གུང་ཐང་དཀོན་མཆོག་བསྟན་པའི་སྒྲོན་མེའི་གསུང་འབུམ།

གུང་ཐང་དཀོན་མཆོག་བསྟན་པའི་སྒྲོན་མེའི་གསུང་འབུམ།

གླེགས་བམ་གཉིས་པ།

གུང་ཐང་དཀོན་མཆོག་བསྟན་པའི་སྒྲོན་མེ།

Nitartha International

Images scanned by BDRC

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཀར་ཆག

― GTD002_Page_0001 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བླ་མ་དམ་པ་གུང་ཐང་འཇམ་པའི་དབྱངས་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་གསུང་འབུམ་ཁ་བའི་དཀར་ཆག་བཞུགས་སོ།།

― GTD002_Page_0002 ―

^{[མ་དཔེ་གཟིགས་ན་འདིར་གནོན།]}

[Full Size]

བསླུ་མེད་དཀོན་མཆོག་ཐུགས་རྗེའི་མཁའ་དབྱིངས་ལས། །བློ་བཟང་བསྟན་པའི་འོད་སྣང་འབུམ་ཕྲག་གིས། །སྙིང་གི་མུན་པ་སེལ་བའི་སྒྲོན་མེ་མཆོག །འཇམ་དཔལ་དབྱངས་དངོས་གུང་ཐང་པ་དེར་འདུད། །རྒྱལ་བའི་དགོངས་མཁར་འགྲོ་ལ་བརྩེ་བ་ཡི། །ཕ་རོལ་ཕྱིན་གཞུང་ཆུ་ཁུར་འབུམ་བརྩེགས་ལས། །དྲང་དང་ངེས་པའི་ཆོས་ཆར་རྒྱུན་བབས་པས། །གདུལ་བྱའི་འཛིན་མའི་ཐ་རྒོད་རླན་འདི་རྨད། །རྗེ་བཙུན་བླ་མ་དམ་པ་འཇམ་པའི་དབྱངས་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་གསུང་འབུམ་ ༼ཁ༽ པ་ལ། ཕར་ཕྱིན་སྐབས་དང་པོའི་མཐའ་དཔྱོད་ཀྱི་མཆན་འགྲེལ་རྩོམ་འཕྲོ་ཅན་ལ་ཤོག་གྲངས། ༡༡༠ སྐབས་བཞི་པའི་བསྡུས་དོན་རྒྱལ་མཁན་པོ་གྲགས་པ་རྒྱལ་མཚན་ལ་གནང་བ་ལ་གྲངས། ༢༦ ཡིད་དང་ཀུན་གཞིའི་དཀའ་གནས་རྣམ་པར་བཤད་པ་མཁས་པའི་འཇུག་ངོགས་ལ་གྲངས། ༦༤ དང་ངེས་རྣམ་འབྱེད་ཀྱི་དཀའ་འགྲེལ་རྩོམ་འཕྲོ་ལེགས་བཤད་སྙིང་པོའི་ཡང་སྙིང་ལ་གྲངས། ༡༦༡ བསྟན་བཅོས་ལེགས་པར་བཤད་པའི་སྙིང་པོ་ལས་སེམས་ཙམ་སྐོར་གྱི་མཆན་འགྲེལ་རྩོམ་འཕྲོ་རྣམ་རིག་གཞུང་རྒྱའི་སྣང་བ་ལ་གྲངས། ༧༦ བདེན་བཞིའི་རྣན་གཞག་ཐར་འདོད་འཇུག་ངོགས་མཁས་པའི་དགའ་སྟོན་ལ་གྲངས། ༡༩ དཀར་ཆག་ལ་ ༡ བཅས་ཁྱོན་ཤོག་གྲངས་ ༤༥༧ བཞུགས། སརྦ་མངྒ་ལཾ།། །།

ཕར་ཕྱིན་སྐབས་དང་པོའི་མཐའ་དཔྱོད་ཀྱི་མཆན་འགྲེལ་རྩོམ་འཕྲོ།

― GTD002_Page_0003 ―

^{[མ་དཔེ་གཟིགས་ན་འདིར་གནོན།]}

[Full Size]

ཕར་ཕྱིན་སྐབས་དང་པོའི་མཐའ་དཔྱོད་ཀྱི་མཆན་འགྲེལ་རྩོམ་འཕྲོ་བཞུགས་སོ། །

― GTD002_Page_0004 ―

^{[མ་དཔེ་གཟིགས་ན་འདིར་གནོན།]}

[Full Size]

ངག་དབང་ལྷ་མོ་མགྲིན་མཚོར་ཞུགས་པ་ཡིས། །ཆད་མེད་བརྩོན་འགྲུས་ཆུ་ཡི་རྦ་རླབས་ཀྱིས། །རྒྱ་ཆེ་གསུང་རབ་ནམ་མཁའི་གོ་འགོག་པ། །སྔོན་མེད་བསྟན་པའི་ཉི་མ་ཁྱོད་ཕྱག་འཚལ། ། ༼༣བ༽ ༼༧༽རབ་བྱེད་བདུན་པའི་འཕྲོས་དོན་སྟོང་ཉིད་བདུན་ཅུ་པ་དང༌། ༼ཀ༽རབ་བྱེད་དང་པོ་རྐྱེན་བརྟགས་པར། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་པར་ཡོད་མ་ཡིན། །བདག་གི་དངོས་པོ་ཡོད་མིན་ན། །གཞན་དངོས་ཡོད་པ་མ་ཡིན་ནོ། །ཞེས་པར་འཕྲོས་ཏེ། རྩོད་བཟློག །གལ་ཏེ་དངོས་པོ་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །ཞེས་ཆོས་ཐམས་ཅད་རང་བཞིན་མེད་ན་བདེན་གྲུབ་འགོག་པའི་གཞུང་རྣམས་ཀྱང་རང་བཞིན་མེད་དགོས་པས་བདེན་གྲུབ་

― GTD002_Page_0005 ―

^{[མ་དཔེ་གཟིགས་ན་འདིར་གནོན།]}

[Full Size]

འགོག་པ་སོགས་ཀྱི་བྱ་བ་མི་རུང་བར་བརྩད་པའི་ལན་དུ་གསུངས་སོ། །སྟོང་ཉིད་བདུན་ཅུ་བ་ནི། རབ་བྱེད་བདུན་པ་ལས། སྒྱུ་མ་ཇི་བཞིན་རྨི་ལམ་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དེ་ནི་འཇིག་པར་གསུངས། །ཞེས་པར་འཕྲོས་ཏེ། གནས་པའམ་སྐྱེ་འཇིག་ཡོད་མེད་དང༌། །དམན་པའམ་མཉམ་དང་ཁྱད་པར་ཅན། །སངས་རྒྱས་འཇིག་རྟེན་སྙད་དབང་གིས། །གསུངས་ཀྱི་ཡང་དག་དབང་གིས་མིན། །ཞེས་ཆོས་ཐམས་ཅད་སྒྱུ་མ་སྤྲུལ་པ་ལྟར་དོན་རང་གི་ངོས་ནས་མེད་ན་བཟང་ངན་སོགས་མི་རུང་སྟེ། བོང་རྡོག་དུ་མ་དངོས་པོ་བཟང་ངན་སྣ་ཚོགས་སུ་སྤྲུལ་པ་བཞིན་ནོ། །ཞེས་བརྩད་པའི་ལན་དུ། མཆོག་དམན་སོགས་སངས་རྒྱས་ཀྱིས་ཀྱང་གསུངས་ལ། ཁོ་བོ་ཅག་ཀྱང་

― GTD002_Page_0006 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་མོད་འོན་ཀྱང་དེ་དོན་རང་གི་ངོས་ནས་མིན་གྱི་འཇིག་རྟེན་ཐ་སྙད་ཀྱི་དབང་གིས་ཡིན་ནོ་ཞེས་ལན་བཏབ་བོ། ། ༼༨༽རྗེ་རིན་པོ་ཆེས་སྔ་མ་ལྟར་དྲུག་བཞེད་པར་རྒྱུད་སྡེ་སྤྱི་རྣམ་ལས་བཤད་དོ། ། ༼ཁ༽ཁ་ཅིག་ཐ་སྙད་དུ་གྲུབ་པ་དང་དྲུག་ཏུ་ཡང་བཤད་མོད། ཚིག་གསལ་གྱི་མཇུག་ཏུ་རིགས་ཚོགས་ཐམས་ཅད་དྲངས་ནས་དེ་མ་དྲངས་པས་མི་འཐད་པར་ཤེས་སོ། ། ༼༣ན༽ ༼༡༽བཙུན་པ་འཕགས་པ་ལྷས་ཀྱང༌། ༼ག༽ཉན་པ་པོ་དང་མཉན་བྱ་དང། །སྨྲ་བོ་འབྱུང་བ་ཤིན་ཏུ་དཀོན། །དེ་ཕྱིར་མདོར་ན་འཁོར་བ་ནི། །མཐའ་ཡོད་མ་ཡིན་མཐའ་མེད་མིན། ། ༼༡༽ཞེས་༼ང༽རབ་བྱེད་ཉེར་བདུན་པའི་ཐད་དུ་བཞི་བརྒྱ་པའི་ལུང༌། ༼༡༽སྒོམ་པ་བཅུ་དང༌། ༼ཅ༽འདི་མདོ་སྡེ་རྒྱན་ལས། རྒྱལ་བའི་སྲས་རྣམས་ཀྱིས་ནི་ཡོད་དང་མེད་པ་དང༌། །སྒྲོ་འདོགས་སྐུར་པའི་རྟོག་དང་གཅིག་ཉིད་དུ་མ་ཉིད། །རང་དང་ཁྱད་པར་རྟོག་དང་མིང་དོན་ཇི་བཞིན་དུ། །མངོན་པར་ཞེན་པའི་རྟོག་པ་ཡང་དག་སྤང་བར་བྱ། །ཞེས་པ་ལ་བརྟེན་པར་སྣང་ལ། དེ་ཡང་ཆོས་ཀྱི་བདག་ལ་བརྟེན་པ་བརྒྱད་དང༌། གང་ཟག་གི་བདག་ལ་བརྟེན་པ་གཉིས་ཀུན་བཏུས་དར་ཊཱིཀ་ཏུ་གསུངས་སོ། ། ༼༢༽ཕན་ཡོན། ༼ཆ༽རྟག་ངུ་ལྟར། ༼༢༽བསོད་ནམས་ཆེ་བ་དང་སོ་གཉིས་སུ་༼ཇ༽གསུངས་རིམ་བཞིན། ༼༣༽མགོ་སྨོས་པས་གོ་བ་ལ། ༼ཉ༽རྟེན་གང་གིས། དགོས་

― GTD002_Page_0007 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གང་གི་ཕྱིར། ཡུལ་གང་ལ། ཚུལ་ཇི་ལྟར་བསླབ་པ་སྟེ། ༼༧༽རྗེ་བཙུན་བྱམས་པས་རྒྱས་འབྲིང་བསྡུས་པ་སྐོར་དགུའམ། ༼ཏ༽རྒྱན་དང་སྦྱར་བའི་མདོ། ༼༣བ༽ ༼༡༽མངོན་པར་རྟོགས་པའི་རྒྱན་མཛད་དོ། །ཞེས་གསུངས་པའི་ཕྱིར། ༼ཐ༽སྔོན་གྱི་མཁས་པ་ཁ་ཅིག །བྱམས་ཆོས་ལྔ་གཞུང་རིལ་བོ་གཅིག་ཡིན་ཏེ། མངོན་རྟོགས་རྒྱན་གཅིག་པུ་ལ་མཆོད་བརྗོད་དང་རྒྱུད་བླར་བསྔོ་བ་འབྱུང་བས་གཞན་གསུམ་ལ་དེས་ཆོག་ཚུལ་ཡོད་པའི་ཕྱིར་ཟེར། དེ་ལ་མདོ་སྡེ་རྒྱན་གྱི་ཊཱིཀ་བྱེད་ཁ་ཅིག །དེ་མི་འཐད་དེ། མངོན་རྟོགས་རྒྱན་དང་རྒྱུད་བླར་མཚན་དཔེ་དང་ཟག་མེད་སྡེ་ཚན་རྣམས་སྟོན་ཚུལ་ཁྱད་མེད་པས་བསྟན་བཅོས་གཅིག་ཡིན་ན་ཟློས་སྐྱོན་འབྱུང་ཟེར། ལུགས་སྔ་མ་དེའི་སྒྲུབ་བྱེད་མ་ངེས་ཏེ། བསྟན་བཅོས་ལ་འཇུག་པའི་སྒོ་ཤིས་བརྗོད་མཆོད་བརྗོད་ངོ་བོ་ངེས་བསྟན་གསུམ་བཤད་པའི་རེ་རེས་ཀྱང་ཆོག་པའི་ཕྱིར་དང༌། དེ་དག་ལ་ཡང་དབུར་ངོ་བོ་ངེས་བསྟན་རེ་སྣང་བའི་ཕྱིར་རོ། །དེ་ཡང་མདོ་སྡེ་རྒྱན་གྱི་རིགས་ཀྱི་སྐབས་ལས་རིགས་ཆད་བཤད་པ་དྲང་དོན་དུ་བཀྲལ་ཏེ་བྱེ་བྲག་ཏུ་བཤད་པ་ལ་རྒྱུད་བླ་བྱུང་བས་དེའི་འཕྲོས་པ་ཡན་ལག་ལྟ་བུ་ཡིན་ཞིང༌། གཉིས་ཀ་མདོ་སྡེའི་སྡེ་སྣོད་དོ། །དབུས་མཐའི་མཚན་ཉིད་དང་སྒྲིབ་པ་དང༌། དེ་ཁོ་ན་དང༌། གཉེན་པོ་དང༌། ཐེག་པ་བླ་ན་

― GTD002_Page_0008 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པའི་ལེའུ་སྟེ་ལྔའི་དང་པོ་ལས་ཆོས་ཉིད་རྣམ་འབྱེད་འཕྲོས་ཤིང་གཉིས་ཀ་མངོན་པའོ། །མངོན་རྟོགས་རྒྱན་ཐེག་ཆེན་གྱི་འདུལ་བ་ཡིན་ཞིང༌། འདི་ལ་འཕྲོས་པ་ཡན་ལག་གི་གཞུང་ཟུར་བ་མེད་དོ། །སློབ་དཔོན་གྱི་.....བརྒྱད་སྟོང་འགྲེལ་ཆེན་དང༌། ཤཱནྟི་པའི་.....སྙིང་པོ་མཆོག་དང༌། ཨ་བྷྱཱ་ཀ་རའི་.....གནད་ཀྱི་ཟླ་འོད་དེ་བརྒྱད་སྟོང་པར་སྦྱར་བ་གསུམ་དང༌། སློབ་དཔོན་གྱི་.....སྡུད་པའི་དཀའ་འགྲེལ་རྟོགས་སླ་དང༌། སངས་རྒྱས་ཡེ་ཤེས་ཀྱི་.....སྡུད་པའི་དཀའ་འགྲེལ་དང༌། ཁ་ཆེ་དྷརྨཱ་ཤྲིས་མཛད་པར་གྲགས་པའི་.....ཤེར་ཕྱིན་མཛོད་ཀྱི་ལྡེ་མིག །དེའི་འགྲེལ་བཤད་.....ཆོས་བཤེས་ཀྱི་ཚིག་གསལ་དང༌། གསེར་གླིང་པ་དང། ཤེར་འབྱུང་གི་.....རྟོགས་དཀའི་སྣང་བ་གཉིས་དང༌། རྩ་བའི་བསྡུས་དོན་ཇོ་བོས་མཛད་པར་གྲགས་ཀྱང་དོགས་པ་ཅན་.....དང། གཞོན་ནུ་དཔལ་གྱིས་མཛད་.....པ་སྟེ་རྩ་བའི་བསྡུས་དོན་.....གཉིས་དང༌། རིན་ཆེན་གྲགས་པས་མཛད་པའི་.....གྲགས་ཆ་དང༌། བུདྡྷ་ཤྲིའི་.....ཤེར་སྒྲོན་དང༌། ཨ་བྷྱཱ་ཀ་རའི་.....ཐུབ་དགོངས། ༼༦༽ས་སྡེ་ལྔ་དང་སྡོམ་གཉིས་མཛད་པའི་ཕྱིར། ༼ང༽དེ་ཡང་བརྗོད་བྱ་དོན་གྱི་ཆ་གཙོ་བོར་གཏན་ལ་འབེབས་པ་གཉིས་ཏེ། གང་ཟག་གཅིག་གི་ལམ་བསྒྲུབ་པའི་མཐུན་ཕྱོགས་ཀྱི་རིམ་པ་སྟོན་པ་སའི་དངོས་གཞི་དང༌། དེ་ཁོ་ན་ཉིད་གཏན་ལ་དབབ་པའི་རྣམ་པར་གཏན་ལ་དབབ་པ་བསྡུ་བའོ། །རྗོད་བྱེད་ཚིག་གི་ཆ་ལ་བརྟགས་པའི་དབང་དུ་བྱས་པ་གཉིས་ཏེ། ཚིག་གི་ཆ་སྡེ་སྣོད་གསུམ་དུ་བསྡུ་བའི་གཞི་བསྡུ་བ་དང༌། ཀུན་བྱང་གི་

― GTD002_Page_0009 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་གྲངས་སྟོན་པའི་རྣམ་གྲངས་བསྡུ་བའོ། །ཚིག་དོན་དེ་གཉིས་ཀ་སྦྱར་ནས་འཆད་ཉན་གྱིས་གཏན་ལ་དབབ་ཚུལ་སྟོན་པ་གཅིག་སྟེ་རྣམ་པར་བཤད་པའི་སྒོ་བསྡུ་བའོ། །སའི་དངོས་གཞིའི་ས་བཅུ་བདུན་གྱི་སྡོམ་ནི། རྣམ་ཤེས་ལྔ་དང་ལྡན་པའི་ས། །ཡིད་ཀྱི་ས་དང་གཞན་གསུམ་སྟེ། །རྟོག་དཔྱོད་བཅས་ལ་སོགས་པ་དང༌། །ཏིང་འཛིན་བཅས་དང་མ་ཡིན་དང༌། །སེམས་ཡོད་པ་དང་སེམས་མེད་དང༌། །ཐོས་དང་བསམ་དང་སྒོམ་ལྡན་དང༌། །དེ་བཞིན་ཐེག་པ་གསུམ་ལྡན་དང༌། །ཕུང་པོར་བཅས་དང་ཕུང་མེད་གཞན། །ཅེས་སོ། །༼༤ན༽ ༼༢༽དུས་ཕྱིས་རྗེ་བཙུན་ཏེ་འཇམ་པའི་དབྱངས་༼༦༽འགྲེལ་པར། དེའི་རྒྱན་ཚིག་ལེའུར་བྱས་པ་དག །༼ན༽ལེའུར་ཞེས་པ་གཙོ་བོར་བརྗོད་བྱ་ལ་བཏགས་པ་ཡིན་ཏེ། ལེའུའི་སྐད་དོད་པ་ཊ་ལ་ཞེས་པའི་པ་ཊ་གོས་ཀྱི་མིང་ཡིན་ཞིང་གོས་ཀྱིས་གནོད་འཚེ་རྣམས་བཟློག་པ་ལྟར། འདིའི་དོན་ཉམས་སུ་བླངས་པས་ལས་ཉོན་གྱི་འཚེ་བ་ཞི་བས་ན་དེ་ལྟར་བཏགས་པའི་ཕྱིར། སྒྲོན་མ་གསལ་བའི་རྒྱ་ཆེར་འགྲེལ་ལས། དོན་འདིས་ཉོན་མོངས་པ་དང༌། ལས་དང༌། སྐྱེ་བའི་ཉེ་བར་འཚེ་བ་བཟློག་པས་ན་གོས་དང་འདྲ་བའི་ཕྱིར་ལེའུའོ། །ཞེས་གསུངས་པའི་ཕྱིར། ༼༧༽རྩོམ་པ་མཐར་ཕྱིན་པའི་ཆེད་ཡིན་པའི་ཕྱིར། ༼པ༽སྤྱིར་འགྲེལ་པ་ལ་དོན་གྱི་གནད་ཚང་བར་སྟོན་པའི་དོན་འགྲེལ་དང༌། དཀའ་གནད་བྱེ་བྲག་ཏུ་བཤད་པའི་དཀའ་འགྲེལ་དང༌། ཚིག་འབྲུ་ཞིབ་ཏུ་གཉེར་བའི་

― GTD002_Page_0010 ―

^{[མ་དཔེ་གཟིགས་ན་འདིར་གནོན།]}

[Full Size]

ཚིག་འགྲེལ་དང༌། ཡིག་དོན་གྱི་ཐོབ་ཚོད་ཙམ་སྟོན་པའི་ངག་འགྲེལ་དང༌། འཕྲོས་པ་ཡན་ལག་དང་བཅས་ཏེ་སྟོན་པའི་རྒྱ་ཆེར་འགྲེལ་དང་ལྔ་བཤད་པ་ལས་དང་པོ་ཡིན་ནོ། ། ༼༤བ༽ ༼༥༽ཚིག་གསལ་ལས། དེ་ནི་དེ་ལྟར་འགྲུབ་པ་ཉིད་འགྲེལ་པ་འབའ་ཞིག་གིས་མི་སྲིད་ལ་ཞེས་གསུངས་པའི་ཕྱིར། ༼ཕ༽ཆོས་བཤེས་རང་གི་ལུགས་ནི། སྒྲའི་བརྗོད་བྱ་ཚིག་ལེའུར་བྱས་པ། དོན་གྱི་བརྗོད་བྱ་རྒྱལ་བ་བསྐྱེད་མ། འགྲེལ་པ་ལེགས་པར་བརྩམས་པ་དགོས་པ། དེ་ལ་བརྟེན་ནས་རྒྱན་ཡུམ་གསུམ་གའི་རྒྱན་དུ་རྟོགས་པ་ཉིང་དགོས་ཏེ་བཞིར་འདོད་དོ། །འདིས་རང་ལུགས་བཞག་པ་མི་འཐད་པར་ཐལ། འགྲེལ་པ་བརྩམས་པ་འགྲེལ་པ་བརྩམས་པའི་དགོས་པར་མི་འཐད་པའི་ཕྱིར། གཞན་ལུགས་འགོག་ཚུལ་ཡང་མི་འཐད་པར་ཐལ། འགྲེལ་པ་ཁོ་ནས་མི་འགྲུབ་པའི་རྟགས་ཀྱིས་དེའི་ཉིང་དགོས་རྣམ་མཁྱེན་མེད་པར་བཤད་པ་དང༌། རྩ་བའི་ཉིང་དགོས་སུ་རྣམ་མཁྱེན་བཤད་པ་ནང་འགལ་ཡིན་པའི་ཕྱིར། ༼༦༽དེ་ལྟར་ན་སྔ་མ་ཤེར་འབྱུང་བཀག་པ་ལས་ཀྱང་ཁྱོད་ཀྱི་རང་ལུགས་འདི་མི་འཐད་པར་ཐལ། ༼༥ན༽ ༼༦༽དེ་ཡང་འདི་ཉིད་ཀྱིས་ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཞེས་གསུངས་པའི་ཕྱིར་དང༌། ༼བ༽དེའི་དོན་ནི། གོང་དུ་དྲངས་པའི་བརྒྱད་སྟོང་དོན་བསྡུས་ལས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དང་དེ་ལྡན་ཕྱིར། །གཞུང་ལམ་དག་ལ་དེ་སྒྲ་ཡིན། །ཞེས་པ་ལྟར། གཞུང་ལམ་འབྲས་བུ་ཤེར་ཕྱིན་གསུམ་ལ་དྷི་ཏིས་བཤད་ཅིང༌། གཞུང་གོང་མ་

― GTD002_Page_0011 ―

^{[མ་དཔེ་གཟིགས་ན་འདིར་གནོན།]}

[Full Size]

དང་འབྲེལ་ལོ། །འོན་ཀྱང༌། གཽ་མིས་མཁྱེན་གསུམ་ལ་བཤད་པ་ཡང༌། འགྲེལ་ཆེན་གྱི་ལུང་གི་མཇུག་དེ་མ་ཐག་ཏུ། དེ་རྣམས་ཉིད་ཀྱིས་ནི་མ་ཡིན་ཏེ། འདི་མེད་ན་མི་འབྱུང་བའི་ཕྱིར། བྱང་ཆུབ་གསུམ་གའི་དབང་དུ་བྱས་པའི་ཕྱིར་རོ། །དེ་ཡང་འདི་ཉིད་ལས། ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པར་བྱའོ། །ཞེས་བྱ་བ་ལ་སོགས་པ་འཆད་པར་འགྱུར་བ་ཡིན་ནོ། །ཞེས་གསུངས་པས། མདོས་བརྗོད་བྱ་མཁྱེན་པ་གསུམ་ག་ལ་ཤེར་ཕྱིན་གྱི་སྒྲས་བཏགས་པས། གཙོ་བོའི་དབང་དུ་མ་བྱས་ན་སངས་རྒྱས་ཁོ་ནར་འཆད་མི་རིགས་ཏེ། དངོས་བཏགས་ཀྱི་ཤེར་ཕྱིན་འདི་ལ་མ་བརྟེན་པར། བྱང་ཆུབ་གསུམ་གང་ཡང་འབྱུང་བ་མེད་པས། མཁྱེན་པ་གསུམ་ག་ཤེར་ཕྱིན་ཏུ་བསྡུས་ནས་མདོ་རྒྱན་གཉིས་ཀས་བརྗོད་བྱར་བྱས་པའི་དོན་ནོ། ། ༼༥བ༽ ༼༤༽རྩ་བའི་སེམ༡ས་ཀྱིས་མིང་གི་སྒོ་ནས་དམིགས་ལ། ༼༥༽རྗེས་སུ་སྤྱོད་པའི་.....སེམ༢ས་༼༥༽འགྲེལ་ཆེན་ལས། ༼མ༽བགྲང་བ་གཞལ་བ་རྟོགས་པ་ངེས་པར་རྟོགས་པ་སྟེ། རིམ་བཞིན་དངོས་པོ་བརྒྱད་དོན་བདུན་ཅུའི་གྲངས་དང༌། སོ་སོའི་ངོ་བོ་དང༌། དེ་ལ་སྒྲོ་སྐུར་སེལ་བ་དང༌། ངེས་ཟིན་དྲན་པར་བྱེད་པ་དང་༼༥༽རྣམ་པ་བཞིས་༼ཙ༽འདི་ལ་ཡང་མདོ་སྡེ་རྒྱན་གྱི་འགྲེལ་པ་དང༌། ཕར་ཕྱིན་ལམ་སྒྲིག་གཉིས་ཅུང་མི་མཐུན་པ་འདུག་གོ །༼༥༽རྣམ་པར་སྤྱོད་པའི་སེམ༣ས་ཀྱིས་དཔྱད་པར་བྱའོ། ། ༼༦༽ངེས་པར་འཛིན་པའི་སེམ༤ས་ཀྱིས་བཟུང་ལ་སྡོམ་པའི་སེམས་སམ་༼༦༽ལྷན་ཅིག་པ་རེ་བའི་

― GTD002_Page_0012 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་.....སམ་སྨོན་པའི་སེམས་༼༦ན༽ ༼༥༽འགྲེལ་པ་ལས། དེ་ལྟར་མཁས་པས་སྣང་བྱས་ཤིང༌། །ནས། ༼ཚ༽སངས་རྒྱས་དབང་གིས་རྙེད་པ་ནི། ། ༼༥༽མཁས་པ་རྣམས་ཀྱིས་དབྱེ་བའི་རིགས། །ཞེས་པའི་ཚིགས་བཅད་གཉིས་བྱུང། ༼ཛ༽འདིས་ཡི་དམ་ལྷས་གནང་བ་ཐོབ་ཚུལ་ཡང་བསྟན་ཏེ། ཤར་ཕྱོགས་ཁ་སར་པ་ནིར་བྱོན་ནས་སྨྱུང་གནས་མཛད་པས་རྨི་ལམ་དུ་སྤྲིན་གྱི་གསེབ་ན་རྗེ་བཙུན་བྱམས་པ་གསེར་གྱི་མདོག་ཅན་བརྒྱད་སྟོང་པའི་གླེགས་བམ་བསྣམས་པ་ཞིག་མཐོང་སྟེ་ཁྱེད་ཀྱི་བསྟན་བཅོས་འདི་ལ་འགྲེལ་པ་མང་དུ་སྣང་ན་གང་གི་རྗེས་སུ་འབྲང་ཞུས་པས། ཐམས་ཅད་ལ་ལེགས་པར་རྟོགས་ལ་དོན་འདྲིལ་བའི་འགྲེལ་པ་རྩོམས་ཤིག །ཅེས་གནང་བ་ཐོབ་ཅིང་ཤེར་ཕྱིན་གྱི་དོན་ཐམས་ཅད་ཐུགས་སུ་ཆུད་པའི་ཕྱིར་རོ། ། ༼༦བ༽ ༼༢༽ལྔ་བརྒྱ་ཐ་མའི་འགྲེལ་པར་ཞི་འཚོའི་བཤད་ཚུལ་བཀོད་པའི་ཕྱིར། ༼ཝ༽ཡུམ་གསུམ་གནོད་འཇོམས་ལས། དེ་དེ་ལྟར་དེ་བཞིན་གཤེགས་པའི་བསྟན་པ་གནས་པའི་དུས་ལོ་ཉིས་སྟོང་ལྔ་བརྒྱར་འགྱུར་ཏེ། ཊཱིཀྐ་འདི་དང་འགལ་བར་སྣང་བ་ཤནྟི་རཀྵི་ཏའི་བསམ་པ་ནི། དགྲ་བཅོམ་པའི་ལེའུ་ནས་ཏིང་ངེ་འཛིན་གྱི་ལེའུའི་བར་ལ་དམ་པའི་ཆོས་གནས་སོ་ཞེས་བསམ་པ་ཡིན་ཏེ། འཆད་པའི་ལུགས་ལ་ལ་ཇི་སྐད་དུ་འཆད་དེ། སྤྱིར་ལོ་ལྔ་སྟོང་དུ་མཐུན་ནོ། །ཞེས་དགྲ་བཅོམ་ཕྱིར་མི་འོང་རྒྱུན་ཞུགས་ཀྱི་ལེའུ་གསུམ་དང་བསླབ་པ་གསུམ་དང་སྡེ་སྣོད་གསུམ་རྟགས་ཙམ་འཛིན་པའི་ལེའུ་དང་བཅུའི་དང་པོ་ལྔ་གནས་དུས་དང༌། ལྔ་འགྲིབ་དུས་ཞེས་པའི་ཚིག་ལ་རྩོད་པར་སྣང་སྟེ། ཕྱི་མ་

― GTD002_Page_0013 ―

^{[མ་དཔེ་གཟིགས་ན་འདིར་གནོན།]}

[Full Size]

ལྔ་ཡང་གནས་དུས་ཡིན་པའི་ཕྱིར་ཞེས་པའོ། །འདིས་ནི་ཞི་འཚོ་ལ་མི་གནོད་དེ། གནས་དུས་འགྲིབ་དུས་གཉིས་སུ་ཕྱེ་བའི་གནས་དུས་མིན་པར་བསམ་གྱི། སྤྱིར་ལོ་ལྔ་སྟོང་དུ་གནས་པ་ཙམ་ཞི་འཚོ་ཡང་བཞེད་པའི་ཕྱིར། ཁ་ཅིག །ཞི་འཚོ་ལྔ་བརྒྱ་བ་ཕྱི་མ་ལྔ་ལྔ་བརྒྱ་ཐ་མར་འདོད་ལ། གནོད་འཇོམས་མཁན་པོ་རྟགས་ཙམ་འཛིན་པའི་ལེའུ་ལ་འདོད་པ་ཁྱད་པར་ཡིན་ཟེར་བ་མི་འཐད་དེ། འདི་ནི་རྩ་བའི་མདོས་ལྔ་བརྒྱ་ཐ་མའི་ཚེ་བསྟན་པ་བྱང་ནས་བྱང་དུ་དར་བར་གསུངས་པ་གང་ཞིག །རྟགས་ཙམ་འཛིན་པའི་ཚེ་བསྟན་པ་དར་བར་སུ་ཡང་མི་འདོད་པའི་ཕྱིར། ༼༢༽སྐྱེ་འགག་ཀུན་བྱང་མེད་པར་བཤད་པའི་སྐབས་སུ་རྩ་ཤེའི་ལུང་དྲངས་ནས་༼ཞ༽འདིར་མེད་པར་ཞེས་པ་བདེན་མེད་ཡིན་པས་སྟོང་ཉིད་བདེན་མེད་དུ་འདོད་ཀྱང༌། དོན་དམ་ཡོད་པར་འདོད་དམ་སྙམ་སྟེ་ལེགས་བཤད་སྙིང་པོར་བལྟའོ། ། ༼༢ན༽ ༼༤༽མ་གྲུབ་ན་སོང༌། ༼ཟ༽ལུང་དེའི་དོན་ནི། རྒྱན་སྣང་ལས། དེ་ལ་སྨྲ་བ་ཞེས་བྱ་བ་ནི། ཐོས་པའི་རང་བཞིན་གྱི་ཤེས་པ་སྐྱེས་པ་ལས་བྱང་ཆུབ་ཀྱི་ས་བོན་སྐྱེ་བའི་དོན་དུ་གང་གིས་འདོན་པར་བྱེད་པའོ། །སྟོན་པ་ནི་བསམ་པའི་རང་བཞིན་གྱི་ཤེས་པ་སྐྱེས་པ་ལས་ཡོངས་སུ་སྨིན་པར་བྱ་བའི་དོན་དུ་གང་གིས་དོན་འཆད་པར་བྱེད་པའོ། །ཉེ་བར་སྟོན་པ་ནི་སྒོམ་པའི་རང་བཞིན་གྱི་ཤེས་པ་སྐྱེས་པ་ལས་ཡོངས་སུ་གྲོལ་བར་བྱ་བའི་དོན་དུ་གང་གིས་གཞུང་དང་དོན་ལ་ངེས་པ་བསྐྱེད་པའི་རབ་ཏུ་སྟོན་པར་བྱེད་པའོ། །དེས་ན་དེ་ལྟར་བརྗོད་པ་དང་ཞེས་བྱ་བ་ལ་སོགས་པའི་ཚིག་གསུམ་ནི་གོ་རིམ་བཞིན་དུ།

― GTD002_Page_0014 ―

^{[མ་དཔེ་གཟིགས་ན་འདིར་གནོན།]}

[Full Size]

སྨྲ་བ་དང་ཞེས་བྱ་བ་ལ་སོགས་པའི་བཤད་པ་ཡིན་ནོ། །ཞེས་ཕྱི་མ་གསུམ་དང་སྔ་མ་གསུམ་མིང་དོན་སྦྱར་ནས། དགོས་པ་གསུམ་གྱི་ཕྱིར་ཐོས་བསམ་སྒོམ་པའི་ཤེས་རབ་གསུམ་སྐྱེད་བྱེད་ལ་སྦྱར་ཏེ། མདོ་སྡེ་རྒྱན་ལས། དེ་ནི་བག་ཆགས་རྟོག་དང་ཞི་བ་དང༌། །རབ་ཏུ་རྟོག་པས་རྣམ་པར་གྲོལ་བར་བྱེད། །ཅེས་པ་དང་གནད་གཅིག་གོ །འདིར་རང་རྒྱལ་གྱི་ལམ་ཤེས་པའི་ལམ་ཤེས་སྐབས་སུ་གཞན་གཅིག་ཀྱང་བཤད་ལ། འདིའི་ཐད་ཀྱི་སྡུད་པར་ཡང༌། འཛམ་བུའི་གླིང་འདིར་ཞེས་པ་ནས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། །འཆད་དང་རིགས་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་གསུངས་སོ། ། ༼༦༽རིགས་པ་དྲུག་ཅུ་པའི་འགྲེལ་པར་ཟླ་བས་བཤད་པའི་ཕྱིར། ༼འ༽དེ་ཡང་ཟླ་བའི་འགྲེལ་པ་ལས། རྟེན་ཅིང་འབྲེལ་བར་འབྱུང་བ་གསུངས་པ་ཉིད་ནི་ཐུབ་པའི་དབང་པོ་མ་ཡིན་པ་ལ་མི་སྲིད་པའི་ཕྱིར། རྟེན་ཅིང་འབྲེལ་བར་འབྱུང་བ་གསུངས་པ་ཉིད་ནི་ཐུབ་པའི་དབང་པོ་ཉིད་ལ་རྒྱུ་ཡིན་ནོ། །ཐུབ་པའི་དབང་པོ་ཉིད་ཀྱང༌། རྟེན་ཅིང་འབྲེལ་བར་འབྱུང་བ་གསུངས་པ་ཉིད་ལ་རྒྱུ་ཡིན་ཏེ། གཞན་ལ་རྟེན་ཅིང་འབྲེལ་བར་འབྱུང་བ་བརྗོད་པར་ནུས་པ་མེད་པའི་ཕྱིར་རོ། །ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་ཀྱང་ཐུབ་པའི་དབང་པོས་བསྟན་པ་ཉིད་ལས་དེ་བརྗོད་པའི་ཕྱིར། ཞེས་པ་འདི་ཡིན་ནམ་དཔྱད་དེ། འདི་ལས་གསལ་བ་མི་སྣང་ངོ༌། །དཔའ་བར་འགྲོ་བའི་ཏིང་ངེ་འཛིན་ནི། ཤུ་རངྒ་ཞེས་པ་དཔའ་ཞིང་འཇིགས་པ་མེད་པ་

― GTD002_Page_0015 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་འཇུག་པས། དཔའ་བོའི་རྗེས་སུ་གཡུལ་རྣམས་འབྲང་བ་ལྟར་འདིའི་རྗེས་སུ་རྒྱལ་སྲས་ཀྱི་ཏིང་ངེ་འཛིན་ཐམས་ཅད་འཇུག་པའི་སྟོབས་ཀྱིས་རྗེས་ཐོབ་ཏུ་སངས་རྒྱས་དང་ཆ་འདྲ་བའི་མཛད་པ་སྟོན་ནུས་པ་ས་བཅུ་བ་ནས་ཐོབ་རྒྱུ། མངོན་ཤེས་དང་མཚུངས་ལྡན་གྱི་སེམས་བསྐྱེད་འཇོག་བྱེད་ཅིག་སྟེ། འོན་ཀྱང་ཏིང་ངེ་འཛིན་འདིའི་རྩལ་ས་བརྒྱད་པར་རྫོགས་ཤིང་བྱམས་སྨོན་ཊཱིཀྐར་བཤད་པ་ནི་སྦྱོར་བ་མཐུ་ཅན་ཐོབ་པ་ལ་བསམ་ཞིང༌། ཐོས་བསམ་སྒོམ་གསུམ་གྱི་ཡིག་ཆའི་དགོངས་པའང་དེ་ཡིན་ནོ། །༼༩ན༽ ༼༡༽སློབ་དཔོན་ཡེ་ཤེས་སྡེས་བཞེད་པ་ལྟར་ལེགས། ཞེས་གསུངས་པའི་ཕྱིར། ༼ཡ༽འདི་ནི་ཀ་བ་ཤཱཀྱ་བཤེས་གཉེན། ཅོག་རོ་ཀླུའི་རྒྱལ་མཚན། ཞང་ཡེ་ཤེས་སྡེ་སྟེ། ཀ་ཅོག་ཞང་གསུམ་དུ་གྲགས་པའི་ནང་ཚན་དེ་ཡིན་ནོ། ། ༼༢༽ཞི་འཚོའི་སྔོན་ནས་འཕགས་གྲོལ་སོགས་ཀྱིས་ཕྱི་དོན་མེད་པའི་དབུ་མ་བཤད་ཅིང༌། ༼ར༽ཞེས་པ་འདི་ཞི་འཚོས་དབུ་མ་རྒྱན་སོགས་བརྩམས་ནས་ཕྱི་དོན་མེད་པའི་དབུ་མ་རྒྱས་པར་མ་བཤད་པའི་སྔོན་དུ་འཕགས་གྲོལ་གྱིས་བཤད་པ་ལ་དགོངས་སམ་དཔྱད་དགོས་ཏེ། རྒྱུད་སྡེ་སྤྱི་རྣམ་ཆེན་མོར་ཞི་འཚོ་འཕགས་གྲོལ་གྱི་བླ་མར་བཤད་པའི་ཕྱིར་རོ། ། ༼༢༽འགྲེལ་པ་ལས། དེ་བྱས་བྱས་པ་མིན་མཐོང་ནས། །དབུ་མར་གནས་པའི་བློས་རྣམ་ཕྱེ། །ཞེས་གསུངས་པའི་ཕྱིར། ༼ལ༽ལུང་འདིས་ཕྱི་དོན་མེད་པའི་དབུ་མ་བཤད་པར་འགྲུབ་ཚུལ་ནི། འགྲེལ་བཤད་ཚིག་གསལ་ལས། རྣམ་པར་རིག་པའི་ཞེན་པ་མ་སྤང་བའི་

― GTD002_Page_0016 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ན། དེ་བྱས་བྱས་པ་མིན་པར་མཐོང་ནས། ཞེས་གསུངས་པ་ལྟར། སྔ་མ་གཉིས་ཀྱིས་ཕྱི་དོན་བཀག་ཀྱང༌། རྣམ་ཤེས་ལ་བདེན་ཞེན་མ་བཀག་པས་རྒྱན་གྱི་དགོངས་པ་མཐར་ཐུག་ཏུ་མ་སོང་ཞེས་བཀག་ནས། རང་ལུགས་དེ་གཉིས་ཚོགས་དགོས་པར་གསུངས་པའི་ཕྱིར་རོ། ། ༼༤༽རྣམ་ཤེས་ཀྱང་བདག་མེད་དང་སྐྱེ་བ་མེད་པར་རྟོགས་པར་བྱ་རུང་ངོ༌། །ཞེས་གསུངས་པའི་ཕྱིར། ༼ཤ༽འདིའི་ཐད་ཀྱི་དབུ་མ་སྙིང་པོར་ཡང༌། གལ་ཏེ་དེ་ནི་འགོག་པའི་ཕྱིར། །བསྒྲུབ་གཞན་ཡོངས་སུ་འཛིན་འདོད་ན། །འདམ་རྫབ་འཁྲུ་བར་བྱེད་པ་བས། །མ་རེག་པར་ནི་བསྲིང་ན་བཟང༌། །ཞེས་གསུངས་སོ། ། ༼༣༽དེ་ཉིད་བཅུ་བ་ལས། དེ་བཞིན་ཉིད་ནི་ཤེས་འདོད་པས། །རྣམ་བཅས་མ་ཡིན་རྣམ་མེད་མིན། ། ༼ས༽བླ་མའི་ངག་གིས་མ་བརྒྱན་པའི། །དབུ་མ་འབྲིང་པོ་ཙམ་ཡིན་ནོ། །ཞེས་བླ་མ་ཟླ་བ་གྲགས་པའི་ངག་གིས་མ་བརྒྱན་པའི་རྣམ་བཅས་ལྟ་བུའི་ཞི་འཚོ་དང༌། རྣམ་མེད་ལྟ་བུའི་ལྭ་བ་པ་སོགས་དབུ་མ་འབྲིང་པོར་བཤད་པས་ཞི་འཚོ་རྣམ་བཅས་པར་གྲུབ་བོ། །༼༩བ༽ ༼༡༽པཎ་ཆེན་ལྷན་སྐྱེས་རྡོ་རྗེའི་འགྲེལ་པ་ལས། ཞི་བ་འཚོའི་ཞལ་སྔ་ནས་ལ་སོགས་པ་རྣམ་པ་བཅས་པའི་དབུ་མ་ཉིད་ཁས་ལེན་པར་བྱེད་དེ། དེ་སྐད་དུ། ༼ཧ༽དབུ་མ་རྒྱན་གྱི་མདོར་བསྟན་དུ་བདག་སྟེ་རང་སྡེ་དང་གཞན་སྡེས་༼༡༽སྨྲས་དངོས་པོ་ཡིས། ། ༼ཨ༽ཡང་དག་དུ་ན་གཅིག་པུ་དང༌། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། ། ༼༡༽ཞེས་སོགས་དབུ་མ་རྒྱན་ཡོངས་རྫོགས་དྲངས་པའི་ཕྱིར། ༼ཀི༽འདི་ལ་དཔེ་ཁ་ཅིག་ཏུ། བདག་

― GTD002_Page_0017 ―

^{[མ་དཔེ་གཟིགས་ན་འདིར་གནོན།]}

[Full Size]

དང་གཞན་སྨྲས་དངོས་པོ་རྣམས། །ཞེས་འབྱུང་ངོ༌། ། ༼༡༽ལེགས་བཤད་སྙིང་པོ་ལས། ལུགས་འདིས་སྔོ་སེར་ལ་སོགས་པའི་རྣམ་པ་༼ཁི༽སྣང་བའི་ཆ་གཅིག་སྒྲོ་བཏགས་དང་མ་འདྲེས་པའི་དོན་གྱི༌༼༢༽དངོས་པོར་.....གནས་པའི་བདེན་པར་༼༢༽དབུ་མ་རྒྱན་ལས། ༼གི༽མ་བརྟགས་གཅིག་པུ་ཉམས་དགའ་བ། ། ༼༤༽ཛེ་ཏཱ་རིའི་བདེ་གཤེགས་གཞུང་གི་རང་འགྲེལ་ལས། ལུང་འདི་ལས་ཀྱང་སློབ་དཔོན་ཆོས་གྲགས་དབུ་མ་པ་ཡིན་པར་གྲུབ་སྟེ། ལུང་གང་ཞེ་ན། ༼༤༽སྣ་ཚོགས་སྣང་ཅན་དོན་རྣམས་ལ། ། ༼ངི༽གལ་ཏེ་གཅིག་ཉིད་མི་རིགས་ན། །རེ་ཞིག་གཅིག་པུའི་བློ་དེ་ཉིད། །སྣ་ཚོགས་སུ་ནི་ཇི་ལྟར་སྣང༌། །ཇི་ལྟ་ཇི་ལྟར་རྣམ་བསམ་པ། །དེ་ལྟ་དེ་ལྟར་རྣམ་བྲལ་ཞེས། །མཁས་པ་རྣམས་ཀྱིས་གང་གསུངས་པ། །དེ་ནི་དངོས་སྟོབས་འོང་བ་ཡིན། །ཞེས་ཤོ་ལོ་ཀ་དང་པོས་རྩོད་པ་དང༌། གཉིས་པས་ལན་བསྟན་ལ། རྩོད་ཚུལ་ནི། ཡུལ་སྣ་ཚོགས་པའི་སྣང་བ་ཅན་གྱི་ཁྲ་འཛིན་མིག་ཤེས་ལྟ་བུའི་ཡུལ་དཀར་སེར་སོགས་བདག་ཉིད་གཅིག་ཏུ་མི་རིགས་པར་ཁྱོད་ཀྱང་འདོད་ན། དེ་དང་དཀར་སེར་དེ་དག་ཁྲ་འཛིན་ཤེས་པ་གཅིག་གི་བདག་ཉིད་དུ་འདོད་པ་ན། གལ་ཏེ་དེ་ལྟར་ན་བློ་གཅིག་པུ་དེ་དུ་མར་ཐལ་བའམ། ཡུལ་དུ་མ་དེ་གཅིག་ཏུ་ཐལ་བར་འགྱུར་ཞེས་པ་ཡིན་ལ། ལན་ནི། གཟུང་འཛིན་སྣང་བ་ལྟར་བདེན་ན། སྐྱོན་དེ་དག་འཇུག་ཀྱང༌། གཟུང་འཛིན་ཇི་ལྟར་སྣང་བ་འདི་ལ་གཅིག་དུ་བྲལ་གྱིས་དཔྱད་པས་ཇི་ལྟ་ཇི་ལྟར་དཔྱད་པ་དེ་དང་དེར་དཔྱད་མི་བཟོད་པས་སྣང་བ་ལྟར་

― GTD002_Page_0018 ―

^{[མ་དཔེ་གཟིགས་ན་འདིར་གནོན།]}

[Full Size]

མ་གྲུབ་ཅེས་མཁས་པ་བཅོམ་ལྡན་འདས་ཀྱིས་གསུངས་པ་འདི་ནི། དངོས་སྟོབས་ཀྱི་རིགས་པས་ལེགས་པར་གྲུབ་སྟེ། ཁོ་བོ་ཅག་འདོད་པས་སྔར་གྱི་སྐྱོན་དེ་མི་འཇུག་གོ ། ༼༥༽སློབ་དཔོན་ཆོས་ཀྱི་གྲགས་པའི་ཞལ་སྔ་ནས་བཞེད་པའི་དབུ་མའི་དེ་ཁོ་ན་ཉིད་འདི། ཞེས་གསུངས་པའི་ཕྱིར། ༼ཅི༽འདིའི་འཁྲུལ་གཞི་གཅིག་དུ་བྲལ་གྱི་དཔྱད་པ་དེ་དབུ་མ་པའི་གཅིག་དུ་བྲལ་གྱི་དཔྱད་ཚུལ་དེར་འཁྲུལ་ཞིང༌། སྟོང་ཉིད་ལྟ་བས་གྲོལ་འགྱུར་གྱི། །ཞེས་པའི་ལུང་གིས་ཀྱང་བྱས་པར་དབུ་མའི་མཐའ་དཔྱོད་དུ་གསུངས། ༼༦༽ཉེར་ལེན་ལས་སྐྱེས་དྲི་མ་ཡིས། །བདག་ཉིད་དབྱེར་མེད་པར་བསྒྲིབས་ཏེ། ། ༼ཆི༽ཞེས་ངོ་བོ་དང་བདག་ཉིད་གཉིས་སོ་སོར་འབྱེད་རྒྱུ་མེད་པས། གཅིག་བསླད་ལ་གཅིག་མ་བསླད་པ་མ་ཡིན་ཞིང༌། དེ་གཉིས་གང་ཡང་མ་བསླད་མོད། འོན་ཀྱང་བསྒྲིབས་པ་ཙམ་ཡིན་ནོ། །དེ་ཇི་ལྟར་ཞེ་ན། བློ་ནི་ཤེལ་སྒོང་རྣམ་པ་ལྟར། །གཞན་གྱི་གཟུགས་སུ་སྣང་བ་ཡིན། །ཞེས་གསུངས་ཏེ། དཔེར་ན་ཤེལ་སྒོང་རས་སྔོན་པོའི་སྟེང་དུ་བཞག་པ་ན། ཤེལ་གྱི་ངོ་བོ་དང་རང་བཞིན་གང་ལའང་སྔོན་པོའི་མདངས་མ་ཞུགས་ཀྱང༌། རྣམ་པ་སྔོ་ལམ་མེ་བ་ཞིག་ཏུ་སྣང་བ་ལྟ་བུ་ཡིན་ནོ། །དེས་ན། སེམས་ཀྱི་རྣམ་པ་འཁྲུལ་བའི་ཕྱིར། །གཟུང་དང་འཛིན་པ་ཐ་དད་དོ། །ཞེས་དེ་གཉིས་གང་ཡང་མ་བསླད་ཀྱང་འཁྲུལ་ཤེས་མིན་མི་དགོས་པར་ཐལ། སྔར་བཤད་པ་ལྟར་དྲི་མས་བསྒྲིབས་པའི་དབང་གིས་རྣམ་པ་ཙམ་འཁྲུལ་ནས་གཟུང་འཛིན་རྫས་ཐ་དད་དུ་སྣང་བ་འབྱུང་བའི་ཕྱིར། ༼༧༽ལེགས་བཤད་སྙིང་པོ་ལས། ཐ་སྙད་དུ་སྔོ་སེར་ལ་སོགས་པའི་རྣམ་པ་རྣམས་.....སྣང་བའི་ཚེ་ཆ་གང་

― GTD002_Page_0019 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་དོན་གྱི།.....དངོས་པོར་.....གྲུབ་པའི་གནས་ཚུལ་དང་མི་མཐུན་པ་.....མེད་པ་.....སྒྲོ་བཏགས་དང་མ་འདྲེས་པ་ཁོ་ནར་འདོད་པས་ན། ༼༡༠ན༽ ༼༡༽ཚུལ་དགུ་པ་དྲངས་པ་ལས་ཀྱང༌། སེམས་ཀྱི་རྣམ་པ་འཁྲུལ་བའི་ཕྱིར། །གཟུང་དང་འཛིན་པ་ཐ་དད་དོ། །ཞེས་སོགས་གསུངས་པའི་ཕྱིར། ༼ཇི༽ཚུལ་དགུ་བའི་ལུང་དྲངས་པ་འདི་རྣམས་ཁ་ཆེའི་པཎྚི་ཏ་སུ་མ་ཏི་ཤྲཱི་དང༌། རིན་ཆེན་གྲུབ་ཀྱིས་བསྒྱུར་བའི་ཕར་ཕྱིན་ཚུལ་དགུ་པ་ལྭ་བ་པས་མཛད་ཟེར་བ་དང༌། དེའི་རང་འགྲེལ་རིན་ཆེན་བཟང་པོས་བསྒྱུར་ཟེར་བ་རྣམས་ན་མི་སྣང༌། ༼༤༽དེ་ལ་སློབ་དཔོན་ཀླུ་སྒྲུབ་དང་ཐོགས་མེད་གཉིས་སུ་ངེས་པའི་ཕྱིར། ༼ཉི༽འཆད་འགྱུར་ལྟར་མཆོད་བརྗོད་ཀྱི། ༼༤༽ཞར་བྱུང་སྐྱེས་བུ་གསུམ་གྱི་རྣམ་གཞག་ལ། ༼ཏི༽ཞེས་གང་ཟག་གསུམ་མི་ཟེར་བར་སྐྱེས་བུ་གསུམ་ཟེར་བ་སྐྱེས་བུའི་སྐད་དོད་པུ་རུ་ཥ་ཞེས་པ་ནུས་ཅན་ལ་འཇུག་པས་འདི་གསུམ་བློའི་ནུས་པ་ཆེ་ཆུང་གི་སྒོ་ནས་བཞག་པ་གོ་ཆེད་ཡིན་པར་དཀའ་ཆེན་གསུངས་སོ། །སངས་རྒྱས་འཕགས་པའི་ལུས་དང་འཁོར་ཕུན་སུམ་ཚོགས་པ་སོགས་མངོན་མཐོ་ཡིན་ཞེས་ལམ་རིམ་ལས་གསུངས་ལ། འདིའི་ཁུངས་ནི། མདོ་སྡེ་རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང༌། །འཁོར་རྩོམ་ཕུན་སུམ་ཚོགས་པ་མངོན་མཐོ་དང༌། །རྟག་ཏུ་ཉོན་མོངས་དབང་ཉིད་མི་འགྲོ་དང༌། །བྱ་བ་རྣམས་ལ་ཕྱིན་ཅི་མ་ལོག་པའོ། །ཞེས་པའི་འགྲེལ་བཤད་དུ་ཕར་ཕྱིན་དང་པོ་བཞི་མངོན་མཐོ་སྒྲུབ་བྱེད་དང༌། ཐ་མ་གཉིས་ངེས་ལེགས་སྒྲུབ་བྱེད་དུ་གསུངས་སོ། ། ༼༡༠བ༽ ༼༢༽བསྡུ་བ་ལས། འདོད་པ་ལ་ལོངས་སྤྱོད་པ་གང་

― GTD002_Page_0020 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ཏུ་ཆོས་ཀྱིས་བབ་ཅོལ་མིན་པ་ཁོ་ནར། ཞེས་གསུངས་པའི་ཕྱིར། ༼ཐི༽ལམ་སྒྲོན་དངོས་བསྟན་གྱི་སྐྱེས་བུ་ཆུང་ངུ་ལ་འདིས་ཁྱབ་སྟེ། པཎ་ཆེན་གྱི་ལམ་སྒྲོན་འགྲེལ་པར། སྤྱིར་སྐྱེས་བུ་ཆུང་ངུ་ལ་ཚེ་འདི་དོན་གཉེར་ཙམ་ཡང་ཡོད་མོད་ཀྱང༌། འདིར་ནི་མངོན་མཐོའི་ཐབས་མ་ནོར་བ་ལ་ཞུགས་པ་དགོས་པའི་ཕྱིར། འདིར་བསྟན་སྐྱེས་བུ་ཆུང་ངུ་ལ་གཅིག་ཉིད་ལས་དབྱེ་བ་གཞན་མི་བྱེད་དོ། །ཞེས་གསུངས་པའི་ཕྱིར། གོང་དུ་དེ་ལ་ཕལ་བ་དང་ཁྱད་པར་ཅན་གཉིས་ཡོད་གསུངས་པ་སྐྱེས་བུ་ཆུང་ངུ་སྤྱིའི་དབྱེ་བ་ཡིན་ནམ་དཔྱད། དེ་བཞིན་དུ་སྐྱེས་བུ་གསུམ་གྱི་རྣམ་གྲངས་ཤིན་ཏུ་མང་སྟེ། ༼༢༽ངེས་འབྱུང་དང༌། ༼དི༽འཁོར་བའི་ཕུན་ཚོགས་ལ་ཉེས་དམིགས་སུ་མི་ལྟ། དེ་ལས་ངེས་པར་འབྱུང་འདོད་མེད། ངེས་འབྱུང་དེ་དོན་དུ་མི་གཉེར་བས་ཆུང་ངུ་དང༌། ཉེས་དམིགས་སུ་ལྟ། ངེས་པར་འབྱུང་འདོད་ཡོད་ཀྱང། དེ་དོན་དུ་མི་གཉེར་བས་འབྲིང་དང། དེ་གསུམ་ག་ལྡན་པ་ནི་ཆེན་པོའོ། །བསྡུ་བ་ན་ཡོད། ༼༢༽སྦྱིན་གནས་༼ནི༽རང་གི་ཡིད་དུ་འོང་བ་ལ་སྦྱིན་པ་གཏོང་ལ་གཞན་ལ་མི་གཏོང་བས་ཆུང་ངུ་དང༌། རང་ལ་དྲིན་ཆེ་བ་སོགས་ལ་དྲིན་གཟོ་བའི་ཕྱིར་དུ་སྦྱིན་པ་གཏོང་ལ། གཞན་ལ་མི་གཏོང་བས་འབྲིང༌། སྡུག་བསྔལ་གྱིས་ཉམ་ཐག་པ་ལ་བརྩེ་བ་དང༌། བླ་མ་སོགས་ལ་དད་པས་གཏོང་བ་ནི་ཆེན་པོའོ། །ཞེས་བསྡུ་བ་ན་ཡོད། ༼༣༽ལམ་སྒྲོན་ལས། གང་ཞིག་རང་ཞི་འགོག་པ་.....ཙམ་དོན་གཉེར། །སྡུག་བདེན་གྱིས་བསྡུས་པའི་སྲིད་པའི་བདེ་ལ་རྒྱབ་ཕྱོགས་ཤིང༌། །རྒྱུ་ཀུན་འབྱུང་གི་གཙོ་བོ་སྡིག་པའི་ལས་ལས་ལྡོག་པའི་བདག་ཉིད། །ལམ་བསླབ་

― GTD002_Page_0021 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གསུམ་ལ་སློབ་པའི། ༼༥༽མདོ་སྡེ་རྒྱན་ལས། ཉོན་མོངས་ཀྱིས་ནི་བདག་འཇོམས་སེམས་ཅན་གཞན་འཇོམས་ཤིང་གཉིས་ཀའི་ཚུལ་ཁྲིམས་འཇོམས། །ཞེས་དང༌།༼པི༽འདི་ལ་རྒྱན་རྩ་འགྲེལ་གྱི་དཔེ་ཕལ་མོ་ཆེར། ཉོན་མོངས་ཀྱིས་ནི་བདག་འཇོམས་སེམས་ཅན་འཇོམས་ཤིང་ཚུལ་ཁྲིམས་འཇོམས། །ཉམས་བཅས་རྙེད་པས་དམན་ཞིང་སྲུང་དང་དེ་བཞིན་སྟོན་པས་སྨད། །ཅེས་ཚིག་རིང་དུ་འབྱུང་ངོ༌། ། ༼༦༽ཚོམས་ལས། སྡིག་ཅན་མི་དང་འགྲོགས་མི་བྱ། །གལ་ཏེ་སྡིག་པ་བྱེད་པ་དག །སྡིག་མི་བྱེད་པས་བསྟེན་ན་ཡང༌། །སྡིག་པ་བྱེད་པར་དོགས་སྐྱེ་ཞིང༌། །མི་སྙན་པ་ཡང་འཕེལ་བར་འགྱུར། །ཞེས་གསུངས་པའི་ཕྱིར། ༼ཕི༽ཚིག་རྐང་ཕྱི་མ་འདི་དང་སྦྱར་ན་སྡིག་ཅན་རྐུན་མ་ལྟ་བུ་དང་འགྲོགས་པའི་ཉེས་དམིགས་ཀྱིས་མི་དེ་ལ་ཡང་གཞན་གྱིས་འདིས་བརྐུས་སམ་སྙམ་པ་སྐྱེ་བ་ལ་བཤད་དགོས་ཤིང༌། དྲངས་པའི་འབྲེལ་ལྟར་ན་སྡིག་པ་མི་བྱེད་པའི་མི་ཡང་དེ་འདྲ་དང་འགྲོགས་ན་བྱེད་དོགས་ཡོད་པ་ལ་འཆད་དགོས་སོ། །༼༡༡ན༽ ༼༢༽ལམ་སྒྲོན་ལས། རང་རྒྱུད་གཏོགས་པའི་སྡུག་བསྔལ་གྱིས། ། ༼བི༽འདིར་ཁ་ཅིག་ཏུ་བདག་གཞན་མཉམ་བརྗེའི་བཤད་པའང་འབྱུང༌། ༼༥༽རང་འགྲེལ་ལས། ཆུང་ངུ་འབྲིང་དང་ཆེན་པོ་ཉིད་ནི་ཡང་དག་པར་ལེན་པའི་སེམས་ཀྱི་དབང་གིས་ཏེ། ཞེས་གསུངས་པའི་ཕྱིར། ༼མི༽སྤང་བྱ་ཕྱོགས་གཅིག་ཙམ་སྤངས་པའི་སྡོམ་པ་དང་ལྡན་པས་ཆུང་ངུ་དང༌། སྤང་བྱ་མ་ལུས་པར་སྤངས་ཀྱང་གཞན་དེ་ལ་མི་འགོད་པ་དང༌། དེའི་བསྔགས་པ་མི་བརྗོད་པས་

― GTD002_Page_0022 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲིང་དང༌། སྤང་བྱ་ཡང་སྤངས་གཞན་དེ་ལ་འགོད་པ་དང༌། བསྔགས་པ་བརྗོད་པས་ཆེན་པོར་བཞག་གོ །༼༥༽དེའི་རིགས་པ་སྦྱར་བ་ནི། ལམ་རིམ་ལས། སྐྱེས་བུ་གསུམ་གྱི་ཐ་སྙད་ཙམ་ཞིག་ནི། ལམ་སྒྲོན་བཞིན་དུ་མཛོད་འགྲེལ་ལས་ཀྱང་གསུངས། ༼༧༽དཔེར་ན་རིན་ཆེན་འཕྲེང་བ་ལས། ༼ཙི༽དང་པོ་མངོན་པར་མཐོ་བའི་ཆོས། །ཕྱིས་ནས་ངེས་པར་ལེགས་འབྱུང་བའོ། ། ༼༧༽དང་པོ་མངོན་པར་མཐོ་ཐོབ་པས། །ཕྱིས་ནི་ངེས་པར་ལེགས་པ་འབྱུང༌། ། ༼ཚི༽དེ་ཡང་རྐང་པ་དང་པོ་གཉིས་ཀྱིས་གདུལ་བྱ་རྣམས་ལ་དང་པོར་མངོན་མཐོའི་ཆོས་བཅུ་དྲུག་བསྟན་ནས་ཕྱིས་ངེས་ལེགས་ཀྱི་ལམ་སྟོང་ཉིད་སྟོན་དགོས་ཏེ། ཞེས་བསྒྲུབ་བྱ་དང༌། རྐང་པ་ཕྱི་མ་གཉིས་ཀྱིས་གདུལ་བྱ་དེ་ལ་མངོན་མཐོ་ཙམ་དུ་འཁྲིད་རུང་དང༌། འབྲིང་ཐེག་དམན་གྱི་ངེས་ལེགས་དང༌། ཆེན་པོ་མཐར་ཐུག་གི་ངེས་ལེགས་ལ་འཁྲིད་འོས་གསུམ་ཡོད་པའི་ཕྱིར། ཞེས་རྒྱུ་མཚན་བསྟན་ལ། འདིས་འཁྲིད་ཚུལ་གྲུབ་མཐའ་རྩ་བར། མངོན་མཐོ་ངེས་ལེགས་སྒྲུབ་བྱེད་དད་ཤེས་གཉིས། །ཞེས་པ་དང་གནད་གཅིག་ལ། ཐལ་འགྱུར་བ་རྣམས་འདིས་ངེས་ལེགས་ཐོབ་པ་དང། ཤེས་རབ་ཀྱི་སྟོབས་ཀྱིས་ངར་འཛིན་ཟད་པ། རྗེས་སུ་འགྲོ་ལྡོག་ཏུ་གསུངས་པས། ཉན་རང་རྣམས་ཀྱང་སྟོང་ཉིད་རྟོགས་པར་འདིས་འགྲུབ་པར་བཞེད་དོ། །འདི་དང་མདོ་ཀུན་བཏུས་གཉིས་ཀླུ་སྒྲུབ་ཀྱི་ལམ་རིམ་ཡིན་ཞིང༌། དལ་འབྱོར་ནས་འཁྲིད་ཚུལ་གསུངས་ལ། མདོ་སྡེ་རྒྱན་དང་ཉན་སར་རིགས་ནས་འཁྲིད་ཚུལ་གསུངས་ཞེས་དཀའ་ཆེན་ཡེ་ཤེས་རྒྱལ་མཚན་གསུངས་སོ། །༼༡༢ན༽ ༼༣༽

― GTD002_Page_0023 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་འགྲེལ་ལས། སྟོང་ཉིད་ལྟ་བས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །ཞེས་གསུངས་པའི་ཕྱིར། ༼ཛི༽འདི་ལ་ཁ་ཅིག་ན་རེ། བདེན་བཞིའི་ཁྱད་ཆོས་གཞན་བཅུ་བཞི་སྔོན་ལ་རྟོགས་ནས། སྟོང་བདག་མེད་གཉིས་རྗེས་ལ་རྟོགས་དགོས་པར་ཐལ། གཞན་བཅུ་བཞི་སྨིན་ལམ་དང་སྦྱོར་བ་ཡིན། དེ་གཉིས་རྟོགས་པའི་ཤེས་རབ་དེ་གྲོལ་ལམ་དངོས་ཡིན་པར་ལུང་འདིས་གྲུབ་པའི་ཕྱིར་ཟེར་བ་མི་འཐད་དེ། འདིའི་སྒོམ་པ་ལྷག་མ་ཞེས་པའི་འབྲུ་བསྣོན་དུ། ཊཱིཀ་ཆེན་དང་ཐར་ལམ་གསལ་བྱེད་གཉིས་ཀར་སྒོམ་པ་ལྷག་མ་མི་རྟག་པ་དང་སྡུག་བསྔལ་ཞེས་པ་ཙམ་ལས་མི་འབྱུང་ཞིང༌། འདི་གོང་གི་རྩ་བར་ཡང༌། དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས། །ཞེས་འབྱུང་བའི་ཕྱིར་རོ། །དེར་མ་ཟད་སྟོང་བདག་མེད་གཉིས་ཀུན་འབྱུང་གི་ཁྱད་ཆོས་སོགས་ཀྱི་རྗེས་སུ་རྟོགས་དགོས་པ་ལུང་རིགས་གཉིས་ཀ་དང་འགལ་ཏེ། ཉན་ས་ལས། རྣམ་པ་བཞིའི་རྗེས་སུ་ཞུགས་པའི་རྣམ་པ་བཅུ་པོ་དག་གིས་སྡུག་བསྔལ་གྱི་མཚན་ཉིད་སོ་སོར་རིག་ནས། གང་ཞིག་སྤང་ན་སྡུག་བསྔལ་འདི་སྤོང་བར་འགྱུར། སྡུག་བསྔལ་གྱི་རྒྱུ་དང༌། ཀུན་འབྱུང་དང༌། རབ་སྐྱེ་དང༌། རྐྱེན་གང་ཡིན་པ་རྣམ་པ་བཞིས་བདེན་པ་ཀུན་འབྱུང་བའི་མཚན་ཉིད་སོ་སོར་རིག་པར་བྱེད་དོ། །ཞེས་མི་རྟག་སྡུག་བསྔལ་སོགས་བཞི་དང༌། འགྱུར་བའི་རྣམ་པ་སོགས་བཅུ་རྟོགས་རྗེས་ཀུན་འབྱུང་ལ་འཇུག་པར་གསུངས་པའི་ཕྱིར་དང༌། འཁོར་བའི་རྩ་བ་མ་རྟོགས་པར་ཀུན་འབྱུང་འཁོར་བའི་འཇུག་

― GTD002_Page_0024 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་རྟོགས་པ་མི་སྲིད་པའི་ཕྱིར་དང༌། རྣམ་འགྲེལ་རང་ལུགས་ལ་ཡང་འགོག་བདེན་བདག་མེད་ཕྲ་མོ་གཉིས་གང་དུ་འདོད་པའི་ཕྱིར་དང༌། སེམས་རང་བཞིན་གྱིས་འོད་གསལ་བའི་རྟགས་ཀྱིས། དྲི་མ་གློ་བུར་བར་བསྒྲུབ་པར་གསུངས་པས་ཀྱང་གནོད་པའི་ཕྱིར་རོ། ། ༼༡༢བ༽ ༼༢༽ལམ་སྒྲོན་ལས། སྲིད་པའི་བདེ་ལ་རྒྱབ་ཕྱོགས་ཤིང༌། །ཞེས་གསུངས་པའི་ཕྱིར། ༼ཝི༽དོན་བསྡུ་ན། བཟང་ངན་ལེགས་ཉེས་སོགས་ལ་ལྟོས་པ་མེད་པར་སྲིད་པ་གང་ཡིན་ལ་ཞེན་པ་ལོག་པ། བྱང་བའི་བྱིས་པ་ཉུང་མས་མི་མགུ་ཟེར་བ་ལྟ་བུ་ཞིག་དགོས་པར་ལམ་རིམ་ལས་གསུངས། ༼༥༽ཡང་ཁ་ཅིག་གིས། བྱང་སེམས་ཀྱིས་ཀྱང་འཁོར་བའི་སྐྱེ་བ་བླངས་ཚད་ཀྱི་ལུས་ལ་འཁོར་བར་འཇོག །ཁ་ཅིག་བྱང་སེམས་སོ་སྐྱེས་བླངས་ཚད་ཀྱི་ལུས་ལ་འཁོར་བར་འཇོག་ཟེར། གཉིས་ཀ་ལ་༼ཞི༽སོ་སྐྱེ་ལ་མ་རིག་བག་ཆགས་ཀྱི་ས་དང༌། ཟག་མེད་ལས་ཀྱི་དབང་གིས་སྐྱེ་བ་ལེན་པ་མེད་པས། སྐྱོན་གཏོང་ལུགས་འདི་ལ་དཔྱོད། ༼༧༽ཁྱོད་སྨོན་ལམ་དག་པའི་དབང་གིས་བླངས་པའི་ལུས་ཡིན་པའི་ཕྱིར། ཀུན་བཏུས་ལས། ཡོངས་སུ་དག་པའི་འཇིག་རྟེན་གྱི་ཁམས་དེ་དག་ནི་སྡུག་བསྔལ་གྱི་བདེན་པ་མ་ཡིན་པར་བལྟ་སྟེ། དེ་དག་ལས་དང་ཉོན་མོངས་པས་བསྐྱེད་པ་མ་ཡིན། ལས་དང་ཉོན་མོངས་པའི་དབང་གིས་བྱུང་བ་མ་ཡིན་གྱི། སྨོན་ལམ་དང་དགེ་བའི་རྩ་བའི་དབང་གིས་བྱུང་བ་དག་གོ །ཞེས་གསུངས་པའི་ཕྱིར། ༈ ༼༡༣ན༽ ༼༥༽བྱམས་པ་ལུང་བསྟན་པའི་མདོ་ལས། འབྱུང་པོ་ཀུན་ལ་ཐུགས་བརྩེ་བ། །བྱམས་པ་རྐང་གཉིས་རྣམས་ཀྱི་མཆོག ། ༼ཟི༽ཉི་ཁྲི་

― GTD002_Page_0025 ―

^{[མ་དཔེ་གཟིགས་ན་འདིར་གནོན།]}

[Full Size]

ཁབ་ཏུ་བཞུགས་ཤིང༌། ཞག་བདུན་དཀའ་བ་སྤྱད་པའི་ལྷག་མ། ༼༥༽ལོ་ནི་དྲུག་ཁྲི་དག་ཏུ་ཡང༌། །དམ་པའི་ཆོས་ནི་སྟོན་པར་འགྱུར། །ཞེས་གསུངས་པའི་ཕྱིར། ༼འི༽ཁ་ཅིག །སྐྱོ་བ་བསྐྱེད་པའི་ཕྱིར་དེ་དུས་ཀྱི་ཚེ་ཚད་ཙམ་མི་བཞུགས་ཏེ། བརྒྱ་བའི་ཚེ། སྟོན་པ་བརྒྱད་ཅུ་ལས་མ་བཞུགས་པ་བཞིན་ཟེར། ༼༦༽རྗེ་བཙུན་བྱམས་པ་འདི་སློབ་ལམ་དུ་༼ཡི༽དགེ་སློང་བློ་གྲོས་བརྟན་པར་གྱུར་པའི་ཚེ། ༼༡༤ན༽ ༼༧༽རོང་ཊཱིཀ་པ་ཁྱོད་ཀྱིས་འགྲེལ་པ་དང་གསེར་འཕྲེང་ལ་རང་དོན་གྱི་དགོས་པ་མེད་པར་སྒྲུབ་པ་ལ་རང་དོན་དོན་གཉེར་མེད་པ་བཀོད་པ་དང༌། ༼རི༽འགྲེལ་པར་ཐོས་པ་ལས་བྱུང་བ་ལ་སོགས་པའི་ཤེས་པ་སྐྱེ་བའི་རིམ་གྱིས་ཞེས་པའི། ༼༧༽སོགས་སྒྲས་འཕགས་པ་བྱམས་པས། ༼༡༤བ༽ ༼༥༽དེར་ཐལ། རྒྱ་ཆེར་རོལ་བ་ལས། ༼ལི༽དཀའ་བ་སྤྱོད་པའི་ལེའུ་ལས། ས་འདིར་རྣམ་བརྒྱར་འཐོར་བར་འགྱུར་ཡང་སྲིད། །རི་རབ་རྩེ་མོར་ལྷུན་པོ་ཆུར་འཕྱོ་སྲིད། །ཉི་ཟླ་སྐར་ཚོགས་ས་ལ་ལྟུང་འགྱུར་སྲིད། ། ༼༥༽སོ་སོ་སྐྱེ་བོ་ཡིན་ཡང་ང་མི་འཆི། ། ༼ཤི༽དེ་ཕྱིར་འདི་ལ་མྱ་ངན་ཁྱོད་མ་བྱེད། །རིང་པོར་མི་ཐོགས་བྱང་ཆུབ་སངས་རྒྱས་འགྱུར། །ཞེས་སྒྱུ་འཕྲུལ་མའི་སྐྱེ་བའི་ལྷ་ལ་གསུངས་སོ། ། ༼༦༽རྒྱུད་བླ་མ་ལས། དེ་ལྟར་ཡིད་ཆེས་པའི་ལུང་༼སི༽དཔལ་འཕྲེང་སེང་གེའི་ང་རོའི་མདོ། གཟུངས་ཀྱི་དབང་ཕྱུག་རྒྱལ་བོའི་མདོ། དེ་བཞིན་གཤེགས་པའི་སྙིང་པོའི་མདོ། ཡེ་ཤེས་སྣང་བ་རྒྱན་གྱི་མདོ་སོགས། ༼༦༽དང་རིགས་པ་ལ། །བརྟེན་ནས་དངོས་སུ་བདག་ཉིད་འབའ་

― GTD002_Page_0026 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་གི་ཤེས་སྒྲིབ་ཕྲ་མོ་དག་ཕྱིར་དང༌། །སྐྱེ་བོ་གང་ཡང་གཞུང་ལུགས་ལ་མོས་པ་དང་དགེ་བ་སྟེ་གཞུང་ལ་ཐོས་བསམ་སྒོམ་པ་བྱེད་པའི་བསོད་ནམས་དང༌། གཞུང་དོན་འབྱེད་པའི་༼༦༽ཕུན་སུམ་ཚོག༦ས་ལྡཁན་བློཀ།༼༡༥ན༽ ༼༤༽རྣམ་བཤད་ལས་ཀྱང། རྗེ་བཙུན་མངོན་པར་རྫོགས་པར་སངས་རྒྱས་པའི་དབང་དུ་བྱེད་ན་ཐུན་མོང་དང་ཐུན་མོང་མ་ཡིན་པའི་སྐབས་༼ཧི༽སྣང་ཚོད་དང༌། དངོས་པོའི་གནས་ཚོད་ལ་བྱེད་པ་རང་ལུགས་ཡིན་པ་འདྲ། ༼༧༽རྒྱུད་བླ་མའི་ཡོན་ཏན་གྱི་ལེའུ་ལས། རང་དོན་གཞན་དོན་རང་དོན་གྱི་སྐུ་དེ་གང་ཞེ་ན་དོན་དམ་སྐུ་དང་ནི། །དེ་ལ་བརྟེན་པའི་གཞན་དོན་སྐུ་དེ་གང་ཞེ་ན་ཀུན་རྫོབ་སྐུ་ཉིད་དོ། །ཞེས་གསུངས་པའི་ཕྱིར། ༼ཨི༽དེ་ཡང་རང་དོན་དོན་དམ་པའི་སྐུ་དང༌། གཞན་དོན་ཀུན་རྫོབ་པའི་སྐུ་ཡིན་ལ། རང་དོན་གཞན་དོན་གྱི་ཁྱད་པར་ཡང༌། གདུལ་བྱ་ལ་དངོས་སུ་སྣང་མི་སྣང་གི་སྒོ་ནས་བཤད་དེ། རྒྱུད་བླར། བདག་ཉིད་ཀྱིས་ནི་འབྱོར་བའི་གནས། །དམ་པའི་དོན་གྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །ཞེས་སོ། །དོན་དམ་དང་ཀུན་རྫོབ་ཀྱི་དོན་ཡང༌། སངས་རྒྱས་སུ་འཇོག་བྱེད་དངོས་ནང་གི་སྤངས་རྟོགས་ཡིན་ལ། གཟུགས་སྐུ་སངས་རྒྱས་སུ་བྱེད་པ་དེ་རྟེན་གྱིས་ཡིན་ཏེ། དཔེར་ན། ནོར་བུ་རིན་པོ་ཆེ་བཅུག་པའི་སྣོད་ལ་ཡང་ཁམས་ཅན་དུ་བརྩི་བ་ལྟ་བུའོ། །འདི་བྱེ་སྨྲས་སངས་རྒྱས་དཀོན་མཆོག་འཇོག་ཚུལ་དང་ཕྱོགས་འདྲ་ལ། བཤགས་བསྟོད་ལས། གཙོ་བོ་ཁྱོད་ལ་དེ་ལས་མཆོག་རབ་གྱུར། །ཆོས་སྐུ་ཉི་མ་བླ་ན་མེད་པའང་མངའ། །ཞེས་ཆོས་སྐུ་

― GTD002_Page_0027 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་སྐུ་ལས་མཆོག་ཏུ་བཤད་པའང་དེ་ལ་དགོངས་སོ། །༼༡༥བ༽ ༼༧༽དེས་ཆོས་སྐུ་ལས་མ་གཡོས་བཞིན་དུ་མཛད་པ་བཅུ་གཉིས་སྟོན་པའི་མཆོག་གི་སྤྲུལ་སྐུའི་མཛད་པ་ལ་གནས་པར་བཤད་པའི་ཕྱིར། རྒྱུད་བླ་མ་ལས། ༼ཀུ༽ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། ། ༼༧༽ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །འདོད་པར་སྐྱེ་བ་བཞེས་ཚུལ་བསྟན་པའི་ཐོག་མ་དགའ་ལྡན་དུ་མངོན་པར་སྐྱེ་བ་དང༌། ། ༼༡༦ན༽ ༼༢༽ཡོངས་སུ་མ་དག་ཞིང་རྣམས་༼ཁུ༽ལས་ཀྱང་འཛམ་གླིང་ལས་ཀྱི་ས་པ་ཡིན་པ་དང༌། ངེས་འབྱུང་སྐྱེ་སླ་བའི་དབང་གིས་འཛམ་གླིང་རྣམས་༼༢༽སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པའི་ཕྱིར། ༼གུ༽མཛད་པ་བཅུ་གཉིས་འདྲེན་ཚུལ་ཡང་དགའ་ལྡན་དུ་སྐྱེ་བ་དང་པོར་བྱས་ནས་ལྷུམས་སུ་ཞུགས་པ་དང་བལྟམས་པ་གཅིག་ཏུ་བགྲང་བ་ཡང་རྒྱུད་བླ་དར་ཊཱིཀ་ཏུ་གསུངས། རིན་ཆེན་འཕྲེང་བར། ཆོས་ཀྱི་འཁོར་ལོ་བསྐོར་བ་དང༌། །ལྷ་རྣམས་ཀུན་ལས་བབས་པ་དང༌། །དེ་བཞིན་དུ་ཡང་མྱ་ངན་ལས། །འདའ་བ་སྟོན་པར་མཛད་པ་ཡིན། །ཞེས་ལྷ་ལས་བབས་པ་གཅིག་ཏུ་བགྲང་ཞིང༌། ཐབས་ལ་མཁས་པའི་མདོར་ཆོས་སྤོང་གི་གཉེན་པོར་དམ་པའི་ཆོས་སྒྲུབ་པ་ལ་མཁས་པ་ཞེས་གཅིག་ཏུ་བགྲང་བར་བུ་སྟོན་ཆོས་འབྱུང་ལས་བཤད་དོ། ། ༼༦༽རྣམ་བཤད་ལས། ཚད་མ་གང་གིས་གྲུབ་ན་འཕགས་པ་བྱམས་པའི་མཉམ་གཞག་སོ་སོར་རང་རིག་པའི་ཡེ་ཤེས་ཀྱིས་རྟོགས་ཤིང་ཞེས་གསུངས་པའི་ཕྱིར།

― GTD002_Page_0028 ―

^{[མ་དཔེ་གཟིགས་ན་འདིར་གནོན།]}

[Full Size]

༼ངུ༽སྒྲ་སྤྱི་དང་དོན་སྤྱིའི་སྣང་བར་མ་འདྲེས་པས་ན་སོ་སོ་ཞེས་བཤད་དེ། རྟོག་པ་རྣམས་སྒྲ་དོན་འདྲེས་པར་འཛིན་པ་ཞེས་སྒྲ་སྤྱིའམ་དོན་སྤྱི་གང་རུང་དང། དོན་བུམ་སོགས་དེ་དག་སོ་སོར་འབྱེད་མི་ནུས་པས་རང་གི་ངོར་འདྲེས་པའམ་གཅིག་པའི་ཚུལ་གྱིས་འཆར་བའི་ཕྱིར། རང་རིག་པ་ནི་དྲང་ངེས་རྣམ་འབྱེད་ཀྱི་མཐའ་དཔྱོད་ལྟར་རང་སྟོབས་ཀྱིས་རིག་པའམ། མདོ་སྡེ་ས་བཅུ་པའི་ལུང་ཚིག་གསལ་དུ་དྲངས་པ་ལས། དེ་འདྲའི་སྤྱོད་ཡུལ་ཕྲ་ཞིང་བལྟ་དཀའ་བ། །རང་རིག་ཡིན་ཕྱིར་བརྗོད་པར་མི་ནུས་ཀྱང༌། །ཞེས་དང༌། རྒྱུད་བླར། བརྟགས་མིན་ཕྱིར་དང་བརྗོད་མིན་ཕྱིར། །འཕགས་པས་མཁྱེན་ཕྱིར་ཞེས་པ་ལྟར་འཕགས་པ་ནང་ཕན་ཚུན་དང་རང་གིས་ཇི་ལྟ་བ་བཞིན་གཟིགས་པ་མ་གཏོགས། སོ་སོ་སྐྱེ་བོའི་སྒྲ་རྟོག་གིས་ཇི་ལྟ་བ་བཞིན་ཡུལ་དུ་བྱེད་མི་ནུས་པས་རང་རིག་པར་བཤད་དོ། །༼༡༦བ༽ ༼༡༽མཆོད་བརྗོད་ཀྱིས་གདུལ་བྱར་མ་ཟད་རྗེ་བཙུན་གྱི་ཐུགས་རྒྱུད་ལ་ཡུམ་མཁྱེན་གསུམ་ལ་དང་བའི་དད་པ་ནས་རྣམ་མཁྱེན་གྱི་བར་ལམ་གྱི་རིམ་པ་སྔ་མ་སྔ་མ་ལས་ཕྱི་མ་སྐྱེ་བའི་རྗེས་འགྲོ་དངོས་སུ་བསྟན་ནས་ལྡོག་པ་ཤུགས་ལ་བསྟན་པའི་ཕྱིར། དེར་ཐལ། ཚིགས་བཅད་དང་པོས་དད་སོགས་ཐེག་པ་ཆུང་འབྲིང་ཐུན་མོང་དང་ཕྱི་མས་ཆེན་པོའི་རྣམ་མཁྱེན་བར་བསྟན་པའི་ཕྱིར། ༼ཅུ༽དེ་ལྟར་ན་སྐྱེས་བུ་གསུམ་གྱི་རྣམ་གཞག་ཀྱང་མཆོད་བརྗོད་ལས་འཕྲོས་ཤིང་དེའི་ཞར་བྱུང་ཡིན་ལ། དེའི་ཚུལ་ཡང༌། ཉེར་ཞི་ཞེས་པ་ཞི་བ་དངོས་འཁོར་བ་མཐའ་དག་ལས་གྲོལ་བ་གཅིག་དང༌། བསྟན་བྱ་ཕལ་པ་ངན་འགྲོའི་སྡུག་བསྔལ་ཙམ་ཞི་བ་གཉིས་བྱས་ནས།

― GTD002_Page_0029 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་གཉིས་དོན་དུ་གཉེར་བའི་ཆུང་འབྲིང་དང༌། རྐང་པ་གཉིས་པ་དང་གསུམ་པས་ཆེན་པོའི་ལམ་འབྲས་རྣམས་བསྟན་པར་དཀའ་ཆེན་རིན་པོ་ཆེས་གསུངས་སོ། ། ༼ཅུ༽སྐབས་བཞི་པའི་ཐར་ཆའི་ཐད་དང་སྦྱར་ནས་བཤད་ཚུལ་ཡང་བླ་མ་ལ་བརྟེན་ནས་བདག་གིས་ལེགས་པར་ཤེས་སོ། ། ༼༡༧བ༽ ༼༡༽དེ་རྒྱ་ཆེར་རོལ་བ་དང་ཕྱོགས་མཐུན་ལ་ཁྱོད་ཀྱི་དེ། ༼ཆུ༽ཤཱཀྱ་བཤེས་གཉེན་དང་སངས་རྒྱས་གསང་བ་གཉིས་ཀྱི་ལུགས་དང༌། ཀུན་དགའ་སྙིང་པོའི་ལུགས་ཏེ། ༼༡༽ཡོ་ག་ལུགས་གཉིས་གང་དང་ཡང་མི་མཐུན་པའི་ཕྱིར་ཏེ། རྒྱུད་སྡེ་སྤྱི་རྣམ་དང་འགལ་བའི་ཕྱིར། ༼༡༨བ༽ ༼༡༽མདོ་དེ་ཉིད་ལས། གང་གིས་བྱང་ཆུབ་བློ་བསྐྱེད་པ། །དེ་སྙེད་བསོད་ནམས་ཁྱབ་པར་བགྱིད། །བྱང་ཆུབ་སེམས་ཀྱི་བསོད་ནམས་གང༌། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འབྱུང༌། །ཞེས་གསུངས་པའི་ཕྱིར། ༼ཇུ༽ལམ་སྒྲོན་དུ། དཔལ་སྦྱིན་གྱིས་ཞུས་པའི་མདོ་བཀོད་པར་ཚིག་རྐང་ཕྱི་མ་འདི་བཞི་ཇི་ལྟ་བ་བཞིན་དུ་འབྱུང་ཞིང༌། དེའི་ཐད་དུ་ལམ་སྒྲོན་འགྲེལ་པ་འགའ་ཞིག་ལས། ཤིང་རྟའི་འཕང་ལོ་ཙམ་གྱི་ཕྱོགས་ན་སྟོང་གསུམ་གྱི་ལྷ་མི་ལས་མང་བའི་སེམས་ཅན་ཡོད། དེ་རེ་རེ་ལས་བསོད་ནམས་ཐོབ་པ་དེ་གཟུགས་སུ་གྲུབ་ན་ཉུངས་འབྲུ་ཙམ་རེ་ལས་མ་བྱུང་ཡང་ནམ་མཁར་མི་ཤོང་བའི་ཚོད་གཅིག་ཏུ་གསུང་སྟེ། ཉུངས་དཀར་གོ་ཡུལ་གྱི་རིགས་པ་འདི་ཡིན་ནམ་སྙམ། ༼༢༽འདི་ནི་ཉུངས་དཀར་གོ་ཡུལ་གྱི་རིགས་པ་དང་༼ཉུ༽འདི་ལ་ཁ་ཅིག །སྟོང་

― GTD002_Page_0030 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་ཉུངས་དཀར་གྱིས་བཀང་སྟེ། ཤར་ཕྱོགས་སུ་འཇིག་རྟེན་གྱི་ཁམས་བརྒྱད་བརྒྱ་ན་ཉུངས་དཀར་རེ་རེ་བཞག་སྟེ་བགྲངས་ཀྱང་ཉུངས་དཀར་ཟད་ཀྱི་འཇིག་རྟེན་མི་ཟད་པ་ལྟར་ཕྱོགས་ཐམས་ཅད་དུ་འདྲ་བས་དམིགས་ཡུལ་སེམས་ཅན་ཚད་མེད་པར་འགྲུབ་ལ། དེ་གྲུབ་ན་སེམས་བསྐྱེད་ནི་དེ་ཐམས་ཅད་ཀྱི་དོན་དུ་ཡིན་པས་ཕན་ཡོན་ཚད་མེད་པར་འགྲུབ་སྟེ། སྤྱོད་འཇུག་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲ་འོ། །ཞེས་གསུངས་པའི་ཕྱིར་ཟེར། ལ་ལ་ཉུངས་དཀར་གཅིག་ལ་སྣུམ་ཅུང་ཟད་འབྱུང་བར་ཤེས་ན་ཉུངས་དཀར་ཚད་མེད་པ་ལས་སྣུམ་ཚད་མེད་པ་འབྱུང་བར་གོ་བ་ལྟར། དམིགས་པ་སེམས་ཅན་འགའ་ཞིག་གི་སྡུག་བསྔལ་ཕྱོགས་རེ་བ་མགོ་ནད་ཙམ་སེལ་འདོད་པ་ལ་བསོད་ནམས་ཚད་མེད་པ་འབྱུང་བ་མཛའ་བོའི་བུ་མོའི་གཏམ་རྒྱུད་ལྟར་ཡིན་ན། སེམས་ཅན་ཚད་མེད་པའི་སྡུག་བསྔལ་མ་ལུས་པ་གཏན་ཟད་དུ་འདོད་པ་ལ་བསོད་ནམས་ཚད་མེད་པ་འགྲུབ་སྟེ། སྤྱོད་འཇུག་ལས། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམ་ན་ཡང༌། །ཕན་འདོགས་བསམ་པ་དང་ལྡན་པས། །བསོད་ནམས་དཔག་མེད་ལྡན་གྱུར་ན། ། ༼༢༽སེམས་ཅན་རེ་རེའི་མི་བདེ་བ། །དཔག་ཏུ་མེད་པ་བསལ་འདོད་ཅིང༌། ། ༼ཏུ༽རེ་རེའང་བདེ་བ་དཔག་མེད་ལ། །འགོད་པར་འདོད་པ་སྨོས་ཅི་དགོས། །ཞེས་གསུངས་པའི་ཕྱིར། ༼༡༩ན༽ ༼༣༽ངག་གི་དབང་ཕྱུག་གྲགས་པས། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང༌། །དགའ་ལྡན་སྐྱེ་བོའི་དོན་མཛད་ཕྱིར་ན་དམ་པ་ཏོག་དཀར་གྱུར། ། ༼ཐུ༽དེ་ནས་འདིར་ནི་འགྲོ་བའི་དོན་དུ་

― GTD002_Page_0031 ―

^{[མ་དཔེ་གཟིགས་ན་འདིར་གནོན།]}

[Full Size]

ཤཱཀྱའི་ཏོག་གྱུར་གང༌། །འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག །༼༤༽དེ་མཉམ་གཞག་ལས་ལངས་པའི་རྗེས་ཐོབ་ཀྱིས་ངེས་པར་བོད་སྔ་མས་བཤད་པའི་ཕྱིར་ན་མ་ཁྱབ་སྟེ། བོད་སྔ་མས་དེ་ལྟར་བཤད་ཀྱང་མ་འབྲེལ་བའི་ཕྱིར། ༼དུ༽མཁས་གྲུབ་རྟོགས་དཀའི་སྣང་བར་ཡང་དེ་ལྟར་གསུངས་སོ། ། ༼༡༩བ༽ ༼༡༽ཕར་ཕྱིན་བསྡུས་པ་ལས། རྒྱལ་སྲས་མཐུ་མཆོག་དེ་འདྲ་རྨད་བྱུང་གང༌། ། ༼ནུ༽འདི་ལ་དཔེ་ཁ་ཅིག་ཏུ། རྒྱལ་སྲས་མཐུ་མཆོག་དེ་འདྲ་རྨད་བྱུང་དག །ཅེས་འབྱུང་ངོ༌། ། ༼༡༽ཐོག་མར་དེ་ལ་དད་པ་ཡོད་ན་འཇུག་ཅིང་མེད་ན་མི་འཇུག་པས་གཙོ་བོར་བཤད་པའི་ཕྱིར། དཔེར་ན། ༼པུ༽དྲིས་ལན་བློ་བཟང་བཞད་པའི་སྒྲ་དབྱངས་ལས། ༼༡༽སེམས་གཙོ་བོར་བཤད་པ་བཞིན། རིན་ཆེན་འཕྲེང་བ་ལས། འདི་གཉིས་གཙོ་བོ་ཤེས་རབ་སྟེ། །འདི་ཡི་སྔོན་འགྲོ་དད་པ་ཡིན། །ཞེས་གསུངས་པའི་ཕྱིར་༼ཕུ༽ཏེ། དཀོན་མཆོག་སྤྲིན་ལས། སེམས་ནི་ཆོས་ཐམས་ཅད་ཀྱི་སྔོན་དུ་འགྲོ་བ་སྟེ། ཞེས་གསུངས་པའི་ཕྱིར། ༼༢༠ན༽ ༼༦༽དགེ་སློང་ཡིན་པའི་ཕྱིར། རྟོག་གེ་འབར་བར་དོན་སྨྲ་དང་རྩོད་སྐབས་སུ་བཤད། ༈ ༼༢༡བ༽ ༼༢༽གཞུང་འདིས་རྟེན་ཐབས་འབྲས་བུ་གསུམ་གྱི་སྒོས་བསྟོད་དེ། ༼བུ༽འདིས་ཀྱང་ཉན་རང་ལྷག་མེད་པས་ཀུན་འབྱུང་སྤངས་པར་འགྲུབ་སྟེ། ཐེག་དམན་རང་ལམ་གྱིས་ཀུན་འབྱུང་སྤངས་པའི་ཉེར་ཞི་ཐོབ་མི་ནུས་ན་སྐབས་འདིར་བཤད་པ་འབྲེལ་མེད་པའི་ཕྱིར་རོ། ། ༼༥༽ལྗོན་པས་ཞུས་པའི་མདོ་ལས། མ་ནི་ཤེས་རབ་ཕ་ནི་ཐབས། །དགེ་བ་རྣམས་

― GTD002_Page_0032 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་གཡོགས་ཡིན་ལ། །ཉེ་དུ་བྱང་ཆུབ་ཕྱོགས་རྣམས་དང༌། །ཞེས་གསུངས་པའི་ཕྱིར། ༼༧༽ཁ་ཅིག་ན་རེ། དེའི་རྒྱུ་མཚན་མཆོད་བརྗོད་གླེང་གཞིའི་ལེའུ་དང༌། ༼མུ༽གཉིས་ཀ་རིམ་བཞིན། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཞེས་པ་ནས། ཤེས་རབ་ཤིན་ཏུ་རྣམ་པར་གྲོལ་བ་ཞེས་པའི་བར་གྱིས་ལྷག་བཅས་དང༌། ཅང་ཤེས་པ་མན་ཆད་ཀྱིས་ལྷག་མེད་དགྲ་བཅོམ་སྟེ་གཉིས་ཀའི་གཞི་ཤེས་ཀྱི་རྟེན་བསྟན་ཅིང༌། བྱང་ཆུབ་སེམས་དཔའ་ཆེན་པོ་གྲངས་མེད་ཚད་མེད་པ་ཐམས་ཅད་ཀྱང་གཟུངས་རབ་ཏུ་ཐོབ་པ་ཞེས་སོགས་ཀྱིས་ལམ་ཤེས་ཀྱི་རྟེན་དང་ཡོན་ཏན་བསྟན། ཕྱོགས་བཅུའི་རྒྱལ་བ་རྣམས་ཀྱིས་སྐྱེས་སུ་བསྐུར་བ་སོགས་ཀྱིས་རྣམ་མཁྱེན་རྟེན་གྱི་སྒོ་ནས་བསྟན་པ་འདིར་བསྡུས་པས་འདི་གཉིས། ༼ཅ༽རྩ་འགྲེལ་སྦྱོར་བའི་ཆེད་ཡིན་པའི་ཕྱིར། ༼༢༢ན༽ ༼༢༽ཉི་སྣང་ལས། ཆོས་ཀྱི་སྐུའི་སྐབས་བསླབ་པའི་འབྲས་བུའི་ལེའུ་སྟེ་བརྒྱད་པའོ། །༼ཙུ༽ཞེས་རིམ་བཞིན་རབ་འབྱོར་གྱི་ལེའུ། མཐའ་གཉིས་རྣམ་དག་གི་ལེའུ། སྤྱོད་པ་ཁྱད་པར་ཅན་གྱི་ལེའུ། དེ་བཞིན་ཉིད་ཀྱི་ལེའུ། བསླབ་པ་ཡོངས་སུ་དག་པའི་ལེའུ། བསླབ་པ་ལ་རིམ་གྱིས་འཇུག་པའི་ལེའུ། བསླབ་པ་ཡོངས་སུ་རྫོགས་པའི་ལེའུ། བསླབ་པའི་འབྲས་བུའི་ལེའུ་སྟེ་བརྒྱད་དངོས་པོ་བརྒྱད་སྟོན་པའི་སྐབས་བརྒྱད་དང་སྦྱར་བ་ལས་འདིར་ཐ་མ་ཡིན་ནོ། ། ༼༣༽འགྲེལ་ཆེན་ལས། བྱ་བ་རྩོམ་པའི་དགོས་པ་ཡིན། །ཞེས་གསུངས་པ་ཡིན་ནོ། །ལེགས་ལྡན་སོགས་ཁ་ཅིག་ན་རེ།༼༣༽དེ་བཞིན་གཤེགས་པའི་གསང་བ་བསྟན་པའི་དབང་དུ་བྱས་༼ཚུ༽ནས་

― GTD002_Page_0033 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་དང་དམ་པའི་ཆོས་བསྲུང་བ་ལ་རྣམ་པ་ཐམས་ཅད་དུ་བདག་པོར་བྱས་པ་ཡིན་པའི་ཕྱིར་དང༌། ཕྱག་ན་རྡོ་རྗེ་དབང་བསྐུར་བ་ལ་སོགས་པ་ལས་བསྟན་པ་གཏད་པ་ཡིན་པའི་ཕྱིར་དང། གཞན་རྣམས་ཀྱིས་ཁྱད་པར་བརྗོད་པ་མེད་པའི་ཕྱིར་ན་ལྕང་ལོ་ཅན་ན་བཞུགས་པའི་ས་བཅུའི་དབང་ཕྱུག་རྡོ་རྗེ་འཛིན་པ་ཆེན་པོས་འཇིག་རྟེན་ཐམས་ཅད་རྗེས་སུ་བཟུང་བའི་ཕྱིར། ཞེས་སོགས་ཀྱིས་གཞན་ལུགས་བཀོད་ཅིང༌། གཞན་དག་ནི་འདི་ཉིད་ཀྱི་ཡོངས་སུ་གཏད་པའི་ལེའུ་ལས། ཞེས་སོགས་ཀྱིས་རང་ལུགས་བསྟན་ཏེ། འདི་སྐད་བདག་གིས་ཐོས་པ་ཞེས་བཀའ་སྡུད་པ་པོ་གང་ཡིན་ལ་རྩོད་པའོ། །དེ་ལ་ཕ་རོལ་པོའི་འདོད་ཚུལ་ནི། གསང་བ་བསྟན་པའམ་གསང་བ་བསམ་གྱིས་མི་ཁྱབ་པའི་མདོས་བཤད་ཚུལ་གྱི་དབང་དུ་བྱས་ནའང་ཕྱག་རྡོར་སྡུད་པ་པོ་ཡིན་ལ། ཕྱག་ན་རྡོ་རྗེ་དབང་བསྐུར་བའི་རྒྱུད་ལྟར་ནའང་དེ་ཡིན་ཏེ། སྔ་མའི་ཚུལ་ནི་སྔོན་སངས་རྒྱས་སྟོང་འཁོར་བསྒྱུར་ཡུལ་འཁོར་སྲུང་གི་སྲས་སུ་འཁྲུངས་ཏེ་ཐུགས་བསྐྱེད་པའི་ཚེ་དེ་ཐམས་ཅད་ཀྱིས་བསྟན་པའི་བདག་པོར་སྨོན་ལམ་བཏབ་པའི་ཁྱེའུ་ཆོས་སེམས་ནི་ཕྱག་རྡོར་ཡིན་ལ། ཆོས་འཁོར་བསྐོར་བར་སྨོན་ལམ་བཏབ་པའི་ཁྱེའུ་ཆོས་ཀྱི་བློ་གྲོས་ནི་ཚངས་པ་གཙུག་ཕུད་ཅན་ཡིན་པའི་ཕྱིར་དང༌། དེས་སྨོན་ལམ་འགྲུབ་པའི་ཕྱིར། ཕྱག་ན་རྡོ་རྗེ་དབང་བསྐུར་བ་ལས་ཀྱང་ཕྱག་རྡོར་ཆོས་ཀྱི་རྒྱལ་པོར་མངའ་གསོལ་བའི་ཕྱིར་སྡུད་པ་ཡིན་ནོ། །འདི་ཟླ་བས་

― GTD002_Page_0034 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་སྒྲོན་གསལ་གྱི་ཊཱིཀྐར་གསུངས་ལ། རྡོ་རྗེ་ཆོས་ཀྱང༌། ཕྱག་རྡོར་ཆོས་ཀྱི་བདག་པོར་མངའ་གསོལ་བའི་མཚན་དུ་འདུས་པ་འཕགས་ལུགས་ཀྱི་བླ་མ་རྣམས་བཞེད་ལ། ཡེ་ཤེས་ཞབས་ལུགས་ཀྱི་འགྲེལ་པ་ཁ་ཅིག་ཏུ་རྡོ་རྗེ་ཆོས་སྤྱན་རས་གཟིགས་ཀྱི་མཚན་གྱི་རྣམ་གྲངས་སུ་གསུངས་སོ། །༼༢༣ན༽ ༼༤༽རྒྱུད་བླ་མ་ལས། བསམ་གཏན་གྱི་བདེ་བའི་མངལ༌༼༦༽ཡུམ་དུ་འགྱུར་ཞེ་ན། ༼ཛུ༽ཉེར་ཞིར་འཁྲིད་པ་དང་རིགས་ཅན་གསུམ་གྱི་དོན་བསྒྲུབ་པ་སོགས་༼༦༽ཇི་སྐད་བཤད་པའི་དོན་ཆེན་པོ་གསུམ་ཐོབ་པའི་ཕྱིར་ཏེ། ༼༢༣བ༽ ༼༢༽ གཞན་ཡང་༼ཝུ༽ཡུམ་སྲས་རྒྱུ་འབྲས་སུ་འདོད་པ་ལྟར་ན། ༼༢༽མཆོད་བརྗོད་ཀྱིས་མཁྱེན་གསུམ་ལ་རང་སྲས་འཕགས་བཞིའི་ཡུམ་བྱེད་ཚུལ་སྒོས་མ་བསྟོད་པར་ཐལ། དང་པོས་གཞི་ཤེས་ལ་རང་རྒྱུད་ལྡན་གྱི་ཡུམ་བྱེད་ཚུལ། གཉིས་པས་ལམ་ཤེས་ལ་དེ་ལྟར་མ་བསྟོད། གསུམ་པས་རྣམ་མཁྱེན་ལ་དེ་ལྟར་མ་བསྟོད་པའི་ཕྱིར་༼ཞུ༽ཏེ། རང་རྒྱུད་ལྡན་གྱི་ཡུམ་ཡིན་པ་མི་སྲིད་པའི་ཕྱིར། རྟགས་སོང༌། འདོད་ན། ༼༣༽འགྲེལ་པར་ཡང་དེ་ལྟར་བསྟོད་པར་བྱའོ། ། ༼༧༽རྣམ་བཤད་ལས། གཞི་ཤེས་ཀྱང་འོག་ནས་མདོའི་དྲིས་ལན་གྱི་དོན་བསྡུའི་སྐབས་ནས་༼ཟུ༽དེ་ལ་ཐམས་ཅད་ཤེས་པ་ཉིད་ནི་གཟུགས་ལ་སོགས་པའི་ཆོས་ལ་མི་རྟག་པ་ལ་སོགས་པའི་རྟེན་ཅན་འབྲས་བུ་བདག་ཏུ་རྨོངས་པ་སྤོངས་པ་ཅན་ཡིན་ནོ་ཞེས། ༼༧༽བཤད་པ་ལྟར་མི་རྟག་སོགས་ཞེས་གསུངས་པའི་ཕྱིར། ༼༢༥ན༽ ༼༥༽རྒྱུད་བླ་མ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་སྐྱེད་

― GTD002_Page_0035 ―

^{[མ་དཔེ་གཟིགས་ན་འདིར་གནོན།]}

[Full Size]

མ་༼འུ༽ཞེས་སོགས་ཀྱི་དོན་ཐེག་ཆེན་ལ་མོས་པའི་སེམས་བསྐྱེད་ཀྱིས་སྡུག་ཀུན་ཕྲ་མོ་ཚུན་ཆད་ཟད་པའི་གཙང་བའི་ཕར་ཕྱིན་ཐུན་མོང་མ་ཡིན་པར་བསྒྲུབ་པའི་ཕྱིར་ཐེག་ཆེན་གྱི་རིགས་སུ་འཇོག་བྱེད་ཡབ་ཀྱི་ས་བོན་ལྟ་བུ་དང༌། མུ་སྟེགས་བདག་ལྟའི་གཉེན་པོ་ཤེས་རབ་ནི་ཐེག་གསུམ་ཐུན་མོང་གི་མ་ལྟ་བུ། ཉན་ཐོས་འཇིགས་སྲེད་ཀྱི་དབང་དུ་མི་འགྲོ་བར་དེའི་གཉེན་པོ་ནམ་མཁའ་མཛོད་སོགས་ཏིང་ངེ་འཛིན་གྱི་ཐབས་མཁས་པའི་སྒོ་ནས་གཞན་དོན་བདེ་བླག་ཏུ་འགྲུབ་པའི་རྟེན་བྱེད་པས་མངལ་ལྟ་བུ་དང༌། རང་རྒྱལ་བརྩེ་མེད་ཀྱི་གཉེན་པོ་སྙིང་རྗེའི་དབང་གིས་འཁོར་བ་མ་སྟོང་བར་བཞུགས་པས་རྟག་པའི་ཕར་ཕྱིན་གྱི་རྒྱུ་དང༌། ཐ་མར་གལ་ཆེ་བ་འབྲས་བུ་སྨིན་པ་ལྟ་བུར་བཤད་དོ། ། ༈ ༼ཡུ༽འདི་ནི་མཆོད་བརྗོད་བཤད་ཐབས་ལྔས་བཤད་པའི་གཉིས་པ་མིན་གྱི། མཚམས་སྦྱར་རྩ་བ་འགྲེལ་པ་གསུམ་དུ་བྱས་པའི་གསུམ་པ་ལ། བསྡུས་དོན། དགོས་དོན། ཚིག་དོན་གསུམ། དང་པོ་སྟོན་པར་ཚིགས་སུ་བཅད་པ་འདིས་ནི་ཞེས་སོགས་བྱུང༌། ༼༥༽གཉིས་པ་ནི། འགྲེལ་པའི་བཤད་ཐབས་དགོས་དོན་གྱི་དབང་རྣོན་དང་བ་སྐྱེ་ཚུལ་འཆད་པར། ༼༢༥བ༽ ༼༡༽གཞི་ལམ་རྣམ་གསུམ་བདེན་མེད་དུ་རྟོགས་པའི་སྒོས་ཡུམ་གྱི་ངོ་བོ་དང་ནུས་པ་ལ་དང་བ་ཤུགས་དྲག་སྐྱེད་པའི་ཕྱིར། ༼རུ༽འདི་ལ་ཁ་ཅིག་སྟོང་ཉིད་རྟོགས་པ་ཙམ་གྱིས་ཆོག་པར་འདོད་པ་ནི། འདིས་སྟོང་ཉིད་རྟོགས་དགོས་ཞེས་པའི་རྒྱུ་མཚན་མ་གོ་བ་ཡིན་ཏེ། འདིར་དེ་དགོས་ཚུལ་གདུལ་བྱ་དེས་ཐོག་མར་ཐོས་པ་བྱས་ཚེ་

― GTD002_Page_0036 ―

^{[མ་དཔེ་གཟིགས་ན་འདིར་གནོན།]}

[Full Size]

བདེན་མེད་དང་མེད་པ་གཉིས་བློ་ངོར་མ་ཕྱེད་པའི་དབང་གིས་བདེན་པར་མེད་ཅེས་པ་དང༌། རང་སྲས་འཕགས་བཞིའི་དོན་སྒྲུབ་ཅེས་པ་གཉིས་འགལ་བ་ལྟར་སྣང་ནས་དཔྱད་པ་འཇུག་པ་ཡིན་ཏེ། གསེར་འཕྲེང་ལས། སྲས་བཞི་བསྐྲུན་པར་བསྟན་པ་ལ། རིགས་པ་ཡང་དག་གིས་གནོད་པ་ཡོད་མེད་བརྟགས་ནས། ཞེས་དང༌། ཡུམ་གྱིས་སྐྱེད་པར་བསྟན་པ་ཀུན་རྫོབ་དང་རིགས་པས་སྐྱེ་མེད་བསྒྲུབ་པ་དོན་དམ་དུ་ཡིན་པས་ཞེས་གསུངས་པའི་ཕྱིར། དེ་ལྟར་དཔྱོད་པའི་མཐར་དོན་དམ་པར་མེད་ཀྱང་སྒྱུ་མ་ཙམ་དུ་དོན་སྒྲུབ་པའི་བྱ་བྱེད་ཀྱི་རྣམ་གཞག་འགལ་མེད་གྲོགས་སུ་འཆར་བ་ཞིག་དགོས་སོ། །དེ་བཞིན་དུ་དབང་རྣོན་གྱིས་སེམས་བསྐྱེད་པ་སྟོང་ཉིད་རྟོགས་པ་ལ་རག་ལས་ཞེས་པའང་སེམས་ཅན་རྣམས་ཀྱི་སེམས་བདེན་སྟོང་རྟོགས་པ་ལ་གཙོ་བོར་བྱེད་པ་སོགས་སྐབས་དོན་མི་འདྲ་བས་མྱུ་གུའི་བདེན་སྟོང་རྟོགས་པ་ཙམ་གྱིས་ཐམས་ཅད་ལ་མི་ཡོང་ངོ༌། ། ༼༥༽བྱང་ཆུབ་སེམས་དཔའི་ཆོས་ཉིད་ངེས་པའམ་མ་ངེས་པ་དང༌། རང་བཞིན་གྱིས་དབང་པོ་རྣོ་བ་དང༌། ཞེས་གསུངས་པའི་ཕྱིར། ༼ལུ༽འདིའི་དོན་ནི། ཆོས་ཉིད་རྟོགས་མ་རྟོགས་ལ་བྱེད་པ་མི་འཐད་དེ། རིགས་ངེས་མ་ངེས་ལ་བྱེད་དགོས་པའི་ཕྱིར། ཀུན་བཏུས་དར་ཊཱིཀ་ལས། ཉན་ཐོས་ཀྱི་ཐེག་པ་ནི་ཁྱད་ཆོས་བདུན་གྱིས་ཤེས་པར་བྱ་སྟེ། ཐོག་མ་མེད་པ་ནས་ཆོས་ཉིད་ཀྱིས་ཐོབ་པའི་རིགས་ཞི་བ་བགྲོད་པ་གཅིག་པུ་བ་ལྟ་བུ་ཐེག་པ་གཞན་དུ་མི་འགྱུར་བར་རིགས་ངེས་པ་དང༌། ཐེག་པ་ཆེན་པོའི་ཡང་ལམ་དུ་འགྱུར་དུ་རུང་བ་རིགས་མ་ངེས་པ་རིགས་ཀྱི་ཁྱད་པར་དང༌།

― GTD002_Page_0037 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པའི་ཕྱིར། ༼༢༦ན༽ ༼༢༽འགྲེལ་པ་ལས། ཚུལ་གསུམ་པ་ཅན་ནི། ཞེས་གསུངས་པའི་ཕྱིར། ༼ཤུ༽འདིར་ཚུལ་ཞེས་པ། ཁ་ཅིག །ཡུམ་དངོས་མིན་པ་ལ་བྱེད་དེ། དཔེར་ན། སངས་རྒྱས་ཀྱིས་བྱང་ཆུབ་སེམས་དཔའི་རྣམ་པ་བཟུང་བ་ལ་ཚུལ་ཟེར་བ་ལྟ་བུའོ་ཞེས་ཟེར་བ། གསེར་འཕྲེང་དུ་བཀག་ནས། རང་ལུགས་ལམ་གྱི་དབྱེ་བ་མི་འདྲ་བ་གསུམ་གྱི་བདག་ཉིད་ཅན་དུ་གསུངས་སོ། །དབྱེ་གཞི་ལ་ཤེར་ཕྱིན་སྨོས་པས་ཀྱང་མི་གནོད་དེ། དེ་བཏགས་པ་བ་ཙམ་ཡིན་པའི་ཕྱིར། གོང་དུ་བཅོམ་ལྡན་འདས་མ་ཡོན་ཏན་རིན་པོ་ཆེ་ཞེས་སོགས་ཀྱིས་ཡུམ་གསུམ་གར། བཅོམ་ལྡན་འདས་མའི་སྒྲས་བཏགས་ནས་གསུངས་པ་ལྟ་བུའོ། ། ༼༥༽རྣམ་བཤད་ལས། མཆོད་བརྗོད་ཀྱི་ལུང་རྒྱུ་མཚན་དུ་བྱར་མི་རུང་ཞེས་སོ། ། ༼སུ༽སྡེ་བདུན་རྒྱན་གྱི་གསུང་ཟིན་ལྟར་ན། ལུང་ལ་གནས་གསུམ་སྟོན་པས་མ་ཁྱབ་པས་མཐོང་བ་མངོན་གྱུར་སྟོན་པའི་ཆ་ལ་མངོན་སུམ་ཚད་མས་ཞེས་སོགས་བྱས་ན་འབྲེལ་མེད་དུ་འགྱུར་བས། མཐོང་བ་མངོན་གྱུར་རྟོགས་པའི་ཚད་མས་གནོད་པ་མེད་པ་ཞེས་སོགས་བྱ་དགོས་ཤིང༌། ལུང་ལ་དཔྱད་པ་གསུམ་གྱིས་དག་པའི་ལུང་གིས་ཁྱབ་བོ། །འོན་ཀྱང༌། རྣམ་འགྲེལ་ལས། དོན་དེ་དག་ལ་མངོན་སུམ་དང༌། །རྗེས་དཔག་རྣམ་པ་གཉིས་ཀྱིས་ཀྱང༌། །གནོད་མེད་འདི་ནི་མི་བསླུ་བའོ། །ཞེས་པའི་ཐད་དུ་སྲས་ཀྱི་ཐུ་བོ་གཉིས་ཀས་མཐུན་པར། བ་སྤྱི་རྟག་དངོས་དང༌། བདག་གཙོ་བོ་དང༌། ཁྲུས་ཀྱིས་སྡིག་པ་འདག་པ་སྟེ། གཞན་

― GTD002_Page_0038 ―

^{[མ་དཔེ་གཟིགས་ན་འདིར་གནོན།]}

[Full Size]

གཞུང་གི་གནས་གསུམ་ལ་ཚད་མས་གནོད་པ་འཇུག་ཅིང༌། རང་གི་སྟོན་པའི་ལུང་ལས་གནས་གསུམ་བསྟན་པ་ལ་ཚད་མ་གསུམ་གྱིས་གནོད་པ་མེད་པ་ནི་དཔྱད་གསུམ་གྱིས་དག་ཚུལ་དུ་གསུངས་པས། འདི་ཡང་མི་འཐད་པ་མིན་ནོ། །དཔྱད་ཚུལ་འདི་ནི། དགེ་སློང་དག་གམ་མཁས་རྣམས་ཀྱིས། །ཞེས་སོགས་ཀྱིས་ཡང་གསལ་བར་བསྟན་ཏོ། །དཔྱད་པ་ཐ་མ་ལ་ཤིན་ལྐོག་བསྟན་པར་ཡིད་ཆེས་རྗེས་དཔག་གིས་གནོད་པ་མེད་ཅེས་པ་དང་རང་ཚིག་འགལ་བས་གནོད་པ་མེད་ཅེས་པ་གཉིས་འབྱུང་ཡང་གནད་གཅིག་གོ །རང་ཚིག་འགལ་བ་ལ་ཡང་ཚིག་སྔ་ཕྱི་གཉིས་མི་དགོས་ཏེ། བདེན་པའི་དོན་ཅན་གྱི་ཚད་མ་མེད་ཅེས་པ་ལྟ་བུའོ། །ཡུལ་དཔྱད་གསུམ་གྱིས་དག་ཚུལ་མི་འདྲ་སྟེ། དེ་དཔྱད་པ་དེ་ལས་འདས་པ་ལ་བྱེད་པས་གསུམ་ཆར་གྱིས་དག་པ་ཞིག་མི་སྲིད་དོ། །རང་ཚིག་འགལ་ཚུལ་ལ་ལུགས་གཉིས་ལས། དངོས་ཤུགས་འགལ་ཞེས་པའི་ཤུགས་ནི་ཤུགས་བསྟན་ལ་མི་བྱེད་ཅིང༌། འདི་དཔྱད་པ་གཉིས་ཀར་བསྡུས་ནས་དཔྱད་པ་གཉིས་ཀྱིས་དག་པའི་རྟགས་ཀྱིས་ལུང་ཚད་མར་སྒྲུབ་ཚུལ་གཅིག་ཀྱང་ཡོད་དེ། རྒྱས་པར་རྣམ་ངེས་དར་ཊཱིཀ་དང༌། རིགས་གཏེར་རྩ་འགྲེལ་བལྟའོ། ། ༼༧༽རྣམ་འགྲེལ་ལས། བླང་བྱ་འགོག་བདེན་དང་དོར་བྱའི་དེ་ཉིད་སྡུག་བདེན་ནི། །ཐབས་སམ་རྒྱུ་ལམ་ཀུན་འབྱུང་གཉིས་དང་བཅས་རབ་བྱུང་ངེས་པ་ཡིས། །སངས་རྒྱས་ཀྱི་གསུང་དེའི་བསྟན་བྱའི་གཙོ་བོའི་དོན་ངེས་ལེགས་ཀྱི་ལམ་ལ་མི་བསླུ་བའི་ཕྱིར། །དེ་རྟགས་སུ་མི་རུང་ཡང་དཔེར་བྱས་ནས་གཞན་མངོན་མཐོ་བསྟན་པ་ལའང་

― GTD002_Page_0039 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེས་སུ་དཔག་པ་ཡིན། །ཞེས་གསུངས་པའི་ཕྱིར། ༼ཧུ༽འདི་ནི་བཞི་བརྒྱ་པར། སངས་རྒྱས་ཀྱིས་གསུངས་ལྐོག་གྱུར་ལ། །གང་ཞིག་ཐེ་ཚོམ་སྐྱེ་འགྱུར་བ། །དེ་ཡིས་སྟོང་པ་ཉིད་བསྟན་ཏེ། །འདི་ཉིད་ཁོ་ནར་ཡིད་ཆེས་བྱ། །ཞེས་དང༌། ལེགས་བཤད་སྙིང་པོ་ལས། ཁྱོད་ཀྱི་སྨྲ་བ་ཟླ་མེད་པ། །མཐོང་བའི་རྒྱུ་མཚན་རྟེན་འབྱུང་གི །ལམ་འདི་ཉིད་ཀྱིས་གསུང་གཞན་ཡང༌། །ཚད་མར་གྱུར་པར་ངེས་པ་སྐྱེ། །ཞེས་དང༌། ཚད་མ་མདོར། ཡིད་ཆེས་ཚིག་ནི་མི་བསླུ་བའི། །སྤྱི་ལས་རྗེས་སུ་དཔག་པ་ཉིད། །ཅེས་པ་དང་གནད་གཅིག་གོ །འདི་རྣམ་འགྲེལ་དུ་ཡང་འབྱུང༌། ༼༢༦བ༽ ༼༢༽རྣམ་འགྲེལ་ལས། གནས་གསུམ་པར་ནི་འཕོས་པ་ན། །ལུང་འདྲེན་པ་ནི་མཁས་པའི་ལུགས། ། ༼ཨུ༽ཚིག་རྐང་ཕྱི་མ་འདི་ལ། བསྟན་བཅོས་ལེན་པ་རིག་ལྡན་ཡིན། །ཞེས་ཀྱང་འབྱུང་ངོ༌། ། ༼༤༽རྣམ་བཤད་ལས། སྐབས་འདིར་དེ་མི་འཐད་པའི་ཕྱིར་ཞེས་གསུངས་པའི་ཕྱིར། ༼ཀེ༽དེ་ཡང་མཁྱེན་གསུམ་གྱི་ཡོན་ཏན་ཤིན་ཏུ་ལྐོག་གྱུར་དུ་སོང་བའི་གང་ཟག་ཡོད་མོད་ཀྱང༌། མཆོད་བརྗོད་ཀྱི་ལུང་ཤེས་བྱེད་དུ་བྱས་ནས་ཡིད་ཆེས་ཀྱི་རྟགས་སྦྱོར་ཡང་དག་གིས་བསྒྲུབ་པའི་ཡུལ་གྱི་ཕྱི་རྒོལ་ཡང་དག་མེད་དེ། ཅུང་ཟད་ལྐོག་གྱུར་གྱི་ཆོས་སྟོང་ཉིད་ལ་སོགས་པ་འདི་རྣམས་ལ་ཇི་སྲིད་དངོས་སྟོབས་ཀྱི་དཔྱད་པ་མི་འཇུག་པ་དེ་སྲིད་དུ་སྒྲུབ་པ་སྐབས་སུ་མ་བབས་པ་ཡིན་ལ། དེ་འཇུག་པའི་ཚེ་ལུང་གིས་བསྒྲུབ་པ་དོན་མེད་པའི་ཕྱིར་རོ། ། ༼ཁེ༽རྣམ་འགྲེལ་ལས། དེས་ན་འཇིག་རྟེན་ན༌རབ་གྲགས་

― GTD002_Page_0040 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་དག་ལ། །བསྟན་བཅོས་དོར་ནའང་ཉེས་པ་མེད། ། ༼གེ༽གཞལ་བྱ་ཤིན་ཏུ་ལྐོག་གྱུར་རྣམས་ལ་ལུང་ཤེས་བྱེད་དུ་བྱས་ནས་སྒྲུབ་དགོས་ཏེ་ཤིན་ཏུ། ལྐོག་གྱུར་དག་ལ་བསྟན་བཅོས་ནི། །ཤེས་བྱེད་དུ་མི་འདོད་ན་དེ་ལ་དངོས་སྟོབས་ཀྱི་དཔྱོད་པ་ཉིད་མི་འཇུག །པས་རྟོགས་པའི་ཐབས་མེད་པར་འགྱུར་རོ། །ཅེས་གསུངས་པའི་ཕྱིར་རོ། ། ༼ངེ༽དེ་ཡང་ཀུན་བཏུས་ལས། ལས་དགེ་བ་དང་མི་དགེ་བ་དེ་ཉིད་གནས་དང༌། དངོས་པོ་དང༌། རྒྱུ་དང༌། རྣམ་པར་སྨིན་པ་དང༌། རབ་ཏུ་དབྱེ་བས་ནི་བསམ་གྱིས་མི་ཁྱབ་སྟེ། ཞེས་གསུངས་པའི་ཁྱད་པར་འདི་རྣམས་ཚང་ན་ཤིན་ལྐོག་ཡིན་གྱི་ཚུལ་ཁྲིམས་བསྲུང་བ་ལས་བདེ་འགྲོ་འབྱུང་བ་ཙམ་ཤིན་ལྐོག་མིན་ཏེ། ཀུན་བཏུས་དར་ཊཱིཀ་ལས། དགེ་བའི་ལས་ཀྱིས་ལྷ་མིའི་ནང་དུ་རྣམ་སྨིན་འདོད་པ་འབྱིན་པ་དང༌། མི་དགེ་བའི་ལས་ཀྱིས་ངན་སོང་གསུམ་དུ་རྣམ་སྨིན་མི་འདོད་པ་འབྱིན་པ་ནི་བསམ་གྱིས་ཁྱབ་པ་ཞེས་བྱ་སྟེ། སྒྲུབ་བྱེད་ལུང་ལ་ལྟོས་མི་དགོས་པར། དངོས་པོ་སྟོབས་ཤུགས་ཀྱི་རིགས་པས་རྟོགས་ནུས་པའི་ཞེས་གསུངས་པའི་ཕྱིར། འདིའི་བསམ་གྱིས་ཁྱབ་པའི་དོན་ཡང་དངོས་པོ་སྟོབས་ཤུགས་ཀྱིས་རྟོགས་ནུས་པ་ལ་བྱེད་ཅིང༌། གོང་གི་ཆོས་བཞི་ཚང་ན་བསམ་གྱིས་མི་ཁྱབ་པར་གསུངས་པ་ཡང་དངོས་སྟོབས་ཀྱིས་རྟོགས་མི་ནུས་པའི་དོན་ནོ། ། ༼༦༽རྣམ་བཤད་ལས། དབང་རྣོན་གྱི་སྐབས་འདིར་༼ཅེ༽གཞི་ལམ་རྣམ་གསུམ་སྐྱེ་མེད་དུ་ཚད་མས་ལེགས་པར་གྲུབ་ནས་དེའི་དོན་གོམས་པར་བྱས་པས་གོམས་བྱའི་དོན་མངོན་སུམ་དུ་རྟོགས་པའི་འཕགས་པའི་གོ་འཕང་ཡོད་པར་

― GTD002_Page_0041 ―

^{[མ་དཔེ་གཟིགས་ན་འདིར་གནོན།]}

[Full Size]

ཚད་མས་གྲུབ་པར་ཁས་བླངས་ན་༼༦༽ཉེས་པ་ཅི་ཡོད་ཅེས་གསུངས་པའི་ཕྱིར། ༼༧༽རྣམ་བཤད་ལས། དེ་ལྟ་ན་༼ཆེ༽དང་བ་སྐྱེ་བ་ལས་ཐོས་བསམ་སྒོམ་གསུམ་ལ་རིམ་གྱིས་འཇུག་པར་བཤད་པ་དང་༼༧༽འགལ་ལོ། །ཞེས་གསུངས་པའི་ཕྱིར།༼༢༧ན༽ ༼༢༽རྣམ་བཤད་ལས། འོ་ན་གཅིག་དུ་བྲལ། ནས། འགྱུར་རོ། །༼ཇེ༽རྩོད་ལན་གྱི་དོན་བསྡུས་ན། ཁོ་ན་རེ། ཁྱོད་ཀྱིས་དབང་རྣོན་རྒྱན་ལ་མ་ཞུགས་གོང་དུ་སྟོང་ཉིད་རྟོགས་པར་བཤད་པ་ལ་གོ་རིམ་འཆོལ་བའི་སྐྱོན་ཡོད་པར་ཐལ། འགྲེལ་ཆེན་གྱིས། དང་པོར་ཞུགས་ནས་གཟོད་ཐོས་བསམ་བྱེད་པར་གསུངས་པ་གང་ཞིག །ཁྱོད་ལྟར་ན་མ་ཞུགས་གོང་ནས་རྒྱན་གྱི་དོན་ལ་བསམ་བྱུང་རྙེད་ཚར་བའི་ཕྱིར་ཏེ། སྟོང་ཉིད་རྟོགས་ཟིན་པའི་ཕྱིར་ཞེ་ན་དེ་ཙམ་གྱིས་རྒྱན་ལ་བསམ་བྱུང་རྙེད་པའི་གོ་མི་ཆོད་པར་ཐལ། རྒྱན་ལ་བསམ་བྱུང་རྙེད་པ་ལ། མཁྱེན་གསུམ་གྱི་རྣམ་པ་བརྒྱ་དོན་གསུམ་རྣམ་རྫོགས་སྦྱོར་བའི་ཡུལ་དུ་བསྡུས་ནས་བསྒོམས་པས་གོམས་པ་དབང་དུ་གྱུར་པའི་རྩེ་སྦྱོར་ནས་བཟུང་ཆོས་སྐུའི་བར་གྱི་ལམ་གྱི་རིམ་པ་མ་ལུས་པ་མཐར་ཆགས་སུ་ཉམས་སུ་ལེན་ཤེས་དགོས་པས། སྟོང་ཉིད་ལས་ཀྱང་རྒྱ་ཆེ་བའི་ལམ་འདི་དཀའ་སྟེ། འཕགས་པ་ཐོགས་མེད་ཀྱིས་ཀྱང་ཤེར་མདོར་སྦས་དོན་གྱི་རིམ་པ་གསུངས་པ་ཟློས་པ་དང་མི་མཐུན་པ་ལྟ་བུར་གྱུར་པ་ལ་དགོངས་ནས། དེའི་ཆེད་དུ་བྱམས་མགོན་བསྒྲུབས་པར་འགྲེལ་ཆེན་ལས་གསུངས་པའི་ཕྱིར། ༼༦༽མདོ་སྡེ་སྤྱོད་པ་དང་རྣལ་འབྱོར་སྤྱོད་པའི་རང་རྒྱུད་པ་གཉིས་ཀའི་ལུགས་ལ།

― GTD002_Page_0042 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་གྲུབ་ན་རང་གི་མཚན་ཉིད་ཀྱིས་གྲུབ་པས་ཁྱབ་པར་འདོད་པའི་ཕྱིར། ༼ཉེ༽དེ་ལྟར་བདེན་གྲུབ་དང་རང་མཚན་གྱིས་གྲུབ་པ་ལ་ཁྱད་པར་ཡོད་པ་མ་གོ་བའི་དབང་གིས་སྔ་རབས་པ་ཕལ་མོ་ཆེས་དབུ་མ་པ་ལ་རང་མཚན་ཁས་ལེན་པ་མེད་པར་བཟུང་སྟེ། ཐལ་རང་གི་ཁྱད་པར་འབྱེད་ཚེ། སྣང་སྟོང་གཉིས་ཚོགས་དོན་དམ་བདེན་པར་འདོད་པ་སྒྱུ་མ་རིགས་སྒྲུབ་པ་དང༌། དགག་བྱ་བཅད་ཙམ་གྱིས་སྟོང་པ་དོན་དམ་བདེན་པར་འདོད་པ་རབ་ཏུ་མི་གནས་པ་ཞེས་བཤད་པ་ནི། རྨོངས་པ་ངོ་མཚར་སྐྱེད་པའི་གཏམ་མོ་ཞེས་རྔོག་ལོའི་སྤྲིང་ཡིག་བདུད་རྩིའི་ཐིགས་པར་གསུངས་པ་ལ། སྟག་ཚང་པས། གྲུབ་མཐའ་ཀུན་ཤེས་ཀྱི་འགྲེལ་པར་དཔའ་བོའི་དོན་དམ་བྱང་ཆུབ་ཀྱི་སེམས་སྒོམ་དང་ཇོ་བོའི་ཆོས་ཆུང་སོགས་དྲངས་ནས་སྐྱོན་བརྗོད་ཀྱང༌། ལྷག་མཐོང་གཉིས་ལས་རྔོག་ལོའི་གསུང་དེ་འཐད་ཕྱོགས་སུ་མཛད་དོ། །དེས་ན་རང་རྒྱུད་པས་རང་མཚན་བཞེད་པའི་ཁུངས་གསལ་ཤོས་འོག་ནས་འབྱུང་བ་ལྟར་ཤེས་རབ་སྒྲོན་མེར། སེམས་ཙམ་པས་ཀུན་བཏགས་རང་མཚན་གྱིས་མེད་པར་གསུངས་པ་བཀག་པ་འདི་ཡིན་ལ། གང་ཕྱིར་དངོས་པོ་འདི་དག་རྣམ་དཔྱད་ན། །ཞེས་པའི་མཚམས་སྦྱར་དུ། འཇུག་པ་རང་འགྲེལ་ལས། དོན་དམ་པར་སྐྱེ་བ་མེད་པས་བདག་དང༌། གཞན་ལས་སྐྱེ་བ་དགག་པ་ལ་རག་མོད། གཟུགས་དང་ཚོར་བ་ལ་སོགས་པ་གང་དག་མངོན་སུམ་དང་རྗེས་སུ་དཔག་པ་དག་གི་དམིགས་པ་དེ་དག་གི་རང་བཞིན་ནི་གདོན་མི་ཟ་བར་གཞན་ལས་སྐྱེ་བར་འགྱུར་རོ། །ཞེས་པས་ཕྱོགས་སྔའི་འདོད་པ་བརྗོད་ཅིང༌། དེ་ཡང་དོན་དམ་པར་གཞན་སྐྱེ་མེད་

― GTD002_Page_0043 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་ཐ་སྙད་དུ་གཞན་སྐྱེ་འདོད་པ་ཞིག་ཏུ་མངོན་ལ། གཞན་སྐྱེའི་དོན་ཡང་རང་མཚན་གྱིས་གྲུབ་པའི་རྒྱུ་ལས་འབྲས་བུ་འབྱུང་བ་ལ་འདོད་པས། དེ་ལྟར་སྨྲ་མཁན་རང་རྒྱུད་པ་མིན་ན་གཏན་མི་རྙེད་པའི་ཕྱིར། དེས་ན་འདིས་ཀྱང་ལེགས་པར་འགྲུབ་བོ། །ལྕང་སྐྱའི་གྲུབ་མཐར། སྒྱུ་མ་རིགས་གྲུབ་པ་དང༌། རབ་ཏུ་མི་གནས་པའི་དབུ་མའི་ཐ་སྙད་ཙམ་མ་བཀག་གསུངས་འདུག་གོ །༼༢༧བ༽ ༼༡༽ལེགས་བཤད་སྙིང་པོ་ལས། ཡོད་མེད་ནི་མཚན་ཉིད་ངོ་བོ་ཉིད་ཡོད་མེད་ཡིན་པས། ཞེས་གསུངས་པའི་ཕྱིར། ༼ཏེ༽ལུང་འདིས་རང་མཚན་གྱིས་གྲུབ་པར་མ་ཟད། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་བཞེད་པ་ཡང་གསལ་བར་བསྟན་ཏེ། དགོངས་འགྲེལ་གྱི་ངོ་བོ་ཉིད་མེད་པ་གསུམ་ལུགས་འདིར་སྟོང་ཉིད་ཡིན་པས། ལུགས་འདིར་མཚན་ཉིད་ངོ་བོ་ཉིད་དེར་ཡོད་པ་མི་རུང་ཞིང༌། དེར་མ་ཟད་འདི་སེམས་ཙམ་པས་ཀུན་བཏགས་མཚན་ཉིད་ངོ་བོ་ཉིད་མེད་པར་བཤད་པ་ལ། འདོགས་བྱེད་དང་གདགས་གཞི་གཉིས་སུ་ཕྱེ་ནས་འགོག་པའི་ཕྱི་མའི་སྐབས་ཡིན་ལ་དེ་སེམས་ཙམ་པས་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པ་ལ་བཤད་པའི་ཕྱིར། ཁ་ཅིག་དེ་མི་འཐད་དེ། ཤེས་རབ་སྒྲོན་མེ་ལས། ཐམས་ཅད་དུ་མིང་ནི་དོན་གྱིས་སྟོང་པ་ཡིན་ཏེ། དེ་ལྟ་བུ་ནི་དངོས་པོ་རང་གི་ངོ་བོ་བརྗོད་པར་བྱེད་པ་མིན་པས་བདག་ཅག་གཉིས་ཀ་ལ་འདྲ་བ་ཡིན་ནོ། །ཞེས་བུམ་སོགས་མིང་བརྡའི་གཞིར་རང་མཚན་གྱིས་གྲུབ་པ་འགོག་པ་དབུ་སེམས་གཉིས་ཀ་ལ་

― GTD002_Page_0044 ―

^{[མ་དཔེ་གཟིགས་ན་འདིར་གནོན།]}

[Full Size]

འདྲ་བས། དེ་ཙམ་འགོག་པ་དབུ་མ་པའི་རིགས་པར་ལྟོས་མི་དགོས་པར་བཤད་པའི་ཕྱིར་དང༌། ལེགས་བཤད་སྙིང་པོ་ལས། དེ་ཡང་ལྟོ་ལྡིར་བ་ལ་བུམ་པ་ཞེས་བཏགས་པའི་བརྡས་བཞག་པའི་ཡུལ་དོན་དམ་པར་གྲུབ་པ་འགོག་པ་ལ་དབུ་མ་པའི་རིགས་པར་ལྟོས་དགོས་སོ་ཞེས་སྨྲ་བ་མིན་ཏེ། ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེར་མིང་བརྡའི་གཞིར་དོན་དམ་དུ་གྲུབ་ན་དེར་གྲུབ་པ་དངོས་པོའི་སྡོད་ལུགས་སུ་འགྱུར་བས། གཞན་གྱི་སྦྱོར་བ་ལ་མི་ལྟོས་པར་ཐལ་བ་སོགས་ཀྱི་སྒོ་ནས་གཉིས་ཀས་འགོག་པར་གསུངས་ཀྱི། རང་མཚན་གྱིས་གྲུབ་པ་ལ་མ་གསུངས་པའི་ཕྱིར། དཀའ་འགྲེལ་ལས། ལེགས་ལྡན་གྱི་ལུགས་ལ་གཟུགས་སོ་ཞེས་ངོ་བོ་དང༌། གཟུགས་ཀྱི་སྐྱེ་བའོ་ཞེས་ཁྱད་པར་དུ་བཏགས་པའི་དོན་དེ་རང་མཚན་གྱིས་གྲུབ་ཀྱང༌། དོན་དམ་པར་མ་གྲུབ་པའི་ཕྱིར། ཞེས་སོགས་གསུངས་པའི་ཕྱིར། འདིས་ཁ་ཅིག་གྲུབ་མཐའི་ཚིག་རིས་ལ་འཁྲུལ་བ་ཡང་སེལ་སླའོ། །དེས་ན་ལེགས་ལྡན་གྱི་ལུགས་ལ། རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པ་དྲངས་མ་ཐག་པའི་ཤེས་རབ་སྒྲོན་མའི་ལུང་ཀུན་བཏགས་ནི་མེད་པ་མ་ཡིན་ཏེ། ཞེས་པ་འདིས་ཀྱང་འགྲུབ་སྟེ། དེའི་མཇུག་ཐོགས་སུ། དེ་ལ་རྣམ་པ་འདྲ་བའི་བློ་གྲོས་འཁྲུལ་བས་ཀུན་བཏགས་པའི་དོན་མེད་ཀྱང༌། སྦྲུལ་འཁྱིལ་བ་ལ་དེ་མེད་པ་མ་ཡིན་པའི་ཕྱིར། ཞེས་དང༌། དབུ་མ་སྙིང་པོ་ལས། ཀུན་བཏགས་ཡོད་པ་མ་ཡིན་ཏེ། །བཏགས་ཕྱིར་སྦྲུལ་དང་འདྲར་མི་འདོད། །ཐག་པའི་དངོས་པོར་མ་ངེས་ཕྱིར། །ཡང་ན་གྲགས་པས་གནོད་པར་འགྱུར། །ཞེས་

― GTD002_Page_0045 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཙམ་པས་ཐག་ཁྲ་སྦྲུལ་འཛིན་དཔེར་བཀོད་པ་ལ། ཐག་ཁྲ་དེའི་གཞིར་རང་མཚན་གྱིས་མེད་ཀྱང༌། སྦྲུལ་ཁོ་རང་སྦྲུལ་འཛིན་གྱི་གཞིར་རང་མཚན་གྱིས་ཡོད་པས་དཔེ་མ་ངེས་ལ། དེ་ཡང་མེད་པར་འདོད་ན་གྲགས་པས་གནོད་པར་གསུངས་པའི་ཕྱིར་རོ། །༼༢༨ན༽ ༼༢༽ལེགས་བཤད་སྙིང་པོ་ལས། དེ་སྤྲུལ་གཞིའི་ངོས་ནས་རྟ་གླང་དུ་སྣང་བ་ཡོད་མོད་ཀྱང༌། མིག་བསླད་པའི་ཤེས་པའི་དབང་གིས་དེ་ལྟར་སྣང་བ་ཡིན་གྱི། རང་གི་གཉུག་མའི་རྒྱུ་རྐྱེན་ལས་དེར་སྣང་དུ་བསྐྱེད་པ་མ་ཡིན་ཏེ་ཞེས་གསུངས་པའི་ཕྱིར། ༼ཐེ༽ཁ་ཅིག །སྒྱུ་མའི་རྟ་ལ་རྟ་ཡིན་པ་ཡོད་དེ། རྟ་ངན་པ་བཟང་པོར་སྤྲུལ་པ་དེ་རྟ་ཡིན་པའི་ཕྱིར་ཟེར་བ་ནི། དེའི་ཚེ་སྤྲུལ་གཞི་ལ་ཡང་ལྟོས་མོད་ཀྱང༌། གཙོ་བོར་འཁྲུལ་རྒྱུས་བསླད་པའི་བློ་དེའི་རང་མདངས་ཤིག །དཔེར་ན་ཆུ་ཟླའི་མདངས་རྩིག་ངོས་ལ་ཕོག་པ་ལྟར་ཚུར་ཤར་བ་ཡིན་པ་དང༌། ཕྱི་དོན་འདོད་པ་ལྟར་ནའང༌། སྤྲུལ་གཞི་དང༌། ས་ཕྱོགས་དང༌། བར་སྣང་རྣམས་ཚོགས་པའི་སྟེང་གི་ཀུན་བཏགས་པའི་གཟུགས་ཤིག་ཡིན་པ་མ་གོ་བར་སྔར་གྱི་སྤྲུལ་གཞི་དེ་ཀ་ཡིན་སྙམ་པར་སྣང་བས་རྡེའུ་ཤིང་རྟ་གླང་དུ་སྤྲུལ་པའི་ཚེ། རྡེའུ་ཤིང་དུ་སྨྲ་དགོས་སོ། །དེས་ན་སྒྱུ་མའི་རྟ་ལ་རྟ་ཡིན་པ་མེད་དེ། དེ་ལ་སེམས་མེད་པའི་ཕྱིར། སྤྱོད་འཇུག་ལས། སྔགས་སོགས་རྣམས་ལ་ནུས་མེད་ཕྱིར། །སྒྱུ་མའི་སེམས་ནི་འབྱུང་བ་མེད། །ཅེས་གསུངས་པའི་ཕྱིར། ༼༤༽ཡང་ཁ་ཅིག་ན་རེ། བདེན་གཉིས་ལས། ༼དེ༽དགག་བྱ་ལ་དོན་དམ་གྱི་ཁྱད་པར་སྦྱར་བའི་དོན་དམ་ལ་བློ་གནོད་མེད་ལ་སྣང་བའི་དབང་

― GTD002_Page_0046 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་བཞག་ཙམ་མིན་པར་གྲུབ་པ་དང༌། རིགས་ངོའི་བདེན་གྲུབ་གཉིས་བཤད་པས། ཕྱི་མ་དབུ་མ་རྒྱན་སོགས་སུ་གསལ་ཡང༌། ལྟ་བ་རྟོགས་པ་ལ་སྔ་མ་གལ་ཆེ་ཞིང་དེ་གཞན་དུ་མི་གསལ་བའི་རྒྱུ་མཚན་གྱིས། རྗེ་བླ་མས་དབུ་མ་སྣང་བ་མ་གཏོགས་རང་རྒྱུད་པའི་གཞུང་གཞན་དུ་དགག་བྱ་ངོས་འཛིན་གསལ་བོ་མི་སྣང་གསུངས་པ་ལ། དེ་མི་འཐད་པར་ཐལ། ༼༤༽བློ་ལ་སྣང་བ་འདི་ཁོ་ན། །ཀུན་རྫོབ་གཞན་ནི་གཅིག་ཤོས་སོ། །ཞེས་པའི་ཀུན་རྫོབ་ཡན་ཆད་ཀྱིས་ཀུན་རྫོབ་ཏུ་གྲུབ་པའི་ཚད་དང༌། ལྷག་མས་དོན་དམ་དུ་གྲུབ་པའི་ཚད་བསྟན་པའི་ཕྱིར་ཟེར་ན། ༼ནེ༽སེམས་ཅན་ཐམས་ཅད་གྲོལ་ཟིན་པར་ཐལ། འདི་དག་ལ་བདེན་སྣང་ཐོག་མེད་ནས་མེད་པའི་ཕྱིར། དེར་ཐལ། བློ་ལ་སྣང་བ་འདི་ཁོ་ན། །ཀུན་རྫོབ་ཅེས་པས་ཀུན་རྫོབ་ཏུ་གྲུབ་ཚད་བསྟན་པའི་ཟླས་དྲངས་ན། བ་ལང་རྫི་སོགས་འཇིག་རྟེན་རང་དགའ་བ་ལ་མི་སྣང་བ་གཅིག་ཤོས་སུ་བཤད་ཅིང༌། གཅིག་ཤོས་ཞེས་པ་བདེན་གྲུབ་ལ་སྙེགས་རིགས་པའི་ཕྱིར། རྟགས་སོང༌། ༼༢༨བ༽ ༼༢༽ཁོ་བོ་ཅག་ནི་ཇི་ལྟར་སྣང་བ་སོར་བཞག་ཏུ་ཁས་ལེན་པ་མ་གཏོགས་འདི་དཔྱོད་པར་མི་བྱེད་ཀྱི་གལ་ཏེ་ཁྱེད་ཅག་དཔྱོད་པར་བྱེད་པ་ལ་ནི་ཁོ་བོས་འགོག་པར་བྱེད་དོ། །ཞེས་གསུངས་པའི་ཕྱིར། ༼པེ༽འགོག་ཚུལ་ཡང༌། འདིའི་གོང་འོག་གི་རྩ་བ་དང༌། རང་འགྲེལ་ལས། དེ་ལྟར་དཔྱད་པ་བྱས་ན་ཀུན་རྫོབ་ཀྱི་རྣམ་གཞག་འཇིག་ཅིང༌། གཟུང་འཛིན་སྣང་བ་ལྟར་མ་གྲུབ་པར་འགྲོ་བས་མི་འཐད་གསུངས་ལ། ཞི་འཚོས་མཛད་པར་གྲགས་པའི་དཀའ་འགྲེལ་ལས་ཀྱང༌། ཇི་ལྟར་སྣང་བ་བཞིན་དུ་ཀུན་རྫོབ་ཏུ་ཡོད་པ་གང་

― GTD002_Page_0047 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པ་དེ་ནི་ངེས་པར་རྒྱུ་ལ་ལྟོས་པ་ཡིན་ནོ། །ཞེས་པ་ནས། དེ་གཉིས་ཀྱང་མངོན་སུམ་ཁོ་ནར་ཤིང་རྟ་ཚོགས་པ་ལ་སོགས་པ་སྐྱེ་བོ་མཐའ་དག་ལ་གྲགས་པའི་ཚད་མའམ་གྲགས་པ་དག་ཡིན་པས། དེ་སྤངས་པ་ན་མངོན་སུམ་དང་འགལ་བ་བཟློག་པར་དཀའ་བ་སྟེ། ཞེས་གསུངས་སོ། །དེས་ན་ལེགས་བཤད་སྙིང་པོ་ལས། འགྲེལ་བཤད་རྩོམ་པ་པོ་ཞི་བ་འཚོ་ཡིན་ཞེས་པ་ཡང་མིང་མཐུན་པའམ། ཁ་གཡར་བ་ཡིན་གྱི་དབུ་མ་རྒྱན་ལ་སོགས་པ་རྩོམ་མཁན་ནི་མིན་ཏེ། འདིས་བསྟན་བཅོས་རྩོམ་པའི་དགོས་པ་བཤད་པ། ཚད་མའི་དེ་ཁོ་ན་ཉིད་བསྡུས་པའི་འགྲེལ་པར་བཀག་པའི་ཕྱིར་དང༌། གཟུང་འཛིན་ཇི་ལྟར་སྣང་བ་ལྟར་མེད་པར་སྨྲ་བ་མངོན་སུམ་དང་འགལ་ཞིང༌། གྲགས་པས་ཀྱང་གནོད་པར་བདེན་གཉིས་རང་འགྲེལ་ལས་བཤད་པ། སྒྲ་སོར་བཞག་གི་དོན་འཐད་ཕྱོགས་སུ་འགྲེལ་པའི་ཕྱིར་རོ། །ཞེས་གསུངས་པ་འདི་ཁས་ལེན་ན། ཞི་འཚོས་གཟུང་འཛིན་སྣང་བ་ལྟར་མ་གྲུབ་པར་འདོད་ཅེས་མ་སྨྲ་ཞིག །དབུ་མའི་མཐའ་དཔྱོད་ཀྱི་དགག་བྱ་ངོས་འཛིན་དང༌། དེར་དྲངས་པའི་དབུ་མ་རྒྱན་རང་འགྲེལ་གྱི་དོན་ཚུར་མཐོང་གི་ཤེས་པའི་སྣང་ཆ་ལ་མ་འཁྲུལ་བའི་ཆ་གཅིག་ཐལ་འགྱུར་བས་མི་འདོད་ཀྱང༌། འདི་པས་འདོད་པའི་དོན་ནོ། །རང་མཚན་ལ་མ་འཁྲུལ་བས་མ་འཁྲུལ་པར་འདོད་དགོས་ན་རྗེས་དཔག་ལ་མི་འགྲིགས་ཤིང༌། རང་རྒྱུད་པ་མན་ཆད་ཐམས་ཅད་ལ་ཧ་ཅང་ཐལ་བར་འགྱུར་ཏེ། ལྷག་མཐོང་ཆེན་མོ་ལས། འདི་ལ་དངོས་པོར་སྨྲ་བས་ནི། གཟུགས་སྒྲ་སོགས་རང་གི་མཚན་ཉིད་ཀྱིས་གྲུབ་

― GTD002_Page_0048 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་རང་བཞིན་མེད་ན། དེ་དག་དོན་བྱེད་པའི་ནུས་པ་ཐམས་ཅད་ཀྱིས་སྟོང་པས་དངོས་མེད་དུ་འདོད་པས་ཡུལ་ལྔའི་རང་མཚན་ལ་ཚད་མར་མ་སོང་ན། ཡུལ་ལྔ་ལ་ཚད་མར་འགྲོ་བ་མེད་ལ། ཡུལ་ལྔ་ལ་ཚད་མར་སོང་ན་ཡང་དེའི་རང་མཚན་ལ་ཚད་མར་འགྲོ་བར་འདོད་དོ། །ཞེས་གསུངས་པའི་ཕྱིར། སྟོང་ཐུན་ལས་ཀྱང་དེ་ལྟར་གསུངས་སོ། །ཐལ་འགྱུར་བའི་ལུགས་ལ་འདི་བའི་ཆོས་བདག་རགས་པ་དང་འཛིན་པ་ཀུན་བཏགས་སུ་འགྲོ་བའི་གནད་ཀྱང་འདི་ཡིན་ཏེ་འོག་ཏུ་འཆད་དོ། །༼༢༩ན༽ ༼༦༽སྤྱོད་འཇུག་ལས། ལོག་པར་བརྟགས་པའི་དངོས་པོ་དགག་བྱའི་སྤྱི་ལ་མ་རེག་པར། །དེ་ཡི་དངོས་མེད་འཛིན་མ་ཡིན། །ཞེས་གསུངས་པའི་ཕྱིར། ༼༦༽ལེགས་བཤད་སྙིང་པོ་ལས། དགག་བྱ་ངོས་བཟུང་བ་ནི་ཤིན་ཏུ་གལ་ཆེ། ཞེས་གསུངས་པའི་ཕྱིར། ༼ཕེ༽འདི་བའི་བློ་གནོད་མེད་ཅེས་པའི་བློ་ལ་རྟོག་མེད་གཙོ་ཞིང༌། གནོད་མེད་ཀྱི་དོན་ཡང་རང་མཚན་སྣང་བ་ལ་གནོད་པ་མེད་ཅིང་ཡུལ་གྱི་རང་མཚན་ལ་ཚད་མར་སོང་བ་དགོས་པས་ཆོས་ཅན་འཛིན་པའི་ཚེ་ཡང་རྒོལ་ཕྱི་རྒོལ་གཉིས་ཀ་ལ་ཐུན་མོང་དུ་ཆོས་ཅན་དེའི་རང་མཚན་ལ་ཚད་མར་སོང་བ་དགོས་ཤིང༌། དེ་ནི་ཚད་གྲུབ་མཐུན་སྣང་ངམ། ཆོས་ཅན་མཐུན་སྣང་བའི་དོན་དུ་འདོད་དོ། །དེའི་རྒྱུ་མཚན་གྱིས་ཟླ་བས་དཔེ་ལ་འདྲ་བ་མེད་པར་གསུངས་ཏེ། འབྱུང་འགྱུར་དང་ནམ་མཁའི་ཡོན་ཏན་ལྟ་བུའི་ཁྱད་པར་དོར་ནས་འཛིན་ལུགས་ཡོད་ཀྱང༌། རང་མཚན་གྱི་ཁྱད་པར་དོར་ནས་འཆར་ཚུལ་མེད་པར་ཁྱོད་ཀྱང་འདོད་པའི་ཕྱིར། གསུངས་པ་ཡིན་ནོ། །དེང་དུས་ཕལ་ཆེར་དོན་དམ་དང་ཀུན་རྫོབ་དཔྱོད་པའི་སྐབས་ཀྱི་ཁྱད་འབྱེད་པ་སྐད་བྱེད་པ་ནི་

― GTD002_Page_0049 ―

^{[མ་དཔེ་གཟིགས་ན་འདིར་གནོན།]}

[Full Size]

ཟླ་བས་བདག་སྐྱེ་འགོག་པ་དོན་དམ་གྱི་ཁྱད་པར་མི་བཞེད་པའི་སྐབས་ལས་ཉམས་སོ། །ཐལ་འགྱུར་བ་ལྟར་ན་འདི་བའི་བློ་གནོད་མེད་དེ་མེད་ཅིང་བློ་དེ་འདྲ་ཞིག་གིས་བཞག་ཙམ་མ་ཡིན་པར་གྲུབ་བོ་སྙམ་པ་གྲུབ་མཐས་མ་བསྒྱུར་བ་ལ་མི་འོང་བས་འདི་པའི་བདེན་འཛིན་ལྷན་སྐྱེས་ཀྱང་རགས་པ་དང་ཀུན་བཏགས་ཁོ་ནར་འདོད་དེ། ལེགས་བཤད་སྙིང་པོ་ལས། རིགས་པ་དེ་དག་གི་གནད་ཀྱིས་རང་རྒྱུད་པས་བཤད་པའི་ཆོས་ཀྱི་བདག་འཛིན་ལྷན་སྐྱེས་སུ་འདོད་པའང་ཀུན་བཏགས་སུ་བྱས་སོ། །ཞེས་སོགས་མཐའ་ཡས་སོ། ། ༼༢༩བ༽ ༼༤༽དེ་མིན་ན་ཐམས་ཅད་ལ་གཟུགས་སྣང་འཆར་དགོས་པའི་ཕྱིར། ༼བེ༽དེ་གདགས་གཞིའི་ངོས་ནས་མི་སྣང་ན། གདགས་གཞི་ལ་ལྟོས་པ་མེད་པར་འགྱུར་ལ། དེ་ལྟར་ན་གཞི་དེར་བུམ་པ་མེད་བཞིན་དུ་བུམ་པའོ་ཞེས་རྟོག་པས་སྒྲོ་བཏགས་ནས་རློམ་པ་ཙམ་གྱིས་ཀྱང་བུམ་པ་དངོས་སུ་སྣང་ནས་དོན་བྱེད་པར་འགྱུར་བས་གཞི་ལ་ལྟོས་པ་མེད་པར་ཡིད་བྱེད་ཀྱིས་བཏགས་པ་ཙམ་གྱིས་དབང་པོའི་ཡུལ་དུ་འགྱུར་བར་ཐལ་བ་སྟེ། འདི་ཡང་མགོ་མཚུངས་ཀྱི་རིགས་པའོ། ། ༼༥༽རྩ་ཤེས་ལས། འདུས་བྱས་ཐམས་ཅད་བསླུ་བའི་ཆོས། ། ༼མེ༽དེས་ན་དེ་དག་རྫུན་པ་ཡིན། །ཞེས་པ་འདི་འདུས་བྱས་ལ་སྦྱར་ན་རྫུན་པར་གྲུབ་ཚད་དུ་འགྲོ་བ་ལ་དགོངས་ནས་སྐབས་འདིར་དྲངས་པ་ཡིན་གྱི་རྫུན་པར་གྲུབ་ཚད་ཐམས་ཅད་འདིའི་རྫུན་པར་གྲུབ་མི་དགོས་ཏེ། འདིའི་རྩ་བའི་མདོ་ལས། དགེ་སློང་དག་འདུ་བྱས་བསླུ་བའི་ཆོས་ཅན་གང་ཡིན་པ་དེ་དག་ནི་རྫུན་པ་ཡིན་ལ།

― GTD002_Page_0050 ―

^{[མ་དཔེ་གཟིགས་ན་འདིར་གནོན།]}

[Full Size]

མི་བསླུ་བའི་ཆོས་མྱ་ངན་ལས་འདས་པ་ནི་བདེན་པ་དམ་པའོ། །ཞེས་མྱང་འདས་དེའི་ལྡོག་ཟླའི་དོན་དམ་དུ་གྲུབ་པར་གསུངས་པའི་ཕྱིར་རོ། ། ༼༦༽ལང་གཤེགས་ལས། དངོས་རྣམས་སྐྱེ་བ་ཀུན་རྫོབ་ཏུ། །དམ་པའི་དོན་དུ་རང་བཞིན་མེད། ། ༼ཙེ༽རང་བཞིན་མེད་ལ་འཁྲུལ་བ་གང༌། །དེ་ནི་ཡང་དག་ཀུན་རྫོབ་འདོད། ། ༼༦༽ཅེས་གསུངས་པའི་ཕྱིར། ཁྱབ་སྟེ། ཀུན་རྫོབ་ཏུ་ཡོད་པའི་ཟློག་ཟླའི་ཡོད་པ་བདེན་གྲུབ་ཀྱི་ཚད་ཡིན་པའི་ཕྱིར། དབུ་མ་སྣང་བ་ལས། ༼ཙེ༽གང་ཡང་ཀུན་རྫོབ་ཞེས་བྱ་བ་འདི་ཅི་ཡིན། ཞེས་སོགས་ཀྱིས་དྲི་བ་བཀོད་ནས། ལན་དུ་དེ་ཡང་ཐོག་མ་མེད་པའི་འཁྲུལ་བའི་བག་ཆགས་ཡོངས་སུ་སྨིན་པའི་དབང་གིས་བྱུང་ལ། ༼༦༽དེས་ཀྱང་སྲོག་ཆགས་ཐམས་ཅད་ཡང་དག་པར་དངོས་པོའི་བདག་ཉིད་ལྟ་བུར་ཉེ་བར་སྟོན་པ་མཐོང་བར་འགྱུར་ཏེ། དེའི་ཕྱིར། དེ་དག་གི་བསམ་པའི་དབང་གིས་དངོས་པོ་རྫུན་པའི་ངོ་བོ་ཐམས་ཅད་ནི་ཀུན་རྫོབ་ཏུ་ཡོད་པ་ཁོ་ནའོ། །ཞེས་གསུངས་པའི་ཕྱིར། ༼ཚེ༽འདིས་དྲངས་མ་ཐག་པའི་ལང་གཤེགས་ཀྱི་ལུང་དོན་བཀྲལ་ཏེ། ཆོས་འདི་དག་དོན་དམ་པར་མེད་ཀྱང་ཐོག་མེད་ནས་གོམས་པའི་མ་རིག་པའི་བག་ཆགས་ཀྱི་དབང་གིས་བདེན་པར་གྲུབ་པ་ལྟར་སྣང་བ་མ་གཏོགས་བརྟགས་ཤིང་དཔྱད་ན་གནོད་མེད་ཀྱི་བློ་ལ་སྣང་བའི་དབང་གིས་བཞག་པ་ཙམ་ལས་མ་འདས་པ་ཀུན་རྫོབ་ཏུ་གྲུབ་ཚད་ཡིན་གསུངས་པས། ལྡོག་ཆ་ནས་དོན་དམ་དུ་གྲུབ་ཚུལ་ཀྱང་གསལ་བར་གསུངས་ཏེ་རང་རྒྱུད་པའི་དགག་བྱ་ངོས་འཛིན་གསལ་ཤོས་འདི་ཁོ་ན་ཡིན་ནོ། །༼༣༠ན༽ ༼༣༽མཐའ་གཉིས་སེལ་བ་རིགས་པའི་རྒྱལ་པོ་

― GTD002_Page_0051 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་འབྲེལ་གྱི་གཏན་ཚིགས་གཉིས་དང་དགུ་སོགས་ཡོད་པ་དེའི་ཕྱིར། ༼ཛེ༽མཐའ་གཉིས་ཅིག་ཅར་སེལ་ཚུལ་ནི། རྟེན་འབྲེལ་ཞེས་པའི་ཚིག་འདི་ལ། ལྟོས་མེད་དུ་གྲུབ་པའི་རྟག་མཐའ་དང༌། ལྟོས་གྲུབ་ཙམ་དུ་ཡང་མེད་པའི་ཆད་མཐའ་གཉིས་ཀ་ཅིག་ཅར་སེལ་བའི་ནུས་པ་ཡོད་པ་ལ་བྱ་སྟེ། འཇུག་འགྲེལ་ལས། འདི་ལྟར་རྐྱེན་ཉིད་འདི་བ་ཙམ་གྱིས། རྟེན་ཅིང་འབྲེལ་བར་འབྱུང་བ་བཤད་པ་ན། རྒྱུ་མེད་པར་སྐྱེ་བ་ལ་སོགས་པའི་རྟོག་པ་འདི་དག་མི་སྲིད་པ་འབའ་ཞིག་ཏུ་མ་ཟད་ཀྱི་རྟག་པ་དང༌། ཆད་པ་དང༌། རྟག་པ་དང༌། མི་རྟག་པ་ལ་སོགས་པའི་རྟོག་པ་གཞན་དག་ཀྱང་མི་སྲིད་པ་ཉིད་དོ། །ཞེས་དང༌། དགོངས་པ་རབ་གསལ་ལས། རྐྱེན་ཉིད་འདི་བ་ཙམ་གྱིས་རྟེན་འབྲེལ་བཤད་པ་ན། ཞེས་སོགས་གསུངས་པའི་ཕྱིར། ཁྱབ་སྟེ་བཤད་པ་ན་ཞེས་པའི་དོན་ཡོད་པའི་ཕྱིར། དེ་ལྟར་ན་བྱས་པའི་དོན་བློ་ཡུལ་དུ་ལེགས་པར་ཤར་ཡང་མཐའ་གཉིས་མི་ཁེགས་ལ། རྟེན་འབྱུང་གི་དོན་རྟོགས་ཙམ་ནས་མཐའ་གཉིས་གང་དུ་ཡང་མི་ལྟུང་སྟེ། མ་དྲོས་པས་ཞུས་པ་ལས། མཁས་པས་རྟེན་འབྱུང་ཆོས་རྣམས་རྟོགས་གྱུར་ཏེ། །མཐར་ལྟ་བ་ལ་རྟེན་པར་ཡོངས་མི་བྱེད། །ཅེས་གསུངས་པའི་ཕྱིར། དེས་ན་འདི་མཐའ་གཉིས་ཅིག་ཅར་སེལ་བའི་ཆ་ནས་རིགས་པ་ཐམས་ཅད་ཀྱི་ཕུལ་དུ་གྱུར་པ་རྒྱལ་པོ་ལྟ་བུར་བཤད་དེ། ལམ་རིམ་ཆེན་མོ་ལས། མཐར་འཛིན་གྱི་ལྟ་བའི་འཆིང་བ་གཅོད་པས་ན། རྟེན་འབྲེལ་གྱི་རྟགས་ཀྱིས་རང་བཞིན་མེད་པར་འགྲུབ་པ་འདི་ནི་རྨད་དུ་བྱུང་བའི་

― GTD002_Page_0052 ―

^{[མ་དཔེ་གཟིགས་ན་འདིར་གནོན།]}

[Full Size]

ཐབས་ལ་མཁས་པ་ཆེན་པོའོ། །ཞེས་གསུངས་པའི་ཕྱིར། རྟེན་འབྱུང་དང༌། ལྟོས་གྲུབ་དང༌། རྟེན་འབྲེལ་གསུམ་ལའང་ཚིག་ནུས་པ་ཆེ་ཆུང་གིས་ལོག་རྟོག་སེལ་ཚུལ་ལམ་རིམ་ཆུང་ངུའི་དགོངས་པ་ལྕང་སྐྱའི་གྲུབ་མཐར་ལེགས་པར་བཤད་འདུག་པས་དེར་ལྟོས། མཐའ་གཉིས་སེལ་ཞེས་པའི་གོ་བ་སྟེར་ཕུལ་འདི་ཆེ་ལ། རྟགས་ཀྱི་བྱེད་པས་ཆད་མཐའ་དང༌། ཆོས་ཀྱི་བྱེད་པས་རྟག་མཐའ་སེལ་བ་ལ་བཤད་པ་འདི་ཡང་མན་ངག་ཏུ་གྲགས་པ་ཐར་ཐོར་ནས་བཤད་པ་ཙམ་མ་ཡིན་གྱི། གཞུང་ཆེན་མོའི་དགོངས་པའང་ཡིན་ཏེ། ལམ་རིམ་ཆུང་ངུ་ལས། གཏན་ཚིགས་ངེས་པས་ནི་ཆད་ལྟ་དང༌། དམ་བཅའི་དོན་ངེས་པས་ནི་རྟག་ལྟ་རྩ་བ་ནས་སུན་འབྱིན་པས། ཞེས་གསུངས་པའི་ཕྱིར་དང༌། རྒྱལ་བ་དགེ་འདུན་རྒྱ་མཚོའི་སྟོང་ཉིད་བདུན་ཅུ་བའི་ཊཱིཀྐར་ཡང༌། སྒྲུབ་ཆོས་བློ་ཡུལ་དུ་སོང་བས་རང་བཞིན་གྱིས་ཡོད་པར་འཛིན་པའི་རྟག་མཐའ་སེལ་ལ། རྟེན་འབྲེལ་ཡིན་པའི་ཕྱིར་ཞེས་པའི་གཏན་ཚིགས་བློ་ཡུལ་དུ་སོང་བས་མྱུ་གུ་མིང་ཙམ་གྱིས་རྟེན་འབྲེལ་དུ་ཡོད་པར་རྟོགས་པས། དེ་གཏན་མེད་པར་འཛིན་པའི་ཆད་མཐའ་སེལ་བས་རྟག་ཆད་ཀྱི་མཐའ་གཉིས་ཀ་དུས་གཅིག་ཏུ་སེལ་བ་ཞེས་གསུངས་པའི་ཕྱིར། དེ་སོགས་སྤྲོ་བྱ་མང་སྟེ་ཤོག་བྱང་གཅིག་གི་འདབས་ལ་འཕགས་བོད་ཀྱི་གཞུང་ལུགས་རབ་འབྱམས་མི་ཤོང་བར་འདུག་པས་མ་བྲིས། ༼༦༽རྟགས་སོ་སོའི་སྒྲུབ་ཚུལ་༼ཝེ༽བདག་ཕུང་བདེན་པར་གཅིག་པ་ལ་སྐྱོན་བདུན་དང༌། ཐ་དད་པ་ལ་སྐྱོན་གཉིས་སོགས་དང༌། རྟེན་བརྟེན་པ་ལ་ཐ་དད་བཀག་པའི་

― GTD002_Page_0053 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་ཀྱི་སྐྱོན་སྦྱོར་ཚུལ། ལྡན་ཚུལ་ལ་གནག་ལྡན་དང་གཟུགས་ལྡན་ལྟ་བུའི་གཞན་དང་གཞན་མིན་གྱི་ལྡན་ཚུལ་གཉིས་རིམ་བཞིན་ཐ་དད་དང་གཅིག་བཀག་པའི་རིགས་འགྲོས་ཀྱིས་འགོག་ལུགས་སོགས་༼༦༽རྩ་ཤེས་དང་ཊཱིཀ་ཆེན་གཉིས་ཀྱི་རབ་བྱེད་ཉེར་བདུན་པར་གཙོ་བོར་ལྟོས། ༼༣༠བ༽ ༼༤༽བཞི་པ། རྡོ་རྗེ་གཟེགས་མ་ནི། དངོས་པོ་རྣམས་ཆོས་ཅན། དོན་དམ་པར་སྐྱེ་བ་མེད་དེ། རང་ལས་ཀྱང་མི་སྐྱེ། ༼ཞེ༽ཞེས་དོན་དམ་གྱི་ཁྱད་པར་མ་སྦྱར་ཀྱང་ལེགས་ལྡན་གྱིས་སངས་རྒྱས་བསྐྱངས་ལ་བདག་སྐྱེ་འགོག་ཚེ་དོན་དམ་མ་སྦྱར་བའི་སྐྱོན་བརྗོད་པ་དང་འགལ་བར་མི་བསམ་སྟེ། རང་རྒྱུད་པའི་ལུགས་ལ་ཡང་སྤྱིར་དོན་དམ་སྦྱོར་མི་དགོས་ཀྱང༌། དེ་མཆོད་བརྗོད་ལས་འཕྲོས་ཏེ་མཉམ་གཞག་གི་ངོར་སྦྱར་བའི་དབང་གིས་ཡིན་པའི་ཕྱིར། ༼༦༽དབུ་མ་སྙིང་པོ་ལས། ཡོད་པ་རྣམ་པར་མི་སྐྱེ་སྟེ། །མེད་པ་ནམ་མཁའི་པདྨོ་བཞིན། །ཞེས་གསུངས་པའི་ཕྱིར། ༼ཟེ༽ཡོད་མེད་སྐྱེ་འགོག་གི་གཏན་ཚིགས་འདི་ལ། སྟོང་ཐུན་ལས། ཡོད་པ་སྐྱེད་དམ། མེད་པ་སྐྱེད་ཟེར་བ་དང༌། རྒྱུ་དུས་ན་ཡོད་པ་སྐྱེའམ། མེད་པ་སྐྱེ་ཟེར་བ་བཀག་ནས། རང་ལུགས་ཡོད་པའི་མྱུ་གུ་སྐྱེའམ། མེད་པའི་མྱུ་གུ་སྐྱེ་ཞེས་དཔྱོད་པར་གསུངས་པ་ནི། རྩ་ཤེས་ལས། གལ་ཏེ་ལས་ལ་རང་བཞིན་ཡོད། །རྟག་པར་འགྱུར་བར་ཐེ་ཚོམ་མེད། །ལས་ནི་བྱས་པ་མ་ཡིན་འགྱུར། །རྟག་ལ་བྱ་བ་མེད་ཕྱིར་རོ། །ཞེས་པ་ལྟ་བུའི་དགོངས་པ་བརླིང་པོ་ཞིག་ཡོད་པར་འདུག་ཀྱང༌། རྩོད་ཚེ་གཏན་ཚིགས་མ་གྲུབ་

― GTD002_Page_0054 ―

^{[མ་དཔེ་གཟིགས་ན་འདིར་གནོན།]}

[Full Size]

པར་འགྱུར་བས་ཞིབ་ཆ་དགོས། ༼༣༡ན༽ ༼༥༽དེ་འཕགས་པ་ཡབ་སྲས་ཀྱིས་མགོ་མཚུངས་མཛད་པའི་རིགས་པ་གཙོ་བོར་བཤད་པའི་ཕྱིར། ༼འེ༽མགོ་མཚུངས་བྱེད་ཚུལ་ཡང་ས་སོགས་དོན་དམ་པར་འབྱུང་བ་ཡིན་ན། དེ་འབྱུང་བའི་ངོ་བོར་སྐྱེད་པ་རྐྱེན་ལ་མི་ལྟོས་དགོས་ཤིང༌། དེ་ལྟར་ན་དེ་འབྱུང་བར་བསྐྱེད་པའི་རྐྱེན་མེད་པར་འགྱུར་རོ། །དེ་འདོད་ན། ཤེས་པ་ཡང་འབྱུང་བའི་ངོ་བོར་གྲུབ་པར་ཐལ། དེ་འབྱུང་བའི་ངོ་བོར་མ་སྐྱེས་ལ། ས་སོགས་འབྱུང་བའི་ངོ་བོར་སྐྱེས་པའི་རྒྱུ་མཚན་མེད་པའི་ཕྱིར་ཏེ། དེ་གཉིས་ཀ་ལ་འབྱུང་བའི་ངོ་བོར་སྐྱེད་བྱེད་ཀྱི་རྐྱེན་མེད་པ་འདྲ་བའི་ཕྱིར། ཞེས་མགོ་བསྡོས་པ་ཡིན་ཏེ། འཚང་རྒྱ་བ་ཚོགས་གཉིས་ལ་མི་ལྟོས་ན། སེམས་ཅན་ཐམས་ཅད་སངས་རྒྱས་པར་ཐལ་བ་འཕེན་པ་ལྟ་བུའོ། ། ༼༣༡བ༽ ༼༡༽འདི་མཐའ་གཉིས་ཅིག་ཅར་སེལ་བའི་རིགས་པའི་རྒྱལ་པོ་ཡིན་ཏེ། ༼ཡེ༽བློན་པོས་བྱ་བཞག་ཐམས་ཅད་ཀྱི་ཕུགས་རྒྱལ་པོ་ལ་གཏུགས་དགོས་པ་ལྟར་འདིར་ཡང༌། འཇུག་པ་ལས། གང་ཕྱིར་རྒྱུ་མེད་པ་དང་དབང་ཕྱུག་གི །ཞེས་སོགས་དང༌། འདི་ནི་འཇིག་རྟེན་ལས་སམ་དེ་ཉིད་དུའང། །ཞེས་སོགས་ལྟར་མཐའ་བཞི་སྐྱེ་འགོག་སོགས་དང། གཅིག་དུ་བྲལ་སོགས་ཀྱི་རིགས་པ་མཐའ་དག་འདི་ལ་གཏུགས་དགོས་པའི་ཕྱིར། ༼༣༽རྗེའི་ཚད་མའི་ལམ་སྒྲིག་ལས། ཁྱབ་བྱེད་མ་དམིགས་པའི་རྟགས་སམ། རང་བཞིན་མ་དམིགས་པའི་རྟགས་སོ། །ཞེས་གསུངས་པའི་ཕྱིར། ༼རེ༽འདི་ལ་ཁ་ཅིག་འདི་ཁྱབ་བྱེད་མ་དམིགས་པ་མ་ཡིན་པར་ཐལ། དེ་ལ་དོན་དང་ཐ་སྙད་གཉིས་ཀ་སྒྲུབ་པ་དགོས་པའི་ཕྱིར།

― GTD002_Page_0055 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་མཆོག་གིས། རྒྱུ་དང་ཁྱབ་པར་བྱེད་པ་མ་དམིགས་པ་ནི་དངོས་པོ་མེད་པ་དང་དངོས་པོ་མེད་པའི་ཐ་སྙད་གཉིས་ཀ་གོ་བར་བྱེད་ལ། ཞེས་གསུངས་པའི་ཕྱིར་ན་མ་ཁྱབ། འདོད་མི་ནུས་ཏེ། དབུ་མ་སྣང་བ་ལས། གཅིག་དང་དུ་མ་ཉིད་དག་ཀྱང་དེ་དང་འདྲ་ལ། ཁྱབ་པར་བྱེད་པ་ལོག་པ་ན་ཁྱབ་པར་བྱ་བ་ལྡོག་པར་ངེས་པའི་ཕྱིར། ཞེས་ཁྱབ་བྱེད་མ་དམིགས་པ་ལ་གསུངས་པའི་ཕྱིར་རོ། །རང་བཞིན་མ་དམིགས་པ་ཡིན་ནམ་མིན་ཞེ་ན། དབུ་མ་རྒྱན་གྱི་ཟིན་བྲིས་ལས། འདི་ཁྱབ་བྱེད་མ་དམིགས་པའི་ཐ་སྙད་སྒྲུབ་པ་ཡིན་གྱི་རང་བཞིན་མ་དམིགས་པ་མིན་པས་དོན་གྲུབ་ཟིན་པའང་དོན་ལྡོག་གི་དོན་དུ་མི་བཟུང་ངོ༌། །ཞེས་དང༌། སྟོང་ཐུན་ལས། ཐ་སྙད་འབའ་ཞིག་སྒྲུབ་ཡིན་ལ། དེའི་ཕྱིར་ཐ་སྙད་འབའ་ཞིག་སྒྲུབ་ལ་རང་བཞིན་མ་དམིགས་པས་ཁྱབ་པ་མིན་ཞེས། རང་བཞིན་མ་དམིགས་པ་མིན་པར་གསུངས་པ་གོ་རྒྱུ་བཟང་བའི་དབང་དུ་བྱས་པ་སྟེ། གཏན་ཚིགས་འདི་ལ་ཞེས་སོགས་ཀྱི་དོན་ཀ་ཤིས་བཤད་པ་དང་མཐུན་པར་ཡོད། ཚིག་གི་ཐོབ་ཚོད་ཙམ་དུ་བྱས་ནས་དོན་སྒྲུབ་ཅེས་པའི་དོན་དེ། དོན་ལྡོག་ལ་བྱས་ན་རྟགས་འདི་ཡང་རང་བཞིན་མ་དམིགས་པར་བཤད་རུང་ཙམ་དུ་ཡོད་དེ། དགག་བྱའི་དོན་ལྡོག་གམ་རང་བཞིན་མ་དམིགས་པ་རྟགས་སུ་བཀོད་པའི་ཕྱིར། སྔ་མ་ལྟར་ན་དོན་གྲུབ་ཟིན་ཞེས་པ་གང་ཟག་གི་ངོས་ནས་ཕར་ལ་བརྡ་སྦྱོར་མ་ནུས་པ་མ་གཏོགས། དོན་ཆོས་ཉིད་ཀྱི་ངོས་ནས་དེ་ལས་ལྷག་པའི་སྟོང་ཚུལ་དང༌། རྣམ་པ་ཞིག་སྟོན་རྒྱུ་མེད་པ་ལ་བྱ་སྟེ། མདོར་བསྡུས་

― GTD002_Page_0056 ―

^{[མ་དཔེ་གཟིགས་ན་འདིར་གནོན།]}

[Full Size]

ན། ཆོས་ཉིད་དོན་གྱིས་རྟོགས་ཡོད་ཀྱང་མིང་བརྡ་སྦྱོར་མ་ནུས་ཞེས་པ་ཡིན་པས། ཚིག་འཁྲིའི་གཏེར་རྡོལ་བར་གྱུར་ཅིག །༼༣༢ན༽ ༼༡༽དཔེར་ན་འདི་ནི་གླང་སྟེ་ལྐོག་ཤལ་ལ་སོགས་པ་འདུས་པའི་བདག་ཉིད་ཡིན་པའི་ཕྱིར་རོ། །ཞེས་གསུངས་པའི་ཕྱིར། ༼ལེ༽འདིའི་དོན་ནི། གཅིག་དུ་བྲལ་གྱི་གཏན་ཚིགས་འདིའི་བསྒྲུབ་བྱ་ལ་གང་ཡོང་ན། དམ་བཅའ་འམ་བསྒྲུབ་བྱའི་དོན་ལྡོག་གི་ཕྱོགས་ནས་མི་ཡོང་གི བསྒྲུབ་ཡུལ་ལམ་བསྒྲུབ་གཞི་ཆོས་ཅན་དེའི་སྟེང་དུ་སྒྲ་རྟོག་གིས་བདེན་མེད་དོ་ཞེས་བཏགས་པའི་ཐ་སྙད་ཙམ་ཞིག་བསྒྲུབ་པ་ཡིན་ཞེས་བསྟན་པར་ཡོངས་ཀྱི་དགེ་བའི་བཤེས་གཉེན་འགའ་ཞིག་འཆད་དོ། །དེ་ལྟར་ནའང་འཕགས་ཡུལ་གྱི་མཁས་པ་ཀ་མ་ལ་ཤཱི་ལའི་དགོངས་པ་ལྟར་ན། བདེན་གྲུབ་ཀྱི་གཅིག་དང་དུ་མ་གང་དུའང་མེད་པར་རྟོགས་ནས། བདེན་པར་སྒྲོ་འདོགས་ལུགས་ཕུང་གསུམ་པ་མེད་པས། གཅིག་དུ་བྲལ་དང༌། བདེན་མེད་རྣམ་གྲངས་ཙམ་ཡིན་ལ། དེའི་ཕྱིར། ཕྱིར་རྒོལ་དེ་ལ་བདེན་མེད་བསྒྲུབ་ཀྱང་མི་དགོས་ཤིང༌། གཅིག་དུ་བྲལ་གྱི་རྟགས་ཀྱིས་བསྒྲུབས་ནའང་བསྒྲུབ་བྱ་རྟགས་སུ་བཀོད་པ་དང་ཁྱད་མེད་པས། མ་གྲུབ་པའི་གཏན་ཚིགས་སུ་འགྱུར་རོ་ཞེས་རྩོད་པའི་ལན་དུ་སྦྱར་རོ། །དེའི་ཚུལ་ནི། གཏན་ཚིགས་འདི་ལ་དམ་བཅའི་ཕྱོགས་གཅིག་རྟགས་སུ་བཀོད་པའི་མ་གྲུབ་པའི་སྐྱོན་མེད་དེ། གཅིག་དུ་བྲལ་དང་བདེན་མེད་དོན་ལ་ཁྱད་པར་མེད་ཀྱང༌། བློ་ལ་འཆར་ཚེ་བདེན་མེད་དོ་ཞེས་ཐ་སྙད་ངེས་དགོས་མི་དགོས་ཀྱི་ཁྱད་པར་ཡོད་ཅིང༌། ཕྱི་རྒོལ་དེས་ཀྱང་ཐ་སྙད་སྦྱར་བ་སྔོན་མ་གོམས་པའི་དབང་གིས་

― GTD002_Page_0057 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་བདེ་སང་དུ་མ་སོང་བ་དེ་སྒྲུབ་ཆེད་ཡིན་པས། རྟགས་ཆོས་ཐ་མི་དད་པ་དང༌། གྲུབ་ཟིན་བསྒྲུབ་པའི་སྐྱོན་གང་ཡང་མེད་ཅེས་འཆད་དགོས་ཏེ། དེས་མཛད་པའི་དབུ་མ་རྒྱན་གྱི་དཀའ་འགྲེལ་ལས། འདིར་དམ་བཅའི་དོན་གྱི་ཕྱོགས་གཅིག་ཡིན་པའི་ཕྱིར། གཏན་ཚིགས་མ་གྲུབ་པ་མ་ཡིན་ནམ། གཅིག་དང་དུ་མའི་ངོ་བོ་གཉིས་ནི་དངོས་པོའི་རྣམ་གྲངས་ཡིན་པའི་ཕྱིར་ཞེས་དང༌། ཅི་སྟེ་གཏན་ཚིགས་གྲུབ་ན་ནི། དེའི་ཚེ་དངོས་པོ་རྣམས་ཀྱི་རང་བཞིན་མེད་པ་ཉིད་ཀྱང་གྲུབ་པ་ཡིན་ཏེ། གཅིག་དང་དུ་མ་དང་བྲལ་བའི་རི་བོང་རྭ་ལ་སོགས་པ་ལ་ནི་དངོས་པོ་ཉིད་འགའ་ཡང་ཁས་མི་ལེན་ནོ་སྙམ་དུ་དོགས་པ་ལ་ཞེས་པ་ནས་གཏན་ཚིགས་དམ་བཅའི་དོན་གྱི་ཕྱོགས་གཅིག་པ་ཉིད་མ་ཡིན་ཏེ། ཞེས་སོགས་གསུངས་པའི་ཕྱིར། དེས་ན་འཇམ་དབྱངས་ལེགས་པ་ཆོས་འབྱོར་སོགས་༼༡༽འགའ་ཞིག་གིས་མཁས་གྲུབ་ཆོས་རྗེས་དེ་ལྟར་བཤད་པ་བཀག་པ་ནི། སངས་རྒྱས་ལས་ང་མཁས་ཞེས་པའི་འཁྲུལ་སྐད་ཆེན་པོའོ། ། ༼༤༽དབུ་མ་རྒྱན་རང་འགྲེལ་ལས། གཅིག་པུའི་བདག་ཉིད་དང་དུ་མའི་བདག་ཉིད་ནི་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པས་ཕུང་པོ་གཞན་སེལ་ཏོ་ཞེས་གསུངས་པའི་ཕྱིར། ༼ཤེ༽ཁ་ཅིག །ཚིག་ལྷུག་འདི་རྣམས་ཀྱང་དབུ་མ་རྒྱན་གྱི་གཞུང་དངོས་ཡིན་གྱི། དེའི་འགྲེལ་པ་མིན་ཏེ། རྗེའི་དབུ་མ་རྒྱན་གྱི་ཟིན་བྲིས་ལས། རྩ་བ་སྔོན་དུ་བརྩམས་ནས་འགྲེལ་པས་ཕྱིས་བཀྲལ་བའི་བསྟན་བཅོས་གཉིས་སུ་མི་བྱ་ཡི། བསྟན་བཅོས་ལ་ཚིགས་བཅད་དང༌། ལྷུག་པ་དང༌། སྤེལ་མའི་

― GTD002_Page_0058 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་གསུམ་གསུངས་པའི་ཕྱི་མ་ཡིན་པར་བཟུང་ལ། དབུ་མ་རྒྱན་གྱི་གཞུང་ངོས་ཟིན་པར་གྱིས་ཤིག །ཅེས་གསུངས་པའི་ཕྱིར་ན་མ་ཁྱབ་སྟེ། རྩ་འགྲེལ་གཞན་ལྟར་རིམ་ཅན་མིན་གྱི། རྩ་ཚིག་བརྩམས་རིམ་བཞིན་འགྲེལ་པས་བཀྲལ་ནས་མཉམ་དུ་གསུངས་པའི་དོན་ཡིན་པའི་ཕྱིར། རྩ་འགྲེལ་གཉིས་ཀ་ལ་མཆོད་བརྗོད་དང་མཇུག་སོགས་གཅིག་གིས་ཆོག་པའང་རྩོམ་ཚུལ་གྱི་གནད་ཀྱིས་ཡིན་ནོ། །དེ་ལྟར་མིན་ན། རྗེའི་གསུང་མང་པོར་ཡང༌། དབུ་མ་རྒྱན་རང་འགྲེལ་ལས། ཞེས་མང་དུ་དྲངས་སྣང་བ་དང་འགལ་བར་འགྱུར་རོ། །༼༣༢བ༽ ༼༤༽ཆོས་གང་ལའང་རང་ཡུལ་ཡིན་པའི་ཆ་དང་རང་གི་དོན་སྤྱི་དང་རང་གི་ཡོན་ཏན་ཏེ་ཁྱད་ཆོས་གསུམ་མེད་པ་མི་སྲིད་ཅིང་དེ་དག་ཀྱང་ཐ་དད་ཡིན་པའི་ཕྱིར། ༼སེ༽འདིའི་མདོར་བསྟན་དུ། རྡུལ་ཕྲན་རང་བཞིན་མེད་གྲུབ་པ། །དེ་ཕྱིར་མིག་དང་རྫས་ལ་སོགས། །བདག་དང་གཞན་སྨྲས་མང་པོ་དག །རང་བཞིན་མེད་པར་མངོན་པ་ཡིན། །ཞེས་རང་སྡེས་བཏགས་པའི་མིག་སོགས་དང༌། གཞན་སྡེ་བྱེ་བྲག་པ་སོགས་ཀྱིས་བཏགས་པའི་རྫས་ལ་སོགས་པ་ཚིག་དོན་དྲུག་ཀྱང་རང་བཞིན་མེད་པར་རྡུལ་ཕྲན་རང་བཞིན་མེད་པའི་རྟགས་ཀྱིས་འགྲུབ་སྟེ། དེ་ཐམས་ཅད་དངོས་བརྒྱུད་ཅི་རིགས་ཀྱི་སྒོ་ནས་རྡུལ་ཕྲན་ལ་བརྟེན་པའི་ཕྱིར། ཞེས་མདོར་བསྟན་ནས། རྒྱས་པར་བཤད་པ་ལ། ༼༥༽དབུ་མ་རྒྱན་ལས། དེའི་རང་བཞིན་དེ་བརྩམས་དང༌། །དེའི་ཡོན་ཏན་དེ་ལས་བདག །དེའི་སྤྱི་དང་ཁྱད་པར་ཡང༌། །དེ་དག་དེ་དང་འདུ་བ་ཅན། །ཞེས་གསུངས་པའི་ཕྱིར། ༼ཧེ༽དོན་ནི་རྡུལ་ཕྲན་དེའི་རང་བཞིན་ཅན་གྱི་མིག་སོགས་

― GTD002_Page_0059 ―

^{[མ་དཔེ་གཟིགས་ན་འདིར་གནོན།]}

[Full Size]

རང་སྡེས་བཏགས་པ་དང༌། གཞན་སྡེ་གཟེགས་ཟན་པས་བཏགས་པའི་རྟོག་གེའི་ཚིག་དོན་དྲུག་སྟེ། རིམ་པ་བཞིན། རྡུལ་ཕྲན་དེ་རྩོམ་གཞི་བྱས་པའི་ས་ཆུ་མེ་རླུང་སོགས་རྫས་དགུ་དང༌། རྫས་དེའི་ཡོན་ཏན་གཟུགས་སྒྲ་དྲི་རོ་རེག་བྱ་སོགས་ཉེར་བཞི་དང༌། འདེག་འཇོག་སོགས་ལས་ལྔ་དང༌། ཁྱབ་མ་ཁྱབ་ཀྱི་སྤྱི་གཉིས་དང༌། བྱེ་བྲག་གམ་ཁྱད་པར་ཏེ། བི་ཤི་ཥ་ཞེས་དེ་གཉིས་ཀྱི་སྐད་དོད་ཐུན་མོང་ངོ༌། །འདུ་འབྲེལ་དང་ལྡན་འབྲེལ་ཏེ་འབྲེལ་བ་གཉིས་སོ། །དབུ་མ་རྒྱན་གྱི་རང་འགྲེལ་དང༌། དཀའ་འགྲེལ་གཉིས་ཀར་རྡུལ་ཕྲན་བདེན་མེད་དུ་གྲུབ་ན། འདི་དག་ཀྱང་བདེན་མེད་དུ་འགྲུབ་པ་ལ་སྦྱར་ཡང༌། འདིར་ཆ་བཅས་ལ་སྦྱར་བ་རིགས་པ་འདྲ་བ་ལ་དགོངས་པ་ཡིན་ནམ་དཔྱད། དེ་ལྟར་ཚིག་དོན་དྲུག་ནི། གྲུབ་མཐའ་རྩ་བར་ཡང༌། རྫས་དང་ཡོན་ཏན་ལས་དང་སྤྱི་བྱེ་བྲག །འདུ་བ་ཚིག་གི་དོན་དྲུག་ཅེས་སོ། །ཁ་ཅིག་དབུ་མ་རྒྱན་གྱི་ལུང་དོན་ཡོན་ཏན་གྱི་ཆ་ཞེས་སོགས་སྨྲ་བ་བབ་ཅོལ་ལོ། །༼༣༣ན༽ ༼༤༽རྣམ་བཤད་ལས། དེའི་ཁྱབ་པ་སྒྲུབ་པ་ལ་ཚད་མ་གསུམ་དགོས་ཀྱང། རྟགས་དང་དགག་བྱའི་ཆོས་ཀྱི་གཞི་མཐུན་འགོག་པ་རྟོགས་དཀའ་བས་སྔོན་དུ་རྟོགས་པ་མི་སྲིད་སྙམ་སྟེ་དཔྱད།༼༥༽ཁྱབ་སྟེ། ཆ་དང་ཆ་ཅན་སྣང་ཚུལ་དང་གནས་ཚུལ་གཉིས་ཀར་གཅིག་ན་༼ཨེ༽རྟོག་ངོ་ཙམ་དུ་ཡང་ཐ་དད་མེད་པའི་གཅིག་ཏུ་འགྱུར་ལ། དེ་གཉིས་ཀ་གཅིག་ཡིན་ན། ༼༦༽ཆ་དང་ཆ་ཅན་གྱི་ཐ་སྙད་མེད་དགོས། དེ་གཉིས་ཀ་ཐ་དད་ནའང་༼ཀོ༽འབྲེལ་མེད་དོན་གཞན་དུ་འགྱུར་བས་རྟ་དང་བ་ལང་གི་རྭ་ལྟར།

― GTD002_Page_0060 ―

^{[མ་དཔེ་གཟིགས་ན་འདིར་གནོན།]}

[Full Size]

༼༦༽ཆ་ཤས་དང་ཆ་ཅན་མེད་དགོས་པའི་ཕྱིར། ༼༣༤ན༽ ༼༦༽འདོད་ན། དེ་ཆོས་ཅན། རང་སྣང་བའི་དབང་ཤེས་ལ་དུ་མར་སྟེ་གཉིས་སྣང་གི་རྣམ་པ་སྣང་བར་ཐལ། རང་སྣང་བའི་དབང་ཤེས་གཉིས་སྣང་ཅན་ཡིན་པའི་ཕྱིར། ཁྱབ་སྟེ། ཞིབ་ཆ་དགོས་དུ་མར་མི་སྣང་བའི་གཉིས་སྣང་མི་རུང་བའི་ཕྱིར། ༼༣༥ན༽ ༼༡༽འཕགས་པ་ལྷས། ༼ཁོ༽དངོས་ཀུན་དངོས་པོ་གཅིག་གི་ངོ་བོ་ཉིད། །དངོས་གཅིག་དངོས་པོ་ཀུན་གྱི་ངོ་བོ་ཉིད། ། ༼༡༽གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང༌། །ཞེས་གསུངས་པའི་ཕྱིར། ༼༣༽ཆོས་གཅིག་གི་ཆོས་ཉིད་རྟོགས་ན་ཆོས་ཀུན་གྱི་སྟོང་ཉིད་དངོས་སུ་རྟོགས་དགོས་པ་མིན་གྱི་༼ཁོ༢༽དངོས་སུ་ཞེས་པའི་རྣམ་བཅད་ཡོངས་གཅོད་ཀྱི་དོན་གང་ཡིན་ཞེ་ན། འདིར་དངོས་སུ་ཞེས་པ་དངོས་ཤུགས་ཀྱི་དངོས་ལ་བྱས་ནས་ཆོས་གཞན་གྱི་སྟོང་ཉིད་རྣམས་ཤུགས་ལ་རྟོགས་ཞེས་པ་མ་ཡིན་ཏེ། འདིར་དངོས་སུ་ཞེས་པ་དངོས་དང་བརྒྱུད་པ་ཞེས་པའི་སྐབས་ཀྱི་དངོས་ལ་བྱས་ནས། ཆོས་གཅིག་གི་སྟོང་ཉིད་རྟོགས་མ་ཐག་ཆོས་ཐམས་ཅད་ཀྱི་སྟོང་ཉིད་རྟོགས་མི་དགོས་ཀྱང༌། དེ་རྗེས་བློ་ཁ་ཕྱོགས་ཙམ་ནས་རྟོགས་སླ་བའི་དོན་ཡིན་ཏེ། ལམ་རིམ་གྱི་ལུང་གི་མཇུག་དེ་མ་ཐག་ལས། ཆོས་གཞན་བདེན་པར་ཡོད་མེད་ལ་བློ་ཁ་ཕྱོགས་པ་ན་རྟོགས་ནུས་པའི་དོན་ནོ། །ཞེས་གསུངས་པའི་ཕྱིར། ཁ་ཅིག་འདི་ལ་འཁྲུལ་སྣང་ངོ༌། ། ༼༤༽མདོ་ཏིང་ངེ་འཛིན་རྒྱལ་པོ་ལས། ཇི་ལྟར་ཁྱོད་ཀྱིས་བདག་གི་འདུ་ཤེས་ནི། །ཤེས་པ་དེ་བཞིན་ཀུན་ལ་བློས་སྦྱར་བྱ། ། ༼གོ༽ཆོས་རྣམས་

― GTD002_Page_0061 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་དེ་ཡི་ངོ་བོ་ཉིད། །རྣམ་པར་དག་པ་ནམ་མཁའ་ལྟ་བུ་ཡིན། ། ༼༣༥བ༽ ༼༣༽རྡོ་རྗེ་སྙིང་འགྲེལ་ལས། ༼ངོ༽ཐེག་པ་གསུམ་གྱི་ངེས་འབྱུང་བར། །ཐེག་པ་གཅིག་གི་འབྲས་བུར་གནས། །ཉན་ཐོས་རང་སངས་རྒྱས་དང་འདིར། །ཐེག་པ་ཆེན་པོ་གསུམ་པ་སྟེ། ། ༼༣༽སངས་རྒྱས་པ་ལ་བཞི་པ་དང༌། །.....སངས་རྒྱས་པ་ནི་བཞི་པ་དང༌། །ལྔ་པ་ཐུབ་པའི་དགོངས་པ་མིན། །.....ཐུབ་པའི་གསུང་ནི་ལྔ་པ་མེད། །ཅེས་གསུངས། ༼ཅོ༽འདི་ཐེག་པ་བཞི་པ་དང་གྲུབ་མཐའ་ལྔ་པ་མེད་པའི་དོན་ཡིན་ནོ། །དེ་གཉིས་སོ་སོར་སྦྱར་བ་བཙན་ཐབས་མ་ཡིན་པར་གཞུང་དང་འབྲེལ་ཏེ། ལུང་དེའི་གོང་དུ་གྲུབ་མཐའ་ལྔ་པ་མེད་ཚུལ་རྒྱས་པར་གསུངས་ནས་འདིར་དོན་བསྡུ་མཉམ་དུ་མཛད་པ་ཡིན་པའི་ཕྱིར། ༼༧༽སྟོང་ཐུན་སྐལ་བཟང་མིག་འབྱེད་ལས། གང་ཟག་རང་བཞིན་མེད་པ་མཚན་ཉིད་ཚང་བ་ཞིག་ཚད་མས་ངེས་ནས་ཕུང་པོ་རང་བཞིན་གྱིས་གྲུབ་པར་དམ་བཅའ་བ་མི་སྲིད་གང་གིས་དབུ་མའི་ལྟ་བ་༼ཆོ༽མཐར་ཐུག་ངེས་པའི་རིགས་པ་དེས་ཕུང་སོགས་ཀྱི་སྟེང་དུ་བདེན་མེད་ལ་བློ་ཁ་ཕྱོགས་པ་ཙམ་གྱིས་ངེས་པར་བྱེད་ནུས་པའི་ཕྱིར་ཏེ། ༼༧༽ཞེས་སོགས་གསུངས་པའི་ཕྱིར། ༼༣༦ན༽ ༼༦༽ལམ་རིམ་ཆུང་ངུ་ལས། ཐོག་མར་འཇིག་རྟེན་ན་རྫུན་པར་གྲགས་པའི་དཔེ་འདི་རྣམས་རང་བཞིན་མེད་པར་རྟོགས་སུ་བཅུག་ནས། དེ་ནས་རྫུན་པར་མ་གྲགས་པའི་གཟུགས་སྒྲ་སོགས་ཆོས་གཞན་རྣམས་རང་བཞིན་མེད་པར་རྟོགས་དགོས་ཤིང་ཞེས་གསུངས་པའི་ཕྱིར། ༼ཇོ༽ཕྱི་རྒོལ་རྒྱུད་སྨིན་མ་སྨིན་གྱི་ཁྱད་པར་ནི་སྟོང་ཉིད་རྟོགས་མ་རྟོགས་ཞེས་ཁ་ཅིག་

― GTD002_Page_0062 ―

^{[མ་དཔེ་གཟིགས་ན་འདིར་གནོན།]}

[Full Size]

ཟེར་ཡང༌། མཐུན་དཔེ་གཞན་གྱི་སྟེང་དུ་སྟོང་ཉིད་རྟོགས་མ་རྟོགས་ལ་བྱ་དགོས་སོ། །སྔ་མས་གཟུགས་བརྙན་བྱད་བཞིན་དུ་སྣང་བ་ལྟར་མ་གྲུབ་པར་རྟོགས་ཀྱང༌། སྣང་བ་ལྟར་མ་གྲུབ་པར་མ་རྟོགས་ཞེས་འཆད་མོད་ཀྱང༌། རང་རྒྱལ་རིགས་ངེས་ཀྱིས་སྔོན་འཛིན་མིག་ཤེས་འཁྲུལ་ཤེས་སུ་རྟོགས་པར་འདོད་ན། རྩ་བའི་བློ་རྩེ་གཏད་སོ་སྟོར་བར་འགྱུར་བས་དཔྱད་དགོས་སོ། ། ༼༣༦བ༽ ༼༧༽དགོངས་པ་རབ་གསལ་ལས། ནང་གི་བློའི་དབང་གིས་མ་བཞག་པའི་སྡོད་ལུགས་ཡོད་པར་མི་འཛིན་པར་བློའི་དབང་གིས་བཞག་པའི་ཡོད་པ་ཙམ་དུ་ཤེས་པར་འགྱུར་རོ། །ཞེས་གསུངས་པའི་ཕྱིར། ༼ཉོ༽དོན་བསྡུ་ན་བློ་གནོད་མེད་ཀྱིས་བཞག་ཙམ་རྟོགས་ཀྱང༌། དེ་ལ་སྣང་བའི་དབང་གིས་བཞག་ཙམ་རྟོགས་མི་དགོས་ཏེ། སྔ་མ་རྟོགས་པ་ཙམ་ལ་བྱེད་ཅིང༌། སྣང་བའི་དབང་ཞེས་པའི་ཚིག་གི་ནུས་པས་དེ་ལ་ལྟོས་མེད་དུ་གྲུབ་པའི་རང་དབང་ཅན་ཡིན་པ་གཅོད་པའི་ཕྱིར་རོ། །༈ ༼༣༧བ༽ ༼༥༽ཤིང་རྟ་པ་ཁ་ཅིག་ན་རེ།.....རེད་མདའ་བ་༼༦༽དང་པོ་གཉིས་མི་འཐད་པར་ཐལ་དེ་ལྟར་ན་གསུམ་གྱིས་ལྔ་ཙམ་བསྡུས་པར་འགྱུར་བའི་ཕྱིར། ༼༣༨ན༽ ༼༢༽བཞི་པ་ཡང་མི་འཐད་པར་ཐལ། ཚིག་གསལ་༼ཏོ༽ལས། དངོས་པོ་བརྒྱད་དུ་རྣམ་པར་ཕྱེ་བ་དེ་དག་ནི་དངོས་ཀྱི་ཚུལ་དུ་དཔྱད་ན་རྣམ་པ་ཐམས་ཅད་མཁྱེན་པ་ཉིད་ཀྱི་སྐབས་ཞེས་གཅིག་ཁོ་ནར་གདགས་པར་རིགས་ཏེ། དེ་ཅིའི་ཕྱིར་ཞེ་ན། སྔར་བསྟན་པའི་རིགས་པའི་ལམ་ཐམས་ཅད་ནི། འབྲས་བུ་རྣམ་པ་ཐམས་ཅད་མཁྱེན་པ་ཉིད་གཅིག་པུ་བརྒྱུད་པའམ་དངོས་སུ་བསྒྲུབ་པའི་ཕྱིར་རོ། །ཞེས་གསུངས་པ་

― GTD002_Page_0063 ―

^{[མ་དཔེ་གཟིགས་ན་འདིར་གནོན།]}

[Full Size]

༼༢༽ལྟར་ན་རུང་ཙམ་ཡོད་ཀྱང་འགྲེལ་པའི་དངོས་ཟིན་དང་མི་མཐུན་པའི་ཕྱིར་ཏེ། གསུམ་གྱིས་བརྒྱད་བསྡུས་ཚུལ་དགོས་པའི་ཕྱིར། ༼༢༽ལྔ་པ་ཡང་མི་འཐད་པར་ཐལ། ཡེ་ཤེས་ཞབས་ཀྱི་ལུགས་ལྟར་ན༼ཐོ༽ཉན་རང་གི་ལམ་གང་ཡིན་གཞི་ཤེས་དང༌། བྱང་སེམས་ཀྱི་ལམ་གང་ཡིན་ཐམས་ཅད་ལམ་ཤེས་ཡིན་ཞིང༌། ལམ་ཤེས་ཚོགས་སྦྱོར་དུ་ཡང་ཡོད་པས། ༼༣༽ཕྱོགས་གཅིག་རུང་ཡང་བརྒྱད་གསུམ་མ་ཡིན་པས་འཕགས་སེང་གི་ལམ་ཁུག་པར་གསུངས་པའི་གཞུང་དང་མི་མཐུན་པའི་ཕྱིར་ཏེ། གསུམ་གྱིས་བརྒྱད་བསྡུས་ཀྱི་རྣམ་མཁྱེན་གཅིག་པུས་ཆོས་སྐུ་བསྡུས་པ་ཡང་མི་འཐད་པའི་ཕྱིར་རོ། །༈ ༼༣༩ན༽ ༼༢༽དང་པོ་གྲུབ་སྟེ། དགྲ་བཅོམ་པ་ཚེ་འདའ་ཁའི་སེམས་ཀྱང་མཚམས་སྦྱོར་བར་ཁས་ལེན་པའི་ཕྱིར། རྣམ་འགྲེལ་ལས། ༼དོ༽ཐ་མའི་སེམས་ནི་སེམས་གཞན་དང༌། །མཚམས་སྦྱོར་བ་ལ་འགལ་ཅི་ཡོད། །ཅེས་སྒྲུབ་བྱེད་དྲིས་པའི་ལན་དགག་པར། ༼༢༽དགྲ་བཅོམ་སེམས་གང་ཡིན་དེ་ཡང༌། །གང་ལས་མཚམས་སྦྱོར་མེད་པར་འདོད། ། ༼ནོ༽ཚད་མས་མ་གྲུབ་དོན་ཅན་གྱི། །གྲུབ་མཐའི་རྗེས་སུ་འབྲང་ངམ་ཅི། ། ༼༣༽དེའི་ཚད་མ་རྒྱན་ལས། ༼པོ༽རྩ་བའི་དོན་བཀྲལ་ཏེ། སོ་སྐྱེ་འཆི་ཁ་མའི་རིག་པ་ཕྱི་མ་མཚམས་སྦྱོར་ན་ཁྱེད་ཀྱི་གཞུང་ལས། དགྲ་བཅོམ་འཆི་ཁ་མའི་རིག་པ་མཚམས་མི་སྦྱོར་བར་བཤད་པ་དང་འགལ་ཏེ་དེ་གཉིས་འཆི་སེམས་ཡིན་པར་མཚུངས་པའི་ཕྱིར། ཞེས་གཞན་གྱིས་སྐྱོན་བརྗོད་པའི་ལན་དུ་ཁྱོད་ཀྱིས་དྲངས་པའི་ལུང་དང་མཐུན་དཔེས་ངེད་ལ་

― GTD002_Page_0064 ―

^{[མ་དཔེ་གཟིགས་ན་འདིར་གནོན།]}

[Full Size]

ནང་འགལ་སྟོན་མི་ཐུབ་པར་ཐལ། ངེད་ཀྱི་ལུང་ལས་དགྲ་བཅོམ་པ་...༼༣༽...ཐ་མའི་སེམས་སེམས་གཞན་དང་མཚམས་སྦྱོར་མེད་པར་བསྒྲུབ་པར་བྱ་བ་སྟེ་གསུངས་པ་ཡིན་ལ། དེའི་ཡུལ་...༼ཕོ༽...ལམ་བསྟན་དོན་དགྲ་བཅོམ་མཚམས་མི་སྦྱོར་བ། ༼༣༽དང་༼བོ༽ཆགས་བཅས་ཀྱི་སྐྱེ་བོ་མཚམས་སྦྱོར་བ་གཉིས། ༼༣༽ལྷན་ཅིག་གམ་ནང་འགལ་བ་ཅི་ཞིག་ཡོད་༼མོ༽དེ་རྒྱུ་སྲེད་པ་ཡོད་མེད་མི་མཚུངས་པའི་ཕྱིར། ༼༣༽ལྷས་ཀྱང༌། སོ་སྐྱེ་ཐ་མའི་སེམས་དེ་འཆི་བའི་སེམས་གཞན་དང་མཚམས་སྦྱོར་བ་ལ་འགལ་བ་ཅི་ཡོད་བསྒྲུབ་པར་བྱ་བ་མཚམས་སྦྱོར་བ་དང་སྒྲུབ་པར་བྱེད་པ་༼ཙོ༽རྩ་བའི་ལུང་འདི་དག་གི་གོང་དུ། སྐད་ཅིག་སྔ་མ་སྔ་མ་དེ། །སྐད་ཅིག་རེ་རེར་སྔོན་མེད་པའི། །རྒྱུ་ཡིན་དེ་ཡི་ཕྱིར་ན་རྒྱུ། །ཐམས་ཅད་ཚེ་ན་མཐོང་བ་ཉིད། །ཅེས་སོགས་རིག་པ་ཕྱི་མ་ཕྱི་མ་མཚམས་སྦྱོར་བའི་ཤེས་བྱེད་༼༤༽དག་དཔེ་དང་ལུང་ལ་འགལ་བ་རྣམ་པ་གཉིས་གང་ཡང་ཡོད་པ་མ་ཡིན་ནོ། ། ༼ཚོ༽ཞེས་འབྲུ་སྣོན་ཚུལ་འདི་ནི་ཡིག་ཆ་དང་སྦྱར་ནས་བཤད་སླ་ཞིང༌། རྩོད་ཚེ་བདེ་བའི་རྒྱུ་མཚན་གྱིས་ད་ལྟའི་སྙན་རྒྱུད་རྣམས་ལས་ལེགས་པའི་ཆ་བསྡེབས་ཏེ་བཀོད་པ་ཙམ་ཡིན་གྱི་གཞུང་གི་དགོངས་པ་མིན་ནོ། །གཞུང་གི་དོན་ནི། བསྒྲུབ་བྱ་མཚམས་སྦྱོར་བ་དང༌། སྒྲུབ་བྱེད་ཐ་མའི་སེམས་གཉིས་ཕན་ཚུན་སྤང་འགལ་དང༌། ལྷན་ཅིག་མི་གནས་འགལ་གང་ཡང་མིན་པས་དེའི་རྟགས་ཀྱིས་དེ་མེད་པར་སྒྲུབ་པ་འབྲེལ་མེད་ཅེས་པ་ཡིན་ལ། བསྒྲུབ་བྱ་མ་ཡིན་ཏེ། སྦྱོར་བ་དེའི་དགག་བྱ་ཡིན་པའི་ཕྱིར། ཞེས་པའི་རྩོད་ཚུལ་སོགས་

― GTD002_Page_0065 ―

^{[མ་དཔེ་གཟིགས་ན་འདིར་གནོན།]}

[Full Size]

ཤཱཀྱ་བློའི་འགྲེལ་པར་གསལ་ཀྱང་འདིར་མ་ཤོང་ལ། ལུང་སྔ་མའི་དོན་ཡང༌། རྒྱལ་བ་ཅན་གྱི་འགྲེལ་བཤད་སོགས་གང་ན་ཡང་གསལ་ཁ་མེད་ལ། ཐར་ལམ་གསལ་བྱེད་དུ་སྔ་མའི་ཟུར་ཙམ་ཡོད་པས་བྲིས་ཀྱང༌། རྒྱན་རང་ཉིད་ཀྱི་གོང་འོག་བསྡུར་ན་ལྷའི་འགྲེལ་པ་དང་དགོངས་པ་གཅིག་པར་སྣང་བས། འབྲུ་སྣོན་ཚུལ་ཡང༌། ཐ་མའི་སེམས་ཀྱི་རྟགས་ཀྱིས་སོ་སྐྱེ་འཆི་ཁ་མའི་སེམས་དེ་སེམས་གཞན་དང་མཚམས་སྦྱོར་མེད་པར་བསྒྲུབ་པར་བྱ་བ་ལ་འབྲེལ་བ་ཅི་ཡང་མེད་དེ། ཐ་མའི་སེམས་དེ་དེའི་ཡུལ་ལམ་བསྒྲུབ་བྱ་མཚམས་སྦྱོར་བ་དེ་དང་ལྷན་ཅིག་གམ་ནང་འགལ་བ་ཅི་ཡོད་ཅེས་པའོ། །བསྒྲུབ་བྱར་བཏགས་པ་སྤྱིའི་སྐབས་ལ་བསམ་པ་སྔ་མ་ལྟར་རོ། ། ༼༤༽འཁོར་བས་བསྡུས་པའི་དགྲ་བཅོམ་པའི་སེམས་ཐ་མ་དེས་འཁོར་བའི་སེམས་གཞན་གྱི་ཉེར་ལེན་མི་བྱེད་པའི་ཕྱིར། ༼ཛོ༽དྲང་ངེས་རྣམ་འབྱེད་ཀྱི་མཐའ་དཔྱོད་དུ་བེམ་རིག་རྒྱུན་ཆད་འདོད་པ་ཉན་ཐོས་སྡེ་པ་ཁོ་ནས་སྒྲོ་བཏགས་མ་ཡིན་གྱི། ལུང་གི་རྗེས་འབྲང་གི་སེམས་ཙམ་པས་ཀྱང་འདོད་གསུངས་པ་འཁོར་བས་བསྡུས་པ་ལ་དགོངས་ཟེར་མི་རུང་གི །ཟག་བཅས་ལ་དགོངས་ཟེར་དགོས་སམ། དེ་ལྟར་ན་ཡང་རྟོག་པ་ཡོད་མེད་སོགས་ཀྱང་སྐབས་དང་བསྟུན་དགོས། ༼༥༽དེ་ལ་རྒྱུ་མཚན་དེའི་སྒོས་སེམས་ཐ་མར་བཤད་པའི་ཕྱིར། རྣམ་ངེས་ལས། ༼ཝོ༽དོན་བྱེད་ནུས་སྟོང་དངོས་པོར་མེད་པའི་དོན་དུ་གསུངས་པ་ལ། ༼༥༽འོ་ན་ནི་མཐའི་སྐད་ཅིག་ཉེ་བར་བརྗོད་པ་མེད་པར་ཐལ་ལོ། །ཞེ་ན་མ་ཡིན་

― GTD002_Page_0066 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ། སེམས་ཅན་དུ་བགྲང་བའི་སྐད་ཅིག་གཞན་ཉེ་བར་ལེན་པ་མེད་པ་ནི་མཐའི་མཚན་ཉིད་ཡིན་ནོ། ། ༼ཞོ༽ཞེས་འཁོར་བའི་སེམས་གཞན་མཚམས་མི་སྦྱོར་བས་མཐའ་ཞེས་བཤད་ཀྱི། འབྲས་བུ་གཏན་མེད་པ་མིན་པས་མི་འགལ་བར་གསུངས། ༼༦༽དགྲ་བཅོམ་པ་ཕུང་པོ་ལྷག་མེད་དུ་འདའ་ཁ་མའི་ཡིད་ཀྱི་ཤེས་པ་སྐད་ཅིག་ཐ་མ་༼ཟོ༽ཆོས་ཅན། ཉེ་བར་བརྗོད་པ་དངོས་པོར་མེད་པར་ཐལ། དོན་བྱེད་མི་ནུས་པའི་ཕྱིར་ཞེ་ན། དགྲ་བཅོམ་པ་ཕུང་པོ་ལྷག་མེད་དུ་མྱ་ངན་ལས་འདའ་ཁ་མའི་སེམས་ཀྱི་སྐད་ཅིག་ཐ་མ་དེས་འབྲས་བུ་ཅུང་ཟད་ཀྱང་མི་བསྐྱེད་པས་ཐ་མར་བཞག་པ་མ་ཡིན་ཏེ། ༼༦༽སེམས་ཅན་དུ་བགྲང་བའི་སེམས་ཀྱི་སྐད་ཅིག་གཞན་གྱི་ཉེ་བར་ལེན་པ་བྱེད་པའི་ནུས་པ་མེད་པ་ནི་མཐའི་མཚན་ཉིད་ཡིན་ནོ། ། ༼འོ༽ཁ་ཅིག་སེམས་ཙམ་པའི་ལུགས་ལ། ཉན་ཐོས་ལྷག་མེད་པ་སངས་རྒྱས་དང་སེམས་ཅན་གང་ཡང་མིན་ཏེ། དེ་སེམས་ཅན་མ་ཡིན་པར་ལུང་འདིས་འགྲུབ་པའི་ཕྱིར། ཞེས་སྨྲ་བ་ནི་འཁོར་བས་བསྡུས་པའི་སེམས་མེད་པ་དགོངས་པར་གསུངས་པ་དང་འགལ་ཞིང༌། གྲུབ་མཐའི་སྐབས་མ་ཕྱེད་པ་ཡིན་ཏེ། རྣམ་འགྲེལ་ངེས་ལྟར་ན། དེ་དག་ཐེག་ཆེན་ཚོགས་ལམ་ལ་འཇུག་དགོས་པའི་ཕྱིར། འོ་ན་ལུགས་འདིར་དེ་སེམས་ཅན་མ་ཡིན་པར་སྒྲུབ་བྱེད་མེད་དམ་ཞེ་ན། རྣམ་པར་གཏན་ལ་དབབ་པ་བསྡུ་བ་ལས། དབྱིངས་དེར་ཡོངས་སུ་མྱ་ངན་ལས་འདས་པ་ནི་ལྷ་ཉིད་ཀྱི་གྲངས་སུ་ཡང་མི་འགྲོ་ལ། དྲི་ཟ་ཉིད་དུ་ཡང་མ་ཡིན། ཀླུ་ཉིད་དུ་ཡང་མ་ཡིན། མིའམ་ཅི་ཉིད་དུ་ཡང་མ་ཡིན། ལྷ་མ་ཡིན་ཉིད་

― GTD002_Page_0067 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་ཡང་མ་ཡིན། གནོད་སྦྱིན་ཉིད་དུ་ཡང་མ་ཡིན་ཞིང༌། མི་ཉིད་ཀྱི་གྲངས་སུ་ཡང་མི་འགྲོ་སྟེ། མདོར་བསྡུ་ན་དེ་ནི་ཕྱོགས་བཅུའི་སེམས་ཅན་དུ་གདགས་པའི་ཁམས་ཐམས་ཅད་དང༌། འགྲོ་བ་ཐམས་ཅད་དང༌། སྐྱེ་བ་ཐམས་ཅད་དང༌། ས་ཐམས་ཅད་པོ་གང་དག་ཡིན་པ་དེ་དག་གི་གྲངས་སུ་མི་འགྲོ་སྟེ། ཞེས་པ་འདིས་འགྲུབ་བམ་སྙམ་སྟེ་དཔྱད། སྔ་མ་ཡང་ཡིག་ཆའི་ཕྱོགས་མཐུན་བྱས་པ་ཡིན་གྱི་ཐར་ལམ་གསལ་བྱེད་དང་ཊཱིཀ་ཆེན་ལྟར་ན་དཔྱད་གཞི་ཡོད།༼༣༩བ༽ ༼༣༽ཞེས་གསུངས་པའི་དགོངས་པར་དེ་ལྟར་འདོད་པར་བཤད་པའི་ཕྱིར། ༼ཡོ༽འདིའི་དོན་ཡང༌། གོས་དམར་སྡེ་བའི་གཞུང་ལས། ཇི་ལྟར་མར་མེ་ཤི་བ་ནི། །ས་ལ་མ་ཡིན་མཁའ་ལ་མིན། །ཕྱོགས་སུ་མི་འགྲོ་ཕྱོགས་མཚམས་མིན། །མར་ཟད་ཉི་ཚེ་ཤི་བ་ལྟར། །སངས་རྒྱས་མྱ་ངན་འདས་པ་ཡང༌། །ས་ལ་མ་ཡིན་མཁའ་ལ་མིན། །ཕྱོགས་སུ་མི་འགྲོ་ཕྱོགས་མཚམས་མིན། །སྲིད་ཟད་ཉི་ཚེ་འདའ་བར་འགྱུར། །ཞེས་རྒྱང་འཕེན་ལྟར་ས་དང་མཁའ་ལ་ཐིམ་པ་ཡིན་ཞིང༌། གཅེར་བུ་བས་སྟེང་ན་གདུགས་ལྟ་བུར་ཡོད་པར་འདོད་པ་དེ་འདྲར་སོང་བ་མིན་གྱི། དེ་ཉིད་དུ་རིག་པ་རྒྱུན་ཆད་པར་འདོད་པའི་དོན་ནོ། ། ༼༤༽བསྡུ་བ་ལས། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ལ་གནས་པ་ལ་ནི་སྒྲིབ་པ་འགའ་ཞིག་དང། སྒྲིབ་པའི་ལ་ལ་རྣམ་པར་བཞག་པ་དག་ཆ་གཉིས་དབྱེར་ཡོད་ཀྱི། ཞེས་གསུངས་པའི་ཕྱིར། ༼༥༽དེའི་ཚེ་དག་པའི་ཞིང་དུ་པདྨའི་སྦུབས་སུ་ཡིད་ལུས་བླངས་པས།

― GTD002_Page_0068 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་བསྟན་ཡང་དག་མཐའ་མངོན་དུ་བྱས་པས་སྒྲིབ་པའི་སེམས་རྒྱུན་ཆད་པར་ཁས་ལེན་པའི་ཕྱིར། ༼རོ༽དེའི་ཚེ་འཁྲུལ་བྱེད་མེད་པས་འཁྲུལ་ཤེས་སོགས་མི་འདོད་ཀྱི་ཟག་མེད་དབྱིངས་ལ་ཞུགས་པའི་ཡེ་ཤེས་དེ་ཁོ་ན་ཡོད་པ་གཞུང་གི་དགོངས་པ་ཡིན་ཚོད་དུ་སྣང་ཡང༌། རྩོད་ཚེ་སྙིང་རྗེ་སོགས་འཇོག་ན་བློ་རིག་གང་ཡིན་སོགས་དཔྱད་དགོས། དབྱིངས་དེར་ཞུགས་པ་ཡང་འཕོ་བ་དང་དུས་མཉམ་པས་དེའི་ཀུན་སློང་ལྷག་བཅས་ཀྱི་ཚེ་འབྱུང་ངོ༌། ། ༼༥༽བསྡུ་བ་ལས། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་ནི་སྒྲིབ་པ་དང་སྒྲིབ་པའི་རྣམ་པར་བཞག་པ་མེད་དོ། །དེ་ཅིའི་ཕྱིར་ཞེ་ན། རྒྱུ་ཚུལ་མིན་ཡིད་བྱེད་སོགས་ཀྱི་མཚན་མ་དང་འབྲས་བུ་ངག་གི་གནས་ངན་ལེན་ཐམས་ཅད་རྒྱུན་ཆད་ཅིང་འགག་པའི་ཕྱིར། ཞེས་གསུངས་པའི་ཕྱིར། ༼ལོ༽རྟེན་རྣམ་སྨིན་གྱི་རྣམ་ཤེས་ལོག་པའི་སྟོབས་ཀྱིས། སྒྲིབ་པ་བག་ཆགས་དང་བཅས་པ་མེད་པ་ཡིན་གྱི་སྤངས་པ་མ་ཡིན་ཏེ། རྣམ་པར་གཏན་ལ་དབབ་པ་བསྡུ་བ་ལས། ཉོན་མོངས་པའི་བག་ཆགས་ཞེས་བྱ་བ། དེ་ཡང་ཉན་ཐོས་དང་རང་རྒྱལ་གྱིས་ནི་མ་སྤངས་ཀྱི། དེ་བཞིན་གཤེགས་པ་ཉག་གཅིག་གིས་སྤངས་པ་ཡིན་ཏེ། དེའི་བག་ཆགས་ཡང་དག་པར་བཅོམ་པ་གང་ཡིན་པ་དེ་ནི། སངས་རྒྱས་ཀྱི་ཆོས་མ་འདྲེས་པ་ཞེས་བྱའོ། །ཞེས་གསུངས་པའི་ཕྱིར། འོན་ཀྱང་སྒྲིབ་པ་མེད་ཙམ་སངས་རྒྱས་དང་འདྲ་བའི་ཞིབ་ཆ་དགོས། ༼༤༠ན༽ ༼༢༽ཡང་ཁ་ཅིག་ན་རེ། སེམས་ཅན་ཐམས་ཅད་སངས་རྒྱས་པའི་དུས་སྲིད་པར་ཐལ། ལྷག་མེད་མྱང་འདས་ལ་གནས་པའི་དགྲ་བཅོམ་

― GTD002_Page_0069 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཡོད་པའི་ཕྱིར་ན་མ་ཁྱབ་སྟེ། ༼ཤོ༽ཁྱོད་ཀྱིས་སྒྲུབ་ཚུལ་དེ་སྐབས་གཉིས་པར་ཉན་རང་དགྲ་བཅོམ་སྐྱེ་བ་ལེན་པ་མཐར་ཐུག་ཐེག་པ་གཅིག་གྲུབ་ཀྱི་ལུགས་ཀྱི་རིགས་པའི་འགྲོས་ཡིན་པས་ལུགས་འདིར་དེ་ལ་ཁྱབ་པ་མེད་པའི་ཕྱིར། དེ་ལྟ་མ་ཡིན་པར་གྲུབ་མཐའ་གཅིག་གི་རིགས་པ་ཐམས་ཅད་ལ་སྦྱར་ཆོག་ན་ཁས་ལེན་མི་མཐུན་པ་མི་འོང་དགོས་པ་ལ་རིགས་པའི་རྗེས་འབྲང་སོགས་དང་མི་མཐུན་པ། ༼༢༽མཐར་ཐུག་ཐེག་པ་གསུམ་དུ་གྲུབ་པའི་སེམས་ཙམ་པའི་ལུགས་ཡོད་པའི་ཕྱིར། ༼༤༠བ༽ ༼༤༽སྡེ་བདུན་རྒྱན་ལས་ཀྱང། སྐྱེས་བུ་ཡིན་ན་ཕུང་པོ་བཞི་འམ་ལྔའི་ཚོགས་པ་ཡིན་པར་འདོད་པའི་རང་ཉིད་ཀྱི་གྲུབ་མཐའ་དང་འགལ། ཞེས་གསུངས་པའི་ཕྱིར་དང༌། ༼སོ༽དེ་ཡང་འགོག་པ་ལ་སྙོམས་པར་ཞུགས་པའི་རྣམ་པར་ཤེས་པ་ལུས་དང་མ་བྲལ་བ་ཡིན་ཞེས་པའི་མདོ་དང་འགལ་བ་དང༌། དེ་སེམས་ཅན་མ་ཡིན་པར་ཐལ་བ་དང༌། དེའི་ལུས་རུལ་བར་ཐལ་བ་དང༌། རང་གི་གྲུབ་མཐའ་དང་འགལ་བའི་སྐྱོན་བཞི་བརྗོད་ཡུལ་གྱི་གཙོ་བོ་བྱེ་སྨྲ་ཡིན་ལ་གང་ལྟར་ཡང་འགོག་སྙོམས་པ་སེམས་མེད་དུ་འདོད་པ་ཞིག་ལས་མ་འདས་སོ། །དེ་ལྟ་ན་དེ་ལ་སེམས་ཅན་ཡིན་ན་ཕུང་པོ་བཞི་དང་ལྡན་པས་ཁྱབ་པར་འདོད་པའི་གྲུབ་མཐའ་མེད་པས་འགལ་ལོ་ཞེ་ན་སྐྱོན་མེད་དེ་གྲུབ་མཐའ་ཞེས་པ། གང་ཟག་དེས་བརྟགས་ཤིང་དཔྱད་པ་མཐར་གཏུགས་ནས་བློ་ཕུགས་གཏོད་ས་དེ་ལ་ཟེར་ཞིང༌། དྲངས་མ་ཐག་གི་ལུང་འདི་ཡང་འདི་བས་གང་ཟག་འཇོག་ཚུལ་གྱི་ཁུངས་གཏུགས་ས་ཡིན་པས། དེ་ལ་གྲུབ་མཐའི་

― GTD002_Page_0070 ―

^{[མ་དཔེ་གཟིགས་ན་འདིར་གནོན།]}

[Full Size]

མིང་གིས་བཏགས་ནས་ལུང་དང་འགལ་བ་བརྗོད་པ་ཡིན་ཏེ། དཔེར་ན། འགྲེལ་པ་ལས། གྲུབ་པའི་མཐའ་ལས། འཇིག་རྟེན་སྣ་ཚོགས་ལས་ལས་སྐྱེས། །ཞེས་འབྱུང་བའི་ཕྱིར། ཞེས་མཛོད་རྩ་བར་གྲུབ་མཐའི་མིང་གིས་བཏགས་པ་ལྟ་བུའོ། །འཇུག་པར། མདོ་ལས་ཕུང་པོ་བརྟེན་ནས་ཡིན་གསུངས་པ། །ཞེས་པའི་མདོ་ཡང་འདི་ཡིན་ལ། ཟླ་བས་འདིས་སྟོང་ཉིད་བསྟན་པར་བཞེད་དེ། ཚིག་གི་ནུས་པ་འདོན་ཚུལ་གྱི་ཁྱད་ཆེའོ། ། ༼༤༡ན༽ ༼༣༽སྤྱོད་འཇུག་ལས་ཀྱང༌། ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །༼ཧོ༽འདི་ཐལ་འགྱུར་བ་ལྟར་ན། མངོན་པ་འོག་མ་ནས་བཤད་པའི་ཉོན་མོངས་མེད་ཀྱང་བདེན་འཛིན་གྱིས་བསྡུས་པའི་སྲེད་ལེན་གྱིས་གསོས་བཏབ་ནས་སླར་ཡང་ལས་ཉོན་གྱིས་དབང་གིས་སྐྱེ་བ་ལ་བཤད་དགོས་པས། ཁ་ཅིག་མོའུ་འགལ་གྱི་བུ་སོགས་ཉོན་མོངས་སྤངས་ཀྱང་ལས་ཀྱི་རྣམ་སྨིན་ཚེ་དེར་མྱོང་བར་བཤད་པ་སྟོང་ཐུན་དུ་བཀག་པ་ཡང་ཐལ་འགྱུར་བའི་ལུགས་ཡིན་གྱི། ལུགས་འདིར་དེ་ལྟར་ཡང་བཤད་རུང་ལ། གཙོ་བོ་ཉོན་མོངས་མེད་ཀྱང་འཕེན་བྱེད་ཀྱི་ལས་ཡོད་པ་ལ་བཤད་དོ། །འོན་ཀྱང་འདི་བ་ལྟར་ན་ལུང་དེའི་འཕྲོར། རེ་ཞིག་ཉེར་ལེན་སྲེད་པ་ནི། །མེད་ཅེས་ངེས་པ་ཉིད་ཅེ་ན། །ཞེས་ཕ་རོལ་པོས་ཚུར་སྐྱོན་སྤོང་བྱེད་ཚུལ་དང༌། སྲེད་འདི་ཉོན་མོངས་ཅན་མིན་ཡང༌། །ཀུན་རྨོངས་བཞིན་དུ་ཇི་སྟེ་མེད། །ཚོར་བའི་རྐྱེན་གྱིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །ཅེས་སོགས་ཀྱིས་སྐྱོན་སྤོང་དགག་ཚུལ་སོགས་འབྲེལ་ཆགས་པ་ཞིག་དཀའ་བར་

― GTD002_Page_0071 ―

^{[མ་དཔེ་གཟིགས་ན་འདིར་གནོན།]}

[Full Size]

སྣང་སྟེ། གྲུབ་མཐའི་གཏིང་དཔོག་པ་རྣམས་ཀྱིས་དཔྱད་པར་བྱ་ཡི། ཁྲི་དགེ་འདུན་ཕུན་ཚོགས་ཀྱི་མཚན་སྙན་རམ་གྱིས་ཁ་བསྒྱུར་བའི་བླུན་པོ་ཝ་སྐྱེས་འདྲ་བ་བདག་གིས་ནི་ལུགས་འདི་ལ་སྦྱར་ནས་དེའི་དོན་བཤད་པར་མི་སྤོབས་སོ། ། ༼༤༡བ༽ ༼༢༽དེའི་གོང་གི་ཐོགས་འགྲེལ་ལས། ཟག་པ་མེད་པའི་དབྱིངས་ལ་གནས་པའི་དགྲ་བཅོམ་པ་དང༌། ༼ཨོ༽རང་སངས་རྒྱས་རྣམས་དང༌། དབང་ཐོབ་པའི་བྱང་ཆུབ་སེམས་དཔའ་རྣམས་ལ་ཡང་དེ་བཞིན་གཤེགས་པའི། ༼༢༽ཆོས་ཀྱི་སྐུའི་ཡོན་ཏན་གྱི་ཕ་རོལ་ཏུ་ཕྱིན་པ་༼ཀ༢༽སྟེ་དབྱེ་བ་གཙང་བདག་བདེ་རྟག་གི་ཕ་རོལ་ཏུ་ཕྱིན་པ། ༼༢༽རྣམ་པ་འདི་བཞི་ཐོབ་པའི་གེགས་སུ་གྱུར་པ་རིམ་པ་བཞིན་དུ་འདི་བཞི་སྟེ། འདི་ལྟ་སྟེ། རྐྱེན་གྱི་མཚན་ཉིད་༼ཁ༢༽མ་རིག་བག་ཆགས་ཀྱི་ས་༼༢༽དང། རྒྱུའི་མཚན་ཉིད་༼ག༢༽མ་རིག་བག་ཆགས་ཀྱི་སས་བསྐྱེད་པའི་ཟག་མེད་ཀྱི་ལས་༼༢༽དང༌། འབྱུང་བའི་མཚན་ཉིད་༼ང༢༽ཡིད་ཀྱི་རང་བཞིན་གྱི་ལུས་ལེན་པའི་སྐྱེ་བ་༼༢༽དང༌། བསམ་གྱིས་མི་ཁྱབ་པའི་འཆི་འཕོ་ནི། ༼༢༽འཇིག་པའི་མཚན་ཉིད་དོ། །ཞེས་གསུངས་པའི་ཕྱིར། ༼༧༽མཛོད་ལས། འདུས་མ་བྱས་རྣམ་གསུམ་ཡང་སྟེ། །ནམ་མཁའ་དང་ནི་འགོག་པ་གཉིས། །ཞེས་གསུངས་པའི་ཕྱིར། ༼ཅ༢༽དེ་ཡང་ནམ་མཁའ་ནི་རླུང་རྟེན་པའི་དོན་བྱེད། བརྟགས་འགོག་གིས་སྤང་བྱ་འགོག་པ་དང༌། བརྟགས་མིན་གྱིས་མ་འོངས་པ་མི་སྐྱེ་བའི་དོན་བྱེད། འདུས་མ་བྱས་གཞན་རྣམས་ཆོས་གཞན་གྱི་ཆ་ལ་

― GTD002_Page_0072 ―

^{[མ་དཔེ་གཟིགས་ན་འདིར་གནོན།]}

[Full Size]

བཏགས་པ་ཙམ་ལས། དེ་གསུམ་ལྟ་བུའི་དོན་ཁྱད་པར་པ་བྱེད་པའི་ནུས་པ་མེད་དོ། ། ༼༤༢ན༽ ༼༧༽གསེར་འཕྲེང་ལས། ངོ་བོ་ནི་བསྡུ་བར། ཆོས་དབྱིངས་ཤིན་ཏུ་དག་པའི་མཚན་ཉིད་དུ་བཤད་ཅིང༌། ཞེས་གསུངས་པའི་ཕྱིར། ༼ཆ༢༽ཆོས་དབྱིངས་སུ་འདོད་ཚུལ། སྤྲིན་ནམ་མཁའ་ལ་ཡལ་བ་ན། ནམ་མཁའ་ལས་ལོགས་སུ་ཟད་ཆ་མེད་པ་ལྟར། སྒྲིབ་པ་ཆོས་དབྱིངས་སུ་ཟད་པའི་ཆ་ཡང༌། ཆོས་དབྱིངས་ལས་གཞན་མེད་དོ། །དེས་ན་ཐེག་ཆེན་གྱི་རྣམ་གྲོལ་ལམ་རང་འཛིན་རྟོག་པའི་ཞེན་གཞིར་རང་མཚན་གྱིས་མེད་པ་འགོག་བདེན་ཡིན་ལ། དེ་རང་སྐྱ་ཐུབ་པའི་རྫས་སུ་མེད་པའང་འགོག་བདེན་ཡིན་ཏེ། དེ་ལ་གཞི་ཤེས་ཀྱང་ཡོད་པའི་ཕྱིར། ཐེག་དམན་ལམ་གྱི་སྟེང་གི་ཆོས་ཀྱི་བདག་མེད་འགོག་བདེན་མིན་ཏེ། ཐེག་དམན་འཕགས་པ་རྣམས་ཀྱིས་མ་རྟོགས་པའི་ཕྱིར་དང༌། དེ་ཉིད་དམིགས་པར་བྱས་ནས་ཉོན་སྒྲིབ་སྤངས་པ་མ་ཡིན་པས། དེའི་ངོ་བོར་ཟད་པ་འབྲེལ་མེད་པའི་ཕྱིར། དེ་དག་སྟོང་ཉིད་དུ་འཇོག་པའི་དགག་བྱ་ལ་མེད་པས་ཁྱབ་ཅིང༌། འགོག་བདེན་དུ་འཇོག་པའི་དགག་བྱ་ལ་ཡོད་པས་ཁྱབ་བོ། །དེའི་ཕྱིར་ལུགས་འདི་དང་ཐལ་འགྱུར་བ་ལྟར་ན། སྟོང་ཉིད་ལ་རང་གི་དགག་བྱ་ཤེས་བྱ་ལ་མི་སྲིད་པས་མ་ཁྱབ་བོ། །༼༤༢བ༽ ༼༤༽སྒྲིབ་གཉིས་སྤངས་པའི་མཐར་ཐུག་གི་སོ་སོར་བརྟགས་འགོག་དེ་ཐེག་ཆེན་མྱང་འདས་ཀྱི་མཚན་ཉིད། ༼ཇ༢༽འཇུག་པ་རང་འགྲེལ་ལས། མ་རིག་པའི་བག་ཆགས་ནི་ཤེས་བྱ་ཡོངས་སུ་གཅོད་པའི་གེགས་སུ་གྱུར་པ་ཡིན་ལ། ཞེས་གསུངས་པའི་ཕྱིར་ན། ༼༤༽འདི་ནི་

― GTD002_Page_0073 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་མཁྱེན་ཐོབ་པའི་བར་ཆད་སྤངས་ཚུལ་ཡིན། ༼༥༽རྒྱུད་བླ་མ་ལྟར་ན་༼ཉ༢༽ཉོན་མོངས་ཤེས་བྱ་སྙོམས་འཇུག་གི །སྒྲིབ་གསུམ་ལས་ནི་ངེས་གྲོལ་ཏེ། །ཞེས་གསུངས་པ་ལྟར། ༼༤༽སྒྲིབ་གསུམ་མམ། ༼ཏ༢༽ཡང་ན། ཆོས་ལ་ཁོང་ཁྲོ་བདག་ལྟ་དང༌། །འཁོར་བའི་སྡུག་བསྔལ་གྱིས་འཇིགས་དང༌། །སེམས་ཅན་དོན་ལ་ལྟོས་མེད་ཉིད། །འདོད་ཆེན་མུ་སྟེགས་ཉན་ཐོས་དང༌། །རང་བྱུང་རྣམས་ཀྱི་སྒྲིབ་རྣམ་བཞི། །ཞེས་གསུངས་པ་ལྟར། སྲིད་མཐར་ལྟུང་བྱེད་གཉིས་དང་ཞི་མཐར་ལྟུང་བྱེད་གཉིས་ཏེ། ༼༥༽སྒྲིབ་བཞི་སྤངས་པའི་མཐར་ཐུག་གི་དེ་དགོས་ཏེ། དེ་ནི་ཆོས་སྐུའི་ཡོན་ཏན་གཙང་བདེ་རྟག་བདག་བཞིའི་དབང་དུ་བྱས་པའི་ཕྱིར་ཏེ། དེ་དག་ཀྱང་དོན་གཅིག་ལ་ལྡོག་པའི་བཤད་ཚུལ་ཡིན་ནོ། ། ༼༧༽ཐེག་དམན་གཉིས་ཀས་ཐོག་མར་ལྷག་མེད་མྱང་འདས་མངོན་དུ་བྱས་ནས་རྗེས་ཐོབ་ཏུ་ལངས་པ་དང་དུས་མཚུངས་པར་ལྷག་བཅས་མྱང་འདས་མངོན་དུ་བྱས་པའི་ཕྱིར་ཏེ། རིགས་པ་དྲུག་ཅུ་བའི་འགྲེལ་པར་༼ཐ༢༽ཤཱ་རིའི་བུ་ཡིས་མྱ་ངན་འདས། །མངོན་དུ་བྱས་ནས་བཤད་པ་ཡིན། །ཞེས་པའི་མདོ་དྲངས་ཏེ། ཤཱ་རིའི་བུས། ལྷག་མེད་མྱང་འདས་མངོན་དུ་བྱས་རྗེས་རྗེས་བཟླས་བྱ་བའི་མདོ་བཤད་པར། ༼༧༽བཤད་པའི་ཕྱིར་དང༌། ༼༤༣ན༽ ༼༡༽གང་སྡུག་བསྔལ་འདི་ངེས་པར་སྤངས་པ་མ་ལུས་པར་སྤངས་པ་ཞེས་སོགས་གསུངས་པའི་ཕྱིར། ༼ད༢༽ཁྱབ་སྟེ། འདི་ཞེས་པའི་ཉེ་ཚིག་གིས་ཚེ་དེ་ལ་གོ་དགོས་ཤིང༌། ཉོན་མོངས་ཞེས་

― GTD002_Page_0074 ―

^{[མ་དཔེ་གཟིགས་ན་འདིར་གནོན།]}

[Full Size]

མ་གསུངས་པར་སྡུག་བསྔལ་སྤྱི་ལ་སྦྱར་བས་ཟད་པ་དངོས་ལ་མི་རུང་གི །ཟད་ཚུལ་ཐུན་མོང་མ་ཡིན་པ་ཞིག་ལྷག་མ་མེད་པའི་དོན་དུ་གསུངས་པའི་ཕྱིར། ༼༦༽ཟག་མེད་ཀྱི་ཕུང་པོ་ལྔ་དང་ལྡན་པའི་ཕྱིར། དེར་ཐལ། རང་དོན་གྱི་སྐུ་ལ་བརྟེན་པའི་ཡོན་ཏན་སྟོབས་བཅུ་མི་འཇིགས་པ་བཞི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་སོ་གཉིས་གཞན་དོན་གཟུགས་ཀྱི་སྐུ་ལ་བརྟེན་པའི་ཡོན་ཏན་ཏེ་མཚན་སོ་གཉིས་དང་བཅས་སྡོམ་པའི་སྟོབས་སོགས་ཀྱི་ཡོན་ཏན་དྲུག་ཅུ་རྩ་བཞི་དང་ལྡན་པའི་ཕྱིར། རྒྱུད་བླ་མ་ལས། སྐུ་གཉིས་ལས་དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། ། ༼ན༢༽གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། ། ༼༤༣བ༽ ༼༡༽མཛོད་ལས། འབྲས་བུ་ཐ་མ་ནི། །ཁམས་གསུམ་དུའོ། །ཞེས་གསུངས་པའི་ཕྱིར། ༼༥༽དེ་ལ་ཇོ་ནང་བ་ཁོ་ན་རེ། མྱང་འདས་ལ་ལྷག་བཅས་མྱང་འདས་མི་འཐད་པར་ཐལ། ཐེག་དམན་གང་ཟག་རྒྱུད་ཀྱི་མྱང་འདས་མི་ཡོང་བའི་ཕྱིར། ༼པ༢༽མཐའ་དཔྱོད་བསིལ་ལྡན་རི་ལ་རྩེན་པ་ཡི། །མཆན་འགྲེལ་གདོང་ལྔ་བཞད་པའི་སྒྲ་དབྱངས་ཀྱིས། །ལུང་རིགས་མཆེ་སྡེར་བྲལ་བ་ཤ་བོའི་ཚོགས། །ཚིགས་བཅད་རྭ་བཅུ་ངོམས་ལ་འཇིགས་པ་སྟེར། །མཚམས་འདིར་བཀྲ་ཤིས་འཁྱིལ་གྱི་ཕར་ཕྱིན་སྐབས་དང་པོའི་པར་རྙིང་ལ་ཤོག་གྲངས་ཀྱི་ཁ་ཡིག་ནོར་ཡོད་པས་དེ་དང་བསྟུན་ཚེ། ༈ ༼༥༧ན༽ ༼༢༽རྟེན་སྒོ་གསུམ་མི་མཐུན་ཕྱོགས་ལས་བསྡམས་ཤིང༌། རྣལ་འབྱོར་ཅན་རྣམས་༼པ༢༽འདིར་རྣལ་འབྱོར་ཅན་ལ་གཞན་

― GTD002_Page_0075 ―

^{[མ་དཔེ་གཟིགས་ན་འདིར་གནོན།]}

[Full Size]

སྡེ་ཡང་ཡོད་ཅིང༌། དབང་ཕྱུག་ནི། བདེན་བཞི་ལ་དམིགས་པ་སོགས་ནང་པའི་བསྟན་པས་བསྡུས་པའི་ཞི་ལྷག་ཟུང་འབྲེལ་ཅན་རྣམས་སོ། །དེ་ཐམས་ཅད་ཀྱི་གཙོ་བོར་གྱུར་པ་ནི་སངས་རྒྱས་བཅོམ་ལྡན་འདས་ཉག་ཅིག་ཡིན་པས། རྟེན་སྟོན་པ་དང་འབྲེལ་བའི་དབང་གིས་སྤྱི་སྒྲ་རྣམ་མཁྱེན་ལ་གོ་བར་གསུངས་སོ། །ཟུར་དང་པོ་གྲུབ་སྟེ། ཐེག་བསྡུས་བཤད་སྦྱར་ལས། ཞི་གནས་དང་ལྷག་མཐོང་ཟུང་དུ་འབྲེལ་བར་རང་གི་ངང་གིས་འཇུག་པ་དང་ལྡན་པ་ནི་རྣལ་འབྱོར་རོ། །དེ་སུ་དག་ལ་ཡོད་པ་དེ་ནི་རྣལ་འབྱོར་བའོ། །ཞེས་གསུངས་པའི་ཕྱིར། རྣལ་འབྱོར་གྱི་དོན་ཡང༌། ཞི་གནས་ལ་བརྟེན་ནས་བྱིང་རྒོད་ཀྱི་གཡེང་བ་སོགས་སེམས་ལས་སུ་མི་རུང་བར་བྱེད་པའི་སྐྱོན་དང་བྲལ་བ་རླུང་མེད་པའི་མར་མེ་བཞིན་རྣལ་དུ་གནས་པ་དང༌། ལྷག་མཐོང་གི་འོད་གསལ་བས། མར་མེས་མུན་པ་སེལ་བ་ལྟར་ཡུལ་སོ་སོར་གཅོད་པ་དང༌། སྤྲུལ་བསྒྱུར་སོགས་ཀྱི་དོན་མཐའ་དག་འབྱོར་བའམ་ཕུན་སུམ་ཚོགས་པར་བྱེད་པས་རྣལ་འབྱོར་ཞེས་བཤད་པའི་ཕྱིར། དབུས་མཐའ་ལས། དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་བར་འགྱུར། །ཞེས་གསུངས་པ་འདི་རྣལ་འབྱོར་གྱི་སྒྲ་བཤད་དུ་རུང་བར་སྣང་ལ། རྫུ་འཕྲུལ་གྱི་རྐང་པའི་སྒྲ་བཤད་དུའང་དེའི་འགྲེལ་བཤད་དང༌། མཆིམས་ཊཱིཀ་སོགས་ལས་བཤད་དོ། །༼༥༧བ༽ ༼༡༽འཁོར་སྒྱུར་མེད་པའི་ས་ཕྱོགས་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། འཁོར་སྒྱུར་

― GTD002_Page_0076 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་འཁོར་ལོ་ཡོད་པར་ཐལ། འདོད་པའི་ཕྱིར། ༼ཕ༢༽འདི་ལ་ཁ་ཅིག །གསེར་མེད་པའི་ས་ཕྱོགས་ཆོས་ཅན། གསེར་ཡོད་པར་ཐལ། གསེར་ལྟ་བུའི་སེམས་བསྐྱེད་ཡོད་པའི་ཕྱིར། ཁྱབ་པ་དོན་གྱིས་ཁས་ཟེར་བར་སྣང༌། ༼༢༽བྱས་པ་ལ་ཁོ་ན་རེ། མཚན་ཉིད་དེ་རུང་བར་ཐལ། རྣམ་བཤད་ལས། འཁོར་ལོ་དང་ཆོས་མཐུན་པའི་ཕྱིར་འཁོར་ལོ་ཞེས་བྱའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་དེ་དང་མཚུངས་ཚུལ་ཙམ་བསྟན་པའི་ཕྱིར། ༼བ༢༽བྱེ་སྨྲས་འཁོར་ལོ་དང་མཐུན་པའི་ཕྱིར་ཆོས་འཁོར་མཐོང་ལམ་དུ་འདོད་ལ། མཐུན་ཚུལ་དབྱིག་བཤེས་ཀྱིས་ཆོས་དྲུག་གིས་སྦྱར་རོ། །དེའི་ནང་ཚན་ཆོས་བཟོད་ཀྱང་ཆོས་འཁོར་ཡིན་ཏེ། ཆོས་དྲུག་དཔེ་ལ་ཡང་ཅིག་ཅར་ཚང་བ་མེད་པའི་ཕྱིར། དེའི་ཚེ་ལྷ་རྣམས་ཀྱིས་ཆོས་འཁོར་བསྐོར་བར་བསྒྲགས་པ་ཙམ་གྱི་རྒྱུ་མཚན་ལྟར་ན། གཞན་དག་གི་མཐོང་ལམ་ཆོས་འཁོར་མིན་ཏེ། གཞན་དུ་ན་དེ་དག་གང་ལ་བརྟེན་པའི་ལུང་ཡང་ལུང་གི་ཆོས་འཁོར་དུ་ཐལ་བའི་ཕྱིར་རོ། །དེས་བཟླས་པ་གསུམ་མཐོང་སྒོམ་མི་སློབ་ལམ་གསུམ་ལ་བཟླས་པར་འདོད་པ་རང་གི་ཁས་བླངས་དང་འགལ་བར་དབྱིག་གཉེན་གྱིས་གསུངས་ལ། དེ་གསུམ་ལ་བཟླས་ཚུལ་ཡང་ལག་རྗེས་ཐ་དད་པ་ཙམ་ལས་སོ་སོའི་བར་སྐབས་སུ་མིན་ཏེ། ལུགས་དེར་མཐོང་སྒོམ་དཀྱུས་གཅིག་ཡིན་པའི་ཕྱིར་རོ། །དབྱངས་སྒྲོགས་ནི། དེའི་ཚོགས་པའི་འཕགས་ལམ་ཡན་ལག་བརྒྱད་ཆོས་གསུམ་གྱིས་ཆོས་འཁོར་དང་མཐུན་པར་བཤད་ལ། འདི་འདྲའི་ཐ་སྙད་ཙམ་གོང་མའི་སྐབས་སུ་ཡང་གཏན་མེད་པ་མ་ཡིན་ཏེ། རྗེའི་

― GTD002_Page_0077 ―

^{[མ་དཔེ་གཟིགས་ན་འདིར་གནོན།]}

[Full Size]

གསུང་ཟིན་བྲིས་ངན་སོང་སྦྱོང་རྒྱུད་ཀྱི་མཆན་ལས། ཆོས་ཀྱི་འཁོར་ལོ་ནི་སྒྲ་ཡངས་པའི་དབང་དུ་བྱས་ན་ལུང་རྟོགས་གཉིས། དོག་པའི་དབང་དུ་བྱས་ན་རྟོགས་པའི་ཆོས་འཕགས་ལམ་ཡན་ལག་བརྒྱད་དེ་དེའི་དབང་དུ་བྱས་ནས། འཁོར་ལོ་ལ་རྟེན་ལྟེ་བ་གཅོད་པའི་རྩིབས་སྡུད་པའི་མུ་ཁྱུད་གསུམ་ཡོད་པ་ལྟར། ཡང་དག་པའི་ངག་ཅེས་སོགས་གསུངས་པའི་ཕྱིར་རོ། །༼༥༨ན༽ ༼༡༽ལྷག་པའི་བསླབ་པ་གསུམ་རེ་རེ་ནས་ཆོས་ཅན། ལམ་ཞུགས་ཀྱི་མངོན་རྟོགས་ཡིན་པར་ཐལ། རྟོགས་པའི་ཆོས་འཁོར་ཡིན་པའི་ཕྱིར། དེར་ཐལ། རྟོགས་པའི་བསྟན་པ་ཡིན་པའི་ཕྱིར། རྟགས་ཆོས་ཅན་གྱིས་གྲུབ་ཅིང༌། ༼མ༢༽ཞེས་པ་ཆོས་ཅན་དེ་ཡིན་པའི་ཕྱིར། ཟེར་བ་ཙམ་མིན་གྱི་ལྷག་པའི་དོན་ཡོད་པའི་ཕྱིར། ཞེས་པ་སྟེ། དེ་ནི་མདོ་སྡེ་རྒྱན་ལས། གཞན་དང་ཐུན་མོང་མ་ཡིན་ལྡན་པ་དང༌། །ཁམས་གསུམ་ཉོན་མོངས་རྣམ་སྤོང་རྫོགས་བྱེད་དང༌། །ངོ་བོ་ཉིད་དག་དྲི་མ་དག་པ་སྟེ། །ཚངས་སྤྱོད་ཡོན་ཏན་བཞི་ལྡན་ཡིན་པར་འདོད། །ཅེས་དང༌། བློ་བརྟན་གྱི་འགྲེལ་བཤད་ལས། མུ་སྟེགས་པ་རྣམས་ལ་མེད་པས་ན་གཅིག་པུ་ཞེས་བྱའོ། །ཁམས་གསུམ་པའི་ཉོན་མོངས་སྤངས་པས་རྫོགས་པ་ཞེས་བྱ་ལ། འཇིག་རྟེན་པའི་ལམ་གྱིས་ཉོན་མོངས་པ་སྤོང་ཡང༌། སྲིད་པའི་རྩེ་མོའི་ཉོན་མོངས་སྤོང་བར་མི་ནུས་པས་རྫོགས་པ་ཞེས་མི་བྱའོ། །ཞེས་སོགས་ཀྱི་ཁྱད་པར་བཞི་གསུངས་པའི་ཕྱིར་ནང་པའི་བསྟན་པ་ཁོ་ནར་འགྲུབ་བོ། ། ༼༣༽མཛོད་ལས། སྟོན་པའི་དམ་

― GTD002_Page_0078 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པར་བྱེད་པ་ཁོ་ན་ཡིན། །ཞེས་གསུངས་པའི་ཕྱིར། ༼ཙ༢༽ལུང་ལ་གསར་དུ་དད་པས་ཞུགས་པའི་ཐོས་སོགས་ཀྱི་ཤེས་རབ་ཀྱང་བསྟན་པ་ཡིན་པས་ལུང་རྟོགས་ཀྱི་བསྟན་པར་ཞུགས་པ་རིམ་ཅན་དུ་འཇོག་དཀའ་ལ། འདི་འདྲ་རེ་རེ་ཙམ་ཡོད་པས་བསྟན་པ་ཡོད་པར་ཡང་མི་འགྱུར་ཏེ། འདུལ་བ་མེད་པར་མདོ་མངོན་ཡོད་ཀྱང་བསྟན་པ་ཡོད་པར་མི་འཇོག་པའམ། ཡང་ན་ཡོད་ཀྱང་གནས་འདུལ་བ་མེད་པའི་ཕྱིར། གནས་པ་མ་ཡིན་པར་འདོད་དགོས་པའི་ཕྱིར། ལུང་ཞུ་བ་ལས། ཉེ་བར་འཁོར། ཇི་སྲིད་དུ་ལས་ཀྱང་ཡོད། ནན་ཏན་བྱེད་པ་ཡང་ཡོད་པ་དེ་སྲིད་དུ་དམ་པའི་ཆོས་གནས་པ་ཞེས་བྱའོ། །ལས་ཀྱང་མེད། ནན་ཏན་བྱེད་པ་ཡང་མེད་ན་དམ་པའི་ཆོས་ཞིག་པ་ཞེས་བྱའོ། །ཞེས་དང༌། འདུལ་བར་བསྟོད་པ་ལས། མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང༌། །ཞེས་གསུངས་པའི་ཕྱིར། ༼༥༨བ༽ ༼༡༽རིམ་གྱིས་བསྐོར་ཚུལ་བཤད་པའི་ཕྱིར། ༼ཚ༢༽འདི་ནི་སྔོན་རུས་སྦལ་དུ་སྐྱེས་པའི་དུས་ཀྱི་སྨོན་ལམ་གྱི་དབང་གིས། དང་པོར་ཀོའུ་ཏེ་ནྱ། མིང་ཅན། བཟང་ལྡན། རླང་པ། རྟ་ཐུལ་ལྔ་དང༌། ལྷ་བརྒྱད་ཁྲི་བཏུལ་བར་གསུངས་སོ། ། ༼༥༽མཛོད་རང་འགྲེལ་ལས། ༼ཛ༢༽བྱེ་སྨྲ་སྔ་མའི་འདོད་པ་བཀོད་ཟིན་ཏེ། ལོགས་སུ་སློབ་དཔོན་རང་གི་ལུགས་བཞག་འདོད་ནས། ༼༦༽ཡང་ན་འཕགས་པའི་ལམ་ཐམས་ཅད་ཀྱང་གདུལ་བྱའི་རྒྱུད་ལ་འཇུག་པའི་ཕྱིར་འཁོར་ལོ་ཡིན་ཏེ།

― GTD002_Page_0079 ―

^{[མ་དཔེ་གཟིགས་ན་འདིར་གནོན།]}

[Full Size]

༼ཝ༢༽ཞེས་པ་འདི་ལ་བརྟེན་ནས་མཁས་གྲུབ་རྟོགས་དཀའི་སྣང་བར། ཚོགས་སྦྱོར་ནི་ཆོས་འཁོར་མ་ཡིན་ཏེ། མི་མཐུན་ཕྱོགས་ཀྱི་ས་བོན་གཅོད་མི་ནུས་པའི་ཕྱིར་རོ། །ཞེས་འཕགས་ལམ་ཁོ་ནར་གསུངས་ཀྱང༌། སྔར་དྲངས་པ་རྣམས་དང༌། ཚིག་གསལ་ལས། ཆོས་ཀྱི་འཁོར་ལོ་ཁ་ཅིག་ནི་ཚོགས་ཀྱི་ལམ་མོ། །ཞེས་གསལ་བར་གསུངས་པས་ཁེགས་སོ། ། ༼༥༩ན༽ ༼༤༽དང་པོ་གྲུབ་སྟེ། སྒྲུབ་པའི་སྐབས་ཀྱི་ཉི་ཁྲི་ལས། མདོར་བསྟན་པ་ནི། མི་འཇིགས་པ་ཐོབ་པའི་གནས་ཏེ། ཇི་ལྟར་ན་༼ཞ༢༽འདུ་ཤེས་ཐམས་ཅད་ཀྱི་ནང་ནས་མི་རྟག་པའི་འདུ་ཤེས་མཆོག །རྗེས་ཐམས་ཅད་ཀྱི་ནང་ནས་བ་ལང་གི་རྗེས་མཆོག་ཏུ་བཤད་པ་ལྟར་བ་ལང་གི་ཐོག་མར་ཁྱུ་མཆོག་འགྲོ་བའི་རྗེས་སུ་སོང་ན་གནོད་པ་འབྱུང་མི་སྲིད་པ་ལྟར། རྒྱལ་བས་བླང་དོར་བསྟན་པའི་རྗེས་འབྲང་རྣམས་བསླུ་མི་སྲིད་པ་གཞན་ལ་བརྟེན་པའི་དམ་བཅའ་གཉིས་སྟོན་པར་༼༥༽ཁྱུ་མཆོག་རླབས་པོ་ཆེའི་གནས་སུ་དམ་བཅའ་འོ། ། ༼ཟ༢༽རང་ཉིད་ཀྱི་སྤངས་རྟོགས་ལ་གཞན་གྱིས་ཀླན་ཀའི་སྐབས་མེད་པས་རང་ལ་བརྟེན་པའི་དམ་བཅའ་གཉིས་སྟོན་པར། ༼༥༽འཁོར་གྱི་ནང་དུ་སེང་གེའི་སྒྲ་སྒྲོག་གོ ། ༼༦༽དགོངས་འགྲེལ་ལས་ཀྱང༌། ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་སྔོན་ལྷར་གྱུར་པ་སོགས་གསུངས་པའི་ཕྱིར། ༼འ༢༽གྲུབ་མཐའ་ཆེན་མོར། སྔོན་འདི་འདྲ་མ་མཐོང་བ་དང་མ་ཐོས་པས་ངོ་མཚར་བ་དང༌། རྨད་དུ་བྱུང་བར་བཤད་ལ། འགྲེལ་ཆེན་ལས།

― GTD002_Page_0080 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུ་ཕུན་སུམ་ཚོགས་པས་ངོ་མཚར་བ་དང༌། འབྲས་བུ་ཕུན་སུམ་ཚོགས་པས་རྨད་དུ་བྱུང་བར་བཤད་དོ། ། ༼༥༩བ༽ ༼༣༽དེ་ལ་ཁོ་ན་རེ། ལུང་གི་ཆོས་འཁོར་བསྐོར་བའི་ས་བརྒྱད་པ་བ་ཡོད་པར་ཐལ། འགྲེལ་པ་ལས། ཆོས་ཀྱི་འཁོར་ལོ་རབ་ཏུ་བསྐོར་བ་དང༌། ཞེས་གསུངས་པའི་ཕྱིར་ན་མ་ཁྱབ་སྟེ། མ་འོངས་པ་ན་ཆོས་འཁོར་བསྐོར་བའི་སྦྱོར་བའི་ནུས་པ་༼ཡ༢༽འབད་རྩོལ་རགས་པ་ཞི་བའི་སྒོ་ནས་ཆོས་སྟོན་པའི་ནུས་པ་ཁྱད་པར་ཅན། ༼༤༽འདི་ནས་ཐོབ་པར་བཤད་པ་ཙམ་ཡིན་པའི་ཕྱིར། ༼༧༽དང་པོ་ལ་བསོད་གྲགས་སོགས་ཁ་ཅིག་ན་རེ་༼ར༢༽འདིར་བསྟན་འཁོར་ལོ་གསུམ་གསུངས་པའི་ཚེ་ལྷ་རྣམས་ཀྱིས་ཨ་ལ་ལ་འཛམ་བུའི་གླིང་དུ་ཆོས་ཀྱི་འཁོར་ལོ་བསྐོར་བར་མཐོང་ངོ༌། །ཞེས་པ་དང༌། ཆོས་ཀྱི་འཁོར་ལོ་གཉིས་པ་བསྐོར་བར་མཐོང་ངོ༌། །ཞེས་སོགས་བསྒྲགས་པར་བཤད་ཀྱི་གཞན་ལ་མ་བཤད་པའི་ཕྱིར་དང༌། འཁོར་ལོ་གསུམ་གྱི་ཐ་སྙད་གཙོ་བོར་དགོངས་འགྲེལ་ལ་བརྟེན་པ་ཡིན་པས་འདིར་བསྟན་གྱི་འཁོར་ལོ་གསུམ་ལས་ལོགས་སུ་འཁོར་ལོ་གསུམ་འཇོག་པ་ལ་མདོའི་ཁུངས་མེད་པའི་ཕྱིར་ན། ༼༧༽སངས་རྒྱས་ཀྱི་བཀའ་ཐམས་ཅད་འཁོར་ལོ་རིམ་པ་གསུམ་དུ་མ་འདུས་ཟེར། ༼༦༠ན༽ ༼༣༽རྒྱུད་སྡེ་སྤྱི་རྣམ་ལས། དང་པོ་ནི་ཐེག་དམན་གྱི་སྡེ་སྣོད་དང༌། གཞན་གཉིས་ཐེག་ཆེན་གྱི་སྡེ་སྣོད་དོ། །ཞེས་གསུངས་པའི་ཕྱིར། ༼ལ༢༽འདི་ནི་གྲུབ་མཐའ་རྩ་བར་ཡང༌། འཁོར་ལོ་དང་པོའི་དོན་བཞིན་དོན་སྨྲ་དང༌། །བར་མཐའི་ལུགས་བཞིན་དབུ་སེམས་གཉིས་བཞག་ཕྱིར། །ཞེས་པ་དང་མཐུན་ལ། འདི་ནི་རིན་ཆེན་བྱང་

― GTD002_Page_0081 ―

^{[མ་དཔེ་གཟིགས་ན་འདིར་གནོན།]}

[Full Size]

ཆུབ་ཀྱི་སྤྱི་དོན་ལས་ཀྱང༌། བདག་མེད་གཏན་ལ་འབེབ་ཚུལ་མི་འདྲ་བ་གསུམ་གྱི་སྒོ་ནས་འཁོར་ལོ་གསུམ་གྱི་ཐ་སྙད་འཇོག་དགོས་ཞེས་པ་ལྟར། གྲུབ་མཐའ་གསུམ་གྱི་ལྟ་བའི་ཆ་ནས་ཕྱེ་བ་ཡིན་གྱི། སྤྱོད་པའི་ཆ་དེ་དག་ལ་མི་མཐུན་པ་ཆེར་མེད་པས། ཕལ་ཆེར་རྒྱ་ཆེའི་ལམ་མཐུན་ཟབ་ལ་མིན། །ཞེས་གསུངས་སོ། །འོན་ཀྱང་སེམས་བསྐྱེད་པ་ཙམ་གྱིས་ཀྱང་རིགས་ཀྱི་སྒོ་ནས་ཉན་རང་ཐམས་ཅད་ཟིལ་གྱིས་གནོན་ཏེ། དགྲ་བཅོམ་ཆེན་པོ་རྣམས་ཀྱིས་ཀྱང་ཕྱག་བྱ་བའི་འོས་སུ་བཤད་པ་སོགས་ཁྱད་པར་འགའ་ཞིག་བྱེ་སྨྲ་རྣམས་མི་འདོད་དེ། དེ་འདྲ་ལ་བརྟེན་ནས་ཐེག་ཆེན་བཀའ་མ་ཡིན་པར་བསྒྲུབས་པའི་ཚེ་དགྲ་བཅོམ་ལ་སྨོད་པ་དང་ཁྱིམ་པ་ལ་འདུད་པར་སྨྲ་བའི་ཕྱིར། ཞེས་རྩོད་པར་རྟོག་གེ་འབར་བ་ལས་རྒྱ་ཆེར་གསུངས་སོ། །༼༦༠བ༽ ༼༡༽དེས་འཁོར་ལོ་དང་པོ་བར་བ་གཉིས་ཀའི་གསུང་ཚུལ་དངོས་སུ་བསྟན་ཅིང་བར་ལ་དྲི་བ་དངོས་སུ་བསྟན་ནས་ཐ་མ་བཀའ་སྩལ་ཚུལ་ཤུགས་ལ་བསྟན་པའི་ཕྱིར་ཏེ། ༼༡༽ལེགས་བཤད་སྙིང་པོ་ལས། ཤུགས་ལ་གནས་པའི་དོན་དེ་ཉིད་དུས་ཀྱི་རིམ་པའི་སྒོ་ནས་འཁོར་ལོ་གསུམ་དང་སྦྱར་བའི་ཞེས་གསུངས་པའི་ཕྱིར། ༼ཤ༢༽འདིའི་དོན་ཡང་གཉན་སྟོན་གྱི་དྲང་ངེས་རྣམ་འབྱེད་སོགས་དུ་མར། དང་པོ་གཉིས་དྲང་དོན་དང༌། ཐ་མ་ངེས་དོན་དུ་དྲི་ཞུས་ཀྱིས་ཤུགས་ལ་བསྟན་པར་བཤད་པ་ནི། དཀའ་འགྲེལ་ལས། དོན་གྱིས་འཁོར་ལོ་དང་པོ་དང་བར་བ་གཉིས་དྲང་དོན་དང་ཞེས་པར་མཐུན་ཡང༌། ཡིག་ཆ་རང་གི་དགོངས་པ་ནི་དྲིས་ཞུས་སུ་འཁོར་ལོ་

― GTD002_Page_0082 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་གྱི་ཐ་སྙད་མ་སྦྱར་ཡང༌། གསུངས་ཚུལ་གོ་རིམ་བཞིན་བཀོད་པའི་ཤུགས་ལ་འཁོར་ལོ་གསུམ་ཞེས་པའི་ཐ་སྙད་ཐོབ་ཡོད་པ་གྲུབ་དོན་དུ་ཐ་སྙད་དེ་དངོས་སུ་སྦྱར་བ་ལ་མངོན་ནོ། །སྔ་མ་རིགས་པས་ཀྱང་མི་འགྲུབ་སྟེ། ལེགས་བཤད་སྙིང་པོར་ཚིག་དེའི་གྲུབ་དོན་འཆད་པའི་སྐབས་སུ་གསུངས་པའི་དྲི་ཞུས་ཀྱི་ཤུགས་ཞེས་པ་ལན་ཡང་དེར་བསྡུ་བའི་དབང་དུ་བྱས་པ་ཡིན་ཏེ། ལན་གྱི་དངོས་སུ་གསུངས་ཟིན་ན་འདི་ནས་གཟོད་གསལ་བར་གསུངས་ཞེས་མཚམས་ཕྱེ་བ་འབྲེལ་མེད་ཅིང༌། ལན་ཡང་དེར་བསྡུས་པ་ཡིན་ན་དྲང་ངེས་ཀྱི་ཁྱད་པར་ཤུགས་བསྟན་ཙམ་དུ་མི་རུང་སྟེ། དགོངས་པ་གཞན་དུ་འགྲེལ་ཚུལ་ཆེས་གསལ་བས་གྲུབ་དོན་དུ་དྲང་བའི་དོན། རྩོད་པའི་གཞིའི་གནས་ཞེས་མིང་ཙམ་བཤད་པ་ལས་ཀྱང་ཆེས་ལྷག་པའི་ཕྱིར་རོ། ། ༼༦༡ན༽ ༼༦༽རྣམ་བཤད་ལས། གཞུག་པ་ལ་ལྡེམ་པོར་དགོངས་པ་ནི། རང་སྡེ་དང་གཞན་སྡེ་ཁ་ཅིག་རྗེས་སུ་བཟུང་བའི་ཆེད་དུ་གང་ཟག་གི་བདག་ཡོད་པར་གསུངས་པ་ལྟ་བུའོ། །ཞེས་གསུངས་པའི་ཕྱིར། ༼ས༢༽འདིའི་གང་ཟག་གི་བདག་བསྟན་ཚུལ་ནི་ཁུར་དང་ཁུར་མཁན་ངོ་བོ་ཐ་དད་པ་ལྟར། ཕུང་པོ་ལེན་པ་པོའི་ང་ལོགས་སུ་ཡོད་པར་བཤད་དེ་རང་སྐྱ་བའི་དོན་ཡང་དེ་ཡིན་ནོ། །འདི་ནི་གཞུག་པ་ལྡེམ་དགོངས་ཡིན་ལ། དགོངས་འགྲེལ་མཚན་ཉིད་ལྡེམ་དགོངས་སུ་རྣམ་བཤད་བཞིན་དུ་པཎ་ཆེན་སྤྱི་དོན་ལས་ཀྱང་བཤད་པ་ནི། འཕགས་སེང་དྲང་ངེས་ཀྱི་ཁྱད་པར་ཐལ་འགྱུར་བ་ལྟར་བཞེད་པས་དེའི་དབང་དུ་བྱས་པ་ཡིན་གྱི། རྣལ་འབྱོར་སྤྱོད་པའི་

― GTD002_Page_0083 ―

^{[མ་དཔེ་གཟིགས་ན་འདིར་གནོན།]}

[Full Size]

དབུ་མ་པ་སྤྱིའི་ལུགས་མ་ཡིན་ནོ། ། ༼༦༡བ༽ ༼༡༽ གཞན་ཡང་བདེན་བཞིའི་ཆོས་འཁོར་གྱི་མདོ་ལས། སྡུག་བསྔལ་ཤེས་པར་བྱ་སྟེ། ཤེས་པར་བྱར་མེད་ཅེས་པའི་མདོ་ཆོས་ཅན། དགོངས་འགྲེལ་ནས་བཤད་པའི་དེར་ཐལ། འཁོར་ལོ་དང་པོ་ཡིན་པའི་ཕྱིར། ༼ཧ༢༽ཚིག་འདི་བཟླས་པ་གསུམ་པར་བཤད་ལ་རྒྱལ་སྲས་མར་ཡོངས་སུ་ཤེས་སོ་ཞེས་བྱ་བ་ནི་གསུམ་པ་ཡིན་ཏེ་ཞེས་གསུངས་པ། བྱེད་པ་འབྲས་བུ་ལ་བཟླས་པར་གོ་སླ་ལ། སྔ་མ་ཡང་འཇོག་ཚེ་བདག་མེད་ཙམ་ལ་མ་སྦྱར་བར་ཟད་ཤེས་དང་མི་སྐྱེ་བ་ཤེས་པའི་དབྱེ་བས་ཕྱེ་སྟེ་སླར་ཤེས་པར་བྱར་མེད་པའང་བསྟན་ནམ་དཔྱད། བྱེ་སྨྲ་མིག་སྐྱེས་ཞེས་སོགས་རྣམ་གྲངས་སུ་འདོད་པས་རྒྱས་པར་ན་བཟླས་པ་བཅུ་གཉིས་དང་རྣམ་གྲངས་ཞེ་བརྒྱད་ཀྱང་འདོད་ལ། མདོ་སྡེ་པ་ཡན་གྱིས་བཟླས་པ་གསུམ་གྱི་ཟུར་བཅུ་གཉིས་རྣམ་གྲངས་སུ་འདོད་པས་གཉིས་ཀ་ལ་དབྱེ་བ་དེ་ལས་མེད་པར་འདོད་དོ། །བློ་མིག་ཤེས་རིག་བཞི་བསོད་གྲགས་ཀྱིས་སྦྱོར་མཐོང་སོགས་བཞི་ལ་སྦྱར་ཡང༌། མཛོད་འགྲེལ་རྒྱལ་སྲས་མ་ལས། དེ་ལ་ཟག་པ་མེད་པའི་ཤེས་རབ་ནི་མངོན་སུམ་གྱི་ཕྱིར་མིག་གོ །ཐེ་ཚོམ་མེད་པའི་ཕྱིར་ཤེས་པའོ། །ཡང་དག་པའི་དོན་གྱི་ཕྱིར་རིག་པའོ། །རྣམ་པར་དག་པའི་ཕྱིར་བློ་སྟེ། ཞེས་ངོ་བོ་མཐོང་ལམ་གཅིག་པུ་ལ་ལྡོག་པ་ཐ་དད་པའི་རྣམ་གྲངས་སུ་གསུངས་པ་ལྟར། བརྒྱད་སྟོང་འགྲེལ་ཆེན་དུ་ཡང་གསུངས་པས་ཕྱོགས་ཕྱི་མ་བཟུང་འོས་སོ། ། ༼༥༽རྟགས་གྲུབ་སྟེ། རྣམ་འགྲེལ་ལས། ༼ཧ༢༽མ་རིག་གིས་བསླད་བདག་ཉིད་ཅན། །

― GTD002_Page_0084 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་སོགས་དང༌། ཕ་རོལ་མཐོང་མིན་ཐམས་ཅད་ཀྱིས། །ཞེས་སོགས་སྔར་བཤད་པའི་དགོངས་གཞི་དང་དགོས་པ། ༼༥༽དེའི་ཕྱིར་ན་དེ་ཁོ་ན་ཉིད་ཀྱི་དོན་རེ་ཞིག་མི་སྟོན་པར་བཏང་སྙོམས་སུ་མཛད་པ་ཅན། ། ༼ཨ༢༽སངས་རྒྱས་བཅོམ་ལྡན་འདས་ཀྱིས་གཉིས་སྟོང་གི་དོན་གཟིགས་ཀྱང་མི་མངོན་པར་བྱས་ཏེ། ༼༥༽གླང་ཆེན་གཟིགས་སྟངས་ཉིད་མཛད་ནས། ། ༼ཀི༢༽སྟོན་པའི་རང་ལུགས་མ་ཡིན་པར་ཉན་ཐོས་སྡེ་བའི་རིགས་ཅན་༼༥༽འཇིག་རྟེན་པ་རྣམས་ལ་ཐུགས་ནི་བརྩེ་བ་འབའ་ཞིག་གིས། ། ༼ཁི༢༽དབང་གིས་འཁོར་ལོ་དང་པོའི་སྐབས་ནས་དང་པོར༌༼༥༽ཕྱི་རོལ་དཔྱོད་ལ་འཇུག་པར་མཛད། །ཅེས་གསུངས་པའི་ཕྱིར། ༼གི༢༽འབྲུ་སྣོན་འདི་ཊཱིཀ་ཆེན་དང་མཐུན་པར་བྱས་ལ། ཐར་ལམ་གསལ་བྱེད་ལས། གཞན་འདྲ་ཡང༌། འཇིག་རྟེན་པ་རིལ་བོར་འཛིན་པའི་གང་ཟག་གི་བདག་འཛིན་བཟློག་པའི་ཐུགས་དགོངས་འབའ་ཞིག་གིས་ཞེས་དགོངས་གཞི་ལ་གསལ་བར་སྦྱར་རོ། །༼༦༢ན༽ ༼༡༽ ལེགས་བཤད་སྙིང་པོ་ལས། འཁོར་ལོ་དང་པོ་ལས་ཕྱི་རོལ་གྱི་དབང་དུ་བྱས་པའི་གཟུང་འཛིན་གཉིས་གསུངས་པ་དྲང་དོན་དུ་༼ངི༢༽འགྲེལ་པའི་དགོངས་གཞི་ནི། ཉི་ཤུ་བ་ལས། རང་གི་ས་བོན་གང་ལས་སུ། །རྣམ་རིག་སྣང་བ་གང་འབྱུང་བ། །དེ་དང་དེ་ཡི་སྐྱེ་མཆེད་ནི། །རྣམ་པ་གཉིས་སུ་ཐུབ་པས་གསུངས། །ཞེས་གསུངས་པ་དང༌། དགོས་པ་ཡང་དེ་ཉིད་ལས། གཟུགས་སོགས་སྐྱེ་མཆེད་ཡོད་པར་ནི། །དེས་འདུལ་བ་ཡི་སྐྱེ་བོ་ལ། །དགོས་པའི་དབང་གིས་གསུངས་པ་སྟེ། །རྫུས་ཏེ་འབྱུང་བའི་སེམས་ཅན་

― GTD002_Page_0085 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན། །ཞེས་གསུངས། ཞེས་སོགས་ཀྱི་དོན་ནི། ཀུན་གཞིའི་སྟེང་གི་དོན་སྣང་གི་བག་ཆགས་སྨིན་པ་ལས། དེར་སྣང་བ་ཡོད་པ་ལ་དགོངས་པར་གསུངས་ཤིང༌། དེ་ཉིད་མདོ་ཕྱི་མའི་དགོངས་གཞིར་ཡང་གྲུབ་མཐའ་རྩ་འགྲེལ་གྱིས་གསལ་བར་འགྲུབ་བོ། །ལུང་ཕྱི་མའི་དོན་ནི། རྣམ་ཤེས་སྐྱེ་བའི་སྒོ་ཕྱི་ནང་གི་སྐྱེ་མཆེད་གཉིས་ལས། ཡུལ་ལ་ལོངས་སྤྱོད་པའི་རྣམ་ཤེས་འབྱུང་བར་བསྟན་པའི་ཤུགས་ཀྱིས་དེ་ལས་ལོགས་སུ་ལྟ་བ་པོའི་བདག་མེད་པར་རྟོགས་ཆེད་ཡིན་ལ། ཕུང་པོ་རང་མཚན་གྱིས་གྲུབ་པར་བཤད་པས་སེམས་སེམས་བྱུང་དང༌། སྐྱེ་མཆེད་ཀྱི་གཟུགས། སེམས། ཁམས་ཀྱི་ལུས་རིལ་འཛིན་གཞིག་པར་ཡང་དུ་མར་བཤད་དེ། ང་རྒྱལ་སྤྱད་པ་རྣམ་སྦྱོང་གི་དམིགས་པར་འགྲོ་ཚུལ་ཡང་དེ་ལྟར་རོ། །རྫུས་སྐྱེས་ཞེས་པ་གུང་རུའི་དྲང་ངེས་རྣམ་འབྱེད་དུ་རྫུས་ཏེ་འབྱུང་བའི་སེམས་ཅན་རང་དབང་དུ་ཡོད་དེ་ཞེས་བདག་བསྟན་པའི་ཕྱོགས་ཀྱི་བཤད་པ་ལེགས་ཏེ། ཉི་ཤུ་བའི་འགྲེལ་བཤད་དུལ་ལྷས་མཛད་པར་གསལ་བས་དེར་བལྟའོ། ། ༼༣༽གཞན་ཡང༌། ཡུམ་བར་བ་ལས། གང་ཡང་དག་པའི་སྐྱོན་མེད་པ་ལ་ཞུགས་པ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་མཐུ་མེད་དོ། །ཞེས་པའི་མདོ་ཆོས་ཅན། ༼ཅི༢༽ཁ་ཅིག་འདིའི་སྐྱོན་མེད་པ་ལྷག་མེད་ལ་བྱེད་དེ། དེ་མཐོང་ལམ་ལ་བྱེད་ན། རིགས་ངེས་དེའི་སྔར་ནས་ཀྱང་འཇུག་མི་སྲིད་པས་ཁྱད་པར་སྦྱོར་མི་དགོས་ཤིང༌། མ་ངེས་པ་དེའི་རྗེས་སུ་འཇུག་སྲིད་པའི་ཕྱིར། མཐོང་ལམ་

― GTD002_Page_0086 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོབ་ནས་མྱང་འདས་མ་ཐོབ་བར་དུ་ཡང་ཟེར་མི་རུང་སྟེ། ཐེག་གཅིག་ལྟར་ན་སྒྲས་ཟིན་དེ་ལྟར་བཀྲལ་ཏེ་སྒྲ་ཇི་བཞིན་པར་འདོད་རུང་ཙམ་ཡོད་ཀྱང༌། ལུགས་འདིར་དེ་ལྟར་བྱས་ན་ཚིག་གི་ནུས་པས་མཐར་ཐུག་ཐེག་གཅིག་བསྟན་པར་འགྲོ་བ་ལས། ཐེག་གསུམ་གྱི་ཁུངས་སུ་མི་འགྲོ་བའི་ཕྱིར་ཟེར་ཡང༌། དེ་མཐོང་ལམ་ལ་བྱེད་དེ། མདོ་སྡེ་རྒྱན། རྒྱན་སྣང༌། མཛོད་སོགས་དུ་མར་མཐོང་ལམ་གྱི་རྣམ་གྲངས་སུ་གསུངས་པའི་ཕྱིར། དེས་ན་བྲིས་ངན་པར་གོམས་པ་བསྒྱུར་དཀའ་བ་ལྟར་མཐོང་ལམ་དུ་སླེབས་ནས་ཕལ་ཆེར་ཐེག་ཆེན་དུ་མི་འཇུག་པའི་དོན་ནོ། །བྱེ་སྨྲ་རྣམས་བཟོད་པ་ནས་མི་འཇུག་པར་འདོད་དེ། གྲངས་མེད་གསུམ་གྱི་རིང་ལ་ལས་ཉོན་གྱི་དབང་གིས་སྐྱེ་དགོས་པ་ངན་འགྲོའི་མྱ་ངན་འདས་པ་གཉིས་འགལ་བར་འདོད་པའི་ཕྱིར། ཁ་ཅིག །དེ་ནས་ཐེག་དམན་དུ་རིགས་ངེས་པའི་རྒྱུ་མཚན་གྱིས་ཡིན་ཟེར་བ་རྟགས་ཆོས་ཐ་མི་དད་དོ། །ཐེག་གཅིག་ལྟར་ན་ལུང་འདི་དྲང་ངེས་གང་ཡིན་ཞེ་ན། གསེར་འཕྲེང་དང༌། ཡིག་ཆར་ཡུལ་ངེས་ཀྱི་མདོར་མཛད་ལ། འགྲེལ་ཆེན་དང་རྣམ་བཤད་དུ་ཁྱབ་པའི་མདོར་མཛད་པས་དཔྱད་གཞི་ཆེའོ། །༼༦༢བ༽ ༼༥༽ གཞན་ཡང༌། སྟོན་པ་འདའ་ཚུལ་སྟོན་ཁར་གསུངས་པའི་འདུལ་བ་མདོར་བསྡུས་༼ཆི༢༽འདིའི་དགག་བཅས་རྣམས་ལ་མི་རུང་མཐུན་ཡང་ཡོད་མོད་ཀྱི་སྔ་རབས་པ་རྣམས་ལ་གནང་བཅས་ཀྱི་སྒོ་ནས་༼༥༽རུང་མཐུན་དུ་གྲགས་པ་དེ་ཆོས་ཅན། ༼༦༣ན༽ ༼༣༽ རྒྱུད་བླ་མ་ལས། དེ་ལྟར་དེ་ནི་མཉམ་བཞག་ནས། །སླར་ཡང་བླ་མའི་རྒྱུད་འདིར་ནི། ། ༼ཇི༢༽ཉེས་པ་ལྔ་དག་སྤངས་

― GTD002_Page_0087 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། །བདེ་གཤེགས་སྙིང་པོ་ཞེས་སུ་བརྗོད། ། ༼༣༽ཅེས་དང༌། དེའི་དར་ཊཱིཀ་ལས་སླར་ཡང་བླ་མའི་རྒྱུད་འཁོར་ལོ་གསུམ་པ་དེ་བཞིན་གཤེགས་པའི་སྙིང་པོའི་མདོ་ལ་སོགས་པ་བཞིན་ནོ། །ཞེས་གསུངས་པའི་ཕྱིར། ༼ཉི༢༽འདི་ནི་རྡོ་རྗེ་རྩེ་མོ་ལས། འཁོར་བ་རྒྱུད་དུ་འདོད་པ་སྟེ། །མྱ་ངན་འདས་པ་རྒྱུད་ཕྱི་མ། །ཞེས་གསུངས་པ་ལྟར། གཞིའི་རྒྱུད་སྦྱང་གཞི་སེམས་བདེན་སྟོང་དང༌། སྦྱངས་འབྲས་དྲི་བྲལ་གྱི་དབྱིངས་གཉིས་དྲི་མས་བསྒྲིབས་མ་བསྒྲིབས་ཀྱི་ཁྱད་པར་ཡོད་ཀྱང༌། རང་བཞིན་འགྱུར་བ་མེད་པའི་ཕྱིར་རྒྱུད་ཅེས་བཏགས་ཏེ། རྒྱུད་ཕྱི་མ་ལས། རིགས་ནི་རྒྱུད་ཅེས་བྱ་བར་བརྗོད། །ཅེས་དང༌། མཐའ་དཔྱོད་མྱུ་གུར་ཡང༌། རྒྱུད་ནི་རྒྱུན་ཆགས་པ་ཡིན་ལ་དེ་ལ་ལམ་གྱི་བྱེད་པ་འཇུག་པའི་གཞིའི་རྒྱུད་དང༌། ཞེས་གསུངས་པའི་ཕྱིར། སེམས་བདེན་སྟོང་དེ་ཉིད་སྟོན་པའི་མདོ་སྔ་མ་ཤེར་མདོ་དང༌། ཕྱི་མ་སྙིང་པོའི་མདོ་ཡིན་ཞིང༌། འདིར་དེའི་དོན་འཆད་པས། རྩ་འགྲེལ་གཉིས་ཀར་བརྗོད་བྱའི་སྟོང་ཉིད་དང་གཞུང་གི་མིང་བཏགས་སོ། ། ༼༥༽ས་སྡེ་ལྔ། སྡོམ་རྣམ་གཉིས་དང༌། པྲ་ཀ་ར་ཎ་སྡེ་བརྒྱད་དང༌། རྣམ་བཤད་རིགས་པ་གང་དུ་ཡང་མདོ་དེས་བདེན་གྲུབ་སྟོན་པར་དྲངས་པ་མེད་པའི་ཕྱིར་དང༌། ཐོགས་འགྲེལ་གྱིས་བདེན་མེད་བསྟན་ཚུལ་འཆད་པར་འགྱུར་བའི་ཕྱིར་ཏེ། ༼ཏི༢༽པྲ་ཀ་ར་ཎ་སྡེ་བརྒྱད་ཀྱི་ངེས་པ་རྒྱུད་སྡེ་སྤྱི་རྣམ་དུ་བཀག་ཀྱང༌། གཞུང་ཕལ་མོ་ཆེར་རྣམ་བཤད་རིགས་པ་སོགས་རང་རྐང་ལྔ་དང༌། གཞན་འགྲེལ་གསུམ་དུ་བཤད་དོ། །

― GTD002_Page_0088 ―

^{[མ་དཔེ་གཟིགས་ན་འདིར་གནོན།]}

[Full Size]

འོན་ཀྱང་པཎྚི་ཏ་མུ་ཎི་ཤྲིས། ཕུང་པོ་ལྔའི་རབ་བྱེད། ཉི་ཤུ་པ། སུམ་ཅུ་པ་གསུམ་བྱམས་པས་མཛད་པར་གསུངས། ཤན་ཏི་པས། ཤེར་ཕྱིན་མན་ངག་ཏུ་ཀུན་བཏུས་བྱམས་པས་མཛད་པར་གསུངས་པ་ལྟ་བུ་བྱམས་པ་དང་འབྲེལ་བའི་ཆོས་ཉི་ཤུ་པོ་འདིའི་གྲངས་དང་མཛད་པ་པོ་ལ་བཤད་ཚུལ་མང་བས། འདི་ཡང་རྣམ་བཤད་རིགས་པ་སྡེ་བརྒྱད་ལས་ལོགས་སུ་བྱས་པའི་བཤད་ཚུལ་ཞིག་ལ་བརྟེན་ནམ་དཔྱད་པར་བྱའོ། །༼༦༣བ༽ ༼༣༽ དྲི་ཞུས་ཀྱི་མདོ་ལས། ཕུང་པོ་རྣམས་ཀྱི་ཇི་ལྟ་བ་དེ་བཞིན་དུ་སྐྱེ་མཆེད་རྣམས་དང་རྟེན་ཅིང་འབྲེལ་བར་འབྱུང་བ་དང༌། ༼ཐི༢༽གནས་དབང་པོ་རྒྱས་བྱེད་ཁམས་ཀྱི་ཟས། གནས་པ་སེམས་སོགས་རྒྱས་བྱེད་རག་པའི་ཟས་ཏེ་མ་མ་ལྟ་བུ་གཉིས་དང༌། སྲིད་པ་ཕྱི་མ་འཕེན་པའི་སེམས་པའི་ཟས་དང༌། འཕངས་ནས་སླར་ཡང་གཞན་འགྲུབ་བྱེད་རྣམ་ཤེས་ཀྱི་ཟས་གཉིས་ནི་མ་ལྟ་བུ་སྟེ། ༼༤༽ཟས་རྣམས་ཀྱི་བར་ཡང་བཀའ་སྩལ། ༼༥༽དེར་མ་ཟད། ༼དི༢༽བཟུང་བ་ཡུལ་གྱི་ཁམས་དྲུག །རྟེན་དབང་པོའི་ཁམས་དྲུག །བརྟེན་པ་རྣམ་ཤེས་ཀྱི་ཁམས་དྲུག་སྟེ། ༼༥༽ཁམས་བཅོ་བརྒྱད་དང༌། ༼༦༤བ༽ ༼༣༽ བདེན་བཞིའི་ཆོས་འཁོར་ཡང་སངས་རྒྱས་པའི་ཚུལ་ནས་འདའ་ཚུལ་བར་དུ་བསྟན་པར་ལུང་སྡེ་བཞི་ན་བསྙོན་མེད་དུ་བཤད་པའི་ཕྱིར། ༼ནི༢༽དེའི་ཚེ་རྟག་ཏུ་བདེན་བཞི་ལ་བླང་དོར་གྱི་ཚུལ་ལས་བརྩམས་ཏེ་ཆགས་སོགས་སྨད་ནས་ཡིད་འབྱུང་བསྐྱེད་དེ་གླེང་གཞི་བསླངས་ནས་བཅས་པ་མཛད་ཅིང༌། འདའ་བ་ལ་ཉེ་བའི་ཚེ་ཡང་བདེན་བཞིའི་གཟུགས་བརྙན་སྲིད་པའི་འཁོར་ལོ་བྲི་

― GTD002_Page_0089 ―

^{[མ་དཔེ་གཟིགས་ན་འདིར་གནོན།]}

[Full Size]

བར་གསུངས་པའི་ཕྱིར། སུས་ཀྱང་དེའི་བར་དུ་མ་གསུངས་ཞེས་ཁྲེལ་བོར་བའི་ཨུ་ཚུགས་བྱར་མེད་པའི་དོན་ནོ། །འོན་ཀྱང་དེ་ལྟར་སྟོན་ཚད་བདེན་བཞིའི་ཆོས་འཁོར་དུ་བྱས་ན་གྲགས་པ་དང་འགལ་བས་དཔྱད་གཞི་ཅུང་ཟད་ཡོད་ཀྱང་སླ། ༼༥༽རིན་ཆེན་འཕྲེང་བ་ལས། བརྡ་སྤྲོད་པ་དག་ཇི་ལྟ་བར། ། ༼པི༢༽ཡི་གེའི་ཕྱི་མོ་ཀློག་འཇུག་ལྟར། །ཞེས་ཀ་ཁ་རྩ་བ་ཡིན་པས་དང་པོར་དེ་ནས་བཟུང་སྟེ་སླ་རིམ་ནས་སློབ་པ་དཔེར་མཛད་ཅིང་མ་དཔེ་ཡང་ཁུངས་གཏུགས་ས་ཡིན་པས་ཀླུ་སྒྲུབ་ལ་ཕྱི་མོའི་དབུ་མ་པ་ཟེར་བ་ལྟར་ཕྱི་མོའི་སྒྲ་འཇུག་གོ །༼༦༥ན༽ ༼༢༽ དུས་འཁོར་འགྲེལ་ཆེན་དྲི་མེད་འོད་ལས། ས་ག་ཟླ་བའི་ཚེས་བཅོ་ལྔའི་ཉིན་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས། ཆོས་ཀྱི་འཁོར་ལོ་བསྐོར་ཞིང་ཐེག་པ་གསུམ་སྟོན་པར་མཛད་དེ། བཅུ་གཉིས་པ་ནག་པ་ཉ་ལ་ཤྲཱི་དྷཱ་ནྱ་ཀ་ཊ་ཀར་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་གསུངས་སོ། །ཞེས་གསུངས་པའི་ཕྱིར། ༼ཕི༢༽མཁས་གྲུབ་རྗེའི་རིགས་ལྡན་དྲིས་ལན་དུ། ལོའི་དང་པོ་རབ་བྱུང༌། ཟླ་བའི་དང་པོ་ནག་ཟླ། རྒྱུ་སྐར་དང་པོ་ཐ་སྐར། ཞེས་གསུངས་པ་ལྟར། ལོ་རྒན་དྲུག་ཅུ་རྫོགས་མཐར་གཟའ་སྐར་ཐམས་ཅད་སྟོང་བར་འཇུག་པའི་རི་མོ་ཤར་རྗེས་ངེས་པ་ཐམས་ཅད་ཀྱི་མགོ་རྩོམ་པ་ན་ཡར་ངོ་སྔོན་འགྲོ་ཅན་གྱི་ནག་ཟླ་ནས་ལོ་མགོ་འཛིན་པ་ཞིག་ཀྱང་ཡོད་ལ། དཔྱིད་ཟླ་འབྲིང་པོའི་མར་ངོ་ལ་ལུག་ཁྱིམ་གྱི་རི་མོ་ཤར་བའི་ཚེ་མར་ངོ་སྔོན་འགྲོ་ཅན་གྱི་ས་ག་ཟླ་བ་ནས་ལོ་མགོ་འཛིན་དགོས་པས། འདིར་

― GTD002_Page_0090 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་མ་སྟེ། ཧོར་ཟླ་གསུམ་པའི་ཚེས་བཅུ་དྲུག་ནས་ས་ག་ཟླ་བ་དང་ལོ་མགོ་བཟུང་སྟེ་མཇུག་ཏུ་སྐར་མ་ནག་པས་ཟླ་བ་ཉ་བ་དང༌། ནག་ཟླ་དང༌། ལོ་རྫོགས་པ་ཡིན་པས་དེའི་དབང་དུ་བྱས་ན་ནག་ཟླ་བཅུ་གཉིས་པ་ཡིན་ཞིང༌། དེའི་མཇུག་ཏུ་རྩ་རྒྱུད་ཟླ་བཟང་ལ་གསུངས་པ་ཡིན། ཕྱི་དེ་ལོ་ཞེས་པ་སྤྱི་སྐད་བྱས་ན་ལོ་དེར་གཏོགས་ཀྱི་ནག་ཟླ་ཡིན་ཚེ་ས་གའི་སྔོན་དུ་འགྲོ་ཞིང་ས་གའི་རྗེས་ཀྱི་ནག་ཟླ་ཡིན་ན་ལོ་རྗེས་མའི་ཁུངས་སུ་འགྲོ་སྙམ་པ་འགོག་ཆེད་ཡིན་ནམ་དཔྱད་ལ། སྤྱིར་ནི་ཕྱི་དེ་ལོ་ཕྱི་ལོ་དང༌། ཕྱི་དེ་ཉིན་ཕྱི་ཉིན་ལ་འཇུག་པ་གཙོ་ཆེའོ། །དྲང་ངེས་རྣམ་འབྱེད་ཀྱི་མཐའ་དཔྱོད་དུ་ཟུར་ཙམ་གསལ། ༼༥༽འདི་ལ་རང་ཕྱོགས་ཀྱི་ས་ག་ཟླ་བ་མར་ངོ་སྔོན་འགྲོ་ཅན་གྱི་ལོ་མགོ་འཛིན་པས་གཞན་འི་བཤད་ཚུལ་མང་མོད་ཀྱང་མ་སྤྲོས། ༼༦༥བ༽ ༼༡༽ བསྙེན་རྫོགས་བཅུའི་སངས་རྒྱས་རང་བྱུང་གིས་རྫོགས་པའི་རྗེས་མཆོག་ཟུང་ཚུར་ཤོག་གིས་རྫོགས་པའི་སྔོན་ལ་མ་བྱུང་བར་ཐལ། ༼༢༽རྟགས་ཁྱབ་ཕྲན་ཚེགས་ཀྱིས་གྲུབ་བོ། ། ༼བི༢༽དེ་ཡང་ཕྲན་ཚེགས་ལས། ཤམ་ཐབས་ཟླུམ་པོར་བགོ་བར་བྱའོ། །ཞེས་བྱ་བ་ནི་དང་པོར་བཅས་པའི་འདུལ་བ་ཡིན་ལ། ཆོས་གོས་ཟླུམ་པོར་བགོ་བར་བྱའོ། །ཞེས་བྱ་བ་ནི་བར་དུ་བཅས་པའི་འདུལ་བ་ཡིན་ཞེས་སོགས་དང༌། བཟང་བྱིན་ལ་བརྟེན་ནས་ཕམ་པ་བཅས་པ་གསུམ་པར་གསུངས་པ་གང་ཞིག །བསྡུས་རྗེས་ཀྱི་ལུང་ལས། ཕམ་པ་དང་པོར་བཤད། ཤམ་ཐབས་དང་ཆོས་གོས་ཀྱི་དེ་ལྕི་ཡང་གི་སྒོ་ནས་ཉེས་བྱས་བརྒྱ་རྩ་བཅུ་གཉིས་ཀྱི་གྲངས་སུ་བཤད་པ་སྡེ་ལྔའི་མཇུག་ཏུ་འོང་བའི་ཕྱིར། ༼༦༦ན༽ ༼༢༽ དེ་སྐད་དུ། ལེགས་

― GTD002_Page_0091 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་སྙིང་པོ་ལས། དགོངས་འགྲེལ་ལས་འཁོར་ལོ་རིམ་པ་གསུམ་གསུངས་པ་ནི་འཁོར་གྱི་འདུ་ཐེབས་དང༌། སྟོན་པའི་སྐུ་ཚེའི་ཚིགས་ལ་སོགས་པས་འཇོག་པ་མིན་གྱི། ཞེས་གསུངས་པའི་ཕྱིར། ༼མི༢༽འདི་ལ་ཁ་ཅིག །སྐུ་ཚེ་དུམ་བུ་གསུམ་བྱས་པ་ཡིན་ཟེར། ལ་ལ་སངས་རྒྱས་ཕྱིན་ཆད་ཀྱི་སྐུ་ཚེ་ཆ་མཉམ་པར་གསུམ་དུ་ཕྱེ་བ་ཡིན་ཟེར་བ་རྡོལ་གཏམ་མོ། །ཡིག་ཆ་རང་གི་ལུང་དོན་འདི་ལྟར་འབྲེལ་ཚོད་དུ་སྣང་སྟེ། འཁོར་ལོ་དང་པོ་བསྐོར་ཡུལ་རྣམས་དུས་གཅིག་ཏུ་འདུས་པ་མ་ཡིན་པར་ནམ་འདུས་སུ་གསུངས་པའི་གནད་ཀྱི་སྐུ་ཚེ་ལ་ཆ་བཞག་སྟེ་འདི་ཡན་ལ་མ་གསུངས་འདི་ཕྱིན་ལ་མ་གསུངས་ཞེས་ཁ་ཚོན་གཅོད་མི་ནུས་ཀྱང་དུས་ཀྱི་སྒོ་ནས་འཁོར་ལོ་གསུམ་བཞག་ཆོག་པ་ནི་ཐུན་མོང་བ་སྤྱི་ལ་གྲགས་ཚོད་དུ་འདི་ཝ་ར་ཎ་སིར་གསུངས། འདི་བྱ་རྒོད་ཕུང་པོར་གསུངས། འདི་མ་ལ་ཡ་དང་ཡངས་པ་ཅན་དུ་གསུངས་ཞེས་གྲགས་ཆེ་བ་དང་བསྟུན་ནས་བཞག་པ་ཡིན་ཏེ། འོག་ཏུ་ཐུན་མོང་གི་སྣང་བ་གཙོ་ཆེ་ཞེས་པའང་དེ་ཡིན་ནོ། །ལྕང་སྐྱའི་གྲུབ་མཐར་ལུང་འདི་ལ་བརྟེན་ནས་འཁོར་ལོ་གསུམ་དུས་ཀྱི་རིམ་པས་འཇོག་པ་མི་འཐད་པར་བསྒྲུབས་ཚུལ་དེར་ལྟོས། ༼༤༽ཐུན་མོང་དང་མང་བ་གཙོ་བོར་བྱས་ན་འཁོར་ལོ་གསུམ་དང་མཛད་པ་བཅུ་གཉིས་རིམ་ཅན་ཡིན་པའི་ཕྱིར། ༼ཙི༢༽ཁོ་ན་རེ། ཚིག་གསལ་དུ་སུམ་ཅུ་རྩ་གསུམ་པའི་མདོ་ལ་བརྟེན་ནས་འཁོར་ལོ་གསུམ་ཅིག་ཅར་མ་གཏོགས་རིམ་ཅན་དུ་བསྐོར་བ་བཀག་ཅིང༌། མཁས་གྲུབ་རྗེས་འཁོར་ལོ་གསུམ་ཅིག་ཅར་བསྐོར་བ་ཡིན་ན་སངས་རྒྱས་མ་ཐག་ནས་མཛད་པ་རྫོགས་ཟིན་པ་ཡིན་པས་དུས་གཉིས་པར་འདའ་

― GTD002_Page_0092 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་སོ། །དེས་ན་རིམ་ཅན་ཁོ་ན་ཡིན་གསུངས། རང་ལུགས་ཅིག་ཅར་བསྐོར་བ་དང༌། དགོངས་འགྲེལ་ལྟར་རིམ་གྱིས་བསྐོར་བ་ཡང་འདོད་པ་མིན་ནམ་ཞེ་ན། དགོངས་འགྲེལ་ལས་རིམ་ཅན་ཁོ་ནའི་བཤད་པ་མཛད་པ་ལྟར་འདོད་པ་དང་འགལ་ཟེར་དགོས་སམ་དཔྱད། ཁ་ཅིག་ཐུན་མོང་བ་ལྟར་ན་ཡང་འཁོར་ལོ་གསུམ་ཅིག་ཅར་བསྐོར་བར་ཐལ། ཟབ་ཞི་སྤྲོས་བྲལ་ཞེས་སོགས་ཀྱི་ཚེ་བརྒྱད་སྟོང་པའི་བརྗོད་དོན་བསྐོར་བ་གང་ཞིག །འགྲེལ་པ་དོན་གསལ་སྟོན་པས་བསྐོར་ཚུལ་ཡོད་པའི་ཕྱིར་ན་མ་ཁྱབ་སྟེ། དངོས་སུ་གསུངས་པ་རྣམས་ལ་གསུངས་པ་གཙོ་ཆེ་བའི་ཕྱིར། ༼༦༧ན༽ ༼༥༽ ཡང་ཁ་ཅིག་ན་རེ། དགོངས་འགྲེལ་རིལ་བོ་སྟེ་ཚིག་ཡོངས་སུ་རྫོགས་པ་དགོངས་འགྲེལ་ནས་བཤད་པའི་ལེགས་ཕྱེའི་ཆོས་འཁོར་ཡིན་པར་ཐལ། དགོངས་འགྲེལ་དེ་ཡིན་པའི་ཕྱིར་ན་མ་ཁྱབ། ༼ཚི༢༽དེ་ལ་ལེའུ་དུ་ཡོད་དང༌། བསྟན་བཅོས་བཤད་ཐབས་ལྔ་ལྡན་ཞིག་ཡིན་མིན་སོགས་ནི་ད་ལྟའི་རྩོད་པ་ཡང་རབ་བོ། །༼༦༧བ༽ ༼༡༽ དགོངས་འགྲེལ་གྱི་ལེའུ་གཞན་མིན་ཞེས་པའི་དོན་ཡིན་པའི་ཕྱིར། ༼ཛི༢༽བྱང་སེམས་བཅུ་ནི། དོན་ཟབ་དགོངས་པ་ངེས་འགྲེལ་དང༌། ཚུལ་བཞིན་ཀུན་ཏུ་འདྲི་བ་དང༌། ཆོས་འཕགས་དང༌། བློ་གྲོས་རྣམ་དག་དང༌། བློ་གྲོས་ཡངས་པ་དང༌། ཡོན་ཏན་འབྱུང་གནས་དང༌། དོན་དམ་ཡང་དག་འཕགས་དང༌། བྱམས་པ། སྤྱན་རས་གཟིགས། འཇམ་དབྱངས་རྣམས་སོ། །ལེའུར་བྱེད་ཚེ། དང་པོ་གཉིས་ཀྱིས་ཐུན་མོང་དུ་ཞུས་པས་ལེའུ་གཅིག་ཡིན་ལ། དེའི་གོང་ན་གླེང་གཞིའི་ལེའུ་ཡོད་པས་ལྷག་མ་གྲངས་ལྟར་རོ། །འདི་ལ་དཔྱད་རྒྱུ་ཞིག་ཡོད། ༼༣༽ལེགས་

― GTD002_Page_0093 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་སྙིང་པོ་ལས། ཆོས་ཀྱི་འཁོར་ལོ་བསྐོར་བ་འདི་ནི་ཞེས་ཉེ་བའི་ཚིག་གིས་སྨོས་པ་ནི་དེ་མ་ཐག་ཏུ་སྨོས་པའི་ལེགས་པར་རྣམ་པར་ཕྱེ་བའི་འཁོར་ལོ་དགོངས་འགྲེལ་དང་དེ་བཞིན་དུ་ཕྱེ་བ་རྣམས་ལ་ཟེར་བ་ཡིན་གྱི། ཞེས་གསུངས་པའི་ཕྱིར། ༼ཝི༢༽ཁ་ཅིག །བརྗོད་བྱའི་ཆ་ནས་ཉེ་ཚིག་ཐམས་ཅད་ལ་འཇུག་ཀྱང༌། རྗོད་བྱེད་ཀྱི་ཆ་ནས་དགོངས་འགྲེལ་དང་དོན་དམ་ཡང་དག་འཕགས་ཞུས་གཉིས་ལ་འཇུག་ཅེས་འཆད་པ་སྙིང་པོ་ཡོད་མེད་དཔྱད་པར་བྱའོ། ། ༼༥༽ལེགས་ཕྱེའི་དོན་དེ་ཡིན་པའི་ཕྱིར། ༼ཞི༢༽རང་རྒྱུད་པ་ཡང་ཚིག་ཟིན་ལ་དེ་ལྟར་ཕྱེ་བས་འཇོག་གི །བདེན་མེད་དང་རང་མཚན་གྱིས་གྲུབ་པ་ཁྱད་པར་ཕྱེ་ཟེར་བ་མདོ་ལ་སྦྱར་ན་འཐད་དཀའ་འོ། ། ༼༦༨ན༽ ༼༥༽ བར་ཐ་གཉིས་ཀྱང་རང་རང་གསུངས་ནས་འདའ་ཚུལ་གྱི་བར་དུ་གསུངས་པའི་ཕྱིར། ༼ཟི༢༽འདིའི་ཚིག་གི་ནུས་པ་ཞིབ་ཆ་ཡོད་དམ་དཔྱད།༄༄༄༄༄༄༄༼༦༩བ༽ ༼༣༽ གཞན་ཡང་དབུ་སེམས་ཀྱི་ཐུན་མོང་མིན་པར་ཆོས་འཁོར་ཅིག་ཅར་བསྐོར་བ་མི་འཐད་པར་ཐལ། ཀུན་དགའ་བོས་དེ་ལྟར་མ་ཐོས་པའི་ཕྱིར། དེར་ཐལ། དེས་རིམ་ཅན་ཁོ་ནར་ཐོས་པའི་ཕྱིར། དེར་ཐལ། ༼འི༢༽དུས་གཅིག་ན་བྱ་རྒོད་ཕུང་པོའི་རི་ལ་བཞུགས་ཏེ་ཞེས་པ་ཕྱི་མ་དང་སྦྱར་ཏེ་བཤད་ཚུལ་གཅིག་ཀྱང་བརྒྱད་སྟོང་འགྲེལ་ཆེན་དང༌། པཎྚི་ཏ་འཇམ་དཔལ་རྡོ་རྗེས་མཛད་པར་གྲགས་པའི་རྒྱན་གྱི་འགྲེལ་པ་སོགས་ལས་གསུངས་ལ་སྔ་མ་དང་སྦྱར་ཏེ་བཤད་ཚུལ་ནི་ནང་གི་དོན་རྟོགས་ཤེས་རབ་ལྡན་པའི་ཚུལ་འདི་ཁོ་ན་བཞིན་གསུངས་ཞེས་ཆོས་ལ་ཆད་ལྷག་གི་ཉེས་པ་མེད་པར་ངེས་

― GTD002_Page_0094 ―

^{[མ་དཔེ་གཟིགས་ན་འདིར་གནོན།]}

[Full Size]

པ་སྐྱེ་ཆེད་འདི་སྐད་དང༌། སློབ་དཔོན་གྱི་མན་ངག་ལྡན་ཚུལ་སངས་རྒྱས་ལས་དངོས་སུ་ཐོས་པས་བདག་གིས་དང༌། ཁེངས་སྐྱུངས་ཏེ་དོན་མ་རྟོགས་པར་ཚིག་ཙམ་ཡིན་པས་ཐོས་པ་དང༌། དུས་གཅིག་ཅེས་པ་ཆོས་དང་གང་ཟག་ཐོས་པ་གསུམ་ལ་སྦྱོར་ཚུལ་འོག་ཏུ་འབྱུང་ངོ༌། ། ༼༧༽འདིས་ནི་བསམ་མི་ཁྱབ་ཀྱི་ཚད་མའི་སྐྱེས་བུར་བསྟན་པའི་ཕྱིར་ཏེ། ༼ཡི༢༽འདིས་ཚད་མའི་སྐྱེས་བུར་བསྟན་ལུགས་བརྒྱད་སྟོང་དོན་བསྡུས་ན་གསལ། ༼༧༠བ༽ ༼༢༽ ཀུན་དགའ་བོའི་མདོ་ལས། བདག་གིས་ཆོས་ཀྱི་ཕུང་པོ་བརྒྱད་ཁྲི་ལྷག་ནི་བཅོམ་ལྡན་འདས་ལས་བཟུང༌། གཉིས་ནི་དགེ་སློང་དག་ལས་སོ། ། ༼རི༢༽འདི་ལ་རྟོག་གེ་འབར་བ་གྲུབ་མཐའ་ཆེན་མོ་མཆིམས་མཛོད་རྣམས་སུ་དྲངས་པ་ལས། བདག་གིས་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་ཞིག་ནི་བཅོམ་ལྡན་འདས་ལས་བཟུང༌། ཞེས་འབྱུང་སྟེ། བྱེ་སྨྲ་སྤྱིའི་འདོད་ཚུལ་ནི། ལྕང་སྐྱའི་གྲུབ་མཐར་དེ་འཆད་པའི་སྐབས་སུ་བརྒྱད་ཁྲི་བཞི་སྟོང་ཞེས་བཤད་པ་ལྟར་ཡིན་ཀྱང༌། ཁ་ཆེ་བ་ཁོ་ནས་བརྒྱད་ཁྲི་ཙམ་དུ་འདོད་ལ། དེ་འདྲའི་དབང་གིས་སྡེ་བ་སོ་སོའི་ལུགས་འདོད་ཚུལ་ཐ་དད་པའང་དུ་མ་ཞིག་འོང་བར་སྣང་བས། དེ་འདྲ་ཞིག་གམ་འགྱུར་ཁྱད་ཡིན་དཔྱད་པར་བྱའོ། ། ༼༣༽ཞེས་གསུངས་པའི་ཕྱིར་ན་སློབ་དཔོན་འདི་ལྟར་ན་མ་ཁྱབ་སྟེ། དཔལ་འཕྲེང་སེང་གེའི་ང་རོའི་མདོ་ལྟ་བུ་སངས་རྒྱས་ལ་སླར་ཡང་ཞུས་པའམ་སངས་རྒྱས་ཀྱི་མཐུས་དགེ་སློང་གཞན་ལས་ཐོས་པ་ཡང་སངས་རྒྱས་ལས་ཐོས་པ་ཡིན་པའི་ཕྱིར་ཏེ། ༼༧༡ན༽ ༼༡༽ དེ་ལས་ཀྱང་རྟོག་གེ་འབར་བ་ལས། ཐེག་པ་ཆེན་པོ་

― GTD002_Page_0095 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པར་བྱེད་པ་པོ་ཀུན་ཏུ་བཟང་པོ་དང༌། འཇམ་དབྱངས་དང༌། གསང་བའི་བདག་པོ་དང༌། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །བདག་ཅག་གི་རྩ་བའི་སྡུད་པར་བྱེད་པ་པོ་ཉན་ཐོས་ནི་མ་ཡིན་ཏེ། ཐེག་པ་ཆེན་པོའི་གསུང་རབ་ནི་དེ་དག་གི་སྤྱོད་ཡུལ་མ་ཡིན་པའི་ཕྱིར། ཞེས་གསུངས་པའི་ཕྱིར། ༼ལི༢༽ཞིབ་ཏུ་ཤེས་པར་འདོད་ན། བླ་མ་ཀུན་དགའ་པར་ཏ་ལི། །སྡུག་བསྔལ་ཕུང་པོ་ས་བ་ཏི། །འཆར་བྱེད་སྟོང་པ་འཆར་བ་དང༌། །གང་པོ་སྦང་བ་རམས་པ་དང༌། །ཞེས་སོགས་ཀྱི་ཐད་ཀྱི་རྟོག་གེ་འབར་བའི་ལེའུ་བཞི་པ་ཉན་ཐོས་ཀྱི་དེ་ཉིད་གཏན་ལ་དབབ་པ་ལས་ཤེས་པར་བྱའོ། ། ༼༧༽དེ་ལྟར་ན་ལོ་བཞི་བཅུའི་ཕྱེད་ལ་ཆོས་ཀྱི་ཕུང་བོ་ཉིས་སྟོང་ལས་མང་གསུངས་དགོས་པའི་ཕྱིར་ཏེ། རྣམ་བཤད་རིགས་པ་ལས། དུས་དེ་སྲིད་དུ་བཞི་བཅུ་ཆ་བས་ཀྱང་ཉུང་བའི་ཆོས་བཤད་པ་ནི་མི་རུང་ངོ༌། །ཞེས་གསུངས་པའི་ཕྱིར། ༼ཤི༢༽འདི་ལ་ཁ་ཅིག་ཀུན་དགའ་བོ་འཁོར་དུ་འོངས་ནས་ལོ་ཉི་ཤུ་ལྷག་ཙམ་བཞུགས་ལ། སྤྱིར་སྟོན་པ་སངས་རྒྱས་ནས་ལོ་བཞི་བཅུ་ལྷག་བཞུགས་པས་ཕྱེད་སྔ་མ་ཉི་ཤུ་ལ་རྗེས་ཀྱི་ལོ་ཉི་ཤུར་གསུངས་པ་ལས་ཉུང་མི་རིགས་ཟེར་བ་ལྟར་ན། ཕྱིས་ཀྱི་བརྒྱད་ཁྲི་ལྟར་སྔར་གྱི་བརྒྱད་ཁྲི་སྟེ་འབུམ་དང་དྲུག་ཁྲིར་འགྱུར་རོ། །གལ་ཏེ་འདོད་ན་ཚད་ལ་ཞིབ་ཆ་གྱིས། རང་ལུགས་ནི། སྔར་གསུངས་པ་རྣམས་དགེ་སློང་དག་ལས་ཐོས་པའི་དབང་དུ་བྱས་ཀྱང༌། ཀུན་མ་ཚང་བ་དཔྱད་པས་འགྲུབ་པར་ཐལ། ལོ་དེ་སྙེད་ཅིག་ཏུ་

― GTD002_Page_0096 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཕུང་བརྒྱད་ཁྲི་བཞི་སྟོང་ཆ་བཞི་བཅུར་བྱས་པའི་ཆ་གཅིག་ཀྱང་མ་གསུངས་པ་མི་སྲིད་ལ། དེའི་ཆ་གཅིག་ལ་ཡང་ཉིས་སྟོང་ལས་ཅུང་ལྷག་དགོས་ན། ཉིས་སྟོང་ལས་མ་བཟུང་བར་རང་ཉིད་ཀྱིས་བཤད་པའི་ཕྱིར། ༼༧༢ ན༽ ༼༤༽ གཞན་ཡང༌། དེ་དག་ལ་དེ་བཞིན་གཤེགས་པས་ཆོས་སྟོན་པའི་བྱ་བ་རྫོགས་པར་ཐལ་ལོ། །འདོད་པའི་ཕྱིར། འདོད་མི་ནུས། ༼སི༢༽འདི་གནད་ཆེ་སྟེ། ཐེག་གསུམ་འདོད་པའི་སེམས་ཙམ་པ་ལྟར་ན་ཀུན་དགའ་བོས་ཆོས་ཕུང་གཅིག་རྫོགས་པར་ཤེས་ལ། ཉོན་མོངས་པ་སྣ་གཅིག་སྤངས་ཙམ་གྱི་གཉེན་པོ་ཚང་བས་ཀྱང་ཆོས་ཕུང་རྫོགས་པ་ཡིན་ཏེ། ཞི་བ་བགྲོད་པ་ལྟ་བུའི་ཉོན་མོངས་སྤངས་ཙམ་གྱིས་རང་གི་འདོད་པ་རྫོགས་པའི་ཕྱིར་རོ། །ཐེག་གཅིག་ལྟར་ན་དེ་ཙམ་གྱིས་རང་གིས་ལམ་སྒོམ་པའི་བྱ་བ་དང༌། སྟོན་པས་ཆོས་སྟོན་པའི་མཛད་པ་རྫོགས་པ་མ་ཡིན་པས། ཆོས་ཕུང་གཅིག་རྫོགས་པ་དང༌། གཉེན་པོ་ཆ་ཚང་བ་ལ་བག་ཆགས་དང་བཅས་པ་སྤོང་ཚུལ་ཚང་དགོས་པས་ཉན་ཐོས་ཀྱིས་མི་ཤེས་ཏེ། གྲུབ་མཐའ་ཉིས་བརྒྱ་རེ་གཅིག་པར་ལྟོས། ༼༧༢བ༽ ༼༤༽ དེ་དག་གིས་དབུ་མ་པའི་ལུགས་ཀྱི་དེ་གསུམ་གཙོ་བོ་དང༌། སེམས་ཙམ་པའི་ལུགས་ཀྱི་དེ་གསུམ་ཞར་བྱུང་དུ་བསྟན་པའི་མདོ་གཉིས་གཉིས་ཡོད་པའི་ཕྱིར། ༼ཧི༢༽འདི་ལ་བརྟེན་ནས་ཁ་ཅིག །ཚིག་ལ་ཆ་འབྱེད་ཟེར་ན། འོ་ན་དབུ་མ་པའི་དེ་གཙོ་བོ་དང༌། སེམས་ཙམ་པའི་དེ་ཞར་ལ་སྟོན་པའི་མདོ་ཐ་དད་པར་ཐལ། ཁྱོད་ཀྱིས་དེ་མདོ་གཉིས་གཉིས་ཞེས་པའི་དོན་དུ་འདོད་པའི་ཕྱིར། འདོད་ན། ཕྱི་མའི་དངོས་བསྟན་གཙོ་བོ་མེད་པར་ཐལ། སེམས་

― GTD002_Page_0097 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་པའི་དེ་ཞར་བྱུང་གང་ཞིག །སྔ་མ་ལས་ལོག་ཡིན་པའི་ཕྱིར། རྟགས་ཁས། གལ་ཏེ་འདོད་ན། མདོ་སྤྱི་ལ་ལྟོས་པའི་ཞར་བྱུང་དུ་སྨོས། འགའ་ཞིག་དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་སོགས་དང༌། ལང་གཤེགས་ལས། ཕྱི་རོལ་སྣང་བ་ཡོད་མིན་ཏེ། །ཞེས་སོགས་དང༌། རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །ཞེས་སོགས་སེམས་ཙམ་པའི་ཐུན་མོང་མ་ཡིན་པའི་ལྟ་བ་སྟོན་པ་རྣམས་ཟུར་དུ་འབྱེད་གསུངས་པའང་དཔྱད་ན་ཆེས་མི་འཐད་པར་ཐལ། ལེགས་པར་ཕྱེ་བ་མཚན་ཉིད་གསུམ་ལ་སྦྱོར་དགོས་ཀྱི། དེའི་ལྟ་བ་སྟོན་པ་གང་ཡོད་མ་ཡིན་པས། དོན་དམ་ཡང་དག་འཕགས་ཀྱི་ལེའུ་ལྟ་བུ་ལ་བྱེད་དགོས་ན། ཚིག་གཅིག་ཀྱང་སོ་སོར་མེད་པའི་ཕྱིར་དང༌། དགོངས་འགྲེལ་གྱི་ལུང་དེ་བློ་གྲོས་ཡངས་པའི་ལེའུ་ན་ཡོད་ཅིང༌། ལེའུ་དེ་ལེགས་ཕྱེའི་ཆོས་འཁོར་དུ་དབུ་སེམས་སུས་ཀྱང་བཤད་པ་མི་སྣང་བའི་ཕྱིར་རོ། །ལུང་དེ་ཡིན་ཀྱང་ལེའུ་རིལ་བོ་ཡིན་མི་དགོས་སྙམ་ན་ལེའུ་རིལ་བོས་ཀུན་གཞི་བསྟན་པར་ཁྱད་མི་སྣང་ངོ༌། ། ༼༥༽དྲང་ངེས་རྣམ་འབྱེད་ལས། དགོངས་འགྲེལ་དང། ལང་གཤེགས་དང༌། ནས། ཆ་ཕྱེ་ནས་མདོའི་དོན་དུ་འཇོག་གོ །ཞེས་གསུངས་པའི་ཕྱིར། ༼ཨི༢༽འདི་ཡང་འཕགས་སེང་མ་གཏོགས་པའི་རྣལ་འབྱོར་སྤྱོད་པའི་དབུ་མ་པ་རྣམས་ཀྱི་ལུགས་ཡིན་གྱི། ལེགས་ལྡན་སོགས་སེམས་ཙམ་པའི་དེ་བསྟན་བྱ་ཕལ་བ་ཙམ་དུ་ཡང་མི་བཞེད་པས་ཆ་འབྱེད་མི་དགོས་སོ། །༼༧ན༣༽ ༼༥༽

― GTD002_Page_0098 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེག་དམན་གྱི་མདོ་ལས། གཟུགས་ནི་ཅུང་ཟད་བརྟན་པས་དབུ་བ་བརྡོས་པ་འདྲ། །ཚོར་བ་མི་བརྟན་པས་ཆུ་ཡི་ཆུ་བུར་བཞིན། །འདུ་ཤེས་༼ཀུ༢༽ནི་ཡུལ་དང་ཡིད་བྱེད་དང༌། མཚན་མ་སོགས་ཁྱད་པར་དུ་མ་འདུས་པ། བྱེ་མ་སྐྱ་བོ་དང༌། ཉིན་མོའི་ཕྱེད་དང༌། དཔྱིད་དུས་འཛོམས་པས། ༼༥༽སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་སྙིང་པོ་མེད་པས་ཆུ་ཤིང་བཞིན། །རྣམ་པར་ཤེས་པ་འཇིག་རྟེན་སྣ་ཚོགས་བྱེད་པས་སྒྱུ་མ་ལྟར། །ཉི་མའི་གཉེན་གྱིས་བཀའ་སྩལ་ཏོ། ། ༼ཁུ༢༽འདི་ལ་ལེགས་ལྡན་གྱི་འདོད་ཚུལ་གྱི་ཐད་ཀྱི་གྲུབ་མཐར་རྩ་ཤེ་རབ་བྱེད་བདུན་པ་ལས་ཞེས་པ་ཡི་གེ་མ་དག་གོ །༼༧བ༣༽ ༼༤༽ དགོངས་འགྲེལ་ལས། ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། ཞེས་གསུངས་པའི་ཕྱིར། ༼གུ༢༽འདིའི་དོན་མཁས་གྲུབ་རྟོགས་དཀའི་སྣང་བར། བར་བའི་གདུལ་བྱ་དབང་པོ་རྣོ་བས་གཞན་གྱིས་དྲང་མི་ནུས་ཀྱང༌། འདི་ཐེག་པ་གང་དུ་བསྒྱུར་རུང་གི་མ་ངེས་པའི་རིགས་ཅན་ཡིན་པ་ལ་གསུངས་ཀྱང༌། རང་ལུགས་རྗོད་བྱེད་ཀྱི་ཐེག་པ་འཁོར་ལོ་དང་པོ་གཉིས་ལ་དཔྱོད་པའི་སྒོ་ནས་ཞུགས་པ་ལ་འདོད་པ་ལེགས་སོ། ། ༼༧ན༤༽ ༼༥༽ དབུ་མ་སྣང་བ་ལས། ངེས་པའི་དོན་ཀྱང་གང་ལ་བྱ་ཞེ་ན། ཚད་མ་དང་བཅས་པ་དང། དོན་དམ་པའི་དབང་དུ་མཛད་ནས་བཤད་པ་གང་ཡིན་པ་སྟེ། ཞེས་གསུངས་པའི་ཕྱིར་ན་མ་ཁྱབ་སྟེ། ༼ངུ༢༽ལུང་གི་ཟུར་གཉིས་སྨོས་པ་ལ། ངེས་དོན་དུ་འགྲོ་བ་སེམས་ཙམ་ལྟར་ཚད་གྲུབ་ཙམ་གྱིས་མི་ཆོག་པ་དོན་དམ་གཙོ་བོར་སྟོན་དགོས་

― GTD002_Page_0099 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གོ་བའི་དགོས་པ་དང། དོན་དམ་གྱི་སྒྲས་བསྟན་ཚད་ཐམས་ཅད་མ་ཡིན་པར་རང་ལུགས་ཀྱི་དོན་དམ་བདེན་པ་གཙོ་བོར་སྟོན་དགོས་པ་གོ་བའི་དགོས་པ་གཉིས་ཡོད་པའི་ཕྱིར། དང་པོ་གྲུབ་སྟེ། ལུང་དེའི་འཕྲོ་དེ་མ་ཐག་ཏུ། དེ་ལས་ལོགས་སུ་གང་དུ་ཡང་དྲང་དུ་མེད་པའི་ཕྱིར་རོ། །ཞེས་གསུངས་པའི་ཕྱིར། ཁྱབ་སྟེ། གང་དུ་ཡང་ཞེས་མང་ཚིག་སྨོས་པས་སྒྲས་ཟིན་ཡོད་མེད་དང། དེ་ལས་ལོགས་སུ་གནས་ལུགས་ལ་འདྲེན་དགོས་པའི་དྲང་ཚུལ་གཉིས་གསུངས་ཤིང། སེམས་ཙམ་གཅིག་ལས་མི་འདོད་པས་ཆོས་ཐམས་ཅད་ངེས་དོན་དང། དེའི་རྒྱུ་མཚན་གྱིས་སྒྲ་ཇི་བཞིན་པ་ཙམ་ངེས་དོན་གྱི་མདོར་འདོད་དོ། ། ༼༧༽ལེགས་བཤད་སྙིང་པོ་ལས། བསྟན་པ་ལྟར་གྱི་དོན་ཡོད་མེད་ལ་དྲང་ངེས་སུ་བྱེད་ན་སེམས་ཙམ་པ་ལྟར་ན་ཚད་མ་དང་བཅས་པས་ཆོག་ཀྱང་དབུ་མ་པ་ལྟར་ན་དེས་མི་ཆོག་པས་དོན་དམ་པའི་དབང་དུ་མཛད་པ་ཞེས་གསུངས་པའི་ཕྱིར། ༼༧བ༤༽ ༼༡༽ དབུ་མ་སྣང་བ་ལས། འདི་ལ་ཀུན་བཏགས་པའི་ངོ་བོ་ཉིད་ཁོ་ན་རང་བཞིན་ཡིན་པར་རིགས་པ་ཡང་མིན་ཏེ། དེ་ནི་གློ་བུར་བ་ཉིད་ཀྱི་རང་བཞིན་ལས་ཕྱི་རོལ་ཏུ་གྱུར་པའི་ཕྱིར་༼ཅུ༢༽དང་དེ་ལྟར་སྒྲའི་དོན་མི་འཐད་པའི་ཕྱིར་རོ། ཞེས་གསུངས་པའི་ཕྱིར་ཏེ། རང་བཞིན་གྱི་སྒྲ་དོན་མ་ཚང་ཚུལ་ཡང། ཀུན་བཏགས་ནི་བློ་འཁྲུལ་བས་འཕྲལ་དུ་བཏགས་པ་ཙམ་ཡིན་ལ། སྔ་མའི་དོན་ནི་རྩ་ཤེ་རབ་བྱེད་བཅོ་ལྔ་བར། རང་བཞིན་དག་ནི་བཅོས་མིན་དང། །གཞན་ལ་ལྟོས་པ་མེད་པ་ཡིན། །ཞེས་གསུངས་

― GTD002_Page_0100 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། ལུང་འདི་ཡང་རྗེ་དགེ་འདུན་གྲུབ་ཀྱི་རྩ་ཤེ་ཊཱིཀ་ཆུང་དང། བ་སོའི་མཆན་ལས་དགག་བྱར་སྦྱར་བ་ལྟར། བྲ་སྟི་དགེ་བཤེས་ཀྱིས་ལྷག་མཐོང་གི་མཆན་དུ་ཡང་བཤད་མོད། འདིར་རང་བཞིན་གནས་ལུགས་ཀྱི་དོན་དུ་བཤད་པ་ཟླ་བའི་ཚིག་གསལ་དང། རྩ་ཤེས་ཊཱིཀ་ཆེན་ཚད་མར་བྱས་སོ། །ལྷག་མཐོང་ཆེན་མོ་དང། སྟོང་ཐུན་ལས། རང་བཞིན་རྒྱུ་དང་རྐྱེན་ལས་ནི། །ཞེས་སོགས་མཐར་ཆགས་སུ་དྲངས་པ་དང། ཕ་རོལ་པོས་ཁྱད་མེད་བྱས་པའི་གནད་ཀྱིས་ཡིན་ཏེ། འདི་ནི་དགག་བྱ་ངོས་འཛིན་ཤེས་འདོད་ཀྱི་ཆེད་དུ་བྲིས་པས་སྤྲོ་བྱ་མང་ཡང་མ་སྤྲོས་སོ། ། ༼༣༽ཡུམ་རྒྱས་པ་ལས། གཟུགས་འདུས་ཞེས་བྱ་བར་ཡང་དག་པར་རྗེས་སུ་མི་མཐོང་ངོ་། །ནས། གཟུགས་སྐྱེ་ཞེས་བྱ་བར་ཡང་དག་པར་རྗེས་སུ་མི་མཐོང་ངོ་། ། ༼ཆུ༢༽འདིའི་ཡང་དག་དོན་དམ་ཡིན་ན་དངོས་སུ་སྦྱར་བར་འགྱུར་བས། རང་བཞིན་ལ་བྱེད། ཁ་ཅིག་སོགས་སྒྲས་བསྡུས་པ་འདིར་བསྟན་འཁོར་ལོ་བར་བར་བཞག་པ་ལ་དགོངས་ཟེར་བ་ནི་བསྙོན་འདེངས་བར་སྣང་ངོ་། །༼༧ན༥༽ ༼༣༽ ལུང་དེའི་དོན་ལེགས་བཤད་སྙིང་པོ་ལས། དགག་བྱ་ལ་ཁྱད་པར་སྐབས་དེར་མ་སྦྱར་བའི་སྐྱེ་བ་མེད་པ་ལ་སོགས་པ་སྒྲ་ཇི་བཞིན་པ་མིན་པས་ངེས་དོན་མིན་ནོ་སྙམ་དུ་མི་བཟུང་སྟེ། ཞེས་པ་ནས། དོན་གྱིས་སྦྱར་ཟིན་པས་དངོས་སུ་མ་སྨོས་པ་དེ་དག་ཀྱང་སྒྲ་ཇི་བཞིན་པའོ། །ཞེས་གསུངས་པའི་ཕྱིར། ༼ཇུ༢༽འདི་དང་མཐུན་པར་ལྕང་སྐྱའི་གྲུབ་མཐར་ཡང། མདོ་དེའི་ནང་ན་དངོས་སུ་སྦྱར་བ་གཅིག་ཡོད་ན་གཞན་ལ་ཡང་སྦྱར་བས་ཁྱབ་པར་གསུངས་

― GTD002_Page_0101 ―

^{[མ་དཔེ་གཟིགས་ན་འདིར་གནོན།]}

[Full Size]

སོ། །འོན་ཀྱང་གྲུབ་མཐའ་ཆེན་མོར། རྡོར་གཅོད་ལས། དེའི་ཚེ་ཆོས་ཀྱང་སྤངས་ན་ཆོས་མ་ཡིན་པ་ལྟ་ཅི་སྨོས། ཞེས་དང། དཀོན་བརྩེགས་ལས། སངས་རྒྱས་པའི་ནུབ་མོ་ནས། མྱ་ངན་འདས་པའི་བར་དུ་ཚིག་གཅིག་ཀྱང་མ་གསུངས་ཞེས་པ་གཉིས་ཁྱད་པར་གཏན་མ་སྦྱར་བ་ལ་གསུངས་ཤིང། མདོ་གཉིས་ཀའི་ནང་ན་དངོས་སུ་སྦྱར་ཡོད་ཀྱང་དཀྱུས་མི་འདྲ་བ་ཡིན་ནམ་དཔྱད། ༼༧བ༦༽ ༼༢༽ མདོ་སྔ་མའི་སྒྲས་ཟིན་ལྟར་ཕ་མ་གསད་བྱ་དེ་བརྗོད་བྱ་ཙམ་ཡང་མིན་ལ་བསམ་དོན་གྱི་སྲིད་སྲེད་༼ཉུ༢༽སྟེ་དཔལ་འབྱོར་ལྷུན་འགྲུབ་ཀྱི་དྲང་ངེས་རྣམ་འབྱེད་ལྟར། སྲིད་པ་ནི་རྣམ་སྨིན་ཡིད་དུ་འོང་མི་འོང་སོ་སོའི་ཐུན་མོང་མ་ཡིན་པའི་རྒྱུ་བྱེད་པས་ཕ་ལྟ་བུ་དང། སྲེད་པ་ནི་གནས་གང་དུ་ཉིང་མཚམས་སྦྱོར་ཀྱང་ཐུན་མོང་དུ་སྲེད་པས་གསོས་འདེབས་པར་འདྲ་བས་མ་ལྟ་བུ་སྟེ། དེ་༼༣༽གཉིས་སྤངས་པ་བརྗོད་དོན་ཡིན་པ་གང་ཞིག །༼༧ན༧༽ ༼༢༽ ཡང་ཁོ་ན་རེ། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། ། ༼ཏུ༢༽ཞེས་པའི་དོན། རེད་མདའ་བའི་ཀུན་བཏུས་རྣམ་བཤད་ལེགས་པར་བཤད་པའི་རྒྱ་མཚོ་ལས། འབྲས་བུ་རྣམ་སྨིན་གྱི་ཆ་དེ་འཇིག་རྟེན་པའི་མཁས་པས་མི་དཔོག་པས་ཟབ་པ་དང་ས་བོན་གྱི་ཀུན་གཞི་དེ་རྟེན་ལ་བཏགས་ཡོད་ཙམ་དུ་ཡོད་པས་ཕྲ་བ་དང། ཐོས་བསམ་གྱིས་མངོན་སུམ་དུ་མི་ཤེས་པས་ཟབ་པ་དང། འཇིག་རྟེན་པའི་སྒོམ་བྱུང་གིས་མངོན་སུམ་དུ་མི་ཤེས་པས་ཕྲ་བ་དང། ཉན་རང་གིས་ཤེས་དཀའ་བས་ཟབ་པ་དང། མོས་སྤྱོད་པས་ཤེས་དཀའ་

― GTD002_Page_0102 ―

^{[མ་དཔེ་གཟིགས་ན་འདིར་གནོན།]}

[Full Size]

བས་ཕྲ་བ་སྟེ། ཚུལ་གསུམ་བཤད་ལ། འདི་ལས་འཕྲོས་ཏེ། ཀུན་གཞི་རྟོགས་པ་ལ་སྟོང་ཉིད་རྟོགས་དགོས་ཚུལ་དང། རང་རྒྱལ་གྱིས་ཡན་ལག་བཅུ་གཉིས་རྟོགས་པ་མི་འགལ་ཚུལ་སོགས་ཤེས་པར་བྱའོ། ། ༼༦༽ཀུན་གཞི་སྟོན་ཡུལ་ཆོས་དང་གང་ཟག་གི་བདག་མེད་རགས་པ་གཉིས་སྟོན་རུང་ཡིན་པའི་ཕྱིར་༼ཐུ༢༽འདི་ལ་འོ་ན། ཕལ་ཆེན་པའི་ལུང་ལས། ལེན་པའི་རྣམ་ཤེས་དང། སྲིད་པའི་ཡན་ལག་ཅེས་སོགས་རྣམ་གྲངས་ཀྱི་སྒོ་ནས་ཀུན་གཞི་བསྟན་པ་མ་ཡིན་ནམ་ཞེ་ན། དེའི་ནང་དུ་སྟོན་པའི་ཚིག་ཡོད་ཀྱང་མདོ་རང་གིས་མ་བསྟན་ཟེར་དགོས་ཏེ། རང་རྒྱུད་པ་མན་གྱིས་དམན་མདོར་སྟོང་ཉིད་བཤད་པ་མི་འདོད་ལ། སྲིད་པ་འཕོ་བའི་མདོ་སོགས་ཀྱི་ནང་ན་སྟོང་ཉིད་སྟོན་པའི་ཚིག་ཡོད་པར་བྱང་ས་ལས་གསུངས་པའི་ཕྱིར་རོ། ། ༼༧བ༧༽ ༼༦༽ དེ་གཉིས་གང་ལ་དགོངས་པའི་དགོངས་གཞི་གཅིག་པ་མི་རུང་བའི་ཕྱིར། འདོད་མི་ནུས་ཏེ། ༼དུ༢༽དེ་གཉིས་དགོངས་གཞི་གཅིག་པའི་གནད་ཀྱིས། ཐེག་བསྡུས་སུ་ཀུན་གཞིའི་སྒྲུབ་བྱེད་དུ་བཀོད་པའི་ལུང། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང། །མྱ་ངན་འདས་པ་ཐོབ་པར་འགྱུར། །ཞེས་པ་དེ་ཉིད་རྒྱུད་བླ་ཐོགས་འགྲེལ་ལས་བདེ་གཤེགས་སྙིང་པོ་སྒྲུབ་བྱེད་དུ་བཀོད་པར་སྟོང་ཐུན་ལས་གསུངས་པ་དཔྱད་གཞི་ཆེའོ། །༼༧ན༨༽ ༼༡༽ རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །བདེར་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །ཅེས་༼ནུ༢༽རྣམ་

― GTD002_Page_0103 ―

^{[མ་དཔེ་གཟིགས་ན་འདིར་གནོན།]}

[Full Size]

གྲངས་སུ་གསུངས་ཤིང། ལང་གཤེགས་ལས་ཀྱང། དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པར་བསྒྲགས་པ་རྣམ་པར་ཤེས་པ་བདུན་དང་བཅས་པ་ཞེས་རྣམ་གྲངས་སུ་༼༢༽གསུངས་པའི་ཕྱིར། ༼༤༽འཇུག་འགྲེལ་ལས་ཀྱང། དངོས་པོ་ཐམས་ཅད་ཀྱི་རང་བཞིན་གྱི་རྗེས་སུ་ཞུགས་པའི་ཕྱིར་སྟོང་ཉིད་ཁོ་ན་ཀུན་གཞི་རྣམ་པར་ཤེས་པའི་སྒྲས་བསྟན་པར་རིག་པར་བྱའོ། །ཞེས་གསུངས་པའི་ཕྱིར། ༼པུ༢༽འདིས་སྟོང་ཉིད་ལ་ཀུན་གཞིའི་མིང་གིས་བཏགས་པའི་དོན་བཤད་དེ། ཀུན་གཞི་འདོད་པ་རྣམས་ཀྱིས་དེ་གཞིར་བྱས་ནས་ཀུན་བྱང་ཐམས་ཅད་འཇོག་པས། དེ་ལ་ཐེག་བསྡུས་སུ་ཐེག་ཆེན་པའི་ཁྱད་པར་བཅུ་བཤད་པའི་ཚེ་ཤེས་བྱའི་གནས་ཞེས་བཤད་པ་ལྟར། བདེན་སྟོང་ཡང་རྟེན་འབྱུང་བྱ་བྱེད་ཐམས་ཅད་འཇོག་པའི་གཞི་ཡིན་པས་གནད་ཀྱིས་རྒྱུ་བྱེད་པས་རིགས་སུ་འཇོག་ཚུལ་དང། རྟེན་བྱེད་པས་རིགས་སུ་འཇོག་པ་ནམ་མཁའ་དང་འདྲ་བར་ཡང་བཤད་དེ། དོན་བསྡུས་ན་སྒྲ་དོན་གྱི་སྟེང་ནས་དགོངས་གཞིར་བཤད་པའོ། ། ༼༥༽ལང་གཤེགས་དང་འཇུག་འགྲེལ་གྱི་༼ཕུ༢༽སྙིང་པོ་རྟག་བརྟན་སྟོན་པའི་མདོ་ལུང་དྲངས་པ་འདི་དག་ཀྱང། ལང་གཤེགས་སུ་མདོ་དེའི་བཤད་ཚུལ་བཀོད་པ་རྣམས་སུ་འདུག་ཅིང། མདོར་རང་ཉིད་བོད་དུ་འགྱུར་བ་མ་མཐོང་ངོ་། ། ༼༧བ༨༽ ༼༢༽ཐོགས་འགྲེལ་ལས། དོན་གྱི་གནས་གསུམ་པོ་འདི་དག་ཀྱང་དེ་བཞིན་གཤེགས་པའི་སྙིང་པོའི་མདོའི་རྗེས་སུ་འབྲང་སྟེ། ཞེས་གསུངས་པ་གང་ཞིག །༼བུ༢༽ཞེས་སོགས་ཀྱི་དོན་ནི། ཐོབ་བྱ་

― GTD002_Page_0104 ―

^{[མ་དཔེ་གཟིགས་ན་འདིར་གནོན།]}

[Full Size]

དཀོན་མཆོག་གསུམ་དང། ཐོབ་བྱེད་ཁམས། བྱང་ཆུབ། ཡོན་ཏན། འཕྲིན་ལས་བཞི་སྟེ། རྡོ་རྗེའི་གནས་བདུན་གྱི་དང་པོ་གསུམ་ལ། ཕྱི་མ་བཞི་རྒྱུ་དང་བྱེད་པ་ཅི་རིགས་ཀྱིས་བསྡུས་ནས་བདེན་མེད་དུ་བཤད་ཅེས་པ་ཡིན་ལ། དེ་བཞིན་གཤེགས་པའི་སྙིང་པོའི་མདོར་སྐྱབས་གསུམ་བཤད་པའང་མི་སྣང་ཞིང། ཐོགས་འགྲེལ་གྱི་དཔེ་གསར་རྙིང་བདུན་དུ་བཙལ་ཀྱང། ལུང་འདི་མ་རྙེད་ལ། དར་ཊཱིཀ་དང་རོང་སྟོན་གྱི་ཊཱིཀྐ་སོགས་སུ་ཡང་དེ་འདྲའི་ཟུར་མི་སྣང་བས། འདི་ནི་ཐོགས་འགྲེལ་ལས། གནས་གསུམ་པོ་འདི་ནི་ལྷག་པའི་བསམ་པ་བརྟན་པའི་ལེའུའི་རྗེས་སུ་འབྲང་སྟེ་རིགས་པར་བྱའོ། །ཞེས་པའི་ཡི་གེ་ནོར་བར་སྣང་ལ། དེ་ནི་དཀོན་བརྩེགས་ཀྱི་ལེའུ་ཞིག་ཡིན་ནོ། །འོན་ཀྱང་དེ་ལྟར་བྱས་ན་འདི་དག་གིས་དེ་བཞིན་གཤེགས་པའི་སྙིང་པོའི་མདོ་ངེས་དོན་དུ་སྒྲུབ་པའི་འབྲེལ་ཆེས་དཀའ་བར་སྣང་སྟེ། གཟུར་གནས་བློ་ལྡན་རྣམས་ཀྱིས་དཔྱད་པར་བྱ་དགོས་སོ། ། ༼༣༽ཐོགས་འགྲེལ་ལས། དོན་གྱི་གནས་བཞི་བོ་འདི་དག་ལས་ཀྱང། ཤེས་བྱ་ཐམས་ཅད་བསྡུས་པའི་ཕྱིར། ཞེས་གསུངས་པའི་ཕྱིར། ༼མུ༢༽འདི་བཞིས་བསྡུས་ཚུལ་རྒྱུད་བླར༌། རྟོགས་བྱ་རྟོགས་པ་དེ་ཡིས་ནི། །ཡན་ལག་རྟོགས་པར་བྱེད་ཕྱིར་ཏེ། །གོ་རིམ་ཇི་བཞིན་གནས་གཅིག་སྟེ། །དག་རྒྱུ་གསུམ་ནི་རྐྱེན་ཡིན་ནོ། །ཞེས་པས་བསྟན་ཏེ་འདིར་མ་བྲིས། ༼༤༽དེ་སྐད་དུ། སྟོང་ཐུན་ལས། ལང་གཤེགས་དང་རང་འགྲེལ་ལས་དྲང་དོན་དུ་གསུངས་པ་འདི་ནི། ༼ཙུ༢༽བདེ་གཤེགས་སྙིང་པོའི་མདོ། གཟུངས་ཀྱི་དབང་ཕྱུག་རྒྱལ་པོའི་མདོ། དཔལ་འཕྲེང།

― GTD002_Page_0105 ―

^{[མ་དཔེ་གཟིགས་ན་འདིར་གནོན།]}

[Full Size]

མྱང་འདས། ཡེ་ཤེས་སྣང་བ་རྒྱན། རྔ་བོ་ཆེ། དགོངས་འགྲེལ། སོར་མོའི་འཕྲེང་བ་ལ་ཕན་པའི་མདོ། འཕེལ་འགྲིབ་མེད་པ་བསྟན་པའི་མདོ། རྣམ་པར་མི་རྟོག་པ་ལ་འཇུག་པའི་གཟུངས་ཏེ། ད་ལྟ་བོད་ཕྱི་མ་རྣམས་ལ་ཡོངས་སུ་གྲགས་པའི་༼༤༽སྙིང་པོའི་མདོ་བཅུའི་ནང་གི་བདེ་བར་གཤེགས་པའི་སྙིང་པོའི་མདོ་ཞེས་བྱ་བ་ཐེག་པ་ཆེན་པོ་རྒྱུད་བླ་མས་དེའི་དོན་རྒྱ་ཆེར་གཏན་ལ་ཕབ་པ་དེ་མིན་ཏེ། ༼༥༽དེ་བཞིན་གཤེགས་པའི་སྙིང་པོའི་མདོ་སྒྲ་ཇི་བཞིན་པ་མ་ཡིན་པས་དྲང་དོན་དུ་བྱེད་ན་འོག་ནས་ཁམས་བསྟན་པའི་དགོས་པ་སྟོན་པའི་རྩོད་ལན་ཅུང་ཟད་ཀྱང་འབྲེལ་མེད་པར་འགྱུར་བའི་ཕྱིར། ༼ཚུ༢༽དེའི་ཚུལ་ཡང། སྤྲིན་དང་རྨི་ལམ་ཇི་བཞིན་དེ་དང་དེར། །ཤེས་བྱ་ཐམས་ཅད་རྣམ་ཀུན་སྟོང་པ་ཞེས། །གསུངས་ནས་ཡང་འདིར་རྒྱལ་རྣམས་སེམས་ཅན་ལ། །སངས་རྒྱས་སྙིང་པོ་ཡོད་ཅེས་ཅི་སྟེ་གསུངས། །ཞེས་འགལ་བའི་རྩོད་པ་དངོས་སུ་བཀོད་ནས། ཟློས་པའི་རྩོད་པ་ཤུགས་ལ་བསྟན་ཀྱང། ལན་དེ་ལས་བཟློག་སྟེ། སེམས་ཞུམ་སེམས་ཅན་དམན་ལ་བརྙས་པ་དང། །ཡང་དག་མིན་འཛིན་ཡང་དག་ཆོས་ལ་བསྐུར། །བདག་ཅག་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་གསུངས་པའི་ཤུགས་བསྟན་གྱི་རྩོད་པ་དང། དངོས་སུ་བཀོད་པའི་ལན་རྣམས་འབྲེལ་མེད་དུ་འགྱུར་ཏེ། འདི་དྲང་དོན་ཡིན་ན་ཀུན་རྫོབ་གཙོ་བོར་སྟོན་པས་ཤེར་མདོ་དང་དངོས་བསྟན་གཙོ་བོ་མི་འདྲ་བ་ལ། དེ་དང་ཟློས་སྙམ་པ་བློ་ལྡན་ལ་སྐྱེ་མི་སྲིད་པའི་ཕྱིར་རོ། །རྒྱུད་བླ་

― GTD002_Page_0106 ―

^{[མ་དཔེ་གཟིགས་ན་འདིར་གནོན།]}

[Full Size]

དར་ཊཱིཀ་ན། ཐལ་འགྱུར་འདིའི་ལན་འདེབས་ལུགས་སོགས་ཞིབ་ཆ་མང་པོ་ཡོད། འཇམ་དབྱངས་མཁྱེན་པ་ཉི་མ་སྟོང་གི་འོད། །སྤྲོས་པས་གསུང་རབ་དཀའ་གནད་འདབ་མ་བརྒྱ། །ཆེས་ཆེར་བཞད་པའི་ལེགས་བཤད་དཔལ་ཡོན་ཅན། །དཔལ་ལྡན་རྡོ་རྗེ་འཆང་དབང་ཁྱོད་ཕྱག་འཚལ། །བརྩམས་པའི་འུར་སྒྲ་ཆུང་ཡང་གཏིང་མི་མངོན། །བདག་བློའི་རལ་བཅུད་བཤད་པའི་ཀླུང་ཆེན་འདི། །སྦྱར་བྱང་ཝུ་བའི་གོས་ཅན་སྙིགས་དུས་ཀྱི། །མཁས་རློམ་བཤད་པའི་ཆུ་ཕྲན་དོ་ཟླ་མིན། །༈ ༼༨ན༠༽ ༼༧༽ གསེར་འཕྲེང་ལས། དེ་ལྟ་ན་བསྟན་བཅོས་ལ་དོགས་པ་འདི་འགོད་པ། ཞེས་གསུངས་པའི་ཕྱིར། ༼ཛུ༢༽འགྲེལ་པའི་དེ་མདོ་དང་བསྟན་བཅོས་གཉིས་སུ་ཕྱེ་བའི་མདོ་ལ་ཡིན་པར་ཐལ། དེ་འགོད་ཡུལ་གྱི་མདོ་བསྟན་བཅོས་གཉིས་སུ་ཕྱེ་བའི་བསྟན་བཅོས་མེད་པའི་ཕྱིར། སོགས་སྤྲོ་སླ། རྒྱན་སྣང་གི་དེ་དངོས་སུ་བྱུང་བར་གསུངས་པས་རྩོད་པ་པོ་རང་གཞན་གྱི་སྡེ་བ་གོང་འོག་སུ་ཞིག་ཡིན་དཔྱད་པར་བྱ་དགོས་ཏེ། རྒྱལ་བ་ལ་རྩོད་པའི་ཕྱིར་རོ་ཞེས་ཁ་ཅིག་ཟེར། ༼༨བ༠༽ ༼༤༽ གསུམ་ག་སྟོན་ན་ཟློས་ཞེས་བརྩད་པ་ལ། ལན་དུ་གསུམ་ག་སྟོན་ཡང་ཟློས་སྐྱོན་མེད་ཅེས་ལན་མཛད་པའི་ཕྱིར། ༼ཝུ༢༽ཡུམ་གསུམ་དང་ཟློས་སྤོང་དགོས་འབྲེལ་གྱིས་བཤད་པའི་བརྒལ་ལན་འདི་གཙོ་བོ་ཡིན་ཞིང། རེ་རེ་བ་སྟོན་ན་མི་འཐད་ཅེས་པའི་རྩོད་པ་སློབ་དཔོན་གྱིས་ཁ་བསྐང་བའོ། །འདི་ལ་གསེར་འཕྲེང་ལྟར་ན་འདིས་རྩོད་ཚུལ་གཞི་ཙམ་མམ། ལམ་ཙམ་མམ། རྣམ་པ་ཙམ་སྟོན་ན་ཟློས་པའམ། ཆད་པའི་སྐྱོན་ཡོད་ལ། གསུམ་ག་སྟོན་ན་ལུས་གསུམ་དུ་འགྱུར་

― GTD002_Page_0107 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་རྩོད་པ་བཀོད་པ་ཡིན་ཚེ། ལན་ཇི་ལྟར་བྱས་ཀྱང་མི་འགྲིག་སྟེ། མངོན་པར་བཤད་པའི་ཕུང་ཁམས་སྐྱེ་མཆེད་ཀྱི་ཆོས་གསུམ་པོ་ཙམ་བསྟན་ཀྱང་སྐྱོན་མེད་ན། ལན་དུ་བཀོད་པའི་སྨན་གྱི་དཔེ་དང་མི་འགྲིགས་ཤིང། འགྲེལ་ཆེན་དུ་ཕྱོགས་སྔ་མའི་བརྟགས་པ་ཁས་བླངས་ན་རང་ལུགས་ལ་ཡང་སྐྱོན་འབྱུང་བར་གསུངས་པ་དང་འགལ་ལོ། །སྐྱོན་འོང་བར་ཡང་མི་རིགས་ཏེ། མངོན་པར་བཤད་པའི་གཞི་དེ་འདིར་བསྟན་པར་རང་གིས་ཀྱང་འདོད་དགོས་པའི་ཕྱིར། གལ་ཏེ་ཁོ་ནའི་སྒྲ་ཙམ་ལ་རེ་ན་དེས་ཀྱང་མི་ཕན་ཏེ། མངོན་པར་བཤད་པའི་ཆོས་གསུམ་གྱིས་ཤེས་བྱ་ཐམས་ཅད་བསྡུས་པའི་ཕྱིར་ན་ཙམ་སྒྲ་སྦྱར་ཡང་འདོད་དགོས་པའི་ཕྱིར་རོ། །འོན་ཀྱང་ཟློས་སྐྱོན་མེད་དེ། ཟློས་སྐྱོན་ཡོད་མེད་བཤད་བྱ་ལ་སྦྱར་བ་མིན་གྱི་བཤད་ཚུལ་ལམ་དགོས་པ་ལ་སྦྱོར་དགོས་པའི་ཕྱིར། དེས་ན་རྩོད་ཚུལ། མཛོད་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཞིག་ཉེ་བར་ཞི་བར་བྱ་བའི་ཐབས་མེད་ལ། །ཞེས་གསུངས་པ་ལྟར། སྤང་བྱ་ཉོན་མོངས་ཙམ་འཇོམས་བྱེད་ཀྱི་གཉེན་པོར་གཞི་མི་རྟག་སོགས་རྟོགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་ཕྱིར་དུ་གཞི་སྟོན་ནམ་ཞེས་སོགས་ཡིན་ལ། ལན་ཡང་དགོས་པ་དེ་ཙམ་གྱི་ཕྱིར་གཞི་སྟོན་ན་ཟློས་སྐྱོན་ཡོད་ཀྱང། འདིར་དེའི་ཡུལ་ཅན་གོལ་ས་གཞི་ཤེས་མཚོན་བྱེད་ཡིན་ཞེས་བཤད་དགོས་པས་ཁོ་ནའི་སྒྲ་ཡང་མི་དགོས་ལ། ཕྱོགས་སྔའི་བརྟགས་པ་ལྟར་གྱི་གསུམ་ག་བསྡུས་ཞེས་ཀྱང་ཟེར་མི་རུང་བར་སྣང་སྟེ་

― GTD002_Page_0108 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིབ་པར་དེ་ཉིད་དུ་དྲངས་པའི་འགྲེལ་ཆེན་སོགས་ལ་དཔྱད་པར་བྱའོ། །རྣམ་བཤད་ཀྱང་འབྲུ་སྣོན་སྐབས་འདི་དང་མཐུན་པར་སྣང་ངོ་། །༼༨ན༡༽ ༼༡༽ ཡང་ཁ་ཅིག་ན་རེ། དོགས་པ་སྐྱེ་བའི་གཞི་མཆོད་བརྗོད་ཟེར་ནའང་མི་འཐད་པར་ཐལ། འདིའི་དོགས་པ་དང་རྩོད་པ་མཆོད་བརྗོད་ལ་མ་ཡིན་པར་ཁྱོད་ཀྱིས་ཁས་བླངས་པའི་ཕྱིར། ༼ཞུ༢༽ཞེས་པ་ནི་ཕ་རོལ་པོ་དེ་མཆོད་བརྗོད་དེ་ནི་ལུས་དང་མཐུན་པའི་ཕྱག་ཡིན་པས། མཆོད་བརྗོད་དུ་གཞི་གཉེན་རྣམ་གསུམ་བཤད་འདུག་སྙམ་དུ་དོགས་པ་སྐྱེ་བའི་གཞི་བྱས་ཏེ་འདི་ལ་དཔག་ན་ལུས་ལའང་རེ་རེའམ་གསུམ་ག་སྟོན་ཞེས་རྩོད་པར་འདོད་མཁན་ཞིག་གོ །འགོག་ལུགས་ནི་དེ་བཤད་ཚུལ་མི་ལེགས་པར་ཐལ། གང་ལ་དོགས་པ་སྐྱེ་བ་དེ་ཉིད་ལ་རྩོད་ཀྱི་གཞན་དུ་འབྲེལ་མེད་པའི་ཕྱིར་ཞེས་པ་ཡིན་ནམ་སྙམ། ༼༥༽ལམ་ཤེས་ཆོས་ཅན། རྣམ་གཞག་གི་རྟེན་བྱང་སེམས་འཕགས་པར་བྱེད་པའི་རྒྱུ་མཚན་ཡོད་དེ། བྱང་སེམས་ཀྱིས་ཉན་རང་སངས་རྒྱས་ཀྱི་ལམ་གསུམ་ཤེས་སྐྱེད་བྱེད་དགོས་ཤིང། ༼ཟུ༢༽ཤེས་སྐྱེད་ཀྱི་དོན་གསེར་འཕྲེང་ལས། རང་རྒྱུད་ལ་སྐྱེད་ཅིང་གཞན་ལ་སྟོན་ཚུལ་ཤེས་པ་ལ་གསུངས་ཤིང། མཁས་པ་འགའ་ཞིག་རྟོགས་རིགས་སྐྱེད་ཅིང་ཉན་རང་གི་ལམ་དངོས་རྣམས་ཤེས་པ་ལ་གསུངས་པ་ཡང་དེ་དང་མཐུན་ནོ། །རྒྱལ་ཚབ་དང་པོར་བསྐྱེད་ཅིང། ཕྱིས་མངོན་སུམ་ཤེས་པ་ལ་གསུངས་པ་བུ་ཊཱིཀ་དང་ཕྱོགས་འདྲ་ཞིང་མཁས་གྲུབ་རྗེས་སྒོམ་བྱུང་གིས་སྐྱེད་ཅིང་ཐོས་བསམ་གྱིས་ཤེས་པ་ལ་གསུངས་སོ། ། ༼༨ན༢༽ ༼༣༽ ཐབས་ཤེས་ཁྱད་པར་ཅན་སྟོང་ཉིད་རྟོགས་པའི་ལྟ་བ་

― GTD002_Page_0109 ―

^{[མ་དཔེ་གཟིགས་ན་འདིར་གནོན།]}

[Full Size]

དང་སྙིང་རྗེ་ཆེན་པོ་ཕན་ཚུན་གཅིག་གིས་གཅིག་མ་ཟིན་ན་ཁྱད་པར་ཅན་མ་ཡིན་པས་ཁྱབ་པའི་ཕྱིར། ༼འུ༢༽སྙིང་རྗེ་ཆེན་པོ་ཙམ་གྱིས་ཟིན་པའི་སྟོང་ཉིད་རྟོགས་པའི་ཤེས་རབ་ཉན་རང་ལ་ཡོད་ཀྱང། གཞན་དོན་ཁུར་འཁྱེར་གྱི་དེ་མེད་དེ། དེ་ནི་ཚོང་ཐག་བཅད་པ་ལྟ་བུ་དགོས་པར་ཞལ་ལུང་གསུངས་ཤིང། དེ་འདྲའི་བློ་སྟོབས་རྫོགས་པ་དེ་ལ་མེད་པའི་ཕྱིར་རོ། ། ༼༥༽ཇོ་བོ་ལྷ་གཅིག་གིས་ཀྱང། ཐབས་དང་བྲལ་བའི་ཤེས་རབ་དང། །ཤེས་རབ་བྲལ་བའི་ཐབས་དག་ཀྱང། །གང་ཕྱིར་འཆིང་བ་ཞེས་གསུངས་པ། །དེ་བས་གཉིས་ཀ་སྤང་མི་བྱ། །ཞེས་༼ཡུ༢༽དྲི་མ་མེད་པར་གྲགས་པའི་མདོ་ལས་གསུངས་པ་སྟེ། ལུང་འདི་མདོ་དེ་ཉིད་ཚིགས་བཅད་དུ་བྱས་པའོ། ། ༼༧༽གཉིས་པ་གྲུབ་སྟེ། རྩ་བར། གཉེན་པོ་ཉི་ཚེ་བ་དང་འབྲས་བུ་རྒྱུན་ཞུགས་སོགས་སྣ་ཚོགས་ཉིད། ། ༼རུ༢༽སྟེ་ཐེག་ཆེན་ལ་འཁོར་འདས་རོ་མཉམ་དུ་རྟོགས་པའི་ཡེ་ཤེས་ཡོད་པས། རྒྱ་མཚོར་རོ་གཅིག་པ་ལྟ་བུ་སྟེ། འབྲས་བུ་བཞི་སོགས་ཀྱི་དབྱེ་བ་མ་མཛད་པ་རྒྱལ་སྲས་རྣམས་ངང་རིང་བའི་དབང་གིས་ཡིན་ལ། ཐེག་དམན་རྣམས་ངང་ཐུང་བས་ཐབས་མཁས་ཀྱི་བར་དུ་གྲོང་ཁྱེར་སྤྲུལ་བ་ལྟར། མཐར་ཐུག་ཐེག་གཅིག་སྒྲུབ་སྐབས་སུ་གསུངས་པ་ལྟ་བུའོ། ། ༼༧༽ཅེས་གསུངས་པའི་ཕྱིར། ༼ལུ༢༽ཁྱད་མཚན་སྤྱི་དང། མཐའ་དག་པ་དང་ཡོངས་འཛིན་དང། །རོ་མྱང་མེད་དང་ཞེས་ཐ་མ་གསུམ། སྲིད་ཞི་མཉམ་ཉིད་དང། ཟབ་པ་བརྒྱད་ཀྱི་གསུམ་པ་དང་བརྒྱད་པ་སོགས་༼ཤུ༢༽སྐབས་བཞི་པའི་རིགས་པས་ཀྱང་ཁེགས་སོ། །༼༨བ༢༽ ༼༡༽

― GTD002_Page_0110 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པ་སྤངས་རྟོགས་རྫོགས་ཚད་ལ་ཨར་དང་ཉ་དཔོན་སོགས་ཁ་ཅིག་ན་རེ། ༼༦༽ཡང་རློམ་པ་རོང་ཊཱིཀ་པ་ཁ་ཅིག་ན་རེ། ༼༧༽འཁོར་བར་འཆིང་བྱེད་ཀྱི་ཉོན་མོངས་དགྲ་བཅོམ་ལྟར་ས་དང་པོ་བས་ཀྱང་ས་དང་པོ་ནས་སྤངས་ལ་བག་ལ་ཉལ་གྱི་ཉོན་སྒྲིབ་ས་དང་པོ་བས་མ་སྤངས་པ་ལྟར་ཉན་རང་དགྲ་བཅོམ་པས་ཀྱང་མ་སྤངས་པའི་ཕྱིར། ༼སུ༢༽དང་པོ་གྲུབ་སྟེ། རབ་འབྱོར་དང་ཐེག་ཆེན་མཐོང་ལམ་པ་གཉིས་ཉོན་མོངས་སྤངས་པར་ཆོས་མཚུངས་པའི་ཕྱིར། མཐོང་ལམ་ལ་གདམས་པའི་གདམས་ངག་དེ་རབ་འབྱོར་གྱིས་བཤད་པ་ཡིན་ཏེ། ཉི་སྣང་ལས། ཅིའི་ཕྱིར་གནས་བརྟན་རབ་འབྱོར་གྱི་ཁ་ཉིད་ནས་སྟོན་པར་མཛད་ཅེ་ན། དེ་ནི་ཉོན་མོངས་པ་མེད་པའི་མཆོག་ཏུ་གྱུར་པ་ཉིད་ཀྱིས་ཉོན་མོངས་པ་དང་བྲལ་བའི་སྐལ་བ་མཉམ་པ་ལྷག་པའི་ཕྱིར། མཐོང་བའི་ལམ་དང་རྗེས་སུ་མཐུན་པའི་སྟོན་པ་པོ་ཉིད་ཡིན་པའི་ཕྱིར་རོ། །ཞེས་གསུངས་པའི་ཕྱིར། ༼༨ན༣༽ ༼༣༽ འཇུག་པ་ལས། གང་དག་དུད་འགྲོར་བསྐལ་བ་མང་པོར་ཚེ་བརྐྱལ་གྱུར་པ། །དེས་ཀྱང་མ་སྐྱེས་ཤིང་རྟག་པའི་བདག་འདི་མ་མཐོང་ལ། །ངར་འཛིན་དེ་དག་ལ་ཡང་འཇུག་མཐོང་སྟེ། །ཞེས་གསུངས་པའི་ཕྱིར་དང། ༼༨བ༣༽ ༼༡༽ གཉིས་པ་གྲུབ་སྟེ། རྒྱུད་བླ་མ་ལས། འཕགས་པའི་ལམ་དང་འབྲེལ་བ་ཡིས། །འཇིག་ཚོགས་སྙིང་པོ་བཅོམ་རྣམས་ཀྱིས། །སྒོམ་ལམ་ཡེ་ཤེས་སྤང་བྱ་རྣམས། །གོས་རུལ་༼ཧུ༢༽ཀྱི་དཔེ་ནི་མཐོང་སྒོམ་གྱི་སྤང་བྱ་གཉིས་རྒྱུ་སྤུན་ལྟར་གྲོགས་སུ་སོང་ཡོད་པ་ལས་མཐོང་སྤང་གི་སྙིང་པོ་ཟད་ཟིན་པའི་ཆ་ནས་ཡིན་ལ། བཙོ་བླག་མཁན་གྱིས་དྲི་མ་ཆུང་རིམ་ལ་སྦྱངས་

― GTD002_Page_0111 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར་འབད་པ་ཆེར་བརྟེན་དགོས་པ་ལྟར། སྒོམ་སྤང་ཆུང་རིམ་དང་གཉེན་པོ་ཆེ་རིམ་སྦྱོར་དགོས་པས་དེ་སྤོང་ཚུལ་༼༢༽དྲི་མ་དག་ལུགས་དང་མཚུངས། །ཞེས་གསུངས་པའི་ཕྱིར། ༼༣༽ཁྱབ་སྟེ། རྐང་པ་དང་པོ་གཉིས་ཀྱིས་མདོ་ལས་འཇིག་ཚོགས་ལ་ལྟ་བའི་རིའི་རྩེ་མོ་མཐོང་སྤང་ཉི་ཤུ་མཐོང་ལམ་ཡེ་ཤེས་ཀྱིས་བཅོམ་པ་དང། ༼༨ན༤༽ ༼༢༽ གཉིས་པ་གྲུབ་སྟེ། ༼ཨུ༢༽བདག་མེད་རྟོགས་པའི་ཤེས་རབ་ཆོས་ཅན། ཁྱོད་གོམས་པར་བྱས་པ་ལས་སྐྱེ་བོ་ལ་ལས་ཆགས་སོགས་ཉོན་མོངས་ཟད་པར་འགྱུར་ཏེ། དེ་དང་འཕེལ་འགྲིབ་རྗེས་སུ་འགྲོ་ལྡོག་ངེས་པའི་མི་མཐུན་ཕྱོགས་གང་ཞིག །ཁྱོད་གོམས་པ་ལས་སེམས་ཀྱི་བདག་ཉིད་དུ་འགྱུར་རུང་གི་ཡོན་ཏན་ཡིན་པའི་ཕྱིར། ཞེས་འཆད་པར། ༼༢༽རྣམ་འགྲེལ་ལས། ༼ཀེ༢༽འགྲིབ་དང་ཕུལ་བྱུང་བརྟེན་པ་ཀུན། །མི་མཐུན་ཕྱོགས་དང་བཅས་ཉིད་ཕྱིར། ། ༼༢༽དེ་གོམས་པ་ལས་ཆགས་གྱུར་པ། །ལ་ལར་ཟག་པ་ཟད་པར་འགྱུར། །ཞེས་གསུངས་པའི་ཕྱིར། ༼༥༽མཛོད་ལས་ཀྱང་དེའོ། ། ༼ཁེ༢༽ཕྲ་རྒྱས་སྤངས་པ་མ་ཡིན་དང། །ཡུལ་ནི་ཉེ་བར་གནས་པ་དང། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་སོ། །འདིའི་ཡུལ་ཞེས་པ་དང། ལུང་སྔ་མའི་གནས་ཀྱི་ཆོས་ཞེས་པ་ཉོན་མོངས་པའི་དམིགས་རྐྱེན་སྡུག་མི་སྡུག་སོགས་སོ། ། ༼༥༽རྩ་རྟགས་བཞི་པ་གྲུབ་སྟེ། དེ་ཉོན་མོངས་ཀྱི་ས་བོན་དང། ཉོན་མོངས་ལྐོག་གྱུར་པ་དང། ཉོན་མོངས་སྤང་དགོས་ཀྱི་རྒྱུད་ལ་ཡོད་པར་བཤད་པའི་ཕྱིར་ཏེ། ༼གེ༢༽སྒྲིབ་

― GTD002_Page_0112 ―

^{[མ་དཔེ་གཟིགས་ན་འདིར་གནོན།]}

[Full Size]

བྱའི་དོན་དགུ་ལས། སོ་སྐྱེའི་ས་ལ་བརྟེན་པ་བཞི་སྟེ། ༼༦༽རྒྱུད་བླ་མ་ལས། ཆ༡གས་དང་རྨོང༢ས་དང་སྡ༣ང་དང་དེའི། །ཀུན་ལྡང་དྲ༤ག་དང་བག་ཆ༥གས་དང། ། ༼༨བ༤༽ ༼༡༽ དབུ་མ་སྙིང་པོའི་ལེའུ་གསུམ་པ་ལས། གངས་འཕྲེང་བསིལ་བའི་འོད་ཟེར་དང། ཙན་དན་བས་ལྷག་གསུང་གི་ཆུས། །ལུས་ཅན་ཡིད་ཀྱི་ཉོན་མོངས་མེས། །རབ་ཏུ་གདུང་བ་ཞི་བར་བྱེད། ། ༼༥༽དགེ་འདུན་དཀོན་མཆོག་ཡིན་པའི་ཕྱིར། ཁྱབ་སྟེ། དེ་ལ་༼ངེ༢༽ཆོས་མཐོང་བ་སོགས་བཞི་དང། ཐེ་ཚོམ་དང་སོམ་ཉི་ལས་བརྒལ་བ་བསྒོམས་པས། ༼༦༽འཕགས་པའི་ཁྱད་པར་ལྔའམ་དང་པོ་བཞི་སོ་སོར་ཕྱེ་བའི་བརྒྱད་དང་ལྡན་པའི་ཁྱབ་པས་ཕྱིར་ཏེ། མདོ་ལས། ཆོས་མཐོང་བ་ཆོས་བཟོད། ཆོས་ཐོབ་པ། ཆོས་ཤེས་ཆོས་རིག་པ། རྗེས་བཟོད། ཆོས་ངེས་པ། རྗེས་ཤེས་སོ། ། ༼ཅེ༢༽ཞེས་རྒྱལ་སྲས་མ་དང། དར་ཊཱིཀ་སོགས་སུ་གསུངས་པ་ལྟར་ན། ཝེན་ཚེགས་ཀྱི་དགོངས་འགྲེལ་འགྲེལ་ཆེན་ལས། དེ་ལ་མིག་ཅེས་བྱ་བ་ནི། འདི་ལྟ་སྟེ། ཆོས་སུ་བཟོད་པའོ། །ཤེས་པ་ནི། འདི་ལྟ་སྟེ། ཆོས་སུ་ཤེས་པ་རྣམས་སོ། །རིག་པ་ནི་འདི་ལྟ་སྟེ། རྗེས་སུ་ཤེས་པའི་བཟོད་པའོ། །བློ་ནི་འདི་ལྟ་སྟེ། རྗེས་སུ་ཤེས་པ་རྣམས་སོ། །ཞེས་པའང་འབྲེལ་མི་ཆགས་པར་མི་སྣང། ༼༦༽རང་གིས་མཐོང་ལམ་ཐོབ་པ་ལ་སོམ་ཉི་ལས་བརྒལ་བ། གཞན་གྱི་དེ་ལ་ཐེ་ཚོམ་ལས་བརྒལ་བ། ༼ཆེ༢༽ལམ་སྒོམ་ཚུལ་རང་གིས་ཤེས་པས་གཞན་ཟེར་གྱི་རྗེས་འདེད་མི་དགོས་པས་༼༧༽གཞན་གྱི་དྲིང་ལ་མི་འཇོག་པ། སྟོན་པའི་བསྟན་པ་མུ་སྟེགས་སོགས་གཞན་གྱིས་བཀྲིར་མི་བཏུབ་པ། ཆོས་རྣམས་དྲིས་ལན་གྱིས་སྟོན་པ་ལ་

― GTD002_Page_0113 ―

^{[མ་དཔེ་གཟིགས་ན་འདིར་གནོན།]}

[Full Size]

མི་འཇིགས་པ་ཐོབ་པ། ཞེས་གསུངས་པའི་ཕྱིར། ༼༨ན༥༽ ༼༡༽ ཡང་ན་ནེམ་ནུར་ངེས་པར་མི་འདོད་པ་༼ཇེ༢༽སྟེ། མེད་པའི་ཕྱོགས་གཙོ་བོར་འཛིན་པས་དོན་མི་འགྱུར་༼༢༽ཡིན་ནོ། །ཐེ་ཚོམ་ནི་འདི་སྐད་བཤད་པའི་མཚན་ཉིད་ཀྱི་ཡིད་གཉིས་ཆ་མཉམ་པ་ཡིན་ནོ། ། ༼༦༽བྱས་པ་ལ་རོང་ཊཱིཀ་པ་ཁོ་ན་རེ། ༼ཉེ༢༽ཉོན་སྒྲིབ་ཀྱི་བག་ལ་ཉལ་དང༌། ཉོན་སྒྲིབ་ཀྱི་བག་ཆགས་གཅིག་ཏུ་འཁྲུལ་ནས། ༼༦༽བག་ལ་ཉལ་གྱི་ཉོན་སྒྲིབ་ཤེས་སྒྲིབ་ལ་ཁོ་བོས་ཀྱང་འདོད་ཟེར་ན། ༼༨བ༥༽ ༼༥༽ ཀུན་བཏུས་ལས། དེས་བྱང་ཆུབ་ཐོབ་པ་ན་ཉོན་མོངས་པ་དང་ཤེས་བྱའི་སྒྲིབ་པ་ཅིག་ཅར་སྤོང་ངོ༌། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །ཞེས་གསུངས་པའི་ཕྱིར། ༼ཏེ༢༽ལུང་འདིའི་དོན་རོང་ཊཱིཀ་པ་རྗེས་འབྲང་དང་བཅས་པས་སྒྲིབ་གཉིས་ཀྱི་བག་ཆགས་ཅིག་ཅར་སྤོང་བ་ལ་བཤད་སྣང༌། ༼༨ན༦༽ ༼༧༽ ཡང་སྔོན་གྱི་ཆེན་པོ་༼ལོ༽ཁ་ཅིག་ན་རེ། ༼ཐེ༢༽ས་བརྒྱད་པར་ཆེད་དུ་འབད་པ་ལ་མ་ལྟོས་པར་མི་རྟག་སོགས་མངོན་སུམ་དུ་རྟོགས་པ་འབྱུང་བས་གཞི་ཤེས་ཀྱི་གཟུགས་བརྙན་ཀྱང་དེ་ནས་འཇོག་སྟེ། དེ་མན་ཆད་རྩོལ་བཅས་ཀྱི་ས་ཡིན་པས། ཆེད་དུ་མ་བསྒོམས་པར་མངོན་སུམ་དུ་རྟོགས་པ་མི་འབྱུང་ལ་བསྒོམས་ན་དམན་ལམ་དུ་ལྟུང་བའི་ཕྱིར། དེས་ན་༼༧༽བྱང་སེམས་ཀྱིས་ཉན་རང་གི་ལམ་ཤེས་སྐྱེད་བྱེད་པ་ས་བརྒྱད་པར་ཡིན་གྱི་དེ་མན་ཆད་དུ་བྱས་ན་ཐེག་དམན་དུ་ལྟུང་བས་ས་བརྒྱད་པར་ཉན་རང་གི་སྤངས་རྟོགས་ཀྱི་རིགས་རྫོགས་ལ། ཉི་སྣང་གིས་མཐོང་ལམ་སྡུག་བསྔལ་ཆོས་བཟོད་ཀྱི་སྐབས་སུ་མི་རྟག་སོགས་མངོན་སུམ་དུ་

― GTD002_Page_0114 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་པར་བཤད་ཀྱང་དེ་ནི་ཤེས་བྱ་ཉན་ཐོས་ཀྱི་ཡིན་གྱི་ཤེས་བྱེད་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་མིན་གསུངས། ༼དེ༢༽ཁ་ཅིག །མི་རྟག་སོགས་མངོན་སུམ་དུ་མ་རྟོགས་པའི་འཕགས་པ་མི་སྲིད་པས། རིགས་ངེས་མཐོང་ལམ་གྱི་ཚེ་ཡང་མི་རྟག་པ་མངོན་སུམ་དུ་རྟོགས་ལ། དེ་མཐོང་ལམ་སྐབས་སུ་ཡང་བཤད་མོད། འོན་ཀྱང་ལམ་ཤེས་ཀྱི་ལྡོག་ཆ་ནས་ཡིན་གྱི། གཞི་ཤེས་ཀྱི་ལྡོག་ཆ་ནས་མིན་ཟེར་བ་རང་ལུགས་ཞེན་འཐས་པ་དང༌། ཚིག་ཙམ་སྙིང་པོར་ཟད་ཀྱི། ལོ་ཆེན་གྱི་དགོངས་པ་མིན་ཏེ། མི་རྟག་སོགས་མངོན་སུམ་དུ་རྟོགས་པ་ཡོད་ན། དེ་ལས་ལྷག་པའི་སྐབས་གསུམ་པའི་བསྟན་བྱའི་གཞི་ཤེས་བཞག་ཏུ་མེད་ཅིང༌། གཞི་ཤེས་དངོས་ས་བརྒྱད་པར་ཡང་མེད་པའི་ཕྱིར་དང༌། འོག་ཏུ་འགོག་ཚུལ་གྱིས་ཤེས་པའི་ཕྱིར། ཞིབ་ཏུ་རྣམ་བཤད་སྐབས་གསུམ་པར་བལྟ། ༼༦༽ཉི་སྣང་ལས། ཉན་ཐོས་དང་རང་སངས་རྒྱས་ཀྱི་ས་ལ་བྱང་ཆུབ་སེམས་དཔའ་ཤེས་པ་དང༌། ནས། བྱང་ཆུབ་སེམས་དཔའི་མཐོང་བའི་ལམ་ཉིད་དུ་ཉན་ཐོས་ཀྱི་རྟོགས་པ་ཐམས་ཅད་ཡོངས་སུ་རྫོགས་པ་ཡིན་ནོ། །ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར། ཁྱབ་སྟེ། ༼ནེ༢༽འདའ་ཚུལ་ཡང་ས་བརྒྱད་པར་ཡང་དག་མཐའ་ལ་སྙོམས་པར་འཇུག་ཀྱང་དེ་མངོན་དུ་བྱེད་པ་ལས་འདའ་བ་ལྟ་བུ་གནས་ནས་འདའ་བ། མི་རྟག་སོགས་མངོན་སུམ་དུ་རྟོགས་པར་བྱེད་ཀྱང༌། དེའི་རྗེས་གཙོ་བོར་སྒོམ་པ་ལས་འདའ་བ་ཤེས་མཐོང་གིས་བལྟས་ནས་འདའ་བ་གཉིས་ཡོད་པ་ལས་༼༧༽ཤེས་མཐོང་གིས་བལྟས་ནས་འདའ༌༼༨ན༧༽ ༼༣༽ ཉི་སྣང་ལས། གལ་ཏེ་ཉན་ཐོས་ཀྱི་མྱ་

― GTD002_Page_0115 ―

^{[མ་དཔེ་གཟིགས་ན་འདིར་གནོན།]}

[Full Size]

ངན་ལས་འདས་པ་ཡིན་ན་དེ་ནི་མི་རིགས་ཏེ། ཉན་ཐོས་ཀྱི་མྱ་ངན་ལས་འདས་པ་ལ་འདོད་པའི་ཡིད་ལ་བྱེད་པ་ནི་སེམས་བསྐྱེད་པ་ནས་བརྩམས་ཏེ་རིང་དུ་ཡོངས་སུ་སྤངས་པ་ཡིན་ནོ། །ཞེས་གསུངས་པའི་ཕྱིར་དང༌། ༼པེ༢༽བདུད་རིས་སོགས་ཀྱིས་མི་ཕྱེད་པ་དང༌། དགེ་རྩ་ཉན་རང་ལས་ཐུན་མོང་མ་ཡིན་པ་སོགས་༼༤༽སྦྱོར་བའི་ཡོན་ཏན་བཤད་པས་ཀྱང་ཤེས་པའི་ཕྱིར། ༼༨ན༨༽ ༼༧༽ ཡང་རྣམ་བཤད་ལས། ཇི་སྲིད་ཀུན་སློང་གི་རྟོག་པ་ཡོད་པ་དེ་སྲིད་དུ་མི་ནུས་པས། ཞེས་གསུངས་པའི་ཕྱིར། འདིའི་རྒྱུ་མཚན་༼ཕེ༢༽གང་ཞེ་ན། ཡང་དག་མཐའ་མངོན་དུ་བྱས་ཚུལ་ནི་གཟུགས་སྐུའི་བཀོད་པ་སྣ་ཚོགས་སུ་བསྟན་ཀྱང༌། ཐུགས་དེ་བཞིན་ཉིད་ལ་མཉམ་པར་བཞག་པ་ལས་གཡོ་བ་མེད་པ་ཡིན་ལ། འབྲས་དུས་ན་དེ་ལྟར་འབྱུང་བ་ལ། རྒྱུ་དུས་ན་དེ་དང་རྣམ་པ་མཐུན་པའི་ལམ་ཞིག་བསྒྲུབས་དགོས་ཀྱང༌། མཚན་ཉིད་ཐེག་པར་དེ་མ་ཚང་ལ། སྔགས་ལ་ལམ་དུས་ན་ཡང་ངེས་པ་སྟོང་ཉིད་ལ་དྲངས་ཤིང་གཟུང་རྣམ་ལྷ་སྐུར་ཤར་བའི་ཟབ་གསལ་གཉིས་སུ་མེད་པའི་བདེ་སྟོང་གི་ཡེ་ཤེས་རྫོགས་རིམ་གྱི་ཐོག་མ་ནས་ཡོད་པའི་ཕྱིར་༼༡༽དང༌། དེ་ལ་ཡང་ཀུན་རྟོག་དགག་དགོས་ཤིང་ རྟོག་པ་ལྡོག་པའི་རྒྱུ་༼བེ༢༽གང་ཡིན་ན། དེའི་བཞོན་པའི་རླུང་འགག་པ་ལ་ལྟོས་པས། དེ་འགོག་ཚུལ་སེམས་གནས་དགུ་པའམ། དབང་པོ་རྣོ་ན་བརྒྱད་པ་ཙམ་གྱི་ཚེ་བསྐྱེད་རིམ་པ་དེས་དམིགས་མེད་ཀྱིས་རྒྱས་འདེབས་དང་སྦྲགས་ཏེ་སྤྲོ་སྡུད་ཀྱི་རིམ་པ་ལ་གོམས་པར་བྱས་པའི་མཐུས། དཔྱད་འཇོག་གཉིས་ཀར་ལས་སུ་མི་རུང་

― GTD002_Page_0116 ―

^{[མ་དཔེ་གཟིགས་ན་འདིར་གནོན།]}

[Full Size]

བར་བྱེད་པའི་རླུང་ལུས་ལ་ཁྱབ་པར་གནས་པ་དང༌། དེ་གཉིས་ཀའི་གེགས་ཀྱི་གནས་ངན་ལེན་ཐམས་ཅད་ཀྱང་གོ་རིམ་ལྟར་གྱི་བྱེད་པས་ཅིག་ཅར་སྦྱངས་ཏེ། ཞི་ལྷག་གཉིས་ཀྱང་ཅིག་ཅར་འཐོབ་པའི་ཚུལ་འདི་ནི། ༼༡༽གསང་འདུས་ཁོ་ནས་ཤེས་དགོས་པས་༼མེ༢༽ཕྱིར་སྔགས་རིམ་ཆེན་མོ་ལས། རྒྱུད་སྡེ་གསུམ་དང༌། དེ་དག་གི་དགོངས་འགྲེལ་གྱི་པཎ་ཆེན་རྣམས་ཀྱིས་སྟོང་ཉིད་བསྒོམས་པས་ཞི་ལྷག་གི་འགྲེལ་ལུགས་རྣམས་ནི། སློབ་དཔོན་མཁས་པ་ཀ་མ་ལ་ཤཱི་ལའི་སྒོམ་རིམ་གསུམ་དང༌། ཤན་ཏི་བའི་ཤེར་ཕྱིན་མན་ངག་དང༌། ས་སྡེ་དང་བྱམས་ཆོས་ལ་སོགས་པ་ནས་འབྱུང་བ་དང་འདྲ་བར་སྣང་ངོ༌། །ཞེས་གསུངས་པའི་ཕྱིར། རྒྱུད་སྡེ་གཞན་ལ་མེད་དོ། །འོ་ན་དུམ་བུ་དང་པོ་ལས། མཚན་མ་དེ་ནི་ཁྱབ་བྱ་བ། །སེམས་ནི་ཀུན་ཏུ་ཁྱབ་པར་བྱ། །ཞེས་དང༌། དེ་ནས་དེ་ཡང་བསྡུ་བ་ནི། །སྣ་ཡི་རྩེ་མོའི་བར་དུ་གནས། །ཞེས་སོགས་དང༌། ཀོ་ས་ལའི་རྒྱན་སྟོད་འགྲེལ་སོགས་དུ་མས་རྣལ་འབྱོར་རྒྱུད་ཀྱི་སྐབས་སུ་ཡང༌། དེ་འདྲ་བཤད་པ་མ་ཡིན་ནམ་ཞེ་ན། དེ་དག་ལ་ཡང་སྤྲོ་སྡུད་ཙམ་ཡོད་ཀྱང༌། རྩ་རླུང་ཐིག་ལེས་སྤྱོད་ཚུལ་གྱི་གནད་ཕྲ་མོ་མེད་པས། དེ་དག་གིས་ཞི་གནས་སྔར་མ་བསྒྲུབས་པར་དཔྱད་པ་དྲག་པོ་བྱས་ན་ཞི་གནས་ཙམ་ཡང་འགྲུབ་མི་ནུས་ཏེ། སྔགས་རིམ་ལས། ཐིག་ལེ་ཕྲ་མོ་ལས་སེམས་བཙན་ཐབས་སུ་བཟུང་ནས་བསྒོམས་པས་གནས་དང་དམིགས་རྟེན་གྱི་གནད་ཀྱིས་རིམ་གྱིས་རླུང་ནང་དུ་གནས་པའི་རྐྱེན་བྱེད་པར་དཔྱད་སྒོམ་མང་པོ་དང་བསྲེས་ཀྱང། རླུང་རིམ་གྱིས་དུལ་བའི་མཐུས་སྔ་མའི་རྒོད་པ་སོགས་མྱུར་དུ་དགག་

― GTD002_Page_0117 ―

^{[མ་དཔེ་གཟིགས་ན་འདིར་གནོན།]}

[Full Size]

ནུས་པས། གཞུང་གཞན་ནས་བཤད་པའི་ཏིང་ངེ་འཛིན་སྒྲུབ་ལུགས་དང་མི་འདྲའོ། །ཞེས་གསུངས་པའི་ཕྱིར། རྣམ་རྟོག་གི་གཉེན་པོར་དབུགས་འབྱུང་རྔུབ་བསྒོམས་པའི་གནད་ཀྱང་འདི་ལ་ཐུག་གོ །དེ་ལྟར་ཡང་དག་མཐའ་མངོན་དུ་བྱེད་པའི་ཚུལ་དང༌། རྟོག་པ་ལྡོག་པའི་རྒྱུ་གཉིས་སྔགས་ལ་རག་ལས་ཚུལ་སོ་སོར་ཕྱེ་སྟེ་རྟགས་དང་རྟགས་སྒྲུབ་ཏུ་སྦྱར་བ་འདི་ནི་འདྲེན་མཆོག་དགྱེས་པའི་རོལ་མོར་ཨེ་འགྲོ་སྙམ་ཡང༌། བདག་ནི་རྒྱུད་སྡེ་ལ་སྦྱངས་པ་མ་སོང་བས། རིགས་སྔགས་འཆང་བ་རྣམས་ཀྱིས་དཔྱད་པར་མཛོད་མཛོད། ༼༨ན༩༽ ༼༡༽ དེ་ཡང་དག་མཐའ་མངོན་དུ་བྱེད་པའི་སྔ་རོལ་ཏུ་གྲུབ་དགོས་པའི་ཡོན་ཏན་གསུམ་གྱི་གཅིག་ཡིན་པའི་ཕྱིར། ༼ཙེ༢༽ཁ་ཅིག་ལམ་དུས་ཀྱི་གདུལ་བྱ་རྫོགས་པ་ལམ་དུས་ན་ཡོད་དེ། ལམ་དུས་ཀྱི་མཛད་པ་དང་ལམ་རྫོགས་པ་དེར་ཡོད་པའི་ཕྱིར། སེམས་དཔའི་རྣལ་འབྱོར་མཐར་ཐུག་རྣམ་མཁྱེན་མ་ཡིན་པའི་ཕྱིར་དང༌། རྒྱུ་ཚོགས་རྫོགས་པ་དང༌། འབྲས་བུ་སྐྱེ་བ་དུས་མཉམ་ན་སངས་རྒྱས་ཀྱི་ཞིང་གི་རྒྱུ་ཚོགས་རྫོགས་པའང་འབྲས་དུས་སུ་ཐལ་ལོ་ཟེར།༼༣༽ཡང་ཁ་ཅིག་ན་རེ། སངས་རྒྱས་རང་སྣང་ལ་ཞིང་དག་པ་རབ་འབྱམས་འབའ་ཞིག་གཟིགས་པ་དེ་སངས་རྒྱས་ཀྱི་ཞིང་སྦྱངས་པའི་ཚད་ཡིན་ཏེ། མ་དག་པའི་ཞིང་སངས་རྒྱས་རང་སྣང་ལ་མི་སྣང་བའི་ཕྱིར་ཏེ། དེ་མ་རིག་པའི་འཁྲུལ་བའི་དབང་གིས་སྣང་བ་ཡིན་པའི་ཕྱིར་ཟེར། ༼ཚེ༢༽སངས་རྒྱས་ཀྱི་སར་ཞིང་དག་པ་རབ་འབྱམས་མི་སྣང་ན། ལམ་དུས་སུ་ཞིང་དག་པ་རབ་འབྱམས་འབའ་ཞིག་ཏུ་བསྒོམས་པ་

― GTD002_Page_0118 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲས་མེད་དུ་འགྱུར་བའི་ཕྱིར་རོ། །དེ་ལྟ་ནའང་འགྲོ་བའི་དོན་མཛད་ནུས་པ་མི་འགལ་ཏེ། དཔེར་ན། མཁྲིས་ནད་ཅན་ལ་དུང་དཀར་སེར་པོ་དང༌། རླུང་ནད་ཅན་ལ་གངས་རི་སྔོན་པོ་སྣང་བའི་ཚེ་སྣང་བ་དེ་དག་སྨན་པ་ལ་མི་འབྱུང་ཡང༌། ནད་པར་སྣང་བའི་སྣང་ཚུལ་དེའི་སྤྱི་ཤར་ནས། དེ་སེལ་ནུས་པ་ལྟ་བུ་ཡིན་པའི་ཕྱིར་རོ། ། ༼༤༽རྣམ་བཤད་ལས། ཡང་སངས་རྒྱས་རང་སྣང༌། ནས། སྐད་བྱེད་པ་ནི། ཞེས་སོ། ། ༼ཛེ༢༽ཁ་ཅིག་འདི་ལམ་རིམ་ཆུང་ངུའི་དགོངས་པའང་ཡིན་ཏེ། དེ་ཉིད་ལས། མ་རིག་པས་བསླད་པ་ཡོད་པའི་གང་ཟག་ལ་དེ་དག་སྣང་བ་ཁོ་ནའི་སྒོ་ནས་སངས་རྒྱས་ལ་སྣང་བ་ཡིན་གྱི། གཞན་ལ་དེ་ལྟར་སྣང་བ་ལ་མ་ལྟོས་པར་སངས་རྒྱས་ཀྱི་རང་ངོས་ནས་སྣང་བ་མིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། རང་སྣང་ལ་སྣང་བ་དང༌། གཞན་ལ་ལྟོས་པ་མི་འགལ་བའི་ཕྱིར་རོ། ། ༼༩ན༠༽ ༼༦༽ དེ་ཆོས་ཅན། ཁྱོད་མངོན་དུ་བྱས་པའི་གང་ཟག་ཡིན་ན། སྤྲུལ་སྐུ་འོད་དཔག་མེད་ཡིན་དགོས་པར་ཐལ། ཁྱོད་དེའི་དབང་དུ་བྱས་པའི་སྨོན་ལམ་རྫོགས་པའི་ཚད་ཡིན་པའི་ཕྱིར། ༼ཝེ༢༽ཁོ་ན་རེ། ལོངས་སྐུ་འོད་དཔག་མེད་ཀྱིས་ཀྱང་སྤྲུལ་སྐུ་འོད་དཔག་མེད་ཀྱི་དབང་དུ་བྱས་པའི་སྨོན་ལམ་རྫོགས་པའི་ཚད་མངོན་དུ་བྱས་པར་ཐལ། དེས་དེའི་རྒྱུད་ཀྱི་ཡོན་ཏན་མ་ལུས་པ་མངོན་དུ་བྱས་པའི་ཕྱིར། གཞན་དུ་ན་དེའི་གོ་འཕང་ཡང་མངོན་དུ་མ་བྱས་པར་འགྱུར་རོ་ཟེར། ༼༩བ༡༽ ༼༧༽ འོ་ན་འདིར་བསྟན་ཡང་དག་མཐའ་ཡིན་ན། རྫོགས་སྨིན་སྦྱངས་གསུམ་མ་བྱས་པའི་སྔ་རོལ་ཏུ་མངོན་དུ་བྱེད་ནུས་ལ་མི་བྱེད་པ་དང་བྱས་རྗེས་སུ་བྱེད་པའི་ཁྱད་

― GTD002_Page_0119 ―

^{[མ་དཔེ་གཟིགས་ན་འདིར་གནོན།]}

[Full Size]

པར་གསུམ་ལྡན་གྱི་ཡང་དག་མཐའ་ཡིན་པས་ཁྱབ་པར་ཐལ། དེ་གཉིས་མ་ཡིན་པའི་རྒྱུ་མཚན་ཡོད་པའི་ཕྱིར། ༼ཞེ༢༽ཁྱད་ཆོས་གསུམ་ཡང༌། ཐལ་འགྱུར་བས་འདི་ལྟར་བགྲང་མི་བགྲང་དཔྱད་དགོས་ཏེ། དབུ་མའི་མཐའ་དཔྱོད་སེམས་བསྐྱེད་གསུམ་པར། མྱང་འདས་ཐོབ་ཀྱང་ཉན་རང་ལྟར་མངོན་དུ་བྱེད་པ་བཀག་བྱས་ན་ལེགས། ཞེས་གསུངས་པའི་ཕྱིར། གཞན་དོན་དོར་ཏེ་རགས་པའི་སྡུག་ཀུན་ཟད་པའི་ཞི་བའི་བདེ་བ་ལ་ཞེན་པའི་ཚུལ་གྱིས་མངོན་དུ་མི་བྱེད་པ་ཡིན་ནམ་སྙམ། ༼༩ན༢༽ ༼༧༽ འོན་ཀྱང་ས་བདུན་པ་མན་ཆད་དུ་མངོན་དུ་བྱེད་པའི་དོགས་པ་ཆུང་ལ། ས་བརྒྱད་པར་དོགས་པ་ཆེ་བས། ནས། ཆོས་གསུམ་མ་རྫོགས་པའི་བར་དུ་ཡང་དག་པའི་མཐའ་མངོན་དུ་བྱེད་པ་ག་ལ་སྲིད། ཅེས་གསུངས་པའི་ཕྱིར། ༼ཟེ༢༽ས་བདུན་པ་མན་ཆད་རྩོལ་བཅས་ཀྱི་ས་ཡིན་པས། མངོན་དུ་བྱེད་དོགས་ཆུང་ལ། ས་བརྒྱད་པར་མཚན་མེད་རྩོལ་མེད་ཀྱི་ས་ཐོག་མར་ཐོབ་པའི་གནད་ཀྱིས་མངོན་དུ་བྱེད་འདོད་ཙམ་བྱུང་ན་མཉམ་གཞག་ཏུ་ངང་གིས་འགྲོ་བའི་རྒྱུ་མཚན་གྱིས་དོགས་པ་ཆེ་བའི་ཕྱིར། དགུ་པ་སོགས་སུ་བརྟན་པ་གོམས་པའི་སྟོབས་ཀྱིས་དོགས་པ་ཆུང་སྟེ། འཕགས་པའི་འཕྲིན་ལས་ཉེར་བདུན་གྱི་བཅུ་དྲུག་པ་བྱང་ཆུབ་ཏུ་ངེས་པ་ས་དགུ་བར་སྦྱོར་བའང་དེ་ཡིན་ནོ། །༼༩བ༣༽ ༼༣༽ རྟོགས་རིགས་དེ་གཉིས་རྫོགས་པ་དང༌། རྟོགས་རིགས་དེ་གཉིས་སམ་སྤངས་རྟོགས་མ་ལུས་པ་མཐར་ཕྱིན་པ་དོན་གཅིག་ཡིན་པའི་ཕྱིར་ཏེ། ༼༣༽དེ་ནི་དཔལ་

― GTD002_Page_0120 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྲེང་སེང་གེའི་མདོ་ལས། སངས་རྒྱས་རྣམས་ནི་འཕགས་པའི་བདེན་པའི་དོན་བསྟན་པ་བགྱི་བ་མ་མཆིས་པ་བཞི་པོ་དག་ལ་རྫོགས་པར་མཛད་པ་ལགས། ཉན་ཐོས་དང་རང་སངས་རྒྱས་རྣམས་ནི་རྫོགས་པར་བགྱི་བ་མ་ལགས་སོ། །ཞེས་གསུངས་པའི་ཕྱིར། ༼འེ༢༽འདིའི་དོན་གང་ཞེ་ན། མདོ་དེ་ཉིད་ལས། འཕགས་པའི་བདེན་པའི་དོན་བཤད་པ་རྣམ་པ་གཉིས་གང་ཞེ་ན། འཕགས་པའི་བདེན་པའི་དོན་བཤད་པའི་བགྱི་བ་མཆིས་པ་དང༌། བགྱི་བ་མ་མཆིས་པ་ལགས་སོ། །ཞེས་མདོར་བསྟན་ནས། སྔ་མའི་རྒྱས་བཤད་སྐབས་སུ་དེ་ལྟ་ལགས་པས་འཁོར་བ་ལ་ཡང་འདུ་བྱས་དང་འདུས་མ་བྱས་མཆིས་སོ། །མྱ་ངན་ལས་འདས་པ་ལ་ཡང་འདུ་བྱས་དང་འདུས་མ་བྱས་མཆིས་སོ། །ཞེས་གསུངས་ཤིང༌། བགྱི་བ་མ་མཆིས་པའི་དོན་སངས་རྒྱས་མ་གཏོགས་ཉན་རང་སོགས་ཀྱིས་རྫོགས་པར་མ་གཟིགས་ཚུལ། སྔར་དྲངས་པའི་རྒྱུ་མཚན་སྟོན་པར། རབ་འབྲིང་ཐ་མའི་ཆོས་སུ་རྟོགས་པས་མྱ་ངན་ལས་འདས་པའི་དབྱིངས་རྟོགས་པ་མ་ལགས་པའི་སླད་དུའོ། །ཞེས་དང༌། གོང་དུ་དེ་བཞིན་གཤེགས་པའི་སྙིང་པོ་ནི་འཕགས་པའི་བདེན་པའི་དོན་བཤད་པའི་གནས་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོའི་གནས་ཟབ་པས་ན། འཕགས་པའི་བདེན་པའི་དོན་ཡང་ཟབ་ཅིང་ཕྲ་ལ་བརྟགས་དཀའ་སྟེ། ཞེས་སོགས་གོང་བསྒྲིགས་ནས་དཔྱད་ན། བདེན་བཞིར་ཕྲ་རགས་གཉིས་ཡོད་པ་ལས་ཕྲ་བའི་བདེན་བཞིའི་འཇུག་ལྡོག་བྱེད་པ་ལ། རང་བཞིན་གྱིས་མྱ་ངན་ལས་འདས་པའི་དབྱིངས་རྟོགས་པའི་སྟོབས་

― GTD002_Page_0121 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་འཁོར་འདས་རོ་མཉམ་དུ་ཤེས་པ་དགོས་ཀྱང༌། ཉན་རང་རྣམས་དེ་གཉིས་ལ་དངོས་པོ་དངོས་མེད་རབ་འབྲིང་མཆོག་དམན་སོགས་སུ་མཚན་མར་ཞེན་པ་མ་སྤངས་པའི་སྟོབས་ཀྱིས་སྡུག་ཀུན་ཕྲ་མོ་རྣམས་ཀྱང་མི་སྤོང་ཞིང༌། ལམ་སྒོམ་པ་དང་འགོག་པ་མངོན་དུ་བྱ་བའང་མ་རྫོགས་སོ། །དེའི་ཕྱིར་དེ་དག་གིས་བློ་ནུས་དང་མཐུན་པར་རགས་པའི་བདེན་བཞི་དང་དེ་སྒོམ་ཚུལ་ལ་མཚན་འཛིན་གྱི་སྤྲོས་པ་མ་ཁེགས་པས་བགྱི་བ་མཆིས་པ་ཞེས་བཤད། ཐེག་ཆེན་གྱིས་སྡུག་ཀུན་ཕྲ་རགས་ཐམས་ཅད་སྤོང་དགོས་པས་སྒོམ་ཚེ་ཡང་བརྒྱ་དོན་གསུམ་སོགས་དང༌། གཙོ་བོ་དེ་བཞིན་གཤེགས་པའི་སྙིང་པོ་སྟེ་སྟོང་ཉིད་གཞིར་བྱས་ནས། དེ་ལ་བདེན་བཞིའི་འཇུག་ལྡོག་སོགས་རྟེན་འབྱུང་གི་རིམ་པ་འཇོག་པར་རྩ་འཇུག་གཞི་གསུམ་སོགས་ལས་རྒྱ་ཆེར་གསུངས་པ་ལྟར་གོམས་དགོས་པས། དེ་ལྟར་མཚན་མའི་སྤྲོས་པ་མེད་པར་གོམས་པ་མཐར་ཐུག་པ་ལ་བགྱི་བ་མ་མཆིས་པ་རྫོགས་པར་མཛད་པ་ཞེས་པ་ཡིན་ནམ་སྙམ་ཡང༌། མདོ་འདིའི་སྒེར་གྱི་འགྲེལ་པ་འཕགས་བོད་ཀྱི་མཁས་པ་ཚད་ལྡན་སུས་ཀྱང་མཛད་པ་མ་མཐོང་བས། མདོ་དོན་ལ་རང་དབང་དུ་ཁ་ཚོན་གཅོད་ག་ལ་ནུས། འདི་ལས་ཕྲ་བར་དཔྱོད་ནུས་མཁན་ཡོད་ན་ཅིས་ཀྱང་དཔྱད་པར་བྱའོ། ། ༼༤༽ཁྱབ་སྟེ། དེ་བཞིའི་ཁྱད་ཆོས་མི་རྟག་སོགས་རྫོགས་པ་མི་རྟོགས་པའི་ཕྱིར། ༼༩ན༤༽ ༼༤༽ སེམས་ཅན་སྨིན་ཚུལ་ཡོད་དེ། སྐྱོན་སྤང་རུང་དང་གཉེན་པོ་སྐྱེ་རུང་ཡིན་པའི་ཕྱིར་ཏེ། དཔེར་ན་རྨ་སྨིན་པའི་རྣག་གཟག་རུང་དང་ཤིང་ཐོག་སྨིན་པ་ལོངས་སྤྱད་རུང་ལྟ་བུ་ཡིན་པའི་

― GTD002_Page_0122 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ཏེ། མདོ་སྡེ་རྒྱན་ལས། དཔེ་ནི་ཇི་ལྟར་རྨ་དང་ཟས་ལ་དེ་དག་གིས། དོན་ནི་དེ་བཞིན་རྟེན་ནམ་གནས་ཀྱི་སྒྲ་ནི་ཕུང་པོ་ལྔ་ལ་བྱའོ། །འདིར་ཕྱོགས་གཉིས་ནི་ཆགས་སོགས་ཉོན་མོངས་པའི་ཕྱོགས་དང༌། དད་སོགས་གཉེན་པོའི་ཕྱོགས་སོ། །ཞི་བ་དང༌། །དེ་བཞིན་སྤྱད་པ་ཉིད་དུ་སྨིན་པ་བསྟན། །ཞེས་གསུངས་པའི་ཕྱིར། ༼༦༽དབྱེ་ན་སྨིན་པ་བརྒྱད་ཡོད་དེ། ཉོན་མོངས་དང་བྲལ་བར་སྨིན་པ་དང༌། ཐེག་པ་གསུམ་གྱིས་ཡོངས་སུ་སྨིན་པ་དང༌། ༼ཡེ༢༽ཕྱོགས་རེ་མ་ཡིན་པར་ཐེག་གསུམ་གྱི་གདུལ་བྱ་ཀུན་སྨིན་པར་བྱེད་པའི་ཡོངས་སྨིན་ཏེ། བློ་བརྟན་གྱིས། གང་ཟག་ཀུན་སྨིན་པར་བྱ་བ་ནི་ཡོངས་སུ་སྨིན་བྱེད་ཅེས་སོ། ། ༼༧༽ཕྱི་རོལ་བའི་གཟུགས་གཟུགས་མེད་དུ་སྨིན་པ་ལས་རབ་ཏུ་སྨིན་པ་དང༌། རང་རང་གི་སྐལ་བ་དང་འཚམས་པའི་མཐུན་པར་སྨིན་པ་དང༌། ཆགས་སྡང་མེད་པར་གདུལ་བྱ་ཀུན་སྨིན་པའི་ཐབས་ལ་འབད་ཅིང་གུས་པར་བྱེད་པའི་ལེགས་སྨིན་དང༌། རྟོགས་པར་སྨིན་པར་བྱེད་པ་དང༌། ༼རེ༢༽བློ་བརྟན་གྱི་འགྲེལ་བཤད་ལས། བདག་ཉིད་ཀྱིས་ས་དང་པོ་ཐོབ་ནས་ཆོས་ཀྱི་དབྱིངས་རྟོགས་པར་བྱས་ཏེ། གཞན་དག་ཀྱང་ས་དང་པོ་ཐོབ་པར་བྱས་ནས་ཆོས་ཀྱི་དབྱིངས་རྟོགས་པར་བྱ་བ་ནི་རྟོགས་པའི་སྨིན་བྱེད་ཅེས་སོ། །ངོ་བོ་ཉིད་མེད་པའི་འགྲེལ་བཤད་ལས། ཆོས་ཀྱི་དོན་དུ་གསུངས་པ་ཡིན་ཏེ་ཟས་ཀྱི་ལྟོར་ཅེས་པ་ལྟ་བུའོ། །ཞེས་རྟོགས་པའི་ཆེད་དུ་སྨིན་པ་ལ་བཤད་པ་འདྲ་སྟེ་དཔྱད་དགོས། ༼༧༽ཕྱིན་ཅི་མ་ལོག་པས་རྟག་ཏུ་སྨིན་པར་བྱེད་པ་དང༌། ༼ལེ༢༽ནམ་ཡང་རྟག་པ་དང་བདག་ཏུ་མི་སྟོན་པར་ཕྱིན་ཅི་མ་ལོག་པའི་ཆོས་ཀྱིས་སྨིན་པ་ལ་བཤད་ཀྱང་ཞིབ་ཆ་དགོས། ༼༩བ༥༽ ༼༣༽ གཉིས་པ་གྲུབ་སྟེ། རྒྱུད་བླ་མ་ལས། འཕགས་

― GTD002_Page_0123 ―

^{[མ་དཔེ་གཟིགས་ན་འདིར་གནོན།]}

[Full Size]

པས་ན་དང་རྒ་བ་དང༌། །འཆི་བའི་སྡུག་བསྔལ་རྩད་ནས་སྤངས། །པ་ཡིན་ཏེ་སྡུག་བསྔལ་དེ་དག་གི་གཞི་ལས་དང་ཉོན་མོངས་དབང་གིས་སྐྱེ། །བ་ལ་བརྟེན་པ་ཡིན་པ་གང་ཞིག །འཕགས་པ་དེ་ལ་སྐྱེ་བ་དེ་མེད་ཕྱིར་ན་སྡུག་བསྔལ་དེ་རྣམས་མེད། །ཅེས་གསུངས་པའི་ཕྱིར། ༼༧༽སྐད་ཅིག་རེ་རེ་ལ་སྟོང་གསུམ་གྱི་འཇིག་རྟེན་གྱི་ཁམས་འབུམ་གྱི་རྡུལ་ཕྲ་རབ་ཀྱི་གྲངས་སྙེད་སྨིན་པར་བྱེད་པའི་དེ་ཡིན་པའི་ཕྱིར། དེར་ཐལ། ཡོན་ཏན་དེ་སྙེད་ཕྲག་བཅུ་གཉིས་ཐོབ་པའི་ཕྱིར། ༼ཤེ༢༽འདི་ལ་འོ་ན། ས་དགུ་པ་པ་དེས་སྐད་ཅིག་མ་གཅིག་ལ་སྐུའི་བཀོད་པ་སྟོང་གསུམ་བྱེ་བ་འབུམ་གྱི་རྡུལ་སྙེད་སྟོན་པ་དང༌། གདུལ་བྱ་དེ་སྙེད་སྨིན་པར་བྱེད་ཀྱང་སྨིན་པར་མ་བྱས་པའི་ཞིབ་ཆ་འཐད་པར་ཐལ་ལོ། །འདོད་ན། དེས་ཞིང་བྱེ་བ་ཕྲག་བརྒྱར་སྐུ་བྱེ་བ་ཕྲག་བརྒྱ་བསྟན་ནས། དེ་རེ་རེས་ཀྱང་གདུལ་བྱ་བྱེ་བ་ཕྲག་བརྒྱ་རེ་སྨིན་པར་བྱེད་པར་ཐལ། དེ་ལས་སྔ་མ་ཆེས་མང་བའི་ཕྱིར་རོ། །འདོད་ན། དེ་དག་སྨིན་ལམ་ལ་འགོད་ཀྱང་མ་བཀོད་པའི་ཁྱད་པར་འབྱེད་པར་ཐལ། འགོད་ནུས་པའི་ཕྱིར་ཏེ། སྨིན་པར་བྱེད་ནུས་པའི་ཕྱིར། འདོད་ན། སེམས་ཅན་སྨིན་པའི་ཚད་དང་འགལ་ཟེར། ༼༩ན༧༽ ༼༡༽ སེམས་ཅན་ཡིན་ན་རང་སངས་རྒྱས་པའི་སངས་རྒྱས་ཀྱི་ཞིང་ཡོད་པས་ཁྱབ་པའི་ཕྱིར་ཏེ། རང་སངས་རྒྱས་པ་ཡོད་པས་ཁྱབ་པའི་ཕྱིར། ༼སེ༢༽ལྷས་སྦྱིན་སངས་རྒྱས་པའི་སངས་རྒྱས་ཀྱི་ཞིང་གི་རྒྱུ་ཚོགས་རྫོགས་པར་ཐལ། དེ་སངས་རྒྱས་ཀྱི་ཞིང་ཡིན་པའི་ཕྱིར། སོགས་ཤེས་བྱའི་རྣམ་གྲངས་མང་ཡང་དགོས་པ་ཆུང་ལ། རྒྱུན་མཐའི་དུས་ཀྱི་

― GTD002_Page_0124 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་དེ་འོག་མིན་ཡིན་ནམ། འོག་མིན་ལ་སངས་རྒྱས་ཀྱི་ཞིང་དགོས་སམ་མི་དགོས། སངས་རྒྱས་རྣམས་ཀྱི་ཞིང་གཅིག་ཐ་དད་སྟེང་ནས་དཔྱད་རྒྱུ་ཅུང་ཟད་ཡོད། ༼༩ན༨༽ ༼༢༽ ཉི་སྣང་ལས། བསྟན་པ་འདི་ལ་མྱ་ངན་ལས་འདས་པ་རྣམ་པ་མང་པོ་རྣམ་པར་བཞག་སྟེ། འདི་ལྟར་རྩེ་མོ་༼ཧེ༢༽ཐོབ་པ་རྣམས་ཀྱི་དགེ་བའི་རྩ་བ་ཆད་པ་ཡོངས་སུ་མྱ་ངན་ལས་འདས་པ་ཡིན་ནོ། །བཟོད་པ་ཐོབ་པ་རྣམས་ཀྱིས་ནི་ངན་འགྲོའི་ཡོངས་སུ་མྱ་ངན་ལས་འདས་པ་ཡིན་ནོ། །བསམ་གཏན་ཐོབ་པ་རྣམས་ཀྱིས་ནི། དེའི་ཡན་ལག་ཡོངས་སུ་མྱ་ངན་ལས་འདས་པ་ཡིན་ནོ། །རྒྱུན་དུ་ཞུགས་པ་རྣམས་ཀྱིས་ནི་སྲིད་པ་བརྒྱད་པ་ཡོངས་སུ་མྱ་ངན་ལས་འདས་པ་ཡིན་ནོ། །ལན་ཅིག་ཕྱིར་འོང་བ་རྣམས་ཀྱིས་ནི། འདིར་སྲིད་པ་གཉིས་པ་ཡོངས་སུ་མྱ་ངན་ལས་འདས་པ་ཡིན་ནོ། །ཕྱིར་མི་འོང་བ་རྣམས་ཀྱིས་ནི། འདོད་པའི་ཁམས་ཡོངས་སུ་མྱ་ངན་ལས་འདས་པ་ཡིན་ནོ། །དགྲ་བཅོམ་པ་རྣམས་ཀྱིས་ནི་ཕུང་པོ་ལྷག་མ་དང་བཅས་པ་དང༌། ཕུང་པོ་ལྷག་མ་མེད་པ་མྱ་ངན་ལས་འདས་པ་ཡིན་ནོ། །འདིར་ཡང་དམ་པའི་ཆོས་པདྨ་དཀར་པོའི་མདོ་ཚད་མར་བྱས་ནས་ཇི་ལྟར་འཕགས་པ་ཤཱ་རིའི་བུ་ལ་སོགས་པའི་བྱང་ཆུབ་སེམས་དཔའ་ཉན་ཐོས་ཀྱི་ཡོངས་སུ་མྱ་ངན་ལས་འདས་པའི་རྣམ་པར་བཞག་པ་གསུངས་པ་དེ་བཞིན་དུ་དགོངས་པ་ཅན་གྱི་མྱ་ངན་ལས་འདས་པ་ཡིན་པ་ཤེས་པར་བྱ་སྟེ། དུས་དེ་སྲིད་དུ་འགྲོ་བའི་དོན་རྒྱུན་ཆད་པའི་ཕྱིར་རོ། ། ༼༢༽དེ་ཉིད་ཀྱི་ཕྱིར་སེམས་ཅན་ཐམས་ཅད་ཀྱི་དོན་གྱི་བྱ་བ་རྒྱུན་བཅད་པའི་ཕྱིར་དེ་ཉིད་འདིའི་ཡོངས་སུ་མྱ་ངན་ལས་འདས་པ་ཡིན་ནོ་ཞེས་

― GTD002_Page_0125 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་དོ་ཞེས་གསུངས་པའི་ཕྱིར། ༼ཨེ༢༽ལུང་འདིའི་མཇུག་ལྟར་དགོངས་པ་ཅན་གྱི་མྱང་འདས་ནི། བརྟགས་པ་མཐའ་བཟུང་གི་གཞན་དོན་རེ་ཞིག་རྒྱུན་ཆད་པའི་ཆ་ལ་འདོད་པ་ལེགས་ཀྱང༌། བསོད་གྲགས་ཆོས་ཉིད་ལ་བཤད་དོ། །དེ་ཉིད་མྱང་འདས་མིན་ཀྱང་མྱང་འདས་ཀྱི་སྒྲས་བསྟན་རུང་བའི་དཔེར་མྱང་འདས་བརྒྱད་བཤད་པ་ལྟར་སྣང་ཡང༌། ཡིག་ཆས་དགོངས་པ་ཅན་གྱི་མྱང་འདས་དྲངས་པ་ལྟར་ན། ལྷག་བཅས་ལྷག་མེད་བསྡོམ་མོ། །འདིར་བསམ་གཏན་ཐོབ་པ་རྣམས་ནི་རང་གི་ཡན་ལག་ཡོངས་སུ་མྱ་ངན་ལས་འདས་ཞེས་པའི་དོན་ནི། དང་པོའི་སྙོམས་འཇུག་ཁྱད་པར་ཅན་གྱི་རྟོག་པ་དང༌། གཉིས་པའི་དཔྱོད་པ། གསུམ་པའི་བདེ་བ་རང་གི་ཡན་ལག་ཏུ་བྲལ་བ་ལྟ་བུའོ། །འདིར་བཤད་པའི་ཤཱ་རིའི་བུ་ནི་མཆོག་ཟུང་ཡ་གྱལ་གྱི་ཤཱ་རིའི་བུ་མིན་ལ། དེའི་མིང་ཅན་ཞིག་གོ་ཞེས་མཁས་པ་རྣམས་ལ་རླུང་ལྟར་གྲགས་ཀྱང༌། མདོ་དེ་ཉིད་ལས། ཤཱ་རིའི་བུ་ཁྱོད་མ་འོངས་དུས་སུ་ནི། །རྒྱལ་བ་དེ་བཞིན་གཤེགས་པ་འབྱུང་འགྱུར་ཏེ། །པདྨ་འོད་ཅེས་བྱ་བ་ཀུན་ཏུ་སྤྱན། །ཞེས་སོགས་རྣམ་བཤད་སྙིང་པོ་རྒྱན་ནས་སྤྱིར་གྱི་ཤཱ་རིའི་བུ་འཚང་རྒྱ་བའི་ཤེས་བྱེད་དུ་དྲངས་ལ། མདོ་སྔ་ཕྱི་འདི་དག་གསུངས་པ་ཐ་དད་པའི་ཚོད་ན་མི་སྣང་བས་ཚིམ་མི་སླ་བས་དཔྱོད་ཅིག །ཤེས་རབ་འཁོར་ལོ་དཔལ་གྱི་འདབ་མའི་རྡུལ། །བཏུད་པས་རབ་མྱོས་བུང་བའི་ན་ཆུང་མ། །རྒྱལ་བསྟན་ཁོར་ཡུག་འགེངས་པའི་དར་དིར་དབྱངས། །སྒྲོག་སླད་བརྩོན་ཤེས་འདབ་མའི་གར་གྱིས་བྲེལ། །མཐའ་བྲལ་བློ་གྲོས་རལ་ཀློང་

― GTD002_Page_0126 ―

^{[མ་དཔེ་གཟིགས་ན་འདིར་གནོན།]}

[Full Size]

ནས། །ལེགས་བཤད་མཆོད་ཡོན་བསྒྲེངས་མཁས་པ། །ཡོངས་འཛིན་ཚངས་པ་ཆེན་པོའི་ཞབས། །དད་པ་ཡིས་ནི་སྤྱི་བོར་བསྟེན། ། ༈ ༼༩ན༩༽ ༼༤༽ ཡང་པཎྚི་ཏ་འགའ་ཞིག་ན་རེ། དགོས་འབྲེལ་གྱི་དགོས་པ་གཞུང་མཛེས་པའོ་ཟེར། སྤྱིར་ལུས་མཛེས་པ་རུང་ཡང་དགོས་པ་ལུས་མཛེས་ཙམ་མ་ཡིན་པར་ཐལ། དེ་ལས་དོན་རྟོགས་པ་སོགས་དགོས་པ་ཡོད་པའི་ཕྱིར་ཏེ། གསེར་འཕྲེང་ལས། འོན་ཀྱང་མཛེས་པ་དགོས་པར་འཆད་པ་སྐབས་སུ་མ་བབས་པའོ་ཞེས་གསུངས་པའི་ཕྱིར། ༼ཀོ༣༽འདི་འདོད་པ་བོ་ཤི་ཀར་ནནྟའམ་བདེ་བྱེད་དགའ་བའོ། །སྔ་མ་ནི་མ་ལེན་གྱི་གཞུང་ལས། བསྟན་བཅོས་དག་ནི་ཐམས་ཅད་དམ། །ཞེས་སོགས་འབྱུང་བ་དེ་ཡིན་ཞིང༌། ཀུ་མ་རི་ལ་ཞེས་ཀྱང་འབྱུང་ངོ༌། ། ༼༡ན༠༠༽ ༼༣༽ ཡང་ཁོ་ན་རེ། དགོས་སོགས་ལ་བཞིར་མ་ངེས་པར་ཐལ། བདེ་མཆོག་བསྟོད་འགྲེལ་ལས་རྗོད་བྱེད་ཕུན་ཚོགས་དང་ལྔར་བཤད། ༈ ༼༡བ༠༠༽ ༼༡༽ རང་འགྲེལ་ལས། བྱེ་བྲག་ཏུ་སྨྲ་བ་རྣམས་ན་རེ། ཆོས་ཐམས་ཅད་རྟོག་གེའི་སྤྱོད་ཡུལ་མིན་པས་ལྡན་པ་མ་ཡིན་པའི་འདུ་བྱེད་ཀྱི་རང་བཞིན་མིང་གི་ཚོགས་ལ་སོགས་པ་ནི་རྫས་སུ་ཡོད་པ་ཁོ་ནའོ། །ཞེས་གསུངས་པའི་ཕྱིར། ༼ཁོ༣༽འདིའི་དོན་ལ་མཆན་ཁ་ཅིག་ཏུ། རྟོག་གེ་ཞེས་པ་མདོ་སྡེ་པ་སོགས་ལ་བྱས་ནས། དེ་དག་གིས་མ་ཤེས་པ་ཡིན་གྱི། ལྡན་པ་མ་ཡིན་པའི་མིང་རྫས་གྲུབ་ཡོད་ཅེས་བཤད་ལ། གཞན་བཤད་པ་གསལ་པོ་མི་སྣང་ཡང༌། ཁོ་བོས་དཔྱད་ན་རྟོག་གེ་བ་ཞེས་མི་འབྱུང་བས། རྟོག་གེ་ཞེས་པ་སྒྲར་བྱས་ནས་ཆོས་ཐམས་ཅད་དེས་ཇི་ལྟ་བ་བཞིན་བརྗོད་མི་ནུས་པས་

― GTD002_Page_0127 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་ཀྱི་བརྗོད་བྱ་མིང་དང་དེ་སྒྲ་སྤྱི་དང་ལྡན་མིན་དུ་འདོད་ལ་བསྟན་བཅོས་སོགས་ཀྱང་དེར་འདོད་ཅིང༌། དོན་སྤྱིའི་བཤད་པ་མི་གསལ་ལ། རྣམ་འགྲེལ་ཊཱིཀ་ཆེན་ལེའུ་གསུམ་པར། རྣམ་པ་མེད་པར་བཤད་པའི་འདྲ་རྣམ་ཡང་འཇོག་དཀའ་ལ། སེལ་འཇུག་མི་འདོད་པའི་ཕྱོགས་ཀྱང༌། འབྱུང་བ་སྐལ་མཉམ་འཆད་པའི་མཛོད་འགྲེལ་གྱིས་གྲུབ་པ་འདྲ་ཞིག་སྣང་ཡང༌། གནས་དྲུག་པར། རྫས་སུ་རྣམ་པ་བཅུ་དྲུག་གོ །རྣམ་པ་ཤེས་རབ་ཅེས་འབྱུང་བས། དབང་ཤེས་ཉིད་རྣམ་མེད་དུ་རིགས་སོ། །རྣམ་པར་གཏན་ལ་དབབ་པ་བསྡུ་བའི་བམ་པོ་སོ་ལྔ་བར། གཞན་ཡང་ཚིག་ནི་མིང་ལ་འཇུག་ཅིང༌། མིང་གིས་དོན་སྟོན་པར་བྱེད་དོ། །ཞེས་གསུངས་ཀྱང༌། ལུགས་དེ་ལ་སྒྲ་སྤྱི་དངོས་པོ་ལ་འདོད་པའི་གནས་མེད་པས་དགོངས་པ་བཙལ་བར་བྱའོ། ། ༼༣༽རང་འགྲེལ་ལས། མིང་བྱེད་པ་ནི་མིང་སྟེ། དཔེར་ན་གཟུགས་སྒྲ་ཞེས་བྱ་བ་ཞེས་གསུངས་པའི་ཕྱིར། ༼གོ༣༽བྱེ་སྨྲས་བུམ་པ་ཞེས་པའི་ཚིག་བུམ་པ་ལ་བཏགས་པའི་ཆ་དེ་ཡང་རྗོད་བྱེད་དུ་འདོད་ཅིང༌། མིང་ཡང་དེ་ཡིན་ཏེ་དེ་ལ་དགོངས་ནས་སློབ་དཔོན་གྱིས་འདིར་མིང་བྱེད་པ་ཞེས་སྨོས་པ་བཏགས་པའི་མིང་དུ་བསྟན་ནས། མིང་གཞི་ཞེས་པའི་མིང་དུ་འཁྲུལ་བ་འགོག་ཆེད་ཡིན་པར་གང་སྤེལ་འཆད་དོ། །༼༡ན༠༡༽ ༼༡༽ མིང་གང་དོན་དེ་དང་དེ་ལ་བཏགས་པ། ༼ངོ༣༽ངག་ཕྱོགས་ས་དང་འོད་ཟེར་དང༌། །ཕྱུག་དང་མིག་དང་རྡོ་རྗེ་དང༌། །མཐོ་རིས་ཆུ་དང་དོན་དགུ་ལ། །མཁས་པས་གཽ་སྒྲ་ངེས་པར་གདགས། །ཞེས་པ་ལྟར། ༼༡༽གཽ་

― GTD002_Page_0128 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲ་དོན་དགུ་ལ་བྱས་པ་ལྟ་བུ། ༼༢༽དེ་སྐད་དུ། རང་འགྲེལ་ལས། དེ་དག་ནི་ངག་གི་རང་བཞིན་མིན་ཏེ། ངག་གི་སྒྲ་ཡིན་ན་སྒྲ་ཙམ་གྱིས་༼ཅོ༣༽དོན་གོ་བར་མི་འགྱུར་རོ། །འོ་ན་ཅི་ཞེ་ན་ངག་ནི་མིང་ལ་འཇུག ༼༢༽དཔེར་ན་གཽ་ཞེས་བྱ་བ་ལྟ་བུའོ། །ཞེས་གསུངས་པའི་ཕྱིར། ༼ཆོ༣༽གྲུབ་མཐའ་ཆེན་མོར། བེམ་པོ་དང་ལྡན་མིན་འདུ་བྱེད་དུ་གཏོགས་པར་གསུངས་ལ། ཊཱིཀ་ཆེན་དེ་ཉིད་སྣང་བར། མདོ་སྡེ་པའི་སྐབས་སུ། འདུ་བྱེད་བེམ་པོ་ཡོད་མ་ཡིན། །ཞེས་པའི་ཤུགས་ལ། བྱེ་སྨྲས་ལྡན་མིན་འདུ་བྱེད་དང་བེམ་པོའི་གཞི་མཐུན་འདོད་པར་གསུངས་སོ། །ཞེས་གསུངས་པས་གྲུབ་མཐའ་རིན་ཆེན་འཕྲེང་བ་ལྟར་རོ། །གསེར་འཕྲེང་གི་ལུང་འདི་དག་ལ་ཞིབ་ཆ་དགོས་ཞེས་མཛོད་ཀྱི་མཐའ་དཔྱོད་དུ་གསུངས་པས་དཔྱད་པར་བྱའོ། ། ༼༣༽ཡང་དཔྱོད་པ་བ་སོགས་རྟོག་གེ་བ་དག་བསྟན་བཅོས་ཀྱི་ངོ་བོ་ཀུན་བཏགས་དང་དངོས་མེད་ལ་འདོད་དེ། ༼༤༽རྣམ་འགྲེལ་ལས། ཚིག་སོགས་ཀུན་བཏགས་དངོས་མེད་ལ། །དངོས་པོ་ཡིན་ན་འབྲེལ་བ་གང༌། །ཇི་ལྟ་བུར་ན་འཇུག་པར་འགྱུར། །ཞེས་གསུངས་པ་དང༌། ༼ཇོ༣༽འདི་ལ་ཐར་ལམ་གསལ་བྱེད། ཊཱིཀ་ཆེན། གྲྭ་ཆུང་བའི་ཊཱིཀྐ་སོགས་སུ། ཚིག་སོགས་ཆོས་ཅན་ཁྱོད་རང་གི་བརྗོད་བྱའི་དོན་དངོས་པོ་ཡི་ནི་འབྲེལ་བའམ། འབྲེལ་བ་དངོས་པོར་གྲུབ་པ་མེད་པར་ཐལ། ཁྱོད་དེ་ལ་ཀུན་བཏགས་ཀྱི་ཆ་དངོས་མེད་རྟོག་བཏགས་ཙམ་ཡིན་པའི་ཕྱིར། ཞེས་མཐུན་པར་འབྱུང་ལ། སྡེ་བདུན་རྒྱན་དུ་ཚིག་སོགས་ཀུན་བཏགས་པ་ཞེས་རྩོད་གཞི་ལ་སྦྱར་ཀྱང༌། འགལ་བ་མེད་དེ། ཕ་

― GTD002_Page_0129 ―

^{[མ་དཔེ་གཟིགས་ན་འདིར་གནོན།]}

[Full Size]

རོལ་པོས་ཀུན་བཏགས་པའི་ཆ་ཡང་སྒྲ་སྤྱི་ཡིན་པས་རྗོད་བྱེད་དུ་འདོད་པའི་ཕྱིར་རོ། ། ༼༤༽གསེར་འཕྲེང་ལས། རྟོག་གེ་བ་ནི་དངོས་ཀྱི་རྗོད་བྱེད་སྒྲ་སྤྱི་དང་ཞེན་པའི་རྗོད་བྱེད་སྒྲ་རང་མཚན་པ་ལ་འདོད་ཅེས་གསུངས་པའི་ཕྱིར། གསེར་འཕྲེང་ཚིག་ཟིན་འདི་འདྲ་ཞིག་འདུག་པས་དཔྱད་རྒྱུ་དུ་མ་ཡོད། འདིར་ཞིབ་ཆ་འགའ་དགོས་སོ། ། ༼ཉོ༣༽ཞིབ་ཆ་ནི། འདི་འདོད་པ་བོ་གཙོ་བོར་དཔྱོད་པ་བ་ཡིན་ལ། དེ་དག་གིས་རིག་བྱེད་ཀྱི་ངོ་བོ་ཀུན་བཏགས་ཀྱི་ཆ་ལ་འདོད་པས། དངོས་མེད་དུ་དོན་གྱིས་ཁས་བླངས་སོང་ཡང་དངོས་མེད་དུ་མི་སྨྲ་སྟེ། འོག་ནས་རྣམ་བརྟགས་འབྲེལ་ལ་ཉེས་འདི་མེད། །ཅེས་སྐྱོན་སྤོང་སྐབས། ཁྱེད་ཅག་འབྲེལ་བ་རྟག་དངོས་འདོད་པ་ལ་སྐྱོན་འཇུག་ཀྱང༌། ཁོ་བོ་ཅག་བློས་བཏགས་ཙམ་དུ་སྨྲ་བས་སྐྱོན་མེད་ཅེས་བཤད་པའི་ཕྱིར་དང༌། རིགས་གཏེར་ལས། གངས་ཅན་པ་དང་ཉན་ཐོས་གཉིས། །སྒྲ་དོན་དངོས་ཀྱི་བརྗོད་བྱར་འདོད། །ལྡན་མིན་འདུ་བྱེད་ལ་སྦྱར་བའི། །འབྲེལ་མེད་གཟུགས་ནི་ཇི་ལྟར་སྟོན། །ཞེས་ཉན་ཐོས་བྱེ་བྲག་སྨྲ་བ་དང་སྦྱར་བ་ལྟར་ན་ཡང༌། དེས་ཀྱང་ལྡན་མིན་དུ་འདོད་པས་དངོས་མེད་མི་རུང་ངོ༌། །༼༡བ༠༡༽ ༼༡༽ དེ་བཞིན་དུ་ཉི་སྣང་དབུ་མ་སྙིང་པོ་རྟོག་གེ་འབར་བ་༼ཏོ༣༽རྣམ་བཤད་རིགས་པ་འབུམ་ཊཱིཀ་སོགས་ལས་ཡན་ལག་དྲུག་ཅུ་བཤད་པ་མི་འཐད་པར་ཐལ་བ་དང༌། ༼༤༽སྤྱོད་འཇུག་ལས། ལུས་ཅན་ཀུན་གྱིས་བྱ་དང་ནི། །ཤིང་དང་འོད་ཟེར་ཐམས་ཅད་དང༌། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་འཆད་པར་ཐོས་པར་ཤོག །ཅེས་གསུངས་པའི་ཕྱིར། ༼ཐོ༣༽འདི་ནི་ཡུལ་སྟེང་ནས་ཀྱང་འགྲུབ་རུང་གི་སྨོན་ལམ་སྟེ། མོས་

― GTD002_Page_0130 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་དང༌། རྩོལ་བཅས་རྩོལ་མེད་ཀྱི་ས་ལ་རིམ་པར་འགྲུབ་ཚུལ། རྒྱན་ལས། སེམས་དཔའ་མཆོག་གི་སྟོན་པ་ནི། །ལུང་དང་ཡོན་ཏན་དབང་འབྱོར་ལས། །ཁྭ་དང་གཟུགས་ནི་ཐམས་ཅད་དང༌། །ནམ་མཁའ་ལས་ཀྱང་འབྱུང་བ་ཡིན། །ཞེས་པ་དང་གཅིག་པར་སྣང་ངོ༌། ། ༼༡ན༠༢༽ ༼༧༽ མིང་གི་སྒོ་ནས་བསྟན་བཅོས་ལ་དགུ་ཡོད་པའི་དྲུག་ལྟར་སྣང་དང༌། ནང་པའི་བསྟན་བཅོས་ལ་ཕྱི་མ་གསུམ་ཀ་ཡིན་པས་ཁྱབ་པའི་ཕྱིར་ཏེ། རྣམ་བཤད་རིགས་པ་ལས། ཕྱི་བའི་རྟོག་གེའི་གཞུང་ལྟ་བུ་དགོས་པའི་སྒོ་ནས། ཐོས་རྩོད་སྒྲུབ་པ་ལྷུར་ལེན་དང༌། །འཇོག་པོའི་གཙུག་རྒྱན་དང༌། བྱ་རོག་སོ་རྟོག་ལྟ་བུ་བརྗོད་བྱའི་སྒོ་ནས་དོན་མེད་དོན་ལོག་དོན་དང་ལྡན། །ཀུན་སློང་གི་སྒོ་ནས། བྲམ་ཟེ་གསང་ཚིག་སྟོན་པ་དང་ཕྱུགས་ཀྱི་མཆོད་སྦྱིན་ལ་འཇུག་པའི་དེ་ལྟ་བུ་ངན་གཡོ་སྙིང་མེད་སྡུག་བསྔལ་སྤོང༌། །བསྟན་བཅོས་གསུམ་ཚན་གསུམ་དུ་འདོད། །ཅེས་གསུངས་པའི་ཕྱིར། ༼༡ན༠༣༽ ༼༣༽ མདོ་རིམ་པ་གསུམ་དུ་བསྡུས་ནས་བཤད་པ་གང་ཞིག །བཀའ་ཐམས་ཅད་དེ་གསུམ་དུ་འདུ་བའི་ཕྱིར། དང་པོ་གྲུབ་སྟེ། རྣམ་བཤད་ལས། ནོར་བུ་སྦྱོང་བའི་ཚུལ་དཔེར་བླངས་ནས་གདུལ་བྱ་བཀྲི་བའི་རིམ་པ་གསུམ་མཛད་དོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། གདུལ་བྱ་གྲོལ་བྱེད་ཀྱི་ཆོས་དེར་མ་འདུས་པའི་སྐབས་མེད་པའི་ཕྱིར། ༼དོ༣༽འདི་ལ་རིམ་པ་གཉིས་པའི་མཚན་གཞིར་རྣམ་བཤད་སོགས་ལས་ཤེར་མདོ་བཞག་ཀྱང༌། དགེ་འདུན་རྒྱ་མཚོའི་དཀའ་འགྲེལ་གྱི་མཇུག་ཏུ་དེ་རིམ་པ་གསུམ་པར་གསུངས་པ་དཔྱད་དགོས་ལ། དཀའ་འགྲེལ་འདིར་དགོངས་འགྲེལ་གྱི་ལེའུ་བཅུ་བགྲང་བའི་ཚེ་ཡང༌། རབ་

― GTD002_Page_0131 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་གྱི་ལེའུ་མ་བགྲང་བར་གླེང་གཞི་བགྲང་བ་གླེགས་བམ་དང་མི་མཐུན་ཞིང༌། གལ་ཏེ་རབ་འབྱོར་བྱང་ཆུབ་སེམས་དཔའ་མ་ཡིན་ལ། འདི་བྱང་ཆུབ་སེམས་དཔའ་བཅུས་དྲི་ལན་གྱིས་བཤད་པར་རྣམ་བཤད་ལས་འབྱུང་ངོ་ཞེ་ན། གླེང་གཞིར་དྲི་ལན་ཀྱང་མེད་ལ། ཞུ་བ་པོ་ཡང་མེད་པའི་སྐྱོན་སོ་ན་གནས་སོ། །དེས་ན་དགོངས་འགྲེལ་དང༌། ཚུལ་བཞིན་ཀུན་ཏུ་དྲི་བ་སོ་སོར་བགྲངས་ཀྱང༌། དེ་གཉིས་ཀྱི་དྲིས་ལན་ལེའུ་གཅིག་ཡིན་པས། བྱང་སེམས་རེ་དང་ལེའུ་རེ་སྦྱོར་མི་དགོས་ལ། གླེགས་བམ་སོར་བཞག་རུང་ངོ༌། ། ༼༧༽ཐོགས་འགྲེལ་ལས། དེ་ལ་གང་དག་སྟོང་པ་ཉིད་ཀྱི་ཚུལ་འདི་ལ་ཕྱིན་ཅི་ལོག་ཏུ་རྣམ་པར་གཡེང་ཞིང་རྣམ་པར་འཕྲོ་ལ་མཉམ་པར་མི་འཇོག་ཅིང་རྩེ་གཅིག་ཏུ་མི་འགྱུར་བ་དེས་ན་སྟོང་པ་ཉིད་ལ་སེམས་རྣམ་པར་གཡེང་བ་ཞེས་བརྗོད་དོ། །ཞེས་གསུངས་པའི་ཕྱིར། ༼ནོ༣༽འདི་ལ་ཁ་ཅིག །སྟོང་ཉིད་ལ་རྣམ་གཡེང་ཡིན་པས་རྣམ་གཡེང་དུ་འགྱུར་ན་བདེན་འཛིན་དེར་འགྱུར་ལ། མིན་ན་སྐྱོན་བརྗོད་འབྲེལ་མེད་དོ་ཟེར་ཡང༌། དཔྱད་ན་ཕ་རོལ་པོའི་ཁས་བླངས་ལ་འཁྲིས་པའི་སྐྱོན་བརྗོད་པ་ཡིན་པས་རྣམ་གཡེང་ཉོན་སྒྲིབ་མ་ཡིན་པར་མི་འགྱུར་རོ། །དེ་ཡང་ཕ་རོལ་པོ་དེས་རྒྱུད་བླའི་ལུང་དོན་འཆད་པའི་ཚེ་རྣམ་གཡེང་མེད་པའི་དོན། གང་བཤད་བྱའི་དོན་དེ་ལས་ལོག་པར་ཞུགས་པའི་གཡེང་བ་མ་སྤངས་པར་ཡོད་ན། བསམ་པ་དེའི་དབང་གིས་བཤད་པ་ལ་ཡང༌། ཕྱིན་ཅི་ལོག་གི་ཉེས་པ་འབྱུང་བས་ཚིག་དོན་གཉིས་ཀར་སྐྱོན་མེད་པའི་བཤད་པ་རྣམ་དག་ཏུ་མི་འགྱུར་

― GTD002_Page_0132 ―

^{[མ་དཔེ་གཟིགས་ན་འདིར་གནོན།]}

[Full Size]

རོ་སྙམ་པ་ཡིན་ལ། དེ་ལྟ་ན་སྟོང་ཉིད་སྟོན་པའི་བསྟན་བཅོས་རྣམ་དག་བརྩམས་པ་ལ་སྟོང་ཉིད་ལ་གཡེང་བ་སྤང་དགོས་ཞེས་པ་རྣམ་པར་དཔྱོད་པའི་སྒོ་བླ་ན་མེད་པ་ཡིན་ནོ། །རང་ལུགས་ལ། རྣམ་གཡེང་མེད་པའི་དོན་སྤོང་བ་ལ་མི་བྱེད་ཅིང་འདིའི་རྣམ་གཡེང་ཡང༌། དར་ཊཱིཀ་ལས། བྱེད་པ་པོའི་ཀུན་སློང་གི་ཁྱད་པར་རྙེད་པ་དང༌། བཀུར་སྟི་དང༌། གྲགས་པ་ལ་ལྟ་བ་སོགས་འཁོར་བའི་འདུ་འཛིའི་རྣམ་གཡེང་མེད་པའི་ཡིད་ཅན་གྱིས་བཤད་པ་དང༌། ཞེས་འབྱུང་སྟེ། དེ་ཙམ་ནི་འདུལ་བ་མདོ་རྩ་བར། རྙེད་པ་དང༌། བཀུར་སྟི་དང༌། ཟང་ཟིང་མེད་པའི་སེམས་ཀྱིས་སོ། །ཞེས་གསུངས་པ་ལྟར། ཆོས་འཆད་པ་ཐམས་ཅད་ལ་ཡང་དགོས་པས་ཕྱོགས་སྔ་དང་རང་གཞུང་ཤན་ཕྱེད་པ་གལ་ཆེ་བར་སྣང་ངོ༌། ། ༼༡བ༠༣༽ ༼༧༽ དེ་དག་མཁས་པ་རྣམས་ཀྱི་དོགས་པར་སྣང་བས་བཤད། ༼པོ༣༽ཐལ་འགྱུར་བའི་ལུགས་ལ་བསྟན་བཅོས་ཐམས་ཅད་ཐར་ལམ་སྟོན་བྱེད་ཡིན་ན། སེམས་བསྐྱེད་ཙམ་སྟོན་པ་དེས་ཀྱང་ཐར་ལམ་བསྟན་པར་འདོད་དགོས་པས། དེ་ལ་སླེབས་པ་ཡང་ཐར་ལམ་དུ་སླེབས་པར་འགྱུར་རོ་ཟེར་བ་སོགས་༼༧༽བླུན་པོས་བརྗོད་པ་ལ་དོགས་དཔྱོད་མ་བྱས་སོ། །༼༡ན༠༤༽ ༼༣༽ ལྷག་བསམ་བསྐུལ་བའི་མདོ་བསླབ་བཏུས་སུ་དྲངས་པ་ལས། བྱམས་པ་གཞན་ཡང་རྒྱུ་བཞིས་ན་སྤོབས་པ་ཐམས་ཅད་སངས་རྒྱས་ཀྱི་གསུང་ཡིན་པར་རིག་པར་བྱའོ། ། ༼༧༽མདོ་མངོན་གཉིས་མི་འགལ་བར་བཤད་དེ། ༼ཕོ༣༽དེར་མ་ཟད་སྡེ་སྣོད་གསུམ་ག་ཡིན་པ་ཡང༌། རྣམ་འགྲེལ་ལེའུ་དང་པོའི་མཐའ་དཔྱོད་ལས། ཐེག་ཆེན་ཐུན་མོང་མ་ཡིན་པའི་འདུལ་

― GTD002_Page_0133 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་སྡེ་སྣོད་དང༌། སྡེ་སྣོད་གཞན་གཉིས་ཀྱི་གཞི་མཐུན་ཡོད་པའི་ཕྱིར། དཔེར་ན། མཚན་གཞི་དཀོན་བརྩེགས་དང༌། སངས་རྒྱས་ཕལ་བོ་ཆེ་དང༌། མདོ་ཏིང་ངེ་འཛིན་རྒྱལ་པོ་ལྟ་བུའོ། །ཞེས་གསུངས་པ་ལྟར། སྐྱབས་མགོན་མཆོག་གིས་མཛད་པའི་གསོལ་འདེབས་ཀེ་ཏ་ཀའི་འཕྲེང་མཛེས་ཀྱི་ཊཱིཀྐར་གསུངས་ལ། དབུ་མའི་མཐའ་དཔྱོད་དུ་ཡང་གསུངས་སོ། །སྡེ་སྣོད་གསུམ་དུ་འཇོག་ཚུལ་སྤང་བྱ་ལ་ལྟོས་ནས་འདོད་པ་བསོད་སྙོམས་ཀྱི་མཐའ་དང༌། ངལ་དུབ་ཀྱི་མཐའ་སྟེ་མཐའ་གཉིས། ཐེ་ཚོམ་དང༌། འདུལ་བས་ཚུལ་ཁྲིམས་ལ་འགྱོད་པ་མེད་པས་ཞི་གནས་ཀྱང་བརྒྱུད་ནས་འགྲུབ། དེའི་སྟེང་དུ་མངོན་པས་ལྷག་མཐོང་འགྲུབ་པ་དང༌། ཤེས་བྱ་ལ་ལྟོས་ནས་མདོའི་ཚིག་དོན་གཉིས་ཀ་ལ་བྱང་ཆུབ་པར་བྱེད། མངོན་པའི་འབེལ་གཏམ་གྱིས་ཆོས་དོན་རྫོགས་པར་ལོངས་སྤྱོད། འདུལ་བས་ཆོས་དོན་མངོན་དུ་བྱེད་པར་བུ་སྟོན་གསུངས་ལ། ཀུན་བཏུས་དར་ཊཱིཀ་ལས། བྱེད་ལས་ཀྱི་དབང་དུ་བྱས་པ་དང༌། རང་གི་ངོ་བོའི་དབང་དུ་བྱས་པ་དང༌། བརྗོད་བྱའི་དབང་དུ་བྱས་པ་གསུམ་དུ་འདུས་པའོ། །ཞེས་གསུངས་པ་དོན་ཕལ་ཆེར་འདྲ་ལ། དབུས་མཐར། ཁམས་རྟས་བྱེད་དང་ཡིད་བྱེད་དང༌། །ཞེས་སོགས་དང༌། རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང༌། །བསྡུས་པའི་ཕྱིར་ན་རྒྱུ་ནི་དགུར་འདོད་དོ། །ཞེས་པའི་ཐད་ཀྱི་འགྲེལ་པར་

― GTD002_Page_0134 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་འབྱུང་ངོ༌། ། ༼༡བ༠༤༽ ༼༡༽ བཅུ་གཉིས་ཀྱི་ངོས་འཛིན་མདོ་དང་བསྟན་བཅོས་ལས་དུ་མར་བཤད། ས་སྡེ་གཅིག་པུ་ལ་ཡང་སྣ་ཚོགས་བཤད་པ་རྟེན་གཞི་མདོའི་དབང་གིས་སོ། ། ༼བོ༣༽དེ་ཡང་ཉན་ས་ལས། དེ་ལ་རེ་ཞིག་མདོ་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་དུ་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། ཆེད་དུ་བརྗོད་པའི་སྡེ་དང༌། རྟོགས་པ་བརྗོད་པའི་སྡེ་དང༌། དེ་ལྟ་བུ་བྱུང་བའི་སྡེ་དང༌། སྐྱེས་པ་རབས་ཀྱི་སྡེ་དང། ཤིན་ཏུ་རྒྱས་པའི་སྡེ་དང། རྨད་དུ་བྱུང་བའི་ཆོས་ཀྱི་སྡེ་ཞེས་གང་གསུངས་པ་དེ་ནི་མདོ་སྡེ་ཡིན་ནོ། །གླེང་གཞིའི་སྡེ་ཞེས་གང་གསུངས་པ་དེ་ནི་འདུལ་བ་ཞེས་བྱ་བའོ། །གཏན་ལ་དབབ་པར་བསྟན་པའི་སྡེ་ཞེས་གང་གསུངས་པ་དེ་ནི་ཆོས་མངོན་པ་ཞེས་བྱ་སྟེ། ཞེས་དང། གཞི་བསྡུ་བར། ཡན་ལག་བཅུ་གཉིས་ལས། ཤིན་ཏུ་རྒྱས་པའི་ཡན་ལག་མ་གཏོགས་པ་རྣམས་ནི། ཉན་ཐོས་དང་ལྡན་པའོ། །ཞེས་པ་ལྟར། བྱང་སར་ཡང་གསུངས་ལ། རྟེན་ས་ཡང༌། ཉན་སས་དམན་མདོར་བརྟེན་ཏེ། རྣམ་འགྲེལ་མཐའ་དཔྱོད་དུ་སྐྱེས་པའི་རབས་ནི་བྱང་ཆུབ་སེམས་དཔའི་འདུལ་བ་ཡིན་ཀྱང༌། ཉན་ཐོས་ཀྱི་འདུལ་བའི་སྡེ་སྣོད་མ་ཡིན་པས་དེར་མ་བཤད་ལ། ཞེས་གསུངས་པའི་ཕྱིར། དེ་ལ་མདོའི་སྡེ་ནི་དོན་བསྡུའི་ཐོག་མར་ཚིག་ལྷུག་ཏུ་གསུངས་པ་སྟེ། མདོར་ཞེས་རིང་ཆ་འབྱུང་བས་མདོ་རྒྱས་ཀྱི་མདོ་ཡིན་གྱི་མདོ་མངོན་གྱི་མདོ་མིན་ནོ། །མཚན་གཞི་ཤེར་སྙིང་ལས། ཕུང་པོ་ལྔ་པོ་དེ་དག་ལ་རང་བཞིན་གྱིས་སྟོང་པ་རྣམ་པར་བལྟ། ཞེས་པ་ལྟ་བུའི་ཐེག་དམན་གྱི་མདོ་དང། དབྱངས་བསྙད་དབུས་དང་ཐ་མར་ཚིགས་བཅད་

― GTD002_Page_0135 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་བ་རྡོར་གཅོད་ལས། གང་དག་ང་ལ་གཟུགས་སུ་མཐོང༌། །ཞེས་པ་ལྟ་བུའོ། །ལུང་བསྟན་ཤི་ནས་གར་སྐྱེ་སྟོན་པ་པད་དཀར་ལྟ་བུའོ། །སྔ་མ་དྲང་དོན་དང་འདི་ངེས་དོན་བྱེད་ཚེ་ལུང་སྟོན་པ་ཡང༌། དགོངས་པ་ལུང་སྟོན་པ་ལ་སྦྱར་རོ། །ཚིགས་བཅད་ལུས་རིལ་བོ་ཚིགས་བཅད་དུ་སྟོན་པ་སྡུད་པ་ལྟ་བུའི་ཐེག་དམན་གྱི་མདོའོ། །ཆེད་བརྗོད་ནི་ལེགས་སོ་ལེགས་སོ་ཞེས་བྱ་བ་བྱིན་ནས་ལེགས་སོ། །ཞེས་པ་ལྟ་བུའོ། །གླེང་གཞི་ནོར་ཅན་ལ་བཅས་པ་ལྟ་བུའོ། །རྟོགས་བརྗོད་ཚངས་བྱིན་གྱི་ལྟ་བུའོ། །དེ་ལྟ་བུ་བྱུང་ལས་བརྒྱ་བ་ལྟ་བུའོ། །སྐྱེས་རབས་སླ། ཤིན་ཏུ་རྒྱས་པ་ཡུམ་ལྟ་བུ། རྨད་བྱུང་ནི་ཐེག་དམན་ལ་མི་སྲིད་པས་ཐེག་ཆེན་གྱི་ཆེ་བ་སྟོན་པ་སྟེ། དད་པའི་སྟོབས་བསྐྱེད་པ་ལ་འཇུག་པ་ཕྱག་རྒྱའི་མདོ་ལྟ་བུའོ། ། ༼༥༽མཁས་གྲུབ་ཐམས་ཅད་མཁྱེན་པའི་གསུང་རྒྱུད་སྡེ་སྤྱི་རྣམ་ལས་ཀྱང༌། ཡན་ལག་བཅུ་གཉིས་ཀྱི་དང་པོ་ལྔ་ནི་ཐེག་དམན་གྱི་མདོ་སྡེའི་སྡེ་སྣོད་དང༌། ༼༡ན༠༥༽ ༼༡༽ བསྡུ་བ་ལྟར་ན་དེ་དུས་ནས་མ་ཚང་བར་མངོན་ནོ། ། ༼མོ༣༽དེ་ཡང་གཞི་བསྡུ་བའི་མདོར་བསྟན་དུ། གནས་གསུམ་གྱིས་གཞི་བསྡུ་བར་འགྱུར་ཏེ། འདི་ལྟ་སྟེ། མདོ་སྡེའི་གཞི་དང༌། འདུལ་བའི་གཞི་དང་མ་མོའི་གཞིའོ། །ཞེས་གསུངས་ཀྱང༌། རྒྱས་བཤད་དུ་མངོན་པ་བསྡུ་བ་མ་མཛད་པའི་རྒྱུ་མཚན། དེའི་སྔ་རོལ་ཏུ་སྤྲང་པོ་ཉི་མའི་དངོས་གྲུབ་སོགས་མངོན་པའི་དགྲ་ལན་གསུམ་བྱུང་བས། དེ་དུས་མངོན་པ་ཚང་བ་མི་བཞུགས་པ་ཡིན་ཟེར། ད་ལྟ་འདི་ཙམ་སྨྲ་བ་ཡང་སྨིན་མ་ཟང་ཟིང་བྱེད་ཀྱང་དེ་ནི་ལུང་

― GTD002_Page_0136 ―

^{[མ་དཔེ་གཟིགས་ན་འདིར་གནོན།]}

[Full Size]

རིགས་དུ་མ་དང་འགལ་ཏེ། དེ་དུས་མངོན་པ་གཏན་མེད་པར་ཁྱོད་ཀྱང་མི་འདོད་ལ། ཐོར་བུར་ཡོད་ན་དེ་བསྡུ་བར་སྐྱེ་བ་བཞེས་པ་ཡིན་པས་ལྷག་པར་བསྡུ་རིགས་ཏེ། སྔ་མས་བསྒྲིགས་ཟིན་ཁོ་ན་ལ་དཔར་ལོག་བྱེད་པ་བོད་ཀྱི་མཚང་ཡིན་པའི་ཕྱིར་དང༌། ཁྱོད་ལྟར་ན་མདོ་འདུལ་ཡང་བསྡུ་མི་རུང་སྟེ། སློབ་སྤྲིངས་ལས། མདོ་སྡེ་ཕལ་ཆེར་ཀླུ་ཡུལ་ན་བཞུགས་པར་བཤད་ཅིང༌། འདུལ་བ་ཡང༌། མདོ་རྩའི་འགྲེལ་ཆུང་ལས། དགེ་སློང་མའི་ཁྲིམས་ལྔ་བརྒྱ་སྲུང་ངོ་ཞེས་དང༌། སྨན་བླའི་མདོར་དགེ་སློང་མ་གང་དག་བསླབ་པའི་གཞི་ལྔ་བརྒྱ་པོ་དག་འཛིན་པ་ཞེས་གསུངས་ཀྱང་སུམ་བརྒྱ་རེ་བཞི་ལས་གཞན་པ་ཀུན་ནུབ་པའི་ཕྱིར་དང༌། དེས་ན་རྣམ་བཤད་རིགས་པ་ལས། ཡང་དག་བསྡུས་པའི་གཞི་ཉམས་ཕྱིར། །ཞེས་གསུངས་པས་དེ་ཡང་བསྡུ་མི་རིགས་པར་འགྱུར་རོ། །དེས་ན་འདིར་ཟུར་དུ་བསྡུ་བ་མ་མཛད་པ་བསྡུ་རྒྱུ་མ་རྙེད་པ་མིན་ཏེ། བུ་སྟོན་ཆོས་འབྱུང་ལས། འདིའི་མདོར་བསྟན་དུ། སྡེ་སྣོད་གསུམ་བསྡུ་བ་སྨོས་ནས། རྒྱས་བཤད་དུ་མདོ་སྡེ་དང་འདུལ་བ་བསྡུ་བ་གཉིས་ལས་མ་བཤད་པ་ནི། མ་མོ་བསྡུ་བ་ས་སྡེ་ལྔ་པོ་ཉིད་ཡིན་པས་ལོགས་སུ་མ་བཤད་ཅེས་གསུངས་པའི་ཕྱིར། འདི་ཆེས་ལེགས་ཏེ། ཐོས་པའི་ས་གཏན་ལ་དབབ་པ་བསྡུ་བར་དེ་ལ་མ་མོ་བསྡུ་བ་ནི་ས་བཅུ་བདུན་དང་བསྡུ་བ་བཞིའོ། །ཞེས་གསུངས་པའི་ཕྱིར། བར་འདིར་འདི་གསུངས་པ་གཞུང་སྤྱི་ལ་དཔྱད་པ་འཇུག་ཆེད་ཡིན་པས་བཀའ་དྲིན་དུ་ཤེས་པར་གྱིས། ༼༡༽ཡང་བཀའ་ལ་ཞལ་ནས་གསུངས་པ་མདོ་སྡུད་པ་དང༌། ༼ཙོ༣༽ཆོས་ཡང་དག་པར་སྡུད་པའམ་

― GTD002_Page_0137 ―

^{[མ་དཔེ་གཟིགས་ན་འདིར་གནོན།]}

[Full Size]

འཕགས་པ་ཆོས་ཀུན་ཏུ་འགྲོ་བའི་མདོ་ལས་འདི་སྐད་བདག་གིས་ཐོས་པ་ཞེས་གྱིས་ལ་ཆོས་བསྡུས་ཤིག །ཅེས་དང༌། གོ་རིམ་དང་འབྲེལ་ཡང༌། རྗེས་སུ་བསྟན་པར་བྱའོ། །ཞེས་པ་ལྟ་བུའི་སྒོ་ནས་བཀས་༼༢༽རྗེས་སུ་གནང་བ་འདི་སྐད་བདག་གིས་ཐོས་སོགས་གླེང་གཞིའི་ལེའུ་དང༌། ༼༢༽སྐུས་བྱིན་གྱིས་བརླབས་པ་མདོ་སྡེ་ས་བཅུ་བ་ལྟ་བུ་༼ཚོ༣༽སྟེ། དེ་ཉིད་ལས། བྱང་ཆུབ་སེམས་དཔའ་རྡོ་རྗེ་སྙིང་པོ་ལ་ཟིལ་གྱིས་མི་གནོན་པའི་ལུས་ཉེ་བར་བསྒྲུབས་ཏེ། ཞེས་པ་ནས། སངས་རྒྱས་བཅོམ་ལྡན་འདས་དེ་དག་གིས་དེ་ཉིད་ན་བཞུགས་བཞིན་དུ་ཕྱག་གཡས་པ་རྣམས་བརྐྱངས་ཏེ། བྱང་ཆུབ་སེམས་དཔའ་རྡོ་རྗེ་སྙིང་པོའི་མགོ་ལ་བྱུགས་པ་མཛད། ཞེས་སོགས་སྣང་ཚོད་གཙོ་བོར་བྱས་ཏེ་ཕྱག་དབང་གནང་བའི་ཚུལ་གྱིས་བྱིན་གྱིས་བརླབས་པའོ། །གཉིས་པར་ཡང་ཁ་ཅིག །ཕ་དང་མ་ནི་ཞེས་སོགས་ཚིག་ངན་པས་སངས་རྒྱས་ཀྱི་གསུང་གི་ནུས་པས་ཟབ་མོར་བསྒྱུར་ཟེར་བ་ཚིགས་བཅད་འདི་གྲགས་ཆེ་བའི་དབང་ཙམ་སྟེ། དོན་དངོས་ནི་སངས་རྒྱས་ཀྱི་བཀས། འཇམ་དཔལ་ལ་ཁྱོད་ཀྱི་མ་སྐྱེས་དགྲའི་འགྱོད་པ་སོལ་ཅིག་ཅེས་བསྒོས་ནས་བསྟན་པ་དང༌། མོའུ་འགལ་གྱི་བུ་མང་བཀུར་གྱི་གདུང་བརྒྱུད་བཤད་པར་བསྐོས་ནས་བསྟན་པ་ལྟ་བུའོ་ཞེས་ཝ་རི་ཇོ་སྲས་ཀྱི་འདུལ་བར་འབྱུང་བ་ལེགས་ཏེ། འཇིག་རྟེན་ན་ཡང་རྒྱལ་པོའི་ལུང་གིས་མངགས་པའི་ཕོ་ཉའི་ཚིག་བཙན་པ་ལྟ་བུའོ། །སྔགས་ནི། བྷུ་ཙ་ར༌ཎ། པ་ཏ་ལ་ཙ་ར་ཡ། ཁེ་ཙ་ར་ཡ། པུར་བ་ན་སོགས་ཉེ་སྙིང་དང༌།

― GTD002_Page_0138 ―

^{[མ་དཔེ་གཟིགས་ན་འདིར་གནོན།]}

[Full Size]

སྙིང་པོ། ཧྲཱིཿཥྚྲཱིཿཀྱི་བྱིན་གྱིས་བརླབས་པ་ལྟ་བུའོ། ། ༼༡བ༠༥༽ ༼༡༽ གསུང་རབ་ཐམས་ཅད་ཀྱི་དགོངས་འགྲེལ་ལམ་སྒྲོན་དང༌། ལམ་རིམ་གཉིས་དང༌། ཐུབ་དགོངས་ལྟ་བུ་༼༣ཛོ༽སྟེ། ཐུབ་དགོངས་ཀྱི་ལེའུ་དང་པོ་གཉིས་གསུང་རབ་སྤྱིའི་དགོངས་འགྲེལ་གྱི་ཚུལ་དུ་བྱས་ནས། ཐ་མ་གཉིས་ཀྱིས་རྒྱན་གྱི་དོན་བྱེ་བྲག་ཏུ་འགྲེལ་པས་མངོན་རྟོགས་རྒྱན་གྱི་འགྲེལ་པར་ཡང་བགྲང་ངོ༌། ། ༼༢༽ཡང་བསྟན་བཅོས་ལ་བྱེད་ལས་ཀྱི་སྒོ་ནས་ཐོར་བ་སྡུད་པའི་བསྟན་བཅོས། འཁྲུག་པ་བསྡེབས་པའི་བསྟན་བཅོས། རྒྱ་ཆེ་བ་སྡུད་པའི་བསྟན་བཅོས། མ་ཚང་བ་ཁ་སྐོང་བའི་བསྟན་བཅོས་བཞི་ཡོད་ཚད་མའི་གཞུང་ཆུང་བརྒྱ་རྩ་སྡུད་པའི་ཕྱིར་མཛད་པས་ཚད་མ་མདོའམ་ཚད་མ་ཀུན་བཏུས་དང་པོ་དང༌། ༼༣ཝོ༽གླེང་གཞིའི་དབང་གིས་ལྕི་ཡང་དང་འབྱུང་ཚུལ་སོགས་ཀྱི་གོ་རིམ་ངེས་པ་མེད་པར་ལུང་སྡེ་བཞིར་ཐོར་བུར་གསུང་བ་རྣམས་སྡོམ་པ་མ་ཐོབ་པ་ཐོབ་བྱེད་སོགས་ཀྱི་རིམ་པར་བསྒྲིགས་པའི་༼༣༽འདུལ་བ་མདོ་རྩ་དང༌། མདོ་སྡེ་མཐའ་དག་བསྡུས་ཏེ་མགོ་སྐྱབས་འགྲོ་ནས་རིམ་པར་བཤད་པའི་མདོ་སྡེ་རྒྱན་གཉིས་པ། ༼༡ན༠༦༽ ༼༥༽ རྣམ་འགྲེལ་ལས། དེ་དོན་ཕྱིར་ན་ཐབས་གོམས་པ། །དེ་ཉིད་སྟོན་པ་ཡིན་པར་འདོད། །ཅེས་དང༌། ཡང་དེ་ཉིད་ལས། དེ་ཕྱིར་ཚད་ཡིན་༼༣ཞོ༽ཞེས་ལུགས་མཐུན་གྱི་སྒོ་ནས་སྒྲུབ་ཚུལ་བཤད་ཟིན་ཏེ། སླར་ཡང་ལུགས་ལྡོག་གི་སྒོ་ནས་སྟོན་པ་ཚད་མའི་སྐྱེས་བུར་བསྒྲུབས་པ་ནི། ༼༥༽ཡང་ན་སྐྱོབ། །བདེན་པ་བཞི་ནི་སྟོན་མཛད་པ། །ཞེས་དང། ༈ ༼༡བ༠༧༽ ༼༥༽ ཡང་ཁ་ཅིག །མཁྱེན་གསུམ་ནི་རལ་གྲི་ཐང་ལ་བཞག་པ་འདྲ་བས་ས་

― GTD002_Page_0139 ―

^{[མ་དཔེ་གཟིགས་ན་འདིར་གནོན།]}

[Full Size]

མཚམས་མེད། སྦྱོར་བཞི་ཆོས་སྐུ་ལ་ས་མཚམས་ཡོད་ཟེར། ༼༣ཟོ༽འདི་ནི་བཤད་ལུགས་ཉེས་ཙམ་ཡིན་ཏེ། བསམ་ཚོད་ནི་དང་པོ་གསུམ་གྱིས་སྤྱིར་བཤད་པ་ཡིན་པས། གདུལ་བྱ་ཐམས་ཅད་ཀྱི་རྒྱུད་ལ་བསྐྱེད་བྱ་ཡིན་ལ། ཕྱི་མ་ལྔས་རྒྱན་གྱི་ཆེད་དུ་བྱ་བའི་གདུལ་བྱའི་རྒྱུད་ལ་འབྱུང་འགྱུར་རྣམས་བྱེ་བྲག་ཏུ་བཤད་དོ་སྙམ་པ་སྟེ། སྐབས་གཉིས་པར་ལམ་ཤེས་སྐབས་གཉིས་པའི་ལམ་ཤེས་ཡིན་གསུངས་ནས། སྐབས་བཞི་པར་རྣམ་རྫོགས་སྦྱོར་བ་སྤྱི་ཙམ་བཞི་པའི་དེ་མ་ཡིན་པར་གསུངས་པ་དང་གནད་གཅིག་གོ །༼༡ན༠༨༽ ༼༢༽ གླེང་གཞི་དང་རྟག་ཏུ་ངུའི་ལེའུ་ཆོས་འཕགས་ཀྱི་ལེའུ་ཡོངས་གཏད་ཀྱི་ལེའུ་དང་བཞི་ཚིག་སྣ་དངོས་བསྟན་ལ་མ་བསྡུས་པའི་ཕྱིར། ༼༣འོ༽དེས་ན་སྡུད་པར་ཡང༌། སེམས་ཅན་གང་དག་གཞན་ཕྱིར་སེམས་པ་རྣམ་དག་པ། །ཞེས་སོགས་ཤོ་ལོ་ཀ་གཅིག་སྐབས་དྲུག་པ་དང༌། སྤྱོ་བ་བྱས་སམ་སོགས་ཤོ་ལོ་ཀ་གཉིས་བདུན་པ་དང༌། བདག་གི་བདེ་བ་བཏང་ནས་ཞེས་སོགས་ཤོ་ལོ་ཀ་གཅིག་བརྒྱད་པ་ལ་སྦྱར་ནས། ཉེར་དགུ་པ་རྗེས་སུ་རིགས་པའི་ལེའུ་ཡན་ལ་རྒྱན་རྫོགས་པར་བྱས་ན། སློབ་དཔོན་གྱི་སྡུད་འགྲེལ་དང༌། རྒྱན་སྣང་སོགས་དང་མཐུན་ཀྱང༌། བུདྡྷ་ཤྲིས་དེའི་སྟེང་དུ་བཟོད་པའི་ཕར་ཕྱིན་ལ་གནས་ཞེས་པའི་བར་གྱི་རྟག་ངུ་དང༌། ཟླ་བ་ཡར་གྱི་ངོ་བཞིན་ནོ། །ཞེས་པའི་བར་ཆོས་འཕགས་ཀྱི་ལེའུ་ཡང་སྐབས་ལྔ་བའི་ཁུངས་སུ་སྦྱར་ཏེ། སྐབས་ཕྱི་མ་གསུམ་མདོ་དང་སྦྱོར་བ་ན་ཡོངས་གཏད་ཀྱི་འགོ་ནས། བྱང་ཆུབ་

― GTD002_Page_0140 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔའི་སྦྱིན་པ་ཞེས་སོགས་དྲུག་པ་དང༌། ཆོས་འདི་ཡོངས་རྫོགས་ཞེས་པའི་རྐང་པ་གཅིག་བདུན་པ་དང༌། ཡོངས་དག་ཞིང་དང་ཞེས་སོགས་བརྒྱད་པར་སྦྱར་བ་ཚིག་འགྲིག་པ་ལྟར་སྣང་ཡང༌། ལེའུ་སོ་གཉིས་སུ་སྦྱར་ན་ཁོག་དང་མི་འགྲིག་ལ། གོང་དུ་སྐབས་བཞི་པའི་འགོ་ཆོས་རྣམས་རང་བཞིན་ཞེས་སོགས་ནས་མ་བཟུང་བར། རྒྱལ་བ་ལྷ་རྒྱལ་ཞེས་སོགས་ནས་བཟུང་བའི་དབང་གིས་རྣམ་པའི་མདོ་མ་རྙེད་པར། རྒྱན་གྱི་ཚིག་བསྒྱུར་ཏེ། རྟེན་དང་བཅས་པའི་རྣམ་པ་དང༌། །ཞེས་བཤད་པ་ནི། སྐབས་བཞི་པར་རྣམ་པའི་རྒྱས་བཤད་དེ་སྙེད་ཅིག་གསུངས་པ་ལ་དངོས་སུ་བསྙོན་པར་སྣང་ཡང༌། ད་ལྟའི་སྡུད་པའི་དཔེ་ཐམས་ཅད་ལ་རྟོག་དཔྱོད་མེད་པར་བུདྡྷ་ཤྲི་ལྟར་སྐབས་ཕྱེ་སྣང་བ་ནི། རིམ་གྲོའི་ཆོས་ཀླག་ཆོས་ཙམ་དུ་གོ་ནས་སྣང་མེད་བྱས་པས་ལན་ནོ། ། ༼༦༽རྒྱན་སྣང་ལས། གླེང་བསླངས་པ་བྱས་ནས་དེ་བཞིན་གཤེགས་པ་དང་འབྲེལ་བའི་ཡོངས་སུ་གཏད་པ་ཆུང་ངུའི་དོན་ནི་ཀུན་དགའ་བོ་དེ་ལྟ་བས་ན། ཞེས་གསུངས་པའི་ཕྱིར་ན་མ་ཁྱབ། ༼༣ཡོ༽ཡོངས་གཏད་ཆུང་ངུ་ནི་ཡོངས་གཏད་ཀྱི་ལེའུ་དངོས་མ་ཡིན་གྱི། ལེའུ་ཉེར་བརྒྱད་པ་མེ་ཏོག་བཀྲམ་པའི་ལེའུའི་ཁུངས་སུ་གཏོགས་ལ། ཡོངས་གཏད་དངོས་ནི་ལེའུ་སོ་གཉིས་པ་ཡིན་ནོ། །དེས་ན་བྱང་ཆུབ་ཆེན་པོའི་རྒྱུའི་བཤད་བྱ་ནི་སྔ་མ་ཡིན་གྱི་ཕྱི་མ་མ་ཡིན་པས་ཡོངས་གཏད་བསྡུས་པར་མི་འགྱུར་རོ། ། ༼༡བ༠༨༽ ༼༡༽ ཚིག་གསལ་ན་རེ། ༼༣རོ༽བྱམས་ཞུས་ཀྱི་བཤད་བྱ་ནི། ཐེག་པ་གཅིག་དང་རིགས་གཅིག་ཏུ་སྟོན་པ་ཡིན་ལ། དེས་ན་རབ་ཞི་རྣམ་ངེས་སོགས་མདོ་དང༌། རྩ་ཤེས་

― GTD002_Page_0141 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་བསྟན་བཅོས་སུ་གསལ་བས་འདིར༌༼༡༽བྱམས་ཞུས་མ་བསྡུས་གསུངས་པ་མི་འཐད་པར་ཐལ། བྱམས་ཞུས་ཀྱི་བསླབ་པ་རབ་དབྱེའི་ལེའུ་འཕྲིན་ལས་ཉེར་གཉིས་པ་ཕྱིན་ཅི་ལོག་སྤོང་བའི་འཕྲིན་ལས་ཀྱི་བཤད་བྱ་ཡིན་པའི་ཕྱིར་ཏེ། ༼༣༽སྡུད་པ་ལས། རྒྱལ་བ་འདས་དང་མ་བྱོན་ཕྱོགས་བཅུ་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་གསུངས་པའི་ཕྱིར། ༼༣ལོ༽གསེར་འཕྲེང་ལྟར་ན། སློབ་དཔོན་འདིས་ཤེར་ཕྱིན་དངོས། རྡོ་རྗེ་ལྟ་བུའི་ཏིང་ངེ་འཛིན་དུ་འདོད་ཀྱང༌། སངས་རྒྱས་ལ་ཤེར་ཕྱིན་གཙོ་བོར་བཞག་པ་འགལ་བ་མེད་དེ། གནོད་འཇོམས་ལས། སངས་རྒྱས་ཀྱི་སར་གཏོགས་པའི་ཤེས་རབ་རྣམ་པར་མི་རྟོག་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ཞེས་གསུངས་པས། སངས་རྒྱས་ཀྱི་མཉམ་གཞག་སྣང་༼༧༽མེད་ཡེ་ཤེས་དེ་ཉིད་རྡོར་ཏིང་ཡིན་པས་སྔ་མ་རྣམས་རྒྱུན་མཐའི་ཡེ་ཤེས་ལ་བཞེད་པར་འདོད་པ་ནོར་བར་གསུངས་པའི་ཕྱིར་རོ། །༼༡ན༠༩༽ ༼༣༽ ཕལ་བ་ལ་དེ་ཡིན་མིན་གཉིས་ཡོད་པའི་ཕྱིར་ཏེ། ༼༣ཤོ༽གསེར་འཕྲེང་ལས། མི་ཕལ་བ་མི་ཡིན་པ་ལྟར་ཤེར་ཕྱིན་ཕལ་བ་ཤེར་ཕྱིན་ཡིན་པར་གསུངས་པ་སྒྲ་སོར་བཞག་བྱེད་ན། དེ་སྒྲ་ཡིན་ཞེས་པ་ལམ་ལ་ལྟོས་ནས་ཕལ་བ་དང༌། གཞུང་ལ་ལྟོས་ནས་བཏགས་པ་བར་འགྱུར་ཚུལ་གཉིས་དགོས་སམ་དཔྱད། ༼༦༽དབུས་མཐའ་ལས། དེ་ཕྱིར་དམ་པའི་དོན་གྱིས་ནི། །ཕ་རོལ་ཕྱིན་པ་བཅུར་འདོད་དོ། །ཞེས་དང༌། ༼༣སོ༽ཡང་དེ་ཉིད་ལས། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་

― GTD002_Page_0142 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་སྟོབས་དང་ཡེ་ཤེས་དང༌། །འདི་དག་ཕ་རོལ་ཕྱིན་བཅུ་འོ། །ཞེས་དང༌། དམ་པ་བཅུ་གཉིས་བདག་ཉིད་དེ། །རྒྱ་ཆེ་བ་དང་ཡུན་རིང་དང༌། །ཆེད་དུ་བྱ་དང་མི་ཟད་དང༌། །རྒྱུན་མི་འཆད་དང་ཚེགས་མེད་དང༌། །དབང་འབྱོར་བ་དང་ཡོངས་བཟུང་དང༌། །རྩོམ་དང་ཐོབ་དང་རྒྱུ་མཐུན་དང༌། །འགྲུབ་པ་དམ་པར་འདོད་པ་ཡིན། །ཞེས་པའི་དང་པོ་གཉིས་སྤྱི། ལྷག་མ་བཅུ་བྱེ་བྲག་ལ་སྦྱར་ཏེ། ཐ་མ་བཞི་འགྲེལ་པ་འགྲེལ་བཤད་དག་ལས། མོས་སྤྱོད། ས་དང་པོ། གཉིས་པ་ནས་དགུ་པ་བའི་བར་དང༌། བཅུ་བ་ལ་སྦྱར་བ་ལྟར་ན་འགལ་ཡང་གཙོ་བོ་ལ་དགོངས་སམ་དཔྱད། ༼༡བ༠༩༽ ༼༢༽ཐེག་བསྡུས་ལས། འདི་དག་གི་མཚན་ཉིད་ཇི་ལྟར་བལྟ་ཞེ་ན། དམ་པ་དྲུག་གིས་བལྟ་བར་བྱ་སྟེ། ༼༣ཧོ༽གནས་དམ་པ་ནི་བྱང་ཆུབ་ཀྱི་སེམས་ཀྱི་གནས་ཡིན་པའི་ཕྱིར་རོ། །དངོས་པོ་དམ་པ་ནི་མཐའ་དག་ཀུན་ཏུ་སྤྱོད་པའི་ཕྱིར་རོ། །ཆེད་དུ་བྱ་བ་དམ་པ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་ཆེད་དུ་བྱ་བའི་ཕྱིར་རོ། །ཐབས་ལ་མཁས་པ་དམ་པ་ནི་རྣམ་པར་མི་རྟོག་པའི་ཡེ་ཤེས་ཀྱིས་ཡོངས་སུ་ཟིན་པའི་ཕྱིར་རོ། །ཡོངས་སུ་བསྔོ་བ་དམ་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བའི་ཕྱིར་རོ། །རྣམ་པར་དག་པ་དམ་པ་དེ་ཉོན་མོངས་པ་དང་ཤེས་བྱའི་སྒྲིབ་པས་སྒྲིབ་པ་མེད་པར་ཡང་དག་པར་འགྲུབ་པའི་ཕྱིར་རོ། ། ༼༢༽ཞེས་གསུངས་པའི་ཕྱིར་དང༌། ༼༣ཨོ༽འདིའི་དང་པོ་ལ་འགྱུར་ཁ་ཅིག་ཏུ། རྟེན་དམ་པ་ཞེས་གསུངས་ཀྱང་གང་ཟག་ཏུ་མི་ནོར་བས་འདི་ལེགས་སོ། །མཐའ་དག་ཀུན་ཏུ་སྤྱོད་པའི་དོན་ནི་ལོངས་སྤྱོད་ཉན་རང་ཡང་གཏོང་ལ། འདིས་བཏང་བྱའི་དངོས་

― GTD002_Page_0143 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་དགེ་རྩ་འབྲས་བུ་དང་བཅས་གཏོང་ལ། ཚུལ་ཁྲིམས་ཀྱང་སྒོ་གསུམ་ཀའི་སྡོམ་པ་ཚང་བར་ཡོད་པའོ། །༼༡ན༡༠༽ ༼༢༽ གཞན་ཡང༌། དགོངས་འགྲེལ་ལས། བཅོམ་ལྡན་འདས་ཅིའི་སླད་དུ་ཕ་རོལ་ཏུ་ཕྱིན་པ་དེ་ལ་ཕ་རོལ་ཏུ་ཕྱིན་པ་རྣམས་ཞེས་བགྱི་བ་ལགས། སྤྱན་རས་གཟིགས་དབང་ཕྱུག་ལྔའི་ཕྱིར་ཏེ། དངོས་པོ་དམ་པ་མཐའ་དག་གཏོང་བའི་ཕྱིར་བཏང་བྱའི་ཟས་ལ་ཆགས་པ་མེད་པ་ཉིད་དང༌། ཆེད་དུ་བྱ་བ་དམ་པ་གཞན་དོན་ཁོ་ན་ཡིན་པས་ལན་ལ་མི་ལྟ་བ་ཉིད་དང། ༼༤ཀ༽རྒྱུ་ལ་དམན་པའི་ཡིད་བྱེད་ཀྱིས་ཀྱང་མ་གོས་པས། འབྲས་བུ་ལ་སྐྱོན་ཀུན་རྣམ་པར་དག་པའི་སྐུ་འགྲུབ་པར་བྱེད་པ། ཁ་ན་མ་ཐོ་བ་མེད་པ་ཉིད་དང༌། འཁོར་གསུམ་དུ་རྣམ་པར་མི་རྟོག་པ་ཉིད་དང༌། རྫོགས་བྱང་དུ་ཡོངས་སུ་བསྔོ་བ་ཉིད་དོ། ། ༼༥༽དང་པོ་གྲུབ་སྟེ། དགོངས་འགྲེལ་སྤྱན་རས་གཟིགས་ཀྱི་ལེའུ་ལས། མོས་པ་སྤྱོད་པའི་ས་ལ་མོས་པ་ཆུང་ངུ་དང་འབྲིང་ལ་ཞུགས་པ་དེ་ནི་ཕ་རོལ་ཏུ་ཕྱིན་པ་ཞེས་བྱའོ། །ཞེས་གསུངས་པའི་ཕྱིར། ༼༡བ༡༠༽ ༼༦༽ འཁོར་བ་ཕྲ་རགས་ཀྱི་ཕ་རོལ་ཏུ་ཕྱིན་ཟིན་པའི་ཡེ་ཤེས་ཁྱད་པར་གསུམ་མམ་བཞི་ལྡན་དེ། ལས་སྒྲུབ་ཀྱི་ཕར་ཕྱིན་གྱི་མཚན་ཉིད། ༼༤ཁ༽དེ་ནི་འགྲེལ་ཆེན་ལས། དེ་ལྟར་ན་དང་པོ་ཐོས་པ་དང༌། ཞེས་པ་ནས། གཉིས་སུ་མེད་པའི་ཡེ་ཤེས་སྒྱུ་མ་ལྟ་བུ་ནི་དངོས་ཡིན་ལ་རྒྱུའི་ཁྱད་པར་ཐོས་བསམ་སྒོམ་པ་མཐར་ཕྱིན་པ་ལས་བྱུང་བ། རྟེན་གྱི་ཁྱད་པར་སངས་རྒྱས་ཁོ་ན་ལ་ཡོད་པ། ངོ་བོའི་ཁྱད་པར་གཉིས་མེད་ཀྱི་ཡེ་ཤེས་ཡིན་པ་སྟེ་གསུམ་མམ། དགག་བྱ་དང་བྲལ་བའི་ཁྱད་པར་བདེན་སྟོང་སྒྱུ་མ་ལྟ་བུ་བསྣན་པའི་བཞི་ལྡན་དུ་

― GTD002_Page_0144 ―

^{[མ་དཔེ་གཟིགས་ན་འདིར་གནོན།]}

[Full Size]

བསོད་གྲགས་པའི་སྤྱི་དོན་དུ་བཤད་ལ། ཁ་ཅིག་གཙང་བདེ་རྟག་བདག་དམ་པའི་ཕར་ཕྱིན་བཞི་ཟེར་བའི་ཁུངས་མ་མཐོང་ངོ༌། །༼༡ན༡༡༽ ༼༡༽ རྒྱས་འབྲིང་བསྡུས་གསུམ་མམ་དགུར་ཡོད། འདི་དག་བཤད་ཚུལ་མང་ཡང་འདི་ག་རང་ཁྱད་པར་འཕགས་པ་ཡིན་ནོ། ། ༼༤ག༽གཞུང་ཤེར་ཕྱིན་ལ་ཤེར་ཕྱིན་གྱི་གཞུང་དགོས་ན། འདིའི་དགོངས་འགྲེལ་ཀྱང་ཤེར་མདོར་ཐལ་བར་འགྱུར་ཏེ། འདི་ལ་དགོངས་ནས་མཁས་གྲུབ་རྟོགས་དཀའི་སྣང་བར། ཐེག་ཆེན་གྱི་བསྟན་བཅོས་ཡིན་ཀྱང་བསོད་ནམས་ཀྱི་ཚོགས་དང་འབྲེལ་བ་ཙམ་ཞིག་སྟོན་པ་རྣམས་ནི་གཞུང་ཤེར་ཕྱིན་མ་ཡིན་ལ། ཡེ་ཤེས་ཀྱི་ཚོགས་ཀྱི་དབང་དུ་བྱས་པའི་བསྟན་བཅོས་ཁོ་ན་གཞུང་ཤེར་ཕྱིན་ཡིན་ནོ། །གཞན་དུ་ན་ཐེག་ཆེན་གྱི་མདོ་ཡིན་ན་ཤེར་མདོ་ཡིན་པས་ཁྱབ་པར་ཐལ་ལོ། །དེ་བཞིན་དུ་ཡེ་ཤེས་ཀྱི་ཚོགས་སུ་གཏོགས་པའི་ལམ་དག་ཤེར་ཕྱིན་ཡིན་གྱི། ཞེས་གསུངས་ཏེ། དེའི་ཆ་ནས་འཇོག་ཀྱང་སྒྲ་སོར་བཞག་མི་རུང་བར་སྣང་ངོ༌། ། ༼༦༽ཉན་རང་ལ་དམ་པ་བདུན་པོ་གཅིག་ཀྱང་མེད་པས་ཕྱིན་དྲུག་གི་མིང་མི་ཐོབ་པར་དབུ་སེམས་ཀུན་མཐུན་པའི་ཕྱིར་ཏེ། ༼༤ང༽འདི་ལ་རིན་ཆེན་འཕྲེང་བ་ལས། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་སྙིང་རྗེ་འོ། །ཞེས་པའི་བདུན་པོ་སྦྱོར་བ་དག་སྣང་ཡང༌། བཤད་སྦྱར་རང་གིས་བཤད་པའི་འབྲེལ་ལ་བརྟགས་ན། ཐོག་མར་བདུན་ཞེས་པའི་ཡི་གེ་འདི་དག་མ་དག་དཔྱད་དགོས་པའི་ཚོད་དུ་སྣང་ངོ༌། །དེ་བས་དམ་པ་དྲུག་རང་ལ་བྱས་ན། རིན་ཆེན་འཕྲེང་བ་ལས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང༌། །སྤྱོད་པ་

― GTD002_Page_0145 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་བསྔོ་མ་བཤད་དེ། །བྱང་ཆུབ་སེམས་དཔར་ག་ལ་འགྱུར། །ཞེས་པ་དང་ཡང་འགྲིག་པར་སྣང་བས། གཟུར་གནས་རྣམས་ཀྱིས་དཔྱད་པར་བྱ་སྟེ། ཕྱིན་དྲུག་མེད་པས་ཕྱིན་དྲུག་གི་མིང་མི་འཐོབ་བྱས་ན་བཞད་གད་ཀྱི་གནས་ཀྱང་མ་ཡིན་ནམ། རྙེད་གྲགས་དཔལ་གྱིས་མཐོ་བའི་རི་བོ་བརྒྱར། །མ་ཆགས་གཞུང་ཀུན་ཡན་ལག་བརྒྱད་ལྡན་ཆབ། །དམའ་བ་བདག་བློའི་རྫིང་བུར་འཁྱིལ་བ་འདི། །ཨེ་མ་བསམ་གྱིན་འདུན་མ་ལེགས་སོ་སྙམ། །༈ ༼༡བ༡༡༽ ༼༥༽ མདོ་ལས། ཤཱ་རིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེར་ཕྱིན་ལ་བསླབ་པར་བྱའོ། ། ༼༤ཅ༽ཞེས་གསུངས་པའི་དོན་ནི། ཆོས་ཡང་དག་པར་སྡུད་པ་ལས། རྣམ་གྲངས་གང་གིས་ན་ཆོས་ཐམས་ཅད་བྱང་ཆུབ་ཡིན་ལ། ཆོས་ཐམས་ཅད་བྱང་ཆུབ་ཀྱང་མ་ཡིན། སྨྲས་པ། ཆོས་ཐམས་ཅད་མཉམ་པ་ཉིད་དང༌། ཆོས་ཐམས་ཅད་ཀྱི་དེ་བཞིན་ཉིད་ཁོང་དུ་ཆུད་པ་ནི་བྱང་ཆུབ་པའོ། །ཞེས་པ་ལྟར་ཡིན་ལ། རྣམ་པ་ཐམས་ཅད་སྨོས་པའི་ཚིག་གི་ནུས་པ་འདོན་ཚུལ་ཆོས་དུ་མ་ལ་བྱེད་མི་དགོས་ཀྱི། བུམ་པ་ལྟ་བུ་གཅིག་ལ་ཡང༌། དེའི་ཆོས་ཉིད་མངོན་སུམ་དུ་གཟིགས་བཞིན་དུ་ཆོས་ཅན་དང༌། དེ་མངོན་སུམ་དུ་གཟིགས་བཞིན་དུ་ཆོས་ཉིད་མངོན་སུམ་དུ་གཟིགས་པའི་དོན་ནོ། །ཕྱག་ན་རྡོ་རྗེ་དབང་བསྐུར་བའི་རྒྱུད་ལས་ཀྱང༌། གང་དངོས་པོ་ཐམས་ཅད་དང་བྲལ་བ་དེ་ནི་མི་འཁྲུགས་པའོ། །གང་མི་འཁྲུགས་པ་དེ་ནི་ཆོས་སོ། །ཆོས་

― GTD002_Page_0146 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ཡིན་པ་དེ་ནི་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། ། ༼༡ན༡༢༽ ༼༢༽ དམྱལ་བའི་ལུས་རྟེན་ལ་ཡང་ཡོད་པའི་ཕྱིར། ༼༤ཆ༽ཡི་དྭགས་ཀྱང༌། ཟ་མ་ཏོག་བཀོད་པའི་མདོ་ལས། སྤྱན་རས་གཟིགས་ཀྱིས་ཡི་དྭགས་དུ་མ་བདེན་པ་ལ་བཀོད་པར་གསུངས་པའི་དགོངས་པ་སེམས་བསྐྱེད་ལ་བཀོད་པ་ཡིན་པར་བཤད་དོ། ། ༼༧༽སྐལ་བ་ཡོད་ཀྱི་གཞན་དུ་མིན། །ཞེས་དང༌། ༼༤ཇ༽བྱང་སའི་སྡོམ་ནི། གཞི་དང་རྟགས་དང་ཕྱོགས་རྣམས་དང༌། །ལྷག་པའི་བསམ་དང་གནས་པ་དང༌། །བསྐྱེད་དང་ཡོངས་སུ་འཛིན་དང་ས། །སྤྱོད་དང་རབ་གནས་ཐམས་ཅད་ཡིན། །ཞེས་སོ། ། ༼༧༽བྱང་སའི་ཚུལ་ཁྲིམས་ལེའུ་ལས། ༼༡བ༡༢༽ ༼༡༽ རྣམ་བཤད་ལས། བྱང་ས་དང་ལམ་སྒྲོན་དུ་དེའི་རྟེན་སོ་ཐར་གྱི་སྡོམ་པ་དགོས་པར་བཤད་པ་ནི་རྟེན་ཁྱད་པར་ཅན་གྱི་དབང་དུ་བྱས་པ་ཡིན་གྱི། ཞེས་གསུངས་པའི་ཕྱིར། ༼༤ཉ༽འདིའི་རྟེན་ཁྱད་པར་ཅན་གྱི་དབང་དུ་བྱས་པ་ནི། ལམ་སྒྲོན་རང་འགྲེལ་ལས་ཀྱང༌། ད་ནི་ཚུལ་ཁྲིམས་ཀྱི་སྡོམ་པའི་རྟེན་ཁྱད་པར་ཅན་འདོད་ནས། ཞེས་གསུངས་སོ། །དེ་ལ་འོ་ན་ཚེ་འཕོས་ཚེ་སོ་ཐར་གྱི་སྡོམ་པ་གཏོང་བས། ཁྱད་པར་ཅན་མ་ཡིན་པར་འགྱུར་རོ་སྙམ་ན། རྣལ་འབྱོར་པ་ཆེན་པོའི་ཞལ་ནས་རྒན་པོ་ལང་བའི་རྟེན་དབྱུག་པས་བྱེད་ཅིང༌། ཕྱི་ནས་དབྱུག་པ་མི་འགྱེལ་བ་རྒན་པོས་མགོ་ནས་བཟུང་བས་བྱེད་པ་ལྟར་དང་པོར་སྐྱེ་བའི་རྟེན་སོ་ཐར་གྱིས་བྱེད་ལ། དེ་ནས་གཞན་གནོད་གཞིར་བཅས་ལས་ལོག་པ་དེ་བྱང་ཆུབ་སྙིང་པོའི་བར་མི་འཆོར་བར་བྱང་སྡོམ་གྱིས་བྱེད། ཞེས་གསུངས་ཏེ། སྤྱན་རས་གཟིགས་ལྟ་བུ་འགའ་ཞིག་མ་གཏོགས་པའི་བྱང་སེམས་རྣམས་ཀྱི་

― GTD002_Page_0147 ―

^{[མ་དཔེ་གཟིགས་ན་འདིར་གནོན།]}

[Full Size]

སོ་ཐར་གྱི་སྡོམ་པ་བྱང་ཆུབ་མཐའ་ཅན་མིན་ཀྱང༌། སྔ་མའི་ས་བོན་མ་ཉམས་ཤིང༌། གཞན་གནོད་གཞིར་བཅས་སྤོང་བའི་རིགས་མ་ལོག་པས་ཁྱད་པར་ཅན་དུ་འགྱུར་རོ། །རྟེན་ཁྱད་པར་ཅན་ལ་དེ་དགོས་པ་ནི། ཟླ་བ་སྒྲོན་མེའི་མདོ་ལས། དགེ་སློང་དངོས་པོ་མཆོག་ཏུ་བྱ་བ་ཡི། །བྱང་ཆུབ་དམ་པ་མཆོག་ཏུ་སེམས་བསྐྱེད་ཅིག །ཅེས་དང༌། སངས་རྒྱས་བསྟན་པ་རིན་ཆེན་སྒྲོན། །འབར་བའི་སྣོད་ནི་དཀའ་ཐུབ་ཅན། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་དང༌། གསུམ་ལ་དགེ་སློང་མཆོག་ཡིན་འབྲིང༌། །ཞེས་སོགས་གསུངས་པའི་ཕྱིར་རོ། ། ༼༤༽ཐུབ་དགོངས་ལས། གལ་ཏེ་སོ་སོར་ཐར་པའི་སྡོམ་པ་མེད་པར་བྱང་ཆུབ་སེམས་དཔའི་སྡོམ་པ་མི་སྐྱེ་ན་ནི། དེའི་ཚེ་བྱང་ཆུབ་སེམས་དཔའི་སྡེ་སྣོད་ལ་སོགས་པ་དང༌། དེའི་རྗེས་སུ་འབྲངས་པའི་གཞུང་དུ་འདི་དེའི་རྩ་བར་བཤད་པར་འགྱུར་རོ། །ཞེས་གསུངས་པའི་ཕྱིར་རོ། ། ༼༤ཏ༽བུ་ཊཱིཀ་ལུང་སྙེར་སེམས་ཙམ་ལུགས་ཀྱི་བྱང་སྡོམ་ལེན་ཚུལ་བྱམས་མགོན་ནས་བརྒྱུད་པ་ཇོ་བོས་ཕྱག་ལེན་མཛད་པ་འདིའི་རྟེན་ལ་སོ་ཐར་དགོས་པ་ལམ་སྒྲོན་གྱི་ལུང་གིས་སྒྲུབ་ཅིང༌། དབུ་མ་པའི་ལུགས་འཇམ་དབྱངས་ནས་བརྒྱུད་པ། ཞི་བ་ལྷའི་ཕྱག་སྲོལ་གྱི་དེ་ལ་མི་དགོས་པ། མདོ་ལས། ལྷའི་བུ་གང་དག་གིས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ཞེས་སོགས་གསུངས་པས་བསྒྲུབས་ཏེ། ཚུལ་གཉིས་མཛད་ཅིང༌། ས་བཟང་མ་ཏི་པཎ་ཆེན་གྱིས། མདོ་སྡེ་རྒྱན་གྱི་འགྲེལ་པར། དབུ་མ་པའི་ལུགས་ཀྱི་སེམས་བསྐྱེད། སེམས་ཙམ་པའི་

― GTD002_Page_0148 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་ཀྱི་སེམས་བསྐྱེད་ཅེས་ཁ་ཅིག་འཆད་ཀྱང༌། སྤྱོད་འཇུག་འགྲེལ་པར་སྡོམ་པ་ཉི་ཤུ་བ་དྲངས་པ་སོགས་ཕན་ཚུན་དུ་དྲངས་ཡོད་པས་མི་འཐད་གསུངས་པ་ལྟར། འགྲེལ་པ་མཁན་པོ་རྣམས་ཀྱིས་ཀྱང་ཁྱད་མེད་བྱས་པ་ལས་དེ་གཉིས་ལུགས་ཐ་དད་དུ་བཀྲལ་བ་མེད་དོ། །ཡང་སོ་ཐར་གྱི་སྡོམ་ལྡན་དང་བྱང་སེམས་ཀྱི་སྡོམ་ལྡན་འགལ་བར་འདོད་པའང་བྱུང་སྟེ། བྱང་ཆུབ་གཞུང་ལམ་ལས། སོ་ཐར་གྱི་སྡོམ་པ་དང་ཐེག་དམན་གྱི་བསམ་པ་ཁྱད་མ་ཕྱེ་བས་འཁྲུལ་བ་སྟེ། ཞེས་སོགས་གསུངས་པའི་ཕྱིར། ༼༦༽ཁྱབ་སྟེ། དེར་གྱུར་པའི་འགྲོ་བ་དེ་ལ་བདེ་འགྲོ་བས་ཁྱབ་པའི་ཕྱིར་ཏེ། རིན་ཆེན་འཕྲེང་བ་ལས། བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། །ཞེས་གསུངས་པའི་ཕྱིར། ༼༤ཐ༽བྱེ་སྨྲས་འདི་ལ་འཁྲུལ་ནས། ཟག་བཅས་ཐམས་ཅད་སྡུག་བསྔལ་བར་བཤད་པ་དང་འགལ་བའི་རྩོད་ཚུལ་ཞིག་ཀྱང་གྲུབ་མཐའ་ཆེན་མོར་གསུངས་ལ་བཟོད་ཐོབ་ཐེག་ཆེན་དུ་མི་འཇུག་པའི་རྒྱུ་མཚན་ཡང༌། བྱང་སེམས་ལས་ཉོན་གྱི་དབང་གིས་བདེ་འགྲོ་དང་ངན་འགྲོར་སྐྱེ་བ་སྣ་ཚོགས་ལེན་པའི་གནད་ཀྱིས་ཡིན་པར་བཤད་དོ། །བསོད་གྲགས་ཀྱི་མཐའ་དཔྱོད་དུ་ངན་འགྲོའི་རྟེན་ལ་སེམས་བསྐྱེད་པ་དེའི་ལུས་དགེ་མི་དགེ་གཉིས་ཀྱིས་འཕངས་འབྲས་སུ་ཐལ། ཞེས་བཀག་ཀྱང༌། དེ་དགེ་བའི་འཕངས་འབྲས་སུ་འགྱུར་དོན་མེད་དོ། །༼༡ན༡༣༽ ༼༣༽ དེ་ལ་ཁོ་ན་རེ། འཇུག་སྡོམ་ལ་ཉེས་སྤྱོད་སྡོམ་པ་དང༌། དགེ་བ་ཆོས་སྡུད་དང༌། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ཚང་མི་དགོས་པར་ཐལ། དེ་ལ་སོ་ཐར་གྱི་སྡོམ་པ་ཚང་མི་དགོས་པའི་ཕྱིར་ན་མ་ཁྱབ་༼༤ད༽སྟེ།

― GTD002_Page_0149 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་སྒྲོན་གྱི་ལུང་དེས་རབ་ལ་དགེ་སློང་གི་སྡོམ་པ་དགོས་པར་བཤད་པའི་ཤུགས་ལ། མ་མཐའ་སྲོག་གཅོད་སོགས་སྤོང་བའི་སྡོམ་པ་རྟེན་དུ་དགོས་པར་བཤད་པའི་ཕྱིར། སློབ་དཔོན་བྱང་ཆུབ་བཟང་པོའི་སྡོམ་པ་ཉི་ཤུ་བའི་འགྲེལ་པ་ལས། སོ་སོར་ཐར་པའི་སྡོམ་པ་གཞན་དང་ལྡན་པ་འདིས་བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་སྣོད་དུ་འགྱུར་བ་ལ་བསླབ་པའི་ཚིག་འདི་ཡང་སྦྱིན་པར་བྱ་བའི་དོན་ཏེ། འདི་ལ་སྲོག་གཅོད་པ་ལ་སོགས་པ་ལས་ལྡོག་པའི་ཆོ་ག་གཞན་ཉིད་ནི་མ་ཡིན་ཞིང༌། དེ་རྣམས་ཀྱང་ལྡོག་པ་མ་ཡིན་པ་ནི་བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་སྣོད་དུ་འགྱུར་བ་ཡོད་པ་མ་ཡིན་ནོ། །ཞེས་གསུངས་པ་གང་ཞིག །ལམ་སྒྲོན་གྱི་ལུང་འདིས་དེའི་དོན་བསྡུས་པར་རང་འགྲེལ་ལས་གསུངས་པའི་ཕྱིར་རོ། ། ༼༥༽མཁས་གྲུབ་ཐམས་ཅད་མཁྱེན་པའི་གསུང་ལས། དེ་ཡང་མ་མཐའ་མི་དགེ་བཅུ་སྤོང་གི་ཚུལ་ཁྲིམས་ཙམ་དང༌། བསླབ་པ་ལྔ་བསྲུང་བ་དགེ་བསྙེན་གྱི་སྡོམ་པ་ཙམ་དང༌། ཡ་མཐའ་བསྙེན་རྫོགས་ཀྱི་སོ་ཐར་གྱི་སྡོམ་པ་གང་རུང་རྒྱུད་ལ་མེད་པར་བྱང་ཆུབ་སེམས་དཔའི་སྡོམ་པ་མི་ཆགས་པས། ཞེས་གསུངས་པའི་ཕྱིར། ༼༤ན༽བྱང་སྡོམ་ལྡན་ཚད་ལ་སྲོག་གཅོད་སྤོང་བ་ངེས་ཅན་དུ་དགོས་ན། དེ་གནང་ཡུལ་དེ་ཡང་དེ་ལས་ལྡོག་དགོས་སམ་སྙམ་པའི་རྩོད་ཚུལ་དང་ལན་བྱང་ཆུབ་གཞུང་ལམ་ལས། བྱང་སེམས་ཀྱི་སྡོམ་ལྡན་ལ་འོག་ནས་འབྱུང་བ་ལྟར་སྲོག་གཅོད་སོགས་ལུས་ངག་གི་བདུན་གནང་བའི་སྐབས་སྲིད་ཀྱང༌། སྲོག་

― GTD002_Page_0150 ―

^{[མ་དཔེ་གཟིགས་ན་འདིར་གནོན།]}

[Full Size]

གཅོད་སྤོང་བ་སོགས་སོ་ཐར་དང་ཐུན་མོང་མ་ཡིན་པའི་སྐྱོན་མེད་དེ། དཔེར་ན། ཆང་མ་གཏོགས་པའི་བཅས་རྐྱང་ནད་པ་ལ་གནང་ཡང༌། སྤྱིར་དགེ་སློང་སྡོམ་ལྡན་གྱིས་དེ་ལས་བཟློག་དགོས་པ་དང༌། དགེ་སློང་གི་སྡོམ་པ་ལེན་པ་ན་ཡང༌། ཡན་ལག་ཐམས་ཅད་སྤོང་བར་འདོད་པས་བླང་དགོས་པ་བཞིན་ཏེ། ལུས་ངག་གི་བདུན་དམིགས་བསལ་གྱི་སྐབས་མ་གཏོགས་པར་སོ་ཐར་བཞིན་དུ་སྲོག་ལ་བབས་ཀྱང་མི་འཇུག་པར་བསྲུང་བར་གསུངས་པའི་ཕྱིར་རོ། །ཞེས་གསུངས་ཏེ། ད་ལྟའི་ཚིག་འཁྲི་མཁན་རྣམས་ཀྱིས་སྟོང་དུ་འབད་པ་ལས། འདི་ལ་རིགས་ལམ་ཕྲ་བ་ཞིག་དགོས་པར་སྣང་ངོ༌། །༼༡བ༡༣༽ ༼༡༽ བསྟན་བྱའི་གཙོ་བོ་ལ་བྱེད་པའི་ཕྱིར། ༼༤པ༽སེམས་བསྐྱེད་སྤྱི་ལྡོག་དེའི་དངོས་བསྟན་ཡིན་ཞིང་དེ་ལ་དབྱེ་བ་ཉེར་གཉིས་ཡོད་པ་སྟེ། དཔེར་ན་ལྷས་སྦྱིན་ཞེས་པའི་ཚིག་གིས་དེའི་ཕུང་པོ་མ་བརྗོད་ཀྱང༌། དེས་བརྗོད་པའི་ལྷས་སྦྱིན་ལ་ཕུང་པོ་ཡོད་པ་མི་འགལ་བ་བཞིན་ནོ། ། ༼༢༽སེམས་བསྐྱེད་ཉེར་གཉིས་དངོས་སུ་བསྟན་ནས། གྲོགས་འདུན་སོགས་དང་དཔེ་ཆོས་མཐུན་སྦྱོར་ཚུལ་དོན་གྱིས་བསྟན་པ་དེའི་དོན་ཡིན་པའི་ཕྱིར། ༼༤ཕ༽འདིར་འདུན་སོགས་ཉེར་གཉིས་སོ་སོར་ཕྱེ་བའི་མི་ཟད་པ་བརྒྱད་ཅུ་ནི། དག་ལྡན་ལས། སེམས་བསྐྱེད་བསམ་སྦྱོར་ལྷག་བསམ་དང༌། །ཕ་རོལ་ཕྱིན་དང་ཚད་མེད་དང༌། །མངོན་པར་ཤེས་དང་བསྡུ་དངོས་བཞི། །སོ་སོར་རིགས་སྟོན་ཚོགས་གཉིས་དང༌། །བྱང་ཆུབ་ཕྱོགས་མཐུན་ཞི་གནས་སོགས། །གཟུངས་བཞི་ཆོས་ཀྱི་མདོ་བཤད་དང༌། །བགྲོད་གཅིག་ཐབས་ལ་མཁས་པ་འོ། །ཞེས་གསུངས་ཏེ། འདིའི་གྲངས་སུ་ཟག་ཟད་མ་

― GTD002_Page_0151 ―

^{[མ་དཔེ་གཟིགས་ན་འདིར་གནོན།]}

[Full Size]

གཏོགས་པའི་མངོན་ཤེས་ལྔ་བགྲང་དགོས་པ་ནི། བློ་གྲོས་མི་ཟད་པའི་མདོ་ལས། གཞན་ཡང་བཙུན་པ་ཤཱ་ར་ཏོ་ཏིའི་བུ། བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པ་ལྔ་མི་ཟད་པ་སྟེ། འཕྲུལ་གྱི་མིག་དང༌། འཕྲུལ་གྱི་རྣ་བ་དང༌། ཕ་རོལ་གྱི་སེམས་ཤེས་པ་དང༌། སྔོན་གནས་དྲན་པ་དང༌། རྫུ་འཕྲུལ་གྱི་བྱ་བ་ཤེས་པའོ། །ཞེས་དང༌། རྣམ་བཤད་ལས། མངོན་ཤེས་ལྔས་ཇི་ལྟར་སྨོན་པའི་འབྲས་བུ་འགྲུབ་པའི་ཕྱིར། ཞེས་གསུངས་སོ། །འོན་ཀྱང་འདིའི་རྩ་བའི་མདོར་ཟག་པ་ཟད་པའི་མངོན་པར་ཤེས་པ་སྒྲུབ་པར་འདོད་ཅིང༌། ཡང་དག་པའི་མཐའ་མངོན་སུམ་དུ་བྱེད་མི་འདོད་པས་ཞེས་སོགས་གསུངས་པའི་དགོངས་པ་བཙལ་བར་བྱའོ། ། ༼༥༽སྤྲོ་བ་ཆེ་བ་སོགས་ཀྱིས་ཡོན་ཏན་གསུམ་མམ་གཉིས་ལ་དམིགས་ནས་དོན་གཉེར་གྱི་སེམས་པར་བྱེད་པ་སེམས་བསྐྱེད་ཀྱི་བསྐྱེད་པའི་དོན་དུ་བཤད་པའི་ཕྱིར། ༼༤བ༽དུས་རིང་ཞིང་རྒྱ་ཆེ་བའི་དཀའ་སྤྱད་ལ་སྤྲོ་བའི་གོ་ཆ་དང༌། བསམ་པ་དེ་དང་མཚུངས་པའི་རྩོམ་པ་གཉིས་གཅིག་ཏུ་སྡོམ་པས་སྐྱེས་བུ་བྱེད་པའི་ཡོན་ཏན་དང༌། རང་གཞན་གྱི་དོན་སྒྲུབ་པས་དོན་བྱེད་པའི་ཡོན་ཏན་དང༌། བྱང་ཆེན་འགྲུབ་པའི་འབྲས་བུ་ཡོངས་སུ་འཛིན་པའི་ཡོན་ཏན་གསུམ་མམ། དོན་གཉིས་ཕུན་ཚོགས་ལ་དམིགས་པའི་ཕྱིར། ༼༡ན༡༤༽ ༼༣༽ གསེར་འཕྲེང་ལས། འཕགས་པ་དང་སློབ་དཔོན་གྱི་ལུགས་སུན་ཕྱུང་ནས་དོན་གཉེར་གྱི་འདུན་པ་སེམས་སུ་འདོད་པས་སེམས་སེམས་བྱུང་རྫས་གཅིག་ཏུ་འདོད་དོ། ། ༼༤མ༽འདི་ནི་སེམས་ཀྱི་རྫས་དང་སེམས་

― GTD002_Page_0152 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་གི་རྫས་གཉིས་ཀར་འདོད་པ་ལ་སྐྱོན་བརྗོད་པ་ཡིན་གྱི། སེམས་སེམས་བྱུང་རྫས་གཅིག་པ་རྣམ་བཤད་ལས། དེས་སེམས་སེམས་བྱུང་རྫས་ཐ་དད་དུ་བསྟན་ཏོ་ཞེས་ཟེར་བ་ནི་འགལ་ན་རྫས་ཐ་དད་ཀྱིས་ཁྱབ་པ་ཚངས་པས་ཀྱང་སྒྲུབ་མི་ནུས་སོ། །ཞེས་གསུངས་ཤིང༌། མཛོད་གནས་དང་པོའི་མཐའ་དཔྱོད་དུ་རྫས་གཅིག་ཀྱང་རྫས་མཚུངས་མི་ཉམས་ཚུལ་གསལ་བར་གསུངས་ལ། རྟོག་གེ་འབར་བའི་སེམས་ཙམ་པ་འགོག་པའི་སྐབས་དཔྱད་པ་སྣ་ཚོགས་ཤིག་མཛད་སྣང་ངོ༌། ། ༼༧༽སྨོན་ལམ་དང་ལྡན་པའི་སེམས་བསྐྱེད་པའི་འགྱུར་བ་ཞེས་བྱ་བ་འཐད་པར་འགྱུར། ༼༤ཙ༽ཞེས་སེམས་བསྐྱེད་ལ་འདུན་པའམ་འདོད་པར་བཏགས་པ་ནི་གཞན་དོན་འདོད་པ་སེམས་བསྐྱེད་ཀྱི་རྒྱུར་བསྟན་པས་མར་ཤེས་སོགས་ལམ་གྱི་གོ་རིམ་ལ་མཁས་པ་དང༌། བྱང་ཆུབ་འདོད་པ་གྲོགས་སུ་བསྟན་པས། ལམ་གྱི་གནད་དམ་རྩ་བའམ་སྒོ་ཤེས་ཆེད་ཡིན་པར་ལམ་རིམ་གྱི་མཆན་དང་རྣམ་བཤད་གསུངས། ༼༡བ༡༤༽ ༼༡༽ ཉི་སྣང་ལས། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ། རྣམ་པར་རིག་པའོ། །རྣམ་པར་ཤེས་པ་གང་ཡིན་ཞེ་ན། ཡིད་ཀྱི་རྣམ་པར་ཤེས་པ་སྟེ། དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་གསུངས་པའི་ཕྱིར། ༼༤ཚ༽འདིའི་བྱང་ཆུབ་མདོར་བསྟན་དུ་ཆོས་ཀུན་མངོན་པར་རྫོགས་པར་འཚང་རྒྱ་བར་འདོད་པ་དང༌། རྒྱས་བཤད་དུ་ཕྱིན་དྲུག་རེ་རེ་ནས་རྫོགས་པར་འདོད་པ་གསུངས་ལ། གཞན་དོན་མདོར་བསྟན་དུ་སེམས་ཅན་ཐམས་ཅད་ལྷག་མེད་དུ་འདའ་བར་འདོད་

― GTD002_Page_0153 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དང༌། རྒྱས་བཤད་དུ་སེར་སྣ་ཅན་སྦྱིན་པ་ལ་འགོད་པ་དང་ཚུལ་ཁྲིམས་འཆལ་བ་ཚུལ་ཁྲིམས་ལ་འགོད་པ་སོགས་གསུངས་པས་སེམས་བསྐྱེད་དུ་འགྱུར་བ་ལ་མཐར་ཐུག་གི་དམིགས་པ་རྫོགས་བྱང་ལ་མ་དམིགས་ན་བློའི་འཕེན་པ་དམན་པས་སེམས་བསྐྱེད་དུ་མི་འགྲོ་ཡང༌། གནས་སྐབས་ཀྱི་དམིགས་པར་ཅི་རིགས་ཡོང་བར་རྗེ་བཙུན་བླ་མ་རྣམས་གསུངས་སོ། །༼༡ན༡༥༽ ༼༢༽ བདག་བསྟོད་ཙམ་གྱི་རྩ་ལྟུང་བྱུང་བའི་བྱང་སེམས་ཆོས་ཅན། དེར་ཐལ། དེའི་ཕྱིར། ༼༤ཛ༽འདིར་ཙམ་སྒྲ་སྨོས་པ་ནི་སེམས་འདོར་གྱི་རྩ་ལྟུང་ལྟ་བུས་འཇུག་སྡོམ་དང་འཇུག་སེམས་གཉིས་ཆར་གཏོང་བ་ལ་དགོངས་སོ། །འདི་ལ་ཁ་ཅིག་རྩ་ལྟུང་བྱུང་བ་ལ། བྱང་སྡོམ་མི་ལྡན་དགོས་ན། བྱང་ཆུབ་གཞུང་ལམ་ལས། བྱང་ཆུབ་ཀྱི་སེམས་འདོར་བ་ནི། སྨོན་སེམས་འདོར་བའོ། །དེ་ལ་རྩ་ལྟུང་དུ་ཐབས་ལ་མཁས་པའི་མདོ་ལས་གསུངས་པས། རྩ་ལྟུང་འདི་སྐྱེད་པའི་རྟེན་ལ་བྱང་སེམས་ཀྱི་སྡོམ་ལྡན་དགོས་པས། སེམས་དོར་བའི་སྐད་ཅིག་དང་པོ་ལ་སྡོམ་པ་ཡོད་ལ་གཉིས་པ་ནས་སྡོམ་པ་གཏོང་བ་ཡིན་གྱི་དོར་བ་ཙམ་ནས་བྱང་སེམས་མ་ཡིན་པར་མི་འགྱུར་རོ། །ཞེས་གསུངས་པ་ཇི་ལྟར་ཡིན་ཞེ་ན། ཕྱོགས་གླང་གི་བྱུང་བ་སོགས་ལ་བརྟགས་ན། བྱང་ཆུབ་ཀྱི་སེམས་འདོར་འདོད་ཙམ་སྐྱེས་ཀྱང༌། དམན་པའི་ཡིད་བྱེད་མ་སྐྱེས་པ་ཞིག་ཡོད་འདྲ་བས་དེ་ལ་ཕམ་པའི་ཆར་གཏོགས་ཀྱི་ལྟུང་བ་ལྕི་བ་ཞིག་བྱུང་བ་ལ་དགོངས་སམ་དཔྱད། ༼༤༽བདག་བསྟོད་ཀྱི་རྩ་ལྟུང་ཙམ་བྱུང་བའི་རྒྱུད་ཀྱི་དེ་ཡིན་པའི་

― GTD002_Page_0154 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། ༼༤ཉ༽འདིར་ཀུན་དཀྲིས་ཆེན་པོ་སྨོས་པ་ནི། ལོག་ལྟ་སྐྱེས་པ་དང༌། བྱང་ཆུབ་ཀྱི་སེམས་དོར་བ་གཉིས་ལ་དེ་སྐྱེས་པ་ཙམ་གྱིས་ཆོག་པས་ཀུན་དཀྲིས་ཆེན་པོ་ཚང་མི་དགོས་ལ། འདིར་དེ་མ་ཚང་ན་ཉེས་བྱས་སུ་འགྱུར་བའི་ཕྱིར་རོ། །ཀུན་དཀྲིས་ཆེན་པོ་ནི། བྱང་ས་ལས། རྒྱུན་མ་ཆད་པར་ཀུན་ཏུ་སྤྱོད་པ་དང༌། ངོ་ཚ་ཤེས་པ་དང་ཁྲེལ་ཡོད་པ་ཆུང་ངུ་ཙམ་ཡང་མི་སྐྱེད་པ་དང༌། དེས་མགུ་བར་བྱེད་ཅིང་དེ་ལ་དགའ་བ་དང༌། དེ་ཉིད་ལ་ཡོན་ཏན་དུ་ལྟ་བ་ཅན་དུ་འགྱུར་བ་འདི་ནི། ཀུན་ནས་དཀྲིས་པ་ཆེན་པོ་ཡིན་པར་རིག་པར་བྱའོ། །ཞེས་ཡན་ལག་བཞི་གསུངས་ལ། མགུ་བ་དང་དགའ་བའི་ཁྱད་པར། ཡོན་ཏན་འོད་ཀྱིས། མགུ་བ་ནི་བསམ་མ་ཐག་པ་ནས་དགའ་བ་བསྐྱེད་པ་དང༌། དགའ་བ་སྦྱོར་བའི་སྒོ་ནས་གནས་པ་ལ་གསུངས་ཤིང༌། ས་མུ་ཏྲས་བཟློག་སྟེ་བཤད་དོ། །ཡན་ལག་མ་ཚང་བས་ཆུང་འབྲིང་དུ་འགྱུར་ཚུལ་ཡང༌། བྱང་སའི་ཚུལ་ལེའུའི་རྣམ་བཤད་ལས། དེས་ན་ཀུན་དཀྲིས་ཆེན་པོའི་ཡན་ལག་མ་ཚང་བའི་ཉེས་དམིགས་སུ་ལྟ་བ་འདུག་ན་ལྷག་མ་ཐམས་ཅད་ཚང་ཡང་ཆུང་ངུར་ཤེས་པར་བྱ་ལ། ཉེས་དམིགས་སུ་ལྟ་བ་མི་འདུག་ན་འབྲིང་དུ་ཤེས་པར་བྱའོ། །ཞེས་གསུངས་སོ། ། ༼༥༽ལམ་རིམ་ལས། སྡོམ་པ་བཟུང་བ་ནས་སེམས་དེ་འཇུག་པའི་སེམས་སུ་ཤེས་པར་བྱ་སྟེ། ཞེས་གསུངས་པའི་ཕྱིར། ༼༤ཛ༽ལམ་རིམ་ལས། འདི་ལ་མི་མཐུན་པ་མང་དུ་སྣང་ཡང་སེམས་ཅན་གྱི་དོན་དུ་སངས་རྒྱས་ཐོབ་པར་གྱུར་ཅིག་སྙམ་པའམ། སངས་རྒྱས་སུ་བྱའོ་སྙམ་དུ་སྨོན་པས་སྦྱིན་པ་ལ་སོགས་པའི་སྤྱོད་པ་ལ་སློབ་ཀྱང་རུང༌། མི་སློབ་ཀྱང་རུང༌། ཇི་

― GTD002_Page_0155 ―

^{[མ་དཔེ་གཟིགས་ན་འདིར་གནོན།]}

[Full Size]

སྲིད་སྡོམ་པ་མ་བཟུང་བ་དེ་སྲིད་དུ་སྨོན་པའི་སེམས་ཡིན་ལ། སྡོམ་པ་བཟུང་བ་ནས་འཇུག་པའི་སེམས་སུ་ཤེས་པར་བྱའོ། །ཞེས་པ་འདིའི་མཆན་བུར་འདིར་སྨོན་འཇུག་གི་ཁྱད་པར་སྡོམ་པ་བཟུང་མ་བཟུང་ལ་མཛད་དོ། །ཞེས་བཤད་ཀྱང༌། འཇུག་སྡོམ་གྱི་སྤང་བྱ་རྣམས་བསྲུང་བའི་སེམས་པའི་རིགས་དང་མི་ལྡན་ན་སྤྱོད་པ་ལ་སློབ་ཀྱང་སྨོན་སེམས་སུ་འགྱུར་ཞེས་པའི་ཚིག་གི་ནུས་པས་དེ་འདྲའི་བསྲུང་སེམས་ཐོབ་པའི་སྟེང་ནས་སྤྱོད་པ་ལ་སློབ་པའི་སེམས་བསྐྱེད་ལ་འཇུག་སེམས་དགོས་པར་བསྟན་པ་ཡིན་གྱི། སྡོམ་པ་བཟུང་ཕྱིན་ཆད་ཀྱི་སེམས་བསྐྱེད་ཐམས་ཅད་དེར་སྟོན་པ་མིན་པ་ལ་དགོངས་ནས་འདིར་ཡང་ལམ་རིམ་གྱི་ལུང་འདིར་དྲངས་པར་སྣང་བས། ལམ་རིམ་དང་རྣམ་བཤད་མི་མཐུན་ཟེར་བ་བརྟག་པར་བྱའོ། ། ༼༧༽རྩ་བར། རྟག་ཏུ་ཚངས་པར་སྤྱོད་ཉིད་དང༌། །ཞེས་སོ། ། ༼༤ཝ༽ཐེག་དམན་ལ་ཡང་མཐོང་ལམ་དུ་དཀོན་མཆོག་གསུམ་ལ་ཐེ་ཚོམ་སྤངས་པའི་བྱེད་པས་རྗེས་ཐོབ་ཏུ་ཤེས་ནས་དད་པ་ཐོབ་པའི་དཀོན་མཆོག་མངོན་རྟོགས་དང༌། དེའི་མཐུས་སངས་རྒྱས་དཔང་པོར་བྱས་ཏེ་བླངས་པའི་ཚུལ་ཁྲིམས་ཀྱི་ངོ་བོ་ལས་འབྲས་ཀྱི་བླང་དོར་ཚུལ་བཞིན་བྱས་པས་དྷ་ར་སྟེ། ངན་འགྲོ་ལས་འཛིན་པའི་དོན་གྱིས་ཆོས་ལ་གཅིག་ཏུ་གཞོལ་བའི་དབང་གིས་འཆད་ཁྲིམས་ཀུན་ཏུ་མི་འབྱུང་བའི་མངོན་རྟོགས་ཏེ། མཛོད་ལས། བདེན་གསུམ་མཐོང་ན་ཚུལ་ཁྲིམས་དང༌། །ཆོས་ལ་ཤེས་ནས་དད་པ་ཐོབ། །ལམ་མངོན་རྟོགས་ན་སངས་རྒྱས་དང༌། །དེ་ཡིས་དགེ་འདུན་དག་ལ་ཡང༌། །

― GTD002_Page_0156 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པ་འདིས་དམིགས་ཕྱེ་ནས་གནས་དྲུག་པ་རིམ་གྱིས་མངོན་རྟོགས་བདུན་ལ་སྦྱོར་ཚུལ་གཅིག་ཀྱང་ཁོ་བོས་རྙེད་མོད་ཀྱང༌། ལེགས་བཤད་ལ་ལེགས་བཤད་དུ་ཤེས་མཁན་མི་སྣང་ངོ༌། །༼༡ན༡༦༽ ༼༡༽ འཕགས་པ་བྱམས་པའི་རྣམ་པར་ཐར་པ་ལས། རིགས་ཀྱི་བུ་འདི་ལྟ་སྟེ། དཔེར་ན་རྡོ་རྗེ་རིན་པོ་ཆེ་ནི། ནས་༼༤ཞ༽ཇི་ལྟར་ཆགས་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་གནོན་ཏོ། །རྡོ་རྗེ་རིན་པོ་ཆེའི་མིང་ཡང་མི་འདོར་ཞིང༌། དབུལ་བ་ཐམས་ཅད་ཀྱང་བཟློག་གོ །༼༥༽སེམས་བསྐྱེད་དང་སྤྱོད་པ་ཉམས་ལེན་གྱི་སྤྱོད་པར་སྟོང་ཉིད་རྟོགས་པ་གཅིག་པུ་དེ་བཞག་པའི་ཕྱིར། ༼༤ཟ༽འདི་དག་འཁྲུལ་གཞི་ནི། མདོ་ལས། སྦྱིན་སོགས་དྲུག་ལ་མངོན་པར་ཞེན་པ་བདུད་ཀྱི་ལས་སོ། །ཞེས་དང༌། ཕུང་པོ་གསུམ་པ་ལས། དམིགས་པར་ལྷུང་བས་སྦྱིན་པ་སྦྱིན་པ་དང༌། ཚུལ་ཁྲིམས་མཆོག་འཛིན་གྱིས་ཚུལ་ཁྲིམས་བསྲུང་བ་ལ་སོགས་པ་དེ་དག་སོ་སོར་བཤགས་པར་བྱའོ། །ཞེས་དང༌། ཚངས་པས་ཞུས་པ་ལས། སྤྱོད་པ་ཇི་སྙེད་པ་འདི་ཐམས་ཅད་རྟོག་པའོ། །ཡོངས་སུ་མི་རྟོག་པ་ནི་བྱང་ཆུབ་བོ། །ཞེས་སོགས་ཡིན་ལ་དེ་དགག་ཚུལ་སོགས་ཞིབ་པར་ནི་སྒོམ་རིམ་དང་པོ་དང་ཐ་མ་དང༌། ལམ་རིམ་ཆུང་ངུ་སོགས་ལས་ཤེས་པར་བྱའོ། ། ༼༡བ༡༦༽ ༼༢༽ གཡོ་བྱས་ནས་སེམས་བསྐྱེད་པ་དང༌། རས་ཀྱི་ཁ་ཚར་ཕུལ་ནས་སེམས་ཙམ་བསྐྱེད་པ་སོགས་དང༌། གསལ་རྒྱལ་གྱིས་དགེ་བ་ཀུན་ལ་ཡི་རང་བྱས་ནས་སངས་རྒྱས་བྱང་སེམས་ལ་ཕུལ་ནས་སེམས་བསྐྱེད་པ་ཐམས་ཅད་བསླབ་བཏུས་དང། སྒོམ་

― GTD002_Page_0157 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་གཉིས་ཀར་སྨོན་སེམས་སུ་བཤད་པའི་ཕྱིར་ཏེ། ༼༤འ༽འདི་གསུམ་ཡང་དཔའ་བར་འགྲོ་བའི་ཏིང་ངེ་འཛིན་གྱི་མདོ་དང༌། བསྐལ་བཟང་དང༌། གསལ་རྒྱལ་ལ་གདམས་པའི་མདོ་ལས་བྱུང་ལ། དང་པོ་འདི་བསླབ་བཏུས་ལས་གཡོ་བྱས་ཏེ་བྱང་ཆུབ་ཏུ་སེམས་བསྐྱེད་པའང་སངས་རྒྱས་ཀྱི་རྒྱུར་གསུངས་ན། ཞེས་སངས་རྒྱས་ཀྱི་རྒྱུ་ཙམ་དུ་བཤད་ཀྱང༌། སྨོན་སེམས་དངོས་སུ་བཤད་པ་མེད་དོ། །༼༡ན༡༧༽ ༼༡༽ དམ་བཅའ་བ་འཇུག་སེམས་དང་འབྲས་བུ་ལ་དམ་བཅའ་བ་སྨོན་སེམས་སུ་སྦྱར་བ་སོགས་ཡོད་དེ། དེ་དག་མི་འཐད་པའི་ཕྱིར། ༼༤ཡ༽ཕྱི་མ་འདི་དཔའ་བོ་གཙུག་ལག་འཕྲེང་བའི་སྤྱོད་འཇུག་འགྲེལ་པ་ཐེག་ཆེན་རྒྱ་མཚོའི་སྙིང་པོར། ཐེག་བསྡུས་ལས། དེ་ལ་སྨོན་པའི་བྱང་ཆུབ་ཀྱི་སེམས་ནི་འབྲས་བུ་ལ་དམ་བཅའ་བ་ཡིན་ལ། འཇུག་པ་བྱང་ཆུབ་ཀྱི་སེམས་ནི་རྒྱུ་ལ་དམ་བཅའ་བ་ཡིན་ནོ་ཞེས་ཤེས་བྱེད་དུ་ལེགས་པར་དྲངས་མོད་ཀྱང༌། འཕགས་པ་ཐོགས་མེད་ཀྱིས་མཛད་པ་ལོ་པཎ་རྣམས་ཀྱིས་བསྒྱུར་བའི་ཐེག་བསྡུས་ན་དེ་འདྲ་མི་སྣང་ངོ༌། །དེས་ན་གསེར་འཕྲེང་ལས། དང་པོར་རྒྱུའི་སེམས་བསྐྱེད་པ་སྨོན་པ་དང༌། སྨོན་པ་ལྟར་བྱ་བ་བསྒྲུབ་པའི་ཐབས་ཕུན་ཚོགས་རྫོགས་པར་བྱའོ། །ཞེས་འབྲས་བུའི་སེམས་བསྐྱེད་པ་ནི་འཇུག་སེམས་བསྐྱེད་ཚུལ་ལོ། །ཞེས་པ་ལྟར་ཁོ་རང་གཉིས་ཕན་ཚུན་རྒྱུ་འབྲས་སུ་སྦྱར་ཏེ་རྒྱུའི་སེམས་བསྐྱེད་དང་འབྲས་བུའི་སེམས་བསྐྱེད་ཅེས་པ་ལེགས་ཀྱི། རྒྱུ་ལ་དང༌། འབྲས་བུ་ལ་ཞེས་པ་ཐ་སྙད་འདོགས་ལུགས་ལ་ཡང་སྐྱོན་ཆགས་པའི་དབང་གིས་འདིར་ཡང་

― GTD002_Page_0158 ―

^{[མ་དཔེ་གཟིགས་ན་འདིར་གནོན།]}

[Full Size]

སྨོན་འཇུག་ལ་སྦྱོར་ཚུལ་མ་གསུངས་པར་དེ་གཉིས་སྤྱིར་བཀག་གོ །བསླབ་བཏུས་ཟིན་བྲིས་ན་དཔྱད་རྒྱུ་ཞིག་ཡོད། ༼༡བ༡༧༽ ༼༣༽ ཡང་ཁ་ཅིག་ན་རེ། འཇུག་སྡོམ་དང་འཇུག་སེམས་ཅིག་ཅར་ཁོ་ནར་སྐྱེ་བ་༼༤ར༽འཇུག་སྡོམ་དང་འཇུག་སེམས་གཉིས་འགལ་ཡང་ཞེས་སོགས་གོང་དུ་དྲངས་པའི། ༼༣༽རྣམ་བཤད་ཀྱི་ལུང་དོན་ཟེར། བསོད་གྲགས་སོགས་ལ་ལས་དེ་རྣམ་བཤད་ཀྱི་དོན་དུ་བྱས་ནས་ལམ་རིམ་དང་མི་མཐུན་ཟེར། གཞན་དག་གིས་རྒྱུ་མཚན་མེད་པར་འཇུག་སེམས་ཚོགས་ལམ་འབྲིང་ཁོ་ནར་ཡོད་ཟེར། ༼༤ལ༽འདི་ཡང་བསོད་གྲགས་ཀྱི་སྤྱི་དོན་ལས། མཁས་པ་ཁ་ཅིག་ལམ་མ་ཞུགས་ན་འཇུག་སྡོམ་མམ་བྱང་སྡོམ་ཡོད་ཅེས་མགྲིན་པ་གསེང་སྟེ་སྨྲ་བ་ནི་རི་བོང་གི་ཅལ་ལྟ་བུ་ཡིན་ཏེ། སྡོམ་པ་འབོག་པ་ན། བྱང་སར་རིགས་ཀྱི་བུའམ་ཆོས་ཀྱི་སྤུན་མིང་འདི་ཞེས་བགྱི་བ་ཁྱོད་བྱང་ཆུབ་སེམས་དཔའ་ཡིན་ནམ། བྱང་ཆུབ་ཏུ་སྨོན་ལམ་བཏབ་བམ། ཞེས་དྲི་བར་གསུངས་པས་བྱང་སེམས་མ་ཡིན་པ་ལ་དེ་འབོགས་སུ་མི་རུང་བའི་ཕྱིར་དང༌། འཇུག་སེམས་དངོས་སུ་སྐྱེ་བའི་རྟེན་དང༌། འཇུག་སྡོམ་དངོས་སུ་སྐྱེ་བའི་རྟེན་དོན་གཅིག་པར་སྨྲས་པ་དང་ཁས་བླངས་ནང་འགལ་བའི་ཕྱིར། ཞེས་གསུངས་པ་དཔྱད་པར་བྱ་སྟེ། འཇུག་སྡོམ་དཔྱིས་ཕྱིན་པར་ལེན་མཁན་ཐམས་ཅད་བྱང་སེམས་ཡིན་པའི་ཤེས་བྱེད་དུ་དེ་ལྟར་དྲི་དགོས་པ་བཀོད་པ་ཡིན་ན་རྟགས་མ་གྲུབ་སྟེ། འདྲི་དགོས་པའི་ངེས་པ་ཡང་མེད་པར་མ་ཟད། བྱང་སྡོམ་ལེན་པ་ལ་འདྲི་བ་པོ་སློབ་དཔོན་རང་ཡོད་དགོས་པའི་ངེས་པ་མ་གྲུབ་པའི་ཕྱིར། ལམ་སྒྲོན་ལས། དེ་ལ་འབད་པས་དེ་འདྲ་བའི། །གལ་

― GTD002_Page_0159 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ་བླ་མ་མ་རྙེད་ན། །དེ་ལས་གཞན་སྡོམ་ནོད་པ་ཡི། །ཆོ་ག་ཡང་དག་བཤད་པར་བྱ། །ཞེས་སོགས་ཀྱིས་བསླབ་བཏུས་ལ་བརྟེན་ནས། བླ་མ་མེད་པའི་ཆོ་ག་གསུངས་པའི་ཕྱིར་རོ། །བླ་མ་ཡོད་ཅིང་དེས་དྲིས་པ་གཞིར་བཞག་གོ་ཟེར་ན་ཡང་མི་འཐད་པར་ཐལ། བྱང་ཆུབ་གཞུང་ལམ་ལས། དྲི་བ་གཉིས་ཀྱི་དོན་ནི། རིགས་ཀྱི་ནུས་པ་ལེགས་པར་སད་པ་དང༌། སྨོན་སེམས་བརྟན་པ་ལ་བྱའོ། །ཞེས་སྔ་མར་ཞིབ་ཆ་བྱས་ནས་བྱང་སེམས་དངོས་ལ་མ་བྱས་པར་རིགས་སད་པ་ཙམ་ལ་བྱས་པས་ཕྱི་མ་ཡང་སྨོན་པ་བརྟན་པ་ཙམ་ལ་བྱ་བ་དགོངས་པར་མངོན་པའི་ཕྱིར། ༼༡བ༡༨༽ ༼༣༽ གསེར་འཕྲེང་ལས། ཚོགས་ལམ་ཆུང་ངུར་སྨོན་སེམས་དང་འབྲིང་ནས་འཇུག་སེམས་བཞག་སྟེ། ཞེས་གསུངས་པའི་ཕྱིར་ན་མ་ཁྱབ་སྟེ། ༼༤ཤ༽སེམས་བསྐྱེད་དང་པོ་གཉིས་ཀྱི་མདོ་གཉིས་ཀྱི་སྤྱིའི་མདོར་བསྟན་རྒྱས་བཤད་ལ་ཡང་སྦྱོར་དགོས་ལ་སྤྱོད་པ་ཉམས་ལེན་གྱིས་ཟིན་པ་དངོས་སུ་བསྟན་མ་བསྟན་གྱི་ཁྱད་པར་ཀྱང་ཡོད་པས། ༼༣༽སེམས་བསྐྱེད་ཉེར་གཉིས་ཀྱི་མདོའི་དངོས་བསྟན་དང་སྦྱར་ཙམ་རིགས་པ་ལྟ་བུ་ཡིན་པའི་ཕྱིར་ཏེ། ༼༡ན༡༩༽ ༼༡༽ ཛེ་ཏཱ་རིས། སྐྱབས་གསུམ་སྔོན་དུ་འགྲོ་བ་ཅན། །ཞེས་གསུངས་པའི་དོན་མ་གྲུབ་པར་ཐལ། ཐེག་ཆེན་སེམས་བསྐྱེད་ཀྱི་སེམས་རྟེན་ལ། རྒྱལ་བ་ལ་དམིགས་པའི་དད་པ་ཡང་མེད། སྐྱབས་འགྲོ་ཁྱད་པར་ཅན་ཡང་མེད་པའི་ཕྱིར། དེར་ཐལ། དེའི་སེམས་རྟེན་དུ་གྱུར་པའི་སེམས་བྱུང་མེད་པའི་ཕྱིར་ཏེ། དམ་བཅའ་འཐད་པའི་ཕྱིར། ༼༤ས༽གཞན་ཡང་འདིའི་སྐྱེ་བའི་སེམས་རྟེན་

― GTD002_Page_0160 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དད་པ། སྙིང་རྗེ། སྙིང་སྟོབས་སོགས་སྣ་ཚོགས་པ་ཡོད་དེ། བྱང་ས་སོགས་ལས། སངས་རྒྱས་ཀྱི་རྫུ་འཕྲུལ་སོགས་མཐོང་བ་དང༌། དེ་མིན་ཡང་ཐེག་ཆེན་གྱི་ཆེ་བ་སྟོན་པའི་སྡེ་སྣོད་ཐོས་པ་དང༌། དེ་མིན་ཡང་ཐེག་ཆེན་གྱི་བསྟན་པ་ཉམས་པ་མ་བཟོད་པ་དང༌། དེ་མིན་ཡང་དུས་སྙིགས་མར་སོང་བ་མ་བཟོད་པ་སྟེ་རྐྱེན་བཞི་དང༌། རང་ངོས་ནས་རིགས་ཀྱི་ནུས་པ་སྨིན་པ། གཞན་ངོས་ནས་བཤེས་གཉེན་དམ་པས་ཟིན་པ། འགྲོ་བ་སྡུག་བསྔལ་གྱིས་མནར་བ་ལ་བརྩེ་བ། དེ་དག་སྒྲོལ་བའི་དཀའ་སྤྱད་ལ་མི་སྐྲག་པའི་སྙིང་སྟོབས་ཏེ་རྒྱུ་བཞི་དང༌། གཞན་ལ་ཆེར་མི་ལྟོས་པ་རང་གི་སྟོབས། ཆེད་དུ་ལྟོས་དགོས་པ་གྲོགས་ཀྱི་སྟོབས། སྔོན་ནས་གོམས་པ་རྒྱུའི་སྟོབས། ཚེ་འདིར་འབད་པ་སྦྱོར་བའི་སྟོབས་ཏེ་བཞི་སོགས་ཅི་རིགས་ལས་སྐྱེ་བར་གསུངས་པའི་ཕྱིར་རོ། ། ༼༧༽ཐབས་ཁྱད་པར་ཅན་དུ་བྱས་ན་སློབ་ལམ་ལ་རུང་ཡང་སེམས་བསྐྱེད་གཉིས་ཀྱི་གཞི་མཐུན་འདོད་ན་མི་རུང་བས་སྔར་བཤད་པ་ཀུན་ལ་ལེགས། ༼༤ཧ༽འདིའི་དོན་ལ་ཁ་ཅིག་འདིའི་ཁྱད་པར་ཅན་ཐབས་ཁྱད་པར་ཅན་ལ་བྱས་ན་དེའི་རིགས་པའི་འཕུལ་གྱིས། དོན་དམ་སེམས་བསྐྱེད་ཀྱི་ཁྱད་པར་ཅན་ཞེས་པ་དེ་ཤེས་རབ་ཁྱད་པར་ཅན་དུ་འགྱུར་བས་སངས་རྒྱས་ཀྱི་སར་སེམས་བསྐྱེད་གཉིས་ཀྱི་གཞི་མཐུན་མི་སྲིད་པར་ཐལ་བའི་སྐྱོན་ཡོད་ཟེར་བ་ཐ་ཆད་ཡིན་ཏེ། འདི་ལྟར། སངས་རྒྱས་ཀྱི་སའི་སེམས་བསྐྱེད་ལ་ཤེས་རབ་ཀྱི་ཆ་མ་ཡིན་པས་ཁྱབ་པར་ཐལ། དོན་དམ་སེམས་བསྐྱེད་ལ་ཤེས་རབ་ཀྱི་ཆ་དགོས་ན། སངས་རྒྱས་ཀྱི་སའི་སེམས་བསྐྱེད་ལ་དོན་

― GTD002_Page_0161 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་སེམས་བསྐྱེད་མི་ཡོང་བའི་རྒྱུ་མཚན་ཡོད་པའི་ཕྱིར། འདོད་ན། སེམས་བསྐྱེད་ལ་ཐབས་ཀྱི་ཆས་ཁྱབ་པར་ཐལ། དེ་ལ་ཤེས་རབ་ཀྱི་ཆ་མེད་པའི་ཕྱིར། འདོད་ན། དོན་དམ་སེམས་བསྐྱེད་ལ་ཤེས་རབ་ཀྱི་ཆས་ཁྱབ་པར་ཐལ། ཀུན་རྫོབ་སེམས་བསྐྱེད་ལ་ཐབས་ཀྱི་ཆས་ཁྱབ་པ་གང་ཞིག །དེ་གཉིས་གཅིག་ཤོས་ཐབས་ཁྱད་པར་དུ་བསྒྲུབས་པས་གཅིག་ཤོས་ཤེས་རབ་ཁྱད་པར་ཅན་དུ་དོན་གྱིས་འགྲུབ་པའི་ཕྱིར། རྟགས་ཁས། འདོད་ན། སེམས་བསྐྱེད་གཉིས་འགལ་བར་ཐལ། རྒྱུ་མཚན་དེའི་ཕྱིར། རྟགས་ཁྱབ་ཁས། དེས་ན་གཞུང་གི་ཐོབ་ཚོད་ནི་དོན་དམ་སེམས་བསྐྱེད་ཀུན་རྫོབ་སེམས་བསྐྱེད་ཡིན་པའི་དབང་དུ་བྱས་སྣང་ཡང༌། སངས་རྒྱས་འཕགས་པའི་ཡིད་ཀྱི་རྣམ་ཤེས་ཐམས་ཅད་དེར་བཞག་ན་ཐེག་དམན་རྟོགས་རིགས་སུ་གནས་པའི་སེམས་བསྐྱེད་སོགས་ཧ་ཅང་ཐལ་བས་བདག་གཞན་མཉམ་པ་ཉིད་དུ་རོ་གཅིག་པར་རྟོགས་པའི་ཡེ་ཤེས་ལྟ་བུ་ལམ་དུས་ན་སེམས་བསྐྱེད་དང་ཟུང་འབྲེལ་དུ་སྒོམ་ཚུལ་གྱི་ཁྱད་ཅིག་ཡོད་དམ་དཔྱད་དེ་ཡེ་ཤེས་དེ་ཞི་མཐའ་འགོག་བྱེད་དུ་བཤད་པའང་ཡོད་ལ། སྐབས་བཞི་པར་སྒྲིབ་པ་བཞིའི་ནང་ནས་ཕྱི་མ་གཉིས་བདེན་འཛིན་ཤས་ཆེ་བར་གསུངས་པས་ཀྱང་འགྲུབ་བམ་སྙམ། ༼༡བ༡༩༽ ༼༣༽ དེ་དུས་སེམས་བསྐྱེད་དངོས་སུ་མེད་ན་ཡང་དེའི་ཤུགས་དངོས་སུ་དེ་ལ་འཇུག་ན་དེ་དེས་དངོས་སུ་ཟིན་པའི་ཕྱིར་ཏེ། ༼༤ཨ༽དེས་ཤུགས་ཀྱིས་ཟིན་ཚུལ། བུ་ཤི་བའི་མ་ཟས་ཟ་བ་ན་ཡང༌། མྱ་ངན་གྱི་བློ་མངོན་གྱུར་དུ་མེད་ཀྱང་དེའི་ཤུགས་མ་ཉམས་པས་

― GTD002_Page_0162 ―

^{[མ་དཔེ་གཟིགས་ན་འདིར་གནོན།]}

[Full Size]

བློའི་ཟུར་གཅིག་གིས་དུ་རེ་དྲན་པ་དང་འདྲ་བར་དབུ་མའི་མཐའ་དཔྱོད་དུ་གསུངས། ༼༡ན༢༠༽ ༼༤༽ མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པ་འོ། །ཞེས་སོ། ། ༼༤ཀི༽འདི་ནི་ས་བཟང་བའི་ཊཱིཀྐར། མོས་སྤྱོད་ཀྱི་སའི་གནས་སྐབས་ན། བདག་གཞན་མཉམ་པ་ལ་སོགས་པར་མངོན་སུམ་དུ་མ་རྟོགས་ཀྱང་སྤྱིའི་རྣམ་པར་མོས་པ་ཡིད་ལ་བྱེད་པ་ལས་བྱུང་བའི་སེམས་བསྐྱེད་ཅེས་བཤད་ལ། དེ་ལས་བཟློག་པས་ལྷག་བསམ་རྣམ་དག་དང༌། དག་སར་འབད་རྩོལ་རགས་པ་ལ་མི་ལྟོས་པར་སྔོན་མི་རྟོག་ཡེ་ཤེས་གོམས་པའི་འབྲས་བུ་རྣམ་པར་སྨིན་པའི་དབང་དུ་བྱས་ཏེ་སྐབས་བདུན་པ་ལྟར་རོ། ། ༼༦༽གཉིས་པ་ནི། སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་ནས། བདག་འཚང་རྒྱ་བར་འདོད་པའི་སེམས་བསྐྱེད་དེ། སྤྱན་རས་གཟིགས་ཀྱིས་སེམས་བསྐྱེད་པར་བཤད་པ་ལྟ་བུ། ༼༤ཁི༽སྤྱན་རས་གཟིགས་ལ་དང་པོ་ནས་ཕྱུགས་རྫི་ལྟ་བུའི་སེམས་བསྐྱེད་དེ་སྐྱེས་པ་ཡིན་ན། བདག་ཅག་གི་སྟོན་པ་ལ་དང་པོ་ནས་རྒྱལ་པོ་ལྟ་བུའི་སེམས་བསྐྱེད་དེ་སྐྱེ་དགོས་སོ་ཞེ་ན། སེམས་བསྐྱེད་ཚུལ་གྱིས་ཕྱེ་བའི་དེ་སྐྱེས་པ་ཡིན་པའི་ཞིབ་ཆ་དགོས། ༼༡ན༢༡༽ ༼༡༽ འགྲེལ་པ་ལས། སེམས་བསྐྱེད་པའི་རབ་ཏུ་དབྱེ་བ་ནི་ལས་དང་པོ་བའི་ས་ནས་བཟུང་སྟེ། སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་གསུངས་པའི་ཕྱིར། ༼༤གི༽འདི་ལ་ཕྱ་བའི་ཕར་ཕྱིན་ལས། དེ་ལས་མཚམས་སྦྱར་བ་ནི་རིགས་པ་མ་ཡིན་ཏེ། ཆོས་ཀྱི་དགའ་སྟོན་དང༌། བགྲོད་

― GTD002_Page_0163 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གཅིག་པའི་ལམ་ས་བཅུ་ལས་འདས་པར་བཤད་པ་མི་འགྲིག་སྟེ། ཆོས་ཀྱི་དགའ་སྟོན་ནི་ས་དགུ་པར། ཆོས་སྨྲ་བའི་སྐྱེས་བུར་གྱུར་པ་ཡིན་པ་དང༌། བགྲོད་པ་གཅིག་པའི་ལམ་ས་བརྒྱད་པ་ནས་ཐོབ་པར་གསུངས་པའི་ཕྱིར། ཞེས་པ་ནས། དེས་ན་སློབ་དཔོན་དབྱིག་གཉེན་དང་འཕགས་པས་ལྔར་སྦྱར་བར་བྱའོ། །ཞེས་བཤད་ཀྱང་སྐབས་འདིར་སློབ་དཔོན་བཀག་པ་ནི། ཡལ་ག་ཞོན་ནས་རྩ་བ་གཅོད་པའི་བློ་གྲོས་སོ། ། ༼༣༽རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་བྱུང་དང༌། །ཞེས་དང༌། ༼༤དི༽ཁ་ཅིག །འདི་གཉིས་ཀྱི་ཐ་མ་གོམས་པ་ལས་སྐྱེས་པ་དེ་དོན་དམ་སེམས་བསྐྱེད་དུ་གསེར་འཕྲེང་གསུངས་སོ། །ཟེར་བ་མིག་བར་ཧ་ཅང་ཡངས་ཏེ། འདི་ལྔ་ཀ་བརྡའ་ལས་བྱུང་བ་ལ་གསུངས་ནས་སྒོམ་བྱུང་གི་དོན་དམ་སེམས་བསྐྱེད་ལོགས་སུ་གསུངས་པའི་ཕྱིར། དེས་ན་བརྡའ་ལས་བྱུང་བར་བྱས་ཚད་རགས་པ་བརྡའ་ལས་བྱུང་བའི་སེམས་བསྐྱེད་བུར་ཤིང་གི་ཤུན་པ་ལྟ་བུ་དེ་ལ་བྱེད་དགོས་པའི་ངེས་པ་མེད་དེ། བསྡུ་བ་ལས། སེམས་བསྐྱེད་པ་ནི་རྣམ་པ་བཅུ་སྟེ། འདི་ལྟ་སྟེ། ཡང་དག་པར་བླངས་པ་བརྡའ་ལས་བྱུང་བ་དང༌། ཆོས་ཉིད་ཀྱིས་ཐོབ་པ་དང༌། མ་ངེས་པ་དང༌། ངེས་པ་དང༌། ཡོངས་སུ་མ་དག་པ་དང༌། ཡོངས་སུ་དག་པ་དང༌། སྟོབས་ཆུང་བ་དང༌། སྟོབས་དང་ལྡན་པ་དང༌། འབྲས་བུ་ཡོངས་སུ་མ་གྲུབ་པ་དང༌། འབྲས་བུ་ཡོངས་སུ་གྲུབ་པའོ། །དེ་ལ་ཡང་དག་པར་བླངས་པ་བརྡ་ལས་བྱུང་བ་ནི་

― GTD002_Page_0164 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་སེམས་དཔའ་ཡང་དག་པ་ཉིད་དུ་སྐྱོན་མེད་པ་ལ་མ་ཞུགས་པ་ཐམས་ཅད་ཀྱིའོ། །དེ་ལ་ཆོས་ཉིད་ཀྱིས་ཐོབ་པ་ནི། བྱང་ཆུབ་སེམས་དཔའ་ཡང་དག་པ་ཉིད་དུ་སྐྱོན་མེད་པ་ལ་ཞུགས་པ་དང༌། ཉན་ཐོས་བྱང་ཆུབ་ཏུ་ཡོངས་སུ་གྱུར་པ་རྣམས་ཀྱིའོ། །ཞེས་གསུངས། ལྷག་མ་ཡང་རིགས་ངེས་མ་ངེས། ཀུན་སློང་དག་མ་དག །ཀུན་དཀྲིས་ཀྱིས་ཉམས་ནུས་མི་ནུས། སློབ་མི་སློབ་ལ་སྦྱར་བ་སོགས་སྣ་ཚོགས་ཡོད་པའི་ཕྱིར། དེས་ན་འདིར་བརྡའ་ལས་བྱུང་བའི་དོན་ཆོ་གས་བཟུང་དུ་ཡོད་པ་དང༌། གཞན་དུ་བཤད་པ་ཐོས་བྱུང་ཙམ་ལ་བྱེད་དམ་དཔྱད་པར་བྱའོ། ། ༼༡ན༢༢༽ ༼༡༽ བློ་གྲོས་མི་ཟད་པའི་མདོ་ལས། རྣམ་པ་དྲུག་ཅུ་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕུང་པོ་མི་ཟད་པ་ཡིན་ནོ། ། ༼༤ཅ༽འདིར་མི་ཟད་པ་བརྒྱད་ཅུའི་ནང་ནས་མི་འགྲིག་བཞིན་དུ་བྲི་སྣོན་སྣ་ཚོགས་བྱེད་པ་མི་རིགས་ཏེ། མདོ་ཉིད་ལས། འདིའི་རེ་ལྔ་པོ་ཟུར་དུ་གསུངས་པའི་ཕྱིར་རོ། ། ༼༦༽འདོད་མི་ནུས་ཏེ། མདོ་དཀོན་མཆོག་བརྩེགས་པ་ལས། འོད་སྲུང་ཟླ་བ་ཚེས་པ་ལ་ནི་ཕྱག་བྱ་ཡི། ཞེས་པའི་དངོས་བསྟན་གྱི་བྱང་སེམས་མ་ཡིན་པའི་ཕྱིར། སྒྲ་ནི་རྒྱུན་མིན་སྐྱེས་བུ་ཁྱབ་བདག་མིན། །ནམ་འཇུག་སྙན་སྒྲོགས་བུང་བའི་ལྡིང་འཁོར་འདྲ། །དེ་སླད་འབད་པས་བསགས་པ་སྙིང་གྲོགས་ལ། །འབྱོར་བས་འགྱོད་མེད་ཡིད་ནི་དགེ་གྱུར་ཅིག ། ༈ ༼༡ན༢༣༽ ༼༥༽ འདིར་བསྟན་གདམས་ངག་བཅུ་བོ་༼༤ཆ༽ཚོགས་ལ་གསུམ་དང་སྦྱོར་ལ་ལྔ། །མཐོང་སྒོམ་གཉིས་ལ་རེ་རེ་འོ། ། ༼༥༽ངག་ཡིན་པའི་ཕྱིར་ན་མ་ཁྱབ། ༼༤ཇ༽འོན་ཀྱང་བརྒྱད་སྟོང་པ་འདིར་བསྟན་

― GTD002_Page_0165 ―

^{[མ་དཔེ་གཟིགས་ན་འདིར་གནོན།]}

[Full Size]

གདམས་ངག་བཅུ་ཆར་ཡིན་ལ། ངག་ཏུ་མ་ཐོན་པ་ཞིག་དེ་ལ་ཡང་བཞག་དགོས་སམ་དཔྱད། ༼༡བ༢༣༽ ༼༣༽ མདོ་ལས། ཀུན་ཏུ་རྒྱུ་ཉེར་འགྲོའི་དྲི་བའི་ལན་སྟོན་པར། ཉེར་འགྲོ་ང་ནི་སངས་རྒྱས་ཏེ། །ང་ལ་སློབ་དཔོན་ཅི་ཡང་མེད། ། ༼༡ན༢༤༽ ༼༤༽ རྩོད་སྤོང་ལ་ཁོ་ན་རེ། སྒྲ་མེད་ལུས་ཀྱི་རྣམ་འགྱུར་གྱིས་སྟོན་པའི་གདམས་ངག་ཆོས་ཅན། རྗོད་བྱེད་རྣམ་དག་ཡིན་པར་ཐལ། གདམས་ངག་ཡིན་པའི་ཕྱིར། ༼༤ཉ༽འདི་ལུང་རྟོགས་ཀྱི་བསྟན་པ་གང་ཡིན་དཔྱད་ན་ཡ་མཚན་ཞིག་ཡོད། ༼༥༽རྩ་བར། སྒྲ་མེད་ཀྱང་དེ་དེ་ལྟར་སྣང༌། །ཞེས་སོ། ། ༼༤ཏ༽རང་རྒྱལ་ལུས་ཀྱིས་སྟོན་པ་འདི་གཞུང་སྤྱི་སྐད་ལ་གྲགས་ཀྱང༌། རྟོགས་དཀའི་སྣང་བར། ལུས་ངག་གི་རྣམ་རིག་གཉིས་རྟོག་དཔྱོད་ཀྱིས་ཀུན་ནས་བསླང་བར་འདྲ་བས། སྟོན་པ་པོའི་ཤེས་པའི་རྩལ་སྟོན་བྱེད་དུ་མཚུངས་ལ། རྒྱུའི་རྟོག་དཔྱོད་ཀྱང་གཡེང་བའི་རྒྱུར་མཚུངས་པའི་ཕྱིར། ལུས་ཀྱིས་སྟོན་པའང་བཀག་སྟེ། རང་རྒྱལ་རང་གི་ཐུགས་ལ་ཤར་བ་ན། སྨོན་ལམ་གྱི་མཐུས་གདུལ་བྱ་ལ་གོ་བ་སྐྱེད་པར་གསུངས་ཏེ། སྒྲ་མེད་ཀྱང་དེ་དེ་ལྟར་སྣང༌། །ཞེས་པའི་ཚིག་གི་ནུས་པ་འདོན་ལུགས་འདི་ལེགས་སམ་དཔྱད། །༈ ༼༡བ༢༤༽ ༼༤༽ སྒྲུབ་པའི་ངོ་བོ་ལ་གདམས་པ་དང༌། དེའི་དམིགས་པ་ལ་གདམས་པ་གཉིས། དང་པོ་ནི། ༼༤ཐ༽ཐེག་ཆེན་གྱི་ལམ་གྱི་ལུས་ཚང་བ་འདི་གཉིས་ཟུང་དུ་འཇུག་པ་ཁོ་ན་ལ་ལྟོས་པས། སྒྲུབ་པའི་ངོ་བོ་ཞེས་བཤད་དེ། གཞི་ལ་བདེན་གཉིས་ཟུང་འཇུག་ཏུ་སོང་ན་ལམ་ལ་ཚོགས་གཉིས་དང༌། འབྲས་བུ་སྐུ་གཉིས་ཟུང་འཇུག་འབྱུང་བས་སོ། །

― GTD002_Page_0166 ―

^{[མ་དཔེ་གཟིགས་ན་འདིར་གནོན།]}

[Full Size]

༼༡ན༢༥༽ ༼༤༽ གཞན་དོན་དུ་ཆོས་སྐུ་དོན་དུ་གཉེར་བའི་སྒོ་ནས་བྱང་ཆེན་དང་བྱང་ཆེན་གྱི་མིང་དང་ཤེར་ཕྱིན་དང་རྫོགས་བྱང་བཞི་ཐ་སྙད་དུ་ཡོད་བཞིན་དུ་དོན་དམ་པར་དམིགས་སུ་མེད་པ་ཉམས་སུ་ལོངས་ཤིག་ཅེས་འདོམས་པའི་ཤེར་མདོ་ཡིན་པའི་ཕྱིར། ༼༤ད༽སེམས་བསྐྱེད་ཀྱི་མདོར། གང་གིས། གང་ལ། གང་གི་ཕྱིར་སློབ་པར་གསུངས་པའི་ཡུལ་རྣམས་ལའང་ཞེན་པ་འགོག་པ་སྟེ། འདིའི་མིང་ནི་བྱང་ཆུབ་སེམས་དཔའ་ཆེན་པོའི་གདགས་གཞིར་གྱུར་པའི་མིང་གཞི་ལ་ཁ་ཅིག་འདོད་ཀྱང༌། མདོའི་འབྲེལ་ལ་དཔྱད་ན་མིང་དུ་བཏགས་པ་ཙམ་ཞེས་པའི་མིང་དེ་ཡང་དམིགས་སུ་མེད་པ་ལ་བྱའམ་སྙམ། ༼༢༽ཁ་ཅིག་མ་བརྟགས་མ་དཔྱད་པའི་ཤེས་བྱ་ཟེར། ༼༤ན༽སྟག་ལོའི་གྲུབ་མཐའ་རྩ་བར། བདེན་གཉིས་དབྱེ་གཞི་ཤེས་བྱ་ཙམ་དུ་གསུངས། །ཞེས་བཤད་ཀྱང༌། འགྲེལ་པར་ཀུན་རྫོབ་རིག་ངོའི་ཤེས་བྱ་དང༌། དོན་དམ་འཁྲུལ་ངོའི་ཤེས་བྱ་མིན་ཡང། མ་ཕྱེ་བར་མ་བརྟགས་མ་དཔྱད་པའི་ངོ་ཙམ་དུ་ཤེས་བྱ་བདེན་གཉིས་ཀྱི་དབྱེ་གཞིར་མདོ་ལས་གསུངས་ཏེ་ཞེས་འབྱུང་སྟེ། དོན་ཇི་ལྟར་ཡང་ཐ་སྙད་མཁན་པོ་རྣམས་ལ་ཚིག་གི་སྐྱོན་ཕྲ་མོ་ཡང་ཤིན་ཏུ་དགག་འོས་སོ། ། ༼༡བ༢༥༽ ༼༡༽ ཁ་ཅིག་ན་རེ། བདེན་གཉིས་ངོ་བོ་གཅིག་མི་རུང་བས་གཅིག་བཀག་པའི་ཐ་དད་ཡིན་ཟེར་ན། ༼༤པ༽འདི་ལ་ཁ་ཅིག་ངོ་བོ་གཅིག་བཀག་པའི་ངོ་བོ་ཐ་དད་དུ་འདོད་ཟེར་བ་བབ་ཅོལ་ཏེ། དེ་ལྟ་ན་དེའི་ངོ་བོ་ཡོད་མེད་རྩོད་མི་དགོས་པའི་ཕྱིར། དེས་ན་འདི་བོད་སྔ་རབས་པ་རྣམས་ཐ་དད་མུ་གསུམ་པར་སྨྲ་བ་ཡིན་ཏེ། ལམ་རིམ་ཆུང་ངུ་

― GTD002_Page_0167 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ཤེས་པར་བྱའོ། ། ༼༥༽སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། ། ༼༤ཕ༽ཞེས་དང༌། རྡོ་རྗེ་གཅོད་པར། ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། ། ༼༦༽བདེན་གཉིས་ལ་འཇུག་པའི་མདོ་ལས། དོན་དམ་པར་ན་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ་ཞེས་པ་ནས། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་ཡུལ་གྱི་བར་ལས་འདས་པ་ཡིན་ཏེ། ཇི་ལྟར་འདའ་བ་ཡིན་ཞེ་ན། སྤྱིར་དེའི་ཡུལ་ཡིན་མོད་ཀྱང་དོན་དམ་པའི་བདེན་པའོ་ཞེས་གཉིས་ཀྱི་ཚུལ་གྱིས་བརྗོད་པ་ལྟར་ནི་མིན་ནོ། །ཞེས་གསུངས་པའི་ཕྱིར། ༼༡ན༢༦༽ ༼༢༽ དབུ་མ་རྒྱན་གྱི་རང་འགྲེལ་ལས། དཔེར་ན་ཡིད་ཀྱིས་བརྒྱ་བྱིན་ལ་ཆོས་བཤད་པ་དང། ནས། དེ་བས་ན་སྤྲོས་པའི་ཚོགས་ཐམས་ཅད་དང་བྲལ་བ་དོན་དམ་པའི་བདེན་པ་བསྟན་པ་ལ་སེམས་ཀྱི་རྒྱུ་བ་ཡང་མེད་པར་བསྟན་ཏོ། །ཞེས་གསུངས་པའི་ཕྱིར། ༼༤བ༽འདིར་ཆོས་བསྟན་ཚུལ་མཁས་གྲུབ་ཀྱི་ཕར་ཕྱིན་སྐབས་གཉིས་པར་ཡིད་ལ་ཚིགས་སུ་བཅད་པ་བསམ་པས། ལྷའི་དབང་པོའི་ཐེ་ཚོམ་བསལ་བར་མདོ་ལས་གསུངས་པ་ལྟར། ཡིད་ཀྱིས་ཆོས་སྟོན་པ་ཡིན་ནོ། །ཞེས་པ་ལྟར་ཡིན་ལ། ཁ་ཅིག་འདི་རྣམ་རྟོག་སོགས་ཀྱི་སྤྲོས་པ་མེད་པའི་དཔེར་འདོད་པ་མི་རུང་སྟེ། ངག་གི་བརྗོད་པ་མེད་ཀྱང༌། ཡིད་ཀྱིས་བརྗོད་པ་ཡོད་པས་སྤྲོས་པ་ཕྲ་མོ་འདི་ཙམ་ཡང་དོན་དམ་ལ་གཟིགས་པའི་ངོར་ཁེག་དགོས་པའི་དོན་དུ་འགྲེལ་པ་འགྲེལ་བཤད་གཉིས་ཀྱིས་འགྲུབ་པའི་ཕྱིར། ༼༧༽བློ་གྲོས་མི་ཟད་པའི་མདོ་ལས། དེ་ལ་ཀུན་རྫོབ་བདེན་པ་གང་ཞེ་ན།

― GTD002_Page_0168 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་གྱི་ཐ་སྙད་ཇི་སྙེད་པ་དང༌། ཡི་གེ་དང༌། སྐད་དང༌། བརྡ་སྟོན་པའོ། །ཞེས་གསུངས་པའི་ཕྱིར། ༼༤མ༽འདིའི་ཡི་གེ་ལ་ངག་དང་ཡིད་ཀྱི་བརྗོད་པ་གཉིས་ཡོད་པར་དབུ་མ་རྒྱན་ལས་གསུངས་ཤིང༌། ཕྱི་མ་གཉིས་ལ་ཡུལ་གྱི་སྐད་དང༌། འདོད་རྒྱལ་གྱི་བརྡ་ཞེས་བོད་སྔ་མ་ཁ་ཅིག་བཤད་ཀྱང་ཁུངས་ཆེ་བ་མ་མཐོང་ངོ༌། །༼༡བ༢༦༽ ༼༧༽ དབུ་མ་སྙིང་པོ་ལས། སྔོན་འཛིན་མིག་ཤེས་ལྟ་བུའི་སྟེང་ན་རང་ལས་ལོགས་སུ་རང་གིས་མྱོང་བྱའི་ཡུལ་དུ་སྣང་བ་སྔོན་པོའི་རྣམ་པ་ལས་གཞན་དུ་གྱུར་པའི། །རྣམ་པ་སེམས་ཉིད་རང་ལ་རང་གི་གསལ་མྱོང་གི་ཆ་ཙམ་ཇི་འདྲ་བ་ཞིག་སྣང༌། ། ༼༤ཙ༽སྟེ་དེ་འདྲ་མི་རུང་ངོ༌། །ཅིའི་ཕྱིར་ཞེ་ན། རང་ལས་ཐ་དད་པའི་ཚུལ་དུ་གྲུབ་པའམ་སྣང་བ་ཅི་རིགས་མེད་ན་དེའི་ཡུལ་དུ་མི་རིགས་ཏེ། བྱ་བྱེད་གཅིག་ཏུ་ཐལ་ཞེས་པའོ། །འདིས་ཞར་ལ་རང་རིག་སྨྲ་བ་རྣམས་ཀྱི་འདོད་ཚུལ་བཤད་པས་འདིར་དྲངས་པ་ཡིན་གྱི་འདི་ལེགས་ལྡན་གྱིས་ཁས་ལེན་པ་མིན་ནོ། །ལུང་འདི་ལ་ཡང༌། འགྱུར་ཁ་ཅིག་ཏུ། ཡུལ་ཏུ་སྣང་བ་མ་གཏོགས་པར། །སེམས་ཀྱི་བདག་ཉིད་གཞན་ཅི་ཞིག །ཅེས་འབྱུང་ལ། འདིའི་མཇུག་ཐོགས་སུ་ཤེལ་དང་དཔེ་དོན་སྦྱར་ཏེ་རང་རིག་སྒྲུབ་ཚུལ་དང༌། དེ་དགག་ཚུལ་མང་སྟེ། རྟོག་གེ་འབར་བའི་ལེའུ་ལྔ་པ་དང༌། ལྕང་སྐྱའི་གྲུབ་མཐའ་སོགས་ལས་ཤེས་པར་བྱའོ། ། ༼༢༽ཡང་ཁ་ཅིག །སྔོར་སྣང་དབང་ཤེས་དོན་དམ་བདེན་པ་ཡིན་པ་བཅད་པའི་ཆེད་དུ་རང་མངོན་སུམ་དུ་རྟོགས་པའི་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་བྱ་གང༌། སྒྲུབ་པའི་རྣམ་པར་རྟོགས་བྱ་མིན། །པ་དེ་དོན་དམ་བདེན་པའི་མཚན་ཉིད་ཡིན་ཏེ། རྣམ་བཤད་ལས་འདི་ལྟར་བཤད་པས་སོ། །ཟེར་ན། འོ་ན་རྟག་

― GTD002_Page_0169 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་ཀྱིས་སྟོང་པའི་སྔོར་སྣང་དབང་ཤེས་ཆོས་ཅན། ༼༡བ༢༧༽ ༼༡༽ རྩ་ཤེས་ལས། ༼༤ཚ༽ལས་དང་ཉོན་མོངས་ཟད་པའི་ཐར། །ལས་དང་ཉོན་མོངས་རྣམ་རྟོག་ལས། ། ༼༡༽ལས་ཉོན་གྱི་རྒྱུ་ཚུལ་མིན་གྱི་རྣམ་རྟོག་དེ་དག་ནི་སྤྲོས་པ་སྣ་ཚོགས་བཟང་ངན་སོགས་སུ་བདེན་པར་ཞེན་པ་གོམས་པ་ལས་སྐྱེ་ལ་སྤྲོས་པ་རྗེས་མ་འདི་བདེན་འཛིན་ལ་བྱེད་པར་སྔགས་རིམ་ཆེན་མོར་ཡང་གསུངས་པ་དེ་ནི། །སྟོང་པ་ཉིད་ཀྱིས་འགག་པར་འགྱུར། ། ༼༥༽ཡང་དག་མཐོང་ཡུལ་གང་དེ་དེ་ཉིད་དེ། །སོགས་འཇུག་པའི་ལུང་དོན་ལ་ཡང་ཁ་ཅིག །༼༡ན༢༨༽ ༼༦༽ གཉིས་སྣང་མེད་པའི་ཤེར་ཕྱིན་ལ་བདག་དང་གང་ཟག་དང་ཆོས་ཀྱི་བདག་མེད་རགས་པ་ཡང་བཟློག་དགོས་པའི་ཕྱིར་ཏེ། རིན་ཆེན་འཕྲེང་བ་ལས། བདག་དང་བདག་མེད་ལྟ་བ་དག །དེ་ཕྱིར་ཐུབ་པ་ཆེན་པོས་བཟློག །ཅེས་གསུངས་པའི་ཕྱིར། ༼༤ཛ༽འདིའི་དྲངས་མཚམས་ལྟར་ན་རགས་པའི་བདག་མེད་དུ་འགྲོ་བའི་ཚོད་དུ་སྣང་ཞིང༌། དར་ཊཱིཀ་ཏུ་བདག་མེད་ཙམ་ལས་དབྱེ་བ་མ་མཛད་ལ། སྟོང་ཐུན་ལས། ཁྱབ་བྱེད་བདེན་གྲུབ་ཙམ་ཁེགས་པའི་རྟགས་ཀྱིས་ཁྱབ་བྱ་སྟོང་ཉིད་བདེན་གྲུབ་འགོག་པ་ཡིན་གྱི་ཞེས་བདག་མེད་ཕྲ་མོ་ལ་སྦྱར་རོ། ། ༼༡ན༢༩༽ ༼༢༽ གཞན་ཡང་སྟོང་ཉིད་རྟོགས་པའི་མཉམ་གཞག་ཡེ་ཤེས་ཆོས་ཅན། ཀུན་རྫོབ་བདེན་པ་མ་ཡིན་པར་ཐལ། དེའི་སྒྲ་བཤད་མེད་པའི་ཕྱིར། ༼༤ཝ༽འདི་ནི་གང་གི་ངོར་བདེན་པའི་ཀུན་རྫོབ་ཀྱི་སྒྲ་བཤད་ཡིན་པས་སྔ་མ་དང་མི་འགལ་ལོ། ། ༼༣༽དེས་དོན་དམ་གཉིས་ཀྱང་རིགས་འདྲ། ༼༤ཞ༽ཡེ་ཤེས་དམ་པའི་དོན་ལ་དོན་དམ་ཞེས་ཡུལ་ལ་སྦྱར་བ་གྲགས་ཆེ་ལ། གང་

― GTD002_Page_0170 ―

^{[མ་དཔེ་གཟིགས་ན་འདིར་གནོན།]}

[Full Size]

གི་ངོར་ཀུན་རྫོབ་རྣམས་དགག་བྱ་དང༌། དོན་དམ་བདེན་པ་རྣམས་གནས་ལུགས་སུ་འཇོག་པའི་ཡུལ་ཅན་ལ་དོན་དམ་དུ་བཤད་པ་ཡང༌། དབུ་མ་སྣང་བ་འོག་ཏུ་དྲངས་པ་དང༌། དགོངས་པ་རབ་གསལ་ལས། ཐོས་བསམ་སྒོམ་གསུམ་གྱི་རིག་ཤེས་ལ་དོན་དམ་དུ་བྱས་ནས་ཞེས་པ་ལྟར་སྟོང་ཐུན་ཡང་གསུངས་སོ། །འདི་ནི་རྟོག་གེ་འབར་བར། ཡང་ན་དོན་དམ་པ་དང་མཐུན་པ་སྟེ། ཞེས་སོགས་དང་གཅིག་པར་སྣང་ལ། ཡུལ་ཡུལ་ཅན་ལ་སྦྱོར་ཚུལ་གསུམ་སོགས་ལྕང་སྐྱའི་གྲུབ་མཐའི་མདོ་སྡེ་སྤྱོད་པའི་ཐད་བལྟའོ། ། ༼༥༽ཀུན་བཏགས་རྣམས་ཕལ་ཆེར་ལོག་པར་བཏགས་པའི་ཀུན་རྫོབ། གཞན་དབང་རྣམས་ལས་གཙོ་བོ་ཕྱི་དོན་དུ་མངོན་པར་ཤེས་པ་སྟེ་ཞེན་པའི་ཀུན་རྫོབ། ཡང་དག་མ་ཡིན་ཀུན་རྟོག་དང༌། །ཡོངས་གྲུབ་རྣམས་གཟིགས་པ་ལྟར་བསྟན་དུ་མེད་ཀྱང་དེ་བཞིན་ཉིད་ལ་སོཊ་པའི་རྣམ་གྲངས་ཀྱིས་བརྗོད་པའི་ཀུན་རྫོབ་ཡིན་པའི་ཕྱིར། ༼༤ཟ༽འདི་གསུམ་ངོ་བོ་ཉིད་མེད་པ་གསུམ་གྱི་དོན་དང་སྦྱར་ཏེ་ཤེར་མདོའི་དགོངས་པ་འགྲེལ་ཚུལ་འགྲེལ་པ་འགྲེལ་བཤད་སོགས་སུ་མེད་ཀྱང་ལེགས་བཤད་སྙིང་པོར་ཕྱི་མའི་ཡོངས་གྲུབ་ཀུན་རྫོབ་ཏུ་གསུངས་པས། དགོངས་པ་འགྲེལ་པར་གསུངས་པས་དམིགས་ཕྱེ་སྟེ་དཔྱད་རྒྱུ་ཡོད། ༼༡བ༢༩༽ ༼༡༽ ཁྱབ་སྟེ། སྟོང་ཉིད་དོན་དོན་དམ་དང༌། ༼༤འ༽དགོས་དོན་དམ་པ་མྱང་འདས་སྒྲུབ་པའམ། གཟུང་དོན་དམ་པ་ཆོས་ཉིད་ཡུལ་དུ་བྱེད་པའི་ཆ་ནས། ༼༡༽ལམ་རྣམས་སྒྲུབ་པ་དོན་དམ་དང༌། ༼༤ཡ༽འཇུག་པར། དེ་ནི་དགོས་པ་མཆོག་ཡིན་པས། །དོན་དམ་མྱ་ངན་འདས་པ། ཞེས་པ་ལྟར། ༼༡༽མྱང་འདས་རྣམས་ཐོབ་པ་དོན་

― GTD002_Page_0171 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་ཡིན་པའི་ཕྱིར། ༼༤༽དངོས་པོ་ཡང་དག་པར་སྐྱེ་བ་དང་སོགས་སྒྲས་ཡང་དག་པར་འཇིག་པ་རྣམས་ཆོས་ཅན། ཀུན་རྫོབ་བདེན་པ་ཡིན་པར་ཐལ། ལོག་པའི་ཀུན་རྫོབ་ཡིན་པའི་ཕྱིར། དེར་ཐལ། ༼༤ར༽དངོས་སྨྲ་བ་ལ་ཡང་དག་པའི་སྐྱེ་བ་སོགས་ལོག་པའི་ཀུན་རྫོབ་ཡིན་ཏེ། ཁྱེད་ཅག་གི་གྲུབ་མཐས་སྒྲོ་བཏགས་པ་ཙམ་དུ་ཟད་པའི་ཕྱིར། རྟགས་གྲུབ་སྟེ། ཡུལ་འཇོག་པ་ཡུལ་ཅན་ལ་ལྟོས་ཤིང༌། འདི་ནི་ངེད་གཉིས་མཐུན་སྣང་དུ་གྲུབ་པའི་སྔོན་འཛིན་ཤེས་པ་སོགས་ཀྱིས་མྱོང་བས་མ་གྲུབ་པའི་ཕྱིར། ཁྱབ་སྟེ། ཁྱོད་རང་གིས་དཔྱད་པའི་ངོར་ཡོད་པས་མི་ཆོག་སྟེ། འཛིན་པ་ཀུན་བཏགས་དེ་ནི་དཔྱད་པའི་གཞི་ཡིན་པའི་ཕྱིར། ཞེས་འཕངས་པའི་ལན་དུ། ༼༤༽ཕྱོགས་སྔ་མས་དེ་ནི་དབང་ཤེས་ལ་མི་སྣང་བས་ལོག་པའི་ཀུན་རྫོབ་ཡིན་པ་ལྟར་དེ་བཀག་པའི་སྟོང་པ་ཡང་དབང་ཤེས་ལ་མི་སྣང་བས་ལོག་པའི་ཀུན་རྫོབ་ཏུ་བྱེད་དགོས་ཞེས་མགོ་མཚུངས་སུ་རྩོད་པ་གང་ཞིག །༼༧༽དབང་ཤེས་ལ་གསལ་བར་སྣང་བ་མེད་ན་ལོག་པའི་ཀུན་རྫོབ་ཡིན་པར་དབུ་སེམས་མཐུན་པའི་ཕྱིར། ༼༤ལ༽ལུགས་འདིར་བདེན་གྲུབ་དབང་ཤེས་ལ་སྣང་ན། དེ་ཉིད་ལོག་པའི་ཀུན་རྫོབ་ཡིན་པར་གཅིག་དུ་བྲལ་སོགས་ཀྱིས་སྒྲུབ་དགོས་པའི་དོན་དེ། ཡེ་ཤེས་སྙིང་པོས་བདེན་སྣང་བཞེད་པར་འདོད་པ་དག་གིས་རྩོད་ལན་འདི་དག་ཤོད་པའི་སྐབས་མེད་དོ། ། ༼༡ན༣༡༽ ༼༡༽ མདོ་ལས་འཛམ་བུའི་གླིང་འདི་དགེ་སློང་ཤཱ་རིའི་བུ་དང་མོའུ་འགལ་གྱི་བུ་ལྟ་བུ་ཤ་སྟག་གིས་ཡོངས་སུ་གང་བ་འདི་ལྟ་སྟེ། དཔེར་ན། འདམ་བུའི་ཚལ་ལམ། འོད་མའི་

― GTD002_Page_0172 ―

^{[མ་དཔེ་གཟིགས་ན་འདིར་གནོན།]}

[Full Size]

ཚལ་ལམ། བུ་རམ་ཤིང་གི་ཚལ་ལམ། སྨིག་མའི་ཚལ་ལམ། འབྲས་ཀྱི་ཞིང་ངམ། ཏིལ་གྱི་ཞིང་ལྟར་ཡོངས་སུ་གང་བར་གྱུར་ཀྱང༌། ༼༤ཤ༽ཚལ་དང་ལམ་གྱི་དོན་ཡང་གསེར་འཕྲེང་ལས་ཤེས་ལ། ཐ་མར་ལམ་སྒྲ་སྨོས་པའི་དོགས་གཅོད་བྱ་སའི་ཐ་མ་དཔྱད་རྒྱུ་ཅུང་ཟད་ཡོད། ༼༡ན༣༢༽ ༼༡༽ གཉིས་པ་ལ། བདེན་གཉིས་ཀྱི་དབྱེ་གཞི་དང༌། ཇི་ལྟར་དུ་ཕྱེ་བའི་གྲངས་ངེས་དང། དེ་ལྟར་དུ་ཕྱེ་བའི་དོན་དང། ཕྱེ་བ་སོ་སོར་བཤད་པ་བཞི། ༼༤ས༽གཞན་གྱིས་འདོད་པའི་བདེན་གཉིས་ནི། མཛོད་འགྲེལ་ལས། གང་ལ་བཅོམ་དང་བློ་ཡི་གཞན། །ཞེས་སོགས་དང༌། རྣམ་འགྲེལ་ལས། དོན་དམ་དོན་བྱེད་ནུས་པ་གང༌། །ཞེས་སོགས་ཏེ། ཕྱི་མ་འདི་ལ་ཊཱིཀ་ཆེན་ལས། དོན་བྱེད་ནུས་པ་གང་ཡིན་པ། །ཞེས་འདོན་དགོས་པར་བཤད་དོ། ། ༼༡ན༣༣༽ ༼༡༽ རྟོག་པ་གཉིས་ཀྱིས་ཀྱང་སོ་སོར་འཛིན་པས་ལྡོག་པའམ་གཞན་སེལ་ལ་ལྟོས་ནས་ཐ་དད་ཡིན་པའི་ཕྱིར། ༼༤ཧ༽སྟོང་ཉིད་བརྗོད་པའི་སྒྲ་དེ་ཡོངས་གྲུབ་བརྗོད་པའི་སྒྲ་ཡིན་ཀྱང༌། ཡོངས་གྲུབ་ཅེས་བརྗོད་པའི་སྒྲ་མིན་པའང་ཞིབ་ཆའི་རྣམ་གྲངས་སོ། ། ༼༡བ༣༣༽ ༼༡༽ རྣམ་འགྲེལ་ལས། གྲངས་ཅན་ལྟར་ན་སྔོ་སེར་སོགས་དངོས་པོའི་ངོ་བོ་གཅིག་ཉིད་ཕྱིར། །ངོ་བོ་ཐ་དད་དུ་བློ་མ་འཁྲུལ་བ་ལ་སྣང་བ་གང་ལས། ། ༼༤ཨ༽འབྱུང་ཞེས་པ་ཡིན་ལ་ཊཱིཀ་ཆེན་དུ་སྤྱི་གསལ་རྣམ་པ་ཐ་དད་མེད་པར་ཐལ་བ་ལ་སྦྱར་རོ། ། ༼༢༽ཡང་རྣམ་འགྲེལ་ལས། ཤེས་ལ་ཡོད་པ་སྟེ་སྣང་བའི་དོན་དེ་རྣམས། །འདི་ལྟར་༼༤ཀི༽དཔེར་ན། བ་ལང་ནག་རྒུར་ལྟ་བུ་ཡང་རིགས་མཐུན་པ་བ་ལང་དཀར་ཟལ་ལས་ལྡོག་པ་དང་རིགས་མི་མཐུན་པ་རྟ་ལས་ལོག་པ་སོགས་ལྡོག་པ་

― GTD002_Page_0173 ―

^{[མ་དཔེ་གཟིགས་ན་འདིར་གནོན།]}

[Full Size]

སྣ་ཚོགས་ལ་ལྟོས་པའི༌༼༢༽ལྡོག་པའི་ངོ་བོ་ཅན། །ཞེས་གསུངས་པའི་ཕྱིར། ཁྱབ་སྟེ། ཕྱི་མས་ལྡོག་པའི་དོན་ཡང་བཤད་ལ། ཡང་རྣམ་འགྲེལ་ལས། ཤིང་འཛིན་གྱི་བློ་དེ་ཡིས་ཇི་ལྟར་ཀུན་བརྟགས་པ། །དོན་གྱི་སྤྱི་དེ་ནི་དམ་པའི་དོན་དུ་མེད། ། ༼༤ཁི༽ཡོད་ན་ཤིང་འཛིན་རྟོག་པ་མ་འཁྲུལ་བར་འགྱུར་ལ། དེ་ལྟ་ན་དེ་ལ་ཤིང་སྤྱི་དང་ཤིང་གསལ་རྣམས་འདྲེས་པར་སྣང་བ་ལྟར་གྲུབ་དགོས་པས། ཤིང་གི་སྤྱི་གང་ལ་རྗེས་སུ་འགྲོ་བ་དེར། ཤུག་པ་ཡང་རྗེས་སུ་འགྲོ་དགོས་པ་ལས། གསལ་བ་ཤ་ཤུག་རྗེས་འགྲོ་མི་བྱེད་པར་མངོན་ཅིང༌། རྗེས་སུ་འགྲོ་བའི་སྤྱི་དོན་གཞན་ཡང་མེད་པའི་ཕྱིར། ཞེས་པའོ། །སྤྱི་གསལ་གཉིས་འབྲེལ་བ་རྫས་གྲུབ་ཡོད་ན་སྐྱོན་དེ་འབྱུང་བ་བཞིན། ཀུན་གཞི་དང་ས་བོན་ལྟ་བུ་རྟེན་བརྟེན་པར་འབྲེལ་བ་རྫས་གྲུབ་ཡོད་ན། རྟེན་པ་འདོད་པའི་ས་བོན་དང་ཀུན་གཞི་ཡང་རང་བཞིན་འདྲེས་པར་འགྱུར་བའི་ཕྱིར། ཀུན་གཞི་འདོད་པར་གཏོགས་དགོས་པ་ལྟར་གོང་མའི་ཆོས་དང་ཡང་རང་བཞིན་འདྲེས་པས་གོང་མའི་སར་གཏོགས་པས་ཁམས་འཆོལ་བར་འགྱུར་བ་སྟེ། འདི་ལ་དགོངས་ནས་དཀའ་འགྲེལ་དུ། ཤིང་མིན་ལས་ལྡོག་ངོ་བོ་དེ། །ཞེས་སོགས་དྲངས་པ་ཡིན་ཏེ། དེའི་ཐད་ཀྱི་རིགས་གཏེར་འགྲེལ་པར། ཤིང་མ་ཡིན་པ་ལས་ལྡོག་པ་དེ་དངོས་པོ་ཡིན་ན་ལོག་པའི་ཤིང་ཤ་བ་དང་གཅིག་གམ་ཐ་དད། ཞེས་སོགས་འབྱུང་སྟེ་གཞུང་གི་དོན་བཙལ་དགོས་པ་དུ་མ་ཞིག་ཡོད། ༼༥༽རྣམ་འགྲེལ་ལས། གཞན་ཡང་འབྲེལ་བ་བདེན་གྲུབ་མེད་དེ། སྒྲ་རྣམས་ཀྱིས་

― GTD002_Page_0174 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་བརྡར་བཏགས་པའི་དོན་དེ་སྟོན། །ལ་དེ་ནི་ཐ་སྙད་ཆེད་དུ་བྱས། །ཀྱང་ཐ་སྙད་དུས་དེ་ཚེ་བརྡ་དུས་ཀྱི་དོན་རང་གི་མཚན་ཉིད་འགག་ནས་མེད། །ལ་དེས་ན་དེ་ལ་བརྡ་དོན་དམ་པར་འཇུག་པ་མ་ཡིན། །ཞེས་གསུངས་པའི་ཕྱིར། ༼༤གི༽འདི་དག་དྲངས་པའི་དགོས་པ་ནི་སྒྲ་རྟོག་གི་འཇུག་ཚུལ་ཞིབ་པར་མ་ཤེས་ན། སེལ་བ་ལ་ལྟོས་པའི་ཐ་དད་དཔྱིས་ཕྱིན་པར་འཇོག་མི་ཤེས་ཤིང། དེའི་དབང་གིས་ཐ་དད་བྱས་ཚད་ངོ་བོ་སོ་སོར་འབྱེད་རྒྱུ་ཡོད་པའི་རགས་པ་ཞིག་ཏུ་གོ་ནས་ངོ་བོ་གཅིག་ལ་ལྡོག་པ་ཐ་དད་ཀྱི་རྣམ་དབྱེ་འཇོག་མི་ནུས་པའི་ལོག་རྟོག་སེལ་བའི་ཕྱིར་ཡིན་ནོ། །འདིའི་མན་ངག་ཕྲ་མོ་ཞིག་རྣམ་འགྲེལ་ཊཱིཀ་ཆེན་ཤོག་གུ་གོ་བདུན་པར་ཡོད་ཀྱང་མང་དོགས་ནས་མ་བྲིས། ཊཱིཀ་ཆེན་ཤོག་གུ་ང་ལྔ་བར་གསལ་བོར་འདུག །འདིས་ནི་བརྡ་དང་ཐ་སྙད་ཀྱི་ཁྱད་པར་ཀྱང་ཤེས་ཏེ། ཡུལ་དེ་ལ་དང་པོར་བཏགས་པ་བརྡ་དང༌། བརྡ་དེ་ཕྱིས་སུ་འཇགས་པའི་གནས་སྐབས་ལ་ཐ་སྙད་ཅེས་པའོ། །༼༡བ༣༤༽ ༼༡༽ དབུ་མ་སྣང་བ་ལས། མ་རིག་པའི་བག་ཆགས་ཀྱིས་བློ་འདི་སྒྲིབ་པ་འམ་འདུན་བློ་འདིས་དེ་ཁོ་ན་ཉིད་འགེབས་པ་ལྟ་བུ་ཀུན་ནས་སྒྲིབ་པར་བྱེད་པའི་ཕྱིར་རོ། །ཞེས་གསུངས་པའི་ཕྱིར། ༼༤ངི༽བདེན་གཉིས་རང་འགྲེལ་གྱིས། གང་ཞིག་གིས་སམ་གང་ཞིག་ལ། །ཡང་དག་སྒྲིབ་བྱེད་དེ་ཀུན་རྫོབ། །ཅེས་པ་རྩ་འགྲེལ་དང་ཡང་གཅིག་གོ །༼༡༽ཀུན་རྫོབ་ཀྱི་སྐད་དོད་སཾ་པྲྀ་ཏའི་སཾ་ཡང་དག་དང༌། པྲྀ་ཏ་སྒྲིབ་པར་བྱས་ཏེ། མདོ་ལས། ཡང་དག་ཀུན་རྫོབ་འདོད། །ཅེས་པ་ཡང་ཡང་དག་པ་བསྒྲིབས་ཞེས་པ་དེ་ཡིན་པའི་ཕྱིར། ༼༡བ༣༥༽ ༼༤༽ གཟུགས་སངས་འཕགས་ལ་སྣང་ཚུལ་

― GTD002_Page_0175 ―

^{[མ་དཔེ་གཟིགས་ན་འདིར་གནོན།]}

[Full Size]

དང་གནས་ཚུལ་མི་མཐུན་པར་ཐལ། འདོད་པའི་ཕྱིར་ན་མ་ཁྱབ་སྟེ། ༼༤ཅི༽ཡིག་ཆ་རྙིང་པར་སངས་འཕགས་ལ་རྫུན་པར་མ་སོང་བའི་དབང་དུ་བྱས་སྣང༌། ༼༦༽སངས་རྒྱས་ཀྱི་མིག་ཤེས་ཀྱི་དེ་ཡིན་པའི་ཕྱིར། ༼༤ཆི༽བརྒྱད་སྟོང་འགྲེལ་ཆེན་ལས། སངས་རྒྱས་ཉིད་ཀྱི་གནས་སྐབས་སུ་མི་ཤེས་པའི་རང་བཞིན་གྱི་དབང་པོ་ཡོངས་སུ་སྤངས་པ་ཡིན་པས། ཡིད་ཀྱི་བློ་དང་འདྲ་བར་དབང་བོས་བློའི་ཡུལ་ཡོངས་སུ་གཅོད་པས། གང་གི་ཕྱིར། བཅོམ་ལྡན་འདས་ཀྱི་རྣམ་པར་ཤེས་པ་ཐམས་ཅད་དང། ཡུལ་ཐམས་ཅད་པ་ཡིན་པར་འདོད་དེ། དེ་བས་ན་དྲི་མ་མེད་པའི་སྤྱན་ལ་སོགས་པས་མ་གཟིགས་པ་ལ་སོགས་པ་གང་ཡང་མ་མཆིས་སོ། །ཞེས་གསུངས་པའི་ཕྱིར་རོ། ། ༼༡ན༣༦༽ ༼༡༽ སྐལ་བཟང་མིག་འབྱེད་ལས། ཤེས་པ་ཡིན་པའི་ལོག་པའི་ཀུན་རྫོབ་མི་སྲིད་པའི་ཕྱིར། ཡུལ་ཅན་ལ་ཡང་ལོག་གཉིས་མི་འབྱེད་ཀྱི། ཡུལ་ཁོ་ན་ལ་ཡང་ལོག་གཉིས་འབྱེད་དོ། །ཞེས་གསུངས་པའི་ཕྱིར། ༼༤ཇི༽ཐལ་འགྱུར་བ་རྫུན་ཚིག་ཀྱང་འཇིག་རྟེན་ཤེས་ངོའི་ལོག་པའི་ཀུན་རྫོབ་ཏུ་འདོད་པས། འདིར་ཡང་ལོག་པའི་ཀུན་རྫོབ་ཏུ་འཇོག་དགོས་སམ་དཔྱད་དེ་ཡུལ་ཅན་ལ་ཞིབ་ཆ་གྱིས། ༼༤༽རྒྱང་ཕན་གྱི་འབྱུང་བ་ལས་གྱུར་པའི་སེམས་ལ་སོགས་པ་དང༌། རིག་པ་ཅན་གྱི་བེམ་པོ་སོགས་ཀྱང་ལོག་པའི་ཀུན་རྫོབ་སྟེ་ཀུན་རྫོབ་ལོག་པ་ཡིན་པའི་ཕྱིར་ཏེ། ༼༤ཉི༽འདི་ལ་ཁ་ཅིག་བཞི་བརྒྱ་པའི་འགྲེལ་པར། རང་གི་སྡེ་པ་རྣམས་ནི་བྱེ་བྲག་པ་ལྟར། རྫས་ཀྱི་རྡུལ་ཕྲ་རབ་ཁས་བླང་བར་མི་རིགས་སོ། །ཞེས་གསུངས་ལ། བྱེ་རིག་གཉིས་གྲུབ་

― GTD002_Page_0176 ―

^{[མ་དཔེ་གཟིགས་ན་འདིར་གནོན།]}

[Full Size]

མཐའ་སྤྱི་འདྲ་བས་འདིས་ཀྱང་རྡུལ་རྫས་ཡན་གར་བ་འདོད་པ་ཡིན་ཟེར་ཡང༌། རྣམ་འགྲེལ་ངེས་ཀྱི་ཊཱིཀ་ཆེན་རྣམས་གུང་བསྒྲིགས་ན་བདེ་སོགས་ཕྱི་ནང་གི་བེམ་པོར་འདོད་པའི་གཞན་སྡེའི་ལུགས་གཉིས་བྱུང་བ་ལས་བྱེ་རིག་གཉིས་བདེ་བ་ནང་གི་བེམ་པོར་འདོད་ཅིང་བདག་དང་འདུ་འབྲེལ་གྲུབ་པའི་ཤེས་པ་ལྟར་མྱོང་བར་འདོད་པ་ཉིད་ལ་མངོན་ནོ། ། ༼༦༽དེའི་རང་འགྲེལ་ལས། ནི་ཞེས་བྱ་བ་ནི་བསྣན་པའི་དོན་ནམ་གོ་རིམ་བཟློག་པའོ། །ཞེས་གསུངས་པའི་ཕྱིར། ༼༤ཙི༽འདི་ལ་འགྱུར་ཁ་ཅིག་ཏུ། ནི་ཞེས་པ་ངེས་པར་བཟུང་བའམ་གོ་རིམ་བཟློག་པའོ། །ཞེས་འབྱུང་ལ། ནི་ཞེས་པ་ཡི་གེ་འབྲི་སྣོན་གྱིས་བསྣན་པ་ཁོ་ནའི་དབང་དུ་བྱས་ཏེ་ཀུན་བཏགས་ཞེས་པའི་མཇུག་ཏུ་བསྣན་ཟེར་ན། དེ་ནི། ཀུན༼ཁ༽་བཏགས་ནི། ཡང༼ཀ༽་དག་མིན། ཞེས་གོ་རིམ་བཟློག་པ་རང་གིས་ཆོག་འདུག་པས། དཔེ་ཁ་ཅིག་ཏུ་བརྣན་ནས་སམ། ཞེས་ར་མགོ་བྱས་འདུག་པ་ངེས་བཟུང་ལྟ་བུ་ཞིག་གི་བརྡ་རྙིང་ཡིན་ནམ་དཔྱད་དེ་གང་ལྟར་རྟོག་བཏགས་ཀྱི་སླད་དང་འདྲེས་པ་རྣམས་ལོག་པའི་ཀུན་རྫོབ་ཡིན་གྱི། གཞན་མིན་ཞེས་ངེས་བཟུང་གི་ཚིག་ཅིག་ཐོབ་ཚོད་དུ་འདུག་གོ །༈ ༼༡ན༣༧༽ ༼༤༽ བདེན་བཞི་ལ་ཤེས་པ་དང༌། སྤངས་པ་དང༌། མངོན་དུ་བྱ་བ་དང༌། སྒོམ་པར་བྱ་ལ། དོན་དམ་པར་ཤེས་སྤངས་མངོན་བསྒོམ་བཞི་བྱར་མེད་པར་འདོམས་པའི་གདམས་ངག་ཡིན་པའི་ཕྱིར། ༼༤ཚི༽བསྡུ་བར་བདེན་པ་བཞི་པོ་ཐམས་ཅད་ཀྱང༌། ཡོངས་སུ་ཤེས་པར་བྱ་བ་དག་ཡིན་པ་དེའི་ཚེ། ཅིའི་ཕྱིར་སྡུག་བསྔལ་གྱི་བདེན་པ་དག་ཁོ་ན་ཡོངས་སུ་ཤེས་པར་བྱ་ཞེས་གསུངས་ཞེ་ན། སྨྲས་པ།

― GTD002_Page_0177 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་གྱི་བདེན་པ་ནི། མཚན་ཉིད་གཉིས་ཀྱིས་ཡོངས་སུ་ཤེས་པར་བྱ་བ་ཡིན་ཏེ། རང་གི་མཚན་ཉིད་དང་སྤྱིའི་མཚན་ཉིད་ཀྱིས་སོ། །དེ་ལས་གཞན་པ་དག་ནི་རང་གི་མཚན་ཉིད་ཁོ་ནས་ཏེ། ཞེས་གསུངས་ཤིང༌། གཞན་ཡང་གསུངས་མོད་ཀྱང་ནད་དང་དེའི་རྒྱུ་ལ་སྦྱར་བའི་དཔེ་འདིའི་སྟེང་ནས་དཔྱད་ན་དཀའ་གནས་སུ་མི་སྣང་ངོ༌། ། ༼༧༽མཛོད་ལས། སེམས་ཅན་བརྗོད། རྒྱུད་དུ་གཏོགས་ཞེས་པ་ཙམ་མོ། ། ༼༡༽དེ་ལ་ཁོ་ན་རེ། བསོད་གྲགས་སོགས་དེ་ཆོས་ཅན། ཉེར་ལེན་གྱི་ཕུང་པོ་ཡིན་པར་ཐལ། སྡུག་བདེན་ཡིན་པའི་ཕྱིར། ༼༡བ༣༧༽ ༼༤༽ གསེར་འཕྲེང་ལས། ཀུན་འབྱུང་ལ་དེས་ཁྱབ་ཀྱང༌། སྡུག་བདེན་ལ་དེས་མ་ཁྱབ་པ་ནི། ཞེས་གསུངས་པའི་ཕྱིར། ༼༤ཛི༽བསྡུ་བར་ཡང་ཀུན་འབྱུང་བའི་བདེན་པ་གང་ཡིན་པ་དེ་ནི་སྡུག་བསྔལ་གྱི་བདེན་པ་ཡང་ཡིན་མོད་ཀྱི། སྡུག་བསྔལ་གྱི་བདེན་པ་ཡིན་ལ། ཀུན་འབྱུང་བའི་བདེན་པ་མ་ཡིན་པ་ཡང་ཡོད་དེ། ཞེས་གསུངས་ལ། མཛོད་ལས། སྡུག་བསྔལ་ཀུན་འབྱུང་འཇིག་རྟེན་དང༌། །ལྟ་གནས་སྲིད་པའང་དེ་དག་ཡིན། །ཞེས་རྣམ་གྲངས་སུ་གསུངས་སོ། །འདིའི་སྡུག་ཀུན་དངོས་ལ་མི་བྱེད་པར། སྒྲས་བརྗོད་ཙམ་དུ་འདོད་པའང་མི་རིགས་ཏེ། འོག་ཏུ་གནས་དྲུག་པར། བདེན་པ་དག་ནི་བཞིར་བཤད་དོ། །ཞེས་པའི་བཤད་པའང་དེ་ལ་བྱེད་དགོས་པས་འདི་དངོས་མིན་ན། དངོས་དེ་གང་དུའང་མ་བཤད་པར་ཐལ་བས་སོ། །དེས་ན་མཆིམས་ཊཱིཀ་ལས། འདིར་ཟག་བཅས་འབྲས་བུའི་ཆ་ཐམས་ཅད་ནི་སྡུག་བསྔལ་དང༌།

― GTD002_Page_0178 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཉིད་རྒྱུར་གྱུར་པའི་ཀུན་འབྱུང་དང༌། ཞེས་ལྡོག་ཆ་ནས་འབྱེད་པར་གསུངས་པས། བྱེ་སྨྲས་འཇོག་མཚམས་འདི་ཁྱབ་ཆེ་བར་སྣང་ལ་མདོ་སྡེ་པས་ནི་ཧ་ཅང་ཁྱབ་ཆུང་སྟེ། མདོ་ལས། ཀུན་འབྱུང་བའི་བདེན་པ་གང་ཞེ་ན། གང་འདི་དགའ་བའི་འདོད་ཆགས་དང་ལྷན་ཅིག་པའི་སྲེད་པ་སྟེ། དེ་དང་དེ་ལ་མངོན་པར་དགའ་བ་ཅན་ཡིན་ནོ། །ཞེས་པའི་ལུང་ལ་བརྟེན་ནས་སྲེད་པ་ཁོ་ན་ཀུན་འབྱུང་དུ་འདོད་ཀྱང༌། མདོ་དེ་ནི་གཙོ་བོའི་དབང་དུ་བྱས་པའམ། མངོན་པར་འགྲུབ་པའི་རྒྱུའི་དབང་དུ་བྱས་པ་ཡིན་ནོ། ། ༼༥༽ཁམས་གོང་མའི་སྐྱེ་བ་འཕེན་བྱེད་ཀྱི་ཉོན་མོངས་ཆོས་ཅན། ། ༼༤ཝི༽ཁ་ཅིག་གོང་མའི་རྣམ་སྨིན་གྱི་སྐྱེ་བ་འཕེན་པའི་ཉོན་མོངས་ཡོད་ན་རྣམ་སྨིན་ཡིད་འོང་འབྱིན་པའི་ལུང་མ་བསྟན་དུ་འགྱུར་རོ། །ཟེར་ཡང༌། འཕེན་བྱེད་ཀྱི་རྒྱུ་གསུམ་མེད་པར་འདོད་པ་དེ་བས་ཀྱང་མི་རིགས་སོ། །༼༡ན༣༨༽ ༼༢༽ ཡང་ཁ་ཅིག་ན་རེ། སྡུག་བསྔལ་ལ་དབྱེ་ན། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་གསུམ་དབྱེར་ཡོད་ཟེར་ན། དེ་གསུམ་གང་རུང་ཡིན་ན། སྡུག་བསྔལ་ཡིན་དགོས་པར་ཐལ། འདོད་པའི་ཕྱིར། འདོད་ན། ཟག་བཅས་ཀྱི་ཚོར་བ་བདེ་བ་ཆོས་ཅན། ༼༤ཞི༽ཟག་བཅས་ཀྱི་ཚོར་བ་བཏང་སྙོམས་ལ་ཁྱབ་པ་འདུ་བྱེད་ཅེས་བརྗོད་པའི་རྒྱུ་མཚན་ནི། ཟག་བཅས་ཀྱི་ཚོར་བ་བདེ་སྡུག་གང་སྐྱེས་ཀྱང༌། འགག་པའི་ཚེ། དེའི་ངོ་བོར་བག་ལ་ཞ་ནས་ཆུད་མི་ཟ་བར་གནས་ཏེ། རྐྱེན་དང་འཕྲད་ཚེ་ལྡང་རུང་དུ་གནས་པ་སྟེ། གསོད་པའི་ཁྲིམས་མ་ཁྲོལ་བར་གནས་སྐབས་བདེ་བ་མྱོང་ཡང་མཐར་སྡུག་བསྔལ་

― GTD002_Page_0179 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱིན་པའི་ཁྲིམས་ཀྱིས་ཟིན་པ་ལྟ་བུ་སྟེ། བདེ་ལམ་སོགས་ལས་ཤེས་པར་བྱའོ། ། ༼༥༽དེ་བཅུ་དྲུག་ལྟ་ལོག་བཅུ་དྲུག་སྤྱད་པ་ལྡོག་ཆེད་དུ་གྲུབ་མཐའ་བཞི་ཀ་ལ་གྲུབ་པའི་ཕྱིར་ཏེ། ༼༤ཟི༽ཁྱད་ཆོས་བཅུ་དྲུག་ལྟ་ལོག་བཅུ་དྲུག་གི་གཉེན་པོར་སྦྱོར་ཚུལ་ལ་མི་གཙང་བའི་རྫས་སོ་གཉིས་སོགས་སུ་ཕྱེ་སྟེ་དཔྱད་པའི་ཚུགས་ཐུབ་ཀྱི་བདག་གཅིག་པུ་བས་སྟོང་བར་སྒོམ་པ་གཙང་བར་འཛིན་པའི་གཉེན་པོར་སྦྱར་རུང་ཡོད་སྣང་ཡང༌། རྣམ་པར་གཏན་ལ་དབབ་པ་བསྡུ་བ་ལས། ཅིའི་ཕྱིར་སྡུག་བསྔལ་གྱི་བདེན་པ་རྣམ་པ་བཞིས་བལྟ་བར་བྱ་ཞེ་ན། སྨྲས་པ། ཕྱིན་ཅི་ལོག་རྣམ་པ་བཞིའི་གཉེན་པོར་ཏེ། དེ་ལ་རྣམ་པ་གཅིག་ནི་ཕྱིན་ཅི་ལོག་གཅིག་གི་གཉེན་པོའོ། །རྣམ་པ་གཅིག་ནི་ཕྱིན་ཅི་ལོག་གཉིས་ཀྱི་གཉེན་པོའོ། །རྣམ་པ་ཐ་མ་གཉིས་ནི་ཕྱིན་ཅི་ལོག་གཅིག་གི་གཉེན་པོའོ། །ཞེས་གསུངས་པས། གཙང་བདེ་གཉིས་གཉེན་པོ་གཅིག་ལ་སྦྱར་ཞིང༌། བདག་ཏུ་ལྟ་བ་ལ་གཉེན་པོ་གཉིས་སྦྱོར་དགོས་ཏེ། རེད་མདའ་བའི་ཀུན་བཏུས་ཊཱིཀྐར། གཙང་བ་དང་བདེ་བའི་གཉེན་པོ་ནི་སྡུག་བསྔལ་བའི་རྣམ་པ་ཡིན་ནོ། །ཞེས་གསུངས་པའི་ཕྱིར། ལོག་ཞུགས་ལྷག་མ་གསེར་འཕྲེང་དུ་ལྟ་ཞིང༌། གཅིག་པུ་ནི་དུས་དང༌། འགྱུར་བ་ནི་རྩ་བའི་རང་བཞིན་གྱི་རྣམ་འགྱུར་ཡིན་ལ། སྡུག་བསྔལ་ཐར་བར་འཛིན་པ་ནི། རྒྱལ་དཔོག་པའི་གཞུང་ལས། ཁ་བ་རྒྱ་སྤོས་ཀུ་མུད་དང༌། །བ་ཞོ་བ་མོ་མུ་ཏིག་མདོག །གདུགས་དཀར་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །

― GTD002_Page_0180 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པ་སྟེ། བཤེས་སྤྲིང་དུ། ས་ཆུ་མེ་རླུང་ཉི་ཟླ་བྲལ་ཐོབ་མཛོད། །ཅེས་ཟུར་ཟ་བ་ཡང་དེ་ཡིན་ལ། བརྟགས་པ་མཐའ་བཟུང་གི་དེ་ལུགས་འདིར་ཡོད་ཀྱང་སྡུག་ཀུན་གཉིས་སུ་ཕྱེ་བའི་སྡུག་བདེན་ཡིན་ལ། གྱ་ནོམ་པར་འཛིན་རྒྱུའི་བསམ་གཏན་གྱི་བདེ་བ་ཀུན་འབྱུང་ཡིན་པས་མི་འདྲའོ། །བྱེ་སྨྲས་ཐར་པ་ལྡོག་པ་འདོད་ཀྱང་མི་ལྡོག་པའི་ཐར་པ་མེད་པར་མི་འདོད་ལ། དེ་ལོག་པ་ཡང༌། འབྲས་ལས་ཉམས་པ་འཆི་བ་མེད། །ཅེས་སླར་འཁོར་བར་འཁོར་བ་མི་སྲིད་པས་འདི་ལོག་ཞུགས་སུ་འགྲོ་དོན་མེད་དོ། །རྒྱན་བཟང་བས། བདག་གཙོ་བོ་སོགས་རྒྱུ་གཅིག་པུ་དང༌། སྒྲའི་ཚངས་པ་འགྱུར་བས་བྱས་པར་འཛིན་པ་ཞེས་གསུངས། ༼༦༽དེ་དེའི་མཚན་ཉིད་ཡིན་པའི་ཕྱིར། ཁྱབ་སྟེ། ༼༤འི༽རྣམ་འགྲེལ་ལས། གཟུང་དང་འཛིན་པའི་རྣམ་པ་ལས། །མཚན་ཉིད་གཞན་ནི་ཡོད་མ་ཡིན། །ཞེས་སོགས་སྐབས་དུ་མར་༼༧༽མཚན་ཉིད་ཀྱིས་མཚོན་པ་ལ་མཚན་ཉིད་ཐོག་མར་རྟོགས་པ་ལ་ལྟོས་པས། མཚན་ཉིད་རྫས་ཡོད་དང༌། མཚོན་བྱ་དེ་ལ་ལྟོས་པའི་བཏགས་ཡོད་དུ་བཤད་པའི་ཕྱིར། ༼༡བ༣༨༽ ༼༤༽ འཕེན་བྱེད་དགེ་བའི་ལས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ལས་ཀྱི་ཀུན་འབྱུང་བདེན་པ་ཡིན་པའི་ཕྱིར། འདོད་མི་ནུས་ཏེ། བླང་བྱ་ཡིན་པའི་ཕྱིར་ཞེས་སྤྱི་དོན་རོལ་མཚོར་བཤད་པའི་ཕྱིར། ༼༥༽བཞི་བརྒྱ་པ་ལས། ཡུལ་ནི་དགེ་བས་ཡིད་འོང་ན། །ཡུལ་དེའང་ངན་པར་རྩི་བ་ཡིན། །གང་ཞིག་བཏང་བ་ཤེས་འགྱུར་བ། །དེ་གྲུབ་པ་ཡིས་ཅི་ཞིག་བྱ། །ཞེས་དང༌། དེའི་འགྲེལ་པ་ལས།

― GTD002_Page_0181 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུལ་ཡིད་དུ་འོང་བ་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ཞེས་བྱ་བ་འདོད་པའི་ཡོན་ཏན་ལྔའི་བདག་ཉིད་གང་ཡིན་པ་དེ་ནི། དགེ་བའི་ལས་ཀྱིས་འཐོབ་ན་དེ་ཉིད་ཐར་པ་འདོད་པའི་སེམས་ཅན་རྣམས་ཀྱིས་མི་གཙང་བས་བསྡུས་པའི་ཁྱི་ལྟར་སྨད་པར་འགྱུར་རོ། །ཞེས་གསུངས་པའི་ཕྱིར། ༼༤ཡི༽བཞི་བརྒྱ་པ་འདིར་འཕེན་བྱེད་དགེ་བ་ཡང་བླང་བྱ་མ་ཡིན་པར་གསུངས་ལ། འཕངས་འབྲས་བདེ་བ་ཡང་སྡུག་བསྔལ་གྱི་རང་བཞིན་ཅན་དུ་གསུངས་པས། མཛོད་རང་འགྲེལ་ལས། རེ་ཞིག་བདེ་བ་ལ་སྐུར་བ་འདེབས་པ་དེ་ལ་འདི་འདྲི་བར་བྱ་སྟེ། ཞེས་སོགས་ཀྱི་ཕྱོགས་སྔ་ཡང་འཕགས་པ་ལྷ་ཡིན་པར་ཟླ་བས་གསུངས་སོ། །དེ་ལྟར་འདོད་པ་མཚུངས་པ་མིན་ནམ་ཞེ་ན། མིང་ཙམ་ལས་བློ་རྩེ་མི་གཅིག་སྟེ། དབུ་མ་པས། སྡུག་བསྔལ་ཆུང་འབྲིང་ཆེ་གསུམ་ལོག་ཙམ་གྱི་ཆ་ལ་བདེ་བ་ཆེ་འབྲིང་ཆུང་ངུར་བཏགས་པ་ལས་གཞན་དུ་བདེ་བ་རང་མཚན་པ་མྱོང་རྒྱུ་མེད་པར་འདོད་ལ། དངོས་སྨྲས་ཕར་བཏགས་ཀྱི་འཇོག་མཚམས་ཕྲ་མོ་མི་ཤེས་པས་སྡུག་བསྔལ་ལས་ལོགས་སུ་བདེ་བ་མེད་པར་གོ་ནས་སྐུར་འདེབས་སུ་བཤད་དེ། དེ་ནི་ལུགས་འདི་ལ་བདེན་པ་གཉིས་ཆར་ལས་ཉམས་པ་ཡིན་པའི་ཕྱིར། བརྒྱ་བའི་འགྲེལ་པར། གང་གིས་ན་སློབ་དཔོན་དབྱིག་གཉེན་གྱིས་འདི་སྐད་དུ། རེ་ཞིག་བདེ་བ་ལ་སྐུར་བ་འདེབས་པ་ཞེས་བྱ་བ་ལ་སོགས་པ་གསུངས་པ་སློབ་དཔོན་འཕགས་པ་ལྷའི་ཞལ་སྔ་ནས་ལ་དངོས་

― GTD002_Page_0182 ―

^{[མ་དཔེ་གཟིགས་ན་འདིར་གནོན།]}

[Full Size]

པོའི་རང་བཞིན་ཉིད་དུ་གསུངས་པ་གང་ལ་ཡོད་ཅེས་པ་ནས། རྣམ་པར་རྟོག་པ་ལོག་པ་ཙམ་ལས་འབྱུང་བའི་ཕྱིར་དང་སྐྱེས་མ་ཐག་ཏུ་འཇིག་པའི་ཕྱིར། བདེ་བ་སྡུག་བསྔལ་བ་ཉིད་དོ། །ཞེས་པ་ནས། སློབ་དཔོན་ཀླུ་སྒྲུབ་ཞབས་ཀྱི་ལམ་ལས་ནི། །ཞེས་པ་ནས། དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་བཤད་དོ། །ཞེས་འཇུག་པ་ཡང་ཚུར་དྲང་ངོ༌། །མཛོད་འགྲེལ་ལས། དེ་ལྟ་བས་ན་བདེ་བའི་ཚོར་བ་ནི་རང་གི་མཚན་ཉིད་ཀྱིས་ཡོད་པ་ཁོ་ནའོ། །ཞེས་དང༌། སྡུག་བསྔལ་ཆུང་ངུ་ལ་སོགས་པ་བདེ་བ་ལ་སོགས་པའི་ཚོར་བར་རྣམ་པར་བཞག་ཏུ་མི་རུང་ངོ༌། །བསམ་གཏན་གསུམ་པ་ན་བདེ་བ་ཡོད་དོ། །ཞེས་འབྱུང་བས། སྡུག་བསྔལ་ཆུང་ངུར་ཡང་འགྱུར་ལ་ཞེས་སོགས་རྩོད་ཚུལ་མང་ཡང་བྲིར་མ་ལངས་ཏེ། མཛོད་འགྲེལ་གནས་དྲུག་པ་དང༌། བརྒྱ་བའི་རབ་བྱེད་གཉིས་པ་དང་བདུན་པའི་འགྲེལ་པ་སོགས་ལས་ཁོང་དུ་ཆུད་པར་བྱའོ། །དོན་བསྡུས་ན་ལམ་རིམ་ཆུང་ངུ་ལས། ད་ལྟའི་ཚོར་བ་བདེ་བ་ལ་སོགས་པ་ཕལ་མོ་ཆེ་ཞིག་ནི་སྡུག་བསྔལ་ཕྱིར་བཅོས་པ་ལ་བདེ་བའི་བློ་སྐྱེས་པ་ཡིན་གྱི། ཞེས་པ་ནས། སྡུག་བསྔལ་ཆུང་ངུ་རིམ་གྱིས་འགག་པའི་ཚེ་བདེ་བ་རིམ་གྱིས་སྐྱེས་པར་སྣང་བ་ཡིན་གྱི། ངོ་བོ་ཉིད་ཀྱི་བདེ་བ་ནི་མ་ཡིན་ཏེ། སླར་ཡང་བསྡད་དྲགས་ན་སྔར་ལྟར་སྡུག་བསྔལ་སྐྱེ་བའི་ཕྱིར་རོ། །ཞེས་གསུངས། ༼༧༽བརྒྱ་འགྲེལ་པ་ལས། དེ་རྣམས་ལ་ཆོས་ལ་ཆགས་པ་འཁོར་བའི་བཙོན་རའི་ཁང་པར་འཆིང་བ་ཉིད་ཡིན་ཏེ། ཞེས་གསུངས་པའི་ཕྱིར།

― GTD002_Page_0183 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱབ་སྟེ། དེའི་རྒྱུ་མཚན་གྱིས་༼༤རི༽འཇིག་རྟེན་ན་ཆོས་སུ་གྲགས་པ་འཕེན་བྱེད་བསོད་ནམས་ཀྱི་ལས་སོགས་འཁོར་བའི་རྒྱུར་འགྲོ་བས། ༼༡ན༣༩༽ ༼༡༽ དེ་འདྲའི་ཆོས་སྤང་དགོས་པར་རྡོ་རྗེ་གཅོད་པར་བཤད་པའི་ཕྱིར་ཏེ། བརྒྱ་བའི་འགྲེལ་པར་མདོ་དྲངས་པ་ལས། གང་གི་ཕྱིར་ཆོས་ཀྱི་རྣམ་གྲངས་འདི་གཟིངས་དང་འདྲ་བར་ཀུན་ནས་ཤེས་པ་རྣམས་ཀྱིས་ནི་ཆོས་རྣམས་ཉིད་སྤང་བར་བྱ་བ་ཡིན་ན། ཆོས་མ་ཡིན་པ་དག་ལྟ་ཅི་སྨོས། ཞེས་གསུངས་པའི་ཕྱིར་རོ། ། ༼༤ལི༽འདིའི་ཆོས་གསུང་རབ་དང༌། ཞེས་པ་སྤོང་བ་སྒྲ་ཇི་བཞིན་དུ་མི་འཛིན་པ་དང་མདོ་སྔ་མའི་དོན་བདེན་ཞེན་སྤོང་བ་ཡིན་ནམ་བརྟགས་དགོས། ༼༢༽དེ་ལ་ཁོ་ན་རེ། དེ་ཆོས་ཅན། སྤང་བྱ་མ་ཡིན་པར་ཐལ། དགེ་བ་ཡིན་པའི་ཕྱིར་ན་མ་ཁྱབ་སྟེ། དགེ་བ་ཡིན་ཀྱང་ཟས་དུག་ཅན་ལྟར་འཁོར་བར་འཆིང་བྱེད་ཡིན་པས་སྤང་དགོས་པའི་ཕྱིར། ༼༤ཤི༽རྣམ་འགྲེལ་ལས། གཅིག་ཏུ་དེ་ནི་སྡུག་བསྔལ་མིན། །ཕལ་ཆེར་དུག་བཅས་ཟས་བཞིན་ནོ། །ཞེས་གསུངས། ༈ ༼༣༽ཡང་ཁོ་ན་རེ། ལུང་རིགས་གཏེར་མཛོད་པ་སོགས་དེ་གང་རུང་ལ་སྤང་བྱ་མི་དགོས་པར་ཐལ། སྡུག་བདེན་དུ་གྱུར་པའི་འཕགས་པ་ཡོད། ཀུན་འབྱུང་བདེན་པར་གྱུར་བའི་ཚོགས་སྦྱོར་ཡོད་པའི་ཕྱིར། དང་པོ་གྲུབ་སྟེ། ལས་ཉོན་གྱིས་འཁོར་བར་སྐྱེ་བ་ལེན་པའི་འབྲས་གནས་དང་པོ་གསུམ་ཡོད་པའི་ཕྱིར་ན་མ་ཁྱབ། བསོད་གྲགས་སོགས་ཀྱིས། ཁྱབ་སྟེ། དེ་དག་སྡུག་བདེན་ཡིན་པའི་ཕྱིར་ཏེ། ཀུན་བཏུས་ལས། སྡུག་བསྔལ་

― GTD002_Page_0184 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་པའི་ཕྱིར་ན་མ་ཁྱབ་༼༤སི༽བསོད་གྲགས་ཀྱིས་ལུང་འདི་དང་གོང་གི་རྣམ་འགྲེལ་གྱི་ལུང་ལ་བརྟེན་ནས། ཉན་ཐོས་སྒོམ་ལམ་པ་ཡང་འཁོར་བ་པ་ཡིན་པར་བཤད་དོ། །༼༡བ༣༩༽ ༼༧༽ རིན་ཆེན་འཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཞེས་གསུངས་པའི་ཕྱིར། ༼༤ཧི༽ལུང་འདིའི་ཕུང་པོར་འཛིན་པ་ཆོས་ཀྱི་བདག་འཛིན་ལ་བྱེད་ན། ཇི་སྲིད་དང་དེ་སྲིད་ཀྱི་དོན་རང་རྒྱུད་པས་བཤད་མི་ནུས་སོ་ཞེ་ན། ཡིག་ཆའི་དྲངས་མཚམས་འདི་ལྟར་ན། ཆོས་ཀྱི་བདག་འཛིན་ལ་ལམ་གསུམ་སྐྱེད་པའི་ནུས་པ་མ་ཉམས་པར་ཡོད་ཀྱི་བར་དུ་ངར་འཛིན་དེ་འབྱུང་ཞེས་དྲངས་དགོས་ལ། ཨ་བྷྱཱ་ཀ་ར་རང་གིས་ཉན་རང་རྣམས་སྟོང་ཉིད་རྟོགས་པར་བཞེད་འདུག་ཀྱང༌། དེས་རང་རྒྱུད་པ་སོགས་ཀྱིས་ལུང་དེའི་དགོངས་པ་ལེན་ཚུལ་སྐབས་ཀྱི་ཐུབ་དགོངས་ལས། རིན་ཆེན་འཕྲེང་བར་གསུངས་རྣམས་ཀྱང༌། ཁ་ཅིག་སྐད་ཅིག་མའི་བདག་མེད་པ་དང༌། ཁ་ཅིག་ཆོས་ཀྱི་བདག་མེད་དུ་སྦྱར་ཏེ། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་རིགས་རྣམས་ཀྱི་ཐུན་མོང་བ་ཉིད་དུ་གསུངས་པའི་ཕྱིར་རོ། །ཞེས་ཟེར་རོ། །ཞེས་གསུངས་ཏེ། ཕུང་པོ་རང་རྐྱ་བར་ཞེན་པ་ལས་ང་རང་རྐྱ་བར་ཞེན་པ་འབྱུང་ཞེས་སོགས་སུ་སྦྱོར་རྒྱུ་ཡིན་ནམ་དཔྱད་པར་བྱའོ། ། ༼༡ན༤༠༽ ༼༢༽ ཡང་ཁ་ཅིག །སྡུག་བདེན་ཕྲ་མོ་མེད་པར་

― GTD002_Page_0185 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། སྡུག་བདེན་ཡིན་ན། སྡུག་བདེན་རགས་པ་ཡིན་དགོས་པའི་ཕྱིར་ན། ཐུན་མོང་གི་དབང་བྱས་ནས་མ་ཁྱབ། ༼༤ཨི༽ཐུན་མོང་སྨོས་པ་ཐལ་འགྱུར་བས་བདེན་འཛིན་གྱིས་ཐོག་མའི་མ་རིག་པ་བྱས་པའི་འཕངས་འབྲས་རྣམས་སྡུག་བདེན་དངོས་ཡིན་ཀྱང་སྡུག་བདེན་ཕྲ་མོར་ཡང་འདོད་པའི་ཕྱིར་ཡིན་ལ། དེ་བས་ལམ་བདེན་རགས་པ་ལམ་བདེན་དུ་མི་འདོད་ཀྱང་འདིར་ཐེག་དམན་གྱི་ལམ་བདེན་རྣམས་རགས་པར་འདོད་དོ། །མི་རྟག་སོགས་བཅུ་དྲུག་ལ་འདི་བས་ཕྲ་རགས་མི་འདོད་ཀྱང་ཐལ་འགྱུར་བ་འདོད་པས། རྗེ་དྲུང་ཤེས་རབ་དབང་པོའི་དབུ་མར་ལུགས་གཉིས་ཀར་མི་རྟག་པ་ལ་ཕྲ་རགས་ཁྱད་མེད་པར་བཤད་པ་འཐད་དཀའ་འོ། ། ༼༦༽རྒྱུད་བླ་མ་ལས། མེ་གསུམ་འཆི་དང་ན་བ་དང༌། །རྒ་བའི་མེ་གསུམ། ཞེས་དང༌། ༼༤ཀུ༽དེའི་ཚིག་དོན་དར་ཊཱིཀ་ལས། འཆི་བ་དང༌། ན་བ་དང༌། རྒ་བའི་མེ་གསུམ་རིམ་པ་བཞིན་དུ། སྣོད་ཀྱི་འཇིག་རྟེན་མཐའ་དག་སྲེག་པར་བྱེད་པ་དང། དམྱལ་བའི་ལུས་སྲེག་པར་བྱེད་པ་དང། བུད་ཤིང་སྲེག་པར་བྱེད་པས། དུས་མཐའི་མེ་དང༌། དམྱལ་བའི་མེ་དང༌། ཐ་མལ་གྱི་མེ་གསུམ་པོ་དེ་དང་འདྲ་བར་ཤེས་པར་བྱ་སྟེ། ལུས་གཏན་འཇོམས་པ་དང༌། ནད་མེད་པ་འཇོམས་པ་དང༌། དར་ལ་བབས་པ་འཇོམས་པས་སོ། །ཞེས་འཇོམས་ཚུལ་སྟོབས་ཆེ་འབྲིང་ཆུང་གསུམ་ལ་སྦྱར་ནས་གསུངས་སོ། །༼༡བ༤༠༽ ༼༤༽ རྒྱུད་བླ་དར་ཊཱིཀ་ལས། ལས་ཉོན་གྱི་མྱ་ངན་ལས་འདས་པ་ཡིན་ལ།

― GTD002_Page_0186 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་སྒྲིབ་ཀྱི་ཕྱོགས་ཀྱིས་བསྡུས་པའི་དབང་གིས་འཁོར་བར་འཁོར་བའོ། །ཞེས་གསུངས་པའི་ཕྱིར། ༼༤ཁུ༽གོང་དུ་རྒྱུད་བླ་མར། གཙང་བདག་བདེ་དང་ཞེས་པ་ནས། འདིའི་བར་གྱི་ལུང་དྲངས་པ་ཐམས་ཅད་ཀྱི་གནད་བསྡུས་ན། དགྲ་བཅོམ་གཉིས་དང་དག་ས་པ་ལ་ཡང་ཡིད་ཀྱི་རང་བཞིན་གྱི་ལུས་ལེན་པའི་སྐྱེ་བ་དང༌། དེའི་རྒྱུ་ཀུན་འབྱུང་ཕྲ་མོ་ཡོད་པས། འཁོར་བ་ཕྲ་མོའམ་སྡུག་བདེན་ཕྲ་མོ་ལས་བརྒལ་མི་ནུས་ལ། དེ་མ་སྤངས་བར་དུ་ཕར་ཕྱིན་བཞིའི་ནང་གི་བདེ་བ་དམ་པའི་ཕར་ཕྱིན་ཐོབ་མི་ནུས་ཏེ། རྒྱུད་བླར། ཡིད་ཀྱི་རང་བཞིན་ཕུང་པོ་དང༌། །དེ་རྒྱུ་ལོག་ཕྱིར་བདེ་བ་ཉིད། །ཅེས་གསུངས་པའི་ཕྱིར་ཞེས་བྱ་བའི་དོན་ནོ། ། ༼༡ན༤༡༽ ༼༢༽ མཛོད་ལས། སྦྱོར་ལམ་ཆོས་མཆོག་མན་ཆད་ནི་སློབ་མི་སློབ་གང་གི་ཡང་ལམ་མ་ཐོབ་པ་སོ་སོ་ཡི། །སྐྱེ་བོར་འདོད་དོ། །ཞེས་སོ། ། ༼༤གུ༽ཐལ་འགྱུར་བ་ཡང་དེ་ལྟར་འདོད་དེ། སྐྱབས་འགྲོ་བདུན་ཅུ་པར། གང་ཞིག་འཕགས་ལམ་མ་སྐྱེས་པའི། །བྱིས་རྨོངས་སོ་སོ་སྐྱེ་བོ་དག །དེ་དག་སློབ་དང་མི་སློབ་པ། །མིན་ཞེས་བསྟན་བཅོས་ལས་བཤད་དོ། །ཞེས་གསུངས་སོ། ། ༼༣༽ཡང་ཁ་ཅིག་ན་རེ། རང་འབྲས་སྡུག་བསྔལ་དངོས་སུ་སྐྱེད་པའི་ཟག་བཅས་དེ་ཀུན་འབྱུང་བདེན་པའི་མཚན་ཉིད་ཟེར་ན། གནས་གཙང་གི་སྐྱེ་བ་འཕེན་པའི་དགེ་བའི་ལས་ཆོས་ཅན། ༼༤ངུ༽དམ་ཆོས་ཀྱི་རྟེན་འབྲེལ་ལས། འོ་ན་གནས་གཙང་དུ་སྐྱེ་བ་འཕེན་བྱེད་ཀྱི་ལས་མེད་པར་ཐལ། དམ་བཅའ་འཐད་པའི་ཕྱིར་ན་འདོད་དེ། ཞེས་ལས་འདི་མེད་པར་བཤད་དོ། །

― GTD002_Page_0187 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུ་མཚན་ཡང་རྗེ་ཡབ་སྲས་ཀྱིས། འཕགས་པས་འཕེན་བྱེད་ལས་གསར་གསོག་མེད་པའི་སྐྱོན་སྤོང་དུ་འབྲས་བུ་ཆེ་བར་འཕེན་བྱེད་ཀྱི་ལས་དེ། དེར་སྐྱེ་བའི་རྒྱུར་བསྒྱུར་བར་གསུངས་ཀྱི། འཕེན་བྱེད་དུ་བསྒྱུར་བར་མ་གསུངས་པའི་ཕྱིར། ཞེས་འདོད་ཀྱང། དེ་འདྲའི་འཕེན་བྱེད་ལས་ཤིག་མེད་ན། ཕ་རོལ་པོ་དེས་འཕེན་བྱེད་ལས་དེ་འཕགས་པས་གསར་དུ་བསག་དགོས་པས། བདེན་པ་མཐོང་ལ་འཕེན་པ་མེད། །ཅེས་པ་དང་འགལ་སྙམ་དུ་རྩོད་པའི་ཚེ། ཁྱོད་ཀྱིས་ཟེར་རྒྱུའི་ལས་དེ་འདྲ་མེད་ཅེས་ལན་འདེབས་དགོས་པ་ལ། རྗེ་ཡབ་སྲས་ཀྱིས་དེ་ཡོད་པ་གཞིར་བཞག་གི་སྟེང་ནས་རྒྱུན་སྔར་ནས་བསགས་ཟིན་ཞེས་སྐྱོན་སྤོང་མཛད་པའི་ཕྱིར་དང༌། དེ་འཕེན་བྱེད་ལས་མིན་ན་འཕགས་པས་གསར་དུ་བསགས་ཀྱང་འགལ་བ་མེད་ལ། དེ་གསར་དུ་བསགས་པས་འཕེན་བྱེད་ལས་གསར་བསགས་མེད་པར་བཤད་པ་དང་འགལ་དོན་ཡང་མེད་ལ། དེ་འཕེན་བྱེད་དང་ལས་ཀྱི་ཀུན་འབྱུང་དངོས་མིན་ན། འབྲས་བུ་སྐྱེ་བ་ཡང༌། འཕངས་འབྲས་དང་སྡུག་བདེན་དངོས་མིན་དགོས་པས། གཟུགས་ཀྱི་སྐྱེ་སྲིད་བཅུ་བདུན་མེད་པར་གསུངས་ནུས་སམ། སྤྲོ་བྱ་མང༌། ༼༡བ༤༡༽ ༼༡༽ མཛོད་ལས། གསུམ་ལམ་བདུན་ནི་ལས་ཀྱང་ཡིན། །ཞེས་གསུངས་པའི་ཕྱིར། ༼༤ཅུ༽འདི་ཡང་བྱེ་སྨྲས་ལུགས་ཡིན་གྱི། མདོ་སྡེ་པ་ལས་ཉོན་གཉིས་ཀའི་གཞི་མཐུན་འདོད་དེ། མཛོད་རང་འགྲེལ་ལས། དཔེ་སྟོན་པ་རྣམས་ན་རེ། ཆེད་དུ་བསམ་པར་བྱ་བའི་མདོ་

― GTD002_Page_0188 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་གསུངས་པའི་ཕྱིར། བརྣབ་སེམས་ལ་སོགས་པ་ཁོ་ན་ཡིད་ཀྱི་ལས་ཡིན་ནོ་ཞེས་ཟེར་རོ། །ཞེས་གསུངས་པའི་ཕྱིར། ལས་ལམ་གྱི་སྒྲ་དོན་ཡང་འདི་ཁོ་ནར་མ་ངེས་ཏེ། ལས་གྲུབ་པ་ལས། ཇི་ལྟར་ན་སེམས་པ་ལས་ཀྱི་ལམ་ཡིན་ཞེ་ན། དེ་ནི་ལས་ཀྱང་ཡིན་ལ་བདེ་འགྲོ་དང་ངན་འགྲོ་གཉིས་ཀྱི་ལམ་ཡང་ཡིན་པས་ན་ལས་ཀྱི་ལམ་མོ། །ཡང་ན་ལུས་གཡོ་བ་ལས་ཀྱི་ལམ་སྟེ། སེམས་པ་ཞེས་བྱ་བའི་ལས་རྣམ་པ་གསུམ་པོ་དེ་ལ་བརྟེན་ནས་འཇུག་པའི་ཕྱིར་རོ། །ཞེས་སོགས་གསུངས་པའི་ཕྱིར། ༼༣༽དང་པོ་གྲུབ་སྟེ། ཐེག་བསྡུས་ལས། བྱང་ཆུབ་སེམས་དཔའ་རྣམས་ཀྱི་ཤེས། །རྣམ་རྟོག་མེད་པའི་རྣམ་སྨིན་ནི། །སངས་རྒྱས་དཀྱིལ་འཁོར་གཉིས་སུ་སྟེ། །སྦྱོར་བ་དང་ནི་ཐོབ་པས་སོ། །ཞེས་གསུངས་པའི་ཕྱིར། ༼༤ཆུ༽འདི་ལ་ཐེག་བསྡུས་བཤད་སྦྱར་ལས། སྦྱོར་བ་དང་ནི་ཐོབ་པས་སོ། །ཞེས་བྱ་བ་ནི་རྣམ་པར་སྨིན་པའི་དོན་བརྗོད་ཀྱི་འདི་རྣམ་པར་སྨིན་པའི་རྒྱུ་མ་ཡིན་ཏེ། དེའི་གཉེན་པོ་ཡིན་པའི་ཕྱིར་རོ། །འདི་ནི་རྣམ་པར་སྨིན་པའི་དོན་གཞན་ཡིན་ཏེ། འདི་ལྟ་སྟེ། བདག་པོའི་དོན་ནོ་ཞེས་གསུངས་ཀྱང༌། བཤད་སྦྱར་འདིའི་གོང་འོག་ཏུ་བྱེ་སྨྲའི་བཤད་པའི་ཤན་ཞུགས་པ་མང་ཚོད་དུ་སྣང་ལ། ཐེག་བསྡུས་འགྲེལ་པ་དབྱིག་གཉེན་གྱིས་མཛད་པ་ལས། རྣམ་པར་མི་རྟོག་པའི་སྦྱོར་བ་ལ་ཞུགས་པའི་རྣམ་པར་སྨིན་པ་ནི་སྤྲུལ་བའོ། །རྣམ་པར་མི་རྟོག་པའི་དོན་ཐོབ་པའི་རྣམ་པར་སྨིན་པ་ནི་ལོངས་སྤྱོད་རྫོགས་པར་འགྱུར་རོ། །ཞེས་གསུངས་པ་གཞིར་བཞག་པར་སྣང་སྟེ། དོན་གསང་ལས།

― GTD002_Page_0189 ―

^{[མ་དཔེ་གཟིགས་ན་འདིར་གནོན།]}

[Full Size]

འདིའི་ཐད་ལྟ་ཞོག་མཚན་ཉིད་ཀྱི་དོན་མན་ཆད་འགྱུར་མི་སྣང་ངོ༌། །དག་པའི་སྐུ་གསུམ་ཐོབ་ཅེས་པའི་ཐད་ཀྱི་དབྱིག་འགྲེལ་ལས། དག་པའི་སྐུ་གསུམ་ཐོབ་ཕྱིར་དང༌། །ཞེས་བྱ་བའི་དོན་ཏེ། དག་པ་སྨོས་པ་ནི་འདི་ལྟར་སྐུ་གསུམ་པོ་དེའི་དང་པོ་ས་དང་པོ་ཉིད་དུ་ཐོབ་པར་འགྱུར་ལ། བཅུ་པ་ལ་ནི་ཤིན་ཏུ་རྣམ་པར་དག་པར་འགྱུར་རོ། །ཞེས་སོགས་གསུངས་ཏེ། སློབ་ལམ་ལ་སྦྱར་ཡང༌། ཡིག་ཆའི་འདི་ཉིད་སྐབས་དང་འབྲེལ་ལོ། །༼༡ན༤༢༽ ༼༣༽ སྔོན་གྱི་ཁ་ཅིག །༼༤ཇུ༽སྔར་དྲངས་པའི་ཀུན་བཏུས་ཀྱི་ལུང་ལམ་གྱི་བདེན་པ་གང་ཞེ་ན། ལམ་གང་གིས་སྡུག་བསྔལ་ཡོངས་སུ་ཤེས་པ་དང༌། ཀུན་འབྱུང་སྤོང་བ་དང༌། འགོག་པ་མངོན་དུ་བྱེད་པ་དང༌། ལམ་སྒོམ་པ་སྟེ། འདི་ནི་ལམ་གྱི་མཚན་ཉིད་མདོར་བསྡུས་པའོ། །ཡང་ལམ་རྣམ་པ་ལྔ་སྟེ། ཚོགས་ཀྱི་ལམ་དང༌། སྦྱོར་བའི་ལམ་དང། མཐོང་བའི་ལམ་དང། སྒོམ་པའི་ལམ་དང། མཐར་ཕྱིན་པའི་ལམ་མོ། །ཞེས་སོགས་ལ་བརྟེན་ནས། ༼༣༽ཚོགས་ལམ་ཡང་ལམ་བདེན་ཟེར་ན། ༼༡བ༤༢༽ ༼༡༽ གོ་རིམ་ཡོད་དེ། སྤྱིར་གོ་རིམ་ལ་བཤད་པའི་རིམ་པ་སེམས་བསྐྱེད་དང་རིགས་ལྟ་བུ། ༼༤ཉུ༽ཕྱིན་དྲུག་ནི་རྒྱན་ལས། རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་པ་ལྟར། ༼༡༽ངེས་དཀའ་སླའི་རིམ་པ་དང༌། ཡང་ན། དམན་དང་མཆོག་ཏུ་གནས་ཕྱིར་དང༌། །ཞེས་དམན་མཆོག་གི་རིམ་པ་ཕྱིན་དྲུག་ལྟ་བུ་སོགས་དུ་མ་ཡོད་པས་རྒྱུ་འབྲས་དོན་རིམ་བྱས་ན། རྒྱུ་དང་ལམ་དང་

― GTD002_Page_0190 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་དང༌། །ཞེས་སོགས། སྐབས་བཞི་པ་ལྟར་བཤད་ཀྱང༌། འདིར་ནི་ཡུལ་ཅན་མངོན་རྟོགས་སྐྱེ་རིམ་ཡིན་པའི་ཕྱིར་ཏེ། སྡུག་བསྔལ་ནི་ནད་ལྟར་སྡུག་བསྔལ་བར་ཤེས་དགོས་པས་དང་པོར་བསྟན། ཕྱི་ཚུལ་དག་གིས་མིན་ཞེས་གསུངས་པས། ཀུན་འབྱུང་ནི་ནད་ཀྱི་རྒྱུ་ལྟར་དེའི་རྒྱུ་སྤང་བྱར་དེ་རྗེས་སུ་རྟོགས་པས་གཉིས་པར་བསྟན། ༼༣༽རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །༼༤ཏུ༽འགོག་པ་རྒྱུད་ལ་རིག་པར་བྱ་བ་སྟེ། མངོན་དུ་བྱ་བའི་དོན་ཡིན་གྱི། རིག་པར་བྱ་ཟེར་བ་མ་བརྟགས་པ་སྟེ། བདེ་བ་ལ་གནས་པ་རིག་པས་ཆོག་ན་ཚེགས་ཆུང་ངོ༌། ། ༼༥༽བདེན་བཞི་ཆོས་ཅན། འཕགས་པའི་བདེན་པ་ཞེས་བརྗོད་པའི་རྒྱུ་མཚན་ཡོད་དེ། འཕགས་པས་གཟིགས་པ་ལྟར་གནས་ལ་བྱིས་པ་ཕལ་པས་མཐོང་བ་ལྟར་མི་བདེན་པས་དེ་ལྟར་བརྗོད་པའི་ཕྱིར་ཏེ། ཉན་ས་ལས། འཕགས་པ་རྣམས་ཀྱི་བདེན་པ་དེ་དག་དེ་ཁོ་ན་ལྟར་ཡིན་པའི་ཕྱིར་ཞེས་སོ། ། ༼༤ཐུ༽འཕགས་པའི་བདེན་པའི་སྒྲ་དོན་འདི་ཐལ་འགྱུར་བས་མི་བཞེད་དེ། དེས་འཕགས་པ་ཞེས་པ་དོན་དང་མཐུན་པར་གནས་པས། ཁྱད་པར་དུ་འཕགས་པའི་ཆ་ནས་ཡུལ་བདེན་བཞི་ལ་གཙོ་བོར་སྦྱར་ཞིང༌། འཕགས་པ་ཞེས་པ་འཕགས་པའི་གང་ཟག་ལ་བྱེད་ནའང༌། དེས་བསྟན་པའི་བདེན་པ་ཞེས་འཆད་ཀྱི་གྲུབ་མཐའ་འོག་མ་ལྟར་མི་འདོད་ལ་དེའི་ཚིག་ཟུར་གྱི་བདེན་པ་ཞེས་པའང་སྡུག་བསྔལ་བདེ་བའི་

― GTD002_Page_0191 ―

^{[མ་དཔེ་གཟིགས་ན་འདིར་གནོན།]}

[Full Size]

རང་བཞིན་དུ་དོན་ལ་མི་གནས་པ་དེ་ལ་ལྟོས་པའི་བདེན་པ་དོན་དུ་གནས་པ་ཙམ་ལ་བྱ་སྟེ། དབུ་མའི་མཐའ་དཔྱོད་སེམས་བསྐྱེད་ལྔ་པ་དང༌། མཐའ་ཆོད་པར་ཤེས་འདོད་ན་རིགས་པ་དྲུག་ཅུ་པའི་འགྲེལ་པར་ལྟའོ། ། ༼༦༽རང་རྒྱུ་ཀུན་འབྱུང་བདེན་པ་ལས་སྐྱེས་པའི་ཆ་ནས་བཞག་པའི་ཟག་བཅས་ཀྱི་དངོས་པོ་དེ་སྡུག་བསྔལ་བདེན་པའི་མཚན་ཉིད་ཆ་བཞག་སྨོས་པས་འདི་འདྲའི་གང་ཟག་གཅོད། ༼༡ན༤༣༽ ༼༡༽ ངོ་བོའི་སྒོ་ནས་སྡུག་བསྔལ་གྱི་སྡུག་བསྔལ་དང༌། འགྱུར་བའི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་གསུམ་ཡོད། ༼༤དུ༽སྡུག་བསྔལ་གྱི་དབྱེ་བ་ནི། བྱང་ས་ལས། སྡུག་བསྔལ་གཅིག་དང༌། གཉིས་ཚན་དང༌། གསུམ་ཚན་ནས་བཅུ་ཚན་གྱི་བར་ང་ལྔ་དང༌། ལྷག་མ་ང་ལྔ་སྟེ། བརྒྱ་རྩ་བཅུ་གསུངས་པའི་ནང་ནས། ལམ་རིམ་རྣམས་སུ། བདུན་ཚན་གྱི་སྐྱེ་རྒ་ན་འཆི། མི་སྡུག་པ་དང་ཕྲད་པ། སྡུག་པ་དང་བྲལ་བ། འདོད་པ་བཙལ་ཏེ་མི་རྙེད་པ་བདུན་གྱི་སྟེང་དུ། དང་པོ་ཉེར་ལེན་གྱི་ཕུང་པོ་ལྔ་སྡུག་བསྔལ་བ་སྟེ། སྤྱི་དེ་ཉིད་བསྣན་པས་བརྒྱད་གཙོ་བོར་གསུངས། སྡུག་བསྔལ་དྲུག་ནི་རིགས་དྲུག་གི་སོ་སོའི་སྡུག་བསྔལ་ལོ། །བཤེས་སྤྲིང་གི་ངེས་མེད་དྲུག་དང༌། བྱང་སའི་ངེས་མེད་དྲུག་སོགས་ལ་ཁ་ཅིག་སྦྱར་བ་ལམ་རིམ་དང་མི་མཐུན། ༈ ༼༡བ༤༣༽ ༼༣༽ ཡུམ་ལས། གཟུགས་ལ་རྣམ་པ་ཐམས་ཅད་མཁྱེན་པ་ཉིད་ཀྱིས་སྦྱོར་བར་མི་བྱེད་དེ། གཟུགས་ཉིད་ཡང་དག་པར་རྗེས་སུ་མི་མཐོང༌། ཞེས་སོགས་ཀྱིས་

― GTD002_Page_0192 ―

^{[མ་དཔེ་གཟིགས་ན་འདིར་གནོན།]}

[Full Size]

དཀོན་མཆོག་བཤད་པ་དེ་འཆད་པར་རྩ་འགྲེལ་འདི་བྱུང༌། ༼༤ནུ༽མདོའི་དོན་གཟུགས་ལ་རྣམ་མཁྱེན་གྱིས་བདེན་པར་མི་ཞེན་པ་དེ་ལ་མི་སྦྱོར་བའི་དོན་དུ་འདོད་པ་སྐབས་དོན་གཙོ་བོ་མིན་ཏེ། འདིའི་དོན་བསྡུས་ན་འགྲེལ་པར་བཤད་པའི་ཚེ་རྣམ་མཁྱེན་ལ་གཟུགས་ཀྱིས་ཚུར་མི་སྦྱོར་བར་གསུངས་པ་གང་ཞིག །ཚུར་ཞེན་པ་ཡོད་མེད་ཀྱི་ཐ་སྙད་མེད་པའི་ཕྱིར། དེས་ན་འདིའི་དོན་དེ་གཉིས་ཐ་སྙད་ཙམ་དུ་ཕན་ཚུན་ཡུལ་ཡུལ་ཅན་དང༌། དབྱིངས་དང་རིག་པར་སྦྱར་ཡང་དོན་དམ་པར་དེ་ལྟར་སྦྱར་ནས་བཞག་ཏུ་མེད་པའི་དོན་ནོ། ། ༼༧༽མཛོད་ལས། སངས་རྒྱས་སུ་བྱེད་པའི་ཆོས་དང་དགེ་འདུན་བྱེད་པའི་ཆོས། །རིམ་པ་བཞིན་མི་སློབ་པ་དང་སློབ་མི་སློབ་གཉིས་ཀ་དང་ཕྱི་མ་འདི་ལ་སངས་རྒྱས་ཀྱི་ལམ་མེད་དོ། །ཞེས་གསུངས་པའི་ཕྱིར་དང༌། རང་འགྲེལ་ལས། ཡང་ན་གང་དག་བརྙེས་པས་སྟོབས་ཀྱིས་ཆོས་ཐམས་ཅད་ཐུགས་སུ་ཆུད་པར་སྤྱོད་པའི་ཕྱིར་སངས་རྒྱས་ཡིན་པའོ། །ཞེས་གསུངས་པའི་ཕྱིར། ༼༡ན༤༤༽ ༼༡༽ ཡང་ཁོ་ན་རེ། མཛོད་ཀྱི་བྱེ་སྨྲའི་ལུགས་ལ། སངས་རྒྱས་ཀྱི་གཟུགས་ཕུང་སངས་རྒྱས་མ་ཡིན་པར་ཐལ། རང་འགྲེལ་ལས། གཟུགས་ཀྱི་སྐུ་ནི་སངས་རྒྱས་མ་ཡིན་ཏེ། སྔ་མ་དང་ཕྱི་མར་ཡང་བྱེ་བྲག་ཁྱད་པར་མེད་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། བྱེ་སྨྲ་སྔ་མ་དག་གིས་འདོད་ཚུལ་ཡིན་པའི་ཕྱིར། ༼༤པུ༽རྟེན་སངས་རྒྱས་མིན་ན། སངས་རྒྱས་ལ་ངན་སེམས་ཀྱིས་ཁྲག་ཕྱུང་བའི་མཚམས་མེད་མེད་པར་ཐལ་བའི་རྩོད་པ་དང༌། བྱེ་སྨྲས་མིག་ལ་གནོད་པས་མིག་ཤེས་ལ་གནོད་

― GTD002_Page_0193 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བཞིན། རྟེན་ལ་གནོད་པས་དེ་ལ་གནོད་པར་འཇོག་ཅེས་ལན་འདེབས་ཚུལ་མཛོད་རྩ་འགྲེལ་ན་མང་ཡང་མ་བྲིས་པས་དེར་ལྟོས། དབུ་མ་སྙིང་པོར་ཡང༌། སྟོན་པའི་རྣམ་པར་མི་རྟོག་བློ། །སྐུ་ལ་བརྟེན་པ་མ་ཡིན་ཏེ། །ལུས་ཅན་ཡིན་ཕྱིར་བ་རྫི་ཡི། །ལུས་ལ་ཇི་ལྟ་བ་བཞིན་ཟེར། །ཞེས་ཕྱོགས་སྔ་བཀོད་ནས་ལན་དངོས་མི་གསལ་ཡང༌། དེ་དག་གིས་བཀོད་པའི་རྒྱུ་མཚན་ལྟར་སྣང་སྔོན་གྱི་ལས་ཀྱི་རྣམ་པར་སྨིན་པས་བསྙུན་པ་དང༌། སྐུ་ཚེ་ཐུང་བ་དང༌། སྐྱོ་བའི་གསུང་བྱོན་པ་དང༌། གཞན་ལ་དྲི་བ་དང༌། འདོད་པ་སྤྱད་པ་དང༌། ལུས་ཀྱིས་གདུང་བ་ལམ་དུ་འཁྲུལ་པ་དང༌། ཕྱི་རོལ་པ་ལས་ཐར་ལམ་བཙལ་བར་གསུངས་པ། དྲང་དོན་དགོས་དབང་ཁོ་ན་ཡིན་པར་རྟོག་གེ་འབར་བ་ལས་ཆེས་རྒྱས་པར་འབྱུང་བས་དེར་གཟིགས་འཚལ་ལོ། ། ༼༢༽ཡང་ཁ་ཅིག །དེའི་གཟུགས་ཕུང་སངས་རྒྱས་ཡིན་ཟེར་ན། དེ་མི་འཐད་པར་ཐལ། བྱེ་སྨྲ་སྔ་མས་དེའི་རྟེན་གཟུགས་ཕུང་སངས་རྒྱས་མ་ཡིན་པར་འདོད་པའི་ཕྱིར་ཏེ། མངོན་པ་སྡེ་བདུན་གྱི་ནང་ཚན། བསྟན་བཅོས་གདགས་པ་ལས། གང་དག་སངས་རྒྱས་ལ་སྐྱབས་སུ་འགྲོ་བ་དེ་ནི་མི་སློབ་པ་སངས་རྒྱས་སུ་བྱེད་པའི་ཆོས་དག་ལ་སྐྱབས་སུ་འགྲོའོ། ། ༼༧༽གཞན་ཡང༌། གང་ཞིག་ཀུན་ལ་མུན་པ་གཏན་བཅོམ་ཞིང༌། །ཞེས་པའི་རང་འགྲེལ་ལས། གང་ཞིག་ཅེས་བྱ་བ་ནི་སངས་རྒྱས་བཅོམ་ལྡན་འདས་ཀྱི་དབང་དུ་བྱས་ནས། ཞེས་དང༌། མཛོད་ལས། སངས་རྒྱས་སུ་འགྱུར་གཞན་རང་རྒྱལ་ལ་དྲོད་རྩེ་བཟོད་པ་གསུམ་

― GTD002_Page_0194 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ཡང༌། །འཇུག་ཞེས་དང༌། ཞུ་བ་ལས། བཙུན་པ་སངས་རྒྱས་ལས་ཀྱི་ཁ་སྐོང་གི་གྲངས་སུ་བསྐང་སྟེ་བགྱིད་པར་རུང་ངམ་ཨུ་བ་ལི་མ་ཡིན་ནོ། །ཞེས་གསུངས་པ་རྣམས་ཀྱི་དོན་མ་གྲུབ་པར་ཐལ། ༼༤ཕུ༽མདོ་འདི་དག་གི་དོན་བསྡུས་ཏེ། མདོ་རྩ་བར། རྒྱལ་བ་ནི་མི་མཐུན་པ་བྱེད་པ་ཉིད་མ་ཡིན་ནོ། །ཁ་སྐོང་བ་ཉིད་མ་ཡིན་ནོ། །ཞེས་གསུངས་པའི་ཐད་ཀྱི་རྒྱ་ཆེར་འགྲེལ་ལས། དེ་ནི་དཀོན་མཆོག་གཞན་ཡིན་པས། དགེ་འདུན་གྱི་ལས་མི་མཐུན་པར་བྱེད་པ་ཉིད་མ་ཡིན་ནོ། །ཞེས་བྱ་བའི་ཐ་ཚིག་གོ །ཞེས་སངས་རྒྱས་བཅོམ་ལྡན་འདས་སངས་རྒྱས་དཀོན་མཆོག་ཀྱང་ཡིན་པ་འདྲ་ཞིག་གསུངས་པ་འཇིག་རྟེན་གྱི་གྲགས་ཚོད་དང་བསྟུན་པ་ཙམ་ཡིན་ཏེ། དགེ་སློང་བཞི་སྡེ་དེ་ལ་དགེ་འདུན་དཀོན་མཆོག་གི་ཐ་སྙད་མཛད་ནས་དེ་དང་དཀོན་མཆོག་སོ་སོ་བར་གསུངས་ཀྱང་གྲུབ་མཐའ་སུ་ཡང་མི་འདོད་པའི་ཕྱིར་རོ། །༼༡བ༤༦༽ ༼༡༽ ཐེག་ཆེན་འཕགས་པ་ཡིན་ན་རིག་གྲོལ་གྱི་ཡོན་ཏན་བརྒྱད་ཀ་དང་ལྡན་པས་ཁྱབ་པའི་ཕྱིར། ༼༤བུ༽འདི་ལྟར་བརྒྱད་དུ་ཕྱེ་བ་གསེར་འཕྲེང་ལས་ཧ་ཅང་འཐད་པའི་ཕྱོགས་སུ་མ་མཛད་ཀྱང་གསེར་འཕྲེང་ལས་བཀག་ཟེར་བ་བབ་ཅོལ་དུ་སྣང་ངོ༌། ། ༼༣༽ཡང་དེ་ཉིད་ལས། ཐམས་ཅད་མཁྱེན་པའི་ཆོས་ཉིད་ནི། །སེམས་ཅན་ཐམས་ཅད་ལ་ཡོད་པ། །མཐོང་ཕྱིར་ཇི་སྙེད་ཡོད་པ་ཉིད། །ཅེས་དང༌། ༼༤མུ༽ལུང་འདི་ལ་འཁྲུལ་ནས་ཇི་སྙེད་པ་རིག་པའི་འཛིན་སྟངས་ལ་སངས་རྒྱས་སུ་འགྱུར་རུང་གི་ཆོས་ཉིད་འཇོག་པ་མི་རིགས་ཏེ། དེ་དོན་དམ་དང༌། དེས་སེམས་ཅན་ལ་ཁྱབ་པ་ཀུན་རྫོབ་ཡིན་ཞིང༌།

― GTD002_Page_0195 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་ཕྱི་མའི་རྣམ་པ་ཅན་ཡིན་པའི་ཕྱིར། གསེར་འཕྲེང་ལས། དེས་ན་དང་པོས་ཆོས་ཉིད་རང་གི་ངོ་བོ་དང༌། ཕྱི་མས་དེ་གནས་པ་རྟོགས་པའོ། །ཞེས་གསུངས་པའི་ཕྱིར། ༼༣༽ཡང་དེ་ཉིད་ལས། དེ་ལྟར་རྟོགས་པ་གང་ཡིན་དེ། །སོ་སོ་རང་ཤེས་མཐོང་བ་ཉིད། ། ༼༤ཙུ༽ལུང་འདིའི་དོན་དར་ཊཱིཀ་ལས། ཇི་ལྟ་བ་དང་ཇི་སྙེད་པ་འཕགས་པ་རྣམས་ཀྱིས་མངོན་སུམ་དུ་རྟོགས་པ་གང་ཡིན་པ་དེ་སོ་སོ་རང་གི་རིག་པའི་ཡེ་ཤེས་ཀྱིས་མཐོང་བ་ཉིད་དོ། །ཞེས་ཡེ་ཤེས་སྔ་མ་གཉིས་ཀྱི་སྤྱི་ལ་སྦྱར་བ་ཡང་རུང་ལ། རྣམ་པ་གཅིག་ཏུ་ན་རྒྱུད་བླ་ཐལ་འགྱུར་བའི་རང་གཞུང་ཡིན་པས། འདིར། བློ་ལྡན་ཕྱིར་མི་ལྡོག་པའི་ཚོགས། །ཞེས་ཕྱིར་མི་ལྡོག་པའི་དགེ་འདུན་ཁོ་ནར་སྦྱར་བ་དང༌། དམན་སྒྲིབ་ལས་གྲོལ་བར་བཤད་པ་དང༌། ཐོགས་སྒྲིབ་ཡང་ཅི་རིགས་ལས་གྲོལ་བར་གསུངས་པ་དང༌། ཆགས་སྒྲིབ་བམ་ཉོན་སྒྲིབ་ཟད་པར་སྤངས་པ་ཡིན་པས། སྤངས་པ་འགོག་བདེན་དེ་རྣམས་རང་སྟེང་དུ་མཐོང་བའི་ཡེ་ཤེས་གཅིག་ལ་སོ་སོ་རང་རིག་པར་བཞག་ན། ཐལ་འགྱུར་བའི་གྲུབ་མཐའི་ཁོག་དང་འགྲིག་པར་སྣང་ལ། རྩ་བར་ཡང་འདིའི་མཇུག་ཏུ་གྲོལ་བའི་ཡོན་ཏན་བཤད་པ་འགྲེལ་པས་ཀྱང་ཁ་མ་ཕྲལ་བར་བཤད་དེ། དེ་ལྟ་བུའི་འབྲེལ་མ་གོ་བར་ཡོན་ཏན་བརྒྱད་དུ་སོ་སོར་བགྲང་ན་གནད་མི་གོ་བས་གསེར་འཕྲེང་གི་ཟུར་ཟ་ཡང་དེ་ལ་ཡིན་གྱི་ཡོན་ཏན་བརྒྱད་དུ་ཕྱེ་བ་ཙམ་ལ་མིན་ནམ་སྙམ། ༼༡ན༤༧༽ ༼༦༽ ཡང་ཁོ་ན་རེ།.....རོང། སློབ་ལམ་ཆོས་ཅན། མཐར་ཐུག་གི་སྐྱབས་མིན་ཏེ། བརྫུན་པ་བསླུ་བའི་ཆོས་ཅན་ཡིན་པའི་

― GTD002_Page_0196 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། ཞེས་པའི་སྦྱོར་བ་དེ། རྒྱུད་བླ་མ་ལས། བསླུ་བའི་ཆོས་ཅན་ཕྱིར། །ཞེས་དང༌། ཆོས་རྣམ་གཉིས་ཞེས་གསུངས་པའི་དོན་སྦྱོར་རྣམ་དག་ཟེར་ན། ༼༤ཚུ༽འདིའི་འཁྲུལ་གཞི་ནི་ཐོགས་འགྲེལ་ལས། ལམ་ནི་འདུས་བྱས་ཀྱི་མཚན་ཉིད་དུ་གཏོགས་ལ། འདུ་བྱས་ཀྱི་མཚན་ཉིད་དུ་གཏོགས་པ་གང་ཡིན་པ་དེ་ནི། རྫུན་པ་བསླུ་བའི་ཆོས་ཅན། གང་རྫུན་པ་བསླུ་བའི་ཆོས་ཅན་དེ་ནི། མི་བདེན་པ། གང་མི་བདེན་པ་དེ་མི་རྟག །གང་མི་རྟག་པ་དེ་སྐྱབས་མ་ཡིན་ནོ། །ཞེས་པ་འདི་ཡིན་ལ། དར་ཊཱིཀ་ལས་རྐང་པ་གཉིས་པའི་དོན་འདུ་བྱས་ཀྱི་ཆོས་ལ་རྫུན་པས་ཁྱབ་པའི་དོན་དུ་མ་སྦྱར་བར། འདུ་བྱས་ཀྱི་ཆོས་སུ་གཏོགས་པའི་ལམ་བདེན་དེ་ནི་ཞེས་མཚན་གཞིར་བཟུང་སྟེ། རང་དོན་ལམ་གྱི་བསྒྲོད་པ་མཐར་ཐུག་པ་ལྟར་སྣང་ཡང་མི་གནས་པའི་རྫུན་པ་ཞེས་སོགས་སུ་སྦྱར་བས། ༈ ༼༡བ༤༧༽ ༼༤༽ དཔེར་ན། སངས་རྒྱས་ལ་སངས་རྒྱས་ཀྱི་ཡེ་ཤེས་དོན་དམ་དང༌། དེའི་སྐུ་གཟུགས་གསེར་མདོག་ཀུན་རྫོབ་པ་དང༌། ༼༤ཛུ༽འདི་སངས་རྒྱས་སུ་འཇོག་པ་ནང་གི་སྤངས་རྟོགས་ལ་ལྟོས་དགོས་ཀྱི། དེ་མེད་པར་འཇོག་མི་ནུས་པ་ནོར་བུའི་ཟ་མ་ཏོག་དང་འདྲ་བར་གསུངས་པས་ཀུན་རྫོབ་སངས་རྒྱས་ཞེས་བཏགས་ཀྱང་སྤྱིར་དོན་དམ་པའི་སངས་རྒྱས་ཡིན་ཏེ། འོག་ཏུ་དྲངས་པའི་ཐུབ་དགོངས་ལས། དོན་དམ་པ་ནི་སྐུ་གསུམ་གྱིས་ཡང་དག་པར་བསྡུས་པའོ། །ཞེས་དང༌། དེའི་མཆན་བུར། ཆོས་ལོངས་སྤྲུལ་པའི་སྐུ་གསུམ་གྱིས་ཡང་དག་པར་བསྡུས་པ་ཞེས་འབྱུང་བའི་ཕྱིར་རོ། །ཁོ་ན་རེ། འདིའི་སྤྲུལ་སྐུ་དོན་དམ་པའི་སངས་རྒྱས་སུ་འགྲུབ་ཀྱང༌། དེས་གཟུགས་སྐུ་དོན་དམ་པའི་སངས་

― GTD002_Page_0197 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་སུ་མི་འགྲུབ་ཟེར་ན་ཡང་མིན་ཏེ། སངས་རྒྱས་སུ་འཇོག་པ་སྐུའི་སྒོ་ནས་མ་ཡིན་པར་ནང་གི་སྤངས་རྟོགས་ཀྱི་སྒོ་ནས་བཞག་པས་སྤངས་རྟོགས་ཁོ་ན་ལ་ཀུན་རྫོབ་དང་དོན་དམ་པའི་སངས་རྒྱས་ཀྱི་དོན་གཉིས་གཉིས་བཤད་པའི་སྔ་མའི་དོན་དམ་གྱི་དོན་ཚང་ལ་གཟུགས་སྐུ་དང་སྐུ་གཟུགས་གཉིས་ལ་དེ་མ་ཚང་བས་རྒྱུ་མཚན་མཚུངས་པའི་ཕྱིར་དང༌། དོན་དམ་པའི་འཇོག་ཚུལ་ཕྱི་མ་དགོས་དོན་མཆོག་གམ་མཐར་ཐུག་གི་དོན་ཚང་བར་འདྲ་ལ། དེའི་སྒོ་ནས་དོན་དམ་པའི་སངས་རྒྱས་སུ་འཇོག་རུང་ན། གཉིས་ཀ་རུང་མཉམ་ཡིན་དགོས་པའི་ཕྱིར་དང༌། འོག་ཏུ་དོན་ཡང་ཡིན། དམ་པའང་ཡིན་ལ་སངས་རྒྱས་དཀོན་མཆོག་ཀྱང་ཡིན་ན་དོན་དམ་པའི་སངས་རྒྱས་དཀོན་མཆོག་ཡིན་དགོས་པར་གསུངས་པས་ཀྱང་ཤེས་པའི་ཕྱིར་རོ། ། ༈ ༼༥༽དགེ་འདུན་ལ་འཕགས་པའི་རིག་གྲོལ་དོན་དམ་པ་དང༌། ཀུན་རྫོབ་པ་འཕགས་པ་དང་ཚོགས་སྦྱོར་བ་ལྟ་བུ་ཡིན་པའི་ཕྱིར་ཏེ། ༼༤ཝུ༽འདི་ཡང་སྒྲ་དོན་གྱི་སྟེང་ནས་ཤེས་པར་བྱ་སྟེ། ཟླ་བས། སྐྱེས་བུ་གང་ཟག་ཟུང་བརྒྱད་པོ། །མི་ཕྱེད་དགེ་འདུན་ཞེས་བཤད་དོ། །ཞེས་དང༌། དར་ཊཱིཀ་ལས། འཕགས་པའི་གོ་འཕང་ཐོབ་པ་ན། སྐྱབས་གནས་ཡང་དག་ལ་ཡང་དག་ཡིན་མིན་གྱི་ཐེ་ཚོམ་གྱི་ས་བོན་སྤངས་པས་སྐྱབས་གནས་དང་མི་ཕྱེད་པས་ཁྱབ་པའི་ཕྱིར། དགེ་འདུན་དཀོན་མཆོག་ཏུ་རྣམ་པར་བཞག་གི །སོ་སོའི་སྐྱེ་བོ་ལ་ནི་མ་ཡིན་ཏེ། ཚེ་འཕོས་ནས་སྟོན་པ་གཞན་གྱི་ཁ་ཕྱིར་འབྲང་བ་སྲིད་པའི་ཕྱིར། ཞེས་གསུངས། ༈ ༼༡ན༤༨༽ ༼༡༽ ཐུབ་དགོངས་

― GTD002_Page_0198 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། འདིར་སངས་རྒྱས་ནི་གཉིས་ཏེ། དོན་དམ་པ་ནི་སྐུ་གསུམ་གྱིས་ཡང་དག་པར་བསྡུས་པའོ། །ཐ་སྙད་པ་ནི་སྐུ་གདུང་གི་མཆོད་རྟེན་དང་སྐུ་གཟུགས་དང་མཆོད་རྟེན་དང་བྱང་ཆུབ་སེམས་དཔའི་མཆོད་རྟེན་དང་གཟུགས་ཏེ། ཞེས་གསུངས་པའི་ཕྱིར། ༼༤ཞུ༽མདོ་མྱང་འདས་ལས། བསོད་སྙོམས་གང་གསོལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དང༌། བསོད་སྙོམས་གང་གསོལ་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པའི་བསོད་སྙོམས་དེ་གཉིས་ཀའང་འབྲས་བུ་མི་མཉམ་པ་མེད་པའོ། །ཞེས་པ་འདིས་ཀྱང་སངས་རྒྱས་དང་བྱང་སེམས་ཡོན་གནས་སུ་ཁྱད་པར་མེད་པར་གསུངས་པས། བྱང་སེམས་ཐམས་ཅད་ཀྱང་ཀུན་རྫོབ་པའི་སངས་རྒྱས་སུ་འགྲུབ་སྟེ། ཟླ་བའི་སྐྱབས་འགྲོ་བདུན་ཅུ་པ་ལས་ཀྱང༌། ཤར་རིའི་ལུང་ལས། དགྲ་བཅོམ་གྱིས། །བྱང་ཆུབ་སེམས་དཔར་ཕྱག་བྱ་སྟེ། །དེ་ནི་དཀོན་མཆོག་གསུམ་གཞན་མིན། །སངས་རྒྱས་ཁུངས་སུ་གཏོགས་པར་འདོད། །ཅེས་ཉན་ཐོས་དགྲ་བཅོམ་གྱིས་ཀྱང་ཕྱག་བྱ་བར་གསུངས་པའི་རྟགས་ཀྱིས་ཀུན་རྫོབ་པའི་སངས་རྒྱས་སུ་སྒྲུབ་ལ། ཤར་རིའི་སྡེ་པའི་ལུང་ནི། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་ཇི་ལྟ་བ་དེ་ལྟར་ཡང༌། ཉན་ཐོས་དང་རང་སངས་རྒྱས་རྣམས་ཀྱི་ཡུལ་ཡང་མ་ལགས་པས། བྱང་ཆུབ་སེམས་དཔའ་ལ་ཕྱག་འཚལ་ལོ། །ཞེས་ཨ་བྷྱཱས་དྲངས་པ་དེ་ཡིན་ནམ་སྙམ་ལ། སྡེ་པ་སོ་སོའི་ལུང་གིས་རང་རང་ལ་བྱང་ཆུབ་སེམས་དཔའ་རྣམས་དགྲ་བཅོམ་

― GTD002_Page_0199 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་ཀྱང་ཕྱག་འོས་སུ་སྒྲུབ་སྣང་བ་དེར་ལྟོས། ༈ ༼༡བ༤༨༽ ༼༢༽ ཐོགས་འགྲེལ་ལས། འདིར་བསྟན་དགེ་འདུན་ཞེས་པ་འདི་ནི་ཐེག་པ་གསུམ་དང་ལྡན་པའི་སློབ་པའི་ཚོགས་ཀྱི་ཚིག་བླ་དྭགས་སོ། ། ༈ ༼༡ན༤༩༽ ༼༣༽ དགོངས་རྒྱན་ལས། བྱང་ཆུབ་སེམས་དཔའ་རྣམས་ནི་འདི་ལྟར་དགེ་འདུན་གྱིས་བསྡུས་པ་ཡང་སྟེ་དེ་རྣམས་ནི་སངས་རྒྱས་ཀྱི་མྱུ་གུ་ཐ་སྙད་པའི་སངས་རྒྱས་ཏེ་རྒྱུའི་དངོས་པོའི་རྒྱུན་གཅིག་པའི་ཕྱིར། ༼༤ཟུ༽ནྱ་གྲོ་དྷའི་མྱུ་གུ་དང་ནྱ་གྲོ་དྷའི་ལྗོན་ཤིང་གི་རྒྱུན་བཞིན་ནོ། །ཞེས་གསུངས་པའི་ཕྱིར། ༈ ༼༤༽དར་ཊཱིཀ་ལས། ཉེ་རྒྱུ་དག་ས་གསུམ་ལ་དཀོན་མཆོག་གསུམ་རིམ་གྱིས་གྲུབ་པའི་ཚུལ་དང༌། ཞེས་གསུངས་པའི་དོན་ཡོད་པའི་ཕྱིར། ༼༤འུ༽འདིའི་ཚུལ་ཡང་ས་བརྒྱད་པར་རྡོ་རྗེའི་ལུས་རྗེས་མཐུན་པ་ཐོབ་པ་དང༌། དགུ་པར་སོ་སོ་ཡང་དག་པར་རིག་པ་བཞི་རྗེས་མཐུན་པ་ཐོབ་པའོ། །ཞེས་རླུང་ལྟར་གྲགས་ལ། ས་བཅུ་པར་ལོངས་སྐུའི་འཁོར་གྱི་གཙོ་བོར་གྱུར་པའོ། །ཞེས་ཁ་ཅིག་སྨྲ་ཞིང༌། གཞན་དག་མི་སྨྲ་བའི་བརྟུལ་ཞུགས་འཛིན་ནོ། །དཔྱད་པར་བྱ་སྟེ། དབུ་མའི་མཐའ་དཔྱོད་ལས། བྱང་ཆུབ་སེམས་དཔའི་རྡོ་རྗེའི་ལུས་ཡོད་ཅིང༌། དེ་ཆོས་སྐུ་བཏགས་པ་བ་དང༌། རྡོ་རྗེའི་ལུས་མཚན་ཉིད་པ་ཡིན་པའི་ཕྱིར། ཞེས་པ་ཇི་ལྟར་དྲངས། དེར་མ་ཟད་འདི་དང་བར་པ་གཉིས་ཡི་གེ་ཙམ་མཐོང་ཡང་དོན་གྱི་འབྲེལ་མ་གོ་བའི་རྟགས་དང༌། ཐ་མ་ནི་ཡི་གེ་ཙམ་ཡང་མ་མཐོང་བའི་རྣམ་འགྱུར་ཏེ། ཁྱེད་ཅག་གིས་དེའི་སྐུ་དེ་རྣམ་པ་སངས་རྒྱས་དང་འདྲ་ཙམ་དང༌། ཆོས་ལ་ཡང་སོ་རིག་རྗེས་མཐུན་པ་ཁོ་རང་འཇོག་རྒྱུ་དང༌། དགེ་འདུན་ལ་ཡང་

― GTD002_Page_0200 ―

^{[མ་དཔེ་གཟིགས་ན་འདིར་གནོན།]}

[Full Size]

ས་བཅུ་པ་བ་ཁོ་རང་འཇོག་པར་བསམ་འདུག་ཀྱང༌། སློབ་དཔོན་འཕགས་པ་ཐོགས་མེད་ཀྱིས་སྔར་དྲངས་པའི་གཟུངས་རྒྱལ་གྱི་གླེང་གཞི་མདོར་བསྟན་གྱི་ཚིག་དེ་ཆ་གསུམ་དུ་བྱས་ནས་ས་བརྒྱད་པར་འབད་རྩོལ་རགས་པ་མེད་པར་གང་སྣང་བདེན་སྟོང་མཉམ་པ་ཉིད་དུ་གཟིགས་པས་སངས་རྒྱས་དང༌། ས་དགུ་པར་སོ་རིག་རྗེས་མཐུན་པ་བཞིའི་སྒོ་ནས་གང་ཟག་སོ་སོ་ལ་ཡུལ་གྱི་སྐད་རིགས་དང་རྣམ་གྲངས་མཐའ་ཡས་པས་ཆོས་སྟོན་པས། ཆོས་དཀོན་མཆོག་བཏགས་པ་བ་འདི་ནི་གཙོ་བོ་ལུང་གིས་བསྡུས་པ་ཡིན་ལ། དགེ་འདུན་ཡང་ས་བཅུ་པ་ནས་གཞན་དོན་གོ་རིམ་དུ་བྱེད་པའི་སྒྲུབ་པ་ཐོབ་པས། རང་ལ་སློབ་མའི་ཚོགས་མཁས་ཤིང་དུལ་བ་མཐའ་ཡས་པ་འབྱུང་བ་ལ་བྱེད་ཀྱི། རང་དེར་འགྱུར་བའི་དོན་མིན་པའི་གནད་ཀྱིས། དར་ཊཱིཀ་ཏུ་ཡང༌། དཀོན་མཆོག་གསུམ་རིམ་གྱིས་གྲུབ་པ། ཞེས་གསུངས་ཀྱི་ཐོབ་པ་ཞེས་མ་གསུངས་སོ། །ལུང་འདིར་མ་བྲིས་པས་ཐོགས་འགྲེལ་གྱི་དབུར་བལྟ། ས་བརྒྱད་པའི་སྐུ་དེ་མི་འདོར་ན། དེ་འཕོས་མ་ཐག་གི་ཚེ་སྔ་མའི་ལུས་སེམས་རྟེན་བརྟེན་པའི་འབྲེལ་བ་ཆད་མ་ཆད་སོགས་ཙམ་ཞིག་མཁས་པའི་དབང་པོ་རྣམས་ཀྱི་ཞལ་ན་ཡང་གསལ། ༈ ༼༡བ༤༩༽ ༼༤༽ རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་གསུངས་པའི་ཕྱིར། ༼༤ཡུ༽འདིའི་ཡོན་ཏན་གསུམ་པ་ནི། དར་ཊཱིཀ་ལས། སྒྲ་དང་རྣམ་པར་རྟོག་པ་གཞན་གྱིས་རྐྱེན་གྱི་རྟོགས་ཚུལ་རྫོགས་པའི་ཚུལ་གྱིས་རྟོགས་

― GTD002_Page_0201 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱ་བ་མ་ཡིན་པའོ། །ཞེས་པའི་དོན་དུ་བསམ་ནས། སྤྱི་དོན་རོལ་མཚོ་ལས། རང་སྣང་ཡུལ་དུ་བྱེད་པའི་བློ་ལ་སྣང་བ་ལྟར་རྗོད་བྱེད་ཀྱི་སྒྲ་དང་རྟོག་པས་ཇི་ལྟ་བ་བཞིན་རྟོགས་མི་ནུས་པའི་ཡོན་ཏན་ཞེས་ཡེ་ཤེས་རང་ཉིད་གཞན་གྱིས་རྟོགས་དཀའ་བའི་དོན་དུ་སྦྱར་ནས་ཇི་ལྟ་བ་མཁྱེན་པའི་ཡོན་ཏན་ཟུར་དུ་བགྲང་བ་ནི་སྔོན་མེད་པའི་འདུས་མ་བྱས་སོགས་ཀྱི་ཡོན་ཏན་དགུ་པ་ཡིན་ལ། དར་ཊཱིཀ་ཀྱི་དོན་ཡང༌། དོན་དམ་བདེན་པ་འདིས་གཟིགས་པ་ལྟར་གཞན་གྱིས་རྟོགས་མི་ནུས་པའི་དོན་ཡིན་གྱི། འདི་གཞན་གྱིས་རྟོགས་མི་ནུས་པའི་དོན་མ་ཡིན་ལ། དེའི་ཕྱིར་འདི་ཉིད་ཇི་ལྟ་བ་མཁྱེན་པའི་ཡོན་ཏན་ཡིན་པས། དེ་ཟུར་དུ་བགྲང་མི་དགོས་ཏེ། དར་ཊཱིཀ་ལས། རང་བཞིན་རྣམ་དག་དང་གློ་བུར་རྣམ་དག་དང༌། ཇི་ལྟ་བ་མཁྱེན་པའི་ཡེ་ཤེས་རྣམ་པ་གསུམ་ཞེས་གསུངས་པའི་ཕྱིར། ཇི་སྙེད་པ་མཁྱེན་པ་སོགས། རང་དོན་གྱི་སྐུ་ཡིན་ཀྱང་འདིར་གཞན་དོན་གྱི་སྐུར་བཤད་པའི་དགོས་པ། དར་ཊཱིཀ་ལས། ཐུགས་རྗེ་དང་ནུས་པ་གཞན་དོན་དུ་བཞག་པ་ནི་གཟུགས་ཀྱི་སྐུ་གདུལ་བྱ་ལ་དངོས་སུ་སྣང་ནས་ཆོས་སྟོན་པ་དེ་གཉིས་ཀྱི་ལག་རྗེས་ཡིན་པའི་དབང་དུ་བྱས་ནས་རྣམ་པར་བཞག་པའོ། །ཇི་སྙེད་པ་མཁྱེན་པའི་ཡེ་ཤེས་གཞན་དོན་དུ་བསྡུས་པ་ནི་ཐུགས་རྗེ་འཇུག་པའི་རྒྱུའི་དབང་དུ་བྱས་པ་སྟེ། ཞེས་འགྲོ་བའི་ངང་ཚུལ་གཟིགས་པ་ལ་སྦྱར་རོ། ། ༈ ༼༦༽སྒྲ་རྟོག་གིས་མཐའ་བཞིར་བསམ་དུ་མེད་པ་དང༌། ༼༤རུ༽འདིར་མཐའ་བཞི་ཡང་སྒྲས་ཇི་ལྟ་བ་བཞིན་ཡོད་པ་དང༌། མེད་པར་བརྗོད་དུ་མེད་པ་དང༌།

― GTD002_Page_0202 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོག་པས་ཇི་ལྟ་བ་བཞིན་ཡོད་པ་དང་མེད་པ་བཟུང་དུ་མེད་པ་ཞེས་འདྲེན་པ་མི་རིགས་ཏེ། ཐོགས་འགྲེལ་ལས། མེད་པ་དང༌། ཡོད་པ་དང༌། ཡོད་མེད་དང༌། གཉིས་ཀ་མ་ཡིན་པ་སྟེ། རྣམ་པ་བཞི་ཀ་ལྟར་ཡང་རྟོག་གེའི་ཡུལ་མ་ཡིན་པའི་ཕྱིར། ཞེས་གསུངས་པས་སོ། །དར་ཊཱིཀ་ལས། མེད་པ་དང༌། ཡོད་པ་དང༌། ཡོད་མེད་གཉིས་ཀ་དང༌། དེ་ལས་གཞན་དུ་ཡང་ཡོད་མེད་གཉིས་ཀ་མ་ཡིན་པ་རང་བཞིན་གྱིས་གྲུབ་པར་བརྟགས་པར་མི་ནུས་པའི་སྤྲོས་པའི་མཐའ་བཞི་དང་བྲལ་བའོ། །ཞེས་རང་བཞིན་རྣམ་དག་གི་ཆ་དོན་དམ་པའི་བདེན་པར་གསུངས་པ་ཤིན་ཏུ་ལེགས་ཏེ། འདིའི་ཐད་ཀྱི་དཔལ་འཕྲེང་གི་མདོ་ཐོགས་འགྲེལ་དུ་དྲངས་པ་ལས། འཇམ་དཔལ་སྐྱེ་བ་མེད་ཅིང་འགག་པ་མེད་པ་ལ་ནི་སེམས་དང་ཡིད་དང་རྣམ་པར་ཤེས་པ་མི་འཇུག་གོ །ཞེས་གསུངས་པའི་ཕྱིར། སེམས་ཡིད་རྣམ་ཤེས་གསུམ་ལ་ཊཱིཀ་བྱེད་དུ་མས་ཀུན་གཞི་ཉོན་ཡིད་འཇུག་ཤེས་གསུམ་ལ་སྦྱར་བ་སྟུག་པོ་བཀོད་པའི་མདོ་ལྟར། སེམས་ཙམ་ལུགས་ལ་རུང་ཡང་འདིར་ཆེས་མ་འབྲེལ་བས་ཕུང་ཁམས་སྐྱེ་མཆེད་གསུམ་མམ། དུས་གསུམ་མམ། ཡང་ན། དར་ཊཱིཀ་ལྟར་རྟེན་བརྟེན་པ་སོགས་ལ་སྦྱར་རོ། ། ༈ ༼༡ན༥༢༽ ༼༤༽ རྒྱན་ལས། ཀུན་ཏུ་འགྲོ་དང་ཁས་ལེན་རྟོགས་དང་ཟིལ་གནོན་པར། །དབྱེ་བའི་རང་བཞིན་དོན་རྣམ་བཞི་ཡི་ཁྱད་པར་གྱིས། །ཐེག་པ་མཆོག་ཕྱིར་དཀོན་མཆོག་སྐྱབས་རབ་སོང་བ་གང༌། །དེ་ཉིད་སྐྱབས་སུ་སོང་བ་རྣམས་ཀྱི་མཆོག་ཅེས་བྱ། །ཞེས་གསུངས་པའི་ཕྱིར། ༼༤ལུ༽དེ་ཡང་ལམ་རིམ་ལས། ཇི་ཙམ་གྱིས་སྐྱབས་སུ་སོང་བའི་ཚུལ་ནི། བསྡུ་བ་ནས་

― GTD002_Page_0203 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པའི་ཚུལ་བཞི་སྟེ། ཡོན་ཏན་ཤེས་པ་དང༌། ཁྱད་པར་ཤེས་པ་དང༌། ཁས་བླངས་པ་དང༌། གཞན་དུ་མི་སྨྲ་བའི་སྐྱབས་སུ་སོང་བའོ། །ཞེས་གསུངས་ལ། ཐུབ་དགོངས་ལས། རྒྱུ་བཞིས་སྐྱབས་སུ་འགྲོ་བར་རིགས་པར་བྱ་སྟེ། ཡོན་ཏན་ཤེས་པ་དང༌། ཁྱད་པར་ཤེས་པ་དང༌། ཁས་བླངས་པ་དང༌། སྟོན་པ་གཞན་བསྟེན་པ་མ་ཡིན་པས་སོ། །དེ་རྣམས་ཀྱི་སྔ་མ་སྔ་མ་ཕྱི་མ་ཕྱི་མའི་རྒྱུ་སྟེ་ཞེས་སོགས་གསུངས་པ་སྔ་མ་དང་དོན་གཅིག་ལ། འདི་ཙམ་སྐྱབས་འགྲོ་དཔྱིས་ཕྱིན་པ་ཀུན་ལ་དགོས་ཀྱང༌། མདོ་སྡེ་རྒྱན་གྱི་ཐེག་ཆེན་ཐུན་མོང་མ་ཡིན་པ་སྟེ། དམིགས་པའི་ཁྱད་པར་སེམས་ཅན་ཀུན་གྱི་དོན་སྒྲུབ་པའི་ཕྱིར་རང་གི་མོས་པའི་ཡུལ་ཐེག་པ་གསུམ་གྱི་རྟོགས་རིགས་རྫོགས་པའི་གེགས་ཤེས་བྱའི་སྒྲིབ་པ་ཡང་དག་པའི་ཡེ་ཤེས་ཀྱིས་བཅོམ་པ་ལས་འབྲས་བུ་འཁོར་ཞི་རོ་གཅིག་པ་མི་གནས་པའི་མྱང་འདས་འགྲུབ་པའི་ཀུན་ཏུ་འགྲོ་བ་བཞི་དང༌། ངོ་བོའི་ཁྱད་པར་འབྲས་བུའི་སྐྱབས་དེ་རང་ལ་སྒྲུབ་པར་ཁས་བླངས་པའི་ཚུལ་གྱིས་སྐྱབས་སུ་སོང་བས་རྒྱལ་བའི་རིགས་སུ་སྐྱེ་ཞིང༌། དེར་སྐྱེས་པའི་རྒྱལ་པོའི་བུ་དང་བློན་པོ་ཆེན་པོ་ལྟར་ཡོན་ཏན་དུ་མ་འགྲུབ་པ་དང༌། ལམ་དུ་མ་ཞུགས་པ་དང༌། ཞུགས་པ་ན་ཡོན་ཏན་དུ་མ་རིམ་གྱིས་རྟོགས་པ་སྟེ་ཐོབ་པ་དང༌། ཉན་རང་ཟིལ་གནོན་གྱི་ཁྱད་པར་བཞི་དང་ལྡན་པའོ། །བློ་བརྟན་གྱི་འགྲེལ་བཤད་ལས། བདག་མེད་པ་ཉིད་རྟོགས་པས་ན་རྟོགས་པ་ཁྱད་ཞུགས་སོ། །ཞེས་བཤད་ཀྱང༌། ཡེ་ཤེས་ཀུན་འགྲོའི་དོན་ལས་གཞན་མི་སྣང་བས་འཐད་དཀའ་འམ་དཔྱད། ཁྱད་

― GTD002_Page_0204 ―

^{[མ་དཔེ་གཟིགས་ན་འདིར་གནོན།]}

[Full Size]

པར་རྒྱས་པར་ནི་འགྲེལ་པ་འགྲེལ་བཤད་རྣམས་ལ་བལྟ་སྟེ། འདིར་གཞུང་གི་མཚམས་འབྱེད་ཚུལ་དང༌། དོན་གྱི་འབྲེལ་ལ་དཔྱོད་པའི་སྒོ་ཙམ་ལེགས་པར་ཕྱེ་ཡོད་དོ། ། ༈ ༼༥༽ཕར་ཕྱིན་བསྡུས་པ་ལས། སེམས་ཅན་རྣམས་ལ་སྙིང་བརྩེ་ཞིང༌། །བདེར་གཤེགས་ཡོན་ཏན་ཐོབ་མོས་ན། །དེ་བཞིན་གཤེགས་པ་ཐམས་ཅད་ལ། །མདོར་བསྡུས་སྐྱབས་སུ་སོང་བ་ཡིན། །ཞེས་དང། ཡང་དེ་ཉིད་ལས། བྱང་ཆུབ་མཆོག་གི་ཕྱོགས་ཀྱི་ཆོས། །བདག་དོན་མ་ཡིན་གཞན་དོན་དུ། །སྙིང་རྗེ་ཆེན་པོ་སྤྱོད་བྱེད་ན། །ཆོས་ལ་སྐྱབས་སུ་སོང་བ་ཡིན། །ཞེས་དང༌། ཡང་དེ་ཉིད་ལས། བྱང་ཆུབ་སེམས་མཆོག་མི་ལྡོག་དང༌། །དབང་དང་ཚད་མེད་ཡོན་ཏན་གྱིས། །བརྒྱན་པའི་ཡོན་ཏན་གང་འཚོལ་བ། །དེ་ནི་དགེ་འདུན་སྐྱབས་སོང་ཡིན། །ཞེས་གསུངས་པའི་ཕྱིར། ༼༤ཤུ༽ལུང་འདི་གསུམ་གྱི་དོན་ཐེག་ཆེན་པ་སངས་རྒྱས་ལ་སྐྱབས་སུ་འགྲོ་ཚུལ་སངས་རྒྱས་ཟུར་དུ་བཞག་ནས་ལྷ་སྐུ་ལ་ཕྱག་འཚལ་བ་ལྟར་སྐྱབས་སུ་འགྲོ་བ་མ་ཡིན་གྱི། སེམས་ཅན་རྣམས་ལ་སྙིང་བརྩེ་བས་དེ་དག་སྒྲོལ་བའི་ཆེད་དུ་རང་ཉིད་སངས་རྒྱས་ཀྱི་ངོ་བོར་སྒྲུབ་པར་འདོད་པ་ཡིན་པའི་ཕྱིར། རྒྱན་ལས། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་བརྩེ་ལས་རིགས་བྱ། །ཞེས་སོ། །ཚིགས་བཅད་གཉིས་པའི་དོན་ཡང༌། མ་བཏུང་བར་ཕྱག་འཚལ་བས་སྨན་གྱིས་མི་ཕན་པ་ལྟར། རྒྱུད་དང་མ་འདྲེས་པའི་ཆོས་ནི་སྐྱབས་དངོས་སུ་མི་འགྱུར་བས། སངས་རྒྱས་སྨན་པ་དེས་བསྟན་པའི་ཆོས་ཀྱི་སྨན་ལ་ཐེག་པ་ཆེན་པོའི་ཆོ་ག་བཞིན་དུ་སྤྱད་ན་ཤེས་བྱའི་སྒྲིབ་པའི་ནད་སེལ་ཏེ། སྐབས་

― GTD002_Page_0205 ―

^{[མ་དཔེ་གཟིགས་ན་འདིར་གནོན།]}

[Full Size]

འདིའི་སྐྱབས་དངོས་སུ་བྱས་ནས་སྐྱོབ་ཚུལ་ཡིན་ནོ། །གསུམ་པའི་དོན། རྒྱང་རིང་པོར་འགྲོ་བའི་ལམ་གྲོགས་ནི། དེར་སོན་གྱི་བར་དུ་མི་ལྡོག་པ་ལམ་བར་གྱི་མཐུན་རྐྱེན་རྣམས་ལ་དབང་འབྱོར་བ། གྲོགས་ལ་བརྩེ་ཞིང་བྱམས་པ་ཞིག་ལ་བརྟེན་དགོས་པ་ལྟར། འདིར་ཡང་ཕྱིར་མི་ལྡོག་སོགས་ཀྱི་ཡོན་ཏན་ཅན་ཞིག་ནི། སྐྱབས་འགྲོའི་ཡུལ་གྱི་དགེ་འདུན་ཡིན་ནོ། །འདིར་ཚོལ་བ་ཞེས་པ་ཡོན་ཏན་དེ་དག་རང་གིས་ཚོལ་བ་ལ་བྱས་ན་གཉིས་པ་དང་ཟློས་པས་དེ་འདྲའི་ཡོན་ཏན་ཅན་གྱི་གྲོགས་ཚོལ་བའམ། དེ་འདྲ་འཚོལ་བའི་གྲོགས་དགེ་འདུན་ལ་ལམ་གྱི་ཟླ་གྲོགས་ཞུ་བ་ཅི་རིགས་སུ་སྦྱོར་དགོས་པས་འདིའི་འགྱུར་ཧ་ཅང་བདེ་བ་མི་སྣང༌། ༈ ༼༡བ༥༢༽ ༼༡༽ དར་ཊཱིཀ་ལས། སྐྱབས་འགྲོ་འདི་ལ་གོ་བ་ལེགས་པར་ཆགས་ན་གསུང་རབ་དགོངས་འགྲེལ་དང་བཅས་པ་མ་ལུས་པ་སྐྱབས་འགྲོ་བྱས་པའི་ཡན་ལག་ཏུ་ཤེས་པར་འགྱུར་རོ། །ཞེས་གསུངས་པའི་ཕྱིར། ༼༤སུ༽འདིའི་གནད་ཀྱིས་ཆོས་ཕུང་བརྒྱད་ཁྲི་བཞི་སྟོང་ཐམས་ཅད་ངོ་བོའི་ལྡོག་ཆའམ། རྒྱུའི་ལྡོག་ཆའམ། བྱེད་པ་སྟེ་འཕྲིན་ལས་ཀྱི་ལྡོག་ཆ་ནས་སངས་རྒྱས་ཀྱི་ཡོན་ཏན་སྟོན་བྱེད་ཁོ་ན་ཡིན་ནོ། །ཞེས་རྗེ་བཙུན་ཡེ་ཤེས་རྒྱལ་མཚན་གསུངས་ཏེ། གསུང་རབ་གདམས་པར་ཤར་བའི་ལེགས་བཤད་དོ། ། ༈ ༼༣༽སྐྱབས་ཀྱི་དོན་དང་ཡོངས་སུ་སྐྱོབ་པའི་དོན་ཉོན་མོངས་ནས་ཐེག་དམན་གྱི་བར་ལས་སྐྱབས་པ་དང་སྐྱོབ་པའི་དོན་ཡིན་ཏེ། རྒྱན་གྱི་བྱང་ཆུབ་ཀྱི་སྐབས་ལས། ཉོན་མོངས་པའི་ཀུན་ནས་ཉོན་མོངས་པའམ། ཉོན་མོངས་པའི་ལམ་ལས་སྐྱོབ་ཚུལ་སྟོན་པར། རྟག་ཏུ་ཉོན་མོངས་ཚོགས་ཀུན་

― GTD002_Page_0206 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། །ལས་ཀྱི་ཀུན་ཉོན་ནམ་ཉོན་མོངས་ལས་སྐྱོབ་ཚུལ་སྟོན་པར་ཉེས་པར་སྤྱོད་པ་ཐམས་ཅད་དང༌། །ཚེའི་ཀུན་ཉོན་ནམ་སྡུག་བསྔལ་གྱི་ལམ་ལས་སྐྱོབ་ཚུལ་སྟོན་པར། རྒ་དང་འཆི་བ་དག་ལས་ཀྱང། །སངས་རྒྱས་ཉིད་ནི་ཡོངས་སུ་སྐྱོབ། །ནས། ༼༤ཧུ༽འཚེ་བ་དག་ནི་ཐམས་ཅད་དང༌། །ངན་སོང་དང་ནི་ཐབས་མིན་དང༌། །འཇིག་ཚོགས་ཐེག་པ་དམན་པ་ལས། ། ༈ ༼༤༽དེ་ཕྱིར་སྐྱབས་ཀྱི་དམ་པ་འོ། །ཞེས་གསུངས་པའི་ཕྱིར། ༼༤ཨུ༽ཚིགས་བཅད་ཕྱི་མ་འདི་འགྲེལ་པ་འགྲེལ་བཤད་སོགས་ལས་སྐྱེས་བུ་གསུམ་ལ་སྦྱར་བ་མི་སྣང་ཡང༌། རྐང་པ་དང་པོ་གཉིས་ཀྱིས་ཆུང་ངུ་ཕལ་པ་དང༌། ཁྱད་པར་ཅན་གཉིས་ཚེ་འདིའི་གནོད་འཚེ་སོགས་དང༌། ཕྱི་མར་ངན་སོང་ལས་སྐྱོབ་ཚུལ་དང༌། རྐང་པ་གསུམ་པས་སྐྱེས་བུ་འབྲིང་རྣམས་འཇིག་ལྟ་སོགས་ཉོན་སྒྲིབ་ལས་སྐྱོབ་ཚུལ་དང་ཆེན་པོ་རྣམས་ཐེག་དམན་གྱི་ཡིད་བྱེད་ལས་སྐྱོབ་ཚུལ་བསྟན་པར་གསལ་ལ། མདོ་སྡེ་རྒྱན་གྱི་གཞུང་གོང་འོག་གང་ནའང་སྐྱེས་བུ་གསུམ་ལ་སྦྱར་ནས་བཤད་དགོས་པ་ཤིན་ཏུ་མང་བས་སླར་བཤད་པར་སྨོན། ༈ ༼༡ན༥༣༽ ༼༡༽ ཡང་ཁོ་ན་རེ། དོན་དམ་པའི་སྐྱབས་གསུམ་འགལ་བར་ཐལ། ཀུན་རྫོབ་པའི་སྐྱབས་གསུམ་འགལ་བའི་ཕྱིར་ན་མ་ཁྱབ་སྟེ། ༼༤ཀེ༽སེམས་ཙམ་པ་དང་མདོ་སྡེ་སྤྱོད་པ་བ་རྣམ་ཤེས་བདག་གི་མཚན་གཞིར་འདོད་པས་ཀུན་རྫོབ་པའི་སྐྱབས་གསུམ་ཀའི་གཞི་མཐུན་དུ་འདོད་དགོས་པར་སྣང་ལ། རྣལ་འབྱོར་སྤྱོད་པ་བ་དེ་ལྟར་མ་ཡིན་པར་ཕུང་པོའི་ཚོགས་ཙམ་གྱི་ང་ཞིག་འཇོག་སྟེ། འགྲེལ་ཆེན་ལས། རྒྱུན་ཉིད་ཀྱིས་ནི་གང་ཟག་ཅེས་བྱ་བ་ནི་གཅིག་གོ །ཞེས་དང༌། ཕར་ཕྱིན་ལམ་ཊཱིཀ་ལས། སློབ་དཔོན་གྱིས་

― GTD002_Page_0207 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུང་པོའི་རྒྱུན་གང་ཟག་ལ་འཇོག་པས་གང་ཟག་བདེན་པར་འཛིན་པ་ནི་ཕུང་པོ་ལས་བདེན་པར་འཛིན་པ་ཡིན་ལ། ཞེས་གསུངས་པའི་ཕྱིར། ༈ ༼༡བ༥༤༽ ༼༣༽ རྣམ་འགྲེལ་ལས། ཡུལ་མཐོང་བ་བག་ཆགས་ཙམ་ལས། དོན་གྱི་ནུས་པ་ལྟོས་མེད་ན། །བར་ཆད་ལ་སོགས་ཡོད་ན་ཡང༌། །དབང་སྐྱེ་བློ་ནི་སྐྱེ་བར་འགྱུར། །ཞེས་གསུངས་པའི་ཕྱིར། ༼༤ཁེ༽འདིར་དྲངས་པའི་ལུང་གི་འབྲེལ་དང༌། འོག་ཏུ། དང་པོའི་བག་ཙམ་སྲོག་ཆགས་ཕལ་ཆེར་ལ། །ཞེས་པ་ལྟར་ཕ་མ་ལས་ཐོབ་པའི་འཕངས་འབྲས་ཀྱི་མིག་གིས་བདག་རྐྱེན་བྱས་པའི་མིག་ཤེས་ཕལ་བ་ཞིག་སྐབས་འདིའི་ཤའི་མིག་ཤེས་ཙམ་པོ་དེ་ཡིན་པར་མངོན། ༈ ༼༡བ༥༦༽ ༼༣༽ རྒྱན་ལས། དབང་བོ་ལྔ་རྣམས་གཞན་འགྱུར་ན། །དོན་ཀུན་འཇུག་དང་ཐམས་ཅད་ཀྱི། །ཡོན་ཏན་བརྒྱ་ཕྲག་བཅུ་གཉིས་འབྱུང༌། །ཞེས་དང༌། ༼༤གེ༽འདིར་ཆ་བའི་ཕར་ཕྱིན་ལས། ཡང་ན་བརྒྱ་ཕྲག་དང༌། བཅུ་གཉིས་ཞེས་ཕྱེ་ནས། མཚན་སོ་གཉིས་དང༌། དཔེ་བྱད་བརྒྱད་ཅུ་སྟེ། ཡོན་ཏན་བརྒྱ་ཕྲག་བཅུ་གཉིས་ཞེས་ཀྱང་བཤད་རུང་བས། དེ་ལྟ་ན་གོ་སླ་བ་ཉིད་དོ། །ཞེས་བཤད་ཀྱང༌། དབྱིག་འགྲེལ་ལས། དེ་ལའང་སོ་སོར་ཡོན་ཏན་བརྒྱ་ཕྲག་བཅུ་གཉིས་འབྱུང་བ་ལ། ཞེས་འབྱུང་ཞིང༌། བློ་བརྟན་གྱིས་ཀྱང་གཟུངས་ཀྱི་དབང་ཕྱུག་རྒྱལ་པོ་དང༌། པད་དཀར་ལ་ཞལ་འཕང་མཛད་པའི་སྔ་མར་མི་གསལ་ཡང༌། ཕྱི་མ་འདིར་དྲངས་པ་འདི་ཡིན་པས་ཐུན་མོང་དུ་སྦྱར་བ་དང༌། གྲངས་བསྡུས་པ་མི་འཐད་པར་སེམས་སོ། ། ༈ ༼༡ན༥༧༽ ༼༤༽ དབྱེ་ན་གནས་དང་གནས་མིན་མཁྱེན་པ་མ་གཏོགས་པའི་ཤེས་པ་དགུ་ཡོད།

― GTD002_Page_0208 ―

^{[མ་དཔེ་གཟིགས་ན་འདིར་གནོན།]}

[Full Size]

༼༤ངེ༽གནས་དང་གནས་མིན་མཁྱེན་པ་དང་ཡུལ་མཚུངས་པའི་མངོན་སུམ་ཡོད་ན། ལས་འབྲས་ཀྱི་འབྲེལ་བ་ཕྲ་མོ་རྟོགས་པའི་དེ་ཡོད་པར་འགྱུར་ཞིང༌། འདིར་ཆོས་ཀྱི་སྤྱན་གསར་ཐོབ་ནས་ཡོད་པའི་དབྱེ་བ་བསྟན་པའོ་ཞེས་ཁ་ཅིག་འདོད་ལ། དབང་པོའི་རིམ་པ་རྟོགས་པའི་ཚེ་ཆོས་ལ་གུས་པ་དང་ཆོས་སྤངས་པའི་རྣམ་སྨིན་གྱིས་དབང་པོ་རྣོ་རྟུལ་དུ་འགྱུར་བ་དང༌། ཚེ་སྔ་མར་སྦྱངས་པ་དང་ལྡན་མི་ལྡན། བསོད་ནམས་དང་བསོད་ནམས་མ་ཡིན་པ་ཇི་ལྟ་བུ་ལྡན་པ་དང༌། རྣམ་པར་ཤེས་པའི་ཁམས་ལ་སོགས་པ་ཤེས་པས་ལས་ཀྱི་རྣམ་པར་སྨིན་པ་དང༌། ཚེ་སྔ་མ་དང༌། འཆི་འཕོ་བ་དང༌། འཇིག་རྟེན་གྱི་ཁམས་དུ་མ་ཤེས་པ་སོགས་ཡོད་ཀྱང༌། དེའི་ཡུལ་ལ་ལས་འབྲས་ཀྱི་འབྲེལ་བ་འོང་དོན་མེད་པའི་རྒྱུ་མཚན་གྱིས་ཡིན་ནམ་དཔྱད། ༈ ༼༡བ༥༧༽ ༼༢༽ ཡུམ་འདི་ལ་སྤྱོད་པའི་བྱང་ཆེན་མངོན་པར་ཤེས་པའི་ཕ་རོལ་ཏུ་ཕྱིན་པ་འཐོབ་སྟེ། ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཡོངས་སུ་ཉམས་པར་མི་འགྱུར་རོ། །ཞེས་པ་ནས། དགེ་སློང་སུམ་བརྒྱས་ཆོས་གོས་གྱོན་པ་ཕུལ་ནས་སེམས་བསྐྱེད་པས། བསྐལ་པ་དྲུག་ཅུ་རྩ་གཅིག་གི་རྗེས་སུ་བསྐལ་པ་སྐར་མ་ལྟ་བུ་ལ་རྫོགས་པའི་སངས་རྒྱས་དཔལ་ཆེན་པོ་ཞེས་བྱ་བར་ལུང་བསྟན་པའི་བར་གྱི་མདོ་ལས་མངོན་ཤེས་དྲུག་བཤད་པའི་དོན་སྟོན་པར། རྩ་འགྲེལ་འདི་བྱུང༌། ༼༤ཅེ༽འདི་མདོ་སྡེ་བསྐལ་བཟང་ལས། བསྐལ་པ་བཟང་པོ་འདིའི་འོག་ཏུ་སངས་རྒྱས་མེད་པའི་བསྐལ་པ་དྲུག་ཅུ་འབྱུང་ངོ༌། །དེའི་འོག་ཏུ་བསྐལ་པ་སྙན་པ་ཆེན་པོ་ཞེས་བྱ་བ་འབྱུང་སྟེ། བསྐལ་པ་གཅིག་པོ་དེ་ལ་སངས་རྒྱས་ཁྲི་འབྱུང་ངོ༌། །

― GTD002_Page_0209 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐལ་པ་སྙན་པ་ཆེན་པོ་དེའི་འོག་ཏུ་སངས་རྒྱས་མེད་པའི་བསྐལ་པ་བརྒྱད་ཁྲི་འབྱུང་ངོ༌། །དེའི་འོག་ཏུ་བསྐལ་པ་སྐར་མ་ལྟ་བུ་ཞེས་བྱ་བ་འབྱུང་ངོ༌། །བསྐལ་པ་དེ་གཅིག་ལ་སངས་རྒྱས་བརྒྱད་ཁྲི་འབྱུང་ངོ༌། །ཞེས་གསུངས་པ་འདི་དང་ཅུང་མི་འདྲ་བ་དཔྱད་དགོས་ལ། འདི་མངོན་ཤེས་ལ་འདོམས་པར་འགྲོ་ཚུལ་ནི། ཉི་སྣང་ལས། དེའི་དུས་སུ་ལུང་བསྟན་པའི་གདམས་ངག་གི་འབྲས་བུ་དུས་གཞན་དུ་ཐོབ་པར་བསྟན་པའི་དོན་གྱིས་གསུངས་པ་ཡིན་ནོ། །ཞེས་མ་འོངས་པ་ཆགས་ཐོགས་མེད་པར་གཟིགས་པའི་མངོན་ཤེས་རང་ལ་མངའ་བར་བསྟན་པའི་སྒོ་ནས་གདུལ་བྱ་ལ་ཡང་དེ་སྒྲུབ་པར་འདོམས་པས་བསྡུ་བ་བཞིའི་ནང་གི་དོན་མཐུན་དོན་སྤྱོད་གཉིས་ཡིན་ནོ། ། ༈ ༼༥༽མཛོད་ལས། བསམ་གཏན་དག་གིས་ལམ་རྣམས་སླ། །ས་གཞན་དག་གིས་དཀའ་བ་ཡིན། །ཞེས་གསུངས་པའི་ཕྱིར། ༼༤ཆེ༽མཛོད་ཀྱི་ལུང་འདི་མཐོང་བཞིན་དུ་ད་དུང་འདི་ལམ་སྤྱིའི་དབང་དུ་བྱས་པ་ཡིན་གྱི། མངོན་ཤེས་ཉེར་བསྡོགས་ལ་བརྟེན་པ་མི་སྲིད་ཅེས་ཡིག་འཇོག་མཁན་མང་པོས་བྲིས་སྣང་བ་མི་འཐད་དེ། འདིའི་རྩ་བ་ཆོས་མངོན་པའི་མདོ་ལས། དགེ་སློང་དག་ལམ་ནི་རྣམ་པ་བཞི་སྟེ། མངོན་པར་ཤེས་པ་བུལ་ལ་དཀའ་བའི་ལམ་དང༌། མངོན་པར་ཤེས་པ་མྱུར་ལ་དཀའ་བའི་ལམ་དང༌། མངོན་པར་ཤེས་པ་བུལ་ལ་སླ་བའི་ལམ་དང༌། མངོན་པར་ཤེས་པ་མྱུར་ལ་སླ་བའི་ལམ་མོ་ཞེས་གསུངས་པའི་ཕྱིར། ༈ ༼༦༽ཁྱབ་སྟེ། ༼༤ཇེ༽དེའི་མཇུག་ཏུ། བློ་རྟུལ་མངོན་ཤེས་བུལ་བ་དང༌། །གཅིག་ཤོས་

― GTD002_Page_0210 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ནི་མངོན་ཤེས་མྱུར། །ཞེས། ༼༦༽སྐྱེ་དཀའ་ལ་མྱུར་བ་དང་བུལ་བ་གཉིས་བཤད་པའི་ཕྱིར། ༈ ༼༡ན༥༨༽ ༼༦༽ འབུམ་གྱི་གནོད་འཇོམས་ལས། བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱི་མངོན་པར་ཤེས་པ་ནི་སངས་རྒྱས་བཅོམ་ལྡན་འདས་ལ་སོགས་པས་གོང་མ་རྣམས་ཀྱི་མཐུ་ལ་སོགས་པ་ཤེས་པ་ལ་ཐོགས་པ་མེད་དེ། ཞེས་གསུངས་པའི་ཕྱིར། ༼༤ཉེ༽འདིར་འཇིག་རྟེན་པའི་ཐུགས་མངོན་དུ་མཛད་པ་དེ་ཉིད་བྱང་སེམས་ཀྱི་མངོན་ཤེས་ཀྱི་ཡུལ་དུ་འགྱུར་བའི་དོན་ཡིན་པར་བླ་མ་རྣམས་གསུངས་ལ། འཇིག་རྟེན་པའི་ཐུགས་མངོན་དུ་བྱས་ཚུལ་ཡང༌། གཞི་བསྡུ་བར། དེ་བཞིན་གཤེགས་པས་འཇིག་རྟེན་པའི་ཐུགས་ཀྱིས་འོང་བར་བྱ་བའི་དགོངས་པ་བསྐྱེད་པ་རིགས་པའི་ཕྱིར་རོ། །ཞེས་དང༌། མཛོད་འགྲེལ་དུ། འཇིག་རྟེན་པའི་སེམས་མངོན་དུ་བྱས་པའི་ཚེ་འཕགས་ལམ་མེད་ཀྱང༌། ཐོས་པ་ལྡན་པར་བཤད་པ་ལྟར་ན། སེམས་བྱེ་བྲག་པ་ཀུན་རྫོབ་རྣམ་ཅན་ཞིག་བཞག་དགོས་ལ། རྟོག་གེ་འབར་བ་ལས། ལྷ་དག་གིས་ཀྱང་བཅོམ་ལྡན་འདས་ཀྱིས་སྐབས་གནང་བས། ཐུགས་ལ་བལྟས་ནས། ཞེས་པ་ནས། གཞན་དུ་ན་བཅོམ་ལྡན་འདས་ཀྱི་ཐུགས་སུས་ཀྱང་ཤེས་པར་མི་ནུས་སོ། །ཞེས་པ་ལྟར་ན། འཇིག་རྟེན་པའི་ཐུགས་མངོན་དུ་བྱས་པའི་དོན། ཐུགས་དེ་དག་གིས་རྟོགས་ནུས་པར་བྱིན་གྱིས་བརླབས་པ་ཙམ་ལ་བྱ་ཡི། ཤེས་པ་མི་འདྲ་བ་ཞིག་བསྐྱེད་དགོས་པ་མིན་ལ། ལུང་འདི་ལྟར་ན་དེ་ལྟར་བྱས་ཚེ་ལྷ་ཕལ་བས་ཀྱང་རྟོགས་ནུས་ལ། སྤྱིར་སེམས་ཅན་སུས་ཀྱང་རྟོགས་མི་ནུས་པ་འདྲ་ཞིག་འདུག་པས་ཞིབ་དཔྱོད་དགོས། ༈ ༼༡ན༥༩༽ ༼༤༽

― GTD002_Page_0211 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱེ་ན། རྫུ་འཕྲུལ་གྱི་དེ། ལྷའི་རྣ་བའི་དེ། ༼༤ཏེ༽འདིར་བདག་རྐྱེན་ལྷའི་རྣ་བ་སོགས་ནི། འཕངས་འབྲས་ཀྱི་རྣ་དབང་དེའི་ཐན་ཀོར་དུ་བསམ་གཏན་གྱི་སས་བསྡུས་པའི་འབྱུང་བ་རྒྱུར་བྱས་པ་ལས་ཤ་ཁྲག་སོགས་དང་མ་འབྲེལ་བའི་དབང་པོ་དྭངས་པ་མེ་ལོང་དང༌། གཟུགས་བརྙན་གྱི་ཚུལ་དུ་འབྱུང་བ་ཡིན་གྱི། བྱང་སེམས་ཁ་ཅིག་དང༌། འཁོར་སྒྱུར་དང༌། ཁྱིམ་བདག་ལྟ་བུ་ལྷའི་མིག་དང་འདྲ་བས་དེར་བརྟགས་པ་ཙམ་མ་ཡིན་པར་མཛོད་འགྲེལ་ལས་གསུངས་སོ། ། ༈ ༼༡བ༦༢༽ ༼༥༽ ཡང་ཁ་ཅིག་ན་རེ། ཡོངས་འཛིན་གྱི་ཁྱད་པར་དེ་གཉིས་ལ་ཐེག་ཆེན་གྱི་ལམ་གྱི་ལུས་ཡོངས་རྫོགས་སྟོན་པའི་བཤེས་གཉེན་ཡོད་པ་དང་མེད་པས་ཟེར། ཆོས་རྒྱུན་གྱི་ཏིང་ངེ་འཛིན་ལ་བསམས་ཏེ། ལ་ལས་སྟོན་པ་མཆོག་སྤྲུལ་གྱིས་དེ་ལྟར་སྟོན་པ་ཡོད་མེད་ཀྱིས་ཟེར། ལ་ལས་༼༤ཐེ༽ལེའུ་བརྒྱད་མ་མ་མཐོང་བར་འགྲེལ་ཆུང་དང༌། རྒྱན་སྣང་ཙམ་ལ་བལྟས་ནས་སློབ་དཔོན་གྱི་ལུགས་ལ་ཕྱིའི་ཡོངས་འཛིན་ཁོ་ནའི་སྒོ་ནས་ཁྱད་པར་དུ་འཕགས་ཚུལ་བཤད་པ་ཡིན་ལ། འཕགས་པས་ཉི་སྣང་དུ་རྐང་པ་དང་པོས་ནང་གི་ཡོངས་འཛིན་ཐབས་མཁས་དང༌། གཉིས་པས་ཕྱིའི་ཡོངས་འཛིན་བཤེས་གཉེན་བསྟན་པར་གསུངས་པས་ཕྱི་ནང་གི་ཡོངས་འཛིན་ཚང་མ་ཚང་གི་སྒོ་ནས་ཁྱད་འབྱེད་དགོས་པས། ༈ ༼༥༽འཕགས་སེང་གི་ལུགས་གཉིས་ཐ་དད་པ་སྐད་ཟེར་རོ། ། ༈ ༼༦༽དེར་ཐལ། དེ་ལྟར་མདོ་ཉི་ཁྲི་ལས་གསུངས་ཤིང༌། དེ་དང་སྦྱར་བའི་ཚེ་མདོའི་དབང་གིས་འཕགས་སེང་གཉིས་ཀྱང་བཞེད་ཚུལ་མཚུངས་པར་གསལ་བའི་ཕྱིར་ཏེ། ༈ ༼༡ན༦༣༽ ༼༤༽ འགྲེལ་

― GTD002_Page_0212 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལས། ཡོངས་སུ་འཛིན་པ་དང་བྲལ་བ་དང༌། ཞེས་སོ། ། ༼༤དེ༽འདིར་ལེའུ་བརྒྱད་མ་དྲངས་པས་སློབ་དཔོན་གྱི་བཞེད་པ་ཡང་འཕགས་པ་དང་མཐུན་པར་བསྟན་ཅིང༌། འགྲེལ་པར་ཡོངས་སུ་འཛིན་པ་དང་བྲལ་གསུངས་པ་ཡང་གཉིས་ཀ་ཡོངས་འཛིན་དུ་མཚུངས་པས་ཚིག་གཅིག་ལ་བསྡུས་པ་ཡིན་གྱི། ཕྱིའི་ཡོངས་འཛིན་ཁོ་ནར་སྦྱོར་བ་མི་འཐད་པས། དེ་གོ་ཆེད་དུ་ལེའུ་བརྒྱད་མ་དྲངས་པའི་དོན་བསྡུར་འགྲེལ་ཆུང་དྲངས་སོ། །༈ ༼༡བ༦༣༽ ༼༣༽ འདིའི་སྦྱོར་ལམ་བཞི་དང་མཐོང་སྤང་གཟུང་འཛིན་གྱི་རྟོག་པ་མངོན་གྱུར་བཞི་རིམ་བཞིན་ཉམས་སྨད་བྱེད་ཀྱི་སྤོང་གཉེན་དུ་སྦྱོར་བའི་ཕྱིར། ༼༤ནེ༽ཐལ་འགྱུར་བ་དམིགས་པ་སོ་སོ་བ་བསྡུས་ནས་དང༌། རྣམ་པ་རིག་པའི་རྣམ་གྲངས་མང་ཉུང་ཡོད་ཀྱང༌། མཐོང་ལམ་དུ་མཐོང་སྤང་བདེན་འཛིན་སྤོང་ཞིང༌། སྦྱོར་ལམ་དུ་ཉམས་སྨོད་པ་འདྲ་བས། རྣམ་རྟོག་བཞི་དང་ལྡན་ཚུལ་གྱི་ཁྱད་དཀའ་སྟེ། གྲོགས་སོགས་ཀྱི་སྟོབས་ཀྱི་ནུས་པ་ཆེ་ཆུང་ཞིག་འབྱེད་རྒྱུ་ཡིན་ནམ་དཔྱད། དམན་པའི་ལམ་གྱིས་གང་ཟག་གི་བདག་འཛིན་རགས་པ་མངོན་གྱུར་པ་དེའི་ཚེ་ཉམས་སྨོད་པར་རང་རྒྱུད་པ་འདོད་ཀྱང༌། ཆགས་བྲལ་སྔོན་སོང་དུ་མི་འགྱུར་ཚུལ་གྱི་ཞིབ་ཆ་དགོས། མཁས་གྲུབ་རྟོག་གེ་སྣང་བར། སྤང་བྱར་ལྡན་པས་དེའི་ཁྱད་ཆོས་སུ་འགྲོ་ན་ཤེས་སྒྲིབ་བག་ཆགས་དང་བཅས་པ་སངས་རྒྱས་ཀྱི་ཁྱད་ཆོས་སུ་འགྱུར་ཞེས་བཀག་ནས། རང་ལུགས་ཡེ་ཤེས་དེའི་ངེས་ངོར་བདེན་མེད་རྟོགས་ཀྱང་སྣང་ངོར་གཟུང་འཛིན་ཀུན་བྱང་སོགས་སུ་བདེན་པར་སྣང་བ་ལ་བྱེད་ཅེས་རང་ཡིན་གྱི་ཚུལ་དུ་གསུངས་ཤིང། མཐོང་སྤང་སོགས་སུ་གསུངས་པ་དེའི་ཟག་པ་དང་

― GTD002_Page_0213 ―

^{[མ་དཔེ་གཟིགས་ན་འདིར་གནོན།]}

[Full Size]

བཅས་པ་ལ་བཀྲལ་ལོ། ། ༈ ༼༡༧༠༽ ༼༥༽ སྒྲ་གཅིག་པུ་བརྗོད་ཚེ་དེ་ཡིན་པའི་ཕྱིར་ན་མ་ཁྱབ། ༼༤པེ༽སྟེ། སྤྱིར་སྒྲ་བྱས་པ་ཡིན་ཞེས་བརྗོད་པའི་ཚེ་ཀ་བུམ་སོགས་ཀྱི་བྱས་པ་ཡིན་པ་གཅོད་པས་ཁྱད་པར་གཞན་སྤོང་ཡིན་ཀྱང་སྒྲ་གཅིག་པུ་དམིགས་ཀྱིས་བཀར་ཏེ་བྱས་སམ་མ་བྱས་དྲིས་པ་ལ་བྱས་པ་ཡིན་ཞེས་བརྗོད་པའི་ཚེ་བརྗོད་འདོད་ཀྱི་དབང་གིས་ཀ་བུམ་སོགས་ཀྱི་བྱས་པ་གཅོད་དོན་མེད་པས་ཁྱད་པར་གཞན་མི་སྤོང་ཡིན་ཏེ། སྤོང་མི་སྤོང་བརྗོད་འདོད་ཀྱི་དབང་གིས་མ་གཏོགས་སྒྲའི་ངོས་ནས་འབྱེད་དཀའ་བའི་ཕྱིར་རོ། །༈ ༼༡ན༧༢༽ ༼༤༽ ཤེས་སྒྲིབ་གཟུང་རྟོག་ཡིན་པའི་ཕྱིར། དེར་ཐལ། སྐབས་ལྔ་པ་ནས་བཤད་པའི་ཤེས་སྒྲིབ་འཇུག་པ་གཟུང་རྟོག་དགུ་དང༌། ཤེས་སྒྲིབ་ལྡོག་པ་གཟུང་རྟོག་དགུ་ཡོད་པའི་ཕྱིར་ཏེ། ༈ ༼༡བ༧༢༽ ༼༦༽ ཤེས་སྒྲིབ་གཟུང་འཛིན་གྱི་རྟོག་པ་གཉིས་དམིགས་ཡུལ་ཁོ་ནའི་སྒོ་ནས་འཇོག་པའི་ཕྱིར། ཁྱབ་སྟེ། ༼༤ཕེ༽དེ་ལྟར་བྱས་ན་དེའི་ཡུལ་ལ་གཟུང་འཛིན་གཉིས་སུ་ཕྱེ་བའི་གཟུང་བ་ཁོ་ན་མ་གཏོགས་མི་ཡོང་དགོས་པ་གང་ཞིག ། ༈ ༼༦༽སྐྱེ་མཆེད་བཅུ་གཉིས་ཀྱི་གཟུགས་སོགས་ཡུལ་དྲུག་གཟུང་བ་དང། མིག་སོགས་ཡུལ་ཅན་དྲུག་འཛིན་པ་ཡིན་པའི་ཕྱིར་ཏེ། གསེར་འཕྲེང་ལས། སྐྱེ་མཆེད་དང། ཤེས་པ་དང། ཤེས་བྱ་དང། བདག་དང་བདག་གི་བའི་དབང་དུ་བྱས་པའོ། །དང་པོ་ལྟར་ན་ཡུལ་དྲུག་གཟུང་བ་དང། དབང་པོ་དྲུག་འཛིན་པའོ། །གཉིས་པ་ལྟར་ན་བེམ་པོ་ཐམས་ཅད་གཟུང་བ་དང། རིག་པ་ཐམས་ཅད་འཛིན་པའོ། །གསུམ་པ་ལྟར་ན་བདག་ནི་གཟུང་བ་དང། བདག་གི་བ་ནི་འཛིན་པའོ། །ཞེས་གསུངས་པའི་ཕྱིར། ༈ ༼༡བ༧༣༽ ༼༣༽ འཛིན་རྟོག་ལ་རྫས་འཛིན་དང་རྫས་འཛིན་རྟོག་པའི་ཁྱད་པར་མ་ཕྱེད་པ་ཁ་ཅིག་ན་རེ།

― GTD002_Page_0214 ―

^{[མ་དཔེ་གཟིགས་ན་འདིར་གནོན།]}

[Full Size]

༈ ༼༡བ༧༤༽ ༼༡༽ ཉི་སྣང་ལས། ཆོས་ཐམས་ཅད་བདག་མེད་པ་ཡིན་ནོ། །ཞེས་སོ་སོ་སྐྱེ་བོས་ཀྱང་རྟོགས་པ་མིན་ནམ། ནས། སོ་སོ་སྐྱེ་བོ། དེ་དག་གིས་ནི་མོས་པ་ཡིད་ལ་བྱེད་པ་ལ། འདིར་འཕགས་པ་ནི་དེ་ཁོ་ན་ཡིད་ལ་བྱེད་པ་བརྗོད་པར་འདོད་པས། ༼༤བེ༽དེ་གཉིས་ལ་བཏགས་པ་ཙམ་དུ་འཆར་ཚུལ་ཤུགས་ཆེ་ཆུང་ཆེས་མི་འདྲ་སྟེ། དེའི་ཕྱིར་ཁྱོད་ཀྱི་རྩོད་པ། ༼༤༽སྙིང་པོ་མེད་དོ། །ཞེས་གསུངས་པའི་ཕྱིར་དང། ༈ ༼༣༽ཉི་སྣང་ལས། དེའི་ཚིག་ནི་ཐ་སྙད་པ་ཕ་རོལ་བོས་གོ་ཆེད་ཡིན་གྱི་དོན་དམ་པ་དངོས་གནས་ལ་ངའོ་སྙམ་དུ་ཞེན་ནས་མིན་པ་དེས་ན་སྙིང་པོ་མེད་དོ། །ཞེས་གསུངས་པའི་ཕྱིར་དང། ༈ ༼༤༽རྣམ་བཤད་ལས། སྤྱིར༌འཛིན་རྟོག་གཉིས་ཀའང་སྐྱེ་འཕགས་གཉིས་ཀའི་རྟེན་ཅན་དུ་ཤེས་པར་བྱའོ། །ཞེས་གསུངས་པའི་ཕྱིར། ༈ ༼༡ན༧༥༽ ༼༦༽ ཉི་སྣང་ལས། གཟུང་བའི་རྣམ་པར་རྟོག་པ་ཡིན་ལ་འཛིན་པའི་རྣམ་པར་རྟོག་པ་ནི་མ་ཡིན་པ་ཞེས་བྱ་བ་མུ་བཞི་སྟེ། མུ་དང་པོ་ནི། གཟུགས་ལ་སོགས་པའི་ཡུལ་དྲུག་གོ །ཞེས་གསུངས་པའི་ཕྱིར། ༼༤མེ༽ཉི་སྣང་གི་ལུང་དེས་གཟུགས་སོགས་ཡུལ་དྲུག་ལས་ཚིག་ཟིན་ལ་མ་བསྟན་ཡང། དེ་ལོངས་སྤྱོད་བྱར་བདེན་པར་ཞེན་པའི་ཡུལ་ཅན་གཟུང་རྟོག་དང་པོར་གོ་བའི་དོན་ནོ། ། ༈ ༼༡བ༧༥༽ ༼༦༽ མདོ་ལས། གཟུང་རྟོག་སྤྱིར་བསྟན་པའི་རྟོག་པ་ཡིན་ན་རྣམ་བྱང་གཟུང་རྟོག་ཡིན་དགོས་པའི་ཕྱིར་ཏེ། ༼༤ཙེ༽གསེར་འཕྲེང་ལས། འདིའི་དོན་གཟུང་རྟོག་ཚན་གཉིས་ཀྱི་དང་པོ་དངོས་ཙམ་ལ་བརྟེན་པ་ཞེས་པ། དེ་ནི་ཀུན་བྱང་གཉིས་ཀའི་ཡུལ་ཅན་དང། གཉེན་པོའི་རྟེན་ཅན་ནི་རྣམ་བྱང་ཁོ་ནའི་ཡུལ་ཅན་ཡིན་པས་དང་པོ་གང་ཡིན་དེས་གཉིས་པའི་དམིགས་

― GTD002_Page_0215 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཡང་དམིགས་ལ་གཉིས་པ་གང་ཡིན་དེས་དང་པོའི་དམིགས་པ་ཆ་ཙམ་ལ་མ་དམིགས་པས་ཁྱབ་པར་གསུངས་སོ། །འོག་ཏུ་ཉོན་མོངས་གཟུང་རྟོག་དགུ་གསུངས་ཀྱང། ཉི་སྣང་ལས། དངོས་པོ་ཙམ་ལ་བརྟེན་པ་ཞེས་འབྱུང་ཞིང། ཙམ་སྒྲའི་དོན་ཀུན་བྱང་བྱེ་བྲག་ཏུ་མ་བཅད་པར་ཐུན་མོང་དུ་དམིགས་པ་ལ་གསུངས་སོ། །དེ་མཚན་ཉིད་ཀྱི་དབང་དུ་བྱས་ཞེས་པའི་གཅིག་པུ་དེ་ཡིན་གྱི། དགུ་ཚན་དང་པོ་དེ་མ་ཡིན་ནོ་སྙམ་ན། འདིར་དངོས་པོ་ཞེས་པ་རྩ་བའི་གཞི་ཞེས་པའི་འབྲེལ་བ་ཡིན་ཞིང། དེ་ནི་སོ་སོར་རྣམ་པ་དགུ །ཞེས་པའི་དེ་སྒྲ་གོང་གི་གཞི་ལའང་འཇུག་དགོས་པའི་ཕྱིར་ཏེ། གསེར་འཕྲེང་སྟེང་ནས་དཔྱད་རྒྱུ་དུ་མ་ཡོད་མོད་ཀྱང་མ་སྤྲོས། ༈ ༼༡ན༧༨༽ ༼༡༽ གཟུང་བ་རང་བཞིན་མེད་པ་མན་ཆད་ཀྱི་ཆོས་ཐོས་པས་གསོ་བར་བྱ་བ་རང་རྒྱལ་གྱི་རིགས་ཟེར་བ་ལ། ཡང་ཁ་ཅིག་ན་རེ། རང་རྒྱལ་གྱི་རིགས་གཟུང་བ་རང་བཞིན་མེད་པའི་ཆོས་ཐོས་པས་གསོ་བའི་དོན་གཟུང་བ་ཕྱི་དོན་མེད་པ་དང་བདེན་མེད་གང་རུང་དགོས་པས་མི་འཐད་ཟེར། ༼༤ཚེ༽འདི་ལ་ཡིག་ཆ་རྙིང་པར་རྒ་ཤི་མ་རིག་པའི་འཁྲུལ་སྣང་ཙམ་ལས། དོན་གཞན་གྱིས་སྟོང་པར་རྟོགས་པ་ལ་བྱེད་གསུངས་པ་ནི། མེད་པའི་རྣམ་པ་ནས་བཟུང་སྟེ། །ཞེས་སོགས་ཀྱི་ཐད་དང་འགྲིག་པར་སྣང་ངོ་། ། ༈ ༼༡བ༧༨༽ ༼༡༽ མངོན་རྟོགས་བཅུའི་ནང་གི་ཆོས་དང། དོན་དང། དེ་ཁོ་ན་དང། རྗེས་ལ་དང། དཀོན་མཆོག་དང། ཀུན་ཏུ་མི་འབྱུང་བ་དང་མཐར་ཐུག་པའི་མངོན་པར་རྟོགས་པ་བདུན་དང། ཉན་ཐོས་ཀྱི་མངོན་རྟོགས། རང་རྒྱལ་གྱི་མངོན་རྟོགས། སངས་

― GTD002_Page_0216 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་ཀྱི་མངོན་རྟོགས་ཏེ་བཅུ་པོ་དེ་ཡིན་པའི་ཕྱིར། ༈ ༼༡ན༧༩༽ ༼༦༽ དཔེ་དགུ་ཚན་གཉིས་ཀྱིས་ཀྱང་བསྟན་པའི་ཕྱིར། ༼༤ཛེ༽རིགས་འདི་དཔེའི་སྒོ་ནས་སྟོན་པར། རྒྱུད་བླ་མ་ལས། དེ་ཡི་རང་བཞིན་ཆོས་སྐུ་དང། །དེ་བཞིན་ཉིད་དང་རིགས་ཀྱིས་ཏེ། །ཞེས་པའི་ཆོས་སྐུ་ལ་དྲང་ངེས་ཀྱི་མདོ་གཉིས། རྟོགས་པའི་བསྟན་པ་སྟེ་གསུམ། དེ་བཞིན་ཉིད་དང་བཞི། རིགས་ལ་རང་བཞིན་གནས་རིགས་དང། རྒྱས་འགྱུར་གཉིས་ཏེ་དྲུག །རྒྱས་འགྱུར་ལ་ཡང། ཆོས་སྐུར་འགྱུར་རུང་དང། གཟུགས་སྐུ་གཉིས་ལ་འགྱུར་རུང་སྟེ། དོན་དགུ་པོ་མཚོན་བྱེད་དཔེ་དགུ་སྟོན་པར། སངས་རྒྱས་སྦྲང་རྩི་སྙིང་པོ་བཞིན། །གསེར་བཞིན་གཏེར་བཞིན་ལྗོན་པ་བཞིན། །རིན་ཆེན་སྐུ་དང་འཁོར་ལོ་ཡིས། །བསྒྱུར་བ་བཞིན་དང་གསེར་གཟུགས་བཞིན། །ཞེས་བྱུང། རིགས་དེ་སྒྲིབ་བྱེད་དགུ་འཆད་པར། ཆགས་དང་སྡང་དང་རྨོངས་དང་དེའི། །ཀུན་སྡང་དྲག་དང་བག་ཆགས་དང། །མཐོང་སྒོམ་ལམ་སྤང་མ་དག་དང། །དག་པའི་ས་ལ་བརྟེན་པ་ཡི། །དྲི་མ་རྣམ་དགུ །ཞེས་བྱུང། ཀུན་སྡང་དྲག་དང་ཞེས་དུག་གསུམ་གྱི་མངོན་གྱུར་པ་གསུམ་གཅིག་ཏུ་བགྲངས་སོ། །དེ་མཚོན་བྱེད་དགུ་སྟོན་པར། པདྨ་སྲོག་ཆགས་བུང་བ་དང། །སྦུན་པ་དང་ནི་མི་གཙང་དང། །འབྲས་ཤུན་གོས་ཧྲུལ་བུད་མེད་ཀྱི། །མངལ་དང་ས་ཡི་སྦུབས་ན་ཡང། །ཞེས་བྱུང། དེ་དག་མཚོན་ཚུལ་སོགས་རྒྱུད་བླ་རྩ་འགྲེལ་དུ་གསལ་ལོ། ། ༈ ༼༦༽རྒྱུད་བླ་མ་ལས། དེ་ལྟར་རྒྱལ་བའི་སྙིང་པོ་ཡིས། །རྣམ་གཞག་རྣམ་པ་བཅུ་ཞེས་བརྗོད། ། ༼༤ཝེ༽རྣམ་གཞག་རྣམ་པ་བཅུའི་སྒོ་ནས་རིགས་གཏན་ལ་ཕབ་སྟེ།

― GTD002_Page_0217 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུད་བླ་མ་ལས། ངོ༡་བོ་རྒྱུ༢་འབྲ༣ས་ལ༤ས་ལྡ༥ན་འཇུ༦ག་པ་དང། །གན༧ས་སྐབས་དེ་བཞིན་ཀུ༨ན་ཏུ་འགྲོ་བའི་དོན། །རྟག་ཏུ་མི༩་འགྱུར་ཡོན་ཏན་དབྱེ༡༠ར་མེད་ནི། །ཞེས་པས་མདོར་བསྟན་ནས། རྒྱས་པར། རིན་ཆེན་ནམ་མཁའ་ཆུ་དག་བཞིན། །ཞེས་སོགས་རང་སྤྱི་གཉིས་ཀྱི་སྒོ་ནས་ངོ་བོ་ལ་སྦྱར། ཐེག་མཆོག་ལ་མོས་ས་བོན་ཤེས་རབ་ནི། །ཞེས་སོགས་རྒྱུ་ལ་སྦྱར། གཙང་བདག་བདེ་དང་རྟག་ཉིད་ཀྱི། །ཞེས་སོགས་ཀྱིས་འབྲས་བུའི་དོན་དུ་བཤད་པ་སོགས་ལེགས་བཤད་བླ་ན་མེད་པ་དུ་མ་རྗེ་བཙུན་དམ་པའི་ཞལ་ལས་ཐོས་ཀྱང་ཤོག་ཆུང་འདིའི་འདབས་སུ་མ་ཤོང། ༈ ༼༡ན༨༡༽ ༼༥༽ མཛོད་ལས། སངས་རྒྱས་གཉིས་དང་ཉན་ཐོས་བདུན། །དེ་དགུ། ཞེས་པ་ལྟར། དབྱེ་ན་དགྲ་བཅོམ་དགུའི་རིགས་དགུ་ཡོད། ༈ ༼༡བ༨༡༽ ༼༤༽ མདོ་ལས། སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། ཞེས་གསུངས་པའི་ཕྱིར། ༼༤ཞེ༽འདིའི་དོན་ཡང་ན་སྐྱེ་མཆེད་དྲུག་ལ་བཏགས་པའི་གང་ཟག་གི་གདགས་གཞིའི་རྣམ་ཤེས་སྟེང་དུ་བག་ཆགས་འཇོག་ཅེས་པའི་དོན་ཡིན་གསུངས། ༈ ༼༤༽སྒོ་ལྔའི་རྣམ་ཤེས་གནས་འགྱུར་སྤྲུལ་སྐུར་བཙུན་པས་བཞེད་པའི་ཕྱིར། ༼༤ཟེ༽ཞེས་གསུངས་པ་འདི་ལྟར་ན་མིག་ཤེས་ཀྱི་སྟེང་ན་ཡང་སངས་རྒྱ་རུང་གི་བག་ཆགས་ཡོད་པས་བག་ཆགས་འཛིན་པའི་ཤེས་པ་ལ་ཀུན་གཞིར་མ་ངེས་སོ། ། ༈ ༼༡ན༨༢༽ ༼༣༽ རིགས་དྲུག་ནི་གོ་སླ། ༼༤འེ༽ཐེག་པ་གསུམ་གྱི་རིགས་གསུམ། ངེས་མ་ངེས་ཀྱི་རིགས་གཉིས། རིགས་ཆད་དང་དྲུག་གོ ། ༈ ༼༡བ༨༢༽ ཀླུ་སྒྲུབ་ཀྱིས། དག་ཕྱོགས་ས་དང་འོད་ཟེར་དང། །ཕྱུག་

― GTD002_Page_0218 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མིག་དང་རྡོ་རྗེ་དང། །མཐོ་རིས་ཆུ་དང་དོན་དགུ་ལ། །མཁས་པས་གོ་སྒྲ་ངེས་པར་གདགས། །ཞེས་གསུངས་པ་ལྟར། གོ་སྒྲ་ས་ལ་བྱས་ནས་སས་བསྡུས་པ་སྐྱོབ་པས་དེར་བརྗོད་པའི་ཕྱིར་ཏེ། ༼༤ཡེ༽གོ་ཏྲ་ཞེས་པའི་གའི་ན་རོ་ཨུ་ན་ཞེས་པར་བསྒྱུར་བའི་གའི་སྲོག་ཏུ་ཞུགས། ཞབས་ཀྱུ་ག་ལ་བཏགས་པས། གུ་ཎ་སས་བསྡུས་དང། ཕྱོགས་སོགས་ལ་འཇུག །ཏྲའི་ཏ་དང་ར་སོ་སོར་ཕྲལ་བས་ཏ་ར་སྒྲོལ་བའམ་སྐྱོབ་པ་སྟེ། གསང་འདུས་རྩ་རྒྱུད་ལས། ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །ཞེས་སོགས་གསུངས་པའི་ཕྱིར། ༈ ༼༡བ༨༤༽ ༼༣༽ གཉེན་པོ་བར་ཆད་མེད་ལམ་གྱི་ངོས་སྐལ་གྱི་སྤང་བྱ་སྐྱེ་འགྱུར་གྱིས་སྤོང་བ་དབུ་སེམས་ཀྱི་ལུགས་དང། འགག་འགྱུར་གྱིས་སྤོང་བ་བྱེ་སྨྲའི་ལུགས་གཉིས་ཀ་གཅིག་ཏུ་བསྲེས་པའི་ཕྱིར། ༼༤རེ༽དངོས་གཉེན་སྐྱེ་བ་ལ་མངོན་དུ་ཕྱོགས་པ་དང། དེའི་སྤང་བྱ་འགག་པ་ལ་མངོན་དུ་ཕྱོགས་པའི་ཚུལ་གྱིས་སྤོང་བ་ནི། སྐྱེ་འགྱུར་གྱི་སྤོང་ལུགས་དང། སྤང་གཉེན་གཉིས་ཅིག་ཅར་མཛོ་སྦྲེལ་གཡང་ལ་ལྷུང་བ་ལྟར་འགག་པ་ནི་འགག་འགྱུར་གྱི་སྤོང་ལུགས་སོ། ། ༈ ན་བདག་ཉིད་ཆེན་པོ་ཞེས་འདུག་པས་བློ་ལྡན་ཤེས་རབ་ཡིན་ནམ་དཔྱོད།༼༡བ༩༦༽ ༼༦༽ གསེར་འཕྲེང་ལས་འདི་བྱང་ཡེའི་བཞེད་པར་བཤད་དོ། ། ༈ ༼༢བ༠༠༽ ༼༣༽ མངོན་མཐོ་ལ་ལྟོས་ནས་ཀྱང་དེར་ངེས། ༼༤ལེ༽མདོ་སྡེ་རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང། །འཁོར་རྩོམ་ཕུན་སུམ་ཚོགས་པ་མངོན་མཐོ་དང། །རྟག་ཏུ་ཉོན་མོངས་དབང་ཉིད་མི་འགྲོ་དང། །བྱ་བ་རྣམས་ལ་ཕྱིན་ཅི་མ་ལོག་པའོ། །འདི་

― GTD002_Page_0219 ―

^{[མ་དཔེ་གཟིགས་ན་འདིར་གནོན།]}

[Full Size]

མངོན་མཐོ་ལ་ལྟོས་པའི་དྲང་ངེས་སྒྲུབ་བྱེད་དང། ༈ ༼༣༽དོན་གཉིས་སྒྲུབ་པས་ཀྱང་དེར་ངེས། ༼༤ཤེ༽འདིའི་སྒྲུབ་བྱེད། སེམས་ཅན་དོན་ནི་རབ་བརྩོན་པའི། །གཏོང་དང་མི་གནོད་བཟོད་པས་བྱེད། །གནས་དང་གྲོལ་བ་གཞིར་བཅས་པ། །རང་དོན་རྣམ་པ་ཐམས་ཅད་པའོ། །ཞེས་གསུངས། ༈ ༼༣༽གཞན་དོན་རྣམ་པ་ཐམས་ཅད་པས་ཀྱང་དེར་ངེས། ༼༤སེ༽འདིའི་སྒྲུབ་བྱེད། མི་འཕོངས་པ་དང་རྣམ་པར་མི་འཚེ་དང། །རྣམ་འཚེ་བཟོད་དང་བྱ་བས་མི་སྐྱོ་དང། །དགའ་བྱེད་ལེགས་པར་བརྗོད་པ་དེ་ཡི་ཕྱིར། །གཞན་གྱི་དོན་ནི་རང་གི་དོན་ཡིན་ནོ། །ཞེས་གསུངས། ༈ ༼༣༽ཐེག་ཆེན་ཐམས་ཅད་སྡུད་པ་ལས་ཀྱང་དེར་ངེས། ༼༤ཧེ༽འདིའི་སྒྲུབ་བྱེད། ལོངས་སྤྱོད་མངོན་པར་མི་དགའ་དང། །རབ་གུས་གཉིས་ལ་མི་སྐྱོ་དང། །རྣམ་འབྱེད་རྣམ་པར་མི་རྟོག་པ༌། །ཐེག་ཆེན་མཐའ་དག་འདིར་ཟད་དོ། །ཞེས་གསུངས། ༈ ༼༣༽ཐབས་ཀྱི་རྣམ་པ་ཐམས་ཅད་པའི་དབང་དུ་བྱས་ནས་ཀྱང་དེར་ངེས། ༼༤ཨེ༽འདིའི་སྒྲུབ་བྱེད། ཡུལ་རྣམས་ལ་ནི་མ་ཆགས་ལམ། །དེ་ཐོབ་རྣམ་གཡེང་སྡོམ་པའི་གཞན། །སེམས་ཅན་མི་གཏོང་འཕེལ་བ་དང། །སྒྲིབ་པ་རྣམ་པར་སྦྱོང་བའི་གཞན། །ཞེས་གསུངས། ༈ ༼༢བ༠༡༽ ༼༣༽ རྒྱུ་དང། རྣམ་སྨིན་དང། སྨོན་ལམ་དང། སོ་སོར་རྟོག་པའི་སྒོམ་པ་བཞི་དང། ༼༤ཀོ༽སྒོམ་ཚུལ་གྱི་ནང་གསེས་དབྱེ་བ་འདི་དག་ལ་རྩ་ཚིག་མེད་ཀྱང། དབྱིག་འགྲེལ་གསལ། ༈ ༼༤༽ལྔ་པ་དབང་འབྱོར་ལ་སྐུ་ངོ་བོ་ཉིད་སྐུ་ལོངས་སྐུ་དང། སྤྱོད་པ་སྤྲུལ་སྐུ་དང། སྟོན་པ་ཕྱིན་དྲུག་

― GTD002_Page_0220 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དབང་འབྱོར་པ་སྒོམ་པ་གསུམ་རྣམས་ཡོད་པའི་ཕྱིར་ཏེ། ༈ ༼༥༽ཕྱིན་དྲུག་རེ་རེ་ལ་ངོ་བོ་ཉིད་དང། རྒྱུ་དང། འབྲས་བུ་དང། ལས་དང། སྦྱོར་བ་དང། འཇུག་པ་དང་དྲུག་གི་སྒོ་ནས་རབ་ཏུ་དབྱེ་བ་དེ་ཡིན་པའི་ཕྱིར་ཏེ། རྒྱན་ལས། སྦྱིན་པ་ལ་སྦྱར་ན་དོན་རྣམས་གཏོང་བར་བྱེད་པ་དང། ། ༼༤ཁོ༽འདིས་ངོ་བོ། རྩ་བ་སེམས་པ་ལ་བརྟེན་པ། །འདིས་རྒྱུ། ལུས་དང་ལོངས་སྤྱོད་ཕུན་ཚོགས་དང། །འདིས་འབྲས་བུ། གཉིས་རྗེས་འཛིན་དང་རྫོགས་བྱེད་དང། །འདིས་ལས། དེ་ཡང་སེར་སྣ་མེད་ལྡན་དང། །འདིས་ལྡན་པ། ཆོས་དང་ཟང་ཟིང་མི་འཇིགས་གཏོང། །འདིས་འཇུག་པའི་ཁྱད་པར་བསྟན་ཞེས་དབྱིག་འགྲེལ་གསུངས། ༈ ༼༧༽བདུན་པ་མི་མཐུན་ཕྱོགས་ཉམས་པར་བྱས་ཚུལ་ཡོད་དེ། མི་མཐུན་ཕྱོགས་༼༤གོ༽ལོངས་སྤྱོད་ལ་ཆགས་པ༡། ཕྱི་བཤོལ་ལ་ཆགས་པ༢། མཆོག་འཛིན་ལ་ཆགས་པ༣། ལན་ལ་ཆགས་པ༤། རྣམ་སྨིན་ལ་ཆགས་པ༥། མི་མཐུན་ཕྱོགས་ལ་ཆགས་པ༦། རྣམ་གཡེང་ལ་ཆགས་པ༧་སྟེ། ༼༧༽ཆགས་པ་བདུན་ཅི་རིགས་ལས་གྲོལ་བའི་ཕྱིར་ཏེ། ༈ ༼༢ན༠༢༽ ༼༡༽ བརྒྱད་པ་ཕར་ཕྱིན་གྱི་ཡོན་ཏན་རྒྱ་ཆེ་བ་ལ་ངོ་མཚར་བ་རང་གཞན་གྱི་དགའ་བདེ་བླ་ན་མེད་པ་ཡོད་དེ། སོ་སོའི་ཡོན་ཏན་ཚིགས་བཅད་ཉེར་གཉིས་ཀྱིས་བཤད་པའི་ཕྱིར་ཏེ། རྒྱན་ལས། སངས་རྒྱས་སྲས་རྣམས་༼༤ངོ༽འདིར་ཚིགས་བཅད་ཉེར་གཉིས་དང། དབྱིག་འགྲེལ་དུ་ཉེར་གསུམ་བྱུང་ཡང་རྩ་བར་ཚིགས་བཅད་སོ་དྲུག་འདུག་པས་བསྡུ་ལུགས་དཔྱད་དགོས། ༼༢༽ཞེས་སོགས་ནས། བརྩོན་འགྲུས་ལྡན་པ་ཐོབ་པས་ཕམ་པ་མེད། །ཅེས་པའི་བར་འབྱུང་བའི་ཕྱིར། འདིར་ཤོག་

― GTD002_Page_0221 ―

^{[མ་དཔེ་གཟིགས་ན་འདིར་གནོན།]}

[Full Size]

གྲངས་དང་ཐིག་འཕྲེང་གི་ཨང་ཡིག་རྣམས་དང། ཉིན་སྲིབ་ཀྱི་རྟགས་སུ་ན་ཡིག་དང་བ་ཡིག་འཇོག་དགོས་རྣམས། བཀྲ་ཤིས་འཁྱིལ་གྱི་ཕར་ཕྱིན་སྐབས་དང་པོའི་པར་རྙིང་དང་བསྟུན་ཚེ། དེར་ཤོག་གྲངས་ཀྱི་ཁ་ཡིག་ནོར་ཡོད་པ་རྣམས་ཀྱང་མ་བཅོས་པར། དེ་དང་མཐུན་པར་པར་དུ་བརྐོས་པ་ལགས་སོ།། མདྒ་ལཾ།། །།

ཕར་ཕྱིན་སྐབས་བཞི་པའི་བསྡུས་དོན།

― GTD002_Page_0223 ―

^{[མ་དཔེ་གཟིགས་ན་འདིར་གནོན།]}

[Full Size]

ཕར་ཕྱིན་སྐབས་བཞི་པའི་བསྡུས་དོན་རྒྱལ་མཁན་པོ་གྲགས་པ་རྒྱལ་མཚན་ལ་གནང་བ་བཞུགས་སོ། །

― GTD002_Page_0224 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱོར་བཞིའི་རིན་ཆེན་རྡུལ་བརྩེགས་རི་བོའི་སྤོར། །སྒྲིབ་བྲལ་དབྱིངས་རིག་དབྱེར་མེད་ལྡིང་ཁང་ན། །ལྔ་ལྡན་ལོངས་སྤྱོད་རྫོགས་པའི་འཆི་མེད་གཙོ། །སྣང་བརྙན་བྱེ་བ་བརྒྱར་འགྱེད་དེས་སྐྱོངས་ཤིག །གཞི་ཤེས་མཇུག་སྡུད་མདོ་ཚན་བཅུ་དགུ་སོགས། །སྤྱོད་པ་ཁྱད་པར་ཅན་གྱི་ལེ་འུ་ཡི། །མདོ་ཚན་གསུམ་གྱི་མཁྱེན་གསུམ་རྗོད་བྱེད་སྐབས། །གསུམ་པོ་རྫོགས་པ་ཡིན་པར་བསྟན་ཟིན་ནས། །དེ་ཡང་ཐོས་ཙམ་མིན་པར་བསྒོམ་དགོས་ཕྱིར། །དབང་དུ་བྱ་ཕྱིར་ཡང་ཞེས་གསུངས་པ་ལས། །གཞུང་ལ་སྦྱར་ནས་ཡང་སྒྲ་རྗེས་གཅོད་འཁྲུལ། །ལོ་ཆེན་མཚམས་སྦྱོར་གཞུང་ཚིག་སྔ་ཕྱི་ལ། །ཤེས་དང་སྒོམ་པའི་སྒྲ་ལས་མ་བྱུང་ཕྱིར། །དེ་དེ་ཙམ་ཕྱིར་ཡིན་པས་མི་ཟློས་ལོ། །གང་ཐོས་དེ་ཉིད་བསྒོམ་བྱར་གཞུང་བརྒྱས་འགྲུབ། །ལ་ལ་དང་པོ་གསུམ་དུ་མཁྱེན་གསུམ་གྱི། །རྣམ་པ་མི་གསལ་

― GTD002_Page_0225 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ན་མི་ཟློས་ཟེར། །རྒྱུ་འབྲས་ལ་སོགས་དོན་དང་ལམ་གསུམ་སོགས། །ཤེས་རྣམ་ཅི་རིགས་དེར་ཡང་གསལ་ཕྱིར་མིན། །༈ རང་ལུགས་ཡུལ་ངོ་བྱེད་ལས་གསུམ་ཕྱིར་ཏེ། །ཐོར་བུ་ཕྱེ་བ་འདིར་བསྡུས་བསྡུས་བསྒོམ་ཕྱིར། །སྐབས་འདིས་ལྷན་ཅིག་གསུངས་ལ་ཐོར་བུའི་དོན། །ཚང་བ་ལས་ཀྱང་ལྷག་ཕྱིར་འདིས་ཆོག་གོ །མ་ཡིན་མཁྱེན་གསུམ་སོ་སོའི་མཚན་ཉིད་དང། །སྒོམ་བྱེད་སྦྱོར་ཤེས་དགོས་པ་གཞན་ཕྱིར་ཏེ། །ལྡོག་ཆ་ཙམ་དང་སྒོམ་བྱེད་ཀྱིས་བསྙད་ཕྱིར། །གསུམ་པ་བྱེད་ལས་སྒོས་ཀྱང་མི་མཚུངས་ཏེ། །དེ་ཞི་བ་དང་གཉེན་པོའི་སྒྲས་བསྟན་ཕྱིར། །རིམས་ནད་ཞི་དང་ཞི་བའི་ཐབས་བརྗོད་བཞིན། །དང་པོ་བསྡུས་སྒོམ་དོན་ཡང་ལོ་ཆེན་གྱིས། །གཞི་ཡི་ཉེར་བདུན་ལམ་གྱི་སུམ་ཅུ་དྲུག །རྣམ་ཐར་རྣམ་གསུམ་བར་ཆད་མེད་ལམ་བཞི། །དེ་བཞིན་ཉིད་བཅས་དོན་དམ་དོན་གཅིག་ལས། །སྟོང་དང་བདག་མེད་གཞི་ལམ་དབྱེ་བས་བཞི། །

― GTD002_Page_0226 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔར་རྗེས་མཐུན་རྣམ་མཁྱེན་རྣམ་པའི་སྟོང། །ལྔ་པོ་སྟོང་པ་ཉིད་ཀྱི་རྣམ་པ་འོ། །གཞི་ལམ་དབྱེ་བས་འགོག་ལམ་ཞེ་གཉིས་དང། །རྣམ་པའི་མཚན་མེད་འགོག་ལམ་བར་ཆད་མེད། །ཞེ་ལྔ་མཚན་མེད་དོ་སྨོན་མེད་བཅོ་བརྒྱད་དེ། །སྡུག་ཀུན་གཞི་ལམ་དབྱེ་བས་བཅུ་དྲུག་སྟེང། །ཀུན་འབྱུང་བར་ཆད་མེད་དང་སྨོན་མེད་དོ། །སྟོང་སྨོན་ཐུན་མོང་སྡུག་བསྔལ་དངོས་ཉིད་མེད། །གསུམ་གའི་ཐུན་མོང་དེ་བཞིན་ཉིད་རྣམ་སྟེ། །ཐུན་མོང་རྣམ་ཐར་ཀྱང་བསྡུས་གཙོ་བོ་ནི། །ལྷག་མ་ཆོས་ཅན་རྣམ་པ་བརྒྱ་གཉིས་བཅས། ངོ་བོ་རྒྱུ་འབྲས་བདེན་སྟོང་སྤྲོས་བྲལ་དུ། །བསྡུས་ནས་བསྒོམ་པ་བསྡུས་སྒོམ་དོན་དུ་འདོད། །དོན་གཅིག་བདེན་མེད་ཡིན་པའི་ཕྱིར་བསམ་ན། །ལྷག་ལ་ཐལ་བར་འགྱུར་ཞེས་ལམ་སྒྲིག་གསུངས། །མདོ་སྒྲ་ཙམ་ལ་བརྟེན་ནས་མི་རྟག་སོགས། །རང་ལྡོག་མི་འདྲེན་ཆོས་ཉིད་འདྲེན་ན་ཡང། །རང་ལྡོག་ཇི་སྙེད་རྣམ་པར་འདོད་དགོས་ཤིང། །གྲངས་ཕན་ཀུན་རྫོབ་རྣམ་པ་བརྒྱ་དང་གཉིས། །དངོས་སུའང་ཁྱེད་འདོད་དེ་དག་སྒོམ་མམ་མིན། །བསྒོམ་ན་སྒོམ་ཚུལ་འཆད་ཚེ་འཆད་དགོས་ཕྱིར། །འགྲེལ་ཚིག་བསྒྱུར་ནས་སྟོང་ཙམ་བསྒོམ་གསུངས་འགལ། །མི་སྒོམ་རྟག་འཛིན་གཉེན་པོར་མི་རྟག་སོགས། །རིམ་གསུངས་རྩ་བ་འགྲེལ་པ་ཀུན་དང་འགལ། །ཁ་ཅིག་ཞི་ལྷག་ཡུལ་དུ་བསྡུས་འདོད་འཁྲུལ། །སེམས་བསྐྱེད་ཞི་གནས་ལ་རག་ཧ་ཅང་ཕྱིར། །རང་ལུགས་མཁྱེན་གསུམ་རྣམ་ཀུན་རྣམ་རྫོགས་ཀྱི། །འཛིན་སྟངས་ཡུལ་དུ་སྡུད་

― GTD002_Page_0227 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བསྡུས་སྒོམ་དོན། །སྒྲ་དོན་མ་ངེས་རྣམ་རྫོགས་སྦྱོར་བ་བཞིན། ། ༈ གཞུང་གི་དོན་ལ་རྣམ་རྫོགས་སྤྱི་དོན་དང། །ཐར་ཆ་ནས་བཟུང་རྒྱུད་ལ་སྐྱེ་རིམ་གཉིས། །དང་པོ་སྦྱར་ས་རྣམ་པ་སྦྱོར་མཁན་རྟེན། །སྦྱོར་བའི་ངོ་བོ་སྐྱོན་ཡོན་མཚན་ཉིད་དྲུག །རྒྱས་བཤད་དོན་དང་མདོར་བསྟན་ཤེས་རྣམ་བདུན། །དེར་ཡང་དངོས་དང་སྒོམ་བྱེད་སྦྱོར་རྣམ་གཉིས། །དེ་ཕྱིར་མདོར་བསྟན་རྐང་པ་དང་པོ་ཡིས། །ཟློག་ཕྱོགས་འགལ་ཟླའི་རྣམ་ལྡན་ཤེས་རྣམ་བསྟན། །རྣམ་པའམ་བྱེ་བྲག་ཅེས་པས་རྟག་འཛིན་དང། །བདེར་འཛིན་ལ་སོགས་སོ་སོའི་བྱེ་བྲག་གི །ངོས་སྐལ་གནོད་བྱེད་འཛིན་སྟངས་འགལ་བ་བསྟན། །མཚན་ཉིད་ཅེས་པས་འཛིན་སྟངས་འགལ་བ་དེ། །གོང་དུ་བཤད་པའི་ཤེས་རྣམ་སྦྱོར་རྣམ་གཉིས། །གཉེན་པོར་འཇོག་བྱེད་མཚན་ཉིད་ཡིན་པར་གསུངས། །ཁ་ཅིག་རྣམ་པའི་མཚན་ཉིད་འཆད་བྱེད་དུ། །བྱེད་པ་རྣམ་བཤད་ལས་ནི་བཀག་གོ་ཟེར། །བདེན་བཞིའི་སྟེང་དུ་རྟག་འཛིན་ལ་སོགས་པ། །འཇོམས་བྱེད་གཉེན་པོར་འགྱུར་ཚུལ་མ་སྦྱར་བར། །རྣམ་པ་ཤེས་རབ་བོ་ཞེས་འདྲ་ཁ་ཡན་ཙམ། །བཤད་ན་དགོས་པ་སྟོར་བ་དེ་དོན་ཡིན། །དེ་ཕྱིར་གཞི་མེད་རྣམ་པར་མ་སོང་བར། །རྣམ་པའི་དོན་དུ་མཛད་པ་ཡབ་སྲས་མཐུན། །ཚིག་གསལ་གཞི་ཡིས་གཞི་ཤེས་ཤེས་པ་ཞེས། །ལམ་དང་རྣམ་པས་རྣམ་མཁྱེན་བསྟན་ནོ་ཟེར། །རྣམ་པ་དེ་ལ་ཀུན་མཁྱེན་ཉིད་གསུམ་གྱི། །ཤེས་རྣམ་རྩ་བར་གསུངས་ཕྱིར་མཐའ་རྐྱང་

― GTD002_Page_0228 ―

^{[མ་དཔེ་གཟིགས་ན་འདིར་གནོན།]}

[Full Size]

མིན། །རྗེ་སོགས་ལས་དང་བྱེད་པའི་རྣམ་པ་ལ། །དོན་རྣམ་ཤེས་རྣམ་ཐ་སྙད་རིམ་སྦྱར་བ། །གསུང་རབ་ཐ་སྙད་མིན་ཞེས་ཁ་ཅིག་ཟེར། །རྩ་བར་འཕགས་པའི་བདེན་པ་བཞི་དག་གི །རྣམ་པ་ཞེས་པས་དོན་རྣམ་གསལ་བར་གསུངས། །དེ་བཞིན་ཤེས་པའི་རྣམ་པའང་ཡེ་ཤེས་ཀྱི། །རྣམ་པ་ཞེས་ནི་རིག་བྱིན་གསུངས་ཕྱིར་རོ། །དོན་རྣམ་ཤེས་རྣམ་གཉིས་ལས་བསྒོམ་བྱ་དངོས། །གང་ཡིན་ཁ་ཅིག་རྩོད་པ་དོན་ཆུང་སྟེ། །མི་རྟག་སྒོམ་པས་དེ་བློ་བསྒོམ་འགྱུར་ཞིང། །སྟོང་ཉིད་སྒོམ་ལ་ཤེར་ཕྱིན་བསྒོམ་གསུངས་ཕྱིར། །ཁ་ཅིག་མཐོང་ལམ་བར་ཆད་མེད་ལམ་གྱིས། །ཡེ་ཤེས་བསྒོམས་ན་ཤེས་པ་བསྒོམ་འགྱུར་ཟེར། །མ་ངེས་དེ་ལྟ་མིན་ན་ཡེ་ཤེས་དེར། །མཉམ་པར་བཞག་བློ་མེད་པར་ཐལ་བར་འགྱུར། །ཁྱེད་ཅག་བསྒོམ་བྱར་བྱས་ན་འཛིན་སྟངས་སུ། །བྱེད་དགོས་སྙམ་པ་འདི་ཡིས་ནོངས་པའི་ཕྱིར། །སྒོམ་ཚུལ་སྣ་ཚོགས་དབྱེ་བ་ཤེས་དགོས་ཏེ། །སྟོང་དང་བདེན་བཞི་འཛིན་སྟངས་ཡུལ་བྱས་བསྒོམ། །བྱམས་སོགས་ཡུལ་ཅན་ངོ་བོར་བསྐྱེད་ནས་བསྒོམ། །ཚོགས་ལ་དབང་སྟོབས་རྗེས་མཐུན་རྣམ་པས་བསྒོམ། །སོ་སྐྱེས་མཁྱེན་གསུམ་རྟོགས་རིགས་སྒོ་ནས་བསྒོམ། །ཕལ་པས་དངོས་བརྒྱད་མཚན་ཉིད་རྗེས་དཔྱོད་བསྒོམ། །རྒྱལ་ཀུན་གསང་གསུམ་སྨོན་ལམ་རྣམ་པས་བསྒོམ། །ལ་སོགས་འཕྲོས་དོན་སྣ་ཚོགས་ཤེས་པར་བྱ། །རང་ལུགས་འཛིན་སྟངས་ཡུལ་རྣམ་ཤར་བའི་སྒོས། །རང་གི་མི་མཐུན་ཕྱོགས་ལ་གནོད་བྱེད་ཀྱི། །ཆ་གཞག་རིག་པ་གཉེན་པོའི་མཚན་ཉིད་དེ། །ཆ་བཞག་འཛིན་སྟངས་མི་གསལ་ཁ་ཅིག་དང། །རང་གི་མི་མཐུན་ཕྱོགས་མེད་རྣམ་མཁྱེན་སྡུད། །འདིར་བསྟན་དེ་ནི་འདིར་བསྟན་གཉེན་པོའི་དོན། །ཆ་བཞག་མ་སྨོས་སྦྱོར་རྣམ་གཙོ་ཕྱིར་དཔྱད། །

― GTD002_Page_0229 ―

^{[མ་དཔེ་གཟིགས་ན་འདིར་གནོན།]}

[Full Size]

གཉེན་པོ་ལམ་ཞུགས་ཁོ་ནར་འདོད་མི་རིགས། །སྤོང་གཉེན་ཙམ་མིན་གཉེན་པོ་སྣ་ཚོགས་ཏེ། །གང་གང་སྐྱོན་མཐོང་རྣམ་པར་སུན་འབྱིན་གཉེན། །རྐུན་པོ་འབྱིན་འདྲའི་སྤོང་གཉེན་བར་ཆད་མེད། །བྲལ་ཐོབ་འཛིན་པའི་གཞི་གཉེན་རྣམ་གྲོལ་ལམ། །དེ་ཡན་ཁྱད་པར་ལམ་རྣམས་ཐག་བསྲིང་གཉེན། །བྱེ་སྨྲ་རྣམ་གྲོལ་ལམ་ཡང་འདིར་འདོད་ལོ། །གཞན་ཡང་ཚུལ་ཁྲིམས་སྐྱེས་བུ་ཆུང་ངུར་ཡང། །ཡོད་ཕྱིར་གཉེན་པོ་མིན་ན་མཛོད་སོགས་ལས། །མཚན་ཉིད་མི་མཐུན་ཕྱིར་རིང་འབྱུང་བཞི་དང། །མི་མཐུན་གཉེན་པོས་རིང་བ་ཁྲིམས་དང་འཆལ། །ཤར་ནུབ་ཡུལ་གྱིས་རིང་ཞིང་འདས་མ་འོངས། །དུས་ཀྱིས་རིང་སྟེ་བཞི་གསུངས་གཉིས་པར་འགལ། །ཁ་ཅིག་གཉེན་པོ་ཡིན་ན་སྤང་བྱ་དེར། །འཛིན་སྟངས་དངོས་འགལ་དགོས་འདོད་འཁྲུལ་བ་སྟེ། །འདུ་ཤེས་ཀུན་མཆོག་མི་རྟག་འདུ་ཤེས་སུ། །གསུངས་ཕྱིར་བདེན་འཛིན་གཉེན་པོར་གཞོལ་ཕྱིར་དང། །བདག་མེད་རྣམ་གཉིས་རྟོགས་པའི་ཡེ་ཤེས་གཉིས། །ཆགས་པར་དངོས་འགལ་ཡིན་པ་ཆགས་པ་དེ། །འཛིན་པ་གཉིས་ཕྱིར་སྒྲིབ་པ་གཉིས་ཀར་འགྱུར། །ཁ་ཅིག་མདོ་ཡིས་དོན་རྣམ་ཙམ་བསྟན་ཟེར། །མ་མཆིས་ཞེས་པས་དོན་དང་ཤེར་ཕྱིན་ཞེས། །ཤེས་རྣམ་གསུངས་ཤིང་གཞན་ཡང་ཅི་རིགས་པར། །རྒྱལ་དང་རབ་འབྱོར་གཉིས་ཀྱིས་དོན་ཤེས་ཀྱི། །རྣམ་པ་གཉིས་ཀ་གསུངས་ཕྱིར་མི་འཐད་དོ། །ལ་ལ་རྒྱས་བཤད་ཤེས་རྣམ་གཙོར་བསྟན་ཏེ། །ལམ་གྱི་རྣམ་པ་དེ་སྙེད་བསྟན་ཕྱིར་ཟེར། །ཤེས་རྣམ་ཡིན་ཀྱང་སྐབས་འདིར་ཤེས་རྣམ་དུ། །བྱས་ཏེ་མ་བསྟན་ཕྱིར་ན་མི་འགལ་ལོ། །ཁ་ཅིག་གཉེན་པོར་འཛིན་

― GTD002_Page_0230 ―

^{[མ་དཔེ་གཟིགས་ན་འདིར་གནོན།]}

[Full Size]

སྟངས་རྣམ་འཆར་ན། །བར་ཆད་མེད་ལ་འཛིན་སྟངས་འཆར་འགྱུར་ཞིང། །འདོད་ན་རང་ཡུལ་འཆར་རམ་ཞེ་ན་མིན། །ཡུལ་ལ་དམིགས་ཡུལ་ལ་སོགས་སྣ་ཚོགས་ཤིང། །འཛིན་སྟངས་བདག་མེད་ཕྲ་རགས་གང་རུང་ཕྱིར། །ཚིག་ལ་གཟབ་ཅིང་ཤུགས་ཡུལ་གསུངས་པ་དཔྱད། །རྒྱས་པར་བཤད་གསུམ་དང་པོ་གཞི་ཤེས་ལ། །གྲུབ་འཕྲལ་འགྱུར་ལྡོག་མི་རྟག་མེད་པའི་དོན། །དོན་དམ་རྨོངས་པའི་ཉེར་ལེན་སྡུག་བསྔལ་ཏེ། །ཡང་ན་སྐད་ཅིག་ལས་ལྷག་མི་སྐྱེས་དང། །བདག་དབེན་བདག་གི་བ་ཡིས་མི་བརྫི་བཞི། །སྲེད་པ་བདེན་མེད་ཀུན་འབྱུང་ནམ་མཁའ་འདྲ། །རབ་ཏུ་སྐྱེད་བྱེད་ཚུལ་བཞིན་མ་ཡིན་པའི། །ཡིད་བྱེད་རྟོག་དཔྱོད་ལ་སོགས་བརྗོད་དུ་མེད། །ཡང་ན་རྟོག་དཔྱོད་མེད་ཕྱིར་རྗོད་བྱེད་མེད། །ཡང་སྲིད་རྐྱེན་གྱིས་ཚོར་སོགས་མིང་བཞི་མེད། །འགོག་པ་གཞན་གྱི་རྒྱུད་དུ་འགྲོ་བ་མེད། །གཏན་དུ་ཞི་ཕྱིར་རྐྱེན་གྱིས་མི་འཕྲོག་སྟེ། །དག་སྙིང་གཟུང་མེད་ལ་སྦྱར་གསེར་འཕྲེང་བཞེད། །ཆོས་དབྱིངས་ཉིད་ཕྱིར་ཐར་པ་མི་ཟད་དེ། །ཆོས་ཉིད་དྲི་བྲལ་འགོག་པ་སྐྱེ་བ་མེད། །ལམ་ལ་ཉོན་སྒྲིབ་གཉེན་པོ་རྣམ་བཞི་སྟེ། །ལམ་སྒོམ་བྱེད་པོ་དོན་དམ་རིག་པ་པོ། །གོང་མར་འཕོ་བོ་ཉོན་མོངས་འདུལ་བ་པོ། །བདག་མེད་རྟོགས་པའི་མཐོང་ལམ་ཟག་མེད་བཞི། །འཕོ་བ་རྒྱན་བཟང་འཆི་འཕོར་བཤད་ཀྱང་མིན། །ཉོན་མོངས་གཉེན་པོ་རྫོགས་ཕྱིར་ལྷག་བཅུ་གཅིག །འོས་མེད་རིགས་པས་ཤེས་སྒྲིབ་གཉེན་པོར་འགྲུབ། །དེ་སྤང་དཀའ་ཕྱིར་མཐོང་སྒོམ་གཉིས་ཕྱེ་བར། །མཉམ་གཞག་གཙོ་དང་མཉམ་རྗེས་སྤེལ་མ་རུ། །དུས་རིང་འབྱུང་ཕྱིར་ཟག་མེད་ཟག་བཅས་འབྱེད། །སློབ་དཔོན་ལམ་འདིས་རང་རྒྱལ་སྡུད་པའི་ཕྱིར། །ཤེས་སྒྲིབ་གཉེན་པོ་གསུངས་

― GTD002_Page_0231 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ལོ་ཆེན་གྱིས། །རང་རྒྱལ་སྡུད་དགོས་ཞེས་པ་ཤེས་རྣམ་གྱི། །དབང་བྱས་ཡིན་ན་དོན་རྣམ་བཤད་སྐབས་འཆོལ། །དོན་རྣམ་ཡིན་ན་དེར་འདུ་ག་ལ་དགོས། །བདེན་པ་དང་པོ་གསུམ་དང་མཚུངས་ཞེས་ཟེར། །རྒྱལ་བས་སྡུག་ཀུན་སྤོང་ཕྱིར་ལམ་བསྒོམ་ཞེས། །གདམས་ཏེ་བསྐྱེད་བྱར་ཡིན་གྱི་ཤེས་བྱར་མིན། །འདིར་ཡང་གཞི་ཤེས་འབའ་ཞིག་སྐབས་ཡིན་ཕྱིར། །ལམ་འདིས་གཞི་ཤེས་རང་གི་ངོ་བོའི་སྒོས། །མཚོན་སླད་རང་ཡིན་ཚུལ་གྱིས་བསྡུས་པས་ན། །དམིགས་པར་བསྡུས་པའི་ཚུལ་དང་ག་ལ་མཚུངས། །གལ་ཏེ་ཁྱོད་ལྟར་དམིགས་པའི་དབང་བྱས་ཀྱང། །ཉན་རང་རང་རྒྱུད་ལུས་ཚོར་སེམས་ཆོས་ཙམ། །དམིགས་ཕྱིར་དམན་ཞེས་དབུས་མཐའི་འགྲེལ་པར་གསུངས། །འཕགས་པས་འདིའོ་ཞེས་དགག་ཚིག་མ་མཛད་ཕྱིར། །ཐེག་པ་གཉི་གའི་ཤེས་སྒྲིབ་གཉེན་པོ་ཀུན། །བཞེད་ཀྱི་སློབ་དཔོན་ལྟར་མིན་གསུངས་པ་ཡང། །མི་རིགས་དེས་ཀྱང་མཐོང་སྒོམ་ཉིད་གསུངས་ཕྱིར། །ཚིག་གསལ་ཕྱི་མ་འདི་གཉིས་སྒོམ་གཅིག་པུར། །གསུངས་པ་འགྲེལ་ཆུང་འགྱུར་ལ་བདེ་འདྲ་ཡང། །སྣང་བ་གཉིས་དང་མི་མཐུན་ཕྱིར་ན་དོར། །དེ་ཡང་སྒོམ་ལ་ངོ་བོ་ཉིད་མེད་ལྔ། །མཐོང་ལ་ཕྱི་དོན་ཀུན་ཉོན་རྣམ་བྱང་དང། །བག་ཆགས་དབྱེ་བའི་སྤྲོས་དང་རྟོགས་པའི་རློམ། །ཕྱི་དོན་རྟོགས་པ་ཐོབ་ཟིན་ཉམས་མེད་དྲུག །ཐ་མར་གསེར་འཕྲེང་སྟོང་ཉིད་མི་གཡོ་གསུངས། །འདི་དག་ལེགས་ལྡན་འདོད་ཚུལ་ལམ་སྒྲིག་གསལ། །འདིར་བསྟན་གཙོ་བོ་རྣམ་གཞག་རྟེན་ཤེས་ནས། །རྗེས་སུ་གཟུང་ཕྱིར་སེམས་དཔའི་བསྐྱེད་བྱ་ཙམ། །ཡིན་ཕྱིར་དམན་ལ་མིན་ཞིང་རྒྱལ་ལའང་མིན། །སྐབས་འདིར་གཙོར་བསྟན་ལམ་ཤེས་འང་གཞི་ཤེས་ཉིད། །

― GTD002_Page_0232 ―

^{[མ་དཔེ་གཟིགས་ན་འདིར་གནོན།]}

[Full Size]

ཁ་ཅིག་བདག་མེད་མངོན་སུམ་རྟོགས་པའི་བློས། །ཟིན་པའི་ཐེག་དམན་ཤེས་རབ་རྟོགས་རིགས་དེ། །གཞི་ཤེས་དམིགས་ལ་ལོག་ཞུགས་གཉེན་པོར་འདོད། །གཞི་ཤེས་དམིགས་པར་ལོག་ཞུགས་བདེན་འཛིན་ཡང། །ཡོད་ཅིང་མི་རྟག་རྟོགས་བློ་དེའི་གཉེན་པོར། །མི་རིགས་འདིར་བསྟན་གཉེན་པོ་རྣམ་པའི་དོན། །སྔར་བཤད་བཞིན་དུ་འཛིན་སྟངས་འགལ་དགོས་ཤིང། །གཉེན་པོ་ཙམ་ལ་བསམ་ན་སྐབས་འཆོལ་ཕྱིར། །གང་གི་གཉེན་པོ་བྱ་ཡུལ་སྒྲིབ་པ་ལ། །མཚན་ཉིད་ཟུར་དུ་ཆ་བཞག་མ་སྨོས་པར། །ཐར་དང་ཐམས་ཅད་མཁྱེན་ལ་བར་གཅོད་སྒྲིབ། །རིམ་བཞིན་སྒྲིབ་གཉིས་དོན་དུ་ཁ་ཅིག་འདོད། །གཞན་དག་སྔ་མའི་སྐྱོན་དུ་བདེན་འཛིན་འཕེན། །འཇིག་ཚོགས་ལྟ་བའི་གདོན་གྱིས་བྱང་ཆུབ་མཆོག །ཐོབ་ལ་བར་དུ་གཅོད་ཕྱིར་སྔ་མ་ཞིག །དགྲ་བཅོམ་བདེན་འཛིན་ལྡན་ཕྱིར་གནོད་ཙམ་གྱིས། །བར་གཅོད་མི་དགོས་ཕྱིར་ན་གཞན་དེའང་ཁེགས། །སྒྲིབ་དེ་གཉིས་སུ་ངེས་ཀྱང་མ་ཁྱབ་སྟེ། །སྟོབས་ཀྱི་སྒྲ་དོན་དབང་པོའི་རྡོ་རྗེ་བཞིན། །གང་ལ་ཐོགས་པ་མེད་ཚུལ་འཆད་པའི་སྐབས། །གནས་དང་གནས་མིན་མཁྱེན་པ་ལ་སོགས་དྲུག །ཤེས་སྒྲིབ་གོ་ཆས་འཐུམས་པ་འབིགས་བྱེད་དང། །བསམ་གཏན་རྣམ་ཐར་མཁྱེན་སོགས་ཁམས་གཅོད་པའི། །སྙོམས་འཇུག་སྒྲིབ་པའི་རྩིག་པ་གཞིག་བྱེད་གསུམ། །སྲིད་པའི་འདབ་རྒྱས་ཉོན་མོངས་ལྗོན་ཤིང་ཆེ། །གཅོད་བྱེད་ཟག་ཟད་སྟོབས་སུ་རྒྱུད་བླར་གསུངས། །འོན་ཀྱང་བྱིང་ཕྲ་དགེ་ལ་རགས་པ་ནི། །མ་སྒྲིབ་ལུང་མ་བསྟན་དུ་བཤད་པའི་ཕྱིར། །སྒྲིབ་གཉིས་ལས་གཞན་སྙོམས་འཇུག་སྒྲིབ་གང་དཔྱད། །སྙོམས་འཇུག་སྒྲིབ་ལ་སྒྲིབ་པས་ཁྱབ་གསུངས་ཤིང། །ལས་སྒྲིབ་དེ་ལས་བཟློག་ཕྱིར་དེ་ཉིད་ལ། །ངོ་ཚ་ཁྲེལ་མེད་དང་ལྡན་མེད་དམ་དཔྱད། །གཞན་ཡང་

― GTD002_Page_0233 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲིབ་པའི་འཇོག་ཚུལ་དུ་མ་སྟེ། །དབུས་མཐའ་རྩ་འགྲེལ་སྒྲིབ་པའི་ལེ་འུ་ལས། །སྒྲིབ་པ་ཆེན་པོ་ནས་བཟུང་ཕར་ཕྱིན་དང། །ཁྱད་པར་འགྲོ་ལ་སྒྲིབ་བཅས་བཅུ་གསུངས་ཤིང། །དེ་ཡི་ཐ་མ་གཉིས་ཀྱིས་བསྡུས་པ་ཡི། །ཀུན་རྨོངས་ཉེར་གཉིས་བཅུ་གཅིག་གནས་ངན་ལེན། །སྒྲིབ་གཉིས་ལས་གཞན་ཁ་ཅིག་ཆགས་སྒྲིབ་དང། །ཐོགས་སྒྲིབ་གཉིས་ཀྱང་སྒྲིབ་གཉིས་ལས་གཞན་ཟེར། །མི་འཐད་ཇི་ལྟ་ཇི་སྙེད་ལ་རྨོངས་པའི། །ཆ་ནས་ཕྱེ་ཡང་ཤེས་སྒྲིབ་དང་གཅིག་ཕྱིར། །ཁ་ཅིག་འདོད་ཆེན་ཆོས་ལ་སྡང་བ་དང། །མུ་སྟེགས་བདག་ལྟ་ཉན་ཐོས་འཇིགས་སྲེད་དང། །རང་རྒྱལ་བརྩེ་མེད་སྒྲིབ་བཞིའང་གཉིས་མིན་ཟེར། །སྔ་གཉིས་སྲིད་མཐར་ལྟུང་བྱེད་ཉོན་སྒྲིབ་དང། །ཕྱི་གཉིས་ཞི་མཐར་ལྟུང་བྱེད་བདེན་འཛིན་གཙོ། །གཉེན་པོ་མོས་པ་ལ་སོགས་བཞི་ཡི་འབྲས། །གཙང་བདེ་རྟག་བདག་དམ་པའི་ཕར་ཕྱིན་བཞི། །གཞི་ཤེས་བཞིན་དུ་རང་གི་དམིགས་རྣམ་གཅིག །བྱས་ནས་ཉམས་ལེན་གཞི་ཤེས་སྦྱོར་བའི་དོན། །དམིགས་པ་བདེན་བཞི་རྣམ་པ་གཞི་ཤེས་ཀྱི། །འཛིན་སྟངས་ཉེར་བདུན་གང་རུང་སྒོམ་པ་ཡི། །རབ་ཕྱེ་སེམས་དཔའི་སྦྱོར་བ་འདིར་དངོས་སུ། །གཙོར་བསྟན་སེམས་དཔའི་གཞི་ཤེས་སྦྱོར་བའི་དོན། །དེ་དག་དོན་ལ་ཁ་ཅིག་ཤེས་སྒྲིབ་རགས། །ཤེས་སྒྲིབ་མིན་ཏེ་རགས་པ་ཡིན་པའི་ཕྱིར། །བདག་འཛིན་རགས་པ་བདག་འཛིན་མིན་བཞིན་ཟེར། །ཤེས་སྒྲིབ་ཡིན་པ་རྣམ་དག་སྐབས་ཀྱིས་འགྲུབ། །ཁ་ཅིག་བྱེད་པོ་བདག་མེད་རྟོགས་སོགས་བཞི། །བཅོ་ལྔར་དབྱེ་བའི་དོན་རྣམ་མ་ཡིན་ཏེ། །ལམ་གྱི་རྣམ་པ་སྒོམ་བྱེད་ཡིན་ཕྱིར་ཟེར། །མ་ངེས་ལམ་སྟེང་འདིར་བསྟན་དོན་རྣམ་ལ། །ལམ་དེའི་འཛིན་སྟངས་

― GTD002_Page_0234 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུལ་ཞིག་མི་དགོས་ཕྱིར། །དེ་ལྟར་མེད་པ་ནས་བཟུང་མི་གཡོའི་བར། །གཞི་ལ་སྦྱར་ཕྱིར་ལམ་ལ་མཚམས་འབྱེད་བྱེད། །དངོས་སུ་མེད་ཀྱང་འདོད་ཆགས་བྲལ་རྣམ་ནས། །དངོས་མེད་དངོས་ཉིད་བར་ཞེས་དོན་གྱིས་འཐོབ། །རྒྱུད་བླར་མངོན་རྟོགས་རིམ་དང་འདིར་གསུངས་པ། །རྒྱུ་འབྲས་དོན་རིམ་ཕྱིར་ན་འགལ་བ་མེད། །ཀུན་འབྱུང་སྤོང་གཉེན་སྒོ་ནས་རྣམ་པ་བརྒྱད། །ལམ་ལ་དམ་བཅའ་འཐད་པའི་སྒོ་ནས་བདུན། །སྡུག་བདེན་རང་སྤྱིའི་སྒོས་ལྔ་འགོག་བདེན་ལ། །སྟོང་ཉིད་སྒོ་ནས་རྣམ་པ་བཅུ་དྲུག་སྟེ། །རྣམ་བཤད་ལྟར་ན་ཕན་ཡོན་རྣམ་པས་སོ། །དང་པོ་བདག་མེད་མངོན་མཐོང་ཡེ་ཤེས་དེ། །མ་འོངས་ལ་འདུན་མི་འབྲལ་འདོད་ཆགས་དང། །ཡང་སྲིད་ལ་དགའ་གསུམ་གྱི་གཉེན་པོ་སྟེ། །ཐོབ་འདོད་ཆགས་བྲལ་ཞེན་པས་མི་གནས་དང། །སྲེད་པ་ཞི་བའི་ཡེ་ཤེས་གསུམ་ཡིན་ཕྱིར། །གསེར་ཕྲེང་འདུན་པ་ཡུལ་ངེས་ལ་གསུངས་དཔྱད། །དེ་བཞིན་ཆགས་སྡང་རྨོངས་གསུམ་གཉེན་པོ་སྟེ། །དེ་ཡི་ཞེན་ཚུལ་མེད་པའི་རྣམ་ཅན་ཕྱིར། །བདག་འཛིན་གྱུར་བའི་ཞེ་སྡང་འདི་ཡིས་འགྲུབ། །གཙང་བདེ་སོགས་གསུམ་ཀུན་རྟོག་གཉེན་པོ་སྟེ། །ཀུན་ནས་ཉོན་མོངས་ཞེན་ཡུལ་མེད་རྟོགས་ཕྱིར། །རང་དབང་སེམས་ཅན་ཉིད་དུ་མངོན་ཞེན་པའི། །གཉེན་པོ་ཡིན་ཏེ་དེ་མེད་མཐོང་ཕྱིར་རོ། །དེ་ལྟར་མདོ་ལས་ཀུན་འབྱུང་སྤང་བྱ་རུ། །ཤེས་ཕྱིར་དངོས་སུ་མ་བསྟན་གཉེན་པོ་བརྒྱད། །བསྟན་ཏེ་འདིར་ནི་སྤོང་གཉེན་སྦྱར་ནས་གསུངས། །ལམ་སོགས་གསུམ་གྱི་དངོས་དང་འཐད་པ་ནི། །སེམས་ཅན་ཚད་མེད་ཐར་པའི་གོ་འབྱེད་དེ། །སྲིད་ཞིའི་མཐའ་དང་མ་འབྲེལ་འབྱེད་ཕྱིར་རོ། །ཆོས་དབྱིངས་ངོ་བོ་ཐ་དད་མེད་རྟོགས་ཏེ། །གཞན་མཆོག་མི་འཛིན་རྫོགས་བྱང་སྒྲུབ་ཕྱིར་རོ། །ཡོན་ཏན་

― GTD002_Page_0235 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲུབ་ཀྱང་རྣམ་པར་མི་རྟོག་སྟེ། །ཐོབ་དང་མ་ཐོབ་གཞལ་དུ་མེད་རྟོགས་ཕྱིར། །འདིའི་མདོར་ཚད་མའི་ཐ་སྙད་གསུངས་པར་ནི། །ཉི་སྣང་དྲངས་ཕྱིར་ཤེས་རབ་རིན་ཆེན་སོགས། །ཚད་མ་ཕྱོགས་གླང་ཡབ་སྲས་བློས་བྱས་ལས། །རྒྱལ་བས་མ་གསུངས་ཐལ་རང་མི་འདོད་ཅེས། །སྨྲ་བ་ཁེགས་སོ་འོན་ཀྱང་བརྒྱད་སྟོང་དང། །ཉི་ཁྲི་རྒྱན་སྣང་སོགས་སུ་ཚད་མེད་ལ། །བསྒྱུར་ཅིང་ཉི་སྣང་ལས་ནི་འདི་ལྟར་གསུངས། །ཆགས་མེད་རྣམ་པར་མངོན་མཐོང་ངེས་འབྱིན་ཏེ། །འཐད་པ་མ་གསུངས་གདུལ་བྱ་ཉེ་བའི་དབང། །འོ་ན་གསེར་ཕྲེང་རྣམ་པ་ཉེར་བདུན་དང། །སོ་དྲུག་དག་ལ་དམ་བཅའ་འཐད་པའི་མདོ། །གྲངས་མཉམ་ཡོད་ཅིང་རྣམ་མཁྱེན་རྣམ་པ་ཡི། །བྱང་ཕྱོགས་སྡེ་ཚན་བདུན་ལ་མདོ་བདུན་དང། །སོ་བཞིའི་རྣམ་ཐར་སྙོམས་འཇུག་སྤོང་ལམ་ལ། །རེ་རེ་ལྷག་མ་བཅུ་གསུམ་རེ་རེ་སྟེ། །སོ་དགུའི་སྡེ་ཚན་བཞི་དང་ཐ་མ་གསུམ། །སོ་སོར་བྱས་པའི་བདུན་གསུངས་ཅི་ཞེ་ན། །མདོ་ལས་ནམ་མཁའི་རང་བཞིན་ཉིད་ཕྱིར་ཞེས། །འཐད་པ་གསུངས་ཀྱང་དེར་བསྟན་རྣམ་པ་ནི། །དམ་བཅའི་རྣམ་པར་གཅིག་སྟེ་བརྒྱད་སྟོང་ལས། །ཆགས་པ་མ་མཆིས་སླད་དུ་ཆགས་མེད་ཅེས། །གསུངས་ཕྱིར་སྔ་ཕྱིའི་ལུང་ལ་འགལ་བ་མེད། །སྡུག་བསྔལ་རང་མཚན་བཞི་དང་སྤྱི་ཡི་གཅིག །འཇིག་ཕྱིར་མི་རྟག་འཕགས་དང་མི་མཐུན་སྡུག །རྟེན་བྱེད་བདག་སྟོང་རང་ཉིད་བདག་མ་ཡིན། ། ༈ སྒྲུབ་པའི་དམ་བཅའ་དང་འཐད་པའི་མདོ་ནི། ཉི་ཁྲི་ལས། བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཞལ་དུ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ཀྱི་ཚད་དམིགས་སུ་མེད་པའི་ཕྱིར་རོ། །ཞེས་ཚད་ཅེས་པ་ལས་ཚད་མ་ཞེས་མི་འབྱུང་ཡང། ཉི་སྣང་དུ་ཇི་ལྟར་དེ་

― GTD002_Page_0236 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བྱ་བའི་རྣམ་པར་རྟོག་པ་མེད་ཅེས་བྱ་ཞེ་ན། གཞལ་དུ་མེད་པའི་རྣམ་པས་ཆོས་ཐམས་ཅད་ཀྱི་ཚད་མ་དམིགས་སུ་མེད་པའི་ཕྱིར་རོ་ཞེས་གསུངས་པ་ཡིན་ནོ། །ཞེས་མདོ་དྲངས་པར་ཡིག་ཆར་ཡང་སོར་བཞག་མཛད་པས་སྔ་མ་འགྱུར་སྐྱོན་ཡིན་ནམ་དཔྱད་གཞི་ཡོད་དེ། འདིའི་བརྒྱད་སྟོང་པར་ཡང་བཅོམ་ལྡན་འདས་ཆོས་ཉིད་ཚད་མ་མཆིས་པ་ཉིད་ཀྱི་སླད་དུ་འདི་ནི་གཞལ་དུ་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་གསུངས་ཤིང། འདིར་སླད་དུ་ཞེས་པ་ཕྱིར་ན་ཞེས་འཐད་པའམ་རྒྱུ་མཚན་དུ་སྟོན་བྱེད་ཡིན་ནོ། །རྒྱན་སྣང་ལས་ཀྱང། གཞལ་དུ་མེད་པ་ཞེས་བྱ་བ་གསུངས་ཏེ་ཆོས་ཉིད་ཚད་མ་མཆིས་པའི་སླད་དུ་ཐོབ་པ་ཡོངས་སུ་ཉམས་པ་དང། ཞེས་སོགས་གསུངས་སོ། །ངེས་འབྱིན་ལའང་དམ་བཅའ་དང་འཐད་པའི་མདོ་སྔར་ལྟར་སོ་སོར་ཡོད་དེ། ཉི་ཁྲི་ལས། གསོལ་བ། བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆགས་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ནམ་མཁའི་རང་བཞིན་ཡིན་པའི་ཕྱིར་རོ། །ཞེས་གསུངས། འོན་ཀྱང་ལམ་རིག་སྒྲུབ་པ་གསུམ་གྱི་སྐབས་སུ་བསྟན་པ་དང་མི་འདྲ་སྟེ། དེ་དག་གི་དམ་བཅའ་དང་འཐད་པས་བསྟན་པའི་རྣམ་པ་གཉིས་ལ་དོན་མི་འདྲ་བ་དང། བློར་འཆར་ཚུལ། འཛིན་སྟངས་སོ་སོ་བ་ཡོད་ལ་འདིར་ནམ་མཁའི་རང་བཞིན་ཞེས་པའང་ཆགས་པ་མ་མཆིས་པ་ལས་ལོགས་སུ་གོ་རྒྱུ་དང་སྒོམ་ཚུལ་མེད་དེ། བརྒྱད་སྟོང་པར། བཅོམ་ལྡན་འདས། ཆོས་ཐམས་ཅད་ཆགས་པ་མ་མཆིས་པའི་སླད་དུ་ཆགས་པ་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་གསུངས་པའི་ཕྱིར། ཁྱབ་སྟེ། འདིའི་འང་སླད་དུ་ཞེས་པ་རྒྱུ་མཚན་སྟོན་བྱེད་ཡིན་པ་སྔར་དང་འདྲ་བས། དམ་བཅའ་དང་འཐད་པ་གཉིས་བསྐྱར་ནས་གསུངས་པ་ཙམ་ལས་མི་འདྲ་བ་མེད་པས་ཤེས་སོ། །དེའི་ཕྱིར་ལུང་སྔ་ཕྱི་འགལ་བ་མེད་ཚུལ་ཤེས་སོ། །བདེན་པས་སྟོང་པ་སྤྱི་ཡི་མཚན་ཉིད་དོ། །ཕྱི་དང་ནང་སོགས་བདེན་འཛིན་སྤངས་པ་ཡི། །འགོག་པ་བཅུ་དྲུག་སྟེང་གི་སྟོང་ཉིད་རྣམས། །འདིར་བསྟན་འགོག་བདེན་རྣམ་པ་བཅུ་དྲུག་

― GTD002_Page_0237 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། །དེ་རྟོགས་སྦྱོར་བ་དོན་དམ་རྣམ་ཅན་གསུངས། །ཁ་ཅིག་ལམ་ཤེས་སྐབས་གསུངས་སྦྱོར་བ་ཀུན། །དོན་དམ་རྣམ་ཅན་འདོད་པ་མི་རིགས་ཏེ། །མ་འོངས་སྲིད་པའི་ཞེན་ཡུལ་མེད་པ་དེ། །དོན་དམ་མིན་ཡང་དེ་ཡི་འཛིན་སྟངས་ཕྱིར། །གཞན་དུ་སེམས་དཔའི་ལམ་ཤེས་སྦྱོར་བ་ལ། །ཐེག་པ་གསུམ་གྱི་རྟོགས་རིགས་མེད་འགྱུར་ཕྱིར། །གཉེན་པོའི་རབ་དབྱེ་ཤེས་པར་མི་འགྱུར་རོ། །ཐེག་ཆེན་རྟོགས་རིགས་འདིར་བསྟན་སྦྱོར་བར་ཡང། །ཀུན་རྫོབ་རྣམ་ཅན་ལམ་གྱི་གཉིས་སོགས་མང། །སྲིད་ཞིའི་མཐའ་གཉིས་སེལ་བར་བྱེད་པའི་ཕྱིར། །སྡུག་བདེན་སྟེང་གི་གཞི་ཤེས་སྦྱོར་བཞི་ཡང། །སེམས་དཔའི་རྒྱུད་ལ་ལམ་ཤེས་སྦྱོར་བར་གནས། །ཁ་ཅིག་ལམ་དེས་རྟོགས་བྱ་དེ་ཉིད་ཀྱི། །རྣམ་པའི་དོན་དུ་འདོད་ཀྱང་མཉམ་གཞག་བློ། །རང་གི་ཤེས་རྣམ་ཡིན་ཕྱིར་མི་རུང་ངོ་། ། ༈ རང་ལུགས་ལམ་ཤེས་དོན་རྣམ་གང་ཡང་རུང། །ཤར་ནས་སྒོམ་པའི་སེམས་དཔའི་སྦྱོར་བ་དེ། །འདི་ཡི་དངོས་བསྟན་ལམ་ཤེས་སྦྱོར་བའི་དོན། །འདིར་བསྟན་ལམ་ཤེས་འདོད་སྲེད་མ་སྤངས་ཤིང། །གཙོ་བོར་མི་སྤོང་རྒྱུད་ཀྱིས་བསྡུས་པས་ན། །ཟག་བཅས་སྒྲས་བསྟན་རྣམ་གྲངས་ཟག་བཅས་ཕྱིར། །རྒྱུ་ཡི་ལམ་ཤེས་ཁོ་ན་ཡིན་པར་གསུངས། ། ༈ རྣམ་མཁྱེན་རྣམ་པར་ཉན་ཐོས་བྱང་སེམས་ལ། །ཡོད་དང་རྗེས་མཐུན་རྣམ་མཁྱེན་རྣམ་པ་དང། །སངས་རྒྱས་ཁོ་ནའི་ཐུན་མོང་མིན་རྣམ་གསུམ། །འདི་ལ་ཁ་ཅིག་རྣམ་མཁྱེན་ཁོ་ན་དང། །རྟེན་ཡང་སངས་རྒྱས་ཁོ་ནར་བཤད་སྐབས་ཕྱིར། །གང་ཟག་གསུམ་ལ་ཡོད་ཅིང་མཁྱེན་གསུམ་དུ། །དབྱེ་བ་མི་རུང་ཞེས་རྩོད་ལན་ལ་ཡང། །ཁ་ཅིག་འཕགས་ཚོགས་ཡོན་ཏན་ཡར་ལྡན་དུ། །བསྡུས་ཕྱིར་གཞི་ཤེས་ལམ་ཤེས་བཏགས་

― GTD002_Page_0238 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཟེར། །ཁ་ཅིག་རྒྱུར་བཤད་ཙམ་ལས་རྣམ་མཁྱེན་གྱི། །མ་ཡིན་གཞི་ལམ་རྣམ་པར་གོང་བགྲང་ཟེར། །དང་པོ་མི་འཐད་ཁྱོད་ཀྱིས་རྩ་བ་ལས། །ལམ་གྱི་བདེན་པའི་རྗེས་མཐུན་གསུངས་ཕྱིར་རོ། །བསམ་ན་འགལ་ཁྱབ་ཡིན་ཏེ་དེ་ཡི་དོན། །ཆ་འདྲར་མི་བྱེད་དེ་ལ་ཡོད་པ་དང། །མཐུན་པར་རྒྱལ་ལ་ཡོད་པའི་དོན་ཕྱིར་ཏེ། །ཆོས་སྐུའི་སྐབས་སུ་འདི་ལ་ཞལ་འཕངས་ཕྱིར། །གཉིས་པ་རྒྱུར་བཤད་པ་ཡང་མི་རིགས་ཏེ། །མཁྱེན་གསུམ་ཕྱེད་པའི་དོན་དང་རང་རང་གི །རིགས་འདྲ་གར་བསྐྱེད་ཇི་ལྟར་སྒོམ་ཚུལ་སོགས། །ཤེས་ཕྱིར་རྣམ་མཁྱེན་ཉིད་ལ་སོ་བདུན་སོགས། །ཕྱེ་བར་ཚིག་གསལ་མཁན་པོ་ཉིད་ཀྱང་བཞེད། །དེ་ཕྱིར་བར་ཆད་མེད་དང་དྲོད་སོགས་ཀྱང། །གསུངས་པ་རྒྱུན་ལ་དགོངས་ཕྱིར་འགལ་བ་མེད། །གསེར་འཕྲེང་ལྟར་ན་ཡུལ་དུ་བསྡུས་པ་སྟེ། །སྔ་མར་མི་ཟློས་དེར་ནི་མཁྱེན་པ་གཉིས། །རྟོགས་བྱེད་དང་འདིར་རྟོགས་བྱར་བསྟན་ཕྱིར་དང། །འདིར་ནི་དེར་བསྟན་རྣམ་ཀུན་ཡུལ་ཅན་ཕྱིར། །ཡུལ་ལ་བདེན་གསུམ་ཡོད་ཀྱང་ལམ་བསྡུས་ན། །ཤེས་རྣམ་རྐྱང་པ་མིན་ཕྱིར་དེ་བསྡུས་འགྱུར། །དེར་ཡོད་དང་མཐུན་ཐུན་མོང་ཞེས་བྱ་ཡི། །འཕགས་པ་འོག་མར་ཐུན་མོང་རྣམ་མཁྱེན་ཞེས། །མི་སྨོས་དམན་མཆོག་ཡོན་ཏན་འགལ་ཕྱིར་གསུངས། །ཁ་ཅིག་ཆུང་འབྲིང་ཐུན་མོང་ལམ་བཞིན་ཟེར། །སོ་བདུན་སོ་བཞི་ཉན་ཐོས་བྱང་སེམས་དང། །ཐུན་མོང་གསུངས་པ་རྟོགས་རིགས་ཕྱིར་མིན་ཏེ། །རིགས་ཅན་གསུམ་དོན་སྒྲུབ་སླད་སེམས་དཔའི་དེར། །རྣམ་ཐར་གསུམ་སོགས་དམན་པའི་རྟོགས་རིགས་མང། །དེ་བཞིན་འདིར་བསྟན་བྱང་ཕྱོགས་སོ་བདུན་ཡང། །དམན་པའི་རྟོགས་རིགས་མིན་ཏེ་འདིར་བསྟན་གྱི། །དྲན་ཉེ་སེམས་དཔའི་བསྒོམ་བྱ་གཙོ་ཞིང་དེ། །དམན་པའི་དེ་ལས་བཅུ་བཞིས་.....མདོ་སྡེ་རྒྱན་ལས། རྟེན་དང་

― GTD002_Page_0239 ―

^{[མ་དཔེ་གཟིགས་ན་འདིར་གནོན།]}

[Full Size]

གཉེན་པོ་དག་དང་ནི། །དེ་བཞིན་དུ་ནི་འཇུག་པ་དང། །དམིགས་པ་དང་ནི་ཡིད་བྱེད་དང། །ཐོབ་པའི་སྒོམ་པ་ཁྱད་པར་འཕགས། །མཐུན་དང་རྗེས་སུ་འཇུག་པ་དང། །ཡོངས་སུ་ཤེས་དང་སྐྱེས་པ་དང། །ཆེན་པོ་དང་ནི་མཆོག་ཉིད་དང། །བསྒོམ་དང་ཡང་དག་འགྲུབ་པ་གཞན། །ཞེས་གསུངས། ཁྱད་འཕགས་ཏེ། །ཐེག་མཆོག་ཤེས་རབ་གསུམ་རྟེན་མཚན་འཛིན་གཉེན། །གཞན་བདེན་བཞིར་འཇུག་སེམས་ཅན་ཀུན་ལུས་དམིགས། །མི་དམིགས་ཡིད་བྱེད་དེ་བཞིན་ཐོབ་པའི་སྟེ། །ལུས་བྲལ་ཕྱིར་མིན་མི་འབྲལ་ཕྱིར་ཡང་མིན། །ཁ་ཅིག་ཆོས་སྐུ་ཟག་ཕུང་གཉིས་ལ་སྦྱར། །ལ་ལ་ཞིར་འཇུག་མིན་ཡང་འདོད་ལ་སྦྱར། །ཕར་ཕྱིན་དང་མཐུན་ཉན་རང་རྗེས་སུའང་འཇུག །སྒྱུ་འདྲར་ཡོངས་ཤེས་བསམ་བཞིན་སྲིད་པར་སྐྱེ། །རང་བཞིན་རྣོ་བས་བསྒོམ་པ་ཆུང་ངུའང་ཆེ། །དག་སར་འདྲེས་པ་ཉེ་བར་སྒོམ་ཕྱིར་མཆོག །ཤིན་ཏུ་བསྒོམ་པས་ལྷག་མེད་ཟད་མི་འགྱུར། །བཅུ་པའི་ས་དང་སངས་རྒྱས་ཡང་དག་འགྲུབ། །ཁ་ཅིག་སྟོབས་བཅུ་ཐུན་མོང་ཟེར་ཡང་མིན། །ངོ་བོ་ཐུན་མོང་མིན་ཏེ་སེམས་དཔར་མེད། །བསྒོམ་བྱར་ཡང་མིན་རྒྱལ་བས་མི་སྒོམ་ཕྱིར། །སོ་རིག་ཐོབ་ལ་ཆགས་ཐོགས་སྒྲིབ་པ་སྤངས། །དགོས་ཕྱིར་དགུ་བར་རྒྱན་གསུངས་རྗེས་མཐུན་ཙམ། །རང་ལུགས་ཐུན་མོང་དོན་ནི་རང་ཉིད་གར། །གཏོགས་པའི་སྡེ་ཚན་འཕགས་པ་འོག་མ་ལ། །ཡོད་པའོ་རང་གི་སྡེ་ཚན་ཞེས་བརྗོད་ན། །ཐུབ་པའི་བྱང་ཕྱོགས་སྡེ་ཚན་ཟག་མེད་ཀྱི། །ཡེ་ཤེས་སྡེ་ཚན་ཡིན་ཕྱིར་ཚིག་གིས་གནོད། །རྒྱས་བཤད་སོ་བདུན་སོ་བཞི་སོ་དགུ་པས། །དང་པོར་སྤྱི་དང་སོ་སོའི་རྣམ་གཞག་གཉིས། །དང་པོར་སྡེ་ཚན་དབྱེ་བས་རྣམ་པ་བདུན། །སྒོམ་ཚུལ་ཚོགས་ལམ་ཆུང་འབྲིང་ཆེ་གསུམ་དང། །སྦྱོར་ལམ་གཉིས་གཉིས་མཐོང་

― GTD002_Page_0240 ―

^{[མ་དཔེ་གཟིགས་ན་འདིར་གནོན།]}

[Full Size]

སྒོམ་རིམ་བཞིན་གཙོ། །དང་པོར་འཕྲུལ་དང་མཐོང་ལའང་ལམ་མེད་མིན། །བྱེ་སྨྲ་ཚོགས་གཅིག་སྦྱོར་བཞི་སྒོམ་མཐོང་ལ། །རིམ་སྦྱར་བྱང་ལག་སྔར་སྨོས་གྲངས་བསྟུན་ཟེར། །ཚུལ་འདི་ཉན་ཐོས་ལ་སྦྱོར་རྨོངས་གཏམ་མོ། །མིང་གི་ལྡོག་ཆས་སོ་བདུན་རྫས་སུ་བཅུ། །དད་བརྩོན་དྲན་དང་ཤེས་རབ་ཏིང་འཛིན་དགའ། །བཏང་སྙོམས་རྟོག་དང་ཤིན་སྦྱངས་ཚུལ་ཁྲིམས་ཏེ། །ངག་དང་ལས་མཐའ་འཚོ་གསུམ་ཐ་མས་བསྡུས། །བསྡུ་བར་བྱང་ཕྱོགས་ལ་ནི་དད་སོགས་ལྔས། །མ་བསྡུས་ཚུལ་ཁྲིམས་གསུམ་དང་ཤིན་སྦྱངས་དགའ། །བཏང་སྙོམས་དྲུག་གམ་ཚུལ་ཁྲིམས་བསྡོམས་ན་བཞི། །གསུངས་ཏེ་རྟོག་པ་ཤེས་རབ་རྫས་ཕྱིར་བཀོལ། །དེ་ལྟར་བྱས་ན་སོ་བདུན་རྫས་དགུར་འདུས། །རྫུ་འཕྲུལ་ཏིང་འཛིན་འདུན་སོགས་རྐང་པ་རུ། །བྱེ་སྨྲ་འདོད་ཕྱིར་འདུན་སེམས་དཔྱོད་པའི་རྫས། །བསྣན་པས་བཅུ་གསུམ་ཉིད་དུ་འགྱུར་རམ་དཔྱད། །གྲུབ་མཐའ་གོང་མས་རྫུ་འཕྲུལ་སྤྲུལ་བསྒྱུར་དང། །རྐང་པ་ཏིང་འཛིན་འདུན་སོགས་དེའི་རྒྱུར་བཞེད། །དྲན་ཉེ་ངོ་བོ་ལུས་ཚོར་སེམས་ཆོས་བཞི། །གང་རུང་ལ་དམིགས་རང་སྤྱི་ཅི་རིགས་སུ། །སེམས་པའི་ཤེས་རབ་རིགས་གནས་མཁྱེན་པ་འོ། །ཁ་ཅིག་ཏིང་འཛིན་ཤེས་རབ་མཚུངས་ལྡན་འདོད། །རྫས་མཚུངས་ཉམས་ཕྱིར་རང་བཞིན་དྲན་ཉེ་དང། །ཤེས་རབ་ལྡན་མིན་ཏིང་འཛིན་ཏིང་འཛིན་དང། །མི་ལྡན་འང་འབྲེལ་བའི་དྲན་ཉེ་ཡིན་ཞིང་འདིར། །དམིགས་པ་དྲན་ཉེ་མ་གཏོགས་དངོས་ཡིན་ཏེ། །སྦྱོར་བྱུང་ཡོན་ཏན་ཀུན་ཀྱང་ཡིན་གསུངས་ཕྱིར། །ལུས་སོགས་བཞིར་དམིགས་རང་སྤྱིའི་མཚན་ཉིད་དུ། །རྟོགས་བྱེད་དྲན་ཉེའི་དོན་དུ་ཁ་ཅིག་སྨྲ། །མི་འཐད་ལམ་མ་ཞུགས་ན་ཡོད་ཕྱིར་དང། །ལུས་ཙམ་ལ་དམིགས་

― GTD002_Page_0241 ―

^{[མ་དཔེ་གཟིགས་ན་འདིར་གནོན།]}

[Full Size]

དྲན་ཉེ་གསུངས་ཕྱིར་ཏེ། །རང་ལུས་སེམས་ཅན་ཀུན་གྱི་ལུས་སུ་དང། །དེ་ཉིད་རྒྱལ་སྐུའི་གནས་སུ་སེམས་པ་ཡི། །དྲན་ཉེ་གཙུག་ན་རིན་ཆེན་མདོ་ལས་སོ། །མདོ་དོན་འགྲོ་བའི་སྡུག་བསྔལ་རང་བླངས་ཏེ། །དེ་ལུས་བདེ་ཆེན་ཟག་མེད་སྐུར་མོས་ཞེས། །ཁ་ཅིག་འདོད་ཀྱང་ལུང་དེའི་མཇུག་ཐོགས་སུ། །ཆོས་ཉིད་རྣམ་པར་གསུངས་ཏེ་གཙུག་ན་རིན་ཆེན་གྱི་ལུང་དེའི་འཕྲོར་ཇི་ལྟར་དེ་བཞིན་གཤེགས་པའི་སྐུ་ཟག་པ་མེད་པ་ལྟར། རང་གི་ལུས་ཀྱི་ཆོས་ཉིད་ལའང་དེ་བཞིན་དུ་རྟོག་གོ །དེ་ཟག་པ་མེད་པའི་ཆོས་ལ་མཁས་པས་སེམས་ཅན་ཐམས་ཅད་ཀྱི་ལུས་ཀྱང་དེའི་མཚན་ཉིད་དུ་རབ་ཏུ་ཤེས་སོ། །ཞེས་གསུངས། བསླབ་བཏུས་ལྟོས། །ཡིག་ཆར་སྤྱི་མཚན་གསུངས་པའི་དགོངས་པའང་ཡིན། །དམིགས་པ་ལུས་ཚོར་སེམས་ཆོས་བཞི་ག་ལ། །ཕྱི་ནང་གཉིས་ཀའི་དབྱེ་བས་གསུམ་གསུམ་སྟེ། །རང་གི་མིག་དབང་སོགས་དང་ཕྱི་ཡི་ཡུལ། །གཞན་གྱི་ལུས་ལ་དམིགས་པའི་ཚོར་བ་གསུམ། །རིམ་བཞིན་ཡིན་ཏེ་གཞན་གསུམ་ལ་ཡང་མཚུངས། །ལུས་ནི་གནས་ངན་ལེན་གྱིས་རབ་ཕྱེ་ཞིང། །ཚོར་བ་ཀུན་འབྱུང་གཙོ་བོ་སྲེད་པའི་རྒྱུ། །བདག་མེད་ན་ཡང་སྐྲག་པར་མི་འགྱུར་ཏེ། །སེམས་ཉིད་འགོག་པ་ཐོབ་པའི་གཞིར་ཡོད་ཕྱིར། །ཆོས་ཚུལ་བླང་དོར་ཤེས་པའི་ལམ་བསྒོམ་སྟེ། །དེ་ལྟར་རིམ་བཞིན་བདེན་པ་བཞིར་འཇུག་ཅིང། །མི་རྟག་སྡུག་བསྔལ་ལ་སོགས་གཞིར་མང་འཇུག །དགོས་པ་བདག་གི་གནས་དང་ལོངས་སྤྱོད་དང། །དངོས་དང་ཀུན་བྱང་གཞིར་ལྟ་སྤོང་ཕྱིར་གསུངས། །སྒོམ་ཚུལ་ལུས་ལ་ལུས་རྗེས་ལྟ་སོགས་ཏེ། །རང་ལུས་འང་རྟོག་པའི་གཟུགས་བརྙན་ཀེང་རུས་ཀྱི། །རྗེས་སུ་ལྟ་བར་རྒྱལ་སྲས་མ་ལས་གསུངས། །སྒོམ་ཚུལ་གཞན་ཡང་ཐོག་མར་འཇུག་པའི་རྒྱུ། །འདུན་དང་

― GTD002_Page_0242 ―

^{[མ་དཔེ་གཟིགས་ན་འདིར་གནོན།]}

[Full Size]

མ་སྐྱེས་སྐྱེད་བྱེད་བརྩོན་དང་རྩོལ། །སྐྱེས་པ་མི་ཉམས་བྱེད་རྒྱུ་རང་ལ་བརྟེན། །སྤྲོ་དང་གཞན་འཚེས་མི་སྐྱོ་མཐུན་པ་འོ། །ཁྱད་པར་བྱེད་རྒྱུ་ཡོན་ཏན་ཆུང་ངུས་ཀྱང། །རློམ་པས་ཆོག་འཛིན་ཕྱིར་ནུར་མེད་སོགས་བཞི། །རྩོལ་བ་འདི་ཡང་བྱིང་རྒོད་སྤོང་བྱེད་ཕྱིར། །རྫུ་འཕྲུལ་རྐང་པའི་སྒོམ་དང་ཁྱད་མེད་པས། །མཉམ་བསྒོམ་མཉམ་ཐོབ་ཡོད་དེ་རྒྱུ་མཚུངས་ཕྱིར། །དོན་སྤྱི་ཆགས་པའི་ལྟད་མོ་འདི་ཡིན་ནོ། །དེ་བཞིན་སྤོང་བ་སྒོམ་ཚེ་འབད་བརྩོན་གཉིས། །གསུངས་པའང་རིམ་བཞིན་བྱིང་རྒོད་གཉེན་པོར་སྦྱར། །འདི་ཡི་སྒོམ་ཚུལ་ཁྱད་པར་གསེར་ཕྲེང་གསལ། །དྲན་ཉེའི་སྒྲ་དོན་བྱེ་བྲག་སྨྲ་བ་རྣམས། །ཤིང་གཤག་ཁྱེའུ་འམ་འཛེར་པས་འཛིན་པ་ལྟར། །དྲན་པའི་སྟོབས་ཀྱིས་ཤེས་རབ་དམིགས་པ་ལ། །འཇོག་པར་འདོད་ཀྱང་སློབ་དཔོན་ཤེས་རབ་ཀྱིས། །རྣམ་པར་ཕྱེ་སྟེ་དྲན་པས་འཇོག་པར་གསུངས། །སྤོང་གཉེན་བླང་དོར་ལ་སྤྲོ་བརྩོན་འགྲུས་ཀྱི། །ཆ་ནས་བཞག་མཁྱེན་ཡང་དག་སྤོང་བ་སྟེ། །ཡང་དག་འཇོག་པ་ཞེས་ཀྱང་མཛོད་འགྲེལ་གསུངས། །ཁ་ཅིག་སྤང་གཉེན་བླང་དོར་ལ་བརྩོན་ཙམ། །དེ་དོན་སྨྲ་བ་མི་འཐད་ལམ་མིན་ཕྱིར། །ཁ་ཅིག་ཡང་དག་སྤོང་བར་ཉེར་ལེན་གྱི། །དྲན་ཉེ་སྔོན་སོང་དགོས་པར་འགྲེལ་གསུངས་ལོ། །ངོ་བོ་ཉིད་ཀྱི་དེ་གཉིས་རྒྱུན་གཅིག་ཏུ། །མི་རུང་བརྩོན་དང་ཤེས་རབ་རྫས་གཞན་ཕྱིར། །སྤྱི་ཙམ་ཡིན་ཡང་མཉམ་དུ་ཐོབ་རུང་བ། །གོང་དུ་སྒོམ་ཚུལ་བཤད་པས་ཤེས་ཕྱིར་རོ། །སྤོང་བཞི་གཉེན་པོ་སྟོབས་བཞིར་སྡུད་ཚུལ་ཡང། །སྡིག་སྐྱེས་སྤོང་བ་རྟེན་དང་སུན་འབྱིན་སྟོབས། །མ་སྐྱེས་མི་སྐྱེད་ཉེས་ལས་ལྡོག་པའི་སྟོབས། །སྐྱེད་དང་སྤེལ་བ་གཉེན་པོ་ཀུན་སྤྱོད་སྟོབས། །ཞེས་སུ་མཆིམས་གསུངས་ལམ་

― GTD002_Page_0243 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་མཆན་བུ་ལས། །སྡིག་སྐྱེས་སྤོང་བ་ལྡོག་དང་སུན་འབྱིན་སྟོབས། །མ་སྐྱེས་མི་སྐྱེད་རྟེན་དང་གཉེན་པོའི་སྟོབས། །གསུངས་ཀྱང་སྔ་མ་ལེགས་པས་གཟུང་བར་བྱ། །བྱ་བ་སྒྲུབ་པའི་ཡུལ་དམིགས་ཏིང་ངེ་འཛིན། །དོན་གཉིས་སོགས་ཀྱི་འབྱོར་བའི་གནས་བྱེད་པའི། །ཆ་བཞག་མཁྱེན་པ་རྫུ་འཕྲུལ་རྐང་པའི་དོན། །རྫུ་འཕྲུལ་འབྱོར་པའོ་རྐང་པ་གནས་ཡིན་ཏེ། །དབུས་མཐར་དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་པར་འགྱུར་ཞེས་གསུངས། །དེ་ནི་ར་དྷི་པཱ་དའི་དོན་ཡང་ཡིན། །ཁ་ཅིག་ཉེས་ལྔའི་གཉེན་པོ་འདུ་བྱེད་བརྒྱད། །ལྡན་པའི་ཏིང་འཛིན་འདི་ཡི་དོན་དུ་འདོད། །བྱིས་པར་ཡོད་ཅིང་རྒྱལ་ལ་མེད་ཕྱིར་འཁྲུལ། །ལམ་ཞུགས་སློབ་པ་གཅིག་ལའང་འདུ་བྱེད་བརྒྱད། །མི་ལྡན་ཞི་ཚེ་རྩོལ་བ་སྐྱོན་ཡིན་ཕྱིར། །གུས་སྦྱོར་འདུན་དང་རྟག་སྦྱོར་བརྩོན་འགྲུས་དང། །སེམས་ཀྱི་ས་བོན་གདམས་དོན་དཔྱོད་བཞི་ལས། །འདུན་བརྩོན་སེམས་དང་དཔྱོད་པའི་ཏིང་འཛིན་བཞི། །སྒྲུབ་པའི་འདི་བྱེད་བསྡུས་ན་ཐབས་བཞི་སྟེ། །དད་འདུན་རྩོལ་གསུམ་འབད་པར་བྱེད་པའི་ཐབས། །ཤིན་ཏུ་སྦྱངས་པ་ཕན་འདོགས་ཐབས་ཡིན་ཞིང། །དྲན་དང་ཤེས་བཞིན་གཏོད་པར་བྱེད་པའི་ཐབས། །ཤེས་བཞིན་འཕྲོ་བ་ཤེས་པར་དབྱིག་འགྲེལ་གསུངས། །ཏིང་འཛིན་ནོར་དང་བྱིང་རྒོད་རྐུན་པོ་གཉིས། །གང་ལ་དམིགས་ཀྱང་རུང་སྟེ་སྲུང་མ་བཞིན། །འདུ་བྱེད་དང་ནི་བཏང་སྙོམས་གཉེན་པོའི་ཐབས། །སྒྲུབ་པ་དྲུག་སྟེ་མཐོང་བ་སྤྱན་ལྔ་འོ། །གདམས་ངག་མངོན་ཤེས་དྲུག་གིས་འདོམས་པར་གསུངས། །གནས་པའམ་ཏིང་ངེ་འཛིན་གྱི་སྤྲུལ་པས་རྩེ། །

― GTD002_Page_0244 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔའི་སྨོན་ལམ་མཆོག་དང་དབང་བཅུ་དང། །རྒྱལ་བའི་མ་འདྲེས་ཆོས་རྣམས་སྒྲུབ་པར་བྱེད། །བདེན་བཞིར་ཡིད་ཆེས་སོགས་ཀྱིས་དབང་བྱེད་པའི། །དད་སོགས་གཙོར་གྱུར་རིགས་གནས་མཁྱེན་པ་དེ། །དབང་པོའི་དོན་ནོ་ཁ་ཅིག་འཕགས་པའི་ལམ། །སྐྱེད་ལ་རང་དབང་གྱུར་བའི་མཁྱེན་པར་འདོད། །ཉན་ཐོས་སྦྱོར་ལམ་པ་དེ་གཞན་རྐྱེན་གྱིས། །འགྲོ་བར་གསུངས་ཕྱིར་རང་དབང་ཅན་མིན་ནོ། །རྣམ་བྱང་དབང་པོ་དད་སོགས་ལྔར་མ་ངེས། །མཚུངས་ལྡན་རྣམ་བྱང་དབང་པོ་གསུངས་ཕྱིར་རོ། །བྱེ་སྨྲས་ལམ་མ་ཞུགས་ཀྱི་དད་བརྩོན་གཉིས། །དབང་པོར་འདོད་དོ་དགེ་བ་གཞན་གསུམ་ཡང། །སྒྲ་དོན་རྒྱན་བཟང་དབང་པོ་ལྔ་ཡི་སྟེང། །འཕགས་ཆོས་བསྣན་ཏེ་རིམ་རིམ་དབང་བྱེད་ཟེར། །རང་ལུགས་འཕགས་ལམ་འགྲུབ་ལ་དབང་བྱེད་པའོ། །མངོན་གྱུར་མི་མཐུན་ཕྱོགས་བཅོམ་རབ་ཕྱེ་བའི། །བཟོད་པ་ཡན་གྱི་དད་སོགས་མཁྱེན་པ་དེ། །སྟོབས་ཀྱི་དོན་ནོ་ཁ་ཅིག་དབང་པོ་ལྔ། །སྟོབས་སུ་འདོད་ཀྱང་དྲོད་རྩེའི་རྗེས་ཐོབ་ཏུ། །མི་མཐུན་ཕྱོགས་ཀྱི་མ་དད་འབྱུང་སྲིད་ཕྱིར། །སྟོབས་མིན་མི་མཐུན་ཕྱོགས་དང་འདྲེས་ཕྱིར་རོ། །ཁྱབ་སྟེ་སྟོབས་ནི་གཉེན་པོ་འབའ་ཞིག་ཕྱིར། །དེ་ལ་ཁ་ཅིག་མ་དད་ཉོན་མོངས་ཀྱི། །ས་ཕྱིར་འཕགས་པར་ཡོད་ཅིང་དཀོན་མཆོག་ལ། །དྲོད་དུའང་མ་དད་ལྟ་ཅི་ཐེ་ཚོམ་ཡང། །ཟད་པར་འོག་ནས་གསུངས་ཕྱིར་མི་འཐད་ཟེར། །གང་ལས་དྲོད་སོགས་འཇོག་པའི་བདག་མེད་དེར། །ཡིན་ཏེ་མི་མཐུན་ཕྱོགས་ཞེས་བཀོལ་ཕྱིར་དང། །རང་གི་ངོས་སྐལ་མ་དད་མ་བཅོམ་ན། །བཟོད་པའི་དབང་པོར་སྟོབས་ཀྱིས་མ་ཁྱབ་གསུངས། །དབང་སྟོབས་གཉིས་ཀས་མངོན་པར་རྟོགས་པ་ལ། །སྦྱོར་ཞིང་འབྲེལ་ཡང་རིང་སྦྱོར་ཉེར་འབྲེལ་ལོ། །དེ་ཉིད་མངོན་སུམ་རྟོགས་

― GTD002_Page_0245 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དྲན་སོགས་ཀྱིས། །བསྡུས་པའི་མཐོང་ལམ་ཡན་གྱི་མངོན་རྟོགས་དེ། །ཟད་མི་སྐྱེ་ཤེས་བྱང་ཆུབ་ཡན་ལག་དོན། །ཡན་ལག་རྒྱུ་འོ་རྫོགས་བྱེད་ལ་ཡང་འཇུག །བདེན་བཞིའི་གནས་ལུགས་མཐར་ཐུག་མངོན་མཐོང་ཞེས། །ཁ་ཅིག་འདོད་ཀྱང་ཉན་ཐོས་ལམ་གྱིས་ཁེགས། །བསྡུ་བར་དེ་ལ་རྟོག་པའང་གསུངས་ཕྱིར་རོ། །འོ་ན་དེ་ཉིད་རྟོགས་པའང་མི་རིགས་ཏེ། །དེ་ཉིད་མཐོང་ལ་སྟོང་ཉིད་དགོས་ཕྱིར་ཏེ། །རྫས་ཡོད་བདག་མེད་དེ་ཉིད་མིན་ཕྱིར་ཟེར། །བདག་མེད་རྫུན་པ་ཡིན་ཕྱིར་ཐེག་དམན་གྱི། །འཕགས་རྣམས་བདེན་པ་མ་མཐོང་ཐལ་བར་འགྱུར། །མི་རྟོག་ཤེས་རབ་གཙོ་ཕྱིར་རང་བཞིན་དང། །དྲན་པས་མི་གཡེང་གནས་ཀྱི་ཡན་ལག་སྟེ། །བརྩོན་པས་སོ་སྐྱེ་ས་ལས་ངེས་པར་འབྱུང། །དགའ་བ་ལུས་སེམས་ཕན་འདོགས་ཡན་ལག་གོ །ཉོན་མོངས་མེད་པའི་ཡན་ལག་རྣམ་གསུམ་སྟེ། །ཉོན་མོངས་མེད་གཞིའི་ཡན་ལག་ཤིན་ཏུ་སྦྱངས། །ཉོན་མོངས་མེད་གནས་ཡན་ལག་ཏིང་ངེ་འཛིན། །ཉོན་མོངས་མེད་པའི་ངོ་བོ་བཏང་སྙོམས་སོ། །རྒྱུན་གྱི་རྒྱལ་བྱེད་དྲན་པ་འཁོར་ལོ་སྟེ། །ཤེས་རབ་མཚན་འཛིན་འཇོམས་པས་གླང་པོ་ཆེ། །མྱུར་དུ་རྟོགས་པར་བྱེད་པས་བརྩོན་འགྲུས་རྟ། །ཆོས་ཚུལ་སྣང་བས་རབ་དགའ་ནོར་བུའི་འོད། །འདི་གཉིས་གོ་རིམ་ཐལ་འཕྲེང་ཡི་གེ་ནོར། །ཤིན་སྦྱངས་ཟག་མེད་བདེ་སྟེར་བཙུན་མོ་སྟེ། །མཁོ་དགུའི་འབྱུང་གནས་ཏིང་འཛིན་ཁྱིམ་བདག་མཆོག །བཏང་སྙོམས་འདོར་ལེན་བྱེད་པས་བློན་པོ་འོ། །རང་འབྲས་འཕགས་ལམ་སྐྱེད་པའི་རིགས་གནས་ཀྱི། །མཁྱེན་པ་འཕགས་ལམ་ཡན་ལག་མཚན་ཉིད་དོ། །སྒྲ་དོན་འཕགས་པའི་ལམ་གྱི་གཞིར་གྱུར་པའོ། །ཁ་ཅིག་འཕགས་

― GTD002_Page_0246 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་ཡན་ལག་སྒོམ་ལམ་དང། །སྦྱར་བ་མི་འཐད་མཐོང་ལ་ཡོད་ཕྱིར་ཟེར། །མ་ཁྱབ་དབྱིག་གཉེན་གྱིས་ཀྱང་སྦྱར་ཕྱིར་དང། །དེ་ཚེ་སོ་བདུན་ཐོབ་པར་རྒྱན་གསུངས་ཕྱིར། །འོན་ཀྱང་རྒྱུན་ཞུགས་ཞུགས་པས་མ་ཐོབ་སྟེ། །མི་ལྕོགས་མེད་ན་དགའ་བ་མེད་གསུངས་ཕྱིར། །མཐོང་དོན་རྗེས་སུ་དཔྱོད་པའི་ལྟ་བ་དང། །དེ་དོན་གཞན་ལ་སྟོན་བྱེད་རྟོག་པ་སྟེ། །ངག་ལུས་ཁྲིམས་དག་ངག་དང་ལས་ཀྱི་མཐའ། །ཡང་དག་འཚོ་བ་ལུས་ངག་གཉིས་གའི་སྟེ། །ཚུལ་འཆོས་ཁ་གསག་གཉིས་སོགས་སྤོང་ཕྱིར་རོ། །རྙེད་འདོད་ཡིད་གཅུགས་སྨྲ་བ་ཁ་གསག་སྟེ། །ནོར་བསྔགས་གཞོག་སློང་ངོ་སྦྱིན་བདག་དྲུང་ཕྱིན་ཏེ། །ཁྱོད་དྲུང་དགྲ་བཅོམ་བྱིན་པ་བསོད་ནམས་ཆེ། །ཞེས་བརྗོད་ཐོབ་ཀྱིས་འཇལ་བར་ཉི་སྣང་གསུངས། །བྱེ་སྨྲ་རྣམ་རིག་མ་ཡིན་གཟུགས་མེད་ན། །ཡན་ལག་བརྒྱད་པོ་མ་ཚང་འགྱུར་ཞེས་སྨྲ། །དེ་ཉིད་གཟུགས་སུ་མི་འདོད་སྡེ་དག་གིས། །སྒོམ་ཚེའང་ངག་དེས་དངོས་སུ་བརྗོད་དམ་ཅི། །ཞེས་རྩོད་ལན་དུ་བྱེ་སྨྲ་དེ་མིན་ཡང། །མཉམ་གཞག་དེ་ལས་ལངས་པའི་རྗེས་ཐོབ་ཏུ། །ལོག་པའི་ངག་ལ་མི་འཇུག་རྒྱུ་མཚན་ཅན། །དངོས་སུ་མཐོང་ཕྱིར་དེ་ཡི་རྒྱུ་མཚན་གྱིས། །རིག་མིན་སྡོམ་པ་ཐོབ་པར་བཞག་གོ་ཟེར། །འོ་ན་སེམས་པའི་ཁྱད་པར་ཐོབ་པས་ཀྱང། །རུང་སྟེ་དངོས་སུ་བརྗོད་པ་མི་དགོས་ཤིང། །དེ་ཡང་རྒྱུ་མཚན་ཡིན་ཕྱིར་མགོ་མཚུངས་སོ། །སྒོམ་སྤང་རིམ་པ་དུ་མ་སྤོང་དགོས་ཀྱང། །མི་སྐྱོ་གཉེན་པོ་སྒོམ་ལ་ཡང་དག་རྩོལ། །རྒྱུ་མཚན་རྣམ་གསུམ་མི་བརྗེད་དྲན་པ་སྟེ། །ཞི་གནས་རྒྱུ་མཚན་རྒོད་ཚེ་མི་སྡུག་པ། །བསྒོམས་པའོ་རབ་ཏུ་འཛིན་པའི་རྒྱུ་མཚན་ནི། །བྱིང་ཚེ་སྡུག་པའི་མཚན་མ་ཡིད་ལ་བྱེད། །བཏང་སྙོམས་རྒྱུ་མཚན་ལྷུན་གྲུབ་འཇུག་པའི་ཚེ། །རྒྱུན་བསྲིང་བ་ལ་

― GTD002_Page_0247 ―

^{[མ་དཔེ་གཟིགས་ན་འདིར་གནོན།]}

[Full Size]

དབུས་མཐའི་འགྲེལ་བཤད་གསུངས། །མངོན་ཤེས་སོགས་སྒྲུབ་ཡང་དག་ཏིང་འཛིན་ནོ། །དེ་བརྒྱད་བསྡུ་ན་བཞི་སྟེ་ལྟ་བ་ནི། །མཉམ་གཞག་མཐོང་དོན་ཡོངས་གཅོད་ཡན་ལག་དང། །རྟོག་པ་དེ་དོན་གོ་བྱེད་ཡན་ལག་སྟེ། །ལས་གསུམ་ལྟ་ཁྲིམས་ཡོ་བྱད་བསྙུངས་པ་ལ། །གཞན་ཡིད་ཆེས་པར་བྱེད་པའི་ཡན་ལག་གོ །གཉེན་པོའི་ཡན་ལག་རྩོལ་དྲན་ཏིང་འཛིན་ཏེ། །སྒོམ་སྤོང་དང་ནི་བྱིང་རྒོད་རྣམ་གཉིས་དང། །ཁྱད་འཕགས་ཡོན་ཏན་གེགས་རྣམས་འཇོམས་ཕྱིར་རོ། །ངག་སོགས་གཟུགས་སུ་འདོད་རྣམས་ལུས་ངག་ལས། །རྫས་གཞན་ཕྱིར་ན་བཅུ་གཅིག་རྫས་སུ་འགྱུར། །སེམས་དཔར་ཡོད་པ་དང་མཐུན་གཉེན་པོའི་ལམ། །སྤྲུལ་པའི་ལམ་དང་མཐོང་ཆོས་བདེར་གནས་ལམ། །འདས་ལམ་སྤོང་ལམ་སངས་རྒྱས་ལམ་དྲུག་ལས། །རྣམ་ཐར་སྒོ་གསུམ་མདོ་ལས་བསྟན་ཚུལ་ནི། །ལྟ་བའི་བྱས་པའི་རྣམ་པ་དམིགས་མེད་ཅེས། །སྟོང་པའི་རྣམ་པ་སྟོང་དང་བདག་མེད་གཉིས། །མཚན་མེད་སྟོན་པར་རྣམ་རྟོག་དམིགས་མེད་ཅེས། །མཚན་འཛིན་ཞི་དང་ཞི་བྱེད་འགོག་ལམ་བསྟན། །རྒྱུ་མཚན་ཅན་ཞེས་བསྒྱུར་དགོས་གསེར་ཕྲེང་གསལ། །སྨོན་ལམ་དམིགས་སུ་མེད་ཅེས་སྨོན་མེད་དེ། །སྲིད་སྨོན་སེལ་ཕྱིར་སྡུག་ཀུན་རྣམ་པ་དྲུག །འདི་ལ་འཆད་ཚུལ་གཞན་ཡང་དུ་མ་སྟེ། །བསྡུ་བར་སྟོང་མཚན་སྨོན་མེད་སྒྲས་བསྟན་དེར། །ཐོས་བསམ་སྒོམ་གསུམ་མོ་སྟོང་ཉིད་ལ་སོགས་ཀྱི། །ཏིང་འཛིན་སྒྲས་བསྟན་སྐྱེ་འཕགས་སྒོམ་བྱུང་གཉིས། །རྣམ་ཐར་སྒྲས་བསྟན་འདས་ལམ་སྒོམ་བྱུང་ཉིད། །སྔ་སྔ་སྤྱི་དང་ཕྱི་མ་བྱེ་བྲག་ཕྱིར། །མཆིམས་མཛོད་དང་པོར་སྒོམ་དང་གཉིས་པ་ལ། །སྒོམ་བྱུང་འདས་ལམ་མ་བཞག་

― GTD002_Page_0248 ―

^{[མ་དཔེ་གཟིགས་ན་འདིར་གནོན།]}

[Full Size]

འཐད་པར་དཀའ། །བྱེ་སྨྲ་ལམ་ཡང་སུན་འབྱིན་ལམ་གསུམ་གྱིས། །གཅོད་ཕྱིར་སྨོན་མེད་ལ་བསྣན་གཞན་རྣམས་མཚུངས། །རྒྱན་ལས་སྟོང་པར་བདག་མེད་རྣམ་གཉིས་དང། །སྨོན་མེད་དམིགས་པ་སྡུག་བསྔལ་ཕུང་པོ་སོགས། །དེ་དག་ཉེ་བར་ཞི་བ་མཚན་མེད་ཕྱིར། །བཅུ་དྲུག་སོགས་ལ་དངོས་སུ་མ་སྦྱར་ཞིང། །ཐུན་མོང་ཐུན་མོང་མ་ཡིན་གཉིས་ཀ་ཡང། །བསྡུས་ཕྱིར་སྟོང་པ་རྫས་ཡོད་བཀག་ཙམ་མིན། །བཀར་བཏགས་ཕྱག་རྒྱ་གཉིས་ཀྱིས་སྨོན་མེད་དང། །གསུམ་པས་སྟོང་པ་བཞི་བས་མཚན་མེད་འགྲུབ། །རྣམ་ཐར་བརྒྱད་ལས་སྤྲུལ་པའི་ལམ་གསུམ་སྟེ། །རྟེན་གྱི་གང་ཟག་ཐེག་ཆེན་ཚོགས་ལམ་ཆེ། །ཐེག་དམན་ལུས་མངོན་བྱེད་དང་རྒྱན་བཅས་སོ། །ཁ་ཅིག་མཛོད་ལྟར་མི་ཉིད་ཁོ་ན་ཟེར། །བྱང་སེམས་གཟུགས་དང་འདོད་ལྷར་སྐྱེས་པའང་ཡོད། །སེམས་རྟེན་མཛོད་ལས་རྣམ་ཐར་གསུམ་པ་ནི། །བཞི་པར་བརྟེན་ཡང་རྣམ་ཐར་དང་པོ་གཉིས། །བསམ་བཏན་དང་པོ་གཉིས་པོ་ཅི་རིགས་ཏེ། །འདོད་དང་དང་པོའི་སས་བསྡུས་ཁ་དོག་ལ། །ཆགས་བྲལ་གཉེན་པོར་མི་སྡུག་བསྒོམ་པར་འདོད། །གོང་དེར་ཆགས་དང་བྲལ་ཕྱིར་མིག་ཤེས་འང་མེད། །གྲུབ་མཐའ་གོང་མས་རྣམ་ཐར་གསུམ་ག་ཡང། །རབ་མཐའི་བསམ་གཏན་བཞི་པར་བརྟེན་པར་གསུངས། །ཉི་སྣང་གཟུགས་མེད་གསུངས་པ་དེ་ཐོབ་ན། །གཟུགས་ཀྱི་འདུ་ཤེས་གཞིག་པ་སླ་བར་དགོངས། །ཡིག་ཆར་བསམ་གཟུགས་གང་རུང་གསུངས་པའང་དེ། །གཞན་དུ་བསམ་གཏན་གཟུགས་མེད་པར་འགལ་བྱེད། །འདོད་ནས་སྲིད་རྩེའི་བར་དུ་སོང་འོང་གཉིས། །སླར་ཡང་འདོད་ནས་བཞི་པའི་བར་སོང་སྟེ། །མཐུན་པར་བྱ་བ་རབ་ཀྱི་དོན་ཡིན་ཞིང། །མཐའ་ནི་བསམ་གཏན་བཞི་པར་བྱེ་སྨྲ་འདོད། །གོང་མས་དེ་དོན་རབ་ཀྱིས་

― GTD002_Page_0249 ―

^{[མ་དཔེ་གཟིགས་ན་འདིར་གནོན།]}

[Full Size]

མཐར་ཕྱིན་ཅེས། །བསྡོམས་ཏེ་དེར་གྱུར་བསམ་གཏན་བཞི་ག་འདོད། །གཟུགས་ཀྱི་འདུ་ཤེས་བཞག་དང་གཞིག་པ་ནི། །འབྲས་དུས་གཞན་དོན་སྒྲུབ་ཚུལ་སྣ་ཚོགས་ཕྱིར། །སྡུག་དང་མི་སྡུག་སྤྲུལ་འདོད་མི་འདོད་ཀྱི། །གཉེན་པོར་རོ་མཉམ་སྡུག་པའི་རྣམ་ཐར་ཏེ། །དགའ་དང་མི་དགའ་གསུངས་ཀྱང་བསམ་གཏན་བཞི། །ཐོབ་སྟེ་དགའ་བ་སྤངས་ཕྱིར་འདོད་ལ་དགོངས། །དམིགས་ཡུལ་ཆེ་ཆུང་བཟང་ངན་སྣ་ཚོགས་སོ། །སྒྲ་དོན་འབྱུང་ཆ་སྙོམས་ཕྱིར་སྙོམས་འཇུག་དང། །རང་སའི་ཀུན་དཀྲིས་མ་འདྲེས་རྣམ་ཐར་རོ། །རྣམ་ཐར་སྔ་མ་ཕྱི་མའི་སྔོན་འགྲོ་བར། །གསུངས་ཕྱིར་དང་པོ་གསར་ཐོབ་ལུས་མངོན་བྱེད། །བཞག་པར་དཀའ་ཕྱིར་རྟེན་གྱི་ས་མཚམས་དཔྱད། །འདས་ལམ་བསམ་གཏན་གཟུགས་མེད་འགོག་སྙོམས་དགུ། །རིམ་གྱིས་ཐོབ་ཕྱིར་མཐར་གྱི་སྙོམས་འཇུག་གོ །འགོག་སྙོམས་རྟེན་ལ་ཁ་ཅིག་མིར་ངེས་ཟེར། །ལ་ལ་གཟུགས་མེད་རྟེན་ལ་གསར་སྐྱེ་འདོད། །ཕྱི་ནས་གཟུགས་སུའང་བསྒོམ་ལ་གསར་ཐོབ་མིར། །མཛོད་ལས་གསུངས་ཕྱིར་གཉིས་ཀ་རིམ་བཞིན་ཁེགས། །གསེར་ཕྲེང་ལ་བརྟེན་རྒྱལ་ལ་མེད་ཅེས་ཟེར། །མི་འཐད་ཆོས་སྐུར་སྙོམས་འཇུག་དགུ་གསུངས་ཤིང། །མྱང་འདས་ལ་སོགས་མདོ་སྡེ་དུ་མར་གསུངས། །སེམས་རྟེན་རྩོམ་པ་དང་པོར་སྲིད་རྩེ་དང། །ཕྱི་ནས་ས་དགུར་བརྟེན་པ་ཡུམ་ལས་གསུངས། །ཡིད་ལ་བྱེད་པ་ཏིང་འཛིན་རྩལ་སྦྱོང་ཕྱིར། །དགག་བྱ་ཚོར་འདུ་རགས་པ་འགོག་པ་སྟེ། །ངོ་བོ་ཟླ་གྲགས་ས་བཅུའི་མདོར་བརྟེན་ནས། །གཙོ་བོ་ཆོས་ཉིད་སྟེང་དུ་ཚོར་འདུ་སོགས། །བཀག་པའི་ཟག་མེད་ཡེ་ཤེས་ལ་འདོད་ཅིང། །འཕགས་སེང་ཚོར་འདུ་རགས་

― GTD002_Page_0250 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བཀག་ཆ་དང། །དེ་ལ་མཉམ་གཞག་ཡུལ་ཅན་གཉིས་ཆར་བཞེད། །མདོ་སེམས་ཚོར་འདུ་རགས་པ་བཀག་ཙམ་གྱི། །ལྡན་མིན་ལ་འདོད་འདི་ལ་ཁ་ཅིག་གིས། །རྒྱལ་ཚབ་དེ་ལ་འདས་ལམ་མི་བཞེད་དེ། །འདས་ལམ་སྟོབས་ཀྱིས་ཐོབ་པའི་འདས་ལམ་དུ། །བཞག་ཅེས་རྣམ་བཤད་ལས་ནི་གསུངས་ཕྱིར་ཟེར། །དེ་མཐུས་ཐོབ་པ་ཙམ་ལ་དགོངས་ཕྱིར་ཏེ། །རྣམ་ཐར་སྐབས་སུ་དེ་ལ་ཚོར་བ་དང། །འདུ་ཤེས་རགས་པ་ཞི་བར་གནས་པའི་ལམ། །གསུངས་ཕྱིར་ཁྱབ་སྟེ་རགས་པ་སྨོས་དོན་ཕྱིར། །དེ་དང་འགོག་སྙོམས་མི་འདྲའང་མ་ཡིན་ཏེ། །འཕགས་པས་འགོག་སྙོམས་ཟུར་དུ་མ་གསུངས་པ། །རྣམ་ཐར་སྐབས་དང་གཅིག་པའི་རྒྱུ་མཚན་ཕྱིར། །གཞན་ཡང་དེ་ལ་འདས་ལམ་ཡོད་མིན་ན། །ཡེ་ཤེས་སྡེ་ཚན་ཉེར་གཅིག་མེད་པར་འགྱུར། །དེ་བཞིན་ཟླ་བས་ཆོས་ཉིད་མཉམ་གཞག་བློ། །འཕགས་སེང་ཚོར་འདུ་རགས་བཀག་ལྡན་མིན་ལ། །བཞེད་ཅེས་རྣམ་བཤད་ཚིག་ཟིན་ལ་གསུངས་ཀྱང། །དེ་བསྐྱེད་ངོ་བོར་བསྐྱེད་པ་ལ་དགོངས་སོ། །སྔ་མ་རྗེས་ཐོབ་པ་ལ་ཡོད་མེད་དཔྱད། །གཞན་ཡང་འཕགས་ལམ་མིན་ན་ཞིར་གནས་ལམ། །གསུངས་པར་འགལ་ཏེ་ཞི་དང་རྣམ་ཐར་སྒྲས། །བསྟན་པ་འདས་ལམ་ཉིད་དུ་བསྡུས་པས་འགྲུབ། །མཛོད་ལས་ཕྲ་བ་ཕྲ་བའི་མཇུག་ཐོགས་སུ། །གསུངས་ཕྱིར་ཕྲ་མོ་ཡོད་དེ་གཞན་དུ་ན། །སེམས་ལྡན་གྲངས་སུ་མི་འགྲོ་དེའི་ལུས་ཀྱང། །རུལ་བར་འགྱུར་ཞིང་ལུང་ཡང་མཆོད་སྦྱིན་མས། །ཞུས་པར་དགེ་སློང་འགོག་ལ་སྙོམས་འཇུག་དེའི། །རྣམ་ཤེས་ལུས་དང་མ་བྲལ་གསུངས་པར་འགལ། །རང་གི་གྲུབ་མཐའི་གང་ཟག་ངོས་འཛིན་མདོ། །གྲུབ་མཐའ་བཞི་ག་མཐུན་གྲུབ་དེ་ལས་ཀྱང། །ཇི་ལྟར་ཡན་ལག་ཚོགས་རྣམས་ཞེས་སོགས་ཀྱིས། །

― GTD002_Page_0251 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུང་པོ་བཞི་ཚོགས་དགོས་གསུངས་དེར་ཡང་འགལ། །དེ་ཕྱིར་དེ་ཚེ་སེམས་ཡོད་འདོད་པ་ནི། །ས་ཡི་སྙིང་པོ་འཁོར་ལོ་བཅུ་པ་སོགས། །ཐེག་པ་ཆེ་ཆུང་མདོ་སྡེ་དུ་མར་གསུངས། །སྤྱོད་འཇུག་འགགས་པ་སླར་ཡང་སྐྱེ་འགྱུར་ཏེ། །འདུ་ཤེས་མེད་པའི་སྙོམས་འཇུག་བཞིན་ཞེས་དང། །ཉན་སར་ཚིག་རིས་དེ་མཚུངས་གསུངས་མོད་ཀྱང། །དགོངས་པ་ཚོར་འདུ་རགས་པ་བཀག་པར་མངོན། །དོན་གསང་ལས་གསུངས་འདོད་ཚུལ་གསུམ་ཡོད་དེ། །ཁ་ཅིག་ཚོར་འདུ་བཀག་ཙམ་བརྟག་འགོག་ཟེར། །ཐལ་འགྱུར་བ་ཡི་འགོག་སྙོམས་ཡུལ་དང་མཚུངས། །ལ་ལས་དེ་བཀག་ཆ་ཡི་ལྡན་མིན་ཟེར། །གཞན་དག་དེ་བསྒོམ་སེམས་ཀྱི་བག་ཆགས་ཏེ། །ལངས་པའི་ཚེ་ཡང་དེ་དང་ལྡན་ཕྱིར་ཟེར། །དང་པོ་མི་འཐད་མ་མཐའང་ཀུན་བཏུས་ལྟར། །འདུ་བྱེད་ཕུང་པོར་འཐད་ཀྱི་རྟག་པར་མིན། །རང་ལུགས་འཐད་ལྡན་གཉིས་པ་ཡང་མིན་ཏེ། །རྣམ་པར་ཐར་པ་ཡིན་ཕྱིར་ཤེས་པ་ཉིད། །གསེར་འཕྲེང་དེ་ཚེ་དབྱིག་བཤེས་སེམས་འདོད་པ། །ཐེག་བསྡུས་སོགས་ལས་བཀག་ཅིང་སྐུ་མཆེད་ཀྱི། །གཞུང་ལས་གཞན་དུ་མཁས་པས་མ་བཀྲལ་ཕྱིར། །ཐེག་ཆེན་སྤྱི་ཡི་སེམས་མེད་འདོད་ཕྱིར་ཏེ། །རྟག་ཏུ་ཡིད་ཤེས་འབྱུང་ཞེས་སྤྱིར་བསྟན་ནས། །སེམས་མེད་གཉིད་དང་བརྒྱལ་རྣམས་བསལ་ཕྱིར་དང། །འཇུག་ཤེས་ཡོད་ན་ཀུན་གཞི་མེད་ཀྱང་དེ། །ཤི་བར་ཐལ་བའི་སྐྱོན་བརྗོད་འབྲེལ་མེད་དོ། །དེ་ཕྱིར་སེམས་མེད་ཡིན་ཀྱང་སྙོམས་འཇུག་ཏུ། །གསུངས་པ་རྒྱུ་མིང་འབྲས་ལ་བཏགས་པ་འམ། །འདི་ཡིས་འབྱུང་བ་སྙོམས་པ་ལ་དགོངས་ཤིང། །རྒྱལ་བའི་ཡེ་ཤེས་ཆོས་སྐུར་བཤད་པ་ཡང། །མངོན་དུ་བྱེད་པར་ནུས་པ་ལ་དགོངས་ཞེས། །རྒྱས་པར་གསུངས་པའི་དགོངས་པ་བཙལ་བར་བྱ། །མདོ་

― GTD002_Page_0252 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་དྲུག་པར་འགོག་པ་ཐོབ་གསུངས་པ། །ལུགས་འདིར་དུས་ལ་སྦྱོར་གྱི་འཛིན་སྟངས་མིན། །ཉི་མའི་སྙིང་པོར་ཞག་བདུན་ལས་ལྷག་འདིར། །ཞུགས་ན་སེམས་དཔའི་སྤྱོད་ལས་ཉམས་གསུངས་པ། །ཐེག་དམན་ལྟ་བུ་ཞི་བདེར་ཞེན་པ་ཡིས། །ཞུགས་ལ་དགོངས་ཏེ་པད་དཀར་སོགས་ཀྱིས་ཤེས། །སྤོང་བའི་ལམ་ལ་བར་ཆད་མེད་ལམ་བཞི། །ཆོས་ཤེས་རྒྱུན་མཐར་སྦྱར་ཡང་ཐུབ་དགོངས་ལས། །མཐོང་ལམ་ལ་གསུངས་འཕགས་སེང་དགོངས་པར་མཐུན། །སངས་རྒྱས་ལམ་ལ་སྦྱིན་སོགས་ཕར་ཕྱིན་བཅུ། །གང་དུ་གཏོགས་པའི་སྡེ་ཚན་མཚན་ཉིད་པ། །འོག་མར་མེད་པའི་རིགས་གནས་མཁྱེན་པ་དེ། །ཐུན་མོང་མ་ཡིན་རྣམ་མཁྱེན་རྣམ་པའི་དོན། །དབྱེ་ན་མི་མཐུན་ཕྱོགས་ཀུན་ལས་རྒྱལ་ཞིང། །དེ་ཡིས་བརྫི་བར་མི་ནུས་རིགས་གནས་སྟོབས། །གནས་དང་གནས་མིན་མཁྱེན་པ་ལ་སོགས་བཅུ། །འཁོར་དབུས་སྤངས་རྟོགས་ཆོས་སྟོན་འཇིགས་མེད་པའི། །ཆ་བཞག་མཐར་ཐུག་མཁྱེན་པ་མི་འཇིགས་པའོ། །ཆ་བཞག་མེད་ན་མཐར་ཐུག་གཞི་ཤེས་ཀྱང། །དེར་འགྱུར་དགོས་ལ་ཐེག་དམན་རྟོགས་རིགས་ཕྱིར། །ཐུན་མོང་མ་ཡིན་རྣམ་པར་འགལ་ཕྱིར་རོ། །འོན་ཀྱང་སངས་རྒྱས་ཁོ་ནའི་རྟོགས་རིགས་སུ། །མི་འཐད་དེ་བཞིན་ཉིད་རྣམ་སེམས་དཔའི་ཡིན། །རིགས་འདྲ་སྔ་མ་འཕགས་པ་འོག་མར་མེད། །སྨྲ་བའང་མི་རུང་ཉེར་ལེན་ལས་སྐྱེས་ཕྱིར། །རང་དོན་སྤངས་རྟོགས་གཉིས་དང་གཞན་གྱི་དོན། །བར་གཅོད་ཆོས་དང་ངེས་འབྱུང་ལམ་སྟེ་བཞི། །དམ་བཅས་པ་ལ་རྒོལ་མེད་མི་འཇིགས་བཞི། །འཆད་བྱ་འཆད་བྱེད་སྤོབས་པ་སོ་སོར་ནི། །ཆགས་ཐོགས་མེད་པར་སོ་སོར་གཟིགས་པ་ཡི། །རིགས་གནས་མཁྱེན་པ་སོ་སོར་ཡང་དག་རིག །རང་གི་སྡེ་ཚན་འཕགས་པ་

― GTD002_Page_0253 ―

^{[མ་དཔེ་གཟིགས་ན་འདིར་གནོན།]}

[Full Size]

འོག་མ་དང། །ཅུང་ཟད་ཙམ་ཡང་མ་འདྲེས་རིགས་གནས་ཀྱི། །མཐར་ཐུག་མཁྱེན་པ་སངས་རྒྱས་མ་འདྲེས་ཆོས། །དབྱེ་ན་རྟོགས་པ་སྤྱོད་པ་འཕྲིན་ལས་དང། །ཡེ་ཤེས་མ་འདྲེས་དྲུག་དྲུག་གསུམ་གསུམ་མོ། །སྟོབས་བཅུ་མི་འཇིགས་བཞི་དང་དྲན་ཉེ་གསུམ། །ཐུགས་རྗེ་ཆེ་དང་བཅོ་བརྒྱད་བྱེ་སྨྲའི་ལུགས། །ཡེ་ཤེས་ལས་འཕྲོས་དུས་གསུམ་རྣམ་གཞག་ལ། །ཆོས་སྐྱོབ་དངོས་འགྱུར་གསེར་བུམ་བཅོམ་བཞིན་ཟེར། །དབྱངས་སྒྲོགས་མཚན་ཉིད་ཤས་ཆེ་ཆགས་བཞིན་ཟེར། །དབྱིག་བཤེས་གནས་སྐབས་རྩིས་ཀྱི་རྡེའུ་བཞིན་འགྱུར། །མ་བུ་གཞན་གཞན་འགྱུར་འདོད་སངས་རྒྱས་ལྷ། །དང་པོ་མི་འཐད་གྲངས་ཅན་ལུགས་ཕྱིར་རོ། །གཉིས་པ་མི་འཐད་མཚན་ཉིད་འཆོལ་ཕྱིར་རོ། །བཞི་པ་མི་འཐད་གསུམ་གར་ཐལ་ཕྱིར་རོ། །གསུམ་པ་ཅུང་བཟང་འོན་ཀྱང་བྱ་བ་སོགས། །བྱེད་དང་མི་བྱེད་གནས་སྐབས་མེད་པར་འགྱུར། །ཁ་ཅིག་དུས་གསུམ་དངོས་པོར་འདོད་བཞིན་དུ་། །སྐྱེས་ལ་འགགས་དང་སྐྱེས་ལ་མ་འགག་པ། །སྐྱེ་རྒྱུ་ཡོད་ཀྱང་མ་སྐྱེས་དུས་གསུམ་ཟེར། །དེ་དག་དངོས་པོ་རང་ལ་མ་བརྩིས་པར། །སྨྲ་མཁན་དེ་ལ་ལྟོས་ཏེ་བཞག་པའི་ཕྱིར། །འགགས་ཟིན་ང་ལས་ནུ་དང་མ་སྐྱེས་པའི། །འཁོར་སྒྱུར་དུང་སོགས་ཡོད་མིན་མེད་མིན་འགྱུར། །རང་ལུགས་དངོས་པོ་གཞན་ཞིག་འགག་ཆ་དང། །དངོས་གཞན་སྐྱེ་རྒྱུ་ཡོད་ཀྱང་མ་སྐྱེས་ཆ། །འདས་དང་མ་འོང་ངོ་གཉིས་ཀ་མེད་དགག་ཉིད། །ཁ་ཅིག་སྐྱེ་གནས་འཇིག་གསུམ་མཉམ་གྲུབ་ཟེར། །སྐྱེ་བ་རྒྱུ་དུས་ཡིན་ལ་གཞན་གཉིས་ནི། །དེ་ཡི་ཁྱད་ཆོས་ཡིན་ཡང་ཚིག་ལ་གཟབ། །སྐད་ཅིག་གསུངས་པའང་རྫོགས་པར་གྲུབ་ཟིན་ནས། །སྐད་ཅིག་ལས་ལྷག་

― GTD002_Page_0254 ―

^{[མ་དཔེ་གཟིགས་ན་འདིར་གནོན།]}

[Full Size]

མི་སྡོད་དོན་ཡིན་ཏེ། །རབ་བྱུང་ལོ་ནི་མགོ་ཟླའི་ཚེས་གཅིག་དང། །མཉམ་གྲུབ་བཅུ་གཉིས་ཟླ་བར་སྡོད་ཕྱིར་རོ། །ཁ་ཅིག་འདས་པའི་མི་ཡོད་དྲན་ཕྱིར་ན། །མ་ཁྱབ་དྲན་མཁན་དེ་ལ་ལྟོས་ཕྱིར་རོ། །བུམ་པ་ཞིག་པ་བུམ་པའི་འདས་པ་སྟེ། །འོན་ཀྱང་བུམ་པའི་དུས་སུ་མ་འོང་ངོ་། །སྐབས་དོན་འདས་དང་མ་འོངས་ད་ལྟར་ཡང། །གཟིགས་ཚུལ་ད་ལྟར་བྱུང་བར་གཟིགས་མིན་ཡང། །ད་ལྟའི་དུས་སུ་སྔ་ཕྱིའི་བྱུང་ཚུལ་ཀུན། །མངོན་སུམ་གཟིགས་ཕྱིར་ཡེ་ཤེས་མ་འདྲེས་པའོ། །དེ་བཞིན་ཉིད་དང་རང་བྱུང་སངས་རྒྱས་ཀྱི། །རྣམ་པ་གསུམ་ལ་ཤེས་རྣམ་སྦྱོར་དགོས་ཏེ། །རྣམ་མཁྱེན་བདེན་སྟོང་དང་ནི་རང་རྒྱལ་དང། །སངས་འཕགས་མིག་ཤེས་གསུམ་གྱིས་མ་ངེས་ཕྱིར། །དེ་གསུམ་དོན་ནི་རིམ་བཞིན་ཡང་དག་མཐར། །མི་ལྡང་ཚུལ་གྱིས་མཉམ་གཞག་ཡེ་ཤེས་དང། །སློབ་དཔོན་གཞན་ལ་མ་ལྟོས་རང་བྱུང་གི །ཆོས་རྣམས་ཀུན་ལ་མངའ་བསྒྱུར་ཡེ་ཤེས་དང། །ཆོས་ཀུན་རྣམ་པ་མ་ལུས་མངོན་སུམ་དུ། །རྟོགས་པའི་རིགས་གནས་མཐར་ཐུག་མཁྱེན་པ་འོ། །རྣམ་གྲངས་ཟག་བཅས་ཟག་མེད་སྒྲས་བརྗོད་ཙམ། །ཡིན་གྱི་ཟག་བཅས་དངོས་མིན་སྔར་བཤད་དོ། །བདག་འཛིན་དངོས་སུ་འཇོམས་པའི་སྦྱོར་བའི་རྟེན། །ཁ་ཅིག་བྱང་སེམས་ཐམས་ཅད་ཤེར་ཕྱིན་གྱི། །སྣོད་རུང་ཟེར་ཞིང་ལ་ལ་ཕྱི་ནང་གི །བཤེས་གཉེན་གཉིས་ལྡན་བྱང་སེམས་ཐམས་ཅད་ཟེར། །བྱེ་སྨྲར་གྱུར་པའི་བྱང་སེམས་དང་པོའི་སྐྱོན། །འདི་ནི་དམན་སྒྲིབ་ལ་གནས་གསུངས་པ་དཔྱད། །ཉན་སྣོད་སེམས་ཙམ་བྱང་སེམས་གཉིས་པའི་སྐྱོན། །འདིར་བསྟན་སྦྱོར་བ་བསྒོམ་པའི་ཉན་ཐོས་ཀྱང། ཡོད་ཕྱིར་དེ་ནི་སེམས་དཔར་མ་ངེས་སོ། །རང་ལུགས་རྒྱལ་བསྟེན་དེ་ལས་དགེ་རྩ་བསྐྲུན། །ཐེག་ཆེན་

― GTD002_Page_0255 ―

^{[མ་དཔེ་གཟིགས་ན་འདིར་གནོན།]}

[Full Size]

བཤེས་ཀྱིས་ཟིན་པ་གསུམ་ཚང་བའི། །འདིར་བསྟན་གདུལ་བྱ་འདིར་བསྟན་ཉན་པའི་སྣོད། །ཐོས་བསམ་སྒོམ་གསུམ་ལམ་གྱི་སྔོན་འགྲོ་ཕྱིར། །ལམ་ཞུགས་ལམ་མ་ཞུགས་དང་རིགས་ཅན་གསུམ། །ཉན་སྣོད་ཉན་ཐོས་དེ་ཡང་སྣོད་རུང་མིན། །ཚིགས་བཅད་གཉིས་པས་བསྟན་པ་རྣམ་བཞི་སྟེ། །སངས་རྒྱས་བསྙེན་བཀུར་དེ་ལ་ཐེ་ཚོམ་དྲི། །སྦྱིན་སོགས་སྤྱོད་དང་བཤེས་ཀྱིས་བྱིན་བརླབ་བཞིས། །རིམ་བཞིན་ཉན་དང་ཚིག་འཛིན་དོན་མི་བརྗེད། །ཚུལ་བཞིན་ཡིད་བྱེད་སྣོད་དེ་གཙོར་བྱས་ཀྱང། །དང་པོ་ཀུན་ལ་དགོས་ཕྱིར་སྤྱིར་ཞེས་གསུངས། །ཐ་མ་ཀུན་ལ་དགོས་པ་གཞུང་ཀུན་མཐུན། །ཉན་འཛིན་ཐོས་པའོ་བསམ་སྒོམ་ཐ་མ་གཉིས། །༈ དེ་ནས་བསྒོམ་བྱ་སྦྱོར་བའི་ངོ་བོ་ནི། །གཞི་ལམ་རྣམ་གསུམ་བདེན་སྟོང་སྤྲོས་བྲལ་དུ། །བསྒོམ་པའི་རིགས་གནས་སེམས་དཔའི་རྣལ་འབྱོར་རོ། །ཁ་ཅིག་དེ་འདྲའི་ཞི་ལྷག་ཟུང་འབྲེལ་ཟེར། །མི་འཐད་ཚོགས་ལམ་ལ་ཡང་ཡོད་ཕྱིར་རོ། །འདིས་ནི་མངོན་སུམ་མཐོང་བར་འདོད་པའང་ཁེགས། །དབྱེ་ན་གཟུགས་སོགས་ཡུལ་ལ་གནས་བཀག་དང། །སྦྱོར་བ་དེར་ཡང་མ་ཞེན་རྣལ་འབྱོར་བཀག །ཟབ་དཀའ་ཚད་མེད་གསུམ་སྟེ་ངོ་བོས་ལྔ། །ཚོགས་ལམ་ནས་བཟུང་རྒྱུན་མཐའི་བར་དུ་འཇུག །དེ་ཕྱིར་ཁ་ཅིག་དེ་ལྔའི་གནས་སྐབས་ལ། །ལྷག་མ་བཅུ་བཞི་བཞག་ཅིང་ཐ་མ་ནི། །སྦྱོར་བ་དེ་དག་འགྲུབ་པའི་རྒྱུ་འོ་ཟེར། །ཚེགས་ཆེན་ཡུན་རིང་རྟོགས་པའང་དང་པོ་ལྔའི། །གནས་སྐབས་ཡིན་པ་མི་རུང་སྟོང་ཉིད་ལ། །སྐྲག་པས་སྤངས་ཏེ་ངན་འགྲོར་འགྲོ་གསུངས་ཕྱིར། །མཐའ་གསུམ་རིམ་བཞིན་གཞི་ལམ་རྣམ་གསུམ་གྱི། །ཆོས་ཉིད་ཟབ་

― GTD002_Page_0256 ―

^{[མ་དཔེ་གཟིགས་ན་འདིར་གནོན།]}

[Full Size]

དཀའ་ཚད་མེད་རྟོགས་པ་སྟེ། །གསེར་ཕྲེང་གཞི་ཤེས་ཐ་མལ་ལས་ལྷག་ཟབ། །ལམ་ཤེས་ཉན་རང་ཐུན་མོང་མ་ཡིན་དཀའ། །རྣམ་མཁྱེན་ཁྱད་པར་འགྲོར་མེད་གསུམ་རྟོགས་གསུངས། །ཤཱནྟིས་གསུམ་ལ་གནས་དང་རྣལ་འབྱོར་བཀག །གཉིས་གཉིས་དབྱེ་བས་སྦྱོར་བ་ཉེར་གསུམ་འདོད། །རྟེན་གྱི་སྒོ་ནས་ཚེགས་ཆེན་ལ་སོགས་བརྒྱད། །འཕེལ་འགྲིབ་མེད་སོགས་སྦྱོར་བའི་རྟོགས་ཐབས་བཞི། །སྟོན་བྱེད་མདོར་ཡང་ཤེར་ཕྱིན་ལ་སྤྱོད་ཚེ། །གསུངས་ཕྱིར་ཐབས་ཤེས་ཟུང་དུ་འབྲེལ་ཚུལ་ལོ། །རིན་ཆེན་སྦྱིན་སོགས་འབྲས་གཉིས་དུས་ཀྱིས་གཅིག །རིམ་བཞིན་ཚོགས་གཅིག་ངེས་འབྱེད་ཆ་ལ་བཞི། །ལྗོན་གསར་དཔེ་ཡིས་མཐོང་ལམ་བྱང་ཆུབ་ཉེ། །མ་དག་ས་ལ་སྦྲུམ་མ་ཉེ་བའི་དཔེའི། །སངས་རྒྱས་མྱུར་དེ་ས་བདུན་དྲི་མ་ནི། །མངལ་སྦུབ་འདྲ་བར་རྒྱུད་བླར་གསུངས་ཕྱིར་དང། །དེ་གྲོལ་ས་བརྒྱད་པ་ལ་གཞོན་ནུར་གྲགས། །དེར་ལྔ་ཆོས་འཁོར་བསྐོར་བའི་སྦྱོར་བའི་ནུས། །ཐོབ་ཕྱིར་གཞན་གྱི་དོན་དང་འཕེལ་འགྲེབ་མེད། །ཁམས་གསུམ་ཆོས་དང་ཆོས་མིན་སོགས་མི་མཐོང། །བསམ་མི་ཁྱབ་དང་རྣམ་པར་མི་རྟོག་པའོ། །འབྲས་བུའི་སྒོ་ནས་གཉིས་དེ་དགུ་པ་ལ། །སོ་རིག་བཞི་ཡིས་སེམས་ཅན་སྨིན་བྱེད་ཕྱིར། །རྒྱུན་ཞུགས་ནས་བཟུང་བླ་མེད་བྱང་ཆུབ་བར། །སྟེར་བའི་འབྲས་བུ་རིན་ཆེན་སྦྱིན་བྱེད་དང། །བཅུ་བར་ཉེས་སེལ་རྣམ་དག་སྦྱོར་བ་འོ། །དུས་ཀྱི་སྒོ་ནས་ས་མཚམས་སྦྱོར་བ་སྟེ། །བརྒྱད་པར་རྩོལ་མེད་འཇུག་ཕྱིར་ལོ་ཟླའི་མཚམས། །མི་དགོས་ཕྱིར་ན་ཚོགས་ནས་བདུན་པའི་བར། །འདི་དག་དོན་ལ་ཁ་ཅིག་ཚེགས་ཆེན་གྱི། །སྦྱོར་བར་སྟོང་ཉིད་རྟོགས་པ་མེད་ཅེས་ཟེར། །མི་འཐད་དབང་རྟུལ་ཚོགས་ལམ་ཆེན་པོ་ཡི། །སྟོང་

― GTD002_Page_0257 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་རྟོགས་པའི་ཞི་གནས་དེ་ཡིན་ཕྱིར། །ཁ་ཅིག་དབང་རྣོན་རྒྱུད་ལ་འདོད་ཀྱང་མིན། །ཁ་ཅིག་ལུང་བསྟན་ཐོབ་པའི་སྦྱོར་བ་ཡིས། །ཐོབ་གསུངས་གཅིག་ཏུ་ཐོབ་ཟིན་ཁོ་ན་ཟེར། །ལ་ལས་རྒྱལ་ལས་དངོས་ཐོབ་ཁོ་ནར་འདོད། །གཞན་དག་དེ་གཉིས་བཀག་ནས་འཐོབ་ཅེས་པ། །མ་འོངས་ཚིག་སྟེ་ཉི་སྣང་དགོངས་པར་སྨྲ། །གསུམ་ག་མི་འཐད་དངོས་སུ་ཐོབ་པ་འམ། །དུས་དེར་སངས་རྒྱས་མེད་ཀྱང་སྔར་ཐོབ་མཐུས། །མི་རིང་གཞན་གྱིའང་ལུང་སྟོན་རྒྱན་སྣང་གསུངས། །༈ སྤྲོ་ཕྱིར་སྦྱོར་བའི་མཇུག་ཏུ་ཡོན་ཏན་ཏེ། །ཐེག་ཆེན་སྦྱོར་བ་བསྒོམས་སྟོབས་ཀྱིས་ཐོབ་པའི། །ཐེག་ཆེན་ལམ་ཞུགས་རྒྱུད་ཀྱི་ཡོན་ཏན་ནོ། །སྦྱོར་ལམ་བཞི་དང་ས་བཅུར་གཞོན་ནུ་དཔལ། །སྦྱར་ཡང་བཅུ་བཞི་ཚོགས་ནས་སངས་རྒྱས་བར། །ཁ་ཅིག་སྐྱོན་རྣམས་སྐྱེ་བའི་གེགས་ཡིན་ཕྱིར། །ཡོན་ཏན་འདི་རྣམས་སྦྱོར་བའི་རྒྱུ་འོ་ཟེར། །དེ་རྒྱུ་ལྟ་ཞོག་ནུས་དང་ནུས་ཅན་ཡང། །མིན་ཏེ་ཕན་ཡོན་གསུངས་ཕྱིར་འབྲས་བུ་འོ། །ཁ་ཅིག་སྦྱོར་བ་སྒོམ་རྟེན་ཡོན་ཏན་ཏེ། །ཐེག་ཆེན་སྦྱོར་བའི་ཡོན་ཏན་དོན་དུ་འདོད། །ལ་ལ་ཐེག་ཆེན་སྦྱོར་བ་བསྒོམ་སྟོབས་ཟེར། །དང་པོ་མི་འཐད་ཐེག་དམན་ལ་ཡོད་ཕྱིར། །གཉིས་པ་ཡང་མིན་སྦྱོར་བ་གསར་བསྒོམ་ཚེ། །རྒྱལ་ཀུན་བསྲུང་ཕྱིར་བདུད་ཀྱིས་མི་ཚུགས་ཀྱང། །སྦྱོར་བསྒོམ་སྔོན་སོང་མིན་ཕྱིར་ཡོན་ཏན་མིན། །ཁ་ཅིག་སེམས་དཔའ་ཁོ་ནར་འདོད་ཀྱང་འདིས། །ཡོན་ཏན་ལྔ་པར་ཆེན་པོ་གསུམ་གསུངས་སོ། །གསེར་གླིང་པ་དང་ཨར་སོགས་ཚན་པ་གཉིས། །རིམ་བཞིན་རྒྱུ་དང་འབྲས་བུའི་ཡོན་ཏན་འདོད། །ཁ་ཅིག་སྔ་ཕྱི་མིང་དོན་སྦྱོར་དགོས་ཟེར། །རང་ལུགས་

― GTD002_Page_0258 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་བཞིན་བསྒྲུབ་བྱ་སྒྲུབ་བྱེད་དེ། །ཚེ་འདིར་རྒྱལ་བས་བྱིན་གྱིས་བརླབས་པའི་ཕྱིར། །ཚེ་རབས་གཞན་དུ་བདུད་བཅོམ་ཡོན་ཏན་འབྱུང། །ཚེ་འདིར་བསྒོམ་པ་རྒྱལ་བའི་དགོངས་ཐོབ་ཕྱིར། །ཚེ་རབས་གཞན་དུ་དགོངས་ཤིང་མཁྱེན་ཉིད་འབྱུང། །ཚེ་འདིར་བསྒོམ་པ་ཡེ་ཤེས་ཀྱིས་གཟིགས་ཕྱིར། །གཞན་ཚེ་རྒྱལ་བས་མངོན་སུམ་མཛད་པར་འགྱུར། །འདི་གསུམ་རིམ་བཞིན་དགྲ་ཡི་མཚོན་བཅག་དང། །གཉེན་ལ་གོ་བསྐོན་ལག་ཏུ་མཚོན་གཏད་བཞིན། །སྦྱོར་བའི་ནུས་པ་ཆུང་འབྲིང་ཆེ་གསུམ་མོ། །ལྷག་ཀྱང་དེ་ལྟར་བསྒྲུབ་བྱ་སྒྲུབ་བྱེད་སྦྱར། །དྲུག་པར་འཕྲོས་ཏེ་བསྟན་པའི་གནས་ཚད་དཔྱད། །ཐེག་ཆེན་སྦྱོར་བ་སྐྱེ་གནས་གོང་འཕེལ་གསུམ། །ཅི་རིགས་གེགས་བྱེད་ཆ་ནས་བདུད་ལས་སུ། །བཤད་དེ་སྦྱོར་བའི་སྐྱོན་གྱི་མཚན་ཉིད་དོ། །འོན་ཀྱང་བདུད་ལས་དངོས་སུ་མ་ངེས་ཏེ། །ཆ་འདྲའམ་བདུད་ལས་རྒྱུ་ཕྱིར་བཤད་པ་མང། །ཁ་ཅིག་སྐྱེ་གནས་གེགས་སུ་འདོད་མོད་ཀྱང། །མ་ཡིན་སྦྱོར་བ་རྒྱུན་ལྡན་ལ་ཡོད་ཕྱིར། །སྐྱོན་གྱི་དབྱེ་བ་འགལ་རྐྱེན་ཉེར་གསུམ་སྟེ། །དོན་ཤེས་བར་གཅོད་སྤོབས་པའི་དབང་བྱ་བ། །ཚེགས་ཆེན་བུལ་དང་མྱུར་ཆེས་མི་བརྟན་གཉིས། །སྒོ་གསུམ་གནས་ངན་ལེན་གྱི་དབང་བྱས་གསུམ། །ཐེག་ཆེན་ཉམས་བྱེད་རྒྱུ་བདུན་ཡུལ་མང་ལ། །རྟོག་སོགས་གཡེང་བའི་རྒྱུ་བརྒྱད་རང་བརྟེན་ཞིང། །བདུད་ཀྱིས་འབྱེད་སོགས་མཐའ་གསུམ་གཞན་བརྟེན་ནོ། །མཐུན་རྐྱེན་མ་ཚང་སྙོམས་ལས་ཀྱིས་ཉམས་སོགས། །གཉིས་བརྟེན་ཉེར་གཅིག་རང་བརྟེན་འགྲོ་གཉིས་སོ། །ཡང་ན་རིམ་བཞིན་རང་གཞན་ཐུན་མོང་དང། །རང་དང་གཞན་བརྟེན་བཅུ་བཞི་གཉིས་བདུན་ནོ། །ཉམས་བྱེད་རྒྱུ་བདུན་ཚོགས་ལམ་མན་ཆད་དང། །གཞན་ཡང་ཕལ་ཆེར་སྦྱོར་ལམ་མན་ཆད་དེ། །ཕྲ་མོ་མ་དག་ས་

― GTD002_Page_0259 ―

^{[མ་དཔེ་གཟིགས་ན་འདིར་གནོན།]}

[Full Size]

བདུན་བར་དུ་ཡོད། །ཚོགས་པའི་ཆོས་སྤྱོད་སྐབས་སུ་དཔོན་སློབ་གཉིས། །མ་མཐུན་སྟོབས་ཀྱིས་མི་སྦྱོར་སྐྱོན་ཡིན་གྱི། །སློབ་དཔོན་མཁས་པས་སློབ་མ་མི་མཁས་ཀྱང། །འཁྲིད་པ་སྐྱོན་མིན་དམ་པའི་ལུགས་སྲོལ་ལོ། །༈ དེ་ལྟར་སྐྱོན་ཡོན་བླང་དང་དོར་བའི་སྒོས། །སྦྱོར་བ་སྒོམ་ལ་མཚན་ཉིད་ཤེས་དགོས་ཕྱིར། །མདོ་ལས་ཤེས་མཚན་ལ་སོགས་རྣམ་བཞི་ལས། །ཕྱེ་བས་གོ་གཅིག་གསུངས་པ་རྗེ་བཙུན་གྱིས། །བསྡུས་ཏེ་བྱེད་སྒྲུབ་ལས་སྒྲུབ་གཉིས་སུ་མཛད། །གཞོན་ནུ་དཔལ་གྱིས་ཤེས་མཚན་ལ་སོགས་བཞི། །རིམ་བཞིན་ཕྱོགས་ཆོས་རྗེས་ཁྱབ་ལྡོག་ཁྱབ་དང། །དཔག་བྱར་འདོད་ཀྱང་ཡིན་འགོད་ཡོད་འགོད་གཉིས། །གང་གི་དབང་དུ་བྱས་ཀྱང་མ་ངེས་ཏེ། །སངས་རྒྱས་ལ་ཡང་ཤེས་མཚན་ཡོད་ཕྱིར་དང། །སྦྱོར་བའི་ངོ་བོ་ཉིད་མཚན་མེད་ཕྱིར་རོ། །འོན་ཀྱང་འདིར་བསྟན་ཤེས་མཚན་སངས་རྒྱས་ལ། །མེད་དེ་འདི་ནི་སྦྱོར་བའི་ཤེས་མཚན་ཕྱིར། །ཁ་ཅིག་ཀུ་མཱ་ར་ཡི་དེ་འཐད་དེ། །བྱེད་པའི་ནུས་དང་མི་ལྡན་རྣམ་བཅད་ནས། །ངོ་བོ་ཉིད་ལ་ནུས་ལྡན་རྗེས་འགྲོ་བསྒྲུབས། །ཁྱད་མཚན་གྱིས་ནི་ཉན་རང་ལ་སོགས་ལ། །ལྡན་པ་གཅོད་པས་ལྡོག་ཁྱབ་འགྲུབ་ཕྱིར་ཟེར། །དེ་ཙམ་རྗེས་ལྡོག་ཁྱབ་པའི་དོན་མིན་ཞིང། །ངོ་བོ་ཉིད་དུ་སྒྲུབ་ཕྱིར་སློབ་པར་ངེས། །དེ་ལ་མཁྱེན་གསུམ་མེད་ཕྱིར་ཆོས་ཅན་ཉམས། །གཽ་མིའི་དགོངས་པར་མཛད་དེ་ལོ་ཆེན་གྱིས། །སྦྱོར་བ་ཉི་ཤུའམ་རང་བཞིན་སྦྱོར་བ་ལྔ། །མཚན་གཞི་ངོ་བོ་ཉིད་ནི་མཚོན་བྱ་དང། །བྱེད་མཚན་ཁྱད་མཚན་གཉིས་ནི་མཚན་ཉིད་དེ། །མེ་ནི་མཚན་གཞི་སྲེག་བྱེད་མཚན་ཉིད་དང། །མེ་ཡི་ཐ་སྙད་བྱ་རུང་མཚོན་བྱ་དང། །མཚན་མཚོན་གཞི་གསུམ་

― GTD002_Page_0260 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་གཅོད་ཚད་མ་ལ། །མཚོན་པར་བཤད་བཞིན་འདིར་ཡང་ཤེས་མཚན་གྱིས། །སྦྱོར་བ་དེ་དག་བྱེད་པ་ཁྱད་པར་དང། །ལྡན་པར་རྟོགས་ཕྱིར་མཚོན་པ་ཞེས་བྱ་ལ། །འོན་ཀྱང་འདིར་བསྟན་བཅུ་དྲུག་ཕྲག་གསུམ་གྱི། །བྱེད་མཚན་ཁྱད་མཚན་གཉིས་ལ་མ་དམིགས་ཕྱིར། །མཚོན་པ་དངོས་མིན་དོན་ཡང་དེ་ཡི་ཡུལ། །ཡིན་ཕྱིར་ཡུལ་གྱི་སྒོ་ནས་བསྟན་ཏོ་ཟེར། །མི་འཐད་དེ་བཞིན་གཤེགས་འབྱུང་ཞེས་སོགས་ཀྱིས། །ཤེས་མཚན་ཞེ་བརྒྱད་དངོས་སུ་ཚིག་ཟིན་ལ། །བསྟན་པ་རྩ་འགྲེལ་ཀུན་གྱིས་འགྲུབ་པའི་ཕྱིར། །ཡུལ་གྱིས་ཡུལ་ཅན་འཕངས་ཙམ་ག་ལ་ཡིན། །ཤེར་འབྱུང་སྔར་བཤད་མཁྱེན་གསུམ་ལ་བརྟེན་པའི། །བདེན་རྣམ་བཅུ་དྲུག་རྟོགས་པ་ཤེས་མཚན་དང། །དེ་གསུམ་ཐབས་ཤེས་གྲོགས་ཀྱིས་ཟིན་པའི་སྒོས། །སྐྱེད་ཕྱིར་སྐྱོན་རྣམས་ཀུན་བྲལ་རྣམ་དག་ཏུ། །འབྱུང་བའི་ལྡོག་ཆ་ནས་ནི་ཁྱད་མཚན་ཟེར། །རྣམ་པའི་སྐབས་དང་འདི་ཡི་མཁྱེན་གསུམ་སྦྱོར། །མིང་ཙམ་འདྲ་ཡང་སྐྱེད་ཚུལ་མི་མཚུངས་ཏེ། །སྔ་མ་བཅུ་དྲུག་བདེན་རྣམ་མཁྱེན་ཆ་དང། །འདི་ནི་དེ་བཞིན་གཤེགས་པ་འབྱུང་སོགས་ཡུལ། །ཞེ་བརྒྱད་མཁྱེན་པའི་ཆ་ནས་འཇོག་ཕྱིར་དང། །ཁྱད་མཚན་ཀུན་མཁྱེན་གསུམ་ལ་སྦྱར་བ་ཡང། །ནོར་ཏེ་སློབ་དཔོན་གཞི་ཤེས་བསལ་ཕྱིར་རོ། །བྱེད་མཚན་སྦྱོར་རྣམས་སངས་རྒྱས་སྐྱེད་བྱེད་དུ། །མཚོན་ཏེ་འདི་ཡི་མཚན་ཉིད་བྱེད་ཚུལ་ཟེར། །དོན་དུ་སངས་རྒྱས་སྐྱེད་བྱེད་ཡིན་མོད་ཀྱང། །འདིར་ནི་མཚོན་ཚུལ་དེ་ལྟར་མ་ཡིན་ཏེ། །གཞུང་ལམ་འབྲས་བུའི་ཤེར་ཕྱིན་གསུམ་ཤེས་ཏེ། །འབྲས་བུ་དོན་གཉེར་ཇི་བཞིན་སྐྱེ་བ་ལ། །ལམ་གྱི་མཚན་ཉིད་ལེགས་པར་ཤེས་དགོས་ཕྱིར། །ལམ་ཉིད་རང་གི་བྱེད་པ་ལ་སོགས་ལ། །སྦྱོར་བའི་མཚན་ཉིད་མིང་གིས་

― GTD002_Page_0261 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་ཕྱིར་རོ། །༈ རང་ལུགས་ལ་ཡང་མཚོན་ཚུལ་དུ་མ་སྟེ། །མེ་ཡི་ཚ་བ་ལྟ་བུ་རང་མཚན་དང། །མི་རྟག་བདག་མེད་ལ་སོགས་སྤྱི་མཚན་དང། །བྱས་དང་མི་རྟག་ལ་ཡང་མ་བྱས་དང། །རྟག་སོགས་ལྡོག་ཆས་དབྱེ་བའི་མཚན་ཉིད་དང། །མ་ཁྱབ་ཁྱབ་ཆེས་གཉིས་བཀག་རིགས་མཐུན་ཙམ། །དེར་བསྒྲུབ་རིགས་མི་མཐུན་སེལ་མཚན་ཉིད་དང། །དོན་ལ་མི་དགོས་འང་ལོག་རྟོག་སེལ་བའི་ཕྱིར། །སྨོས་པ་ལོག་རྟོག་སེལ་བའི་མཚན་ཉིད་སོགས། །ཡོད་ཀྱང་འདིར་ནི་རིགས་མི་མཐུན་སེལ་དང། །ལྡོག་ཆའི་མཚན་ཉིད་གཙོ་སྟེ་སྦྱོར་བ་ལ། །ཤེས་ཁྱད་བྱེད་དོ་ལྡོག་པས་དབྱེ་ཕྱིར་ཏེ། །སྦྱོར་བ་རྟོགས་དང་འཕྲིན་ལས་མཐར་ཐུག་སྟེ། །དོན་གཉིས་ཕུན་ཚོགས་སྐྱེད་པའི་ནུས་ལྡན་པར། ཤེས་བྱེད་གཉིས་ཀྱིས་མི་ལྡན་རྣམ་གཅོད་དུ། །མཚོན་ཞིང་ནུས་པ་དེ་གཞན་ལ་ཡོད་ན། །ཐེག་ཆེན་ལམ་གྱི་དཀའ་སྤྱད་མི་དགོས་ཀྱང། །ཁྱད་མཚན་གྱིས་ནི་ཉན་རང་ལ་སོགས་པ། །གཞན་ལ་ལྡན་པ་རྣམ་བཅད་ཚུལ་གྱིས་མཚོན། །ཁྱད་མཚན་འདི་ཡིས་ཤེས་མཚན་སོ་གཉིས་ནི། །ཉན་རང་སྦྱོར་བ་ལས་ནི་རང་ལྡོག་སྒོས། །ཁྱད་པར་ཞུགས་པར་བསྟན་ཀྱང་གཞི་ཤེས་ཀྱིས། །བཅུ་དྲུག་དེ་ལྟར་མ་བསྟན་དེ་དག་ནི། །ཟིན་བྱེད་དབང་གིས་ནུས་པའམ་རྫས་ཀྱི་ཁྱད། །ཞུགས་ཀྱང་རང་ལྡོག་སྒོ་ནས་འཕགས་མིན་ཕྱིར། །ཁ་ཅིག་སྐབས་གསུམ་པར་བསྟན་ཟིན་དབང་བྱས་ཟེར། །སྒོམ་ལམ་གྱིས་བསྡུས་སྦྱོར་བའི་ཁྱད་མཚན་ནི། །འོག་ཏུ་འཆད་འགྱུར་ཕྱིར་ཞེས་མཁས་གྲུབ་གསུངས། །བར་བ་མཐོང་ལམ་སྨོས་པས་དེ་ཉིད་ཀྱིས། །རྒྱུ་འབྲས་སྦྱོར་སྒོམ་གཉིས་ཀྱང་མཚོན་པར་གསེར་ཕྲེང་གསུངས། །ངོ་བོ་ཉིད་ཀྱང་མཚན་

― GTD002_Page_0262 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཡིན་མོད་ཀྱི། །དང་པོ་གསུམ་ལ་ལྟོས་ནས་ཐ་མ་འདི། །རང་བཞིན་ནམ་མཚོན་བྱར་བཤད་ཅེས་གསེར་ཕྲེང་གསུངས། །མཚན་མཚོན་ཚུལ་ཡང་བྱ་རོག་བབ་པ་ཡི། །ཁང་བཟང་དེ་ཉིད་བྱ་རོག་དེ་བསྟན་ནས། །ཤེས་ལ་མཚོན་པར་བཤད་པ་ཙམ་ཡིན་གྱི། །རྣམ་པར་བཞག་འཇོག་མཚན་མཚོན་དངོས་མིན་ཕྱིར། །སྦྱོར་བར་མ་ཟད་སྦྱོར་བའི་ནུས་པ་ཡང། །མཚོན་བྱར་བཤད་ལ་འགལ་བ་ཡོད་མིན་ཏེ། །ནུས་དང་ནུས་ཅན་ངོ་བོ་གཅིག་ཕྱིར་རོ། །དབྱེ་ན་འདིར་བསྟན་ཤེས་མཚན་སྦྱོར་བའི་དོན། །མཁྱེན་གསུམ་དམིགས་པ་གང་རུང་ལ་དམིགས་ནས། །དེ་བཞིན་གཤེགས་པ་འབྱུང་བ་ཤེས་པ་སོགས། །གཙོ་བོར་གྱུར་པའི་འདིར་བསྟན་ཤེར་ཕྱིན་ནོ། །དེ་ལ་གཞི་ལམ་རྣམ་མཁྱེན་སྦྱོར་བ་གསུམ། །དོན་ནི་གཞི་ཤེས་དམིགས་པ་ལྟར་དམིགས་ནས། །དེ་བཞིན་གཤེགས་འབྱུང་ཤེས་སོགས་བཅུ་དྲུག་གི །ཆ་ནས་བཞག་པའི་འདིར་བསྟན་ལམ་ཤེར་ཕྱིན། །དང་པོའོ་དེ་བཞིན་ལམ་ཤེས་ལྟར་དམིགས་ནས། །སྟོང་ཉིད་མཚན་མེད་ཤེས་སོགས་རྣམ་མཁྱེན་ལྟར། །དམིགས་ནས་སངས་རྒྱས་ཉིད་ཀྱི་ཆོས་ཤེས་སོགས། །བཅུ་དྲུག་ཆ་བཞག་འདིར་བསྟན་ལམ་ཤེར་ཕྱིན། །རྣམ་མཁྱེན་སྦྱོར་བའོ་སྦྱོར་དང་ཤེས་མཚན་གཉིས། །འཆོལ་བར་མི་སེམས་སྦྱོར་བར་བྱེད་ལས་སྒོས། །ཤེས་མཚན་ལ་སོགས་མིང་གིས་བསྟན་ཙམ་ལས། །མཚན་ཉིད་སྦྱོར་ལས་གཞན་གྱུར་ཡོད་མིན་ཕྱིར། །མཚོན་བྱ་ལྟ་བུར་མཚོན་ཞེས་གསུངས་ཕྱིར་རོ། །འདིར་བསྟན་གཞི་ཤེས་ཤེས་མཚན་བཅུ་དྲུག་པོ། །གཞི་ཤེས་སྦྱོར་བ་ཡིན་ཀྱང་གཞི་ཤེས་ཀྱི། །ཤེས་མཚན་འཆད་བྱེད་དངོས་བསྟན་མ་ངེས་ཏེ། །འཇིག་རྟེན་འཇིག་མེད་ཅེས་པའི་དངོས་བསྟན་གྱི། །ཟིན་བྱེད་བདེན་མེད་

― GTD002_Page_0263 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་པའི་ལམ་གསུངས་ཕྱིར། །རྒྱ་ཆེ་ཞེས་བྱ་སེམས་ཀྱི་གནས་ལུགས་ཏེ། །ཐ་སྙད་ཡོན་ཏན་འགྲུབ་རུང་ཆེན་པོར་མྱུར། །གྲངས་ཀྱིས་གཞལ་བར་མི་ནུས་ཚད་མེད་དང། །སེམས་དེ་དབང་ཤེས་ལ་ནི་བསྟན་མེད་པར། །མ་ཟད་སངས་རྒྱས་སྤྱན་ལྔས་བལྟར་ཡང་མེད། ། ༈ གཡོ་བ་སོགས་ཏེ་འདུ་བཀྲམ་བཅུམ་པ་བཞི། །དེ་ལས་ལུང་མ་བསྟན་ལྟ་བཅུ་བཞི་སྟེ། །སྔོན་མཐར་བརྟེན་པ་འཇིག་རྟེན་རྟག་སོགས་བཞི། །ཕྱི་མཐར་བརྟེན་པ་མཐའ་ལྡན་ལ་སོགས་བཞི། །མྱང་འདས་ལ་བརྟེན་གྲོལ་བདག་གྲོངས་ཕན་ཆད། །འབྱུང་དང་མི་འབྱུང་གཉིས་ཀ་གཉིས་མིན་བཞི། །ལུས་སྲོག་ལ་བརྟེན་རྫས་གཅིག་ཐ་དད་གཉིས། །སྒྲུབ་པ་མི་རུང་དགག་པ་དེར་མི་འོས། །དེ་ཕྱིར་ལུང་མ་བསྟན་པར་རྣམ་བཤད་གསུངས། །རྩ་ཤེས་ཊཱིཀ་ཆེན་གསུངས་ཚུལ་དེ་ལས་གཞན། །གྲོལ་བདག་ལེགས་ལྡན་སངས་རྒྱས་ཉིད་ལ་གསུངས། །གསེར་ཕྲེང་བདག་གམ་སེམས་ཅན་ཙམ་ལ་སྦྱར། །མཐའ་དང་མི་ལྡན་རྟག་དང་གྲོལ་བདག་འབྱུང། །གྲངས་ཅན་ལ་བརྟེན་གཡོ་བའི་ལྟ་བ་གསུམ། །ཟློག་ཕྱོགས་རྒྱང་འཕེན་ལ་བརྟེན་འདུ་བ་གསུམ། །གསེར་ཕྲེང་མཐའ་ལྡན་མཐའ་ནི་ཕྱི་མའི་ཆར། །མཛད་དེ་གྲངས་ཅན་པ་ལ་མཐའ་ལྡན་སྦྱར། །གཅེར་བུ་བ་དག་བུམ་པའི་གནས་སྐབས་ནི། །ཞིག་ཀྱང་རང་བཞིན་མི་འཇིག་སྨྲ་བའི་ཕྱིར། །དགག་སྒྲུབ་ཆ་མཉམ་བཀྲམ་པའི་ལྟ་བ་གསུམ། །གནས་མ་བུར་བརྟེན་ཟློག་ཕྱོགས་བཅུམ་པ་གསུམ། །བདག་འཛིན་མིན་ཡང་ཁྱད་གཞི་བཏགས་བདག་ལ། །བརྟེན་ཕྱིར་ཁྱད་ཆོས་འཛིན་པ་ལོག་ཞུགས་སོ། །རྣམ་མཁྱེན་ཤེས་མཚན་སྟོན་བྱེད་གཞུང་ཚིག་དེར། །དེ་བཞིན་ཉིད་ཀྱི་ཆོས་བརྟེན་ཞེས་གསུངས་སོ། །བརྗོད་དང་

― GTD002_Page_0264 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་མཛད་མངོན་སུམ་མཛད་གསུམ་དོན། །ཁ་ཅིག་ཐོས་བསམ་སྒོམ་གསུམ་དབང་བྱས་ཟེར། །ཡང་ན་ཉན་ཐོས་བྱང་སེམས་སངས་རྒྱས་གསུམ། །ཡང་ན་གདུལ་བྱ་སྤྱི་ལ་བརྗོད་མཛད་ཅིང། །སྨིན་པ་རྣམས་ལ་སྒོམ་པས་ཤེས་པར་མཛད། །རྣམ་གྲོལ་གདུལ་བྱས་མངོན་སུམ་མཐོང་མཛད་དོ། །བསམ་མི་ཁྱབ་སོགས་བཅུ་དྲུག་ཅི་རིགས་ཀྱིས། །ཐེག་དམན་ལས་འཕགས་ཆ་བཞག་ལམ་ཤེར་ཕྱིན། །སེམས་དཔའི་ཁྱད་མཚན་སྦྱོར་བའི་མཚན་ཉིད་དོ། །གཞན་ལ་ཕན་བདེ་སྐྱོབ་སོགས་བྱེད་པའི་ཆོས། །བཅུ་གཅིག་ཆ་བཞག་འདིར་བསྟན་ལམ་ཤེར་ཕྱིན། །འདིར་བསྟན་སེམས་དཔའི་བྱེད་མཚན་སྦྱོར་བ་སྟེ། །དང་པོ་དགུ་དང་མཐའ་གཉིས་རིམ་པ་བཞིན། །འགྲེལ་ཆེན་གཉིས་ལས་སྦྱོར་བ་གསུམ་དང་སྦྱར། །འགྲེལ་ཆུང་གཞི་ཤེས་ཙམ་གྱི་ལྡོག་པ་ནས། །གསུམ་ལས་མི་ནུས་ཕྱིར་ན་གོང་གསུམ་སྨོས། །གླིང་ལ་རྣམ་པ་གསུམ་སོགས་གསེར་འཕྲེང་གསལ། །མཚན་གཞིའི་སྦྱོར་བའི་དོན་ནི་ཤེས་ཁྱད་བྱེད། །གསུམ་གྱིས་མཚོན་པས་ལས་སྒྲུབ་ཀྱིས་བསྟན་པའི། །སྦྱོར་བའི་དངོས་ཉིད་སེམས་དཔའི་ཡེ་ཤེས་སོ། །གཞི་ཤེས་སྦྱོར་བཞི་གསུམ་གྱིས་མཚོན་ནམ་དཔྱད། །དགོས་ཏེ་རྩོད་སྤོང་དོན་ཡང་འདི་ཡིན་ནོ། །འདི་བཞིའང་གཞུང་གི་དངོས་བསྟན་ཟིན་བྱེད་གཙོ། །འདིར་བསྟན་མཚན་ཉིད་གོ་གཅིག་ཚོགས་ལམ་ནས། །རྒྱུན་མཐའི་བར་རོ་གཞན་དུ་རྒྱལ་བར་འབྱུང། །༈ ཐར་ཆ་ནས་བཟུང་རྒྱུད་ལ་སྐྱེ་རིམ་ལ། །གྲངས་མེད་གསུམ་གྱི་ཐོག་མ་ངོས་བཟུང་སྟེ། །རྒྱན་གྱི་ཆེད་བྱའི་གདུལ་བྱ་ངོས་འཛིན་དང། །དེ་ནས་སྨིན་བྱེད་ལམ་གྱི་སྐྱེ་རིམ་དང། །མངོན་རྟོགས་ཁྱད་པར་ཅན་གྱི་སྐྱེ་རིམ་གསུམ། །དང་པོ་སྔར་བཤད་མཁྱེན་གསུམ་རྣམ་པ་དང། །མཚན་ཉིད་བཞི་སོགས་བསྒོམས་

― GTD002_Page_0265 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུས་འགའ་ཞིག་ལ། །ཐར་ཆ་གྲངས་མེད་ཚོགས་དང་མཉམ་འབྱུང་སྟེ། །དད་དང་དྲན་པར་མཁས་ཕྱིར་མི་ལྡོག་ཅིང། །བརྩོན་འགྲུས་མཁས་པས་འཇུག་སེམས་བསྐྱེད་ཕྱིར་དང། །ཏིང་འཛིན་ཤེས་རབ་མཁས་ཕྱིར་ལྟ་བ་ཡི། །དཔྱད་པ་རྫོགས་ཕྱིར་རོ་དེ་ལས་དང་པོ་གཉིས། །ཐེག་ཆེན་འཇུག་སྒོའི་སྔོན་འགྲོ་དངོས་གཞི་སྟེ། །དེ་ནས་གསུམ་པས་སྤྱོད་པ་སྤྱི་བསླབ་དང། །ཕར་ཕྱིན་མཐའ་གཉིས་སློབ་ཚུལ་མཐའ་གཉིས་སོ། །མདོ་ཡི་ཚིག་ཟིན་དད་སོགས་ཆུང་འབྲིང་དང། །དབང་པོ་རྟུལ་འབྲིང་ཉན་རང་ལ་ཡིན་ཕྱིར། །བྱང་སེམས་མིང་གིས་བཏགས་ནས་གསུངས་པ་ལས། །བྱང་སེམས་ཉིད་ལ་རིགས་ཅན་གསུམ་འདོད་འཁྲུལ། །ཁ་ཅིག་རྩ་བར་བཤད་པའི་རྣོ་རྟུལ་ཡང། །ཐེག་དམན་ལ་འདོད་མི་རིགས་དེ་གཉིས་ནི། །རྫོགས་བྱང་དོན་དུ་གཉེར་བར་མཚུངས་པ་ལ། །རྣོ་རྟུལ་དབང་གིས་དཀའ་སླ་གསུངས་ཕྱིར་རོ། །ཁ་ཅིག་རྣོ་རྟུལ་གཉིས་སུ་མ་ངེས་ཏེ། །འབྲིང་པོའོ་ཟེར་ཡང་དེ་ནི་རྟུལ་པོས་བསྡུས། །དད་སོགས་ལྔ་ལ་མཁས་པའི་རིགས་གནས་ཀྱི། །ཐབས་ཤེས་ཁྱད་པར་ཅན་གཉིས་ཀྱིས་ཟིན་པའི། །རང་བཞིན་གྱིས་ནི་དབང་རྣོན་ཆོས་མངོན་རྟོགས། །འདི་ཡི་དངོས་བསྟན་ཐར་པ་ཆ་མཐུན་དོན། །གཞན་ནི་ཐབས་ཤེས་ཉི་ཚེས་ཟིན་པ་དང། །རང་བཞིན་དབང་འབྲིང་དབང་རྟུལ་མངོན་རྟོགས་སོ། །ཐར་པའི་ཆ་ལ་ཕན་ཕྱིར་ཐར་ཆ་སྟེ། །ལུས་རྟེན་སེམས་རྟེན་གཉིས་ནི་སེམས་བསྐྱེད་བཞིན། །རྒྱན་བརྟེན་ཡུལ་ལྔ་གང་རུང་རྟོགས་དགོས་ཀྱི། །ཐེག་ཆེན་རིགས་ཅན་དེ་ནི་བསྟན་བཅོས་འདིའི། །ཆེད་དུ་བྱ་བའི་གདུལ་བྱའི་དོན་གསུངས་ཤིང། །གདམས་དང་རྗེས་བསྟན་གང་རུང་དབང་བྱས་ན། །དེར་གྱུར་འཕགས་པ་ཡོད་

― GTD002_Page_0266 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་དཔྱད་བྱ་སྟེ། །བདེན་པ་མངོན་སུམ་མཐོང་ཚེ་ལུང་གི་ཆོས། །གཟིངས་དང་འདྲ་ཕྱིར་ཆེད་དུ་མི་བརྟེན་པས། །རྒྱན་ལས་རྟོག་གེར་ཆེད་དུ་བརྟེན་པ་དང། །དམ་བཅའ་གཞན་དུ་འགྱུར་ཕྱིར་མ་ངེས་དང། །ཆོས་ཀུན་ཡུལ་དུ་མི་བྱེད་མ་ཁྱབ་དང། །ཀུན་རྫོབ་ཙམ་ལས་དོན་དམ་མ་མཐོང་དང། །སྤོབས་པ་ཡོངས་སུ་གཏུགས་པའི་སྐྱོ་བ་ཅན། །འདི་ལྔ་སོ་སྐྱེ་ཁོ་ནར་སྦྱར་ཕྱིར་རོ། །བློ་བརྟན་རྟོག་གེའི་གཞུང་ལ་སྦྱར་ཏེ་བཤད། །༈ གཉིས་པ་སྨིན་བྱེད་ལམ་ལ་དངོས་དང་ནི། །མངོན་རྟོགས་གོ་རིམ་ལོག་རྟོག་སྤངས་པ་གཉིས། །མཉམ་གཞག་ཤེས་རབ་སྒོམ་ཚུལ་སྔར་བཤད་ནས། །རྗེས་ཐོབ་བརྩེ་སོགས་ཐབས་ཀྱི་རྟོགས་རིགས་རྣམས། །འདིར་གསུངས་བསྡོམས་པས་སྦྱོར་ལམ་ཡོངས་རྫོགས་འགྱུར། །འདིར་ནི་རྩ་བའི་ཚིག་དང་སྒོ་བསྡུར་ཏེ། །དྲོད་སོགས་སྤྱི་ལ་སྦྱར་ཡང་སྣང་བ་གཉིས། །ཕྱི་སྟེ་མཉམ་བྱམས་གཉིས་དང་ཕན་སོགས་གསུམ། །ཕ་མའི་སེམས་སོགས་ལྔ་དང་དྲོད་གསུམ་སྦྱར། །ཚིག་གསལ་སེམས་མཉམ་ཁོ་ནར་དྲོད་ཆུང་སྦྱར། །སྡིག་ལས་ལྡོག་ཅིང་གཞན་དགོད་བསྔགས་བརྗོད་དང། །སྦྱིན་སོགས་ལ་གནས་གཞན་འགོད་བསྔགས་པ་བརྗོད། །ནང་སྟོང་ཉིད་ལ་གནས་སོགས་རྩེ་མོ་གསུམ། །བདེན་བཞིར་ཤེས་སྤོང་སོགས་བྱེད་གཞན་འགོད་དང། །རྒྱུན་ཞུགས་འབྲས་སོགས་ཤེས་ཀྱང་མངོན་མི་བྱེད། །མཐོང་སོགས་ལ་གནས་གཞན་འགོད་བཟོད་པ་གསུམ། །སེམས་ཅན་སྨིན་དང་མངོན་ཤེས་བསྐྱེད་པ་དང། །རྣམ་མཁྱེན་བསྐྱེད་ཅིང་གཞན་འགོད་ཆོས་མཆོག་གསུམ། །ཁ་ཅིག་རྩ་བར་སེམས་ཅན་དམིགས་པ་དང། །བདེན་ཤེས་རྣམ་པར་གསུངས་ཀྱང་སློབ་དཔོན་གྱིས། །བདེན་

― GTD002_Page_0267 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་དམིགས་པར་བྱས་ཏེ་དམིགས་པ་ཡི། །སེམས་ཅན་ཆད་པའི་ཕྱིར་ན་མི་འཐད་ཟེར། །སློབ་དཔོན་རྩེ་མོ་བཞིན་དུ་གཞན་ལ་ཡང། །སྦྱོར་གསུངས་ཕྱིར་ན་སེམས་ཅན་ཆད་པ་དང། །བདེན་པ་དམིགས་པར་གསུངས་པའི་སྐབས་མེད་དོ། །རྩོད་ཚུལ་འདི་ནི་སྤྱི་ལ་མི་རུང་ངམ་དཔྱད། །རང་ལུགས་གཙོ་བོར་ཐབས་ཆས་ཁྱད་པར་དུ། །བྱས་པའི་སེམས་དཔའི་རྒྱུད་ཀྱི་དོན་མངོན་རྟོགས། །ཐེག་ཆེན་ངེས་འབྱེད་ཆ་མཐུན་དོན་ཡིན་ནོ། །མངོན་རྟོགས་གོ་རིམ་ལོག་རྟོག་སྤོང་ཚུལ་ནི། །ཁ་ཅིག་སྦྱོར་མཐོང་སྒོམ་གསུམ་སྐབས་དྲུག་ཏུ། །གསུངས་ཀྱང་མི་ཟློས་དང་པོ་གསུམ་གྱི་དེ། །བསྒོམ་བྱ་མི་མཚུངས་ཕྱིར་ན་མི་ཟློས་ཤིང། །བཞི་པར་ས་བརྒྱད་ཡེ་ཤེས་ཆེ་ཆུང་གསུམ། །ལྔ་པར་དགུ་དང་བཅུ་པའི་སྟོད་ཆ་དང། །དྲུག་པར་བཅུ་པའི་སྨད་ཆར་སྦྱོར་མཐོང་སོགས། །མིང་གིས་བཏགས་པའི་ཕྱིར་ན་མི་ཟློས་སོ། །ཕྱི་མ་འདི་ལ་ཡིག་ཆར་སྟོད་ཆ་གསུངས། །དེ་དག་དེ་ཡི་རྒྱུ་མཚན་རྩ་བ་ལས། །བག་ལ་ཉལ་ཀུན་འཇོམས་ཞེས་གསུངས་ཕྱིར་དང། །ཀུན་མཁྱེན་ཉིད་གསུམ་ཆོས་རྣམས་ཡོངས་རྫོགས་པར། །གསུངས་ཕྱིར་ཞེ་ན་མཚུངས་ཏེ་སྐབས་དང་པོར། །སྦྱོར་ལམ་སྐབས་སུ་དག་པ་ལྔ་གསུངས་དང། །དཔའ་བར་འགྲོ་དང་རློམ་ཟད་གསུངས་ཕྱིར་རོ། །དེ་དག་མོས་སྒོམ་ཙམ་དང་རྒྱུར་གནས་ལ། །འདོད་ན་ཁྱོད་ཀྱིས་དེ་ཡང་དེ་དང་འདྲ། །དེ་ཕྱིར་རྐྱང་པའི་དབང་བྱས་མི་རིགས་ཏེ། །ཕྱིར་མི་ལྡོག་རྟགས་རྫོགས་རྗེས་སློབ་པའི་ཆོས། །བཤད་ཟིན་ད་ནི་མི་སློབ་དགེ་འདུན་ཞེས། །གཉིས་སུ་ཕྱེ་ཕྱིར་ས་བརྒྱད་གཅིག་པུར་འགལ། །སྡུད་འགྲེལ་སློབ་དཔོན་སྔ་མའི་ཕྱོགས་བཟུང་སྟེ། །གསུངས་ཀྱང་རང་ལུགས་ཁུག་པའི་དབང་བྱེད་

― GTD002_Page_0268 ―

^{[མ་དཔེ་གཟིགས་ན་འདིར་གནོན།]}

[Full Size]

པ། །འགྲེལ་ཆེན་བཞིན་ནོ་དེ་ཡང་སྐབས་དྲུག་ལས། །དང་པོ་གསུམ་ནི་བླང་བྱའི་དབང་བྱས་ཤིང། །གཞན་གསུམ་ཉམས་སུ་ལེན་བྱེད་དབང་བྱས་ལ། །ནང་གསེས་ཀྱི་ཡང་མི་འདྲ་སྦྱོར་བ་གསུམ། །རིམ་པས་རེ་རེ་ཙམ་ཞིག་བསྒོམ་སྙམ་པའི། །ལོག་རྟོག་བསལ་ནས་མཉམ་དུ་འཇུག་ཕྱིར་རོ། །༈ གསུམ་པ་མངོན་རྟོགས་གོང་མ་སྐྱེ་རིམ་ལ། །སྦྱོར་མཐོང་སྒོམ་གྱི་ཕྱིར་མི་ལྡོག་རྟགས་དང། །སྐུ་གསུམ་འགྲུབ་བྱེད་ལམ་གསུམ་བཤད་པ་གཉིས། །ཁ་ཅིག་རྟགས་ནི་ལུས་ངག་མཚན་མ་ཟེར། །དེར་གྱུར་བདེན་ཞེན་མངོན་གྱུར་ལོག་ཆ་དང། །ཐེ་ཚོམ་མི་ཁོམ་ཟད་ཆ་བྱམས་ཡིད་སོགས། །ལུས་ངག་མཚན་མ་མིན་ཕྱིར་མི་འཐད་དོ། །གཞན་དག་རྟགས་ནི་གཞན་གྱིས་དཔོག་པའི་དུས། །ཁོ་ནར་བསམས་ཏེ་སྦྱོར་ལམ་ཐོབ་མ་ཐག །མེད་ཅེས་སྨྲ་བ་དག་ཀྱང་འདིས་ཁེགས་སོ། །ཁ་ཅིག་རྟགས་འདི་འབྲས་རྟགས་ཁོ་ན་དང། །ལ་ལ་རང་བཞིན་རྟགས་འདོད་གཞན་དག་ནི། །གཏན་ཚིགས་སྒོ་ནས་དཔོག་པ་མེད་ཅེས་ཟེར། །གསུམ་ག་མི་འཐད་མདོ་ལས་འབྲས་རང་གཉིས། །ཅི་རིགས་སྒོ་ནས་རྟོགས་པ་གསུངས་ཕྱིར་རོ། །གཡོ་ཅན་སེམས་དང་ལུས་ངག་མི་མཐུན་ཀྱང། །ལུས་ངག་སྒོ་ནས་དཔོག་པ་མི་འགལ་ཏེ། །དམ་པ་རྣམས་ནི་དགོས་དབང་མ་གཏོགས་པ། །ནང་གི་སེམས་དང་སྤྱོད་པ་མཐུན་ཕྱིར་རོ། །ཁ་ཅིག་གཟུགས་ལས་ལྡོག་སོགས་རྟགས་ཞེ་བཞི། །གང་རུང་ཐོབ་པའི་སེམས་དཔའ་ཕྱིར་མི་ལྡོག །དགེ་འདུན་དོན་དུ་འདོད་པ་རྒྱལ་བས་ཁེགས། །སློབ་པའི་དབང་བྱས་ན་ཡང་མཐོང་ལམ་པ། །དབང་རྟུལ་དེ་ཡིས་རྟགས་རྣམས་མ་ཐོབ་ཀྱང། །སློབ་དང་ཕྱིར་མི་ལྡོག་གཉིས་ཡིན་ཕྱིར་འགལ། །རོང་སྟོན་མ་དག་ས་ལ་སྦྱོར་བའི་སྒོས། །ཕྱིར་མི་ལྡོག་རྟགས་ཐོབ་ཀྱང་བསམ་

― GTD002_Page_0269 ―

^{[མ་དཔེ་གཟིགས་ན་འདིར་གནོན།]}

[Full Size]

པས་མིན། །རང་ཙམ་དོན་དུ་ཐར་པ་འདོད་ཕྱིར་ཏེ། །ལུང་ལས་ཇི་སྲིད་ས་བརྒྱད་མ་ཐོབ་པ། །དེ་སྲིད་ཐེག་པ་དམན་པས་འཇིགས་གསུངས་ཕྱིར། །ཞེས་ཟེར་སེམས་བསྐྱེད་ཉམས་པའི་བྱང་འཕགས་མཚར། །ལུང་འདི་རྒྱུད་བླ་དང་ནི་ལང་གཤེགས་ཞེས། །མང་པོ་འཁྲུལ་ཡང་རྡོ་རྗེ་རྩེ་མོའི་ཡིན། ། ༈ རང་ལུགས་བསམ་སྦྱོར་གཉིས་སྒོས་གཟུགས་སོགས་ལ། །བདེན་ཞེན་མངོན་གྱུར་ལྡོག་སོགས་རྟགས་ཞེ་བཞི། །གང་རུང་ཐོབ་པའི་སེམས་དཔའ་ཕྱིར་མི་ལྡོག །རྟགས་ཐོབ་བྱང་ཆུབ་སེམས་དཔའི་དོན་དུ་འདོད། །སྦྱོར་མཐོང་སྒོམ་ལ་ཉི་ཤུ་བཅུ་དྲུག་བརྒྱད། །སྦྱོར་ལམ་བཞིར་ཡང་བཅུ་གཅིག་དྲུག་གཉིས་གཅིག །མཐོང་ལམ་སྐད་ཅིག་བཅུ་དྲུག་གསུངས་པ་ནི། །ཤེས་བཟོད་བཅུ་དྲུག་ལག་རྗེས་ལུས་ངག་གི །བྱ་བར་རྒྱུ་ཡི་མིང་གིས་བཏགས་པ་འོ། །རེ་རེར་རྣམ་པ་རྟགས་དང་མཚན་མ་གསུམ། །དེ་ཡི་ཁྱད་པར་འགྲེལ་ཆེན་གཉིས་ལ་ལྟོས། །མཐོང་ལམ་ལས་འཕྲོས་དབང་པོ་ཉེར་གཉིས་ལ། །ཀུན་བཏུས་བསྡུ་བ་མཛོད་ཀྱི་བཤད་ཚུལ་མང། །སྒོམ་ལམ་ཁྱད་ཆོས་ངོ་བོ་དབྱེ་བ་གསུམ། །དབྱེ་བ་ལས་འཕྲོས་གྲངས་དང་བྱེད་པ་ལ། །རྩོད་པ་སྤོང་ཚུལ་གཉིས་སོ་དང་པོ་ནི། །གྲངས་མེད་ལ་སོགས་བསྟན་པ་ཞེས་སོགས་གསུངས། །འདི་ཡི་བདེན་པ་དབུ་མ་རང་ལུགས་ཀྱི། །བདེན་པ་གཉིས་ལ་འགྲེ་སོགས་འདོད་ཀྱང་མིན། །རྫས་སམ་དངོས་པོ་རང་མཚན་དོན་དམ་དང། །ལྡོག་པ་སྤྱི་མཚན་ཀུན་རྫོབ་བདེན་པ་སྟེ། །དངོས་པོ་གཅིག་ཀྱང་ལྡོག་པ་ཐ་དད་ཕྱིར། །བྱེད་པར་དོན་དམ་ཐ་སྙད་ལ་ལྟོས་པའི། །རྩོད་པ་གཉིས་སོ་བྲི་འཕེལ་དོན་དམ་པར། །མེད་པར་ཐལ་བ་འདོད་པ་

― GTD002_Page_0270 ―

^{[མ་དཔེ་གཟིགས་ན་འདིར་གནོན།]}

[Full Size]

ཁོ་ན་དང། །ཐ་སྙད་དུ་ནི་རེ་རེ་བ་སོགས་ཀྱི། །མིན་ཡང་མ་ངེས་རྟེན་འབྲེལ་ཚོགས་པས་སོ། །ཆོས་སྐུ་འགྲུབ་བྱེད་སྲིད་ཞི་མཉམ་ཉིད་སྦྱོར། །ངོ་བོ་རྗེས་ཐོབ་སོགས་ཀྱི་སྐབས་སུ་ཡང། །བདེན་འཛིན་མངོན་གྱུར་སྐྱེ་བའི་སྐབས་བཅོམ་པའི། །ཆ་ནས་བཞག་པའི་དག་སའི་ཡེ་ཤེས་སོ། །ཁ་ཅིག་སྟོང་ཉིད་རྟོགས་པ་ཁོ་ནར་འདོད། །དག་སའི་བདག་མེད་ཕྲ་རགས་གསུམ་རྟོགས་པའི། །ཡེ་ཤེས་གསུམ་ཡང་ཤེས་རབ་ཆ་ཡིན་ཞིང། །ཆོས་སྐུའི་ལག་རྗེས་གཙོ་བོར་འཇོག་བྱེད་ཕྱིར། །འདིར་གསུངས་རྟགས་འདིས་ཤེས་རབ་ཆ་ཀུན་འགྲུབ། །གསེར་འཕྲེང་ཚོགས་ལམ་ལ་ཡང་སྦྱོར་བ་གསུམ། །སྒོམ་ཚུལ་གསུངས་པར་འཁྲུལ་ནས་ཐོབ་བོ་ཞེས། །ཁ་ཅིག་འདོད་ཀྱང་མི་འཐད་རྗེས་ཀྱི་ཚེ། །བདེན་འཛིན་མངོན་གྱུར་གོ་སྐབས་མ་བཅོམ་ཕྱིར། །རྩོད་ཚུལ་འདི་དག་ཁ་ཅིག་དབུ་སེམས་དང། །ཁ་ཅིག་ཐལ་རང་ཁོ་ནའི་རྩོད་ཚུལ་ཟེར། །ལ་ལ་དེ་གཉིས་མི་འཐད་འདི་དག་ནི། །མདོ་ལས་དངོས་བསྟན་རྩོད་པ་ཡིན་ཕྱིར་ཟེར། །གསུམ་ག་མི་འཐད་འདི་ལ་དོན་སྨྲ་དང། །སེམས་ཙམ་རང་རྒྱུད་པ་ཡིས་རྩོད་ཚུལ་ཏེ། །ཐལ་རང་སེམས་ཙམ་གསུམ་གྱིས་ལན་རེ་ཡང། །ཡོད་པའི་ཕྱིར་ཏེ་གྲུབ་མཐའ་རང་རང་གི །བདེན་གཉིས་འཇོག་མཚམས་ཕྲ་རགས་མི་མཚུངས་ཕྱིར། །མདོར་གསུངས་གྲུབ་མཐའི་རྩོད་ཚུལ་མིན་དགོས་ན། །གྲུབ་མཐའི་རྩོད་ཚུལ་མདོ་དོན་མིན་པར་འགྱུར། །ཁ་ཅིག་གཞན་གསོད་རྨིས་པ་མངོན་ཞེན་གྱིས། །བསད་པས་སྲོག་གཅོད་ལས་ལམ་རྫོགས་པར་སྨྲ། །རྨི་ལམ་མི་ལ་སེམས་མེད་ཕྱིར་ན་དེ། །མི་འཐད་ཕ་མ་བསད་པར་ཐལ་བར་འགྱུར། །དེ་ཕྱིར་ཕྱི་ནས་ལས་ལམ་རྫོགས་གསུངས་པ། །གནོད་སེམས་བྱས་བསགས་ཚང་བ་ཡིན་ནམ་དཔྱད། །རོང་སྟོན་དེར་སྡིག་

― GTD002_Page_0271 ―

^{[མ་དཔེ་གཟིགས་ན་འདིར་གནོན།]}

[Full Size]

གསོག་ན་ཕམ་པ་ཡང། །འབྱུང་ཞེས་རྩོད་དེ་བཅས་དབང་མ་དགོངས་སོ། །འདི་ལས་འཕྲོས་ཏེ་མདོར་གསུངས་ཀླན་ཀ་ནི། །ལས་མེད་ལས་འབྲས་དོན་དམ་ཐལ་བ་དང། །ལུང་འགལ་རྨི་ལམ་ལས་གསོག་ཐལ་བ་བཞི། །ཉིན་ཡང་ལས་མེད་ཀླན་ཀ་དང་པོ་འོ། །དོན་དམ་དུ་འདོད་ཀུན་རྫོབ་ཏུ་ན་དཔེ། །མ་གྲུབ་ཞེན་པས་གསོས་ན་བྲི་འཕེལ་ཕྱིར། །འོ་ན་རྨི་ལམ་ལས་ཀྱང་བྲི་འཕེལ་དུ། །འགྱུར་ཕྱིར་དོན་དམ་ཐལ་བ་གཉིས་པ་འོ། །ལས་ནི་དམིགས་བཅས་སྐྱེ་ཕྱིར་མངོན་ཞེན་གྱིས། །འཕེལ་བ་བདེན་ཕྱིར་མ་ཡིན་རྫུན་ཕྱིར་མིན། །གཉིས་པར་བརྒྱད་སྟོང་བདེ་གཤེགས་ལས་གསོག་འཕངས། །དམིགས་བཅས་སྐྱེ་ན་མདོ་ལས་ཆོས་རྣམས་ཀུན། །དབེན་གསུངས་ལུང་འགལ་ཀླན་ཀ་གསུམ་པ་འོ། །དབེན་པ་དོན་དམ་སྐྱེ་བ་རྫུན་ཕྱིར་རུང། །རྨི་ལམ་ལས་ལམ་རྫོགས་འགྱུར་བཞི་པ་སྟེ། །རབ་འབྱོར་མ་འོངས་རྒྱལ་འབྱུང་དོན་ཡོད་ཕྱིར། །བྱམས་པར་ཁ་འཕངས་དེས་ཀྱང་ཀླན་ཀ་ཡི། །འཁོར་གསུམ་མི་དམིགས་གསུངས་ཏེ་དོན་གྱི་ལན། །དེ་ནས་ལོངས་སྤྲུལ་འགྲུབ་བྱེད་ཞིང་དག་དང། །ཐབས་མཁས་གཙོར་བསྟན་ཀུན་ཀྱང་ཚོགས་གཉིས་འབྲས། །ཁྱད་པར་ཐབས་མཁས་འབྲས་བུ་བདུད་ལས་རྒྱལ། །བདུད་ཀྱང་བཞི་སྟེ་གང་ཞིག་འཆི་བ་ནི། །ཉེ་བར་ལེན་པའི་ཕུང་པོ་ཕྲ་རགས་དང། །གང་གིས་འཆི་བ་ཉོན་མོངས་བག་ཆགས་བཅས། །འཆི་བའི་ངོ་བོ་ཕྲ་རགས་འཆི་བདག་བདུད། །དེ་ལས་འདའ་བའི་བར་གཅོད་འདོད་ལྷ་དང། །དེ་ཡི་བྱེད་པ་ཅི་རིགས་ལྷའི་བུའི་བདུད། །ཁ་ཅིག་བདུད་བཞི་རྒྱུན་ཆད་མི་རིགས་ཏེ། །འདོད་ལྷ་དེ་ནི་སངས་རྒྱས་འགྱུར་ཕྱིར་ཟེར། །མ་ཁྱབ་ངན་འགྲོ་རྒྱུན་ཆད་གསུངས་

― GTD002_Page_0272 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་རོ། །བདུད་བཞི་རགས་པ་ཙམ་ལས་འདའ་ཚུལ་ནི། །ཐེག་དམན་ལྷག་མེད་ཚེ་དང་དགྲ་བཅོམ་ཚེ། །གཉིས་ལས་རྣམ་གྲོལ་ཚེ་དང་མཐོང་ལམ་ཚེ། །རིམ་བཞིན་ཕྱི་མ་ཐེག་ཆེན་སྦྱོར་ལམ་དུས། །གཞན་གསུམ་ས་བརྒྱད་ཚེ་འོ་ཁ་ཅིག་གིས། །རགས་པ་མི་སྦྱོར་ཐེག་དམན་གང་ཟག་བཞིར། །སྔར་བཞིན་བཤད་པ་མི་རིགས་བདུད་བཞིའི་གཡུལ། །གཅིག་ཅར་བཅོམ་དང་ལྷུན་གྲུབ་འཕྲིན་ལས་ཀྱི། །གཏེར་མངའ་སྐུ་གསུམ་མངོན་གྱུར་དུས་མཉམ་ཕྱིར། །ཚུལ་འདིར་འབད་པ་ལས་བྱུང་ལེགས་བྱས་མཐུས། །ཐོས་པའི་རྗེས་འཇུག་སྒྲུབ་པ་མཐར་ཕྱིན་ཅིང། །ཁྱད་པར་བྱམས་མགོན་ཉིན་བྱེད་ཤར་བའི་ཚེ། །གསུང་གི་བདུད་རྩིའི་རོ་ཡིས་ཚིམ་པར་ཤོག ། ༈ ཤེས་བྱའི་འཁོར་ལོ་ཡངས་པའི་འཆི་མེད་ལམ། །བགྲོད་པའི་མཁྱེན་དཔྱོད་ཟླ་ཤེལ་འཛུམ་རླབས་ཅན། །ལེགས་བཤད་ག་བུར་ཐིགས་པ་འབུམ་གཡོ་བ། །དཔལ་ལྡན་བླ་མ་སྙིང་གི་མུན་སེལ་རྒྱལ། །སྐབས་བཞི་པའི་ཚིག་དོན་ཀུན་ཚང་ཞིང། དཀའ་གནད་རྣམས་གསལ་བར་ཕྱེ་སྟེ་མདོར་བསྡུས་པ་འདི་ལྟ་བུ་ཞིག་དགོས་ཞེས་གསོལ་བ་ཡང་ཡང་བཏབ་པ་བཞིན། ༸རྗེ་བླ་མ་མཚན་བརྗོད་པར་དཀའ་བ་དཀོན་མཆོག་བསྟན་པའི་སྒྲོན་མེ་དཔལ་བཟང་པོ་ཉིད་དགུང་ལོ་ཉེར་ལྔ་བཞེས་པ་མེ་རྟའི་ལོར་ལྷ་ལྡན་མཚན་བཏགས་གནང་ནས་མདོ་སྨད་དུ་ཕེབས་ཁར་ཕེབས་རྒྱུའི་གྲ་སྒྲིག་དང། དོན་གཉེར་བ་གྲངས་མེད་པ་ལ་འདོད་ཆོས་མང་པོ་གནང་དགོས་པས་བྲེལ་བ་ཤིན་ཏུ་ཆེ་སྟབས་ཕྱག་དཔེ་ལ་གསར་དུ་གཟིགས་ལོང་མ་བྱུང་ཡང་འཕྲལ་དུ་ཐུགས་ལ་གང་བཞུགས་རྣམས་སྒོ་མང་བླ་མ་སངས་རྒྱས་རྡོ་རྗེའི་སྐུ་སྐྱེ་གྲགས་པ་རྒྱལ་མཚན་བདག་ལ་དཔལ་ལྡན་འབྲས་སྤུངས་ཆོས་སྡེ་ཆེན་པོར་འཛིན་ཆོས་སུ་བརྩེ་བས་རྗེས་སུ་གནང་བ་ཡིན་ནོ། །རྒྱལ་བསྟན་སྤྱི་

― GTD002_Page_0273 ―

^{[མ་དཔེ་གཟིགས་ན་འདིར་གནོན།]}

[Full Size]

དང་འཇམ་མགོན་བཤད་སྒྲུབ་བསྟན། །འཕེལ་རྒྱས་འགྲོ་ལ་བདེ་སྐྱིད་འབྱུང་བའི་སླད། །དགའ་བ་བརྒྱ་ལྡན་ཕོ་བྲང་གན་མཛོད་ནས། །ཆོས་སྦྱིན་འཛད་མེད་གངྒའི་རྒྱུན་འདི་སྤེལ། །སརྦ་མངྒ་ལཾ།། །།

ཀུན་གཞིའི་དཀའ་གནས་རྣམ་བཤད།

― GTD002_Page_0275 ―

^{[མ་དཔེ་གཟིགས་ན་འདིར་གནོན།]}

[Full Size]

བིཁྱཱཏཔཊུསྱཏིརྠཾནཱམམནཙསརྦབསྟུསྱདུརྶྠབིཧརཏིསྨ།
ཡིད་དང་ཀུན་གཞིའི་དཀའ་བའི་གནས་རྣམ་པར་བཤད་པ་མཁས་པའི་འཇུག་ངོགས་ཞེས་བྱ་བ་བཞུགས་སོ། །

― GTD002_Page_0276 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་མཉྫུ་གྷོ་ཥཱ་ཡ། གང་གི་ཐུགས་རྗེའི་དྲི་བཞོན་དང་འགྲོགས་ན། །བློ་གྲོས་གྲུ་གཟིངས་དད་པའི་བ་དན་ཅན། །གྲུབ་མཐའ་རྒྱ་མཚོའི་ཕ་རོལ་ཕྱིན་བྱེད་པ། །འཇམ་དབྱངས་བླ་མ་དེ་ཡིས་རིང་དུ་སྐྱོངས། །ཕན་བདེའི་འབྱུང་གནས་བཅོམ་ལྡན་ཐུགས་རྗེའི་རྒྱུན། །ཟབ་ཡངས་དྲག་ཏུ་འབབ་པའི་རྦ་ཀློང་ཆེ། །ཅིག་ཅར་རོལ་ལ་མི་ཕམ་སྙིང་སྟོབས་ཀྱི། །མཐུ་ལྡན་ཛ་ཧུའི་ཞལ་ལུང་གངྒཱ་མ། །ཐོགས་པ་མེད་པའི་རྣམ་དཔྱོད་བརྩོན་འགྲུས་ཀྱིས། །དབྱིག་འཛིན་ཁོར་ཡུག་ཁྱབ་པར་འདྲེན་པའི་གཉེན། །བློ་བཟང་གྲགས་སྙན་འབར་བའི་རྒྱལ་སྲིད་ལ། །མངའ་བསྒྱུར་འཇིགས་མེད་དབང་བོའི་ཞབས་ལ་འདུད། །སྣོད་བཅུད་འཁོར་འདས་སྣ་ཚོགས་དབང་བོའི་གཞུ། །མཐའ་ཀླས་ཀུན་བྱེད་སེམས་ཀྱི་རང་མདངས་སུ། །མཐོང་སྟེ་སྤྲོས་ཀུན་ཉེར་ཞིའི་དབྱིངས་རྟོགས་པ། །རྣམ་རིག་གཞུང་བརྒྱའི་དོན་གྱི་དེ་ཉིད་ཡིན། །དེ་ཕྱིར་བདེ་དང་

― GTD002_Page_0277 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་ཀུན་གྱི་གཞི། །རང་སེམས་ཁོ་ནར་ངེས་ནས་གསུང་རབ་ཀུན། །དེ་ཉིད་འདུལ་བའི་ཐབས་སུ་འཁྱེར་བ་ཡི། །དཔྱོད་ལྡན་དེ་ཡིས་ལུགས་འདི་བརྟེན་པར་རིགས། །དེ་ཡང་མདོ་སྡེ་ལང་ཀར་གཤེགས་པ་དང། འཇམ་དཔལ་རྩ་བའི་རྒྱུད་སོགས་དུ་མ་ནས་ལུང་བསྟན་པ་ལྟར་ཐེག་པ་ཆེན་པོའི་བསྟན་པ་འཇིག་རྟེན་གསུམ་དུ་གསལ་བར་མཛད་པའི་ཤིང་རྟ་ཆེན་པོ་གཉིས་ཀྱི་ཡ་གྱལ་རྣལ་འབྱོར་སྤྱོད་པའི་ལམ་གྱི་སྲོལ་འབྱེད་ཆེན་པོ་ས་གསུམ་བརྙེས་པ་སློབ་དཔོན་ཐོགས་མེད་ཀྱི་རྗེས་སུ་འབྲངས་ཏེ་ཆོས་ཐམས་ཅད་ནང་སེམས་ཀྱི་བདག་ཉིད་ཙམ་དུ་སྨྲ་བ་རྣམ་རིག་པའི་གྲུབ་མཐའི་རྣམ་གཞག་དཔྱིས་ཕྱིན་པ་ཤེས་པར་འདོད་པ་དག་གིས་གཏན་ལ་དབབ་བྱའི་དངོས་པོ་ནི། ལང་གཤེགས་ལས། ཆོས་ལྔ་དག་དང་རང་བཞིན་དང། །རྣམ་པར་ཤེས་པ་བརྒྱད་ཉིད་དང། །བདག་མེད་གཉིས་ཀྱི་དངོས་པོར་

― GTD002_Page_0278 ―

^{[མ་དཔེ་གཟིགས་ན་འདིར་གནོན།]}

[Full Size]

ནི། །ཐེག་པ་ཆེན་པོ་ཐམས་ཅད་འདུས། །ཞེས། མིང། རྒྱུ་མཚན། རྣམ་རྟོག །དེ་བཞིན་ཉིད། ཡང་དག་པའི་ཡེ་ཤེས་ཏེ་ཆོས་ལྔ། རང་བཞིན་ནམ་མཚན་ཉིད་གསུམ། ཀུན་གཞི་ལ་སོགས་པའི་རྣམ་ཤེས་བརྒྱད། བདག་མེད་གཉིས་རྣམས་སུ་འདུས་པར་གསུངས་ཤིང། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང། །དེ་ཡི་རྒྱུ་འབྲས་དེ་རབ་དབྱེ་བ་དང། །བསླབ་པ་གསུམ་དང་དེ་འབྲས་སྤང་བ་དང། །དེས་ན་ཐེག་པ་མཆོག་གྱུར་ཁྱད་པར་འཕགས། །ཞེས་དོན་གྱི་གཙོ་བོ་བཅུར་བསྡུས་ནས་ཀུན་གཞི་ནི་འོག་མ་ཐམས་ཅད་ཀྱི་གཞི་ལྟ་བུ་ཡིན་པས་ཤེས་བྱའི་གནས་ཞེས་དང་པོར་སྨོས་སོ། །དེས་ན་རེ་ཞིག་ཀུན་གཞིའི་རྣམ་གཞག་གཏན་ལ་འབེབས་པར་བྱེད་པ་ལ། རྣམ་ཤེས་གྲངས་མང་ཉུང་གི་འདོད་ཚུལ་སྤྱིར་བསྟན་པ། ཀུན་གཞི་དང་ཉོན་ཡིད་ཀྱི་རྣམ་གཞག་བྱེ་བྲག་ཏུ་བཤད་པ་གཉིས། དང་པོ་ལ་ཡང་སྤྱིའི་དོན་དང། མཐའ་དཔྱད་པ་གཉིས་ལས། དང་པོ་ནི། སྤྱིར་རྣམ་ཤེས་ཀྱི་གྲངས་འདོད་ཚུལ་དུ་མ་ཡོད་དེ། གྲུབ་མཐའ་ཆེན་མོ་ལས། དངོས་སྨྲ་ལ་རྣམ་པར་ཤེས་པ་གཅིག་ཏུ་འདོད་པ་དང། གཉིས་སུ་འདོད་པ། དྲུག་ཏུ་འདོད་པ། བདུན་དུ་འདོད་པ། བརྒྱད་དུ་འདོད་པ། དགུར་འདོད་པ་དང་དྲུག་ཡོད་དེ། ཞེས་གསུངས་པ་ལྟར་རྣམ་ཤེས་གཅིག་སྨྲ་བ་དང། ཆོས་ཉིད་ཀྱི་སེམས་དང་མཚུངས་ལྡན་གྱི་སེམས་གཉིས་སུ་འདོད་པ་དང། རྣམ་ཤེས་

― GTD002_Page_0279 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་དྲུག་ཏུ་སྨྲ་བ་དང། འཇུག་ཤེས་དྲུག་ཉོན་ཡིད་དེ་བདུན་དུ་འདོད་པ་དང། སྐབས་འདིར་རྣམ་ཤེས་ཚོགས་བརྒྱད་དུ་འདོད་ལ། སློབ་དཔོན་ཡང་དག་བདེན་པས་དགུར་ཡང་བཤད་པའི་ཕྱིར། དང་པོ་ལ་ཡང་གྲུབ་མཐའ་ཆེན་མོ་ལས། རྣམ་ཤེས་གཅིག་འདོད་མཁན་ལ་ཀུན་གཞི་ལ་འདོད་པ་དང། ཡིད་ཀྱི་རྣམ་ཤེས་ལ་འདོད་པ་གཉིས། ཞེས་ནང་གསེས་ཀྱི་ལུགས་མི་འདྲ་བ་གཉིས་ཡོད་པར་བཤད་ཅིང། རྩ་བར་འདོད་མཁན་གཅིག་སྨྲ་བའི་བྱང་སེམས་ཀྱིས་འདོད་ཚུལ་ནི་ཀུན་གཞི་རྩ་བར། ཡིད་ཤེས་གཅིག་ཉིད་དབང་དྲུག་གི །རྟེན་ལ་སོ་སོར་རྒྱུ་བའི་ཚེ། །སོ་སོའི་མིང་དུ་བཏགས་པ་ཙམ། །ཞེས་གསུངས་པ་ལྟར་ཏེ། དེ་ཡང་བྲམ་ཟེའི་ཚོམས་ལས། གང་ཞིག་ལུས་མེད་ཕུག་གནས་ཤིང། །རིང་དུ་འགྲོ་ལ་གཅིག་པུར་རྒྱུ། །ཞེས་སྤྲེའུ་གཅིག་གིས་ཁང་པའི་བུ་ག་སོ་སོ་ནས་བལྟ་བའི་དཔེས་གསུངས་པ་དང། སྐྱེ་མཆེད་བཅུ་གཉིས་སྟོན་པའི་མདོ་ལས། རྣམ་པར་ཤེས་པའི་ཚོགས་དྲུག་ནི་ཡིད་ཀྱི་སྐྱེ་མཆེད་དོ། །ཞེས་ནང་དུ་མར་མེ་གཅིག་སྦར་བའི་འོད་བུ་ག་སོ་སོ་ནས་འབྱུང་བ་དཔེར་བྱས་ཏེ་གསུངས་པ་རྣམས་ལ་བརྟེན་ནས་ཡིད་ཀྱི་གནས་སྐབས་སོ་སོ་ལ་བཏགས་པ་ཙམ་མ་ཡིན་པའི་དབང་ཤེས་དང་སེམས་བྱུང་ལོགས་པ་མེད་པར་འདོད་དོ། །གཉིས་པའི་འདོད་ཚུལ་ནི། ཝེན་ཚེག་གི་དགོངས་འགྲེལ་འགྲེལ་ཆེན་ལས། སློབ་དཔོན་བོ་དེ་

― GTD002_Page_0280 ―

^{[མ་དཔེ་གཟིགས་ན་འདིར་གནོན།]}

[Full Size]

ལེའུ་ཅིས་བསྟན་བཅོས་རྣམ་པར་རིག་པ་ཙམ་དུ་གྲུབ་པ་ལ་བརྟེན་ནས། སེམས་རྣམ་པ་གཉིས་རྣམ་པར་འཇོག་གོ །དེ་ལ་དང་པོ་ནི་ཆོས་ཉིད་ཀྱི་སེམས་ཏེ། དེ་ཡང་དེ་བཞིན་ཉིད་ཀྱི་ངོ་བོ་ཉིད་དོ། །དེ་བཞིན་ཉིད་ཀྱི་ངོ་བོ་ཉིད་འདི་ཉིད་ལ་སེམས་ཞེས་བྱ་ཡང་དམིགས་པ་ཅན་ནི་མ་ཡིན་ནོ། །གཉིས་པ་ནི། མཚུངས་པར་ལྡན་པའི་སེམས་ཏེ། དད་པ་དང། འདོད་ཆགས་ལ་སོགས་པའི་སེམས་ལས་བྱུང་བ་རྣམས་དང་མཚུངས་པར་ལྡན་པའོ། །ཞེས་བཤད་དོ། །ཞེས་གསུངས། དགུར་འདོད་ཚུལ་ཡང། དེ་ཉིད་ལས། སློབ་དཔོན་ཡང་དག་བདེན་པས་རྣམ་པར་ངེས་པའི་མཛོད་ཅེས་བྱ་བའི་བསྟན་བཅོས་ལ་བརྟེན་ནས་རྣམ་པར་ཤེས་པ་དགུའི་དོན་འཇུག་སྟེ། ཞེས་དང། བདུན་པ་ནི་ལེན་པའི་རྣམ་པར་ཤེས་པ་སྟེ། བརྒྱད་པ་ལ་བདག་དང་བདག་གིར་འཛིན་པ་ཉོན་མོངས་པ་ཁོ་ནའི་སྒྲིབ་པ་དང་ལྡན་གྱི་ཆོས་ཀྱི་འཛིན་པ་ནི་མེད་དེ་ངེས་པར་སངས་རྒྱས་སུ་མི་འགྲུབ་བོ། །བརྒྱད་པ་ནི་ཀུན་གཞིའི་རྣམ་པར་ཤེས་པ་སྟེ་འདི་ཡང་རྣམ་པ་གསུམ་མོ། །དང་པོ་ངོ་བོ་ཉིད་ཀྱི་ཀུན་གཞི་ནི་སངས་རྒྱས་འགྲུབ་པའི་དོན་དང་ལྡན་པའོ། །གཉིས་པ་རྣམ་པར་སྨིན་པའི་ཀུན་གཞི་ནི་ཁམས་བཅོ་བརྒྱད་པོ་དག་ལ་དམིགས་པ་སྟེ། ཞེས་དང། གསུམ་པ་ཀུན་ནས་ཉོན་མོངས་པའི་ཀུན་གཞི་ནི། དེ་བཞིན་ཉིད་ཀྱི་ཡུལ་ལ་དམིགས་ནས་ང་རྒྱལ་རྣམ་པ་བཞི་འབྱུང་སྟེ་དེ་ནི་ཆོས་འཛིན་པ་ཡིན་གྱི་གང་ཟག་འཛིན་པ་མ་ཡིན་ནོ། །དགུ་པ་ནི་དྲི་མ་མེད་པའི་རྣམ་པར་ཤེས་པ་སྟེ། དེ་བཞིན་ཉིད་ཀྱི་བདག་ཉིད་དོ། །ཞེས་སོགས་ཀྱི་དོན་རྩ་བར། བརྒྱད་པ་ལེན་པའི་རྣམ་ཤེས་དང། །ཀུན་གཞི་གསུམ་དུ་འཆད་པ་དང། །དགུ་པ་དྲི་མེད་རྣམ་ཤེས་སུ། །འདོད་པ་ཡང་དག་བདེན་པའི་ལུགས། །ཞེས་

― GTD002_Page_0281 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལྟར་རོ། །ཚོགས་བརྒྱད་ཀྱི་འདོད་ཚུལ་འོག་ཏུ་འབྱུང་ཞིང་ལྷག་མ་གོ་སླ་བས་མ་བྲིས། མཐའ་དཔྱད་པ་ལ། ཁ་ཅིག་ན་རེ། རྣམ་ཤེས་ཚོགས་དྲུག་འདོད་པའི་གྲུབ་མཐའ་གོང་འོག་དུ་མ་ཡོད་ཀྱང་བརྒྱད་དང་དགུ་དང་གཅིག་ཏུ་འདོད་མཁན་གསུམ་སེམས་ཙམ་པ་ཁོ་ན་ཡིན་ཟེར་ན་མི་འཐད་པར་ཐལ། གཅིག་སྨྲ་བའི་བྱང་སེམས་དེ་ཉན་ཐོས་སྡེ་པ་ཡིན་པའི་ཕྱིར། དེར་ཐལ། དེ་དབུ་མ་པ་མ་ཡིན་པ་གང་ཞིག །སེམས་ཙམ་པ་ཡང་མ་ཡིན་པའི་ཕྱིར། དང་པོ་གྲུབ་སྟེ། གྲུབ་མཐའ་ལས། དངོས་སྨྲ་བ་ལ་རྣམ་ཤེས་གཅིག་ཏུ་འདོད་པ་དང། ཞེས་གསུངས་ཤིང། འོག་ཏུ་འདི་དེའི་མཚན་གཞིར་བཤད་པའི་ཕྱིར། གཉིས་པ་གྲུབ་སྟེ། འདི་ཐེག་བསྡུས་སོགས་ཀྱི་སྔོན་ནས་བྱུང་བའི་ཕྱིར་ཏེ། ཐེག་བསྡུས་ལས། ཁ་ཅིག་ནི། ཡིད་ཀྱི་རྣམ་པར་ཤེས་པ་དེ་ཉིད་རྟེན་དེ་དང་དེ་ནས་འབྱུང་བ་ན་དེ་དང་དེའི་མིང་འཐོབ་སྟེ། སེམས་པ་ལ་ལུས་དང་ངག་གི་ལས་ཞེས་བྱ་བ་བཞིན་ནོ་སྙམ་མོ། །ཞེས་སེམས་པ་ལུས་ཀྱི་སྒོ་ནས་འཇུག་པ་ལ་ལུས་ལས་དང། ངག་གི་སྒོ་ནས་ཞུགས་ན་ངག་ལས་ཀྱི་མིང་འཐོབ་པ་དཔེར་བྱས་ཏེ་འདོད་ཚུལ་དང་ཤེས་བྱེད་ཀྱི་ཁུངས་སོགས་རྒྱས་པར་བཀོད་པའི་ཕྱིར། སྤྱིར་གཅིག་སྨྲ་བ་ལ་གཉིས་བཤད་ཀྱང་འདི་ཀུན་གཞི་མི་འདོད་མཁན་ཞིག་ཡིན་ཏེ། འདིའི་འདོད་ཚུལ་སྨོས་པའི་ཐད་ཀྱི་བཤད་སྦྱར་ལས། དེ་ལ་ཡིད་ཀྱི་རྣམ་པར་ཤེས་པ་མ་ཡིན་པ། རྣམ་པར་ཤེས་པ་གཞན་ཀུན་གཞིའི་རྣམ་པར་ཤེས་པ་ཞེས་བྱ་བ་དེ་ལྟ་བུ་ནི་མེད་དོ། །ཞེས་གསུངས་པའི་ཕྱིར། འོན་ཀྱང་ཐེག་བསྡུས་ལས་དངོས་སུ་དགག་པ་མི་མཛད་པའི་རྒྱུ་མཚན་ཡོད་དེ། ཚོགས་བརྒྱད་ཀྱི་སྒྲུབ་

― GTD002_Page_0282 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་གསུངས་པ་རྣམས་དོན་གྱིས་འདིའི་དགག་པར་འགྲོ་བ་དང། གཏན་ལ་དབབ་པ་བསྡུ་བ་ལས། སེམས་ལས་བྱུང་བའི་ཆོས་ནི་མི་འདོད་པ་གང་དག་ཡོད་པ་དེ་དག་ཀྱང་མི་འཐད་དོ། །དེ་ཅིའི་ཕྱིར་ཞེ་ན། ལྔ་ཉིད་འཐད་པ་མེད་ཕྱིར་དང། །དེ་ཡི་གནས་སྐབས་སྐྱོན་ཕྱིར་དང། །བྱེད་རྒྱུ་བྱེ་བྲག་མེད་ཕྱིར་དང། །ལུང་དང་འགལ་བར་འགྱུར་ཕྱིར་རོ། །ཞེས་གསུངས་པ་དེ་ཕྱོགས་སྔ་གཉིས་ཀར་ཐུན་མོང་གི་དགག་པར་འགྲོ་བའི་རྒྱུ་མཚན་གྱིས་ཡིན་པའི་ཕྱིར། དེས་འགོག་ཚུལ་ཡང་ཡོད་དེ། སེམས་བྱུང་མེད་ན་ཚོར་སོགས་ཕུང་པོ་ལྔ་མི་འཐད་པར་འགྱུར་ལ། དེའི་གནས་སྐབས་སོ་སོ་ལ་བཏགས་ཞེས་པ་ཡང་བཏགས་པ་ཙམ་ལས་སེམས་བྱུང་དང་དབང་ཤེས་དངོས་ཀྱི་དོན་མི་ནུས་ན་སྔ་མའི་སྐྱོན་སོ་ན་གནས་པ་དང། དེའི་དོན་བྱེད་ནུས་ན་ཚོར་སོགས་དང་དབང་ཤེས་སོགས་རྫས་སུ་གྲུབ་པས་སེམས་གཅིག་པུར་སྨྲ་བ་དོན་མེད་པར་འགྱུར་ཞིང། སེམས་གཅིག་པུར་འདོད་ན། ལུང་ལས། སེམས་འདོད་ཆགས་དང་བཅས་པ་ཞེས་གསུངས་པ་སོགས་དུ་མ་དང་འགལ་བའི་སྐྱོན་འབྱུང་བ་སོགས་ཀྱི་སྒོ་ནས་བཀག་པའི་ཕྱིར། ཡང་ཁོ་ན་རེ། འདིའི་གཅིག་སྨྲ་བ་དེ་ཐེག་ཆེན་གྱི་གྲུབ་མཐའ་སྨྲ་བ་ཞིག་ཡིན་པར་ཐལ། ཀུན་གཞི་དཀའ་འགྲེལ་ལས། ཐེག་པ་ཆེན་པོའི་སློབ་དཔོན་རྣམས་རྣམ་ཤེས་གྲངས་མང་ཉུང་དུ་འདོད་པ་རྒྱའི་སློབ་དཔོན་ཝེན་ཚེག་གིས་བཤད་པ་ལྟར་བཀོད་དོ། །ཞེས་གསུངས་པའི་གྲངས་ཉུང་བར་འདོད་མཁན་གཅིག་སྨྲ་བ་ལ་བྱེད་པའི་ཕྱིར་ཟེར་ན། མི་འཐད་པར་ཐལ། དྲུག་དང། གཉིས་དང། དགུར་འདོད་ཚུལ་རྣམས་ལ་རྒྱ་ནག་འགྲེལ་ཆེན་གྱི་བཤད་པ་བཀོད་ཀྱང་གཅིག་སྨྲའི་སྐབས་སུ་དེའི་ཟུར་

― GTD002_Page_0283 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་ཡང་མ་བཤད་པའི་ཕྱིར། ཡང་ཁ་ཅིག །རྣམ་ཤེས་གཅིག་སྨྲ་བ་དེ་ཉན་ཐོས་སྡེ་བ་ཁོ་ན་ཟེར་ན་ཡང་ཤིན་ཏུ་མི་འཐད་པར་ཐལ། དེ་ལ་ཀུན་གཞི་གཅིག་པུར་སྨྲ་བ་ཞིག་ཡོད་པ་གང་ཞིག །ཀུན་གཞི་འདོད་པའི་ཉན་ཐོས་སྡེ་བ་མེད་པའི་ཕྱིར། དང་པོ་བསྒྲུབས་ཟིན། གཉིས་པ་མ་གྲུབ་ན། དེ་ཆོས་ཅན། སྣོད་བཅུད་མཐའ་དག་ཀུན་གཞིའི་སྟེང་གི་བག་ཆགས་སྨིན་པ་ལས་འབྱུང་བར་འདོད་པར་ཐལ། ཀུན་གཞི་ཁས་ལེན་པའི་རྒྱུ་མཚན་ཡོད་པའི་ཕྱིར། ཁྱབ་སྟེ། ལེགས་བཤད་སྙིང་པོ་ལས། ཕྱི་རོལ་ཁས་ལེན་པའི་གནད་ཀྱིས་ཀྱང་ཀུན་གཞི་མི་འཇོག་པ་ཡིན་ཏེ། དེ་ཁས་ལེན་ན་དབུས་མཐའ་ལས། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེ་འོ་དེ་དོན་མེད། །དེ་མེད་པས་ན་དེ་ཡང་མེད། །ཅེས་གསུངས་པ་ལྟར་འདོད་དགོས་པའི་ཕྱིར་རོ། །ཞེས་གསུངས་པའི་ཕྱིར་རོ། །གོང་དུ་འདོད་ན། ཆོས་ཐམས་ཅད་ནང་སེམས་ཀྱི་བདག་ཉིད་ཙམ་དུ་ཁས་ལེན་པར་ཐལ། འདོད་པའི་ཕྱིར། འདོད་ན། ཉན་ཐོས་སྡེ་བ་མ་ཡིན་པར་ཐལ། ཕྱི་དོན་མི་འདོད་པའི་ཕྱིར། ཁྱབ་སྟེ། ཕྱི་དོན་མི་འདོད་པའི་དོན་སྨྲ་བ་བཞད་གད་ཡིན་པའི་ཕྱིར་དང། ཕྱི་དོན་བདེན་ཞེན་གྱིས་ཁས་ལེན་པའི་ནང་པའི་གྲུབ་མཐའ་སྨྲ་བའི་གང་ཟག་དེ། ཉན་ཐོས་སྡེ་པའི་མཚན་ཉིད་ཡིན་པའི་ཕྱིར། ཡང་ཁ་ཅིག་ན་རེ། དབུ་མ་པ་ལ་རྣམ་ཤེས་ཚོགས་དྲུག་ལས་ལྷག་འདོད་པ་མེད་ཟེར་ན། དེ་མི་རུང་བར་ཐལ། སྐབས་འདིར་དབུ་མ་པ་ཡིན་ན་སེམས་ཙམ་པ་ཡིན་དགོས་པའི་ཕྱིར། ངོ་བོ་ཉིད་མེད་པར་སྨྲ་བ་ལ་བསམ་ན་ཡང་མི་འཐད་པར་ཐལ། ཐུབ་དགོངས་རྩོམ་དུས་ཀྱི་སློབ་

― GTD002_Page_0284 ―

^{[མ་དཔེ་གཟིགས་ན་འདིར་གནོན།]}

[Full Size]

དཔོན་ཨ་བྷྱཱ་ཀ་ར་སོགས་ཀྱིས་རྣམ་ཤེས་ཚོགས་བརྒྱད་དུ་འདོད་པའི་ཕྱིར། ཐུབ་དགོངས་ན་གསལ། འོན་ཀྱང་སྐུ་ཚེའི་སྨད་ལ་ཀུན་གཞི་མི་བཞེད་པས། རྣམ་བཤད་དགོངས་པ་རབ་གསལ་ལས། ཞི་འཚོ་ཡང་ཀུན་གཞིའི་རྣམ་ཤེས་མི་བཞེད་པར་གསལ་ལ། ཨ་བྷྱཱ་ཀ་ར་ཡང་དེ་དང་འདྲའོ། །ཞེས་གསུངས་ཤིང། སྔགས་རིམ་ལས་དེས་ཀུན་གཞི་འདོད་པར་གསུངས་པ་སྐུ་ཚེ་སྟོད་ཀྱི་དབང་དུ་བྱས་པ་ཡིན་ཏེ། རིམ་ལྔ་གསལ་སྒྲོན་ལས། རྩོམ་པ་ཡང་སྔ་ཕྱིའི་དབང་གིས་འགལ་བར་བཤད། ཅེས་གསུངས་པའི་ཕྱིར། དེ་ལ་ཁོ་ན་རེ། ངོ་བོ་ཉིད་མེད་པར་སྨྲ་བ་ཕལ་ཆེར་ཀྱང་ཀུན་གཞི་བཞེད་པར་ཐལ། ཀླུ་སྒྲུབ་དང་འཕགས་སེང་སོགས་ཀྱིས་བཞེད་པ་གང་ཞིག །ཟླ་བས་བཞེད་པའི་ཕྱིར། དང་པོ་གྲུབ་སྟེ། ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས། ཇི་ལྟར་རྒྱ་མཚོ་ལ་ནི་ཤིང། །སེམས་ནི་མེད་ཀྱང་གཡོ་བར་འགྱུར། །དེ་བཞིན་ཀུན་གཞིའི་རྣམ་ཤེས་ནི། །ལུས་ལ་བརྟེན་ནས་གཡོ་བ་ཡིན། །ཞེས་དང། ཉི་སྣང་ལས། ཀུན་གཞིའི་རྣམ་པར་ཤེས་པ་ལ་སོགས་པ་ཤེས་བྱ་རྣམ་པ་བཅུས་བསྡུས་པས། ཞེས་དང། སློབ་དཔོན་གྱི་སྡུད་འགྲེལ་ལས། ཀུན་གཞིའི་རྣམ་པར་ཤེས་པ་ལ་ཆོས་ཐམས་ཅད་ཀྱི་བག་ཆགས་བརྟེན་པས། ཞེས་གསུངས་པའི་ཕྱིར། གཉིས་པ་གྲུབ་སྟེ། འཇུག་པ་ལས། ཀུན་གཞི་ཡོད་ཅིང་གང་ཟག་ཉིད་ཡོད་ལ། །ཕུང་པོ་འདི་དག་འབའ་ཞིག་ཉིད་ཡོད་ཅེས། །བསྟན་པ་འདི་ནི་དེ་ལྟར་ཆེས་ཟབ་དོན། །རིག་པར་མི་འགྱུར་གང་ཡིན་དེ་ལ་འོ། །ཞེས་གསུངས་པའི་ཕྱིར། ཁྱབ་སྟེ། དེས་ཀུན་གཞི་དང་གང་ཟག་དང་ཕུང་པོ་སོགས་ལ་ཁྱད་མེད་དུ་བཀག་པའི་ཡོད་པ་ཙམ་ལ་བྱེད་ན། གང་ཟག་དང་ཕུང་པོ་

― GTD002_Page_0285 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཡོད་པར་གསུངས་པ་སྒྲ་ཇི་བཞིན་པ་མ་ཡིན་པས། དེ་གཉིས་ཀྱང་མེད་པར་འདོད་དགོས་ལ། རང་བཞིན་གྱིས་ཡོད་པ་ལ་བྱེད་ན་ཀུན་གཞི་རང་བཞིན་གྱིས་ཡོད་པ་བཀག་པས་ཀུན་གཞི་མི་ཁེགས་པར་མ་ཟད་ཐ་སྙད་དུ་ཡོད་པ་དོན་གྱིས་གོ་བའི་ཕྱིར། ཞེས་ཟེར་བ་རྣམས་རིམ་པ་བཞིན་འགོག་པར་བྱེད་ན། དང་པོ་བྱང་ཆུབ་སེམས་འགྲེལ་གྱི་ལུང་དེས་ཀུན་གཞི་བཤད་པ་མ་ཡིན་པར་ཐལ། དེར་ཀུན་གཞིའི་མིང་གིས་བསྟན་པ་དེ་ཡིད་ཀྱི་རྣམ་ཤེས་ལ་བྱེད་པའི་ཕྱིར། དེར་ཐལ། དེ་ཉིད་ལས། དེའི་ཚེ་སྲིད་པ་འཛིན་པར་བྱེད་ཅེས་ཉིང་མཚམས་སྦྱོར་བའི་སེམས་སུ་བཤད་པ་གང་ཞིག །འཕགས་པ་ཡབ་སྲས་ཀྱིས་འདུས་པའི་སྐོར་གྱི་གཞུང་གཞན་ལས་འཆི་སེམས་དང་སྐྱེ་སེམས་གཉིས་ཀ་ཡིད་ཤེས་སུ་ཡང་ཡང་གསུངས་པའི་ཕྱིར། དེ་དང་བཤད་ཚུལ་མཐུན་མི་དགོས་སྙམ་ན་ཡང་མི་འཐད་པར་ཐལ། འདིས་འདུས་པའི་རྩ་རྒྱུད་ལེའུ་གཉིས་པའི་ནང་གི་རྣམ་སྣང་གིས་གསུངས་པའི་བྱང་ཆུབ་ཀྱི་སེམས་ཀྱི་ཚིགས་བཅད་དེའི་དོན་འགྲེལ་པས་མཚན་ཡང་བྱང་ཆུབ་སེམས་འགྲེལ་ཞེས་བཏགས་ཤིང་འདུས་པའི་ཡན་ལག་གི་གཞུང་ཡིན་པའི་ཕྱིར། གཞན་ཡང་བྱང་ཆུབ་སེམས་འགྲེལ་གྱིས་ཀུན་གཞི་གསུངས་པ་མི་འཐད་པར་ཐལ། དེར་ཕྱི་དོན་ཡོད་པར་བཤད་པའི་ཕྱིར་ཏེ། དེ་ཉིད་ལས། ཤེས་པས་ཤེས་བྱ་རྟོགས་པ་སྟེ། །ཤེས་བྱ་མེད་པར་ཤེས་པ་མེད། །ཅེས་སོགས་ཀྱི་དོན་སེམས་ཡོད་མེད་མཚུངས་པར་གསུངས་ཚུལ། འཇུག་པ་ལས། གཟུགས་མེད་ན་ནི་སེམས་ཡོད་མ་འཛིན་ཞིག །སེམས་ཡོད་ཉིད་ནའང་གཟུགས་

― GTD002_Page_0286 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་མ་འཛིན་ཞིག །ཅེས་པ་ཇི་ལྟ་བ་བཞིན་སྣང་བའི་ཕྱིར། སྟོང་ཐུན་ལས་སོ། །འཕགས་སེང་གཉིས་ཀས་ཀྱང་ཀུན་གཞི་མི་བཞེད་པར་ཐལ། དེ་བཞེད་ན་གང་ཟག་གི་མཚན་གཞིར་འཇོག་དགོས་པ་ལ་མ་བཞག་པའི་ཕྱིར། དེར་ཐལ། རྒྱན་སྣང་ལས། རྒྱུན་ཉིད་ཀྱིས་ན་གང་ཟག་ཅེས་བྱ་བ་ནི་གཅིག་གོ །ཞེས་དང། དབུ་མ་ལུང་རིགས་སྒྲོན་མེ་ལས། འཕགས་སེང་གཉིས་ཀྱིས་ཡིད་ཀྱི་རྣམ་པར་ཤེས་པའི་ཕུང་པོའི་རྒྱུན་བདག་གི་མཚན་གཞིར་བཞེད་དེ། ཞེས་གསུངས་པའི་ཕྱིར་དང། རྣམ་བཤད་སྙིང་པོ་རྒྱན་ལས་ཀྱང། སློབ་དཔོན་གྱི་འགྲེལ་ཆེན་དུ། ཞེས་པ་ནས། ཚོགས་དྲུག་ལས་ངོ་བོ་ཐ་དད་པའི་ཀུན་གཞིའི་བཤད་པ་ཟུར་ཙམ་ཡང་མེད་པའི། ཞེས་གསུངས་པའི་ཕྱིར། དེས་ན་ཀུན་གཞིའི་ཐ་སྙད་བཏགས་ཚད་ཀུན་གཞི་དངོས་ལ་བྱེད་མི་དགོས་ཏེ། མཁས་གྲུབ་རྗེའི་བརྟག་གཉིས་རྣམ་བཤད་ལས། ཀུན་གཞི་དང་ཉོན་ཡིད་ཀྱི་ཐ་སྙད་རྒྱུད་དང་གྲུབ་ཆེན་གྱི་གཞུང་དུ་མ་ལས་གསུངས་པ་ཡོད་ཀྱང་ཆོས་ཉིད་ལ་ཀུན་གཞི་དང། རླུང་ལ་ཉོན་ཡིད་ཀྱི་ཐ་སྙད་མཛད་པ་སོགས་དུ་མ་ཡོད་པས་ཚིག་ཙམ་གྱིས་འཁྲུལ་པར་མི་བྱའོ། །ཞེས་གསུངས་པའི་ཕྱིར། འཇུག་པའི་ལུང་དོན་ཡང་ཁྱོད་ལྟར་བཤད་མི་དགོས་པར་ཐལ། ཀུན་གཞི་འདོད་མི་འདོད་ཀྱི་གྲུབ་མཐའ་དུ་མ་ཡོད་ཅིང་འདི་ཡང་དེ་ལ་རྩོད་པའི་སྐབས་ཡིན་པས་དེ་གསུངས་པ་སྒྲ་ཇི་བཞིན་པ་མ་ཡིན་པར་བཤད་པ་ན་ཀུན་གཞི་གཏན་མེད་དུ་གོ་ལ། གང་ཟག་དང་ཕུང་པོ་མི་འདོད་པའི་གྲུབ་མཐའ་སྨྲ་བ་སུ་ཡང་མེད་པས་དེའི་སྒྲ་ཇི་བཞིན་པ་བཀག་ཀྱང་གཏན་མེད་ཀྱི་དོགས་པ་མེད་པས་རང་བཞིན་གྱིས་མེད་པར་གོ་བའི་ཕྱིར་དང། དགོངས་

― GTD002_Page_0287 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་ཡང་ཕུང་སོགས་ཐ་སྙད་ཙམ་དུ་ཡོད་པ་ལ་བཀྲལ་ཞིང་ཀུན་གཞི་ལ་དེ་ལྟར་མ་བྱས་པར། འཇུག་འགྲེལ་ལས། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར་སྟོང་ཉིད་ཁོ་ན་ཀུན་གཞིའི་རྣམ་པར་ཤེས་པའི་སྒྲས་བསྟན་པར་རིག་པར་བྱའོ། །ཞེས་དོན་གཞན་ཞིག་གི་སྟེང་ནས་གསུངས་པའི་ཕྱིར། ཁྱོད་ལྟར་ན་དཔལ་ལྡན་ཟླ་བས་ལས་འབྲས་རང་བཞིན་གྱིས་གྲུབ་པར་བཞེད་པར་ཐལ། དེ་ཕྱིར་ཀུན་གཞི་མེད་ཀྱང་འདི་ནུས་ཕྱིར། །ཞེས་པའི་དོན་སྤྱིར་ཀུན་གཞི་མེད་ཀྱང་ཞེས་བཤད་མི་རུང་བས་དོན་དམ་པར་ཀུན་གཞི་མེད་ཀྱང་ལས་འབྲས་ཡོད་ཅེས་བཤད་དགོས་པའི་ཕྱིར། ཁྱབ་པ་འགྲིག །འཁོར་གསུམ། དེས་ན་ཐལ་འགྱུར་བས་ཀུན་གཞི་མི་བཞེད་པར་ཐལ། དེས་ཕྱི་དོན་བཞེད་པའི་ཕྱིར། ཁྱབ་སྟེ། ལེགས་བཤད་སྙིང་པོ་ལས། ཀུན་གཞི་འཇོག་པ་ན་ཕྱི་རོལ་དོན་གྱིས་སྟོང་པར་བསྟན་དགོས། ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། དོན་ཤེས་ཡོད་མེད་མཚུངས་པར་བཤད་ཚུལ་སྔར་དྲངས་པ་དང། ཇི་ལྟར་དེར་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པ་སྐྱེ་འགྱུར་ལྟར། །ཞེས་པས་ཀྱང་འགྲུབ་པའི་ཕྱིར། དེར་ཐལ། དེས་གཟུགས་དང་གཟུགས་འཛིན་མིག་ཤེས་གཉིས་རྒྱུ་འབྲས་སུ་བཤད་པའི་ཕྱིར། ཁྱབ་སྟེ། རྒྱུ་འབྲས་ཡིན་ན་རྫས་གཅིག་མ་ཡིན་དགོས་པའི་ཕྱིར། དེས་ན་ཁ་ཅིག་ཐལ་འགྱུར་བའི་ལུགས་ལ་ཡང་ཕྱི་དོན་མེད་པར་སྨྲ་བ་ནི་ཉམས་མྱོང་ལ་བསྐོར་བའི་མན་ངག་ཟབ་མོར་རློམ་པ་མི་འཐད་པར་ཐལ། དེའི་འཁྲུལ་གཞི་ནི་དོན་སྣང་ཙམ་གྱི་སྒོ་ནས་

― GTD002_Page_0288 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་དོན་འཇོག་མ་ཤེས་པར་དེ་ཡོད་ན་ཚུགས་ཐུབ་ཏུ་གྲུབ་པའི་ཕྱི་དོན་ཉན་ཐོས་སྡེ་བས་སྒྲོ་བཏགས་པ་དེ་འདྲ་ཞིག་ཡོད་དགོས་སྙམ་པར་འདུག་པའི་ཕྱིར། དེས་ན་སྟོང་ཐུན་སྐལ་བཟང་མིག་འབྱེད་ལས། མདོ་སྡེ་པ་དང་ཐལ་འགྱུར་བ་གཉིས་ཀ་ཕྱི་དོན་ཁས་ལེན་ཞེས་པ་ཙམ་ཞིག་མཚུངས་ཀྱང་ལེན་ཚུལ་གཏན་མི་འདྲ་བ་ཡིན་ནོ། །ཞེས་པ་འདི་གོ་ན་མན་ངག་ཟབ་ངེས་ཡིན་ནོ། །ཡང་ཁ་ཅིག་ན་རེ། ཟླ་གྲགས་དང་ལེགས་ལྡན་གཉིས་ཀུན་གཞི་ཡོད་པར་སྟོན་པའི་མདོའི་དགོངས་གཞི་འདྲེན་ཚུལ་མཐུན་ཟེར་ན། མི་འཐད་པར་ཐལ། ལེགས་ལྡན་གྱིས་དེ་འདྲའི་མདོ་དེ་དྲང་དོན་གྱི་མདོར་མི་བཞེད་པའི་ཕྱིར། དེར་ཐལ། ལེགས་ལྡན་གྱིས་དེ་འདྲའི་མདོ་གཏན་ནས་མེད་པར་བཞེད་པའི་ཕྱིར། དེར་ཐལ། དབུ་མ་ལུང་རིགས་སྒྲོན་མེ་ལས། ཟླ་བས་མདོ་དེས་དེ་ལྟར་བསྟན་ཀྱང་དགོངས་གཞི་སྟོང་ཉིད་ལ་དགོངས་པར་བཤད། ལེགས་ལྡན་གྱིས། ཞེས་པ་ནས། མདོ་དེ་དག་ཀུན་གཞི་སྟོན་བྱེད་མ་ཡིན་པར་རྣམ་ཤེས་གཅིག་གི་གནས་སྐབས་ལ་འཁོར་འདས་ཀྱི་གཞི་བྱེད་པ་ལ་དགོངས་པར་བཤད། ཅེས་གསུངས་པའི་ཕྱིར། ཁྱབ་སྟེ། དེའི་རྒྱུ་མཚན་ཕྱི་དོན་མེད་པར་སྟོན་པའི་མདོ་ཡང་མེད་པར་བཞེད། གཞན་དབང་ཡོངས་གྲུབ་བདེན་གྲུབ་དང། ཀུན་བཏགས་ཀྱི་ཆོས་རྣམས་བདེན་མེད་དུ་སྟོན་པའི་མདོ་ཡང་མེད་པར་བཞེད་པས། སེམས་ཙམ་པའི་གྲུབ་མཐའ་ཐུན་མོང་མ་ཡིན་པ་ཐམས་ཅད་མདོའི་དོན་ཕལ་བ་ཙམ་ཡང་མ་ཡིན་ཞིང། ཐོགས་མེད་ཀྱི་རང་བཟོར་འདོད་པའི་ཕྱིར། དང་པོ་གྲུབ་སྟེ། ས་བཅུ་བ་ལས། ཁམས་གསུམ་པོ་འདི་ནི་སེམས་ཙམ་མོ། །ཞེས་པ་

― GTD002_Page_0289 ―

^{[མ་དཔེ་གཟིགས་ན་འདིར་གནོན།]}

[Full Size]

འདིས་ཕྱི་དོན་བཀག་པ་མ་ཡིན་པར་ཟླ་བས་ཀྱང་བཞེད་ལ། ལེགས་ལྡན་གྱིས་ལང་གཤེགས་ལས། ཕྱི་རོལ་སྣང་བ་ཡོད་མིན་ཏེ། །ཞེས་སོགས་ཀྱིས་ཀྱང་ཕྱི་དོན་བཀག་པ་མིན་པར་བཞེད་པའི་ཕྱིར། ལེགས་བཤད་སྙིང་པོ་ལས། ཕྱི་རོལ་སྣང་བ་ཡོད་མིན་ཏེ། །ལུས་དང་ལོངས་སྤྱོད་གནས་འདྲ་བར། །སེམས་ནི་སྣ་ཚོགས་སྣང་བས་ན། །སེམས་ཙམ་དུ་ནི་ང་སྨྲ་འོ། །ཞེས་གསུངས་པས་ཀྱང་ཕྱི་རོལ་བཀག་པ་མིན་པར་བཞེད་པས་ཕྱི་རོལ་བཀག་པ་དེ་མདོ་གང་གིའང་དོན་མིན་པར་བཞེད་དམ་དཔྱད་པར་བྱའོ། །ཞེས་དང། སྟོང་ཐུན་ལས། ལེགས་ལྡན་གྱིས་ལན་འདེབས་པའི་ཚུལ་ནི། མདོ་དེས་ཕྱི་རོལ་བཀག་ནས་སེམས་ཙམ་བསྟན་པ་མ་ཡིན་གྱི། ཞེས་པ་ནས། དཔལ་ལྡན་ཟླ་བ་མདོ་དེས་སེམས་ཙམ་མ་བསྟན་ཞེས་མི་འཆད་ཀྱི་སེམས་ཙམ་གསུངས་པ་དྲང་དོན་ཡིན་པར་འགྲེལ་ཏེ། ཞེས་གསུངས་པའི་ཕྱིར། གཉིས་པ་གྲུབ་སྟེ། ལེགས་བཤད་སྙིང་པོ་ལས། དགོངས་འགྲེལ་ལས་མཚན་ཉིད་གསུམ་གསུངས་པའི་དོན་རྣལ་འབྱོར་སྤྱོད་པ་བ་དག་གིས་ཇི་ལྟར་བཀྲལ་བ་མདོའི་དོན་མ་ཡིན་པར་དབུ་མའི་དོན་དུ་འགྲེལ་པའི་སྲོལ་འདི་ནི་ལེགས་ལྡན་འབྱེད་ཀྱིས་ཕྱེ་བ་ཞེས་དང། གྲུབ་མཐའ་རྩ་བར། བྱེད་པོ་འགོག་ཕྱིར་གཟུང་མེད་མདོ་དོན་མིན། །ཞེས་གསུངས་པའི་ཕྱིར། ཁོ་ན་རེ། དེ་དགོངས་དོན་མཐར་ཐུག་གམ་གཙོ་བོ་མིན་ཞེས་པའི་དོན་ཡིན་ཟེར་ན་བླུན་གཏམ་ཡིན་ཏེ། དེས་ཕྱི་དོན་མེད་པ་མདོའི་དགོངས་དོན་མཐར་ཐུག་ཏུ་བཞེད་མི་བཞེད་ཀྱི་དོགས་པ་མེད་པས་རྗེ་བླ་མས་དེ་ལ་དཔྱད་དགོས་མི་གསུང་ཞིང། ཁྱོད་

― GTD002_Page_0290 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར་ན་སྟོང་ཐུན་གྱི་དོན་ཡང། དཔལ་ལྡན་ཟླ་བས་ལང་གཤེགས་ལས། སེམས་ཙམ་དུ་གསུངས་པ་དེ་མདོའི་དགོངས་དོན་མཐར་ཐུག་ཡིན་ཀྱང་ཁས་ལེན་མི་རུང་ཞེས་པར་འགྲོ་བས་ཆོས་སྤོང་གི་ལས་སུ་འགྱུར་བའི་ཕྱིར་ཏེ། དེ་ལྟར་མ་བྱས་ན་ཟླ་གྲགས་དང་ལེགས་ལྡན་གྱི་བཞེད་པ་མི་འདྲ་བའི་ཁྱད་པར་བཤད་དུ་མེད་པའི་ཕྱིར། དེ་བཞིན་དུ་དེའི་ལུགས་ཀྱི་མཚན་ཉིད་གསུམ་མདོའི་དོན་མིན་གསུངས་པ་ཡང་གཙོ་བོ་ལ་བྱེད་ན། ཞི་འཚོ་སོགས་ཀྱི་སྐབས་སུ། ཆ་ཕྱེ་ནས་མདོའི་དོན་དུ་འཇོག་གོ །ཞེས་པ་དང། རྒྱན་སྟུག་དགོངས་འགྲེལ་ལང་གཤེགས་མདོ་སོགས་དོན། །གཙོ་ཕལ་ཆ་གཉིས་རིམ་བཞིན་དབུ་སེམས་ལུགས། །ཞེས་སྔ་མ་དང་ཆ་ཕྱེ་ནས་གསུངས་པ་འབྲེལ་མེད་དུ་འགྱུར་ཏེ་བསྟན་དོན་གཙོ་བོར་ཞི་འཚོ་ཡང་མི་བཞེད་ལ། བསྟན་དོན་ཕལ་བར་ལེགས་ལྡན་ཀྱང་བཞེད་པའི་ཕྱིར། རྟགས་ཁས། དེ་ལྟར་ན་དེ་རྣམས་བསྟན་དོན་ཕལ་པ་ཙམ་དུ་བྱེད་པའི་མདོ་ཡང་མེད་པས་ཐོགས་མེད་ཀྱི་བློས་བྱས་ཁོ་ནར་འཆད་དེ། མདོ་ལས་དྲང་དོན་གསུངས་པ་ཐམས་ཅད་ཀྱང་གདུལ་བྱ་བཀྲི་བའི་དགོས་པ་ཅན་ཤ་སྟག་ཡིན་ཞིང། སེམས་ཙམ་དུ་བཤད་པ་མངོན་སུམ་ལ་སྐུར་འདེབས་ཡིན་པས་གདུལ་བྱ་གོལ་སར་འཁྲིད་པ་ལས་དགོས་པ་ཅི་ཡང་མེད་པར་བཤད་པའི་ཕྱིར། ཤེས་རབ་སྒྲོན་མེ་ལས། དང་པོ་རྣམ་པར་རིག་པ་ཙམ་བླངས་ནས་ཕྱིས་དེ་ཡོངས་སུ་གཏོང་ན་ཡང་འདམ་རྫབ་ཀྱིས་སྦགས་ནས་འཁྲུ་བ་ལས་དང་པོ་ནས་ཐག་བསྲིང་བ་བཟང་སྟེ། ཞེས་གསུངས་ཤིང། རྟོག་གེ་འབར་བ་ལས་ཀྱང། སློབ་དཔོན་ཐོགས་མེད་དབྱིག་གཉེན་ལ་སོགས་པ། ཞེས་པ་ནས་ཐེག་པ་

― GTD002_Page_0291 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་པོའི་དོན་གྱི་ལུགས་གཞན་དུ་འདྲེན་པར་བྱེད་ཅིང་ངོ་ཚ་དང་ཁྲེལ་མེད་པ་དོན་རྣམ་པར་མི་ཤེས་བཞིན་དུ་རྣམ་པར་ཤེས་ཞེས་མཁས་པར་ང་རྒྱལ་བྱེད་པ་ཞེས་སོགས་སྐྱོན་བརྗོད་བྱས་པ་ལྟ་བུ་བྱེ་མདོ་སོགས་ལ་དགག་པ་བྱེད་པའི་སྐབས་སུ་ཡང་མ་བརྗོད་པར་སྣང་བའི་ཕྱིར། འོན་ཀྱང་དེ་གྲུབ་མཐའ་བཞི་བཞེད་མི་བཞེད་སོགས་བྱིས་པའི་རོལ་རྩེད་མང་ཡང་མ་སྤྲོས། ཡང་སྟག་ལོ་ན་རེ། ཀུན་གཞི་མི་འདོད་པའི་སེམས་ཙམ་པ་མེད་ཅེས་ཟེར་ཏེ། དེའི་གྲུབ་མཐའ་ཀུན་ཤེས་ལས། སེམས་ཙམ་པ་ལ་ཀུན་གཞི་བཞེད་མི་བཞེད། །གཉིས་སུ་གངས་ཅན་འདི་ན་གྲགས་མོད་ཀྱང། །སྐུ་མཆེད་གཉིས་ཀྱིས་གསལ་བར་བཤད་པ་ལས། །རྗེས་འབྲང་ལ་ལས་གསལ་བོར་མ་བརྗོད་ཀྱང། །འགོག་པའི་ལུང་རིགས་སུས་ཀྱང་མ་བརྗོད་ཕྱིར། །ཀུན་གཞི་མི་འདོད་སེམས་ཙམ་ཚད་ལྡན་དཀའ། །ཞེས་དང་དེའི་འགྲེལ་པར་ཡང་ཀུན་གཞི་མེད་ན་འཁོར་འདས་ཐམས་ཅད་འཇོག་པའི་གཞི་མེད་པ་དང་ཡིད་ཤེས་ལ་རྒྱུན་ཤིན་ཏུ་བརྟན་པ་མེད་ཅིང་བག་ཆགས་ཀྱི་གཞིར་མི་རུང་བས་དེ་བསྒོ་གཞི་མེད་པར་ཐལ་བ་དང། ལང་གཤེགས་དགོངས་འགྲེལ་སོགས་སེམས་ཙམ་མདོ་ལྔར་གྲགས་པ་རྣམས་དྲང་དོན་དུ་འགྲེལ་ན་སེམས་ཙམ་པ་མཚན་ཉིད་པར་མི་རུང་བ་དང། སྔགས་ལམ་གྱི་བསྒྲུབ་གཞི་མི་རུང་བ་དང། ཀུན་གཞི་ལས་གཞན་འབྱུང་བ་མིན། །ཞེས་པའི་ཚིག་དངོས་སུ་བྱུང་བ་དང། སེམས་ཙམ་དངོས་སུ་མ་ཟད་དེར་སྒོ་བསྟུན་པའི་ཞི་འཚོ་འཕགས་སེང་དང་བཅས་པས་ཀྱང་རྒྱས་པར་གསུངས་པའི་ཕྱིར། ཞེས་སྨྲ་བར་བྱེད་ཅིང། མདོ་དང་སྡེ་བདུན་

― GTD002_Page_0292 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་རྒྱ་ཆེར་མི་གསལ་བ་ནི། དེ་ལ་བརྟེན་པའི་བཤད་པ་དང་འབྲེལ་ཆུང་བས་ཡིན་ནོ། །ཞེས་བཤད་དོ། །སྒྲུབ་བྱེད་དེ་དག་ཐམས་ཅད་ནི་རིགས་པ་ལྟར་སྣང་ཁོ་ན་ཡིན་ཏེ། ཁྱོད་ལྟར་ན་སྡེ་བདུན་སྐབས་སུ་དེ་ལ་བརྟེན་པའི་བཤད་པ་འབྲེལ་ཆུང་བ་མི་འཐད་པར་ཐལ། འཁོར་འདས་ཀྱི་རྣམ་གཞག་ཐམས་ཅད་ཀུན་གཞིའི་སྟེང་ནས་བསྒྲུབ་དགོས་ལ། འདི་ཡང་ཀུན་བྱང་གི་རིམ་པ་མི་སྟོན་པར་བྱ་རོག་སོ་རྟོག་གི་བསྟན་ཆོས་མ་ཡིན་པའི་ཕྱིར་དང། ཕྱི་དོན་མེད་ཚུལ་དང། ལུགས་འདིའི་ཐ་སྙད་ཕྲ་མོ་འཇོག་ཚུལ་ལ་ཤིན་ཏུ་འབྲེལ་ཆེ་བའི་ཕྱིར་དང། མངོན་སུམ་ཚད་མ་དང་ལྟར་སྣང་གི་དབྱེ་བ་སོགས་བློ་རིག་མི་འདྲ་བའི་ཁྱད་པར་ཐམས་ཅད་གསུངས་ཀྱང་ཀུན་གཞི་དང་མི་འབྲེལ་བ་དེ། དེ་མི་བཞེད་པའི་རྟགས་ཡང་དག་ཡིན་པའི་ཕྱིར། ཡིད་ཤེས་ལ་རྒྱུན་བརྟན་པ་མི་སྲིད་པ་ཡང་མ་ཡིན་པར་ཐལ། ལེའུ་གཉིས་པར། ཐམས་ཅད་མཁྱེན་པ་བསྒྲུབ་པའི་སྐབས་སུ། རྟེན་མི་བརྟན་པ་ཉིད་འགྱུར་ན། །ཁྱད་པར་དག་ནི་མི་འཕེལ་ན། །རང་བཞིན་དེ་འདྲའང་མ་ཡིན་ཏེ། །ཞེས་རྟེན་བརྟན་པར་གསུངས་པའི་ཕྱིར། འཇུག་ཤེས་བག་ཆགས་ཀྱི་གཞིར་མི་རུང་བ་ཡང་མ་ཡིན་པར་ཐལ། ཕྱོགས་གླང་གི་དམིགས་པ་བརྟག་པ་ལས། ནུས་པ་འཇོག་ཕྱིར་རིམ་གྱིས་ཡིན། །ཞེས་སྔོ་འཛིན་སྔ་མ་སྔ་མའི་སྟེང་ན་ཕྱི་མ་ཡུལ་གྱི་རྣམ་ལྡན་དུ་སྐྱེད་པའི་ནུས་པའམ། བག་ཆགས་ཡོད་པ་དེ། ཕྱི་མ་ཕྱི་མའི་དམིགས་རྐྱེན་དུ་བཤད་པ་གང་ཞིག །དེ་དེའི་སྟེང་དུ་བསྒོས་ནས་ཡོད་ཀྱི། རེག་ལ་མ་འབྱར་བ་མ་ཡིན་པའི་ཕྱིར་དང། ལུགས་འདིའི་དབང་པོ་འཇོག་ཚུལ་ཐུན་མོང་མ་ཡིན་པ་ཡང། ལྷན་ཅིག་བྱེད་དབང་ནུས་པ་

― GTD002_Page_0293 ―

^{[མ་དཔེ་གཟིགས་ན་འདིར་གནོན།]}

[Full Size]

ཡི། །ངོ་བོ་གང་ཡིན་ནུས་པའང་ཡིན། །ཞེས་བཤད་ཅིང། འཇུག་པ་ལས་ཀྱང། རང་གི་རྣམ་ཤེས་རྟེན་གྱི་ནུས་དེ་ལ། །དབང་པོ་གཟུགས་ཅན་མིག་ཅེས་བྱ་བར་རྟོག །ཅེས་ཕྱོགས་སྔར་མཛད་པའི་ཕྱིར། དེར་མ་ཟད། རྣམ་འགྲེལ་ལས། མེད་པ་སྔར་ནུས་མེད་ཕྱིར་དང། །ཕྱིས་ཀྱང་ཉེ་བར་མི་སྦྱོར་ཕྱིར། །རྒྱུ་རྣམས་ཐམས་ཅད་སྔར་ཡོད་ཡིན། །ཞེས་རྒྱུ་འབྲས་དུས་མཉམ་འགོག་པའི་རིགས་པས་བསྒོ་བྱ་བསྒོ་བྱེད་མཉམ་དུ་གྲུབ་ན་བག་ཆགས་ཀྱི་སྔོན་དུ་དེ་འཇོག་བྱེད་མེད་ཅིང། བག་ཆགས་གྲུབ་ཟིན་ནས་འཇོག་མི་དགོས་ཞེས་བསྟན་ལ། གྲངས་ཅན་གྱི་གཙོ་བོ་འགོག་པའི་རིགས་པའི་འགྲོས་ཀྱིས་ཀུན་གཞི་ལ་ས་བོན་ཐམས་ཅད་རྟག་ཏུ་ཡོད་ན། སྣོད་བཅུད་ཀྱི་རིགས་མཐའ་དག་རྟག་ཏུ་སྐྱེ་བར་ཐལ་བ་སོགས་ཀུན་གཞི་འདོད་པའི་ལུགས་དང་མི་མཐུན་པའི་རིགས་པའི་འགྲོས་ཤིན་ཏུ་མང་ངོ་། །ལང་གཤེགས་དང་དགོངས་འགྲེལ་སོགས་སེམས་ཙམ་པའི་ཁུངས་གཏུགས་པའི་མདོ་རྣམས་དྲང་དོན་དུ་འགྲེལ་ན་སེམས་ཙམ་པར་མི་རུང་ཟེར་བ་ཡང་ལྟག་ཆོད་ཡིན་ཏེ། དེ་དག་ལས་མཚན་ཉིད་གསུམ་ལ་བདེན་པར་ཡོད་མེད་ཀྱི་ཁྱད་པར་ཕྱེ་བ་ལྟ་བུ་ལེགས་ཕྱེའི་ཆོས་འཁོར་དུ་འཇོག་བྱེད་གཙོ་བོ་རྣམས་དྲང་དོན་དུ་བཀྲལ་ན་སེམས་ཙམ་པར་མི་རུང་ཡང། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་པ་ལྟ་བུའི་དོན་ཚན་རེ་གཉིས་དྲང་དོན་དུ་བཀྲལ་བས་སེམས་ཙམ་པ་མིན་པར་མི་འགྱུར་བའི་ཕྱིར། མ་གྲུབ་ན། སློབ་དཔོན་ཆོས་གྲགས་ཀྱིས་ཀྱང་གཏན་ནས་རིགས་ཆད་དང་མཐར་ཐུག་ཐེག་པ་གསུམ་གྲུབ་སོགས་བཞེད་པར་ཐལ། སེམས་

― GTD002_Page_0294 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་གྱི་རྩ་བའི་མདོ་སྡེ་རྣམས་སུ་ཞི་བ་བགྲོད་པ་གཅིག་པུ་བ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་ཀྱི་སྙིང་པོ་ལ་བཞག་སྟེ་བླ་ན་མེད་པའི་བྱང་ཆུབ་ཐོབ་པར་བྱེད་མི་ནུས་སོ། །ཞེས་དང། ལོག་སྲེད་ཅན་གཏན་ཡོངས་སུ་མྱ་ངན་ལས་མི་འདའ་བའི་ཆོས་ཅན་ཞེས་གསུངས་ཤིང། མདོ་སྡེ་རྒྱན་ལས་ཀྱང། ཆོས་དང་བདག་མེད་རྣམ་གྲོལ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །ཞེས་སོགས་ཀྱིས་མཐར་ཐུག་ཐེག་པ་གཅིག་བཤད་པ་དྲང་དོན་དུ་བཀྲལ་བའི་ཕྱིར། རྟགས་ཁྱབ་ཁས། འདོད་ན། རྣམ་འགྲེལ་ལས། རྟག་ཉིད་ཕྱིར་རམ་ཐབས་མེད་ཕྱིར། །ཞེས་སོགས་རིགས་པ་མཐའ་ཡས་པས་སེམས་ཅན་ཐམས་ཅད་ལ་སངས་རྒྱས་ཀྱི་རིགས་ཡོད་ཅིང་མཐར་ཐུག་ཐེག་པ་གཅིག་ཏུ་རྐང་བཙུགས་ནས་བསྒྲུབས་པའི་ལུང་རིགས་ཐམས་ཅད་བསུབ་པའམ། ཡང་ན་དཔལ་ལྡན་ཆོས་གྲགས་སེམས་ཙམ་པའི་གྲལ་ནས་འབྱིན་དགོས་པར་འགྱུར་རོ། །དེར་མ་ཟད་ལང་གཤེགས་དང་རྒྱན་སྟུག་གི་སྐབས་འགའ་ཞིག་ཏུ་ཀུན་གཞི་གསུངས་པའི་དགོངས་པ་བཀྲལ་ཏེ་དྲང་དོན་དུ་གསུངས་པ་དང། དེ་ལྔའི་ནང་ནས་ས་བཅུ་བར་ཆོས་མཉམ་པ་ཉིད་བཅུའི་སྒོ་ནས་ཆོས་ཐམས་ཅད་བདེན་མེད་དུ་བཤད་པ་སོགས་ཡོད་པས་འགལ་འདུ་ཐམས་ཅད་ཁས་ལོངས་ལ་སེམས་ཙམ་པ་ཚད་ལྡན་གྱི་གྲལ་དུ་སྡོད་ཅིག །སྔགས་ཀྱི་བསྒྲུབ་གཞི་མི་རུང་བར་ཐལ་བའི་ཟབ་ཁྱད་བཏོན་པ་ཡང་ཉ་དང་ཉུང་མ་བསྲེས་པས་སྐབས་སུ་མ་བབས་ལ། ཤིན་ཏུ་ཕྲ་བའི་གཉུག་སེམས་དེ་ཉིད་ལྷན་སྐྱེས་ཀྱི་བདེ་བ་ཆེན་པོའི་ངོ་བོར་བསྐྱེད་དེ་ཡུལ་སྟོང་པ་ཉིད་ལ་མཉམ་པར་འཇོག་པར་གསུངས་པ་དེ་ལ་བྱེད་ན། ཀུན་གཞི་ནི་ཐེག་

― GTD002_Page_0295 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་གྱི་སྒོམ་ལམ་མཐོན་པོར་མ་སླེབ་བར་དུ་མི་ལྡོག་ཅིང། དེའི་ངོ་བོ་ནི་སུམ་ཅུ་བར། རྣམ་པར་རིག་དང་མི་རིག་དང། །ཞེས་ཐོགས་མེད་སྐུ་མཆེད་བཞེད་པའི་ཀུན་གཞི་དེ་རང་ཡུལ་གང་ཡང་ངེས་མི་ནུས་པ་ཞིག་ཡིན་ལ་ཁྱོད་ཀྱིས་བཀྲལ་བའི་ཕྱོགས་གླང་ཡབ་སྲས་ལུགས་ཀྱི་ཀུན་གཞི་དེས་སྟོང་པ་ཉིད་ཀྱང་རྟོགས་པ་ངོ་མཚར་རོ། །ཀུན་གཞི་ལས་གཞན་འབྱུང་བ་མེད། །ཅེས་པ་ཙམ་བྱུང་ཡང་དེའི་དོན་བརྟག་པ་མཐའ་བཟུང་གི་ཀུན་གཞི་འདོད་ན་མ་གཏོགས་སེམས་རིགས་མཐུན་དུ་མ་ཅིག་ཅར་མི་འཇུག་པ་ལ་བཤད་དུ་རུང་ཞིང། ཡང་ན་བློ་གྲོས་ཡངས་པའི་ལེའུའི་ཚིག་རིས་དང་སྒོ་བསྟུན་ཙམ་ཡིན་ལ། ཀུན་གཞི་འདོད་ན་ཉོན་ཡིད་ཀྱང་འདོད་དགོས་པས་སྤྱིར་རྣམ་ཤེས་རིགས་མཐུན་དུ་མ་ཅིག་ཅར་མངོན་དུ་འགྱུར་བ་དང། ཁྱད་པར་དུ་བདག་མེད་རྟོགས་པའི་རྗེས་དཔག་དང། བདག་ཏུ་འཛིན་པའི་རྟོག་པ་གཉིས་ཅིག་ཅར་མངོན་དུ་གྱུར་པ་ཞིག་ཀྱང་འདོད་དགོས་པས། རྣམ་འགྲེལ་ལས། དེ་དག་རྣམས་ལས་རིགས་མཐུན་པའི། །རྣམ་པར་ཤེས་ལ་ངེས་པར་འགྱུར། །འདི་ལྟར་རྣམ་པར་རྟོག་པ་རྣམས། །རིམ་གྱིས་འབྱུང་བར་ཡང་དག་རྟོགས། །ཞེས་དང། རྟོག་གཉིས་ཅིག་ཅར་མཐོང་བ་མེད། །ཅེས་སོགས་ལན་གྲངས་བརྒྱ་ཕྲག་ཏུ་གསུངས་པ་རྣམས་ཇི་ལྟར་དྲང་ལེགས་པར་བསམ་དགོས་སོ། །དེ་དང་སྒོ་བསྟུན་པའི་ཞི་འཚོ་འཕགས་སེང་སོགས་ཀྱིས་ཀུན་གཞི་བཞེད་པར་སྨྲ་བ་ཡང་ལྐུག་པའི་རིགས་པ་ཡིན་ཏེ་ཟུར་ཙམ་གོང་དུ་བཀག་ཟིན་པས་མ་སྤྲོས་ལ་དེ་དག་གིས་རྣམ་ཤེས་གྲངས་མང་ཉུང་གི་འདོད་ཚུལ་རགས་པ་ཙམ་སྨོས་ཟིན་པས་གཞི་

― GTD002_Page_0296 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་ཏེ་རྣམ་དཔྱོད་ཅན་རྣམས་ཀྱིས་མཁས་པ་སོ་སོའི་བཞེད་ཚུལ་ལ་ཞིབ་ཏུ་དཔྱད་པར་བྱའོ། ། ༈ གཉིས་པ་ཀུན་གཞི་དང་ཉོན་ཡིད་ཀྱི་རྣམ་གཞག་བྱེ་བྲག་ཏུ་བཤད་པ་ལ་གཉིས། ཀུན་གཞི་བཤད་པ་དང། ཉོན་ཡིད་བཤད་པའོ། །དང་པོ་ལ་སྤྱི་དོན་དང། མཐའ་དཔྱད་པ་གཉིས། དང་པོ་ནི། ཀུན་གཞིའི་རྣམ་གཞག་རྒྱས་པར་གཏན་ལ་འབེབས་ཚུལ་ཡོད་དེ། ས་སྡེ་ལས། རང་བཞིན་མཚན་ཉིད་དམིགས་རྣམ་འཁོར། །འཇུག་པའི་ཚུལ་དང་ལྡོག་པའི་དུས། །དབྱེ་བ་རྣམ་གྲངས་སྒྲ་བཤད་དོན། །ཚད་མ་དག་གིས་ཤེས་པར་བྱ། །ཞེས་པ་ལྟར། རང་བཞིན། མཚན་ཉིད། དམིགས་པ། རྣམ་པ། འཁོར། འཇུག་ཚུལ། ལྡོག་དུས། དབྱེ་བ། མིང་གི་རྣམ་གྲངས། སྒྲ་བཤད། སྒྲུབ་བྱེད་ཀྱི་ཚད་མ་སྟེ་དོན་ཚན་བཅུ་གཅིག་ཏུ་ཕྱེ་ནས་བཤད་པའི་ཕྱིར། དང་པོ་ངོ་བོ་ཡོད་དེ། གཞི་ལྔའི་ནང་ནས་གཙོ་བོ་སེམས་ཀྱི་གཞི་ཡིན་ཞིང། དགེ་རྩ་ཆད་པ་དང། ཁམས་གོང་མ་པ་སོགས་ཐམས་ཅད་ལ་ཡོད་པས་ལུང་མ་བསྟན་ཡིན་ལ། སྒྲིབ་མ་སྒྲིབ་གཉིས་ཀྱི་ནང་ནས་ཀྱང་འདི་རྣམ་སྨིན་གྱི་ཆ་ཡིན་པས་མ་སྒྲིབ་ལུང་མ་བསྟན་དུ་ངེས་པའི་ཕྱིར། སུམ་ཅུ་པ་ལས། དེ་ནི་མ་སྒྲིབ་ལུང་མ་བསྟན། །ཞེས་དང། རྩ་བར་ཡང། བག་ཆགས་བསྒོ་གཞི་ཡིན་ཕྱིར་དང། །དགེ་དང་མི་དགེ་མངོན་གྱུར་དང། །རྒྱུད་གཅིག་ལ་ནི་འཇུག་པའི་ཕྱིར། །མ་སྒྲིབ་ལུང་མ་བསྟན་དུ་གྲུབ། །ཅེས་དང། མཛོད་ལས། རྣམ་སྨིན་ལུང་དུ་མ་བསྟན་ཆོས། །ཞེས་དང། སྒྲིབ་ལ་བཅོ་བརྒྱད། ཅེས་གསུངས་པའི་ཕྱིར། ལུང་ཕྱི་མ་གཉིས་ལ་གྲུབ་མཐའ་གོང་འོག་མི་འདྲ་བའི་ཞིབ་ཆ་དགོས། གཉིས་པ་མཚན་ཉིད་དམ་འཇོག་བྱེད་ནི། རྒྱུན་ཤིན་ཏུ་བརྟན་

― GTD002_Page_0297 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་བག་ཆགས་བསྒོ་གཞིར་གྱུར་བའི་ཆ་ནས་བཞག་པའི་མ་སྒྲིབ་ལུང་མ་བསྟན་གྱི་གཙོ་སེམས་དེ། ཀུན་གཞིའི་མཚན་ཉིད། རྩོད་ཚེ་བག་ཆགས་བསྒོ་གཞིའི་ཆ་ནས་བཞག་པའི་སེམས་དེ་དེའི་མཚན་ཉིད། ཆ་བཞག་གིས་དག་ས་སོགས་ན་ཡོད་པའི་རྣམ་སྨིན་གྱི་རྣམ་ཤེས་གཅོད། དོན་དེ་ཅུང་ཟད་སྤྲོས་ན། གང་དུ་བསྒོ་བའི་གཞི། གང་གིས་བསྒོ་བའི་ཆོས། ཇི་ལྟར་བསྒོ་བའི་ཚུལ། བསྒོས་པའི་བག་ཆགས་ཀྱི་རང་བཞིན་བཞིར་ཡང་གསུང་ལ། བསྒོ་གཞི་ནི། ཐེག་བསྡུས་ལས། བརྟན་ལུང་མ་བསྟན་བསྒོ་བྱ་བ། །ཞེས་སོགས་བཞིན་དུ་རྩ་བར་ཡང། བརྟན་ལུང་མ་བསྟན་བསྒོ་བྱ་བ། །བསྒོ་བར་བྱེད་དང་འབྲེལ་བ་དང། །མཐའ་གཅིག་རྟེན་དུ་གྱུར་པ་སྟེ། །ཁྱད་པར་ལྔ་དང་ལྡན་པ་འོ། །ཞེས་གསུངས་ཏེ། དཔེར་ན་མེ་ཏོག་སྣ་མའི་དྲི་བསྒོ་བ་ལ། བརྟན་པ་ཤིང་སོགས་དེའི་རྟེན་དུ་རུང་གི མི་བརྟན་པ་སྒྲ་སོགས་དེའི་རྟེན་དུ་མི་རུང་བ་ལྟར། དབང་པོ་དང་དབང་ཤེས་རྣམས་གཟུགས་མེད་དུ་སྐྱེས་པའི་ཚེ་མི་འཇུག་པས་མི་བརྟན་ཅིང། དྲུག་པ་ཡིད་ཤེས་ནི། སུམ་ཅུ་བ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུའོ་འདུ་ཤེས་མེད་པ་བ། །སྙོམས་པར་འཇུག་པ་རྣམ་གཉིས་དང། །སེམས་མེད་གཉིད་དང་བརྒྱལ་མ་གཏོགས། །ཞེས་གསུངས་ལ། ཉོན་ཡིད་ཀྱང། འཇིག་རྟེན་འདས་པའི་ལམ་ན་མེད། །འགོག་པའི་སྙོམས་པར་འཇུག་ནའང་མེད། །ཅེས་སྐབས་དེ་དག་ཏུ་མེད་པས་བསྒོ་གཞིར་མི་རུང་ཡང། ཀུན་གཞི་ནི་བསྒོ་བྱེད་ཡོད་ཀྱི་བར་རྒྱུན་བརྟན་པས་དེར་རུང་ངོ་། །ལུང་དུ་མ་བསྟན་པ་ཡང་དགོས་ཏེ། སྒོག་སྐྱ་དང་ཙན་དན་ལྟ་བུའི་དྲི་ཆེ་བ་ལ་

― GTD002_Page_0298 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་གྱི་དྲི་མི་འགོ་ཡང་ཏིལ་ལྟ་བུའི་དྲི་མཉམ་པ་ལ་འགོ་བ་ལྟར། དགེ་མི་དགེ་གང་རུང་ཡིན་ན། རིས་སུ་ཆད་པས་གཅིག་ཤོས་ཀྱི་བག་ཆགས་མི་འཛིན་པའི་ཕྱིར་དང། དེ་དང་ལྷན་ཅིག་མངོན་དུ་འགྱུར་ཡང་མི་རུང་བའི་ཕྱིར། བསྒོ་བར་བྱ་བའམ། བསྒོ་བར་འོས་པ་ནི། འདུས་མ་བྱས་རྣམས་རྐྱེན་གྱིས་ཁྱད་པར་དུ་བྱར་མེད་པས་བསྒོ་བྱེད་ཀྱི་ནུས་པ་མི་འཇུག་ལ་ཕྱི་རོལ་གྱི་དངོས་པོ་རྣམས་ཀྱང་བསྒོ་བའི་འོས་མ་ཡིན་ཏེ། ཐེག་བསྡུས་འགྲེལ་པ་ལས། བསྒོ་བར་བྱ་བ་མ་ཡིན་པ་འདི་ལྟ་སྟེ། རྡོ་བ་དང། དངུལ་དང། གསེར་ལ་སོགས་པ་ལ་ནི་མི་བསྒོའོ། །གང་བསྒོ་བ་འཛིན་པ་དེ་ལ་བསྒོ་བར་བྱེད་པས་བསྒོ་བ་ཞེས་བྱ་སྟེ། བསྒོ་བར་འོས་པ་ལའོ། །ཞེས་གསུངས་པའི་ཕྱིར་དང། གང་བསྒོ་བ་འཛིན་པ་དེ་ལ་བསྒོ་འོས་པའི་དོན་ཡང། དང་པོར་ལས་དེའི་བག་ཆགས་བཟུང་ནས་སླར་རྣམ་སྨིན་གྱི་ངོ་བོར་སྦྱར་ཏེ་མྱོང་ཞིང་དེ་ལ་སྨིན་པ་ཞིག་དགོས་པ་གང་ཞིག །མདོ་ལས། ལས་བྱས་ཤིང་བསགས་པ་རྣམས་ཀྱི་རྣམ་པར་སྨིན་པ་ནི་ཕྱི་རོལ་གྱི་སའི་ཁམས་ལ་སྨིན་པ་མ་ཡིན། ཞེས་སོགས་གསུངས་པའི་ཕྱིར། ཡང་ན་ཐེག་བསྡུས་འགྲེལ་པའི་དོན། མེ་ཏོག་གི་དྲི་དེ་སྙི་བ་ཏིལ་སོགས་ལ་འགོ་ཡང་སྲ་བ་རྡོ་སོགས་ལ་མི་འགོ་བ་ལྟར། བག་ཆགས་བསྒོ་གཞི་ཡང་འདུས་བྱས་ལ་རུང་གི་འདུས་མ་བྱས་ལ་མི་རུང་བའི་དོན་ཏེ། ལུགས་འདིས་རང་བཞིན་གནས་རིགས་ཀྱང་འདུས་བྱས་སུ་འདོད་ཅིང། དེའི་སྟོབས་ཀྱིས་རིགས་བདེན་གྲུབ་དང་དེ་ལ་བརྟེན་ནས་མཐར་ཐུག་ཐེག་པ་གསུམ་དུ་སྨྲ་དགོས་བྱུང་བ་ཡིན་ནོ། །བསྒོ་བྱེད་དང་འབྲེལ་བ་ཡང། མེ་ཏོག་གི་དྲི་ཡུལ་དུས་གཞན་གྱི་དངོས་པོ་ལ་མི་བསྒོ་

― GTD002_Page_0299 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ལྟར་རྒྱུད་གཞན་ལ་མི་རུང་བས་རྒྱུད་གཅིག་ལ་བསྒོ་བྱ་བསྒོ་བྱེད་ལྷན་ཅིག་ཏུ་འབྲེལ་བ་ཡིན་ལ། མཐའ་གཅིག་རྟེན་དུ་གྱུར་པ་ནི། དེའི་འཁོར་གྱི་རེག་སོགས་ནི་གཞན་ལ་བརྟེན་པ་ཡིན་པས་བསྒོ་གཞིར་མི་རུང་ཡང། ཀུན་གཞིར་རང་སྟོབས་ཀྱིས་བག་ཆགས་ཀྱི་གཞིར་ཡོད་པར་གསུངས་ཏེ། ཁྱད་པར་ཕྱི་མ་འདི་ཐེག་བསྡུས་ན་མི་གསལ་ཡང་དོན་གསང་གི་དགོངས་པ་བཀོད་པའོ། །འོ་ན་བསྒོ་གཞི་དེ་ལྟར་ཡིན་ན་བསྒོ་བྱེད་ཇི་ལྟ་བུ་ཞེ་ན། ཀུན་གཞི་རང་ཉིད་རང་ལ་བྱེད་པ་འགལ་བས་མི་རུང་ཞིང། དེ་ལས་གཞན་པའི་རྣམ་ཤེས་ཚོགས་བདུན་གྱིས་བསྒོ་ལ། བསྒོ་ཚུལ་ནི་ཏིལ་དང་མེ་ཏོག་ལྷན་ཅིག་ཏུ་བཞག་སྟེ། མེ་ཏོག་བསལ་ཀྱང་ཏིལ་ལ་དེའི་དྲི་གནས་པ་ལྟར་བསྒོ་བྱ་བསྒོ་བྱེད་གཉིས་རྒྱུད་གཅིག་ལ་ལྷན་དུ་ཚོགས་ཏེ་ཕྱིས་བསྒོ་བྱེད་རང་ཉིད་འགག་ཀྱང་རང་གི་བག་ཆགས་བསྒོ་གཞིའི་སྟེང་དུ་གནས་ཏེ། རྩ་བར། བསྒོ་བར་བྱེད་པས་བསྒོ་གཞི་ལ། །འགག་ལ་མངོན་དུ་ཕྱོགས་པའི་ཚེ། །བཞག་པའི་ནུས་པ་འོ། །ཞེས་དང། ཐེག་བསྡུས་ལས། ཏིལ་དག་ལ་མེ་ཏོག་དག་གིས་བསྒོས་པ་ཏིལ་དང་མེ་ཏོག་ལྷན་ཅིག་འབྱུང་ཞིང་འགག་ཀྱང་ཞེས་སོགས་ལྟར་རོ། །གསུམ་པ་དམིགས་པ་ནི། དོན་དང་སེམས་ཅན་བག་ཆགས་ལ། །ཞེས་ཕྱི་སྣོད་ཀྱི་རྣམ་རིག་དོན་ལྔ་དང། ནང་སེམས་ཅན་དུ་སྣང་བའི་དབང་སོགས་གཉིས་བཤད་དེ། དབུས་མཐའ་ལས་ཀྱང། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །ཞེས་དོན་དང་སེམས་ཅན་དུ་སྣང་བའི་རྣམ་ཤེས་ཀུན་གཞི་དང། བདག་ཏུ་སྣང་བའི་རྣམ་ཤེས་ཉོན་ཡིད་དང། རྣམ་

― GTD002_Page_0300 ―

^{[མ་དཔེ་གཟིགས་ན་འདིར་གནོན།]}

[Full Size]

པར་རིག་པར་སྣང་བའི་རྣམ་ཤེས་འཇུག་ཤེས་སུ་གསུངས་པ་ལྟར་འདིར་ཡང་སེམས་ཀྱིས་ཟིན་པའི་དབང་སོགས་ལ་སེམས་ཅན་གྱི་སྒྲས་བསྟན་ཅིང། སྒྲས་བརྗོད་ཀྱིས་ཕྱེ་ན་བག་ཆགས་ཏེ་དམིགས་པ་གསུམ་དུ་བཤད་དོ། །འོན་ཀྱང་བག་ཆགས་ནི་དམིགས་པ་དངོས་མིན་ཏེ། རྩ་བར། ས་བོན་གྱི། དབང་གིས་གནས་དོན་ལུས་སུ་ནི། །སྣང་ཕྱིར་དམིགས་པ་དག་ཏུ་འདོད། །ཅེས་བག་ཆགས་དེའི་སྟོབས་ཀྱིས་གནས་དབང་རྟེན་དང། དོན་ཡུལ་ལྔ། ལུས་དབང་པོ་སོགས་སྣོད་བཅུད་ཀྱི་སྣང་བ་འབྱུང་བས་དམིགས་པར་བཏགས་པ་ཙམ་དུ་བཤད་པའི་ཕྱིར། བཞི་པ་ནི། རྣམ་པ་རིས་སུ་མ་ཆད་ཅིང་མི་གསལ་བས་སྣོད་བཅུད་དེ་དག་སྣང་ཡང་ངེས་པ་འདྲེན་མི་ནུས་ཏེ། སུམ་ཅུ་བ་དང་འདི་གཉིས་ཀ་ལས། རྣམ་པར་རིག་པ་མི་རིག་པ། །ཞེས་གསུངས་ཤིང། དུལ་ལྷའི་འགྲེལ་བཤད་ལས་ཀྱང། དེ་ནི་དམིགས་པ་ཡོངས་སུ་མི་གསལ་བ་དང། རྣམ་པ་ཡོངས་སུ་མི་གསལ་བ་སྟེ། ཞེས་དང། ཀུན་གཞིའི་རྣམ་པར་ཤེས་པས་འདི་ལ་འདི་ཞེས་སོ་སོ་རང་གི་རིག་པས་རྣམ་པར་མི་རིག་སྟེ། ཞེས་སོ། ། ལྔ་པ་ནི། འཁོར་ཀུན་འགྲོ་ལྔ་ཁོ་ནར་ངེས་ཤིང། དེའི་ནང་ནས་ཚོར་བ་ཡང་བཏང་སྙོམས་འབའ་ཞིག་ཡིན་ཏེ། འདི་ཉིད་ལས། རེག་སོགས་ལྔར་ངེས་ཚོར་བ་ནི། །བར་མའོ། །ཞེས་བྱུང་སྟེ། མ་སྒྲིབ་ལུང་མ་བསྟན་ཡིན་པས་གཞན་རྣམས་ལ་དོགས་པ་ཆུང་ཡང་གཞན་འགྱུར་གྱི་ཁྲོད་དུ་དཔྱད་གཞི་ཅུང་ཟད་ཡོད། དྲུག་པ་འཇུག་ཚུལ་ནི། བསྡུ་བ་ལས། དམིགས་དང་མཚུངས་པར་ལྡན་པ་དང། །གཅིག་གི་རྐྱེན་ཉིད་གཅིག་ཡིན་དང། །ལྷན་ཅིག་དངོས་པོའི་འཇུག་པ་

― GTD002_Page_0301 ―

^{[མ་དཔེ་གཟིགས་ན་འདིར་གནོན།]}

[Full Size]

དང། །ཞེས་ཡུལ་གང་ལ་དམིགས་ནས་འཇུག་ཚུལ། གྲོགས་གང་དང་མཚུངས་ལྡན་དུ་འཇུག་ཚུལ། འཇུག་ཤེས་སོགས་དང་ཕན་ཚུན་རྐྱེན་བྱས་ཏེ་འཇུག་ཚུལ། རྣམ་ཤེས་ཚོགས་དུ་དང་ལྷན་ཅིག་འཇུག་ཚུལ། རང་གི་དངོས་པོའི་འཇུག་ཚུལ་ཏེ་ལྔར་གསུངས་པའི་དང་པོ་བཞི་གོང་འོག་ཅི་རིགས་པར་འཆད་ཅིང། ལྔ་པ་ནི་རྒྱུན་གྱི་དབང་དུ་བྱས་ན་ཐོག་མ་མེད་པ་ནས་འཇུག་ལ། ཚེ་སྔ་ཕྱི་བརྒྱུད་དེ་འཇུག་ཚུལ་ཡང། སུམ་ཅུ་བ་ལས། ལས་ཀྱི་བག་ཆགས་འཛིན་གཉིས་ཀྱི། །བག་ཆགས་བཅས་པ་སྔ་མ་ཡི། །རྣམ་པར་སྨིན་པ་ཟད་ནས་གཞན། །རྣམ་སྨིན་བསྐྱེད་པ་དེ་ཡིན་ནོ། །ཞེས་ཚེ་སྔ་མར་ལས་ཀྱི་བག་ཆགས་གཟུང་འཛིན་གཉིས་སུ་སྣང་བའི་བག་ཆགས་ཀྱིས་གསོས་པ་ལས་ཚེ་འདིའི་རྣམ་སྨིན་གྱི་ཀུན་གཞི་གྲུབ་པ་ཡིན་ཞིང། འདི་ཟད་པ་ན་ཡང་སྔར་བཞིན་གསོས་ཏེ་རྣམ་སྨིན་གྱི་ཀུན་གཞི་གཞན་དང་གཞན་འབྱུང་བས་གཞན་སྡེའི་བདག་ལྟར་རྟག་པར་མི་འགྱུར་བ། ལས་འབྲས་ཀྱི་རྟེན་གཞི་ཆད་པར་ཡང་མི་འགྱུར་ཏེ། བློ་བརྟན་གྱི་འགྲེལ་པ་ལས། དེ་ལྟར་ན་ལས་ཀྱི་བག་ཆགས་འབའ་ཞིག་མ་ཡིན་གྱི། འཛིན་པ་གཉིས་ཀྱི་བག་ཆགས་ཀྱིས་ཟིན་པས་རྣམ་པར་སྨིན་པ་བསྐྱེད་དོ། །ཞེས་དང། སྔ་མའི་རྣམ་པར་སྨིན་པ་ཟད་ནས་ཞེས་བྱ་བ་འདིས་རྟག་པའི་མཐའ་སྤོང་ངོ༌། །རྣམ་པར་སྨིན་པ་གཞན་བསྐྱེད་དོ་ཞེས་བྱ་བས་ནི་ཆད་པའི་མཐའ་སྤོང་ངོ༌། །ཞེས་གསུངས་པའི་ཕྱིར། བདུན་པ། ལྡོག་མཚམས་ནི། ཐེག་དམན་གྱི་དགྲ་བཅོམ་དང། ཐེག་ཆེན་གྱི་ས་བརྒྱད་པ་ཐོབ་པ་ནས་ལྡོག་སྟེ། དེ་ཕྱིར་དབང་ཐོབ་དགྲ་བཅོམ་ལ། །ཀུན་

― GTD002_Page_0302 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་ཡོད་པ་མ་ཡིན་ཏེ། །འཇོག་བྱེད་གཉིས་པོ་མེད་ཕྱིར་རོ། །ཞེས་དང། སུམ་ཅུ་པ་ལས། དགྲ་བཅོམ་ཉིད་ན་དེ་ལྡོག །ཅེས་སོ། །འོན་ཀྱང་གོང་དུ། ལྷག་མ་མེད་དང་རྡོ་རྗེ་ལྟའི། །བར་དུ་རྒྱུན་མི་འཆད་དུ་འཇུག །ཅེས་གསུངས་པ་དང་མི་འགལ་ཏེ། དེ་ནི་རྣམ་སྨིན་གྱི་རྣམ་ཤེས་ལ་དགོངས་ཤིང། ཀུན་གཞི་དངོས་ས་བརྒྱད་པ་ནས་ལོག་ཀྱང་རྒྱུན་ཟག་བཅས་ཀྱི་ཆ་སྤངས་པ་ནི་ཟག་པ་མེད་པའི་ཡེ་ཤེས་མེ་ལོང་ལྟ་བུར་གནས་གྱུར་པ་ནས་འཇོག་པའི་ཕྱིར། བསྡུ་བ་ལས། གནས་གྱུར་མ་ཐག་ཏུ་ཀུན་གཞིའི་རྣམ་པར་ཤེས་པ་སྤངས་པར་བརྗོད་པར་བྱ་སྟེ། ཞེས་དང། ཙནྡྲ་གོ་མིས། གང་ཡང་ཀུན་གཞིའི་རྣམ་པར་ཤེས། །མེ་ལོང་ཡེ་ཤེས་གནས་གྱུར་པ། །ཞེས་གསུངས་པའི་ཕྱིར། བརྒྱད་པ་དབྱེ་བ་ལ། སྒྲས་བརྗོད་ཀྱིས་དབྱེ་ན། རྟེན་དུ་གྱུར་པ་རྣམ་སྨིན་གྱི་ཀུན་གཞི། དེ་ལ་བརྟེན་པ་ས་བོན་གྱི་ཀུན་གཞི་གཉིས་སུ་བཤད་པའི་སྔ་མ་ནི་ཀུན་གཞི་དངོས་ཡིན་ལ། ཕྱི་མ་དང་ཀུན་གཞིའི་སྟེང་གི་བག་ཆགས་དོན་གཅིག་གོ །དེ་ལའང། ངོ་བོ། དབྱེ་བ་གཉིས། དང་པོ་ནི། འདི་ཉིད་ལས། བརྟེན་པ་ས་བོན་ཀུན་གཞི་ནི། །བསྒོ་བར་བྱེད་པས་བསྒོ་གཞི་ལ། །འགག་ལ་མངོན་དུ་ཕྱོགས་པའི་ཚེ། །བཞག་པའི་ནུས་པའོ། །ཞེས་བསྒོ་བྱེད་ཚོགས་བདུན་གང་རུང་གིས་ཀུན་གཞིའི་སྟེང་དུ་རིགས་འདྲ་ཕྱི་མའམ་རྣམ་སྨིན་སོགས་འབྲས་བུའི་ཁྱད་པར་ཅི་རིགས་འགྲུབ་རུང་གི་ནུས་པ་ཁྱད་པར་བ་ཞིག་བཞག་པ་དེ་ཉིད་ཡིན་པར་གསུངས་སོ། །གཉིས་པ་དབྱེ་བ་ལ། དྲུག་ཏུ་དབྱེ་བ། གསུམ་དུ་དབྱེ་བ། བཞི་ཚན་གཉིས་སུ་དབྱེ་བ་རྣམས་ལས། དང་པོ་ནི། ཐེག་བསྡུས་ལས། ཕྱི་དང་ནང་དང་མི་གསལ་བ། །གཉིས་དང་ཀུན་རྫོབ་

― GTD002_Page_0303 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་དང་ནི། །དམ་པའི་དོན་ཏེ་དེ་དག་ཀུན། །ས་བོན་རྣམ་པ་དྲུག་ཏུ་འདོད། །ཅེས་རྩ་བའི་དབྱེ་བ་ས་ལུ་སོགས་ཕྱིའི་ས་བོན། ཀུན་གཞི་ལ་གནས་པ་ནང་གི་ས་བོན་ཏེ་གཉིས་དང། དེ་གཉིས་རེ་རེ་ནས་དགེ་མི་དགེ་གང་དུ་ཡང་མི་གསལ་བ་སྟེ་ལུང་མ་བསྟན་ཡིན་པས་ཕྱིའི་མི་གསལ་བ་དང། ནང་གི་མི་གསལ་བ་ཞེས་གྲངས་གཉིས་དང། དེ་རིམ་པ་བཞིན་ཕྱི་ཐ་སྙད་པའི་ཤེས་པའི་སྣང་ཚོད་ཙམ་ཡིན་པས་ཀུན་རྫོབ་དང། ནང་དཔྱད་བཟོད་ཀྱི་ས་བོན་མཐར་ཐུག་པ་ཡིན་པས་དོན་དམ་པའི་ས་བོན་ཞེས་གྲངས་གཉིས་ཏེ་དྲུག་ཏུ་ཕྱེ་བ་ལྡོག་ཆ་ཙམ་ཡིན་གྱི་དོན་སྔ་མ་གཉིས་སུ་འདུས་སོ། །གསུམ་དུ་ཕྱེ་བ་ཡང། རྩ་བར། གཞན་ཡང་མངོན་བརྗོད་བདག་ལྟ་དང། །སྲིད་པའི་ཡན་ལག་བག་ཆགས་གསུམ། །ཞེས་ཆོས་རྣམས་ལ་འདི་ནི་འདིའོ་ཞེས་ཐ་སྙད་སྦྱོར་བའི་རྒྱུ་བྱེད་པ་མངོན་བརྗོད་ཀྱི་བག་ཆགས། རྟག་ཏུ་ངའོ་སྙམ་པ་སྐྱེད་པ་བདག་ལྟའི་བག་ཆགས། འགྲོ་བ་རྣམས་སུ་སྐྱེ་འཆི་འགྲུབ་བྱེད་སྲིད་པའི་ཡན་ལག་གི་བག་ཆགས་ཏེ། རིམ་པ་བཞིན་ཡིད་ཤེས་དང། ཉོན་ཡིད་དང། དགེ་མི་དགེའི་ལས་ཀྱིས་འཇོག་ཅིང། སྤྲོས་པའི་བག་ཆགས། འཇིག་ལྟའི་བག་ཆགས། སེམས་ཀྱི་བག་ཆགས་ཞེས་ཀྱང་བཤད་དོ། །བཞི་ཚན་གཉིས་ལས། དང་པོ་ནི། སྣོད་བཅུད་འགྲུབ་བྱེད་ཀྱི་བག་ཆགས་གཉིས་ལ་རིམ་བཞིན་ཐུན་མོང་དང་ཐུན་མོང་མ་ཡིན་པའི་བག་ཆགས་སམ། ཚོར་མེད་དང་ཚོར་བཅས་ཀྱི་བག་ཆགས་ཞེས་བཤད་པ་ཡིན་ལ། བཞི་ཚན་གཉིས་པ་ནི། གནས་ངན་ལེན་གྱི་བག་ཆགས། ཤིན་ཏུ་སྦྱངས་པའི་བག་ཆགས། སྤྱད་

― GTD002_Page_0304 ―

^{[མ་དཔེ་གཟིགས་ན་འདིར་གནོན།]}

[Full Size]

ཟིན་པའི་བག་ཆགས། སྤྱད་མ་ཟིན་པའི་བག་ཆགས་ཞེས་ཀུན་ཉོན་ཕྱོགས་དང། རྣམ་བྱང་ཕྱོགས་དང། འཕངས་འབྲས་གྲུབ་ཟིན་དུས་ཀྱི་ལས་ཀྱི་ས་བོན་དང་མངོན་བརྗོད་ཀྱི་བག་ཆགས་བཞི་ལ་བཤད་པའི་དང་པོ་རྣམས་གོ་སླའང་སྤྱད་མ་ཟིན་པའི་དོན་ནི་མངོན་བརྗོད་ཀྱི་བག་ཆགས་དེ་ཉིད་ཐོག་མེད་ནས་ལྷན་སྐྱེས་སུ་འབྱུང་ཞིང། གཉིས་སྣང་འཁྲུལ་པའི་ཆ་གཉེན་པོས་མ་སྤངས་བར་དུ་སྤྱད་པས་ཟད་དུ་མེད་པ་ལ་བྱ་ཡི་སྔ་མའི་རིགས་པ་སྦྱར་ནས་འཕངས་འབྲས་ཕྱུང་མ་ཟིན་པའི་ལས་ཀྱི་བག་ཆགས་ལ་འདོད་པ་མི་འཐད་དེ། དཀའ་འགྲེལ་ལས། སྤྱད་མ་ཟིན་པའི་ས་བོན་ནི། མངོན་བརྗོད་ཀྱི་བག་ཆགས་ཏེ། དེ་ནི་ཐོག་མ་མེད་པ་ནས་འབྱུང་བའི་ཕྱིར། ཞེས་སོ། །དགུ་པ་རྣམ་གྲངས་དང། བཅུ་བ་སྒྲ་བཤད་གཉིས་ཕྱོགས་གཅིག་ཏུ་བཤད་ན་གོ་སླ་བས། དེའང་ཤེས་བྱ་ངོ་བོ་ཉིད་གསུམ་གྱི་གནས་ཡིན་པས་ཤེས་བྱའི་གནས་དང། ས་བོན་ཐམས་ཅད་ཀྱི་རྟེན་བྱེད་པས་ས་བོན་ཐམས་ཅད་པ་དང། རྣམ་སྨིན་གྱི་ལུས་ལེན་པས་ན་ལེན་པའི་རྣམ་ཤེས་ཞེས་ཐེག་ཆེན་གྱི་སྡེ་སྣོད་ལས་གསུངས་ལ། ཐེག་དམན་གྱི་སྡེ་སྣོད་ཀྱང་ཕལ་ཆེན་པའི་ལུང་ལས། ཉོན་མོངས་པའི་ཆོས་རྣམས་ཀྱི་རྩ་བ་ཡིན་པས་རྩ་བའི་རྣམ་ཤེས་དང། ས་སྟོན་པའི་ལུང་ལས། འཁོར་བ་ལས་མ་གྲོལ་བ་དེ་སྲིད་དུ་འཇུག་པས་འཁོར་བ་ཇི་སྲིད་པའི་ཕུང་པོ་དང། གནས་བརྟན་པའི་ལུང་ལས། སྲིད་པའི་རྒྱུ་བྱེད་པས་སྲིད་པའི་ཡན་ལག་གི་རྣམ་ཤེས་དང། མང་བཀུར་བའི་ལུང་ལས། ཟག་བཅས་ལས་ཀྱི་རྣམ་སྨིན་ཡིན་པས་རྣམ་པར་སྨིན་པའི་རྣམ་ཤེས་དང། ཐེག་པ་ཐུན་མོང་དུ། འཁོར་འདས་ཀུན་གྱི་གཞི་

― GTD002_Page_0305 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་པས་ཀུན་གཞིའི་རྣམ་ཤེས་ཞེས་བསྟན་པ་རྣམས་རྣམ་གྲངས་ཡིན་ཀྱང་དོན་གཅིག་ཁོ་ནར་མ་ངེས་སོ། །འོ་ན། ཐེག་བསྡུས་ལས། ཅིའི་ཕྱིར་ཉན་ཐོས་ཀྱི་ཐེག་པར་སེམས་དེ་ཀུན་གཞིའི་རྣམ་པར་ཤེས་ཞེས་བྱ་བའམ། ལེན་པའི་རྣམ་པར་ཤེས་པར་མ་བསྟན་ཅེ་ན། ཤེས་བྱ་ཕྲ་མོ་བསྡུས་པའི་ཕྱིར། ཞེས་དང། བསྟན་འདི་འདི་ལྟར་གཞན་ན་མ་མཐོང་ལ། །འདི་དག་བྱང་ཆུབ་ཆེན་པོའི་རྒྱུར་མཐོང་བས། །གནས་ཚུལ་བསྟན་པ་ཁྱད་ཞུགས་གང་ཡིན་པ། །ཐེག་པ་ཆེན་པོ་སངས་རྒྱས་བཀར་འདོད་དོ། །ཞེས་གསུངས་པས་ཀུན་གཞིའི་ཐ་སྙད་ཐེག་པ་ཐུན་མོང་དུ་གསུངས་པ་མི་འཐད་སྙམ་ན་སྐྱོན་མེད་དེ། འདི་ཉིད་ལས། ཐེག་དམན་གཙུག་ལག་རྣམས་སུ་ཡང། །ཀུན་གཞི་རྩ་བའི་རྣམ་ཤེས་དང། །སྲིད་པའི་ཡན་ལག་ཇི་སྲིད་པའི། །ཕུང་བོ་རྣམ་གྲངས་དག་གིས་བསྟན། །ཞེས་གསུངས་ཤིང། སྐྱེ་དགུ་ཀུན་གཞི་ལ་དགའ་བ། ཀུན་གཞི་ལས་ཡང་དག་པར་འབྱུང་བ་ཞེས་སོགས་ལུང་གཅིག་ལས་འཕྲོས་པར་འབྱུང་བའི་ཕྱིར། དེས་ན་ཐེག་བསྡུས་ཀྱི་དོན་ཐེག་དམན་གྱི་སྡེ་སྣོད་ལས་ཐེག་ཆེན་བཞིན་དུ་ཀུན་གཞིའི་རང་བཞིན་འཇོག་བྱེད། འཇུག་ལྡོག་གི་ཚུལ་སོགས་མ་གསུངས་པའི་དོན་ཡིན་གྱི། དེའི་ཐ་སྙད་ཙམ་མེད་པ་མིན་ཏེ། དེ་ཉིད་ལས། བསྟན་འདི་འདི་ལྟར། ཞེས་དང། ཐེག་པ་ཆེན་པོར་ནི། ཀུན་གཞིའི་རྣམ་ཤེས། ལེན་པའི་རྣམ་ཤེས། ཤེས་བྱའི་གནས། ཞེས་སོགས་སྒྲ་དྲང་བོར་རྫོགས་པར་བསྟན་ཅིང། དེ་ལྟ་བུ་ཉན་ཐོས་ཀྱི་ཐེག་པར་བསྟན་པ་མེད་པས། ཞེས་གསུངས་པའི་ཕྱིར་དང། རྫོགས་པར་

― GTD002_Page_0306 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པའི་ཚིག་གི་ནུས་པ་འདོན་ཚུལ་ཡོད་པའི་ཕྱིར། དེས་ན་རང་ལུགས་འདིར་གཙོ་བོའི་དབང་དུ་བྱས་ན་སེམས་ཞེས་པ་ཡང་ཀུན་གཞིའི་མིང་གི་རྣམ་གྲངས་སུ་བཞེད་དེ། སྤྱིར་སེམས་ཡིད་རྣམ་ཤེས་གསུམ་དོན་གཅིག་ཀྱང། ངེས་ཚིག་གིས་བཤད་ན། ཀུན་གཞི་ནི་བག་ཆགས་བསགས་པའི་གཞི་ཡིན་པས་སེམས་དང། ཉོན་ཡིད་ཀྱིས་ཐོག་མེད་ནས་གོམས་པའི་ཤུགས་ཀྱིས་རྟག་ཏུ་ངར་སེམས་པས་ཡིད་དང། འཇུག་ཤེས་ཀྱིས་གཟུགས་སོགས་ཡུལ་དྲུག་སོ་སོར་རིག་པས་རྣམ་ཤེས་ཞེས་བཤད་དགོས་པའི་ཕྱིར། སུམ་ཅུ་པ་ལས། གྱུར་པ་དེ་ཡང་རྣམ་གསུམ་སྟེ། །རྣམ་པར་སྨིན་དང་ངར་སེམས་དང། །ཡུལ་ལ་རྣམ་པར་རིག་པ་འོ། །ཞེས་དང། བློ་བརྟན་གྱི་འགྲེལ་པ་ལས། བག་ཆགས་ཡོངས་སུ་སྨིན་པའི་དབང་གིས་ཇི་ལྟར་འཕངས་པའི་འབྲས་བུ་མངོན་པར་འགྲུབ་པ་ནི་རྣམ་པར་སྨིན་པའོ། །ཉོན་མོངས་པ་ཅན་གྱི་ཡིད་ནི་རྟག་ཏུ་ངར་སེམས་པའི་བདག་ཉིད་ཡིན་པས་ངར་སེམས་པའོ། །གཟུགས་ལ་སོགས་པའི་ཡུལ་སོ་སོར་སྣང་བའི་མིག་ལ་སོགས་པའི་རྣམ་པར་ཤེས་པ་དྲུག་ནི་ཡུལ་ལ་རྣམ་པར་རིག་པ་ཞེས་བྱའོ། །ཞེས་སོ། །དེས་ན་ཀུན་གཞི་ལ་རྣམ་པར་སྨིན་པ་ཞེས་པ་ཡང། སྔ་མའི་ལས་ཀྱི་རྣམ་སྨིན་དེའི་སྟེང་དུ་སྨིན་པ་ལ་མི་བྱེད་ཀྱི། དེའི་སྟེང་དུ་ཡང་ཡང་བསགས་པའི་བག་ཆགས་ཀྱི་ནུས་པ་སླར་སྨིན་པར་འགྱུར་བ་ལ་བྱེད་དེ། དགོངས་འགྲེལ་ལས། དེ་ནི་ལེན་པའི་རྣམ་པར་ཤེས་པ་ཞེས་བྱ་སྟེ། འདི་ལྟར་དེས་ལུས་གཟུང་ཞིང་བླངས་པའི་ཕྱིར་རོ་ནས། སེམས་ཞེས་ཀྱང་བྱ་སྟེ། འདི་ལྟར་དེ་ནི་གཟུགས་དང། སྒྲ་དང། དྲི་དང། རོ་

― GTD002_Page_0307 ―

^{[མ་དཔེ་གཟིགས་ན་འདིར་གནོན།]}

[Full Size]

དང། རེག་བྱ་དང། ཆོས་རྣམས་ཀྱི་ཀུན་ཏུ་བསགས་པ་དང་ཉེ་བར་བསགས་པ་ཡིན་པའི་ཕྱིར་རོ། །ཞེས་དང། རེད་མདའ་བའི་ཀུན་བཏུས་ཊཱིཀྐ་ལས། ཀུན་གཞི་ནི་བག་ཆགས་བསགས་པའི་རང་བཞིན་ཡིན་པས་སེམས་ཉིད་དུ་རིག་པའི་ཕྱིར་རོ། །ཞེས་གསུངས་ལ། རྒྱུ་མཚན་དེའི་ཕྱིར། སུམ་ཅུ་པ་ལས་ཀྱང། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །ཞེས་དང། དུལ་ལྷའི་འགྲེལ་བཤད་ལས། ཀུན་གཞིའི་རྣམ་པར་ཤེས་པ་ལས་དགེ་བ་དང་མི་དགེ་བའི་རྣམ་པར་སྨིན་པར་འགྱུར་ཏེ། དེ་བས་ན་རྣམ་པར་སྨིན་པ་ཞེས་བྱའོ། །ཞེས་གསུངས་པའི་ཕྱིར། བག་ཆགས་བསགས་པས་སེམས་ཞེས་བཤད་ཚུལ་ཡང། ཙི་ཏ་ཞེས་པ་སེམས་ཀྱི་སྐད་དོད་ཡིན་ལ། དེ་ཡང་བྱིངས་མདོ་ལས། ཙིཉྲ་གསོག་པ་ལའོ། །ཞེས་པའི་བྱིངས་བཞག ཉྲ་རྗེས་འབྲེལ་ཡིན་པས་ཕྱིས། ལས་མེད་པ་སོགས་ཀྱི་རྐྱེན་ཀྟ་བྱིན། ཀ་བརྗོད་དོན་ཡིན་པས་ཕྱིས། རྣམ་དབྱེ་དང་པོའི་གཅིག་ཚིག་སི་བྱིན། ས་ར་དག་གིས་རྣམ་བཅད་དོ་ཞེས། ས་རྣམ་བཅད་བྱས་པས་ཙི་ཏཿགྲུབ་ཅིང། དེ་བཞིན་དུ་ཡིད་ཀྱང། མྣཱ་གོམས་པ་ལའོ། །ཞེས་པའི་བྱིངས་བཞག་སྟེ། རྐྱེན་ཏིཔྲ་བྱིན་ནས་བསྒྲུབས་པས་མ་ན་ཏི། ཞེས་པ་རྟག་ཏུ་གོམས་བཞིན་པའི་དོན་དུ་འགྲོ་ལ། རྣམ་ཤེས་ནི། བིད། ཤེས་པ་ལའོ། །ཞེས་པའི་བྱིངས་ལས་བསྒྲུབ་སྟེ། ཉེར་བསྒྱུར་གྱི་དབང་གིས། བི་བེ་དཿ ཞེས་པ་རྣམ་པར་རིག་པར་བྱེད་པ་དང། པྲ་བི་དི་ཏཿ ཞེས་པ་སོ་སོར་རིག་པར་བྱེད་པ་ལ་འཇུག་པའི་ཕྱིར། དེ་ལྟར་

― GTD002_Page_0308 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཡིད་རྣམ་ཤེས་གསུམ་གྱི་ངེས་ཚིག་དང་སྦྱར་ཏེ། སོ་སོར་བཤད་པ་མདོའི་དགོངས་པའང་ཡིན་ཏེ། ལང་གཤེགས་ལས། སེམས་ནི་ཀུན་གཞིའི་རྣམ་ཤེས་ཏེ། །ངར་འཛིན་པ་ནི་ཡིད་ཡིན་ནོ། །ཡུལ་ལ་རྣམ་པར་རིག་པ་གང། །དེ་ནི་འཇུག་པའི་རྣམ་ཤེས་འདོད། །ཅེས་དང། དོན་གསང་ལས། སོགས་པས་ན་སེམས་སོ། །རྟོགས་པས་ན་ཡིད་དོ། །རྣམ་པར་ཤེས་པས་ན་རྣམ་པར་ཤེས་པའོ། །ཞེས་གསུངས་པའི་ཕྱིར། བཅུ་གཅིག་པ་སྒྲུབ་བྱེད་ལ། ལུང་རིགས་གཉིས་ལས། ལུང་ནི་ཆོས་མངོན་པའི་མདོ་ལས། །ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང། །མྱ་ངན་འདས་པའང་འཐོབ་པར་འགྱུར། །ཞེས་དང། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། །ཞེས་དང། ལང་གཤེགས་ལས། དེ་བཞིན་ཀུན་གཞིའི་ཆུ་བོ་ནི། །སྣ་ཚོགས་ཡུལ་གྱི་རླུང་གིས་བསྐྱོད། །རྣམ་ཤེས་སྣ་ཚོགས་རྦ་རླབས་རྣམས། །གང་ཞིང་རབ་ཏུ་འབྱུང་བར་འགྱུར། །ཞེས་དང། རྒྱན་སྟུག་པོ་བཀོད་པར། དེ་བཞིན་ཀུན་གཞིའི་རྣམ་ཤེས་ཀྱང། །རྣམ་ཤེས་བདུན་དང་ལྷན་ཅིག་གནས། །ཞེས་སོགས་དང། ཐེག་དམན་གྱི་ལུང་གོང་དུ་སྨོས་པ་རྣམས་སོ། །རིགས་པ་ཡང་ཕུང་པོ་ལྔའི་རབ་བྱེད་དང་སའི་སྟོད་འགྲེལ་སོགས་ལས་གསུངས་པའི་རྣམ་གྲངས་མང་ཡང། གཙོ་བོ་ནི་བསྡུ་བར། ལེན་དང་དང་པོ་གསལ་བ་དང། །ས་བོན་ལས་དང་ལུས་ཚོར་དང། །སེམས་

― GTD002_Page_0309 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་སྙོམས་པར་འཇུག་པ་དང། །དེ་བཞིན་འཆི་འཕོ་མི་རུང་འགྱུར། །ཞེས་རིགས་པའི་གཙོ་བོ་བརྒྱད་དུ་བསྡུས་ནས་གསུངས་པའི་ནང་ནས་དང་པོ་མི་རུང་བ་དང། གསལ་བ་མི་རུང་བ་དང། ལས་བཞི་མི་རུང་བར་ཐལ་བ་གསུམ་ནི། ཕྱོགས་སྔ་མས། ཀུན་གཞི་འགོག་བྱེད་ཀྱི་གཙོ་བོ། སེམས་ཅན་རྣམས་ནི་རྣམ་པར་ཤེས་པ་རྒྱུད་རེ་རེ་བའོ། །ཞེས་པའི་ལུང་དང་འགལ་བར་ཐལ་བའི་རྩོད་སྤོང་གི་རིགས་པ་ཡིན་ལ་གཞན་ལྔ་ནི་ཀུན་གཞི་ཡོད་པར་སྒྲུབ་པའི་གཏན་ཚིགས་དངོས་སོ། །དང་པོ་ནི། ཀུན་གཞི་མེད་ན་ལུས་ལེན་བྱེད་མེད་དགོས་ཏེ། ཡིད་ཀྱི་རྣམ་ཤེས་དེར་མི་རུང་བའི་ཕྱིར། དེར་ཐལ། འཇུག་ཤེས་རྣམས་ནི། ཡུལ་དབང་ཡིད་བྱེད་གསུམ་འདུས་ནས་གསར་དུ་གྲུབ་དགོས་པས་ཉིང་མཚམས་སྦྱར་མ་ཐག་པའི་ཚེ་འཇུག་ཤེས་རང་ཉིད་མ་སྐྱེས་པའི་ཕྱིར་དང་དེ་ལུས་ལེན་བྱེད་ཡིན་ན་འཛིན་བྱེད་ཀྱང་ཡིན་དགོས་ལ། དེ་རྣམས་ལུས་ཀྱི་ཆ་སོ་སོར་གནས་པས་ངེས་མ་ཟིན་པའི་ཆ་རྣམས་རྒྱུད་ཀྱིས་མ་བསྡུས་པར་འགྱུར་བའི་ཕྱིར་དང། སེམས་མེད་ཀྱི་གནས་སྐབས་སོ་སོའི་མཐར་གསར་དུ་འཇུག་ཤེས་སྐྱེས་པའི་ཚེ་ལུས་བླངས་པར་འདོད་དགོས་པས་ཚེ་གཅིག་ལ་ལུས་ཡང་ཡང་འདོར་ལེན་བྱེད་པར་ཐལ་བའི་ཕྱིར། ཞེས་སོགས་རྟགས་སྒྲུབ་ལྔ་གསུངས་ཤིང་འདི་ལྟར་ན་ཡིད་ཤེས་ཀྱི་གནས་སྙིང་ཁོ་ན་དང། སེམས་མེད་ཀྱི་གནས་སྐབས་སུ་དགེ་སོགས་མེད་པར་འདོད་དགོས་ཞེས་མཁས་པ་ཁ་ཅིག་གསུངས་ཏེ་དཔྱད་པར་བྱའོ། །རིགས་པ་གཉིས་པ་ནི། ཕ་རོལ་པོས་ཀུན་གཞི་ཡོད་ན་རྣམ་ཤེས་དུ་མ་ཅིག་ཅར་མངོན་དུ་འགྱུར་བར་ཐལ་བའི་སྐྱོན་བརྗོད་པ་ལ། དེ་ལྟར་སྐྱེ་བ་འདོད་པ་ཁོ་ན་ཡིན་ཏེ།

― GTD002_Page_0310 ―

^{[མ་དཔེ་གཟིགས་ན་འདིར་གནོན།]}

[Full Size]

དཔེར་ན། གཟུགས་སོགས་ཡུལ་དྲུག་ཁྱད་མེད་དུ་ཉེ་བར་གནས་ཤིང། དབང་པོ་དྲུག་ཀྱང་མཉམ་པར་ཡོད་ན་གཟུགས་ལ་བལྟ་འདོད་སོགས་ཡིད་བྱེད་དྲུག་ཉེ་རིང་ཁྱད་པར་མེད་པའི་ཚེ་མཇུག་དེ་མ་ཐག་རྣམ་ཤེས་དྲུག་ཀ་སྐྱེ་དགོས་པའི་ཕྱིར། དེར་ཐལ། རྒྱུའི་རྐྱེན་ཀུན་གཞི་ཡོད་ལ། དེ་མ་ཐག་རྐྱེན་སྔ་རོལ་དེ་མ་ཐག་འགག་པའི་ཤེས་པ་གང་ཡིན་གྱིས་བྱས་ཆོག་པ་གང་ཞིག །དམིགས་རྐྱེན་བདག་རྐྱེན་གཉིས་ཀྱང་འཛོམ་པས་རྐྱེན་བཞི་ག་ཚང་བའི་ཕྱིར། མ་ཁྱབ་ན། དེའི་ནང་ནས་དང་པོར་གཅིག་ཀྱང་མི་སྐྱེ་བར་ཐལ། རྐྱེན་ཚང་བར་ཁྱད་མེད་བཞིན་དུ་གཅིག་སྐྱེ་ལ་གཅིག་མི་སྐྱེ་བའི་རྒྱུ་མཚན་མེད་པའི་ཕྱིར། བློ་གྲོས་ཡངས་པའི་ལེའུ་ལས། གལ་ཏེ་རླབས་གཅིག་འབྱུང་བའི་རྐྱེན་ཉེ་བར་གནས་པར་གྱུར་ན་རླབས་གཅིག་འབྱུང་ངོ་ནས། ཀུན་གཞིའི་རྣམ་པར་ཤེས་པ་ལ་བརྟེན་ཅིང་རབ་ཏུ་གནས་ནས་གལ་ཏེ་མིག་གི་རྣམ་པར་ཤེས་པ་གཅིག་པུ་འབྱུང་བའི་རྐྱེན་ཉེ་བར་གནས་པར་གྱུར་ན་མིག་གི་རྣམ་པར་ཤེས་པ་གཅིག་པུ་འབྱུང་ངོ་། །གལ་ཏེ་རྣམ་པར་ཤེས་པ་གཉིས་སམ་གསུམ་མམ་ལྔ་འབྱུང་བའི་རྐྱེན་ཉེ་བར་གནས་པར་གྱུར་ན་ཡང་གཉིས་སམ་གསུམ་མམ་ལྔའི་བར་དུ་ཡང་འབྱུང་བར་འགྱུར་རོ། །ཞེས་སོ། །རིགས་པ་གསུམ་པ་ཡང། ཕྱོགས་སྔ་དེ་ཉིད་ལ་འཕངས་པ་སྟེ། དེ་ཡང་རྣམ་ཤེས་དུ་མ་ཅིག་ཅར་སྐྱེ་བ་ཡོད་པར་ཐལ། གཟུགས་མཐོང་བཞིན་པའི་དུས་ཀྱི་དེ་ལ་འཇུག་པའི་ཡིད་ཤེས་གསལ་བ་གཅིག་དང། དེ་འདས་རྗེས་སུ་དྲན་པའི་རྣམ་ཤེས་མི་གསལ་བ་གཅིག་དང་གཉིས་ཡོད་པར་མྱོང་བས་གྲུབ་པའི་ཕྱིར། ཁྱབ་སྟེ། རྣམ་ཤེས་དུ་མ་ཅིག་ཅར་མེད་ན་མིག་ཤེས་མངོན་དུ་གྱུར་དུས་ཀྱི་ཡིད་ཤེས་གསལ་བ་དེ་མེད་དགོས་པའི་ཕྱིར། བཞི་པ་ནི། ཀུན་གཞི་མེད་ན་སེམས་ཅན་གྱི་རྒྱུད་ལ་དགེ་

― GTD002_Page_0311 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་ཀྱི་ས་བོན་མེད་པར་འགྱུར་བའི་ཕྱིར་ཏེ། རྟེན་ཀུན་གཞི་མེད་ཅིང་འཇུག་ཤེས་རྣམས་དེར་མི་རུང་བའི་ཕྱིར། དེར་ཐལ། འཇུག་ཤེས་དགེ་བའི་རྗེས་སུ་མི་དགེ་བ་དང་ཁམས་གོང་འོག་འདས་མ་འདས་སོགས་སྤེལ་ནས་སྐྱེ་བས་ཕན་ཚུན་རྟེན་དུ་མི་རུང་བའི་ཕྱིར་དང། འཇུག་ཤེས་ལ་བསྒོ་ན་བརྒྱལ་བ་སོགས་ཀྱི་ཚེ་འཇུག་ཤེས་མེད་པས་བག་ཆགས་རྒྱུན་ཆད་དེ་ལས་བྱས་པ་ཆུད་ཟོས་པར་འགྱུར་བའི་ཕྱིར། གལ་ཏེ་དེའི་ཚེ་འཇུག་ཤེས་མངོན་གྱུར་དུ་མེད་ཀྱང་ས་བོན་གྱི་ཚུལ་དུ་ཡོད་ཟེར་ན། སྔ་མའི་སྐྱོན་སོ་ན་གནས་ཏེ་ས་བོན་ས་བོན་གྱི་རྟེན་དུ་མི་རུང་བས། དེ་ལ་ཡང་བསྒོ་གཞི་ཞིག་དགོས་པའི་ཕྱིར། ཡང་དེའི་ཚེ་འཇུག་ཤེས་མངོན་གྱུར་ཡོད་ཀྱང་རྒྱུན་གྱི་འཇུག་ཤེས་དང་མི་འདྲ་བར་དམིགས་རྣམ་བྱེ་བྲག་ཏུ་གཅོད་མི་ནུས་པས་ཤིན་ཏུ་ཕྲ་བ་ཞིག་ཟེར་ན་ཡང་མི་འཐད་པར་ཐལ། ངོ་བོ་དམིགས་རྣམ་དེ་ལྟ་བུ་ལ་ས་བོན་ཐམས་ཅད་ཀྱི་རྟེན་བྱེད་པ་ཞིག་ཡིན་ན། ཁྱོད་ཀྱིས་དེར་ཡིད་ཀྱི་རྣམ་ཤེས་ཞེས་བཤད་ཀྱང། དོན་ཀུན་གཞི་ལས་མ་འདས་པའི་ཕྱིར། ཐེག་བསྡུས་ལས། གང་བརྒྱལ་བ་དེ་ས་བོན་ཐམས་ཅད་པ་ཡིན་ན་ནི། དེས་ན་ཡིད་ཀྱི་རྣམ་པར་ཤེས་པ་བྱ་བ་ཀུན་གཞིའི་རྣམ་པར་ཤེས་པ་ཉིད་ཀྱི་རྣམ་གྲངས་ཀྱི་མིང་དུ་གཞུག་པ་ཡིན་ནོ། །ཞེས་གསུངས་པའི་ཕྱིར། ས་བོན་མེད་ན་ཀུན་བྱང་ཐམས་ཅད་མེད་དགོས་པས་རིགས་པ་བཞི་པ་འདི་ཉིད་ལུགས་འདིའི་གཏན་ཚིགས་གཙོ་བོ་ཞིག་གོ །ལྔ་པ་ཡང་རྣམ་ཤེས་དུ་མ་ཅིག་ཅར་འབྱུང་བ་མེད་ན་ལས་མི་རུང་བར་འགྱུར་ཏེ། དཔེར་ན། ལམ་དུ་འགྲོ་བའི་ཚེ་སྣོད་ཀྱི་རྣམ་རིག་

― GTD002_Page_0312 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་འཇིག་རྟེན་དུ་སྣང་བ་དང། གནས་ཀྱི་རྣམ་རིག་ནང་སེམས་ཅན་དུ་སྣང་བ་དང། ངའོ་སྙམ་པའི་རྣམ་རིག་བདག་ཏུ་སྣང་བ་དང། ཡུལ་གྱི་རྣམ་རིག་གཟུགས་སོགས་སོ་སོར་སྣང་བ་སྟེ་གང་དུ་འགྲོ་བ་དང། འགྲོ་བ་པོ་དང། འགྲོ་བའི་བྱ་བ་རྣམས་མ་ཤར་བར་འགྲོ་འོང་སོགས་ཀྱི་ལས་སམ་བྱ་བ་བྱེད་ཚུལ་མེད་པ་གང་ཞིག །དེ་དག་རྣམ་ཤེས་སོ་སོ་ལ་འཆར་བ་མ་གཏོགས་སེམས་གཅིག་ལ་སྐྱེ་མཆེད་ཐ་དད་པའི་སྣང་ཚུལ་དུ་མ་མི་རིགས་པའི་ཕྱིར། དྲུག་པ་ནི། ཀུན་གཞི་མེད་ན་དགེ་སེམས་ལྟ་བུ་མངོན་དུ་གྱུར་བའི་ཚེ་ལུས་ལ་ཕན་གནོད་བྱས་པས་མྱོང་བྱེད་ཀྱི་ལུས་ཚོར་མི་སྐྱེ་བར་འགྱུར་ཏེ། ཡིད་ཤེས་དགེ་བའི་དམིགས་པ་ལ་གཏད་པས་དེ་ཡིད་ལ་མི་བྱེད་ཅིང། ཀུན་གཞི་མེད་པས་དེ་ལ་རྟེན་སྦྱིན་པའམ་སློང་བའི་རྒྱུ་མེད་པའི་ཕྱིར། དཀའ་འགྲེལ་ལེགས་བཤད་རྒྱ་མཚོ་ལས། མྱོང་བ་དེ་ལ་རྟེན་སྦྱིན་པའི་སྒོ་ནས་ལུས་ལ་སྐྱེ་བར་འཇུག་པའི་རྟེན་མེད་པས། ཞེས་གསུངས་པའི་ཕྱིར། བདུན་པ་སེམས་མེད་སྙོམས་འཇུག་མི་རུང་བ་ནི། སེམས་མེད་སྙོམས་འཇུག་གཉིས་ལ་ཞུགས་པའི་གང་ཟག་གིས་ལུས་རྟེན་དེ་རྣམ་ཤེས་ཀྱིས་བོར་བས་ཤི་ལུས་སུ་འགྱུར་ཏེ། དེ་དང་རྟེན་བརྟེན་པའི་འཇུག་ཤེས་མེད་ལ་ཀུན་གཞི་མ་བཞག་པའི་ཕྱིར། འདོད་ན། ཆོས་སྦྱིན་མའི་མདོ་ལས། དྲོད་དང་མ་བྲལ་ཞིང་སྲོག་གི་དབང་པོ་དང་མ་བྲལ་བས། དེའི་རྣམ་པར་ཤེས་པ་ལུས་དང་མ་བྲལ་བ་ཡིན་ནོ། །ཞེས་སོགས་དང་འགལ་ཞིང་སྙོམས་འཇུག་གཉིས་ཀྱང་མེད་པར་འགྱུར་ཏེ། དེ་ལ་ཞུགས་པའི་གང་ཟག་མེད་པའི་ཕྱིར། དེ་བཞིན་དུ་མཉམ་གཞག་ཟག་མེད་ཀྱང་མི་

― GTD002_Page_0313 ―

^{[མ་དཔེ་གཟིགས་ན་འདིར་གནོན།]}

[Full Size]

འཐད་པར་འགྱུར་ཏེ། དེ་ལ་གནས་པའི་གང་ཟག་མེད་པའི་ཕྱིར། དེར་ཐལ། ཡིད་ཤེས་ཟག་མེད་ཡིན་པས་ཁམས་གསུམ་གང་རུང་གི་འགྲོ་བར་མི་འཐད་ཅིང། དེ་ལས་གཞན་གང་ཟག་གི་མཚན་གཞི་མེད་པའི་ཕྱིར་ཏེ། ཐེག་བསྡུས་ལས། དེ་ཉིད་ན་འཇིག་རྟེན་ལས་འདས་པའི་སེམས་མངོན་པར་བྱེད་ཚེ་དེ་མ་ཡིན་པ་གཞན་འཇིག་རྟེན་པའི་སེམས་མེད་པར་འགྱུར་བས་དེའི་འགྲོ་བ་ལྡོག་པ་ཉིད་དུ་འགྱུར་རོ། །ཞེས་གསུངས་པའི་ཕྱིར། བརྒྱད་པ་ནི། ཀུན་གཞི་མེད་ན། རིམ་གྱིས་འཆི་འཕོ་ཞིང་དྲོད་སྡུད་པ་མི་རིགས་པར་འགྱུར་ཏེ། བྱེ་བཤད་ལས། ཀུན་གཞིའི་རྣམ་པར་ཤེས་པ་ནི་ཁོག་པ་ཐམས་ཅད་ལ་ཁྱབ་པའོ། །ཞེས་པ་ལྟར་དེས་ལུས་ཀུན་བཟུང་སྟེ། ནམ་འཕེན་པ་ཟད་པ་ན་ལུས་ཀྱི་ཆ་གང་ཀུན་གཞིའི་རྟེན་དུ་མི་རུང་བར་གྱུར་པ་དེ་ནས་བསྡུས་པས་རིམ་པ་བཞིན་དུ་དྲོད་ཀྱང་སྡུད་པའི་ཕྱིར། དེར་ཐལ། དབང་ཤེས་རྣམས་ལུས་ཀྱིས་ཕྱོགས་རེ་བ་ཙམ་ལ་བརྟེན་པ་གང་ཞིག །ཡིད་ཤེས་དེ་ལྟར་མིན་ཡང་ཀུན་གཞི་ལྟར་ཆ་ཐམས་ཅད་དུ་ཁྱབ་ནས་འཛིན་པའི་ནུས་པ་མེད་པའི་ཕྱིར། ཕྱི་མ་དེར་ཐལ། ཡིད་ཤེས་གསལ་བར་ཡོད་བཞིན་དུ་དྲོད་སྡུད་པ་དུ་མ་ཡོད་པའི་ཕྱིར། བསྡུ་བ་ལས། འཆི་བའི་རྣམ་པར་ཤེས་པ་ལུས་ཀྱི་སྟོད་དམ་སྨད་དུ་དྲོད་ཡལ་བར་བྱེད་ཅིང་འདོར་ན་ཡིད་ཀྱི་རྣམ་པར་ཤེས་པ་ནི་ནམ་ཡང་མི་འབྱུང་བ་མ་ཡིན་ཏེ། ཞེས་དང། དཀའ་འགྲེལ་ལས། ཡིད་ཤེས་ནི་ལུས་ཀྱི་ཆ་ཤས་ལ་མི་གནས་ཀྱང། ཞེས་གསུངས་པའི་ཕྱིར། འདིས་སྙིང་ཁོ་ནར་གནས་པར་འདོད་པ་ཁེགས་སོ། །

― GTD002_Page_0314 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པ། མཐའ་དཔྱད་པ་ལ། ས་བཟང་མ་ཏི་པཎ་ཆེན་གྱི་གསུང་ན་རེ། ཀུན་གཞི་ལ་ཀུན་རྫོབ་པ་རྣམ་ཤེས་དང། དོན་དམ་པ་ཡེ་ཤེས་གཉིས་ཡོད་ལ། འོན་ཀྱང་དེ་གཉིས་དོན་གཅིག་ཏུ་འདོད་པ་བདེན་གཉིས་ཀྱི་རྣམ་དབྱེ་མ་ཤེས་པ་ཡིན་པས། ཤིན་ཏུ་ཁྱད་པར་ཆེ་བར་འདོད་དེ། དེ་ཉིད་ཀྱི་ཀུན་བཏུས་འགྲེལ་པ་ལས། གཞུང་ལུགས་ཆེན་མོ་རྣམས་ཀྱི་དགོངས་པ་ཤེས་པ་ལ་ཀུན་རྫོབ་དང། དོན་དམ་དང། ཆོས་ཅན་དང། ཆོས་ཉིད་དང། རྣམ་ཤེས་དང། ཡེ་ཤེས་ལ་སོགས་པའི་རྣམ་པར་དབྱེ་བ་ཤེས་དགོས་ཤིང། ཁྱད་པར་སེམས་དང་ཀུན་གཞི་ལ་ཡང་བདེན་གཉིས་ཀྱི་རྣམ་དབྱེ་ཤེས་དགོས་པས། ཞེས་པ་ནས། ཀུན་གཞི་ལའང་ཆ་གཉིས་ཀྱི་ཀུན་རྫོབ་པ་ཆོས་ཅན་རྣམ་ཤེས་ཀྱི་ཆ་ནི་གང་རྣམ་པར་ཤེས་པ་ཚོགས་བརྒྱད་ཀྱི་ཡ་གྱལ་དུ་གྱུར་པ་དེ་ཉིད་ཡིན་ལ། དོན་དམ་ཆོས་ཉིད་ཡེ་ཤེས་ཀྱི་ཆ་ནི་དེ་བཞིན་གཤེགས་པའི་སྙིང་པོ་ཉིད་ཡིན་ཏེ། རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །སྙིང་པོ་ཀུན་གཞིར་བསྟན་པ་ཡང། །བློ་ཞན་རྣམས་ཀྱིས་མི་ཤེས་སོ། །ཞེས་སོགས་གསུངས་པ་ལྟར་རོ། །ཞེས་དང། བཅོམ་ལྡན་འདས་ཀྱིས་ཆོས་མངོན་པའི་ཞེས་པ་ནས། མྱ་ངན་འདས་པའང་ཐོབ་པར་འགྱུར། །ཞེས་གང་གསུངས་པ་དེ་ཉིད། གསུང་གཅིག་ཉིད་དུ་གསུང་ན་ཡང། །དུ་མ་ཉིད་དུ་སོ་སོར་གོ །ཞེས་པ་ལྟར་གདུལ་བྱའི་སྐལ་བ་ཇི་ལྟ་བ་བཞིན་དུ་གཉིས་ཀ་སྦྱར་ཏེ་བཤད་དུ་རུང་བས། འཕགས་པ་འདི་ཉིད་ཀྱི་ཐེག་པ་ཆེན་པོ་བསྡུས་པར། ཀུན་

― GTD002_Page_0315 ―

^{[མ་དཔེ་གཟིགས་ན་འདིར་གནོན།]}

[Full Size]

གཞིའི་རྣམ་པར་ཤེས་པའི་སྒྲུབ་བྱེད་དུ་སྦྱར་ནས་བཤད་ཅིང། ཐེག་པ་ཆེན་པོ་རྒྱུད་བླ་མའི་འགྲེལ་པར་ཀུན་གཞི་དེ་བཞིན་གཤེགས་པའི་སྒྲུབ་བྱེད་དུ་མདོ་དང་སྦྱར་ནས་བཤད་པ་ཡིན་ནོ། །ཞེས་དང། འགའ་ཞིག་དེ་གཉིས་གཅིག་པར་བཤད་པ་ནི། གང་དག་བདེན་པ་དེ་གཉིས་ཀྱི་ཞེས་པ་ནས། སྦུན་པ་དང་སྙིང་པོ་ལྟར་ཁྱད་པར་ཤིན་ཏུ་ཆེ་བར་གནས་པའི་ཕྱིར་རོ། །དེ་བས་ན་གནས་སྐབས་ཐམས་ཅད་དུ་བདེན་གཉིས་ཀྱི་རྣམ་དབྱེ་ལ་མཁས་པར་བྱའོ། །ཞེས་སོ། །དེ་ལ་འོ་ན་སེམས་ཙམ་པས་ཀུན་གཞི་དང་དེ་བཞིན་གཤེགས་པའི་སྙིང་པོ་གཉིས་ཀ་མདོ་དེའི་བསྟན་དོན་དུ་བྱས་ནས་ཁས་ལེན་པར་ཐལ། དེ་ལ་བདེན་པ་གཉིས་ཀྱི་ཆ་ཕྱེ་ནས་དེ་གཉིས་སོ་སོར་བཞག་པའི་ཕྱིར། རྟགས་སོང། ཁྱབ་སྟེ། གྲུབ་མཐའ་སྨྲ་བ་སུས་ཀྱང་རང་ལུགས་ཀྱི་བདེན་གཉིས་གཅིག་གིས་གཅིག་མི་འགོག་པས་འགལ་མེད་འཐད་ལྡན་དུ་ཁས་ལེན་དགོས་པའི་ཕྱིར། སྟོང་ཐུན་ལས། གྲུབ་མཐའ་སྨྲ་བ་སུའང། ཁོའི་བདེན་གཉིས་ཀྱི་རྣམ་གཞག་ལ་གྲུབ་མཐའ་སྨྲ་བ་གཞན་གྱིས་འགལ་འདུ་བརྗོད་པ་ཡོད་ཀྱི། རང་གིས་བཞག་པའི་བདེན་གཉིས་ཀྱི་རྣམ་གཞག་ལ་འགལ་འདུ་ཡོད་པར་རང་གིས་ཁས་བླངས་ནས། དོན་དམ་དཔྱོད་པའི་ཚད་མས་ཀུན་རྫོབ་འགོག་པར་སྨྲ་བ་སུ་ཡང་མེད་དོ། །ཞེས་གསུངས་པའི་ཕྱིར་དང། ཀུན་གཞི་གཉིས་པོ་དེ་ཆོས་ཉིད་རྣམ་འབྱེད་ལས། གང་ཞིག་ཤེས་ནས་འགའ་ཞིག་སྤང་ཕྱིར་དང། །གཞན་གང་ཞིག་ནི་མངོན་སུམ་ཉིད་བྱ་བ། ཞེས་སོ་སོར་འབྱེད་རྒྱུའི་ཆོས་དང་ཆོས་ཉིད་ཀྱི་གཙོ་བོར་ཁྱོད་ཀྱིས་བཞག་པའི་ཕྱིར། གོང་དུ་འདོད་

― GTD002_Page_0316 ―

^{[མ་དཔེ་གཟིགས་ན་འདིར་གནོན།]}

[Full Size]

ན། རྒྱུད་བླ་རྩ་འགྲེལ་ནས་བཤད་པ་ལྟར་གྱི་དེ་བཞིན་གཤེགས་པའི་སྙིང་པོ་དེ་ལུགས་འདིར་ཁས་ལེན་པར་ཐལ། དེ་དོན་དམ་བདེན་པར་འདོད་པའི་ཕྱིར། འདོད་ན། རྒྱུ་མཚན་གསུམ་གྱི་སྒོ་ནས་བདེ་གཤེགས་སྙིང་པོས་སེམས་ཅན་ཐམས་ཅད་ལ་ཁྱབ་པར་འདོད་པར་ཐལ། རྒྱུད་བླའི་འགྲེལ་པར། རྫོགས་སངས་སྐུ་ནི་འཕྲོ་ཕྱིར། ཞེས་སོགས་དང། ཆོས་མངོན་པའི་ལུང་སྔར་དྲངས་པ་གཉིས་དོན་གཅིག་ཏུ་བཤད་པའི་ཕྱིར། འདོད་མི་ནུས་ཏེ། སྐབས་འདིར་མཐར་ཐུག་ཐེག་པ་གསུམ་དུ་གྲུབ་པའི་ཕྱིར། གཞན་ཡང། སེམས་ཅན་གྱི་སེམས་ཀྱི་ཆོས་ཉིད་ལ་རིགས་སུ་འཇོག་པར་ཐལ། རྒྱུད་བླ་མ་ལས། མ་དག་མ་དག་དག་པ་དང། །ཞེས་སོགས་དང། དཀོན་བརྩེགས་ལས། རིགས་དེ་ནི་ཐམས་ཅད་ཀྱི་ཚེ་ཆོས་ཀྱི་དེ་བཞིན་ཉིད་ཡིན་པས་ཆོས་ཀྱི་རོ་གཅིག་ཏུ་གྱུར་པ་ཉིད་ཀྱིས་རྟག་པའོ། །ཞེས་སོགས་ཀྱིས་ཆོས་ཉིད་ལ་ཁམས་དང་བདེ་གཤེགས་སྙིང་པོར་བཤད་ཅིང་ཁྱོད་ཀྱིས་ཀྱང་དེ་དོན་དམ་བདེན་པར་འདོད་པའི་རྩ་བ་དེ་ལ་ཐུག་པའི་ཕྱིར། འདོད་མི་ནུས་ཏེ། བྱང་ས་ལས། རང་བཞིན་གྱི་གནས་པའི་རིགས་ནི་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། ཞེས་པ་ནས། རིགས་དེ་ནི་ས་བོན་ཞེས་ཀྱང་བྱ། ཞེས་དང། ཉན་ས་ལས། དེ་ནི་ལུས་ལས་ཁྱད་པར་དུ་གྱུར་པ་དང། སྐྱེ་མཆེད་དྲུག་གིས་ཟིན་པ། ཞེས་སོགས་ཀྱིས་ཁྱད་ཆོས་བཞི་ཚང་བའི་སེམས་སྟེང་གི་ས་བོན་ཞིག་ཏུ་བཤད་པའི་ཕྱིར་དང། ཉི་སྣང་ལས། དེ་དག་གི་རང་བཞིན་དུ་གནས་པའི་རིགས་ལ་རང་བཞིན་དུ་གནས་པའི་དོན་བརྗོད་དགོས་སོ། །ཞེས་

― GTD002_Page_0317 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་ཀྱིས་སེམས་ཙམ་པ་དང་རྩོད་ཚུལ་ཡོད་པའི་ཕྱིར། མདོ་དང་འཕགས་པའི་བཤད་ཚུལ་དེའང་ཁྱོད་ཀྱི་ཤེས་བྱེད་དུ་མི་རུང་བར་ཐལ། མདོ་ལས། བདེན་གྲུབ་དང་བདེན་མེད་གཉིས་ཀར་བཤད་པ་ཡོད་ཀྱང་གདུལ་བྱ་སོ་སོའི་དབང་དུ་བྱས་པ་ཡིན་ལ། འཕགས་པའི་གསུངས་ཚུལ་ཡང་སྐབས་སོ་སོ་ལ་མ་འདྲེས་པར་སྦྱོར་དགོས་པའི་ཕྱིར། ཕྱི་མ་དེར་ཐལ། དེར་རྒྱུད་བླའི་འགྲེལ་པར་དེ་བཞིན་གཤེགས་པའི་སྙིང་པོ་བཤད་ཀྱང། ཀུན་གཞི་ཟུར་ཙམ་ཡང་མ་བཤད། ཐེག་བསྡུས་སུ་དེ་བཞིན་གཤེགས་པའི་སྙིང་པོ་མ་བཤད་པར་ཀུན་གཞི་ལ་བཤད་པ་མ་གཏོགས་ཕྱོགས་གཅིག་ཏུ་བསྡེབས་ནས་ལུགས་གཅིག་ལ་མ་སྦྱར་བའི་ཕྱིར། དེར་མ་ཟད་གདུལ་བྱའི་སྐལ་བ་བཞིན་དུ་སོ་སོར་སྟོན་དགོས་པ་ཡང་རང་ཚིག་དང་འགལ་ཏེ། དེ་བཞིན་གཤེགས་པའི་སྙིང་པོ་དོན་དམ་དུ་བཤད་པའི་དོན་དམ་ཡང་སེམས་ཙམ་པའི་རང་ལུགས་ཀྱི་དོན་དམ་ལ་བྱེད་དགོས་པས་དེ་དག་ཀུན་གཞི་གཉིས་སྟོན་ཡུལ་གྱི་གདུལ་བྱ་ལ་ཁྱད་པར་ཅུང་ཟད་ཀྱང་མེད་པའི་ཕྱིར། གཞན་ཡང་དེ་དོན་དམ་ཡང་ཡིན་ལ་ཡེ་ཤེས་ཀྱང་ཡིན་པར་སྨྲ་བ་ནི་འཐད་ལྡན་སོགས་ཀྱི་ཚིག་ཟིན་འགའ་ཞིག་ལ་བརྟེན་ནས་སེམས་ཙམ་པའི་ཆོས་ཉིད་སེམས་སུ་འདོད་ཅེས་སྨྲ་མཁན་མང་དུ་བྱུང་བའི་ཤན་དང། ཁྱད་པར་དུ་ཇོ་ནང་པའི་ངེས་དོན་རྒྱ་མཚོ་ལས་དག་པ་ཡེ་ཤེས་ཀྱི་ཀུན་གཞི་འཁོར་བའི་ཆོས་ཐམས་ཅད་ཀྱིས་སྟོང་པའི་གཞན་སྟོང་རྟག་བརྟན་གཡུང་དྲུང་ཐེར་ཟུག་དང། ཞེས་པ་དེ་ཉིད་ཀྱི་དྲི་བྲོ་བར་སྣང་ཡང་ལེགས་བཤད་སྙིང་པོའི་མཆན་འགྲེལ་

― GTD002_Page_0318 ―

^{[མ་དཔེ་གཟིགས་ན་འདིར་གནོན།]}

[Full Size]

དང། བདེན་བཞིའི་རྣམ་བཤད་དུ་དགག་ཟིན་པས་མ་སྤྲོས་ལ། ལུགས་འདིར་ཡང་ཆོས་ཉིད་ལ་དགག་བྱ་བཅད་ཙམ་གྱི་མེད་དགག་དགོས་པ་ནི། དགོངས་འགྲེལ་ལས། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་ཞེས་དང། ཐེག་བསྡུས་ལས། ཡོངས་སུ་གྲུབ་པའི་མཚན་ཉིད་གང་ཞེ་ན། གང་གཞན་གྱི་དབང་གི་མཚན་ཉིད་ལ་དོན་གྱི་མཚན་ཉིད་དེ་གཏན་མེད་པ་ཉིད་དོ། །ཞེས་སོགས་དུ་མས་འགྲུབ་བོ། །ཡང་ཁ་ཅིག །ཀུན་གཞིའི་ངོ་བོ་རྟོག་པར་འདོད་ཟེར་ན་མི་འཐད་པར་ཐལ། དེ་རྟོག་མེད་ཀྱི་བློ་ཡིན་པའི་ཕྱིར། དེར་ཐལ། གསལ་སྣང་ཅན་གྱི་བློ་ཡིན་པའི་ཕྱིར། དེར་ཐལ། རང་ཡུལ་གསལ་བར་སྣང་ཡང་དེ་ལ་ངེས་པ་འདྲེན་མི་ནུས་པའི་སྣང་ལ་མ་ངེས་ཀྱི་བློ་ཡིན་པའི་ཕྱིར། སུམ་ཅུ་པ་ལས། རྣམ་པར་རིག་པ་མི་རིག་པ། །ཞེས་དང། དཀའ་འགྲེལ་ལས། སྣོད་བཅུད་དེ་དག་སྣང་ཡང་རང་གིས་ཀྱང་མི་ངེས་ལ་རྗེས་སུ་ངེས་པ་ཡང་འདྲེན་མི་ནུས་པ། ཞེས་གསུངས་པའི་ཕྱིར། དེ་ལ་ཁོ་ན་རེ། ཀུན་གཞི་ལ་ཡུལ་གསལ་བར་སྣང་བ་མི་འཐད་པར་ཐལ། དེ་ཡུལ་འཆར་ཚུལ་རྟོག་པ་ལས་ཀྱང་མི་གསལ་བ་ཞིག་ཡིན་པའི་ཕྱིར། སྡེ་བདུན་ཡིད་ཀྱི་མུན་སེལ་ལས། རྣམ་པ་ཤིན་ཏུ་མི་གསལ་བ་ཐ་ན་ཡིད་ཤེས་རྟོག་བཅས་ལས་ཀྱང་མི་གསལ་བར་འདོད་དགོས་པའི་ཕྱིར་རོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ཀུན་གཞི་ལ་ཡུལ་གསལ་བར་མི་སྣང་བའི་དོན་མིན་གྱི་དེ་རང་ཉིད་ངོ་བོ་ཕྲ་བའི་དབང་གིས་གཞན་ལ་འཆར་དཀའ་བའི་དོན་ཡིན་པའི་ཕྱིར། རྟོག་གེ་འབར་བ་ལས། འདིའི་ཞེའམ། འདི་ནའོ། །ཞེས་

― GTD002_Page_0319 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་པའི་མཁས་པ་རྣམས་ཀྱི་ཡུལ་ཡང་མ་ཡིན་པས་རྣམ་པ་ཡང་དག་པར་མི་རིག་པའོ། །ཞེས་སེམས་ཙམ་གྱི་འདོད་པ་བརྗོད་པའི་ཐད་དུ་གསུངས་པའི་ཕྱིར། བྱས་པ་ལ་ཁོ་ན་རེ། དེ་མ་འབྲེལ་བར་ཐལ། དེ་ལྟ་ན་ཡིད་ཤེས་རྟོག་པ་ལས་ཀྱང་ཟེར་དོན་མེད་པའི་ཕྱིར་ཟེར་ན། སྐྱོན་མེད་དེ། དབང་པོའི་མངོན་སུམ་ལས་ཡིད་ཤེས་རྟོག་པ་འཆར་དཀའ་ཞིང། འདི་དེ་ལས་ཀྱང་འཆར་དཀའ་བའི་ཕྱིར། དེས་ན་ཁ་ཅིག །མི་རིག་པ་ཞེས་པའི་དོན་དེས་རང་ཡུལ་ངེས་མི་ནུས་པ་ཁོ་ནར་འཆད་པ་མི་འཐད་པར་ཐལ། དེའི་དོན་ཀུན་གཞིས་ཕར་རང་ཡུལ་ངེས་མི་ནུས་པ་དང། ཀུན་གཞི་རང་ཉིད་ཚུར་གཞན་གྱིས་ངེས་དཀའ་བ་གཉིས་ཀ་ལ་བཤད་དགོས་པའི་ཕྱིར་ཏེ། སུམ་ཅུ་པའི་འགྲེལ་པ་ལས། དེ་ནི་འདི་ལ་འདིའོ་ཞེས་ཚོར་བའི་རྣམ་པར་མི་རིག་པས་དེའི་ཕྱིར་དེ་ནི་ལེན་པ་མི་རིག་པ་ཞེས་བྱའོ། །ཞེས་དང། དེ་ལ་འདིའོ་ཞེས་རིག་པར་མི་ནུས་པས་དེའི་ཕྱིར་མི་རིག་པ་ཞེས་བྱའོ། །ཞེས་བཤད་ཚུལ་གཉིས་བཀོད་པ་ལྟར་དུལ་ལྷའི་འགྲེལ་བཤད་དུ་ཡང་གསུངས་པའི་ཕྱིར། ཁ་ཅིག་ན་རེ། དབང་དོན་བག་ཆགས་གསུམ་ག་ཀུན་གཞི་ལ་གསལ་བར་སྣང་ཟེར་ན། དབང་དོན་གཉིས་སྣང་ཡང་བག་ཆགས་དེ་ལ་མི་སྣང་བར་ཐལ། བག་ཆགས་དེའི་དམིགས་པར་བཤད་པ་ནི་བག་ཆགས་ཀྱི་དབང་གིས་ཡུལ་སྣང་བ་ཙམ་ལ་དགོངས་པ་ཡིན་པའི་ཕྱིར། དེར་ཐལ། དཀའ་འགྲེལ་ལས། ས་བོན་དེ་སྣང་ནས་ཡུལ་དུ་མི་འགྱུར་ཡང་དེའི་དབང་གིས། ཞེས་སོགས་གསུངས་པའི་ཕྱིར། བྱས་པ་ལ་ཁོ་ན་རེ། འོ་ན་གཟུགས་མེད་ཀྱི་ཀུན་གཞིའི་སྣང་ཡུལ་

― GTD002_Page_0320 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པར་ཐལ། དེར་གྱུར་བའི་དབང་དོན་གཉིས་མེད། བག་ཆགས་ཀྱང་མེད་པའི་ཕྱིར། རྟགས་ཕྱི་མ་ཁས། དང་པོ་གྲུབ་སྟེ། ཁམས་དང་ས་དེའི་དབང་དོན་གཉིས་མེད་ལ། ས་གཞན་གྱི་དེ་ཡུལ་དུ་མི་བྱེད་པའི་ཕྱིར། འདོད་མི་ནུས་ཏེ། སྣང་ཡུལ་ཤེས་པ་ཀུན་ལ་ཡོད། །ཞེན་ཡུལ་རྟོག་པའི་སྒེར་ཆོས་ཡིན། །ཞེས་བཤད་པའི་ཕྱིར་ཟེར། དེ་ལ་ཁ་ཅིག་ན་རེ། དེ་རིགས་པའི་རྗེས་འབྲང་གི་བཤད་ཚུལ་ཡིན་ལ། སྐབས་འདིར་ཤེས་པ་ཡིན་ན་རང་གི་སྣང་ཡུལ་ཡོད་མི་དགོས་པར་ཐལ། དཀའ་འགྲེལ་དུ། ཐེག་བསྡུས་ལས། འདས་སོགས་དེ་བཞིན་རྨི་ལམ་དང། །གཟུགས་བརྙན་རྣམ་པ་གཉིས་པོ་ཡང། །དམིགས་པ་ཡོད་པ་མ་ཡིན་པས། །དེ་ལ་དམིགས་པ་རུང་ཕྱིར་རོ། །ཞེས་གསུངས་པ་ལྟར། ཤེས་པ་ཐམས་ཅད་དམིགས་པ་ཡོད་པ་ལ་ལྟོས་མི་དགོས་ཀྱི། ཞེས་པ་ནས། ལས་ཀྱི་སྟོབས་ཀྱིས་འཇུག་གིས་སྣང་བའི་དམིགས་པ་ནི་ཡོད་པ་མ་ཡིན་ནོ་ཞེས་གསུངས་པའི་ཕྱིར་ན་མ་ཁྱབ་སྟེ། དེའི་དོན་ཤེས་པའི་དམིགས་པ་ལ་ཕྱི་རོལ་གྱི་དངོས་པོ་ཞིག་ཡོད་མི་དགོས་ཞེས་པའི་དོན་ཡིན་པའི་ཕྱིར་ཏེ། དེ་ལྟ་མ་ཡིན་ན་དེའི་མཐུན་དཔེར་བཀོད་པའི་རྨི་ལམ་གྱི་ཤེས་པ་སོགས་ལའང་སྣང་ཡུལ་མེད་པར་ཐལ་བའི་སྐྱོན་འབྱུང་བའི་ཕྱིར་དང། ཡུལ་བཞི་གང་ཡང་མེད་ན་ཡུལ་རིག་པ་བློའི་མཚན་ཉིད་ཡིན་པས་ཤེས་པར་མི་རུང་ཞིང་ཡུལ་ཅན་ཙམ་ཡང་མ་ཡིན་པར་འགྱུར་བའི་ཕྱིར། གཞན་ཡང་དེ་མི་འཐད་པར་ཐལ། དེ་ལ་སྣང་རྒྱུའི་དམིགས་པ་ཞིག་ཡོད་ཀྱང་དབང་དོན་བག་ཆགས་གསུམ་གང་རུང་སྣང་མི་དགོས་པའི་ཕྱིར། དང་པོ་གྲུབ་སྟེ། སུམ་ཅུ་བའི་འགྲེལ་པ་ལས། དམིགས་པ་

― GTD002_Page_0321 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པ་དང། རྣམ་པ་མེད་པའི་རྣམ་པར་ཤེས་པ་ནི་མི་རུང་ངོ༌། །ཞེས་དང། དུལ་ལྷའི་འགྲེལ་བཤད་ལས། ཀུན་གཞིའི་རྣམ་པར་ཤེས་པ་དམིགས་པ་དང། རྣམ་པ་མེད་པ་ནི་ཁོ་བོ་ཡང་མི་འདོད་མོད་ཀྱི། ཞེས་གསུངས་པའི་ཕྱིར། གཉིས་པ་གྲུབ་སྟེ། གཟུགས་མེད་པའི་མིང་གཞིའི་ཕུང་པོ་དེ་ཀུན་གཞིའི་དམིགས་པར་འཇོག་པའི་ཕྱིར། དེར་ཐལ། དེ་ནི་ལེན་པ་དག་དང་གནས། །རྣམ་པར་རིག་པ། ཞེས་ཀུན་གཞིའི་དམིགས་པ་ལ་ནང་གི་ཉེ་བར་ལེན་པ་དང། ཕྱི་སྣོད་ཀྱི་གནས་གཉིས་སུ་ཕྱེ་སྟེ། སྔ་མ་ལ་བག་ཆགས་དབང་པོ་མིང་གསུམ་བཞག་པའི་ཕྱིར། སུམ་ཅུ་པའི་འགྲེལ་པ་ལས། བག་ཆགས་དང། གནས་དང་བཅས་པའི་དབང་པོའི་གཟུགས་དང་མིང་སྟེ། དེའི་དམིགས་པ་ཤིན་ཏུ་ཕྲ་བའི་ཕྱིར་རོ། །ཞེས་གསུངས་པའི་ཕྱིར། ཁྱབ་སྟེ། དེའི་མིང་ཞེས་པ་གཟུགས་མེད་ལ་སྦྱར་དགོས་པའི་ཕྱིར། དེ་ཉིད་ལས། གཟུགས་མེད་པའི་ཁམས་ན་ནི། གཟུགས་སུ་རྣམ་པར་སྨིན་པ་མངོན་པར་མི་འགྲུབ་པས་མིང་གཞི་ལེན་པ་ཉིད་དེ། ཞེས་གསུངས་པའི་ཕྱིར། གཞན་ཡང། དེ་ལྟར་འཐད་པར་ཐལ། ལུས་དང་དབང་པོ་སོགས་དམིགས་པར་འཇོག་པའི་དོན་ཡང། དེ་དག་བླང་བྱའི་ཕུང་པོ་དང། ཀུན་གཞི་ལེན་པ་པོའི་གང་ཟག་ཡིན་པའི་རྒྱུ་མཚན་གྱིས་ཡིན་ལ། དེ་འདིར་ཡང་མཚུངས་པའི་ཕྱིར་དང། དམྱལ་བའི་སྡུག་བསྔལ་སོགས་ཀུན་གཞིས་དངོས་སུ་མ་མྱོང་ཡང་དེ་མྱོང་བྱེད་ཀྱི་ཚོར་བ་དེ་ཀུན་གཞི་ལ་སྣང་བའི་སྒོ་ནས་ཀུན་གཞི་རྣམ་སྨིན་མྱོང་བ་པོར་བཤད་པའི་ཕྱིར། འདི་ལ་ཐལ་འགྱུར་བས་གཞལ་ན།

― GTD002_Page_0322 ―

^{[མ་དཔེ་གཟིགས་ན་འདིར་གནོན།]}

[Full Size]

ལེན་པོར་རང་ཉེར་ལེན་གཅིག་རིགས་དངོས་མིན། །ཞེས་པའི་འགལ་བ་བརྗོད་ཚུལ་ཞིག་བྱུང་ཡང་སྐབས་མིན་པས་མ་སྤྲོས། ཡང་ཁ་ཅིག་ན་རེ། དམྱལ་བའི་ཀུན་གཞིས་སྡུག་བསྔལ་མྱོང་བར་ཐལ། དེ་བདེ་སྡུག་སོགས་རྣམ་སྨིན་མྱོང་བ་པོ་ཡིན་པའི་ཕྱིར། དེར་ཐལ། དེ་རྣམ་སྨིན་མྱོང་བ་པོའི་ང་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། རྣམ་སྨིན་མྱོང་བ་པོའི་མཚན་གཞིའི་ང་ཡིན་པའི་ཕྱིར། དེར་ཐལ། དེ་འདྲའི་རྣམ་སྨིན་མྱོང་བ་པོ་དེའི་བཏགས་དོན་བཙལ་ན་རྙེད་པའི་ཕྱིར། དེ་རང་ངོས་ནས་གྲུབ་པའི་ཕྱིར། ཁྱོད་རང་ལ། རྒྱལ་པོ་མ་སྐྱེས་དགྲའི་རྒྱུད་ཀྱི་ཀུན་གཞི་དེ་རང་གི་ཕ་གསོད་པ་པོ་ཡིན་པར་ཐལ། དེ་ཕ་གསོད་པ་པོའི་རྒྱལ་པོ་མ་སྐྱེས་དགྲའི་མཚན་གཞིའི་ང་ཡིན་པའི་ཕྱིར། ཁྱབ་པ་འགྲིག །གོང་དུ་འདོད་ན། དམྱལ་བའི་ཀུན་གཞི་ཆོས་ཅན། རང་གྲོགས་ཚོར་བའི་སྒོ་ནས་སྡུག་བསྔལ་མྱོང་བར་ཐལ། སྡུག་བསྔལ་མྱོང་བའི་སེམས་ཡིན་པའི་ཕྱིར། ཁྱབ་སྟེ། དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང། །ཞེས་གསུངས་པའི་ཕྱིར། འདོད་ན། དེ་ཆོས་ཅན། ཁྱོད་དང་མཚུངས་ལྡན་གྱི་སྡུག་བསྔལ་མྱོང་བའི་ཚོར་བ་ཡོད་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཚོར་བ་སྡུག་བསྔལ་ཡིན་པར་ཐལ། གདུང་བ་ཉམས་སུ་མྱོང་བའི་ཚོར་བ་ཡིན་པའི་ཕྱིར། ཁྱབ་སྟེ། དེ་དེའི་མཚན་ཉིད་ཡིན་པའི་ཕྱིར། འདོད་མི་ནུས་ཏེ། ཚོར་བ་བཏང་སྙོམས་ཡིན་པའི་ཕྱིར། ཀུན་གཞིའི་འཁོར་གྱི་ཚོར་བ་ཡིན་པའི་ཕྱིར། ཁྱབ་སྟེ། རྩ་བར། ཚོར་བ་ནི། བར་མའོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ།

― GTD002_Page_0323 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གཞིའི་འཁོར་གྱི་ཚོར་བས་སྡུག་བསྔལ་མྱོང་བ་ཡོད་པར་ཐལ། ཚོར་བ་དེ་ལ་སྡུག་བསྔལ་སྣང་བ་ཡོད་པའི་ཕྱིར། ཁྱབ་སྟེ། ཚོར་བ་ལ་སྣང་བ་དེ་ཚོར་བས་མྱོང་བའི་དོན་ཡིན་པའི་ཕྱིར་ཟེར་ན། སངས་འཕགས་ཀྱི་རྒྱུད་ཀྱི་ཚོར་བ་ཡིན་ན། འཁོར་བའི་སྡུག་བསྔལ་ཐམས་ཅད་ཅིག་ཅར་དུ་མྱོང་བས་ཁྱབ་པར་ཐལ། དེ་ཡིན་ན་བདེ་སྡུག་བཏང་སྙོམས་ཐམས་ཅད་སྣང་བས་ཁྱབ་པའི་ཕྱིར། འཁོར་གསུམ། གཞན་ཡང་ཚོར་བས་མྱོང་བ་དང། ཚོར་བ་དེ་ལ་སྣང་བ་གཉིས་གཏན་མི་འདྲ་བར་ཐལ། བསམ་གཏན་དང་པོའི་དངོས་གཞི་ཙམ་པོ་བས་སེམས་རྟེན་བྱས་པའི་བར་ཆད་མེད་ལམ་དང་མཚུངས་ལྡན་གྱི་ཚོར་བ་དེས་མྱོང་བ་དང། དེ་ལ་སྣང་བ་གཉིས་འགལ་བའི་ཕྱིར། དེར་ཐལ། དེ་བདེ་བའི་ངོ་བོར་སྐྱེས་པས་བདེ་བ་མྱོང་བར་འཇོག་ཀྱང་བདེ་བ་ཀུན་རྫོབ་ཡིན་པས་དེའི་སྣང་ཡུལ་དུ་མི་རུང། ཆོས་ཉིད་དེའི་སྣང་ཡུལ་ཡིན་ཀྱང་ཆོས་ཉིད་མྱོང་བའི་ཐ་སྙད་མེད་པའི་ཕྱིར། རྟགས་ཟུར་དང་པོ་གྲུབ་སྟེ། བདེ་བ་མྱོང་ཞེས་པའི་བདེ་བ་ཡང་ཚོར་བ་རང་ཉིད་ཡིན་གྱི་ཕྱིའི་ཆོས་མ་ཡིན་པའི་ཕྱིར། རྟགས་ཟུར་ཕྱི་མ་གྲུབ་སྟེ། བར་ཆད་མེད་ལམ་ཡིན་པའི་ཕྱིར། དེར་ཐལ། བར་ཆད་མེད་ལམ་པའི་རྒྱུད་ཀྱི་འཇུག་ཤེས་མངོན་གྱུར་པ་ཡིན་པའི་ཕྱིར་དང། དེས་ཆོས་ཉིད་མྱོང་ན་ཟག་བཅས་སྡུག་བསྔལ་དུ་རྟོགས་པའི་དངོས་གཞི་ཙམ་པོ་བ་དེས་སིམ་གདུང་གཉིས་ཀ་མྱོང་བའི་སྐྱོན་འཇུག་པའི་ཕྱིར། བྱས་པ་ལ་ཁོ་ན་རེ། ཚོར་བའི་མྱོང་བྱ་དེ་དེའི་ཡུལ་ལ་བྱེད་པར་ཐལ། སྤྱོད་འཇུག་ལས། གཞན་མྱོང་བ་དང་འབྲེལ་བ་

― GTD002_Page_0324 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། །ཞེས་སྔོ་འཛིན་གྱིས་སྔོན་པོ་མྱོང་བར་བཤད་ཅིང། རང་ཡུལ་རང་སྟོབས་ཀྱིས་མྱོང་བའི་སེམས་བྱུང་མྱོང་བ་དེ། ཚོར་བའི་མཚན་ཉིད་དུ་བཤད་པའི་ཕྱིར་ཟེར་ན། སྔ་མ་ནི་རང་མྱོང་གཞན་མྱོང་དཔྱད་པའི་ཟླས་དྲངས་ཏེ་ཤར་བ་ཙམ་ལ་མྱོང་བར་བཏགས་པ་ཡིན་ཞིང། ཕྱི་མ་ཡང་སིམ་གདུང་བར་མ་ཅི་རིགས་རང་སྟོབས་ཀྱིས་མྱོང་བའི་དོན་ཡིན་ཏེ། སྤྱིའི་མཚན་ཉིད་དེ་ལྟར་འཇོག་ན། བྱེ་བྲག་ཚོར་བ་བདེ་བའི་མཚན་ཉིད་ལ་ཡང་རང་ཡུལ་སིམ་པ་རང་སྟོབས་ཀྱིས་མྱོང་བ་ཞེས་བཤད་དགོས་པ་གང་ཞིག །ལུས་ཚོར་བདེ་བའི་ཡུལ་དུ་གྱུར་པའི་སིམ་པ་གཞི་མ་གྲུབ་པའི་ཕྱིར། ཡང་ཁོ་ན་རེ། སྤྱིར་ཚོར་བ་དེ་ལ་སྣང་ན་དེས་མྱོང་བས་མ་ཁྱབ་ཀྱང། ཀུན་གཞིའི་འཁོར་གྱི་ཚོར་བ་ལ་ཁྱབ་པར་ཐལ། དཀའ་འགྲེལ་ལས། འདོད་ན། དེ་དག་ལ་སྡུག་བསྔལ་གྱིས་གདུང་བ་ཡོད་པར་འགྱུར་ཏེ། དེ་དག་གི་ཀུན་གཞིའི་སྟེང་གི་དམྱལ་སྣང་མཚན་ཉིད་པ་སྣང་བའི་ས་བོན་སད་པའི་ཕྱིར་རོ། །ཞེས་གསུངས་པའི་ཕྱིར། ཁྱབ་སྟེ། ཀུན་གཞིའི་སྣང་ཚུལ་འདི་ལ་མངོན་པ་བ་ཁ་ཅིག །བསམ་གཏན་བཞི་པ་མན་ཆད་ཀྱི་སྣོད་བཅུད་ཐམས་ཅད་སྣང་ཟེར། ཁ་ཅིག །བསམ་གཏན་བཞི་པ་ནི་བསྐལ་པ་ཆགས་འཇིག་སོགས་ཀྱི་ཁོངས་སུ་མི་གཏོགས་པར་ཐུན་མོང་མ་ཡིན་པའི་ལས་ཀྱི་བདག་འབྲས་ཡིན་པས་གསུམ་པ་མན་ཆད་སྣང་ཟེར། ལ་ལས་སྣོད་བཅུད་ཐམས་ཅད་སྣང་ཞེས་འདོད་ཅིང་དེ་ལ་ནང་གསེས་ཀྱིས་ཕྱེ་ན་བལ་པོ་ཛ་ཧུ་སོགས་མིའི་ཀུན་གཞི་ལ་འཇིག་རྟེན་ཐམས་ཅད་མིའི་འཇིག་རྟེན་ལྟ་བུར་སྣང་ཟེར་བ་རྣམ་པ་གཅིག་ཏུ་སྣང་བའི་ལུགས་དང། མིའི་

― GTD002_Page_0325 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གཞི་ལ་ཡང་རིགས་དྲུག་གི་སྣོད་བཅུད་རིགས་དྲུག་སོ་སོ་ལ་འཆར་ཚུལ་ལྟར་དུ་སྣང་ཟེར་བ་རྣམ་པ་ཁྲ་བོར་སྣང་བའི་ལུགས་སོགས་ཡོད་ཀྱང། སྐབས་འདིར་དེ་དག་བཀག་ནས་མིའི་ཀུན་གཞི་ལ་མིའི་སྣོད་བཅུད་ཁོ་ན་སྣང་བར་བསྒྲུབ་པའི་རྒྱུ་མཚན་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། ཀུན་གཞིའི་དམིགས་པ་ལ། དེའི་སྟེང་གི་ལས་ཀྱི་བག་ཆགས་སྨིན་པ་ལས་བྱུང་བའི་ཕྱི་རོལ་གྱི་ལོངས་སྤྱད་བྱའི་ཆ་དང། དེ་ལ་ལོངས་སྤྱོད་བྱེད་ནང་ལེན་པའི་ཆ་གཉིས་སུ་ངེས་ཀྱི་ཀུན་གཞི་རང་ཉིད་ཀྱི་སྟེང་གི་བག་ཆགས་སྨིན་པའི་མདངས་ཕར་འཕྲོས་པ་མ་ཡིན་པའི་སྣོད་སེམས་ཅན་གཞན་གྱི་ལས་ལས་གྲུབ་པ་ཞིག་དེའི་དམིགས་པར་འོང་དོན་མེད་པའི་ཕྱིར། རྣམ་པར་གཏན་ལ་དབབ་པ་བསྡུ་བ་ལས། མར་མེ་འབར་བ་ནི་སྙིང་པོ་དང་སྣུམ་གྱི་རྒྱུས་ནི་ནང་དུ་འཇུག་པར་འགྱུར་ལ་ཕྱི་རོལ་ཏུ་ནི་འོད་འབྱུང་བར་བྱེད་པ་དེ་བཞིན་དུ། ནང་གི་ལེན་པའི་དམིགས་པ་དང་ཕྱི་རོལ་གྱི་དམིགས་པའི་ཚུལ་འདི་ལ་ཡང་ཀུན་གཞིའི་རྣམ་པར་ཤེས་པའི་ཚུལ་འདི་དང་འདྲ་བར་བལྟ་བར་བྱའོ། །ཞེས་གསུངས་པའི་ཕྱིར། ཁྱབ་སྟེ། མར་མེའི་འོད་མར་མེ་ལས་འབྱུང་བ་ལྟར་ཀུན་གཞིའི་དམིགས་པའི་ཕྱི་རོལ་གྱི་དངོས་པོ་དེ་ལ་ཡང། ཀུན་གཞི་དེ་ཉིད་ཀྱི་རང་མདངས་ཕར་འཕྲོས་པ་ཞིག་དགོས་པར་བཤད་པའི་ཕྱིར། དེ་ལ་ཁོ་ན་རེ། བལྟ་བྱ་ཐུན་མོང་བའི་དངོས་པོ་གཅིག་མེད་པར་ཐལ། ལྷས་སྦྱིན་གྱི་ཀུན་གཞི་ལ་སྣང་ན་མཆོད་སྦྱིན་གྱི་ཀུན་གཞི་ལ་མི་སྣང་བས་ཁྱབ་པའི་ཕྱིར། དེར་ཐལ། དེ་ཡིན་ན་མཆོད་སྦྱིན་

― GTD002_Page_0326 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་ལས་ཀྱི་བདག་འབྲས་མ་ཡིན་དགོས་པའི་ཕྱིར། དེར་ཐལ། ལྷས་སྦྱིན་གྱི་ལས་ཀྱི་བདག་འབྲས་ཡིན་པའི་ཕྱིར་ན། མ་ཁྱབ་སྟེ། དེ་གཉིས་ཀའི་གཞི་མཐུན་ཡོད་པའི་ཕྱིར། དེར་ཐལ། རྣམ་སྨིན་གྱི་འབྲས་བུ་ཐུན་མོང་བ་མེད་ཀྱང་བདག་འབྲས་ཐུན་མོང་བ་ཡོད་པའི་ཕྱིར་ཏེ། སྣོད་ཀྱི་འཇིག་རྟེན་གཅིག་ལ་དུ་མས་ཐུན་མོང་དུ་ལོངས་སྤྱོད་པ་ཡོད་པའི་ཕྱིར། ཁྱབ་སྟེ། དེའི་རྒྱུ་རེ་རེ་ནས་སུས་ཀྱང་མ་བསགས་ན་རྒྱུ་མེད་དུ་འགྱུར་བའི་ཕྱིར། བྱས་པ་ལ་ཁོ་ན་རེ། བལྟ་བྱ་ཐུན་མོང་བ་མེད་པར་ཐལ། དེ་ཁོ་ན་ཤེས་པའི་བདག་ཉིད་དུ་མ་གྲུབ་དགོས་པའི་ཕྱིར། དཀའ་འགྲེལ་ལས། དེའི་ཚེ་ནི་ཐུན་མོང་བ་ཁས་མི་ལེན་ལ་མ་བརྟགས་མ་དཔྱད་པའི་དོན་གཟུང་ཆ་ཐུན་མོང་བ་འདོད་ཀྱང་ཤེས་པའི་བདག་ཉིད་དུ་མི་འདོད་དེ་ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་གྲུབ་མཐའ་ཀུན་ཤེས་ལས། འདི་དག་རྟོག་ངོར་ཕྱི་རོལ་དོན་ཡང་ཡོད། །དོན་ལ་གཞན་རིག་སེམས་དང་སེམས་བྱུང་མེད། །ཅེས་པ་ལྟར་སྔ་རབས་པ་རྣམས་དབུ་སེམས་གང་གི་སྐབས་སུ་ཡང་མ་བརྟགས་མ་དཔྱད་ན་འདི་ཡིན་ལ་བརྟགས་ཤིང་དཔྱད་ན་དེ་ཡིན་ཞེས་ཆ་གཉིས་རེ་འབྱེད་པའི་ཕྱོགས་མཐུན་བྱས་ཙམ་ཡིན་གྱི་བལྟ་བྱ་ཐུན་མོང་ཡོད་ཀྱང་ཕྱི་དོན་ཡོད་མི་དགོས་པར་ཡབ་སྲས་ཀྱི་ཕྱི་རྩོམ་ཐམས་ཅད་དགོངས་པ་མཐུན་ནོ། །ཁ་ཅིག་ན་རེ། ཀུན་གཞི་བཀྲར་འཛིན་གྱིས་དབེན་ཕྱིར། །ཞེས་གསུངས་པ་མི་འཐད་པར་ཐལ། ཀུན་གཞིའི་འཁོར་གྱི་འདུ་ཤེས་དེས་རང་ཡུལ་ལ་སོ་སོར་ཕྱེ་སྟེ་འདི་ནི་འདིའོ། །འདི་ནི་འདི་མ་ཡིན་ནོ་ཞེས་མཚན་མར་ཕྱེ་ནས་འཛིན་པའི་ཕྱིར། འཇུག་པ་ལས། འདུ་ཤེས་

― GTD002_Page_0327 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་མར་འཛིན་པ་སྟེ། །ཞེས་དང། སུམ་ཅུ་པའི་འགྲེལ་པ་ལས། འདུ་ཤེས་ནི་ཡུལ་ལ་མཚན་མར་འཛིན་པའོ། །ཡུལ་ནི་དམིགས་པའོ། །མཚན་མ་ནི་དེའི་བྱེ་བྲག་སྔོན་པོ་དང་སེར་པོ་ལ་སོགས་པ་དམིགས་པ་རྣམ་པར་བཞག་པའི་རྒྱུའོ། །དེ་ལ་འཛིན་པ་ནི་འདི་སྔོན་པོ་ཉིད་ཡིན་གྱི་སེར་པོ་ནི་མ་ཡིན་ནོ། །ཞེས་རྟོག་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཀུན་གཞི་ལ་དབང་དོན་སོ་སོར་སྣང་ཙམ་དེ་འདུ་ཤེས་ཀྱི་བྱེད་པར་བསྟན་པ་ཡིན་གྱི་འདི་ནི་འདིའོ་ཞེས་ངེས་པ་དབང་ཤེས་ལའང་མེད་པའི་ཕྱིར། མདོ་ལས། མིག་གི་རྣམ་པར་ཤེས་པས་སྔོན་པོ་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །ཞེས་དང། མཛོད་ལས། ངེས་རྟོག་མེད་ཕྱིར་ལྟ་མ་ཡིན། །ཞེས་གསུངས་པའི་ཕྱིར། ཁོ་ན་རེ། དེ་ལ་འདི་ནི་འདིའོ་ཞེས་འཆར་བར་ཐལ། གཟུགས་མེད་དང་པོ་གཉིས་ཀྱི་ཀུན་གཞི་ལ་ནམ་མཁའ་མཐའ་ཡས་སོ། །རྣམ་ཤེས་མཐའ་ཡས་སོ། །སྙམ་དུ་འཆར་བ་གང་ཞིག །ཕྱི་མ་གཉིས་ཀྱང་རྒྱུ་ཕྲ་བ་དང་ཤིན་ཏུ་ཕྲ་བའི་དམིགས་པ་ཅན་ཡིན་པའི་ཕྱིར། བསྡུ་བ་ལས། གཟུགས་མེད་པའི་ཁམས་ནམ་མཁའ་མཐའ་ཡས་སྐྱེ་མཆེད་དང་རྣམ་ཤེས་མཐའ་ཡས་སྐྱེ་མཆེད་ན་ནི་རྒྱུ་ཚད་མེད་པའི་དམིགས་པ་ཅན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ཀུན་གཞིའི་འཆར་ཚུལ་མིན་གྱི་ཀུན་གཞིའི་དམིགས་པར་གྱུར་བའི་མིང་གཞིས་བསྡུས་པའི་སྙོམས་འཇུག་གི་ཡུལ་འཆར་ཚུལ་ཡིན་པའི་ཕྱིར། ལུང་འདི་ལ་བརྟེན་ནས་རྗེ་བཙུན་རེད་མདའ་བའི་ཀུན་བཏུས་ཊཱིཀྐར་མིང་གཞིའི་ཕུང་པོ་དམིགས་པར་མ་བཞག་པར་ནམ་མཁའ་མཐའ་

― GTD002_Page_0328 ―

^{[མ་དཔེ་གཟིགས་ན་འདིར་གནོན།]}

[Full Size]

ཡས་སོ། །ཞེས་པ་ལྟ་བུ་དམིགས་པར་གསུངས་ཀྱང། བློ་བརྟན་དང་དུལ་ལྷའི་བཤད་ཚུལ་གོང་དུ་བཀོད་པ་དེ་ཉིད་བསྡུ་བའི་དགོངས་པའང་ཡིན་ཏེ། བསྡུ་བའི་ལུང་དེའི་གོང་གི་མདོར་བསྟན་དུ། དེ་ལ་ཕྱི་རོལ་གྱི་སྣོད་རྣམ་པར་རིག་པ་ནི་ཀུན་གཞིའི་རྣམ་པར་ཤེས་པ་ནི་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས་འཇིག་རྟེན་དང་སྣོད་ཀྱི་རྒྱུན་རྣམ་པར་རིག་སྟེ། ཞེས་གསུངས་པའི་ཕྱིར། ཁྱབ་སྟེ། ཁམས་གསུམ་ལ་ཆུང་ངུ་དང་ཆེན་པོ་ཚད་མེད་པ་སོགས་ཀྱི་དམིགས་པ་བཤད་པ་དེ་ཕྱིའི་དབང་དུ་བྱས་པའི་དམིགས་པའི་དབྱེ་བ་ཡིན་ལ། དེ་འཆར་ཚུལ་ནང་གི་དམིགས་པ་ལེན་པ་ལ་ཤར་བའི་སྒོས་ཀུན་གཞིའི་དམིགས་པར་འཇོག་པ་ལུང་དེས་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས་ཞེས་གསལ་བར་གསུངས་པའི་ཕྱིར། ཡང་ཁ་ཅིག་ན་རེ། ཀུན་གཞི་ལ་རང་ཡུལ་ངེས་པ་ཡོད་པར་ཐལ། དེ་ལ་སྟོང་ཉིད་རྟོགས་པ་ཡོད་པའི་ཕྱིར། དེར་ཐལ། འཕགས་རྒྱུད་ཀྱི་ཀུན་གཞི་འཕགས་པ་ཡིན་པའི་ཕྱིར་ཏེ། བདེ་འགྲོ་བའི་རྒྱུད་ཀྱི་ཀུན་གཞི་བདེ་འགྲོ་བ་ཡིན་པའི་ཕྱིར། ཁྱབ་སྟེ། བདེ་འགྲོའི་མཚན་གཞི་ཡིན་པས་བདེ་འགྲོར་འཇོག་ན་སྔ་མ་ལ་ཡང་མཚུངས་པའི་ཕྱིར་ཟེར་ན། ཤིན་ཏུ་མི་མཚུངས་ཏེ། ཤཱ་རིའི་བུ་ལྟ་བུ་ལ་ང་དང་འགྲོ་བ་ཞེས་པ་སྔ་མའི་རྣམ་སྨིན་གྱི་ཕུང་པོ་གྲུབ་པའི་ལྡོག་ཆ་ཙམ་ནས་བཤད་ཅིང་རིགས་མཐུན་གྱི་འགྲོ་བ་ཐམས་ཅད་དང་ཐུན་མོང་དུ་འཇུག་པས་གདགས་གཞིའི་ཆ་ཡིན་ལ་དགེ་སློང་དང་འཕགས་པ་ཞེས་པ་སྡོམ་པ་དང། འཕགས་ལམ་སོགས་ཁྱད་པར་གཞན་ལ་ལྟོས་ནས་བཞག་པའི་བཏགས་ཆོས་ཀྱི་ང་ཡིན་པའི་ཕྱིར། དེར་ཐལ། དེ་དགེ་སློང་སོགས་

― GTD002_Page_0329 ―

^{[མ་དཔེ་གཟིགས་ན་འདིར་གནོན།]}

[Full Size]

སུ་འདོད་ན་དེའི་མཁན་སློབ་ཀྱང་འཇོག་དགོས་ལ་འོན་ཀྱང་དེའི་འགྲོ་བར་འཇོག་དགོས་པ་ནི། ཐེག་བསྡུས་ལས། རྣམ་པར་སྨིན་པའི་རྣམ་པར་ཤེས་པ་མེད་ན། ཞེས་པ་ནས། དེའི་འགྲོ་བ་ལྡོག་པ་ཉིད་དུ་འགྱུར་རོ། །ཞེས་པས་འགྲུབ་བོ། །གཞན་ཡང་ཁྱོད་ལྟར་ན། ལྷར་གྱུར་བའི་བྱང་སེམས་ས་དང་པོ་བའི་མཚན་གཞིར་གྱུར་པའི་ཀུན་གཞི་དེ་ལྷ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེའི་སྤྲུལ་བར་གྱུར་པའི་འཁོར་ལོ་བསྒྱུར་རྒྱལ་གྱི་མཚན་གཞིར་གྱུར་པའི་ཀུན་གཞི་དེ་མི་ཡིན་པར་ཐལ། སྤྲུལ་བ་དེ་མི་ཡིན་པ་གང་ཞིག །མིའི་མཚན་གཞི་ལ་མིས་ཁྱབ་པའི་ཕྱིར། རྟགས་ཁས། འདོད་ན། དེ་གཉིས་ཀྱི་མཚན་གཞི་ལ་ཀུན་གཞི་སོ་སོ་བ་རེ་འཇོག་པར་ཐལ། དེ་ལ་ལྷ་ཡིན་པ་གཅིག་དང། མི་ཡིན་པ་གཅིག་སྟེ་གཉིས་ཡོད་པའི་ཕྱིར། འདོད་ན། དེའི་ཚེ་སྤྲུལ་པ་བརྒྱ་ལ་ཀུན་གཞི་ཡང་བརྒྱ་འབྱུང་བར་ཐལ་ལོ། །འདོད་ན། མ་དག་ས་བདུན་གྱི་སྐབས་སུ་ཀུན་གཞི་དང། ཉོན་ཡིད་བརྒྱ་སྟོང་འབུམ་སོགས་ཡོན་ཏན་གྱི་གྲངས་ལྟར་སྤྲུལ་ནས་འཕེལ་དགོས་པར་ཐལ་ལོ། །གཞན་ཡང་སྤྲུལ་པ་དེ་དག་རྒྱུད་གཅིག་མ་ཡིན་པར་ཐལ། དེ་དག་རྩ་བའི་རྣམ་ཤེས་སོ་སོ་ཡིན་པའི་ཕྱིར། རྟགས་སོང། ཁྱབ་སྟེ། སྐུའི་རྣམ་པ་སྣ་ཚོགས་སུ་བསྟན་ཀྱང་རྩ་བའི་རྣམ་ཤེས་གཅིག་ཡིན་པས་རྒྱུད་གཅིག་པར་བཞག་པ་ཡིན་པའི་ཕྱིར། དེར་ཐལ། རྒྱུད་གཅིག་ཅེས་པའི་རྒྱུད་ངོས་འཛིན་རྒྱུ་ཡོད་པའི་ཕྱིར། ཁོ་ན་རེ། དེ་བདེ་འགྲོ་བ་ཡང་མ་ཡིན་པར་ཐལ། འདོད་པའི་ཕྱིར་ཟེར་ན། མི་མཚུངས་ཏེ། སྤྲུལ་པ་སྤྲུལ་མཁན་ཐམས་ཅད་

― GTD002_Page_0330 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་འགྲོ་བར་མཚུངས་པའི་ཕྱིར་ཏེ། བྱང་སེམས་ལ་བདེ་འགྲོ་བས་ཁྱབ་པའི་རྒྱུ་མཚན་ཡོད་པའི་ཕྱིར། ཁོ་ན་རེ། ལྷས་སྦྱིན་གྱི་ང་ལ་ཀུན་གཞིས་ཁྱབ་པར་ཐལ། དེ་ལ་ཉོན་ཡིད་ཀྱི་དམིགས་པས་ཁྱབ་པའི་ཕྱིར། དེར་ཐལ། དེ་ཡིན་ན་ངར་འཛིན་ལྷན་སྐྱེས་ཀྱི་དམིགས་པ་ཡིན་དགོས་པའི་ཕྱིར་ན་མ་ཁྱབ་སྟེ། དེ་ལྟར་གསུངས་པ་གཙོ་ཆེ་བ་ལ་དགོངས་པའི་ཕྱིར། གོང་དུ་འདོད་མི་ནུས་ཏེ། ལྷས་སྦྱིན་ཀུན་གཞི་མ་ཡིན་པའི་ཕྱིར། ཡང་ཁ་ཅིག །ལྷས་སྦྱིན་གྱི་ང་ལ་སྐྱེ་བ་སྔ་ཕྱིའི་ང་དུ་མ་ཡོད་ཟེར། ལ་ལས་དེ་བཀག་ནས་ལྷས་སྦྱིན་གྱི་ངའོ་སྙམ་པ་སྐྱེ་བའི་གཞིར་གྱུར་བའི་ང་ལ་སྐྱེ་བ་དེའི་ངས་ཁྱབ་ཟེར། དེ་གཉིས་ཀ་མི་འཐད་པར་ཐལ། ལྷས་སྦྱིན་གྱི་ང་ཞེས་བཤད་པའི་ཚེ་སྐྱེ་བ་དེའི་ཁྱད་པར་དུ་བྱས་པ་ཡིན་པས་སྐྱེ་བ་སྔ་ཕྱིའི་དུས་སུ་མེད་པ་གང་ཞིག །ངའོ་སྙམ་པའི་གཞིའི་ང་ཙམ་དེ་དུས་ཐམས་ཅད་དུ་ཡོད་པའི་ཕྱིར། དང་པོ་གྲུབ་སྟེ། རྩ་ཤེས་ཊཱིཀ་ཆེན་ལས། ལྷས་སྦྱིན་གྱི་སྐྱེ་བ་སོ་སོར་ཕྱེ་བའི་བདག་ལ་ངའོ་སྙམ་དུ་བཟུང་བའི་བདག་ནི་ཚེ་རེ་རེ་བའི་བདག་ཕྱོགས་རེ་བ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། ལྷས་སྦྱིན་གྱིས་མངོན་པར་ཤེས་པས་སྐྱེ་བ་སྔ་མ་དྲན་ནས་ངའོ་སྙམ་པ་དང། དེ་ལ་དམིགས་པའི་འཇིག་ལྟ་སྐྱེ་བ་ཡོད་ལ་ང་སྐྱེ་བ་ཕྱི་མར་སྡུག་བསྔལ་གྱིས་དོགས་ནས་དགེ་བ་བསྒྲུབ་པའང་ཡོད་པས་ཡུལ་དུས་བྱེ་བྲག་མ་ཕྱེ་བར་ངའོ་སྙམ་པའི་གཞིའི་ང་ཙམ་དེ་ཚེ་སྔ་ཕྱི་གཉིས་ཀའི་དུས་སུ་ཡོད་པའི་ཕྱིར། རྩ་ཤེ་ཊཱིཀ་ཆེན་ལས། ཚེ་འདིའི་ལྷས་སྦྱིན་གྱིས་གང་ལ་དམིགས་ནས་ངའོ་སྙམ་

― GTD002_Page_0331 ―

^{[མ་དཔེ་གཟིགས་ན་འདིར་གནོན།]}

[Full Size]

པ་སྐྱེ་བའི་དམིགས་པར་གྱུར་པའི་བདག་ནི་ཚེ་རབས་སྔ་མ་རྣམས་སུ་ཡང་ཡོད་ལ། ཞེས་དང། ཚེ་འདིའི་དུས་ཀྱི་གང་ཟག་དེ་ཉིད་སྐྱེ་བ་ཕྱི་མར་མི་འགྲོ་ཡང་ངའོ་སྙམ་པའི་དམིགས་པའི་ང་ཙམ་ཞིག་དེར་ཡང་རྗེས་སུ་འགྲོ་བས། ཞེས་གསུངས་པའི་ཕྱིར། འདི་ལ་ཞིབ་ཆ་དགོས། ཁོ་ན་རེ། ལྷས་སྦྱིན་གྱི་ངའོ་སྙམ་པ་སྐྱེ་བའི་གཞིའི་ང་དེ་ཚེ་སྔ་མར་མེད་པར་ཐལ། དེ་དང་ལྷས་སྦྱིན་གཉིས་ཕན་ཚུན་ངོ་བོ་གཅིག་ཡིན་པའི་ཕྱིར། དེར་ཐལ། དངོས་སྨྲ་བ་རྣམས་དེ་གཉིས་ངོ་བོ་གཅིག་ཏུ་འདོད་ལ། ཐལ་འགྱུར་བས་མི་འདོད་པའི་ཁྱད་པར་ཡོད་པའི་ཕྱིར། ཊཱིཀ་ཆེན་ལས། ལྷས་སྦྱིན་དང་དེའི་བདག་གཉིས་ངོ་བོ་ཉིད་ཀྱིས་གྲུབ་པའི་ཕྱོགས་ལ་སོ་སོ་བ་མི་འདོད་པས་ངོ་བོ་གཅིག་ཏུ་འདོད་ལ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་རིང་གི་མི་ལ་ཁ་སང་ངས་གཟུགས་མཐོང་ངོ་སྙམ་པ་སྐྱེ་བ་མྱོང་བས་གྲུབ་པས་དངོས་སྨྲས་ཀྱང་འདོད་ལ། ལུང་དེའི་དོན་ལྷས་སྦྱིན་གྱི་གདགས་གཞིར་གྱུར་པའི་ང་དེ་ཐོག་མེད་ནས་ཡོད་པར་ཐལ་འགྱུར་བས་འདོད་ཀྱང་གཞན་གྱིས་མི་འདོད་པའི་དོན་ཡིན་པའི་ཕྱིར། དེ་ཉིད་ལས། ཐ་སྙད་འདོགས་མཁན་གྱི་མི་དང། ཐ་སྙད་བཏགས་པའི་གཞི་བདག་གཉིས་ཁྱབ་མཉམ་དུ་མི་གཟུང་བར་མི་དེ་བདག་དེའི་ཆ་གཅིག་ཡིན་པར་ཤེས་པར་བྱོས་ཤིག །ཅེས་གསུངས་པའི་ཕྱིར། དེའི་རྒྱུ་མཚན་ཡོད་དེ། སྐྱེ་བ་སྔ་ཕྱི་གཉིས་ཀ་ལ་ང་ཞེས་པའི་ཐ་སྙད་ཐུན་མོང་དུ་འཇུག་ཅིང་ཐལ་འགྱུར་བའི་ལུགས་ལ་ཐ་སྙད་དེ་ཙམ་གྱིས་ང་འཇོག་ནུས་པས་གཉིས་ཀའི་གདགས་གཞིར་

― GTD002_Page_0332 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་བའི་ང་ཐུན་མོང་བ་མིང་གིས་བཏགས་པ་ཙམ་ཞིག་ཡོད་ཀྱང་སྔ་མའི་གདགས་གཞིའི་ང་དེ་ཕྱི་མའི་གདགས་གཞིའི་ང་ཡིན་མི་དགོས་ཏེ། དཔེར་ན། གསེར་བུམ་ཟངས་བུམ་གཉིས་བུམ་པའི་བྱེ་བྲག་ཡིན་པས་དེ་གཉིས་ཀྱི་སྤྱིར་གྱུར་པའི་བུམ་པ་ཞིག་ཡོད་དགོས་ཀྱང་གསེར་བུམ་གྱི་སྤྱི་དེ་ཟངས་བུམ་གྱི་སྤྱི་ཡང་མིན་ལ་དེ་གཉིས་ཀྱི་སྤྱིར་གྱུར་བའི་བུམ་པ་དེ་དེ་གཉིས་ལས་གོ་ས་ལོགས་ན་ཡང་བསྟན་རྒྱུ་མེད་པར་བུམ་པ་ཞེས་པའི་མིང་ཙམ་གྱི་སྟེང་ནས་འཇོག་དགོས་པ་བཞིན་ནོ། །དངོས་སྨྲ་རྣམས་ལྷས་སྦྱིན་གྱི་བཏགས་དོན་བཙལ་ཏེ་གདགས་གཞི་ཡང་དེའི་ཚོགས་པ་ནས་རྙེད་དགོས་པར་འདོད་པས་སྐྱེ་བ་གཞན་གྱི་ཚོགས་པར་རྗེས་སུ་འགྲོ་ཚུལ་མེད་ཅིང་དེའི་གནད་ཀྱིས་གདགས་གཞི་ཐུན་མོང་བ་ཡང་མི་སྲིད་དོ། །འདི་ནི་ཤིན་ཏུ་དཀའ་བའི་རིགས་པའི་གསང་ཚིག་ཞིག་ཏུ་སྣང་བས་ལེགས་པར་བཤད་ཡོད་དོ། །སྐྱེ་འཕགས་ཀྱི་གདགས་གཞིའི་ཡིན་པ་ཡོད་མེད་སོགས་མ་སྤྲོས་ཀྱང་ད་ལྟའི་རིགས་སྨྲ་རྣམས་ཀྱིས་དགོངས་པར་འགྱུར་རོ། །ཁ་ཅིག་ན་རེ། ཀུན་གཞིའི་དམིགས་པའི་དབང་པོ་ལ་གཞན་རྒྱུད་ཀྱི་དབང་པོ་ཡོད་པར་ཐལ། སུམ་ཅུ་པའི་འགྲེལ་པ་ལས་སེམས་ཅན་ནི་བདག་དང་གཞན་གྱི་རྒྱུད་ལ་དབང་པོ་ལྔར་སྣང་བ་གང་ཡིན་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཀུན་གཞི་སྤྱི་ཙམ་དང་གང་ཟག་ལྟོས་ས་ལྟོས་འཇོག་གི་དབང་དུ་བྱས་པའི་ཕྱིར། དེར་ཐལ། ལྷས་སྦྱིན་གྱི་ཀུན་གཞི་ལ་མཆོད་སྦྱིན་གྱི་དབང་པོ་སྣང་ན་དེ་གཉིས་རྒྱུད་གཅིག་ཏུ་འགྱུར་བའི་ཕྱིར། འོན་ཀྱང་མངོན་ཤེས་ལ་གཞན་གྱི་སེམས་སྣང་ཡང་རྣལ་

― GTD002_Page_0333 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་གྱི་སྟོབས་ཡིན་པས་རྒྱུད་གཅིག་པར་མི་འགྱུར་ཚུལ་ནི་རྒྱུད་གཞན་སྒྲུབ་པ་སོགས་ལས་ཤེས་པར་བྱའོ། །ཁ་ཅིག་ན་རེ། ཀུན་གཞི་སྒྲིབ་ལུང་མ་བསྟན་ཡིན་པར་ཐལ། ཤེས་སྒྲིབ་དང་ལུང་མ་བསྟན་གྱི་གཞི་མཐུན་ཡིན་པའི་ཕྱིར། དེར་ཐལ། རྣམ་མཁྱེན་ཐོབ་པ་དང་དུས་མཉམ་དུ་སྤང་རྒྱུའི་ཆོས་ཡིན་པའི་ཕྱིར་ཟེར་ན། མི་འཐད་པར་ཐལ། ཀུན་འབྱུང་ཕྲ་མོས་བསྡུས་པའི་ལས་ཏེ་ཟག་བཅས་དང་ལས་གཉིས་ཀ་ཡིན་ཀྱང། ཟག་མེད་ལས་སུ་བཞག་པ་ལྟར་འགའ་ཞིག་སྒྲིབ་པ་དང་ལུང་མ་བསྟན་གཉིས་ཀ་ཡིན་ཀྱང་མ་སྒྲིབ་ལུང་མ་བསྟན་དུ་བཞག་ཆོག་ལ་ཀུན་གཞི་སྒྲིབ་པ་ཡང་མ་ཡིན་པའི་ཕྱིར། དང་པོ་གྲུབ་སྟེ། མངོན་པ་གོང་འོག་གང་དུའང་ཤེས་སྒྲིབ་དང་སྦྱར་ནས་སྒྲིབ་ལུང་མ་བསྟན་དུ་བཤད་པ་མེད་ལ་མཛོད་ཀྱིས་ཉོན་སྒྲིབ་ལ་བཤད་པའི་རིགས་པ་སྦྱར་ན་འཁོར་དུ་སེམས་བྱུང་དུ་འཇུག་སོགས་ཐམས་ཅད་དང་མི་འགྲིག་པའི་ཕྱིར། གཉིས་པ་གྲུབ་སྟེ། ཀུན་གཞི་སྤང་བྱར་བཤད་པ་རྣམ་སྨིན་གྱི་ཆ་ཡིན་ལ་སྤོང་ཚུལ་ཡང་རྟོག་པའི་ངོ་བོ་སོགས་ཟག་བཅས་ཀྱི་ཆ་སྤོང་བ་ཡིན་གྱི་རྒྱུན་གཅོད་པ་མ་ཡིན་པའི་ཕྱིར། དེར་ཐལ། དེས་ལམ་འབྲས་གང་རུང་སྐྱེ་བ་ལ་གེགས་མི་བྱེད་པར་མ་ཟད་ལམ་གྱི་བག་ཆགས་འཛིན་བྱེད་ཡིན་ལ་མཐར་ཐུག་གི་ཚེ་མེ་ལོང་ལྟ་བུའི་ཡེ་ཤེས་སུ་འགྱུར་བའི་ཕྱིར། དེར་ཐལ། དགོངས་འགྲེལ་ལས། མེ་ལོང་ལྟ་བུའི་ལེན་པའི་རྣམ་པར་ཤེས་པ་དེ་ལ་བརྟེན་ཅིང་གནས་ནས་ཞེས་སོགས་ཀྱིས་རྣམ་ཤེས་གཞན་རྣམས་ཀུན་གཞི་ལས་འབྱུང་ཚུལ་དང། མདོ་སྡེ་རྒྱན་ལས། མེ་ལོང་ཡེ་ཤེས་

― GTD002_Page_0334 ―

^{[མ་དཔེ་གཟིགས་ན་འདིར་གནོན།]}

[Full Size]

མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །ཞེས་ཡེ་ཤེས་གཞན་རྣམས་མེ་ལོང་ཡེ་ཤེས་ལས་འབྱུང་ཚུལ་གསུངས་པའི་འབྲེལ་གྱིས་ཀྱང་ཀུན་གཞི་གནས་འགྱུར་གསུངས་པ་རྫས་རྒྱུན་སྔ་ཕྱི་རྣལ་མ་ཡིན་པར་བསྒྲུབ་ནུས་སོ། །ཡང་ཁ་ཅིག་ན་རེ། བརྒྱུད་ནས་དེ་ཡི་ཚོགས་དྲུག་གི །ཡུལ་དུ་སྣང་བར་གང་ནུས་པ། །ཀུན་གཞིའི་ཡུལ་དུ་འཇོག་པ་ཡིན། །ཞེས་པ་དང། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །ཞེས་པ་གཉིས་འགལ་ཟེར་ན་མི་འགལ་བར་ཐལ། སྔ་མའི་དོན་ནི་རྣམ་སྨིན་གྱི་དབང་པོ་དྲུག་ལ་སྣང་རྒྱུའི་ལས་ཀྱི་བདག་འབྲས་སུ་གྲུབ་པའི་ཡུལ་ཐམས་ཅད་ཀུན་གཞིའི་དམིགས་པར་འཇོག་པའི་དོན་ཡིན་ལ་ཕྱི་མ་ནི་དྲུག་པའི་ཡུལ་གྱི་གསུང་རབ་ཡན་ལག་བཅུ་གཉིས་དང་འདས་མ་འོངས་སོགས་འདུ་མ་བྱས་རྣམས་ཀུན་གཞིའི་ཡུལ་དུ་མི་འཇོག་པའི་དོན་ཡིན་པའི་ཕྱིར། ཁ་ཅིག་ན་རེ། བག་ཆགས་བསྒོ་བྱེད་ལ་དགེ་མི་དགེ་གང་རུང་གིས་ཁྱབ་ཟེར་ན། ཉོན་ཡིད་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། བདག་ལྟའི་བག་ཆགས་བསྒོ་བྱེད་ཡིན་པའི་ཕྱིར། གཞན་ཡང་བག་ཆགས་བསྒོ་བྱེད་ལ་ལུང་མ་བསྟན་ཡོད་པར་ཐལ། དགེ་མི་དགེ་གཉིས་ཀྱི་རྒྱུ་མཐུན་དང་རྣམ་སྨིན་གྱི་བག་ཆགས་གཉིས་ཀ་བསྒོས་ལ་ལུང་མ་བསྟན་གྱིས་རྒྱུ་མཐུན་གཅིག་པུ་བསྒོ་བའི་ཕྱིར། སུམ་ཅུ་པའི་འགྲེལ་པ་ལས། དགེ་བ་དང་མི་དགེ་བ་ནི་ཀུན་གཞིའི་རྣམ་པར་ཤེས་པ་ལ་རྣམ་པར་སྨིན་པའི་བག་ཆགས་དང་རྒྱུན་མཐུན་པའི་བག་ཆགས་བསྐྱེད་དོ། །ལུང་དུ་མ་བསྟན་པ་དང་ཉོན་མོངས་པ་ཅན་གྱི་ཡིད་ནི་རྒྱུ་

― GTD002_Page_0335 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུན་པའི་བག་ཆགས་ཉིད་བསྐྱེད་དོ། །ཞེས་གསུངས་པའི་ཕྱིར། ཡང་ས་བཟང་གི་འགྲེལ་པ་ལས། རྒྱུ་མཚན་ཚང་བའི་ཕྱིར། ཀུན་གཞིའི་འཁོར་གྱི་ཀུན་འགྲོ་ལྔ་པོ་དེ་དག་གིས་ཀྱང་རྒྱུ་མཐུན་པའི་བག་ཆགས་བསྒོས་པར་རིགས་པར་བྱའོ། །ཞེས་གསུངས་པ་མི་འཐད་པར་ཐལ། དེ་དམིགས་རྣམ་ཤིན་ཏུ་མི་གསལ་བའི་བློ་ཡིན་པའི་ཕྱིར། ཁྱབ་སྟེ། དེར་མ་ཟད་དམིགས་རྣམ་མི་གསལ་བ་གཟུགས་ཡིད་འོང་མཐོང་བ་ལ་ལྷག་པར་ཆགས་དུས་ཀྱི་སྒྲ་འཛིན་རྣ་ཤེས་ལྟ་བུས་ཀྱང་བག་ཆགས་བསྒོ་མི་ནུས་པའི་ཕྱིར། དེར་ཐལ། དེས་སླར་ངས་སྒྲ་འདི་ལྟ་བུ་ཐོས་སོ་སྙམ་དུ་དྲན་ཤེས་བསྐྱེད་མི་ཐུབ་པའི་རྒྱུ་མཚན་ཡོད་པའི་ཕྱིར། རེད་མདའ་བའི་ཀུན་བཏུས་ཊཱིཀྐ་ལས། དེ་དང་མཚུངས་ལྡན་གྱི་སེམས་ལས་བྱུང་བ་དག་གིས་ཀྱང་བསྒོ་བར་མི་བྱེད་དེ། དེ་དག་ཀུན་གཞི་བཞིན་དུ་དམིགས་རྣམ་ཤིན་ཏུ་མི་གསལ་བའི་ཕྱིར་རོ། །ཞེས་དང། བག་ཆགས་འཇོག་པའི་ནུས་པ་མེད་པར་མཐོང་སྟེ། གང་གི་ཚེ་ཡིད་རྣམ་པར་གཡེང་བ་དང་དམིགས་པ་ནང་དུ་གཏད་པ་ལ་སོགས་པའི་གནས་སྐབས་ན་མིག་གིས་གཟུགས་མཐོང་བ་དང། ཞེས་པ་ནས། མཐོང་ཐོས་ཞེས་པའི་དྲན་པ་སྐྱེ་བ་མེད་པའི་ཕྱིར་རོ། །ཞེས་གསུངས་པའི་ཕྱིར། འདི་དཀའ་འགྲེལ་ལས་ཀྱང་རང་ལུགས་སུ་མཛད་ལ་རིགས་པས་ཀྱང་འགྲུབ་སྟེ། བག་ཆགས་བཞག་པའི་དགོས་པ་ནི། རང་ཉིད་འགག་ཀྱང་ཀུན་གཞིའི་སྟེང་དུ་བག་ཆགས་བསྒོས་ཏེ་ཀུན་གཞིའི་ནུས་པ་གསོ་བྱེད་ཀྱི་རྒྱུ་བྱེད་ལ་དེའི་སྟེང་གི་བག་ཆགས་དེ་ཉིད་སླར་སད་ནས་རང་གི་རིགས་

― GTD002_Page_0336 ―

^{[མ་དཔེ་གཟིགས་ན་འདིར་གནོན།]}

[Full Size]

འདྲ་ཕྱི་མ་དེ་ཀུན་གཞིའི་འབྲས་བུའི་ཚུལ་དུ་འབྱུང་བས་ཕན་ཚུན་རྒྱུ་འབྲས་སུ་སྦྱོར་བ་གང་ཞིག །སེམས་བྱུང་དེ་རྣམས་ཀུན་གཞི་དང་སྐྱེ་འགག་དུས་གཅིག་པས་དེ་འདྲ་བའི་དོགས་པ་གང་ཡང་མེད་པའི་ཕྱིར། ཆོས་མངོན་པའི་མདོ་ལས། ཆོས་ཀུན་རྣམ་པར་ཤེས་ལ་སྦྱོར། །དེ་དག་ལ་ཡང་དེ་དེ་བཞིན། །ཕན་ཚུན་འབྲས་བུའི་ངོ་བོ་དང། །རྒྱུ་ཡི་ངོ་བོར་རྟག་ཏུ་སྦྱོར། །ཞེས་དང། དབྱིག་གཉེན་གྱི་ཐེག་བསྡུས་འགྲེལ་པ་ལས། གང་གི་ཚེ་ཀུན་གཞིའི་རྣམ་པར་ཤེས་པ་རྒྱུ་ཡིན་པ་དེའི་ཚེ་དེ་འབྲས་བུ་ཡིན་ལ། གང་གི་ཚེ་དེ་རྒྱུ་ཡིན་པ་ན་ཀུན་གཞིའི་རྣམ་པར་ཤེས་པ་འབྲས་བུ་ཡིན་ནོ། །ཞེས་དང། རྩ་བར་ཡང། ཀུན་ནས་ཉོན་མོངས་ཆོས་ཐམས་ཅད། །རྒྱུ་འམ་འབྲས་བུའི་ངོ་བོ་རུ། །སྦྱོར་བའི་ཕྱིར་ན་ཀུན་གཞི་འོ། །ཞེས་གསུངས་པའི་ཕྱིར། དེའང་དགོངས་འགྲེལ་ལས། བདག་ཏུ་རྟོག་པར་གྱུར་ན། ཞེས་སོགས་ལྟར་ཀུན་གཞི་བསྟན་པ་ལ་རྗེ་བོ་ལྟ་བུའི་ཕུང་སོགས་ལ་དབང་སྒྱུར་བ་པོར་འཁྲུལ་པ་དང་སྣོད་བཅུད་མཐའ་དག་བྱེད་པའི་རྟག་པ་རང་བྱུང་གི་དབང་ཕྱུག་དང། རྣམ་འགྱུར་ཐམས་ཅད་སྤྲུལ་པའི་རྩ་བའི་རང་བཞིན་ལྟ་བུར་འཁྲུལ་ཉེན་ཆེ་ཡང་དོགས་པ་དེ་སེལ་བྱེད་ཀྱི་རིགས་པའི་གནད་འདི་ཡིན་ཏེ། གཞན་སྡེས་འདོད་པའི་དབང་ཕྱུག་སོགས་ནི་རང་ཉིད་གང་ལ་མ་ལྟོས་པའི་རྒྱུ་མེད་དང་རང་གིས་འབྲས་བུ་ཐམས་ཅད་འདོད་དགར་བྱེད་པར་འདོད་ལ་ཀུན་གཞིས་རང་སྟེང་དུ་སྔར་ལས་ཀྱི་ས་བོན་བཞག་པ་དེ་ལ་བརྟེན་ནས་དེ་དང་མཐུན་པའི་འབྲས་བུ་སྲེད་སོགས་ཀྱིས་གསོས་བཏབ་པ་ན་སྐྱེད་པར་འདོད་པའི་ཕྱིར། ཁ་ཅིག་ན་རེ། བག་ཆགས་བསྒོ་གཞི་དང་བསྒོ་བྱེད་འཇོག་པ་མི་འཐད་

― GTD002_Page_0337 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཐལ། བག་ཆགས་དེ་ཉིད་བསྒོ་བྱེད་གཞན་ལ་ལྟོས་མི་དགོས་པའི་ཕྱིར། དེར་ཐལ། དེ་ཐོག་མ་མེད་པ་ནས་ཆོས་ཉིད་ཀྱིས་གནས་པའི་ཕྱིར། དོན་གསང་ལས། ཇི་ལྟར་ཆོས་ཉིད་ཀྱིས་གནས་པའི་བག་ཆགས་སུ་འགྱུར་ཞེ་ན། ནས། ཏིལ་ལ་སོགས་པ་ལ་ཆོས་ཉིད་ཁོ་ནས་དྲི་འཛིན་པའི་ནུས་པ་ཡོད་དོ་ཞེས་བྱ་བར་ཤེས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། དོན་གསང་མཁན་པོས་བག་ཆགས་ཆོས་ཉིད་ཀྱིས་གནས་པ་ཁོ་ནར་འདོད་ཀྱང། རྗེས་རང་ལུགས་སུ་མ་མཛད་པའི་ཕྱིར། དེར་ཐལ། བག་ཆགས་བསྒོ་ཚུལ་ལ་ཆོས་ཉིད་ཀྱིས་གནས་པའི་བག་ཆགས་རྙིང་པ་ཁོ་ན་གསོ་བར་འདོད་པ་དང། གསར་བཞག་ཁོ་ནར་འདོད་པ་དང། རྙིང་པ་གསོ་བ་ཡང་ཡོད་ལ་གསར་བཞག་ཀྱང་ཡོད་པར་འདོད་པའི་ལུགས་གསུམ་ཡོད་པས་དང་པོ་དོན་གསང་མཁན་པོའི་བཞེད་པ་གང་ཞིག །ལུགས་ཕྱི་མ་གཉིས་འདོད་མཁན་བཞེད་ཚུལ་མི་འདྲ་བའི་ཕྱིར། དང་པོ་གྲུབ་སྟེ། དཀའ་འགྲེལ་ལས། ལུགས་གསུམ་དོན་གསང་དུ་བཀོད་ནས་ཕན་ཚུན་སྐྱོན་བརྗོད་དང་འགལ་སྤོང་རྒྱས་པར་བྱས་ཤིང་ལུགས་དང་པོ་འཐད་ཕྱོགས་སུ་ཁས་བླངས་ཀྱང་འདིར་ནི་ཕྱོགས་གསུམ་པ་བཟུང་ངོ༌། །ཞེས་གསུངས་པའི་ཕྱིར་དང། ལུགས་དང་པོ་ནི། དོན་གསང་ལས། བག་ཆགས་ནི་བསྒོ་བར་བྱེད་པ་ལ་མི་ལྟོས་པར་ཆོས་ཉིད་ཀྱིས་གནས་ལ་འདོད་ཆགས་ལ་སོགས་པ་ལྷན་ཅིག་སྐྱེ་བ་དང་འགག་པས་ནི་ཡོངས་སུ་གསོ་བ་འབའ་ཞིག་ཏུ་ཟད་ཀྱི་སྐྱེད་པ་ནི་མ་ཡིན་ནོ། །ཞེས་གསུངས་པའི་ཕྱིར། སློབ་དཔོན་འདིའི་རང་ལུགས་འདི་ཉིད་ཡིན་པར་རེད་མདའ་བས་ཀྱང་

― GTD002_Page_0338 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་ལ། འོན་ཀྱང་གྲུབ་མཐའ་ཆེན་མོར་གསུམ་པ་མ་བཀག་པས་རང་ཡང་འདོད་པར་སེམས། ཞེས་གསུངས་པས་དཔྱད་གཞི་ཆེ་བར་སྣང་ངོ༌། །རྟགས་གཉིས་པ་གྲུབ་སྟེ། གྲུབ་མཐའ་ཆེན་མོ་ལས། བུ་སྟོན་ཐམས་ཅད་མཁྱེན་པས་ལུགས་དང་པོ་བློ་བརྟན་དང། གཉིས་པ་བཙུན་པ་ཡང་དག་བདེན་སྨྲ་དང། གསུམ་པ་མཆོག་གི་སྡེ་དང་དགའ་བའི་སྡེར་འདོད་ལ། དཔང་ལོ་དང་ས་བཟང། དང་པོ་ཟླ་སྐྱོང་དང་ཡང་དག་བདེན་སོགས་དང། གསུམ་པ་ཆོས་སྐྱོང་སོགས་ལ་འདོད་གསུང་ཡང་ལུང་དང་རྒྱུ་མཚན་སྤྲོས་པ་མ་མཐོང། ཞེས་གསུངས་པའི་ཕྱིར། བློ་བརྟན་གྱིས་དེ་ལྟར་བཞེད་པ་ནི། དུལ་ལྷའི་སུམ་ཅུ་པའི་འགྲེལ་བཤད་ལས། འགྲེལ་པ་བྱེད་པས་ཕྱོགས་པར་མ་བཞག་གོ །ཞེས་གསུངས་པས་འགྲུབ་སྟེ། དེར་བག་ཆགས་གདོད་མ་ནས་ཡོད་པ་དེ་ལུགས་གཉིས་པར་བཀོད་པའི་ཕྱིར། རྗེའི་རང་ལུགས་ལ་བཤད་ཚུལ་གསུམ་པ་འཐད་ལྡན་དུ་མཛད་དགོས་ཏེ། བཤད་ཚུལ་དང་པོ་མི་འཐད་པ་གང་ཞིག །གཉིས་པ་ཡང་མི་འཐད་པའི་ཕྱིར། དང་པོ་གྲུབ་སྟེ། བག་ཆགས་ཆོས་ཉིད་ཀྱིས་གནས་པ་ཁོ་ན་ཡིན་ན། ཀུན་གཞི་དང་ཀུན་ནས་ཉོན་མོངས་པའི་ཆོས་རྣམས་ཕན་ཚུན་རྒྱུ་འབྲས་སུ་སྦྱོར་ཚུལ་མེད་པས་ཐེག་བསྡུས་དང་འགལ་ཞིང་གྲངས་ཅན་གྱི་གཙོ་བོ་ལྟ་བུར་འགྱུར་བ་དང། ལམ་སྒོམ་པ་སོགས་ཀྱི་རྩོལ་བ་གསར་དུ་བྱེད་པ་དོན་མེད་དུ་ཐལ་བ་དང། ཐ་ན་ཏིལ་ལ་མེ་ཏོག་གི་དྲི་བསྒོ་བ་ལྟ་བུ་ཡང་མི་སྲིད་པར་འགྱུར་བའི་ཕྱིར། དེར་ཐལ། དེ་ལ་ནུས་པ་དེ་འབྱུང་བ་ལ་དེའི་ནུས་པ་སྔར་ནས་ཡོད་དགོས་པའི་ཕྱིར་ཏེ། སྔར་མེད་

― GTD002_Page_0339 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ནུས་པ་གསར་དུ་བསྒོ་བ་མི་སྲིད་པའི་ཕྱིར། གཉིས་པ་གྲུབ་སྟེ། བག་ཆགས་གསར་བཞག་ཁོ་ན་ཡིན་ན། ཀུན་གཞི་འགྲུབ་བྱེད་ཀྱི་ནུས་པ་གསར་བཞག་དགོས་པས་འཁོར་བའི་ཐོག་མ་ཡོད་པའམ། དེ་འདྲའི་ནུས་པ་གཏན་མེད་དུ་འགྱུར་ལ་ཟག་མེད་ཡེ་ཤེས་འགྲུབ་པའི་ནུས་པ་ཡང་གསར་བཞག་དགོས་ན་རང་གི་རིགས་འདྲ་ཞིག་གིས་འཇོག་དགོས་ཤིང་ཆོས་མཆོག་མན་ལ་འཕགས་ལམ་སྐྱེ་མ་མྱོང་བས་ཟག་མེད་སྐད་ཅིག་དང་པོ་རྒྱུ་མེད་དུ་ཐལ་བའི་སྐྱོན་འབྱུང་བའི་ཕྱིར། དེར་ཐལ། ཟག་མེད་ཡེ་ཤེས་འགྲུབ་རུང་གི་ནུས་པ་དེ་ཐོག་མེད་ནས་ཡོད་པའི་རྒྱུ་མཚན་གྱིས་རང་བཞིན་དུ་གནས་པའི་རིགས་ཞེས་བཤད་པའི་ཕྱིར། རྟགས་གྲུབ་སྟེ། རིགས་ལ་གནས་པའི་གང་ཟག་དེས་ནམ་ཐོས་བསམ་ཚུལ་བཞིན་དུ་བྱས་པ་ན་ལམ་གྱི་རྟོགས་པ་སྐྱེ་ལ་རིགས་ཆད་ཀྱིས་ནན་ཏན་བྱས་ཀྱང་ལམ་མི་སྐྱེ་བ་གདོད་ནས་དེ་འབྱུང་རུང་གི་ནུས་པ་དང་མི་ལྡན་པའི་དབང་གིས་ཡིན་པའི་ཕྱིར། དཔེར་ན། ནས་ཀྱི་ས་བོན་གྲུང་པོ་དེ་ཐོག་མ་ནས་མྱུ་གུ་སྐྱེད་པའི་ནུས་པ་དང་ལྡན་པས་ནམ་ཆུ་ལུད་དང་ཕྲད་པ་ན་མྱུ་གུ་སྐྱེ་ལ་ས་བོན་ཚིག་པ་རྐྱེན་དང་ཕྲད་ཀྱང་མི་སྐྱེ་བ་བཞིན་ཡིན་པའི་ཕྱིར། དེས་ན་ཟག་མེད་ཀྱི་ས་བོན་ལྟ་བུ་ཆོས་ཉིད་ཀྱིས་གནས་པ་དང། རྒྱུ་མཐུན་དང་རྣམ་སྨིན་གྱི་ས་བོན་ལྟ་བུ་གསར་དུ་བཞག་པ་གཉིས་ཀ་འདོད་དགོས་ཏེ། ཕྱོགས་རེ་རེ་ཁོ་ན་ཁས་ལེན་པ་བཀག་ཟིན་པའི་ཕྱིར། འདི་ལ་རྗེ་བཙུན་རེད་མདའ་བའི་ཊཱིཀྐར། ཁོ་བོས་ནི་བག་ཆགས་ཆོས་ཉིད་ཀྱིས་གནས་སམ་གསར་དུ་སྐྱེ་ཞེས་དཔྱོད་པ་ཉིད་གནས་མ་ཡིན་པ་ལ་དཔྱོད་པ་བྱེད་པར་

― GTD002_Page_0340 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་སོ། །ཞེས་གསུངས་པ་དང། རྫས་གཅིག་ཐ་དད་གང་ཡང་མ་ཡིན་པར་གསུངས་པ་དང་གནད་གཅིག་སྟེ་འོག་ཏུ་འཆད་དོ། །བསྒོས་པའི་བག་ཆགས་ཀྱི་ངོ་བོ་ལ་ཁ་ཅིག་ན་རེ། དགེ་བའི་བག་ཆགས་དགེ་བ་དང་མི་དགེ་བའི་བག་ཆགས་མི་དགེ་བ་ཡིན་ཟེར་ན། མི་འཐད་པར་ཐལ། དེ་གཉིས་ཀ་མ་སྒྲིབ་ལུང་མ་བསྟན་ཡིན་པའི་ཕྱིར། དེར་ཐལ། རྩ་བར། འཇོག་བྱེད་དགེ་སོགས་གང་ཡིན་ཀྱང། །བཞག་པའི་བག་ཆགས་ལུང་མ་བསྟན། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། བག་ཆགས་ལུང་མ་བསྟན་ཁོ་ནར་འདོད་པ་མི་འཐད་པར་ཐལ། དེ་ལྟར་ན་ཀུན་བཏུས་ལས། རྗེས་སུ་འབྲེལ་བའི་དགེ་བ་གང་ཞེ་ན། དེ་དག་ཉིད་ཀྱི་བག་ཆགས་སོ། །ཞེས་རྗེས་འབྲེལ་གྱི་དགེ་བར་བཤད་པའི་ལུང་དང་འགལ་བ་དང་འཕེན་བྱེད་ལས་ཀྱི་བག་ཆགས་དེས་རྣམ་སྨིན་གྱི་རྒྱུ་བྱེད་མི་ནུས་པས་ལས་འབྲས་ཀྱི་རྣམ་གཞག་འཇིག་པར་ཐལ་བ་དང། དགེ་པའི་སྐལ་མཉམ་གྱི་རྒྱུ་ལ་དགེ་བ་ཞིག་དགོས་ཤིང་བག་ཆགས་ལ་དགེ་བ་མེད་ན་སེམས་མེད་ཀྱི་གནས་སྐབས་རྣམས་སུ་དགེ་མི་དགེ་གང་གི་ཡང་རིགས་འདྲའི་རྒྱུ་མེད་པར་འགྱུར་བས་སླར་དགེ་སེམས་སོགས་སྐྱེ་མི་སྲིད་པར་ཐལ་བ་དང། སོ་ཐར་གྱི་སྡོམ་པའི་ངོ་བོ་སྤོང་སེམས་རྒྱུན་ཆགས་པ་ས་བོན་དང་བཅས་པ་ལ་འདོད་ཅིང་སྡོམ་པ་ཐོབ་ལ་མ་ཉམས་པའི་བར་དུ་དགེ་བ་རྒྱུན་ཆགས་སུ་འབྱུང་བར་གསུངས་པ་དང་འགལ་བའི་ཉེས་པ་བཞི་འབྱུང་བའི་ཕྱིར་ཟེར། རྩོད་པ་དང་པོ་མི་འཐད་པར་ཐལ། རྗེས་འབྲེལ་གྱི་དགེ་བར་གསུངས་པས་དགེ་བར་འགྲུབ་ན། གཟུགས་མེད་ན་ཡང་གཟུགས་སྐྱེད་བྱེད་ཀྱི་བག་ཆགས་ཡོད་ཅིང་དེ་རྗེས་འབྲེལ་གྱི་གཟུགས་སུ་གསུངས་པས་དེར་གཟུགས་ཡོད་

― GTD002_Page_0341 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཐལ་བ་དང། ཁམས་གོང་ན་མི་དགེ་བ་ཡོད་པར་ཐལ་བའི་སྐྱོན་སོགས་འབྱུང་བའི་ཕྱིར། རྩོད་པ་གཉིས་པ་ཡང་མི་འཐད་པར་ཐལ། འཕེན་བྱེད་ལས་ཀྱི་བག་ཆགས་དེ་རྣམ་སྨིན་འཕེན་བྱེད་ཀྱི་རྒྱུ་མིན་ལ་སྐྱེད་བྱེད་ཀྱི་རྒྱུ་ཡིན་ཀྱང་དགེ་མི་དགེ་གང་རུང་ཡིན་མི་དགོས་པའི་ཕྱིར། དེར་ཐལ། འཕངས་འབྲས་ཀྱི་མིག་དབང་སྔ་མ་སྔ་མས་ཕྱི་མ་ཕྱི་མ་བསྐྱེད་དེ་རྒྱུན་མ་ཆད་པར་འབྱུང་ཡང་སྔ་མ་ཕྱི་མའི་འཕེན་བྱེད་དུ་མི་འགྱུར་བ་བཞིན་ཡིན་པའི་ཕྱིར། དེ་ལྟར་ན་ལས་འབྲས་ཀྱི་རྣམ་གཞག་བསྒྲུབ་མི་ནུས་པའི་སྐྱོན་ཡང་མེད་དེ། སྤྱིར་གཞན་སྡེ་རྣམས་ཀྱི་ལས་འབྲས་མི་འཐད་པའི་རྩོད་པ་འགོག་ཚུལ་ནི། རྩ་ཤེ་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགག་ན་འགག་འགྱུར་བས། །འབྲས་བུ་ཇི་ལྟར་འབྱུང་བར་འགྱུར། །ཞེས་གསུངས་པ་བཞིན་རྩོད་པར་བྱེད་ལ། དེའི་སྐྱོན་སྤོང་དུ་བྱེ་སྨྲ་ཁ་ཅིག་ཐོབ་པ་དང། ལ་ལས་བུ་ལོན་གྱི་དཔང་རྒྱ་ལྟ་བུའི་ཆུད་མི་ཟ་བ་དང། གྲུབ་མཐའ་གཞན་ཕལ་ཆེར་རྣམ་ཤེས་ཀྱི་རྒྱུན་དང་ཐལ་འགྱུར་བས་ཞིག་པ་དངོས་པོར་ཁས་བླངས་ཏེ་སྐྱོན་སེལ་ལ་སེམས་ཙམ་པས་ཀུན་གཞིའི་སྟེང་ནས་སྐྱོན་སྤོང་ཚུལ་ནི། དཔེར་ན། མདའ་འཕེན་པའི་ཚེ་དང་པོར་འདོམ་བཀང་སྟེ་འཕངས་ན་དེའི་ཤུགས་ཀྱིས་འབེན་ལ་མ་ཕོག་བར་དུ་རྒྱུན་ཆད་མེད་པར་འགྲོ་འང་སྐད་ཅིག་ཕྱི་མ་རྣམས་ལ་འཕེན་པའི་རྩོལ་བ་མི་དགོས་པ་ལྟར་དང་པོར་ལས་ཀྱིས་འཕང་སྟེ་དེ་ནས་ཀུན་གཞི་ལ་བག་ཆགས་བསྒོས་པས་ཕྱིས་སུ་དེའི་རྒྱུད་ལ་འཕེན་བྱེད་མེད་ཀྱང་སྔ་མའི་ནུས་པ་མ་ཉམས་པའི་དབང་གིས་འཕང་འབྲས་འབྱིན་པར་འདོད་དེ། ཐེག་

― GTD002_Page_0342 ―

^{[མ་དཔེ་གཟིགས་ན་འདིར་གནོན།]}

[Full Size]

བསྡུས་ལས། མ་བཏབ་ཤི་བ་འཕེན་པའི་ཕྱིར། །མདའ་ནི་བར་དུ་མི་ལྟུང་བཞིན། །ཞེས་སོ། །རྩོད་པ་གསུམ་པ་ཡང་མི་འཐད་པར་ཐལ། སེམས་མེད་གནས་སྐབས་ཀྱི་མཇུག་ཐོགས་སུ་དགེ་སེམས་སྐྱེས་པ་ན་དངོས་སུ་སྐྱེད་བྱེད་བག་ཆགས་ལུང་མ་བསྟན་ཡིན་ཀྱང་བག་ཆགས་དེ་འཇོག་བྱེད་དགེ་བ་ཡིན་པས་ཕྱིས་ཀྱི་དགེ་སེམས་དེ་ཉིད་རིགས་མཐུན་སྐལ་བ་མཉམ་པའི་རྒྱུ་ལས་སྐྱེ་བར་འཇོག་པའི་ཕྱིར། དཔེར་ན། ནས་ཀྱི་ས་བོན་བཏབ་པ་ལས་སྐྱེས་པའི་མྱུ་གུ་སྔོན་པོ་དེ་ནས་དང་མི་འདྲ་ཡང་སླར་འབྲས་བུ་སྨིན་པ་ན་ས་བོན་དང་དབྱིབས་འདྲ་བས་འབྲས་བུ་མ་འཆོལ་བར་བཞག་པ་བཞིན་ཡིན་པའི་ཕྱིར། འདི་ལ་ཐེག་བསྡུས་ལས། བག་ཆགས་ཐ་དད་པ་མ་ཡིན་ཞིང་སྣ་ཚོགས་མ་ཡིན་པ་ཆོས་ཐ་དད་པ་སྣ་ཚོགས་དག་གི་རྒྱུར་ཇི་ལྟར་རུང་ཞེ་ན། དཔེར་ན། ཚིག་གུའི་རྩི་སྣ་ཚོགས་ཀྱིས་བསྒྱུར་བའི་རས་སྣ་ཚོགས་སུ་མི་སྣང་བ་གང་གི་ཚེ་ཚོན་གྱི་སྣོད་དུ་བཅུག་པ་དེའི་ཚེ་རས་ལ་ཚོན་རྣམས་ཀྱི་དབྱེ་བ་ཐ་དད་པ་རྣམ་པ་སྣ་ཚོགས་དུ་མ་སྟོན་པ་བཞིན་དུ། ཞེས་དང། དབྱིག་འགྲེལ་ལས། བག་ཆགས་ཀྱི་དུས་ན་སྣ་ཚོགས་མ་ཡིན་ཡང་འབྲས་བུའི་དུས་ན་རྣམ་པ་དུ་མའི་ཆོས་ཀྱི་རྒྱུའི་ངོ་བོ་མཐོང་སྟེ་བཙོས་པའི་གོས་བཞིན་ནོ། །ཞེས་རས་ཡུག་དཀར་པོ་གཅིག་ལ་ཚིག་གུའི་རྩིའམ་སྒྱུར་རྩི་གར་སླ་སྣ་ཚོགས་བསྒོས་ན་སྐབས་དེར་མདོག་མི་འདྲ་བ་མི་འཆར་ཡང། སླར་ཚོས་སྣོད་དུ་བཅུག་པའི་ཚེ་ཚིག་གུའི་རྩི་མི་འདྲ་བའི་ནུས་པས་མདོག་བཟང་ངན་སྣ་ཚོགས་འབྱུང་བ་དཔེར་བྱས་ནས་གསུངས་སོ། །རྩོད་པ་བཞི་པ་ཡང་མི་འཐད་དེ། སོ་ཐར་གྱི་སྡོམ་པ་སྤོང་སེམས་ས་བོན་དང་བཅས་པར་བཤད་པ་ནི། སྤོང་སེམས་

― GTD002_Page_0343 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཤུགས་མ་ཉམས་པའི་དབང་གིས་ཉེས་ལྟུང་འབྱུང་བར་རྩོམ་པ་ན་དྲན་ཤེས་སྐྱེས་ཏེ་འགོག་ནུས་ཤིང་ཡུན་ཇི་ཙམ་བསྲུང་བ་བཞིན་དུ་རྣམ་སྨིན་གོང་འཕེལ་དུ་འགྲོ་བའི་དོན་ཡིན་གྱི་དགེ་བ་ཡིན་བཞིན་པར་ཡོད་པའི་དོན་མ་ཡིན་པའི་ཕྱིར་ཏེ། དེ་ལྟར་མ་ཡིན་ན་དགེ་མི་དགེ་གཉིས་རྒྱུད་གཅིག་ལ་ཅིག་ཅར་འཇུག་དགོས་པས་སྣང་མུན་ལྷན་གཅིག་སྐྱེ་བ་ལྟར་ཧ་ཅང་ཐལ་བའི་ཕྱིར། ལས་གྲུབ་པའི་རབ་བྱེད་ལས། སེམས་གཡེང་བ་དང། སེམས་མེད་པ་དག་ལ་སེམས་པ་དེ་མེད་ན་སྡོམ་པ་དང་སྡོམ་པ་མ་ཡིན་པ་གཉིས་ཇི་ལྟར་ཡོད་ཅེ་ན༌། སྡོམ་པའི་ཁྱད་པར་གྱི་བག་ཆགས་མ་བཅོམ་པའི་ཕྱིར། སྡོམ་པ་དང་སྡོམ་པ་མ་ཡིན་པ་གཉིས་ཀ་ཡོད་དོ། །ཞེས་དང། བཤད་སྦྱར་ལས། ནུས་པའི་རང་བཞིན་གྱི་ཁྱད་པར་གྱི་ཕྱིར་རོ་ནས། ནུས་པ་ཡང་ནུས་པ་ཅན་ལས་དེ་ཉིད་དང། གཞན་དུ་བརྗོད་པར་བྱ་བ་མ་ཡིན་ནོ། །ཞེས་དང། དཀའ་འགྲེལ་ལས། ཚུལ་ཁྲིམས་ཀྱི་རྒྱུན་སྡོམ་པའི་ནུས་པ་ཡོད་ན་དེ་ཙམ་གྱིས་སྔར་བླངས་པའི་སྡོམ་པ་ཡོད་པར་འཇོག་ནུས་ལ། ཞེས་པ་ནས། འགྲེལ་པ་གཉིས་ཀར་ལུང་མ་བསྟན་དུ་བཀྲལ་བས་ལུང་མ་བསྟན་དུ་གྲུབ་བོ། །ཞེས་གསུངས་པའི་ཕྱིར། འོན་ཀྱང་དེ་འདྲའི་སྐབས་ཀྱི་སྡོམ་པ་དགེ་བ་ཡིན་མིན་དང། དགེ་མི་དགེ་ཅིག་ཅར་འབྱུང་བ་མེད་ན་མི་གསོད་པ་གཞན་ལ་བཅོལ་ཏེ། རང་ཉིད་དགེ་སེམས་ཞིག་ལ་གནས་བཞིན་པའི་སྐབས་སུ་ཕ་རོལ་པོ་དེས་མི་གསོད་པའི་དངོས་གཞི་གྲུབ་ན་འདི་ལ་ཕམ་པ་འབྱུང་མི་འབྱུང་སོགས་སྤྲོས་པས་ཆོག་གོ །ཁ་ཅིག་བག་ཆགས་ལུང་མ་བསྟན་དུ་

― GTD002_Page_0344 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་པ་ནི། ཞེ་སྡང་ལྟ་བུའི་བག་ཆགས་ལ་དེའི་རྒྱུན་དུ་གྱུར་བའི་ས་བོན་གྱི་ངོ་བོའི་བག་ཆགས་ཉོན་སྒྲིབ་ཏུ་གཏོགས་པ་ཞིག་དང། དེས་བཞག་པའི་བག་ཆགས་ཤེས་སྒྲིབ་ཀྱིས་བསྡུས་པ་གཉིས་ཡོད་པའི་ཕྱི་མ་ལ་དགོངས་ཟེར་བ་ནི་སྙིང་པོ་མེད་པའི་གཏམ་སྟེ། དེ་ལྟར་ན་རྩོད་ལན་དེ་ཐམས་ཅད་འབྲེལ་མེད་ཁོ་ནར་འགྱུར་བའི་ཕྱིར་དང། དེ་སླད་སྨྲ་བ་ནི་ཀུན་གཞི་དང་བག་ཆགས་བྱ་བའི་རྫས་སོ་སོ་བ་རེ་ལོགས་སུ་ཡོད་པར་གོ་བའི་སྐྱོན་ཡིན་པའི་ཕྱིར། དེར་ཐལ། ཞིང་ལ་འབྲས་བུ་སྣ་ཚོགས་བཏབ་པ་རྣམས་ཕན་ཚུན་དབྱིབས་དང་ཁ་དོག་མི་འདྲ་ཞིང། ཞིང་ལས་ངོ་བོ་ཐ་དད་དུ་ཕྱེ་ནས་ཟུར་དུ་སྟོན་རྒྱུ་ཡོད་པ་ལྟར་བག་ཆགས་ནང་ཕན་ཚུན་ཡང་དགེ་མི་དགེ་ལུང་མ་བསྟན་གྱི་རིགས་མི་འདྲ་ཞིང་བསྒོ་གཞིའི་བདག་ཉིད་དུ་གྱུར་པ་མ་ཡིན་པར་དེ་ལས་ལོགས་སུ་ཕྱེ་ན་ངོ་བོ་བཞག་ཏུ་ཡོད་པར་འཁྲུལ་པ་གང་ཞིག །དེ་ལྟར་གནས་ན་རང་རྐྱ་འཛིན་ཐུབ་པའི་རྫས་ཡོད་དུ་འགྱུར་ལ། དེ་ལྟར་མ་ཡིན་པར་ཀུན་གཞི་རང་ཉིད་རྣམ་སྨིན་དེ་དང་དེ་འབྱིན་པའི་ནུས་ལྡན་དུ་གྱུར་པ་ལ་དེས་བག་ཆགས་བཞག་ཅེས་བཏགས་པ་ཙམ་ཡིན་པས་བག་ཆགས་བཏགས་ཡོད་དུ་གསུངས་པའི་ཕྱིར། དཔེར་ན་མཚོན་བརྡར་དེ་གཅོད་བྱ་གཅོད་ནུས་སུ་གྱུར་པ་ལ་རྣོ་བ་ཞེས་བཏགས་ཙམ་ཡིན་གྱི་རྣོ་བ་མཚོན་ལས་ལོགས་སུ་མེད་པ་ལྟ་བུ་ཡིན་པའི་ཕྱིར། འདིའི་རྒྱུ་མཚན་གྱིས་སྔར་དྲངས་པའི་བཤད་སྦྱར་དང། རྗེ་བཙུན་རེད་མདའ་བས་བག་ཆགས་གསར་རྙིང་བསྒོ་ཚུལ་དཔྱོད་པ་གནས་མ་ཡིན་པར་གསུངས་པ་ཡང་བསྒོ་བྱ་བསྒོ་བྱེད་གཉིས་རྫས་ཡོད་ཀྱི་སོ་སོ་བར་བཟུང་ནས་སྔ་ཕྱི་དཔྱོད་པ་བཀག་པ་ཡིན་ནོ། །དེས་ན་རྩ་བར། བག་

― GTD002_Page_0345 ―

^{[མ་དཔེ་གཟིགས་ན་འདིར་གནོན།]}

[Full Size]

ཆགས་དེ་ཉིད་རྟེན་ལས་ནི། །རྫས་གཅིག་ཐ་དད་གང་ཡང་མིན། །ཞེས་གསུངས་པ་ཡང། ཐེག་བསྡུས་ལས། གང་དེ་འབྱུང་བའི་མཐུའི་ཁྱད་པར་ཅན་ཀུན་གཞིའི་རྣམ་པར་ཤེས་པ་དེ། ཞེས་གསུངས་པ་ལྟར་བསྒོ་བྱེད་དེས་བསྒོ་གཞི་དེ་ནུས་ལྡན་དུ་བྱས་པའི་ཆ་ལ་བག་ཆགས་ཞེས་བཏགས་པ་ཡིན་པས་བག་ཆགས་རྫས་སུ་གྲུབ་ན་རྟེན་བརྟེན་པའི་འབྲེལ་བ་ཡང་རྫས་གྲུབ་ཏུ་འགྱུར་ལ། དེ་རྫས་སུ་གྲུབ་ན་རྫས་གྲུབ་ཀྱི་གཅིག་དང་དུ་མ་གང་རུང་ལས་མ་འདས་ཀྱང། དེ་གང་དུའང་ཁས་ལེན་དུ་མི་རུང་ཞེས་པའི་དོན་ཡིན་པའི་ཕྱིར། དེར་ཐལ། དེ་གཉིས་འབྲེལ་བ་རྫས་གྲུབ་ཀྱི་གཅིག་མ་ཡིན་པ་གང་ཞིག །དེའི་དུ་མའང་མ་ཡིན་པའི་ཕྱིར། དང་པོ་མ་གྲུབ་ན། ཀུན་གཞི་དང་བག་ཆགས་གཉིས་ཆོས་ཅན། ཆ་གང་ནས་ཀྱང་སོ་སོར་དབྱེ་རྒྱུ་མེད་པའི་གཅིག་ཡིན་པར་ཐལ། འབྲེལ་བ་རྫས་གྲུབ་ཀྱི་སྒོ་ནས་གཅིག་ཏུ་གནས་པའི་ཕྱིར། ཁྱབ་སྟེ། འབྲེལ་བ་བཏགས་ཡོད་ཙམ་ལ་ངོ་བོ་གཅིག་ཏུ་གནས་ཀྱང་ལྡོག་པ་ཐ་དད་པ་རུང་ལ། འབྲེལ་བ་རྫས་གྲུབ་ལ་ངོ་བོ་གཅིག་ཡིན་ན་ལྡོག་པ་ཡང་གཅིག་ཡིན་དགོས་པར་འདོད་པའི་ཕྱིར་ཏེ། དཔེར་ན་ཐལ་འགྱུར་བ་སོགས་ཀྱིས་ཀུན་རྫོབ་ཏུ་ངོ་བོ་གཅིག་ལ་ལྡོག་པ་ཐ་དད་རུང་ཡང་དོན་དམ་པར་ངོ་བོ་གཅིག་ཡིན་ན་དེར་སྣང་གི་བློ་ལ་སྣང་ཚུལ་དེ་གནས་ལུགས་མཐར་ཐུག་ཡིན་པས་ལྡོག་པ་ཡང་གཅིག་ཏུ་འདོད་དགོས་ཞེས་བཤད་པ་བཞིན་ཡིན་པའི་ཕྱིར། གོང་དུ་འདོད་ན། ཀུན་གཞིའི་སྟེང་གི་ས་བོན་དེས་ཀྱང་དམིགས་རྣམ་འཛིན་པ་དང། འགྲོ་བ་ལྔར་འཕེན་བྱེད་ཀྱི་དགེ་མི་དགེ་རྣམས་དང། ཁམས་སོ་སོའི་བག་ཆགས་རྣམས་ཀྱང་

― GTD002_Page_0346 ―

^{[མ་དཔེ་གཟིགས་ན་འདིར་གནོན།]}

[Full Size]

ཕན་ཚུན་ཡིན་ཁྱབ་མཉམ་ཡིན་པར་ཐལ། དེ་དག་རེ་རེ་ནས་རྩ་བའི་ཀུན་གཞི་དང་ལྡོག་པ་གཅིག་ཡིན་པའི་ཕྱིར། ཁྱབ་སྟེ། ས་བོན་དམིགས་རྣམ་ཡོད་པ་དང། །འགྲོ་བ་ལྔ་ཡིས་ས་བོན་རྣམས། །འཆོལ་བ་ཉིད་དུ་འགྱུར་ཕྱིར་དང། །ཁམས་ཀྱང་འཆོལ་ཕྱིར་གཅིག་ཉིད་མིན། །ཞེས་གསུངས་པའི་ཕྱིར། རྩ་རྟགས་གཉིས་པ་མ་གྲུབ་ན། དེ་གཉིས་ཆོས་ཅན། འབྲེལ་མེད་དོན་གཞན་ཡིན་པར་ཐལ། རྫས་གྲུབ་ཀྱི་ཐ་དད་ཡིན་པའི་ཕྱིར། ཁྱབ་སྟེ། སྤྱིར་ཐ་དད་ཙམ་དུ་མ་ཟད་རྒྱུ་འབྲས་ལྟ་བུ་ངོ་བོ་ཐ་དད་ལ་ཡང་འབྲེལ་མེད་དོན་གཞན་མི་དགོས་ཀྱང་རྫས་གྲུབ་ཀྱི་ཐ་དད་ལ་དེ་དགོས་པའི་ཕྱིར། དེར་ཐལ། དེ་གཉིས་ཐ་དད་པའི་ཆ་དེ་རྫས་སུ་གྲུབ་ན་རྣམ་པ་ཐམས་ཅད་ནས་མ་འདྲེས་པའི་ཐ་དད་ཡིན་དགོས་པའི་ཕྱིར། ཐེག་བསྡུས་འགྲེལ་པ་ལས། ཐ་དད་ན་ནི་ཡན་ལག་ཐམས་ཅད་ཀྱིས་ཀྱང་ཐ་དད་པ་ཉིད་ཐོབ་པར་འགྱུར་ཞིང། ཞེས་གསུངས་པའི་ཕྱིར་དང། འཇུག་པ་ལས། གང་དག་རང་མཚན་ཉིད་ཀྱིས་སོ་སོ་བ། །དེ་དག་རྒྱུད་གཅིག་གཏོགས་པ་རིགས་མ་ཡིན། །ཞེས་ངོ་བོ་ཉིད་ཀྱིས་ཐ་དད་ཡིན་ན་རྒྱུད་གཅིག་ལ་གནས་པ་ཡང་མི་རུང་བར་བཤད་པའི་རིགས་པ་དང་འགྲོས་མཐུན་པར་སྣང་བའི་ཕྱིར། གོང་དུ་འདོད་ན། སོ་སྐྱེའི་རྒྱུད་ཀྱི་བག་ཆགས་དེ་ཆོས་ཅན། ཁྱོད་ཀྱང་ཀུན་གཞིའི་རྣམ་ཤེས་གཅིག་ཡིན་པར་ཐལ། གཟུགས་དང་ལྡན་མིན་རྣམ་ཤེས་ཚོགས་བདུན་གང་ཡང་མ་ཡིན་པའི་ཚུར་མཐོང་རྒྱུད་ཀྱིས་བསྡུས་པའི་ཆོས་གཅིག་ཡིན་པའི་ཕྱིར། དཀའ་འགྲེལ་ལས། གཟུགས་དང་ལྡན་མིན་དང་ཚོགས་བདུན་གང་ཡང་མ་ཡིན་ཏེ། རྫས་སུ་གྲུབ་པ་དང། གཟུགས་མེད་ན་ཡོད་པ་དང། ཞེས་སོགས་གསུངས་པའི་ཕྱིར། འདིའི་

― GTD002_Page_0347 ―

^{[མ་དཔེ་གཟིགས་ན་འདིར་གནོན།]}

[Full Size]

རྫས་གྲུབ་ཅེས་པ་ལྡན་མིན་ཞེས་པ་དང་སྦྱོར་དགོས་པས། ཁ་ཅིག་འདིའི་ཐ་དད་མ་ཡིན་པ་རྫས་ཐ་དད་མ་ཡིན་པ་ཙམ་ལ་བྱེད་པ་མ་འབྲེལ་ཏེ། དེ་ལྟར་ན་ལྡན་མིན་མ་ཡིན་ཏེ། རྫས་ཐ་དད་ཡིན་པའི་ཕྱིར། ཞེས་ཟེར་དགོས་པས་རྟ་གླང་གཉིས་ཀྱང་རྫས་ཐ་དད་མ་ཡིན་པར་འགྱུར་རོ། །དེས་ན་སྔར་ལྟར་རྫས་གྲུབ་ཀྱི་ཐ་དད་མ་ཡིན་པ་ལ་བྱེད་པ་གཞུང་གི་དགོངས་པ་རྨ་མེད་པའོ། །གོང་དུ་འདོད་ན། སོ་སྐྱེ་དེ་ཆོས་ཅན། རྒྱུད་ཐ་དད་པ་ཅན་ཡིན་པར་ཐལ། ཁྱོད་ཀྱི་རྒྱུད་ལ་ཀུན་གཞི་གཉིས་ཡོད་པའི་ཕྱིར་ཏེ། རྣམ་སྨིན་དང་ས་བོན་གྱི་ཆ་རེ་རེ་ནས་ཀུན་གཞི་ཡིན་པའི་ཕྱིར། རྟགས་ཁས། ཁྱབ་སྟེ། རྩ་བར། རྟེན་གཅིག་ལ་ནི་ཀུན་གཞི་གཉིས། །འཇུག་པར་འགྱུར་བས་སོ་སོ་མིན། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཁྱོད་ལྟར་ན་ཡང་རྒྱུད་དུ་མར་འགྱུར་བར་ཐལ། དེའི་རྒྱུད་ལ་རྣམ་ཤེས་ཚོགས་བདུན་ཡོད་པ་གང་ཞིག །སེམས་སེམས་བྱུང་དུ་མ་ཡོད་པའི་ཕྱིར་ན་མ་ཁྱབ་སྟེ། ཚོགས་བདུན་ཀུན་གཞི་ལ་བརྟེན་ནས་འཇུག་ཅིང། སེམས་བྱུང་རྣམས་སེམས་ལ་བརྟེན་ནས་འཇུག་དགོས་པས་རྒྱུད་རང་རྐྱ་བར་མི་འགྱུར་བ་གང་ཞིག །ཀུན་གཞི་གཉིས་ཡོད་ན་གཉིས་ཀ་ཕན་ཚུན་ལྟོས་མི་དགོས་པའི་བརྟན་པ་རང་དབང་ཅན་གྱི་རྣམ་ཤེས་ཡིན་དགོས་པས་རྒྱུད་དུ་མར་འགྱུར་བའི་ཕྱིར། ཡང་ཁོ་ན་རེ། ཁྱོད་ཀྱིས་རྫས་གྲུབ་ཀྱི་གཅིག་ཐ་དད་ཅེས་བཤད་པ་དཀྱོག་བཤད་ཡིན་པར་ཐལ། རྩ་བ་དང། དཀའ་འགྲེལ་གང་དུ་ཡང་རྫས་གཅིག་ཐ་དད་གང་ཡང་མིན་ཞེས་བཤད་པ་མ་གཏོགས་རྫས་གྲུབ་ཀྱི་ཟུར་ཙམ་ཡང་མ་བྱུང་

― GTD002_Page_0348 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཕྱིར་ཟེར་ན། ཤིན་ཏུ་མི་འཐད་པར་ཐལ། དཀའ་འགྲེལ་དུ་དྲངས་པའི་ཐེག་བསྡུས་ལས། དེ་ལ་གནས་པ་དེ་དག་དང་རྫས་སུ་ཐ་དད་ཡང་མ་ཡིན། ཐ་མི་དད་པའང་མ་ཡིན། ཞེས་གསུངས་ལ། དེར་དྲངས་པའི་དོན་གསང་དང། བཤད་སྦྱར་གཉིས་ཀར་རྫས་སུ་ཐ་དད་པ་ཡང་མ་ཡིན། ཞེས་འབྱུང་ཞིང། ཡང་ས་བོན་ནི་བཏགས་པའི་ཡོད་པ་ཡིན་གྱི་རྫས་སུ་ཡོད་པ་ནི་མ་ཡིན་ནོ། །ཞེས་དབྱིག་འགྲེལ་གྱི་ལུང་དྲངས་པ་དང། ནུས་པ་བཏགས་ཡོད་ནུས་པ་ཅན་རྫས་ཡོད་དུ་བཞེད་པའི་ཞེས་སོགས་ཤིན་ཏུ་མང་ལ། རྩ་བར་སྒྲུབ་བྱེད་ཀྱི་དོན་བསྡུས་ཏེ་འཆད་པ་ན། བཏགས་ཡོད་ཙམ་དུ་གནས་ཕྱིར་རོ། །ཞེས་གསུངས་པས་སྔ་མ་རྫས་ཡོད་བཀག་པ་ཡིན་པར་ཤིན་ཏུ་གསལ་བའི་ཕྱིར། དེར་མ་ཟད་དཔེ་དང་ལུང་གིས་བསྒྲུབ་ཚུལ་གྱིས་ཀྱང་ཤེས་ཏེ། དཀའ་འགྲེལ་ལས། ཆོས་ཀྱི་རྗེས་ཀྱང། ཤིང་མིན་ལས་ལྡོག་དངོས་པོ་དེ། །ཤ་པ་ཡིན་ན་གཞན་ཤིང་ཡིན། །དེ་ཡི་རང་བཞིན་གཞན་མིན་ཕྱིར། །ཞེས་ཤིང་མ་ཡིན་པ་ལས་ལྡོག་པའི་དངོས་པོ་དེ་ཤ་བ་དང་རྫས་གཅིག་གམ་ཐ་དད། ཅེས་པ་ནས། ཞེས་གསུངས་པའི་རིགས་པ་དང་རྗེས་སུ་མཐུན་ནོ། །ཞེས་རིགས་གཏེར་གྱི་བསྒྲུབ་ཚུལ་དེ་དང་མཐུན་པར་གསུངས་པ་གང་ཞིག །དེས་འབྲེལ་བ་རྫས་གྲུབ་བཀག་པ་ཡིན་པའི་ཕྱིར། ཕྱི་མ་དེར་ཐལ། རིགས་གཏེར་རང་འགྲེལ་ལས། དེའི་མཚམས་སྦྱོར་དུ། བཞི་པ་སེལ་བ་དངོས་པོར་གྲུབ་མ་གྲུབ་བརྟགས་ནས་མི་འཐད་པ་སྤང་བ་ནི། ཞེས་པ་ནས། ལྡོག་པ་དང་སྤྱི་དངོས་པོར་ཁས་བླངས་པ་དེས་ཆོས་ཀྱི་གྲགས་པས་གང་བཀག་པ་དེ་སྙིང་ནད་

― GTD002_Page_0349 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཁས་བླངས་པ་ཡིན་ནོ། །ཞེས་གསུངས་ཤིང། རྣམ་འགྲེལ་ལས། དེ་ཡིས་ཇི་ལྟར་ཀུན་བཏགས་པ། །དེ་ནི་དམ་པའི་དོན་དུ་མེད། །གསལ་བ་རྣམས་ནི་རྗེས་མི་འགྲོ། །རྗེས་འགྲོ་གཞན་ནི་སྣང་བ་མེད། །ཅེས་ཤིང་དང་ཤ་པ་གཉིས་སྤྱི་གསལ་དུ་གྲུབ་པའི་འབྲེལ་བ་རྫས་གཅིག་ཡོད་ན་ཆ་ཐམས་ཅད་ནས་འདྲེས་དགོས་པས་ཤིང་གིས་གང་ཁྱབ་ལ་ཤ་བས་ཁྱབ་པ་སོགས་ཀྱིས་ཤ་ཤུག་གཉིས་ཀྱང་ཕན་ཚུན་འདྲེས་པར་འགྱུར་བའམ། ཡང་ན་གསལ་བ་རྫས་སོ་སོ་བ་ཡོད་པ་ལྟར་ཤིང་སྤྱི་ཡང་རྫས་སོ་སོ་བ་ཡོད་དགོས་པ་ལ། དེ་ལྟ་བུ་རྫས་གཞན་ནི་བློ་མ་འཁྲུལ་བ་ལ་སྣང་རྒྱུ་མེད་ཅིང་གལ་ཏེ་ཡོད་ན་ཤིང་ཙམ་དེ་གང་གི་ཡང་སྤྱི་མ་ཡིན་པར་འགྱུར་བས་ཤ་བ་ཤིང་མ་ཡིན་པར་ཐལ་བ་འཕེན་ཚུལ་རིགས་གཏེར་དང་གཉིས་ཀ་མཐུན་པའི་ཕྱིར། དེར་ཐལ། སྤྱི་གསལ་གྱི་འབྲེལ་པ་རྫས་གྲུབ་ལ་བཀོད་པའི་སྐྱོན་དེ་རྟེན་བརྟེན་པའི་འབྲེལ་པ་རྫས་གྲུབ་ལ་ཡང་འཇུག་པ་དཀའ་འགྲེལ་གྱི་ལུང་དོན་གང་ཞིག །དེ་ཆོས་ཀྱི་གྲགས་པའི་དགོངས་པ་ཡིན་པའི་ཕྱིར། དང་པོ་བསྒྲུབས་ཟིན། གཉིས་པ་གྲུབ་སྟེ། རྣམ་འགྲེལ་ལས། ཆོས་དང་ཆོས་ཅན་རྣམ་གཞག་དང། །ཐ་དད་ཐ་དད་མིན་ཅི་འདྲ། །དེ་ཉིད་དོན་ནི་མ་བཏགས་པར། །འཇིག་རྟེན་ཇི་ལྟར་གྲགས་དེ་ལ། །དེ་བཞིན་ཁོ་ནར་བརྟེན་ནས་ནི། །བསྒྲུབ་བྱ་བསྒྲུབ་པ་ཀུན་བཞག་ལ། །དམ་པའི་དོན་ལ་འཇུག་བྱའི་ཕྱིར། །མཁས་པ་རྣམས་ཀྱིས་བྱས་པ་ཡིན། །ཞེས་བྱ་བྱེད་ཀྱི་འབྲེལ་པའི་ཆ་རྣམས་རྟོག་པ་འཁྲུལ་པའི་སྣང་ངོ་ཙམ་ལ་ལྟོས་ནས་འཇོག་

― GTD002_Page_0350 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་པའི་བཏགས་ཡོད་དུ་མཚུངས་པར་གསུངས་པའི་ཕྱིར། དེར་ཐལ། དེའི་རྒྱུ་མཚན། དེ་དག་བཏགས་ཡོད་ཡིན་ན་བཏགས་ཡོད་ནི་བློ་འཁྲུལ་པའི་དབང་གིས་འཇོག་ནུས་པས་སྤྱི་གསལ་དང་རྟེན་བརྟེན་པ་སོགས་འདྲེར་རུང་གི་ཚུལ་དུ་སྣང་ཡང་དོན་ལ་འདྲེས་མི་དགོས་ཀྱང་རྫས་ཡོད་ལ་དེ་ལྟར་མ་ཡིན་པའི་ཕྱིར། རིགས་གཏེར་དར་ཊཱིཀ་ལས། ཤིང་མ་ཡིན་པ་ལས་ལོག་པར་སྣང་བ་དངོས་པོ་ཡིན་ན་དེར་སྣང་གི་བློ་མ་འཁྲུལ་བར་འགྱུར་ལ། དེ་ལྟ་ན་རྟོག་མེད་མ་འཁྲུལ་བའི་གཟུང་དོན་ཆ་དང་ཆ་ཅན་གྱིས་དབེན་པར་སྣང་གི་ཆ་ཅན་མི་སྣང་བས་ཤ་བ་ལ་རྗེས་སུ་འགྲོ་བའི་ཆ་ཤུག་པ་ལ་ཡང་རྗེས་སུ་འགྲོ་བར་ཁས་ལེན་དགོས་པས། ཞེས་དང། རྣམ་འགྲེལ་ཊཱིཀ་ཆེན་ལས། སྣང་བ་དེ་དམ་པའི་དོན་དུ་མེད་དེ། དོན་དམ་པར་ཡོད་ན་དེ་འཛིན་གྱི་སྤྱི་བློ་དེ་སྣང་ཡུལ་ལ་མ་འཁྲུལ་བར་འགྱུར་ལ། དེ་ལྟ་ན་ཤིང་གི་སྤྱི་བློ་དེ་ལ་ཤིང་གསལ་རྣམས་རང་བཞིན་འདྲེས་པར་སྣང་བས་ཤིང་གསལ་རྣམས་རང་བཞིན་འདྲེས་དགོས་ནའང། ཞེས་དང། ཤིང་གི་སྤྱི་འཛིན་ཤེས་པ་ལ་ཤིང་དུ་སྣང་བ་དེ་དངོས་པོར་གྲུབ་ན་དེར་སྣང་གི་རྟོག་པ་དེ་སྣང་ཡུལ་ལ་མ་འཁྲུལ་བར་འགྱུར་ལ། དེ་ལྟར་ན་སྣང་བ་དེ་ཉིད་དུ་ཐལ། དེ་ལ་ཤིང་དུ་སྣང་བ་གང་ཞིག །དེ་སྣང་ཡུལ་ལ་མ་འཁྲུལ་པའི་ཕྱིར། ཞེས་སོགས་གསུངས་པའི་ཕྱིར། དེས་ན་འདིར་གསལ་བ་རྣམས་ཕན་ཚུན་འདྲེས་པའམ་སྤྱི་རྫས་གཞན་ཡོད་པའི་ཉེས་པ་བརྗོད་ཚུལ་དང་ཀུན་གཞིའི་བག་ཆགས་ཕན་ཚུན་འཆོལ་བའམ་ཀུན་གཞི་རྫས་གཞན་ཡོད་པའི་འགལ་བ་བརྗོད་ཚུལ་ཤིན་ཏུ་མཚུངས་པའི་

― GTD002_Page_0351 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ཏེ། དཀའ་འགྲེལ་ལས། དེས་ན་ཇི་སྲིད་གསལ་བ་རྣམས་ལས་མ་གཏོགས་པའི་སྤྱི་རྫས་སུ་གྲུབ་པར་འདོད་པ་དེ་སྲིད་དུ་རྫས་གཅིག་དང་ཐ་དད་བརྟག་པའི་སྐྱོན་སྤོང་མི་ནུས་སོ། །ཞེས་གསུངས་པའི་ཕྱིར། དཀའ་གནད་རྗེན་པར་བཤད་ཡོད་དོ། །ཡང་བཤད་སྦྱར་གྱི་དོན་དུ་བྱས་ནས་ས་བཟང་གིས་ལྡོག་པ་དེ་ཉིད་དུ་བརྗོད་དུ་མེད་ཅིང་རྫས་གཞན་དུ་བརྗོད་དུ་མེད་པ་ཞེས་བྱའོ། །ཞེས་གསུངས་པ་མི་འཐད་དེ། དེ་ལྟར་ན་དོན་གསང་དུ་ཡང་བྱེ་མདོ་གཉིས་ཀའི་འདོད་ཚུལ་རེ་བཀོད་ཡོད་པས་དོན་གསང་མཁན་པོས་དེ་གཉིས་ཀ་བཞེད་པར་འགྱུར་བའི་ཕྱིར་དང། དཀའ་འགྲེལ་ལས། རྫས་གཅིག་ལྡོག་པ་ཐ་དད་དུ་འདོད་པ་ནི་གཞུང་ལུགས་གཞན་གྱི་ཆོས་སྐད་འཆུགས་པས་རང་སྐད་མ་ཐོན་པ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཀུན་གཞི་དང་དེའི་སྟེང་གི་བག་ཆགས་གཉིས་རྫས་གཅིག་ལྡོག་པ་ཐ་དད་མ་ཡིན་པར་ཐལ། དཀའ་འགྲེལ་གྱི་ལུང་དེའི་ཕྱིར་ན་མ་ཁྱབ་སྟེ། སྐབས་འདིའི་རྫས་གཅིག་ཐ་དད་གང་ཡང་མིན་ཞེས་པའི་དོན་དེ་ལ་མི་བྱེད་ཅེས་པ་ཡིན་པའི་ཕྱིར། འདོད་མི་ནུས་ཏེ། འདུ་བྱས་གང་ཞིག །ངོ་བོ་གཅིག་ལ་ལྡོག་པ་ཐ་དད་ཡིན་པའི་ཕྱིར། ཡང་ཁོ་ན་རེ། དེ་གཉིས་ཀ་ཆོས་ཅན། རྫས་གཅིག་མ་ཡིན་པར་ཐལ། རྫས་གཅིག་དང་ཐ་དད་གང་ཡང་མ་ཡིན་པའི་ཕྱིར། དེར་ཐལ། རྫས་ཡོད་མ་ཡིན་པའི་ཕྱིར། ཁྱབ་སྟེ། གཅིག་དང་ཐ་དད་གང་རུང་ཡིན་ན་ཡོད་པས་ཁྱབ་པ་གང་ཞིག །སྤྱིའི་ཁྱབ་པ་གྲུབ་ན་བྱེ་བྲག་གི་ཁྱབ་པ་ཡང་འགྲུབ་དགོས་པའི་

― GTD002_Page_0352 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ཟེར་ན་མི་འཐད་པར་ཐལ། རྫས་ཡོད་ཅེས་པའི་རྫས་དང་རྫས་གཅིག་ཐ་དད་ཅེས་པའི་རྫས་མི་འདྲ་བའི་ཕྱིར། དེར་ཐལ། སྔ་མ་རང་རྐྱ་འཛིན་ཐུབ་པའི་རྫས་ལ་བྱེད་ཕྱི་མ་དོན་བྱེད་ནུས་པའི་རྫས་ལ་བྱེད་པའི་ཕྱིར། དང་པོ་གྲུབ་སྟེ། བསྡུ་བ་ལས། དེ་ལས་གཞན་པ་དག་ལ་མི་ལྟོས་ཤིང་དེ་ལས་གཞན་པ་དག་ལ་མི་བརྟེན་པར་རང་གི་མཚན་ཉིད་འདོག་པར་བྱེད་པ་དེ་ནི་མདོར་ན་རྫས་སུ་ཡོད་པ་ཡིན་པར་བལྟ་བར་བྱའོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། སྤྱིར་རྫས་ཀྱི་སྒྲ་འཇུག་ཚུལ་ལ་རྟོག་གེ་འབར་བ་ལས། རྫས་ཀྱི་མཚན་ཉིད་སྤྱི་ནི་བྱ་བ་དང་ལྡན་པ་དང། འདུ་བའི་རྒྱུར་གྱུར་པ་ཞེས་སོགས་གསུངས་པ་ལྟ་བུ་དུ་མ་ཡོད་ཀྱང་འདིར་རྒྱུ་འབྲས་ཀྱི་ཁྱད་པར་ལ་བྱེད་པའི་ཕྱིར། དེར་ཐལ། གཟུགས་དང་གཟུགས་འཛིན་ཚད་མ་གཉིས་བག་ཆགས་གཅིག་གིས་བསྐྱེད་པས་རྫས་གཅིག་པར་བཤད་པའི་ཕྱིར། གཞན་ཡང་ཁྱོད་ལྟར་ན་དེ་གཉིས་རྫས་གཅིག་མ་ཡིན་པར་ཐལ། དེ་གཉིས་བཏགས་ཡོད་ཡིན་པའི་ཕྱིར་ཏེ། ལྡན་མིན་འདུ་བྱེད་ཡིན་པའི་ཕྱིར། འདོད་ན། ལྷན་ཅིག་དམིགས་ངེས་ཡིན་ན་རྫས་གཅིག་མ་ཡིན་པས་ཁྱབ་པར་ཐལ། སྔོན་པོ་དང་སྔོ་འཛིན་མིག་ཤེས་གཉིས་ཀྱང་རྫས་གཅིག་མ་ཡིན་པའི་ཕྱིར། རྟགས་ཁས། འདོད་ན། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་པ་དེ་སྔོ་དང་དེ་བློ་གཅིག་མ་ཡིན་ཞེས་བཟློག་རིགས་པར་ཐལ་ལོ། །རྟགས་འདིའི་བསྒྲུབ་བྱ་ལ་དེ་གཉིས་རྫས་གཅིག་པ་འགོད་པར་རྣམ་འགྲེལ་ཊཱིཀ་ཆེན་དང་ལྕང་སྐྱ་

― GTD002_Page_0353 ―

^{[མ་དཔེ་གཟིགས་ན་འདིར་གནོན།]}

[Full Size]

རིན་པོ་ཆེའི་གྲུབ་མཐར་གསུངས་ལ། ཡིག་ཆའི་སྐབས་ལྔ་པར་དངོས་ཟིན་དེ་ལྟར་བཀོད་ན་རྗེས་ཁྱབ་མི་འགྲུབ་པས་མི་རུང་བར་གསུངས་ཀྱང་རྟགས་དེ་ལ་བརྟེན་ནས་རྫས་གཅིག་ཏུ་རྟོགས་དགོས་པར་དགོངས་པ་མཐུན་ནོ། །ཀུན་གཞི་དང་བག་ཆགས་གཅིག་ཐ་དད་ཀྱི་དཔྱད་ཚུལ་འདིར་དོན་གསང་ལས། བག་ཆགས་མ་སྒྲིབ་ལུང་མ་བསྟན་དུ་ཐལ་བ་འཕངས་པ་ཐེག་བསྡུས་དང་འགལ་ཞེས་རྗེ་བཙུན་རེད་མདའ་བས་བཀག་པ་ཤིན་ཏུ་ལེགས་ལ་དེ་སོགས་མཁས་པའི་བཞེད་ཚུལ་དཔྱད་དགོས་མང་ཡང་ཚིག་ཚོགས་ཆེས་དོགས་པས་མ་སྤྲོས། ཁ་ཅིག་ན་རེ། ཀུན་གཞིའི་རྣམ་ཤེས་ས་བོན་ཐམས་ཅད་པ་མ་ཡིན་པར་ཐལ། དེ་ལ་མི་གནས་པའི་ཕྱིའི་ས་བོན་ཡོད་པའི་ཕྱིར་ན་མ་ཁྱབ་སྟེ། ཕྱིའི་ས་བོན་དེ་ཡང་ཀུན་གཞིའི་སྟེང་གི་ས་བོན་ལ་བརྟེན་ནས་འབྱུང་དགོས་པའི་ཕྱིར། བྱས་པ་ལ་ཁོ་ན་རེ། ཕྱི་སྣོད་ཀྱི་འཇིག་རྟེན་འབྱུང་འཇིག་ཀུན་གཞི་ལ་མི་ལྟོས་པར་ཐལ། གང་ཟག་ཤི་འཕོས་ཀྱང་དེའི་ལས་དབང་གིས་གྲུབ་པའི་སྣོད་མི་འཇིག་པའི་ཕྱིར། དེར་ཐལ། མི་གཅིག་ཤི་ན་དེའི་ལས་དབང་གིས་གྲུབ་པའི་ཁང་པ་ལྟ་བུ་འཇིག་མི་དགོས་པ་མངོན་སུམ་གྱིས་གྲུབ་པའི་ཕྱིར་ཟེར་ན། གོང་དུ་མ་ཁྱབ་སྟེ། སྣོད་འགྲུབ་བྱེད་ཀྱི་བག་ཆགས་ལ་ཚོར་མེད་དང་ཐུན་མོང་བའི་བག་ཆགས་ཞེས་བཤད་པའི་རྒྱུ་མཚན་གང་ཟག་དུ་མའི་སྤྱི་མཐུན་གྱི་ལས་ཀྱིས་འགྲུབ་དགོས་པས་གང་ཟག་རེ་རེ་ཤི་འཕོས་པ་ན་དེའི་ལོངས་སྤྱད་བྱའི་ཆ་འགགས་ཀྱང་རྩ་བའི་སྣོད་སྤྱི་ལྡོག་དེ་འགག་མི་དགོས་པའི་ཕྱིར། དེར་ཐལ། བསམ་

― GTD002_Page_0354 ―

^{[མ་དཔེ་གཟིགས་ན་འདིར་གནོན།]}

[Full Size]

གཏན་བཞི་པའི་སྣོད་ལྟ་བུར་རང་རང་གི་ཐུན་མོང་མ་ཡིན་པའི་ལས་ལས་གྲུབ་པས། མཛོད་ལས། སེམས་ཅན་བཅས་ཏེ་འབྱུང་འཇིག་ཕྱིར། །ཞེས་གསུངས་པ་ལྟར་མཉམ་དུ་འགགས་པའང་ཡོད་ལ་གཞན་རྣམས་སྤྱི་མཐུན་གྱི་ལས་ཅན་མཐའ་དག་གི་ལས་ཀྱི་ནུས་པ་རྫོགས་པ་ན་སྣོད་ཀྱང་འགགས་ཏེ་བསྐལ་པ་འཇིག་པའི་ཕྱིར། དེར་ཐལ། མར་མེ་བརྒྱ་མཉམ་དུ་སྦར་བའི་ཚེ་འོད་སོ་སོར་བསྟན་དུ་མེད་ཀྱང་རིམ་གྱིས་འགག་པའི་མཐར་གསལ་ཆ་གཏན་མེད་དུ་འགྲོ་བ་བཞིན་ཡིན་པའི་ཕྱིར། དེར་ཐལ། ལྷས་སྦྱིན་གྱི་ཀུན་གཞིའི་སྟེང་ནའང་འཛམ་གླིང་གི་སྣོད་འགྲུབ་བྱེད་ཀྱི་བག་ཆགས་ཞིག་མེད་ན་དེས་དེར་ལོངས་སྤྱོད་མི་ནུས་པའི་ཕྱིར། ལམ་རིམ་ལས། འབྲས་བུ་ལ་ལོངས་སྤྱོད་པ་རྣམས་ཀྱིས་དེའི་རྒྱུ་ཐམས་ཅད་བསགས་མི་དགོས་ཀྱང་ཆ་གཅིག་བསགས་དགོས་པ་ཡིན་ནོ། །ཞེས་གསུངས་པའི་ཕྱིར། ཡང་ཁོ་ན་རེ། ཕྱིའི་ས་བོན་བཤད་པའི་རྒྱུ་མཚན་ཡོད་དེ། ཕྱིའི་ས་བོན་གང་བཏབ་མ་འཆོལ་བར་སྐྱེ་བ་དཔེར་བྱས་ནས་ནང་གི་ས་བོན་ཡང་དེ་ལྟར་འབྱུང་བ་རྟོགས་པའི་ཆེད་ཡིན་པའི་ཕྱིར་ཟེར་ན། རྒྱུ་མཚན་དེ་ཙམ་མ་ཡིན་པར་ཐལ། ནང་གི་ས་བོན་བཤད་པའི་ཟླས་དྲངས་ཏེ་བཤད་པ་ཡིན་ལ་ཕྱིའི་ས་བོན་འགའ་ཞིག་རིགས་མཐུན་མ་བཏབ་པ་ལས་ཀྱང་སྐྱེ་བ་ཡོད་ལ་ནང་གི་ས་བོན་ལ་དེ་འདྲ་མི་སྲིད་པས་ཕྱིའི་ས་བོན་ལས་ཀྱང་ནང་གི་ས་བོན་གཙོ་ཆེ་ཞིང་མི་འཆོལ་བར་བཤད་པ་ཡིན་པའི་ཕྱིར། དེར་ཐལ། ཏིལ་དང། ཨུཏྤ་ལའི་རྩ་བ་དང། དུར་བ་གསུམ་རང་རང་མ་བཏབ་ཀྱང་

― GTD002_Page_0355 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་བཞིན་སོལ་བ་དང། བ་ལང་གི་ལྕི་བ་དང། ལུག་གི་བལ་ལས་སྐྱེ་བ་ཡོད་པར་བཤད་སྦྱར་ལས་གསུངས་པའི་ཕྱིར། ཡང་ཁ་ཅིག་ན་རེ། ས་བོན་ལ་ནང་གི་ས་བོན་གཅིག་མེད་པར་ཐལ། ས་ལུ་འགྲུབ་བྱེད་ཀྱི་ས་བོན་ནང་གི་ས་བོན་གཅིག་མེད་པའི་ཕྱིར། དེར་ཐལ། ས་ལུའི་ས་བོན་ལ་ནང་གི་ས་བོན་གཅིག་མེད་པའི་ཕྱིར་ན་མ་ཁྱབ་སྟེ། འཇིག་རྟེན་གྱི་ཐ་སྙད་གཙོ་ཆེ་བའི་ཕྱིར། ཡང་ཁོ་ན་རེ། མྱུ་གུ་ས་བོན་ལས་སྐྱེ་བར་རྟོགས་པ་ལ་ཀུན་གཞི་རྟོགས་དགོས་པར་ཐལ། དེ་སྐྱེད་བྱེད་ཀྱི་ས་བོན་ལ་ཀུན་གཞིའི་སྟེང་གི་ས་བོན་ཞིག་ཡོད་པའི་ཕྱིར་ན་ཡང་མ་ཁྱབ་སྟེ། མྱུ་གུ་སྐྱེ་བར་རྟོགས་ན་དེའི་རྒྱུར་གྱུར་པའི་ལས་ཉོན་ཐམས་ཅད་རྟོགས་མི་དགོས་པའི་ཕྱིར། བྱས་པ་ལ་འོ་ན། ཀུན་གཞིའི་སྟེང་གི་ས་བོན་ལས་སྐྱེ་བར་རྟོགས་ན་ཀུན་གཞི་རྟོགས་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། བཅུ་གཅིག་པ་སྐྱེ་བའི་རྟེན་འབྲེལ་དེ་ཀུན་གཞིའི་སྟེང་གི་འཕེན་བྱེད་ལས་ཀྱི་བག་ཆགས་ལས་བྱུང་བར་རྟོགས་ན་ཀུན་གཞི་རྟོགས་དགོས་པར་ཐལ། འདོད་པའི་ཕྱིར། འདོད་ན། དེ་བཅུ་པ་སྲིད་པའི་རྟེན་འབྲེལ་ལས་བྱུང་བར་རྟོགས་ན་ཀུན་གཞི་རྟོགས་པས་ཁྱབ་པར་ཐལ། བཅུ་པ་སྲིད་པའི་རྟེན་འབྲེལ་དེ་ཀུན་གཞིའི་སྟེང་གི་བག་ཆགས་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། རྟེན་འབྲེལ་མདོ་འགྲེལ་ལས། བག་ཆགས་ཀྱི་གནས་སྐབས་ལ་སྲིད་པའི་མིང་ཐོབ་པ་ཡིན་ནོ། །ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། དེ་རྟོགས་པའི་ཐེག་

― GTD002_Page_0356 ―

^{[མ་དཔེ་གཟིགས་ན་འདིར་གནོན།]}

[Full Size]

དམན་རིགས་ངེས་ཡང་ཡོད་ཐེག་དམན་གྱི་གྲུབ་མཐའ་སྨྲ་བ་ཡང་ཡོད་པ་གང་ཞིག །ཀུན་གཞི་རྟོགས་པའི་དེ་དག་མེད་པའི་ཕྱིར། རྟགས་ཟུར་དང་པོ་གྲུབ་སྟེ། ཐེག་དམན་འཕགས་པ་ཡིན་ན་ཡན་ལག་བཅུ་གཉིས་མངོན་སུམ་དུ་རྟོགས་པས་ཁྱབ་པའི་ཕྱིར། དེར་ཐལ། རྣལ་འབྱོར་སྤྱོད་པའི་ས་ལས། རྒྱུན་ཏུ་ཞུགས་པས་ཡན་ལག་དུ་ཞིག་སྤངས་ཞེ་ན། ཐམས་ཅད་ཀྱི་ཕྱོགས་གཅིག་སྟེ། ཞེས་གསུངས་པའི་ཕྱིར། ཁྱབ་སྟེ། དེས་ངན་འགྲོའི་ཡན་ལག་བཅུ་གཉིས་སྤངས་པའི་ཕྱིར་དང། ཡན་ལག་བཅུ་གཉིས་མ་རྟོགས་པར་ཡན་ལག་བཅུ་གཉིས་ཀྱིས་བསྡུས་པའི་འཁོར་བ་སྤོང་ཚུལ་མེད་པའི་ཕྱིར། རྟགས་ཟུར་གཉིས་པ་གྲུབ་སྟེ། བྱེ་བྲག་སྨྲ་བར་གྱུར་པའི་བྱང་སེམས་ཡོད་པའི་ཕྱིར། ཁྱབ་སྟེ། དེས་ཡན་ལག་བཅུ་གཉིས་ལུགས་འབྱུང་ལྡོག་གཉིས་ཀར་རྟོགས་པའི་ཕྱིར། དེར་ཐལ། དེས་སྡུག་ཀུན་གཉིས་རྟོགས་པའི་ཕྱིར་ཏེ། འཁོར་བ་ལས་ངེས་པར་འབྱུང་འདོད་དང་ཐར་པ་ཐོབ་འདོད་ཀྱི་བློ་བཅོས་མིན་སྐྱེས་པའི་ཕྱིར། ཁྱབ་སྟེ། སའི་དངོས་གཞི་ལས། བདེན་པའི་ཚུལ་བསྟན་པའི་དབང་དུ་བྱས་ཏེ་འདི་ལྟར་སྐྱེ་བ་དང་རྒ་ཤི་ནི་སྡུག་བསྔལ་གྱི་བདེན་པའི་རབ་ཏུ་ཕྱེ་བའོ། །ཞེས་དང། རྗེའི་གསུང་མགུར་ལས། སྡུག་བདེན་ཉེས་དམིགས་བསམ་ལ་མ་འབད་ན། །ཐར་པ་དོན་གཉེར་ཇི་བཞིན་མི་སྐྱེ་ཞིང། །ཞེས་སོགས་གསུངས་པའི་ཕྱིར། རྟགས་ཟུར་གསུམ་པ་གྲུབ་སྟེ། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་གསུངས་པའི་ཕྱིར། ཁྱབ་སྟེ། ཟབ་པ་འཇིག་རྟེན་རང་དགའ་བས་མ་རྟོགས་པ་དང་ཕྲ་བ་ཉན་རང་གིས་རྟོགས་མི་ནུས་པ་ལ་བྱེད་པའི་ཕྱིར། བཤད་

― GTD002_Page_0357 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱར་ལས། ཕྲ་བ་ནི་ཉན་ཐོས་རྣམས་ཀྱིས་ཀྱང་ཤེས་པར་དཀའ་བའི་ཕྱིར་རོ། །དེའི་ཕྱིར་དེ་དག་ཤེས་བྱ་ཕྲ་བ་ཐམས་ཅད་ཤེས་པའི་སྐབས་མ་ཡིན་པས་ཉན་ཐོས་རྣམས་ལ་མ་བཤད་དོ། །ཞེས་གསུངས་པའི་ཕྱིར། གཞན་ཡང་དེ་ལྟར་ཡིན་པར་ཐལ། ཀུན་གཞི་མ་རྟོགས་པར་ཐར་པ་ཐོབ་ནུས་པ་གང་ཞིག །ཐམས་ཅད་མཁྱེན་པ་ཐོབ་མི་ནུས་པའི་ཕྱིར། དང་པོ་གྲུབ་སྟེ། ཐེག་བསྡུས་ལས། དེ་དག་ནི་བསྟན་པ་མེད་པར་ཡང་ཤེས་པར་རབ་ཏུ་གྲུབ་པས། ཞེས་དང། བཤད་སྦྱར་ལས། དེ་བསྟན་པ་མེད་པར་ཡང་ཞེས་བྱ་བ་ལ་སོགས་པ་ནི་ཉན་ཐོས་རྣམས་ལ་ཀུན་གཞིའི་རྣམ་པར་ཤེས་པ་མ་བསྟན་ཀྱང། ཞེས་པ་ནས། ཉོན་མོངས་རྣམས་སྤོང་སྟེ། ཞེས་གསུངས་པའི་ཕྱིར། གཉིས་པ་གྲུབ་སྟེ། ཐེག་བསྡུས་ལས། དེ་ཤེས་པ་མེད་པར་ཐམས་ཅད་མཁྱེན་པའི་ཡེ་ཤེས་ཐོབ་པར་སླ་བ་མ་ཡིན་ནོ། །ཞེས་གསུངས་པའི་ཕྱིར། དེ་ལ་ཁོ་ན་རེ། རིགས་ངེས་རྒྱུན་ཞུགས་ཆོས་ཅན། ཁྱོད་ཀྱིས་གསུམ་པ་རྣམ་ཤེས་ཀྱི་རྟེན་འབྲེལ་རྟོགས་པར་ཐལ། ཡན་ལག་བཅུ་གཉིས་རྟོགས་པའི་ཕྱིར། འདོད་ན། ཀུན་གཞི་རྟོགས་པར་ཐལ། དེ་ཀུན་གཞི་ཡིན་པའི་ཕྱིར་ན་མ་ཁྱབ། ཁྱོད་རང་ལ་དེ་ཆོས་ཅན། ཁྱོད་ཀྱིས་ཕྱི་རོལ་དོན་དུ་མ་གྲུབ་པའི་བུམ་པ་རྟོགས་པར་ཐལ། བུམ་པ་རྟོགས་པ་གང་ཞིག །བུམ་པ་དེ་ཡིན་པའི་ཕྱིར། ཁྱབ་པ་འགྲིག་བྱས་པ་ལ། དེ་མི་མཚུངས་པར་ཐལ། བུམ་པ་དེ་ཕྱི་རོལ་དོན་དུ་མ་གྲུབ་པའི་བུམ་པ་ཡིན་ཀྱང་རྟོགས་ཚེ་དེའི་ཁྱད་པར་དུ་བྱེད་མི་དགོས་པར་བུམ་པ་སྤྱི་ཙམ་རྟོགས་པར་བཞག་ཆོག་པའི་ཕྱིར་ཟེར་ན། གསུམ་པ་རྣམ་

― GTD002_Page_0358 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་དེ་ཀུན་གཞི་ཡིན་ཀྱང་རྟོགས་པའི་ཚེ་སྣོད་བཅུད་ཀུན་གྱི་གཞི་ཡིན་ཚུལ་གྱི་ཁྱད་པར་དུ་བྱེད་མི་དགོས་པར་རྣམ་ཤེས་སྤྱི་ཙམ་རྟོགས་པར་བཞག་ཆོག་པའི་ཕྱིར་བྱ་བའི་ལན་བྱ་རོག་གིས་མ་ཟོས་སོ། །ཡང་ཁ་ཅིག་ན་རེ། ཉན་ཐོས་སྡེ་བ་ལ་ཀུན་གཞི་ལུང་གིས་བསྒྲུབ་པ་མི་འཐད་པར་ཐལ། ཐེག་དམན་ལ་གྲགས་པའི་ལུང་གིས་ཀུན་གཞི་དངོས་སུ་བསྟན་པ་མེད་པའི་ཕྱིར། དེར་ཐལ། ཐེག་དམན་གྱི་ལུང་ལ་ཀུན་གཞི་དངོས་སུ་སྟོན་པ་མེད་པའི་ཕྱིར་ན་མ་ཁྱབ་སྟེ། དེ་ལ་གྲགས་ཞེས་སྨོས་པའི་རྒྱུ་མཚན་ཡོད་པའི་ཕྱིར། དེར་ཐལ། ལུང་གཅིག་ལས་འཕྲོས་པའི་ནང་གི་སྐྱེ་དགུ་ཀུན་གཞི་ལ་དགའ་བ་ཞེས་སོགས་ཀྱི་ལུང་འདི་ཐེག་དམན་གྱི་ལུང་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་ཆེད་དུ་བྱ་བའི་གདུལ་བྱ་ཉན་ཐོས་སྡེ་བའི་རིགས་ཅན་ལ་གདམས་པའི་མདོ་ཡིན་པར་ཐལ། ཐེག་དམན་གྱི་མདོ་ཡིན་པའི་ཕྱིར། འདོད་མི་ནུས་ཏེ། དེའི་ཆེད་དུ་བྱ་བའི་གདུལ་བྱ་ཉན་ཐོས་སྡེ་པ་མེད་པའི་ཕྱིར། དེར་ཐལ། ཀུན་གཞི་དངོས་སུ་སྟོན་ཡུལ་གྱི་ཉན་ཐོས་སྡེ་པ་མེད་པའི་ཕྱིར། དེར་ཐལ། ཆོས་ཀྱི་བདག་མེད་ཕྲ་མོ་དངོས་སུ་སྟོན་ཡུལ་གྱི་ཉན་ཐོས་སྡེ་པ་མེད་པའི་ཕྱིར། མ་ཁྱབ་ན། ཆོས་ཀྱི་བདག་མེད་ཕྲ་མོ་དངོས་སུ་སྟོན་ཡུལ་གྱི་དེ་མེད་པར་ཐལ། མ་ཁྱབ་པ་དེའི་ཕྱིར། འདོད་མི་ནུས་ཏེ། ཁྱོད་ལྟར་ན་སྲིད་པ་འཕོ་བའི་མདོ་ལས། མིང་ནི་གང་དང་གང་གིས་སུ། །ཞེས་སོགས་ཀྱི་ཚིགས་བཅད་འདིའི་ཆེད་དུ་བྱ་བའི་གདུལ་བྱ་དེ་སྟོང་ཉིད་དངོས་སུ་སྟོན་ཡུལ་གྱི་དེ་ཡིན་པའི་ཕྱིར། དེར་ཐལ། དེ་སྟོང་ཉིད་དངོས་སུ་སྟོན་པའི་ཐེག་དམན་གྱི་ལུང་

― GTD002_Page_0359 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པའི་ཕྱིར། དེར་ཐལ། དེ་དངོས་སུ་སྟོན་བྱེད་ཀྱི་ཐེག་དམན་གྱི་མདོའི་ནང་གི་ཚིག་ཡིན་པའི་ཕྱིར་དང། ཐེག་དམན་རང་ལ་གྲགས་པའི་ལུང་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། ཐེག་དམན་གྱི་ལུང་ལས་ཆོས་ཀྱི་བདག་མེད་དངོས་སུ་བསྟན་པར་ཐལ་འགྱུར་བ་མ་གཏོགས་པས་ཁས་མི་ལེན་པའི་ཕྱིར། འཇུག་འགྲེལ་ལས། གང་ཞིག་གལ་ཏེ་ཉན་ཐོས་ཀྱི་ཐེག་པ་ལས་ཀྱང་ཆོས་ལ་བདག་མེད་པ་བསྟན་ན་དེའི་ཚེ་ཐེག་པ་ཆེན་པོ་བསྟན་པ་དོན་མེད་པར་འགྱུར་རོ་སྙམ་དུ་སེམས་པ་དེའི་ལུགས་དེ་ཡང་འདི་ལྟར་རིགས་པ་དང་ལུང་དང་འགལ་བར་རྟོགས་སོ། །ཞེས་གསུངས་པའི་ཕྱིར། ཁྱབ་སྟེ། དེ་དངོས་སུ་དགག་ཡུལ་ལེགས་ལྡན་ཡིན་ཀྱང་དེ་ལྟར་འདོད་པ་ལ་སེམས་ཙམ་པ་དང་རང་རྒྱུད་པ་མཚུངས་པའི་ཕྱིར། སྟོང་ཐུན་ལས། སེམས་ཙམ་པ་དང་དབུ་མ་རང་རྒྱུད་པ་གཉིས་ཀའང་ཐེག་དམན་གྱི་སྡེ་སྣོད་ལས་ཆོས་ཀྱི་བདག་མེད་ཅུང་ཟད་ཀྱང་མ་བསྟན་པར་འདོད་པ་ལ་ཁྱད་པར་མེད་ཅིང། ཞེས་གསུངས་པའི་ཕྱིར། ཡང་ཁ་ཅིག །ཐེག་ཆེན་གྱི་ལུང་གིས་ཀུན་གཞི་བསྒྲུབ་ཡུལ་གྱི་ཉན་ཐོས་སྡེ་པ་རིགས་པའི་རྗེས་འབྲང་ཡོད་ཀྱང་ལུང་གི་རྗེས་འབྲང་མེད་དེ། དེས་ཐེག་ཆེན་བཀར་ཁས་མི་ལེན་པའི་ཕྱིར་ཟེར། དེ་ལ་སྐྱོན་འཕེན་པ་ཁ་ཅིག་ན་རེ། ལུང་གིས་བསྒྲུབ་ཡུལ་གྱི་དེ་ཡོད་པར་ཐལ། ལུང་ལས་གསུངས་པའི་རིགས་པས་བསྒྲུབ་པ་ཡོད་པའི་ཕྱིར་དང། ཀུན་གཞི་སྒྲུབ་བྱེད་ཀྱི་རྟགས་སྦྱོར་ལ་ལུང་གི་ཚིག་ཡོད་པའི་ཕྱིར་ན་མ་ཁྱབ། ཁྱོད་རང་ལ་བསྒྲུབ་བྱ་དེ་བསྒྲུབ་ན་དཔྱད་གསུམ་གྱིས་དག་པའི་ལུང་

― GTD002_Page_0360 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་བསྒྲུབ་པས་ཁྱབ་པར་ཐལ། དེ་འདྲའི་ལུང་ལས་གསུངས་པའི་རྟགས་སྦྱོར་གྱིས་བསྒྲུབ་པས་ཁྱབ་པའི་ཕྱིར། འདོད་ན། བསྒྲུབ་བྱ་ཡིན་ན་ཤིན་ལྐོག་ཡིན་པས་ཁྱབ་པར་ཐལ་ལོ། །ཡང་ཁོ་ན་རེ། ཀུན་གཞིའི་སྒྲུབ་བྱེད་དུ་དྲངས་པའི་ཐེག་དམན་ལ་གྲགས་པའི་ལུང་དེ་ཆོས་ཅན། ཕྱི་དོན་འགོག་བྱེད་ཡིན་པར་ཐལ། ཀུན་གཞི་སྒྲུབ་བྱེད་ཡིན་པའི་ཕྱིར། འདོད་ན། ཉན་ཐོས་སྡེ་པ་འགོག་བྱེད་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་དག་གིས་ལུང་དེ་རང་གཞུང་དུ་ཁས་ལེན་པའི་ཕྱིར་ན་མ་ཁྱབ་སྟེ། དེས་དོན་ལ་ཀུན་གཞི་བསྟན་པ་ཡིན་ཀྱང་དེ་དག་ཀུན་གཞི་སྟོན་བྱེད་དུ་མི་འདོད་པའི་ཕྱིར། དེར་ཐལ། ཀུན་གཞི་ལ་དགའ་བ་ཞེས་པའི་ཀུན་གཞི་དེ་དབྱིག་བཤེས་ཀྱི་ཉེར་ལེན་གྱི་ཕུང་པོ་ལ་བཤད། བཙུན་པ་མིའུ་ཐུང་གིས་ཚོར་བ་བདེ་བ་ལ་བཤད། དབྱངས་སྒྲོགས་ཀྱིས་འཇིག་ལྟ་ལ་བཤད་པའི་ཕྱིར། རྩ་བར། དེ་ལྟར་གསུངས་པའི་ཀུན་གཞི་ལ། །དབྱིག་བཤེས་མིའུ་ཐུང་དབྱངས་སྒྲོགས་གསུམ། །རིམ་བཞིན་ཕུང་པོ་ཚོར་བ་དང། །འཇིག་ལྟ་གསུམ་ལ་དགོངས་ཞེས་ཟེར། །ཞེས་གསུངས་པའི་ཕྱིར། སློབ་དཔོན་དེ་གསུམ་གྱི་བཞེད་ཚུལ་དེ་ཡང་ཁས་ལེན་རུང་བར་ཐལ། ཚུལ་དེ་མི་རུང་མེད་མོད་ཀྱི། ཞེས་གསུངས་པའི་ཕྱིར་ན་མ་ཁྱབ། འདོད་མི་ནུས་ཏེ། ཐེག་བསྡུས་ལས། དེ་གསུམ་ལའང་རིམ་པ་བཞིན་སྡུག་བསྔལ་གྱིས་གཟིར་ནས་འཆི་བ་དོན་དུ་གཉེར་བའི་གང་ཟག་དང། བསམ་གཏན་བཞི་པ་ཡན་ཆད་དང། བདག་འཛིན་ལ་སྐྱོན་དུ་ལྟ་བའི་སོ་སྐྱེས་རྣམས་དེ་དག་ལ་དགའ་བ་མི་འཐད་པའི་སྐྱོན་བརྗོད་པའི་ཕྱིར། ཡང་ཁ་ཅིག །

― GTD002_Page_0361 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གཞི་མེད་ན་ལུས་ལེན་པ་པོ་མེད་མི་དགོས་པར་ཐལ། ཉིང་མཚམས་སྦྱར་མ་ཐག་པའི་རྒྱུད་ལ་རྣམ་སྨིན་དུ་གྱུར་པའི་ཉོན་མོངས་ཅན་གྱི་སེམས་གཅིག་ཡོད་པའི་ཕྱིར། མཛོད་ལས། སྐྱེ་བའི་སྲིད་པ་ཉོན་མོངས་ཅན། །ཞེས་གསུངས་པའི་ཕྱིར་ན་མ་ཁྱབ་སྟེ། ཆགས་སྡང་གང་རུང་གིས་ཉེ་རྒྱུ་བྱེད་པའི་ཆ་ནས་ཉོན་མོངས་སུ་བཏགས་པ་ཡིན་ཞིང། གྲུབ་མཐའ་གཞན་གྱི་སྐབས་ཡིན་པའི་ཕྱིར། ཁོ་ན་རེ། ཉིང་མཚམས་སྦྱར་མ་ཐག་པའི་བྱང་སེམས་ཀྱི་རྒྱུད་ལ་སེམས་བསྐྱེད་མེད་པར་ཐལ། དམ་བཅའ་འཐད་པའི་ཕྱིར་ཟེར་ན། དེ་ཡོད་པར་ཁས་ལེན་གྲགས་ཆེ་ཡང་འདིའི་གཞུང་གོང་འོག་གི་བཤད་ཚུལ་གཞིར་བཞག་ན་མེད་པར་མངོན་ནོ། །འོ་ན་དེ་ཆོས་ཅན། བྱང་སེམས་མ་ཡིན་པར་ཐལ། སེམས་བསྐྱེད་རྒྱུད་ལ་མི་ལྡན་པའི་གང་ཟག་ཡིན་པའི་ཕྱིར་ཟེར་ན། མ་གྲུབ་སྟེ། དེའི་ས་བོན་དང་ལྡན་པས་དེ་ལྡན་པར་བཞག་ཆོག་པའི་ཕྱིར། དེ་རྣམ་མཁྱེན་དང་ལྡན་པར་ཐལ། དེར་ས་བོན་དང་ལྡན་པའི་ཕྱིར་ན་མི་མཚུངས་ཏེ། འདི་ཐོབ་འགྱུར་གྱི་ནུས་པ་ཙམ་ཡིན་ལ། གཅིག་ཤོས་སྔར་མངོན་གྱུར་དུ་ཐོབ་པ་དེའི་ས་བོན་ཡིན་པའི་ཕྱིར། འདི་ཡང་ཁྱབ་མཐའ་བཟུང་བ་མིན་ཏེ། སྡོམ་པ་མངོན་གྱུར་ཐོབ་ནས་བཏང་བའི་རྗེས་སུའང་དེའི་ས་བོན་ཡོད་པའི་ཕྱིར། རིགས་པ་གཉིས་པའི་སྐབས་སུ། ས་བཟང་ན་རེ། གཟུགས་མཐོང་འདོད་ནས། ཆོས་ཤེས་པར་འདོད་པའི་བར་གྱི་ཡིད་བྱེད་དྲུག་ཅིག་ཅར་སྐྱེ་བར་བཤད་པ་མི་འཐད་པར་ཐལ། དེའི་ཚེ་གཟུགས་

― GTD002_Page_0362 ―

^{[མ་དཔེ་གཟིགས་ན་འདིར་གནོན།]}

[Full Size]

མཐོང་འདོད་ལྟ་བུའི་ཡིད་བྱེད་ཁྱད་པར་བ་ཞིག་ཀྱང་མེད་པའི་ཕྱིར། དེ་འདྲ་ཡོད་ན་དབང་ཤེས་གཞན་རྣམས་སྐྱེ་བ་ལ་གེགས་བྱེད་ཅིང། འདིར་ཆ་མཉམ་པའི་དོན་ཡིད་བྱེད་ཉེ་རིང་མེད་པར་གང་ཡིན་ཀྱང་སྐྱེ་རུང་གི་ཚུལ་དུ་ཡོད་པ་ལ་བྱེད་པའི་ཕྱིར། དེར་ཐལ། སུམ་ཅུ་པའི་འགྲེལ་པ་ལས། དམིགས་པའི་རྐྱེན་དང་ཕྲད་ན་དེ་མ་ཐག་པའི་རྐྱེན་གཅིག་པུ་དེ་ལས་ཀྱང་རྣམ་པར་ཤེས་པ་གཉིས་སམ་མང་པོ་འབྱུང་སྟེ། ཞེས་རྐྱེན་གཉིས་ལས་ཡིད་བྱེད་མ་གསུངས་ཤིང། དཀའ་འགྲེལ་ལས་ཀྱང། མཐོང་འདོད་ཉན་ཐོས་ཀྱི་རྟོག་པ་གཉིས་ཅིག་ཅར་སྐྱེ་མི་སྲིད་པས། ཞེས་གསུངས་པའི་ཕྱིར། ཁོ་ན་རེ། སྐབས་འདིར་དབང་ཤེས་ཀྱི་ཡུལ་ལ་དེའི་དམིགས་རྐྱེན་དུ་བཤད་པ་མི་འཐད་པར་ཐལ། དེ་དེ་དང་བདག་ཉིད་གཅིག་ཡིན་པའི་ཕྱིར་ན་མ་ཁྱབ་སྟེ། དེའི་དམིགས་རྐྱེན་དངོས་མིན་ཀྱང་ཡོད་མེད་རྗེས་སུ་འགྲོ་ལྡོག་མི་འཁྲུལ་བའི་ཆ་ནས་སྣང་བའི་དམིགས་རྐྱེན་ནམ་དམིགས་རྐྱེན་བཏགས་པ་བར་བཞག་པའི་ཕྱིར་ཏེ། དམིགས་བརྟག་ལས། གཅིག་ཆའང་མི་འཁྲུལ་ཕྱིར་ན་རྐྱེན། །ཞེས་གསུངས་པའི་ཕྱིར། ཡང་ཁོ་ན་རེ། སྔོ་འཛིན་མིག་ཤེས་ཡུལ་གྱི་སྔོན་པོ་དེ་མིག་ཤེས་དེ་དང་བདག་ཉིད་གཅིག་མ་ཡིན་པར་ཐལ། དེའི་སྔ་རོལ་ནས་གྲུབ་པའི་ཕྱིར། དེར་ཐལ། དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་དེས་མཐོང་དགོས་པའི་ཕྱིར་ཟེར་ན། འདི་ལ་མདོ་སེམས་སུའི་ལུགས་བྱས་ཀྱང་ཞིབ་ཆ་ཞིག་དགོས་པར་སྣང། གསལ་བ་མི་རུང་བའི་དོན་ཡང། ཁ་ཅིག །རྣམ་ཤེས་དུ་མ་ཅིག་ཅར་སྐྱེ་བ་མེད་

― GTD002_Page_0363 ―

^{[མ་དཔེ་གཟིགས་ན་འདིར་གནོན།]}

[Full Size]

ན་དབང་མངོན་འདས་མ་ཐག་ཡུལ་དེ་གསལ་བར་སྣང་བའི་ཡིད་ཤེས་དང་སླར་དེ་མི་གསལ་བར་སྣང་བའི་ངེས་ཤེས་སྐྱེ་བ་འགལ་ཟེར། ཁ་ཅིག །ཡུལ་ད་ལྟ་བ་གསལ་བར་སྣང་བའི་ཡིད་ཤེས་དང་འདས་མ་འོངས་སོགས་མི་གསལ་བར་སྣང་བའི་ཡིད་ཤེས་གཉིས་མི་འཐད་པར་ཐལ་བ་འཕེན་ཟེར། དང་པོ་མི་འཐད་པར་ཐལ། རྣམ་ཤེས་དུ་མ་ཅིག་ཅར་མི་སྐྱེ་བར་འདོད་པ་ལ་རིམ་ཅན་དུ་མི་སྐྱེ་བར་ཐལ་བ་འཕེན་པ་བཞད་གད་ཡིན་པའི་ཕྱིར། གཉིས་པ་ཡང་མི་འཐད་པར་ཐལ། དེ་འདྲའི་ཡིད་ཤེས་གཉིས་ཅིག་ཅར་མངོན་གྱུར་དུ་མི་སྐྱེ་བར་རང་ཡང་འདོད་དགོས་ལ། རིམ་ཅན་དུ་མི་སྐྱེ་བར་ཐལ་བ་ཙམ་འཕངས་ན་འབྲེལ་མེད་པ་སྔ་མ་དང་འདྲ་བའི་ཕྱིར། དེར་ཐལ། སྔོན་པོ་མཐོང་བའི་དབང་ཤེས་མངོན་དུ་གྱུར་བཞིན་པའི་དུས་སུ་དེའི་ཡུལ་གྱི་སྔོན་པོ་དེ་ཡིད་ལ་ཡང་གསལ་བར་སྣང་དགོས་པས་དེ་རྟོགས་ཀྱི་ཡིད་མངོན་ཞིག་འབྱུང་ལ། དབང་མངོན་འདས་ཚེ་ཡུལ་སྔོན་པོ་དེ་ཡང་འདས་ཟིན་པས་ཕལ་བས་མངོན་སུམ་གྱི་ཡུལ་དུ་མི་འགྱུར་བར་དྲན་ཤེས་རྟོག་བཅས་ཀྱིས་གཞལ་དགོས་པའི་ཕྱིར། བསྡུ་བ་ལས། འདས་པའི་ཡུལ་མྱོང་བ་རྗེས་སུ་དྲན་པ་དེའི་ཚེ་ཡིད་ཀྱི་རྣམ་པར་ཤེས་པ་རྒྱུ་བ་ནི་གསལ་བ་མ་ཡིན་ལ། ད་ལྟར་གྱི་ཡུལ་ལ་རྒྱུ་བའི་ཡིད་ནི་དེ་ལྟར་མི་གསལ་བ་མ་ཡིན་ཏེ། ཞེས་གསུངས་པའི་ཕྱིར། ཁྱབ་སྟེ། འདིའི་ཡུལ་ད་ལྟ་བ་ཞེས་པ་སྤྱིར་ད་ལྟ་བ་ཙམ་ལ་མི་བྱེད་པར་དབང་ཤེས་དེ་ལ་ལྟོས་ནས་དེས་མྱོང་བཞིན་པ་དེར་འཇོག་དགོས་པའི་ཕྱིར། དཀའ་འགྲེལ་ལས། གལ་ཏེ་དབང་ཤེས་དང་དུས་

― GTD002_Page_0364 ―

^{[མ་དཔེ་གཟིགས་ན་འདིར་གནོན།]}

[Full Size]

མི་མཉམ་ཡང་ད་ལྟར་བའི་ཡུལ་ཅན་ཡིད་ནི་གསལ་འདས་པ་ལྟ་བུ་མི་གསལ་བ་ཡིན་ནོ། །ཞེས་ན་མི་རུང་སྟེ་ཞེས་དང། རེད་མདའ་བའི་ཀུན་བཏུས་ཊཱིཀྐ་ལས། སེམས་གཉིས་ཅིག་ཅར་མི་འབྱུང་ན་དབང་བོའི་ཤེས་པ་དང་ལྷན་ཅིག་འབྱུང་བའི་ཡིད་ཀྱི་ཤེས་པ་མི་སྲིད་པས་དེའི་ཕྱིར་ཡུལ་གསལ་བར་འཛིན་པའི་ཡིད་ཀྱི་རྣམ་ཤེས་མི་རུང་བ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཡིད་མངོན་དེ་ལྟར་སྐྱེ་བ་མི་འཐད་པར་ཐལ། མཛོད་ལས། དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་དང། བློ་རིག་གི་མཐའ་དཔྱོད་ལས། ཡིད་མངོན་ཡིན་ན་དབང་མངོན་གྱི་རྗེས་སུ་བྱུང་བས་ཁྱབ་སྟེ། རྟོག་གེའི་སྐད་ལས་དབང་མངོན་འདས་མ་ཐག་ཏུ་ཡིད་མངོན་སྐྱེའོ། །ཞེས་སོགས་གསུངས་པའི་ཕྱིར་ན་མ་ཁྱབ་སྟེ། རྣམ་འགྲེལ་རང་ལུགས་དེ་ལྟར་ཡིན་ཀྱང་ལུང་གི་རྗེས་འབྲང་རྣམས་དེ་ལྟར་འདོད་མི་དགོས་པའི་ཕྱིར། དེར་མ་ཟད་རྣམ་འགྲེལ་གྱི་རྗེས་འབྲང་རྒྱན་མཁན་པོས་ཀྱང། གོམས་ལས་བདུན་ན་གནས་པ་ལ། །འདི་འོ་ཞེས་ན་ཤེས་པ་གང། །མངོན་སུམ་བྱེད་ཕྱིར་དེ་ལ་ནི། །ཡིད་ཀྱི་མངོན་སུམ་ཡིན་པར་འདོད། །ཅེས་པ་ལྟ་བུ་ཡོད་པས་སློབ་དཔོན་སོ་སོའི་བཞེད་ཚུལ་མ་འདྲེས་པ་དགོས་སོ། །སྔ་མའི་བསྒྲུབ་ཚུལ་དེ་ཡང་ཅུང་ཟད་གསལ་བར་བཤད་ན་འདི་ཡིན་ཏེ། མདུན་གྱི་སྐྱེས་བུ་ལན་འདེབས་པ་པོ་ཆོས་ཅན། ཁྱོད་ཀྱིས་བ་ལང་མངོན་སུམ་དུ་རྟོགས་པར་ཐལ། དེ་མངོན་སུམ་དུ་རྟོགས་པ་ལ་མངོན་ཤེས་དང་འཕགས་ལམ་སོགས་ཐོབ་མི་དགོས་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་

― GTD002_Page_0365 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ལང་མིག་གིས་མཐོང་བཞིན་པའི་དུས་སུ་མངོན་སུམ་དུ་རྟོགས་པར་ཐལ། དེ་མངོན་སུམ་དུ་རྟོགས་པ་གང་ཞིག །ལྐོག་ཏུ་སོང་བའི་ཚེ་དྲན་པའི་བློ་དེ་རྟོག་པ་ཡིན་པའི་ཕྱིར་ཏེ། དེའི་ཚེ་བ་ལང་གི་རྣམ་པ་ལྟ་བུར་སྣང་བ་དེ་དོན་སྤྱིའི་སྣང་བ་ཡིན་པའི་ཕྱིར། གོང་དུ་འདོད་ན། དེ་ཆོས་ཅན། ཁྱོད་ཀྱི་རྒྱུད་ལ་དེ་མངོན་སུམ་དུ་རྟོགས་པའི་ཡིད་མངོན་ཡོད་པར་ཐལ། དེ་འདྲའི་མངོན་སུམ་ཡོད་ལ། དབང་མངོན་མེད། རྣལ་འབྱོར་མངོན་སུམ་མེད། རང་རིག་ས་སྡེ་ལས་མ་གསུངས་ཤིང་ཡོད་ཀྱང་འཛིན་རྣམ་ཡན་གར་བ་ཡིན་དགོས་པའི་ཕྱིར། དང་པོ་གྲུབ་སྟེ། དེ་མིག་ཤེས་ཀྱི་གཟུང་བྱ་མ་ཡིན་པའི་ཕྱིར། ཞེས་པ་ཡིན་ལ། དེས་མཚོན་ཏེ་རྒྱང་རིང་པོའི་མེ་ཆུ་སོགས་ཀྱང་མིག་གིས་མཐོང་བའི་ཚེ་ཡིད་ཀྱིས་མངོན་སུམ་དུ་རྟོགས་པར་མ་བཞག་ན་དེ་དག་མངོན་སུམ་དུ་རྟོགས་ཚུལ་བཞག་དཀའ་བར་སྣང་ཞིང། འདི་ལ་སྤྱི་དོན་རོལ་མཚོ་ལས། དེ་འདྲའི་ཡིད་མངོན་མེད་པ་རྣམ་འགྲེལ་དང་སྒོ་བསྟུན་པའི་ལུགས་སུ་བྱས་ཏེ་མིག་སྔོན་པོ་ལ་བལྟ་བཞིན་པའི་དུས་ཀྱི་སྔོན་པོ་དྲན་པའི་དྲན་ཤེས་གསུངས་པ་ནི་དེ་ལས་ཀྱང་མ་འབྲེལ། ཡང་ཁ་ཅིག །རིགས་པ་ལྔ་པའི་སྐབས་ཀྱི་རྣམ་རིག་བཞི་ག་དྲུག་པ་ཡིད་ཤེས་ཡིན་ཟེར་ན་མི་འཐད་པར་ཐལ། འདིའི་སྣོད་ཀྱི་རྣམ་རིག་ཅེས་པ་ཡུལ་ཕྱོགས་སྤྱིའི་སྣང་བ་དང། གནས་ཀྱི་རྣམ་རིག་ཅེས་པ་རང་གི་ལུས་རྐང་པ་འདེགས་འཇོག་སོགས་ཀྱི་སྣང་བ་ཡིན་པས་དེ་གཉིས་གོང་དུ་དོན་དང་སེམས་ཅན་ཞེས་པ་ལྟར་ཀུན་གཞི་ལ་སྦྱོར་དགོས་ཤིང༌། ངའོ་

― GTD002_Page_0366 ―

^{[མ་དཔེ་གཟིགས་ན་འདིར་གནོན།]}

[Full Size]

སྙམ་པའི་རྣམ་རིག་ཉོན་ཡིད་དང༌། ཡུལ་གྱི་རྣམ་རིག་ཡུལ་དྲུག་སོ་སོར་སྣང་བའི་འཇུག་ཤེས་ལ་བྱེད་པའི་ཕྱིར། དཀའ་འགྲེལ་ལས་སོ། །ཡང་ཁ་ཅིག་ན་རེ། ཀུན་གཞི་མེད་ན་ལུས་ཚོར་མི་རུང་བ་མ་ཡིན་པར་ཐལ། ཀུན་གཞི་ཡོད་ཀྱང་ལུས་ཚོར་བདེ་སྡུག་སོགས་དེས་མྱོང་བ་མ་ཡིན་པའི་ཕྱིར་ན་མ་ཁྱབ་སྟེ། འདིས་བསྒྲུབ་ཚུལ་དེ་ལྟར་མ་ཡིན་པའི་ཕྱིར། དེར་ཐལ། ཡིད་གཞན་ལ་གཏད་བའི་ཚེ་ལུས་ལ་ཕན་གནོད་བྱས་པའི་ཚོར་བ་བདེ་སྡུག་སྐྱེ་བ་ཀུན་གཞིའི་སྟོབས་ཡིན་པའི་ཕྱིར། དེར་ཐལ། ལུས་ཚོར་བདེ་སྡུག་སྐྱེ་བ་ཡིད་བྱེད་ལ་མི་ལྟོས་ཀྱང་ནང་དུ་དེ་སྐྱེ་བའི་རྟེན་ཞིག་ཡོད་དགོས་པའི་ཕྱིར། རྟགས་ཟུར་དང་པོ་གྲུབ་སྟེ། མཛོད་རང་འགྲེལ་དང་གནད་སྒྲོན་གཉིས་ཀ་ལས། སེམས་ཀྱི་བདེ་བ་དང་སྡུག་བསྔལ་ནི་ཕལ་ཆེར་རྣམ་པར་རྟོག་པ་ལས་སྐྱེ་ཡི་ལུས་ཀྱི་ནི་མ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། ནང་གི་སེམས་ལ་མི་ལྟོས་ན་རོ་ལ་མཚོན་བསྣུན་པས་ཀྱང་ལུས་ཚོར་སྐྱེ་བར་ཐལ་བའི་སྐྱོན་འབྱུང་བའི་ཕྱིར། དེ་བཞིན་དུ་གཉིད་འཐུག་ལོག་པའི་ཡིད་བྱེད་མེད་ཀྱང་ལུས་ལ་ཕན་གནོད་དང་དུང་སྒྲ་སོགས་ཀྱིས་གཉིད་བསླངས་ཏེ་དབང་ཤེས་སྐྱེ་བ་ཡང་གཉིད་ལོག་བཞིན་པའི་དུས་སུ་སྐྱེ་བའི་རྟེན་གྱི་རྣམ་ཤེས་གཅིག་ཡོད་པའི་རྒྱུ་མཚན་གྱིས་ཡིན་པའི་ཕྱིར། ཁོ་ན་རེ། སྐྱོན་མེད་དེ། དེའི་ཚེ་རྣམ་ཤེས་མེད་ཀྱང་སྒྲ་ཐོས་པ་སོགས་ཀྱི་ས་བོན་ཡོད་པའི་ཕྱིར་ཞེ་ན། དེས་སྐྱོན་སྤོང་མི་ནུས་པར་ཐལ། དེ་འདྲའི་ས་བོན་དེ་ཡང་རྣམ་ཤེས་གཅིག་ལ་བརྟེན་དགོས་པས་ཀུན་གཞི་ལས་མ་འདས་ཤིང་སྔ་མས་སྒྲུབ་ཚུལ་ཡང་ས་བོན་དེའི་སྟེང་ནས་བཤད་པ་ཡིན་པའི་ཕྱིར།

― GTD002_Page_0367 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་ཁོ་ན་རེ། གཉིད་ལོག་པའི་ཚེ་དྲུག་པ་ཡིད་ཤེས་མེད་པར་ཐལ། སེམས་མེད་སྙོམས་འཇུག་གཉིས་དང་གཉིད་དང་བརྒྱལ་བ་སོགས་ཀྱི་ཚེ་དེ་མེད་པས་ཀུན་གཞི་མེད་ན་དེ་དག་མི་རུང་བར་ཐལ་བ་འཕེན་ཚུལ་ཡོད་པའི་ཕྱིར་དང༌། སུམ་ཅུ་པ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུའོ་འདུ་ཤེས་མེད་པ་དང༌། །སྙོམས་པར་འཇུག་པ་རྣམ་གཉིས་དང༌། །སེམས་མེད་གཉིད་དང་བརྒྱལ་མ་གཏོགས། །ཞེས་གསུངས་པའི་ཕྱིར་ན་མ་ཁྱབ། འདོད་མི་ནུས་ཏེ། གཉིད་ལོག་པའི་ཚེ་དྲུག་པ་ཡིད་ཤེས་ཡོད་པའི་ཕྱིར། དེར་ཐལ། དེའི་ཚེ་གཉིད་དང་མཚུངས་ལྡན་གྱི་སེམས་ཡོད་པའི་ཕྱིར། དེར་ཐལ། དེའི་ཚེ་གཉིད་ཡོད་པའི་ཕྱིར་དང༌། སེམས་སེམས་བྱུང་མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་ལུང་དོན་ཡོད་དེ། གཉིད་སྲབ་མོའི་ཚེ་རྨི་ལམ་རྨིས་བྱེད་ཀྱི་ཤེས་པ་གཉིད་དང་མཚུངས་ལྡན་དུ་ཡོད་པ་མྱོང་བས་གྲུབ་ལ། གཉིད་འཐུག་པོ་ལོག་པའི་ཚེ་རྨི་ལམ་ཡང་མི་འབྱུང་བས་གཉིད་ཀྱི་ཤེས་པ་མེད་པར་འགྲུབ་པའི་ཕྱིར་ཏེ། སུམ་ཅུ་པའི་འགྲེལ་པ་ལས། སེམས་མེད་པའི་གཉིད་ནི་གཉིད་འཐུག་པོས་ནོན་པའི་ཕྱིར་དུས་དེ་སྲིད་གཅིག་ཏུ་ཡིད་ཀྱི་རྣམ་པར་ཤེས་པ་མི་འབྱུང་བས་སེམས་མེད་པ་ཞེས་བྱའོ། །ཞེས་གསུངས་ཤིང༌། གཞུང་གཞན་ལས་ཀྱང་གཉིད་འཐུག་གི་ཐིག་ལེ་དང་རྨི་ལམ་གྱི་ཐིག་ལེ་ཞེས་སྐབས་སོ་སོར་བཤད་པའི་རྒྱུ་མཚན་ཡོད་པའི་ཕྱིར། ཁོ་ན་རེ། གཉིད་འཐུག་པོ་ལོག་པའི་ཚེ་གཉིད་ཀྱི་ཤེས་པ་ཡོད་པར་ཐལ། དེའི་ཚེ་གཉིད་འཐུག་པོ་

― GTD002_Page_0368 ―

^{[མ་དཔེ་གཟིགས་ན་འདིར་གནོན།]}

[Full Size]

ལོག་པའི་ཕྱིར་ན་མ་ཁྱབ་སྟེ། སྡུག་བསྔལ་ཤུགས་དྲག་པོའི་དབང་གིས་བརྒྱལ་བའི་ཚེ་སྡུག་བསྔལ་དངོས་སུ་མེད་ཀྱང་སྔུག་བསྔལ་གྱིས་བརྒྱལ་བར་འཇོག་པ་བཞིན་གཉིད་ཀྱིས་སྟོབས་ཀྱིས་འཇུག་ཤེས་ཕྲ་རགས་ཐམས་ཅད་བསྡུས་པའི་ཚེ་གཉིད་འཐུག་པོ་ལོག་པར་འཇོག་ཀྱང་གཉིད་དེའི་ཚེ་ཡོད་མི་དགོས་པའི་ཕྱིར། ཁ་ཅིག །གཉིད་ཀུན་གཞིའི་འཁོར་དུ་འཇོག་ཟེར་ན། དེ་ལ་མ་སྒྲིབ་ལུང་མ་བསྟན་གྱིས་ཁྱབ་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལ་དགེ་མི་དགེ་དུ་མ་ཡོད་པའི་ཕྱིར། མངོན་རྟོགས་རྒྱན་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྟ་ལ་སོགས། །ཞེས་དང༌། གསེར་ཕྲེང་ལས། དགེ་བའི་གཉིད་སར་གནས་ལ་ཡང་ཡོད་པ་མི་འགལ་བས། ཞེས་གསུངས་པའི་ཕྱིར། གཞན་ཡང་དེ་ཀུན་གཞིའི་འཁོར་དུ་འབྱུང་བ་མི་རུང་བར་ཐལ། དེ་འཁོར་དུ་འབྱུང་ན་ཐོག་མ་མེད་པ་ནས་བར་མ་ཆད་དུ་འཇུག་དགོས་ལ་ཀུན་གཞི་ཡིན་ན་ཁྱོད་དང་མཚུངས་ལྡན་གྱི་གཉིད་ཡོད་པས་མ་ཁྱབ་པའི་ཕྱིར། རེད་མདའ་བའི་ཀུན་བཏུས་ཊཱིཀྐ་ལས། བར་མ་ཆད་པར་མ་སྒྲིབ་ལུང་མ་བསྟན་པའི་ངོ་བོར་གནས་པ་ཞིག་རྣམ་པར་སྨིན་པར་རིགས་ན། ཞེས་གསུངས་པའི་ཕྱིར། འདོད་པའི་ཀུན་གཞིའི་འཁོར་དུ་རྟོག་དཔྱོད་ཀྱང་མི་འབྱུང་བར་ཀུན་འགྲོ་ལྔ་ཁོ་ན་བྱེད་པའི་རྒྱུ་མཚན་དེ་ཡིན་ནོ། །ཡང་ཁ་ཅིག་ན་རེ། ཁྱོད་ཀྱིས་ཤེར་མདོ་སོགས་ལས་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ཞེས་གསུངས་པ་ལ་བརྟེན་ནས་འགོག་སྙོམས་ཀྱི་ཚེ་འཇུག་ཤེས་མེད་པར་འདོད་པ་མི་འཐད་པར་ཐལ། དེ་ལྟར་ན་ཀུན་གཞིའི་འཁོར་དུ་ཡང་ཚོར་

― GTD002_Page_0369 ―

^{[མ་དཔེ་གཟིགས་ན་འདིར་གནོན།]}

[Full Size]

འདུ་གཉིས་ཡོད་པས་དེ་འགོག་དགོས་པའི་ཕྱིར་ཟེར་ན། མི་མཚུངས་ཏེ། དེའི་འཁོར་གྱི་ཚོར་འདུ་སོགས་དམིགས་རྣམ་ཤིན་ཏུ་ཕྲ་བས་འགོག་མི་དགོས་པའི་ཕྱིར། ཁ་ཅིག་ན་རེ། ཀུན་གཞིའི་ངོ་བོ་ཙམ་ས་བརྒྱད་པ་དང་ཐེག་དམན་དགྲ་བཅོམ་ནས་ལྡོག་ཀྱང་རྣམ་སྨིན་གྱི་རྣམ་ཤེས་རྒྱུན་མཐའ་དང་ཐེག་དམན་ལྷག་མེད་ཀྱི་ཚེ་ལྡོག་པར་ཐལ། ཁྱོད་ཀྱི་གཞུང་གོང་འོག་མི་འགལ་ཚུལ་འཐད་པའི་ཕྱིར། འདོད་ན། རྟག་པར་བདག་ཏུ་སྦྱོར་བའི་གཞི་ཡིན་པའི་ཆ་ནས་ཀུན་གཞིར་འཇོག་བྱེད་ཀྱི་ཉོན་ཡིད་དགྲ་བཅོམ་ཐོབ་མ་ཐག་སྤངས་ཀྱང་ཀུན་ཉོན་གྱི་ཆོས་རྣམས་འབྲས་བུའི་ངོ་བོར་སྦྱོར་བའི་ཆ་ནས་ཀུན་གཞིར་འཇོག་བྱེད་ཀྱི་སྒྲིབ་པའི་བག་ཆགས་མ་ལུས་པ་འདིའི་ཚེ་འགག་པ་ཡིན་པར་ཐལ། འདོད་པའི་ཕྱིར། འདོད་ན། དེའི་ཚེ་ཤེས་སྒྲིབ་ཀྱི་བག་ཆགས་མཐའ་དག་ཀྱང་རྒྱུན་ཆད་པར་ཐལ་ལོ། །འདོད་ན། དེའི་ཚེ་ཤེས་སྒྲིབ་ཀྱི་བག་ཆགས་མཐའ་དག་སྤངས་པར་ཐལ། འདོད་པའི་ཕྱིར་ན་མ་ཁྱབ། རྟགས་གྲུབ་སྟེ། བསྡུ་བ་ལས། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་ནི་སྒྲིབ་པ་དང་སྒྲིབ་པའི་རྣམ་པར་བཞག་པ་དག་མེད་ཀྱི། ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། ཤེས་སྒྲིབ་སྤངས་ན་ཐམས་ཅད་མཁྱེན་པ་ཐོབ་དགོས་པའི་ཕྱིར། དཀའ་འགྲེལ་ལས། མ་ལུས་པར་སྤངས་པ་མེད་ཀྱང་ཤེས་སྒྲིབ་རྒྱུན་ཆད་པའི་ལྡོག་པ་ཡོད་དེ། ཕུང་པོ་ལྔའི་རྒྱུན་ལྡོག་པའི་ཕྱིར་རོ། །ཞེས་གསུངས་པའི་ཕྱིར། སོ་སོར་ཕྱེ་ན་སྲིད་པའི་ཡན་ལག་གི་བག་ཆགས་རྣམ་

― GTD002_Page_0370 ―

^{[མ་དཔེ་གཟིགས་ན་འདིར་གནོན།]}

[Full Size]

སྨིན་ཕྱུང་ནས་དང༌། བདག་ལྟའི་བག་ཆགས་དངོས་གཉེན་སྐྱེ་ན་དང༌། མངོན་བརྗོད་ཀྱི་བག་ཆགས་ལྷག་མེད་དང་རྒྱུན་མཐའ་ནས་ལྡོག་པར་དོན་གསང་ལས་གསུངས་སོ། །གཉིས་པ་ཉོན་ཡིད་ཀྱི་རྣམ་གཞག་བཤད་པ་ལ་སྤྱི་དོན་དང། མཐའ་ཅུང་ཟད་དཔྱད་པ་གཉིས། དང་པོ་ངོ་བོ་ནི་ཀུན་གཞིའི་རྣམ་སྨིན་གྱི་ཆ་ཁོ་ན་ལ་དམིགས་ནས་རྟག་ཏུ་ངར་སེམས་པའི་རྣམ་པ་ཅན་གྱི་རབ་ཏུ་མ་ཞི་བའི་ཡིད་ཀྱི་རྣམ་ཤེས་བརྟན་པས་རབ་ཏུ་ཕྱེ་བ་ཞིག་ཡིན་ཏེ། རྩ་བར། ཀུན་གཞི་རྣམ་སྨིན་ཆ་ཉིད་ལ། །བདག་ལྟ་སྒྲིབ་ལ་ལུང་མ་བསྟན། །ཞེས་སོ། །འཁོར་ནི་ཀུན་འགྲོ་ལྔ། ལྟ་བ། མ་རིག་པ། ང་རྒྱལ། འདོད་ཆགས་ཏེ་སེམས་བྱུང་རྫས་ཡོད་དགུར་ངེས་ལ། དེའི་སྟེང་དུ་ལྟ་བ་ལ་བཏགས་པའི་རྣམ་གཡེང༌། རྨོངས་པ་ལ་བཏགས་པ་མ་དད་པ། ལེ་ལོ། རྨུགས་པ་གསུམ། འདོད་ཆགས་ལ་བཏགས་པའི་རྒོད་པ། ཆགས་སྡང་གཉིས་ཀ་ལ་བཏགས་པ་བག་མེད་དེ་དྲུག་བསྣན་ནས་བཅོ་ལྔར་ཡང་གསུངས་ཏེ། སུམ་ཅུ་པ་ལས། ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཏུ་ཆགས་པ་སྟེ། །ཞེས་དང༌། དཀའ་འགྲེལ་ལས། དྲུག་པོ་དེ་དག་ཉོན་མོངས་པ་བཞི་པོ་དེའི་རྫས་ཡིན་པས་དེ་བཞི་ལས་གུད་ན་མེད་དོ་ཞེས་གསུངས་པའི་ཕྱིར། སའི་ཁྱད་པར་རང་ཉིད་གང་གི་རྒྱུད་ལ་ལྡན་པའི་གང་ཟག་ས་གང་དུ་གཏོགས་པ་དེས་བསྡུས་པ་དགོས་ཏེ། རང་དང་མཚུངས་པར་ལྡན་པའི་འདོད་ཆགས་ཀྱིས་ས་དེའི་རྣམ་སྨིན་གྱི་ཀུན་གཞི་ལ་དམིགས་ནས་སྲེད་པས་བདག་གིར་བྱས་པའི་ཕྱིར། སུམ་ཅུ་པ་ལས། གང་

― GTD002_Page_0371 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་སྐྱེས་པ་དེ་ཡི་འོ། །ཞེས་དང། མཛོད་ལས། བདག་གིར་མ་བྱས་ཞེས་དང། ཀུན་འགྲོ་མ་ཡིན། ཞེས་གསུངས་པའི་ཕྱིར། བྱེད་ལས་ཀྱི་ཁྱད་པར་ཡིད་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་ཅིང་ཀུན་གཞི་ལ་བདག་ལྟའི་ས་བོན་བཏབ་ནས་ཚོགས་དྲུག་ཀ་མཚན་མའི་གནས་ལ་འཆིང་བར་བྱེད་དོ། །འཇུག་ལྡོག་གི་ཁྱད་པར། འཕགས་ལམ་མ་ཐོབ་བར་དུ་རྒྱུན་མ་ཆད་པར་མངོན་གྱུར་དུ་འབྱུང་ཞིང་འཕགས་པའི་མཉམ་གཞག་ཡེ་ཤེས་དང་འགོག་སྙོམས་ཀྱི་དུས་སུ་མངོན་གྱུར་ལྡོག་ཀྱང་དེ་ལས་ལངས་མ་ཐག་འབྱུང་བས་གནས་སྐབས་ཙམ་ཡིན་ལ། ས་བརྒྱད་པ་དང་ཐེག་དམན་དགྲ་བཅོམ་ཐོབ་པ་ན་གཏན་དུ་ལྡོག་གོ །སྒྲུབ་བྱེད་ལ་ལུང་ནི། ལུང་ཕྲན་ཚེགས་ལས། ཉོན་མོངས་ཅན་ཡིན་རྟག་ཏུ་ནི། །ཉོན་མོངས་ལྷན་ཅིག་སྐྱེ་ཞིང་འབྱུང༌། །དེ་ནི་ཉོན་མོངས་རྣམས་ལས་ནི། །མ་གྲོལ་གྲོལ་བར་མི་འགྱུར་རོ། །ཞེས་དང༌། ལང་གཤེགས་ལས། སེམས་ནི་རང་བཞིན་དྭངས་པ་སྟེ། །རྙོགས་པར་བྱེད་པ་ཡིད་ཡིན་ནོ། །ཞེས་དང༌། སྟུག་པོ་བཀོད་པ་ལས། ངར་སེམས་བདག་ཉིད་ཡིན་ནོ། །ཞེས་དང༌། དགོངས་འགྲེལ་ལས། རེས་འགའ་ནི་ཀུན་གཞིའི་རྣམ་པར་ཤེས་པ་འདི་རྣམ་པར་ཤེས་པ་གཅིག་དང་ལྷན་ཅིག་སྟེ་ཡིད་དང༌། ཞེས་པ་ནས། རྣམ་པར་ཤེས་པ་བདུན་དང་ལྷན་ཅིག་འཇུག་སྟེ། ཞེས་དང༌། གསེར་འོད་ལས། ཀུན་གཞི་ལ་གནས་པའི་ཡིད་སྦྱངས་པས་ལོངས་སྤྱོད་རྫོགས་པའི་སྐུ་འཐོབ་བོ། །ཞེས་སོགས་ཤིན་ཏུ་མང་ངོ༌། །རིགས་པའི་སྒྲུབ་བྱེད་ནི། ཐེག་བསྡུས་ལས། ཉོན་མོངས་ཅན་གྱི་ཡིད་མེད་ན། །

― GTD002_Page_0372 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འདྲེས་པ་ཡི་མ་རིག་དང༌། །ལྔ་བོ་དག་དང་འདྲ་བ་དང༌། །སྙོམས་པར་འཇུག་པའི་བྱེ་བྲག་དང༌། །ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེས་པའི་རྒྱུན། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི། །རྣམ་པ་ཀུན་ཏུ་མི་འཐད་དོ། །ཞེས་སྒྲུབ་བྱེད་དྲུག་གསུངས་ཏེ། རྒྱུན་ཆགས་སུ་མངོན་དུ་འགྱུར་བའི་རྟེན་མ་འདྲེས་པའི་མ་རིག་པ་མེད་པར་ཐལ་བ་དང༌། དབང་ཤེས་ལྔ་ལ་ཐུན་མོང་མ་ཡིན་པའི་བདག་རྐྱེན་དབང་པོ་རེ་ཡོད་ཀྱང་དྲུག་པ་ཡིད་ཤེས་ལ་ཐུན་མོང་མ་ཡིན་པའི་བདག་རྐྱེན་མེད་པར་ཐལ་བ་དང༌། འགོག་པའི་སྙོམས་འཇུག་དང་འདུ་ཤེས་མེད་པའི་སྙོམས་འཇུག་གཉིས་ལ་ཞི་བ་དང་མཐུན་མི་མཐུན་གྱི་ཁྱད་པར་མེད་པར་ཐལ་བ་དང༌། རྟག་ཏུ་ངར་སེམས་པས་ན་ཡིད་དོ་ཞེས་ཉོན་ཡིད་རང་གི་ངེས་ཚིག་གམ་ཉོན་ཡིད་ཀྱི་དབང་གིས་ངས་མཐོང་ངས་ཐོས་ཞེས་པ་ལྟ་བུའི་ངེས་ཚིག་འབྱུང་བ་མི་འཐད་པར་ཐལ་བ་དང༌། འདུ་ཤེས་མེད་པར་སྐྱེས་པའི་གང་ཟག་གི་རྒྱུད་ལ་ངར་འཛིན་མེད་པར་ཐལ་བ་དང། དགེ་བའི་ལས་ཀྱི་ཀུན་སློང་སོགས་སུ་ངར་འཛིན་འབྱུང་བ་མེད་པར་ཐལ་བ་རྣམས་སོ། །མཐའ་དཔྱད་པ་ལ། ཁ་ཅིག་ན་རེ། དམིགས་པ་རང་རྒྱུད་ཀྱི་ཀུན་གཞི་ལ་དམིགས་ནས་རྣམ་པ་རྫས་ཡོད་ཀྱི་བདག་ཏུ་འཛིན་པའི་བརྟན་པའི་རྣམ་རིག་དེ། ཉོན་ཡིད་ཀྱི་ངོ་བོ་ཟེར་ན། ཉོན་ཡིད་ཆོས་ཅན། བློ་དོན་མཐུན་ཡིན་པར་ཐལ། ཀུན་གཞི་རྫས་ཡོད་ཀྱི་བདག་ཏུ་འཛིན་པའི་བློ་ཡིན་པའི་ཕྱིར། རྟགས་ཁས། ཁྱབ་སྟེ། ཀུན་གཞི་རྫས་ཡོད་ཀྱི་བདག་ཡིན་པའི་ཕྱིར། མ་གྲུབ་ན། ཀུན་གཞི་ཆོས་ཅན། རྫས་ཡོད་ཀྱི་བདག་ཡིན་པར་

― GTD002_Page_0373 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་པའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པའི་བདག་ཡིན་པའི་ཕྱིར། དེར་ཐལ། དེ་འདྲའི་རྣམ་སྨིན་གྱི་རྣམ་ཤེས་ཡིན་པའི་ཕྱིར། ཁྱབ་སྟེ། མདོ་ལས། ལས་དང་རྣམ་པར་སྨིན་པ་ནི་ཡོད་ལ་བྱེད་པ་པོ་ནི་མི་དམིགས་སོ། །ཞེས་དང༌། ལེགས་བཤད་སྙིང་པོ་ལས། ལས་དང་རྣམ་སྨིན་ཀུན་རྫོབ་ཏུ་ཡོད་ཅིང་རྫས་སུ་ཡང་ཡོད་ལ།ཞེས་གསུངས་པའི་ཕྱིར་དང༌། རྣམ་བཤད་དགོངས་པ་རབ་གསལ་ལས་ཀྱང་འདི་དག་གིས་གང་ཟག་སྤྱི་ལྡོག་བཏགས་ཡོད་ཡིན་ཀྱང་གཞི་ལྡོག་ཀུན་གཞི་སོགས་རྫས་ཡོད་དུ་འདོད་པར་གསུངས་པ་ལ་སྒྲ་བ་ཤེས་རབ་རིན་ཆེན་གྱིས། རྫས་ཡོད་བདག་སྨྲ་གནས་མ་བུར་ངེས་དང༌། །རྣམ་ཤེས་བདག་སྨྲའི་དབུ་སེམས་ཡོད་པ་འགལ། །ཞེས་རྫས་ཡོད་ཀྱི་བདག་དང་རང་རྐྱ་ཐུབ་པའི་རྫས་ཡོད་ཀྱི་བདག་གི་ཁྱད་པར་མ་ཕྱེད་པར་དགག་པ་བྱས་པའི་ཕྱིར། ཁྱབ་སྟེ། དེ་ལ་ལན་འདེབས་པའི་ཚེ་རྗེ་བླ་མས་རང་རྐྱ་ཐུབ་པའི་རྫས་ཡོད་ཀྱི་བདག་ཁས་ལེན་པའི་རང་སྡེ་གནས་མ་བུ་བ་མ་གཏོགས་མེད་པར་གསུངས་ཀྱི་རྫས་ཡོད་ཀྱི་བདག་ཁས་ལེན་མཁན་གཞན་མེད་པར་མ་གསུངས་པས་ཁྱོད་ཀྱི་དགག་པ་དེ་ཕྱོགས་སྔ་ངོས་མ་ཟིན་པའི་ལྟག་ཆོད་དུ་འདུག་ཅེས་བཤད་དགོས་པའི་ཕྱིར། འདི་ལ་བྲ་སྟི་དགེ་བཤེས་ཀྱིས་རྫས་ཡོད་ཀྱང་གང་ཟག་གི་སྟེང་དུ་བཞག་ན་རང་རྐྱ་ཐུབ་པའི་རྫས་ཡོད་ཀྱི་བདག་གི་གྲུབ་ཚད་ལས་མ་འདས་པས་མི་འཇོག་ཅིང་ཤེས་པ་དང་གཟུགས་ཀྱི་སྟེང་དུ་འཇོག་ཚུལ་སྔར་ལྟར་རོ། །ཞེས་བཤད་པ་ཡང་

― GTD002_Page_0374 ―

^{[མ་དཔེ་གཟིགས་ན་འདིར་གནོན།]}

[Full Size]

མི་འཐད་པར་ཐལ། མཚན་གཞིའི་རྣམ་ཤེས་རང་རྐྱ་ཐུབ་པའི་རྫས་ཡོད་དུ་འདོད་པའི་གྲུབ་མཐའ་གོང་མ་ཡོད་ན་རྗེ་བླ་མ་ལ་སྟག་ལོའི་དགག་པ་དེ་འཇུག་པར་ཐལ་བ་དང༌། སེམས་ཙམ་གྱི་ལུགས་ལའང་གང་ཟག་གི་བདག་མེད་སྟོང་གཞིའི་སྒོ་ནས་འཇོག་པར་ཐལ་བ་དང༌། དེ་འདོད་ན། མདོས་གཟུགས་ནས་འཕགས་ལམ་ཡན་ལག་གི་བར་གྱི་ཆོས་རྣམས་ཀྱི་སྟེང་དུ་འཁོར་ལོ་དང་པོའི་དགོངས་གཞིའི་གང་ཟག་གི་བདག་མེད་ཀྱི་དབང་དུ་བྱས་པའི་མཚན་ཉིད་གསུམ་བཞག་པ་མི་འཐད་པར་ཐལ་བ་དང༌། གང་ཟག་གི་བདག་མེད་ཕྲ་མོའི་དགག་བྱ་དེ་གཟུགས་ཤེས་གཉིས་ཀྱི་སྟེང་དུ་ཚད་མས་གྲུབ་ན་གཟུགས་ཤེས་གཉིས་གང་ཟག་གི་བདག་མེད་མ་ཡིན་པར་ཐལ་བ་སོགས་མི་འཚམས་པ་དུ་མ་འབྱུང་བའི་ཕྱིར། དེས་ན་ཀུན་མཁྱེན་བླ་མའི་དྲང་ངེས་རྣམ་འབྱེད་ཆེན་མོར་དེ་གཉིས་ཀྱིས་ཁྱད་པར་ཕྱེ་བ་ལ་ལྕང་སྐྱ་རིན་པོ་ཆེའི་གྲུབ་མཐར་ཁ་ཅིག་རང་རྐྱ་འཛིན་ཐུབ་པའི་རྫས་ཡོད་དང་རང་རྐྱ་ཐུབ་པའི་རྫས་ཡོད་གཉིས་ཀྱི་ཞིབ་ཆ་འབྱེད་པ་ཡང་རྒྱ་གཞུང་ཚད་ཐུབ་རྣམས་དང་རྗེ་ཡབ་སྲས་ཀྱི་གསུངས་གང་ལས་ཀྱང་མི་འབྱུང་བས་འཐད་རྒྱུ་ཞིག་མི་འདུག །ཅེས་སོགས་མང་དུ་གསུངས་པ་ཡང་མཁས་པ་སྔ་མ་ཁ་ཅིག་གི་བཤད་རྒྱུན་བསྐྱངས་པ་ཙམ་ལས་རྗེ་དེ་ཉིད་ཀྱི་རང་ལུགས་མིན་ཏེ། བསྡུ་བ་དང༌། རྣམ་བཤད་གཉིས་ཀར་དགག་བྱ་བཅད་པ་སོགས་ལ་མ་ལྟོས་པར་ངོ་བོ་བློ་ཡུལ་དུ་འཆར་དུ་ཡོད་པའི་རྫས་ཡོད་དང་གདགས་གཞིའམ་ཆ་ཤས་སོ་སོ་ལ་མ་ལྟོས་པར་ཚུགས་ཐུབ་ཏུ་གྲུབ་པས་རང་རྐྱ་ཐུབ་པར་གསུངས་པ་ལས་ལྷག་པའི་ཚད་ཐུབ་ཀྱི་གཞུང་དང་ཁྱད་པར་འབྱེད་ཚུལ་མེད་པའི་ཕྱིར་ཏེ། བུམ་པ་ལྟ་བུ་

― GTD002_Page_0375 ―

^{[མ་དཔེ་གཟིགས་ན་འདིར་གནོན།]}

[Full Size]

དགག་བྱ་བཅད་པ་སོགས་ལ་མ་ལྟོས་པར་མངོན་སུམ་དུ་མཐོང་དུ་ཡོད་ཀྱང་ཁ་ཞབས་ལྟོ་བ་སོགས་ལ་མ་ལྟོས་པར་ཚུགས་ཐུབ་ཏུ་གྲུབ་ཚུལ་མེད་པས་དེ་གཉིས་ཆེས་མི་འདྲ་བའི་ཕྱིར། དེས་ན་ལྕང་སྐྱ་ཐམས་ཅད་མཁྱེན་པའི་གྲུབ་མཐར་གསུངས་པ་ཐམས་ཅད་ཉིད་ཀྱི་རང་ལུགས་ཁོ་ན་མཛད་པའི་ངེས་པ་མེད་དེ། དཔེར་ན་དེར་ཉན་རང་ལ་སྙིང་རྗེ་ཆེན་པོ་མེད་པར་གསུངས་ཀྱང་དེ་ཉིད་ཀྱིས་མཛད་པའི་དབུ་མའི་སེམས་བསྐྱེད་དང་པོའི་མཐའ་དཔྱོད་དུ་དེ་ཡོད་པར་ལུང་རིགས་དུ་མས་བསྒྲུབ་པ་ལྟ་བུའོ། །ཡང་ཁ་ཅིག་ན་རེ། ཀུན་གཞི་རྫས་ཡོད་ཡིན་ཀྱང་ང་མ་ཡིན་པས་ཉོན་ཡིད་ཀྱིས་དེ་ལ་རྫས་ཡོད་ཀྱི་ངའོ་སྙམ་དུ་བཟུང་བས་ལོག་ཤེས་སུ་འགྲོ་ཟེར་ན། ཀུན་གཞི་ཆོས་ཅན། ང་ཡིན་པར་ཐལ། ཉོན་ཡིད་དང་མཚུངས་ལྡན་གྱི་འཇིག་ལྟའི་དམིགས་ཡུལ་ཡིན་པའི་ཕྱིར་ཏེ། ཉོན་ཡིད་ཀྱི་དམིགས་ཡུལ་ཡིན་པའི་ཕྱིར། ཁྱབ་སྟེ། ལམ་རིམ་ཆུང་ངུ་ལས། ངར་འཛིན་གྱི་དམིགས་རྣམ་གཉིས་ཀྱི་ནང་ནས་དམིགས་པའི་ཡུལ་ཡིན་ན་བདག་ཏུ་བཞག་དགོས་པས་སོ། །ཞེས་གསུངས་པའི་ཕྱིར། གཞན་ཡང་འཇིག་ལྟ་ཡིན་ན་ང་ལ་དམིགས་དགོས་པར་ཐལ། དེའི་ཞེན་ཡུལ་མེད་པར་རྟོགས་པའི་ཡེ་ཤེས་ཀྱིས་ང་ལ་དམིགས་དགོས་པ་གང་ཞིག །དེ་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར། དང་པོ་མ་གྲུབ་ན། དེ་དགོས་པར་ཐལ། དེས་དེ་ལ་མ་དམིགས་ན་ངར་འཛིན་འཇིག་ལྟའི་ཞེན་ཡུལ་དྲུངས་འབྱིན་མི་ནུས་པའི་ཕྱིར། འཇུག་པ་ལས། བདག་མེད་རྟོགས་ཚེ་རྟག་པའི་བདག་སྤོང་ཞིང༌། །འདི་ནི་ངར་འཛིན་རྟེན་

― GTD002_Page_0376 ―

^{[མ་དཔེ་གཟིགས་ན་འདིར་གནོན།]}

[Full Size]

དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །ཞེས་གསུངས་པའི་ཕྱིར་དང༌། བདག་མེད་གཏན་ལ་འབེབ་པའི་གཞུང་ཚད་ལྡན་ཐམས་ཅད་དུ་ཐ་སྙད་པའི་ང་ངོས་འཛིན་ཚུལ་ནན་ཏན་དུ་གསུངས་པའི་དགོས་པ་ཡོད་པའི་ཕྱིར། དེ་ལ་ཁོ་ན་རེ། ཉོན་ཡིད་ཀྱིས་ཀུན་གཞི་ལ་མ་དམིགས་པར་ཐལ། དོན་གསང་ལས། ཀུན་གཞི་རྣམ་པར་ཤེས་པ་ལ་ཇི་ལྟར་དམིགས་ཞེ་ན། དེའི་དབང་གིས་བདག་གི་རྣམ་པར་སྐྱེ་བའི་སྒོ་ནས་ཡིན་གྱི་རང་གི་ངོ་བོ་འཇོག་པའི་སྒོ་ནས་ནི་མ་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ཉོན་ཡིད་ཀྱིས་ང་སྤྱི་ཙམ་དེ་ལ་དངོས་སུ་དམིགས་པ་མིན་ཀྱང་ཀུན་གཞི་ལ་དམིགས་པའི་སྒོ་ནས་ང་ལ་དམིགས་པར་འཇོག་པའམ། ཉོན་ཡིད་ལ་ཀུན་གཞི་དེ་རྣམ་སྨིན་ཡིན་ཚུལ་དང་བག་ཆགས་འཇོག་ཚུལ་སོགས་ཀྱི་ཁྱད་པར་མཐའ་དག་མ་ཤར་ཡང་ལུས་ལེན་པ་པོའི་བདག་ཏུ་སྣང་བའི་རྒྱུ་མཚན་གྱིས་ཀུན་གཞིའི་རྣམ་སྨིན་གྱི་ཆ་ལ་དམིགས་ཞེས་བཤད་པ་ཡིན་པའི་ཕྱིར། དང་པོ་གྲུབ་སྟེ། རེད་མདའ་བའི་ཊཱིཀྐ་ལས། ཀུན་གཞིའི་རྣམ་པར་ཤེས་པའི་དབང་གིས་འདི་བདག་གི་རྣམ་པར་སྐྱེ་བའི་ཕྱིར། དེས་བདག་ལ་དམིགས་པ་ཡིན་གྱི་དངོས་སུ་ནི་མ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། དཀའ་འགྲེལ་ལས། རྣམ་སྨིན་གྱི་རྫས་དེ་ཉིད་སྣང་ནས་ཉོན་ཡིད་ཀྱི་ཡུལ་དུ་མི་འགྱུར་ཡང༌། ཞེས་གསུངས་པའི་ཕྱིར། མ་ཁྱབ་མཚམས་ལ་འདོད་མི་ནུས་ཏེ། སུམ་ཅུ་པ་ལས། དེ་ལ་དམིགས་པ་ཡིད་ཅེས་བྱ། །ཞེས་དང༌། དེའི་འགྲེལ་པ་ལས། དེ་ལ་ཞེས་བྱ་བའི་

― GTD002_Page_0377 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲ་ནི་ཀུན་གཞི་རྣམ་པར་ཤེས་པ་ཉིད་ལ་སྦྱར་རོ། །ཞེས་གསུངས་པའི་ཕྱིར་དང༌། དོན་གསང་རང་ཉིད་ལས་ཀྱང༌། ཡིད་ནི་འཁོར་བ་ཇི་སྲིད་པར་རིགས་གཅིག་པ་དང༌། དམིགས་པ་ཉེ་བ་ཀུན་གཞི་རྣམ་པར་ཤེས་པ་ལས་འབྱུང་བ་ཀོ་ཇི་ལྟར་རྒྱུན་འཆད། ཅེས་ཉོན་ཡིད་རྒྱུན་ཆགས་སུ་འབྱུང་བའི་སྒྲུབ་བྱེད་དུ་འཇུག་ཤེས་དང་མི་འདྲ་བར་སྔ་ཕྱི་རིགས་མཐུན་ཅིང་དམིགས་ཡུལ་ཀུན་གཞི་རྟག་ཏུ་ཡོད་པ་བཀོད་པའི་ཕྱིར། ཡང་ཉོན་ཡིད་སྒྲིབ་ལུང་མ་བསྟན་དུ་བཤད་པའི་དོན་ལ། ས་བཟང་གིས། ཟག་མེད་ལམ་དང་ལྷན་ཅིག་མངོན་གྱུར་དུ་མི་འབྱུང་བས་ཐར་པ་ཐོབ་པ་ལ་སྒྲིབ་ཅིང་ཞེས་བཤད་པ་མི་འཐད་པར་ཐལ། འདིའི་སྒྲིབ་ཅེས་པ་རང་གི་ངོ་བོ་ཉོན་མོངས་གཞན་གྱིས་སྒྲིབ་པའི་དོན་ཡིན་གྱི་རང་གིས་གཞན་ལ་སྒྲིབ་པའི་དོན་མ་ཡིན་པའི་ཕྱིར། དཀའ་འགྲེལ་ལས། ཐར་པ་ལ་སྒྲིབ་མི་སྒྲིབ་ཏུ་འདོད་པ་ནི་སྒྲིབ་པ་དང་མ་སྒྲིབ་པའི་རང་གི་ངོ་བོ་མི་ཤེས་ཤིང༌། ཞེས་དང་ཡིད་འདི་ཡང་ཉོན་མོངས་པ་བཞིས་རྙོགས་རྙོགས་པོར་བྱས་པའི། ཞེས་གསུངས་པའི་ཕྱིར་དང༌། སུམ་ཅུ་བའི་འགྲེལ་པ་ལས། ཉེ་བའི་ཉོན་མོངས་པ་གློ་བུར་བ་རྣམས་ཀྱིས་མ་སྒྲིབ་པའི་ཕྱིར་མ་སྒྲིབ་པ་ཞེས་བྱའོ། །ཞེས་གསུངས་པ་དང་ཤིན་ཏུ་མཐུན་པའི་ཕྱིར། འདི་ལ་སྐབས་ཐོབ་ཀྱི་ཞིབ་ཆ་དགོས། ཡང་ཁ་ཅིག་ན་རེ། ཉོན་ཡིད་དང་མཚུངས་ལྡན་གྱི་འདོད་ཆགས་དང་ང་རྒྱལ་སོགས་མེད་པར་ཐལ། དེ་དག་ལ་དགའ་བའི་རྣམ་ཅན་དགོས་པའི་ཕྱིར། མཛོད་ལས། བདེ་བ་དག་དང་འདོད་ཆགས་སུ། །མཚུངས་ལྡན། ཞེས་པའི་རང་འགྲེལ་ལས། འདོད་

― GTD002_Page_0378 ―

^{[མ་དཔེ་གཟིགས་ན་འདིར་གནོན།]}

[Full Size]

ཆགས་དང་ཞེ་སྡང་དག་ནི་དགའ་བ་དང་སྐྱེ་བའི་རྣམ་པར་འཇུག་པའི། ཞེས་དང༌། ང་རྒྱལ་དེ་དགའ་བའི་རྣམ་པར་འཇུག་པའི་ཞེས་གསུངས་ཤིང༌། བཤད་སྦྱར་ལས་ཀྱང༌། བདག་ལ་ཆགས་པ་འབྱུང་སྟེ། བདག་ལ་དགའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ཆགས་སེམས་ཀྱིས་གཅེས་པའི་རྣམ་པར་སྐྱེ་བའི་དོན་ཡིན་གྱི་ཡིད་བདེ་བའི་རྣམ་ཅན་མ་ཡིན་པའི་ཕྱིར་ཏེ། དོན་གསང་ལས། དགའ་བའི་རྣམ་པ་ཅན་ཡིན་ཡང་སིམ་པའི་ཚོར་བ་ཅན་ནི་མ་ཡིན། ཞེས་དང༌། དཀའ་འགྲེལ་ལས། ཚོར་བའི་དགའ་རྣམ་མིན་གྱི་འདོད་ཆགས་ཀྱི་དགའ་རྣམ་ཡིན་ཏེ། ཞེས་གསུངས་པའི་ཕྱིར། ཁ་ཅིག་ན་རེ། ཉོན་ཡིད་ཀྱི་འཁོར་དུ་ཉེ་ཉོན་དེ་དྲུག་མེད་པར་ཐལ། ཉེ་ཉོན་ནི་རྩ་ཉོན་གྱི་ཤུགས་ཞན་དུ་སོང་བའི་གནས་སྐབས་ལ་འཇོག་ཅིང་ཉོན་ཡིད་གནས་ཀྱི་བར་དུ་དེ་འདྲ་མི་སྲིད་པའི་ཕྱིར་ཏེ། དོན་གསང་ལས། ཡང་ན་མཚུངས་པར་མི་ལྡན་པ་ཉིད་དེ། འདོད་ཆགས་ལ་སོགས་པ་ནི་གསལ་བའི་རྣམ་པར་ཞུགས་པ་ཡིན་ལ། དེའི་རྗེས་ལ་ཤས་ཀྱི་བྲི་བར་ཞུགས་པ་ན་ཉེ་བའི་ཉོན་མོངས་པ་རྣམས་ཞེས་གདགས་ན་ཡིད་ལ་ནི་དེ་ལྟ་བུ་མི་སྲིད་དེ། ཞེས་གསུངས་པའི་ཕྱིར་ཟེར། དེ་ལ་སྐྱོན་འཕེན་པ་ཁ་ཅིག་ན་རེ། དེ་མི་འཐད་པར་ཐལ། དེའི་རྩ་ཉོན་བཞི་ཡང་ཉེ་ཉོན་ཡིན་པའི་ཕྱིར། མཛོད་འགྲེལ་ལས། གང་དག་ཉོན་མོངས་པ་ཡིན་པ་དེ་དག་ནི་ཉེ་བའི་ཉོན་མོངས་པ་ཡང་ཡིན་ཏེ། སེམས་ཉེ་བར་ཉོན་མོངས་པར་བྱེད་དོ། །ཞེས་གསུངས་པའི་ཕྱིར་ན་མ་ཁྱབ་སྟེ། གྲུབ་མཐའ་གཞན་གྱི་སྐབས་ཡིན་པའི་ཕྱིར། གོང་དུ་འདོད་མི་ནུས་ཏེ། ཀུན་བཏུས་ལས། རྨུགས་པ་དང༌། རྒོད་པ་དང༌། མ་དད་པ་དང༌། ལེ་ལོ་དང༌། བག་མེད་པ་ནི་ཉོན་

― GTD002_Page_0379 ―

^{[མ་དཔེ་གཟིགས་ན་འདིར་གནོན།]}

[Full Size]

མོངས་པ་ཐམས་ཅད་དང་མཚུངས་པར་ལྡན་ནོ། །ཞེས་གསུངས་པའི་ཕྱིར་དང༌། དེ་དག་རྩ་ཉོན་བཞིའི་རྫས་ལ་བཏགས་ཙམ་ཡིན་པས་སྔ་མ་དང་མི་འགལ་བའི་ཕྱིར། བྱས་པ་ལ་ཁོ་ན་རེ། འདོད་པའི་ཉོན་ཡིད་ཀྱི་འཁོར་དུ་རྟོག་དཔྱོད་ཀྱང་བཞག་ཆོག་པར་ཐལ། དེ་ཤེས་རབ་ཀྱི་རྫས་ལ་བཏགས་ཙམ་ཡིན་པའི་ཕྱིར་ན་མི་མཚུངས་ཏེ། འདོད་པའི་ཉོན་ཡིད་ཀྱི་འཁོར་དུ་ཡོད་ན་དེའི་རིགས་འདྲ་ཞིག་གོང་མའི་ཉོན་ཡིད་ཀྱི་འཁོར་དུ་ཡང་ཡོད་དགོས་པའི་ཕྱིར། དེར་ཐལ། འདོད་པ་ནས་གོང་མར་སྐྱེ་བ་དང༌། གོང་མ་ནས་འདོད་པར་སྐྱེ་བའི་ཚེ་ཉོན་ཡིད་ས་འཕོས་པ་བཞིན་དུ་འཁོར་གྱི་ཉོན་མོངས་རྣམས་ཀྱང་ས་དེའི་ཉོན་མོངས་དེ་དང་དེར་འགྱུར་དགོས་ཀྱི་བར་སྐབས་སུ་ཆད་པའམ་ལྷག་པ་འབྱུང་མི་རུང་བའི་ཕྱིར། དཀའ་འགྲེལ་ལས། འདིའི་འཁོར་ལ་ཁམས་གསུམ་གར་མང་ཉུང་མི་འབྱུང་སྟེ། བརྟན་པའི་རྣམ་ཤེས་ཡིན་པས་གཙོ་བོ་དང་འཇུག་ལྡོག་གི་དུས་གཅིག་ཡིན་པའི་ཕྱིར་རོ། །ཞེས་གསུངས་པའི་ཕྱིར། དེ་ལ་ཁོ་ན་རེ། འདིའི་ཉོན་མོངས་གོང་མའི་ཉོན་མོངས་སུ་འགྱུར་བ་མེད་པར་ཐལ། གང་སྤེལ་ལས། འདོད་པ་སྤྱོད་པའི་ཀུན་ཏུ་འགྲོ་བའི་རྒྱུའི་འབྲས་བུ་ནི་འདོད་པ་སྤྱོད་པའི་ཉོན་མོངས་པ་ཁོ་ན་ཡིན་ནོ། །ཞེས་སོགས་རྩ་འགྲེལ་གྱི་དོན་ཡོད་པའི་ཕྱིར་ཟེར་ན། ཀུན་གཞི་ཉོན་ཡིད་གཉིས་ཀྱང་མེད་པར་ཐལ། དེ་མེད་པར་བྱེ་སྨྲས་འདོད་པའི་ཕྱིར། ཁྱབ་པ་ཁས། ཡང་ཁོ་ན་རེ། འདོད་རྟེན་ཅན་གྱི་འབྲས་བུ་རིམ་གྱིས་པའི་ཕྱིར་མི་འོང་གི་རྒྱུད་ལ་འདོད་ཉོན་ཡོད་པར་ཐལ། དེའི་རྒྱུད་ཀྱི་ཉོན་ཡིད་དང་མཚུངས་ལྡན་གྱི་འཇིག་ལྟ་དེ་འདོད་ཉོན་

― GTD002_Page_0380 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པའི་ཕྱིར། འདོད་མི་ནུས་ཏེ། དེས་འདོད་པའི་ཉོན་མོངས་མ་ལུས་པར་སྤངས་པའི་ཕྱིར། དེར་ཐལ། དེས་འདོད་ཉོན་སྐོར་དགུ་སྤངས་པའི་ཕྱིར་ན་མ་ཁྱབ། རྟགས་གྲུབ་སྟེ། འདོད་ཉོན་སྐོར་དགུའི་གཉེན་པོ་བར་ཆད་མེད་ལམ་དགུས་དྲངས་པའི་འདུས་བྱས་རྣམ་གྲོལ་ལམ་དགུ་དང་འདུ་མ་བྱས་འགོག་བདེན་དགུ་ཐོབ་ཟིན་པའི་ཕྱིར་ཏེ། འདུས་བྱས་རྣམ་གྲོལ་ལམ་བརྒྱད་ཅུ་རྩ་གཅིག་རིམ་གྱིས་ཐོབ་ཚུལ་ཡོད་པའི་ཕྱིར། བྱས་པ་ལ། དེ་འདྲའི་ཕྱིར་མི་འོང་དེས་སླར་ལས་ཉོན་གྱི་དབང་གིས་འདོད་པར་སྐྱེ་བ་ལེན་རུང་བར་ཐལ། དེས་འདོད་པའི་ཉོན་མོངས་མ་སྤངས་པའི་ཕྱིར་ན་མ་ཁྱབ་སྟེ། འདོད་པའི་ཡང་སྲིད་འགྲུབ་བྱེད་ཀྱི་ལས་ལ་གསོས་འདེབས་པའི་སྲེད་ལེན་གཉིས་སྤངས་ཟིན་པའི་ཕྱིར། ཡང་ཁ་ཅིག །འདོད་རྟེན་ཅན་གྱི་ཕྱིར་མི་འོང་དེས་འདོད་ཉོན་མ་སྤངས་ཡང་གོང་མའི་རྟེན་ཅན་དེས་སྤངས་ཟེར་ན། འོ་ན་འདོད་པ་ནས་ཁམས་གོང་མར་སྐྱེས་མ་ཐག་དེས་ཀྱང་སྤངས་པར་ཐལ། དེ་གོང་མའི་རྟེན་ཅན་གྱི་ཕྱིར་མི་འོང་ཡིན་པའི་ཕྱིར། འདོད་ན། འདོད་པ་ནས་འཆི་ཁ་མ་དེ་འདོད་ཉོན་སྤོང་ཁ་མ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། འདོད་ཉོན་གྱི་དངོས་གཉེན་ལ་གནས་པའི་གང་ཟག་ཡིན་པར་ཐལ། དེ་སྤོང་ཁ་མ་གང་ཞིག །འདོད་པའི་ཉོན་མོངས་དེ་དངོས་གཉེན་གྱི་གཞོམ་བྱ་ཡིན་པའི་ཕྱིར། འདོད་མི་ནུས་ཏེ། འཆི་སྲིད་ཕྲ་མོ་ལ་གནས་པའི་གང་ཟག་ཡིན་པའི་ཕྱིར། ཡང་ཁོ་ན་རེ། ཉན་ཐོས་དགྲ་བཅོམ་ལ་ཅིག་ཅར་བས་ཁྱབ་པར་ཐལ། ས་དགུའི་ཉོན་མོངས་ཅིག་ཅར་སྤོང་དགོས་པའི་ཕྱིར་ན་མ་ཁྱབ་སྟེ། ས་དགུའི་ཉོན་མོངས་ཆུང་ངུ་དགུ་རིམ་གྱིས་སྤོང་

― GTD002_Page_0381 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ཡོད་པའི་ཕྱིར། དེར་ཐལ། ཉོན་མོངས་སྐོར་དགུ་འབྱེད་པ་འཇུག་ཤེས་སུ་གྱུར་པའི་ཉོན་མོངས་ལ་བྱེད་པའི་ཕྱིར། དེར་ཐལ། བསྡུ་བ་ལས། ཕྱིར་མི་འོང་བས་ཡན་ལག་དུ་ཞིག་སྤངས་ཞེ་ན་འདོད་པ་ན་སྤྱོད་པ་ཐམས་ཅད་དང༌། ཞེས་པའི་ཐོག་མའི་མ་རིག་པ་ཡང་འཇུག་ཤེས་ཀྱི་དེ་ལ་བྱེད་པའི་ཕྱིར། ཁོ་ན་རེ། རིམ་གྱིས་པའི་ཕྱིར་མི་འོང་དེས་འདོད་ཉོན་སྤངས་པར་ཐལ། དཀའ་འགྲེལ་དུ་འདོད་པ་ལ་ཆགས་བྲལ་གྱི་སོ་སྐྱེའི་རྒྱུད་ལ་འདོད་ཉོན་མངོན་འགྱུར་འབྱུང་ཚུལ་གྱི་སྐྱོན་སྤོང་ལུགས་འཐད་པའི་ཕྱིར་ན་མ་ཁྱབ་ཀྱང་དཔྱད་གཞི་ཆེ་བར་སྣང་ངོ༌། །ཡང་ཁ་ཅིག །མ་འདྲེས་པའི་མ་རིག་པ་ལ་ཉོན་ཡིད་འཁོར་གྱིས་ཁྱབ་ཟེར་ན། རང་གྲོགས་ཚོར་བ་ཡིད་མི་བདེ་དང་མཚུངས་ལྡན་གྱི་མ་འདྲེས་པའི་མ་རིག་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། དེ་ལ་རང་གྲོགས་ཚོར་བ་ཡིད་མི་བདེ་དང་མཚུངས་ལྡན་གཅིག་དང་བཏང་སྙོམས་དང་མཚུངས་ལྡན་གཅིག་སྟེ་གཉིས་ཡོད་པའི་ཕྱིར། དེར་ཐལ། ཀུན་བཏུས་ལས། མ་རིག་པ་མ་འདྲེས་པ་གང་ཡིན་པ་དེ་འདོད་པའི་ཁམས་ན་ཡིད་མི་བདེ་བ་དང་བཏང་སྙོམས་དང་མཚུངས་པར་ལྡན་ནོ། །ཞེས་གསུངས་པའི་ཕྱིར། གོང་དུ་མ་ཁྱབ་ན་ཁྱབ་པ་ཡོད་པར་ཐལ། ཉོན་ཡིད་འཁོར་གྱི་མ་རིག་པ་ཡིན་ན། རང་གྲོགས་ཚོར་བ་བཏང་སྙོམས་དང་མཚུངས་ལྡན་དགོས་པའི་ཕྱིར། དེར་ཐལ། ཉོན་ཡིད་འཁོར་གྱི་ཚོར་བ་ཡིན་ན་བཏང་སྙོམས་ཡིན་དགོས་པའི་ཕྱིར་ཏེ། སུམ་ཅུ་པ་ལས། གང་དུ་སྐྱེ་བ་དེ་ཡིའོ་གཞན། །རེག་སོགས་ཀྱང་དེ། །ཞེས་གསུངས་པའི་ཕྱིར། ཁྱབ་སྟེ། ཀུན་

― GTD002_Page_0382 ―

^{[མ་དཔེ་གཟིགས་ན་འདིར་གནོན།]}

[Full Size]

གཞིའི་འཁོར་གྱི་ཀུན་འགྲོ་ལྔ་དང་འདིའི་ཀུན་འགྲོ་ལྔ་ལ་སྒྲིབ་མ་སྒྲིབ་ཙམ་ལས་གཞན་གྱི་ཁྱད་མ་ཕྱེ་བས་ཚོར་བ་ཡང་བཏང་སྙོམས་ཁོ་ན་དགོས་པར་གྲུབ་པའི་ཕྱིར། དཀའ་འགྲེལ་ལས། ཀུན་གཞིའི་འཁོར་གྱི་རེག་སོགས་ལྔ་པོ་ཉོན་ཡིད་ཀྱི་འཁོར་དུའང་བཤད་ཅིང་ཚོར་བ་ལ་བྱེ་བྲག་མ་བྱས་པའི། ཞེས་གསུངས་པའི་ཕྱིར། དེ་ལ་ཁོ་ན་རེ། མ་འདྲེས་པའི་མ་རིག་པ་ཡིན་ན་ཉོན་ཡིད་འཁོར་ཡིན་དགོས་པར་ཐལ། ཉོན་ཡིད་མེད་ན་མ་འདྲེས་པའི་མ་རིག་པ་མེད་པར་ཐལ་བའི་སྐྱོན་བརྗོད་ཚུལ་ཡོད་པའི་ཕྱིར་ན་མ་ཁྱབ་སྟེ། དེ་མ་འདྲེས་པའི་མ་རིག་པ་ཙམ་མ་ཡིན་པར་སོ་སྐྱེའི་གནས་སྐབས་སུ་རྟག་ཏུ་རྒྱུན་མ་ཆད་པར་མངོན་འགྱུར་དུ་འཇུག་པའི་མ་རིག་པ་ཞིག་མེད་པར་ཐལ་བ་འཕངས་པ་ཡིན་པའི་ཕྱིར། དེར་ཐལ། དེ་འདྲ་ཞིག་ཡོད་པ་ནི། ཡང་དག་དོན་ལ་འཇུག་པ་ཡི། །སེམས་ཀྱི་གེགས་སུ་རྟག་གྱུར་དང༌། །དུས་རྣམས་ཀུན་ཏུ་འབྱུང་བ་དེ། །མ་འདྲེས་པ་ཡི་མ་རིག་འདོད། །ཅེས་པའི་ལུང་གིས་འགྲུབ་ལ་འཇུག་ཤེས་འཁོར་ལ་དེ་འདྲ་མི་རུང་བའི་ཕྱིར། དོན་གསང་ལས། ཐེག་པ་ཆེན་པོ་ལྟར་ན་རྣམ་པ་གཉིས་ཏེ། ཞེས་པ་ནས། འཇུག་པའི་རྣམ་པར་ཤེས་པ་དང་མཚུངས་པར་ལྡན་པ་ནི་གཅིག་གོ །གཉིས་པ་ནི། དུས་ཐམས་ཅད་དུ་ཀུན་ཏུ་འབྱུང་བའི་ཕྱིར། འཆད་པར་འགྱུར་བའི་སྒྲུབ་པས་རབ་ཏུ་གྲུབ་པ་ཡིན་ནོ། །ཞེས་དང༌། བཤད་སྦྱར་ལས། དུས་རྣམས་ཀུན་ཏུ་འབྱུང་བ་དེ། །ཞེས་བྱ་བ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པའི་གནས་སྐབས་སུ་ཡང་རྗེས་སུ་འབྲེལ་བའི་ཕྱིར་རོ། །ཞེས་གསུངས་པའི་ཕྱིར། ཡང་དག་དོན་ལ་ཞེས་སོགས་ཀྱི་ལུང་འདི་དཀའ་འགྲེལ་ལས་རེད་མདའ་བའི་ཊཱིཀྐ་

― GTD002_Page_0383 ―

^{[མ་དཔེ་གཟིགས་ན་འདིར་གནོན།]}

[Full Size]

དང་སྒོ་བསྟུན་ཏེ། ཐེག་བསྡུས་ལས་ཞེས་གསུངས་ལ། དོན་གསང་ལས། དེ་ནི་དེ་ཆོས་མངོན་པའི་མདོ་ལས་གསུངས་པའི་ཚིགས་སུ་བཅད་པའི་སྟོན་པར་བྱེད་དོ། །ཞེས་མདོ་ལུང་ཡིན་པར་གསུངས་ཤིང་ཐེག་བསྡུས་སུ་བར་གྱི་ཚིགས་བཅད་དང་དཀྱུས་གཅིག་ཏུ་འབྱུང་བས་དཔྱད་པར་བྱའོ། །མ་འདྲེས་པའི་དོན་ལ་ཡང་བཞེད་ཚུལ་མི་འདྲ་བ་དུ་མ་ཡོད་དེ། བཤད་སྦྱར་ལས། ཉོན་མོངས་པ་གཞན་དང་མཚུངས་པར་མི་ལྡན་པའི་ཕྱིར་མ་འདྲེས་པ་ཉིད་དུ་འདོད་པ་མ་ཡིན་གྱི་འོ་ན་ཇི་ལྟར་ཞེ་ན། གཞན་ལ་མེད་པའི་ཕྱིར་ཏེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་བཞིན་ནོ། །ཞེས་འདིར་བསྟན་མ་འདྲེས་པའི་མ་རིག་པ་དེ་རྟེན་ཉོན་ཡིད་ཁོ་ན་དང་མཚུངས་ལྡན་དུ་ཡོད་པས་རྟེན་མ་འདྲེས་པ་ཡིན་པར་བཤད། དོན་གསང་ལས། ཐུན་མོང་མ་ཡིན་པའི་དོན་གྱིས་ནི་མ་ཡིན་ཏེ། རྣམ་པར་ཤེས་པ་གཞན་དང་མཚུངས་པར་ལྡན་པ་ཡང་དེ་ཐལ་བར་འགྱུར་དུ་འོང་བས་སོ། །ཞེས་དང༌། མ་རིག་པ་རང་དབང་ཅན་ཡོད་དེ་དེའི་སྟོབས་ཀྱིས་དེ་དང་མཚུངས་པར་ལྡན་པའི་འདོད་ཆགས་ལ་སོགས་པ་དྲངས་པའི་ཕྱིར་ཞེས་སེམས་གཞན་གྱི་འཁོར་དུ་མི་འགྲོ་བ་ཙམ་ཡིན་ན་མི་དགེ་བའི་སེམས་དང་མཚུངས་ལྡན་གྱི་མ་རིག་པ་དེ་ཡང་སེམས་གཞན་གྱི་འཁོར་དུ་མི་འགྲོ་བས་མ་རིག་པ་ཐམས་ཅད་མ་འདྲེས་པའི་དེར་ཐལ་བ་འཕངས་ནས་རང་ལུགས་རྫས་མ་འདྲེས་པའམ་རང་སྟོབས་ཀྱིས་ཉོན་མོངས་གཞན་རྣམས་འདྲེན་པའི་མཐུ་མ་འདྲེས་པ་ལ་བཤད་དེ་རྫས་ཀྱང་ནུས་པའི་རྣམ་གྲངས་ཡིན་པས་དོན་གཅིག་གོ །རྒྱ་གར་མཁས་པའི་བཞེད་པ་འདི་དག་དགོངས་པ་ཟབ་

― GTD002_Page_0384 ―

^{[མ་དཔེ་གཟིགས་ན་འདིར་གནོན།]}

[Full Size]

པས་ཁ་ཚོན་གཅོད་དཀའ་ཡང་དཀའ་འགྲེལ་ལས། ཉོན་ཡིད་ཀྱི་འཁོར་རྣམས་ཕན་ཚུན་རྒྱུ་འབྲས་ཡིན་པས་འདི་ཁོ་ནས་དྲངས་ཞེས་བཞག་ཏུ་མེད་པའི་ཕྱིར་རོ། །ཞེས་ལུགས་ཕྱི་མ་བཀག་ནས་སྔ་མ་འཐད་ཕྱོགས་སུ་མཛད་དོ། །འདི་ལ་ཁ་ཅིག །མ་འདྲེས་པའི་མ་རིག་པ་དེ་དོན་གསང་མཁན་པོས་ནུས་པ་མ་འདྲེས་པར་བཤད་ཀྱང་རང་ལུགས་རྟེན་མ་འདྲེས་པ་ཡིན་ཟེར་ན། འོ་ན། རང་ལུགས་ལ་མ་འདྲེས་པའི་མ་རིག་པ་དེ་རྟེན་ཉོན་ཡིད་ཁོ་ན་དང་མཚུངས་ལྡན་ཡིན་པར་ཐལ། དེ་རྟེན་མ་འདྲེས་པར་འཇོག་ཚུལ་འཐད་པའི་ཕྱིར། འདོད་མི་ནུས་ཏེ། དེ་ལ་ཉོན་ཡིད་དང་མཚུངས་ལྡན་ཡིན་མིན་གཉིས་ཡོད་པའི་ཕྱིར། ཀུན་བཏུས་ལས། མ་འདྲེས་པ་ནི་བདེན་པ་རྣམས་མི་ཤེས་པའོ། །ཞེས་དང༌། དོན་གསང་ལས། མ་འདྲེས་པ་ནི་མི་བརྟན་པ་དང་བརྟན་པ་སྟེ། མི་བརྟན་པ་ནི་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་ཞེས་པ་ནས། མཐོང་བས་སྤང་བར་བྱ་བ་ཁོ་ན་ཡིན་ནོ། །ཞེས་གསུངས་པའི་ཕྱིར། དེས་ན་གོང་དུ་བཤད་པ་ཉོན་ཡིད་འཁོར་གཞིར་བཞག་ཡིན་ནོ། །དེ་ལ་ཁོ་ན་རེ། འཇུག་ཤེས་དང་མཚུངས་ལྡན་གྱི་མ་འདྲེས་པའི་མ་རིག་པ་དེ་མཐོང་སྤང་དུ་བཤད་པ་མི་འཐད་པར་ཐལ། དེ་ལ་སྒོམ་སྤང་གིས་ཁྱབ་པའི་ཕྱིར། དེར་ཐལ། དེ་ལ་འཇིག་ལྟ་ལྷན་སྐྱེས་དང་མཚུངས་ལྡན་གཅིག་དགོས་པའི་ཕྱིར། དེར་ཐལ། རེད་མདའ་བའི་ཊཱིཀྐ་ལས། གཅིག་ནི་ཡིད་ཀྱི་རྣམ་པར་ཤེས་པའི་འཁོར་དུ་འབྱུང་བའི་འཇིག་ཚོགས་ལ་ལྟ་བ་ལྷན་ཅིག་སྐྱེས་པ་དང་མཚུངས་ལྡན་དུ་འབྱུང་བའི་མ་རིག་པའོ། །ཞེས་གསུངས་པའི་ཕྱིར་ཟེར་ན། འདིའི་ཡི་གེ་ནོར་པའམ་གང་ལྟར་ཡང་འཇིག་ལྟ་དང་མཚུངས་ལྡན་དུ་

― GTD002_Page_0385 ―

^{[མ་དཔེ་གཟིགས་ན་འདིར་གནོན།]}

[Full Size]

ཁས་བླང་མི་རུང་སྟེ། ཊཱིཀྐ་རང་ཉིད་ལས། གང་གིས་བདེན་པའི་གནས་ལུགས་ལ་རྨོངས་པར་བྱེད་ཅིང་མི་ཤེས་པ་གང་ཡིན་པ་སྟེ། དེ་ཡང་ཡིད་ཀྱི་ཤེས་པའི་འཁོར་དུ་བྱུང་བ་ནི་ཉོན་མོངས་གཞན་དང་མཚུངས་ལྡན་མ་འདྲེས་པ་ཡིན་ལ། ཞེས་གསུངས་པ་གང་ཞིག །མཚུངས་ལྡན་མ་འདྲེས་པའི་དོན་རྩ་ཉོན་གཞན་དང་མཚུངས་ལྡན་དུ་མ་སོང་བ་ལ་བཤད་པའི་ཕྱིར། ཀུན་བཏུས་དར་ཊཱིཀ་ལས་ཀྱང༌། ཡིད་ཤེས་འཁོར་དུ་འབྱུང་བ་ནི་ཉོན་མོངས་གཞན་དང་མཚུངས་ལྡན་མ་འདྲེས་པ་ཡིན་ལ། ཉོན་ཡིད་ཀྱི་འཁོར་དུ་བྱུང་བ་ནི་རྟེན་ནམ་རྫས་མ་འདྲེས་པ་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། འདི་མཚུངས་ལྡན་མ་འདྲེས་པ་མིན་ན་མ་འདྲེས་པའི་དོན་གཞན་རྣམས་མ་ཚང་བས་དེར་འཇོག་ཚུལ་མེད་པའི་ཕྱིར། གཞན་ཡང་འཇུག་ཤེས་སུ་གྱུར་པའི་མ་འདྲེས་པའི་མ་རིག་པ་དེ་འཇིག་ལྟ་དང་མཚུངས་ལྡན་དུ་འགྲོ་བ་མི་འཐད་པར་ཐལ། འདོད་པའི་སས་བསྡུས་ཀྱི་དེ་འདྲའི་མ་རིག་པ་དེ་རང་གྲོགས་འཇིག་ལྟ་དང་མཚུངས་ལྡན་མ་ཡིན་པའི་ཕྱིར། དེར་ཐལ། དེ་འདྲའི་མ་རིག་པ་དེ་ལ་ཡིད་མི་བདེ་དང་མཚུངས་ལྡན་གཙོ་ཆེ་བ་གང་ཞིག །འཇིག་ལྟ་ལ་ཡིད་མི་བདེ་དང་མཚུངས་ལྡན་མ་ཡིན་པས་ཁྱབ་པའི་ཕྱིར། དང་པོ་གྲུབ་སྟེ། ཀུན་བཏུས་སྔར་དྲངས་ཟིན་ཅིང་དེའི་དར་ཊཱིཀ་ལས། མ་འདྲེས་པའི་མ་རིག་པ་ཉོན་ཡིད་ཀྱི་འཁོར་ལས་གཞན་པ་དེ་ནི་འདོད་པ་ན་ཡིད་མི་བདེ་བ་དང་བཏང་སྙོམས་དང་ལྡན་ལ། ཞེས་པ་ནས། ཡིད་མི་བདེ་བ་དང་ལྡན་པའི་རྒྱུ་མཚན་ཡིད་གཏན་ལ་མ་ཕེབས་པ་ལ་མོས་པ་མེད་པས་ཡིད་བདེ་མེད་པའི་ཕྱིར་རོ། །ཞེས་

― GTD002_Page_0386 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། རྗེ་བཙུན་རེད་མདའ་བས་ཀྱང༌། ཉོན་ཡིད་འཁོར་ལས་གཞན་པ་དེ་ནི་འདོད་པའི་ཁམས་ན་བདེན་པ་ལ་རྨོངས་ནས་ཡང་དག་པའི་ཆོས་ལ་མི་དགའ་བས་ཡིད་མི་བདེ་བ་དང་འགག་ཁར་བཏང་སྙོམས་དང་མཚུངས་པར་ལྡན་ནོ། །ཞེས་གསུངས་པའི་ཕྱིར། ཤིན་ཏུ་གསལ་ལོ། །གཉིས་པ་གྲུབ་སྟེ། ཀུན་བཏུས་ལས། ང་རྒྱལ་ནི་འདོད་པའི་ཁམས་ན་ཡིད་བདེ་བ་དང་བཏང་སྙོམས་དང་མཚུངས་པར་ལྡན་ནོ། །ང་རྒྱལ་ཇི་ལྟ་བ་བཞིན་དུ་འཇིག་ཚོགས་ལ་ལྟ་བ་དང་ཞེས་གསུངས་པས་མ་རིག་པ་དེ་འཇིག་ལྟ་དང་མཚུངས་ལྡན་དུ་མི་འབྱུང་ལ་བདེན་པ་མཐོང་བ་ལ་གེགས་བྱེད་དུ་གསུང་ཚུལ་གྱིས་མཐོང་སྤང་དུ་འགྲུབ་པས་ལྷན་སྐྱེས་དང་མཚུངས་པར་ལྡན་པ་ལྷག་ཏུའང་མི་རུང་ངོ༌། །ཁོ་ན་རེ། འཇུག་ཤེས་སུ་གྱུར་པའི་མ་འདྲེས་པའི་མ་རིག་པ་དེ་མཛོད་ཇི་ལྟ་བ་བཞིན་འཇོག་པར་ཐལ། དེ་ཆགས་སོགས་ལྟ་མིན་བཞི་ལྟ་བ་ལྔ་ཁྲོ་སོགས་བཅུ་གང་དང་མཚུངས་པར་མི་ལྡན་པའི་མཐོང་སྤང་གི་མ་རིག་པ་ཞིག་ལ་འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། མཛོད་ལུགས་དང་འདི་གཉིས་གྲོགས་སེམས་བྱུང་མང་ཉུང་མི་འདྲ་བའི་ཕྱིར། དེར་ཐལ། མཛོད་ལས། མི་དགེ་ལ་ནི་མ་འདྲེས་དང༌། །ལྟ་དང་ལྡན་ལ་ཉི་ཤུ་འབྱུང། །ཞེས་འདོད་པའི་མ་འདྲེས་པའི་མ་རིག་པ་དང་མཚུངས་ལྡན་གྱི་སེམས་དེའི་འཁོར་དུ་སེམས་ཀྱི་ས་མང་བཅུ། ཉོན་མོངས་ཆེན་པོའི་ས་པ་དྲུག །མི་དགེ་བའི་ས་མང་གཉིས། རྟོག་དཔྱོད་གཉིས་ཏེ་ཉི་ཤུ་འབྱུང་བར་འདོད་ཀྱང༌། ལུགས་འདིར་དང་པོ་བཅུའི་ནང་ནས་ཡུལ་ངེས་ལྔ་བསལ་ཏེ་དགེ་སེམས་ཁོ་ནའི་འཁོར་དུ་བཞག་པས་མ་རིག་པ་དང་མཚུངས་ལྡན་མི་རུང་བའི་

― GTD002_Page_0387 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། རིགས་པ་དང་པོ་འདི་ལ་སྤྱི་དོན་རོལ་མཚོར། ཉོན་ཡིད་འབའ་ཞིག་གི་འཁོར་གྱི་མ་རིག་པ་མེད་པར་ཐལ། ཉོན་ཡིད་མེད་པའི་ཕྱིར། ཞེས་འཕངས་པ་ནི་ཁྱབ་པ་ཡོད་ཙམ་ལས་བསྒྲུབ་བྱ་སྒྲུབ་ནུས་མིན་ཞིང༌། ལྔ་པོ་དག་དང་འདྲ་བ་དང༌། །ཞེས་པའི་དོན་ལ་ཡིད་ཀྱི་རྣམ་ཤེས་ལ་སྒོ་ལྔའི་དབང་ཤེས་དང་འདྲ་བར་བདག་རྐྱེན་ཡིད་དབང་ལ་བརྟེན་པ་ཡོད་པ་གང་ཞིག །དེ་ཡོད་ན་ཉོན་ཡིད་ཡོད་དགོས་པའི་ཕྱིར། ཞེས་པ་ཡང་སྐབས་དོན་ལ་མ་ཞུགས་ཏེ། རྣམ་ཤེས་དྲུག་ཀ་འཇུག་ཤེས་སུ་འདྲ་བ་ལ་རྟེན་དབང་པོའི་ཁམས་དྲུག་ཁྱད་མེད་དུ་དགོས་པར་བྱེ་སྨྲས་ཀྱང་འདོད་པའི་ཕྱིར། དེར་ཐལ། མཛོད་ལས། དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །དྲུག་པའི་རྟེན་ནི་རབ་སྒྲུབ་ཕྱིར། །ཞེས་དྲུག་པ་ཡིད་ཀྱི་རྣམ་ཤེས་ཀྱི་རྟེན་ནམ་བདག་རྐྱེན་སྒྲུབ་པའི་ཕྱིར་ཚོགས་དྲུག་སྔ་མ་འགག་མ་ཐག་པའི་ཡིད་དེ་ལ་ཡིད་ཀྱི་དབང་པོའམ་ཡིད་ཀྱི་ཁམས་ཞེས་ལོགས་སུ་བཞག་པའི་ཕྱིར། དེར་ཐལ། དེ་ལྟར་ན་ཡིད་ཀྱི་ཁམས་དང་རྣམ་ཤེས་ཀྱི་ཁམས་དྲུག་ཕན་ཚུན་དུ་འདུ་ཡང་ཁམས་བཅོ་བརྒྱད་དུ་མི་འགྱུར་བའི་སྐྱོན་མེད་ཚུལ་དཔེ་དང་བཅས་ཏེ་གསུངས་པའི་ཕྱིར། མཛོད་རང་འགྲེལ་ལས། རྣམ་པར་ཤེས་པ་གང་དང་གང་འགག་མ་ཐག་པ་དེ་ཉིད་ནི་ཡིད་ཀྱི་ཁམས་ཞེས་བྱ་སྟེ། དཔེར་ན་བུ་དེ་ཉིད་གཞན་གྱི་ཕར་འགྱུར་བ་དང༌།ཞེས་པ་ནས། རྫས་སུ་ན་ཁམས་བཅུ་བདུན་ནམ་བཅུ་གཉིས་སུ་འགྱུར་ན། ཞེས་སོགས་གསུངས་པའི་ཕྱིར་རོ། །དེས་ན་ལྔ་པོ་དག་དང་མི་འདྲ་བའི་སྐྱོན་བརྗོད་ཚུལ་དབང་ཤེས་ལྔ་ལ་བདག་

― GTD002_Page_0388 ―

^{[མ་དཔེ་གཟིགས་ན་འདིར་གནོན།]}

[Full Size]

རྐྱེན་དབང་པོ་སྔོན་དུ་འགྲོ་དགོས་པ་ལྟར་ཡིད་ཤེས་ལ་ཡང་བདག་རྐྱེན་དགོས་ཞེས་བཤད་པ་མ་ཡིན་པར་ཐལ། མིག་ཤེས་སོགས་ལ་རང་དང་དུས་མཉམ་པའི་རྟེན་དབང་པོ་ཡོད་པ་ལྟར་ཡིད་ཤེས་ལ་ཡང་རང་དང་མཉམ་དུ་ཡོད་པའི་རྟེན་ཐུན་མོང་མ་ཡིན་པ་ཞིག་དགོས་ཞེས་བཤད་པ་ཡིན་པའི་ཕྱིར། ཐེག་བསྡུས་ལས། རྣམ་པར་ཤེས་པ་ལྔའི་ཚོགས་དག་གི་ལྷན་ཅིག་འབྱུང་བའི་གནས་ནི་མིག་ལ་སོགས་པའོ། །ཞེས་གསུངས་ལ། དབྱིག་འགྲེལ་ལས། ཡིད་ཀྱི་རྣམ་པར་ཤེས་པའང་དེ་དང་མཚུངས་པར་གྱུར་བའི་རྟེན་ཡོད་པ་ཡིན་ནོ། །ཞེས་གསུངས་པའི་ཕྱིར་དང༌། ལྷན་ཅིག་འབྱུང་བ་ཞེས་པའི་དོན་ཡོད་པའི་ཕྱིར། དཀའ་འགྲེལ་ལས་ཀྱང་དབང་ཤེས་ལྔ་ལ་འདས་པའི་རྟེན་འདས་མ་ཐག་པ་དེ་དང་ལྷན་ཅིག་པའི་རྟེན་དབང་པོ་ལྔ་སྟེ་གཉིས་ཡོད་ལ་ཡིད་ཤེས་ལ་མེད་པ་མི་འཐད་དེ། ཞེས་སོ། །དེ་ལ་ཁོ་ན་རེ། སྐྱོན་དེ་མི་འཇུག་པར་ཐལ། དྲུག་པ་ཡིད་ཤེས་ཀྱི་དུས་སུ་ཀུན་གཞི་ཡོད་པའི་ཕྱིར་ཟེར་ན། མི་འཐད་པར་ཐལ། ཀུན་གཞི་དབང་དོན་ཐམས་ཅད་ཀྱི་ཐུན་མོང་གི་རྒྱུ་རྐྱེན་ཡིན་པས། རྣམ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་དུ་མི་རུང་བའི་ཕྱིར། དོན་གསང་ལས། རྩ་བའི་རྣམ་པར་ཤེས་པ་དང་འཁོར་བ་ཇི་སྲིད་པའི་ཕུང་པོ་ཞེས་བྱ་བ་རྣམ་པར་ཤེས་པ་དྲུག་ཆར་གྱིས་ཐ་མི་དད་པའི་རྒྱུ་ཡིན་པ་དེ་དག་ལ་ཡང་བརྗོད་པར་བྱ་སྟེ། ཡིད་ཀྱི་རྣམ་ཤེས་ནི་རྟེན་ཐུན་མོང་བ་ཅན་ཁོ་ན་མིན་ཏེ། འཇུག་པའི་རྣམ་པར་ཤེས་པ་ཡིན་པའི་ཕྱིར། དེ་དག་བཞིན་ནོ། །ཞེས་གསུངས་པའི་ཕྱིར། འདིས་ནི་ཕལ་ཆེན་པ་དང་ས་སྟོན་པའི་ལུགས་ཀྱང་ཁེགས་སོ། །ཡང་ཁ་ཅིག །སྐབས་འདིར་འགོག་ཡུལ་ལ་ཡིད་ཀྱི་རྣམ་

― GTD002_Page_0389 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་དང་དུས་མཉམ་པའི་དེའི་རྟེན་དབང་པོ་མི་འདོད་པས་ཁྱབ་པར་ཐལ། རྩོད་ཚུལ་འཐད་པའི་ཕྱིར་ཟེར་ན་མ་ཁྱབ། གཙོ་བོ་དེ་ལྟར་ཡིན་ཀྱང་དུས་མཉམ་པའི་རྟེན་འདོད་མཁན་ཡང་ཡོད་པའི་ཕྱིར། རྟགས་ཟུར་དང་པོ་གྲུབ་སྟེ། མཛོད་ལས། ཐ་མའི་རྟེན་འདས་ལྔ་རྣམས་ཀྱི། །དེ་དག་ལྷན་ཅིག་སྐྱེ་བའང་ཡིན། །ཞེས་གསུངས་པའི་ཕྱིར། གཉིས་པ་གྲུབ་སྟེ། དོན་གསང་ལས། གནས་བརྟན་པ་རྣམས་ཀྱི་ལྟར་རྣམ་པར་ཤེས་པ་ཚོགས་ལྔའི་ཐམས་ཅད་བྱེ་བྲག་ཏུ་སྨྲ་བས་བཤད་པ་བཞིན་ནོ། །ཡིད་ཀྱི་རྣམ་པར་ཤེས་པའི་ལྷན་ཅིག་སྐྱེས་པའི་རྟེན་ནི་སྙིང་གི་ཕྱོགས་བུ་ག་གཅིག་དང་གཉིས་དང་གསུམ་དང་བཞི་ནས་བུ་ག་དགུའི་བར་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། དེས་རྟེན་དུས་མཉམ་པ་བཞག་ཀྱང་དེ་རྟེན་དུ་མེད་རུང་བས་སྔ་མའི་སྐྱོན་སྤོང་མི་ནུས་བའི་ཕྱིར། དེར་ཐལ། ཡིད་ཤེས་ཀྱི་རྟེན་དབང་བོ་གཟུགས་ཅན་པ་ཡོད་ན་དེ་དབང་ཤེས་སུ་ཐལ་བ་དང༌། དབང་ཤེས་བཞིན་དུ་ཡུལ་འདས་པ་འཛིན་མི་ནུས་པར་ཐལ་བ་དང༌། གཟུགས་མེད་ཁམས་ན་ཡིད་ཤེས་ཀྱང་མེད་པར་ཐལ་བ་སོགས་འབྱུང་བའི་ཕྱིར། སྤྲོས་པས་ཆོག་གོ །ཡང་ཁ་ཅིག །ཡིད་ཤེས་ལ་ལྷན་ཅིག་བྱེད་པའི་རྟེན་བཤད་པ་མི་འཐད་པར་ཐལ། དེ་ཕ་རོལ་པོ་ཁ་ཅིག་གིས་རྣམ་ཤེས་ལ་ལྷན་ཅིག་པའི་རྟེན་ངེས་ཅན་དུ་དགོསཔར་བཤད་པའི་ཁས་བླང་ལ་འཁྲིས་ནས་དགག་པ་བྱས་པ་ཡིན་གྱི་རང་ལུགས་ལ་དེ་དང་ལྷན་ཅིག་པའི་རྟེན་སྒྲུབ་པའི་དབང་དུ་བྱས་པ་མ་ཡིན་པའི་ཕྱིར་ཏེ། བཤད་སྦྱར་ལས། ལྔ་པོ་དག་དང་འདྲ་བ་ཞེས་བྱ་བ་ནི་སྒྲུབ་པ་མ་ཡིན་ནོ། །འོ་

― GTD002_Page_0390 ―

^{[མ་དཔེ་གཟིགས་ན་འདིར་གནོན།]}

[Full Size]

ན་ཅི་ཞེ་ན། སུན་འབྱིན་པ་སྟེ། ཞེས་པ་ནས། གཞན་གྱི་གཞུང་ལ་ནི་གང་ལྷན་ཅིག་སྐྱེ་བའི་གནས་མེད་པའི་རྣམ་པར་ཤེས་པ་ཅི་ཡང་མེད་དོ་ཞེའོ། །ཞེས་གསུངས་པའི་ཕྱིར་ན་མ་ཁྱབ་སྟེ། རྣམ་ཤེས་དེ་དང་དུས་མཉམ་པའི་དབང་པོ་དེ་དེའི་བདག་རྐྱེན་དུ་བྱེ་སྨྲས་འདོད་ཀྱང་སྐབས་འདིར་དེ་ལ་བརྟེན་པའི་ཆ་ནས་རྐྱེན་དུ་བཏགས་པ་ཙམ་ལས་རྐྱེན་དངོས་སུ་མི་འདོད་པའི་དོན་ཡིན་པའི་ཕྱིར་དང༌། ཕྱིར་རྒོལ་རང་ལ་གྲགས་པའི་ལུང་གིས་བསྒྲུབ་པ་ལ་སྔ་རྒོལ་རང་གིས་ཁས་མི་ལེན་མི་དགོས་པའི་ཕྱིར་རོ། །ཡང་ཁོ་ན་རེ། མཛོད་ལས། དྲུག་པོ་འདས་མ་ཐག་པ་ཡི། །ཞེས་སོགས་ཀྱི་སྐབས་ལྟར་འདིར་ཡང་ཁས་ལེན་པར་ཐལ། ཀུན་བཏུས་ལས། ཡིད་གང་ཞེ་ན། ཞེས་པ་ནས། རྣམ་པར་ཤེས་པ་དྲུག་པོ་དག་འགག་མ་ཐག་པའི་རྣམ་པར་ཤེས་པའོ། །ཞེས་གསུངས་པའི་ཕྱིར་ན་མ་ཁྱབ། མཛོད་ཀྱི་དེ་དྲུག་ཀའི་ཐུན་མོང་མ་ཡིན་པའི་བདག་རྐྱེན་གྱི་གཙོ་བོ་དང་ཡིད་ཁམས་ཀྱི་གཙོ་བོའི་དབང་དུ་བྱས་པ་ཡིན་ལ་སྐབས་འདིར་དེ་བདག་རྐྱེན་གྱི་གཙོ་བོར་མི་རུང་བ་གང་ཞིག །ཡིད་ཀྱི་ཁམས་ཀྱི་གཙོ་བོར་ཡང་མི་རུང་བའི་ཕྱིར། རྟགས་དང་པོ་གྲུབ་སྟེ། སྐབས་འདིར་བཤད་པ་དེ་མ་ཐག་རྐྱེན་གྱི་དབང་དུ་བྱས་པ་ཡིན་པའི་ཕྱིར། དེར་ཐལ། ཐེག་བསྡུས་ལས། ཡིད་ནི་རྣམ་པ་གཉིས་ཏེ། དེ་མ་ཐག་པའི་རྐྱེན་བྱེད་པའི་གནས་སུ་གྱུར་པའི་ཕྱིར་རྣམ་པར་ཤེས་པ་འགག་མ་ཐག་པ་ཡིད་ཅེས་བྱ་བ་རྣམ་པར་ཤེས་པ་སྐྱེ་བའི་གནས་དང་གཉིས་པ་ཉོན་མོངས་པ་ཅན་གྱི་ཡིད། ཅེས་གསུངས་པའི་ཕྱིར། གཉིས་པ་གྲུབ་སྟེ། ཀུན་བཏུས་དར་ཊཱིཀ་ལས། བསྟན་པའི་དབང་དུ་བྱས་ནས་ཁམས་བསྟན་པར་སེམས་

― GTD002_Page_0391 ―

^{[མ་དཔེ་གཟིགས་ན་འདིར་གནོན།]}

[Full Size]

དང་སྐྱེ་མཆེད་བསྟན་པར་ཡིད་དང། ཞེས་སོགས་གསུངས་པའི་ཕྱིར། ཁྱབ་སྟེ། ཁམས་ཀྱི་སྒྲ་དོན། སྤོང་དང་སྐྱེ་སྒོ་རིགས་ཀྱི་དོན། །ཞེས་པ་ལྟར་འབྲས་བུ་ཕྱི་མ་འགྲུབ་པའི་ནུས་པའི་ཆ་ནས་གཙོ་བོར་འཇོག་དགོས་པ་གྲུབ་མཐའ་བཞི་ག་མཐུན་ལ་སྐབས་འདིར་བག་ཆགས་བསགས་པས་སེམས་སུ་འཇོག་ཚུལ་སྔར་བཤད་ཟིན་པའི་ཕྱིར། ཡང་ཁོ་ན་རེ། དྲུག་པོ་འདས་མ་ཐག་པའི་ཡིད་དེ་བདག་རྐྱེན་དང་ཉོན་ཡིད་དེ་མ་ཐག་རྐྱེན་དུ་བཞག་ནའང་ཆོག་པར་ཐལ། དྲུག་པ་ཡིད་ཀྱི་རྣམ་ཤེས་སྐྱེ་བ་ལ་དེ་གཉིས་ཀ་དགོས་པའི་ཕྱིར། དར་ཊཱིཀ་ལས། འགག་ཁ་མ་དེ་ཉིད་དུས་གཞན་གྱི་བར་དུ་མ་ཆོད་པའི་རྣམ་ཤེས་ཕྱི་མ་དེ་ཉིད་སྐྱེ་བའི་གོ་ཕྱེ་བའི་སྒོ་ནས་བདག་རྐྱེན་བྱེད་པའི་ཕྱིར་ཡིད་ཅེས་བྱའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེས་བདག་རྐྱེན་ཕལ་བ་ཙམ་བྱེད་ཀྱང་གཙོ་བོར་དེ་མ་ཐག་རྐྱེན་དུ་འཇོག་དགོས་པའི་ཕྱིར་ཏེ། །དེ་ཉིད་ལས། དེ་མ་ཐག་རྐྱེན་ཡིན་ཡང་ཕྱི་མ་སྐྱེ་བའི་གོ་འབྱེད་པའི་བྱེད་ལས་དང་ལྡན་པས་བདག་རྐྱེན་དུ་བཞག་ལ། ཞེས་གསུངས་པའི་ཕྱིར། དེས་ན་གཉིས་པ་ཡང་མི་འཐད་པར་ཐལ། དེ་མ་ཐག་རྐྱེན་ལ་རང་ཉིད་མངོན་གྱུར་དུ་ཡོད་པ་དེ་འགག་པའི་སྒོ་ནས་རྣམ་ཤེས་ཕྱི་མ་དེ་ལ་སྐྱེ་བའི་གོ་སྐབས་སྦྱིན་པ་ཞིག་དགོས་པ་གང་ཞིག །ཉོན་ཡིད་རྟག་ཏུ་མངོན་གྱུར་དུ་འཇུག་པས་དེ་འདྲའི་རྣམ་དབྱེ་མི་འཐད་པའི་ཕྱིར། རྗེ་བཙུན་རེད་མདའ་བས། འདི་ལ་ཀུན་གཞི་དང་ཉོན་ཡིད་ནི་འཇུག་པའི་རྣམ་པར་ཤེས་པ་དག་གི་དེ་མ་ཐག་པའི་གནས་མ་ཡིན་ཏེ། དེ་གཉིས་ནི་དུས་ཐམས་ཅད་དུ་འབྱུང་བས་དེ་དག་འགག་སྟོབས་

― GTD002_Page_0392 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ཤེས་པ་གཞན་སྐྱེ་བའི་གོ་འབྱེད་པ་མ་ཡིན་པའི་ཕྱིར། ཞེས་གསུངས་ཤིང་འདིར་སྙོམས་འཇུག་ལས་ལངས་མ་ཐག་པ་སོགས་ལ་ཞིབ་ཆ་དགོས། ཁ་ཅིག་ན་རེ། ཉོན་ཡིད་ཀྱི་སྒོ་ནས་སྙོམས་འཇུག་གཉིས་ཀྱི་བྱེ་བྲག་གམ་ཁྱད་པར་འབྱེད་ཚུལ་ཉོན་ཡིད་དང་མཚུངས་ལྡན་དུ་འཇུག་མི་འཇུག་གི་སྒོ་ནས་འཇོག་ཟེར་ན། འོ་ན་འདུ་ཤེས་མེད་པའི་སྙོམས་འཇུག་དེ་ཉོན་ཡིད་དང་མཚུངས་ལྡན་ཡིན་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེ། དེ་མཚུངས་ལྡན་མ་ཡིན་པའི་འདུ་བྱེད་ཡིན་པའི་ཕྱིར། ཀུན་བཏུས་ལས། སེམས་དང་སེམས་ལས་བྱུང་བའི་ཆོས་བརྟན་པ་མ་ཡིན་པ་རྣམས་འགོག་པ་ལ་འདུ་ཤེས་མེད་པའི་སྙོམས་པར་འཇུག་པ་ཞེས་གདགས་སོ། །ཞེས་དང། བསྡུ་བ་ལས། དེ་ཡང་བཏགས་པའི་ཡོད་པ་ཡིན་གྱི་རྫས་སུ་ནི་མིན་པར་རིགས་པར་བྱའོ། །ཞེས་གསུངས་པའི་ཕྱིར་དང། སྙོམས་འཇུག་དེ་ཉིད་ཤེས་པར་འདོད་ན་འགོག་སྙོམས་ལ་ཡང་འདྲ་བས་དེའི་ཚེ་ཤི་ལུས་སུ་ཐལ་བའི་སྐྱོན་སྤོང་བའི་ཚེ་ཀུན་གཞི་ཡོད་པས་སྐྱོན་མེད་ཅེས་བཤད་མི་དགོས་པར་སྙོམས་འཇུག་རང་ཉིད་ཡིད་ཤེས་ཡིན་པའི་ཕྱིར་ཞེས་ལན་བཏབ་ཆོག་པའི་ཕྱིར། གསེར་འཕྲེང་ལས། འགོག་སྙོམས་ཡིད་ཤེས་ཡིན་པས་སེམས་ཡོད་ཡིན་ཞེས་ལན་བཏབ་ཆོག་པའི་ཕྱིར། ཞེས་གསུངས་པའི་ཕྱིར། གལ་ཏེ་ཤེས་པར་འདོད་ན་ཡང་ཏིང་ངེ་འཛིན་དང་མཚུངས་ལྡན་ཅི་རིགས་ཡིན་པས་ཉོན་ཡིད་དང་མཚུངས་ལྡན་མི་རུང་བའི་ཕྱིར། གཞན་ཡང་སྙོམས་འཇུག་གཉིས་ཀྱི་བྱེ་བྲག་འབྱེད་ཚུལ་དེ་ལྟར་མ་ཡིན་པར་ཐལ། འགོག་སྙོམས་ཀྱི་ཚེ་ཉོན་ཡིད་མེད་ལ། འདུ་ཤེས་མེད་

― GTD002_Page_0393 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྙོམས་འཇུག་གི་ཚེ་ཉོན་ཡིད་ཡོད་པས་དེ་དང་མཚུངས་ལྡན་གྱི་ལྟ་བ་དང་འདོད་ཆགས་སོགས་ཀྱི་སྒོ་ནས་བདག་ཏུ་སྲེད་པའི་ཤུགས་མི་ཉམས་པའི་སྐྱོན་དང་བཅས་པའི་ཕྱིར། ཐེག་བསྡུས་འགྲེལ་པ་ལས། འདི་ལྟར་དེའི་དུས་སྐབས་ན་ཉོན་མོངས་ཅན་གྱི་ཡིད་མེད་ན་ངར་འཛིན་པ་མེད་པར་འགྱུར་རོ། །དེ་ལྟར་ན་ནི་འཕགས་པས་ཀྱང་སྨད་པར་མི་འགྱུར་ན་དེ་ནི་སྨད་པ་ཉིད་ཡིན་པས། ཞེས་གསུངས་པའི་ཕྱིར། ཡང་ཁོ་ན་རེ། སྙོམས་འཇུག་དེ་གཉིས་ལ་རང་གི་ངོ་བོ་ཞི་མ་ཞིའི་ཁྱད་པར་མེད་པར་ཐལ། དེ་གཉིས་ཀ་དང་མཚུངས་ལྡན་གྱི་ཉོན་མོངས་མེད་པ་འདྲ་བའི་ཕྱིར་ན་མ་ཁྱབ་སྟེ། དེ་དང་མཚུངས་ལྡན་གྱི་ཉོན་མོངས་མེད་ཀྱང་དེའི་ཚེ་ཉོན་མོངས་མངོན་གྱུར་དུ་ཡོད་པས་སྲེད་པའི་བརླན་དང་བཅས་པ་ཡིན་པའི་ཕྱིར་ཏེ། ཐེག་བསྡུས་ལས། འདུ་ཤེས་མེད་པའི་སྙོམས་པར་འཇུག་པ་ནི་ཉོན་མོངས་པ་ཅན་གྱི་ཡིད་ཀྱིས་རབ་ཏུ་ཕྱེ་བ་ཡིན་གྱི། ཞེས་གསུངས་པའི་ཕྱིར། དཔེར་ན་སྐྱེ་སྲིད་དེ་རྣམ་སྨིན་ཡིན་པས་ཉོན་མོངས་དང་མཚུངས་ལྡན་མི་རུང་ཡང་སྐྱེ་བའི་སྲིད་པ་ཉོན་མོངས་ཅན། ཞེས་བཤད་པ་ལྟ་བུ་ཡིན་པའི་ཕྱིར། ངེས་ཚིག་མེད་པའི་སྐྱོན་བརྗོད་ཚུལ་ལ་རོལ་མཚོ་སོགས་སུ་ཉོན་ཡིད་ཀྱི་ངེས་ཚིག་ལ་ངར་སེམས་པ་ཞེས་བཤད་པ་མི་འཐད་པར་ཐལ། དེ་མེད་པའི་ཕྱིར། ཞེས་པ་ནུས་པ་ཤིན་ཏུ་ཆུང་སྟེ། ཉོན་ཡིད་འཁོར་བཅས་ལས་གཞན་པའི་ངར་སེམས་པ་ཡོད་པའི་ཕྱིར་དང༌། རྟག་ཏུ་ཞེས་པའི་ཚིག་གི་ནུས་པ་མ་ཐོན་པའི་ཕྱིར། དེར་ཐལ། ཕྲན་ཚེགས་ལས།

― GTD002_Page_0394 ―

^{[མ་དཔེ་གཟིགས་ན་འདིར་གནོན།]}

[Full Size]

ཉོན་མོངས་ཅན་ཡིད་རྟག་ཏུ་ནི། །ཞེས་སོགས་དང༌། དཀའ་འགྲེལ་ལས། ཉོན་ཡིད་མེད་ན་རྟག་ཏུ་ངར་སེམས་པའི་ཕྱིར་ཡིད་དོ། །ཞེས་པའི་ངེས་ཚིག་འདི་རྣམ་པར་ཤེས་པ་གང་ལ་ཡང་མི་གནས་པར་འགྱུར་ཞེས་གསུངས་པའི་ཕྱིར་དང༌། བྱིངས་མདོ་ལས། མྣཱ་གོམས་པ་ལའོ། ཞེས་པའི་བྱིངས་བཞག །རྐྱེན་ཏིཔ྄་བྱིན། བྱེད་པ་པོ་ལ་ཨཔ྄འོ། །ཞེས་པས་ཨཔ྄་བྱིན། མྣཱ་ཞེས་པ་མ་ན་རུ་བསྒྱུར། པ྄་གཉིས་དང་བྱིངས་མཐའི་ཨ་ཡང་ཕྱིས། ན་སྲོག་མེད་ཨ་ལ་དྲངས་པས་མན་ཏི་གྲུབ་ཅིང་རྟག་ཏུ་གོམས་པའི་དོན་དུ་འགྲོ་ལ། སོ་སྐྱེའི་གནས་སྐབས་སུ་རྒྱུན་མ་ཆད་པར་ང་ང་ཞེས་པའི་གོམས་པ་རྒྱུན་ཆགས་པ་ཉོན་ཡིད་ལས་གཞན་མེད་པའི་ཕྱིར། ཁ་ཅིག་ན་རེ། ངས་མཐོང་ངས་ཐོས་ཞེས་པ་ལྟ་བུའི་ངེས་ཚིག་ཀྱང་ཉོན་ཡིད་ཀྱི་དབང་གིས་འབྱུང་བ་མི་འཐད་པར་ཐལ། དགྲ་བཅོམ་པ་ཡང་དེ་ལྟར་གསུངས་པ་ཡོད་པའི་ཕྱིར་ན་མ་ཁྱབ་སྟེ། སོ་སྐྱེས་ཀྱིས་དེ་ལྟར་བཤད་པ་ངར་འཛིན་གྱི་དབང་གིས་ཡིན་ཀྱང་འཕགས་པས་གསུང་བ་དེ་དང་མཚུངས་མི་དགོས་པའི་ཕྱིར། ཉི་སྣང་ལས། དེའི་ཚིག་ནི་ཐ་སྙད་པ་ཡིན་གྱི་དོན་དམ་མ་ཡིན་པ་དེས་ན་སྙིང་པོ་མེད་དོ། །ཞེས་གསུངས་པའི་ཕྱིར། ཡང་ཁ་ཅིག །འདུ་ཤེས་མེད་པར་སྐྱེས་པའི་ཚེ་ཉོན་ཡིད་མེད་ཀྱང་གང་ཟག་དེ་ངར་འཛིན་དང་བྲལ་མི་དགོས་པར་ཐལ། དེ་ངར་འཛིན་གྱི་བག་ཆགས་དང་ལྡན་པའི་ཕྱིར་ཟེར་ན། དགྲ་བཅོམ་སྐྱོན་དུ་འཕེན་ལ། དེའི་ས་བོན་དང་ལྡན་པའི་ཕྱིར་ཟེར་ན་ཡང་མི་འཐད་པར་ཐལ། དེ་སྤྱིར་ཉོན་ཡིད་འདོད་པའི་དབང་དུ་བྱས་པ་ཡིན་ན་ཡང་མི་འཐད། མི་འདོད་པའི་དབང་དུ་བྱས་པ་ཡིན་ན་ཡང་མི་འཐད་པའི་ཕྱིར།

― GTD002_Page_0395 ―

^{[མ་དཔེ་གཟིགས་ན་འདིར་གནོན།]}

[Full Size]

དང་པོ་གྲུབ་སྟེ། སྤྱིར་ཉོན་ཡིད་ཡོད་ན་འདུ་ཤེས་མེད་པའི་ཚེ་དེ་འགག་དོན་མེད་པའི་ཕྱིར། གཉིས་པ་གྲུབ་སྟེ། སྤྱིར་ཉོན་ཡིད་མི་འདོད་ན་ཀུན་གཞི་ཡང་མི་འདོད་དགོས་པས་དེའི་ཚེ་ངར་འཛིན་གྱི་བག་ཆགས་ཀྱང་མེད་དགོས་པའི་ཕྱིར། དེར་ཐལ། དེའི་བག་ཆགས་ཡོད་པ་ལ་བསྒོ་གཞི་ཞིག་དགོས་པས་ཀུན་གཞི་ཡོད་པར་གྲུབ་པའི་ཕྱིར། ཁ་ཅིག་གིས། དཀའ་འགྲེལ་ལས། ངར་འཛིན་མི་དགེ་བའི་སེམས་དང་མཚུངས་པར་ལྡན་པས་ན་དགེ་བ་ལུང་མ་བསྟན་གྱི་སེམས་དང་དུས་གཅིག་ཏུ་མི་འབྱུང་ངོ༌། །ཞེས་པའི་དོན་དུ་བསམས་ནས་ཉོན་ཡིད་འཁོར་བཅས་ལས་གཞན་པའི་ངར་འཛིན་ལ་མི་དགེ་བས་ཁྱབ་ཟེར་ན། གོང་མའི་སས་བསྡུས་ཀྱི་མཐོང་སྤང་འཇིག་ལྟ་ཆོས་ཅན། མི་དགེ་བ་ཡིན་པར་ཐལ། ཉོན་ཡིད་དང་མཚུངས་ལྡན་མ་ཡིན་པའི་འཇིག་ལྟ་ཡིན་པའི་ཕྱིར། ཟུར་དང་པོ་གྲུབ་སྟེ། མཐོང་སྤང་ཀུན་བཏགས་ཡིན་པའི་ཕྱིར། ཁྱབ་སྟེ། ཉོན་ཡིད་དང་མཚུངས་ལྡན་གྱི་འཇིག་ལྟ་ལ་ལྷན་སྐྱེས་ཀྱིས་ཁྱབ་པའི་ཕྱིར། གཉིས་པ་གྲུབ་སྟེ། གོང་མའི་སས་བསྡུས་ཀྱི་མཐོང་སྤང་འཇིག་ལྟ་ཡོད་པའི་ཕྱིར། དེར་ཐལ། ཀུན་བཏུས་དར་ཊཱིཀ་ལས། མཐོང་སྤང་ཉོན་མོངས་བརྒྱ་དང་བཅུ་གཉིས་ཡོད་དེ། འདོད་པའི་ཁམས་ན་ལྟ་བ་ལྔ་དང་ལྟ་མིན་ལྔ་སྟེ་བདེན་པ་བཞི་རེ་རེ་ལ་ལོག་ཞུགས་བཅུ་བཅུ་ཁམས་གོང་མ་གཉིས་ན་ཁོང་ཁྲོ་བཞི་བཞི་བོར་བས་སུམ་ཅུ་རྩ་དྲུག་པ་གཉིས་སུ་ཡོད་པའི་ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། གོང་མའི་སས་བསྡུས་ཀྱི་ཉོན་མོངས་ཡིན་པའི་ཕྱིར། ཁྱབ་སྟེ། མཛོད་ལས། གོང་མ་ཐམས་ཅད་ལུང་མ་བསྟན། །

― GTD002_Page_0396 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པའི་ཕྱིར། ཉོན་ཡིད་ལྡོག་མཚམས་ལ་ཁ་ཅིག་ན་རེ། འཕགས་པ་མཉམ་གཞག་པའི་རྒྱུད་ལ་ཉོན་ཡིད་མེད་པ་མི་འཐད་པར་ཐལ། དེའི་རྒྱུད་ལ་ཉོན་ཡིད་ཡོད་པར་མ་ཟད་དབང་ཤེས་ཀྱང་ཡོད་པའི་ཕྱིར། དེར་ཐལ། སེམས་ནང་དུ་བསྡུས་ཏེ་ཏིང་ངེ་འཛིན་ལ་རྩེ་གཅིག་ཏུ་མཉམ་པར་གཞག་པའི་གང་ཟག་གི་རྒྱུད་ལ་ཡང་གཟུགས་མཐོང་བའི་མིག་ཤེས་ཡོད་པའི་ཕྱིར། དེར་ཐལ། རྣམ་འགྲེལ་ལས། ཐམས་ཅད་ལས་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་ནའང་མིག་གིས་གཟུགས་དག་ནི། །མཐོང་བའི་བློ་དེ་དབང་སྐྱེས་ཡིན། །ཞེས་གསུངས་ཤིང༌། རྣམ་བཤད་ལས། སྟོང་པ་ཉིད་ལ་མཉམ་པར་བཞག་བཞིན་པའི་དུས་ན་གང་ཟག་དེའི་རྒྱུད་ལ་ཐེག་ཆེན་སེམས་བསྐྱེད་ཡོད་མོད་ཀྱང༌། ཞེས་གསུངས་པའི་ཕྱིར་དང། དེ་གཉིས་འདྲ་བའི་ཕྱིར་ཏེ། རྣམ་འགྲེལ་ལས། རྩེ་གཅིག་གསལ་བས་སྒྲིབ་ན་ཡང། །སེམས་ཀྱི་ཁྱད་པར་རྒྱུན་དག་ལ། །ཞེས་དེ་དག་གི་སྐབས་སུ་བློ་གཞན་དང་གཞན་རྒྱུད་ལ་ཡོད་ཀྱང་མངོན་གྱུར་པ་དེས་སྒྲིབ་ནས་མི་གསལ་བ་ཡིན་པའི་ཕྱིར་ཟེར་ན། རེ་ཞིག་ཕྱི་མ་བཞག་ལ་སྔ་མ་མི་འཐད་པར་ཐལ། སློབ་པ་མཉམ་གཞག་པའི་རྒྱུད་ལ་དབང་ཤེས་མེད་པའི་ཕྱིར། དེར་ཐལ། དེར་མ་ཟད་གཉིད་ལོག་པའི་གང་ཟག་གི་རྒྱུད་ལ་དབང་ཤེས་མེད་པའི་ཕྱིར། དེར་ཐལ། འཇུག་པ་ལས། གལ་ཏེ་གཉིད་ན་མིག་བློ་མི་སྲིད་པས། །ཞེས་གསུངས་པའི་ཕྱིར། མ་ཁྱབ་ན་གཉིད་ལོག་པའི་གང་ཟག་གི་རྒྱུད་ཀྱི་མིག་ཤེས་ཆོས་ཅན། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་སྐྱེས་པའི་ཤེས་པ་ཡིན་པར་

― GTD002_Page_0397 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། མིག་ཤེས་ཡིན་པའི་ཕྱིར། འདོད་ན། གཉིད་ལོག་པའི་གང་ཟག་གི་རྒྱུད་ཀྱི་མིག་དབང་དེས་ཀྱང་མིག་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་ནུས་པར་ཐལ། འདོད་པའི་ཕྱིར། འདོད་ན། དེས་ཀྱང་གཟུགས་མཐོང་བར་ཐལ་བ་དང༌། དེ་རྟེན་བཅས་ཀྱི་དབང་པོར་ཐལ་བའམ། ཡང་ན་མིག་ཤེས་ཀྱིས་ཡུལ་འདས་པ་མཐོང་བར་ཐལ་བ་སོགས་སྤྲོས་པས་ཆོག་གོ །ཡང་ཁ་ཅིག །འགོག་པ་མཉམ་གཞག་གནས་སྐབས་དུས། །ཞེས་པའི་དོན་དུ་བསམ་ནས། མི་རྟག་པ་ལ་མཉམ་པར་བཞག་པའི་འཕགས་པའི་རྒྱུད་ལ་ཉོན་ཡིད་མེད་ཟེར་ན། འོ་ན་མི་རྟག་པ་མངོན་སུམ་དུ་རྟོགས་པའི་འཕགས་ལམ་མངོན་དུ་གྱུར་བའི་འཕགས་པའི་རྒྱུད་ལ་མེད་པར་ཐལ། དམ་བཅའ་འཐད་པའི་ཕྱིར། འདོད་ན། འགོག་སྙོམས་དམིགས་ཀྱིས་བསལ་བའི་དགོས་པ་མེད་པར་ཐལ། འཕགས་ལམ་མངོན་དུ་གྱུར་པ་ཐམས་ཅད་ལ་དེ་མེད་པའི་ཕྱིར། བྱས་པ་ལ་ཁོ་ན་རེ། དེའི་རྒྱུད་ལ་ཉོན་ཡིད་མེད་པར་ཐལ། དེ་འཕགས་པ་མཉམ་གཞག་པ་ཡིན་པའི་ཕྱིར། དེར་ཐལ། མི་རྟག་པ་ལ་མཉམ་པར་བཞག་པའི་འཕགས་པ་ཡིན་པའི་ཕྱིར་ན་མ་ཁྱབ་སྟེ། འཕགས་པའི་མཉམ་གཞག་ཡེ་ཤེས་ལ་བདག་མེད་ཕྲ་རགས་གང་རུང་ལ་མཉམ་པར་བཞག་པ་དགོས་པའི་ཕྱིར། དེར་ཐལ། རྩ་བར་མཉམ་གཞག་ཅེས་པ་དེ་སུམ་ཅུ་པ་ལས།འགོག་པའི་སྙོམས་པར་འཇུག་ན་མེད། །འཇིག་རྟེན་འདས་པའི་ལམ་ན་མེད། །ཅེས་པའི་འདས་ལམ་དེ་ལ་སྦྱོར་དགོས་བའི་ཕྱིར། ཁྱབ་སྟེ། སྤྱིར་འཕགས་ལམ་ལ་འདས་ལམ་གྱིས་ཁྱབ་ཀྱང་འདས་ལམ་དང་མཉམ་གཞག་ཡེ་

― GTD002_Page_0398 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་རྣམ་གྲངས་སུ་བཤད་པའི་སྐབས་ཀྱི་དེར་བདག་མེད་མངོན་སུམ་དུ་རྟོགས་པ་ཞིག་དགོས་པའི་ཕྱིར། དེར་ཐལ། ཡུམ་བར་མ་ལས། ཇི་ཙམ་དུ་གཉིས་པ་དེ་ཙམ་དུ་དམིགས་པའོ། །མི་གཉིས་པ་ནི་མི་དམིགས་པའོ། །ཞེས་དང༌། འཇུག་པ་ལས། གསུམ་ལ་ཆགས་པས་སྟོང་སྟེ་འཇིག་རྟེན་འདས། །ཞེས་གསུངས་པའི་ཕྱིར་དང༌། བདེན་སྟོང་སྒྱུ་མ་ལྟ་བུ་མངོན་སུམ་དུ་རྟོགས་མ་ཐག་པའི་མཐོང་ལམ་དེ་ཡང་རྗེས་ཐོབ་ཡེ་ཤེས་སུ་བཤད་པའི་ཕྱིར། གཞན་ཡང༌། རྫུ་འཕྲུལ་གྱི་མངོན་ཤེས་ལ་མཉམ་པར་བཞག་སྟེ་ནམ་མཁའ་ལ་འགྲོ་འཆག་ཉལ་འདུག་སོགས་བྱེད་པའི་བྱང་འཕགས་དེ་ཆོས་ཅན། མཉམ་གཞག་པ་ཡིན་པར་ཐལ། རྫུ་འཕྲུལ་གྱི་ཏིང་ངེ་འཛིན་ལ་མཉམ་པར་བཞག་པའི་འཕགས་པ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། མཉམ་རྗེས་ངོ་བོ་གཅིག་ཏུ་སོང་བའི་གང་ཟག་ཡིན་པར་ཐལ། མཉམ་གཞག་གི་ངང་ནས་རྗེས་ཐོབ་ཀྱི་བྱ་བ་བྱེད་ནུས་པའི་གང་ཟག་ཡིན་པའི་ཕྱིར། དེར་ཐལ། དེའི་ངང་ནས་སྤྱོད་ལམ་རྣམ་བཞི་དང་གཞན་ལ་ཆོས་སྟོན་པ་སོགས་ངེས་པ་གང་ཞིག །དེ་ལས་ལྷག་པའི་རྗེས་ཐོབ་ཀྱི་བྱ་བ་འཇོག་ཚུལ་མེད་པའི་ཕྱིར། ཡང་ཁོ་ན་རེ། འགོག་སྙོམས་ཀྱི་ཚེ་ཉོན་ཡིད་ཡོད་པར་ཐལ། འགོག་སྙོམས་ལས་ལངས་མ་ཐག་པའི་ཡིད་ཤེས་དེའི་ཐུན་མོང་མ་ཡིན་པའི་བདག་རྐྱེན་ཡོད་པའི་ཕྱིར་ཏེ། ཁྱོད་ཀྱིས་ལྔ་པོ་དག་དང་འདྲ་བ་དང༌། ཞེས་དྲངས་པ་དེའི་ཕྱིར་ཟེར་ན་གོང་དུ་མ་ཁྱབ་སྟེ། དེའི་སྐབས་སུ་ཡང་ཉོན་ཡིད་ཀྱི་རྒྱུན་དུ་གྱུར་པའི་ཡིད་ཤེས་གཅིག་ཡོད་ཀྱང་ཉོན་ཡིད་དུ་མི་འཇོག་པའི་ཕྱིར། དེར་ཐལ། དེའི་རྒྱུད་ན་

― GTD002_Page_0399 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གཞི་ཡོད་པ་གང་ཞིག །ཀུན་གཞི་ཡོད་ན་དེ་དང་མཉམ་དུ་ཉུང་མཐའ་ལ་ཡང་ཡིད་ཤེས་གཅིག་ཡོད་པས་ཁྱབ་པའི་ཕྱིར། དཀའ་འགྲེལ་ལས། མཉམ་གཞག་གི་ཚེ་ཡང་ཡིད་ཤེས་ཀྱི་རྫས་རྒྱུན་ཆད་པའི་ལོག་པ་ནི་མེད་དེ། དགོངས་འགྲེལ་ལས། ཀུན་གཞི་དེ་ཉུང་ཡང་ཡིད་ཤེས་གཅིག་ཡིད་དང་ལྷན་ཅིག་འཇུག་པར་བསྟན་པའི་ཕྱིར། ཞེས་གསུངས་པའི་ཕྱིར། ཁོ་ན་རེ། དེའི་སྐབས་ཀྱི་ཉོན་ཡིད་ཀྱི་རྒྱུན་ཕྱི་མའི་ཡིད་དེ་ཆོས་ཅན། ཁྱོད་དང་མཚུངས་ལྡན་གྱི་ཉོན་མོངས་བཞི་སོགས་མེད་པར་ཐལ། ཁྱོད་ཉོན་ཡིད་དུ་མི་འཇོག་པའི་རྒྱུ་མཚན་ཡོད་པའི་ཕྱིར། འདོད་ན། དེ་ཆོས་ཅན། ཟག་མེད་ཡིན་པར་ཐལ། འདོད་པའི་ཕྱིར་ཟེར་ན། འདི་ལ་སློབ་དཔོན་སོ་སོའི་བཞེད་ཚུལ་མི་འདྲ་བ་གཉིས་ཡོད་དེ། དོན་གསང་ལས། ཡིད་དེ་ཡང་ཁ་ཅིག་ན་རེ། གནས་སྐབས་དེ་ན་ཟག་པ་མེད་པ་ཡིན་ཏེ། ཞེས་དང༌། ཁ་ཅིག་ན་རེ༌། ཟག་པ་དང་བཅས་པ་སྟེ་འདི་ལྟར་ནུས་པ་གཉིས་དང་ལྡན་པའི་ཕྱིར་རོ་ཞེས་ཟེར་རོ། །ཞེས་གསུངས་ཀྱང་རང་ལུགས་ལ་ཕྱི་མ་ཁས་ལེན་དགོས་ཏེ། རྗེ་བཙུན་རེད་མདའ་བས་ཕྱོགས་གཉིས་པ་འདི་ནི་ལེགས་པར་བཤད་པ་ཡིན་ཏེ། ཞེས་དང༌། རྩ་བར། ཉོན་མོངས་ཅན་དུ་འཇོག་བྱེད་པའི། །གང་ཟག་འཛིན་པ་ལོག་གྱུར་ཀྱང༌། །དེ་ཡི་རིགས་ཙམ་ཡོད་ཕྱིར་དང༌། །ཆོས་འཛིན་བསྐྱེད་ནུས་མ་ལོག་ཕྱིར། །ཡིད་ཤེས་མེད་དང་མཉམ་པ་ཉིད། །ཐོབ་པའི་སྐྱོན་གཉིས་རིང་དུ་སྤངས། །ཞེས་གསུངས་པའི་ཕྱིར། །ཁྱབ་སྟེ། དབང་ཐོབ་དགྲ་བཅོམ་གཉིས་དང་འགོག་པ་མཉམ་གཞག་སོགས་

― GTD002_Page_0400 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཚེ་ཉོན་ཡིད་མེད་ཀྱང་དེའི་རྒྱུན་གྱི་ཡིད་ཡོད་པས་འཇུག་ཤེས་ཀྱི་བདག་རྐྱེན་མེད་པའི་སྐྱོན་མི་འོང་ལ། ཡིད་དེ་ཟག་བཅས་ཡིན་པས་ཉོན་ཡིད་གནས་འགྱུར་གྱི་མཉམ་ཉིད་ཡེ་ཤེས་ཐོབ་པར་ཐལ་བའི་སྐྱོན་ཡང་མི་ཡོང་པའི་ཕྱིར། དེར་ཐལ། དེ་ཟག་བཅས་སུ་འཇོག་པའི་རྒྱུ་མཚན་སྤྱིར་ཉོན་ཡིད་དེ་ལ་ཉོན་མོངས་པའི་སྒྲིབ་པ་ཅན་དུ་འཇོག་བྱེད་རང་གྲོགས་ཉོན་མོངས་བཞི་དང༌། ཤེས་སྒྲིབ་དང་བཅས་པར་འཇོག་བྱེད་འཇུག་ཤེས་ཀྱི་རྟེན་བྱེད་པའི་སྒོ་ནས་དེ་ཕྱི་རོལ་དོན་གྱི་སྣང་བ་དང་བཅས་པར་བསྐྱེད་པའི་ནུས་པ་གཉིས་ཡོད་པ་ལས་འདི་དག་གི་ཚེ་སྔ་མ་ལོག་ཀྱང་ཕྱི་མ་ཡོད་པས་ཤེས་སྒྲིབ་ཀྱི་ཟག་བཅས་ཡིན་པའི་ཕྱིར། དཀའ་འགྲེལ་ལས། ཐ་སྙད་སྣ་ཚོགས་འདོགས་པའི་ཡེ་ཤེས་ཀྱི་ལྷན་ཅིག་སྐྱེ་བའི་རྟེན་བྱས་ནས་ཆོས་འཛིན་པ་ཤེས་སྒྲིབ་བསྐྱེད་པའི་ནུས་པ་གཉིས་ཡོད་ལ། ཞེས་སོགས་གསུངས་པའི་ཕྱིར། ཁོ་ན་རེ། རིགས་ངེས་ཀྱིས་ས་བརྒྱད་པ་ནས་ཉོན་མོངས་སྤོང་བར་ཐལ། དེས་ཉོན་ཡིད་སྤངས་པའི་ཕྱིར། དེར་ཐལ། དེ་ནས་ཉོན་ཡིད་གཏན་དུ་ལོག་པའི་ཕྱིར་ན་མ་ཁྱབ་སྟེ། ཉོན་ཡིད་ལ་བློ་མངོན་གྱུར་པས་ཁྱབ་ཅིང་ས་བརྒྱད་པ་ནས་སྲིད་ཞི་མཉམ་ཉིད་ཀྱི་སྦྱོར་བ་ཐོབ་སྟེ། ཆོས་ཉིད་ཡེ་ཤེས་ལ་དབང་བའི་དོན་དུ་རྟོགས་པས་དེའི་འཁོར་དུ་ཉོན་མོངས་བཞི་གཏན་མི་འབྱུང་བར་བྱས་པ་ཡིན་པའི་ཕྱིར། མངོན་རྟོགས་རྒྱན་ལས། སྲིད་དང་ཞི་བར་མི་རྟོག་པ། །ཞེས་དང༌། མདོ་སྡེ་རྒྱན་ལས།ཞིང་དང་ཡེ་ཤེས་ལས་དག་ལ། །ཞེས་གསུངས་པའི་ཕྱིར། གོང་དུ་འདོད་མི་ནུས་ཏེ། སློབ་དཔོན་ཀླུ་སྒྲུབ་ཀྱིས་ས་བརྒྱད་པ་ནས་ཉོན་མོངས་སྤོང་བར་བཞེད་ལ། འཕགས་པ་ཐོགས་མེད་ཀྱིས་སངས་

― GTD002_Page_0401 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་པ་དང་དུས་མཉམ་དུ་སྤོང་བར་བཞེད་པའི་ཕྱིར། ཀུན་བཏུས་དར་ཊཱིཀ་ལས། མགོན་པོ་ཀླུ་སྒྲུབ་ཀྱི་བཞེད་པ་དང་མི་འདྲ་སྟེ། དེའི་བཞེད་པས་ས་བརྒྱད་པར་ཉོན་སྒྲིབ་ཟད་པར་བྱེད་པའི་ཕྱིར། ཞེས་གསུངས་པའི་ཕྱིར། ཁྱབ་སྟེ། དེ་ལྟར་འབྱུང་བ་རྟེན་གཞིའི་མདོའི་དབང་གིས་ཡིན་པའི་ཕྱིར་ཏེ། དགོངས་འགྲེལ་ལས། ས་བཅུ་གཅིག་པ་ལ་ནི་ཉོན་མོངས་པ་དང་ཤེས་བྱའི་སྒྲིབ་པ་ཤིན་ཏུ་ཕྲ་མོ་སྤངས་པས། ཞེས་གསུངས་པའི་ཕྱིར་དང༌། ཀུན་བཏུས་ལས་ཀྱང༌། དེ་བྱང་ཆུབ་ཐོབ་པ་ནས་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ཅིག་ཅར་སྤོང་ངོ༌། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །ཞེས་སོ། །སྨྲས་པ། བློ་གྲོས་ཉི་མ་འབར་བའི་གདེངས་ཀ་ལས། །ཀུན་རྨོངས་མུན་པའི་དྲ་བ་མཐར་བྱེད་པའི། །ལེགས་བཤད་འོད་བརྒྱའི་སྣང་བ་སྤྲོས་པ་ཡིས། །བློ་གསལ་རྐང་དྲུག་རབ་དགའི་དབྱངས་ཀྱིས་བྲེལ། །ལུང་རིགས་ལང་ཚོ་དར་བའི་གཞོན་ནུ་འདིའི། །མཆེད་པོ་སྔོན་དགེའི་བསྐལ་པར་ཅི་སྟེ་མེད། །ཕྱི་མའི་དུས་ཀྱང་ཐུབ་བསྟན་སྒེག་མོ་ཡིས། །འདི་ལྟའི་མཛའ་བོ་རྙེད་པར་གྱུར་ཅིག་གུ། །ཐུབ་བསྟན་སྲོག་རྗེས་འགྲོ་ལྡོག་མི་འཁྲུལ་བའི། །བཤད་སྒྲུབ་དབུགས་བྲལ་འབྱུང་བོའི་སྟངས་སྟབས་གར། །བསྒྱུར་བའི་ཆོས་བརྒྱད་རོལ་པ་ལེགས་བྱས་ཀྱི། །རྩེད་འཇོར་འཁྲུལ་བས་གཡེང་རྣམས་སྙིང་རྗེའི་ཡུལ། །དེ་ཕྱིར་དམ་པའི་མགོན་ལ་གུས་བརྟེན་ནས། །གཞུང་མང་ཐོས་བའི་དཀའ་སྤྱད་ལྷུར་བླངས་པས། །འཕགས་བོད་མཁས་པའི་ལེགས་བཤད་དགའ་སྟོན་ལ། །ལོངས་སུ་སྤྱོད་པའི་སྐལ་བཟང་ཁོ་

― GTD002_Page_0402 ―

^{[མ་དཔེ་གཟིགས་ན་འདིར་གནོན།]}

[Full Size]

བོས་རྙེད། །ཚུལ་འདིར་འབད་པ་ལས་བྱུང་ལེགས་བྱས་ཀྱི། །ཆ་ཤས་ཡོངས་སུ་གང་བའི་བསིལ་ཟེར་ཅན། །རང་བཞིན་དག་པའི་དབྱིངས་ཀྱི་མཁར་འཕགས་ཏེ། །དོན་གཉིས་ཀུན་དའི་དགའ་ཚལ་འབྱེད་གྱུར་ཅིག །ཅེས་ཡིད་དང་ཀུན་གཞིའི་དཀའ་གནད་རྣམ་པར་བཤད་པ་མཁས་པའི་འཇུག་ངོགས་ཞེས་བྱ་བ་འདི་ནི་ཆོས་གྲྭ་ཆེན་པོ་དཔལ་ལྡན་བཀྲ་ཤིས་འཁྱིལ་གྱི་གྲྭ་ཚང་ཐོས་བསམ་གླིང་ནས་སྒོ་མང་དཔོན་སློབ་ངག་དབང་དགེ་ལེགས་ཀྱི་སྤྲུལ་པའི་སྐུ་སྐལ་བཟང་དགེ་ལེགས་རྒྱ་མཚོ་དང༌། སྐྱོར་དཔོན་བློ་བཟང་ཤེས་རབ་སོགས་འཛིན་གྲྭའི་དགེ་འདུན་རྣམས་ཀྱིས་ཡང་ཡང་བསྐུལ་བའི་ངོར། བཙུན་བ་དཀོན་མཆོག་བསྟན་པའི་སྒྲོན་མེས་རང་ལོ་སོ་བདུན་པ་ས་ཕོ་རྟའི་ལོ་ཁྲུམས་སྟོད་ཟླ་བའི་དཀར་ཕྱོགས་ཀྱི་དགའ་བ་དང་པོའི་ཉིན་ཆོས་སྡེ་ཆེན་པོ་དགོན་ལུང་བྱམས་པ་གླིང་དུ་རྫོགས་པར་སྦྱར་བའི་ཡི་གེ་པ་ནི་སྡོམ་བརྩོན་རྣམ་དཔྱོད་ཡངས་པ་དཀོན་མཆོག་བསྟན་པའོ། །འདིས་ཀྱང་འཇམ་མགོན་བླ་མའི་རིང་ལུགས་དྲི་མ་མེད་པ་ཕྱོགས་དུས་ཀུན་ཏུ་རྒྱས་པར་གྱུར་ཅིག།། །།

དྲང་ངེས་རྣམ་འབྱེད་ཀྱི་དཀའ་འགྲེལ་རྩོམ་འཕྲོ།

― GTD002_Page_0403 ―

^{[མ་དཔེ་གཟིགས་ན་འདིར་གནོན།]}

[Full Size]

དྲང་ངེས་རྣམ་འབྱེད་ཀྱི་དཀའ་འགྲེལ་རྩོམ་འཕྲོ་ལེགས་བཤད་སྙིང་པོའི་ཡང་སྙིང་ཞེས་བྱ་བ་བཞུགས་སོ། །

― GTD002_Page_0404 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མཉྫུ་གྷོ་ཥཱ་ཡ། ཚད་མའི་སྟོན་པ་ཟླ་བྲལ་ཤཱཀྱའི་ཏོག །ཟབ་རྒྱས་བསྟན་པའི་སྲོག་འཛིན་བྱམས་འཇམ་དབྱངས། །དེ་རྗེས་བསྟན་ལ་དྲང་ངེས་འབྱེད་པ་པོ། །ཤིང་རྟ་ཆེན་པོ་གཉིས་སོགས་གཙུག་ན་རྒྱལ། །རབ་འབྱམས་ཞིང་དུ་རྒྱལ་བསྟན་སྙིང་པོའི་དོན། །ཉི་ལྟར་གསལ་མཛད་འཇམ་དབྱངས་བླ་མ་དང། །དེ་ཉིད་དགྱེས་བཞད་འཇིགས་མེད་སྨྲ་བའི་དབང། །རྡོ་རྗེ་ཅན་ཞབས་པདྨོར་སྤྱི་བོས་འདུད། །འདི་ཕྱིར་ཕན་དང་བདེ་བ་ལེགས་པའི་ལམ། །ཇི་སྙེད་གསུངས་པའི་སྙིང་པོ་ཐར་པའི་སྒོ། །ཇི་བཞིན་གསལ་བར་བྱེད་པའི་གདམས་པ་མཆོག །འདི་ཉིད་ཁོ་ན་ཐར་འདོད་འཇུག་ངོགས་ཡིན། །བདག་འདྲས་གཏིང་མཐའ་དཔོག་པར་མི་ནུས་ཀྱང། །ཐེ་ཚོམ་ཙམ་གྱིས་སྲིད་པ་ཧྲུལ་བྱེད་ལ། །རྒྱལ་ཀུན་དགྱེས་པ་སྐྱེད་པའི་ཕན་ཡོན་གྱིས། །ཡིད་རབ་འཕྲོག་པས་ཆ་ཙམ་འབྱེད་ལ་སྤྲོ། །གང་ཞིག་དགེ་བའི་བཤེས་ཀྱིས་ཡོངས་བཟུང་མཐུས། །བླང་དོར་འབྱེད་པའི་

― GTD002_Page_0405 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་མིག་རབ་གསལ་ཞིང། །ཡང་དག་ལམ་བཟང་སྒྲུབ་པའི་མོས་བརྩོན་ཅན། །སྐལ་ལྡན་དེ་དག་དང་བས་འདིར་ཞུགས་ཤིག །དེའང་འཇམ་མགོན་རྒྱལ་བ་གཉིས་པའི་ཐུགས་ཀྱི་བཅུད། མདོ་དང་སྔགས་ཀྱི་གསུང་རབ་མཐའ་དག་གི་དེ་ཁོ་ན་ཉིད་གསལ་བར་བྱེད་པའི་བསྟན་བཅོས་ཆེན་པོ་ལེགས་པར་བཤད་པའི་སྙིང་པོའི་དོན་འགྲེལ་པ་ལ་གསུམ། བཤད་པ་ལ་འཇུག་པའི་ཡན་ལག །གཞུང་དངོས་ཀྱི་དོན། བཤད་པ་མཐར་ཕྱིན་པའི་ཚུལ་ལོ། །དང་པོ་ནི། ན་མོ་གུ་རུ། ཞེས་པ་ནས། སྨྲ་བ་ཟླ་མེད་འདོད་རྣམས་གུས་པས་ཉོན། །ཅེས་པའི་བར་ཏེ། ཐོག་མར་འགྱུར་ཕྱག་དང་སྒོ་མཚུངས་པར་འཇམ་པའི་དབྱངས་ལ་ཕྱག་བྱས་པ་ནི་སྡེ་སྣོད་གསུམ་ལ་མི་འདྲ་བའི་འགྱུར་ཕྱག་བྱེད་ཚུལ་བཀས་བཅད་ལས་འབྱུང་བ་བཞིན། འདིའང་ཐེག་ཆེན་གྱི་དོན་དམ་པའི་མངོན་པར་འདུ་བའི་དོན་ཡང་ཡིན་མོད། གཙོ་བོར་རྗེ་ཉིད་ཀྱིས་གང་

― GTD002_Page_0406 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བརྟེན་ནས་ལམ་བཟང་འདི་ཉིད་ཐུགས་སུ་ཆུད་པའི་ཡོངས་འཛིན་ཐུན་མོང་མ་ཡིན་པ་བླ་མ་ལྷག་པའི་ལྷ་ལ་བཀའ་དྲིན་དྲན་པས་མཆོད་པར་བརྗོད་པ་ཡིན་ཏེ། སྔགས་རིམ་ལས། དམར་སེར་སྐུ་ཡིས་ཡིད་འཕྲོག་གང་གི་གཙུག །མཐོན་མཐིང་རལ་བའི་ཟུར་ཕུད་ལྔས་མཛེས་པའི། །འཇམ་དབྱངས་དེ་ཡིས་ཚེ་རབས་ཀུན་ཏུ་བདག །དགྱེས་བཞིན་རྗེས་སུ་བཟུང་བའི་དྲིན་ལས་ནི། །ཞེས་དང། རིམ་ལྔ་གསལ་སྒྲོན་ལས། གང་གི་འཕྲིན་ལས་ཟེགས་མའི་ཆ་ཤས་ཙམ། །སྙིང་ལ་ཞུགས་པ་ཡིས་ཀྱང་རྙེད་དཀའ་བ། །ཤིན་ཏུ་སྦས་དོན་ལྷང་ངེར་གསལ་མཛད་པ། །རྗེ་བཙུན་མཁྱེན་པའི་གཏེར་དེས་བདག་སྐྱོངས་ཤིག །ཅེས་སོགས་གསུང་ཕལ་ཆེར་དུ་དེ་འདྲ་རེ་འབྱུང་ཞིང། ཁྱད་པར་དུ་འདིར། འཇམ་མགོན་བླ་མའི་དྲིན་གྱིས་ལེགས་མཐོང་ནས། །ཞེས་གསུངས་པ་བཞིན་ནོ། །དེ་ནས་བཤད་པའི་སྔོན་འགྲོ་དངོས་ལ། བསྟན་པའི་བདག་པོ་ལ་མཆོད་པར་བརྗོད་པ། དེའི་སྲོལ་འཛིན་རྣམས་ལ་མཆོད་པར་བརྗོད་པ། བསྟན་བཅོས་རྩོམ་པར་དམ་བཅའ་བ། སྣོད་ལྡན་ཉན་པར་བསྐུལ་བ་རྣམས་སུ་ཡོད་པས། དང་པོ་ནི། བདེ་འབྱུང་ཞེས་སོགས་ཤོ་ལོ་ཀ་གཉིས་ཏེ། དེའང་ཤམྦྷུཿསྟེ་བདེ་འབྱུང་ནི་དབང་ཕྱུག་ཆེན་པོ། མེ་གྷ་བཱ་ཧ་ནཿསྟེ་སྤྲིན་ལ་ཞོན་ནི་བརྒྱ་བྱིན། ཧི་ར་ཎྱ་གརྦྷཿསྟེ་གསེར་གྱི་མངལ་ཅན་ཚངས་པ། ཨ་ནཾ་གཿལུས་མེད་དང། དེ་ལ་པ་ཏི་སྦྱར་ན་ལུས་མེད་བདག་པོ་སྟེ་འདོད་ལྷ་དང། དཱ་མོ་ད་རཿནི་སྔ་མ་རྣམས་ཐ་གུའི་ལྟོ་བར་

― GTD002_Page_0407 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒྱུར་བ་ལྟར་བྱས་པ་ཡིན་ལ། དེའི་རྒྱུ་མཚན་ཚིག་གཏེར་འགྲེལ་པ་ལས། བྱིས་པའི་དུས་ན་ཐ་གུའི་སྐ་རགས་བཅིངས་པའོ། །ཞེས་གསུངས་ཀྱང། འདོད་འཇོ་འགྱུར་གསར་ལས། དཱ་མོ་ད་རཿསྟེ་མེ་ཏོག་ལྟོའོ། །ཞེས་དང། གྲགས་པ་དང། སྙིང་རྗེ་དང། རོལ་པ་དང། སེལ་བའི་དོན་གྱིས་མེ་ཏོག་གི་ཆུན་པོ་རྣམས་འདིའི་ལྟོ་བ་ལ་ལྡན་པའི་ཕྱིར། དེས་ཉེ་བར་མཚོན་པ། ཞེས་སོགས་འབྱུང་བ་ལེགས་ཏེ། མེ་ཏོག་གི་ཐོད་བཅིངས་སོགས་ལ་གཞོན་ནུའི་རྒྱན་དུ་གསུངས་པ་ལྟར། འདིའང་བྱིས་པ་གཞོན་ནུའི་སྐབས་མེ་ཏོག་གི་ཆུན་པོ་ལྟོ་བའི་ངོས་སུ་བཅིངས་པ་ཡིན་ནམ་སྙམ་མོ། །འདོད་འཇོ་ཤོང་སྟོན་གྱི་འགྱུར་ལས། མེ་ཏོག་ལྟོ་ནི་ལྷ་མོ་གྲགས་མ་ཞེས་བྱ་བ་ཁྱབ་འཇུག་གི་ཆུང་མའོ། །དེས་མེ་ཏོག་ཕྲེང་བ་མགོ་ལ་འཇོག་པར་འདོད་པ་ལ་མ་སླེབ་པས་ལྟོ་བ་ལ་བཞག་གོ །དེ་ཡིས་ཉེ་བར་མཚོན་པས་མེ་ཏོག་ལྟོ་ཅན་ནོ། །ཞེས་འབྱུང་སྟེ། སྔ་མ་དང་མི་མཐུན་པ་རྒྱ་དཔེ་མ་འདྲ་བར་མངོན། དབང་ཕྱུག་ལ་བདེ་འབྱུང་ཞེས་པའང་གཉན་སྟོན་གྱིས་ལྷ་མོ་ཨུ་མ་ལ་བརྟེན་ནས་བདེ་བ་འབྱུང་བ་ལ་བཤད་པ་ནི་རང་ལས་བདེ་བ་འབྱུང་ཚུལ་བཤད་དགོས་རྒྱུ་ལ་གཞན་ལས་བདེ་བ་འབྱུང་ཚུལ་བཤད་པ་དེ་སྡུག་བདེན་ལ་ཀུན་འབྱུང་གི་སྒྲ་བཤད་པ་བཞིན་འབྲེལ་མེད་པས། དཀའ་འགྲེལ་ལས། མཆོག་ཏུ་དགའ་བའི་གཟུགས་འཆང་བས་བདེ་འབྱུང།

― GTD002_Page_0408 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གཞན་གྱིས་མཐོང་ན་བདེ་དགེ་ཐམས་ཅད་འབྱུང་བའི་གཟུགས་དང་ལྡན་པར་གསུངས་པ་ལེགས་ཏེ། རབ་འབྱོར་ཟླ་བས། ཤཾ་ཞེས་པ་ནི་མི་ཟད་པ་དགེ་བའི་དོན་ཅན་ནོ། །ཞེས་པ་ནས། ཤམྦྷུཿསྟེ་བདེ་འབྱུང་ངམ་དགེ་འབྱུང་ངོ་། །ཞེས་གསུངས་ལ། དེ་ལས་ཐར་པ་སོགས་འཐོབ་པ་དགེ་འབྱུང་གི་དོན་དང། གནས་སྐབས་སུ་དགའ་བ་སྐྱེད་པ་བདེ་འབྱུང་གི་དོན་ཡིན་ཅིང། དེ་དབང་ཕྱུག་གི་ཡོན་ཏན་བརྒྱད་ཀྱི་ཐ་མ་དགའ་མགུར་གནས་པའི་དོན་ཡང་ཡིན་པའི་ཕྱིར་ཏེ། སྤྱན་རས་གཟིགས་བརྟུལ་ཞུགས་ཀྱི་འགྲེལ་བཤད་དུ་དབང་ཕྱུག་གི་གཞུང་དྲངས་པ་ལས། ཐར་པའམ་ཡང་ན་ལྷ་ཡི་ལུས། །གང་དུ་བདག་ཉིད་འདོད་པ་དག །ཐམས་ཅད་འདོད་པ་ཐོབ་འགྱུར་བས། །དེས་ན་དགའ་མགུར་གནས་ཞེས་བྱ། །ཞེས་འབྱུང་བའི་ཕྱིར། སྤྲིན་ཞོན་ཡང་ཁ་ཅིག་སྤྲིན་གྱི་ཤུགས་འཆང་བའི་གླང་པོ་ཆེ་ཞེས་མྱུར་མགྱོགས་ལ་བཤད་ཀྱང། འདོད་འཇོ་ལས། སྤྲིན་ཆེན་པོ་གླང་པོ་ཆེའི་གཟུགས་འཛིན་པའི་ས་སྲུང་བུ་ལ་སོགས་པ་རྣམས་འདིའི་བཞོན་པ་ཡིན་པས། ཞེས་ཤིན་ཏུ་ཆེ་ཞིང་དལ་གྱིས་གཡོ་བས་བརྗིད་པའི་ཉམས་དང་སྦྱར་བ་ཡིན་ཏེ། གླང་པོའི་སྐྱེས་རབས་ལས། སྟོན་ཀའི་སྤྲིན་ནམ་ན་བུན་གྱི་ཚོགས་རླུང་གིས་བསྐྱོད་པ་བཞིན་ཚུར་འོངས་པ་མཐོང་ངོ་། །ཞེས་གསུངས་པ་ལྟར་རོ། །གསེར་མངལ་ནི་ཡེ་ཤེས་སྙིང་པོ་ཀུན་བཏུས་ཀྱི་འགྲེལ་པ་བྱང་བཟང་གིས་མཛད་པར། ཆུ་དང་ས་དང་མེའི་དཀྱིལ་འཁོར་གྲུབ་པར་གྱུར་ཅིང། མེའི་དབུས་སུ་སྒོ་ང་ཆེན་པོ་འོད་འབར་ཞིང་གསལ་བར་གནས་པ་དེ་སྨིན་ཅིང་བརྟོལ་བ་ལས་འཇིག་རྟེན་གྱི་མེས་པོ་ཚངས་པ་ཆེན་པོ་

― GTD002_Page_0409 ―

^{[མ་དཔེ་གཟིགས་ན་འདིར་གནོན།]}

[Full Size]

པདྨོའི་མངལ་ལས་སྐྱེས་ཤིང་པདྨ་ལ་གནས་པ་གདོང་བཞི་པ་ཞིག་བྱུང་སྟེ། དེས་འཇིག་རྟེན་རྣམས་སྤྲུལ་པའོ་ཞེས་ཟེར་བ་ཚངས་པས་འདོད་པ་སྟེ། ཞེས་མེ་དཀྱིལ་གྱི་དབུས་སུ་གསེར་གྱི་སྒོ་ང་སྨིན་པ་ལས་བྱུང་བར་བཤད། དྲན་པའི་གཞུང་ལས། གསེར་གྱི་མདོག་ཅན་རབ་མཛེས་པའི། །སྒོ་ང་ཆུ་ལས་རང་བྱུང་སྟེ། །དེ་ལས་རང་ཉིད་ཚངས་པ་སྐྱེས། །རང་བྱུང་ཞེས་སུ་རྣམ་པར་གྲགས། །སྒོ་ང་དུམ་བུ་གཉིས་གྱུར་དེས། །མཁའ་དང་ས་རུ་དེ་ནས་ཆགས། །ཞེས་སྒོ་ང་ཆུ་ལས་བྱུང་བ་དང། དེ་གས་ནས་ནམ་མཁའ་དང་ས་གཞི་བྱུང་བར་བཤད་དེ། རྒྱ་ནག་ཤེའུའི་སྲོལ་འཛིན་པ་དག་དང་པོར་ཧུན་དུན་ཞེས་གནམ་ས་སོ་སོར་མ་ཕྱེ་བའི་འཐིབ་པོར་ཡོད་ལ། དེ་ནས་ཡང་ཞིང་གསལ་བའི་ཆ་སྟེང་དུ་འཕགས་པས་གནམ་དང། ལྕི་ཞིང་རྙོག་པའི་ཆ་ཐུར་དུ་བབས་པས་ས་བྱུང་ཞེས་སྨྲ་བའང་འདི་འདྲ་ཞིག་ལ་བརྟེན་པར་སྣང། ལུས་མེད་ཅེས་པ་དབང་ཕྱུག་ཆེན་པོ་ལྷ་མོ་ཨུ་མས་མཆོད་ཅིང་དཀའ་ཐུབ་ལ་གནས་པ་ན་དགའ་རབ་དབང་ཕྱུག་གིས་མདའ་ལྔ་འཕངས་པས་དཀའ་ཐུབ་ལས་ཉམས་པས། དེ་བདུད་ཀྱི་བྱེད་པར་ཤེས་ནས་དབང་ཕྱུག་ཁྲོས་ཏེ་ཉི་མ་ཟླ་བ་མེའི་མིག་གསུམ་གྱི་དབུས་མ་མེའི་མིག་ལས་མེ་སྦར་བས་བདུད་སྡིག་ཅན་བསྲེགས་ཏེ་ལུས་མེད་པར་བྱས་ཞེས་མངོན་བརྗོད་ལས་འབྱུང་ངོ་། །མདའ་ལྔ་ནི་སྒྲོན་གསལ་ལས། དྲེགས་པར་བྱེད་པ་དང། རྨོངས་པར་བྱེད་པ་དང། ཀུན་ཏུ་རྨོངས་པར་བྱེད་པ་དང། བརྒྱལ་བར་བྱེད་པ་དང། སེམས་མེད་པར་བྱེད་པ་སྟེ་མདའ་ལྔའོ། །ཞེས་གསུངས། རྒྱལ་བའི་ལྷའི་སྡེབ་སྦྱོར་གྱི་རྒྱ་ཆེར་འགྲེལ་ལས། དགོད་བྱེད་རབ་ཏུ་འདུ་བྱེད་དང། །རྨོངས་

― GTD002_Page_0410 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་དེ་བཞིན་བརྒྱལ་བར་བྱེད། །འཆི་བྱེད་རྣམས་ནི་འདོད་དབང་གི །མདའ་ལྔ་རྣམས་སུ་རབ་ཏུ་གྲགས། །ཞེས་གསུངས། རབ་འབྱོར་ཟླ་བས། མདའ་ལྔ་ནི་སྨྱོ་བྱེད་དང། སྲེད་བྱེད་དང། རྨོངས་བྱེད་དང། སྐེམ་བྱེད་དང། འཆི་བྱེད་ཅེས་བྱ་བ་རྣམས་སོ། །ཞེས་གསུངས་པ་རྣམས་མིང་འདོགས་མི་འདྲ་འང། སྒྲོན་གསལ་གྱི་མཆན་ལས། འདོད་ཆགས་རྒྱས་ཤིང་མྱོས་པར་བྱེད་པས་དྲེགས་པར་བྱེད་པ། ཞེས་པ་ནས། མི་གཡོ་བས་རོ་བཞིན་དུ་བྱེད་པ་སེམས་མེད་པར་བྱེད་པ། ཞེས་གསུངས་པ་དང་སྦྱར་ན་དོན་འདྲ་ལ། ཚིག་གཏེར་འགྲེལ་པར་མྱོས་བྱེད་འདར་བྱེད་སོགས་ལྔ་དང། མངོན་བརྗོད་གཞན་ལས་གསོད་བྱེད་རྗེད་བྱེད་སོགས་སྔར་བཤད་པ་རྣམས་འདྲ་མི་འདྲ་བརྟག་དགོས། ཐ་གུའི་ལྟོ་ནི་བཤད་ཟིན་ལ། སོགས་སྒྲས་བསྡུས་པ་གཞོན་ནུ་གདོང་དྲུག །ཚོགས་བདག ཉི་མ། ཟླ་བ། སྒྲ་མཁན་ཕུར་བུ་སོགས་སྡུད་དོ། །དེ་ལྟར་ན་གཞུང་འདིས་སངས་རྒྱས་བཅོམ་ལྡན་འདས་ལ་བསྟོད་ཚུལ་ཡོད་དེ། འཇིག་རྟེན་གྱི་ལྷ་ཆེན་པོ་རང་རང་གི་གནས་ན་འཁོད་པའི་ཚེ་བློ་གྲོས་དང་མཐུ་སྟོབས་རྫུ་འཕྲུལ་སོགས་འགྲན་ཟླ་མེད་པར་རློམ་པ་རྣམས་ཀྱང་བཅོམ་ལྡན་འདས་ཀྱི་དྲུང་དུ་ཉེ་བར་སླེབ་པ་ན་ཉི་མའི་འོད་ཀྱིས་མེ་ཁྱེར་བཅོམ་པ་བཞིན་ཟིལ་གྱིས་མནན་པས་ཁེངས་དྲེགས་བསྙིལ་ཏེ་གཙུག་གི་ཅོད་པཎ་གྱིས་གང་གི་ཞབས་ཀྱི་པདྨོར་འདུད་པས་ན་སངས་རྒྱས་ནི་ལྷའི་ཡང་ལྷར་གྱུར་ཚུལ་གྱི་སྒོ་ནས་བསྟོད་པའི་ཕྱིར། དེ་དག་གི་དོན་ལ་ཅུང་ཟད་མཐའ་དཔྱད་ན། ཁ་ཅིག་ན་རེ། ཚངས་པ་ཆོས་ཅན། སྒོང་སྐྱེས་ཡིན་པར་ཐལ། གསེར་གྱི་སྒོ་ང་ལས་སྐྱེས་པའི་ཕྱིར། དེར་ཐལ། ལུང་སྔར་དྲངས་པ་དེའི་ཕྱིར་ཟེར་ན། མ་

― GTD002_Page_0411 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱབ་སྟེ། གསེར་གྱི་ཁ་དོག་ཅན་གྱི་པདྨ་སྒོ་ངའི་དབྱིབས་ལྟ་བུ་ཞིག་ལས་སྐྱེས་པས་དེ་ལྟར་བཤད་ཀྱི། སྒོ་ང་མཚན་ཉིད་པ་ལས་སྐྱེས་པ་མ་ཡིན་པའི་ཕྱིར། འདོད་མི་ནུས་ཏེ། རྫུས་སྐྱེས་ཡིན་པའི་ཕྱིར། དེར་ཐལ། ལྷ་དང་དམྱལ་བ་བར་དོ་བ་གསུམ་གང་རུང་ལ་རྫུས་སྐྱེས་ཀྱིས་ཁྱབ་པའི་ཕྱིར། མཛོད་ལས། དམྱལ་བ་རྣམས་དང་ལྷ་རྣམས་དང། །སྲིད་པ་བར་མ་རྫུས་ཏེ་སྐྱེས། །ཞེས་གསུངས་པའི་ཕྱིར། དེར་མ་ཟད་གཟུགས་ཁམས་ཀྱི་ལྷ་རྣམས་དང་པོར་སྐྱེ་བའི་ཚེ་བོངས་ཚོད་རྫོགས་ཤིང་གོས་དང་བཅས་པར་རྫུས་ཏེ་སྐྱེས་པའི་ཕྱིར། མཛོད་ལས། གཟུགས་ཅན་རྣམས། །ཀུན་རྫོགས་གོས་དང་བཅས་པ་ཉིད། །ཅེས་སོ། །དེ་ལ་ཁོ་ན་རེ། སྐྱེ་གནས་བཞི་སོ་སོར་བཤད་ཀྱང་རྫུས་སྐྱེས་སྒོང་སྐྱེས་འགལ་མི་དགོས་པར་ཐལ། སྒོང་སྐྱེས་དང་མངལ་སྐྱེས་ཀྱང་མི་འགལ་བའི་ཕྱིར། དེར་ཐལ། སྒོ་ང་ལས་སྐྱེས་པའི་བྱ་དེ་མངལ་སྐྱེས་ཡིན་པའི་ཕྱིར། དེར་ཐལ། མངལ་ལས་སྐྱེས་པའི་ཕྱིར་ན་མ་ཁྱབ། འོ་ན་དྲོད་གཤེར་སྐྱེས་ཀྱང་ཡིན་པར་ཐལ། ཕ་མའི་ཁུ་ཁྲག་དང་ལུས་ཀྱི་དྲོད་ལས་སྐྱེས་པའི་ཕྱིར། ཁྱབ་པ་འགྲིག །ཡང་ཁ་ཅིག །གསེར་གྱི་སྒོ་ང་ཆུ་དཀྱིལ་ནས་བྱུང་བར་བཤད་པ་མི་འཐད་པར་ཐལ། ཀུན་བཏུས་འགྲེལ་པར་མེ་དཀྱིལ་ལས་བྱུང་བར་བཤད་པའི་ཕྱིར་ན་མ་ཁྱབ། གཉིས་ཀ་རིག་བྱེད་ལ་གྲགས་པའི་གཏམ་རྒྱུད་བཀོད་པ་ཙམ་ཡིན་གྱི། དོན་དངོས་གནས་མ་ཡིན་པའི་ཕྱིར་ཏེ། རིག་བྱེད་ལས་ཚངས་པ་དབང་ཕྱུག་གི་ས་བོན་ལས་སྤྲུལ་པ་དང། ཁྱབ་འཇུག་གི་ལྟོ་བའི་པདྨ་ལས་སྐྱེས་པ་

― GTD002_Page_0412 ―

^{[མ་དཔེ་གཟིགས་ན་འདིར་གནོན།]}

[Full Size]

དང། ཡང་ཚངས་པ་རང་ཉིད་ཀྱིས་འཇིག་རྟེན་ཐམས་ཅད་བྱས་པར་བཤད་པ་དང། ཁྱབ་འཇུག་གི་སྒྲ་དོན་བརྟན་གཡོ་ཀུན་ལ་ཁྱབ་ཅིང་འཇུག་པ་བཅུས་དོན་བྱེད་པ་ལ་བཤད་ནས། ཡང་ཁྱབ་འཇུག་སྐྲག་སྟེ་གཞན་དུ་བྲོས་ཚུལ་བཤད་པ་དང། ཚངས་པ་སྒོང་སྐྱེས། ཁྱབ་འཇུག་མངལ་སྐྱེས། དབང་ཕྱུག་བདག་ལས་སྐྱེས་པར་བཤད་པ་སོགས་འགལ་འདུ་སྣ་ཚོགས་བཤད་པ་དངོས་གནས་སུ་ཁས་བླངས་མི་རུང་བའི་ཕྱིར། དོན་དངོས་པོ་ལ་འཇིག་རྟེན་ཆགས་པའི་ཚེ་ས་ལ་མ་བརྟེན་པའི་གནས་རྣམས་ཡས་རིམ་ནས་ཆགས་པ་དང། བརྟེན་པ་རྣམས་མས་རིམ་ནས་ཆགས་དགོས་ལ། འདིར་དེ་གཉིས་ག་བསྲེས་ནས་བཤད་སྣང་བའི་ཕྱིར་རོ། །ཁོ་ན་རེ། འཇིག་རྟེན་ཆགས་པའི་ཚེ་ཐོག་མར་ཚངས་པ་ཆེན་པོ་བྱུང་ཞེས་བཤད་མི་རིགས་པར་ཐལ། འཇིག་རྟེན་གསར་དུ་ཆགས་དུས་བསམ་གཏན་གཉིས་པ་དང་གསུམ་པ་ནས་བརྩམས་ཏེ་ཆགས་པའི་སྐབས་ཀྱང་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། བསྐལ་པ་སྔ་མ་མེས་ཞིག་ན་ཕྱི་མ་བསམ་གཏན་དང་པོ་ནས་འགོ་བརྩམས་ཏེ་ཆགས་དགོས་ལ། སྔ་མ་ཆུ་དང་རླུང་གིས་ཞིག་ན་ཕྱི་མ་བསམ་གཏན་གཉིས་པ་དང་གསུམ་པ་ནས་བརྩམས་ཏེ་ཆགས་དགོས་པའི་ཕྱིར། དེས་ན་གཞུང་ཕལ་ཆེར་ལས་ཐོག་མར་ཚངས་པའི་འཇིག་རྟེན་ཆགས་ཚུལ་གསུངས་པ་ནི་བསྐལ་པ་འདིའི་དབང་དུ་བྱས་པ་ཡིན་པས། འདིའི་སྔ་མའི་བསྐལ་པ་དེ་མེ་འཇིག་གིས་ཞིག་པ་ཡིན་པར་གསུངས་སོ། །དོགས་པ་འདི་ལ་བརྟེན་ནས་བརྒྱད་སྟོང་འགྲེལ་ཆེན་ལས། ཚངས་པའང་ཁ་

― GTD002_Page_0413 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིག་ན་རེ། བསམ་གཏན་བཞི་པར་བྱུང་བ་ཡིན་ཏེ། འཇིག་པ་མེ་དང་ཆུ་དང་ནི། །རླུང་གིས་རྣམ་པ་གསུམ་དུ་འགྱུར། །ཞེས་བྱ་བའི་ཚུལ་གྱིས་གོ་རིམ་བཞིན་དུ་དང་པོ་ལ་སོགས་པ་བསམ་གཏན་གསུམ་ནི་འཇིག་པས་དེ་ཉིད་ནི་ཡུན་རིང་པོར་གནས་པའི་ཕྱིར་བདག་པོ་ཉིད་དུ་མངོན་པར་རློམ་པའི་ཕྱིར་རོ། །ཞེས་ཟེར་རོ། །གཞན་དག་ནི་གཞན་དུ་འཆད་དེ་འོད་གསལ་གྱི་ལྷའི་རིས་ལས་ཞེས་སོགས་ཡོངས་གྲགས་དང་མཐུན་པ་གཅིག་སྟེ་གཉིས་མཛད་དོ། །བྱས་པ་ལ། འོ་ན་གསེར་འཕྲེང་ལས། གཙོ་བོ་གཅིག་ཏུ་ཟད་པའི་ལས་བསགས་པའི་ཕྱིར་དང། ལོག་ལྟའི་གནས་ཡིན་པའི་ཕྱིར། ཞེས་གསུངས་པའང་སྤྱིར་བཏང་མ་ཡིན་པར་བསྐལ་པ་འདིའི་དབང་དུ་བྱས་པ་ཡིན་པར་ཐལ། དེ་འཇིག་རྟེན་ཆགས་པའི་ཐོག་མར་མ་བྱུང་ན་ཐམས་ཅད་རང་གིས་སྤྲུལ་སྙམ་པའི་ལོག་རྟོག་སྐྱེ་དོན་མེད་པའི་ཕྱིར་ན། མ་གྲུབ་སྟེ། དེར་ལོག་ལྟ་སྐྱེས་པ་འགྲོ་བའི་སྒྲིབ་པ་ལྟ་བུ་ལས་དབང་གིས་ཡིན་པའི་ཕྱིར། གཞན་དུ་ན་འཕགས་པ་རྣམས་དེར་མི་སྐྱེ་བ་དང། དང་པོའི་སས་བསྡུས་ཀྱི་གཡོ་སྒྱུ་བཤད་པ་སོགས་རྣམ་གཞག་དུ་མ་འཇིག་པར་འགྱུར་རོ། །ཡང་ཁ་ཅིག །དགའ་རབ་དབང་ཕྱུག་ལ་ལུས་མེད་བདག་པོ་ཞེས་བཤད་པ་མི་འཐད་པར་ཐལ། དེ་ལ་ལུས་མེད་ཅེས་བཤད་པའི་ཕྱིར་ན་མ་ཁྱབ། ཁྱབ་པར་ཐལ། ལུས་མེད་དང་ལུས་མེད་ཀྱི་བདག་པོ་སོ་སོར་འཇོག་དགོས་པའི་ཕྱིར་ནའང་མ་ཁྱབ་སྟེ། མངོན་བརྗོད་ཀྱི་སྐབས་སུ་འདོད་པ་དང་འདོད་ལྷ་གཉི་ག་དབྱེ་བ་མ་བྱས་པར་མིང་ཐུན་མོང་དུ་

― GTD002_Page_0414 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱར་བ་ཡིན་པས། སྒྲ་དེ་འདོད་ལྷ་ལ་སྦྱར་བའི་ཚེ་རྒྱུ་མཚན་སྔར་བཤད་པ་ལྟར་ཡིན་ལ། འདོད་པའམ་འདོད་ཆགས་ལ་སྦྱར་བའི་ཚེ་དེ་ལ་ལུས་མེད་ཀྱང་སེམས་ཅན་རྣམས་ཀྱི་སྙིང་ལ་གནས་ཏེ་སྲིད་པའི་ཀུན་སྦྱོར་སྣ་ཚོགས་རྩོམ་པས། ཡིད་ལ་ཉལ་དང་ལུས་མེད་དུ་བཤད་པའི་ཕྱིར། དཔེར་ན་སྤྱོད་འཇུག་ལས། གནོད་པའི་ཚོགས་རབ་འཕེལ་བའི་རྒྱུ་གཅིག་པུ། །བདག་གི་སྙིང་ལ་ངེས་པར་གནས་འཆའ་ན། །ཞེས་གསུངས་པ་བཞིན་ནོ། །དེས་ན་འདོད་སྲེད་ལ་ལུས་མེད་དང། དགའ་རབ་དབང་ཕྱུག་གིས་སེམས་ཅན་རྣམས་ལ་ཐབས་སྣ་ཚོགས་ཀྱིས་འདོད་སྲེད་བསྐྱེད་ནས་སྲིད་པར་འཆིང་བར་བྱེད་པས་དེའི་བདག་པོར་བཤད་པ་ཡིན་ནོ། །འགའ་ཞིག་ཁམས་གོང་མ་ལ་ལྟོས་ཏེ་འདོད་ཁམས་པ་རྣམས་ལུས་ཆུང་བས་མེད་པ་དང་འདྲ་ཞིང། འདི་དེའི་བདག་པོ་ཡིན་པའི་ཕྱིར་ཟེར་བ་དོན་མེད་དེ། གཟུགས་ཅན་དང་པོ་དཔག་ཚད་ཕྱེད། །འོད་ཆུང་རྣམས་ཀྱི་ལྟག་ཡན་ཆད། །ལུས་ནི་ཉིས་འགྱུར་ཉིས་འགྱུར་ཏེ། །ཞེས་གསུངས་པས། ལྟོས་ས་ལྟོས་འཇོག་གིས་འབྲས་བུ་ཆེ་བ་མན་ཆད་ལུས་མེད་དུ་འགྱུར་བའི་ཕྱིར་རོ། །འདིར་བཅོམ་ལྡན་འདས་ལ་ལྷ་ཆེན་པོ་རྣམས་ཀྱིས་བཏུད་ཚུལ་གྱི་སྒོ་ནས་བསྟོད་པའི་རྒྱུ་མཚན་ལའང། ཁ་ཅིག་ན་རེ། དེ་མདོ་ལས། ལྷ་དང་མི་རྣམས་ཀྱི་སྟོན་པ་ཞེས་གསུངས་པ་དང། སྐབས་གསུམ་པ་དང་དབང་པོའི་དགྲ །ཞེས་སོགས་ཀྱིས་འགྲོ་བ་མ་ལུས་པའི་གཙུག་རྒྱན་དུ་གྱུར་ཚུལ་གསུངས་པ་དང་དོན་འདྲ་ཟེར་ན། ཤིན་ཏུ་མི་འཐད་པར་ཐལ། དེ་སྒྲུབ་ཕྱོགས་ནས་དེ་དག་སྲིད་ཞིའི་འཇིགས་པ་ལས་སྐྱོབ་

― GTD002_Page_0415 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྐྱབས་སུ་གྱུར་ཚུལ་གྱི་སྒོ་ནས་བསྟན་པ་ཡིན་ལ། འདིར་ལྷ་ཆེན་པོ་དེ་དག་གིས་ལམ་ལྟར་སྣང་བསྟན་པ་རྣམས་བཅོམ་ལྡན་འདས་ཀྱིས་གསུང་གི་འོད་ཟེར་གྱིས་རྨེག་མེད་དུ་བཅོམ་སྟེ་སྨྲ་བ་ཟླ་མེད་པར་གྱུར་པ་དེའི་སྒོ་ནས་བསྟོད་པ་ཡིན་པའི་ཕྱིར། དེར་ཐལ། སྔ་མ་ནི། འདྲེན་པ་མཉམ་མེད་སྟོན་པ་བཅོམ་ལྡན་འདས། །ཞེས་པ་ལྟར་བརྩེ་བ་ཆེན་པོ་སོགས་རྒྱ་ཆེ་བའི་ཡོན་ཏན་གྱི་སྒོ་ནས་བསྟོད་ཚུལ་ཡིན་ལ། ཕྱི་མ་ནི། སྨྲ་བ་ཟླ་མེད་འདྲེན་མཆོག་ཤཱཀྱའི་ཏོག །ཅེས་པ་ལྟར་ཟབ་མོ་ལྟ་བའི་སྒོ་ནས་བསྟོད་ཚུལ་ཡིན་པས་སྐབས་འདིར་དེ་གཙོ་བོར་བྱེད་དགོས་པའི་ཕྱིར། དེར་ཐལ། ནང་པའི་བསྟན་པ་བཅོམ་ལྡན་འདས་ཀྱིས་ཕྱེ་བ་དང། ཕྱི་པའི་བསྟན་པ་འཇིག་རྟེན་པའི་ལྷ་ཆེན་པོ་རྣམས་ཀྱི་རྗེས་སུ་འབྲངས་པ་ཡིན་ལ། ཀླ་ཀློ་རྣམས་ལྷ་མ་ཡིན་གྱིས་བྱས་པའི་གཞུང་གི་སྟེང་ནས་ལྟ་སྒོམ་གཏན་ལ་དབབ་རྒྱུ་མེད་ཀྱང་དེ་ལ་སྐྱབས་སུ་བསྟེན་ཅིང་ཚུར་སྡོངས་གྲོགས་བྱེད་པས་ལྷ་མིན་གྱི་རྗེས་འབྲང་དུ་བཤད་ལ། དེའི་རྒྱུ་མཚན་གྱིས་དེ་གསུམ་སྔ་མ་སྔ་མ་ལས་ཕྱི་མ་ཕྱི་མ་དམན་པའི་ཕྱིར། རྟགས་བར་བ་གྲུབ་སྟེ། ཚངས་པ། ཁྱབ་འཇུག །དབང་ཕྱུག་གསུམ་གྱིས་ཕྱི་པའི་གྲུབ་མཐའ་བསྟན་ཚུལ་གྲགས་ཆེ་ལ། བརྒྱ་བྱིན་སྨོས་པའི་རྒྱུ་མཚན་སྤྱིར་ཚངས་པ་རྟག་ཞི་བས་བྱས་པའི་སྒྲ་མདོ་སོགས་ཡོད་ཀྱང། སྒྲའི་ཁུངས་གཏུགས་ས་བརྒྱ་བྱིན་གྲགས་ཆེ་བས་རིག་བྱེད་དེ་ལ་ཞེན་པ་རྣམས་བརྒྱ་བྱིན་ཚད་མའི་སྐྱེས་བུ་ལྟ་བུར་འཛིན་པ་འགོག་ཆེད་དང། བདུད་སྡིག་ཅན་ནི་བྱེད་པ་སྣ་ཚོགས་ཀྱིས་སྐྱེ་བོ་རྣམས་

― GTD002_Page_0416 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིད་བསྒྱུར་ཏེ་སྟོན་པའི་བསྟན་པ་ལས་རྒྱབ་ཀྱིས་ཕྱོགས་པར་བྱེད་པའི་འགལ་ཟླ་ཡིན་པས་འདིར་དངོས་སུ་སྨོས་པ་ཡིན་པའི་ཕྱིར། གོང་གི་རྟགས་གྲུབ་སྟེ། བདག་ཅག་གི་སྟོན་པས་གཞན་སྡེའི་སྟོན་པ་སོགས་སྨྲ་བ་ངན་པ་ཐམས་ཅད་ཟིལ་གྱིས་མནན་ནས་སྨྲ་བ་ཟླ་མེད་པར་གྱུར་པ་དང། རང་ཉིད་ཀྱི་བསྟན་པ་ལ་གཞན་གྱིས་ཀླན་ཀའི་སྐབས་མེད་པས་སྨྲ་བ་བླ་ན་མེད་པར་འགྲོ་བའི་རྒྱུ་མཚན་མཐར་ཐུག་ཟབ་མོ་རྟེན་འབྱུང་གི་དེ་ཁོ་ན་ཉིད་རང་དབང་དུ་བསྟན་པ་འདི་ཉིད་ཡིན་པའི་ཕྱིར། ལེགས་བཤད་སྙིང་པོ་ཆུང་བར། ཁྱོད་ཀྱི་སྨྲ་བ་ཟླ་མེད་པར། །མཐོང་བའི་རྒྱུ་མཚན་རྟེན་འབྱུང་གི །ལམ་འདི་ཉིད། ཅེས་དང། སྨྲ་བ་བླ་ན་མེད་པའི་རྒྱུ། །ཞེས་གསུངས་པའི་ཕྱིར། ཚུལ་འདི་མདོ་དང་ཀླུ་སྒྲུབ་ཡབ་སྲས་ཀུན་གྱི་དགོངས་པ་ཡིན་ཏེ། སྡུད་པ་ལས། མི་ཡི་སེང་གེ་ཤེས་རབ་ཕ་རོལ་ཕྱིན་བརྟེན་ནས། །མུ་སྟེགས་ཅན་མང་སྐྲག་བྱེད་འཇིག་རྟེན་སྒྲ་ཡང་སྒྲོགས། །ཞེས་དང། རྩ་ཤེ་ལས། གང་གིས་རྟེན་ཅིང་འབྲེལ་པར་འབྱུང། །ནས། རྫོགས་པའི་སངས་རྒྱས་སྨྲ་རྣམས་ཀྱི། །དམ་པ། ཞེས་གསུངས་ལ། དེའི་དོན་འགྲེལ་པ་ཚིག་གསལ་ལས། རྟེན་ཅིང་འབྲེལ་བར་འབྱུང་བ་ཇི་སྐད་བསྟན་པ་ཐུགས་སུ་ཆུད་པའི་ཕྱིར་དེ་བཞིན་གཤེགས་པ་ཉག་གཅིག་དོན་ཕྱིན་ཅི་མ་ལོག་པར་གསུངས་པ་ཉིད་དུ་གཟིགས་ཤིང། ཕ་རོལ་པོའི་སྨྲ་བ་ཐམས་ཅད་བྱིས་པ་རྡོལ་ཐབས་སྨྲ་བ་དང་འདྲ་བར་ཐུགས་སུ་ཆུད་ནས། སློབ་དཔོན་ཤིན་ཏུ་དང་བ་དང་ལྡན་པར་གྱུར་པས། སླར་ཡང་བཅོམ་ལྡན་འདས་ལ་ཁྱད་པར་དུ་མཛད་པ་ནི། སྨྲ་རྣམས་ཀྱི། །དམ་པ། ཞེས་བྱའོ། །ཞེས་གསུངས་པའི་ཕྱིར། དོན་འདི་རང་ཅག་རྗེས་

― GTD002_Page_0417 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་རྣམས་ཀྱི་ཉམས་ལེན་དུའང་གོ་དགོས་ཏེ། རང་གི་སྟོན་པ་ཚད་མའི་སྐྱེས་བུར་མཐོང་ན་དེའི་བསྟན་པ་ཁོ་ནར་འཇུག་པ་ལས། གཞན་འཇིག་རྟེན་པའི་ལྷ་ཆེན་པོ་དག་གི་རྗེས་སུའང་འབྲང་མི་རིགས་ན། ར་རྫི་སྐར་རྒྱལ་གྱི་ཆོས་ལུགས་ལྟ་བུ་མི་མ་ཡིན་ཕྲ་མོ་རེས་བསྟན་པ་དང། ཉམས་མྱོང་བན་བུན་གྱི་སྣང་བ་ལ་བརྟེན་པའི་མན་ངག་ཟབ་མོར་གྲགས་པ་རྣམས་ལ་འཇུག་མི་འོས་པ་སྨོས་ཅི་དགོས་པའི་ཕྱིར། དེས་ན་ལྷ་ལས་ཕུལ་བྱུང་གི་བསྟོད་པའི་འགྲེལ་པ་སློབ་དཔོན་ཤེས་རབ་གོ་ཆས་མཛད་པ་ལས། རི་བོ་ཏེ་སིར་སོང་སྟེ་ཕྱིན་པ་དང། ལྷ་ཆེན་པོ་དགྲ་བཅོམ་པའི་དགེ་འདུན་རྣམས་བསོད་སྙོམས་སྟོབ་པ་ལ་བརྩོན་པ་དང་ཕྲད་དེ། དེ་ལས་སངས་རྒྱས་བཅོམ་ལྡན་འདས་ཉིད་ནི་སྲིད་པ་གསུམ་གྱི་བླ་མའི་དམ་པ་ཡིན་ནོ་ཞེས་བསྟན་པ་དང་ངེས་པ་རྙེད་དེ། སངས་རྒྱས་ཀྱི་བསྟན་པ་ལ་ཞུགས་ནས། ཞེས་དང། དེས་མཛད་པའི་ཁྱད་པར་འཕགས་བསྟོད་ཀྱི་འགྲེལ་པ་ལས་ཀྱང་སྔ་མའི་ལོ་རྒྱུས་རྒྱས་པ་དང། དེ་ནས་དེ་བཞིན་གཤེགས་པའི་གསུང་རབ་ཀྱི་ཆོས་རྣམས་ཁ་ན་མ་ཐོ་བ་མེད་པ་ཡིན་པར་ཤེས་པས་རིག་བྱེད་ཀྱི་ཚིག་རྣམས་རྩྭ་ལྟར་བོར་ཏེ། ཞེས་གསུངས་པ་ལྟར་ཡིན་པས། ཆོས་ལུགས་ལྟར་སྣང་ལ་མགོ་མ་འཁོར་བར་རྒྱལ་བ་ཀུན་གྱི་གཤེགས་བཤུལ་འཇམ་མགོན་བླ་མས་གསལ་བར་ཕྱེ་བ་འདི་ལྟ་བུ་ལ་སློབ་དགོས་པ་ནི་མཆོད་བརྗོད་དང་པོ་འདིའི་དོན་གྱི་སྙིང་པོ་ཡིན་ནོ། །དེ་ནས་ཟབ་རྒྱས་ཀྱི་བཀའ་བབ་བྱམས་འཇམ་དབྱངས་གཉིས་ལ་མཆོད་པར་བརྗོད་པ་ནི། མཁྱེན་བརྩེའི་ཞེས་སོགས་ཏེ། རྒྱ་མཚོ་

― GTD002_Page_0418 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་གཏིང་མཐའ་དཔག་དཀའ་བ། རླབས་འཕྲེང་གཡོ་བ། རིན་པོ་ཆེའི་འབྱུང་གནས་སུ་གྱུར་པའི་ཁྱད་ཆོས་གསུམ་དང་ལྡན་པ་ལྟར། འདི་གཉིས་ཀྱང་མཁྱེན་བརྩེའི་གཏིང་མཐའ་དཔག་དཀའ་བའམ། ཡང་ན་མཁྱེན་པ་ནི་ཟབ་མོའི་དེ་ཁོ་ན་ཉིད་དང་རོ་གཅིག་ཏུ་གྱུར་པས་གཏིང་དཔག་དཀའ་བ་དང། བརྩེ་བས་གཞན་ཕན་གྱི་ཐབས་མཐའ་ཡས་པ་ལ་གཞོལ་བས་རྒྱ་ཆེའོ། །ཁྱད་པར་གཉིས་པ་ནི། སྤྱིར་སྤྱོད་པ་ཕྱིན་དྲུག་སོགས་དུ་མ་དང། ཁྱད་པར་མདོ་སྡེ་རྒྱན་ལས། སངས་རྒྱས་འཁོར་གྱི་དཀྱིལ་འཁོར་སྟོན་པའི་རྣམ་པ་ཤེས། །ཞེས་གསུངས་པ་ལྟར། མཛད་པ་བཅུ་གཉིས་ལ་སོགས་པའི་ཚུལ་གྱིས་རྒྱལ་བའི་མཛད་པ་ཐམས་ཅད་རང་གི་ཁུར་དུ་ལེན་པ་འཁོར་ལོས་བསྒྱུར་བའི་སྲས་དང་བློན་པོ་ཆེན་པོ་ལྟ་བུ་སྟེ། དགེ་འདུན་ཉི་ཤུའི་མདོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བདག་ཉིད་ཀྱི་ལུས་དེ་བཞིན་གཤེགས་པའི་སྐུ་ལྟ་བུར་སྤྲུལ་ནས། ཞེས་སོགས་དང། བྱང་ཆེན་གང་དག་སེམས་དང་པོ་བསྐྱེད་པ་ཉིད་ཀྱིས་བྱང་ཆུབ་ཏུ་འཚང་རྒྱ་ཞིང་ཆོས་ཀྱི་འཁོར་ལོ་བསྐོར་ཏེ། ཞེས་སོགས་ལྟ་བུའོ། །འདིའང་དེ་གཉིས་བྱང་སེམས་ཡིན་པའི་དབང་དུ་བྱས་པའོ། །ཁྱད་པར་གསུམ་པ་ནི། དེ་གཉིས་ལེགས་བཤད་ཐམས་ཅད་ཀྱི་གཏེར་དུ་བསྟན་པའི་ཤུགས་ལ་ལེགས་བཤད་འདི་ཐམས་ཅད་ཀྱང་རྩ་བ་སངས་རྒྱས་བཅོམ་ལྡན་འདས་ནས་དེ་གཉིས་ལ་བརྒྱུད་དེ་རིམ་པར་འོངས་པ་ཁོ་ན་ཡིན་པའི་ཚུལ་བསྟན་ཅིང། འདིས་མཚོན་ཏེ་གདམས་པ་གང་ཡིན་ཀྱང་དམ་པ་བར་མ་ཆད་པ་ལས་བརྒྱུད་དེ་འོངས་པ་ཆུ་མགོ་གངས་ལ་ཐུག་པ་ལྟ་བུ་ཞིག་

― GTD002_Page_0419 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་པར་བསྟན་པ་ཡིན་ནོ། །ཤིང་རྟའི་སྲོལ་འབྱེད་གཉིས་ལ་མཆོད་པར་བརྗོད་པ་ནི། བདེ་གཤེགས་གསུང་རབ། ཅེས་སོགས་བྱུང། དེའི་དོན་ལ་ཁ་ཅིག །དགོངས་འགྲེལ་དང་བློ་གྲོས་མི་ཟད་པས་བཤད་ཚུལ་ལྟར་གྱི་ཤིང་རྟའི་སྲོལ་གཉིས་ཕྱེ་བར་བསྟན་ཟེར་ན་མི་འཐད་པར་ཐལ། འདིའི་གསུང་རབ་ཅེས་པ་གཙོ་བོར་དེ་གཉིས་ཙམ་ལ་བྱེད་པའང་མི་འཐད། ཚུལ་ཞེས་པ་བཤད་ཚུལ་ཙམ་དུ་བྱས་པའང་མི་འཐད་པའི་ཕྱིར། དང་པོ་གྲུབ་སྟེ། འདིའི་བདེ་གཤེགས་གསུང་རབ་ཅེས་པ་དང། འོག་ཏུ། འཁོར་བ་ལས་གྲོལ་བ་ལ་རྒྱལ་བའི་གསུང་རབ་ལ་དྲང་ངེས་འབྱེད་དགོས། དེའང་གསུང་རབ་ལ་དྲང་ངེས་འབྱེད་པར་ལུང་བསྟན་པའི་ཤིང་རྟ་ཆེན་པོ་དག་གི་རྗེས་སུ་འབྲང་དགོས། ཞེས་པའི་གསུང་རབ་ལ་དྲང་ངེས་འབྱེད་མཁན་གྱི་ཤིང་རྟའི་སྲོལ་འབྱེད་དེ་ངོས་བཟུང་ནས་མཆོད་བརྗོད་བྱས་པ་ཡིན་པས་གོང་འོག་གི་གསུང་རབ་འདྲ་དགོས་པ་གང་ཞིག །དེ་ལྟར་ན་གསུང་རབ་སྤྱི་དང་གཙོ་བོ་ཤེར་མདོ་ལ་བྱེད་དགོས་པའི་ཕྱིར། དེར་ཐལ། དགོངས་འགྲེལ་དང་བློ་གྲོས་མི་ཟད་པའི་མདོ་གཉིས་དྲང་ངེས་འབྱེད་བྱེད་ཀྱི་གཞུང་ལྡེ་མིག་ལྟ་བུ་ཡིན་གྱི། གང་ལ་དྲང་ངེས་འབྱེད་པའི་གཞིའི་མཛོད་ལྟ་བུ་ཤེར་མདོ་གཙོ་བོར་བྱེད་དགོས་པའི་ཕྱིར། དེར་ཐལ། དབུ་མ་པ་སྨོས་མི་དགོས་ལ། སེམས་ཙམ་པས་ཀྱང་ཤེར་མདོ་མདོ་སྡེ་ཀུན་གྱི་གཙོ་བོ་དང། དེའི་ཆེད་དུ་བྱ་བའི་གདུལ་བྱ་ནི་དགོངས་འགྲེལ་གྱི་ཆེད་དུ་བྱ་བའི་གདུལ་བྱ་ལས་དབང་བོ་རྣོ་བའི་སེམས་ཙམ་པ་ཁོ་ནར་འདོད་པའི་ཕྱིར། འོག་ཏུ་འཆད་དོ། །རྟགས་ཟུར་གཉིས་པ་གྲུབ་སྟེ། ཚུལ་གཉིས་ཞེས་པ་བཤད་

― GTD002_Page_0420 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཙམ་ལ་མི་བྱེད་པར། དྲང་ངེས་སུ་འཇོག་པའི་ལམ་མི་འདྲ་བ་གཉིས་ལ་བྱེད་པའི་ཕྱིར། དེར་ཐལ། སྨྲ་སྒོ་མཚོན་ཆ་ལས། ཚུལ་ནི་འདྲ་དང་སྨད་པ་དང། །སྒོ་དང་སྡོམ་པ་མཚན་ཉིད་དང། །ཐབས་དང་རིག་པ་དོན་དང་འདོད། །ལེགས་པ་དག་ལ་འཇུག་པ་ལས། །ཞེས་ཚུལ་གྱི་སྒྲ་དོན་བཅུར་ཕྱེའང་ལམ་གྱི་གསལ་ཁ་མ་བྱུང་ལ། རྣམ་བཤད་རིགས་པ་ལས། ཚུལ་གྱི་སྒྲ་ནི་བདེན་པ་དང། །ལམ་དང་འབྲེལ་འབྱུང་རིག་པ་དང། །ཞེས་གསུངས་པས། ལམ་ནི་ས་ལམ་གྱི་ལམ་ཁོ་ན་ལ་བྱེད་པ་མ་ཡིན་པར་ལམ་སྲོལ་ལའང་སྦྱོར་དགོས་ཤིང། དེ་ལྟར་ན་རྒྱལ་བའི་ཡུམ་རྣམ་པ་གསུམ་གྱི་དགོངས་དོན་མཐར་ཐུག་དབུ་སེམས་ཀྱི་ལུགས་སུ་འགྲེལ་པའི་ལམ་སྲོལ་ཆེན་པོ་གཉིས་ཕྱེ་བ་གཞུང་གི་དོན་དུ་འཇོག་དགོས་པའི་ཕྱིར། རྒྱལ་བའི་བསྟན་པ་མཆོག་ཅེས་པའང་མཆོག་གི་སྒྲ་ཉེ་ཚིག་ཏུ་བྱས་ཏེ་བསྟན་པ་སྤྱི་ལ་སྦྱར་ཡང་རུང་ལ། འོན་ཀྱང་ཞིབ་ཏུ་བརྟགས་ན་དཔལ་མགོན་ཀླུ་སྒྲུབ་ནི་ཟབ་མོའི་ལམ་གྱི་བཀའ་བབ་དང། འཕགས་པ་ཐོགས་མེད་རྒྱ་ཆེ་བའི་ལམ་གྱི་བཀའ་བབ་ཡིན་པས། གཉི་ག་བསྡོམས་ཏེ་ཟབ་རྒྱས་ཟུང་དུ་འཇུག་པའི་ཐེག་པ་མཆོག་གི་ལམ་བཟང་གསལ་བར་མཛད་པའི་དོན་དུ་བྱས་ན་ལེགས་པས། བསྟན་པ་མཆོག་ཅེས་པའང་ཐབས་ཤེས་ཡ་བྲལ་དུ་མ་སོང་བའི་ཐེག་ཆེན་གྱི་བསྟན་པ་ལ་བྱའོ། །དེ་ནས། ཤིང་རྟ་ཆེན་པོའི་སྲོལ་གཉིས་ལེགས་བཟུང་ཞེས་སོགས་ཀྱིས་ཤིང་རྟའི་སྲོལ་འཛིན་རྣམས་ལ་བསྔགས་ཤིང། དེའང། ཟླ་བ་གྲགས་པའི་ཞབས་ཞེས་པ་ཡན་གྱིས་དབུ་མ་དང། དབྱིག་གཉེན་ཞེས་སོགས་ཀྱིས་སེམས་ཙམ་པའི་སྲོལ་འཛིན་གཙོ་བོ་

― GTD002_Page_0421 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་སྨོས་པ་ཡིན་ཏེ། ཚིག་དོན་གོ་སླའོ། །རྩོམ་པར་དམ་བཅའ་བ་ནི། གཞུང་ལུགས་མང་ཐོས། ཞེས་པ་ནས། ཤིན་ཏུ་བརྩེ་བའི་བསམ་པས་བདག་གིས་བཤད། །ཅེས་པའི་བར་བྱུང། དེའང་གཞུང་ལུགས་མང་ཐོས་ཞེས་སོགས་ཀྱི་ངོས་འཛིན་ལ། གཞུང་ལུགས་མང་དུ་ཐོས་པ་རྔོག་ལོ། ས་པཎ། བུ་སྟོན་སོགས་དང། རིགས་ལམ་ལ་ངལ་བ་མང་དུ་བསྟེན་པ་ཆ་པ་ཆོས་སེང་སོགས་སེང་ཆེན་བརྒྱད་དུ་གྲགས་པ་དང། མངོན་པར་རྟོགས་པའི་ཡོན་ཏན་གྱི་མི་དམན་པ་ཀུན་མཁྱེན་དོལ་བུ་བ་སོགས་སུ་མཁས་པ་འགའ་ཞིག་གསུངས་པ་ལྟར་སོ་སོར་སྦྱར་ཡང་རུང་ལ། འདི་ཉིད་ཀྱི་མཇུག་ཏུའང། རླབས་ཆེན་སྤྱོད་ལ་རིང་ནས་ཞུགས་པ་ཡི། །རྒྱལ་སྲས་རིག་གནས་ཀུན་ལ་མཁས་པས་ཀྱང། །ཤིན་ཏུ་དཔག་དཀའ་ཟབ་ཅིང་རྒྱ་ཆེའི་གནས། །གསུངས་པ་བཞིན་ཐུན་མོང་དུ་སྦྱར་ན་གོ་བ་སྟེར་ཕུལ་ཆེ་སྟེ། དམ་པ་དེ་དག་རེ་རེ་བཞིན་སྤྱོད་ཕྱོགས་རྒྱ་ཆེ་བའི་ལམ་གྱི་མངོན་པར་རྟོགས་པའི་ཡོན་ཏན་དུ་མ་དང་ལྡན་ཞིང་སྐྱེས་ཐོབ་ཀྱི་བློ་གྲོས་ཕུན་སུམ་ཚོགས་པའི་སྟེང་དུ་མདོ་སྔགས་རིག་གནས་སོགས་ཀྱི་གཞུང་ལུགས་ལ་ཐོས་བསམ་རྒྱ་ཆེན་པོ་མཛད། ཁྱད་པར་ལྟ་བའི་གནད་དོན་ཚོལ་བར་འདོད་ནས་རིགས་པའི་ལམ་ལ་སྐྱོ་ངལ་གྱི་འདུ་ཤེས་མེད་པར་འབད་པ་བསྟེན་ཀྱང་རྟོགས་པར་མི་ནུས་པའི་དེ་ཁོ་ན་ཉིད་ཀྱི་དོན་དེ་འཇམ་མགོན་བླ་མ་ཉིད་ཀྱིས་འོལ་ཁ་སོགས་སུ་དཀའ་སྤྱད་ཤུགས་དྲག་པོས་བསག་སྦྱང་དང་གཞུང་དོན་ལ་དཔྱད་པ། ཁྱད་པར་དུ་

― GTD002_Page_0422 ―

^{[མ་དཔེ་གཟིགས་ན་འདིར་གནོན།]}

[Full Size]

མགོན་པོ་འཇམ་པའི་དབྱངས་དགེ་བའི་བཤེས་གཉེན་དུ་བཟུང་ནས་ཚུལ་བཞིན་དུ་བསྟེན་ཅིང་དེས་རྗེས་སུ་བཟུང་བའི་བཀའ་དྲིན་ལས་རྙེད་ཚུལ་བསྟན་པ་ཡིན་ནོ། །འདི་དག་གིས་བསྟན་བཅོས་རྩོམ་པའི་རྒྱུ་ཚོགས་སློབ་དཔོན་སྔ་མའི་མན་ངག་དང་ལྡན་ཚུལ། ནང་གི་དོན་རྟོགས་ཤེས་རབ་དང་ལྡན་ཚུལ་གཉིས་ཀྱང་ཚང་བར་བཤད་པ་ཡིན་ཏེ། སངས་རྒྱས་ནས་བཟུང་དམ་པ་བར་མ་ཆད་པ་དང། ཁྱད་པར་དུ་མགོན་པོ་འཇམ་པའི་དབྱངས་ཀྱིས་རྗེས་སུ་བཟུང་ཚུལ་གསུངས་པས་རྒྱུ་ཚོགས་དང་པོ་བསྟན་ཅིང། དྲིན་གྱིས་ཞེས་པའི་ཤུགས་ལ་རང་སྟོབས་ཀྱིས་རྟོགས་པར་མི་ནུས་ཞེས་ཁེངས་བསྐྱུང་བའང་མཛད་དོ། །ལེགས་མཐོང་ནས་ཞེས་པས་རྒྱུ་ཚོགས་གཉིས་པ་གསུང་རབ་ཀྱི་དགོངས་པ་མ་ནོར་བར་གཟིགས་པའི་མཁྱེན་རབ་ཕུན་སུམ་ཚོགས་པ་བསྟན། ཤིན་ཏུ་བརྩེ་བའི་བསམ་པས་ཞེས་པས་བརྩེ་བ་ཕུན་སུམ་ཚོགས་པ་བསྟན་ཅིང་གདུལ་བྱ་ངེས་ལེགས་སུ་འཁྲིད་པར་བྱེད་པ་ལ་ཐབས་འདི་ལས་ལྷག་པ་མེད་པས་བསྟན་བཅོས་རྩོམ་རིགས་པར་བསྒྲུབས་པའང་ཡིན་ནོ། །འདིས་མཚོན་སྐབས་དུ་མར་སྔ་མ་མང་པོའི་ལུགས་བཀག་ཀྱང་མིང་བཟུང་མ་མཛད་པ་དེ་དག་གི་ལྟ་བ་ལ་ནོར་བ་བྱུང་ཡང་སྤྱོད་ཕྱོགས་མི་ནུབ་པར་བསྐྱངས་པའི་བཀའ་དྲིན་ཆེ་བའི་གནད་ཀྱིས་ཡིན་ལ། རྐང་པ་གཉིས་པར་ངལ་བ་མེད་བསྟེན་ཞེས་ཀྱང་དཔེ་ཁ་ཅིག་ཏུ་འབྱུང་སྟེ་དོན་ལ་ཁྱད་པར་ཆེར་མེད་དོ། །སྣོད་ལྡན་ཉན་པར་བསྐུལ་བ་ནི། བསྟན་པའི་དེ་ཉིད་ཅེས་སོགས་རྐང་པ་གཉིས་བྱུང། མདོ་དང་སྔགས་ཀྱི་བསྟན་པ་གང་ལ་བརྟེན་ནས་ཀྱང་བླ་ན་མེད་

― GTD002_Page_0423 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་བྱང་ཆུབ་སྒྲུབ་པ་ལ་བསྟན་པའི་སྙིང་པོ་དེ་ཁོ་ན་ཉིད་ཀྱི་དོན་འདི་ལས་གཞན་དུ་འདར་མེད་པས། དེ་ཉིད་ཐོས་བསམ་སྒོམ་པས་གཏན་ལ་དབབ་པར་བྱ་བའི་ཕྱིར་ཐོག་མ་ཁོ་ནར་བསམ་སྦྱོར་ཕུན་སུམ་ཚོགས་པའི་སྒོ་ནས་ཚུལ་བཞིན་དུ་ཉན་པར་གྱིས་ཤིག་ཅེས་བསྐུལ་བ་ཡིན་ལ། སྔ་ཕྱི་བསྡོམས་པས་དགོས་སོགས་ཆོས་བཞིའང་བསྟན་ཏེ། གནས་འདི་ནི་ཞེས་པ་ཡན་གྱིས་བརྗོད་བྱ་དང། བསྟན་པའི་དེ་ཉིད་རྟོགས་པའི་རྣམ་དཔྱོད་ཅེས་པས་དེ་ཁོ་ན་ཉིད་ཀྱི་དོན་རྣམ་པར་འབྱེད་པའི་ཤེས་རབ་བསྐྱེད་པ་གནས་སྐབས་ཀྱི་དགོས་པ་དང། སྨྲ་བ་ཟླ་མེད་ཅེས་པས་དེའི་དོན་གོམས་པ་མཐར་ཕྱིན་ནས་སྨྲ་བ་ངན་པ་ཐམས་ཅད་ཟིལ་གྱིས་མནན་ཏེ་གདུལ་བྱ་རྣམས་བྱང་གྲོལ་ལ་འགོད་པ་སངས་རྒྱས་ཀྱི་གོ་འཕང་མཐར་ཐུག་གི་ཉིང་དགོས་སུ་བསྟན་ཅིང། དེ་དག་ཕྱི་མ་ཕྱི་མ་སྔ་མ་དང་འབྲེལ་བ་དེ་འབྲེལ་བ་ཡིན་པས་ཤུགས་ཀྱིས་ཐོན་པའི་ཕྱིར། དེ་དག་གི་མཐའ་ཅུང་ཟད་དཔྱད་ན། ཁ་ཅིག་ན་རེ། འདིའི་དགོས་སོགས་ཆོས་བཞིའི་འབྲེལ་པ་དེ་འབྲེལ་བ་མཚན་ཉིད་པ་མ་ཡིན་པར་ཐལ། འབྲེལ་བ་ལ་གཞན་སྡེས་རྟོག་བཏགས་སྣ་ཚོགས་ཡོད་ཀྱང། དཔལ་ཆོས་ཀྱི་གྲགས་པས་བདག་གཅིག་འབྲེལ་དང་རྟེན་བྱུང་འབྲེལ་གཉིས་སུ་གྲངས་ངེས་པར་གསུངས་པ་གང་ཞིག །འདི་དེ་གཉིས་གང་ཡང་མ་ཡིན་པའི་ཕྱིར། དང་པོ་གྲུབ་སྟེ། རྣམ་འགྲེལ་ལས། དེ་ཕྱིར་དེ་ཙམ་དང་འབྲེལ་བའི། །ངོ་བོ་ཉིད་ཀྱིས་ངོ་བོ་ཉིད། །ལྡོག་པར་འགྱུར་བའམ་རྒྱུ་ཡིས་ནི། །འབྲས་བུ་འཁྲུལ་བ་མེད་པའི་ཕྱིར། །ཞེས་

― GTD002_Page_0424 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་གསུངས་ཤིང། དེ་ལས་འཕྲོས་ཏེ་འབྲེལ་བ་བརྟག་པར་ཚུལ་དེ་རྒྱས་པར་སྒྲུབ་པའི་ཕྱིར་ཟེར་ན། གོང་གི་རྟགས་ཕྱི་མ་མ་གྲུབ་སྟེ། འདིའི་འབྲེལ་བ་རྟེན་བྱུང་འབྲེལ་གྱི་འབྲེལ་བ་ལ་བྱེད་པའི་ཕྱིར། དེར་ཐལ། འཇོག་པའི་གཙུག་རྒྱན་བླངས་ན་དུག་ཞི་བར་བཤད་པ་ལྟ་བུ་དགོས་པ་བཤད་ཀྱང་དེའི་ཐབས་མ་བསྟན་པས་སྐྱེ་བོའི་དོན་དུ་མི་འགྱུར་བ་དེ་འདྲ་མ་ཡིན་པར། སྒྲུབ་བྱེད་ཀྱི་ཐབས་དང་ཐབས་དེ་ལས་བྱུང་བའི་དགོས་པ་གཉིས་འབྲེལ་ཆགས་སུ་འབྱུང་བའི་ཐབས་བྱུང་གི་འབྲེལ་བ་ལ་བྱེད་པའི་ཕྱིར། རྣམ་འགྲེལ་ལས། འབྲེལ་བ་དང་ནི་རྗེས་མཐུན་ཐབས། །སྐྱེས་བུའི་དོན་ནི་རྗོད་བྱེད་ངག །ཅེས་གསུངས་པའི་ཕྱིར། ཡང་ཁོ་ན་རེ། དེ་ཙམ་གྱིས་འདིའི་རྒྱུ་འབྲས་ཀྱི་འབྲེལ་བར་མི་འགྲུབ་པར་ཐལ། དགོས་སོགས་ཆོས་བཞི་འདྲེན་པའི་ཚེ་བརྗོད་བྱ་དང་དགོས་པ་ཉིང་དགོས་ཞེས་འདྲེན་དགོས་པ་གང་ཞིག །དེའི་བརྗོད་བྱ་ལ་སྟོང་ཉིད་ཀྱང་ཡོད། ཉིང་དགོས་ལ་མི་གནས་པའི་མྱང་འདས་ཀྱང་ཡོད་པའི་ཕྱིར་ན་མ་ཁྱབ། དེ་གསུམ་རྒྱུ་འབྲས་སུ་འབྲེལ་ཚུལ་འཆད་པའི་ཚེ་བརྗོད་བྱ་ཙམ་ལ་མི་བྱེད་པར་བརྗོད་བྱའི་དོན་དེ་ཉིད་བསྟན་བཅོས་དེའི་བཤད་པ་ལ་བྱེད་ཅིང། དེ་དང་གདུལ་བྱས་དེའི་དོན་རྟོགས་པ་གཉིས་རྒྱུ་འབྲས་ཡིན་པའི་ཕྱིར་དང། ཉིང་དགོས་ལ་སྤངས་རྟོགས་གཉིས་ཀ་ཡོད་ཀྱང་བརྗོད་བྱ་དང་དགོས་པ་ལ་བརྟེན་ནས་འབྱུང་རྒྱུ་དེ་རྟོགས་པའི་ཆ་ལ་གཙོ་བོར་བྱེད་དགོས་པའི་ཕྱིར། གསེར་ཕྲེང་ལས། བསྟན་བཅོས་དང་དགོས་པའམ། དགོས་པ་གཉིས་རྒྱུ་འབྲས་སུ་འབྲེལ་བ་སྟེ། ཞེས་གསུངས་པའི་ཕྱིར། ཁྱབ་སྟེ། བརྗོད་བྱ་དང་ཞེས་མ་གསུངས་པར་བསྟན་བཅོས་དང་ཞེས་

― GTD002_Page_0425 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པ་དེ། དང་པོར་བསྟན་བཅོས་ལས་བཤད། དེ་ནས་དེ་ཐོས་བསམ་སྒོམ་པའི་རིམ་གྱིས་ཉམས་སུ་ལེན་དགོས་པ་ཤེས་པའི་ཆེད་ཡིན་པའི་ཕྱིར་ཏེ། མདོ་སྡེ་རྒྱན་ལས། འདི་ན་དང་པོར་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང། །ཚུལ་བཞིན་ཡིད་ལ་བྱེད་ལས་ཡང་དག་དོན་ཡུལ་ཡེ་ཤེས་འབྱུང། །ཞེས་སོ། །ཡང་ཁ་ཅིག་ན་རེ། གཞུང་འདིས་བསྟན་པ་མཐའ་དག་གི་དེ་ཁོ་ན་ཉིད་གཏན་ལ་ཕབ་པ་མི་འཐད་པར་ཐལ། མདོ་ཕྱོགས་ཀྱི་བསྟན་པའི་དེ་ཁོ་ན་ཉིད་གཏན་ལ་ཕབ་ཀྱང། སྔགས་ཀྱི་བསྟན་པའི་དེ་ཁོ་ན་ཉིད་གཏན་ལ་མ་ཕབ་པའི་ཕྱིར། དེར་ཐལ། སྔགས་ཀྱི་ལམ་རིམ་གཉིས་སོགས་གཏན་ལ་མ་ཕབ་པའི་ཕྱིར་ན་མ་ཁྱབ། འདིས་སྔགས་ཀྱི་ལམ་ལྷའི་རྣལ་འབྱོར་དང་རྩ་རླུང་སོགས་གཏན་ལ་མ་ཕབ་ཀྱང། སྔགས་ལམ་གྱི་སྙིང་པོ་འོད་གསལ་ཡེ་ཤེས་ཀྱི་ཡུལ་གཏན་ལ་ཕབ་པས་སྔགས་ཀྱི་དེ་ཉིད་མཐར་ཐུག་གཏན་ལ་ཕབ་པར་འགྲོ་བའི་ཕྱིར། དེར་ཐལ། སྔགས་ལམ་ལ་བརྟེན་ནས་སྒྲིབ་གཉིས་སྤོང་བ་ལའང་དངོས་གཉེན་མདོ་ལུགས་ཀྱི་སྟོང་པ་ཉིད་འདི་འཛིན་སྟངས་ཀྱི་ཡུལ་དུ་བྱས་ནས་སྒོམ་དགོས་ཀྱི། འདི་མེད་ན་སྔགས་ལམ་མཐོན་པོ་སྒོམ་ཁུལ་བྱས་ཀྱང་ཐར་ལམ་ཙམ་དུའང་མི་འགྲོ་བའི་ཕྱིར། རྗེ་བཙུན་རེད་མདའ་བའི་དྲིས་ལན་ལས། སྔགས་ཀྱི་རྫོགས་རིམ་རྣམས་ལའང་མཚན་ཉིད་ཀྱི་ལྟ་བའི་མྱོང་བ་འདོན་ལུགས་འདི་མེད་པས། དེ་རྐྱང་པ་བྱས་ན་ལྟ་བའི་གོ་ཡུལ་ཙམ་ཡོད་ཀྱང་ལམ་དུ་གཏན་མི་འགྲོ། ཞེས་དང། རྗེ་བླ་མས་དཀའ་བཞི་པ་ཤེས་རབ་དཔལ་བཟང་ལ་གདམས་པ་ལས། ཟབ་

― GTD002_Page_0426 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་སྤྲོས་པ་དང་བྲལ་བའི་དོན་ལ་ནི་སྔགས་དང་ཕར་ཕྱིན་ཁྱད་པར་མེད་པར་མཁས་པ་གོང་མ་རྣམས་བཞེད་པ་ལེགས་པར་མཐོང་བས་ཟབ་དོན་གྱི་གོ་བ་ནི་དབུ་མའི་བསྟན་བཅོས་ལས་བཙལ་ན་སྔགས་ལས་རྟོགས་སླ་བར་མཐོང་ངོ་། །ཞེས་གསུངས་ཤིང། སྟོང་ཐུན་ལས་ཀྱང། དུས་ཀྱི་འཁོར་ལོའི་རྒྱུད་ཀྱི་དགོངས་པ་ནི། ཞེས་པ་ནས། འཁོར་བའི་རྩ་བ་གཅོད་བྱེད་ཀྱི་གཉེན་པོ་ནི་བདག་མེད་རྟོགས་པའི་ཤེས་རབ་ཉིད་ཡིན་པར་བཞེད་པ་ལ་ཕ་རོལ་ཏུ་ཕྱིན་པའི་དབུ་མ་པ་དང་མི་མཐུན་པ་ཅུང་ཟད་ཀྱང་མེད་དོ་ཞེས་ཤེས་པར་བྱའོ། །ཞེས་གསུངས་པའི་ཕྱིར། དེར་མ་ཟད་སྔགས་དང་ཕར་ཕྱིན་གཉིས་ཀྱི་ལྟ་བའི་དེ་ཁོ་ན་ཉིད་མཆོག་དམན་དུ་བཟུང་ན་རྩ་ལྟུང་དུ་འགྱུར་བར་གསུངས་ཏེ། འགྲེལ་ཆེན་དྲི་མེད་འོད་ལས། གྲུབ་པའི་མཐའ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྔགས་ཀྱི་ཚུལ་ལ་དེ་ཁོ་ན་ཉིད་ཀྱི་ལེའུའོ། །དེ་ལ་སྨོད་པ་གང་ཡིན་པ་དེ་ནི་དྲུག་པའོ། །ཞེས་སོ། །མདོར་ན་འདི་ཉིད་ཀྱི་མཇུག་ཏུ། གསུང་རབ་ཀྱི་དྲང་ངེས་ཕྱེ་ནས་དེ་ཁོ་ན་ཉིད་གཏན་ལ་འབེབས་པའི་ཤིང་རྟའི་སྲོལ་གཉིས་པོ་འདི་ནི་ཕ་རོལ་ཏུ་ཕྱིན་པའི་ཐེག་པའི་སྐབས་སུ་རྒྱས་མོད་ཀྱང། གསང་སྔགས་ཀྱི་གཞུང་འགྲེལ་པའི་པཎྚི་ཏ་དང་གྲུབ་ཐོབ་རྣམས་ཀྱིས་ཀྱང་དེ་གཉིས་གང་རུང་ཞིག་དང་མཐུན་པར་དེ་ཁོ་ན་ཉིད་ཀྱི་དོན་གཏན་ལ་འབེབ་པ་ལས་གཞན་པའི་ཕུང་གསུམ་མེད་པས་ཚུལ་འདི་ནི་གསུང་རབ་མདོ་སྔགས་མཐའ་དག་གི་དེ་ཁོ་ན་ཉིད་གཏན་ལ་འབེབས་པའི་ལམ་དུ་ཤེས་པར་བྱའོ། །ཞེས་གསུངས་པ་འདི་གོ་ན་བསྟན་པའི་སྙིང་པོ་སྟོང་པ་ཉིད་ཅེས་པ་དང། བསྟན་པའི་དེ་ཉིད་རྟོགས་པའི་རྣམ་དཔྱོད་

― GTD002_Page_0427 ―

^{[མ་དཔེ་གཟིགས་ན་འདིར་གནོན།]}

[Full Size]

ཅེས་པ་རྣམས་ལ་ཕྱོགས་རེ་བ་ཙམ་མ་ཡིན་པའི་གོ་བ་མཐའ་ཆོད་པ་སྟེར་ཞིང་ལེགས་བཤད་སྙིང་པོ་ཆེ་ཆུང་གི་མིང་བཏགས་པའི་མཚན་གྱི་དོན་ཡང་ཤེས་པར་འགྱུར་རོ། །ཡང་ཁ་ཅིག་བསྟན་བཅོས་ལ་འཇུག་པའི་ཡན་ལག་དགོས་སོགས་བཞི་བཤད་པ་མི་འཐད་པར་ཐལ། བསྟན་བཅོས་ལ་འཇུག་པའི་སྔོན་དུ་དེ་བཞི་རྟོགས་མི་དགོས་པའི་ཕྱིར། དེར་ཐལ། དེའི་བརྗོད་བྱ་རྟོགས་པ་ལ་དེ་ཁོ་ན་ཉིད་རྟོགས་དགོས་པ་གང་ཞིག །དེ་བསྟན་བཅོས་ལ་ཞུགས་ནས་གཟོད་འབྱུང་དགོས་པའི་ཕྱིར་ཏེ། བསྟན་པའི་དེ་ཉིད་རྟོགས་པའི་རྣམ་དཔྱོད་ཅེས་པས་ཞུགས་པའི་དགོས་པ་བསྟན་པ་གང་ཞིག །འདིའི་འབྲེལ་བ་རྒྱུ་འབྲས་ཀྱི་འབྲེལ་བ་ཡིན་པའི་ཕྱིར། རྟགས་རེ་རེ་ནས་ཁས་ཟེར་ན། གོང་དུ་མ་ཁྱབ་སྟེ། དེའི་སྔོན་དུ་དེ་བཞི་རྟོགས་མི་དགོས་ཀྱང་དོན་འགྱུར་གྱི་ཐེ་ཚོམ་བསྐྱེད་ནས་འཇུག་པའི་རྒྱུ་བྱེད་པའི་ཕྱིར། འཐད་ལྡན་ལས། གང་ཕྱིར་འཇིག་རྟེན་དོན་གཉེར་ནི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་དང། བེའུ་བུམ་སྔོན་པོ་ལས། དོན་འགྱུར་དོན་མི་འགྱུར་བ་དག་ལ། །ཐེ་ཚོམ་ཟ་ནའང་འཇུག་ལྡོག་རྒྱུར་གསུངས། །ཞེས་གསུངས་པའི་ཕྱིར། དེ་འདྲའི་ཐེ་ཚོམ་ཙམ་ཡང་བསོད་ནམས་དམན་པ་ལ་སྐྱེ་དཀའ་ཞིང་སྐྱེས་ན་ཕན་ཡོན་ཤིན་ཏུ་ཆེ་སྟེ། བཞི་བརྒྱ་པ་ལས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཙམ་ཡང་སྐྱེ་མི་འགྱུར། །ཐེ་ཚོམ་ཟོས་པ་ཙམ་གྱིས་ཀྱང། །སྲིད་པ་ཧྲུལ་བོར་བྱེད་པར་འགྱུར། །ཞེས་གསུངས་པའི་ཕྱིར། ལེགས་བཤད་ས་ཧ་ཀ་རའི་ཚལ། །ལོངས་སུ་སྤྱད་པས་

― GTD002_Page_0428 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་མྱོས་པ། །ལག་ལྡན་གླལ་བའི་ཁ་སྒོ་ལས། །ལུང་རིགས་དྲི་བཟང་ཅི་ཡང་སྤྲོ། །ཀྭ་ཡེ་སྙན་ཚིག་གཅམ་བུའི་གླུ་དབྱངས་ཀྱིས། །རྣ་བ་གཙེར་བའི་རྐང་དྲུག་མ་ཡིན་པར། །མདོ་རྒྱུད་མགྲིན་པའི་རྫ་རྔ་རྣམ་སྟོང་དུ། །འཁྲོལ་བ་མཁའ་འགྲོ་དཀར་པོའི་རྗེས་སུ་ཞུགས། ། ༈ གཉིས་པ་གཞུང་དངོས་ཀྱི་དོན་ལ། དྲང་ངེས་འབྱེད་དགོས་པའི་རྒྱུ་མཚན། དྲང་ངེས་ཇི་ལྟར་འབྱེད་པའི་ཚུལ། ཕྱེ་སྟེ་གང་གི་རྗེས་སུ་འབྲང་དགོས་པར་བསྟན་པ་དང་གསུམ། དང་པོ་ལ་དངོས་ཀྱི་དོན་དང། དེ་ཉིད་ཤེས་བྱེད་ཀྱི་མདོ་དང་སྦྱར་བ་གཉིས། དང་པོ་ནི། འཕགས་པ་ཡུལ་འཁོར་སྐྱོང་གིས། ཞེས་པ་ནས། རིགས་པའི་སྒྲུབ་བྱེད་དང་ལྡན་པའི་ཕྱིར་རོ། །ཞེས་པའི་བར་བྱུང། འདི་ལ་སྤྱི་དོན་དང་མཐའ་དཔྱད་གཉིས། དང་པོ་ནི། འཁོར་བ་ལས་གྲོལ་བ་ལ་རྣམ་ཐར་སྒོ་གསུམ་གྱིས་བསྡུས་པའི་དེ་ཁོ་ན་ཉིད་རྟོགས་དགོས། དེ་རྟོགས་པ་ལ་དྲང་དོན་གྱི་གསུང་རབ་ཙམ་ལ་སྦྱངས་པས་མི་ཆོག་པར་ངེས་དོན་གྱི་གསུང་རབ་ཅིག་ལ་ཐོས་བསམ་ཚུལ་བཞིན་དུ་བྱེད་དགོས། གང་ལ་རྟེན་སའི་མདོ་དེའང་ངེས་དོན་ཡིན་པ་དེ་ངེས་དོན་དུ་སྟོན་པའི་ལུང་ཡོད་པ་ཙམ་གྱིས་གོ་མི་ཆོད་དེ། མདོ་ལས་བདེན་པར་གྲུབ་མ་གྲུབ་དང་ཕྱི་དོན་ཡོད་མེད་སོགས་མི་མཐུན་པ་སྣ་ཚོགས་གདུལ་བྱའི་དབང་གིས་གསུངས་ཡོད་པས། མདོའི་སྒྲས་ཟིན་ལ་བསྟན་ཚད་ཁས་བླང་དུ་རུང་བས་ཁྱབ་པ་སྤྱིར་མ་གྲུབ་པ་བཞིན་དུ། འདི་ནི་དྲང་དོན་གྱི་མདོའོ། །འདི་ནི་ངེས་དོན་གྱི་མདོའོ་ཞེས་གསུངས་ཚད་དེ་ལྟར་གནས་པའི་བྱེ་བྲག་གི་ཁྱབ་པའང་མ་གྲུབ་སྟེ། འདིར་བསྟན་འཁོར་ལོ་བར་པ་དགོངས་

― GTD002_Page_0429 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲེལ་ལས་དྲང་དོན་དུ་བཤད་ཀྱང་ངེས་དོན་དུ་གནས་པ་དང། ཐ་མ་དེས་ངེས་དོན་དུ་བཤད་ཀྱང་དྲང་དོན་དུ་གནས་པའི་ཕྱིར་རོ། །དེས་ན་ལུང་ཙམ་རྒྱུ་མཚན་དུ་བྱས་ནས་ཀྱང་དྲང་ངེས་ཀྱི་མདོ་སོ་སོར་འཇོག་མི་ཐུབ་ལ། རང་ཅག་ལྟ་བུས་བློ་སྟོབས་ཀྱིས་ཀྱང་སོ་སོར་འབྱེད་མི་ཐུབ། པཎྚི་ཏ་དང་གྲུབ་ཆེན་ཡིན་ཚད་ཀྱི་གསུང་གི་རྗེས་སུ་འབྲང་ནས་ཀྱང་འབྱེད་མི་ཐུབ་པས། གསུང་རབ་ལ་དྲང་ངེས་འབྱེད་པ་པོར་རྒྱལ་བ་རང་ཉིད་ཀྱིས་ལུང་བསྟན་པའི་ཤིང་རྟ་ཆེན་པོ་གཉིས་གང་རུང་ཞིག་གི་རྗེས་སུ་ཞུགས་ཏེ་དྲང་ངེས་འབྱེད་དགོས། དེའི་རྗེས་སུ་འཇུག་ཚུལ་ཡང་དེས་མཛད་པའི་གཞུང་བཀླག་པ་ཙམ་ལ་མི་ཟེར་བར། རྒྱལ་བའི་གསུང་རབ་ཀྱི་དགོངས་པ་མཐའ་གཞན་དུ་འདྲེན་པའི་གོལ་ས་མཐའ་དག་བཀག་ནས་འདི་ཉིད་ཁོ་ནར་གནས་དགོས་ཞེས་དངོས་སྟོབས་ཀྱི་རིགས་པས་སྒྲུབ་ཚུལ་གྱི་སྲོལ་ཕྱེ་བའི་རིགས་ལམ་དྲི་མ་མེད་པ་དེ་དག་ལ་བརྟེན་ནས་ལེགས་པར་དཔྱད་དེ་གཏན་ལ་འབེབས་དགོས་སོ། །དེ་ལྟར་ན་གཏན་ལ་དབབ་བྱའི་དོན་གྱི་མཐར་ཐུག་པ་ཆོས་རྣམས་ཀྱི་གནས་ལུགས་སྟོང་པ་ཉིད་དང། གཏན་ལ་འབེབས་བྱེད་ཀྱི་མཐར་ཐུག་པ་ཤིང་རྟ་ཆེན་པོའི་རིགས་ལམ་རྣམ་པར་དག་པའི་དཔྱད་པ་ཁོ་ན་ལ་ཐུག་གོ །དེའང། སྟོང་པ་ཞི་བ་སྐྱེ་བ་མེད་པའི་ཚུལ། །ཞེས་སྟོང་པ་ཉིད་ཀྱི་དོན་དེའང་རྣམ་ཐར་སྒོ་གསུམ་དུ་ཕྱེ་ནས་གསུངས་ཏེ། སྟོང་པ་ཞེས་པས་རང་གི་ངོ་བོ་བདེན་པས་སྟོང་པའི་སྟོང་པ་ཉིད་དང། གདོད་ནས་སམ་ཐོག་མ་ནས་དོན་དམ་པར་སྐྱེ་མ་མྱོང་བས་གཟོད་མ་ནས་ཞི་བ་སྟེ་མཚན་མ་མེད་པ་དང། མ་འོངས་པ་ནའང་དོན་

― GTD002_Page_0430 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་པར་སྐྱེ་བར་མི་འགྱུར་བས་སྐྱེ་བ་མེད་པ་སྟེ་སྨོན་མེད་དང་གསུམ་དུ་གསུངས་སོ། །སྤྱིར་རྣམ་ཐར་སྒོ་གསུམ་གྱི་འཇོག་ཚུལ་དུ་མ་ཡོད་དེ། མཛོད་ལས། མཚན་མེད་ཞི་བའི་རྣམ་པ་དང། །སྟོང་ཉིད་བདག་མེད་སྟོང་ཉིད་དུ། །འཇུག་པའོ་སྨོན་པ་མེད་པ་ནི། །དེ་ལས་གཞན་བདེན་རྣམ་པ་ཅན། །ཞེས་སྟོང་བདག་མེད་གཉིས་རྣམ་པར་ཐར་པའི་སྒོ་སྟོང་པ་ཉིད་དང། སྡུག་བདེན་གྱི་ལྷག་མ་གཉིས་དང། ཀུན་འབྱུང་གི་ཁྱད་ཆོས་བཞི་ལམ་གྱི་བཞི་རྣམས་སྨོན་མེད་དང། འགོག་བདེན་གྱི་ཁྱད་ཆོས་བཞི་ནི་མཚན་མེད་དུ་བཤད་དེ། གཟུགས་སོགས་ཡུལ་ལྔ། སྐྱེ་རྒ་མི་རྟག་པ་སྟེ་འདུ་བྱས་ཀྱི་མཚན་ཉིད་གསུམ། ཕོ་མོའི་མཚན་མ་གཉིས་ཏེ་མཚན་མ་བཅུ་དང་བྲལ་བའི་ཕྱིར་རོ། །ལམ་གྱི་བཞི་ལ་དེ་མ་ཚང་ཞིང་མྱ་ངན་ལས་འདའ་བའི་ཚེ་ལམ་སུན་འབྱིན་པའི་ལམ་གསུམ་གྱི་སྒོ་ནས་རྒྱུན་བཅད་དེ་ངེས་པར་འབྱུང་བའི་གནས་ཡིན་པའི་ཕྱིར་སྨོན་མེད་དུ་བཤད་དོ། །ཐེག་ཆེན་ཐུན་མོང་བའི་ལུགས་ནི། མདོ་སྡེ་རྒྱན་ལས། ཏིང་འཛིན་གསུམ་གྱི་སྤྱོད་ཡུལ་ནི། །བདག་མེད་རྣམ་པ་གཉིས་པོ་དང། །བདག་ཏུ་འཛིན་པའི་རྟེན་དང་ནི། །དེ་རྟག་ཉེར་ཞི་ཡིན་ཞེས་བྱ། །ཞེས་དང། འགྲེལ་པ་དོན་གསལ་སྐབས་བཞི་པར་བདེན་བཞིའི་ཁྱད་ཆོས་བཅུ་དྲུག་ལ་སྦྱར་བ་གཅིག་དང་གཉིས་ཡོད་པ་ཅུང་མི་འདྲ་སྟེ། རྒྱན་གྱི་བདག་མེད་གཉིས་ཞེས་པ་དབྱིག་འགྲེལ་ལས། སྟོང་པ་ཉིད་ཀྱི་ཏིང་ངེ་འཛིན་ནི་གང་ཟག་དང་ཆོས་ལ་བདག་མེད་པའོ། །ཞེས་བདག་མེད་གཉིས་གསུངས་ཤིང། འགྲེལ་པ་དོན་གསལ་ལས་དེ་ཁྱད་ཆོས་བཅུ་དྲུག་གི་ནང་གི་སྟོང་བདག་མེད་ཙམ་ལས་ཆོས་ཀྱི་བདག་

― GTD002_Page_0431 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་མ་བཤད་ལ། འགྲེལ་པས་ལམ་གྱི་བཞི་མཚན་མེད་ལ་སྦྱར་ཀྱང། རྒྱན་ལས་ལམ་གྱི་བཞི་གང་ལའང་མ་སྦྱར་ཏེ། བདག་འཛིན་གཉིས་ཤེས་པ་དང། སྤོང་བ་དང་སྤངས་པ་མངོན་དུ་བྱེད་ཚུལ་ཙམ་གསུངས་པ་ཡིན་གྱི། བདེན་བཞིའི་ཁྱད་ཆོས་བཅུ་དྲུག་ལ་སྦྱར་བ་མ་ཡིན་པའི་ཕྱིར། བསྡུ་བ་ལས། ཀུན་བཏགས་པའི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་སྟོང་པ་ཉིད་རྣམ་པར་བཞག་གོ །གཞན་གྱི་དབང་གི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་སྨོན་པ་མེད་པ་རྣམ་པར་བཞག་གོ །ཡོངས་སུ་གྲུབ་པའི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་མཚན་མ་མེད་པ་རྣམ་པར་བཞག་གོ །ཞེས་བདག་གཉིས་སུ་ཀུན་བཏགས་པ་ལྟར་རྣམ་པར་མི་རྟོག་པ་དང། བདག་ཏུ་འཛིན་པའི་རྟེན་མ་དག་པའི་གཞན་དབང་ལ་རྒྱབ་ཀྱིས་ཕྱོགས་པ་དང། དེ་རྟག་ཏུ་ཞི་བའི་མྱང་འདས་ཡོངས་གྲུབ་ཀྱི་ངོ་བོ་ཉིད་མངོན་དུ་བྱས་པས་ཟག་མེད་ཀྱི་དགའ་བདེ་འགྲུབ་ཅིང་སྲིད་པའི་བདེ་བ་སོགས་ལ་སྨོན་པ་ལས་འདའ་བར་འགྱུར་བ་སྟེ། རྒྱན་ལས། རྣམ་པར་མི་རྟོག་རྒྱབ་ཀྱིས་ཕྱོགས། །རྟག་ཏུ་དགའ་དང་ལྡན་པ་འོ། །ཞེས་སོགས་གསུངས་པའི་ཕྱིར། འདིར་རྒྱུ་ཆོས་ཀྱི་སྡོམ་བཞི་ལ་སྦྱོར་ཚུལ་སོགས་མང་སྟེ། རྒྱན་གྱི་ཊཱིཀྐ་རྣམས་ལས་ཤེས་དགོས་ཤིང་མདོར་བསྡུས་གཞན་དུ་བཤད་ཟིན། ཐེག་ཆེན་ཐུན་མོང་མ་ཡིན་པའི་རྣམ་ཐར་སྒོ་གསུམ་ལ་རྒྱུ་འབྲས་ངོ་བོ་གསུམ་ལ་སྦྱར་བ་དང། བྱ་བྱེད་ལས་གསུམ་ལ་སྦྱར་བ་སོགས་ལས། དང་པོ་ནི་རྣམ་སྣང་མངོན་བྱང་ལས། སེམས་ནི་རང་དངོས་མེད་ཕྱིར་དང། །རྒྱུ་དང་འབྲས་བུ་

― GTD002_Page_0432 ―

^{[མ་དཔེ་གཟིགས་ན་འདིར་གནོན།]}

[Full Size]

སྤངས་པའི་ཕྱིར། །ཞེས་དང། ཤཱུ་ནྱ་ཏའི་སྔགས་དོན་བཤད་པའི་ཐད་ཀྱི་སྒྲུབ་ཐབས་ཀུན་བཟང་ལས། ངོ་བོ་ཉིད་དང་བྲལ་ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་ཕྱིར་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་ཏེ། ལམ་དོན་དམ་པར་རྒྱུ་ལས་མ་སྐྱེས་པ་དང། དོན་དམ་པར་མ་གྲུབ་པ་དང། དོན་དམ་པར་འབྲས་བུ་མི་འབྱིན་པ་ཞེས་སྦྱར་ན་ལམ་གྱི་དེ་གསུམ་ལམ་རང་ཉིད་ཀྱི་སྟེང་དུ་བཞག་ནུས་ལ། དེའི་རྒྱུ་དོན་དམ་པར་མ་གྲུབ་པ་ཞེས་སོགས་སུ་སྦྱར་ན་མི་ནུས་སོ། །བྱ་བྱེད་ལས་གསུམ་ལ་སྦྱར་བ་ནི། སྤྱིར་འཁོར་གསུམ་མི་དམིགས་པར་བཤད་པ་ཐམས་ཅད་འདི་ཡིན་ལ། ཁྱད་པར་དུ་གསང་འདུས་རྩ་རྒྱུད་ལེའུ་གཉིས་པར། དངོས་པོ་མེད་པས་སྒོམ་པ་མེད། །བསྒོམ་པར་བྱ་བ་བསྒོམ་པ་མིན། །དེ་ལྟར་དངོས་པོ་དངོས་མེད་པས། །བསྒོམ་པ་དམིགས་སུ་མེད་པ་འོ། །ཞེས་པ་འདི་ལ་ཚུལ་བཞིའི་བཤད་པ་འབྱུང་བ་ལས་སྤྱི་དོན་གྱི་སྐབས་རྒྱུ་འབྲས་ངོ་བོ་གསུམ་ལ་སྦྱར་བ་དེ་ཉིད་བཤད་ཀྱང་ཡིག་དོན་གྱི་སྐབས་སུ་འདི་ཉིད་བཤད་དོ། །དེའང་བྱ་བ་སྟེ་བསྒོམ་བྱའི་ཡུལ་གྱི་དངོས་པོ་དང། བྱེད་པ་སྟེ་སྒོམ་བྱེད་ཀྱི་ལམ་གཉིས་དོན་དམ་པར་མ་གྲུབ་པས། དེས་དེ་བསྒོམ་པའང་དོན་དམ་པར་མ་གྲུབ་པར་འགྱུར་ཏེ། རྩ་ཤེ་ལས། ལམ་ལ་རང་བཞིན་ཡོད་ན་ནི། །བསྒོམ་པ་འཐད་པར་མི་འགྱུར་རོ། །ཞེས་དོན་དམ་པར་གྲུབ་ན་བསྒྱུར་དུ་མེད་པ་ལ་བསྒོམ་པ་དོན་མེད་པའི་ཕྱིར། དེ་ལྟར་གསུམ་བཤད་ཀྱང་རྣམ་པར་ཐར་པའི་སྒོ་སྟོང་པ་ཉིད་དུ་འདུས་ཏེ། ཀླུ་སྒྲུབ་ཀྱིས་མཛད་པའི་བྱང་ཆུབ་ཀྱི་ཚོགས་ལས། རང་བཞིན་མེད་

― GTD002_Page_0433 ―

^{[མ་དཔེ་གཟིགས་ན་འདིར་གནོན།]}

[Full Size]

པས་སྟོང་ལ་སྟོང་པ་ནི། །ཡིན་དང་མཚན་མས་ཅི་ཞིག་བྱེད་པར་འགྱུར། །མཚན་མ་ཐམས་ཅད་ལོག་པར་གྱུར་པའི་ཕྱིར། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་པའི་ཕྱིར། ཁྱབ་སྟེ། ཡིན་དང་ཞེས་པ་ནི་ཡིན་ན་ཞེས་པ་དང་འདྲ་ལ། སྨྲ་སྒོ་མཚོན་ཆ་ལས། རྒྱུ་མཚན་དོན་གྱིས་བསྟན་པ་དང། །ཞེས་ནི་སྒྲ་རྒྱུ་མཚན་ལ་འཇུག་པར་བཤད་པས་འདིའང་རྒྱུ་མཚན་སྟོན་པའི་ཚིག་ཡིན་པའི་ཕྱིར། སྔགས་རིམ་ལས། སྟོང་པ་ཉིད་དང་མཚན་མེད་དང་སྨོན་མེད་གསུམ་བརྗོད་པ་སྒྲའི་དབང་གིས་ཐ་དད་པར་བཞག་ཀྱང། དོན་དམ་པར་སྟོང་པ་ཁོ་ནར་གཞན་གཉིས་འདུས་པར་གསུངས་པ་ནི། བྱང་ཆུབ་ཀྱི་ཚོགས་ལས། རང་བཞིན་མེད་པས་སྟོང་ལ་ཞེས་སོགས་གོང་གི་ལུང་དེ་དྲངས་པའི་ཕྱིར། མཐའ་དཔྱད་པ་ལ། ཁ་ཅིག་ན་རེ། ཁྱོད་ཀྱིས་དྲངས་པའི་ཡུལ་འཁོར་སྐྱོང་གིས་ཞུས་པའི་ལུང་དེ་མི་འཐད་པར་ཐལ། ལུང་དེ་ཡུལ་འཁོར་སྐྱོང་གིས་ཞུས་པའི་མདོར་མེད་པའི་ཕྱིར་ན། མཁས་པ་ཁ་ཅིག་བོད་དུ་འགྱུར་བའི་མདོ་འདིར་མེད་ཀྱང་དབུ་མ་སྣང་བ་སོགས་སུ་དྲངས་པ་འདིར་བཀོད་པ་ཡིན་པས་མི་འགལ་ཟེར། གཉིས་ཀ་མི་འཐད་པར་ཐལ། ཡུལ་འཁོར་སྐྱོང་ཞུས་བོད་དུ་འགྱུར་བ་འདིར་ཡང་དེ་ཡོད་པའི་ཕྱིར། དེར་ཐལ། ཡུལ་འཁོར་སྐྱོང་གིས་ཞུས་པ་ཆུང་ངུ་ལོགས་སུ་བཞུགས་པ་དེར་མེད་ཀྱང། དཀོན་མཆོག་བརྩེགས་པའི་ཆོས་ཀྱི་རྣམ་གྲངས་བཅོ་བརྒྱད་པ་ཡུལ་འཁོར་སྐྱོང་ཞུས་ཀྱི་ལེའུའི་ནང་དུ་ཡོད་པའི་ཕྱིར་ཏེ། དེ་ཉིད་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་འགྱུར་ཏེ། །ཐུགས་རྗེའི་

― GTD002_Page_0434 ―

^{[མ་དཔེ་གཟིགས་ན་འདིར་གནོན།]}

[Full Size]

ཐབས་ཚུལ་རིགས་པ་བརྒྱ་དག་གིས། །དེ་དག་རྣམས་ནི་འཛུད་པར་མཛད་པ་ལགས། །ཞེས་འབྱུང་བ་དང་སྔ་མ་གཉིས་འགྱུར་ཁྱད་ཙམ་ལས་གཅིག་ཏུ་སྣང་བའི་ཕྱིར། དེར་ཐལ། དགེ་སློང་དག་གམ་མཁས་རྣམས་ཀྱིས། །ཞེས་སོགས་ཀྱང་དྲི་མེད་འོད་རྭ་འགྱུར་དུ་འདིར་དྲངས་པ་བཞིན་འབྱུང་ཡང། འབྲོ་འགྱུར་ལས། བསྲེགས་བཅད་བརྡར་བའི་གསེར་བཞིན་དུ། །མཁས་པ་རྣམས་ཀྱིས་ཡོངས་བརྟགས་ནས། །བདག་གསུང་བླང་བྱ་དགེ་སློང་དག །གུས་པའི་ཕྱིར་ནི་མ་ཡིན་ནོ། །ཞེས་འབྱུང་ལ། འགྱུར་གཞན་ཞིག་ཏུ། བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །མཁས་པ་དག་གིས་བླང་བྱ་ཡི། །དགེ་སློང་དག་གིས་གུས་ཕྱིར་མིན། །ཞེས་འབྱུང་བ་ཚིག་རིས་མི་འདྲའང་མདོ་གཅིག་ཡིན་པ་བཞིན་ཡིན་པའི་ཕྱིར། ཁ་ཅིག །དངོས་པོ་མེད་པས་སྒོམ་པ་མེད། །ཅེས་སོགས་ཀྱིས་བྱ་བྱེད་ལས་གསུམ་ལ་སྦྱར་བའི་རྣམ་ཐར་སྒོ་གསུམ་ཁོ་ན་བསྟན་ཟེར་ན། མི་འཐད་པར་ཐལ། དེས་རྒྱུ་འབྲས་ངོ་བོ་གསུམ་ལ་སྦྱར་བའི་རྣམ་ཐར་སྒོ་གསུམ་ཡང་བསྟན་པའི་ཕྱིར། དེར་ཐལ། ཤཱུ་ནྱ་ཏའི་སྔགས་དོན་ལ་རྒྱུ་འབྲས་ངོ་བོ་གསུམ་ལ་སྦྱར་བའི་རྣམ་ཐར་སྒོ་གསུམ་བཤད་དགོས་པ་གང་ཞིག །དེའི་སྔགས་དོན་དང་དངོས་པོ་མེད་པས་ཞེས་སོགས་དོན་འདྲ་བའི་ཕྱིར། དང་པོ་གྲུབ་སྟེ། སྒྲུབ་ཐབས་ཀུན་བཟང་ལས། ངོ་བོ་ཉིད་དང་འབྲེལ་ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་ཕྱིར་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་པའི་ཕྱིར། གཉིས་པ་གྲུབ་སྟེ། མདོར་བྱས་ལས། དངོས་པོ་

― GTD002_Page_0435 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པས་སྒོམ་པ་མེད། །ཅེས་པ་ནས། ཚིགས་བཅད་འདི་ཡིས་རྒྱུ་མི་རྒྱུའི། །བདག་ཉིད་ཆེ་རྣམས་སྟོང་པར་བསྒོམ། །ཆོ་གའི་སྦྱོར་བ་འདི་ཡིས་ནི། །ཡེ་ཤེས་ས་གཞིར་བྱིན་གྱིས་བརླབས། །ཞེས་གསུངས་པའི་ཕྱིར། ཡང་ཁ་ཅིག །ཁྱོད་ཀྱིས་བྱ་བྱེད་ལས་གསུམ་ལ་སྦྱོར་བའི་ཚུལ་དེ་མི་འཐད་པར་ཐལ། སྟོང་ཉིད་དེ་གསུམ་དུ་ཕྱེ་བའི་ནང་གི་ལས་མ་ཡིན་པའི་ཕྱིར། དེར་ཐལ། དེའི་ནང་གི་བྱ་བ་ཡིན་པའི་ཕྱིར་ཏེ། བསྒོམ་བྱ་སྒོམ་བྱེད་གཉིས་སུ་ཕྱེ་བའི་ནང་གི་བསྒོམ་བྱ་ཡིན་པའི་ཕྱིར་ན་མ་ཁྱབ། ཁྱོད་ལྟར་ན། ཚད་མས་གཞལ་བྱ་རྟོགས་ཚུལ་དང་སྲོག་གཅོད་ལྟ་བུའི་བྱ་བྱེད་ལས་གསུམ་གྱི་ནང་གི་བྱ་བ་ལའང་གཞལ་བྱ་དང་གསད་བྱ་དེ་འཇོག་རིགས་པར་ཐལ། དེར་ཡང་གཞལ་བྱ་དང་གསད་བྱ་ཞེས་ཟེར་བའི་ཕྱིར། ཁྱབ་པ་འགྲིག །འདོད་མི་ནུས་ཏེ། གསུམ་དུ་ཕྱེ་བའི་ཚེ་དེ་གཉིས་ལས་སུ་འཇོག་དགོས་པའི་ཕྱིར། གསེར་འཕྲེང་ལས། ལས་སུ་བྱ་བ་གང་བསད་པར་བྱ་བ་དང། བྱེད་པ་པོ་གང་གིས་གསོད་པ་པོ་དང། བྱ་བའི་རང་བཞིན་བསད་པ་སྟེ། ཞེས་དང། རྣམ་འགྲེལ་ཊཱིཀ་ཆེན་ལས། འབྲས་བུ་ནི་མཚོན་བྱ། ཚད་མ་ནི་མཚན་ཉིད། གཞལ་བྱ་ནི་ཚད་མ་དང་འབྲས་བུ་དེ་གཉིས་ཀྱིས་སྒྲོ་འདོགས་གཅད་པར་བྱ་བའི་ཡུལ་ལོ། །དེ་དག་ནི་རིམ་པ་བཞིན་བྱ་བ་དང། བྱེད་པ་དང། ལས་ཀྱི་བདག་ཉིད་དུ་བརྗོད་དོ། །ཞེས་གསུངས་པའི་ཕྱིར། གཞན་ཡང་ཁྱོད་ལྟར་ན་ཚད་མ་མདོ་ལས། བྱ་བ་མེད་པའང་མ་ཡིན་ནོ། །ཞེས་དང། དེའི་རང་འགྲེལ་ལས། འདི་ལ་ཕྱི་རོལ་པ་རྣམས་ཀྱི་བཞིན་དུ་

― GTD002_Page_0436 ―

^{[མ་དཔེ་གཟིགས་ན་འདིར་གནོན།]}

[Full Size]

ཚད་མ་ལས་འབྲས་བུ་དོན་གཞན་དུ་གྱུར་པ་ནི་མེད་ཀྱི། ཞེས་བྱ་བ་རྫས་གཞན་མེད་ཀྱང་བྱ་བ་གཏན་མེད་དུ་མི་འགྱུར་བའི་སྐྱོན་སྤོང་མཛད་པ་འབྲེལ་མེད་པར་ཐལ། བྱ་བ་དེ་བྱེད་པ་ལས་རྫས་གཞན་དུ་མ་གྲུབ་པའི་ཁས་བླང་རང་ལ་མེད་པའི་ཕྱིར། དེར་ཐལ། ཁྱོད་ཀྱིས་གསད་བྱ་དེ་བྱ་བར་བཞག་པ་གང་ཞིག །གསད་བྱ་དེ་གསོད་པ་པོའི་བདག་ཉིད་དུ་ཁས་ལེན་པ་བཞད་གད་ཡིན་པའི་ཕྱིར། བྱ་བ་ཞེས་པ་གཞན་གཉིས་ལ་ལྟོས་ནས་བཞག་ཙམ་མ་གཏོགས་དེ་ལས་དོན་གཞན་དུ་གྱུར་པ་མེད་པ་འདི་བྱ་བྱེད་ལས་གསུམ་དུ་ཕྱེ་བའི་སྐབས་ཐམས་ཅད་ལ་འདྲ་སྟེ། རྣམ་འགྲེལ་ལས། དངོས་སུ་ཐ་དད་མེད་པར་འདོད། །བྱ་བ་བྱེད་པའི་ཐ་སྙད་དག །ཐམས་ཅད་དེ་ལྟར་རྣམ་པར་གནས། །ཞེས་དང། ལྷས་ཀྱང། ཐམས་ཅད་དེ་ལྟའི་རྣམ་པ་ཅན་ཉེ་བར་བཏགས་པའི་རང་བཞིན་ཡིན་གྱི། དངོས་པོ་ལ་བརྟེན་པ་ཅན་ནི་མ་ཡིན་ནོ། །ཞེས་གསུངས་པའི་ཕྱིར། ཁ་ཅིག །སྤྱིར་རྣམ་པར་ཐར་པའི་སྒོ་གཞན་གཉིས་སྟོང་པ་ཉིད་དུ་འདུའང། བུམ་པ་ལྟ་བུའི་རྒྱུ་འབྲས་ངོ་བོ་གསུམ་ལ་སྦྱར་བའི་ནང་གི་མཚན་མེད་སྨོན་མེད་གཉིས་དེའི་སྟོང་ཉིད་དུ་འདུ་ཚུལ་མེད་ཟེར་ན། མི་འཐད་པར་ཐལ། བུམ་པའི་རྒྱུ་བདེན་པར་མེད་པ་མཚན་མེད་དང། བུམ་པའི་འབྲས་བུ་བདེན་པར་མེད་པ་སྨོན་མེད་དུ་བྱས་པའི་ཚེ་བུམ་པའི་སྟོང་ཉིད་དུ་མི་འདུའང། འཇོག་ཚུལ་དེ་ཁོ་ནར་མ་ངེས་པའི་ཕྱིར། དེར་ཐལ། བུམ་པ་དོན་དམ་པར་རྒྱུ་ལས་མ་སྐྱེས་པ་དང། དེས་དོན་དམ་པར་འབྲས་བུ་མི་སྐྱེད་པ་གཉིས་ཀྱང་མཚན་མེད་དང་སྨོན་མེད་དུ་འཇོག་དགོས་པའི་ཕྱིར། དེར་ཐལ། མངོན་རྟོགས་རྒྱན་ལས། རྣམ་ཐར་སྒོ་གསུམ་ཤེས་པ་དང། །

― GTD002_Page_0437 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པའི་བཤད་བྱའི་ཡུམ་གྱི་མདོ་ལས། ཆོས་རྣམས་ངོ་བོ་ཉིད་མ་མཆིས་པ། སྐྱེ་བ་མ་མཆིས་པ། འགག་པ་མ་མཆིས་པ། ཞེས་ཆོས་རེ་རེའི་སྟེང་དུའང་ཁྱད་པར་དེ་དག་སྦྱར་ནས་གསུངས་པའི་ཕྱིར། དེར་ཐལ། དེའི་རྒྱུ་མཚན་གཞི་བུམ་པ་གཅིག་པུ་ལའང་བདེན་པར་ཞེན་པའི་ཚེ། རྒྱུ་ལས་སྐྱེས་པའི་ཆ་ནས་བདེན་པར་ལྟ་བ་དང། འབྲས་བུ་སྐྱེད་པའི་ཆ་ནས་བདེན་པར་ལྟ་བ་སོགས་སྣ་ཚོགས་འབྱུང་བས། དེ་འགོག་ཆེད་དུ་རྣམ་ཐར་སྒོ་གསུམ་གྱི་དབྱེ་བ་མཛད་པའི་ཕྱིར། ཚངས་པས་ཞུས་པ་ལས། བཅོམ་ལྡན་འདས། གང་དག་ཆོས་འགའ་ཞིག་སྐྱེ་བའམ་འགག་པར་འཚལ་བ་དེ་དག་ལ་ནི་སངས་རྒྱས་འབྱུང་བ་མ་ལགས་སོ། །བཅོམ་ལྡན་འདས། གང་དག་འཁོར་བ་དངོས་པོར་འཚོལ་བ་དེ་དག་ནི་འཁོར་བ་ལས་འདའ་བ་མ་ལགས་སོ། །ཞེས་སོགས་གསུངས་པའི་ཕྱིར། བྱ་བྱེད་ལས་གསུམ་ལ་སྦྱར་བའི་ཚེའང་བསྒོམ་བྱ་སྒོམ་བྱེད་བསྒོམ་པའི་བྱ་བ་གསུམ་བདེན་པས་སྟོང་པ་རིམ་བཞིན་མཚན་མེད་སྨོན་མེད་སྟོང་ཉིད་གསུམ་དུ་འཇོག་ཅིང་ཕྱི་མའི་ནང་དུ་སྔ་མ་གཉིས་འདུས་པའི་ཕྱིར། དང་པོ་གྲུབ་སྟེ། གསེར་འཕྲེང་ལས། རྣམ་པར་ཐར་པའི་སྒོ་མཚན་མ་མེད་པ་རྫོགས་པར་བསྒོམ་པ་ཉིད་ཀྱིས་སེམས་ཅན་གྱི་གཟུགས་ནས་རྣམ་མཁྱེན་གྱི་བར་ལ་མཚན་མར་འཛིན་པ་སྤོང་བར་གནས་པ་སྟེ། ཞེས་ཡུལ་ལ་བདེན་ཞེན་བཀག་པའི་ལྡོག་ཆ་ནས་གསུངས་པ་གང་ཞིག །ལུགས་འདིར་ཡུལ་སྔོན་པོ་སོགས་རྒྱུ་དང་སྔོ་འཛིན་སོགས་འབྲས་བུར་འཇོག་ཅིང་རྒྱུ་དང་མཚན་མ་རྣམ་གྲངས་སུ་འབྱུང་

― GTD002_Page_0438 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཕྱིར་དང། སྨོན་པའི་ཡུལ་ནི་འབྱུང་འགྱུར་གྱི་འབྲས་བུ་ཡིན་པར་གྲགས་ཆེ་ལ། སྒོམ་བྱེད་ཡུལ་ཅན་ཡང་དེ་གཉིས་ལས་འབྲས་བུར་འཇོག་དགོས་པའི་ཕྱིར། སྟོང་པ་ཉིད་རང་གི་ངོ་བོའི་སྟེང་ནས་འཇོག་པ་གོ་སླ། རྟགས་ཟུར་ཕྱི་མ་གྲུབ་སྟེ། བསྒོམ་པའི་བྱ་བ་ནི་བསྒོམ་བྱ་སྒོམ་བྱེད་གཉིས་ཚོགས་ཀྱི་སྟེང་ནས་འཇོག་དགོས་པས་དེ་བདེན་སྟོང་དུ་གཞན་གཉིས་ཀྱང་འདུ་ལ། བསྒོམ་བྱ་བདེན་སྟོང་དང་སྒོམ་བྱེད་བདེན་སྟོང་གཉིས་གཅིག་གཅིག་གི་ནང་དུ་མི་འདུ་བའི་ཕྱིར། དེ་ལ་ཁོ་ན་རེ། བུམ་པ་དོན་དམ་པར་མ་སྐྱེས་པ་བུམ་པའི་སྟོང་ཉིད་མ་ཡིན་པར་ཐལ། བུམ་པ་གཞན་སྐྱེ་མེད་པ་བུམ་པའི་སྟོང་ཉིད་མ་ཡིན་པའི་ཕྱིར། དེར་ཐལ། མྱུ་གུ་གཞན་སྐྱེ་མེད་པ་མྱུ་གུ་སྐྱེ་བའི་སྟོང་ཉིད་ཡིན་པར་དབུ་མའི་མཐའ་དཔྱོད་དུ་གསུངས་པའི་ཕྱིར་ན་མ་ཁྱབ། མྱུ་གུའི་སྐྱེ་བ་གཞིར་བྱས་ནས་སྐྱེ་བ་ཞེས་ཕར་བཏགས་ཙམ་གྱིས་མ་ཚིམ་པར་བདག་ལས་ཡིན་ནམ་གཞན་ལས་ཡིན་ཞེས་བཙལ་བའི་ཚེ་དཔྱད་བཟོད་དུ་མ་གྲུབ་པ་མྱུ་གུ་སྐྱེ་བའི་སྟོང་ཉིད་ཡིན་པ་ལ་དགོངས་པའི་ཕྱིར། ཁྱོད་ལྟར་ན་གང་ཟག་དོན་དམ་པར་མ་སྐྱེས་པ་ཆོས་ཀྱི་བདག་མེད་ཕྲ་མོ་ཡིན་པར་ཐལ། དེ་དེའི་སྐྱེ་བའི་སྟེང་གི་སྟོང་ཉིད་ཡིན་པ་གང་ཞིག །ལུགས་འདིར་བདག་མེད་གཉིས་སྟོང་གཞིའི་སྒོ་ནས་འཇོག་པའི་ཕྱིར། འདོད་ན། གང་ཟག་དོན་དམ་པར་གྲུབ་པ་ཅུང་ཟད་ཀྱང་མེད་པར་མཐོང་ནས་དོན་དམ་པར་སྐྱེས་མ་སྐྱེས་ཐེ་ཚོམ་ཟ་བ་ཞིག་ཡོད་པར་ཐལ། བདག་མེད་གཉིས་ཀྱི་རྟོགས་རིམ་འཐད་པའི་ཕྱིར། ཁ་ཅིག །རང་རྒྱུད་པའི་ལུགས་ལ་མྱུ་གུ་དོན་དམ་པར་འཇིག་པ་མེད་པ་མྱུ་གུའི་སྟོང་ཉིད་ཡིན་གྱི། ཐལ་འགྱུར་

― GTD002_Page_0439 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ལུགས་ལ་དེ་མ་ཡིན་པར་ཐལ། སྔ་མའི་ལུགས་ལ་མྱུ་གུ་འཇིག་པ་མྱུ་གུའི་ཚོགས་པའི་ཆོས་ཡིན་ཀྱང། ཐལ་འགྱུར་བའི་ལུགས་ལ་དེ་མ་ཡིན་པའི་ཕྱིར། དེར་ཐལ། ཐལ་འགྱུར་བའི་ལུགས་ལ་མྱུ་གུ་འཇིག་པ་མྱུ་གུའི་རྗེས་སུ་གྲུབ་པའི་ཕྱིར། དེར་ཐལ། དེའི་ལུགས་ལ་མྱུ་གུའི་འཇིག་པ་དང་མྱུ་གུའི་ཞིག་པ་དོན་གཅིག་པའི་ཕྱིར། རྩ་ཤེ་ཊཱིཀ་ཆེན་ལས། སྐབས་འདི་དག་ཏུ་ཚིག་གསལ་ལས་འཇིག་པ་ཞེས་གསུངས་པ་ནི་རང་ཉིད་ཞིག་པའང་འཇིག་པར་བཞེད་པའི་དབང་དུ་མཛད་ཀྱི། ཕ་རོལ་པོ་ནི་ཞིག་འཇིག་འགལ་བར་འདོད་པས། ཞེས་གསུངས་པའི་ཕྱིར་ན་མ་ཁྱབ། དེ་གཞན་རྣམས་དེ་གཉིས་ཀྱི་གཅིག་རྟག་ལ་གཅིག་ཤོས་མི་རྟག་པས་རིགས་འགལ་བར་འདོད་ཀྱང། རང་ལུགས་གཉི་ག་འདུས་བྱས་སུ་རིགས་འདྲ་བར་འདོད་ཅེས་པའི་དོན་ཡིན་པའི་ཕྱིར། འོག་ཏུ་འཆད་དོ། །ཡང་ཁ་ཅིག །རྣམ་ཐར་སྒོ་གསུམ་མེད་པར་ཐལ། ཞི་སྒོ་གསུམ་མེད་པའི་ཕྱིར་ན། ཁ་ཅིག །མ་ཁྱབ་སྟེ་གཞུང་ལས་རྣམ་ཐར་སྒོ་གསུམ་གྱི་ཐ་སྙད་སྦྱར་ཡང་ཞི་བའི་སྒོ་གསུམ་གྱི་ཐ་སྙད་མ་སྦྱར་བའི་ཕྱིར་ཟེར་ཡང། རང་ལུགས། དེར་ཐལ། ཞི་སྒོ་གཉིས་པ་མེད་པའི་ཕྱིར་ན་མ་ཁྱབ། རྟགས་གྲུབ་སྟེ། བཞི་བརྒྱ་པ་ལས། ཞི་སྒོ་གཉིས་པ་མེད་པ་དང། །ཞེས་གསུངས་པའི་ཕྱིར། ཁྱོད་རང་ལ་བདེན་པ་བཞི་མེད་པར་ཐལ། བདེན་པ་གསུམ་པ་མེད་པའི་ཕྱིར་ཏེ། ཡབ་སྲས་མཇལ་བ་ལས། བདེན་པ་གསུམ་པ་འགའ་ཡང་ཡོད་མིན་ཏེ། །ཞེས་གསུངས་པའི་ཕྱིར། ཁ་ཅིག་ན་རེ། རང་རྒྱུད་པའི་ལུགས་ལའང་ཞི་སྒོ་གཉིས་པ་མེད་པར་

― GTD002_Page_0440 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། བཞི་བརྒྱ་པ་ལས་དེ་ལྟར་གསུངས་པ་གང་ཞིག །ཀླུ་སྒྲུབ་ཡབ་སྲས་གཉིས་ལ་གཞུང་ཕྱི་མོའི་དབུ་མ་པ་ཞེས་ཐལ་རང་ཀུན་གྱིས་ཚད་མར་བྱེད་པའི་ཕྱིར་ན་མ་ཁྱབ། ལུང་དེའི་འཕྲོར། བདག་མེད་ཅེས་ནི་བྱ་བར་བརྗོད། །ཅེས་འབྱུང་བས། གང་ཟག་དང་ཆོས་ཀྱི་བདག་མེད་ཕྲ་རགས་སོ་སོར་མ་ཕྱེ་བའི་བདག་མེད་སྤྱི་ཙམ་དེ་ཞི་བའི་སྒོར་བཞག་ནས། དེ་ལས་གཞན་དུ་གྱུར་པའི་ཞི་སྒོ་མེད་པ་ལུང་དེའི་དོན་དུ་འདོད་པའི་ཕྱིར། གོང་དུ་འདོད་མི་ནུས་ཏེ། གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་བློ་དེ་འཁོར་བའི་རྩ་བར་འདོད་པའི་ཕྱིར། ཁྱབ་སྟེ། དེའི་རྒྱུ་མཚན་གྱིས་བདེན་མེད་མ་རྟོགས་ཀྱང་རང་རྐྱ་ཐུབ་པའི་རྫས་ཡོད་ཀྱི་བདག་མེད་པར་མཐོང་ཟིན་གོམས་ན་འཁོར་བ་ལས་གྲོལ་ནུས་པར་འདོད་པའི་ཕྱིར། རྒྱན་ལས། ཉོན་མོངས་ཤེས་བྱ་ལམ་གསུམ་གྱི། །ཞེས་སོགས་གསུངས་པའི་ཕྱིར། ཁོ་ན་རེ། བློ་དེ་འཁོར་བའི་རྩ་བར་འཇོག་པ་དང། དེ་དང་འཛིན་སྟངས་དངོས་འགལ་གྱི་ཡེ་ཤེས་ཞི་སྒོར་འཇོག་པ་གཉིས་ཡིན་ཁྱབ་མཉམ་ཡིན་པར་ཐལ། རང་རྐྱ་ཐུབ་པའི་རྫས་ཡོད་ཀྱི་བདག་མེད་པར་རྟོགས་པའི་ཡེ་ཤེས་ཞི་སྒོ་འཇོག་པའི་རྒྱུ་མཚན་འཐད་པའི་ཕྱིར་ན་མ་ཁྱབ་སྟེ། ཐེག་ཆེན་ཐུན་མོང་བ་ལྟར་ན་ཐར་པ་གཏན་མེད་དུ་འཛིན་པ་བློ་ཀུན་བཏགས་ཡིན་པས་འཁོར་རྩར་མི་འཐད་ཀྱང། དེའི་ཞེན་ཡུལ་མེད་པར་རྟོགས་པའི་ཡེ་ཤེས་སོགས་ཞི་སྒོར་འཇོག་པ་གོང་དུ་བདེན་བཞིའི་ཁྱད་ཆོས་དང་སྦྱར་བས་འགྲུབ་ལ། ཐུན་མོང་མ་ཡིན་པ་ལྟར་ནའང་སྨོན་མེད་ཀྱི་ཡེ་ཤེས་ལ་འདུ་བྱེད་སྡུག་བསྔལ་དུ་མཐོང་བ་གཅིག་ཡོད་པར་དགོངས་པ་རབ་གསལ་ལས་གསུངས་པའི་ཕྱིར། འཕྲོས་དོན་དུ་མ་ཡོད་ཀྱང་

― GTD002_Page_0441 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་པར་གཞན་དུ་བཤད་ཟིན། ཁ་ཅིག་ན་རེ། དེ་དག་ཐུགས་རྗེ་མངའ་བས་ཐབས་ཚུལ་དང། །ཞེས་པའི་ཐབས་དེ་ཐབས་ཤེས་ཀྱི་ཐབས་དང། རིགས་པ་བརྒྱ་དག་ཅེས་པའི་རིགས་པ་དེ་ཤེས་རབ་ཕུན་སུམ་ཚོགས་པ་ལ་བྱེད་ཟེར་ན། དེ་ལ་མི་བྱེད་པར་ཐལ། དེ་ཐབས་སྣ་ཚོགས་ཀྱིས་གདུལ་བྱ་ཁ་དྲངས་པ་ལ་བྱེད་པའི་ཕྱིར། དེར་ཐལ། རྩ་ཤེ་ལས། བདག་གོ་ཞེས་ནི་བསྟན་གྱུར་ཅིང། །བདག་མེད་ཅེས་ཀྱང་བསྟན་པར་གྱུར། །ཅེས་དང། འཕགས་པ་ལྷས། དམ་པ་མིན་ལ་བདག་འཛིན་མཆོག །བདག་མེད་སྟོན་པ་མ་ཡིན་ནོ། །ཞེས་པ་ལྟར་གདུལ་བྱ་བློ་དམན་པ་ལ་གང་ཟག་གི་བདག་ཡོད་པ་དང། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང། བདེན་གྲུབ་དང། མཐར་ཐུག་ཐེག་པ་གསུམ་དུ་གྲུབ་པ་སོགས་གསུངས་པའང་བློ་ཚོད་དང་འཚམ་པར་ཁ་ཁྲིད་དེ་མཐར་དེ་ཁོ་ན་ཉིད་དང་མི་གནས་པའི་མྱང་འདས་སུ་འཁྲིད་པའི་ཐབས་ཡིན་པ་དེ་ལ་བྱེད་པའི་ཕྱིར། དཔེར་ན། སྐས་གདང་འོག་མར་འཛེགས་པ་དེ་གོང་མར་འགོམ་པ་མིན་ཡང་དེའི་ཐབས་སུ་འགྲོ་བ་བཞིན་ཡིན་པའི་ཕྱིར། རིམ་ལྔ་ལས། ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་གསུངས་པའི་ཕྱིར། དེ་རིམ་གཉིས་ཙམ་མ་ཡིན་པར་ལམ་འོག་མ་འོག་མ་ནས་གོང་མ་གོང་མར་འཁྲིད་ཚུལ་ཀུན་ལ་སྦྱོར་དགོས་པ་སྤྱོད་བསྡུས་ཀྱིས་དེའི་དགོངས་པ་བཀྲལ་ནས་རིམ་གྱིས་སློབ་ཚུལ་བཤད་པ་ལྟར་ཡིན་པའི་ཕྱིར་དང། མདོ་ལས་ཀྱང། ཡོངས་སུ་མྱ་ངན་ལས་འདས་

― GTD002_Page_0442 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱི་ཐབས་དམ་པའོ། །ཞེས་མཐར་ཐུག་ཐེག་གསུམ་བསྟན་པ་དེ་རྫོགས་བྱང་དུ་འཁྲིད་པའི་ཐབས་སུ་གསུངས་པ་ལྟ་བུ་ཡིན་པའི་ཕྱིར། ཕྱི་མ་ནི་ཡིག་དོན་ལའང་མ་ཞུགས་ཏེ། འདིར་རིགས་པ་བརྒྱ་དག་ཅེས་པ་རྟེན་འབྲེལ་དང་གཅིག་དུ་བྲལ་སོགས་སྟོང་ཉིད་སྒྲུབ་བྱེད་ཀྱི་གཏན་ཚིགས་སམ་རིགས་པ་མཐའ་ཡས་པ་བསྟན་པའི་དོན་ཡིན་གྱི། རིག་པ་ཡེ་ཤེས་ཞེས་པ་ལྟ་བུའི་བློ་རིག་གི་རིག་པ་མ་ཡིན་པའི་ཕྱིར། ཡང་ཁ་ཅིག་ན་རེ། དེ་ཁོ་ན་ཉིད་རྟོགས་པ་ལ་གསུང་རབ་ལ་དྲང་ངེས་འབྱེད་དགོས་ཟེར་ན། དེ་ཁོ་ན་ཉིད་རྟོགས་པ་ལ་གསུང་རབ་ཀྱི་དོན་ལ་དྲང་ངེས་འབྱེད་དགོས་པར་ཐལ། གསུང་རབ་ལ་དྲང་ངེས་འབྱེད་དགོས་པའི་ཕྱིར། ཁྱབ་སྟེ། གཞུང་འདིས་བདེན་གཉིས་ཀྱི་རྣམ་གཞག་རྒྱས་པར་གཏན་ལ་ཕབ་པ་དེ་གསུང་རབ་ལ་དྲང་ངེས་འབྱེད་ཚུལ་ཡིན་པའི་ཕྱིེར། དཀའ་འགྲེལ་སོགས་ཐམས་ཅད་ཀྱིས་ས་བཅད་བྱེད་པའི་ཚེའང། གསུང་རབ་ལ་དྲང་ངེས་འབྱེད་པ་དོན་ཆེ་བར་བསྟན་པ། དོན་ཆེན་པོ་དང་ལྡན་པའི་གསུང་རབ་ལ་དྲང་ངེས་འབྱེད་ཚུལ། ཞེས་སྨོས་པའི་ཕྱིར་དང། དྲང་ངེས་ཕྱེ་མ་ཕྱེ་གསུང་རབ་ལ་དྲང་ངེས་ཕྱེ་མ་ཕྱེ་ཡིན་པས། འདིའི་མཆོད་བརྗོད་དུའང་ཤིང་རྟ་ཆེན་པོ་གཉིས་ལ་དྲང་ངེས་ཕྱེ་ཚུལ་གྱིས་བསྟོད་པའི་ཚེ་དྲང་ངེས་ཕྱེ་བའི་གཞིར། བདེ་གཤེགས་གསུང་རབ་ཅེས་གསུངས་པའི་ཕྱིར། རྩ་བར་འདོད་ན། དེ་ཁོ་ན་ཉིད་རྟོགས་པ་ལ་གསུང་རབ་ཀྱི་དོན་བདེན་པ་གཉིས་ལ་ཚད་མའི་སྟོབས་ཀྱིས་དྲང་ངེས་འབྱེད་དགོས་པར་ཐལ། བརྗོད་བྱ་དོན་གྱི་དྲང་ངེས་འབྱེད་དགོས་པའི་ཕྱིར། ཁྱབ་སྟེ། ཚད་མའི་སྟོབས་

― GTD002_Page_0443 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ངེས་པ་མ་རྙེད་ན། མོས་མནོས་ཡིད་དཔྱོད་ཙམ་གྱིས་ཕྱེའང་བློ་ཕུགས་སུ་ཐག་མ་ཆོད་པར་ཡོད་པས་དེ་ལ་ཐེ་ཚོམ་མེད་པར་འཇུག་མི་ནུས་པའི་ཕྱིར། རིན་པོ་ཆེ་གསུམ་གྱི་གཏམ་གྱི་སྦྱོར་བ་ལས། གལ་ཏེ་ཡང་དག་དམ་བཅའ་ཙམ་ཞིག་གིས། །ངེས་པ་རྙེད་ཀྱང་སྒྲུབ་དང་སུན་འབྱིན་གྱི། །ཚད་མའི་སྟོབས་ཀྱིས་ངེས་པ་མ་རྙེད་ན། །འདམ་ལ་བཏབ་པའི་ཕུར་པ་བཞིན་འགྱུར་བས། །ཡང་དག་བག་ཆགས་བརྟན་པོ་འཇོག་མི་ནུས། །ཞེས་གསུངས་པའི་ཕྱིར་ཁྱབ་སྟེ། ངེས་པ་རྙེད་ཀྱང་ཞེས་པ་ཡིད་དཔྱོད་ལ་མི་སྦྱོར་ན་བློ་རིག་བདུན་པོ་གང་ལའང་མི་འགྲིག་པའི་ཕྱིར། གོང་དུ་འདོད་ན། དེ་ཁོ་ན་ཉིད་རྟོགས་པ་ལ་བདེན་གཉིས་ཚད་མའི་སྟོབས་ཀྱིས་འབྱེད་མི་དགོས་པར་ཐལ། བདེན་གཉིས་ཚད་མས་རྟོགས་པ་ལ་དེ་ཁོ་ན་ཉིད་རྟོགས་པ་སྔོན་དུ་འགྲོ་དགོས་པའི་ཕྱིར། མ་ཁྱབ་ན། རྣམ་འགྲེལ་ལས། དངོས་སུ་གླང་ཆེན་ཁྲུས་འདྲར་འགྱུར། །ཞེས་པ་དེ་ཁོ་ནར་འགྱུར་རོ། །དེ་ལ་ཁོ་ན་རེ། དེ་ཁོ་ན་ཉིད་རྟོགས་པ་ལ་གསུང་རབ་ལ་དྲང་ངེས་འབྱེད་དགོས་ཞེས་པ་འགོག་མི་རིགས་པར་ཐལ། གཞུང་ཉིད་ལས། ཆོས་རྣམས་ཀྱི་དེ་བཞིན་ཉིད་ནི། ཞེས་པ་ནས། དེའང་རྒྱལ་བའི་གསུང་རབ་ཀྱི་དྲང་བ་དང་ངེས་པའི་དོན་རྣམ་པར་འབྱེད་པ་ལ་རག་ལས་ཤིང། ཞེས་གསུངས་པའི་ཕྱིར་ན་མ་ཁྱབ་སྟེ། གསུང་རབ་ཀྱི་དྲང་ངེས་ཞེས་པ་ནི། གསུང་རབ་ཀྱི་ནང་ནས་དྲང་དོན་གྱི་གསུང་རབ་དང་ངེས་དོན་གྱི་གསུང་རབ་གང་ཡིན་སོ་སོར་ངོས་བཟུང་བ་ལ་བྱེད་པས། རྗོད་བྱེད་ཚིག་གི་དྲང་ངེས་ཡིན་པའི་ཕྱིར། དཀའ་འགྲེལ་ལས།

― GTD002_Page_0444 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་རྣམས་ཀྱི་གནས་ལུགས་མཐར་ཐུག་རྟོགས་པ་དེ་གསུང་རབ་ཀྱི་དྲང་ངེས་འབྱེད་པ་ལ་རག་ལས་ཏེ། ངེས་དོན་གྱི་གསུང་རབ་ཟབ་མོ་ཞིག་གི་རྗེས་སུ་མ་འབྲངས་པར་དྲང་བའི་དོན་གྱི་གསུང་རབ་ཙམ་ལ་བརྟེན་ནས་དེ་ཁོ་ན་ཉིད་རྟོགས་མི་ནུས་ཤིང་དེ་ལ་ངེས་དོན་གྱི་གསུང་རབ་ངོས་ཟིན་དགོས། དེ་ངོས་ཟིན་པ་གསུང་རབ་ཀྱི་དྲང་ངེས་ཚུལ་བཞིན་དུ་ཕྱེད་པ་ལ་རག་ལས་པའི་ཕྱིར་རོ། །ཞེས་གསུངས་པའི་ཕྱིར། དེས་ན་གསུང་རབ་ཀྱི་དྲང་ངེས་ཞེས་པ་དང། གསུང་རབ་ལ་དྲང་ངེས་ཞེས་པ་མི་འདྲ་བར་ཐལ། སྔ་མ། ཀྱི་ནི་འབྲེལ་བའི་དོན་ཡིན་ཏེ། ཞེས་པ་ལྟར་དེའི་ནང་གསེས་ཀྱི་དབྱེ་བ་འབྱེད་ཚུལ་ཡིན་ལ། ཕྱི་མ། སྨོན་དང་ཚད་འཛིན་གཞི་དང་ནི། །ཞེས་པ་ལྟར། དེ་དཔྱད་གཞིར་བྱས་ཏེ་དེའི་སྟེང་ནས་བདེན་གཉིས་ཀྱི་རྣམ་གཞག་གཏན་ལ་འབེབས་པའི་དོན་ཡིན་པའི་ཕྱིར། དེ་ལ་ཁོ་ན་རེ། དེ་ལྟར་ཡིན་ན་དེ་ཁོ་ན་ཉིད་རྟོགས་པ་ལ་གསུང་རབ་ཀྱི་དྲང་ངེས་འབྱེད་དགོས་པའང་མི་འཐད་པར་ཐལ། དེ་འབྱེད་ན་ཚད་མའི་སྟོབས་ཀྱིས་འབྱེད་དགོས་པ་གང་ཞིག །ངེས་དོན་གྱི་གསུང་རབ་དེ་རང་གི་བསྟན་དོན་ལ་མི་བསླུ་བར་རྟོགས་པ་ལ་དེ་ཁོ་ན་ཉིད་རྟོགས་དགོས་པའི་ཕྱིར། རྟགས་སྔ་མ་དོན་གྱིས་ཁས་བླངས་ཤིང་ཕྱི་མ་ཡིད་ཆེས་ཀྱི་རྟགས་སྦྱོར་འགོད་ལུགས་ཀྱིས་གྲུབ་པའི་ཕྱིར། ཟེར་ན། རྟགས་སྔ་མ་མ་གྲུབ་སྟེ། དེ་གཉི་ག་འདྲ་མི་དགོས་པའི་ཕྱིར། དེར་ཐལ། ཤིང་གཅོད་པ་ལ་ཟོར་པས་མི་ཆོད་ཀྱང་རྩྭ་བརྔ་བ་ལ་དེས་ཆོད་པ་ལྟར་། དོན་ལ་དྲང་ངེས་འབྱེད་པ་ཚད་མའི་སྟོབས་ཀྱིས་འབྱེད་དགོས་ཀྱང། ཚིག་གི་དྲང་ངེས་འབྱེད་པ་ཡིད་དཔྱོད་

― GTD002_Page_0445 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ཆོག་པའི་ཕྱིར། དེར་ཐལ། དོན་གྱི་དྲང་ངེས་འབྱེད་པ་བསམ་བྱུང་གི་སྐབས་ཡིན་པས་དོན་སྤྱི་ལེགས་པར་ཤར་ཏེ་སྒྲོ་འདོགས་བཅད་ནས་འབྱེད་དགོས། གཅིག་ཤོས་ཐོས་བྱུང་གི་ཤེས་རབ་ཀྱིས་གཏན་ལ་འབེབ་ལུགས་ཡིན་པས་སྒྲ་སྤྱིའི་གོ་བ་ཆགས་པའི་ཡིད་དཔྱོད་ཀྱིས་ཆོག་པའི་ཕྱིར། མདོ་སྡེ་རྒྱན་ལས། མདོ་ཡི་སྡེ་ལ་སོགས་པའི་ཆོས། །མི་གཉིས་དོན་ནི་རབ་འབྱེད་པ། །མདོ་སོགས་མིང་ལ་སེམས་འཇོག་གོ །དེ་ནས་དེ་ནི་རིམ་བཞིན་དུ། །ཚིག་རབ་དབྱེ་ལ་འཇུག་བྱེད་ཅིང། །སོ་སོའི་ནང་དུ་ཚུལ་བཞིན་དུ། །དེ་ཡི་དོན་ཡང་རྣམ་པར་དཔྱོད། །ཅེས་གསུངས་པའི་ཕྱིར་དང། མཛོད་ལས། ཐོས་སོགས་ལས་བྱུང་བློ་རྣམས་ནི། །མིང་དང་གཉིས་ཀ་དོན་ཡུལ་ཅན། །ཞེས་ཐོས་བྱུང་མིང་ལ་བརྟེན་ཚུལ་ཡོད་པའི་ཕྱིར། དེ་ལྟར་མ་ཡིན་པར་དོན་སྤྱིའི་ངེས་པ་རྙེད་པ་ལ་ཚད་མ་དགོས་ན་སྒྲ་སྤྱི་ཙམ་གྱི་ངེས་པ་དེའང་ཚད་མའི་སྟོབས་ཀྱིས་རྙེད་དགོས་ཟེར་བ་ལྐུག་པའི་རིགས་འགྲེ་ཁོ་ནར་སྣང་བའི་ཕྱིར་དང། དེ་འདྲའི་རིམ་པ་ཞིག་མེད་ན་བློ་རིམ་གྱིས་སྦྱོང་ཚུལ་མེད་པར་འགྱུར་བའི་ཕྱིར། ཡང་ཁ་ཅིག་ན་རེ། དབུ་མ་པ་རང་ལུགས་ལ་དྲང་ངེས་ཀྱི་མདོར་འཇོག་ཚུལ་སྟོང་ཉིད་གཙོ་བོར་དངོས་སུ་སྟོན་མི་སྟོན་གྱི་སྒོ་ནས་འཇོག་ཚུལ་མ་གཏོགས་མེད་ཟེར་ན། མི་འཐད་པར་ཐལ། དགོངས་འགྲེལ་ལྟར་སྒྲ་ཇི་བཞིན་པ་ཡིན་མིན་གྱི་སྒོ་ནས་དྲང་ངེས་ཀྱི་མདོར་འཇོག་ཚུལ་ཡོད་པའི་ཕྱིར། དབུ་མ་པའི་ལུགས་ལ་དེ་འདྲའི་འཇོག་ཚུལ་ཡོད་ཀྱང་དབུ་མ་པས་དེ་ལྟར་འཇོག་མི་དགོས་པའི་ཕྱིར། དེར་ཐལ། དེའི་ལུགས་ལ་གྲུབ་མཐའ་བཞི་གའི་འདོད་

― GTD002_Page_0446 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཡོད་པའི་ཕྱིར་ཏེ་གྲུབ་མཐའ་བཞི་ག་ཡོད་པའི་ཕྱིར། གཞན་ཡང་དེ་མི་འཐད་པར་ཐལ། དབུ་མ་པ་རང་ལུགས་སུ་ཁས་ལེན་རྒྱུའི་དྲང་ངེས་འཇོག་ཚུལ་ལའང་སྔ་མའི་འཇོག་ཚུལ་དེ་མ་ཡིན་པ་ཡོད་པའི་ཕྱིར། དེར་ཐལ། འདུས་པའ་ིརྩ་རྒྱུད་ལས། རིན་ཆེན་ཆེན་པོ་ཁ་དོག་ལྔ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །ཞེས་པའི་ཚིགས་བཅད་གཅིག་པུར་ཡང་བསྐྱེད་རིམ་གྱི་ཕྱག་མཚན་བསྒོམ་པ་བསྟན་པས་དྲང་དོན་དང། རྫོགས་རིམ་པའི་རླུང་གི་རྡོར་བཟླས་བསྟན་པས་ངེས་དོན་དུ་བཤད་པའི་ཕྱིར། དེར་ཐལ། མདོ་ལུགས་བཞིན་དྲང་ངེས་ལ་ཚིག་སོ་སོ་བ་མི་དགོས་པར་ཚིག་གཅིག་ལ་དོན་གཉིས་སུ་ཕྱེ་སྟེ་དྲང་ངེས་སུ་བཞག་ཆོག་པས། འདི་གཉིས་མཐའ་དྲུག་གི་ནང་ནས་དོན་མཐའ་ལ་བརྟེན་པ་ཡིན་པའི་ཕྱིར། ཡེ་ཤེས་རྡོ་རྗེ་ཀུན་ལས་བཏུས་ཀྱི་རྣམ་བཤད་ལས། དྲང་ངེས་ཀྱི་བཤད་པ་གཉིས་ནི་དོན་སོ་སོར་ངེས་ལ་གཞུང་ན་གཅིག་ཏུ་ངེས་སོ། །ཞེས་དང། ཕ་རོལ་ཏུ་ཕྱིན་པ་དང་རྒྱུད་སྡེ་འོག་མ་བདེན་གཉིས་སྟོན་པའི་ཆ་ནས་དྲང་དོན་དང་ངེས་དོན་དུ་བཞག་པ་ཡོད་མོད་ཀྱང། ཞེས་པ་ནས། དེ་དག་གི་དྲང་ངེས་ནི་གཞུང་ཕན་ཚུན་དུ་འགལ་བས་སོ་སོ་བ་ཡིན་ལ། འདིར་ནི་དྲང་ངེས་གཉིས་ཀྱི་བཤད་པ་གཞུང་གཅིག་ལ་བྱེད་པའི། ཞེས་གསུངས་པའི་ཕྱིར། ཚུལ་དེ་དཔལ་ལྡན་ཟླ་བས་ཀྱང་གསུངས་པ་ཐལ་འགྱུར་བ་རང་ལུགས་ལ་འདོད་དགོས་པའི་ཕྱིར་ཏེ། སྒྲོན་གསལ་ལས། སྐལ་ངན་རྣམས་ལ་རྒྱལ་བ་ཡིས། །སྦས་ཏེ་བཤད་པ་དྲང་བའི་དོན། །ཡང་དག་དོན་ནི་རབ་སྟོན་ཕྱིར། །ངེས་

― GTD002_Page_0447 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དོན་ཡང་གསུངས་པ་ཡིན། །ཞེས་དང། དེའི་མཆན་སྦྲགས་ལས། ཡང་དག་པའི་དོན་རྫོགས་རིམ་ཡན་ལག་དང་བཅས་པ་ནི་རབ་ཏུ་སྟོན་པའི་ཕྱིར་དྲང་དོན་གསུངས་པར་མ་ཟད་ངེས་པའི་དོན་ཡང་གསུངས་པ་ཡིན། ཞེས་གསུངས་པའི་ཕྱིར། བློ་གྲོས་མི་ཟད་པའི་མདོ་ལས་ཀྱང། མདོ་གང་ལམ་ལ་འཇུག་པའི་ཕྱིར་བསྟན་པ་དེ་དག་ནི་དྲང་བའི་དོན་ཅེས་བྱའོ། །མདོ་གང་འབྲས་བུ་ལ་འཇུག་པའི་ཕྱིར་བསྟན་པ་དེ་དག་ནི་ངེས་པའི་དོན་ཅེས་བྱའོ། །ཞེས་ལམ་ལ་བརྟེན་ནས་འབྲས་བུར་དྲང་དགོས་པས་དྲང་དོན་དང། འབྲས་བུ་མཐར་ཐུག་གྲུབ་ནས་དེ་ལས་གོང་མར་དྲང་དུ་མེད་པས་ངེས་དོན་དུ་གསུངས་ཏེ་མཐའ་དྲུག་གི་དྲང་ངེས་དང་འགྲོས་མཐུན་ནོ། །དེ་ལྟར་དྲང་ངེས་ཀྱི་འཇོག་ལུགས་སྣ་ཚོགས་ཡོད་པས་གསུང་རབ་ཀྱི་དོན་མཐའ་ཆོད་པ་ལ་དེའི་རེ་རེ་ཙམ་གྱིས་མི་ཆོག་སྟེ། འདི་ཉིད་ལས། གསུང་རབ་ལས་དྲང་ངེས་ཀྱི་འཇོག་ཚུལ་མི་མཐུན་པ་དུ་མ་གསུངས་པས། ཞེས་གསུངས་པའི་ཕྱིར། ཁོ་ན་རེ། དེ་འདྲའི་དྲང་ངེས་དེས་དྲང་ངེས་ཀྱི་གོ་མི་ཆོད་པར་ཐལ། གསུང་རབ་ལ་དྲང་ངེས་འབྱེད་པ་ལ་དབུ་མ་པ་རང་ལུགས་ཀྱི་དྲང་དོན་ཀུན་རྫོབ་བདེན་པ་དང། ངེས་དོན་དོན་དམ་བདེན་པ་གཉིས་ལེགས་པར་འབྱེད་དགོས་པའི་ཕྱིར་ཟེར་ན། གང་ཟག་ལ་སྦྱར་ཚེ་དེ་ལྟར་དགོས་ཀྱང་གཞུང་ལ་སྦྱར་ན་མི་རུང་སྟེ། ས་སྡེ་ལྔས་ཀྱང་གསུང་རབ་ལ་དྲང་ངེས་ཕྱེ་བའི་ཕྱིར། དེར་ཐལ། དྲང་ངེས་འབྱེད་པའི་ཤིང་རྟའི་སྲོལ་འབྱེད་ཀྱི་བསྟན་བཅོས་ཡིན་པའི་ཕྱིར་དང། དེར་མ་ཟད་བརྒྱད་སྟོང་དོན་བསྡུས་ཀྱིས་ཀྱང་སྟོང་ཉིད་བཅུ་དྲུག་བཤད་པའི་ཕྱིར་

― GTD002_Page_0448 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ། དེས་བརྒྱད་སྟོང་པའི་དོན་སོ་གཉིས་སུ་བཀྲལ་པའི་ཕྱིར། བྱས་པ་ལ། འོ་ན་སློབ་དཔོན་ཕྱོགས་གླང་གིས་སྟོང་ཉིད་བཅུ་དྲུག་བཤད་པར་ཐལ། དེས་བརྒྱད་སྟོང་པའི་དོན་འགྲེལ་ཚུལ་ཡོད་པའི་ཕྱིར། འདོད་ན། དྲང་ངེས་ཕྱེ་བར་ཐལ། དེས་བདེན་པ་གཉིས་སོ་སོར་བཤད་པའི་ཕྱིར་ན་མི་མཚུངས་ཏེ། གཞུང་ལ་སྦྱར་ན་དེས་དྲང་ངེས་འབྱེད་ཚུལ་ལ་བཤད་པ་ལས་ལྷག་པ་མེད་ཀྱང། གང་ཟག་ལ་སྦྱར་ན་དེ་མ་ཡིན་པའི་ཕྱིར། དེར་ཐལ། འདི་ནི་དྲང་དོན་ནོ། །འདི་ནི་དོན་དམ་པའོ། །ཞེས་སྨྲས་པ་ཙམ་གྱིས་བཤད་པར་འཇོག་ཀྱང། གང་ཟག་དེས་དྲང་ངེས་ཕྱེ་མ་ཕྱེ་ཚད་མའི་སྟོབས་ཀྱིས་ཕྱེ་མ་ཕྱེ་ལ་འཇོག་པའི་ཕྱིར། སྔ་མ་མ་གྲུབ་ན། དངོས་སྨྲ་རྣམས་དང་དེའི་གཞུང་ལས་མཚན་ཉིད་གསུམ་བདེན་གཉིས་བདེན་བཞི་ཁྱད་ཆོས་བཅུ་དྲུག་ཆོས་ཀྱི་སྡོམ་བཞི་ལམ་ལྔ་སོགས་གང་ཡང་མ་བཤད་པར་ཐལ་ལོ། །ཡང་ཁོ་ན་རེ། བརྒྱད་སྟོང་དོན་བསྡུས་ལས་སྟོང་ཉིད་ཀྱི་ལྟ་བ་བཤད་པར་ཐལ། དེས་སྟོང་ཉིད་བཤད་པའི་ཕྱིར། རྟགས་ཁས། འདོད་ན། དེས་དབུ་མའི་ལྟ་བ་བཤད་པར་ཐལ། དེས་སྟོང་ཉིད་ཀྱི་ལྟ་བ་བཤད་པའི་ཕྱིར་དང། དེས་གཞན་དབང་ཡོངས་གྲུབ་བདེན་པར་གྲུབ་ཅིང་ཀུན་བཏགས་བདེན་པར་མ་གྲུབ་པར་བཤད་པའི་ཕྱིར། ཁྱབ་སྟེ། དབུས་མཐའ་ལས། ཡོད་པས་མེད་པས་ཡོད་པས་ན། །དེ་ནི་དབུ་མའི་ལམ་ཡིན་ནོ། །ཞེས་པ་ལྟར་སེམས་ཙམ་པ་རྣམས་དེ་དབུ་མའི་དོན་དུ་སྨྲ་བའི་ཕྱིར། འདོད་ན། དེ་སེམས་ཙམ་པའི་ལྟ་བ་བཤད་པ་དེ་དབུ་མའི་ལྟ་བ་བཤད་པ་ཡིན་པར་ཐལ་ལོ། །ཟེར་ན། ཁ་ཅིག་གོང་དུ་མ་ཁྱབ་ཟེར་ཡང། དེས་མཐའ་གཉིས་

― GTD002_Page_0449 ―

^{[མ་དཔེ་གཟིགས་ན་འདིར་གནོན།]}

[Full Size]

དང་བྲལ་བའི་དབུས་མ་བཤད་ན་སྒྲོ་སྐུར་གྱི་མཐའ་མ་བཀག་ཟེར་དགོས་པས་ཞིབ་ཆ་འདོན། གཉིས་པ་ཤེས་བྱེད་ཀྱི་ཁུངས་དགོད་པ་ནི། དོན་གྱི་དབང་འདི་གཟིགས་ནས། དགེ་སློང་དག་གམ། ཞེས་པ་ནས། ཞེས་གསུངས་སོ། །ཞེས་པའི་བར་བྱུང། འདི་ལའང་སྤྱི་དོན་དང་མཐའ་དཔྱད་པ་གཉིས། དང་པོ་ནི། གཞུང་ཚིག་སྔ་མ་རྣམས་ཀྱིས་ཀྱང་རྟོན་བཞི་གསུངས་པ་ཡིན་ཀྱང། རྩ་བའི་ཁུངས་འདི་ལས་འཕྲོས་པས། འདིར་རྟོན་བཞི་འཆད་ཚུལ་ཡོད་དེ། ང་ཞེས་དང། གུས་ཕྱིར་མིན་ཞེས་པ་བསྡོམས་པས་སངས་རྒྱས་བཅོམ་ལྡན་འདས་གང་ཟག་ཁྱད་པར་ཅན་དུ་གྲགས་པས་གུས་པ་ཙམ་རྒྱུ་མཚན་དུ་མི་བྱེད་པ་སྟེ་གང་ཟག་ལ་མི་རྟོན་པ་དང། ང་ཡི་བཀའ་བླང་བར་བྱ་ཞེས་དེས་གསུངས་པའི་བཀའ་ལ་ཚད་མར་བྱས་ཏེ་ཆོས་ལ་རྟོན་པ་བཤད། ཡང་ང་ཡི་བཀའ་ཞེས་དང། གུས་ཕྱིར་མིན་ཞེས་པ་བསྡོམས་པས་བཀའ་ལས་གསུངས་པ་རྒྱུ་མཚན་དུ་བྱས་ཏེ་བཤད་ཚད་སྒྲས་ཟིན་ལྟར་མི་འཛིན་པས་ཚིག་ལ་མི་རྟོན་པ་དང། བརྟགས་ལ་བླང་བར་བྱ་ཞེས་པས་དགོངས་དོན་ལེགས་པར་བརྟགས་ཏེ་འཛིན་པས་དོན་ལ་རྟོན་པ་བཤད། བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ཞེས་པས་གསེར་གྱི་ཕྱིའི་སྐྱོན་ཡོན་རགས་པ་ཙམ་རྟོགས་སླའང། གཏིང་ན་སྐྱོན་ཡོད་མེད་ནན་གྱིས་རྟོག་དགོས་པ་ལྟར་བསྟན་དོན་རགས་པ་ཙམ་ཤེས་སླའང་དེས་མི་ངོམས་པས་དྲང་དོན་ལ་མི་རྟོན་པ་དང། དགོངས་པའི་གཏིང་ཤིན་ཏུ་ཟབ་པའི་གནས་ལུགས་ཀྱི་དོན་འཚོལ་དགོས་པས་ངེས་དོན་ལ་རྟོན་པ་

― GTD002_Page_0450 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད། གསེར་ལ་སྐྱོན་ཡོན་ཕྲ་རགས་དང་མཐུན་པར་བརྟག་པའི་ཐབས་མེ་དང་གཅོད་བྱེད་བདར་སོགས་རིམ་པར་ཡོད་པ་བཞིན། གནས་ལུགས་ཟབ་མོ་འཇལ་བྱེད་ཐོས་བསམ་སྒོམ་གསུམ་དང། ཕྱི་མ་ལ་འཇིག་རྟེན་ལས་འདས་མ་འདས་སོགས་ཡོད་པས་སྔ་མ་སྔ་མས་མི་ཆོག་པར་ཕྱི་མ་ཕྱི་མ་དང། མཐར་མཉམ་གཞག་རྣམ་པར་མི་རྟོག་པའི་ཡེ་ཤེས་ཆོས་ཀྱི་དབྱིངས་དང་རོ་གཅིག་ཏུ་ཞུགས་པའི་བར་ལ་སློབ་དགོས་པས་རྣམ་ཤེས་ལ་མི་རྟོན་ཡེ་ཤེས་ལ་རྟོན་པ་བཤད་པའི་ཕྱིར། རྟོན་བཞི་རྒྱས་པར་བཤད་པའི་གཞུང་ནི་བློ་གྲོས་མི་ཟད་པའི་མདོ་ཡིན་ལ། དེ་ལས་དོན་དང་ཡེ་ཤེས་དང་ངེས་དོན་དང་ཆོས་ལ་རྟོན་པར་གསུངས་པའི་གོ་རིམ་ནི་ཐར་འདོད་རྣམས་རྒྱལ་བའི་གསུང་རབ་ཀྱི་དོན་གཏན་ལ་དབབ་དགོས་པ་དང། དེའང་ཐ་སྙད་པའི་ཤེས་པ་ཙམ་གྱིས་དོན་མཐར་ཐུག་འབྱེད་མི་ནུས་པས་དེ་ལ་གནས་ལུགས་རྟོགས་པའི་ཤེས་རབ་དགོས་པ་དང། དེའི་སྒོ་ནས་ངེས་དོན་གྱི་མདོའི་དགོངས་པ་འབྱེད་ཚུལ་གསུམ་སྔར་བཤད་དེ། གང་ཟག་ལ་མི་རྟོན་ཆོས་ཉིད་ལ་རྟོན་པས་ནི། དཔེར་ན་གང་ཟག་གི་བདག་ཡོད་པར་གསུངས་པ་དེ་གདུལ་བྱ་དམན་པ་ལ་ལ་ལས་འབྲས་ལ་ངེས་པ་སྐྱེད་ཕྱིར་གསུངས་པའི་དྲང་དོན་ཡིན་གྱི། དགོངས་པ་མཐར་ཐུག་ཆོས་དང་གང་ཟག་གཉི་ག་བདེན་པར་མེད་པ་འདིར་གནས་ཞེས་དྲང་ངེས་ཀྱི་མཚན་གཞི་ངོས་འཛིན་པའི་དོན་དུ་མཇུག་ཏུ་གསུངས་པ་ཡིན་པའི་ཕྱིར། ཀུན་མཁྱེན་བླ་མའི་མཐའ་དཔྱོད་ལས། བློ་གྲོས་མི་ཟད་པའི་བཤད་ཚུལ་གཅིག་ལ་གང་ཟག་གི་ཐ་སྙད་ལ་བརྟེན་ནས་བདེན་ཞེན་མི་བྱ་བར་བདེན་མེད་ལ་ཡིད་རྟོན་

― GTD002_Page_0451 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གང་ཟག་ལ་མི་རྟོན་ཆོས་ལ་རྟོན་པའི་དོན་དུའང་བཤད། ཅེས་དང། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། གང་ཟག་གི་རྗེས་སུ་འབྲང་བ་ནི་ཇི་ལྟ་བུ་ཆོས་ཀྱི་རྗེས་སུ་འབྲང་བའང་ཇི་ལྟ་བུ་ཞེ་ན། གང་ཟག་ཀྱང་ཡོད་པར་བལྟས། ཆོས་ཀྱང་ཡོད་པར་བལྟས་ནས། གང་ཟག་འདིས་དགེ་བ་བྱས་ན་ནི་བདེན་པ་མཐོང་བར་འགྱུར། མི་དགེ་བ་བྱས་ན་ནི་མི་དགེ་བའི་སྡུག་བསྔལ་མཐོང་བར་འགྱུར་རོ་ཞེས་ལྟ་བ་ནི་གང་ཟག་གི་རྗེས་སུ་འབྲང་བ་ཞེས་བྱའོ། །གང་ཟག་དང་ཆོས་གཉི་ག་རང་བཞིན་མེད་པར་ཁོང་དུ་ཆུད་པས་གཉི་ག་ལ་མི་ལྟ་བ་ནི་ཆོས་ཀྱི་རྗེས་སུ་འབྲང་བ་ཞེས་བྱ། ཞེས་གསུངས་པའི་ཕྱིར། འདི་ལྟར་ན་གང་ཟག་ལ་རང་ཉིད་ཀྱང་བཞག་ཆོག་པའམ། ཡང་ན་དགག་བྱའི་བདག་ལ་བྱེད་དགོས་ཏེ་དཔྱད་པར་བྱའོ། །མདོ་སྡེ་རྒྱན་ལས་དེའི་གོ་རིམ་བཟློག་སྟེ་ཡོངས་གྲགས་འདི་གསུངས་པ་ནི་གདུལ་བྱ་སྤྱིའི་ཉམས་ལེན་གྱི་རིམ་པར་བསྒྲིགས་པའི་རྒྱན་དུ་བྱས་པ་ཡིན་ལ། བྱང་ས་ལས་དོན་ལ་རྟོན་པ་དང་པོ་དང། ཆོས་ལ་རྟོན་པ་གཉིས་པར་བྱས་པ་ནི་དོན་གཙོ་བོར་བྱས་ཏེ་ཉན་ཚུལ་དང། དོན་དེའང་འཐད་སྒྲུབ་ཀྱི་རིགས་པ་དང་ལྡན་པ་ཞིག་དགོས་པར་ཤེས་པའི་ཆེད་ཡིན་ཏེ་རྒྱན་གྱི་བཤད་པ་ལ་ཟུར་བསྐང་བ་ཡིན་པའི་ཕྱིར། བྱང་ས་ལས། རྟོན་པ་བཞི་པོ་དེ་དག་ལས་ནི་མདོར་བསྡུ་ན་ཚད་མ་ཉིད་བཞི་བསྟན་ཏེ། བསྟན་པའི་དོན་དང་རིགས་པ་དང། །ཞེས་གསུངས་པའི་ཕྱིར། དེའང་མདོ་སྡེ་རྒྱན་ལས། གཙུག་ལག་བསྟན་པའི་ཆོས་དང་ནི། །དེའི་དོན་དགོངས་པ་ཅན་དང་ནི། །ངེས་དོན་ཚད་མ་ལྡན་པ་

― GTD002_Page_0452 ―

^{[མ་དཔེ་གཟིགས་ན་འདིར་གནོན།]}

[Full Size]

དང། །དེའི་དོན་བརྗོད་མེད་ཐོབ་པ་འོ། །ཞེས་རྟོན་བཞིའི་ངོ་བོ་དང། སྤོང་དང་ཇི་སྐད་བཤད་པ་དང། །ལོག་པར་ཡང་དག་ཤེས་པ་དང། །བརྗོད་དང་བཅས་པ་ཐོབ་པ་དག །འདིར་ནི་དགག་པར་བསྟན་པ་ཡིན། །ཞེས་དགག་བྱ་བཞི་དང། མོས་དང་རྣམ་པར་དཔྱོད་པ་དང། །གཞན་ལས་ཇི་བཞིན་ཐོས་པ་དང། །བརྗོད་པ་མེད་པའི་ཡེ་ཤེས་ལས། །བརྟན་རྣམས་ཉམས་པར་མི་འགྱུར་རོ། །ཞེས་ཕན་ཡོན་བཞི་གསུངས་སོ། །སའི་དངོས་གཞིར་གང་ཟག་བཞི་ལ་སྦྱར་བ་དང་དུས་བཞི་ལ་སྦྱར་བ་གཉིས་གསུངས་ལ། བྱང་ས་ལས་ཚད་མ་བཞི་དང་སྦྱར་བ་རྣམས་རྟོན་པ་སོ་སོར་རེ་རེ་བཞིན་སྦྱར་ཆོག་ལ། ཀུན་བཏུས་སུ་རིགས་པ་བཞི། རྒྱན་དང་ཐེག་བསྡུས་སུ་དགོངས་པ་བཞི་དང་ལྡེམ་དགོངས་བཞི་གསུངས་པ་རྣམས་སྤྱིར་གསུང་རབ་ཀྱི་དོན་གཏན་ལ་འབེབས་ཚུལ་ཡིན་པས་རྟོན་བཞི་དང་གནད་འདྲའང་རིམ་པ་བཞིན་སྦྱོར་མི་དགོས་སོ། །བྱང་ས་ལས། རྟོན་པ་བཞི་པོ་ཐམས་ཅད་ཀྱིས་ནི་བྱང་ཆུབ་སེམས་དཔའ་ཡང་དག་པའི་སྦྱོར་བ་རྩོམ་པ་ལ་ཞུགས་པའི་ངེས་པར་འབྱིན་པ་འཁྲུལ་བ་མེད་པ་མངོན་པར་གསལ་བར་བྱས་པ་ཡིན་ནོ། །ཞེས་པ་ལྟར་བྱང་ཆུབ་སྒྲུབ་པའི་ལམ་ཉམས་ལེན་གྱི་རིམ་པ་ཐམས་ཅད་གསལ་བར་བསྟན་པ་ཡིན་ཏེ། དང་པོ་ཐོས་པ་བྱེད་ཚུལ་ཡང་བཤད། བསམ་ཚུལ་ཡང་བཤད། སྒོམ་ཚུལ་ཡང་བཤད། དེ་གསུམ་རེ་རེས་མི་ཆོག་པས་ཡ་མ་བྲལ་བར་བྱེད་ཚུལ་ཡང་བཤད། རྒྱུན་གྱི་ཉམས་ལེན་ཡང་བཤད་པའི་ཕྱིར། དང་པོ་གྲུབ་སྟེ། ཐོས་པ་བྱེད་པ་ལ་ཐོག་མར་གང་ཟག་བཞིའི་དང་པོ་ཚུལ་འཆོས་པ་ལྟ་བུ་ཕྱིའི་རྣམ་འགྱུར་སྐྱེས་བུ་དམ་པ་ལྟར་

― GTD002_Page_0453 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོས་པ་དང་བླུན་པོའི་གྲགས་པ་ཙམ་ལ་བརྟེན་པ་མ་ཡིན་པར་ཆོས་བཞིན་སྤྱོད་ཅིང་ཆོས་ཀྱི་ཚུལ་ལེགས་པར་སྟོན་ནུས་པ་ཞིག་ལ་བརྟེན། ཆོས་ཉན་པའི་ཚེའང་རྒྱང་ཕན་པ་ལྟ་བུ་རྟོག་དཔྱོད་མེད་པར་ཚིག་ཙམ་གྱི་རྗེས་སུ་རྒྱུག་པ་མ་ཡིན་པར་དོན་གྱི་ཆ་ལ་བླང་དོར་འཇུག་ལྡོག་གི་གནད་རྣམས་གཙོ་བོར་བྱས་ཏེ་ཉན་པ་དང། ཉན་བྱའི་ཆོས་ཀྱང་རང་ལྟ་མཆོག་འཛིན་པ་ཉན་ཐོས་སྡེ་གཉིས་ལྟ་བུ་རང་བློར་མ་ཤོང་བ་རྒྱུ་མཚན་དུ་བྱས་ནས་ཐེག་པ་ཆེན་པོའི་ངེས་དོན་གྱི་མདོ་རྣམས་སྤོང་བ་དེ་འདྲ་མ་ཡིན་པར། རང་གི་ཁོང་དུ་མ་ཆུད་པ་རྣམས་ངེས་དོན་རྟོགས་པ་གཞན་ལས་མཉན་ཅིང་ཐོས་པར་བྱེད་པ་དང། མཉན་པའི་དགོས་པའང་ཐོས་པ་ཙམ་ལྷུར་ལེན་པའི་གང་ཟག་ལྟ་བུ་ཐོས་ལོ་དང་ཤེས་ལོའི་གྲགས་པ་འདོད་པ་ཙམ་དང་གཤག་འགྱེད་པའི་རྩོད་པ་ལ་ཆགས་པ་ཙམ་མ་ཡིན་པར། གནས་ལུགས་རྟོགས་པའི་ཤེས་རབ་ལ་བརྟེན་ནས་རྣམ་གྲོལ་སྒྲུབ་པའི་ཐབས་སུ་མཉན་པ་ཀུན་སློང་རྣམ་དག་གིས་ཟིན་པ་དགོས་པའི་ཕྱིར། དང་པོ་ནི་སའི་དངོས་གཞི་ལས། འབེལ་བའི་གཏམ་གྱིས་རྣམ་པར་ངེས་པར་བྱས་ནས་ཤེས་པས་རྟོག་པར་བྱ་བ་ཡིན་གྱི། སྤྱོད་ལམ་ཙམ་གྱིས་མ་ཡིན་ནོ། །ཞེས་སོ། །གཉིས་པ་ནི་བྱང་ས་ལས། དོན་འདོད་པའི་ཕྱིར་གཞན་ལས་ཆོས་ཉན་པར་བྱེད་ཀྱི། ཚིག་འབྲུ་ལེགས་པར་སྦྱར་བ་འདོད་པའི་ཕྱིར་མ་ཡིན་ནོ། །ཞེས་སོ། །གསུམ་པ་ནི་རྒྱན་ལས། གཞན་ལས་ཇི་བཞིན་ཐོས་པ་དང། །ཞེས་དང། བློ་བརྟན་གྱིས། སོ་སོར་རྟོན་པ་གསུམ་པས་ནི་སྟོང་པ་དང་བདག་མེད་པར་བཤད་པའི་ཆོས་དག་བདག་གིས་ཁོང་དུ་མ་ཆུད་ན་ང་རྒྱལ་མེད་པར་བྱས་ནས་དེའི་དོན་

― GTD002_Page_0454 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་པ་དག་ལས་བདག་མེད་པ་དང་སྟོང་པའི་དོན་གྱི་ཚུལ་ཉན་པར་བྱེད་དེ། ཞེས་སོ། །བཞི་པ་ནི་དེ་ཉིད་ལས། སོ་སོར་རྟོན་པའི་བཞི་པས་ནི་རྣམ་པར་མི་རྟོག་པའི་ཡེ་ཤེས་ཐོབ་པར་བྱ་བའི་ཕྱིར་འབད་ཅིང་རྩོལ་བར་བྱེད་ཀྱི། ཞེས་སོ། །གཉིས་པ་བསམ་པས་ངེས་པ་སྐྱེད་ཚུལ་ཡང་བཤད་དེ། རང་གི་ཞེན་ཕྱོགས་ཙམ་མ་ཡིན་པར་ཚད་མར་གྱུར་བའི་སྟོན་པའི་གསུང་གི་རྗེས་སུ་སློབ་དགོས། སློབ་ཚུལ་ཡང་གསུང་གི་ཚིག་བཟུང་བ་ཙམ་མ་ཡིན་པར་ལུང་དོན་ལ་འཐད་སྒྲུབ་ཀྱི་རིགས་པས་དཔྱད་པ་གཙོ་བོར་བྱས་ཏེ་གཏན་ལ་འབེབས་དགོས། གཏན་ལ་དབབ་བྱའང་གང་བྱུང་གིས་མི་ཆོག་པར་གང་ལ་ཡིད་རྟོན་པར་བྱས་ན་ཐར་པའི་གྲོང་དུ་བགྲོད་ནུས་ངེས་པའི་དོན་ཟབ་མོ་སྟོང་པ་ཉིད་ཀྱི་ཚུལ་སློབ་དཔོན་ཀླུ་སྒྲུབ་ལྟ་བུས་བཀྲལ་བ་བཞིན་གཏན་ལ་དབབ་དགོས། རྟོགས་པའི་བློའང་བློས་བྱས་ཀྱི་ལྟ་བས་མ་ཡིན་དགག་གི་སྟོང་པ་ལྟ་བུ་གཞལ་བས་མི་ཆོག་པར་དགག་བྱ་བཅད་ཙམ་གྱི་སྟོང་པ་མེད་དགག་དེ་ཉིད་རྟོགས་པ་ཞིག་དགོས་པའི་ཕྱིར། དང་པོ་ནི་བྱང་ས་ལས། རིགས་པ་དང། ཞེས་དང། འདི་ཉིད་ལས། རིགས་པ་དང་འགལ་བའི་གྲུབ་མཐའ་ཁས་ལེན་ན་སྨྲ་བ་པོ་ཚད་མའི་སྐྱེས་བུར་མི་རུང། ཞེས་དང། ལྷ་ལས་ཕུལ་བྱུང་གི་བསྟོད་པ་ལས། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་ཡོངས་སུ་འཛིན། །ཞེས་དང། བློ་བརྟན་གྱིས། ཚད་མར་གྱུར་པ་ནི་སངས་རྒྱས་བཅོམ་ལྡན་འདས་ཏེ། ཞེས་སོ། །གཉིས་པ་ནི་བྱང་ས་ལས། བསྟན་པའི་དོན་དང། ཞེས་དང། སའི་དངོས་གཞི་

― GTD002_Page_0455 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། ཐོས་པ་ལྷུར་བླང་བར་མི་བྱ་ཡི། དོན་ལ་བསམ་པར་བྱ། གཞལ་བར་བྱ། ཉེ་བར་བརྟག་པར་བྱའོ། །ཞེས་དང། འདི་ཉིད་ལས། དྲང་བ་དང་ངེས་པའི་དོན་རྣམ་པར་འབྱེད་པ་ལ་རག་ལས་ཤིང། དེ་གཉིས་རྣམ་པར་འབྱེད་པའང་འདི་ནི་དྲང་བའི་དོན་ནོ་འདི་ནི་ངེས་པའི་དོན་ནོ་ཞེས་པའི་ལུང་ཙམ་གྱིས་ནུས་པ་མ་ཡིན། ཞེས་སོ། །གསུམ་པ་ནི། ངེས་དོན་ཚད་མ་ལྡན་པ་དང་ཞེས་པའི་ཐད་ཀྱི་དབྱིག་འགྲེལ་ལས། ཚད་མ་དང་ལྡན་པའི་དོན་ནི་སྟོན་པ་ཚད་མར་གྱུར་པའམ། དེས་ཚད་མར་མཛད་པས་ངེས་པར་བྱས་ཤིང། ཞེས་དང། བློ་བརྟན་གྱི་འགྲེལ་བཤད་ལས། དེ་བཞིན་གཤེགས་པས་ལུང་བསྟན་པ་སློབ་དཔོན་ཀླུ་སྒྲུབ་ལ་སོགས་པ་ལྟ་བུས་གཉིས་སུ་མེད་པར་བཤད་པའི་དོན་ལ་རྟོན་པ་ནི་ཚད་མར་གྱུར་པས་བཤད་པའི་དོན་ལ་རྟོན་པ་ཞེས་བྱ། ཞེས་དང། འདི་ཉིད་ལས། གསུང་རབ་ཀྱི་དྲང་ངེས་འབྱེད་པར་ལུང་བསྟན་པའི་ཤིང་རྟ་ཆེན་པོ་དག་གིས་དྲང་ངེས་ཀྱི་དགོངས་པ་བཀྲལ་ཅིང་དེའང་ངེས་དོན་གྱི་གསུང་རབ་ཀྱི་དོན་གཞན་དུ་འདྲེན་པ་ལ་གནོད་བྱེད་དང། གཞན་དུ་དྲང་དུ་མི་རུང་བར་དོན་དེར་ངེས་པའི་སྒྲུབ་བྱེད་ཀྱི་རིགས་པས་ལེགས་པར་གཏན་ལ་ཕབ་པ་ཞིག་གི་རྗེས་སུ་འབྲངས་ནས་དགོངས་པ་འཚོལ་དགོས། ཞེས་གསུངས་ལ། རྟོན་པའི་སྒྲ་མི་བསླུ་བ་ལའང་འཇུག་ཅིང་ངེས་དོན་ཡང་མི་བསླུ་བའི་དོན་དུ་འགྲོ་བའི་ཐད་འདིར་བྱང་ས་ལས། རྟོན་པ་དང་ཞེས་གསུངས་སོ། །བཞི་པ་ནི་བློ་གྲོས་མི་ཟད་པའི་མདོ་ལས། རྣམ་པར་ཤེས་པ་ཞེས་བྱ་བ་ནི་རྣམ་པར་ཤེས་པ་གནས་པ་བཞི་

― GTD002_Page_0456 ―

^{[མ་དཔེ་གཟིགས་ན་འདིར་གནོན།]}

[Full Size]

སྟེ། བཞི་གང་ཞེ་ན། འདི་ལྟ་སྟེ། རྣམ་པར་ཤེས་པ་གནས་པ་ན་གཟུགས་ལ་ཉེ་བར་འགྲོ་ཞིང་གནས་སོ། །རྣམ་པར་ཤེས་པ་གནས་པ་ན་ཚོར་བ་ལ་ཉེ་བར་འགྲོ་བ་དང། འདུ་ཤེས་ལ་ཉེ་བར་འགྲོ་བ་དང། འདུ་བྱེད་ལ་ཉེ་བར་འགྲོ་ཞིང་གནས་པ་སྟེ་འདི་ནི་རྣམ་པ་ཤེས་པ་ཞེས་བྱའོ། །ཞེས་པ་ནས། ཆོས་ལ་རྣམ་པར་རིག་པ་འདི་ནི་རྣམ་པར་ཤེས་པ་ཞེས་བྱའོ། །གཞན་ཡང་ནང་ཉེ་བར་ཞི་ཞིང་ཕྱི་རོལ་ཏུ་རྒྱུ་བ་མེད་པ་དང། ཡེ་ཤེས་ལ་རྟོན་པས་ཆོས་གང་ཡང་མི་རྟོག་ཅིང་རྣམ་པར་མི་རྟོག་པ་འདི་ནི་ཡེ་ཤེས་ཞེས་བྱའོ། །ཞེས་དང། བློ་བརྟན་གྱིས། རང་བཞིན་གྱིས་སྟོང་པར་ཁོང་དུ་ཆུད་ཅིང་གཟུགས་ལ་སོགས་པའི་ཡུལ་ལ་མི་རྟོག་པ་ནི་ཡེ་ཤེས་ཞེས་བྱ། ཞེས་ཀུན་རྫོབ་ཀྱི་སྣང་བ་བཀག་ནས་བདེན་སྟོང་གཏན་ལ་དབབ་པར་གསུངས་སོ། །རྣམ་ཤེས་ཀྱི་གནས་པ་བཞིར་བཤད་པའི་རྒྱུ་མཚན། འདོད་ཁམས་པ་རྣམས་འདོད་ཡོན་ལྔས་བསྡུས་པའི་གཟུགས་ལ་སྲེད་པ་དང། བསམ་གཏན་བཞི་ཚོར་བ་རིགས་བཞི་ལ་སྲེད་པ་དང། གཟུགས་མེད་དང་པོ་གསུམ་ནམ་མཁའ་མཐའ་ཡས་སོ་སྙམ་པ་ལྟ་བུའི་འདུ་ཤེས་ཀྱིས་བཅིངས་པ་དང། སྲིད་རྩེར་དེ་འདྲའི་འདུ་ཤེས་ཚུན་ཆད་མེད་ཀྱང་ལས་ཉོན་གྱིས་བཅིངས་པའི་འདུ་བྱེད་མ་དོར་བས་དེ་དག་གི་སས་བསྡུས་པའི་སེམས་ལ་རྣམ་ཤེས་དང། ཁམས་གསུམ་ལས་འདས་པ་འཁོར་བའི་འཆིང་བ་དགྲོལ་བྱེད་ཀྱི་སེམས་ལ་ཡེ་ཤེས་སུ་བྱས་པར་བློ་བརྟན་གྱིས་གསུངས་ལ། བློ་གྲོས་མི་ཟད་པའི་མདོ་འགྲེལ་དབྱིག་གཉེན་གྱིས་མཛད་པ་ལས། འདུ་བྱེད་ལ་ཉེ་བར་འགྲོ་བ་ནི་འགོག་པའི་སྙོམས་པར་འཇུག་པའི་རྣམ་

― GTD002_Page_0457 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཤེས་པ་ཐོག་མ་འགོག་པའི་སྙོམས་པར་འཇུག་པ་ན། དེའི་བྱ་བ་བྱེད་པར་དམིགས་ཤིང་བཅོལ་བའི་ཕྱིར་འདུ་བྱེད་ལ་ཉེ་བར་འགྲོ་བ་ཞེས་བྱའོ། །ཡང་ན་སྲིད་པའི་རྩེ་མོའི་རྣམ་པར་ཤེས་པ་ནི་ཚེའི་འདུ་བྱེད་ཡུན་རིང་པོར་གནས་པ་དེ་ལ་བརྟེན་ཅིང་གནས་པས་ན་འདུ་བྱེད་ལ་ཉེ་བར་འགྲོ་ཞིང་གནས་པ་ཞེས་བྱ་སྟེ། འདི་ནི་རྣམ་པར་ཤེས་པའོ། །ཞེས་གཞན་རྣམས་འདྲའང་འདུ་བྱེད་ལ་ཉེ་བར་འགྲོ་བའི་དོན་ཚུལ་གཉིས་གསུངས་སོ། །དེ་ལྟར་ན་རྟོན་པ་བཞི་ལ། རིགས་པ་ཚད་མ། དོན་ཚད་མ། རྟོན་པ་ཚད་མ། ཡེ་ཤེས་ཚད་མ་ཞེས་ཀྱང་གྲུབ་མཐའ་ཆེན་མོར་གསུངས་སོ། །སྒོམ་པ་བྱེད་ཚུལ་ཡང་བཤད་དེ། དང་པོར་སྒོམ་གྱི་གོལ་ས་ཆེ་ཤོས་ནི་གཞུང་ཆེན་མོ་རྣམས་ཕྱིའི་གོ་རྒྱ་གཅོད་བྱེད་ཙམ་དུ་བཟུང་ནས་ཡལ་བར་དོར་ཏེ་མན་ངག་ཏུ་གྲགས་པ་རེ་ལ་ཉམས་ལེན་སྙིང་པོར་བྱེད་པ་མང་ཡང། སངས་རྒྱས་ལས་མཁས་པ་སུའང་མེད་ཅིང། དེ་ནི་ཐུགས་རྗེ་ལྷག་པར་ཆེ་བས་དོན་དུ་འགྱུར་ན་མི་གསུང་མི་སྲིད་པས། དེའི་གསུང་རབ་ལ་མན་ངག་གི་རྒྱལ་བོར་གོ་ནས་མོས་པ་བྱེད་དགོས། བཀའ་ལ་སྒྲས་ཟིན་འགལ་བ་ཡོད་ཀྱང་དགོངས་པའི་དོན་ལ་དཔྱད་ན་འགལ་བ་མེད་པས་བསྟན་པ་ཐམས་ཅད་འགལ་མེད་དུ་རྟོགས་དགོས། དེ་ལྟར་བྱས་པས་དྲང་དོན་རྣམས་ཀྱིས་རིམ་གྱིས་ཁྲིད་ནས་མཐར་ངེས་དོན་ལ་སྦྱོར་བས་དེ་ཉམས་ལེན་གྱི་སྙིང་པོ་དང་གཞན་རྣམས་དེའི་ཡན་ལག་ཏུ་གོ་སྟེ་གསུང་རབ་མ་ལུས་གདམས་ངག་ཏུ་འཆར་དགོས། གདམས་པར་ཤར་བ་ན་ཉིན་མཚན་མེད་པར་ཉམས་སུ་བླངས་ཏེ་མི་རྟོག་ཡེ་ཤེས་ཀྱིས་མྱང་འདས་སུ་བགྲོད་དགོས་པའི་ཕྱིར། དང་པོ་ནི་རྒྱུད་བླ་མ་ལས། གང་

― GTD002_Page_0458 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པས། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས། །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་དང། རྒྱན་ལས། མོས་དང། ཞེས་དང། བློ་བརྟན་གྱིས། དྲང་སྲོང་ཆེན་པོ་སངས་རྒྱས་བཅོམ་ལྡན་འདས་ཀྱིས་བཤད་པའི་གསུང་རབ་ལས་ཇི་སྐད་འབྱུང་བ་བཞིན་དུ་དེའི་རྗེས་སུ་འབྲང་གི གང་ཟག་སོ་སོ་ཐ་དད་པ་མི་མཐུན་པ་སྟོན་པའི་ཚིག་ལ་མི་སྙེགས་པ་ནི་ཞལ་ནས་གསུང་བའི་ཆོས་སྟོན་པ་ཞེས་བྱ་སྟེ། ཞེས་སངས་རྒྱས་རང་ཉིད་ཀྱིས་གསུངས་པ་དེ་དོར་མི་རུང་བར་བཤད་དེ། གཙུག་ལག་བསྟན་པའི་ཆོས་དང་ནི། །ཞེས་པ་དེར་འགྱུར་ཁྱད་ཞུགས་པར་སྣང། གཉིས་པ་ནི་རྒྱན་ལས། རྣམ་པར་དཔྱོད་པ་དང། ཞེས་དང། བློ་བརྟན་གྱིས། དགོངས་པ་དཔྱོད་པས་ན་ཉམས་པར་མི་འགྱུར་ཏེ། ཅིའི་ཕྱིར་ཞེ་ན། སྒྲ་ཇི་བཞིན་དུ་བཟུང་ནས་དགོངས་པ་ལོག་པར་དྲངས་པ་ནི་ཉམས་པར་འགྱུར་གྱི། དགོངས་པའི་དོན་ཕྱིན་ཅི་མ་ལོག་པར་བཟུང་ན་ཉམས་པར་མི་འགྱུར་བའི་ཕྱིར་རོ། །ཞེས་སོ། །གསུམ་པ་ནི་ལེགས་བཤད་སྙིང་པོ་ཆུང་བར། ཁྱོད་ཀྱིས་ཇི་སྙེད་བཀའ་སྩལ་པ། །རྟེན་འབྲེལ་ཉིད་ལས་བརྩམས་ཏེ་འཇུག །ཅེས་དང། ཡུལ་འཁོར་སྐྱོང་གིས་ཞུས་པ་ལས། དེ་དག་ཐུགས་རྗེ་མངའ་བས་ཐབས་ཚུལ་དང། །རིགས་པ་བརྒྱ་དག་གིས་ནི་འཛུད་པར་མཛད། །ཅེས་སོ། །བཞི་པ་ནི་རྒྱན་ལས། བརྗོད་པ་མེད་པའི་ཡེ་ཤེས། ཞེས་དང། ཊཱིཀ་ཆེན་དེ་ཉིད་སྣང་བ་ལས། ཡེ་ཤེས་ནི་སྒོམ་བྱུང་གི་ཤེས་

― GTD002_Page_0459 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་དང། དེའང་གཙོ་ཆེར་སྟོང་ཉིད་མངོན་སུམ་དུ་རྟོགས་པའི་འཕགས་པའི་ཡེ་ཤེས་ཡིན་ཅིང། ཞེས་སོ། །བཞི་པ་ཐོས་བསམ་སྒོམ་གསུམ་ཡ་མ་བྲལ་བར་བྱེད་ཚུལ་ཡང་བཤད་དེ། གང་ཟག་ལ་མི་རྟོན་ཆོས་ལ་རྟོན་པས་ཐོས་པ་རྒྱ་ཆེན་པོ་བྱས་ཏེ་ཆོས་ཀུན་ཆུབ་པར་བྱེད། ཚིག་ལ་མི་རྟོན་དོན་ལ་རྟོན་པས་གང་ཐོས་པ་དེའི་དོན་རྣམས་མི་བརྗེད་པར་འཛིན་པར་བྱེད། དྲང་དོན་ལ་མི་རྟོན་ངེས་དོན་ལ་རྟོན་པས་དགོངས་པ་ཉེ་བར་བརྟགས་ཏེ་སྒྲོ་འདོགས་བཅད་ནས་ཐོས་པའི་དོན་ལ་བསམ་བྱུང་གི་ངེས་པ་རྙེད་པར་བྱེད། རྣམ་ཤེས་ལ་མི་རྟོན་ཡེ་ཤེས་ལ་རྟོན་པས་ཐོས་བསམ་ཙམ་གྱིས་ཆོག་ཤེས་མི་བྱེད་པར་ཐོས་དོན་ཉམས་སུ་བླངས་ཏེ་སྒོམ་བྱུང་གི་ཡེ་ཤེས་སྐྱེད་པའི་ཕྱིར། སའི་དངོས་གཞི་ལས། དུས་བཞིར་ཆུད་ཟ་བར་འགྱུར་བ་དང། ཆུད་ཟ་བར་མི་འགྱུར་བའི་ཕྱིར་གང་ཟག་བཞིར་རྣམ་པར་བཞག་སྟེ། ཆོས་ཀུན་ཆུབ་པར་བྱེད་པའི་དུས་དང། འཛིན་པའི་དུས་དང། དོན་ལ་ཉེ་བར་རྟོག་པའི་དུས་དང། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པའི་དུས་ལས་རྟོན་པ་བཞིར་རྣམ་པར་བཞག་པ་ཡིན་ནོ། །ཞེས་དང། བྱང་ས་ལས། རྟོག་པའི་ཡེཤེས་ལ་སྙིང་པོར་ལྟ་བ་ཡིན་གྱི། ཐོས་པ་དང་བསམ་པས་ཆོས་དང་དོན་རྣམ་པར་ཤེས་པ་ཙམ་ལ་ནི་མ་ཡིན་ནོ། །ཞེས་སོ། །ལྔ་པ་རྒྱུན་གྱི་ཉམས་ལེན་ནམ་སྤྱོད་ཚུལ་ཡང་བསྟན་ཏེ། གང་ཟག་བཟང་ངན་ལ་མ་ལྟོས་པར་དོན་དུ་འགྱུར་ན་སུས་བཤད་ཀྱང་ཉན་དགོས་པ་དང། ཁ་ནས་བཤད་ཤེས་པས་མི་ཆོག་གི སྒོ་གསུམ་གྱིས་ཅི་བྱེད་དོན་དང་ལྡན་པ་དགོས་པ་དང། དོན་ཡང་ཕུགས་སུ་མི་བསླུ་བ་

― GTD002_Page_0460 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་དགོས་པ་དང། མདོར་ན་ཅི་བྱས་ཐར་པའི་རྒྱུར་འགྲོ་བ་ཞིག་དགོས་པའི་ཕྱིར། དང་པོ་ནི་བྱང་ས་ལས། ཕལ་བའི་སྐད་ཀྱིས་ཆོས་སྟོན་ནའང་བྱང་ཆུབ་སེམས་དཔའ་དོན་ལ་རྟོན་པས་ནི་གུས་པར་བྱས་ཏེ་ཉན་པར་བྱེད། ཅེས་དང། དེའི་དོན་ཀུན་མཁྱེན་བླ་མའི་མཐའ་དཔྱོད་དུ། དོན་ཟབ་ན་ཕལ་པའི་སྐད་དང་ཕལ་པས་སྟོན་ཀྱང་གུས་པར་བྱེད། ཅེས་ཕལ་ཚིག་གིས་བཤད་པར་མ་ཟད་བཤད་མཁན་མི་ཕལ་པ་ཞིག་ཡིན་ནའང་སྨྲས་པ་དོན་དུ་འགྱུར་ཚེ་འདོར་མི་རུང་བར་གསུངས་ཏེ། འཇམ་མགོན་ས་པཎ་གྱིས། ལེགས་བཤད་བྱིས་པ་དག་ལས་ཀྱང། །མཁས་པ་རྣམས་ནི་ཡོངས་སུ་ལེན། །དྲི་ཞིམ་འབྱུང་ན་རི་དྭགས་ཀྱི། །ལྟེ་བ་ལས་ཀྱང་གླ་རྩི་ལེན། །ཞེས་པ་ལྟར་སུ་དང་འགྲོགས་ཀྱང་ལེགས་བཤད་ལེན་ཤེས་པ་ཞིག་དགོས་སོ། །གཉིས་པ་ནི་བློ་བརྟན་གྱིས། འཇིག་རྟེན་གྱི་ཆོས་ལས་འདས་པའི་ཆོས་ནི་དོན་ཏེ། དེ་ལ་རྟོན་པ་ནི་དོན་ལ་རྟོན་པ་ཞེས་བྱའོ། །འཇིག་རྟེན་གྱི་ཆོས་ཐམས་ཅད་ནི་ཚིག་ཅེས་བྱ་སྟེ། དེ་ལ་རྟོན་པ་ནི་ཚིག་ལ་རྟོན་པ་ཞེས་བྱའོ། །ཞེས་འཇིག་རྟེན་གྱི་བདེ་འབྱོར་ཐམས་ཅད་ནི་མིང་སྙན་ཡང་དོན་བསླུ་བྲིད་ལས་མེད་པས་དོན་ལྡན་བསླུ་བ་མེད་པའི་ཆོས་རྣམ་དག་ཁོ་ན་ཞིག་བྱ་དགོས་པར་གསུངས་སོ། །གསུམ་པ་ནི་བློ་གྲོས་མི་ཟད་པའི་མདོ་ལས། མདོ་གང་ལས་ཀྱི་བྱ་བ་ལ་འཇུག་པར་བསྟན་པ་དེ་དག་ནི་དྲང་བའི་དོན་ཞེས་བྱའོ། །མདོ་གང་ལས་དང་ཉོན་མོངས་པ་ཟད་པར་བྱ་བའི་ཕྱིར་བསྟན་པ་དེ་དག་ནི་ངེས་པའི་དོན་ཞེས་བྱའོ། །ཞེས་ཆོས་ཀྱང་སྡིག་སྤོང་དགེ་བ་སྒྲུབ་པ་ཆུང་ངུ་དང་ཐུན་མོང་བའི་མངོན་མཐོའི་ཆོས་སྐོར་ཙམ་གྱིས་མི་ཆོག་པར། ལས་ཉོན་ཟད་པར་

― GTD002_Page_0461 ―

^{[མ་དཔེ་གཟིགས་ན་འདིར་གནོན།]}

[Full Size]

སྤངས་པའི་ངེས་ལེགས་ཐར་པའི་རྒྱུར་འགྲོ་བ་ཞིག་དགོས་པར་གསུངས་པ་ཡིན་ནོ། །བཞི་པ་ནི་བློ་གྲོས་མི་ཟད་པའི་མདོ་ལས། གཞན་ཡང་དམིགས་པ་ལས་རྣམ་པར་ཤེས་པ་སྐྱེ་བ་དང། ཡིད་ལ་བྱེད་པ་ལས་རྣམ་པར་ཤེས་པ་སྐྱེ་བ་དང། ཀུན་ཏུ་རྟོག་པ་ལས་རྣམ་པར་ཤེས་པ་སྐྱེ་བ་འདི་ནི་རྣམ་པར་ཤེས་པ་ཞེས་བྱའོ། །གང་ཡང་འཛིན་པ་མེད་པ་དང། སྙེམས་པ་མེད་པ་དང། དམིགས་པ་མེད་པ་དང། རྣམ་པར་རིག་པ་མེད་པ་དང། རྟོག་པ་མེད་པ་འདི་ནི་ཡེ་ཤེས་ཞེས་བྱའོ། །ཞེས་མཚན་འཛིན་དང་རྣམ་རྟོག་གི་སྤྲོས་པ་མཐའ་དག་ཟད་པའི་དག་པ་གཉིས་ལྡན་གྱི་དབྱིངས་དང་རོ་གཅིག་པའི་ཡེ་ཤེས་མངོན་དུ་བྱེད་ནུས་པ་ཞིག་དགོས་པར་གསུངས་སོ། །ཡང་དགེ་སློང་དག་གམ་ཞེས་སོགས་ཀྱི་ཚིགས་བཅད་དེས་ལུང་དཔྱད་གསུམ་གྱིས་དག་པའི་ཚུལ་ཡང་བསྟན་ཏེ། ཀ་མ་ལ་ཤཱི་ལས། དེ་ལ་བསྲེགས་པ་ནི་མངོན་སུམ་དང་ཆོས་མཐུན་པར་བསྟན་པའི་ཕྱིར་རོ། །བཅད་པ་ནི་རྗེས་སུ་དཔག་པ་དང་ཆོས་མཐུན་པར་བསྟན་པའི་ཕྱིར་རོ། །བརྡར་བ་ནི་ཡིད་ཆེས་པ་དང་ཆོས་མཐུན་པར་བསྟན་པའི་ཕྱིར་རོ། །ཞེས་རིགས་ཐིགས་ཀྱི་ཕྱོགས་སྔ་མ་མདོར་བསྡུས་སུ་གསུངས་སོ། །རྟོན་བཞིའི་རྣམ་གཞག་འདི་ལས་འཕྲོས་པ་གྲགས་ཆེའང་གོང་གི་རྩ་ཚིག་རྣམས་ཀྱིས་རྟོན་བཞི་བཤད་སྙམ་པ་དང། རྟོན་བཞིའི་ཁོངས་འདིར་རྒྱལ་བའི་བསྟན་པ་ལ་སློབ་ཚུལ་གྱི་མན་ངག་ཆ་ཚང་བའི་སྡོམ་ཆེན་པོ་ཞིག་ཡོད་སྙམ་པ་སུ་ལའང་མི་འདུག་པས་ཅུང་ཟད་རྒྱས་པར་བཤད་པ་ཡིན་ནོ། །མཐའ་དཔྱད་པ་ལ་ཁ་ཅིག་ན་རེ། གདུལ་བྱའི་བསམ་ཚོད་ལྟར་ཐར་པ་ཐོབ་

― GTD002_Page_0462 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཐབས་སུ་མི་བདེན་པ་དེ་གང་ཟག་ལ་མི་རྟོན་པའི་དོན་དང། སྟོན་པས་དྲང་ངེས་ཀྱི་གསུང་རབ་ཇི་སྙེད་ཅིག་གསུངས་པ་ཐམས་ཅད་ཐར་པ་ཐོབ་པའི་ཐབས་སུ་བདེན་པ་དེ་ཆོས་ལ་རྟོན་པའི་དོན་ཡིན་ཏེ། ཀུན་མཁྱེན་ཆོས་འབྱུང་གི་གསུང་ལས། གང་ཟག་དེ་རྣམས་ཀྱི་བསམ་ཚུལ་སྣ་ཚོགས་པ་ལྟར་དུ་ཐར་པ་ཐོབ་པའི་ཐབས་སུ་མི་བདེན་གྱི། དེའི་བསམ་ཚུལ་དང་མཐུན་པར་སྟོན་པས་དྲང་ངེས་ཀྱི་ཆོས་སྒོ་སྣ་ཚོགས་སུ་གསུངས་པ་ཐར་པ་ཐོབ་པའི་ཐབས་སུ་བདེན་པ་དེ་གང་ཟག་ལ་མི་རྟོན་ཆོས་ལ་རྟོན་པའི་དོན་ཡིན་ཏེ། ཞེས་གསུངས་པའི་ཕྱིར་ཟེར། དོན་ལ་རུང་ཡང་རྩོད་བློ་འཕེལ་ཕྱིར་ཅུང་ཟད་སྤྲོ་ན། མུ་སྟེགས་གཅེར་བུ་པ་ཆོས་ཅན། ཆོས་ལ་རྟོན་པར་ཐལ། སྟོན་པས་ཆོས་གསུངས་ཚད་ཐར་པ་ཐོབ་པའི་ཐབས་སུ་བདེན་པའི་ཕྱིར་ཏེ། སྟོན་པས་དྲང་ངེས་ཀྱི་སྡེ་སྣོད་གསུངས་ཚད་ཐར་འདོད་ཀྱི་དོན་ལ་མི་བསླུ་བའི་བསྟན་བཅོས་རྣམ་དག་ཡིན་པའི་ཕྱིར། འདོད་མི་ནུས་ཏེ། ཆོས་ལ་མི་རྟོན་པར་གང་ཟག་ལ་རྟོན་པའི་ཕྱིར། སའི་དངོས་གཞི་ལས། དང་པོ་ནི་ཚུལ་འཆོས་པའི་གང་ཟག་གི་བྱེ་བྲག་གིས་སོ། །ཞེས་གསུངས་པའི་ཕྱིར། ཁྱབ་སྟེ། གཅེར་བུ་པ་རྣམས་ནང་དུ་ཆོས་ཀྱི་ཉམས་ལེན་མེད་པར་ཕྱིའི་ཀུན་སྤྱོད་དཀའ་ཐུབ་སོགས་ཆོས་ལྟར་བཅོས་པ་ལ་ཡིད་ཆེས་ནས་དམ་པར་འཛིན་པ་ཡིན་པས། དེ་ལས་གོ་བཟློག་སྟེ་རང་ལུགས་ཀྱི་རྟོན་པ་དང་པོ་བཞག་པ་ཡིན་པའི་ཕྱིར། བཞི་བརྒྱ་པ་ལས། ཤཱཀྱ་གོས་མེད་བྲམ་ཟེ་རྣམས། །ཆོས་ནི་རིམ་བཞིན་ཡིད་དང་ནི། །མིག་དང་རྣ་བ་ཡིས་འཛིན་པ། །དེས་ན་ཐུབ་པའི་གཞུང་ལུགས་ཕྲ། །ཞེས་དང། དེའི་དར་ཊཱིཀ་

― GTD002_Page_0463 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། ཤཱཀྱ་པ་དང། གོས་མེད་གཅེར་བུ་པ་དང། བྲམ་ཟེ་གསུམ་པོ་རྣམས་ཀྱི་ཆོས་རིམ་པ་བཞིན་དུ་ཡིད་དང་མིག་དང་རྣ་བ་ཡིས་འཛིན་པ་དེའི་ཕྱིར་ཐུབ་པའི་གཞུང་ལུགས་ཕྲ་བས། ཞེས་པ་ནས། གཅེར་བུ་པ་རྣམས་ལུས་ཉི་ལྷགས་ཀྱིས་གཟིར་ཞིང་གཙང་སྦྲ་སྤྱོད་པ་དང་བྲལ་བས་མཐོང་བ་ཁོ་ནས་གོ་བ་དང། ཞེས་གསུངས་པའི་ཕྱིར། ཡང་ཁོ་ན་རེ། གསུང་རབ་ཐམས་ཅད་ཐར་པ་ཐོབ་པའི་ཐབས་སུ་བདེན་པ་ཙམ་དེར་མི་འཇོག་གི དེའི་ཐབས་སུ་བདེན་པར་འཛིན་པ་དེ་ཆོས་ལ་རྟོན་པའི་དོན་ཡིན་ཟེར་ན་དེའི་ཐབས་སུ་བདེན་པར་འཛིན་པའང་མི་རུང་བར་ཐལ། དེའི་ཐབས་སུ་བདེན་པར་འཛིན་པའི་བློ་དེ་བདེན་འཛིན་ཡིན་པའི་ཕྱིར། ལམ་བསྒོམ་བྱར་བདེན་པར་འཛིན་པའི་བློ་དེ་བདེན་འཛིན་ཡིན་པའི་ཕྱིར། ལམ་བསྒོམ་བྱར་བདེན་པར་མ་གྲུབ་པ་སྟོང་ཉིད་ཡིན་པའི་ཕྱིར་ཏེ། རྒྱུད་ལས། དངོས་པོ་མེད་པས་སྒོམ་པ་མེད། །ཅེས་གསུངས་པའི་ཕྱིར། ཡང་ཁོ་ན་རེ། དེའི་ཐབས་སུ་བདེན་པར་རྟོགས་པ་དེ་དེའི་དོན་ཡིན་ཟེར་ན། མི་འཐད་པར་ཐལ། དེའི་ཐབས་སུ་བདེན་པར་བཟུང་ན་འཛིན་ཚུལ་ཕྱིན་ཅི་ལོག་ཏུ་འགྲོ་བའི་ཕྱིར། མ་གྲུབ་ན། དེའི་ཐབས་སུ་བདེན་པར་འཛིན་པའི་ཚད་མ་དང། དེའི་ཐབས་སུ་བདེན་པར་མེད་པར་འཛིན་པའི་ཚད་མ་གཉི་ག་ཡོད་པར་ཐལ་བ་དང། དེར་འཛིན་པའི་རིག་པ་ཡེ་ཤེས་དང། དེར་འཛིན་པའི་མ་རིག་པ་གཉིས་ཀ་ཡོད་པར་ཐལ་བ་སོགས་སྤྲོ་སླ་ཞིང། འདོད་མི་ནུས་ཏེ། འགལ་བ་ལ་མི་འཁྲུལ་བའི་ཚད་མ་མེད་པའི་ཕྱིར། ཡང་ཁ་ཅིག །གསུང་རབ་ཐམས་ཅད་ཐར་པ་ཐོབ་པའི་ཐབས་སུ་མི་བསླུ་

― GTD002_Page_0464 ―

^{[མ་དཔེ་གཟིགས་ན་འདིར་གནོན།]}

[Full Size]

བར་རྟོགས་པ་དེ་ཆོས་ལ་རྟོན་པའི་དོན་ཡིན་ཟེར་ན། དྲང་ངེས་ཕྱེ་མ་ཐག་པའི་གང་ཟག་ཆོས་ཅན། ཁྱོད་ཀྱིས་དེ་ལྟར་རྟོགས་པར་ཐལ། ཁྱོད་ཆོས་ལ་རྟོན་པའི་ཕྱིར་ཏེ། རྟོན་པ་བཞིའི་སྒོ་ནས་དྲང་ངེས་ཕྱེ་བའི་ཕྱིར། འདོད་ན། གསུང་རབ་ཐམས་ཅད་ཐར་འདོད་ཀྱི་བསྒྲུབ་བྱའི་དོན་ལ་མི་བསླུ་བར་རྟོགས་པར་ཐལ། འདོད་པའི་ཕྱིར། འདོད་ན། གསུང་རབ་ཐམས་ཅད་རང་གི་བསྟན་དོན་ལ་མི་བསླུ་བར་རྟོགས་པར་ཐལ་ལོ། །འདོད་ན། ཆོས་ཐམས་ཅད་རྟོགས་པར་ཐལ། གསུང་རབ་མཐའ་དག་རང་གི་བསྟན་དོན་ལ་མི་བསླུ་བར་རྟོགས་པའི་ཕྱིར། ཁྱབ་སྟེ། ཡིད་ཆེས་ཀྱི་རྟགས་སྦྱོར་ལ་བརྟེན་ནས་ལུང་དེ་རང་གི་བསྟན་དོན་ལ་མི་བསླུ་བར་རྟོགས་པ་ལ་དེའི་བསྟན་བྱའི་ཤིན་ལྐོག་གི་ཆོས་དེའང་རྟོགས་དགོས་པའི་ཕྱིར། དེར་ཐལ། ལས་འབྲས་ཀྱི་འབྲེལ་བ་ཕྲ་མོ་ཡིད་ཆེས་ཀྱི་རྟགས་སྦྱོར་ལ་བརྟེན་ནས་སྒྲུབ་ཚུལ་དང་རྟོགས་ཚད་ཡོད་པའི་ཕྱིར། ཡང་ཁ་ཅིག་ན་རེ། རྒྱུད་རྟོག་གསུམ་ལས། རྟོག་ཅིང་དཔྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་རིང། །ཞེས་གསུངས་པས། གསུང་རབ་མཐའ་དག་ཚད་མར་བྱེད་དགོས་ཀྱི། དེའི་དོན་ལ་འཐད་མི་འཐད་ཀྱི་བརྟག་དཔྱད་བྱེད་མི་རུང་ཟེར་ན། བརྟག་དཔྱད་བྱས་པ་ཙམ་གྱིས་ཚད་མར་མ་བཟུང་པར་མི་འགྲོ་བར་ཐལ། ལུང་སོ་སོའི་དགོངས་པ་བཙལ་ཏེ་སྒྲས་ཟིན་མི་མཐུན་པའི་རྒྱུ་མཚན་ཤེས་ནས་འདོར་ལེན་བྱས་པ་དེ་ཉིད་གསུང་རབ་ཚད་མར་བྱེད་ལུགས་ཡིན་པའི་ཕྱིར། དེར་ཐལ། མདོ་སྡེ་རྒྱན་ལས། སྤོང་དང་ཇི་སྐད་བཤད་པ་དང། ཞེས་རྟོན་པ་དང་པོའི་ལྡོག་ཕྱོགས་ལུང་སོ་སོའི་སྒྲས་ཟིན་མི་མཐུན་པར་མཐོང་ནས་སྤོང་བ་

― GTD002_Page_0465 ―

^{[མ་དཔེ་གཟིགས་ན་འདིར་གནོན།]}

[Full Size]

དང། རྟོན་པ་གཉིས་པའི་ལྡོག་ཕྱོགས་ཚིག་ཙམ་ལ་རྟོན་པས་ལུང་ཐམས་ཅད་ཀྱི་སྒྲས་ཟིན་ཇི་སྐད་བཤད་པ་བཞིན་དུ་འཛིན་པ་གཉི་ག་ཆོས་ལས་ཉམས་བྱེད་དང་མ་དད་པའི་རྒྱུར་འགྲོ་བའི་ཕྱིར། ཐེག་པ་ཆེན་པོ་ལ་དད་པ་རབ་ཏུ་སྒོམ་པའི་མདོ་རྣམ་བཤད་རིགས་པར་དྲངས་པ་ལས། བཅོམ་ལྡན་འདས་ཀྱིས་སྒྲ་ཇི་བཞིན་དུ་ཚུལ་བཞིན་མ་ཡིན་པས་ཆོས་རྣམས་ལ་རབ་ཏུ་རྣམ་པར་འབྱེད་ན་ཐེག་པ་ཆེན་པོ་ལ་དད་པའི་འབྱུང་གནས་སུ་མི་འགྱུར་རོ། །དགོངས་པ་ཅན་གྱི་དོན་ནི་སྒྲ་ཇི་བཞིན་མ་ཡིན་པ་ཚུལ་བཞིན་ཡིད་ལ་བྱེད་ན་ཐེག་པ་ཆེན་པོ་ལ་དད་པའི་འབྱུང་གནས་སུ་འགྱུར་རོ། །ཞེས་སོགས་ཀྱིས་སྒྲ་ཇི་བཞིན་པ་ཁོ་ནར་བཟུང་བ་ལ་བརྟེན་ནས་ཁས་མི་ལེན་པའི་ལྟ་བ་དང། ངན་གཡོའི་ལྟ་བ་སོགས་ལྟ་ངན་ཉེར་བརྒྱད་འབྱུང་ཚུལ་གསུངས་པའི་ཕྱིར། མདོ་རང་ཉིད་ཀྱི་འགྱུར་ལས། དད་པ་སྐྱེ་བའི་གནས་སུ་འགྱུར་རོ། །ཞེས་འབྱུང། གཞན་ཡང་གསུང་རབ་ཀྱི་དོན་ལ་ཡིད་ཆེས་ཀྱི་ངེས་པ་སྐྱེད་ཚུལ་མེད་པར་ཐལ། ལུང་ཙམ་གྱིས་གོ་མི་ཆོད་ཅིང་རིག་པས་དཔྱད་པ་བྱས་ན་གསུང་རབ་ལ་ཚད་མར་མ་བཟུང་བའི་སྐྱོན་དུ་འགྱུར་བའི་ཕྱིར། རྟགས་ཁས། དེས་ན་གསུང་རབ་ལ་ཚད་མར་བྱེད་དགོས་ཀྱང་བྱེད་ཚུལ་ཤེས་པ་གལ་ཆེ་སྟེ། མོས་བློ་ཙམ་གྱིས་གང་གསུང་སྒྲ་ཇི་བཞིན་དུ་བཟུང་ན་རྟོན་པ་དང་པོ་གཉིས་ཀྱི་ཟློག་ཟླར་འགྱུར་བས། རྒྱལ་བའི་བཀའ་ལས་འབྱུང་བའི་དྲི་མ་མེད་པའི་རིགས་པའི་ལམ་ནས་དོན་དངོས་པོའི་སྡོད་ལུགས་ལ་དཔྱོད་པའི་རིགས་པ་དྲི་མ་མེད་པ་ཞིག་གིས་དྲང་ངེས་འབྱེད་པ་དེ་གསུང་རབ་ལ་ཚད་མར་བྱེད་ལུགས་ཀྱི་མཆོག་ཡིན་པའི་ཕྱིར། སྔགས་རིམ་

― GTD002_Page_0466 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མཐའ་དཔྱོད་མྱུ་གུ་ལས། གཞུང་ལུགས་རྣམས་སུ་རིགས་པས་བསྒྲུབས་པ་ལྟར་རིགས་པས་གྲུབ་པ་དགོས་ཀྱི། དེ་དག་ཚུར་མཐོང་ལ་ཤིན་ཏུ་ལྐོག་གྱུར་ཡིན་པས་སྒྲུབ་བྱེད་ལུང་ཙམ་དུ་ཟད་དོ་ཞེས་སྨྲ་བ་ནི། བདག་ནི་སྟོན་པ་གཞན་སྤངས་ནས། བཅོམ་ལྡན་ཁྱོད་ལ་སྐྱབས་སུ་སོང་བ་འདི་ནི་བདག་རང་གི་འདོད་པ་ཙམ་དུ་ཟད་ཀྱི་སྒྲུབ་བྱེད་ཅི་ཡང་མེད་ཅེས་རང་གི་སྐྱབས་འགྲོའི་མཚང་སྒྲོགས་པར་ཟད་དོ། །ཞེས་དང། དེའི་ཚེ་ལུང་གཉིས་ནི་བདེན་པའི་དོན་ཅན་ཡིན་མིན་དཔྱོད་པའི་གཞི་ཡིན་པས་རྩོད་གཞི་སྒྲུབ་བྱེད་དུ་མི་རུང་བའི་ཕྱིར། རིགས་པ་ཉིད་ཀྱིས་བདེན་པའི་དོན་ཅན་ཡིན་མིན་དབྱེ་བར་བྱའོ། །ཞེས་དང། འདི་ཉིད་ལས། མཐར་གཏུགས་ན་དྲི་མ་མེད་པའི་རིགས་པ་ཉིད་ཀྱིས་འབྱེད་དགོས། ཞེས་གསུངས་པའི་ཕྱིར། ཁ་ཅིག་དག་སྣང་སྦྱོང་བའི་ཁུལ་བྱས་ཏེ་གསུང་རབ་ལས་དགག་སྒྲུབ་སྤང་བླང་དང་ཡོད་མེད་ཡིན་མིན་སོགས་སྒྲས་ཟིན་མི་མཐུན་པར་གསུངས་པ་ཐམས་ཅད་སྒྲ་ཇི་བཞིན་པར་རང་ལུགས་སུ་ཁས་ལེན་པ་ནི་བླུན་པོའི་གཏམ་འགལ་འདུའི་ཕུང་པོ་ཡིན་ཏེ། སྡོམ་གསུམ་རབ་དབྱེ་ལས། ཁ་ཅིག་ཐེག་པ་རང་ས་ན། །བདེན་པ་ཡིན་ཞེས་ཀུན་ལ་སྒྲོགས། །འཇིག་རྟེན་ཕ་རོལ་མེད་པ་སོགས། །ལྟ་ལོག་ཐམས་ཅད་བདེན་པར་འགྱུར། །ཅི་སྟེ་སངས་རྒྱས་ཐེག་པ་ཀུན། །རང་ས་ན་ནི་བདེན་སྙམ་ན། །འདི་ཡང་ཅུང་ཟད་བརྟག་པར་བྱ། །སངས་རྒྱས་གསུང་ལ་དྲང་དོན་དང། །ངེས་དོན་རྣམ་པ་གཉིས་སུ་ཡོད། །ཅེས་སོགས་དང། ཐུབ་བསྟན་བྱི་དོར་ལས། དེ་ཙམ་གྱི་འགལ་འདུའི་ཕུང་པོའང་འགལ་འདུར་མི་རིག་པ་ལས་ཆེས་ཆེར་བླུན་པའི་སྐྱེས་བུ་གང་ཞིག་ཡོད། བླུན་པོའི་རྟགས་བླ་ན་མེད་པ་དེ་ཉིད་གང་ཟག་ངོ་མཚར་བའི་སྒྲུབ་བྱེད་དུ་

― GTD002_Page_0467 ―

^{[མ་དཔེ་གཟིགས་ན་འདིར་གནོན།]}

[Full Size]

ཇི་ལྟར་རུང། ཞེས་གསུངས་པའི་ཕྱིར། ཁ་ཅིག་ན་རེ། ཤེར་མདོ་ཆོས་ཅན། གང་ཟག་ལ་མི་རྟོན་ཆོས་ལ་རྟོན་ཞེས་པའི་ཆོས་ལ་འཇོག་མི་རིགས་པར་ཐལ། ཚིག་ལ་མི་རྟོན་དོན་ལ་རྟོན་ཞེས་པའི་ཚིག་གམ་ཡི་གེ་ལ་འཇོག་པའི་ཕྱིར་ཏེ། བློ་གྲོས་མི་ཟད་པའི་མདོ་ལས། དེ་ལ་དོན་ནི་གང། ཡི་གེ་ནི་གང་ཞེ་ན། མདོར་ན་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་བསྟན་པ་འདི་ནི་ཡི་གེ་ཞེས་བྱའོ། །ཞེས་གསུངས་པའི་ཕྱིར་ཟེར་ན། གོང་དུ་མ་ཁྱབ་སྟེ། དཔེར་ན་སྐས་ཀྱི་ཐེམ་པ་བར་མ་དེ་འོག་མ་ནས་ཡར་བགྲོད་སའི་ཐེམ་པ་གོང་མ་དང། དེའི་སྟེང་མར་བགྲོད་པའི་ཚེ་འདོར་རྒྱུའི་ཐེམ་པ་འོག་མར་འཇོག་པ་མི་འགལ་བ་བཞིན་ཡིན་པའི་ཕྱིར། དེས་ན་གང་ཟག་ཡིན་ན་གང་ཟག་ལ་མི་རྟོན་ཞེས་པའི་སྐབས་ཀྱི་གང་ཟག་དང། དགོས་པ་ཅན་གྱི་ཚིག་ཡིན་ན་དེའི་སྐབས་ཀྱི་ཆོས་ཡིན་པས་ཁྱབ། རྗོད་བྱེད་ཀྱི་སྒྲ་ཐམས་ཅད་ཚིག་ལ་མི་རྟོན་ཞེས་པའི་ཚིག་དང། གཏན་ལ་དབབ་བྱའི་ཆོས་ཐམས་ཅད་དེའི་སྐབས་ཀྱི་དོན་ཡིན། སྟོང་ཉིད་ལས་གཞན་པའི་ཆོས་ཐམས་ཅད་དེའི་སྐབས་ཀྱི་དྲང་དོན་དང། ལམ་གྱི་བསྒོམ་བྱའི་རྣམ་པ་ཐམས་ཅད་དེའི་སྐབས་ཀྱི་ངེས་དོན་ཡིན། འཕགས་པའི་མི་རྟོག་ཡེཤེས་ལས་གཞན་པའི་བློ་ཐམས་ཅད་དེའི་སྐབས་ཀྱི་རྣམ་ཤེས་དང། ལམ་ཐམས་ཅད་དེའི་སྐབས་ཀྱི་ཡེ་ཤེས་ལ་འཇོག་དགོས་པའི་ཕྱིར། བྱས་པ་ལ། ཁོ་ན་རེ། དེ་མི་འཐད་པར་ཐལ། སྲོག་གཅོད་ཀྱི་ལས་དང་དམྱལ་བའི་སྡུག་བསྔལ་སོགས་དོན་ལ་རྟོན་ཞེས་པའི་དོན་དང། ངེས་དོན་ལ་རྟོན་ཞེས་པའི་ངེས་དོན་གཉི་གར་འགྲོ་ཚུལ་མེད་པའི་ཕྱིར་ཟེར་ན། མ་གྲུབ་སྟེ། ངན་འགྲོའི་

― GTD002_Page_0468 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་བསམ་པའི་ཚེ་ཚིག་བརྗོད་པ་ཙམ་གྱིས་མི་ཆོག་པར་དོན་གྱི་རྣམ་པ་བློ་ཡུལ་དུ་འཆར་བ་ཞིག་དགོས། མི་དགེ་བཅུ་སྤོང་བ་ལའང་སོ་སོའི་ངོ་བོ་སྒྲ་སྤྱི་ཙམ་མ་ཡིན་པར་དོན་ལེགས་པར་ངེས་ནས་སྤོང་དགོས་པའི་རྒྱུ་མཚན་གྱིས་དེའི་སྐབས་ཀྱི་དོན་ལ་བཞག་ཆོག་པའི་ཕྱིར། དེ་བཞིན་དུ་དེའི་སྐབས་ཀྱི་ངེས་དོན་ལའང་བཞག་ཆོག་སྟེ། དེ་གཉིས་སོ་སོར་སྟོན་པའི་མདོ་ཡོད་པ་གང་ཞིག །དེ་འདྲའི་མདོ་ལ་དྲང་ངེས་འབྱེད་པའི་ཚེ་རང་གི་བསྟན་བྱའི་གཙོ་བོ་དེ་ངེས་དོན་དུ་འཇོག་དགོས་པའི་ཕྱིར། དེར་ཐལ། དེ་འདྲའི་མདོ་ལ་རྟོན་པ་བཞིས་དྲང་ངེས་འབྱེད་ཚུལ་ཡོད་པའི་ཕྱིར། ཁ་ཅིག་ན་རེ། སྐབས་འདིར་བྱང་ས་ལས་ནག་པོ་བསྟན་པ་དང་ཆེན་པོ་བསྟན་པ་ཞེས་གསུངས་པ་དེ་འཁོར་བའི་ཉེས་དམིགས་སྟོན་བྱེད་དང། ཞི་བའི་ཕན་ཡོན་སྟོན་བྱེད་ལ་སྦྱོར་ཟེར་ན། འོ་ན་དེ་གཉིས་ཀ་དོན་གཅིག་ཡིན་པར་ཐལ། ཁྱོད་ཀྱིས་སྦྱོར་ཚུལ་འཐད་པའི་ཕྱིར། འདོད་མི་ནུས་ཏེ། དེ་གཉིས་འགལ་བ་ཡིན་པའི་ཕྱིར། དེར་ཐལ། འཁོར་བར་འཁྱམ་བྱེད་ཀྱི་རྒྱུ་ཁོ་ན་སྟོན་པ་དེ་ནག་པོ་བསྟན་པ་དང། འཁོར་བའི་འཆིང་བ་དགྲོལ་བྱེད་ཀྱི་གཉེན་པོ་སྟོན་པ་དེ་ཆེན་པོ་སྟོན་པར་འཇོག་དགོས་པའི་ཕྱིར། མདོ་སྡེ་རྒྱན་གྱི་ཆ་ཊཱིཀ་ལས། ནག་པོ་བསྟན་པ་ལ་གཉེན་པོའི་དམིགས་པ་སྟོན་པ་མེད་པས། གཉེན་པོའི་དམིགས་པ་སྟོན་པ་ལ་ཆེན་པོ་སྟོན་པས་ཁྱབ་བོ། །ཞེས་དང། བྱང་སའི་འགྲེལ་པ་ཡོན་ཏན་འོད་ཀྱིས་མཛད་པ་ལས། ནག་པོ་བསྟན་པ་དང་ཆེན་པོ་བསྟན་པ་རྣམས་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་བྱ་བ་ནི། མདོ་སྡེ་ལ་འཇུག་ཅིང། འདུལ་བ་ལ་སྣང་ལ། ཆོས་ཉིད་དང་

― GTD002_Page_0469 ―

^{[མ་དཔེ་གཟིགས་ན་འདིར་གནོན།]}

[Full Size]

མི་འགལ་བ་དེ་ནི་ཆེན་པོ་བསྟན་པ་ཡིན་ལ། དེ་ལས་བཟློག་པ་ནི་ནག་པོ་བསྟན་པའོ། །ཞེས་གསུངས་ཤིང། རྣམ་བཤད་རིགས་པ་ལས་ཀྱང། མདོ་སྡེ་ལ་འཇུག འདུལ་བ་ལ་སྣང། ཆོས་ཉིད་དང་མི་མཐུན་པ་མེད་པ་གང་ཡིན་པ་དེ་སངས་རྒྱས་ཀྱི་གསུང་ཡིན་ཏེ། ཆེན་པོ་སྟོན་པ་ཚད་མ་ཉིད་ཡིན་པའི་ཕྱིར། ཞེས་གསུངས་པའི་ཕྱིར། ལམ་ཐམས་ཅད་འདིའི་ཡེ་ཤེས་སུ་འགྲོ་ཚུལ་ཡོད་དེ། འཁོར་བའི་ཕུན་ཚོགས་ལ་ཞེན་པ་རྣམ་ཤེས་སུ་བྱས་པའི་ཚེ། འཁོར་བའི་ཕུན་ཚོགས་ལ་ཞེན་པ་ལོག་པའི་ངེས་འབྱུང་གི་བསམ་པ་ཡེ་ཤེས་སུ་བྱེད་དགོས་པའི་ཕྱིར། འཁོར་བའི་ཕྱོགས་ཀྱི་བློ་རྣམས་རྣམ་ཤེས་དང། མྱང་འདས་ཀྱི་ཕྱོགས་སུ་གཏོགས་པ་རྣམས་ཡེ་ཤེས་སུ་བློ་གྲོས་མི་ཟད་པར་གསུངས་ལ། བདེན་བཞི་ཤེས་པ་ཡེ་ཤེས་སུ་སའི་དངོས་གཞིར་གསུངས་པའི་ཕྱིར། ཡང་ཁ་ཅིག་ན་རེ། རྟོན་པ་བཞིའི་སྒོ་ནས་དྲང་ངེས་འབྱེད་པ་མི་འཐད་པར་ཐལ། དེ་དབང་རྟུལ་ལ་སྦྱར་ན་མི་རུང་བ་གང་ཞིག །དབང་རྣོན་ལའང་མི་རུང་བའི་ཕྱིར། དང་པོ་གྲུབ་སྟེ། དབང་རྟུལ་གྱིས་ལུང་ལ་ཡིད་ཆེས་བྱས་ཏེ་ཐེ་ཚོམ་མེད་པར་འཇུག་པས་དད་པའི་རྗེས་འབྲང་དང་ལུང་གི་རྗེས་འབྲང་དུ་བཤད་པ་གང་ཞིག །དེ་ལྟར་ན་ཚིག་ལ་མི་རྟོན་དོན་ལ་རྟོན་པའི་དོན་མི་ཚང་བའི་ཕྱིར། གོང་གི་རྟགས་གཉིས་པ་གྲུབ་སྟེ། དབང་རྣོན་གྱིས་དེ་ཁོ་ན་ཉིད་མ་རྟོགས་པའི་གོང་དུ་ངེས་དོན་གྱི་མདོ་སྡེ་ལ་རྟོན་པར་མི་བྱེད་པའི་ཕྱིར། དེར་ཐལ། རྟོན་པ་ནི་ཡིད་ཆེས་པའི་དོན་ཡིན་པའི་ཕྱིར་དང། དབང་རྣོན་དེས་ངེས་དོན་གྱི་མདོར་ཡིད་ཆེས་ཀྱི་དང་བ་སྐྱེ་བའི་སྔོན་དུ་བརྗོད་བྱ་དེ་ཁོ་ན་ཉིད་རྟོགས་དགོས་པའི་ཕྱིར།

― GTD002_Page_0470 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲེལ་པ་དོན་གསལ་ལས། གཞི་དང་ལམ་དང་རྣམ་པ་ཐམས་ཅད་སྐྱེ་བ་མེད་པར་ཡོངས་སུ་ཤེས་པས་ཚིགས་སུ་བཅད་པའི་དོན་གྱི་མཚན་ཉིད་ཀྱི་ཡུམ་ལ་གནོད་པ་མ་མཐོང་ནས། ཞེས་པ་ནས། གདོན་མི་ཟ་བར་སྲིད་པ་ཉིད་དོ། །ཞེས་ངེས་པར་བཟུང་ནས་དེ་ལ་རབ་ཏུ་དང་བ་སྐྱེད་པར་བྱེད་པ་ཉིད་དོ། །ཞེས་གསུངས་པའི་ཕྱིར། ཁྱབ་སྟེ། དེའི་རྒྱུ་མཚན་ངེས་དོན་གྱི་མདོ་རྣམས་རྗོད་བྱེད་མི་བསླུ་པར་རྟོགས་པ་དེ་བརྗོད་བྱ་ངེས་དོན་ཚད་མས་གྲུབ་པ་ལ་བརྟེན་ནས་འབྱུང་དགོས་པའི་ཕྱིར།རྣམ་འགྲེལ་ཊཱིཀ་ཆེན་ལས། བརྗོད་བྱ་རྟོགས་པའི་བསྟན་པ་ཚད་མས་གྲུབ་པའི་སྒོ་ནས་རྗོད་བྱེད་ལུང་གི་བསྟན་པ་སྐྱོན་མེད་པར་གྲུབ་པ་ཡིན་ལ། དེ་སྐྱོན་མེད་པར་གྲུབ་པ་ན་དེའི་རྟགས་ཀྱིས་སྟོན་པ་ཚད་མའི་སྐྱེས་བུར་གྲུབ་པར་བྱེད་པ་ཡིན་ཅིང། ཞེས་གསུངས་པའི་ཕྱིར་ཟེར། དེ་ལ་ཁ་ཅིག་གིས། དེ་མི་འཐད་པར་ཐལ། ངེས་དོན་གྱི་མདོ་སྡེ་སྐྱོན་མེད་དུ་གྲུབ་པ་དང་ངེས་དོན་རྟོགས་པ་དུས་མཉམ་པའི་ཕྱིར། དེར་ཐལ། ཤིན་ལྐོག་སྟོན་པའི་ལུང་བསྟན་དོན་ལ་མི་བསླུ་བར་རྟོགས་པ་དང་དེའི་བསྟན་བྱའི་ཤིན་ལྐོག་རྟོགས་པ་དུས་མཉམ་པའི་ཕྱིར། ཟེར་རོ། །སྔ་མ་མི་འཐད་པར་ཐལ། དབང་རྣོན་ལའང་དེ་ཁོ་ན་ཉིད་རྟོགས་པའི་སྔོན་དུ་ངེས་དོན་གྱི་མདོར་ཡིད་ཆེས་འབྱུང་བའི་ཕྱིར། དེར་ཐལ། དེ་ཁོ་ན་ཉིད་རྟོགས་པའི་སྔོན་དུ་ངེས་དོན་གྱི་མདོར་ཐོས་སོགས་ཀྱིས་འཇུག་པ་ཡོད་པའི་ཕྱིར། ཁྱབ་སྟེ། ཡིད་ཆེས་ཅུང་ཟད་ཀྱང་མེད་པར་དེ་ལ་འཇུག་པ་བླུན་པོའི་སྤྱོད་ཚུལ་ཡིན་པའི་ཕྱིར་དང། འཐད་ལྡན་ལས། གང་ཕྱིར་འཇིག་རྟེན་དོན་གཉེར་ནི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་པ་དེ་གཙོ་བོར་དཔྱད་ནས་འཇུག་པའི་དབང་རྣོན་གྱི་འཇུག་

― GTD002_Page_0471 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་བཤད་པ་ཡིན་པའི་ཕྱིར། དེར་ཐལ། དབང་རྣོན་གྱིས་མདོ་དེ་ལ་གནོད་བྱེད་མི་འཇུག་པར་མཐོང་ནས་མཐའ་གཅིག་ཏུ་མི་འཐད་པར་འཛིན་པའི་སྒྲོ་འདོགས་ཆོད་ལ། རྩེ་གཉིས་པའི་སྒྲོ་འདོགས་ཆོད་ཟིན་པ་མིན་ཡང། དོན་འགྱུར་ཙམ་ལས་ཆ་མཉམ་པའི་ཐེ་ཚོམ་ཡང་ཆེར་མི་འབྱུང་བས་དེ་ལ་ཡིད་ཆེས་རྙེད་པར་བཞག་ཆོག་པའི་ཕྱིར། དེར་ཐལ། དེ་དུས་ཡིད་ཆེས་རྙེད་ཀྱང་སླར་དེའི་དོན་ལ་ཚད་མས་ངེས་པ་རྙེད་དེ་སྒྲོ་འདོགས་ལྷག་མེད་དུ་ཆོད་པ་ན་ཡིད་ཆེས་ཤུགས་དྲག་ཏུ་སོང་སྟེ་མི་ལྡོག་པའི་དང་བ་སྐྱེ་བའི་ཕྱིར་ཏེ། འགྲེལ་ཆུང་གི་དོན་ཡང་དེ་ཡིན་པའི་ཕྱིར། དེ་ལྟར་མ་ཡིན་ན། དེ་ཁོ་ན་ཉིད་རྟོགས་པའི་སྔོན་དུ་དེ་སྟོན་པའི་བཤེས་གཉེན་བསྟེན་མི་དགོས་པར་ཐལ། དེ་འདྲའི་བཤེས་གཉེན་ངོས་ཟིན་པ་དང་དེ་ལ་ཡིད་ཆེས་སྐྱེས་ནས་བསྟེན་པ་ལ་དེ་ཁོ་ན་ཉིད་རྟོགས་དགོས་པའི་ཕྱིར་ཏེ། དེའི་གདམས་ངག་ལ་དེ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། རྒྱན་ལས། དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། །ཞེས་གསུངས་པའི་ཕྱིར། དེས་ན་ཐོག་མར་དེ་ཁོ་ན་ཉིད་རྟོགས་པའི་ཡོན་ཏན་དང་ལྡན་པར་ཚད་མས་རྟོགས་མི་ནུས་ཀྱང། སྟོང་ཉིད་རྟོགས་པའི་རྟགས་ཀྱིས་ལུས་ངག་གི་སྤྱོད་པ་སོགས་གསུང་རབ་ནས་འབྱུང་བ་དང་གཞུང་དོན་འཆད་ལུགས་སོགས་ལ་བལྟས་ནས་རང་གིས་དཔྱོད་ཅིང་གཞན་ལའང་དྲིས་ཏེ་ཡིད་ཆེས་ནས་བླ་མར་བསྟེན་དགོས་པའི་ཕྱིར། ཐར་ལམ་གསལ་བྱེད་ལས། འོ་ན། དེ་ལྟར་དཔྱད་པའི་ཚེ་སྟོན་པར་འཛིན་པའི་སྔོན་དུ་དེ་ལ་བྱང་གྲོལ་གྱི་ལམ་མཁྱེན་པའི་ཡོན་ཏན་ཡོད་པར་ཤེས་སམ་མི་

― GTD002_Page_0472 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས། ཤེས་ན་རང་ཉིད་ཀྱི་སྡུག་བསྔལ་ཞི་བའི་ཐབས་ཤེས་ཟིན་པའི་ཕྱིར་དེ་ཚོལ་བ་དོན་མེད་ལ། མི་ཤེས་པར་བསྟེན་ན་ནི་བསྟེན་པར་བྱ་བ་དང་བསྟེན་པར་བྱ་བ་མིན་པའི་རྣམ་དབྱེ་མི་ཕྱེད་པར་ཐོག་མར་གང་ཕྲད་པ་དེ་བསྟེན་པར་རིགས་སོ་ཞེ་ན། སྐྱོན་མེད་དེ། འདི་ནི་རྟོགས་ལྡན་གྱི་བཤེས་གཉེན་ཚོལ་བའི་ཚུལ་ཡིན་ལ། དེ་ལ་ནི་ཐོག་མར་དོན་རགས་པ་ཚད་མས་ཤེས་ཤིང་ཅུང་ཟད་ཕྲ་བའི་ཡོན་ཏན་ཡོད་པ་ཡིད་དཔྱོད་ཀྱིས་ཀྱང་ཤེས་པར་འགྱུར་ཞིང། གཞན་ལ་དྲིས་པ་དང་གྲགས་པ་སོགས་ལས་ཀྱང་ཕྱོགས་ཙམ་རྟོགས་པར་བྱའོ། །ཞེས་གསུངས་པའི་ཕྱིར། དེ་ལྟར་མ་ཡིན་ན་སྟོང་ཉིད་རྟོགས་པ་ནམ་ཡང་མི་སྲིད་པར་ཐལ། དེ་ལ་སྔོན་དུ་དེ་སྟོན་པའི་བཤེས་གཉེན་ཚད་ལྡན་ཞིག་མོས་གུས་ཀྱིས་ཚུལ་བཞིན་བསྟེན་པ་མེད་མི་རུང་ཡིན་པ་གང་ཞིག །དེའི་སྔོན་དུ་དེ་ངོས་ཟིན་པ་དང་ཡིད་ཆེས་ཀྱིས་མོས་གུས་སྐྱེ་བ་མི་སྲིད་པའི་ཕྱིར། རྟགས་ཁས། དེ་ལྟར་ན་སྟོང་ཉིད་ཀྱི་ལྟ་བ་རྙེད་པའི་སྔོན་དུ་དེ་སྟོན་པའི་བླ་མ་དང་གསུང་རབ་ལ་རྟོན་པའི་ཡིད་ཆེས་ཙམ་འབྱུང་བ་མི་འགལ་བར་ཐལ། ལམ་རིམ་ལས། དེའི་འདྲའི་ལྟ་བའང་དྲང་དོན་ལ་མི་རྟོན་ངེས་དོན་ལ་རྟོན་པ་གཅིག་གིས་བཙལ་དགོས། ཞེས་གསུངས་པའི་ཕྱིར། ལུགས་ཕྱི་མ་ངེས་དོན་སྟོན་པའི་ལུང་གནོད་མེད་དུ་མཐོང་བ་དང་ངེས་དོན་རྟོགས་པ་དུས་མཉམ་པའང་མི་འཐད་པར་ཐལ། ཤིན་ལྐོག་སྟོན་པའི་ལུང་གནོད་མེད་དུ་མཐོང་ན་ཤིན་ལྐོག་གི་དོན་དེ་རྟོགས་པས་མ་ཁྱབ་པའི་ཕྱིར། དེར་ཐལ། ཤིན་ལྐོག་སྟོན་པའི་ལུང་དེ་སྒྲུབ་ཀྱི་ཆོས་ཅན་དང། དཔྱད་པ་གསུམ་གྱིས་གནོད་པ་མེད་པ་དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། འདིའི་འཁྲུལ་གཞི་ནི་ཤིན་ལྐོག་བསྟན་པ་ལ་

― GTD002_Page_0473 ―

^{[མ་དཔེ་གཟིགས་ན་འདིར་གནོན།]}

[Full Size]

རང་ཚིག་འགལ་བ་སོགས་ཀྱི་གནོད་པ་མེད་པར་རྟོགས་པ་དེ་ཡིད་ཆེས་རྗེས་དཔག་ལ་ཐུག་སྙམ་པར་སྣང་ཡང། དེ་མ་ཡིན་ཏེ། ཐར་ལམ་གསལ་བྱེད་ལས། ཤིན་ཏུ་ལྐོག་གྱུར་སྟོན་པའི་སྐབས་སུ་སྔ་ཕྱི་དང་དངོས་ཤུགས་འགལ་བ་མེད་པ་ཡིད་ཆེས་རྗེས་དཔག་གིས་གྲུབ་པ་མི་འཐད་དེ། ད་དུང་དེ་མ་སྐྱེས་པའི་ཕྱིར། དངོས་སྟོབས་ཀྱི་ཚད་མས་ཀྱང་མ་གྲུབ་སྟེ། དེ་ཤིན་ཏུ་ལྐོག་གྱུར་གྱི་དོན་ལ་མི་འཇུག་པའི་ཕྱིར་ཞེ་ན། སྐྱོན་མེད་དེ། ནང་འགལ་མེད་པ་དངོས་སྟོབས་ཀྱིས་གྲུབ་ཀྱང། ཤིན་ཏུ་ལྐོག་གྱུར་གྱི་དོན་དེ་གྲུབ་མི་དགོས་པའི་ཕྱིར་རོ། །ཞེས་གསུངས་པའི་ཕྱིར། ཁྱོད་ལྟར་ན། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པའི་ལུང་ཆོས་ཅན། རང་གི་བསྟན་བྱའི་དོན་ལ་མི་བསླུ་བ་ཡིན་ཏེ། དཔྱད་གསུམ་གྱིས་དག་པའི་ལུང་ཡིན་པའི་ཕྱིར། ཞེས་པའི་སྦྱོར་བའི་རྟགས་རྟོགས་ན་བསྒྲུབ་བྱ་རྟོགས་པས་ཁྱབ་པར་ཐལ། དེའི་རྟགས་དེའང་ཡིད་ཆེས་རྗེས་དཔག་གིས་འགྲུབ་དགོས་པའི་ཕྱིར། རྟགས་ཁས། ཁྱབ་སྟེ། དེ་ཡིད་ཆེས་རྗེས་དཔག་ཏུ་འགྲོ་སའི་ཡུལ་ངོས་འཛིན་རྒྱུ་ཡོད་པའི་ཕྱིར། དེས་མཚོན་ཏེ་ལུགས་སྔ་མ་ལ་སྦྱོར་བ་དེའི་ཤེས་འདོད་ཆོས་ཅན་རྟོགས་པ་ལ་བསྒྲུབ་བྱ་རྟོགས་པ་སྔོན་དུ་འགྲོ་དགོས་པར་ཐལ་བའང་འཕེན་ནོ། །ཁོ་ན་རེ། སྦྱིན་པ་བཏང་བ་ལས་ལོངས་སྤྱོད་འབྱུང་བར་བཤད་པ་ལ་གནོད་པ་མེད་པ་དེ་ཡིད་ཆེས་རྗེས་དཔག་ཁོ་ནས་བསྒྲུབ་དགོས་པར་ཐལ། དེ་དངོས་སྟོབས་ཀྱི་རིགས་པས་སྒྲུབ་ལུགས་མེད་པའི་ཕྱིར་ཟེར་ན། མ་གྲུབ་སྟེ། གནས་སྐབས་ཀྱི་རྐྱེན་གང་ལ་བརྟེན་ནས་བདེ་བ་འབྱུང་བ་དང་མི་འབྱུང་བ་གཉིས་དངོས་འགལ་ཡིན་པ་སུས་ཀྱང་

― GTD002_Page_0474 ―

^{[མ་དཔེ་གཟིགས་ན་འདིར་གནོན།]}

[Full Size]

མངོན་སུམ་གྱིས་གྲུབ་པ་བཞིན། སྦྱིན་པ་ལས་ལོངས་སྤྱོད་འབྱུང་མི་འབྱུང་གཉིས་ཀྱང་འགལ་དགོས་པ་ཤེས་སླ་ལ། གསུང་རབ་ལས་ཀྱང་དེ་འདྲའི་བཤད་པ་གོང་འོག་མི་མཚུངས་པ་བྱུང་ན་དོན་དེ་ལ་གནོད་པ་གྲུབ་ནའང། དེ་འདྲ་དངོས་དང་དོན་ཐོབ་གང་ལའང་སྟོན་རྒྱུ་མི་རྙེད་པས། གནོད་པ་མི་འཇུག་པར་དངོས་སྟོབས་ཀྱིས་གྲུབ་པ་ཡིན་པའི་ཕྱིར། དཔེར་ན་ཕྱི་རོལ་པ་ཁ་ཅིག་ཆགས་སོགས་འཁོར་བའི་རྩ་བར་འདོད་ཅིང། ཁྲུས་དང་གཙང་སྦྲ་སོགས་ཀྱིས་འཁོར་བ་ལས་གྲོལ་བར་བཤད་པ་དེར་གནོད་པ་སྟོན་པའི་ཚེ། ཁྲུས་ཀྱིས་འཁོར་བ་ལས་གྲོལ་བ་ལ་མངོན་སུམ་གྱི་གནོད་པ་སྟོན་མི་ཐུབ་ཀྱང། ཆགས་སེམས་མངོན་དུ་གྱུར་པ་ན་ཁྲུས་བྱས་པས་དེ་ལ་ཅུང་ཟད་ཀྱང་མི་གནོད་པ་མངོན་སུམ་གྱིས་གྲུབ་པས། དེ་ལ་དཔག་ན་དེའི་རྩ་བ་ཅན་གྱི་འཁོར་བ་ལའང་མི་གནོད་པར་གོ་ནུས་པའི་ཕྱིར། རྣམ་འགྲེལ་ལས། ཆགས་སོགས་ཆོས་མིན་རྩ་བ་དང། །ཁྲུས་ཀྱིས་ཆོས་མིན་དག་འགྱུར་བའོ། །ཞེས་དང། ཊཱིཀ་ཆེན་ལས། གང་ཞིག་གང་གི་རྒྱུ་ལ་མི་གནོད་པ་དེས་ནི་དེའི་འབྲས་བུ་འཇོམས་པར་ནུས་པ་མ་ཡིན་ཏེ། མངར་བ་དང་སྣུམ་པའི་རྫས་ཀྱིས་བད་ཀན་ལ་མི་གནོད་པ་བཞིན། ཆུའི་ཁྲུས་ཀྱིས་ཀྱང་སྡིག་པའི་རྒྱུ་ཆགས་སོགས་ལ་གནོད་པ་མ་ཡིན་ནོ། །ཞེས་བྱ་བ་འགལ་ཁྱབ་དམིགས་པའོ། །ཞེས་གསུངས་པའི་ཕྱིར། དེས་ན་རྟགས་ཡང་དག་གང་ཡིན་ཀྱང་ཚུལ་གསུམ་དངོས་སྟོབས་ཀྱིས་གྲུབ་པ་དང། དེའང་མཐར་མངོན་སུམ་ལ་ཐུག་པ་ཞིག་དགོས་ཏེ། སྤྱི་དོན་རིགས་རྒྱན་ལས། རྟགས་ཡང་དག་ཐམས་ཅད་ཀྱི་ཚུལ་གསུམ་མཐར་དངོས་པོ་སྟོབས་ཤུགས་ཀྱིས་གྲུབ་དགོས་པའི་ཕྱིར་རོ། །ཞེས་གསུངས་

― GTD002_Page_0475 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། ཁ་ཅིག་ན་རེ། དཔྱད་པ་གསུམ་གྱིས་དག་ཚུལ། མཐོང་བ་མངོན་གྱུར་སྟོན་པའི་ཆ་ལ་མངོན་སུམ་ཚད་མས་གནོད་པ་མེད་པ། མཐོང་བ་ལྐོག་གྱུར་སྟོན་པའི་ཆ་ལ་དངོས་སྟོབས་རྗེས་དཔག་གིས་གནོད་པ་མེད་པ། ཤིན་ཏུ་ལྐོག་གྱུར་སྟོན་པའི་ཆ་ལ་ཡིད་ཆེས་རྗེས་དཔག་གིས་གནོད་པ་མེད་པ་ཞེས་བཤད་རིགས་པར་ཐལ། ཁྱོད་ཀྱིས་བསྲེགས་བཅད་བརྡར་བའི་སྒོ་ནས་གསེར་གྱི་སྐྱོན་ཡོན་ཕྲ་རགས་ལ་རྟོག་ཚུལ་གསུམ་དང་དཔེ་དོན་སྦྱོར་ལུགས་འཐད་པའི་ཕྱིར། འདོད་ན། མི་འཐད་པར་ཐལ། དཔྱད་གསུམ་གྱིས་དག་པའི་ལུང་ཡིན་ན་གཞལ་བྱའི་གནས་གསུམ་ཆར་སྟོན་པའི་ངེས་པ་མེད་པའི་ཕྱིར་ཏེ། ཤིན་ལྐོག་ཁོ་ན་སྟོན་པའི་ལུང་ཡོད་པའི་ཕྱིར། ཁྱབ་སྟེ། མཐོང་བ་མངོན་གྱུར་མི་སྟོན་ན་དེ་སྟོན་པའི་ཆ་ལ་གནོད་པ་ཡོད་མེད་དཔྱད་དོན་མེད་པའི་ཕྱིར། སྡེ་བདུན་རྒྱན་ལས། དེས་ན། མཐོང་དང་མ་མཐོང་དངོས་པོ་ཡི། །ཞེས་སོགས་ཀྱི་དོན་ཡང་མཐོང་བ་མངོན་གྱུར་སྟོན་པའི་ཆ་ལ་ཞེས་སོགས་སུ་སྦྱོར་རྒྱུ་མིན་གྱི། ཁྱོད་ཀྱི་བརྗོད་བྱ་ལ་མཐོང་བ་མངོན་གྱུར་དུ་འཇལ་བའི་མངོན་སུམ་གྱི་ཚད་མས་ཀྱང་གནོད་པ་མེད། མ་མཐོང་བ་ལྐོག་གྱུར་དུ་འཇལ་བའི་ཚད་མས་ཀྱང་གནོད་པ་མེད། རང་ཚིག་འགལ་བ་སོགས་ཀྱིས་ཀྱང་གནོད་པ་མེད་པའི་ལུང་ཡིན་པའི་ཕྱིར་ཞེས་སྦྱོར་རྒྱུ་ཡིན་ནོ། །ཞེས་གསུངས་པའི་ཕྱིར་ཟེར་ན། དེ་ནི་སྔ་མས་བཤད་ཚུལ་གྱི་རྣམ་གྲངས་ཙམ་ཡིན་གྱི། མཁས་གྲུབ་ཐམས་ཅད་མཁྱེན་པ་རང་གི་བཞེད་པ་མིན་ཏེ། ཊཱིཀ་ཆེན་རིགས་པའི་རྒྱ་མཚོ་ལས། འོ་ན་ཁྱད་པར་གསུམ་ལྡན་གྱི་ལུང་ཞིག་གཞིར་བྱས་ནས་དེ་རང་གི་བརྗོད་བྱ་ལ་མི་སླུ་བར་སྒྲུབ་པ་ཡིན་ན།

― GTD002_Page_0476 ―

^{[མ་དཔེ་གཟིགས་ན་འདིར་གནོན།]}

[Full Size]

རྟགས་གང་གིས་བསྒྲུབ་པར་བྱ་ཞེ་ན། མཐོང་བ་མངོན་གྱུར་སྟོན་པ་ལ་མངོན་སུམ་གྱིས་གནོད་པ་མེད་པ། དཔེར་ན་སྔོན་པོ་མངོན་གྱུར་དུ་བསྟན་པ་ལ་མངོན་སུམ་གྱིས་གནོད་པ་མེད་ཅིང་གྲུབ་པ་དང། གཞན་དག་མངོན་གྱུར་དུ་འདོད་པའི་སྤྱི་དོན་གཞན་སོགས་མངོན་གྱུར་མིན་པར་བསྟན་པ་ལ་མངོན་སུམ་གྱིས་གནོད་པ་མེད་པ་ལྟ་བུ་དང། མཐོང་བ་ལྐོག་གྱུར་གྱི་དོན་སྟོན་པ་ལ་དངོས་པོ་སྟོབས་ཤུགས་ཀྱི་རྗེས་དཔག་ཉིད་ཀྱིས་གནོད་པ་མེད་པ། དཔེར་ན་འཕགས་པའི་བདེན་པ་བཞི་གཏན་ལ་ཕབ་པ་ལ་དངོས་པོ་སྟོབས་ཤུགས་རྗེས་དཔག་གིས་གནོད་པ་མེད་ཅིང་གྲུབ་ལ། གཞན་དག་ལྐོག་ཏུ་གྱུར་འདོད་པའི་བདག་དང་གཙོ་བོ་སོགས་བཀག་པ་ལ་རྗེས་དཔག་གིས་གནོད་པ་མེད་པ་ལྟ་བུ་དང། མ་མཐོང་བའི་དངོས་པོ་ཤིན་ཏུ་ལྐོག་ཏུ་གྱུར་པའི་དོན་དེ་དག་ལུང་དེ་ལས་ཇི་ལྟར་བསྟན་པ་ལྟར་ཁས་བླངས་པ་ལ་ལུང་ལ་བརྟེན་པའི་རྗེས་དཔག་གིས་ཀྱང་གནོད་པ་མེད་ཅིང། རང་ཚིག་སྔ་ཕྱི་འགལ་བ་དང་དངོས་ཤུགས་འགལ་བས་ཀྱང་གནོད་པ་མེད་པ། དཔེར་ན་ཆགས་སོགས་སྡིག་པའི་རྩ་བའང་ཡིན། ཁྲུས་དང་མར་མེར་ལྡུགས་པ་སོགས་ཀྱིས་སྡིག་པ་དག་པའང་ཡིན་པའི་གཞི་མཐུན་བཀག་པ་དང། སྦྱིན་པ་དང་མི་འཚེ་བ་སོགས་ཆོས་སུ་བཤད་པ་ལ་ནང་འགལ་མེད་པ་སྟེ། དེ་ལྟར་དཔྱད་པ་གསུམ་གྱིས་དག་པ་དེ་ཁྱད་པར་གསུམ་ལྡན་གྱི་ལུང་འདིའི་རང་གི་བརྗོད་བྱ་ལ་མི་སླུ་བའི་རྒྱུ་མཚན་ཡང་དག་ཡིན་ནོ། །ཞེས་གསུངས་པའི་ཕྱིར། གཉི་ག་མཁས་གྲུབ་ཐམས་ཅད་མཁྱེན་པའི་གསུང་ཡིན་ཀྱང། ཊཱིཀ་ཆེན་ནི་དཔྱད་པ་རྫོགས་དུས་ཀྱི་ཕྱི་རྩོམ་ཡིན་པས་དབང་བཙན་དགོས་ལ་རྩ་བ་དང་མཐུན་ཚབས་ཆེ་བས་དེ་བཞིན་བྱེད་དགོས་

― GTD002_Page_0477 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ། དེའི་ཐད་ཀྱི་རྣམ་འགྲེལ་ལེའུ་དང་པོར། མཐོང་དང་མ་མཐོང་དངོས་པོ་ཡི། །དོན་དེ་དག་ལ་མངོན་སུམ་དང། །རྗེས་དཔག་རྣམ་པ་གཉིས་ཀྱིས་ཀྱང། །གནོད་མེད་འདི་ཡི་མི་སླུ་བའོ། །ཞེས་དང། ལེའུ་བཞི་པར་ཡང། མཐོང་དང་མ་མཐོང་བ་དག་ལ། །རིགས་པས་གྲུབ་དང་རང་ཚིག་གིས། །གནོད་མེད་བསྟན་བཅོས་གང་ཡིན་དེ། །གཟུང་བར་བྱ་ཕྱིར་དཔྱོད་འཇུག་འགྱུར། །ཞེས་གསུངས་པའི་ཕྱིར། ཁྱབ་སྟེ། དོན་དེ་དག་ལ། ཞེས་དང། མ་མཐོང་བ་དག་ལ། ཞེས་དོན་དེ་དང་དེ་བསྟན་པ་ལ་གནོད་པ་མེད་པར་གསུངས་ཀྱི། དོན་དེ་རྟོགས་པའི་མངོན་སུམ་སོགས་ཀྱིས་གནོད་པ་མེད་པའི་དོན་ཡིན་ན། དོན་དེ་རྟོགས་པའི་མངོན་སུམ་དང། །ཞེས་སོགས་དྲུག་སྒྲ་བྱེད་དགོས་ཀྱི། གནས་གཞིར་བྱེད་མི་རིགས་པའི་ཕྱིར། ཁོ་ན་རེ། ཤིན་ལྐོག་སྟོན་པ་ལ་ལུང་ལ་བརྟེན་པའི་ཡིད་ཆེས་རྗེས་དཔག་གིས་གནོད་པ་མེད་པར་རྟོགས་པ་མི་འཐད་པར་ཐལ། ཤིན་ལྐོག་དེ་བསྒྲུབ་བྱ་ཡིན་པས་དེ་རྟོགས་པའི་ཡིད་ཆེས་རྗེས་དཔག་དེ་དུས་མ་སྐྱེས་པར་ཁྱེད་ཀྱིས་སྔར་བསྒྲུབས་པ་དེ་ཡིན་པའི་ཕྱིར། འདོད་མི་ནུས་ཏེ། རྗེས་དཔག་རྣམ་པ་གཉིས་ཞེས་པའི་གཉིས་པོ་ངོས་འཛིན་རྒྱུ་ཡོད་པའི་ཕྱིར་ཟེར་ན། འདི་ལ་དཔྱད་གཞི་ཅུང་ཟད་སྣང་ངོ་། །གཞལ་བྱའི་གནས་གཉིས་པ་ལ་ཡིད་ཀྱི་མུན་སེལ་དུ་མ་མཐོང་བ་ལྐོག་གྱུར་ཅེས་འབྱུང་ཡང། ཊཱིཀ་ཆེན་དུ་མཐོང་བ་ལྐོག་གྱུར་ཅེས་གསུངས་པའང་ཕྱི་མ་ལྟར་བྱེད་དགོས་ཏེ། སློབ་དཔོན་ཆོས་མཆོག་གིས། རྟེན་མིག་མཐོང་བས་ཀྱང་མཐོང་བར་བརྗོད་དོ། །ཞེས་དབང་རྟེན་མཐོང་བའི་སྒོ་ནས་མིག་མཐོང་བར་འཇོག་པ་བཞིན། ཅུང་ཟད་ལྐོག་གྱུར་ནི་ཤིན་

― GTD002_Page_0478 ―

^{[མ་དཔེ་གཟིགས་ན་འདིར་གནོན།]}

[Full Size]

ལྐོག་ལ་ལྟོས་ཏེ་མངོན་གྱུར་དང་ཉེ་བས་མཐོང་བར་འཇོག་པར་ཐར་ལམ་གསལ་བྱེད་ལས་གསུངས་པའི་ཕྱིར། ཁོ་ན་རེ། མི་རྟག་པ་རྟོགས་པའི་རྗེས་དཔག་གིས་མི་རྟག་པ་མཐོང་བར་ཐལ། དེ་མཐོང་བ་ལ་མངོན་སུམ་དུ་མཐོང་མི་དགོས་པའི་ཕྱིར། འདོད་མི་ནུས་ཏེ། བདེན་པ་མཐོང་བའི་སོ་སྐྱེ་མེད་པའི་ཕྱིར་ཏེ། བདེན་པ་མཐོང་ལ་འཕེན་པ་མེད། །ཅེས་གསུངས་པའི་ཕྱིར་དང། མདོ་ལས་ཆོས་མཐོང་བ་ཆོས་ཐོབ་པ་སོགས་འཕགས་པ་ཁོ་ནར་སྦྱར་ཞིང། གཞི་འགྲེལ་ལས་ཀྱང། ཆོས་ཀྱི་མིག་ཅེས་བྱ་བ་འཕགས་པའི་བདེན་པ་བཞི་མཐོང་བས་ཏེ་རྒྱུན་དུ་ཞུགས་པའི་འབྲས་བུ་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར་ཟེར་ན། མ་ཁྱབ། ཁྱོད་རང་ལ་དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང། །ཞེས་གཙོ་སེམས་དེ་རང་སྟོབས་ཀྱིས་དོན་གྱི་ངོ་བོ་ཙམ་མཐོང་བར་བཤད་པ་དང། རྣམ་འགྲེལ་ལས། རྗེས་དཔག་རྣམ་གཉིས་རང་དོན་ནི། །ཚུལ་གསུམ་རྟགས་ལས་དོན་མཐོང་ཡིན། །ཞེས་གསུངས་པ་གོ་བཟློག་རིགས་པར་ཐལ། རྗེས་དཔག་ཡིན་ན་ཚུལ་གསུམ་པའི་རྟགས་ལ་བརྟེན་ནས་བསྒྲུབ་བྱ་མ་མཐོང་བས་ཁྱབ་པའི་ཕྱིར་ཏེ། དེ་མཐོང་ན་མངོན་སུམ་དུ་རྟོགས་དགོས་པའི་ཕྱིར། རྟགས་ཁས། ཡང་ཁོ་ན་རེ། དཔྱད་གསུམ་གྱིས་དག་པའི་ལུང་གིས་སྦྱིན་པ་ལས་ལོངས་སྤྱོད་འབྱུང་བ་སྒྲུབ་མི་ནུས་པར་ཐལ། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པའི་ལུང་འདིས་སྒྲུབ་མི་ནུས་པའི་ཕྱིར། དེར་ཐལ། དེ་འདྲའི་ལུང་ཆོས་ཅན། རང་གི་བསྟན་བྱའི་དོན་ལ་མི་སླུ་བ་ཡིན་ཏེ། དཔྱད་གསུམ་གྱིས་དག་པའི་ལུང་ཡིན་པའི་ཕྱིར།

― GTD002_Page_0479 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་བཀོད་པའི་ཚེ། ལུང་དེས་སྦྱིན་པ་ལས་ལོངས་སྤྱོད་འབྱུང་བར་སྒྲུབ་པ་མ་ཡིན་པ་གང་ཞིག །འགོད་ཚུལ་གཞན་མེད་པའི་ཕྱིར། དང་པོ་གྲུབ་སྟེ། ཊཱིཀ་ཆེན་ལས། འདིས་ནི་དཔྱད་གསུམ་གྱིས་དག་པའི་ལུང་སྦྱིན་པ་ལས་ལོངས་སྤྱོད་འབྱུང་བའི་སྒྲུབ་བྱེད་དང། མི་འབྱུང་བ་ལ་གནོད་བྱེད་དུ་བསྟན་པ་ཡིན་གྱི། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པ་སྦྱིན་པ་ལས་ལོངས་སྤྱོད་འབྱུང་བའི་སྒྲུབ་བྱེད་དང། མི་འབྱུང་བ་ལ་གནོད་བྱེད་དུ་བསྟན་པ་མ་ཡིན་ཞིང། ཞེས་གསུངས་པའི་ཕྱིར་ན། མ་ཁྱབ་སྟེ། ལུང་དེ་རྟགས་སུ་བཀོད་ནས་སྒྲུབ་པ་མིན་ཞེས་པའི་དོན་ཡིན་པའི་ཕྱིར། གོད་དུ་འདོད་ན། ཤིན་ལྐོག་ཐམས་ཅད་སྒྲུབ་བྱེད་ལ་དཔྱད་གསུམ་གྱིས་དག་པའི་ལུང་རང་ལྡོག་དེ་མ་གཏོགས་མེད་པར་ཐལ། ལུང་བྱེ་བྲག་པ་ཡིན་ན་དེ་མ་ཡིན་དགོས་པའི་ཕྱིར། འདོད་ན། ཐམས་ཅད་སྒྲུབ་བྱེད་ཀྱི་ལུང་གཅིག་ཡིན་པར་ཐལ་ལོ། །ཡང་ཁ་ཅིག །མི་རྟག་པ་སྟོན་པའི་ལུང་རྩོད་གཞིར་བཟུང་ནས་དེ་ལྟར་བཀོད་ཆོག་ཟེར་ན། མི་འཐད་པར་ཐལ། མི་རྟག་པ་སྒྲུབ་པའི་ཚེ་བྱས་པའི་རྟགས་ལྟ་བུས་སྒྲུབ་ན་སླ་བས་དེ་ལྟར་བྱེད་པ་དགོས་པ་མེད་པའི་ཕྱིར། སྡེ་བདུན་རྒྱན་ལས། འོ་ན་སྒྲ་མི་རྟག་པར་སྒྲུབ་པ་ལའང་སྒྲ་མི་རྟག་པར་སྟོན་པའི་ལུང་ཆོས་ཅན། ཁྱོད་རང་གི་བསྟན་བྱའི་དོན་ལ་མི་སླུ་སྟེ། དཔྱད་པ་གསུམ་གྱིས་དག་པའི་ལུང་ཡིན་པའི་ཕྱིར། ཞེས་བཀོད་ན་སྐྱོན་ཅི་ཡོད་ཅེ་ན། དགོས་པ་མེད་པའི་སྐྱོན་ཡོད་དེ། ལུང་དེ་དཔྱད་པ་གསུམ་གྱིས་དག་པར་སྒྲུབ་པ་ལས་སྒྲ་མི་རྟག་པར་ཚད་མས་གྲུབ་པར་སྒྲུབ་དགོས་ལ། དེ་སྒྲུབ་པ་ལ་སྒྲ་མི་རྟག་པར་

― GTD002_Page_0480 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲུབ་པའི་རྟགས་འགོད་དགོས་པའི་ཕྱིར་རོ། །ཞེས་གསུངས་པའི་ཕྱིར་དང། རྣམ་འགྲེལ་ལས། དཔྱོད་པ་ཀུན་ལ་བསྟན་བཅོས་ནི། །ཟུང་ཞེས་ལུགས་འདི་སུ་ཡིས་བྱས། །གནས་གསུམ་པར་ནི་འཕོས་པ་ན། །ལུང་འདྲེན་པ་ནི་མཁས་པའི་ལུགས། །ཞེས་གསུངས་པའི་ཕྱིར། རྟོན་བཞིའི་རྣམ་གཞག་འདི་རྣམས་སྤྱི་བཤད་ཀྱི་སྐབས་ཡིན་པས་ཐལ་འགྱུར་བའི་ལུགས་ལྟར་བྱེད་དགོས་ལ། བློ་གྲོས་མི་ཟད་པའི་མདོར་གསུངས་ཚུལ་དེ་དབུ་མ་པའི་ལུགས་ལས་གཞན་དུ་འདྲེན་པའི་ཐབས་མེད་པ་ལྟ་བུ་ཞིག་ཡིན་པས། བཤད་གཞིའི་དབང་གིས་བློ་བརྟན་གྱིས་ཀྱང་དེའི་དོན་ཀླུ་སྒྲུབ་ཀྱི་བཞེད་ཚུལ་གཙོ་བོར་བྱས་ནས་གསུངས་སོ། །དེ་ལྟར་རྟོན་བཞིའི་རྣམ་གཞག་ཅུང་ཟད་བཤད་པའང། ཀུན་མཁྱེན་བླ་མའི་མཐའ་དཔྱོད་དུ་གསུངས་ཟིན་པའི་དགག་གཞག་ལུང་རིགས་རྣམས་ཚུར་དྲངས་ན་མང་གིས་དོགས་ཏེ་མ་བཀོད་པར། དེར་ཁ་སྐོང་གི་ཚུལ་དུ་བྱས་པ་ཡིན་པས་དོན་གཉེར་ཅན་རྣམས་གཉི་ག་སྦྲགས་ནས་དཔྱོད་དགོས་ཏེ། སྐབས་འོག་མ་རྣམས་ལའང་དེ་བཞིན་དུ་བྱའོ། །སྟོན་པ་མཆོག་དེའི་ཐུགས་ཀྱི་བཅུད། །རྟེན་འབྲེལ་ཟབ་མོ་རྟོགས་པའི་ཐབས། །རྟོན་བཞིའི་རྣམ་གཞག་བཤད་པ་འདིར། །བརྟེན་ནས་བློ་མིག་འབྱེད་པར་མཛོད། །འཛམ་གླིང་ཁོར་ཡུག་ཡངས་པར་ཐུབ་བསྟན་ལ། །སྣ་ཚོགས་རི་མོར་བགྱིད་རྣམས་ཕྱག་གི་ཡུལ། །མི་མཉམ་ལས་འདིར་བརྩོན་པ་རང་གྲིབ་ཀྱི། །གྲོགས་ཅན་སྐྱོ་བའི་རྒྱང་གླུ་ཕྱོགས་བཅུར་ལེན། །༈ གཉིས་པ་དྲང་ངེས་ཇི་ལྟར་འབྱེད་པའི་ཚུལ་ལ་གཉིས། མདོ་སྡེ་དགོངས་འགྲེལ་ལ་བརྟེན་པའི་ཕྱོགས་དང། བློ་གྲོས་མི་ཟད་པའི་མདོ་ལ་བརྟེན་པའི་

― GTD002_Page_0481 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱོགས་སོ། །དང་པོ་ལ་གཉིས། མདོ་སྡེ་ནས་ཇི་ལྟར་གསུངས་པའི་ཚུལ་དང། དེའི་དོན་ཐོགས་མེད་སྐུ་མཆེད་སོགས་ཀྱིས་བཀྲལ་ཚུལ་ལོ། །དང་པོ་ལའང། མདོ་སྡེ་ལ་འགལ་སྤོང་གི་དྲི་བ། འགལ་བ་དེ་སྤོང་བའི་ལན། ངོ་བོ་ཉིད་གསུམ་གྱི་ངོ་བོ་ངོས་བཟུང་བ། དེ་དག་གི་གྲུབ་པའི་དོན་ཞུས་ཚུལ་དང་བཞི། དང་པོ་ནི། དགོངས་འགྲེལ་ལས། བཅོམ་ལྡན་འདས་ཀྱིས་རྣམ་གྲངས་དུ་མར་ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། ཅེས་པ་ནས། དོན་དེ་ཉིད་བཅོམ་ལྡན་འདས་ལ་བདག་ཡོངས་སུ་ཞུ་ལགས་སོ། །ཞེས་གསུངས་སོ། །ཞེས་པའི་བར་གྱིས་དྲི་བའི་གཞུང་བཀོད་ཅིང། འདིས་ནི་མདོ་སྡེ་ཁ་ཅིག་ཏུ་ངོ་བོ་ཉིད་མེད་པ་སོགས་སུ་གསུངས་པ་དང། ཞེས་པ་ནས། མི་བསྐྱུད་པ་ནི་མི་བརྗེད་པའོ། །ཞེས་པའི་བར་གྱིས་དེའི་དོན་གོ་དཀའ་བ་རྣམས་བཀྲལ་བ་ཡིན་ནོ། །དེའང་དགོངས་འགྲེལ་ལ་དྲི་ལན་མི་འདྲ་བའི་ལེའུ་བཅུ་ཡོད་དེ། དང་པོ་རྣམ་རིག་ཙམ་གྱི་དེ་ཉིད་གཏན་ལ་འབེབས་པ་དགོངས་པ་ངེས་འགྲེལ་དང་ཚུལ་བཞིན་ཀུན་ཏུ་དྲི་བ་གཉིས་ཀྱི་དྲིན་ལན་གྱི་ལེའུ། གཉིས་པ་ཆོས་ཉིད་རྟོག་གེའི་སྤྱོད་ཡུལ་ལས་འདས་པར་སྟོན་པ་ཆོས་འཕགས་ཀྱི་ལེའུ། གསུམ་པ་བདེན་གཉིས་ངོ་བོ་གཅིག་ལ་ལྡོག་པ་ཐ་དད་པའི་ཚུལ་སྟོན་པ་བློ་གྲོས་རྣམ་དག་གི་ལེའུ། བཞི་པ་ཆོས་ཀྱི་དབྱིངས་སུ་དབྱེར་མེད་པར་སྟོན་པ་རབ་འབྱོར་གྱི་ལེའུ། ལྔ་པ་ཀུན་གཞི་གཙོ་བོར་སྟོན་པ་བློ་གྲོས་ཡངས་པའི་ལེའུ། དྲུག་པ་མཚན་ཉིད་གསུམ་སྟོན་པ་ཡོན་ཏན་འབྱུང་གནས་ཀྱི་ལེའུ། བདུན་པ་ངོ་བོ་ཉིད་མེད་པ་སོགས་སུ་གསུངས་པའི་དྲང་ངེས་སོ་སོར་འབྱེད་པ་དོན་དམ་ཡང་དག་འཕགས་

― GTD002_Page_0482 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ལེའུ། བརྒྱད་པ་ཞི་ལྷག་གི་རྣམ་གཞག་སྟོན་པ་བྱམས་པས་ཞུས་པའི་ལེའུ། དགུ་པ་ས་བཅུའི་རྣམ་གཞག་སྟོན་པ་སྤྱན་རས་གཟིགས་ཀྱིས་ཞུས་པའི་ལེའུ། བཅུ་པ་སངས་རྒྱས་ཀྱི་སའི་ཡོན་ཏན་སྟོན་པ་འཇམ་དཔལ་གྱིས་ཞུས་པའི་ལེའུ་རྣམས་སོ། །དཀའ་འགྲེལ་ལས་རབ་འབྱོར་གྱི་ལེའུ་མ་བགྲང་བ་ནི། ཁ་ཅིག །རྒྱ་ནག་འགྲེལ་ཆེན་དུ་གླེང་གཞིའི་ལེའུ་སྟེ་དང་པོའོ། །ཞེས་འབྱུང་བ་དང། འདི་ཉིད་ལས་ཀྱང་འོག་ཏུ་གླེང་གཞིའི་ལེའུ་ཞེས་འབྱུང་བས་དེ་ལྟར་ན་ལེའུ་བཅུ་གཅིག་ཏུ་འགྱུར་བས་མ་བགྲང་བ་ཡིན་ཟེར་ཡང། དེ་ནི་མདོ་གཞན་བཞིན་གླེང་གཞི་རྫོགས་མཚམས་ནས་ལེའུ་བྱས་ཀྱང་དོན་གྱིས་ཐོབ་པ་ལ་དགོངས་པ་ཡིན་གྱི། རབ་འབྱོར་གྱི་ལེའུ་གཞུང་རང་ན་ལེའུ་བྱས་ནས་ཡོད་ལ། གཏན་ལ་དབབ་པ་བསྡུ་བས་ཀྱང་དེ་བཞིན་དྲངས་པས་འདོར་ཐབས་མེད་དོ། །དེས་ན་དཀའ་འགྲེལ་གྱི་དགོངས་པ་ནི། རྣམ་བཤད་སྙིང་པོ་རྒྱན་ལས། ས་བཅུའི་དབང་ཕྱུག་བྱང་ཆུབ་སེམས་དཔའ་བཅུས་སྟོན་པ་ལ་དྲི་བ་མི་འདྲ་བ་རེ་རེ་མཛད་པའི། ཞེས་གསུངས་པ་དང། མདོའི་གླེང་གཞིར་སེམས་དཔའ་བཅུའི་མཚན་སྨོས་ཀྱང་རབ་འབྱོར་མ་བྱུང་བས་ལེའུ་དེ་སེམས་དཔའ་བཅུའི་དྲིས་ལན་གྱི་གྲངས་མ་ཡིན་པ་ལ་དགོངས་སོ། །སེམས་དཔའ་བཅུ་ཡོད་ཀྱང་དང་པོ་གཉིས་ལ་དྲི་ལན་ལེའུ་གཅིག་ལས་མེད་པས་རབ་འབྱོར་གྱི་ལེའུ་སྟེ་བཅུ་ཡིན་ལ། དེ་དག་གིས་སེམས་ཙམ་པའི་ལུགས་ཀྱི་གཞི་ལམ་འབྲས་བུའི་རྣམ་གཞག་ཆ་ཚང་བར་སྟོན་ཏེ། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང། །དེ་ཡི་རྒྱུ་འབྲས་དེ་རབ་དབྱེ་བ་དང། །བསླབ་པ་གསུམ་དང་དེ་འབྲས་སྤངས་པ་དང། །ཡེ་

― GTD002_Page_0483 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་ཤེས་བྱའི་གནས་ཀུན་གཞི་དང། མཚན་ཉིད་ཅེས་པའི་མཚན་ཉིད་གསུམ་སྟེ། དེ་བཞིའི་སྒོ་ནས་གཞིའི་རྣམ་གཞག་གཏན་ལ་འབེབས། དེར་འཇུག་ཅེས་དྲོད་རྩེ་དང། བཟོད་མཆོག་དང། མཐོང་ལམ་གསུམ་ན་ཀུན་བཏགས་གཞན་དབང་ཡོངས་གྲུབ་གསུམ་ལ་འཇུག་ཚུལ་དང། དེ་ཡི་རྒྱུ་འབྲས་ཞེས་ཕྱིན་དྲུག་དང། དེ་རབ་དབྱེ་ཞེས་ས་བཅུར་འབྱེད་ཚུལ་དང། བསླབ་པ་གསུམ་ཞེས་པས་བསླབ་པ་གསུམ་དུ་བསྡུ་ཚུལ་ཏེ་ལམ་གྱི་རྣམ་གཞག་གཏན་ལ་འབེབས། དེ་འབྲས་སྤངས་པ་དང་ཞེས་པས་མི་གནས་པའི་མྱང་འདས་དང། ཡེ་ཤེས་ཞེས་པས་ཡེ་ཤེས་ཆོས་སྐུ་སྟེ་གཉིས་ཀྱིས་འབྲས་བུའི་དོན་གཏན་ལ་འབེབས་པས་དགོངས་འགྲེལ་དང་ཁོག་མཐུན་ཀྱང་དོན་ཚན་རེ་རེ་དང་ལེའུ་རེ་རེ་སོ་སོར་སྦྱོར་དགོས་པ་མ་ཡིན་ཏེ། ལེའུ་བརྒྱད་པ་དང་དགུ་པས་ལམ་བསྟན། བཅུ་པའི་འབྲས་བུ་བསྟན་ལ། གཞན་བདུན་ཀས་གཞིའི་རྣམ་གཞག་གཏན་ལ་འབེབས་པའི་ཕྱིར། དེ་དག་ལས་འདིར་དོན་དམ་ཡང་དག་འཕགས་ཀྱིས་མདོ་སྡེ་ལ་འགལ་སྤོང་གི་དྲི་བ་ཞུས་ནས་དྲང་ངེས་ཕྱེ་བའི་ཚུལ་གཙོ་བོར་འཆད་པ་ཡིན་ནོ། །དེའང་བཅོམ་ལྡན་འདས་ཀྱིས་རྣམ་གྲངས་དུ་མར་ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀལ་སྩལ། སྐྱེ་བའི་མཚན་ཉིད་དང། འཇིག་པའི་མཚན་ཉིད་དང་ཞེས་པ་ནི། རྒྱལ་བོ་གཟུགས་ཅན་སྙིང་པོ་ལ་གདམས་པའི་མདོ་ལས། རྒྱལ་པོ་ཆེན་པོ། གཟུགས་ལ་སྐྱེ་བའང་ཡོད། འཇིག་པའང་ཡོད། དེའི་སྐྱེ་བ་དང་འཇིག་པའང་ཤེས་པར་བྱའོ། །རྒྱལ་པོ་ཆེན་པོ་ཚོར་བ་དང། ཞེས་སོགས་ཡིན། སྤངས་

― GTD002_Page_0484 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དང་ཡོངས་སུ་ཤེས་པའང་བཀའ་སྩལ་ཅེས་པ་ནི། མདོ་དེ་ཉིད་ལས། རྒྱལ་པོ་ཆེན་པོ། འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་མཐོང་བ་ནི་གཟུགས་ལའང་ཡིད་འབྱུང་བར་འགྱུར་རོ། །ཚོར་བ་དང། འདུ་ཤེས་དང། འདུ་བྱེད་དང། རྣམ་པར་ཤེས་ལའང་ཡིད་འབྱུང་བར་འགྱུར་རོ། །ཡིད་བྱུང་ན་འདོད་ཆགས་དང་འབྲལ་ལོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། །ཞེས་སྤངས་པ་དང། དེའི་འཕྲོར། རྣམ་པར་གྲོལ་ན་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ། །ཞེས་རྣམ་པར་གྲོལ་བའི་ཡེ་ཤེས་མཐོང་བར་འགྱུར་རོ། །ཞེས་པས་ཡོངས་སུ་ཤེས་པ་བསྟན་པར་བྱས་ན་གོ་རིམ་དང་མཐུན་ལ། ཡོངས་སུ་ཤེས་པའི་དོན་ཕུང་པོ་ལྔའི་ངོ་བོ་བདག་ཏུ་མ་གྲུབ་པར་ཤེས་པ་ལ་སྦྱོར་ན་གོང་དུ། རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་གཟུགས་གང་ཅི་ཡང་རུང། ཞེས་པ་ནས། དེ་དག་ཐམས་ཅད་ལ་འདི་ནི་བདག་མ་ཡིན་ནོ། །བདག་ནི་འདི་མ་ཡིན་ནོ། །འདི་ནི་བདག་གི་བདག་མ་ཡིན་ནོ། །ཞེས་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །ཞེས་པའི་དོན་དུ་བྱེད་དགོས་སོ། །ཕུང་པོ་རྣམས་ཇི་ལྟ་བ་བཞིན་དུ་སྐྱེ་མཆེད་རྣམས་དང། རྟེན་ཅིང་འབྲེལ་བར་འབྱུང་བ་དང། ཟས་རྣམས་ཀྱི་ཡང་བཀའ་སྩལ་ཅེས་པ་ནི། མངོན་པར་འབྱུང་བའི་མདོ་ལས་གསུངས་པ་རལ་བ་ཅན་ལྔ་བརྒྱ་དང་འོད་སྲུང་ཆེན་པོ་སོགས་ལ་གདམས་པ་རྣམས་ཡིན་ནམ་སྙམ་ཡང་དཔྱད་དགོས་ལ། བཅོམ་ལྡན་འདས་ཀྱིས་རྣམ་གྲངས་དུ་མར་བདེན་པ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། ཡོངས་སུ་ཤེས་པ་དང།

― GTD002_Page_0485 ―

^{[མ་དཔེ་གཟིགས་ན་འདིར་གནོན།]}

[Full Size]

སྤངས་པ་དང། མངོན་དུ་བགྱི་བ་དང་བསྒོམ་པའང་བཀའ་སྩལ། ཅེས་པ་ནི་བདེན་བཞིའི་ཆོས་འཁོར་ཏེ། དེའང་ཆོས་ཀྱི་འཁོར་ལོའི་མདོ་ཞེས་ཆོས་འབྱུང་གསན་ཡིག་རྣམས་སུ་མདོ་ཟུར་བ་ཞིག་བྱས་འདུག་ནའང། མངོན་པར་འབྱུང་བའི་མདོར་སངས་རྒྱས་དང་པོ་བལྟམས་ཚུལ་ནས་བརྩམས་ཏེ་རིམ་པར་གསུངས་པའི་ནང་གི་ལྔ་སྡེ་ལ་ཆོས་འཁོར་བསྐོར་ཚུལ་གྱི་ཐད་དེ་ལོགས་སུ་བཀོལ་བ་ཡིན་པ་བལྟས་པས་ཤེས་སོ། །བཅོམ་ལྡན་འདས་ཀྱིས་རྣམ་གྲངས་དུ་མར་ཁམས་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། ཁམས་སྣ་ཚོགས་པ་ཉིད་དང། ཁམས་དུ་མ་བ་ཉིད་དང། སྤངས་པ་དང་ཡོངས་སུ་ཤེས་པའང་བཀའ་སྩལ། ཅེས་པའི་མདོ་ནི་སྤྱིར་མངོན་པ་སྡེ་བདུན་ནང་གི་ཁམས་ཀྱི་ཚོགས་ལྟ་བུ་བྱེ་སྨྲས་བཀར་འདོད་ཀྱང་མདོ་སྡེ་པ་ཁ་ཅིག་དགྲ་བཅོམ་པ་གང་པོས་བྱས་པ་དང། ལ་ལ་དེའི་མིང་ཅན་སོ་སོ་སྐྱེ་བོས་བརྩམས་པར་འདོད་པའི་རྩོད་པ་ཅན་ཡིན་ལ། འདིར་ཆེད་དུ་བྱ་བའི་གདུལ་བྱ་ཉན་ཐོས་སྡེ་གཉིས་ལ་གསུངས་ཤིང། དེ་གཉི་གར་རྩོད་མེད་དུ་ཁུངས་བྱེད་པའི་མདོ་ཞིག་དགོས་པས་ཁམས་མང་པོའི་མདོ་བྱ་བ་འདི་ཡིན་པར་མངོན་ནོ། །བཅོམ་ལྡན་འདས་ཀྱིས་རྣམ་གྲངས་དུ་མར་དྲན་པ་ཉེར་བར་བཞག་པ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། ཅེས་པ་ནས། འཕེལ་ཞིང་ཡང་བ་ཉིད་དུ་བཀའ་སྩལ་ལ། ཞེས་པ་ནི་དྲན་པ་ཉེར་བཞག་སོགས་ཀྱི་ནང་གི་ཡིན་ལ། དྲན་ཉེའང་ལོ་ཙཱ་བ་ཁ་ཅིག་ཐེག་ཆེན་གྱི་བཀར་བཞེད་ཀྱང་ཐེག་དམན་གྱི་ཡིན་པར་དཀར་ཆག་འཕང་ཐང་མ་སོགས་སུ་གསུངས་པ་ལྟར་ཡིན་ནོ། །དེ་དག་སོ་སོར་ཁྱད་པར་སྦྱོར་ཚུལ་རྣམས་ཀྱི་

― GTD002_Page_0486 ―

^{[མ་དཔེ་གཟིགས་ན་འདིར་གནོན།]}

[Full Size]

ནང་ནས་ཅུང་རྟོགས་དཀའ་བ་ནི་ཕུང་པོ་ལྔ་ལ་རང་གི་མཚན་ཉིད་དང། སྐྱེ་བ་དང། འཇིག་པ་དང། སྤང་བ་དང། ཡོངས་སུ་ཤེས་པ་ལྔ་སྦྱར་བའི་དང་པོའི་དོན། རྒྱ་ནག་འགྲེལ་ཆེན་ལས། རང་གི་མཚན་ཉིད་ཅེས་བྱ་བ་ནི་བྱེ་བྲག་གི་མཚན་ཉིད་ཡིན་ཏེ། ཇི་སྐད་དུ་གཟུགས་ནི་ཐོགས་པ་དང་བཅས་པའོ། །ཞེས་བྱ་བ་ནས། རྣམ་པར་ཤེས་པ་ནི་རྣམ་པར་རིག་པའོ། །ཞེས་བྱ་བའི་བར་དུ་བཤད་པ་ལྟ་བུའོ། །ཞེས་ཐུན་མོང་མ་ཡིན་པའི་འཇོག་བྱེད་དམ་མཚན་ཉིད་ལ་སྦྱར་ཡང། འདི་ཉིད་ལས། མདོ་ཉིད་ལས་ཀུན་བཏགས་ཀྱི་སྐབས་སུ་རང་གི་མཚན་ཉིད་ཀྱིས་གྲུབ་པ་ལ་གསལ་བར་གསུངས་པའི་ཕྱིར་དང། ཀུན་བཏགས་ལའང་ཐུན་མོང་མ་ཡིན་པའི་མཚོན་བྱེད་ཡོད་པས་མཚན་ཉིད་ངོ་བོ་ཉིད་མེད་པ་ཀུན་བཏགས་ལ་བཤད་དུ་མི་རུང་བའི་སྐྱོན་དུ་འགྱུར་བའི་ཕྱིར་རོ། །ཞེས་གསུངས་པ་བཞིན་ཡིན་པས་མི་འཐད་ལ། ཁྱད་པར་ཕྱི་མ་གཉིས་ཀྱི་དོན་འགྲེལ་ཆེན་དེ་ཉིད་ལས། ཀུན་ནས་ཉོན་མོངས་པའི་གཟུགས་ཀྱི་ཕུང་པོ་གང་ཡིན་པ་དེ་གཏན་སྤངས་པར་བྱའོ། །ཀུན་ནས་ཉོན་མོངས་པ་མ་ཡིན་པའི་གཟུགས་ཀྱི་ཕུང་པོ་གང་ཡིན་པ་དེ་ནི་ཡོངས་སུ་ཤེས་པར་བྱའོ། །ཡང་ན་ཀུན་འབྱུང་བའི་དོན་གྱི་མཐའ་གང་ཡིན་པ་དེ་ནི་གཏན་དུ་སྤངས་པར་བྱའོ། །སྡུག་བསྔལ་གྱི་བདེན་པའི་མཐའ་གང་ཡིན་པ་དེ་ནི་ཡོངས་སུ་ཤེས་པར་བྱའོ། །ཞེས་ཟག་བཅས་ཉེར་ལེན་གྱི་ཕུང་པོ་ལྔ་སྤང་བ་དང། ཟག་མེད་ཀྱི་ཕུང་པོ་ལྔ་ཡོངས་སུ་ཤེས་པ་ལ་སྦྱོར་ཚུལ་གཅིག་དང། ཟག་བཅས་ཀྱི་ཕུང་པོ་ལྔའི་རྒྱུ་ལས་དང་ཉོན་མོངས་པ་སྤོང་བ་དང། ཕུང་པོ་དེ་ལྔ་རང་གི་ངོ་བོ་ནད་དང་འདྲ་བར་ཡོངས་སུ་ཤེས་

― GTD002_Page_0487 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱ་བ་ལ་སྦྱོར་ཚུལ་གཅིག་སྟེ་གཉིས་གསུངས་པ་ལ་འདིར་དགག་པ་མ་མཛད་པས་འགལ་བ་མེད་པར་མངོན། བྱང་ཕྱོགས་སོ་བདུན་ལ་ཁྱད་པར་བརྒྱད་སྦྱར་བའི་ཕྱི་མ་གཉིས་ལ། ཕྱིར་ཞིང་འབྱུང་བ་དང། འཕེལ་ཞིང་རྒྱས་པ་ཞེས་ཀྱང་ཝེན་ཚེག་གིས་བཤད་པའི་དོན་ནི་གཉེན་པོ་སྐྱེས་པ་དེ་ཉིད་མི་བསྐྱུད་པ་སྟེ་མི་བརྗེད་པ་ཙམ་མ་ཡིན་པར་ཡང་དང་ཡང་དུ་མངོན་དུ་བྱས་ཏེ་གོམས་པར་བྱེད་པ་དང། དེ་ལྟར་གོམས་པའི་སྟོབས་ཀྱིས་གོང་ནས་གོང་དུ་འཕེལ་ཞིང། འཕེལ་བ་དེའང་མཆོང་དང་ཆུའི་དྲོད་བཞིན་མཐའི་ཚད་བཟུང་དུ་ཡོད་པ་དེ་འདྲ་མ་ཡིན་པར་མཐའ་མེད་དུ་རྒྱས་པའི་དོན་ནོ། །མཐའ་དཔྱད་པ་ལ། ཁ་ཅིག་ན་རེ། བཅོམ་ལྡན་འདས་ཀྱིས་དང་པོ་ཡུལ་ཝ་ར་ཎ་སིར། ཞེས་པ་ནས། འཕགས་པའི་བདེན་པ་བཞིའི་རྣམ་པ་བསྟན་པའི་ཆོས་ཀྱི་འཁོར་ལོ། ཞེས་གསུངས་པས། དྲི་ཞུས་ཀྱི་འཁོར་ལོ་དང་པོ་ལ་བརྗོད་བྱ་བདེན་བཞིར་བརྩམས་པས་ཁྱབ་ཟེར་ན། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་གཟུགས་ལ་སྐྱེ་བའང་ཡོད། འཇིག་པའང་ཡོད་ཅེས་སོགས་ཀྱི་མདོ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། ཅེས་པའི་དངོས་བསྟན་གྱི་མདོ་ཡིན་པའི་ཕྱིར། ཁྱབ་སྟེ། བདེན་བཞི་ལ་བརྩམས་པ་ནི་རྣམ་གྲངས་དུ་མར་བདེན་པ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་སོ་སོར་ཕྱེ་སྟེ་གསུངས་པའི་ཕྱིར། དེར་ཐལ། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་སྟོན་པར་ཁྱད་མེད་ཀྱང་

― GTD002_Page_0488 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ལ་བརྩམས་པའི་གཞི་མི་འདྲ་བའི་མདོ་སོ་སོར་ཡོད་པའི་དབང་གིས་དང་པོའི་དྲི་བ་ཞུ་དུས་རྣམ་གྲངས་དུ་མར་ཞེས་ཡང་ཡང་སྨྲས་ལ། བར་བའི་སྐབས་འགྲེས་རྐང་ཕྱེས་མ་ཕྱེས་ཀྱི་ཁྱད་ཙམ་ལས་གཟུགས་ནས་རྣམ་མཁྱེན་གྱི་བར་ཐམས་ཅད་ངོ་བོ་ཉིད་མེད་མཉམ་དུ་གསུངས་ཚུལ་འདྲ་བས་དྲི་བ་འགོད་ཚུལ་ཚན་གཅིག་ཏུ་བསྡུས་ནས་ཞུས་པ་ཡིན་པའི་ཕྱིར། ཁོ་ན་རེ། འོ་ན་བདེན་པ་བཞིའི་རྣམ་པ་བསྟན་པས་ཞེས་དམིགས་ཀྱིས་བཀར་བ་ལ་དགོས་པ་མེད་པར་ཐལ། དེར་བདེན་བཞི་ལས་བརྩམས་མ་བརྩམས་ཅི་རིགས་ཡོད་པའི་ཕྱིར་ན། མ་ཁྱབ་སྟེ། ཉན་ཐོས་སྡེ་བའི་རིགས་ཅན་རྣམས་ཀྱི་བློ་དང་བསྟུན་པའི་གསུང་རབ་ཀྱི་དོན་གཏན་ལ་འབེབ་ཚུལ་གཙོ་བོའི་དབང་དུ་བྱས་པ་ཡིན་པའི་ཕྱིར། དེར་ཐལ། བྱེ་མདོ་གཉིས་མངོན་པ་མཛོད་ཀྱི་གནས་དང་པོ་གསུམ་གས་སྡུག་བདེན། དེ་ནས་གཉིས་ཀྱིས་ཀུན་འབྱུང། དེ་ནས་གསུམ་གྱིས་འགོག་ལམ་བསྟན་པ་ལྟ་བུ་བདེན་བཞིའི་སྟེང་ནས་གཏན་ལ་འབེབ་པར་བྱེད། སེམས་ཙམ་པ་རྣམས་ཕྱི་དོན་མེད་པ་དང་རྣམ་རིག་ཙམ་དུ་བསྒྲུབ་པའི་ཆེད་མཚན་ཉིད་གསུམ་གྱི་སྒོ་ནས་གཏན་ལ་འབེབ་པ་གཙོ་བོར་བྱེད། དབུ་མ་པ་རྣམས་སྣང་སྟོང་ཟུང་འཇུག་དང་ཐབས་ཤེས་ཟུང་འཇུག་བསྒྲུབ་པའི་ཕྱིར་བདེན་པ་གཉིས་ཀྱི་སྒོ་ནས་གཙོ་བོར་གཏན་ལ་འབེབ་པའི་ཕྱིར། ཁ་ཅིག་གཟུགས་ལ་སྐྱེ་བ་ཡོད་ཅེས་སོགས་ཀྱི་མདོ་ཚིག་འདི་རྒྱལ་པོ་ལ་གདམས་པའི་མདོ་རྣམས་སུ་མེད་ཟེར་བ་མི་འཐད་དེ། ད་ལྟ་དཀར་ཆག་སོགས་སུ་རྒྱལ་པོ་ལ་གདམས་པའི་མདོའི་མིང་བཏགས་པ་རྣམས་ཀྱི་ནང་ན་མེད་ཀྱང་གཟུགས་ཅན་སྙིང་པོས་བསུ་བ་ཞེས་པའི་མདོ་

― GTD002_Page_0489 ―

^{[མ་དཔེ་གཟིགས་ན་འདིར་གནོན།]}

[Full Size]

དེར་ཡོད་ལ། དེ་རྒྱལ་པོ་གཟུགས་ཅན་སྙིང་པོ་ལ་གདམས་པ་ཡིན་པའི་ཕྱིར། ཁ་ཅིག །བཟོ་སྦྱང་གཟུགས་ཅན་སྙིང་པོར་གསུངས་པ་ཡིན་ཞིང། དེའི་ནང་དུ་གཟུགས་སྐྱེ་བའང་མ་ཡིན། འཇིག་པའང་མ་ཡིན། དེའི་སྐྱེ་བ་དང་འཇིག་པའང་ཤེས་པར་བྱའོ། །ཞེས་འབྱུང་བས་དེ་ཡིན་ཟེར་བའང་མི་འཐད་དེ། མདོ་དེ་ཇི་ལྟ་བ་མངོན་པར་འབྱུང་བའི་མདོའི་ནང་དུ་ཡོད་ལ། དེར་གཟུགས་སྐྱེ་བའང་ཡོད་ཅེས་སོགས་འབྱུང་བས། འདི་འགྱུར་སྐྱོན་ནམ་རྒྱ་དཔེ་མ་དག་པ་ཡིན་པའི་ཕྱིར་མདོ་གཉིས་བསྡུར་ན་ཤེས་ལ། བཟོ་སྦྱང་གཟུགས་ཅན་སྙིང་པོ་དང་རྒྱལ་པོ་གཟུགས་ཅན་སྙིང་པོ་ཞེས་པའང་མིང་འདོགས་ལུགས་ཙམ་ཡིན་པར་འདུལ་བ་ལུང་དང་གླེང་འབུམ་ལས་གསུངས་སོ། །ཁ་ཅིག་ན་རེ། རྒྱལ་པོ་ཆེན་པོ་ཞེས་སོགས་ཀྱི་མདོ་ཆོས་ཅན། ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་པའི་དངོས་བསྟན་གྱི་མདོ་མ་ཡིན་པར་ཐལ། དྲི་བ་ཞུས་པ་ལྟར་དོགས་པ་ཡོད་པའི་འཁོར་ལོ་དང་པོ་མ་ཡིན་པའི་ཕྱིར། དེར་ཐལ། དེའི་སྒྲས་ཟིན་ལ་དོགས་པ་མེད་པའི་ཕྱིར་ཏེ། གཟུགས་ལ་སྐྱེ་བ་ཡོད་པ་གང་ཞིག །འཇིག་པའང་ཡོད་པའི་ཕྱིར་ཟེར་ན། མ་ཁྱབ་སྟེ། དེའི་སྒྲས་ཟིན་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པའི་སྐྱེ་བ་དང་འཇིག་པ་བསྟན་པ་ཡིན་པའི་ཕྱིར། བྱས་པ་ལ་ཁོ་ན་རེ། མི་འཐད་པར་ཐལ། དེར་སྐྱེ་འཇིག་ཡོད་ཅེས་པ་ཙམ་ལས་གོང་འོག་གང་དུའང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་ཅེས་པའི་ཚིག་ཟུར་ཙམ་ཡང་མེད་པའི་ཕྱིར། ཁྱབ་སྟེ། གཞུང་རང་གི་ཚིག་ལ་མེད་ན་ནན་གྱིས་འདིས་དེ་སྟོན་དགོས་ཞེས་སྨྲ་བ་ནི།

― GTD002_Page_0490 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་འགྲེལ་ལས། ནན་གྱིས་ཁྱོད་འདི་འདོད་བྱས་པ། །གསལ་བར་དབང་ཕྱུག་སྤྱོད་པ་ཡིན། །ཞེས་པ་དེ་ཁོ་ནར་སྣང་པའི་ཕྱིར་ཟེར་བ་ལ། གཞན་དག་ན་རེ། སྐྱོན་མེད་དེ། འདིའི་ཆེད་དུ་བྱ་བའི་གདུལ་བྱ་ཉན་ཐོས་སྡེ་བ་ཡིན་ཞིང་དེའི་ལུགས་ལ་སྐྱེ་འཇིག་ཡོད་ན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་དགོས་པའི་ཕྱིར་ཟེར། ཕྱི་མ་ལ་མངོན་པར་འབྱུང་བའི་མདོ་ལས། འོད་སྲུང། ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །ཞེས་པ་དང་འདུལ་བའི་བསླབ་བྱ་སྟོན་པའི་འཁོར་ལོ་དང་པོ་རྣམས་ཆོས་ཅན། ཁྱོད་ཀྱི་སྒྲས་ཟིན་ལའང་དོན་དེ་དང་དེ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་བསྟན་པར་ཐལ། ཁྱོད་ཀྱི་ཆེད་དུ་བྱ་བའི་གདུལ་བྱ་ཉན་ཐོས་སྡེ་བའི་རིགས་ཅན་ཡིན་པ་གང་ཞིག །དེའི་ལུགས་ལ་སྟོན་པ་དང་ཉན་ཐོས་སོགས་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་ཁྱབ་པའི་ཕྱིར། ཁྱབ་པ་ཁས། འདོད་ན། དེ་དག་ལ་དགོངས་གཞི་གང་ལ་དགོངས་ཞེས་དྲིས་ནས་དོགས་པ་གཅོད་དགོས་པར་ཐལ། དེ་དག་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་བཞིན་དུ་གྲུབ་ཅེས་གསུངས་པ་གང་ཞིག །སྟོན་པ་ལ་འཁྲུལ་པ་མི་མངའ་བའི་ཕྱིར། འདོད་མི་ནུས་ཏེ། འདི་ཉིད་ལས། བསླབ་བྱ་གསུངས་པ་ལ་འདིར་དོགས་པ་གཅོད་མི་དགོས་པ་བཞིན་ནོ། །ཞེས་གསུངས་པའི་ཕྱིར། རང་ལུགས་ལ་གོང་དུ་མ་ཁྱབ་སྟེ། གདུལ་བྱ་དེར་སྐྱེ་འཇིག་སོགས་ཡོད་པར་བསྟན་ཚད་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྟོན་མི་དགོས་ཀྱང། གོང་དུ་དྲངས་པའི་སྐྱེ་འཇིག་ཡོད་ཅེས་

― GTD002_Page_0491 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཚིག་གིས་དེ་སྟོན་དགོས་པའི་ཕྱིར། དེར་ཐལ། སྔར་གདུལ་བྱ་དེའི་བློ་ངོར་ཕུང་པོ་ལ་མ་ལྟོས་པའི་ཚུགས་ཐུབ་ཀྱིས་དབང་སྒྱུར་བ་པོའི་བདག་དང། དེས་དབང་བསྒྱུར་བྱའི་ཕུང་པོ་སོ་སོར་ཡོད་ཅིང། དེ་ལས་ལོགས་སུ་བདག་ཕུང་འཇོག་ཚུལ་མི་ཤེས་པས་དེ་ཕྱུགས་དང་ཕྱུགས་རྫི་ལྟར་ལྟོས་མེད་ཀྱི་སོ་སོ་བ་ཞིག་སྟོན་རྒྱུ་མེད་ཀྱང། རང་རང་འཛིན་པའི་རྟོག་པའི་ཞེན་གཞིར་ང་ཞེས་རང་གི་མཚན་ཉིད་ཀྱིས་གྲུབ་པ་ཞིག་ཡོད་ལ། དེའི་ཞེན་གཞིར་ང་དེའི་བླང་བྱའི་ཕུང་པོ་ཞེས་རང་གི་མཚན་ཉིད་ཀྱིས་གྲུབ་པ་ཞིག་ཀྱང་ཡོད། དེ་ཡོད་པས་ཕུང་པོ་དེ་ལེན་པའི་སྐྱེ་བ་དང། འདོར་བའི་འཇིག་པའང་སྒྲོ་བཏགས་ཙམ་མ་ཡིན་པར་ཞེན་གཞི་དེར་ཡུལ་ཁོ་རང་གི་ངོས་ནས་ཚུར་རང་མཚན་གྱིས་གྲུབ་རྒྱུ་ཞིག་ཡོད་ཅེས་བསྟན་པ་ཡིན་པའི་ཕྱིར། དེར་ཐལ། དེའི་རྒྱུ་མཚན་གྱིས་ཚིག་ཟིན་ལ་སྐྱེ་འཇིག་ཙམ་གསུངས་ཀྱང། བརྗོད་དོན་ངོ་བོ་ལ་ཀུན་བཏགས་པ་གཟུགས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང། ཁྱད་པར་ལ་ཀུན་བཏགས་པ་སྟེ་གཟུགས་ཀྱི་སྐྱེ་བ་རང་འཛིན་རྟོག་པའི་ཞེན་གཞེར་རང་མཚན་གྱིས་གྲུབ་པ་སོགས་སུ་སོང་བ་ཡིན་པའི་ཕྱིར། དགོངས་འགྲེལ་ལས། གཟུགས་ཀྱི་ཕུང་པོ་སྐྱེའོ་ཞེའམ། འགག་གོ་ཞེའམ། གཟུགས་ཀྱི་ཕུང་པོ་སྤང་བ་དང། ཡོངས་སུ་ཤེས་པ་ཞེས་ངོ་བོ་ཉིད་ཀྱི་མཚན་ཉིད་དམ་བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་བཞག་པ་གང་ལགས་པ་དེ་ནི་ཀུན་བཏགས་པའི་མཚན་ཉིད་ལགས། ཞེས་གསུངས་པའི་ཕྱིར། དེའི་རྒྱུ་མཚན་

― GTD002_Page_0492 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་འདིའི་སྒྲས་ཟིན་ལྟར་སྐྱེ་བ་དང་འཇིག་པར་དམིགས་ཤིང་འཛིན་པ་ཐམས་ཅད་ཆོས་ཀྱི་བདག་མེད་པའི་དོན་ལས་ཕྱིན་ཅི་ལོག་ཏུ་གྱུར་བའི་མངོན་པའི་ང་རྒྱལ་གྱིས་བསླད་པ་ཤ་སྟག་ཏུ་འགྲོ་བའི་ཕྱིར་ཏེ། རབ་འབྱོར་གྱི་ལེའུ་ལས། ཕུང་པོའི་སྐྱེ་བ་དམིགས་པ་དང་ཕུང་པོའི་འཇིག་པ་དམིགས་པ་དང། ཞེས་པ་ནས། ཚེ་དང་ལྡན་པ་འདི་དག་ནི་ཆོས་རྣམ་པ་སྣ་ཚོགས་དམིགས་པའི་མངོན་པར་རྟོགས་པ་སྟོན་པས་ཤེས་པ་བརྡ་སྤྲོད་པར་བགྱིད་ཅིང་འདི་ལྟར་དོན་དམ་པ་ཐམས་ཅད་དུ་རོ་གཅིག་པའི་མཚན་ཉིད་མ་འཚལ་བས། ཚེ་དང་ལྡན་པ་འདི་དག་ཐམས་ཅད་ནི་མངོན་པའི་ང་རྒྱལ་ཅན་མངོན་པའི་ང་རྒྱལ་གྱིས་མངོན་དུ་ཟིན་ཅིང་ཤེས་པ་བརྡ་སྤྲོད་པ་བགྱིད་པ་ཤ་སྟག་ལགས་སོ། །ཞེས་གསུངས་པའི་ཕྱིར། འོན་ཀྱང་གདུལ་བྱ་དེ་གནས་སྐབས་སུ་དེ་ལྟར་སྟོན་དགོས་ཏེ། དེ་ལྟར་མ་བསྟན་ན་རྣམ་སྨིན་མྱོང་བ་པོའི་བདག་དང། རྣམ་སྨིན་གྱི་ཕུང་པོ་སོགས་འཇོག་མི་ཤེས་པས་ལས་འབྲས་ལ་ཡིད་ཆེས་དང་འཁོར་བ་ལ་སྐྱོ་བ་སོགས་མི་འབྱུང་བ་གང་ཞིག །གང་ཟག་གི་བདག་མེད་ལ་ལྟོས་པའི་དབུ་མའི་ལམ་ཡང་སྒྲུབ་མི་ནུས་པའི་ཕྱིར། དང་པོ་གྲུབ་སྟེ། དོན་དམ་ཡང་དག་འཕགས་ཞུས་ཀྱི་ལེའུ་ལས། དེ་ལ་སེམས་ཅན་གང་དག་དང་པོ་ཉིད་ནས་དགེ་བའི་རྩ་བ་མ་བསྐྱེད་པ། སྒྲིབ་པ་ཡོངས་སུ་མ་དག་པ། རྒྱུད་ཡོངས་སུ་མ་སྨིན་པ། མོས་པ་མི་མང་བ། བསོད་ནམས་དང་ཡེ་ཤེས་ཀྱི་ཚོགས་ཡང་དག་པར་མ་གྲུབ་པ་དེ་དག་ལ་ནི་ངས་སྐྱེ་བ་ངོ་བོ་ཉིད་མེད་པ་ཉིད་ལས་བརྩམས་ནས་ཆོས་སྟོན་ཏེ། དེ་དག་གིས་ཆོས་དེ་ཐོས་ནས་རྟེན་ཅིང་འབྲེལ་བར་འབྱུང་བའི་འདུ་བྱེད་རྣམས་ལ་མི་རྟག་པ་ཉིད་དུ་ངེས་ཤིང།

― GTD002_Page_0493 ―

^{[མ་དཔེ་གཟིགས་ན་འདིར་གནོན།]}

[Full Size]

མི་བརྟན་པ་ཉིད་དང། ཡིད་བརྟན་དུ་མི་རུང་བ་ཉིད་དང། འགྱུར་བའི་ཆོས་ཉིད་དུ་ཤེས་ནས་འདུ་བྱེད་རྣམས་ལས་ཡིད་སྔང་བར་བྱེད་སྐྱོ་བར་བྱེད་དོ། །ཡིད་སྔང་བར་བྱས་སྐྱོ་བར་བྱས་ནས་སྡིག་པ་ལས་ཕྱིར་ཟློག་སྟེ། དེ་དག་གི་སྡིག་པ་གང་ཡིན་པ་དེ་མི་བྱེད་ཅིང་དགེ་བ་ལ་བརྟེན་པར་བྱེད་དོ། །ཞེས་སྔོན་ལ་སྐྱེ་བ་ངོ་བོ་ཉིད་མེད་པ་སྟེ་གཞན་དབང་རྒྱུ་འབྲས་ཀྱི་བླང་དོར་ཙམ་ལ་འཇུག་ཐབས་དང། འོན་ཀྱང་སྐྱེ་བ་ངོ་བོ་ཉིད་མེད་པ་ཉིད་དེ་ལ། མཚན་ཉིད་ངོ་བོ་ཉིད་མེད་པ་ཉིད་དང། དོན་དམ་པ་ངོ་བོ་ཉིད་མེད་པ་ཉིད་རྣམ་པ་གཉིས་ཡང་དག་པ་ཇི་ལྟ་བ་བཞིན་དུ་མི་ཤེས་པས་འདུ་བྱེད་ཐམས་ཅད་ལས་ཡང་དག་པར་སྐྱོ་བར་མི་འགྱུར། ཡང་དག་པར་འདོད་ཆགས་དང་བྲལ་བར་མི་འགྱུར། ཡང་དག་པར་གྲོལ་བར་མི་འགྱུར་ཞེས་ཆོས་བདག་མ་བཀག་པས་འཁོར་བ་ཕྲ་རགས་ཐམས་ཅད་ལས་གྲོལ་བྱེད་དུ་མི་འགྱུར་བར་གསུངས་ཏེ། བཞི་བརྒྱ་བར། བསོད་ནམས་མིན་པ་དང་པོར་བཟློག །ཅེས་པ་དང་གནད་གཅིག་གོ །རྟགས་གཉིས་པ་གྲུབ་སྟེ། གང་ཟག་གི་བདག་མེད་ལ་ལྟོས་པའི་དབུ་མ་སྒྲུབ་པ་ལ་བདག་མེད་རྟོགས་པའི་བློ་དེས་རྟག་མཐའ་འགོག་ཀྱང། གདུལ་བྱ་དམན་པའི་རིགས་ཅན་རྣམས་དེའི་སྔོན་དུ་རྟོག་པའི་ཞེན་གཞིར་རང་མཚན་གྱིས་གྲུབ་པ་རེ་ཞིག་འཛིན་དུ་མ་བཅུག་ན་ཆད་མཐར་ལྷུང་སྟེ་དབུ་མར་མི་འགྱུར་བའི་ཕྱིར། དེར་ཐལ། དོན་དམ་རྟོགས་པ་ལ་ཐ་སྙད་ཚད་གྲུབ་རྟོགས་པ་སྔོན་དུ་འགྲོ་དགོས་པས་ཐབས་དང་ཐབས་བྱུང་དུ་འཇུག་པ་ལས་གསུངས་པ་བཞིན་གང་ཟག་གི་བདག་མེད་སྒྲུབ་པ་ལའང་དེའི་སྔོན་དུ་སྟོང་གཞི་

― GTD002_Page_0494 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཅན་གྱི་བདག་དང་ཕུང་པོ་ཙམ་བཀག་པར་མི་འགྲོ་བ་ཞིག་བྱེད་དགོས་པ་གང་ཞིག །བདག་ལྟ་གོམས་ཆེས་པའི་གདུལ་བྱ་དམན་པའི་རིགས་ཅན་ལ་རྟོག་པའི་ཞེན་གཞིར་རང་མཚན་གྱིས་གྲུབ་པའི་ལིང་ངེ་བ་ཞིག་ཡོད་པར་མ་བསྟན་ན་སེམས་ཀྱི་སྣང་ཆ་ཙམ་ཞིག་ཡོད་བྱས་ཀྱང་སྐྲ་ཤད་དང་སྨིག་རྒྱུའི་ཆུ་ལྟ་བུར་གོ་ནས་སྐུར་འདེབས་ཀྱི་མཐའ་སེལ་མི་ནུས་པའི་ཕྱིར། དང་པོ་གྲུབ་སྟེ། བྱང་ཆུབ་སེམས་འགྲེལ་ལས། ཆོས་ཅན་ཡོད་ན་ཆོས་རྣམས་ལ། །འཇིག་རྟེན་ན་ནི་དཔྱོད་པ་འཇིག །ཅེས་གསུངས་པའི་ཕྱིར། གཉིས་པ་གྲུབ་སྟེ། འཁོར་ལོ་དང་པོར་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་གསུངས་པའི་དགོངས་གཞིར་གང་ཟག་གི་བདག་མེད་འཇོག་པའི་རྒྱུ་མཚན་ཡོད་པའི་ཕྱིར། འོག་ཏུ་འཆད་དོ། །དེ་ལ་ཁོ་ན་རེ། དེའི་ཆེད་དུ་བྱ་བའི་གདུལ་བྱའི་རྒྱུད་ཀྱི་དང་པོའི་སྒྲས་ཟིན་ལྟར་འཛིན་པའི་བློ་དེ་ཆོས་ཅན། ཚད་མ་ཡིན་པར་ཐལ། རང་ཡུལ་ལ་གསར་དུ་སྒྲོ་འདོགས་གཅོད་བྱེད་ཡིན་པའི་ཕྱིར། དེར་ཐལ། བདག་ཕུང་སོགས་མེད་པར་ལྟ་བའི་ལོག་རྟོག་གཅོད་བྱེད་ཡིན་པའི་ཕྱིར་ཏེ། དེ་སེལ་བའི་ཐབས་སུ་འགྲོ་བའི་ཕྱིར་ན། མ་ཁྱབ་སྟེ། དཔེར་ན་ཐག་ཁྲ་ལ་སྦྲུལ་དུ་འཁྲུལ་ནས་སྐྲག་པའི་ཚེ། དེ་ཤིང་གི་ལྕུག་མ་ཡིན་ཞེས་བསྟན་ན་སྐྲག་པ་སེལ་བའི་ཐབས་སུ་འགྲོའང། ཤིང་གི་ལྕུག་མར་འཛིན་པའི་བློ་དེས་སྦྲུལ་འཛིན་གྱི་སྒྲོ་འདོགས་བཅད་པ་མ་ཡིན་པའི་ཕྱིར། དབུ་མ་སྙིང་པོ་ལས། ཐག་པ་ལ་ནི་སྦྲུལ་ཞེས་འཁྲུལ། །འཁྲི་ཤིང་བཟློག་པར་ཤེས་པ་ནི། །གཉེན་པོའི་ཕྱོགས་ཀྱིས་ཤེས་པར་འགྱུར། །ཞེས་སོ། །ཁྱོད་རང་ལ་ཐེག་ཆེན་ཚོགས་ལམ་

― GTD002_Page_0495 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་རྒྱུད་ཀྱི་སེམས་བསྐྱེད་ཆོས་ཅན། ཆོས་ཀྱི་བདག་ཏུ་འཛིན་པའི་སྒྲོ་འདོགས་གཅོད་བྱེད་ཡིན་པར་ཐལ། ཆོས་ཀྱི་བདག་འཛིན་ས་བོན་དང་བཅས་པ་སྤོང་བའི་ཐབས་ཡིན་ཕྱིར་ཏེ། ངོ་བོ་ཉིད་སྐ྄ུ་ཐོབ་པའི་ཐབས་ཡིན་པའི་ཕྱིར། ཁྱབ་པ་འགྲིག །འདོད་ན། ཆོས་ཀྱི་བདག་མེད་ངེས་བྱེད་ཡིན་པར་ཐལ། ཆོས་ཀྱི་བདག་འཛིན་གཅོད་བྱེད་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། ངེས་པ་དང་ནི་སྒྲོ་འདོགས་ཡིད། །གནོད་བྱ་གནོད་བྱེད་དངོས་པོའི་ཕྱིར། །ཞེས་གསུངས་པའི་ཕྱིར། ཡང་ཁ་ཅིག་ན་རེ། ཁམས་སྣ་ཚོགས་དང་ཁམས་དུ་མ་ཞེས་པའི་དོན། ཁམས་བཅོ་བརྒྱད་པོ་དེ་དག་ལ་ནང་ཚན་མི་འདྲ་བའི་ཁྱད་པར་ཡོད་པ་དང། གདགས་གཞིའི་ཚུལ་གྱིས་སེམས་ཅན་ཐམས་ཅད་ལ་ཁྱབ་པའི་ལྡོག་ཆ་ནས་མིང་གཉིས་བཏགས་པ་ཙམ་ལས་དོན་ལ་ཁྱད་མེད་པར་ཐལ། རྒྱ་ནག་འགྲེལ་ཆེན་ལས། ཁམས་བཅོ་བརྒྱད་པོ་དག་གཅིག་ལ་གཅིག་ཐ་དད་པའི་མཚན་ཉིད་གང་ཡིན་པ་དེ་ནི་ཁམས་སྣ་ཚོགས་པ་ཞེས་བྱའོ། །ཁམས་བཅོ་བརྒྱད་པོ་དེ་དག་ཉིད་སེམས་ཅན་ཚད་མེད་པ་རྣམས་ཀྱི་བྱེ་བྲག་ཏུ་གྱུར་པ་ནི་ཁམས་དུ་མ་ཉིད་ཅེས་བྱའོ། །ཞེས་གསུངས་པའི་ཕྱིར་ན་མ་ཁྱབ་སྟེ། སློབ་དཔོན་ཝེན་ཚེག་གིས་དེ་ལྟར་གསུངས་ཀྱང་རང་ལུགས་ལ་དེ་མི་འཐད་པའི་ཕྱིར། དེར་ཐལ། འོག་ནས་ངོ་བོ་ཉིད་གསུམ་ངོས་འཛིན་གྱི་སྐབས་སུ། ཕུང་པོ་སྐྱེ་མཆེད་རྟེན་འབྲེལ་ཁམས་ཟས་རྣམས་དྲི་ཞུས་ཀྱི་རིམ་པ་བཞིན་གསུངས་པའི་ཁམས་ཀྱི་ཐད་དུ། ཁམས་དྲུག་དང་ཁམས་བཅོ་བརྒྱད་པོ་དག་གི་ཁམས་རེ་རེ་ལའང་དེ་བཞིན་ལགས་སོ། །ཞེས་གསུངས་པ་དང་འདི་གཉིས་

― GTD002_Page_0496 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་འདྲ་དགོས་པའི་ཕྱིར། འདི་ཉིད་ལས། ཁམས་སྣ་ཚོགས་དང་ཁམས་དུ་མ་ལ་འགྲེལ་པ་རྣམས་ཀྱིས་གཞན་དུ་བཤད་ཀྱང་འོག་ནས་འབྱུང་བའི་མདོ་དང་སྦྱར་ན་ཁམས་དྲུག་དང་ཁམས་བཅོ་བརྒྱད་ལ་བྱའོ། །ཞེས་གསུངས་པའི་ཕྱིར། དེ་ལ་ཁོ་ན་རེ། དེ་གཉིས་ཀྱི་དོན་རྒྱ་ནག་འགྲེལ་ཆེན་ལྟར་འཐད་པར་ཐལ། རྣམ་པར་གཏན་ལ་དབབ་པ་བསྡུ་བ་ལས་ཀྱང། ཁམས་སྣ་ཚོགས་པ་ཉིད་གང་ཞེ་ན། ཁམས་བཅོ་བརྒྱད་པོ་དག་ཕན་ཚུན་མཚན་ཉིད་ཐ་དད་པ་ཉིད་གང་ཡིན་པའོ། །ཁམས་དུ་མ་ཉིད་གང་ཞེ་ན་དེ་དག་ཉིད་སེམས་ཅན་སྣ་ཚོགས་དཔག་ཏུ་མེད་པའི་རབ་ཏུ་དབྱེ་བས་གནས་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་བ་རུ་རའི་མདོ་ལས། བཅོམ་ལྡན་འདས་ཀྱིས་དགེ་སློང་དག་དཔེར་ན་བ་རུ་རའི་ཕུང་པོ་འཕང་དུ་དཔག་ཚད་ཙམ་རྒྱར་ཡང་དཔག་ཚད་ཙམ་ཞིག་ཡོད་པར་གྱུར་ལ་བ་རུ་རའི་ཕུང་པོ་དེ་ལས་འགའ་ཞིག་གིས་ལོ་བརྒྱ་བརྒྱ་འདས་ཤིང་བ་རུ་ར་རེ་རེ་ཞིག་བླངས་ཏེ། བ་རུ་ར་འདི་ནི་ཁམས་ཆེ་གེ་མོ་ཞིག་ཏུ་དོར་རོ། །བ་རུ་ར་འདི་ནི་ཁམས་ག་གེ་མོ་ཞིག་ཏུ་དོར་རོ་ཞེས་དེ་སྐད་ཟེར་ན། བ་རུ་རའི་ཕུང་པོ་དེ་ནི་ཉུང་བ་ཁོ་ནར་ཟད་པ་དང་ཡོངས་སུ་གཏུགས་པར་འགྱུར་གྱི། ཁམས་ནི་དེ་ལྟར་ཡོངས་སུ་གཏུགས་པ་མ་ཡིན་ནོ། །ཞེས་དང། དེའི་དོན་བཞིན་མདོ་སྡེ་རྒྱན་ལས། ཁམས་རྣམས་དང་ནི་མོས་པ་དང། །ཞེས་སེམས་ཅན་གྱི་ཁམས་དང་མོས་པ་སྣ་ཚོགས་པར་གསུངས་པ་དེ་དང་སྒོ་བསྟུན་པའི་བཤད་ཚུལ་ཡིན་གྱི། དགོངས་འགྲེལ་གྱི་ཁམས་སྣ་ཚོགས་དང་ཁམས་དུ་མ་ཞེས་པ་འདིའི་དབང་དུ་བྱས་པའི་བཤད་ཚུལ་མ་ཡིན་པའི་ཕྱིར། དེར་ཐལ། དགོངས་

― GTD002_Page_0497 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲེལ་ལས་ཁམས་ཀྱི་དྲི་བ་འགོད་པའི་མདོ་ནི་གཙོ་བོར་ཁམས་མང་པོའི་མདོ་ཡིན་པས། དེ་དང་རྒྱན་གྱི་རྟེན་སའི་མདོ་གཉིས་མི་འདྲ་བའི་ཕྱིར་ཏེ། ངོ་བོ་ཉིད་མེད་པའི་རྒྱན་གྱི་འགྲེལ་བཤད་ལས། ཇི་སྐད་དུ་བ་རུ་རའི་མདོ་ལས་བཤད་པ་ལྟ་བུའོ། །ཞེས་པ་ནས། གསུང་རབ་ལས་འབྱུང་བའི་ཁམས་ཀྱི་དོན་གང་ཡིན་ཞེ་ན། མིག་ལ་སོགས་པའི་ཁམས་ཀྱི་དབྱེ་བ་བསྟན་པ་དང། ཁམས་མང་པོའི་མདོ་དང་སྦྱར་ན་ནི་ཁམས་ཀྱི་དབྱེ་བ་རྣམ་པ་མང་པོ་ཞིག་ཡོད་དོ། །ཞེས་གསུངས་པའི་ཕྱིར། ཁྱབ་སྟེ། འདིར་བ་རུ་རའི་མདོ་ལས་བཤད་ཚུལ་བཀོད་ཟིན་པའི་རྗེས་སུ་གསུང་རབ་ལས་ཞེས་འབྱུང་བ་ནི་དགོངས་འགྲེལ་གྱི་བཤད་པ་འདི་ལ་སྙེགས་དགོས་པ་དང། དེ་ཁམས་མང་པོའི་མདོ་དང་སྦྱོར་དགོས་པའི་དོན་ཡིན་པའི་ཕྱིར། ཡང་ཁོ་ན་རེ། འདི་ཁམས་མང་པོའི་མདོ་དང་སྦྱར་ནའང་མི་འགྲིག་པར་ཐལ། དེར་ཁམས་བཅོ་བརྒྱད་ཀྱི་རྗེས་སུ་ཁམས་དྲུག་ཚན་དང་བཞི་ཚན་གསུམ་ཚན་དུ་མ་གསུངས་ལ། འདིར་ཁམས་དྲུག་ལས་མ་སྨོས་པའི་ཕྱིར་ན་མ་ཁྱབ་སྟེ། སྤྱིར་དེ་ནས་གསུངས་པའི་ཁམས་ལྷག་མ་རྣམས་ཁམས་བཅོ་བརྒྱད་དུ་འདུའང། བདག་མེད་གཏན་ལ་འབེབས་པ་ལ་སྐྱེས་བུ་གདགས་གཞི་ཁམས་དྲུག་ལ་བརྟེན་ཚུལ་ཤེས་དགོས་པས། དེ་དངོས་སུ་སྨོས་ན་ལྷག་མ་རྣམས་དེས་མཚོན་ནས་གོ་ནུས་པའི་ཕྱིར། དང་པོ་གྲུབ་སྟེ། གང་སྤེལ་ལས། ཁམས་བཅོ་བརྒྱད་པོ་དེ་དག་ནི་དྲུག་ཚན་གསུམ་དང། བཞི་ཚན་གཅིག་དང། སུམ་ཚན་དྲུག་དང། གཉིས་ཚན་གཉིས་སུ་སྟེ་བཞི་བཅུ་རྩ་བཞི་རུ་འགྱུར་རོ། །ཞེས་དང། དེ་ལྟར་ན་ཁམས་བཞི་བཅུ་

― GTD002_Page_0498 ―

^{[མ་དཔེ་གཟིགས་ན་འདིར་གནོན།]}

[Full Size]

རྩ་བཞི་པོ་དེ་དག་ནི་ཁམས་བཅོ་བརྒྱད་པོ་དེ་དག་ཏུ་འགྱུར་རོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། རིན་ཆེན་འཕྲེང་བ་ལས། སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་ན་སྐྱེས་བུ་གང། །སྐྱེས་བུ་ཁམས་དྲུག་འདུས་བའི་ཕྱིར། །ཡང་དག་མ་ཡིན་ཇི་ལྟ་བར། །ཞེས་སོགས་གསུངས་པའི་ཕྱིར། དྲི་བ་ཞུས་ཚུལ་ལ་ཁ་ཅིག །འདིར་བསྟན་འཁོར་ལོ་དང་པོར་གཟུགས་ནས་རྣམ་མཁྱེན་བར་རང་གི་མཚན་ཉིད་ཀྱིས་གྲུབ་མཉམ་དང། བར་བས་དེ་མ་གྲུབ་མཉམ་དུ་གསུངས་པ་སྒྲས་ཟིན་འགལ་བས་དོགས་པ་ཞུས་ཟེར་བ་ནི། དང་པོར་སྟོང་ཉིད་ཉི་ཤུ་སོགས་འགྲེལ་རྐང་བརྒྱ་རྩ་བརྒྱད་ཁྱད་གཞིར་མ་བཟུང་བར་ཕུང་སོགས་ཉུང་ཤས་ཤིག་བཟུང་བར་གསུངས་པས་ཁེགས་ལ། ཁ་ཅིག །དེར་ཞིབ་ཆ་ཕྱེ་སྟེ་གཟུགས་ནས་བྱང་ཕྱོགས་བར་རང་གི་མཚན་ཉིད་ཀྱིས་གྲུབ་མཉམ་དུ་གསུངས་པ་ལ་ཟེར་བའང། ཕུང་སོགས་འདུས་བྱས་རང་མཚན་གྱིས་གྲུབ་པར་བསྟན་ན། དངོས་ཤུགས་ཀྱིས་བསྟན་དོན་ལ་དཔྱད་པ་གསུམ་གྱིས་དག་སྟེ་ངེས་དོན་དུ་འགྲོ་བས་དྲི་མི་དགོས་པ་དང། ལ་ལ་དང་པོར་ཕུང་སོགས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་མཉམ་དང། བར་བས་དེར་མེད་མཉམ་དུ་གསུངས་ཟེར་བའང། བར་པ་ངེས་དོན་དུ་ཐལ་བས་འགོག་ཚུལ་སོགས་ཀྱི་སྒྲུབ་བྱེད་རྣམས་ཀུན་མཁྱེན་བླ་མའི་ཡིག་ཆར་གསལ། དེ་ལ་ཁ་ཅིག་ན་རེ། འཁོར་ལོ་དང་པོ་གཉིས་ཀྱིས་ཕུང་སོགས་རང་གི་མཚན་ཉིད་ཀྱིས་གྲུབ་མཉམ་དང་མ་གྲུབ་མཉམ་དུ་བསྟན་པ་མི་འཐད་གསུང་མི་

― GTD002_Page_0499 ―

^{[མ་དཔེ་གཟིགས་ན་འདིར་གནོན།]}

[Full Size]

རིགས་པར་ཐལ། དེ་སྟོང་ཐུན་གྱི་དགོངས་པ་ཡིན་པའི་ཕྱིར། དེར་ཐལ། སྟོང་ཐུན་ལས། དང་པོར་ཕུང་སོགས་རང་གི་མཚན་ཉིད་ཀྱིས་ཡོད་མཉམ་དང། བར་བ་ལས་ཐམས་ཅད་རང་བཞིན་མེད་མཉམ་དུ་གསུངས་ཀྱི། རང་བཞིན་ཡོད་མེད་དངོས་སུ་ཕྱེ་ནས་མ་གསུངས་པས་དྲང་དོན་དང་ཞེས་གསུངས་པའི་ཕྱིར་ན་མ་ཁྱབ་སྟེ། ཆོས་རྣམས་ལ་རང་གི་མཚན་ཉིད་ཀྱིས་གྲུབ་པའི་ངོ་བོ་ཉིད་ཡོད་ཅེས་པའི་ཚིག་ཡོད་མཉམ་ཡིན་པ་ལ་དགོངས་པར་བསྟན་ཟིན་པ་དེ་ཡིན་པའི་ཕྱིར། ཡང་ཁ་ཅིག །ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་པའི་རང་གི་མཚན་ཉིད་དེ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་ལ་བྱེད་པར་གསུངས་པ་མི་འཐད་པར་ཐལ། དེ་རང་གི་མཚན་ཉིད་ཀྱིས་གྲུབ་པ་ལ་བྱེད་པའི་ཕྱིར། དེར་ཐལ། དེའི་རང་མཚན་དེ་ཕུང་སོགས་ཀྱི་སྟེང་དུ་ཡོད་ཀྱང་ཀུན་བཏགས་ཀྱི་སྟེང་དུ་མེད་པ་ཞིག་ཡིན་པའི་ཕྱིར། དེར་ཐལ། དེ་རྒྱ་ནག་འགྲེལ་ཆེན་ལས་ཐུན་མོང་མ་ཡིན་པའི་མཚན་ཉིད་དུ་བཤད་པ་ལ། འདི་ཉིད་ལས་དེ་ལྟ་ན་ཀུན་བཏགས་ལའང་ཐུན་མོང་མ་ཡིན་པའི་འཇོག་བྱེད་ཡོད་པས་རང་མཚན་དེ་ཀུན་བཏགས་ཀྱི་སྟེང་དུའང་ཡོད་པར་ཐལ་བ་འཕེན་ཚུལ་ཡོད་པའི་ཕྱིར། ཁྱབ་སྟེ། དགག་བྱའི་རང་མཚན་ལ་བྱེད་ན་དགོངས་འགྲེལ་ལས་ཕུང་སོགས་ཐམས་ཅད་ཀྱི་སྟེང་དུ་འགོག་རྒྱུའི་གཙོ་བོ་ཡིན་པས་དེར་ཀུན་བཏགས་དམིགས་ཀྱིས་བསལ་དགོས་དོན་མེད་པའི་ཕྱིར། དེས་ན་འདིར། མདོ་ཉིད་ལས་ཀུན་བཏགས་ཀྱི་སྐབས་སུ་རང་གི་མཚན་ཉིད་ཀྱིས་གྲུབ་པ་ལ་གསལ་བར་གསུངས་ཞེས་པ་དེ་གཞན་དུ་སྐྱོག་མི་དགོས་པར་སྒྲ་སོར་བཞག་གི་རང་མཚན་ལ་བྱས་

― GTD002_Page_0500 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོག་ཅིང། མདོ་ཚིག་ཀྱང་མཚན་ཉིད་ངོ་བོ་ཉིད་མེད་ཅེས་པ་དེ་མིན་གྱི། རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་ཞེས་པ་དེ་ལ་སྙེགས་དགོས་ཟེར་ན། འོ་ན། ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་པའི་དངོས་བསྟན་གྱི་འཁོར་ལོ་དང་པོའི་མདོ་དེ་ཉིད་ཀྱི་སྒྲས་ཟིན་སྒྲ་ཇི་བཞིན་པ་ཡོད་པར་ཐལ། དེའི་སྒྲས་ཟིན་ལ་ཕུང་པོ་རང་མཚན་གྱིས་གྲུབ་པ་འཇོག་པའི་ཕྱིར། དེར་ཐལ། དེའི་ཚིག་ཟིན་གྱི་རང་མཚན་དེ་རང་མཚན་དངོས་ལ་བྱེད་པའི་ཕྱིར། བྱས་པ་ལ། ཁོ་ན་རེ། དེ་ལ་ཁྱབ་པ་མེད་དེ། དེའི་ཚིག་ཟིན་གྱི་སྐྱེ་འཇིག་དང་ཡོངས་སུ་ཤེས་པ་སྤངས་པ་སོགས་ནས་འཕེལ་ཞིང་ཡང་བའི་བར་ཐམས་ཅད་དགག་བྱ་ལ་མི་བྱེད་པར། སྐྱེ་འཇིག་ལ་སོགས་པ་དེ་དང་དེ་དངོས་ལ་བྱེད་ཀྱང་བཀའ་སྩལ་ཚུལ་སྐྱེ་སོགས་དེ་དང་དེ་དངོས་བཀའ་སྩལ་པ་མ་ཡིན་པར། དེ་དག་རང་འཛིན་རྟོག་པའི་གཞིར་རང་མཚན་གྱིས་གྲུབ་པར་བཀའ་སྩལ་པ་ཡིན་པའི་ཕྱིར། འདིའང་དེ་དང་འདྲ་ཟེར་ན། འོ་ན། མདོ་ཚིག་དེས་ཕུང་པོ་རང་མཚན་གྱིས་གྲུབ་པ་དེ་ཉིད་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་བཀའ་སྩལ་པ་ཡིན་པར་ཐལ། འདོད་པའི་ཕྱིར། འདོད་ན། འདི་ནི་སྡུག་བསྔལ་འཕགས་པའི་བདེན་པའོ། །ཞེས་པ་འདིས་སྡུག་བདེན་རང་མཚན་གྱིས་གྲུབ་པ་དེ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་བསྟན་པ་ཡིན་པར་ཐལ། སྔ་མ་ལ་དེའི་ཕྱིར། འདོད་ན། དེས་སྡུག་བདེན་གྱི་སྟེང་གི་ཁྱད་པར་ལ་ཀུན་བཏགས་པའི་ཀུན་བཏགས་དེ་སྒྲས་ཟིན་ལ་བསྟན་པ་ཡིན་པར་ཐལ། སྡུག་བདེན་རང་མཚན་གྱིས་གྲུབ་པ་སྡུག་བདེན་གྱི་ཁྱད་ཆོས་ཡིན་པའི་ཕྱིར། འདོད་མི་ནུས་ཏེ། འདི་ངོ་བོ་ལ་བཟླས་པ་ཡིན་པའི་ཕྱིར་དང། ངོ་བོ་ལ་ཀུན་

― GTD002_Page_0501 ―

^{[མ་དཔེ་གཟིགས་ན་འདིར་གནོན།]}

[Full Size]

བཏགས་པའི་ཀུན་བཏགས་སྟོན་བྱེད་ཅིག་ཡོད་དགོས་པའི་ཕྱིར་ཏེ། ཁྱད་གཞི་ངོ་བོ་མ་བཤད་པར་ཁྱད་ཆོས་ཁོ་ན་སྟོན་མི་རིགས་པའི་ཕྱིར། དེས་ན་འདི་ཉིད་ལས་རང་མཚན་གྱིས་གྲུབ་པ་ལ་བྱེད་གསུངས་པའང་དགག་བྱའི་རང་མཚན་གཞིར་བཞག་ཡིན་ཏེ། སྔ་ལོགས་དེ་མ་ཐག་ཏུ། རང་གི་མཚན་ཉིད་ཀྱིས་ཡོད་པར་གསུངས་པ་ཅི་ལ་དགོངས་ཞེས་གསུངས་ཡོད་པ་གང་ཞིག །དེའང་རང་མཚན་དངོས་ལ་བྱེད་ན་ཕུང་སོགས་དེར་གསུངས་པའི་དགོངས་གཞི་དྲི་མི་དགོས་པའི་ཕྱིར། འོན་ཀྱང་ཀུན་བཏགས་དམིགས་ཀྱིས་བསལ་བའི་དགོས་པ་ཡོད་དེ། དགོངས་འགྲེལ་ལས་ཀུན་བཏགས་མཚན་ཉིད་ངོ་བོ་ཉིད་མེད་པར་གསུངས་པའི་དགོངས་པ་ནི་འཁོར་ལོ་དང་པོས་རང་གི་མཚན་ཉིད་གསུངས་པ་དེ་འགོག་ཆེད་ཡིན་པས་དེའི་རང་མཚན་དེ་ཡོད་ན། འདིའི་མཚན་ཉིད་ངོ་བོ་ཉིད་མེད་པ་འདི་འཇོག་མི་ཐུབ་པའི་ཕྱིར་རོ། །ཁ་ཅིག་ན་རེ། ཡིག་ཆར། རང་གི་མཚན་ཉིད་ཀྱང་བཀའ་སྩལ་ཅེས་པའི་རང་མཚན་དེ། ཞེས་པ་ནས། མདོ་ལས་རང་གི་མཚན་ཉིད་ཀྱི་རྣམ་པར་གནས་པ་ནི་མིན་པས། ཞེས་གསུངས་པ་མི་འཐད་པར་ཐལ། འདོད་པའི་ཕྱིར། འདོད་མི་ནུས་ཏེ། འདི་ཉིད་ལས། མདོ་ཉིད་ལས་ཀུན་བཏགས་ཀྱི་སྐབས་སུ་རང་གི་མཚན་ཉིད་ཀྱིས་གྲུབ་པ་ལ་གསལ་བར་གསུངས་པའི་ཕྱིར། ཞེས་གསུངས་པའི་ཕྱིར་ཞེས་འཕངས་པ་འབྲེལ་མེད་པར་ཐལ། རང་གི་མཚན་ཉིད་ཀྱང་བཀའ་སྩལ་ཅེས་པ་དང། ཀུན་བཏགས་ཀྱི་སྐབས་སུ་རང་མཚན་གྱིས་གྲུབ་པ་ལ་གསུངས་ཞེས་པའི་རང་མཚན་དེ་དགག་བྱའི་རང་མཚན་ལ་བྱེད། རང་གི་མཚན་ཉིད་

― GTD002_Page_0502 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་རྣམ་པར་གནས་པ་ནི་མ་ཡིན་ཞེས་པའི་རང་མཚན་དེ་རང་མཚན་དངོས་ལ་བྱེད་པའི་ཕྱིར་ན་མ་ཁྱབ། སྤྱིར་རང་མཚན་གྱིས་གྲུབ་པ་དང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་གཉིས་ཕྱོགས་མི་འདྲའང། ཀུན་བཏགས་རང་མཚན་གྱིས་གྲུབ་ན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་དགོས་པའི་ཕྱིར། དེར་ཐལ། དགོངས་འགྲེལ་འདིར་གཞན་དབང་ཀུན་བཏགས་ཀྱིས་སྟོང་པ་ཡོངས་གྲུབ་ཏུ་བྱས་པ་ཡིན་པས། ཀུན་བཏགས་ཀྱང་སྒྲོ་བཏགས་ཙམ་མ་ཡིན་པར་གཞན་དབང་བཞིན་དུ་བདེན་པར་གྲུབ་ན། གཞན་དབང་གི་སྟེང་དུ་ཀུན་བཏགས་པའི་མཚན་ཉིད་ངོ་བོ་ཉིད་དེ་ཡོད་དགོས་པའི་ཕྱིར། དེར་ཐལ། གཟུགས་གཟུགས་འཛིན་རྟོག་པའི་ཞེན་གཞིར་སྣང་ཚུལ་དང་སྡོད་ཚུལ་དེའང་རང་མཚན་གྱིས་གྲུབ་དགོས་པའི་ཕྱིར། འདི་ནི་རིགས་པའི་འཕུལ་དང་གོ་བ་ཤིན་ཏུ་ཟབ་པ་ཞིག་ཡིན་ནོ། །དྲི་བའི་ངོ་བོ་ལ་ཁ་ཅིག་ཚིག་གིས་ཁྱབ་ཟེར། གཞན་དག་ན་རེ། དོན་དམ་ཡང་དག་འཕགས་ཀྱི་རྒྱུད་ཀྱི་མདོ་གཉིས་སྒྲས་ཟིན་འགལ་བ་དེ་ཅི་ཡིན་སྙམ་པའི་དོགས་པ་དེ་འཇོག་དགོས་ཟེར། སྔ་མ་ལ། དོན་དེ་ཉིད་བཅོམ་ལྡན་འདས་ལ་བདག་ཡོངས་སུ་ཞུ་ལགས་སོ། །ཞེས་པའི་ཚིག་འདི་འཁོར་ལོ་དང་པོ་དང་བར་པ་གཉི་གའི་དྲི་བ་ཡིན་པར་ཐལ། དྲི་བ་ལ་ཚིག་གིས་ཁྱབ་པ་གང་ཞིག །ཚིག་དེ་ལས་གཞན་འཇོག་རྒྱུ་མེད་པའི་ཕྱིར། འདོད་ན། འཁོར་ལོ་དང་པོའི་དྲི་བ་དངོས་སུ་ཞུས་པར་ཐལ། མདོ་དེ་ཞུ་བྱེད་ཀྱི་ཚིག་དངོས་སུ་བྱུང་བའི་ཕྱིར་དང། དང་པོའི་དྲི་བ་ཡིན་ན་དངོས་སུ་ཞུས་པས་ཁྱབ་པའི་ཕྱིར་ཏེ། དེ་ཡིན་ན་བར་པའི་དྲི་བ་ཡིན་པས་ཁྱབ་པའི་ཕྱིར། རྟགས་ཁས།

― GTD002_Page_0503 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་མི་ནུས་ཏེ། དཀའ་འགྲེལ་ལས། འཁོར་ལོ་བར་པའི་དགོངས་གཞི་དངོས་སུ་དྲིས་ཤིང། ཤུགས་ལ་འཁོར་ལོ་དང་པོར་ཕུང་སོགས་རང་གི་མཚན་ཉིད་ཀྱིས་གྲུབ་པར་གསུངས་པའི་དགོངས་གཞིའང་དོན་གྱིས་དྲིས་པ་ཡིན་པས། ཞེས་གསུངས་པའི་ཕྱིར། གཞན་ཡང་དྲི་བ་ལ་ཚིག་གིས་མ་ཁྱབ་པར་ཐལ། བརྒྱ་བྱིན་གྱིས་རབ་འབྱོར་ལ་ཡིད་ཀྱིས་དྲི་བ་བྱས་པར་ཤེར་མདོ་ལས་གསུངས་པའི་ཕྱིར། བྱས་པ་ལ་ཁོ་ན་རེ། མ་ཁྱབ་སྟེ། ངག་ཏུ་མ་ཐོན་པར་ཡིད་ཀྱིས་དྲི་བ་བྱས་པའི་དྲི་བ་དེའང་ཚིག་ཏུ་བཞག་ཆོག་པའི་ཕྱིར། དེར་ཐལ། རྗེ་བཙུན་གྱི་ངག་ཏུ་མ་ཐོན་གོང་གི་ཐུགས་ལ་བཞུགས་པའི་རྒྱན་དང། རྒྱན་གྱི་ཚིག་བཟུང་སྟེ་ཡིད་སྐྱོར་བྱེད་པའི་དུས་ཀྱི་རྒྱན་སོགས་སྒྲ་ཡིན་པར་གསུངས་པའི་ཕྱིར་ཟེར་ན། དེ་ལྟར་བྱས་ཚེ་གཟུགས་མེད་པ་སྤྲུལ་པའི་ལུས་བཟུང་ནས་ཆོས་ཉན་པར་གསུངས་པ་དེ་སྤྲུལ་པ་བསྡུས་མ་ཐག་ཆོས་དེ་བརྗེད་མི་འགྲོ་བས་ཡིད་སྐྱོར་བྱེད་པ་འཇོག་དགོས་ལ། དེའང་སྒྲ་སྤྱིའི་ཕྲེང་བ་རིམ་པར་ཤར་བ་ཙམ་ལ་མི་བྱེད་ན་འཇོག་དཀའ་ཞིང། སྔ་མ་རྣ་ཤེས་ཀྱིས་ཐོས་ཚུལ་དང་ཟིན་པའི་འབྱུང་བ་ལས་གྱུར་ཚུལ་ཡང་འཇོག་དཀའ་བས་དཔྱད་དགོས་ཏེ། རྣམ་འགྲེལ་ལས། བྱེད་པ་རྣམས་ཀྱི་སྦྱོར་བའམ། །ཡིད་ཀྱི་བཟླས་པ་དོན་མེད་འགྱུར། །སྒྲ་ནི་རྣ་བའི་སྤྱོད་ཡུལ་ཡིན། །ཞེས་དང། ཊཱིཀ་ཆེན་ལས། སྔགས་སྒྲ་རང་མཚན་པ་དང་ཡིད་ལ་ཤར་བའི་སྔགས་ཀྱི་སྤྱིའི་རང་བཞིན་རྣམས་སོ་སོར་མ་ཕྱེ་བར། ཞེས་སོགས་རིག་བྱེད་པ་དང་རྩོད་ཚུལ་ཡང་ཤེས་དགོས་སོ། །གོང་གི་ལུགས་ཕྱི་མ་དེའང་མི་འཐད་པར་ཐལ།

― GTD002_Page_0504 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་དམ་ཡང་དག་འཕགས་ཀྱིས་གདུལ་བྱ་གཞན་ལ་དོགས་པ་སྐྱེ་བ་སེལ་བའི་ཕྱིར་ཕན་སེམས་ཀྱིས་ཞུས་པ་ཡིན་གྱི། ཁོང་རང་ལ་མདོ་གཉིས་སྒྲས་ཟིན་འགལ་བ་ཅི་ཡིན་སྙམ་པའི་དོགས་པ་མེད་པའི་ཕྱིར་ཏེ། དགོངས་འགྲེལ་ལས། དོན་དམ་ཡང་དག་འཕགས་ཁྱོད་ཀྱིས་ལྷ་དང་མིར་བཅས་པའི་སྐྱེ་དགུའི་དོན་དང། ཕན་པ་དང་བདེ་བའི་ཕྱིར་ཞུགས་ཏེ། དེ་བཞིན་གཤེགས་པ་ལ་ཁྱོད་དོན་འདི་ཉིད་འདྲི་བར་སེམས་པ་དེ་ལེགས་སོ། །ཞེས་གསུངས་པའི་ཕྱིར་དང། དེ་འོད་ཟེར་ཆེན་པོའི་དབང་སྐུར་ཐོབ་པའི་གང་ཟག་ཡིན་པས་སྔར་མ་ཤེས་པ་གསར་དུ་ཤེས་རྒྱུ་མེད་པའི་ཕྱིར། རྣམ་བཤད་ལས་སོ། །རང་ལུགས་ལ་བར་བའི་དྲི་བ་དངོས་སུ་ཞུས་པའི་ཤུགས་ལ་དང་པོའི་དྲི་བ་ཞུས་པར་འགྲོ་ཚུལ་ཡོད་དེ། དང་པོར་ཆ་མ་ཕྱེ་བར་ཐམས་ཅད་རང་མཚན་གྱིས་གྲུབ་ཅེས་པའི་མདོ་ཚིག་བཀའ་སྩལ། བར་བས་ཆ་མ་ཕྱེ་བར་རང་མཚན་གྱིས་མ་གྲུབ་ཅེས་བཀའ་སྩལ་ཚུལ་གཉི་ག་བཀོད་དེ། བར་བས་ཆ་མ་ཕྱེ་བར་དེ་ལྟར་གསུངས་པ་དེ་ཅི་ལ་དགོངས་ཞེས་དངོས་སུ་དྲིས་པ་ན། ཚིག་གི་ནུས་པས་ཆ་མ་ཕྱེ་བར་གསུངས་པ་དེ་དང་དོན་དུ་འགྲོ་བའི་རྒྱུ་མཚན་ལྟ་བུར་སོང་བས་ཆ་འབྱེད་རྒྱུ་ཞིག་ཡོད་པར་གོ་ཞིང། དེ་ལྟར་ན་དང་པོར་ཡང་ཆ་མ་ཕྱེ་བར་གསུངས་ཚུལ་བཀོད་མ་ཐག་པ་ལྟར་ཡིན་པས་དེའང་དྲིས་པར་འགྲོ་བ་ཡིན་ནོ། །ཡིག་ཆ་རྙིང་པར་ཕྱི་དོན་ཡོད་པར་དངོས་སུ་སྟོན་པའི་འཁོར་ལོ་དང་པོ་དང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་དངོས་སུ་སྟོན་པའི་འཁོར་ལོ་དང་པོ་གཉིས་མདོ་སོ་སོ་བར་གསུངས་ཏེ། རྒྱུ་མཚན་ཡང་འདི་ཉིད་དུ། འཁོར་ལོ་དང་པོ་ལས་ཕྱི་རོལ་གྱི་དབང་དུ་བྱས་པའི་

― GTD002_Page_0505 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུང་འཛིན་གཉིས་གསུངས་པ་དྲང་དོན་དུ་འགྲེལ་པའི་དགོངས་གཞི་ནི། ཞེས་པ་ནས། གནོད་བྱེད་ནི་ཕྱི་རོལ་འགོག་པའི་རིགས་པ་རྣམས་སོ། །ཞེས་པའི་བར་གྱི་གཞུང་འདིས་དང་པོ་དེ་དྲང་དོན་དུ་འགྲེལ་ཚུལ་བསྟན། ཆོས་རྣམས་ལ་ངོ་བོ་དང་ཁྱད་པར་དུ་བཏགས་པའི་ཀུན་བཏགས་ནི་ཆོས་ཀྱི་ཁམས་དང་སྐྱེ་མཆེད་ཡིན་པས་དེ་གཉིས་ལ་མ་ཕྱེ་བར་རང་གི་མཚན་ཉིད་ཀྱིས་གྲུབ་པར་གསུངས་པའང་དྲང་དོན་ནོ། །ཞེས་པའི་གཞུང་འདིས་ཕྱི་མ་དྲང་དོན་དུ་འགྲེལ་ཚུལ་བསྟན་པའི་ཕྱིར་གསུངས་པ་ལ་བརྟེན་ནས། ཁ་ཅིག །ཕྱི་དོན་ཡོད་པར་སྟོན་པའི་འཁོར་ལོ་དང་པོ་དང། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྟོན་པའི་འཁོར་ལོ་དང་པོ་གཉིས་མདོ་སོ་སོ་བ་ཡིན་ཟེར་ན། མི་འཐད་པར་ཐལ། གཉི་ག་དངོས་བསྟན་ལ་མ་སྦྱར་ན་མདོ་དེ་གཉིས་དོན་གཅིག་པའི་ཕྱིར། མ་གྲུབ་ན། ཕྱི་དོན་ཡོད་པར་དངོས་སུ་སྟོན་པའི་འཁོར་ལོ་དང་པོ་ཆོས་ཅན། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྟོན་པའི་མདོ་ཡིན་པར་ཐལ། འདིར་བསྟན་འཁོར་ལོ་དང་པོ་ཡིན་པའི་ཕྱིར། འདི་ཉིད་ལས། འཁོར་ལོ་དང་པོ་ལས་ཕྱི་རོལ་གྱི་དབང་དུ་བྱས་པའི་གཟུང་འཛིན་གཉིས་གསུངས། ཞེས་འདིར་བསྟན་འཁོར་ལོ་དང་པོར་བསྟན་པའི་ཕྱིར་དང། རང་གི་མཚན་ཉིད་ཀྱིས་གྲུབ་པར་གསུངས་པ་ཡང་དྲང་དོན་ནོ། །ཞེས་ཡང་སྒྲས་ཕྱི་དོན་བསྟན་པ་དྲང་དོན་དུ་འགྲེལ་པར་མ་ཟད། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་བསྟན་པའང་དྲང་དོན་དུ་འགྲེལ་ཅེས་པ་ཡིན་པའི་ཕྱིར། སྐྱེ་མཆེད་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་པའི་བཤད་བྱའི་མདོ་ལས། མིག་དང་

― GTD002_Page_0506 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ། །ཞེས་པ་ལྟ་བུ་ཕྱི་དོན་ཡོད་པར་སྟོན་པའི་འཁོར་ལོ་དང་པོར་མི་འཇོག་ན། ཕྱི་དོན་སྟོན་པའི་འཁོར་ལོ་དང་པོའི་མཚན་གཞི་མི་རྙེད་པའི་ཕྱིར། དེས་ན་མདོ་གཅིག་ཡིན་ཀྱང་དྲང་དོན་དུ་འགྲེལ་པའི་སྒོ་གཉིས་སོ་སོར་ཡོད་པ་ཡིག་ཆའི་དགོངས་པ་ཡིན་ནོ། །ཟབ་བརླིང་དགོངས་པ་སྣ་ཚོགས་རྒྱལ་བའི་བཀའ། །གྱ་ཚོམ་མི་འབྱེད་དགོངས་པའི་ཕུགས་བཙལ་ཏེ། །ཕྲ་ཞིབ་རིགས་པའི་དཔྱད་པ་ལྷུར་ལེན་པ། །རྒྱལ་སྲས་དོན་དམ་ཡང་དག་འཕགས་བཞིན་བརྗོད། །དྲང་ངེས་གསུང་རབ་ནམ་མཁའི་མཐར། །དྲིས་ཞུས་འཁོར་ལོས་བགྲོད་པ་ན། །དྲན་དབང་ཆེན་པོ་རློམ་རྣམས་ཀྱང། །དྲེགས་པའི་རལ་པ་ས་ལ་བསྙིལ། །༈ གཉིས་པ་འགལ་བ་དེ་སྤོང་བའི་ལན་ལ། ངོ་བོ་ཉིད་མེད་པར་གསུངས་པའི་དགོངས་པ་བཤད་པ་དང། མ་སྐྱེས་པ་སོགས་སུ་གསུངས་པའི་དགོངས་པ་བཤད་པ་གཉིས། དང་པོ་ལ་མདོར་བསྟན། རྒྱས་བཤད། དེ་དག་གི་དཔེ་བསྟན་པ། དགོངས་གཞི་དེ་ལྟར་བཀྲལ་དགོས་པའི་རྒྱུ་མཚན་བཤད་པ་དང་བཞི། དང་པོ་ལ་བཤད་བྱའི་མདོ་འགོད་པ་ནི། དགོངས་འགྲེལ་ལས། དོན་དམ་ཡང་དག་འཕགས། ངས་ཆོས་རྣམས་ཀྱི་ངོ་བོ་ཉིད་མེད་པར་རྣམ་པ་གསུམ་པོ་འདི་ལྟ་སྟེ། ཞེས་པ་ནས། ངོ་བོ་ཉིད་མེད་པར་གསུངས་སོ། །ཞེས་པའི་བར་དང། དེའི་དོན་འཆད་པར། བསྡུ་བ་ལས་ཀྱང། ཞེས་པ་ནས། སེམས་དང་ལྡན་པ་སུ་ཞིག་སྨྲ། ཞེས་པའི་བར་བྱུང། གཉིས་པ་རྒྱས་བཤད་ལ་གསུམ་ལས། མཚན་ཉིད་ངོ་བོ་ཉིད་མེད་པ་སྟོན་པ་ནི། གལ་ཏེ་ངོ་བོ་ཉིད་མེད་པར་གསུངས་པའི་ཆོས་རྣམས། ཞེས་པ་ནས། ཕྱི་མ་ལྟར་

― GTD002_Page_0507 ―

^{[མ་དཔེ་གཟིགས་ན་འདིར་གནོན།]}

[Full Size]

འཛིན་པ་ནི་ཡོད་དོ། །ཞེས་པའི་བར་བྱུང། སྐྱེ་བ་ངོ་བོ་ཉིད་མེད་པ་སྟོན་པར། ངོ་བོ་ཉིད་མེད་པ་གཉིས་པ་ནི་དགོངས་འགྲེལ་ལས། ཞེས་པ་ནས། ངོ་བོ་ཉིད་མེད་པར་གསུངས་པ་མིན་པའི་ལུགས་སོ། །ཞེས་པའི་བར་བྱུང། དོན་དམ་པ་ངོ་བོ་ཉིད་མེད་པ་སྟོན་པ་ལ། ངོ་བོ་ཉིད་མེད་པ་གསུམ་པ་ལ་འཇོག་ཚུལ་གཉིས་ལས། ཞེས་པ་ནས། དོན་དམ་གཞན་དུ་གྲུབ་མ་གྲུབ་ནི་འཆད་པར་འགྱུར་རོ། །ཞེས་པའི་བར་གྱིས་འཇོག་ཚུལ་དང་པོའི་དབང་དུ་བྱས་པའི་དོན་དམ་པ་ངོ་བོ་ཉིད་མེད་པ་དང། དོན་དམ་པ་ངོ་བོ་ཉིད་མེད་པའི་འཇོག་ཚུལ་གཉིས་པའང་དགོངས་འགྲེལ་ལས། ཞེས་པ་ནས། མི་བཞེད་པའི་ལུགས་སོ། །ཞེས་པའི་བར་བྱུང། གསུམ་པ་དེ་དག་གི་དཔེ་བསྟན་པ་ནི། ངོ་བོ་ཉིད་མེད་པ་གསུམ་པོ་དཔེ་ཇི་དང་འདྲ་བ་ནི་དགོངས་འགྲེལ་ལས། ཞེས་པ་ནས། དཀྱུས་ན་གསལ་ལོ། །ཞེས་པའི་བར་བྱུང། བཞི་པ་དགོངས་གཞི་དེ་ལྟར་བཀྲལ་དགོས་པའི་རྒྱུ་མཚན་ནི། ངོ་བོ་ཉིད་མེད་པར་གསུངས་པའི་ངོ་བོ་ཉིད་མེད་ཚུལ་ནི་དེ་ལྟར་བཤད་ཀྱི། ཞེས་པ་ནས། སྐྱེ་འགག་རང་གི་མཚན་ཉིད་ཀྱིས་མ་གྲུབ་ན་སྐྱེ་འགག་མེད་པར་འགྱུར་བའི་ལུགས་སོ། །ཞེས་པའི་བར་བྱུང། དེ་དག་གི་དོན་འཆད་པ་ལ་སྤྱི་དོན་དང་མཐའ་དཔྱད་པ་གཉིས། དང་པོ་ནི། འཁོར་ལོ་བར་པ་ལས་ཆོས་ཐམས་ཅད་ངོ་བོ་ཉིད་མེད་པར་གསུངས་པའི་དགོངས་གཞི་ཡོད་དེ། མཚན་ཉིད་ངོ་བོ་ཉིད་མེད་པ། སྐྱེ་བ་ངོ་བོ་ཉིད་མེད་པ། དོན་དམ་པ་ངོ་བོ་ཉིད་མེད་པ་གསུམ་ལ་དགོངས་པའི་ཕྱིར་ཞེས་པ་མདོར་བསྟན་གྱི་དོན་སྦྱོར་ཡིན་ཞིང། དཀའ་འགྲེལ་ལས། ཀུན་བཏགས་མཚན་ཉིད་ངོ་བོ་

― GTD002_Page_0508 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་མེད་པ། གཞན་དབང་སྐྱེ་བ་ངོ་བོ་ཉིད་མེད་པ་ཞེས་སོགས་གསུངས་པ་ནི་གོ་བདེ་བའི་ཕྱིར་ཡིན་གྱི། མདོར་བསྟན་སྐབས་ནས་མཚན་ཉིད་གསུམ་ངོ་བོ་ཉིད་མེད་པ་གསུམ་དང་སྦྱར་ཟིན་ན་རྒྱས་བཤད་དུ་མཚན་གཞི་དྲི་མི་དགོས་པར་ཐལ་བ་ཡིག་ཆ་ལྟར་རོ། །བསྡུ་བ་ལས། བཅོམ་ལྡན་འདས་ཀྱིས་ཅི་ལ་དགོངས་ནས་ངོ་བོ་ཉིད་མེད་པ་ཞེས་གསུངས་ཤེ་ན། སྨྲས་པ། འདུལ་བའི་དབང་གིས་དེ་དང་དེར་ངོ་བོ་ཉིད་མེད་པ་ཉིད་རྣམ་པ་གསུམ་ལ་དགོངས་ནས་གསུངས་ཏེ། ཞེས་དང། སུམ་ཅུ་པ་ལས། ངོ་བོ་ཉིད་ནི་རྣམ་གསུམ་གྱིས། །ངོ་བོ་ཉིད་མེད་རྣམ་གསུམ་ལ། །དགོངས་ནས་ཆོས་རྣམས་ཐམས་ཅད་ནི། །ངོ་བོ་ཉིད་མེད་བསྟན་པ་ཡིན། །ཞེས་པའི་ལུང་གཉིས་དྲངས་པའི་དགོས་པ་ནི། ཇོ་ནང་པས་ཤེར་མདོ་ལས་ཆོས་ཐམས་ཅད་ངོ་བོ་ཉིད་མེད་པར་གསུངས་པ་ཀུན་རྫོབ་ཀྱི་ཆོས་ཐམས་ཅད་ལ་དགོངས་ཀྱི་དོན་དམ་ལ་དགོངས་པ་མིན་ཞེས་ཟེར་བ་འགོག་ཆེད་ཡིན་ཏེ། ཤེར་ཕྱིན་གྱི་མདོར་ཆོས་ཐམས་ཅད་ངོ་བོ་ཉིད་མེད་མཉམ་དུ་གསུངས་པའི་རྒྱུ་མཚན་གྱིས་དྲིས་ཞུས་ཀྱི་མདོར་ཅི་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པ་སོགས་སུ་གསུངས་ཞེས་དྲི་དགོས་བྱུང་ཞིང། ལན་དུའང། དོན་དམ་ཡང་དག་འཕགས། ངས་ཆོས་རྣམས་ཀྱི་ངོ་བོ་ཉིད་མེད་པ་ཉིད་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་ཉིད་དང་སྐྱེ་བ་ངོ་བོ་ཉིད་མེད་པ་ཉིད་དང་དོན་དམ་པ་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ། །ཞེས་གསལ་བར་གསུངས་པ་དང་འགལ་བའི་ཕྱིར། བྱས་པ་ལ། མདོའི་ཚིག་ཟིན་ཙམ་དུ་ཆོས་ཐམས་ཅད་ཅེས་གསུངས་ཀྱང་

― GTD002_Page_0509 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་རྫོབ་པའི་ཆོས་ཐམས་ཅད་ཅེས་པའི་དོན་དུ་དྲངས་དགོས་ཟེར་ན། མ་ཡིན་ཏེ། ཁྱོད་ཀྱིས་དབུ་མ་ཆེན་པོར་འདོད་པའི་ཐོགས་མེད་སྐུ་མཆེད་གཉིས་ཀྱིས་ཀྱང་དེ་ལྟར་དགོངས་པ་མ་དྲངས་པར། སྔ་མ་སྒྲ་སོར་བཞག་གི་འབྲུ་མནན་འདུག་པའི་ཕྱིར་ཞེས་དེ་གཉིས་དྲངས་པ་ཡིན་ནོ། །ཀླུ་སྒྲུབ་ཡས་སྲས་ཀྱི་ལུགས་ལས་ཕྱི་རོལ་ཏུ་གྱུར་ཚུལ་གསུངས་པ་ནི་སྟོང་ཉིད་བདེན་གྲུབ་ཏུ་འཛིན་པ་གསོར་མི་རུང་གི་ལྟ་བར་གསུངས་པ་སོགས་ཡིན་ལ། སེམས་ཙམ་པའི་སྐབས་འདིར་ཀླུ་སྒྲུབ་ཀྱི་བཞེད་པ་དང་མཐུན་མི་དགོས་ཀྱང། ཐེག་ཆེན་གྱི་གྲུབ་མཐའ་སྨྲ་བ་ཡིན་ཚེ་ཤིང་རྟ་ཆེན་པོ་གཉིས་གང་རུང་ཞིག་དང་མཐུན་དགོས་པ་དང། འདི་ཐོགས་མེད་སྐུ་མཆེད་ཀྱི་བཞེད་པ་དང་མི་མཐུན་པར་བསྒྲུབས་ཟིན་པས། ཀླུ་སྒྲུབ་དང་མ་མཐུན་ཚེ་ཐེག་ཆེན་གྱི་གྲུབ་མཐའ་ལས་བརྒལ་བར་བསྟན་པ་ཡིན་ཅིང། ཕ་རོལ་པོས། ཐམས་ཅད་ཀྱི་དགོངས་པ་འདྲིལ་བའི་ལུགས་སུ་བྱས་ཀྱང་ཐམས་ཅད་ལས་རྒྱབ་ཀྱིས་ཕྱོགས་པར་གྱུར་ཚུལ་གསུངས་པ་ཡིན་ནོ། །དེ་ལྟར་ན་དགོངས་འགྲེལ་ལས་དྲིས་ལན་གྱི་སྐབས་བདེན་པ་གཉིས་ཀྱི་ཆོས་ཐམས་ཅད་ངོ་བོ་ཉིད་གསུམ་དུ་བསྡུས་ནས་དགོངས་གཞི་བཀྲལ་ཅིང། རྩ་བ་ཤེར་མདོ་རང་ལས་འགྲེལ་རྐང་བརྒྱ་རྩ་བརྒྱད་སོ་སོ་ནས་ངོ་བོ་ཉིད་མེད་པ་དང་ཁྱད་པར་སྟོང་ཉིད་ཀྱི་མིང་གི་རྣམ་གྲངས་ཐམས་ཅད་ནས་སྨོས་ཏེ་ངོ་བོ་ཉིད་མེད་པར་གསུངས་ཡོད་བཞིན་དུ། དེས་ངོ་བོ་ཉིད་མེད་པར་གསུངས་རྒྱུའི་ཆོས་ཀྱི་ནང་ན་དོན་དམ་མེད་ཅེས་ཟེར་བ་དོན་ལ་དཔྱོད་པའི་སེམས་ལྟ་ཅི། ཚིག་ཐོས་པའི་རྣ་བ་ཅན་ཞིག་གིས་ཀྱང་སྨྲ་མི་འོས་སོ། །༈ རྒྱས་བཤད་ལ་

― GTD002_Page_0510 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་རྣམས་ཀྱི་མཚན་ཉིད་ངོ་བོ་ཉིད་མེད་པ་གང་ཞེ་ན། ཞེས་པས་མཚན་གཞི་དྲིས་ཤིང། ཀུན་བཏགས་པའི་མཚན་ཉིད་གང་ཡིན་པའོ། །ཞེས་པས་ཀུན་བཏགས་དེའི་མཚན་གཞིར་བསྟན། དེ་ཅིའི་ཕྱིར་ཞེ་ན། ཞེས་པས་དེའི་རྒྱུ་མཚན་ནམ་སྒྲུབ་བྱེད་དྲིས་ཤིང། འདི་ལྟར་དེ་ནི་མིང་དང་བརྡས་རྣམ་པར་བཞག་པའི་མཚན་ཉིད་ཡིན་གྱི། རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས་དེའི་ཕྱིར་དེ་ནི་མཚན་ཉིད་ངོ་བོ་ཉིད་མེད་པ་ཉིད་ཅེས་བྱའོ། །ཞེས་པས་དགག་ཕྱོགས་ནས་རང་གི་མཚན་ཉིད་ཀྱིས་མ་གྲུབ་པ་དང། སྒྲུབ་ཕྱོགས་ནས་མིང་དང་བརྡས་བཞག་པ་ཙམ་ཡིན་པའི་ཕྱིར། ཞེས་རྒྱུ་མཚན་གསུངས་པ་ཡིན་ནོ། །འོན་ཀྱང་འདི་བའི་ལུགས་ཀྱི་མིང་བརྡས་བཞག་ཙམ་གྱི་དོན་དང། རང་མཚན་གྱིས་མ་གྲུབ་ཚུལ་དེ་ཐལ་འགྱུར་བའི་འཇོག་ཚུལ་དང་བསྟུན་ན་རགས་པས། ལུགས་འདིའི་རང་མཚན་དུ་འཛིན་པ་ལ་ཐལ་འགྱུར་ལུགས་ཀྱི་དེ་ཚང་ཡང། དེ་ལ་འདི་ཚང་མི་དགོས་སོ། །དེ་བཞིན་དུ་སྐྱེ་བ་ངོ་བོ་ཉིད་མེད་པའང་མཚན་གཞི་དང་རྒྱུ་མཚན་དྲིས་ལན་གཉིས་ཀྱི་སྒོ་ནས་བསྟན་ལ། སྒྲུབ་བྱེད་ནི་དགག་ཕྱོགས་ནས་རང་དབང་བའི་སྐྱེ་བའམ་ངོ་བོ་ཉིད་ཀྱིས་སྐྱེ་བ་མེད་པ་དང། སྒྲུབ་ཕྱོགས་ནས་རྒྱུ་རྐྱེན་གཞན་ལ་བརྟེན་པས་སོ། །དོན་དམ་པ་ངོ་བོ་ཉིད་མེད་པ་འཇོག་ཚུལ་གཉིས་ཀྱི་སྔ་མའི་དབང་དུ་བྱས་པ་ནི། ཆོས་རྣམས་ཀྱི་དོན་དམ་པ་ངོ་བོ་ཉིད་མེད་པ་གང་ཞེ་ན། རྟེན་ཅིང་འབྲེལ་པར་འབྱུང་བའི་ཆོས་གང་དག་སྐྱེ་བ་ངོ་བོ་ཉིད་མེད་པ་ཉིེད་ཀྱིས་ངོ་བོ་ཉིད་མེད་པ་དེ་དག་ནི་དོན་དམ་པ་ངོ་བོ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །ཞེས་གཞན་དབང་དེའི་མཚན་གཞིར་ངོས་བཟུང་སྟེ། རྒྱུ་མཚན་སྟོན་པ་ལ།

― GTD002_Page_0511 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། ཆོས་རྣམས་ལ་རྣམ་པར་དག་པའི་དམིགས་པ་གང་ཡིན་པ་དེ་ནི་དོན་དམ་པ་ཡིན་པར་ཡོངས་སུ་བསྟན་ལ། གཞན་གྱི་དབང་གི་མཚན་ཉིད་དེ་རྣམ་པར་དག་པའི་དམིགས་པ་མ་ཡིན་པས་དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་རྣམ་དག་ལམ་གྱི་དམིགས་པ་མཐར་ཐུག་ལ་དོན་དམ་དུ་བྱས་པའི་དོན་དམ་དེར་མ་གྲུབ་པས་དོན་དམ་པ་ངོ་བོ་ཉིད་མེད་ཅེས་བཏགས་པར་གསུངས་སོ། །འཇོག་ཚུལ་གཉིས་པའི་དབང་དུ་བྱས་པའི་དོན་དམ་པ་ངོ་བོ་ཉིད་མེད་པ་ནི། གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེའང་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། ཆོས་རྣམས་ཀྱི་ཆོས་བདག་མེད་པ་གང་ཡིན་པ་དེ་ནི། དེ་དག་གི་ངོ་བོ་ཉིད་མེད་པ་ཉིད་ཅེས་བྱ་སྟེ། དེ་ནི་དོན་དམ་པ་ཡིན་ལ་དོན་དམ་པ་ནི་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས། དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་རྣམ་དག་ལམ་གྱི་དམིགས་པ་མཐར་ཐུག་ཡིན་པས་ན་དོན་དམ་པ་དང། ཆོས་བདག་བཀག་ཙམ་མམ་མེད་ཙམ་གྱིས་རབ་ཏུ་ཕྱེ་བའི་མེད་དགག་ཡིན་པས་ན་ངོ་བོ་ཉིད་མེད་པ་ཞེས་བཤད་དེ། འདི་དང་སྔ་མ་ལ་དོན་དམ་པར་གྲུབ་པའི་ངོ་བོ་ཉིད་མེད་པ་དང་དོན་དམ་པར་སྐྱེ་བ་མེད་པ་ཞེས་ཟེར་བ་ནི་ལུགས་གཞན་ཡིན་ནོ། །དེ་དག་གི་དཔེ་ནི། ཀུན་བཏགས་རྟོག་པས་བཏགས་ཙམ་དུ་གྲུབ་པ་ནམ་མཁའི་མེ་ཏོག་ལྟ་བུ་དང། གཞན་དབང་གི་གཙོ་བོ་ཡང་དག་པ་མ་ཡིན་པའི་ཀུན་རྟོག་ལ་འཁྲུལ་བའི་བག་ཆགས་ཀྱི་དབང་

― GTD002_Page_0512 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་གཟུང་འཛིན་གཉིས་སུ་སྣང་བ་སྒྱུ་མ་ལྟ་བུ་དང། ཀུན་ལ་ཁྱབ་ཅིང་རང་གི་དགག་བྱ་དེ་མེད་པ་ཙམ་ལ་བཏགས་པས་ཡོངས་གྲུབ་ནི་ནམ་མཁའ་དང་ཆོས་མཚུངས་སོ། །དེ་ལྟར་དཔེ་དང་གཏན་ཚིགས་དུ་མའི་སྒོ་ནས་ངོ་བོ་ཉིད་མེད་པ་གསུམ་གཏན་ལ་ཕབ་སྟེ། ཤེར་ཕྱིན་གྱི་མདོར་ཆོས་ཐམས་ཅད་ངོ་བོ་ཉིད་མེད་གསུངས་པའ་ིམེད་ལུགས་ནི་འདི་ལྟར་ཤེས་དགོས་ཀྱི། སྒྲ་ཇི་བཞིན་པར་བཟུང་ན་མཚན་ཉིད་གསུམ་ག་ལ་སྐུར་འདེབས་སུ་འགྱུར་ཏེ། གཞན་དབང་ཡོངས་གྲུབ་གཉིས་རང་གི་མཚན་ཉིད་ཀྱིས་མ་གྲུབ་པས་དེ་གཉིས་གཏན་མེད་དུ་འགྱུར་ཞིང། ཀུན་བཏགས་ནི་རང་ཉིད་རང་མཚན་གྱིས་མ་གྲུབ་པས་ཡེ་མེད་དུ་མི་འགྱུར་ནའང་འདོགས་པའི་གཞི་གཏན་མེད་པའི་དབང་གིས་ཡེ་མེད་དུ་འགྲོ་བའི་ཕྱིར་ཏེ། ཐམས་ཅད་ཀྱི་རྩ་བ་གཞན་དབང་གི་སྐྱེ་འགག་སོགས་བློ་འཁྲུལ་བས་བཏགས་ཙམ་མ་ཡིན་པར་རང་མཚན་གྱིས་གྲུབ་པ་ཞིག་ཀུན་གྱི་གཞིར་དགོས་པར་བཤད་པ་ཡིན་ནོ། །མཐའ་དཔྱད་པ་ལ། ཁ་ཅིག་ན་རེ། མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་སྟོང་ཉིད་ཡིན་ཟེར་ན། མདོར་བསྟན་གྱི་མཚན་ཉིད་ངོ་བོ་ཉིད་མེད་པ་ཉིད་དང་ཞེས་པའི་མདོ་ཚིག་འདི་སྟོང་ཉིད་དངོས་སུ་སྟོན་པའི་མདོ་ཚིག་ཡིན་པར་ཐལ། དེའི་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་སྟོང་ཉིད་ཡིན་པའི་ཕྱིར། འདོད་ན། དོན་དམ་པ་ངོ་བོ་ཉིད་མེད་པ་དངོས་སུ་སྟོན་པའི་མདོ་ཡིན་པར་ཐལ། འདོད་པའི་ཕྱིར། འདོད་ན། དེའི་མཇུག་ཐོགས་སུ་དོན་དམ་པ་ངོ་བོ་ཉིད་མེད་པ་སྨོས་མི་དགོས་པར་ཐལ་ལོ། །གཞན་ཡང་མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་ཆོས་ཅན། ཁྱོད་ཀྱི་དགག་

― GTD002_Page_0513 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་ལ་རང་ཉིད་གང་གིས་སྟོང་པ་ཡོངས་གྲུབ་ཏུ་འཇོག་པའི་སྐབས་ཀྱི་དགག་བྱས་ཁྱབ་པར་ཐལ། ཁྱོད་འགོག་བདེན་ལས་གཞན་པའི་སྟོང་ཉིད་ཡིན་པའི་ཕྱིར། འདོད་ན། མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་དེ་དོན་དམ་པ་ངོ་བོ་ཉིད་མེད་པ་ཡིན་ལ། དེའི་དངོས་བསྟན་གྱི་དོན་དམ་པ་ངོ་བོ་ཉིད་མེད་པ་དེ་མཚན་ཉིད་ངོ་བོ་ཉིད་མེད་པ་ཡིན་ཞེས་གོ་བཟློག་རིགས་པར་ཐལ། དང་པོ་ཁས་བླངས་ཤིང་ཕྱི་མའི་མེད་རྒྱུ་དེར་རྣམ་དག་ལམ་གྱི་དམིགས་པ་མཐར་ཐུག་ལ་དོན་དམ་དུ་བྱས་པའི་དོན་དམ་གཅིག་ཀྱང་བཤད་པའི་ཕྱིར་ཏེ། རྒྱས་བཤད་ཀྱི་སྐབས་སུ་དེ་ལ་འཇོག་ཚུལ་གཉིས་བྱས་ནས་དང་པོར་དེ་བཤད་པའི་ཕྱིར། གཞན་ཡང། མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་ཆོས་ཅན། ཁྱོད་རང་གི་སྟོང་གཞི་ཆོས་ཅན་ལ་ཁྱབ་ཅིང་དགག་བྱའི་བདག་བཀག་ཙམ་གྱི་རབ་ཏུ་ཕྱེ་བས་ནམ་མཁའ་དང་དཔེ་དོན་སྦྱོར་རིགས་པར་ཐལ། ཁྱོད་དེ་འདྲ་བའི་ཆོས་ཀྱི་བདག་མེད་ཕྲ་མོ་ཡིན་པའི་ཕྱིར། འདོད་མི་ནུས་ཏེ། རྟོག་པས་བཏགས་པ་ཙམ་མ་གཏོགས་རང་གི་མཚན་ཉིད་ཀྱིས་མ་གྲུབ་པ་ནམ་མཁའི་མེ་ཏོག་དང་དཔེ་དོན་སྦྱོར་རིགས་པའི་ཕྱིར། དགོངས་འགྲེལ་ལས། ནམ་མཁའི་མེ་ཏོག་ཇི་ལྟ་བ་དེ་ལྟ་བུར་ནི་མཚན་ཉིད་ངོ་བོ་ཉིད་མེད་པ་ཉིད་བལྟ་བར་བྱའོ། །ཞེས་དང། འདི་ཉིད་ལས། ཀུན་བཏགས་ནམ་མཁའི་མེ་ཏོག་དང་འདྲ་བ་ནི་རྟོག་པས་བཏགས་ཙམ་གྱི་དཔེ་ཡིན་གྱི། ཤེས་བྱ་ལ་མི་སྲིད་པའི་དཔེ་མིན་ནོ། །ཞེས་གསུངས་པའི་ཕྱིར་ཏེ། རང་རྒྱུད་པ་རྣམས་ཤེས་བྱ་ལ་མི་སྲིད་པའི་དཔེར་འདོད་ཀྱང། སེམས་ཙམ་པ་དང་

― GTD002_Page_0514 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ་འགྱུར་བ་གཉིས་ཀས་རྟོག་པས་བཏགས་ཙམ་གྱི་དཔེར་འདོད་པའི་ཕྱིར། བྱས་པ་ལ། ཁོ་ན་རེ། དེ་དཔེར་བྱེད་ཚུལ་ཐལ་རང་སེམས་ཙམ་པ་གསུམ་མཐུན་པར་ཐལ། རང་རྒྱུད་པའི་ཐད་ཀྱི་ལེགས་བཤད་སྙིང་པོ་ལས་ཀྱང། མཚན་ཉིད་ངོ་བོ་ཉིད་མེད་དོ་ཞེས་གསུངས་པའི་ཀུན་བཏགས་ནི་ཞེན་ཡུལ་དེ་དོན་དམ་པར་ཀུན་བཏགས་པ་དེ་ཡིན་ལ། དེ་ཉིད་མིང་དང་བརྡས་བཞག་པར་གསུངས་པ་ནི་སྒྲ་རྟོག་གིས་བཏགས་པ་ཙམ་དུ་ཟད་པའི་དོན་ནོ། །ཞེས་གསུངས་པའི་ཕྱིར་ན། མ་ཁྱབ་སྟེ། སེམས་ཙམ་པ་དང་ཐལ་འགྱུར་བ་གཉིས་ཀའི་ལུགས་ལ་རྟོག་པས་བཏགས་ཙམ་ཡིན་ན་ཤེས་བྱ་ལ་མི་སྲིད་མི་དགོས་ཀྱང། རང་རྒྱུད་པའི་ལུགས་ལ་དེ་དགོས་པའི་ཕྱིར། དེར་ཐལ། རང་རྒྱུད་པའི་ལུགས་ལ་ཀུན་བཏགས་ཀྱང་རང་མཚན་གྱིས་གྲུབ་པའི་ཕྱིར་ཏེ། ཤེས་རབ་སྒྲོན་མེ་ལས། ཀུན་བཏགས་པ་མེད་པ་མ་ཡིན་ཏེ། ཞེས་དང། དེའི་ཐད་ཀྱི་ལེགས་བཤད་སྙིང་པོ་ལས། འདིར་ཡོད་མེད་ནི་མཚན་ཉིད་ངོ་བོ་ཉིད་ཡོད་མེད་ཡིན་པས། ཞེས་གསུངས་ཤིང། རྗེའི་བྱང་ཆུབ་བླ་མའི་དྲིས་ལན་ལས་ཀྱང། རང་རྒྱུད་པ་རྣམས་ཐ་སྙད་དུ་རང་གི་མཚན་ཉིད་ཀྱིས་གྲུབ་པ་ཁས་ལེན་པས་དོན་དམ་པར་རང་བཞིན་ཁེགས་ཀྱང་ཀུན་རྫོབ་ཏུ་རྟོག་པས་བཏགས་པ་ཙམ་མིན་པའི་རང་མཚན་འདོད་ལ། ཞེས་གསུངས་པའི་ཕྱིར། ཁྱབ་སྟེ། སྔ་མ་ཕལ་ཆེར་བདེན་གྲུབ་ཁས་མི་ལེན་ན་རང་གི་མཚན་ཉིད་ཀྱིས་གྲུབ་པའང་ཁས་མི་ལེན་པ་གཞིར་བཞག་བྱས་ཀྱང། རང་རྒྱུད་པ་རྣམས་རང་མཚན་ཁས་ལེན་པའི་ཁུངས་གསལ་ཤོས་ཀུན་བཏགས་མཚན་ཉིད་

― GTD002_Page_0515 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་བོ་ཉིད་མེད་པར་བཤད་ཚུལ་འདི་ཡིན་པའི་ཕྱིར། ཡང་ཁ་ཅིག་ན་རེ། མདོར་བསྟན་གྱི་མཚན་ཉིད་ངོ་བོ་ཉིད་མེད་པ་སྟོང་ཉིད་ཡིན་པར་ཐལ། ཡིག་ཆ་ལས། འདིར་དངོས་སུ་བསྟན་པའི་དེ་ཆོས་ཀྱི་བདག་མེད་ཕྲ་མོ་ལ་འཇོག །ཅེས་དང། སྔ་མའི་མེད་རྒྱུ་དེ་ཤེས་བྱ་ལ་མི་སྲིད། ཅེས་དང། དངོས་བསྟན་གྱི་མཚན་ཉིད་ངོ་བོ་ཉིད་ཡིན་ན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང། དེར་རང་ངོས་ནས་གྲུབ་པ་རྣམས་ཡིན་པས་ཁྱབ་པའི་ཕྱིར། ཞེས་གསུངས་པའི་ཕྱིར་ཟེར་ན། མ་ཁྱབ་སྟེ། ལུང་སྔ་མའི་གོང་འོག་གཉི་གར་མཚན་ཉིད་ངོ་བོ་ཉིད་མེད་པ་ཙམ་མ་གསུངས་པར་དེའི་དོན་ཞེས་གསུངས་ཤིང། དོན་སྟོང་ཉིད་དུ་འགྲོ་ཚུལ་འདིས་ངོ་བོ་ཉིད་ལ་བདག་ཏུ་སྒྲོ་བཏགས་པའང་ཡོད་པས་ཚིག་ལ་དེ་བཀག་པ་ལྟར་བརྗོད་ཀྱང། དོན་འཆད་པའི་ཚེ་དེས་སྒྲོ་བཏགས་པ་ལྟར་དུ་མེད་པ་ཞེས་བཤད་དགོས་ཤིང། དེ་ལྟར་བྱས་ན་སྟོང་ཉིད་དུ་འགྲོ་བའི་དོན་ཡིན་པའི་ཕྱིར། ལུང་ཕྱི་མ་གཉིས་ཀྱིས་ཀྱང་མི་གནོད་དེ། དེའང་ཀུན་མཁྱེན་ཆོས་འབྱུང་གི་གསུང་གཞིར་བཞག་ནས་ཚིག་སྣ་བསྡུས་པར་སྣང་ལ། དེ་ཉིད་ལས། སྔ་མ་ཤེས་བྱ་ལ་མི་སྲིད། ཕྱི་མ་ཡོད་པའི་ཕྱིར། དང་པོ་གྲུབ་སྟེ། གཞི་གྲུབ་ན་སྔ་མའི་མཚན་ཉིད་ངོ་བོ་ཉིད་མེད་པ་ཞེས་པས་དངོས་སུ་བསྟན་པའི་མེད་རྒྱུའི་མཚན་ཉིད་ཀྱི་ངོ་བོ་ཉིད་དེར་མེད་པས་ཁྱབ་པའི་ཕྱིར། དེར་ཐལ། དེ་ཡིན་ན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་ཁྱབ་པའི་ཕྱིར་དང། ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་ལྟར་དུའང་མ་གྲུབ་པས་ཁྱབ་པའི་ཕྱིར། ཞེས་དེར་རང་མཚན་གྱིས་གྲུབ་པ་དང། གྲུབ་པར་

― GTD002_Page_0516 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲོ་བཏགས་པ་གཉི་ག་གསུངས་པ་ཡིག་ཆ་ཕྱི་མའི་དགོངས་པར་ཡང་གནས་པས་རང་ལུགས་དེའི་མཚན་ཉིད་ངོ་བོ་ཉིད་ལ་སྒྲོ་བཏགས་པའང་བཞག་ནས་དེ་ལྟར་གྲུབ་པ་ཤེས་བྱ་ལ་མི་སྲིད་པ་དང། དེ་ལྟར་གྲུབ་པ་ལ་ཆོས་བདག་གིས་ཁྱབ་པའི་དོན་ཡིན་པ་སོགས་སྔར་དང་འདྲ་བའི་ཕྱིར། དེ་ལ་ཁོ་ན་རེ། མདོར་བསྟན་གྱི་མཚན་ཉིད་ངོ་བོ་ཉིད་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་དང། བརྟག་པ་མཐའ་བཟུང་གི་དེའི་ཞེན་གཞིར་རང་མཚན་གྱིས་གྲུབ་པ་གང་རུང་གིས་ཁྱབ་པར་ཐལ། དེ་ལ་རང་ཉིད་གང་གིས་སྟོང་པ་ཡོངས་གྲུབ་ཏུ་འཇོག་པའི་སྐབས་ཀྱི་ཀུན་བཏགས་ཀྱིས་མ་ཁྱབ་ཀྱང། དེའི་སྐབས་སུ་མཁོ་བའི་ཀུན་བཏགས་ཀྱིས་ཁྱབ་པའི་ཕྱིར་ཟེར་ན། མདོར་བསྟན་དངོས་བསྟན་གྱི་དེ་ལ་དེས་ཁྱབ་ཀྱང། མདོར་བསྟན་ཙམ་ལ་མ་ཁྱབ་སྟེ། གང་ཟག་གི་བདག་ཏུ་གྲུབ་པ་དང། གྲུབ་པར་སྒྲོ་བཏགས་པ་གཉིས་ཀྱང་མདོར་བསྟན་གྱི་མཚན་ཉིད་ངོ་བོ་ཉིད་དེ་ཡིན་པའི་ཕྱིར། དེར་ཐལ། དེའི་ཤུགས་བསྟན་གྱི་མཚན་ཉིད་ངོ་བོ་ཉིད་ཡིན་པའི་ཕྱིར། དེར་ཐལ། མདོར་བསྟན་རྒྱས་བཤད་འདི་དག་གིས་ཆོས་ཀྱི་བདག་མེད་ཀྱི་དབང་དུ་བྱས་པའི་མཚན་ཉིད་གསུམ་བར་བའི་དགོངས་གཞིར་དངོས་སུ་བསྟན་ནས། གང་ཟག་གི་བདག་མེད་ཀྱི་དབང་དུ་བྱས་པའི་དེ་གསུམ་དང་པོའི་དགོངས་གཞིར་ཤུགས་ལ་བསྟན་པ་ཡིན་པའི་ཕྱིར། དེར་ཐལ། ཉན་ཐོས་ཀྱི་ཐར་བར་བགྲོད་བྱེད་ཀྱི་རྣམ་དག་ལམ་དེས་གཞན་དབང་ཀུན་བཏགས་ཀྱིས་སྟོང་པར་སྒོམ་ཚུལ་གཅིག་ཀྱང་འདིའི་ཞར་ལ་སྟོན་དགོས་པའི་ཕྱིར་ཏེ།

― GTD002_Page_0517 ―

^{[མ་དཔེ་གཟིགས་ན་འདིར་གནོན།]}

[Full Size]

དགོངས་འགྲེལ་ལས། དེ་ལ་སེམས་ཅན་ཉན་ཐོས་ཀྱི་ཐེག་པའི་རིགས་ཅན་རྣམས་ཀྱིས་ཀྱང་ལམ་འདི་ཉིད་དང་སྒྲུབ་པ་འདི་ཉིད་ཀྱིས་གྲུབ་པ་དང་བདེ་བ་བླ་ན་མེད་པའི་མྱ་ངན་ལས་འདས་པ་ཐོབ་པར་འགྱུར་ལ། ཞེས་གསུངས་པའི་ཕྱིར། ཡང་ཁོ་ན་རེ། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་ཆོས་ཅན། མདོར་བསྟན་གྱིས་དངོས་སུ་བསྟན་པར་ཐལ། མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་ཡིན་པའི་ཕྱིར་ན་འགལ་ཁྱབ། ཁྱོད་རང་ལ་ཕྱི་དོན་ཆོས་ཅན། སེམས་ཙམ་པའི་རང་ལུགས་ལ་ཁས་ལེན་པར་ཐལ། སེམས་ཙམ་པའི་རང་ལུགས་ཀྱི་དགག་བྱ་ཡིན་པའི་ཕྱིར། ཁྱབ་པ་འགྲིག །ཡང་ཁོ་ན་རེ། དེ་ཆོས་ཅན། མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མ་ཡིན་པར་ཐལ། དེའི་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་ཡིན་པའི་ཕྱིར་ན། མ་ཁྱབ། རྟགས་གྲུབ་སྟེ། དགོངས་འགྲེལ་ལས། མཚན་ཉིད་ངོ་བོ་ཉིད་མེད་པ་གང་ཞེ་ན། ཀུན་བཏགས་པའི་མཚན་ཉིད་གང་ཡིན་པའམ། ཞེས་གསུངས་པའི་ཕྱིར། ཁྱབ་སྟེ། དེའི་མཚན་གཞི་དྲིས་པ་ཡིན་པའི་ཕྱིར། ཚིག་ལ་ཞིབ་ཆ་དགོས། ཁ་ཅིག་ན་རེ། ཀུན་བཏགས་ཆོས་ཅན། ཁྱོད་ལ་མཚན་ཉིད་ངོ་བོ་ཉིད་མེད་པ་ཞེས་བྱ་སྟེ། ཁྱོད་མིང་བརྡས་བཞག་པ་ཙམ་ཡིན་གྱི་རང་མཚན་གྱིས་མ་གྲུབ་པའི་ཕྱིར། ཞེས་པའི་སྦྱོར་བ་དེ་རྒྱས་བཤད་ཀྱི་དོན་སྦྱོར་དུ་དཀའ་འགྲེལ་ལས་བཀོད་པས་དེ་ལྟར་ཁས་ལེན་དགོས་ཟེར། ཁ་ཅིག །དོན་སྦྱོར་དེ་ལྟར་བཀོད་པ་ལ་ཡིག་ཆར། ཀུན་བཏགས་རང་མཚན་གྱིས་མ་གྲུབ་པ་དེ་སྐབས་

― GTD002_Page_0518 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་དངོས་སུ་བསྟན་པའི་མཚན་ཉིད་ངོ་བོ་ཉིད་མེད་པའི་དོན་ཡིན་པར་ཐལ། སྦྱོར་བ་འཐད་པའི་ཕྱིར། འདོད་མི་ནུས་ཏེ། མདོ་སྡེ་པས་དེ་ཚད་མས་གྲུབ་པའི་ཕྱིར། ཞེས་དགག་པ་མཛད་ལུགས་ཀྱིས་འདིའི་རང་མཚན་གྱིས་མེད་པ་དེར་མདོ་སྡེ་པས་མ་རྟོགས་པ་ཞིག་དགོས་པས། སྦྱོར་བ་འགོད་ཚེ་དགག་ཕྱོགས་ནས་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པའི་ཕྱིར་ཞེས་འགོད་དགོས་ཟེར་བ་གཉི་ག་མི་འཐད་པར་ཐལ། དཀའ་འགྲེལ་གྱི་དགོངས་པ་སྐབས་ཐོབ་ཀྱི་ཀུན་བཏགས་འདི་གཞིར་བཞག་ཡིན་པས། སྔ་མས་ཀུན་བཏགས་སྤྱི་ཙམ་རྩོད་གཞིར་བཟུང་བ་མི་འཐད། ཡིག་ཆས་དགག་པ་མཛད་ཚུལ་ཡང་རྩོད་གཞིར་ཀུན་བཏགས་སྤྱི་ལྡོག་བཟུང་བ་ལ་ཡིན་གྱི། རྟགས་ཆོས་འགོད་ཚུལ་ལ་མ་ཡིན་པའི་ཕྱིར་ཏེ། རང་ལུགས་སྐབས་སུ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་རྩོད་གཞིར་བཟུང་བ་མ་གཏོགས། རྟགས་ཆོས་སྔར་བཞིན་བཀོད་པའི་ཕྱིར། དེ་ལྟར་འགོད་ཀྱང་དགོས་པར་ཐལ། མདོ་ཉིད་ལས། མིང་དང་བརྡས་རྣམ་པར་བཞག་པའི་མཚན་ཉིད་ཡིན་གྱི། ཞེས་པས་སྒྲུབ་ཕྱོགས་ནས་མིང་བརྡས་བཞག་ཙམ་ཡིན་པ་དེ་བསྟན། རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན། ཞེས་པས་དགག་ཕྱོགས་ནས་རང་མཚན་གྱིས་མ་གྲུབ་པ་དེ་བསྟན་པ་གང་ཞིག །འདིའི་མི་གནས་རྒྱུའི་རང་མཚན་དེ་དགག་བྱའི་རང་མཚན་ལ་མི་བྱེད་པར། རྟོག་བཏགས་ཙམ་མ་ཡིན་པའི་རང་མཚན་ནམ་བདེན་གྲུབ་ལ་བྱེད་པའི་ཕྱིར། འདི་ཉིད་ལས། ཀུན་བཏགས་ལ་མེད་རྒྱུའི་མཚན་ཉིད་ཀྱི་ངོ་བོ་ཉིད་ནི་རང་

― GTD002_Page_0519 ―

^{[མ་དཔེ་གཟིགས་ན་འདིར་གནོན།]}

[Full Size]

གི་མཚན་ཉིད་ཀྱིས་གྲུབ་པའམ་གནས་པ་ལ་བྱའོ། །འདིར་རང་གི་མཚན་ཉིད་ཀྱིས་ཡོད་མེད་བསྟན་ཚོད་ནི་མིང་དང་བརྡ་ལ་ལྟོས་ནས་བཞག་མ་བཞག་ཡིན་ལ། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། དེ་མི་འཐད་པར་ཐལ། རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་རྩོད་གཞིར་བཟུང་ཡང། རྟགས་ཆོས་སྔར་བཞིན་བྱས་ན་དེ་དངོས་མེད་དུ་མདོ་སྡེ་པས་རྟོགས་ཟིན་པས། དེ་ལ་གྲུབ་ཟིན་སྒྲུབ་པར་ཐལ་བའི་སྐྱོན་སོ་ན་གནས་པའི་ཕྱིར་ཟེར་ན། བཤད་པར་བྱ་སྟེ། ཀུན་བཏགས་སྤྱི་ལྡོག་དང་ནམ་མཁའ་ལྟ་བུ་རྩོད་གཞིར་བཟུང་སྟེ་རང་མཚན་གྱིས་མ་གྲུབ་པའི་ཕྱིར་ཞེས་འཕང་ན་ཚིག་གིས་བསྟན་ཚོད་དེ་ཙམ་ལས་གོ་རྒྱུ་གཞན་མེད་ལ། འདིར་དེ་ལྟར་སྒྲོ་བཏགས་པ་རྩོད་གཞིར་བཟུང་ནས་རང་མཚན་གྱིས་མ་གྲུབ་པའི་ཕྱིར་ཞེས་འཕང་བ་ན་དེའི་དོན་གོ་ཚུལ་ཁྱད་པར་བ་ཞིག་ཡོད་དེ། དེའང་རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པའམ་སྣང་བ་དེ་རང་མཚན་གྱིས་གྲུབ་ན་རྟོག་པས་ཕར་བཏགས་ཙམ་མིན་པར་དོན་སྟེང་ནས་བདེན་པར་གྲུབ་དགོས། དེ་གྲུབ་ན་སྣང་ཚུལ་དེ་ལྟར་གྲུབ་བམ་མ་གྲུབ་དཔྱད་པའི་ཚེ་དཔྱད་བཟོད་ཀྱིས་རྙེད་དོན་མཐར་ཐུག་ཏུ་འགྲོ་ལ། ལུགས་འདིར་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་མ་གྲུབ་དཔྱད་པའི་མཐར་དཔྱད་བཟོད་དུ་གྲུབ་པ་ཆོས་བདག་དང། དེར་མ་གྲུབ་པ་ཆོས་ཀྱི་བདག་མེད་ཕྲ་མོར་འཇོག་པའི་ཕྱིར། དེས་ན་ཀུན་བཏགས་སྤྱི་ལྡོག་ཙམ་མ་ཡིན་པར་སྐབས་ཀྱི་ཀུན་བཏགས་འདི་ཉིད་གཞིར་

― GTD002_Page_0520 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་པ་ན་མཚན་ཉིད་ངོ་བོ་ཉིད་མེད་པ་ཚིག་ཟིན་གྱིས་བསྟན་ཚོད་ཙམ་དེ་སྟོང་ཉིད་དུ་མི་འགྲོའང། དེའི་སྟེང་ནས་ངོ་བོ་ཉིད་མེད་ཚུལ་རིགས་པའི་འཕུལ་གྱིས་བསྒྲུབ་པའི་དོན་དེ་སྟོང་ཉིད་དུ་འགྲོ་བས། འདི་ཉིད་ལས། འདིར་རང་གི་མཚན་ཉིད་ཀྱིས་ཡོད་མེད་བསྟན་ཚོད་ནི། ཞེས་ཚིག་གིས་བསྟན་ཚོད་དང་དོན་གྱི་ཐོབ་ཚོད་གཉིས་ཡོད་པར་གསུངས་ཤིང། ཡིག་ཆར་མཚན་ཉིད་ངོ་བོ་ཉིད་མེད་པའི་དོན་ཞེས་པ་ཡང་ཡང་གསུངས་པ་ཡིན་ནོ། །སྐབས་འདིར་མཚན་ཉིད་ངོ་བོ་ཉིད་མེད་ཚུལ་བཤད་པའི་ཀུན་བཏགས་ལ་ཀུན་བཏགས་སྤྱི་ཙམ་མ་ཡིན་པར། རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་དེ་འཛིན་པ་གོ་རྒྱུ་ཆེ་ཞིང་མདོའི་དགོངས་པ་མཐར་ཐུག་ཡིན་ཏེ། ཡོན་ཏན་འབྱུང་གནས་ཀྱི་ལེའུ་ལས། རབ་རིབ་ཅན་གྱི་མིག་ལ་རབ་རིབ་ཀྱི་སྐྱོན་ཆགས་པ་དེ་ལྟ་བུར་ནི་ཀུན་བཏགས་པའི་མཚན་ཉིད་བལྟ་བར་བྱའོ། །ཞེས་དང། ཤེལ་ཤིན་ཏུ་གསལ་བ་ལ་ནོར་བུ་རིན་པོ་ཆེ་ཨཎྜ་རྙིལ་དང། མཐོན་ཀ་ཆེན་པོ་དང། པདྨ་རཱ་ག་དང། མརྒད་དང། གསེར་དུ་ལོག་པར་འཛིན་པ་དེ་ལྟ་བུར་ནི་གཞན་གྱི་དབང་གི་མཚན་ཉིད་ལ་ཀུན་བཏགས་པའི་མཚན་ཉིད་དུ་འཛིན་པར་བལྟ་བར་བྱའོ། །ཞེས་བློ་འཁྲུལ་བས་ལོག་པར་སྒྲོ་བཏགས་པའི་སྣང་ཆ་དང་སྦྱར་ནས་ཀུན་བཏགས་ངོས་འཛིན་དགོས་པར་གསུངས་པའི་ཕྱིར། དེ་ལའང་ཁ་ཅིག་ན་རེ། རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་དེ་རང་མཚན་གྱིས་གྲུབ་ནའང། དེའི་དོན་རིགས་པའི་འཕུལ་གྱིས་ཆོས་བདག་ཏུ་མི་འགྲོ་བར་ཐལ། བུམ་པ་རང་མཚན་གྱིས་གྲུབ་ནའང་དེའི་དོན་རིགས་པའི་

― GTD002_Page_0521 ―

^{[མ་དཔེ་གཟིགས་ན་འདིར་གནོན།]}

[Full Size]

འཕུལ་གྱིས་ཆོས་བདག་ཏུ་འགྲོ་དོན་མེད་པ་བཞིན་ཡིན་པའི་ཕྱིར། ཟེར་ན། དེ་གཉིས་མི་མཚུངས་ཏེ། འདི་རང་མཚན་གྱིས་གྲུབ་ན་ཆོས་བདག་ཏུ་འགྲོ་ཚུལ་སྔར་ལྟར་ཡིན་ཅིང། རང་མཚན་གྱིས་མ་གྲུབ་ན་གཏན་ནས་མེད་མི་དགོས་ལ། གཞན་དབང་རང་མཚན་གྱིས་མ་གྲུབ་ན་གཏན་ནས་མེད་དགོས་ཀྱང། རང་མཚན་གྱིས་གྲུབ་ན་ཆོས་བདག་ཏུ་ཐལ་མི་དགོས་པའི་ཕྱིར། དཔེར་ན་མི་ནམ་མཁར་འཕུར་ཐུབ་ན་ཡ་མཚན་ཡིན་ཀྱང་མི་ཐུབ་ན་སྐྱོན་ཡོད་མི་དགོས། བྱ་ནམ་མཁར་འཕུར་མི་ཐུབ་ན་སྐྱོན་ཡོད་པ་ཡིན་ཀྱང་ཐུབ་ན་ཡ་མཚན་མིན་པ་བཞིན་ཡིན་པའི་ཕྱིར། དེ་ལྟར་ཡང་འདི་ཉིད་ལས། ཀུན་བཏགས་རང་གི་མཚན་ཉིད་ཀྱིས་གྲུབ་པར་འཛིན་པ་ཆོས་ཀྱི་བདག་འཛིན་དུ་འདོད་པའི་ཀུན་བཏགས་ནི། ཕུང་པོ་ལ་སོགས་པ་ལ་འདི་གཟུགས་སོ་ཞེས་ངོ་བོ་དང། འདི་གཟུགས་ཀྱི་སྐྱེ་བའོ་ཞེས་སོགས་ཁྱད་པར་དུ་མིང་དང་བརྡར་བཏགས་པའི་དངོས་པོའོ། །ཞེས་གང་ལ་རང་མཚན་གྱིས་གྲུབ་པར་བཟུང་ན་དོན་གྱིས་ཆོས་བདག་ཏུ་འགྲོ་བའི་ཀུན་བཏགས་དེ་ཀུན་བཏགས་བྱེ་བྲག་པ་ཞིག་དགོས་པར་གསུངས་སོ། །ཡིག་ཆ་ཁ་ཅིག་ཏུ་རྣམ་གྲངས་པའི་ཀུན་བཏགས་རྣམས་རྟོག་པས་བཏགས་ཙམ་ཡིན་ཀྱང། མཚན་ཉིད་ཡོངས་ཆད་ཀྱི་ཀུན་བཏགས་རྣམས་རྟོག་པས་བཏགས་ཙམ་མ་ཡིན་ཏེ། དེ་དག་རྟོག་པས་མ་བཞག་པའི་ཕྱིར། དེར་ཐལ། བློས་མ་བཞག་པའི་ཕྱིར་ཏེ། བློའི་ཡུལ་དུ་བྱར་མི་རུང་བའི་ཕྱིར་ཟེར། གཞན་དག་ན་རེ། ནམ་མཁའ་དང་སྒྲ་རྟག་སྟོང་སོགས་ཀྱང་མིང་བརྡས་བཞག་ཙམ་མིན་ཏེ། ནམ་མཁའ་མིང་བརྡས་འཇོག་མི་དགོས་ཤིང། སྒྲ་རྟག་

― GTD002_Page_0522 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་མིང་བརྡས་འཇོག་མི་ནུས་པའི་ཕྱིར། དེར་ཐལ། ནམ་མཁའ་བརྡ་མི་ཤེས་པའི་བ་ལང་ལྟ་བུའང་གཡང་ས་མཐོན་པོར་ཕྱིན་པའི་ཚེ་ཐོགས་རེག་བཀག་པའི་སྟོང་སང་གི་སྤྱི་ཤར་ཏེ་འཇིགས་སྐྲག་སྐྱེ་བས་དེའི་རྣམ་པ་འཆར་བ་མིང་བརྡ་ལ་ལྟོས་མི་དགོས་པའི་ཕྱིར་དང། སྒྲ་རྟག་སྟོང་ནི་དངོས་པོའི་སྟོབས་ཤུགས་ཀྱི་རིགས་པས་བསྒྲུབ་དགོས་ཀྱི། བརྡ་དང་གྲགས་པ་ཙམ་གྱིས་འཇོག་མི་ཐུབ་པའི་ཕྱིར་ཏེ། འདི་ཉིད་ལས་ཀྱང། དེ་དག་གི་མང་པོ་ཞིག་མིང་དང་བརྡས་འཇོག་མི་ནུས་པའི་ཡོད་པ་ཡིན་ཡང་རང་གི་མཚན་ཉིད་ཀྱིས་གྲུབ་པ་མིན་ཏེ། རྟོག་པས་བཏགས་ཙམ་ཡིན་པའི་ཕྱིར། ཞེས་གསུངས་པའི་ཕྱིར་ཟེར། སྔ་མ་མི་འཐད་པར་ཐལ། རྟོག་པས་བཏགས་ཙམ་ལ་ཡོད་པས་ཁྱབ་པ་དབུ་སེམས་གང་གི་སྐབས་སུའང་མི་རུང་བའི་ཕྱིར། རྩ་ཤེ་ཊཱིཀ་ཆེན་ལས། མིང་གི་ཐ་སྙད་ཀྱི་དབང་གིས་མ་བཞག་པའི་ཡོད་པ་མི་སྲིད་ཀྱང་མིང་གི་ཐ་སྙད་ཀྱི་དབང་གིས་གང་བཞག་ཐམས་ཅད་ཡོད་པར་སྟོན་པ་མིན་པར་བཤད་ཟིན་ཏོ། །ཞེས་དང། འདི་ཉིད་ལས་ཀྱང། འདིར་རང་གི་མཚན་ཉིད་ཀྱིས་ཡོད་མེད་བསྟན་ཚོད་ནི་མིང་དང་བརྡ་ལ་ལྟོས་ནས་བཞག་མ་བཞག་ཡིན་ལ། བཞག་པ་ལའང་ཡོད་པས་མ་ཁྱབ་ཅིང། ཞེས་གསུངས་པའི་ཕྱིར། གཉིས་པ་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་ཆོས་ཅན། མིང་བརྡས་བཞག་ཙམ་མ་ཡིན་པར་ཐལ། བརྡ་མི་ཤེས་པའི་གང་ཟག་ལའང་ཁྱོད་ཀྱི་རྣམ་པ་འཆར་བའི་ཕྱིར་ཏེ། དགག་བྱའི་བདེན་སྣང་འབྱུང་བ་བརྡ་ལ་མི་ལྟོས་པའི་ཕྱིར། འདོད་མི་ནུས་ཏེ། མདོ་སྡེ་དགོངས་འགྲེལ་གྱི་དེ་སྐབས་འདིའི་ཀུན་བཏགས་ཀྱི་མཚན་གཞིར་

― GTD002_Page_0523 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་སུ་བསྟན་ནས་དེའི་རྒྱུ་མཚན་སྟོན་པ་ན། འདི་ལྟར་དེ་ནི་མིང་དང་བརྡས་རྣམ་པར་བཞག་པའི་མཚན་ཉིད་ཡིན་གྱི། ཞེས་མིང་བརྡས་བཞག་ཙམ་དུ་གསལ་བར་གསུངས་པའི་ཕྱིར། གསུམ་པ་ལ་ཁྱབ་པ་མེད་དེ། སྒྲ་རྟག་སྟོང་མིང་བརྡས་བཞག་ཙམ་ཡིན་ཀྱང། དེ་མིང་བརྡ་ཙམ་གྱིས་འཇོག་མི་ནུས་པ་འགལ་བ་མེད་པའི་ཕྱིར། དེར་ཐལ། དེ་མིང་བརྡས་བཞག་ཙམ་ཡིན་ཞེས་པའི་ཙམ་གྱི་སྒྲས་རང་མཚན་གྲུབ་པ་གཅོད་ལ། རང་མཚན་གྱིས་མ་གྲུབ་པར་ཁས་ལེན་ཡང་དགོས། མིང་བརྡ་ཙམ་གྱིས་བཞག་པ་ཡིན་ཞེས་པའི་ཙམ་སྒྲས་དེ་འཇོག་བྱེད་སྒྲ་རྟག་སྟོང་ངོ་ཞེས་པའི་སྒྲ་ཙམ་དང། དེ་ལྟར་ཞེན་པའི་འདོད་དབང་ཙམ་གྱིས་བཞག་པ་ལས་དངོས་པོའི་སྟོབས་ཤུགས་ཀྱི་རིགས་པས་འཇོག་བྱེད་ཡོད་པ་གཅོད་ལ། དེ་ལྟར་ཁས་ལེན་མི་རུང་བའི་ཕྱིར། ཕྱི་མ་གྲུབ་སྟེ། རི་བོང་ཅན་ཟླ་བ་ཞེས་པའི་སྒྲས་བརྗོད་དུ་རུང་བ་ལྟ་བུ་འདོད་པ་ཙམ་གྱིས་འགྲུབ་པས་གྲགས་པའི་རྗེས་སུ་དཔག་བྱ་དང། སྒྲ་རྟག་སྟོང་ལྟ་བུ་དངོས་སྟོབས་ཀྱི་རིགས་པས་འགྲུབ་དགོས་པས་དངོས་སྟོབས་ཀྱི་རྗེས་སུ་དཔག་བྱར་འཇོག་པའི་ཕྱིར། རྣམ་འགྲེལ་ལེའུ་བཞི་པ་ལས། སྒྲ་ནི་བརྡ་ལ་བརྟེན་པ་ཅན། །དེ་ཡང་འདོད་ཙམ་བརྟེན་པ་ཡིན། །སྒྲ་ཡིས་གྲུབ་པ་མ་གྲུབ་མིན། །དེ་ལྟར་སྒྲ་བྱུང་གྲགས་པ་གསུངས། །ཞེས་དང། གལ་ཏེ་ལ་ལར་དེ་གྲུབ་ན། །དེ་ནི་དངོས་སྟོབས་ལས་གྲུབ་ཡིན། །བརྡ་འགོག་མེད་ལས་སྐྱེས་པ་ཡི། །གྲགས་པ་ཞེན་བྱའི་རྗེས་སུ་དཔག །ཅེས་སོགས་གསུངས་ལ། ཐར་ལམ་གསལ་བྱེད་ལས་ཀྱང། དོན་གང་ལའང་འདོད་པས་བརྡ་སྦྱོར་བ་འགོག་པ་མེད་པའི་སྟོབས་ལས་སྐྱེས་པའི་གྲགས་པ་ཞེས་བྱ་བའི་རྗེས་སུ་དཔག་པ།

― GTD002_Page_0524 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པའི་ཕྱིར། གཞན་ཡང་དེ་དག་གིས་སྒྲ་རྟག་སྟོང་མིང་བརྡས་བཞག་ཙམ་མ་ཡིན་པར་འདོད་པ་དང། རྟོག་པས་ཕར་བཏགས་ཙམ་དུ་འདོད་པ་ནང་འགལ་ཡིན་ཏེ། མིང་བརྡ་ཞེས་པའི་བརྡ་ནི་རྟོག་པ་ལ་བྱེད་པའི་ཕྱིར་དང། ཁྱོད་ལྟར་ན་དེ་ཆོས་ཅན། རྟོག་པ་ཙམ་གྱིས་བཞག་པ་ཡིན་པར་ཐལ། རྟོག་པས་བཞག་ཙམ་ཡིན་པའི་ཕྱིར། རྟགས་ཁྱབ་ཁས། འདོད་ན། དངོས་སྟོབས་ཀྱི་རིགས་པས་སྒྲུབ་མི་དགོས་པར་ཐལ། རྟག་པས་སྟོང་ངོ་སྙམ་དུ་ཞེན་པའི་རྟོག་པ་ཙམ་གྱིས་འཇོག་ཐུབ་པའི་ཕྱིར། འདོད་མི་ནུས་ཏེ། བྱས་པ་ཁྱོད་སྒྲུབ་པའི་དངོས་སྟོབས་ཀྱི་རྟགས་ཡང་དག་ཡིན་པའི་ཕྱིར། ཡང་ཁ་ཅིག་ན་རེ། འདིའི་མཚན་ཉིད་ངོ་བོ་ཉིད་མེད་ཅེས་པའི་མེད་རྒྱུའི་ངོ་བོ་ཉིད་དེ་རང་བཞིན་གྱིས་གྲུབ་པ་ལ་བྱེད་པར་ཐལ། ལྷག་མཐོང་ཆེན་མོ་ལས། དེ་ལ་མཚན་ཉིད་ངོ་བོ་ཉིད་མེད་པའི་མཚན་ཉིད་ནི་རང་གི་མཚན་ཉིད་དམ་རང་བཞིན་ཡིན་ལ། སེམས་ཙམ་པས་དེ་མེད་པ་ཀུན་བཏགས་ལ་འདོད་ཀྱང་གཞན་དབང་ལ་མཚན་ཉིད་དེ་ཡོད་པས་རང་བཞིན་ཡོད་ལ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་རང་མཚན་གྱིས་གྲུབ་པ་དང་རང་བཞིན་གྱིས་གྲུབ་པ་ལ་ཁྱད་མི་འབྱེད་པའི་ཐལ་འགྱུར་བའི་ལུགས་བཤད་སྐབས་ཡིན་པ་དེའི་དབང་དུ་བྱས་པའི་ཕྱིར། དེ་བཞིན་དུ་གྲུབ་མཐའ་ཆེན་མོར། འཁོར་ལོ་ཐ་མས་ཀུན་བཏགས་རང་བཞིན་མེད་པ་དང་གཞན་དབང་ཡོངས་གྲུབ་རང་བཞིན་གྱིས་ཡོད་པ་དང་དོན་དམ་པར་ཡོད་ཚུལ་བཤད་པའི་མདོ་གཉིས་དྲང་དོན་དང། ཞེས་གསུངས་པའང་དགོངས་པ་དེ་ལྟར་འགྲེལ་དགོས་ཀྱི། དགོངས་འགྲེལ་ལས་ཀུན་བཏགས་རང་བཞིན་མེད་པར་བསྟན་

― GTD002_Page_0525 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དོན་དུ་མི་རུང་སྟེ། ཐལ་འགྱུར་བའི་ལུགས་ལ་སྟོང་ཉིད་བསྟན་པར་ཐལ་བ་དང། སེམས་ཙམ་པའི་ལུགས་ལ་ཀུན་བཏགས་ཡེ་མེད་དུ་བསྟན་པར་ཐལ་པའི་སྐྱོན་གཉིས་སུ་འགྱུར་བའི་ཕྱིར་རོ། །ཡང་ཁ་ཅིག་ན་རེ། སེམས་ཙམ་པའི་ལུགས་ལའང་རང་གི་མཚན་ཉིད་ཀྱིས་གྲུབ་པའི་དོན་དང། རང་ངོས་ནས་གྲུབ་པའི་དོན་ཁྱད་འབྱེད་མི་རིགས་པར་ཐལ། སྔ་མའི་དོན་ཡང་རང་གི་གདགས་གཞིའི་ངོས་ནས་བཙལ་ན་རྙེད་རྒྱུ་ཡོད་པ་ལ་བྱེད་དགོས་པའི་ཕྱིར། དེར་ཐལ། དེ་ལྟར་འདོད་པ་རང་རྒྱུད་པ་མན་ཆད་ཐམས་ཅད་འདྲ་བའི་ཕྱིར། ཐལ་འགྱུར་བའི་ཐད་ཀྱི་ལེགས་བཤད་སྙིང་པོ་ལས། གང་ཟག་གི་ཐ་སྙད་བཏགས་པ་ཙམ་གྱིས་མ་ཚིམ་པར་དེའི་ཐ་སྙད་གང་ལ་བཏགས་པའི་གདགས་གཞི་དེ་ཇི་ལྟར་ཡིན་དཔྱད་ཅིང་བཙལ་ནས་འཇོག་ན་གང་ཟག་རང་གི་མཚན་ཉིད་ཀྱིས་གྲུབ་པར་འཇོག་པ་ཡིན་ཏེ། རང་སྡེ་བྱེ་བྲག་ཏུ་སྨྲ་བ་ནས་དབུ་མ་རང་རྒྱུད་པའི་བར་ཐམས་ཅད་ཀྱིས་དེ་བཞིན་དུ་འདོད་དོ། །ཞེས་གསུངས་པའི་ཕྱིར་ན། མ་ཁྱབ་སྟེ། དེ་དག་གིས་ཆོས་གང་ཡང་བཏགས་དོན་བཙལ་ནས་རྙེད་དགོས་པར་འདོད་པས། དོན་གྱིས་ཐལ་འགྱུར་བའི་ལུགས་ཀྱི་རང་མཚན་དེར་ཁས་བླངས་སོང་བའི་དོན་ཡིན་པའི་ཕྱིར། དེར་ཐལ། སེམས་ཙམ་པས་ཀུན་བཏགས་རང་གི་མཚན་ཉིད་ཀྱིས་མ་གྲུབ་པར་འདོད་པ་ནི་མིང་བརྡས་བཞག་ཙམ་ཡིན་པའི་རྒྱུ་མཚན་གྱིས་ཡིན་ལ། དེའང་གདགས་གཞིའི་ངོས་ནས་བཙལ་ན་རྙེད་རྒྱུ་ཞིག་ཡོད་པར་འདོད་པས། ཐལ་འགྱུར་བས་གཞལ་ཚེ་ཀུན་བཏགས་རང་མཚན་གྱིས་གྲུབ་པ་ལས་མ་འདས་པའི་དོན་ཡིན་པའི་ཕྱིར། དེ་ཉིད་ལས། འོ་ན་སྔར་རྣལ་འབྱོར་

― GTD002_Page_0526 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་པ་པས་གཟུགས་སོགས་ཀྱི་ངོ་བོ་དང་ཁྱད་པར་དུ་བཏགས་པའི་ཀུན་བཏགས་ཡོད་པར་འདོད་པ་ལ་རང་གི་མཚན་ཉིད་ཀྱིས་གྲུབ་པ་བཀག་ནས་མིང་དང་བརྡས་བཞག་པར་བཤད་པ་དང་འགལ་ལོ་སྙམ་ན། སྐྱོན་མེད་དེ་དེ་ནི་མིང་དང་བརྡས་འཇོག་ནུས་པས་རང་གི་མཚན་ཉིད་ཀྱིས་མ་གྲུབ་ཅེས་སྨྲ་བ་ཡིན་གྱི། དེ་ལ་རང་གི་མིང་བཏགས་པའི་བཏགས་གཞི་བཙལ་ན་མ་རྙེད་པར་མི་འདོད་པས་འདི་པས་བཤད་པའི་རང་མཚན་གྱིས་གྲུབ་པར་འཛིན་པ་ཡོད་དོ། །ཞེས་གསུངས་པའི་ཕྱིར། དེས་ན་ཁ་ཅིག་མཚན་ཉིད་གསུམ་ལ་བདེན་པར་གྲུབ་མ་གྲུབ་ཀྱི་ཁྱད་པར་ཡོད་ཀྱང་རང་གི་མཚན་ཉིད་ཀྱིས་གྲུབ་མཉམ་ཡིན་ཟེར་བ་དང། ལ་ལ་རྣམ་འགྲེལ་ལས། རང་གི་མཚན་ཉིད་གཅིག་གཞལ་བྱ། །ཞེས་པའི་དོན་དུ་བསམ་ནས་གཞལ་བྱ་ལ་རང་མཚན་གྱིས་ཁྱབ་པར་སྨྲ་བ་རྣམས་ཤིན་ཏུ་མི་འཐད་དེ། གཞལ་བྱ་ལ་རང་མཚན་གྱིས་ཁྱབ་ན་སྤྱི་མཚན་མེད་དགོས། ཡུལ་ལ་རང་སྤྱི་གཉིས་མེད་ན་ཡུལ་ཅན་ཚད་མ་གཉིས་ཀྱང་མེད་དགོས་པའི་ཕྱིར། སྡེ་བདུན་ཡིད་ཀྱི་མུན་སེལ་ལས། སྤྱི་མཚན་གཞལ་བྱ་མ་ཡིན་པར་སྨྲ་བ་ནི་རྗེས་སུ་དཔག་པ་ཚད་མ་མ་ཡིན་པར་སྨྲ་བ་རྒྱང་འཕེན་པའི་རང་ལུགས་འཛིན་པ་སྟེ། ཞེས་སོ། །ཡང་ཁོ་ན་རེ། ཉན་ཐོས་སྡེ་པའི་ལུགས་ལ་ཀུན་བཏགས་རང་མཚན་གྱིས་གྲུབ་པར་ཐལ། དེ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པའི་ཕྱིར། དེར་ཐལ། གཞི་གྲུབ་པའི་ཕྱིར། ཁྱབ་སྟེ། དེ་དག་གི་ལུགས་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་ན་ཡོད་པར་འཇོག་མི་ཐུབ་པའི་ཕྱིར། འདི་ཉིད་ལས། དོན་སྨྲ་གཉིས་ཀྱིས་གཟུགས་སོགས་རྟོག་པའི་ཞེན་

― GTD002_Page_0527 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་དང་བརྡ་འདོགས་པའི་གནས་སུ་རང་མཚན་གྱིས་གྲུབ་པ་ཁེགས་ན་ཡོད་པར་འཇོག་མི་ཤེས་ཏེ། ཚད་མ་པ་ལ་གྲགས་པའི་རང་མཚན་ནི་མིན་ནོ། །ཞེས་གསུངས་པའི་ཕྱིར་ཟེར་ན། ལུང་དེ་ཁྱོད་ཀྱི་ལུགས་ལ་གནོད་བྱེད་ཡིན་གྱི་སྒྲུབ་བྱེད་མིན་ཏེ། ལུང་དེས་དོན་སྨྲ་གཉིས་ཀྱི་ལུགས་ལ་ཆོས་གང་ཡང་མིང་བརྡ་འཇུག་པའི་གཞིར་གནས་ཚོད་ཀྱི་དབང་གིས་གྲུབ་པ་ཁེགས་ན་ཡོད་པར་འཇོག་མི་ཤེས་ཀྱང། ཚད་མ་པ་རང་ལ་གྲགས་པའི་རང་མཚན་དེ་ཁེགས་ནའང་ཡོད་པར་བཞག་ཆོག་ཅེས་པའི་དོན་ཡིན་པར་ཤིན་ཏུ་གསལ་བའི་ཕྱིར། སྟོང་ཐུན་ལས། འདིར་མདོ་སྡེ་པ་སོགས་ཀྱིས་བརྡ་འདོགས་པའི་གནས་སུ་རང་མཚན་གྱིས་གྲུབ་པ་ཁེགས་ན་ཡོད་པར་འཇོག་མི་ཤེས་ཞེས་པ་ནི་གཞལ་བྱ་གཉིས་ཕྱིར་སོགས་ཀྱི་སྐབས་དེར་མདོ་སྡེ་པ་རང་ལ་གྲགས་པའི་རང་མཚན་དེ་ལ་མི་བྱེད་དེ། མདོ་སྡེ་པས་ནམ་མཁའ་ནམ་མཁའི་མིང་འཇུག་པའི་གཞི་ཡིན་པ་དངོས་པོར་མི་འདོད་པས་དེ་གཞལ་བྱ་གཉིས་ཕྱིར་སོགས་ཀྱི་སྐབས་ཀྱི་རང་མཚན་མིན་ཀྱང་ཡོད་པར་འཇོག་ལ། འོན་ཀྱང་ནམ་མཁའ་ནམ་མཁའི་མིང་འཇུག་པའི་གཞིར་ནམ་མཁའ་རང་གི་གནས་ཚོད་ཀྱི་དབང་གིས་གྲུབ་པར་འདོད་ཅིང། དེ་ལྟར་མ་གྲུབ་ན་ནམ་མཁའ་ཡོད་པར་འཇོག་མི་ཤེས་སོ། །ཞེས་གསུངས་པའི་ཕྱིར། ཁྱབ་སྟེ། དེ་ལྟར་ཀུན་བཏགས་ཀྱི་ཆོས་རྣམས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་ཅེས་དངོས་སུ་ཁས་མི་ལེན་ཡང། རིགས་པའི་འཕུལ་གྱིས་དོན་ཐོབ་ལ་ཁས་བླང་སོང་ཡོད་ཅེས་པ་ཡིན་ཏེ། དངོས་སུ་ཁས་བླངས་པ་དང་རིགས་པའི་

― GTD002_Page_0528 ―

^{[མ་དཔེ་གཟིགས་ན་འདིར་གནོན།]}

[Full Size]

འཕུལ་གྱིས་ཁས་བླང་སོང་བ་གཉིས་བསྲེ་མི་རུང་བའི་ཕྱིར། སྟོང་ཐུན་ལས། ནམ་མཁའ་དང་མྱང་འདས་སོགས་ནམ་མཁའ་དང་ཟག་པ་ཟད་པ་སོགས་ཀྱི་མིང་གང་ལ་འཇུག་པའི་གནས་སུ་རང་གི་གནས་ཚོད་ཀྱི་དབང་གིས་གྲུབ་པར་མདོ་སྡེ་པ་འདོད་པ་དེ་ལ་མདོ་སྡེ་པ་རང་གིས་རང་མཚན་གྱི་མིང་མ་བཏགས་ཀྱང་སེམས་ཙམ་པ་ལྟར་ན་མདོ་སྡེ་པས་དེ་ལ་རང་མཚན་གྱི་དོན་ཁས་བླངས་པར་སོང་བའི་དོན་ཏེ་འདི་རྟོགས་པ་ཤིན་ཏུ་གནད་ཆེ་བར་ཡོད་དོ། །ཞེས་གསུངས་པའི་ཕྱིར། བྱས་པ་ལ། འདིའི་ཚད་མ་པ་ལ་གྲགས་པའི་རང་མཚན་བདེན་གྲུབ་ལ་བྱས་ནས་བདེན་གྲུབ་བཀག་ཀྱང་ཡོད་པར་འཇོག་མི་ཤེས་ཞེས་པའི་དོན་ཡིན་ཟེར་ན། སྔ་མའི་ཉེས་པ་སོ་ན་གནས་ཏེ། མདོ་སྡེ་པ་ཆོས་ཅན། ཁྱོད་ཀྱི་ལུགས་ལ་རང་མཚན་གྱིས་གྲུབ་མ་གྲུབ་ཅེས་པ་དེ་བདེན་པར་གྲུབ་མ་གྲུབ་ཀྱི་དོན་དུ་གྲགས་ཤིང་དོན་ལའང་གནས་པར་ཐལ། ཁྱོད་ལ་གྲགས་པའི་རང་མཚན་དེ་བདེན་གྲུབ་ལ་བྱེད་རིགས་པའི་ཕྱིར། རྟགས་ཁས། འདོད་ན། ཁྱོད་ཀྱི་ལུགས་ལ་བདེན་པར་མེད་ན་རང་མཚན་གྱིས་མེད་པས་ཁྱབ་པར་ཐལ། དེ་གཉིས་དོན་གཅིག་པའི་ཕྱིར། འདོད་ན། ཀུན་བཏགས་ཆོས་ཅན། དེར་ཐལ། དེའི་ཕྱིར། བྱས་པ་ལ་ཁོ་ན་རེ། འོ་ན་དོན་སྨྲ་གཉིས་ཀྱི་ཞེས་དམིགས་ཀྱིས་བཀར་བ་ལ་དགོས་པ་མེད་པར་ཐལ། སེམས་ཙམ་པས་ཀྱང་གཟུགས་སོགས་མིང་བརྡ་འཇུག་པའི་གནས་སུ་རང་གི་གནས་ཚོད་ཀྱིས་དབང་གིས་གྲུབ་པའམ་རང་ངོས་ནས་གྲུབ་པ་ཁེགས་ན་ཡོད་པར་འཇོག་མི་ཤེས་པའི་ཕྱིར། དེར་ཐལ། དེས་ཡོད་ན་རང་ངོས་ནས་གྲུབ་

― GTD002_Page_0529 ―

^{[མ་དཔེ་གཟིགས་ན་འདིར་གནོན།]}

[Full Size]

པས་ཁྱབ་པར་འདོད་པའི་ཕྱིར་ཏེ། རྟགས་ཡང་དག་ཡིན་ན་རང་རྒྱུད་ཀྱི་རྟགས་ཡང་དག་ཡིན་པས་ཁྱབ་པར་འདོད་པའི་ཕྱིར་ཟེར་ན། གོང་དུ་མ་ཁྱབ་སྟེ། སྤྱིར་སེམས་ཙམ་པའི་ལུགས་ལ་རང་ངོས་ནས་གྲུབ་པ་དང་ཡོད་པ་ཙམ་དོན་གཅིག་ཡིན་གྱི། དེ་དང་རང་མཚན་གྱིས་གྲུབ་པ་དོན་མི་གཅིག་ལ། འོན་ཀྱང་མིང་བརྡ་འཇུག་པའི་གཞིར་རང་ངོས་ནས་གྲུབ་པ་དང། དེར་རང་མཚན་གྱིས་གྲུབ་པ་དོན་འདྲ་ཡི། དེར་ཡོད་པ་ཙམ་ལ་དེར་རང་ངོས་ནས་གྲུབ་པས་མ་ཁྱབ་པའི་ཕྱིར། དེར་ཐལ། མིང་བརྡ་འཇུག་པའི་གནས་སུ་ཞེས་པའི་རྣམ་དབྱེ་བདུན་པའི་ཚིག་གི་ནུས་པས་དེར་རང་ངོས་ནས་ཚུར་གྲུབ་ན་མིང་བརྡས་ཕར་བཏགས་པ་ལ་མི་ལྟོས་དགོས་པའི་ཕྱིར། དེའི་རྒྱུ་མཚན་གྱིས་སྟོང་ཐུན་ལས། མིང་གང་ལ་འཇུག་པའི་གནས་སུ་ནམ་མཁའ་དང་མྱང་འདས་སོགས་རང་གི་གནས་ཚོད་ཀྱི་དབང་གིས་གྲུབ་པར་མདོ་སྡེ་པ་འདོད། ཅེས་དམིགས་ཀྱིས་བཀར་ནས་གསུངས་པ་ཡིན་པའི་ཕྱིར། ཡང་ལ་ལ་ན་རེ། མདོ་སྡེ་པས་ཀུན་བཏགས་རང་མཚན་གྱིས་མ་གྲུབ་པར་ཁས་ལེན་ཀྱང་དེ་ལྟར་རྟོགས་པ་མ་ཡིན་པར་ཐལ། ཀུན་བཏགས་རང་མཚན་གྱིས་མ་གྲུབ་པར་རྟོགས་ན་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པར་རྟོགས་དགོས་པའི་ཕྱིར། དེར་ཐལ། ཐར་ལམ་གསལ་བྱེད་ལས། སྤྱིས་སྟོང་པར་ངེས་ན་བྱེ་བྲག་གིས་སྟོང་པར་ངེས་པའི་ཁྱབ་པ་གྲུབ་བོ། །ཞེས་གསུངས་པའི་ཕྱིར་དང། དེ་ཐ་སྙད་ཙམ་དུའང་རང་མཚན་གྱིས་མ་གྲུབ་པར་རྟོགས་ནས་རང་འཛིན་

― GTD002_Page_0530 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོག་པའི་ཞེན་གཞིར་རང་མཚན་གྱིས་གྲུབ་མ་གྲུབ་ཐེ་ཚོམ་ཟ་བ་མི་སྲིད་པའི་ཕྱིར། ཟེར་ན། ལུང་དོན་དེ་ལྟར་མ་ཡིན་པར་ཐལ། སྤྱིས་སྟོང་པར་ངེས་ན་བྱེ་བྲག་གིས་སྟོང་པས་ཁྱབ་པ་འགྲུབ་ཚུལ་སྒྲས་སྟོང་པར་ངེས་ན་དུང་སྒྲས་སྟོང་པས་ཁྱབ་པ་གྲུབ་པ་དང། གཞི་དེར་མེ་མེད་པར་རྟོགས་ན་ཙན་དན་གྱི་མེ་མེད་པར་རྟོགས་དགོས་པ་ལྟ་བུ་སྤྱི་དང་བྱེ་བྲག་གི་ཁྱད་པར་ཙམ་ལས་རང་གི་ངོ་བོས་སྟོང་ཚུལ་ལ་ཁྱད་མེད་པ་རྣམས་ཡིན་གྱི། རང་མཚན་གྱིས་གྲུབ་པ་དང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་གཉིས་ནི་ཚིག་ལ་རང་མཚན་ཞེས་པ་ཙམ་འདྲའང་དོན་གྱི་སྤྱི་བློ་ངོར་འཆར་ཚུལ་ཤིན་ཏུ་མི་འདྲ་བའི་ཕྱིར། ཁྱོད་རང་ལ་གཞི་བུམ་པ་ལྟ་བུ་ཆ་བཅས་དང་མི་རྟག་པ་གང་རུང་དུ་ངེས་ན་རྟག་གཅིག་རང་དབང་ཅན་དུ་གྲུབ་པས་སྟོང་པར་ངེས་དགོས་པར་ཐལ། དེ་མི་རྟག་པར་རྟོགས་ནས་མི་འཇིག་པའི་རྟག་པ་ཡིན་མིན་དང། ཆ་བཅས་སུ་རྟོགས་ནས་ཆ་མེད་ཀྱི་གཅིག་པུ་ཡིན་མིན་ཐེ་ཚོམ་ཟ་ཚུལ་མེད་པའི་ཕྱིར་དང། སྤྱིར་ཆ་མེད་ཀྱིས་སྟོང་པ་རྟོགས་ན་བྱེ་བྲག་ཆ་མེད་སོགས་ཁྱད་པར་གསུམ་ལྡན་གྱིས་སྟོང་པའང་རྟོགས་དགོས་པའི་ཕྱིར། རྟགས་ཁས། འདོད་ན། བུམ་པ་ཁ་ཞབས་སོགས་ཀྱི་ཆ་དང་བཅས་པར་རྟོགས་ན་བུམ་པ་རྟག་གཅིག་རང་དབང་ཅན་དུ་གྲུབ་པས་སྟོང་པ་རྟོགས་དགོས་པ་དང། སེམས་ཅན་ཡིན་ན་རྟག་གཅིག་རང་དབང་ཅན་གྱི་སྟོང་པ་རྟོགས་པས་ཁྱབ་པར་ཐལ་ལོ། །གཞན་ཡང་མདོ་སྡེ་པས་ཀུན་བཏགས་རང་མཚན་གྱིས་མ་གྲུབ་པ་རྟོགས་ཀྱང་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པ་རྟོགས་མི་

― GTD002_Page_0531 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་པར་ཐལ། དེས་ཀུན་བཏགས་དངོས་མེད་དུ་རྟོགས་པ་གང་ཞིག །དེ་ལྟར་ན་སྤྱི་མཚན་དུ་རྟོགས་དགོས་ལ། སྤྱི་མཚན་དུ་རྟོགས་ན་རང་མཚན་གྱིས་མ་གྲུབ་པ་རྟོགས་དགོས་པའི་ཕྱིར། འདི་ཉིད་ལས། ཞེན་ཡུལ་གྱི་རང་ལྡོག་རང་མཚན་གྱིས་གྲུབ་པ་འགོག་ན་རྗེས་དཔག་ཚད་མའི་གཞལ་བྱ་སྤྱི་མཚན་དངོས་པོར་མེད་པ་མདོ་སྡེ་པས་གྲུབ་ཟིན་པས་མི་འཐད་དོ། །ཞེས་གསུངས་པའི་ཕྱིར། ཁྱབ་སྟེ། དེས་ཞེན་ཡུལ་གྱི་རང་ལྡོག་རང་མཚན་གྱིས་མ་གྲུབ་པ་རྟོགས་ཟིན་པའི་སྒྲུབ་བྱེད་དུ་དེ་སྤྱི་མཚན་དང་དངོས་མེད་དུ་རྟོགས་ཟིན་པ་བཀོད་པ་དེ་ཆོས་ཅན་ཀུན་བཏགས་ལའང་འདྲ་བའི་ཕྱིར་དང། དེར་མ་ཟད་ཁྱོད་ལྟར་ན་མདོ་སྡེ་པས་རྟོག་པའི་ཞེན་ཡུལ་གྱི་རང་ལྡོག་ཀྱང་རང་མཚན་གྱིས་མ་གྲུབ་པ་མ་རྟོགས་པར་ཐལ། རང་མཚན་གྱིས་མ་གྲུབ་པ་རྟོགས་ན་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པ་རྟོགས་དགོས་པ་གང་ཞིག །དེ་ཆོས་ཀྱི་བདག་མེད་ཕྲ་མོ་ཡིན་པའི་ཕྱིར། འདོད་ན། རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པའི་དོན་ཞེན་ཡུལ་གྱི་རང་ལྡོག་རང་མཚན་གྱིས་མ་གྲུབ་པ་ལ་བྱས་ཆོག་པར་ཐལ། དེ་ལ་མདོ་སྡེ་པས་གྲུབ་ཟིན་གྲུབ་པར་ཐལ་བའི་སྐྱོན་མི་འོང་བའི་ཕྱིར་ཏེ། མདོ་སྡེ་པས་དེ་གྲུབ་མ་ཟིན་པའི་ཕྱིར། དེས་ཞེན་ཡུལ་གྱི་རང་ལྡོག་བདེན་པར་མ་གྲུབ་པའི་དོན་དུ་དགོངས་པ་འགྲེལ་པའང་ཁེགས་སོ། །བྱས་པ་ལ་ཁོ་ན་རེ། མདོ་སྡེ་པའི་དེའི་ཞེན་ཡུལ་གྱི་རང་ལྡོག་རང་མཚན་གྱིས་གྲུབ་པར་འདོད་པར་ཐལ། དེའི་ཞེན་ཡུལ་ཡིན་པའི་ཆ་དེ་རང་མཚན་གྱིས་གྲུབ་པར་འདོད་པའི་ཕྱིར། འདི་ཉིད་ལས། གཟུགས་ལ་སོགས་པ་བརྡ་འདོགས་པའི་གནས་དང་རྟོག་

― GTD002_Page_0532 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཞེན་གཞི་ཡིན་པ་དེ་རང་གི་མཚན་ཉིད་ཀྱིས་གྲུབ་པ་ལ་སྐྱོན་དེར་མི་འགྱུར་རོ། །ཞེས་ཉན་ཐོས་སྡེ་པ་དག་སྨྲ་མོད་ཀྱང་འདྲའོ་ཞེས་གསུངས་པའི་ཕྱིར་ན་མ་ཁྱབ་སྟེ། རྟོག་པའི་དངོས་ཡུལ་སྒྲ་དོན་གྱི་སྤྱིའི་སྣང་བ་དེ་ཉིད་དོན་དེའི་ངོ་བོར་རང་མཚན་གྱིས་གྲུབ་ན་བརྡ་འབྲེལ་ལ་མི་ལྟོས་པའི་སྐྱོན་ཡོད་ཀྱང། གཟུགས་རང་ཉིད་གཟུགས་འཛིན་རྟོག་པའི་ཞེན་གཞི་ཡིན་པར་རང་མཚན་གྱིས་གྲུབ་པ་ལ་སྐྱོན་དེར་མི་འགྱུར་ཞེས་པའི་དོན་ཡིན་པའི་ཕྱིར། གཞན་ཡང་མདོ་སྡེ་པས་ཀུན་བཏགས་རང་མཚན་གྱིས་མ་གྲུབ་པར་རྟོགས་པར་ཐལ། དེས་ཀུན་བཏགས་རྟོགས་པའི་ཕྱིར། ཁྱབ་སྟེ། རྟོག་པས་བཏགས་ཙམ་ཀུན་བཏགས་ཀྱི་མཚན་ཉིད་ཡིན་པ་གང་ཞིག །དེ་རྟོགས་ན་ཙམ་སྒྲའི་དོན་རང་མཚན་གྱིས་གྲུབ་པ་བཀག་ནས་རྟོགས་དགོས་པའི་ཕྱིར། དེ་ལ་ཁོ་ན་རེ། རང་རྒྱུད་པས་ཀྱང་ཀུན་བཏགས་རང་མཚན་གྱིས་མ་གྲུབ་པ་རྟོགས་པར་ཐལ། དེས་ཀུན་བཏགས་རྟོགས་པའི་ཕྱིར། འདོད་མི་ནུས་ཏེ། ཀུན་བཏགས་རང་མཚན་གྱིས་གྲུབ་པར་དམ་བཅའ་བའི་གྲུབ་མཐའ་སྨྲ་བ་ཡིན་པའི་ཕྱིར་ཟེར་ན། རང་རྒྱུད་པ་རྣམས་ཀུན་བཏགས་ཀྱང་ཐལ་འགྱུར་བའི་ལུགས་ཀྱི་རང་མཚན་དེར་འཛིན་པ་སྨོས་མི་དགོས་ལ། སེམས་ཙམ་པ་ལྟར་གྱི་རང་མཚན་དེར་འཛིན་མི་འཛིན་དཔྱད་པར་བྱ་བ་ཅུང་ཞིག་ཡོད་དེ་རང་རྒྱུད་པའི་སྐབས་སུ་བཤད་པར་བྱའོ། །དེས་ན་ཐལ་འགྱུར་བ་དང་སེམས་ཙམ་པ་གཉིས་ཀུན་བཏགས་རང་མཚན་གྱིས་མ་གྲུབ་ཅེས་ཟེར་བ་དང། རྟོག་པས་བཏགས་ཙམ་ཡིན་ཞེས་ཟེར་བ་འདྲའང་ཙམ་སྒྲས་གཅོད་ཚུལ་དང་རང་མཚན་གྱིས་མ་གྲུབ་ཚུལ་ཁྱད་ཆེ་སྟེ། མདོ་སེམས་གཉི་གས་ཀུན་བཏགས་སེམས་ཙམ་པའི་ལུགས་ཀྱི་

― GTD002_Page_0533 ―

^{[མ་དཔེ་གཟིགས་ན་འདིར་གནོན།]}

[Full Size]

རང་མཚན་དེར་མ་གྲུབ་པར་འདོད་ཀྱང། ཐལ་འགྱུར་བའི་ལུགས་ཀྱི་རང་མཚན་དེར་གྲུབ་པར་འདོད་པའི་ཕྱིར། དེར་ཐལ། དེ་མིང་བརྡ་ལ་མ་ལྟོས་པར་རང་ངོས་ནས་མ་གྲུབ་པར་འདོད་ཀྱང་སྤྱིར་རང་ངོས་ནས་གྲུབ་པར་འདོད་པའི་ཕྱིར། འདི་ཉིད་ལས། ཐལ་འགྱུར་བས་ཡོད་པ་རྣམས་མིང་གི་ཐ་སྙད་ཀྱི་དབང་གིས་བཞག་པ་དང་ཆེས་མི་མཐུན་པས་རང་གི་མཚན་ཉིད་ཀྱིས་ཡོད་མེད་ཀྱི་དོན་ཡང་མི་མཐུན་ནོ། །འོན་ཀྱང་འདིའི་རང་མཚན་གྱིས་གྲུབ་པར་འཛིན་པ་ཡོད་ན་ཐལ་འགྱུར་བའི་རང་མཚན་གྱིས་གྲུབ་པར་འཛིན་པའང་ཡོད་ལ། གཞི་འགའ་ཞིག་སྔ་མ་ལྟར་མི་འཛིན་ཀྱང་ཕྱི་མ་ལྟར་འཛིན་པ་ནི་ཡོད་དོ། །ཞེས་དང། ཐལ་འགྱུར་བའི་ཐད་ལས་ཀྱང། བཏགས་གཞི་བཙལ་ན་མི་རྙེད་པར་མི་འདོད་པས་འདི་པས་བཤད་པའི་རང་མཚན་གྱིས་གྲུབ་པར་འཛིན་པ་ཡོད་དོ། །ཞེས་གསུངས་པའི་ཕྱིར། ཁྱབ་སྟེ། དེས་དོགས་པ་གཅོད་པ་ཀུན་བཏགས་ལ་བྱེད་དགོས་པའི་ཕྱིར། ལུང་སྔ་མའི་དོན་ལའང་ཁ་ཅིག །གཞི་དེ་སེམས་ཙམ་པའི་ལུགས་ཀྱི་རང་མཚན་གྱིས་གྲུབ་པར་འཛིན་པའི་བློ་ཡིན་ན་ཐལ་འགྱུར་བའི་ལུགས་ཀྱི་རང་མཚན་གྱིས་གྲུབ་པར་འཛིན་པའི་བློ་ཡིན་པས་ཁྱབ་ཀྱང། ཐལ་འགྱུར་བའི་ལུགས་ཀྱི་རང་མཚན་གྱིས་གྲུབ་པར་འཛིན་པའི་བློ་ཡིན་ན་སེམས་ཙམ་པའི་ལུགས་ཀྱི་རང་མཚན་དེར་གྲུབ་པར་འཛིན་པའི་བློ་ཡིན་པས་མ་ཁྱབ་ཅེས་པའི་དོན་ཡིན་ཟེར་བ་མི་འཐད་དེ། ཀུན་བཏགས་སེམས་ཙམ་པའི་ལུགས་ཀྱི་རང་མཚན་གྱིས་གྲུབ་པར་འཛིན་པའི་བློ་དེ་ལོག་ཤེས་དང། ཐལ་འགྱུར་བའི་ལུགས་ཀྱི་རང་མཚན་གྱིས་གྲུབ་པར་འཛིན་པའི་

― GTD002_Page_0534 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་དེ་དོན་མཐུན་ཡིན་པས་དེ་གཉིས་གཞི་མཐུན་དུ་འགྲོ་ཚུལ་མེད་པའི་ཕྱིར། དེས་ན་སེམས་ཙམ་པའི་ལུགས་ཀྱི་དེ་ལ་ཐལ་འགྱུར་བའི་ལུགས་ཀྱི་དེའི་འཛིན་ཚུལ་ཚང་དགོས་ལ། ཐལ་འགྱུར་བའི་ལུགས་ཀྱི་དེ་ལ་སེམས་ཙམ་པའི་ལུགས་ཀྱི་དེའི་འཛིན་ཚུལ་ཚང་མི་དགོས་པའི་དོན་ཡིན་པ་སོགས་ཡིག་ཆར་གསལ་བ་ལྟར་ཡིན་ནོ། །བྱས་པ་ལ། འོ་ན། ཀུན་བཏགས་མིང་བརྡས་བཞག་པ་ལ་མ་ལྟོས་པར་རང་ངོས་ནས་གྲུབ་པར་འཛིན་པའི་བློ་དེ་ལ་ཀུན་བཏགས་རང་ངོས་ནས་གྲུབ་པར་འཛིན་པའི་འཛིན་ཚུལ་ཚང་བར་ཐལ། ལུང་དོན་འཐད་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་ཀུན་བཏགས་རང་ངོས་ནས་གྲུབ་པར་འཛིན་པར་ཐལ། འདོད་པའི་ཕྱིར་ན། མ་ཁྱབ་སྟེ། ཀུན་བཏགས་རང་ངོས་ནས་གྲུབ་པ་དེའི་འཛིན་སྟངས་ཀྱི་ཡུལ་མ་ཡིན་པའི་ཕྱིར། དེར་ཐལ། དེའི་འཛིན་སྟངས་ཀྱི་ཡུལ་མེད་པའི་ཕྱིར་ཏེ། ལོག་ཤེས་ཡིན་པའི་ཕྱིར། ཁྱོད་རང་ལ་གཟུགས་གཟུགས་འཛིན་ཚད་མ་ལས་རྫས་གཞན་དུ་ཡོད་པར་འཛིན་པའི་རྟོག་པ་ཆོས་ཅན། ཁྱོད་ཀྱིས་གཟུགས་ཡོད་པར་འཛིན་པར་ཐལ། ཁྱོད་ལ་ཡོད་པའི་འཛིན་ཚུལ་ཚང་བའི་ཕྱིར། དེར་ཐལ། ཡོད་པའི་འཛིན་ཚུལ་གྱི་སྟེང་དུ་ལྷག་པར་སྒྲོ་བཏགས་ནས་འཛིན་པས་ཡོད་མཐར་ལྟ་བ་དང་དེར་ལྷུང་བ་སོགས་སུ་བཤད་པ་ཡིན་པའི་ཕྱིར། འདོད་མི་ནུས་ཏེ། གཟུགས་ཡོད་པ་དེའི་ཡུལ་གང་ཡང་མ་ཡིན་པའི་ཕྱིར། ཡང་ཁོ་ན་རེ། དེ་ཆོས་ཅན། བློ་དོན་མི་མཐུན་མ་ཡིན་པར་ཐལ། ཁྱོད་ལ་དོན་མཐུན་གྱི་འཛིན་ཚུལ་ཚང་བའི་ཕྱིར། དེར་ཐལ། ཡོད་པའི་འཛིན་ཚུལ་ཚང་བའི་ཕྱིར་ན། མ་ཁྱབ། དེའི་འཛིན་ཚུལ་ལ་ཕྱིན་ཅི་ལོག་གིས་མ་བསླད་པའི་དོན་མཐུན་

― GTD002_Page_0535 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་ཆ་ཅུང་ཟད་ཀྱང་མེད་པའི་ཕྱིར། དེར་ཐལ། རྒྱལ་དབང་བློས། སེར་པོ་ལ་འཁྲུལ་ཞིང་དབྱིབས་ལ་མ་འཁྲུལ་པའི་འདོད་པའི་དོན་ཐོབ་པའི་ཕྱིར་མངོན་སུམ་ཉིད་དུ་རྣམ་པར་བཞག་གོ །ཞེས་ལོག་ཤེས་ཡིན་ཀྱང་འཛིན་ཚུལ་ལ་དོན་དང་མཐུན་པའི་ཆ་གཅིག་ཡོད་པར་བཞེད་པ་དང། ཆོས་མཆོག་གི་འཐད་ལྡན་ཆུང་བ་ལས། ལོག་ཤེས་ཡིན་ན་ཤིང་དང་ཇི་ལྟར་ཕྲད་ཅེ་ན། ཅུང་ཟད་ཀྱང་ཕྲད་པ་མེད་དེ། ཞེས་དང། དེ་བས་ན་ལོག་པའི་ཤེས་པ་གང་ཡིན་པ་དེ་ལས་ནི་དོན་གྲུབ་པ་མ་ཡིན་ལ། ཞེས་དེའི་འཛིན་ཚུལ་ལ་དོན་དང་ཕྲད་པའམ་མཐུན་པའི་ཆ་ཅུང་ཟད་ཀྱང་མེད་པར་བཞེད་པའི་ལུགས་གཉིས་བྱུང་ཡང་ཕྱི་མ་འཐད་པ་རྗེ་ཡབ་སྲས་ཀྱི་དགོངས་པ་ཡིན་པའི་ཕྱིར། ཚད་མ་མདོའི་དར་ཊཱིཀ་ལས། བདག་ཉིད་ཆེན་པོ་རྣམས་ཀྱི་བསམ་པ་རིག་པར་དཀའ་མོད། འདྲེན་པ་དམ་པ་རྣམས་ཕྱི་མ་འཐད་པར་བཞེད་པས་ཕྱི་མ་ལྟར་ཁས་བླང་བར་བྱའོ། །ཞེས་གསུངས་པའི་ཕྱིར། འདི་མདོ་སྡེ་པ་དང་ཐུན་མོང་བའི་ལུགས་གཙོ་བོར་བྱས་པ་ཡིན་ལ། སེམས་ཙམ་པ་པའི་ལུགས་ལ་རྒྱལ་དབང་བློའི་བཞེད་ཚུལ་དེའང་མི་རུང་བ་ཆེར་མེད་པར་ལེའུ་གཉིས་པའི་མཐའ་དཔྱོད་དུ་གསུངས་སོ། །ཁ་ཅིག་ན་རེ། གཞན་དབང་སྐྱེ་བ་ངོ་བོ་ཉིད་མེད་པའི་དོན། གཞན་དབང་གཞན་དབང་ལས་མི་སྐྱེ་བ་ལ་བཤད་པ་ཡིག་ཆར་བཀག་པ་མི་འཐད་པར་ཐལ། དེའི་དོན་དེ་ལ་བྱེད་དགོས་པའི་ཕྱིར། དེར་ཐལ། དགོངས་འགྲེལ་ལས། བདག་ཉིད་ཀྱིས་མ་ཡིན་པས། དེའི་ཕྱིར་དེ་ནི་སྐྱེ་བ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་དང། བསྡུ་བ་ལས། རང་མི་

― GTD002_Page_0536 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་བ་ནི་སྐྱེ་བ་ངོ་བོ་ཉིད་མེད་པ་ཉིད་ཅེས་བྱ། ཞེས་གསུངས་ལ། འདི་ཉིད་ལས་ཀྱང། བདག་ཉིད་ཀྱིས་མ་ཡིན་པས་ཞེས་བྱ་བ་ནི་བདག་ཉིད་ཀྱི་སྐྱེ་བའོ། ཞེས་གསུངས་པའི་ཕྱིར་ན། ཤིན་ཏུ་མ་ཁྱབ་སྟེ། ལུང་དེ་རྣམས་སུ་བདག་ཉིད་ཀྱིས་མ་ཡིན་ཞེས་དང། རང་མི་སྐྱེ་བ་ཞེས་གསུང་གི བདག་ཉིད་ལས་མི་སྐྱེ་བ་དང། རང་ལས་མི་སྐྱེ་བ་ཞེས་མ་གསུངས་པའི་ཕྱིར། དཔེར་ན་རྒྱལ་པོའི་ཕོ་བྲང་ལྟ་བུར་གཞན་གྱིས་འཁྲིད་དགོས་པ་ལ་གཞན་སུས་ཀྱང་མ་ཁྲིད་པར་ཞུགས་ན་རང་དབང་དུ་ཞུགས་པའམ་རང་ཉིད་ཞུགས་ཞེས་ཟེར་བ་བཞིན། རྒྱུ་རྐྱེན་ཡོད་མེད་གང་ལ་མ་ལྟོས་པར་རང་ཉིད་རང་དབང་དུ་སྐྱེ་བ་ལ་འདོད་རྒྱལ་གྱིས་སྐྱེ་བའམ་ངོ་བོ་ཉིད་ཀྱིས་སྐྱེ་བ་ཞེས་ཟེར་ཞིང། དེ་རྒྱུ་མེད་ལས་སྐྱེ་ཚུལ་རྒྱང་འཕེན་གྱི་འདོད་པ་ལྟ་བུ་ཡིན། མཐའ་བཞིའི་ནང་གི་བདག་སྐྱེ་ནི་རྒྱུ་རྐྱེན་ཞིག་ལ་ལྟོས་པ་གཞིར་བཞག་སྟེ། རང་དང་ངོ་བོ་གཅིག་པའི་རྒྱུ་ལས་སྐྱེའམ་ངོ་བོ་ཐ་དད་པའི་རྒྱུ་ལས་སྐྱེ་དཔྱད་དེ་ངོ་བོ་གཅིག་པའི་རྒྱུ་ལས་སྐྱེ་བར་བཞག་པ་གྲངས་ཅན་པའི་ལུགས་ལྟ་བུ་ཡིན་པས་ཆེས་མི་འདྲ་བའི་ཕྱིར། དེས་ན་སྐྱེ་བ་ངོ་བོ་ཉིད་ཅེས་པ་གཞན་དབང་གཞན་དབང་ལས་སྐྱེ་བ་ལྟ་བུར་འདོད་མཁན་དེས་ངོ་བོ་ཉིད་ཀྱི་སྐྱེ་བ་ཞེས་པ་བདག་སྐྱེ་ལ་བྱེད་འདོད་པར་སྣང་མོད། བདག་སྐྱེའང་བུམ་པ་བུམ་པ་ལས་སྐྱེ་བ་ལ་མི་ཟེར་གྱི། རང་དང་བདག་ཉིད་གཅིག་པའི་རྒྱུ་ལས་སྐྱེ་བ་ལ་ཟེར་རོ། །འོན་ཀྱང་བྱེ་སྨྲས་རང་དང་བདག་ཉིད་གཅིག་པའི་རྒྱུ་ལས་སྐྱེ་བ་ཁས་ལེན་པ་ནི་དུས་མཉམ་ལ་བསམ་གྱི། ས་བོན་གྱི་དུས་ན་མྱུ་གུའང་མངོན་པར་མི་གསལ་བའི་ཚུལ་གྱིས་ཡོད་པ་དེ་འདྲ་མི་འདོད་པས་བདག་སྐྱེའི་དོན་མེད་དོ། །རྒྱུ་འབྲས་གཅིག་གཅིག་གི་

― GTD002_Page_0537 ―

^{[མ་དཔེ་གཟིགས་ན་འདིར་གནོན།]}

[Full Size]

དུས་ན་དེ་དང་དེའི་ངོ་བོར་མེད་ན་སེམས་ཅན་སུའང་སངས་རྒྱས་ཀྱི་ངོ་བོར་གྲུབ་དུས་མེད་དགོས་པས། དེ་ལྟར་ཡོད་ཀྱང་གྲངས་ཅན་དང་མི་མཚུངས་ཏེ། འདིར་དེའི་ཚེ་དེ་ཡིན་པ་ཙམ་ལ་བསམ་ཞིང། གྲངས་ཅན་གྱིས་མྱུ་གུའི་དུས་ན་ཡོད་པའི་མྱུ་གུའི་རང་བཞིན་དེ་ག་མྱུ་གུའི་རྒྱུ་དུས་ནའང་ཡོད་དགོས་ཀྱི། གཞན་དུ་འབྲེལ་མེད་པ་ལས་འབྱུང་བས་བྱེ་མ་ལས་ཀྱང་སྣུམ་འབྱུང་བར་ཐལ་བ་འཕེན་པ་སོགས་རྣམ་འགྲེལ་ལེའུ་དང་པོར། གལ་ཏེ་ལྡོག་པ་སྤངས་པ་ཡི། །ཞེས་སོགས་ལྟར་ཡིན་པས་འདི་དང་ཆེས་མི་མཚུངས་སོ། །འདིར་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་ཞེས་འབྱུང་བས་འདུས་མ་བྱས་རྣམས་ཀྱང་ཆོས་རྣམས་ཞེས་པའི་དངོས་བསྟན་ཙམ་ཡིན་ལ། སྐྱེ་བ་ངོ་བོ་ཉིད་མེད་པའི་དོན་ཚང་མི་དགོས་ཞེས་ཡིག་ཆའི་སྒྲས་ཟིན་ལ་གསུངས་ཀྱང། འོག་ཏུ་འདུས་མ་བྱས་ལ་གཞན་དབང་དང་སྐྱེ་བ་ངོ་བོ་ཉིད་མེད་པ་བཏགས་པ་ཙམ་འཇོག་ཚུལ་རིགས་འགྲེ་སྦྱོར་དགོས་སམ་དཔྱད་པར་བྱའོ། །ཞེས་ཁ་ཚོན་མ་བཅད་པའི་དགོངས་པ་བཙལ་དགོས་སོ། །ཡང་ཁ་ཅིག་ན་རེ། ཡིག་ཆར་སྐྱེ་བ་ངོ་བོ་ཉིད་མེད་པའི་དོན་རང་གི་མཚན་ཉིད་ཀྱིས་གྲུབ་པའི་སྐྱེ་བ་མེད་པ་ལ་བྱེད་པར་ཐལ། ངོ་བོ་ཉིད་མེད་པར་སྨྲ་བ་ཐལ་རང་གཉིས་ཀྱིས་དེ་ལྟར་བཤད་པའི་ཕྱིར་ན་མ་ཁྱབ། ཅེས་གསུངས་པ་མི་འཐད་པར་ཐལ། ཐལ་རང་གཉིས་ཀྱིས་དེ་ལྟར་མི་འདོད་པའི་ཕྱིར། དེར་ཐལ། ཐལ་འགྱུར་བའི་དེའི་དོན་སེམས་ཙམ་པས་བཞག་པ་ལྟར་ཡིན་པར་འདོད་པ་གང་ཞིག །རང་རྒྱུད་པ་ལྟར་ན་བདེན་གྲུབ་ཀྱི་སྐྱེ་བ་མེད་པ་ལ་བྱེད་དགོས་ཀྱི། རང་མཚན་གྱིས་གྲུབ་པའི་སྐྱེ་བ་མེད་ན་སྐྱེ་བ་གཏན་མེད་

― GTD002_Page_0538 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་དགོས་པའི་ཕྱིར་ཟེར་ན། སྔ་མ་མ་གྲུབ་ཅིང་ཕྱི་མ་མ་ཁྱབ་བོ། །བྱས་པ་ལ། དང་པོ་གྲུབ་སྟེ། ཐལ་འགྱུར་བ་རྣམས་དགོངས་འགྲེལ་ལས་གསུངས་པའི་ངོ་བོ་ཉིད་མེད་པ་གསུམ་གྱི་དོན་སེམས་ཙམ་པས་བཤད་པ་ལྟར་ཡིན་པར་བཞེད་པའི་ཕྱིར་ན། མ་ཁྱབ་སྟེ། དེས་དགོངས་འགྲེལ་སེམས་ཙམ་པའི་རང་གཞུང་དུ་བཞེད་པས། དེ་ལས་གསུངས་པའི་མཚན་ཉིད་གསུམ་དང་ངོ་བོ་ཉིད་མེད་པ་གསུམ་གྱི་འཇོག་ཚུལ་སེམས་ཙམ་པ་རྣམས་ཀྱིས་འདོད་པ་ལྟར་ཡིན་ཀྱང། རང་ལུགས་དེ་དང་སྒོ་མི་བསྟུན་པར་འཇོག་དགོས་པའི་ཕྱིར། འཇུག་པ་རང་འགྲེལ་ལས། འཕགས་པ་བློ་གྲོས་མི་ཟད་པ་ལ་སོགས་པའི་མདོ་སྡེ་དག་ལས་རྒྱ་ཆེར་བསྟན་པའང་རྟོགས་པར་བྱའོ། །ཕྱོགས་ཙམ་ཞིག་ནི་བརྗོད་པར་བྱ་སྟེ། ཞེས་སོགས་དང། དགོངས་པ་རབ་གསལ་ལས། དགོངས་འགྲེལ་ལས་ངོ་བོ་ཉིད་གསུམ་བཤད་པ་དྲང་དོན་དུ་འགྲེལ་ན་རང་ལུགས་ཀྱིས་དེ་གསུམ་འཇོག་ཚུལ་ཇི་ལྟར་ཡིན་སྙམ་པ་ལ་དེའི་ཕྱོགས་ཙམ་སྟོན་པའོ། །ཞེས་གསུངས་ཤིང། འདི་ཉིད་ལས་ཀྱང། དགོངས་འགྲེལ་གྱི་མཚན་ཉིད་གསུམ་གྱི་རྣམ་གཞག་རྣལ་འབྱོར་སྤྱོད་པའི་ལུགས་སུ་འཆད་ན། ཞེས་དང། དགོངས་འགྲེལ་གྱིས་བཞག་པ་དང་མི་མཐུན་ཡང་ཏིང་ངེ་འཛིན་རྒྱལ་པོ་དང་བློ་གྲོས་མི་ཟད་པས་བསྟན་པ་དང་མཐུན་ནོ། །ཞེས་གསུངས་པའི་ཕྱིར། དེ་ལྟར་ན་དགོངས་འགྲེལ་ལས་གསུངས་པའི་སྐྱེ་བ་ངོ་བོ་ཉིད་མེད་པའི་དོན་རང་དབང་དུ་མི་སྐྱེ་བ་ལ་སེམས་ཙམ་པས་འདོད་པ་ལྟར་ཡིན་ཀྱང། ཐལ་འགྱུར་བ་རང་ལུགས་ཀྱི་སྐྱེ་བ་ངོ་བོ་ཉིད་མེད་པའི་དོན་ནི། མ་དྲོས་པས་ཞུས་པ་ལས།

― GTD002_Page_0539 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །ཞེས་དང། ལང་གཤེགས་ལས། བློ་གྲོས་ཆེན་པོ། རང་བཞིན་གྱིས་མ་སྐྱེས་པ་ལ་དགོངས་ནས་ངས་ཆོས་ཐམས་ཅད་མ་སྐྱེས་པར་གསུངས་སོ། །ཞེས་དང། ཤེར་ཕྱིན་བརྒྱ་ལྔ་བཅུ་པར་ཡང། ཆོས་རྣམས་ཐམས་ཅད་སྟོང་པ་སྟེ། །རང་བཞིན་མེད་པའི་ཚུལ་གྱིས་སོ། །ཞེས་སོགས་ལ་བརྟེན་ནས་རང་བཞིན་གྱིས་སྐྱེ་བ་མེད་པ་ལ་བྱེད་པས་འདིར་ཡང་དེ་ཉིད་གསུངས་པ་ཡིན་ནོ། །དེ་ལྟར་མིན་ན་ཐལ་འགྱུར་བའི་ལུགས་ལ་དགོངས་འགྲེལ་ངེས་དོན་གྱི་མདོ་ཡིན་པར་ཐལ། དེས་རང་གི་མཚན་ཉིད་ཀྱིས་གྲུབ་པའི་ངོ་བོ་ཉིད་མེད་པ་དང། རང་བཞིན་གྱིས་སྐྱེ་བ་མེད་པ་ལ་སོགས་གཙོ་བོར་དངོས་སུ་སྟོན་པའི་ཕྱིར། འདོད་མི་ནུས་ཏེ། གྲུབ་མཐའ་རྩ་བར། ཐོག་མཐའ་དྲང་དོན་བར་བ་ངེས་པའི་དོན། །ཞེས་གསུངས་པའི་ཕྱིར། གོང་གི་རྟགས་ཟུར་གཉིས་པའང་མི་འཐད་དེ། རང་རྒྱུད་པ་རྣམས་མདོ་སྡེ་དགོངས་འགྲེལ་རང་གཞུང་དུ་བྱེད་པས་དེའི་སྐྱེ་བ་ངོ་བོ་ཉིད་མེད་པའི་དོན་ཡང་སེམས་ཙམ་པ་དང་མི་འདྲ་བར་བདེན་གྲུབ་ཀྱི་སྐྱེ་བ་མེད་པ་ལ་བྱེད་ཅིང། རང་རྒྱུད་པའི་གཞུང་རྣམས་སུ་བདེན་གྲུབ་ལ་རང་བཞིན་གྱིས་གྲུབ་པའི་མིང་གིས་བཤད་པའང་མང་བས་དེ་དང་བསྟུན་ནས་བཏགས་པ་ཙམ་ཡིན་པའི་ཕྱིར། མདོ་སྡེ་སྤྱོད་པའི་ཐད་ཀྱི་ལེགས་བཤད་སྙིང་པོ་ལས། གཞན་དབང་བདེན་པར་གྲུབ་ན་ཇི་ལྟར་སྣང་བ་ལྟར་གྲུབ་དགོས་པས་སྒྱུ་མ་བཞིན་དུ་མདོ་ལས་གསུངས་པ་མི་འཐད་པར་བཞེད་པས་དེ་རང་བཞིན་གྱིས་སྟོང་པ་དགོངས་འགྲེལ་གྱི་དོན་དུ་འཆད་པའོ། །ཞེས་དང། རྣལ་འབྱོར་སྤྱོད་པའི་ཐད་ལས་

― GTD002_Page_0540 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང། སྐྱེ་བ་ངོ་བོ་ཉིད་མེད་པར་བཤད་པ་ནི་མཁས་པ་རྣམས་བརྟེན་ནས་འབྱུང་བ་གང་ཡིན་པ་དེ་རང་བཞིན་སྟོང་པ་ཉིད་དོ་ཞེས་འདོད་པས། ཞེས་གསུངས་པའི་ཕྱིར། དེས་ན་རང་བཞིན་གྱིས་མེད་པ་ཞེས་བཤད་ཚད་ཐལ་འགྱུར་བ་ལྟར་གྱི་དགག་བྱ་ཕྲ་མོ་དེར་བྱེད་མི་དགོས་ཏེ། འདི་ཉིད་ལས། ཐ་སྙད་དུ་ཡོད་པ་ལའང་དེའི་ངོ་བོ་ཉིད་དང་རང་བཞིན་དང་དེའི་རང་གི་མཚན་ཉིད་སོགས་སུ་ཐལ་འགྱུར་བའི་གཞུང་ནས་བཤད་པའང་མང་ལ། རང་གི་ངོ་བོ་ཉིད་ཀྱིས་མ་གྲུབ་པ་དང་ངོ་བོ་ཉིད་ཀྱིས་མ་སྐྱེས་པ་དང་རྫས་སུ་མ་གྲུབ་པ་ལ་སོགས་པ་སློབ་དཔོན་འདིའི་གཞུང་ནའང་མང་བས་དབྱེ་དཀའ་བར་སྣང། ཞེས་གསུངས་པའི་ཕྱིར། སྐབས་འདིར་རྗེ་བདག་ཉིད་ཆེན་པོ་དང་ཀུན་མཁྱེན་བླ་མས་རང་བཞིན་མེད་པ་ཞེས་གསུངས་པ་ནི་གཞན་གྱི་ཤན་ཤོར་བ་མིན་གྱི། རང་རྒྱུད་པའི་རང་གཞུང་མང་པོར་དེ་ལྟར་གསུངས་པ་ལ་བརྟེན་པ་ཡིན་ཅིང། དེ་དག་གིས་དེ་ལྟར་གསུངས་པ་ནི་མདོ་ལས་རང་བཞིན་གྱིས་སྐྱེ་བ་མེད་པར་གསུངས་པ་རྣམས་བདེན་གྲུབ་ཀྱི་སྐྱེ་བ་མེད་པའི་དོན་དུ་དྲངས་པའི་ཆེད་ཡིན་པའི་ཕྱིར། འདི་ཉིད་ལས། མདོ་གཞན་ལས་ངོ་བོ་ཉིད་ལས་སྐྱེ་བ་དང་རང་བཞིན་གྱིས་སྐྱེ་བ་མེད་པར་གསུངས་པ་དང་དོན་གཅིག་ཏུ་སློབ་དཔོན་འདི་བཞེད་ལ། དེ་ཉིད་དོན་དམ་པར་སྐྱེ་བ་མེད་པའི་དོན་དུ་བཞེད་དོ། ཞེས་གསུངས་པའི་ཕྱིར། དེས་ན་བདག་ཉིད་ཆེན་པོ་རྣམས་ཀྱིས་དོན་དམ་པར་སྐྱེ་བ་མེད་པ་ལ་རང་བཞིན་གྱིས་སྐྱེ་བ་མེད་པའི་སྒྲས་བསྟན་པ་ནི། མདོའི་སྒྲས་ཟིན་གྱི་དོན་གཞན་དུ་འགྲེལ་པའི་ཚུལ་རྟོགས་པའི་ཕྱིར་ཡིན་པར་ཤེས་པར་བྱའོ། །དོན་དམ་པ་ངོ་བོ་ཉིད་མེད་པ་ལ་འཇོག་ཚུལ་གཉིས་གསུངས་པའི་དོན་དམ་དངོས་ནི་ཕྱི་མ་ཡིན་ལ། སྔ་མ་ནི་

― GTD002_Page_0541 ―

^{[མ་དཔེ་གཟིགས་ན་འདིར་གནོན།]}

[Full Size]

དོགས་པ་གཅོད་པའི་ཡན་ལག་ཙམ་ཡིན་ནོ་བྱས་པ་ལ། ཁ་ཅིག་ན་རེ། འཇོག་ཚུལ་དང་པོའི་དོན་དམ་པ་ངོ་བོ་ཉིད་མེད་པའང་སྟོང་ཉིད་ཡིན་པར་ཐལ། གཞན་དབང་བར་ཆད་མེད་ལམ་གྱི་གཟིགས་ངོར་མ་གྲུབ་པ་སྟོང་ཉིད་ཡིན་པའི་ཕྱིར་ན་མ་ཁྱབ། དམིགས་པ་མཐར་ཐུག་ཏུ་མ་གྲུབ་པ་དེའི་དོན་ཡིན་པའི་ཕྱིར་ནའང་མ་ཁྱབ། འོ་ན་གཞན་དབང་དོན་དམ་བདེན་པར་མ་གྲུབ་པ་སྟོང་ཉིད་ཡིན་པར་ཐལ། ཡེ་ཤེས་དམ་པའི་དོན་ཞེས་པ་དེ་ཡིན་ཕྱིར། ཁྱབ་པ་འགྲིག །འདོད་མི་ནུས་ཏེ། གཞན་དབང་དོན་དམ་བདེན་པ་དང་སྟོང་ཉིད་དུ་འཛིན་པའི་བདག་འཛིན་མི་སྲིད་ཅིང། དེ་མ་ཡིན་པར་རྟོགས་པ་ལ་སྟོང་ཉིད་རྟོགས་མི་དགོས་ལ། གཞན་དབང་ཕྱི་རོལ་དོན་དུ་གྲུབ་མ་གྲུབ་དཔྱད་བཟོད་དུ་མདོ་སྡེ་པས་ཀྱང་འཛིན་ཅིང། དེའི་སྟོང་པ་རྟོགས་པའང་སྟོང་ཉིད་རྟོགས་དགོས་པས་མི་མཚུངས་པའི་ཕྱིར། གཞན་དབང་རྣམ་དག་ལམ་གྱི་དམིགས་པ་མཐར་ཐུག་ཏུ་འགྱུར་སྙམ་པའི་དོགས་པ་ཆེ་ལུགས་ཀྱང་ཀུན་མཁྱེན་ཆོས་འབྱུང་གི་གསུང་ལྟར་ན་འདིའི་དོགས་པ་ཐལ་རང་གཉིས་ལ་འབྱུང་བ་སྟེ། དེའང་སེམས་ཙམ་པར་གཞན་དབང་རྣམ་དག་ལམ་གྱི་དམིགས་པར་ཁས་བླངས་པའི་སྟེང་ནས་བདེན་གྲུབ་ཀྱི་ཁས་ལེན་ཡོད་པས། དེའི་དམིགས་པར་བདེན་པར་གྲུབ་ན་དེའི་དམིགས་པར་གྲུབ་པའི་གྲུབ་ལུགས་དེ་དོན་གྱི་སྡོད་ལུགས་མཐར་ཐུག་ཏུ་འགྲོ་དགོས་པས་དམིགས་པ་མཐར་ཐུག་ལས་འོས་མེད་ཅིང། ཀུན་བཏགས་དམིགས་པ་ཙམ་ཡིན་ཀྱང་རྫུན་པར་གྲུབ་པས་སྐྱོན་མེད་སྙམ་པ་ཡིན་ལ། ལན་དུ་དེ་གཉིས་བདེན་གྲུབ་ཏུ་མཚུངས་ཀྱང་བསྒོམས་ན་

― GTD002_Page_0542 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་འཛིན་དང་འཛིན་སྟངས་འགལ་བའི་སྒོ་ནས་སྤོང་མི་སྤོང་གི་ཁྱད་ཡོད་དེ། སྒྲ་དང་སྒྲ་མི་རྟག་པ་སྒྲ་འཛིན་མངོན་སུམ་གྱི་སྣང་ཡུལ་དུ་མཚུངས་ཀྱང་རང་ལ་དམིགས་ན་རྟག་འཛིན་ལྡོག་མི་ལྡོག་གི་ཁྱད་ཡོད་པ་དང་འདྲ་བར་གསུངས་ཏེ་ལེགས་པར་བཤད་པའོ། །སྣང་ཡུལ་ལ་ཞིབ་ཆ་དགོས། འདི་ཉིད་ལས་སྒྲ་མི་རྟག་པ་ལ་དམིགས་པས་སྒྲ་རྟག་འཛིན་ལྡོག་ཀྱང་སྒྲ་ལ་དམིགས་པས་དེ་མི་ལྡོག་པ་དཔེར་བཀོད་པའང་སྒྲ་དང་སྒྲ་མི་རྟག་པ་གཉི་ག་དེའི་ཡུལ་ཡིན་པའང་མཚུངས། བདེན་པར་གྲུབ་པའང་མཚུངས་ཀྱང། བསྒོམས་པས་རྟག་འཛིན་ལྡོག་ནུས་མི་ནུས་ཀྱི་ཁྱད་ཡོད་པ་དཔེར་བྱས་པ་ཡིན་ནོ། །ཁ་ཅིག །དེའི་རྒྱུ་མཚན་ཡོད་དེ། ཆུ་ནང་དུ་ཉི་ཟེར་ཕོག་པའི་འོད་རྩིག་ངོས་སུ་ཐོལ་གྱིས་བྱུང་བ་ན་དེ་ནས་ཤར་བའི་ཉམས་འབྱུང་ཡང་དོན་ལ་ཆུའི་རང་མདངས་ཡིན་པ་ལྟར། དོན་དམ་གཏན་ལ་འབེབ་པ་ན་ཕྱི་རོལ་གྱི་ཡུལ་སྣང་རགས་པ་ལོག་པའི་ཚེ་སེམས་ལས་ལོགས་སུ་མཐོང་རྒྱུ་གཞན་མེད་པས་སེམས་དོན་དམ་དཔྱོད་པའི་རྙེད་དོན་མཐར་ཐུག་ཏུ་འགྱུར་སྙམ་པའི་དོགས་པ་ཆེ་ལ། སེམས་ཙམ་པའི་གཞུང་རྣམས་སུ། ཡང་དག་མ་ཡིན་ཀུན་རྟོག་ཡོད། །ཅེས་པ་ལྟ་བུ་གཞན་དབང་ངོས་འཛིན་པའི་ཚེ་སེམས་གཙོ་བོར་བྱས་པ་མང་བས་གཞན་དབང་རྣམ་དག་ལམ་གྱི་དམིགས་པ་མཐར་ཐུག་ཏུ་འགྱུར་སྙམ་པའི་དོགས་པ་ཆེ་ཞེས་པའི་གཞན་དབང་ཡང་སེམས་ལ་བྱེད་ཟེར་རོ། །མི་འཐད་དེ། སྤྱིར་སེམས་ཀྱི་ངོ་བོ་ཙམ་མཐོང་བ་དེ་ལ་སེམས་ཙམ་གྱི་ལྟ་བ་རྙེད་པར་འདོད་མཁན་དང། དེར་མ་ཟད་དབུ་མའི་ལྟ་བ་མཐར་ཐུག་དང་འོད་གསལ་ཕྱག་རྒྱ་ཆེན་པོའི་ལྟ་བའང་དེ་

― GTD002_Page_0543 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ངོ་སྤྲོད་བྱེད་པའི་བོད་སྔ་ཕྱི་མང་པོ་བྱུང་མོད་ཀྱང། སེམས་ཙམ་པ་ལ་དེ་ལྟ་བུའི་ཁས་ལེན་མེད་པས། དེའི་ལུགས་ལ་འབྲེལ་མེད་ཀྱི་དོགས་གཅོད་དེ་ལྟ་བུ་མདོ་ལས་གསུངས་པའི་གནས་མེད་པའི་ཕྱིར། དེར་ཐལ། དགོངས་འགྲེལ་ལས། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ཡོངས་སུ་གྲུབ་པའི་མཚན་ཉིད་ལགས། ཞེས་དགག་བྱ་བཅད་ཙམ་གྱི་ཆོས་ཉིད་ཁོ་ན་རྣམ་དག་ལམ་གྱི་དམིགས་པར་གསུངས་པའི་ཕྱིར་དང། ཐེག་བསྡུས་ལས། མི་ཞིག་མིག་ནི་བཙུམས་པ་ལྟར། །རྣམ་རྟོག་མེད་པའི་ཤེས་དེ་འདྲ། །ཞེས་པ་འཕགས་པའི་མཉམ་གཞག་ཡེ་ཤེས་ལ་དགག་བྱའི་སྟོང་པ་ཙམ་ལས་མི་འཆར་བས་སྣང་མེད་དུ་བཤད་པའི་ཕྱིར། ཉན་ས་ལས་ཀྱང། དེའི་ཚེ་སེམས་དགག་པ་ལྟ་བུ་སྣང་མོད་ཀྱི། ཞེས་སྦྱོར་ལམ་ལ་བཤད་ན་མཐོང་ལམ་ལྟ་ཅི་སྨོས་པའི་ཕྱིར་ཏེ། ཐེག་བསྡུས་ཀྱི། ཤེས་བྱའི་གནས་དང་མཚན་ཉིད་དེར་འཇུག་དང། །ཞེས་པའི་འཇུག་ཚུལ་ལ། དྲོད་རྩེ་གཉིས། བཟོད་མཆོག་གཉིས། མཐོང་ལམ་རྣམས་སུ་འཇུག་ཚུལ་མི་འདྲ་བ་གསུམ་སོ་སོར་བཤད་པ་ངོས་འཛིན་རྒྱུ་ཡོད་པའི་ཕྱིར། རིན་ཆེན་དོན་གྲུབ་ཀྱི་དྲང་ངེས་རྣམ་འབྱེད་ལས། ཆོས་ཐམས་ཅད་ཀྱི་སྟེང་གི་གཞན་དབང་ཆོས་ཅན། ཁྱོད་ལ་དོན་དམ་པ་ངོ་བོ་ཉིད་མེད་པ་ཞེས་བརྗོད་པའི་རྒྱུ་མཚན་ཡོད་དེ། ཆོས་རྣམས་ཀྱི་སྟེང་གི་སྒྲིབ་པ་ཟད་པར་བྱེད་པའི་དམིགས་པ་མཐར་ཐུག་པ་དེ་དོན་དམ་ཡིན་ལ། ཁྱོད་དམིགས་པ་དེར་མ་གྲུབ་པའི་རྒྱུ་

― GTD002_Page_0544 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་གྱིས་དེ་ལྟར་བརྗོད་པའི་ཕྱིར་ཞེས་བཤད་དོ། །སྔ་མ་མང་པོས་ཆོས་ཐམས་ཅད་ཀྱི་སྟེང་གི་གཞན་དབང་ལ་རང་རང་འཛིན་པའི་ཚད་མ་ལྟ་བུ་གཞན་དབང་དངོས་གནས་རེ་དགོས་པར་འདོད་པ་དེའི་དབང་དུ་བྱས་པ་ཡིན་ན་མི་འཐད་པར་སླར་འཆད་པར་འགྱུར་ལ། ཆོས་རང་རང་དེར་བཞག་ནས་དེའི་གནས་ལུགས་གཏན་ལ་འབེབས་པའི་ཚེ་སྟོང་གཞི་རང་ཉིད་དམིགས་པ་མཐར་ཐུག་ཏུ་འགྱུར་སྙམ་པའི་དོགས་པ་ཆེ་བ་དང། ཀུན་བཏགས་ལ་དོགས་པ་ཆུང་ཞེས་པའང་ཀུན་བཏགས་སྤྱི་ཙམ་མ་ཡིན་པར་ཆོས་དེ་དང་དེའི་སྟེང་གི་ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ལ་བྱས་ན་བཤད་རུང་ཙམ་ཡིན་ཀྱང་དགོངས་པ་རྣལ་མར་མི་འགྲོ་སྟེ། དམིགས་པ་མཐར་ཐུག་ཅེས་པ་འཛིན་སྟངས་ལ་བྱེད་པས་དེའི་དམིགས་ཡུལ་ཡིན་ན་དེའི་འཛིན་སྟངས་ཀྱི་ཡུལ་དུ་འགྱུར་སྙམ་པའི་དོགས་པ་མི་ཆེ་བའི་ཕྱིར་དང། ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ནི་རིགས་པས་དགག་བྱའི་གཙོ་བོར་བཤད་པ་ལ་དེའི་བསྒྲུབ་བྱ་མཐར་ཐུག་ཏུ་འགྱུར་སྙམ་པའི་དོགས་པ་ཆུང་ངུ་ཙམ་ཡང་སྐྱེ་བའི་གནས་མེད་པའི་ཕྱིར་རོ། །ཁ་ཅིག་དེ་ལ་སྐྱོན་འཕེན་པ་ན། ཀུན་རྫོབ་རྣམས་རང་གི་སྟེང་གི་རྣམ་དག་ལམ་གྱི་དམིགས་པ་མཐར་ཐུག་ཏུ་འགྱུར་རམ་སྙམ་པའི་དོགས་པ་སེལ་དགོས་ཀྱང་ཆོས་ཉིད་ལ་དེ་མི་དགོས་ཏེ། དེ་རྣམ་དག་ལམ་གྱི་དམིགས་པ་མཐར་ཐུག་ཡིན་པའི་ཕྱིར། ཞེས་ཟེར་རོ། །དེའང་མི་འཐད་པར་ཐལ། བུམ་པའི་གནས་ལུགས་བཙལ་བའི་ཚེ་བུམ་པའི་སྟོང་ཉིད་དེའི་

― GTD002_Page_0545 ―

^{[མ་དཔེ་གཟིགས་ན་འདིར་གནོན།]}

[Full Size]

དམིགས་པ་མཐར་ཐུག་ཏུ་འགྲོའང། བུམ་པའི་སྟོང་ཉིད་ཀྱི་གནས་ལུགས་བཙལ་བའི་ཚེ་བུམ་པའི་སྟོང་ཉིད་དེའི་དམིགས་པ་མཐར་ཐུག་ཏུ་མི་འགྲོ་བའི་ཕྱིར། བྱས་པ་ལ་ཁོ་ན་རེ། སྟོང་པ་ཉིད་སྟོང་པ་ཉིད་རྟོགས་པའི་ཡེ་ཤེས་ཆོས་ཅན། སྟོང་ཉིད་ཁྱོད་ཀྱི་རྙེད་དོན་ཡིན་པར་ཐལ། ཁྱོད་སྟོང་ཉིད་རྟོགས་པའི་ཡེ་ཤེས་ཡིན་པའི་ཕྱིར་ན་འདིར་མ་ཁྱབ། འདོད་མི་ནུས་ཏེ། སྟོང་ཉིད་སྟོང་ཉིད་ཀྱི་སྟེང་གི་དམ་པའི་དོན་ནམ་དོན་དམ་པ་མ་ཡིན་པའི་ཕྱིར། དེར་ཐལ། དེའི་སྟེང་གི་ཡོངས་གྲུབ་མ་ཡིན་པའི་ཕྱིར་ཏེ། དེའི་སྟེང་གི་གཞན་དབང་ཡིན་པའི་ཕྱིར། སྒོམ་བདེའི་ཡིག་ཆ་སོགས་སུ་ཀུན་བཏགས་ལ་དོགས་པ་ཆུང་ཞིང་གཞན་དབང་ལ་དོགས་པ་ཆེ་བའི་རྒྱུ་མཚན་ཡོད་དེ། དགོངས་འགྲེལ་ལས་གཞན་དབང་སྟོང་གཞིར་བཟུང་ཡང་ཀུན་བཏགས་སོགས་འདུས་མ་བྱས་རྣམས་སྟོང་གཞིར་མ་བཟུང་བའི་ཕྱིར། ཞེས་འབྱུང་ངོ་། །འདུས་མ་བྱས་རྣམས་སྟོང་གཞིར་མ་བཟུང་བ་མི་འཐད་པར་ཐལ། དགོངས་འགྲེལ་ལས། ཁམས་བཅོ་བརྒྱད་པོ་དག་གི་ཁམས་རེ་རེ་ལའང་དེ་བཞིན་ལགས་སོ། །ཞེས་ཆོས་ཁམས་སོགས་སྟོང་གཞིར་བཟུང་སྟེ་དེ་ལ་སྒྲོ་བཏགས་པའི་ཀུན་བཏགས་དང། དེ་བཀག་པའི་སྟོང་པ་ཡོངས་གྲུབ་ཏུ་བཤད་པ་ལས་ལྷག་པའི་སྟོང་གཞིར་འཛིན་ལུགས་མེད་པའི་ཕྱིར། ཁོ་ན་རེ། དེའི་གཞན་དབང་སྟོང་གཞིར་བཟུང་བ་ཡིན་གྱི། ཁོ་རང་སྟོང་གཞིར་བཟུང་བ་མིན་ཟེར། འོ་ན། ཁམས་བཅོ་བརྒྱད་པོ་གང་ཡང་སྟོང་གཞིར་བཟུང་བར་མི་འགྲོ་བར་ཐལ། ཆོས་ཁམས་ལ་དེ་ལྟར་བསྟན་པས་ཁོ་རང་སྟོང་གཞིར་བཟུང་བར་མི་འགྲོ་བ་གང་ཞིག །དེ་དང་གཞན་རྣམས་སྟོན་ལུགས་ཁྱད་མེད་པའི་ཕྱིར། འདོད་ན། སྐབས་དོན་སྟོར་བར་འགྱུར་རོ། །ཡང་ཁ་ཅིག །གཞན་དབང་ལ་དོགས་པ་ཆེ་ལ།

― GTD002_Page_0546 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་བཏགས་ལ་ཆུང་བའི་རྒྱུ་མཚན་གཞན་དབང་གི་ཆོས་ཉིད་སྟོང་ཉིད་ཡིན་ལ། ཀུན་བཏགས་ཀྱི་ཆོས་ཉིད་སྟོང་ཉིད་མ་ཡིན་པའི་རྒྱུ་མཚན་གྱིས་ཡིན་ཟེར་བ་ནི། སྟོང་ཉིད་བཅུ་དྲུག་མེད་པར་ཐལ་བ་སོགས་ཀྱིས་འགོག་ཚུལ་དང། འདི་ལས་འཕྲོས་ཏེ་ཡིག་ཆ་རྙིང་བར། རང་རྒྱལ་གྱི་མཐོང་ལམ་བར་ཆད་མེད་ལམ་འགོག་པ་ཆོས་བཟོད་དུ་སོང་བའི་ཡུལ་ལ་འགོག་བདེན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་སྟོང་པ་འཇོག་པ་དང། འགོག་བདེན་ཕྱི་རོལ་དོན་འཛིན་གྱི་བློ་ལྷན་སྐྱེས་མེད་པ་དང། འགོག་བདེན་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་དེ་ཆོས་བཟོད་དུ་སོང་བའི་ཡུལ་ལ་མི་འཇོག་པར་བཤད་པ་གསུམ་ག་ཁས་བླངས་མི་རུང་བའི་ཚུལ་སོགས་ཡིག་ཆ་ལྟར་རོ། །འཇོག་ཚུལ་གཉིས་པའི་དོན་དམ་པ་ངོ་བོ་ཉིད་མེད་པའི་དོན་འཇོག་ཚུལ་ཡང་མི་འདྲ་སྟེ། གོང་དུ་མཚན་ཉིད་ངོ་བོ་ཉིད་མེད་ཅེས་པའི་མེད་རྒྱུའི་མཚན་ཉིད་མི་འདྲ་བ་དང། སྐྱེ་བ་ངོ་བོ་ཉིད་མེད་པའི་མེད་རྒྱུའི་སྐྱེ་བའང་རྒྱུ་མེད་ལས་སྐྱེ་བ་དང་ཆོས་བདག་གི་སྐྱེ་བ་ལ་བྱེད་ཚུལ་གྱི་ལུགས་མི་འདྲ་བ་རེ་རེ་བཀོད་པ་བཞིན། ངོ་བོ་ཉིད་མེད་པ་གསུམ་པའི་སྐབས་སུ་དོན་དམ་པའང་ཡིན་ལ། དགག་བྱའི་བདག་གི་ངོ་བོ་ཉིད་བཀག་ཙམ་གྱིས་རབ་ཏུ་ཕྱེ་བ་ཡིན་པས་དོན་དམ་པ་ངོ་བོ་ཉིད་མེད་པ་ཞེས་བཤད་པ་སེམས་ཙམ་པའི་ལུགས་དང། ཆོས་ཅན་གཞན་གྱི་སྟེང་གི་དགག་བྱ་བཀག་ཙམ་གྱི་དོན་དམ་ཡིན་པར་མ་ཟད། ཆོས་ཉིད་རང་གི་ངོ་བོའང་དོན་དམ་པར་གྲུབ་པ་མེད་པས་དོན་དམ་པ་ངོ་བོ་ཉིད་མེད་པ་ཞེས་བཤད་པ་དབུ་མ་པའི་ལུགས་གཉིས་མི་མཚུངས་པའི་ཕྱིར། འདི་ཉིད་ལས། ཡོངས་གྲུབ་འདི་ནི་ཆོས་རྣམས་ཀྱི་བདག་གི་ངོ་བོ་རྣམ་པར་བཅད་པ་ཙམ་ཡིན་པས་ཆོས་རྣམས་ཀྱི་དོན་དམ་པ་ངོ་བོ་ཉིད་

― GTD002_Page_0547 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པ་ཞེས་གསུངས་ཀྱི། དགག་པའི་རང་གི་ངོ་བོ་ལ་རང་གི་མཚན་ཉིད་ཀྱིས་གྲུབ་པ་མེད་པས་ངོ་བོ་ཉིད་མེད་པར་མི་བཞེད་པའི་ལུགས་སོ། །ཞེས་གསུངས་པའི་ཕྱིར། ཡིག་ཆར། ཐལ་རང་གཉིས་ཀྱིས་དེ་ལྟར་བཤད་ཀྱང་སྐབས་འདིར་སེམས་ཙམ་པའི་ལུགས་ཡིན་པས། ཞེས་བྱུང་བ་ལྟར། དོན་དམ་པ་ངོ་བོ་ཉིད་མེད་པའི་སྒྲ་བཤད་ཚུལ་ཕྱི་མ་འདི་ཐལ་རང་གཉི་གས་བཞེད་ཀྱང་གཙོ་བོར་ཐལ་འགྱུར་བའི་ལུགས་ཡིན་ལ། རང་རྒྱུད་པ་རྣམས་དགོངས་འགྲེལ་དང་སྒོ་བསྟུན་ནས་སྒྲ་བཤད་ཚུལ་སྔ་མའང་རང་ལུགས་སུ་ཁས་ལེན་པའི་ཕྱིར། དབུ་མ་སྣང་བ་ལས། དེའང་ཚད་མས་ཡང་དག་པར་གྲུབ་པའི་བདག་ཉིད་ཀྱིས་དོན་དམ་པ་ཞེས་ཀྱང་བྱ་ལ། ངོ་བོ་ཉིད་མེད་པས་རབ་ཏུ་ཕྱེ་བའི་ཕྱིར་ངོ་བོ་ཉིད་མེད་པ་ཉིད་ཀྱང་ཡིན་ནོ། །དེའི་ཕྱིར་འདི་ནི་དོན་དམ་པ་ངོ་བོ་ཉིད་མེད་པ་ཡིན་ནོ། །ཞེས་གསུངས་པའི་ཕྱིར། དགོངས་འགྲེལ་ལས་དོན་དམ་པ་ངོ་བོ་ཉིད་མེད་པའི་དོན་དགག་བྱ་བཅད་ཙམ་གྱི་མེད་དགག་ལ་གསལ་བར་གསུངས་ཀྱང། ཇོ་ནང་པས་དེ་ལས་བཟློག་ནས་སྒྲུབ་པ་རང་དབང་པའི་ངོ་བོ་རྟག་བརྟན་ཐེར་ཟུག་རྒྱུ་རྐྱེན་གྱིས་འདུ་མ་བྱས་པ། སྟོབས་སོགས་ཀྱི་ཡོན་ཏན་ཐམས་ཅད་རང་ཆས་སུ་ལྡན་ཞིང་འཁོར་བའི་ཆོས་ཐམས་ཅད་ཀྱིས་སྟོང་པའི་ཟག་མེད་ཡེ་ཤེས་ཤིག་ཏུ་འདོད་དེ། ངེས་དོན་རྒྱ་མཚོར། དག་པ་ཡེ་ཤེས་ཀྱི་ཀུན་གཞི་འཁོར་བའི་ཆོས་ཐམས་ཅད་ཀྱིས་སྟོང་པས་གཞན་སྟོང་རྟག་བརྟན་གཡུང་དྲུང་ཐེར་ཟུག་དང། ཞེས་དང། ཡང་དེས་བརྩམས་པའི་བཀའ་བསྡུ་བཞི་པར། ཆོས་འཁོར་གསུམ་པར་གསུངས་པའི་ཟབ་མོ་ཀུན། །ཀུན་རྫོབ་མ་ཡིན་དོན་དམ་བདེན་པ་ཡིན། །མི་རྟག་མ་ཡིན་རྟག་བརྟན་

― GTD002_Page_0548 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེར་ཟུག་ཡིན། །ཀུན་བཏགས་མ་ཡིན་ཡོངས་གྲུབ་ཡེ་ཤེས་ཡིན། །དངོས་སྨྲ་མ་ཡིན་དབུ་མ་ཆེན་པོ་ཡིན། །ཞེས་དང། རྟག་པ་འདུས་མ་བྱས་ཀྱི་ཡེ་ཤེས་དང། །རྟག་པ་འདུས་མ་བྱས་ཀྱི་རྒྱལ་བ་ལྔ། །རྟག་བརྟན་ཐེར་ཟུག་གཡུང་དྲུང་རིག་མ་ལྔ། །ཞེས་དང། ཡང་ངེས་དོན་རྒྱ་མཚོར། གང་གིས་དག་པ་ནི་ཀུན་བཏགས་གཞན་དབང་གང་ཡིན་པ་ཀུན་རྫོབ་ཀྱི་གཟུགས་ལ་སོགས་པས་དག་པ་སྟེ། ཞེས་སྙིང་པོའི་མདོ་བཅུར་གྲགས་པ་རྣམས་ཀྱི་ཚིག་རིས་ལ་འཁྲུལ་ནས་བདེ་གཤེགས་སྙིང་པོ་དེ་ཉིད་ཟག་མེད་ཡེ་ཤེས་དང། ཡོངས་གྲུབ་རྟག་བརྟན་ཐེར་ཟུག་པ་མཚན་དཔེ་སོགས་སངས་རྒྱས་ཀྱི་ཆོས་རྣམས་དང་ཡང་རང་ཆས་སུ་ལྡན་པར་འདོད་དེ། རྒྱུད་བླ་མར། ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་པ་ཟག་མེད་ཡེ་ཤེས་དངོས་སུ་འཁྲུལ་པ་ཡིན་ཞིང། དེ་ཉིད་གཟུགས་སྐུ་རྒྱལ་བ་ལྔ་སོགས་ཀྱི་བདག་ཉིད་དུ་སྨྲ་བ་ནི། འདིས་དག་པའི་བདག་ཅེས་བཏགས་པ་སྔར་གྱི་ཡེ་ཤེས་དེའི་སྟེང་དུ་ཀུན་རྫོབ་རྣམས་བཀག་པ་ན་མེད་དགག་ཙམ་མ་ཡིན་པར་ཡེ་ཤེས་དེ་ཉིད་ཡིན་པ་ལ་མཚན་དཔེས་བཀྲ་བའི་སྟོང་གཟུགས་ཀྱི་སྐུ་ཞིག་འཛིན་སྟངས་སུ་འདོད་པས། དུས་འཁོར་གྱི་ཆོས་སྐད་ཅུང་ཞིག་བསྲེས་པ་ཡིན་ཏེ། འདི་ལ་བསམ་ནས་རིན་ཆེན་ཏོག་གི་དབང་པོ་རྡོ་རྗེར། མཚན་ཉིད་ཐེག་པར་ཐུན་མོང་མ་ཡིན་པའི་སྔགས་སྦྱར་ནས་བཤད་པ་དེ་འདྲ་དོལ་པོ་པ་མ་ཡིན་པ་སྔོན་ཆད་མ་བྱུང་ཞེས་བཤད་དོ། །ཁོ་ན་རེ། དེས་ཡོངས་གྲུབ་དངོས་པོར་ཁས་ལེན་པ་མི་འཐད་པར་ཐལ། དངོས་མེད་དུ་ཁས་ལེན་པའི་ཕྱིར། དེར་ཐལ། སྟོང་ཐུན་ལས། སྟོང་གཞི་བདེ་གཤེགས་སྙིང་པོ་དངོས་མེད་དེ་ཉིད་གཞན་དབང་དངོས་པོ་འདུས་བྱས་ཀྱི་ཚོགས་ཀྱིས་སྟོང་པའི་གཞན་སྟོང་གཞུང་དེ་དག་གིས་

― GTD002_Page_0549 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་ནོ་སྙམ་དུ་བཟུང་ནས། ཞེས་གསུངས་པའི་ཕྱིར་ན། མ་ཁྱབ་སྟེ། སྤྱིར་བདེ་གཤེགས་སྙིང་པོ་དངོས་མེད་ཡིན་པ་ལ་དགོངས་པའམ། དེ་དག་གིས་དངོས་པོར་ཁས་བླངས་ཀྱང་རྒྱུ་རྐྱེན་གྱིས་འདུ་མ་བྱས་པར་འདོད་པས་དངོས་པོའི་དོན་མེད་པ་ལ་དགོངས་པའི་ཕྱིར། ཡེ་ཤེས་ཡིན་ཀྱང་རྒྱུ་རྐྱེན་གྱིས་འདུ་མ་བྱས་པར་འདོད་པའི་རྒྱུ་མཚན་ངེས་དོན་རྒྱ་མཚོར་མདོ་དྲངས་པ་ལས། སངས་རྒྱས་ཐམས་ཅད་ཀྱིས་ཀུན་ཏུ་ནན་ཏན་དུ་བཙལ་ཡང་དེ་བཞིན་གཤེགས་པའི་སྙིང་པོ་སྐྱེས་པ་མ་བརྙེས་ཏེ། སེམས་ཅན་ཐམས་ཅད་ལ་སངས་རྒྱས་ཀྱི་དབྱིངས་མ་སྐྱེས་པ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །ཞེས་ཆོས་སྐུའི་ཡོན་ཏན་ཐམས་ཅད་ཐོག་མེད་ནས་རང་ཆས་སུ་ཡོད་པས་སྔར་མེད་པ་གསར་དུ་སྐྱེ་རྒྱུ་མེད་ལ། འོན་ཀྱང་སེམས་ཅན་གྱི་དུས་ན་དྲི་མས་བསྒྲིབས་པ་དང། སངས་རྒྱས་ཚེ་སྒྲིབ་བྱེད་དང་བྲལ་བ་ཙམ་གྱི་ཁྱད་པར་ཡིན་པར་འདོད་པའི་ཕྱིར། འདི་དག་གིས་གཞི་འབྲས་ངོ་བོ་དབྱེར་མེད་དང། མཐར་ཐུག་གི་ཡོན་ཏན་འཆད་པའི་ཚེ་བྲལ་བ་དང་བསྐྱེད་པའི་འབྲས་བུ་ཞེས་བརྡ་སྦྱོར་ཚུལ་མི་འདྲ་བར་བྱེད་པའི་རྒྱུ་མཚན་ཡང་འདི་ལ་ཐུག་པ་ཡིན་ནོ། །གོང་དུ་འདོད་མི་ནུས་ཏེ། དེས་དངོས་པོར་ཁས་ལེན་པར་མ་ཟད་རྟག་དངོས་གཉི་གའི་གཞི་མཐུན་དུ་ཁས་ལེན་པའི་ཕྱིར། དེར་ཐལ། རྟག་པ་རང་བྱུང་དང་ཟག་པ་མེད་པའི་ཡེ་ཤེས་ཀྱི་ངོ་བོ་གཉི་གར་ཁས་བླངས་པས་ནང་པ་སངས་རྒྱས་པའི་ལུགས་ལས་བརྒལ་ཞིང། རང་གིས་ཚད་མར་བྱེད་རྒྱུའི་གཞུང་ཐམས་ཅད་དང་རྒྱབ་འགལ་དུ་སོང་བ་ཡིན་པའི་ཕྱིར། སྒྲ་ཚད་པ་རིན་ཆེན་རྣམ་རྒྱལ་གྱི་

― GTD002_Page_0550 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་གཤེགས་སྙིང་པོའི་མཛེས་རྒྱན་ལས། ཡེ་ཤེས་ཀྱི་ངོ་བོ་རྟག་པ་ཡིན་ཀྱང་རྐྱེན་ལ་ལྟོས་ནས་དོན་བྱེད་ན། འདི་ནི་གྲངས་ཅན་པ་དང་དཔྱོད་པ་པ་གཉིས་ཀྱི་གཞུང་བཙུགས་པ་ཡིན་པས་རིགས་པའི་དབང་ཕྱུག་རྣམ་གཉིས་ཀྱིས་རྒྱས་པར་བཀག་ཟིན་ཏོ། །ཞེས་དང། སྡོམ་གསུམ་རབ་དབྱེར། ཁ་ཅིག་གྲངས་ཅན་ལུགས་བཞིན་དུ། །ཡོད་པའི་དགེ་བ་ཞེས་བྱ་བ། །རང་བྱུང་དུ་ནི་གྲུབ་པར་འདོད། །དེ་ལ་བདེ་གཤེགས་སྙིང་པོ་ཟེར། །ཞེས་དང། ཀར་ལན་ཀླུ་སྒྲུབ་དགོངས་རྒྱན་ལས། རྣམ་འགྲེལ་ལས་བཤད་པའི་ལྟ་བ་དེ་ཐོགས་མེད་སྐུ་མཆེད་བཞེད་པའི་དབུ་མ་ཆེན་པོའི་ལྟ་བ་ཡིན་ན། རྣམ་འགྲེལ་དབུ་མ་ཆེན་པོའི་བསྟན་བཅོས་སུ་བཞེད་དགོས་ཤིང་དེ་ལྟར་བཞེད་པའང་འདུག་པས། གཟུང་འཛིན་གཉིས་མེད་ཀྱི་ཡེ་ཤེས་རྟག་དངོས་སུ་བཞེད་པ་ནང་འགལ་ཏེ། ཞེས་སོགས་གསུངས་པའི་ཕྱིར། གཞན་ཡང་ཇོ་ནང་པས་སྟོང་ཉིད་བདེན་གྲུབ་དང་སྒྲུབ་པ་རང་དབང་བར་འདོད་པར་ཐལ། དེས་བདེན་གྲུབ་བཅད་ཙམ་གྱི་མེད་དགག་ནི་སྟོང་ཉིད་དངོས་མ་ཡིན་ཆད་སྟོང་དུ་འདོད་པའི་ཕྱིར། དེར་ཐལ། དེའི་རྒྱུ་མཚན་གྱིས་འཁོར་ལོ་བར་བ་ཆད་སྟོང་དེ་ཙམ་ཞིག་བསྟན་པས་སྒྲ་ཇི་བཞིན་པ་མིན་ལ། འཁོར་ལོ་ཐ་མས་གཞན་སྟོང་བདེན་གྲུབ་བསྟན་པས་ངེས་དོན་དུ་འདོད་པའི་ཕྱིར། ཀར་ལན་ལས། ཡུམ་རྒྱས་འབྲིང་བསྡུས་གསུམ་ལས་ཆད་སྟོང་མེད་དགག་ཙམ་ཞིག་བསྟན་གྱི། སྔར་བཤད་པའི་གཞན་སྟོང་ཆེན་མོ་བདེན་གྲུབ་དེ་མ་བསྟན་པར་བཞེད་པ་དང། ཞེས་གསུངས་པའི་ཕྱིར། དེའི་རྒྱུ་མཚན་གྱིས་འཁོར་ལོ་བར་བར་བདེན་མེད་དུ་གསུང་རྒྱུའི་ཆོས་ཀྱི་ནང་ན་དོན་དམ་བདེན་པ་ཞིག་མེད་པར་འདོད་དེ། སྟོང་ཐུན་ལས། དོན་

― GTD002_Page_0551 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་མ་ཆུད་པར་ཀུན་རྫོབ་འབའ་ཞིག་རང་བཞིན་མེད་པར་བསྟན་པའོ་ཞེས་སྨྲ་བ་ནི། ཞེས་གསུངས་པའི་ཕྱིར། འདོད་ཚུལ་དེ་ནི་འདི་ཉིད་ལས། སྟོང་པ་ཉིད་དང་ཆོས་ཀྱི་དབྱིངས་དང་དེ་བཞིན་ཉིད་ལ་སོགས་པ་དོན་དམ་པའི་རྣམ་གྲངས་ཐམས་ཅད་སྨོས་ནས་དེ་དག་ལ་ངོ་བོ་ཉིད་མེད་པར་གསུངས་པས། མདོ་སྡེ་དེ་དག་ལས་ཆོས་རྣམས་ངོ་བོ་ཉིད་མེད་པར་གསུངས་པའི་ཆོས་ཀྱི་ནང་ན་དོན་དམ་མེད་དོ་ཞེས་སེམས་དང་ལྡན་པ་སུ་ཞིག་སྨྲ། ཞེས་གསུངས་པ་བཞིན་མངོན་སུམ་ལ་བསྙོན་གདེང་བ་ཁོ་ན་ཡིན་ནོ། །འདི་ལ་ཇོ་ནང་པ་ན་རེ། དེར་ཆོས་ཀྱི་དབྱིངས་སོགས་རྣམ་གྲངས་དུ་མའི་སྒོ་ནས་སྨོས་པ་དང། སྟོང་ཉིད་བཅུ་དྲུག་དང་ཉི་ཤུ་སོགས་ཀྱི་དབྱེ་བ་བྱས་ཏེ་དེ་ཐམས་ཅད་རང་བཞིན་མེད་པར་གསུངས་པ་ནི་རང་སྟོང་མེད་དགག་དེ་ཉིད་ལ་རྣམ་གྲངས་དང་དབྱེ་བ་དུ་མ་བྱས་ཏེ་བདེན་མེད་དུ་བསྟན་པ་ཡིན་གྱི། གཞན་སྟོང་ཆེན་མོ་ལ་དེ་འདྲའི་དབྱེ་བ་བྱས་ནས་རང་བཞིན་མེད་པར་བསྟན་པ་མིན་པས་ཀླན་ཀ་དེ་ཁོ་རང་ལ་མི་འཇུག་ཅེས་ཟེར་རོ། །འོན་ཀྱང་དེས་སྐྱོན་སྤོང་མི་ནུས་པར་ཐལ། དགོངས་འགྲེལ་དང་ཐོགས་མེད་སྐུ་མཆེད་ཀྱི་གསུང་སྒྲ་ཇི་བཞིན་པར་ཁས་ལེན་ཀྱང། ཤེར་མདོ་ལས་སྟོང་ཉིད་བདེན་མེད་དུ་མ་བསྟན་པར་འདོད་པ་ནང་འགལ་ཁོ་ན་ཡིན་པའི་ཕྱིར། དེར་ཐལ། དགོངས་འགྲེལ་སོགས་ནས་གསུངས་པའི་དོན་དམ་པ་ངོ་བོ་ཉིད་མེད་པ་དང་ཡོངས་གྲུབ་དེ་ཁོ་རང་ལུགས་ཀྱི་གཞན་སྟོང་ཆེན་མོ་ལ་བྱེད་ན། ངས་ཆོས་རྣམས་ཀྱི་ངོ་བོ་ཉིད་མེད་པ་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་

― GTD002_Page_0552 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་དང། སྐྱེ་བ་ངོ་བོ་ཉིད་མེད་པ་ཉིད་དང། དོན་དམ་པ་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ། །ཞེས་པའི་སྐབས་ཀྱི་དེ་ལ་དགོངས་ནས་ངོ་བོ་ཉིད་མེད་པར་སྟོན་པའི་མདོ་འཁོར་ལོ་བར་བ་ལས་འོས་མེད་པའི་ཕྱིར། གལ་ཏེ་གཞན་སྟོང་ཆེན་མོ་འདིར་བསྟན་འཁོར་ལོ་བར་བའི་དགོངས་གཞི་ཡིན་ཀྱང། འཁོར་ལོ་བར་བས་དེ་རང་བཞིན་མེད་པར་སྟོན་མི་དགོས་སྙམ་ན། གཞན་སྟོང་ཆོས་ཅན། འཁོར་ལོ་བར་བས་ཁྱོད་བདེན་མེད་དུ་གསུངས་པར་ཐལ། འཁོར་ལོ་བར་བ་ལས་ཁྱོད་བདེན་མེད་དུ་གསུངས་པའི་དགོངས་གཞི་ཐུན་མོང་མ་ཡིན་པ་འཇོག་རྒྱུ་ཡོད་པའི་ཕྱིར། དེར་ཐལ། ཡོངས་གྲུབ་དོན་དམ་པ་ངོ་བོ་ཉིད་མེད་པ་དེ་ཡིན་པའི་ཕྱིར། དེར་ཐལ། ཀུན་བཏགས་རྣམས་རང་བཞིན་མེད་པར་གསུངས་པ་དེ་མཚན་ཉིད་ངོ་བོ་ཉིད་མེད་པ་ལ་དགོངས་པ་དང། གཞན་དབང་ངོ་བོ་ཉིད་མེད་པར་གསུངས་པ་དེ་སྐྱེ་བ་ངོ་བོ་ཉིད་མེད་པ་ལ་དགོངས་པ་དང། ཡོངས་གྲུབ་ངོ་བོ་ཉིད་མེད་པར་གསུངས་པ་དེ་དོན་དམ་པ་ངོ་བོ་ཉིད་མེད་པ་ལ་དགོངས་ཞེས་མཚན་ཉིད་གསུམ་སོ་སོའི་སྟེང་ནས་ངོ་བོ་ཉིད་མེད་ལུགས་ཐུན་མོང་མ་ཡིན་པ་རེ་སྦྱར་ནས་དེའི་དགོངས་གཞིར་འཇོག་དགོས་པ་གང་ཞིག །གཞན་སྟོང་ཆེན་མོ་ནི་དོན་དམ་པ་ངོ་བོ་ཉིད་མེད་པ་དང་སྦྱོར་རྒྱུའི་ཡོངས་གྲུབ་དེ་ཡིན་པར་ཁྱོད་རང་གིས་ཁས་བླངས་པའི་ཕྱིར། རྟགས་ཟུར་སྔ་མ་གྲུབ་སྟེ། སུམ་ཅུ་པ་ལས། ངོ་བོ་ཉིད་ནི་རྣམ་གསུམ་གྱི། །ངོ་བོ་ཉིད་མེད་རྣམ་གསུམ་ལ། །དགོངས་ནས། ཞེས་གསུངས་པའི་ཕྱིར། ཁྱབ་སྟེ། ངོ་བོ་ཉིད་ནི་རྣམ་གསུམ་གྱི། །ངོ་བོ་ཉིད་མེད་རྣམ་གསུམ་ཞེས་པ་མཚན་ཉིད་ངོ་བོ་ཉིད་ལ་སོགས་པ་གསུམ་གྱི་ངོ་བོར་མ་གྲུབ་པའི་ངོ་བོ་ཉིད་

― GTD002_Page_0553 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པ་གསུམ་ཞེས་ཁ་ཅིག་ཟེར་ཡང། དེ་ལྟར་མ་ཡིན་པར་གཞན་དབང་ལ་སོགས་པའི་མཚན་ཉིད་གསུམ་གྱི་ངོ་བོ་ཉིད་དེ་རང་རང་ལ་ཐུན་མོང་མ་ཡིན་པའི་ངོ་བོ་ཉིད་མེད་ལུགས་རེ་ཡོད་པ་དེ་གསུམ་དང་སྦྱར་ནས་དགོངས་པ་ལེན་དགོས་ཀྱི། ཁྱད་མ་ཕྱེ་བར་རང་བཞིན་གྱིས་གྲུབ་པའི་ངོ་བོ་ཉིད་མེད་མཉམ་དུ་འཁོར་ལོ་བར་བས་གསུངས་པ་ལྟར་ཁས་ལེན་མི་རུང་ཞེས་པའི་དོན་ཡིན་པའི་ཕྱིར། སུམ་ཅུ་པའི་འགྲེལ་པ་བློ་བརྟན་གྱིས་མཛད་པ་ལས། རང་རང་གི་མཚན་ཉིད་ཀྱིས་ཡོད་པ་ལྟར་གྱུར་པའི་ངོ་བོ་ཉིད་དོ། །ངོ་བོ་ཉིད་མེད་པར་རྣམ་པ་གསུམ་སྟེ། ཞེས་དང། དུལ་བ་ལྷས་མཛད་པའི་འགྲེལ་བཤད་ལས། གཞན་གྱི་དབང་ལ་སོགས་པའི་ངོ་བོ་ཉིད་རྣམ་པ་གསུམ་གྱིས་ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས། ཞེས་གསུངས་པའི་ཕྱིར། ཁྱབ་སྟེ། འདིས་སྒྲུབ་ཕྱོགས་ནས་གཞན་དབང་སོགས་ངོ་བོ་ཉིད་གསུམ་གྱི་སྒྲས་བསྟན་པ་དེ་དགག་ཕྱོགས་ནས་ངོ་བོ་ཉིད་མེད་པ་གསུམ་དུ་འཇོག་དགོས་ཤིང། དེའི་དགོས་པའང་འཁོར་ལོ་བར་བའི་དགོངས་པ་འགྲེལ་པའི་ཆེད་ཡིན་པའི་ཕྱིར། དེས་ན་ཡིག་ཆར་སྔ་མའི་ངོ་བོ་ཉིད་གསུམ་ཕྱི་མའི་ངོ་བོ་ཉིད་མེད་པ་གསུམ་གྱི་མཚན་གཞིར་བསྟན་པར་གསུངས་པའི་དགོངས་པའང་དེ་ཡིན་ནོ། །དེ་ལའང་ཁོ་ན་རེ། ཇོ་ནང་པའི་ལུགས་ལ་འདིར་བསྟན་འཁོར་ལོ་བར་བའི་དགོངས་གཞི་འགྲེལ་མི་དགོས་པར་ཐལ། དེའི་ལུགས་ལ་འདིར་བསྟན་འཁོར་ལོ་བར་བ་སྒྲས་ཟིན་སྒྲ་ཇི་བཞིན་པ་ཡིན་པའི་ཕྱིར། དེར་ཐལ། བར་བས་བདེན་མེད་དུ་གསུངས་རྒྱུའི་ཆོས་ཀྱི་ནང་ན་དོན་དམ་མེད་པ་གང་

― GTD002_Page_0554 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག །ཀུན་རྫོབ་ཐམས་ཅད་བདེན་མེད་དུ་ཇོ་ནང་པ་རང་གིས་ཀྱང་ཁས་ལེན་པའི་ཕྱིར་ཏེ། སྟོང་ཐུན་གྱི་ལུང་སྔར་དྲངས་པ་དེའི་ཕྱིར་ཟེར་ན། མ་ཁྱབ་སྟེ། དེར་གཟུགས་སོགས་བདེན་གྲུབ་བཀག་ཙམ་དོན་དམ་དུ་བཤད་པའི་ཆ་ནས་ཀྱང་དྲང་དོན་དུ་འགྲོ་ལ། ཆོས་ལ་བདེན་པར་གྲུབ་མ་གྲུབ་ཀྱི་དབྱེ་བ་འབྱེད་རྒྱུ་མེད་པར་མ་གྲུབ་མཉམ་དུ་བཤད་པས་ཆ་ནས་ཀྱང་དྲང་དོན་དུ་འགྲོ་བར་བསམ་པ་ཡིན་པའི་ཕྱིར། ཇོ་ནང་པས་ཆོས་ཉིད་སྒྲུབ་པ་རང་དབང་བར་བཞག་པ་ནི། དགོངས་འགྲེལ་ལས། འདུ་བྱེད་རྣམས་ཀྱི་བདག་མེད་པ་ཙམ་དང་ངོ་བོ་ཉིད་མེད་པ་ཙམ་ཉིད་དོན་དམ་པའི་མཚན་ཉིད་ཡིན་པར། ཞེས་དང། ཆོས་ཐམས་ཅད་ཀྱང་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས། ཞེས་སོགས་རང་གིས་ཁུངས་གཏུགས་སའི་མདོ་རྣམས་ལས་དགག་བྱ་རྣམ་པར་བཅད་ཙམ་གྱི་མེད་དགག་ཏུ་འཇོག་པར་གསལ་བར་གསུངས་པ་དང་རྒྱབ་འགལ་དུ་གྱུར་ཚུལ་ཡིག་ཆར་འབྱུང་བ་བཞིན་ནོ། ཁ་ཅིག་ན་རེ། འཇོག་ཚུལ་གཉིས་པའི་དོན་དམ་པ་ངོ་བོ་ཉིད་མེད་པ་ལ་ཆོས་ཀྱི་བདག་མེད་ཕྲ་མོས་ཁྱབ་ཟེར་ན། མི་འཐད་པར་ཐལ། དངོས་བསྟན་གྱི་དེ་ལ་ཆོས་ཀྱི་བདག་མེད་ཕྲ་མོ་དགོས་ཀྱང་ཤུགས་བསྟན་ལ་གང་ཟག་གི་བདག་མེད་ཕྲ་མོ་ཡོད་པའི་ཕྱིར། དེར་ཐལ། འཁོར་ལོ་དང་པོའི་དགོངས་གཞི་གང་ཟག་གི་བདག་མེད་ཀྱི་དབང་དུ་བྱས་པའི་དོན་དམ་པ་ངོ་བོ་ཉིད་མེད་པ་རྒྱས་པར་བཤད་པའི་གཞུང་ངོས་འཛིན་རྒྱུ་ཡོད་པའི་ཕྱིར། བྱས་པ་ལ་ཁོ་ན་རེ། འཇོག་ཚུལ་གཉིས་པའི་དོན་དམ་པ་ངོ་བོ་ཉིད་མེད་པ་ལ་གང་ཟག་གི་བདག་མེད་ཕྲ་མོ་མི་ཡོང་བར་

― GTD002_Page_0555 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། དེ་ལ་ཡོངས་གྲུབ་དགོས་ཤིང་གང་ཟག་གི་བདག་མེད་ཕྲ་མོ་ཡོངས་གྲུབ་མ་ཡིན་པའི་ཕྱིར། དེར་ཐལ། འཕགས་པའི་མཉམ་གཞག་ཡེ་ཤེས་ཀྱི་འཛིན་སྟངས་ཀྱི་བདག་མེད་དེ་ལ་གཉིས་ཡོད་ཀྱང་ཡོངས་གྲུབ་ནི་དེའི་ནང་གི་ཆོས་ཀྱི་བདག་མེད་གཅིག་པུ་ཡིན་པའི་ཕྱིར། དབུས་མཐའ་ལས། རྣམ་དག་སྤྱོད་ཡུལ་རྣམ་གཉིས་ཏེ། །གཅིག་པུ་ཁོ་ནར་བརྗོད་པ་ཡིན། །ཞེས་གསུངས་པའི་ཕྱིར་ན། ཤིན་ཏུ་མ་ཁྱབ་སྟེ། ལུང་དོན་དེ་ལྟར་གཏན་མ་ཡིན་པའི་ཕྱིར། དེར་ཐལ། རྣམ་དག་ལམ་གྱི་སྤྱོད་ཡུལ་ལ་དགག་བྱ་མི་འདྲ་བའི་བདག་མེད་གཉིས་ཡོད་ཀྱང། དེ་གཉིས་ཀ་མཚན་ཉིད་གསུམ་གྱི་ནང་ནས་ཡོངས་གྲུབ་གཅིག་པུར་འཇོག་དགོས་ཞེས་པའི་དོན་ཡིན་པའི་ཕྱིར། བློ་བརྟན་གྱི་དབུས་མཐའི་འགྲེལ་བཤད་ལས། རྣམ་པར་དག་པའི་སྤྱོད་ཡུལ་འདི་རྣམ་པ་གཉིས་ནི་ཡོངས་སུ་གྲུབ་པའི་ངོ་བོ་ཉིད་གཅིག་པུས་བརྗོད་དེ། ཞེས་གསུངས་པའི་ཕྱིར། ཁ་ཅིག་སྤྱོད་ཡུལ་ཞེས་པ་དམིགས་ཡུལ་ལ་བྱས་ནས་རྣམ་དག་ལམ་གྱི་སྤྱོད་ཡུལ་ལ་གཞན་དབང་ཀུན་བཏགས་གཉིས་ཡོད་ཀྱང་འཛིན་སྟངས་ཀྱི་ཡུལ་ཡོངས་གྲུབ་ཁོ་ན་ཡིན་ཟེར་བའང་གཞུང་གི་དོན་མིན་པར་འདིས་ཤེས་སོ། །གཞན་ཡང་བདག་མེད་གཉིས་ཀ་ཡོངས་གྲུབ་དང་ཆོས་དབྱིངས་སྟོང་ཉིད་སོགས་སུ་འཇོག་པ་འདྲ་བར་ཐལ། དབུས་མཐའ་ལས། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་པ་ཉིད། །ཅེས་དང། འགྲེལ་བཤད་ལས། ཡེ་ཤེས་རྣམ་པ་ཉིད་ཀྱི་ཡུལ་ནི་ཆོས་ཉིད་ཡིན་པས། ཞེས་གསུངས་པའི་ཕྱིར། གཞན་ཡང་ཁྱོད་རང་ལ་གང་ཟག་གི་བདག་མེད་ཕྲ་མོ་ཀུན་བཏགས་ཡིན་པར་ཐལ། ཡོད་པ་གང་ཞིག །

― GTD002_Page_0556 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་དབང་ཡོངས་གྲུབ་གཉིས་གང་ཡང་མ་ཡིན་པའི་ཕྱིར། འདོད་ན། བདེན་པར་མ་གྲུབ་པར་ཐལ། ཀུན་བཏགས་ཡིན་པའི་ཕྱིར། འདོད་ན། ཉན་ཐོས་ཀྱི་མྱང་འདས་བདེན་པར་མ་གྲུབ་པར་ཐལ། གང་ཟག་གི་བདག་མེད་བདེན་པར་མ་གྲུབ་པའི་ཕྱིར། ཁྱབ་སྟེ། ཉན་རང་གིས་ཆོས་ཀྱི་བདག་མེད་མི་སྒོམ་པས་དེའི་ངོ་བོར་སྒྲིབ་པ་ཟད་དོན་མེད་ཅིང། ཉན་རང་གི་མཐོང་ལམ་བར་ཆད་མེད་ལམ་ཆོས་བཟོད་དུ་སོང་བའི་ཡུལ་གྱི་བདག་མེད་དེ་བདེན་པར་མ་གྲུབ་པས་དེའི་ངོ་བོར་སྒྲིབ་པ་ཟད་པའི་འགོག་བདེན་དེའང་བདེན་པར་གྲུབ་ཚུལ་མེད་པའི་ཕྱིར། གོང་དུ་འདོད་ན། གཞན་དབང་བདེན་པར་མ་གྲུབ་པར་ཐལ། འཁོར་བ་བདེན་པར་མ་གྲུབ་པའི་ཕྱིར། དེར་ཐལ། མྱང་འདས་བདེན་པར་མ་གྲུབ་པའི་ཕྱིར། ཁྱབ་སྟེ། གཞན་དབང་ཡོངས་གྲུབ་གཉིས་བདེན་པར་གྲུབ་མཉམ་ཡིན་དགོས་པའི་རྩ་བའང་འདི་ལ་ཐུག་པའི་ཕྱིར། རྩ་ཤེ་ཊཱིཀ་ཆེན་ལས། འཕགས་པའི་ཡུལ་གྱི་རང་སྡེ་དངོས་པོར་སྨྲ་བས་ཀྱང་འཁོར་འདས་ལ་བདེན་པར་གྲུབ་མ་གྲུབ་ཀྱི་ཁྱད་པར་མི་འབྱེད། ཅེས་གསུངས་པའི་ཕྱིར་དང། འཁོར་འདས་གཉིས་གཅིག་བདེན་པར་མེད་ན་གཅིག་ཤོས་ཀྱང་བདེན་པར་མེད་དགོས་པའི་རྒྱུ་མཚན། འཁོར་མཁན་དང་གྲོལ་མཁན་གཉིས་ལ་བདེན་པར་གྲུབ་མ་གྲུབ་ཀྱི་ཁྱད་འབྱེད་ཚུལ་མེད་པའི་དབང་གིས་ཡིན་པའི་ཕྱིར། ཆོས་ཡང་དག་པར་སྡུད་པ་ལས། སྡུག་བསྔལ་ནི་འདུ་བྱས་ཏེ། རྫུན་པ་བསླུ་བའི་ཆོས་སོ་ཞེས་མ་སྨྲས་སམ། རབ་འབྱོར་གྱིས་སྨྲས་པ། རིགས་ཀྱི་བུ་སྨྲས་སོ། །བྱང་ཆུབ་སེམས་དཔའ་རྩོམ་པ་མེད་ཀྱིས་སྨྲས་པ། བཙུན་པ་རབ་འབྱོར། ཆོས་གང་རྫུན་

― GTD002_Page_0557 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཡང་དག་པ་མ་ཡིན་པ་དེ་ལ་ནི་འགོག་པ་མེད་ན། ཁྱོད་སྡུག་བསྔལ་དེ་འགོག་པར་ག་ལ་འགྱུར། །ཞེས་སོ། །བྱས་པ་ལ་ཁོ་ན་རེ། སེམས་ཙམ་པས་གང་ཟག་གི་བདག་མེད་དོན་དམ་བདེན་པར་མི་འདོད་པར་ཐལ། སྟོང་ཐུན་ལས། སེམས་ཙམ་པ་དང་དབུ་མ་རང་རྒྱུད་པ་དག་གང་ཟག་གི་བདག་མེད་དོན་དམ་བདེན་པར་མི་འདོད་ཅིང། ཞེས་གསུངས་པའི་ཕྱིར་ན། མ་ཁྱབ་སྟེ། དེ་གྲུབ་མཐའ་བཞི་པོ་གང་རུང་གིས་བདག་བཀག་པའི་སྟོང་པར་འདོད་རྒྱུའི་ཕྱག་རྒྱ་བཞིའི་ཡ་གྱལ་གྱི་བདག་མེད་ཙམ་ལ་བྱེད་པའི་ཕྱིར། ཡིག་ཆར། གང་ཟག་གི་བདག་མེད་དོན་དམ་བདེན་པའང་ཡིན་མོད། སྟོང་ཐུན་ལས་དེ་དོན་དམ་མ་ཡིན་ལ་གང་ཟག་གི་བདག་འགོག་པའི་རིགས་པ་ཀུན་རྫོབ་དཔྱོད་བྱེད་དུ་གསུངས་པ་གང་ཟག་གི་བདག་མེད་སྤྱི་ལྡོག་ལ་དགོངས་གསུངས་པའི་སྤྱི་ལྡོག་གི་དོན་ཡང་དེ་ལ་བྱེད་དགོས་སོ། །སྤྱི་ལྡོག་ཅེས་པའི་དོན་ལ་ཁ་ཅིག་རང་ལྡོག་ཟེར་བ་དང། ལ་ལ་ཕྲ་རགས་གཉིས་སུ་མ་ཕྱེ་བའི་གང་ཟག་གི་བདག་མེད་ཙམ་ལ་བྱེད་ཟེར་བ་མི་འཐད་དེ། བདག་མེད་དོན་དམ་ཡིན་ན་བདག་མེད་རང་ཉིད་དོན་དམ་ཡིན་དགོས་པའི་ཕྱིར་དང། དེ་གཉིས་སུ་མ་ཕྱེ་བའི་བདག་ཁེགས་ན་བདག་ཁེགས་དགོས་པའི་ཕྱིར་རོ། །སྒོམ་བདེའི་ཡིག་ཆ་སོགས་སུ། སྟོང་ཐུན་ལས། ཡོངས་གྲུབ་ནི་གཞན་དབང་གི་སྟེང་དུ་བདག་འཛིན་གཉིས་ཀྱིས་ཀུན་བཏགས་པ་ལྟར་གྲུབ་པས་སྟོང་པའི་དེ་བཞིན་ཉིད་དེ། ཞེས་པ་ལ་བརྟེན་ནས་གང་ཟག་གི་བདག་མེད་ཡོངས་གྲུབ་ཡིན་པ་སྟོང་ཐུན་གྱི་དགོངས་པར་བྱེད་ཅིང། ཡང་ལུགས་སྔ་མ་ལ་བརྟེན་ནས་དོན་དམ་བདེན་པ་མ་ཡིན་པར་

― GTD002_Page_0558 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་པས། དེར་དེ་བཞིན་ཉིད་དུ་གསུངས་པའང་གང་ཟག་གི་བདག་མེད་ཀྱི་དབང་དུ་བྱས་པའི་དེ་བཞིན་ཉིད་ཙམ་ཡིན་པར་བཤད་དོ། །དེ་ལ་འོ་ན། གང་ཟག་གི་བདག་མེད་ཆོས་ཅན། སྟོང་ཉིད་ཡིན་པར་ཐལ། འདུས་མ་བྱས་གང་ཞིག །བདེན་པར་གྲུབ་པའི་ཕྱིར། ཁྱབ་སྟེ། དབུས་མཐའ་ལས། ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་པོ་ཡོད་མ་ཡིན། །སྟོང་པ་ཉིད་ནི་འདི་ལ་ཡོད། །ཅེས་བདེན་གྲུབ་ལ་ཡང་དག་པ་མ་ཡིན་པའི་ཀུན་རྟོག་སྟེ་གཞན་དབང་དང་སྟོང་ཉིད་གཉིས་སུ་ཁ་ཚོན་ཆོད་པར་གསུངས་པའི་ཕྱིར། གལ་ཏེ་སྟོང་ཉིད་ཡིན་ཀྱང་དོན་དམ་ཡིན་མི་དགོས་ཟེར་ན། མི་འཐད་པར་ཐལ། དེ་ཉིད་ལས། སྟོང་པ་ཉིད་ནི་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང། །ཆོས་ཀྱི་དབྱིངས་རྣམས་རྣམ་གྲངས་སོ། །ཞེས་དེ་རྣམས་དོན་གཅིག་མིང་གི་རྣམ་གྲངས་སུ་གསུངས་པའི་ཕྱིར། གཞན་ཡང་དེ་ཆོས་ཅན། དོན་དམ་ཡིན་པར་ཐལ། མཉམ་གཞག་རྣམ་པར་མི་རྟོག་པའི་ཡེ་ཤེས་དམ་པའི་དོན་ཡིན་པའི་ཕྱིར། དེར་ཐལ། རྣམ་དག་ལམ་གྱི་དམིགས་པ་མཐར་ཐུག་ཡིན་པའི་ཕྱིར། དེར་ཐལ། ཡོངས་གྲུབ་ཡིན་པའི་ཕྱིར། ཁྱབ་སྟེ། དགོངས་འགྲེལ་ལས། རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་དེ། ཞེས་གསུངས་པའི་ཕྱིེར། གཞན་ཡང་གང་ཟག་གི་བདག་མེད་ཆོས་ཅན། དེ་བཞིན་ཉིད་ཡིན་པར་ཐལ། གང་ལ་དམིགས་ནས་ཉོན་སྒྲིབ་ཟད་པའི་འགོག་བདེན་ཐོབ་བྱེད་ཀྱི་དམིགས་པ་མཐར་ཐུག་ཡིན་པའི་ཕྱིར། ཁྱབ་སྟེ། ཀུན་བཏུས་ལས། དེ་བཞིན་ཉིད་ལ་དམིགས་

― GTD002_Page_0559 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་གང་དུ་ཟག་པ་དང་བཅས་པའི་དངོས་པོ་འགག་པ་དེ་འགོག་པའི་མཚན་ཉིད་དོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཉན་རང་གི་གཙོ་བོར་བསྒོམ་བྱའི་བདག་མེད་དེ་ཡོངས་གྲུབ་མ་ཡིན་པར་ཐལ། དེ་གཞན་དབང་ཡིན་པའི་ཕྱིར། སྟོང་ཐུན་ལས། སེམས་ཙམ་པས་གཞན་དབང་དང་ཀུན་རྫོབ་བདེན་པ་ཡིན་ན་གང་ལ་དམིགས་ནས་ཀུན་ནས་ཉོན་མོངས་པ་འཕེལ་བར་འགྱུར་བའི་དམིགས་པ་ཡིན་པས་ཁྱབ་པ་དང། གང་ལ་དམིགས་ནས་སྒྲིབ་པ་རྣམ་པར་དག་པར་འགྱུར་བའི་དམིགས་པ་ཡོངས་གྲུབ་ཁོ་ན་ཡིན་པར་ཁས་བླངས་ནས། ཉན་རང་རྣམས་ཀྱིས་ཉན་མོངས་པ་མ་ལུས་པར་སྤོང་བའི་ཡེ་ཤེས་ཀྱི་དམིགས་པ་གཞན་དབང་ཡིན་པས་ཁྱབ་ཅིང། ཡོངས་གྲུབ་ལ་དམིགས་པ་མི་སྲིད་དོ་ཞེས་སྨྲ་བ་ནི་གྲུབ་པའི་མཐའི་ནང་འགལ་བ་ཆེན་པོའོ། །ཞེས་གསུངས་པའི་ཕྱིར་ན། མ་ཁྱབ། དེ་དབུ་མ་པའི་ལུགས་འཆད་པའི་སྐབས་ཡིན་པས་དབུ་མ་པས་གཞལ་ན་གང་ཟག་གི་བདག་མེད་དེ་ཙམ་ཞིག་དོན་སྨྲས་ཀྱང་རྟོགས་པས་དེ་གནས་ལུགས་མཐར་ཐུག་པའི་ཡོངས་གྲུབ་ཏུ་སེམས་ཙམ་པས་ཀྱང་ཁས་ལེན་འོས་མེད་ལ་ཡོངས་གྲུབ་ཏུ་མི་རིགས་ཤིང་བདེན་པར་གྲུབ་ན་གཞན་དབང་ལས་འོས་མེད་པའི་རིགས་པའི་འཕུལ་གྱིས་ནང་འགལ་བསྟན་པ་ཡིན་པའི་ཕྱིར། འོན་ཀྱང་སེམས་ཙམ་པ་རང་ལུགས་ལ་རང་ལ་ནང་འགལ་མེད་དགོས་པས་དེ་རྣམ་དག་ལམ་གྱི་དམིགས་པ་དང་ཡོངས་གྲུབ་གཉི་གར་ཁས་ལེན་པ་ཡིན་ནོ། །དེ་ལྟར་མ་ཡིན་ན། ཉན་རང་གིས་གང་ལ་དམིགས་ནས་སྒྲིབ་པ་དག་པར་འགྱུར་བའི་དམིགས་

― GTD002_Page_0560 ―

^{[མ་དཔེ་གཟིགས་ན་འདིར་གནོན།]}

[Full Size]

པ་མེད་པར་ཐལ། དེ་ལ་ཡོངས་གྲུབ་དགོས་པ་གང་ཞིག །གང་ཟག་གི་བདག་མེད་ཡོངས་གྲུབ་མ་ཡིན། གང་ཟག་གི་བདག་མེད་ལས་གཞན་དུ་དེའི་དམིགས་པ་མཐར་ཐུག་འཇོག་རྒྱུ་མེད་པའི་ཕྱིར། རྟགས་ཟུར་རེ་རེ་ནས་སྟོང་ཐུན་གྱི་ལུང་དེས་འགྲུབ་བོ། །ཁ་ཅིག་ན་རེ། གང་ཟག་གི་བདག་མེད་དོན་དམ་བདེན་པ་ཡིན་ན་གྲུབ་མཐའ་བཞི་གང་རུང་གི་ཕྱག་རྒྱའི་ཡ་གྱལ་ལ་འདོད་རྒྱུའི་བདག་མེད་དེའང་དོན་དམ་ཡིན་དགོས་པར་ཐལ། མང་བཀུར་སྡེ་ལྔས་ཀྱང་དེའི་ཡ་གྱལ་གྱི་བདག་མེད་དེ་རང་རྐྱ་ཐུབ་པའི་རྫས་ཡོད་ཀྱི་བདག་གིས་སྟོང་པར་འཇོག་པའི་ཕྱིར། དེར་ཐལ། དེས་རང་རྐྱ་ཐུབ་པའི་རྫས་ཡོད་ཀྱི་བདག་གིས་སྟོང་པ་བདག་མེད་ཕྲ་མོར་ཁས་ལེན་པའི་ཕྱིར། དེར་ཐལ། དེས་རྟག་གཅིག་རང་དབང་ཅན་གྱི་བདག་གིས་སྟོང་པ་བདག་མེད་རགས་པ་དང། དེ་ལྟར་འཛིན་པ་བདག་འཛིན་ཀུན་བཏགས་སུ་འདོད་པའི་ཕྱིར། དབུ་མའི་མཐའ་དཔྱོད་ལས། འདི་པའི་ལྷན་སྐྱེས་རྫས་ཡོད་དང། རང་སྡེ་གཞན་གྱི་ལྷན་སྐྱེས་རྫས་ཡོད་དང། རང་སྡེ་ཀུན་གྱིས་ཀུན་བཏགས་སུ་འདོད་པའི་ཁྱད་པར་གསུམ་ཡོད་དེ། ཞེས་པ་ནས། མི་འཇིག་པའི་རྟག་པ་དང་ཆ་མེད་པའི་རིལ་བོར་འཛིན་པ་དེ་གསུམ་པ་ཡིན་པའི་ཕྱིར། ཞེས་གསུངས་པའི་ཕྱིར་ན། མ་ཁྱབ་སྟེ། ཕལ་ཆེ་བ་ལ་དགོངས་པའི་ཕྱིར། གོང་དུ་འདོད་མི་ནུས་ཏེ། དེས་རྟག་གཅིག་རང་དབང་ཅན་གྱི་བདག་ཏུ་འཛིན་པ་དེ་བདག་འཛིན་ལྷན་སྐྱེས་སུ་འདོད་པའི་ཕྱིར། སྟོང་ཐུན་ལས། རང་སྡེ་ཁ་ཅིག་རྟག་གཅིག་རང་དབང་ཅན་གྱི་གང་ཟག་ཏུ་འཛིན་པ་བདག་ལྟ་ལྷན་སྐྱེས་སུ་འདོད། ཅེས་གསུངས་པའི་ཕྱིར། བྱས་པ་ལ་

― GTD002_Page_0561 ―

^{[མ་དཔེ་གཟིགས་ན་འདིར་གནོན།]}

[Full Size]

ཁོ་ན་རེ། མང་བཀུར་སྡེ་ལྔས་རང་རྐྱ་ཐུབ་པའི་རྫས་ཡོད་ཀྱི་བདག་ཁས་ལེན་པར་ཐལ། དེས་རང་རྐྱ་ཐུབ་པའི་རྫས་ཡོད་ཀྱི་བདག་གིས་སྟོང་པ་ཁས་མི་ལེན་པའི་ཕྱིར་ན། མ་ཁྱབ། བདག་རང་རྐྱ་བའི་རྫས་སུ་ཡོད་ན་ཕུང་པོ་ལས་ངོ་བོ་ཐ་དད་པར་བརྗོད་དུ་མེད་ཟེར་དོན་མེད་ལ། རྫས་ཡོད་ཀྱི་བདག་གིས་སྟོང་པར་ཁས་ལེན་ནའང་བརྗོད་དུ་མེད་ཟེར་དོན་མེད་པས་རྫས་ཡོད་དང་རྫས་ཡོད་ཀྱིས་སྟོང་པ་གང་དུའང་ཁས་མ་བླངས་པར་བརྗོད་དུ་མེད་བྱས་པ་ཡིན་པའི་ཕྱིར། ཁ་ཅིག་ན་རེ། གང་ཟག་གི་བདག་མེད་རྟོགས་པའི་ལྟ་བ་དེ་དབུ་མའི་ལྟ་བ་ཡིན་པར་ཐལ། གང་ཟག་གི་བདག་མེད་དེ་དབུ་མ་ཡིན་པའི་ཕྱིར་ན། མ་ཁྱབ། ཡང་དེ་ཆོས་ཅན། དོན་དམ་དཔྱོད་པའི་རིགས་ཤེས་ཀྱི་རྙེད་དོན་ཡིན་པར་ཐལ། འདོད་པའི་ཕྱིར། འདོད་ན། ཁྱོད་རྟོགས་པའི་རིགས་ཤེས་དེ་དོན་དམ་དཔྱོད་པའི་རིགས་ཤེས་ཡིན་པར་ཐལ། འདོད་ན། ཉན་ཐོས་སྡེ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རིགས་ཤེས་ཆོས་ཅན། དོན་དམ་དཔྱད་ནས་རྙེད་པའི་རིགས་ཤེས་ཡིན་པར་ཐལ། ཁྱོད་གང་ལ་རིགས་ཤེས་སུ་སོང་བའི་ཡུལ་དེ་ཁྱོད་ཀྱིས་རྙེད་པ་གང་ཞིག །ཡུལ་དེ་དོན་དམ་ཡིན་པའི་ཕྱིར་ན། རྣམ་པ་གཅིག་ཏུ་མ་ཁྱབ། འདོད་མི་ནུས་ཏེ། ཉན་ཐོས་སྡེ་པས་དོན་དམ་མ་རྙེད་པའི་ཕྱིར། དེར་ཐལ། དེས་དབུ་མའི་ལྟ་བ་མ་རྙེད་པའི་ཕྱིར་ཏེ། དེ་རྟག་ཆད་ཀྱི་མཐར་ལྷུང་བའི་གྲུབ་མཐའ་སྨྲ་བ་ཡིན་པའི་ཕྱིར། འདི་དག་བློར་བདེ་བ་མི་འདུག་ཀྱང་གྲུབ་མཐའི་ནང་འགལ་ཡིན་པས་ཁས་ལེན་དེ་ཙམ་གྱིས་

― GTD002_Page_0562 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲིག་པར་བྱ་དགོས་ཏེ། སྟོང་ཐུན་ལས། འགོག་བདེན་ཡིན་ན་དེ་བཞིན་ཉིད་ཡིན་པས་ཁྱབ་པར་འདོད་པ་ལ་དབུ་སེམས་ཀྱི་མཁས་པ་སུའང་མི་མཐུན་པ་མེད་དོ། །དེ་ལྟར་ན། ཉན་ཐོས་འཕགས་པ་ཆོས་ཅན། ཁྱོད་ཀྱིས་ཆོས་ཉིད་མངོན་སུམ་དུ་རྟོགས་པར་ཐལ། ཁྱོད་ཀྱིས་འགོག་བདེན་མངོན་སུམ་དུ་རྟོགས་པའི་ཕྱིར། རྟགས་གསལ་དངོས་སུ་ཁས་བླངས་ཤིང། ཁྱབ་པའང་དོན་གྱིས་ཁས་ལེན་པས་མཆོག་ཏུ་ལྕི་བའི་ནང་འགལ་གྱི་ཁུར་ཆེན་པོའོ། །ཞེས་གསུངས་པའི་ཕྱིར། དེའང་དོན་དམ་པ་ངོ་བོ་ཉིད་མེད་པ་ལ་འཇོག་ཚུལ་གཉིས་མཛད་པའི་འཇོག་ཚུལ་དང་པོ་ནི་འཇོག་ཚུལ་གཉིས་པའི་དོན་དམ་གཏན་ལ་འབེབ་དགོས་པའི་རྒྱུ་མཚན་གོ་བའི་ཕྱིར་ཡིན་ཏེ། ཐོག་མེད་ནས་འཁོར་བར་འཁྱམས་པ་ནི་རང་གི་སྣང་ཚུལ་འདི་ཙམ་ལ་བདེན་པར་ཞེན་ཏེ་དེའི་རྗེས་སུ་འབྲངས་ནས་ཆགས་སྡང་གིས་ལས་སྣ་ཚོགས་བསགས་པའི་དབང་གིས་ཡིན་པས། འཁོར་བའི་རྩ་བ་གཅོད་པ་ལ་སྣང་ཤས་འདི་ཉིད་འགོག་དགོས། དེའང་མིག་བཙུམ་པ་བཞིན་མིསྣང་བར་བྱེད་པ་མིན་གྱི། ད་ལྟའི་སྣང་ཚུལ་འདི་ཙམ་ལ་གནས་ལུགས་སུ་མི་ཞེན་པར། གནས་ལུགས་སྟོང་པ་ཉིད་ཀྱི་དོན་གཟོད་བཙལ་དགོས་པ་ཡིན་ནོ། །དེ་ལྟར་མ་ཡིན་པར་ད་ལྟ་སེམས་ཅན་རང་དགའ་བ་རྣམས་མཐོང་ཐོས་རྣམ་པར་ཤེས་རྒྱུའི་འདུ་བྱེད་ཀྱི་མཚན་མ་སྟོང་གཞི་གཞན་དབང་གི་སྣང་ཚུལ་འདི་ཙམ་ལས་ལྷག་པ་གནས་ལུགས་ཀྱི་དོན་ལྐོག་གྱུར་ཅིག་བཙལ་རྒྱུ་མེད་ན་སོ་སྐྱེ་ཐམས་ཅད་ཀྱིས་ཀྱང་བདེན་པ་མཐོང་ཟིན་པར་ཐལ་བ་དང། རྣལ་འབྱོར་པ་རྣམས་དོན་དམ་པའི་གནས་ལུགས་ཚོལ་བ་དོན་མེད་པར་ཐལ་བ་སོགས་སུ་

― GTD002_Page_0563 ―

^{[མ་དཔེ་གཟིགས་ན་འདིར་གནོན།]}

[Full Size]

འགྱུར་བའི་ཕྱིར། བློ་གྲོས་རྣམ་དག་གི་ལེའུ་ལས། གལ་ཏེ་འདུ་བྱེད་ཀྱི་མཚན་ཉིད་དང་དོན་དམ་པའི་མཚན་ཉིད་ཐ་དད་པ་མ་ཡིན་པར་གྱུར་ན་ནི། དེས་ན་བྱིས་པ་སོ་སོ་སྐྱེ་བོ་ཐམས་ཅད་བདེན་པ་མཐོང་བ་ཡིན་པར་ཡང་འགྱུར། ཞེས་དང། རྣལ་འབྱོར་པ་དག་འདུ་བྱེད་རྣམས་ལ་ཇི་ལྟར་མཐོང་བ་དང། ཇི་ལྟར་ཐོས་པ་དང། ཇི་ལྟར་བྱེ་བྲག་ཕྱེད་པ་དང། ཇི་ལྟར་རྣམ་པར་ཤེས་པ་ལས་གོང་དུ་དོན་དམ་པ་ཡོངས་སུ་ཚོལ་བར་ཡང་མི་འགྱུར་རོ། །ཞེས་གསུངས་པའི་ཕྱིར། དབུ་སེམས་གཉིས་ཅི་ཙམ་གྱིས་གནས་ལུགས་མཐར་ཐུག་ཏུ་འགྲོ་བའི་དོན་དམ་གྱི་འཇོག་མཚམས་མི་འདྲའང། ད་ལྟའི་སྣང་ཚོད་འདི་ཙམ་ལ་ཞེན་ན་འཁོར་བར་འཆིང་བ་དང། འཁོར་བ་ལས་གྲོལ་བྱེད་ཀྱི་ལམ་དུ་འགྲོ་བ་སྣང་ཚོད་དེ་ཙམ་ཞིག་གནས་ལུགས་སུ་ཞེན་པ་དེ་འགོག་དགོས་པར་བཞེད་པ་འདྲ་བའི་ཕྱིར། རྣམ་བཤད་དགོངས་པ་རབ་གསལ་ལས། སྣང་གཞི་དེ་ཉིད་ཀུན་བྱང་གི་འཆིང་གྲོལ་གཉི་གའི་རྒྱུ་ཡིན་པའི་ཕྱིར་རོ། །དབུ་སེམས་གང་གི་ལུགས་ཀྱིས་ཀྱང་ད་ལྟ་སེམས་ཅན་ལ་སྣང་ཞིང། སྣང་བ་ལྟར་དུ་བདེན་པར་ཞེན་པའི་ཞེན་གཞི་དེ་ཞེན་ཡུལ་དེས་སྟོང་པར་བསྟན་པ་གཅིག་ཡོད་ན་སྟོང་ཉིད་རྟོགས་པ་ལམ་དུ་འགྲོ་བ་ཡིན་གྱི། ཞེས་གསུངས་པའི་ཕྱིར། ངོ་བོ་ཉིད་མེད་པ་གསུམ་པོ་དེ་དཔེའི་སྒོ་ནས་སྟོན་པ་ལ་བཤད་བྱའི་མདོ་ནི། དགོངས་འགྲེལ་ལས། དེ་ལ་འདི་ལྟ་སྟེ་དཔེར་ན་ནམ་མཁའི་མེ་ཏོག་ཇི་ལྟ་བུར་དེ་ལྟ་བ་ནི་མཚན་ཉིད་ངོ་བོ་ཉིད་མེད་པ་ཉིད་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན་སྒྱུ་མ་བྱས་པ་ཇི་ལྟ་བ་དེ་ལྟ་བུར་ནི་སྐྱེ་བ་ངོ་བོ་

― GTD002_Page_0564 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་མེད་པ་ཉིད་བལྟ་བར་བྱའོ། །དོན་དམ་པ་ངོ་བོ་ཉིད་མེད་པ་ཉིད་དེ་ལས་ཀྱང་གཅིག་ཀྱང་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན་ནམ་མཁའ་ནི་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་ཐམས་ཅད་དུ་སོང་བ་ཇི་ལྟ་བ་དེ་ལྟ་བུར་ནི་དོན་དམ་པ་ངོ་བོ་ཉིད་མེད་པ་དེ་ལས་ཆོས་བདག་མེད་པས་རབ་ཏུ་ཕྱེ་བ་དང་ཐམས་ཅད་དུ་སོང་བ་གཅིག་བལྟ་བར་བྱའོ། །ཞེས་གསུངས་པའི་ཕྱིར། དེ་ལའང་ཁ་ཅིག་ན་རེ། ཀུན་བཏགས་ཀྱི་དཔེར་ནམ་མཁའི་མེ་ཏོག་བཀོད་པ་དེ་གཏན་མེད་ཀྱི་དཔེར་འདོད་མཁན་མེད་པར་ཐལ། ལེགས་བཤད་སྙིང་པོར། རྟོག་པས་བརྟགས་པ་ཙམ་གྱི་དཔེ་ཡིན་གྱི། ཤེས་བྱ་ལ་མི་སྲིད་པའི་དཔེ་མིན་ནོ། །ཞེས་གསུངས་པའི་ཕྱིར་ན་མ་ཁྱབ། སེམས་ཙམ་པ་དང་ཐལ་འགྱུར་བའི་ལུགས་ལ་གཏན་མེད་ཀྱི་དཔེ་མིན་ཡང་རང་རྒྱུད་པའི་ལུགས་ལ་དེ་ཡིན་པའི་ཕྱིར། གོང་དུ་བཤད་ཟིན། ཡང་ཁ་ཅིག་ན་རེ། གཞན་དབང་སྒྱུ་མ་དང་འདྲ་བ་མི་འཐད་པར་ཐལ། དེ་བདེན་པར་གྲུབ་པའི་ཕྱིར་ན། མ་ཁྱབ་སྟེ། སྒྱུ་མ་དཔེར་བྱེད་ཀྱང་བདེན་པར་མ་གྲུབ་པའི་དཔེར་བྱེད་མི་དགོས་པའི་ཕྱིར། འདི་ཉིད་ལས། གལ་ཏེ་དགོངས་འགྲེལ་ལས་གཞན་དབང་སྒྱུ་མ་བཞིན་དུ་གསུངས་ཤིང། རྒྱན་ལས་ཀྱང་འདུས་བྱས་ཐམས་ཅད་སྒྱུ་མ་བཞིན་དུ་གསུངས་པས་བདེན་པར་གྲུབ་པ་དེ་དག་གི་དོན་མིན་ནོ་ཞེ་ན། སྒྱུ་མ་ལ་སོགས་པ་བཞིན་དུ་བཤད་པས་བདེན་པར་མི་སྟོན་པའི་ངེས་པ་མེད་དེ་སྒྱུ་མ་ལ་སོགས་པ་དཔེར་བྱེད་ལུགས་ལ་རག་ལས་སོ། །ཞེས་གསུངས་པའི་ཕྱིར། དེས་ན་འདིར་སྒྱུ་མ་དཔེར་བཀོད་པ་ནི། མདོ་སྡེ་རྒྱན་ལས། ཇི་ལྟར་སྒྱུ་མ་དེ་བཞིན་དུ། །ཡང་དག་མ་ཡིན་ཀུན་

― GTD002_Page_0565 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོག་འདོད། །སྒྱུ་མའི་རྣམ་པ་ཇི་ལྟ་བར། །དེ་བཞིན་གཉིས་སུ་འཁྲུལ་བ་བརྗོད། །ཅེས་སྔགས་རྫས་ཀྱིས་མིག་བསླད་པ་བཞིན་དུ་གཉིས་སྣང་འཁྲུལ་བའི་བག་ཆགས་ཀྱིས་བསླད་པ་ལ་བརྟེན་ནས་ཕྱི་རོལ་དོན་དུ་སྣང་ཡང་ཕྱི་རོལ་དོན་གྱིས་སྟོང་པའི་དཔེར་བཀོད་པ་ཡིན་པའི་ཕྱིར། ཡོངས་གྲུབ་ནམ་མཁའ་དང་དཔེ་སྦྱར་བ་ནི། ནམ་མཁས་གཟུགས་ཅན་ཐམས་ཅད་ལ་ཁྱབ་ཅིང་རང་གི་ངོ་བོ་ཐོགས་རེག་བཀག་ཙམ་ལ་འཇོག་པ་ལྟར། ཡོངས་གྲུབ་ཀྱིས་ཆོས་ཅན་ཐམས་ཅད་ལ་ཁྱབ་ཅིང་རང་གི་ངོ་བོ་དགག་བྱ་བཀག་ཙམ་གྱི་མེད་དགག་ལ་འཇོག་པའི་དོན་དུ་ཆེས་གསལ་བས། འདིས་ཀྱང་ཇོ་ནང་པས་ཡོངས་གྲུབ་སྒྲུབ་པ་རང་དབང་བར་འདོད་པ་ལེགས་པར་བསལ་བ་ཡིན་ནོ། །དེ་ལྟར་མཚན་ཉིད་གསུམ་རང་རང་གི་སྟེང་གི་ངོ་བོ་ཉིད་མེད་ཚུལ་དང་མ་སྦྱར་བར། འཁོར་ལོ་བར་བའི་སྒྲས་ཟིན་ལྟར་དུ་རང་བཞིན་གྱིས་གྲུབ་པའི་ངོ་བོ་ཉིད་མེད་མཉམ་དུ་ཁས་བླངས་ན་སྐུར་འདེབས་སུ་འགྱུར་བའི་ཚུལ་དགོངས་འགྲེལ་ལས། ངའི་དགོངས་ཏེ་བཤད་པ་ཟབ་མོ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་ཏེ་ཆོས་དེ་ལ་མོས་ཀྱང་ཆོས་འདི་དག་ཐམས་ཅད་ནི་ངོ་བོ་ཉིད་མེད་པ་ཁོ་ན་ཡིན་ནོ། །ཆོས་འདི་དག་ཐམས་ཅད་ནི་མ་སྐྱེས་པ་ཁོ་ནའོ། །མ་འགགས་པ་ཁོ་ནའོ། །གཟོད་མ་ནས་ཞི་བ་ཁོ་ནའོ། །རང་བཞིན་གྱིས་ཡོངས་སུ་མྱ་ངན་ལས་འདས་པ་ཁོ་ནའོ་ཞེས་ཆོས་ཀྱི་དོན་སྒྲ་ཇི་བཞིན་ཁོ་ནར་མངོན་པར་ཞེན་པར་བྱེད་དོ། །དེ་དག་གཞི་དེས་ན་ཆོས་ཐམས་ཅད་ལ་མེད་པར་ལྟ་བ་དང་མཚན་ཉིད་མེད་པར་ལྟ་བ་ཐོབ་ནས་ཀྱང་ཆོས་ཐམས་ཅད་ལ་མཚན་ཉིད་ཐམས་

― GTD002_Page_0566 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་ཀྱིས་སྐུར་བ་འདེབས་ཏེ། ཆོས་རྣམས་ཀྱི་ཀུན་བཏགས་པའི་མཚན་ཉིད་ལའང་སྐུར་བ་འདེབས། ཆོས་རྣམས་ཀྱི་གཞན་གྱི་དབང་གི་མཚན་ཉིད་དང་ཡོངས་སུ་གྲུབ་པའི་མཚན་ཉིད་ལའང་སྐུར་བ་འདེབས་སོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། འདི་ལྟར་གཞན་གྱི་དབང་གི་མཚན་ཉིད་དང་ཡོངས་སུ་གྲུབ་པའི་མཚན་ཉིད་ཡོད་ན་ནི་ཀུན་བཏགས་པའི་མཚན་ཉིད་ཀྱང་རབ་ཏུ་ཤེས་པར་འགྱུར་ན། དེ་ལ་གང་དག་གཞན་གྱི་དབང་གི་མཚན་ཉིད་དང་ཡོངས་སུ་གྲུབ་པའི་མཚན་ཉིད་ལ་མཚན་ཉིད་མེད་པར་མཐོང་བ་དེ་དག་གིས་ནི་ཀུན་བཏགས་པའི་མཚན་ཉིད་ལའང་སྐུར་པ་བཏབ་པ་ཡིན་པའི་ཕྱིར་ཏེ། དེ་ལྟ་བས་ན་དེ་དག་གི་མཚན་ཉིད་རྣམ་པ་གསུམ་ཆར་ལའང་སྐུར་བ་འདེབས་པ་ཞེས་བྱའོ། །ཞེས་གསུངས། དེ་ཅིའི་ཕྱིར་ཞེ་ན་ཞེས་པ་མན་ཆད་ཀྱིས་མཚན་ཉིད་གསུམ་ག་ལ་སྐུར་འདེབས་སུ་འགྲོ་བའི་རྒྱུ་མཚན་བསྟན་པ་ཡིན་ལ། འོན་ཀྱང་གཞན་དབང་ཡོངས་གྲུབ་གཉིས་ལ་སྐུར་འདེབས་སུ་འགྲོ་བའི་རྒྱུ་མཚན་དངོས་སུ་མ་གསུངས་པར། ཀུན་བཏགས་ལ་སྐུར་འདེབས་སུ་འགྲོ་བའི་རྒྱུ་མཚན་གསུངས་པ་ནི་དོགས་པ་ཆེ་ཆུང་གི་དབང་གིས་ཡིན་ཏེ། སྔ་མ་གཉིས་རང་གི་མཚན་ཉིད་ཀྱིས་གྲུབ་པས་དེ་རང་མཚན་གྱིས་མ་གྲུབ་པར་བཟུང་ན་སྐུར་འདེབས་སུ་འགྱུར་བ་རྟོགས་སླ་ལ། ཀུན་བཏགས་རང་གི་མཚན་ཉིད་ཀྱིས་མ་གྲུབ་པས་དེ་ལ་སྐུར་འདེབས་སུ་འགྱུར་ཚུལ་ཤེས་དཀའ་བའི་དབང་གིས་ཡིན་པའི་ཕྱིར། སེམས་ཙམ་པའི་ལུགས་ལ་གཞན་དབང་ཡོངས་གྲུབ་བདེན་པར་གྲུབ་ཅིང། ཀུན་བཏགས་བདེན་པར་མ་གྲུབ་པ་ནི་མདོས་དོགས་པ་གཅོད་ཚུལ་འདིས་ཀྱང་ལེགས་པར་འགྲུབ་མོད། འོན་ཀྱང་མདོས་དམིགས་

― GTD002_Page_0567 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱེད་ཚུལ་རྗེ་བླ་མས་གསལ་བར་མཛད་པའི་བཀའ་དྲིན་ལས་ད་ལྟ་ཀུན་ལ་རླུང་ལྟར་གྲགས་པ་ཡིན་གྱི། དེའི་སྔར་ཇི་བཞིན་ཤེས་པ་དཀོན་པར་བྱུང་སྣང་ངོ་། །གཞན་དབང་ཡོངས་གྲུབ་གཉིས་བདེན་པར་མེད་ན་གཏན་མེད་དགོས་ལ། ཀུན་བཏགས་བདེན་པར་མེད་ཀྱང་གཏན་ནས་མེད་མི་དགོས་པའི་ཚུལ་ནི། དཔེར་ན་ཐག་པ་སྦྲུལ་དུ་གྲུབ་པ་མེད་ཀྱང་ཐག་ཁྲ་སྦྲུལ་སྣང་མེད་མི་དགོས་ལ། རྩ་བའི་ཐག་ཁྲ་མེད་ན་ཐག་ཁྲ་སྦྲུལ་སྣང་ཡང་གཏན་མེད་དགོས་པ་བཞིན་ཏེ། སྔ་མ་ནི་བློ་འཁྲུལ་པའི་སྣང་ཆ་ཙམ་ཡིན་པས་འཇོག་བྱེད་གཞན་མེད་ཀྱི་བློ་ལ་སྣང་ཙམ་མམ་རྟོག་པས་བཏགས་ཙམ་གྱིས་འཇོག་ནུས་པ་ལྟར། ཀུན་བཏགས་རྟོག་པས་བཏགས་ཙམ་གྱིས་འཇོག་ནུས་ལ། ཐག་ཁྲ་ནི་དོན་རང་གི་ངོས་ནས་ཐག་ཁྲར་གྲུབ་པ་བློའི་སྣང་ཙམ་གྱི་དབང་གིས་བཞག་པ་མིན་པ་ཞིག་དགོས་པ་ལྟར། གཞན་དབང་ངེས་པར་རང་མཚན་གྱིས་གྲུབ་པ་ཞིག་དགོས་པའི་ཕྱིར། དེར་ཐལ། ཐག་ཁྲ་སྦྲུལ་དུ་རློམ་པ་དང་འདྲ་བར་བློས་རློམ་ཙམ་ཡིན་ན་ཐག་པའི་སྦྲུལ་དེར་གཞན་ལ་འཚེ་བ་སོགས་ཀྱི་ནུས་པ་མེད་པ་ལྟར། གཞན་དབང་ལའང་འབྲས་བུ་སྐྱེད་པ་སོགས་ཀྱི་ནུས་པ་མེད་དགོས་པའི་ཕྱིར། རྣམ་འགྲེལ་ལས། གལ་ཏེ་ཀུན་ལ་ནུས་མེད་ན། །ས་བོན་སོགས་ནི་མྱུག་སོགས་ལ། །ནུས་མཐོང་གལ་ཏེ་དེ་ཀུན་རྫོབ། །འདོད་ན་ཅི་སྟེ་དེ་ལྟར་འགྱུར། །ཞེས་གསུངས་པའི་ཕྱིར། ཁྱབ་སྟེ། དེའི་དོན་ངོ་བོ་ཉིད་མེད་པར་སྨྲ་བས་འདུས་བྱས་ཐམས་ཅད་དོན་དམ་པར་མེད་པར་སྨྲ་བ་ནི་དོན་གྱིས་འབྲས་བུ་སྐྱེད་པའི་ནུས་པ་མེད་པར་ཁས་བླངས་སོང་བས། ས་བོན་གྱིས་མྱུ་གུ་བསྐྱེད་པ་ལྟ་

― GTD002_Page_0568 ―

^{[མ་དཔེ་གཟིགས་ན་འདིར་གནོན།]}

[Full Size]

བུ་འཇིག་རྟེན་གྱིས་མཐོང་བ་དང་འགལ་ལ། དེ་བསྐྱེད་ཀྱང་སྐྱེད་པ་ཀུན་རྫོབ་ཏུ་ཡིན་ནོ་ཞེས་སྨྲ་བ་ནི། ངས་མི་དེ་མཐོང་ཡང་མཐོང་བ་རྫུན་ཡིན་ཟེར་བ་ལྟར་འབྲེལ་མེད་དངོས་འགལ་གྱི་ཚིག་ཡིན་པའི་ཕྱིར། དེར་མ་ཟད་སྐྱེ་བ་མེད་ན་སྐྱེ་བ་སྔོན་དུ་འགྲོ་བའི་འགག་པའང་མེད་དགོས་ལ། དེ་གཉིས་ཀ་མེད་ན་ལས་དགེ་སྡིག་ལས་འབྲས་བུ་བདེ་སྡུག་འབྱུང་བའི་ལས་འབྲས་དང། ལས་ཉོན་འགག་པའི་ཐར་པ་ཐམས་ཅད་ལ་སྐུར་འདེབས་སུ་འགྲོ་བའི་ཕྱིར། དེས་ན་སེམས་ཙམ་པས་གཞན་དབང་བདེན་གྲུབ་ཏུ་སྒྲུབ་པའི་དགོས་པའི་གཙོ་བོ་ལས་འབྲས་ཀྱི་རྣམ་གཞག་འགྲུབ་པའི་ཆེད་ཡིན་པས། སྟོང་ཐུན་ལས། གཞན་དབང་གི་ངོ་བོ་བདེན་པར་མེད་ན་འབྲས་བུ་སྐྱེད་ནུས་ཀྱི་རྫས་སུ་མེད་དགོས་ལ། ཞེས་གསུངས་ཏེ་འདིར་རྫས་ནི་རང་ངོས་ནས་འབྲས་བུ་སྐྱེད་པའི་མཐུ་དང་ལྡན་པ་ཞིག་ལ་འདོད་པས་རྒྱུ་འབྲས་འཇོག་པ་ལ་དེ་ངེས་པར་དགོས་པར་འདོད་པའི་ཕྱིར། དེ་སྐད་དུ་འཇུག་པར་ཡང། གཞན་གྱི་ལྟར་ན་རྫས་ལ་ཆགས་པ་ཡི། །འཇིག་རྟེན་གྲགས་པའི་རྣམ་གཞག་ཀུན་ཀྱང་བརླག །ཅེས་གསུངས་ཏེ། ཐལ་འགྱུར་བས་རྫས་ཡོད་བཀག་པའང་འདི་ཡིན་གྱི། རྫས་གཅིག་ཐ་དད་ཀྱི་རྫས་ཉེར་ལེན་སོགས་ལ་བྱེད་པས་མི་འགོག་གོ །དེའི་ཕྱིར་རྫས་གཅིག་ཡོད་ཀྱང་རྫས་གྲུབ་ཡོད་མི་དགོས་ཏེ། བདེན་པའི་གཅིག་ཡོད་ཀྱང་བདེན་གྲུབ་ཡོད་མི་དགོས་པ་བཞིན་ནོ། །དེ་ལྟར་མ་ཕྱེ་ན་རྣམ་བཤད་དགོངས་པ་རབ་གསལ་ལས། བུམ་པ་ནི་རྫས་མིན་ཏེ་གཞལ་བྱ་ཡིན་པའི་ཕྱིར། དཔེར་ན་རྨི་ལམ་གྱི་བུམ་པ་བཞིན་ནོ། །ཞེས་སུན་འབྱིན་པ་དེ་ལྟ་བུ་ལ་སོགས་པའི་ཡུལ་ལ་འཇིག་རྟེན་གྱིས་གནོད་ཀྱི། ཞེས་འཇིག་རྟེན་གྱི་དངོས་པོ་འཇིག་རྟེན་ན་གྲགས་པས་སེལ་བ་ཡིན་པས་མི་རུང་བར་གསུངས་པའི་ཕྱིར་

― GTD002_Page_0569 ―

^{[མ་དཔེ་གཟིགས་ན་འདིར་གནོན།]}

[Full Size]

དང། རྫས་རིན་ཐང་ཚང་བ་མེད་ན་ཕམ་པ་གཉིས་པའང་མེད་པར་འགྱུར་བའི་ཕྱིར། འདི་བའི་ལུགས་ལ་རང་བཞིན་གྱིས་མེད་ན་དེ་ལས་ལྷག་པའི་འགག་རྒྱུ་ཞིག་མེད་པར་འདོད་ཀྱང། དབུ་མ་པ་རྣམས་ནི་འགྲེལ་པ་དོན་གསལ་ལས། དངོས་པོ་ཐམས་ཅད་བྱུང་བ་ཉིད་ནས་རང་བཞིན་གྱིས་ངོ་བོ་ཉིད་མེད་པ་ལ་ཀུན་རྫོབ་ཏུའང་འགག་གོ་ཞེས་བྱ་བ་འགག་པ་དང། ཞེས་པ་ལྟར་རང་དུས་ནས་བདེན་པར་གྲུབ་པའི་རང་བཞིན་ཞིག་མེད་ཀྱང་བློ་ལ་སྣང་བའི་དབང་ཙམ་གྱིས་སླར་འགག་པའང་བསྙོན་མེད་དུ་བཞག་ཆོག་པ་ནི་ཟབ་པ་བརྒྱད་ཀྱི་ནང་ནས་དགག་པ་ཟབ་པ་ཡིན་པས་དངོས་སྨྲའི་བློར་མ་ཤོང་བར་འཆད་དོ། །གཞན་དབང་བདེན་པར་གྲུབ་དགོས་པའི་རྒྱུ་མཚན་དེ་ལྟར་ཡིན་དུ་ཆུག་ཀྱང་ཀུན་བཏགས་ཡོངས་གྲུབ་འདུས་མ་བྱས་སུ་འདྲ་བ་ལ་བདེན་པར་ཡོད་མེད་གང་གིས་དབྱེ་ཞེ་ན། སྔར་གྱི་དཔེ་དེས་འགྲུབ་སྟེ་ཐག་ཁྲའི་སྦྲུལ་སྣང་དེ་འཁྲུལ་པ་ཙམ་གྱིས་བཞག་པ་ཡིན་ཀྱང། སྦྲུལ་གྱིས་སྟོང་པ་དེ་རློམ་པ་ཙམ་གྱིས་མི་འགྲུབ་པར་དོན་སྟེང་དུ་གནས་པ་ཞིག་དགོས་ཏེ་རློམ་པ་ཙམ་གྱིས་འགྲུབ་ན་ཐག་ཁྲས་ཀྱང་སྟོང་པར་རློམ་པས། དེས་སྟོང་པར་འགྱུར་དགོས་པ་ལ་མི་འགྱུར་བ་ནི་སྔ་མ་དངོས་པོའི་གཤིས་སུ་གྲུབ་པའི་རྟགས་ཡིན་པས། འདིར་ཡང་ཡོངས་གྲུབ་དེ་ཉིད་དངོས་པོའི་གཤིས་སུ་འགྱུར་བ་ལ་རློམ་ཙམ་མིན་པ་ཞིག་དགོས་པར་གསུངས་སོ། །གཞན་དག་ན་རེ། དེ་ལྟ་ན་ཐག་པ་སྦྲུལ་གྱིས་སྟོང་པ་དང། ཤེས་བྱ་དང་ནམ་མཁའ་སོགས་དོན་དམ་དུ་འགྱུར་རོ་ཞེ་ན། རློམ་པ་ཙམ་གྱིས་འཇོག་མི་ནུས་ཀྱང་རློམ་པས་བཞག་ཙམ་ཡིན་པ་མི་འགལ་ཚུལ་གོང་དུ་བཤད་ཟིན་ཅིང། དེ་ཆོས་ཉིད་ལ་མི་མཚུངས་

― GTD002_Page_0570 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ་དེ་འཇོག་བྱེད་གཙོ་བོ་འཕགས་པའི་མཉམ་གཞག་སོ་སོ་རང་རིག་པའི་ཡེ་ཤེས་ཡིན་ལ། ཐག་ཁྲ་སྦྲུལ་གྱིས་སྟོང་པ་སོགས་འཇོག་བྱེད་གཙོ་བོ་ཚུར་མཐོང་གི་གཉིས་སྣང་འཁྲུལ་པའི་རྟོག་པ་ཡིན་པ་ངོ་བོ་ཉིད་མེད་པར་སྨྲ་བ་ཁྱོད་ཀྱང་འདོད་པའི་ཕྱིར། ཁྱབ་སྟེ། སྔ་མ་གང་གི་ངོར་འཇོག་པ་དེའི་ངོར་གཞི་དེ་ཁེགས་དགོས་ལ། ཕྱི་མའི་སྦྲུལ་གྱིས་སྟོང་པའི་ཐག་ཁྲ་ངེས་པའི་ཤུགས་ཀྱིས་སྟོང་པ་དེའང་ངེས་དགོས་ཤིང། དེའི་སྣང་ཆ་ཙམ་ལས་ཟུར་ན་སྟོང་པ་གཏན་ལ་དབབ་ཏུ་མེད་པའི་ཕྱིར། སྟོང་ཉིད་ལ་སྤྲོས་བྲལ་ཞེས་བཤད་ཀྱང་མེད་དགག་ཐམས་ཅད་ལ་མ་བཤད་པའི་ཕྱིར། དེས་ན་མདོ་སྡེ་རྒྱན་ལས། ཇི་སྐད་བཤད་བཞིན་དོན་མིན་བཅོམ་ལྡན་དགོངས་པ་ཤིན་ཏུ་ཟབ། །མཁས་པ་རྣམས་ཀྱིས་ཚུལ་བཞིན་བརྟགས་ན་ཆོས་འདིས་སྐྲག་མི་འགྱུར། །ཞེས་པ་ལྟར། ཤེར་མདོར་རང་བཞིན་མེད་པར་གསུངས་པ་སྒྲ་ཇི་བཞིན་དུ་ཞེན་མི་རུང་བའི་ལུགས་ཡིན་པས། ལུགས་འདིར་དེ་ལྟར་ཞེན་ན་མེད་པར་ལྟ་བ་དང་མཚན་ཉིད་མེད་པར་ལྟ་བ་ཅན་དུ་འགྱུར་བར་གསུངས་སོ། །དེ་གཉིས་ཀྱི་དོན་ཡང་རྒྱ་ནག་འགྲེལ་ཆེན་ལས། མེད་པར་ལྟ་བ་དང་མཚན་ཉིད་མེད་པར་ལྟ་བའོ། །ལྟ་བ་གཉིས་སོགས་འདི་ལའང་བཤད་པ་རྣམ་པ་གཉིས་ཡོད་དེ། ཁ་ཅིག་ན་རེ། མེད་པར་ལྟ་བ་ཞེས་བྱ་བ་ནི་གཞན་གྱི་དབང་དང་ཡོངས་སུ་གྲུབ་པ་མེད་པར་སྐུར་བའོ། །མཚན་ཉིད་མེད་པར་ལྟ་བ་ཞེས་བྱ་བ་ནི་ཀུན་བཏགས་མེད་པར་སྐུར་བའོ། །ཞེའོ། །ཞེས་སོགས་ཀྱིས་མཚན་ཉིད་གསུམ་ལ་ཆ་ཕྱེ་ནས་སྦྱོར་ཚུལ་གསུངས་པའང། འདི་ལྟར་གཞན་གྱི་དབང་གི་མཚན་ཉིད་དང། ཞེས་སོགས་ལ་འགྲིག་པ་ལྟར་སྣང་ཡང། མེད་པར་ལྟ་བ་ཞེས་པ་མདོར་བསྟན་དང།

― GTD002_Page_0571 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་ཉིད་མེད་པར་ལྟ་བ་ཞེས་པ་རྒྱས་བཤད་དུ་བྱེད་དགོས་ཏེ། ཀུན་བཏུས་ལེའུ་གསུམ་པར། བཅོམ་ལྡན་འདས་ཀྱི་ཆོས་ཀྱི་མེ་ལོང་ཆེན་པོའི་ཆོས་ཀྱི་རྣམ་གྲངས་ལས་གསུངས་པས། བྱང་ཆུབ་སེམས་དཔའ་སྒྲ་ཇི་བཞིན་དུ་ཚུལ་བཞིན་མ་ཡིན་པར་ཆོས་རྣམས་འབྱེད་པ་ལ་ལྟ་བ་ངན་པ་ཉི་ཤུ་རྩ་བརྒྱད་འབྱུང་སྟེ། ལྟ་བ་ངན་པ་ཉི་ཤུ་རྩ་བརྒྱད་པོ་དག་གང་ཞེ་ན། མཚན་མར་ལྟ་བ་དང། བཏགས་པ་ལ་སྐུར་པ་འདེབས་པའི་ལྟ་བ་དང། ཀུན་རྟོག་ལ་སྐུར་བ་འདེབས་པའི་ལྟ་བ་དང། དེ་ཁོ་ན་ལ་སྐུར་པ་འདེབས་པའི་ལྟ་བ་དང། ཞེས་སོགས་དྲངས་ཤིང། དེའི་དོན་ཀུན་བཏུས་དར་ཊཱིཀ་ལས། མེད་ལྟ་རང་གི་ངོ་བོའི་སྒོ་ནས་བསྟན་པ་གཅིག དེ་ལ་ཡུལ་གྱི་སྒོ་ནས་ཕྱེ་བ་གསུམ། ཞེས་གསུངས་པའི་ཕྱིར། ཁྱབ་སྟེ། མེད་ལྟ་རང་གི་ངོ་བོའི་སྒོ་ནས་མདོར་བསྟན། དེ་ལ་ཡུལ་གྱི་སྒོ་ནས་ཕྱེ་ན། བཏགས་པ་སྟེ་ཀུན་བཏགས་དང། ཡང་དག་པ་མ་ཡིན་པའི་ཀུན་རྟོག་གཞན་དབང་དང། དེ་ཁོ་ན་ཡོངས་གྲུབ་ཡིན་པས་མཚན་ཉིད་གསུམ་ལ་སྐུར་པ་འདེབས་པ་གསུམ་དུ་ཕྱེ་སྟེ་མཚན་ཉིད་མེད་པར་ལྟ་བ་དང་སྦྱར་ན། གོང་དུ། ཆོས་ཐམས་ཅད་ལ་མཚན་ཉིད་ཐམས་ཅད་ཀྱི་ཞེས་སོགས་དང་ཆེས་འགྲིག་པའི་ཕྱིར། ཁ་ཅིག་ན་རེ། གཞན་དབང་དེ་ལྟར་ཡིན་ཀྱང་ཀུན་བཏགས་ལུགས་འདིར་ཡང་འཁོར་ལོ་བར་བས་རང་མཚན་གྱིས་མེད་པར་གསུངས་པ་ལྟར་འཛིན་རུང་བར་ཐལ། དེ་རང་མཚན་གྱིས་མ་གྲུབ་པའི་ཕྱིར་ན། མ་ཁྱབ། འཁོར་ལོ་བར་བར་གསུངས་པ་ལྟར་གྱི་རང་མཚན་གྱིས་མ་གྲུབ་པ་དང། ཐལ་འགྱུར་བའི་འདོད་པ་ལྟར་གྱི་རང་མཚན་གྱིས་མ་གྲུབ་པ་གཉིས་ཁྱད་པར་མེད་པས།

― GTD002_Page_0572 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་བཏགས་དེ་གཉིས་གང་དུའང་འཛིན་མི་རུང་བའི་ཕྱིར་ཏེ། ཡོད་ན་རང་ངོས་ནས་ཡོད་དགོས་པ་གང་ཞིག །དེ་གཉིས་ཀས་རང་ངོས་ནས་མེད་པར་གཟུང་བའི་ཕྱིར། ཡང་ཁོ་ན་རེ། ཤེར་མདོས་ཀུན་བཏགས་རང་མཚན་གྱིས་མ་གྲུབ་པར་མ་བསྟན་པར་ཐལ། དེས་བསྟན་པ་ལྟར་གྱི་ཀུན་བཏགས་རང་མཚན་གྱིས་གྲུབ་པར་འཛིན་པ་དེ་ཀུན་བཏགས་རང་མཚན་གྱིས་མ་གྲུབ་པར་འཛིན་པ་མ་ཡིན་པའི་ཕྱིར་ན། མ་ཁྱབ་སྟེ། རང་ངོས་ནས་མ་གྲུབ་པར་བསྟན་ན་རྟོག་པས་ཕར་བཏགས་ཙམ་དུ་སྟོན་དགོས་ལ། དེ་བསྟན་ན་རྟོག་བཏགས་ཙམ་མ་ཡིན་པར་གྲུབ་པ་ཁེགས་དགོས་པའི་རྒྱུ་མཚན་གྱིས་འདིའི་ཞར་ལ་བསྟན་པར་བཤད་པ་ཡིན་པའི་ཕྱིར། ཁོ་ན་རེ། དེ་དེའི་སྒྲས་ཟིན་སྒྲ་ཇི་བཞིན་པ་མ་ཡིན་པར་ཐལ། འདོད་པའི་ཕྱིར་ཞེ་ན་འདོད་པ་ཁོ་ན་སྟེ། དེའི་སྒྲས་ཟིན་ཚད་མས་བསལ་བ་གང་ཞིག །འདི་ཚད་མས་གྲུབ་པའི་ཕྱིར། ཁོ་ན་རེ། གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་རང་མཚན་གྱིས་མེད་པ་འདིའི་སྒྲས་ཟིན་སྒྲ་ཇི་བཞིན་པ་མ་ཡིན་པར་ཐལ། དེའི་ཕྱིར་ན། མ་ཁྱབ་སྟེ། ཆོས་ཐམས་ཅད་ལ་ཆ་མ་ཕྱེ་བར་གསུངས་པའི་གནད་ཀྱིས་སྒྲ་ཇི་བཞིན་པར་མི་འགྱུར་བའི་ཕྱིར། ཁ་ཅིག་གོང་དུ་འདོད་རིགས་ཏེ། ཆོས་ཐམས་ཅད་རང་མཚན་གྱིས་མ་གྲུབ་པའི་ཕྱིར་ཏེ། ཆོས་ཐམས་ཅད་ཀུན་བཏགས་ཡིན་པའི་ཕྱིར་ཟེར་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བདེན་མེད་དུ་བཤད་པའི་བཤད་སྲོལ་ཆེན་པོ་དེ་ངོ་བོ་ཉིད་མེད་པར་སྨྲ་བའི་ཤིང་རྟའི་སྲོལ་མ་ཡིན་པར་ཐལ་བ་དང། ཆོས་ཐམས་ཅད་ངོ་བོ་ཉིད་མེད་པར་གསུངས་པ་སྒྲ་ཇི་བཞིན་དུ་རུང་བར་ཐལ་བ་དང། སེམས་ཙམ་པའང་ངོ་བོ་ཉིད་མེད་པར་སྨྲ་བ་ཡིན་པར་ཐལ་བ་སོགས་སྤྲོ་

― GTD002_Page_0573 ―

^{[མ་དཔེ་གཟིགས་ན་འདིར་གནོན།]}

[Full Size]

སླའོ། །གཉིས་པ་མ་སྐྱེས་པ་སོགས་སུ་བཤད་པའི་དགོངས་གཞི་འཆད་པ་ལ། ངོ་བོ་ཉིད་མེད་པའི་ཚུལ་དེ་ལྟར་ཡིན་ན། སྐྱེ་བ་མེད་པ་སོགས་གང་ལ་དགོངས་ནས་གསུངས་ཤེ་ན། ཞེས་པ་ནས། ཀུན་ལས་བཏུས་ལས་དེ་ལྟར་བཤད་དོ། །ཞེས་བྱུང། དེ་ལ་བཤད་བྱའི་མདོ་ནི་དགོངས་འགྲེལ་ལས། དོན་དམ་ཡང་དག་འཕགས། དེ་ལ་མཚན་ཉིད་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། འདི་ལྟར་རང་གི་མཚན་ཉིད་ཀྱིས་མེད་པ་གང་ཡིན་པ་དེ་ནི་མ་སྐྱེས་པ་ཡིན། མ་སྐྱེས་པ་གང་ཡིན་པ་དེ་ནི་མ་འགགས་པ་ཡིན། མ་སྐྱེས་པ་དང་མ་འགགས་པ་གང་ཡིན་པ་དེ་ནི་གཟོད་མ་ནས་ཞི་བ་ཡིན། གཟོད་མ་ནས་ཞི་བ་གང་ཡིན་པ་དེ་ནི་རང་བཞིན་གྱིས་ཡོངས་སུ་མྱ་ངན་ལས་འདས་པ་ཡིན། རང་བཞིན་གྱིས་ཡོངས་སུ་མྱ་ངན་ལས་འདས་པ་གང་ཡིན་པ་དེ་ནི་ཡོངས་སུ་མྱ་ངན་ལས་བཟླ་བར་བྱ་བ་ཅུང་ཟད་ཀྱང་མེད་དེ། དེའི་ཕྱིར་མཚན་ཉིད་ངོ་བོ་ཉིད་མེད་པ་ཉིད་ལ་དགོངས་ནས། ངས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །དོན་དམ་ཡང་དག་འཕགས། ཡང་དོན་དམ་པ་ངོ་བོ་ཉིད་མེད་པ་ཉིད་ཆོས་བདག་མེད་པས་རབ་ཏུ་ཕྱེ་བ་ལ་དགོངས་ནས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་དོན་དམ་པ་ངོ་བོ་ཉིད་མེད་པ་

― GTD002_Page_0574 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཆོས་བདག་མེད་པས་རབ་ཏུ་ཕྱེ་བ་ནི་རྟག་པ་རྟག་པའི་དུས་དང། ཐེར་ཟུག་ཐེར་ཟུག་གི་དུས་སུ་རྣམ་པར་གནས་པ་ཁོ་ན་ཡིན་ལ། དེ་ནི་ཆོས་རྣམས་ཀྱི་ཆོས་ཉིད་འདུས་མ་བྱས་པ་ཉོན་མོངས་པ་ཐམས་ཅད་དང་བྲལ་བ་ཡིན་ཏེ་རྟག་པ་རྟག་པའི་དུས་དང། ཐེར་ཟུག་ཐེར་ཟུག་གི་དུས་སུ་ཆོས་ཉིད་དེ་ཉིད་ཀྱིས་རྣམ་པར་གནས་པ་འདུས་མ་བྱས་པ་གང་ཡིན་པ་དེ་ནི་འདུས་མ་བྱས་པའི་ཕྱིར་མ་སྐྱེས་པ་དང་མ་འགགས་པ་ཡིན་ལ། དེ་ནི་ཉོན་མོངས་པ་ཐམས་ཅད་དང་བྲལ་བའི་ཕྱིར་གཟོད་མ་ནས་ཞི་བ་དང་རང་བཞིན་གྱིས་ཡོངས་སུ་མྱ་ངན་ལས་འདས་པ་ཡིན་ཏེ། དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཆོས་བདག་མེད་པས་རབ་ཏུ་ཕྱེ་བ་ལ་དགོངས་ནས་ངས་ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་བསྟན་ཏོ། །ཞེས་པའོ། །འདི་ལའང་སྤྱི་དོན་དང་མཐའ་དཔྱད་པ་གཉིས། དང་པོའི་ཤེར་མདོ་ལས་སྐྱེ་འགག་སོགས་རང་བཞིན་མེད་པར་གསུངས་པ་སྒྲ་ཇི་བཞིན་པར་བཟུང་ན་ལས་འབྲས་དང་རྟེན་འབྱུང་གི་རྣམ་གཞག་ཐམས་ཅད་ལ་སྐུར་འདེབས་སུ་འགྲོ་བས་དགོངས་པ་གཞན་དུ་འགྲེལ་དགོས་ལ། འགྲེལ་ཚུལ་སྐྱེ་སོགས་རང་བཞིན་མེད་ཅེས་པ་དེ་རང་གི་ངོ་བོས་གྲུབ་པའི་རང་བཞིན་མེད་པ་མིན་གྱི། དགག་བྱའི་རང་བཞིན་དང་གནས་ལུགས་ལ་རང་བཞིན་དུ་བྱས་པའི་རང་བཞིན་དེ་གཉིས་ཀྱི་དབང་དུ་བྱས་པ་ཡིན་ནོ། །དེའི་ཚུལ་ཡང་དང་པོ་མདོར་བསྟན་གྱི་མཚན་ཉིད་ངོ་བོ་ཉིད་མེད་པའི་མཚན་གཞིར་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང་གྲུབ་པར་སྒྲོ་བཏགས་སོགས་ནི་སྐབས་འདིའི་མཚན་ཉིད་ངོ་བོ་ཉིད་མེད་པའང་ཡིན་པས། དེ་ནི་སྒྲོ་བཏགས་པ་ཙམ་

― GTD002_Page_0575 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་རང་གི་མཚན་ཉིད་ཀྱིས་མ་གྲུབ་གོང་དུ་ངོ་བོ་ཉིད་མེད་པར་གསུངས་པའི་དགོངས་གཞི་འཆད་པའི་སྐབས་སུ་སོང་ཟིན་པ་དེའི་དབང་དུ་བྱས་ཏེ། དེས་རིགས་འགྲོས་སྦྱར་ནས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པའི་སྐྱེ་སོགས་མེད་པའང་མ་སྐྱེས་པ་སོགས་སུ་གསུངས་པའི་དགོངས་གཞིར་བསྟན་པ་ཡིན་ཏེ། འདི་ལྟར་རང་གི་མཚན་ཉིད་ཀྱིས་མེད་པ་གང་ཡིན་པ་དེ་མ་སྐྱེས་པ་ཡིན་ཞེས་མ་སྐྱེས་པའི་རྒྱུ་མཚན་ལ་རང་མཚན་གྱིས་མེད་པ་བཀོད་ཀྱང། རང་མཚན་གྱིས་མེད་པའི་རྒྱུ་མཚན་མ་བཀོད་པ་ཡིན་ནོ། །གཉིས་པ་དོན་དམ་པ་ངོ་བོ་ཉིད་མེད་པ་མ་སྐྱེས་པ་སོགས་སུ་གསུངས་པའི་དགོངས་གཞིར་སྟོན་ཚུལ་ཡང། སྟོང་གཞི་གཞན་དབང་གི་རང་བཞིན་ནམ་གནས་ལུགས་མཐར་ཐུག་ནི་དོན་དམ་པ་ངོ་བོ་ཉིད་མེད་པའི་མཚན་གཞི་ཡོངས་གྲུབ་ཡིན་ལ། རང་བཞིན་མཐར་ཐུག་དེ་ནི་སྔོན་དང་ཕྱི་མའི་གནས་སྐབས་ནམ་གྱི་ཚེའང་སྐྱེ་འཇིག་དང་ཉོན་མོངས་ཀྱིས་བསླད་པ་སོགས་མེད་པར་རང་བཞིན་རྣམ་དག་ཅིག་ཏུ་གནས་པ་འགྱུར་མེད་ཡོངས་གྲུབ་ཅེས་བཤད་པ་ཡིན་པས། དེའི་དབང་དུ་བྱས་ནས་མ་སྐྱེས། མ་འགགས། གཟོད་མ་ནས་ཞི་བ་སོགས་སུ་གསུངས་པ་ཡིན་ནོ། །སྐབས་འདིར་སྐྱེ་བ་ངོ་བོ་ཉིད་མེད་པ་དངོས་སུ་མ་གསུངས་པ་ནི་དེའི་རང་ལྡོག་གཙོ་བོར་བཀར་བ་མིན་གྱི། དེའི་མཚན་གཞི་གཞན་དབང་ལོགས་སུ་བཀར་བ་ཡིན་ཏེ། རྒྱ་ནག་འགྲེལ་ཆེན་ལས། གཞན་དབང་སྐྱེ་བ་མེད་པ་སོགས་ཀྱི་དགོངས་གཞིར་མ་གསུངས་པ་ནི་རྟེན་ཅིང་འབྲེལ་བར་འབྱུང་བའི་དོན་མེད་པ་མ་ཡིན་པར་བསྟན་པའི་ཕྱིར་ཡིན། ཞེས་རྒྱུ་འབྲས་ཀྱི་རྣམ་གཞག་འཇོག་པའི་ཆེད་ཡིན་

― GTD002_Page_0576 ―

^{[མ་དཔེ་གཟིགས་ན་འདིར་གནོན།]}

[Full Size]

པར་གསུངས་ལ། གོང་དུའང་རང་མཚན་གྱིས་མ་གྲུབ་པའི་རྒྱུ་མཚན་གྱིས་མ་སྐྱེས་པར་བསྒྲུབས་པས་ལུགས་འདིར་སྐྱེ་ན་རང་མཚན་གྱིས་སྐྱེ་དགོས་པའི་ཁུངས་གསལ་ཤོས་ཡིན་ནོ། །འདི་ཉིད་ལས། རྟག་པ་རྟག་པའི་དུས་ནི་སྔ་མ་སྔ་མའི་དུས་དང། ཐེར་ཟུག་ཐེར་ཟུག་གི་དུས་ནི་ཕྱི་མ་ཕྱི་མའི་དུས་ལ་རྒྱ་ནག་འགྲེལ་ཆེན་ལས་བཤད་དོ། །ཞེས་བཤད་པ་བཀོད་ནས་དགག་པ་མ་མཛད་པས་རང་ལུགས་སུ་ཁས་ལེན་རུང་ལ། སའི་དངོས་གཞིར། རྟག་པའི་དུས་དང་ཐེར་ཟུག་གི་དུས་སུ་རྒྱུ་ལ་འབྲས་བུ་ཡོད་པ་ཁོ་ནར་མི་རུང་སྟེ། ཞེས་གཉི་ག་སྔ་མའི་དུས་ཀྱི་རྣམ་གྲངས་སུ་གསུངས་པ་ལྟར་བྱས་ཀྱང་ཆོག་སྟེ། སྔོན་ཐོག་མ་མེད་པའི་དུས་ཞེས་འབྱུང་བ་བཞིན་ནོ། །རྣམ་བཤད་རིགས་པར། གཟུགས་རྟག་པ་དང་བརྟན་པ་དང་ཐེར་ཟུག་པ་ཞེས་བྱ་བ་ནི་མདོ་སྡེའི་དུམ་བུའོ། །དེ་ལ་རྟག་པ་ནི་མི་རྟག་པ་ཉིད་མེད་པའི་ཕྱིར་རོ། །བརྟན་པ་ནི་སྐད་ཅིག་མར་འཇིག་པ་མེད་པའི་ཕྱིར་ཏེ་དུས་གཞན་དུ་གནས་པ་ཉིད་ཀྱིས་སོ། །ཐེར་ཟུག་ནི་རྒྱུད་འཇིག་པ་མེད་པའི་ཕྱིར་རོ། །ཞེས་གསུམ་ག་ཕྱི་མའི་དུས་ལ་སྦྱར་ཏེ། དངོས་པོ་རྣམས་སླར་འཇིག་པ་དང། དེའང་སྐད་ཅིག་གིས་འཇིག་པ་དང། དེར་མ་ཟད་རྒྱུན་དང་བཅས་པ་འཇིག་པ་གསུམ་ལས་བཟློག་སྟེ་བཤད་པ་ལྟ་བུ་སྣ་ཚོགས་ཡོད་པས་གཅིག་ཏུ་ངེས་གཟུང་མི་དགོས་སོ། །གཞན་དབང་གཟོད་མ་ནས་ཞི་བ་དང། རང་བཞིན་གྱིས་ཡོངས་སུ་མྱ་ངན་ལས་འདས་པར་གསུངས་པ་གཉིས་ཀྱི་དགོངས་གཞིར་མ་བསྟན་པ་ནི། མདོ་སྡེ་རྣམས་སུ་འཁོར་བ་དང་ཀུན་ཉོན་གྱི་ཕྱོགས་རྣམས་འདུས་བྱས་ཀྱིས་རབ་ཏུ་ཕྱེ་བ་དང། ཆོས་སྐུ་མྱང་འདས་སོགས་རྣམ་བྱང་གི་ཕྱོགས་རྣམས་འདུས་མ་བྱས་

― GTD002_Page_0577 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་རབ་ཏུ་ཕྱེ་བར་གསུངས་པ་མང་ལ། ཁྱད་པར་དུ་སེམས་ཙམ་པའི་སྐབས་འདིར་གཞན་དབང་གི་གཙོ་བོ་ཡང་དག་པ་མ་ཡིན་པའི་ཀུན་རྟོག་ལ་བཤད་པ་མང་ཞིང། བློ་གྲོས་རྣམ་དག་གི་ལེའུ་ལས་ཀྱང། དོན་དམ་པའི་མཚན་ཉིད་ཀུན་ནས་ཉོན་མོངས་པའི་མཚན་ཉིད་དུ་གཏོགས་པ་མ་ཡིན། ཞེས་དང། འདུ་བྱེད་ཀྱི་མཚན་ཉིད་ཀུན་ནས་ཉོན་མོངས་པའི་མཚན་ཉིད་དུ་གཏོགས་པ། ཞེས་འབྱུང་བས། དེ་མ་ཞི་བ་འཁོར་བའི་ཕྱོགས་དང་ཀུན་ཉོན་གྱི་ཕྱོགས་ཤས་ཆེ་བ་ལ་དགོངས་ནས་གཟོད་མ་ནས་ཞི་བ་དང་རང་བཞིན་གྱིས་མྱ་ངན་ལས་འདས་པར་གསུངས་པ་གཉིས་ཀྱི་དགོངས་གཞིར་མ་བསྟན་པ་ཡིན་ནོ། །མཐའ་དཔྱད་པ་ལ། ཁ་ཅིག་ན་རེ། སྐྱེ་བ་ངོ་བོ་ཉིད་མེད་པ་དེ་མ་སྐྱེས་པ་སོགས་སུ་གསུངས་པའི་དགོངས་གཞི་མ་ཡིན་པར་ཐལ། འདི་ཉིད་ལས། སྐྱེ་བ་མེད་པ་སོགས་གང་ལ་དགོངས་ནས་གསུངས་ཤེ་ན། འདི་ནི་ངོ་བོ་ཉིད་མེད་པ་དང་པོ་དང་ཐ་མ་ལ་དགོངས་ནས་གསུངས་ཏེ། ཞེས་གསུངས་པའི་ཕྱིར་ན། མ་ཁྱབ། མ་སྐྱེས་པ་སོགས་སུ་གསུངས་པའི་དགོངས་གཞི་དྲིས་པའི་ལན་དུ་སྐྱེ་བ་ངོ་བོ་ཉིད་མེད་པ་ལ་དགོངས་ཚུལ་མ་གསུངས་པའི་དོན་ཡིན་པའི་ཕྱིར། འདོད་མི་ནུས་ཏེ། དེའི་དགོངས་གཞིར་འཕགས་པ་ཐོགས་མེད་ཀྱིས་བཞེད་པའི་ཕྱིར། ཀུན་བཏུས་ལས ཀུན་བརྟགས་པའི་ངོ་བོ་ཉིད་ལ་མཚན་ཉིད་ངོ་བོ་ཉིད་མེད་པ་དང་གཞན་གྱི་དབང་ལ་སྐྱེ་བ་ངོ་བོ་ཉིད་མེད་པ་དང་ཡོངས་སུ་གྲུབ་པ་ལ་དོན་དམ་པ་ངོ་བོ་ཉིད་མེད་པའི་ཕྱིར་རོ། །མ་སྐྱེས་པ་མ་འགགས་པ་གཟོད་མ་ནས་ཞི་བ་རང་བཞིན་གྱིས་མྱ་ངན་ལས་འདས་པ་ཞེས་འབྱུང་བའི་དགོངས་པ་གང་ཡིན་ཞེ་ན། ཇི་ལྟར་ངོ་བོ་ཉིད་མེད་པ་དེ་ལྟར་མ་སྐྱེས་སོ། །ཇི་ལྟར་མ་སྐྱེས་པ་དེ་

― GTD002_Page_0578 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར་མ་འགགས་སོ། །ཇི་ལྟར་མ་སྐྱེས་པ་དང་མ་འགགས་པ་དེ་ལྟར་གཟོད་མ་ནས་ཞིའོ། །དེ་ལྟར་རང་བཞིན་གྱིས་ཡོངས་སུ་མྱ་ངན་ལས་འདས་སོ། །ཞེས་དང། འདི་ཉིད་ལས། ངོ་བོ་ཉིད་གསུམ་གྱི་རང་རང་གི་སྐབས་ཀྱི་ངོ་བོ་མེད་རྒྱུ་དེའི་དབང་དུ་བྱས་ནས་ཇི་ལྟར་ངོ་བོ་ཉིད་མེད་པ་དེ་ལྟར་མ་སྐྱེས་པ་དང་མ་འགགས་ལ་གཟོད་མ་ནས་ཞི་བ་དང། གདོད་ནས་མྱ་ངན་ལས་འདས་པའང་ཡིན་པ་ལ་དགོངས་ནས་ཀུན་བཏུས་ལས་དེ་ལྟར་བཤད། ཅེས་གསུངས་པའི་ཕྱིར། ཁྱབ་སྟེ། དེ་ལྟར་བྱེད་པ་རྗེ་བཙུན་གྱི་དགོངས་པ་ཡིན་པའི་ཕྱིར་ཏེ། རྒྱན་ལས། ཕྱི་མ་ཕྱི་མའི་རྟེན་ཡིན་པས། །ངོ་བོ་ཉིད་ནི་མེད་པ་ཡིན། །སྐྱེ་མེད་འགག་མེད་གཟོད་ནས་ཞི། །རང་བཞིན་མྱ་ངན་འདས་པ་གྲུབ། །ཅེས་གསུངས་ཤིང། གོང་དུ། རང་དང་རང་གི་མཚན་ཉིད་དུ། །ཅེས་སོགས་གཙོ་བོ་གཞན་དབང་ལ་སྦྱར་ཏེ་དུས་གསུམ་དུ་སྐྱེ་བ་ངོ་བོ་ཉིད་མེད་ཚུལ་གསུངས་པ་ནི་མདོའི་དགོངས་པ་ཁ་བསྐངས་ཏེ་མདོ་སྡེའི་རྒྱན་དུ་འགྱུར་ཚུལ་གྱི་མན་ངག་ཡིན་པའི་ཕྱིར། ཡང་ཁ་ཅིག་ན་རེ། སྐྱེ་བ་ངོ་བོ་ཉིད་མེད་པ་དེ་སྤྱིར་མ་སྐྱེས་པ་སོགས་སུ་གསུངས་པའི་དགོངས་གཞི་ཡིན་ཀྱང། དགོངས་འགྲེལ་ལས་དེ་དེའི་དགོངས་གཞིར་མ་གསུངས་པར་ཐལ། འདི་ཉིད་ལས། སྐྱེ་བ་སོགས་མེད་པའི་གཞི་ངོ་བོ་ཉིད་མེད་པ་བར་པ་ལ་མི་མཛད་པ་དང། ཞེས་གསུངས་པའི་ཕྱིར་ན། མ་ཁྱབ་སྟེ། དགོངས་འགྲེལ་ལས་མ་སྐྱེས་པ་སོགས་སུ་གསུངས་པའི་དགོངས་གཞིར་མ་གསུངས་ཞེས་པ་སྐྱེ་བ་ངོ་བོ་ཉིད་མེད་པའི་རང་ལྡོག་མིན་གྱི། དེའི་གཞི་ལྡོག་གཞན་དབང་དེ་ལྟར་དངོས་སུ་མ་གསུངས་པ་ཡིན་པའི་ཕྱིར། འདི་ཉིད་ལས། སྐྱེ་འགག་མེད་པར་གསུངས་པ་གཞན་དབང་ལ་དགོངས་པ་མིན་ལ། ཞེས་ལུང་གི་དོན་འགྲེལ་པའི་ཚེ་གཞན་དབང་གི་མིང་གིས་

― GTD002_Page_0579 ―

^{[མ་དཔེ་གཟིགས་ན་འདིར་གནོན།]}

[Full Size]

སྨོས་ལ། ཡིག་ཆར་ཡང། མདོ་འདིར་གཞན་དབང་སྐྱེ་འགག་མེད་པ་སོགས་ཀྱི་དགོངས་གཞིར་དངོས་སུ་མ་བསྟན་པ། ཞེས་གསལ་བར་གསུངས་པའི་ཕྱིར། གོང་དུ་འདོད་མི་ནུས་ཏེ། དགོངས་འགྲེལ་ལས་སྐྱེ་བ་ངོ་བོ་ཉིད་མེད་པ་དེ་མ་སྐྱེས་པ་སོགས་སུ་གསུངས་པའི་དགོངས་གཞིར་དངོས་སུ་བསྟན་པའི་ཕྱིར། དེར་ཐལ། མ་སྐྱེས་པ་སོགས་སུ་གསུངས་པའི་དགོངས་གཞི་དྲིས་པའི་ལན་གྱི་སྐབས་ནས་དངོས་སུ་མ་བསྟན་ཀྱང། འོག་ཏུ་མདོའི་དོན་གདུལ་བྱས་གོ་ཚུལ་མི་འདྲ་བར་བཤད་པའི་སྐབས་སུ་གསལ་བར་གསུངས་པའི་ཕྱིར། དགོངས་འགྲེལ་ལས། དོན་དམ་ཡང་དག་འཕགས། འདི་ལ་དེ་བཞིན་གཤེགས་པ་ནི་ངོ་བོ་ཉིད་མེད་པ་ཉིད་རྣམ་པ་གསུམ་པོ་དེ་དག་ཉིད་ལ་དགོངས་ནས། དྲང་བའི་དོན་གྱི་མདོ་བརྗོད་པའི་རྣམ་པ་འདི་ལྟ་སྟེ། ཆོས་ཐམས་ཅད་ངོ་བོ་ཉིད་མེད་པ། ཆོས་ཐམས་ཅད་མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ་ཞེས་སྟོན་ནོ། །ཞེས་གསུངས་པའི་ཕྱིར། འདི་ལ་ཡིག་ཆར་སྐྱེ་བ་ངོ་བོ་ཉིད་མེད་པ་མ་སྐྱེས་པ་སོགས་སུ་གསུངས་པའི་དགོངས་གཞིར་དངོས་སུ་མ་བསྟན་ན་ཇོ་ནང་པ་ལ་སྐྱོན་བསྟན་པ་དག་གིས་ཀྱང་གནོད་པར་གསུངས་པའི་ཚུལ་ནི། དོན་དམ་པ་ངོ་བོ་ཉིད་མེད་པ་བར་བའི་དགོངས་གཞིར་དངོས་སུ་མ་བསྟན་ན་བར་བས་ཡོངས་གྲུབ་རང་མཚན་གྱིས་མེད་པར་གསུངས་པའི་དགོངས་གཞི་དངོས་སུ་མ་བསྟན་པར་འགྱུར་བས། འདིར་དྲང་དོན་དུ་དངོས་སུ་བཀྲལ་བའི་འཁོར་ལོ་བར་བ་དེར་ཡོངས་གྲུབ་རང་མཚན་གྱིས་མེད་པར་མ་བསྟན་པར་འགྱུར་ཞེས་བཀག་པ་ཡིན་པ་ལ། རང་ལུགས་ལའང་

― GTD002_Page_0580 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་བ་ངོ་བོ་ཉིད་མེད་པ་གཞན་དབང་མ་སྐྱེས་པ་སོགས་སུ་གསུངས་པའི་དགོངས་གཞིར་དངོས་སུ་མ་བསྟན་ན། གཞན་དབང་མ་སྐྱེས་པ་སོགས་སུ་གསུངས་པའི་དགོངས་གཞི་དངོས་སུ་མ་བསྟན་པར་འགྱུར་ཏེ། ཀུན་བཏགས་རང་མཚན་གྱིས་མེད་པ་ལ་དགོངས་ནས་གཞན་དབང་མ་སྐྱེས་པ་སོགས་སུ་གསུངས་ཟེར་དོན་མེད་ཅིང་གཞན་དབང་རང་སྟེང་ན་དེའི་དགོངས་གཞི་དངོས་སུ་བསྟན་པའི་སྐྱེ་མེད་ཅིག་མེད་པའི་ཕྱིར། འདིར་དངོས་སུ་དྲང་དོན་དུ་བཀྲལ་བའི་འཁོར་ལོ་བར་བ་དེར་མ་སྐྱེས་པ་སོགས་སུ་གསུངས་པའི་ཆོས་ཀྱི་ནང་ན་གཞན་དབང་མེད་ཅེས་སྨྲ་དགོས་པར་འགྱུར་བའི་དོན་ནོ། །འདི་དག་ལ་དཔག་ནའང་སྐྱེ་བ་ངོ་བོ་ཉིད་མེད་པ་དེ་མཚན་ཉིད་གསུམ་དུ་ཕྱེ་བའི་ཚེ་གཞན་དབང་ཁོ་ན་རང་ངོས་ནས་མ་གྲུབ་པར་གསུངས་པའི་དགོངས་གཞི་དང། དོན་དམ་པ་ངོ་བོ་ཉིད་མེད་པ་ཡོངས་གྲུབ་ཁོ་ན་རང་ངོས་ནས་མ་གྲུབ་པར་གསུངས་པའི་དགོངས་གཞི་ཡིན་ཚོད་དུ་སྣང་སྟེ། དེ་མིན་ན་སྐྱེ་བ་ངོ་བོ་ཉིད་མེད་པ་གཞན་དབང་མ་སྐྱེས་པར་གསུངས་པའི་དགོངས་གཞིར་དངོས་སུ་མ་བསྟན་ཀྱང་དོན་དམ་པ་ངོ་བོ་ཉིད་མེད་པ་དེར་དངོས་སུ་བསྟན་བྱས་ཆོག་པས་ཇོ་ནང་པར་བརྗོད་པའི་སྐྱོན་འཇུག་དོན་མེད་པའི་ཕྱིར། གོང་དུ་ཡིག་ཆའི་གསུང་ཟིན་དགོངས་པ་ཡིན་མིན་བརྟག་དགོས་ཞེས་པའི་རྒྱུ་མཚན་འདི་ཡིན་ནོ། །དེ་ལ་ཁོ་ན་རེ། དོན་དམ་པ་ངོ་བོ་ཉིད་མེད་པ་དེ་མ་སྐྱེས་པ་སོགས་སུ་གསུངས་པའི་དགོངས་གཞི་མ་ཡིན་པར་ཐལ། དེ་གཞན་དབང་མ་སྐྱེས་པ་སོགས་སུ་གསུངས་པའི་དགོངས་གཞི་མ་ཡིན་པ་གང་ཞིག །ཡོངས་གྲུབ་དོན་ལའང་སྐྱེ་བ་མེད་པའི་ཕྱིར། རྟགས་དང་པོ་ཁས་ཟེར་ན། མ་ཁྱབ་སྟེ། མདོ་ལས་ཆོས་ཐམས་ཅད་སྐྱེ་བ་མེད་

― GTD002_Page_0581 ―

^{[མ་དཔེ་གཟིགས་ན་འདིར་གནོན།]}

[Full Size]

མཉམ་དུ་གསུངས་པ་དེ་མཚན་ཉིད་གསུམ་གའི་སྟེང་ན་གོ་རྒྱུ་ཐུན་མོང་མ་ཡིན་པ་རེ་ཡོད་པས་དེའི་དགོངས་གཞིར་བཀྲལ་བ་ཡིན་པའི་ཕྱིར། ཁྱོད་ལྟར་ན་བུམ་པ་རང་མཚན་གྱིས་སྐྱེ་བ་མེད་པར་གསུངས་པ་དེ་ཆོས་སྐུའི་ངོ་བོ་གོང་འཕེལ་དུ་འགྲོ་རྒྱུ་མེད་པ་ལ་དགོངས་པར་ཐལ། སྐྱེ་མེད་བརྒྱད་ཀ་ཁྱད་མེད་དུ་ཆོས་ཐམས་ཅད་སྐྱེ་བ་མེད་པར་གསུངས་པའི་དགོངས་གཞིར་འཇོག་རིགས་པའི་ཕྱིར། ཁ་ཅིག་ན་རེ། འདིར་བསྟན་འཁོར་ལོ་བར་བས་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་མ་སྐྱེས་པར་གསུངས་པར་ཐལ། མ་སྐྱེས་པ་སོགས་སུ་གསུངས་པའི་དགོངས་གཞི་འཆད་རིགས་པའི་ཕྱིར་ན། མ་ཁྱབ་སྟེ། རང་གི་མཚན་ཉིད་ཀྱིས་མ་སྐྱེས་པར་གསུངས་པའི་དགོངས་གཞི་ཡིན་པའི་ཕྱིར། འདོད་མི་ནུས་ཏེ། དེས་གཟུགས་སོགས་མ་སྐྱེས་པར་མ་གསུངས་པའི་ཕྱིར་ཏེ། ཐལ་འགྱུར་བ་ལ་གཟུགས་སྐྱེ་བ་མེད་པར་སྟོན་མི་དགོས་པའི་ཕྱིར། མ་གྲུབ་ན། དེས་ཐལ་འགྱུར་བ་ལ་ལས་འབྲས་དང་ཐར་པ་སོགས་མེད་པར་བསྟན་པར་ཐལ། ལས་དགེ་བའི་འབྲས་བུ་བདེ་བ་སོགས་སྐྱེ་བ་མེད་པར་བསྟན་པ་གང་ཞིག །ལས་དང་ཉོན་མོངས་སོགས་འགག་པ་མེད་པར་བསྟན་པའི་ཕྱིར། ཡང་ཁོ་ན་རེ། དགོངས་འགྲེལ་ལས་གཞན་དབང་སྐྱེ་བ་ངོ་བོ་ཉིད་མེད་པར་གསུངས་པའི་དགོངས་གཞིར་དངོས་སུ་བསྟན་པར་ཐལ། གཞན་དབང་སྐྱེ་བ་ངོ་བོ་ཉིད་མེད་པར་གསུངས་པའི་དགོངས་གཞི་དངོས་སུ་བསྟན་པའི་ཕྱིར་ན། མ་ཁྱབ། རྟགས་གྲུབ་སྟེ། གཞན་དབང་དོན་དམ་པར་སྐྱེ་བ་མེད་པར་གསུངས་པའི་དགོངས་གཞི་དངོས་སུ་བསྟན་པ་གང་ཞིག །གཞན་དབང་གི་སྐྱེ་བ་དོན་དམ་པར་མེད་པར་གསུངས་པའི་

― GTD002_Page_0582 ―

^{[མ་དཔེ་གཟིགས་ན་འདིར་གནོན།]}

[Full Size]

དགོངས་གཞིའང་དངོས་སུ་བསྟན་པའི་ཕྱིར། དང་པོ་གྲུབ་སྟེ། གཞན་དབང་གི་སྟེང་གི་ངོ་བོ་ཉིད་མེད་པ་ཐོག་མཐའ་གཉི་ག་དེ་ཡིན་པའི་ཕྱིར། གཉིས་པ་གྲུབ་སྟེ། གཞན་དབང་སྐྱེ་བའི་སྟེང་གི་མཚན་ཉིད་གསུམ་ག་དེ་ཡིན་པའི་ཕྱིར། ཁ་ཅིག་འདིར་མྱ་ངན་ཞེས་པ་ཀུན་ཉོན་དུ་གསུངས་པ་སེམས་ཙམ་པའི་ལུགས་སུ་བྱས་ནས་ངོ་བོ་ཉིད་མེད་པར་སྨྲ་བའི་ལུགས་ལ་དགག་བྱ་བདེན་གྲུབ་ཏུ་འདོད་ཅེས་ཁྱད་འབྱེད་པ་མི་རིགས་ཏེ། གཉི་གའི་ལུགས་ལ་ཀུན་ཉོན་ཡིན་པའི་ཕྱིར། བྱས་པ་ལ་ཁོ་ན་རེ། དབུ་མ་པའི་ལུགས་ལ་མྱ་ངན་དེར་ཀུན་ཉོན་མི་ཡོང་བར་ཐལ། རང་བཞིན་གྱི་མྱང་འདས་དེ་སྟོང་ཉིད་ཡིན་པའི་ཕྱིར་ན། མ་ཁྱབ། རྟགས་གྲུབ་སྟེ། བཞི་བརྒྱ་བར། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །སྟོང་ཉིད་མྱ་ངན་འདས་པར་ཏེ། །འདིར་ནི་དེ་གཉིས་འབའ་ཞིག་གོ །ཞེས་དང། དེའི་དར་ཊཱིཀ་ལས། དེས་ན་མཐོ་རིས་ཐོབ་བྱེད་ཀྱི་ཆོས་ནི་མི་འཚེ་བར་དེ་བཞིན་གཤེགས་པས་གསུངས་སོ། །ཐར་པ་ཐོབ་པར་བྱེད་པའི་ཆོས་ནི་ཆོས་རྣམས་རང་བཞིན་གྱིས་གྲུབ་པས་སྟོང་པ་ཉིད་རང་བཞིན་གྱི་མྱང་འདས་དང། ཞེས་གསུངས་པའི་ཕྱིར། ཀུན་ཉོན་གྱི་ཆོས་རྣམས་སྟོང་ཉིད་ཀྱི་དགག་བྱར་མི་རིགས་པས་དེ་སྐབས་འདིའི་མྱ་ངན་ལ་བཞག་ནས་རང་བཞིན་གྱི་མྱང་འདས་སྟོང་ཉིད་དུ་བྱ་ཚུལ་ཇི་ལྟར་ཡིན་སྙམ་ན། རྩ་ཤེ་ལས། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགགས་པར་འགྱུར། །ཞེས་དང། ཟླ་བའི་འགྲེལ་པ་ཚིག་གསལ་ལས། ལས་དང་ཉོན་མོངས་པ་ལོག་པས་སྐྱེ་བ་ལོག་པ་དེའི་ཕྱིར་སྟོང་པ་ཉིད་ཁོ་ན་སྤྲོས་པ་ཐམས་ཅད་ལོག་པའི་མཚན་ཉིད་ཅན་

― GTD002_Page_0583 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པས། རང་བཞིན་གྱིས་མྱ་ངན་ལས་འདས་པ་ཞེས་བྱའོ། །ཞེས་པ་ལྟར་ཡིན་ཏེ། དཔེར་ན་ནམ་མཁའ་གཟུགས་ཅན་གཞན་གྱིས་བསྒྲིབས་པའི་ཚེ་དེའི་བདག་ཉིད་དུ་སོང་ན་ནམ་མཁའང་གདོས་བཅས་སུ་འགྲོ་བ་ལ། དེར་མ་སོང་བར་ཐོགས་རེག་བཅད་ཙམ་དུ་གནས་པ་དེ་ག་ནམ་མཁའ་ཡིན་པ་ལྟར། སེམས་ཀྱི་ངོ་བོ་དྲི་མས་བསྒྲིབས་ཀྱང་རང་བཞིན་ལ་མ་ཞུགས་པར་རང་བཞིན་ལས་ཉོན་གྱི་སྤྲོས་པ་དེ་དག་གིས་དབེན་ཞིང་རྣམ་པར་དག་པའི་ཆ་དེ་རང་བཞིན་གྱི་མྱང་འདས་ཡིན་ཏེ། སློབ་པའི་ཚེ་མྱ་ངན་དེ་རང་བཞིན་ལ་མ་ཞུགས་པའི་ཆ་ནས་རང་བཞིན་གྱི་མྱང་འདས་ཞེས་བྱ་ལ། མི་སློབ་པའི་ཚེ་མྱ་ངན་དེས་རང་གི་ངོ་བོ་ཙམ་ཡང་བསྒྲིབ་མི་ནུས་པས་མྱང་འདས་དངོས་ཀྱི་སྒྲ་ཐོབ་པའི་ཕྱིར། དེས་ན་རང་བཞིན་གྱི་མྱ་ངན་དང་དེའི་ཚིག་ཟུར་གྱི་མྱ་ངན་དོན་མི་གཅིག་སྟེ། རང་བཞིན་སྨོས་པའི་དགོས་པ་ཡོད་པའི་ཕྱིར་དང། དཔེར་ན་གསེར་གྱི་རང་བཞིན་ལ་ཞུགས་པའི་བཙའ་མེད་ཅེས་པས་དེའི་རང་བཞིན་ལ་ཞུགས་པའི་བཙའ་ཡོད་པ་བཀག་ཀྱང་སྤྱིར་བཙའ་ཡོད་པ་མི་འགོག་པ་ལྟར། རང་བཞིན་ལ་ཞུགས་པའི་མྱ་ངན་དེ་སྟོང་ཉིད་ཀྱི་དགག་བྱ་ཡིན་ཀྱང་དེའི་ཚིག་ཟུར་གྱི་མྱ་ངན་ཙམ་ལ་སྟོང་ཉིད་ཀྱི་དགག་བྱ་དང་མེད་པ་མི་དགོས་པའི་ཕྱིར། སེམས་ཙམ་པའང་ཐེག་བསྡུས་སོགས་ནས་འབྱུང་བ་ལྟར་སེམས་ཀྱི་རང་བཞིན་དྲི་མས་མ་བསླད་པའི་འོད་གསལ་བར་ཁས་ལེན་ཀྱང་ངོ་བོ་དྲི་མས་བསྒྲིབ་ཚུལ་རྟོག་བཏགས་ཙམ་མ་ཡིན་པར་དྲི་མ་ཁོ་རང་གི་ངོས་ནས་དེ་སྒྲིབ་བྱེད་དུ་སྐྱེས་པར་འདོད་པ་དེ་དབུ་མ་པས་གཞལ་ན་རང་བཞིན་བསླད་པའི་དོན་དུ་འགྱུར་ཏེ། དེ་ལྟར་བསྒྲིབས་པ་ཡིན་ན་འབྲལ་མི་རུང་བར་འདོད་པའི་ཕྱིར།

― GTD002_Page_0584 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཙམ་པས་དེ་ངོ་བོ་སྒྲིབ་པ་ཙམ་དུ་འདོད་དེ། དེ་འདྲ་ཞིག་མ་བྱུང་ན་སྒྲིབ་པར་རློམ་ཙམ་ཡིན་པས་སྒྲིབ་པ་དངོས་སུ་མི་འགྱུར་ལ། དེའི་ཕྱིར་གང་ཟག་ཐམས་ཅད་སངས་རྒྱས་སུ་འགྱུར་ཞིང་ཀུན་ཉོན་གྱི་ཆོས་རྣམས་ཡེ་མེད་དུ་འགྲོ་བར་འདོད་དོ། །གནད་འདི་མ་གོ་བར་རང་བཞིན་ཞེས་པའི་ཚིག་ཙམ་ལ་རེ་བས་གྲུབ་མཐའི་གཏིང་དཔོག་ག་ལ་ནུས་ཏེ། མཐར་ཐུག་ཐེག་གཅིག་དང་ཐེག་གསུམ་འདོད་པའི་རྩ་བའང་འདིས་བྱས་སོ། །དེ་ལ་ཁ་ཅིག་ན་རེ། སེམས་ཀྱི་རང་བཞིན་དྲི་མས་བསླད་པ་དང་བྲལ་བ་དེ་སྐབས་འདིའི་མྱང་འདས་ཀྱི་དོན་ཡིན་པར་ཐལ། གོང་འོག་གི་འཆད་ཚུལ་འཐད་པའི་ཕྱིར། འདོད་ན། དེ་སྟོང་ཉིད་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཉིད་གཞན་དབང་གིས་སྟོང་པ་སྟོང་ཉིད་དུ་འཆད་པ་དོལ་པོ་པ་སོགས་ཀྱི་ལུགས་ཡིན་པའི་ཕྱིར་ཟེར་ན། བློའི་ཤེད་མ་ཕྱེ་བ་རྣམས་ལ་དོགས་པ་འདི་སྐྱེ་བ་ཤིན་ཏུ་བདེན་པས་བཤད་པར་བྱ་སྟེ། ཕ་རོལ་པོས་ཡོངས་གྲུབ་གཞན་དབང་གིས་སྟོང་པར་བཤད་པ་ནི་ལང་གཤེགས་ལས་སྟོང་ཚུལ་བདུན་གསུངས་པའི་ཐ་མ་ས་ཕྱོགས་བུམ་པས་སྟོང་པ་ལྟ་བུ་དོན་གཞན་གྱི་རྟེན་བརྟེན་པའི་ཚུལ་དུ་གྲུབ་པས་སྟོང་པ་ཡིན་ལ། སྟོང་གཞིའང་ཡོངས་གྲུབ་རང་ལ་བྱེད་དགོས། འདིར་བཤད་པ་ནི་དྲི་མ་སེམས་ཀྱི་རང་བཞིན་ལ་ཞུགས་ན་རང་བཞིན་དང་དེ་གཉིས་ཡུལ་དུས་གནས་སྐབས་གང་ལ་ལྟོས་ཏེ་དབྱེ་མི་རུང་ཡིན་དགོས་པས། སེམས་ཀྱི་རང་བཞིན་མཐོང་བའི་ཡེ་ཤེས་རྣམ་པར་མི་རྟོག་པའི་ངོ་བོར་ཡང་དྲི་མ་ལས་ཉོན་བག་ཆགས་དང་བཅས་པ་དེ་དག་གི་སྤྲོས་པ་ཁེགས་མི་ནུས་པས། ཡེ་ཤེས་དེའི་ངོར་ལས་ཉོན་གྱི་དྲི་མ་ཡོད་པ་རང་བཞིན་གྱི་མྱ་ངན་དང་ཆོས་ཉིད་ཀྱི་དགག་བྱར་བཤད་པ་ཡིན་པ་གང་ཞིག །རིག་

― GTD002_Page_0585 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ཀྱི་ངོར་ཀུན་རྫོབ་ཀྱི་ཆོས་ཡོད་པ་རིག་ངོའི་དགག་བྱར་དོལ་པོ་པ་མ་ཡིན་པ་དག་གིས་ཀྱང་འདོད་དགོས་པའི་ཕྱིར། དེས་ན་འདིའི་སྟོང་གཞིར་སེམས་དེ་ཉིད་ཡོང་སྟེ། སེམས་སྟེང་དུ་ཆོས་བདག་བཙལ་མཐར་སྒྲུབ་ཕྱོགས་ནས་རྙེད་རྒྱུ་ཞིག་བྱུང་ན་སེམས་སྟེང་གི་ཆོས་བདག་ཡིན་དགོས་པའི་ཕྱིར། དེ་ལྟ་མ་ཡིན་ན་གནས་ལུགས་ཀྱི་ངོ་བོ་བསྒྲིབས་པའི་དྲི་མ་ལམ་གྱི་སྟོབས་ཀྱིས་ཟད་ཆའི་འགོག་བདེན་དེ་སྟོང་ཉིད་མ་ཡིན་པར་ཐལ། གནས་ལུགས་ཁོ་རང་གི་བདག་ཉིད་སློད་བྱེད་ཀྱི་དྲི་མ་གདོད་ནས་ཟད་པ་དེ་ཆོས་ཉིད་མ་ཡིན་པའི་ཕྱིར། རྟགས་ཁས། ཁྱབ་སྟེ། དེ་གཉིས་ལས་ཕྱི་མ་ཆོས་ཉིད་དུ་འཇོག་པ་ལ་དོགས་པའང་ཆེར་མེད་ལ། སྔ་མ་ནི་ལམ་གྱི་སྟོབས་ཀྱིས་ཡིན་ཞིང། ཆོས་ཉིད་ནི་བཅོས་མ་མ་ཡིན་པ་ཞིག་དགོས་སྙམ་ནས་རང་རྒྱུད་པ་སོགས་འགོག་བདེན་ཆོས་ཉིད་མ་ཡིན་པར་བཞེད་པ་དང། སེམས་ཙམ་པས་དྲི་མ་ཟད་པ་ལམ་གྱི་སྟོབས་ཀྱིས་ཡིན་ཀྱང་གང་གི་ངོ་བོར་ཟད་པའི་ཆོས་དབྱིངས་ནི་ནམ་ཡང་འགྱུར་ལྡོག་མེད་པས་སེམས་ཀྱི་རང་བཞིན་གདོད་ནས་གནས་པ་དེ་ཡིན་པའི་སྐྱོན་མེད་པར་སྨྲ་སྟེ། འདིར་ཡང་རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་རྣམ་པར་གནས་པའི་རྒྱུ་མཚན་གྱིས་སྐྱེ་འགག་མེད་ཅིང་ཀུན་ཉོན་དང་བྲལ་བས་རང་བཞིན་གྱི་མྱང་འདས་སུ་གསུངས་པའང། རྒྱུད་བླ་མར་རྣམ་གཞག་རྣམ་པ་བཅུའི་ནང་ནས་གནས་སྐབས་ཀྱི་དོན་ངོ་བོ་སྒྲིབ་བྱེད་ཡོད་མེད་ཀྱི་མིང་འདོགས་སོ་སོ་བར་བྱས་ཀྱང་རང་བཞིན་ནམ་ཡང་དྲི་མས་བསླད་པ་མེད་པས་སྔ་ཕྱིའི་དུས་ཀུན་ཏུ་མི་འགྱུར་བར་གནས་པ་འགྱུར་བ་མེད་པའི་དོན་དུ་བཤད་ལ། ཐེག་བསྡུས་ལས། གཞན་དུ་མི་

― GTD002_Page_0586 ―

^{[མ་དཔེ་གཟིགས་ན་འདིར་གནོན།]}

[Full Size]

འགྱུར་བའི་ཕྱིར་ཡོངས་གྲུབ་བོ། །ཞེས་ཡོངས་གྲུབ་ཀྱི་སྒྲ་དོན་ཡང་དེ་ལྟར་གསུངས་པ་དང། རྒྱན་ལས་ཕྱི་མ་ཕྱི་མའི་རྟེན་ཡིན་པས་ཞེས་པ་ལྟར་དཀྱུས་གཅིག་ཏུ་སོང་བ་དགོས་ཀྱི། སྐྱེ་འགག་མེད་པ་ཙམ་གྱི་རྒྱུ་མཚན་དུ་སྔ་ཕྱིའི་དུས་ཀུན་ཏུ་རྣམ་པར་གནས་པའི་ཕྱིར་ཞེས་བཀོད་པས་མདོའི་དོན་མི་རྫོགས་སོ། །གཞན་ཡང་སེམས་ཀྱི་རང་བཞིན་ལ་དྲི་མའི་སླད་པ་མ་ཞུགས་པ་ཆོས་ཉིད་ཡིན་པར་ཐལ། སེམས་ཀྱི་རང་བཞིན་འོད་གསལ་བ་ཆོས་ཉིད་ཡིན་པའི་ཕྱིར། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཏེ། །དྲི་མ་རྣམས་ནི་གློ་བུར་བ། །ཞེས་གསུངས་པའི་ཕྱིར། ཁྱབ་སྟེ། འདིའི་རང་བཞིན་འདི་གསལ་བ་དེ་ཆོས་ཉིད་ལ་བྱས་ནས་ནམ་མཁའ་དང་དཔེ་སྦྱར། དྲི་མ་གློ་བུར་བ་སྤྲིན་དང་དཔེ་སྦྱར་ནས་དེ་ནམ་མཁའི་ངོ་བོར་ཟད་པ་ལྟར་དྲི་མ་ཆོས་དབྱིངས་སུ་ཟད་པར་འདོད་པའི་ཕྱིར། ཕར་ཕྱིན་མཐའ་དཔྱོད་དུ་རང་བཞིན་དྲི་མས་མ་བསླད་པའི་ཤེས་བྱེད་ལ་ཐེག་བསྡུས་ཀྱི། ཆུ་ཁམས་གསེར་དང་ནམ་མཁའ་ཞེས་སོགས་དྲངས་པ་ལེའུ་དང་པོའི་ཆོས་ཉིད་རྒྱས་བཤད་ཀྱི་སྐབས་ཡིན་པ་གང་ཞིག །ལེའུ་བཞི་པར་ཡང། ཆོས་ཀྱི་དབྱིངས་ནི་རང་བཞིན་གྱིས། །རྣམ་པར་དག་ཕྱིར་ནམ་མཁའ་བཞིན། །གཉིས་ནི་གློ་བུར་བྱུང་བ་སྟེ། །ཞེས་གསུངས་པའི་ཕྱིར། འདིའི་གཉིས་ཞེས་པ་དག་མ་དག་གཉིས་ཡིན་ལ། ཞིབ་ཆ་འགྲེལ་བཤད་དུ་གསལ། དྲི་མ་སེམས་ཀྱི་རང་བཞིན་ལ་མ་ཞུགས་པའི་ཆོས་ཉིད་དུ་འཆད་ཚུལ་གཞན་ཡང་ཡོད་དེ། རྣམ་འགྲེལ་ཐར་ལམ་གསལ་བྱེད་ལས། སེམས་ལ་བདག་འཛིན་གྱི་མུན་པ་བབ་པ་དེས་རང་བཞིན་ལ་མ་ཞུགས་པའི་དོན་ཏེ། ཞུགས་ན་བདག་འཛིན་གྱི་འཛིན་སྟངས་སེམས་ཀྱི་གནས་ལུགས་ལ་ཇི་ལྟར་

― GTD002_Page_0587 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་པ་དེ་དང་མཐུན་པར་འགྱུར་ལ། དེ་ལྟ་ན་བདག་མེད་མེད་ཅིང་བདག་ཡོད་པར་འགྱུར་རོ། །ཞེས་བདག་འཛིན་དེའི་ཞེན་ཚུལ་དོན་གྱི་སྡོད་ལུགས་སུ་སོང་མ་སོང་ལ་གསུངས་པས། དེས་བཟུང་བ་ལྟར་མ་གྲུབ་པ་དྲི་མ་རང་བཞིན་ལ་མ་ཞུགས་པའི་དོན་དུ་གསལ་བར་བསྟན་པའི་ཕྱིར། དེ་ལྟར་མ་གོ་བར་ཆོས་ཉིད་དྲི་མས་བསླད་མ་བསླད་ཀྱི་དོགས་པ་འབྲེལ་མེད་སྙམ་ནས་རང་བཞིན་དེ་ལྡན་མིན་ཞིག་ཏུ་སྨྲ་བ་སོགས་མཐོང་རྒྱ་ཆུང་བས་བློ་གུ་དོག་པར་ཟད་དོ། །མདོ་ཡི་དགོངས་པ་འགྲེལ་པའི་ཚུལ། །མདོ་རྒྱས་གཉིས་སུ་གསུངས་པ་རྣམས། །མདོ་དང་བསྟན་བཅོས་གུང་བསྒྲིགས་ཏེ། །མདོ་ཙམ་གཏམ་དུ་བསྙད་པ་ཡིན། །ཆོས་དཀར་འོད་ཀྱིས་འཁྱུད་པ་པདྨའི་སྤྱན། །དབང་འབྱོར་རྒྱ་མཚོས་མི་ངོམས་རྒོད་མ་ཁ། །བཀོལ་བའི་བསྟན་འཛིན་མཁས་པ་ཀུནྡའི་ཚལ། །ཀུན་ལ་བདུད་རྩིའི་མཆོད་ཡོན་སྦྲེངས་སམ་སྙམ། །༈ གསུམ་པ་ངོ་བོ་ཉིད་གསུམ་གྱི་ངོ་བོ་ངོས་བཟུང་བ་ལ། ཀུན་བཏགས་ཀྱི་ངོ་བོ་ཉིད། གཞན་དབང་གི་ངོ་བོ་ཉིད། ཡོངས་གྲུབ་ཀྱི་ངོ་བོ་ཉིད་གསུམ་དུ་ཡོད་པས། དེ་གསུམ་རེ་རེ་བཞིན་དྲི་བས་མཚམས་སྦྱར། བཤད་བྱའི་མདོ་བཀོད། མདོའི་དོན་བཤད་པ་གསུམ་གསུམ་གྱིས་གཏན་ལ་འབེབས་པར། ཀུན་བཏགས་མཚན་ཉིད་ངོ་བོ་ཉིད་མེད་པ་ཉིད་ཡིན་ན་ཀུན་བཏགས་ཉིད་གང་ཡིན་སྙམ་ན། ཞེས་པ་ནས། ཀུན་བཏགས་ཁོ་ནས་ངོ་བོ་ཉིད་མེད་པ་ལ་ཡོངས་གྲུབ་ཏུ་བྱེད་ཅེས་པའི་དོན་ནོ། །ཞེས་པའི་བར་དང། ངོ་བོ་ཉིད་ཕྱི་མའི་དོན་ལས་འཕྲོས་ཏེ་ཇོ་ནང་པ་ལ་འགལ་བ་སྟོན་ཚུལ། འདུས་བྱས་འདུས་མ་བྱས་ཀུན་རྫོབ་དོན་དམ་

― GTD002_Page_0588 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་ཀྱི་སྟེང་ནས་མཚན་ཉིད་གསུམ་འཇོག་ལུགས་འདྲ་ཚུལ་དང་བཅས་པ་སྟོན་པར། དེ་ཉིད་གོང་མས། ཞེས་པ་ནས། དོན་དམ་ཡང་དག་འཕགས་ཀྱིས་སྟོན་པ་ལ་གསོལ་བའོ། །ཞེས་པའི་བར་བྱུང། བཤད་བྱའི་མདོ་གསུམ་ནི་དགོངས་འགྲེལ་ལས། བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འདི་ལྟར་འཚལ་ཏེ་རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་ལ་གཟུགས་ཀྱི་ཕུང་པོ་ཞེས་ངོ་བོ་ཉིད་དམ་བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་བཞག་པ་དང། གཟུགས་ཀྱི་ཕུང་པོ་སྐྱེའོ་ཞེའམ། འགག་གོ་ཞེའམ། གཟུགས་ཀྱི་ཕུང་པོ་སྤང་བ་དང་ཡོངས་སུ་ཤེས་པ་ཞེས་ངོ་བོ་ཉིད་ཀྱི་མཚན་ཉིད་དམ་བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་བཞག་པ་གང་ལགས་པ་དེ་ནི་ཀུན་བརྟགས་པའི་མཚན་ཉིད་ལགས་ཏེ། དེ་ལ་བརྟེན་ནས་བཅོམ་ལྡན་འདས་ཆོས་རྣམས་ཀྱི་མཚན་ཉིད་ངོ་བོ་ཉིད་མེད་པ་ཉིད་འདོགས་པར་མཛད་ལགས་སོ། །ཞེས་དང། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་གང་ལགས་པ་དེ་ནི་གཞན་གྱི་དབང་གི་མཚན་ཉིད་ལགས་ཏེ། དེ་ལ་བརྟེན་ནས་བཅོམ་ལྡན་འདས་ཆོས་རྣམས་ཀྱི་སྐྱེ་བ་ངོ་བོ་ཉིད་མ་མཆིས་པ་ཉིད་དང་དོན་དམ་པའི་ངོ་བོ་ཉིད་མ་མཆིས་པ་དེ་ལས་གཅིག་ཀྱང་འདོགས་པར་མཛད་ལགས་སོ། །ཞེས་དང། རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད་ཀུན་བརྟགས་པའི་མཚན་ཉིད་དེར་ཡོངས་སུ་མ་གྲུབ་ཅིང་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་

― GTD002_Page_0589 ―

^{[མ་དཔེ་གཟིགས་ན་འདིར་གནོན།]}

[Full Size]

མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཏེ། དེ་ལ་བརྟེན་ནས་བཅོམ་ལྡན་འདས་དོན་དམ་པ་ངོ་བོ་ཉིད་མ་མཆིས་པ་དེ་ལས་གཅིག་འདོགས་པར་མཛད་ལགས་སོ། །ཞེས་དང་པོར་གཟུགས་ཕུང་གི་སྟེང་ནས་ཚན་གསུམ་གསུངས་ལ། དེ་ནས། གཟུགས་ཀྱི་ཕུང་པོ་ལ་ཇི་ལྟ་བ་བཞིན་དུ་ཕུང་པོ་ལྷག་མ་རྣམས་ལའང་དེ་བཞིན་དུ་སྦྱར་བར་བགྱི་ལགས་སོ། །ཕུང་པོ་རྣམས་ལ་ཇི་ལྟ་བ་བཞིན་དུ་སྐྱེ་མཆེད་བཅུ་གཉིས་པོ་དག་གི་སྐྱེ་མཆེད་རེ་རེ་ལའང་དེ་བཞིན་ལགས་སོ། །སྲིད་པའི་ཡན་ལག་བཅུ་གཉིས་པོ་དག་གི་སྲིད་པའི་ཡན་ལག་རེ་རེ་ལའང་དེ་བཞིན་ལགས་སོ། །ཟས་བཞི་པོ་དག་གི་ཟས་རེ་རེ་ལའང་དེ་བཞིན་ལགས་སོ། །ཁམས་དྲུག་དང་ཁམས་བཅོ་བརྒྱད་པོ་དག་གི་ཁམས་རེ་རེ་ལའང་དེ་བཞིན་ལགས་སོ། །ཞེས་དང། སྡུག་བདེན་ལ་གཟུགས་ཕུང་གི་སྐབས་བཞིན་རྒྱས་པར་གསུངས་པའི་མཇུག་ཏུ། སྡུག་བསྔལ་འཕགས་པའི་བདེན་པ་ལ་ཇི་ལྟ་བ་བཞིན་དུ་བདེན་པ་ལྷག་མ་རྣམས་ལའང་དེ་བཞིན་དུ་སྦྱར་བར་བགྱི་ལགས་སོ། །བདེན་པ་རྣམས་ལ་ཇི་ལྟ་བ་བཞིན་དུ་དྲན་པ་ཉེ་བར་བཞག་པ་རྣམས་དང། ཡང་དག་པའི་སྤོང་བ་རྣམས་དང། རྫུ་འཕྲུལ་གྱི་རྐང་པ་རྣམས་དང། དབང་པོ་རྣམས་དང། སྟོབས་རྣམས་དང། བྱང་ཆུབ་ཀྱི་ཡན་ལག་རྣམས་དང། ལམ་གྱི་ཡན་ལག་རྣམས་ཀྱི་ཡན་ལག་རེ་རེ་ལའང་དེ་བཞིན་དུ་སྦྱར་བར་བགྱི་ལགས་སོ། །ཞེས་གསུངས་ནས་མཐར་ཡང་དག་པའི་ཏིང་ངེ་འཛིན་ལ་སྦྱར་ཏེ་ཡང་གོང་བཞིན་རྒྱས་པར་གསུངས་སོ། །འདི་ལ་སྤྱི་དོན་དང་མཐའ་དཔྱད་པ་

― GTD002_Page_0590 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས། དང་པོ་ནི། ངོ་བོ་ཉིད་མེད་པ་གསུམ་པོ་དེའང་ངོ་བོ་ཉིད་དམ་མཚན་ཉིད་གསུམ་ལས་ལོགས་སུ་མེད་ཀྱང། བར་བའི་དགོངས་གཞིར་སྟོན་པ་ན་སྒྲུབ་ཕྱོགས་ནས་མཚན་ཉིད་གསུམ་གྱི་སྒྲས་མ་བསྟན་པར་དགག་ཕྱོགས་ནས་ངོ་བོ་ཉིད་མེད་པའི་མིང་གིས་བཏགས་ཏེ་བསྟན་པ་ནི། བར་བས་ངོ་བོ་ཉིད་མེད་པར་གསུངས་པ་དེ་རང་བཞིན་གྱིས་གྲུབ་པའི་ངོ་བོ་ཡེ་ནས་མེད་པ་མིན་གྱི། མེད་ཚུལ་འདི་དང་འདི་འདྲ་བ་རེ་ལ་དགོངས་པ་ཡིན་ནོ་ཞེས་གདུལ་བྱས་གོ་བདེ་བའི་ཕྱིར་དེ་ལྟར་བཏགས་པ་ཡིན་ནོ། །དེས་ན་བཏགས་ཆོས་ངོ་བོ་ཉིད་མེད་པ་གསུམ་ངེས་པ་ལ་གདགས་གཞི་ངོ་བོ་ཉིད་གསུམ་ངེས་དགོས་པས་འདིར་དེ་ངོས་འཛིན་ཚུལ་གསུངས་སོ། །དེའང་སྒྲ་རྟོག་གིས་སྒྲ་བཏགས་པ་ཙམ་གྱི་ཆ་ནི་ཀུན་བཏགས་ཀྱི་ངོ་བོ་ཡིན་ལ། རི་བོང་རྭ་ལྟ་བུ་མེད་རྒྱུའི་ཀུན་བཏགས་སམ་མཚན་ཉིད་ཡོངས་ཆད་ཀྱི་ཀུན་བཏགས་དང། སྤྱི་མཚན་དང་ནམ་མཁའ་ལྟ་བུ་རྣམ་གྲངས་པའི་ཀུན་བཏགས་གཉིས་སུ་ཡོད་ཀྱང། འདིའི་དངོས་བསྟན་ནི་གཟུགས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པའམ་གྲུབ་པར་སྒྲོ་བཏགས་པ་ལྟ་བུ་ངོ་བོ་ལ་ཀུན་བཏགས་པ་དང། གཟུགས་ཀྱི་སྐྱེ་བ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང་གྲུབ་པར་སྒྲོ་བཏགས་པ་ལྟ་བུ་ཁྱད་པར་ལ་ཀུན་བཏགས་པ་གཉིས་སུ་མཛད་པས། ཤུགས་བསྟན་གང་ཟག་གི་བདག་ལ་སྦྱར་ཏེ་ངོ་བོ་དང་ཁྱད་པར་ལ་ཀུན་བཏགས་པ་གཉིས་ཀྱང་ཡོད་དོ། །སྒྲ་དོན་ཡང་སྤྱིའི་དབང་དུ་བྱས་ན་རང་གི་ངོ་བོ་སྒྲ་རྟོག་གིས་ཀུན་ཏུ་བཏགས་པ་ཙམ་ཡིན་པ་ལ་བྱེད་ཅིང། འདིར་བསྟན་གྱི་དབང་དུ་བྱས་ན་རབ་རིབ་ཅན་གྱི་མིག་ལ་སྐྱོན་ཆགས་

― GTD002_Page_0591 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དབང་གིས་ཟས་ལ་སྐྲ་ཤད་མཐོང་བ་བཞིན་གཞི་གཞན་དབང་གི་སྟེང་དུ་ལོག་པར་སྒྲོ་བཏགས་པའི་ཆ་ཙམ་ལ་བྱེད་དེ། དང་པོ་ནི་ཐེག་བསྡུས་ལས། ཀུན་ཏུ་རྟོག་པས་ཇི་ལྟར་ཀུན་ཏུ་རྟོག་ཅིང་དམིགས་པ་གང་དང་མཚན་མར་འཛིན་པ་དང། མངོན་པར་ཞེན་པ་གང་དང། ངག་ཀུན་ནས་སློང་བ་གང་དང། ཐ་སྙད་གང་དང། སྒྲོ་འདོགས་པ་གང་གིས་ཀུན་ཏུ་རྟོག །ཅེས་སོ། །གཉིས་པའང་དེ་ཉིད་ལས། རྣམ་པ་གང་གིས་གཞན་གྱི་དབང་གི་ངོ་བོ་ཉིད་ལ་ཀུན་ཏུ་བརྟགས་པ་དེ་ནི་དེ་ལ་ཀུན་ཏུ་རྟོག་པའི་ངོ་བོ་ཉིད་དོ། །ཞེས་དང། ཡོན་ཏན་འབྱུང་གནས་ཀྱི་ལེའུ་ལས། རབ་རིབ་ཅན་གྱི་མིག་ལ་རབ་རིབ་ཀྱི་སྐྱོན་ཆགས་པ་དེ་ལྟ་བུར་ནི་ཀུན་བཏགས་པའི་མཚན་ཉིད་བལྟ་བར་བྱའོ། །ཞེས་གསུངས་ཤིང། ཁྱད་པར་དུ་འདིར་ཁྱད་ཆོས་གསུམ་ལྡན་གྱི་གཞན་དབང་གཞིར་བཟུང་ནས་དེར་སྒྲོ་འདོགས་ཚུལ་དང་བཅས་གསལ་བར་གསུངས་པ་ཡིན་ནོ། །རྒྱུ་རྐྱེན་ལ་ལྟོས་ནས་བྱུང་བ་གཞན་དབང་གི་ངོ་བོ། དེ་ལ་འཁོར་བའི་གནས་ལུས་རྒྱུ་བཅས་ལྟ་བུ་མ་དག་པའི་གཞན་དབང། འཕགས་པའི་མཉམ་རྗེས་ཀྱི་ཡེ་ཤེས་སངས་རྒྱས་ཀྱི་གཟུགས་སྐུ་ལྟ་བུ་དག་པའི་གཞན་དབང་གཉིས་ཡོད། སྒྲ་དོན་ནི་གོང་དུ་དྲངས་པའི་མདོར། འདི་ལྟར་དེ་ནི་རྐྱེན་གཞན་གྱི་སྟོབས་ཀྱིས་བྱུང་བ་ཡིན་གྱི་བདག་ཉིད་ཀྱིས་མ་ཡིན་པས། ཞེས་པ་ལྟར་རྒྱུ་གཞན་ལ་ལྟོས་དགོས་པས་ན་གཞན་དབང་ཞེས་བཤད་པ་ཡིན་ལ། ཡང་ཐེག་བསྡུས་སུ། སྐད་ཅིག་ལས་ལྷག་པར་བདག་ཉིད་གནས་པར་མི་ནུས་པས་ན་གཞན་གྱི་དབང་ཞེས་བྱའོ། །ཞེས་སྐད་ཅིག་གཉིས་པར་སྡོད་པའི་དབང་མེད་པར་འཇིག་དགོས་པའི་ཆ་ནས་

― GTD002_Page_0592 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་གཞན་དབང་དུ་གསུངས་སོ། །སྒྲིབ་གཉིས་ཅི་རིགས་ཀྱི་གཉེན་པོའི་རྣམ་དག་ལམ་གྱི་དམིགས་པ་མཐར་ཐུག་གང་ཞིག །རང་གི་དགག་བྱ་བཅད་ཙམ་གྱི་དེ་བཞིན་ཉིད་ནི་ཡོངས་གྲུབ་ཀྱི་ངོ་བོ། དེ་ལ་གང་ཟག་གི་བདག་བཀག་ཙམ་གྱི་ཡོངས་གྲུབ་དང། ཆོས་བདག་བཀག་ཙམ་གྱི་ཡོངས་གྲུབ་གཉིས། དེ་རེ་རེ་ལའང་ནང་སྟོང་ཉིད་སོགས་ཉི་ཤུ་ཡོད། སྒྲས་བརྗོད་ཀྱིས་ཕྱེ་ན། བསྒོམ་བྱའི་དོན་སྟོང་པ་ཉིད་ནི་དོན་དོན་དམ་དང། དེ་སྒོམ་བྱེད་ཀྱི་ལམ་ནི་སྒྲུབ་པ་དོན་དམ་དང། དེ་ལ་བརྟེན་ནས་དེ་བཞིན་ཉིད་མངོན་དུ་བྱས་པའི་ཐོབ་པ་དོན་དམ་སྟེ་གཞི་ལམ་འབྲས་བུ་ལ་སྦྱར་བ་གསུམ། ཡུལ་དང་ཡུལ་ཅན་ལ་སྦྱར་ཏེ་འཕགས་པའི་མི་རྟོག་ཡེ་ཤེས་ལྟ་བུ་ཕྱིན་ཅི་མ་ལོག་པའི་ཡོངས་གྲུབ་དང། ཆོས་རྣམས་ཀྱི་གནས་ལུགས་འགྱུར་བ་མེད་པའི་ཡོངས་གྲུབ་གཉིས་སུའང་མཛད་དོ། །སྒྲ་དོན་ཡང་དཔེར་ན། རབ་རིབ་དང་བྲལ་བའི་མིག་གིས་ནམ་བལྟས་ཀྱང་དོན་དངོས་གནས་པ་དེ་ཉིད་ཇི་ལྟ་བར་སྣང་བ་བཞིན། འཕགས་པའི་མཉམ་གཞག་ཡེ་ཤེས་ཀྱིས་ཇི་ལྟར་གཟིགས་པ་བཞིན་དག་མ་དག་སྔོན་དང་ཕྱི་མའི་དུས་གང་གི་ཚེའང་འགྱུར་ལྡོག་མེད་པར་ཡུལ་གྱི་གནས་ལུགས་མཐར་ཐུག་ཏུ་གདོད་ནས་གྲུབ་པས་ཡོངས་གྲུབ་ཅེས་བྱ་སྟེ། ཡོན་ཏན་འབྱུང་གནས་ཀྱི་ལེའུ་ལས། མིག་ཡོངས་སུ་དག་ཅིང་མིག་ལ་རབ་རིབ་ཀྱི་སྐྱོན་ཆགས་པ་དང་བྲལ་བར་གྱུར་པ་མིག་དེ་ཉིད་ཀྱི་རང་བཞིན་གྱི་སྤྱོད་ཡུལ་མ་ནོར་བའི་སྤྱོད་ཡུལ་དེ་ལྟ་བུར་ནི་ཡོངས་སུ་གྲུབ་པའི་མཚན་ཉིད་བལྟ་བར་བྱའོ། །ཞེས་གསུངས་པའི་ཕྱིར། ཡོངས་གྲུབ་ཀྱི་རྣམ་གྲངས་སོ་སོའི་སྒྲ་དོན་རྒྱས་པར་ཕྱེ་སྟེ། དབུས་མཐའ་ལས། དེ་བཞིན་ཉིད་

― GTD002_Page_0593 ―

^{[མ་དཔེ་གཟིགས་ན་འདིར་གནོན།]}

[Full Size]

དང་ཡང་དག་མཐའ། །མཚན་མ་མེད་དང་དོན་དམ་དང། །ཆོས་ཀྱི་དབྱིངས་རྣམས་རྣམ་གྲངས་སོ། །ཞེས་དང། གཞན་མིན་ཕྱིན་ཅི་ལོག་མ་ཡིན། །དེ་འགོག་འཕགས་པའི་སྤྱོད་ཡུལ་དང། །འཕགས་པའི་ཆོས་ཀྱི་རྒྱུ་ཡིན་ཕྱིར། །རྣམ་གྲངས་དོན་ཏེ་གོ་རིམ་བཞིན། །ཞེས་རིམ་པ་ལྟར། གནས་ཚུལ་དེ་ལས་གཞན་མིན་པས་དེ་བཞིན་ཉིད། ཕྱིན་ཅི་མ་ལོག་པས་ཡང་དག་པའི་མཐའ། དགག་བྱའི་མཚན་མ་འགོག་པས་མཚན་མེད། འཕགས་པའི་ཡེ་ཤེས་དམ་པའི་སྤྱོད་ཡུལ་གྱི་དོན་ཡིན་པས་དོན་དམ་པ། གང་ལ་དམིགས་ཏེ་བསྒོམས་ན་འཕགས་པའི་ཆོས་ཀྱི་རྒྱུར་འགྲོ་བས་ཆོས་ཀྱི་དབྱིངས་ཏེ། དབྱིངས་ཀྱི་སྐད་དོད་དྷ་ཏུ་ཞེས་པ་སྐབས་འདིར་རྒྱུ་ལ་བྱེད་པར་འགྲེལ་པ་ལས་གསུངས་སོ། །སྟོང་ཉིད་ཀྱི་སྒྲ་དོན་འདིར་མི་གསལ་ཡང། ཀུན་བཏུས་ལས། ཅིའི་ཕྱིར་སྟོང་པ་ཉིད་ཅེས་བྱ་ཞེ་ན། ཀུན་ནས་ཉོན་མོངས་པ་མི་རྒྱུ་བའི་ཕྱིར་རོ། །ཞེས་གསུངས་སོ། །ཡོངས་གྲུབ་ཀྱི་མཚན་ཉིད་ལ་སྟོང་ཐུན་ལས་བདག་འཛིན་གཉིས་ཀྱིས་ཀུན་བཏགས་པ་ལྟར་གྱིས་སྟོང་པའི་དེ་བཞིན་ཉིད། ཅེས་གསུངས་ལ། དཀའ་འགྲེལ་ལས། དེ་ལྟར་སྟོང་ཐུན་དུ་གསུངས་ཀྱང་ཆོས་ཀྱི་བདག་མེད་མ་གཏོགས་གང་ཟག་གི་བདག་མེད་ཡོངས་གྲུབ་མཚན་ཉིད་པ་མ་ཡིན། ཞེས་གསུངས་ནའང། ཡིག་ཆར་སྒྲས་ཟིན་དེ་ཉིད་རྩོམ་པ་པོའི་བཞེད་པ་དངོས་མིན་པར་གསུངས་ཤིང། གྲུབ་མཐའ་རྩ་བར། བདག་གཉིས་བརྟག་པས་སྟོང་པ་ཡོངས་གྲུབ་སྟེ། །ཞེས་པ་རྩ་འགྲེལ་གྱིས་ཀྱང་སྟོང་ཐུན་བཞིན་གསུངས་པས། རང་ལུགས་བདག་མེད་གཉིས་ཀ་ཡོངས་གྲུབ་ཏུ་བྱེད་དགོས་ཏེ། གོང་

― GTD002_Page_0594 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་དབུས་མཐའ་རྩ་འགྲེལ་སོགས་ཀྱི་ཤེས་བྱེད་རྒྱས་པར་བཀོད་པ་བཞིན་ཡིན་ལ། དེར་མ་ཟད་མདོ་འདིར་ལན་གྱི་སྐབས་ནས་གསུངས་པའི་ངོ་བོ་ཉིད་མེད་པ་གསུམ་ལ་འཁོར་ལོ་དང་པོའི་དགོངས་གཞི་གང་ཟག་གི་བདག་མེད་ཀྱི་དབང་དུ་བྱས་པའི་དེ་གསུམ་དང། བར་བའི་དགོངས་གཞི་ཆོས་ཀྱི་བདག་མེད་ཀྱི་དབང་དུ་བྱས་པའི་དེ་གསུམ་སྟེ་ཚན་གཉིས་འབྱེད་དགོས། དེ་ལྟ་ན་སྐབས་འདིར་གསུངས་པའི་ངོ་བོ་ཉིད་གསུམ་ཡང་དེའི་མཚན་གཞིར་གསུངས་པ་ཡིན་པས། བདག་མེད་གཉི་གའི་དབང་དུ་བྱས་པའི་མཚན་ཉིད་གསུམ་གསུམ་འབྱེད་དགོས་པར་འགྲུབ་ཅིང། དེ་འདོད་ན། གཞན་དབང་གང་གིས་སྟོང་པར་བསྒྲུབ་རྒྱུའི་ཀུན་བཏགས་ལ་གང་ཟག་གི་བདག་དང་ཆོས་བདག་གཉིས་ཡོད་ཅིང། བདག་དེ་གཉིས་རྣམ་པར་བཅད་ཙམ་གྱིས་སྟོང་པ་གཉི་ག་རྣམ་དག་ལམ་གྱི་དམིགས་པ་མཐར་ཐུག་དང་ཡོངས་གྲུབ་ཏུ་འཇོག་དགོས་པ་མདོ་ཚན་གསུམ་གའི་འབྲེལ་གྱིས་ཤེས་པའི་ཕྱིར། དེར་མ་ཟད་ཐེག་དམན་རྣམས་ཀྱི་ཉོན་སྒྲིབ་རྣམ་པར་དག་བྱེད་ཀྱི་དམིགས་པ་གང་ཟག་གི་བདག་མེད་ཕྲ་མོ་དང་པོའི་དགོངས་གཞི་དང། ཐེག་ཆེན་པ་རྣམས་ཤེས་སྒྲིབ་རྣམ་པར་དག་བྱེད་ཀྱི་དམིགས་པ་ཆོས་ཀྱི་བདག་མེད་བར་བའི་དགོངས་གཞིར་བྱས་ཏེ་གཉི་ག་མདོ་འདིར་དངོས་ཤུགས་ཀྱི་ཚུལ་དུ་བསྟན་པས། འདིར་ཐེག་པ་ཐམས་ཅད་ལ་ཡང་དག་པར་ཞུགས་པ་ཞེས་གསུངས་པ་དང། ཡང་ཐེག་པ་ཆེ་ཆུང་གཉི་གའི་བསྒོམ་བྱའི་ཡོངས་གྲུབ་མི་འདྲའང་གཉི་ག་འདི་ནས་བཤད་པའི་གཞན་དབང་ཀུན་བཏགས་ཀྱིས་སྟོང་པའི་ཡོངས་གྲུབ་ཏུ་རིགས་འདྲ་བའི་

― GTD002_Page_0595 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་གིས་མདོ་ཉིད་ལས། ཀུན་གྱི་རྣམ་དག་ལམ་ནི་གཅིག་པུ་འདི་ཡིན་ཏེ། །རྣམ་པར་དག་པའང་གཅིག་སྟེ་གཉིས་པ་གང་ཡང་མེད། །དེ་ཕྱིར་ཐེག་པ་གཅིག་པ་འདི་ནི་འདོགས་བྱེད་ཀྱང། །སེམས་ཅན་རིགས་ནི་རྣམ་པ་སྣ་ཚོགས་མེད་པ་མིན། །ཞེས་ཐེག་པ་གསུམ་གའི་རྣམ་དག་གི་ལམ་དང་རྣམ་དག་གཅིག་པར་གསུངས་པ་ཡིན་པའི་ཕྱིར་དང། ལང་གཤེགས་ལས་ཀྱང། ཤེས་བྱའི་སྒྲིབ་པ་ནི་ཆོས་ལ་བདག་མེད་པ་མཐོང་བའི་བྱེ་བྲག་གིས་རྣམ་པར་དག་པར་འགྱུར་རོ། །ཉོན་མོངས་པའི་སྒྲིབ་པ་ནི་གང་ཟག་ལ་བདག་མེད་པ་མཐོང་བའི་བྱེ་བྲག་གིས་རྣམ་པར་དག་པར་འགྱུར་རོ། །ཞེས་གསུངས་པས་ཀྱང་ཐེག་པ་ཆེ་ཆུང་གཉི་གའི་བར་ཆད་མེད་ལམ་ཡང་རྣམ་དག་ལམ་མཚན་ཉིད་པར་འགྲུབ་པའི་ཕྱིར་བདག་མེད་གཉིས་ཀྱང་རྣམ་དག་ལམ་གྱི་དམིགས་པ་མཐར་ཐུག་ཏུ་འགྲུབ་བོ། །དེས་ན་རྗེ་བཙུན་གྱིས། རྣམ་དག་སྤྱོད་ཡུལ་རྣམ་གཉིས་ཞེས་གསུངས་པའང་བདག་མེད་གཉིས་ཀྱི་དབང་དུ་བྱས་པའི་ཐར་ལམ་འཛིན་སྟངས་མི་འདྲ་བ་གཉིས་མདོ་དེ་དག་ཏུ་གསུངས་པ་དེའི་དགོངས་པ་འགྲེལ་པའི་ཕྱིར་ཡིན་ཏེ། ཐེག་དམན་ལ་རྣམ་དག་ལམ་མཚན་ཉིད་པ་མེད་ན་རྣམ་དག་ཐར་པ་མཚན་ཉིད་པའང་མེད་པར་འགྱུར་བའི་ཕྱིར་རོ། །དེའང་འདི་ཉིད་ལས། ཚིག་དང་པོ་གསུམ་གྱིས་ཀུན་བཏགས་འདོགས་པའི་གཞི་བསྟན་ལ། ཞེས་པ་ལྟར། རྣམ་པར་རྟོག་པའི་སྤྱོད་ཡུལ་ཞེས་དང། ཀུན་བཏགས་པའི་མཚན་ཉིད་ཀྱི་གནས་ཞེས་དང། འདུ་བྱེད་ཀྱི་མཚན་མ་ཞེས་པ་གསུམ་གྱིས་གཞན་དབང་དེ་ཉིད་ཀུན་བཏགས་འདོགས་པའི་གཞིར་གྱུར་

― GTD002_Page_0596 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཁྱད་པར་གསུམ་གྱི་སྒོ་ནས་གསུངས་སོ། །དེ་ལ་སྤྱོད་ཡུལ་ནི་མཛོད་གནས་བདུན་པར། རྣམ་པ་རྣམ་པ་སྤྱོད་ཡུལ་དང། །ཞེས་པ་ལྟ་བུ་དམིགས་ཡུལ་གྱི་མིང་ལ་སྤྱོད་ཡུལ་དུ་བཏགས་པ་སྐབས་དུ་མར་འབྱུང་ཞིང། འདིར་ཡང་རྒྱ་ནག་འགྲེལ་ཆེན་ལས། གཟུགས་ཀྱི་ཕུང་པོ་ལ་སོགས་པ་ནི་རྣམ་པར་རྟོག་པ་དེའི་དམིགས་པའི་རྐྱེན་ཡིན་པའི་ཕྱིར་དེའི་སྤྱོད་ཡུལ་ཞེས་བྱའོ། །ཞེས་གསུངས་ཏེ། འདིའི་དམིགས་རྐྱེན་ཞེས་པ་སྣང་བའི་དམིགས་རྐྱེན་ནམ། དམིགས་རྐྱེན་བཏགས་པ་པ་ལ་འཆད་དགོས་སོ། །ཀུན་བཏགས་པའི་མཚན་ཉིད་ཀྱི་གནས་ཞེས་པ་ཀུན་བཏགས་འདོགས་གཞི་ཡིན་པས་གོ་སླ་ལ། འདུ་བྱེད་ཀྱི་མཚན་མ་ནི་རྒྱ་ནག་འགྲེལ་ཆེན་ལས། འདུ་བྱེད་ནི་ལྟ་བའི་རྣམ་པ་སྟེ་འདུ་བྱེད་ལ་བྱེ་བྲག་ཏུ་དམིགས་པའི་ཤེས་པའོ། །མཚན་མ་ནི་རྒྱུ་མཚན་གྱི་རྣམ་པ་སྟེ་དམིགས་པར་བྱ་བའི་མཚན་མའོ། །ཞེས་དང། འདུ་བྱེད་ཀྱི་མཚན་མ་ཞེས་བྱ་བ་ནི་འདུས་བྱས་ཀྱི་རྣམ་པ་སྟེ། ཐམས་ཅད་ཀྱང་གཞན་གྱི་དབང་གི་རྣམ་པའི་མཚན་ཉིད་དོ་ཞེའོ། །ཞེས་ཐུན་མོང་མ་ཡིན་པའི་ཁྱད་པར་གྱི་སྒོ་ནས་ངེས་དགོས་པ་ལ་འཆད་ཚུལ་གཅིག་དང། མཚན་མ་ཞེས་པ་མཚན་ཉིད་ལ་བྱས་ནས་འདུས་བྱས་ཀྱི་མཚན་ཉིད་དམ་འདུས་བྱས་ཀྱི་ངོ་བོར་གྲུབ་པ་ཙམ་ལ་བྱ་ཚུལ་གཅིག་སྟེ་གཉིས་བཀོད་ནས་ཕྱི་མ་བཟང་བར་བཤད་ཀྱང་སྔ་མ་གནད་ཆེ་སྟེ། འདུས་བྱས་ཀྱི་ཆོས་རྣམས་བློ་ཡུལ་དུ་བྱེད་པའི་ཚེ་རང་རང་གི་ཐུན་མོང་མ་ཡིན་པའི་མཚན་མ་སྟེ་མི་འདྲ་བའི་ཁྱད་པར་གྱི་རྒྱུ་མཚན་རེ་རེ་ཤར་བའི་སྒོ་ནས་ངེས་དགོས་ལ། འདུས་མ་བྱས་རྣམས་སྤྱིའི་རྣམ་པ་ཡིད་ལ་བྱ་དགོས་པ་ནི་མྱོང་བས་

― GTD002_Page_0597 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་པས། ལུགས་འདིར་ཡང་དེ་རང་སྤྱིའི་དོན་དུ་མི་འདོད་ཀྱང་སྣང་ཚུལ་དེ་ལྟར་འདོད་དགོས་པའི་ཕྱིར། འདྲ་དང་མི་འདྲ་ཉིད་ཕྱིར་དང། །ཞེས་པའི་ཐད་ཀྱི་རྣམ་འགྲེལ་ཊཱིཀ་ཆེན་ལས། འདྲ་བ་སྟེ་རང་སྣང་ཡུལ་དུ་བྱེད་པའི་ཤེས་པ་ལ་ཐུན་མོང་བར་སྣང་བ་དང། མི་འདྲ་བ་སྟེ་རང་སྣང་ཡུལ་དུ་བྱེད་པའི་ཤེས་པ་ལ་ཐུན་མོང་མ་ཡིན་པར་སྣང་བ་གཉིས་སུ་ངེས་པའི་ཕྱིར། ཞེས་སོགས་དང། རྒྱུ་མཚན་གཞན་ནི་ཡོད་པ་ན། །བློ་ནི་ཡོད་དང་མེད་ཕྱིར་རོ། །ཞེས་སོགས་རྩ་འགྲེལ་རྣམས་ཀྱིས་ཀྱང་འགྲུབ་པའི་ཕྱིར་རོ། །དགོངས་པ་རབ་གསལ་ལས། གཞན་དབང་ལ་ཁྱད་པར་གསུམ་ཡོད་དེ། ཕྱི་རོལ་མེད་པར་འབྱུང་བ་དང་རང་བཞིན་གྱིས་ཡོད་པ་དང། དོན་དམ་པར་སྤྲོས་པ་ཡིན་ནོ་ཅོག་གི་ཡུལ་མ་ཡིན་པའོ། །ཞེས་པ་ལྟར། སེམས་ཙམ་པས་གཞན་དབང་གི་ངོ་བོ་འདོད་ཚུལ་བརྗོད་པའི་སྐབས་སུ་འཇུག་པ་ལས། ཕྱི་རོལ་གཟུང་བ་མེད་པར་འབྱུང་འགྱུར་ལ། །ཡོད་དང་སྤྲོས་ཀུན་ཡུལ་མིན་རང་བཞིན་ཡོད། །ཅེས་ཁྱད་པར་གསུམ་སྦྱར་བ་དང་ཅུང་ཟད་མི་འདྲ་བའང་གནད་མཚུངས་ཏེ། ཕྱི་རོལ་མེད་ཀྱང་རྨི་ལམ་གྱི་གླང་པོ་ལྟར་རྣམ་རྟོག་གི་སྣང་ཆ་ཙམ་དུ་ཡོད་པ་ནི་ཕྱི་རོལ་མེད་པར་འབྱུང་ཚུལ་དང་རྣམ་པར་རྟོག་པའི་སྤྱོད་ཡུལ་གྱི་དོན་གཉིས་ཀར་འབྲེལ་ལོ། །རང་ངོས་ནས་ཐུན་མོང་མ་ཡིན་པའི་རྣམ་པ་གཏོད་པའི་མཐུ་དང་ལྡན་པ་ནི་རང་བཞིན་གྱིས་གྲུབ་ལུགས་དང་འདུ་བྱེད་ཀྱི་མཚན་མར་འཇོག་ཚུལ་གཉི་ག་ཡིན་ཏེ། འདི་ཉིད་ལས། དང་པོས་གང་གི་ཡུལ་ཡིན་པ་དང། གཉིས་པས་ཀུན་བཏགས་ཀྱི་གདགས་གཞི་དང། གསུམ་

― GTD002_Page_0598 ―

^{[མ་དཔེ་གཟིགས་ན་འདིར་གནོན།]}

[Full Size]

པས་རང་གི་ངོ་བོ་བསྟན་ཏོ། །ཞེས་གསུངས་པའི་ཕྱིར། དོན་དམ་པར་སྒྲ་རྟོག་གི་ཡུལ་མ་ཡིན་པ་ནི་ཀུན་བཏགས་པའི་མཚན་ཉིད་ཀྱི་གནས་སུ་གྱུར་པ་དང་གནད་གཅིག་སྟེ། བདག་ཏུ་འཛིན་པས་ཕྱིན་ཅི་ལོག་ཏུ་བཟུང་བ་ནི་ཀུན་ཏུ་སྒྲོ་བཏགས་པའི་རྫུན་པ་ཡིན་གྱི། དོན་དམ་པ་མ་ནོར་བ་དེ་དེའི་ཡུལ་དུ་བྱེད་མི་ནུས་པའི་ཕྱིར། དགོངས་པ་རབ་གསལ་ལས། དོན་དམ་པར་སྒྲ་རྟོག་གི་སྤྲོས་པ་ཀུན་ཏེ་ཐམས་ཅད་ཀྱི་ཡུལ་མིན་པའི་རང་བཞིན་ཅན་དུ་ཡོད་དེ། ཕྱི་ནང་གི་མངོན་པར་བརྗོད་པ་ནི་དངོས་སུ་ན་བརྟག་པའི་རྣམ་པ་འཛིན་པའི་ཕྱིར་རོ། །ཞེས་གསུངས་པའི་ཕྱིར། མཐའ་དཔྱད་པ་ལ། ཁ་ཅིག་ན་རེ། གང་ཟག་གི་བདག་མེད་ལ་སྟོང་ཉིད་བཅུ་དྲུག་དང་ཉི་ཤུར་དབྱེ་བ་མི་འཐད་པར་ཐལ། གང་ཟག་གི་བདག་མེད་གཙོ་བོར་ཉན་ཐོས་ཀྱི་བསྒོམ་བྱ་ཡིན་ལ། སྟོང་ཉིད་བཅུ་དྲུག་ཏུ་ཕྱེ་བ་ཐེག་ཆེན་གྱི་ལམ་གྱི་དབང་དུ་བྱས་པ་ཡིན་པའི་ཕྱིར། དེར་ཐལ། དེ་སྲིད་ཞི་གཉི་གའི་མཐའ་འགོག་པ་དང་ཆོས་གཟུགས་ཀྱི་སྐུ་གཉིས་སྒྲུབ་པ་སོགས་ཀྱི་དབང་དུ་བྱས་པ་ཡིན་པའི་ཕྱིར། དེར་ཐལ། དབུས་མཐའ་ལས། ཟ་བ་བཟའ་དང་དེ་ཡི་ལུས། །གནས་ཀྱི་གཞི་ནི་སྟོང་པ་ཉིད། །དེ་ཡང་གང་གིས་ཇི་ལྟར་མཐོང། །གང་ཕྱིར་དེ་ཡང་སྟོང་པ་ཉིད། །དེ་གཉིས་ཐོབ་པར་བྱ་བའི་ཕྱིར། །རྟག་ཏུ་སེམས་ཅན་ཕན་བྱའི་ཕྱིར། །འཁོར་བ་གཏང་བར་མི་བྱའི་ཕྱིར། །དགེ་བ་མི་ཟད་བྱ་བའི་ཕྱིར། །རིགས་ཀྱང་རྣམ་པར་དག་བྱའི་ཕྱིར། །མཚན་དང་དཔེ་བྱད་ཐོབ་བྱའི་ཕྱིར། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའ་སྒྲུབ་པར་བྱེད། །ཅེས་ལོངས་སྤྱོད་བྱེད་སྤྱད་བྱ་སྤྱོད་པའི་

― GTD002_Page_0599 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་དེའི་ཞིང་རྣམས་ལ་ནང་ཕྱི་གཉི་ག་ཆེན་པོ་སྟོང་པ་ཉིད་བཞི་དང། གཟུང་བ་དང་འཛིན་པར་ཞེན་པ་བཀག་པའི་སྟོང་པ་ཉིད་སྟོང་པ་ཉིད་དང་དོན་དམ་པ་སྟོང་པ་ཉིད་གཉིས་ལམ་དང་འབྲས་བུའི་དགེ་བ་གཉིས་སྒྲུབ་པའི་འདུས་བྱས་དང་འདུས་མ་བྱས་སྟོང་པ་ཉིད་གཉིས་རྣམས་ཐེག་པ་ཆེ་ཆུང་ཐུན་མོང་དུ་སྦྱར་རུང་ཡང། མཐའ་ལས་འདས་པས་རྟག་ཏུ་སེམས་ཅན་གྱི་དོན་སྒྲུབ་པ། ཐོག་མ་དང་ཐ་མ་མེད་པས་འཁོར་བ་མི་འདོར་བའི་རང་བཞིན། དོར་བ་མེད་པས་ལྷག་མེད་ཀྱི་ཚེའང་གཞན་ཡལ་བར་མི་འདོར་བ། རང་བཞིན་སྟོང་པ་ཉིད་ཀྱིས་རང་བཞིན་གནས་རིགས་སྦྱོང་བ། རང་གི་མཚན་ཉིད་སྟོང་པ་ཉིད་ཀྱིས་མཚན་དཔེ་སྒྲུབ་པ། ཆོས་ཐམས་ཅད་སྟོང་པ་ཉིད་ཀྱིས་སྟོབས་དང་མི་འཇིགས་པ་སོགས་སངས་རྒྱས་ཀྱི་ཆོས་ཐམས་ཅད་སྒྲུབ་པ་རྣམས་བྱང་སེམས་མ་གཏོགས་པ་ལ་མི་འབྲེལ་ཞིང། འདིའི་མཇུག་ཏུའང། བྱང་ཆུབ་སེམས་དཔའ་སྒྲུབ་པར་བྱེད། །ཅེས་གསུངས་པའི་ཕྱིར་ན། མ་ཁྱབ། དང་པོ་ནས་ཐབས་ཤེས་ཟུང་འབྲེལ་དུ་ཉམས་སུ་བླངས་ན་རྗེས་སུ་བདག་མེད་བསྒོམ་པའི་ལག་རྗེས་ལ་དེ་ལྟ་བུ་འབྱུང་ཡང་དང་པོ་ནས་ཐབས་ཁྱད་པར་ཅན་གྱིས་མ་ཟིན་ན་བདག་མེད་བསྒོམས་ཀྱང་དེ་འདྲ་འོང་དོན་མེད་པའི་ཕྱིར། དེར་ཐལ། བྱང་སེམས་ཀྱིས་མི་རྟག་སྡུག་བསྔལ་སོགས་བསྒོམས་པས་སྲིད་མཐའ་ཁེགས་བྱེད་དུ་འགྲོའང། ཉན་རང་གིས་དེ་བསྒོམས་པ་སྲིད་མཐའ་ཁེགས་བྱེད་དུ་མི་འགྲོ་བ་བཞིན་ཡིན་པའི་ཕྱིར། གོང་དུ་འདོད་མི་ནུས་ཏེ། ཆོས་ཐམས་ཅད་སྟོང་པ་ཉིད་ཀྱི་བར་བཅུ་བཞི་པོ་དེ་དབྱེ་ཆོས་སུ་བྱས་ནས་དེའི་དབྱེ་གཞི་ལ་བདག་མེད་གཉི་ག་འཇོག་དགོས་པ་གང་ཞིག །

― GTD002_Page_0600 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་པོ་མེད་པ་སྟོང་པ་ཉིད་དང་དངོས་པོ་མེད་པའི་ངོ་བོ་ཉིད་སྟོང་པ་ཉིད་གཉིས་སྤྱིར་དབྱེ་ཆོས་སྟོང་ཉིད་བཅུ་དྲུག་གི་གྲངས་ཡིན་ཀྱང། འདིར་ཐམས་ཅད་ཀྱི་མཐར་ཟུར་དུ་གསུངས་པ་དགོས་དབང་གིས་ཡིན་པའི་ཕྱིར། དབུས་མཐའ་ལས། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་པ་ཉིད། །དེ་དངོས་མེད་པའི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། །ཞེས་དང། འགྲེལ་བཤད་ལས། ཟ་བ་པོ་ལ་སོགས་པ་འདི་ལ་སྟོང་པ་ཉིད་གང་ཡིན་ངོ་བོ་ཉིད་ནི་ཇི་ལྟ་བུ་ཞེ་ན། དེའི་ཕྱིར། གང་ཟག་དང་ནི་ཆོས་རྣམས་ཀྱི། །ཞེས་སོགས་གསུངས་པའི་ཕྱིར། ཟུར་ཕྱི་མ་གྲུབ་སྟེ། དབྱེ་གཞི་བདག་མེད་གཉིས་དང་དབྱེ་ཆོས་སྟོང་ཉིད་བཅུ་བཞི་པོ་དེ་ཐམས་ཅད་ཀྱང་རང་གི་ངོ་བོ་དགག་བྱ་བཀག་ཙམ་དུ་འཇོག་དགོས་པར་ཤེས་པའི་ཕྱིར་དངོས་པོ་མེད་པ་སྟོང་པ་ཉིད་དང། ཡང་དེ་དགག་བྱའི་དངོས་པོ་མེད་ཙམ་ལ་བཞག་པ་ན་གཏན་མེད་དུ་འགྱུར་རམ་སྙམ་པ་ལ་དགག་བྱ་བཅད་ཙམ་དེ་ཉིད་རྣམ་དག་ལམ་གྱི་དམིགས་པ་མཐར་ཐུག་ཏུ་ཡོད་པར་གོ་བའི་ཕྱིར་དངོས་པོ་མེད་པའི་ངོ་བོ་ཉིད་སྟོང་པ་ཉིད་བཞག་པ་ཡིན་པའི་ཕྱིར། འགྲེལ་བཤད་ལས། གང་ཟག་དང་ཆོས་སུ་སྒྲོ་འདོགས་པ་བསལ་བའི་དོན་དུ་དངོས་པོ་མེད་པ་སྟོང་པ་ཉིད་རྣམ་པར་བཞག་གོ །སྟོང་པ་ཉིད་ལ་སྐུར་བ་འདེབས་པ་བསལ་བའི་ཕྱིར་དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །ཞེས་གསུངས་པའི་ཕྱིར། བོད་སྔ་མ་མང་པོས་དབུ་མ་པའི་ལུགས་ཀྱི་སྟོང་པ་ཉིད་བཅུ་དྲུག་དང། སེམས་ཙམ་པའི་ལུགས་ཀྱི་སྟོང་པ་ཉིད་བཅུ་བཞིའམ་བཅུ་བདུན་དུ་གྲངས་ངེས་པར་འདོད་པའང་མི་འཐད་དེ། སྔ་མ་དབུས་མཐའི་ཚིག་

― GTD002_Page_0601 ―

^{[མ་དཔེ་གཟིགས་ན་འདིར་གནོན།]}

[Full Size]

ཟིན་ཙམ་ལ་འཁྲུལ་བར་སྣང་ཡང་དེ་བཅུ་བཞིའི་སྟེང་དུ་ཐ་མ་གཉིས་བསྣན་པས་སྟོང་ཉིད་བཅུ་དྲུག་ཏུ་འགྱུར་བ་དབུས་མཐའ་རང་ལས་གསལ་བའི་ཕྱིར་དང། དབྱིག་འགྲེལ་གྱིས་ཀྱང། སྟོང་པ་ཉིད་རྣམ་པ་བཅུ་དྲུག་པོ་འདི་ལྟ་སྟེ། ཞེས་གསུངས་པའི་ཕྱིར། ཕྱི་མའི་བློ་རྩེ་དགོངས་འགྲེལ་བྱམས་ཞུས་ཀྱི་ལེའུ་ལས་མཚན་མ་བཅུའི་གཉེན་པོ་སྟོང་པ་ཉིད་བཅུ་བདུན་དུ་གསུངས་པ་དེ་ལ་བསམ་པར་སྣང་ཡང་ཤེར་མདོ་ལྟར་སྟོང་ཉིད་བཅུ་དྲུག་གི་གྲངས་ངེས་ཀྱང་མི་འདོད་པ་མ་ཡིན་པའི་ཕྱིར། བློ་བརྟན་གྱི་འགྲེལ་བཤད་ལས། ནང་སྟོང་པ་ཉིད་ཅེས་བྱ་བ་ནས་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཅེས་བྱ་བའི་བར་དུ་སྟོང་པ་ཉིད་རྣམ་པ་བཅུ་དྲུག་པོ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་འབྱུང་ངོ་། །ཞེས་གསུངས་པའི་ཕྱིར། འདི་དག་གིས་ཀྱང་ལུགས་འདིར་བདག་མེད་གཉི་ག་སྟོང་ཉིད་ཡིན་པར་གོ་ནུས་ལ། དེའི་སྒྲུབ་བྱེད་འགའ་ཞིག་གོང་དུ་བཤད་ཟིན་ཅིང་ད་དུང་ཡང་འཆད་པར་འགྱུར་རོ། །ཕྱིས་ཀྱི་ཊཱིཀ་བྱེད་ཕལ་མོ་ཆེ་ན་རེ། སྐབས་འདིར་འདུས་བྱས་འདུས་མ་བྱས་ཀྱི་ཆོས་ཐམས་ཅད་ཀྱི་སྟེང་དུ་ཁྱད་པར་མེད་པར་མཚན་ཉིད་གསུམ་གསུམ་སྦྱོར་དགོས་པ་དང། དེའི་ནང་གི་ཆོས་ཉིད་གཏན་ལ་འབེབས་པའི་གཞི་གཞན་དབང་ལ་ཁྱད་པར་གསུམ་ལྡན་གྱི་གཞན་དབང་མཚན་ཉིད་པ་ཞིག་དགོས་པར་གསུངས་ལ། འདུས་མ་བྱས་ཐམས་ཅད་ལ་ཁྱད་པར་དེ་གསུམ་མ་ཚང་བས། དེ་དག་འཛིན་པའི་ཚད་མ་རྣམས་དེ་དང་དེའི་སྟེང་གི་གཞན་དབང་ལ་འཇོག་དགོས་ཏེ། ཆོས་ཉིད་གཏན་ལ་འབེབས་པ་ལ་དཔྱོད་པའི་གཞི་རང་མཚན་གྱིས་གྲུབ་པ་ཞིག་དགོས་པའི་ཕྱིར་དང།

― GTD002_Page_0602 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་གཞི་བདེན་གྲུབ་ཅིག་མེད་ན་ཡོངས་གྲུབ་ཀྱང་བདེན་མེད་དུ་འགྲོ་བར་སེམས་ཙམ་པའང་ཁས་ལེན་པའི་ཕྱིར། དང་པོ་གྲུབ་སྟེ། རྣམ་འགྲེལ་ལས། རང་གི་མཚན་ཉིད་གཅིག་གཞལ་བྱ། །ཡོད་མེད་ཉིད་དུ་དཔྱོད་རྣམས་ཀྱིས། །དོན་བྱ་དེ་ལས་འགྲུབ་ཕྱིར་རོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། དབུ་མ་པའི་ཐད་དུ་འདི་ཉིད་ལས། ཆོས་རྣམས་རང་གི་མཚན་ཉིད་ཀྱིས་གནས་ཚུལ་ཇི་ལྟར་ཡོད་དཔྱོད་པས་དོན་དམ་དུ་ཡོད་པ་ལ་ཆོས་ཅན་མེད་ན་ཆོས་ཉིད་ཡན་གར་བར་གནས་པའི་མཐུ་མེད་པས། གཞན་དབང་གི་རྟེན་འབྲེལ་ལ་རང་བཞིན་གྱིས་གྲུབ་པས་སྟོང་ན་ཡོངས་གྲུབ་ཀྱང་རང་མཚན་གྱིས་མ་གྲུབ་པར་འགྱུར་ཞེས་ལུགས་སྔ་མས་ཀྱང་སྨྲ་ལ། ཞེས་དང། རྩ་ཤེ་ཊཱིཀ་ཆེན་ལས། བདེན་པར་གྲུབ་པའི་རྟེན་རྫུན་པས་བྱེད་པ་འགལ་བའི་ཕྱིར། ཚུལ་འདི་ལ་དབུ་སེམས་གཉི་ག་མཐུན་ནོ། །ཞེས་གསུངས་པའི་ཕྱིར། དེས་ན་ཆོས་རང་རང་དང། རང་འཛིན་ཚད་མ་དང། དེ་ཉམས་མྱོང་གི་རང་རིག་རྣམས་ཀྱི་ཆོས་ཉིད་ཡིན་ཁྱབ་མཉམ་ཡིན་པས་འདུས་བྱས་སྟོང་པ་ཉིད་དང་འདུས་མ་བྱས་སྟོང་པ་ཉིད་ཀྱང་མི་འགལ་ཞེས་ཟེར་རོ། །དང་པོ་རྣམ་འགྲེལ་གྱི་ལུང་དོན་ཁྱོད་ལྟར་མ་ཡིན་པར་ཐལ། དེའི་དོན་སྤྱིར་གཞལ་བྱ་ཙམ་ལ་རང་བཞིན་གྱིས་གྲུབ་མི་དགོས་ཀྱང། རྟོག་བཏགས་ཙམ་མིན་པའི་གཞལ་བྱ་ལ་རང་མཚན་གྱིས་གྲུབ་པ་དགོས་ཞེས་པ་ཡིན་པས། དེའི་རིགས་པ་ཆོས་ཉིད་གཏན་ལ་འབེབས་པའི་དམིགས་པ་ལ་སྦྱོར་ནའང་ཆོས་ཉིད་གཏན་ལ་འབེབས་པ་ལ་དམིགས་པ་རང་མཚན་གྱིས་གྲུབ་མི་དགོས་ཀྱང། རྟོག་བཏགས་ཙམ་མ་ཡིན་པར་རང་ངོས་ནས་དེའི་

― GTD002_Page_0603 ―

^{[མ་དཔེ་གཟིགས་ན་འདིར་གནོན།]}

[Full Size]

དམིགས་པར་འགྲོ་བ་ལ་རང་མཚན་གྱིས་གྲུབ་པ་ཞིག་དགོས་ཞེས་པ་ཡིན་ལ། ཁྱོད་ཀྱིས་དེ་གོ་བཟློག་ནས་གཞལ་བྱ་ཙམ་དང་ཆོས་ཉིད་གཏན་ལ་འབེབས་པའི་དམིགས་པ་ཙམ་ལའང་རང་མཚན་དགོས་ཞེས་བཤད་པ་ནི་གཞུང་དོན་ལ་ཞིབ་ཏུ་མ་བརྟགས་པའི་སྐྱོན་ཡིན་པའི་ཕྱིར། ཊཱིཀ་ཆེན་ལས། བློས་བཏགས་མིན་པའི་གཞལ་བྱ་ནི་རང་མཚན་གཅིག་པུའོ་ཞེས་པ་ནི་ཤེས་བྱ་ཆོས་ཅན། རང་སྤྱི་གཉིས་ཀྱི་ནང་ནས་དོན་རང་ངོས་ནས་གྲུབ་པའི་གཞལ་བྱ་རང་གི་མཚན་ཉིད་གཅིག་པུ་ཡིན་ཏེ། མངོན་པར་འདོད་པའི་དོན་བྱེད་པའི་ནུས་པ་ཡོད་མེད་ཉིད་དུ་དཔྱོད་པ་རྣམས་ཀྱིས་མངོན་པར་འདོད་པའི་དོན་བྱ་བའི་ནུས་པ་རང་སྤྱི་གཉིས་ཀྱི་ནང་ནས་རང་མཚན་དེ་ཁོ་ན་ལ་གྲུབ་པའི་ཕྱིར། ཞེས་དང། ཐར་ལམ་གསལ་བྱེད་ལས། དོན་དུ་གཉེར་བར་བྱ་བའི་འབྲས་བུ་ཡོད་མེད་རྣམ་པར་དཔྱོད་པའི་རྟོག་ལྡན་རྣམས་ཀྱིས་དོན་བྱ་བ་ནི་རང་མཚན་གཅིག་པུ་དེ་ལས་འགྲུབ་པས། ཞེས་དང། གཞལ་བྱ་ཡིན་ན་རང་མཚན་ཡིན་པས་ཁྱབ་པ་གཞུང་འདིས་བསྟན་པར་འདོད་པ་ཞིབ་ཏུ་མ་བརྟག་པ་སྟེ། ཞེས་གསུངས་པའི་ཕྱིར། རྩ་འགྲེལ་གུང་མ་བསྒྲིགས་པར་དྲངས་ན་འདི་འདྲ་ཡོང་ངོ་། །འདི་ཉིད་ཀྱི་ལུང་དྲངས་པའང་སྤྱིར་དོན་དམ་པར་ཡོད་མེད་ཙམ་མ་ཡིན་པར་རིག་ཤེས་ཀྱིས་དཔྱད་བཟོད་པའི་དགག་བྱའི་དོན་དམ་དེར་ཆོས་ཅན་དང་ཆོས་ཉིད་གཉི་ག་ཡོད་མེད་མཚུངས་དགོས་པའི་དོན་ཡིན་པ། གནས་ཚུལ་ཇི་ལྟར་ཡོད་དཔྱོད་པའི་དོན་དམ་དུ་ཞེས་གསལ་བར་གསུངས་པ་དེ་ཡིན་ནོ། །རྩ་ཤེ་ཊཱིཀ་ཆེན་གྱི་ལུང་དོན་ཡང་ཆོས་ཉིད་རང་

― GTD002_Page_0604 ―

^{[མ་དཔེ་གཟིགས་ན་འདིར་གནོན།]}

[Full Size]

ངོས་ནས་གྲུབ་ན་དེའི་རྟེན་ཡང་རང་ངོས་ནས་གྲུབ་པ་ཞིག་དགོས་ཀྱི། རང་ངོས་ནས་གྲུབ་གྲུབ་ལྟར་སྣང་ཡང་བཏགས་དོན་བཙལ་ན་རྙེད་རྒྱུ་མེད་པ་ཞིག་གིས་མི་ཆོག་པའི་དོན་ཡིན་པའི་ཕྱིར། ཡིག་ཆར་ལུང་འདིའི་དོན་དམ་ཡང་ལུགས་རང་རང་གི་དགག་བྱའི་དོན་དམ་ལ་སྦྱར་བ་མཁས་པ་སྔ་མའི་བཤད་པ་བཀོད་པ་ཙམ་ཡིན་ཏེ། ལུང་དེའི་འཕྲོར། རྣལ་འབྱོར་སྤྱོད་པའི་མཁས་པ་རྣམས་ཀྱང་ཡོངས་གྲུབ་བདེན་པར་གྲུབ་པ་ལ་དེའི་རྟེན་གཞན་དབང་བདེན་པར་གྲུབ་དགོས་པར་མཐོང་ནས་གཞན་དབང་བདེན་པར་གྲུབ་སྟེ་ཞེས་གསུངས་པ་གང་ཞིག །སེམས་ཙམ་པའང་རང་ལུགས་ཀྱི་དགག་བྱའི་དོན་དམ་དེར་གྲུབ་པ་མི་འདོད་པའི་ཕྱིར། ཡུལ་དང་ཡུལ་ཅན་གཉི་གའི་ཆོས་ཉིད་ཀྱི་གཞི་མཐུན་བཞག་པའི་དབང་གིས་ལྷས་སྦྱིན་འཛིན་པའི་རྣམ་མཁྱེན་གྱི་སྟོང་ཉིད་ལྷས་སྦྱིན་གྱི་སྟོང་ཉིད་ཡིན་པས། ལུགས་འདིར་རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུའང་འཇོག་དཀའ་ཞེས་པཎ་ཆེན་བསོད་གྲགས་ཀྱིས་གསུངས་ལ། སྒོམ་བདེའི་ཡིག་ཆར། དེ་འཛིན་པའི་རྣམ་མཁྱེན་གྱི་ཆོས་ཉིད་ལྷས་སྦྱིན་གྱི་ཆོས་ཉིད་མིན་ཡང། ལྷས་སྦྱིན་དང་དེ་འཛིན་རྣམ་མཁྱེན་རྫས་གཞན་གྱིས་སྟོང་པ་གཉི་གའི་ཆོས་ཉིད་ཡིན་པའི་ཕྱིར། ཞེས་འབྱུང་ངོ་། །གཉིས་ཀས་ཀྱང་དེའི་རྒྱུ་མཚན་དུ་རྣམ་འགྲེལ་ལས། དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་གསུངས་པའི་ཕྱིར་དང། འང་སྒྲའི་དོན་ཡོད་པའི་ཕྱིར་ཟེར། ཐར་ལམ་གསལ་བྱེད་ལས་ཀྱང། གཟུང་འཛིན་རྫས་ཐ་དད་གཉིས་ཀྱིས་སྟོང་པའི་སྟོང་ཉིད་གང་ཡིན་པ་དེ་ནི་ཆོས་ཅན། གཉིས་

― GTD002_Page_0605 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་ཀྱི་ཤེས་པར་མ་ཟད་གཉིས་སྣང་དེ་ཡིའང་དེ་ཁོ་ན་ཉིད་ཡིན་ཏེ། ཞེས་འབྱུང་བས། གཉིས་སྣང་ཞེས་པ་གཟུང་བྱ་ལ་བྱེད་དགོས་ཤིང། དེ་ལྟར་ན་གཟུང་འཛིན་གཉི་གའི་ཆོས་ཉིད་ཀྱི་གཞི་མཐུན་བཞག་པར་འདུག་སྙམ་པ་སྐྱེའང། དེའི་དོན་འཆད་ཚུལ་དེ་ལྟར་མ་ཡིན་པར་ཐལ། དེ་གཟུང་འཛིན་གཉི་གའི་སྟོང་ཉིད་ཀྱི་གཞི་མཐུན་ཡོད་པའི་དོན་མིན་གྱི། གཟུང་འཛིན་གཉི་གའི་སྟོང་པ་ཉིད་ཀྱིས་སྟོང་ཚུལ་མཐུན་པའི་དོན་ཡིན་པའི་ཕྱིར། དེར་ཐལ། རྩ་ཤེ་རབ་བྱེད་ཉེར་ལྔ་པར། མྱ་ངན་འདས་མཐའ་གང་ཡིན་པ། །དེ་ནི་འཁོར་བའི་མཐའ་ཡིན་ཏེ། །ཞེས་ཚིག་ཟིན་ལ་མྱང་འདས་ཀྱི་སྟོང་པ་ཉིད་དེ་འཁོར་བའི་སྟོང་པ་ཉིད་ཡིན་པ་ལྟ་བུ་ཞིག་ཡོད་ཀྱང། དེའི་དོན་འཆད་པའི་ཚེ་རིགས་པའི་རྒྱ་མཚོ་ལས། མྱ་ངན་ལས་འདས་པའི་ཡང་དག་པའི་མཐའ་སྟོང་ཉིད་ཀྱིས་སྟོང་ཚུལ་གང་ཡིན་པ་དེ་ནི་འཁོར་བའི་ཡང་དག་པའི་མཐའ་སྟོང་ཉིད་ཀྱིས་སྟོང་ཚུལ་ཡིན་ཏེ། ཞེས་འཁོར་འདས་གཉིས་དགག་བྱའི་བདག་གིས་སྟོང་ཚུལ་འདྲ་བའི་དོན་དུ་གསུངས་པ་ལྟར། འདིར་ཡང་ཕྱི་ཡུལ་དང་ནང་གི་ཤེས་པ་གཉི་ག་གཟུང་འཛིན་རྫས་གཞན་གྱིས་སྟོང་མཉམ་ཡིན་པས། གཉིས་སྟོང་གི་དེ་ཁོ་ན་ཉིད་དེ་གཉི་གའི་སྟེང་དུ་གནས་ཚུལ་དབྱེར་མེད་པའི་དོན་ཡིན་པའི་ཕྱིར། དེར་ཐལ། གོང་དུ། དེ་ཕྱིར་དོན་དང་ཤེས་པ་ལ། །ཞེས་སོགས་ཀྱིས་གཟུང་བྱ་དང། ཡོངས་གཅོད་ནང་ཡིན་ཕྱི་རོལ་ལྟར། །ཞེས་སོགས་ཀྱིས་འཛིན་པ་རྫས་གཞན་བཀག་ནས། དེའི་དོན་བསྡུར། དེ་ལ་གཅིག་ནི་མེད་པས་ཀྱང། །གཉིས་ཀའང་

― GTD002_Page_0606 ―

^{[མ་དཔེ་གཟིགས་ན་འདིར་གནོན།]}

[Full Size]

ཉམས་པར་འགྱུར་བ་ཡིན། །དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་འབྱུང་བའི་ཕྱིར་རོ། །གཞན་ཡང་ལྷས་སྦྱིན་དང་དེ་འཛིན་རྣམ་མཁྱེན་རྫས་གཞན་གྱིས་སྟོང་པ་གཉི་གའི་སྟོང་ཉིད་དུ་བསྒྲུབས་པ་ནི་རྩོད་པ་གཞི་མེད་ཡིན་ཏེ། དེ་འདྲའི་སྟོང་པ་གཞི་མ་གྲུབ་པའི་ཕྱིར། སེམས་ཙམ་པ་ལྟར་ནའང་རྒྱུད་ཐ་དད་པའི་གང་ཟག་གི་སེམས་དང་རྫས་གཅིག་ཏུ་མི་འགྲོ་བར་བསྒྲུབ་པ་ལ་རྒྱུད་གཞན་གྲུབ་པ་ཟུར་དུ་གསུངས་པའི་ཕྱིར། རྒྱས་པར་འོག་ཏུ་འཆད་དོ། །དེ་ལ་ཁོ་ན་རེ། རྣམ་མཁྱེན་དང་ལྷས་སྦྱིན་གཉི་གའི་སྟོང་ཉིད་ཀྱི་གཞི་མཐུན་ཡོད་པར་ཐལ། དེ་གཉི་གའི་སྟེང་གི་སྟོང་ཉིད་འགལ་བ་མ་ཡིན་པའི་ཕྱིར། མ་གྲུབ་ན། དེ་གཉི་གའི་སྟེང་གི་སྟོང་ཉིད་ཆོས་ཅན། ཁྱོད་ཡིན་ན་གང་དྲན་དྲན་ཡིན་དགོས་པར་ཐལ། ཁྱོད་འགལ་བ་ཡིན་པའི་ཕྱིར་ཟེར་ན། དེ་སྒྲ་སྦྱར་ཏེ་རྟགས་མ་གྲུབ་ཀྱི་ལན་འདེབས། ཡང་དེ་གཉི་གའི་སྟེང་གི་སྟོང་ཉིད་ཡིན་ན་གང་དྲན་དྲན་ཡིན་དགོས་པར་ཐལ། དེ་གཉི་གའི་སྟོང་ཉིད་འགལ་བ་ཡིན་པའི་ཕྱིར་ན། སྐྱོན་ཅན་གྱི་ལན་འདེབས། འདོད་མི་ནུས་ཏེ། དེ་གཉི་ག་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་སྟོང་པ་དེ་དེ་གཉི་གའི་སྟོང་ཉིད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེ་གཉི་གའི་སྟོང་ཉིད་ཡིན་པར་ཐལ། དེ་གཉི་གའི་སྟེང་གི་དོན་དམ་དཔྱོད་པའི་རིག་ཤེས་རྗེས་དཔག་གི་རྙེད་དོན་ཡིན་པའི་ཕྱིར། དེར་ཐལ། དེ་གཉིས་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པར་རྟོགས་པའི་རྗེས་དཔག་གི་གཞལ་བྱ་ཡིན་པའི་ཕྱིར། དེར་ཐལ། དེ་ལྟར་

― GTD002_Page_0607 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་པའི་རྗེས་དཔག་ཡོད་པའི་ཕྱིར་ཏེ། དེ་གཉི་ག་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པ་ཡིན་པའི་ཕྱིར། ཡང་ཁ་ཅིག་ན་རེ། དེ་གཉི་གའི་སྟེང་གི་སྟོང་ཉིད་འགལ་བ་མ་ཡིན་པར་ཐལ། དེ་གཉི་གའི་སྟེང་གི་ཡོངས་གྲུབ་འགལ་བ་མ་ཡིན་པའི་ཕྱིར། དེར་ཐལ། དེ་གཅིག་ཡིན་པའི་ཕྱིར་ཏེ། དེ་གཉི་གའི་སྟེང་གི་དགག་བྱ་བཅད་ཙམ་གྱི་དེ་བཞིན་ཉིད་དེ་དེའི་མཚན་ཉིད་ཡིན་པའི་ཕྱིར་དང། དབུ་སེམས་སུའི་ལུགས་ལའང་གཞི་ལམ་རྣམ་གསུམ་གྱི་སྟེང་དུ་དགག་བྱ་ཆོས་བདག་འགོག་པའི་ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་འཇོག་ཚུལ་རེ་ཡོད་པའི་ཕྱིར་ཟེར་ན། འོ་ན་ཀ་བུམ་གཉི་གའི་རང་བཞིན་མཐར་ཐུག་གཅིག་ཡིན་པར་ཐལ། དེ་གཉི་གའི་ཆོས་ཉིད་གཅིག་ཡིན་པའི་ཕྱིར། རྟགས་ཁས། འདོད་ན། དེ་གཉི་གའི་ངོ་བོ་དང་རྒྱུ་འབྲས་བུ་ཐམས་ཅད་ཀྱང་གཅིག་ཡིན་པར་ཐལ། དེ་དག་རེ་རེ་ནས་མཚོན་བྱ་ཡིན་པའི་ཕྱིར། རྟགས་དོན་གྱིས་ཁས། འདོད་ན། དེ་གཉིས་ངོ་བོ་དབྱེར་མེད་ཡིན་པར་ཐལ་ལོ། །གཞན་ཡང་ནམ་མཁའི་སྟེང་གི་གཞན་དབང་ལ་དེ་འཛིན་ཚད་མ་སོགས་ནམ་མཁའ་ལས་དོན་གཞན་ཞིག་བཞག་པ་འབྲེལ་མེད་ཡིན་པར་ཐལ། དེའི་སྟེང་དུ་མཚན་ཉིད་གསུམ་སྦྱར་བའི་དགོས་པ་དེའི་སྟེང་གི་ཆོས་ཀྱི་བདག་འཛིན་འགོག་པ་དང་ཡོངས་གྲུབ་གཏན་ལ་འབེབས་པའི་ཕྱིར་ཡིན་པས། དེ་ལ་མེད་མི་རུང་དུ་ནམ་མཁའ་ཁོ་རང་གཞིར་བཟུང་བ་དགོས་པའི་ཕྱིར་ཏེ། གནོད་འཇོམས་མཁན་པོ་འགོག་པའི་སྐབས་སུ་རྣལ་འབྱོར་སྤྱོད་པ་དང་དབུ་མ་པ་སུའི་ལུགས་ལའང་ཆོས་ཀྱི་བདག་མེད་ཀྱི་ཡོངས་གྲུབ་གཏན་

― GTD002_Page_0608 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་འབེབས་པ་ན་སྟོང་གཞི་གང་ལ་བྱ་དགོས་པ་ནི་ཆོས་ཀྱི་བདག་འཛིན་གྱིས་གཞི་གང་ལ་ཆོས་བདག་ཏུ་བཟུང་བ་དེ་ལ་རག་ལས་ཏེ། དཔེར་ན་ཐག་པ་ལ་སྦྲུལ་དུ་བཟུང་ནས་སྐྲག་པའི་སྡུག་བསྔལ་བསལ་བར་འདོད་ན་ཐག་པ་སྟོང་གཞིར་བཟུང་ནས་དེ་སྦྲུལ་གྱིས་སྟོང་ངོ་ཞེས་བསྟན་དགོས་པ་ལྟར། གང་ལ་བདག་ཏུ་བཟུང་བའི་གཞི་གཞན་དབང་དེ་ཇི་ལྟར་བཟུང་བ་ལྟར་གྱི་ཀུན་བཏགས་ཀྱི་བདག་གིས་སྟོང་པ་ཡོངས་གྲུབ་ཡིན་པས་སྟོང་ཚུལ་དེ་འདྲའི་སྟོང་ཉིད་བསྒོམ་ན་བདག་འཛིན་གྱི་གཉེན་པོར་འགྲོ་བ་ཡིན་གྱི། སྟོང་གཞི་དང་སྟོང་ཚུལ་གཞན་ཞིག་བྱས་ན་འདྲེ་ཤར་སྒོ་དང་གླུད་ནུབ་སྒོའི་དཔེ་ལྟར་གནད་དུ་མི་འགྲོ་ཚུལ་གསུངས་པ་དང་དངོས་སུ་འགལ་ཞིང། དེར་མ་ཟད་གཟུགས་ཕུང་ལ་སྦྱར་ནས་མཚན་ཉིད་གསུམ་གསུངས་པའི་ཚེ་ཁོ་རང་གཞན་དབང་བྱས་ཏེ་དེའི་སྟེང་དུ་ངོ་བོ་དང་ཁྱད་པར་ལ་ཀུན་བཏགས་ཚུལ། དེས་སྟོང་པ་ཡོངས་གྲུབ་ཏུ་འཇོག་ཚུལ་བཅས་རྒྱས་པར་གསུངས་ཏེ། ཕུང་པོ་གཞན་བཞི་ནས་བྱང་ཕྱོགས་སྡེ་ཚན་བདུན་གྱི་བར་ཐམས་ཅད་ལ་མཚན་ཉིད་གསུམ་གསུམ་དེ་ཇི་ལྟ་བ་བཞིན་བྱེད་དགོས་པར་མདོ་རང་ཉིད་ཀྱིས་དངོས་སུ་གསུངས་ཤིང། འདི་ཉིད་ལས་ཀྱང་གདགས་གཞི་སྔར་བཞིན་ལ་ཞེས་ཡང་ཡང་གསུངས་བཞིན་དུ་གདགས་གཞིའི་གཞན་དབང་འཇོག་ཚུལ་གཟུགས་ཕུང་དང་སྡུག་བདེན་སོགས་ཀྱི་ཚེ་དངོས་སུ་གསུངས་པ་དེ་བཞིན་དུ་མི་འཇོག་པར་ལོགས་ཤིག་ནས་བཙལ་བ་མདོ་བསྟན་བཅོས་གཉིས་ཀ་དང་འགལ་ཚུལ་སོགས་ཡིག་ཆ་ལྟར་རོ། །ཡང་གཟུགས་དང་གཟུགས་འཛིན་ཚད་མའི་ཆོས་ཉིད་ཡིན་ཁྱབ་མཉམ་མ་ཡིན་པར་ཐལ། གཟུགས་ཕྱི་དོན་གྱི་བེམ་པོར་མ་གྲུབ་པ་ཆོས་ཉིད་ཡིན་ཀྱང།

― GTD002_Page_0609 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་འཛིན་ཚད་མ་ཕྱི་དོན་གྱི་བེམ་པོར་མ་གྲུབ་པ་ཆོས་ཉིད་མ་ཡིན་པའི་ཕྱིར། དེར་ཐལ། དེ་མདོ་སྡེ་པས་ཀྱང་རྟོགས་པའི་ཕྱིར་ཏེ། དེས་དེ་ཤེས་པར་རྟོགས་པའི་ཕྱིར། ཁྱབ་སྟེ། རྣམ་འགྲེལ་ལས། རྣམ་ཤེས་བེམ་པོའི་རང་བཞིན་ལས། །ལྡོག་པར་རབ་ཏུ་བསྟན་པ་ཡིན། །ཞེས་གསུངས་པའི་ཕྱིར། ཡང་མདོ་ལས། གཟུགས་ཉིད་ཀྱང་མི་དམིགས་ན་གཟུགས་ཀྱི་དེ་བཞིན་ཉིད་དམིགས་པར་ལྟ་ག་ལ་འགྱུར། ཞེས་དང། རྩ་ཤེས་ཊཱིཀ་ཆེན་ལས། རྣལ་འབྱོར་སྤྱོད་པའི་མཁས་པ་རྣམས་ཀྱང་ཡོངས་གྲུབ་བདེན་པར་གྲུབ་པ་ལ་དེའི་རྟེན་གཞན་དབང་བདེན་པར་གྲུབ་དགོས་པར་མཐོང་ནས། ཞེས་པའི་དོན་དུ་བསམ་སྟེ་ཡོངས་གྲུབ་བདེན་གྲུབ་ཡིན་ཕྱིན་དེའི་སྟོང་གཞིའང་བདེན་པར་གྲུབ་དགོས་ཟེར་ན། ནམ་མཁའི་སྟོང་ཉིད་སྟོང་ཉིད་མ་ཡིན་པའང་ནམ་མཁའ་བདེན་གྲུབ་ཏུ་ཐལ་བའི་སྐྱོན་འབྱུང་ཚུལ་དང། བུམ་འཛིན་རྟོག་པའི་ཆོས་ཉིད་བུམ་པའི་ཆོས་ཉིད་ཡིན་ན་བུམ་པ་མེད་པའི་ས་ཕྱོགས་སུ་བུམ་འཛིན་རྟོག་པའང་མེད་པར་ཐལ་བ་སོགས་ཀྱང་ཡིག་ཆར་གསལ་བ་ལྟར་རོ། །གཞན་ཡང་ནམ་མཁའི་གཞན་དབང་ལ་ནམ་མཁའ་རང་ཉིད་འཇོག་དགོས་པར་ཐལ། རྣམ་བརྟགས་ཀྱི་ནམ་མཁའ་ལ་ནམ་མཁའ་རང་ཉིད་འཇོག་དགོས་པའི་ཕྱིར། དེར་ཐལ། གཟུགས་ཕུང་གི་སྟེང་དུ་རྣམ་བརྟགས་ཀྱི་གཟུགས་ཀུན་བཏགས་ཀྱི་གཟུགས་ཆོས་ཉིད་ཀྱི་གཟུགས་གསུམ་དུ་ཕྱེ་བའི་རྣམ་བརྟགས་ཀྱི་གཟུགས་ལ་གཟུགས་རང་ཉིད་བཞག་སྟེ། སྟོང་གཞི་རྣམ་བརྟགས་ཀྱི་གཟུགས་དེ་ཉིད་དགག་བྱ་ཀུན་བཏགས་ཀྱི་གཟུགས་ཀྱིས་སྟོང་པ་ཆོས་ཉིད་ཀྱི་

― GTD002_Page_0610 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་སམ་གཟུགས་ཀྱི་ཡོངས་གྲུབ་ཏུ་བཞག་པ་གང་ཞིག །གཟུགས་ཀྱི་སྟེང་དུ་དེ་གསུམ་འཇོག་ཚུལ་ཇི་ལྟ་བ་བཞིན་ཕུང་ཁམས་སྐྱེ་མཆེད་འདུས་བྱས་འདུས་མ་བྱས་ཐམས་ཅད་ལ་ཁྱད་མེད་དུ་སྦྱོར་དགོས་པའི་ཕྱིར། དང་པོ་གྲུབ་སྟེ། དབྱིག་གཉེན་གྱི་དབུས་མཐའི་འགྲེལ་པར། གཟུགས་ལ་རྣམ་པ་གསུམ་སྟེ། ཀུན་བཏགས་པའི་གཟུགས་ནི་གང་གཟུགས་ཀྱིས་ཀུན་བཏགས་པའི་ངོ་བོ་ཉིད་དོ། །རྣམ་པར་བཏགས་པའི་གཟུགས་ནི་གང་གཟུགས་ཀྱི་གཞན་དབང་གི་ངོ་བོ་ཉིད་དེ་དེ་ལ་གཟུགས་སུ་རྣམ་པར་རྟོག་པར་བྱེད་དོ། །ཆོས་ཉིད་ཀྱི་གཟུགས་ནི་གང་གཟུགས་ཀྱི་ཡོངས་སུ་གྲུབ་པའི་ངོ་བོ་ཉིད་དོ། །ཞེས་གསུངས་པའི་ཕྱིར། ཁྱབ་སྟེ། དེ་ལ་གཟུགས་སུ་རྣམ་པར་རྟོག་པར་བྱེད་དོ་ཞེས་པ་འདིས་རྣམ་བརྟགས་ཀྱི་སྒྲ་དོན་བསྟན་པར་བློ་བརྟན་གྱིས་བཤད་པས། གཟུགས་ཀྱི་ཐ་སྙད་གང་ལ་འདོགས་པའམ་གང་ལ་འདི་ནི་གཟུགས་སོ་སྙམ་དུ་འཛིན་རྒྱུའི་མཚན་གཞི་དེ་ཉིད་དགོས་པར་བསྟན་པ་ཡིན་པའི་ཕྱིར། གཉིས་པ་གྲུབ་སྟེ། དེ་ཉིད་ལས། གཟུགས་ལ་ཇི་ལྟ་བ་དེ་བཞིན་དུ་ཚོར་བ་ལ་སོགས་པའི་ཕུང་པོ་རྣམས་དང་ཁམས་དང་སྐྱེ་མཆེད་ལ་སོགས་པ་རྣམས་ལའང་སྦྱར་བར་བྱའོ། །ཞེས་དང། བློ་བརྟན་གྱི་འགྲེལ་བཤད་ལས། གཟུགས་ལ་གསུམ་དུ་ཕྱེ་སྟེ་ངོ་བོ་ཉིད་གསུམ་དུ་བསྡུས་པ་དེ་བཞིན་དུ་ཚོར་བ་ལ་སོགས་པའི་ཕུང་པོ་རྣམས་དང་ཁམས་དང་སྐྱེ་མཆེད་ལ་སོགས་པ་ལའང་སྦྱར་བར་བྱའོ་ཞེས་བྱ་བ་ནི། ཚོར་བ་དང། འདུ་ཤེས་དང། འདུ་བྱེད་དང། རྣམ་པར་ཤེས་པའི་ཕུང་པོ་དང། ཁམས་དང། སྐྱེ་མཆེད་རྣམས་དང། རྟེན་ཅིང་འབྲེལ་བར་འབྱུང་བའི་ཡན་ལག་

― GTD002_Page_0611 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་དང། གནས་དང་གནས་མ་ཡིན་པ་རྣམས་དང། དབང་པོ་རྣམས་དང། དུས་གསུམ་དང། བདེན་པ་བཞི་དང། ཐེག་པ་གསུམ་དང། འདུས་བྱས་དང། འདུས་མ་བྱས་ཏེ་ཚོར་བ་ལ་སོགས་པ་དང། ཁམས་ལ་སོགས་པ་དེ་དག་ཀྱང་ཀུན་བཏགས་པ་དང། ཞེས་སོགས་གསུངས་པའི་ཕྱིར། དེ་སྐད་དུ་མངོན་པ་ཀུན་བཏུས་ལས་ཀྱང། ཕུང་པོ་དང་ཁམས་དང་སྐྱེ་མཆེད་ཀྱི་རབ་ཏུ་དབྱེ་བ་ནི་རྣམ་པ་གསུམ་སྟེ། ཀུན་ཏུ་བརྟགས་པའི་མཚན་ཉིད་ཀྱིས་རབ་ཏུ་དབྱེ་བ་དང། རྣམ་པར་བརྟགས་པའི་མཚན་ཉིད་ཀྱིས་རབ་ཏུ་དབྱེ་བ་དང། ཆོས་ཉིད་ཀྱི་མཚན་ཉིད་ཀྱིས་རབ་ཏུ་དབྱེ་བའོ། །ཞེས་པ་ནས། རྣམ་པར་བརྟགས་པའི་མཚན་ཉིད་ཀྱི་རབ་ཏུ་དབྱེ་བ་གང་ཞེ་ན། ཕུང་པོ་དང་ཁམས་དང་སྐྱེ་མཆེད་དེ་དག་ཉིད་དོ། །ཞེས་དེའི་སྟེང་གི་རྣམ་བརྟགས་སམ་གཞན་དབང་ལ་དེ་དག་རང་རང་ཁོ་ན་འཇོག་པར་གསུང་གི་གཞན་ཞིག་བཙལ་ནས་འཇོག་པར་མ་གསུངས་སོ། །ཡིག་ཆ་འགའ་ཞིག་ཏུ་ཆོས་ཐམས་ཅད་ཀྱི་སྟེང་གི་ངོ་བོ་ཉིད་གསུམ་ལ་ཁྱད་པར་དེ་གསུམ་འདྲ་བར་སྦྱོར་དགོས་ན་མཚོན་བྱའི་སྟེང་གི་ངོ་བོ་ཉིད་གསུམ་ལའང་རྣམ་བརྟགས་ཀྱི་མཚོན་བྱ། ཀུན་བཏགས་ཀྱི་མཚོན་བྱ། ཆོས་ཉིད་ཀྱི་མཚོན་བྱ་གསུམ་དུ་འཇོག་དགོས་ལ། དེ་ལྟར་ན་ཀུན་བཏགས་དང་ཆོས་ཉིད་ཀྱང་མཚན་ཉིད་དུ་ཐལ་བའི་སྐྱོན་འཕང་བ་ནི་རིགས་པའི་རྣམ་གྲངས་ཙམ་དུ་ཟད་དེ། དེ་གསུམ་དུ་ཕྱེ་བའི་ཀུན་བཏགས་ཀྱི་མཚོན་བྱ་ཞེས་པ་མཚོན་བྱའི་ཀུན་བཏགས་ལ་བྱེད་ཀྱི། ཀུན་བཏགས་མཚན་ཉིད་དུ་བྱས་ནས་དེའི་མཚོན་བྱ་བཞག་

― GTD002_Page_0612 ―

^{[མ་དཔེ་གཟིགས་ན་འདིར་གནོན།]}

[Full Size]

པ་མ་ཡིན་པའི་ཕྱིར། དེར་ཐལ། རྗོད་བྱེད་རྣམས་ནི་སྨྲ་བ་པོའི་བརྗོད་འདོད་ཀྱི་དབང་གིས་དོན་སྟོན་པའི་ཕྱིར། ཁྱོད་ལྟར་ན་ཀུན་བཏགས་ཀྱི་གཟུགས་དང་ཆོས་ཉིད་ཀྱི་གཟུགས་ཀྱང་མེད་པར་ཐལ། ཀུན་བཏགས་ཆོས་ཉིད་གཉིས་ལ་གཟུགས་ཤིག་འཇོག་ཚུལ་མེད་པའི་ཕྱིར། འདོད་མི་ནུས་ཏེ། དབྱིག་འགྲེལ་སྔར་དྲངས་པ་དང། ཉི་ཁྲི་ལས་ཀྱང། བྱམས་པ། གཟུགས་ཀྱི་རབ་ཏུ་དབྱེ་བ་ནི་གསུམ་གྱིས་ཤེས་པར་བྱ་སྟེ། ཡོངས་སུ་བཏགས་པའི་གཟུགས་དང། རྣམ་པར་བཏགས་པའི་གཟུགས་དང། ཆོས་ཉིད་ཀྱི་གཟུགས་སོ། །ཞེས་གསུངས་པའི་ཕྱིར། ཡང་ཁ་ཅིག་ན་རེ། ཡོངས་གྲུབ་ཡིན་ན་ཁྱོད་ཀྱི་སྟོང་གཞི་ཆོས་ཅན་དུ་གྱུར་པའི་འདུས་བྱས་རེ་ཡོད་པས་ཁྱབ་པར་ཐལ། འདི་ཉིད་ལས། ཆོས་ཅན་འདུས་བྱས་ལ་ཆོས་ཀྱི་བདག་རྣམ་པར་བཅད་ཙམ་གྱི་སྤྲོས་པ་མེད་དགག་ལ་ཆོས་ཀྱི་བདག་མེད་ཀྱི་ཡོངས་གྲུབ་ཏུ་འཇོག་པ་ཤིན་ཏུ་གསལ་བའི་ཕྱིར། ཞེས་གསུངས་པའི་ཕྱིར་ན། མ་ཁྱབ་སྟེ། དེ་ཇོ་ནང་པས་ཆོས་ཅན་ལ་སྟོང་ཉིད་བཞག་ནས་དེ་གང་གིས་སྟོང་ན་འདུས་བྱས་ཀྱི་ཚོགས་ཀྱིས་ཚུར་སྟོང་པ་ཡོངས་གྲུབ་ཏུ་བཤད་པ་མདོའི་དོན་མིན་གྱི། འདུས་བྱས་ཆོས་ཅན་ལ་བཞག་ནས་དེ་དགག་བྱ་ཀུན་བཏགས་ཀྱིས་སྟོང་པ་ཡོངས་གྲུབ་ཏུ་ཕར་འཇོག་པ་མདོའི་དོན་དུ་གསལ་ཞེས་པ་ཡིན་པའི་ཕྱིར། དེས་ན་འདུས་བྱས་དམིགས་ཀྱིས་བཀར་བའི་དགོས་པའང་ཀུན་མཁྱེན་ཆོས་འབྱུང་གིས་གཙོ་ཆེ་བར་དགོངས་པར་གསུངས་པའང་རུང་མོད། གཙོ་བོ་ནི་ཕྱོགས་སྔ་མས་འདུས་བྱས་རྣམས་གང་གིས་སྟོང་རྒྱུའི་དགག་བྱ་ལ་བཞག་པ་དེ་བཟློག་

― GTD002_Page_0613 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་འདུས་བྱས་སྟོང་གཞིར་བྱས་ཏེ་དགག་བྱ་ཀུན་བཏགས་ཤིག་འཇོག་དགོས་ཞེས་པ་ཡིན་པས་ཕྱོགས་སྔའི་འདོད་པ་བརྗོད་ཚུལ་གྱི་དབང་གིས་ཡིན་ནོ། །ཁ་ཅིག་ལུང་འདིས་ཀྱང་ཡོངས་གྲུབ་ལ་ཆོས་ཀྱི་བདག་མེད་ཕྲ་མོ་དགོས་པར་བསྟན་ཟེར་བ་ནི་མ་བརྟགས་པ་སྟེ། འདིར་གོང་འོག་གཉི་གར་ཆོས་ཀྱི་ཞེས་སྨོས་པས་ཆོས་བདག་བཀག་ཙམ་དེ་ཆོས་ཀྱི་བདག་མེད་ཡོངས་གྲུབ་ཏུ་བཤད་པའི་ཤུགས་ལ་གང་ཟག་གི་བདག་བཀག་ཙམ་དེ་གང་ཟག་གི་བདག་མེད་ཀྱི་ཡོངས་གྲུབ་ཏུ་ལྷག་པར་འགྲུབ་པ་ཡིན་གྱི། ཡོངས་གྲུབ་ཙམ་ལ་ཆོས་བདག་བཀག་པ་དགོས་པར་སྟོན་པའི་གནས་མེད་པའི་ཕྱིར་རོ། །དེ་བཞིན་དུ་འདི་ཉིད་ལས། ཆོས་ལ་ཞེས་སོགས་ཀྱིས་ཆོས་ཀྱི་བདག་མེད་དེ་བཞིན་ཉིད་ཅེས་བརྗོད་པ་གང་ལ་དམིགས་ནས་བསྒོམས་པས་སྒྲིབ་པ་དག་པར་འགྱུར་བ་དེ་ཉིད་ཡོངས་གྲུབ་ཏུ་ངོས་བཟུང་ངོ་། །ཞེས་པའི་ལུང་འདིས་ཡོངས་གྲུབ་ལ་ཆོས་ཀྱི་བདག་མེད་ཁོ་ན་འཇོག་པར་བསྟན་ཞེས་སྨྲ་བའང་མ་བརྟགས་པ་སྟེ། དེ་ནི་དགོངས་འགྲེལ་གྱི་མདོ་ཚིག་དེའི་དངོས་བསྟན་གྱི་དབང་དུ་བྱས་པར་གསལ་ལ། ཐེག་ཆེན་སློབ་པའི་བསྒོམ་བྱའི་ཆོས་ཀྱི་བདག་མེད་དེ་ཡོངས་གྲུབ་ཏུ་འཇོག་པའི་རྒྱུ་མཚན་སྟོན་པ་ལ། གང་ལ་དམིགས་ནས་བསྒོམ་པས་སྒྲིབ་པ་དག་པར་འགྱུར་བ་ཞེས་གསུངས་པའི་ཤུགས་ཀྱིས་ཐེག་དམན་རྣམས་གང་ལ་དམིགས་ནས་བསྒོམས་པས་སྒྲིབ་པ་དག་པར་འགྱུར་པའི་གང་ཟག་གི་བདག་མེད་དེའང་ཡོངས་གྲུབ་ཏུ་སྒྲུབ་ནུས་པའི་

― GTD002_Page_0614 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་རོ། །ཡང་ཁ་ཅིག །བདག་གཉིས་སུ་སྒྲོ་བཏགས་པ་ལྟར་གྲུབ་པས་སྟོང་པའི་དེ་བཞིན་ཉིད་ཡོངས་གྲུབ་ཀྱི་མཚན་ཉིད་དང། ཆོས་བདག་ཏུ་སྒྲོ་བཏགས་པ་ལྟར་སྒྲུབ་པས་སྟོང་པའི་དེ་བཞིན་ཉིད་ཆོས་ཀྱི་བདག་མེད་ཀྱི་དབང་དུ་བྱས་པའི་ཡོངས་གྲུབ་ཀྱི་མཚན་ཉིད་སོགས་སུ་འཇོག་རིགས་པར་ཐལ། གྲུབ་མཐའ་ཆེན་མོ་ལས། རང་རྐྱ་ཐུབ་པའི་གང་ཟག་གི་བདག་དང་ཆོས་བདག་གཉིས་སུ་བདག་འཛིན་གཉིས་ཀྱིས་སྒྲོ་བཏགས་པ་ལྟར་དུ་གྲུབ་པས་སྟོང་པའི་དེ་བཞིན་ཉིད་དེ་ཡོངས་གྲུབ་ཀྱི་མཚན་ཉིད་ཅེས་གསུངས་པའི་ཕྱིར་ན། མ་ཁྱབ་སྟེ། གོ་ཐོབ་ཀྱི་དབང་དུ་བྱས་པ་ཙམ་ཡིན་པའི་ཕྱིར། གོང་དུ་འདོད་ན། བློ་དེས་ཡོངས་གྲུབ་རྟོགས་ན་བདག་མེད་གཉི་ག་རྟོགས་པས་ཁྱབ་པར་ཐལ། ཡོངས་གྲུབ་རྟོགས་ན་བདག་འཛིན་གཉི་གས་སྒྲོ་བཏགས་པ་ལྟར་གྲུབ་པས་སྟོང་པ་རྟོགས་པས་ཁྱབ་པའི་ཕྱིར། འདོད་ན། ཐེག་ཆེན་མཐོང་ལམ་བར་ཆད་མེད་ལམ་ཆོས་ཅན། དེར་ཐལ། དེའི་ཕྱིར། འདོད་ན། བདག་འཛིན་གཉི་གས་སྒྲོ་བཏགས་པ་ལྟར་གྲུབ་པས་སྟོང་པ་ཆོས་ཅན། ཆོས་ཀྱི་བདག་མེད་ཕྲ་མོ་ཡིན་པར་ཐལ། ཐེག་ཆེན་མཐོང་ལམ་བར་ཆད་མེད་ལམ་གྱི་འཛིན་སྟངས་ཀྱི་ཡུལ་ཡིན་པའི་ཕྱིར། འདོད་མི་ནུས་ཏེ། གང་ཟག་གི་བདག་མེད་ཕྲ་མོ་ཡིན་པའི་ཕྱིར། དེར་ཐལ། ཉན་ཐོས་མཐོང་ལམ་བར་ཆད་མེད་ལམ་གྱི་འཛིན་སྟངས་ཀྱི་ཡུལ་ཡིན་པའི་ཕྱིར། རྟགས་ཁས། གཞན་ཡང་ཆོས་ཀྱི་བདག་མེད་ཕྲ་མོ་ཆོས་ཅན། གང་ཟག་གི་བདག་མེད་ཀྱི་དབང་དུ་བྱས་པའི་ཡོངས་གྲུབ་

― GTD002_Page_0615 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པར་ཐལ། གང་ཟག་གི་བདག་ཏུ་སྒྲོ་བཏགས་པ་ལྟར་གྲུབ་པས་སྟོང་པའི་དེ་བཞིན་ཉིད་ཡིན་པའི་ཕྱིར། དེར་ཐལ། དེ་བཞིན་ཉིད་ཡིན་པའི་ཕྱིར། ཁྱབ་སྟེ། ཆོས་ཡིན་ན་གང་ཟག་གི་བདག་ཏུ་གྲུབ་པས་སྟོང་པའི་ཆོས་ཡིན་པས་ཁྱབ་པའི་ཕྱིར། སོགས་སྤྲོ་སླ། ཁོ་ན་རེ། སྟོང་ཉིད་ཡིན་ན་ཁྱོད་ལ་སྟོང་གཞི་འདུས་བྱས་ཤིག་ཡོད་དགོས་པར་ཐལ། སྟོང་ཉིད་དུ་མ་ཟད་འདུས་མ་བྱས་གང་ཡིན་ཀྱང་རང་འདོགས་པའི་གཞིར་འདུ་བྱས་རེ་ཡོད་དགོས་པའི་ཕྱིར་ན། མ་ཁྱབ། རྟགས་གྲུབ་སྟེ། རྩ་ཤེ་ལས། གང་ཞིག་བརྟེན་ནས་མ་ཡིན་པའི། །དངོས་མེད་ཡོད་པ་མ་ཡིན་ནོ། །ཞེས་དང། །ཐར་ལམ་གསལ་བྱེད་ལས། འོ་ན་འདུས་མ་བྱས་ཀྱི་ནམ་མཁའི་ཤེས་བྱ་ཡིན་མིན་དཔྱོད་པའི་རྟེན་གྱི་དངོས་པོར་ཇི་ལྟར་རུང་ཞེ་ན། དེ་ལ་ཐོག་མར་འདུས་མ་བྱས་ཀྱི་ནམ་མཁའ་ཡོད་མེད་ཐེ་ཚོམ་ཟ་བ་གསལ་ནས་དེ་སྒྲུབ་དགོས་པ་ཡིན་ལ། དེའང་མིག་ཤེས་ལ་སྣང་བའི་བར་གྱི་སྣང་བ་མངོན་པར་སྐབས་ཡོད་ཀྱི་གཟུགས་འདི་མངོན་སུམ་དུ་ཚད་མས་གྲུབ་པ་གཞིར་བཟུང་ནས། དེར་ཐོགས་པའི་རེག་བྱ་ཡོད་མེད་དཔྱད་ནས་ཐོགས་པའི་རེག་བྱས་སྟོང་པར་ངེས་པ་ན་འདུས་མ་བྱས་ཀྱི་ནམ་མཁའི་མཚན་ཉིད་དེ་ལེགས་པར་གྲུབ་པ་ཡིན་པས་དེར་ཡང་དཔྱད་པར་བྱ་བའི་གཞི་དང་ཡོད་མེད་དཔྱོད་པའི་ཆོས་ཀྱང་དངོས་པོ་ཉིད་ལ་ཞེན་པར་ཤིན་ཏུ་གསལ་ལོ། །ཞེས་གསུངས་པའི་ཕྱིར། ཡང་ཁ་ཅིག །དགོངས་འགྲེལ་ལས། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་ཞེས་པའི་དོན། ཡིག་ཆར། མཚན་ཉིད་གསུམ་པོ་གང་གི་མེད་རྒྱུའི་ངོ་བོ་ཉིད་ཡིན་ཞེ་ན། ཀུན་བཏགས་ཁོ་ནའི་མེད་རྒྱུའི་ངོ་བོ་ཉིད་ལ་བྱ་ལ། ངོ་བོ་ཉིད་གཞན་

― GTD002_Page_0616 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཀྱི་མེད་རྒྱུའི་ངོ་བོ་ཉིད་ལ་མི་བྱེད་ཅེས་སྟོན་པ་ལ་ངོ་བོ་ཉིད་དེ་ཁོ་ནས། ཞེས་གསུངས་པའི་ཕྱིར། ཞེས་པའི་དོན་དུ་བསམ་སྟེ། མ་མཆིས་རྒྱུའི་ངོ་བོ་ཉིད་ནི་ངོ་བོ་ཉིད་མེད་པ་གསུམ་གྱི་དང་པོའི་མེད་རྒྱུའི་མཚན་ཉིད་ངོ་བོ་ཉིད་དང། གཉིས་པའི་མེད་རྒྱུའི་སྐྱེ་བ་ངོ་བོ་ཉིད་དང། གསུམ་པའི་མེད་རྒྱུའི་དོན་དམ་པ་ངོ་བོ་ཉིད་གསུམ་གྱི་དང་པོ་ཁོ་ན་ལ་བྱེད་ཟེར་ན། མི་འཐད་པར་ཐལ། ཡིག་ཆའི་དགོངས་པ་སྐབས་ཐོབ་གཙོ་ཆེ་ཆུང་གི་དབང་གིས་ཡིན་པའི་ཕྱིར། དེར་ཐལ། འདིའི་མ་མཆིས་རྒྱུའི་ངོ་བོ་ཉིད་ལ་དོན་དམ་པ་ངོ་བོ་ཉིད་མེད་པ་ཞེས་པའི་མེད་རྒྱུའི་ངོ་བོ་ཉིད་དེའང་ཡོངས་ཀྱང། དེ་ཡོངས་གྲུབ་ངོས་བཟུང་བའི་ཞར་བྱུང་ཙམ་ཡིན་ལ། དགག་བྱ་ངོས་བཟུང་བའི་ཆེད་དུ་གསུངས་པ་ནི་མཚན་ཉིད་མེད་པ་ཡིན་པས་དེ་གཙོ་བོར་བྱས་པ་ཡིན་པའི་ཕྱིར། ཁྱོད་ལྟར་ན་དོན་དམ་པ་ངོ་བོ་ཉིད་མེད་ཅེས་པའི་མེད་རྒྱུ་ལ་ཆོས་བདག་མི་ཡོང་བར་ཐལ། ཁོ་ནའི་སྒྲས་དེ་བཀག་པའི་ཕྱིར། རྟགས་ཁས། འདོད་ན། དོན་དམ་པ་ངོ་བོ་ཉིད་མེད་པ་ལ་ཆོས་ཀྱི་བདག་མེད་ཕྲ་མོ་མི་ཡོང་བར་ཐལ་ལོ། །ཇོ་ནང་པ་ལ་སྐྱོན་སྟོན་མཚམས་ཀྱི་གནད་ཀྱང་འདི་ན་ཡོད་དེ། སྔར་བཤད་པ་ལྟར་ཆོས་ཉིད་སྒྲུབ་པ་རང་དབང་བ་ཞིག་བཞག་པ་དེ་ཤེར་མདོའི་སྐབས་སུ་སྟོང་གཞིར་བཟུང་ནས་བདེན་མེད་དུ་གསུངས་ཞེས་སྒྲུབ་མི་རུང་བས། དེ་ལ་ཤེར་མདོས་སྟོང་ཉིད་བདེན་མེད་དུ་བསྟན་པར་སྒྲུབ་པའི་ཚེ་འདི་ལྟར། ཤེར་མདོ་ཆོས་ཅན། ཁྱོད་ཀྱིས་སྟོང་པ་ཉིད་བདེན་མེད་དུ་བཤད་པར་ཐལ། ཁྱོད་ཀྱིས་དགག་བྱའི་བདག་བཅད་ཙམ་གྱི་མེད་དགག་དེ་བདེན་མེད་དུ་བཤད་པའི་ཕྱིར། དེ་ལ་ཁྱབ་པ་ཡོད་པར་ཐལ།

― GTD002_Page_0617 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་ཉིད་ལ་དགག་བྱ་དེ་བཅད་ཙམ་གྱི་མེད་དགག་ཅིག་དགོས་པའི་ཕྱིར་ཏེ། དེ་ལྟར་དགོས་པ་ཇོ་ནང་པ་ཁྱོད་ཀྱིས་ངེས་དོན་མཐར་ཐུག་ཏུ་འདོད་རྒྱུའི་མདོ་སྡེ་དགོངས་འགྲེལ་གྱི་སྐབས་སུ། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་ཞེས་སོགས་ཀྱིས་གསལ་བར་གསུངས་པའི་ཕྱིར། ཞེས་འགོག་དགོས་སོ། །ཡང་རྣམ་པ་གཅིག་ཏུ་ན་ངོ་བོ་ཉིད་དེ་ཁོ་ནའི་ངོ་བོ་ཉིད་མ་མཆིས་ཞེས་པ་དེ་ངོ་བོ་ཉིད་མེད་པ་གསུམ་གྱི་མེད་རྒྱུའི་ངོ་བོ་ཉིད་གསུམ་གྱི་ནང་ནས་གཅིག་ཁོ་ནའི་ངོ་བོར་མ་མཆིས་པའམ་བཀག་ཙམ་ལ་མ་སྦྱར་བར། མཚན་ཉིད་གསུམ་ལ་ངོ་བོ་ཉིད་གསུམ་དུ་བྱས་པའི་ནང་གི་ཀུན་བཏགས་ཀྱི་ངོ་བོ་གཅིག་པུ་བཀག་ཙམ་ལ་འཇོག་གི། གཞན་དབང་ཡོངས་གྲུབ་གཉིས་ཀྱི་ངོ་བོ་བཀག་པ་མི་འཇོག་ཅེས་ཁོ་ནའི་སྒྲས་མཚན་ཉིད་གཞན་གཉིས་གཅོད་པའི་དོན་དུ་སྦྱོར་རུང་སྟེ། དགོངས་འགྲེལ་ལས། ཀུན་བཏགས་པའི་མཚན་ཉིད་དེར་མ་གྲུབ་ཅིང་ངོ་བོ་ཉིད་དེ་ཁོ་ནས། ཞེས་གསུངས་པའི་ཕྱིར། ཁྱབ་སྟེ། འདི་ཉིད་ལས། ངོ་བོ་ཉིད་དེ་ཁོ་ནས་ཞེས་ཀུན་བཏགས་ཀྱི་ངོ་བོ་ཉིད་གོང་དུ་སྨོས་པ་ལ་གསུངས་ནས་ཁོ་ནས་ཞེས་པས་ནི་གཞན་གཅོད་པས་ངོ་བོ་ཉིད་གཞན་གཉིས་ཀྱི་ངོ་བོ་ཉིད་མ་མཆིས་པ་ལ་མི་བྱེད་ཀྱི། ཀུན་བཏགས་ཁོ་ནའི་ངོ་བོ་མེད་པ་ལ་ཡོངས་གྲུབ་ཏུ་བྱེད་ཅེས་པའི་དོན་ནོ། །ཞེས་དང། མདོ་འདིས་སྟོང་ཚུལ་བསྟན་པ་ངེས་དོན་དུ་འདོད་པ་དང་ངོ་བོ་ཉིད་ཐ་མ་ངོ་བོ་ཉིད་དང་པོ་གཉིས་ཀྱིས་སྟོང་པ་ཡོངས་གྲུབ་འདོད་པའང་འགལ་བའོ། །ཞེས་གསུངས་པའི་ཕྱིར། དེར་མ་ཟད་འདི་ཉིད་ལས། སྡུག་བདེན་ལ་ནི་གདགས་གཞི་

― GTD002_Page_0618 ―

^{[མ་དཔེ་གཟིགས་ན་འདིར་གནོན།]}

[Full Size]

སྔར་བཞིན་ལ་སྡུག་བསྔལ་གྱི་བདེན་པའོ་ཞེས་ངོ་བོ་དང་སྡུག་བདེན་ཡོངས་སུ་ཤེས་པ་ཞེས་བྱེ་བྲག་ཏུ་མིང་དང་བརྡས་བཞག་པ་ཀུན་བཏགས་དང། གཞན་དབང་སྔར་བཞིན་དང་ཡོངས་གྲུབ་ཀྱང་སྔར་དང་འདྲ་ལ་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཞེས་གསུངས་ཤིང། དེ་བཞིན་དུ་བདེན་པ་ལྷག་མ་ལའང་སྦྱར་རོ། །ཞེས་གསུངས་པའང་ཇོ་ནང་པའི་འདོད་ཚུལ་དེ་ལ་ལུང་འགལ་སྟོན་པ་ཡིན་ཏེ། གོང་གི་གཟུགས་ཕུང་དང་འདིར་སྡུག་བདེན་གྱི་སྟེང་དུ་ཡོངས་གྲུབ་འཇོག་ཚུལ་མདོ་ཚིག་ཟུར་ཙམ་ཡང་མི་འདྲ་བ་མེད་པས་ཡོངས་གྲུབ་སྔར་དང་འདྲ་ཞེས་པས་ཆོག་མོད་ཀྱང། དེའི་སྟེང་དུ་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཞེས་གསུངས་ཞེས་བསྣན་པའི་དགོས་པ་ནི་དེ་དག་གིས་ཆོས་ལ་ཆ་ཕྱེ་ནས་ཀུན་རྫོབ་པ་རྣམས་རང་གི་ངོ་བོ་བདེན་གྲུབ་ཀྱིས་སྟོང་པ་དང་ཆོས་ཉིད་ཀུན་རྫོབ་པའི་ཆོས་གཞན་གྱིས་སྟོང་པ་ཞེས་བཤད་ཀྱང། མདོ་ལས་གོང་འོག་གང་དུའང་ཁྱད་མ་ཕྱེ་བར་གཟུགས་ཕུང་ནས་འདིའི་བར་ཐམས་ཅད་ལ་རང་གི་ངོ་བོ་ཀུན་བཏགས་ཀྱིས་སྟོང་པ་ཡོངས་གྲུབ་ཏུ་འཇོག་པ་དང། ཁྱད་པར་འདིའི་མཇུག་དེ་མ་ཐག་འགོག་ལམ་གཉིས་ཀྱང་སྨོས་པར་འགྱུར་བས་ཀུན་བྱང་གང་ལའང་ཆོས་ཉིད་ཀྱི་འཇོག་ཚུལ་ཁྱད་མེད་པར་གོ་བའི་ཆེད་དུ་མི་འཕྱུག་པའི་གཟེར་བཏབ་པ་ཡིན་པར་དགོངས་ནས་རྗེ་བླ་མས་རྡོ་རྗེའི་ཚིག་འདི་གསུངས་པ་ཡིན་པའི་ཕྱིར། ཡང་ཁོ་ན་རེ། འདིར་མཚན་ཉིད་གསུམ་གསུམ་སྦྱར་བར་གསུངས་སོ་ཞེས་པ་འབྲེལ་མེད་པར་ཐལ། གསུམ་གསུམ་སྦྱོར་མཁན་མདོ་ཡིན་པ་གང་ཞིག །དེ་ལྟར་ན་གསུངས་སོ་ཞེས་པ་མདོ་ལས་གཞན་གཅིག་ལ་ངོས་འཛིན་

― GTD002_Page_0619 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་པའི་ཕྱིར་ན། མ་གྲུབ་སྟེ། གཉི་ག་ལེའུ་འདིའི་ནང་གི་ཡིན་ཀྱང་མདོ་ཚིག་སོ་སོ་བ་ཡིན་པའི་ཕྱིར། དེར་ཐལ། མཚན་ཉིད་གསུམ་སྦྱོར་མཁན་ནི་དྲི་བ་ཞུས་པའིལན་དུ་སྟོན་པས་བཀའ་སྩལ་བའི་མདོ་ཚིག་ཡིན་ལ། ཕྱི་མ་ནི་བདག་གིས་གོ་ལགས་ཞེས་དོན་དམ་ཡང་དག་འཕགས་ཀྱིས་ཡར་ཞུས་པའི་ཚིག་ཡིན་པའི་ཕྱིར། གཞན་ཡང་ཆོས་ཐམས་ཅད་ལ་མཚན་ཉིད་གསུམ་གསུམ་སྦྱར་བའི་ནང་གི་གཞན་དབང་དེར་གཞན་དབང་མཚན་ཉིད་པ་ཞིག་དགོས་པར་བསམ་ནས་རང་རང་མི་འཇོག་པར་གཞན་རེ་བཙལ་ནས་འཇོག་པ་ནི་སྐབས་དོན་གྱི་དགོས་པ་མ་རྟོགས་པ་ཡིན་པར་ཐལ། དེའི་དགོས་པ་སྟོང་ཉིད་གཏན་ལ་འབེབས་པ་ལ་ཐོག་མར་སྟོང་གཞི་ངོས་བཟུང། དེ་ནས་དེའི་སྟེང་དུ་འགོག་རྒྱུའི་དགག་བྱ་ངོས་བཟུང། དེ་ནས་དེས་སྟོང་པའི་ཡོངས་གྲུབ་ངོས་འཛིན་པའི་ཆེད་ཡིན་པས་སྟོང་གཞིར་འགྲོ་མི་འགྲོ་གཙོ་ཆེ་བ་མ་གཏོགས་གཞན་དབང་མཚན་ཉིད་པ་ཡིན་མིན་ལ་ལྟོས་དོན་མེད་པའི་ཕྱིར། དེར་ཐལ། འདི་ཉིད་ལས་མཚན་ཉིད་གསུམ་གསུམ་གྱི་འཇོག་ལུགས་བྱས་ནས་ཞེས་པའི་ཚིག་གི་ནུས་པ་འདོན་ལུགས་དོན་དེ་དངོས་མ་ཡིན་ཀྱང་ཕྱོགས་ཙམ་འདྲ་བ་ལ་ཚུལ་དང་ལུགས་ཀྱི་སྒྲ་འཇུག་པས། འདིར་འདུས་མ་བྱས་རྣམས་ཀྱི་གཞན་དབང་ལ་གཞན་དབང་གི་དོན་དངོས་མ་ཚང་ཡང། སྟོང་གཞི་ཡིན་པའི་ཆ་ནས་གཞན་དབང་དུ་འཇོག་ལུགས་བྱས་ཆོག་པའི་དོན་དུ་ཀུན་མཁྱེན་ཆོས་འབྱུང་གིས་གསུངས་པ་བཞིན་ཡིན་པའི་ཕྱིར། སྟོང་གཞིར་འགྲོ་ཚུལ་གྱི་སྒོ་ནས་གཞན་དབང་གི་སྒྲ་བཤད་ལུགས་ཡོད་

― GTD002_Page_0620 ―

^{[མ་དཔེ་གཟིགས་ན་འདིར་གནོན།]}

[Full Size]

དེ། རྟོག་གེ་འབར་བ་ལས། ཀུན་བཏགས་པ་དང་ཡོངས་སུ་གྲུབ་པ་གཞན་དག་ལ་དབང་བས་ཏེ། ཀུན་བཏགས་པ་དང་ཡོངས་སུ་གྲུབ་པ་དེ་དག་གི་རྟེན་ཡིན་པའི་ཕྱིར་གཞན་གྱི་དབང་གི་ངོ་བོ་ཉིད་དོ། །ཞེས་གསུངས་པའི་ཕྱིར། དཔེར་ན་མི་གཅིག་རང་ལ་གཏད་སོ་མེད་པར་གྲོགས་བཟང་ངན་གྱིས་གར་ཁྲིད་ཡིན་པ་དེར་གཞན་གྱི་དབང་དུ་འགྲོ་ཟེར་བ་ལྟར། སྟོང་གཞི་རང་ངོས་ནས་ཡང་དག་པ་དང་ཕྱིན་ཅི་ལོག་གང་དུ་ངེས་པ་སྐྱེད་མི་ནུས་ཀྱང། བདག་འཛིན་གྱིས་ལོག་པར་སྒྲོ་བཏགས་པའི་ཆ་ནས་ཀུན་བཏགས་པའི་སྣང་ཚུལ་དང། འཕགས་པའི་ཡེ་ཤེས་ཀྱིས་ཕྱིན་ཅི་མ་ལོག་པར་གཟིགས་པའི་ཆ་ནས་ཡང་དག་པའི་གནས་ཚུལ་བཞག་པ་ཡིན་པའི་ཕྱིར་ཏེ། གཞི་གཅིག་པུ་དེ་ལ་དམིགས་པར་ཁྱད་མེད་ཀྱང་འཛིན་སྟངས་དངོས་འགལ་དུ་སོང་བ་ཡིན་པས་ཐུང་མོང་གི་དམིགས་པའི་དབང་དུ་བྱས་ནས་གཞན་དབང་དང། འཛིན་སྟངས་སོ་སོའི་ངོ་ལ་ལྟོས་ཏེ་མཚན་ཉིད་གཞན་གཉིས་བཞག་པ་ཡིན་པའི་ཕྱིར། དེ་ལ་ཁོ་ན་རེ། ནམ་མཁའི་སྟེང་གི་གཞན་དབང་ལ་སྐྱེ་བ་ངོ་བོ་ཉིད་མེད་ཚུལ་བཤད་དུ་མེད་ཀྱང། དེའི་སྟེང་གི་གཞན་དབང་འཇོག་ཚུལ་ཡོད་པའི་ཁྱད་པར་འཐད་པར་ཐལ། འདོད་པའི་ཕྱིར། འདོད་ན། ནམ་མཁའ་ལ་སྐྱེ་བ་ངོ་བོ་ཉིད་མེད་ཚུལ་གཅིག་བཤད་དུ་མེད་པར་ཐལ། ནམ་མཁའི་སྟེང་གི་གཞན་དབང་ལ་དེ་མེད་པའི་ཕྱིར། རྟགས་ཁྱབ་ཁས། འདོད་ན། ནམ་མཁའ་གཞན་དབང་དུ་བྱས་ནས་དེའི་ཡོངས་གྲུབ་གཏན་ལ་འབེབས་ཚུལ་གཅིག་མེད་པའི་ཕྱིར་ཏེ། དེ་ལ་སྐྱེ་བ་ངོ་བོ་ཉིད་མེད་ཚུལ་གཅིག་བཤད་དུ་མེད་པའི་ཕྱིར་ན། མ་ཁྱབ། བྲམ་

― GTD002_Page_0621 ―

^{[མ་དཔེ་གཟིགས་ན་འདིར་གནོན།]}

[Full Size]

ཟེའི་བུ་སྣ་ཉག་ཆོས་ཅན། ཁྱོད་སེང་གེ་ཡིན་ཚུལ་བཤད་དུ་ཡོད་པར་ཐལ། ཁྱོད་ལ་སེང་གེར་བཤད་ཚུལ་གཅིག་ཡོད་པའི་ཕྱིར། ཁྱབ་པ་འགྲིག །གོང་དུ་འདོད་མི་ནུས་ཏེ། དེར་བཤད་ཚུལ་གཅིག་ཡོད་ན་དེ་ཡིན་མི་དགོས་པའི་ཕྱིར། དོན་དམ་པ་ངོ་བོ་ཉིད་མེད་པར་བཤད་ཚུལ་ཡོད་ཀྱང་དེ་མ་ཡིན་པ་གཞན་དབང་ལྟ་བུ་ཡོད་པའི་ཕྱིར། ཡང་ཁ་ཅིག་ན་རེ། བློ་དེའི་དམིགས་ཡུལ་ཡིན་ན་བློ་དེའི་སྤྱོད་ཡུལ་ཡིན་དགོས་པར་ཐལ། རྣམ་པར་རྟོག་པའི་སྤྱོད་ཡུལ་ཞེས་པ་དེའི་དམིགས་ཡུལ་ལ་བྱེད་པའི་ཕྱིར་ན། མ་ཁྱབ། འདོད་ན། རྣམ་མཁྱེན་ཆོས་ཅན། ཐེག་ཆེན་མཐོང་ལམ་བར་ཆད་མེད་ལམ་གྱི་སྤྱོད་ཡུལ་ཡིན་པར་ཐལ། དེའི་དམིགས་ཡུལ་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། ཁྱབ་སྟེ། དེས་ཆོས་ཐམས་ཅད་ཀྱི་སྟེང་གི་སྟོང་པ་ཉིད་ཆོས་དབྱིངས་ཀུན་འགྲོའི་ཚུལ་གྱིས་རྟོགས་པའི་ཕྱིར་དང། དེ་རྣམ་མཁྱེན་གྱི་སྟེང་གི་ཆོས་ཀྱི་བདག་འཛིན་ཀུན་བཏགས་ཀྱི་དངོས་གཉེན་བར་ཆད་མེད་ལམ་ཡིན་པས་བདག་འཛིན་དེ་དང་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་འགྲོ་དགོས་པའི་ཕྱིར། གོང་དུ་འདོད་མི་ནུས་ཏེ། སེམས་ཅན་གྱི་མངོན་སུམ་གྱི་སྤྱོད་ཡུལ་མ་ཡིན་པའི་ཕྱིར། དེར་ཐལ། སེམས་ཅན་གྱི་མངོན་སུམ་གྱི་སྤྱོད་ཡུལ་དུ་མ་གྱུར་བའི་ལས་འབྲས་ཀྱི་འབྲེལ་བ་ཕྲ་མོ་དང་སངས་རྒྱས་ཀྱི་གསང་བ་བསམ་མི་ཁྱབ་འཇོག་རྒྱུ་ཡོད་པའི་ཕྱིར། མདོ་ལས། རྒྱལ་སྲས་རང་རྒྱལ་རྣམས་དང་ཉན་ཐོས་ཀུན་གྱིས་ཀྱང། །སྤྱོད་ཡུལ་མ་གྱུར་རྫོགས་སངས་རྒྱས་ཀྱི་གསང་

― GTD002_Page_0622 ―

^{[མ་དཔེ་གཟིགས་ན་འདིར་གནོན།]}

[Full Size]

བ་འདི། །ཞེས་དང། མཛོད་འགྲེལ་རྒྱལ་སྲས་མ་ལས། གང་དག་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་དུ་གཏོགས་པ་ཁོ་ན་ཡིན་པ་དེ་དག །ཅེས་གསུངས་པའི་ཕྱིར། ཡང་ཁ་ཅིག་ན་རེ། གཟུགས་དེ་གཟུགས་ཀྱི་ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ཀྱི་གདགས་གཞི་ཡིན་པར་ཐལ། དགོངས་འགྲེལ་ལས་ཀུན་བཏགས་པའི་མཚན་ཉིད་ཀྱི་གནས་ཞེས་གསུངས་ཤིང། དེའི་དོན་འདི་ཉིད་ལས། གཉིས་པས་ཀུན་བཏགས་ཀྱི་གདགས་གཞི་དང། ཞེས་གསུངས་པའི་ཕྱིར། འདོད་ན། གཟུགས་ཀྱི་སྟེང་གི་ཀུན་བཏགས་ཡིན་ན་གཟུགས་ཁྱོད་ཀྱི་གདགས་གཞི་ཡིན་དགོས་པར་ཐལ། ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ལ་དེའི་ཕྱིར། འདོད་ན། གཟུགས་དེ་གཟུགས་ལ་མོ་གཤམ་གྱི་བུར་འཛིན་པའི་རྟོག་པས་སྒྲོ་བཏགས་པའི་ཆ་དང། དེས་བཟུང་བ་ལྟར་གྱི་མོ་གཤམ་གྱི་བུ་གཉི་གའི་གདགས་གཞི་ཡིན་པར་ཐལ། དེ་ལྟར་འཛིན་པ་ཡོད་པའི་ཕྱིར་ཏེ། རྣམ་རྟོག་ལ་མཐའ་མེད་པའི་ཕྱིར་དང་རྟོག་པ་དེ་ལོག་ཤེས་སུ་ཁས་ལེན་དགོས་པའི་ཕྱིར། འདོད་ན། མོ་གཤམ་གྱི་བུའི་གདགས་གཞིའི་ཕུང་པོ་ལྔ་ཡོད་པར་ཐལ། གདགས་གཞི་ཕུང་པོ་ལྔ་ལ་བཏགས་པའི་ཀུན་བཏགས་ཤིག་ཡོད་པའི་ཕྱིར་ཏེ། ཕུང་པོ་ལྔ་དེའི་གདགས་གཞི་ཡིན་པར་ཁས་བླངས་ཤིང་ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ཡོད་པར་ཡོངས་སུ་གྲགས་པའི་ཕྱིར་ཟེར་ན། དོན་ལ་འགལ་བ་ཆེར་མེད་པས་ཐ་སྙད་གྲགས་ཚོད་དང་མཐུན་པའི་ལན་འདེབས། ཁ་ཅིག་ན་རེ། རྩ་ཤེས་རྣམ་བཤད་ལས། རང་སྡེ་དངོས་པོར་

― GTD002_Page_0623 ―

^{[མ་དཔེ་གཟིགས་ན་འདིར་གནོན།]}

[Full Size]

སྨྲ་བས་ཀྱང་འཁོར་འདས་གཉིས་ལ་བདེན་པར་གྲུབ་མ་གྲུབ་ཀྱི་ཁྱད་པར་མི་འབྱེད་གསུངས་པ་མི་རིགས་པར་ཐལ། དེ་ལ་ཁྱད་འབྱེད་པའི་དངོས་སྨྲ་བ་ཡོད་པའི་ཕྱིར་ན། མ་ཁྱབ་སྟེ། སྐབས་འདིར་གཙོ་བོ་སེམས་ཙམ་པ་ལ་དགོངས་པའི་ཕྱིར། གོང་གི་རྟགས་གྲུབ་སྟེ། མདོ་སྡེ་པ་དེ་ཡིན་པའི་ཕྱིར། དེར་ཐལ། དེས་འཁོར་བ་དངོས་པོ་དང་མྱང་འདས་རྟག་པར་ཁས་ལེན་པ་གང་ཞིག །རྟག་དངོས་གཉིས་ལ་རིམ་བཞིན་བདེན་མེད་དང་བདེན་གྲུབ་ཀྱིས་ཁྱབ་པ་ཁས་ལེན་པའི་ཕྱིར། དེར་ཐལ། སྔ་མ་ལ་ཀུན་རྫོབ་ཏུ་ཡོད་པ་དང་སྤྱི་མཚན་གྱིས་ཁྱབ་པ་དང། ཕྱི་མ་ལ་དོན་དམ་དུ་ཡོད་པ་དང་རང་མཚན་གྱིས་ཁྱབ་པར་ཁས་ལེན་པའི་ཕྱིར་ཏེ། རྣམ་འགྲེལ་ལས། དོན་བྱེད་ནུས་པ་གང་ཡིན་པ། །དེ་འདིར་དོན་དམ་ཡོད་པ་སྟེ། །གཞན་ནི་ཀུན་རྫོབ་ཡོད་པ་འོ། །དེ་དག་རང་སྤྱིའི་མཚན་ཉིད་བཤད། །ཅེས་གསུངས་པའི་ཕྱིར། ངོ་བོ་ཉིད་མེད་གསུམ་གྱི་གཞི། །ངོ་བོ་ཉིད་ནི་རྣམ་གསུམ་གྱི། །ངོ་བོ་གསལ་བར་ངོས་འཛིན་ཚུལ། །ངོ་མཚར་རིག་སྔགས་རྒྱལ་པོ་འདི། །རྒྱལ་རྣམས་དགྱེས་བྱེད་མཆོད་པའི་སྤྲིན་གྱི་གཟུངས། །མཁས་པ་དགའ་བྱེད་ཤེས་རབ་བློ་འཕེལ་སྔགས། །རྒོལ་ངན་མཐར་བྱེད་དམོད་པའི་དྲག་སྔགས་ཏེ། །སྒྲ་ཙམ་འདོན་ལ་ནེ་ཙོའི་མ་ཎི་ཡིན། །༈ བཞི་པ་དེ་དག་གི་གྲུབ་པའི་དོན་ཞུས་ཚུལ་ལ། དྲི་བས་མཚམས་སྦྱར་བ། བཤད་བྱའི་མདོ་འགོད་པ། མདོའི་དོན་བཤད་པ་གསུམ། དང་པོ་ནི། དེ་ལྟར་ན་གསུང་རབ་ལ་ཆོས་རྣམས་རང་གི་མཚན་ཉིད་ཀྱིས་ཡོད་པ་དང་ཆོས་རྣམས་རང་གི་མཚན་ཉིད་ཀྱིས་མ་གྲུབ་པར་སྟོན་པ་དང། རང་

― GTD002_Page_0624 ―

^{[མ་དཔེ་གཟིགས་ན་འདིར་གནོན།]}

[Full Size]

གི་མཚན་ཉིད་ཀྱིས་གྲུབ་མ་གྲུབ་ལེགས་པར་ཕྱེ་མ་ཕྱེ་གཉིས་སུ་འགྱུར་ལ་ཕྱེ་བ་ནི་དོན་གཞན་དུ་དྲང་བར་མི་བྱ་བས་ངེས་པའི་དོན་དང། མ་ཕྱེ་བ་ནི་དོན་གཞན་དུ་དྲང་དགོས་པས་དྲང་བའི་དོན་ཡིན་ལ། དེ་ལའང་གཉིས་ཡོད་པས་མདོ་སྡེ་གཉིས་དྲང་དོན་དང་གཅིག་ངེས་དོན་དུ་སྔར་བཤད་པ་རྣམས་ཀྱི་ཤུགས་ཀྱིས་ཤེས་པར་འགྱུར་རོ། །ཤུགས་ལ་གནས་པའི་དོན་དེ་ཉིད་དུས་ཀྱི་རིམ་པའི་སྒོ་ནས་འཁོར་ལོ་གསུམ་དང་སྦྱར་བའི་དྲང་ངེས་སུ་འགྱུར་ཚུལ་དོན་དམ་ཡང་དག་འཕགས་ཀྱིས་སྟོན་པ་ལ་ཞུས་པ་ནི། ཞེས་བྱུང། གཉིས་པ་ནི། དགོངས་འགྲེལ་ལས། བཅོམ་ལྡན་འདས་ཀྱིས་དང་པོར་ཡུལ་ཝ་ར་ཎཱ་སིར་དྲང་སྲོང་སྨྲ་བ་རི་དྭགས་ཀྱི་ནགས་སུ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་འཕགས་པའི་བདེན་པ་བཞིའི་རྣམ་པ་བསྟན་པས་ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་སྔོན་ལྷར་གྱུར་པའམ་མིར་གྱུར་པ་སུས་ཀྱང་མཐུན་པར་འཇིག་རྟེན་དུ་མ་བསྐོར་བ་གཅིག་རབ་ཏུ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དེའང་བླ་ན་མཆིས་པ་སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས། སྐྱེ་བ་མ་མཆིས་པ་དང་འགག་པ་མ་མཆིས་པ་དང་གཟོད་མ་ནས་ཞི་བ་དང་རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་

― GTD002_Page_0625 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་པ་ཉིད་སྨོས་པའི་རྣམ་པས་ཆེས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གཉིས་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེའང་བླ་ན་མཆིས་པ་སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་ཀྱི། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས། སྐྱེ་བ་མ་མཆིས་པ་དང་འགག་པ་མ་མཆིས་པ་དང་གཟོད་མ་ནས་ཞི་བ་དང་རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་འདི་ནི་བླ་ན་མ་མཆིས་པ་སྐབས་མ་མཆིས་པ་ངེས་པའི་དོན་ལགས་ཏེ་རྩོད་པའི་གཞིའི་གནས་སུ་གྱུར་པ་མ་ལགས་སོ། །ཞེས་གསུངས་སོ། །གསུམ་པ་ལ་མདོའི་ཚིག་དོན་དང། དེ་ནས་འབྱུང་བའི་དྲང་ངེས་ཀྱི་ཚུལ་བཤད་པ་གཉིས། དང་པོ་ནི། དེ་ལ་འཁོར་ལོ་དང་པོ་བསྐོར་བའི་གནས་ཞེས་སོགས་དང། གཉིས་པ་ནི། དེ་འདྲ་བའི་འཁོར་ལོ་དང་པོ་ལ་བདེན་བཞིའི་ཆོས་འཁོར་དང་ཞེས་སོགས་གསུངས། འདི་ལ་སྤྱི་དོན་མཐའ་དཔྱད་པ་གཉིས། དང་པོ་ནི། མདོ་ཚིག་འདི་དག་གིས་འཁོར་ལོ་གསུམ་གྱི་རྣམ་གཞག་སྟོན་ཚུལ་ཡང། བཅོམ་ལྡན་འདས་ཀྱིས་ཞེས་ཆོས་འཁོར་སྐོར་བ་པོ་དང། དང་པོར་ཞེས་བསྐོར་བའི་དུས་དང། ཡུལ་ཝ་ར་ཎཱ་སིར་ཞེས་སོགས་ཀྱིས་གང་དུ་བསྐོར་བའི་

― GTD002_Page_0626 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་དང། ཉན་ཐོས་ཀྱི་ཐེག་པ་ལ་ཞེས་སོགས་ཀྱིས་ཐེག་པ་དམན་པའི་སྡེ་སྣོད་ལ་གཙོ་བོར་བརྟེན་པའི་གདུལ་བྱ་དང། བདེན་པ་བཞིའི་ཞེས་སོགས་ཀྱིས་གང་ལས་བརྩམས་པའི་བརྗོད་བྱ་དང། ཆོས་ཀྱི་འཁོར་ལོ་ཞེས་ངོ་བོ་དང། ངོ་མཚར་ཞེས་སོགས་ཀྱིས་ཆེ་བ་དང། དེའང་བླ་ན་མཆིས་པ་ཞེས་སོགས་ཀྱིས་དྲང་ངེས་ཀྱི་ཁྱད་པར་ཏེ་འཁོར་ལོ་དང་པོ་དོན་ཚན་བརྒྱད་ཀྱི་སྒོ་ནས་བསྟན་ཏོ། །ཕྱི་མ་གཉིས་ལ་གནས་དང་དུས་དངོས་སུ་མ་གསུངས་ཀྱང་སྔ་མའི་ཤུགས་ཀྱིས་སྦྱོར་དགོས་ལ། རྒྱ་ནག་འགྲེལ་ཆེན་དུ་མདོ་དྲངས་པ་ན། དུས་གཉིས་པའི་ཚེ་ཞེས་དང། དུས་གསུམ་པ་འདིར་ཞེས་ཕྱི་མ་གཉིས་ལའང་དུས་ཀྱི་ཁྱད་པར་དངོས་སུ་གསུང་སྣང་ངོ་། །དེ་ལ་འཁོར་ལོ་དང་པོ་བསྐོར་བའི་གནས་ཝ་ར་ཎཱ་སི་ཞེས་པའི་དོན་ནི། ཀུན་གཟིགས་ལྔ་པ་ཆེན་པོའི་གསུང་ལས། ཝར་ཎ་ཕུབ་དང་ཨ་སི་རལ་གྲི་སྟེ་སྔོན་ཡུལ་དེར་འཁྲུགས་པ་ཤིན་ཏུ་དར་བས་གོ་མཚོན་རྒྱུན་དུ་བསྟེན་པས་ཕུབ་རལ་ཅན་ནམ། ཡང་ན་ཝ་རཱ་འཁོར་མོ་དང་ན་སི་འཇིགས་པར་བཞེད་པ་དང། པཎྚི་ཏ་འགའ་ཞིག་ཆུ་བོ་ཝར་ཎ་དང་ཨ་སིའི་བར་གྱི་ཡུལ་ཡིན་པས་མཚམས་སྦྱར་བས་ཝར་ཎཱ་སི་ཡིན་གསུངས། ཞེས་འབྱུང་སྟེ། ཕྱི་མ་ནི་བྱེ་བྲག་བཤད་མཛོད་ལས། ཅིའི་ཕྱིར་ཝ་ར་ཎཱ་སི་ཞེས་བྱ་ཞེ་ན། སྨྲས་པ། འདི་ནི་ཆུ་ཀླུང་གི་མིང་ཡིན་ཏེ། དེ་ལས་མི་རིང་བ་ན་རྒྱལ་པོའི་གྲོང་ཁྱེར་བརྩིགས་པས། དེའི་ཕྱིར་གྲོང་ཁྱེར་འདིའང་བ་ར་ཎཱ་སི་

― GTD002_Page_0627 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་བྱའོ། །ཞེས་གསུངས་པ་རྒྱ་ནག་འགྲེལ་ཆེན་དུ་དྲངས་པ་དང་མཐུན་ནོ། །དྲང་སྲོང་ལྷུང་བ་ཞེས་པའང། བཀོད་པ་ཆེན་པོ་བསྟན་པའི་མདོ་ལས། ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་ནམ་ལྷུམས་སུ་འཇུག་པར་དགོངས་པ་ན། ལྷའི་བུ་དག་འཛམ་བུའི་གླིང་དུ་བབས་ནས་རང་སངས་རྒྱས་རྣམས་ལ་འཕགས་པ་དག་ཞིང་འདི་ཡོངས་སུ་སྤངས་པའི་རིགས་སོ། །དེ་ཅིའི་ཕྱིར་ཞེ་ན། ལོ་བཅུ་གཉིས་ན་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པར་འགྱུར་རོ། །ཞེས་སྨྲས་པ་དང། དེའི་ཚེ་ཡུལ་ཝ་ར་ཎཱ་སིར་རང་སངས་རྒྱས་ལྔ་བརྒྱས་ལྷའི་བུའི་ཚིག་ཐོས་པས་འདུག་པའི་སྟན་ལས་ལངས་ནས་ནམ་མཁའ་ལ་ཏཱ་ལ་བདུན་ཙམ་དུ་འཕགས་ཏེ། མེས་རང་གི་ཕུང་པོ་བསྲེགས་ནས་ཡོངས་སུ་མྱ་ངན་ལས་འདས་ཀྱི་ཤཱ་རི་རཾ་འབའ་ཞིག་ནམ་མཁའ་ལས་བབས་པས། དེའི་ཕྱིར་གནས་འདི་དྲང་སྲོང་ལྷུང་བའི་གནས་ཞེས་བྱའོ། །ཞེས་གསུངས་ལ། རྒྱུད་སྡེ་སྤྱི་རྣམ་ལས་སངས་རྒྱས་འོད་སྲུང་འཇིག་རྟེན་དུ་འབྱོན་པའི་གོང་དུ་དེ་ལྟར་བྱུང་བར་བཤད་དོ། །བྱེ་བྲག་བཤད་མཛོད་དུ་སྔོན་དྲང་སྲོང་ལྔ་བརྒྱ་ནམ་མཁའ་ལ་འགྲོ་བ་ན་རྫུ་འཕྲུལ་ཉམས་ཏེ་གནས་འདིར་ལྷུང་བས་དེ་ལྟར་བཏགས་པ་དང། དྲང་སྲོང་མཆོག་སངས་རྒྱས་རྣམས་ཀྱིས་ཆོས་འཁོར་ཐོག་མ་བསྐོར་བའི་གནས་ཡིན་པའི་ཆ་ནས་དྲང་སྲོང་སྨྲ་བ་

― GTD002_Page_0628 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་ཀྱང་འབྱུང་ངོ་། །སློབ་དཔོན་ཡང་དག་བདེན་པའི་བརྗེད་བྱང་ལས། དུས་དང་པོར་ཡུལ་ཝ་ར་ཎཱ་སི་རི་དྭགས་ཀྱི་ཚལ་དྲང་སྲོང་འདུས་པའི་གནས་སུ་ཞེས་བྱ་བ་ནི་ཡོན་ཏན་རྣམ་པ་གསུམ་དང་ལྡན་པའི་ཕྱིར་གང་ཟག་རྣམ་པ་གསུམ་རྟག་ཏུ་དེར་འདུའོ། །ཞེས་ཚལ་དང་ཆུ་དང་གནས་ཀྱི་ཡོན་ཏན་གསུམ་དང་ལྡན་པས། སངས་རྒྱས་འཇིག་རྟེན་དུ་བྱོན་པའི་ཚེ་འཁོར་འཕགས་པའི་ཚོགས་འདུ་བ་དང། དེ་མ་ཡིན་པའི་ཚེ་རེས་འགའ་རང་སངས་རྒྱས་དུ་མ་འདུ་ལ། རེས་འགའ་འཇིག་རྟེན་པའི་དྲང་སྲོང་དུ་མ་འདུ་བས་དྲང་སྲོང་འདུས་པའི་གནས་ཞེས་པ་ཡིན་པར་བཤད་དོ། །དེ་བཞིན་དུ། རི་དྭགས་རུ་རུ་མང་པོ་གནས་པ་དང། ཤ་བ་སྦྲུམ་མའ་ིདོན་དུ་རི་དྭགས་ཀྱི་རྒྱལ་པོས་སྲོག་བཏང་བའི་རྐྱེན་གྱིས་རྒྱལ་པོས་དེ་རྣམས་ལ་མི་འཇིགས་པ་བྱིན་པ་དང། ཆོས་འཁོར་བསྐོར་བའི་ཚེ་རི་དྭགས་ཤ་བ་གསུམ་རྟག་པར་ཆོས་ཉན་དུ་འོངས་པ་སོགས་ལ་བརྟེན་ནས་རི་དྭགས་ཀྱི་ནགས་དང། རི་དྭགས་བྱིན་པའི་ཚལ་དང། རི་དྭགས་རྒྱུ་བའི་གནས་ཞེས་སོགས་དུ་མར་བསྒྱུར་རོ། །འཁོར་ལོ་བར་པ་ནི་བྱ་རྒོད་ཕུང་པོའི་རི། མགོན་མེད་ཟས་སྦྱིན་གྱི་ཀུན་དགའ་ར་བ། གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་ཁང་པ། ཀ་ལནྡ་ཀའི་ཚལ་ཏེ་གནས་བཞིར་འདུས་པ་བཅུ་དྲུག་ཏུ་གསུངས་པར་བཤད་པས་དགོངས་འགྲེལ་གྱིས་གནས་གཅིག་ཏུ་ངོས་མ་བཟུང་ངོ་། །འོན་ཀྱང་གྲགས་ཆེ་བ་བྱ་རྒོད་ཕུང་པོའི་རི་ཡིན་ལ། དེའི་སྒྲ་དོན་ནི། ས་ལུ་ལྗང་བའི་མདོར་བྲག་བྱ་རྒོད་ཀྱི་མགོའི་དབྱིབས་ལྟ་བུར་

― GTD002_Page_0629 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་པས་དེ་ལྟར་བཏགས་པར་གསུངས་ལ། ལོ་རྒྱུས་ཁ་ཅིག་ཏུ་ཤེར་མདོ་གསུངས་པའི་ཚེ་ཞིང་གཞན་ནས་བྱང་སེམས་དུ་མ་བྱ་རྒོད་ཀྱི་གཟུགས་སུ་སྤྲུལ་ཏེ་ཆོས་ཉན་པར་འོངས་པས་ཡིན་པར་བཤད་ཀྱང། རྒྱན་སྣང་ལས། དེ་བཞིན་གཤེགས་པ་རྣམས་ཀྱིས་རྒྱལ་བའི་ཡུམ་སྟོན་པ་ལ། བྱང་ཆུབ་སེམས་དཔའ་ལ་སོགས་པའི་ཚོགས་ཆེན་པོའི་ཁུར་ཡུལ་གཞན་གྱིས་འདེགས་པར་མི་ནུས་པ་ཉིད་ཀྱིས་མངོན་པར་བྱང་ཆུབ་པའི་གནས་དང་འདྲ་བར་འདོད་པར་བྱ་བ། རིན་པོ་ཆེ་སྣ་ཚོགས་ཀྱི་ཕུང་པོར་གྱུར་པ་ཡོད་པ་གང་ཡིན་པ་ནི་བྱ་རྒོད་ཀྱི་ཕུང་པོའོ། །ལྷ་ལ་སོགས་པ་བསོད་ནམས་འདོད་པ་རྣམས་ཚེས་བརྒྱད་ལ་སོགས་པའི་དུས་ཚིགས་རྣམས་སུ་འདུ་བ་རྒྱ་ཆེར་བྱེད་པ་ཞེས་བྱ་བའི་ངེས་པའི་ཚིག་གི་ཚལ་གྱིས་ན་རིའོ། །ཞེས་གྷྲྀ་དྷ་ཀུ་ཊཿདང་པ་ར་བ་ཏའི་ངེས་ཚིག་གི་སྟེང་ནས་གསུངས་སོ། །འདི་ལ་དཔག་ན་ཏིང་ངེ་འཛིན་རྒྱལ་པོ་སོགས་མདོ་སྡེ་འགའ་ཞིག་ཏུ་བྱ་རྒོད་ཕུང་པོའི་རི་འདི་བསྐལ་པ་སྔ་མ་རྣམས་ལ་ཡོད་པར་གསུངས་པའང་སྒྲ་ཇི་བཞིན་དུ་རུང་སྟེ། བསྐལ་པ་འཇིག་པའི་ཚེའང་མངོན་པར་བྱང་ཆུབ་པའི་གནས་རྡོ་རྗེ་གདན་ནི་མི་འཇིག་པར་གསུངས་ལ་འདིའང་དེ་དང་འདྲ་བར་མངོན་ནོ། །དེ་བཞིན་དུ་འཁོར་ལོ་ཐ་མ་བསྐོར་བའི་གནས་ཀྱང་གཅིག་ཏུ་ངེས་བཟུང་མ་མཛད་པ་ཡིན་ཏེ། སློབ་དཔོན་ཡང་དག་པའི་བདེན་པའི་བརྗེད་བྱང་ལས། གལ་ཏེ་ཡངས་པ་ཅན་དུ་བཞུགས་ནས་ཞེས་བསྟན་ན་དེས་ཞིང་

― GTD002_Page_0630 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་སུ་མ་དག་པ་ན་བཞུགས་པར་བསྟན་པར་འགྱུར་བས་མདོ་དང་མི་མཐུན་པར་འགྱུར་རོ། །ཞེས་དང། གནས་བདུན་དུ་འདུས་པ་བརྒྱད་ཀྱིས་གསུངས་པར་འགྱུར་ཏེ། མདོ་ལས་འབྱུང་བ་བཞིན་དུ་རིག་པར་བྱའོ། །ཞེས་དགོངས་འགྲེལ་ཡངས་པ་ཅན་དུ་གསུངས་པས་དེ་གཙོ་བོར་སྨོས་པ་ཡིན་གྱི། འཁོར་ལོ་ཐ་མ་བསྐོར་བའི་གནས་དེ་ཁོ་ནར་མ་ངེས་པར་གསུངས་པ་བཞིན་འཐད་དེ། ལང་གཤེགས་ལངྒའི་གྲོང་ཁྱེར་དུ་གསུངས་ལ། རྒྱན་སྟུག་ལས། འདོད་པ་དང་གཟུགས་དང་གཟུགས་མེད་པ་དང་འདུ་ཤེས་མེད་པའི་སེམས་ཅན་རྣམས་ལས་འདས་ཏེ་སངས་རྒྱས་ཀྱི་ཞིང་སྟུག་པོ་ན། ཞེས་འོག་མིན་དུ་གསུངས་ཚུལ་གླེང་གཞིའི་སྐབས་སུ་འབྱུང་བའི་ཕྱིར་རོ། །དེའི་རྒྱུ་མཚན་གྱིས་རྒྱ་ནག་འགྲེལ་ཆེན་ལས་ཀྱང། ཆོས་ཀྱི་འཁོར་ལོ་གསུམ་པ་ནི་གནས་གཉིས་སུ་བཞུགས་ནས་གསུངས་ཏེ། ཞིང་ཡོངས་སུ་དག་པ་དང་ཞིང་ཡོངས་སུ་མ་དག་པ་ཞེས་བཤད་དོ། །འོན་ཀྱང་ཕལ་ཆེར་དུ་ཡངས་པ་ཅན་སྨོས་པ་ནི་དགོངས་འགྲེལ་འཁོར་ལོ་གསུམ་པའི་གཙོ་བོ་ཡིན་ལ། དེ་ཡངས་པ་ཅན་གྱི་ཡི་དྭགས་ཀྱི་རྒྱལ་པོའི་ཆོས་ཀྱི་ཁང་པར་གསུངས་པའི་རྒྱུ་མཚན་གྱིས་ཡིན་ནོ། །དུས་ཀྱི་ཁྱད་པར་འཁོར་ལོ་དང་པོ་ལ་དུས་དང་པོར་ཞེས་གསུངས་པས། ཕྱི་མ་གཉིས་ལ་བར་བ་དང་ཐ་མར་ཞེས་པ་དོན་གྱིས་འཐོབ་ཅིང། ཐུན་མོང་བའི་དབང་དུ་བྱས་ན་ཐོག་མར་གསུང་རིམ་དེ་བཞིན་བྱེད་པ་ཕལ་ཆེར་མཐུན་ཀྱང། སོ་སོའི་ལོ་གྲངས་ལ་འཁྲུངས་ལོ་དང་འདས་ལོའི་རྩི་ཚུལ་སོགས་མ་འདྲ་བའི་དབང་

― GTD002_Page_0631 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་བཤད་ཚུལ་སྣ་ཚོགས་ཡོད་དེ། ཆག་ལོ་ཙཱ་བས་དང་པོ་ལོ་བདུན། བར་བ་སོ་གཅིག ཐ་མ་བདུན་ནམ་དགུར་བཤད་པ་ནི་རྒྱ་ནག་འགྲེལ་ཆེན་དང་མཐུན། ཁྲོ་ཕུ་ལོ་ཙཱ་བས་གསུམ་དང་སུམ་ཅུ་དང་བཅུ་གཉིས་སུ་བཤད། བསྟན་པ་གསལ་བྱེད་རྒྱན་གྱི་འོད་ཟེར་ལས་དང་པོ་ལོ་བདུན་མ་ལོང་བ་དང། བར་བ་བཅུ་གཉིས། ཐ་མ་ཉེར་བརྒྱད་དུ་བཤད། མཆིམས་ཆེན་པོས་བདུན་དང། ཉེར་བདུན་དང། བཅུར་བཤད་ཀྱང། བུ་སྟོན་རིན་པོ་ཆེས། དུས་ཀྱི་ངེས་པ་འདི་རྣམས་ཀྱི་ཁུངས་གསལ་བ་ཁོ་བོས་མ་མཐོང་ངོ་། །ཞེས་གསུངས་པ་ལྟར་ལོ་རྩི་ཚུལ་གྱི་བཤད་རྒྱུན་ཙམ་ལས་རྩོད་མེད་ཀྱི་ཁུངས་དང་མི་ལྡན་ཞིང་བདེན་བཞིའི་ཆོས་འཁོར་ལྟ་བུས་སངས་རྒྱས་ཚུལ་བསྟན་པ་ནས་མྱ་ངན་ལས་འདའ་ཚུལ་གྱི་བར་དུ་གསུངས་པ་ལུང་སྡེ་བཞིས་གྲུབ་ཚུལ་ཀུན་མཁྱེན་བླ་མས་གསུངས་པ་ལྟར་རོ། །གདུལ་བྱ་ནི་དང་པོར་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་ཞེས་དང། བར་བར་ཐེག་པ་ཆེན་པོ་ལ་ཡང་དག་པར་ཞུགས་པ་ཞེས་དང། ཐ་མར་ཐེག་པ་ཐམས་ཅད་ལ་ཡང་དག་པར་ཞུགས་པ་ཞེས་གསུངས་ཏེ། གཙོ་བོར་ཉན་ཐོས་ཀྱི་སྡེ་སྣོད་ལ་བརྟེན་པ་དང། ཐེག་པ་ཆེན་པོའི་སྡེ་སྣོད་ལ་བརྟེན་པ་དང། ཐེག་པ་གོང་འོག་གཉི་གའི་སྡེ་སྣོད་ཀྱི་དགོངས་པ་འཚོལ་བའི་གདུལ་བྱ་རིགས་གསུམ་དུ་ཕྱེ་ནས་གསུངས་སོ། །གང་ལས་བརྩམས་པའི་བརྗོད་བྱ་ནི། འཁོར་ལོ་དང་པོར་འཕགས་པའི་བདེན་པ་བཞིའི་རྣམ་པ་བསྟན་པས། ཞེས་གསུངས་ཤིང། བར་བ་དང་ཐ་མ་གཉིས་ལ་ཆོས་རྣམས་ཀྱི་ངོ་བོ་ཉིད་མ་མཆིས་པ་

― GTD002_Page_0632 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་བརྩམས་སྐྱེ་བ་མ་མཆིས་པ། འགག་པ་མ་མཆིས་པ་དང། གཟོད་མ་ནས་ཞི་བ་དང། རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས། ཞེས་ཁྱད་མེད་དུ་ངོ་བོ་ཉིད་མེད་པ་སོགས་ལྔ་ལས་བརྩམས་པ་འདྲ་བར་གསུངས་སོ། །འོན་ཀྱང་སྟོན་ཚུལ་མི་འདྲ་སྟེ། ཐ་མ་ལ་ལེགས་པར་རྣམ་པར་ཕྱེ་བ་དང་ལྡན་པ་ཞེས་འབྱུང་ཞིང། བར་པ་ལ་མདོའི་འགྱུར་འདིར་སྟོང་ཉིད་སྨོས་པའི་རྣམ་པའི་ཞེས་འབྱུང་ཡང། རྒྱ་ནག་འགྲེལ་ཆེན་དུ་བསྒྱུར་སྐབས་མི་མངོན་པའི་རྣམ་པས་ཞེས་བསྒྱུར་བས་འགྱུར་དེ་ལེགས་པར་འདི་ཉིད་དུ་གསུངས་སོ། །དེའི་རྒྱུ་མཚན་མཚན་ཉིད་གསུམ་གང་ལའང་བདེན་པར་གྲུབ་པའི་ཕྱོགས་གསལ་བར་མ་བསྟན་པར་སྟོང་ཕྱོགས་གཙོ་བོར་བྱས་ནས་བདེན་པར་མེད་མཉམ་དུ་གསུངས་ཏེ། ཡོད་པ་མཁྱུད་པའམ་སྦས་པས་ན་མི་མངོན་པའི་རྣམ་པ་ཞེས་གསུངས་པ་ཡིན་པར་དེ་ཉིད་དུ་བཤད་དོ། །དེ་ལྟར་མི་མངོན་པར་ཞེས་བསྒྱུར་ན་འབྲེལ་ཆགས་པ་ནི་ཕྱི་མ་ལེགས་པར་ཕྱེ་ཞེས་པའི་ཚིག་གི་ནུས་པས་ཀྱང་ཤེས་ཏེ། མདོ་དེ་གཉི་ག་ངོ་བོ་ཉིད་མེད་པ་ལས་བརྩམས་པར་འདྲ་འང། གཅིག་གིས་བདེན་པར་ཡོད་མེད་གསལ་བར་ཕྱེ་ཞེས་པའི་ཤུགས་ལ་གཅིག་ཤོས་ཀྱིས་གསལ་བར་མ་ཕྱེ་བ་གོ་བའི་ཕྱིར། འོན་ཀྱང་ལེགས་པར་ཕྱེ་ཞེས་པ་བདེན་པར་གྲུབ་པའི་ཕྱོགས་དང་བདེན་གྲུབ་ཀྱིས་སྟོང་པའི་ཕྱོགས་གཉིས་སུ་ཕྱེ་བ་ལ་བྱས་ན། སྔ་མས་སྟོང་ཕྱོགས་གཅིག་པུ་གཙོ་བོར་བྱས་པ་གོ་ནུས་པས་དེའང་འབྲེལ་མེད་པ་མིན་ནོ། །ཆོས་ཀྱི་འཁོར་ལོ་ཞེས་པས་ངོ་བོ་བསྟན་ཅིང། དེའང་བྱེ་བྲག་སྨྲ་བ་རྣམས་ནི་མཛོད་ལས།

― GTD002_Page_0633 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཀྱི་འཁོར་ལོ་མཐོང་བའི་ལམ། །ཞེས་པ་ལྟར་རྟོགས་པའི་ཆོས་འཁོར་ལ་མཐོང་ལམ་གྱིས་ཁྱབ་པ་དང། ལུང་གི་ཆོས་འཁོར་ལ་བདེན་བཞིའི་ཆོས་འཁོར་གྱིས་ཁྱབ་པར་འདོད་ཅིང། དེ་གཉིས་ཀྱི་ནང་ནས་ཀྱང་ཆོས་འཁོར་དངོས་ནི་སྔ་མ་ཁོ་ནར་འདོད་དོ། །དེ་ལ་འཁོར་ལོའི་མིང་འདོགས་པའི་རྒྱུ་མཚན་ནི་མཛོད་ལས། མྱུར་བར་འགྲོ་སོགས་རྩིབས་སོགས་ཕྱིར། །ཞེས་དཔེ་དོན་སྦྱོར་ཚུལ་གཉིས་གསུངས་ཏེ། འཁོར་སྒྱུར་གྱི་འཁོར་ལོ་ནི་བགྲོད་པ་མྱུར་བ། ས་གཞན་དང་གཞན་དུ་འགྲོ་བ། ཡུལ་འཁོར་དབང་དུ་མ་བསྡུས་པ་རྣམས་སྡུད་པས་ན་མ་རྒྱལ་བ་ལས་རྒྱལ་བ། བསྡུས་ཟིན་བརྟན་པར་བྱེད་པས་རྒྱལ་བ་རྣལ་དུ་འགོད་པ། མཐོ་བ་ལ་འཕར་བ། དམའ་བ་ལ་འབབ་པ་དྲུག་དང་ཆོས་མཐུན་པར་མཐོང་ལམ་གྱི་སྐད་ཅིག་རེ་རེས་ཀྱང་ཡོངས་སུ་ཤེས་པ་དང་སྤོང་བ་སོགས་ཀྱི་བྱ་བ་བྱེད་པ། བདེན་པའི་དམིགས་རྣམ་སྔ་མ་སྔ་མ་དོར་ནས་གཞན་དང་གཞན་ལ་འཇུག་པ་མཐོང་སྤང་སྔར་མ་སྤངས་པ་སྤོང་བ། སྤངས་ཟིན་བརྟན་པར་བྱེད་པས་འགོག་བདེན་ཐོབ་པ། ཁམས་གོང་མའི་བདེན་པ་ལ་དམིགས་པས་འཕར་བ། འོག་མའི་བདེན་པ་ལ་དམིགས་པས་འབབ་པ་རྣམས་ཡིན་པའི་ཕྱིར། མཛོད་རང་འགྲེལ་ལས། མྱུར་དུ་འགྲོ་བའི་ཕྱིར་དང། འདོར་བ་དང་འཇུག་པའི་ཕྱིར་དང། མ་རྒྱལ་བ་ལས་རྒྱལ་བར་བྱེད་པ་དང། རྒྱལ་བ་རྣལ་དུ་འགོད་པའི་ཕྱིར་དང། འཕར་བ་དང་འབབ་པའི་ཕྱིར་ཏེ། མྱུར་བར་འགྲོ་བ་ལ་སོགས་པས་ནི་དེ་ལྟ་བུ་ཡིན་ནོ། །ཞེས་སོ། །རྩིབས་སོགས་

― GTD002_Page_0634 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ཞེས་པའང་དེ་ཉིད་ལས། བཙུན་པ་དབྱངས་སྒྲོགས་ན་རེ། འཕགས་པའི་ལམ་ཡན་ལག་བརྒྱད་པ་ནི་རྩིབས་ལ་སོགས་པ་དང་ཆོས་མཐུན་པའི་ཕྱིར་འཁོར་ལོ་ཞེས་བྱ་སྟེ། ཡང་དག་པའི་ལྟ་བ་དང་རྟོག་པ་དང་རྩོལ་བ་དང་དྲན་པ་རྣམས་ནི་རྩིབས་ལྟ་བུ་ཡིན་ནོ། །ཡང་དག་པའི་ངག་དང་ལས་ཀྱི་མཐའ་དང་འཚོ་བ་རྣམས་ནི་ལྟེ་བ་ལྟ་བུ་ཡིན་ནོ། །ཏིང་ངེ་འཛིན་ནི་མུ་ཁྱུད་ལྟ་བུ་ཡིན་ནོ་ཞེས་ཟེར་རོ། །ཞེས་འཕགས་ལམ་ཡན་ལག་བརྒྱད་དང་སྦྱར་ནས་གསུངས་ཏེ། འཁོར་ལོའི་གཞན་དུ་སྒྲོད་བྱེད་དམ་ཡུལ་ཡོངས་སུ་གཅོད་བྱེད་རྩིབས་ཡིན་པ་ལྟར། གཞལ་བྱ་རང་སྟོབས་ཀྱིས་རྟོག་བྱེད་དང་བསྒོམ་པའི་བྱ་བར་འཇུག་བྱེད་ཡང་དག་པའི་ལྟ་བ་སོགས་ཡིན་པས་དེ་བཞི་གཅོད་པའི་རྩིབས་དང་སྦྱར། རྩིབས་ཀྱི་རྟེན་གཞི་ལྟེ་བ་ཡིན་པ་ལྟར་ཤེས་རབ་དང་ཏིང་ངེ་འཛིན་གྱི་རྟེན་གཞི་ཚུལ་ཁྲིམས་ཡིན་པས་ཚུལ་ཁྲིམས་ཀྱིས་བསྡུས་པའི་ཡང་དག་པའི་ངག་སོགས་གསུམ་རྟེན་པའི་ལྟེ་བ་དང་སྦྱར། རྩིབས་རྣམས་མི་འཐོར་བར་བསྡུ་བྱེད་མུ་ཁྱུད་ཡིན་པ་ལྟར་ཤེས་རབ་ཀྱང་བྱིང་རྒོད་ཀྱིས་མི་གཡེང་བར་དམིགས་པ་ལ་གནས་བྱེད་ཡང་དག་པའི་ཏིང་ངེ་འཛིན་ཡིན་པས་དེ་སྡུད་པའི་མུ་ཁྱུད་དང་སྦྱར་རོ། །བདེན་བཞི་ཤེས་པ་ལ་སྦྱོར་ཚུལ་ཡང་ཡོད་དེ། རྒྱ་ནག་འགྲེལ་ཆེན་ལས། ཇི་ལྟར་ཤིང་རྟའི་འཁོར་ལོ་ལྟེ་བ་དབུས་སུ་གནས་པས་རྩིབས་ལྟེ་བ་ལ་བརྟེན་པ་དང་མུ་ཁྱུད་ཀྱིས་ལྟེ་བ་བསྡུས་པ་དེ་བཞིན་དུ་མཐོང་བའི་ལམ་ལས་སྡུག་བསྔལ་དང་ཀུན་འབྱུང་བའི་བཟོད་པ་དང་ཤེས་པ་ནི་རྩིབས་ལྟ་བུའོ། །འགོག་པའི་བཟོད་པ་དང་འགོག་པའི་ཤེས་པ་ནི་ལྟེ་བ་ལྟ་བུའོ། །ལམ་གྱི་བཟོད་

― GTD002_Page_0635 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དང་ལམ་གྱི་ཤེས་པ་ནི་མུ་ཁྱུད་ལྟ་བུ་ཡིན་ཏེ་ལམ་ཐམས་ཅད་ལ་དམིགས་པའི་ཕྱིར་རོ། །ཞེས་གསུངས་ཏེ། སྡུག་ཀུན་གཉིས་ནི་ཡོངས་སུ་གཅོད་བྱ་དང། འགོག་བདེན་མངོན་དུ་བྱ་རྒྱུའི་སྙིང་པོ་ཡིན་ལ། དེ་ལྟར་བྱེད་མཁན་ལམ་ཡིན་པ་ལ་བསམ་པར་སྣང་ངོ་། །རྒྱན་ལས། ཤེས་བྱ་མ་རྒྱལ་རྒྱལ་བའི་ཕྱིར། །དྲན་པ་དག་ནིཀུན་ཏུ་སྤྱོད། །ཅེས་པའི་དབྱིག་འགྲེལ་དུ། ཤེས་བྱ་མ་རྒྱལ་བ་རྒྱལ་བར་བྱ་བའི་ཕྱིར་ཏེ། དཔེར་ན་འཁོར་ལོས་སྒྱུར་བའི་འཁོར་ལོ་རིན་པོ་ཆེ་ཡུལ་མ་ཕེབས་པ་འབེབ་པ་ལྟ་བུའོ། །ཞེས་པ་ནི་བྱང་ཆུབ་ཡན་ལག་བདུན་རྒྱལ་སྲིད་སྣ་བདུན་དང་སྦྱར་བའི་ཡ་གྱལ་ཙམ་ཡིན་པས་འདི་དང་མི་འདྲའོ། །བདེན་བཞིའི་ཆོས་འཁོར་ལ་བཟླས་པ་གསུམ་དང་རྣམ་གྲངས་བཅུ་གཉིས་སུ་བྱེད་པ་འདྲའང་ངོས་འཛིན་མི་འདྲ་སྟེ། བྱེ་སྨྲས་འདི་ནི་སྡུག་བསྔལ་འཕགས་པའི་བདེན་པའོ། །ཞེས་སོགས་ངོ་བོ་ལ་བཟླས་པ་དང། སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་བསྒོམ་པར་བྱའོ། །ཞེས་བྱ་བ་བཟླས་པ་དང། སྡུག་བསྔལ་ཡོངས་སུ་ཤེས་སོ། །ཀུན་འབྱུང་སྤངས་སོ་ཞེས་སོགས་བྱེད་པ་ལ་བཟླས་པ་ཡིན་ཞིང། བཟླས་པ་རེ་རེའི་མཐར་མིག་སྐྱེ། ཤེས་པ་སྐྱེ། རིག་པ་སྐྱེ། བློ་སྐྱེ་ཞེས་བཞི་བཞི་བྱུང་བས་རྣམ་གྲངས་བཅུ་གཉིས་དང། ཡང་ངོ་བོ་ལ་བཟླས་པ་དེར་བདེན་བཞིའི་ངོ་བོ་ལ་བཟླས་པ་བཞི་ཡོད་པ་ལྟར་ཕྱི་མ་གཉིས་ལའང་བཞི་བཞི་ཡོད་པས་བཟླས་པ་བཅུ་གཉིས་སུ་བྱས་ནས་རེ་རེའི་མཐར་མིག་

― GTD002_Page_0636 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་སོགས་བཞི་བཞི་སྦྱར་བས་རྣམ་གྲངས་ཞེ་བརྒྱད་དུ་འགྱུར་རོ། །འོན་ཀྱང་སུམ་ཚན་དང་བཅུ་གཉིས་ཚན་དུ་གྲངས་མཚུངས་པས་སྔར་བཤད་པ་དང་མི་འགལ་ཏེ། དཔེར་ན་དགེ་སློང་གནས་བདུན་ལ་མཁས་ཞེས་པ་དེ་ཟག་བཅས་ཉེར་ལེན་གྱི་གཟུགས་ཕུང་ལ་སྦྱར་ན་དེའི་ངོ་བོ་དང། དེའི་རྒྱུ་ཀུན་འབྱུང་དང། དེ་འགོག་པ་དང། དེར་འགྲོ་བའི་ལམ་དང། དེ་དག་གི་ཕན་ཡོན་དང། ཉེས་དམིགས་དང། ཇི་ལྟར་ངེས་པར་འབྱུང་ཚུལ་བདུན་ལ་མཁས་པ་ཡིན་པས། ཕུང་པོ་གཞན་བཞིའི་སྟེང་ནས་བདུན་རེ་སྟེ་མཁས་བྱའི་གནས་སོ་ལྔ་འབྱུང་ཡང་བདུན་ཚན་དུ་འདྲ་བས་དེ་ལྟར་བཤད་པ་བཞིན་ཡིན་པའི་ཕྱིར། མཛོད་འགྲེལ་ལས། གསུམ་ཚན་དང་བཅུ་གཉིས་སུ་ཆོས་མཐུན་པའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བཤད་དེ། ཆོས་གཉིས་དང་གནས་བདུན་ལ་མཁས་པ་བསྟན་པ་བཞིན་ནོ། །བཟླས་པ་འདི་དག་གིས་ནི་གྲངས་བཞིན་དུ་མཐོང་བ་དང་སྒོམ་པ་དང་མི་སློབ་པའི་ལམ་རྣམས་བསྟན་ཏོ་ཞེས་ཟེར་རོ། །ཞེས་གསུངས་པའི་ཕྱིར། མདོ་སྡེ་པས་དེ་བཀག་ནས་བཟླས་པ་གསུམ་གས་མཐོང་ལམ་སྐྱེ་བར་བསྐོར་བ་ཡིན་ལ། རྣམ་གྲངས་བཅུ་གཉིས་ཀྱང་འདི་ནི་སྡུག་བསྔལ་འཕགས་པའི་བདེན་པའོ། །ཞེས་པ་ལྟ་བུ་རྣམ་གྲངས་དེར་རྩི་བས་ལུགས་འདིར་བཟླས་པ་བཅུ་གཉིས་དང་རྣམ་གྲངས་ཞེ་བརྒྱད་བྱར་མེད་དོ། །མིག་བློ་ཤེས་རིག་བཞི་ངོས་འཛིན་ཚུལ་ཡང་སྣ་ཚོགས་ཡོད་དེ། རྣམ་བཤད་རིགས་པ་ལས། ཟག་པ་མེད་པའི་ཤེས་རབ་ནི་མིག་གོ །ཐེ་ཚོམ་མེད་པའི་ཕྱིར་ཤེས་པའོ། །ཡང་དག་པར་

― GTD002_Page_0637 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་དུ་འགྱུར་བའི་ཕྱིར་རིག་པའོ། །རྣམ་པར་དག་པའི་ཕྱིར་བློ་སྟེ། ངེས་པའི་ཚིག་གི་ཚུལ་ཉིད་ཀྱིས་ན་རྣམ་པར་དག་པའི་ཕྱིར་བློ་ཡིན་ནོ། །མིག་ལ་གཞན་པ་དང། ནོར་བ་དང། རྙོག་པ་ཉིད་མེད་པ་ཡང་དག་པར་བསྟན་པའི་ཕྱིར་རྣམ་གསུམ་གྱིས་ཁྱད་པར་དུ་བྱེད་པ་ཡིན་ནོ། །ཞེས་ཆོས་ཀྱི་མིག་ཁྱད་གཞི་བྱས་ཏེ། དེ་ལ་བྱེད་ལས་ཐ་དད་པའི་ལྡོག་ཆ་ནས་གཞན་གསུམ་བཏགས་པར་གསུངས་ཤིང། རྒྱན་སྣང་ལས་ཀྱང། མངོན་སུམ་དུ་བྱེད་པའི་དོན་ཉིད་ཀྱིས་ན་ཟག་པ་མེད་པའི་ཤེས་རབ་ཀྱི་མིག་སྐྱེས་སོ། །ཐེ་ཚོམ་མེད་པ་ཉིད་ཀྱིས་ན་ཤེས་པའོ། །ཡང་དག་པའི་དོན་ཉིད་ཡིན་པའི་ཕྱིར་རིག་པའོ། །རྣམ་པར་དག་པ་ཉིད་ཡིན་པའི་ཕྱིར་བློ་སྐྱེས་སོ། །ཞེས་གསུངས། ཡང་རྣམ་བཤད་རིགས་པ་ལས། གཞན་ཡང་བཟླས་པ་གསུམ་དག་ལ་ཐོག་མར་མཐོང་བ་ནི་མིག་གོ །ཇི་ལྟར་མཐོང་བ་ལ་རྣམ་པར་དཔྱོད་པ་ནི་ཤེས་པའོ། །གཉིས་པོ་དེ་ཉིད་ཇི་སྙེད་ཡོད་པ་ཅན་ཉིད་ལ་བརྟེན་ནས་རིག་པ་སྟེ། ཇི་སྙེད་ཡོད་པ་ལ་འཛིན་པའི་ཕྱིར་རོ། །ཇི་ལྟར་ཡོད་པ་ཅན་ཉིད་ལ་བརྟེན་ནས་བློ་སྟེ། ཡང་དག་པ་ཇི་ལྟ་བ་བཞིན་དུ་རྟོགས་པའི་ཕྱིར་རོ། །ཞེས་དང། ལོག་རྟོག་འགོག་ཚུལ་གྱིས་བཞིའང་གསུངས་པས། སྔ་མ་དང་རྒྱ་ནག་འགྲེལ་ཆེན་ལས། དེ་ལ་མིག་ཅེས་བྱ་བ་ནི་འདི་ལྟ་སྟེ་ཆོས་སུ་བཟོད་པའོ། །ཤེས་པ་ནི་འདི་ལྟ་སྟེ་ཆོས་སུ་ཤེས་པའོ། །རིག་པ་ནི་འདི་ལྟ་སྟེ་རྗེས་སུ་ཤེས་པའི་བཟོད་པའོ། །བློ་ནི་འདི་ལྟ་སྟེ་རྗེས་སུ་ཤེས་པ་རྣམས་སོ། །ཞེས་པ་གཉིས་ཕྱོགས་མཐུན་ནམ་སྙམ། བུ་སྟོན་

― GTD002_Page_0638 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་འབྱུང་ལས། བཟླས་པ་རེ་རེར་མིག་སྐྱེས་སོ། །ཤེས་པ་དང་རིག་པ་དང་བློ་སྐྱེས་སོ་ཞེས། སྦྱོར་བ་དང། བར་ཆད་མེད་པ་དང། རྣམ་གྲོལ་དང། ཁྱད་པར་གྱི་ལམ་སྐྱེས་པར་བསྟན་པ་ནི་རྣམ་གྲངས་བཅུ་གཉིས་སོ། །ཞེས་ལམ་རང་རང་གི་སྦྱོར་དངོས་རྗེས་ལ་སྦྱར་བ་ནི་བྱེ་སྨྲས་བཟླས་པ་གསུམ་མཐོང་སྒོམ་མི་སློབ་ལམ་གསུམ་སྐྱེ་བར་བསྐོར་ཅེས་འདོད་པ་དང་འགྲིག ཕྱིས་ཀྱི་ཡིག་ཆ་དུ་མར་མཐོང་སྒོམ་མི་སློབ་ལམ་གསུམ་སྦྱོར་ལམ་དང་བཞི་ལ་སྦྱར་བ་དང། རྣམ་གྲངས་བསྡུ་བ་ལས། མིག་ནི་མངོན་སུམ་གྱི་དངོས་པོ་འཛིན་པའོ། །ཤེས་པ་ནི་ལྐོག་ཏུ་གྱུར་པའི་རིགས་འཛིན་པའོ། །རིག་པ་ནི་དངོས་པོ་ཇི་སྙེད་ཡོད་པ་ལ་འཇུག་པའོ། །བློ་ནི་ཇི་ལྟ་བ་བཞིན་དུ་རྗེས་སུ་རྟོགས་པའོ། །ཞེས་འབྱུང་བ་སོགས་བཤད་ཚུལ་གཞན་ཡང་ཡོད་དོ། །མཐོང་ལམ་ཁོ་ན་ཆོས་འཁོར་དུ་བྱེད་པའི་རྒྱུ་མཚན་ནི། གསེར་འཕྲེང་ལས། བྱེ་སྨྲ་རྣམས་མཐོང་ལམ་ཁོ་ན་ཆོས་འཁོར་དུ་འདོད་དེ། ལྔ་སྡེ་ལ་ཝ་ར་ཎཱ་སིར་ཆོས་བསྟན་པས་ཀུན་ཤེས་ཀོའུ་དི་ནྱ་ལ་མཐོང་ལམ་སྐྱེས་པ་ན་གནོད་སྦྱིན་རྣམས་ཀྱིས་ཆོས་ཀྱི་འཁོར་ལོ་བསྐོརརོ་ཞེས་བསྒྲགས་པ་དང། ཞེས་གསུངས་པས། རྒྱུ་མཚན་འདི་ལ་དཔག་ན་མཐོང་ལམ་གྱི་ནང་ནས་ཀྱང་དེའི་ཚེ་གདུལ་བྱ་དེ་དག་གི་རྒྱུད་ལ་སྐྱེས་པའི་མཐོང་ལམ་འབའ་ཞིག་ཆོས་འཁོར་དུ་བྱེད་དགོས་པར་མངོན་ནོ། །དེ་ལྟར་ན་གཏན་ལ་དབབ་བྱའི་གཙོ་བོའི་དབང་དུ་བྱས་ཏེ་འདིར་བསྟན་འཁོར་ལོ་དང་པོ་ལ་བདེན་བཞིའི་ཆོས་འཁོར་དང། བར་བ་ལ་མཚན་ཉིད་མེད་པའི་ཆོས་འཁོར་ཞེས་བཏགས་སོ། །ཐ་མ་ལ་

― GTD002_Page_0639 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱ་ནག་འགྲེལ་ཆེན་ལས་དོན་དམ་རྣམ་པར་ངེས་པའི་ཆོས་འཁོར་ཞེས་བཏགས་ཀྱང། རྗེ་བླ་མས་ལེགས་པར་རྣམ་པར་ཕྱེ་བའི་འཁོར་ལོ་ཞེས་གསུངས་སོ། །སྔ་མའི་རྒྱུ་མཚན་ནི་དོན་དམ་ཡང་དག་འཕགས་ཞུས་ཀྱི་ལེའུ་འདིའི་མཇུག་ཏུ། ཆོས་ཀྱི་རྣམ་གྲངས་འདིར་བསྟན་པ་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་བ། དོན་དམ་ཡང་དག་འཕགས། འདི་ནི་དོན་དམ་པ་ངེས་པའི་དོན་བསྟན་པ་ཡིན་ཏེ། འདི་ནི་དོན་དམ་པ་ངེས་པའི་དོན་བསྟན་པ་ཞེས་བྱ་བར་ཟུངས་ཤིག །ཅེས་པ་འདི་ལ་བརྟེན་པར་སྣང་ཡང། དེ་འདྲ་རེ་ལེའུ་རང་རང་གི་མཐར་འབྱུང་བའི་སྒེར་གྱི་མིང་ཡིན་པས་ཁྱབ་ཆུང་ལ། འཁོར་ལོ་གསུམ་དུ་ཕྱེ་ནས་སོ་སོར་མིང་འདོགས་པའི་ཚེ་འཁོར་ལོ་ཐ་མ་ལ་མདོ་རང་ཉིད་ལས་ལེགས་པར་རྣམ་པར་ཕྱེ་བ་དང་ལྡན་པ་ཞེས་བརྗོད་བྱ་ངོ་བོ་ཉིད་གསུམ་ལ་བདེན་པར་ཡོད་མེད་ཀྱི་ཁྱད་པར་ལེགས་པར་ཕྱེ་བའི་སྒོ་ནས་མིང་བཏགས་པ་ནི་སྔ་མ་གཉིས་ལ་མིང་འདོགས་ཚུལ་གྱི་འགྲོས་དང་མཐུན་ཞིང། ལང་གཤེགས་སོགས་འདི་འདྲ་བ་གཞན་ལའང་འབྲེལ་ཆགས་པས་ཁྱབ་ཆེ་བར་དགོངས་ཏེ་རྗེ་བླ་མས་འདི་གཙོ་བོར་མཛད་པ་ཡིན་སྣང་ངོ་། །ངོ་མཚར་རྨད་དུ་བྱུང་བ་སྔོན་ལྷར་གྱུར་པའམ་མིར་གྱུར་པ་སུས་ཀྱང་མཐུན་པར་འཇིག་རྟེན་དུ་མ་བསྐོར་བ་ཞིག་རབ་ཏུ་བསྐོར་ཏེ་ཞེས་ཆེ་བ་བསྟན་ཅིང། ཁྱད་པར་དུ་འཁོར་ལོ་བར་བ་ལ་ཆེས་ངོ་མཚར་རྨད་དུ་བྱུང་བ་ཞེས་བསྣན་ནས་གསུངས་པ་ནི་བརྗོད་བྱ་སྟོང་པ་ཉིད་རྒྱ་ཆེར་སྟོན་

― GTD002_Page_0640 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྒོ་ནས་མདོ་སྡེ་ཀུན་གྱི་གཙོ་བོར་གྱུར་བའི་དོན་ནོ། །ངོ་མཚར་རྨད་དུ་བྱུང་བ་ཞེས་པ་ནི་བརྒྱད་སྟོང་འགྲེལ་ཆེན་ལས། རྒྱུ་ཁྱད་པར་དུ་འཕགས་པས་ངོ་མཚར་རོ། །འབྲས་བུ་ཕུལ་དུ་བྱུང་བས་རྨད་དུ་བྱུང་བའོ། །ཞེས་རྒྱུ་ཚོགས་གཉིས་དང་མཁྱེན་བརྩེ་ནུས་པ་མཐར་ཕྱིན་པ་ལས་བྱུང་བས་ངོ་མཚར་བ་དང། འབྲས་བུ་སོ་སོའི་སྐལ་བ་བཞིན་རྣམ་གྲོལ་གསུམ་ལ་སྦྱར་ཏེ། དེ་ལས་ལྷག་པ་བྱར་མེད་པས་རྨད་དུ་བྱུང་བར་གསུངས་ཤིང། སྒྲོན་གསལ་ལས། ངོ་མཚར་དུ་གྱུར་པ་ནི་ཀུན་རྫོབ་ཀྱི་བདེན་པས་སོ། །རྨད་དུ་གྱུར་པ་ནི་དོན་དམ་པའི་བདེན་པས་སོ། །ཞེས་གསུངས་ལ། གྲུབ་མཐའ་ཆེན་མོར། སྔོན་ཆད་དེ་འདྲ་མ་མཐོང་བས་ངོ་མཚར་བ་དང། དེ་འདྲ་མ་ཐོས་པས་རྨད་དུ་བྱུང་བ་ཞེས་གསུངས་སོ། །གཞན་སུས་ཀྱང་མ་བསྐོར་བ་ནི་དེའི་བདག་རྐྱེན་དུ་གྱུར་པའི་རྣམ་མཁྱེན་མ་ཐོབ་པར་དེ་བསྐོར་མི་ནུས་པ་ཡིན་ཏེ། མདོ་ལས། རྣམ་པ་ཐམས་ཅད་མཁྱེན་པ་ཉིད་མ་ཐོབ་པར་ཆོས་ཀྱི་འཁོར་ལོ་བསྐོར་བར་མི་ནུས་སོ། །ཞེས་གསུངས་པའི་ཕྱིར། ཆོས་ཀྱི་འཁོར་ལོ་རབ་ཏུ་བསྐོར་བ་དེའང་བླ་ན་མཆིས་པ་ཞེས་སོགས་ཀྱིས་དྲང་ངེས་ཀྱི་ཁྱད་པར་བསྟན་ལ། དེ་དག་སོ་སོའི་དོན་ནི། བླ་ན་མཆིས་པ་ནི་གུ་རུ་ཞེས་པ་བླ་མ་དང་གོང་མ་གཉི་གའི་སྐད་དོད་ཡིན་ཞིང། ན་གནས་གཞིའི་དོན་ཡིན་པས། དེའི་བླ་ནའམ་གོང་ན་དེ་དང་མི་མཐུན་པའི་ངེས་དོན་གྱི་མདོ་གཞན་ཡོད་པ་དང། སྐབས་མཆིས་པ་ནི་འདིས་བཤད་པ་ལྟར་ཁས་བླངས་པ་ལ་རྒོལ་བ་གཞན་གྱི་ཀླན་ཀའི་སྐབས་ཡོད་པ་སྟེ་གནོད་བྱེད་བརྗོད་རྒྱུ་རྙེད་པ་དང། དྲང་

― GTD002_Page_0641 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་དོན་ནི་དེའི་རྒྱུ་མཚན་གྱིས་སྒྲས་ཟིན་ལ་བཤད་པ་ལྟར་ཁས་ལེན་མི་རུང་བར་དགོངས་པ་གཞན་དུ་འདྲེན་དགོས་པ་དང། རྩོད་པའི་གཞིའི་གནས་སུ་གྱུར་པ་ནི་མཚན་ཉིད་གསུམ་ལ་བདེན་པར་ཡོད་མེད་ཀྱི་ཁྱད་པར་གསལ་བར་མ་མཛད་པས་རྗེས་འཇུག་རྣམས་དེའི་དགོངས་པ་རྣལ་མ་ཡིན་མིན་ལ་མི་མཐུན་པར་རྩོད་པ་འབྱུང་བའོ། །རྒྱ་ནག་འགྲེལ་ཆེན་ལས། འདི་ལྟར་ཆོས་ཀྱི་འཁོར་ལོ་འདི་སྟོང་པ་ཉིད་མཁྱུད་ཅིང་ཡོད་པ་ཉིད་དུ་བསྟན་པས་དྲང་བའི་དོན་ཡིན་ལ་འཁོར་བ་དང་མྱ་ངན་ལས་འདས་པའི་རྒྱུ་དང། འབྲས་བུ་དང་གང་ཟག་ལ་བདག་མེད་པ་ཡོངས་སུ་རྫོགས་པར་སྟོན་ཅིང། ཆོས་སྟོང་པ་ཉིད་ཀྱི་རིགས་པ་སྟོན་པར་མི་བྱེད་པས། དེའི་བསྟན་པ་འདི་ནི་གོང་ན་ཁྱད་པར་ཅན་ཡོད་པའི་བསྟན་པ་དང། སྐབས་ཁྱད་པར་ཅན་ཡོད་པའི་བསྟན་པ་དང། གཞན་དག་གིས་གཞིག་པར་བྱ་བ་དང། སྡེ་བ་ཉི་ཤུ་པོ་རྩོད་པར་སྨྲ་བ་དག་གི་གནས་སུ་གྱུར་པ་ཡིན་ནོ་ཞེས་བྱ་བའི་ཐ་ཚིག་གོ །ཞེས་དྲང་དོན་དུ་འགྲོ་ཚུལ་ཐོག་མར་སྨོས་ཏེ། དེའི་རྒྱུ་མཚན་གྱིས་བླ་ན་མཆིས་པ་སོགས་གསུམ་དུ་འགྱུར་ཚུལ་གསུངས་སོ། །འདིར་སྐབས་ཁྱད་པར་ཅན་ཡོད་ཅེས་པ་དང། འོག་ཏུ། ཕྱིས་མཆོག་ཏུ་གྱུར་པའི་སྐབས་མེད་ཅེས་པ་གཉིས་དོན་ལ་མ་ཞུགས་པས་རྗེས་རང་ལུགས་སུ་མ་མཛད་ལ། ཝེན་ཚེག་རང་ཉིད་ཀྱིས་རྒོལ་བ་དང་བཅས་པ་ཞེས་བསྒྱུར་བ་དང་ཡང་མ་འབྲེལ་ཏེ། འགྱུར་དེའང་རྗེས་གསུངས་ཚུལ་འདི་ལ་ཤིན་ཏུ་འགྲིག་གོ །ཁྱད་པར་གཞན་གསུམ་ལ་དགག་པ་མ་མཛད་པས་རང་ལུགས་ཀྱི་འགྲེལ་ཚུལ་

― GTD002_Page_0642 ―

^{[མ་དཔེ་གཟིགས་ན་འདིར་གནོན།]}

[Full Size]

དང་དོན་མཐུན་ནོ། །འདིར་བསྟན་འཁོར་ལོ་བར་བ་ལའང་བླ་ན་མཆིས་པ་སོགས་བཞི་གསུངས་པ་ཕལ་ཆེར་སྔ་མ་ལྟར་ཡིན་ལ། འདིའི་གོང་ན་ངེས་དོན་གྱི་མདོ་གཞན་ཡོད་ཅེས་པ་ནི་སྒྲས་ཟིན་སྟོན་ཚུལ་གྱི་སྒོ་ནས་ཡིན་ནོ། །སློབ་དཔོན་ཡང་དག་བདེན་པའི་བརྗེད་བྱང་ལས། བར་བ་འདི་ནི་ཐེག་པ་ཆེན་པོ་ཐེག་པ་ཆུང་ངུ་ལས་ཐ་དད་པར་སྟོ༡ན་པའི་ཕྱིར་ངེས་པའི་དོན་མ་ཡིན་པའོ། །ད་དུང་ཐེག་པ་གཅིག་ཡོ༢ད་པའི་ཕྱིར་གོང་མ་དང་བཅས་པའོ། །ཐེག་པ་ཆུང་ངུ་བ་དག་དང་ཐ༣་དད་པའི་ཕྱིར་ཐེག་པ་ཆུང་ངུ་བ་དག་དང་འཐབ་ཅིང་རྩོད་པར་འགྱུར་བའོ། །ཐེག་པ་གཅིག་གིས་རྣམ་པར་འཇིག་པའི་ཕྱིར་རྒོལ་བ་དང་བཅས་པའོ། །ཞེས་བཤད་པ་ནི་མི་ལེགས་པར་འདི་ཉིད་དུ་གསུངས་ལ། མི་ལེགས་ཚུལ་བར་བའི་སྐབས་སུ་དང་པོའི་སྒྲས་ཟིན་བཀག་ཀྱང་དགོངས་གཞི་མ་བསྟན་པས་དེ་གཏན་ནས་དོན་མ་ཡིན་པར་བསྟ༡ན་པ་ལྟ་བུར་སོང་སྟེ་ཐེག་པ་ཆུང་ངུ་བ་དག་དང་ཐ༣་དད་དམ་རྒྱབ་འགལ་དུ་སོང་ཞིང་དེའི་དབང་གིས་མི་མཐུན་པའི་རྩོད་པ་འབྱུང་བ་དང། འདིའི་གོང་ན་སྔགས་ཀྱི་ཐེག་པ་ཡོད་ཅི༢ང་དེས་ཟིལ་གྱིས་གནོ༣ན་པའི་དོན་དུ་བཤད་དེ་སྐབས་དང་མ་འབྲེལ་བར་སོང་བའམ། ཡང་ན་བར་བས་མཐར་ཐུག་ཐེག་ཆེན་གྱི་ཐེག་པ་གཅིག་པུ་ལས་མ་བཤད་པས་དྲང་དོན་སོགས་སུ་བསྒྲུབས་པ་སྟེ། ཐེག་པ་གསུམ་པོ་རང་ལམ་གྱིས་སྡུག་ཀུན་མ་ལུས་པར་ཟད་པའི་རྣམ་གྲོལ་ཐོབ་ནུས་མི་ནུས་མི་མཚུངས་པར་ཐེག་དམན་གྱི་ཞི་བ་ཉི་ཚེ་བར་བཤད་པས་དྲང་བའི་དོན་དང། མཐར་ཐུག་ཐེག་པ་གསུམ་ཆར་སྟོན་པའི་མདོ་དགོངས་འགྲེལ་སོགས་བརྗོད་བྱ་

― GTD002_Page_0643 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོགས་པའི་མདོ་གཞན་རང་གི་གོང་ནའམ་བླ་ན་ཡོད་པ་དང། ཐེག་དམན་གྱི་སྡེ་སྣོད་སོགས་ལས་ཉན་རང་དགྲ་བཅོམ་ཐོབ་ནས་ཐེག་ཆེན་དུ་མི་འཇུག་པར་བཤད་པ་དང་ཕྱོགས་ཙམ་ཡང་མི་མཐུན་པས་རྩོད་པའི་གནས་དང། མཐར་ཐུག་ཐེག་གསུམ་སྟོན་པའི་དགོངས་འགྲེལ་སོགས་ལུང་རིགས་ཀྱིས་འཇིག་པས་སྐབས་མཆིས་པའམ་རྒོལ་བ་དང་བཅས་ཞེས་པ་ཡིན་ནའང། འདིར་ངོ་བོ་ཉིད་གསུམ་བདེན་པར་ཡོད་མེད་བཤད་པ་གཙོ་ཆེ་ཡི། ཐེག་གསུམ་དང་ཐེག་གཅིག་ལྟ་བུ་བརྗོད་བྱ་སྣ་རེའི་སྒོ་ནས་མི་འབྱེད་པས་མི་འཐད་པ་ཡིན་ནམ་དཔྱད་པར་བྱའོ། །ཐ་མ་ལ་ཆོས་ཀྱི་འཁོར་ལོ་བསྐོར་བ་འདི་ནི་བླ་ན་མཆིས་ཞེས་སོགས་གསུངས་པ་སྔར་གྱི་བླ་ན་མཆིས་པ་སོགས་བཞི་གོ་བཟློག་སྟེ། འདིའི་གོང་ན་གཞན་མེད་པ། རྒོལ་བའི་སྐབས་མེད་པ། སྒྲས་ཟིན་གྱི་དོན་དེར་ངེས་པ། ཞིབ་ཏུ་ཕྱེ་ནས་གསུངས་ཡོད་པས་མཁས་པས་བརྟགས་ན་རྩོད་པ་འོང་དོན་མེད་པ་ཡིན་ནོ། །རྩོད་པ་མེད་པའི་དོན་སློབ་དཔོན་ཡང་དག་བདེན་པས། ཐེག་པ་ཆུང་ངུ་བ་ཀུན་གྱིས་བགྲོད་པར་བྱ་བ་ཡིན་པའི་ཕྱིར་རྩོད་པ་མེད་པའོ། །ཞེས་པ་ལ་དཔག་ན་རིགས་ཅན་གསུམ་གས་འདི་ལ་ཆེད་དུ་བརྟེན་ནས་རང་གི་ཐར་པ་འཐོབ་ནུས་པ་དང། ཐེག་པ་ཐམས་ཅད་ལ་ཡང་དག་པར་ཞུགས་པའི་དོན་ཡང་དེར་འདོད་དམ་སྙམ་ལ། དེ་ལྟ་ན་མི་འཐད་པ་འོག་ཏུ་འཆད་པར་འགྱུར་རོ། །མཐའ་དཔྱད་པ་ལ། ཁ་ཅིག་ན་རེ། འདིའི་མཚམས་སྦྱོར་དུ་ཤུགས་ལ་གནས་ཞེས་པའི་དོན། གྲུབ་དོན་གྱི་སྐབས་འདིར་འཁོར་ལོ་གསུམ་གྱི་ཐ་སྙད་སོ་སོར་སྦྱར་བ་

― GTD002_Page_0644 ―

^{[མ་དཔེ་གཟིགས་ན་འདིར་གནོན།]}

[Full Size]

མ་གཏོགས། དེའི་སྔོན་ལ་བདེན་གཞིའི་ཆོས་འཁོར་དང་མཚན་ཉིད་མེད་པའི་ཆོས་འཁོར་ཟེར་བ་ཙམ་ལས་འཁོར་ལོ་དང་པོ་སོགས་ཀྱི་ཐ་སྙད་མ་བྱུང་བ་ཡིན་ཏེ། དེའི་རྒྱུ་མཚན་གྱིས་འདིར་ཡང་འཁོར་ལོ་དང་པོ་གཉིས་དྲང་དོན་ཞེས་མ་གསུངས་པར། མདོ་སྡེ་གཉིས་དྲང་དོན་དང་གཅིག་ངེས་དོན་དུ་སྔར་བཤད་པ་རྣམས་ཀྱི་ཤུགས་ཀྱིས་ཤེས་པར་འགྱུར་རོ། །ཤུགས་ལ་གནས་པའི་དོན་དེ་ཉིད། ཅེས་གསུངས་པའི་ཕྱིར་ཟེར་ན། དེ་མི་འཐད་པར་ཐལ། དེའི་སྔོན་ནས་འཁོར་ལོ་དང་པོ་སོགས་ཀྱི་ཐ་སྙད་བྱུང་བའི་ཕྱིར། དེར་ཐལ། བདེན་བཞིའི་ཆོས་འཁོར་བསྐོར་བའི་ཚེ་ལྷ་རྣམས་ཀྱིས་འཛམ་བུའི་གླིང་དུ་སྔོན་མ་བྱུང་བའི་ཆོས་ཀྱི་འཁོར་ལོ་བསྐོར་བ་མཐོང་ངོ་ཞེས་བསྒྲགས་ཚུལ་མངོན་པར་འབྱུང་བའི་མདོ་ལས་གསུངས་ཤིང། ཤེར་མདོ་གསུངས་པའི་ཚེ་ལྷ་རྣམས་ཀྱིས་ཨ་ལ་ལ་འཛམ་བུའི་གླིང་དུ་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ངོ་ཞེས་བསྒྲགས་པར་བརྒྱད་སྟོང་པའི་རྣམ་མཁྱེན་མཇུག་སྡུད་ཀྱི་སྐབས་སུ་གསུངས་པའི་ཕྱིར་དང། གཉིས་པ་འཇོག་པ་ལ་དང་པོ་ཞིག་ཡོད་དགོས་པའི་ཕྱིར། ཡང་ཁ་ཅིག་འཁོར་ལོ་དང་པོ་གཉིས་དྲང་དོན་ཡིན་པ་དང། ཐ་མ་ངེས་དོན་ཡིན་པ་རེ་རེ་ནས་གྲུབ་དོན་ཡན་ལ་དངོས་སུ་མ་བསྟན་ཅིང། འདིར་བླ་ན་མཆིས་པ་སོགས་ཚན་གཉིས་ཀྱིས་དང་པོ་གཉི་ག་དྲང་དོན་དུ་དངོས་སུ་བསྟན། བླ་ན་མ་མཆིས་ཞེས་སོགས་ཀྱིས་ཐ་མ་ངེས་དོན་དུ་དངོས་སུ་བསྟན་པའི་ཕྱིར་ཟེར་བའང་མི་འཐད་པར་ཐལ། གོང་གི་དྲིས་ཞུས་དང་ལན་སོགས་ཀྱིས་དང་པོ་གཉིས་དྲང་དོན་དུ་དངོས་སུ་བསྟན་པའི་ཕྱིར། དེར་ཐལ། དེ་ནི་མིང་དང་བརྡས་རྣམ་པར་བཞག་པ་ཙམ་

― GTD002_Page_0645 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་གྱི་ཞེས་སོགས་ཀྱིས་ཀུན་བཏགས་རང་གི་མཚན་ཉིད་ཀྱིས་མ་གྲུབ་པར་བསྟན་ནས་འཁོར་ལོ་དང་པོའི་དངོས་ལ་གནོད་བྱེད་བསྟན། འདི་དང་ངོ་བོ་ཉིད་མེད་པ་གཞན་གཉིས་ཏེ་གསུམ་གས་འཁོར་ལོ་བར་བའི་དགོངས་གཞི་བསྟན། དེ་ནི་རྐྱེན་གཞན་གྱི་སྟོབས་ཀྱིས་བྱུང་བ་ཡིན་གྱི་ཞེས་སོགས་ཀྱིས་གཞན་དབང་བདེན་གྲུབ་ཏུ་བསྟན་པ་དང། རྣམ་པར་དག་པའི་དམིགས་པ་གང་ཡིན་པ་དེ་ནི་དོན་དམ་ཡིན་ལ་ཞེས་སོགས་ཀྱིས་ཡོངས་གྲུབ་བདེན་གྲུབ་ཏུ་བསྟན་ནས་འཁོར་ལོ་དང་པོའི་དགོངས་གཞི་དང་བར་བའི་དངོས་ལ་གནོད་བྱེད་བསྟན། ངའི་དགོངས་ཏེ་བཤད་པ་ཞེས་སོགས་ཀྱིས་དྲང་དོན་གྱི་མདོའི་སྒྲ་ཇི་བཞིན་པར་ཞེན་ན་རྟག་ཆད་ཀྱི་ལྟ་བར་འགྱུར་ཚུལ་རྒྱུ་མཚན་དང་བཅས་པ་གསལ་བར་གསུངས་པའི་ཕྱིར། ཁྱབ་སྟེ། གྲུབ་དོན་གྱི་སྐབས་འདིར་དྲང་བའི་དོན་ནོ་ཞེས་པའི་ཚིག་ཙམ་བྱུང་ཡང་དྲང་དོན་དུ་སྒྲུབ་པ་ལ་དེ་གཙོ་མི་ཆེ་བར་དྲང་དོན་དུ་བྱེད་དགོས་པའི་རྒྱུ་མཚན་དགོངས་གཞི་དགོས་པ་དངོས་ལ་གནོད་བྱེད་སོགས་བསྟན་པ་གཙོ་ཆེ་ཞིང་དེ་གྲུབ་དོན་གྱི་གོང་ནས་དངོས་སུ་གསུངས་པའི་ཕྱིར། བྱས་པ་ལ། འོ་ན་འདིར་ཤུགས་ལ་གནས་པའི་དོན་ཞེས་པ་དེ་བསྙེགས་ས་ཞིག་མེད་པར་ཐལ། འཁོར་ལོ་དང་པོ་དྲང་དོན་ཡིན་པ་སོགས་འདིའི་ཤུགས་བསྟན་དུ་བཤད་པའང་མིན། འཁོར་ལོ་སོ་སོའི་ཐ་སྙད་ཤུགས་ཀྱིས་ཐོབ་ཡོད་ཀྱང་སྔར་དངོས་སུ་མ་གྲགས་པའི་དོན་ཡང་མ་ཡིན་པའི་ཕྱིར་ན། མ་ཁྱབ་སྟེ། གོང་གི་དྲིས་ལན་རྣམས་ཀྱིས་འཁོར་ལོ་དང་པོ་དང་བར་བ་གཉི་གས་

― GTD002_Page_0646 ―

^{[མ་དཔེ་གཟིགས་ན་འདིར་གནོན།]}

[Full Size]

ཆ་མ་ཕྱེ་བར་རང་མཚན་གྱིས་ཡོད་མཉམ་དང་མེད་མཉམ་དུ་བཀའ་སྩལ་ཚུལ་དང་དེ་ལ་གནོད་བྱེད་འབབ་ཚུལ་དངོས་སུ་བསྟན། དང་པོའི་དགོངས་གཞི་ཤུགས་ལ་བསྟན་ཅིང་བར་བའི་དགོངས་གཞིའང་དངོས་སུ་བསྟན་པའི་ཤུགས་ཀྱིས་ཆ་ཕྱེ་ནས་སྟོན་པའི་ངེས་དོན་གཅིག་ཡོད་པར་འགྲུབ་ལ། ཚན་གསུམ་པོ་དེ་དུས་སྔ་ཕྱི་བར་གསུམ་དུ་གསུངས་པ་ཡིན་པས་གོ་རིམ་དེའི་སྒོ་ནས་འཁོར་ལོ་གསུམ་ཞེས་པའི་ཐ་སྙད་དང་མདོ་ཚན་གསུམ་ག་མིང་དོན་སྦྱོར་དགོས་ནའང། དེ་དྲིས་ཞུས་སོགས་ཀྱི་ཤུགས་ལ་ཐོན་པ་མ་གཏོགས་དངོས་སུ་མ་གསུངས་པ་གྲུབ་དོན་འདིར་དངོས་སུ་གསུངས་ཞེས་པ་ཡིན་པའི་ཕྱིར། དེ་ལྟར་བྱས་ན་ཀུན་མཁྱེན་བླ་མའི་ཕར་ཕྱིན་མཐའ་དཔྱོད་ལས། བཀའ་ཐམས་ཅད་བསྡུས་ན་དུས་དང་པོར་གསུངས་པའི་འཁོར་ལོ་དང་པོ་དང། དུས་བར་བར་གསུངས་པའི་འཁོར་ལོ་བར་བ་དང། དུས་ཐ་མར་གསུངས་པའི་འཁོར་ལོ་ཐ་མ་གསུམ་དུ་གྲངས་ངེས་པའི་ཕྱིར། དེ་ལྟར་གྲངས་ངེས་པར་དགོངས་འགྲེལ་དྲིས་ཞུས་ཀྱི་ཤུགས་ལ་བསྟན་པའི་ཕྱིར། ཞེས་དང། དེས་འཁོར་ལོ་དང་པོ་དང་བར་བ་གཉིས་ལ་དྲི་བ་དངོས་སུ་བསྟན་ནས་ཐ་མ་ཤུགས་ལ་བསྟན་པའི་ཕྱིར། ཞེས་དེའི་ཤེས་བྱེད་དུ་ཤུགས་ལ་གནས་པའི་དོན་ཞེས་སོགས་དྲངས་པའི་དགོངས་པའང་ལེགས་པར་གོ་ནུས་ཏེ། དྲིས་ལན་གཉི་གས་དང་པོ་དགོངས་གཞི་དངོས་སུ་དྲིས་པ་དང་ལན་བཏབ་པ་མེད་ཀྱང་དྲི་བའི་གཞི་འགོད་པའི་ཚེ་བཀའ་སྩལ་ཚུལ་དངོས་སུ་ཐོན་ཡོད་པས་ཐ་མ་ལ་ལྟོས་ན་དེའང་གསལ་བའི་རྒྱུ་མཚན་གྱིས་ཡིག་ཆར་འཁོར་ལོ་དང་པོ་དང་བར་བ་གཉིས་

― GTD002_Page_0647 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དྲི་བ་དངོས་སུ་བསྟན་ཞེས་གསུངས་པ་ཡིན། ཐ་མ་ཤུགས་ལ་བསྟན་པའི་ཕྱིར་ཞེས་པ་དེར་དྲི་བའི་ཤུགས་ལ་བཀོད་ཅེས་པའི་དོན་མིན་གྱི། ཆ་མ་ཕྱེ་བ་གཉིས་དྲང་དོན་དུ་བཤད་པའི་ཤུགས་ཀྱིས་ཆ་ཕྱེ་བའི་ངེས་དོན་གཅིག་ཡོད་པར་ཤུགས་ལ་བསྟན་ཅིང། ཡང་སྔ་མ་གཉིས་ཀྱི་སྟེང་དུ་དེ་བསྣན་ན་འཁོར་ལོ་གསུམ་དུ་འགྱུར་ཚུལ་ཡང་ཤུགས་ལ་བསྟན་ཅེས་པ་ཡིན་ཏེ། འདིར་འཁོར་ལོ་དང་པོ་གཉིས་དྲང་དོན་དང་ཐ་མ་ངེས་དོན་དུ་སྔར་བཤད་པའི་ཤུགས་ཀྱིས་ཤེས་མ་གསུངས་པར། མདོ་སྡེ་གཉིས་དྲང་དོན་དང་གཅིག་ངེས་དོན་དུ་ཞེས་གསུངས་པའང་སྤྱིར་དེའི་སྔོན་དུ་འཁོར་ལོ་དང་པོ་དང་གཉིས་པའི་ཐ་སྙད་མེད་པ་མིན་ཀྱང། ལེའུ་འདིར་གྲུབ་དོན་གྱི་གོང་དུ་འཁོར་ལོ་སོ་སོའི་ཐ་སྙད་དང་དྲང་ངེས་སྦྱར་ནས་བསྟན་པ་མེད་ལ། གཙོ་བོར་ནི་འཁོར་ལོ་དང་པོ་གཉིས་ཟེར་བ་ལ་ཐ་མ་ཞིག་ཡོད་དགོས་ཤིང། དེའི་ཐ་སྙད་སྔར་མ་བྱུང་བའི་དབང་གིས་ཡིན་ནོ། །ཁོ་བོའི་མཆན་འགྲེལ་དུ་འདི་དང་མི་འདྲ་ཙམ་ཞིག་བྲིས་ཡོད་ཀྱང་ཡིག་ཆའི་ཁོག་བསྒྲིགས་ན་འདི་ལྟར་བྱེད་དགོས་པར་སྣང་ངོ་། །གཉལ་སྟོན་གྱི་དཀའ་འགྲེལ་ལས་འཁོར་ལོ་ཕྱི་མ་གཉིས་ལ་ངོ་མཚར་རྨད་དུ་བྱུང་བ་ཙམ་སྨོས་ཤིང། དང་པོ་ལ་དེའི་སྟེང་དུ་སྔོན་ལྷར་གྱུར་པའམ་མིར་གྱུར་པ་སུས་ཀྱང་མཐུན་པར་འཇིག་རྟེན་དུ་མ་བསྐོར་བ་གཅིག་རབ་ཏུ་བསྐོར་ཅེས་པས་འཁོར་ལོ་དང་པོ་ཡིན་པར་བསྟན་ཅེས་བཤད་པ་མི་འཐད་དེ། འདིར་སྔོན་ཞེས་པ་སྟོན་པ་འཇིག་རྟེན་དུ་མ་བྱོན་གོང་ལ་བྱེད་ཀྱི། མདོ་མ་གསུངས་པའི་སྔོན་ཙམ་ལ་མི་བྱེད་ཅིང་མ་བསྐོར་

― GTD002_Page_0648 ―

^{[མ་དཔེ་གཟིགས་ན་འདིར་གནོན།]}

[Full Size]

བའང་ཚངས་པ་སོགས་གཞན་གྱིས་མ་བསྐོར་བ་ལ་བྱ་ཡི། སྟོན་པས་སྔར་མ་བསྐོར་བ་ལ་མི་བྱེད་པའི་ཕྱིར། གཞན་དུ་ན་ཤེར་མདོའང་འཁོར་ལོ་དང་པོ་ཡིན་པར་ཐལ། ཉི་ཁྲི་ལས་ཚངས་པའི་འཁོར་ལོ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གཞན་སུས་ཀྱང་རུང་བའི་ཆོས་དང་ལྡན་པར་འཇིག་རྟེན་དུ་བསྐོར་བར་མི་ནུས་པ། ཞེས་གསུངས་པའི་ཕྱིར། ཁྱབ་པ་འགྲིག །དེས་ན་སྟོན་པ་ཉག་ཅིག་མ་གཏོགས་པ་གཞན་སུས་ཀྱང་བསྐོར་མི་ནུས་པའི་ཚངས་པའི་འཁོར་ལོའམ་ཆོས་ཀྱི་འཁོར་ལོར་འཇོག་ཚུལ་གསུངས་པ་ཡིན་པས་འཁོར་ལོ་ཕྱི་མ་གཉིས་ལའང་སྦྱོར་དགོས་སོ། །ཡང་ཁ་ཅིག་འདིར་བསྟན་འཁོར་ལོ་དང་པོ་ཡིན་ན་བདེན་བཞིའི་ཆོས་འཁོར་ཡིན་པས་ཁྱབ་པ་དང། བདེན་བཞི་གང་རུང་ལས་བརྩམས་ནས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྟོན་པས་ཁྱབ་པར་ཐལ། མདོ་ལས། འཕགས་པའི་བདེན་པ་བཞིའི་རྣམ་པ་བསྟན་པའི་ཞེས་གསུངས་ཤིང། འདི་ཉིད་ལས། བདེན་བཞིའི་རྣམ་པ་བསྟན་པའི་ཞེས་པ་ནི་བརྗོད་བྱ་གང་ལས་བརྩམས་ནས་བསྟན་པའོ། །ཞེས་དང། དེ་འདྲ་བའི་འཁོར་ལོ་དང་པོ་ལ་བདེན་བཞིའི་ཆོས་འཁོར་དང། ཞེས་གསུངས་པའི་ཕྱིར་ན། མ་ཁྱབ་སྟེ། ཉན་ཐོས་སྡེ་གཉིས་ཀྱི་བློ་དང་འཚམ་པའི་གནས་ལུགས་གཏན་ལ་འབེབས་ཚུལ་མངོན་པ་མཛོད་ལྟར་བདེན་བཞི་དང་སྦྱར་བ་འདི་ཡིན་པས་དེ་གཙོ་ཆེ་བ་ལ་དགོངས་པའི་ཕྱིར། དེར་ཐལ། དེ་གཉིས་ཀྱིས་འཁོར་ལོ་དང་པོའི་དོན་བཞིན་བདེན་བཞིའི་སྟེང་ནས་གཏན་ལ་འབེབས། ངོ་བོ་ཉིད་མེད་པར་སྨྲ་བས་བར་

― GTD002_Page_0649 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་དོན་བཞིན་བདེན་གཉིས་སམ་སྣང་སྟོང་གཉིས་ཚོགས་པའི་སྟེང་ནས་གཏན་ལ་འབེབས་ཤིང་རྒྱུད་སྡེ་གོང་འོག་གི་ལམ་དང་རིམ་གཉིས་སྤྱི་རྫོགས་རིམ་སོ་སོ་ཀུན་ཀྱང་འདི་གཙོ་བོར་བྱས། སེམས་ཙམ་པས་འཁོར་ལོ་ཐ་མའི་དོན་བཞིན་ངོ་བོ་ཉིད་གསུམ་གྱི་སྟེང་ནས་གཏན་ལ་འབེབས་པའི་ཕྱིར། གྲུབ་མཐའ་རྩ་བར། འཁོར་ལོ་དང་པོའི་དོན་བཞིན་དོན་སྨྲ་གཉིས། །བར་མཐའི་ལུགས་བཞིན་དབུ་སེམས་གཉིས་བཞག་ཕྱིར། །གྲུབ་མཐའ་བཞི་ཡང་ཐུབ་དགོངས་མཆོག་དམན་བཞེད། །ཅེས་དང། རྒྱ་ནག་འགྲེལ་ཆེན་ལས། རི་དྭགས་ཀྱི་ཚལ་དུ་ཆོས་བསྟན་པ་གང་ཡིན་པ་དེ་ནི་བདེན་པ་བཞི་རྣམ་པར་བཞག་པའོ། །རྒྱལ་བྱེད་ཀྱི་ཚལ་དུ་ཆོས་གསུངས་པ་གང་ཡིན་པ་དེ་ནི་བདེན་པ་གཉིས་རྣམ་པར་བཞག་པའོ། །ཡངས་པ་ཅན་དུ་ཆོས་བཤད་པ་གང་ཡིན་དེ་ནི་བདེན་པར་རྣམ་པར་མ་བཞག་པ་སྟེ། ཞེས་དང། ངོ་བོ་ཉིད་རྣམ་པ་གསུམ་དང་ངོ་བོ་ཉིད་མེད་པ་རྣམ་པ་གསུམ་ལས་བརྩམས་ནས་ཡོད་པ་དང་མེད་པའི་རིགས་པ་མ་ལུས་ཤིང་ཡོངས་སུ་རྫོགས་པར་སྟོན་པ་གང་ཡིན་པ་དེ་དག་ནི་དུས་གསུམ་པའི་བསྟན་པའོ། །ཞེས་གསུངས་པའི་ཕྱིར། དེས་ན་འཁོར་ལོ་སོ་སོའི་རྩོམ་གཞི་ལ་གང་གཙོ་ཆེ་བ་དེའི་དབང་དུ་བྱས་པ་ཡིན་གྱི། ཁྱབ་མཐའ་བཟུང་བ་མིན་ཏེ། འདིར་བསྟན་འཁོར་ལོ་བར་བ་ལའང་བདེན་པ་གཉི་ག་ཁྱད་གཞིར་བཟུང་བས་མ་ཁྱབ་པའི་ཕྱིར། དེར་ཐལ། དེ་ལ་བརྩམས་ཞེས་པ་དགོངས་པ་དེར་འབབ་པ་ཙམ་ལ་བཤད་ཚུལ་གཅིག་ཡོད་ཀྱང་སྐབས་འདིར་ཁྱད་གཞིར་བཟུང་

― GTD002_Page_0650 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ལ་བྱེད་པའི་ཕྱིར། རྟགས་ཟུར་དང་པོ་གྲུབ་སྟེ། རྗེ་བླ་མས། ཁྱོད་ཀྱིས་ཇི་སྙེད་བཀའ་སྩལ་པ། །རྟེན་འབྲེལ་ཉིད་ལ་བརྩམས་ཏེ་འཇུག །ཅེས་གསུང་རབ་ཐམས་ཅད་ཟབ་མོ་རྟེན་འབྱུང་ལས་བརྩམས་པར་གསུངས་ཤིང། དགོངས་འགྲེལ་བྱམས་ཞུས་ཀྱི་ལེའུ་ལས་ཀྱང། ཆོས་འདི་དག་ཐམས་ཅད་ནི་དེ་བཞིན་ཉིད་ལ་གཞོལ་བ། དེ་བཞིན་ཉིད་ལ་འབབ་པ། དེ་བཞིན་ཉིད་ལ་བབ་པ། ཞེས་སོགས་གསུངས་པའི་ཕྱིར། ཟུར་གཉིས་པ་གྲུབ་སྟེ། སྐབས་འདིའི་བདེན་བཞི་ལ་བརྩམས་པའི་མདོ་ལ་བདེན་བཞི་ཁྱད་གཞིར་བཟུང་བ་དགོས་པའི་ཕྱིར་ཏེ། དྲིས་ཞུས་ཀྱི་ཚེ་ཕུང་པོ་ལྔ། སྐྱེ་མཆེད་བཅུ་གཉིས། རྟེན་འབྲེལ་བཅུ་གཉིས། ཟས་བཞི། བདེན་པ་བཞི། ཁམས་བཅོ་བརྒྱད། བྱང་ཕྱོགས་སོ་བདུན་ཏེ་སྡེ་ཚན་བདུན་ལ་བརྩམས་ནས་བཀའ་སྩལ་ཚུལ་སོ་སོར་གསུངས་པས་དེ་དང་དེའི་དངོས་བསྟན་གྱི་མདོ་མ་འདྲེས་པར་སོ་སོར་འཇོག་དགོས་ཀྱི། དེ་ཐམས་ཅད་བདེན་པ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ་ཅེས་པའི་དངོས་བསྟན་གྱི་འགྲེས་རྐང་ལྔ་པའི་མདོར་འཇོག་པ་འབྲེལ་མེད་པའི་ཕྱིར། ཞིབ་པར་ཀུན་མཁྱེན་བླ་མའི་གསུང་ལྟར་རོ། །ཡང་ཁོ་ན་རེ། རྒྱལ་པོ་ཆེན་པོ་གཟུགས་ལ་སྐྱེ་བ་ཡོད་ཅེས་སོགས་ཀྱི་མདོ་འདིས་བདེན་བཞི་གང་རུང་ལ་བརྩམས་པར་ཐལ། དེས་སྡུག་བདེན་ལས་བརྩམས་པའི་ཕྱིར། དེར་ཐལ། དེས་ཟག་བཅས་ཉེར་ལེན་གྱི་ཕུང་པོ་ལས་བརྩམས་པ་གང་ཞིག །དེ་སྡུག་བདེན་ཡིན་པའི་ཕྱིར་ན། མ་ཁྱབ། འོ་ན་ཕུང་པོ་ལ་བརྩམས་ན་ཁམས་དང་སྐྱེ་མཆེད་གཉིས་

― GTD002_Page_0651 ―

^{[མ་དཔེ་གཟིགས་ན་འདིར་གནོན།]}

[Full Size]

ལའང་བརྩམས་པས་ཁྱབ་པར་ཐལ། དེ་དག་ཕན་ཚུན་གཅིག་གིས་གཅིག་བསྡུས་པའི་ཕྱིར། འདོད་མི་ནུས་ཏེ། གདུལ་བྱ་དབང་པོ་རྣོ་འབྲིང་རྟུལ་གསུམ་ལ་ལྟོས་ཏེ་དེ་གསུམ་ལ་རྩོམ་ཚུལ་སོ་སོར་འཇོག་དགོས་པའི་ཕྱིར། མཛོད་འགྲེལ་ལས། ཅིའི་ཕྱིར་བཅོམ་ལྡན་འདས་ཀྱིས་ཕུང་པོ་ལ་སོགས་པའི་སྒོ་ནས་སྟོན་པ་རྣམ་པ་གསུམ་རྩོམ་པར་མཛད་ཅེ་ན། སྨྲས་པ། འདུལ་བ་རྣམས་ཀྱི། རྨོངས་དབང་འདོད་རྣམ་གསུམ་གྱི་ཕྱིར། །ཕུང་པོ་ལ་སོགས་གསུམ་བསྟན་ཏོ། །ཞེས་གསུངས་པའི་ཕྱིར། དེས་ན་བརྗོད་འདོད་དང་ཕ་རོལ་པོས་གོ་ཚུལ་ལ་ལྟོས་ཀྱི། ཆོས་དེ་ཡིན་པ་ཙམ་གྱིས་མི་ཆོག་པའི་ཕྱིར་ཏེ། ཕུང་པོ་རྟོགས་ན་སྡུག་བདེན་རྟོགས་པ་དང། བུམ་པ་མཐོང་ན་སྡུག་བདེན་མཐོང་བས་མ་ཁྱབ་པའི་ཕྱིར་རོ། །བྱས་པ་ལ། དེའང་ཁྱབ་པར་ཐལ། སྔོན་འཛིན་མིག་ཤེས་དེ་གཟུགས་འཛིན་མིག་ཤེས་ཡིན་པའི་ཕྱིར། དེར་ཐལ། མདུན་གྱི་དམ་བཅའ་བ་འདིའི་རྒྱུད་ལ་གཟུགས་འཛིན་མིག་ཤེས་མངོན་དུ་གྱུར་པའི་སྐབས་ཤིག་དང་དེའི་མཚན་གཞི་འཇོག་རྒྱུ་ཡོད་པའི་ཕྱིར་ན། མ་ཁྱབ་སྟེ། གཟུགས་མ་རྟོགས་པའི་གང་ཟག་ཀྱང་འཇོག་རྒྱུ་ཡོད་པའི་ཕྱིར། ཡང་ཁ་ཅིག་ན་རེ། ཝེན་ཚེག་གིས་བླ་ན་མཆིས་པ་སོགས་ཀྱི་དོན་བཤད་ཚུལ་འདིར་འགོད་པའི་ཚེ་གཞན་གྱིས་གཞིག་པར་བྱ་བ་ཞེས་པ་རྩོད་པ་དང་བཅས་པའི་དོན་དུ་སྦྱར་བ་མི་འཐད་པར་ཐལ། ཝེན་ཚེག་གིས་དེ་སྐབས་མཆིས་པའི་དོན་དུ་བཤད་པའི་ཕྱིར། དེར་ཐལ། དེའི་འགྲེལ་པར། སྐབས་ཁྱད་

― GTD002_Page_0652 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཅན་ཡོད་པའི་བསྟན་པ་དང། གཞན་དག་གིས་གཞིག་པར་བྱ་བ་དང། སྡེ་པ་ཉི་ཤུ་པོ་རྩོད་པར་སྨྲ་བ་དག་གི་གནས་སུ་གྱུར་པ་ཡིན་ནོ། །ཞེས་འབྱུང་བས། གཞན་དག་གིས་གཞིག་པར་བྱ་བ་དང་ཞེས་པ་དེ་གོང་དེ་མ་ཐག་ཏུ། སྐབས་ཁྱད་པར་ཅན་ཡོད་པའི་བསྟན་པ་དང་ཞེས་པ་དེའི་མཇུག་ཏུ་ཡར་སྦྱར་ནས་བཤད་དགོས་ཀྱི། སྡེ་པ་ཉི་ཤུ་པོ་ཞེས་སོགས་ཀྱི་མགོར་མར་སྦྱོར་རྒྱུ་མ་ཡིན་པའི་ཕྱིར། དེར་ཐལ། བླ་ན་མ་མཆིས་པ་སོགས་ཀྱི་དོན་འཆད་པའི་ཚེ་དེ་ཉིད་ཀྱི་འགྲེལ་པ་ལས། ཆོས་ཀྱི་འཁོར་ལོ་བསྐོར་བ་འདི་མཆོག་ཏུ་རྨད་དུ་བྱུང་ཞིང་དེ་ལས་ལྷག་པའི་མཆོག་གཞན་མེད་པའི་ཕྱིར་བླ་ན་མེད་པ་ཞེས་བྱའོ། །ཕྱིས་མཆོག་ཏུ་འགྱུར་བའི་སྐབས་མེད་ཅིང་ཕྱིས་གཞིག་པའི་སྐབས་མེད་པའི་ཕྱིར་སྐབས་མེད་པ་ཞེས་བྱའོ། །ཡོད་པ་དང་མེད་པ་ཡོངས་སུ་རྫོགས་པར་བསྟན་པའི་ཕྱིར་ངེས་པའི་དོན་ཡིན་ཞིང་རྩོད་པ་སྨྲ་བ་རྣམས་ཀྱི་གཞིའི་གནས་མ་ཡིན་པའོ། །ཞེས་གཞན་གྱིས་གཞིག་ཏུ་མེད་པ་དེ་སྐབས་མེད་ཚུལ་དང་སྦྱར་བ་འདིས་གཞན་གྱིས་གཞིག་ནུས་པ་དེ་སྐབས་ཡོད་ཚུལ་ལ་སྦྱོར་བ་གོ་ནུས་པའི་ཕྱིར་དང། འདི་ཉིད་ལས་ཀྱང་སྐབས་མེད་པའི་སྔ་མ་མ་གཏོགས་པ་ཞེས་དེས་སྐབས་མེད་པ་ལ་བཤད་ཚུལ་གཉིས་བྱས་པར་གསུངས་པ་ལྟར་སྐབས་ཡོད་པ་ལའང་བཤད་ཚུལ་གཉིས་བྱས་ན་གོང་འོག་མཐུན་པར་འགྱུར་བའི་ཕྱིར་ཟེར་ན། གོང་འོག་གི་ཚིག་རིས་ཙམ་ལ་བལྟས་ཚེ་དེ་ལྟར་ཡིན་ཀྱང་རྗེའི་དགོངས་པ་ཤིན་ཏུ་བརླིང་བས་འདི་བཞིན་བྱེད་དགོས་ཏེ། ཐོག་མར་སྐབས་ཡོད་མེད་ཅེས་པས་སྐབས་ཀྱི་དོན་

― GTD002_Page_0653 ―

^{[མ་དཔེ་གཟིགས་ན་འདིར་གནོན།]}

[Full Size]

ཇི་ལྟར་འཆད་ཤེས་དགོས་སོ། །དེའང་སྒྲོན་གསལ་ལས། ལེ་འུ་དེ་བཞིན་ཆོ་ག་དང། །དུམ་བུ་དེ་བཞིན་རིམ་པར་ཕྱེ། །ཞེས་པ་ལྟར། ལེའུ་ནི་བ་རི་ཙྪེ་དཿཞེས་དོན་ཚན་སོ་སོར་གཅོད་པ་དང། ཆོ་ག་ནི་ཀལྤ་ཞེས་སྒྲུབ་པར་བྱེད་པའི་ཐབས་ལ་འཇུག་ཅིང་ཐབས་དེ་རྟོགས་པར་བྱེད་པའི་དོན་དུའང་འགྲོ་བས་ལ་ལར་རྟོག་པ་ཞེས་བསྒྱུར། ཁཎྜ་འམ་དུམ་བུ་ཞེས་པ་སྡེ་ཚན་དུམ་བུར་གནས་པ་དང། སརྒ་ནི་རིམ་པ་གཉིས་དང་ཐེག་པ་གོང་འོག་ལྟ་བུ་རིམ་པར་ཕྱེ་བ་ལ་འཇུག་ཅིང་དེ་དག་དོན་གཅིག་མིང་གི་རྣམ་གྲངས་སུ་གསུངས་ལ། རྒྱན་ལས་སྦས་དོན་མངོན་རྟོགས་རིམ་པར་བགྲོད་ཚུལ་བསྟན་པའི་ཆ་ནས་སྐབས་བརྒྱད་དུ་བྱས་པ་ཡིན་པས། གསེར་འཕྲེང་ལས་སྐབས་ཞེས་པའང་ལེའུ་སོགས་དང་དོན་འདྲ་བར་གསུངས་སོ། །ཡང་སྐབས་ཀྱི་སྒྲ་འཇུག་ཚུལ་རྣམ་པ་གཅིག་ནི། ཀུན་བཏུས་འགྲེལ་པ་རྒྱལ་སྲས་མ་ལས། མངོན་པར་སྐབས་ཡོད་པ་ནི་དེ་ལས་གཞན་ཟློག་པར་བྱེད་པའི་རེག་བྱ་དང་བྲལ་བའོ། །ཞེས་བར་སྣང་སྐྱ་སེང་ལྟ་བུས་གཟུགས་གཞན་འགོག་མི་ནུས་པར་གོ་འབྱེད་པ་ལ་མངོན་པར་སྐབས་ཡོད་ཀྱི་གཟུགས་སུ་བཤད་པ་ལྟར་དོན་ཞིབ་ཏུ་མ་ཕྱེ་བའི་དབང་གིས་རྒོལ་བའི་རྩོད་པ་འགོག་མི་ནུས་པར་ཀླན་ཀ་འཇུག་ཏུ་རུང་བ་ལའང་སྐབས་ཀྱི་སྒྲ་འཇུག་གོ །དེས་ན་ཝེན་ཚེག་གིས་སྔ་མ་བཞིན་ལམ་གོང་འོག་ལྟ་བུ་དམན་མཆོག་གི་རིམ་པར་ཕྱེ་རྒྱུ་ཡོད་པའི་དོན་དུ་བསམ་སྣང་བས་སྐབས་ཡོད་མེད་ཀྱི་ཁྱད་པར་ཡང་འདིའི་དགོངས་པ་རྟོགས་ན་ཕྱིས་དེ་ལས་ལྷག་ཅིག་རྟོགས་རྒྱུ་ཡོད་མེད་ལ་འདོད་འདུག་པའི་ཕྱིར། དེར་ཐལ། དེའི་

― GTD002_Page_0654 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲེལ་པ་ལས། ཕྱིས་མཆོག་ཏུ་འགྱུར་བའི་སྐབས་ཞེས་བཤད་པའི་ཕྱིར། ཁྱབ་སྟེ། རྒོལ་བའི་སྐབས་ཡོད་མེད་ལ་མ་སྦྱར་བར་མཆོག་ཏུ་འགྱུར་བའི་སྐབས་ཡོད་མེད་ལ་སྦྱར་བའི་ཕྱིར། དེ་ལ་ཁྱབ་པ་ཡོད་པར་ཐལ། དེ་ལས་མཆོག་ཏུ་གྱུར་པའི་མདོ་ཡོད་པ་ལ་བྱས་ན་བླ་ན་མཆིས་པའི་དོན་བཤད་པ་དང་ཟློས་ལ། དེར་ཕྱིར་གྱི་སྒྲའང་སྦྱོར་མི་དགོས་པས་འདིར་གདུལ་བྱ་རང་ཉིད་ཀྱིས་མདོ་དོན་རྟོགས་ཚུལ་ལ་སྦྱོར་དགོས་པའི་ཕྱིར། བྱས་པ་ལ་ཁོ་ན་རེ། ཝེན་ཚེག་གིས་ཀྱང་སྐབས་མེད་པའི་དོན་རྒོལ་བའི་ཀླན་ཀས་འཇིག་པའི་སྐབས་མེད་པ་ལ་འདོད་པར་ཐལ། དེའི་འགྲེལ་པ་ལས། ཕྱིས་གཞིག་པའི་སྐབས་མེད་པའི་ཕྱིར་སྐབས་མེད་པ་ཞེས་བྱའོ། །ཞེས་གསུངས་པའི་ཕྱིར་ན། མ་ཁྱབ་སྟེ། རྒོལ་བའི་ཀླན་ཀས་གཞིག་མི་ནུས་པའི་དོན་ཡིན་ན་ཕྱིས་ཞེས་སྨོས་དོན་མེད་པའི་ཕྱིར། དེར་ཐལ། རྒོལ་བའི་ཀླན་ཀས་གཞིག་ནུས་ན་དུས་དེར་ཡང་གཞིག་ནུས་པ་འདྲ་བའི་ཕྱིར། ཁྱབ་སྟེ། འདིའི་གཞིག་ཚུལ་ནི་སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པ་ལྟར་རང་གི་གདུལ་བྱས་མདོ་དེའི་དོན་རྟོགས་ནས་རང་གི་བསམ་ངོར་དེ་ལས་ལྷག་ཅིག་རྟོགས་རྒྱུ་མེད་པ་ལྟ་བུར་བསམས་ཀྱང་ཕྱིས་དེ་དང་མི་མཐུན་པའི་མདོ་ཟབ་མོ་གཞན་གྱི་དགོངས་པ་རྟོགས་པ་ན་སྔར་གྱི་དམ་བཅའ་གཞིག་པ་དེ་སྐབས་འདིའི་གཞིག་ཚུལ་ཡིན་པའི་ཕྱིར། དེར་ཐལ། དགོངས་འགྲེལ་བཞིན་མཐར་ཐུག་ཐེག་པ་གསུམ་གའི་ལམ་གྱི་བགྲོད་ཚུལ་ཚང་བར་རྟོགས་པ་ན་ཤེར་མདོ་ལྟར་མཐར་ཐུག་ཐེག་པ་

― GTD002_Page_0655 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ཏུ་འཛིན་པའི་དམ་བཅའ་འཇིག་པ་ལྟ་བུ་ཡིན་པའི་ཕྱིར། དེར་ཐལ། འདིས་བཤད་ཚུལ་རྣམས་སློབ་དཔོན་ཡང་དག་བདེན་པ་ཁུངས་སུ་བྱས་པར་སྣང་ཞིང། དེའི་བརྗེད་བྱང་ལས། ཐེག་པ་གཅིག་གིས་རྣམ་པར་འཇིག་པའི་ཕྱིར་རྒོལ་བ་དང་བཅས་པའོ། །ཞེས་བར་པའི་ཁྱད་པར་གྱི་བཤད་པ་སྔར་དྲངས་པ་བཞིན་ཐེག་པའམ་རྟོགས་པ་གོང་མ་སྐྱེས་པ་ན་འཇིག་པར་བཤད་ཅིང། འཁོར་ལོ་ཐ་མའི་ཐད་དུའང། ཐེག་པ་ཆུང་ངུ་བ་ཀུན་གྱིས་བགྲོད་པར་བྱ་བ་ཡིན་པའི་ཕྱིར་རྩོད་པ་མེད་པའོ། །རྩོད་པ་མེད་པའི་ཕྱིར་གཞིག་ཏུ་མེད་པའོ། །གཞིག་ཏུ་མེད་པའི་ཕྱིར་རྒོལ་བ་མེད་པའོ། །ཞེས་འབྱུང་བའི་ཕྱིར། འདིས་སྒྲུབ་ཚུལ་ལ་དཔག་ནའང་གཞིག་ཏུ་ཡོད་མེད་རྩོད་པ་ཡོད་མེད་ལ་སྦྱར་བ་སློབ་དཔོན་འདིའི་དགོངས་པར་བྱེད་དགོས་པར་མངོན་ནོ། །སློབ་དཔོན་འདི་གཉིས་ཀྱིས་ཐེག་པ་ཐམས་ཅད་ལ་ཡང་དག་པར་ཞུགས་པའི་དོན་ཡང་དགོངས་འགྲེལ་ལ་བརྟེན་ནས་རང་གི་གདུལ་བྱ་ཐེག་པ་གསུམ་གའི་རིགས་ཅན་རྣམས་ཀྱིས་རང་ལམ་ལ་བརྟེན་ནས་མཐར་ཐུག་གི་སར་བགྲོད་དུ་ཡོད་པ་ལ་འདོད་པར་སྣང་སྟེ། རྒྱ་ནག་འགྲེལ་ཆེན་ལས། གཉིས་པ་ནི་ཐེག་པ་ཆེན་པོའི་གང་ཟག་གི་ཆེད་དུའོ། །གསུམ་པ་ནི་ཐེག་པ་གསུམ་གའི་གང་ཟག་གི་ཆེད་དུའོ། །ཞེས་གསུངས་པའི་ཕྱིར། ཁོ་ན་རེ། ཝེན་ཚེག་གིས་སྐབས་མེད་པའི་དོན་བཤད་ཚུལ་ཕྱི་མ་མདོ་དེ་ལས་གོང་མར་གྱུར་པ་ཞིག་གི་དོན་རྟོགས་ནས་འདོར་དུ་མེད་པ་ལ་བཤད་མི་རིགས་པར་ཐལ། དེ་རྒོལ་བ་གཞན་གྱིས་གཞིག་ཏུ་མེད་པ་ལ་

― GTD002_Page_0656 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་པའི་ཕྱིར། དེར་ཐལ། རང་ལུགས་ལ་དེ་ལྟར་ཡིན་པ་གང་ཞིག །དེའི་དོན་བཤད་ཚུལ་རང་ལུགས་དང་འདྲ་བའི་ཕྱིར། དེར་ཐལ། འདི་ཉིད་ལས་སྐབས་མེད་པའི་སྔ་མ་མ་གཏོགས་པ་ཞེས་དམིགས་ཀྱིས་བཀར་བས་གཞན་རྣམས་འདྲ་བ་དེས་ཤེས་པའི་ཕྱིར་ཟེར་ན། འདི་ལ་དཔྱད་གཞི་ཅུང་ཟད་སྣང་ཡང་ལུགས་གཉི་གས་གཞིག་ཏུ་མེད་པར་བཞག་པ་ཙམ་འདྲ་བ་ལ་དགོངས་སམ་སྙམ། ཁ་ཅིག་ན་རེ། ཝེན་ཚེག་གིས་རྩོད་པའི་གཞིའི་གནས་སུ་གྱུར་པའི་དོན་བཤད་པའང་མི་འཐད་པར་ཐལ། འཁོར་ལོ་དང་པོའི་སྒྲས་ཟིན་གྱི་དོན་ལ་རྩོད་པ་སྨྲ་བ་པོར་ཉན་ཐོས་སྡེ་པ་མི་ཡོང་བའི་ཕྱིར། དེར་ཐལ། འདི་སྒྲ་ཇི་བཞིན་པར་མི་རུང་ཞེས་རྩོད་པ་འགོད་པ་པོར་ཉན་ཐོས་སྡེ་པ་མི་ཡོང་བའི་ཕྱིར་ན། མ་ཁྱབ་སྟེ། འདིར་ཉན་ཐོས་སྡེ་པ་རྣམས་ཀྱིས་རྩོད་ཅེས་པ་དེར་མི་འཐད་ཅེས་རྩོད་པ་མིན་གྱི། དེ་རང་ལུགས་སུ་འཐད་པ་གཞིར་བཞག་གི་སྟེང་ནས་དེའི་དགོངས་པ་འགྲེལ་ཚུལ་ལ་རྩོད་པ་ཡིན་པའི་ཕྱིར། དེར་ཐལ། འཁོར་ལོ་དང་པོ་ལས་རང་གི་མཚན་ཉིད་ཀྱིས་གྲུབ་གྲུབ་ཅེས་གསུངས་ཀྱང་ཡོད་མེད་ཀྱི་མཚམས་གསལ་བར་ངོས་བཟུང་སྟེ། འདི་ལས་ལྷག་ན་རྟག་མཐར་ལྟུང། འདི་ལས་གཞན་ན་ཆད་མཐར་ལྟུང་ཞེས་ཞིབ་ཏུ་ཕྱེ་བ་མེད་པའི་དབང་གིས་སྡེ་པ་བཅོ་བརྒྱད་དང། མདོ་སྡེ་པ་སྔ་ཕྱི་གཉིས་སོགས་ནང་ཕན་ཚུན་རྩོད་པ་འབྱུང་བའི་དོན་ཡིན་པའི་ཕྱིར། རྒྱ་ནག་འགྲེལ་ཆེན་ལས། སྡེ་པ་ཉི་ཤུ་པོ་རྩོད་པར་སྨྲ་བ་དག་གི་གནས་སུ་གྱུར་པ་ཡིན་ནོ་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར། ཞིབ་ཆ་འདི་ལྟར་མ་བྱས་ན་རང་ལུགས་ལའང་

― GTD002_Page_0657 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་མཆིས་པ་དང་རྩོད་པའི་གནས་སུ་གྱུར་པ་གཉིས་ཟློག་པར་ཐལ་བའི་སྐྱོན་སྤོང་མི་ནུས་སོ། །ཡང་ཁ་ཅིག །འདིས་སྟོང་པ་ཉིད་མི་སྟོན་ཞིང་ཡོད་པ་བསྟན་པས་དྲང་དོན་དུ་བཤད་པའང་མི་རུང་བར་ཐལ། ཡོད་པ་བསྟན་པས་དྲང་དོན་དུ་འགྲོ་དོན་མེད་ལ། སྟོང་ཉིད་མ་བསྟན་པས་དྲང་དོན་དུ་བཤད་པ་ངོ་བོ་ཉིད་མེད་པར་སྨྲ་བའི་ལུགས་ཡིན་པས་སྐབས་འཆོལ་བའི་ཕྱིར་ཟེར་ན་མིན་ཏེ། འཁོར་ལོ་དང་པོར་སྟོང་པ་ཉིད་མཁྱུད་ཅིང་ཡོད་པ་སྟོན་པ་དང། བར་པ་ལ་ཡོད་པ་མཁྱུད་ཅིང་སྟོང་པ་ཉིད་སྟོན་པ་ཞེས་འབྱུང་བས། སྔ་མའི་དོན་ཀུན་བཏགས་རང་མཚན་གྱིས་མ་གྲུབ་པ་མཁྱུད་པ་སྟེ་སྦས་ནས་ཆོས་ཐམས་ཅད་ལ་རང་མཚན་གྱིས་གྲུབ་གྲུབ་ཅེས་པའི་ཚིག་མཉམ་པར་བཀའ་སྩལ་བའི་དོན་ཡིན། ཕྱི་མ་རང་མཚན་གྱིས་གྲུབ་པ་ཆོས་གང་གི་སྟེང་དུའང་མ་བསྟན་པར་རང་མཚན་གྱིས་མེད་མཉམ་དུ་གསུངས་པའི་དོན་ཡིན་པའི་ཕྱིར། དེར་ཐལ། འདིའི་སྟོང་ཉིད་ཅེས་པ་རང་ལུགས་ཀྱིས་ཆོས་ཀྱི་བདག་མེད་ཕྲ་མོ་ལ་མི་བྱེད་པར་རང་མཚན་གྱིས་མ་གྲུབ་པ་ཙམ་ལ་བྱེད་པའི་ཕྱིར། དེར་ཐལ། སྟོང་ཉིད་སྨོས་པའི་རྣམ་པས་ཞེས་པའི་དོན་ཆོས་ཀྱི་བདག་མེད་ལ་མི་བྱེད་པའི་ཕྱིར་ཏེ། ཁ་ཅིག་གིས་དེ་ལྟར་བཤད་ཀྱང་རྗེས་རང་ལུགས་སུ་མ་མཛད་པའི་ཕྱིར། འདི་ཉིད་ལས། སྟོང་ཉིད་སྨོས་པའི་རྣམ་པས་ཞེས་པའི་དོན་ཆོས་ཀྱི་བདག་མེད་བསྟན་པ་ལ་འགྲེལ་པ་ཁ་ཅིག་གིས་བཤད། ཅེས་གསུངས་པའི་ཕྱིར། གཞན་ཡང་བར་བའི་སྐབས་སུ་ཡོད་པ་མཁྱུད་ཅིང་སྟོང་ཉིད་བསྟན་ཅེས་

― GTD002_Page_0658 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྟོང་ཉིད་དེ་རང་མཚན་གྱིས་གྲུབ་པས་སྟོང་པ་ཙམ་ལ་བྱེད་དགོས་པར་ཐལ། དེ་སྟོང་ཉིད་དངོས་ལ་བྱེད་ན་མཚན་ཉིད་གསུམ་གའི་སྟེང་དུ་འཇོག་དགོས་ཀྱང་འདི་ཆ་ཕྱེ་སྟེ་ཀུན་བཏགས་ཙམ་ལ་སྦྱར་བ་ཡིན་པའི་ཕྱིར། དེར་ཐལ། འཁོར་ལོ་ཐ་མའི་སྐབས་སུ་ཡོད་མེད་རྫོགས་པར་བསྟན་ཅེས་པའི་དོན་འཁོར་ལོ་དང་པོ་གཉིས་ཀྱིས་དེ་ལས་རེ་རེ་སྦས་ནས་རེ་རེ་ཙམ་བསྟན་ཀྱང། འདིར་མཚན་ཉིད་གསུམ་གྱི་སྟེང་དུ་ཆ་ཕྱེ་ནས་ཕྱོགས་གཉི་ག་རྫོགས་པར་བསྟན་པ་ཡིན་པའི་ཕྱིར། དེར་ཐལ། དེ་ལྟར་སྟོན་པའི་ཚིག་ཀྱང་བྱེ་བྲག་ཏུ་ཕྱེ་ན་དགོངས་འགྲེལ་ལས། རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས། ཞེས་དང། རྐྱེན་གཞན་གྱི་སྟོབས་ཀྱིས་བྱུང་བ་ཞེས་སོགས་སྔར་དྲངས་པ་རྣམས་དང། ལང་གཤེགས་ལས། བརྟག་པའི་དངོས་པོ་མེད་པ་ཉིད། །གཞན་གྱི་དབང་ནི་ཡོད་པ་ཡིན། །སྒྲོ་འདོགས་པ་དང་སྐུར་འདེབས་པའི། །མཐའ་ལ་རྟོག་པ་རྣམ་པར་བརླག །ཅེས་པ་ལྟ་བུ་ཡིན་པའི་ཕྱིར། ཡང་ཁ་ཅིག་ན་རེ། འདིར་བསྟན་འཁོར་ལོ་དང་པོ་གཉིས་པོ་གང་རུང་ཡིན་ན་ཁྱོད་ཀྱི་གོང་ན་ངེས་དོན་གྱི་མདོ་གཞན་ཡོད་པས་ཁྱབ་པ་དང། འདིར་བསྟན་འཁོར་ལོ་ཐ་མ་ཡིན་ན་ཁྱོད་ཀྱི་གོང་ན་ངེས་དོན་གྱི་མདོ་གཞན་མེད་པས་ཁྱབ་པར་ཐལ། བླ་ན་མཆིས་པ་དང་བླ་ན་མ་མཆིས་པའི་དོན་བཤད་ཚུལ་འཐད་པའི་ཕྱིར། འདོད་ན། རིམ་བཞིན་བདག་ཅག་གི་སྟོན་པའི་ཐུགས་རྒྱུད་ཀྱི་འཁོར་ལོ་དང་པོ་གཉིས་དང། སློབ་པའི་རྒྱུད་ཀྱི་འཁོར་ལོ་ཐ་མ་རེ་རེ་ནས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། སྔ་མ་དོན་དམ་པའི་

― GTD002_Page_0659 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱབས་ཡིན་པས་དེ་ལས་མཆོག་ཏུ་གྱུར་པའི་ཆོས་མེད་པ་གང་ཞིག །ཕྱི་མ་ཀུན་རྫོབ་པའི་སྐྱབས་ཡིན་པས་ངོ་བོ་གོང་འཕེལ་དུ་འགྲོ་དགོས་པའི་ཕྱིར་ན། མ་ཁྱབ་སྟེ། དེའི་གོང་ན་ངེས་དོན་གྱི་མདོ་གཞན་ཡོད་མེད་ནི་བརྗོད་བྱ་སོགས་ཀྱི་སྒོ་ནས་ཡིན་གྱི། ངོ་བོ་མཆོག་དམན་གྱི་དབང་གིས་མ་ཡིན་པའི་ཕྱིར། གོང་གི་རྟགས་གྲུབ་སྟེ། རྒྱུད་བླ་མ་ལས། སྤངས་ཕྱིར་ཞེས་དང། ཆོས་རྣམ་གཉིས་གཏན་གྱི་སྐྱབས་གནས་མ་ཡིན་ཏེ། ཞེས་དང། དེའི་རྩ་བའི་དཔལ་འཕྲེང་གི་མདོ་ལས། ཆོས་ཞེས་བགྱི་བ་དེ་ནི། ཞེས་པ་ནས། སྐྱབས་འདི་གཉིས་ནི་དེའི་ཡན་ལག་གི་སྐྱབས་ཞེས་བགྱི་སྟེ་སྐྱབས་ཀྱི་རབ་མ་ལགས་སོ། །ཞེས་གསུངས་པའི་ཕྱིར། རང་ལུགས་ལ་འདིར་བསྟན་འཁོར་ལོ་དང་པོ་གཉིས་གང་རུང་ཡིན་ན་ཁྱོད་ཀྱི་གོང་ན་ངེས་དོན་གྱི་མདོ་གཞན་ཡོད་པས་མ་ཁྱབ་པར་ཐལ། བར་པ་མཚན་ཉིད་མེད་པའི་ཆོས་འཁོར་དེའི་གོང་ན་ངེས་དོན་གྱི་མདོ་གཞན་མེད་པའི་ཕྱིར། དེར་ཐལ། སངས་རྒྱས་འཇིག་རྟེན་དུ་བྱོན་པའི་དགོས་པའི་གཙོ་བོ་གདུལ་བྱ་འཁོར་བ་ལས་སྒྲོལ་བའི་ཆེད་ཡིན་ལ། འཁོར་རྩ་གཅོད་བྱེད་སྟོང་པ་ཉིད་རིགས་པའི་རྣམ་གྲངས་དང་སྒོ་མཐའ་ཡས་པས་གཏན་ལ་འབེབས་པ་ལ་ཤེར་མདོ་ལས་ལྷག་པ་མེད་པས་དེ་མདོ་སྡེ་ཀུན་གྱི་གཙོ་བོའམ་གོང་མར་འཇོག་དགོས་པའི་ཕྱིར། དེར་ཐལ། དེ་ལྟར་ཡིན་པ་གླེང་གཞི་དང་ཡོངས་གཏད་ཀྱིས་ཤེས་ཤིང་དེའི་རྒྱུ་མཚན་གྱིས་དེ་ལྟར་འདོད་པ་དབུ་སེམས་གཉིས་ཀ་མཐུན་པའི་ཕྱིར། རྣམ་བཤད་སྙིང་པོ་རྒྱན་ལས།

― GTD002_Page_0660 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་པར་རིག་པ་ཙམ་གྱི་ཤིང་རྟའི་སྲོལ་ཕྱེ་བ་ལྟར་ན། ཞེས་པ་ནས། དྲང་བའི་དོན་ཡིན་ཡང་རྣམ་པར་མི་རྟོག་པའི་ཡེ་ཤེས་ཀྱི་དམིགས་པ་འགྱུར་བ་མེད་པའི་ཡོངས་གྲུབ་ཀྱིས་བསྡུས་པའི་སྟོང་པ་ཉིད་རྒྱས་པར་གཏན་ལ་འབེབས་པ་མདོ་སྡེ་རྣམས་ཀྱི་གཙོ་བོ་ཡིན། ཞེས་གསུངས་པའི་ཕྱིར། གཞན་ཡང་ཤེར་མདོ་དང་དགོངས་འགྲེལ་གཉིས་ཀྱི་ནང་ནས་ཀྱང་ཤེར་མདོ་གོང་མར་བྱེད་དགོས་པར་ཐལ། དེའི་ཆེད་དུ་བྱ་བའི་གདུལ་བྱ་གཉིས་ཀྱི་ནང་ནས་ཤེར་མདོའི་ཆེད་དུ་བྱ་བའི་གདུལ་བྱ་གོང་མར་བྱེད་དགོས་པའི་ཕྱིར། དེར་ཐལ། དེས་དགོངས་འགྲེལ་སོགས་ལ་མ་བརྟེན་པར་ཤེར་མདོའི་དགོངས་པ་རྟོགས་ནུས་ལ། གཅིག་ཤོས་ཀྱིས་དེ་ལྟར་མི་ནུས་པས་དེ་ལ་ལྟོས་ཏེ་དབང་པོ་རྟུལ་བའི་ཕྱིར། རྣམ་བཤད་ལས། མདོ་སྡེ་རྣམས་ཀྱི་གཙོ་བོ་ཡིན་ཞིང་དེའི་ཆེད་དུ་བྱ་བའི་གདུལ་བྱས་ནི་མདོ་སྡེ་གཞན་གྱིས་དགོངས་པ་བཀྲལ་པ་ལ་ལྟོས་མི་དགོས་པར་དགོངས་པ་རྫོགས་པར་རྟོགས་ཤིང་སྒྲ་ཇི་བཞིན་པར་མི་འཛིན་ནོ། །མདོ་དགོངས་འགྲེལ་ལྟ་བུས་དེའི་དགོངས་པ་གསལ་བར་ཕྱེ་ནས་བསྟན་དགོས་པའི་རིགས་ཅན་རྣམས་ནི་ཐེག་པ་ཆེན་པོའི་རིགས་ཅན་ཡིན་ཡང་སྔ་མ་ལས་དབང་པོ་དམན་པ་ཡིན་ལ། ཞེས་གསུངས་པའི་ཕྱིར། ཁྱབ་སྟེ། ཐེག་པ་གསུམ་གྱི་སྡེ་སྣོད་དང་རྒྱུད་སྡེ་བཞིའི་གོང་འོག་གི་ཁྱད་པར་ཐམས་ཅད་གདུལ་བྱའི་དབང་པོ་མཆོག་དམན་གྱི་རིམ་པ་ཡིན་གྱི། བཀའ་རང་གི་ངོ་བོ་ལ་མཆོག་དམན་དབྱེ་དཀའ་བའི་ཕྱིར། གཞན་ཡང་དེ་མདོ་སྡེ་ཀུན་གྱི་གཙོ་བོར་བྱེད་རིགས་པར་ཐལ། དགོངས་འགྲེལ་ལས་ཀྱང་འཁོར་ལོ་ཐོག་མཐའ་གཉིས་ལ་

― GTD002_Page_0661 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་མཚར་རྨད་དུ་བྱུང་བ་ཙམ་ལས་མ་སྨོས་ཤིང། བར་བ་ལ་ཆེས་ངོ་མཚར་རྨད་དུ་བྱུང་བ་ཞེས་ཁྱད་པར་འབྱེད་དོན་ཡོད་པའི་ཕྱིར། བྱས་པ་ལ། དེ་མི་འཐད་པར་ཐལ། ཐ་མ་ལ་ཤིན་ཏུ་ངོ་མཚར་རྨད་དུ་བྱུང་བ་ཞེས་བྱུང་བའི་ཕྱིར་ཟེར་ན། དེ་མ་དག་པ་ཡིན་ཏེ། རྟག་བརྟན་དཔར་མ་དང་རྒྱ་ནག་འགྲེལ་ཆེན་ལས་དེ་ལྟར་འབྱུང་ཡང། སྔོན་གྱི་དཔེ་དག་པ་དུ་མ་དང་གཏན་ལ་དབབ་པ་བསྡུ་བར་དྲངས་པ་སོགས་སུ་མི་འབྱུང་བས་རྗེ་བླ་མས་ཀྱང་མ་བཀོད་པ་ཡིན་པའི་ཕྱིར། ཡང་ཁོ་ན་རེ། བར་བ་ལ་དགོངས་འགྲེལ་ལས་བླ་ན་མཆིས་པ་ཞེས་གསུངས་པ་མི་འཐད་པར་ཐལ། དེའི་གོང་ན་ངེས་དོན་གྱི་མདོ་གཞན་མེད་པའི་ཕྱིར་ན། མ་ཁྱབ། བརྗོད་བྱ་སྟོན་ཚུལ་གྱི་སྒོ་ནས་བླ་ན་མཆིས་པར་བཞག་པ་ཡིན་པའི་ཕྱིར། དེར་ཐལ། བརྗོད་བྱའི་སྒོ་ནས་མཆོག་དམན་འབྱེད་ཚུལ་བསྟན་པའི་སྙིང་པོ་སྟོང་པ་ཉིད་ཀྱི་རྣམ་གཞག་རྒྱས་མི་རྒྱས་ཀྱི་སྒོ་ནས་ཡིན། དེ་སྟོན་ཚུལ་གྱི་སྒོ་ནས་ཁྱད་འབྱེད་ཚེ་མ་སྦས་པར་སྒྲ་ཇི་བཞིན་དུ་སྟོན་མི་སྟོན་གྱི་སྒོ་ནས་ཡིན་པའི་ཕྱིར། དཔེར་ན་འཇིག་རྟེན་ན་གཙོ་བོ་རྒྱལ་པོ་ཡིན་ཀྱང་ལས་དོན་གསལ་པོར་སྟོན་པ་ལ་བློན་པོ་བཟང་བའི་སྐབས་སྲིད་པ་ལྟ་བུ་ཡིན་པའི་ཕྱིར། ཡང་ཁ་ཅིག་ན་རེ། འདིར་བསྟན་འཁོར་ལོ་དང་པོའི་ཆེད་དུ་བྱ་བའི་གདུལ་བྱ་ལ་ཐེག་དམན་གང་ཟག་གིས་ཁྱབ། བར་བའི་དེ་ལ་ཐེག་ཆེན་གང་ཟག་གིས་ཁྱབ། ཐ་མའི་དེ་ལ་རིགས་ཅན་གསུམ་ག་ཡོད་པར་ཐལ། རིམ་པ་བཞིན་མདོ་ལས། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་ཞེས་དང། ཐེག་པ་ཆེན་

― GTD002_Page_0662 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་ལ་ཡང་དག་པར་ཞུགས་པ་རྣམས་ལ་ཞེས་དང། ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ཞེས་གསུངས་པའི་ཕྱིར་ན། མ་ཁྱབ། འདིའི་ཐེག་པ་ཞེས་པ་དེ་དང་དེའི་ལམ་ལ་མི་བྱེད་པར་དེའི་ལམ་འབྲས་གཙོ་བོར་སྟོན་པའི་བཀའ་ལ་བྱེད་པའི་ཕྱིར། དེར་ཐལ། འཁོར་ལོ་དང་པོའི་ཆེད་དུ་བྱ་བའི་གདུལ་བྱས་འཁོར་ལོ་དང་པོ་ལ་ཆེད་དུ་བརྟེན་ནས་གང་ཟག་གི་བདག་མེད་ཀྱི་དབང་དུ་བྱས་པའི་མཚན་ཉིད་གསུམ་རྟོགས་ནུས་པ་དང། བར་བའི་གདུལ་བྱས་བར་བ་རང་ཉིད་ལ་བརྟེན་ནས་དེའི་དགོངས་གཞི་ཆོས་ཀྱི་བདག་མེད་ཀྱི་དབང་དུ་བྱས་པའི་མཚན་ཉིད་གསུམ་རྟོགས་ནུས་པ་དང། ཐ་མའི་ཆེད་དུ་བྱ་བའི་གདུལ་བྱས་དེ་ལ་བརྟེན་ནས་འཁོར་ལོ་གསུམ་གའི་དགོངས་པ་དང་དྲང་ངེས་ཀྱི་ཁྱད་པར་སོགས་རྟོགས་དགོས་པ་དེ་རིམ་བཞིན་ཉན་ཐོས་ཀྱི་ཐེག་པ་དང། ཐེག་པ་ཆེན་པོ་དང། ཐེག་པ་ཐམས་ཅད་ལ་ཞུགས་ཚུལ་ཡིན་པའི་ཕྱིར། ཞིབ་པར་ཀུན་མཁྱེན་བླ་མའི་གསུང་དུ་གསལ། དེས་ན་ཀུན་མཁྱེན་ཆོས་འབྱུང་གིས་ཀྱང། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་ཞེས་པའི་སྐབས་ཀྱི་ཐེག་པ་དེ་འཁོར་ལོ་དང་པོ་ལ་བྱེད། ཐེག་པ་ཆེན་པོ་ལ་ཡང་དག་པར་ཞུགས་པ་ཞེས་པའི་སྐབས་ཀྱི་ཐེག་པ་དེ་འཁོར་ལོ་བར་བ་ལ་བྱེད། ཐེག་པ་ཐམས་ཅད་ལ་ཡང་དག་པར་ཞུགས་པ་ཞེས་པའི་སྐབས་ཀྱི་ཐེག་པ་དེ་འཁོར་ལོ་གསུམ་ག་ལ་བྱེད་རིགས་པའི་ཕྱིར། ཞེས་གསུངས་སོ། །ཁོ་ན་རེ། དེ་མི་འཐད་པར་ཐལ། ཐེག་པ་ཞེས་པ་འདིར་བགྲོད་པའམ་འདིས་བགྲོད་པའི་ལམ་ལ་བྱེད་དགོས་ཀྱི། དེ་སྟོན་

― GTD002_Page_0663 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་གཞུང་ལ་བྱེད་པ་འབྲེལ་མེད་པའི་ཕྱིར་ཟེར་ན། མ་གྲུབ་སྟེ། རྟོག་གེ་འབར་བ་ལས། འབྲས་བུ་དང་བཅས་པའི་ཕ་རོལ་ཏུ་ཕྱིན་པ་དྲུག་ཅེས་བྱ་བའི་ལམ་དང་དེ་སྟོན་པར་བྱེད་པའི་གཙུག་ལག་ཀྱང་ཐེག་པ་ཆེན་པོ་ཞེས་བྱ་སྟེ། ཞེས་དང། བློ་བརྟན་གྱི་དབུས་མཐའི་འགྲེལ་བཤད་ལས། ཐེག་པ་ཆེན་པོ་འདི་སྟོན་པའི་མདོ་སྡེ་ལ་སོགས་པ་བཤད་པ་གང་ཡིན་པ་དེ་དག་ཀྱང་ཐེག་པ་ཆེན་པོ་ཡིན་ནོ། །ཞེས་གསུངས་པའི་ཕྱིར་དང། དེར་མ་ཟད་ངོ་བོ་ཉིད་མེད་པའི་རྒྱན་གྱི་འགྲེལ་བཤད་ལས། རིགས་ལ་ཐེག་པ་ཉེ་བར་བཏགས་པའི་ཕྱིར་རོ། །ཞེས་ཐེག་པ་དེ་དང་དེའི་རིགས་ལ་དེའི་ཐེག་པར་བཤད་པའི་སྐབས་ཀྱང་ཡོད་པའི་ཕྱིར། གཞན་ཡང་དེ་མི་འཐད་པར་ཐལ། མདོ་གཅིག་གི་ཆེད་དུ་བྱ་བའི་གདུལ་བྱ་ལ་ཐེག་པ་ཆེ་ཆུང་གཉི་གའི་གང་ཟག་འོང་མི་སྲིད་པའི་ཕྱིར། དེར་ཐལ། ཐེག་པ་ཆེ་ཆུང་གི་མདོའི་གཞི་མཐུན་མི་སྲིད་པའི་ཕྱིར། ཁྱབ་སྟེ། ཐེག་པ་ཆེ་ཆུང་གི་སྡེ་སྣོད་དུ་འཇོག་ཚུལ་ཆེད་དུ་བྱ་བའི་གདུལ་བྱའི་སྒོ་ནས་ཡིན་པའི་ཕྱིར། དཀའ་འགྲེལ་ལས། ཐེག་པ་ཆེ་ཆུང་གི་གསུང་རབ་གཉིས་ཆེད་དུ་བྱ་བའི་གདུལ་བྱ་ཐེག་ཆེན་གྱི་རིགས་ཅན་དང་ཐེག་དམན་གྱི་རིགས་ཅན་གཉིས་ལ་གཙོ་བོར་དགོངས་ནས་གསུངས་པའི་ཆ་ནས་རིམ་པ་ལྟར་སོ་སོར་འབྱེད་པར་སྔགས་རིམ་ཆེན་མོ་སོགས་རྗེའི་གསུང་རབ་ཇི་སྙེད་ཅིག་ལས་གསུངས་ཤིང། ཆེད་དུ་བྱ་བའི་གདུལ་བྱའི་སྒོ་ནས་ཐེག་པ་ཆེ་ཆུང་གི་གསུང་རབ་གཉིས་སོ་སོར་མི་འབྱེད་ན་དེ་གཉིས་སོ་

― GTD002_Page_0664 ―

^{[མ་དཔེ་གཟིགས་ན་འདིར་གནོན།]}

[Full Size]

སོར་འབྱེད་པའི་སྒོ་གཞན་མེད་པས། ཞེས་གསུངས་པའི་ཕྱིར། ཁྱབ་སྟེ། དེའི་རྒྱུ་མཚན་ཐེག་པ་གསུམ་སོ་སོར་འབྱེད་བྱེད་ནི་བསམ་པས་སེམས་བསྐྱེད་རྒྱ་ཆེ་ཆུང་དང། གང་ལ་ཆེད་དུ་བརྟེན་པའི་སྡེ་སྣོད་དང། དེ་ནས་བཤད་པ་ལྟར་གྱི་སྦྱོར་བ་དང། དེས་བསྒྲུབ་པའི་ཚོགས་རྒྱ་ཆེ་ཆུང། དེ་ལ་བརྟེན་པའི་འབྲས་བུ་མཆོག་དམན་ཏེ་ལྔས་འབྱེད་དགོས་པའི་ཕྱིར། མདོ་སྡེ་རྒྱན་ལས། བསམ་པ་དང་ནི་བཤད་ཉིད་དང། །སྦྱོར་བ་དང་ནི་ཚོགས་དག་དང། །འགྲུབ་པའི་རབ་ཏུ་དབྱེ་བ་ཡིས། །ཐེག་པ་རྣམ་པ་གསུམ་དུ་འདོད། །ཅེས་དང། དེའི་དབྱིག་འགྲེལ་ལས། དམན་པ་རྣམས་ནི་ཉན་ཐོས་ཀྱི་ཐེག་པའོ། །འབྲིང་རྣམས་ནི་རང་སངས་རྒྱས་ཀྱི་ཐེག་པའོ། །མཆོག་རྣམས་ནི་ཐེག་པ་ཆེན་པོ་སྟེ། བསམ་པ་ཇི་ལྟ་བ་དང། འདོད་པ་ཇི་ལྟ་བར་ཆོས་བཤད་པ་ཡིན་ནོ། །ཆོས་བཤད་པ་ཇི་ལྟར་དེ་ལ་སྦྱོར་རོ། །སྦྱོར་བ་ཇི་ལྟ་བར་ཚོགས་སོགས་སོ། །ཚོགས་ཇི་ལྟ་བར་བྱང་ཆུབ་ཡང་དག་པར་འགྲུབ་བོ། །ཞེས་གསུངས་པའི་ཕྱིར། དེ་ལ་ཁོ་ན་རེ། དེ་མི་འཐད་པར་ཐལ། འདིར་བསྟན་འཁོར་ལོ་དང་པོའི་ཆེད་དུ་བྱ་བའི་གདུལ་བྱ་བྱང་སེམས་ཡོད་པའི་ཕྱིར། དེར་ཐལ། སྐབས་འདིའི་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་དེ་ལ་བྱང་སེམས་ཡོད་པའི་ཕྱིར་ན། མ་ཁྱབ། རྟགས་གྲུབ་སྟེ། རེ་ཞིག་འཁོར་ལོ་དང་པོའི་སྒྲས་ཟིན་ཙམ་བསྟན་ནས་གང་ཟག་གི་བདག་མེད་ལ་དཀྲི་དགོས་པའི་བྱང་སེམས་ཡོད་པ་གང་ཞིག །དེ་སྐབས་འདིའི་ཉན་ཐོས་ཀྱི་ཐེག་པ་ལ་ཞུགས་པའི་དོན་ཡིན་པའི་ཕྱིར། དེར་ཐལ། དང་པོའི་གདུལ་བྱས་དང་པོ་ལ་བརྟེན་ནས་དེ་ཙམ་

― GTD002_Page_0665 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་རྟོགས་ནུས་ལ། བར་པའི་དགོངས་གཞི་ཆོས་ཀྱི་བདག་མེད་རྟོགས་མི་ནུས་པས་དེ་ཉན་ཐོས་ཀྱི་ཐེག་པ་ཙམ་ལ་ཞུགས་པར་བཤད། ཐ་མའི་གདུལ་བྱས་ཐ་མ་ལ་བརྟེན་ནས་འཁོར་ལོ་སྔ་མ་གཉི་གའི་དགོངས་གཞི་གང་ཟག་དང་ཆོས་ཀྱི་བདག་མེད་གཉི་ག་ཚང་བར་རྟོགས་ནུས་པས་ཐེག་པ་ཐམས་ཅད་ལ་ཞུགས་པར་བཤད་པ་ཡིན་པའི་ཕྱིར། འདི་ཉིད་ལས། འཁོར་ལོ་དང་པོ་གསུངས་པའི་གདུལ་བྱ་ནི་གང་ཟག་གི་བདག་མེད་ཀྱི་དབང་དུ་བྱས་པའི་མཚན་ཉིད་ངོ་བོ་ཉིད་མེད་པ་རྟོགས་པའི་སྣོད་དུ་རུང་ལ། ཆོས་ཀྱི་བདག་མེད་ཀྱི་དབང་དུ་བྱས་པའི་མཚན་ཉིད་ངོ་བོ་ཉིད་མེད་པ་རྟོགས་པའི་སྣོད་དུ་མི་རུང་བ་ལ་གསུངས་པར་དགོངས་འགྲེལ་གྱིས་ཤུགས་ཀྱིས་འགྲེལ་པས། ལེགས་པར་རྣམ་པར་ཕྱེ་བའི་ཆོས་འཁོར་ཐེག་པ་ཐམས་ཅད་ལ་ཞུགས་པའི་ཆེད་དུ་གསུངས་པའི་དོན་ནི་དེའོ། །ཞེས་གསུངས་པའི་ཕྱིར། དེར་མ་ཟད་བྱེ་མདོ་གཉིས་ལ་ཉན་ཐོས་པ་དང། དབུ་སེམས་གཉིས་ལ་ཐེག་ཆེན་པ་ཞེས་པའང་དེ་དང་དེའི་སྡེ་སྣོད་ལ་བརྟེན་ནས་གྲུབ་མཐའ་འཛིན་ཚུལ་ཡིན་གྱི། སྔ་མར་བྱང་སེམས་དང་ཕྱི་མར་ཉན་རང་འཕགས་པ་ཐམས་ཅད་ཡོང་བས་ཉན་ཐོས་དང་ཐེག་ཆེན་གང་ཟག་དངོས་ལ་བྱེད་མི་རུང་བའི་ཕྱིར་ཏེ། སྟག་ལོ་སོགས་སྔ་མ་མང་པོས་ཐེག་པ་གསུམ་དང་གྲུབ་མཐའ་བཞི་སྦྱར་བ་སོགས་འབྲེལ་མེད་མང་དུ་བཤད་པའི་འཁྲུལ་གཞིའང་འདི་འདྲ་ཡིན་པའི་ཕྱིར། ཐུབ་བསྟན་བྱི་དོར་ལས། ཐེག་ཆེན་པའི་གྲུབ་མཐའ་དང་ཐེག་ཆེན་པའི་གང་ཟག་གཅིག་ཏུ་འཁྲུལ་བའི་ནོར་བ་ཆེན་པོ་སྟེ། ཞེས་དང། སྟོང་ཐུན་ལས་ཀྱང་དེ་བཞིན་གསུངས་ལ། གྲུབ་མཐའ་རྩ་བར།

― GTD002_Page_0666 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེག་གསུམ་ལ་སྡུད་གསུམ་འདོད་ལྔར་དབྱེ་འཁྲུལ། །ཞེས་པ་རྩ་འགྲེལ་གྱིས་ཀྱང་ཁེགས་སོ། །གོང་དུ་འདོད་མི་ནུས་ཏེ། ཐེག་པ་དམན་པའི་སྡེ་སྣོད་ཀྱི་ཆེད་དུ་བྱ་བའི་གདུལ་བྱར་ཐེག་ཆེན་གང་ཟག་འཇོག་པ་འབྲེལ་མེད་ཡིན་པའི་ཕྱིར། དེར་ཐལ། ཐེག་པ་ཆེན་པོར་འགྲོ་བ་ལ་ཐེག་པ་ཆེན་པོའི་སྡེ་སྣོད་ལ་སློབ་པ་སོགས་བདུན་གྱི་སྒོ་ནས་འཇོག་པའི་ཕྱིར། རྒྱན་ལས། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དག་དང། །ཡེ་ཤེས་བརྩོན་འགྲུས་རྩོམ་པ་དང། །ཐབས་ལ་མཁས་པར་གྱུར་པ་དང། །ཡང་དག་འགྲུབ་པ་ཆེན་པོ་དང། །སངས་རྒྱས་འཕྲིན་ལས་ཆེན་པོ་སྟེ། །ཆེན་པོ་འདི་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་དང། འགྲེལ་པ་ལས། ཆེན་པོ་ཉིད་རྣམ་པ་བདུན་དང་ལྡན་པའི་ཕྱིར་ཐེག་པ་ཆེན་པོ་ཞེས་ངེས་པར་བརྗོད་དེ་དམིགས་པ་ཆེན་པོ་ཉིད་ནི་མདོའི་སྡེ་ལ་སོགས་པའི་ཆོས་རྒྱ་ཆེན་པོ་དཔག་ཏུ་མེད་པ་དང་ལྡན་པའི་ཕྱིར་རོ། །ཞེས་གསུངས་པའི་ཕྱིར། དེ་ལ་ཁོ་ན་རེ། འདིར་བསྟན་འཁོར་ལོ་དང་པོའི་ཆེད་དུ་བྱ་བའི་གདུལ་བྱ་ལ་ཐེག་ཆེན་གང་ཟག་མེད་པ་སོགས་མི་འཐད་པར་ཐལ། དྲང་ངེས་རྣམ་འབྱེད་ཀྱི་མཐའ་དཔྱོད་ལས། འོ་ན། འཁོར་ལོ་དང་པོའི་ཆེད་དུ་བྱ་བའི་གདུལ་བྱ་ལ་ཉན་ཐོས་ཀྱིས་ཁྱབ་པ་དང། འཁོར་ལོ་བར་བའི་ཆེད་དུ་བྱ་བའི་གདུལ་བྱ་ལ་ཐེག་ཆེན་གང་ཟག་གིས་ཁྱབ་པར་ཐལ། འདོད་པའི་ཕྱིར། འདོད་ན། དེ་མི་འཐད་པར་ཐལ། ཞེས་སོགས་ཀྱིས་སྒྲུབ་ཚུལ་ཡོད་པའི་ཕྱིར་ན། མ་ཁྱབ་སྟེ། དང་པོ་གཉིས་ཉན་ཐོས་ཀྱི་ཐེག་པ་དང་ཐེག་པ་ཆེན་པོ་ལ་ཞུགས་ཞེས་པའི་ཐེག་པ་གཉིས་དེ་དང་དེའི་ལམ་དངོས་ལ་བྱེད་ན་ཐེག་པ་

― GTD002_Page_0667 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་ལ་ཞུགས་ཞེས་པ་འདི་ཐེག་པ་གསུམ་གའི་ལམ་དངོས་ལ་བྱེད་པ་ལས་འོས་མེད་པས་གཙོ་བོར་དེ་འགོག་པ་ཡིན་ལ། ཡང་དེར་ཐེག་དམན་རིགས་ཅན་དགོས་ཀྱང་ཐེག་དམན་ལམ་ཞུགས་མི་དགོས་པས་ཕ་རོལ་པོ་ཉན་ཐོས་ཀྱིས་ཁྱབ་པར་འདོད་པའང་བཀག་ཆོག་པའི་ཕྱིར། ཡང་ཁ་ཅིག །འཁོར་ལོ་དང་པོའི་སྐབས་སུ་ཉན་ཐོས་ཀྱི་ཐེག་པ་ལ་ཞུགས་ཞེས་པ་ནི་ཉན་ཐོས་དངོས་ལ་བྱེད་པར་ཐལ། དགོངས་ལྡེམ་དགོངས་ཀྱི་སྒོ་ནས་དྲང་ངེས་འབྱེད་ཚུལ་འཁོར་ལོ་དང་པོར་གང་ཟག་གི་བདག་མེད་ལ་གཞུག་པའི་ཕྱིར་ཕུང་སོགས་བསྟན་པ་དེ་དགོས་དབང་གིས་གསུངས་པས་གཞུག་པ་ལྡེམ་དགོངས་སུ་འགྲོ་ཚུལ་ཤེས་ནས་དྲང་དོན་དུ་འགྲེལ་པ་དང། བར་བས་ཆོས་ཐམས་ཅད་ངོ་བོ་ཉིད་མེད་པར་གསུངས་པ་དེ་རང་བཞིན་གྱིས་གྲུབ་པའི་ངོ་བོ་གཏན་ནས་མེད་པ་མ་ཡིན་པར་མཚན་ཉིད་གསུམ་སོ་སོའི་དབང་དུ་བྱས་པའི་མེད་ལུགས་རེ་ཡོད་པས་མཚན་ཉིད་ལྡེམ་དགོངས་དང། དོན་གཞན་ལ་དགོངས་པར་ཤེས་ནས་དྲང་དོན་དུ་འགྲེལ་པ་ཡིན་པ་གང་ཞིག །སྔ་མའི་སྒོ་ནས་བསྟན་པར་གཞུག་དགོས་ཀྱི་གདུལ་བྱ་དེར་ཉན་ཐོས་ཀྱིས་ཁྱབ་པའི་ཕྱིར། དེར་ཐལ། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། ཉན་ཐོས་དག་མི་སྐྲག་ཅིང་བསྟན་པར་གཟུང་བ་དང་ཆོས་ཡོད་པར་བཤད་པའི་སྒོ་ནས་གང་ཟག་ལ་བདག་མེད་པར་རྟོག་པར་བྱ་བའི་ཕྱིར་གཟུགས་ལ་སོགས་པའི་ཆོས་ཡོད་ཅེས་བཤད་པར་ནི་རྗེས་སུ་གཞུག་པའི་དགོངས་པ་ཞེས་བྱའོ། །ཞེས་གསུངས་པའི་ཕྱིར་ན། མ་ཁྱབ་སྟེ། ཕལ་ཆེ་བ་ལ་དགོངས་པའི་ཕྱིར། མཁས་

― GTD002_Page_0668 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་རྟོགས་དཀའི་སྣང་བར་ཐེག་པ་ཐམས་ཅད་ལ་ཞུགས་ཞེས་པ་དགོངས་འགྲེལ་གྱི་ཆེད་དུ་བྱ་བའི་གདུལ་བྱ་དེ་ཐེག་ཆེན་རིགས་ཅན་ཡིན་ཀྱང་དབང་པོ་རྟུལ་བས་ཐེག་པ་གཞན་དུ་དཀྲིར་རུང་བ་ལ་གསུངས་པའང་སྔ་མའི་བཤད་པ་བཀོད་ཙམ་ཡིན་པས་རང་ལུགས་སུ་མི་རུང་ངོ་། །ཁ་ཅིག་ན་རེ། འདིར་བསྟན་འཁོར་ལོ་ཐ་མ་གསར་དུ་བསྐོར་བའི་ཚེ་དེའི་ཆེད་དུ་བྱ་བའི་གདུལ་བྱ་མེད་པར་ཐལ། དེ་དུས་ཀྱི་གདུལ་བྱ་ལ་ཐེག་པ་ཐམས་ཅད་ལ་ཡང་དག་པར་ཞུགས་པའི་དོན་མ་ཚང་བའི་ཕྱིར། དེར་ཐལ། དེས་འཁོར་ལོ་ཐ་མ་ལ་བརྟེན་ནས་འཁོར་ལོ་དང་པོ་གཉིས་ཀྱི་དགོངས་དོན་མ་རྟོགས་པའི་ཕྱིར། དེར་ཐལ། དེ་ལ་བརྟེན་ནས་དེ་གཉིས་ཀྱི་དགོངས་པ་རྟོགས་དགོས་ཀྱི་གང་ཟག་ཡིན་པའི་ཕྱིར། དེར་ཐལ། དེའི་ཚེ་འཁོར་ལོ་ཐ་མ་གསུངས་མ་ཐག་ཡིན་པ་གང་ཞིག །དེ་ལ་བརྟེན་ནས་སྔ་མ་གཉིས་ཀྱི་དགོངས་དོན་རྟོགས་པ་དགོས་སོགས་ཆོས་བཞིའི་ནང་གི་དགོས་པ་ཡིན་པས། དེའི་སྔོན་དུ་དེའི་བརྗོད་དོན་ལ་ཐོས་སོགས་ཀྱིས་ཞུགས་པ་འགྲོ་དགོས་པའི་ཕྱིར། གཞན་ཡང་འདི་ཉིད་ལས། གདུལ་བྱ་ནི་ཐེག་པ་ཐམས་ཅད་ལ་ཞུགས་པ་སྟེ་སྔ་མ་གཉིས་ནི་ཐེག་པ་ཆེ་ཆུང་སོ་སོ་བ་ཡིན་ལ། འདི་ནི་གཉི་གའི་དབང་དུ་བྱས་པའོ་ཞེས་གསུངས་པ་དང་ཡང་མི་འགྲིག་པར་ཐལ། ཁྱོད་ཀྱིས་བཤད་ཚུལ་ལྟར་ན་འཁོར་ལོ་བར་བའི་ཆེད་དུ་བྱ་བའི་གདུལ་བྱའང་ཐེག་པ་ཐམས་ཅད་ལ་ཞུགས་པར་འཇོག་དགོས་པའི་ཕྱིར། དེར་ཐལ། དེས་འཁོར་ལོ་དང་པོ་དང་བར་བ་གཉི་གའི་དགོངས་གཞི་རྫོགས་པར་རྟོགས་པའི་ཕྱིར། ཁྱབ་སྟེ། དེ་ཐེག་པ་ཐམས་ཅད་ལ་ཞུགས་པའི་དོན་ཡིན་པའི་ཕྱིར།

― GTD002_Page_0669 ―

^{[མ་དཔེ་གཟིགས་ན་འདིར་གནོན།]}

[Full Size]

རྟགས་ཁས། མ་ཁྱབ་མཚམས་ཀྱི་རྟགས་གྲུབ་སྟེ། ཐ་མའི་ཆེད་དུ་བྱ་བའི་གདུལ་བྱས་དེ་ལྟར་རྟོགས་པ་གང་ཞིག །བར་པའི་གདུལ་བྱ་ནི་དེ་ལས་ཀྱང་ལྷག་པར་དབང་པོ་རྣོ་བ་ཞིག་ཡིན་པའི་ཕྱིར། དེས་ན་འདིར། ཐེག་པ་ཐམས་ཅད་ལ་ཡང་དག་པར་ཞུགས་པའི་ཆེད་དུ་གསུངས་པའི་དོན་དེའོ། །ཞེས་སོགས་ཀྱང་འཁོར་ལོ་ཐ་མས་འཁོར་ལོ་དང་པོ་གཉིས་ཀྱི་དགོངས་པ་འགྲེལ་ཚུལ་སྟོན་པ་ཡིན་གྱི། དེའི་ཆེད་དུ་བྱ་བའི་གདུལ་བྱ་ངོས་བཟུང་བ་མིན་ཏེ། ཡང་དག་པར་ཞུགས་པའི་དོན་དེའོ་ཞེས་མ་གསུངས་པར། ཡང་དག་པར་ཞུགས་པའི་ཆེད་དུ་གསུངས་པའི་དོན་དེ་དེའོ་ཞེས་འབྱུང་བའི་ཕྱིར། དེས་ན་སོ་སོར་ཞུགས་པ་དང་ཐམས་ཅད་ལ་ཞུགས་པའི་གོ་དོན་སོ་སོའི་དགོངས་དོན་ལ་དོགས་པ་སྐྱེས་པ་དང་སྔ་མ་གཉི་གའི་དགོངས་དོན་ལ་དོགས་པ་སྐྱེས་ནས་ཞུགས་པའི་དོན་ཡིན་ཞེས་པཎ་ཆེན་བསོད་གྲགས་ཀྱི་དྲང་ངེས་རྣམ་འབྱེད་ལས་བཤད་དོ། །དེ་མི་འཐད་པར་ཐལ། གསུང་འདིས་དེའི་ཆེད་དུ་བྱ་བའི་གདུལ་བྱ་ངོས་བཟུང་བ་ཡིན་པའི་ཕྱིར། དེར་ཐལ། དེས་གདུལ་བྱ་ཇི་ལྟ་བུ་ཞིག་གི་ཆེད་དུ་གསུངས་ཚུལ་བསྟན་པ་ཡིན་པའི་ཕྱིར། དེར་ཐལ། གདུལ་བྱ་ནི་ཐེག་པ་ཐམས་ཅད་ལ་ཞུགས་པ་སྟེ་ཞེས་དེས་གདུལ་བྱ་ངོས་བཟུང་བ་ཡིན་པ་བསྙོན་མེད་ལ། དེའི་ཆེད་དུ་གསུངས་པར་ཡང་གཞུང་ཚིག་གིས་དངོས་སུ་ཐོན་ཅིང་རང་གིས་ཀྱང་ཁས་བླངས་པའི་ཕྱིར། ཁྱབ་སྟེ། གདུལ་བྱ་འདི་ལྟ་བུ་ཞིག་གི་ཆེད་དུ་གསུངས་ཞེས་སྟོན་པ་ལ་དེ་ལྟ་བུའི་གདུལ་བྱ་དེ་ངོས་འཛིན་དགོས་པའི་ཕྱིར། བར་པའི་གདུལ་བྱ་ཐེག་པ་ཐམས་ཅད་ལ་ཞུགས་པར་ཐལ་བའི་སྐྱོན་

― GTD002_Page_0670 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་འདྲ་བར་ཐལ། བར་བའི་གདུལ་བྱ་དེས་འཁོར་ལོ་དང་པོ་གཉི་གའི་སྒྲས་ཟིན་ལ་དོགས་པ་ཞུགས་པའི་ཕྱིར། དེར་ཐལ། དང་པོའི་སྒྲས་ཟིན་ལྟར་རང་མཚན་གྱིས་ཡོད་མཉམ་དུ་བཟུང་ན་རྟག་མཐའ་དང། བར་བའི་སྒྲས་ཟིན་ལྟར་རང་མཚན་གྱིས་མེད་མཉམ་དུ་བཟུང་ན་ཆད་མཐའ་འགྲོ་ཚུལ་ལ་དོགས་པ་ཆོད་དེ་སེམས་ཙམ་གྱི་ལྟ་བ་མཐར་ཐུག་རྙེད་པའི་ཕྱིར། བྱས་པ་ལ། དེ་འགལ་ཁྱབ་ཡིན་ཏེ། དང་པོའི་སྒྲས་ཟིན་ལ་དོགས་པ་ཆོད་ན་དེར་དོགས་པ་ཆོད་དགོས་པའི་ཕྱིར་ཟེར་ན། འོ་ན་བར་བའི་སྒྲས་ཟིན་ལའང་དོགས་པ་མེད་པར་ཐལ། དེར་དོགས་པ་ཆོད་པའི་ཕྱིར། དེར་ཐལ། དེའི་དགོངས་གཞི་རྟོགས་པའི་ཕྱིར། རྟགས་ཁས། གོང་དུ་འདོད་མི་ནུས་ཏེ། དེར་དོགས་པ་སྐྱེས་པའི་ཕྱིར། མ་གྲུབ་ན། དེར་དོགས་པ་ཞུགས་པ་དེ་ཐེག་པ་དེ་ལ་ཞུགས་པའི་དོན་དུ་རང་གིས་ཁས་བླངས་པ་དང་འགལ་ལོ། །ཁོ་ན་རེ། དགོངས་འགྲེལ་གྱི་ཆེད་དུ་བྱ་བའི་གདུལ་བྱར་ཐེག་པ་ཆེ་ཆུང་གཉི་གའི་གང་ཟག་ཡོད་པར་ཐལ། དགོངས་འགྲེལ་ཐེག་པ་ཆེ་ཆུང་གཉི་གའི་མདོའི་དགོངས་འགྲེལ་ཡིན་པའི་ཕྱིར། དེར་ཐལ། དེ་འཁོར་ལོ་རིམ་པ་གསུམ་གའི་དགོངས་འགྲེལ་ཡིན་པའི་ཕྱིར། དེར་ཐལ། འཁོར་ལོ་གསུམ་གའི་དྲང་ངེས་ཀྱི་ཁྱད་འབྱེད་པའི་དགོངས་འགྲེལ་ཡིན་པའི་ཕྱིར་ན། མ་ཁྱབ། ཚད་མ་རྣམ་འགྲེལ་ཆོས་ཅན། ཕྱི་རོལ་པའི་ལྟ་བ་སྟོན་པའི་བསྟན་བཅོས་ཡིན་པར་ཐལ། ཕྱི་ནང་གཉི་གའི་ལྟ་བའི་ཁྱད་པར་འབྱེད་པའི་བསྟན་བཅོས་ཡིན་པའི་ཕྱིར་ཏེ། སྟོན་པ་བསྟན་པ་ལྟ་བ་གསུམ་གྱི་སྒོ་ནས་ཕྱི་ནང་གི་ཁྱད་པར་འབྱེད་

― GTD002_Page_0671 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་བསྟན་བཅོས་ཡིན་པའི་ཕྱིར། ཁྱབ་པ་འགྲིག །གོང་དུ། དེར་ཐལ། འཁོར་ལོ་གསུམ་གའི་དགོངས་པ་འགྲེལ་པའི་ཕྱིར་ན། མ་ཁྱབ་སྟེ། བར་བའི་དགོངས་པ་གཙོ་བོ་འགྲེལ་ཅིང་དང་པོའི་དགོངས་པ་ཞར་བྱུང་ཙམ་དུ་འགྲེལ་པ་ཡིན་པས་དང་པོའི་དགོངས་འགྲེལ་དུ་མི་འཇོག་པར་ཡིག་ཆར་གསུངས་པ་བཞིན་ཡིན་པའི་ཕྱིར། བྱས་པ་ལ། ཡིག་ཆའི་བཤད་ཚུལ་ལའང་ནང་འགལ་ཡོད་པར་ཐལ། བཀའ་བསྟན་བཅོས་སྐབས་ཀྱི་མཐའ་དཔྱོད་ལས། འཁོར་ལོ་གསུམ་གའིདགོངས་འགྲེལ་ཀུན་བཏུས་དང། དབུ་མ་སྣང་བ་དང། དབུ་མ་རྒྱན་ལྟ་བུ། གསུང་རབ་ཐམས་ཅད་ཀྱི་དགོངས་འགྲེལ་ལམ་སྒྲོན་དང། ལམ་རིམ་གཉིས་དང་ཐུབ་དགོངས་ལྟ་བུ། ཞེས་འབྱུང་བས་དེ་དག་ཀྱང་ཐེག་པ་ཆེ་ཆུང་གཉི་གའི་བསྟན་བཅོས་སུ་འགྱུར་དགོས་པའི་ཕྱིར་ཟེར་ན། མི་མཚུངས་ཏེ། དགོངས་འགྲེལ་གྱིས་ཐེག་པ་ཆེ་ཆུང་གཉི་གའི་མདོའི་དགོངས་པ་འགྲེལ་ཀྱང་གཙོ་ཆེ་ཆུང་ཡོད། ཀུན་བཏུས་ཀྱིས་དེ་གཉི་གའི་དགོངས་པ་འགྲེལ་ཚུལ་ལ་གཙོ་ཆེ་ཆུང་མེད་པར་ཆ་མཉམ་དུ་འགྲེལ་པས་གཉི་གའི་དགོངས་འགྲེལ་དུ་འཇོག་དགོས་ཀྱང་ཆེད་དུ་བྱ་བའི་གདུལ་བྱ་ཐེག་ཆེན་རིགས་ཅན་ཡིན་པས་ངོ་བོ་ཐེག་ཆེན་གྱི་བསྟན་བཅོས་སུ་འཇོག་དགོས་པའི་ཕྱིར། ཁོ་ན་རེ། ཀུན་བཏུས་ཐེག་ཆེན་གྱི་བསྟན་བཅོས་མ་ཡིན་པར་ཐལ། གྲུབ་མཐའ་ཆེན་མོ་ལས། ཀུན་བཏུས་ལས་ལོངས་སྐུའང་མ་བསྟན་ལ། ས་བཅུ་ལའང་མིང་ཙམ་ལས་མེད་པས་ཐེག་ཆེན་གྱི་དགོངས་འགྲེལ་མིན་ནོ། །ཞེས་གསུངས་པའི་

― GTD002_Page_0672 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ན། མ་ཁྱབ་སྟེ། ཐེག་ཆེན་ཐུན་མོང་མ་ཡིན་པའི་དེ་མིན་ཞེས་པའི་དོན་ཡིན་པའི་ཕྱིར། འདོད་མི་ནུས་ཏེ། རྒྱུད་སྡེ་སྤྱི་རྣམ་ལས། སྡོམ་རྣམ་པ་གཉིས་ནི་འཁོར་ལོ་ཐ་མའི་དགོངས་འགྲེལ་ལྟ་བ་གཙོ་བོར་སྟོན་པའི་བསྟན་བཅོས་ཏེ། ཞེས་གསུངས་པའི་ཕྱིར། གཞན་ཡང་ཐེག་པ་ཆེ་ཆུང་གི་སྡེ་སྣོད་མི་འགལ་བར་ཐལ། གཏན་ལ་དབབ་པའི་སྡེ་དེ་ཐེག་པ་ཆེ་ཆུང་གཉི་གའི་སྡེ་སྣོད་ཡིན་པའི་ཕྱིར། དེར་ཐལ། དེ་དེ་གཉི་གའི་མངོན་པའི་སྡེ་སྣོད་ཡིན་པའི་ཕྱིར། དེར་ཐལ། ཀུན་བཏུས་ལས། གཏན་ལ་དབབ་པ་བསྟན་པའི་སྡེ་ནི་གཉི་གའི་མངོན་པའི་སྡེ་སྣོད་དོ། །ཞེས་གསུངས་པའི་ཕྱིར་ན། མ་ཁྱབ་སྟེ། དེ་ལ་ནང་གསེས་ཀྱིས་ཐེག་པ་ཆེ་ཆུང་གི་མངོན་པ་གཉིས་འབྱེད་རྒྱུ་ཡོད་པའི་དོན་ཡིན་པའི་ཕྱིར། ཡང་ཁོ་ན་རེ། ཐེག་པ་ཆེ་ཆུང་གཉི་གའི་སྡེ་སྣོད་ཀྱི་ཡིན་པ་ཡོད་པར་ཐལ། ཐེག་པ་ཆེ་ཆུང་ཐུན་མོང་གི་སྡེ་སྣོད་ཀྱི་ཡིན་པ་ཡོད་པའི་ཕྱིར་ན། མ་ཁྱབ། འོ་ན་ཐེག་པ་ཆེ་ཆུང་གཉི་གའི་ལམ་གྱི་ཡིན་པ་ཡོད་པར་ཐལ། ཐེག་པ་ཆེ་ཆུང་ཐུན་མོང་གི་ལམ་གྱི་ཡིན་པ་ཡོད་པའི་ཕྱིར། དེར་ཐལ། སྐྱེས་བུ་ཆེ་འབྲིང་ཐུན་མོང་གི་ལམ་གྱི་ཡིན་པ་ཡོད་པའི་ཕྱིར། དེར་ཐལ། མི་རྟག་སོགས་བཅུ་དྲུག་རྟོགས་པའི་ལམ་དེ་ཡིན་པའི་ཕྱིར་ཏེ། རྗེ་བླ་མས། ལམ་མཆོག་གཉིས་ཀར་དགོས་པའི་ཐུན་མོང་ལམ། །ཞེས་གསུངས་པའི་ཕྱིར། དེ་ལ་ཁ་ཅིག་ཉན་ཐོས་དང་བྱང་སེམས་ཀྱི་སྡེ་སྣོད་མི་འགལ་བར་ཐལ། དེ་གཉི་གའི་ལམ་གྱི་གཞི་མཐུན་མེད་ཀྱང་སྡེ་སྣོད་ཀྱི་གཞི་མཐུན་བཞག་ཆོག་པའི་ཕྱིར། དེར་ཐལ། ཉན་ཐོས་དང་རང་རྒྱལ་གཉི་གའི་སྡེ་

― GTD002_Page_0673 ―

^{[མ་དཔེ་གཟིགས་ན་འདིར་གནོན།]}

[Full Size]

སྣོད་ཀྱི་གཞི་མཐུན་བཞག་ཆོག་པའི་ཕྱིར་ན། མ་ཁྱབ། རང་རྒྱལ་གྱིས་ཀྱང་ཉན་ཐོས་ཀྱི་སྡེ་སྣོད་ལ་བརྟེན་ནས་ལམ་ལ་སློབ་པ་མ་གཏོགས་རང་གི་སྡེ་སྣོད་ཟུར་བ་མེད་པའི་ཕྱིར། རྟགས་ཟུར་དང་པོ་གྲུབ་སྟེ། ཀུན་བཏུས་ལས། རང་སངས་རྒྱས་ཀྱི་ཐེག་པ་གང་ཞེ་ན་བདག་ཉིད་མངོན་པར་རྫོགས་པར་སངས་རྒྱས་པའི་བསམ་པ་ཅན་དང་ཉན་ཐོས་ཀྱི་སྡེ་སྣོད་ཉིད་ལ་དམིགས་ནས་ཆོས་ཀྱི་རྗེས་སུ་མཐུན་པའི་ཆོས་བསྒྲུབ་པ། ཞེས་གསུངས་པའི་ཕྱིར། ཟུར་ཕྱི་མ་གྲུབ་སྟེ། དེའི་རྒྱུ་མཚན་གྱིས་བཀའ་ཐམས་ཅད་ཉན་ཐོས་ཀྱི་ཐེག་པའི་ཆོས་འཁོར་དང། བྱང་སེམས་ཀྱི་ཐེག་པའི་ཆོས་འཁོར་གཉིས་སུ་གྲངས་ངེས་པའི་ཕྱིར། མྱང་འདས་རྒྱ་ནག་མ་ལས། རིགས་ཀྱི་བུ་གཞན་ཡང་གང་ཟག་ལ་རྣམ་པ་གཉིས་ཏེ། དབང་པོ་འབྲིང་དང་དབང་པོ་རབ་བོ། དབང་པོ་འབྲིང་ལ་ནི་ཝ་ར་ཎཱ་སིར་ཆོས་ཀྱི་འཁོར་ལོ་བསྐོར་ཏེ། དབང་པོ་རབ་ལ་ནི་མིའི་ནང་ནས་ཁྱུ་མཆོག་གི་རྒྱལ་པོ་ལྟ་བུ་བྱང་ཆུབ་སེམས་དཔའི་འཁོར་ལོ་བསྐོར་རོ། །རིགས་ཀྱི་བུ་དབང་པོ་ཐ་མ་ལ་ནི་དེ་བཞིན་གཤེགས་པས་ཆོས་ཀྱི་འཁོར་ལོ་མི་བསྐོར་ཏེ། དབང་པོ་ཐ་མ་ཞེས་བྱ་བ་ནི་ལོག་སྲེད་ཅན་དག་གོ །ཞེས་གསུངས་པའི་ཕྱིར། འདིས་ནི་པཎྚི་ཏ་གཞན་ཕན་བཟང་པོ་རིགས་མེད་ལ་མངོན་མཐོའི་ཆོས་འཁོར་ཟུར་དུ་བསྐོར་ཟེར་བ་དང། བྲམ་ཟེ་སཛྫ་ནས་རང་རྒྱལ་རིགས་ཅན་ལ་དེའི་ཆོས་འཁོར་ཟུར་དུ་བསྐོར་ཟེར་བ་གཉིས་ཀྱང་ཁེགས་སོ། །ཡང་ཁ་ཅིག་ཐེག་པ་ཆེ་ཆུང་གི་མདོའི་ཡིན་པ་ཡོད་པར་ཐལ། དབུ་སེམས་གཉི་གའི་མདོའི་ཡིན་པ་ཡོད་པའི་ཕྱིར། དེར་ཐལ། ཤེར་མདོ་དེ་ཡིན་པའི་ཕྱིར།

― GTD002_Page_0674 ―

^{[མ་དཔེ་གཟིགས་ན་འདིར་གནོན།]}

[Full Size]

དེར་ཐལ། དེ་དེ་གཉི་གས་རང་གཞུང་དུ་ཁས་ལེན་པའི་ཕྱིར་ན། མ་ཁྱབ་སྟེ། རང་རང་གིས་དེ་ལྟར་ཁས་ལེན་ཀྱང་སེམས་ཙམ་པས་གཞལ་ན་ཅིག་ཤོས་ཀྱི་རང་གཞུང་དུ་མ་སོང་བའི་ཕྱིར། དེར་ཐལ། དེས་དེ་དགོངས་པ་ཅན་ཡིན་པ་མ་ཤེས་པར་སྒྲ་ཇི་བཞིན་དུ་ཞེན་ནས་ཉམས་པར་བྱས་པ་ཡིན་གྱི། རང་གཞུང་བྱས་ཏེ་གཏན་ལ་བབ་པར་མ་སོང་བའི་ཕྱིར། རྣམ་བཤད་རིགས་པ་ལས། དེ་ལྟ་བས་ན་ཐེག་པ་ཆེན་པོ་ནི་དགོངས་པ་ཅན་གྱི་དོན་ཡིན་པའི་ཕྱིར་ཉམས་པར་བྱེད་ཀྱི་གཞུང་དུ་བྱས་པ་མ་ཡིན་ནོ། །ཞེས་གསུངས་པའི་ཕྱིར། ཡང་ཁོ་ན་རེ། འོ་ན་ངོ་བོ་ཉིད་མེད་པར་སྨྲ་བའི་རང་གཞུང་དུ་གྱུར་པའི་མདོ་ཞིག་མེད་པར་ཐལ། འཁོར་ལོ་བར་མཐའ་གཉིས་གང་ཡང་དེར་མི་རུང་བའི་ཕྱིར། འདོད་མི་ནུས་ཏེ། དེའི་རང་གཞུང་དུ་གྱུར་པའི་མདོ་ཞིག་མེད་ན་མདོ་གང་གིའང་དགོངས་པ་མ་ཡིན་པར་འགྱུར་བའི་ཕྱིར་ཟེར་ན། དེའི་རང་གཞུང་དུ་གྱུར་པའི་མདོ་རིལ་བོ་ཞིག་འཇོག་དཀའ་ལ་ཤེར་མདོ་ལྟ་བུ་དེའི་རང་གཞུང་མིན་ཀྱང་གྲུབ་མཐའ་དེ་དེའི་དགོངས་པ་ཕལ་པར་འགྲོ་བ་འགལ་བ་མེད་པའི་ཕྱིར། ཁ་ཅིག་ན་རེ། རྩོད་པའི་གཞིའི་གནས་སུ་གྱུར་པ་མ་ལགས་ཞེས་པའི་དོན་དེའི་སྒྲས་ཟིན་ལྟར་ཁས་བླངས་པ་ལ་མཁས་པའི་རྩོད་པ་མི་འབྱུང་བའི་དོན་ཡིན་ཟེར་ན། མདོ་སྡེ་དགོངས་འགྲེལ་གྱི་སྒྲས་ཟིན་ལ་གནོད་བྱེད་སྟོན་པའི་མཁས་པ་མེད་པར་ཐལ། དེའི་དོན་འཐད་པའི་ཕྱིར། འདོད་ན། ཐལ་འགྱུར་བ་ལ་མཁས་པ་མེད་པར་ཐལ། དེས་དགོངས་འགྲེལ་གྱི་སྒྲས་ཟིན་ལ་གནོད་བྱེད་བསྟན་པའི་ཕྱིར། དེར་ཐལ། དེའི་སྒྲས་ཟིན་ལ་གནོད་བྱེད་བསྟན་ནས་དྲང་དོན་དུ་འགྲེལ་པའི་ཕྱིར།

― GTD002_Page_0675 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་པ་ལས། རྣམ་པ་དེ་ལྟའི་མདོ་སྡེ་གཞན་ཡང་ནི། །དྲང་དོན་ཉིད་དུ་ལུང་འདིས་གསལ་བར་བྱེད། །ཅེས་དྲང་དོན་དགོངས་པ་ཅན་དུ་གསུངས་པའི་མདོ་ངོས་འཛིན་པ་ན། རང་འགྲེལ་ལས། རྣམ་པ་དེ་ལྟ་བུའི་མདོ་སྡེ་གང་ཡིན་ཞེ་ན། ཇི་སྐད་དུ་དགོངས་པ་ངེས་པར་འགྲེལ་པའི་མདོ་ལས། བཏགས་པ་དང། གཞན་གྱི་དབང་དང། ཡོངས་སུ་གྲུབ་པ་ཞེས་བྱ་བའི་རང་བཞིན་གསུམ་བསྟན་པ། ཞེས་སོགས་གསུངས་པའི་ཕྱིར། དེས་ན་དགོངས་འགྲེལ་གྱི་སྒྲས་ཟིན་ལ་རྒོལ་བའི་མཁས་པ་གཏན་མེད་པ་མ་ཡིན་པར་ཐལ། དེ་འདྲའི་མཁས་པ་ཙམ་ཡོད་ཀྱང་བརྟག་པ་མཐའ་ཆོད་པར་བྱས་པའི་མཁས་པ་མེད་པའམ། ཡང་ན་མདོ་རང་གི་སྟོན་ཚུལ་ཞལ་མི་གསལ་བའི་དབང་གིས་དེའི་དགོངས་པ་དེ་ལྟར་ཡིན་ནམ་མིན་ཞེས་རྩོད་པ་འོང་དོན་མེད་པའི་དོན་ཡིན་པའི་ཕྱིར། འདི་ཉིད་ལས། རྩོད་པ་ཡོད་མེད་ནི་མདོ་དེའི་དོན་ངོ་བོ་ཉིད་ཡོད་མེད་སྟོན་པས་དེ་ལྟར་གཏན་ལ་ཕབ་པ་ཡིན་མིན་ལ་མཁས་པས་བརྟགས་ན་རྩོད་པ་མེད་པ་ལ་བྱ་ཡི། རྩོད་པ་གཞན་མེད་པར་སྟོན་པ་མིན་ནོ། །ཞེས་དང། གྲུབ་མཐའ་ཆེན་མོ་ལས། མདོ་འདིས་དེ་ལྟར་བཤད་མི་བཤད་ལ་ཁ་མི་གསལ་བའི་དབང་གིས་རྩོད་པ་མེད་པས་རྩོད་གཞིའི་གནས་མིན་པ་ལགས་ཀྱི། དེ་ལྟར་བཤད་ཀྱང་དབུ་མ་པ་ལྟ་བུས་མི་འཐད་ཅེས་རྩོད་པ་མེད་པ་ནི་མ་ཡིན་ནོ། །ཞེས་གསུངས་པའི་ཕྱིར། དེའང་མདོ་དེའི་དོན་ལ་རྩོད་པ་འོང་ཚུལ་ལ་མདོ་རང་གི་སྒྲས་ཟིན་མི་གསལ་བའི་དབང་གིས་མདོ་དེའི་དགོངས་པ་དེ་ལྟར་ཡིན་ནམ་མིན་ཞེས་རྩོད་པ་གཅིག་དང།

― GTD002_Page_0676 ―

^{[མ་དཔེ་གཟིགས་ན་འདིར་གནོན།]}

[Full Size]

མདོ་དེའི་དགོངས་པ་དེ་ལྟར་ཡིན་པར་ཐག་ཆོད་ཀྱང་དེ་དགོས་དབང་ཡིན་པས་རང་ལུགས་སུ་མི་རུང་ཞེས་རྩོད་ཚུལ་དང་གཉིས་ཡོད་པ་ལས། ཐལ་འགྱུར་བས་དགོངས་འགྲེལ་གྱི་དོན་ལ་རྩོད་ཚུལ་ནི་ཕྱི་མ་ཡིན་པའི་ཕྱིར། ཁ་ཅིག་ན་རེ། ངོ་བོ་ཉིད་མེད་པ་སོགས་ལྔ་པོ་དེ་འཁོར་ལོ་བར་མཐའ་གཉི་གའི་རྩོམ་གཞིར་འཇོག་པ་འདྲ་བར་ཐལ། འདི་ཉིད་ལས། འཁོར་ལོ་གསུམ་པ་བརྗོད་བྱ་གང་ལས་བརྩམས་པ་བར་བ་དང་འདྲ་ཞིང། ཞེས་གསུངས་པའི་ཕྱིར། འདོད་ན། ངོ་བོ་ཉིད་མེད་པ་སོགས་ལྔ་པོ་དེ་འཁོར་ལོ་བར་མཐའ་གཉི་གའི་སྒྲས་ཟིན་སྒྲ་ཇི་བཞིན་པ་ཡིན་པར་ཐལ། འདོད་པའི་ཕྱིར་ན། མ་ཁྱབ་སྟེ། བར་མཐའ་གཉི་གས་དེ་ལྔ་ག་ལ་བརྩམས་ཞེས་པ་དེ་གཉི་གའི་དགོངས་པ་མཐར་ཐུག་ཏུ་འཇོག་པའི་དོན་ཡིན་པའི་ཕྱིར། གོང་དུ་འདོད་མི་ནུས་ཏེ། འདིར་བསྟན་འཁོར་ལོ་བར་བའི་སྒྲས་ཟིན་སྒྲ་ཇི་བཞིན་པ་མ་ཡིན་པའི་ཕྱིར། དེར་ཐལ། དེའི་སྒྲས་ཟིན་སྒྲ་ཇི་བཞིན་པའི་ངོ་བོ་ཉིད་མེད་པ་ནི་ཆོས་ཐམས་ཅད་ལ་རང་བཞིན་གྱིས་གྲུབ་པའི་ངོ་བོ་ཉིད་མེད་པ་སོགས་ལ་བྱེད་དགོས་པས་དེའི་སྒྲས་ཟིན་ལྟར་གྱི་དེ་ལྔ་ཚད་མས་བསལ་བ་ཡིན། ཐ་མའི་སྒྲས་ཟིན་གྱི་ངོ་བོ་ཉིད་མེད་པ་ནི་མཚན་ཉིད་གསུམ་རང་རང་གི་ངོ་བོ་ཉིད་མེད་ལུགས་རེ་སྔར་བཤད་པ་ལྟར་ཡིན་པས་སྔ་ཕྱིའི་ངོ་བོ་ཉིད་མེད་པ་སོགས་མིང་འདྲའང་དོན་མི་འདྲ་བའི་ཕྱིར། ཁོ་ན་རེ། ངོ་བོ་ཉིད་མེད་པ་སོགས་ལྔ་བར་བའི་སྒྲས་ཟིན་སྒྲ་ཇི་བཞིན་པ་ཡིན་པར་ཐལ། བར་བའི་སྒྲས་ཟིན་ལ་ངོ་བོ་ཉིད་མེད་པ་སོགས་སུ་གསུངས་པའི་ཕྱིར་ན་མ་ཁྱབ་སྟེ། ངོ་བོ་ཉིད་མེད་པ་སོགས་སུ་མིང་མཐུན་པའི་གྲགས་

― GTD002_Page_0677 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོད་དང་བསྟུན་དགོས་པའི་ཕྱིར། མ་གྲུབ་ན། འདིར་བསྟན་འཁོར་ལོ་བར་པ་ལས་ངོ་བོ་ཉིད་མེད་པ་སོགས་སུ་གསུངས་པའི་དགོངས་གཞི་དྲི་མི་དགོས་པར་ཐལ། དེ་ལས་ངོ་བོ་ཉིད་མེད་པ་སོགས་སུ་མ་གསུངས་པའི་ཕྱིར། དེར་ཐལ། དེའི་སྒྲས་ཟིན་ལ་དེ་ལྟར་མ་གསུངས་པའི་ཕྱིར། རྟགས་ཁས། ཡང་ཁ་ཅིག་ན་རེ། འདི་ཉིད་ལས། མདོ་སྔ་མ་གཉིས་ཀྱི་སྒྲ་ཇི་བཞིན་པའི་དོན་ལ་སྐྱོན་གྱི་སྐབས་ཡོད་ལ་འདིར་མེད་པ་ནི་སྒྲ་ཇི་བཞིན་པའི་དོན་དེ་ལས་གཞན་དུ་དྲང་དགོས་མི་དགོས་ཀྱི་རྒྱུ་མཚན་གྱིས་ཡིན་ལ། ཞེས་འཁོར་ལོ་དང་པོ་གཉིས་ཀྱི་དགོངས་པ་གཞན་དུ་འདྲེན་དགོས་པར་མཐོང་ནས་དེའི་རྒྱུ་མཚན་གྱིས་མདོ་དེ་གཉིས་སྒྲ་ཇི་བཞིན་པར་མི་རུང་ཞེས་བསྒྲུབས་པ་མི་འཐད་པར་ཐལ། སྔོན་དུ་དེའི་སྒྲས་ཟིན་ལ་གནོད་བྱེད་མཐོང་ནས་དེ་རྗེས་དགོངས་པ་ཇི་འདྲ་ཞིག་ཏུ་འདྲེན་དགོས་སྙམ་དུ་དགོངས་གཞི་ཚོལ་བ་ལ་འཇུག་པ་ཡིན་པའི་ཕྱིར། དཔེར་ན་དོན་སྨྲའི་གྲུབ་མཐའ་ལ་གནོད་བྱེད་མཐོང་ནས་སེམས་ཙམ་དུ་འཇུག་པ་ཡིན་གྱི། སེམས་ཙམ་པའི་གྲུབ་མཐའ་འཐད་ལྡན་དུ་གོ་ནས་དེ་རྗེས་དོན་སྨྲའི་གྲུབ་མཐའ་ལ་གནོད་བྱེད་མཐོང་བ་མ་ཡིན་པ་དང། ཐར་པ་དོན་གཉེར་བཅོས་མིན་སྐྱེས་ནས་གཟོད་འཁོར་བ་ལ་ཞེན་ལོག་སྐྱེད་པ་མ་ཡིན་པ་བཞིན་ཡིན་པའི་ཕྱིར་ཟེར་ན། འདིར་བཤད་པའི་རིམ་པ་ནི་དོགས་པ་སྐྱེ་ཚུལ་གྱི་ཁྱད་ཅིག་ཡིན་ཏེ། ཕ་རོལ་པོ་ཁ་ཅིག་འདི་སྙམ་དུ་ཆོས་ཐམས་ཅད་རང་བཞིན་མེད་པར་གསུང་བ་པོ་དང་ཆ་ཕྱེ་ནས་གསུང་བ་པོ་གཅིག་ཡིན་པས་གཅིག་གི་སྒྲས་ཟིན་ཁས་ལེན་ལ་གཅིག་ཁས་མི་ལེན་པ་ནང་

― GTD002_Page_0678 ―

^{[མ་དཔེ་གཟིགས་ན་འདིར་གནོན།]}

[Full Size]

འགལ་ཏེ། ཕྱི་མ་ཤེས་བྱེད་དུ་རུང་ན་སྔ་མ་ཤེས་བྱེད་དུ་རུང་དགོས་སོ་ཞེ་ན། གསུང་བ་པོ་ལ་ཕྱོགས་གཅིག་ནས་འཁྲུལ་བ་བྱུང་བ་ཡིན་ན་ཁྱོད་བདེན་ཡང། སྟོན་པས་ནི་མཁྱེན་བཞིན་དུ་གསུངས་པ་ཡིན་པས་དེ་ལ་རང་གི་ལུགས་གཅིག་དང། གདུལ་བྱའི་དབང་གིས་ཡིན་པ་གཅིག་སྟེ་གཉིས་འབྱེད་དགོས་ལ། དེ་ལྟར་འབྱེད་པའང་རིགས་པས་འབྱེད་དགོས་པས་མཁས་པས་མཐའ་ཆོད་པར་དཔྱད་ན་རྩོད་པ་མི་འཇུག་པ་ནི་འཁོར་ལོ་ཐ་མ་ཡིན་པས་མདོ་དེ་གཉིས་ཀྱི་སྒྲས་ཟིན་ལའང་འཐད་མི་འཐད་ཀྱི་དབྱེ་བ་བྱེད་རུང་ཞེས་པའི་དོན་ཡིན་ཏེ། མདོར་བསྡུ་ན་སྟོན་པའི་བཀའ་ལ་འདི་ནི་དྲང་དོན་ནོ། །འདི་ནི་ངེས་དོན་ནོ་ཞེས་གྱ་ཚོམ་དུ་དྲང་ངེས་འབྱེད་མི་རུང་བས། སྔོན་ལ་མདོ་དེའི་དགོངས་པ་དེ་ཁོ་ན་ལྟར་གནས་སམ་གཞན་དུ་འདྲེན་དགོས་ཞེས་ལེགས་པར་བརྟགས་ཏེ་དེ་ནས་དྲང་ངེས་འབྱེད་དགོས་ཞེས་པ་ཡིན་པས་གོ་རིམ་འཆོལ་བའི་སྐྱོན་མེད་དོ། །ཁ་ཅིག་སྟོང་ཐུན་ལས། དེའི་ཕྱིར་གསུང་རབ་ཡིན་པ་ལ་འཁོར་ལོ་གསུམ་གང་རུང་གི་མདོ་ཡིན་པས་མ་ཁྱབ་ཀྱི། གསུམ་དུ་ཕྱེ་བ་ནི་གཙོ་བོའི་དབང་དུ་བྱས་པའི་དབྱེ་བའོ། །ཞེས་པའི་དོན་དུ་བསམ་ནས་བཀའ་ལ་འཁོར་ལོ་གསུམ་གང་རུང་གིས་མ་ཁྱབ་པར་འདོད་པ་མི་འཐད་པར་ཐལ། དེ་དྲིས་ཞུས་ཀྱི་འཁོར་ལོ་གསུམ་གང་རུང་ཡིན་པས་མ་ཁྱབ་ཅེས་པའི་དོན་ཡིན་པའི་ཕྱིར། དེར་ཐལ། དེའི་གོང་དེ་མ་ཐག་ཏུ། དགོངས་འགྲེལ་ལས་འཁོར་ལོ་རིམ་པ་གསུམ་གསུངས་པ་ནི། ཞེས་པ་ནས། ལྔ་སྡེ་ལ་ཤམ་ཐབས་ཟླུམ་པོར་བགོ་བར་གསུངས་པ་ལྟ་བུ་རྣམས་བདག་མེད་གཏན་ལ་འབེབས་ཚུལ་མི་འདྲ་བ་

― GTD002_Page_0679 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་གྱི་སྒོ་ནས་དྲང་ངེས་སོ་སོར་འབྱེད་པ་འདི་འདྲ་བའི་དྲང་ངེས་དཔྱོད་པའི་གཞིར་འོང་དོན་མེད་དེ། ཤམ་ཐབས་ཟླུམ་པོར་བགོ་བར་གསུངས་པའི་སྟོན་ཚུལ་ནི་བདག་མེད་སྟོན་ཚུལ་གསུམ་པོ་གང་ཡང་མ་ཡིན་པའི་ཕྱིར་རོ། །དེའི་ཕྱིར་གསུང་རབ་ཅེས་སོགས་གསུངས་པའི་ཕྱིར། ཁྱབ་སྟེ། དྲི་བ་ཞུས་ནས་དྲང་ངེས་སོ་སོར་འབྱེད་རྒྱུའི་ཆོས་འཁོར་གཞིར་བཞག་འདུག་པའི་ཕྱིར་ཏེ། དེ་ནི་འདི་ཉིད་ལས། རང་གི་མཚན་ཉིད་ཡོད་པ་སོགས་སུ་སྟོན་པའི་འཁོར་ལོ་དྲང་དོན་དུ་སྟོན་པ་ཡིན་གྱི། ཞེས་སོགས་དང། འོག་ཏུའང། མདོ་སྡེ་གཞན་རྣམས་འདིའི་དྲང་ངེས་དཔྱོད་པའི་གཞིར་འོང་དོན་མེད་དོ། །ཞེས་གསུངས་པའི་དོན་བསྡུས་ནས་བཀྲལ་བ་ཡིན་པའི་ཕྱིར། དེས་ན་གསུང་རབ་ཐམས་ཅད་ཆོས་འཁོར་གསུམ་དུ་འདུ་བར་ཐལ། གསེར་ཕྲེང་ལས། ཆོས་འཁོར་གསུམ་གྱིས་གསུང་རབ་ཐམས་ཅད་བསྡུས་པ་དང། ཞེས་གསུངས་པའི་ཕྱིར། ཁྱབ་སྟེ། སྤྱིར་ཆོས་ཀྱི་སྒོ་མོ་མཐའ་ཡས་ཀྱང་དེ་ཐམས་ཅད་སྡེ་ཚན་དུ་བསྡུས་ན་དུས་ཐོག་མཐའ་བར་དུ་གསུངས་པར་མི་འདུ་བ་མེད་པས་འཁོར་ལོ་རིམ་པ་གསུམ་དུ་བྱས་པ་ཡིན་པའི་ཕྱིར། རྣམ་བཤད་ལས། ཆོས་ཀྱི་འཁོར་ལོ་ཐོར་བུ་ཐོར་བུར་གསུངས་པ་རྣམས་ཀྱི་དོན་ཕྱོགས་གཅིག་ཏུ་གོ་སླ་བར་བསྡུས་ནས་ཆོས་ཀྱི་འཁོར་ལོ་གསུམ་གྱི་མིང་གི་ཐ་སྙད་ཀྱིས་དངོས་སུ་གསུངས། ཞེས་དང། འདི་ཉིད་ལས་ཀྱང། དུས་ཀྱི་རིམ་པའི་སྒོ་ནས་འཁོར་ལོ་གསུམ་དང་སྦྱར། ཞེས་གསུངས་པའི་ཕྱིར། ཁྱབ་སྟེ། སྤྱི་ཁྱབ་ཏུ་འཁོར་

― GTD002_Page_0680 ―

^{[མ་དཔེ་གཟིགས་ན་འདིར་གནོན།]}

[Full Size]

ལོ་གསུམ་གྱི་རྣམ་གཞག་དུས་ཀྱི་རིམ་པའི་སྒོ་ནས་འཇོག་པར་གྲུབ་ན་སྐབས་འདིར་དྲང་ངེས་སུ་འཇོག་རྒྱུའི་མདོ་གསུམ་ཡང་གོ་རིམ་ལྟར་དུས་ཀྱི་རིམ་པ་དེ་དང་འགྲིག་ཡོད་པས། བྱེ་བྲག་འདིར་བསྟན་འཁོར་ལོ་གསུམ་གྱི་འཇོག་ཚུལ་ཡང་དེས་འགྲུབ་པའི་ཕྱིར། དེ་ལྟར་ན་དུས་དང་པོར་གསུངས་པའི་མདོ་འཁོར་ལོ་དང་པོའི་མཚན་ཉིད་དུ་འཇོག་པ་གཞུང་འདིའི་དགོངས་པར་ཤིན་ཏུ་གསལ་ཏེ། འདི་ཉིད་ལས། དུས་དང་པོར་བདེན་པ་བཞི་ལ་བརྩམས་ནས་རང་གི་མཚན་ཉིད་ཡོད་པ་སོགས་སུ་གསུངས་པའི་འཁོར་ལོ་དང་པོ་དྲང་དོན་དུ་སྟོན་པ་ཡིན་གྱི། དུས་དང་པོར་གསུངས་ཚད་ཀྱི་གསུང་རབ་ཐམས་ཅད་ལ་མིན་ཏེ། དཔེར་ན་དུས་དང་པོར་ཝ་ར་ཎཱ་སིར་ལྔ་སྡེ་ལ་ཤམ་ཐབས་ཟླུམ་པོར་བགོ་བར་བྱའོ། །ཞེས་པ་ལ་སོགས་པའི་བསླབ་བྱ་གསུངས་པ་ལ་འདིར་དོགས་པ་གཅོད་མི་དགོས་པ་བཞིན་ནོ། །ཞེས་གསུངས་པའི་ཕྱིར། ཁྱབ་སྟེ། འདིའི་དོགས་པ་གཅོད་ལུགས་ནི་གོང་དུ་འཁོར་ལོ་དང་པོ་གཉིས་དྲང་དོན་དང་ཐ་མ་ངེས་དོན་ཞེས་པའི་ཚིག་ཡང་ཡང་བྱུང་བ་ལ། འོ་ན་འཁོར་ལོ་དང་པོ་ཐམས་ཅད་དྲང་དོན་ཡིན་ནམ་ཞེ་ན་དེའི་ནང་ནས་རང་གི་མཚན་ཉིད་ཡོད་པ་སོགས་སུ་གསུངས་པ་དྲང་དོན་ཡིན་གྱི་འཁོར་ལོ་དང་པོ་ཐམས་ཅད་མིན་ཏེ། ལྔ་སྡེ་ལ་ཤམ་ཐབས་ཟླུམ་པོར་བགོ་བ་ལ་བསླབ་པར་གསུངས་པ་ལྟ་བུ་དུས་དང་པོར་ཡང་གདུལ་བྱའི་དབང་གིས་སྣ་ཚོགས་ཤིག་གསུངས་པས་དེ་ཐམས་ཅད་ལ་དོགས་པ་གཅོད་དོན་མེད་ཅེས་པ་ཡིན་པའི་ཕྱིར། གལ་ཏེ་དུས་དང་པོར་གསུངས་པའི་མདོ་འཁོར་ལོ་དང་པོའི་

― GTD002_Page_0681 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་མིན་ན་འཁོར་ལོ་དང་པོ་ཐམས་ཅད་དྲང་དོན་མ་ཡིན་ཏེ། དུས་དང་པོར་གསུངས་པའི་མདོ་ལ་བསླབ་བྱ་ཙམ་སྟོན་པའང་ཡོད་པའི་ཕྱིར་ཞེས་པའི་རྟགས་ཆོས་ལ་འབྲེལ་ཅིའང་མེད་དེ། དཔེར་ན། དངོས་པོ་ལ་ལྡན་མིན་གྱིས་མ་ཁྱབ་པར་ཐལ། དོན་བྱེད་ནུས་པར་གྱུར་པའི་གཟུགས་ཤེས་ལྡན་མིན་གསུམ་ག་ཡོད་པའི་ཕྱིར། བྱས་ན་འབྲེལ་བ་མ་གཏོགས། དངོས་པོ་ལ་ལྡན་མིན་གྱིས་མ་ཁྱབ་པར་ཐལ། ཤེས་བྱར་གྱུར་པའི་རྟག་པའང་ཡོད་པའི་ཕྱིར་བྱས་ན་འབྲེལ་མེད་པ་བཞིན་ཡིན་པའི་ཕྱིར། དེས་ན་གྲུབ་མཐའ་ལྷུན་པོའི་མཛེས་རྒྱན་ལས། རྗེ་བླ་མས་དུས་དང་པོར་གསུངས་པའི་མདོ་ཡིན་ན་འཁོར་ལོ་དང་པོ་ཡིན་པས་ཁྱབ་པར་གཟུང་གིས་དོགས་ནས་དེ་འགོག་པའི་ཆེད་དུ་གསུངས་ཞེས་ལུང་འདིས་དུས་དང་པོར་གསུངས་པའི་མདོ་ལ་འཁོར་ལོ་དང་པོས་མ་ཁྱབ་པར་བསྟན་གསུངས་པའང་མཁས་པ་སྔ་མའི་བཤད་པའི་རྣམ་གྲངས་བཀོད་པ་ཙམ་ཡིན་ཏེ། ཐམས་ཅད་ལ་མིན་གསུངས་པ་འཁོར་ལོ་དང་པོ་ཙམ་ཡང་མིན་པ་ལ་བྱེད་ན། འཁོར་ལོ་དང་པོ་ཙམ་ལའང་རང་གི་མཚན་ཉིད་ཡོད་པ་སོགས་སུ་གསུངས་པ་ཞིག་དགོས་པར་འགྱུར་བ་ལ་འདིར་དེ་ལྟར་གསུངས་པའི་འཁོར་ལོ་དང་པོ་ཞེས་སྨོས་པས་དེ་ལྟར་མ་གསུངས་པ་ཞིག་ཀྱང་བསྟན་པའི་ཕྱིར་དང། རྗེ་བཙུན་དམ་པ་དེས་ཀྱང་སྤྱིར་བཀའ་ཐམས་ཅད་འཁོར་ལོ་གསུམ་དུ་འདུ་བར་ཡང་ཡང་གསུངས་པས་འཁོར་ལོ་དང་པོ་ལ་དྲིས་ཞུས་ཀྱི་འཁོར་ལོ་དང་པོས་ཁྱབ་པར་མི་བཞེད་སྣང་བའི་ཕྱིར་རོ། །གལ་ཏེ་བཀའ་ཐམས་ཅད་སྤྱིར་འཁོར་ལོ་གསུམ་དུ་གྲངས་

― GTD002_Page_0682 ―

^{[མ་དཔེ་གཟིགས་ན་འདིར་གནོན།]}

[Full Size]

ངེས་ཀྱང་སྤྱིའི་འཁོར་ལོ་གསུམ་ནི་བརྗོད་བྱ་ཕྱོགས་མཐུན་གྱི་སྒོ་ནས་འཇོག་ཚུལ་རྒྱུད་སྡེ་སྤྱི་རྣམ་ལས་བཤད་པ་དེ་ཡིན་གྱི། དུས་དང་པོར་གསུངས་པའི་མདོ་སོགས་གསུམ་ལ་བྱེད་པ་མིན་ཟེར་ན། འོ་ན་འདི་ཉིད་ལས། འཁོར་ལོ་གསུམ་པ་ངེས་དོན་དུ་བཤད་པའང་སྔར་བཤད་པ་ལྟར་ལེགས་པར་ཕྱེ་བ་རྣམས་ཡིན་གྱི་ཐམས་ཅད་མིན་པ་ནི་མདོ་ཉིད་ལས་ཀྱང་ཤིན་ཏུ་གསལ་ལ། དཔེར་ན་མྱ་ངན་ལས་འདའ་ཁར་འདུལ་བ་མདོར་བསྡུས་ཞེས་བྱ་བ་རུང་མཐུན་དུ་གྲགས་པ་གསུངས་ཀྱང་དེ་མདོ་འདིས་ངེས་དོན་དུ་སྟོན་པ་མིན་པ་བཞིན་ནོ། །ཞེས་གསུངས་པའི་དགོངས་པ་ཇི་ལྟར་འགྲེལ། གོང་དུ་ཐམས་ཅད་མིན་ཞེས་པ་དེ་འཁོར་ལོ་དང་པོ་ཙམ་ཡང་མིན་པ་ལ་བྱེད་པ་ལྟར་ན་འདི་འཁོར་ལོ་ཐ་མ་མིན་ཞེས་པའི་དོན་དུ་འགྲོ་དགོས་ལ། དེ་ལྟ་ན་འཁོར་ལོ་ཐ་མ་ཐམས་ཅད་འཁོར་ལོ་ཐ་མ་མིན་ཞེས་པར་འགྱུར་རོ། །དེས་ན་མིན་རྒྱུ་དེ་དྲི་བ་ཞུས་ནས་ངེས་དོན་དུ་འགྲེལ་རྒྱུའི་མདོ་དང། ཐམས་ཅད་ཅེས་པ་འཁོར་ལོ་ཐ་མ་ལ་བྱེད་དགོས་ཏེ། འཁོར་ལོ་ཐ་མ་ལ་གྲུབ་དོན་གྱི་སྐབས་འདིར་བླ་ན་མ་མཆིས་ཞེས་སོགས་ཀྱིས་ངེས་དོན་དུ་བཤད་རྒྱུ་དེས་ཁྱབ་བམ་ཞེ་ན། དེའི་ནང་ནས་ལེགས་ཕྱེའི་ཆོས་འཁོར་རྣམས་དེ་ཡིན་གྱི། འཁོར་ལོ་ཐ་མ་ཙམ་ལ་འདིར་ངེས་དོན་དུ་བཤད་རྒྱུའི་མདོས་མ་ཁྱབ་སྟེ། འདུལ་བ་མདོར་བསྡུས་རུང་མཐུན་དུ་གྲགས་པ་དེ་སྟོན་པ་མྱ་ངན་ལས་འདའ་ཁར་གསུངས་པས་འཁོར་ལོ་ཐ་མ་ཡིན་ཀྱང་འདིར་དེ་ངེས་དོན་དུ་སྒྲུབ་མི་དགོས་པ་བཞིན་ཞེས་པའི་དོན་ཡིན་པ་ཤིན་ཏུ་གསལ་བའི་ཕྱིར་དང། དེ་འདོད་ན། འདུལ་བ་མདོར་བསྡུས་དེ་འཁོར་ལོ་ཐ་མ་ཡིན་ན་འདིར་ངེས་དོན་དུ་

― GTD002_Page_0683 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་རྒྱུའི་མདོ་ཡིན་པས་མ་ཁྱབ་ཀྱི་སྐྱོན་ལ་འཇོག་རིགས་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། དུས་ཐ་མར་གསུངས་པའི་མདོ་འཁོར་ལོ་ཐ་མའི་དོན་དུ་བྱས་ཏེ་དེ་ལ་འདིར་ངེས་དོན་དུ་བཤད་རྒྱུའི་མདོས་མ་ཁྱབ་པའི་སྐྱོན་ལ་བཞག་པ་མ་ཡིན་པ་གང་ཞིག །བརྗོད་བྱ་ཕྱོགས་མཐུན་གྱི་འཁོར་ལོ་ཐ་མ་ལ་དེས་མ་ཁྱབ་པའི་སྐྱོན་དུའང་མི་འཇོག དྲིས་ཞུས་ཀྱི་འཁོར་ལོ་ཐ་མ་ལ་དེས་མ་ཁྱབ་པའི་སྐྱོན་དུའང་མི་འཇོག་པའི་ཕྱིར། དང་པོ་མ་གྲུབ་ན་དངོས། གཉིས་པ་མ་གྲུབ་ན། འདུལ་བ་མདོར་བསྡུས་ཆོས་ཅན། བརྗོད་བྱ་ཕྱོགས་མཐུན་གྱི་འཁོར་ལོ་ཐ་མ་མ་ཡིན་པར་ཐལ། བརྗོད་བྱ་ཕྱོགས་མཐུན་གྱི་འཁོར་ལོ་དང་པོ་ཡིན་པའི་ཕྱིར། དེར་ཐལ། ལུང་སྡེ་བཞི་དེ་ཡིན་པའི་ཕྱིར། རྒྱུད་སྡེ་སྤྱི་རྣམ་ལས། བདེན་པ་བཞིའི་ཆོས་ཀྱི་འཁོར་ལོ་བསྐོར་བའི་མདོ་ནི་འཁོར་ལོ་དང་པོའི་མདོ་དངོས་ཡིན་ཞིང། དེ་དང་བརྗོད་བྱ་ཕྱོགས་མཐུན་གྱི་སྒོ་ནས་འདུལ་བ་ལུང་དང། མདོ་དྲན་པ་ཉེར་བཞག་དང། མདོ་རྒྱ་ཆེར་རོལ་པ་དང། མདོ་སྡེ་ལས་བརྒྱ་པ་དང། མདོ་སྡེ་རྟོགས་བརྗོད་བརྒྱ་པ་ལ་སོགས་པའང་འཁོར་ལོ་དང་པོའི་མདོར་གཏོགས་སོ། །ཞེས་གསུངས་པའི་ཕྱིར། གསུམ་པ་མ་གྲུབ་ན་དྲིས་ཞུས་ཀྱི་འཁོར་ལོ་ཐ་མ་ལ་འདིར་ངེས་དོན་དུ་བཤད་རྒྱུའི་མདོས་ཁྱབ་པར་ཐལ། དེ་ལ་ལེགས་ཕྱེའི་ཆོས་འཁོར་གྱིས་ཁྱབ་པའི་ཕྱིར། འདི་ཉིད་ལས། ངེས་དོན་དུ་བཤད་པའང་སྔར་བཤད་པ་ལྟར་ལེགས་པར་ཕྱེ་བ་རྣམས་ཡིན། ཞེས་གསུངས་པའི་ཕྱིར། ཁྱབ་སྟེ། ཡིན་ཞེས་པའི་ཡིན་རྒྱུ་དང་ཐམས་ཅད་མིན་ཞེས་

― GTD002_Page_0684 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་མིན་རྒྱུ་གཉི་ག་བསྲེ་མི་རུང་བའི་ཕྱིར། དེས་ན་རྗེ་བླ་མས་མ་ཁྱབ་པའི་སྐྱོན་འཇོག་ཚུལ་འདིའང་དུས་ཐ་མར་གསུངས་པའི་མདོ་འཁོར་ལོ་ཐ་མའི་དོན་དུ་འཇོག་རྒྱུའི་དབང་དུ་བྱས་པར་མངོན་ཏེ། མྱ་ངན་ལས་འདའ་ཁར་ཞེས་སྨོས་པའི་དགོས་པ་དུས་ཐ་མར་གསུངས་པ་གོ་བའི་ཆེད་ཡིན་ལ། དེ་བཞི་འཁོར་ལོ་ཐ་མར་འབད་མེད་དུ་གྲུབ་པའི་དབང་དུ་བྱས་པར་སྣང་བའི་ཕྱིར་རོ། །དེ་བཞིན་དུ་འཁོར་ལོ་དང་པོ་ལ་དྲིས་ཞུས་ཀྱི་དེས་མ་ཁྱབ་པའི་སྐྱོན་དུ་ཤམ་ཐབས་ཟླུམ་པོར་བགོ་བ་ལ་བསླབ་པར་གསུངས་པ་བཞག་པའང་ལུང་ཕྲན་ཚེགས་ལས། ཤམ་ཐབས་ཟླུམ་པོ་བགོ་བ་ལ་བསླབ་པར་བྱའོ་ཞེས་པ་ནི་དང་པོར་བཅས་པའི་འདུལ་བ་ཡིན་ལ། ཞེས་སོགས་གསུངས་པ་དེས་དུས་དང་པོར་གསུངས་པའི་མདོར་གྲུབ་པ་ཐུགས་ལ་བཞག་ནས་དེས་འཁོར་ལོ་དང་པོར་སྒྲུབ་སླ་བའི་དབང་དུ་བྱས་པ་ཡིན་ཏེ། ལུང་སྡེ་བཞིའི་ནང་ན་འཁོར་ལོ་གསུམ་གྱི་ཆ་འབྱེད་རྒྱུ་ཡོད་པ་འདི་དུས་ཀྱི་རིམ་པའི་དབང་དུ་བྱས་པ་མ་གཏོགས་གང་ལའང་མི་འགྲིག་གོ །སྤྱིར་འཁོར་ལོ་གསུམ་གྱི་འཇོག་ཚུལ་ལ་དུས་ཀྱི་རིམ་པའི་དབང་དུ་བྱས་པ་དང། བརྗོད་བྱ་ཕྱོགས་མཐུན་གྱི་དབང་དུ་བྱས་པ་གཉི་ག་རང་ལུགས་སུ་ཁས་ལེན་དགོས་ཀྱང། ཁྱབ་མཐའ་བཟུང་བའི་ཚེ་དུས་ཀྱི་རིམ་པའི་དེ་གཙོ་བོར་བྱེད་དགོས་ཏེ། ཀུན་མཁྱེན་བླ་མས་ཀྱང་རྒྱུད་སྡེ་སྤྱི་རྣམ་ལྟར་ན་ཞེས་བརྗོད་བྱ་ཕྱོགས་མཐུན་གྱི་འཁོར་ལོ་གསུམ་དུ་འབྱེད་ཚུལ་གསུངས་ནས་མཇུག་ཏུ་རྒྱུད་སྡེ་སྤྱི་རྣམ་གྱི་ལུགས་ཡིན་ནོ། །ཞེས་གསུངས་པའི་ཚིག་གི་ནུས་པ་ལ་དཔག་ན་དེ་ལྟར་བཤད་ལུགས་

― GTD002_Page_0685 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་ཆོག་ཀྱང་འདིར་བཤད་བྱ་རྩ་བའི་གཞུང་གི་དངོས་ཟིན་དང་མཐུན་ཚབས་ཆེ་ཞིང་སྤྱི་ཁྱབ་ཏུ་འཇོག་བདེ་བ་ནི་དུས་ཀྱི་རིམ་པས་འཇོག་ཚུལ་འདི་ཡིན་པས་དེ་གཙོ་བོར་བྱེད་དགོས་ཞེས་པའི་དོན་ཡིན་པའི་ཕྱིར། ཡང་ཁོ་ན་རེ། འཁོར་ལོ་གསུམ་དུས་ཀྱི་རིམ་པའི་སྒོ་ནས་འཇོག་མི་རུང་བར་ཐལ། དེ་གསུམ་གཅིག་ཅར་བསྐོར་བ་ཡིན་པའི་ཕྱིར་ཏེ། ཐུན་མོང་མ་ཡིན་པའི་གདུལ་བྱ་ལ་དེ་ཡིན་པའི་ཕྱིར། ཁྱབ་སྟེ། གཅིག་ཅར་བསྐོར་ན་དང་པོ་བསྐོར་བའི་དུས་སུ་བར་མཐའ་གཉིས་ཀྱང་བསྐོར་བ་ཡིན་པས་དུས་སྔ་ཕྱིའི་སྒོ་ནས་འཇོག་ཚུལ་མེད་པའི་ཕྱིར་ཟེར་ན། ཁྱོད་རང་ལ་འཁོར་ལོ་གསུམ་གཅིག་ཅར་ཁོ་ནར་བསྐོར་བ་ཡིན་པར་ཐལ། རིམ་ཅན་དུ་མ་བསྐོར་བའི་ཕྱིར། དེར་ཐལ། རིམ་ཅན་དུ་བསྐོར་ན་དང་པོ་འདི་བསྐོར། དེ་རྗེས་འདི་བསྐོར་ཞེས་སྔ་ཕྱིའི་རིམ་པ་ཡོད་དགོས་པའི་ཕྱིར། འདོད་མི་ནུས་ཏེ། གདུལ་བྱ་ཐུན་མོང་བ་ལ་རིམ་ཅན་དུ་བསྐོར་བའི་ཕྱིར་དང། ཐུན་མོང་དང་ཐུན་མོང་མ་ཡིན་པ་གཉི་ག་དངོས་གནས་པར་ཁས་ལེན་དགོས་པའི་ཕྱིར། གཞན་ཡང་ཁྱོད་ལྟར་ན་འཁོར་ལོ་གསུམ་བརྗོད་བྱའི་སྒོ་ནས་ཀྱང་བཞག་མི་ཆོག་པར་ཐལ། འཁོར་ལོ་དང་པོའི་མདོ་ཚིག་དེས་བར་མཐའ་གཉིས་ཀྱི་བརྗོད་དོན་ཡང་བསྟན་པའི་ཕྱིར། དེར་ཐལ། འཁོར་ལོ་དང་པོ་བསྐོར་བའི་གསུང་གཅིག་པུ་དེས་བར་མཐའ་གཉིས་ཀྱང་བསྐོར་བའི་ཕྱིར། ཁྱབ་པ་འགྲིག །རྟགས་གྲུབ་སྟེ། དོན་ཚད་མེད་པའི་མདོ་རྒྱ་ནག་འགྲེལ་ཆེན་དུ་དྲངས་པ་ལས། དེ་བཞིན་གཤེགས་པས་ནི་གསུང་གཅིག་ཏུ་ཆོས་ཀྱི་འཁོར་ལོ་གསུམ་གསུངས་པར་མཛད་དོ། །ཞེས་གསུངས་པའི་ཕྱིར། འཁོར་ལོ་གསུམ་ཙམ་དུ་མ་

― GTD002_Page_0686 ―

^{[མ་དཔེ་གཟིགས་ན་འདིར་གནོན།]}

[Full Size]

ཟད་སེམས་ཅན་ཐམས་ཅད་ལ་རང་རང་གི་ཁམས་དང་འཚམ་པའི་དྲིས་ལན་བརྗོད་བྱ་མི་འདྲ་བ་དེ་སྙེད་ཀྱང་གསུང་གཅིག་གིས་འདོམས་པའི་ཕྱིར། བདེན་པ་པོའི་ལེའུ་ལས། འདི་ལྟར་སེམས་ཅན་ཀུན་གྱིས་ངེས་པའི་ཚིག །མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། གསུང་དབྱངས་གཅིག་གིས་སོ་སོར་ལན་ཀྱང་འདེབས། །ཞེས་དང། ལམ་རིམ་ཆེན་མོ་ལས། འཇིག་རྟེན་གྱི་ཁམས་ཀྱི་སེམས་ཅན་གང་ཡོད་ཀྱིས་དུས་གཅིག་ཏུ་དྲི་བ་མི་འདྲ་བ་ཁོ་ན་རེ་རེ་ནས་དྲིས་ཀྱང་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བཟུང་ནས་གསུང་གཅིག་གིས་དྲི་བ་ཐམས་ཅད་ཀྱི་ལན་མཛད་ཅིང་དེ་རྣམས་ཀྱིས་ཀྱང་རང་རང་གི་སྐད་དུ་གོ་བར་འགྱུར། ཞེས་གསུངས་པའི་ཕྱིར། སྟོན་པའི་ངག་ཏུ་གྱུར་བའི་བདེན་གཞིའི་ཆོས་འཁོར་དེས་ཐེག་ཆེན་རིགས་ཅན་ལ་ཆོས་ཀྱི་བདག་མེད་དངོས་སུ་སྟོན་ན་དེའི་ཆེད་དུ་བྱ་བའི་གདུལ་བྱ་ཐེག་ཆེན་པ་ཞིག་ཀྱང་འཇོག་དགོས་པས་ཐེག་པ་ཆེ་ཆུང་གི་མདོ་དང་འཁོར་ལོ་གསུམ་གྱི་ངོས་འཛིན་འཆོལ་བར་ཐལ་བ་འཕེན་ཚུལ་དང་ལན་གྱི་ཞིབ་ཆ་འབྱེད་ཚུལ་ཀྱང་ཤེས་དགོས་སོ། །ཁོ་ན་རེ། འཁོར་ལོ་གསུམ་གྱི་འཇོག་ཚུལ་དུས་ཀྱི་རིམ་པའི་སྒོ་ནས་མི་འཇོག་པར་བརྗོད་བྱའི་སྒོ་ནས་འཇོག་དགོས་པར་ཐལ། འདི་ཉིད་ལས། དགོངས་འགྲེལ་ལས་འཁོར་ལོ་རིམ་པ་གསུམ་གསུངས་པ་ནི་འཁོར་གྱི་འདུ་ཐེབས་དང་སྟོན་པའི་སྐུ་ཚེའི་ཚིགས་ལ་སོགས་པས་འཇོག་པ་མིན་གྱི་བརྗོད་བྱའི་ངོས་ནས་ཡིན་ནོ། །ཞེས་གསུངས་པའི་ཕྱིར་ན། མ་ཁྱབ་སྟེ། དྲིས་ཞུས་ཀྱི་འཁོར་ལོ་གསུམ་དུ་འབྱེད་བྱེད་ཀྱི་གཙོ་བོ་འཁོར་གྱི་འདུ་

― GTD002_Page_0687 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེབས་དང་སྐུ་ཚེའི་ཚིགས་ཀྱིས་འཇོག་པ་མ་ཡིན་པར་བདག་མེད་གཉིས་སྟོན་ཚུལ་དང་དགག་བྱ་འགོག་ཚབས་ཆེ་ཆུང་གི་སྒོ་ནས་འཇོག་ཅེས་པའི་དོན་ཡིན་པས་དེས་སྤྱིར་འཁོར་ལོ་གསུམ་དུས་ཀྱི་རིམ་པའི་སྒོ་ནས་འཇོག་པ་ལ་མི་གནོད་པའི་ཕྱིར། དེར་ཐལ། འཁོར་འདུ་ཐེབས་དང་སྐུ་ཚེའི་ཚིགས་ཞེས་པ་སྐབས་འདིའི་དུས་ཀྱི་སྒོ་ནས་འཇོག་ཚུལ་མ་ཡིན་པའི་ཕྱིར་ཏེ། དང་པོ་ནི་མདོ་སྡེ་བསྐལ་བཟང་ལས། འདུས་པ་དང་པོ་ལ་ནི་དགེ་སློང་སྟོང་ཉིས་བརྒྱ་ལྔ་བཅུའོ། །ཞེས་ལྟེང་རྒྱས་འོད་སྲུངས་འཁོར་བཅས་ལྔ་བརྒྱ། ག་ཡ་འོད་སྲུངས་འཁོར་བཅས་ལྔ་བརྒྱ། མཆོག་ཟུང་འཁོར་བཅས་ཉིས་བརྒྱ་ལྔ་བཅུ་སྟེ་བརྒྱ་ཕྲག་ཕྱེད་དང་བཅུ་གསུམ་གྱི་དགེ་འདུན་ལ་འདུས་པ་དང་པོར་གསུངས་པས་འཁོར་ལོ་དང་པོ་དེ་རྣམས་ལ་བསྐོར་བ་དང། དེ་བཞིན་དུ་བར་བ་འདུས་པ་གཉིས་པ་ལ་གསུངས་པ་སོགས་མིན་ཞེས་པའི་དོན་ཡིན། འདུས་པ་དང་པོ་ལ་གསུངས་པས་འཁོར་ལོ་དང་པོར་འཇོག་ན་ཤེར་མདོའང་འཁོར་ལོ་དང་པོར་འགྱུར་ཏེ། གླེང་གཞིར་བརྒྱ་ཕྲག་ཕྱེད་དང་བཅུ་གསུམ་ཞེས་འབྱུང་བས་སྟོང་ཉིས་བརྒྱ་ལྔ་བཅུ་པོ་དེར་སྣང་བའི་ཕྱིར། འདི་ལ་ཁ་ཅིག །གླེང་གཞི་ལ་ལར་ལྔ་སྟོང་ཞེས་འབྱུང་བས་རྒྱས་འབྲིང་བསྡུས་གསུམ་བསྐོར་ཡུལ་མི་གཅིག་ཟེར། དེ་མི་འཐད་པར་ཐལ། དེ་གཉིས་ཀྱི་ཞུ་བ་པོ་མཐུན་པར་འབྱུང་ཞིང། ཞིང་དག་སྦྱོར་བའི་ཐད་དུ་གངྒའི་ལྷ་མོ་ལུང་བསྟན་པར་འདྲ་བས་དུས་གཅིག་ལ་གསུངས་པ་གདུལ་བྱས་ཐོས་ཚུལ་གྱིས་རྒྱས་བསྡུས་བྱུང་བ་མ་གཏོགས་མདོ་སྔ་ཕྱི་

― GTD002_Page_0688 ―

^{[མ་དཔེ་གཟིགས་ན་འདིར་གནོན།]}

[Full Size]

བ་མ་ཡིན་པའི་ཕྱིར་ཏེ། འགྲེལ་པ་དོན་གསལ་ལས། དེ་ལ་བསྡུས་སོགས་རབ་དབྱེ་བས། །ཁྱད་པར་ཡོད་པ་ཁོ་ནར་ཟད། །ཅེས་གསུངས་པའི་ཕྱིར། འོན་ཀྱང་དེ་གཉིས་ཀྱི་གྲངས་མི་མཚུངས་པ་ནི་གསུང་བའི་ཚིག་ལ་རྒྱས་བསྡུས་ཀྱི་སྣང་ཚུལ་མི་འདྲ་བ་རུང་བ་ལྟར། གསུང་ཡུལ་གྱི་འཁོར་ལའང་མང་ཉུང་གི་སྣང་ཚུལ་མི་འདྲ་བ་འགལ་བ་མེད་མོད། སྔ་མ་འགའ་ཞིག་གང་ཟག་བགྲང་ན་ལྔ་སྟོང་ཡིན་ཀྱང་སྟོང་ཉིས་བརྒྱ་ལྔ་བཅུའི་དགེ་འདུན་ཞེས་འབྱུང་བས། བཞི་ཚན་དུ་བསྡེབས་ཏེ་དགེ་འདུན་བགྲང་ན་སྟོང་ཉིས་བརྒྱ་ལྔ་བཅུར་འགྱུར་ཞེས་ཟེར་བ་དཔྱད་དགོས་སོ། །སྐུ་ཚེའི་ཚིགས་ཀྱི་སྒོ་ནས་འཇོག་ཚེ་སྐུ་ཚེའི་སྟོད་སྨད་བར་གསུམ་དུ་གསུངས་པ་ལ་བྱེད་དགོས་ཀྱང་བདེན་བཞིའི་ཆོས་འཁོར་ནི་དགུང་ལོ་སོ་ལྔ་པའི་ས་གའི་ཉ་ལ་སངས་རྒྱས་པ་དེ་ནས་བརྩིས་པའི་ཞག་ཞེ་དགུ་པ་རགས་རྩིས་ཀྱིས་ཆུ་སྟོད་ཟླ་བའི་ཚེས་བཞི་དང། ཞིབ་རྩིས་ལ་ཞག་མི་ཐུབ་དོར་བའི་དབང་དུ་བྱས་ན་ཚེས་དྲུག་ལ་བསྐོར་བ་ཡིན། དེའི་ཕྱི་ལོ་ནག་ཟླའི་ཚེས་བཅོ་ལྔ་ལ་ཤེར་མདོ་དང་དུས་འཁོར་རྩ་རྒྱུད་མཉམ་དུ་གསུངས་པ་ཡིན་པས་བར་དུ་ཟླ་བ་བཅུ་ཙམ་ལས་མེད་པར་སྐུ་ཚེའི་སྟོད་ཡིན་མིན་གཉིས་འབྱེད་མི་ཐུབ་པའི་ཕྱིར། དུས་འཁོར་རྩ་རྒྱུད་ལས། སྟོན་པས་བྱ་རྒོད་ཕུང་པོ་རུ། །ཆོས་བསྟན་དཔལ་ལྡན་འབྲས་སྤུངས་སུ། །ཤེར་རབ་ཕ་རོལ་ཕྱིན་ཚུལ་བཞིན། །དེ་བཞིན་གསང་སྔགས་ཚུལ་རབ་གསུངས། །ཞེས་གསུངས་པའི་ཕྱིར། འོ་ན་དུས་དང་པོ་དང་བར་བར་ཡང་འཇོག་མི་ཐུབ་པར་ཐལ། བར་དུ་ཟླ་བ་བཅུ་ལས་མེད་པའི་ཕྱིར་ན། མི་མཚུངས་

― GTD002_Page_0689 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ། དེ་གཉིས་བརྗོད་བྱ་སོགས་ཆེས་མི་འདྲ་ལ། ཕྱི་མའི་ལྷ་རྣམས་ཀྱིས་འཁོར་ལོ་གཉིས་པ་བསྐོར་བ་མཐོང་ངོ་ཞེས་བསྒྲགས་པ་ལྟ་བུ་སྔ་མ་ལས་ལོགས་སུ་གྲགས་ཆེན་པོ་བྱུང་བས་སྣང་ཚོད་དེ་དང་བསྟུན་པ་ཡིན་ཞིང། སྐུ་ཚེའི་བར་དུ་འཇོག་པ་ལ་དེ་འདྲའི་རྒྱུ་མཚན་ཅིའང་མེད་པའི་ཕྱིར། ཕར་ཕྱིན་མཐའ་དཔྱོད་ལས། འཁོར་ལོ་གསུམ་བྱེད་པ་སྐུ་ཚེའི་ཚད་དང་འཁོར་འདུ་ཐེབས་ཀྱིས་མི་བྱེད་དེ། ཐུན་མོང་གི་སྣང་བ་གཙོ་ཆེ་བ་སོགས་ཤེས་དགོས། ཞེས་གསུངས་པའི་དགོངས་པའང་དེ་ཡིན་ཏེ། དཔེར་ན་ཀླུ་སྒྲུབ་ཀྱི་ཆོས་སྒྲ་དང་པོ་གཉིས་ཀྱི་བར་དུ་ཆེར་མ་འགྱང་ལ། ཆོས་སྒྲ་གསུམ་པ་དང་བར་དུ་ལོ་བརྒྱ་ཕྲག་དུ་མ་འགྱང་ཞིང་དེའི་བར་ལ་རྩོམ་པ་མཛད་པ་མང་ཡང་ཆོས་སྒྲ་གསུམ་པོ་གྲགས་ཆེ་ཚུལ་དང་བཤད་པའི་སྒོ་མི་འདྲ་ཚུལ་གྱི་སྟེང་ནས་བཞག་པ་ཡིན་པའི་ཕྱིར། དེ་ལ་ཁོ་ན་རེ། སངས་རྒྱས་ཚུལ་བསྟན་པའི་ཕྱི་ལོ་ཤེར་མདོ་དང་དུས་འཁོར་རྩ་རྒྱུད་གསུངས་པ་མི་འཐད་པར་ཐལ། དེ་དུས་ཀུན་དགའ་བོ་འཁོར་དུ་མེད་པས་དེའི་ཚེ་ཤེར་མདོ་གསུངས་པ་ཡིན་ན། མདོའི་གླེང་གཞི་ལས། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །ཞེས་གསུངས་པ་དང་འགལ། དུས་འཁོར་རྩ་རྒྱུད་ནི་འགྲེལ་ཆེན་དྲི་མེད་འོད་ལས། ས་ག་ཟླ་བའི་ཚེས་བཅོ་ལྔའི་ཉིན་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་ཞིང་ཐེག་པ་གསུམ་སྟོན་པར་མཛད་དེ། བཅུ་གཉིས་པ་ནག་པ་ཉ་ལ་ཤྲཱི་དྷཱ་ནྱཱ་ཀ་ཊ་ཀར་ཆོས་དབྱིངས་གསུང་གི་དབང་ཕྱུག་

― GTD002_Page_0690 ―

^{[མ་དཔེ་གཟིགས་ན་འདིར་གནོན།]}

[Full Size]

གི་དཀྱིལ་འཁོར་གསུངས་སོ། །ཞེས་གསུངས་པས། བཅུ་གཉིས་པ་ཞེས་པ་དང་བསྟུན་ན་སངས་རྒྱས་པའི་ལོ་དེར་གསུངས་པར་བྱེད་དགོས། ཐེག་པ་གསུམ་སྟོན་པར་མཛད་དེ་ཞེས་པ་དང་བསྟུན་ན་འཁོར་ལོ་གསུམ་པོ་ཕལ་ཆེར་བསྐོར་ཟིན་ནས་མྱ་ངན་ལས་འདའ་རྒྱུའི་ལོ་དེའི་ནག་ཟླ་ལ་བྱེད་དགོས་པས། དུས་འཁོར་བ་སྔ་མ་རྣམས་ལུགས་དེ་གཉིས་གང་རུང་རེ་འདོད་པ་མ་གཏོགས་དེའི་ཕྱི་ལོའི་ནག་ཟླ་ལ་བྱེད་པ་ལུགས་གང་དང་ཡང་མི་མཐུན་པའི་ཕྱིར་ཟེར་ན། སྐྱོན་དང་པོ་མི་འཇུག་པར་ཐལ། ཤེར་མདོ་གསར་དུ་གསུངས་པའི་ཚེ་ཀུན་དགའ་བོ་མེད་ཀྱང་དེ་ཐོས་པ་འཛིན་པའི་མཆོག་ཡིན་པས་ཕྱིས་བསྐྱར་ནས་གསུངས་པའམ། སངས་རྒྱས་ཀྱི་མཐུས་དགེ་སློང་གཞན་ལས་ཐོས་པའང་སངས་རྒྱས་ལས་ཐོས་པར་བཞག་ཆོག་པ་དང། འདི་སྐད་བདག་གིས་ཐོས་ཞེས་པའང་དོན་འགྲེལ་ཚུལ་གསུམ་དུ་བྱེད་དགོས་པ་རྣམས་རྒྱན་སྣང་ལས་ཞིབ་ཏུ་གསུངས་པ་ཡིག་ཆར་གསལ་བ་ལྟར་ཡིན་པས། དོན་གྱི་སྡེ་ཚན་དང་ལེའུ་གོ་རིམ་ངེས་གཟུང་སོགས་བཀའ་བསྡུ་བའི་དུས་དང་བམ་གྲངས་སོགས་བསྒྱུར་བའི་དུས་སུ་བཀོད་པ་ཡིན་གྱི་ཐོག་མ་ནས་འདི་ལྟར་ཡོད་མི་དགོས་པའི་ཕྱིར། འོ་ན་དེ་དུས་ཀྱི་བརྒྱད་སྟོང་པ་ལ་གླེང་གཞི་དང་ཡོངས་གཏད་མ་ཚང་ན་ལེའུ་སོ་གཉིས་དང་ཤོ་ལོ་ཀ་བརྒྱད་སྟོང་མ་ལོང་བས་བརྒྱད་སྟོང་པར་འཇོག་མི་ཐུབ་པའམ། དེ་ལ་ཡང་ཚང་ན་ཕྱིས་ཀྱིས་དེ་ལ་ལྷག་པས་བརྒྱད་སྟོང་པ་མ་ཡིན་པར་ཐལ་ལོ་ཟེར་ན། གསར་དུ་ཚེས་པའི་ལོའང་ལོ་མཚན་ཉིད་པ་ཡིན་པས་ཟླ་བ་བཅུ་གཉིས་ཚང་དགོས་ཀྱང་ལོ་སར་མ་ཐག་ཟླ་བ་བཅུ་གཉིས་པ་

― GTD002_Page_0691 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་མི་དགོས་པ་དང། སེམས་ནི་སྔ་མས་བྱང་ཆུབ་བར། །ཞེས་སོགས་ཀྱི་རིགས་པ་ལྟར་ཡིན་པས་སྐྱོན་མི་འཇུག་གོ །དུས་འཁོར་རྩ་རྒྱུད་ཀྱང་དེ་དང་མཉམ་དུ་གསུངས་པ་ལ་འགལ་བ་མེད་པར་ཐལ། འགྲེལ་ཆེན་གྱི་བཅུ་གཉིས་པ་ཞེས་པ་དེ་སངས་རྒྱས་པའི་ས་ག་ཟླ་བ་དེ་ནས་བརྩིས་པའི་བཅུ་གཉིས་པ་ལ་བྱས་ནས་ཀྱང་བཤད་ཆོག་པ་གང་ཞིག །ལོ་དེའི་བཅུ་གཉིས་པར་བྱེད་ནའང་དེ་དུས་འཁོར་རང་ལུགས་ཡིན་པས་ཡོངས་གྲགས་ལ་དེ་ལྟར་ཁས་ལེན་མི་དགོས་པའི་ཕྱིར། དང་པོ་གྲུབ་སྟེ། བུ་སྟོན་དང་མཁས་གྲུབ་རྗེས་ཀྱང་དེ་ལྟར་གསུངས་པས་དུས་འཁོར་པ་ལ་དེ་འདྲའི་བཤད་པ་མ་བྱུང་བ་མི་འཐད་པའི་ཕྱིར། མཁས་གྲུབ་ཊཱིཀ་ཆེན་ལས། སངས་རྒྱས་པའི་དུས་དེ་ནས་བརྩིས་པའི་ཟླ་བ་བཅུ་གཉིས་པ་ནག་པའི་ཟླ་བ། ཞེས་གསུངས་པའི་ཕྱིར། གཉིས་པ་གྲུབ་སྟེ། མཁས་གྲུབ་ནོར་བཟང་བས་དུས་འཁོར་ལུགས་ལ་ལོ་མགོ་ནག་ཟླ་ནས་འཛིན་པ་དང་ས་ག་ནས་འཛིན་པ་གཉིས་བཤད་པས། དེ་ལྟར་ན་སངས་རྒྱས་པའི་ལོ་དེའི་བཅུ་གཉིས་པར་བྱས་ཆོག་པའི་ཕྱིར། རྟགས་གྲུབ་སྟེ། ལུག་ཁྱིམ་གྱི་རི་མོ་ཤར་བ་ནས་ལོ་མགོ་འཛིན་དགོས་ལ། དེ་རབ་བྱུང་གི་ལོ་ལྟ་བུར་ཧོར་ཟླ་གསུམ་པའི་ཚེས་གཅིག་ནས་ཤར་ནའང་ཚེས་ཞག་གི་ཟླ་བས་ཁྱིམ་ཞག་གི་ཟླ་བའི་དོད་མ་ཐུབ་པར་ཞག་གཅིག་མ་ལོང་ཙམ་རེ་ལྷག་པ་བསགས་ནས་དེའི་ཕྱི་ལོ་ལུག་ཁྱིམ་གྱི་རི་མོ་ཚེས་བཅུ་གཅིག་ལ་འཆར་བའི་ལོ་དེ་གཉིས་ལ་ཡར་ངོ་སྔོན་འགྲོ་ཅན་གྱི་ནག་ཟླ་ལོ་མགོར་བྱེད་དགོས། དེའི་

― GTD002_Page_0692 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་ལོ་ཞག་བཅུ་གཅིག་པ་གཉིས་ཕྱི་ནུར་བྱས་པས་རགས་རྩིས་ཀྱིས་ཧོར་ཟླ་གསུམ་པའི་ཉི་ཤུ་གཉིས་ལ་འཆར་བས་ལོ་དེར་མར་ངོ་སྔོན་འགྲོ་ཅན་གྱི་ས་ག་ཟླ་བ་ལོ་མགོར་བྱེད་དགོས་པའི་ཕྱིར། ཟུར་ཕྱི་མ་དེར་ཐལ། ཉི་མས་ནག་པའི་སྐར་ཁྱིམ་གྱི་ཆ་གསུམ་ལ་ལོངས་སྤྱད་ཟིན་ཏེ་བཞི་ཆར་སླེབས་པ་ནས་ལུག་ཁྱིམ་གྱི་རི་མོ་ཤར་བས་ལུག་ཁྱིམ་དང་ས་ག་མཉམ་དུ་རྫོགས་པ་ཞིག་ཡོད་ལ། ལོ་དེར་ལུག་ཁྱིམ་དང་ས་ག་སྦྱོར་དགོས་པས་ལོ་མགོའང་དེ་ནས་འཛིན་པའི་ཕྱིར། དྲི་མེད་འོད་ལས། ལྷུན་པོའི་ལྷོའི་དུམ་བུ་འདིར་ལུག་ལ་ཉི་མ་གཉིས་པ་དཔྱིད་ཀྱི་དུས་ས་ག་ཟླ་བར་བྱེད་དོ། །ཞེས་གསུངས་པའི་ཕྱིར། དེས་ན་མཁས་གྲུབ་ཐམས་ཅད་མཁྱེན་པའི་དགོངས་པའང་འགྲེལ་ཆེན་དུ་ནག་ཟླའི་ཚེས་གཅིག་དང་ལུག་ཁྱིམ་སྦྱར་བའི་བཤད་པ་མང་བས་དེར་སྒོ་བསྟུན་པ་ཙམ་ཡིན་གྱི། རི་མོ་འཆར་སྔ་ཕྱིའི་དབང་གིས་ལོ་མགོ་འཛིན་ཚུལ་མི་འདྲ་བར་བྱེད་པ་འདི་མི་བཞེད་པ་མིན་ཏེ། མཁས་གྲུབ་རྗེའི་རིགས་ལྡན་དྲིས་ལན་ལས། དུས་བཞིའི་མཐར་ཟད་བྱེད་ཀྱི་ལོ་དཔྱིད་ཟླ་ར་བའི་གནམ་སྟོང་ལ་གཟའ་ཐམས་ཅད་སྐར་མ་ནམ་གྲུའི་སྟེང་དུ་སྟོངས་པ་ལ་ཞུགས་ནས་ངེས་པ་ཐམས་ཅད་སྟོང་པར་འགྱུར་ཞིང། སླར་ཡང་ནང་བར་ནས་ངེས་པ་ཐམས་ཅད་ཀྱི་མགོ་རྩོམ་པ་ན་ལོ་རབ་བྱུང་ཟླ་བ་དཔྱིད་ཟླ་འབྲིང་པོ་ནག་པས་ཉ་བ། གཟའ་ཉི་མ་སྐར་མ་ཐ་སྐར་སྦྱོར་བ་རྣམ་སེལ། བྱེད་པ་བྷ་ཝཾ་རྣམས་ཤར་ནས་ངེས་པ་ཐམས་ཅད་རིམ་བཞིན་དུ་འབྱུང་བ་ཡིན་པས། དེའི་ཕྱིར་ལོའི་དང་པོ་རབ་བྱུང་དང། ཟླ་བའི་དང་པོ་ནག་ཟླ། རྒྱུ་སྐར་དང་པོ་ཐ་སྐར།

― GTD002_Page_0693 ―

^{[མ་དཔེ་གཟིགས་ན་འདིར་གནོན།]}

[Full Size]

གཟའི་དང་པོ་ཉི་མ། སྦྱོར་བའི་དང་པོ་རྣམ་སེལ། བྱེད་པའི་དང་པོ་བྷ་ཝཾ་དུ་བྱས་པ་ལགས། ཞེས་གསུངས་པའི་ཕྱིར། ཁྱབ་སྟེ། ཟླ་བ་དང་པོ་ནག་ཟླར་བྱས་པ་ནི་དེ་འདྲའི་དུས་བྱེ་བྲག་པའི་དབང་དུ་བྱས་པ་ཡིན་གྱི། ལོ་ཐམས་ཅད་ལ་ངེས་གཟུང་མིན་པར་གསུངས་པའི་ཕྱིར། ཁོ་བོའི་ཕར་ཕྱིན་གྱི་མཆན་དུ་ཕྱི་དེ་ལོ་ཞེས་པ་ལ་བཤད་ཚུལ་གཞན་ཞིག་བྱས་ཡོད་པ། དེ་སྐབས་གོང་གི་རྩོད་པ་མ་སོང་བར་ལུགས་གཉི་གའི་ཞིབ་ཆ་མ་ཕྱེད་པ་ཡིན་ནོ། །ཁོ་ན་རེ། ནག་ཟླ་དང་ས་ག་གཉི་ག་ནས་ལོ་མགོ་འཛིན་ཚུལ་གཉིས་ཡོད་པ་མི་འཐད་པར་ཐལ། ལོ་སྔ་མར་ནག་ཟླ་ནས་ལོ་མགོ་གཟུང་ན་ཕྱི་མར་ས་ག་ནས་ལོ་མགོ་འཛིན་ཚུལ་མེད། ལོ་སྔ་མར་ས་ག་ནས་ལོ་མགོ་གཟུང་ན་ཕྱི་མར་ནག་པ་ནས་ལོ་མགོ་འཛིན་ཚུལ་མེད་པའི་ཕྱིར། དང་པོ་གྲུབ་སྟེ། དེ་ལྟར་ན་ཟླ་བཤོལ་མ་ཡིན་པར་ལོ་གཅིག་པོ་དེའི་མགོ་མཇུག་ལ་ནག་ཟླ་གཉིས་འབྱུང་བའམ་ལོ་དེའི་མཇུག་གི་དབོ་ཟླ་དང་ཕྱི་མའི་ལོ་མགོའི་ས་ག་ཟླ་བ་གཉིས་ཀྱི་བར་ནས་ནག་ཟླ་ཞིག་ཆད་པར་ཐལ་བའི་སྐྱོན་འབྱུང་བའི་ཕྱིར། གཉིས་པ་གྲུབ་སྟེ། ལོ་སྔ་མ་ས་ག་ནས་མགོ་བཟུང་ཕྱི་མ་ནག་ཟླ་ནས་མགོ་བཟུང་ན་ལོ་སྔ་མ་དེར་ནག་ཟླ་མ་ཚང་བར་ཐལ་བའམ། ལོ་སྔ་ཕྱིའི་ནག་ཟླ་གཉིས་བསྟུད་ནས་འོང་བར་ཐལ་བའི་ཕྱིར་ཟེར་ན། ཡར་ངོ་མར་ངོའི་མིང་འདོགས་ལུགས་ཙམ་སོ་སོར་སོང་བ་ཡིན་གྱི། ཟླ་བ་བཅུ་གཉིས་ལ་ཆད་ལྷག་བྱུང་བ་མིན་པས་སྐྱོན་མེད་ཚུལ་གྱི་ཞིབ་ཆ་ཡོད་པར་སྣང་ཡང་སྐབས་མ་ཡིན་པས་ཧ་ཅང་མ་སྤྲོས་ཏེ་དཔྱོད་པའི་སྒོ་ཙམ་བསྟན་པ་ཡིན་ནོ། །དེས་ན་ཤེར་མདོ་གསུངས་པ་དང་མཉམ་དུ་དུས་འཁོར་

― GTD002_Page_0694 ―

^{[མ་དཔེ་གཟིགས་ན་འདིར་གནོན།]}

[Full Size]

རྩ་རྒྱུད་གསུངས་པར་བཤད་པ་ལ། འགྲེལ་ཆེན་ལས་ཐེག་པ་གསུམ་སྟོན་པར་མཛད་ནས་ཞེས་པའི་ལུང་གིས་ཀྱང་མི་གནོད་དེ། དེས་མདོ་ཕྱོགས་ལས་ཐེག་པ་གསུམ་དང་སྔགས་ཀྱི་རྒྱུད་རྣམས་གསུངས་ཞེས་པ་ཡིན་གྱི། གསུངས་པའི་གོ་རིམ་བསྟན་པ་མིན་ལ། མྱ་ངན་ལས་འདའ་བའི་ལོ་གསུངས་ནའང་སངས་རྒྱས་པའི་ཕྱི་ལོ་མ་གསུངས་མི་དགོས་པའི་ཕྱིར། ཉི་མ་ཐང་པའི་དུས་ཚིགས་ལས། སྟོན་པ་མངོན་པར་རྫོགས་པར་སངས་རྒྱས་པའི་ཕྱི་དེ་ལོ་ནག་པ་ཟླ་བར་དུས་འཁོར་རྩ་རྒྱུད་གསུངས་པར་ཁས་ལེན་པ་དང། དེ་རྗེས་སླར་ཡང་མྱ་ངན་ལས་འདས་ལོ་ལྕགས་འབྲུག་ལ་དུས་འཁོར་རྩ་རྒྱུད་གསུངས་པར་ཁས་ལེན་པ་གཉིས་ལ་ནང་འགལ་ཅུང་ཟད་ཀྱང་མེད་དེ། སྟོན་པས་གདུལ་བྱའི་ངོ་བོར་དུས་དང་པོར་རྩ་རྒྱུད་སྔ་ཕྱི་རིམ་པར་དུ་མ་གསུངས་པ་ལ་འགལ་བ་ཅུང་ཟད་ཀྱང་མེད་པའི་ཕྱིར་ཏེ། དཔེར་ན་སྟོན་པས་གདུལ་བྱའི་ངོ་བོ་ཤེར་ཕྱིན་གྱི་མདོ་དུས་སྔ་ཕྱི་རིམ་པར་དུ་མ་གསུངས་པའི་ཕྱིར་དང། ཁྱད་པར་བཀའ་བརྒྱད་སྟོང་པ་གཅིག་པོ་དེ་གདུལ་བྱའི་ངོ་བོར་དུས་སྔ་ཕྱི་རིམ་པར་ལན་གཉིས་གསུངས་པ་བཞིན་ཡིན་པའི་ཕྱིར། ཞེས་གསུངས་པའི་ཕྱིར་དང། དཔལ་འཕྲེང་གི་མདོའང་གྲོང་ཁྱེར་མཐའ་མེད་དུ་བྱོན་ནས་བུ་མོ་དཔལ་འཕྲེང་ལ་གསུངས་ཏེ་སླར་རྒྱལ་བྱེད་ཚུལ་དུ་བྱོན་ནས་ཀུན་དགའ་བོ་ལ་གསུངས་ཚུལ་མདོ་རང་ཉིད་ལས་གསལ་བར་གསུངས་པའི་ཕྱིར། འདིས་ཀུན་དགའ་བོ་ལ་བསྐྱར་ནས་གསུང་བ་མི་འཐད་ཟེར་བ་རྣམས་ཁེགས་སོ། །ཐེག་པ་ཆེ་ཆུང་གི་བཀའ་བསྡུ་བ་པོའི་རྣམ་གཞག་ནི་སྐབས་འདིར་དོགས་པ་ཆུང་ཡང་སྤྱིར་མཁོ་ཆེ་བས་ཅུང་ཟད་བཤད་ན། ཉན་ཐོས་

― GTD002_Page_0695 ―

^{[མ་དཔེ་གཟིགས་ན་འདིར་གནོན།]}

[Full Size]

སྡེ་པ་སྔ་མ་རྣམས་ཐེག་པ་ཆེན་པོའི་མདོ་སྡེ་སངས་རྒྱས་ཀྱིས་མ་གསུངས་པའི་སྒྲུབ་བྱེད་དུ་ཀུན་དགའ་བོ་སོགས་ཀྱིས་སྡེ་སྣོད་གསུམ་བསྡུ་བའི་ཚེ་མ་བསྡུས་པའི་ཕྱིར་ཞེས་ཟེར་ཏེ། ཕྱོགས་སྔ་འགོད་པའི་སྐབས་ཀྱི་དབུ་མ་སྙིང་པོ་ལས། ཐེག་ཆེན་སངས་རྒྱས་གསུང་མིན་ཏེ། །མདོ་སྡེ་སོགས་སུ་མ་བསྡུས་ཕྱིར། །རིག་བྱེད་མཐའ་ཡི་ལྟ་བ་བཞིན། །ཞེས་གསུངས་པའི་ཕྱིར། དེ་ལ་གྲུབ་མཐའ་གོང་མས་ལན་བྱེད་ཚུལ་ཡོད་དེ། ཀུན་དགའ་བོ་སོགས་ཀྱིས་མ་བཟུང་ན་བཀའ་མ་ཡིན་པས་མ་ཁྱབ་པར་ཉན་ཐོས་སྡེ་པ་རང་ལ་གྲགས་པའི་ལུང་གིས་བསྒྲུབས་པ་དང། ཀུན་དགའ་བོ་སོགས་ཀྱིས་མ་བསྡུས་ཀྱང་སྡུད་པ་པོ་མེད་མི་དགོས་ཚུལ་གཉིས་ཡོད་པའི་ཕྱིར། དང་པོ་གྲུབ་སྟེ། དེ་ལ་གྲགས་པའི་ལུང་བཙུན་པ་བླ་མའི་མདོ་སྡེ་ལས་མདོ་དེ་འཛིན་པའི་ཉན་ཐོས་བཙུན་པ་བླ་མ་གཅིག་པུ་ལས་མེད་པར་གསུངས་པ་དང། ཀུན་དགའ་བོའི་མདོ་ལས་རང་ཉིད་སྟོན་པའི་དྲུང་ནས་ལོ་ཉི་ཤུ་ལྷག་ཙམ་ལ་དངོས་སུ་ཉན་ཅིང་དེས་སྔར་གསུངས་པའི་ཆོས་ཕུང་ཉིས་སྟོང་ཙམ་ཞིག་དགེ་སློང་གཞན་ལས་ཐོས་པར་གསུངས་ལ། སྔོན་གྱི་ལོ་དེ་སྙེད་ཅིག་ཏུ་ཉིས་སྟོང་པོ་དེ་ལས་མ་གསུངས་པར་ཁས་ལེན་མི་ནུས་པས་དེའི་རྟགས་ཀྱིས་ཀུན་དགའ་བོས་ལུང་ཐམས་ཅད་མ་བཟུང་བར་འགྲུབ་པ་དང། བ་ད་ལིའམ་འོད་སེལ་གྱི་མདོར་རྟ་ཅང་ཤེས་བཟང་པོའི་རྟེའུ་ཞེས་བྱ་བའི་མདོ་ཞིག་གསུངས་པ་དེའང་དེས་མ་བཟུང་བ་སོགས་དེ་འདྲ་དུ་མ་ཡོད་པའི་ཕྱིར་ཟེར། དབུ་མ་སྙིང་པོར་སྡོམ་ཚིག་བཀོད་པ་ལས། བླ་མ་ཀུན་དགའ་བ་ཏ་ལི། །སྡུག་བསྔལ་

― GTD002_Page_0696 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུང་པོ་ས་པ་དང། །འཆར་བྱེད་སྟོང་པ་འཆར་བ་དང། །གང་བོ་སྤངས་པ་རམས་པ་དང། །མྱ་ངན་འདས་དང་ཡུལ་འཁོར་སྐྱོང། །ཞེས་བྱ་གཞན་ཡང་འགྲོ་བའི་མདོ། །རྩ་བའི་སྡུད་པར་མ་ཚང་བས། །རྒྱས་པ་མིན་པར་རྟོགས་པར་བྱ། །ཞེས་འབྱུང་ངོ་། །ཚིགས་བཅད་དེ་རྣམ་བཤད་རིགས་པར་བཀོད་པ་ལས། བླ་མ་ཀུན་དགའ་འོད་སེལ་དང། །སྡུག་བསྔལ་ཕུང་སྟོན་ས་སྟོན་དང། །འཆར་ཀ་སྟོང་ཉིད་ཆུ་ལས་སྐྱེས། །གང་བོ་ས་མཚོ་ཆུ་ཤིང་དང། །མྱ་ངན་འདས་དང་ཡུལ་འཁོར་སྐྱོང། །འགྲོ་བའི་མདོ་དང་དེ་བཞིན་གཞན། །ཡང་དག་བསྡུས་པའི་གཞི་ཉམས་ཕྱིར། །མཐའ་དག་མིན་པར་རྟོགས་པ་ཡིན། །ཞེས་འབྱུང་སྟེ། འགྱུར་ཁྱད་ཙམ་ལས་རྒྱ་དཔེ་ལ་གཅིག་ཏུ་ཡོད་པར་སྣང་ཞིང་འདྲེན་རྒྱུའི་མདོ་རྣམས་ཀྱང་གཅིག་པ་ཡིན་པར་སྣང་ངོ་། །འོན་ཀྱང་ཚིག་རྐང་ཐ་མ་གཉིས་ལ། རྩ་བའི་སྡུད་པར་མ་ཚང་བས། །རྒྱས་པ་མིན་པར་རྟོགས་པར་བྱ། །ཞེས་པའི་འགྱུར་ལྟར་ན་བཀའ་བསྡུ་བའི་དུས་ནས་མ་ཚང་བར་བྱེད་དགོས་ལ། དེ་ལྟ་ན་ཀུན་དགའ་བོས་མདོ་སྡེ་ཐམས་ཅད་བཟུང་བ་མིན་པར་བཤད་པ་དང་འགྲིག ཡང། ཡང་དག་བསྡུས་པའི་གཞི་ཉམས་ཕྱིར། །མཐའ་དག་མིན་པར་རྟོགས་པར་བྱ། །ཞེས་པ་དང། དེའི་ཐད་ཀྱི་འགྲེལ་པ་ལས། ཡང་དག་པར་བསྡུས་པའི་གཞི་འོད་སྲུངས་ཆེན་པོ་ལ་སོགས་པ་དགྲ་བཅོམ་པ་རྣམས་ཀྱིས་མཛད་པ་གང་ཡིན་པ་དེའང་ད་ལྟར་ཉམས་ཏེ། ཞེས་པ་ལྟར་ན་དེ་དག་གིས་བསྡུས་ཀྱང་ད་ལྟ་ཡོངས་སུ་གྲགས་པར་ཡོད་མི་དགོས་ཞེས་པར་འགྱུར་ལ། དེ་ལྟར་བྱས་ན་དེ་རྣམས་ཀྱིས་བསྡུས་པའི་ལུང་ཡང་ད་ལྟ་སྡེ་པ་སོ་

― GTD002_Page_0697 ―

^{[མ་དཔེ་གཟིགས་ན་འདིར་གནོན།]}

[Full Size]

སོས་འདོན་ཚུལ་མི་འདྲ་བ་མང་བས་གང་བསྡུས་པ་ལྟར་གནས་ཡོད་པར་མ་ངེས་པ་དང། ཤེར་མདོ་ཀུན་དགའ་བོས་བསྡུས་ཀྱང་ཁྱེད་རྣམས་ལ་གྲགས་མི་དགོས་ཞེས་སྐབས་དོན་དང་ཡང་འགྲིག་པས་འགྲེལ་རྒྱག་ཚུལ་གཉི་ག་རང་ལུགས་སུ་བྱེད་དགོས་སོ། །གཞན་ཡང་ཐེག་ཆེན་གྱི་མདོ་འགའ་ཞིག་དེ་རྣམས་ཀྱིས་མ་བསྡུས་ཀྱང་བཀའ་མིན་མི་དགོས་པར་ཐལ། དེ་མ་བསྡུས་པའི་རྒྱུ་མཚན་བཀའ་མིན་ནས་མ་བསྡུས་པ་མིན་གྱི། དེ་དག་གི་ཡུལ་མིན་ནས་མ་བསྡུས་པ་ཡིན་པའི་ཕྱིར། རྟོག་གེ་འབར་བ་ལས། བདག་ཅག་གི་རྩ་བའི་སྡུད་པར་བྱེད་པ་པོ་ཉན་ཐོས་མ་ཡིན་ཏེ། ཐེག་པ་ཆེན་པོའི་གསུང་རབ་ནི་དེ་དག་གི་ཡུལ་མ་ཡིན་པའི་ཕྱིར་རོ། །ཞེས་གསུངས་པའི་ཕྱིར། གོང་གི་རྟགས་ཟུར་གཉིས་པ་ཉན་ཐོས་ཆེན་པོ་རྣམས་ཀྱིས་མ་བསྡུས་ཀྱང་དེ་སྡུད་པ་པོ་མེད་མི་དགོས་པར་ཐལ། དེ་ཕྱག་ན་རྡོ་རྗེ་སོགས་ཀྱིས་བསྡུས་པའི་ཕྱིར། རྟོག་གེ་འབར་བ་ལས། ཐེག་པ་ཆེན་པོ་སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པར་བྱེད་པ་པོ་ཀུན་ཏུ་བཟང་པོ་དང། འཇམ་དབྱངས་དང། གསང་བའི་བདག་པོ་དང། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར། ཞེས་དང། རྒྱན་སྣང་ལས། དེ་བཞིན་གཤེགས་པས་གསང་བ་བསྟན་པའི་དབང་དུ་བྱས་ནས་བསྐལ་པ་བཟང་པོ་བའི་དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་དང་དམ་པའི་ཆོས་ཀྱི་ཚོགས་བསྲུང་བ་ལ་རྣམ་པ་ཐམས་ཅད་དུ་བདག་པོར་བྱས་པ་ཡིན་པའི་ཕྱིར་དང། ཕྱག་ན་རྡོ་རྗེ་དབང་བསྐུར་བ་ལ་སོགས་པ་ལས་བསྟན་པ་གཏད་པ་ཡིན་པའི་

― GTD002_Page_0698 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་དང། གཞན་རྣམས་ཀྱི་ཁྱད་པར་བརྗོད་པ་མེད་པའི་ཕྱིར་ན་ལྕང་ལོ་ཅན་ན་བཞུགས་པ་ས་བཅུའི་དབང་ཕྱུག་རྡོ་རྗེ་འཛིན་པ་ཆེན་པོས་འཇིག་རྟེན་ཐམས་ཅད་རྗེས་སུ་གཟུང་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེ་སྡུད་པར་གསོལ་བ་འདེབས་པ་འཕགས་པ་བྱམས་པ་ལ་སོགས་པ་བྱང་ཆུབ་སེམས་དཔའི་ཚོགས་རྣམས་ལ་འདི་སྐད་ཅེས་བྱ་བ་ལ་སོགས་པ་གསུངས་པ་ཡིན་ནོ་ཞེས་སྔོན་གྱི་སློབ་དཔོན་རྣམས་འཆད་དོ། །ཞེས་གསུངས་པའི་ཕྱིར། རྟོག་གེ་འབར་བར་ཀུན་བཟང་གསང་བདག་ལས་ལོགས་སུ་བྱས་པ་ནི་གཉིས་མེད་རྣམ་རྒྱལ་གྱི་རྒྱུད་སྒྲོན་གསལ་དུ་དྲངས་པ་ལས། ཀུན་ཏུ་བཟང་པོའི་ནི་གནས་བརྟན་ཀུན་དགའ་བོར་གྱུར་ཏོ། །ཞེས་པའི་ཚིག་རིས་ལྟར་བྱས་པ་ཡིན་ལ། རང་ལུགས་དེ་གཉིས་གཅིག་ཏུ་བྱེད་དགོས་ཏེ། སྒྲོན་གསལ་ལས། བཙུན་པ་ཀུན་དགའ་བོ་ལ་སོགས་པ་སྡུད་པར་བྱེད་པར་ཅིའི་ཕྱིར་འཇིག་རྟེན་དུ་གྲགས། སྨྲས་པ། ཀུན་དགའ་བོ་ནི་འདིར་བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་སྟེ་ཕྱག་ན་རྡོ་རྗེ་ཡིན་ལ། རྡོ་རྗེ་འཆང་ཆེན་པོའང་དེ་ཉིད་ལས་གཞན་མ་ཡིན་ཏེ། ཞེས་གསུངས་པའི་ཕྱིར། དེའི་རྒྱུ་མཚན་ཡང་ཕྱག་ན་རྡོ་རྗེ་དཀྱིལ་འཁོར་དུ་བཅུག་སྟེ་དབང་བསྐུར་བའི་གསང་མཚན་ཀུན་ཏུ་བཟང་པོ་ཡིན་པའི་ཕྱིར་ཏེ། ལག་ན་རྡོ་རྗེ་དབང་བསྐུར་བའི་རྒྱུད་ལས། ལག་ན་རྡོ་རྗེ་དབང་ཆེན་པོ་བསྐུར་བས་བྱང་ཆུབ་སེམས་དཔའ་ཀུན་ཏུ་བཟང་པོ་དབང་བསྐུར་ནས་དེ་ཉིད་ལ་བསྟན་པ་གཏད་དོ། །ཞེས་གསུངས་པའི་ཕྱིར། དེ་ལ་ཁ་ཅིག །ཐེག་ཆེན་གྱི་བཀའ་བསྡུ་བ་པོ་དེ་ལྟར་བཞག་པ་མི་འཐད་པར་ཐལ། རྒྱུད་སྡེ་སྤྱི་རྣམ་ལས།

― GTD002_Page_0699 ―

^{[མ་དཔེ་གཟིགས་ན་འདིར་གནོན།]}

[Full Size]

ཁ་ཅིག་ཐེག་ཆེན་གྱི་བཀའ་བསྡུ་བ་བྱུང་ཚུལ་ལ་བཅོམ་ལྡན་འདས་མྱ་ངན་ལས་འདས་ནས་རྒྱལ་པོའི་ཁབ་ཀྱི་ལྷོ་ཕྱོགས་ཀྱི་རི་བི་མ་ལ་སྭ་བྷཱ་ཝ་ཞེས་བྱ་བར་བྱང་ཆུབ་སེམས་དཔའ་འབུམ་ཕྲག་བཅུ་འདུས་ནས། འཕགས་པ་འཇམ་དཔལ་དང། བྱམས་པ་དང། ཕྱག་ན་རྡོ་རྗེ་གསུམ་གྱིས་རིམ་པ་བཞིན་ཐེག་པ་ཆེན་པོའི་མངོན་པ་འདུལ་བ་མདོ་སྡེའི་སྡེ་སྣོད་གསུམ་བསྡུས་ཞེས་ཟེར་རོ། །དེ་ནི་མི་འཐད་དེ། ཞེས་པ་ནས། ཨེ་ཝཾ་གྱི་ཡི་གེ་གཉིས་ཀྱི་བརྡ་རྡོ་རྗེ་འཆང་ཉིད་ཀྱིས་བཤད་པ་དང་འགལ། ཞེས་གསུངས་པའི་ཕྱིར་ན། མ་ཁྱབ་སྟེ། ཐུན་མོང་བའི་ལུགས་ཀྱི་བཀའ་བསྡུ་ལྟར་སངས་རྒྱས་མྱ་ངན་ལས་འདའ་ཚུལ་བསྟན་རྗེས་སུ་དེ་རྣམས་ཀྱིས་བསྡུས་པ་མིན་ཞེས་པའི་དོན་ཡིན་པའི་ཕྱིར། མདོ་ཕྱོགས་ལའང་ཆོས་ཡང་དག་པར་སྡུད་པ་ལས། དགེ་སློང་དག །ངའི་གསུང་རབ་རྣམས་ཀྱི་ཐོག་མར། འདི་སྐད་བདག་གིས་ཐོས་པ་དུས་གཅིག་ན་ཞེས་བྱ་བ་ལ་སོགས་པ་དང། བར་དུ་མཚམས་སྦྱོར་གྱི་ཚིག་རྣམས་ཆུག་ལ་སྡུས་ཤིག །ཅེས་དང། ལང་གཤེགས་ལས་ཀྱང། འདི་སྐད་བདག་གིས་ཐོས་ལ་སོགས། །ཤཱཀྱ་སེང་གེས་བཤད་པ་ཡིན། །ཞེས་འབྱུང་ཡང། སླར་འདི་ལྟར་སྡུས་ཤིག་ཅེས་རྗེས་སུ་གནང་བ་ཡིན་གྱི། བསྡུ་ས་ཡིན་པའི་གླེང་གཞིའི་དོན་བཤད་པ་མིན་པས་རྒྱུད་ལས་གླེང་གཞིའི་ཡི་གེ་བཞི་བཅུའི་དོན་བཤད་པ་སོགས་དང་མི་འདྲ་སྟེ། སྒྲོན་གསལ་གྱི་མཆན་ལས། མདོ་སྡེའི་ཕྱོགས་ནས་བཅོམ་ལྡན་འདས་མྱ་ངན་ལས་འདས་རྗེས་སུ་སྡེ་སྣོད་གསུམ་གྱི་བསྡུ་ས་

― GTD002_Page_0700 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པར་གསུངས་པ་བཞིན་དུ་འདུས་པ་སོགས་ལ་དེ་ལྟར་འདོད་པ་ཤིན་ཏུ་མི་རིགས་ཏེ། ཞེས་གསུངས་པའི་ཕྱིར། ཚུལ་འདིས་ཀྱང་བརྒྱད་སྟོང་པ་ཡོད་ན་གླེང་གཞི་ནས་བཟུང་ད་ལྟའི་འདི་བཞིན་ཡོད་མི་དགོས་པར་འགྲུབ་སྟེ། དེ་དགོས་ན་སངས་རྒྱས་མྱ་ངན་ལས་མ་འདས་བར་དུ་བརྒྱད་སྟོང་པ་མ་བྱུང་བར་ཐལ་བའི་ཕྱིར་རོ། །འོ་ན་ཀུན་དགའ་བོ་ཉན་ཐོས་མ་ཡིན་པར་ཁས་ལེན་ནམ་ཞེ་ན། གཅིག་ཏུ་ཁ་ཚོན་གཅོད་མི་རུང་སྟེ། དེ་ལ་སྤྲུལ་པ་གཅིག་ཀྱང་ཡོད་ལ་ཉན་ཐོས་དངོས་གནས་གཅིག་ཀྱང་ཡོད་པའི་ཕྱིར། དང་པོ་གྲུབ་སྟེ། ཐུབ་བསྟན་བྱི་དོར་ལས། སྲས་སྒྲ་གཅན་འཛིན་དང། ཀུན་དགའ་བོ་དང། ལྷས་སྦྱིན་རྣམས་ཀྱང་བྱེ་བ་ཕྲག་བརྒྱ་ལ་སོགས་པར་གསུངས་སོ། །ཚུལ་འདི་ལྟར་གསུངས་པ་ལས་ན་རྒྱལ་པོ་ཟས་གཙང་མ་ལ་སོགས་པ་དེ་དག་ཀྱང་དེ་དང་དེའི་ཚུལ་བསྟན་པའི་སྤྲུལ་སྐུ་ཡིན་གྱི། གང་ཟག་རང་རྒྱུད་པ་མིན་ནོ། །ཞེས་དང། མཁས་གྲུབ་རྗེའི་དུས་འཁོར་ཟིན་བྲིས་ལས། དེ་ལ་ཀུན་དགའ་བོ་རྒྱུད་དོན་མི་ཤེས་པའི་ཆགས་བྲལ་གྱི་དཔེར་སྨོས་པ་ནི། ཆགས་བྲལ་གྱི་སྤྱོད་པ་དང་རྒྱ་ཆེན་པོའི་སྤྱོད་པ་དང། ཆགས་ཅན་གྱི་སྤྱོད་པ་གསུམ་གྱི་ནང་ནས་ཀུན་དགའ་བོ་དང་པོ་ལ་སྤྱོད་པའི་ཚུལ་བཟུང་བ་ཉིད་ཀྱི་ཆ་ནས། ཞེས་གསུངས་པའི་ཕྱིར། འདི་མདོ་ལུགས་ལའང་འདོད་དགོས་ཏེ། སུམ་ཅུ་རྩ་གསུམ་པའི་ལེའུ་ལས། འཇིག་རྟེན་མགོན་པོ་ཁྱོད་ནི་འཇིག་རྟེན་མཐོང་བ་བཞིན། །དེ་སྙེད་ཀྱི་ནི་ཤཱ་རིའི་བུ་དང་གསུས་པོ་ཆེ། །ཀ་པི་ན་དང་ནམ་གྲུ་ཀ་ཏ་ཡ་ནའི་བུ། །གང་བོ་དང་ནི་རབ་འབྱོར་འོད་སྲུང་

― GTD002_Page_0701 ―

^{[མ་དཔེ་གཟིགས་ན་འདིར་གནོན།]}

[Full Size]

མཐོང་བར་གྱུར། །ཐོས་པ་རྒྱ་མཚོ་ལྟ་བུའི་དགེ་སློང་ཀུན་དགའ་བོ། །ཀུན་ཏུ་སངས་རྒྱས་རྣམས་ལ་ཞུ་བ་བདག་གིས་མཐོང། །ཞེས་སངས་རྒྱས་གང་དུ་བྱོན་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་སོགས་སུའང་དེ་ཉིད་ཀྱི་མཆོག་ཟུང་ཀུན་དགའ་བོ་སོགས་ཡོད་པར་གསུངས་པའི་ཕྱིར། འདི་ནི་དེང་དུས་ཆེན་པོའི་གོ་ས་རེར་སླེབས་པ་ན་འབྲེལ་མེད་ཀྱི་སྐྱེས་རབས་མང་པོ་ཁ་བདག་བྱས་ཏེ། དང་པོར་སངས་རྒྱས། བར་དུ་ཚོགས་བསགས། མཐར་འཁོར་བའི་གཏིང་རྡོར་ལྷུང་སྟེ་ཆགས་སྡང་གི་འཁོར་ལོ་བསྐོར་བའི་རྣམ་ཐར་རྣམས་དང་མི་མཚུངས་པར་ཚད་མའི་ལུང་གིས་གྲུབ་པའི་ཡུལ་ཡིན་ནོ། །གོང་གི་རྟགས་གཉིས་པ་གྲུབ་སྟེ། སྟོང་ཐུན་ལས། དེ་དག་ཐམས་ཅད་སྤྲུལ་པའ་ིཉན་ཐོས་ཡིན་པས་ཉན་ཐོས་མཚན་ཉིད་པ་མིན་པའི་ཕྱིར་སྐྱོན་མེད་དོ་ཞེ་ན། འོ་ན་ལྔ་སྡེ་བཟང་པོ་ཉན་ཐོས་ཀྱི་རིགས་ཅན་མ་ཡིན་པའི་ཕྱིར། དེ་དག་ཆེད་དུ་བྱ་བའི་གདུལ་བྱའི་གཙོ་བོར་བྱས་ནས་གསུངས་པའི་འཁོར་ལོ་དང་པོའི་མདོ་ཐེག་དམན་གྱི་སྡེ་སྣོད་མ་ཡིན་པར་ཐལ་ཞིང། བཅོམ་ལྡན་འདས་ཀྱི་དངོས་ཀྱི་འཁོར་ན་ཉན་ཐོས་མཚན་ཉིད་པའི་མཚན་གཞི་གཟུང་རྒྱུ་སུ་ཞིག་ཡོད་པ་སྨྲོས་ཤིག །ཅེས་གསུངས་པའི་ཕྱིར། ཁོ་ན་རེ། མདོ་དྲན་པ་ཉེར་བཞག་བརྗོད་བྱ་ཕྱོགས་མཐུན་གྱི་འཁོར་ལོ་དང་པོར་འཇོག་པ་མི་འཐད་པར་ཐལ། དེ་ཐེག་ཆེན་གྱི་མདོ་ཡིན་པའི་ཕྱིར། དེར་ཐལ། མདོ་རང་ཉིད་ལས། དྲན་པ་ཉེ་བར་བཞག་པ་ཞེས་བྱ་བ་ཐེག་པ་ཆེན་པོའི་མདོ། ཞེས་གསུངས་པའི་ཕྱིར་ན། མ་ཁྱབ་སྟེ། བུ་སྟོན་ཆོས་འབྱུང་ལས། འདི་ལོ་ཙཱ་བ་ཐེག་

― GTD002_Page_0702 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་དུ་མཛད། དཀར་ཆག་ཆེན་མོ་དག་ལས་ཐེག་ཆུང་དུ་བཤད་དོ། །ཞེས་པ་ལྟར་ལོ་ཙཱ་བས་བསྒྱུར་དུས་དེ་ལྟར་བཤད་པ་ཙམ་ཡིན་པའི་ཕྱིར། འོན་ཀྱང་རྒྱ་དཔེ་ལ་ལར་ཡང་ཐེག་ཆེན་དུ་བཤད་པ་ཡོད་པར་མངོན་ཏེ། སའི་སྟོད་འགྲེལ་ལས། ལུང་ཡང་ཉན་ཐོས་ཀྱི་ཐེག་པ་ནི་འོག་ནས་བརྗོད་པར་བྱའོ། །ཐེག་པ་ཆེན་པོ་བརྗོད་པར་བྱ་སྟེ། འཕགས་པ་དམ་པའི་ཆོས་དྲན་པ་ཉེ་བར་བཞག་པའི་མདོ་ལས། ཞེས་བར་སྲིད་ཀྱི་སྒྲུབ་བྱེད་དུ་འདྲེན་པའི་སྐབས་ཐེག་ཆེན་གྱི་ལུང་ཡིན་རྒྱུ་བྱས་ཏེ་དྲངས་སྣང་ངོ་། །ཡང་ཁ་ཅིག་ན་རེ། བཀའ་ཐམས་ཅད་ཆོས་ཕུང་བརྒྱད་ཁྲི་བཞི་སྟོང་དུ་གྲངས་མ་ངེས་པར་ཐལ། ཉོན་མོངས་པའི་སྤྱོད་པ་ལ་བརྒྱད་ཁྲི་བཞི་སྟོང་དུ་གྲངས་མ་ངེས་པ་གང་ཞིག །ཆོས་ཕུང་གི་གྲངས་ནི་སེམས་ཅན་གྱི་ཉོན་མོངས་པའི་སྤྱོད་པའི་སྒོ་དང་བསྟུན་ནས་དེ་སྙེད་ཅིག་གསུངས་པ་ཡིན་པའི་ཕྱིར། དང་པོ་གྲུབ་སྟེ། མདོ་ལས། འགྲོ་བ་སྤྱོད་པའི་སྒོ་རྣམས་ཇི་སྙེད་པ། །དེ་སྙེད་ཆོས་ཀྱི་སྒོ་ལ་རབ་ཞུགས་ཏེ། །ཞེས་དང། མཛོད་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་གསུངས་པའི་ཕྱིར། གཉིས་པ་གྲུབ་སྟེ། ཉོན་མོངས་པའི་སྤྱོད་པ་བརྒྱད་ཁྲི་བཞི་སྟོང་ཞེས་བཤད་པ་ནི་གདུལ་བྱ་དབང་རྟུལ་ལ་བསྟན་པའི་དྲང་དོན་ཡིན་གྱི། དངོས་གནས་ལ་དེར་མི་འདུས་པའི་ཕྱིར། གསང་བ་བསམ་གྱིས་མི་ཁྱབ་པའི་མདོ་ལས། སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་ཞེས་འབྱུང་བ་ནི་སེམས་ཅན་དབང་པོ་མཐུ་ཆུང་བ་རྣམས་གཟུང་བའི་ཕྱིར་དེ་བཞིན་གཤེགས་པས་བསྟན་གྱི། ཞེས་པ་ནས། སྤྱོད་པ་གང་ཡིན་པ་དེ་དག་སྐལ་བ་ཙམ་དུ་བསྟན་ཀྱང་

― GTD002_Page_0703 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་དག་རེ་རེས་ཀྱང་དེ་བས་ལྷག་པར་འགྱུར་རོ། །ཞེས་གསུངས་པའི་ཕྱིར་ན། མ་ཁྱབ་སྟེ། རྐྱེན་འདི་ཁོ་ན་དང་འབྱུང་ཚུལ་ཡང་འདི་ཁོ་ན་ཉེས་དམིགས་འདི་ཙམ་ཁོ་ན་སྐྱེད་པ་ཞེས་ཁ་ཚོན་བཅད་པའི་སྤྱོད་པ་བྱེ་བྲག་པ་ཞིག་ངོས་བཟུང་སྟེ་འདི་ལྟ་བུ་བརྒྱད་ཁྲི་བཞི་སྟོང་ལས་མེད་ཅེས་གྲངས་ངེས་པ་དང། ཆོས་ཕུང་གཅིག་ལའང་ཤོ་ལོ་ཀ་སོགས་ཀྱི་ཚད་བཟུང་སྟེ་འདི་འདྲ་བ་བརྒྱད་ཁྲི་བཞི་སྟོང་ལས་མེད་ཅེས་གྲངས་ངེས་བྱེད་མི་ནུས་པའི་དོན་ཡིན་པའི་ཕྱིར། དེར་ཐལ། ནང་གསེས་རེ་རེ་ལ་དབྱེ་བ་ཚད་མེད་པ་ཡོད་ཀྱང་སྤྱི་སྡོམ་གྱི་གྲངས་ངེས་བྱས་ཆོག་པ་འགལ་བ་མེད་པའི་ཕྱིར། དེར་ཐལ། ཕུང་པོ་ལྔ་དང་ཁམས་བཅོ་བརྒྱད་པོ་རེ་རེ་ལའང་དབྱེ་བ་མཐའ་མེད་པ་ཡོད་ཀྱང་སྤྱིར་འདུས་བྱས་ཐམས་ཅད་ཕུང་པོ་ལྔར་གྲངས་ངེས་པ་དང། ཆོས་ཐམས་ཅད་ཁམས་བཅོ་བརྒྱད་དུ་གྲངས་ངེས་པ་མི་འགལ་བ་བཞིན་ཡིན་པའི་ཕྱིར། རྟགས་གྲུབ་སྟེ། དེའི་ནང་གི་སྤྱོད་པ་སྣ་གཅིག་གི་གཉེན་པོ་རྫོགས་པ་ལའང་མངོན་གྱུར་ཅུང་ཟད་མགོ་གནོན་པ་ལས་དང་པོ་བའི་སྐབས་ནས་བཟུང། དེའི་བག་ཆགས་ཤེས་སྒྲིབ་ཕྲ་མོ་སྤོང་བའི་རྒྱུན་མཐའི་ཡེ་ཤེས་དང་དེས་དྲངས་པའི་རྣམ་གྲོལ་ལམ་གྱི་བར་སྐྱེས་བུ་གསུམ་གྱི་ལམ་ཡོངས་སུ་རྫོགས་པ་ཞིག་དགོས་པའི་ཕྱིར། དེར་ཐལ། དེའི་རྒྱུ་མཚན་གྱིས་སྤྱོད་པ་སྣ་གཅིག་གི་གཉེན་པོ་ཆ་ཚང་ཡང་ཉན་ཐོས་རྣམས་ཀྱིས་མི་ཤེས་པའི་ཕྱིར། ཕལ་ཆེན་སྡེ་པའི་ལུང་ལས། འཇམ་དཔལ་གཞོན་ནུར་གྱུར་པས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །གནས་བརྟན་རབ་འབྱོར་གང་དེ་བཞིན་གཤེགས་

― GTD002_Page_0704 ―

^{[མ་དཔེ་གཟིགས་ན་འདིར་གནོན།]}

[Full Size]

པས་སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་ཞིག་མཁྱེན་པ་དེ་ཁྱོད་ཀྱི་ཤེས་སམ། རྟོགས་སམ། མཐོང་ངམ། དེ་དག་དང་མཐུན་པར་གཏམ་བརྗོད་པར་བྱེད་ནུས་སམ། སྨྲས་པ། འཇམ་དཔལ་དེ་ནི་མ་ཡིན་ནོ། །ཞེས་གསུངས་ཤིང། འདི་ལས་འཕྲོས་ཏེ་ཉན་ཐོས་ཀྱིས་དེ་མི་ཤེས་ཤིང་ཆོས་ཐམས་ཅད་ངོ་བོ་ཉིད་ཀྱིས་མཉམ་པར་བྱས་པ་ཞེས་བྱ་བའི་ཏིང་ངེ་འཛིན་ཐོབ་པའི་བྱང་སེམས་ཀྱིས་སེམས་ཅན་གྱི་སྤྱོད་པ་མཐའ་དག་ཤེས་ཏེ་དེ་དང་མཐུན་པར་ཆོས་སྟོན་ནུས་པ་དང་དེའི་རྒྱུ་མཚན་གྱིས་ཉན་ཐོས་རྣམས་བྱང་སེམས་ལ་ཕྱག་བྱ་བར་བཤད་དོ། །ཁོ་ན་རེ། རབ་འབྱོར་གྱིས་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོ་ཆ་ཚང་བར་ཤེས་པར་ཐལ། དེས་ཉོན་མོངས་བརྒྱད་ཁྲི་བཞི་སྟོང་ཚང་བར་སྤོང་བྱེད་ཀྱི་གཉེན་པོ་ཤེས་པའི་ཕྱིར་ན། མ་ཁྱབ། རྟགས་གྲུབ་སྟེ། དེས་ཉོན་མོངས་ཐམས་ཅད་ཀྱི་གཉེན་པོ་སྒོམ་ཤེས་པའི་ཕྱིར་ཏེ། ཉོན་མོངས་ཐམས་ཅད་སྤངས་པའི་ཕྱིར། གོང་དུ་འདོད་མི་ནུས་ཏེ། ཉོན་མོངས་ཡིན་ན་ཁྱོད་ཀྱི་རྩ་བར་གྱུར་པའི་ཆོས་ཀྱི་བདག་འཛིན་ཡོད་པས་ཁྱབ་པའི་ཕྱིར། ཁྱབ་སྟེ། སངས་རྒྱས་ཀྱིས་དེ་བསྟན་པའི་དགོངས་པ་དང། གདུལ་བྱས་དེའི་ཉམས་ལེན་ཡོངས་སུ་རྫོགས་པ་ལ་རྩ་བ་བག་ཆགས་དང་བཅས་པ་སྤངས་ཏེ་སླར་སློབ་རྒྱུ་མེད་པ་ཞིག་དགོས་པ་གང་ཞིག །ཉན་རང་གི་ཐེག་པ་ནི་རེ་ཞིག་ངལ་གསོ་བའི་དྲང་དོན་ཡིན་པས་དེའི་དགྲ་བཅོམ་རྣམས་ནི་ཤེས་སྒྲིབ་ཀྱི་འཇིགས་པ་དང་བཅས་ཤིང་སློབ་པའི་བྱ་བ་དང་བཅས་པ་ཀུན་རྫོབ་པའི་སྐྱབས་སུ་གསུངས་པའི་ཕྱིར། ཡང་ཁ་ཅིག །རྣམ་བཤད་ལས། འདི་ནི་བླ་ན་མ་མཆིས་པ་ཞེས་ཉེ་ཚིག་སྨོས་པའི་

― GTD002_Page_0705 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་གཞིར་མདོ་སྡེ་དགོངས་པ་ངེས་འགྲེལ་རིལ་པོ་འཛིན་པའང་མི་འཐད་དེ། དེར་ས་བཅུའི་དབང་ཕྱུག་བྱང་ཆུབ་སེམས་དཔའ་བཅུས་སྟོན་པ་ལ་དྲི་བ་མི་འདྲ་བ་རེ་རེ་མཛད་པའི་དྲིས་ལན་གཞན་རྣམས་འདིའི་མཚན་གཞིར་འབྲེལ་མེད་པའི་ཕྱིར་རོ། །དེས་ན་བྱང་ཆུབ་སེམས་དཔའ་དོན་དམ་ཡང་དག་འཕགས་ཀྱིས་དྲང་དོན་དང་ངེས་དོན་ཞུས་པའི་ལན་སྟོན་པས་བཀའ་སྩལ་བ་དེ་ཉིད་ཡིན་ཞེས་གསུངས་པ་ལ་བརྟེན་ནས་འདི་ནི་བླ་ན་མ་མཆིས་ཞེས་ཉེ་ཚིག་སྨོས་པའི་མཚན་གཞིར་དོན་དམ་ཡང་དག་འཕགས་ཞུས་ཀྱི་ལེའུ་གཅིག་པུ་འཛིན་ཟེར་ན། མི་འཐད་པར་ཐལ། སྐབས་འདིར་ལེགས་པར་ཕྱེ་ཚུལ་ངོ་བོ་ཉིད་གསུམ་ལ་བདེན་པར་ཡོད་མཉམ་དང། མེད་མཉམ་དང། ཡོད་མེད་ཆ་ཕྱེ་བ་གསུམ་ལ་དྲང་ངེས་སུ་འཇོག་ཚུལ་དྲིས་ལན་གྱིས་གཏན་ལ་ཕབ་པའི་གྲུབ་དོན་ཡིན་པའི་ཕྱིར། ཁྱབ་སྟེ། དེ་ལྟར་ན་ངོ་བོ་ཉིད་གསུམ་ལ་བདེན་པར་ཡོད་མེད་ཁྱད་པར་ལེགས་པར་ཕྱེ་བའི་མདོ་ཐམས་ཅད་ངེས་དོན་དུ་འདིས་གྲུབ་དགོས་པས་དེ་ཐམས་ཅད་འདི་ནི་བླ་ན་མ་མཆིས་པ་དང་ངེས་པའི་དོན་དུ་བཤད་པའི་མདོར་འཇོག་དགོས་པའི་ཕྱིར། དེར་ཐལ། དེ་དག་ངེས་དོན་དུ་སྒྲུབ་པ་འདིར་སྐབས་སུ་མ་བབ་པ་དང་སྒྲུབ་མི་ནུས་པ་གང་ཡང་མ་ཡིན་པའི་ཕྱིར་ཏེ། དཔེར་ན། མདོ་རེ་རེ་ནས་མ་སྨོས་ཀྱང་མཚན་ཉིད་གསུམ་ལ་ཆ་མ་ཕྱེ་བ་རང་བཞིན་གྱིས་མེད་མཉམ་དུ་སྟོན་ཚུལ་འདྲ་བའི་མདོ་ཚིག་ཡུམ་རྒྱས་འབྲིང་བསྡུས་པ་གང་གི་ནང་དུ་བྱུང་ཡང་འདིས་དྲང་དོན་དུ་བསྟན་པར་འགྲོ་བ་བཞིན་ཡིན་པའི་ཕྱིར། དེས་ན་ཡོན་

― GTD002_Page_0706 ―

^{[མ་དཔེ་གཟིགས་ན་འདིར་གནོན།]}

[Full Size]

ཏན་འབྱུང་གནས་ཀྱི་ལེའུ། ཚུལ་བཞིན་ཀུན་ཏུ་དྲི་བའི་ལེའུ་གཉིས་ཀྱང་དེ་ཡིན་ལ། དེར་མ་ཟད་ལང་གཤེགས་དང་རྒྱན་སྟུག་པོ་བཀོད་པ། འོད་སྲུང་གིས་ཞུས་པ་རྣམས་ཀྱང་དེའི་མཚན་གཞིར་འོངས་ཏེ། འདི་ཉིད་ལས། འདི་ནི་ཞེས་ཉེ་ཚིག་སྨོས་པ་ནི་དེ་མ་ཐག་ཏུ་སྨོས་པའི་ལེགས་པར་རྣམ་པར་ཕྱེ་བའི་འཁོར་ལོ་དགོངས་འགྲེལ་དང་དེ་བཞིན་དུ་ཕྱེ་བ་རྣམས་ལ་ཟེར་བ་ཡིན་གྱི། ཞེས་གསུངས་པའི་ཕྱིར་དང། དེ་བཞིན་ཕྱེ་བ་རྣམས་ཞེས་མང་ཚིག་སྨོས་པའི་དགོས་པ་ཡོད་པའི་ཕྱིར། དེས་ན་ཀུན་མཁྱེན་བླ་མས། བསྟན་ཚུལ་འདི་ནི་ཞེས་བརྗོད་བྱའི་ངོས་ནས་བཤད་པའི་མཚན་གཞི་ལེགས་བཤད་སྙིང་པོ་ལྟར་དང། ཆོས་འཁོར་སྐོར་བཞིན་པའི་ལེའུ་འདི་ནི་ཞེས་རྗོད་བྱེད་ལ་སྦྱར་ན་རྣམ་བཤད་ལྟར་བྱའོ། །ཞེས་བརྗོད་བྱ་རྗོད་བྱེད་ལ་སོ་སོར་སྦྱར་ཏེ་ཡབ་སྲས་དགོངས་པ་གཅིག་ཏུ་བསྒྲུབས་པ་ནི་ལེགས་བཤད་ཆེན་པོ་ཡིན་ཏེ། རྗོད་བྱེད་ཀྱི་ཆ་ནས་ཉེ་ཚིག་སྨོས་པའི་ཚེ་སྐོར་བཞིན་པ་འདི་ནི་ཟེར་དགོས་པས་ལང་གཤེགས་སོགས་ཡོང་དོན་མེད་ཀྱང། བརྗོད་བྱའི་ཆ་ནས་ཉེ་ཚིག་སྨོས་པའི་ཚེ་མཚན་ཉིད་གསུམ་ལ་བདེན་པར་གྲུབ་མ་གྲུབ་ཀྱི་ཁྱད་པར་ཕྱེ་བའི་འཁོར་ལོ་ཐ་མ་འདི་ནི་ཟེར་དགོས་པས་རང་དང་སྟོན་ཚུལ་མཚུངས་པའི་མདོ་ལང་གཤེགས་སོགས་ཐམས་ཅད་ཡོད་པའི་ཕྱིར་ཏེ། གྲུབ་དོན་འདི་འཁོར་ལོ་ཐ་མ་ལེགས་ཕྱེའི་ཆོས་འཁོར་ཐམས་ཅད་ཀྱི་གྲུབ་དོན་ཡིན་པའི་ཕྱིར། དེ་ལ་ཁོ་ན་རེ། ལང་གཤེགས་འདིར་བསྟན་འཁོར་ལོ་ཐ་མ་མ་ཡིན་པར་ཐལ། དེ་འདིར་བསྟན་འཁོར་ལོ་ཐ་མ་དངོས་མ་ཡིན་པར་དེ་དང་བརྗོད་བྱ་ཕྱོགས་མཐུན་གྱི་འཁོར་

― GTD002_Page_0707 ―

^{[མ་དཔེ་གཟིགས་ན་འདིར་གནོན།]}

[Full Size]

ལོ་ཐ་མར་འཇོག་དགོས་པའི་ཕྱིར། དེར་ཐལ། གྲུབ་མཐའ་ཆེན་མོ་ལས། འཁོར་ལོ་ཐ་མའི་མཚན་གཞི་དགོངས་འགྲེལ་དང་དེའི་འཕགས་ཞུས་ཀྱི་ལེའུ་གཉིས་དངོས་ཡིན་ལ། ཕྱོགས་གཏོགས་རྒྱན་སྟུག་པོ་བཀོད་པ་སོགས་ཡིན། དབུ་མ་པས་གཞལ་ན་ལང་གཤེགས། མདོ་སྡེ་ས་བཅུ་པ། དེ་བཞིན་གཤེགས་པའི་སྙིང་པོའི་མདོ་སོགས་འཁོར་ལོ་ཐ་མའི་ཕྱོགས་མིན་ཀྱང། སེམས་ཙམ་པས་འདི་དག་དྲངས་ནས་ཤེར་ཕྱོགས་དྲང་དོན་དུ་བསྒྲུབས་པས་ལེགས་ཕྱེའི་ཕྱོགས་གཏོགས་ཀྱི་མདོར་འཇོག་དགོས། ཞེས་གསུངས་པའི་ཕྱིར་ན། མ་ཁྱབ་སྟེ། དེ་རྣམས་ཀྱིས་བརྗོད་བྱ་སྟོན་ཚུལ་དང་འདྲ་བའི་དོན་ཡིན་པའི་ཕྱིར། ཡང་ཁ་ཅིག་ཡིག་ཆར་དགོངས་འགྲེལ་རིལ་པོ་འདིར་བསྟན་འཁོར་ལོ་ཐ་མ་མ་ཡིན་པར་གསུངས་པ་མི་འཐད་པར་ཐལ། དགོངས་འགྲེལ་རིལ་པོ་དང་དགོངས་འགྲེལ་དོན་གཅིག་ཡིན་པའི་ཕྱིར། དེར་ཐལ། དགོངས་འགྲེལ་རིལ་པོ་དེ་དགོངས་འགྲེལ་གྱི་ལེའུ་བཅུ་ཚོགས་པའི་གཞུང་གཅིག་ཡིན་པའི་ཕྱིར། དེར་ཐལ། དགོངས་འགྲེལ་རིལ་པོ་ལ་ལེའུ་བཅུ་ཡོད་པའི་ཕྱིར་ཏེ། དེ་དང་དགོངས་འགྲེལ་གཉིས་ལ་མང་ཉུང་མེད་པའི་ཕྱིར་ན། མ་ཁྱབ་སྟེ། རིལ་པོ་ཞེས་པ་ཡོངས་རྫོགས་ཀྱི་དོན་ཡིན་པ་གང་ཞིག །དགོངས་འགྲེལ་གྱི་ལེའུ་བཅུ་ཡོངས་རྫོགས་དང་དགོངས་འགྲེལ་ལ་མང་ཉུང་འབྱེད་མི་ཐུབ་ཀྱང་ལེའུ་བཅུ་ཡོངས་རྫོགས་ལ་ལེའུ་བཅུ་རེ་ཡོད་པར་ཁས་ལེན་མི་རུང་བའི་ཕྱིར་ཏེ། དེ་ལྟ་ན་ལེའུ་བརྒྱ་ཡོད་པར་ཐལ་བའི་ཕྱིར། དཔེར་ན་མདུན་གྱི་སྐྱེས་བུ་ལན་འདེབས་པ་པོ་འདིའི་ལུས་ཡོངས་རྫོགས་དང་འདིའི་ལུས་ཆེ་ཆུང་དང་གཅིག་གི་གོ་སར་གཅིག་ཆུད་མི་ཆུད་ཀྱི་ཁྱད་མེད་ཀྱང་

― GTD002_Page_0708 ―

^{[མ་དཔེ་གཟིགས་ན་འདིར་གནོན།]}

[Full Size]

ལུས་ཡོངས་རྫོགས་ལ་ཡན་ལག་ལྔ་དང་དབང་པོ་ལྔ་སོགས་ཡོད་པར་འཇོག་མི་ཐུབ་པའི་ཕྱིར། ལུས་ཡོངས་རྫོགས་ལ་མིག་ཡོད་པས་བརྒྱ་བྱིན་ལྟ་བུར་ཐལ་བ་དང། ལུས་ཡོངས་རྫོགས་ལ་སྐྲ་དང་སོ་སེན་སོགས་སྐྱེ་བར་ཐལ་བ་དང། མེད་ན་དབང་པོ་ལྔ་ཚང་བའི་མི་ལུས་གཅིག་མེད་པར་ཐལ་བ་སོགས་ཚིག་གི་འཁྲི་ཚུལ་ཤེས་སླ་ཞིང་རིགས་ལམ་བྱང་བའི་ཡན་ལག་ཏུ་སྤྲོས་པས་ཆོག་གོ །འཁོར་ལོ་གསུམ་གྱི་དྲང་ངེས་འཇོག་ཚུལ་དགོས་འགྲེལ་ལས་གསུངས་པ་འདི་སྒྲ་ཇི་བཞིན་པར་འདོད་པའི་ལུགས་སུ་རློམ་ཡང་མདོའི་དགོངས་དོན་ལས་གཞན་དུ་སོང་བ་མང་སྟེ། འདི་ཉིད་ལས། ཁ་ཅིག་མདོ་འདི་ལ་བརྟེན་ནས་དུས་གསུམ་པར་གསུངས་པའི་མདོ་ཐམས་ཅད་ངེས་དོན་དུ་བསྒྲུབས་ནས་གཞན་སྡེའི་རིགས་ཅན་བདག་ཏུ་སྨྲ་བ་ལ་ཞེན་པ་རྣམས་དྲང་བའི་ཕྱིར་དུ་གསུངས་པ་འགའ་ཞིག་སྒྲ་ཇི་བཞིན་པར་འདོད་ཅིང། ཆོས་ཉིད་མ་གཏོགས་པའི་ཆོས་ཅན་ཐམས་ཅད་འཁྲུལ་པའི་བློས་རློམ་པ་མ་གཏོགས་པ་རང་གི་ངོ་བོས་གྲུབ་པ་ཅུང་ཟད་ཀྱང་མེད་ཅིང་ཆོས་ཉིད་བདེན་པར་གྲུབ་པའི་བདེན་མི་བདེན་རྣམ་པར་ཕྱེ་བ་ནི་སྔར་བཤད་པའི་ལེགས་པ་རྣམ་པར་ཕྱེ་བའི་དོན་དུ་འདོད་དོ། །ཞེས་པ་ལྟར་གྱི་ཕྱོགས་སྔ་སྨྲ་བ་བོ་ནི་དོལ་པོ་ཤེས་རབ་རྒྱལ་མཚན་སོགས་སྙིང་པོ་རྟག་བརྟན་འདོད་པ་རྣམས་ཡིན་ལ། དེ་དག་གིས་རང་གི་གྲུབ་མཐའི་ཁུངས་སུ་བྱེད་རྒྱུའི་མདོ་ནི་བདེ་གཤེགས་སྙིང་པོའི་མདོ། འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ། མྱ་ངན་ལས་འདས་པ་ཆེན་པོའི་མདོ། སོར་མོའི་ཕྲེང་བ་ལ་ཕན་པའི་མདོ། དཔལ་འཕྲེང་སེང་གེའི་ང་རོས་ཞུས་པའི་མདོ། ཡེ་ཤེས་སྣང་བ་རྒྱན་གྱི་མདོ། འཕེལ་བ་དང་འགྲིབ་

― GTD002_Page_0709 ―

^{[མ་དཔེ་གཟིགས་ན་འདིར་གནོན།]}

[Full Size]

པ་མེད་པར་བསྟན་པའི་མདོ། རྔ་བོ་ཆེ་ཆེན་པོའི་མདོ། རྣམ་པར་མི་རྟོག་པ་ལ་འཇུག་པའི་གཟུངས། མདོ་དགོངས་འགྲེལ་རྣམས་ཡིན་ཞིང་དེ་བཅུ་ལ་ཇོ་མོ་ནང་པས་སྙིང་པོའི་མདོ་བཅུ་ཞེས་ཟེར་རོ། །ཡང་འདི་ཉིད་ལས། གཞན་དག་གིས་ནི་མདོ་འདིས་དྲང་ངེས་ཕྱེ་བ་ལྟར་ཡིན་ན་ཕྱོགས་སྔ་མས་སྨྲ་བ་ལྟར་འགྱུར་རོ་སྙམ་ནས་དྲང་ངེས་ཀྱི་ཚུལ་དེ་སྒྲ་ཇི་བཞིན་པ་མིན་ནོ་ཞེས་འགོག་གོ །ཞེས་གསུངས་པའི་ཕྱོགས་སྔ་མའང་རྒྱུད་སྡེ་སྤྱི་རྣམ་ལས། བུ་སྟོན་རིན་པོ་ཆེས་མདོ་བཅུ་པོ་དེ་བཀའ་ཐ་མའི་མདོ་ཡིན་ཞིང། མདོ་དེ་དག་ལས་ཇོ་ནང་པས་འདོད་པ་ལྟར་དུ་བསྟན་པའི་དབང་དུ་མཛད་ནས་དེ་དག་དྲང་དོན་དུ་བཞེད་ལ། ངོ་བོ་ཉིད་ཀྱི་སྐུ་དང་བདེ་གཤེགས་སྙིང་པོ་དོན་གཅིག་པར་མཛད་ནས་དེ་སེམས་ཅན་གྱི་རྒྱུད་ལ་མེད་པར་བཞེད་ཅིང་བཀའ་བར་བ་ཁོ་ན་ངེས་དོན་དུ་བཞེད་དོ། །མདོ་བཅུ་བོ་དེ་བརྗོད་བྱ་ཕྱོགས་མཐུན་དུ་འདོད་པ་མི་འཐད་དེ། ཞེས་སོགས་གསུངས་སོ། །ཡང་ལ་ལས་ནི་དྲང་ངེས་ཀྱི་ཚུལ་འདིར་གསུང་བ་སྒྲ་ཇི་བཞིན་དུ་བྱེད་ཀྱང་འདོད་ལ། ཤེར་མདོ་དྲང་དོན་བྱེད་མི་བདེ་བས་འགལ་བ་སྤོང་བར་འདོད་ནས་བར་མཐའ་གཉིས་ཀྱི་མཚན་གཞི་གོ་བཟློག་ནས་འཇོག་སྟེ། སྟོང་ཐུན་ལས། དགོངས་འགྲེལ་ལས་འཁོར་ལོ་ཐ་མ་ངེས་དོན་དུ་གསུངས་པས་འཁོར་ལོ་ཐ་མ་ངེས་དོན་ཡིན་ཞིང་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་འབྲིང་བསྡུས་གསུམ་སོགས་འཁོར་ལོ་ཐ་མའི་མདོ་ཡིན་ནོ་ཞེས་ཟེར་རོ། །ཞེས་དང། རྣམ་བཤད་ལས། འཁོར་ལོ་བར་ཐ་གཉིས་ཀྱི་དྲང་ངེས་ཀྱི་ཐ་སྙད་སོར་བཞག་བྱས་ནས་མདོའི་མཚན་གཞི་གོ་ཟློག་པ་ནི་དོན་ལ་ཅུང་ཟད་

― GTD002_Page_0710 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་མ་དཔྱད་པ་ཚིག་འབའ་ཞིག་ལ་བརྟེན་པར་གསལ་ལོ། །ཞེས་གསུངས་པས། འདི་ལྟར་སྨྲ་བའི་བོད་སྔ་མ་མང་པོ་བྱུང་ལ། ཡར་འབྲོག་པ་རིན་ཆེན་ཏོག་གིས་ཀྱང། ཆོས་ཀྱི་འཁོར་ལོ་གསུམ་པ་ནི། །ཤེར་ཕྱིན་ཕལ་ཆེན་ཆོས་པད་དཀར། །དེ་སོགས་ཁྱབ་བྱེད་དབུ་མ་ཆེ། །ཟབ་ཡངས་རྩོད་པ་དང་བྲལ་བའོ། །ཞེས་དང། ཡུམ་ལས་ཆོས་སྐོར་ལན་གཉིས་ཞེས། །འབྱུང་ཕྱིར་འཁོར་ལོ་བར་བར་འདོད། །ཅེ་ན་བདེན་མོད་གཞུང་འདིའི་དོན། །ཐེག་ཆུང་གཅིག་ཤོས་གཉིས་སུ་འདོད། །དཔེར་ན་སྡེ་སྣོད་གསུམ་གཉིས་བཞིན། །ཞེས་འཁོར་ལོ་གསུམ་སྐས་ཀྱི་གདང་བུ་ལྟར་ཕྱི་མ་ཕྱི་མ་མཐོ་སྟེ། དེའི་ཕྱིར་ཤེར་མདོ་འཁོར་ལོ་ཐ་མ་ཡིན་ལ། དགོངས་འགྲེལ་སོགས་སྙིང་པོ་རྟག་བརྟན་སྟོན་པའི་མདོ་རྣམས་འཁོར་ལོ་ཐ་མ་མིན་ཏེ་རྟག་བརྟན་བཤད་པ་དྲང་དོན་ཡིན་ཞིང་འཁོར་ལོ་ཐ་མ་ངེས་དོན་དུ་གསུངས་པའི་ཕྱིར། ཤེར་མདོ་རང་ཉིད་ལས་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ངོ་། །ཞེས་གསུངས་པས་ཀྱང་དེ་འཁོར་ལོ་བར་བ་ཡིན་པར་མི་འགྲུབ་སྟེ། འདིའི་གཉིས་པ་ཞེས་པ་འཁོར་ལོ་གསུམ་གྱི་གཉིས་པ་མིན་གྱི་ཐེག་པ་དམན་པའི་ཆོས་འཁོར་དང་ཐེག་ཆེན་པའི་གཉིས་སུ་ཕྱེ་བའི་གཉིས་པ་ཡིན་ཏེ། དཔེར་ན་མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང། །ཞེས་པའི་སྡེ་སྣོད་གཉིས་པ་ལ་སྡེ་སྣོད་གསུམ་དུ་ཕྱེ་བའི་གཉིས་པ་མི་དགོས་པ་བཞིན་ཡིན་པའི་ཕྱིར་ཞེས་འདོད་ཅིང་དོལ་པོ་བ་ཚིག་ངན་གྱིས་ཚར་བཅད་མོད། དགོངས་འགྲེལ་སྙིང་པོ་རྟག་བརྟན་སྟོན་པའི་མདོར་རང་གིས་ཀྱང་ཁས་བླངས་ནས་ཐོག་ཏོག་དང་དབང་པོ་རྡོ་རྗེ་སོགས་བྲི་

― GTD002_Page_0711 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ངལ་བ་བྱས་པ་ནི་རལ་གྲི་དགྲ་ལ་ཤོར་ཏེ་ཤུབས་ཀྱི་སྟེང་ནས་དཔའ་སྐད་འདོན་པ་དང་འདྲ་བས་སྙིང་པོ་ཅིའང་མེད་དོ། །འདིའི་འཁྲུལ་གཞིའང་སྙིང་པོ་རྟག་བརྟན་དང་བདེ་གཤེགས་སྙིང་པོ་དོན་གཅིག་ཏུ་འཁྲུལ་བ་དང། གཟུངས་རྒྱལ་གྱི་མདོ་ལས་གསུངས་པའི་གདུལ་བྱ་བཀྲི་བའི་རིམ་པ་གསུམ་དང་དགོངས་འགྲེལ་གྱི་འཁོར་ལོ་གསུམ་རིམ་པ་བཞིན་དུ་སྦྱོར་དགོས་པར་བཟུང་ཞིང་དེ་གསུམ་སྔ་མ་སྔ་མ་ལས་ཕྱི་མ་ཕྱི་མ་མཆོག་ཏུ་འགྲོ་དགོས་སྙམ་དུ་འཁྲུལ་བའི་སྐྱོན་ཡིན་ཏེ། སྟོང་ཐུན་ལས། ཁ་ཅིག་འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས། རིགས་ཀྱི་བུ་དཔེར་ན་འདི་ལྟ་སྟེ། ནོར་བུ་མཁན་མཁས་པས་ནོར་བུ་སྦྱོང་བའི་ཚུལ་ཞེས་པ་ནས། འདིས་འཁོར་ལོ་རིམ་པ་གསུམ་གྱིས་རིམ་པ་བཞིན་བདེ་བར་གཤེགས་པའི་སྙིང་པོ་ལ་སྒྲིབ་པའི་དྲི་མ་རགས་པ་དང་ཕྲ་བ་དང་ཤིན་ཏུ་ཕྲ་བ་དག་སྦྱོང་བར་བསྟན་པ་ཡིན་ལ། དེའི་ཕྱིར་འཁོར་ལོ་ཐ་མ་ཉིད་ངེས་པའི་དོན་ནོ་ཞེས་སྨྲའོ། །ཞེས་པ་ལྟར་རོ། །དེ་མི་འཐད་པའི་ཚུལ་ཡང་དེ་ཉིད་ལས། དེ་ལྟར་ན་དཔེ་དོན་ཆོས་མཐུན་སྦྱོར་བ་ན་ནོར་བུ་གཅིག་ཉིད་སྦྱོང་བྱེད་གསུམ་གྱིས་རིམ་ཅན་དུ་སྦྱོང་བ་ལྟར། གདུལ་བྱ་གཅིག་ཉིད་ཀྱི་རྒྱུད་ཀྱི་དྲི་མ་ཕྲ་རགས་གསུམ་སྦྱོང་བྱེད་འཁོར་ལོ་གསུམ་གྱིས་རིམ་ཅན་དུ་སྦྱོང་བར་ཁས་ལེན་དགོས་ལ། དེ་ལྟར་དགོངས་འགྲེལ་ལས་འཁོར་ལོ་གསུམ་གྱི་གདུལ་བྱའི་རིགས་ཐ་དད་པར་བཤད་པ་དང་འགལ་བའི་ཕྱིར་དང། རང་གིས་ཀྱང་གདུལ་བྱའི་རིགས་ཐ་དད་དུ་སྨྲས་པ་དང་ཁས་བླངས་འགལ་ཞིང། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་ཆེད་དུ་

― GTD002_Page_0712 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་བའི་གདུལ་བྱ་ཡིན་ན་ཐེག་པ་གསུམ་ལ་རིམ་ཅན་དུ་འཇུག་པས་ཁྱབ་པར་ཐལ་བའི་ཕྱིར་རོ། །གཞན་ཡང་ཕྱིར་མི་ལྡོག་པའི་ཆོས་ཀྱི་འཁོར་ལོའི་གཏམ་ཞེས་པ་ནི་མཐར་ཐུག་ཐེག་པ་གཅིག་ཏུ་སྟོན་པ་ལ་ཟེར་བ་ཡིན་ལ། འཁོར་ལོ་ཐ་མ་ལས་མཐར་ཐུག་ཐེག་པ་གསུམ་དུ་བསྟན་པར་གོང་དུ་བཤད་ཟིན་པ་ལྟར་ཡིན་པས་འབྲེལ་མེད་དོ། །ཞེས་དང། རྣམ་བཤད་ལས། མདོ་སྡེ་འདི་ཉིད་དུ་གཞན་དབང་ཡོངས་གྲུབ་བདེན་པར་གྲུབ་པ་དང་མཐར་ཐུག་ཐེག་པ་གསུམ་དུ་བསྟན་ལ། དེ་བཞིན་གཤེགས་པའི་སྙིང་པོའི་མདོ་དང། འཕགས་པ་དཔལ་འཕྲེང་གི་མདོ་ལ་སོགས་པར་ཆོས་ཐམས་ཅད་བདེན་པས་སྟོང་ཞིང་དྲི་མ་གློ་བུར་བ་ཡིན་པ་དང། མཐར་ཐུག་ཐེག་པ་གཅིག་ཏུ་བསྟན་པར་ཐེག་པ་ཆེན་པོ་རྒྱུད་བླ་མས་ལེགས་པར་བསྒྲུབས་པས་དེ་དག་གི་དོན་གཅིག་ཡིན་མིན་བསམ་པར་བྱ་བ་ཡིན་ནོ། །ཞེས་གསུངས་སོ། །ལུགས་སྔ་མ་གཉི་གས་སྙིང་པོའི་མདོ་བཅུ་ཞེས་བརྗོད་བྱ་ཕྱོགས་མཐུན་དུ་བྱེད་ནའང། དགོངས་འགྲེལ་གྱིས་མཐར་ཐུག་ཐེག་པ་གསུམ་དུ་སྟོན་ལ། དཔལ་འཕྲེང་གི་མདོ་དང་དེ་བཞིན་གཤེགས་པའི་སྙིང་པོའི་མདོ་སོགས་ལས་མཐར་ཐུག་ཐེག་པ་གཅིག་ཏུ་བསྟན་པ་དང། ཡང་དགོངས་འགྲེལ་གྱིས་དྲང་ངེས་སུ་འཇོག་ཚུལ་སྒྲ་ཇི་བཞིན་པ་ཡིན་མིན་གྱི་སྒོ་ནས་བཤད་ལ། ཡེ་ཤེས་སྣང་བ་རྒྱན་གྱི་མདོས་བློ་གྲོས་མི་ཟད་པ་ལྟར་བདེན་གཉིས་གཙོ་བོར་བསྟན་ཚུལ་གྱི་སྒོ་ནས་བཤད་པ་སོགས་གནད་ཆེ་ས་ལ་མི་མཐུན་པ་མང་དུ་ཡོད་པས་ཕྱོགས་གཅིག་ཏུ་བྱར་མི་རུང་བའི་ཚུལ་སོགས་ཀྱང་སྟོང་ཐུན་ན་གསལ་བས་དེར་ཤེས་པར་བྱའོ། །སྐབས་འདིར་སྙིང་

― GTD002_Page_0713 ―

^{[མ་དཔེ་གཟིགས་ན་འདིར་གནོན།]}

[Full Size]

པོའི་མདོ་བཅུར་གྲགས་པའི་ནང་གི་བདེ་གཤེགས་སྙིང་པོའི་མདོ་དེ་དྲང་ངེས་གང་ཡིན་སྙམ་ན་འདི་ལ་ཁ་ཅིག་ན་རེ། དེ་དྲང་དོན་ཡིན་པར་ཐལ། གཞན་སྡེའི་ལྟ་བ་ལ་གོམས་པ་ཆེ་བ་འགའ་ཞིག་རྗེས་སུ་གཟུང་བའི་ཕྱིར་གསུངས་པའི་དྲང་དོན་དགོངས་པ་ཅན་གྱི་མདོ་ཡིན་པའི་ཕྱིར། ཕར་ཕྱིན་མཐའ་དཔྱོད་ལས། སྙིང་པོ་རྟག་བརྟན་གསུང་ཡུལ་གཞན་སྡེའམ་སྔོན་གཞན་སྡེའི་ལྟ་བར་གོམས་ཆེས་པས་རེ་ཞིག་གང་ཟག་གི་བདག་མེད་ཐུན་མོང་པའང་བསྟན་མི་རུང་བའི་གང་ཟག་ཡིན་ལ། ཞེས་གསུངས་པའི་ཕྱིར། ཁྱབ་སྟེ། དེ་བཞིན་གཤེགས་པའི་སྙིང་པོའི་མདོ་དེ་སྙིང་པོ་རྟག་བརྟན་སྟོན་པའི་མདོར་མི་འཇོག་ན་ཇོ་ནང་པས་ཁུངས་སུ་བྱེད་ཅིང་སྒྲ་ཇི་བཞིན་པར་འདོད་རྒྱུའི་མདོ་བཅུའི་ནང་དུ་སྙིང་པོ་རྟག་བརྟན་སྟོན་པའི་མདོ་གཅིག་མེད་དགོས་ལ་དེ་མི་རིགས་པའི་ཕྱིར་ཏེ། འདི་ཉིད་ལས། གཞན་སྡེའི་རིགས་ཅན་བདག་ཏུ་སྨྲ་བ་ལ་ཞེན་པ་རྣམས་དྲང་བའི་ཕྱིར་དུ་གསུངས་པ་འགའ་ཞིག་སྒྲ་ཇི་བཞིན་པར་འདོད་ཅིང། ཞེས་གསུངས་པའི་ཕྱིར་དང། མདོ་དེ་ལོགས་སུ་ཡོད་ན་སྙིང་པོའི་མདོ་བཅུ་གཅིག་བྱེད་དགོས་པའི་ཕྱིར། གཞན་ཡང་ཇོ་ནང་པས་གྲུབ་མཐའི་རྩ་བར་བྱེད་རྒྱུའི་བདེ་གཤེགས་སྙིང་པོའི་མདོ་དེ་རྒྱུད་བླ་མར་རིགས་སྒྲུབ་བྱེད་དཔེ་དགུ་དོན་དགུ་སོགས་ཀྱི་བཤད་བྱ་རྩ་བར་གྱུར་པའི་དེ་བཞིན་གཤེགས་པའི་སྙིང་པོའི་མདོ་ལ་བྱེད་པར་ཐལ། སྟོང་ཐུན་ལས། སྙིང་པོའི་མདོ་ལ་སོགས་པ་རྣམས་ཀྱི་དགོངས་པ་འགྲེལ་པའི་ཚེ་ནི་རྒྱུད་བླ་རྩ་འགྲེལ་དུ་མཐར་ཐུག་གི་ཐེག་པ་གཅིག་ཏུ་བཤད། ཅེས་དང། རྒྱུད་སྡེ་

― GTD002_Page_0714 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱི་རྣམ་ལས། དེ་དག་གིས་བདེ་གཤེགས་སྙིང་པོ་དང་རྫོགས་པའི་སངས་རྒྱས་ཀྱི་ངོ་བོ་ཉིད་སྐུ་དོན་གཅིག་ཅིང། བདེན་པར་གྲུབ་པ། རྟག་བརྟན་ཐེར་ཟུག འདུས་མ་བྱས་ཀྱི་མཚན་དཔེས་བརྒྱན་པ། སེམས་ཅན་ཐམས་ཅད་ཀྱི་རྒྱུད་ལ་འཁོར་བ་ཐོག་མ་མེད་པ་ནས་ཉོན་མོངས་པའི་སྦུབས་ན་རང་ཆས་སུ་ཡོད་པ་དེ་དཔེ་དགུ་དོན་དགུའི་སྒོ་ནས་བསྟན་པར་འདོད་ལ། ཞེས་གསུངས་པའི་ཕྱིར། ཁྱབ་སྟེ། དཔེ་དགུའི་དང་པོ་གླེང་གཞིའི་ཚུལ་གྱིས་བསྟན་ཅིང། ལྷག་མ་བརྒྱད་གཞུང་དོན་དངོས་བྱས་ཏེ་སྟོན་པའི་མདོ་དེ་བཞིན་གཤེགས་པའི་སྙིང་པོའི་མདོ་འདི་ཉིད་ལས་གཞན་དུ་འོས་མེད་པའི་ཕྱིར་ཟེར་ན། སྐྱོན་དེ་དག་མི་འཇུག་པར་ཐལ། ལང་གཤེགས་ལས་དྲང་དོན་དུ་འགྲེལ་རྒྱུའི་སྙིང་པོ་རྟག་བརྟན་སྟོན་པའི་མདོ་ནི་དྲང་དོན་ཡིན་ཞིང་དེའི་མིང་ལའང་གཞུང་དུ་མར་བདེ་གཤེགས་སྙིང་པོའི་མདོ་ཞེས་བཤད། དེ་རང་ཉིད་བོད་དུ་མ་འགྱུར་བས་ད་ལྟ་ཡིག་ཆ་སོགས་སུ་དྲངས་ཡོད་པ་འདི་དེའི་བཤད་པ་ལང་གཤེགས་སུ་བཀོད་པའི་ཚིག་རྣམས་ཡིན། རྒྱུད་བླ་མའི་བཤད་བྱ་དཔེ་དགུ་དོན་དགུ་སོགས་སྟོན་པའི་དེ་བཞིན་གཤེགས་པའི་སྙིང་པོའི་མདོ་ད་ལྟ་བོད་དུ་འགྱུར་ཡོད་པ་འདི་ནི་ངེས་དོན་སྟོང་ཉིད་གཙོ་བོར་གཏན་ལ་འབེབས་པ་ཤེར་མདོ་དང་འདྲ་བའི་ཕྱིར། རྒྱུད་བླ་དར་ཊཱིཀ་ལས། དེ་བཞིན་གཤེགས་པའི་སྙིང་པོའི་མདོའང་ཤེར་ཕྱིན་གྱི་མདོ་དང་འདྲ་བར། ཞེས་པ་ནས། དེ་བཞིན་གཤེགས་པའི་སྙིང་པོའི་མདོ་སྒྲ་ཇི་བཞིན་པ་མིན་པའི་དྲང་དོན་དུ་བྱེད་ན་འོག་ནས་ཁམས་བསྟན་པའི་དགོས་པ་སྟོན་པའི་རྩོད་ལན་འབྲེལ་བ་ཅུང་ཟད་ཀྱང་མེད་པར་འགྱུར།

― GTD002_Page_0715 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པའི་ཕྱིར་ཏེ། སེམས་ཞུམ་སེམས་ཅན་དམན་ལ་བརྙས་པ་དང། །ཞེས་སོགས་ཀྱི་སྐབས་སུ་ཤེར་མདོ་དང་མི་ཟློས་པའི་རྩོད་སྤོང་མཛད་པ་གང་ཞིག །མདོ་གཉིས་ཀ་བརྗོད་བྱ་སྟོན་ཚུལ་མི་འདྲ་ན་ཟློས་སམ་སྙམ་པའི་རྩོད་པ་འོང་དོན་མེད་པའི་ཕྱིར། དེ་ལ་ཁོ་ན་རེ། ལང་གཤེགས་སུ་བཀོད་པའི་ཚིག་དེ་ཇི་ལྟ་བ་བཞིན་ད་ལྟ་འགྱུར་བའི་དེ་བཞིན་གཤེགས་པའི་སྙིང་པོའི་མདོ་འདིར་མེད་ཀྱང། ལང་གཤེགས་ཀྱི་མདོ་འདིའི་གོང་འོག་ཀུན་ཏུ་བཤད་པའི་དོན་བསྡུས་ནས་བཀོད་པ་ཡིན་པའི་ཕྱིར། དེར་ཐལ། ལང་གཤེགས་སུ་བདེ་གཤེགས་སྙིང་པོའི་མདོ་བཀོད་པ་ལས། རང་བཞིན་གྱིས་འོད་གསལ་བ་རྣམ་པར་དག་པས་ཐོག་མ་ནས་རྣམ་པར་དག་པ་མཚན་སུམ་ཅུ་རྩ་གཉིས་དང་ལྡན་པ་སེམས་ཅན་ཐམས་ཅད་ཀྱི་ལུས་ཀྱི་ནང་ན་མཆིས་པར་བརྗོད་དེ། ཞེས་པ་ནི་དེ་བཞིན་གཤེགས་པའི་སྙིང་པོའི་མདོ་དཔེ་དང་པོའི་སྐབས་སུ། ཇི་ལྟར་དེ་བཞིན་གཤེགས་པས་སྤྲུལ་པའི་པདྨ་ཁ་དོག་ངན་པ། དྲི་ང་བ་སྨད་པར་འོས་པ་མངོན་པར་དགའ་བར་འགྱུར་བ་མ་ཡིན་པ་འདི་དག་དང། དེ་བཞིན་གཤེགས་པའི་གཟུགས་མཛེས་པ་གཟུགས་བཟང་བ་བལྟ་ན་སྡུག་པ་དག་པདྨའི་སྙིང་པོ་འདི་དག་ལ་སྐྱིལ་མོ་ཀྲུང་བཅས་ཤིང་འཁོད་དེ། ཞེས་པ་ནས། ཉོན་མོངས་པའི་སྦུབས་སུ་གྱུར་པ་དེ་དག་གི་ནང་ན་ང་འདྲ་བར་ཡེ་ཤེས་དང་ལྡན་པ། མིག་དང་ལྡན་པའི་དེ་བཞིན་གཤེགས་པ་མང་པོ་འཁོད་ཅིང་སྐྱིལ་མོ་ཀྲུང་བཅས་ནས་མི་གཡོ་བར་འཁོད་པ་མཐོང་སྟེ། ཉོན་མོངས་པ་ཐམས་ཅད་ཀྱིས་ཉོན་མོངས་པ་ཅན་དུ་གྱུར་པ་དེ་དག་

― GTD002_Page_0716 ―

^{[མ་དཔེ་གཟིགས་ན་འདིར་གནོན།]}

[Full Size]

གི་ནང་ན་དེ་བཞིན་གཤེགས་པའི་ཆོས་ཉིད་མི་གཡོ་ཞིང་སྲིད་པའི་འགྲོ་བ་ཐམས་ཅད་ཀྱིས་མ་གོས་པ་དག་མཐོང་ནས། ཞེས་དང། དཔེ་བདུན་པའི་སྐབས་སུ། སེམས་ཅན་ཉོན་མོངས་པ་སྣ་ཚོགས་ཀྱི་དཀྲི་བས་དཀྲིས་པར་གྱུར་པ་རྣམས་ཀྱི་ནང་ནའང་དེ་བཞིན་གཤེགས་པའི་ལུས་ང་ཅི་འདྲ་བ་ཡོད་པར་མཐོང་ངོ་། །ཞེས་དང། ངས་ནི་ཉོན་མོངས་དཀྲིས་པའི་ནང་དག་ན། །རྒྱལ་བའི་སྐུ་ནི་མཉམ་པར་གཞག་གྱུར་ལ། །དེ་ནི་གཡོ་བ་མེད་ཅིང་མི་འགྱུར་ཡང། །ཞེས་དང། དཔེ་ལྔ་བའི་སྐབས་སུ། སེམས་ཅན་ཐམས་ཅད་ཀྱི་མངོན་པར་ཞེན་པའི་ཡིད་ལ་བྱེད་པ་ཁྱིམ་ལྟ་བུར་གྱུར་པའི་འོག་ན་དེ་བཞིན་གཤེགས་པའི་སྙིང་པོ་སྟོབས་དང། མི་འཇིགས་པ་དང། མ་འདྲེས་པ་དང། སངས་རྒྱས་ཀྱི་ཆོས་ཐམས་ཅད་ཀྱི་མཛོད་ཀྱི་གཏེར་ཆེན་པོ་ཡོད་ཀྱང། ཞེས་སོགས་ཀྱི་ཚིག་སྣ་བསྡུས་པ་ཡིན། ཡང་ལང་གཤེགས་སུ་བཀོད་པའི་ལུང་གི་འཕྲོར། བཅོམ་ལྡན་འདས་ཀྱིས་རིན་པོ་ཆེ་རིན་ཐང་ཆེན་པོ་གོས་དྲི་མ་ཅན་གྱིས་ཡོངས་སུ་དཀྲིས་པ་ལྟར། ཕུང་པོ་དང་ཁམས་སྐྱེ་མཆེད་ཀྱི་གོས་ཀྱིས་ཡོངས་སུ་དཀྲིས་པ། འདོད་ཆགས་དང་ཞེ་སྡང་དང་གཏི་མུག་གི་ཟིལ་གྱིས་ནོན་པ། ཡོངས་སུ་རྟོག་པའི་དྲི་མས་དྲི་མ་ཅན་དུ་གྱུར་པ། རྟག་པ། བརྟན་པ། ཐེར་ཟུག་པར་ནི་བརྗོད་ན། ཞེས་པའང་དཔེ་བདུན་པའི་སྐབས་སུ། ཡོངས་སུ་དཀྲིས་པ་བདེ་བར་གཤེགས་པའི་གཟུགས། །རིན་ཆེན་བྱས་པ་རས་དུམ་དཀྲིས་པ་དེ། །ཞེས་སོགས་དང། དཔེ་དྲུག་པའི་སྐབས་སུ། དེ་བཞིན་གཤེགས་པའང་འཇིག་རྟེན་ན་གནས་པ། འདོད་ཆགས་དང་ཞེ་སྡང་དང་གཏི་མུག་དང། སྲེད་པ་དང་མ་

― GTD002_Page_0717 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་པའི་ཉོན་མོངས་པའི་ཕྱི་ཤུན་གྱི་སྦུབས་ཀྱིས་ཀུན་ཏུ་དཀྲིས་པར་མཐོང་ངོ་། །ཞེས་དང། དཔེ་ལྔ་པའི་སྐབས་སུ། དེར་དེ་ལོ་ནི་མི་ཉུང་བ་ཞིག་ཏུ། །དེ་ལྟར་གནས་ཀྱང་མི་འཇིག་ཆོས་ཅན་ནོ། །ཞེས་རྟག་བརྟན་དུ་གསུངས་པའི་ཕྱིར་དང། །དཔལ་འཕྲེང་གི་མདོ་ལས། དེ་བཞིན་གཤེགས་པའི་སྙིང་པོ་ནི་རྟག་བརྟན་ཐེར་ཟུག་པ་ལགས་སོ། །ཞེས་འབྱུང་ལ། སྙིང་པོ་རྟག་བརྟན་སྟོན་པའི་མདོ་ཞེས་པ་སྤྱི་མིང་ཡིན་པས་སྒེར་དུ་འཇོག་མི་དགོས་ཀྱི་སྙིང་པོའི་མདོ་བཅུ་ག་དེར་འཇོག་ཅེས་ཟེར་འདོད་པ་ཡིན་ནམ་སྙམ། འོ་ན་མངོན་རྟོགས་རྒྱན་ལས། དེ་ལྟར་མཛད་པ་རྒྱ་ཆེའི་ཕྱིར། །སངས་རྒྱས་ཁྱབ་པར་ངེས་པར་བརྗོད། །དེ་ཉིད་ཟད་པ་མེད་པའི་ཕྱིར། །རྟག་པ་ཞེས་ཀྱང་བརྗོད་པ་ཡིན། །ཞེས་པ་འདིས་ཀྱང་སེམས་ཅན་ཐམས་ཅད་ཀྱི་རྒྱུད་ལ་སངས་རྒྱས་རང་ཆས་སུ་ཡོད་པ་དང་དེ་ཉིད་རྟག་བརྟན་ཐེར་ཟུག་ཏུ་བཤད་པར་ཐལ། དེར་ཡང་ཐམས་ཅད་ལ་ཁྱབ་ཅེས་པ་དང། རྟག་ཅེས་པའི་ཚིག་རིས་ཙམ་བྱུང་བའི་ཕྱིར། བྱས་པ་ལ། མི་མཚུངས་ཏེ། རྒྱན་གྱི་དེས་སངས་རྒྱས་ཀྱི་མཛད་པས་ཁྱབ་པ་ལ་དེ་ལྟར་བཤད་པ་ཡིན་པའི་ཕྱིར་ཟེར་ན། དེ་བཞིན་གཤེགས་པའི་སྙིང་པོའི་མདོ་དོན་ཡང་དེ་ལྟར་ཡིན་ཏེ། རྒྱུད་བླ་མས་མདོ་དེའི་དགོངས་པ་བཀྲོལ་བ་ཡིན་པར་ཕྱོགས་གཉི་ག་མཐུན་ལ། དེར་སངས་རྒྱས་ཀྱི་སྐུས་ཐམས་ཅད་ལ་ཁྱབ་ཚུལ་དྲང་ངེས་ཀྱི་གསུང་རབ་སོགས་མཛད་པ་འཕྲིན་ལས་ཀྱིས་ཁྱབ་པ་དང། འཁོར་འདས་གཉི་ག་དེ་བཞིན་ཉིད་དུ་རོ་གཅིག་པ་དང། མ་འོངས་པ་ན་སངས་རྒྱས་ཀྱི་སའི་ཡོན་ཏན་མཐའ་དག་འབྱུང་རུང་གི་རིགས་གཉིས་ཡོད་པ་

― GTD002_Page_0718 ―

^{[མ་དཔེ་གཟིགས་ན་འདིར་གནོན།]}

[Full Size]

དང་གསུམ་གྱི་དོན་དུ་བཀྲལ་བའི་ཕྱིར། དེར་ཐལ། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང། །དེ་བཞིན་ཉིད་དབྱེར་མེད་ཕྱིར་དང། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་མདོར་བསྟན་ཏེ་རྒྱས་བཤད་དུ་དཔེ་དོན་བཅོ་བརྒྱད་སྦྱར་ནས་གསུངས་པའི་ཕྱིར། ཁྱབ་སྟེ། སངས་རྒྱས་ཀྱི་སྐུས་ཁྱབ་ཅེས་པའི་ཁྱབ་ལུགས་འདི་ལྟར་གོ་དགོས་ཀྱི། རྒྱུ་ཚོགས་གཉིས་གང་ཡང་མ་བསྒྲུབས་གོང་ནས་སངས་རྒྱས་རང་ཆས་སུ་ཡོད་པར་བཟུང་ན་མདོ་འདིའི་དགོངས་པར་གཏན་མི་འགྲོ་ཞེས་པ་ཡིན་པས། ཇོ་ནང་པས་མདོ་འདིའི་དགོངས་པ་ལེན་ཚུལ་ཕྱིན་ཅི་ལོག་ཏུ་སོང་ཡོད་པ་རྒྱུད་བླ་མས་མདོ་འདི་འགྲེལ་ཚུལ་ལ་བལྟས་ན་ཤིན་ཏུ་གསལ་བའི་ཕྱིར། དེར་ཐལ། རྒྱུད་བླ་མས་འགྲེལ་ཚུལ་འདི་ལེགས་པར་གོ་ན་འདིའི་བཤད་བྱའི་བདེ་གཤེགས་སྙིང་པོའི་མདོ་སོགས་བརྗོད་བྱ་ཤེར་མདོ་དང་ཕྱོགས་མཐུན་པར་སེམས་བདེན་སྟོང་གཙོ་བོར་བསྟན་པ་ཡིན་པས། རྟག་བརྟན་གྱི་སྙིང་པོ་བདེན་གྲུབ་མ་བསྟན་པར་མ་ཟད་འགོག་བྱེད་མཐར་ཐུག་ཏུ་སོང་ཡོད་པར་རྗེ་བདག་ཉིད་ཆེན་པོས་གསུངས་པའི་ཕྱིར། རྒྱུད་སྡེ་སྤྱི་རྣམ་ལས། རྗེ་རིན་པོ་ཆེའི་བཞེད་པས་བཀའ་བར་བའི་ཕྱོགས་མཐུན་གྱི་མདོ། བདེ་གཤེགས་སྙིང་པོའི་མདོ་དང། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང། ཡེ་ཤེས་སྣང་བ་རྒྱན་གྱི་མདོ་དང། སོར་མོའི་འཕྲེང་བ་ལ་ཕན་པའི་མདོ་དང། འཕགས་པ་དཔལ་འཕྲེང་གི་མདོ་ལ་སོགས་པའི་དགོངས་པ་གཙོ་བོར་འགྲེལ་ལ། དགོངས་པ་ཐལ་འགྱུར་དུ་གནས་ཤིང་འཕགས་པ་ཐོགས་མེད་ཀྱིས་ཀྱང་ཐལ་འགྱུར་དུ་བཀྲལ་བར་བཞེད་དེ།

― GTD002_Page_0719 ―

^{[མ་དཔེ་གཟིགས་ན་འདིར་གནོན།]}

[Full Size]

ཇོ་ནང་པའི་གྲུབ་མཐའ་ལ་འདི་ལས་གནོད་པ་མེད་གསུང་ངོ་། །ཞེས་གསུངས་པའི་ཕྱིར། ཁོ་ན་རེ། དེ་བཞིན་གཤེགས་པའི་སྙིང་པོའ་ིམདོ་སོགས་བརྗོད་བྱ་ཕྱོགས་མཐུན་གྱི་འཁོར་ལོ་བར་བ་ཡིན་པར་ཐལ། ལུང་དེའི་དོན་འཐད་པའི་ཕྱིར། འདོད་ན། འཁོར་ལོ་བར་པ་ཡིན་པར་ཐལ། འདོད་པའི་ཕྱིར་ན། མ་ཁྱབ། འདོད་མི་ནུས་ཏེ། འཁོར་ལོ་གསུམ་པ་ཡིན་པའི་ཕྱིར། རྒྱུད་བླ་དར་ཊཱིཀ་ལས། སླར་ཡང་བླ་མའི་རྒྱུད་འཁོར་ལོ་གསུམ་པ་དེ་བཞིན་གཤེགས་པའི་སྙིང་པོའི་མདོ་ལ་སོགས་པ། ཞེས་གསུངས་པའི་ཕྱིར་ཏེ། རྒྱུད་བླ་མའམ་ཕྱི་མ་དངོས་ནི་དེ་བཞིན་གཤེགས་པའི་སྙིང་པོའི་མདོ་སོགས་ལ་བྱེད་པས་འདིར་བཤད་བྱའི་མིང་འཆད་བྱེད་ལ་བཏགས་པ་ཡིན་པའི་ཕྱིར། དེར་ཐལ། རྒྱུད་ཅེས་པ་སེམས་ཀྱི་ཆོས་ཉིད་ལ་བྱས་ནས་དེ་གཙོ་བོར་གཏན་ལ་འབེབས་པའི་འཁོར་ལོ་བར་བ་ཤེར་མདོ་རྒྱུད་སྔ་མར་བཞག་སྟེ། འཁོར་ལོ་གསུམ་པ་དེ་བཞིན་གཤེགས་པའི་སྙིང་པོའི་མདོ་སོགས་དེ་ལ་ལྟོས་པས་རྒྱུད་ཕྱི་མར་བཞག་པ་ཡིན་པའི་ཕྱིར། འདུས་པ་ཕྱི་མ་ལས། རྒྱུད་ནི་རྒྱུན་ཞེས་བྱ་བར་གྲགས། །རྒྱུན་དེ་རྣམ་པ་གསུམ་འགྱུར་ཏེ། །གཞི་དང་དེ་བཞིན་རང་བཞིན་དང། །མི་འཕྲོག་པ་ཡིས་རབ་ཕྱེ་བ། །ཞེས་གསུངས་པའི་ཕྱིར། ཁྱབ་སྟེ། དེ་གསུམ་ལས་རྒྱུ་རྒྱུད་དམ་རང་བཞིན་གྱི་རྒྱུད་དེ་འདིར་བཤད་བྱའི་གཙོ་བོར་བྱས་པའི་སྟེང་ནས་སྒྲ་དོན་བཤད་དགོས་པའི་ཕྱིར། དེ་ཙམ་མདོ་སྔགས་གཉི་ག་འདྲ་ལ་ཆོས་ཉིད་ཀྱི་ངོས་འཛིན་མི་འདྲའང་རྒྱུ་རྒྱུད་སེམས་ཀྱི་ཆོས་ཉིད་ལ་འཇོག་པ་ཙམ་དབུ་སེམས་གཉི་གའང་འདྲ་བའི་ཕྱིར། སྦས་དོན་ཀུན་གསལ་ལས།

― GTD002_Page_0720 ―

^{[མ་དཔེ་གཟིགས་ན་འདིར་གནོན།]}

[Full Size]

ཤཱནྟི་པ་དང་ཨ་བྷྱཱ་ཀ་རས་རྒྱུ་རྒྱུད་སེམས་ཀྱི་ཆོས་ཉིད་ལ་བཤད་དོ། །ཞེས་གསུངས་པའི་ཕྱིར། དེ་བཞིན་གཤེགས་པའི་མདོའི་ཚིག་རིས་ཙམ་ལ་སེམས་ཅན་རྣམས་ཀྱི་ནང་ནས་སངས་རྒྱས་ཀྱི་སྐུ་དང་ཡེ་ཤེས་ཡོད་ཅེས་པ་འགའ་ཞིག་བྱུང་མོད་ཀྱང། སྐབས་གཞན་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་ཆོས་ཉིད་ཆུད་མི་ཟ་བ་ཡོད་པས། ཞེས་དང། སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན། ཞེས་ཞིབ་ཆ་ཕྱེ་ནས་གསུངས་ཡོད་པ་དེ་མ་ཕྱེ་བར་གསུངས་པའི་སྐབས་རྣམས་ལ་སྦྱོར་དགོས་པ་སྤྱི་ལུགས་ཡིན་པའི་ཕྱིར་དང། མདོའི་མཚན་ལའང་དེ་བཞིན་གཤེགས་པའི་སྙིང་པོའི་མདོ་ཞེས་འབྱུང་བའི་སྙིང་པོ་ནི་རིགས་སམ་ཁམས་ལ་བྱེད་དགོས་པ་གང་ཞིག །རྒྱུད་བླ་མ་ལས། རིགས་ཁམས་སྦྲང་རྩི་དང་འདྲ་འདི་གཟིགས་ནས། །ཞེས་དང། ཐོགས་འགྲེལ་ལས། འདིར་ཁམས་ཀྱི་དོན་ནི་རྒྱུའི་དོན་ནོ། །ཞེས་གསུངས་པས། ཁྱེད་ཅག་སངས་རྒྱས་ཀྱི་རྒྱུ་ཡོད་པར་གསུངས་པ་རྒྱུ་མཚན་དུ་བྱས་ནས་འབྲས་བུ་སངས་རྒྱས་ཡོད་པར་འདོད་པ་ནི་གྲངས་ཅན་པའི་ལུགས་ངན་གྲ་མ་ཉམས་པ་ཡིན་ནོ། །ཁོ་ན་རེ། སྙིང་པོ་རྟག་བརྟན་སྟོན་པའི་མདོའི་སྒྲས་ཟིན་འགོག་མི་རིགས་པར་ཐལ། སྙིང་པོ་རྟག་བརྟན་ཁས་ལེན་དགོས་པའི་ཕྱིར། དེར་ཐལ། དེ་བཞིན་གཤེགས་པའི་སྙིང་པོ་མི་འཇིག་པའི་རྟག་པ་དང། རྒྱུན་མི་འཆད་པའི་བརྟན་པར་ཁས་ལེན་དགོས་པའི་ཕྱིར་ན། མ་ཁྱབ། ཁྱོད་རང་ལ་ཀུན་གཞིའི་རྣམ་ཤེས་གང་ཟག་གི་བདག་ཏུ་ཁས་ལེན་པར་ཐལ། དེ་གང་ཟག་གི་མཚན་གཞིར་གྱུར་པའི་བདག་ཏུ་ཁས་ལེན་པའི་ཕྱིར། ཁྱབ་པ་འགྲིག །ཤེར་མདོ་འཁོར་ལོ་ཐ་མ་ཡིན་

― GTD002_Page_0721 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་བཤད་ཚུལ་གཅིག་སློབ་དཔོན་ཡང་དག་བདེན་པས་ཀྱང་བྱས་ཏེ། དེའི་བརྗེད་བྱང་རྣམ་པ་གཉིས་ཡོད་པ་ལས་གཅིག་སྔར་དྲངས་པ་དེ་ཉིད་ཡིན་པར་མདོའི་ངོས་འཛིན་དཀྱུས་དང་མཐུན་ལ། སྡེ་པ་རྣམས་ཀྱི་ལྟ་བ་བསྟན་པའི་བརྗེད་བྱང་ལས། མྱ་ངན་ལས་འདས་པ་ཆེན་པོའི་མདོ་ནི་ཆོས་ཀྱི་འཁོར་ལོ་གཉིས་པ་ཞེས་བྱ་སྟེ། འཕགས་པ་སངས་རྒྱས་ཕལ་པོ་ཆེ་དང། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ནི་ཆོས་ཀྱི་འཁོར་ལོ་གསུམ་པ་ཞེས་བྱ་སྟེ། ཆེན་པོ་ཁོ་ནའི་ཆེད་དུ་ཡིན་གྱི་ཆུང་ངུ་ནི་མ་ཡིན་ནོ། །ཞེས་སྔ་མ་ལས་བཟློག་སྟེ་བཤད་ལ། ཤེར་མདོ་གསུངས་པའི་ཚེ་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ཞེས་པའི་དོན་དུས་གཉིས་པར་གསུངས་པའི་ཆོས་འཁོར་ཡིན་པ་ལ་བྱ་ཡི། འཁོར་ལོ་གཉིས་པ་ཡིན་པའི་དོན་མིན་ནོ་ཞེས་འདོད་པར་ཝེན་ཚེག་གིས་བཤད་དོ། །སློབ་དཔོན་འདིས་ཤེར་མདོ་འཁོར་ལོ་གསུམ་པར་བཤད་ཀྱང་དགོངས་འགྲེལ་ལས་གསུམ་པ་འདི་ནི་སྨོས་པའི་གསུམ་པ་དུས་གསུམ་པར་གསུངས་པ་ལ་བྱེད་ཅེས་དགོངས་པ་ལེན་གྱི། འདི་ནི་ཞེས་ཉེ་ཚིག་སྨོས་པའི་གསུམ་པ་དེར་སྔོན་གསུངས་པའི་མདོ་ཞིག་འཇོག་ཅེས་བསྙོན་མི་གདེང་ངོ་། །རྒྱ་གར་གྱི་སློབ་དཔོན་བྷ་བྱས་ཤེར་མདོ་འཁོར་ལོ་ཐ་མར་འདོད་པའི་ཚུལ་གཅིག་རྒྱ་ནག་འགྲེལ་ཆེན་དུ་གསུངས་པའང་ལེགས་ལྡན་དང་མཚན་མཐུན་པ་ཞིག་ཡིན་གྱི་ལེགས་ལྡན་འབྱེད་མིན་ནོ། །དེ་དག་གི་དོན་བསྡུས་ན་མདོ་འདིའི་དགོངས་པ་ནི་རང་མཚན་གྱིས་གྲུབ་མ་གྲུབ་ཆ་ཕྱེ་མ་ཕྱེས་ཀྱི་སྒོ་ནས་དྲང་ངེས་སུ་འཇོག་པ་ཡིན་གྱི། དུས་འདི་དང་འདིའི་ཚེ་གསུངས་པ་དྲང་དོན་དང་

― GTD002_Page_0722 ―

^{[མ་དཔེ་གཟིགས་ན་འདིར་གནོན།]}

[Full Size]

ངེས་དོན་ནོ་ཞེས་འབྱེད་པ་མིན་པས། དོལ་པོ་པ་དང་ཡར་འབྲོག་པ་སོགས་ཀྱི་བཤད་ཚུལ་དེ་ནི་དྲིས་ཞུས་སོགས་སུ་ཆོས་རྣམས་རང་མཚན་གྱིས་ཡོད་མཉམ་དུ་གསུངས་པ་དང་མེད་མཉམ་དུ་གསུངས་པ་གཉིས་ཅི་ལ་དགོངས་ཞེས་དྲིས། ལན་དུ་དེ་གཉིས་ཀྱི་དགོངས་གཞི་བསྟན་ནས་དོན་དེ་ལྟར་གོ་དགོས་ཀྱི་སྒྲ་ཇི་བཞིན་དུ་བཟུང་ན་རྟག་ཆད་ཀྱི་མཐར་འགྲོ་ཞེས་བཤད་པས། རང་མཚན་གྱིས་ཡོད་མེད་ཆ་ཕྱེ་སྟེ་གསུངས་པ་ལྟར་བཟུང་ན་དབུ་མའི་ལམ་ཡང་དག་པར་འགྲོ་ཞེས་གསུངས་པའི་ཚུལ་ལ་ཞིབ་ཏུ་མ་བརྟགས་པའི་སྐྱོན་ཡིན་ཏེ། ཁྱེད་ཅག་གིས་དུས་འདིའི་སྐབས་སུ་གསུངས་པ་དྲང་དོན་དང། འདིའི་སྐབས་སུ་གསུངས་པ་ངེས་དོན་ཡིན་ཞེས་པ་འདིའི་དོན་དུ་བསམས་ནས་ཐ་མའི་སྐབས་སུ་གསུངས་ཚད་ངེས་དོན་ཡིན་མིན་རྩོད་པའི་ཕྱིར། ཁྱབ་སྟེ། ཁྱེད་ཅག་ལྟར་ན་དུས་དང་པོར་གསུངས་པ་དང་བར་དུ་གསུངས་པ་རྣམས་ཅི་ལ་དགོངས་ཟེར་དགོས་པ་ལ། མདོ་ལས་དེའི་ནང་ནས་བརྗོད་བྱ་སྟོན་ཚུལ་གྱི་སྒོ་ནས་བྱེ་བྲག་པ་རེ་དམིགས་ཀྱིས་བསལ་ནས་དྲིས་པའི་ཕྱིར། འདི་ཉིད་ལས། དེ་གཉི་གས་ཀྱང་མདོ་འདིར་མདོ་སྡེ་ལ་འགལ་སྤོང་གི་དྲི་བ་བྱུང་ལུགས་དང་དེ་ལ་སྟོན་པས་ལན་བཏབ་ལུགས་དང་དེ་ལ་བརྟེན་ནས་དྲང་ངེས་སུ་བཞག་ལུགས་རྣམས་ལ་ཞིབ་ཏུ་མ་བརྟགས་པར་དྲང་ངེས་ཀྱི་རྣམ་དབྱེ་བྱས་པའི་སྐབས་ཙམ་ཞིག་ལ་རྩོད་པར་སྣང་ངོ་། །ཞེས་སོ། །གྲུབ་པའི་དབང་ཕྱུག་བྱེ་བ་གཤེགས་པའི་བཤུལ། །གྲུབ་མཐའ་གོང་མ་གཉིས་ལས་རྣམ་རིག་པའི། །གྲུབ་མཐའི་རྩ་བ་ལེགས་ཕྱེའི་ཆོས་འཁོར་གྱི། །གྲུབ་དོན་སྙིང་པོར་དྲིལ་བ་འདི་ཡིན་ནོ། །འབད་པ་བློ་ཡི་གྲོགས་ལྡན་ཞིང། །རྣམ་དཔྱོད་བརྩོན་

― GTD002_Page_0723 ―

^{[མ་དཔེ་གཟིགས་ན་འདིར་གནོན།]}

[Full Size]

པས་ཡོངས་བཟུང་བ། །སྐལ་བཟང་དེ་ཡིས་འདིར་ཞུགས་ཏེ། །མདོ་སྔགས་ལམ་བཟང་བགྲོད་པར་རིགས། །ལེགས་བཤད་འགྲན་ཟླ་དང་བྲལ་བ་འདི་མཁས་པའི་དབང་པོ་ལྷ་བཙུན་སྤྲུལ་པའི་སྐུ་བློ་བཟང་དགེ་ལེགས་བསྟན་འཛིན་གྱིས་གསོལ་བ་ནན་ཏན་དུ་བཏབ་སྟེ། འཕྲལ་དུ་བཀའ་རྩོམ་མཛད་ནས་ཆོས་འཁོར་གྱི་ཐད་དུ་སླེབས་པའི་མཚམས་སུ་སྐུལ་བ་པོ་ཉིད་མྱུར་བར་རང་ཡུལ་དུ་ལྡོག་དགོས་བྱུང་སྟེ། འཕྲོ་མ་སླར་ཤིན་ཏུ་རྒྱས་པ་ཞིག་གནང་དགོས་ཞེས་ཡང་ཡང་ཞུས་ཡོད་ཀྱང། འཕྲོ་མ་ལྗགས་རྩོམ་མ་མཛད་པར་ཐད་འདིར་འཇོག་པར་མཛད་པ་ནི་ཕྱིས་འབྱུང་གི་རྟེན་འབྲེལ་ཕུན་སུམ་ཚོགས་པ་ཞིག་ཡོད་པར་མངོན་ནོ། །

དྲང་ངེས་ལེགས་བཤད་སྙིང་པོའི་མཆན་འགྲེལ་རྩོམ་འཕྲོ།

― GTD002_Page_0725 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་བཅོས་ལེགས་པར་བཤད་པའི་སྙིང་པོ་ལས་སེམས་ཙམ་སྐོར་གྱི་མཆན་འགྲེལ་རྩོམ་འཕྲོ་རྣམ་རིག་གཞུང་བརྒྱའི་སྣང་བ་ཞེས་བྱ་བ་བཞུགས་སོ། །

― GTD002_Page_0726 ―

^{[མ་དཔེ་གཟིགས་ན་འདིར་གནོན།]}

[Full Size]

༼ཀ༽ མཁྱེན་གཏེར་རྒྱལ་དབང་མཁྱེན་པའི་སྣང་བརྙན་མཆོག །རལ་གྲིའི་གདེངས་ཀ་རབ་རྨོངས་མུན་པའི་དགྲ། །ཕྱག་སོར་རྩེ་ན་རྩེན་པའི་ཟློས་གར་གྱིས། །བདག་ཡིད་འཆིང་བརྒྱའི་འཆིང་བ་ད་དགྲོལ་ཅིག །སྡེ་སྣོད་གསུམ་བསྒྱུར་བའི་ཚེ་མངོན་པའི་བརྗོད་བྱ་ལྷག་པའི་ཤེས་རབ་ཀྱི་ཡུལ་རང་དང་སྤྱིའི་མཚན་ཉིད་ཇི་ལྟ་བ་བཞིན་འབྱེད་པའི་ཤེས་རབ་ནི་འཇམ་པའི་དབྱངས་ལ་རག་ལས་པས་དེ་ལ་འགྱུར་ཕྱག་བྱ་བ་དང༌། འདུལ་བའི་བཅས་རྐྱང་ཕྲ་མོ་ཞིག་ཀྱང་སྟོན་པ་ཉག་གཅིག་མ་གཏོགས་བྱམས་འཇམ་དབྱངས་སོགས་ཀྱང་མི་དབང་བའི་ཕྱིར་རམ། བླང་དོར་གྱི་གནས་ཕྲ་མོ་རྣམས་སངས་རྒྱས་ཁོ་ནའི་མངོན་སུམ་གྱི་སྤྱོད་ཡུལ་ཡིན་པའི་ཕྱིར་ཐམས་ཅད་མཁྱེན་པ་དང༌། མདོ་སྡེ་ལས་སངས་རྒྱས་བྱང་སེམས་ཀྱི་མཛད་པ་དང༌། ཉམས་ལེན་རྣལ་

― GTD002_Page_0727 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་གྱི་རིམ་པ་གཙོ་བོར་སྟོན་པས་སངས་རྒྱས་དང་བྱང་ཆུབ་སེམས་དཔའ་ལ་ཕྱག་བྱ་བར་བཀས་བཅད་ཅིང་ཕལ་ཆེར་དེ་དང་མཐུན་པར་འབྱུང་ངོ༌། །འདིར་ཡང་བརྗོད་བྱའི་ཆ་ནས་དེ་དང་མཐུན་ཞིང་ཆོས་ཁུངས་བཙུན་པར་བསྟན་པའི་ཕྱིར་དང༌། གཙོ་བོ་རང་གིས་གང་ལས་ལམ་འདི་རྙེད་པའི་རྩ་བའི་བླ་མ་ལ་བཀའ་དྲིན་ཆེ་བའི་སྒོ་ནས་སྒེར་གྱི་ཕྱག་འཚལ་བའོ། །དེར་མ་ཟད་ལྟ་བ་འཚོལ་བ་ལ་བླ་མ་འཇམ་པའི་དབྱངས་ངེས་པར་བསྟེན་དགོས་པར་གོ་བའི་ཆེད་ཀྱང་ཡིན་ཏེ། གཞུང་འདིར་ཡང༌། གྲུབ་མཐའ་གོང་འོག་གི་ལྟ་བའི་གནད་ཡོངས་སུ་རྫོགས་པར་སྟོན་པའི་མདོ་སྔགས་གང་ཉམས་སུ་ལེན་ཀྱང་ལྟ་བའི་གནད་འདིར་བཤད་པ་ལས་ལོག་ན་གང་ཡང་མེད་ཅིང༌། སུས་ལྟ་བ་རྙེད་ན་གང་ཟག་དེ་ཉིད་ཐར་པའི་སྒོར་ཚུད་པ་ཡིན་པས། དེ་ལ་སངས་རྒྱས་

― GTD002_Page_0728 ―

^{[མ་དཔེ་གཟིགས་ན་འདིར་གནོན།]}

[Full Size]

བྱོན་པའི་དགོས་པ་ཡང་གྲུབ་པ་ཡིན་གྱི་དེའི་བར་དུ་ནི་མ་ཡིན་ཏེ། བསྟན་པ་གཞན་ཐམས་ཅད་ནི་འདི་ལ་བརྩམས་ཏེ་འཇུག་པའི་སྨིན་བྱེད་སྦྱོར་བ་ཙམ་ཡིན་ལ། དངོས་གཞིའི་སྙིང་པོའི་དོན་ནི་ཡང་དག་པའི་ལྟ་བ་ཡིན་པས། འདི་ཡང་མདོ་དང་སྔགས་ཀྱི་ལེགས་པར་བཤད་པ་ཐམས་ཅད་ཀྱི་སྙིང་པོར་བཤད་པ་མིང་དོན་མཐུན་པ་ཡིན་ཞིང༌། ཕྱག་འདི་ཡང་མངོན་པ་གཞན་ལས་ཀྱང་ལྷག་པར་བརྗོད་བྱ་དང་མཐུན་པའི་ཕྱག་ཡིན་ནོ། །དེ་ལྟར་བསྟན་པ་ཡོངས་ཀྱི་སྙིང་པོར་འགྱུར་བ་ལ་དགོངས་ནས་འདིའི་མཇུག་ཏུ། རྒྱལ་བའི་དགོངས་ཟབ་ཟབ་མོའི་མདོ་ཡིས་རབ་བསྟན་བསྟན་པའི་སྙིང་པོ་འཛིན། །ཞེས་གསུངས་ཤིང༌། ལེགས་བཤད་སྙིང་པོ་ཆུང་བར། བསྟན་པའི་སྙིང་པོ་སྟོང་པ་ཉིད། །ཅེས་འདོམས་པར་མཛད་དོ། ། ༼ཁ༽འདི་དག་གི་དོན་བསྡུ་ན་རྗེ་ཉིད་ཀྱིས། གང་ཞིག་གཟིགས་ཤིང་གསུངས་པ་ཡི། །མཁྱེན་དང་སྟོན་པ་བླ་ན་མེད། །ཅེས་གསུངས་པ་ལྟར། འཇིག་རྟེན་ཐམས་ཅད་ཀྱི་གཙུག་རྒྱན་བླ་ན་མེད་པའི་སྟོན་པར་གྱུར་པ་ནི། འོག་ཏུ་འཆད་པར་འགྱུར་བས་གཞུང་གི་དོན་རྟེན་འབྱུང་སྟོང་པ་དང༌། སྟོང་པ་རྟེན་འབྱུང་གི་དོན་དུ་འགྲོ་བ་འདི་ཉིད་རང་གི་ཐུགས་སུ་ཆུད་ཅིང༌། གཞན་ལ་འདོམས་པའི་སྒོ་ནས་ཡིན་པར་གོ་བའི་ཆེད་དེ། དེ་ལྟར་བྱས་ན་ལེགས་བཤད་སྙིང་པོ་ཆེ་ཆུང་གི་མིང་བཏགས་པ་ཡང་ཤེས་སོ། །ཚིག་རིས་གཞན་གྲགས་ཆེ་ལ།

― GTD002_Page_0729 ―

^{[མ་དཔེ་གཟིགས་ན་འདིར་གནོན།]}

[Full Size]

ལུས་མེད་བདག་པོ་ཞེས་པ་མངོན་བརྗོད་ཀྱི་གཞུང་ལས། འདོད་ཁམས་པ་རྣམས་གོང་མ་ལ་ལྟོས་ན་ལུས་ཆུང་བས་མེད་པ་དང་འདྲ་ལ། འདི་དེའི་བདག་པོ་ཡིན་པའི་ཕྱིར་རམ། ཡང་ན་དབང་ཕྱུག་ཆེན་པོ་དཀའ་ཐུབ་ལ་གནས་པའི་ཚེ་འདིས། རྨོངས་བྱེད་བརྒྱལ་བྱེད་སྨྱོ་བྱེད་དང༌། །གསོད་བྱེད་བརྗེད་བྱེད་མདའ་ལྔ་འོ། །ཞེས་པ་ལྟར་རམ། ཚིག་གཏེར་འགྲེལ་པར་བཤད་པ་ལྟར། མྱོས་བྱེད། འདར་བྱེད། དྲེགས་བྱེད། རྨོངས་བྱེད། འཆིང་བྱེད་ཀྱི་མདའ་ལྔ་འཕངས་པའི་ཚེ། དཀའ་ཐུབ་ཉམས་པས་ཁྲོས་ཏེ་ཉི་མ་ཟླ་བ་མེའི་མིག་གསུམ་གྱི་དབུས་མ་མེའི་མིག་གིས་བསྲེགས་ཏེ་ལུས་མེད་པར་བྱས་པར་བཤད་དེ། འདི་དག་དེའི་བྱེད་པ་ཡིད་ལ་ཞུགས་པར་མདའ་ཞེས་བཏགས་སོ། ། ༼ག༽རྒྱ་མཚོ་དང་ཆོས་མཐུན་གསུམ་གྱིས་སྦྱར་བས། གཉིས་པ་འདི་ནི་སྤྱིར་སྤྱོད་པ་ཕྱིན་དྲུག་སོགས་དུ་མ་དང༌། ཁྱད་པར་མདོ་སྡེ་རྒྱན་ལས། སངས་རྒྱས་འཁོར་གྱི་དཀྱིལ་འཁོར་སྟོན་པའི་རྣམ་པ་ཤེས། །ཞེས་གསུངས་པ་ལྟར། མཛད་པ་བཅུ་གཉིས་ལ་སོགས་པའི་ཚུལ་གྱིས་རྒྱལ་བའི་མཛད་པ་ཐམས་ཅད་རང་གི་ཁུར་དུ་བླངས་པའི་བློན་པོ་ཆེན་པོ་ལྟ་བུ་སྟེ། དགེ་འདུན་ཉི་ཤུའི་མདོར་བྱང་ཆུབ་

― GTD002_Page_0730 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔའ་སེམས་དཔའ་ཆེན་པོ་གང་དག་བདག་ཉིད་ཀྱི་ལུས་དེ་བཞིན་གཤེགས་པའི་སྐུ་ལྟ་བུར་སྤྲུལ་ནས། ཞེས་སོགས་དང༌། བྱང་ཆེན་གང་དག་སེམས་དང་པོ་བསྐྱེད་པ་ཉིད་ཀྱིས་བྱང་ཆུབ་ཏུ་འཚང་རྒྱ་ཞིང་ཆོས་ཀྱི་འཁོར་ལོ་བསྐོར་ཏེ། ཞེས་སོགས་ལྟ་བུའོ། །འདི་ཡང་དེ་གཉིས་བྱང་སེམས་ཡིན་པས་དབང་དུ་བྱས་པའོ། ། ༼ང༽གཞུང་ལུགས་མང་ཐོས་ཞེས་པ་མན་ཆད་དགོས་སོགས་བཞི་ལ་སྦྱར་རུང་དུ་སྣང་ཞིང༌། ཚིག་དོན་ནི། ཇོ་ནང་པ་སོགས་སྤྱིར་གཞུང་ལུགས་མང་དུ་ཐོས་ཤིང༌། ཁྱད་པར་ལྟ་བའི་གནད་དོན་ཚོལ་བར་འདོད་ནས། རིགས་པའི་ལམ་ལ་སྐྱོ་ངལ་གྱི་འདུ་ཤེས་མེད་པར་འབད་པ་བསྟེན་པ། སྤྱོད་པའི་ཕྱོགས་ཀྱི་ཡོན་ཏན་དུ་མ་ཡང་མངའ་བ་དེ་དག་གིས་ཀྱང་མ་རྟོགས་པའི་ལམ་སྲོལ་བཟང་པོ་འདི་ཉིད། འོལ་ཁ་སོགས་སུ་དཀའ་བ་དུ་མའི་སྒོ་ནས་བཙལ་ཞིང་འཇམ་པའི་དབྱངས་ཀྱིས་རྗེས་སུ་བཟུངས་པའི་བཀའ་དྲིན་ལས་རྙེད་ཚུལ་དང་སྣོད་ལྡན་ལ་ཉན་པར་སྐུལ་བ་སོགས་སོ། །འདིས་མཚོན་སྐབས་དུ་མར་སྔ་མ་མང་པོའི་ལུགས་བཀག་ཀྱང༌། མིང་བཟུང་མ་མཛད་པ་དེ་དག་གི་ལྟ་བ་ལ་ནོར་བ་བྱུང་ཡང་སྤྱོད་ཕྱོགས་མི་ནུབ་པར་བསྐྱངས་པའི་བཀའ་དྲིན་ཆེ་བའི་གནད་ཀྱིས་ཡིན་ལ། རྐང་པ་གཉིས་པར་ངལ་བ་མང་བསྟེན་ཞེས་ཀྱང་དཔེ་ཁ་ཅིག་ཏུ་འབྱུང་སྟེ་དོན་ལ་ཁྱད་པར་ཆེར་མེད་དོ། །དེ་ནས་གཞུང་དངོས་ཀྱི་དོན་ལ་གཉིས་ལས། དང་པོ་དྲང་ངེས་འབྱེད་དགོས་པའི་རྒྱུ་མཚན་ནི། སྟོང་པ་སྟེ་རྣམ་པར་ཐར་པའི་སྒོ་སྟོང་པ་ཉིད་དང༌། ཞི་བ་སྟེ་མཚན་

― GTD002_Page_0731 ―

^{[མ་དཔེ་གཟིགས་ན་འདིར་གནོན།]}

[Full Size]

མ་མེད་པ་དང༌། སྐྱེ་བ་མེད་པ་སྟེ་སྨོན་མེད་གསུམ་མ་རྟོགས་པར་འཁོར་བ་ལས་མི་གྲོལ་ཚུལ་སྟོན་པ་ལ་ཡུལ་འཁོར་སྐྱོང་གིས་ཞུས་པའི་མདོ་ལུང་ནི། བོད་དུ་འགྱུར་བའི་མདོ་འདིར་མེད་ཀྱང༌། དབུ་མ་སྣང་བ་སོགས་སུ་ཡུལ་འཁོར་སྐྱོང་གིས་ཞུས་པ་དྲངས་པ་ལས་འབྱུང་བ་འདིར་བཀོད་པའོ། །ཞེས་འགའ་ཞིག་གསུངས་ཀྱང་དཀོན་བརྩེགས་ཀྱི་ཡུལ་འཁོར་སྐྱོང་ཞུས་ན་འགྱུར་ཙམ་མ་གཏོགས་ཇི་བཞིན་པར་སྣང༌། དེ་ལ་རྣམ་ཐར་སྒོ་གསུམ་ནི། མཛོད་ལས། མཚན་མེད་ཞི་བའི་རྣམ་པ་དང། །སྟོང་ཉིད་བདག་མེད་སྟོང་ཉིད་དུ། །འཇུག་པའོ་སྨོན་པ་མེད་པ་ནི། །དེ་ལས་གཞན་བདེན་རྣམ་པ་ཅན། །ཞེས་སྟོང་བདག་མེད་གཉིས་རྣམ་པར་ཐར་པའི་སྒོ་སྟོང་པ་ཉིད། སྡུག་བདེན་གྱི་ལྷག་མ་གཉིས་དང༌། ཀུན་འབྱུང་གི་ཁྱད་ཆོས་བཞི། ལམ་གྱི་བཞི་རྣམས་སྨོན་མེད་དང༌། འགོག་པའི་བཞི་མཚན་མེད་དེ། གཟུགས་སོགས་ཡུལ་ལྔ། སྐྱེ་རྒ་མི་རྟག་པ་སྟེ་འདུས་བྱས་ཀྱི་མཚན་ཉིད་གསུམ། ཕོ་མོའི་མཚན་མ་གཉིས་ཏེ་མཚན་མ་བཅུ་དང་བྲལ་བའི་ཕྱིར་རོ། །ལམ་གྱི་བཞི་ལ་དེ་མ་ཚང་ཞིང་མྱ་ངན་ལས་འདའ་བའི་ཚེ། ལམ་སུན་འབྱིན་པའི་ལམ་གསུམ་གྱི་སྒོ་ནས་རྒྱུན་བཅད་དེ། ངེས་པར་འབྱུང་བའི་གནས་ཡིན་པའི་ཕྱིར་སྨོན་མེད་དུ་བཤད་དོ། །ཐེག་ཆེན་ཐུན་མོང་བའི་ལུགས་ནི། མདོ་སྡེ་རྒྱན་ལས། ཏིང་འཛིན་གསུམ་གྱི་སྤྱོད་ཡུལ་ནི། །བདག་མེད་རྣམ་པ་གཉིས་པོ་དང༌། །བདག་ཏུ་འཛིན་པའི་རྟེན་དང་ནི། །དེ་རྟག་ཉེར་ཞི་ཡིན་ཞེས་བྱ། །ཞེས་དང༌། འགྲེལ་པ་དོན་གསལ་སྐབས་

― GTD002_Page_0732 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་པར་བདེན་བཞིའི་ཁྱད་ཆོས་བཅུ་དྲུག་ལ་སྦྱར་བ་གཅིག་དང་གཉིས་ཡོད་པ་ཅུང་མི་འདྲ་སྟེ། རྒྱན་གྱི་བདག་མེད་གཉིས་ཞེས་པ། དབྱིག་འགྲེལ་ལས། སྟོང་པ་ཉིད་ཀྱི་ཏིང་ངེ་འཛིན་ནི་གང་ཟག་དང་ཆོས་ལ་བདག་མེད་པའོ། །ཞེས་བདག་མེད་གཉིས་གསུང་ཞིང༌། འགྲེལ་པ་དོན་གསལ་ལས། ཆོས་ཀྱི་བདག་མེད་མ་བཤད་ལ་དེས་མཚན་མེད་ལ་ལམ་གྱི་བཞི་ཡང་སྦྱར་ཀྱང༌། རྒྱན་ལས། ལམ་གྱི་བཞི་གང་ལ་ཡང་མ་སྦྱར་ཏེ། བདག་འཛིན་གཉིས་ཤེས་པ་དང༌། སྤོང་བ་དང༌། སྤངས་པ་མངོན་དུ་བྱེད་ཚུལ་ཙམ་ལས་ཁྱད་ཆོས་བཅུ་དྲུག་སོགས་ལ་མ་སྦྱར་བའི་ཕྱིར། བསྡུ་བ་ལས། ཀུན་བཏགས་ཀྱི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་དང་པོ་བཞག་གོ །གཞན་གྱི་དབང་གི་ངོ་བོ་ཉིད་ལ་བརྟེན་ནས་རྣམ་པར་ཐར་པའི་སྒོ་གཉིས་པ་བཞག་གོ །ཞེས་སོགས་ཀྱིས་ངོ་བོ་ཉིད་གསུམ་ལ་སྦྱར་བ་ཡང་འདི་དང་དོན་གཅིག་སྟེ། བདག་གཉིས་སུ་ཀུན་བཏགས་པ་འགོག་པ་དང༌། བདག་ཏུ་འཛིན་པའི་རྟེན་མ་དག་པའི་གཞན་དབང་ལ་རྒྱབ་ཀྱིས་ཕྱོགས་པ་དང༌། དེ་རྟག་ཏུ་ཞི་བའི་ཆོས་ཀྱི་དབྱིངས་ཀྱི་འགོག་པ་མངོན་དུ་བྱས་པའི་ཟག་མེད་ཀྱི་དགའ་བདེ་འགྲུབ་པ་སྟེ། རྒྱན་ལས། རྣམ་པར་མི་རྟོག་རྒྱབ་ཀྱིས་ཕྱོགས། །རྟག་ཏུ་དགའ་དང་ལྡན་པ་འོ། །ཞེས་སོགས་གསུངས་པའི་ཕྱིར། འདིར་རྒྱུ་ཆོས་ཀྱི་སྡོམ་བཞི་ལ་སྦྱོར་ཚུལ་སོགས་མང་སྟེ། རྒྱན་གྱི་ཊཱིཀྐ་རྣམས་ལ་ལྟོས། མཆིམས་མཛོད་ལས། རྣམ་པར་གཏན་ལ་དབབ་པ་བསྡུ་བས། འདི་གསུམ་ངོ་བོ་ཉིད་གསུམ་གྱི་ཡུལ་ཅན་དུ་གསུངས་ཞེས་པ་དང༌། ཐོས་བསམ་ལས་

― GTD002_Page_0733 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་བ་དང༌། འཇིག་རྟེན་པའི་སྒོམ་བྱུང་དང༌། འཇིག་རྟེན་ལས་འདས་པའི་སྒོམ་བྱུང་གསུམ་རིམ་བཞིན་སྟོང་པ་ཉིད་སོགས་དང༌། སྟོང་པ་ཉིད་ཀྱི་ཏིང་ངེ་འཛིན་སོགས་དང༌། རྣམ་པར་ཐར་པའི་སྒོ་སྟོང་པ་ཉིད་སོགས་སུ་གསུངས་ཞེས་བཤད་ཀྱང༌། ཀུན་བཏགས་དང་པོའི་ཡུལ་དུ་གསུངས་པ་ཡིན་མིན་དཔྱད་དགོས་ལ། སྟོང་པ་ཉིད་སོགས་ཀྱི་སྒྲས་གསུངས་པ་དེར་སྒོམ་བྱུང་དང༌། ཏིང་ངེ་འཛིན་གྱི་སྒྲས་གསུངས་པ་དེར་འཇིག་རྟེན་ལས་འདས་པའི་སྒོམ་བྱུང་དོར་ནས་བཤད་པ་འཐད་དཀའ་སྟེ། སྔ་མ་སྔ་མ་སྤྱི་དང་ཕྱི་མ་བྱེ་བྲག་གི་ཚུལ་ཡིན་གྱི་ནང་ཕན་ཚུན་འགལ་བ་མ་ཡིན་པའི་ཕྱིར། ཐེག་ཆེན་ཐུན་མོང་མ་ཡིན་པའི་རྣམ་ཐར་སྒོ་གསུམ་ལ་རྒྱུ་འབྲས་ངོ་བོ་གསུམ་ལ་སྦྱར་བ་དང། བྱ་བྱེད་ལས་གསུམ་ལ་སྦྱར་བ་སོགས་ལས། དང་པོ་ནི། རྣམ་སྣང་མངོན་བྱང་ལས། སེམས་ནི་རང་ངོས་མེད་ཕྱིར་དང༌། །རྒྱུ་དང་འབྲས་བུ་སྤངས་པའི་ཕྱིར། །ཞེས་དང༌། ཤུ་ནྱ་ཏཱའི་སྔགས་དོན་བཤད་པའི་ཐད་ཀྱི་སྒྲུབ་ཐབས་ཀུན་བཟང་ལས། ངོ་བོ་ཉིད་དང་བྲལ་ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་ཕྱིར་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་ཏེ། ལམ་དོན་དམ་པར་རྒྱུ་ལས་མ་སྐྱེས་པ་དང༌། དོན་དམ་པར་མ་གྲུབ་པ་དང༌། དོན་དམ་པར་འབྲས་བུ་མི་འབྱིན་པ་ཞེས་སྦྱར་ན། ལམ་གྱི་དེ་གསུམ་ལམ་རང་ཉིད་ཀྱི་སྟེང་དུ་བཞག་ནུས་ལ། དེའི་རྒྱུ་དོན་དམ་པར་མ་གྲུབ་པ་ཞེས་སོགས་སུ་སྦྱར་ན་མི་ནུས་སོ། །འོན་ཀྱང་རང་ཉིད་ཀྱི་སྟེང་གི་སྟོང་

― GTD002_Page_0734 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་དགོས་མི་དགོས་དཔྱད་པར་བྱའོ། །འོ་ན་དབུ་མའི་མཐའ་དཔྱོད་ལས། མྱུ་གུ་གཞན་སྐྱེ་མེད་པ་སྟོང་ཉིད་མ་ཡིན་པར་ཐལ། མྱུ་གུའི་སྟོང་ཉིད་མ་ཡིན་པའི་ཕྱིར་ན་མ་ཁྱབ། མྱུ་གུ་སྐྱེ་བའི་སྟོང་ཉིད་ཡིན་ཀྱང་མྱུ་གུའི་སྟོང་ཉིད་མ་ཡིན་པའི་ཕྱིར་ཏེ། ཞེས་གསུངས་པ་ཅི་ཞེ་ན། གཞན་སྐྱེ་འཇོག་ཚུལ་ནི། སྐྱེ་བ་འཇོག་མཚམས་བཏགས་ཡོད་ཙམ་གྱིས་མ་ཚིམ་པར་དཔྱད་ནས་རྒྱུ་རང་མཚན་གྱིས་གྲུབ་པ་ཞིག་ལས་འབྲས་བུ་རང་མཚན་གྱིས་གྲུབ་པ་ཞིག་སྐྱེ་བ་གཞན་སྐྱེའི་དོན་དུ་འདོད་ལ། དེ་ལྟར་སྐྱེ་བ་དཔྱད་བཟོད་དུ་མ་གྲུབ་པ་སྐྱེ་བའི་སྟོང་ཉིད་ཡིན་པ་ལ་དགོངས་སོ། །བྱ་བྱེད་ལས་གསུམ་ལ་སྦྱར་བ་དེ་གང་གིས་བཤད་ཅེ་ན། སྤྱིར་འཁོར་གསུམ་མི་དམིགས་པར་བཤད་པ་ཐམས་ཅད་ཀྱང་འདི་ཡིན་ལ། ཁྱད་པར་གསང་འདུས་རྩ་རྒྱུད་ལེའུ་གཉིས་པར། དངོས་པོ་མེད་པས་བསྒོམ་པ་མེད། །བསྒོམ་པར་བྱ་བ་བསྒོམ་པ་མིན། །དེ་ལྟར་དངོས་པོ་དངོས་མེད་པས། །བསྒོམ་པ་དམིགས་སུ་མེད་པར་རོ། །ཞེས་པ་འདི་ལ་ཚུལ་བཞིའི་བཤད་པ་འབྱུང་བ་ལས། སྤྱི་དོན་གྱི་སྐབས་སུ་རྒྱུ་འབྲས་ངོ་བོ་གསུམ་ལ་སྦྱར་བ་དེ་ཉིད་བཤད་ཀྱང༌། ཡིག་དོན་སྐབས་སུ་འདི་ཉིད་བཤད་དོ། །དེ་ཡང་ལས་སམ་བསྒོམ་བྱའི་ཡུལ་གྱི་དངོས་པོ་དང༌། བྱེད་པ་སྟེ་སྒོམ་བྱེད་ལམ་གཉིས་དོན་དམ་པར་མ་གྲུབ་པས། དེས་དེ་བསྒོམ་པ་ཡང་དོན་དམ་པར་མ་གྲུབ་པར་འགྱུར་ཏེ། རྩ་ཤེས་ལས། ལམ་ལ་རང་བཞིན་ཡོད་ན་ནི། བསྒོམ་པ་འཐད་པར་མི་འགྱུར་རོ། །ཞེས་དོན་དམ་པར་གྲུབ་ན་བསྒྱུར་དུ་མེད་པ་ལ། བསྒོམ་པ་དོན་མེད་པའི་ཕྱིར། དེ་ལྟར་གསུམ་བཤད་ཀྱང༌། རྣམ་པར་

― GTD002_Page_0735 ―

^{[མ་དཔེ་གཟིགས་ན་འདིར་གནོན།]}

[Full Size]

ཐར་པའི་སྒོ་སྟོང་པ་ཉིད་དུ་འདུས་ཏེ། ཀླུ་སྒྲུབ་ཀྱིས་མཛད་པའི་བྱང་ཆུབ་ཀྱི་ཚོགས་ལས། རང་བཞིན་མེད་པའི་སྟོང་ལ་སྟོང་པ་ནི། །ཡིན་དང་མཚན་མའི་ཅི་ཞིག་བྱེད་པར་འགྱུར། །མཚན་མ་ཐམས་ཅད་ལོག་པར་གྱུར་པའི་ཕྱིར། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་པའི་ཕྱིར། ཁྱབ་སྟེ། ཡིན་དང་ཞེས་པ་རྒྱུ་མཚན་སྟོན་པའི་ཚིག་ཡིན་པའི་ཕྱིར། སྔགས་རིམ་ལས། སྟོང་པ་ཁོ་ནར་དངོས་པོ་ཉིད་གཞན་གཉིས་འདུས་པར་གསུངས་པ་ནི། བྱང་ཆུབ་ཀྱི་ཚོགས་ལས་ཞེས་སོགས་གསུངས་པའི་ཕྱིར། འདི་ཡང་ཞི་སྒོ་གཉིས་པར་ཐལ་བའི་སྐྱོན་སྤོང་བཞེད་པ་ཡིན་ནོ། །འདི་དག་ལས་འཕྲོས་ཏེ། རང་རྒྱུད་པས་ཞི་སྒོ་གཉིས་པ་དང༌། འཁོར་རྩ་གསུམ་པ་སོགས་འདོད་མི་འདོད་དང༌། བྱེ་སྨྲས་སྟོང་ཉིད་ཀྱི་ཐ་སྙད་འདོད་མི་འདོད་སོགས་ཀྱང་དཔྱད་པར་བྱའོ། །༈ རེ་ཞིག་རགས་པའི་བདག་མེད་ཙམ་སྟོན་པར་མཛད་པ་སོགས། ༈ རྟེན་འབྱུང་སོགས། ༼ཅ༽རྒྱུད་བླ་མ་ལས། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པས། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས། །ཞེས་གསུངས་པ་ལྟར། རྒྱལ་བ་ཉིད་ཚད་མར་བྱེད་དགོས་སོ། །འོན་ཀྱང་རྒྱལ་བའི་གསུང་ལ་རིགས་པས་དཔྱད་པ་བྱེད་པ་ལ། དེ་ཚད་མར་མ་བཟུང་བ་འདྲ་བ་ཞིག་ཏུ་གོ་ནས། གང་གསུངས་སྒྲ་ཇི་བཞིན་དུ་འཛིན་པ་ནི། རྟོན་པ་དང་པོ་གཉིས་མ་གོ་བའི་བླུན་ཚིག་ཡིན་

― GTD002_Page_0736 ―

^{[མ་དཔེ་གཟིགས་ན་འདིར་གནོན།]}

[Full Size]

ཏེ། མཐའ་དཔྱོད་མྱུ་གུ་ལས། གཞུང་ལུགས་རྣམས་སུ་རིགས་པས་སྒྲུབ་པ་ལྟར། རིགས་པས་གྲུབ་པ་དགོས་ཀྱི། དེ་དག་ཚུར་མཐོང་ལ་ཤིན་ཏུ་ལྐོག་གྱུར་ཡིན་པས། སྒྲུབ་བྱེད་ལུང་ཙམ་དུ་ཟད་དོ། །ཞེས་སྨྲས་པ་ནི། བདག་ནི་སྟོན་པ་གཞན་སྤངས་ནས་བཅོམ་ལྡན་ཁྱོད་ལ་སྐྱབས་སུ་སོང་བ་འདི་ནི་བདག་རང་གི་འདོད་པ་ཙམ་དུ་ཟད་ཀྱི་སྒྲུབ་བྱེད་ཅི་ཡང་མེད་ཅེས་རང་གི་སྐྱབས་འགྲོའི་མཚང་སྒྲོག་པ་སྟེ་ཞེས་དང༌། དེའི་ཚེ་ལུང་གཉིས་ནི་བདེན་པའི་དོན་ཅན་ཡིན་མིན་དཔྱོད་པའི་གཞི་ཡིན་པས་རྩོད་གཞི་སྒྲུབ་བྱེད་དུ་མི་རུང་བའི་ཕྱིར། རིགས་པ་ཉིད་ཀྱིས་བདེན་པའི་དོན་ཅན་ཡིན་མིན་དབྱེ་བར་བྱའོ། །ཞེས་གསུངས་པའི་ཕྱིར། དེས་ན་ཚད་མར་བྱེད་ཀྱང་བྱེད་ཚུལ་ཤེས་དགོས་པས། དང་པོ་ནས་མོས་མནོ་ཙམ་མ་ཡིན་པར། རྒྱལ་བའི་བཀའ་ཉིད་ལས་འབྱུང་བའི་དྲི་མ་མེད་པའི་རིགས་པའི་ལམ་ནས་དོན་དངོས་པོའི་སྡོད་ལུགས་ལ་དཔྱོད་པའི་རིགས་པ་དྲི་མ་མེད་པ་ཞིག་གི་སྒོ་ནས། ༼ཆ༽དེ་ལྟར་ཚད་མར་གྱུར་པ་རྒྱལ་བའི་བཀའ་ཡིན་ཡང་དེའི་དགོངས་པ་འགྲེལ་པ་ལ། ཚད་མར་གྱུར་པའི་ཤིང་རྟ་ཆེན་པོ་ཞིག་གི་རྗེས་སུ་མ་འབྲང་བར་མདོར་དྲང་ངེས་ཀྱི་ཚུལ་དུ་མ་གསུངས་པ་རང་སྟོབས་ཀྱིས་དབྱེ་མི་ནུས་པས། ༼ཇ༽དོན་བསྡུ་ན་བཀའ་ལ་བརྟེན་དགོས་ཞེས་པ་དང༌། ཤིང་རྟ་ཆེན་པོའི་རྗེས་སུ་འབྲང་དགོས་ཞེས་པ་ཐམས་ཅད་ཀྱང་ཕུགས་ཀྱི་གཏད་སོ་རིགས་པས་དབྱེ་དགོས་ཞེས་པ་འདི་ལ་ཐུག་སྟེ་གང་གི་རྗེས་སུ་འབྲང་བའི་ཡུལ་དེ་ཡང་ཆེས་མཆོག་ཏུ་གྲགས་པ་ཞིག་ཡིན་ཡང༌། དེའི་བཤད་པ་དོན་གྱི་སྡོད་ལུགས་དང་མི་མཐུན་ན། བཤད་པ་དེ་ཉིད་བརྗོད་དོན་ལ་བསླུ་བ་ཡིན་པས་འདོར་བའི་སྤྲུས་དེ་

― GTD002_Page_0737 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་འོས་ཀྱི་དངོས་པོའི་རང་བཞིན་ལོག་པར་འཛིན་མི་འོས་ཏེ། སྔ་མ་ལ་རྒྱབ་རྟེན་ཚད་མ་མེད་ལ། ཕྱི་མ་ལྐོག་གྱུར་རྣམས་ཀྱང་འཐད་སྒྲུབ་ཀྱི་རྒྱབ་རྟེན་དང་བཅས་པའི་ཕྱིར་ཞེས་སྟོན་པར། ༼ཉ༽བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །མཁས་པ་དག་གིས་བླང་བྱ་ཡི། །དགེ་སློང་དག་གིས་གུས་ཕྱིར་མིན། །ཞེས་ཀྱང་འགྲེལ་ཆེན་དྲི་མེད་འོད་དུ་འབྱུང་བ་ནི་འགྱུར་ཁྱད་ཙམ་མོ། །འདིས་ནི་ལུང་དཔྱད་པ་གསུམ་གྱིས་དག་པའི་ཚུལ་ཡང་བསྟན་ཏེ། ཀ་མ་ལ་ཤཱི་ལས། དེ་ལ་བསྲེག་པ་ནི་མངོན་སུམ་དང་ཆོས་མཐུན་པར་བསྟན་པའི་ཕྱིར་རོ། །བཅད་པ་ནི་རྗེས་སུ་དཔག་པ་དང་ཆོས་མཐུན་པར་བསྟན་པའི་ཕྱིར་རོ། །བརྡར་བ་ནི་ཡིད་ཆེས་པ་དང་ཆོས་མཐུན་པར་བསྟན་པའི་ཕྱིར་རོ། །ཞེས་རིགས་ཐིག་གི་ཕྱོགས་སྔ་མ་མདོར་བསྡུས་སུ་གསུངས། རྟོན་བཞིའི་རྣམ་གཞག་འདི་ལས་འཕྲོས་པ་གྲགས་ཆེ་ཡང་གོང་གི་རྩ་ཚིག་རྣམས་ཀྱིས་རྟོན་བཞི་བཤད་སྙམ་པ་སུ་ལ་མི་འདུག་པས་ཟུར་ཙམ་གོང་དུ་བྲིས་ཟིན་ཅིང་རྟོན་བཞི་རྒྱས་པར་ནི། བཻ་ཌཱུརྱ་དཀར་པོའི་གན་མཛོད་སྐལ་བཟང་རེ་སྐོང་ལས་ཤེས་དགོས་ལ། དེའི་ནང་ནས་བརྡ་ཁྱད་ཅུང་རྟོགས་དཀའ་བ་ནག་པོ་བསྟན་པ་དང༌། ཆེན་པོ་བསྟན་པ་ཞེས་པ་ནི། འཁོར་བ་དང་ངན་སོང་གི་རྒྱུ་ཙམ་ཞིག་ལ་བླང་བྱར་སྟོན་པ་ཕྱི་བའི་བསྟན་པ་དང། འཁོར་བ་སྤོང་བྱེད་ཀྱི་གཉེན་པོ་དང་དམིགས་པ་ཡིད་ལ་བྱས་ནས་སྒོམ་ཚུལ་སྟོན་པས་ཆེན་པོ་བསྟན་པ་ནང་བའི་བསྟན་ཆོས་རྣམས་ཡིན་ཏེ། མདོ་སྡེ་རྒྱན་གྱི་ཆ་ཊཱིཀ་ལས། ཞི་བའི་ཕན་ཡོན་སྟོན་པར་མཛད་པ་གང༌། །

― GTD002_Page_0738 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ནི་དྲང་སྲོང་གསུངས་ཡིན་ལྡོག་པ་གཞན། །ཞེས་པ་ལྟར། ནག་པོ་བསྟན་པ་ལ་གཉེན་པོའི་དམིགས་པ་སྟོན་པ་མེད་པས། གཉེན་པོའི་དམིགས་པ་སྟོན་པ་ལ་ཆེན་པོ་སྟོན་པས་ཁྱབ་བོ། །ཞེས་གསུངས་པའི་ཕྱིར། ས་སྡེའི་མཆན་ལས་ཀྱང་འབྱུང༌། རྣམ་པར་ཤེས་པ་གནས་པ་བཞི་ནི། མདོ་ཉིད་ལས། རྣམ་པར་ཤེས་པ་གནས་པ་བཞི་སྟེ། བཞི་གང་ཞེ་ན། རྣམ་པར་ཤེས་པ་གནས་པ་ན་གཟུགས་ལ་ཉེ་བར་འགྲོ་ཞིང་གནས་སོ། །རྣམ་པར་ཤེས་པ་གནས་པ་ན་ཚོར་བ་ལ་ཉེ་བར་འགྲོ་བ་དང༌། རྣམ་པར་ཤེས་པ་གནས་པ་ན་འདུ་ཤེས་ལ་ཉེ་བར་འགྲོ་བ་དང༌། འདུ་བྱེད་ལ་ཉེ་བར་འགྲོ་ཞིང་གནས་པ་སྟེ། འདི་ནི་རྣམ་པར་ཤེས་པ་གནས་པ་ཞེས་བྱའོ། །དེ་ལ་ཡེ་ཤེས་གང་ཞེ་ན། ཕུང་པོ་བཞི་ལ་གནས་པའི་རྣམ་པར་ཤེས་པའི་ཕུང་པོ་ཀུན་ཤེས་པ་སྟེ་འདི་ནི་ཡེ་ཤེས་ཞེས་བྱའོ། །ཞེས་གསུངས་པའི་ཕྱིར། འདིས་མཚོན་ཏེ་མདོ་དང་བརྗོད་བྱ་སོ་སོ་ལ་ལྟོས་པའི་རྟོན་བཞིའི་རྣམ་གཞག་བྱ་དགོས་པས། མི་རྟག་པ་གཙོ་བོར་སྟོན་པའི་མདོ་ལ་དྲང་ངེས་ཕྱེ་ན་འཇུག་པའི་ཚེ་མི་རྟག་པ་ངེས་དོན་དང༌། དེ་རྟོགས་ཀྱི་མངོན་སུམ་ཡེ་ཤེས་ཡིན་པ་སོགས་ཤེས་དགོས་ཏེ། གྲུབ་མཐའ་ཆེན་མོར་འཁོར་བས་བསྡུས་པའི་སྒོམ་བྱུང་ཡང་རྣམ་ཤེས་དང༌། བདེན་བཞི་ཤེས་པ་ཡེ་ཤེས་སུ་སའི་དངོས་གཞིའི་ལུང་གིས་སྒྲུབས་པའི་ཕྱིར། ༼ཏ༽རྟོག་གེ་འབར་བའི་ཡོད་སྨྲའི་ནང་ཚན་འགའ་ཞིག་གི་དམ་ཚིག་བརྗོད་པའི་སྐབས་ལས། མདོ་སྡེ་ཐམས་ཅད་ནི་ངེས་པའི་དོན་ཡིན་ནོ། །ཞེས་གསུངས་པས་དྲང་ངེས་ཀྱི་དབྱེ་བ་མི་འབྱེད་པ་ཡང་ཡོད་ལ། དྲང་ངེས་འདོད་ཀྱང་ཐེག་ཆེན་བཀར་མི་འདོད་པ་ཡང་སྟོང་ཐུན་ལས་

― GTD002_Page_0739 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་སོ། །ཐེག་ཆེན་པ་རྣམས་ཤིང་རྟ་ཆེན་པོ་གཉིས་ཀྱིས་བྱམས་འཇམ་དབྱངས་གཉིས་ལ་བརྟེན་ནས་མདོ་འདི་གཉིས་ཀྱི་དོན་བཞིན་དུ་དྲང་ངེས་འབྱེད་ཚུལ་གསུངས་པ་གཉིས་ཅི་རིགས་ལ་ངེས་པར་བརྟེན་ཏེ་མདོའི་དོན་ལ་འཇུག་གོ །དེ་ཡང་ཚིག་གི་དྲང་ངེས་ཕྱེ་བ་ནི་སྒྲ་སྤྱིའི་གོ་བ་ལེགས་པར་ཆགས་ཏེ་མདོ་གཉིས་སོ་སོར་ཕྱེ་བ་ནས་ཡིན་ལ། བརྗོད་བྱ་དོན་གྱི་དྲང་ངེས་ཕྱེ་བ་ནི་ལྟ་བའི་དཔྱད་པ་རྫོགས་པ་ནས་ཡིན་ནོ། །དེ་ཁོ་ན་ཉིད་རྟོགས་པ་ལ་སྔོན་དུ་འགྲོ་དགོས་རྒྱུ་ནི་ཚིག་གི་དྲང་ངེས་དབྱེ་བ་ཡིན་ལ་དེ་ཙམ་གྱིས་གསུང་རབ་ལ་དྲང་ངེས་ཕྱེ་བར་མི་འགྱུར་ཏེ། གང་ལ་དྲང་ངེས་འབྱེད་པའི་གཞི་ནི་གསུང་རབ་ཡིན་པས། དེ་ལ་དྲང་ངེས་ཕྱེ་ན་དོན་གྱི་དྲང་ངེས་མ་ཕྱེ་བར་འགལ་བའི་ཕྱིར། ཁ་ཅིག་སེམས་ཙམ་དང་མཐུན་པའི་དྲང་ངེས་ཕྱེ་བ་ཡང་དྲང་ངེས་ཕྱེ་བ་མ་ཡིན་ན། ས་སྡེ་སོགས་སུ་དྲང་ངེས་མ་ཕྱེ་བར་འགྱུར་ཞིང༌། འཕགས་པ་ཐོགས་མེད་དྲང་ངེས་འབྱེད་པ་པོར་ལུང་བསྟན་པ་དོན་མེད་པར་འགྱུར་རོ་ཞེ་ན། གཞུང་དེས་ཕྱེ་མ་ཕྱེ་ནི་འདི་དྲང་དོན་ནོ། །འདི་ངེས་དོན་ནོ་ཞེས་བཤད་མ་བཤད་ཙམ་ཡིན་ལ་བཤད་པར་ནི་འདོད་དགོས་ཏེ། གཞན་དུ་ན་མཚན་ཉིད་གསུམ་ཡང་མ་བཤད་པར་འགྱུར་ལ། བརྒྱད་སྟོང་དོན་བསྡུས་ལས་ཀྱང་སྟོང་ཉིད་བཅུ་དྲུག་བཤད་པར་གྲགས་པའི་ཕྱིར། ༼ཐ༽འདི་དག་ལས་ཅུང་རྟོགས་དཀའ་བ་འདི་ཡོད་དེ། ཕུང་བོ་ལྔ་ལ་རང་གི་ངོ་བོ་དང༌། སྐྱེ་འཇིག་གཉིས་དང༌། སྤངས་པ་དང༌། ཡོངས་སུ་ཤེས་པ་གཉིས་སྦྱར་བའི་ཕྱི་མ་སྦྱོར་ཚུལ་ཇི་ལྟར་ཞེ་ན། རྒྱ་ནག་འགྲེལ་ཆེན་ལས། ཀུན་ནས་ཉོན་

― GTD002_Page_0740 ―

^{[མ་དཔེ་གཟིགས་ན་འདིར་གནོན།]}

[Full Size]

མོངས་པའི་གཟུགས་ཀྱི་ཕུང་པོ་གང་ཡིན་པ་དེ་གཏན་དུ་སྤང་བར་བྱའོ། །ཀུན་ནས་ཉོན་མོངས་པ་མ་ཡིན་པའི་གཟུགས་ཀྱི་ཕུང་པོ་གང་ཡིན་པ་དེ་ནི་ཡོངས་སུ་ཤེས་པར་བྱའོ། །ཡང་ན་ཀུན་འབྱུང་བའི་དོན་གྱི་མཐའ་གང་ཡིན་པ་དེ་ནི་གཏན་དུ་སྤང་བར་བྱའོ། །སྡུག་བསྔལ་གྱི་བདེན་པའི་དོན་གྱི་མཐའ་གང་ཡིན་པ་དེ་ནི་ཡོངས་སུ་ཤེས་པར་བྱའོ། །ཞེས་ཟག་བཅས་ཉེར་ལེན་གྱི་ཕུང་པོ་ལྔ་སྤོང་བ་དང༌། ཟག་མེད་ཀྱི་ཕུང་པོ་ལྔ་ཡོངས་སུ་ཤེས་པ་ལ་སྦྱོར་ཚུལ་གཅིག་དང༌། ཟག་བཅས་ཀྱི་ཕུང་བོ་ལྔའི་རྒྱུ་ལས་དང་ཉོན་མོངས་སྤོང་བ་དང༌། ཕུང་པོ་དེ་ལྔ་རང་གི་ངོ་བོ་ནད་དང་འདྲ་བར་ཡོངས་སུ་ཤེས་པར་བྱ་བ་ལ་སྦྱོར་ཚུལ་གཅིག་སྟེ་གཉིས་གསུངས་སོ། །བྱང་ཕྱོགས་སོ་བདུན་ལ་ཁྱད་པར་བརྒྱད་སྦྱར་བའི་ཕྱི་མ་གཉིས་ལ་ཕྱིར་ཞིང་འབྱུང་བ་དང༌། འཕེལ་ཞིང་རྒྱས་པ་ཞེས་ཀྱང་ཝེན་ཚེག་གིས་བཤད་པའི་དོན་ནི་གཉེན་པོ་སྐྱེས་པ་དེ་ཉིད་མི་བསྐྱུད་པ་སྟེ་མ་བརྗེད་པ་ཙམ་མ་ཡིན་པར་ཡང་དང་ཡང་དུ་མངོན་དུ་བྱས་ཏེ་གོམས་པར་བྱེད་པ་དང༌། དེ་ལྟར་གོམས་པའི་སྟོབས་ཀྱིས་གོང་ནས་གོང་དུ་འཕེལ་ཞིང༌། འཕེལ་བ་དེ་ཡང་མཆོང་དང་ཆུའི་དྲོད་བཞིན་མཐའི་ཚད་བཟུང་དུ་ཡོད་པ་དེ་ལྟར་མ་ཡིན་པར་མཐའ་མེད་དུ་རྒྱས་པའི་དོན་ནོ། །འདིར་བཤད་པའི་ཕུང་པོ་ལྔ་ལ་བརྩམས་པའི་མདོ་ནི། རྒྱལ་པོ་གཟུགས་ཅན་སྙིང་པོ་ལ་གདམས་པའི་མདོ་སོགས་ཡིན་ལ། དེ་ཡང་བཟོ་སྦྱངས་གཟུགས་ཅན་སྙིང་པོ་ལ་གདམས་པ་ཞེས་ཀྱང་འབྱུང་སྟེ། རྒྱལ་པོ་གཟུགས་ཅན་སྙིང་པོ་དང༌། དམག་ལྡན་གཟུགས་ཅན་སྙིང་པོ་དང༌། བཟོ་སྦྱངས་གཟུགས་ཅན་སྙིང་པོ་གསུམ་གནས་སྐབས་སོ་སོའི་

― GTD002_Page_0741 ―

^{[མ་དཔེ་གཟིགས་ན་འདིར་གནོན།]}

[Full Size]

མིང་འདོགས་ཚུལ་ཙམ་ལས། དོན་རྣམ་གྲངས་པ་ཡིན་པར་འདུལ་བ་ལུང་དང་གླེང་འབུམ་ལས་འབྱུང་ངོ༌། །བདེན་བཞི་ལ་བརྩམས་པ་ནི་བདེན་བཞིའི་ཆོས་འཁོར་ལྟ་བུ་ཡིན་ལ། དེར་སྡུག་བསྔལ་ཤེས་པར་བྱའོ། །ཞེས་པ་ཙམ་གསུངས་པ་ཡང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་བསྟན་པ་ལ་འགྲོ་བ་ནི་གདུལ་བྱའི་གོ་ཚོད་དང༌། སྟོན་པས་ཀྱང་དེ་མ་ཐག་གང་ཟག་གི་བདག་མེད་སྟོན་བཞེད་ཅིང༌། བློ་ཞན་པའི་སྟོབས་ཀྱིས་ཆད་མཐར་ལྟུང་བའི་ཉེན་ཡོད་པ་བཀག་སྟེ། བདག་མེད་དེ་ལ་ལྟོས་པའི་དབུ་མ་བསྒྲུབ་པའི་གཞི་བློ་ངོར་བསྟན་པར་བྱ་བའི་དོན་དུ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་སྟོན་བཞེད་པའི་ཐུགས་དགོངས་གཉིས་ཚོགས་ཀྱི་དབང་གིས་ཡིན་པས། ཤམ་ཐབས་ཟླུམ་པོར་བགོ་བ་ལ་བསླབ་པར་བྱའོ། །ཞེས་པ་ལྟ་བུ་ཡང་དེ་ལྟར་བསྟན་པར་ཐལ་བར་མི་འགྱུར་རོ། ། ༼ད༽འདིར་བར་བའི་དགོངས་གཞི་དངོས་སུ་དྲིས་པའི་ཤུགས་ལ་དང་པོའི་དགོངས་གཞི་ཡང་དྲིས་པར་འགྲོ་བ་ནི། བར་བའི་སྐབས་སུ་ཆ་མ་ཕྱེ་བར་ངོ་བོ་ཉིད་མེད་མཉམ་དུ་གསུངས་པ་སྒྲ་ཇི་བཞིན་དུ་མི་རུང་བས་ཅི་ལ་དགོངས་ཞེས་པའི་ཚིག་གི་ནུས་པས། དང་པོར་ཆ་མ་ཕྱེ་བར་རང་མཚན་གྱིས་གྲུབ་གྲུབ་ཅེས་པའི་མདོ་ཚིག་བཀའ་བསྩལ་བ་ཡང་དྲང་དོན་དུ་གོ་ནུས་ལ། སྔ་ལོགས་དེ་མ་ཐག་བཤད་པའི་གཞིར་ཡང་དྲངས་ཡོད་པས། དེ་ཡང་དྲིས་པར་འགྲོའོ། །ཁ་ཅིག་ངོ་བོ་ཉིད་མེད་ཚུལ་དྲིས་པ་ཡིན་ན། ལན་དུ་ཡང་ངོ་བོ་ཉིད་མེད་ཚུལ་གསུངས་དགོས་ཤིང༌། དེ་ལྟ་ན་ངོ་བོ་

― GTD002_Page_0742 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་མེད་པར་གསུངས་པར་ཐལ་བའི་ཕྱིར། བར་བ་བཞིན་དྲང་དོན་དུ་འགྲོ་བའི་ལུགས་སོ་ཞེ་ན། ངོ་བོ་ཉིད་མེད་པའི་དབང་དུ་བྱས་ནས་མེད་ཚུལ་སྟོན་པ་མིན་གྱི། ངོ་བོ་ཉིད་མེད་ཅེས་པ་དེ་གཏན་མེད་པ་མིན་གྱི་མེད་ཚུལ་གཞན་ཞིག་ཡིན་ནོ་ཞེས་སྟོན་པ་ཡིན་པས་སྐྱོན་མེད་དོ། །འོ་ན་ཆོས་ཐམས་ཅད་དོན་དམ་པར་མ་གྲུབ་ཚུལ་ཡང་སྟོན་པར་ཁས་ལེན་ནམ་ཞེ་ན་ཐ་སྙད་ཤུགས་ཆེ་བས་མི་མཚུངས་སོ། ། ༼ན༽དེ་ཉིད་ལས་རང་གི་མཚན་ཉིད་ཅེས་བྱ་བ་ནི་བྱེ་བྲག་གི་མཚན་ཉིད་ཡིན་ཏེ། ཇི་སྐད་དུ། གཟུགས་ནི་ཐོགས་པ་དང་བཅས་པའོ། །ཞེས་བྱ་བ་ནས། རྣམ་པར་ཤེས་པ་ནི་རྣམ་པར་རིག་པའོ། །ཞེས་བྱ་བའི་བར་དུ་བཤད་པ་ལྟ་བུའོ། །ཞེས་འབྱུང་བ། ༼པ༽རྒྱ་ནག་འགྲེལ་ཆེན་ལས། ཁམས་བཅོ་བརྒྱད་པོ་དག་གཅིག་ལ་གཅིག་ཐ་དད་པའི་མཚན་ཉིད་གང་ཡིན་པ་དེ་ནི་ཁམས་སྣ་ཚོགས་པ་ཞེས་བྱའོ། །ཁམས་བཅོ་བརྒྱད་པོ་དེ་དག་ཉིད་སེམས་ཅན་ཚད་མེད་པ་རྣམས་ཀྱི་བྱེ་བྲག་ཏུ་གྱུར་པ་ནི་ཁམས་དུ་མ་ཉིད་ཅེས་བྱའོ། །ཞེས་ཁམས་བཅོ་བརྒྱད་པོ་དེ་དག་ལ་ནང་ཚན་མི་འདྲ་བའི་ཁྱད་པར་ཡོད་པ་དང༌། གདགས་གཞིའི་ཚུལ་གྱིས་སེམས་ཅན་ཐམས་ཅད་ལ་ཁྱབ་པའི་ལྡོག་ཆ་ནས་མིང་གཉིས་བཏགས་པ་ཙམ་ཡིན་པར་བཤད་པ་སོགས། ༼ཕ༽ལས་ཟས་རེ་རེ་ལ་ཡང་དེ་བཞིན་ལགས་སོ། །ཁམས་དྲུག་དང༌། བཅོ་བརྒྱད་དག་གི་ཁམས་རེ་རེ་ལ་ཡང་དེ་བཞིན་ལགས་སོ་ཞེས་པ། ༼བ༽འོན་ཀྱང་རབ་འབྱོར་གྱི་ལེའུ་ལས་ཁམས་སྣ་ཚོགས་དང༌། ཁམས་དུ་མ་ཞེས་པ་དེ་

― GTD002_Page_0743 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་གཅིག་ལ་ཡང་ཁྱད་ཆོས་མང་བོ་སྦྱར་ནས་བཤད་པའི་དཀྱུས་ལ་འབྱུང་བས་འགྲེལ་ཆེན་གྱི་དེ་ལྟར་བཤད་དགོས་སམ་སྙམ། ༼མ༽འདིར་ཆོས་རྣམས་ཞེས་འབྱུང་བ་ཡང་མཚན་ཉིད་གསུམ་པོ་དེ་རང་རང་གི་སྟེང་གི་གཞན་དབང་དང་དེ་ལ་བཏགས་པའི་ཀུན་བཏགས་ཞེས་སོགས་སུ་སྦྱར་ན་ཆ་མ་ཕྱེ་བར་ཆོས་ཐམས་ཅད་མཚན་གཞིར་བཟུང་བའི་དོན་དུ་འགྲོ་ཡང་ཆ་འབྱེད་དགོས་པར་ལེགས་ཕྱེའི་མིང་གིས་ཀྱང་ཤེས་པའི་ཕྱིར་དང༌། ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་ཞེས་འབྱུང་ཡང༌། དེའི་དོན་གཞན་ལས་སྐྱེ་ཡང༌། བདག་སྐྱེ་མེད་པ་ལ་གསུངས་ཤིང་བསྡུ་བས་ཀྱང༌། དེ་རྟེན་འབྱུང་ཁོ་ན་ལ་སྦྱར་བའི་ཕྱིར། འོ་ན་ཆོས་རྣམས་ཞེས་པ་ཅི་ཞེ་ན། དེ་ལ་ཉན་ཐོས་རྣམས་ཀྱི་ལམ་ནི་རྣམ་པ་ལྔ་སྟེ། ཞེས་འབྱུང་ཡང་ཉན་ཐོས་ཀྱི་ལམ་ལྔ་ཀ་ཉན་ཐོས་ཐམས་ཅད་ལ་ཡོད་མི་དགོས་པ་བཞིན་འདིར་ཡང་ཆོས་རྣམས་ཆ་གསུམ་དུ་ཕྱེ་ནས་སྦྱོར་དགོས་པའི་དོན་ནོ། །འདིའི་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་དོན་དམ་པ་ཡིན་པར་འདོད་ན། གང་ཟག་གི་བདག་མེད་ཀྱང་དོན་དམ་ཡིན་པས་འདིར་བསྟན་པའི་མཚན་ཉིད་ངོ་བོ་ཉིད་མེད་པ་དོན་དམ་དུ་འདོད་དགོས་ལ། དེ་ལྟ་ན་ཆེས་གོ་ལོག་པར་འགྱུར་ཏེ། འདིར་བསྟན་པའི་དོན་དམ་པ་ངོ་བོ་ཉིད་མེད་པ་དོན་དམ་མ་ཡིན་ལ། མཚན་ཉིད་ངོ་བོ་ཉིད་མེད་པ་དོན་དམ་ཡིན་པའི་ཕྱིར། དང་པོ་གྲུབ་སྟེ། རྒྱས་བཤད་ཀྱི་དོན་དམ་པ་ངོ་བོ་ཉིད་མེད་པ་ལ་དོན་དམ་ཡིན་མིན་གཉིས་ཡོད་པ་གང་ཞིག །རྒྱས་བཤད་ཀྱི་རྒྱས་པར་བཤད་རྒྱུ་ལ་མདོར་བསྟན་

― GTD002_Page_0744 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་མདོར་བསྟན་པས་ཁྱབ་པའི་ཕྱིར། བྱས་པ་ལ་འཇོག་ཚུལ་དང་པོའི་དོན་དམ་པ་ངོ་བོ་ཉིད་མེད་པ་ཡང་སྟོང་ཉིད་ཡིན་པར་ཐལ། གཞན་དབང་བར་ཆད་མེད་ལམ་གྱི་གཟིགས་ངོར་མ་གྲུབ་པ་སྟོང་པ་ཉིད་ཡིན་པའི་ཕྱིར་ན་མ་ཁྱབ། དམིགས་པ་མཐར་ཐུག་ཏུ་མ་གྲུབ་པ་དེའི་དོན་ཡིན་པའི་ཕྱིར་ན་ཡང་མ་ཁྱབ། འོ་ན་གཞན་དབང་དོན་དམ་བདེན་པར་མ་གྲུབ་པ་སྟོང་ཉིད་ཡིན་པར་ཐལ། ཡེ་ཤེས་དམ་པའི་དོན་ཞེས་པ་དེ་ཡིན་པའི་ཕྱིར། ཁྱབ་པ་འགྲིག །འདོད་མི་ནུས་ཏེ། གཞན་དབང་དོན་དམ་བདེན་པ་དང༌། སྟོང་ཉིད་དུ་འཛིན་པའི་བདག་འཛིན་མི་སྲིད་ཅིེང༌། དེ་མ་ཡིན་པར་རྟོགས་པ་ལ་སྟོང་ཉིད་རྟོགས་མི་དགོས་ལ། གཞན་དབང་ཕྱི་རོལ་དོན་དུ་གྲུབ་མ་གྲུབ་དཔྱོད་པའི་དཔྱད་བཟོད་དུ་མདོ་སྡེ་པས་ཀྱང་འཛིན་ཅིང༌། དེས་སྟོང་པ་རྟོགས་པ་ལ་ཡང་སྟོང་ཉིད་རྟོགས་དགོས་པས་མི་མཚུངས་སོ། །གཞན་ཡང་མཚན་ཉིད་ངོ་བོ་ཉིད་མེད་པ་སྟོང་ཉིད་ཡིན་ན། མདོར་བསྟན་དངོས་བསྟན་གྱི་དོན་དམ་པ་ངོ་བོ་ཉིད་མེད་པ་དང༌། གཉིས་ཀའི་དགག་བྱ་དང་ངོ་བོ་དང་གསལ་བར་བསྟན་མ་བསྟན་སོགས་ཁྱད་པར་གང་ཡང་མེད་པས་ཟློས་པར་འགྱུར་རོ། །གལ་ཏེ་འདི་དགག་བྱ་ངོས་བཟུང་བའི་ལྡོག་ཆ་ནས་ཡིན་ལ། ཕྱི་མ་དེ་བཀག་པའི་ལྡོག་ཆ་ནས་ཡིན་ནོ་ཞེ་ན། འདིའི་མཚན་ཉིད་ངོ་བོ་ཉིད་མེད་པ་ཞེས་པའི་མཚན་ཉིད་དང༌། ཕྱི་མའི་ཚིག་ཟུར་གྱི་དོན་དམ་པ་ངོ་བོ་ཉིད་གཉིས་ཀ་ཡང་འདྲ་བས་ཚིག་ཙམ་སྙིང་བོར་ཟད་དོ། །འོ་ན་ཡིག་ཆར། འདིར་དངོས་སུ་བསྟན་པའི་དེ་ཆོས་ཀྱི་བདག་མེད་ཕྲ་མོ་ལ་འཇོག་ཅེས་དང༌། སྔ་མའི་མེད་རྒྱུ་དེ་ཤེས་བྱ་ལ་མི་སྲིད་ཅེས་དང༌།

― GTD002_Page_0745 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་བསྟན་གྱི་མཚན་ཉིད་ངོ་བོ་ཉིད་ཡིན་ན་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་དང༌། དེར་རང་ངོས་ནས་གྲུབ་པ་རྣམས་ཡིན་པས་ཁྱབ་པའི་ཕྱིར། ཞེས་གསུངས་པ་ཅི་ཡིན་ཞེ་ན། སྔ་མའི་གོང་འོག་གཉིས་ཀར་མཚན་ཉིད་ངོ་བོ་ཉིད་མེད་པ་ཙམ་མ་གསུངས་པར་དེའི་དོན་ཞེས་གསུངས་ཤིང་དོན་སྟོང་ཉིད་དུ་འགྲོ་ཚུལ་འདིའི་ངོ་བོ་ཉིད་ལ་བདག་ཏུ་སྒྲོ་བཏགས་པ་ཡང་ཡོད་པས་ཚིག་ལ་དེ་བཀག་པ་ལྟར་བརྗོད་ཀྱང༌། དོན་འཆད་པའི་ཚེ་དེ་ལ་སྒྲོ་བཏགས་པ་ལྟར་དུ་མེད་པ་ཞེས་བཤད་དགོས་ཤིང༌། དེ་ལྟར་བྱས་ན་སྟོང་ཉིད་དུ་འགྲོ་བའི་དོན་ནོ། །ལུང་ཕྱི་མ་གཉིས་ཀྱིས་མི་གནོད་དེ། དེ་ཡང་ཀུན་མཁྱེན་ཆོས་འབྱུང་གི་གསུངས་ཟིན་གཞིར་བཞག་པར་སྣང་ལ། དེར་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པའི་ཕྱིར་དང༌། ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་ལྟར་མ་གྲུབ་པས་ཁྱབ་པའི་ཕྱིར། ཞེས་གཉིས་ཀ་སྨོས་པས་མཚན་ཉིད་ངོ་བོ་ཉིད་ལ་སྒྲོ་བཏགས་པ་ཡང་བཞག་ནས་དེ་ལྟར་གྲུབ་པ་ཤེས་བྱ་ལ་མི་སྲིད་པ་དང༌། དེ་ལྟར་གྲུབ་པ་ལ་ཆོས་བདག་གིས་ཁྱབ་པའི་དོན་ཡིན་པ་སོགས་སྔར་དང་འདྲ་བའི་ཕྱིར་དངོས་ཤུགས་ཀྱི་མཚན་ཉིད་ངོ་བོ་ཉིད་མེད་པ་གཉིས་འགལ་ཡང༌། ཆོས་སོ་སོའི་སྟེང་གི་དངོས་ཤུགས་ཀྱི་སྐྱེ་བ་ངོ་བོ་ཉིད་མེད་པ་འགལ་མི་རུང་སྟེ། བུམ་པ་ལྟ་བུའི་སྟེང་གི་བདག་མེད་གཉིས་ཀྱི་དབང་དུ་བྱས་པའི་གཞན་དབང་དོན་གཅིག་པའི་ཕྱིར་ཏེ། དེ་གང་རུང་ལ་བུམ་པ་དང་གཅིག་གིས་ཁྱབ་པའི་ཕྱིར། དེ་ལྟ་མ་ཡིན་

― GTD002_Page_0746 ―

^{[མ་དཔེ་གཟིགས་ན་འདིར་གནོན།]}

[Full Size]

ན་བུམ་པའི་སྟེང་གི་ཆོས་ཀྱི་བདག་མེད་ཀྱི་དབང་དུ་བྱས་པའི་གཞན་དབང་ལ་བུམ་པའི་སྟེང་གི་ཆོས་ཀྱི་བདག་མེད་ཀྱི་སྟོང་གཞི་མ་ཡིན་དགོས་པས་ཆེས་འབྲེལ་མེད་པར་འགྱུར་རོ། ། ༼ཙ༽ཞེས་སྔ་མའི་ངོ་བོ་ཉིད་གསུམ་ཕྱི་མའི་ངོ་བོ་ཉིད་མེད་པ་གསུམ་གྱི་མཚན་གཞིར་བསྟན་པར་ཡིག་ཆར་གསུངས་པ་ལེགས་ཏེ། བློ་བརྟན་གྱི་ཕུང་པོ་ལྔའི་འགྲེལ་བཤད་ལས་གསུངས་པ་དང༌། གང་སྤེལ་ལས་ཀྱང་གཟུགས་ཉིད་ཕུང་པོ་ཡིན་པས། གཟུགས་ཀྱི་ཕུང་པོ་ཡིན་ན་ཞེས་པ་ལྟར་འདིར་ཡང་གྱི་སྒྲ་གཞི་མཐུན་སྟོན་པའི་དྲུག་སྒྲ་ཡིན་པའི་ཕྱིར་ཏེ། སྒྲུབ་ཕྱོགས་ནས་རྐྱེན་གཞན་ལས་སྐྱེས་པ་སོགས་རང་རང་གི་ཁྱད་ཆོས་དང་ལྡན་པས་གཞན་གྱི་དབང་གི་ངོ་བོ་ཉིད་ལ་སོགས་པར་བཞག་པ་དེ་ཉིད་ཀྱིས་བདག་ཉིད་ལ་དགག་ཕྱོགས་ནས་སྐྱེ་བ་ངོ་བོ་ཉིད་མེད་པ་ལ་སོགས་པར་བཞག་པ་དེ་གསུམ་འདིའི་དགོངས་གཞིར་བསྟན་ཏེ། ངོ་བོ་ཉིད་གསུམ་ལས་དོན་གཞན་པའི་ངོ་བོ་ཉིད་མེད་པ་གསུམ་མ་ཡིན་པར་གོ་བའི་ཆེད་དང་ངོ་བོ་ཉིད་མེད་པ་གསུམ་གྱི་སོ་སོའི་མེད་ཚུལ་ལ་མ་སྦྱར་བར་བར་བའི་སྒྲས་ཟིན་ལྟར་འདོད་མི་རུང་བ་གོ་བའི་ཆེད་ཡིན་ཏེ། འདིའི་འགྲེལ་པ་བློ་བརྟན་གྱིས་མཛད་པ་ལས། རང་རང་གི་མཚན་ཉིད་ཀྱིས་ཡོད་པ་ལྟར་གྱུར་པའི་ངོ་བོ་ཉིད་དོ། །ངོ་བོ་ཉིད་མེད་པ་རྣམ་པ་གསུམ་སྟེ། ཞེས་གསུངས་པའི་ཕྱིར། ཁྱབ་སྟེ། བྱི་ནི་ཊ་དེ་བའི་འགྲེལ་བཤད་ལས། གཞན་གྱི་དབང་ལ་སོགས་པའི་ངོ་བོ་ཉིད་རྣམ་པ་གསུམ་གྱི་ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས་ཞེས་གསུངས་པ་གང་ཞིག །སྔ་མས་དགག་བྱའི་ངོ་བོ་ཉིད་

― GTD002_Page_0747 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་བསྟན་ནས་དེའི་ངོ་བོར་མེད་ཅེས་བཤད་པ་འགྲེལ་པ་འགྲེལ་བཤད་གཉིས་དང་མི་མཐུན་པའི་ཕྱིར། ༸ ཀུན་མཁྱེན་ཇོ་ནང་པ་སོགས། ༸ རང་བཞིན་མེད་པ། ༸ རང་བཞིན་མེད་པ། ༼ཚ༽འདི་སྨྲ་བ་པོ་ཇོ་ནང་པ་ཡིན་ལ་དེའི་འདོད་པ་ནི། རང་ཉིད་ཀྱི་ངེས་དོན་རྒྱ་མཚོར། དག་པ་ཡེ་ཤེས་ཀྱི་ཀུན་གཞི་ནི་འཁོར་བའི་ཆོས་ཐམས་ཅད་ཀྱིས་སྟོང་པས་གཞན་སྟོང་རྟག་བརྟན་གཡུང་དྲུང་ཐེར་ཟུག་དང་ཞེས་དང༌། ཡང་དེས་བརྩམས་པའི་བཀའ་བསྡུ་བཞི་པར། ཆོས་འཁོར་གསུམ་པར་གསུངས་པའི་ཟབ་མོ་ཀུན། །ཀུན་རྫོབ་མ་ཡིན་དོན་དམ་བདེན་པ་ཡིན། །མི་རྟག་མ་ཡིན་རྟག་བརྟན་ཐེར་ཟུག་ཡིན། །ཀུན་བཏགས་མ་ཡིན་ཡོངས་གྲུབ་ཡེ་ཤེས་ཡིན། །དངོས་མེད་མ་ཡིན་དབུ་མ་ཆེན་པོ་ཡིན། །ཞེས་དང༌། རྟག་པ་འདུས་མ་བྱས་ཀྱི་ཡེ་ཤེས་དང༌། །རྟག་པ་འདུས་མ་བྱས་ཀྱི་རྒྱལ་བ་ལྔ། །རྟག་བརྟན་ཐེར་ཟུག་གཡུང་དྲུང་རིག་མ་ལྔ། །ཞེས་དང༌། ཡང་ངེས་དོན་རྒྱ་མཚོར། གང་གིས་དག་པ་ནི་ཀུན་བཏགས་དང་གཞན་དབང་གང་ཡིན་པ་ཀུན་རྫོབ་ཀྱི་ཆོས་གཟུགས་ལ་སོགས་པས་དག་པ་སྟེ། ཞེས་སྙིང་པོའི་མདོ་བཅུར་གྲགས་པ་རྣམས་ཀྱི་ཚིག་རིས་ལ་འཁྲུལ་ནས་བདེ་གཤེགས་སྙིང་པོ་དེ་ཉིད་ཟག་མེད་ཡེ་ཤེས་དང༌། ཡོངས་གྲུབ་རྟག་བརྟན་ཐེར་ཟུག་པ་མཚན་དཔེ་སོགས་སངས་རྒྱས་ཀྱི་ཆོས་རྣམས་དང་ཡང་རང་ཆས་སུ་ལྡན་པར་འདོད་དེ། རྒྱུད་བླ་མར། ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་པ་ཟག་མེད་ཡེ་ཤེས་དངོས་སུ་འཁྲུལ་བ་ཡིན་ཞིང༌། དེ་ཉིད་

― GTD002_Page_0748 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་སྐུ་རྒྱལ་བ་ལྔ་སོགས་ཀྱི་བདག་ཉིད་དུ་སྨྲ་བ་ནི། འདིས་དག་པའི་བདག་ཅེས་བཏགས་པ་སྔར་གྱི་ཡེ་ཤེས་དེའི་སྟེང་དུ་ཀུན་རྫོབ་རྣམས་བཀག་པ་ནི་མེད་དགག་ཙམ་མ་ཡིན་པར་ཡེ་ཤེས་དེ་ཉིད་ཡིན་པ་ལ་མཚན་དཔེས་བཀྲ་བའི་སྟོང་གཟུགས་ཀྱི་སྐུ་ཞིག་འཛིན་སྟངས་སུ་འདོད་པས། དུས་འཁོར་གྱི་ཆོས་སྐད་ཅུང་ཞིག་བསྲེས་པ་ཡིན་ཏེ། འདི་ལ་བསམ་ནས། རིན་ཆེན་ཏོག་གི་དབང་བོའི་རྡོ་རྗེར། མཚན་ཉིད་ཐེག་པར་ཐུན་མོང༌མ་ཡིན་པའི་སྔགས་སྦྱར་ནས་བཤད་པ་དེ་འདྲ་དོལ་བོ་བ་མ་ཡིན་པ་སྔོན་ཆད་མ་བྱུང་ཞེས་བཤད་དོ། །འདིས་ཁོ་རང་གི་ལུགས་ཀྱི་གཞན་སྟོང་ཆེན་མོ་དེ་འཁོར་ལོ་ཐ་མར་གསུངས་ཀྱང། བར་བར་ཆད་སྟོང་མེད་དགག་ཙམ་གྱི་རང་སྟོང་ཞིག་ལས་མ་གསུངས་ལ། རང་སྟོང་དེ་སྟོང་ཉིད་དངོས་མ་ཡིན་པར་འདོད་པའི་ཕྱིར། ཟུར་གཉིས་པ་གྲུབ་སྟེ། ངེས་དོན་རྒྱ་མཚོར་ཤེར་མདོ་དྲང་དོན་དུ་བསྒྲུབ་པར་ཐོག་ཏོག་ལས་བཤད་ཅིང་ཀར་ལན་ཀླུ་སྒྲུབ་དགོངས་རྒྱན་གྱི་དགག་པ་ཐམས་ཅད་ཀྱང་འདི་དང་ཀརྨ་པ་གཉིས་ལ་ཐུན་མོང་ཡིན་པས་དེ་ཉིད་ལས་ཡུམ་རྒྱས་འབྲིང་བསྡུས་གསུམ་ལས་ཆད་སྟོང་མེད་དགག་ཙམ་ཞིག་བསྟན་གྱི་སྔར་བཤད་པའི་གཞན་སྟོང་ཆེན་མོ་བདེན་གྲུབ་དེ་མ་བསྟན་པར་བཞེད་པ་དང༌། ཞེས་གསུངས་པའི་ཕྱིར། གསུམ་པ་གྲུབ་སྟེ། ཀར་ལན་ལས། སྟོང་ཉིད་ཡིན་ན་གཞན་སྟོང་ཆེན་མོ་ཡིན་པས་ཁྱབ། གཞན་སྟོང་ཆེན་མོའི་སྟོང་གཞི་ཆོས་ཅན་ཡིན་ན་དོན་དམ་བདེན་པ་ཡིན་དགོས་པའི་ཕྱིར། རྟགས་ཐམས་ཅད་སོང་ཞེས་དང༌། ནང་སྟོང་པ་ཉིད་ཀྱི་སྟོང་གཞི་

― GTD002_Page_0749 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ཡིན་ཞེས་སོགས་དྲིས་པའི་མཐར། ཀུན་མཁྱེན་ཇོ་ནང་པ་ལན་ཅི་གསུངས། ཞེས་གསུངས་པའི་ཕྱིར་དང༌། འདུ་བྱེད་ཀྱི་སྟེང་དུ་ཆོས་བདག་བཀག་པའི་སྟོང་ཉིད་ཅིག་མེད་པ་དགོངས་འགྲེལ་དང་འགལ་བར་གསུངས་པས་ཀྱང་ཤེས་ཤིང༌། དེའི་ལུགས་ལ་རང་སྟོང་ནི་ཆད་སྟོང་མེད་དགག་ཡིན་ལ། ཆོས་ཉིད་ལ་སྒྲུབ་པ་རང་དབང་བ་དགོས་པར་བཤད་པའི་ཕྱིར། དེ་ལྟར་བྱས་ནས་འཁོར་ལོ་བར་བའི་སྐབས་ནས་ཁོ་རང་འདོད་པའི་སྟོང་ཉིད་དེ་དངོས་སུ་མ་བསྟན་ལ། ཆོས་ཀྱི་དབྱིངས་ལ་སོགས་པའི་རྣམ་གྲངས་ཀྱིས་སྨོས་པ་ནི། རང་སྟོང་ཙམ་ཞིག་གཞིར་བཟུང་བ་ཡིན་ཏེ། རྒྱུད་བླ་མར། སྤྲིན་དང་རྨི་ལམ་སྒྱུ་བཞིན་དེ་དང་དེར། །ཞེས་སོགས་ཀྱིས་བར་བར་བཤད་པའི་སྟོང་ཉིད་དྲང་དོན་དུ་བཀྲལ་བའི་ཕྱིར་ཟེར་རོ། །དེར་དོན་དམ་མ་བཟུང་ན་ཀུན་རྫོབ་རྣམས་ངོ་བོ་ཉིད་མེད་པ་སྒྲ་སོར་བཞག་རུང་བས་དགོངས་གཞི་འཇོག་མི་དགོས་སོ། །ཞེ་ན་མ་ཡིན་ཏེ། དེར་ཆོས་རྣམས་ཁྱད་མེད་དུ་ཆ་མ་ཕྱེ་བར་གསུངས་པའི་ཆ་ནས་ཀྱང་དྲང་དོན་དུ་འགྱུར་ལ། གཟུགས་སོགས་བདེན་གྲུབ་བཀག་ཙམ་དོན་དམ་པའི་བདེན་པར་བཤད་པའི་ཆ་ནས་ཀྱང་དྲང་དོན་དུ་འགྱུར་མོད། འདིར་ཀུན་རྫོབ་རྣམས་ལ་དགོངས་པར་བཤད་པ་སྔ་མའི་དབང་དུ་བྱས་སོ། །དེ་ལྟར་བྱས་ན་སྟོང་ཐུན་ལས། དོན་དམ་མ་ཆུད་པར་ཀུན་རྫོབ་འབའ་ཞིག་རང་བཞིན་མེད་པར་བསྟན་པའོ། །ཞེས་སྨྲ་བ་ནི་ཞེས་གསུངས་པ་ལྟར། ཕྱོགས་སྔ་མས་དངོས་སུ་ཁས་བླངས་པས་རིགས་པའི་ཕུལ་ཙམ་ཡང་

― GTD002_Page_0750 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཡིན་ནོ། །༼ཛ༽འདིའི་དོན་སྦྱོར་ལ། ཀུན་བཏགས་ཆོས་ཅན། ཁྱོད་ལ་མཚན་ཉིད་ངོ་བོ་ཉིད་མེད་པ་ཞེས་བརྗོད་པའི་རྒྱུ་མཚན་ཡོད་དེ། སྒྲུབ་ཕྱོགས་ནས་མིང་བརྡས་བཞག་ཙམ་ཡིན་ཀྱང་དགག་ཕྱོགས་ནས་རང་གི་མཚན་ཉིད་ཀྱིས་མ་གྲུབ་པའི་ཕྱིར། ཞེས་པ་བཀག་ཀྱང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྒྲོ་བཏགས་པ་གཞིར་བཟུང་ནས་རྟགས་ཆོས་སྔར་ལྟར་བཀོད་པ་མི་འགལ་ཏེ། ཀུན་བཏགས་སྤྱི་ཙམ་མཚན་ཉིད་ངོ་བོ་ཉིད་མེད་པའི་མཚན་གཞིར་འབྲེལ་མེད་ཅིང་འདིར་ཡང་མ་གསུངས་པས་དེ་འགོད་པ་པོའི་བསམ་པ་སྐབས་འདིའི་མཚན་ཉིད་ངོ་བོ་ཉིད་མེད་པའི་དོན་རང་ལྡོག་སྒྲུབ་བྱེད་དུ་སྦྱོར་བ་དེ་བཀོད་པ་ཡིན་ན་དེའི་དོན་དོན་སྨྲས་རྟོགས་པ་མི་རུང་བས་བཀག་པ་ཡིན་ལ། ཕྱི་མ་ནི་དེ་མཚན་ཉིད་ངོ་བོ་ཉིད་མེད་པའི་གཞི་ལྡོག་སྒྲུབ་འདོད་པ་ཡིན་པས། རྟགས་ཆོས་དོན་སྨྲས་རྟོགས་ཀྱང་མི་འགལ་ལོ། །དེས་ན་འདི་ལྟར་དེ་ནི་མིང་དང་བརྡས་ཞེས་སོགས་མཚན་ཉིད་ངོ་བོ་ཉིད་མེད་པའི་གཞི་ལྡོག་སྒྲུབ་པའི་གཞུང་ཡིན་གྱི། དེའི་དོན་གྱི་རང་ལྡོག་སྒྲུབ་བྱེད་བཤད་པ་ཡིན་ན་སྟོང་པ་ཉིད་ཀྱི་དོན་བསྒྲུབས་པས་དོན་དམ་པ་ངོ་བོ་ཉིད་མེད་པ་རྒྱས་པར་བཤད་པའི་གཞུང་དུ་འགྱུར་རོ། །ཀུན་བཏགས་སྤྱི་ལྡོག་རྩོད་གཞིར་བཟུང་བ་བཀག་པ་ནི། ཆོས་འབྱུང་གི་གསུང་གཞིར་བཞག་ཡིན་ལ། དཀའ་འགྲེལ་ལས། ཀུན་བཏགས་ཆོས་ཅན། ཁྱོད་ལ་མཚན་ཉིད་ངོ་བོ་ཉིད་མེད་པ་ཞེས་བྱ་སྟེ། ཁྱོད་མིང་དང་བརྡས་བཞག་ཙམ་ཡིན་གྱི་རང་མཚན་གྱིས་མ་གྲུབ་པའི་ཕྱིར། ཞེས་གསུངས་སོ། ། ༼ཝ༽འདི་ལ་ཁ་ཅིག་

― GTD002_Page_0751 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷག་མཐོང་ཆེན་མོ་ལས། དེ་ལ་མཚན་ཉིད་ངོ་བོ་ཉིད་མེད་པའི་མཚན་ཉིད་ནི་རང་གི་མཚན་ཉིད་དམ་རང་བཞིན་ཡིན་ལ། སེམས་ཙམ་པས་དེ་མེད་པ་ཀུན་བཏགས་ལ་འདོད་ཀྱང༌། གཞན་དབང་ལ་མཚན་ཉིད་དེ་ཡོད་པས་རང་བཞིན་ཡོད་ལ། ཞེས་གསུངས་པས། འདི་པ་དང་ཐལ་འགྱུར་བ་གཉིས་ཀའི་ལུགས་ཀྱི་ཀུན་བཏགས་རང་མཚན་གྱིས་མ་གྲུབ་པར་འཛིན་པ་གཉིས་འཛིན་སྟངས་མཚུངས་ཏེ། གཉིས་ཀས་ཀྱང་རང་བཞིན་གྱིས་མ་གྲུབ་པར་བཟུང་བའི་ཕྱིར་ཏེ། ལུགས་འདིར་ཡང་ཀུན་བཏགས་རང་བཞིན་གྱིས་གྲུབ་པའི་ངོ་བོ་མེད་པ་ལུང་འདིས་གྲུབ་པའི་ཕྱིར་ཞེ་ན་མ་གྲུབ་སྟེ། དེ་ནི་རང་མཚན་གྱིས་གྲུབ་པ་དང༌། རང་བཞིན་གྱིས་གྲུབ་པ་ལ་ཁྱད་མི་འབྱེད་པའི་ཐལ་འགྱུར་བའི་ལུགས་བཤད་སྐབས་ཡིན་པ་དེའི་དབང་དུ་བྱས་པའི་ཕྱིར། དེ་ལྟ་མ་ཡིན་པར་རང་བཞིན་གྱིས་མེད་ན་མེད་དགོས་ཤིང་ཀུན་བཏགས་ཡེ་མེད་ན་ཤེས་བྱ་ཐམས་ཅད་རྫས་ཡོད་དུ་ཐལ་བ་སྟོང་ཐུན་ནས་འཕངས་པའི་འབྲེལ་ནི་ཡིག་ཆར་བདེན་གྲུབ་ཀྱི་རྫས་ཡོད་ཅེས་བཀྲལ་བ་ཡོངས་གྲུབ་མེད་དགག་ཏུ་འདོད་དགོས་པའི་མན་ངག་ཡིན་ལ། འོག་ཏུ་ཊཱིཀ་ཆེན་གྱི་བཤད་པ་མཆན་དུ་འགོད་པར་འགྱུར་བ་ལྟར་ཡོངས་གྲུབ་ཡེ་ཤེས་དང༌། རྫས་ཡོད་ཀྱང་དོན་བྱེད་པའི་རྫས་ཡོད་དངོས་ལ་བྱས་ནའང་བཤད་པའི་རྣམ་གྲངས་སུ་རུང་སྟེ། ཕྱོགས་སྔ་མས་ཡོངས་གྲུབ་ཡེ་ཤེས་སུ་འདོད་ཅིང་ཀུན་བཏགས་རང་མཚན་གྱིས་མ་གྲུབ་ཚུལ་མ་ཤེས་པའི་དབང་ཡིན་པའི་ཕྱིར་རོ། །འོན་ཀྱང་རང་འཛིན་རྟོག་པའི་ཞེན་གཞིར་

― GTD002_Page_0752 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱར་ན་འདི་བས་ཀྱང་རང་མཚན་གྱིས་གྲུབ་པ་དང༌། རང་བཞིན་གྱིས་གྲུབ་པ་ལ་ཁྱད་མི་འབྱེད་ཀྱང༌། དོན་སྨྲས་འབྱེད་ལ་དེའི་ཕྱིར་དོན་སྨྲས་ཆོས་གང་ཡང་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པའི་དོན་ཁེགས་ན་ཡོད་པར་འཇོག་མི་ཤེས་ཀྱང༌། རིགས་པའི་རྗེས་འབྲང་གི་མདོ་སྡེ་པ་སོགས་རང་རང་གི་ལུགས་ཀྱི་རང་མཚན་ཁེགས་པས་ཆོས་དེ་ཡོད་པར་འཇོག་མི་ཤེས་པ་མ་ཡིན་ནོ། །ཚིག་ཙམ་ལ་འཆེལ་བ་ཁ་ཅིག །ཀུན་བཏགས་ཐལ་འགྱུར་བའི་འདོད་པ་ལྟར་གྱི་རང་མཚན་དེར་མ་གྲུབ་པར་འཛིན་པ་ལོག་ཤེས་ཡིན་ཀྱང༌། ཐལ་འགྱུར་བའི་འདོད་པ་ལྟར་གྱི་ཀུན་བཏགས་རང་མཚན་གྱིས་མ་གྲུབ་པར་འཛིན་པ་ལོག་ཤེས་མ་ཡིན་ཏེ། དེ་རང་མཚན་གྱིས་མ་གྲུབ་པའི་ཕྱིར་ཞེ་ན་སེམས་ཙམ་པའི་འདོད་པ་ལྟར་གྱི་ཀུན་བཏགས་རང་མཚན་གྱིས་མ་གྲུབ་པ་དང༌། གཉིས་ཀའི་མ་གྲུབ་ཚད་མཚུངས་ཤིང༌། གཉིས་ཀས་ཀྱང་དམིགས་པ་ལ་ཀུན་བཏགས་སྤྱི་ཙམ་མི་ཡོང་བར་ཐལ་ལོ། །འདོད་ན། སེམས་ཙམ་པ་ལྟར་གྱི་བུམ་པའི་སྟོང་ཉིད་ཀྱང༌། བུམ་པའི་སྟོང་ཉིད་དུ་མ་སོང་བར་ཐལ་ལོ། ། ༼ཞ༽ཆོས་རང་རང་གི་སྟེང་གི་གཞན་དབང་ཡང་ཡིན་ལ། སྐྱེ་བ་ངོ་བོ་ཉིད་མེད་པ་ཡང་ཡིན་པས་དེ་དག་གི་སྒྲ་འདུས་མ་བྱས་རྣམས་ལ་ཇི་ལྟར་བཤད་ཅེ་ན། སྤྱིར་གཞན་དབང་གི་སྒྲ་དོན་ནི་ཐེག་བསྡུས་ལས། ཅིའི་ཕྱིར་གཞན་གྱི་དབང་ཞེས་བྱ་ཞེ་ན། རང་གི་བག་ཆགས་ཀྱི་ས་བོན་ལས་སྐྱེས་པ་ཡིན་པས། དེ་ལྟ་བས་ན་རྐྱེན་གྱི་གཞན་དབང་ཡིན་ནོ། །སྐྱེས་ནས་ཀྱང་སྐད་ཅིག་ལས་ལྷག་པར་བདག་ཉིད་གནས་པར་མི་ནུས་པས་ན་གཞན་གྱི་དབང་ཞེས་བྱའོ་ཞེས་སོགས་

― GTD002_Page_0753 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་ཏེ་འདུས་མ་བྱས་རྣམས་ཀྱང་ནང་གི་བག་ཆགས་སྨིན་པའི་དབང་གིས་ཤར་བའི་སྣང་ཆ་ཙམ་དུ་འདོད་དགོས་ལ། སྤྲིན་དང་ནམ་མཁའ་བཞིན་རང་གི་ཆོས་ཉིད་དེ་ལ་བརྟེན་ནས་གནས་དགོས་ཤིང༌། ཆོས་ཉིད་ཀྱང་དེའི་རྟེན་དུ་འགྱུར་བ་མེད་པའི་ཡོངས་གྲུབ་དང༌། ཆོས་རང་ཉིད་རང་གི་གཞན་དབང་དུ་བཞག་པ་ཡིན་ཏེ། སྒྲའི་སྟེང་གི་མི་རྟག་པ་ལ་སྒྲ་དང་གཅིག་མི་དགོས་ཀྱང༌། དེའི་སྟེང་གི་གཞན་དབང་ལ་དེ་དང་གཅིག་ཡིན་དགོས་པའང་དེ་ཡིན་ནོ། །དེ་ལྟར་སྒྲུབ་ཕྱོགས་ནས་གཞན་དབང་གི་སྒྲ་དོན་ཤེས་ན་དེའི་འགལ་ཟླའི་ངོ་བོར་མེད་པ་ཆོས་དེའི་སྐྱེ་བ་ངོ་བོ་ཉིད་མེད་པའི་དོན་ཡིན་པས། འདུས་མ་བྱས་རྣམས་ཀྱང་བག་ཆགས་སྨིན་པ་ལ་མ་ལྟོས་པར་གྲུབ་པ་དང༌། གནས་ལུགས་ལ་མ་ལྟོས་པར་རང་དབང་དུ་སྡོད་པའི་མཐུ་མེད་པ་སོགས་ལ་བྱ་སྟེ་དོན་ཆོས་ཀྱི་བདག་མེད་པ་ལ་ཐུག་གོ །བདག་སྐྱེ་ཡང་བུམ་པ་བུམ་པ་ལས་སྐྱེས་པ་ལ་མི་ཟེར་གྱི་རང་དང་བདག་ཉིད་གཅིག་པའི་རྒྱུ་ལས་སྐྱེས་པ་ལ་ཟེར་རོ། །འོན་ཀྱང་བྱེ་སྨྲས་རང་དང་བདག་ཉིད་གཅིག་པའི་རྒྱུ་ལས་སྐྱེས་པ་ཁས་ལེན་པ་ནི་དུས་མཉམ་ལ་བསམ་གྱི་ས་བོན་གྱི་དུས་ན་མྱུ་གུ་ཡང་མངོན་པར་མི་གསལ་བའི་ཚུལ་གྱིས་ཡོད་པ་དེ་འདྲ་མི་འདོད་པས་བདག་སྐྱེའི་དོན་མེད་དོ། །རྒྱུ་འབྲས་གཅིག་གཅིག་གི་དུས་ན་དེ་དང་དེའི་ངོ་བོར་མེད་ན་སེམས་ཅན་སུ་ཡང་སངས་རྒྱས་ཀྱི་ངོ་བོར་གྲུབ་དུས་མེད་དགོས་པས། དེ་ལྟར་ཡོད་ཀྱང་གྲངས་ཅན་དང་མི་མཚུངས་ཏེ། འདིར་དེའི་ཚེ་དེ་ཡིན་པ་ཙམ་ལ་བསམས་ཤིང་གྲངས་ཅན་གྱིས་མྱུ་གུའི་དུས་ན་ཡོད་པའི་མྱུ་གུའི་རང་བཞིན་དེ་ཀ་མྱུ་

― GTD002_Page_0754 ―

^{[མ་དཔེ་གཟིགས་ན་འདིར་གནོན།]}

[Full Size]

གུའི་རྒྱུ་དུས་ན་ཡང་ཡོད་དགོས་ཀྱི་གཞན་དུ་ན་འབྲེལ་མེད་པ་ལས་འབྱུང་བས། བྱེ་མ་ལས་ཀྱང་སྣུམ་འབྱུང་བར་ཐལ་བ་འཕེན་པ་སོགས། རྣམ་འགྲེལ་ལེའུ་དང་པོར། གལ་ཏེ་ལྡོག་པ་སྤངས་པ་ཡི། །ཞེས་སོགས་ལྟར་ཡིན་པས། འདི་དང་ཆེས་མི་མཚུངས་སོ། །འདིར་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་ཞེས་འབྱུང་བས་འདུས་མ་བྱས་རྣམས་ཀྱང་ཆོས་རྣམས་ཞེས་པའི་དངོས་བསྟན་ཙམ་ཡིན་ལ་སྐྱེ་བ་ངོ་བོ་ཉིད་མེད་པའི་དོན་ཚང་མི་དགོས་ཞེས་ཡིག་ཆའི་སྒྲས་ཟིན་ལ་གསུངས་ཀྱང༌། དགོངས་པ་ཡིན་མིན་བརྟག་པར་བྱ། ༼ཟ༽འདིར་གཞན་དབང་ལ་རྣམ་དག་ལམ་གྱི་དམིགས་པ་མཐར་ཐུག་ཏུ་འགྱུར་སྙམ་པའི་དོགས་པ་ཆེ་ཞེས་པའི་དོན། ཁ་ཅིག་དབུས་མཐར། ཡང་དག་མ་ཡིན་ཀུན་རྟོག་ཡོད། །ཅེས་པ་ལྟ་བུ་སེམས་ཙམ་གྱི་གཞུང་རྣམས་སུ་གཞན་དབང་འཆད་པའི་ཚེ་སེམས་གཙོ་བོར་བཤད་པས་འདིར་ཡང་སེམས་དེ་དོན་དམ་དུ་འགྱུར་སྙམ་པ་ཡིན་ཏེ། ཕྱི་རོལ་ཡུལ་སྣང་རྒྱང་ཆད་ཚུགས་ཐུབ་འདྲ་བ་འདི་བཀག་སྟེ་དཔེར་ན་ཆུ་ནང་དུ་ཉི་འོད་ཕོག་པའི་ཚེ། དེའི་མདངས་ཤིག་རྩིག་ངོས་ལ་ཐོལ་གྱིས་བྱུང་བ་ན་ངོས་དེར་གདོད་ནས་གྲུབ་པ་ལྟར་སྣང་ཡང༌། དོན་ལ་ཆུའི་མདངས་དེ་ནས་ཚུར་ཤར་བ་ཙམ་ཡིན་པ་ལྟར། ཕྱི་རོལ་ལྟར་སྣང་བ་འདི་ཡང༌། སེམས་ཀྱི་རང་མདངས་ཙམ་དུ་གོམས་པས་རིམ་གྱིས་སྣང་བ་རགས་པ་ལོག་པའི་མཐར་ཕྱིའི་སྣང་བ་བཀག་ནས་སེམས་ཀྱི་ངོ་བོ་གསལ་རིག་ཙམ་ཞིག་ཤར་བ་ལ་སེམས་ཙམ་གྱི་ལྟ་བ་རྙེད་པར་རློམ་ནས། བོད་སྔ་མ་མང་པོས་ཀྱང་དེ་ཙམ་ལ་ལྟ་བའི་ངོ་སྤྲོད་མཐར་ཐུག་ཏུ་བྱས་

― GTD002_Page_0755 ―

^{[མ་དཔེ་གཟིགས་ན་འདིར་གནོན།]}

[Full Size]

འདུག་པ་སོགས་དགག་ཆེད་ཡིན་ཟེར། སྤྱིར་དེ་འདྲ་བའི་དོགས་པ་སྐྱེ་བ་བདེན་ཡང་ཕྱོགས་སྔའི་ཁས་བླངས་ཡོད་མེད་མི་ཤེས་པའི་དོགས་པ་གཅིག་མདོ་ལས་བཀོད་ཀྱང་ཕལ་ཆེར་མི་ཡོང་ལ་འོག་ཏུ་རྗེས་སྐྱོན་སྤོང་མཛད་པ་རྣམས་དང་ཡང་མི་འབྲེལ་ལོ། །སེམས་ཙམ་ལ་ཁས་བླངས་དེ་མེད་པ་འོག་ཏུ་དགོངས་འགྲེལ་ལས། ཆོས་ཉིད་དགག་བྱ་བཅད་ཙམ་ལ་འཇོག་པར་གསུངས་པ་སོགས་ཀྱིས་འགྲུབ་ཅིང་རྗེས་བཟོད་བཞི་དང་རྗེས་ཤེས་བཞི་འཛིན་པའི་ཡུལ་ཅན་དུ་བཤད་པ་ལྟར་ནའང་མཉམ་གཞག་གིས་དྲངས་པའི་རྗེས་ཐོབ་ཡུལ་གྱི་ཐ་སྙད་ཕྲ་མོ་ལ་རུང་ཡང་ལྟ་བ་དངོས་ཀྱི་འཛིན་སྟངས་སུ་མི་འགྱུར་ལ། ལྕང་སྐྱ་རིན་པོ་ཆེའི་གྲུབ་མཐར་དེ་དོན་དམ་སྒྲུབ་བྱེད་ཀྱི་སྦྱོར་བའི་བསྒྲུབ་བྱ་དང༌། དོན་དམ་དཔྱོད་པའི་རིག་པའི་རྙེད་དོན་དུ་གསུངས་པ་ཡང༌། སྔ་མ་མང་པོའི་ཕྱོགས་མཐུན་ཙམ་མཛད་པ་ཡིན་ནམ་བརྟག་པར་བྱ་དགོས་ཏེ། ཉན་ས་ལས། དེའི་ཚེ་ན་སེམས་འགག་པ་ལྟ་བུར་སྣང་མོད་ཀྱི་ཞེས་སྦྱོར་ལམ་ལ་བཤད་ན་མཐོང་ལམ་ལྟ་ཅི་སྨོས་པའི་ཕྱིར་དང་ཤེས་བྱའི་གནས་དང་མཚན་ཉིད་དེར་འཇུག་དང༌། ཞེས་པའི་དེར་འཇུག་ཚུལ་ལ་དྲོད་རྩེ་གཉིས། བཟོད་མཆོག་གཉིས་མཐོང་ལམ་དང་གསུམ་དུ་འཇུག་ཚུལ་བཤད་པའི་ཕྱིར་དང་ཐེག་བསྡུས་ལས། མི་ཞིག་མིག་ནི་བཙུམ་པ་ལྟར། །རྣམ་རྟོག་མེད་པའི་ཤེས་དེ་འདྲ། །ཞེས་པ་འཕགས་པའི་མཉམ་གཞག་ཡེ་ཤེས་ལ་དགག་བྱའི་སྟོང་པ་ཙམ་ལས་མི་འཆར་བས་སྣང་མེད་དུ་བཤད་པའི་ཕྱིར། ཀུན་

― GTD002_Page_0756 ―

^{[མ་དཔེ་གཟིགས་ན་འདིར་གནོན།]}

[Full Size]

མཁྱེན་ཆོས་འབྱུང་གི་གསུང་ལྟར་ན་འདིའི་དོགས་པ་ཐལ་རང་གཉིས་ལ་འབྱུང་བ་སྟེ། དེ་ཡང་སེམས་ཙམ་པར་གཞན་དབང་རྣམ་དག་ལམ་གྱི་དམིགས་པར་ཁས་བླང་བའི་སྟེང་ནས་བདེན་གྲུབ་ཀྱི་ཁས་ལེན་ཡོད་པས། དེའི་དམིགས་པར་བདེན་པར་གྲུབ་ན་དེའི་དམིགས་པར་གྲུབ་པའི་གྲུབ་ལུགས་དེ་དོན་གྱི་སྡོད་ལུགས་མཐར་ཐུག་ཏུ་འགྲོ་དགོས་པས། དམིགས་པ་མཐར་ཐུག་ལས་འོས་མེད་ཅིང༌། ཀུན་བཏགས་དམིགས་པ་ཙམ་ཡིན་ཀྱང་རྫུན་པར་གྲུབ་པས་སྐྱོན་མེད་སྙམ་པ་ཡིན་ལ། ལན་དུ་དེ་གཉིས་བདེན་གྲུབ་ཏུ་མཚུངས་ཀྱང༌། བསྒོམ་ན་བདག་འཛིན་དང་འཛིན་སྟངས་འགལ་བའི་སྒོ་ནས་སྤོང་མི་སྤོང་གི་ཁྱད་ཡོད་དེ་སྒྲ་དང་སྒྲ་མི་རྟག་པ་སྒྲ་འཛིན་མངོན་སུམ་གྱི་སྣང་ཡུལ་དུ་མཚུངས་ཀྱང་རང་ལ་དམིགས་ན་རྟག་འཛིན་ཟློག་མི་ཟློག་གི་ཁྱད་ཡོད་པ་དང་འདྲ་བར་གསུངས་ཏེ་ལེགས་པར་བཤད་པའོ། །སྣང་ཡུལ་ལ་ཞིབ་ཆ་དགོས། ཤར་བ་ནམ་མཁའ་རྒྱལ་མཚན་གྱི་དྲང་ངེས་རྣམ་འབྱེད་སོགས་འགའ་ཞིག་ལས། དགོངས་འགྲེལ་དུ་འདུས་བྱས་དང་འདུས་མ་བྱས་རྣམས་ཀྱི་ཆོས་ཉིད་གཏན་ལ་འབེབས་པའི་ཚེ། དེ་དག་གི་གཞན་དབང་སྟོང་གཞིར་དངོས་སུ་བཟུང་ཡང་འདུས་མ་བྱས་རྣམས་སྟོང་གཞིར་དངོས་སུ་མ་བཟུང་བའི་རྒྱུ་མཚན་གྱིས་ཡིན་ཟེར། དགོངས་འགྲེལ་ལས་ཁམས་བཅོ་བརྒྱད་པོ་དག་གི་ཁམས་རེ་རེ་ལ་ཡང་དེ་བཞིན་ལགས་སོ། །ཞེས་པ་འདིས། དེའི་སྟེང་གི་ངོ་བོ་ཉིད་གསུམ་འཇོག་ཚུལ་སྔ་མ་དང་འདྲ་བར་དངོས་སུ་མ་བསྟན་ན་ཅི་ཞིག་དངོས་སུ་བསྟན། གལ་ཏེ་དེའི་སྟེང་གི་གཞན་དབང་དང་ཀུན་བཏགས་དངོས་སུ་མ་བསྟན་ལ་

― GTD002_Page_0757 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་གྲུབ་དངོས་སུ་བསྟན་པ་དེའི་གཞན་དབང་གི་སྟེང་གི་ཡིན་ཟེར་ན། མཚན་ཉིད་གསུམ་སྟོན་པ་ཐམས་ཅད་ལས་དེ་དང་དེའི་གཞན་དབང་སྟོང་གཞིའི་དབང་དུ་བྱས་ཏེ་འཆད་པ་ཤ་སྟག་ཡིན་པས། རང་གི་སྟེང་གི་སྟོང་ཉིད་དངོས་སུ་བསྟན་པ་མི་སྲིད་པར་འགྱུར་ཏེ་ཞིབ་པར་འོག་ཏུ་འཆད་དོ། །རིན་ཆེན་དོན་འགྲུབ་ཀྱི་དྲང་ངེས་རྣམ་འབྱེད་ལས། ཆོས་ཐམས་ཅད་ཀྱི་སྟེང་གི་གཞན་དབང་ཆོས་ཅན། ཁྱོད་ལ་དོན་དམ་པ་ངོ་བོ་ཉིད་མེད་པ་ཞེས་བརྗོད་པའི་རྒྱུ་མཚན་ཡོད་དེ། ཆོས་རྣམས་ཀྱི་སྟེང་གི་སྒྲིབ་པ་ཟད་པར་བྱེད་པའི་དམིགས་པ་མཐར་ཐུག་པ་དེ་རྣམས་དོན་དམ་ཡིན་ལ། ཁྱོད་དམིགས་པ་དེར་མ་གྲུབ་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར་ཞེས་བཤད་པ་ཡིག་ཆ་དང་ཡང་མི་མཐུན་པ་མེད་པས་དེ་ལྟར་ན་འདིའི་དོགས་པ་ཆེ་ཆུང་ཞེས་པ་དེ་ཀུན་བཏགས་སྤྱི་ཙམ་ལ་མ་བྱས་པར་གཞི་དེ་དང་དེའི་སྟེང་གི་སྟོང་ཉིད་གཏན་ལ་འབེབ་པའི་ཚེ་གཞི་དེའི་སྟེང་གི་ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་ལ་དོགས་པ་ཆུང་ཞིང་སྟོང་གཞི་དེ་དང་དེར་དོགས་པ་ཆེ་བའི་དོན་ཏེ། དེ་ལྟར་ན་ཆོས་ཐམས་ཅད་འདིའི་དོན་དམ་ལ་ཡོང་ངོ༌། །ཁོ་ན་རེ། གཞན་དབང་ཡོང་ཡང་སྟོང་ཉིད་ཡོང་དོན་མེད་དེ། ཡེ་ཤེས་ཀྱི་དམིགས་པ་མཐར་ཐུག་ཡིན་པའི་ཕྱིར་ཞེ་ན་སྐྱོན་མེད་དེ། རང་གི་ཆོས་ཉིད་བཙལ་བའི་ཚེ་དེ་ཡང་དམིགས་པ་མཐར་ཐུག་ཏུ་མི་རུང་བའི་ཕྱིར་ཏེ། བུམ་པ་ཕྱི་དོན་དུ་གྲུབ་མ་གྲུབ་དཔྱད་པའི་མཐར་བུམ་པའི་སྟེང་གི་དོན་སྟོང་རྙེད་ཀྱང་དོན་དམ་དཔྱོད་པའི་དཔྱད་

― GTD002_Page_0758 ―

^{[མ་དཔེ་གཟིགས་ན་འདིར་གནོན།]}

[Full Size]

བཟོད་དུ་མི་འགྲོ་ལ། དོན་སྟོང་རང་ཉིད་ཕྱི་རོལ་དོན་དུ་གྲུབ་མ་གྲུབ་དཔྱད་པའི་མཐར་རང་ཉིད་རྙེད་ན་དོན་དམ་དཔྱོད་པའི་དཔྱད་བཟོད་དུ་འགྱུར་བའི་ཕྱིར། ཁོ་ན་རེ། དོན་སྟོང་དོན་སྟོང་དུ་རྟོགས་པའི་ཡེ་ཤེས་ཆོས་ཅན། དོན་སྟོང་ཁྱོད་ཀྱི་རྙེད་དོན་ཡིན་པར་ཐལ། ཁྱོད་དོན་སྟོང་རྟོགས་པའི་ཡེ་ཤེས་ཡིན་པའི་ཕྱིར་ན་འདིར་མ་ཁྱབ། འདོད་ན། དོན་སྟོང་ཆོས་ཅན། རང་གི་སྟེང་གི་རྣམ་དག་ལམ་གྱི་དམིགས་པ་མཐར་ཐུག་ཡིན་པར་ཐལ། ཁྱོད་ཀྱི་སྟེང་གི་དོན་སྟོང་རྟོགས་པའི་བློ་དེས་ཁྱོད་འཛིན་སྟངས་སུ་བྱས་པའི་ཕྱིར་ཏེ། རྟོག་མེད་དབང་ཤེས་ལ་ལྟོས་པའི་ལྟ་བ་ཡིན་ན་ཁྱོད་རྙེད་པས་ཁྱབ་པའི་ཕྱིར། རྟགས་དོན་གྱིས་སོང༌། འདོད་ན། དེ་ཆོས་ཅན། རང་སྟེང་གི་ཡོངས་གྲུབ་མ་ཡིན་པར་ཐལ། རང་སྟེང་གི་གཞན་དབང་ཡིན་པའི་ཕྱིར། ༼འ༽ཁ་ཅིག་འདིའི་དོན་དུ་བསམ་ནས་འཇོག་ཚུལ་གཉིས་པའི་དོན་དམ་པ་ངོ་བོ་ཉིད་མེད་པ་ལ་ཆོས་ཀྱི་བདག་མེད་ཕྲ་མོས་ཁྱབ་པར་འདོད་པ་མི་འཐད་པར་ཐལ། རྒྱས་བཤད་ཀྱི་ཤུགས་བསྟན་ལ་གང་ཟག་གི་བདག་མེད་ཕྲ་མོ་ཡོང་ཞིང༌། དེ་ཡང་དོན་དམ་ཡིན་པའི་ཕྱིར། དབུས་མཐའ་ལས། རྣམ་དག་སྤྱོད་ཡུལ་རྣམ་གཉིས་ཏེ། །གཅིག་པུ་ཁོ་ནར་བརྗོད་པ་ཡིན། །ཞེས་གསུངས་པའི་ཕྱིར། བྱས་པ་ལ་ཁ་ཅིག །འཕགས་པའི་མཉམ་གཞག་ཡེ་ཤེས་ཀྱི་འཛིན་སྟངས་ཀྱི་བདག་མེད་དེ་ལ་གཉིས་ཡོད་ཀྱང༌། ཡོངས་གྲུབ་ནི་དེའི་ནང་ནས་ཆོས་ཀྱི་བདག་མེད་གཅིག་པུ་ཡིན་ཞེས་པའི་དོན་ཟེར་བ་མི་འཐད་དེ། བློ་བརྟན་གྱི་འགྲེལ་བཤད་ལས། རྣམ་པར་དག་པའི་སྤྱོད་ཡུལ་འདི་རྣམ་པ་གཉིས་ནི་ཡོངས་སུ་གྲུབ་པའི་ངོ་བོ་

― GTD002_Page_0759 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་གཅིག་པུས་བརྗོད་དེ། ཞེས་གསུངས་པའི་ཕྱིར། གོང་གི་དབུས་མཐའ་རྩ་བར་ཡང༌། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་པ་ཉིད། །ཅེས་གསུངས་ཤིང༌། འགྲེལ་བཤད་ལས། ཡེ་ཤེས་རྣམ་པ་གཉིས་ཀྱི་ཡུལ་ནི་ཆོས་ཉིད་ཡིན་པས་ཞེས་གསུངས་པའི་ཕྱིར། ཉན་རང་གི་མཐོང་ལམ་བར་ཆད་མེད་ལམ་ཆོས་བཟོད་དུ་སོང་བའི་ཡུལ་ཡང་མེད་པར་འགྱུར་ཏེ། དེ་གང་ལ་ཆོས་བཟོད་དུ་སོང་བའི་ཡུལ་དེའི་ངོ་བོར་མཐོང་སྤང་ཟད་པ་འགོག་བདེན་དུ་འདོད་དགོས་ལ། འགོག་བདེན་དོན་དམ་པར་མ་གྲུབ་ན་ཐར་པ་དོན་དམ་པར་མ་གྲུབ་དགོས་ལ། འཁོར་འདས་དོན་དམ་པར་ཡོད་མཉམ་ཡིན་དགོས་པར་གསུངས་པའི་ཕྱིར། ཁྱབ་སྟེ། ཉན་རང་ཆོས་ཀྱི་བདག་མེད་མི་སྒོམ་པས་དེའི་ངོ་བོར་སྒྲིབ་པ་ཟད་དོན་མེད་ཅིང༌། དེའི་ཕྱིར་ཉན་རང་གི་འགོག་བདེན་ལ་གང་ཟག་གི་བདག་མེད་ཕྲ་མོས་ཁྱབ་པའི་ཕྱིར། འདི་ལ་སྒོམ་སྡེ་ནམ་མཁའ་རྒྱལ་མཚན་སོགས་ཀྱིས་སྟོང་ཐུན་ལྟར་ན་བདག་མེད་ཡོངས་གྲུབ་ཡིན་ཏེ། དེ་ཉིད་ལས། ཡོངས་གྲུབ་ནི་གཞན་དབང་གི་སྟེང་དུ་བདག་འཛིན་གཉིས་ཀྱིས་ཀུན་བཏགས་པ་ལྟར་གྲུབ་པའི་སྟོང་པའི་དེ་བཞིན་ཉིད་དེ་ཞེས་གསུངས་པའི་ཕྱིར། འོན་ཀྱང་དོན་དམ་བདེན་པ་མིན་ཏེ། དེ་ཉིད་ལས། སེམས་ཙམ་པ་དང་དབུ་མ་རང་རྒྱུད་པ་དག་གང་ཟག་གི་བདག་མེད་དོན་དམ་བདེན་པར་མི་འདོད་ཅིང་ཞེས་གསུངས་པའི་ཕྱིར། དོན་དམ་བདེན་པ་མིན་ཀྱང་ལུང་སྔ་མ་དང་མི་འགལ་ཏེ། གང་ཟག་གི་བདག་མེད་ཀྱི་དབང་དུ་བྱས་པའི་དེ་བཞིན་

― GTD002_Page_0760 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཡིན་པ་ལ་དགོངས་པའི་ཕྱིར་ཟེར། ཡིག་ཆར་གང་ཟག་གི་བདག་མེད་དོན་དམ་བདེན་པ་ཡང་ཡིན་མོད་སྟོང་ཐུན་ལས་དེ་དོན་དམ་མ་ཡིན་ལ། གང་ཟག་གི་བདག་འགོག་པའི་རིགས་པ་ཀུན་རྫོབ་དཔྱོད་བྱེད་དུ་གསུངས་པ་གང་ཟག་གི་བདག་མེད་སྤྱི་ལྡོག་ལ་དགོངས་གསུངས་པའི་དོན་གང་ཞེ་ན། གང་ཟག་གི་བདག་མེད་རང་ལྡོག་ལ་དགོངས་ཟེར་བ་མི་རིགས་ཏེ། རང་ལྡོག་ཀུན་རྫོབ་ཡིན་ན་དགོངས་པ་འགྲེལ་མི་དགོས་པའི་ཕྱིར། ཁ་ཅིག་བདག་མེད་ཕྲ་རགས་གཉིས་སུ་མ་ཕྱེ་བའི་གང་ཟག་གི་བདག་མེད་སྤྱི་ཙམ་པ་ཡིན་ཟེར། དེ་ལ་བདག་མེད་གཉིས་སུ་དབྱེར་ཡོད་པར་ཐལ། སྐབས་དོན་འཐད་པའི་ཕྱིར། འདོད་ན། བདག་མེད་ཕྲ་རགས་གང་རུང་ཡིན་ན་ཁྱོད་ཡིན་དགོས་པར་ཐལ་ལོ། །དེས་ན་སྟག་ཚང་བ་ཁྱོད་ཀྱིས། མ་བརྟགས་མ་དཔྱད་པའི་ཤེས་བྱ་ཆོས་ཅན་ཟེར་བཞིན་དུ་འདི་འདྲ་སྨྲས་ན་མི་མཛེས་སོ། །གཞན་ཡང་ཕྲ་རགས་གཉིས་སུ་མ་ཕྱེ་བའི་སྡུག་བདེན་དེ་སྡུག་བདེན་མ་ཡིན་པར་ཐལ། ཕྲ་རགས་གཉིས་སུ་མ་ཕྱེ་བར་བདག་བཀག་ཙམ་གྱི་སྟོང་པ་དེ་བདག་བཀག་ཙམ་གྱི་སྟོང་པ་མ་ཡིན་པའི་ཕྱིར། འདོད་ན། ལྷག་མེད་དགྲ་བཅོམ་པ་ཆོས་ཅན། ཁྱོད་ཀྱི་རྒྱུད་ལ་སྡུག་བདེན་སྤྱི་ཙམ་པ་ཡོད་པར་ཐལ། ཕྲ་རགས་གཉིས་སུ་ཕྱེ་བའི་དེ་མེད་ཀྱང་མ་ཕྱེ་བའི་དེ་ཡོད་པའི་ཕྱིར། ཁྱབ་སྟེ། སྤྱི་ཙམ་གྱི་དོན་ཁྱོད་ལ་འཐད་པའི་ཕྱིར། རང་ལུགས་ལ་སྟོང་ཐུན་གྱི་ལུང་དོན་ཡོད་དེ། གྲུབ་མཐའ་བཞི་པོ་གང་རུང་གིས་བདག་བཀག་པའི་སྟོང་པར་འདོད་རྒྱུའི་བདག་མེད་ཕྱག་རྒྱ་བཞིའི་ཡ་གྱལ་གྱི་བདག་མེད་ཙམ་ལ་བྱ་བའི་ཕྱིར། རྟགས་ཡིག་ཆ་དང་སྟོང་ཐུན་གཉིས་ཀའི་འབྲེལ་གྱིས་

― GTD002_Page_0761 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ། སྐབས་འདིར་དྲངས་པའི་སྟོང་ཐུན་ནས་རང་སྡེ་ཁ་ཅིག་རྟག་གཅིག་རང་དབང་ཅན་གྱི་གང་ཟག་ཏུ་འཛིན་པ་གང་ཟག་གི་བདག་ལྟ་ལྷན་སྐྱེས་སུ་འདོད་གསུངས་པ་ལྟར་ན། གནས་མ་བུ་བས་རང་སྐྱ་ཐུབ་པའི་རྫས་ཡོད་ཀྱི་སྟོང་པ་ཁས་མ་བླངས་པ་འདྲ་སྟེ། དེ་འདོད་ན་འདི་བདག་མེད་རགས་པར་འགྲོ་དགོས་པས་སོ། །འོན་ཀྱང་རང་སྐྱ་ཐུབ་པའི་རྫས་ཡོད་དུ་མི་འདོད་དེ། བདག་རང་སྐྱ་བའི་རྫས་སུ་ཡོད་ན་ཕུང་པོ་ལས་ངོ་བོ་ཐ་དད་པར་བརྗོད་དུ་མེད་ཟེར་དོན་མེད་པའི་ཕྱིར། དེ་དང༌ཐ་དད་དུ་བརྗོད་པའི་ཕྱིར། འོན་ཀྱང་ཆེན་པོ་རྣམས་ཀྱི་དོགས་པའི་གནས་ཡིན་པས་ཁ་ཚོན་གཅོད་དཀའོ། །དེ་དག་གི་དོན་ལ་ཁ་ཅིག་ན་རེ། གང་ཟག་གི་བདག་མེད་རྟོགས་པའི་ལྟ་བ་དེ་དབུ་མའི་ལྟ་བ་ཡིན་པར་ཐལ། གང་ཟག་གི་བདག་མེད་དེ་དབུ་མ་ཡིན་པའི་ཕྱིར་ན་འདིར་མ་ཁྱབ་ཡང་དེ་ཆོས་ཅན། དོན་དམ་དཔྱོད་པའི་རིགས་ཤེས་ཀྱི་རྙེད་དོན་ཡིན་པར་ཐལ། འདོད་པའི་ཕྱིར། འདོད་ན། ཁྱོད་རྟོགས་པའི་རིགས་ཤེས་དེ་དོན་དམ་དཔྱོད་པའི་རིགས་ཤེས་ཡིན་པར་ཐལ། འདོད་ན། ཉན་ཐོས་སྡེ་བའི་རྒྱུད་ཀྱི་གང་ཟག་གི་བདག་མེད་རྟོགས་པའི་རིགས་ཤེས་ཆོས་ཅན། དོན་དམ་དཔྱད་ནས་རྙེད་པའི་རིགས་ཤེས་ཡིན་པར་ཐལ། དོམ་དམ་དཔྱོད་པའི་རིགས་ཤེས་གང་ཞིག །ཁྱོད་གང་ལ་རིགས་ཤེས་སུ་སོང་བའི་ཡུལ་དེ་ཁྱོད་ཀྱིས་རྙེད་པ་ཡང་ཡིན་པའི་ཕྱིར་ན། རྣམ་པ་གཅིག་ཏུ་མ་ཁྱབ། འདོད་མི་ནུས་ཏེ། ཉན་ཐོས་སྡེ་བས་གནས་ལུགས་ཀྱི་དོན་མ་རྙེད་པའི་ཕྱིར་ཏེ། གནས་ལུགས་རྟོགས་པའི་ལྟ་བ་མ་རྙེད་པའི་ཕྱིར།

― GTD002_Page_0762 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་དག་ཧ་ཅང་བློར་བདེ་བ་ཞིག་མི་འདུག་ཀྱང༌། སྟོང་ཐུན་ལས། འགོག་བདེན་ཡིན་ན་དེ་བཞིན་ཉིད་ཡིན་པས་ཁྱབ་པར་འདོད་པ་ལ་དབུ་སེམས་ཀྱི་མཁས་པ་སུ་ཡང་མི་མཐུན་པ་མེད་དོ། །དེ་ལྟར་ན་ཉན་ཐོས་འཕགས་པ་ཆོས་ཅན། ཁྱོད་ཀྱིས་ཆོས་ཉིད་མངོན་སུམ་དུ་རྟོགས་པར་ཐལ། ཁྱོད་ཀྱིས་འགོག་བདེན་མངོན་སུམ་དུ་རྟོགས་པའི་ཕྱིར། རྟགས་གསལ་དངོས་སུ་ཁས་བླངས་ཤིང༌། ཁྱབ་པ་ཡང་དོན་གྱིས་ཁས་བླངས་པས། ཞེས་པ་ནས། གྲུབ་མཐའི་ནང་འགལ་ཆེན་པོའོ། །ཞེས་གསུངས་པས། དེ་ཙམ་ལས་བཤད་མི་བདེ་བས་དེས་འགྲིག་པར་བྱ་དགོས་སོ། །དབུ་མའི་མཐའ་དཔྱོད་ལས། འདི་བའི་ལྷན་སྐྱེས་རགས་པའི་རྫས་ཡོད་དང༌། རང་སྡེ་གཞན་གྱི་ལྷན་སྐྱེས་རྫས་ཡོད་དང༌། རང་སྡེ་ཀུན་གྱིས་ཀུན་བཏགས་སུ་འདོད་པའི་ཁྱད་པར་གསུམ་ཡོད་དེ་ཞེས་པ་ནས། མི་འཇིག་པའི་རྟག་པ་དང་ཆ་མེད་པའི་གཅིག་པུར་འཛིན་པ་དེ་གསུམ་པ་ཡིན་པའི་ཕྱིར་གསུངས་པ་ཡང་ཕལ་ཆེ་བ་ལ་དགོངས་ཏེ། མང་བཀུར་སྡེ་ལྔས་བདག་རང་སྐྱ་བའི་རྫས་སུ་མེད་པར་འདོད་ན། བརྗོད་མེད་ཟེར་དོན་མེད་དེ། ཕུང་པོ་ལས་ངོ་བོ་ཐ་དད་དུ་གནས་པའི་ནུས་པས་སྟོང་བར་ཁས་བླངས་ཡོད་པའི་ཕྱིར། ༼ཡ༽འདིའི་སྒྲུབ་པ་རང་དབང་བ་ནི་སྔར་བཤད་པའི་ངེས་དོན་རྒྱ་མཚོ་ལྟར་སེམས་ཅན་ཐམས་ཅད་ལ་ཡོད་པའི་ཟག་མེད་ཡེ་ཤེས་ཡིན་ཏེ། ཀརྨ་བའི་ཕར་ཕྱིན་ལས། གཟུང་འཛིན་གཉིས་མེད་ཀྱི་ཡེ་ཤེས་དེ་ཉིད་ལ་གནས་ལུགས་མཐར་ཐུག་ཏུ་འཇོག་པའི་དབུ་མ་ཆེན་པོ་ཀླུ་སྒྲུབ་ཀྱི་བསྟོད་ཚོགས་དང༌། སློབ་དཔོན་འཕགས་པ་ལྷའི་

― GTD002_Page_0763 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་བརྒྱ་པ་སོགས་སུ་བསྟན་པ་ཡིན་ནོ། །ཞེས་བཤད་པའི་ཕྱིར། ཁ་ཅིག་འདིའི་ཕྱོགས་སྔ་ཆོས་ཉིད་ཀྱི་ངོ་བོ་ཡེ་ཤེས་སུ་འདོད་མཁན་ཞིག་མིན་ཏེ། ཡིག་ཆར་དེས་སྒྲུབ་པ་རང་དབང་བའི་རྟག་པར་འདོད། ཅེས་གསུངས་པའི་ཕྱིར་ན་མ་ཁྱབ། སྒྲ་ཚད་པ་རིན་ཆེན་རྣམ་རྒྱལ་གྱི་བདེ་གཤེགས་སྙིང་པོའི་མཛེས་རྒྱན་ལས། ཡེ་ཤེས་ཀྱི་ངོ་བོ་རྟག་པ་ཡིན་ཀྱང་རྐྱེན་ལ་ལྟོས་ནས་དོན་བྱེད་ན། འདི་ནི་གྲངས་ཅན་པ་དང་དཔྱོད་པ་གཉིས་ཀྱི་གཞུང་བཙུགས་པ་ཡིན་པས། རིགས་པའི་དབང་ཕྱུག་རྣམ་གཉིས་ཀྱིས་རྒྱས་པར་བཀག་ཟིན་ཏོ་ཞེས་དང༌། སྡོམ་གསུམ་རབ་དབྱེར། ཁ་ཅིག་གྲངས་ཅན་ལུགས་བཞིན་དུ། །ཡོད་པའི་དགེ་བ་ཞེས་བྱ་བ། །རང་བྱུང་དུ་ནི་གྲུབ་པར་འདོད། །དེ་ལ་བདེ་གཤེགས་སྙིང་པོ་ཟེར། །ཞེས་དང༌། ཀར་ལན་ཀླུ་སྒྲུབ་དགོངས་རྒྱན་ལས། རྣམ་འགྲེལ་ལས་བཤད་པའི་ལྟ་བ་དེ་ཐོགས་མེད་སྐུ་མཆེད་བཞེད་པའི་དབུ་མ་ཆེན་པོའི་ལྟ་བ་ཡིན་ན། རྣམ་འགྲེལ་དབུ་མ་ཆེན་པོའི་བསྟན་བཅོས་སུ་བཞེད་དགོས་ཤིང༌། དེ་ལྟར་བཞེད་པར་ཡང་འདུག་པས་གཟུང་འཛིན་གཉིས་མེད་ཀྱི་ཡེ་ཤེས་རྟག་དངོས་སུ་བཞེད་པ་དང་འགལ་ཏེ། ཞེས་སོགས་དང༌། རང་རིག་པའི་ཡེ་ཤེས་ཀྱི་དངོས་ཡུལ་ལ་ཤེས་པ་གཅིག་ལས་འོས་མེད་སྙམ་དུ་དགོངས་པར་འདུག་ནའང༌། ཞེས་པ་ནས། རང་རིག་འཛིན་རྣམ་ཁྱད་པར་གསུམ་ལྡན་ལྟ་བུ་གཏན་མ་ཡིན་པས་འབྲེལ་མེད་ལ། ཞེས་སོགས་ལྟར་ཡོངས་གྲུབ་རྟག་དངོས་ཀྱི་ཡེ་ཤེས་གཅིག་ལ་འདོད་པའི་ཕྱིར། སེམས་ཙམ་

― GTD002_Page_0764 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་གཞུང་ལ་དཔྱོད་པ་རྣམས་ལ་ཡོངས་གྲུབ་ཡེ་ཤེས་སུ་འགྱུར་སྙམ་པ་འབྱུང་ཉེ་བས། དྲངས་མ་ཐག་པ་ལྟར་འོག་ཏུ་ཡེ་ཤེས་རང་རིག་གི་དོགས་གཅོད་ཀྱང་མཛད་དགོས་བྱུང་བ་ཡིན་ལ། ཊཱིཀ་ཆེན་ལེའུ་གསུམ་པའི་ཤོག་གྲངས་དོན་གསུམ་པར་ཡང་སེམས་ཀྱི་རང་བཞིན་འོད་གསལ་བ་དེ་ཉིད་གཉིས་མེད་ཀྱི་ངོ་བོ་ལས་གཡོ་བ་མེད་པའི་ཆ་ནས་འགྱུར་མེད་ཡོངས་གྲུབ་ཡིན་ཀྱང༌། ཡེ་ཤེས་མིན་ན་རྫས་སུ་མེད་པས་བཏགས་ཡོད་དུ་འགྱུར་བའི་ཕྱིར། བདེན་གྲུབ་ཏུ་འདོད་པ་དང་འགལ་བར་གསུངས་པ་དང། སྤྱན་རས་གཟིགས་བརྟུལ་ཞུགས་ཀྱིས་སེམས་ཙམ་པ་འགོག་བདེན་རྫས་སུ་འདོད་པར་གསུངས་པ་ཡང་དོགས་པ་དེས་བྱས་སོ། །ཡང་ཁ་ཅིག །དེས་ཡོངས་གྲུབ་དངོས་པོར་མི་འདོད་དེ། སྟོང་ཐུན་ལས། སྟོང་གཞི་བདེ་གཤེགས་སྙིང་པོ་དངོས་མེད་དེ་ཉིད་གཞན་དབང་དངོས་པོ་འདུས་བྱས་ཀྱི་ཚོགས་ཀྱིས་སྟོང་པའི་གཞན་སྟོང་གཞུང་དེ་དག་གིས་བསྟན་ནོ་སྙམ་དུ་བཟུང་ནས་ཞེས་གསུངས་པའི་ཕྱིར་ན་མ་ཁྱབ་སྟེ། དེས་དངོས་པོར་འདོད་ཀྱང་འདུས་མ་བྱས་སུ་སྨྲས་པས་དངོས་པོའི་དོན་མེད་པ་ལ་དགོངས་པའམ་ཡང་ན་བདེ་གཤེགས་སྙིང་པོ་དོན་དུ་དངོས་མེད་ཡིན་པ་ལ་དགོངས་སོ། །༼ར༽ངོ་བོ་ཉིད་མེད་པ་གསུམ་གའི་མཐར་དབུ་མ་པའི་འཇོག་ལུགས་དང་མི་མཚུངས་ཚུལ་རེ་རེ་གསུངས་པས། ཀུན་བཏགས་རང་མཚན་གྱིས་མེད་པས་མཚན་ཉིད་ངོ་བོ་ཉིད་མེད་པར་འདོད་པ་འདྲ་ཡང་མེད་རྒྱུའི་རང་མཚན་མི་འདྲ་བ་དང༌། གཉིས་པར་སེམས་ཙམ་པས་བདག་སྐྱེས་ལ་སྦྱར་ཞིང༌། དབུ་མ་པས་རང་ལུགས་ཀྱི་ཆོས་བདག་དེའི་སྐྱེ་བ་མེད་པ་ལ་

― GTD002_Page_0765 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱར་ཏེ། མ་དྲོས་པས་ཞུས་པ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །ཞེས་སོགས་དང༌། རྩ་ཤེས་ལས། རང་བཞིན་རྒྱུ་དང་རྐྱེན་ལས་ནི། །འབྱུང་བར་རིགས་པ་མ་ཡིན་ནོ། །ཞེས་སོགས་ཀྱི་དོན་དུ་འཆད་དོ། །གསུམ་པ་སེམས་ཙམ་པས་འདིའི་དངོས་བསྟན་གཟུང་འཛིན་རྫས་གཞན་མེད་པའི་རབ་ཏུ་ཕྱེ་བ་ཙམ་ཡིན་པས། དོན་དམ་པ་ངོ་བོ་ཉིད་མེད་པ་ཞེས་ཚིག་ཟུར་གྱི་དོམ་དམ་དེ་མེད་རྒྱུའི་དགག་བྱ་ལ་སྦྱར་ཞིང། དབུ་མ་པས་ཆོས་ཉིད་མེད་དགག་རང་གི་ངོ་བོ་ལ་སྟེ་རང་གི་སྟེང་དུ་རང་མཚན་མ་གྲུབ་པས་དོན་དམ་པ་ངོ་བོ་ཉིད་མེད་པ་ཞེས་ཚིག་ཟུར་གྱི་དོན་དམ་དེ་དོན་དམ་དངོས་ལ་བྱས་ནས་གསུངས་ལ། ཡང་དོན་དམ་དེ་དོན་དམ་དངོས་ལ་བྱས་ཀྱང་ངོ་བོ་ཉིད་མེད་ཅེས་པ་དེ་དོན་དམ་རང་ཉིད་དོན་དམ་པར་མ་གྲུབ་པ་ལ་མ་སྦྱར་བར་དོན་དམ་དེ་ཆོས་གཞན་དོན་དམ་པར་གྲུབ་པ་བཀག་པས་རབ་ཏུ་ཕྱེ་བ་ཙམ་ཡིན་པས། ངོ་བོ་ཉིད་མེད་པར་བཤད་ལུགས་གཅིག་ཀྱང་ཡོད་དེ། དང་པོ་ནི། འདིར་བཀོད་པ་འདི་ཉིད་ཡིན་ཏེ། ཀུན་མཁྱེན་ཆོས་འབྱུང་གིས། དགག་བྱ་བཅད་ཙམ་ཡིན་པས་དོན་དམ་པ་ངོ་བོ་ཉིད་མེད་པ་འཆད་པའི་ལུགས་དང༌། དགག་བྱ་བཅད་ཙམ་གྱི་མེད་དགག་དེ་ཉིད་དོན་དམ་པར་རང་མཚན་གྱིས་གྲུབ་པ་མེད་པས། དོན་དམ་པར་ངོ་བོ་ཉིད་མེད་པར་འཆད་པའི་ལུགས་གཉིས་ཡོད་པས། དང་པོ་ནི་སེམས་ཙམ་པས་བཞེད། གཉིས་པ་ངོ་བོ་ཉིད་མེད་པར་སྨྲ་བས་བཞེད། ཅེས་གསུངས། ལུགས་གཉིས་པ་ནི། དབུ་མ་སྣང་བ་ལས། དེ་ཡང་ཚད་མས་ཡང་དག་

― GTD002_Page_0766 ―

^{[མ་དཔེ་གཟིགས་ན་འདིར་གནོན།]}

[Full Size]

པར་གྲུབ་པའི་བདག་ཉིད་ཀྱི་དོན་དམ་པ་ཞེས་ཀྱང་བྱ་ལ། ངོ་བོ་ཉིད་མེད་པའི་རབ་ཏུ་ཕྱེ་བའི་ཕྱིར་ངོ་བོ་ཉིད་མེད་པ་ཉིད་ཀྱང་ཡིན་ནོ། །དེའི་ཕྱིར་འདི་ནི་དོན་དམ་པ་ངོ་བོ་ཉིད་མེད་པ་ཡིན་ནོ་ཞེས་གསུངས། ༼ལ༽དེ་ཡང་དཔེར་ན་ཐག་ཁྲ་སྦྲུལ་དུ་གྲུབ་པ་མེད་ཀྱང་ཐག་ཁྲ་སྦྲུལ་སྣང་མེད་མི་དགོས་ལ། རྩ་བའི་ཐག་ཁྲ་མེད་ན་ཐག་ཁྲ་སྦྲུལ་སྣང་ཡང་གཏན་མེད་དགོས་པ་བཞིན་ཏེ། སྔ་མ་ནི་བློ་འཁྲུལ་བའི་སྣང་ཆ་ཙམ་ཡིན་པས། འཇོག་བྱེད་གཞན་མེད་ཀྱི། བློ་ལ་སྣང་ཙམ་མམ་རྟོག་པའི་བཏགས་ཙམ་གྱིས་འཇོག་ནུས་པ་ལྟར་ཀུན་བཏགས་རྟོག་པས་བཏགས་ཙམ་གྱིས་འཇོག་ནུས་ལ། ཐག་ཁྲ་ནི་དོན་རང་གི་ངོས་ནས་ཐག་ཁྲར་གྲུབ་པ་བློའི་སྣང་བ་ཙམ་གྱི་དབང་གིས་བཞག་པ་མིན་པ་ཞིག་དགོས་པ་ལྟར། གཞན་དབང་ངེས་པར་རང་མཚན་གྱིས་གྲུབ་པ་ཞིག་དགོས་ཏེ། དེ་མིན་ན་ཐག་ཁྲ་སྦྲུལ་དུ་རློམ་པ་དང་འདྲ་བར་བློའི་རློམ་པ་ཙམ་ཡིན་པས། ཐག་པའི་སྦྲུལ་དེར་གཞན་ལ་འཚེ་བ་སོགས་ཀྱི་ནུས་པ་མེད་པ་ལྟར། གཞན་དབང་ལ་ཡང་འབྲས་བུ་སྐྱེད་པ་སོགས་ཀྱི་ནུས་པ་མེད་དགོས་ཏེ། རྣམ་འགྲེལ་ལས། གལ་ཏེ་ཀུན་ལ་ནུས་མེད་ན། །ས་བོན་སོགས་ནི་མྱུག་སོགས་ལ། །ནུས་མཐོང་གལ་ཏེ་དེ་ཀུན་རྫོབ། །འདོད་ན་ཅི་སྟེ་དེ་ལྟར་འགྱུར། །ཞེས་དང༌། རྣམ་འགྲེལ་ཊཱིཀ་ཆེན་དུ་རྩ་བའི་འགྱུར་བཅོས་ནས་དྲངས་པ་ལས། དོན་བྱེད་ནུས་པ་གང་ཡིན་པ། །དེ་འདིར་དོན་དམ་ཡོད་པ་སྟེ། །ཞེས་པ་ལྟར། ངོ་བོ་ཉིད་མེད་པར་སྨྲ་བས་འདུས་བྱས་ཐམས་ཅད་དོན་དམ་པར་མེད་པར་སྨྲ་བ་ནི་དོན་གྱིས་འབྲས་བུ་སྐྱེད་པའི་ནུས་པ་ཡང་མེད་པར་ཁས་བླངས་སོང་

― GTD002_Page_0767 ―

^{[མ་དཔེ་གཟིགས་ན་འདིར་གནོན།]}

[Full Size]

བས། ས་བོན་གྱིས་མྱུ་གུ་སྐྱེད་པ་ལྟ་བུ་འཇིག་རྟེན་གྱིས་མཐོང་བ་དང་འགལ་ལ། དེ་བསྐྱེད་ཀྱང་སྐྱེད་པ་ཀུན་རྫོབ་ཏུ་ཡིན་ནོ་ཞེ་ན། དེ་སྐྱེད་ན་དོན་དམ་པར་སྐྱེད་པ་ལས་མ་འདས་པས། དེ་སྐྱེད་པར་འདོད་བཞིན་དུ་དེ་སྐྱེད་པ་ཀུན་རྫོབ་ཏུ་ཡིན་ནོ་ཞེས་སྨྲ་མི་རིགས་པར་གསུངས་ཏེ། ངས་མི་དེ་མཐོང་ཡང་མཐོང་བ་རྫུན་ཡིན་ཟེར་བ་ལྟ་བུ་ཞིག་ཏུ་སོང་བར་དགོངས་སོ། །དེ་ལྟར་རང་བཞིན་གྱིས་སྐྱེ་བ་མེད་ན་སྐྱེ་བ་སྔོན་དུ་འགྲོ་བའི་འགག་པ་ཡང་མེད་དགོས་ལ། དེར་མ་ཟད་རང་བཞིན་གྱིས་མེད་ན་དེ་ལས་ལྷག་པའི་འགག་ལུགས་མེད་པར་བཞེད་ཅིང༌། དབུ་མ་པ་དག་ནི། འགྲེལ་པ་དོན་གསལ་ལས། དངོས་པོ་ཐམས་ཅད་བྱུང་བ་ཉིད་ནས་རང་བཞིན་གྱིས་ངོ་བོ་ཉིད་མེད་པ་ལ་ཀུན་རྫོབ་ཏུ་ཡང་འགག་གོ་ཞེས་བྱ་བ་འགག་པ་དང༌། ཞེས་འགག་པ་ཟབ་པ་ཡིན་པས་དངོས་སྨྲ་བའི་བློར་མ་ཤོང་བར་འཆད་དོ། །གཞན་དབང་བདེན་གྲུབ་ཏུ་སྒྲུབ་པའི་རིགས་པའི་གནད་བསྡུས་པ་ནི། སྟོང་ཐུན་ལས། གཞན་དབང་གི་ངོ་བོ་བདེན་པར་མེད་ན་འབྲས་བུ་སྐྱེད་ནུས་ཀྱི་རྫས་སུ་མེད་དགོས་པས་གཏན་ནས་མེད་དགོས་ལ། ཞེས་གསུངས་ཏེ། འདིར་རྫས་ནི་རང་གི་ངོས་ནས་འབྲས་བུ་སྐྱེད་པའི་མཐུ་དང་ལྡན་པ་ཞིག་ལ་འདོད་པས་རྒྱུ་འབྲས་འཇོག་པ་ལ་དེ་ངེས་པར་དགོས་པར་འདོད་པས། འཇུག་པར་ཡང༌། གཞན་གྱི་ལྟར་ན་རྫས་ལ་ཆགས་པ་ཡིས། །འཇིག་རྟེན་གྲགས་པའི་རྣམ་གཞག་ཀུན་ཀྱང་བརླག །ཅེས་གསུང་སྟེ། ཐལ་འགྱུར་བས་རྫས་ཡོད་བཀག་པ་ཡང་འདི་ཡིན་གྱི། རྫས་

― GTD002_Page_0768 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ཐ་དད་ཀྱི་རྫས་ཉེར་ལེན་སོགས་ལ་བྱེད་པས་མི་འགོག་གོ །དེའི་ཕྱིར་རྫས་གཅིག་ཡོད་ཀྱང་རྫས་གྲུབ་ཡོད་མི་དགོས་ཏེ། བདེན་པའི་གཅིག་ཡོད་ཀྱང་བདེན་གྲུབ་ཡོད་མི་དགོས་པ་བཞིན་ནོ། །དེ་ལྟར་མ་ཕྱེ་ན། རྣམ་བཤད་དགོངས་པ་རབ་གསལ་ལས། བུམ་པ་ནི་རྫས་མིན་ཏེ་གཞལ་བྱ་ཡིན་པའི་ཕྱིར། དཔེར་ན་རྨི་ལམ་གྱི་བུམ་པ་བཞིན་ནོ། །ཞེས་སུན་འབྱིན་པ་དེ་ལྟ་བུ་ལ་སོགས་པའི་ཡུལ་ལ་འཇིག་རྟེན་གྱིས་གནོད་ཀྱི། ཞེས་འཇིག་རྟེན་གྱི་དངོས་པོ་འཇིག་རྟེན་ན་གྲགས་པའི་སེལ་བ་ཡིན་པས་མི་རུང་བར་གསུངས་པའི་ཕྱིར་དང༌། རྫས་རིན་ཐང་ཚང་བ་མེད་ན་ཕམ་པ་གཉིས་པ་ཡང་མེད་པར་འགྱུར་བའི་ཕྱིར། ཞེས་སྨྲའོ། །གཞན་དབང་དེ་ལྟར་ཡིན་དུ་ཆུག་ཀྱང་ཀུན་བཏགས་དང་ཡོངས་གྲུབ་འདུས་མ་བྱས་སུ་འདྲ་བ་ལ་བདེན་པར་ཡོད་མེད་གང་གིས་དབྱེ་ཞེ་ན། སྔར་གྱི་དཔེ་དེས་འགྲུབ་སྟེ། ཐག་ཁྲའི་སྦྲུལ་སྣང་དེ་འཁྲུལ་བ་ཙམ་གྱིས་བཞག་པ་ཡིན་ཀྱང༌། སྦྲུལ་གྱིས་སྟོང་པ་དེ་རློམ་པ་ཙམ་གྱིས་མི་འགྲུབ་པར་དོན་སྟེང་དུ་གནས་པ་ཞིག་དགོས་ཏེ། རློམ་པ་ཙམ་གྱིས་འགྲུབ་ན་ཐག་ཁྲས་ཀྱང་སྟོང་པར་རློམ་པས། དེ་སྟོང་པར་འགྱུར་དགོས་པ་ལ་མི་འགྱུར་བ་ནི། སྔ་མ་དངོས་པོའི་གཤིས་སུ་གྲུབ་པའི་རྟགས་ཡིན་པས། འདིར་ཡང་ཡོངས་གྲུབ་དེ་ཉིད་དངོས་པོའི་གཤིས་སུ་འགྱུར་བ་ལ་རློམ་ཙམ་མ་ཡིན་པ་ཞིག་དགོས་པར་གསུངས་སོ། །གཞན་དག་ན་རེ། དེ་ལྟ་ན་ཐག་ཁྲ་སྦྲུལ་གྱིས་སྟོང་པ་དང༌། ཤེས་བྱ་དང༌། ནམ་མཁའ་སོགས་དོན་དམ་དུ་འགྱུར་རོ་ཞེ་ན། རློམ་པ་ཙམ་གྱིས་འཇོག་མི་ནུས་ཀྱང་རློམ་པས་བཞག་ཙམ་ཡིན་པ་མི་

― GTD002_Page_0769 ―

^{[མ་དཔེ་གཟིགས་ན་འདིར་གནོན།]}

[Full Size]

འགལ་ཚུལ་འཆད་པར་འགྱུར་རོ། །ཆོས་ཉིད་ལ་མི་མཚུངས་ཏེ། དེ་འཇོག་བྱེད་གཙོ་བོ་འཕགས་པའི་མཉམ་གཞག་སོ་སོ་རིག་པའི་ཡེ་ཤེས་ཡིན་ལ། ཐག་ཁྲ་སྦྲུལ་གྱིས་སྟོང་པ་སོགས་འཇོག་བྱེད་གཙོ་བོ་ཚུར་མཐོང་གི་གཉིས་སྣང་འཁྲུལ་བའི་རྟོག་པ་ཡིན་པ་ངོ་བོ་ཉིད་མེད་པར་སྨྲ་བ་ཁྱོད་ཀྱང་འདོད་པའི་ཕྱིར། ཁྱབ་སྟེ། སྔ་མ་གང་གི་ངོར་འཇོག་པ་དེའི་ངོར་གཞི་དེ་ཁེགས་དགོས་ལ། ཕྱི་མའི་སྦྲུལ་གྱིས་སྟོང་པའི་ཐག་ཁྲ་ངེས་པའི་ཤུགས་ཀྱིས་སྟོང་པ་དེ་ཡང་ངེས་དགོས་ཤིང༌། དེའི་སྣང་ཆ་ཙམ་ལས་ཟུར་ན་སྟོང་པ་གཏན་ལ་དབབ་རྒྱུ་མེད་པའི་ཕྱིར་ཏེ། སྟོང་ཉིད་ལ་སྤྲོས་བྲལ་ཞེས་བཤད་ཀྱང་མེད་དགག་ཐམས་ཅད་ལ་མ་བཤད་པའི་ཕྱིར། ༼ཤ༽དེ་ཡང་མདོ་སྡེ་རྒྱན་ལས། ཇི་སྐད་བཤད་བཞིན་དོན་མིན་བཅོམ་ལྡན་དགོངས་པ་ཤིན་ཏུ་ཟབ། །མཁས་པ་རྣམས་ཀྱིས་ཚུལ་བཞིན་བརྟགས་ན་ཆོས་འདིས་སྐྲག་མི་འགྱུར། །ཞེས་པ་ལྟར། ཤེར་མདོར་རང་བཞིན་མེད་པར་གསུངས་པ་སྒྲ་ཇི་བཞིན་དུ་ཞེན་མི་རུང་བའི་ལུགས་ཡིན་པས། ལུགས་འདིར་དེ་ལྟར་ཞེན་ན་མེད་པར་ལྟ་བ་དང་མཚན་ཉིད་མེད་པར་ལྟ་བ་ཅན་དུ་འགྱུར་བར་གསུངས་ལ། དེ་གཉིས་ཀྱི་དོན་གང་ཞེ་ན། རྒྱ་ནག་འགྲེལ་ཆེན་ལས། མེད་པར་ལྟ་བ་དང་མཚན་ཉིད་མེད་པར་ལྟ་བའོ། །ལྟ་བ་གཉིས་པོ་འདི་ལ་ཡང་བཤད་པ་རྣམ་པ་གཉིས་ཡོད་དེ། ཁ་ཅིག་ན་རེ་མེད་པར་ལྟ་བ་ཞེས་བྱ་བ་ནི་གཞན་གྱི་དབང་དང་ཡོངས་སུ་གྲུབ་པ་མེད་པར་སྐུར་བའོ། །མཚན་ཉིད་མེད་པར་ལྟ་བ་ཞེས་བྱ་བ་ནི་ཀུན་བཏགས་མེད་པར་སྐུར་

― GTD002_Page_0770 ―

^{[མ་དཔེ་གཟིགས་ན་འདིར་གནོན།]}

[Full Size]

བའོ། །ཞེའོ། །ཞེས་སོགས་ཀྱིས་མཚན་ཉིད་གསུམ་ལ་ཆ་ཕྱེ་ནས་སྦྱོར་ཚུལ་གསུངས་པ་ཡང༌། འདི་ལྟར་གཞན་གྱི་དབང་གི་མཚན་ཉིད་དང༌། ཞེས་སོགས་ལ་འགྲིག་པ་ལྟར་སྣང་ཡང། ཀུན་བཏུས་ལེའུ་གསུམ་པར་བཅོམ་ལྡན་འདས་ཀྱི་ཆོས་མེ་ལོང་ཆེན་པོའི་ཆོས་ཀྱི་རྣམ་གྲངས་ལས་གསུངས་པ། བྱང་ཆུབ་སེམས་དཔའ་སྒྲ་ཇི་བཞིན་དུ་ཚུལ་བཞིན་མ་ཡིན་པར་ཆོས་རྣམས་འབྱེད་པ་ལ་ལྟ་བ་ངན་པ་ཉི་ཤུ་རྩ་བརྒྱད་འབྱུང་སྟེ། ལྟ་བ་ངན་པ་ཉི་ཤུ་རྩ་བརྒྱད་པོ་དག་གང་ཞེ་ན། མཚན་མར་ལྟ་བ་དང༌། བཏགས་པ་ལ་སྐུར་བ་འདེབས་པའི་ལྟ་བ་དང༌། ཀུན་རྟོག་ལ་སྐུར་བ་འདེབས་པའི་ལྟ་བ་དང༌། དེ་ཁོ་ན་ལ་སྐུར་བ་འདེབས་པའི་ལྟ་བ་དང༌། ཞེས་སོགས་དྲངས་པ་འདི་གཉིས་ལ་དངོས་སུ་མ་སྦྱར་ཀྱང་དོན་གྱིས་སྦྱོར་དགོས་པ་གོང་འོག་གི་འབྲེལ་གྱིས་ཤེས་ཏེ། ཀུན་བཏུས་དར་ཊཱིཀ་ལས། མེད་ལྟ་རང་གི་ངོ་བོའི་སྒོ་ནས་བསྟན་པ་གཅིག །དེ་ལ་ཡུལ་གྱི་སྒོ་ནས་ཕྱེ་བ་གསུམ་ཞེས་གསུངས་པའི་ཕྱིར། ཁྱབ་སྟེ། འདིའི་བཏགས་པ་ཀུན་བཏགས་དང༌། ཀུན་རྟོག་གཞན་དབང་དང༌། དེ་ཁོ་ན་ཡོངས་གྲུབ་ཡིན་པས། འདི་གསུམ་བྱེ་བྲག་ལ་སྦྱར་ནས་མེད་ལྟ་ཞེས་པ་སྤྱི་ལ་སྦྱར་བ་གོང་དུ་ཆོས་ཐམས་ཅད་ལ་མཚན་ཉིད་ཐམས་ཅད་ཀྱིས་ཞེས་སོགས་དང་ཆེས་འགྲིགས་ཤིང་ལྟ་བ་གཉིས་ཀྱི་རྒྱས་བཤད་འདི་ཡིན་གྱི་འདི་ལྟར་ཞེས་སོགས། དེའི་སྒྲུབ་བྱེད་སྟོན་པ་ཙམ་ཡིན་པའི་ཕྱིར། ཁ་ཅིག་ན་རེ། གཞན་དབང་དེ་ལྟར་ཡིན་ཀྱང་ཀུན་བཏགས་ལུགས་འདིར་ཡང་འཁོར་ལོ་བར་བས་རང་མཚན་གྱིས་མེད་པར་གསུངས་པ་ལྟར་བཟུང་དུ་རུང་སྟེ།

― GTD002_Page_0771 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་རང་མཚན་གྱིས་མ་གྲུབ་པའི་ཕྱིར་ཞེ་ན་མ་ཁྱབ་སྟེ། འཁོར་ལོ་བར་པར་གསུངས་པ་ལྟར་གྱི་རང་མཚན་གྱིས་མ་གྲུབ་པ་དང། ཐལ་འགྱུར་བའི་འདོད་པ་ལྟར་གྱི་རང་མཚན་གྱིས་མ་གྲུབ་པ་གཉིས་ཁྱད་པར་མེད་པས་ཀུན་བཏགས་དེ་གཉིས་གང་དུའང་འཛིན་མི་རུང་བའི་ཕྱིར་ཏེ། ཡོད་ན་རང་ངོས་ནས་ཡོད་དགོས་པ་གང་ཞིག །དེ་གཉིས་ཀས་རང་ངོས་ནས་མེད་པར་བཟུང་བའི་ཕྱིར། ཡང་ཁོ་ན་རེ། ཤེར་མདོས་ཀུན་བཏགས་རང་མཚན་གྱིས་མ་གྲུབ་པར་མ་བསྟན་པར་ཐལ། དེས་བསྟན་པ་ལྟར་གྱི་ཀུན་བཏགས་རང་མཚན་གྱིས་མ་གྲུབ་པར་འཛིན་པ་དེ་ཀུན་བཏགས་རང་མཚན་གྱིས་མ་གྲུབ་པར་འཛིན་པ་མ་ཡིན་པའི་ཕྱིར་ན་མ་ཁྱབ་སྟེ། རང་ངོས་ནས་མ་གྲུབ་པར་བསྟན་ན་རྟོག་པས་ཕར་བཏགས་ཙམ་དུ་སྟོན་དགོས་ལ། དེ་བསྟན་ན་རྟོག་བཏགས་ཙམ་མ་ཡིན་པར་གྲུབ་པ་ཁེགས་དགོས་པའི་རྒྱུ་མཚན་གྱིས་འདིའི་ཞར་ལ་བསྟན་པར་བཤད་པ་ཡིན་པའི་ཕྱིར། ཁོ་ན་རེ། དེ་དེའི་སྒྲས་ཟིན་སྒྲ་ཇི་བཞིན་པ་མ་ཡིན་པར་ཐལ། འདོད་པའི་ཕྱིར་ཞེ་ན། འདོད་པ་ཁོ་ན་སྟེ། དེའི་སྒྲས་ཟིན་ཚད་མས་བསལ་བ་གང་ཞིག །འདི་ཚད་མས་གྲུབ་པའི་ཕྱིར། ཁོ་ན་རེ། གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་རང་མཚན་གྱིས་མེད་པ་འདིའི་སྒྲས་ཟིན་སྒྲ་ཇི་བཞིན་པ་མ་ཡིན་པར་ཐལ། དེའི་ཕྱིར་ན་མ་ཁྱབ་སྟེ། ཆོས་ཐམས་ཅད་ལ་ཆ་མ་ཕྱེ་བར་གསུངས་པའི་གནད་ཀྱིས་དེ་སྒྲ་ཇི་བཞིན་པར་མི་འགྱུར་བའི་ཕྱིར། ཁ་ཅིག་གོང་དུ་འདོད་རིགས་ཏེ། ཆོས་ཐམས་ཅད་རང་མཚན་གྱིས་མ་གྲུབ་པའི་ཕྱིར་ཏེ་

― GTD002_Page_0772 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཐམས་ཅད་ཀུན་བཏགས་ཡིན་པའི་ཕྱིར་ཟེར་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བདེན་མེད་དུ་བཤད་པའི་བཤད་སྲོལ་ཆེན་པོ་དེ་ངོ་བོ་ཉིད་མེད་པར་སྨྲ་བའི་ཤིང་རྟའི་སྲོལ་མ་ཡིན་པར་ཐལ་བ་དང༌། ཆོས་ཐམས་ཅད་ངོ་བོ་ཉིད་མེད་པར་གསུངས་པ་སྒྲ་ཇི་བཞིན་དུ་བཟུང་རུང་བར་ཐལ་བ་དང༌། སེམས་ཙམ་པ་ཡང་ངོ་བོ་ཉིད་མེད་པར་སྨྲ་བ་ཡིན་པར་ཐལ་བ་སོགས་སྤྲོ་སླའོ། །༼ས༽དགོངས་འགྲེལ་ལས། ངོ་བོ་ཉིད་མེད་པ་རྣམ་པ་གསུམ་པོ་དེ་དག་ལ་དགོངས་ནས། དྲང་བའི་དོན་གྱི་མདོ་བརྗོད་པའི་རྣམ་པ་འདི་ལྟ་སྟེ། ཆོས་ཐམས་ཅད་ངོ་བོ་མེད་པ། མ་སྐྱེས་པ། མ་འགག་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པའོ། །ཞེས་ཆོས་སྟོན་ཏོ། །ཞེས་ངོ་བོ་ཉིད་མེད་པ་གསུམ་ག་ལ་དགོངས་པར་དངོས་སུ་གསུངས་ཀྱང༌། འདིར་གཉིས་སྨོས་པ་མཚན་གཞིའི་དབང་དུ་བྱས་ཏེ། ཀུན་བཏགས་དང་ཡོངས་གྲུབ་དགོངས་གཞིར་དངོས་སུ་གསུངས་ཀྱང༌། གཞན་དབང་དངོས་སུ་མ་གསུངས་པའི་དོན་ནོ། ། ༼ཧ༽ཁ་ཅིག་དགོངས་འགྲེལ་གྱི་ལུང་འདིེས་ཀྱང་མདོར་བསྟན་དངོས་བསྟན་གྱི་མཚན་ཉིད་ངོ་བོ་ཉིད་མེད་པ་ཀུན་བཏགས་ཡིན་པར་འགྲུབ་སྟེ། དེ་དང་འདིར་མ་སྐྱེས་པ་སོགས་སུ་གསུངས་པའི་དགོངས་གཞིའི་མཚན་ཉིད་ངོ་བོ་ཉིད་མེད་པ་འདྲ་བ་གང་ཞིག །འདི་ཀུན་བཏགས་ཡིན་པའི་ཕྱིར། དེར་ཐལ། འདི་སྐྱེ་འགག་དང་བྲལ་བས་དེའི་དགོངས་གཞིར་གསུངས་ལ། སྐྱེ་འགག་མེད་པའི་རྒྱུ་མཚན་དུ་རང་མཚན་གྱིས་མ་གྲུབ་པ་བཀོད་པས་མཚན་ཉིད་གཞན་གཉིས་སུ་མི་རུང་བའི་ཕྱིར་ཟེར་ན། འདིར་མཚན་

― GTD002_Page_0773 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ངོ་བོ་ཉིད་མེད་པ་དེས་དངོས་སུ་མ་བསྟན་པར་སྨྲ་མི་ནུས་ལ། དེ་ལྟ་ན་དེ་སྐྱེ་འགག་མེད་པར་གསུངས་པའི་རྒྱུ་མཚན་ཡང་དངོས་སུ་སྟོན་དགོས་པས། དེའི་ཤེས་བྱེད་ལ་འོལ་སྤྱི་ཙམ་དུ་རུང་ཡང་གཙོ་བོའི་དོན་མིན་ཏེ། འདིར་མཚན་ཉིད་ངོ་བོ་ཉིད་མེད་པ་ཞེས་པ་གཞི་ལྡོག་གི་ཀུན་བཏགས་གཙོ་ཆེ་ཡི། རང་ལྡོག་གཙོ་མི་ཆེ་བའི་ཕྱིར་ཏེ། རང་ལྡོག་གི་དབང་དུ་བྱས་པ་ཡིན་ན་སྐྱེ་བ་ངོ་བོ་ཉིད་མེད་པ་དངོས་སུ་མི་གསུང་བའི་རྒྱུ་མཚན་མེད་པའི་ཕྱིར། འདི་ལ་ཡང་རིགས་སྨྲ་རློམ་པ་ཁ་ཅིག་ན་རེ། འདིར་བསྟན་འཁོར་ལོ་བར་བས་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་མ་སྐྱེས་པར་གསུང་བར་ཐལ། མ་སྐྱེས་པ་སོགས་སུ་གསུངས་པའི་དགོངས་གཞི་འཆད་རིགས་པའི་ཕྱིར་ན་མ་ཁྱབ་སྟེ། རང་གི་མཚན་ཉིད་ཀྱིས་མ་སྐྱེས་པར་གསུངས་པའི་དགོངས་གཞི་ཡིན་པའི་ཕྱིར། འདོད་མི་ནུས་ཏེ། དེས་གཟུགས་སོགས་མ་སྐྱེས་པར་མ་གསུངས་པའི་ཕྱིར་ཏེ། ཐལ་འགྱུར་བ་ལ་གཟུགས་སྐྱེ་བ་མེད་པར་སྟོན་མི་དགོས་པའི་ཕྱིར། མ་གྲུབ་ན། དེས་ཐལ་འགྱུར་བ་ལ་ལས་འབྲས་དང་ཐར་པ་སོགས་མེད་པར་བསྟན་པར་ཐལ། ལས་དགེ་བའི་འབྲས་བུ་བདེ་བ་སོགས་སྐྱེ་བ་མེད་པར་བསྟན་པ་གང་ཞིག །ལས་དང་ཉོན་མོངས་སོགས་འགག་པ་མེད་པར་བསྟན་པའི་ཕྱིར། ༼ཨ༽ཁ་ཅིག་འདིར་མྱ་ངན་ཀུན་ཉོན་དུ་གསུངས་པ་སེམས་ཙམ་པའི་ལུགས་བྱས་ནས་ངོ་བོ་ཉིད་མེད་པར་སྨྲ་བའི་ལུགས་ལ་དགག་བྱ་བདེན་གྲུབ་ཏུ་འདོད་ཅེས་ཁྱད་འབྱེད་པ་མི་རིགས་ཏེ། གཉིས་ཀའི་ལུགས་ལ་ཀུན་ཉོན་ཡིན་པའི་

― GTD002_Page_0774 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། ཁོ་ན་རེ། དེའི་ལུགས་ལ་མྱ་ངན་ལ་ཀུན་ཉོན་མི་ཡོང་བར་ཐལ། རང་བཞིན་གྱི་མྱང་འདས་དེ་སྟོང་ཉིད་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བཞི་བརྒྱ་བར། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །སྟོང་ཉིད་མྱ་ངན་འདས་པ་སྟེ། །འདིར་ནི་དེ་གཉིས་འབའ་ཞིག་གོ །ཞེས་དང༌། དེའི་དར་ཊཱིཀ་ལས། དེས་ན་མཐོ་རིས་ཐོབ་བྱེད་ཀྱི་ཆོས་ནི་མདོར་ན་མི་འཚེ་བར་དེ་བཞིན་གཤེགས་པས་གསུངས་སོ། །ཐར་པ་ཐོབ་པར་བྱེད་པའི་ཆོས་ནི། ཆོས་རྣམས་རང་བཞིན་གྱིས་གྲུབ་པའི་སྟོང་པ་ཉིད་རང་བཞིན་གྱི་མྱང་འདས་དང་ཞེས་གསུངས་པའི་ཕྱིར། དེ་ལ་ཁོ་ན་རེ། མྱ་ངན་ལ་ཀུན་ཉོན་བཞག་ནས་མྱང་འདས་སྟོང་ཉིད་དུ་བཤད་ཚུལ་ཇི་ལྟར་ཡིན་ཞེ་ན། འདི་ནི་ཆེས་འགྲིག་པ་ཞིག་ཡིན་ཏེ། རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་དང༌། ཟླ་བའི་འགྲེལ་པ་ཚིག་གསལ་ལས། ལས་དང་ཉོན་མོངས་པ་ལོག་པས་སྐྱེ་བ་ལྡོག་པ་དེའི་ཕྱིར་སྟོང་པ་ཉིད་ཁོ་ན་སྤྲོས་པ་ཐམས་ཅད་ལོག་པའི་མཚན་ཉིད་ཅན་ཡིན་པས་མྱ་ངན་ལས་འདས་པ་ཞེས་བྱའོ། །ཞེས་པ་ལྟར་ཡིན་ཏེ། དཔེར་ན་ནམ་མཁའ་གཟུགས་ཅན་གཞན་གྱིས་སྒྲིབ་པའི་ཚེ་དེའི་བདག་ཉིད་དུ་སོང་ན་ནམ་མཁའ་ཡང་གདོས་བཅས་སུ་འགྲོ་བ་ལ། དེར་མ་སོང་བར་ཐོགས་རེག་བཅད་ཙམ་དུ་གནས་པ་དེ་ཀ་ནམ་མཁའ་ཡིན་པ་ལྟར། སེམས་ཀྱི་ངོ་བོ་དྲི་མས་སྒྲིབ་ཀྱང་རང་བཞིན་ལ་མ་ཞུགས་པར་རང་བཞིན་ལས་ཉོན་གྱི་སྤྲོས་པ་དེ་དག་གིས་དབེན་ཞིང་རྣམ་པར་དག་པའི་ཆ་

― GTD002_Page_0775 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་རང་བཞིན་གྱི་མྱང་འདས་ཡིན་ཏེ། སློབ་པའི་ཚེ་མྱ་ངན་དེ་རང་བཞིན་ལ་མ་ཞུགས་པའི་ཆ་ནས་རང་བཞིན་གྱི་མྱང་འདས་ཞེས་གསུངས་ལ། མི་སློབ་པའི་ཚེ་མྱ་ངན་དེས་རང་གི་ངོ་བོ་ཙམ་ཡང་སྒྲིབ་མི་ནུས་པས་མྱང་འདས་དངོས་ཀྱི་སྒྲ་ཐོབ་བོ། །དེས་ན་རང་བཞིན་གྱི་མྱ་ངན་དང་དེའི་ཚིག་ཟུར་གྱི་མྱ་ངན་དོན་མི་གཅིག་སྟེ། རང་བཞིན་སྨོས་པའི་དགོས་པ་ཡོད་པའི་ཕྱིར་དང༌། དཔེར་ན་གསེར་གྱི་རང་བཞིན་ལ་ཞུགས་པའི་བཙའ་མེད་ཅེས་པས་དེའི་རང་བཞིན་ལ་ཞུགས་པའི་བཙའ་ཡོད་པ་བཀག་ཀྱང༌། སྤྱིར་བཙའ་ཡོད་པ་མི་འགོག་པ་ལྟར་ཡིན་པའི་ཕྱིར། སེམས་ཙམ་པ་ཡང་རང་བཞིན་དྲི་མས་མ་བསླད་པའི་འོད་གསལ་བ་ཙམ་འདོད་ཀྱང༌། རྟོག་བཏགས་ཙམ་མ་ཡིན་པར་དྲི་མ་ཁོ་རང་གི་ངོས་ནས་སེམས་ཀྱི་ངོ་བོ་སྒྲིབ་པ་དེ་དབུ་མ་པས་རང་བཞིན་བསླད་པའི་དོན་དུ་འདོད་དེ། དེ་ལྟར་སྒྲིབ་པ་ཡིན་ན་འབྲལ་མི་རུང་དུ་འདོད་པའི་ཕྱིར། སེམས་ཙམ་པས་དེ་ངོ་བོ་སྒྲིབ་པ་ཙམ་དུ་འདོད་དེ། དེ་འདྲ་ཞིག་མ་བྱུང་ན་སྒྲིབ་པར་རློམ་ཙམ་ཡིན་པས་སྒྲིབ་པ་དངོས་སུ་མི་འགྱུར་ལ། དེའི་ཕྱིར་གང་ཟག་ཐམས་ཅད་སངས་རྒྱས་སུ་འགྱུར་ཞིང་ཀུན་ཉོན་གྱི་ཆོས་རྣམས་ཡེ་མེད་དུ་འགྲོ་བར་འདོད་དོ། །གནད་འདི་མ་གོ་བར་རང་བཞིན་ཞེས་པའི་ཚིག་ཙམ་ལ་རེ་བས་གྲུབ་མཐའི་གཏིང་དཔོག་ག་ལ་ནུས་ཏེ། མཐར་ཐུག་ཐེག་པ་གཅིག་དང་ཐེག་གསུམ་འདོད་པའི་རྩ་བ་ཡང་འདིས་བྱས་སོ། །རལ་གྲིའི་རྩེ་ན་རྣོ་བའི་རྡུལ་ཆགས་པ། །བརྡར་བ་ཙམ་གྱིས་ཟད་པའི་ལྕགས་ནག་མིན། །སྐྱེས་སྦྱངས་བློ་གྲོས་རྡོ་རྗེའི་གར་བུ་ནི། །བཅད་ཅིང་བརྡར་

― GTD002_Page_0776 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་རྣོན་པོའི་རང་འོད་འཆར། ། ༼ཀི༽འདི་ལ་ཁ་ཅིག་སེམས་ཀྱི་རང་བཞིན་དྲི་མས་བསླད་པ་དང་བྲལ་བ་དེ་སྐབས་འདིའི་མྱང་འདས་ཀྱི་དོན་ཡིན་པར་ཐལ། གོང་འོག་གི་འཆད་ཚུལ་འཐད་པའི་ཕྱིར། འདོད་ན་དེ་སྟོང་ཉིད་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཉིད་གཞན་དབང་གིས་སྟོང་པ་སྟོང་ཉིད་དུ་འཆད་པ་དོལ་བོ་པ་སོགས་ཀྱི་ལུགས་ཡིན་པའི་ཕྱིར་ཟེར་ན། བློའི་ཤེད་མ་ཕྱེ་བ་རྣམས་ལ་དོགས་པ་འདི་སྐྱེ་བ་ཤིན་ཏུ་བདེན་པས་བཤད་པར་བྱ་སྟེ། ཕ་རོལ་བོས་ཡོངས་གྲུབ་གཞན་དབང་གིས་སྟོང་བར་བཤད་པ་ནི། ལང་གཤེགས་ལས་སྟོང་ཚུལ་བདུན་གསུངས་པའི་ཐ་མ་ས་ཕྱོགས་བུམ་པས་སྟོང་པ་ལྟ་བུ་དོན་གཞན་གྱི་རྟེན་བརྟེན་པའི་ཚུལ་དུ་གྲུབ་པའི་སྟོང་པ་ཡིན་ལ། སྟོང་གཞི་ཡང་ཡོངས་གྲུབ་ཀྱི་སྟེང་གི་ཡིན་ནོ། །འདིར་བཤད་པ་ནི་དྲི་མ་སེམས་ཀྱི་རང་བཞིན་ལ་ཞུགས་ན་སེམས་ཀྱི་རང་བཞིན་དང་དེ་གཉིས་ཡུལ་དུས་གནས་སྐབས་གང་ལ་ལྟོས་ཏེ་དབྱེ་མི་རུང་ཡིན་དགོས་པས་སེམས་ཀྱི་རང་བཞིན་མཐོང་བའི་ཡེ་ཤེས་རྣམ་པར་མི་རྟོག་པའི་ངོ་བོར་ཡང་དྲི་མ་ལས་ཉོན་བག་ཆགས་དང་བཅས་པ་དེ་དག་གི་སྤྲོས་པ་ཁེགས་མི་ནུས་ལ། རིགས་ཤེས་ཀྱི་ངོར་ཀུན་རྫོབ་ཀྱི་ཆོས་ཡོད་པ་རིགས་ངོས་དགག་བྱར་དོལ་བོ་བ་མིན་པ་དག་གིས་ཀྱང་འདོད་དགོས་སོ། །དེས་ན་དེའི་སྟོང་གཞིར་ཡང་སེམས་དེ་ཉིད་ཡོང་སྟེ། སེམས་སྟེང་དུ་ཆོས་བདག་བཙལ་མཐར་སྒྲུབ་ཕྱོགས་ནས་རྙེད་རྒྱུ་ཞིག་བྱུང་ན་སེམས་སྟེང་གི་ཆོས་བདག་ཡིན་དགོས་ཀྱི་མ་བཙལ་བ་ཞིག་རྙེད་དོན་མེད་པའི་ཕྱིར། འོ་ན་དེའི་མཐར་ཆོས་ཉིད་ཀྱང་མི་རྙེད་པར་འགྱུར་རོ་སྙམ་ན་མ་ཡིན་ཏེ། མི་

― GTD002_Page_0777 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་ལ་ནོར་བསླང་བའི་ཚེ་ནོར་མེད་ཅེས་སྨྲ་བ་ན་མེད་ཙམ་བློ་ངོར་འཕེན་གྱི་ནོར་མེད་པ་དེ་ཡོད་པར་འཕེན་དོན་ཡང་མེད་ལ། དེ་ལས་གཞན་པའི་ཡོད་པ་བློར་འཕེན་རྒྱུ་ཡང་མེད་པ་ལྟར་རམ། གཟུགས་ཅན་གཞན་མ་མཐོང་བ་ལ་ནམ་མཁའ་མཐོང་ཞེས་བཏགས་ཙམ་ལྟ་བུ་ཡིན་པའི་ཕྱིར། སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཡིན་དོན་འདི་རྟོགས་པར་གྱིས། །ཞེས་གསུངས་པའི་ཕྱིར་དང༌། །ལྕང་སྐྱ་རིན་པོ་ཆེའི་ལྟ་མགུར་དུ། །ཕ་རྒན་བཙལ་བས་ནི་མ་རྙེད་པ་དེ། །མ་རྒན་རྙེད་པ་ཁོ་ཡིན་པར་འདུག་པས། །ཞེས་གསུངས་པའི་ཕྱིར། དེ་ལྟ་མ་ཡིན་ན་གནས་ལུགས་ཀྱི་ངོ་བོ་སྒྲིབ་པའི་དྲི་མ་ལམ་གྱི་སྟོབས་ཀྱིས་ཟད་ཆའི་འགོག་བདེན་དེ་སྟོང་ཉིད་མ་ཡིན་པར་ཐལ། གནས་ལུགས་ཁོ་རང་གི་བདག་ཉིད་བསླད་བྱེད་ཀྱི་དྲི་མ་གདོད་ནས་ཟད་པ་དེ་ཆོས་ཉིད་མ་ཡིན་པའི་ཕྱིར། རྟགས་ཁས་ཁྱབ་སྟེ། དེ་གཉིས་ལས་ཕྱི་མ་ཆོས་ཉིད་དུ་འཇོག་པ་ལ་དོགས་པ་ཡང་ཆེར་མེད་ལ། སྔ་མ་ནི་ལམ་གྱི་སྟོབས་ཀྱིས་ཡིན་ཞིང༌། ཆོས་ཉིད་ནི་བཅོས་མ་མ་ཡིན་པ་ཞིག་དགོས་སྙམ་ནས་རང་རྒྱུད་པ་སོགས་འགོག་བདེན་ཆོས་ཉིད་མ་ཡིན་པར་བཞེད་ལ། སེམས་ཙམ་པས་དྲི་མ་ཟད་པ་ལམ་གྱི་སྟོབས་ཀྱིས་ཡིན་ཀྱང་གང་གི་ངོར་ཟད་པའི་ཆོས་དབྱིངས་ནི་ནམ་ཡང་འགྱུར་ལྡོག་མེད་པས་སེམས་ཀྱི་རང་བཞིན་གདོད་ནས་གནས་པ་དེ་ཡིན་པའི་སྐྱོན་མེད་པར་སྨྲ་སྟེ། འདིར་ཡང་རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་རྣམ་པར་གནས་པའི་རྒྱུ་མཚན་གྱིས་སྐྱེ་འགག་

― GTD002_Page_0778 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་ཅིང་ཀུན་ཉོན་ཐམས་ཅད་དང་བྲལ་བའི་རང་བཞིན་གྱི་མྱང་འདས་སུ་གསུངས་པ་ཡང། རྒྱུད་བླ་མར། རྣམ་གཞག་རྣམ་པ་བཅུའི་ནང་ནས་གནས་སྐབས་ཀྱི་དོན་ངོ་བོ་སྒྲིབ་བྱེད་ཡོད་མེད་ཀྱི་མིང་འདོགས་སོ་སོ་བར་བྱས་ཀྱང་རང་བཞིན་ནམ་ཡང་དྲི་མས་བསླད་པ་མེད་པས་སྔ་ཕྱིས་དུས་ཀུན་ཏུ་མི་འགྱུར་བར་གནས་པ་འགྱུར་བ་མེད་པའི་དོན་དུ་བཤད་པ་དང༌། རྒྱན་ལས། ཕྱི་མ་ཕྱི་མའི་རྟེན་ཡིན་པས། །ཞེས་པ་ལྟར་དཀྱུས་གཅིག་ཏུ་སོང་བ་དགོས་ཀྱི་སྐྱེ་འགག་མེད་པ་ཙམ་གྱི་རྒྱུ་མཚན་དུ་སྔ་ཕྱིས་དུས་ཀུན་ཏུ་རྣམ་པར་གནས་པའི་ཕྱིར་ཞེས་བཀོད་པས་མདོའི་དོན་མི་རྫོགས་སོ། །གཞན་ཡང་སེམས་ཀྱི་རང་བཞིན་དྲི་མས་བསླད་པ་མ་ཞུགས་པ་ཆོས་ཉིད་ཡིན་པར་ཐལ། སེམས་ཀྱི་རང་བཞིན་འོད་གསལ་བ་ཆོས་ཉིད་ཡིན་པའི་ཕྱིར། རྣམ་འགྲེལ་ལས། སེམས་ཀྱི་རང་བཞིན་འོད་གསལ་དེ། །དྲི་མ་རྣམས་ནི་གློ་བུར་བ། །ཞེས་གསུངས་པའི་ཕྱིར། ཁྱབ་སྟེ། འདིའི་རང་བཞིན་འོད་གསལ་བ་དེ་ཆོས་ཉིད་ལ་བྱས་ནས་ནམ་མཁའ་དང་དཔེ་སྦྱར། དྲི་མ་གློ་བུར་བ་སྤྲིན་དང་དཔེ་སྦྱར་ནས་དེ་ནམ་མཁའི་ངོ་བོར་ཟད་པ་ལྟར་དྲི་མ་ཆོས་དབྱིངས་སུ་ཟད་པར་འདོད་པའི་ཕྱིར། ཕར་ཕྱིན་མཐའ་དཔྱོད་དུ་རང་བཞིན་དྲི་མས་མ་བསླད་པའི་ཤེས་བྱེད་ལ། ཐེག་བསྡུས་ཀྱི་ཆུ་ཁམས་གསེར་དང་ནམ་མཁའ་ཞེས་སོགས་དྲངས་པ་ལེའུ་དང་པོའི་ཆོས་ཉིད་རྒྱས་བཤད་ཀྱི་སྐབས་ཡིན་པ་གང་ཞིག །ལེའུ་བཞི་པར་ཡང༌། ཆོས་ཀྱི་དབྱིངས་ནི་རང་བཞིན་གྱིས། །རྣམ་པར་དག་ཕྱིར་ནམ་མཁའ་བཞིན། །གཉིས་ནི་གློ་བུར་བྱུང་བ་སྟེ། །ཞེས་གསུངས་པའི་ཕྱིར། འདིའི་གཉིས་ཞེས་པ་དག་མ་དག་

― GTD002_Page_0779 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཡིན་ལ། ཞིབ་ཆ་འགྲེལ་བཤད་དུ་གསལ། དྲི་མ་སེམས་ཀྱི་རང་བཞིན་ལ་མ་ཞུགས་པ་དེ་ཆོས་ཉིད་དུ་འཆད་ཚུལ་གཞན་ཡང་ཡོད་དེ། རྣམ་འགྲེལ་ཐར་ལམ་གསལ་བྱེད་ལས། སེམས་ལ་བདག་འཛིན་གྱི་མུན་པ་བབ་པ་དེའི་རང་བཞིན་ལ་མ་ཞུགས་པའི་དོན་ཏེ། ཞུགས་ན་བདག་འཛིན་གྱི་འཛིན་སྟངས་སེམས་ཀྱི་གནས་ལུགས་ལ་ཇི་ལྟར་ཡོད་པ་དེ་དང་མཐུན་པར་འགྱུར་ལ། དེ་ལྟར་ན་བདག་མེད་མེད་ཅིང་བདག་ཡོད་པར་འགྱུར་རོ་ཞེས་བདག་འཛིན་དེའི་ཞེན་ཚུལ་དོན་གྱི་སྡོད་ལུགས་སུ་སོང་མ་སོང་ལ་གསུངས་པས། དེས་བཟུང་བ་ལྟར་མ་གྲུབ་པ་དྲི་མ་རང་བཞིན་ལ་མ་ཞུགས་པའི་དོན་དུ་གསལ་བར་བསྟན་པའི་ཕྱིར། དེ་ལྟར་མ་གོ་བར་ཆོས་ཉིད་དྲི་མས་བསླད་མ་བསླད་ཀྱི་དོགས་པ་འབྲེལ་མེད་སྙམ་ནས་རང་བཞིན་དེ་ལྡན་མིན་ཞིག་ཏུ་སྨྲ་བ་སོགས་མཐོང་རྒྱ་ཆུང་བས་བློ་གུ་དོག་པར་ཟད་དོ། ། ༼ཁི༽འདི་ལ་ཡིག་ཆར་སྐྱེ་བ་ངོ་བོ་ཉིད་མེད་པ་མ་སྐྱེས་པ་སོགས་སུ་གསུངས་པའི་དགོངས་གཞིར་དངོས་སུ་མ་བསྟན་ན་ཇོ་ནང་བ་ལ་སྐྱོན་བསྟན་པ་དག་གིས་ཀྱང་གནོད་པར་གསུངས་པའི་ཚུལ་ནི། དོན་དམ་པ་ངོ་བོ་ཉིད་མེད་པ་བར་བའི་དགོངས་གཞིར་དངོས་སུ་མ་བསྟན་ན་བར་བའི་ཡོངས་གྲུབ་རང་མཚན་གྱིས་མེད་པར་གསུངས་པའི་དགོངས་གཞི་དངོས་སུ་མ་བསྟན་པར་འགྱུར་བས། འདིར་དྲང་དོན་དུ་དངོས་སུ་བཀྲལ་བའི་འཁོར་ལོ་བར་བ་དེར་ཡོངས་གྲུབ་རང་མཚན་གྱིས་མེད་པར་མ་བསྟན་པར་འགྱུར་ཞེས་བཀག་པ་ཡིན་ལ། རང་ལུགས་ལ་ཡང་སྐྱེ་བ་ངོ་བོ་ཉིད་མེད་པ་གཞན་དབང་མ་སྐྱེས་པ་སོགས་སུ་གསུངས་

― GTD002_Page_0780 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དགོངས་གཞིར་དངོས་སུ་མ་བསྟན་ན། གཞན་དབང་མ་སྐྱེས་པ་སོགས་སུ་གསུངས་པའི་དགོངས་གཞི་དངོས་སུ་མ་བསྟན་པར་འགྱུར་ཏེ། ཀུན་བཏགས་རང་མཚན་གྱིས་མེད་པ་ལ་དགོངས་ནས་གཞན་དབང་མ་སྐྱེས་པ་སོགས་སུ་གསུངས་ཟེར་དོན་མེད་ཅིང༌། གཞན་དབང་རང་སྟེང་ན་དེའི་དགོངས་གཞིར་དངོས་སུ་བསྟན་པའི་སྐྱེ་མེད་ཅིག་མེད་པའི་ཕྱིར། འདོད་ན། འདིར་དངོས་སུ་དྲང་དོན་དུ་བཀྲལ་བའི་འཁོར་ལོ་བར་བ་དེར་མ་སྐྱེས་པ་སོགས་སུ་གསུངས་པའི་ཆོས་ཀྱི་ནང་ན་གཞན་དབང་མེད་ཅེས་སྨྲ་དགོས་པར་འགྱུར་བའི་དོན་ནོ། །འདི་དག་ལ་དཔག་ན་ཡང་སྐྱེ་བ་ངོ་བོ་ཉིད་མེད་པ་གཞན་དབང་ཁོ་ན་རང་ངོས་ནས་མ་གྲུབ་པར་གསུངས་པའི་དགོངས་གཞི་དང༌། དོན་དམ་པ་ངོ་བོ་ཉིད་མེད་པ་ཡོངས་གྲུབ་ཁོ་ན་རང་ངོས་ནས་མ་གྲུབ་པར་གསུངས་པའི་དགོངས་གཞི་ཡིན་ཚོད་དུ་སྣང་སྟེ། དེ་མིན་ན་སྐྱེ་བ་ངོ་བོ་ཉིད་མེད་པ་གཞན་དབང་མ་སྐྱེས་པར་གསུངས་པའི་དགོངས་གཞིར་དངོས་སུ་མ་བསྟན་ཀྱང་དོན་དམ་པ་ངོ་བོ་ཉིད་མེད་པ་དེར་དངོས་སུ་བསྟན་བྱས་ཆོག་པས། ཇོ་ནང་བར་བརྗོད་པའི་སྐྱོན་འཇུག་དོན་མེད་པའི་ཕྱིར། གོང་དུ་ཡིག་ཆའི་གསུངས་ཟིན་དགོངས་པ་ཡིན་མིན་བརྟག་དགོས་ཞེས་པའི་རྒྱུ་མཚན་གཅིག་འདི་ཡིན་ནོ། །དེ་ལ་ཁོ་ན་རེ། དོན་དམ་པ་ངོ་བོ་ཉིད་མེད་པ་དེ་མ་སྐྱེས་པ་སོགས་སུ་གསུངས་པའི་དགོངས་གཞི་མ་ཡིན་པར་ཐལ། དེ་གཞན་དབང་མ་སྐྱེས་པར་གསུངས་པའི་དགོངས་གཞི་མ་ཡིན་པ་གང་ཞིག །ཡོངས་གྲུབ་དོན་ལ་ཡང་སྐྱེ་བ་མེད་པའི་ཕྱིར། རྟགས་དང་པོ་ཁས་ཟེར་ན་མ་ཁྱབ་སྟེ། མདོ་ལས་ཆོས་ཐམས་ཅད་སྐྱེ་བ་མེད་མཉམ་དུ་གསུངས་

― GTD002_Page_0781 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དེར་མཚན་ཉིད་གསུམ་གའི་སྟེང་ན་གོ་རྒྱུ་ཐུན་མོང་མ་ཡིན་པ་རེ་ཡོད་པས། དེ་དགོངས་གཞིར་བཀྲལ་བ་ཡིན་པའི་ཕྱིར། ཁྱོད་ལྟར་ན་བུམ་པ་རང་མཚན་གྱིས་སྐྱེ་བ་མེད་པར་གསུངས་པ་དེ་ཆོས་སྐུའི་ངོ་བོ་གོང་འཕེལ་དུ་འགྲོ་རྒྱུ་མེད་པ་ལ་དགོངས་པར་ཐལ། སྐྱེ་མེད་བརྒྱད་ཀ་ཐམས་ཅད་ཀྱི་དགོངས་གཞིར་སྦྱོར་འདོད་འདུག་པའི་ཕྱིར། ཡང་ཁ་ཅིག་ན་རེ། དགོངས་འགྲེལ་གྱིས་གཞན་དབང་མ་སྐྱེས་པར་གསུངས་པའི་དགོངས་གཞིར་དངོས་སུ་བསྟན་པར་ཐལ། གཞན་དབང་རང་མཚན་གྱིས་མེད་པར་གསུངས་པའི་དགོངས་གཞིར་དངོས་སུ་བསྟན་པའི་ཕྱིར་ན་མ་ཁྱབ། རྟགས་གྲུབ་སྟེ། ངོ་བོ་ཉིད་མེད་པར་གསུངས་པའི་དགོངས་གཞིར་དངོས་སུ་བསྟན་པའི་ཕྱིར་བྱས་པ་ལ། འོ་ན་འདུས་བྱས་ཡིན་ན་ཁྱོད་ཀྱི་གཞན་དབང་ཁྱོད་རང་མཚན་གྱིས་མེད་པར་གསུངས་པའི་དགོངས་གཞིར་དངོས་སུ་བསྟན་པའི་ཁྱབ་པར་ཐལ། འདོད་པའི་ཕྱིར། འདོད་ན། གཞན་དབང་སྐྱེ་བ་ཆོས་ཅན། དེར་ཐལ། དེའི་ཕྱིར། འདོད་ན། གཞན་དབང་སྐྱེ་མེད་འགག་མེད་སོགས་སུ་གསུངས་པའི་དགོངས་གཞིར་དངོས་སུ་བསྟན་པར་ཐལ། སྐྱེ་སོགས་རང་མཚན་གྱིས་མེད་པར་གསུངས་པའི་དགོངས་གཞིར་དངོས་སུ་བསྟན་པ་གང་ཞིག་སྐྱེ་མེད་ཀྱི་དོན་དེ་ཡིན་པའི་ཕྱིར་ན་མ་ཁྱབ་སྟེ། གཞན་དབང་དོན་དམ་པར་སྐྱེ་བ་མེད་པར་གསུངས་པའི་དགོངས་གཞིར་དངོས་སུ་མ་བསྟན་ཀྱང༌། གཞན་དབང་སྐྱེ་བ་དོན་དམ་པར་མེད་པར་གསུངས་པའི་དགོངས་གཞིར་དངོས་སུ་བསྟན་པ་མི་འགལ་བའི་ཕྱིར་ཏེ། གཞན་དབང་དོན་དམ་པར་མི་སྐྱེ་བ་གཞན་དབང་གི་སྟེང་

― GTD002_Page_0782 ―

^{[མ་དཔེ་གཟིགས་ན་འདིར་གནོན།]}

[Full Size]

གི་ཀུན་བཏགས་ཡིན་ལ། ཕྱི་མ་གཞན་དབང་སྐྱེ་བའི་སྟེང་གི་ཀུན་བཏགས་ཡིན་པའི་ཕྱིར། ༼གི༽དེ་ལ་སྤྱོད་ཡུལ་ནི། རྣམ་པ་རྣམ་པ་སྤྱོད་ཡུལ་དང༌། །ཞེས་དམིགས་ཡུལ་གྱི་མིང་ལ་སྤྱོད་ཡུལ་དུ་བཏགས་པ་སྐབས་དུ་མར་འབྱུང་ཞིང། འདིར་ཡང་རྒྱ་ནག་འགྲེལ་ཆེན་ལས། གཟུགས་ཀྱི་ཕུང་པོ་ལ་སོགས་པ་ནི་རྣམ་པར་རྟོག་པ་དེའི་དམིགས་པའི་རྐྱེན་ཡིན་པའི་ཕྱིར། དེའི་སྤྱོད་ཡུལ་ཞེས་བྱའོ། །ཞེས་གསུངས་ཏེ། འདིའི་དམིགས་རྐྱེན་ཞེས་པ་སྣང་བའི་དམིགས་རྐྱེན་ནམ། དམིགས་རྐྱེན་བཏགས་པ་ལ་འཆད་དགོས་པས་རྣམ་པར་རྟོག་པ་ཡང་གཙོ་བོར་རང་རང་འཛིན་པའི་རྟོག་པ་ལ་བྱ་སྟེ། དེ་བྱས་ན་དམིགས་པ་དང་ཞེན་གཞི་དང་ཞེན་ཡུལ་སོ་སོར་དབྱེ་མི་དགོས་པས་སྤྱོད་ཡུལ་དངོས་སུ་ཡང་རུང་ལ། དེ་དག་གི་སྟེང་གི་བདག་འཛིན་ལྟ་བུ་ཞེན་གཞི་དང་ཞེན་ཡུལ་ཐ་དད་པ་རྣམས་ཀྱི་དམིགས་པ་རྐྱང་བ་ནི་སྤྱོད་ཡུལ་དུ་མི་རུང་སྟེ། རྣམ་མཁྱེན་ཡང་བར་ཆད་མེད་ལམ་གྱི་སྤྱོད་ཡུལ་དུ་འདོད་ན། སེམས་ཅན་གྱི་མངོན་སུམ་གྱི་སྤྱོད་ཡུལ་དུ་མི་འགྱུར་བར་སངས་རྒྱས་ཁོ་ནའི་མངོན་སུམ་གྱི་སྤྱོད་ཡུལ་དུ་འགྱུར་བ་ཞིག་མེད་པར་འགྱུར་རོ། །ཀུན་བཏགས་པའི་མཚན་ཉིད་ཀྱི་གནས་ཞེས་པ་དེ་འདོགས་པའི་གཞི་ཡིན་ཏེ་གོ་སླ་ལ། གདགས་གཞི་བཏགས་ཆོས་སུ་ཐལ་བ་སོགས་ཚིག་སྐྱོན་མ་བཀག་ན་གདགས་གཞི་ཕུང་པོ་ལ་བཏགས་པའི་ཆོས་བདག་སོགས་སྨྲ་དགོས་པར་འགྱུར་རོ། །འདུ་བྱེད་ཀྱི་མཚན་མ་ནི། རྒྱ་ནག་འགྲེལ་ཆེན་ལས། འདུ་བྱེད་ནི་ལྟ་བའི་རྣམ་པ་སྟེ། འདུ་བྱེད་ལ་བྱེ་བྲག་ཏུ་དམིགས་པའི་ཤེས་པའོ། །མཚན་མ་ནི་རྒྱུ་མཚན་གྱི་རྣམ་པ་སྟེ། དམིགས་པར་བྱ་བའི་མཚན་

― GTD002_Page_0783 ―

^{[མ་དཔེ་གཟིགས་ན་འདིར་གནོན།]}

[Full Size]

མའོ་ཞེས་དང༌། འདུ་བྱེད་ཀྱི་མཚན་མ་ཞེས་བྱ་བ་ནི་འདུས་བྱས་ཀྱི་རྣམ་པ་སྟེ། ཐམས་ཅད་ཀྱང་གཞན་གྱི་དབང་གི་རྣམ་པའི་མཚན་ཉིད་དོ་ཞེའོ། །ཞེས་ཐུན་མོང་མ་ཡིན་པའི་ཁྱད་པར་གྱི་སྒོ་ནས་ངེས་དགོས་པ་ལ་འཆད་ཚུལ་གཅིག་དང༌། མཚན་མ་ཞེས་པ་མཚན་ཉིད་ལ་བྱས་ནས་འདུས་བྱས་ཀྱི་མཚན་ཉིད་དམ་འདུས་བྱས་ཀྱི་ངོ་བོར་གྲུབ་པ་ཙམ་ལ་བྱ་ཚུལ་གཅིག་སྟེ་གཉིས་བཀོད་ནས་ཕྱི་མ་བཟང་བར་བཤད་ཀྱང་སྔ་མ་གནད་ཆེ་སྟེ། འདུས་བྱས་ཀྱི་ཆོས་རྣམས་བློ་ཡུལ་དུ་བྱེད་པའི་ཚེ་རང་རང་གི་ཐུན་མོང་མ་ཡིན་པའི་མཚན་མ་སྟེ། མི་འདྲ་བའི་ཁྱད་པར་གྱི་རྒྱུ་མཚན་རེ་རེ་ཤར་བའི་སྒོ་ནས་ངེས་དགོས་ལ། འདུས་མ་བྱས་རྣམས་སྤྱིའི་རྣམ་པ་ཡིད་ལ་བྱ་དགོས་པ་ནི་མྱོང་བས་འགྲུབ་པས་ལུགས་འདིར་ཡང་དེ་རང་སྤྱིའི་དོན་དུ་མི་འདོད་ཀྱང་སྣང་ཚུལ་དེ་ལྟར་འདོད་དགོས་པའི་ཕྱིར། འདྲ་དང་མི་འདྲ་ཉིད་ཕྱིར་དང༌། །ཞེས་པའི་ཐད་ཀྱི་རྣམ་འགྲེལ་ཊཱིཀ་ཆེན་ལས། འདྲ་བ་སྟེ་རང་སྣང་ཡུལ་དུ་བྱེད་པའི་ཤེས་པ་ལ་ཐུན་མོང་བར་སྣང་བ་དང༌། མི་འདྲ་བ་སྟེ་རང་སྣང་ཡུལ་དུ་བྱེད་པའི་ཤེས་པ་ལ་ཐུན་མོང་མ་ཡིན་པར་སྣང་བ་གཉིས་སུ་ངེས་པའི་ཕྱིར། ཞེས་སོགས་དང༌། རྒྱུ་མཚན་གཞན་ནི་ཡོད་པ་ན། །བློ་ནི་ཡོད་དང་མེད་ཕྱིར་རོ། །ཞེས་སོགས་རྩ་འགྲེལ་རྣམས་ཀྱིས་ཀྱང་འགྲུབ་པའི་ཕྱིར་རོ། །༼ངི༽སྐབས་འདིར་ཊཱིཀ་བྱེད་ཕལ་མོ་ཆེས་འདིའི་དངོས་བསྟན་གྱི་གཞན་དབང་ལ་ཆོས་ཐམས་ཅད་ཀྱི་སྟེང་གི་གཞན་དབང་ཡོང་བར་འདོད་དེ། ནམ་མཁའི་གཞན་དབང་ལ་ནམ་མཁའ་འཛིན་པའི་ཚད་མ་བཞག་པའི་ཕྱིར།

― GTD002_Page_0784 ―

^{[མ་དཔེ་གཟིགས་ན་འདིར་གནོན།]}

[Full Size]

དེའི་རྒྱུ་མཚན་ཡང་ཆོས་ཉིད་གཏན་ལ་འབེབ་པ་ལ་དཔྱོད་པའི་གཞིར་རང་མཚན་གྱིས་གྲུབ་པ་ཞིག་དགོས་པའི་ཕྱིར་དང༌། སྟོང་གཞི་བདེན་གྲུབ་ཅིག་མེད་ན་ཡོངས་གྲུབ་ཀྱང་བདེན་མེད་དུ་འགྲོ་བར་སེམས་ཙམ་པ་ཡང་ཁས་ལེན་པའི་ཕྱིར། དང་པོ་གྲུབ་སྟེ། རྣམ་འགྲེལ་ལས། རང་གི་མཚན་ཉིད་གཅིག་གཞལ་བྱ། །ཡོད་མེད་ཉིད་དུ་དཔྱོད་རྣམས་ཀྱིས། །དོན་བྱ་དེ་ལས་འགྲུབ་ཕྱིར་རོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། དབུ་མ་པའི་ཐད་དུའང་འདི་ཉིད་ལས། ཆོས་རྣམས་རང་གི་མཚན་ཉིད་ཀྱི་གནས་ཚུལ་ཇི་ལྟར་ཡོད་དཔྱོད་པའི་དོན་དམ་དུ་ཡོད་པ་ལ་ཆོས་ཅན་མེད་ན་ཆོས་ཉིད་ཡན་གར་བར་གནས་པའི་མཐུ་མེད་པས། གཞན་དབང་གི་རྟེན་འབྲེལ་རྣམས་རང་བཞིན་གྱིས་གྲུབ་པས་སྟོང་ན་ཡོངས་གྲུབ་ཀྱང་རང་བཞིན་གྱིས་མ་གྲུབ་པར་འགྱུར་ཞེས་ལུགས་སྔ་མས་ཀྱང་སྨྲ་ལ་ཞེས་དང༌། རྩ་ཤེས་ཊཱིཀ་ཆེན་ལས། བདེན་པར་གྲུབ་པའི་རྟེན་རྫུན་པས་བྱེད་པ་འགལ་བའི་ཕྱིར། ཚུལ་འདི་ལ་དབུ་སེམས་གཉིས་ཀ་མཐུན་ནོ། །ཞེས་གསུངས་པའི་ཕྱིར། དེས་ན་གཟུགས་དང་གཟུགས་འཛིན་ཚད་མ་དང༌། དེ་མྱོང་བའི་རང་རིག་རྣམས་ཀྱི་ཆོས་ཉིད་ཡིན་ཁྱབ་མཉམ་ཡིན་པས། འདུས་བྱས་སྟོང་པ་ཉིད་དང༌། འདུས་མ་བྱས་སྟོང་པ་ཉིད་ཀྱང་མི་འགལ་ལ། ལྷས་སྦྱིན་འཛིན་པའི་རྣམ་མཁྱེན་གྱི་སྟོང་ཉིད་ལྷས་སྦྱིན་གྱི་སྟོང་ཉིད་ཡིན་པས། ལུགས་འདིར་རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་ཡང་བཞག་དཀའ་ཞེས་བསོད་གྲགས་ཀྱི་དྲང་ངེས་རྣམ་འབྱེད་དུ་བཤད་ལ། ཤར་བ་ནམ་མཁའ་རྒྱལ་མཚན་གྱིས་དེ་འཛིན་པའི་རྣམ་མཁྱེན་གྱི་ཆོས་ཉིད་ལྷས་སྦྱིན་གྱི་

― GTD002_Page_0785 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཉིད་མིན་ཡང༌། དེའི་གཞི་མཐུན་ཡོད་པར་འདོད་དེ་ལྷས་སྦྱིན་དང་དེ་འཛིན་རྣམ་མཁྱེན་རྫས་གཞན་གྱིས་སྟོང་པ་གཉིས་ཀའི་ཆོས་ཉིད་ཡིན་པའི་ཕྱིར་ཟེར་ཏེ། གཉིས་ཀས་དེའི་རྒྱུ་མཚན་དུ། རྣམ་འགྲེལ་ལས། དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་དང༌། འང་སྒྲའི་དོན་ཡོད་པའི་ཕྱིར་ཟེར། ལན་རིམ་བཞིན་བཤད་ན། རྣམ་འགྲེལ་གྱི་ལུང་དོན་ཁྱོད་ལྟར་མིན་ཏེ། དེའི་དོན་ནི་སྤྱིར་གཞལ་བྱ་ཙམ་ལ་རང་མཚན་གྱིས་གྲུབ་མི་དགོས་ཀྱང༌། རྟོག་བཏགས་ཙམ་མ་ཡིན་པའི་གཞལ་བྱ་ལ་རང་མཚན་གྱིས་གྲུབ་པ་དགོས་ཞེས་པ་ཡིན་པས། དེའི་རིགས་པ་ཆོས་ཉིད་གཏན་ལ་འབེབས་པའི་དམིགས་པ་ལ་སྦྱོར་ནའང༌། ཆོས་ཉིད་གཏན་ལ་འབེབས་པ་ལ་དམིགས་པ་རང་མཚན་གྱིས་གྲུབ་པ་མི་དགོས་ཀྱང༌། རྟོག་བཏགས་ཙམ་མ་ཡིན་པར་རང་ངོས་ནས་དེའི་དམིགས་པར་འགྲོ་བ་ལ་རང་མཚན་གྱིས་གྲུབ་པ་ཞིག་དགོས་ཞེས་པ་ཡིན་ལ། ཁྱོད་ཀྱིས་གཞལ་བྱ་ལ་རང་མཚན་ཞིག་དགོས་པ་ལྟར་དམིགས་པ་ལ་རང་མཚན་ཞིག་དགོས་ཞེས་སྦྱར་བ་རྒྱབ་འགལ་ཡིན་པའི་ཕྱིར། ཊཱིཀ་ཆེན་ལས། བློས་བཏགས་མ་ཡིན་པའི་གཞལ་བྱ་ནི་རང་མཚན་གཅིག་པུའོ། །ཞེས་སྟོན་པ་ནི། ཤེས་བྱ་ཆོས་ཅན། རང་སྤྱི་གཉིས་ཀྱི་ནང་ནས་དོན་རང་ངོས་ནས་གྲུབ་པའི་གཞལ་བྱ་རང་གི་མཚན་ཉིད་གཅིག་པུ་ཡིན་ཏེ། མངོན་པར་འདོད་པའི་དོན་བྱེད་པའི་ནུས་པ་ཡོད་མེད་ཉིད་དུ་དཔྱོད་པ་རྣམས་ཀྱིས་མངོན་པར་འདོད་པའི་དོན་བྱ་བའི་ནུས་པ་རང་སྤྱི་གཉིས་ཀྱི་ནང་ནས་རང་མཚན་དེ་ཁོ་

― GTD002_Page_0786 ―

^{[མ་དཔེ་གཟིགས་ན་འདིར་གནོན།]}

[Full Size]

ན་ལ་གྲུབ་པའི་ཕྱིར། ཞེས་དང། ཐར་ལམ་གསལ་བྱེད་ལས། དོན་དུ་གཉེར་བར་བྱ་བའི་འབྲས་བུ་ཡོད་མེད་རྣམ་པར་དཔྱོད་པའི་རྟོགས་ལྡན་རྣམས་ཀྱི་དོན་བྱ་བ་ནི་རང་མཚན་གཅིག་པུ་དེ་ལས་གྲུབ་པས་ཞེས་དང༌། གཞལ་བྱ་ཡིན་ན་རང་མཚན་ཡིན་པས་ཁྱབ་པ་གཞུང་འདིས་བསྟན་པར་འདོད་པ་ནི་ཞིབ་ཏུ་མ་བརྟགས་པ་སྟེ། ཞེས་གསུངས་པའི་ཕྱིར། རྩ་འགྲེལ་གུང་མ་བསྒྲིགས་པར་དྲངས་ན་འདི་འདྲ་ཡོང་ངོ༌། །འདི་ཉིད་ཀྱི་ལུང་དྲངས་པ་ཡང་རིགས་ཤེས་ཀྱི་དཔྱད་བཟོད་ཀྱི་དོན་དམ་དེར་ཆོས་ཅན་དང་ཆོས་ཉིད་ཡོད་མེད་མཚུངས་དགོས་པའི་དོན་དུ་གནས་ཚུལ་ཇི་ལྟར་ཡོད་དཔྱོད་པའི་དོན་དམ་དུ་ཞེས་གསལ་བར་གསུངས་པས། ཁྱོད་ལྟར་དོན་དམ་པར་ཡོད་མེད་ཙམ་མིན་ཞིང༌། ལུང་གསུམ་པའི་དོན་ཡང༌། ཆོས་ཉིད་རང་ངོས་ནས་གྲུབ་ན་དེའི་རྟེན་ཡང་རང་ངོས་ནས་གྲུབ་པ་ཞིག་དགོས་ཀྱི། རང་ངོས་ནས་གྲུབ་གྲུབ་ལྟར་སྣང་ཡང་བཏགས་དོན་བཙལ་ན་རྙེད་རྒྱུ་མེད་པ་ཞིག་གིས་མི་ཆོག་པའི་དོན་ཡིན་པའི་ཕྱིར། ཡིག་ཆར་ལུང་འདིའི་དོན་དམ་ཡང་ལུགས་རང་རང་གི་དགག་བྱའི་དོན་དམ་ལ་སྦྱར་བ་མཁས་པ་སྔ་མའི་བཤད་པ་བཀོད་ཙམ་ཡིན་ཏེ། ལུང་དེའི་འཕྲོར། རྣལ་འབྱོར་སྤྱོད་པའི་མཁས་པ་རྣམས་ཀྱང་ཡོངས་གྲུབ་བདེན་པར་གྲུབ་པ་ལ་དེའི་རྟེན་གཞན་དབང་བདེན་པར་གྲུབ་དགོས་པར་མཐོང་ནས། གཞན་དབང་བདེན་པར་གྲུབ་སྟེ་ཞེས་གསུངས་པ་གང་ཞིག །སེམས་ཙམ་པ་ཡང་རང་ལུགས་ཀྱི་དགག་བྱའི་དོན་དམ་དེར་གྲུབ་པ་མི་འདོད་པའི་ཕྱིར། རྣམ་འགྲེལ་གྱི་ལུང་ཕྱི་མ་འདི་དཔྱད་གཞི་ཆེ་སྟེ། ཊཱིཀ་ཆེན་ལས། གཟུང་འཛིན་གཉིས་ཀྱིས་སྟོང་པའི་

― GTD002_Page_0787 ―

^{[མ་དཔེ་གཟིགས་ན་འདིར་གནོན།]}

[Full Size]

མྱོང་བ་གང་ཡིན་པ་དེ་ནི་ཤེས་པ་དེའི་དེ་ཁོ་ན་ཉིད་ཡིན་ནོ། །ཞེས་པ་འདི་ཁྱོད་ཀྱང་སྒྲ་ཇི་བཞིན་པར་མི་འདོད་ལས་ཆེ་ཡང༌། ཐར་ལམ་གསལ་བྱེད་ལས། གཟུང་འཛིན་རྫས་ཐ་དད་གཉིས་ཀྱིས་སྟོང་པའི་སྟོང་ཉིད་གང་ཡིན་པ་དེ་ནི་ཆོས་ཅན། གཉིས་མེད་ཀྱི་ཤེས་པར་མ་ཟད། གཉིས་སྣང་དེ་ཡི་ཡང་དེ་ཁོ་ན་ཉིད་ཡིན་ཏེ། མཐར་ཐུག་དཔྱོད་པའི་རིགས་ཤེས་ཀྱི་དཔྱད་བཟོད་ཡིན་པ་དེའི་ཕྱིར་ཞེས་པའི་གཉིས་སྣང་ཞེས་པ་གཟུང་བྱ་ལ་བྱེད་སྙམ་པ་སྣང་མོད། དེ་ནི་གཟུང་བྱ་ལ་བྱ་དགོས་ཀྱང༌། གཉིས་ཀའི་ཆོས་ཉིད་ཀྱི་གཞི་མཐུན་བཞག་པར་མི་འགྲོ་བ་འདིས་འཆད་ཚུལ་ཞིག་ཤེས་དགོས་པ་ཡིན་ཏེ། དཔེར་ན་རྩ་ཤེས་རབ་བྱེད་ཉེར་ལྔ་བར། མྱ་ངན་འདས་མཐའ་གང་ཡིན་པ། །དེ་ནི་འཁོར་བའི་མཐའ་ཡིན་ཏེ། །ཞེས་པའི་དོན་འཆད་པའི་ཚེ། རིགས་པའི་རྒྱ་མཚོ་ལས། མྱ་ངན་ལས་འདས་པའི་ཡང་དག་པའི་མཐའ་སྟོང་ཉིད་ཀྱི་སྟོང་ཚུལ་གང་ཡིན་པ་དེ་ནི། འཁོར་བའི་ཡང་དག་པའི་མཐའ་སྟོང་ཉིད་ཀྱི་སྟོང་ཚུལ་ཡིན་ཏེ། ཞེས་དེའི་སྟོང་ཉིད་ཡིན་པ་འདྲ་བ་ཞིག་ཚིག་ལ་ཡོད་ཀྱང་སྟོང་ཚུལ་གཅིག་པའི་དོན་དུ་གསུངས་པ་ལྟར་འདིར་ཡང་ཕྱིའི་ཡུལ་དང་ནང་གི་ཤེས་པ་གཉིས་ཀ་གཟུང་འཛིན་རྫས་གཞན་གྱིས་སྟོང་མཉམ་ཡིན་པས། གཉིས་སྟོང་གི་དེ་ཁོ་ན་ཉིད་དེ་གཉིས་ཀའི་སྟེང་དུ་གནས་ཚུལ་དབྱེར་མེད་པའི་དོན་ཡིན་ཏེ། གོང་དུ། དེ་ཕྱིར་དོན་དང་ཤེས་པ་ལ། །ཞེས་སོགས་ཀྱིས་གཟུང་བྱ་དང༌། ཡོངས་གཅོད་ནང་ཡིན་ཕྱི་རོལ་ལྟར། །ཞེས་སོགས་ཀྱིས་འཛིན་པ་རྫས་གཞན་བཀག་ནས། དེའི་དོན་བསྡུར།

― GTD002_Page_0788 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལ་གཅིག་ནི་མེད་པས་ཀྱང༌། །གཉིས་ཀའང་ཉམས་པར་འགྱུར་བ་ཡིན། །དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་འབྱུང་བའི་ཕྱིར། གཞན་ཡང་ལྷས་སྦྱིན་དང་དེ་འཛིན་པའི་རྣམ་མཁྱེན་རྫས་གཞན་གྱིས་སྟོང་པ་གཉིས་ཀའི་སྟོང་ཉིད་དུ་སྒྲུབ་པ་ནི་རྩོད་པ་གཞི་མེད་ཡིན་ཏེ། དེ་འདྲའི་སྟོང་པ་གཞི་མ་གྲུབ་པའི་ཕྱིར། སེམས་ཙམ་པ་ལྟར་ན་ཡང་རྒྱུད་ཐ་དད་པའི་གང་ཟག་གི་སེམས་དང་རྫས་གཅིག་ཏུ་མི་འགྲོ་བར་སྒྲུབ་པ་ལ་རྒྱུད་གཞན་སྒྲུབ་པ་ཟུར་དུ་གསུངས་པའི་ཕྱིར། རྒྱས་པར་འོག་ཏུ་འཆད་དོ། ། ༼ཅི༽འདི་ལ་ཁ་ཅིག་ཡིག་ཆར་ཀུན་བཏགས་ཁོ་ནའི་མེད་རྒྱུའི་ངོ་བོ་ཉིད་ལ་བྱ་ལ། ངོ་བོ་ཉིད་མེད་པ་གཞན་གཉིས་ཀྱི་མེད་རྒྱུའི་ངོ་བོ་ཉིད་ལ་མི་བྱེད་ཅེས་སྟོན་པ་ལ་ངོ་བོ་ཉིད་དེ་ཁོ་ནའི་ཞེས་གསུངས་པའི་ཕྱིར། ཞེས་པའི་དོན་དུ་བསམས་ནས་འདིར་མེད་རྒྱུའི་ངོ་བོ་ཉིད་དེ་མཚན་ཉིད་ངོ་བོ་ཉིད་མེད་ཅེས་པའི་མེད་རྒྱུའི་མཚན་ཉིད་དང༌། དོན་དམ་པ་ངོ་བོ་ཉིད་མེད་ཅེས་པའི་དོན་དམ་པ་ངོ་བོ་ཉིད་དང༌། སྐྱེ་བ་ངོ་བོ་ཉིད་མེད་ཅེས་པའི་མེད་རྒྱུའི་སྐྱེ་བ་ངོ་བོ་ཉིད་གསུམ་གྱི་དང་པོ་ཁོ་ན་ལ་བྱེད་ཟེར། ཡིག་ཆའི་མདོར་བསྟན་རྒྱས་བཤད་དུ་ཡང༌། སྐབས་འདིར་དངོས་བསྟན་གྱི་ངོ་བོ་ཉིད་མེད་པ་གསུམ་པོ་གང་གི་ཡང་ངོ་བོ་ཉིད་མེད་པ་གཅིག་ཡོངས་གྲུབ་ཏུ་འཇོག་མི་རིགས་པར་ཐལ། མཚན་ཉིད་ངོ་བོ་མེད་པ་དེ་མ་ཡིན་པ་གང་ཞིག །གཞན་གཉིས་མ་ཡིན་པའི་ཕྱིར་ན་རྟགས་དང་པོ་མ་གྲུབ་ཅེས་དེ་ཡིན་རྒྱུ་འདྲ་བ་ཞིག་གསུངས་འདུག་ཀྱང་དགོངས་པ་བཙལ་ན་འདིའི་མེད་རྒྱུ་ལ་དོན་དམ་པར་ངོ་བོ་ཉིད་མེད་པའི་མེད་རྒྱུ་དེ་ཡང་ཡོང་ཡང་དེ་ནི་ཡོངས་

― GTD002_Page_0789 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་ངོས་བཟུང་བའི་ཞར་བྱུང་ཙམ་ཡིན་ལ། དགག་བྱ་ངོས་བཟུང་བའི་ཆེད་དུ་གསུངས་པ་ནི་མཚན་ཉིད་ངོ་བོ་ཉིད་མེད་པ་ཡིན་པས། སྟོན་པ་པོའི་བརྗོད་འདོད་ཀྱི་ཆ་ནས་འདི་གཙོ་ཆེ་བ་ལ་དགོངས་ཏེ། དེ་ལྟ་མིན་ན་དོན་དམ་པ་ངོ་བོ་ཉིད་མེད་ཅེས་པའི་མེད་རྒྱུ་ལ་ཆོས་བདག་མི་ཡོང་བར་ཐལ། ཁོ་ནའི་སྒྲས་དེ་བཀག་པའི་ཕྱིར། རྟགས་ཁས། འདོད་ན། དོན་དམ་པ་ངོ་བོ་ཉིད་མེད་པ་ལ་ཆོས་ཀྱི་བདག་མེད་ཕྲ་མོ་མི་ཡོང་བར་ཐལ་ལོ། །ཁྱོད་ལྟར་ན་ཇོ་ནང་བ་ལ་སྐྱོན་སྟོན་མཚམས་ཡང་མི་འགྲིགས་པས་གསུང་འདི་དག་དཀྲུགས་མི་རུང་ངོ༌། །ཇོ་ནང་བ་ལ་སྐྱོན་སྟོན་མཚམས་ཀྱི་གནད་ཀྱང་འདི་ན་ཡོད་དེ། སྔར་བཤད་པ་ལྟར་ཆོས་ཉིད་སྒྲུབ་པ་རང་དབང་བ་ཞིག་བཞག་པ་དེ་ཤེར་མདོའི་སྐབས་སུ་སྟོང་གཞིར་བཟུང་ནས་བདེན་མེད་དུ་གསུངས་ཟེར་མི་རུང་བས། དེ་ལ་ཤེར་མདོས་སྟོང་ཉིད་བདེན་མེད་དུ་བསྟན་པར་སྒྲུབ་པའི་ཚེ་འདི་ལྟར་ཤེར་མདོ་ཆོས་ཅན། ཁྱོད་ཀྱིས་སྟོང་ཉིད་བདེན་མེད་དུ་བཤད་པར་ཐལ། ཁྱོད་ཀྱིས་དགག་བྱའི་བདག་བཅད་ཙམ་གྱི་མེད་དགག་དེ་བདེན་མེད་དུ་བཤད་པའི་ཕྱིར། དེ་ལ་ཁྱབ་པ་ཡོད་པར་ཐལ། སྟོང་ཉིད་ལ་དགག་བྱ་དེ་བཅད་ཙམ་གྱི་མེད་དགག་ཅིག་དགོས་པའི་ཕྱིར་ཏེ། དེ་ལྟར་དགོས་པ་ཇོ་ནང་བ་ཁྱོད་ཀྱིས་ངེས་དོན་མཐར་ཐུག་ཏུ་འདོད་རྒྱུའི་མདོ་སྡེ་དགོངས་འགྲེལ་གྱི་སྐབས་སུ་ངོ་བོ་ཉིད་དེ་ཁོ་ནའི་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་ཞེས་སོགས་ཀྱིས་གསལ་བར་གསུངས་པའི་ཕྱིར། ཞེས་འགོག་དགོས་སོ། །གཞན་ཡང་དོན་དམ་པ་ངོ་བོ་ཉིད་མེད་

― GTD002_Page_0790 ―

^{[མ་དཔེ་གཟིགས་ན་འདིར་གནོན།]}

[Full Size]

ཅེས་པའི་དོན་དམ་དེ་གཙོ་བོ་ཆོས་བདག་ལ་བྱེད་པར་ཐལ། དེ་དོན་དམ་དངོས་ལ་བཤད་པ་མི་འདོད་པའི་ལུགས་ཡིན་པར་གོང་དུ་བསྟན་པའི་ཕྱིར་དང༌། འཇོག་ཚུལ་གཅིག་ཤོས་ཀྱང་འདིའི་དོགས་གཅོད་ཙམ་ཡིན་པའི་ཕྱིར། ༼ཆི༽འདིར་མཚན་ཉིད་གསུམ་གསུམ་སྦྱར་བར་གསུངས་སོ་ཞེས་འབྱུང་བས། གསུངས་སོ་ཟེར་བ་དེ་མདོ་རང་ཉིད་མིན་ནམ། དེ་ཡིན་ན་དེ་ལྟར་སྦྱར་བ་ཡང་མདོ་ཡིན་པས་ཚིག་མ་འབྲེལ་ཞེ་ན། དེ་གཉིས་ཀ་ཡང་དོན་དམ་ཡང་དག་འཕགས་ཞུས་ཀྱི་ལེའུའི་ཚིག་ཡིན་མོད། འོན་ཀྱང་མདོ་མི་གཅིག་སྟེ། སྦྱར་ཞེས་པ་དྲི་ཞུས་ཀྱི་ལན་དུ་ངོ་བོ་ཉིད་མེད་པ་གསུམ་གསུངས་པའི་ཚེ། དོན་གྱིས་ཆོས་ཐམས་ཅད་ལ་རང་སྟེང་གི་མཚན་ཉིད་གསུམ་གྱི་འཇོག་ཚུལ་རེ་སྦྱར་ཡོད་པས་ལན་གྱི་ཚིག་དེ་ལ་བྱེད་ཅིང་གསུངས་སོ་ཞེས་པ་དོན་དམ་ཡང་དག་འཕགས་ཀྱིས་སྟོན་པས་དེ་ལྟར་སྦྱར་བ་བདག་གིས་གོ་ལགས་ཞེས་ཞུས་པའི་ཚིག་འདིས་གསུངས་པ་ལ་བྱེད་པའི་ཕྱིར། ཕུང་པོ་ལྷག་མ་བཞི་ནས། ཁམས་བཅོ་བརྒྱད་ཀྱི་བར་ལ་རང་རང་སྨོས་ཏེ་མཇུག་ཏུ་དེ་བཞིན་ལགས་སོ་ཞེས་པ་ཙམ་ལས་མ་བྱུང་ལ། སྡུག་བདེན་ལ་གཟུགས་ཕུང་གི་སྐབས་སུ་གསུངས་པ་བཞིན་མཚན་ཉིད་གསུམ་སྦྱོར་བྱེད་ཀྱི་ཚིག་མདོ་ལས་རྒྱས་པར་བཀོད་ཡོད་པས་འདིར་ཡང་ཟུར་དུ་སྨོས་པ་ཡིན་གྱི། དེ་ལ་སྦྱོར་ཚུལ་མི་འདྲ་བ་ཞིག་ཡོད་ནས་མ་ཡིན་ནོ། །འདི་དང་གོང་དུ་ཡོངས་གྲུབ་སྟོན་པའི་མདོ་གཉིས་ལ་ཚིག་ཟུར་ཙམ་ཡང་མི་འདྲ་བ་མེད་པས་ཡོངས་གྲུབ་ཀྱང་སྔར་དང་འདྲ་ཞེས་པ་ཆོག་པ་ལ་ངོ་བོ་ཉིད་དེ་ཁོ་ནའི་ངོ་བོ་ཉིད་མ་མཆིས་པ་ཞེས་གསུངས་ཤིང་ཞེས་སྨོས་

― GTD002_Page_0791 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དགོས་པ་ཅི་ཡོད་ཅེ་ན། འདི་ལ་ལོག་རྟོག་འགོག་པའི་དགོས་པ་ཆེན་པོ་ཞིག་ཡོད་དེ། ཇོ་ནང་བ་སོགས་ཀྱིས་ཆོས་ལ་ཆ་ཕྱེ་ནས་ཀུན་རྫོབ་པ་རྣམས་རང་གི་ངོ་བོ་བདེན་གྲུབ་ཀྱིས་སྟོང་པ་དང༌། ཆོས་ཉིད་ཀུན་རྫོབ་པའི་ཆོས་གཞན་གྱིས་སྟོང་པ་ཞེས་བཤད་ཀྱང༌། མདོ་ལས་གོང་འོག་གང་དུ་ཡང་ཁྱད་མ་ཕྱེ་བར་གཟུགས་ཕུང་ནས་འདིའི་བར་ཐམས་ཅད་ལ་རང་གི་ངོ་བོ་ཀུན་བཏགས་ཀྱིས་སྟོང་པ་ཡོངས་གྲུབ་ཏུ་འཇོག་པ་དང༌། ཁྱད་པར་འདིའི་མཇུག་དེ་མ་ཐག་འགོག་ལམ་གཉིས་ཀྱང་སྨོས་པར་འགྱུར་བས་ཀུན་བྱང་གང་ལ་ཡང་ཆོས་ཉིད་ཀྱིས་འཇོག་ཚུལ་ཁྱད་མེད་པར་གོ་བའི་ཆེད་དུ་མི་འཆུག་པའི་གཟེར་བཏབ་པ་ཡིན་པར་དགོངས་ནས་རྗེ་བླ་མས་རྡོ་རྗེའི་ཚིག་འདི་གསུངས་པ་ཡིན་པའི་ཕྱིར། ༼ཇི༽འདིའི་ཚིག་གི་ནུས་པ་འདོན་ཚུལ་ཡང་ཀུན་མཁྱེན་ཆོས་འབྱུང་གིས། གཞན་ཡང་མཚན་ཉིད་གསུམ་གསུམ་གྱི་འཇོག་ལུགས་བྱས་ནས་ཞེས་སྨོས་པ་ལ་དགོས་པ་མེད་པར་ཐལ། འདུས་མ་བྱས་ཀྱི་ཆོས་རྣམས་ཀྱི་གཞན་དབང་ལ་སྐྱེ་བ་ངོ་བོ་ཉིད་མེད་ཚུལ་བཤད་དུ་མེད་ཀྱང་དེ་རྣམས་ཀྱི་གཞན་དབང་གི་འཇོག་ལུགས་ཤིག་ཡོད་པའི་ཁྱད་པར་མེད་པའི་ཕྱིར། ཞེས་བཀག་པས་རང་ལུགས་ཚུལ་དང་ལུགས་ཞེས་པ་དེ་དངོས་མིན་ཀྱང་ཕྱོགས་ཙམ་འདྲ་བའི་ཆ་ནས་དེར་བཏགས་པ་ཞིག་ལ་འཇུག་པས། འདིར་ཡང་གཞན་དབང་དངོས་མིན་ཀྱང་རང་གི་སྟེང་གི་སྟོང་ཉིད་དེའི་སྟོང་གཞི་ཡིན་པའི་ཆ་ནས་དེར་བཏགས་ཏེ་བཞག་པའི་དོན་ཡིན་པས། ནམ་མཁའ་ནམ་མཁའི་གཞན་དབང་ཡིན་པར་འགྲུབ་ཅིང་དེར་མ་ཟད། གོང་དུ་དེ་ལྟར་གཟུགས་ཕུང་ལ་ཇི་ལྟར་སྦྱར་བ་བཞིན་དུ་ཞེས་པ་

― GTD002_Page_0792 ―

^{[མ་དཔེ་གཟིགས་ན་འདིར་གནོན།]}

[Full Size]

རང་ཉིད་གཞན་དབང་དང༌། བདག་ཏུ་སྒྲོ་བཏགས་པ་ཀུན་བཏགས་སུ་འཇོག་ལུགས་སོགས་ཁམས་བཅོ་བརྒྱད་སོགས་ཀྱང་གཟུགས་ཕུང་དང་འདྲ་བར་གསུངས་པ་དང། འོག་ཏུ་གནོད་འཇོམས་མཁན་པོ་འགོག་པའི་སྐབས་སུ་ཡང་གཟུགས་ནས་རྣམ་མཁྱེན་གྱི་བར་རེ་རེ་ལ་མཚན་ཉིད་གསུམ་གསུམ་གྱི་རྣམ་གཞག་བྱས་ནས། སྟོང་གཞི་རྣམ་བརྟགས་དགག་བྱ་ཀུན་བཏགས་ཀྱིས་སྟོང་པ་ཆོས་ཉིད་ཡོངས་གྲུབ་ཏུ་བཤད་པས། ཞེས་སོགས་ཀྱིས་ཆོས་ཉིད་ཀྱི་གཟུགས་ཀྱི་སྟོང་གཞི་ལ་རྣམ་བརྟགས་ཀྱི་གཟུགས་དགོས་པ་ཆོས་ཐམས་ཅད་ལ་འདྲ་བར་བསྟན་པས་ཀྱང་ནམ་མཁའ་རྣམ་བརྟགས་ཀྱི་ནམ་མཁའ་ཡིན་པར་གྲུབ་ཅིང༌། དེ་གྲུབ་ན་ནམ་མཁའ་ནམ་མཁའི་གཞན་དབང་ཡིན་པར་གྲུབ་སྟེ། དབྱིག་གཉེན་གྱི་དབུས་མཐའི་འགྲེལ་པ་ལས། རྣམ་པར་བརྟགས་པའི་གཟུགས་ནི། གང་གཟུགས་ཀྱི་གཞན་དབང་གི་ངོ་བོ་ཉིད་དེ། དེ་ལ་གཟུགས་སུ་རྣམ་པར་རྟོགས་པར་བྱེད་དོ་ཞེས་པ་ནས། གཟུགས་ལ་ཇི་ལྟ་བ་བཞིན་དུ་ཚོར་བ་ལ་སོགས་པའི་ཕུང་པོ་དང༌། ཁམས་དང་སྐྱེ་མཆེད་ལ་སོགས་པ་ཡང་སྦྱར་བར་བྱའོ། །ཞེས་གསུངས་པའི་ཕྱིར། དེ་ལྟར་གཟུགས་སུ་རྣམ་པར་རྟོགས་པར་བྱེད་དོ། །ཞེས་པ་འདིས་རྣམ་བརྟགས་ཀྱི་གཟུགས་ཀྱི་སྒྲ་དོན་བསྟན་པར་བློ་བརྟན་གྱིས་བཤད་པས། ཡི་གེ་ཡང་བའི་སྔོན་འཇུག་དང་ར་མགོ་ཡོད་པ་འདི་བྱེད་དགོས་ལ། ནམ་མཁའ་ཡང་རྣམ་བརྟགས་ཀྱི་ནམ་མཁའ་ཡིན་པར་འདིས་གསལ་བར་བསྟན་ཏེ། གང་ལ་འདིར་ནི་ནམ་མཁའོ་སྙམ་དུ་འཛིན་པའི་གཞི་ཡིན་པ་དེ་རྣམ་བརྟགས་ཀྱི་དོན་དུ་གསུངས་པའི་ཕྱིར་རོ། །དེ་ལ་ཁ་ཅིག་ན་རེ། ནམ་མཁའི་སྟེང་གི་གཞན་དབང་ལ་སྐྱེ་བ་

― GTD002_Page_0793 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་བོ་ཉིད་མེད་ཚུལ་བཤད་དུ་མེད་ཀྱང༌། དེའི་སྟེང་གི་གཞན་དབང་འཇོག་ཚུལ་ཡོད་པའི་ཁྱད་པར་འཐད་པར་ཐལ། ཁྱོད་ཀྱིས་ཆོས་འབྱུང་གི་ལུང་དྲངས་པ་དེའི་ཕྱིར། འདོད་ན་ནམ་མཁའ་ལ་སྐྱེ་བ་ངོ་བོ་ཉིད་མེད་ཚུལ་གཅིག་བཤད་དུ་མེད་པར་ཐལ། ནམ་མཁའི་སྟེང་གི་གཞན་དབང་ལ་དེ་མེད་པའི་ཕྱིར། རྟགས་ཁྱབ་ཁས། འདོད་ན། ནམ་མཁའ་གཞན་དབང་དུ་བྱས་ནས་དེའི་ཡོངས་གྲུབ་གཏན་ལ་འབེབ་ཚུལ་གཅིག་མེད་པར་ཐལ། ནམ་མཁའ་ལ་གཞན་དབང་དུ་འཇོག་ཚུལ་མེད་པའི་ཕྱིར་ཏེ། དེ་ལ་སྐྱེ་བ་ངོ་བོ་ཉིད་མེད་པར་བཤད་ཚུལ་གཅིག་མེད་པའི་ཕྱིར་ཏེ། དེ་སྐྱེ་བ་ངོ་བོ་ཉིད་མེད་ཚུལ་གཅིག་བཤད་དུ་མེད་པའི་ཕྱིར་ན་མ་ཁྱབ། བྲམ་ཟེ་བུ་སྣ་ཉག་ཆོས་ཅན། ཁྱོད་སེང་གེ་ཡིན་ཚུལ་བཤད་དུ་ཡོད་པར་ཐལ། ཁྱོད་ལ་སེང་གེར་བཤད་ཚུལ་ཞིག་ཡོད་པའི་ཕྱིར། ཁྱབ་པ་འགྲིག །གོང་དུ་འདོད་མི་ནུས་ཏེ། དེར་བཤད་ཚུལ་ཞིག་ཡོད་ན་དེ་ཡིན་མི་དགོས་པའི་ཕྱིར་ཏེ། དོན་དམ་པ་ངོ་བོ་ཉིད་མེད་པར་བཤད་ཚུལ་ཡོད་ཀྱང་དེ་མ་ཡིན་པ་གཞན་དབང་ལྟ་བུ་ཡོད་པའི་ཕྱིར། ༼ཉི༽འདིར་ཤུགས་ལ་གནས་པའི་དོན་ཞེས་པ་དགོངས་འགྲེལ་གྱི་ཤུགས་བསྟན་དུ་མི་རུང་སྟེ། གྲུབ་དོན་གྱི་དངོས་བསྟན་ཡིན་པའི་ཕྱིར། དྲང་ངེས་ཀྱི་ཁྱད་པར་འདི་ཡན་ཆད་ཀྱི་ཤུགས་བསྟན་ཡིན་པའང་མི་རུང་སྟེ། དྲང་བའི་དོན་གྱི་མདོ་སྒྲ་ཇི་བཞིན་པར་ཞེན་ན་རྟག་ཆད་ཀྱི་ལྟ་བ་ཐོབ་པར་གསུངས་ཤིང༌། དགོངས་གཞིའི་ངོ་བོ་ཉིད་མེད་པ་གསལ་བར་བཤད་པ་ལས་ལྷག་པའི་དྲང་དོན་དུ་སྒྲུབ་ཚུལ་གྲུབ་དོན་ལ་མེད་པའི་ཕྱིར།

― GTD002_Page_0794 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་དྲང་བའི་དོན་ཞེས་པའི་ཚིག་ཙམ་བྱུང་ཡང་དྲང་དོན་ཡིན་མིན་སྒྲུབ་པའི་སྐབས་མ་ཡིན་པའི་ཕྱིར། དེས་ན་འཁོར་ལོ་གསུམ་ཞེས་པའི་ཐ་སྙད་གྲུབ་དོན་ཡན་ལ་མ་བྱུང་བས། འདིར་ཤུགས་ལ་གནས་པའི་དོན་ཡིན་ཏེ། འདི་དང་འདི་ལྟར་བཀའ་སྩལ་ཅེས་མདོ་སྡེ་སོ་སོར་བཟུང་ནས་དྲང་ངེས་ཕྱེ་སྟེ་བཤད་པའི་ཤུགས་ཀྱིས་འཁོར་ལོ་གསུམ་གྱི་མིང་སྦྱར་ཏེ་དྲང་ངེས་སུ་འཇོག་ཚུལ་ཡང་ཤེས་མོད། འོན་ཀྱང་ཚིག་ལ་མི་གསལ་བས་གྲུབ་དོན་འདིར་འཁོར་ལོ་སོ་སོའི་ཐ་སྙད་དང༌། དྲང་ངེས་སུ་འཇོག་ཚུལ་སྦྱར་ནས་གསུངས་པ་ཡིན་ལ། འཁོར་ལོ་གསུམ་གྱི་ཐ་སྙད་གང་གི་སྒོ་ནས་སྦྱར་བ་ཡིན་ན། དུས་ཀྱི་རིམ་པའི་སྒོ་ནས་སྦྱར་ཞེས་པའི་དོན་ཡིན་པའི་ཕྱིར་ཏེ། ཁ་ཅིག་ཚིག་གི་གཅོད་མཚམས་འདི་ལས་ལྡོག་སྟེ་གཉིས་དྲང་དོན་དང༌། གཅིག་ངེས་དོན་ཡིན་པ་དེ་སྔར་བཤད་པའི་ཤུགས་ཀྱིས་ཤེས་ཟེར། དེ་མི་འཐད་པར་ཐལ། གཉིས་དྲང་དོན་གཅིག་ངེས་དོན་ཡིན་པར་སྔར་བཤད་པའི་ཤུགས་ཀྱིས་གཞན་ཞིག་ཤེས་རྒྱུ་ཡོད་པའི་ཕྱིར། མ་གྲུབ་ན། འཁོར་ལོ་དང་པོ་གཉིས་དྲང་དོན་དང་ཐ་མ་ངེས་དོན་དུ་སྔར་བཤད་པའི་ཤུགས་ཀྱིས་ཤེས་མ་གསུངས་པར་མདོ་སྡེ་གཉིས་ཞེས་སྨོས་པ་ལ་དགོས་པ་མེད་པར་ཐལ། མདོ་དེ་གཉིས་ཀྱི་ངོ་བོ་བརྗོད་བྱ་དྲང་ངེས་སོགས་དངོས་སུ་གསུངས་ཀྱང་འཁོར་ལོ་སོ་སོའི་ཐ་སྙད་སྔར་དངོས་སུ་བཤད་པ་མེད་པའི་རྒྱུ་མཚན་གྱིས་མ་ཡིན་པའི་ཕྱིར། ལུང་ཙམ་སྐྱབས་སུ་མ་བྱས་པར་རིགས་པས་ལེགས་པར་དཔྱད་པ་ཡིན་ཡང་ད་དུང་གཟུར་གནས་རྣམས་ཀྱིས་དཔྱད་པར་བྱའོ། །ཆོས་འཁོར་དངོས་ལ་གསུང་བ་པོ་དང༌། དུས་དང། ཡུལ་དང༌།

― GTD002_Page_0795 ―

^{[མ་དཔེ་གཟིགས་ན་འདིར་གནོན།]}

[Full Size]

གདུལ་བྱ་དང༌། བརྗོད་བྱ་གང་ལ་བརྩམས་པ་དང༌། ཆོས་འཁོར་གྱི་ཆེ་བ་དང་དྲང་ངེས་ཀྱི་ཁྱད་པར་རྣམས་རིམ་བཞིན་དཀྱུས་ན་གསལ། ༼ཏི༽གཉིས་པ་དང་གསུམ་པར་ངོ་མཚར་རྨད་དུ་བྱུང་བ་སྨོས་པ་དང༌། སྔོན་ལྷར་གྱུར་ཞེས་པ་ནས་བསྐོར་ཏེ་ཞེས་མ་གསུངས་པའི་རྒྱུ་མཚན་གྱིས། གཉལ་སྟོན་དཔལ་འབྱོར་ལྷུན་གྲུབ་ཀྱི་དཀའ་འགྲེལ་ལས། མ་བསྐོར་བ་ཞིག་བསྐོར་ཞེས་པའི་འཁོར་ལོ་དང་པོ་བསྟན་ཞེས་བཤད་ཀྱང་འཐད་པར་མ་མཐོང་སྟེ། འདིར་སྔོན་ཞེས་པ་སྟོན་པ་འཇིག་རྟེན་དུ་མ་བྱོན་གོང་ལ་བྱེད་ཀྱི། མདོ་དེ་གསུངས་པའི་སྔོན་ཙམ་ལ་མི་བྱེད་ཀྱང༌། མ་བསྐོར་བ་ཡང་ཚངས་པ་སོགས་གཞན་གྱིས་མ་བསྐོར་བ་ལ་བྱ་ཡི་སྟོན་པས་སྔར་མ་བསྐོར་བ་ལ་མི་བྱེད་པའི་ཕྱིར་ན། འཁོར་ལོ་ཕྱི་མ་གཉིས་ལ་ཡང་སྦྱོར་དགོས་པ་དོན་གྱིས་བསྡུས་པའི་ཕྱིར། ཉི་ཁྲི་ལས། ཚངས་པའི་འཁོར་ལོ་འཇིག་རྟེན་ན་དགེ་སྦྱོང་ངམ་བྲམ་ཟེའམ་ཞེས་པ་ནས། གཞན་སུ་ཡང་རུང་བས་ཆོས་དང་ལྡན་པར་འཇིག་རྟེན་ན་བསྐོར་བར་མི་ནུས་ལ། ཞེས་གསུངས་པའི་ཕྱིར། ཁྱོད་ལྟར་ན་འཁོར་ལོ་བར་བ་ཡང་འཁོར་ལོ་དང་པོར་ཐལ། སྟོན་པས་བྱ་རྒོད་ཕུང་པོར་གསུངས་པའི་སྔོན་ལ་མ་བསྐོར་བའི་ཕྱིར་ཏེ། འདི་ཐུན་མོང་གི་བཤད་པའི་སྐབས་ཡིན་པའི་ཕྱིར། འདིར་གང་ལ་བརྩམས་པའི་ངོ་བོ་ཉིད་མེད་པ་དང༌། གོང་དུ་ངོ་བོ་ཉིད་མེད་པར་གསུངས་པའི་དགོངས་པ་དྲི་བའི་སྐབས་ཀྱི་ངོ་བོ་ཉིད་མེད་པ་གཉིས་མི་གཅིག་སྟེ། ཕྱི་མ་ནི་ཆོས་ཐམས་ཅད་ལ་རང་བཞིན་གྱིས་གྲུབ་པའི་ངོ་བོ་ཉིད་མེད་པ་ལ་སྔར་བཤད་ཟིན་ཅིང༌། སྔ་མ་ནི་

― GTD002_Page_0796 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་ལོ་ཐ་མའི་དགོངས་པ་མཐར་ཐུག་གི་ངོ་བོ་ཉིད་མེད་པ་ལྔ་ལ་བྱེད་དགོས་པའི་ཕྱིར། འོན་ཀྱང་དེའི་ངོ་བོ་ཉིད་མེད་པ་ལྔ་ཡང་ཡོངས་གྲུབ་མ་ཡིན་ཏེ། འདིར་མེད་རྒྱུའི་ངོ་བོ་ཉིད་དང་སྐྱེ་བ་སོགས་མཚན་ཉིད་གསུམ་ལ་རང་རང་གི་སྐབས་ཀྱི་མེད་རྒྱུ་རེ་སོ་སོར་སྦྱོར་བ་མ་གཏོགས་དགག་བྱའི་བདག་གཅིག་པུ་ཐམས་ཅད་ལ་ཐུན་མོང་དུ་སྦྱོར་བའི་ལུགས་མ་ཡིན་པར་བཤད་ཟིན་པའི་ཕྱིར། དེ་ལ་ཁ་ཅིག་ན་རེ། ངོ་བོ་ཉིད་མེད་པ་སོགས་ལྔ་འཁོར་ལོ་ཐ་མའི་སྒྲས་ཟིན་སྒྲ་ཇི་བཞིན་པ་ཡིན་པར་ཐལ། དེའི་མེད་ཚུལ་ལ་དབུ་སེམས་ཀྱི་ལུགས་གཉིས་ཡོད་ཀྱང་འདིར་སེམས་ཙམ་གྱི་རང་ལུགས་གཙོ་ཆེ་བའི་ཕྱིར། འདོད་མི་ནུས་ཏེ། བར་བའི་སྒྲས་ཟིན་སྒྲ་ཇི་བཞིན་པ་ཡིན་པའི་ཕྱིར། དེར་ཐལ། བར་བའི་སྒྲས་ཟིན་ལ་ངོ་བོ་ཉིད་མེད་པར་གསུངས་པའི་ཕྱིར་ན་མ་ཁྱབ། ༼ཐི༽འདིར་ཐེག་པ་ཐམས་ཅད་ལ་ཡང་དག་པར་ཞུགས་པའི་དོན་ནི། ཁ་ཅིག །ཆེད་དུ་བྱ་བའི་གདུལ་བྱ་རིགས་ཅན་གསུམ་ག་ཡོད་པ་ལ་འཆད་པ་དང༌། རྟོག་གེ་སྣང་བར་འདིའི་གདུལ་བྱ་ཐེག་ཆེན་རིགས་ཅན་ཡིན་ཀྱང་དབང་པོ་རྟུལ་བས་ཐེག་པ་གཞན་དུ་ཡང་དཀྲི་ནུས་ལ། བར་བའི་གདུལ་བྱ་དབང་པོ་རྣོ་བས་དཀྲི་མི་ནུས་པ་ལ་བཤད་པ་སོགས་ཡོད་ལ། དང་པོ་ནི་ཡང་དག་བདེན་པ་དང་ཡང་ཕྱོགས་མཐུན་ཏེ་འོག་ཏུ་འཆད་པར་འགྱུར་རོ། །རང་གི་ལུགས་ནི་འདིའི་སྒོ་ནས་འཁོར་ལོ་གསུམ་གའི་དྲང་ངེས་ཀྱི་ཁྱད་པར་ཐམས་ཅད་གོ་བར་ནུས་པས་རྗོད་བྱེད་ཚིག་གི་ཐེག་པ་ཐམས་ཅད་ལ་ཞུགས་པ་སྟེ། དེ་ཡང་རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས་ཞེས་འཁོར་ལོ་དང་པོ་དྲང་དོན་དུ་བསྟན། རྐྱེན་གཞན་གྱི་སྟོབས་ཀྱིས་བྱུང་ཞེས་པ་དང༌། རྣམ་པར་

― GTD002_Page_0797 ―

^{[མ་དཔེ་གཟིགས་ན་འདིར་གནོན།]}

[Full Size]

དག་པའི་དམིགས་པ་གང་ཡིན་པ་དེ་ནི་དོན་དམ་པ་ཞེས་པས་འཁོར་ལོ་བར་བ་དྲང་དོན་དུ་བསྟན། དེ་ལྟར་ཆ་མ་ཕྱེ་བ་རྣམས་དྲང་དོན་དུ་བསྟན་པས་ཐ་མ་རང་ཉིད་ངེས་དོན་དུ་གོ་བའི་ཕྱིར། འདི་ནི་ཞེས་པའི་ཉེ་ཚིག་འཇུག་ཚུལ་ལ་ཡིག་ཆར་བརྗོད་བྱ་རྗོད་བྱེད་ལ་སྦྱར་བ་གཉིས་གསུངས་པ་ལེགས་ཏེ། རྗོད་བྱེད་ཀྱི་ཆ་ནས་ཉེ་ཚིག་སྨོས་པའི་ཚེ་སྐོར་བཞིན་པ་འདི་ནི་ཟེར་དགོས་པས། ལང་གཤེགས་སོགས་ཡོང་དོན་མེད་ཀྱང༌། བརྗོད་བྱའི་ཆ་ནས་ཉེ་ཚིག་སྨོས་པའི་ཚེ་མཚན་ཉིད་གསུམ་ལ་བདེན་པར་གྲུབ་མ་གྲུབ་ཀྱི་ཁྱད་པར་ཕྱེ་བའི་འཁོར་ལོ་ཐ་མ་འདི་ནི་ཟེར་དགོས་པས་རང་དང་སྟོན་ཚུལ་མཚུངས་པའི་མདོ་ལང་གཤེགས་སོགས་ཐམས་ཅད་ཡོང་སྟེ། གྲུབ་དོན་འདི་འཁོར་ལོ་ཐ་མ་ལེགས་ཕྱེའི་ཆོས་འཁོར་ཐམས་ཅད་ཀྱི་གྲུབ་དོན་ཡིན་པར་ཡིག་ཆ་ལས་སོ། །༼དི༽ཝེན་ཚེག་གིས་སྐབས་མཆིས་པའི་དོན་བཤད་པ་འདི་ནི་འོག་ཏུ་སྐབས་མ་མཆིས་པ་ལ་བཤད་པ་གཉིས་བྱས་པའི་སྔ་མའི་ལྡོག་ཕྱོགས་སུ་སྣང་བས་རང་ལུགས་སུ་མི་རུང་སྟེ། བླ་ན་མཆིས་པའི་དོན་དང་ཟློས་པའི་ཕྱིར། ལྷག་མ་གསུམ་ནི་བླ་ན་མ་མཆིས་པ་སོགས་ཀྱི་ལྡོག་ཕྱོགས་སུ་སྣང་ལ། བླ་ན་མ་མཆིས་པ་སོགས་གསུམ་གྱི་དོན་དང༌། སྐབས་མ་མཆིས་པའི་བཤད་པ་ཕྱི་མ་རྗེས་ཀྱང་རང་ལུགས་སུ་མཛད་པས་འདི་གསུམ་ཡང་བླ་ན་མཆིས་པ་སོགས་ཀྱི་དོན་དུ་རུང་སྟེ། རྗེས་བཤད་པ་ཟུར་དུ་མཛད་པ་ཡང་འདི་ཉིད་གོ་བདེ་བར་བྱས་པའོ། །འདི་ལ་ཁ་ཅིག་ན་རེ། ཝེན་ཚེག་གིས་རྩོད་པའི་གཞིའི་གནས་སུ་གྱུར་པའི་དོན་བཤད་པ་ཡང་མི་འཐད་པར་ཐལ། འཁོར་

― GTD002_Page_0798 ―

^{[མ་དཔེ་གཟིགས་ན་འདིར་གནོན།]}

[Full Size]

ལོ་དང་པོའི་སྒྲས་ཟིན་གྱི་དོན་ལ་རྩོད་པ་སྨྲ་བ་པོར་ཉན་ཐོས་སྡེ་བ་མི་ཡོང་བའི་ཕྱིར། དེར་ཐལ། འདི་སྒྲས་ཟིན་སྒྲ་ཇི་བཞིན་པར་མི་རུང་ཞེས་རྩོད་པ་འགོད་པ་པོར་ཉན་ཐོས་སྡེ་པ་མི་ཡོང་བའི་ཕྱིར་ན་མ་ཁྱབ་སྟེ། འདིར་ཉན་ཐོས་སྡེ་པ་རྣམས་ཀྱིས་རྩོད་ཅེས་པ་དེ་མི་འཐད་ཅེས་རྩོད་པ་མིན་གྱི། དེ་རང་ལུགས་སུ་འཐད་པ་གཞིར་བཞག་གི་སྟེང་ནས་དེའི་དགོངས་པ་འགྲེལ་ཚུལ་ལ་སྡེ་བ་བཅོ་བརྒྱད་དང༌། མདོ་སྡེ་པ་སྔ་ཕྱི་གཉིས་སོགས་ནང་ཕན་ཚུན་རྩོད་པ་འབྱུང་བའི་དོན་ཡིན་པའི་ཕྱིར། རྒྱ་ནག་འགྲེལ་ཆེན་ལས། སྡེ་བ་ཉི་ཤུ་བོ་རྩོད་པར་སྨྲ་བ་དག་གི་གནས་སུ་འགྱུར་བ་ཡིན་ནོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར། ཡང་ཁ་ཅིག་འདིས་སྟོང་པ་ཉིད་མི་སྟོན་ཞིང་ཡོད་པ་བསྟན་པས་དྲང་དོན་དུ་བཤད་པའང་མི་རུང་བར་ཐལ། ཡོད་པ་བསྟན་པས་དྲང་དོན་དུ་འགྲོ་དོན་མེད་ལ། སྟོང་ཉིད་མ་བསྟན་པས་དྲང་དོན་དུ་བཤད་ན་སྐབས་འཆོལ་བའི་ཕྱིར་ཟེར་ན་མ་ཡིན་ཏེ། འཁོར་ལོ་དང་པོར་སྟོང་པ་ཉིད་མཁྱུད་ཅིང་ཡོད་པ་སྟོན་པ་དང༌། བར་བ་ལ་ཡོད་པ་མཁྱུད་ཅིང་སྟོང་ཉིད་སྟོན་པ་ཞེས་བྱུང་བས། སྔ་མའི་དོན་ཡང་ཀུན་བཏགས་རང་མཚན་གྱིས་མ་གྲུབ་པ་མཁྱུད་པ་སྟེ་སྦས་ནས་ཆོས་ཐམས་ཅད་ལ་རང་མཚན་གྱིས་གྲུབ་གྲུབ་ཅེས་པའི་ཚིག་མཉམ་པར་བཀའ་སྩལ་པའི་དོན་ཡིན་པའི་ཕྱིར། སྟོང་ཉིད་ཀྱང་འོག་ཏུ་ཆོས་ཀྱི་བདག་མེད་ཕྲ་མོར་བཤད་པའི་ལུགས་ལས་ལོགས་སུ་བྱས་པས་རང་མཚན་གྱིས་གྲུབ་པའི་སྟོང་པ་ཙམ་ལ་བྱའམ་དཔྱད། ༼ནི༽སློབ་དཔོན་ཡང་དག་བདེན་པའི་བརྗེད་བྱང་ལས། བར་བ་འདི་ནི་ཐེག་པ་ཆེན་པོ་ཐེག་པ་ཆུང་ངུ་ལས་ཐ་དད་པར་སྟོན་པའི་ཕྱིར་ངེས་པའི་དོན་མ་

― GTD002_Page_0799 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པའོ། །ད་དུང་ཐེག་པ་གཅིག་ཡོད་པའི་ཕྱིར་གོང་མ་དང་བཅས་པའོ། །ཐེག་པ་ཆུང་ངུ་བ་དག་དང་ཐ་དད་པའི་ཕྱིར་ཐེག་པ་ཆུང་ངུ་བ་དག་དང་འཐབ་ཅིང་རྩོད་པར་གྱུར་པའོ། །ཐེག་པ་གཅིག་གིས་རྣམ་པར་འཇིག་པའི་ཕྱིར་རྒོལ་བ་དང་བཅས་པའོ། །ཞེས་དང༌། འཁོར་ལོ་ཐ་མའི་ཐད་དུ་དེ་ཉིད་ལས། འདིས་ནི་ཐེག་པ་ཆུང་ངུ་བ་དང་ཐེག་པ་ཆེན་པོ་བ་དག་རྒྱུ་རྐྱེན་མཚུངས་ཤིང་འབྲས་བུ་མཚུངས་པར་སྟོན་པའི་ཕྱིར་རྣམ་པར་མི་རྟོག་པ་དོན་དམ་པ་བསྟན་པ་ཞེས་བྱའོ། །ཆོས་ཀྱི་འཁོར་ལོ་དེ་མཆོག་ཏུ་རྨད་དུ་བྱུང་བ་དོན་དེ་ལས་ལྷག་པ་གཞན་མེད་པའི་ཕྱིར་བླ་ན་མེད་པ་ཞེས་བྱའོ། །གཞན་ཡང་ཐེག་པ་ཆུང་ངུ་བ་ཀུན་གྱིས་བགྲོད་པར་བྱ་བ་ཡིན་པའི་ཕྱིར་རྩོད་པ་མེད་པའོ། །རྩོད་པ་མེད་པའི་ཕྱིར་གཞིག་ཏུ་མེད་པའོ། །གཞིག་ཏུ་མེད་པའི་ཕྱིར་རྒོལ་བ་མེད་པའོ། །ཞེས་བྱུང་སྟེ། དོན་ནི་བར་བས་མཐར་ཐུག་ཐེག་ཆེན་གྱི་ཐེག་པ་གཅིག་པུ་ལས་མ་བཤད་པས་དྲང་དོན་སོགས་སུ་སྒྲུབ་པ་སྟེ། ཐེག་པ་གསུམ་པོ་རང་ལམ་གྱི་སྡུག་ཀུན་མ་ལུས་པར་ཟད་པའི་རྣམ་གྲོལ་མི་མཚུངས་པར་ཐེག་དམན་གྱི་ཞི་བ་ཉི་ཚེ་བར་བཤད་པའི་དྲང་བའི་དོན་དང༌། མཐར་ཐུག་ཐེག་པ་གསུམ་ཆར་སྟོན་པའི་མདོ་དགོངས་འགྲེལ་སོགས་བརྗོད་བྱ་རྫོགས་པའི་མདོ་གཞན་རང་གི་གོང་ནའམ་བླ་ན་ཡོད་པ་དང༌། ཐེག་དམན་གྱི་སྡེ་སྣོད་སོགས་ལས་ཉན་རང་དགྲ་བཅོམ་ཐོབ་ནས་ཐེག་ཆེན་དུ་མི་འཇུག་པར་བཤད་པ་དང་ཕྱོགས་ཙམ་ཡང་མི་མཐུན་པས་རྩོད་པའི་གནས་དང༌། མཐར་ཐུག་ཐེག་གསུམ་སྟོན་པའི་

― GTD002_Page_0800 ―

^{[མ་དཔེ་གཟིགས་ན་འདིར་གནོན།]}

[Full Size]

དགོངས་འགྲེལ་སོགས་ལུང་རིགས་ཀྱིས་འཇིག་པས་སྐབས་མཆིས་པ་དང༌། ཐ་མའི་བཤད་པ་ཕལ་ཆེར་སྔ་མ་ལས་ལྡོག་པར་སྣང་ལ་ཐེག་པ་ཆུང་ངུ་བ་ཀུན་གྱིས་བགྲོད་བར་བྱ་བ་ཞེས་པ་འདིས་རིགས་ཅན་གསུམ་གས་འདི་ལ་ཆེད་དུ་བརྟེན་ནས་རང་གི་ཐར་པ་ཐོབ་པ་དང༌། ཐེག་པ་ཐམས་ཅད་ལ་ཡང་དག་པར་ཞུགས་པའི་དོན་ཀྱང་དེ་ལྟར་འགྲེལ་པའི་ཚོད་དུ་སྣང་ངོ༌། །༼པི༽སྐབས་མེད་པའི་སྔ་མ་ནི་སྐབས་མེད་ཅེས་པ་ལ་བཤད་ཚུལ་གཉིས་བྱས་པའི་སྔ་མ་ཕྱིས་མཆོག་ཏུ་འགྱུར་བའི་སྐབས་མེད་ཅེས་པ་དེ་ཡིན་ཞིང༌། དེའི་དོན་མདོ་འདི་ལས་མཆོག་ཏུ་གྱུར་པ་གཞན་ལ་འཇུག་ཏུ་མེད་པ་ལ་བྱེད་ན་བླ་ན་མ་མཆིས་པ་དང་ཟློས་པས་རང་ལུགས་མ་མཛད་དོ། །ཡོད་མེད་རྫོགས་པར་བསྟན་ཞེས་པའི་ཡོད་མེད་ནི་རང་མཚན་གྱིས་གྲུབ་མ་གྲུབ་ཡིན་ལ། འཁོར་ལོ་དང་པོ་གཉིས་ཀྱིས་དེ་ལས་རེ་རེ་སྦས་ནས་རེ་རེ་ཙམ་བསྟན་ཀྱང༌། འདིར་མཚན་ཉིད་གསུམ་གྱི་སྟེང་དུ་ཆ་ཕྱེ་ནས་ཕྱོགས་གཉིས་ཀ་རྫོགས་པར་བསྟན་པའོ། །དེ་ལྟར་རྫོགས་པར་སྟོན་པའི་ཚིག་ཀྱང་བྱེ་བྲག་ཏུ་ཕྱེ་ན་དགོངས་འགྲེལ་གྱི་ཚིག་རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་ཞེས་སོགས་སྔར་དྲངས་པ་རྣམས་ཡིན་ལ། ལང་གཤེགས་ལས། བརྟགས་པའི་དངོས་པོ་མེད་པ་ཉིེད། །གཞན་གྱི་དབང་ནི་ཡོད་པ་ཡིན། །སྒྲོ་འདོགས་པ་དང་སྐུར་འདེབས་པའི། །མཐའ་ལ་རྟོག་པ་རྣམ་པར་བརླག། །ཅེས་པ་ལྟ་བུ་ཡིན་ཞིང༌། དབུ་མ་པས་འདིའི་ཀུན་བཏགས་དགག་བྱའི་དོན་དམ་ལ་བྱས་ནས་དོན་དམ་པར་མེད་ཀྱང་སྟོང་གཞི་གཞན་དབང་དེ་ཉིད་ཐ་སྙད་ཙམ་དུ་ཡོད་པ་ལ་བྱེད་དེ། དེའི་ཕྱིར་ཡང་ཆ་ཕྱེ་ནས་མདོའི་དོན་

― GTD002_Page_0801 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་འཇོག་ཅེས་པ་དོན་ལ་ཆ་འབྱེད་པར་མངོན་ནོ། །འདི་ལ་ཁ་ཅིག་ལེགས་ཕྱེའི་ཆོས་འཁོར་ལ་རང་ལས་མཆོག་ཏུ་གྱུར་པའི་ངེས་དོན་གྱི་མདོ་མེད་མི་དགོས་པར་ཐལ། སློབ་པའི་ལུང་གི་ཆོས་རྣམས་ངོ་བོ་གོང་འཕེལ་དུ་འགྲོ་བའི་ཕྱིར་སོགས་སྨྲ་སྟེ་བྱིས་པའི་རོལ་རྩེད་ཡིན་པས་མ་སྤྲོས་སོ། །༼ཕི༽འདི་ལ་དོགས་པ་འདི་ཡོད་དེ། མདོ་དེའི་སྒྲ་ཇི་བཞིན་པ་ལ་གནོད་བྱེད་མཐོང་བ་ན། དེ་ལས་གཞན་དུ་འདྲེན་དགོས་པར་མཐོང་ནས་དགོངས་གཞི་ཚོལ་བ་ལ་འཇུག་པ་ཡིན་གྱི། དགོངས་གཞི་གཞན་དུ་འདྲེན་དགོས་པར་མཐོང་ནས་དེའི་རྟགས་ཀྱིས་སྒྲ་ཇི་བཞིན་པར་མི་རུང་བ་སྒྲུབ་མི་རིགས་པས། འདིར་དེའི་རྒྱུ་མཚན་དུ་བཀོད་པ་མི་འཐད་དེ། དཔེར་ན་དོན་སྨྲའི་གྲུབ་མཐའ་ལ་གནོད་བྱེད་མཐོང་ནས་སེམས་ཙམ་དུ་འཇུག་པ་ཡིན་གྱི་སེམས་ཙམ་པའི་གྲུབ་མཐའ་འཐད་ལྡན་དུ་གོ་ནས་དེའི་རྗེས་དོན་སྨྲའི་གྲུབ་མཐའ་ལ་གནོད་བྱེད་མཐོང་བ་མིན་པ་དང༌། ཐར་པ་དོན་གཉེར་བཅོས་མིན་སྐྱེས་ནས། གཟོད་འཁོར་བ་ལ་ཞེན་ལོག་སྐྱེས་པ་མ་ཡིན་པ་བཞིན་ནོ་ཞེ་ན་འདིར་བཤད་པའི་རིམ་པ་ནི། དོགས་པ་སྐྱེ་ཚུལ་གྱི་ཁྱད་ཅིག་ཡིན་ཏེ། ཕ་རོལ་པོ་ཁ་ཅིག་འདི་སྙམ་དུ་ཆོས་ཐམས་ཅད་རང་བཞིན་མེད་པར་གསུང་བ་པོ་དང༌། ཆ་ཕྱེ་ནས་གསུང་བ་པོ་གཅིག་ཡིན་པས། གཅིག་གི་སྒྲས་ཟིན་ཁས་ལེན་ལ། གཅིག་ཁས་མི་ལེན་པ་ནང་འགལ་ཏེ། ཕྱི་མ་ཤེས་བྱེད་དུ་རུང་ན་སྔ་མ་ཡང་ཤེས་བྱེད་དུ་རུང་དགོས་སོ་ཞེ་ན། གསུངས་པ་ཕྱོགས་གཅིག་ནས་འཁྲུལ་བ་བྱུང་བ་ཡིན་ན། ཁྱོད་བདེན་

― GTD002_Page_0802 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་སྟོན་པས་ནི་མཁྱེན་བཞིན་དུ་གསུངས་པ་ཡིན་པས། དེ་ལ་རང་ལུགས་གཅིག་དང་གདུལ་བྱའི་དབང་གིས་ཡིན་པ་གཅིག་སྟེ་གཉིས་འབྱེད་དགོས་ལ། དེ་ལྟར་འབྱེད་པ་ཡང་རིགས་པས་འབྱེད་དགོས་པས་མཁས་པས་མཐའ་ཆོད་པར་དཔྱད་ན་རྩོད་པ་མི་འཇུག་པ་ནི་འཁོར་ལོ་ཐ་མ་ཡིན་པས། མདོ་དེ་གཉིས་ཀྱི་སྒྲས་ཟིན་ལ་ཡང་འཐད་མི་འཐད་ཀྱི་དབྱེ་བ་བྱེད་རུང་ངོ༌། །འདི་ལ་ཁ་ཅིག་གིས། ཐལ་འགྱུར་བ་ལ་མཁས་པ་མེད་པར་ཐལ། མདོ་དགོངས་འགྲེལ་ངེས་དོན་དུ་མི་རུང་ཞེས་རྩོད་པའི་ཕྱིར་ན་མ་ཁྱབ་སྟེ། མཁས་པ་ཡོད་ཀྱང་བརྟགས་པ་མཐའ་ཆོད་པར་བྱས་པ་མེད་པར་ཉི་ཚེ་བ་ཙམ་དུ་སོང་བ་ཡིན་པའི་ཕྱིར། འདིར་མཁས་པས་བརྟགས་ན་ཞེས་སྨོས་པ་ལ་དགོས་པ་ཡོད་པའི་ཕྱིར། གྲུབ་མཐའ་ཆེན་མོར་ཡང་དེ་ལྟར་བཤད་མ་བཤད་ཁ་མི་གསལ་བའི་དབང་གིས་རྩོད་པ་མེད་པས་རྩོད་པའི་གཞིའི་གནས་མིན་པ་ལགས་ཀྱི། དེ་ལྟར་བཤད་ཀྱང་དབུ་མ་པ་ལྟ་བུས་མི་འཐད་ཅེས་རྩོད་པ་མེད་པ་ནི་མ་ཡིན་ནོ་ཞེས་ཞིབ་ཆ་ལེགས་པར་ཕྱེ་ནས་གསུངས་སོ། ། ༼བི༽འདི་དག་གི་དོན་དུ་བསམ་ནས་དུས་དང་པོར་གསུངས་པའི་མདོ་འཁོར་ལོ་དང་པོའི་དོན་དུ་འཇོག་པ་ཆེས་ལེགས་པ་ཡིན་ཏེ། འདིའི་གོང་དུ་འཁོར་ལོ་དང་པོ་གཉིས་དྲང་དོན་དང་ཐ་མ་ངེས་དོན་ཞེས་པའི་ཚིག་ཡང་ཡང་བྱུང་བ་ལ། འོ་ན་འཁོར་ལོ་དང་པོ་ཐམས་ཅད་དྲང་དོན་ཡིན་ནམ་ཞེ་ན། དེའི་ནང་ནས་རང་གི་མཚན་ཉིད་ཡོད་པ་སོགས་སུ་གསུངས་པ་དྲང་དོན་ཡིན་གྱི་འཁོར་ལོ་དང་པོ་ཐམས་ཅད་མིན་ཏེ། ལྔ་སྡེ་ལ་ཤམ་ཐབས་ཟླུམ་པོར་བགོ་བ་ལ་བསླབ་པར་གསུངས་པ་ལྟ་བུ་དུས་དང་

― GTD002_Page_0803 ―

^{[མ་དཔེ་གཟིགས་ན་འདིར་གནོན།]}

[Full Size]

པོར་ཡང་གདུལ་བྱའི་དབང་གིས་སྣ་ཚོགས་ཤིག་གསུངས་པས། དེ་ཐམས་ཅད་ལ་དོགས་པ་གཅོད་དོན་མེད་པའི་ཕྱིར་ཞེས་པའི་དོན་ཡིན་པས་སོ། །དེ་ལྟར་དུས་དང་པོར་གསུངས་པའི་མདོ་འཁོར་ལོ་དང་པོའི་དོན་མིན་ན་འཁོར་ལོ་དང་པོ་ཐམས་ཅད་དྲང་དོན་མ་ཡིན་ཏེ། དུས་དང་པོར་གསུངས་པའི་མདོ་ལ་བསླབ་བྱ་ཙམ་སྟོན་པའང་ཡོད་པའི་ཕྱིར་ཞེས་པའི་རྟགས་ཆོས་ལ་འབྲེལ་ཅི་འདུག ལྕང་སྐྱ་རིན་པོ་ཆེའི་གྲུབ་མཐར་རྗེ་བླ་མས་དུས་དང་པོར་གསུངས་པའི་མདོ་ཡིན་ན་འཁོར་ལོ་དང་པོ་ཡིན་པས་ཁྱབ་པར་བཟུང་གིས་དོགས་ནས་གསུངས་ཞེས་ལུང་འདིས་དུས་དང་པོར་གསུངས་པའི་མདོ་ལ་འཁོར་ལོ་དང་པོས་མ་ཁྱབ་པར་བསྟན་གསུངས་པ་ཡང་མཁས་པའི་བཤད་པའི་རྣམ་གྲངས་ཙམ་ཡིན་ཏེ། ཐམས་ཅད་ལ་མིན་གསུངས་པ་འཁོར་ལོ་དང་པོ་ཙམ་ཡང་མིན་པ་ལ་བྱེད་ན་འཁོར་ལོ་དང་པོ་ཙམ་ལ་ཡང་རང་གི་མཚན་ཉིད་ཡོད་པ་སོགས་སུ་གསུངས་པ་ཞིག་དགོས་པར་འགྱུར་བ་ལ་འདིར་དེ་ལྟར་གསུངས་པའི་འཁོར་ལོ་དང་པོ་ཞེས་སྨོས་པས་དེ་ལྟར་མ་གསུངས་པ་ཞིག་ཀྱང་བསྟན་ཅིང༌། རྗེ་བཙུན་དམ་པ་དེ་ཡང་འཁོར་ལོ་དང་པོ་ལ་འདིར་བསྟན་གྱི་དེས་ཁྱབ་པར་མི་བཞེད་པའི་ཕྱིར། ༼མི༽ཞེས་པར་མཐའ་གཉིས་ལས་ཀྱང་ངོ་བོ་ཉིད་མེད་པ་སོགས་ལས་བརྩམས་པ་རྣམས་དྲང་ངེས་དཔྱོད་པའི་གཞི་ཡིན་གྱི་གྲུབ་མཐའི་འདོད་པ་ཐུན་མོང་མ་ཡིན་པ་རེ་སྟོན་ཚད་ལ་སྐབས་འདིར་དྲང་ངེས་དངོས་སུ་འབྱེད་པ་མིན་པའི་རྒྱུ་མཚན་གྱིས་སློབ་དཔོན་ཡང་དག་བདེན་པས་ཐེག་པ་གསུམ་དང་གཅིག་བསྟན་པའི་ཆ་ནས་ཕྱེ་བ་ཡང་མི་

― GTD002_Page_0804 ―

^{[མ་དཔེ་གཟིགས་ན་འདིར་གནོན།]}

[Full Size]

འཐད་ལ། ཁ་ཅིག་གིས་ཚིག་ལ་ཆ་འབྱེད་དོ་ཟེར་ནས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །ཞེས་སོགས་ཀུན་གཞི་སྟོན་པའི་ལུང་རྣམས་སེམས་ཙམ་པའི་ལུགས་ཀྱི་ལེགས་ཕྱེའི་ཆོས་འཁོར་དུ་སྨྲ་བ་ཡང་ཁེགས་སོ། །དེར་མ་ཟད་ལུང་འདི་བློ་གྲོས་ཡངས་པའི་ལེའུ་ལས་འབྱུང་ཞིང༌། ལེའུ་དེ་ལེགས་ཕྱེའི་ཆོས་འཁོར་དུ་བཤད་པ་ཡང་མེད་དོ། །ལུང་འདི་ལེའུའི་ནང་ནས་ཟུར་དུ་བཀོད་པ་ཡང་མི་རིགས་ཏེ། ལེའུ་རིལ་པོ་བརྗོད་བྱ་ཀུན་གཞི་སྟོན་པར་མཚུངས་པས་སོ། །དེས་ན་ཆ་འབྱེད་པར་འདོད་པའི་རང་རྒྱུད་པ་སྟེ་འཕགས་སེང་དང་ལེགས་ལྡན་མ་གཏོགས་པ་ཞི་བ་འཚོ་ལ་སོགས་པ་རྣམས་འཁོར་ལོ་ཐ་མ་ལ་ཆ་འབྱེད་པར་གསུངས་པ་དོན་ལ་ཡིན་ཏེ། གྲུབ་མཐའི་རྣམ་གཞག་འཁྲུལ་སྤོང་གདོང་ལྔའི་སྒྲ་དབྱངས་ལས། ལང་གཤེགས་དགོངས་འགྲེལ་རྒྱན་སྟུག་མདོ་སོགས་དོན། །གཙོ་ཕལ་ཆ་གཉིས་རིམ་བཞིན་དབུ་སེམས་ལུགས། །ཞེས་གསུངས་པའི་ཕྱིར།༼ཙི༽དེ་ལ་གཞན་ལུགས་གཉིས་བཀོད་པའི་སྔ་མ་ནི་དོལ་བོ་ཤེས་རབ་རྒྱལ་མཚན་དང༌། ཉ་ཕྲུག་ཀུན་དགའ་དཔལ་སོགས་སྙིང་པོ་རྟག་བརྟན་སྟོན་པའི་མདོ་ཡང་སྒྲ་ཇི་བཞིན་པར་འདོད་མཁན་རྣམས་ཡིན་ལ། གཉིས་པ་ལྟར་འདོད་མཁན་ཡང་བོད་སྔ་མ་མང་པོ་བྱུང་ཞིང༌། ཡར་འབྲོག་པ་རིན་ཆེན་ཏོག་གིས་ཀྱང༌། ཆོས་ཀྱི་འཁོར་ལོ་གསུམ་པ་ནི། །ཤེར་ཕྱིན་ཕལ་ཆེན་ཆོས་པད་དཀར། །དེ་སོགས་ཁྱབ་བྱེད་དབུ་མ་ཆེ། །ཟབ་ཡང་རྩོད་དང་བྲལ་བ་འོ། །ཞེས་དང༌། ཡུམ་ལས། ཆོས་འཁོར་ལན་གཉིས་ཞེས་དང༌། འབྱུང་ཕྱིར་འཁོར་ལོ་

― GTD002_Page_0805 ―

^{[མ་དཔེ་གཟིགས་ན་འདིར་གནོན།]}

[Full Size]

བར་བར་འདོད། །ཅེ་ན་བདེན་མོད། གཞུང་འདིའི་དོན། ཐེག་ཆུང་གཅིག་ཤོས་གཉིས་སུ་འདོད། །དཔེར་ན་སྡེ་སྣོད་གསུམ་གཉིས་བཞིན། །ཞེས་འཁོར་ལོ་གསུམ་སྐས་ཀྱི་གདང་བུ་ལྟར་ཕྱི་མ་ཕྱི་མ་མཐོ་སྟེ། དེའི་ཕྱིར་ཤེར་མདོ་འཁོར་ལོ་ཐ་མ་ཡིན་ལ། དགོངས་འགྲེལ་སོགས་སྙིང་པོ་རྟག་བརྟན་སྟོན་པའི་མདོ་རྣམས་འཁོར་ལོ་ཐ་མ་མིན་ཏེ། རྟག་བརྟན་བཤད་པ་དྲང་དོན་ཡིན་ཞིང༌། འཁོར་ལོ་ཐ་མ་ངེས་དོན་དུ་གསུངས་པའི་ཕྱིར། ཤེར་མདོ་རང་ཉིད་ལས། ཆོས་ཀྱི་འཁོར་ལོ་གཉིས་པ་བསྐོར་བར་མཐོང་ངོ༌། །ཞེས་གསུངས་པས་ཀྱང༌། དེ་འཁོར་ལོ་བར་བ་ཡིན་པར་མི་འགྲུབ་སྟེ། འདིའི་གཉིས་པ་ཞེས་པ་འཁོར་ལོ་གསུམ་གྱི་གཉིས་པ་མིན་གྱི། ཐེག་པ་དམན་པའི་ཆོས་འཁོར་དང་ཐེག་ཆེན་པའི་ཆོས་འཁོར་གཉིས་སུ་ཕྱེ་བའི་གཉིས་པ་ཡིན་ཏེ། དཔེར་ན་མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང༌། །ཞེས་པའི་སྡེ་སྣོད་གཉིས་པ་ལ་སྡེ་སྣོད་གསུམ་དུ་ཕྱེ་བའི་གཉིས་པ་མི་དགོས་པ་བཞིན་ཡིན་པར་འདོད་ཅིང༌། དོལ་པོ་བ་ཚིག་ངན་གྱིས་ཚར་བཅད་མོད། དགོངས་འགྲེལ་སྙིང་པོ་རྟག་བརྟན་སྟོན་པའི་མདོར་རང་གིས་ཀྱང་ཁས་བླངས་ནས་ཐོག་ཏོག་དང་དབང་པོ་རྡོ་རྗེ་སོགས་བྲིས་པའི་ངལ་བ་བྱས་པ་ནི་རལ་གྲི་དགྲ་ལ་ཤོར་ཏེ་ཤུབས་ཀྱི་སྟེང་ནས་དཔའ་སྐད་འདོན་པ་དང་འདྲ་བས་སྙིང་པོ་ཅི་ཡང་མེད་དོ། །འདིའི་འཁྲུལ་གཞི་ཡང་སྙིང་པོ་རྟག་བརྟན་དང་བདེ་གཤེགས་སྙིང་པོ་མ་ཕྱེ་བས་ནོངས་ལ། དེ་བཞིན་གཤེགས་པའི་སྙིང་པོའི་མདོ་དང༌། སྙིང་པོ་རྟག་བརྟན་སྟོན་པའི་མདོ་ཡང་སྔ་མ་

― GTD002_Page_0806 ―

^{[མ་དཔེ་གཟིགས་ན་འདིར་གནོན།]}

[Full Size]

ཕལ་ཆེར་གྱིས་གཅིག་ཏུ་བྱས་མོད། སྙིང་པོ་རྟག་བརྟན་སྟོན་པའི་ཚིག་རྣམས་དེ་ན་མི་འདུག་ཅིང༌། ལང་གཤེགས་སུ་མདོ་དེའི་གསུངས་ཚུལ་བཀོད་པ་དྲངས་པ་མ་གཏོགས་མདོ་རང་ཉིད་བོད་དུ་འགྱུར་བ་མི་སྣང་ངོ༌། །ཤེར་མདོ་འཁོར་ལོ་ཐ་མ་ཡིན་པའི་བཤད་ཚུལ་གཅིག་སློབ་དཔོན་ཡང་དག་བདེན་པས་ཀྱང་བྱས་ཏེ། དེའི་བརྗེད་བྱང་རྣམ་པ་གཉིས་ཡོད་པ་ལས། གཅིག་སྔར་དྲངས་པ་དེ་ཉིད་ཡིན་པས་མདོའི་ངོས་འཛིན་དཀྱུས་དང་མཐུན་ལ། སྡེ་བ་རྣམས་ཀྱི་ལྟ་བ་བསྟན་པའི་བརྗེད་བྱང་ལས། མྱ་ངན་ལས་འདས་པ་ཆེན་པོའི་མདོ་ནི། ཆོས་ཀྱི་འཁོར་ལོ་གཉིས་པ་ཞེས་བྱ་སྟེ་ཐེག་པ་ཆེ་ཆུང་གཉིས་ཀའི་ཆེད་དུ་གསུངས་པའོ། །འཕགས་པ་སངས་རྒྱས་ཕལ་པོ་ཆེ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ནི། ཆོས་ཀྱི་འཁོར་ལོ་གསུམ་པ་ཞེས་བྱ་སྟེ། ཆེན་པོ་ཁོ་ནའི་ཆེད་དུ་ཡིན་གྱི། ཆུང་ངུ་ནི་མིན་ནོ། །ཞེས་སྔ་མ་ལས་ལྡོག་སྟེ་བཤད་ལ། ཤེར་མདོ་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ཞེས་པའི་དོན་དུས་གཉིས་པར་གསུངས་པའི་ཆོས་འཁོར་ཡིན་པ་ལ་བྱ་ཡི། འཁོར་ལོ་གཉིས་པ་ཡིན་པའི་དོན་མིན་ནོ་ཞེས་འདོད་པར་ཝེན་ཚེག་གིས་བཤད་དོ། །སློབ་དཔོན་འདིས་ཤེར་མདོ་འཁོར་ལོ་གསུམ་པར་བཤད་ཀྱང༌། དགོངས་འགྲེལ་ལས་གསུམ་པ་འདི་ནི་སྨོས་པའི་གསུམ་པ་དུས་གསུམ་པར་གསུངས་པ་ལ་བྱེད་ཅེས་དགོངས་པ་ལེན་གྱི། འདི་ནི་ཞེས་ཉེ་ཚིག་སྨོས་པའི་གསུམ་པ་དེར་སྔོན་གསུངས་པའི་མདོ་ཞིག་འཇོག་ཅེས་བསྙོན་མི་འདིང་ངོ༌། །དེ་དག་གི་དོན་བསྡུས་ན་མདོ་འདིའི་དགོངས་པ་ནི་རང་མཚན་གྱིས་གྲུབ་མ་

― GTD002_Page_0807 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་ཆ་ཕྱེ་མ་ཕྱེའི་སྒོ་ནས་དྲང་ངེས་སུ་འཇོག་པ་ཡིན་གྱི། དུས་འདི་དང་འདིའི་ཚེ་གསུངས་པ་དྲང་དོན་དང་ངེས་དོན་ནོ་ཞེས་འབྱེད་པ་མ་ཡིན་པ་དེའི་ཕྱིར། དོལ་པོ་པ་དང་ཡར་འབྲོག་པ་སོགས་ཀྱི་བཤད་ཚུལ་དེ་ནི་དྲི་ཞུས་སོགས་སུ་ཆོས་རྣམས་རང་མཚན་གྱིས་ཡོད་མཉམ་དུ་གསུངས་པ་དང་མེད་མཉམ་དུ་གསུངས་པ་ཅི་ལ་དགོངས་ཞེས་དྲི་བ་དང༌། ལན་ཡང་དེ་ལྟར་གསུངས་པའི་ཚུལ་ལ་ཞིབ་ཏུ་མ་བརྟགས་པའི་སྐྱོན་ཡིན་ཏེ། ཁྱེད་ཅག་གིས་དུས་འདིའི་སྐབས་སུ་གསུངས་པ་དྲང་དོན་དང༌། འདིའི་སྐབས་སུ་གསུངས་པ་ངེས་དོན་ཡིན་ཞེས་པ་འདིའི་དོན་དུ་བསམ་ནས་ཐ་མའི་སྐབས་སུ་གསུངས་ཚད་ངེས་དོན་ཡིན་མིན་རྩོད་པའི་ཕྱིར། ཁྱབ་སྟེ། ཁྱེད་ཅག་ལྟར་ན་དུས་དང་པོར་གསུངས་པ་དང་བར་དུ་གསུངས་པ་རྣམས་ཅི་ལ་དགོངས་ཟེར་དགོས་པ་ལ། མདོ་ལས། དེའི་ནང་ནས་བརྗོད་བྱ་སྟོན་ཚུལ་གྱི་སྒོ་ནས་བྱེ་བྲག་པ་རེ་དམིགས་ཀྱིས་བསལ་ནས་དྲིས་པའི་ཕྱིར་རོ། །གོང་དུ་དེའི་ཕྱིར་ཞེས་པ་ཡང་དེ་ལྟར་འགྲེལ་དགོས་སོ། །༼ཚི༽འདིར་དོན་དམ་པ་མཚན་ཉིད་ལྔ་ལྡན་ནི། བསྡུ་བ་ལས། དོན་དམ་པ་ནི་མཚན་ཉིད་ལྔ་དང་ལྡན་པ་ཡིན་ཏེ། བརྗོད་དུ་མེད་པའི་མཚན་ཉིད་དང༌། གཉིས་སུ་མེད་པའི་མཚན་ཉིད་དང༌། རྟོག་གེའི་སྤྱོད་ཡུལ་ལས་ཡང་དག་པར་འདས་པའི་མཚན་ཉིད་དང༌། ཐ་དད་པ་དང་ཐ་དད་པ་མ་ཡིན་པ་ཉིད་ལས་ཡང་དག་པར་འདས་པའི་མཚན་ཉིད་དང༌། ཐམས་ཅད་དུ་རོ་གཅིག་པའི་མཚན་ཉིད་དོ། །དེ་ལ་བརྗོད་དུ་མེད་པའི་མཚན་ཉིད་དང༌། གཉིས་སུ་མེད་པའི་མཚན་ཉིད་ནི་དགོངས་པ་

― GTD002_Page_0808 ―

^{[མ་དཔེ་གཟིགས་ན་འདིར་གནོན།]}

[Full Size]

ངེས་པར་འགྲེལ་པའི་མདོ་ལས་ཇི་སྐད་འབྱུང་བ་བཞིན་བལྟ་བར་བྱ་སྟེ། བྱང་ཆུབ་སེམས་དཔའ་ཚུལ་བཞིན་ཀུན་ཏུ་འདྲི་བས་ཞེས་པ་ནས། ཟབ་མོ་བྱིས་པའི་སྤྱོད་ཡུལ་མ་ཡིན་པ། །བརྗོད་མེད་གཉིས་མིན་རྒྱལ་བས་བསྟན་མཛད་ཀྱང༌། །བྱིས་པ་འདི་དག་གླེན་པ་རྣམ་པར་རྨོངས། །སྨྲ་བའི་སྤྲོས་ལ་དགའ་ཞིང་རྣམ་པར་རྨོངས། ཞེས་སོགས་ཀྱི་བར་དགོངས་པ་ངེས་འགྲེལ་གྱི་ལེའུའི་ཚིག་ཡོངས་རྫོགས་དྲངས་ཤིང༌། དེ་བཞིན་དུ་རྟོག་གེའི་སྤྱོད་ཡུལ་ལས་འདས་པའི་མཚན་ཉིད་འཆད་བྱེད་ལ། བཅོམ་ལྡན་འདས་ལ་བྱང་ཆུབ་སེམས་དཔའ་ཆོས་འཕགས་ཀྱིས་འདི་སྐད་ཅེས་གསོལ་ཏོ། །ཞེས་པ་ནས། རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེ་ཀུན་ལས་འདས་མཚན་ཉིད། །ཅེས་པའི་བར་ཆོས་འཕགས་ཀྱི་ལེའུ་མཐར་ཆགས་སུ་དྲངས་ཤིང༌། ཐ་དད་པ་དང་ཐ་དད་པ་མ་ཡིན་པ་ཉིད་ལས་འདས་པའི་མཚན་ཉིད་འཆད་བྱེད་ལ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་ཤིན་ཏུ་རྣམ་དག་གིས་འདི་སྐད་ཅེས་གསོལ་ཏོ་ཞེས་པ་ནས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །ཞེས་སོགས་ཀྱི་བར་ལེའུ་ཡོངས་རྫོགས་དང། ཐམས་ཅད་དུ་རོ་གཅིག་པའི་མཚན་ཉིད་སྟོན་པ་ལ། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་བ་ཞེས་པ་ནས། དོན་དམ་དེ་ནི་ཐ་དད་མ་ཡིན་ཏེ། །ཀུན་ཏུ་རོ་གཅིག་མཚན་ཉིད་སངས་རྒྱས་གསུངས། །ཞེས་སོགས་ཀྱི་བར་རབ་འབྱོར་གྱི་ལེའུ་རྫོགས་པར་དྲངས་སོ། །གཞུང་ལས་མཚན་ཉིད་

― GTD002_Page_0809 ―

^{[མ་དཔེ་གཟིགས་ན་འདིར་གནོན།]}

[Full Size]

དང་པོ་གཉིས་མ་གཏོགས་པ་སོ་སོ་ནས་སྨོས་ཏེ་དགོངས་འགྲེལ་ལས་འབྱུང་བ་བཞིན་བལྟ་བར་བྱ་གསུངས་ཀྱང༌། འདིར་དོན་དམ་པ་མཚན་ཉིད་ལྔ་དང་ལྡན་པ་ཡང་དགོངས་འགྲེལ་ལས་ཞེས་སོགས་གསུངས་པ་དེའི་དོན་བསྡུས་པ་ཡིན་གྱི། བསྡུ་བའི་ཚིག་དངོས་ལ་དེ་ལྟར་མི་འབྱུང་ངོ༌། །དོན་དམ་པའི་ལེའུ་རྣམས་ཞེས་མང་ཚིག་གིས་སྨོས་པ་ཡང་ལེའུ་འདི་བཞི་ཡོངས་རྫོགས་ཀྱིས་དོན་དམ་པའི་མཚན་ཉིད་ལྔ་བཤད་པས། བཞི་ཀར་དོན་དམ་པའི་ལེའུ་ཞེས་གསུངས་པ་ཡིན་ཏེ། ལེའུ་སོ་སོའི་མཇུག་ཏུ་ཚིགས་བཅད་རྐང་པ་བཞིའམ་བརྒྱད་རེ་འབྱུང་བ་ལེའུ་དེ་དང་དེའི་དོན་བསྡུ་ཡིན་པས། འདིར་ཡང་བཀོད་ཡོད་དོ། །ཆོས་རྣམས་ཀྱི་མཚན་ཉིད་ནི། དགོངས་འགྲེལ་ལས་ཞེས་འདིར་བསྡུས་ནས་གསུངས་ཀྱང་བསྡུ་བ་རང་ལས་སེམས་ཀྱི་མཚན་ཉིད་དང་ཆོས་ཀྱི་མཚན་ཉིད་གཉིས་སུ་ཕྱེ་ནས་དང་པོ་སྟོན་པ་ལ། བཅོམ་ལྡན་འདས་ལ་བློ་གྲོས་ཡངས་པས་ཞུ་བ་ཞུས་པ་ཞེས་པ་ནས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་སོགས་ཀྱི་བར་བློ་གྲོས་ཡངས་པའི་ལེའུ་དང༌། གཉིས་པ་སྟོན་པ་ལ། བཅོམ་ལྡན་འདས་ལ་ཡོན་ཏན་འབྱུང་གནས་ཀྱིས་ཞུ་བ་ཞུས་པ་ཞེས་པ་ནས། མཚན་ཉིད་མེད་པའི་ཆོས་ནི་རབ་ཤེས་ན། །ཀུན་ནས་ཉོན་མོངས་ཆོས་ནི་རབ་སྤོང་འགྱུར། །ཀུན་ནས་ཉོན་མོངས་ཆོས་ནི་རབ་སྤངས་ན། །ཤིན་ཏུ་རྣམ་དག་མཚན་ཉིད་རབ་ཐོབ་འགྱུར། །ཞེས་པའི་བར་ཡོན་ཏན་འབྱུང་གནས་ཀྱི་ལེའུ་ཡོངས་རྫོགས་དྲངས་པ་གཉིས་ཀ་བཀོད་པ་ཡིན་ཏེ། མཚན་ཉིད་ཀྱི་ལེའུ་རྣམས་ཞེས་གསུངས་

― GTD002_Page_0810 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར་དང༌། དགོངས་འགྲེལ་གྱི་མགོ་ནས་མཐར་ཆགས་སུ་དྲངས་པ་ལ་བློ་གྲོས་ཡངས་པའི་ལེའུ་འདོར་དོན་མེད་པའི་ཕྱིར། ཐ་མ་འདིས་མཚན་ཉིད་མེད་ཅེས་པ་དང༌། ཀུན་ནས་ཉོན་མོངས་ཞེས་པ་དང༌། ཤིན་ཏུ་རྣམ་དག་ཅེས་པས་མཚན་ཉིད་གསུམ་བསྟན་པ་ཡིན་ནོ། །ངོ་བོ་ཉིད་མེད་པའི་མཚན་ཉིད་སྟོན་པར་དོན་དམ་ཡང་དག་འཕགས་ཞུས་ཡོངས་རྫོགས་དྲངས་ལ་བྱམས་ཞུས་དྲངས་པའི་མཚམས་སྦྱོར་དུ་ཆོས་རྣམ་པར་འགོད་པ་ལས་བརྩམས་ནས་རྣལ་འབྱོར་གྱིས་ཡོངས་སུ་བསྡུས་པའི་ཞི་གནས་དང་ལྷག་མཐོང་གི་རབ་ཏུ་དབྱེ་བ་ནི་དགོངས་པ་ངེས་པར་འགྲེལ་པ་ལས་ཇི་སྐད་འབྱུང་བ་བཞིན་རིགས་པར་བྱ་སྟེ་ཞེས་གསུངས་ཀྱང༌། ལེའུ་འདིས་ཕྱི་དོན་གསུངས་པ་དྲང་དོན་དུ་འགྲེལ་པའི་གནད་ཀྱིས་ངོ་བོ་ཉིད་མེད་པའི་ལེའུར་སྡུད་པ་རྣམས་ཀྱི་སྒྲའི་དོན་ཡིན་ནམ་དཔྱད། མཐར་ཐུག་རིགས་ངེས་པ་དང༌། རྣམ་ཤེས་ཚོགས་བརྒྱད་སོགས་ནི་སྤྱན་རས་གཟིགས་ཀྱི་ལེའུ་སོགས་ལས་ཐོར་བུར་གསུངས་པ་མ་གཏོགས་སྔ་མ་རྣམས་དང་འདྲ་བར་ལེའུ་རིལ་པོས་སྟོན་པ་མེད་པས་ལེའུ་རྣམས་ཞེས་མ་སྨོས་པར་དགོངས་འགྲེལ་ལས་གསུངས་པ་རྣམས་ཞེས་སྨོས་ལ་བྱང་ས་སོགས་ལས་གཞན་དབང་ཀུན་བཏགས་ཀྱིས་སྟོང་པ་ཡོངས་གྲུབ་ཏུ་སྒྲུབ་ཚུལ་འོག་ཏུ་འཆད་པར་འགྱུར་བས། འདིར་ཟུར་ཙམ་ལས་མ་སྨོས་སོ། །སྐབས་འདིར་གཉལ་སྟོན་དཔལ་འབྱོར་ལྷུན་གྲུབ་ཀྱིས་དོན་དམ་པ་མཚན་ཉིད་ལྔ་ལྡན་ཞེས་པ་དང་མདོ་སྡེ་རྒྱན་དྲངས་ནས་དེ་ལྟར་དུ་བཤད་པ་ནི་འོལ་ཚོད་ཀྱིས་ཉ་དང་ཉུང་མ་བསྲེས་པའོ། །ཡང་དེས་འཕགས་པ་ཐོགས་མེད་ཀྱིས་གཙོ་བོར་དགོངས་འགྲེལ་ལ་བརྟེན་ནས་ཞེས་གཙོ་

― GTD002_Page_0811 ―

^{[མ་དཔེ་གཟིགས་ན་འདིར་གནོན།]}

[Full Size]

བོར་སྨོས་པ། རྒྱུད་བླ་མའི་འགྲེལ་པར་སེམས་བདེན་སྟོང་གཏན་ལ་འབེབ་པའི་ཚེ། གཟུངས་ཀྱི་དབང་ཕྱུག་རྒྱལ་པོ་སོགས་ལ་བརྟེན་ཀྱང་དེ་གཙོ་བོ་ཡིན་པ་འགོག་ཆེད་དུ་བཤད་པ་ཡང་མ་འབྲེལ་ཏེ། འཕགས་པ་ཐོགས་མེད་ཀྱིས་གསུངས་ཚད་མདོ་གང་ལ་བརྟེན་འཆད་པ་མིན་གྱི། སེམས་ཙམ་དང་མཐུན་པའི་དྲང་ངེས་ཀྱི་ཚུལ་འདི་གང་ལ་བརྟེན་འཆད་པ་འོག་ཏུ་ཀླུ་སྒྲུབ་ཀྱིས་གང་ལ་བརྟེན་འཆད་པའི་སྐབས་ཀྱིས་ཤེས་ལ། དེ་ཡང་ལེགས་ཕྱེའི་ནང་ནས་ལང་གཤེགས་སོགས་ལས་འདི་གཙོ་བོའི་དོན་ཡིན་གྱི། སྐབས་འདིར་གཟུངས་ཀྱི་དབང་ཕྱུག་རྒྱལ་པོར་བརྟེན་པ་ཙམ་ཡང་མ་ཡིན་པས་གཙོ་བོ་སྨོས་དོན་མེད་ལ། དེའི་ཚེ་དེ་གཙོ་བའི་ཕྱིར། ༼ཛི༽དེ་ལ་དང་པོ་ཇི་ལྟར་ཡོད་ཅེ་ན་ཞེས་པའི་དོན་ལ་པྲ་སྟིས་སྒྲོ་སྐུར་བྱེད་ཚུལ་ཇི་ལྟར་ཡོད་ཅེ་ན་ཞེས་བཤད་ཀྱང༌། འོག་ཏུ་སྒྲོ་སྐུར་སྤང་བའི་ཚུལ་གྱིས་ཡོད་དེ་ཞེས་གསུངས་ཀྱི་ཞེས་པ་དང་མ་འབྲེལ་བས། རང་ལུགས་དཀའ་འགྲེལ་ལས། གནས་ལུགས་ཀྱི་དོན་ཇི་ལྟར་ཡོད་ཅེ་ན་ཞེས་པ་ལྟར་གནས་ལུགས་སམ་མཐའ་གཉིས་སྤང་བའི་དབུ་མའི་ལམ་དེ་ཇི་ལྟར་ཡོད་ཅེས་དྲིས་པ་ཡིན་ནོ། །འདི་ལ་བསམ་ནས་གཞི་གྲུབ་ན་སྒྲོ་སྐུར་སྤང་བའི་ཚུལ་གྱིས་ཡོད་པས་ཁྱབ་པར་སྨྲ་བ་ཡིག་ཆ་གསར་རྙིང་གཉིས་ཀས་བཀག་ལ། གཞུང་གི་དོན་ཡང་མ་ཡིན་ཏེ། གཞུང་འདིའི་དོན་བློ་དམན་པ་རྣམས་ཀྱིས་གནས་ལུགས་ཇི་ལྟར་ཡོད་བཙལ་བའི་ཚེ་ཁ་ཅིག་མེད་བཞིན་དུ་ལྷག་པར་སྒྲོ་བཏགས་ཏེ་སྒྲུབ་ཚོད་མ་ཟིན་པར་དབུས་ནས་ཐལ་སོང་བས་རྟག་མཐའ་དང༌། ཁ་ཅིག་ཡོད་པ་དེ་ལ་

― GTD002_Page_0812 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་མེད་དོ་ཞེས་དགག་ཚོད་མ་ཟིན་པར་དབུས་ནས་ཐལ་སོང་བས་ཆད་མཐའ་སྟེ་མཐའ་གཉིས་སྤང་བའི་ཚུལ་གྱིས་ཡོད་ཅེས་པ་མ་ཟིན་པ་སྨོས་པའི་དོན་ཡིན་པའི་ཕྱིར། གཞན་དུ་ན་སྒྲོ་འདོགས་སྤངས་པ་དང་ཞེས་སྨོས་པའི་ཆོག་པའི་ཕྱིར། སྒྲོ་འདོགས་སྒྲོ་འདོགས་ཀྱི་མཐའ་མིན་ལ། སྒྲོ་འདོགས་ཀྱི་མཐའ་དང༌། རྟག་མཐའ་ཡོད་མཐའ་སོགས་བརྟགས་པ་མཐའ་བཟུང་གི་དོན་གཅིག་ཀྱང་སྤྱིར་མེད་པ་དང༌། འོན་ཀྱང་དེར་གནས་པ་དང་ལྷུང་བ་ཡོད་པ་མི་འགལ་བ་སོགས་དང། ཆོས་ཐམས་ཅད་གཞི་དབུ་མ་ཡིན་ཀྱང་རང་སྟོན་པའི་གཞུང་དང་རྟོགས་པའི་བློ་དེ་གཞུང་དང་ལམ་གྱི་དབུ་མ་ཡིན་མི་དགོས་པ་སོགས་ཞིབ་ཆ་ཕྲན་ཚེགས་རྣམས་མཐའ་དཔྱོད་ལས་ཤེས་པར་བྱའོ། །ཁ་ཅིག་གཟུགས་ལ་སོགས་པའི་ཆོས་རྣམས་དང༌། གཟུགས་ལ་སོགས་པའི་ངོ་བོ་ཞེས་སྨོས་པ་ཁྱད་པར་དང་ངོ་བོའི་དབང་དུ་བྱས་ཟེར་ཡང༌། སྔ་མས་ཆོས་རྣམས་སྤྱིར་བསྟན་པ། ཕྱི་མས་སྒྲོ་འདོགས་ཀྱི་གཞིའི་གཙོ་བོ་གཞན་དབང་ཡིན་པས་དེ་ཉིད་དམིགས་ཀྱིས་བསལ་བའོ། །ཁ་ཅིག་འོ་ན་འདིར་དངོས་སུ་བསྟན་པའི་སྒྲོ་འདོགས་ཀྱི་གཞི་ཀུན་བཏགས་མིན་ནམ་ཞེ་ན་འོག་ཏུ་འཆད་དོ། །དེ་ནས་སྐུར་འདེབས་ཀྱི་གཞི་གཞན་དབང་ཁྱད་ཆོས་གསུམ་ལྡན་དུ་བཤད་པའི་གཉིས་པ་བརྗོད་དུ་མེད་པའི་དངོས་པོའི་དོན། དཀའ་འགྲེལ་ལས་བརྡའ་སྦྱོར་དགོས་ཀྱི་དངོས་པོ་ཞིག་ལ་གསུངས་པའི་དགོངས་པ་ཡིག་ཆར་བརྡ་སྦྱོར་དགོས་ཀྱི་གང་ཟག་གི་ངོ་ལ་སྦྱར་ཏེ། སྤྱིར་རང་གྲུབ་ཙམ་ནས་ཐ་སྙད་དང་ལྡན་དགོས་པར་དགོངས་སོ། །རིན་ཆེན་བྱང་ཆུབ་ཀྱིས་ཀྱང་བུམ་བརྡ་མ་སྦྱར་བ་དེས་ལྟོ་ལྡིར་བ་མཐོང་བའི་ཚེ་

― GTD002_Page_0813 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གི་ངོ་བོ་ཙམ་བརྗོད་དུ་ཡོད་ཀྱང་བུམ་པའི་ཐ་སྙད་བརྗོད་དུ་མེད་པས། མཚོན་བྱས་བསྡུས་པའི་འདུས་བྱས་རྣམས་བརྗོད་དུ་མེད་པའི་དངོས་པོ་མིན་ལ། མཚན་ཉིད་ཀྱིས་བསྡུས་པ་རྣམས་དེ་ཡིན་ནོ་ཞེས་བཤད་དེ། མཚོན་བྱ་ལ་རང་གི་ངོ་བོ་ངེས་པ་ལས་ལོགས་སུ་ཐ་སྙད་ཚོལ་རྒྱུ་མེད་པ་ལ་བསམ་པའོ། །འོན་ཀྱང་ཀུན་མཁྱེན་འཇམ་དབྱངས་བཞད་པ་རང་ཉིད་ཀྱི་དགོངས་པ་ནི་བརྗོད་དུ་མེད་པའི་དངོས་པོའི་དོན། དོན་དམ་པར་སྒྲ་རྟོག་གི་ཡུལ་མ་ཡིན་པ་ལ་བྱེད་པར་མངོན་ཏེ། བྱང་སར། བཏགས་པའི་ཚིག་གི་མཚན་མའི་གཞི་ཞེས་སོགས་ཀྱིས་བཤད་པའི་ཁྱད་ཆོས་གསུམ་དང༌། འཇུག་པར་སེམས་ཙམ་པའི་འདོད་པ་བརྗོད་པའི་སྐབས་སུ། ཡོད་དང་སྤྲོས་ཀུན་ཡུལ་མིན་རང་བཞིན་ཡོད། །ཅེས་ཁྱད་ཆོས་གསུམ་གསུངས་པ་སྦྱར་ཏེ། གཉིས་ཀའི་ཐད་དུ། དོན་དམ་པར་སྒྲ་རྟོག་གི་སྤྲོས་པའི་ཡུལ་མ་ཡིན་པའམ། བརྗོད་དུ་མེད་པ་དང༌། ཞེས་གསུངས་པའི་ཕྱིར། དོན་དམ་པར་དེའི་ཡུལ་མིན་ཚུལ་ཡང༌། གནས་ཀྱི་བཀོད་པ་ལྟ་བུ་ཞིག་གཞན་གྱིས་བརྗོད་པའི་ཚེ་བློར་ལམ་གྱིས་འཆར་རྒྱུ་ཞིག་ཡོད་པ་དེ་སྒྲ་སྤྱི་ཡིན་གྱི་དོན་དངོས་མ་ཡིན་ཏེ། དེ་ཡིན་ན་མིག་གིས་མཐོང་བ་ལྟར་རྩི་ཤིང་སོགས་ཀྱང་འཆར་དགོས་པ་ལ། དེ་དག་འཆར་བ་སོ་སོ་ནས་བརྗོད་དགོས་ཀྱི། བརྡ་གཅིག་གིས་ཁྱད་པར་ཀུན་བློར་འཕེན་མི་ནུས་པའི་ཕྱིར། སེལ་བའི་རྣམ་པའི་འཇུག་ཚུལ་ཡང་དེ་ཡིན་ཏེ། རྣམ་འགྲེལ་ལས། ཁྱད་པར་རྣམས་ལ་བརྡ་དག་ནི། །འཇུག་པ་སྲིད་པ་ཡོད་མ་ཡིན། །ཞེས་དང༌། དགོངས་པ་རབ་གསལ་ལས།

― GTD002_Page_0814 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་སུ་ན་བཏགས་པའི་རྣམ་པ་འཛིན་པའི་ཞེས་གསུངས་པའི་ཕྱིར། དེར་མ་ཟད་ཞིབ་ཏུ་ཕྱེ་ན་བརྗོད་པ་པོའི་རྟོགས་དུས་ཀྱི་དེ་ཁོ་ནའི་དོན་སྤྱི་ཡིན་གྱི། སྐབས་དེར་ཡོད་པ་དེའི་སྒྲ་སྤྱི་ཡིན་པར་མ་ངེས་ཏེ། སྐབས་དེར་ཡུལ་ཇི་ལྟར་ཡོད་ཀྱང༌། བློ་ལ་དེའི་བཤད་པ་ལྟར་གྱི་རྣམ་པ་ཞིག་འཆར་བའི་ཕྱིར། འོན་ཀྱང་སངས་རྒྱས་ཀྱི་གསུང་གི་ཁྱད་པར་ཡང་བརྗོད་པས། སེལ་འཇུག་མ་ཡིན་པར་བླ་མ་དག་འཆད་ཀྱང༌། གཅིག་གིས་བློར་མཉམ་དུ་མི་འཕེན་པས་དཔྱད་དགོས། དེ་ལ་འོ་ན་ཡོད་དང་ཞེས་པས་ཀུན་བཏགས་ཀྱི་གཞི་ཡིན་པར་ཇི་ལྟར་བསྟན་ཞེ་ན། གཞུང་དེའི་ཕྱོགས་སྔར་དབུས་མཐའི་འགྲེལ་པ་སོགས་ཡོང་ཞིང༌། དེར་ལྷག་མ་ཡོད་པར་གསུངས་པ་ཀུན་བཏགས་བཀག་ཤུལ་ན་དེས་སྟོང་རྒྱུའི་གཞི་དང་སྟོང་པ་དོན་དམ་པར་ཡོད་པ་ལ་འོག་ཏུ་འཆད་པར་འགྱུར་བས་འདིར་སྨོས་པ་ཡང་དེར་མ་གྲུབ་བཞིན་དུ་དེར་ཀུན་བཏགས་པའི་གཞི་དོན་དམ་པར་ཡོད་པ་ལ་བྱ་ཡི། སྤྱིར་ཡོད་ཙམ་ལ་མི་བྱ་སྟེ། དབུ་མ་སྙིང་པོར་ཡང༌། བཏགས་པ་རྒྱུ་མཚན་བཅས་ཕྱིར་དང༌། །ཞེས་སྨོས་སོ། །པྲ་སྟིའི་དྲང་ངེས་རྣམ་འབྱེད་རྒྱས་པར་གཞན་དབང་གི་གཙོ་བོ་ཀུན་རྟོག་དང་ཡོངས་གྲུབ་གཉིས་རང་རིག་དང་མི་རྟོག་ཡེ་ཤེས་ཀྱི་ངོར་གཉིས་སྣང་ནུབ་པའི་ཕྱིར་སྤྲོས་པའི་རྣམ་པར་བརྗོད་དུ་མེད་པ་ལ་བཤད་པ་ཡང་བབ་ལེགས་ཀྱང་སྔ་མ་གཞུང་སྤྱི་དང་མཐུན་ནོ། །འདིར་འདུལ་བ་ལས་ཉམས་པར་གསུངས་པའི་འདུལ་བ་ནི། སྒྲིབ་པ་ཟད་བྱེད་ཀྱི་དམིགས་པ་ཆོས་ཉིད་སྟོན་པའི་མདོ་དགོངས་འགྲེལ་སོགས་ལ་བྱ་ཡི། དེའི་བྱེད་པ་ལུས་ངག་གི་ལྟུང་བ་འགོག་པའི་སོ་ཐར་གྱི་

― GTD002_Page_0815 ―

^{[མ་དཔེ་གཟིགས་ན་འདིར་གནོན།]}

[Full Size]

འདུལ་བ་སོགས་ལ་མི་བྱའོ། །དེ་ལྟར་འདུལ་བ་གཉིས་སུ་དབྱེ་བ་ཡང༌། ཐེག་པ་ཆེན་པོའི་མན་ངག་གི་མདོ་ལས། འདུལ་བ་ནི་དེ་བཞིན་གཤེགས་པས་གཉིས་འཐད་གསུངས་ཏེ། གཉིས་གང་ཞེ་ན། ལྟུང་བ་འདུལ་བ་དང། ཉོན་མོངས་པ་འདུལ་བའོ། །ཞེས་གསུངས་པའི་ཕྱིར། ༼ཝི༽འདིར་ཐམས་ཅད་ཀྱི་ཐམས་ཅད་ཅེས་སྨོས་པའི་དོན་ལ་ཁ་ཅིག་དབུ་མ་པ་ཐམས་ཅད་ཀྱིས་ཆོས་ཐམས་ཅད་བདེན་པར་མེད་དོ་ཞེས་སྐུར་བ་འདེབས་པ་ལ་འདོད་ཀྱང༌། འདི་ལྟར་བཤད་ན་ལེགས་སམ་སྙམ་སྟེ། རྩ་ཤེས་ལས། དངོས་པོ་གང་དང་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གུར་གུམ་དང་ལོ་ཏོག་ལྟ་བུ་ཡུལ་དུས་འགའ་ཞིག་ཏུ་མི་སྐྱེ་བ་ལྟ་བུ་མ་ཡིན་པར། ཡུལ་དུས་གྲུབ་པའི་མཐའ་གང་གི་དབང་གིས་ཡང་རང་མཚན་གྱིས་སྐྱེ་བ་མེད་པར་གསུངས་པ་ལྟ་བུ་རང་མཚན་ཆ་ཐམས་ཅད་ནས་མེད་པར་སྒྲུབ་པ་ལ་ལུགས་འདིས་སྐུར་འདེབས་སུ་བཤད་པའོ། །བཤད་ཚུལ་འདི་ལྟར་འཐད་པ་ནི། འོག་ཏུ་དོན་དམ་པར་ཡོད་པའི་དངོས་པོ་ཡེ་མེད་དམ། ཐམས་ཅད་ཀྱིས་ཐམས་ཅད་དུ་མེད་ཅེས་པ་འགོག་པ་ཡིན་གྱི་ཞེས་པས་ཀྱང་ཤེས་སོ། །འདི་ལ་དཔར་གསར་རྙིང་གཉིས་ཀས་ཐམས་ཅད་དུ་མེད་ཅེས་འགོག་པ་ཞེས་འདུག་ཀྱང༌། གོང་དུ་ཡེ་མེད་མིན་གསུངས་པ་ནི་ཞེས་པ་དང་སྦྱར་ན་པ་ཆད་པ་ཡིན་ཚོད་དུ་འདུག་པས་བརྟག་དགོས། འདི་ལ་ཁ་ཅིག་བརྗོད་དུ་མེད་པའི་དོན་དོན་དམ་པར་སྒྲ་རྟོག་གི་ཡུལ་མ་ཡིན་པ་ལ་བཤད་པ་མི་རིགས་པར་ཐལ། འདུས་མ་བྱས་རྣམས་ཀྱང་དོན་དམ་པར་སྒྲ་རྟོག་གི་ཡུལ་མ་

― GTD002_Page_0816 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པ་གང་ཞིག །འདི་འདུས་བྱས་ལ་སྦྱར་བའི་ཕྱིར་ན་མ་ཁྱབ་སྟེ། འདུས་བྱས་རྣམས་དོན་དམ་པར་ཡང་གྲུབ་ལ་སྒྲ་རྟོག་གི་ཡུལ་ཡང་ཡིན་པས་དེའི་ཡུལ་དུ་དོན་དམ་པར་གྲུབ་སྙམ་པའི་དོགས་པ་ཆེ་བ་འགོག་ཆེད་ཡིན་པའི་ཕྱིར། གཞན་དུ་ན་ཀུན་བཏགས་འདོགས་པའི་གཞི་ཡིན་པའང་འདིར་སྦྱར་མི་རིགས་པར་ཐལ། འདུས་མ་བྱས་རྣམས་ཀྱང་དེ་ཡིན་པའི་ཕྱིར། ཡང་ཁ་ཅིག་གཞན་དབང་རང་མཚན་གྱིས་མེད་པ་དེ་སྒྲོ་འདོགས་ཀྱི་མཐའ་ཡིན་པར་ཐལ། དེ་ལྟར་འཛིན་པའི་བློ་དེ་སྒྲོ་འདོགས་ཡིན་པའི་ཕྱིར་ཏེ། གཞན་དབང་རང་མཚན་གྱིས་གྲུབ་པར་རྟོགས་པའི་ཡིད་དཔྱོད་ཀྱིས་གཅོད་རྒྱུའི་མཐའ་གཅིག་འཛིན་གྱི་སྒྲོ་འདོགས་ཡོད་པའི་ཕྱིར་ན་མ་ཁྱབ་སྟེ། དེ་ཡིན་ཀྱང་སྒྲོ་འདོགས་ཡིན་མི་དགོས་པའི་ཕྱིར། ཁྱོད་རང་ལ་དེ་ཆོས་ཅན། བྱང་སའི་དངོས་བསྟན་གྱི་སྒྲོ་འདོགས་ཡིན་པར་ཐལ། བཏགས་པའི་ཚིག་གི་མཚན་མའི་གཞི་ཞེས་སོགས་ཀྱི་དངོས་བསྟན་གྱི་སྒྲོ་འདོགས་ཡིན་པའི་ཕྱིར་ཏེ། གཞུང་འདིས་དངོས་སུ་འགོག་རྒྱུ་ལ་སྒྲོ་འདོགས་གཅིག་ཡོད་པའི་ཕྱིར། བྱས་པ་ལ་ཁོ་ན་རེ། སྒྲོ་སྐུར་མི་འགལ་བར་ཐལ། གཞན་དབང་རྟོག་པས་བཏགས་ཙམ་དུ་གྲུབ་པར་འཛིན་པ་དེ་དང་པོ་གང་ཞིག །ཕྱི་མ་ཡིན་པའི་ཕྱིར་ཏེ། དེ་རྟོག་བཏགས་ཙམ་དུ་བཟུང་ན་མཚན་ཉིད་གསུམ་ག་ལ་སྐུར་འདེབས་སུ་བཤད་པའི་ཕྱིར་ཟེར་ན། དང་པོ་མ་གྲུབ་བྱས་པ་ལ་ཁོ་ན་རེ། དེར་ཐལ། རྟོག་བཏགས་ཙམ་དུ་མ་གྲུབ་བཞིན་དུ་གྲུབ་པར་བཟུང་བའི་ཕྱིར་ན་མ་ཁྱབ་སྟེ། བདག་དང་འཇིག་རྟེན་མཐའ་དང་ལྡན་པར་ལྟ་བ་དེས་མི་ལྡན་བཞིན་དུ་ལྡན་པར་བལྟས་ཀྱང༌། རྣམ་བཤད་ལས། མཐའ་དང་ལྡན་པ་སྐྱེ་བ་

― GTD002_Page_0817 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་མར་མི་འཇུག་པར་ལྟ་བ་ཞེས་གསུངས་ལ། གསེར་ཕྲེང་ལས་ཀྱང༌། མཐའི་དོན་དེ་ལྟར་འཆད་པའི་དབང་དུ་བྱས་ན་འདུ་བའི་ལྟ་བར་གསུངས་ཀྱི་གཡོ་བའི་ལྟ་བར་མ་གསུངས་པའི་ཕྱིར་རོ། །༼ཞི༽འདི་ལ་དཔྱོད་ལྡན་ཁ་ཅིག་ན་རེ། མཐའ་གཉིས་སྤོང་ཚུལ་སྤྱིར་བསྟན་པའི་སྐབས་ཀྱི་སྒྲོ་འདོགས་ཀྱི་མཐའ་དང༌། སྒྲོ་འདོགས་ཀྱི་མཐའ་བྱེ་བྲག་ཏུ་འགོག་བའི་སྐབས་ཀྱི་སྒྲོ་འདོགས་ཀྱི་མཐའ་གཅིག་གམ་མི་གཅིག མི་གཅིག་ན་དེ་གཉིས་འགོག་བྱེད་སོ་སོ་བ་དགོས་པ་ལ། འོག་ཏུ་ངོ་བོ་དང༌། ཁྱད་པར་དུ་བཏགས་པ་དེས་དེ་དོན་དམ་པར་སྟོང་པར་བསྟན་པས་འགོག་སྟེ། ཞིབ་ཏུ་འཆད་པར་འགྱུར་རོ། །ཞེས་ཐུན་མོང་དུ་གསུངས་པ་དང་འགལ་ལོ། །གཅིག་ན་ནི། འོག་མར་ཆོས་བདག་དགོས་པས། འདིར་ཡང་དེ་དགོས་སམ། དགོས་ན་ཀུན་བཏགས་རང་མཚན་གྱིས་གྲུབ་པ་ཡང་དེར་འགྱུར་ཏེ། ཀུན་བཏགས་རང་མཚན་གྱིས་གྲུབ་པར་འཛིན་པ་སྒྲོ་འདོགས་སུ་དངོས་སུ་བསྟན་ནས་དོན་དམ་པར་ཡོད་པར་འཛིན་པ་སྒྲོ་འདོགས་སུ་ཤུགས་ལ་བསྟན་པའི་ཕྱིར་ཟེར་ན། སྔོན་གྱི་མཁས་པ་མང་པོ་ཞིག་ཀུན་བཏགས་རང་མཚན་གྱིས་གྲུབ་པ་ཆོས་བདག་ཏུ་འདོད་དེ། འདིར་བྱང་སའི་དོན་འཆད་པའི་ཚེ་གོང་དུ་ཚིག་གིས་བཏགས་པའི་ངོ་བོ་ཉིད་གཟུགས་ལ་སོགས་པ་ཚིག་གིས་བཏགས་པའི་གཞི་དེ་ཉིད་རང་མཚན་གྱིས་ཡོད་པར་ཞེན་པ་ལ་བྱས་ནས། དོན་བསྡུས་ཚེ། སྤྱིར་ཀུན་བཏགས་དོན་དམ་དུ་ཡོད་པར་ཞེན་པ་ལ་གསུངས་ཀྱི། དེ་གཉིས་ཁྱད་མ་ཕྱེ་བའི་ཕྱིར་ཟེར།

― GTD002_Page_0818 ―

^{[མ་དཔེ་གཟིགས་ན་འདིར་གནོན།]}

[Full Size]

མཐའ་གཉིས་སྤྱིར་བསྟན་པའི་དེ་ལ་ཀུན་བཏགས་རང་མཚན་གྱིས་གྲུབ་པ་ཡོང་ཞིང༌། སྒྲོ་འདོགས་ཀྱི་མཐའ་བྱེ་བྲག་ཏུ་དགག་པའི་སྐབས་ཀྱི་སྒྲོ་འདོགས་ཀྱི་མཐའ་ལ་ཡང་ཡོང་ཆོག་མོད་འོན་ཀྱང་ཆོས་བདག་དངོས་ཡིན་མི་དགོས་ཏེ། འདིར་བཤད་པའི་ཀུན་བཏགས་ནི་ཐག་ཁྲ་སྦྲུལ་དུ་སྣང་བའི་སྣང་ཆ་དང་དཔེ་དོན་སྦྱོར་བ་གོང་དུ་བཤད་ཟིན་པས་དེའི་སྟེང་ནས་བཤད་ན་དེ་འདྲའི་སྣང་ཆ་དེ་བློས་བཏགས་ཙམ་མ་ཡིན་པར་གྲུབ་ན་རང་ངོས་ནས་སྦྲུལ་གྱི་རྣམ་པར་སྐྱེ་དགོས་ལ། དེ་སྐྱེས་ན་དེ་འདྲའི་སྣང་ཆ་དེ་གཞི་ཐག་ཁྲ་དེ་དང་འབྲེལ་ཞིང༌། སྦྲུལ་གྱི་རྣམ་པར་སྐྱེས་པ་དེ་ཡང་དོན་བདེན་པ་ཡིན་པས་ཐག་ཁྲའི་གཤིས་སུ་སོང་སྟེ། ཐག་ཁྲ་དེ་ཉིད་སྦྲུལ་དུ་གྲུབ་དགོས་ཀྱི་ལོག་ན་སྦྲུལ་དུ་གྲུབ་རྒྱུ་གཞན་མེད་དོ། །འོན་ཀྱང་སྣང་ཆ་སྦྲུལ་གྱིས་སྟོང་པ་དེ་ཐག་ཁྲ་སྦྲུལ་དུ་གྲུབ་པ་བཀག་ཙམ་ཡང་མིན་ལ། སྣང་ཆ་སྦྲུལ་དུ་མ་གྲུབ་པར་བཟུང་བས་ཐག་ཁྲ་སྦྲུལ་འཇིགས་ཡང་དངོས་སུ་མི་སེལ་ལོ། །དེ་བཞིན་དུ་ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་དོན་དམ་པར་གྲུབ་ན་ཡོངས་གྲུབ་ལྟར་གཞི་གཞན་དབང་དེའི་སྡོད་ལུགས་སུ་མི་བསླུ་དགོས་པས། ཆོས་བདག་ཏུ་ཀུན་བཏགས་པ་དོན་ལ་གནས་དགོས་ཀྱང་ཀུན་བཏགས་དོན་དམ་པར་མ་གྲུབ་པ་ཆོས་ཀྱི་བདག་མེད་ཕྲ་མོ་ཡིན་མི་དགོས་སོ། །འདིར་ཐུན་མོང་དུ་བཀག་པ་ནི་སྔར་བཤད་པ་ལྟར་ཀུན་བཏགས་རང་མཚན་གྱིས་གྲུབ་པ་དང་ཆོས་བདག་ཡོད་ན་ཡོད་མཉམ་དང༌། མེད་ན་མེད་མཉམ་ཡིན་དགོས་པའི་རིགས་པའི་འཕུལ་ཡིན་པས་རིགས་པའི་འཕུལ་དང་དངོས་ཀྱི་ཁས་བླངས་གཉིས་ཁྱད་ཕྱེད་པ་གལ་ཆེའོ། ། ༼ཟི༽བྱང་སའི་ལུང་འདིས་དེ་གཉིས་ཀ་

― GTD002_Page_0819 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་མི་རིགས་སོ་ཞེས་པ་ཡོངས་གྲུབ་ཀུན་བཏགས་གཉིས་ལ་བྱེད་ཀྱང་གོང་དུ་གཉིས་ཀ་ལ་བཤད་པ་ལ་སྐྱོན་མེད་ཅེས་པ། གཞན་དབང་ཡོངས་གྲུབ་གཉིས་ལ་བྱེད་དེ། དགོངས་འགྲེལ་ལས། བཏགས་པའི་ཚིག་གིས་མཚན་མའི་གཞི་གཞན་དབང་ལ་སྦྱར་བའི་དོན་བཞིན། བྱང་སའི་ཡང་དངོས་སུ་གཞན་དབང་གཅིག་པུ་དོན་དམ་པར་མ་གྲུབ་པར་ལྟ་བ་སྐུར་འདེབས་སུ་བཤད་མོད་ཀྱང༌། བཤད་ཚུལ་དེ་གཞན་དབང་ཡོངས་གྲུབ་གཉིས་ཀ་ལ་སྦྱར་ཏེ་དོན་དམ་པར་མ་གྲུབ་པར་ལྟ་བ་སྐུར་འདེབས་སུ་བཤད་ཆོག་པའི་ཕྱིར། ཞེས་པའི་དོན་ཡིན་པས་སོ། །འདི་ལ་ཁ་ཅིག་གཞན་དབང་དོན་དམ་པར་མ་གྲུབ་པར་ལྟ་བ་སྐུར་འདེབས་སུ་དངོས་སུ་མ་བཤད་པར་ཐལ། གཞན་དབང་རང་མཚན་གྱིས་མ་གྲུབ་པར་ལྟ་བ་སྐུར་འདེབས་སུ་དངོས་སུ་བཤད་ནས་དོན་དམ་པར་མ་གྲུབ་པར་ལྟ་བ་སྐུར་འདེབས་སུ་ཤུགས་ལ་བཤད་པའི་ཕྱིར། དེར་ཐལ། ཀུན་བཏགས་རང་མཚན་གྱིས་གྲུབ་པར་ལྟ་བ་སྒྲོ་འདོགས་སུ་དངོས་སུ་བཤད་ནས་དོན་དམ་པར་གྲུབ་པར་ལྟ་བ་སྒྲོ་འདོགས་སུ་ཤུགས་ལ་བཤད་པའི་ཕྱིར་ན་མ་ཁྱབ་སྟེ། བྱང་སའི་གཞུང་རང་ཉིད་ལས་སྔ་མ་ལ་རང་གི་མཚན་ཉིད་ཀྱིས་ཡོད་པ་མ་ཡིན་པ་ལ་ཞེས་གསུངས་ཤིང༌། ཕྱི་མ་ལ་དོན་དམ་པར་ཡོད་པ་ཡང་དག་པའི་དངོས་པོ་ལ་ཞེས་གསུངས་པས་ཁྱད་ཡོད་པ་མངོན་སུམ་གྱིས་གྲུབ་པའི་ཕྱིར། སྤྱིར་དོན་དམ་པར་གྲུབ་པ་དང་རང་མཚན་གྱིས་གྲུབ་པ་ལ་ཁྱད་མེད་ཀྱང༌། འདིར་དེ་ལྟར་གསུངས་པའི་རྒྱུ་མཚན་ཡོད་དེ། ཀུན་བཏགས་བདེན་པར་མ་གྲུབ་ཀྱང་དེ་ལ་བདེན་

― GTD002_Page_0820 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་ཀྱི་ངོ་བོ་ཉིད་མེད་པ་ཞེས་མ་གྲགས་པར་མཚན་ཉིད་ངོ་བོ་ཉིད་མེད་པ་ཞེས་གྲགས་པའི་ཟླས་དྲངས་ནས་རང་གི་མཚན་ཉིད་ཀྱིས་གྲུབ་པར་འཛིན་པ་སྒྲོ་འདོགས་སུ་བཤད་ཅིང༌། དབུ་མ་པ་རྣམས་དོན་དམ་དུ་ཡོད་པའི་ཡོད་མཐའ་དང༌། ཐ་སྙད་དུ་མེད་པའི་མེད་མཐའ་ཞེས་ཟེར་གྱི་རང་མཚན་གྱིས་གྲུབ་པའི་ཡོད་མཐའ་ཞེས་ཆེར་མ་གྲགས་པས། སྔ་མ་དེའི་ཟླས་དྲངས་ནས་དོན་དམ་དུ་མེད་པར་འཛིན་པ་སྐུར་འདེབས་སུ་དངོས་སུ་བཤད་པ་ཡིན་པའི་ཕྱིར། གཞན་དབང་རང་མཚན་གྱིས་མ་གྲུབ་པར་འཛིན་པ་དེ་གཞན་དབང་དོན་དམ་པར་མ་གྲུབ་པར་འཛིན་པ་ཡིན་པས། བྱང་སའི་དངོས་བསྟན་གྱི་སྐུར་འདེབས་ཡིན་ཀྱང༌། བྱང་སའི་དེ་དངོས་སུ་སྐུར་འདེབས་སུ་བཤད་མི་དགོས་སམ་སྙམ་སྟེ་བརྟག་པར་བྱའོ། །༼འི༽འདི་ནི་ཕྱོགས་སྔ་མས་ཁོ་བོ་ཅག་ཆོས་རྣམས་མེད་དོ་ཞེས་མི་སྨྲ་ཡི། དོན་དམ་པར་མེད་ཅེས་སྨྲ་བ་ཡིན་པས། གང་ཟག་ལྟ་བུ་ཡང་རང་གི་གདགས་གཞིའི་ཕུང་པོ་ལྔ་ལ་བཏགས་ཙམ་དུ་ཡོད་དོ་ཞེས་པའི་ལན་ཁོང་ནས་བསུས་ཏེ་འགོག་པ་ཡིན་ལ། འགོག་ཚུལ་ནི་གང་ཟག་རྟོག་བཏགས་ཙམ་དུ་ཡང་མེད་པར་ཐལ། དེ་གང་ལ་འདོགས་པའི་གཞི་ཁོ་རང་མེད་པའི་ཕྱིར། དེར་ཐལ། ཐོ་ཡོར་ལ་མིར་འཁྲུལ་པའི་ཚེ་དེའི་ཆ་ཤས་སོགས་ལ་མགོ་དང་ལུས་སོགས་སུ་རློམ་པ་སྐྱེ་ཡང༌། དེ་ཙམ་གྱིས་ཐོ་ཡོར་གྱི་མིའི་གདགས་གཞིར་གྱུར་པའི་ལུས་སོགས་དོན་དུ་ཡོད་མི་དགོས་པ་དང་འདྲ་བར་འདིར་གང་ཟག་དངོས་ཀྱི་གདགས་གཞི་དེ་ཡང་རློམ་ཙམ་ལས་དོན་དུ་མེད་པའི་ཕྱིར་ཞེས་པ་སྟེ་དོན་བསྡུས་ན། གདགས་གཞི་མེད་པའི་གདགས་ཆོས་མི་རུང་ངོ་ཞེས་པ་ཡིན་ལ།

― GTD002_Page_0821 ―

^{[མ་དཔེ་གཟིགས་ན་འདིར་གནོན།]}

[Full Size]

དབུ་མ་པས་དེ་ལ་ལན་འདེབས་ཚུལ་ནི། ཐོ་ཡོར་གྱི་མི་དང་མི་དངོས་གཉིས་སེམས་ཀྱི་སྣང་ཆ་ཙམ་དུ་མཚུངས་མོད་ཀྱང༌། མིར་གྲུབ་མ་གྲུབ་ཀྱི་ཁྱད་པར་འབྱེད་ཚུལ་ཡོད་དེ། སྔ་མ་ནི་རང་གིས་ཀྱང་མི་མ་ཡིན་པར་སླར་ངེས་པའི་ཚེ་ཐ་སྙད་པའི་ཚད་མས་ཁེགས་པར་འགྱུར་ལ། གཞན་གྱིས་ཀྱང་དེ་མི་མ་ཡིན་ནོ་ཞེས་གྲགས་པས་འགོག་པར་འགྱུར་ཞིང༌། མི་དངོས་ལ་ནི་དེ་ལྟར་ཐ་སྙད་པའི་ཚད་མས་གནོད་པ་མི་འཇུག་པའི་ཕྱིར་ཞེས་སྨྲ་སྟེ། ལྷག་མཐོང་ཆེན་མོར་ཐ་སྙད་པའི་ཚད་མས་མི་གནོད་པ་དགོས་ཏེ། དེ་ལྟ་མ་ཡིན་ན་དབང་ཕྱུག་ལ་སོགས་པ་ཐ་སྙད་དུ་ཁས་མི་ལེན་ལ། གཟུགས་སྒྲ་སོགས་ཐ་སྙད་དུ་ཁས་ལེན་པའི་ཁྱད་པར་གཏན་མི་རུང་བས། ཞེས་གསུངས་པའི་ཕྱིར། ཁ་ཅིག་འདི་ལ་ཡང་རྟོན་པ་ཕྱི་མ་གཉིས་གོ་ལྡོག་པར་ཐལ་བའི་སྐྱོན་བརྗོད་མོད་ཀྱང་འགོག་ཚུལ་སྟོང་ཐུན་ལས་ཤེས་པར་བྱ་ཡི། སྐབས་མིན་པས་འདིར་མ་སྤྲོས་སོ། །ཐལ་འགྱུར་བ་ཕྱི་དོན་ཁས་ལེན་པའི་རྒྱུ་མཚན་ཡང༌། དེ་ལ་བློ་ལ་སྣང་རྒྱུ་ཙམ་ཞིག་ཡོད་ལ། སྣང་ཙམ་པོ་དེར་ཐ་སྙད་པའི་ཚད་མས་གནོད་པ་འདི་བས་ཀྱང་མ་བརྗོད་ཅིང་དོན་དུ་ཡང་མི་འཇུག་པ་དེའི་གནད་ཀྱིས་ཡིན་ཏེ། གྲུབ་མཐའ་རྩ་བར། ཐ་སྙད་དཔྱོད་བློས་མི་ཁེགས་མི་འགྲུབ་ཕྱིར། །ཕྱི་དོན་ཡོད་དང་ཞེས་གསུངས་པའི་ཕྱིར། ༼ཡི༽འདི་དག་ལ་དབུ་མ་པས་ལན་འདེབས་ཚུལ་ནི། རྩ་ཤེས་རབ་བྱེད་ཉེར་བཞི་པར། ཁྱོད་ཀྱིས་རང་གི་སྐྱོན་རྣམས་ནི། །ང་ལ་སྐྱོན་དུ་སྒྱུར་བྱེད་པ། །རྟ་ལ་མངོན་པར་ཞོན་བཞིན་དུ། །རྟ་ཉིད་བརྗེད་པར་གྱུར་པ་བཞིན། །ཞེས་པ་ནས། གལ་ཏེ་འདི་ཀུན་མི་

― GTD002_Page_0822 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་ན། །འབྱུང་བ་མེད་ཅིང་འཇིག་པ་མེད། །ཅེས་སོགས་ཏེ། ཁོ་བོ་ཅག་རང་ངོས་ནས་མེད་པར་སྨྲ་བ་ལ་རྒྱུ་རྐྱེན་གཞན་གྱིས་བཅོས་པ་ལྷག་པར་འཐད་པ་ཡིན་གྱི། རང་བཞིན་དང་བཅོས་མ་རྒྱབ་འགལ་ཡིན་པས་སེམས་ཙམ་པ་ཁྱེད་ཅག་ལ་རྒྱུ་འབྲས་མེད་པར་ཐལ་བ་འབྱུང་བ་ལ་ད་དུང་ངེད་འགོག་པ་མི་རིགས་ཏེ། དེ་ནི་རྟ་ལ་ཞོན་བཞིན་དུ་བརྗེད་ནས་གཞན་ལ་རྐུན་ཁེག་འགེལ་བ་དང་འདྲ་བའི་ཕྱིར་ཏེ། རྟེན་འབྱུང་ཁས་ལེན་ལ་གནས་བཞིན་དུ་རྟེན་པའི་དོན་བརྗེད་དེ། ཕར་བཏགས་ཙམ་གྱིས་ཡོད་པ་དེ་མ་ཤེས་པར་ཁོ་བོ་ཅག་གིས་རྟེན་འབྱུང་གི་ཆོས་ལ་སྐུར་བ་བཏབས་སོ་ཞེས་སྨྲ་བའི་ཕྱིར་ཞེས་པའི་དོན་ནོ། །འདི་ལྟར་དབུ་མ་པས་ལན་འདེབས་ཚུལ་དང་སྦྲགས་པ་འདི་ཡང་བཤད་པ་རྒྱ་སྐྱེད་བྱེད་ཙམ་མ་ཡིན་གྱི། རྗེ་བླ་མས་ལུགས་འདིས་བསམས་སོ་གསུངས་པས། རང་ལུགས་ཀྱི་ལན་འདེབས་ཚུལ་དེ་ཤུགས་ན་འདོན་རྒྱུ་ཡོད་པ་ཡིན་ཀྱང༌། དགོངས་པ་ཁོང་ན་ཡོད་པ་ལྟ་ཅི། ཚིག་རིས་དཀའ་བ་རྣམས་ལ་སླེབ་པའི་ཚེ་ན་ཡང་ལེགས་བཤད་སྙིང་པོ་འདི་ལ་འགྲེལ་པ་མང་ཡང་བཀྲལ་བ་ཉུང་བར་སྣང་བས་ཟུར་ཙམ་བྲིས་པའོ། །༼རི༽འདིར་གཞན་དབང་ཁོ་རང་ཞེས་སྨོས་པའི་ཚིག་གི་ནུས་པ་འདོན་ཚུལ་ནི། སེམས་ཙམ་པ་རྣམས་གཞན་དབང་རང་ངོས་ནས་སམ། རང་བཞིན་གྱིས་མེད་ཅེས་པ་ལ་གཞན་དབང་ཁོ་རང་མེད་ཟེར་བ་ཞིག་ཏུ་གོ་བའི་དོན་ཏེ། རང་རྒྱུད་པ་མན་ཆད་གཞན་དབང་རང་ངོས་ནས་གྲུབ་པ་དང༌། གཞན་དབང་སོ་སོར་འབྱེད་མི་ནུས་པས་ཆོས་ཅན་མཐུན་སྣང་བ་དང༌། རང་རྒྱུད་པའི་ལུགས་ཀྱི་བློ་གནོད་མེད་ཀྱང་མེད་པར་འགྱུར་ཏེ། འདིར་མ་སྤྲོས་སོ། ། ༼༡༽ཐལ་

― GTD002_Page_0823 ―

^{[མ་དཔེ་གཟིགས་ན་འདིར་གནོན།]}

[Full Size]

འགྱུར་བ་ཁྱེད་ཅག །༼༢༽བཏགས་ཙམ་མ་ཡིན་པར་གྲུབ་པས་སྟོང་པ་༼༣༽ཐ་སྙད་བཏགས་ཡོད་ཙམ་དུ་ཡོད་ཅེས་པ་དེ་ཡང་ཚིག་ཙམ་དུ་སོང་སྟེ་དོན་ལ་ཅི་ཡང་མེད་པས། ༼ལི༽འདིར་གང་ཟག་ཏུ་ལྟ་བ་ནི་སླ་ཡི་ཞེས་སོགས་དྲངས་པ་ནི། དཀོན་བརྩེགས་ལས། འོད་སྲུང་གང་ཟག་ཏུ་ལྟ་བ་རི་རབ་ཙམ་ནི་སླ་ཡི། མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟར་མ་ཡིན་ནོ་ཞེས་པ་འདི་ཉིད་ཡིན་པས། སེམས་ཙམ་པ་རྣམས་གང་ཟག་ཏུ་ལྟ་བ་འཇིག་ལྟས་ནི་བསོད་ནམས་ཀྱི་ལས་ཀྱང་སློང་བས། དངོས་སུ་ངན་འགྲོར་སྒྱུར་བྱེད་ཡིན་པར་མ་ངེས་ལ། ཆད་པར་ལྟ་བས་བསླབ་པ་སོགས་ལས་གཡེལ་བར་བྱས་པས་མཐའ་གཅིག་ཏུ་ངན་འགྲོར་བསྒྱུར་བར་འདོད་དེ། མེད་པར་ལྟ་བ་ཚེ་རབས་ཕྱི་མ་ལ། །གནས་པ་དེ་ན་མུན་ནག་རླུང་གྲང་ལྡང༌། །དེ་ན་རུས་པའང་འཇིག་པའི་ནད་སློང་ན། །བདག་ལ་ཕན་འདོད་སུ་ཞིག་དེ་རྒྱུ་འཇུག །ཅེས་པ་ལྟར་རོ། །འདི་ལ་དབུ་མ་པ་རྣམས་ཀྱིས་ལན་འདེབས་ཚུལ་ནི། མདོ་དེའི་དོན་དེ་ལྟར་མིན་གྱི། རྩ་ཤེས་ལས། གང་ཞིག་རང་བཞིན་གྱིས་ཡོད་པ། །དེ་ནི་མེད་པ་མིན་པས་རྟག །སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་པ་ལྟར། དུས་སྔ་མར་ཆགས་སོགས་རང་བཞིན་གྱིས་སྐྱེས་པ་ཕྱིས་འགག་པར་ཁས་བླངས་ན་རང་བཞིན་གྱིས་སྐྱེས་པས་རྟག་ལྟར་འགྱུར་ལ། དེ་འགག་པས་ཆད་ལྟར་འགྱུར་བ་སྟེ། སྤྱིར་སྐྱེས་པ་འགག་པས་ཆད་ལྟར་མི་འགྱུར་ཀྱང་རང་བཞིན་གྱིས་ཡོད་ན་གཏན་དུ་ཡོད་དགོས་པ་ལ་དེ་འགག་པས་ཆད་ལྟར་འགྲོ་བའི་དོན་ཡིན་ཏེ།

― GTD002_Page_0824 ―

^{[མ་དཔེ་གཟིགས་ན་འདིར་གནོན།]}

[Full Size]

ལང་གཤེགས་ལས། བཅོམ་ལྡན་འདས་གང་གིས་སྔར་འདོད་ཆགས་དང༌། ཞེ་སྡང་དང༌། གཏི་མུག་དག་གཡར་གྱི་ཁས་བླངས་ནས། ཕྱིས་འདོད་ཆགས་དང་ཞེ་སྡང་དང་གཏི་མུག་གི་དངོས་པོ་ཡོད་པ་མ་ཡིན་ནོ། །ཞེས་སྨྲ་བ་དེ་ནི་མེད་པར་གྱུར་པ་ལགས་སོ། །ཞེས་པ་ནས། བློ་གྲོས་ཆེན་པོ་ངས་འདི་ལ་དགོངས་ཏེ་གང་ཟག་ཏུ་ལྟ་བ་རི་རབ་ཙམ་ནི་སླ་ཡི། ཡོད་པ་དང་མེད་པ་ཉིད་དུ་མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །ཞེས་བཤད་དོ། །ཞེས་གསུངས་པའི་ཕྱིར། འདིའི་མེད་པ་དེ་ལ་སྟག་ལོ་སོགས་དཔྱད་པ་རིམ་པ་གསུམ་བྱས་ནས་དང་པོར་ཆོས་རྣམས་ཡོད་པ་དང་ཕྱིས་མེད་པར་འདོད་མཁན་དེ་འདྲ་ཞིག་དགོས་སམ་སྙམ་ན་འདིར་ཕྱིས་མེད་པར་སྨྲ་ཞེས་པ་སྔར་ཆོས་ཐམས་ཅད་དོན་དམ་པར་ཡོད་པར་ཁས་བླངས་ལ། ཕྱིས་ཁས་བླངས་དེ་དོར་ནས་ཆོས་ཐམསཅད་མེད་པར་སྨྲ་བ་དེ་འདྲ་མ་ཡིན་གྱི། འདུས་བྱས་རང་བཞིན་གྱིས་སྐྱེས་ནས་རང་བཞིན་གྱིས་འཇིག་པར་འདོད་མཁན་ཐམས་ཅད་ཡོང་སྟེ། དབུ་མ་སྣང་བ་ལས། དེའི་ཕྱིར་བཅོམ་ལྡན་འདས་ཀྱིས་དངོས་པོར་སྨྲ་བ་རྣམས་ཁོ་ན་མངོན་པའི་ང་རྒྱལ་ཅན་ཉིད་དུ་བསྟན་པ་ཡིན་ནོ། །ཞེས་དང༌། ཟླ་བའི་ཚིག་གསལ་ལས། སྔར་དངོས་པོའི་རང་བཞིན་ཁས་བླངས་ནས་ཕྱིས་དེ་ལྡོག་པ་ལ་བརྟེན་པར་བྱེད་པ་དེ་ནི་དངོས་པོའི་རང་བཞིན་སྔར་དམིགས་པ་ལ་སྐུར་པ་བཏབ་པས་མེད་པར་ལྟ་བར་འགྱུར་གྱི་ཞེས་པ་ནས་ཀུན་བཏགས་པའི་ངོ་བོ་ཉིད་མེད་པས་ཡོད་པར་ལྟ་བ་ཉིད་སྤོང་ཞིང༌། གཞན་གྱི་དབང་གི་ངོ་བོ་ཉིད་ཀུན་ནས་ཉོན་མོངས་པ་དང་རྣམ་པར་བྱང་བའི་རྒྱུར་གྱུར་པ་ཙམ་ཞིག་ཡོད་པས་མེད་པར་ལྟ་བ་ཉིད་སྤོང་བར་

― GTD002_Page_0825 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་པ་དེ་ལྟར་ན་ཀུན་ཏུ་བཏགས་པ་ཡོད་པ་མ་ཡིན་པའི་ཕྱིར་དང༌། གཞན་གྱི་དབང་ཡོད་པའི་ཕྱིར་ཡོད་པ་དང་མེད་པ་ཉིད་དུ་ལྟ་བ་གཉིས་ཀར་ཡང་འགྱུར་བའི་ཕྱིར། ཞེས་གསུངས་པའི་ཕྱིར། ཡང་དབུ་མ་པ་རྣམས་འདི་ལྟར་འཆད་དེ། དེ་ལྟར་རང་བཞིན་མེད་པར་མཐོང་ན་བསླབ་པའི་གཞི་ལས་མི་གཡེལ་བར་མ་ཟད་ཆེས་བརྩོན་པར་འགྱུར་བ་ཡིན་ཏེ། འཇུག་པ་ལས། དེ་ལ་དེ་ཡི་རྗེས་སུ་འགྲོ་བའི་ཡོན་ཏན་འབྱུང༌། །རྟག་ཏུ་ཚུལ་ཁྲིམས་ཡང་དག་བླངས་ནས་གནས་པར་འགྱུར། །སྦྱིན་པ་གཏོང་བར་འགྱུར་ཞིང་སྙིང་རྗེ་བསྟེན་པར་བྱེད། །ཞེས་སོགས་ལྟར་ལྟ་བ་དེ་ཉམས་སུ་ལེན་པའི་རྟེན་གྱི་རྒྱུ་ལ་ཚུལ་ཁྲིམས་དང༌། མཐུན་རྐྱེན་གྱི་ཕྱིར་སྦྱིན་སོགས་ལ་ཤིན་ཏུ་གུས་པར་བྱེད་པ་ཡིན་ནོ། །བོད་སྔ་མ་ཁ་ཅིག་ལྟ་བ་རྙེད་ཁུལ་གྱིས་ལས་རྒྱུ་འབྲས་ཀྱི་རྣམ་གཞག་ཐམས་ཅད་མཚན་འཛིན་གྱི་སྤྱོད་པའོ། །ཞེས་འདོད་པ་ནི། སེམས་ཙམ་པས་བརྗོད་པའི་སྐྱོན་འདི་དག་ཐམས་ཅད་སྤྱི་བོ་ནས་ནོད་པ་ཡིན་ཏེ། དོན་འདི་ལ་དགོངས་ནས་གངས་ལྗོངས་གྲུབ་ཐོབ་ཡོངས་ཀྱི་འཁོར་ལོའི་བསྒྱུར་བ་རྗེ་བཙུན་མི་ལ་རས་པས། སྟོང་ཉིད་ལ་ཡིད་ཆེས་སྟེང་སྟོང་ཉིད་ཁོ་རང་རྒྱུ་འབྲས་སུ་ཤར་བ་གོ་ནས་རྒྱུ་འབྲས་ཀྱི་འདོར་ལེན་སྡིག་སྤོང་དགེ་སྒྲུབ་ལ་བརྩོན་དུ་རང་འགྲོ་བ་ཡིན་གསུངས་པ་དང༌། ཡང་ཁོང་ལ་གཞན་གྱིས་ཆད་ལྟ་བ་ཡིན་ཞེས་སྐུར་བ་ཞུས་ཚེ། ཆད་མ་ཆད་ངའི་སྤྱོད་པ་ལ་ལྟོས་གསུངས་སོ། ། ༼ཤི༽དེ་ལྟར་སློབ་དཔོན་ཐོགས་མེད་ཀྱིས་བྱང་སའི་སྐབས་འདིར་གཞན་དབང་ཀུན་བཏགས་ཀྱིས་སྟོང་ཞིང༌། དེའི་ཤུལ་དུ་གཞན་དབང་

― GTD002_Page_0826 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གི་ངོ་བོ་བདེན་གྲུབ་ཙམ་ཞིག་ལྷག་མར་ལུས་རྒྱུ་ཡོད་པས་སྒྲོ་སྐུར་གཉིས་ཀ་བསལ་བར་གསུངས་ཀྱང་རྒྱུད་བླ་མར། འདི་ལ་བསལ་བྱ་ཅི་ཡང་མེད། །བཞག་པར་བྱ་བའང་ཅུང་ཟད་མེད། །ཡང་དག་ཉིད་ལའང་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་པའི་དོན་འགྲེལ་པའི་ཚེ། ཐོགས་འགྲེལ་ལས། དེ་ལྟར་ན་གང་ཞིག་གང་ན་མེད་པ་དེ་ནི་དེས་སྟོང་ངོ་ཞེས་ཡང་དག་པར་རྗེས་སུ་མཐོང་ལ། གང་ཞིག་དེར་ལྷག་མར་གྱུར་པ་དེ་ནི་དེ་ལ་རྟག་པར་ཡོད་དོ། །ཞེས་ཡང་དག་པ་ཇི་ལྟ་བ་བཞིན་ཤེས་སོ། །ཞེས་ཁམས་བདེ་བར་གཤེགས་པའི་སྙིང་པོ་དེ་ཉིད་སྒྲིབ་བྱེད་གློ་བུར་གྱི་དྲི་མ་རྣམ་པར་དབྱེ་རུང་ཡིན་པས་རང་བཞིན་ལ་མ་ཞུགས་པ་དེའི་ཕྱིར་རང་བཞིན་གྱི་མྱ་ངན་གྱིས་སྟོང་ཞིང༌། དེའི་ཤུལ་ན་བླ་མེད་བྱང་ཆུབ་འགྲུབ་རུང་གི་ཡོན་ཏན་རང་བཞིན་རྣམ་པར་དག་པའི་ཆ་དེ་ནི་རྟག་པར་ཡོད་པ་ལ་གསུངས་སོ། །གོང་དུ་བཤད་པ་ལྟར་སེམས་ཙམ་པས་སེམས་ཀྱི་རང་བཞིན་སྒྲིབ་པ་ཙམ་གྱི་དོན་དུ་འདོད་རྒྱུ་དེ་ཡང་དབུ་མ་པའི་ལུགས་ཀྱི་རང་བཞིན་ལ་བསླད་པ་ཞུགས་པའི་དོན་དུ་འགྲོ་ཞིང་དེ་ནི་རང་བཞིན་གྱི་མྱ་ངན་ཡིན་པས། རང་བཞིན་ལ་དྲི་མས་བསླད་པ་མ་ཞུགས་པ་དེ་རང་བཞིན་གྱིས་མྱང་འདས་དང༌། ཆོས་ཉིད་དུ་བཤད་པ་དེ་ལྟར་མ་ཡིན་ན་ལུང་འདིའི་གོང་གི་རྒྱས་བཤད་དུ། དེས་ན་དེ་བཞིན་གཤེགས་པའི་སྙིང་པོ་ནི་རྣམ་པར་དབྱེ་བ་ཡོད་པ་དང་བྲལ་བའི་ཤེས་པ་ཉོན་མོངས་པའི་སྦུབས་ཐམས་ཅད་ཀྱིས་ནི་སྟོང་པ་ཡིན་

― GTD002_Page_0827 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཞེས་རང་བཞིན་དྲི་མས་སྟོང་པ་ཙམ་ལ་གསུངས་པ་དང༌། དར་ཊཱིཀ་ལས། དེ་ལྟར་ན་རང་བཞིན་གྱིས་གྲུབ་པའི་ཆོས་གང་ཞིག་གཞི་གང་ན་མེད་པ་དེ་ནི་དེས་སྟོང་ངོ༌། །ཞེས་བདག་མེད་མངོན་སུམ་དུ་རྟོགས་པའི་ཤེས་རབ་ཀྱིས་ཡང་དག་པར་རྗེས་སུ་མཐོང་ལ། གང་ཞིག་དེ་ལ་ལྷག་མར་གྱུར་པ་རང་བཞིན་གྱིས་སྟོང་པ་དེ་ནི་དེ་ལ་རྟག་པར་ཡོད་དོ་ཞེས་རྗེས་ཀྱི་སྐབས་སུ་ཡང་དག་པ་ཇི་ལྟ་བ་བཞིན་དུ་ཤེས་སོ། །ཞེས་དགག་བྱའི་བདག་གི་སྟོང་པ་ལ་གསུངས་པ་གཉིས་གནད་གཅིག་ཏུ་མི་འགྲོ་བས་གཅིག་རྩ་བའི་དགོངས་པ་མ་ཡིན་པར་འགྱུར་ལ། དེར་མ་ཟད་འདིར་སྟོང་ཞེས་པ་སྟོང་རྒྱུའི་དགག་བྱའི་ཁྱད་ཙམ་ལས་སྟོང་ཚུལ་སོགས་ལ་ཁྱད་མེད་ན། རྣམ་བཤད་དགོངས་པ་རབ་གསལ་ལས། བྱང་ས་དང་དབུས་མཐའི་འགྲེལ་པ་ལས། གང་ལ་གང་མེད་པ་ཞེས་སོགས་ཀྱི་དོན་སྔར་བཤད་པ་དེ་ཡིན་ལ། རྒྱུད་བླ་མའི་འགྲེལ་པར། གང་ཞིག་གང་ན་མེད་པ་དེ་ནི་ཞེས་སོགས་ཀྱི་དོན་བཀྲལ་བ་ནི། སྔ་མ་གཉིས་དང་གཏན་མི་འདྲ་བར་དབུ་མའི་འགྲེལ་ཚུལ་དུ་ཡོད་དེ་མང་བས་འཇིགས་ནས་མ་བྲིས་ཞེས་གཏན་མི་འདྲ་གསུངས་མི་དགོས་པར་དབུ་མའི་འགྲེལ་ཚུལ་དུ་ཡོད་གསུངས་པས་ཆོག་པའི་ཕྱིར། ༼སི༽གནས་ཚུལ་དེ་ལས་ལྡོག་སྟེ་བདེན་པར་ཡོད་ཡོད་ལྟར་འཛིན་དུ་འཇུག་པས། ༼ཧི༽དེ་ལ་བདེན་པར་གྲུབ་བོ་ཞེས་དང་པོར་བརྡ་འདོགས་ཤིང་བརྡ་དེ་ཡང་ཡང་ཡིད་ཀྱི་མངོན་པར་བརྗོད་པས་གོམས་པར་བྱས་པ་ལས་ཐ་སྙད་འཇོག་པ་ན་ཕར་བརྡ་བྱས་པའི་ཉམས་མེད་པར་ཡུལ་སྟེང་ནས་གྲུབ་པ་འདྲ་བ་ཞིག་འཆར་བས་རིམ་བཞིན། ༼ཨི༽འདིར་བྱང་སའི་

― GTD002_Page_0828 ―

^{[མ་དཔེ་གཟིགས་ན་འདིར་གནོན།]}

[Full Size]

མཇུག་ཐོག་ཏུ་བསྡུ་བའི་བཤད་པ་བཀོད་པ་ནི་བྱང་སར་བདག་བཀག་ཤུལ་དུ་སྟོང་གཞི་དོན་དམ་པར་གྲུབ་པ་སྒྲུབ་ཏུ་ཡོད་པ་མཐའ་གཉིས་བསལ་ཏེ་དབུ་མའི་ལམ་དུ་བཞག་པ་དེ་ཉིད་གཞན་དུ་དྲང་མི་རུང་བར་སྒྲུབ་པའི་རྒྱབ་རྟེན་ཡིན་ཏེ། དེ་ཡང་དབུ་མ་པ་རྣམས་བློ་འཁྲུལ་བའི་སྣང་ཆ་ཙམ་ལས་ལོགས་སུ་རང་ངོས་ནས་གྲུབ་པ་ཡོད་པ་བཀག་སྟེ། དེའི་ཤུལ་ན་རང་བཞིན་གྱིས་གྲུབ་པས་སྟོང་བའི་སྟོང་ཉིད་ཙམ་ཞིག་ལྷག་མར་ཡོད་པར་བཤད་པ་ནི་ཚུལ་འདི་ལས་གཞན་དུ་འདྲེན་པའི་གོལ་ས་ཆེ་ཤོས་ཡིན་པར་འདི་བ་འདོད་པས་དེ་དག་དགག་པར་འདོད་ནས་བློ་འཁྲུལ་བའི་སྣང་ཆ་ཙམ་ཞེས་པས་འཁྲུལ་པ་དང་ལྷག་མ་ལུས་རྒྱུའི་དོན་དམ་གཉིས་པོ་དྲིས་པ་ཡིན་ལ། འོག་ཏུ་དོན་དམ་བདེན་པ་མཚན་ཉིད་ལྔ་ལྡན་དུ་བཤད་པ་དང། བསྡུ་བ་འགལ་བར་རྩོད་པ་པོ་དེ་དག་ནི་དོན་དམ་པར་ཡོད་པ་དང་དོན་དམ་ཡིན་པ་མ་ཕྱེད་པས། འདིར་ཡང་དོན་དམ་པར་ཡོད་པའི་ཡོད་ས་དྲིས་པ་ལ་འདོད་མོད་ཀྱང༌། དེ་འདྲའི་དོན་དམ་དེར་ནི་ཆོས་ཉིད་ཀྱང་ཡོད་པར་དབུ་མ་པས་འདོད་པའི་ཕྱིར། དབུ་སེམས་གཉིས་ཀས་ཡོད་མེད་རྩོད་པའི་དོན་དམ་དེ་མ་ཡིན་པར་སྒྲུབ་ཚུལ་གཞུང་འདི་ཉིད་ན་གསལ། ༼ཀུ༽དེར་གྲུབ་བོ་ཟེར་དོན་མེད་ཀྱི་དེའི་ཞེན་ཡུལ་དུ་གྲུབ་བོ་ཞེས་སྨྲ་དགོས་ན། དེ་ཡང་འཐད་པ་མ་ཡིན་ཏེ། བདེན་འཛིན་༼ཁུ༽འདིར་མངོན་པར་བརྗོད་པ་ནི་ངོ་བོ་ཉིད་མེད་པ་ལ་ངོ་བོ་ཉིད་དུ་འཁྲུལ་པའི་བློ་ཀུན་རྫོབ་པ་དེ་ཡིན་ལ། དཀའ་འགྲེལ་ལས། འོན་ཏེ་མངོན་པར་བརྗོད་པས་རྟོག་པས་བཏགས་ཙམ་དང༌། མིང་གིས་བཞག་ཙམ་གྱི་ཀུན་རྫོབ་ཙམ་ཞིག་ཡིན་ཞེས་འབྲུ་བསྣན་ཞིང༌། རྩ་བའི་དཔར་གསར་རྙིང་གཉིས་ཀར་

― GTD002_Page_0829 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་རྫོབ་དང་མངོན་པར་བརྗོད་པའི་རྣམ་རྟོག་གིས་ཞེས་གསུངས་པ་ལྟར་ན་དྲི་བ་འདིའི་བདེན་འཛིན་དེ་རྟོག་བཏགས་ཙམ་ཡང་ཡིན་ལ་རྒྱུ་ལས་ཀྱང་འབྱུང་བ་ཞིག་ཡིན་ནམ། རྟོག་པས་བཏགས་ཙམ་དང་མིང་གིས་བཏགས་ཙམ་ཁོ་ན་ཞིག་ཡིན་ཞེས་པར་སྣང་ལ། རིན་ཆེན་དོན་གྲུབ་ཀྱིས། བློ་ཀུན་རྫོབ་པ་དང་རྟོག་པའི་རྒྱུ་ལས་བྱུང་བ་ཡིན་ནམ། བློ་ཀུན་རྫོབ་པ་དང་རྟོག་པས་བཏགས་པ་ཙམ་ཞིག་ཡིན་ཞེས་བཤད་པ་དང༌། འོག་གི་རྩ་བར། མངོན་པར་བརྗོད་པ་རྟོག་པས་བཏགས་ཙམ་ཡིན་ན་གཞན་རྣམས་ཀྱང་དེ་ཙམ་དུ་འགྱུར་ཞེས་པ་ལྟར་ན་དྲི་བ་ཡང་བདེན་འཛིན་དེ་རྒྱུ་ལས་འབྱུང་བའི་མངོན་པར་བརྗོད་པ་ཞིག་ཡིན་ནམ། རྟོག་བཏགས་ཙམ་གྱི་མངོན་པར་བརྗོད་པ་ཞིག་ཡིན་ཞེས་མངོན་པར་བརྗོད་པ་དེའི་བཏགས་དོན་བཙལ་བར་འགྲོ་ལ། དཀའ་འགྲེལ་རང་ལས་ཀྱང༌། མངོན་པར་བརྗོད་པའི་རྣམ་རྟོག་དང་བློ་ཀུན་རྫོབ་པ་ཡིན་ལ་ཞེས་སྔ་མའི་འབྲུ་སྣོན་སྐབས་སུ་མངོན་པར་བརྗོད་པ་རྣམ་རྟོག་ཙམ་ལ་གསུངས་པ་དང། རྩ་བ་སྔར་དྲངས་པ་ལས། གཞན་རྣམས་ཀྱང་ཞེས་པ་ལྟར་ནའང་མངོན་པར་བརྗོད་པ་ཞེས་དེ་ཉིད་དངོས་སུ་རྩོད་གཞིར་བཟུང་བ་འབྲེལ་ཆེ་བས། གོང་དུ་མངོན་པར་བརྗོད་པའི་ཞེས་འབྲེལ་སྒྲ་སྨོས་པ་ཡི་གེ་དག་མ་དག་དཔྱད་པར་བྱའོ། །༈ རང་མཚན་གྱིས་གྲུབ་པར། ༈ དེས་བཟུང་བའི་དོན། ༈ དབུ་མ་བ། ༈ རང་མཚན་གྱིས་གྲུབ་པར་དམིགས་པའི་བློ་དེ་ནི་དོན་དང་མི་མཐུན་པས། ༼གུ༽འདི་ནི་རྩ་ཤེས་ལས། གལ་ཏེ་དངོས་པོ་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །ཞེས་པ་ལྟར། བྱ་བ་ཅི་རིགས་པ་

― GTD002_Page_0830 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་བྱེད་པར་ཁས་བླངས་ཕྱིན་རང་བཞིན་གྱིས་གྲུབ་པར་ཁས་བླངས་སོང་བས། འདིར་ཡང་ཕྱིན་ཅི་ལོག་ཏུ་སྒྲོ་འདོགས་པ་ཡོད་ན་རང་བཞིན་གྱིས་གྲུབ་དགོས་པས། ཆོས་ཐམས་ཅད་ཀྱང་རང་བཞིན་གྱིས་མ་གྲུབ་པར་ཁས་བླངས་པ་དང་འགལ་བར་བརྗོད་པ་སྟེ། དཔེར་ན་ངག་བཅད་ཀྱི་ཚེ་ཅང་མ་སྨྲ་ཞེས་བརྗོད་ན་ཡང་ངག་བཏང་བར་འགྲོ་བ་དང་འདྲ་སྙམ་དུ་བསམ་པར་སྣང་ངོ༌། །དབུ་མ་པ་རྣམས་ནི་དེ་གཉིས་ཀ་རྫུན་པ་ཡིན་ཀྱང་གཅིག་གིས་གཅིག་ཤོས་བཟློག་པ་མི་འགལ་བ་སྤྲུལ་བའི་དམག་གིས་སྤྲུལ་བའི་དམག་གཞན་བཟློག་པ་དང་འདྲ་བར་རྩོད་ཟློག་ལས། ལོག་འཛིན་འབྱུང་སྟེ་སྤྲུལ་པ་ཡི། །འགོག་བྱེད་འདི་ནི་དེ་ལྟ་ཡིན། །ཞེས་གསུངས་སོ། །༈ བློ་རང་ཉིད། ༈ བློ་དེ་ནི་འཛིན་སྟངས་ལ། ༈ དེ་དོན་ལ། ༈ ཡོངས་གྲུབ། ༼ངུ༽ཀུན་བཏགས་དོན་དམ་པར་མ་གྲུབ་པ་ལ་སྐྱོན་བསྟན་དུ་མེད་ཀྱང༌། རང་ངོས་ནས་མ་གྲུབ་པ་ལ་སྐྱོན་བསྟན་དུ་ཡོད་པས། དེའི་དབང་དུ་བྱས་ཏེ་ཀུན་བཏགས་དང་ཡོངས་གྲུབ་གཉིས་ཞེས་སོགས་གསུངས་ལ། འདིར་དོན་དམ་གྱི་དངོས་འཛིན་འགོག་པའི་ཚེ་ཡང་ཡོངས་གྲུབ་དོན་དམ་པར་མེད་པ་དངོས་སུ་མ་བཀག་པར། བློ་འཁྲུལ་བ་དོན་དམ་པར་མེད་པ་བཀག་པའི་རྒྱུ་མཚན་དེ་ཉིད་དོན་དམ་པ་ཡོད་མེད་རྩོད་པའི་གཞིའི་གཙོ་བོ་ཡིན་པར་གསུངས་ཤིང༌། དེར་མ་ཟད་དབུ་མ་པའི་མཁས་པ་ཆེན་པོ་རྣམས་ནི། བོད་ཀྱི་དབུ་མར་རློམ་པ་ཁ་ཅིག་ལྟར་མཐའ་བཞི་གང་དུ་ཡང་མེད་པས་མེད་དགོས་མི་ཟེར་གྱི། དེ་ལྟར་མེད་ཀྱང་རང་གི་ཚོགས་པ་ལ་རྟོག་པས་ཕར་བཏགས་ཙམ་དུ་ཡོད་པས་གཏན་མེད་དུ་མི་འགྲོ་ཞེས་མཐའ་བཞི་སྐྱེ་འགོག་སོགས་ཀྱང་བློས་བཏགས་ཙམ་གྱི་རྟེན་

― GTD002_Page_0831 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲེལ་ལ་གཏུགས་པས་རྟོག་བཏགས་ཙམ་དུ་སྨྲ་བ་ནི་དེའི་གྲུབ་མཐའི་རྫོང་ལྟ་བུ་ཡིན་ལ། དེ་བཤིག་སྟེ་མེད་པ་དང་རང་བཞིན་མེད་པ་ཁྱད་མེད་དུ་སོང་ན་རང་བཞིན་གྱིས་གྲུབ་པ་དང་གཏན་མེད་གང་རུང་ལས་འགྲོ་ས་མེད་ཅིང༌། གཏན་མེད་པར་མི་འདོད་པས་རང་བཞིན་ཡོད་པའི་ཕྱོགས་སུ་འཁྲིད་ནུས་སོ་སྙམ་ནས་ཁྱོད་ཀྱིས་རྟོག་བཏགས་ཙམ་པོ་དེ་ཡང་མེད་པར་ཐལ། འདོགས་བྱེད་རྟོག་པ་མེད་པའི་ཕྱིར་ཞེས་སོགས་སྒོ་དུ་མ་ནས་སྒྲུབ་པར་སྣང་ངོ༌། ། ༼ཅུ༽དེ་ལ་མངོན་པར་རྟོག་པ་ནི་རྣམ་རྟོག་སྟེ་གཞན་དབང་ཡིན་ལ། དེ་ཉིད་སྒྲ་རྟོག་གི་ཡུལ་དུ་གྲུབ་བམ་མ་གྲུབ་ཅེས་དྲིས་པར་དེའི་ཡུལ་དུ་གྲུབ་ཀྱང་ཐ་སྙད་བཏགས་ཙམ་ལས་དོན་དམ་པར་མ་གྲུབ་བོ། །ཞེས་ལན་བཏབ་པ་ཡིན་ནོ། །འདིས་ཀུན་བཏགས་དོན་དམ་པར་མ་གྲུབ་ལ་ཐ་སྙད་ཙམ་དུ་ཡོད་པ་ཡང་བསྟན་པ་ཡིན་ཏེ། སྔོན་འཛིན་མིག་ཤེས་ཀྱིས་སྔོན་པོ་ལ་བལྟས་པའི་ཚེ་ཕ་རོལ་ནས་ཚུར་སྔོན་པོའི་སྣང་བ་ཤར་བ་དེ་སྔོན་པོ་དངོས་མ་ཡིན་གྱི། ཐོག་མེད་ནས་བག་ཆགས་གོམས་པའི་དབང་གིས་ཤར་བའི་སྣང་ཆ་ཀུན་བཏགས་ཙམ་ཞིག་ཡིན་ཏེ། དེ་ཉིད་དོན་དམ་པར་གྲུབ་ན་འཁྲུལ་བའི་སྣང་ཆ་གཞན་མེད་པས། སེམས་ལས་དོན་གཞན་དུ་རྒྱང་ཆད་ལ་འགྲོ་སྟེ། ཀུན་བཏགས་དོན་དམ་པར་གྲུབ་པ་དང༌། ཆོས་བདག་གཉིས་རྩ་བ་གཅིག་ཏུ་ཡོད་ཚུལ་བཤད་ཟིན་ཏོ། །འོན་ཀྱང་དེ་ཉིད་སྣང་བ་ལས་སྔོན་པོ་སྣང་བར་འཇོག་པ་དྲན་པའི་ངོ་བོར་འདས་པའི་མི་སོགས་གྲོང་དེ་ཡོད་པ་མི་དེ་ཉིད་མིན་ཀྱང༌། དེ་ལས་མི་དེ་ངེས་པར་འཇོག་པ་དང་འདྲ་བས། སྔོན་པོ་དངོས་

― GTD002_Page_0832 ―

^{[མ་དཔེ་གཟིགས་ན་འདིར་གནོན།]}

[Full Size]

ནི། ཕ་རོལ་ནས་ཚུར་འཆར་རྒྱུ་ཡང་མེད་ལ། ཚུར་ངོས་ཀྱི་སེམས་ཀྱང་མིན། ཡེ་མེད་ཀྱང་མ་ཡིན་པ་རྨི་ལམ་གྱི་གླང་པོ་དང་འདྲ་བའི་ཕྱིར་བརྗོད་དུ་མེད་པའི་དངོས་པོ་ཡིན་ནོ། །དེ་ལྟར་ཕ་རོལ་ནས་ཚུར་ཧྲིང་ངེ་ཤར་བའི་སྔོན་པོ་དེ་ནི་འཛིན་སྟངས་ཀྱི་སྔོན་པོ་དངོས་མ་ཡིན་པ་བཞིན་དུ་དེར་སྣང་བའི་རྫུན་པ་ཀུན་བཏགས་ཡིན་ལ། དེ་དོན་དམ་པར་མ་གྲུབ་པ་འདིའི་དོན་ཏེ་འོག་ཏུ་སྔོན་པོ་ཞེས་བརྗོད་པའི་དོན་དེའི་ངོ་བོ་ཉིད་གང་ཡིན་ཞེས་སོགས་ཀྱི་དྲི་ལན་ཡང་འདིར་འདྲ་སྟེ་འཆད་པར་འགྱུར་རོ། ། ༼ཆུ༽ལུང་ཕྱི་མ་འདིས་ཀྱང་སྔར་བཤད་པའི་དོན་དེ་ཉིད་ཆེས་གསལ་བར་མཛད་པ་ཡིན་ཏེ། འདིའི་རྣམ་པར་ཤེས་པའི་དམིགས་པ་ཞེས་པ་འཇིག་རྟེན་རང་དགའ་བ་ལ་སྣང་ཚོད་ལྟར་གྱི་སྔོན་པོ་དེ་ཡིན་པས། དེ་ནི་སྐབས་འདིའི་ཀུན་བཏགས་པའི་ངོ་བོ་ཉིད་ཡིན་པར་གསུངས་ཏེ། རང་དགའ་བ་ལ་སྣང་བའི་ཚེ་སྔར་བཤད་པ་ལྟར་ཕ་རོལ་ནས་ཚུར་ཧྲིང་ངེ་ཤར་བའི་ཉམས་ཤིག་ལས་མེད་པ་རྗེས་ཀྱི་རྟོག་པས་དྲངས་པའི་ཐ་སྙད་ལ་ཕ་གི་ན་སྔོན་པོ་ཞིག་འདུག་པ་མཐོང༌། ཕ་གི་ན་དམར་པོ་ཞིག་འདུག་པ་མཐོང་ཞེས་པ་ཙམ་ལས་ཀུན་བཏགས་པའི་སྣང་ཆ་ཙམ་པོ་དེ་ཤར་བའི་སྒོ་ནས་བརྗོད་མེད་ཀྱི་སྔོན་པོ་མཐོང་ཞེས་སྨྲ་རྒྱུ་མེད་པས་ཤེས་སོ། །དེ་ལྟར་ཕལ་པ་རྣམས་འདི་མཐོང་དེ་མཐོང་ཞེས་བརྗོད་རྒྱུ་ཐམས་ཅད་ནི་སྣང་ཆ་རང་ལ་ཤར་ཚོད་ཙམ་དེ་ཡིན་པས། དེ་ནི་ཤེས་པའི་དམིགས་པ་དངོས་ལ་མ་སོང་ཡང༌། མ་བརྟགས་མ་དཔྱད་པའི་སྐབས་ཀྱི་འཆར་ཚོད་གཙོ་བོར་བྱས་ཏེ་རྣམ་པར་ཤེས་པའི་དམིགས་པ་ཞེས་གསུངས་ལ། བརྗོད་མེད་ཀྱི་སྔོན་པོ་དངོས་མ་ཡིན་པ་གོ་བའི་ཆེད་དུ་ཀུན་བཏགས་པའི་ངོ་བོ་ཉིད་གང་ཡིན་པ་ཞེས་གཞི་མཐུན་དུ་

― GTD002_Page_0833 ―

^{[མ་དཔེ་གཟིགས་ན་འདིར་གནོན།]}

[Full Size]

བསྡུས་ནས་གསུངས་སོ། །དེ་དམིགས་པ་དངོས་མ་ཡིན་བཞིན་དུ་དེ་ཇི་ལྟར་སྣང་བ་ཅི་ཡིན་སྙམ་དུ་དོགས་པའི་ཕྱིར། མངོན་པར་བརྗོད་པ་ལ་ཡོངས་སུ་གོམས་པའི་ཞེས་བག་ཆགས་ཀྱི་དབང་ཡིན་པར་གསུངས་སོ། །སྣང་ཆའི་ཀུན་བཏགས་དེ་དོན་སྤྱི་ཡིན་ནམ་སྙམ་ན་འདིར་གོལ་ས་ཆེ་ཞིང༌། དེ་ལས་ཆེས་ཕྲ་བའི་ཚུལ་འགངས་ཆེ་སྟེ་འཆད་པར་འགྱུར་རོ། ། ༼ཇུ༽འདི་དང་མཐུན་པར་སྟོང་ཐུན་ལས་ཀྱང་གསུངས་ལ། དགོངས་འགྲེལ་ལེའུ་བཅུ་ཞེས་ཡོངས་སུ་གྲགས་ཤིང༌། དཀའ་འགྲེལ་ལས་རབ་འབྱོར་གྱི་ལེའུ་དོར་ཏེ་གླེང་གཞི་བསྣན་ནས་བཅུར་མཛད་མོད་ཀྱང་རྒྱུ་མཚན་ཆེ་བ་མ་མཐོང་ལ། བསྡུ་བ་ལས། རབ་འབྱོར་གྱི་ལེའུ་ལོགས་སུ་བྱེད་པའི་དབང་དུ་བྱས་ནས་གསུངས་པ་དང་ཡང་མི་མཐུན་ནོ། །རྣམ་བཤད་ལས་བྱང་ཆུབ་སེམས་དཔའ་བཅུས་དྲི་ལན་གྱི་ཚུལ་དུ་གསུངས་པར་བཤད་ལ། རབ་འབྱོར་བྱང་སེམས་མ་ཡིན་པས་གནོད་དོ་སྙམ་ན། དེ་ཡང་དོན་མ་ཡིན་ཏེ། ཚུལ་བཞིན་ཀུན་ཏུ་དྲི་བ་དང༌། བྱང་ཆུབ་སེམས་དཔའ་དགོངས་པ་ངེས་འགྲེལ་གཉིས་ལ་དྲི་ལན་གྱི་ལེའུ་ཐུན་མོང་དུ་གཅིག་ཡིན་གྱི། ལེའུ་རེ་དང་བྱང་སེམས་རེ་སྦྱོར་ན་གླེང་གཞི་ལ་ཡང་སྦྱར་དུ་མེད་པས་སྐྱོན་མཚུངས་སོ། །འོན་ཀྱང་ལེའུ་དེ་དང་གླེང་གཞི་གཉིས་ཀ་བགྲང་ན་ལེའུ་བཅུ་གཅིག་ཏུ་འགྱུར་ལ་རྟག་བརྟན་གྱི་དཔར་མ་སོགས་སུ་གླེང་གཞི་ལ་ཟུར་དུ་ལེའུ་མ་བྱས་པར་སྣང་བས་འདིར་གཞུང་གི་དགོངས་པ་གཞུང་གཞན་ཁ་ཅིག་ལ་གླེང་གཞིའི་ལེའུ་ཟུར་དུ་བྱས་སྣང་བ་ལྟར་འདིར་ཡང་གླེང་གཞི་ལས་ལེའུ་འོག་མ་དག་དང་མི་འདྲ་བའི་བརྗོད་བྱ་ཚན་གཅིག་སྟོན་པས་ཟུར་དུ་

― GTD002_Page_0834 ―

^{[མ་དཔེ་གཟིགས་ན་འདིར་གནོན།]}

[Full Size]

ལེའུར་བྱེད་པ་དོན་གྱིས་འཐོབ་པས་དེ་ལྟར་གསུངས་ཀྱི་གྲངས་ཕན་གྱི་དབང་དུ་བྱས་པ་མ་ཡིན་ནོ། །ཡང་འདིར་འཕགས་པ་ཐོགས་མེད་ཀྱིས་དགོངས་འགྲེལ་གྱི་འགྲེལ་པ་ཟུར་དུ་མཛད་དགོས་པ་མི་སྣང་ཞེས་དེས་མཛད་པའི་འགྲེལ་པ་དེ་འདྲ་མེད་པར་བཞེད་འདུག་ཀྱང༌། བསྟན་འགྱུར་གྱི་གྲངས་སུ་འཕགས་པ་ཐོགས་མེད་ཀྱིས་མཛད་ཅེས་བཅུག་འདུག་པ་བླ་མ་བྱམས་པའི་དཀར་ཆག་ཏུ་ཡང་དེ་སོར་བཞག་བྱས་སྣང་བས། བླ་མ་རང་གིས་ཡོངས་རྫོགས་བསྒྲིགས་པ་མིན་ནམ་བརྟགས་ཏེ། ཡུམ་གསུམ་གནོད་འཇོམས་དབྱིག་གཉེན་གྱི་མ་ཡིན་པར་འདི་དང་གསེར་འཕྲེང་གཉིས་ཀར་བསྒྲུབས་པ་ཡང་ལྡོག་སྟེ་བཤད་ཅིང༌། རིགས་པ་དྲུག་ཅུ་པའི་རང་འགྲེལ་རྙེད་ན་བྲི་ཞེས་རྩ་ཤེས་ཊཱིཀ་ཆེན་དང་འགལ་བ་སོགས་ནོར་བ་མང་དུ་སྣང་ངོ༌། །༼ཉུ༽འདིར་ཡང་མིང་མ་སྨོས་ལ། བཤད་ཚུལ་དེ་ནི་བུ་སྟོན་ཐམས་ཅད་མཁྱེན་པས་ཀྱང་མཛད་དེ། དེ་ཉིད་ཀྱི་ཆོས་འབྱུང་ལས། འདིའི་ཀུན་བཏགས་མེད། གཞན་དབང་ཀུན་རྫོབ་ཏུ་ཡོད། ཡོངས་གྲུབ་གཉིས་དོན་དམ་དུ་ཡོད་པར་བསྟན་པས་མཐའ་གཉིས་སུ་འཛིན་པ་ལོག་པས་ངེས་དོན་རྩོད་མེད་ཡིན་ཞེས་ལེགས་ཕྱེའི་དོན་དུ་བཤད་པས། དེའི་ཕྱོགས་སྔ་དེ་ཉིད་ཡིན་པ་འདྲའོ། །དབུ་མ་པ་ནི་ཐ་སྙད་དུ་ཡོད་པའི་ལྡོག་ཟླའི་ཡོད་པ་དོན་དམ་དུ་གྲུབ་ཚད་ལ་འདོད་ཀྱང༌། ལུགས་འདིར་སྒྲ་རྟོག་གི་ཡུལ་དུ་ཡོད་པ་ཙམ་ལ་ཐ་སྙད་དུ་ཡོད་པར་འདོད་པས། དེ་ལ་རྫུན་པར་གྲུབ་པ་མི་དགོས་ཏེ། དཀའ་འགྲེལ་དུ་ཡང་ཆོས་ཐམས་ཅད་ཐ་སྙད་དུ་ཡོད་མཉམ་ཡིན་པར་གསུངས་སོ། །དེར་མ་ཟད་ལུང་འདིས་ཀྱང་འགྲུབ་སྟེ། ཕྱོགས་སྔ་མས་ཐ་སྙད་དུ་ཡོད་ཀྱང་དོན་དམ་པར་མེད་པར་

― GTD002_Page_0835 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་པ་ལ་ཁྱོད་ལྟར་ན་ཐ་སྙད་དུ་ཡོད་པའི་དོན་སྒྲ་རྟོག་གི་ཡུལ་དུ་ཡོད་པ་ཙམ་ལ་མི་བྱེད་པར་ངོ་བོ་ཉིད་མེད་པར་སྨྲ་བ་བཞིན་དོན་དམ་པར་ཡོད་པའི་ལྡོག་ཕྱོགས་ཤིག་ལ་བྱེད་དགོས་ལ། དེ་ལྟར་ན་ལུགས་འདིའི་སྐུར་འདེབས་མཐར་ཐུག་ཏུ་འགྲོ་ཞེས་ཐ་སྙད་དུ་ཡོད་ལུགས་ལ་དྲི་བ་མཛད་ནས། ལན་དུ་བཤད་པ་དེ་གཉིས་བཀག་གི །སྤྱིར་ཐ་སྙད་དུ་ཡོད་པ་མ་བཀག་པའི་ཕྱིར་རོ། །རང་རྒྱུད་པ་ཕལ་ཆེར་དེ་ལྟར་འདོད་ལ། དགོངས་འགྲེལ་ངེས་དོན་དུ་ཡང་འདོད་མོད་ཀྱི་ལུགས་འདིར་དེ་ཡང་འགལ་བ་ཡིན་ནོ། །བུ་སྟོན་གྱི་ཐུགས་རྩེ་གཏད་སོ་ནི། དབུས་མཐའ་ལས། ངོ་བོ་ཉིད་གསུམ་རྟག་མེད་དང༌། །ཡོད་ཀྱང་ཁོ་ན་མ་ཡིན་དང༌། །ཡོད་དང་མེད་དེ་ཁོ་ན་སྟེ། །ཞེས་དང། དེའི་འགྲེལ་པར། ཀུན་བཏགས་པའི་མཚན་ཉིད་ནི་རྟག་ཏུ་མེད་པའོ། །གཞན་གྱི་དབང་གི་མཚན་ཉིད་ནི་ཡོད་ཀྱང་ཡང་དག་པར་ནི་མིན་ཏེ། འཁྲུལ་བའི་ཕྱིར་རོ། །ཞེས་པ་འདི་ཉིད་ཡིན་ནམ་སྙམ་ཡང་དེའི་གསུང་དུ་དེ་ལྟར་དྲངས་པ་དང་ཚད་ལྡན་རྣམས་ཀྱིས་བཤད་པ་མ་མཐོང་བས་དཔྱད་དགོས་ལ། དེ་ལྟར་ཡིན་ན་འོག་ཏུ་དོན་དམ་པར་གྲུབ་ཀྱང་དོན་དམ་ཡིན་མི་དགོས་པར་གསུངས་པའི་ཞར་ལ་ཁེགས་པར་འགྱུར་རོ། ། ༈ དོན་དམ་པར་ཡོད་པ་དང་དོན་དམ་ཡིན་པ་གཉིས་སོ་སོར་མ་ཕྱེད་པའི་རྒོལ་བ་ཁ་ཅིག་དོན་དམ་པར་ཡོད་གསུངས་པ་དང། དོན་དམ་པ་མིན་གསུངས་པ་གཉིས་འགལ་སྙམ་ནས་འདི་སྐད་ཅེས། ༈ རབ་འབྱོར་གྱི་ལེའུ་༼ཏུ༽དགོངས་འགྲེལ་གྱི་ལུང་དོན་ནི། འཕགས་ལམ་ཡན་ལག་བརྒྱད་ནང་ཕན་ཚུན་ངོ་བོ་དང་བྱེད་ལས་སོགས་མི་འདྲ་བ་སོ་སོར་

― GTD002_Page_0836 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་ཀྱང། དེ་དག་ཐམས་ཅད་ཀྱི་ཆོས་ཉིད་ནི་དགག་བྱ་བཅད་ཙམ་དུ་གཅིག་པའི་དོན་ཏེ། དཔེར་ན་གཟུགས་ཆེ་ཆུང་མི་འདྲ་བ་ཁ་དོག་ཀྱང་མི་འདྲ་བ་སྣ་ཚོགས་པ་ལ་གྲིབ་མ་ཁ་དོག་གཅིག་ཏུ་འབྱུང་བ་སོགས་འགྲེལ་པ་རྣམས་ལས་བཤད་པ་དུ་མ་འབྱུང་ཡང་ཉེ་བར་མི་མཁོ་བས་མ་བྲིས་སོ། ། ༼ཐུ༽དེ་ལ་མདོ་སྡེ་རྒྱན་ལས་གསུངས་པའི་དོན་དམ་པའི་མཚན་ཉིད་ལྔ་ནི་ཡིག་ཆ་གསར་རྙིང་གཉིས་ཀ་ལས། ཡོད་མེད་ཀྱི་མཐའ་དང༌། གཅིག་ཐ་དད་ཀྱི་མཐའ་དང༌། སྐྱེ་འཇིག་མི་བྱེད་ཅིང་སློབ་པའི་དུས་ན་དྲི་མས་མ་དག སངས་རྒྱས་པའི་ཚེ་དྲི་མས་དག་པའི་ཁྱད་པར་ལྔ་ཞེས་འདྲེན་ཚུལ་ཡང་དེ་འདྲ་ཞིག་བྱས་ཏེ། བྲི་བར་མི་འགྱུར་ཏེ། འཕེལ་བ་མེད་ཅིང་ཞེས་པའི་ཐད་གཉིས་ཀར་ཡང་ཆད་སྣང་ངོ༌། །དབྱིག་འགྲེལ་ལས། ཡོད་མིན་མེད་མིན་ཞེས་པ་ཡོད་མེད་ཀྱི་མཐའ་གཉིས་ལ་མ་སྦྱར་བར་མངོན་ཏེ། འདིར་དྲངས་པའི་དབྱིག་འགྲེལ་གྱི་དོན་འཆད་པར་བློ་བརྟན་གྱི་འགྲེལ་བཤད་ལས་ཀུན་བཏགས་པ་དང་གཞན་གྱི་དབང་གི་མཚན་ཉིད་ལྟ་བུར་ཡོད་པ་མ་ཡིན་པས་ན་ཡོད་མིན་ཞེས་བྱའོ། །ཞེས་གཉིས་ཆོས་ཀྱི་རྣམ་པར་མེད་ཅིང་དགག་བྱ་བཅད་ཙམ་དུ་ཡོད་པ་ལ་གསལ་བར་གསུངས་སོ། །གཅིག་ཐ་དད་ནི་ལྡོག་པ་གཅིག་དང་ངོ་བོ་ཐ་དད་ཡིན་ལ། མཚན་ཉིད་ཐ་མ་གཉིས་ནི་དབྱིག་གཉེན་གྱི་འགྲེལ་པ་ལས་ཀུན་ནས་ཉོན་མོངས་པ་དང༌། རྣམ་པར་བྱང་བ་འགག་པ་དང༌། སྐྱེ་བ་ན་དེ་བཞིན་ཉིད་གནས་པའི་ཕྱིར་བྲི་བར་ཡང་མི་འགྱུར་འཕེལ་བར་ཡང་མི་འགྱུར་རོ། །རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་པའི་ཕྱིར་རྣམ་པར་དག་པར་འགྱུར་བ་མེད་དོ། །གློ་བུར་གྱི་ཉོན་མོངས་པ་དང་བྲལ་བས་རྣམ་

― GTD002_Page_0837 ―

^{[མ་དཔེ་གཟིགས་ན་འདིར་གནོན།]}

[Full Size]

པར་མི་འདག་པ་ཡང་མ་ཡིན་ཏེ་ཞེས་ཀུན་ཉོན་ཟད་པས་ཟད་ཅིང་རྣམ་བྱང་འཕེལ་བས་འཕེལ་བ་མེད་པ་དང། རང་བཞིན་གྱིས་དྲི་མ་གཟོད་ནས་དག་པས་སླར་འདག་རྒྱུ་ཡང་མེད་ལ། གློ་བུར་གྱི་དྲི་མ་དག་པར་མི་འགྱུར་བ་ཡང་མ་ཡིན་པ་སྟེ། འགྲེལ་བཤད་གཉིས་ཀྱང་དེ་ཁོ་ནར་བཤད་དོ། །བསྡུ་བའི་མཚན་ཉིད་ལྔ་ཆོས་ཐམས་ཅད་ལ་རུང་ཡང་འདི་རྒྱུད་ཀྱིས་མ་བསྡུས་པའི་ཆོས་ཀྱི་སྟེང་དུ་འཇོག་དཀའ་བས་དོན་དམ་བདེན་པ་མཚན་ཉིད་ལྔ་ལྡན་དུ་མ་བཤད་པར་ཐལ་བ་སོགས་ལ་ཞིབ་ཆ་ཅུང་ཟད་དགོས། རྒྱུ་མཚན་ནི་དབུས་མཐའི་འགྲེལ་པར་གཞན་དབང་ལ་གསུངས་ཤིང༌། བསྡུ་བ་ལས། རྒྱུ་མཚན་གང་ཞེ་ན་མངོན་པར་བརྗོད་པའི་ཚིག་གི་གནས་སུ་གྱུར་པའི་དངོས་པོ་གང་ཡིན་པའོ་ཞེས་འབྱུང་སྟེ། འདིས་འདུས་མ་བྱས་ཀྱང་བཤད་པར་རང་རྒྱུད་པའི་ཐད་དུ་འདི་ཉིད་ལས་གསུངས་སོ། །རྣམ་པར་རྟོག་པ་ནི་བསྡུ་བ་ལས། རྣམ་པར་རྟོག་པ་གང་ཞེ་ན། ཁམས་གསུམ་ན་སྤྱོད་པའི་སེམས་དང་སེམས་ལས་བྱུང་བའི་ཆོས་རྣམས་སོ་ཞེས་གསུངས་པའི་ཕྱིར་ཏེ་མི་མཐུན་པ་མེད་དོ། །༈ དེའི་དབང་བྱས་པའི་༼དུ༽ལུང་འདིའི་དོན་གོ་ན་སེམས་ཙམ་གྱི་གྲུབ་མཐའི་གཏིང་ཚུགས་པར་སྣང་བས་ཅུང་ཟད་བཤད་ན་ལུང་ཚན་པ་སྔ་ཕྱིས་རྣམ་ཤེས་མི་འདྲ་བ་གཉིས་བཤད་པའི་སྔ་མ་ནི་ཚུར་མཐོང་གི་ཤེས་པ་རང་དགའ་བ་ཐོག་མེད་ནས་གོམས་པའི་བག་ཆགས་ཁོ་ནའི་དབང་གིས་འཁྲུལ་སྣང་སྣ་ཚོགས་སུ་འཆར་བ་འདི་ཡིན་ལ། དེའི་དམིགས་པ་གཟུགས་ལ་སོགས་པའི་མིང་ཅན་གྱི་དངོས་པོ་ཞེས་པ་དེའི་སྣང་ཚོད་ལྟར་གྱི་གཟུགས་རང་ལས་རྒྱང་

― GTD002_Page_0838 ―

^{[མ་དཔེ་གཟིགས་ན་འདིར་གནོན།]}

[Full Size]

ཆད་དུ་ཡོད་ཡོད་འདྲ་བ་དེ་ཡིན་ཞིང། དེ་ནི་གཟུགས་འཛིན་རྟོག་པའི་སྣང་ཆ་ཙམ་གྱི་ཀུན་བཏགས་ཤིག་ཡིན་པས་གཟུགས་ལ་སོགས་པའི་བདག་ཉིད་གང་གི་ཡོད་པ་ཞེས་ཁོ་རང་གི་ངོས་ནས་རང་མཚན་གྱིས་མ་གྲུབ་པར་གཟུགས་གཟུགས་འཛིན་རྟོག་པའི་ཡུལ་དུ་སོང་བའི་ཆ་ཙམ་ལ་བཏགས་ནས་བཞག་པ་ཡིན་ནོ། །དེ་ལ་གཟུགས་ལ་སོགས་པའི་མིང་ཅན་ཟེར་བའི་རྒྱུ་མཚན་ཅི་ཡིན་ཞེ་ན། མིང་གིས་བཏགས་ཙམ་དུ་སྟོན་འདོད་པ་མ་ཡིན་གྱི། སོ་སྐྱེས་གཟུགས་ལ་བལྟས་པའི་ཚེ་ཁོ་རང་གི་སྣང་ཚོད་ཙམ་པོ་ནི་སྣང་ཆ་དེ་ཁོ་ན་ཡིན་ཞིང༌། ངས་གཟུགས་མཐོང་ཞེས་དངོས་སུ་བརྡ་སྦྱོར་བའང་དེ་ཉིད་ཡིན་པས། དེ་ལ་གཟུགས་ཀྱི་མིང་ཅན་ཞེས་བཏགས་སོ། །དེ་ལ་འོ་ན་རང་རེའི་ཤར་ཚོད་འདི་ཀུན་བཏགས་ཡིན་ན་འདི་ལ་ཐོགས་རེག་སོགས་འབྱུང་བ་མི་རིགས་ཤིང༌། བརྡ་ཡང་འདི་ལ་སྦྱར་བ་ཡིན་པས་བརྡ་ཐམས་ཅད་ཀྱང་དོན་མི་མཐུན་དུ་འགྱུར་རོ་སྙམ་ན་བཤད་པར་བྱ་སྟེ། མཁྲིས་ནད་ཅན་ལ་དུང་དང་ཞོ་འོ་མ་སོགས་ཀྱང་སེར་པོར་སྣང་ལ། དེ་ནད་ཀྱི་དབང་ཡིན་པར་མ་ཤེས་ན་དེ་ལྟར་འཛིན་པར་བྱེད་དོ། །དེ་འདྲ་བ་དེས་བདག་གིས་དུང་ལ་རེག་གོ །ཞོ་ལ་ལོངས་སྤྱད་དོ། །ཞེས་བརྗོད་པ་ཐམས་ཅད་ཀྱང་ཁོ་རང་གི་སྣང་ངོའི་དུང་སེར་པོ་དེ་ཉིད་གཞིར་བཟུང་ནས་དེ་ལ་དུང་གི་བརྡ་སྦྱར་བ་ཙམ་ཡིན་པར་སླར་དྲིས་པས་ཤེས་སོ། །འོན་ཀྱང་ཁོ་རང་ལ་དུང་སེར་པོ་སྣང་བ་དེའི་སྒོ་ནས་དུང་དཀར་པོ་དེ་ལ་རེག་པ་སོགས་ཀྱི་བྱ་བ་བསྙོན་མེད་དུ་བྱེད་ནུས་ལ། དེ་ལྟར་བྱས་ཞེས་པའི་བརྡ་ཡང་དོན་མི་མཐུན་དུ་མི་འགྱུར་མོད། གཞན་ཞིག་གིས་ཁྱོད་ཀྱིས་རེག་པའི་དུང་ནི་དུང་དཀར་པོ་ཡིན་གྱི་དུང་སེར་པོ་མི་སྲིད་དོ་ཞེས་སྨྲས་ན་ཡང་དེ་

― GTD002_Page_0839 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་པ་མངོན་སུམ་དུ་ཡིན་ཏེ། ད་ལྟ་བདག་གིས་རེག་ཅིང་ཐོགས་རྒྱུ་ཡོད་པ་འདི་ཡིན་ནོ་ཞེས་ལན་འདེབས་ཏེ། དེའི་ཚེ་དེ་ལ་དུང་དཀར་པོ་དཔྱིས་ཕྱིན་པར་མ་སྣང་བཞིན་དུ་ལོངས་སྤྱོད་དུ་ཡོད་པས་ན་དུང་དཀར་པོ་དེ་དེ་ལ་བརྗོད་དུ་མེད་པའི་དངོས་པོར་སོང་བ་ཡིན་ནོ། །གལ་ཏེ་དེའི་སྣང་ངོའི་དུང་སེར་པོ་དེ་སྣང་ཆ་ཙམ་མ་ཡིན་པར་དོན་དུ་བདེན་པ་ཡིན་ན་རྩ་བའི་དུང་དེའི་གཤིས་སུ་འགྱུར་བས། རྩ་བའི་དེ་ཡང་སེར་པོ་འགྱུར་ལ། དེ་བཞིན་དུ་རང་རེའི་སྣང་ཆ་གཟུགས་སོགས་ཀྱི་མིང་འདོགས་པ་འདི་རང་མཚན་གྱིས་གྲུབ་ན་རྒྱངས་ཆད་དུ་ཧྲེང་ཡོད་ཡོད་འདྲ་བ་འདི་དངོས་པོའི་སྡོད་ལུགས་སུ་འགྲོ་དགོས་ཏེ། རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པ་དང༌། དེའི་རྣམ་རིག་ཙམ་ལ་འཇུག་པའི་གོ་དོན་ཡིན་ནོ། །དེའི་ཕྱིར་དེ་ནི་རྫས་དང་དོན་དམ་གཉིས་ཀར་མེད་དེ། དེ་ཕྱི་དོན་གྱི་སྣང་བ་ཙམ་ཡིན་པའི་ཕྱིར། ཐལ་འགྱུར་བ་དེ་འདྲའི་སྣང་ཙམ་པོ་དེ་ཉིད་གཟུགས་སུ་འདོད་ཅིང༌། དེ་ཙམ་གྱིས་ཕྱི་དོན་ཡོད་པའི་གོ་ཆོད་ཀྱི། དེ་ལས་ལྷག་པའི་སྡོད་ལུགས་ཤིག་བཙལ་ན་བཏགས་དོན་བཙལ་བར་འགྲོ་ཞེས་འདོད་དེ། དེའི་ཕྱིར་ཕྱི་དོན་ཡོད་པར་འདོད་པའི་རྩ་བ་ཡང་རང་ངོས་ནས་མ་གྲུབ་པ་ལ་ཐུག་གོ །ལུང་ཕྱི་མའི་དོན་ནི་དོན་སྣང་གི་བག་ཆགས་ཀྱིས་མ་བསླད་པའི་ཤེས་པའི་དམིགས་པ་བརྗོད་མེད་ཀྱི་གཟུགས་དངོས་ནི་རྫས་སུ་ཡང་ཡོད་ལ་དོན་དམ་པར་ཡོད་པ་སྟེ་སྔ་མའི་ལྡོག་དོན་དུ་སྣང་བས་དེའི་ཤུགས་ཀྱིས་ཤེས་སོ། །དེ་ལྟ་བུའི་འཁྲུལ་སྣང་དང་མ་འདྲེས་པའི་ཤེས་པ་རང་རིག་ལྟ་བུས་རང་མཚན་བརྗོད་མེད་དེ་ཉིད་ཇི་ལྟ་བ་

― GTD002_Page_0840 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་ཡུལ་དུ་བྱེད་པས། དེའི་ཡུལ་དུ་རང་མཚན་གྱིས་གྲུབ་ཀྱང་སྐྱོན་མེད་དེ། དེའི་བར་ན་ཡུལ་དེ་ཇི་འདྲ་བའི་ཕྱི་དོན་གྱི་སྣང་བ་དེ་འདྲ་བ་མེད་པས། དེའི་སྣང་ཚོད་ཙམ་པོ་དེ་བརྗོད་མེད་ཀྱི་རང་མཚན་དངོས་གནས་པ་དེ་ཡིན་པའི་ཕྱིར། དེས་ན་ཀུན་མཁྱེན་བླ་མའི་ལེགས་བཤད་བཻ་ཌཱུརྱ་དཀར་པོའི་གན་མཛོད་ལས་རྟོག་པའི་ཡུལ་དུ་དོན་དམ་པར་གྲུབ་པའི་ཕྱིར་ཏེ། ཚད་མའི་ཡུལ་དུ་དོན་དམ་པར་གྲུབ་པའི་ཕྱིར་ན་མ་ཁྱབ། དེར་ཐལ། གཞལ་བྱར་དོན་དམ་པར་གྲུབ་པའི་ཕྱིར་ཞེས་གསུངས་པ་ཡང་ལེགས་བཤད་དྲི་མ་མེད་པ་ཡིན་པས། མི་ཤེས་པ་ཁ་ཅིག་རྩོད་པའི་ཚེ་ཁ་སྒོ་གཅོད་བྱེད་ཙམ་མོ་ཞེས་ཁ་བདུད་ཀྱིས་ཕྱེ་བའི་འཆོལ་གཏམ་སྨྲ་བ་རྣམས་བག་ཡོད་པར་བྱོས་ཤིག །དེ་དག་གི་དོན་ལ་ཁ་ཅིག་ཡུལ་ཤེས་གཉིས་ཀྱི་བར་ན་དེ་འདྲའི་རྣམ་པ་ཞིག་ཡོད་ན་དོན་སྤྱིར་འགྲོ་བས། དེ་རང་མཚན་གྱིས་མེད་པ་མདོ་སྡེ་པས་ཀྱང་ཤེས་ལ། དེའི་ཕྱིར་དེའི་རྣམ་རིག་ཙམ་ལ་འཇུག་པར་ཡང་མི་ནུས་སོ་ཞེ་ན། དོན་སྤྱི་བྱ་བ་ཡུལ་དེ་དེ་ན་མེད་བཞིན་དུ་ཡང་ཡིད་ངོར་ལམ་ལམ་འཆར་རྒྱུ་དེ་ཡིན་ལ། འདི་ནི་མིག་གིས་ཕར་བལྟས་ན་ཡང་མདུན་དུ་ཡོ་རེ་ཡོད་པ་འདི་ཀ་ཡིན་པས་འདྲ་བ་གཏན་ནས་མེད་དོ། །འདི་དག་ལ་ལེགས་པར་དཔྱད་ན་བརྗོད་དུ་མེད་པའི་དངོས་པོ་དེ་ཡང་རྩོད་དུས་ཀྱི་ཡམ་ཡམ་དེ་མ་ཡིན་པར་ངེས་པ་དོན་དུ་རང་བརྗོད་དུ་མེད་པ་ཞིག་ཏུ་འདུག་སྟེ། མདོར་བསྡུས་ཤིག་གོ་སླ་བའི་ངག་གིས་བཤད་ཟིན་ཏོ། །སྨྲས་པ། འཇམ་མགོན་ཐུགས་ཀྱི་སྲས་གཅིག་མཁས་གྲུབ་རྗེས། །ཡབ་རྗེའི་གཞུང་འདི་ཁོ་བོས་འགྲེལ་དགོས་ཀྱང༌། །ས་ངན་བདུད་ཀྱིས་གང་ཕྱིར་འཁྲུག་པ་སྐྱེ། །དེ་སླད་ཁྱོད་ཀྱིས་དགྲོལ་ཞེས་དབང་བསྐུར་

― GTD002_Page_0841 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན། །ཞེས་ཀྱང་གཏམ་དུ་བྱས་སོ། ། ༼ནུ༽ནམ་མཁའ་སོགས་དགག་བྱ་ཐོགས་རེག་གི་སྤྱི་བློར་འཆར་བ་དང༌། གང་ཟག་སོགས་ཕུང་སོགས་བློར་འཆར་བ་ལ་ལྟོས་ཤིང༌། སྒྲ་དོན་གྱི་སྤྱི་སོགས་ལ་མ་བརྟེན་པར་མངོན་སུམ་དུ་རྟོགས་བྱར་མེད་པ་རྣམས་བཏགས་ཡོད་ཡིན་ལ། དབང་པོའི་གཟུང་བྱའི་གཟུགས་དང་རྣམ་ཤེས་གཉིས་དབང་ཤེས་དང་རང་རིག་ལ་ལྟོས་ཏེ་རྒྱུ་མཚན་སྔ་མ་ལས་ལྡོག་པས་རྫས་ཡོད་ཡིན་ནོ། །ཡིག་ཆར་གཉིས་སྟོང་གི་གཟུགས་སྣང་བ་དགག་བྱའི་སྤྱི་འཆར་བ་ལ་མི་ལྟོས་པར་གསུངས་པ་སྒྲ་སོར་བཞག་རུང་ཡང༌། འོག་ཏུ་རྡུལ་ཕྲ་རབ་དེ་རྫས་ཡོད་དང་དབྱིབས་ཟླུམ་པོ་ཅན་ཡིན་པའི་ཕྱིར་གསུངས་པ་ཆ་དུ་མ་འདུས་པ་ལ་བཏགས་པ་རྣམས་བཅོམ་པའི་བློ་འདོར་རུང་བ་ལ་བཏགས་ཡོད་དང༌། ལྡོག་པ་རྫས་ཡོད་དུ་འཆད་པའི་ལུགས་སུ་དགོངས་པ་འགྲེལ་དགོས་སོ། །པྲ་སྟིེའི་དྲང་ངེས་རྣམ་འབྱེད་རྒྱས་པར། འདི་བས་རྫས་ཡོད་ཀྱང་གང་ཟག་གི་སྟེང་དུ་བཞག་ན་རང་སྐྱ་ཐུབ་པའི་རྫས་ཡོད་ཀྱི་བདག་གི་གྲུབ་ཚད་ལས་མ་འདས་པས་མི་འཇོག་ཅིང༌། ཤེས་པ་དང་གཟུགས་ཀྱི་སྟེང་དུ་འཇོག་ཚུལ་ཡང་སྔར་ལྟར་རོ། །ཞེས་བཤད་དོ། །དེ་ལ་འོ་ན། སེམས་ཙམ་པ་འདི་བས་ཀྱང་གང་ཟག་གི་བདག་མེད་སྟོང་གཞིའི་སྒོ་ནས་འཇོག་པར་ཐལ། འདོད་པའི་ཕྱིར། འདོད་ན། ཉན་ཐོས་རིགས་ངེས་དེས་སྡུག་བདེན་གྱི་ཁྱད་ཆོས་བཞི་མ་རྟོགས་པར་ཐལ། དེའི་སྟེང་གི་བདག་མེད་ཕྲ་མོ་ལ་ཆོས་ཀྱི་བདག་མེད་ཕྲ་མོ་དགོས་པའི་ཕྱིར། གཞན་ཡང་སྒྲ་བ་ཤེས་རབ་རིན་ཆེན་གྱིས། རྫས་ཡོད་བདག་སྨྲ་གནས་མ་བུར་ངེས་དང༌། །རྣམ་ཤེས་བདག་སྨྲས་

― GTD002_Page_0842 ―

^{[མ་དཔེ་གཟིགས་ན་འདིར་གནོན།]}

[Full Size]

དབུ་སེམས་ཡོད་པ་འགལ། །ཞེས་རྗེ་བླ་མ་བཀག་པ་དེ་དོན་དུ་སོང་བར་ཐལ། གང་ཟག་སྤྱི་ལྡོག་བཏགས་ཡོད་ཡིན་ཀྱང། གཞི་ལྡོག་ཀུན་གཞིའམ་དེ་མེད་པའི་ལུགས་ལའང་མཚན་གཞིའི་རྣམ་ཤེས་རྫས་ཡོད་དུ་འདོད་པར་རྣམ་བཤད་དགོངས་པ་རབ་གསལ་ལས་གསུངས་པ་གང་ཞིག །ཉོན་ཡིད་འཁོར་གྱི་འཇིག་ལྟ་གང་ཟག་གི་བདག་འཛིན་ཡིན་པར་སེམས་ཙམ་པས་འདོད་དགོས་པའི་ཕྱིར་རོ། །དེས་ན་རང་ལུགས་འདིར་བཤད་པའི་རྫས་ཡོད་ནི་རིགས་པའི་གྲུབ་པའི་རྫས་ཡོད། བརྟན་པ་མི་འགྱུར་བའི་རྫས་ཡོད། དོན་བྱེད་ནུས་པའི་རྫས་ཡོད་གསུམ་མ་ཡིན་པས་རང་སྐྱ་འཛིན་ཐུབ་པའི་རྫས་ཡོད་ཡིན་ལ། རང་སྐྱ་འཛིན་ཐུབ་ཚུལ་སྔར་ལྟར་ཡིན་ཞིང༌། རང་སྐྱ་ཐུབ་པའི་རྫས་ཡོད་ནི་ཕུང་སོགས་ལ་ལྟོས་མེད་ངོ་བོ་ཐ་དད་དུ་དེ་ལ་དབང་སྒྱུར་བ་པོའི་ཚུལ་གྱིས་ཡོད་པ་ལ་བྱ་བ་སྔ་མ་དང་མི་འདྲའོ། །ལྕང་སྐྱ་རིན་པོ་ཆེའི་གྲུབ་མཐར་ཁ་ཅིག་རང་སྐྱ་འཛིན་ཐུབ་པའི་རྫས་ཡོད་དང༌། རང་སྐྱ་ཐུབ་པའི་རྫས་ཡོད་གཉིས་ཀྱི་ཞིབ་ཆ་འབྱེད་པ་ཡང༌། རྒྱ་གཞུང་ཚད་ཐུབ་རྣམས་དང༌། རྗེ་ཡབ་སྲས་ཀྱི་གསུང་གང་ལས་ཀྱང་མི་འབྱུང་བས་འཐད་རྒྱུ་ཞིག་མི་འདུག་ཅེས་སོགས་མང་དུ་གསུངས་པ་ཡང་མཁས་པ་སྔ་མའི་ཁས་ལེན་གྱི་རྒྱུན་བསྐྱངས་པ་ཙམ་ལས་དགོངས་པ་དངོས་མིན་འགྲོ། ཁ་ཅིག་གང་ཟག་དང་སྐྱེས་བུར་རྫས་བཏགས་འབྱེད་པ་ནི་འགྲེལ་པ་དོན་གསལ་སོགས་ལས་གང་ཟག་རྫས་སུ་ཡོད་པ་དང་སྐྱེས་བུ་བཏགས་པར་ཡོད་པའི་རྟེན་ཅན་ཞེས་པའི་ཚིག་ལ་འཁྲུལ་བར་སྣང་ཡང་དེ་ནི་རྒྱ་སྐད་ལ་ཚིག་གི་ནུས་པ་འདོན་ལུགས་ཀྱི་ཁྱད་ཙམ་ཞིག་ཡིན་ཏེ། ཉི་སྣང་ལས། པུ་ནི་ལུས་ལ་བྱ་བར་

― GTD002_Page_0843 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་ལ། དེ་ལ་བརྟེན་པས་ན་པུ་རུ་ཥ་སྟེ་སྐྱེས་བུའོ། ཞེས་གསུངས་པ་ལྟར། གདགས་གཞི་ཕུང་བོར་བརྟེན་པ་ཚིག་ཟུར་དུ་ཐོན་པའི་དབང་གིས་ཡིན་ནོ། །ལྷས་སྦྱིན་སྣང་བ་གདགས་གཞི་སྣང་བར་ལྟོས་ཀྱང༌། རྟོགས་པ་ལ་དེ་རྟོགས་དགོས་ན་ཐམས་ཅད་ཀྱང་གདགས་གཞིའི་ཕུང་པོར་ལྟོས་མེད་ཀྱི་ང་མེད་པར་རྟོགས་པར་འགྱུར་ལ། འོན་ཀྱང་ལྷས་སྦྱིན་མངོན་སུམ་དུ་རྟོགས་པའི་བློ་གང་ཡིན་དཔྱད། ༼པུ༽དེ་ལ་བཏགས་ཡོད་དུ་འཇོག་ཚུལ་ཡང་དུ་མ་ཡོད་དེ། ཚད་མ་རིགས་རྒྱན་ལས། བཏགས་ཡོད་ལ་ཡང་ཆ་ལ་བཏགས་པ་དང༌། གནས་སྐབས་ལ་བཏགས་པ་དང༌། མེད་བཞིན་དུ་བཏགས་པ་དང༌། དེ་ལས་གཞན་པའི་བཏགས་ཡོད་བཞི་ཞེས་གསུངས་པ་དང༌། གཞུང་གཞན་ཁ་ཅིག་ལས། བརྟེན་ནས་བཏགས་པའི་བཏགས་ཡོད། ཆ་ལ་བཏགས་པའི་བཏགས་ཡོད། རྟོག་པས་བཏགས་པའི་བཏགས་ཡོད་ཅེས་ཀྱང་འབྱུང་བས་བཏགས་ཡོད་བྱས་ཚད་གཅིག་ཏུ་འཁྲུལ་མི་རུང་སྟེ། ཀུན་གཞིའི་བག་ཆགས་ལྟ་བུ་བརྟེན་ནས་བཏགས་པ་དང༌། འཇིག་ལྟ་ལྟ་བུ་ཆ་ལ་བཏགས་པ་དང༌། ནམ་མཁའ་ལྟ་བུ་རྟོག་པས་བཏགས་པ་སོགས་ཡོད་ཀྱང་འདིར་གཙོ་བོ་གནས་སྐབས་ལ་བཏགས་པ་དེར་བྱའོ། །དེ་ཡང་དགེ་སོགས་འཕེལ་འགྲིབ་ཀྱི་གནས་སྐབས་ལ་རྙེད་ཐོབ་དང༌། དེའི་རྒྱུན་གྱི་ལྡན་ཐོབ་རྣམས་བཏགས། སེམས་མེད་པའི་གནས་སྐབས་ལ་འགོག་སྙོམས། འདུ་ཤེས་མེད་པའི་སྙོམས་འཇུག འདུ་ཤེས་མེད་པ་གསུམ་བཏགས་ལ། དང་པོ་ནི། སྲིད་རྩེ་ལས་

― GTD002_Page_0844 ―

^{[མ་དཔེ་གཟིགས་ན་འདིར་གནོན།]}

[Full Size]

གྱེན་དུ་བསྐྱོད་པར་གསུངས་པས། འཕགས་པ་ཁོ་ནར་ཡོད་ཅིང་ལུགས་འདིའི་ཡུལ་ཚོར་འདུ་རགས་པ་འགག་པའི་ཆ་ཁོ་ན་དང། རང་རྒྱུད་པའི་ཡུལ་ཤེས་གཉིས་ཀ་དང༌། ཐལ་འགྱུར་བས་ཤེས་པ་ཁོ་ནར་འདོད་པ་སྐབས་བཞི་པའི་མཐའ་དཔྱོད་དུ་གསུངས་ལ། ཁ་ཅིག །དབུ་མའི་མཐའ་དཔྱོད་དུ་དྲངས་པའི་སྡུད་པའི་ལུང་ལ་བརྟེན་ནས་སྟོང་ཉིད་རྟོགས་པ་ཁོ་ནར་འདོད་ཀྱང༌། དེའི་དཀྱུས་ལ་རྣམ་ཐར་བརྒྱད་ཀ་གསུངས་པས་ཐུན་མོང་མ་ཡིན་པའི་དེ་ཡིན་པར་མངོན་ནོ། །འགོག་སྙོམས་ཐོབ་པ་ལ་སྙོམས་འཇུག་གི་སྒྲིབ་པ་སྤོང་དགོས་ཤིང༌། མཐོང་ལམ་དུ་དེ་ཐོབ་པ་ཡོད་པས་སྙོམས་འཇུག་གི་སྒྲིབ་པ་གང་ཞིག་ངོས་སྐལ་གྱི་གཞོམ་བྱ་ཡིན་ན་མཐོང་སྤང་ཡིན་དགོས་སོ་ཞེས་ཁ་ཅིག་འདོད་ཀྱང༌། དེ་སྤང་དགོས་པར་གསུངས་པ་ས་བོན་སྤོང་བ་ཡིན་མིན་དཔྱད་པར་བྱའོ། །འདུ་ཤེས་མེད་པའི་སྙོམས་འཇུག་བསམ་གཏན་བཞི་པར་བརྟེན་པས་དེ་ཡན་ཆད་ཀྱི་ཚོར་འདུ་རགས་པ་སོགས་དགག་བྱར་འོང་དོན་མེད་ཅིང་སོ་སྐྱེ་ཁོ་ནར་ཡོད་པས་འགོག་སྙོམས་དང་གཏན་མི་མཐུན་ནོ། །འདུ་ཤེས་མེད་པ་བ་ནི་འབྲས་བུ་ཆེ་བའི་ཕྱོགས་གཅིག་ན་གྲོང་ལས་དགོན་པའི་ཚུལ་དུ་ཡོད་དོ། །གནས་པའི་གནས་སྐབས་ལ་སྲོག་ཅེས་བཏགས་ཤིང་དྲོད་དང་རྣམ་ཤེས་བརྟེན་པའི་ཆ་ལ་ཚེའམ་སྲོག་ཏུ་འཇོག་པ་དང༌། སྡེ་པ་ཁ་ཅིག་སྔ་མའི་ལས་ཀྱི་མཐུས་རིས་མཐུན་གནས་པ་ཚེ་དང༌། ད་ལྟའི་མཐུན་རྐྱེན་སོགས་ཀྱི་མཐུས་འཚོ་བ་སྲོག་ཏུ་འདོད་པ་ཡང་ཡོད་དོ། །འདྲ་བའི་གནས་སྐབས་ལ་རིས་མཐུན་ནམ་སྐལ་མཉམ་བཏགས་ཤིང༌། མཚན་ཉིད་ཀྱི་གནས་སྐབས་ལ་སྐྱེ་རྒ་གནས་པ་མི་རྟག་

― GTD002_Page_0845 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བཞི་བཏགས་སོ། །ཐ་སྙད་ཀྱི་གནས་སྐབས་ལ་མིང་ཚིག་ཡི་གེའི་ཚོགས་གསུམ་བཏགས་ཏེ། བསྟན་བཅོས་སོགས་མིང་ཚིག་དུ་མ་ཚོགས་པ་ཡིན་ཀྱང་ཚོགས་པའི་རང་ལྡོག་བཏགས་ཡོད་དུ་བཤད་པ་ལས་ཁྱབ་པ་བསྟན་པ་མིན་ནོ། །འཕགས་ཆོས་མ་རྙེད་པ་ལ་སོ་སྐྱེས་ཞེས་བཏགས་ཤིང༌། དེ་དག་ལས་སོ་སྐྱེས་ཚབ་ཏུ་མ་ཐོབ་པ་བགྲངས་ནས་བྱེ་སྨྲ་རྣམས་བཅུ་བཞིར་བཤད་ཅིང་ལྷག་མ་དགུ་མ་བཤད་དོ། །ལྷག་མ་དགུ་ལས་སོ་སོར་ངེས་པ་ལ་རང་སྤྱི་དང༌། དགེ་སྡིག །བདེ་སྡུག་སྟེ་མཚན་ཉིད་དང་རྒྱུ་འབྲས་སོ་སོར་ངེས་པ་གསུམ་དང༌། འབྱོར་འབྲེལ་ལ་བཟོ་བོའི་ལག་ཆ་ཚོགས་པ་དང༌། རྒྱུ་ཚོགས་དང༌། དངོས་པོ་རང་རང་གི་བྱ་བ་དང་ལྡན་པ་སྟེ། ཐབས་དང་འདུས་པ་དང་རིགས་པའི་ཚུལ་གྱིས་བྱ་བ་བྱེད་པའི་འབྱོར་འབྲེལ་གསུམ་དང༌། མགྱོགས་པ་ལ་རྒྱུ་འགག་མ་ཐག་འབྲས་བུ་འབྱུང་བ་དང༌། འཕྱོང་བ་དང༌། འཕུར་བ་སྟེ་འདུ་བྱེད་ཀྱི་དང༌། སྐྱེས་བུ་བྱེད་པའི་དང༌། རྫུ་འཕྲུལ་གྱི་མགྱོགས་པ་དང་གསུམ་དང༌། དམན་མཆོག་སྔ་ཕྱི་སོགས་ཀྱི་གོ་རིམ་དང༌། དུས་གསུམ་དང༌། གནས་དང་གང་ཟག་ཚོགས་སྟེང་ནས་རྒྱ་གར་ལྟ་བུའི་ཡུལ་དང༌། ཚོད་གཞལ་བར་བྱེད་པའི་གྲངས་དང༌། རྒྱུ་ཚོགས་ཚང་བའི་ཚོགས་པའོ། །འབྱོར་འབྲེལ་དུ་རྒྱུ་ཚོགས་བཤད་པ་ནི། དེ་དག་ཕན་ཚུན་གཅིག་ལ་གཅིག་བརྟེན་པའི་ལྡོག་ཆ་ནས་ཡིན་ལ། འདིར་གྲངས་ཚང་བར་ཡོད་པའི་ལྡོག་ཆ་ནས་ཡིན་པས་མི་མཚུངས་སོ། །བཏགས་ཡོད་འཇོག་ཚུལ་དུ་མར་གསུངས་པའི་དགོས་པ་ཡང་ཆོས་ཐམས་ཅད་བཏགས་ཡོད་

― GTD002_Page_0846 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་དུ་གསུངས་པའི་དགོངས་པ་འགྲེལ་ཆེད་ཡིན་ལ། ཀུན་བཏུས་ལས་ཐམས་ཅད་ཀྱང་བཏགས་པར་ཡོད་པའོ་ཞེས་གསུངས་པས་ཆོས་ཐམས་ཅད་རྣམ་གྲངས་པའི་བཏགས་ཡོད་ཀྱང་ཡིན་ལ། རྣམ་གྲངས་པའི་རྫས་ཡོད་ཀྱང་ཡིན་ཏེ། བྷ་བ་རྫས་དང་ཡོད་པ་གཉིས་ཀ་ལ་འཇུག་པས་དེ་ལྟར་བཤད་དོ། །མཐའ་དཔྱོད་ལས། ཤེར་མདོར་རྫས་གྲུབ་ཏུ་གསུངས་ཞེས་པ་དཔྱད། ༼ཕུ༽འདི་དག་གི་དོན་མཐའ་དཔྱོད་ལས། ཡེ་ཤེས་རང་ཉིད་མི་རིག་ན་སོ་སོར་རང་རིག་ཅེས་པ་འབྲེལ་མེད་ཅེས་རྩོད་པ་དང༌། སོ་སོ་རང་རིག་ཅེས་པ་ཆོས་ཉིད་གཟིགས་ཚུལ་གྱིས་བཏགས་པ་ཡིན་ཏེ། སྒྲ་སྤྱི་སོགས་དང་མ་འདྲེས་པས་སོ་སོ་དང༌། འཕགས་པ་ནང་ཕན་ཚུན་ཁོ་ནའི་མངོན་སུམ་གྱི་སྤྱོད་ཡུལ་ཡིན་པའམ། རང་སྟོབས་ཀྱིས་རིག་པས་རང་རིག་པར་བཞག་གི རང་ཉིད་རིག་པས་ནི་མ་ཡིན་ནོ་ཞེས་པ་ལན་དུ་མཛད་ལ། ཀར་ལན་ཀླུ་སྒྲུབ་དགོངས་རྒྱན་དུ་ཡང་རང་ཡུལ་གཉིས་མེད་ཀྱི་ཤེས་པ་རིག་པ་མིན་ན་སོ་སོ་རང་རིག་ཅེས་པ་འབྲེལ་མེད་ཅེས་ཕྱོགས་སྔའི་རྩོད་པ་བཀོད་ནས། དབུ་མ་སྣང་བ་སོགས་གྲུབ་མཐའ་བཞི་ཀའི་གཞུང་ཐམས་ཅད་ལས་སོ་སོར་རང་རིག་ཅེས་འབྱུང་བས་ཐམས་ཅད་ཀྱང་གཉིས་མེད་ཀྱི་ཤེས་པ་དོན་དམ་བདེན་པར་ཁས་ལེན་པར་ཐལ་ལོ་ཞེས་མགོ་མཚུངས་མཛད་པར་གསུངས་ཏེ། ཡིག་ཆར། དབུ་མ་སྣང་བར་ཞེས་པ་ནས། གསུངས་པ་ལྟར་མདོ་བསྟན་བཅོས་ནས་འབྱུང་བ་འདིར་ཡང་འདོད་དགོས་ལ་ཞེས་པ་དང་དགོངས་པ་གཅིག་ཅིང༌། འདི་ལྟར་ན་ལུགས་འདིའི་ཞེས་པ་དམིགས་ཀྱིས་བསལ་བ་མ་ཡིན་པར་ལུགས་འདིས་ཀྱང་ཞེས་བཤད་དགོས་སོ། །

― GTD002_Page_0847 ―

^{[མ་དཔེ་གཟིགས་ན་འདིར་གནོན།]}

[Full Size]

ལྕང་སྐྱ་རིན་པོ་ཆེའི་གྲུབ་མཐར་སོ་སོར་རང་རིག་པའི་དོན་རང་ཉིད་ཀྱིས་རང་ཉིད་འཇལ་བ་ལ་འདོད་པའི་གྲུབ་མཐའ་སྨྲ་བ་དང་མཁས་པ་སུ་ཡང་མེད་པས། དེ་འདྲའི་རྩོད་པའི་ལན་དུ་སྦྱར་བ་རྗེའི་དགོངས་པར་མ་སོན་གསུངས་ཀྱང༌། དེ་འདྲ་ཇོ་ནང་བས་འདོད་ཡོད་པ་འདྲ། ལྕང་སྐྱ་རིན་པོ་ཆེའི་གྲུབ་མཐར། རང་ལུགས་ནི་ཟག་མེད་ཀྱི་ཡེ་ཤེས་དམ་པའི་དོན་ལ་དོན་དམ་དུ་འཆད་དགོས་ན་མཉམ་གཞག་ཡེ་ཤེས་མྱོང་བའི་རང་རིག་ཀྱང་ཟག་མེད་མ་འཁྲུལ་བའི་ཤེས་པ་ཡིན་ཞིང༌། ཡེ་ཤེས་དེ་དེའི་རྙེད་དོན་ཡིན་པའི་ཕྱིར་དོན་དམ་བདེན་པར་འགྱུར་རོ། །ཞེས་རྩོད་པ་དང༌། ལན་དུ་ཟག་མེད་ཀྱི་ཤེས་པ་གཅིག་གི་ཡུལ་ཡིན་ཙམ་གྱིས་དོན་དམ་བདེན་པར་འཇོག་ན་བདེན་ཡང༌། དོན་དམ་བདེན་པར་འཇོག་པ་ལ་ཡུལ་གྱི་གནས་ལུགས་དཔྱད་པའི་དཔྱད་མཐར་རྙེད་ཅིང༌། ཡུལ་ཅན་ཤེས་པ་དེ་ཡང་ཡུལ་དེ་ལ་དོན་དམ་དཔྱོད་བྱེད་དུ་སོང་བ་ཞིག་དགོས་ཞེས་ལན་མཛད་ཅིང༌། དེ་ལྟར་མིན་ན་ལུགས་འདིའི་ཞེས་དམིགས་ཀྱིས་བཀར་བ་དོན་མེད་དུ་འགྱུར་བར་གསུངས་སོ། །རེ་ཞིག་ཨ་པའི་ཁ་ཕོར་གཙོ་ཆེ་བས། དེའི་ཕྱོགས་བཟུང་ནས་འདི་སྐད་བྱ་སྟེ། སེམས་ཙམ་པས་ནི་མཉམ་གཞག་ཡེ་ཤེས་སུ་མ་ཟད། སྐྱེ་འཕགས་ཀྱི་ཤེས་པ་ཐམས་ཅད་ལ་རང་མྱོང་རང་རིག་རེ་འདོད་ཅིང༌། སོ་སྐྱེས་རང་རིག་ལ་ཡང་ཉོན་མོངས་ལྟ་ཞོག་གཉིས་སྣང་འཁྲུལ་པའི་ཟག་པ་ཡང་མེད་པ་ནི་ཉིད་ཀྱི་གྲུབ་མཐར་གསུངས་པ་བཞིན་ཡིན་པས། རང་རིག་གི་དངོས་ཡུལ་ཡིན་ཙམ་གྱི་དོན་དམ་བདེན་པར་འགྱུར་ན་གངས་རི་

― GTD002_Page_0848 ―

^{[མ་དཔེ་གཟིགས་ན་འདིར་གནོན།]}

[Full Size]

སྔོན་པོར་སྣང་བའི་དབང་ཤེས་ཀྱང་དེར་འགྱུར་དགོས་པ་ལ། དེ་གནས་ལུགས་མཐར་ཐུག་ཀྱི་དོན་དམ་བདེན་པར་འགྱུར་སྙམ་པའི་དོགས་པ་གྲུབ་མཐའ་སྨྲ་བ་དང་མཁས་པ་སུ་ལ་ཡང་སྐྱེ་མི་སྲིད་དོ། །གལ་ཏེ་ཕ་རོལ་པོ་དེས་རང་རིག་མི་འདོད་པའི་རྒྱུ་མཚན་གྱིས་རང་རིག་ཡོད་ན་དེ་ལྟར་འགྱུར་རོ་ཞེས་རིགས་པའི་འཕུལ་ཡིན་གྱི་ཡེ་ཤེས་དེ་དོན་དམ་པར་འགྱུར་སྙམ་པའི་དོགས་པ་སྐྱེས་པ་མ་ཡིན་ནོ་ཞེ་ན། དེ་ལྟར་ན་ཤེས་པ་ཐམས་ཅད་དོན་དམ་བདེན་པར་འགྱུར་ཞེས་རྩོད་རིགས་ཀྱི་མཉམ་གཞག་ཡེ་ཤེས་དམིགས་ཀྱིས་བཀར་བ་དོན་མེད་དུ་འགྱུར་རོ། །དེས་ན་སྔ་མ་རྗེའི་དགོངས་པར་སོན་ངེས་སོ། །དེ་དག་རིགས་པའི་རྣམ་འགྱུར་ཡིན་པས་ད་ནི་དམ་པ་གཉིས་ཀྱི་དགོངས་པ་གཅིག་ཏུ་དྲིལ་ན་འདི་སྐད་བྱ་སྟེ། སེམས་ཙམ་པའི་ལུགས་འདིར་ཤེས་པ་གཞན་ལ་ཡང་རང་མྱོང་རང་རིག་རེ་ཡོད་མོད་ཀྱང་སོ་སོར་རང་རིག་གི་དོན་དུ་འགྲོ་མི་དགོས་ལ། མཉམ་གཞག་ཟག་མེད་ཡེ་ཤེས་དེའི་སྟེང་དུ་དེ་གཉིས་དོན་གཅིག་དགོས་སོ། །དེའི་རྒྱུ་མཚན་ནི་རང་རིག་གི་སྣང་ཚོད་དེ་ནི་བརྗོད་མེད་ཀྱི་དངོས་པོ་སེམས་ཀྱི་རང་བཞིན་འཁྲུལ་མེད་དེ་ཡིན་ལ། སོ་སྐྱེས་གཞན་རིག་གི་ཤེས་པའི་སྣང་ཆ་ནི་ཀུན་བཏགས་པ་ཙམ་ཡིན་ཞིང༌། དེ་འདྲའི་སྣང་ཆ་ཀུན་བཏགས་པ་དེ་ནི་ཕྱི་རོལ་དོན་སྣང་ཡང་ཡིན་པས་གནས་ལུགས་དཔྱད་སྟོབས་ཀྱིས་རིམ་པས་ཕྲ་རུ་སོང་སྟེ། མཐར་གཟུང་རྣམ་དེ་ཡང་སྣང་ཚུལ་སོགས་འཛིན་རྣམ་ཇི་ལྟ་བར་ཕྱི་དོན་གྱི་སྣང་བ་ལོག་ནས་ཡེ་ཤེས་རང་གི་ངོ་བོ་རིག་པར་འགྱུར་ལ། དེའི་ཕྱིར་སོ་སོར་རང་རིག་པར་ཡང་བཤད་དོ། །དེའི་ཚེ་མར་མེ་བཞིན་གཟུང་རྣམ་དེས་རང་

― GTD002_Page_0849 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་རང་རིག་ཀྱང་དེ་རིག་པ་འཛིན་རྣམ་ཡིན་ལ། སྤྱིར་འཛིན་རྣམ་གྱིས་སེམས་ཀྱི་ངོ་བོ་དཔྱིས་ཕྱིན་པར་མཐོང་བ་དཔྱད་པ་ལ་མ་ལྟོས་ཀྱང་འདི་ནི་དཔྱད་སྟོབས་ཀྱིས་དེ་ལྟར་མཐོང་བའི་སེམས་ཀྱི་གསལ་ཆ་ཡིན་པས། འདིས་སེམས་ཉིད་རང་གི་ངོ་བོ་རྙེད་པ་ཡང་དོན་དམ་དཔྱད་པའི་དཔྱད་མཐར་རྙེད་པ་ལ་འགྲོ་བས་ཡུལ་ཡེ་ཤེས་དེ་ཡང་དོན་དམ་བདེན་པར་འགྱུར་ཞེས་རྩོད་པ་ཡིན་ལ། ལན་ནི་སོ་སོར་རང་རིག་ཅེས་པ་ཆོས་ཉིད་གཟིགས་ཚུལ་གྱི་སྒོ་ནས་ཡིན་གྱི་ཡེ་ཤེས་རང་ཉིད་རིག་པའི་ཆ་ནས་བཤད་པ་མ་ཡིན་ལ། གཟུང་རྣམ་མཉམ་གཞག་ཡེ་ཤེས་དེས་ཡེ་ཤེས་རང་གི་ངོ་བོ་མ་མཐོང་ན་འཛིན་རྣམ་རྐྱང་བ་ལ་དེ་ཤར་ཡང་དཔྱད་སྟོབས་ཀྱིས་ཤར་བར་འགྲོ་དོན་མེད་ཅིང༌། དེའི་ཕྱིར་འཛིན་རྣམ་རང་རིག་དེ་ཉིད་ཀྱིས་ཡེ་ཤེས་དེ་རྙེད་ཅིང༌། དེ་ཟག་མེད་མ་འཁྲུལ་བའི་ཤེས་པ་ཡང་ཡིན་མོད་ཀྱང་ཡུལ་དེ་གནས་ལུགས་དཔྱོད་པའི་དཔྱད་མཐར་རྙེད་པ་མ་ཡིན་པས་དེའི་སྒོ་ནས་དོན་དམ་བདེན་པར་འཇོག་མི་ནུས་སོ་ཞེས་ལན་མཛད་དོ། །ཕྱོགས་སྔ་དེས་གནས་ལུགས་རྟོགས་པའི་ངོར་གཉིས་མེད་ཀྱི་སེམས་ཡོད་པ་ཡེ་ཤེས་སྙིང་པོའི་ཀུན་ལས་བཏུས་ཀྱི་ལུང་འདིས་བསྒྲུབས་ཀྱང་རང་ལུགས་འཇོག་ཚུལ་དང་པོའི་དོན་དམ་དུ་ཡོད་པའི་དོན་དུ་གསུངས་པ་སྐབས་ཀྱིས་ཤེས་སོ། །གྲུབ་མཐའ་ཆེན་མོར་ལུགས་འདིའི་ཡེ་ཤེས་དེ་རང་རིག་ཏུ་བཞེད་ཅེས་སོགས་ཀྱི་ལུང་འདི་དང༌། འདི་གང་ལས་འཕྲོས་པའི་གཞུང་དབུ་མ་སྣང་བ་ལས། གང་འཕགས་པ་རྣམས་ཀྱིས་ཞེས་སོགས་དང༌། སོ་སོར་

― GTD002_Page_0850 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གིས་རིག་པར་བྱ་བ་དངོས་པོའི་ངོ་བོ་ཉིད་ཅེས་སོགས་ཀྱང་མདོ་སྡེ་པའི་རིགས་པར་བརྟེན་ནས་རྣལ་འབྱོར་མངོན་སུམ་གྱི་སྣང་ཡུལ་དངོས་པོ་ཁོ་ནར་འདོད་པའི་སེམས་ཙམ་པ་ཁ་ཅིག་གི་ལུགས་ཡིན་པར་གསུངས་ལ། ལྕང་སྐྱ་རིན་པོ་ཆེའི་གྲུབ་མཐར་དབུ་མ་སྣང་བའི་ལུང་དེ་དག་ཟག་མེད་ཀྱི་ཤེས་པའི་དངོས་ཡུལ་ཙམ་ལ་སྦྱར་སྣང་སྟེ་བློ་ལྡན་རྣམས་ཀྱིས་དཔྱད་པར་བྱའོ། །གོང་དུ་བཤད་པ་དེ་ལྟར་བྱས་ན་ལུགས་འདིའི་ཡེ་ཤེས་དེ་ཞེས་པ་སྒྲིབ་གཉིས་དག་བྱེད་ཀྱི་སོ་སོ་རང་རིག་པའི་ཡེ་ཤེས་གཉིས་བཤད་པ་ལས་གཟུང་འཛིན་གཉིས་སྟོང་རྟོགས་པའི་སོ་སོ་རང་རིག་དེ་ལ་སྒེར་དུ་དོགས་པ་བཅད་པར་བྱས་ཀྱང་རུང་ངམ་སྙམ། ༼བུ༽ཀུན་བཏུས་ལས། ཅིའི་ཕྱིར་ཀུན་རྫོབ་ཏུ་ཡོད་པར་བརྟགས་ཞེ་ན་ཀུན་ནས་ཉོན་མོངས་པར་གྱུར་པའི་དམིགས་པ་ནི་ཀུན་རྫོབ་ཏུ་ཡོད་པའོ། །ཐམས་ཅད་ཀྱང་ཀུན་རྫོབ་ཏུ་ཡོད་པའོ། །ཅིའི་ཕྱིར་དོན་དམ་པར་ཡོད་པར་བརྟགས་ཞེ་ན་རྣམ་པར་དག་པར་འགྱུར་བའི་དམིགས་པ་ནི་དོན་དམ་པར་ཡོད་པའོ། །ཐམས་ཅད་ཀྱང་དོན་དམ་པར་ཡོད་པའོ་ཞེས་པ་འདི་ཉིད་ཡིན་ལ། འདིས་ཀྱང་དོན་དངོས་གནས་པ་རེ་རེ་དང་སྒྲ་ཡངས་པའི་དབང་དུ་བྱས་ཏེ་ཆོས་ཐམས་ཅད་རྣམ་གྲངས་པའི་ཀུན་རྫོབ་དང་དོན་དམ་གཉིས་ཀར་བཤད་ཚུལ་རེ་བྱས་པས་སྔ་མ་སྔ་མ་དང་མཐུན་པ་ཡིན་ལ། ཕྱི་མ་ནི་ཤེར་མདོའི་དགོངས་པ་འགྲེལ་ཕྱིར་དུ་ཀུན་རྫོབ་དང་དོན་དམ་དུ་བཤད་ལུགས་ཙམ་རེ་བྱས་པ་ཡིན་ལ། ཆོས་ཐམས་ཅད་དོན་དམ་དུ་འཆད་ཚུལ་རྒྱལ་སྲས་མ་ལས་ཐམས་ཅད་ཀྱང་དོན་དམ་པར་ཡོད་པའོ་ཞེས་བྱ་བ་ནི་ཆོས་ཐམས་ཅད་དེ་བཞིན་

― GTD002_Page_0851 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ལས་གཞན་མ་ཡིན་པའི་ཕྱིར་ཞེས་གསུངས་ལ། ཀུན་རྫོབ་ཏུ་འཆད་ཚུལ་དེར་དངོས་སུ་མེད་ཅིང་དར་ཊཱིཀ་ལས། འཁྲུལ་བའི་ཤེས་པ་ཡུལ་དང་བཅས་པ་ཐམས་ཅད་ཀྱང་རྣམ་གྲངས་ཀྱི་ཀུན་རྫོབ་ཏུ་ཡོད་པའོ་ཞེས་གསུངས་ལ། གྲུབ་མཐའ་ཆེན་མོར་ཆོས་ཐམས་ཅད་རྣམ་གྲངས་པའི་རྫས་བཏགས་གཉིས་ཀར་གསུངས་པས། ཆོས་ཐམས་ཅད་རྣམ་གྲངས་པའི་ཀུན་རྫོབ་ཏུ་ཡང་བྱ་དགོས་ཏེ། རྩ་བར་ཁྱད་མ་ཕྱེ་བར་ཐམས་ཅད་ཅེས་གསུངས་པའི་ཕྱིར་རོ། །དེས་ན་དར་ཊཱིཀ་ལས་འཁྲུལ་ཤེས་དམིགས་ཀྱིས་བསལ་བ་ཡང༌། དེ་བཞིན་ཉིད་ལྟ་བུ་རྣམ་གྲངས་པའི་ཀུན་རྫོབ་ཏུ་བཤད་པ་རྗེས་ཐོབ་འཁྲུལ་སྣང་དང་བཅས་པའི་སྐབས་ཀྱི་ཤེས་པའི་ངོ་ལ་སྦྱར་ནས་འཇོག་དགོས་པ་ལ་དགོངས་སོ། །དེ་ལྟར་ཀུན་བཏུས་ཀྱི་བཤད་པ་སྔ་མ་དེ་དང༌། དགོངས་འགྲེལ་གྱི་བཤད་ཚུལ་དེ་གཉིས་ཀ་ཡང་འཇོག་ཚུལ་གཉིས་པའི་ཀུན་རྫོབ་ཏུ་ཡོད་ཚུལ་གཅིག་ཡིན་ཏེ། བསྡུ་བར་ཀུན་ནས་ཉོན་མོངས་པ་ཀུན་ནས་སློང་བའི་ཕྱིར་དང་ཞེས་དང༌། གྲུབ་མཐར། གཉིས་པ་ཀུན་ཉོན་སློང་རུང་ཞེས་སོ། །བསྡུ་བ་ལས། གདགས་པའི་གཞི་ཡིན་པའི་ཕྱིར་ཞེས་དང། གྲུབ་མཐར་ཐ་སྙད་གཞི་ཞེས་པའི་སྐབས་ནས་བསྟན་པའི་འཇོག་ཚུལ་གཉིས་པའི་ཀུན་རྫོབ་ཏུ་བཤད་ཚུལ་གཞན་ཡང་ཡོད་དེ། ཀུན་རྫོབ་བདེན་པ་ཡིན་ན་འཇོག་ཚུལ་གཉིས་པའི་ཀུན་རྫོབ་ཏུ་ཡོད་པས་ཁྱབ་པ་གང་ཞིག །སྔ་མ་དེ་ནི་ཟག་མེད་འདུས་བྱས་སོགས་ལ་སྦྱར་མི་རུང་བའི་ཕྱིར། དེས་ན་འཇོག་ཚུལ་གཉིས་པའི་ཀུན་རྫོབ་ཏུ་ཡོད་པའི་དོན་གཙོ་

― GTD002_Page_0852 ―

^{[མ་དཔེ་གཟིགས་ན་འདིར་གནོན།]}

[Full Size]

བོ་ནི་ཕྱི་མ་འདི་ཡིན་ལ། དེའི་ཚུལ་ཡང་རྐང་པས་བརྒལ་བར་བྱ་བའི་འབབ་སྟེགས་ལ་རྐང་པའི་འབབ་སྟེགས་ཟེར་བ་བཞིན་གཉིས་སྣང་ཅན་གྱི་བློ་ཀུན་རྫོབ་པ་རྟོག་པ་སོགས་ཀྱིས་བཞག་པར་བྱ་བའི་ཆོས་ལ་ཀུན་རྫོབ་པའི་བདེན་པ་ཞེས་བཞག་པ་སྟེ། དོན་བསྡུ་ན། ཀུན་རྫོབ་དཔྱོད་པའི་རིགས་ཤེས་ཀྱི་རྙེད་དོན་དུ་ཡོད་པས་ཀུན་རྫོབ་ཏུ་འཇོག་ཚུལ་འཆད་པར། ༼མུ༽ཞར་བྱུང་བཤད་པའི་རྣམ་གྲངས་གཞན་ཡང༌། ༼ཙུ༽བསྡུ་བའི་བཤད་ཚུལ་ཕྱི་མ་འདི་ནི་སྔ་མ་དག་དང་མི་མཚུངས་ཏེ། འདིར་རང་ཉིད་བློ་ཇི་འདྲ་ཞིག་གིས་བཞག་པའི་དབང་དུ་མ་བྱས་པར་རང་གི་ཡུལ་ཀུན་རྫོབ་དང་དོན་དམ་གང་འཇོག་པའི་དབང་དུ་བྱས་སོ། །དེ་ལ་རྒྱུ་མཚན་སྔ་མ་གཉིས་མེད་པར་གསུངས་པ། གཉལ་སྟོན་གྱིས་ཐ་སྙད་ཀྱི་དབང་གིས་བཞག་པའི་ཡོད་པ་ཡང་མ་ཡིན། ཀུན་ནས་ཉོན་མོངས་ཀྱི་དམིགས་པ་ཡང་མ་ཡིན་པར་རང་གི་མཚན་ཉིད་ཀྱིས་ཡོད་པའི་ཕྱིར་ཀུན་རྫོབ་ཏུ་ཡོད་པའི་རྒྱུ་མཚན་སྔ་མ་གཉིས་མེད་ཅེས་པའི་དོན་ནོ། །ཞེས་བཤད་པའི་དོན་ཐ་སྙད་ཀྱི་དབང་གིས་བཞག་པ་སྟེ། ཐ་སྙད་རྟོག་བཏགས་ཙམ་དུ་ཡོད་པ་དང༌། ཀུན་ཉོན་སློང་བའི་དམིགས་པ་གཉིས་ལ་བྱས་པ་ཡིན་ན་ལེགས་ཀྱང༌། ཐ་སྙད་པའི་ཤེས་པའི་རྙེད་དོན་ལ་བྱས་ཏེ་འཇོག་ཚུལ་གཉིས་པའི་ཀུན་རྫོབ་ཏུ་འཇོག་བྱེད་གཉིས་མེད་པ་ལ་བྱས་པ་ཡིན་ན་མི་ལེགས་ཏེ། འཇོག་ཚུལ་གཉིས་པའི་ཀུན་རྫོབ་ཡིན་ན་དེར་འཇོག་བྱེད་ཡོད་དགོས་པའི་ཕྱིར་དང༌། ཀུན་རྫོབ་བདེན་པ་ཡིན་ན་དེའི་མཚན་ཉིད་ཚང་དགོས་པའི་ཕྱིར་རོ། །རྗེས་ཐོབ་ཡེ་ཤེས་དོན་དམ་དུ་བཤད་པའི་ངེས་ངོར་སྟོང་ཉིད་ཤར་བ་ལ་པྲ་སྟིས་བཤད་ཅིང༌། རང་མཚན་གྱིས་གྲུབ་

― GTD002_Page_0853 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལ་གཉལ་སྟོན་གྱིས་བཤད་དོ། །དེའི་འཛིན་སྟངས་སུ་ཀུན་རྫོབ་བདེན་པ་གཙོ་ཆེ་བའི་ཕྱིར་དང༌། རང་མཚན་གྱིས་གྲུབ་པ་དོན་དམ་དུ་བྱས་པའི་བཤད་ཚུལ་འཆད་པའི་སྐབས་མིན་པས་གཉིས་ཀ་ཡང་འཐད་པར་མི་སེམས་ཀྱི། བདེན་པ་གཉིས་ཀ་རྟོགས་པས་གཉིས་ཀར་བཤད་པ་ཙམ་ཡིན་ནོ། །ཞར་བྱུང་རྫོགས་ནས་འཇོག་ཚུལ་གཉིས་པའི་ཀུན་རྫོབ་ཏུ་ཡོད་པ་ལ་གཞན་གྱི་རྩོད་པ་སྤོང་ཚུལ་སྟོན་པར། ༈ སྟེ་དབུ་མ་སྣང་བར་སྟོང་པ་ཉིད་ཆེན་པོའི་མདོ་ལས་ཞེས་དྲངས་སོ། །༼ཚུ༽དེ་དག་གི་དོན་བསྡུས་ན་འདིར་རྣམ་བཤད་རིགས་པ་དྲངས་པ་ནི་ཐ་སྙད་དུ་ཡོད། དོན་དམ་པར་ཡོད་ཅེས་པ་ལ་ཡང་ཡོད་ལུགས་སྣ་ཚོགས་ཡོད་པས། ཉན་ཐོས་སྡེ་པ་ཁྱོད་ཀྱིས་དོན་དམ་དང་ཀུན་རྫོབ་ཀྱི་འཇོག་ལུགས་གང་ཡིན་མ་ཕྱེ་བར་ཤེར་ཕྱིན་གྱི་མདོ་ལས། ལས་དང་རྣམ་སྨིན་ཡོད་པར་གསུངས་པ་དོན་དམ་པར་ཡིན་ན། ཆོས་ཐམས་ཅད་བདེན་པར་མེད་པ་མི་འཐད་ལ་ཀུན་རྫོབ་ཏུ་ཡིན་ན་དེར་བྱེད་པ་པོ་ཡོད་པས་མི་འཐད་ཅེས་ངོ་བོ་ཉིད་མེད་པར་སྨྲ་བའི་གཙོ་བྱས་པའི་ཐེག་ཆེན་པ་ལ་སྐྱོན་བརྗོད་པ་དེ་བརྗོད་ཚུལ་མི་ལེགས་པར་ཐལ། འཇོག་ཚུལ་གཉིས་པའི་ཀུན་རྫོབ་ཀྱི་དོན་ཀུན་རྫོབ་པའི་མིང་དང་ཐ་སྙད་ཀྱི་གཞིར་ཡོད་པ་དང༌། འཇོག་ཚུལ་དང་པོའི་དོན་དམ་གྱི་དོན་རང་མཚན་གྱིས་གྲུབ་པ་ལ་བྱེད་པས་དེ་གཉིས་ཀར་ཡོད་པ་མི་འགལ་བའི་ཕྱིར་ཞེས་པ་སྟེ། འཇོག་ཚུལ་གཉིས་སུ་བསྡུ་བར་མ་ཟད་འདིས་ཀྱང་གསལ་བར་གསུངས་པའི་དཔེར་བཀོད་པ་ཡིན་ནོ། ། ༼ཛུ༽སེམས་ཙམ་པས་ཉན་ཐོས་སྡེ་བ་ལ་ལན་འདེབས་པའི་ཚེ་རྫས་བཏགས་

― GTD002_Page_0854 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཁྱད་པར་ཕྱེ་ནས་ལས་ཀྱི་གཙོ་བོ་སེམས་པ་དང་རྣམ་སྨིན་གྱི་གཙོ་བོ་ལུས་དང་ཚོར་བ་སོགས་རྫས་སུ་ཡོད་ལ་གང་ཟག་རང་ལྡོག་འཇོག་ཚུལ་གཉིས་པའི་ཀུན་རྫོབ་ཏུ་ཡོད་ཀྱང་རྫས་སུ་མེད་པའི་དོན་ཡིན་པར་བཤད་དོ། །དབུ་མ་པ་རྣམས་ནི་ལན་འདེབས་ཚུལ་ཟླ་བའི་འཇུག་འགྲེལ་ལས་བྱེད་པ་པོ་བདེན་གྲུབ་ཏུ་བཀག་པ་ལ་གསུངས་ཤིང༌། དབུ་མ་སྣང་བ་ལས། འདི་ལྟར་ལས་དང་འབྲས་བུ་ནི་ཀུན་རྫོབ་ཁོ་ནར་ཡོད་པ་ཉིད་ལ། མུ་སྟེགས་ཅན་གྱིས་ཀུན་བཏགས་པའི་བྱེད་པ་པོ་ནི་ཀུན་རྫོབ་ཏུ་ཡང་མེད་པ་ཉིད་དོ། །ཞེས་བསྟན་པའི་ཕྱིར། འགལ་བའི་གོ་སྐབས་སུ་ག་ལ་འགྱུར་ཞེས་གསུངས་སོ། །འཇུག་འགྲེལ་ལས་བྱེད་པ་པོ་རང་བཞིན་དུ་གྱུར་པ་བཀག་པར་ཤེས་པར་བྱ་ཡི། བརྟེན་ནས་གདགས་པར་བྱ་བ་ཐ་སྙད་ཀྱི་ཡུལ་དུ་གྱུར་པ་ཡང་བཀག་གོ །ཞེས་བྱ་བར་ནི་ཤེས་པར་མི་བྱའོ། །ཞེས་ཀྱང་འགྲེལ་ཚུལ་གཅིག་གསུངས་པའི་ཚུལ་དེ་དག་མ་དགོངས་པའི་སེམས་ཙམ་པ་རྣམས་ངོ་བོ་ཉིད་མེད་པར་སྨྲ་བའི་ནི་ཀུན་རྫོབ་དང་དོན་དམ་པའི་ཁྱད་པར་འབྱེད་མི་རུང་ལ། ཆོས་ཐམས་ཅད་རང་མཚན་གྱིས་མ་གྲུབ་པའི་ཕྱིར་རྫས་བཏགས་ཀྱི་དབྱེ་བ་ཡང་མི་རུང་བས་སྐྱོན་འདི་འཇུག་གོ་སྙམ་ནས་ཉན་ཐོས་སྡེ་བའི་ཕྱོགས་བཟུང་སྟེ་དབུ་མ་པ་འགོག་པ་ཡིན་ཏེ། འདི་སྐད་དུ། ༈ ཕྲ་བའི་དེ་ཁོ་ན་ཉིད་དོན་དམ་པའི་བདེན་པ་ཡིན་པས་དེའི་ཟླས་དྲངས་ཏེ། ༼ཝུ༽དེ་ཡང་དབུས་མཐའི་དོན་བློ་བརྟན་གྱིས་ཀུན་བཏགས་མེད་བཞིན་དུ་རྟོག་པས་བཏགས་པས་བཏགས་པའི་ཀུན་རྫོབ་དང༌། གཞན་དབང་གི་གཙོ་བོ་ཡང་དག་མ་ཡིན་པའི་ཀུན་རྟོག་ནི་ཤེས་པའི་ཀུན་རྫོབ་དང༌། ཡོངས་གྲུབ་དོན་དམ་པར་སྒྲ་རྟོག་གི་ཡུལ་

― GTD002_Page_0855 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་བྱར་མེད་ཀྱང༌། དེ་བཞིན་ཉིད་ལ་སོགས་པའི་རྣམ་གྲངས་དུ་མས་བརྗོད་དུ་རུང་བས་བརྗོད་པའི་ཀུན་རྫོབ་ཡིན་པར་བཤད་ལ། ཕྱི་མའི་དོན་དེ་བཞིན་ཉིད་དང་ཆོས་དབྱིངས་སོགས་ཐ་སྙད་སྣ་ཚོགས་འཇུག་པའི་གཞིར་ཡོད་པས་ཐ་སྙད་དམ་ཀུན་རྫོབ་ཏུ་ཡོད་པར་བཏགས་པ་སྟེ། གོང་དུ་རྐང་པའི་འབབ་སྟེགས་ཀྱི་དཔེས་བཤད་པ་དང་སྦྱར་ཡང་བློ་བརྟན་གྱིས་གསུངས་པ་དང་འགལ་བར་མི་སྣང་ངོ་། །ཡོངས་གྲུབ་ནི་འཇོག་ཚུལ་དང་པོའི་དོན་དམ་དུ་ཡོད་པར་མ་ཟད། གཉིས་པའི་དོན་དམ་དུ་ཡང་ཡོད་པས་དེ་ཀུན་རྫོབ་ཏུ་ཡོད་པར་གསུངས་པ་དེ་སྒོ་གང་དུ་བཀྲལ་ཀྱང་མི་འགྲིག་གོ་སྙམ་པ་ལ་བརྗོད་པའི་ཀུན་རྫོབ་ཏུ་ཡོད་ཚུལ་འདི་ཤེས་ན་ཐ་སྙད་ཀྱི་གཞིར་ཡོད་པ་ཙམ་གྱིས་ཀུན་རྫོབ་ཏུ་ཡོད་པར་གསུངས་སོ། །ཞེས་བདེ་བླག་ཏུ་འགྲེལ་ནུས་པས་གལ་ཆེའོ། །གྲུབ་མཐའ་གཅིག་གི་དབང་དུ་བྱས་ན་ཡང༌། ཀུན་རྫོབ་དང་དོན་དམ་པར་ཡོད་ཚུལ་དང་དེ་གཉིས་ཀར་མི་འགལ་བའི་དབུ་མའི་ལམ་དུ་འཇོག་ཚུལ་དུ་མ་ཡོད་པ་ནི། རྒྱས་པར་གྲུབ་མཐའ་ཆེན་མོར། འོད་སྲུང་ལེའུ་ལས་དབུ་མའི་ལམ་བཅུ་གསུམ་གསུངས་པ་བཀོད་པ་དང༌། ལེའུ་དེའི་འགྲེལ་པ་བློ་བརྟན་གྱིས་མཛད་པ་སོགས་ལས་ཤེས་པར་བྱ་ལ། དབུས་མཐའི་ལེའུ་ལྔ་བར། ཐ་དད་པ་དང་གཅིག་མཐའ་དང༌། །ཞེས་སོགས་མང་དུ་གསུངས། །ཕྱོགས་གླང་ཆོས་གྲགས་ཀྱི་གཞུང་ནས་བཤད་པའིཚུལ་ཞེས་ས་བཅད་ཕྱི་མ་འདི་འགྲེལ་པ་དག་གིས་བསྣན། ༼ཞུ༽མདོ་སྡེ་རྒྱན་གྱི་དོན་ནི། མ་འོངས་པ་རང་ལས་སྐྱེ་བ་མེད་པ་དང༌། འདས་པ་བསྐྱར་ནས་དེའི་བདག་ཉིད་དུ་གྲུབ་པ་མེད་པ་དང༌། ད་ལྟ་བ་རང་དུས་གཉིས་པར་མི་གནས་པ་དང༌། བྱིས་པས་ཞེན་པ་ལྟར་གཙང་བདེ་རྟག་བདག་ཏུ་མེད་པ་བཞི་ལ་དགོངས་ནས་ཤེར་མདོར་ཆོས་ཐམས་ཅད་ངོ་བོ་ཉིད་མེད་པར་གསུངས་

― GTD002_Page_0856 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པའོ། །དུས་གསུམ་ལ་སྦྱོར་ཚུལ་འདི་འགྲེལ་བཤད་དུ་གསལ་བ་ལྟར། ཊཱིཀ་བྱེད་རྣམས་ཀྱང་མཐུན་ནོ། །འོན་ཀྱང་གཉལ་སྟོན་དང༌། དེའི་རྗེས་སུ་འབྲང་བའི་ཊཱིཀ་བྱེད་པ་པྲ་སྟི་རབ་འབྱམས་པ་བློ་བཟང་དགེ་ལེགས་སོགས། གཟུགས་གཟུགས་ཞེས་པའི་སྒྲ་འཇུག་གཞིར་རང་མཚན་གྱིས་མེད་པ་དང༌། གཟུགས་རང་དབང་དུ་སྐྱེ་བ་མེད་པ་དང༌། གཟུགས་ཀྱི་ཆོས་ཉིད་ཆོས་བདག་གི་ངོ་བོར་མེད་པ་དང༌། སྔར་བཤད་པ་ལྟར་དུས་གསུམ་དང་བྱིས་པས་ཞེན་པ་ལྟར་མེད་པ་བཞི་དང༌། ཕྱི་རོལ་དོན་དུ་མེད་པ་སྟེ་ངོ་བོ་ཉིད་མེད་པ་བཅུ་གཅིག་ཏུ་བཤད་ཀྱང༌། དང་པོ་གསུམ་དགོངས་འགྲེལ་དངོས་བསྟན་དང༌། ལྷག་མ་བརྒྱད་ཤུགས་བསྟན་ཡིན་པར་བཤད་ཅིང༌། དང་པོ་དང༌། གསུམ་པ་དང༌། བཅུ་གཅིག་པ་གསུམ་ཆོས་ཀྱི་བདག་མེད་ཕྲ་མོ་ཡིན་ཞིང༌། ལྷག་མ་ཉན་རང་གིས་ཀྱང་རྟོགས་པར་བཤད་དོ། །གཉིས་པ་དང་བཞི་པ་བདག་སྐྱེ་མེད་པར་མཚུངས་པས་གཅིག་དངོས་དང་གཅིག་ཤུགས་བསྟན་དུ་མི་རུང་ལ། ཕྱི་དོན་མེད་པ་དངོས་སུ་མ་བསྟན་ཟེར་ན་སྐབས་འབྱེད་དགོས་སོ། །མདོ་སྡེ་རྒྱན་གྱི་ལུང་འདི་དང༌། ཐོག་མ་དང་ནི་ཞེས་སོགས་དང༌། ཆོས་དང་བདག་མེད་རྣམ་གྲོལ་ཞེས་སོགས་ལུང་གསུམ་མཐར་ཆགས་སུ་འབྱུང་ལ། དེའི་དོན་སྟག་ལོའི་གྲུབ་མཐར། གཞི་ལ་ངོ་བོ་ཉིད་མེད་ལ་སོགས་དང༌། །ལམ་ལ་སྐྱེ་མེད་ཆོས་ལ་བཟོད་པ་དང༌། །འབྲས་བུ་མཐར་ཐུག་ཐེག་པ་གཅིག་གྲུབ་སོགས། །ཞེས་གཞི་ལམ་འབྲས་གསུམ་ལ་སྦྱར་བ་ཤིན་ཏུ་འབྲེལ་ཞིང༌། གྲུབ་མཐའི་འདོད་པ་བྱིངས་ལ་གོ་བ་སྟེར་ནུས་སུ་སྣང་ཡང༌། ཊཱིཀ་བྱེད་ཕལ་མོ་ཆེས་མ་ཐོན་འདུག་གོ །༼ཟུ༽

― GTD002_Page_0857 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལྟར་འགྲེལ་དགོས་པ་ཡང་ངོ་བོ་ཉིད་མེད་པའི་འགྲེལ་བཤད་དུ་གཟུགས་ལ་སོགས་པའི་ཆོས་རྣམས་ལ་གཉིས་སུ་མངོན་པར་ཞེན་པར་འཛིན་པ་དེ་ལྟར་མེད་པའི་ཕྱིར་ངོ་བོ་ཉིད་མེད་དེ་ཞེས་སོགས་གསུངས་པ་དང༌། དེ་ནས་མདོ་ལས། ཆོས་ཀུན་གལ་ཏེ་བྱིས་པ་ཡི། །ཇི་ལྟར་རྣམ་བརྟགས་མཐོང་བ་བཞིན། །དེ་དག་ཡོད་པར་གྱུར་ན་ནི། །ཐམས་ཅད་དེ་ཉིད་མཐོང་བར་འགྱུར། ཞེས་པ་དང་མཐུན་པས། འདིར་ཚད་མར་མཛད་པ་ཡིན་ལ། བློ་བརྟན་གྱིས་ཀུན་བཏགས་པའི་མཚན་ཉིད་གཞན་དུ་འཛིན་པ་དེ་ལྟར་ངོ་བོ་ཉིད་མེད་པ་ཞེས་པའི་ཐད་དུ་བདག་ཅེའམ། གཞན་ཞེའམ། གཟུགས་ཤེའམ། སྒྲ་ཞེས་ཀུན་ཏུ་བཏགས་ཏེ། ཞེས་རང་གཞན་སོགས་ཐ་དད་པའི་ཆ་ཅི་རིགས་ལ་སྦྱར་རོ། །དུས་གསུམ་ལ་སྦྱར་བ་ཡང་སྐྱེ་འགག་བྱེད་པ་པོ་འདུས་བྱས་རྣམས་དོན་དམ་པར་ཡོད་ཀྱང༌། སྐྱེ་སོགས་བྱ་བྱེད་ཀྱི་ཆ་བདེན་མེད་དུ་སྟོན་པ་ཡིན་པས་འོག་ཏུ། མེད་ཅེས་བྱ་ལ་སོགས་ཚིག་གིས། །བཏགས་པ་ཐམས་ཅད་འགོག་པ་ཡིན། །ཞེས་པ་དང་གནད་གཅིག་ཀྱང༌། དགོས་པ་ཡང་རང་དང་གཞན་ཞེས་ཐ་དད་དུ་ཕྱོགས་གཉིས་བཟུང་བ་འདི་ཡང་ལོག་པར་གོམས་པའི་བློ་འཁྲུལ་བས་བྱས་པ་ཙམ་ཡིན་གྱི། ཕྱོགས་ཕན་ཚུན་ཐ་དད་པ་དོན་དམ་པར་གྲུབ་པ་ཞིག་མེད་དོ་ཞེས་ཆགས་སྡང་མགོ་གནོན་པ་སྟེ། དེ་ལྟར་གོ་ན་སེམས་ཙམ་པས་ཀུན་བཏགས་རང་མཚན་གྱིས་མེད་ཅེས་པ་འདི་ཡང་བྱང་ཆུབ་ལམ་གྱི་རིམ་པའི་ཉམས་ལེན་དུ་འཁྱེར་ཤེས་པ་ཞིག་ཡོང་ངོ་། ། ༼འུ༽འདིར་སྐྱེ་མེད་བརྒྱད་པོ་འདི་ཙམ་སྨོས་པ་ནི། དོན་སྨྲ་བ་རྣམས་ཀྱང་

― GTD002_Page_0858 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེར་མདོ་བཀའ་མ་ཡིན་པར་སྒྲུབ་པའི་ཚེ་འཇུག་ལྡོག་བྱ་བའི་ཡུལ་གྱི་གཙོ་བོ་འཁོར་འདས་ཀྱི་རྣམ་གཞག་འདི་དག་ལ་སྐུར་བ་བཏབ་པར་བཤད་པའི་འགལ་སྤོང་དང༌། དབུ་མ་པ་རྣམས་དེ་སྒྲ་ཇི་བཞིན་པར་འདོད་པ་འགོག་བྱེད་དང༌། དབུ་མ་པས་སེམས་ཙམ་པ་ལ་རྩོད་པའི་ཚེ་མི་སྐྱེ་བའི་ཆོས་ལ་བཟོད་པ་ཐོབ་ཅེས་གསུངས་པ་མི་འཐད་པར་ཐལ། གང་ལ་བཟོད་པ་ཐོབ་པའི་ཡུལ་གྱི་སྐྱེ་མེད་དེ་ཁྱོད་ཀྱིས་སྐུར་འདེབས་ཀྱི་མཐར་ཁས་བླང་བའི་ཕྱིར་ཞེས་རྩོད་པའི་ལན་གསུམ་ག་ཡིན་ལ། འདིར་དཔྱད་གཞི་འདི་ཡོད་དེ། ལུགས་འདིར་མི་སྐྱེ་བའི་ཆོས་ལ་བཟོད་པ་ཐོབ་པའི་ཚེ་འདི་བརྒྱད་ལ་བཟོད་པ་ཐོབ་པ་ཡིན་ནམ་ཞེ་ན་ཀུན་མཁྱེན་ཆོས་འབྱུང་གིས། དོན་དམ་པར་སྐྱེ་བ་མེད་པ་དེ་མ་སྐྱེ་བའི་ཆོས་ལ་བཟོད་པ་ཐོབ་པའི་མི་སྐྱེ་བ་མ་ཡིན་པའི་ཕྱིར། དེར་ཐལ། སྐྱེ་མེད་བརྒྱད་པོ་དེ་དེ་ཡིན་པའི་ཕྱིར་ཞེས་གསུངས་ལ། པྲ་སྟིའི་དྲང་ངེས་རྣམ་འབྱེད་ལས་ཀྱང་མི་སྐྱེ་བའི་ཆོས་ལ་བཟོད་པ་ཐོབ་ཅེས་པའི་སྐབས་ཀྱི་བཟོད་པ་བརྒྱད་པོ་ཞེས་དང༌། ཐོག་མའི་མཐའ་མི་མངོན་པའི་དེ་ལ་བཟོད་པ་སྐྱེ་བར་བྱེད་དགོས་ཤིང་ཞེས་འདི་བརྒྱད་ལ་བཟོད་པ་ཐོབ་པ་ཡིན་པར་བཤད་དོ། །རིན་ཆེན་དོན་གྲུབ་ཀྱིས། སྐྱེ་བ་མེད་ཚུལ་བརྒྱད་པོ་དེ་རྒྱུ་མཚན་དུ་བྱས་ནས་མི་སྐྱེ་བའི་ཆོས་ལ་བཟོད་པ་ཐོབ་ཅེས་གསུངས་པས་ཆོས་རྣམས་ལ་སྐྱེ་བ་མེད་ཅེས་བཤད་དོ། །ཞེས་སྐྱེ་མེད་བརྒྱད་པོ་དེ་བཟོད་པ་ཐོབ་པའི་ཡུལ་གྱི་ཆོས་རྣམས་ལ་སྐྱེ་བ་མེད་ཅེས་གསུངས་པའི་རྒྱུ་མཚན་ཙམ་དུ་བཤད་ལ། ཡིག་ཆར་ཡང་ཆོས་འབྱུང་གི་གསུང་དེ་སོར་བཞག་ཏུ་མ་བཀོད་པ་དང༌། བདག་སྐྱེ་མེད་པ་ལྟ་བུ་ལ་བཟོད་པ་ཆུང་འབྲིང་ཆེ་གསུམ་ཐོབ་པ་

― GTD002_Page_0859 ―

^{[མ་དཔེ་གཟིགས་ན་འདིར་གནོན།]}

[Full Size]

ལ། སྦྱོར་མཐོང་དག་ས་གསུམ་ཐོབ་དགོས་པ་སོགས་ཧ་ཅང་ཐལ་བས་བཟོད་པ་ཐོབ་པ་ནི་ལུགས་འདིར་ཡང་བདག་མེད་ཀྱི་དོན་ལ་ཡིན་ཞིང༌། དེའི་གཞིར་གྱུར་པའི་ཆོས་རྣམས་ལ་སྐྱེ་བ་མེད་ཅེས་པའི་མེད་ཚུལ་ནི་འདི་དག་ཡིན་ནོ་ཞེས་ཀྱང་བྱ་རུང་ངོ༌། །ལུགས་དང་པོ་ནི། བློ་བརྟན་གྱིས་འཁོར་བའི་ཐོག་མ་སྐྱེ་བ་མེད་དོ་ཞེས་བཟོད་ན་མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་བྱའོ། །ཞེས་སོགས་དང༌། བཙུན་པ་ངོ་བོ་ཉིད་མེད་པས་སྔོན་མེད་པ་སྐྱེ་བ་མེད་པ་བཟོད་པའི་ཕྱིར་བཟོད་པ་ཐོབ་ཅེས་བྱའོ། །གཞན་གྱི་དབང་ལ་ནི་རང་སྐྱེ་བ་མེད་པར་བཟོད་པའི་ཕྱིར་རོ། །ཞེས་པ་དང་མཐུན་ནོ། །ལུང་ཕྱི་མ་ཡང་སྐྱེ་མེད་བརྒྱད་བཤད་པའི་མཚམས་སྦྱོར་དུ་དབུ་མ་སྣང་བ་ལས་ཆོས་ཐམས་ཅད་མ་སྐྱེས་པའོ། །ཞེས་བཤད་པ་འདི་ལ་ཡང་མ་སྐྱེས་པའི་དོན་འདི་གང་ཡིན་པར་འདོད་ཅེས་པ་དང་མཐུན་ཞིང༌། དབྱིག་འགྲེལ་ནི་གཉིས་ཀར་འགྲེལ་རུང་དུ་སྣང་ལ། རྩ་བར་འགྲེལ་བཤད་མ་བཀོད་པར་དབུ་མ་སྣང་བ་བཀོད་པ་དང༌། ཆོས་རྣམས་ཀྱི་སྐྱེ་བ་མེད་ཚུལ་བཤད་དོ། །ཞེས་གསུངས་པ། གུང་བསྒྲིག་ན་ཕྱི་མ་རྩ་བའི་དགོངས་པ་ཡིན་ནམ་དཔྱད། ༼ཡུ༽སྟོང་ཐུན་ལས། གཞན་ཉིད་ཅེས་པ་རྒྱུ་ལས་མི་མཐུན་པའི་འབྲས་བུ་མི་སྐྱེ་བ་དང༌། ཞེས་གསུངས་པ་ཡང་འདི་དང་གནད་གཅིག་སྟེ། རྒྱང་ཕན་ལྟ་བུ་སྐྱེ་བ་སྔ་མ་མེད་པར་གཟུགས་ཅན་གྱི་འབྱུང་བ་ལས་སེམས་འགྲུབ་པས་སྐྱེ་བ་ལེན་པ་ཞིག་ཁས་བླངས་ན་འཁོར་བའི་ཐོག་མའི་སྐྱེ་བར་ཡང་འགྱུར་ལ་རྒྱུ་མི་མཐུན་པ་ལས་འབྱུང་བར་ཡང་འགྲོ་སྟེ། རྣམ་འགྲེལ་ལས། རྣམ་ཤེས་

― GTD002_Page_0860 ―

^{[མ་དཔེ་གཟིགས་ན་འདིར་གནོན།]}

[Full Size]

མིན་པའི་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་འགྲུབ། །ཅེས་དང༌། སྐྱེ་བ་ཡོངས་སུ་ལེན་པ་ན། །འབྱུང་རྔུབ་དབང་པོ་བློ་དག་ནི། །རང་གི་རིགས་ལ་ལྟོས་མེད་ཅན། །ལུས་ཉིད་འབའ་ཞིག་ལས་སྐྱེ་མིན། །ཞེས་གསུངས་པ་ལྟར་རོ། །འདིར་འཁོར་བ་ནི་མཚན་གཞི་ཙམ་བཟུང་བ་ཡིན་ལ། དངོས་པོ་ཐམས་ཅད་ཀྱང་ཐོག་མའི་མཐའ་མེད་པར་མཚུངས་པ་ནི། རྩ་ཤེས་ལས། འཁོར་བ་འབའ་ཞིག་སྔོན་གྱི་མཐའ། །ཡོད་མ་ཡིན་པར་མ་ཟད་ཀྱི། །དངོས་པོ་ཐམས་ཅད་ཉིད་ལ་ཡང༌། །སྔོན་གྱི་མཐའ་ནི་ཡོད་མ་ཡིན། །ཞེས་གསུངས་ཤིང༌། དབུ་མ་སྣང་བར་ཡང༌། དངོས་པོ་སྤྱི་ལྡོག་གཞིར་བཟུང་ངོ༌། །དེ་ལ་ས་དང་པོ་པས་སྤྲུལ་མ་ཐག་པ་དེས་སྔར་འཁོར་བ་སྐྱེ་བ་ལེན་མྱོང་ངམ་མ་མྱོང༌། མྱོང་ན་དེའི་ཚེ་དེའི་རྒྱུད་ལ་སྐྱེ་བ་ཡོད་མེད་གང་ཟག་ཡིན་མིན། ཡན་ལག་བཅུ་གཉིས་སོགས་དང་ལམ་གྱི་ཐོག་མ་ཡོད་མེད་སོགས་ཀྱང་ཤེས་བྱ་ཡིན་མོད་ཀྱང་དགོས་པ་ཆུང་བས་འདིར་མ་སྤྲོས་སོ། །༼རུ༽དེ་ལ་ཡང་ནང་གསེས་ཀྱི་གནས་མ་བུ་བ་སོགས་འདུས་བྱས་ལ་སྐད་ཅིག་མས་མ་ཁྱབ་པར་འདོད་ལ། མང་སྟོན་པ་སོགས་དེ་ལྟར་མི་འདོད་པ་ཡང་ཡོད་དེ། སྔ་མའི་དམ་ཚིག་བརྗོད་པའི་རྟོག་གེ་འབར་བ་ལས། འདུས་བྱས་ནི་སྐད་ཅིག་པ་དང་སྐད་ཅིག་པ་མ་ཡིན་པ་ཡང་ཡོད་དོ་ཞེས་དང༌། མཛོད་ལས། སྐད་ཅིག་མ་ཡིན་འཇིག་ཕྱིར་རོ། །ཞེས་པའི་སྐབས་སུ་དེ་ལ་འཇིག་པའི་ངང་ཅན་ཡིན་པའི་རྟགས་ཀྱིས་སྐད་ཅིག་དེ་མ་ཐག་འཇིག་པར་སྒྲུབ་པ་སྟེ། དོན་ནི། དང་པོར་སྐྱེས། གཉིས་པར་གནས་ན་གཉིས་པ་དེ་ཡང་དེ་ལས་དུས་གཉིས་པར་གནས་དགོས་ཤིང༌། དེའི་གནས་པ་དེ་ཡང་དེའི་གཉིས་པར་གནས་

― GTD002_Page_0861 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་ཞེས་རྟག་པར་ཐལ་བ་འཕང་བ་ཡིན་ལ། ལན་དུ། དེ་ཆོས་བརྒྱད་དང་གཅིག་ལ་འཇུག། །ཅེས་གནས་པས་གནས་པ་སྐྱེ་བའི་གནས་པ་ལས་ལོགས་སུ་མེད་པ་སོགས་ཀྱི་རྒྱུ་མཚན་གྱིས་སྐྱོན་མེད་པར་བཤད་དོ། །མང་སྟོན་པའི་དམ་ཚིག་ནི། རྟོག་གེ་འབར་བ་ལས། འདུས་བྱས་ཐམས་ཅད་ནི་སྐད་ཅིག་མའོ། །ཞེས་གསུངས་པའི་ཕྱིར། དེ་དག་གི་དོན་ལ་ཁ་ཅིག་ན་རེ། གནས་མ་བུ་བས་འདུས་བྱས་ཐམས་ཅད་སྐད་ཅིག་མར་འདོད་པར་ཐལ། དེས་སྐད་ཅིག་མ་ཡིན་ཀྱང་སྐད་ཅིག་གིས་འཇིག་མི་དགོས་པར་འདོད་པའི་ཕྱིར། མཛོད་ཀྱི་མཐའ་དཔྱོད་ལས། སྐད་ཅིག་གི་དོན་འཇིག་པ་ཁོ་ནར་བཤད་མི་དགོས་པར་ཐལ། སྣོད་སྐད་ཅིག་མ་ཞེས་པ་ལྟ་བུ་སྣོད་སྟོང་པར་འཇུག །ལྷས་སྦྱིན་སྐད་ཅིག་མ་ཞེས་པ་ལྟ་བུ་བྱ་བ་མེད་པར་འཇུག །དུས་སྐད་ཅིག་མ་ཞེས་པ་ལྟ་བུ་དུས་མཐའ་ལ་འཇུག་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། དེ་དག་ལ་སྐད་ཅིག་མའི་སྒྲ་བཤད་དུ་ཡོད་པར་འདོད་ཀྱང་སྐད་ཅིག་མ་ཡིན་པར་འདོད་མི་དགོས་པའི་ཕྱིར་ཏེ། དེས་བུམ་པ་སོགས་འཇིག་པ་ཕྱིས་འབྱུང་གི་རྒྱུ་ལ་ལྟོས་པར་འདོད་ཅིང༌། སྒྲ་བློ་སོགས་སྐད་ཅིག་མར་འདོད་པ་མཛོད་འགྲེལ་ལས་བཤད་པའི་ཕྱིར། ཡང་ཁ་ཅིག་གིས་གྲུབ་མཐའ་གོང་མ་ལྟར་ན་བྱ་བ་དེ་གསུམ་ཅིག་ཅར་གྲུབ་པར་ཐལ། འདོད་པའི་ཕྱིར། འདོད་ན། སྐྱེ་བ་གྲུབ་པ་དང་གནས་པ་གྲུབ་པ་དང་འཇིག་པ་གྲུབ་པ་དུས་མཉམ་པར་ཐལ། འདོད་པའི་ཕྱིར། འདོད་ན་སྐྱེ་གནས་འཇིག་གསུམ་དུས་མཉམ་པར་ཐལ། འདོད་པའི་ཕྱིར་ན་མ་ཁྱབ། ཡང་ཁ་ཅིག །ཚེས་གཅིག་གི་དུས་དེ་རང་གྲུབ་དུས་ལས་སྐད་ཅིག་

― GTD002_Page_0862 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པར་མི་གནས་པར་ཐལ། དེ་སྐད་ཅིག་མ་ཡིན་པའི་ཕྱིར། འདོད་ན་དེ་གྲུབ་མ་ཐག་པའི་སྐད་ཅིག་གཉིས་པའི་ཚེ་ཞིག་ཟིན་པར་ཐལ། འཇིག་ཁ་མ་ཡིན་པའི་ཕྱིར་ན་མ་ཁྱབ་སྟེ། སྡེ་བདུན་ཡིད་ཀྱི་མུན་སེལ་ལས། ཚེས་གཅིག་གི་སྔ་དྲོ་ནས་ཚེས་གཅིག་གི་མགོ་ཟུག་པའི་ཕྱིར། ཚེས་གཅིག་ཡོད་ཀྱང་ཚེས་གཅིག་རྫོགས་པར་གྲུབ་པ་མ་ཡིན་ལ། ཚེས་གཉིས་ཀྱི་སྔ་དྲོའི་སྔ་ལོགས་ཙམ་དུ་ཚེས་གཅིག་རྫོགས་པར་གྲུབ་ཀྱང་དེའི་སྐད་ཅིག་གཉིས་པར་ཚེས་གཅིག་ཞིག་པའི་ཕྱིར་དང༌། རང་གྲུབ་དུས་ལས་སྐད་ཅིག་གཉིས་པར་མི་སྡོད་པ་ཉིད་སྐད་ཅིག་མའི་དོན་ཡིན་པའི་ཕྱིར། ཞེས་སོ། །དེ་བཞིན་དུ་སྐྱེ་བ་འདི་ཕྱི་མའི་དངོས་རྒྱུ་ཡིན་ཀྱང་དེར་འགྱུར་ཁ་མ་མ་ཡིན་པ་སོགས་ཚིག་ལ་ཡང་གཟབ་བོ། །༼ལུ༽དེ་ལྟར་ཕྱི་དོན་མེད་ཅིང་སེམས་ཀྱི་སྣང་ཆ་ཙམ་ཡོད་པ་སྒྱུ་མའི་དཔེས་མཚོན་པར་མ་ཟད་གང་ཟག་གི་བདག་མེད་ལ་སྦྱར་ཏེ་སྒྱུ་མའི་དཔེ་འཆད་ཚུལ་ཡང་ཡོད་པས་དེ་སྟོན་པར། ༼ཤུ༽དེ་ཡང་མདོ་སྡེ་རྒྱན་ལས། སངས་རྒྱས་རྣམས་སངས་རྒྱས་མཆོག་རྣམས་ཀྱིས་དེ་དང་དེ་ལས་འདུས་བྱས་དག། །གསུངས་པ་སྒྱུ་མ་རྨི་ལམ་སྨིག་རྒྱུ་གཟུགས་བརྙན་དང་འདྲ་མིག་ཡོར་དང༌། །བྲག་ཆ་ལྟ་བུ་དང་ནི་ཆུ་ཟླའི་གཟུགས་འདྲ་སྤྲུལ་དང་འདྲར་ཤེས་བྱ། །དྲུག་དང་དྲུག་དང་གཉིས་དང་དྲུག་ཚན་གཉིས་དང་གསུམ་པོ་རེ་རེ་འདོད། །ཅེས་དྲུག་ཚན་སོགས་དཔེ་རེ་རེ་དང་སྦྱར་ཏེ་རིམ་བཞིན་ནང་གི་སྐྱེ་མཆེད་དྲུག་གདགས་གཞིར་བྱས་ཏེ་བདག་གོ་སྙམ་དུ་རློམ་པ་སྐྱེ་བས་སྒྱུ་མ་དང༌། ཕྱིའི་སྐྱེ་མཆེད་དྲུག་ཕྱི་དོན་གྱི་ངོས་ནས་མྱོང་རྒྱུ་མེད་ཀྱང༌། སེམས་རང་ཉིད་ཀྱི་སྣང་ཆ་ཙམ་པོ་དེ་ལ་རང་གིས་ལོངས་སྤྱོད་དུ་ཡོད་པས་རྨི་ལམ་ལྟ་བུ་

― GTD002_Page_0863 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། སྨིག་རྒྱུས་ཆུར་འཁྲུལ་བ་བསྐྱེད་པ་ལྟར་སེམས་སེམས་བྱུང་གཉིས་ཀྱིས་རང་གི་རྫས་ལ་དོན་དུ་འཁྲུལ་བ་བསྐྱེད་པ་སྨིག་རྒྱུ་ལྟ་བུ་དང༌། ཡང་ནང་གི་སྐྱེ་མཆེད་དྲུག་ནི་ལས་ཀྱི་གཟུགས་བརྙན་ལྟ་བུ་དང༌། ནང་གི་སྐྱེ་མཆེད་དྲུག་གི་གདུགས་ཕུབ་པས་དེའི་སྣང་ཆ་ཕྱིའི་སྐྱེ་མཆེད་དྲུག་གྲིབ་མ་ལྟ་བུ་འབྱུང་བས་ཕྱིའི་སྐྱེ་མཆེད་དྲུག་ནི་གྲིབ་མའམ་མིག་ཡོར་ལྟ་བུ་དང༌། ཐ་མ་གསུམ་ནི་དཔེ་རེ་རེ་དང་དོན་ཡང་རེ་རེ་སྦྱར་བ་སྟེ་བཤད་པའི་ཆོས་ནི་བྲག་ཆ་ལྟ་བུ་དང༌། དེའི་དོན་གོམས་པའི་ཏིང་ངེ་འཛིན་གྱི་རྣམ་པ་གསལ་བར་འཆར་བ་ནི་ཆུ་ཟླ་ལྟ་བུ་དང༌། དེ་ནས་གཞན་དོན་དུ་བསམ་བཞིན་སྲིད་པ་འཛིན་པ་ནི་སྤྲུལ་པ་ལྟ་བུའོ། །དཔེ་གཉིས་པར་འདི་ཉིད་ལས་གང་ཟག་གི་བདག་གིས་ཉེ་བར་སྤྱད་བྱར་མེད་པ་ཞེས་གསུངས་ལ། དབྱིག་འགྲེལ་ལས་རྨི་ལམ་ལྟ་བུ་ནི། ཕྱིའི་སྐྱེ་མཆེད་དྲུག་སྟེ་ཉེ་བར་སྤྱད་པའི་ངོར་མེད་པའི་ཕྱིར། ཞེས་པ་ཙམ་ལས་གསལ་ཁ་མ་བྱས་ཤིང༌། བཙུན་པས་ཐད་འདིར་བཤད་པ་མ་བྱས་ལ་བློ་བརྟན་གྱིས་གཟུགས་དང་སྒྲ་ལ་སོགས་པ་རྣམ་པར་ཤེས་པའི་ཡུལ་དུ་ཡོད་པ་མ་ཡིན་པའི་ཕྱིར་རྨི་ལམ་ལྟ་བུའོ། །ཞེས་ཕྱི་དོན་མེད་པའི་དཔེ་ལ་སྦྱར་བ་ལྟར་བོད་ཀྱི་ཊཱིཀ་བྱེད་དག་གིས་ཀྱང་བྲིས་སོ། །འདི་ཉིད་ཀྱི་དགོངས་པ་ནི་ཕྱི་ནང་གི་སྐྱེ་མཆེད་དྲུག་ཚན་གཉིས་ལ་དཔེ་ལན་གཉིས་གཉིས་འབྱུང་ཞིང༌། དང་པོ་གང་ཟག་གི་བདག་མེད་པའི་དཔེར་གསལ་བས། གཉིས་པ་བདག་གི་བ་མེད་པ་ལ་སྦྱར་ན་དཔེ་ཕྱི་མ་གཉིས་དང་མི་ཟློས་ཤིང་བདག་མེད་གཉིས་ཀ་རྫོགས་པར་སྟོན་ནུས་པར་འདུག་དགོངས་པར་སྣང་བས་སྔོན་མེད་ལེགས་བཤད་དུ་ཤེས་པར་གྱིས།

― GTD002_Page_0864 ―

^{[མ་དཔེ་གཟིགས་ན་འདིར་གནོན།]}

[Full Size]

༼སུ༽ཐེག་བསྡུས་ཀྱི་སྒྱུ་མ་ཡང་ཕྱི་དོན་མེད་པའི་དཔེར་མཛད་ལ། ལྷག་མ་ཕལ་ཆེར་མདོ་སྡེ་རྒྱན་གྱི་བཤད་པ་ཕྱི་མ་དང་གཅིག་གོ། དོན་མེད་ན་ཇི་ལྟར་རྣམ་པར་ཤེས་པ་སྣ་ཚོགས་འབྱུང་སྙམ་པ་ཟློག་པའི་ཕྱིར་མིག་ཡོར་ལྟ་བུ་ཉིད་དོ་ཞེས་གསུངས་པ་ཡང་རྣམ་ཤེས་ཚོགས་དྲུག་མི་འདྲ་བ་སོ་སོའི་སྣང་ཆ་ལས་ཕྱིའི་སྐྱེ་མཆེད་དྲུག་མི་འདྲ་བ་སོ་སོར་འབྱུང་བ་གྲིབ་མ་དབྱིབས་སྣ་ཚོགས་སུ་འབྱུང་བ་ལྟ་བུ་ཡིན་པས་སྔ་མ་དང་མི་མཐུན་པ་མེད་དོ། །༈ མདོ་ལས་༼ཧུ༽འཇུག་པ་ཕྱིན་ཅི་མ་ལོག་པར་གསུངས་ལ་ཞེས་པའི་ཐད་དུ་སྟོང་ཐུན་ལས། ཕྱིན་ཅི་མ་ལོག་པར་འགྲེལ་པར་གསུངས་ལ། ཞེས་གསུངས་པ་ནི་འགྲེལ་པར་དྲངས་པའི་མདོར་གང་ན་གང་མེད་པ་ཞེས་སོགས་ལས་གསུངས་པའམ། ཡང་ན་མདོ་འདིའི་དོན་དུ་འགྲེལ་པར་གསུངས་པ་ལ་བྱ་ཡི། འགྲེལ་པ་རང་ཉིད་ཀྱིས་གསུངས་པ་ཙམ་ལ་བྱས་ན་མི་འབྲེལ་ཏེ། འདིེས་ཀྱང་དེ་སྟོན་ཞེས་པའི་འདི་སྒྲ་དབུས་མཐའི་རྩ་བ་ལ་འཇུག་དགོས་པས་འགྲེལ་པར་གསུངས་པའི་དོན་བཞིན་དུ་རྩ་བས་ཀྱང་དེ་ལྟར་དུ་གསུངས་ཞེས་བཤད་ན་གོ་ལོག་པ་ཡིན་པའི་ཕྱིར། རང་ལུགས་མདོ་ལས་གསུངས་ལ། དབུས་མཐས་ཀྱང་མདོའི་དོན་བཞིན་བསྟན་ཏོ། །ཞེས་བཟུང་ངོ༌། །འདིར་ཀྱང་སྒྲ་སྨོས་པ་ནི། མདོ་སྡེ་རྒྱན་ལས། མདོའི་དོན་བཞིན་དེ་ལྟར་གསུངས་པར་མ་ཟད་ཅེས་པ་གཅིག་ཀྱང་འཐོབ་སྟེ། མདོ་སྡེ་རྒྱན་ལས། དེ་བཞིན་གཉིས་སྣང་དེ་ལ་ཡོད། །དེ་ཡི་ངོ་བོ་ཡོད་མ་ཡིན། །ཞེས་དང༌། དེའི་འགྲེལ་པར། གཉིས་སུ་སྣང་བ་ནི་ཡོད་དོ། །གཉིས་ཀྱི་ངོ་བོ་ནི་མེད་དོ། །ཞེས་སོགས་འདི་དང་ཤིན་ཏུ་འདྲ་བར་འབྱུང་ངོ༌། །འོན་ཀྱང་མདོ་སྡེ་རྒྱན་གྱི་

― GTD002_Page_0865 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་པ་ལས་འདི་ཟུར་དུ་བཀོད་པ་ནི་སྟོང་ཉིད་དོན་དམ་པར་ཡོད་པ་ཤུལ་དུ་སྒྲུབ་ཚུལ་རྒྱན་གྱི་ལུང་དེར་མི་གསལ་ཞིང༌། འདིའི་འཁོར་ལོ་གསུམ་ལ་དྲང་ངེས་འབྱེད་ཚུལ་སོགས་འགྲེལ་བཤད་ལས་གསུངས་པ་ཞར་ལ་འཆད་བཞེད་ནས་བཀོད་པ་ཡིན་ནོ། །སྟོང་ཐུན་གྱི་ལུང་དོན། དེ་ལྟར་འགྲེལ་དགོས་པར་སྟོང་ཐུན་རང་ལས་ཀྱང་ཤེས་ཏེ། སྐབས་གཞན་དུ་ཀུན་བཏུས་ལས་གང་ན་གང་མེད་པ་ཞེས་སོགས་དྲངས་ཤིང༌། དེ་ཡང་ཁྱད་ཆོས་བཅུ་དྲུག་གིས་སྟོང་པ་བཤད་པའི་སྐབས་སུ་མདོ་ཚིག་འདི་ཉིད་སོར་བཞག་ཏུ་བཀོད་པ་རྣམས་དྲངས་པའི་ཕྱིར། འདི་ལ་གཉལ་སྟོན་གྱི་བཤད་པ་དོན་དུ་སོང་སྣང་ངོ༌། ། ༼ཨུ༽འདི་ལ་ཁ་ཅིག་གཞན་དབང་གི་སྟེང་དུ་ཀུན་བཏགས་བཀག་ཤུལ་དུ་ལྷག་མར་ལུས་པའི་ཡོད་པ་ཞིག་སྒྲུབ་རྒྱུ་ཡོད་པར་ཐལ། འདོད་པའི་ཕྱིར། འདོད་ན། དགག་བྱའི་ཀུན་བཏགས་བཀག་ཤུལ་དུ་གཞན་དབང་ཡོངས་གྲུབ་གཉིས་བདེན་པར་གྲུབ་པ་སྒྲུབ་རྒྱུ་ཡིན་པར་ཐལ། འདོད་པའི་ཕྱིར། འདོད་ན། དེའི་ཤུལ་དུ་མ་ཡིན་དགག་དང་སྒྲུབ་པ་གང་རུང་ཞིག་སྒྲུབ་རྒྱུ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལྟར་ན་ཆོས་ཉིད་མ་ཡིན་དགག་ཏུ་འགྱུར་བའི་ཕྱིར། དེར་ཐལ། ཆོས་ཉིད་བརྗོད་པའི་སྒྲ་དེས་དགག་བྱ་བཀག་ཤུལ་དུ་སྒྲུབ་པའམ་མ་ཡིན་དགག་སོགས་བསྒྲུབ་ན་དེ་སྒྲུབ་པར་འགྲོ་བའི་ཕྱིར་ན་མ་ཁྱབ་བྱས་པ་ལས། འོ་ན་ཡང་སྟོང་ཉིད་མ་ཡིན་དགག་ཏུ་ཐལ། གཞན་དབང་ལ་ཀུན་བཏགས་མེད་པར་གསུངས་པའི་ལུང་འདིས་དགག་བྱ་བཀག་ཤུལ་དུ་སྟོང་གཞི་བདེན་གྲུབ་བསྒྲུབ་པའི་

― GTD002_Page_0866 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ན་མ་གྲུབ་སྟེ། འདིར་དེའི་ཤུལ་དུ་སྒྲུབ་ཅེས་པ་རྐང་པ་ཕྱི་མས་བསྒྲུབ་པ་དང༌། སྤྱིར་སྒྲུབ་རྒྱུ་ཡོད་པ་ལ་བྱ་ཡི། གཞུང་ཚིག་གཅིག་པོ་དེས་སྒྲུབ་པ་ལ་མི་བྱ་བའི་ཕྱིར། དེས་ན་བསྒྲུབ་བྱ་མ་ཡིན་དགག་ཏུ་ཐལ་བའི་སྐྱོན་མི་ཡོང་ལ། ལྕང་སྐྱ་རིན་པོ་ཆེའི་གྲུབ་མཐར་ལུགས་འདིའི་དགག་བྱ་མ་ཡིན་དགག་ཏུ་སོང་ཡང་སྐྱོན་མེད་པར་གསུངས་སོ། ། ༼ཀེ༽དེ་ལྟར་རྐང་པ་གཉིས་པས་འཁོར་ལོ་བར་བའི་དགོངས་གཞིའི་ངོ་བོ་ཉིད་མེད་པ་དངོས་སུ་བསྟན་ཅིང༌། དང་པོའི་སྒྲས་ཟིན་ཡང་དངོས་སུ་བཀག་གོ །དེ་བཞིན་དུ་རྐང་པ་དང་པོས་བར་བའི་སྒྲས་ཟིན་བཀག་ཅིང། དང་པོའི་དགོངས་གཞི་བསྟན་པ་ཡིན་ཏེ། གཞན་དབང་རང་མཚན་གྱིས་གྲུབ་པར་དངོས་སུ་བསྟན་པའི་ཕྱིར་དང༌། ཡང་དག་མ་ཡིན་ཞེས་དོན་དུ་མ་གྲུབ་བཞིན་དུ་དོན་དུ་འཁྲུལ་བའི་སྣང་ཆ་གསུངས་པ་དེ་ཉིད་འཁོར་ལོ་དང་པོའི་དགོངས་གཞི་ཡིན་པ། རྣམ་འགྲེལ་ལས། མ་རིག་གིས་བསླད་བདག་ཉིད་ནི། །ཇི་ལྟའི་རང་རྐྱེན་ལ་ལྟོས་ནས། །རྣམ་རིག་དེ་བཞིན་མིན་རྣམ་པ། །སྐྱེ་འགྱུར་རབ་རིབ་ལ་སོགས་བཞིན། །ཞེས་དང༌། འོག་གི་ཉི་ཤུ་པ་སོགས་ཀྱིས་འགྲུབ་པའི་ཕྱིར་དང༌། རྐང་པ་དང་པོས་ཡུམ་གྱི་སྒྲས་ཟིན་ལ་ཞེན་ནས་སྐུར་འདེབས་ཀྱི་མཐའ་ལ་ལྟུང་བའི་ཐལ་འགྱུར་བ་འགོག་པ་དང༌། རྐང་པ་གཉིས་པས་འཁོར་ལོ་དང་པོའི་སྒྲས་ཟིན་ལ་ཞེན་པ་རྣམས་ཀྱི་སྒྲོ་འདོགས་ཀྱི་མཐའ་འགོག་པར་འགྲེལ་བཤད་ལས་བཤད་པས་ཀྱང་ཤེས་པའི་ཕྱིར། དེ་ལ་རྐང་པ་དང་པོའི་ཡོད་ཅེས་པ་ཡང་འགྲེལ་བཤད་ལས། རང་བཞིན་གྱི་ཞེས་བྱ་བ་ནི་ཚིག་གི་ལྷག་མའོ། །ཞེས་རང་བཞིན་གྱིས་ཡོད་པ་ལ་གསལ་བར་གསུངས་པས། བུ་སྟོན་སོགས་ཀྱིས་

― GTD002_Page_0867 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་དབང་ཐ་སྙད་ཙམ་དུ་ཡོད་པ་དང༌། ཡོངས་གྲུབ་དོན་དམ་པར་ཡོད་པར་གསུངས་པ་ཁེགས་ཤིང༌། རྐང་པ་གཉིས་པས་གཞི་གཞན་དབང་དེའི་སྟེང་དུ་དགག་བྱ་ཆོས་བདག་འགོག་པར་གསུངས་པས། ཇོ་ནང་བ་སོགས་གཞི་ཡོངས་གྲུབ་ཀྱི་སྟེང་དུ་དགག་བྱ་གཞན་དབང་འགོག་པར་བཤད་པ་ཡང་གསལ་བར་བཀག་གོ ། ༼ཁེ༽འདིའི་དོགས་པ་སྐྱེ་ཚུལ་ནི། འོག་ཏུ་ཡོད་པ་སྔ་མ་དང་མེད་པ་ཕྱི་མ་ཡིན་པར་བསྟན་པས་སྟོང་ཉིད་མེད་སྙམ་པའི་དོགས་པ་འབྱུང་བར་གསལ་ཞེས། ཆ་ཕྱེ་ནས་སྟོན་པའི་སྐབས་སུ། བདེན་པར་ཡོད་པ་གང་ཡིན་པ་དེ་སྔར་བསྟན་ཟིན་ནས། དེ་རྗེས་བདེན་པར་མེད་པ་དེ་ཉིད་འཆད་དགོས་པས་ཡོངས་གྲུབ་ཀྱང་བདེན་པར་ཡོད་ན་ཀུན་བཏགས་བདེན་མེད་དུ་བཤད་པ་འདིའི་གོང་དུ་བཤད་དགོས་པ་ལ་དེར་མ་བཤད་ཅིང་གཞན་དུ་བཤད་ན་སྐབས་འཆོལ་བའི་སྐྱོན་འབྱུང་བས་ཕྱི་མར་བདེན་མེད་བཤད་པ་འདིའི་ཁུངས་སུ་བསྡུ་དགོས་ཏེ། འདུས་མ་བྱས་སུ་ཡང་མཚུངས་པའི་ཕྱིར་སྙམ་དུ་དོགས་པའོ། །དོགས་པ་སྐྱེ་ཚུལ་འདི་ལ་བློ་གྲོས་རྒྱ་མཚོའི་དབུས་མཐའི་འགྲེལ་པ་རིན་ཆེན་ཕྲེང་བར། གལ་ཏེ་མི་སྟོང་ཅུང་ཟད་ཡོད། །སྟོང་པ་ཡོད་པར་ག་ལ་འགྱུར། །ཞེས་པའི་ཚུལ་གྱིས་སྟོང་ཉིད་བདེན་པར་མེད་དོ་སྙམ་ན་མ་ཡིན་ཏེ། སྟོང་པ་ཉིད་ནི་གཞན་དབང་འདི་ལ་དཔྱད་བཟོད་དུ་ཡོད་པའི་ཕྱིར། ཞེས་རྩ་ཤེས་ཀྱི་ལུང་འདྲ་བོ་ཞིག་དྲངས་ནས་གཞན་དབང་བདེན་པར་གྲུབ་ན་སྟོང་ཉིད་མེད་པར་འགྱུར་ཏེ། འགལ་བ་ལ་མི་འཁྲུལ་བའི་ཚད་མ་མེད་པའི་ཕྱིར། ཞེས་དོགས་པ་བསླང་བར་བསམ་མོ། །རང་ལུགས་ཀྱི་ལན་ནི། གཞན་དབང་གི་

― GTD002_Page_0868 ―

^{[མ་དཔེ་གཟིགས་ན་འདིར་གནོན།]}

[Full Size]

སྟེང་དུ་གཟུང་འཛིན་ཐ་དད་དུ་གྲུབ་པ་དོན་དམ་དཔྱོད་པའི་རིགས་པས་ཁེགས་པར་བསྟན་པ་ན། སྟོང་པ་དེ་ཉིད་དོན་དམ་དཔྱོད་པའི་རིགས་པས་རྙེད་དོན་མཐར་ཐུག་ཏུ་གོ་ཞིང༌། དེ་ནི་ལུགས་འདིའི་སྟོང་ཉིད་དོན་དམ་པར་སྒྲུབ་པའི་རྒྱུ་མཚན་མཐར་ཐུག་ཡིན་པས་སྔར་སྨོས་ནས་བསྒྲུབ་བྱ་རྗེས་སུ་བསྟན་པ་ཡིན་ནོ། །༼གེ༽འདིས་ནི་ཀུན་རྟོག་སྟེ་འཛིན་པ་རང་བཞིན་གྱིས་ཡོད་ན་བཟུང་བ་རང་བཞིན་གྱིས་ཡོད་དགོས་པས་གཟུང་འཛིན་གཉིས་ཀ་རང་བཞིན་གྱིས་ཡོད་ན་གཟུང་འཛིན་གཉིས་སྟོང་མེད་པར་འགྱུར་ཞེས་རྩོད་པ་གཅིག་དང༌། ལན་དུ་གཟུང་འཛིན་གཉིས་ལ་ཆ་ཕྱེ་ནས་གསུངས་ཤིང་སྟོང་ཉིད་ཀྱང་མེད་པར་མི་འགྱུར་ཚུལ་གཅིག་བློ་བརྟན་གྱིས་སུམ་ཅུ་པའི་འགྲེལ་པར་གསུངས་པ་འདི་ཉིད་དབུས་མཐའི་ལུང་དེའི་དོན་དུ་ཡང་སྦྱར་རུང་བར་གོ་བའི་ཆེད་ཡིན་ལ། འདིར་མཐའ་གཅིག་ཏུ་སྨྲ་བ་འདི་རྣམ་པ་གཉིས་ཞེས་པ་ནི་དོན་སྨྲ་བ་དང་ངོ་བོ་ཉིད་མེད་པར་སྨྲ་བ་ལ་བྱིན་ཊ་དེ་བས་བཤད་དོ། །དེ་ཉིད་དབུས་མཐའི་དགོངས་པར་འགྲེལ་ཚུལ་ནི། རྐང་པ་དང་པོས་འཛིན་པ་རྫས་གྲུབ་དང༌། གཉིས་པས་དེ་ལས་དོན་གཞན་པའི་བཟུང་བ་མེད་པར་བཤད་པ་སྟེ། སྔར་བཤད་པ་དང་ཕལ་ཆེར་འདྲ་ལ། དེ་ལྟར་བཟུང་བ་ཕྱི་དོན་བཀག་པའི་ལན་དུ། འོ་ན་ཐར་པ་མེད་པར་ཐལ། ཐར་པའི་ལམ་མི་རྟོག་ཡེ་ཤེས་ཀྱི་བསྒོམ་བྱའི་ཡུལ་མེད་པའི་ཕྱིར་ཏེ། ཕྱི་དོན་མེད་པའི་ཕྱིར་ཞེས་ཕྱི་དོན་བཀག་པ་ལ་གཟུང་བྱ་ཙམ་བཀག་པར་འཁྲུལ་བའི་རྩོད་པ་དང༌། གཉིས་སྟོང་དེ་ཉིད་རྣམ་དག་ལམ་གྱི་འཛིན་སྟངས་ཡིན་པས་ཐར་ལམ་མེད་པར་མི་འགྱུར་ཞེས་ལན་མཛད་པར་ཡང་འགྲེལ་བཤད་ལས་གསུངས་སོ། །ཁ་ཅིག་ཡང་དག་ཅེས་པའི་སྟོང་ཉིད་དང༌། མ་

― GTD002_Page_0869 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ཀུན་རྟོག་ཅེས་པའི་གཞན་དབང་སྟེ་རྐང་པ་དང་པོས་གཉིས་ཀ་བདེན་གྲུབ་ཏུ་བསྟན་ཟེར་བ་ནི་ཡིག་དོན་ལ་ཡང་མ་ཞུགས་ཤིང༌། རྐང་པ་གསུམ་པའི་ཐད་ཀྱི་འགྲེལ་བཤད་ལས། ཡང་དག་མ་ཡིན་པའི་ཀུན་ཏུ་རྟོག་པ་ནི་ཞེས་སོགས་སྔར་དྲངས་པ་དང་འགལ་བས་མི་འཐད་དེ། དང་པོར་རང་བཞིན་ཡོད་པར་གསུངས་པའི་ལོག་རྟོག་མི་སེལ་ན་འདིས་ཀྱང་མི་སེལ་བར་མཚུངས་པའི་ཕྱིར་རོ། །༼ངེ༽ཞེས་རྐང་པ་གསུམ་པས་གཉིས་སྟོང་དེ་ཉིད་གཞན་དབང་གི་གནས་ལུགས་སུ་གཏན་དུ་གནས་པར་བཤད་པ་ལ་གཞི་གཟུགས་སོགས་མཐོང་བའི་ཚེ་གནས་ལུགས་ཀྱང་མཐོང་བར་འགྱུར་རོ་སྙམ་དུ་རྩོད་པའི་ལན་དུ། ཡོངས་གྲུབ་དེ་མེད་ནས་མ་མཐོང་བ་མ་ཡིན་གྱི་སྒྲིབ་བྱེད་གཉིས་སྣང་འཁྲུལ་བའི་ཀུན་རྟོག་ཡོད་པས་མ་མཐོང་བ་ཡིན་ཞེས་སྟོན་པར་རྐང་པ་བཞི་པ་བྱུང་བར་གསུངས་སོ། །ཁ་ཅིག་སྟོང་ཉིད་དེ་གཏན་དུ་ཡོད་ན་སོ་སྐྱེས་ཐམས་ཅད་ཀྱིས་ཀྱང་ཅིའི་ཕྱིར་མ་མཐོང་སྙམ་པའི་ལན་དུ་སོ་སྐྱེས་དེ་ལ་གཉིས་སྣང་འཁྲུལ་བ་དེ་ཡོད་ཅེས་དེ་སྒྲ་སོ་སྐྱེས་ལ་བཤད་པ་གོང་དུ་འདི་དང་འདིར་དེ་ཞེས་པའི་ཚིག་གི་ནུས་པས་སྟོང་ཉིད་ཁོ་ན་ལ་སྦྱོར་དགོས་པ་མ་ཤེས་པས་ནོངས་པའོ། །རོང་སྟོན་གྱི་དབུས་མཐའི་འགྲེལ་པ་མི་ཕམ་དགོངས་རྒྱན་ལས། སྟོང་པ་ཉིད་ནི་ཀུན་ཏུ་རྟོག་པ་འདི་ལ་ཆོས་ཉིད་དུ་ཡོད་ཅེས་བྱའོ། །སྟོང་པ་ཉིད་དེ་ལ་ཡང་ནི་ཀུན་ཏུ་རྟོག་པ་འདི་ཆོས་ཅན་གྱི་ཚུལ་དུ་ཡོད་ཅེས། ཆོས་དང་ཆོས་ཅན་ཡ་མ་བྲལ་བ་བདེན་གཉིས་ཟུང་འཇུག་གི་ཚུལ་དུ་བཤད་པ་ཡང་སྐབས་འདིའི་འགྲེལ་བཤད་ཀྱི་ཚུལ་གོང་འོག་གང་དང་ཡང་མི་མཐུན་

― GTD002_Page_0870 ―

^{[མ་དཔེ་གཟིགས་ན་འདིར་གནོན།]}

[Full Size]

ནོ། །འགྲེལ་བཤད་ལས་སྔར་བཤད་པ་དེ་དག་ཏུ་མ་ཟད་བཤད་པའི་རྣམ་གྲངས་གཞན་ཡང་མཛད་དེ། འདི་ལྟར་རྐང་པ་དང་པོས་ཀུན་ཉོན་གྱི་ངོ་བོ་འཁྲུལ་བའི་མཚན་ཉིད་ཅན་གྱི་ཀུན་རྟོག་དང༌། གཉིས་པས་དེ་འཁྲུལ་བར་འཇོག་བྱེད་བསྟན་ཏེ། དེ་ལྟར་གཟུང་འཛིན་གཉིས་སུ་མ་གྲུབ་བཞིན་དུ་གྲུབ་པར་འཁྲུལ་བའི་བློ་དེས་རྩ་བ་བྱས་ནས་ཆགས་སོགས་བསྐྱེད་ཅིང༌། དེའི་དབང་གིས་ལས་བསགས་ཏེ་ཐོག་མེད་ནས་ད་ལྟའི་བར་དུ་འཁོར་བར་འཁོར་ཚུལ་བཤད་པ་ན། འོ་ན་ད་དུང་ཡང་འཁོར་བའི་རྩ་བ་དེ་ཉིད་རྒྱུད་ལ་ཡོད་པས་ཐར་མི་ནུས་སམ་སྙམ་ན། དེ་ལྟ་མ་ཡིན་གྱི་ཐར་པ་ངེས་པར་འཐོབ་ནུས་ཏེ། རྣམ་བྱང་གི་ངོ་བོ་འགོག་ལམ་སོགས་ཡོན་ཏན་ཐམས་ཅད་འབྱུང་རུང་གི་སེམས་ཀྱི་ཆོས་ཉིད་ནི་གང་གིས་ཀྱང་མ་བསླད་པས་འོད་གསལ་བར་ཡོད་དོ་ཞེས་འགོག་པ་ཐོབ་ནུས་སུ་བསྟན་པ་ལ། དེ་ལྟ་བུའི་ཆོས་ཉིད་དེ་ཐོག་མེད་ནས་ཡོད་བཞིན་དུ་སེམས་ཅན་རྣམས་ཅིའི་ཕྱིར་མ་གྲོལ་སྙམ་ན། རང་བཞིན་དྲི་མས་དག་མོད་ཀྱང་གློ་བུར་གྱི་དྲི་མ་མ་ཟད་པས་དབང་གིས་མ་གྲོལ་བ་ཡིན་ལ། དེ་ཟད་པ་ལམ་གྱི་རྩོལ་བ་ལ་ལྟོས་པས་ལམ་བསླབ་པ་གསུམ་ལ་སློབས་ཤིག་ཅེས་འདོམས་པ་སྟེ། རྩ་འགྲེལ་གྱི་དགོངས་པ་རྫོགས་པར་ཕྱེ་སྟེ་བཤད་ཡོད་དོ། །༼ཅེ༽འདིའི་དོན་ཡང་རིན་ཆེན་བྱང་ཆུབ་ཀྱི་དྲང་ངེས་རྣམ་འབྱེད་ལས། དབུ་མ་པ་གཞན་ངོ་བོ་ཉིད་མེད་པར་སྨྲ་བ་ལྟར་ན་གཟུགས་སོགས་ཆོས་རྣམས་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་སྟོང་པའི་སྟོང་ཉིད་ལས་ཕྱི་མ་གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་མཆོག་ཏུ་བཞེད་ཀྱང༌། རྣམ་རིག་པ་སེམས་ཙམ་པའི་ལུགས་

― GTD002_Page_0871 ―

^{[མ་དཔེ་གཟིགས་ན་འདིར་གནོན།]}

[Full Size]

འདིས། དེ་འདྲའི་སྟོང་ཉིད་གཉིས་ཀ་དབུ་མའི་དོན་དུ་འགྲེལ་ཚུལ་གཅིག་ཏུ་འགྲེལ་པས། དེ་འདྲའི་སྟོང་ཉིད་གཉིས་པོ་དེ་སྟོང་ཉིད་རྣམ་དག་ཏུ་དོན་གཅིག་ཏུ་མཛད་པའི་ཕྱིར་ཞེས་གསུངས་པ་ནི། ཡ་མཚན་པ་ཞིག་སྟེ། སྟོང་ཉིད་ཕྱི་མ་དེ་ཐལ་འགྱུར་བ་དང་མདོ་སྡེ་སྤྱོད་པས་གཏན་དུ་རང་མི་བཞེད་ཅིང༌། རྣལ་འབྱོར་སྤྱོད་པའི་དབུ་མ་པ་ནི་གཉིས་ཀ་ཡང་ཆོས་ཀྱི་བདག་མེད་རགས་པ་དང༌། རང་རྒྱལ་བར་ཆད་མེད་ལམ་གྱི་འཛིན་སྟངས་སུ་མཚུངས་པར་འདོད་པས་མཆོག་དམན་འབྱེད་མཁན་གྱི་དབུ་མ་པ་དེ་ངོས་བཟུང་མེད་པར་འགྱུར་རོ། །དེས་ན་གཞུང་གི་དོན་ནི། སེམས་ཙམ་པའི་སྐབས་འདིར་རྣམ་རིག་ཙམ་གྱི་ཚུལ་འདི་དབུ་མའི་དོན་དུ་འགྲེལ་དགོས་པའི་རྒྱུ་མཚན་གྱིས། དབུས་མཐའ་ལས། ཡོད་པའི་མེད་པའི་ཞེས་སོགས་དང༌། འོད་སྲུང་ལེའུ་གཉིས་ཀྱི་དོན་འགྲེལ་ཚུལ་ཡང་ངོ་བོ་ཉིད་མེད་པར་སྨྲ་བ་དང་མི་འདྲ་བ་ཞིག་བྱ་དགོས་ཏེ། ངོ་བོ་ཉིད་མེད་པར་སྨྲ་བའི་དབུ་མ་པ་རྣམས་ཀྱི་སྔ་མ་དབུས་མཐས་བཤད་པའི་དབུ་མའི་ལམ་དེ་ལས་འོད་སྲུང་ལེའུར་བཤད་པའི་དབུ་མའི་ལམ་དེ་མཆོག་ཏུ་བཞེད་དེ། སྔ་མ་སེམས་ཙམ་དང་ཕྱི་མ་ངོ་བོ་ཉིད་མེད་པ་རང་གི་ལུགས་སུ་འདོད་པའི་ཕྱིར་དང༌། སེམས་ཙམ་པས་ནི་སྔར་བཤད་པའི་ཚུལ་འདིས་དེ་གཉིས་ཀ་སེམས་ཙམ་རང་གི་ལུགས་སུ་བཀྲལ་ཏེ་དོན་གཅིག་ཏུ་མཛད་པའི་ཕྱིར་ཞེས་པའི་དོན་ནོ། །པྲ་སྟིའི་དྲང་ངེས་རྣམ་འབྱེད་ལས། ཐལ་རང་གཉིས་དང་མི་འདྲ་བར་རྣམ་པར་རིག་པ་ཙམ་གྱི་ཚུལ་འདི་ཉིད་དབུ་མའི་དོན་དུ་འགྲེལ་པས་ན་ཡུལ་སྟོང་པ་དང་ཡུལ་ཅན་ཡེ་ཤེས་

― GTD002_Page_0872 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཀ་དབུ་མའི་དོན་དུ་འཇོག་པར་འདྲ་ཞེས་གསུངས་སོ་ཞེས་བཤད་པ་ཡང་ལེགས་པར་མ་མཐོང་སྟེ། རྣམ་པར་རིག་པ་ཙམ་ཞེས་པས་ཡུལ་ཅན་དང༌། དབུ་མ་ཞེས་པས་ཡུལ་བཤད་པར་བཟུང་སྟེ། དེ་གཉིས་ལ་མཆོག་དམན་འབྱེད་མི་འབྱེད་ལ་འདོད་པར་སྣང་ཡང༌། དེས་ན་ཞེས་རྒྱུ་མཚན་བསྟན་པ་དང་མི་འབྲེལ་ཞིང༌། མི་རྟོག་ཡེ་ཤེས་ལམ་དབུ་མར་ནི་ཐལ་རང་གཉིས་ཀྱང་འདོད་ལ། ལུགས་འདིས་ཀྱང་གཉིས་མེད་ཀྱི་ཡེ་ཤེས་དབུ་མ་དངོས་སུ་འདོད་པ་མ་ཡིན་པ་དང༌། སེམས་ཙམ་གྱི་གཞུང་རྣམས་ལས་རྣམ་པར་རིག་པ་ཙམ་གྱི་ཚུལ་ཞེས་འབྱུང་བ་ཕལ་ཆེར་ཡུལ་གཟུང་འཛིན་གཉིས་སྟོང་ལ་བྱ་དགོས་ཀྱི། ཡུལ་ཅན་རྣམ་པར་རིག་པ་ཙམ་ལ་མ་བཤད་ཅིང༌། དེ་གཉིས་དོན་གཅིག་ཏུ་མཛད་ཅེས་པ་དང་མི་འགྲིག་པའི་ཕྱིར།༼ཆེ༽དེ་ཡང་བརྒྱད་སྟོང་དོན་བསྡུས་ལས། ཤེས་རབ་ཕ་རོལ་ཕྱིན་པ་ནི། །མཚན་ཉིད་གསུམ་ལ་ཡང་དག་བརྟེན། །བཏགས་པ་དང་ནི་གཞན་དབང་དང༌། །ཡོངས་སུ་གྲུབ་པ་ཉིད་ཀྱང་ངོ༌། །མེད་ཅེས་བྱ་ལ་སོགས་ཚིག་གིས། །བཏགས་པ་ཐམས་ཅད་འགོག་པ་ཡིན། །སྒྱུ་མ་ལ་སོགས་དཔེ་རྣམས་ཀྱིས། །གཞན་གྱི་དབང་ནི་བསྟན་པ་ཡིན། །རྣམ་པར་བྱང་བ་བཞི་ཡིས་ནི། །ཡོངས་སུ་གྲུབ་པ་རབ་ཏུ་བསྒྲགས། །ཞེས་གསུངས། འདིར་རྣམ་བྱང་བཞི་ཞེས་པ་ཡིག་ཆར་མ་སྐྱེས་པ་སོགས་བཞི་ལ་བྱས་པ་འདྲ་བ་ཞིག་སྣང་བ་ནི་གོང་མའི་གསུང་རྒྱུན་སོར་བཞག་ཙམ་དུ་སྣང་ལ། རང་ལུགས་འདི་ལྟར་བཟུང་སྟེ། ཐེག་བསྡུས་ལས། འབྱུང་རྟེན་སྒྱུ་མ་ལ་སོགས་བསྟན། །བཏགས་ལ་བརྟེན་ནས་མེད་པ་བསྟན། །རྣམ་པར་བྱང་བ་བཞི་བརྟེན་ནས། །ཡོངས་སུ་གྲུབ་པ་

― GTD002_Page_0873 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་པ་ཡིན། །དག་པ་དེ་ནི་རང་བཞིན་དང༌། །དྲི་མ་མེད་དང་ལམ་དང་དམིགས། །རྣམ་པར་དག་པའི་ཆོས་ཀྱི་རྣམས། །རྣམ་པ་བཞི་པོ་བསྡུས་པ་ཡིན། །ཞེས་རང་བཞིན་གྱི་རྣམ་བྱང་སྟོང་ཉིད་དང་དྲི་མ་མེད་པའི་རྣམ་བྱང་འགོག་བདེན་དང༌། ལམ་རྣམ་པར་བྱང་བ་ལམ་བདེན་དང༌། དམིགས་པ་རྣམ་པར་བྱང་བ་ཐེག་ཆེན་གྱི་སྡེ་སྣོད་དེ་བཞི་ལ་ཟུར་དུ་གསུངས་ཤིང༌། མེད་ཅེས་བྱ་ལ་སོགས་ཞེས་པས་ཀྱང་སོགས་སྒྲས་མ་སྐྱེས་པ་སོགས་བསྡུས་ཟིན་པའི་ཕྱིར་རོ། །ཚིགས་བཅད་འདི་གཉིས་དབུས་མཐའི་འགྲེལ་བཤད་དུ་དྲངས་པ་ལས། ཆོས་མངོན་པའི་མདོའི་ནང་ནས་ཚིགས་སུ་བཅད་པ་གཉིས་ལས། ཞེས་གསུངས་པ་ལུང་དེ་མངོན་པ་ལས་བསྡུས་པའི་དོན་ནམ་ཡི་གེ་མ་དག་པ་ཡིན་དཔྱད་པར་བྱའོ། །༼ཇེ༽སྐྱེ་སོགས་འབྱེད་པའི་ཡུལ་ཅན་དེ་འཁྲུལ་བར་བསྒྲུབ་པས་ཡུལ་དེ་དེ་ལ་སྣང་བ་ལྟར་རྒྱངས་ཆད་དུ་མེད་པ་ཤོ་ལོ་ཀ་དང་པོའི་དོན་ཡིན་ལ། གཉིས་པའི་དོན་ནི་མཚན་ཉིད་འཛིན་པའི་ཕྱོགས་སུ་ཆད་པ་ལྟར་སྣང་བ་དེ་ཉིད་ཀྱིས་མཚོན་བྱ་བཟུང་བའི་ཕྱོགས་སུ་ཆད་པ་ལྟར་སྣང་བ་དེ་ཉིད་ཕར་མཚོན་པས། མཚན་མཚོན་གྱི་ཚུལ་ཡང་བློའི་སྣང་ཆ་ཙམ་ལས་ལོགས་ན་དོན་གྱི་ངོས་ནས་དབྱེ་རྒྱུ་མེད་ལ། སྣང་ཆ་ཙམ་ཞེས་གང་གི་ངོར་འཇོག་པའི་བློ་དེ་ལ་གཟུང་འཛིན་ཕྱོགས་གཉིས་སུ་ཡོད་ཡོད་ལྟར་སྣང་བའི་སྣང་ཚུལ་དེ་ཡང་གོང་དུ་སྐྱེ་འགག་སོ་སོར་

― GTD002_Page_0874 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱེད་པའི་བློ་ལ་གསུངས་པ་བཞིན་འཁྲུལ་ཆ་ཙམ་ཡིན་པས། དོན་དུ་རང་མཚན་གྱིས་གྲུབ་པ་མེད་ཅེས་ཡིད་ཤེས་རྟོག་པ་ལ་ལྟོས་པའི་རྣམ་རིག་པའི་ལྟ་བ་གསུངས་ཤིང༌། ཐེག་བསྡུས་སུ་གཟུང་འཛིན་རྫས་ཐ་དད་དུ་གྲུབ་པ་མེད་ཀྱང་ཡུལ་དུ་བྱར་རུང་བ་དང༌། བདེ་སྡུག་མྱོང་རུང་བ་སོགས་རྟོག་མེད་དབང་ཤེས་ལ་ལྟོས་པའི་རྣམ་རིག་པའི་ལྟ་བ་དཔེ་དང་ལུང་རིགས་དུ་མས་སྒྲུབ་པའི་ཕྱིར། བོད་སྔ་མ་མང་བོས་གཟུང་འཛིན་གཉིས་སྟོང༌། ཕྱོགས་གླང་ཆོས་གྲགས་ཀྱི་ལུགས་དང༌། རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པ་ཐོགས་མེད་སྐུ་མཆེད་ཀྱི་ལུགས་སོ་ཞེས་སྨྲ་བ་མི་འཐད་པར་མངོན་ཞིང༌། སྟག་ལོའི་གྲུབ་མཐའ་རྩ་བར། རྣམ་རིག་སྨྲ་བའི་གཙུག་རྒྱན་སྐུ་མཆེད་གཉིས། །ཞེས་པ་ནས། ཆོས་བདག་འདི་གཉིས་འགོག་ལ་སོ་སོར་བརྩོན། །ཞེས་དང༌། དེའི་འགྲེལ་བར། གཅེན་གྱིས་རྟོག་པ་ལ་དང༌། གཅུང་གིས་རྟོག་མེད་ལ་སྣང་བའི་ཆོས་བདག་འགོག་ཚུལ་ལོ། །ཞེས་ལུགས་ཐ་དད་དུ་བྱས་པ་ཡང་སྙིང་པོ་མེད་པར་གསལ་ལོ། ། ༼ཉེ༽འདིའི་དོན་ཊཱིཀ་ཆེན་དང་སྡེ་བདུན་ཡིད་ཀྱི་མུན་སེལ་གཉིས་ཀ་ལས། ཁ་ཅིག་ཤོ་ལོ་ཀ་ཕྱི་མ་འདི་མདོ་སྡེ་པའི་ལུགས་ལ་སྦྱོར་བ་ནི་མི་འཐད་དེ། མདོ་སྡེ་པ་སོགས་ཉན་ཐོས་སྡེ་པ་ཕལ་ཆེར་ཐེག་ཆེན་བཀར་མི་འདོད་པས། དེ་དག་གིས་བཀའ་བར་བའི་དགོངས་པ་འཆད་དགོས་པའི་ངེས་པ་མེད་པའི་ཕྱིར་དང༌། དེས་ཀྱང་ཞེས་ཀྱང་སྒྲས་སྔ་མ་སྡུད་པའི་ཕྱིར་རོ། །དེས་ན་སྔ་ཕྱི་གཉིས་ཀ་རྣམ་རིག་པ་རང་གིས་བཤད་པའི་རྣམ་གྲངས་ཡིན་ནོ་ཞེས་གསུངས་པ། འདིའི་སྒོ་ནས་དཔྱད་ན་རྒྱུད་སྡེ་སྤྱི་རྣམ་ལས།

― GTD002_Page_0875 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་འཁོར་དེ་ལས་གཞན་བསྐོར་བར་མི་འདོད་ཅིང་ཐེག་པ་ཆེན་པོ་བཀར་མི་འདོད་དོ། །ཞེས་པའི་གོང་དུ་ཡང་ཉན་ཐོས་སྡེ་གཉིས་ཀྱི་ལུགས་ཞེས་པ་ཙམ་ལས་ཐམས་ཅད་ཅེས་མི་འབྱུང་བས། གསུམ་གའི་དགོངས་པ་ཉན་ཐོས་སྡེ་པ་སྤྱི་ཙམ་གྱི་ལུགས་བྱས་ན་ལུང་གི་རྗེས་འབྲང་གཙོ་ཆེ་བས། དེ་ལྟར་ན་ཤེར་མདོ་ཡང་བཀའ་མ་ཡིན་པས་དགོངས་པ་འགྲེལ་དོན་མེད་ལ། འོན་ཀྱང་ཉན་ཐོས་སྡེ་པ་ཁ་ཅིག་གི་ལུགས་ལ་དེ་དྲང་དོན་དུ་འགྲེལ་རུང་བ་ཡིན་ནམ་དཔྱད་དགོས་ཏེ། གོང་དུ་ཕལ་ཆེར་ཞེས་སྨོས་པའི་དགོས་པ་ཡོད་པའི་ཕྱིར། སྟོང་ཐུན་གྱི་གསུང་ཟིན་དེའི་ནང་ཚན་ལ་ཡང་ཐེག་ཆེན་བཀར་འདོད་མཁན་མེད་པ་འདྲ་ཞིག་སྣང་ཡང༌། དགོངས་པ་སྔ་མའི་ལུང་གསུམ་ལྟར་བྱས་ཏེ་ཡབ་སྲས་གསུམ་གས་རྣམ་འགྲེལ་གྱི་ལུང་དེ་དོན་སྨྲ་བ་ཁ་ཅིག་གི་མདོ་དོན་འགྲེལ་ཚུལ་དུ་བཞེད་པ་ནི། མཐའ་དཔྱོད་ལས། རྗེ་ཡབ་སྲས་དགོངས་པ་གཅིག་མི་གཅིག་སོགས་དཔྱད་དགོས་མང་པོ་འདུག་ཅེས་དཀའ་འགྲེལ་ལས་ཐ་དད་དུ་མཛད་ཀྱང་དཔྱད་དགོས་པར་གསུངས་པའི་དཔྱད་ཚུལ་དེ་ཡིན་ནོ། །ལུང་དེ་ཉན་ཐོས་སྡེ་པ་ཁ་ཅིག་ལ་སྦྱོར་དགོས་པ་ནི། ལྷ་དབང་བློའི་འགྲེལ་པར་ཡང༌། ཕྱི་རོལ་གྱི་དོན་ཁས་བླངས་ན་ཡང་ཆོས་ཐམས་ཅད་མཚན་ཉིད་མེད་པ་ཅན་ཡིན་ཏེ། ཕུང་པོ་ལ་སོགས་བྱེ་བྲག་གི །ཞེས་སོགས་དང༌། ཛ་མ་རིས་ཞར་ལ་ཐེག་པ་ཐ་ཤལ་གྱི་རྣམ་གཞག་སྟོན་པའི་ཕྱིར་བཤད་པ་ཞེས་གསུངས་སོ། །འོ་ན་རང་ལུགས་ཀྱང་སྒྲའི་དོན་ཇི་ལྟར་འཆད་ཅེ་ན། གྲུབ་མཐའ་ཆེན་མོར་ཀྱང་སྒྲས་དགོངས་གཞི་སྔ་མར་མ་ཟད་འདི་ཡང་རུང་བ་

― GTD002_Page_0876 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། སེམས་ཙམ་པར་མ་ཟད་ཉན་ཐོས་སྡེ་པའང་འདོད་པ་བསྡུའོ། །ཞེས་གསུངས་པ་ལྟར་རོ། །འདིར་ཡང་ཁ་ཅིག་འདོད་པ་བསྡུའོ། །ཞེས་ཞིབ་ཆ་འབྱེད་དགོས་སོ། །ཚིག་དོན་ནི་མཚན་མཚོན་བྱ་བྱེད་ཀྱི་ཆ་བདེན་པར་གྲུབ་ན་སྣང་བ་ལྟར་གནས་དགོས་ལ། དེ་འདོད་ན་མཚན་ཉིད་སྔར་ཡོད་ལ་ཐ་སྙད་ཕྱིས་སུ་གྲུབ་དགོས་པས་མཚན་མཚོན་རྒྱུ་འབྲས་སུ་ཐལ་བར་འགྱུར་བའི་ཕྱིར། དེ་འདྲའི་ཆ་བདེན་པར་མེད་པ་ལ་དགོངས་པར་ཐར་ལམ་གསལ་བྱེད་དུ་གསུངས་པས་ཚིགས་བཅད་སྔ་མས་མཚན་མཚོན་གྱི་ཆ་ལ་སྦྱོར་ཚུལ་དང་གཏན་མི་འདྲའོ། ། སརྦ་མངྒ་ལཾ།།

བདེན་བཞིའི་རྣམ་གཞག་ཐར་འདོད་མཁས་པའི་དགའ་སྟོན།

― GTD002_Page_0877 ―

^{[མ་དཔེ་གཟིགས་ན་འདིར་གནོན།]}

[Full Size]

བདེན་བཞིའི་རྣམ་གཞག་ཐར་འདོད་འཇུག་ངོགས་མཁས་པའི་དགའ་སྟོན་ཞེས་བྱ་བ་བཞུགས་སོ། །

― GTD002_Page_0878 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མཉྫུ་གྷོ་ཥཱ་ཡ། དུང་དུང་གུས་པའི་དབྱངས་ཀྱི་རྔ་སྒྲ་དང༌། །ལྷན་ཅིག་གར་བསྒྱུར་ཡབ་གཅིག་མཁྱེན་པའི་གཏེར། །ལམ་ལམ་འབར་བ་རལ་གྲིའི་འཁྲི་ཤིང་གིས། །བཅུ་དྲུག་འཆིང་བའི་དྲ་བ་དྲུངས་ཕྱུངས་ཤིག །མིང་སྐམ་རི་བོའི་ཕག་ཏུ་མ་འཆེལ་ཞིང༌། །གོས་དར་ཆུ་འཛིན་དྲ་བས་མ་བསྒྲིབས་པར། །ལུང་རིགས་ཚ་ཟེར་རྒྱས་པའི་ཉི་མ་གང༌། །མཁས་པ་དགའ་བྱེད་གཏམ་གྱི་འོད་འདི་སྤྲོ། །མྱ་ངམ་སྲིད་པའི་འབྲོག་ཏུ་ཡིད་སྐྱོ་ཞིང། །རྣམ་གྲོལ་ཆུ་གཏེར་སྙིང་ལ་འགོད་བཞིན་དུ། །ལེགས་བཤད་མགྲིན་རྔ་དལ་གྱིས་སྒྲོགས་པ་ཡི། །བློ་ལྡན་ངང་བའི་ཁྱུ་ཚོགས་འདིར་ཞུགས་ཤིག །དེ་ཡང༌། རྗེ་བདག་ཉིད་ཆེན་པོས། ཁྱོད་ཀྱིས་ཇི་སྙེད་བཀའ་སྩལ་པ། །རྟེན་འབྲེལ་ཉིད་ལས་བརྩམས་ཏེ་འཇུག །དེ་ཡང་མྱ་ངན་འདའ་ཕྱིར་ཏེ། །ཞི་འགྱུར་མིན་མཛད་ཁྱོད་ལ་མེད། །ཅེས་གསུངས་པ་ལྟར།

― GTD002_Page_0879 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོན་པས་ཆོས་ཕུང་ཇི་སྙེད་ཅིག་བཀའ་སྩལ་པ་ཐམས་ཅད་ཀྱི་དགོངས་པའི་གཏད་སོ་ནི། འཁོར་བ་སྡུག་བསྔལ་གྱི་རྒྱ་མཚོར་བྱིང་བའི་འགྲོ་བ་མཐའ་དག་དེ་ལས་སྒྲོལ་བའི་ཆེད་དུ་ཡིན་ལ། དེའི་ཚུལ་ཡང༌། ཇི་སྐད་དུ། དེ་དག་ཡུལ་ལ་མ་མཐོང་བས། །ཡིན་གྱི་ཕྱི་ཚུལ་དག་གིས་མིན། །ཞེས་ཕྱི་རོལ་ཚེར་མ་འདོན་པའི་ཚུལ་གྱིས་སྤོང་མི་ནུས་པས་སྡུག་བསྔལ་གྱི་རྩ་བ་སུན་དབྱུང་དགོས་ལ། དེ་ཡང་ལས་ཀྱི་ཀུན་འབྱུང་དང༌། དེའི་རྩ་བ་ཕྲ་རྒྱས་དང༌། དེའི་ནང་ནས་ཀྱང་གཙོ་བོ་བདག་ཏུ་འཛིན་པའི་མ་རིག་པ་ལ་ཐུག་ཅིང༌། དེ་འཇོམས་བྱེད་ཀྱི་གཉེན་པོ་དངོས་ནི། ཟབ་མོ་རྟེན་ཅིང་འབྲེལ་བར་འབྱུང་བའི་དེ་ཁོ་ན་ཉིད་རྟོགས་པའི་ཤེས་རབ་ཡིན་པའི་ཕྱིར། སྡེ་སྣོད་ཐམས་ཅད་ཀྱང་ལམ་དེ་ལ་འབབ་ཅིང་གཞོལ་བ་ཤ་སྟག་ཡིན་ཏེ། མདོར་བསྡུ་ན་རྒྱལ་བའི་བཀའ་དང་དགོངས་འགྲེལ་གྱི་བསྟན་བཅོས་དྲི་མ་མེད་

― GTD002_Page_0880 ―

^{[མ་དཔེ་གཟིགས་ན་འདིར་གནོན།]}

[Full Size]

པ་མཐའ་དག་གདུལ་བྱ་རྣམས་ཀྱི་སྡུག་བསྔལ་རྒྱུ་བཅས་སྤོང་བ་དང༌། མྱང་འདས་ཐོབ་བྱེད་ལམ་དང་བཅས་ཏེ་འདོམས་པ་འབའ་ཞིག་ལས་མ་འདས་པས་བདེན་བཞིའི་བླང་དོར་གྱི་ཚུལ་འདི་ནི་སངས་རྒྱས་བཅོམ་ལྡན་འདས་ཀྱི་ཐུགས་ཀྱི་གཅེས་མཛོད་གཅིག་པུ་ཡིན་པར་ཤེས་དགོས་ཏེ། རྗེ་བདག་ཉིད་ཆེན་པོའི་ལམ་རིམ་ཆེ་ཆུང་གཉིས་ཀ་ལས། བདེན་པ་བཞི་ནི་ཐེག་པ་ཆེ་ཆུང་ཀུན་ཏུ་ལན་དུ་མར་གསུངས་ཤིང༌། འཁོར་བར་འཇུག་པ་དང༌། དེ་ལས་བཟློག་པའི་གནད་རྣམས་བདེ་བར་གཤེགས་པས་བསྡུས་པ་ཡིན་པས་རྣམ་གྲོལ་བསྒྲུབ་པ་ལ་ཤིན་ཏུ་གལ་ཆེ་ཞིང༌། ཉམས་ལེན་གྱི་འགག་སྡོམ་ཆེ་བས་རིམ་པ་དེ་ལྟར་དུ་སློབ་མ་འཁྲིད་དགོས་ཏེ། ཞེས་གསུངས་པའི་ཕྱིར་རོ། །དོན་གྱི་དབང་འདི་གཟིགས་ནས་དཔལ་ཆོས་ཀྱི་གྲགས་པས་ཚད་མ་རྣམ་འགྲེལ་ལས། འདི་ཡིས་སྲིན་བུའི་གྲངས་མཁྱེན་པ། །ངེད་ལ་འགར་ཡང་ཉེར་མཁོ་མེད། །བླང་དང་དོར་བྱའི་དེ་ཉིད་ནི། །ཐབས་དང་བཅས་པ་རིག་མཛད་པ། །གང་དེ་ཚད་མ་ཉིད་འདོད་ཀྱི། །ཞེས་དང༌། ལུགས་ལྡོག་གི་སྐབས་སུ་ཡང༌། ཡང་ན་སྐྱོབ། །བདེན་པ་བཞི་ནི་སྟོན་མཛད་པའོ། །ཞེས་བདེན་བཞིའི་བླང་དོར་ཕྱིན་ཅི་མ་ལོག་པར་སྟོན་པའི་སྒོ་ནས་སྟོན་པ་སྐྱོན་མེད་དུ་བསྒྲུབས་ཤིང༌། དབུ་མ་སྙིང་བོར་ཐེག་ཆེན་བཀར་བསྒྲུབ་ཀྱི་སྐབས་སུ། ཐེག་ཆེན་སངས་རྒྱས་གསུངས་ཡིན་ཏེ། །བདག་མེད་ལ་སོགས་སྟོན་པ་དང༌། །ཞེས་དང༌། རྟོག་གེ་འབར་བ་ལས། སྟོང་པ་དང་མི་རྟག་པ་ལ་སོགས་པ་ཡོད་པ་དེ་ནི་བདག་མེད་པ་ལ་

― GTD002_Page_0881 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་སོ། །དེ་རྣམས་སྟོན་པར་བྱེད་པ་ནི། བདག་མེད་ལ་སོགས་སྟོན་པའོ། །ཞེས་བདེན་བཞིའི་ཁྱད་ཆོས་མི་རྟག་སོགས་སྟོན་པའི་རྟགས་ཀྱིས་ཐེག་པ་ཆེན་པོ་སངས་རྒྱས་བསྟན་པ་སྐྱོན་མེད་ཡིན་པར་བསྒྲུབ་སྟེ། དེའི་ཕྱིར་རྣམ་དཔྱོད་དང་ལྡན་པ་རྣམས་ཀྱིས་ཚུལ་འདི་ལ་རིང་དུ་འདྲིས་པར་བྱའོ། །༈ དེ་ལ་ཡང་ཁྱད་གཞི་བདེན་པ་བཞིའི་རྣམ་གཞག །ཁྱད་ཆོས་མི་རྟག་སོགས་བཅུ་དྲུག་གི་རྣམ་གཞག །དེ་དག་གོམས་པས་ལམ་བགྲོད་ཚུལ་དང་གསུམ། དང་པོ་ལ་ཡང་བདེན་པ་བཞིར་ཕྱེ་བའི་དགོས་པ། སྡུག་བདེན་སྔོན་དུ་གསུངས་པའི་དགོས་པ། སོ་སོའི་ངོ་བོ། གྲུབ་མཐའི་འདོད་ཚུལ་དང་བཞི། ༈ དང་པོ་ནི། སྤྱིར་ཤེས་བྱའི་རྣམ་གྲངས་ལ་མཐའ་ཡས་པ་ཡོད་ཀྱང༌། གསུང་རབ་ལས་གཙོ་བོ་བདེན་པ་བཞིར་ཕྱེ་ནས་གསུངས་པའི་རྒྱུ་མཚན་ཡོད་དེ། བདག་ལེགས་སུ་འདོད་པ་རྣམས་གང་ལས་ལྡོག་པ་དང༌། གང་དུ་འཇུག་ཤེས་ནས་བླང་དོར་བྱ་བའི་ཕྱིར་གཏན་ལ་དབབ་བྱ་ནི་ཀུན་ཉོན་དང་རྣམ་བྱང་གི་ཕྱོགས་གཉིས་སུ་ངེས་ལ། དེ་གཉིས་ཀྱང་ཆེ་ལོང་བསྡུས་ན་སྔ་མའི་རྒྱུ་འབྲས་སྡུག་ཀུན་གཉིས་དང༌། ཕྱི་མའི་རྒྱུ་འབྲས་འགོག་ལམ་གཉིས་སུ་ངེས་པ། དེའི་དབང་དུ་བྱས་ཀྱི་དབྱེ་གཞི་གཅིག་ལ་ཕུང་གསུམ་སེལ་བའི་གྲངས་ངེས་ཀྱི་དབང་དུ་བྱས་ནས་ཕྱེ་བ་མ་ཡིན་པའི་ཕྱིར་ཏེ། རྣམ་བཤད་སྙིང་པོ་རྒྱན་ལས། ཐར་པ་དོན་དུ་གཉེར་བ་རྣམས་ཀྱིས་གཏན་ལ་དབབ་བྱའི་གཙོ་བོ་ནི་འཁོར་བ་དང༌། མྱ་ངན་ལས་འདས་པས་བསྡུས་པའི་ཕྱོགས་གཉིས་སུ་ངེས་པ་ཞེས་གསུངས་པའི་

― GTD002_Page_0882 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། ཉན་ས་ལས། དེ་ལ་དཀར་པོའི་ཕྱོགས་དང་ནག་པོའི་ཕྱོགས་ལ་བརྟེན་པ་རྣམ་པ་གཉིས་སུ་ངེས་པའི་ཕྱིར། བདེན་པ་བཞི་རྣམ་པར་བཞག་གོ་ཞེས་གསུངས་པ་ཡང༌། འདི་དང་དགོངས་པ་གཅིག་པས་ཀུན་བྱང་གི་ཕྱོགས་གཉིས་ལ་བྱ་ཡི། དཀར་ནག་གི་ཕྱོགས་སྤྱི་ཙམ་ལ་མི་རུང་སྟེ། རིགས་རྒྱན་ལས། སྤྱད་པ་ལས་བདེ་བ་འབྱུང་བ་དཀར་ཆོས་ཀྱི་མཚན་ཉིད་ཅེས་གསུངས་ཤིང༌། འགྲོ་བ་ཞི་བའི་འཕྲིན་ལས་ཡང་ཡིན་པས་འཕེན་བྱེད་དགེ་བའི་ལས་ལྟ་བུ་སྤྱིར་དཀར་པོའི་ཆོས་ཀྱི་ཕྱོགས་སུ་འདོད་དགོས་ཀྱང༌། འདིར་བཤད་པའི་ནག་པོའི་ཕྱོགས་ཡིན་ཏེ། ལྡོག་བྱའི་ཕྱོགས་ཀྱི་འཕགས་པའི་བདེན་པ་ཡིན་པའི་ཕྱིར། ཕྱིས་ཀྱི་ཡིག་འཇོག་པ་ཁ་ཅིག་དེ་ལྡོག་བྱ་མ་ཡིན་ཏེ། གནས་སྐབས་ཀྱི་བླང་བྱ་ཡིན་པའི་ཕྱིར་ཟེར་བ་ནི་བདེན་བཞིའི་འཇུག་ལྡོག་སྟོན་པ་སྤྱི་ལུགས་དང་འགལ་ཞིང༌། ཁྱད་པར་དུ་བཞི་བརྒྱ་པ་ལས། ཡུལ་ནི་དགེ་བའི་ཡིད་འོང་ན། །ཡུལ་དེ་ངན་པར་རྩི་བ་ཡིན། །གང་ཞིག་བཏང་བ་ཤེས་འགྱུར་བ། །དེ་སྒྲུབ་པ་ཡིས་ཅི་ཞིག་བྱ། །ཞེས་པ་དག་དང་དེའི་འགྲེལ་པ་ཟླ་བས་མཛད་པ་ལས། ཡུལ་ཡིད་དུ་འོང་བ། གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ཞེས་པ་འདོད་པའི་ཡོན་ཏན་ལྔའི་བདག་ཉིད་གང་ཡིན་པ་དེ་ནི་དགེ་བའི་ལས་ཀྱིས་འཐོབ་ན། དེ་ཉིད་ཐར་པ་འདོད་པའི་སེམས་ཅན་རྣམས་ཀྱིས་མི་གཙང་བས་བསྐུས་པའི་ཁྱི་ལྟར་སྨད་པར་འགྱུར་རོ། །ཞེས་སོགས་ལས་ཕྱི་རོལ་ཏུ་གྱུར་པ་ཡིན་ཏེ། སྙིང་ནས་ལྡོག་བྱར་མི་བྱེད་ན་ཚིག་ཙམ་གྱིས་སྨོད་པ་ནི་དེང་དུས་ཀྱི་ཕལ་མོ་ཆེའི་གཡོ་སྒྱུའི་སྤྱོད་ཚུལ་དང་མཐུན་ཡང་དམ་པའི་ལུགས་སྲོལ་མ་ཡིན་པའི་ཕྱིར། འོན་ཏེ་འདིས་འདོད་ཡོན་སྤང་བྱར་བསྟན་པ་ཡིན་གྱི། དེའི་རྒྱུ་བསོད་ནམས་ཀྱི་ལས་

― GTD002_Page_0883 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་ལྡོག་བྱར་བསྟན་པ་མ་ཡིན་ནོ་སྙམ་ན་ཆེས་མི་རིགས་ཏེ། འདིར་བཤད་པའི་གཙོ་བོ་ནི་ལས་དེ་དག་གིས་དེ་ལྟ་བུའི་ཕན་པ་ཉི་ཚེ་བསྒྲུབ་ནུས་ཀྱང་ཕུགས་འཁོར་བར་འཆིང་བྱེད་ཡིན་པས། དཔེར་ན། དུག་ཅན་གྱི་ཟས་དེས་གནས་སྐབས་ལྟོ་འགྲང་བ་ཙམ་ཡོད་ཀྱང༌། ཕུགས་སྲོག་ལ་རྒོལ་བས་འདོར་དགོས་པ་ལྟར་འདི་ཡང་འདོར་བྱར་བསྟན་པ་ཡིན་པའི་ཕྱིར་ཏེ། དེ་ཉིད་ལས། འདི་ན་ཡུལ་ལོག་གྱུར་པ་ལ། །ཡུལ་ནི་དམིགས་པར་གྲགས་འགྱུར་ཏེ། །ཕྱིན་ཅི་ལོག་ཏུ་གྱུར་པའི་ཆོས། །རྒྱུ་ཅི་ཞིག་གིས་ཡང་དག་འདོད། །ཅེས་ཡུལ་སྲིད་པའི་ཕུན་ཚོགས་རྣམས་དོར་ནས་ཚངས་སྤྱོད་ལ་གནས་ཀྱང༌། ད་དུང་ཕུགས་སུ་དེ་འདོད་པས་ཕྱི་མར་དེ་སྒྲུབ་བྱེད་ཀྱི་རྒྱུའི་ལས་སོགས་བླང་བྱར་བྱེད་པ་ཕྱིན་ཅི་ལོག་གི་ཆོས་སུ་གསུངས་པའི་ཕྱིར། དེའི་དམིགས་ཞེས་པ་འདོད་པའི་དོན་དུ་དར་ཊཱིཀ་ལས་གསུངས་སོ། །༈ གཉིས་པ་ནི། སྤྱིར་གོ་རིམ་ལ། རིགས་སད་པ་སེམས་བསྐྱེད་ཀྱི་སྔོན་དུ་འགྲོ་དགོས་ཀྱང༌། རྒྱན་ལས་སེམས་བསྐྱེད་དེའི་སྔོན་དུ་གསུངས་པ་ལྟ་བུ་བཤད་པའི་རིམ་པ་དང༌། ཡང་ཕྱིན་དྲུག་ལྟ་བུ་ནི། མདོ་སྡེ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་རྒྱུ་འབྲས་དང༌། དམན་མཆོག་དང༌། ངེས་དཀའ་སླ་གསུམ་གའི་དབང་དུ་བྱས་པར་གསུངས་པ་སོགས་སྣ་ཚོགས་ཡོད་ལ། བདེན་བཞིའི་གོ་རིམ་ཡང༌། སྐབས་བཞི་བར། རྒྱུ་དང་ལམ་དང་སྡུག་བསྔལ་དང༌། ཞེས་སོགས་ཀྱི་དོན་ནི། འགྲེལ་ཆུང་དོན་གསལ་ལས། ཀུན་ནས་ཉོན་མོངས་པ་གཅིག་ཤོས་ཀྱི་ཕྱོགས་

― GTD002_Page_0884 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བརྟེན་ནས་ཀུན་འབྱུང་བ་དང་ལམ་གྱི་བདེན་པ་དག་ནི་རྒྱུ་ཡིན་ལ། སྡུག་བསྔལ་དང་འགོག་པའི་བདེན་པ་དག་ནི་འབྲས་བུ་ཡིན་པར་དོན་གྱིས་བསྟན་པའི་ཕྱིར། ཞེས་པ་ལྟ་བུའི་སྐབས་ཁ་ཅིག་ཡོད་ཀྱང༌། གཙོ་བོ་ནི་དགེ་སློང་དག འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་ཀུན་འབྱུང་འཕགས་པའི་བདེན་པའོ། །ཞེས་སོགས་མདོ་དང་ཀུན་བཏུས་གཉིས་པ་བདེན་པ་རྣམ་ངེས་ལས། བདེན་པ་རྣམ་པར་ངེས་པ་གང་ཞེ་ན། འཕགས་པའི་བདེན་པ་བཞི་བོ་དག་སྟེ། སྡུག་བསྔལ་དང་ཀུན་འབྱུང་བ་དང༌། འགོག་པ་དང་ལམ་མོ། །ཞེས་སོགས་བསྟན་བཅོས་ཕལ་མོ་ཆེར་རྒྱུ་འབྲས་ཀྱི་རིམ་པ་ལས་བཟློག་སྟེ་གསུངས་པ་ཅི་ཡིན་སྙམ་ན། མཛོད་ལས། དེ་དག་ཇི་ལྟར་མངོན་རྟོགས་རིམ། །ཞེས་ཡུལ་ཅན་མངོན་རྟོགས་སྐྱེ་རིམ་དང་བསྟུན་པར་གསུངས་ཤིང༌། དེའི་ཚུལ་ནི། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་པ་ལྟར་སྡུག་བསྔལ་ནད་དང་འདྲ་བར་ཤེས་པ་ན་དེ་དང་འབྲལ་དགོས་པའང་ཤེས་པར་འགྱུར་ལ། དེའི་ཚེ་དེ་ཡང༌། གང་ཕྱིར་དེ་ལྟར་རྒྱུ་གནས་ན། །འབྲས་ལོག་གཟིགས་པ་མེད་ཕྱིར་རོ། །ཞེས་པའི་ཚུལ་གྱིས་རྒྱུ་ལོག་པ་ལ་ལྟོས་པར་མཐོང་ནས། རྒྱུ་ཀུན་འབྱུང་ལ་སྤོང་འདོད་སྐྱེ་ཞིང༌། རྒྱུའི་རྩ་བ་ངོས་ཟིན་ནས་དེའི་ཞེན་ཡུལ་ཁེགས་པ་ན། དེ་གཞི་མེད་པས་སྤོང་ནུས་སུ་ཤེས་ཏེ་འགོག་པ་མངོན་དུ་བྱ་འདོད་སྐྱེའོ། །དེ་ལྟར་སྤོང་དགོས་ཤིང་རང་གིས་ཀྱང་སྤོང་ནུས་པར་མཐོང་བ་ན། དེ་སྤོང་བའི་ཐབས་ལ་འཇུག་པ་ནི་དཔྱོད་ལྡན་སྤྱིའི་ལམ་སྲོལ་

― GTD002_Page_0885 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པས་ལམ་བདེན་བཞི་པར་བསྟན་ཏོ། །དེ་ལྟར་ན་སྡུག་བདེན་དང་པོར་བསྟན་པ་འདི་ནི་གསར་རྟོགས་ཀྱི་སྐབས་སུ་མ་ཟད། ལས་དང་པོ་བས་ཐོག་མར་བློ་སྦྱོང་བའི་སྐབས་སུ་ཡང་ཉམས་ལེན་གྱི་གནད་ཁྱད་པར་ཅན་ཡོད་པས་མན་ངག་བླ་ན་མེད་པ་ཡིན་ཏེ། ལམ་རིམ་ལས། སྟོན་པས་རྒྱུ་འབྲས་ཀྱི་རིམ་པ་ལས་བཟློག་སྟེ་གསུངས་པ་ལ་ནི་ཉམས་ལེན་གྱི་གནད་ཆེན་པོ་ཡོད་པས། ཞེས་གསུངས་པའི་ཕྱིར། ཚུལ་དེ་ཅུང་ཟད་ཞིབ་ཏུ་བཤད་ན་འདི་ཡིན་ཏེ། གཞི་བསྡུ་བ་ལས། ཡང་དག་པའི་དོན་དུ་འདུ་ཤེས་པ་ལ། ལེགས་པར་འདྲེས་པར་བྱས་པ་ན། ཕྱིས་མི་མཐུན་པའི་འདུ་ཤེས་ཡང་དག་པར་གནས་པར་འགྱུར་ཏེ། འབྲས་བུ་ནི་སྔར་བསྟན་ཏེ། རྒྱུ་ནི་ཕྱིས་བསྟན་ཏོ། །ཞེས་གསུངས་པ་ལྟར་རང་རེའི་ཤེས་རྒྱུད་ལ་ཞིབ་ཏུ་བརྟག་པ་ན་ཚིག་སྤྱི་ཙམ་མ་གཏོགས་སྙིང་ནས་ཐར་པ་དོན་གཉེར་འབྱུང་བ་ཤིན་ཏུ་དཀའ་ཞིང༌། སྡུག་བསྔལ་གྱི་རྒྱུ་ལས་ཉོན་སོགས་ལ་ངང་གིས་ཞུགས་འགྲོ་བ་འདི་ནི། ཐོག་མ་མེད་པ་ནས་སེམས་ཉོན་མོངས་པའི་གཞན་དབང་དུ་གྱུར་པས་སྡུག་བསྔལ་ལ་བདེ་བར་འཁྲུལ་བའི་དབང་གིས་ཡིན་ཏེ། དཔེར་ན་གབ་ཚད་ཀྱི་རིགས་འགའ་ཞིག་གྲང་བར་འཁྲུལ་བ་ན། དེ་སེལ་བྱེད་ཀྱི་གཉེན་པོ་མི་བསྟེན་པར། འཕེལ་བྱེད་ཀྱི་ཟས་སྤྱོད་སོགས་ལ་ཆེད་དུ་གཉེར་ནས་འཇུག་པ་དང༌འདྲ་བས། དེ་དེ་ལས་བཟློག་པ་ལ་མེད་མི་རུང་དུ་ནད་ངོ་ཤེས་དགོས་པ་ལྟར། འདིར་ཡང་སྲིད་པ་སྡུག་བསྔལ་གྱི་རང་བཞིན་ལ་སྡུག་བསྔལ་དུ་ངོ་ཤེས་ནས་ཞེན་པ་གཏིང་ནས་ལོག་པ་ཞིག་མ་བྱུང་ན་རྩ་བ་ཆད་པས་གོང་དུ་འཁྲིད་ཐབས་མེད་ཅིང་དེའི་མུ་

― GTD002_Page_0886 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ཐར་པ་དོན་དུ་གཉེར་ཁུལ་བྱས་ཀྱང་འོག་གི་ཟག་བཅས་ཀྱི་ཁྱད་པར་འགའ་ཞིག་ཐར་པར་འཛིན་པ་སོགས་ལོག་པ་འབའ་ཞིག་ཏུ་འགྲོ་བས་ཐར་འདོད་རྣལ་མ་སྐྱེ་བ་གཏན་མི་སྲིད་དེ། བཞི་བརྒྱ་པ་ལས། གང་ལ་འདིར་སྐྱོ་ཡོད་མིན་པ། །དེ་ལ་ཞི་གུས་ག་ལ་ཡོད། །ཞེས་དང༌། རྒྱུད་བླ་མ་ལས། སྡུག་བསྔལ་ཡིད་འབྱུང་ཞི་ཐོབ་པར། །འདུན་དང༌། ཞེས་གསུངས་པའི་ཕྱིར། དེ་ཡང་སྡུག་བསྔལ་གྱི་སྡུག་བསྔལ་རང་ཐོག་ཏུ་བབས་པ་ལ་ཡིད་འབྱུང་བ་ནི་ཐམས་ཅད་ལ་ཡོད་ཅིང༌། ངན་སོང་གི་སྡུག་བསྔལ་ལྟ་བུ་ལས་ཡིད་འབྱུང་བའི་ཚུལ་ནི་སྐབས་གཞན་དུ་ཤེས་དགོས་སོ། ། ༈ འགྱུར་བའི་སྡུག་བསྔལ་ལས་ཡིད་འབྱུང་སྐྱེད་ཚུལ་ནི། མངལ་འཇུག་གི་མདོ་ལས། སྡུག་བསྔལ་དེ་དང་དེ་གཅད་པའི་ཕྱིར། སྡུག་བསྔལ་གསར་བ་གཞན་དང་གཞན་འབྱུང་བ་ལ་བདེ་བའི་འདུ་ཤེས་འབྱུང་སྟེ། ཞེས་གསུངས་པ་ལྟར་ད་ལྟའི་ཚོར་བ་བདེ་བ་ཕལ་ཆེར་ནི་སྡུག་བསྔལ་ཆེ་བ་གཞན་ཞིག་འགག་ཤུལ་དུ་སྡུག་བསྔལ་ཆུང་ངུ་ཞིག་སྐྱེས་པ་ན་སྔ་མ་འགག་པ་ཤེས་ཤིང༌། ཕྱི་མ་མི་མངོན་པའི་བར་སྐབས་དེར་བདེ་བའི་སྣང་བ་ཤར་བ་ཙམ་ཡིན་གྱི། ངོ་བོ་ཉིད་ལ་བདེ་བ་མ་ཡིན་ཏེ། དེ་ཡིན་ན་ཡུན་དུ་བསྟེན་པ་ལས་བདེ་བ་འཕེལ་རིགས་པ་ལ། ཚ་བས་གདུངས་པ་བསིལ་བར་བསྡད་པ་ལྟ་བུའི་ཚེ། དང་པོ་བདེ་ཉམས་སྐྱེ་ཡང་རིང་དུ་བསྟེན་ནས་མངོན་ཐུབ་པ་ན་སྔ་མ་ལས་བཟློག་སྟེ། སྡུག་བསྔལ་དུ་མཐོང་བའི་རྟགས་ཀྱིས་ཤེས་པའི་ཕྱིར་ཏེ། བཞི་བརྒྱ་པ་ལས། འཕེལ་བཞིན་པ་ཡི་བདེ་བ་ལ། །ཇི་ལྟར་བཟློག་པ་མཐོང་འགྱུར་བ། །ཞེས་གསུངས་ཤིང༌། མདོ་ལས། བདེ་བའི་ཚོར་བ་ནི་སྐྱེ་བ་ན་ཡང་བདེ། གནས་པ་ན་ཡང་བདེ་སྟེ། ཞིག་པ་ན་

― GTD002_Page_0887 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་ལོ། །ཞེས་དང༌། གང་མི་རྟག་པ་དེ་སྡུག་བསྔལ་ལོ། །ཞེས་སོགས་ཀྱང་འདི་དང་གནད་གཅིག་གོ །འདི་ལ་ཐལ་འགྱུར་བའི་ལུགས་ཀྱི་གནད་ཕྲ་མོ་ཞིག་ཀྱང་ཡོད་ལ། གཞན་གྱིས་རྩོད་ཚུལ་སོགས་ནི་མཛོད་འགྲེལ་དང༌། རྒྱལ་སྲས་མར་གསལ་བས། ཞིབ་ཏུ་ཤེས་པར་འདོད་ན་དེར་བལྟའོ། །འོན་ཀྱང་འདི་ཙམ་ལ་ཡིད་འབྱུང་བའི་ཕྱི་རོལ་པ་ཡང་ཡོད་ཅིང༌། དེར་ཐར་པ་དོན་གཉེར་མཚན་ཉིད་པ་འདྲེན་མི་ནུས་པས་གཙོ་བོ་མ་ཡིན་ལ། འདུ་བྱེད་ཀྱི་སྡུག་བསྔལ་ནི་སྡུག་བསྔལ་སྔ་མ་གཉིས་ཀའི་རྩ་བ་དང་ཁྱབ་བྱེད་ཡིན་པས་དེ་ལ་རྩལ་དུ་བཏོན་ནས་སྐྱོ་ཤས་བསྐྱེད་དགོས་ཏེ། དེ་དང་མ་བྲལ་གྱི་བར་དུ་ཚོར་བ་སྡུག་བསྔལ་མངོན་འགྱུར་ད་ལྟ་མེད་པའི་སྐབས་རེ་རེ་ཙམ་བྱུང་ཡང༌། ནམ་རྐྱེན་དང་ཕྲད་པ་ན་སྒོ་དུ་མ་ནས་སྡུག་བསྔལ་དྲངས་ཡོང་བ་དཔེར་ན། མི་གསོད་ངེས་བཙོན་དུ་ཚུད་པ་ཞིག་ལ་གནས་སྐབས་ངོ་ཆེན་སོགས་ཀྱིས་ལུས་ལ་ཁྲིམས་ཀྱི་སྡུག་བསྔལ་མ་བྱུང་ཡང༌། ཉིན་རེ་ཞིང་འཆི་བ་ལ་ཇེ་ཉེར་འགྲོ་བའི་ཕུགས་བློ་བདེ་བའི་སྐབས་མེད་པ་དང༌། ཁུར་ཆེན་པོ་འཁྱེར་དགོས་པ་དེར་མ་ཕྱིན་གྱི་བར་དུ་ངལ་སོས་པ་ན་ཡང་དེ་ཙམ་དུ་བདེ་བ་མི་ཡོང་བ་ལྟ་བུ་ཡིན་ཏེ། བདེ་ལམ་ལས། སྡུག་བསྔལ་རྩ་བ་ནས་སྤངས་པའི་ཐར་པ་ཞིག་མ་ཐོབ་ན། བདེ་བའི་སྐབས་སྐད་ཅིག་ཀྱང་མི་འདུག་སྟེ། དཔེར་ན་མི་ནག་ཅན་ཞེས་སོགས་དང༌། ལམ་རིམ་ལས། ཁུར་ཆེན་པོ་འཁྱེར་དགོས་པ་ཁུར་དེ་ཇི་ཙམ་བཀུར་དགོས་པ་དེ་ཙམ་དུ་བདེ་བ་མེད་པ་ཞེས་སོགས་གསུངས་པའི་ཕྱིར། མདོ་ལས། དགེ་སློང་དག་ཁུར་ཡོད་དོ་ཞེས་སོགས་ཀྱང་འདི་ལ་གདམས་ངག་ཏུ་འཁྱེར་ཤེས་དགོས་པས། བདག་

― GTD002_Page_0888 ―

^{[མ་དཔེ་གཟིགས་ན་འདིར་གནོན།]}

[Full Size]

ཏུ་ལྟ་བ་གོམས་པའི་རིགས་ཅན་ཁོ་ན་རྗེས་སུ་འཛིན་ཆེད་དུ་གསུངས་པའི་ཆོས་སོ་སྙམ་དུ་གཟུང་བར་མི་བྱའོ། །ཚུལ་དེ་དག་ལ་ལེགས་པར་འདྲིས་པར་བྱས་པ་ན། སྲིད་པའི་དངོས་པོ་མཐའ་དག་ལ་མི་མཐུན་པ་རལ་གྲི་གདེངས་པའི་གཤེད་མ་ལྟ་བུའི་འདུ་ཤེས་འབྱུང་སྟེ། དེ་ནས་རང་ཉིད་དེ་ལས་ཐར་པར་འདོད་པའི་ངེས་འབྱུང་དང༌། རང་ཉམས་ལ་དཔགས་ཏེ་གཞན་དེ་ལས་སྐྱོབ་འདོད་ཀྱི་སྙིང་རྗེ་སོགས་ཀྱང་དཀའ་ཚེགས་མེད་པར་འབྱུང་བས། སྡུག་བདེན་སྔོན་དུ་གསུངས་པ་ལ་དགོས་པ་ཁྱད་པར་ཅན་དེ་ལྟ་བུ་ཡོད་དེ། དེ་དག་གིས་གཞི་བསྡུ་བའི་ལུང་གི་དོན་ཡང་ལེགས་པར་བཤད་པ་ཡིན་ནོ། ། ༈ གསུམ་པ་ནི། རང་རྒྱུ་ལས་ཉོན་གྱིས་བསྐྱེད་པའི་ཟག་བཅས་ཀྱི་དངོས་པོ་དེ་སྡུག་བསྔལ་བདེན་པའི་ངོ་བོ། རང་འབྲས་སྡུག་བདེན་བསྐྱེད་པའི་ལས་ཉོན་ཅི་རིགས་ཀྱིས་བསྡུས་པ་དེ་ཀུན་འབྱུང་བདེན་པའི་ངོ་བོ། རང་ཉིད་ཐོབ་བྱེད་བར་ཆད་མེད་ལམ་གྱི་ངོས་སྐལ་གྱི་སྒྲིབ་པ་སྤངས་པའི་སོ་སོར་བརྟག་འགོག་དེ་འགོག་བདེན་གྱི་ངོ་བོ། འགོག་བདེན་ཐོབ་བྱེད་ཐབས་དངོས་སམ་དེའི་རྒྱུན་ཅི་རིགས་ཀྱིས་བསྡུས་པའི་འཕགས་ལམ་དེ་ལམ་བདེན་གྱི་ངོ་བོ་ཡིན་ཏེ། རྣམ་པར་གཏན་ལ་དབབ་པ་བསྡུ་བ་ལས། སྡུག་བསྔལ་གྱི་བདེན་པའི་དོན་གང་ཞེ་ན། སྨྲས་པ། ཉོན་མོངས་པ་ལས་བྱུང་བའི་འདུ་བྱེད་ཀྱི་དོན་ཏོ། །ཀུན་འབྱུང་བདེན་པའི་དོན་གང་ཞེ་ན། སྨྲས་པ། སྡུག་བསྔལ་བདེན་པ་བསྐྱེད་པའི་དོན་ཏོ། །འགོག་པའི་བདེན་པའི་དོན་གང་ཞེ་ན། སྨྲས་པ། དེ་གཉིས་ཀ་ཉེ་བར་ཞི་བའི་དོན་ཏོ། །ལམ་གྱི་བདེན་པའི་དོན་གང་ཞེ་ན། སྨྲས་པ། དོན་གསུམ་པོ་

― GTD002_Page_0889 ―

^{[མ་དཔེ་གཟིགས་ན་འདིར་གནོན།]}

[Full Size]

དག་སྒྲུབ་པའི་དོན་ཏོ། །ཞེས་གསུངས་པའི་ཕྱིར། གྲ་ཆུང་བ་སོགས་མཁས་པ་ཁ་ཅིག །ཀུན་ལས་བཏུས་སུ། སྡུག་བསྔལ་སྤྱིའི་མཚན་ཉིད་གང་ཞེ་ན། མི་རྟག་པ་ཉིད་ཀྱི་མཚན་ཉིད་དང༌། ཞེས་སོགས་ཀྱི་དོན་དུ་བསམས་ཏེ། མི་རྟག་སྡུག་བསྔལ་སྟོང་བདག་མེད་བཞིའི་ཚོགས་དོན་སྡུག་བསྔལ་བདེན་པའི་མཚན་ཉིད། ཞེས་སོགས་སུ་སྨྲ་བ་ཡང་འཐད་པར་མ་མཐོང་སྟེ། གཞི་གཅིག་བྱ་བྱེད་ལས་གསུམ་གྱི་སྒོ་ནས་མཚོན་ཚུལ་སྣ་ཚོགས་ཡོད་པ་ལ། གཞུང་ཆེན་མོ་རྣམས་སུ་མཚན་ཉིད་ཀྱི་སྒྲས་གསུངས་པ་ཤེས་མཚན་ཁྱད་མཚན་ལྟ་བུ་མང་དུ་ཡོད་པས། དེ་ཐམས་ཅད་རྣམ་པར་བཞག་འཇོག་གི་མཚན་མཚོན་དངོས་གནས་པར་མི་རུང་བར་གསེར་ཕྲེང་ལས་གསུངས་པའི་ཕྱིར་དང༌། མཚན་ཉིད་དངོས་ཀྱིས་རང་གི་མཚོན་བྱ་མཚོན་ཚུལ་ནི། རྣམ་འགྲེལ་ལས། གཟུང་དང་འཛིན་པའི་རྣམ་པ་ལས། །མཚན་ཉིད་གཞན་ནི་ཡོད་མ་ཡིན། །ཞེས་དང༌། ངོ་བོ་ཉིད་མེད་པའི་མདོ་སྡེ་རྒྱན་གྱི་འགྲེལ་བཤད་ལས། མཚན་ཉིད་འདི་ནི་ལས་ལྟ་བུ་ཡིན་ལ། མཚོན་བྱ་ནི་བྱེད་པ་ལྟ་བུ་ཡིན་ཏེ། ཞེས་གསུངས་པ་ལྟར། མཚན་ཉིད་སྔོན་དུ་ངེས་པའི་དབང་གིས་འཛིན་པ་རང་ལ་ཉེ་བའི་རྣམ་པ་དང་སྔོན་ནས་གནས་པ་ལྟར་སྣང་བས་རྫས་ཡོད་དང་དོན་དུ་བཤད་ཅིང༌། མཚོན་བྱ་དེས་རྗེས་སུ་རྟོགས་པའི་དབང་གིས་ཕྱིས་གསར་སྒྲུབ་དང་སྔ་མ་ལ་ལྟོས་ཏེ་བློ་ལ་རིང་བ་གཟུང་བའི་ཕྱོགས་སུ་ཆད་པ་ལྟར་སྣང་བས་བཏགས་ཡོད་དང་ཐ་སྙད་དུ་བཤད་ལ། དེ་ལྟར་དོན་སྔར་ཡོད་དང་ཕྱིས་ཀྱི་ཐ་སྙད་སྦྱོར་བར་སྣང་བའི་སྣང་ཆ་ཙམ་གྱི་སྒོ་ནས་མཚན་མཚོན་གྱི་འབྲེལ་བ་

― GTD002_Page_0890 ―

^{[མ་དཔེ་གཟིགས་ན་འདིར་གནོན།]}

[Full Size]

བཞག་པ་གང་ཞིག །དེ་གཉིས་རྟོགས་རིམ་དེ་ལྟ་མིན་ན་བློ་ལ་ཉེ་རིང་གི་ཁྱད་པར་མི་རུང་ཞིང༌། དེ་མེད་ན་རྫས་བཏགས་ཀྱང་མི་འགྲུབ་ལ། དེའི་དོན་དང་ཐ་སྙད་ཀྱི་ཁྱད་པར་ཀྱང་ཉམས་པར་འགྱུར་བའི་ཕྱིར། ཐར་ལམ་གསལ་བྱེད་ལས། མཚན་ཉིད་ཀྱིས་མཚོན་བྱ་མཚོན་པའི་ཚེ། མཚོན་བྱ་ལས་སུ་བྱ་བ་གཟུང་བྱའི་ཕྱོགས་སུ་ཆད་པ་དང༌། མཚན་ཉིད་ལས་སུ་བྱ་བ་དེ་འཇོག་པར་བྱེད་པའི་འཛིན་པའི་ཕྱོགས་སུ་ཆད་པ་ལྟར་སྣང་བ་ལས་མ་གཏོགས་པའི་མཚན་ཉིད་ཀྱིས་མཚོན་བྱ་བློ་ཡུལ་དུ་མཚོན་མི་ཤེས་ལ། ཞེས་སོ། །ཡང་མཁས་པ་ཁ་ཅིག །སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང༌། སྐྱེ་བའི་གནས་ཀྱིས་ཀྱང་རིགས་པར་བྱའོ། །ཞེས་པ་ཁུངས་སུ་བྱས་ནས་ལས་ཉོན་གྱི་དབང་གིས་སྐྱེ་བ་བླངས་པའི་གང་ཟག་རྣམས་ཀྱང་སྡུག་བདེན་དུ་འདོད་ཅིང༌། སྡུག་བསྔལ་འཁོར་བ་ཅན་ཕུང་བོ་ཞེས་པའི་དོན་དུ་བསམས་ནས་སྡུག་བདེན་ལ་འཁོར་བས་ཁྱབ་པར་ཡང་འདོད་དོ། །ཤེས་བྱེད་སྔ་མ་ལས་དེའི་དོན་བསྡུ་བར། སེམས་ཅན་གྱི་འཇིག་རྟེན་གང་ཡིན་པ་དང༌། སྣོད་ཀྱི་འཇིག་རྟེན་གང་ཡིན་པ་ལས་དང་ཉོན་མོངས་པས་བསྐྱེད་པ། ལས་དང་ཉོན་མོངས་པ་ལས་བྱུང་བ་འདི་མཐའ་དག་ནི་སྡུག་བསྔལ་གྱི་བདེན་པའོ། །ཞེས་པ་དྲངས་ན་གསལ་བ་ལྟར་སྣང་ཡང༌། དགོངས་པ་དེ་ལྟར་མ་ཡིན་གྱི། ཉོན་མོངས་གསུམ་ལས་སྐྱེ་བའི་ཀུན་ཉོན་སྡུག་བདེན་དང༌། ལྷག་མ་གཉིས་ཀུན་འབྱུང་དུ་སྟོན་པ་ཡིན་ཏེ། བསྡུ་བ་ལས། མདོར་བསྡུ་ན་སྐྱེ་བའི་ཀུན་ནས་ཉོན་མོངས་པ་ཇི་སྐད་བསྟན་པ་ནི་སྡུག་བསྔལ་གྱི་བདེན་པ་ཞེས་བྱའོ། །ཞེས་གསུངས་པའི་ཕྱིར། དེའི་དགོས་པ་ཡང༌། རིན་ཆེན་ཕྲེང་བ་ལས། ལམ་གསུམ་

― GTD002_Page_0891 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོག་མཐའ་དབུས་མེད་པ། །ཞེས་གསུངས་པ་ལྟར། སྐྱེ་བའི་ཀུན་ཉོན་ལ་བརྟེན་ནས་ཉོན་མོངས་དང་ལས་གསོག་ཅིང༌། དེས་ཡང་སྐྱེ་བ་གཞན་འགྲུབ་པས། ཟོ་ཆུན་གྱི་འཁྱུད་མོ་བཞིན་དུ་འཁོར་ཏེ་རྒྱས་པར་ཕྱེ་ན། མཛོད་ལས། ཉོན་མོངས་གསུམ་མོ་ལས་གཉིས་སོ། །གཞི་བདུན། ཞེས་གསུངས་པ་ལྟར་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་འཁོར་ཚུལ་ཞར་ལ་བསྟན་པས་ཡིད་འབྱུང་སྐྱེ་ཆེད་ཡིན་ཏེ། དེ་ལྟར་ན་མངོན་པ་གོང་འོག་གཉིས་ཀའི་སྐབས་འདིར། ཁམས་གསུམ་དུ་དབྱེ་བ། འགྲོ་བ་ལྔར་དབྱེ་བ། སྐྱེ་གནས་བཞིར་དབྱེ་བ་སོགས་སེམས་ཅན་གྱི་རིས་དུ་མ་ཞིག་གསུངས་པ་རྣམས་ཀྱང༌། ལས་ཉོན་གྱིས་མཚམས་སྦྱར་ཕྱིན། སྐྱེ་བ་མཆོག་དམན་ཅི་འདྲ་ཞིག་བླངས་ཀྱང་སྡུག་བསྔལ་གྱི་རང་བཞིན་ལས་མ་འདས་སོ། །ཞེས་གོ་བའི་ཆེད་དུ། དེ་དག་གི་སྐྱེ་བ་སྡུག་བསྔལ་བདེན་པའི་དབྱེ་བར་བསྟན་པ་ཡིན་ལ། ཁྱད་ཆོས་ཡན་འགར་བ་སྟོན་ཚུལ་མེད་པས་གང་ཟག་རྣམས་ནི་དེའི་ཁྱད་གཞིར་བཟུང་བ་ཡིན་གྱི་སྡུག་བདེན་དངོས་སུ་བཤད་པ་མ་ཡིན་ནོ། །དེ་ལྟ་བུའི་འཁོར་བའི་སྐྱེ་བ་དེ་ནི་སྡུག་བདེན་གྱི་ཡང་གཙོ་བོ་ཡིན་པས་རྣམ་འགྲེལ་གྱི་ལུང་དོན་ཡང་དེ་ལྟར་འགྲེལ་དགོས་ཀྱི། སྡུག་བདེན་ལ་འཁོར་བས་ཁྱབ་པའི་དོན་དུ་མི་བཟུང་ངོ༌། ། ༈ བཞི་པ་ལ། གྲུབ་མཐའ་གོང་འོག་དང་ནང་གསེས་ཀྱི་འདོད་ཚུལ་མི་འདྲ་བའི་ཁྱད་པར་དུ་མ་ཡོད་དེ། བྱེ་སྨྲས་སྡུག་ཀུན་གཉིས་དོན་གཅིག་ཏུ་འདོད་ཅིང༌། མདོ་སྡེ་པས་ཀུན་འབྱུང་ལ་སྲེད་པས་ཁྱབ་པར་འདོད་ལ། གཉིས་ཀས་ཀྱང་སྡུག་ཀུན་ཕྲ་རགས་ཀྱི་དབྱེ་བ་

― GTD002_Page_0892 ―

^{[མ་དཔེ་གཟིགས་ན་འདིར་གནོན།]}

[Full Size]

མི་འདོད། གྲུབ་མཐའ་གོང་མས་སྡུག་ཀུན་ཕྲ་རགས་འདོད་ཀྱང་འཇོག་ཚུལ་མི་འདྲ་བ་ཡོད་པའི་ཕྱིར། དང་པོ་གྲུབ་སྟེ། མཛོད་ལས། སྡུག་བསྔལ་ཀུན་འབྱུང་འཇིག་རྟེན་དང༌། །ལྟ་གནས་སྲིད་པའང་དེ་དག་ཡིན། །ཞེས་གསུངས་པའི་ཕྱིར། འདི་སྒྲས་བརྗོད་ཙམ་གྱིས་རྣམ་གྲངས་སུ་འདོད་པའང་རིགས་པ་མ་ཡིན་ཏེ། མཛོད་འགྲེལ་གནས་དྲུག་པར། འདི་གཉིས་ནི་རྒྱུ་དང་འབྲས་བུར་གྱུར་པའི་མིང་གི་བྱེ་བྲག་ཡོད་ཀྱི། རྫས་སུ་ནི་མ་ཡིན་ནོ། །ཞེས་དང༌། རྒྱལ་སྲས་མ་ལས། དེ་གཉིས་ཉེ་བར་ལེན་པའི་ཕུང་བོ་ལྔའི་མཚན་ཉིད་དུ་ཁྱད་པར་མེད་པའི་ཕྱིར་དམིགས་པ་ལས་ནི་མ་ཡིན་ཏེ། ཞེས་ཤེས་བཅུའི་ནང་ནས་སྡུག་ཀུན་ཤེས་པ་གཉིས་རྣམ་པ་ཁོ་ནས་འབྱེད་དགོས་ཀྱི་དམིགས་ཡུལ་ཁྱད་པར་མེད་པར་གསུངས་པའི་ཕྱིར་རོ། །གཉིས་པ་གྲུབ་སྟེ། མདོ་ལས། ཀུན་འབྱུང་གི་བདེན་པ་གང་ཞེ་ན། གང་འདི་དགའ་བའི་འདོད་ཆགས་དང་ལྷན་ཅིག་པའི་སྲེད་པ་སྟེ། དེ་དང་དེ་ལ་མངོན་པར་དགའ་བ་ཅན་ཡིན་ནོ། །ཞེས་པའི་ལུང་ལ་བརྟེན་ནས་མདོ་སྡེ་པ་རྣམས་ཀུན་འབྱུང་སྲེད་པར་འདོད་ཀྱང༌། བྱེ་སྨྲ་སོགས་གཞན་དག་གིས་དེ་ལྟར་མི་འདོད་དེ། སྐྱེ་མཆེད་དྲུག་གི་ཚོགས་ཀྱི་མདོ་ལས། ལས་དང་སྲེད་པ་དང་ནི་མ་རིག་པ། །ཕྱི་མའི་ཚེ་ལ་འདུ་བྱེད་རྣམས་ཀྱི་རྒྱུ། །ཞེས་སོགས་ཀྱི་སྒོ་ནས་སྔ་མའི་ཁྱབ་མཐའ་བཟུང་བ་བཀག་ནས་རང་ལུགས་མངོན་པར་འགྲུབ་པའི་རྒྱུའི་དབང་དུ་བྱས་པ་དང༌། གཙོ་བོའི་དབང་དུ་བྱས་པར་འདོད་དེ། མཛོད་འགྲེལ་ལས། མངོན་པར་འགྲུབ་པའི་རྒྱུ་བཀའ་སྩལ་པ་ན་ནི། ཞེས་སོགས་དང༌། རྣམ་འགྲེལ་ལས། མི་ཤེས་སྲིད་པའི་རྒྱུ་ཡིན་ཡང། །ཞེས་སོགས་

― GTD002_Page_0893 ―

^{[མ་དཔེ་གཟིགས་ན་འདིར་གནོན།]}

[Full Size]

དང༌། ཀུན་བཏུས་ལས། གཙོ་བོའི་དོན་གང་ཞེ་ན། གང་ཐམས་ཅད་དུ་འགྲོ་བའི་དོན་ཏོ། །ཞེས་སོགས་གསུངས་པའི་ཕྱིར། གསུམ་པ་གྲུབ་སྟེ། ཆོས་མངོན་པའི་མདོ་ལས་གསུངས་པའི་བདེན་བཞི་ཁྱད་ཆོས་བཅུ་དྲུག་དང་བཅས་པ་དེ་ལས་གཞན་དུ་བདེན་པའི་རྣམ་པ་མི་སྲིད་ལ། གལ་ཏེ་བཤད་ནའང་གསེར་གྱི་སྣོད་དུ་གསེར་ཁབ་ཀྱིས་གྲོག་མ་བསད་པས་ཐར་བར་བཤད་པ་བཞིན་དུ་ཡིད་རྟོན་མི་རུང་བར་འདོད་ཅིང༌། བཅོམ་ལྡན་འདས་ཀྱིས་ཀྱང་དེ་དག་ལ་བདེན་བཞི་རགས་པ་ཙམ་ལས་མ་བསྟན་པའི་ཕྱིར། རིམ་བཞིན། མཛོད་ལས། དྲི་མེད་བཅུ་དྲུག་གཞན་རྣམས་མེད། །ཅེས་དང༌། དབུ་མ་སྙིང་བོར། བདེན་པ་མཐོང་བ་དེ་ཉིད་མིན། །དེ་ཉིད་མེད་པར་ཐལ་བར་འགྱུར། །ནམ་མཁའི་ལྷ་ཡིས་བསྟན་པ་ལྟར། །དེ་ཉིད་ཡིན་པར་མི་འདོད་དོ། །ཞེས་དང༌། སྤྱོད་འཇུག་ལས་ཀྱང༌། རྣལ་འབྱོར་ཀུན་རྫོབ་གཉིས་པ་མེད། །འཇིག་རྟེན་ལ་ལྟོས་དེ་ཉིད་མཐོང༌། །ཞེས་དང།རྩ་ཤེ་ལས་ཀྱང༌། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །ཞེས་གསུངས་པའི་ཕྱིར་རོ། །བཞི་པ་གྲུབ་སྟེ། རྒྱུད་བླ་མར། ཡིད་ཀྱི་རང་བཞིན་ཕུང་བོ་དང༌། །དེ་རྒྱུ་ལོག་ཕྱིར་བདེ་བ་ཉིད། །ཅེས་དང༌། བསྡུ་བ་ལས། ཟག་པ་དང་བཅས་པའི་གནས་ངན་ལེན་དེ་ནི། ནས། དེ་བཞིན་གཤེགས་པ་ཉག་ཅིག་གིས་སྤངས་པ་ཡིན་ཏེ། ཞེས་འབྱུང་བས་རྣམ་གྲངས་ཙམ་ཞིག་ཀུན་གྱིས་འདོད་དགོས་ཀྱང༌། གཞན་དག་

― GTD002_Page_0894 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་སྡུག་ཀུན་ཕྲ་མོ་གཉིས་སྡུག་བདེན་དང་ཀུན་འབྱུང་དངོས་སུ་མི་འདོད་ལ། ཐལ་འགྱུར་བས་ནི་དངོས་ཡིན་པར་མ་ཟད་གཙོ་བོར་འདོད་དེ། སྟོང་ཉིད་བདུན་ཅུ་པ་ལས། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང༌། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང༌། །ཞེས་སོགས་ཀྱི་སྒོ་ནས་ཐོག་མའི་མ་རིག་པ་གཙོ་བོར་བདེན་འཛིན་དུ་སྒྲུབ་ཅིང༌། དེས་ཐམས་ཅད་འགྲུབ་པས་སོ། །འགོག་ལམ་ལ་ཡང་འདོད་ཚུལ་སྣ་ཚོགས་ཡོད་དེ། བྱེ་སྨྲ་རྣམས་ཧ་ཅང་བཏགས་དོན་ཚོལ་ཆེ་བས། དགག་བྱ་དང་བྲལ་ཙམ་གྱི་དངོས་པོ་ཞིག་འཇོག་མ་ཐུབ་པར་འགོག་བདེན་ལ་ཡང་དེའི་ཤུལ་དུ་སྤང་བྱ་བཀག་པའི་ནུས་པའི་རྫས་ཤིག་བསྒྲུབ་ཏུ་ཡོད་པས་མ་ཡིན་དགག་ཏུ་འདོད་ལ། དེའི་ཕྱིར་འདི་བས་སེལ་བ་ཡང་མི་འདོད་པར་རྣམ་འགྲེལ་ཊཱིཀ་ཆེན་ལས་གསུངས་ཤིང༌། མདོ་སྡེ་པས་མེད་དགག་ཏུ་འདོད་དེ། རྩོད་ཚུལ་ཞིབ་པར་ནི་མཛོད་འགྲེལ་གནས་གཉིས་པ་ལས་ཤེས་པར་བྱའོ། །དེ་སྐད་དུ་ཡང༌། སྤྱན་རས་གཟིགས་བརྟུལ་ཞུགས་ལས། རྫས་སུ་ཡོད་པར་སྨྲ་བ་ནི། དངོས་པོ་ཡིན་པར་སྨྲ་བ་སྟེ། གྲངས་ཅན་དང༌། བྱེ་བྲག་པ་དང༌། བྱེ་བྲག་ཏུ་སྨྲ་བ་དང༌། རྣལ་འབྱོར་སྤྱོད་པ་ལ་སོགས་པ་དག་གོ །རྫས་སུ་ཡོད་པ་མ་ཡིན་པར་སྨྲ་བ་ནི། དངོས་པོ་མེད་པ་ཡིན་པར་སྨྲ་བ་སྟེ། གོས་དམར་སྡེ་དང༌། མདོ་སྡེ་པ་དང༌། འཇིག་རྟེན་རྒྱང་ཕན་ལ་སོགས་པ་དག་གོ །ཞེས་བཤད་པས་ཐ་མ་ནི་ཡེ་མེད་ཀྱི་དབང་དུ་བྱས་ལ། སྔ་མ་རྣམས་དངོས་དང་རང་རང་གིས་སྒྲོ་བཏགས་ཅི་རིགས་ཡིན་པས་གཞན་རྣམས་རྟོགས་སླ་ཞིང༌། སེམས་ཙམ་པའི་ལུགས་བཀོད་པ་ནི་དཔྱད་གཞི་ཆེ་སྟེ་འདི་བས་འགོག་བདེན་

― GTD002_Page_0895 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དེ་བཞིན་ཉིད་འདོད་ཚུལ་ནི། གསེར་འཕྲེང་ལས། སེམས་ཀྱི་རང་བཞིན་དྲི་བྲལ་དུ་གནས་གྱུར་པའང་འགོག་བདེན་དུ་འདོད་དགོས་སོ། །ཞེས་གསུངས་པ་ལྟར་སེམས་ཀྱི་རང་བཞིན་འོད་གསལ་བ་ནམ་མཁའ་ལྟ་བུ་དེ་ཉིད་སོ་སྐྱེ་ལ་ཡོད་ཀྱང༌། དྲི་མའི་སྤྲིན་གྱིས་བསྒྲིབས་པས་འགོག་བདེན་དུ་མི་འཇོག་ལ། ནམ་ཞིག་ན་སྤྲིན་ནམ་མཁའི་དབྱིངས་སུ་ཟད་པ་ལྟར། དྲི་མ་གློ་བུར་བ་རྣམས་དེའི་ངོ་བོར་ཟད་པ་ན་རང་བཞིན་འོད་གསལ་བ་དེ་ཉིད་འགོག་བདེན་དུ་འགྱུར་བར་འདོད་པས། ཐོག་མར་སེམས་ཀྱི་རང་བཞིན་འོད་གསལ་བ་དེ་ཉིད་ཅི་ཞིག་ཡིན་ཤེས་དགོས་ལ། དེ་ཡང༌། ཤཱཀྱ་བློས། བྱང་སེམས་ཆོས་བདག་མེད་དུ་མཁྱེན་པས་ནི་གཉིས་ཀྱིས་སྟོང་བའི་རང་རིག་པ་ཁོ་ན་མཁྱེན་ནོ། །ཞེས་གསུངས་ཤིང༌། དེའི་དགོངས་པར་མཛད་དེ། རྣམ་འགྲེལ་ཊཱིཀ་ཆེན་ལས་ཀྱང༌། སེམས་ཀྱི་རང་བཞིན་འོད་གསལ་ཞེས་བརྗོད་པ་གང་ཡིན་པ་ཤེས་པ་རྣམས་ཀྱི་མྱོང་བ་གསལ་རིག་གི་ཆ། ཞེས་པ་ནས། འདི་དང་ཤེས་པའི་འཛིན་རྣམ་ལ་ཁྱད་པར་མེད་དོ། །ཞེས་དང༌། ཡོངས་གྲུབ་ཀྱི་མཚན་ཉིད་རང་གིས་མྱོང་བྱར་གྱུར་པའི་ཤེས་པའི་གནས་ལུགས་གང་ཞིག །གཉིས་སྣང་དང་བྲལ་བའི་གསལ་རིག་ཅེས་ཤེས་པར་བྱའོ། །ཞེས་གསུངས་ཏེ། ལུགས་འདིས་ཡེ་ཤེས་དེ་རང་རིག་ཏུ་བཞེད་པས་ཞེས་སོགས་ཀྱི་དགོངས་པ་དང་འབྲེལ་ཆེ་ཞིང་འདི་བའི་ལུགས་ཀྱི་ཕྲ་ས་ཡིན་ལ་སྔ་མ་མང་བོས་ཀྱང་རྣམ་རིག་པས་གཉིས་མེད་ཀྱི་ཤེས་པ་དེ་བཞིན་ཉིད་དུ་འདོད་པར་བཤད་དེ། སྤྱི་ལ་དེ་ལྟར་བཤད་པས་བྱེ་བྲག་འགོག་བདེན་ཡང་གྲུབ་པ་ཡིན་ནོ། །ཁྱད་པར་དུ་འཐད་

― GTD002_Page_0896 ―

^{[མ་དཔེ་གཟིགས་ན་འདིར་གནོན།]}

[Full Size]

ལྡན་ལས་ཀྱང༌། ངེས་པར་ལེགས་པའི་རང་བཞིན་དུ་གྱུར་པའི་སེམས་ནི་འགོག་པའོ། །ཞེས་འབྱུང་སྟེ་སྤྱན་རས་གཟིགས་བརྟུལ་ཞུགས་ཀྱིས་ཀྱང་དེ་ལྟ་བུ་ཞིག་ལ་བརྟེན་ནམ་སྙམ་མོ། །འོན་ཀྱང་ལུང་དེའི་དོན་ནི། རྣམ་ངེས་དར་ཊཱིཀ་ལས། སེམས་རྒྱུད་ཀྱི་སྟེང་ན་ཡོད་པའི་ངེས་ལེགས་ཀྱི་རང་བཞིན་གློ་བུར་དྲི་བྲལ་དེ་ཉིད་འགོག་བདེན་དུ་འདོད་པས། གློ་བུར་དྲི་བྲལ་གྱི་ཁྱད་གཞི་ངོས་འཛིན་པ་ཡིན་གྱི། སེམས་འགོག་བདེན་གྱི་མཚན་གཞིར་སྟོན་པ་མིན་ནོ། །ཞེས་གསུངས་པ་ལྟར་བྱ་དགོས་ཏེ། བསྡུ་བ་ལས། འགོག་པའི་བདེན་པ་དང༌། ཕུང་བོ་རྣམས་ནི་གཅིག་གིས་གཅིག་མ་བསྡུས་ཏེ། འགོག་པ་ནི་དེ་དག་ཉེ་བར་ཞི་བའི་རབ་ཏུ་ཕྱེ་བ་ཡིན་པའི་ཕྱིར་རོ། །ཞེས་དང༌། དོན་དམ་བདེན་པ་མཚན་ཉིད་ལྔ་ལྡན་དུ་གསུངས་པ་སོགས་གྲུབ་མཐའ་འདིའི་རྩ་བར་གྱུར་པ་མཐའ་དག་གིས་འགྲུབ་པས་སོ། །ལམ་ལ་ཡང་བྱེ་སྨྲས་འཕགས་རྒྱུད་ཀྱི་ལམ་ལ་འཕགས་ལམ་གྱིས་མ་ཁྱབ་པར་འདོད་པ་སོགས་འདྲ་མིན་ཅུང་ཟད་ཡོད་ཀྱང་དཔྱད་གཞི་ཧ་ཅང་མི་ཆེ་བས་མ་སྤྲོས་སོ། །དེར་མ་ཟད་འཕགས་པའི་བདེན་པའི་སྒྲ་དོན་ཡང་མི་མཚུངས་ཏེ། ཉན་ས་ལས། འཕགས་པ་རྣམས་ཀྱིས་བདེན་པ་དེ་དག་དེ་ཁོ་ན་ལྟར་ཡིན་པར་བདེན་པའི་སྒོམ་པ་ཡང་དག་པ་ཇི་ལྟ་བ་བཞིན་མཁྱེན་ཅིང་གཟིགས་ཀྱི། ཞེས་སོགས་དང༌། མཛོད་འགྲེལ་ལས། གཞན་གྱིས་བདེ་བར་གང་བཟུང་བ། །དེ་ནི་འཕགས་པས་སྡུག་བསྔལ་རིག། །ཅེས་པ་ལྟར་འཕགས་པ་རྣམས་ཀྱིས་གཟིགས་པ་ཁོ་ན་དོན་དང་མཐུན་པའི་དེ་ལ་བདེན་པ་ཡིན་གྱི། བྱིས་པ་རྣམས་ལ་བློ་དོན་གཉིས་མ་མཐུན་པས་བདེན་པར་མི་འཇོག་ཅེས་འོག་མ་རྣམས་ཀྱིས་འདོད་ཀྱང་དཔལ་ལྡན་ཟླ་བས་ནི་རགས་པའི་ཐ་སྙད་

― GTD002_Page_0897 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་འོག་མ་དང་སྒོ་བསྟུན་པར་མི་མཛད་པས། དེ་ལས་གཞན་དུ་འཆད་དེ། རིགས་པ་དྲུག་ཅུ་བའི་འགྲེལ་པ་ལས། དེ་ནི་འཕགས་པ་རྣམས་ཁོ་ནས་ནི་མ་ཡིན་ཏེ། ཞེས་སོགས་ཀྱིས་འཕགས་པ་ཞེས་པ་གང་ཟག་ལ་མ་སྦྱར་བར་རང་ཉིད་དོན་དང་མཐུན་པར་གནས་པ་ཞེས་བཤད་ཚུལ་གཅིག་དང༌། གང་ལ་དམིགས་ནས་གོམས་པས་འཕགས་པར་བྱེད་པ་ཞེས་བཤད་ཚུལ་གཅིག་དང༌། གང་ཟག་ལ་སྦྱར་ཡང་འཕགས་པས་བསྟན་པའི་བདེན་པ་ཞེས་བཤད་ཚུལ་གཅིག་དང་གསུམ་མཛད་དེ། འཕགས་པ་ཆོས་ཀུན་འགྲོ་བའི་མདོའི་དགོངས་པའོ། །༈ གཉིས་པ། ཁྱད་ཆོས་མི་རྟག་སོགས་བཅུ་དྲུག་གི་རྣམ་གཞག་ལ་གཉིས། དངོས་ཀྱི་དོན་དང༌། དེ་དག་སྐྱེ་བའི་རིམ་པའོ། །དང་པོ་ནི། འདིར་ཁྱད་ཆོས་བདེན་པའི་རྣམ་པ་དེ་ལ་བཅུ་དྲུག་ཏུ་བཞག་སྟེ། བསལ་བྱ་ལོག་ཞུགས་ལ་བཅུ་དྲུག་ཡོད་པས་དེའི་དབང་དུ་བྱས་པས་སོ། །དེ་ཡང་སྡུག་བསྔལ་ལ་གཙང་བདེ་རྟག་བདག་ཏུ་འཛིན་པ་བཞི་དང༌། ཀུན་འབྱུང་ལ་རྒྱང་འཕེན་ལྟ་བུ་སྡུག་བསྔལ་རྒྱུ་མེད་དུ་འཛིན་པ་དང། གསལ་བྱེད་པས་དུས་རྟག་པ་ལྟ་བུར་རྒྱུ་གཅིག་ཁོ་ནར་འཛིན་པ་དང༌། རིག་བྱེད་པས་སྒྲའི་ཚངས་པ་དང༌། གྲངས་ཅན་པས་གཙོ་བོའི་རྣམ་འགྱུར་ལྟ་བུ་རང་བཞིན་རྟག་ལ་གནས་སྐབས་འགྱུར་བར་འཛིན་པ་དང༌། རིག་པ་ཅན་པ་དང་བྱེ་བྲག་པ་ལྟར་དབང་ཕྱུག་གིས་བློ་སྔར་བཏང་བ་ཙམ་ལས་སྐྱེ་བས་དེའི་གཡོ་བ་ལས་བྱུང་བར་འཛིན་པ་དང་བཞི་སྟེ། ཕྱི་མ་གསུམ་ནི་མི་མཐུན་པ་རྒྱུར་འཛིན་པ་ཡིན་ལ། དེ་དག་དེ་ལྟར་སྦྱོར་དགོས་པ་ནི། ས་ལུ་ལྗང་བའི་མདོ་ཚིག་གསལ་དུ་

― GTD002_Page_0898 ―

^{[མ་དཔེ་གཟིགས་ན་འདིར་གནོན།]}

[Full Size]

དྲངས་པ་ལས། དབང་ཕྱུག་གིས་མ་བྱས། དུས་ཀྱིས་མ་བསྒྱུར། ཕྲ་རབ་ལས་མ་བྱུང༌། རང་བཞིན་ལས་མ་བྱུང༌། ངོ་བོ་ཉིད་ལས་མ་བྱུང༌། རྒྱུ་མེད་པ་ལས་མ་སྐྱེས། ཞེས་སོགས་ཀྱིས་ཀྱང་འགྲུབ་ལ། བྱེ་སྨྲའི་ལུགས་ནི། མཛོད་ལས། དབང་ཕྱུག་སོགས་རྒྱུར་མངོན་ཞེན་པ། །ཞེས་སོགས་གསུངས་པས་ཞིབ་ཆ་དགོས་སོ། ། ༈ འགོག་པ་ལ། རྒྱང་འཕེན་ལྟ་བུ་ཐར་པ་གཏན་མེད་དུ་འཛིན་པ་དང༌། ཟད་བྱེད་པ་སྟེང་ཕྱོགས་ན་གདུགས་དཀར་པོ་ཁ་གྱེན་བསླང་ལྟ་བུའི་ཐར་པ་ཡོད་པར་ལྟ་བ་ལྟ་བུ་ཟག་བཅས་ཀྱི་ཁྱད་པར་འགའ་ཞིག་ཐར་བར་འཛིན་པ་དང༌། གྲངས་ཅན་གྱིས་གྲོལ་བའི་བདག་ལྟ་བུ་གྱ་ནོམ་པའི་ཐར་པར་འཛིན་པ་དང༌། རེ་ཞིག་ཐར་ཡང་སླར་མི་ལྡོག་པའི་ཆོས་ཅན་གྱི་ཐར་པ་གཏན་དུ་བ་མེད་པར་འཛིན་པ་དང་བཞི་སྟེ། བཤེས་སྤྲིངས་ལས། ས་ཆུ་མེ་རླུང་ཉི་ཟླ་བྲལ་ཐོབ་མཛོད། །ཅེས་པའང་དེ་དག་གི་དོན་དུ་རེད་མདའ་བའི་ཊཱིཀྐར་གསུངས་སོ། ། ༈ ལམ་ལ་ཡང་ཐར་ལམ་གཏན་མེད་དུ་འཛིན་པ་དང༌། བདག་མེད་རྟོགས་པའི་ཤེས་རབ་འདི་ལམ་ངན་པའོ་སྙམ་དུ་འཛིན་པ་དང༌། དབང་ཕྱུག་གི་དཀྱིལ་འཁོར་དུ་དབང་བསྐུར་བ་དང་མེ་ལྔ་བསྟེན་པ་སོགས་འདི་ལས་ལྷག་པའི་ལམ་ཡོད་པར་འཛིན་པ་དང༌། འདིས་སྡུག་བསྔལ་གཏན་ཟད་དུ་བྱེད་མི་ནུས་པར་འཛིན་པ་དང་བཞིའོ། ། ༈ འོ་ན་འདི་དག་གཉེན་པོ་བཅུ་དྲུག་དང་སྦྱོར་ཚུལ་ཡང་གྲངས་འདི་ཁོ་ན་ལྟར་ཡིན་ནམ་ཞེ་ན། ཕྱི་མ་བཅུ་གཉིས་དེ་ལྟར་ཡིན་ཀྱང་དང་པོ་བཞི་ནི་མ་ཡིན་ནོ། །ཁ་ཅིག་སྟོང་བའི་རྣམ་པ་སྔོན་དུ་བཏོན་ཏེ་གཙང་བའི་བདག་དོན་གཞན་གྱིས་སྟོང་བའི་ཕྱིར། ཞེས་བཀོད་པ་ནི་ལུང་མ་བསྟན་ཡིན་ན་ལེགས་

― GTD002_Page_0899 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི། གཙང་བར་འཛིན་པ་དང༌། སྟོང་བའི་རྣམ་པ་གཉིས་སྦྱོར་དགོས་པར་འདོད་ན་མི་རིགས་ཏེ། བསྡུ་བ་ལས། དེ་ལ་རྣམ་པ་གཅིག་ནི་ཕྱིན་ཅི་ལོག་གཅིག་གི་གཉེན་པོའོ། །རྣམ་པ་གཅིག་ནི་ཕྱིན་ཅི་ལོག་གཉིས་ཀྱི་གཉེན་པོའོ། །རྣམ་པ་ཐ་མ་གཉིས་ནི་ཕྱིན་ཅི་ལོག་ཐ་མ་གཅིག་གི་གཉེན་པོ་ཡིན་ནོ། །ཞེས་དང༌། མཁས་གྲུབ་རྟོགས་དཀའི་སྣང་བ་ལས། རྟག་པར་འཛིན་པའི་གཉེན་པོ་མི་རྟག་པ་དང༌། གཙང་བ་དང་བདེ་བར་འཛིན་པའི་གཉེན་པོ་སྡུག་བསྔལ་དང༌། བདག་ཏུ་འཛིན་པའི་གཉེན་པོར་རྣམ་པ་ལྷག་མ་གཉིས་བསྟན་ནོ། །ཞེས་གསུངས་ཤིང༌། རེད་མདའ་བའི་ཀུན་བཏུས་ཊཱིཀྐར་ཡང༌། གཙང་བ་དང་བདེ་བའི་གཉེན་པོ་ནི་སྡུག་བསྔལ་གྱི་རྣམ་པ་གཅིག་སྟེ། གཙང་བ་དང་བདེ་བ་ནི་ཡིད་དུ་འོང་བའི་རྣམ་པར་ཞུགས་པ་ཡིན་ལ། སྡུག་བསྔལ་ནི་དེ་དང་འགལ་བ་ཡིད་སུན་འབྱིན་པའི་རྣམ་པར་ཞུགས་པའི་ཕྱིར་ཞེས་གསུངས་པའི་ཕྱིར་རོ། །ཡང་བློ་གསལ་བར་རློམ་པ་འགའ་ཞིག་གིས་འགོག་པའི་སྟེང་གི་ལོག་ཞུགས་ཐ་མ་ལ། གསེར་འཕྲེང་ལས། ཐར་པ་གཏན་མི་ལྡོག་པ་མིན་ནོ་སྙམ་དུ་ལྟ་བ། ཞེས་གསུངས་པས་ལོག་ཞུགས་འདི་བྱེ་སྨྲ་ལ་ཡང་བཞག་དགོས་ཏེ། དེས་དགྲ་བཅོམ་ཉམས་པ་ཁས་ལེན་པའི་ཕྱིར་ཞེས་སྨྲ་བ་ནི་རྣམ་པར་མ་བརྟགས་པ་སྟེ། དེས་འདོད་པའི་ཚུལ་ནི་ལམ་བསྒོམ་སྟོབས་ཀྱིས་རེ་ཞིག་ཐར་ཡང༌། སླར་ཉམས་པ་ནི་ལམ་ལ་མ་ཞུགས་པའི་གནས་སྐབས་དང་ཁྱད་མེད་དུ་སོང་ནས་ཕྱིར་ཡང་འཁོར་བར་འཁྱམས་པར་འདོད་པ་ཡིན་ལ། བྱེ་སྨྲའི་ལུགས་ནི་འདི་འདྲ་གཏན་མ་ཡིན་པའི་ཕྱིར་ཏེ། མཛོད་ལས། འབྲས་ལས་

― GTD002_Page_0900 ―

^{[མ་དཔེ་གཟིགས་ན་འདིར་གནོན།]}

[Full Size]

ཉམས་པ་འཆི་བ་མེད། །བྱ་བ་མ་ཡིན་དེ་མི་བྱེད། །ཅེས་དང། གང་སྤེལ་ལས། དགྲ་བཅོམ་པ་ཉིད་ལས་ཡོངས་སུ་ཉམས་པ་ཡང་སྐྱེ་བར་འགྱུར་ན། ཚངས་སྤྱོད་འདི་ལ་ལེགས་སྤྱད་ཅིང༌། །ཞེས་བྱ་བ་འདི་ལ་ཡིད་བརྟན་དུ་མི་རུང་བར་འགྱུར་རོ། །ཞེས་སོགས་གསུངས་ཤིང༌། དེར་མ་ཟད་གྲུབ་མཐའ་གོང་མས་ཐེག་དམན་དགྲ་བཅོམ་གྱིས་ཡིད་ལུས་བླངས་ཏེ་རྫོགས་བྱང་སྒྲུབ་པར་འདོད་པ་ཡང་ཉན་རང་གི་མྱང་འདས་ལ་སྐུར་འདེབས་སུ་བཤད་པ་སོགས་ཕྱག་རྒྱ་བཞི་དང་འགལ་བའི་སྐྱོན་བརྗོད་ཚུལ་རྟོག་གེ་འབར་བ་ལས་བྱུང་བས་སོ། །གཞན་རྣམས་གོ་སླ་བས་མ་སྤྲོས། ༈ ད་ནི་དེ་དག་ཁྱད་ཆོས་སོ་སོས་འགོག་ཚུལ་ཇི་ལྟ་བུ་ཡིན་ཞེ་ན་བཞི་ལས། དང་པོ་ནི། ཉེར་ལེན་གྱི་ཕུང་བོ་ལྔ་ཆོས་ཅན། མི་རྟག་སྟེ། རེས་འགའ་སྐྱེ་བའི་ཕྱིར། སྡུག་བསྔལ་བ་ཡིན་ཏེ། ལས་ཉོན་གྱི་གཞན་དབང་ཅན་ཡིན་པའི་ཕྱིར། སྟོང་པ་ཡིན་ཏེ། བྱིན་གྱིས་རློབ་པ་པོའི་བདག་དོན་གཞན་གྱིས་དབེན་པའི་ཕྱིར། བདག་མེད་པ་ཡིན་ཏེ། མི་རྟག་དུ་མ་གཞན་དབང་ཅན་ཡིན་པའི་ཕྱིར། དེ་དག་སྟོན་པར་རྣམ་འགྲེལ་ལས། དེ་ནི་རེས་འགའ་དམིགས་པའི་ཕྱིར། །མི་རྟག་ཉེས་པའི་རྟེན་ཕྱིར་དང༌། །རྒྱུ་དབང་ཕྱིར་ཡང་སྡུག་བསྔལ་ཡིན། །བདག་མིན་བྱིན་གྱིས་བརླབས་པའང་མིན། །རྒྱུ་མིན་བྱིན་གྱིས་རློབས་པ་མིན། །ཞེས་པ་ནས། དེ་ནི་རྟག་རྣམས་ལ་ཡོད་མིན། །ཞེས་བྱུང། ༈ གཉིས་པ་ནི། སྲེད་པ་ཆོས་ཅན། རྒྱུ་ཡིན་ཏེ། ཡང་སྲིད་ཀྱི་བག་ཆགས་འཇོག་པའི་རྩ་བ་ཡིན་པའི་ཕྱིར། ཀུན་འབྱུང་ཡིན་ཏེ། འགྲོ་བ་སོ་སོར་དུས་ཡང་ཡང་བསྐྱེད་པའི་ཕྱིར། རབ་སྐྱེ་ཡིན་ཏེ། འགྲོ་བ་ལྔའི་སྐྱེ་གནས་སོགས་མི་འདྲ་བ་བསམ་མི་ཁྱབ་སོ་སོར་སྐྱེད་ནུས་པའི་ཕྱིར། རྐྱེན་

― GTD002_Page_0901 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ཏེ། ཉེར་ལེན་གཙོ་བོ་ལས་ཡིན་ཀྱང་ཁྱོད་ཀྱིས་དེ་ལ་གསོས་བཏབ་པའི་སྒོ་ནས་སྲིད་པ་གཞན་དང་གཞན་འགྲུབ་པས་འཁོར་བ་ལས་མི་འདའ་བར་བྱེད་པའི་ཕྱིར། ཕྱི་མ་ལ་སྲིད་སྲེད་གཙོ་ཆེ་བར་རྣམ་བཤད་དང་ཚད་མའི་ལམ་ཊཱིཀ་ལས་གསུངས་ལ། གོང་དུ་དྲངས་པའི་མདོར་སྲེད་པ་ཡང་འབྱུང་བ་ཞེས་སོགས་ཀྱི་དོན་སོ་སོར་ཕྲལ་ཏེ་རྟག་པར་སྲེད་པའི་རྒྱུ་དང༌། བདེ་བ་དང་གཙང་བར་སྲེད་པའི་ཀུན་འབྱུང་དང་རབ་སྐྱེ། བདག་སྲེད་ཀྱིས་རྐྱེན་གྱི་བྱ་བ་སྔར་བཤད་པ་དེ་ལྟར་བྱེད་པར་ཀུན་བཏུས་དར་ཊཱིཀ་ལས་གསུངས་པ་ནི་བསྡུ་བའི་དགོངས་པ་སྟེ། དེ་ཉིད་ལས། ཅིའི་ཕྱིར་ཀུན་འབྱུང་བདེན་པ་ལ་རྣམ་པ་བཞིས་བལྟ་བར་བྱ་ཞེ་ན། སྨྲས་པ། སྲེད་པ་རྣམ་པ་བཞིའི་ཕྱིར་ཏེ། དེ་ཡང་རྟག་པ་དང༌། བདེ་བ་དང༌། གཙང་བ་དང༌། བདག་ཏུ་སྲེད་པའི་བྱེ་བྲག་ལས་སོ་ཞེས་གསུངས་ཤིང་འགོག་ལམ་ཡང་དེ་ལྟར་སྦྱར་རོ། །རྣམ་འགྲེལ་དངོས་ཟིན་དང་སྦྱོར་ན་སྡུག་བདེན་གྱི་སྐབས་བཞིན་ཉེར་ལེན་གྱི་ཕུང་བོ་རྩོད་གཞིར་བཟུང་བ་བདེ་སྟེ། དེ་ཆོས་ཅན། རྒྱུ་དང་བཅས་ཏེ། རེས་འགའ་སྐྱེ་བའི་ཕྱིར། རྟག་པ་གཅིག་པུའི་རྒྱུ་ལས་མ་བྱུང་སྟེ། རྟག་པ་ལ་རིམ་དང་ཅིག་ཅར་དོན་བྱེད་པའི་ནུས་པ་མེད་པའི་ཕྱིར། ཞེས་སོགས་སུ་སྦྱར་རོ། །༈ དེ་ལ་དང་པོ་ནི། རེས་འགའ་བ་ཉིད་ཡིན་པས་ན། །སྡུག་བསྔལ་འདི་རྒྱུ་བཅས་ཉིད་འགྲུབ། །ནས། མཐོང་བ་ལ་ནི་རྒྱུ་མཚན་ཡིན། །ཞེས་པའི་བར་བྱུང༌། ༈ གཉིས་པ་ནི། རྟག་རྣམས་བཀག་ཕྱིར་དབང་ཕྱུག་ལ། །སོགས་པ་ལས་ཀྱང་སྲིད་མིན་ཏེ། །ནུས་པ་མེད་ཕྱིར། །ཞེས་བྱུང༌། འདི་

― GTD002_Page_0902 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་ཤིན་ཏུ་གནད་ཆེ་བས་ཅུང་ཟད་བཤད་ན། གཞན་སྡེ་ཐར་པ་ཁས་ལེན་པ་རྣམས་ཀྱི་འགལ་འདུའི་གཙོ་བོ་ནི། སྡུག་བསྔལ་ལྡོག་ནུས་པར་འདོད་བཞིན་དུ་དེའི་རྩ་བ་མཐར་གཏུགས་པ་བདག་དང་གཙོ་བོ་སོགས་རྟག་པ་གཅིག་པུར་སྨྲ་བ་འདི་ཡིན་ཏེ། སྤྱིར་རྒྱུ་འབྲས་འཇོག་ཚུལ་ནི། ཐོག་མར་འགྲུབ་པའི་ཚེ་ན་ཡང་རྒྱུ་སྔར་མེད་གསར་སྐྱེས་ལས་འབྲས་བུ་སྔར་མེད་གསར་དུ་སྐྱེ་ཞིང༌། འགག་པའི་ཚེ་ཡང་སྣུམ་ཟད་པའི་མར་མེ་ཤི་བ་ལྟར། རྒྱུ་འགག་པ་ལས་རིམ་གྱིས་འབྲས་བུ་ཡང་འགག་པར་འགྱུར་རིགས་པ་ལ། རྒྱུ་རྟག་པར་འདོད་ན་རྣམ་གཞག་དེ་ལྟ་བུ་མི་རུང་སྟེ། གོང་དུ། རྟག་ལ་ལྡོག་པ་མེད་པའི་ཕྱིར། །ནུས་པ་ཉིད་ཀྱང་ལྡོག་པར་དཀའ། །ཞེས་གསུངས་པ་ལྟར། རྟག་པ་ནི་ཡུལ་དུས་འགར་ཡང་ལྡོག་པ་མི་སྲིད་པས། དེའི་རྩ་བ་ཅན་གྱི་སྡུག་བསྔལ་ལྡོག་པར་སྨྲས་པ་ཡང་ཚིག་ཙམ་ལས་དོན་རྣམ་པ་ཐམས་ཅད་དུ་རིགས་པས་མི་འགྲུབ་བོ། །དེར་མ་ཟད་རྟག་པ་ལ་འབྲས་བུ་སྐྱེད་པའི་ནུས་མེད་ཅིང༌། གལ་ཏེ་ཡོད་ན་རྣམ་པ་ཐམས་ཅད་དུ་ཡོད་དགོས་པས་འབྲས་བུ་སྡུག་བསྔལ་ཡང་རྟག་ཏུ་གྲུབ་བཞིན་པར་འགྱུར་གྱི་རེས་འགའ་འགག་ཅིང་དེ་ནས་ཡང་རྐྱེན་འཛོམས་པ་ན་ཡང་དང་ཡང་དུ་ཀུན་འབྱུང་བ་དེ་ལྟ་བུ་མི་རིགས་ཞེས་པའི་དོན་ནོ། ། ༈ རྣམ་པ་ལྷག་མ་གཉིས་ནི། དེ་ཡི་ཕྱིར། །སྲིད་འདོད་རྒྱུ་ཡིན་གང་གི་ཕྱིར། །ནས། དེ་ཡོད་ན་ཡོད་མེད་ཕྱིར་རོ། །ཞེས་པའི་བར་ཏེ། འདིར་རྩོད་སྤོང་སོགས་མང་བས་མ་བྲིས་ཏེ་ཊཱིཀྐ་དག་ལས་ཤེས་པར་བྱའོ། །འདི་ལ་འགའ་ཞིག་ཉེར་ལེན་གྱི་ཕུང་བོ་འདི་བཅུ་བ་སྲིད་པ་དང༌། དེ་སྲེད་ལེན། དེ་འཕེན་བྱེད་ལས། དེ་

― GTD002_Page_0903 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོག་མའི་མ་རིག་པ་ལས་བྱུང་བར་རྟོགས་པ་ན་རིམ་བཞིན་རྐྱེན། རབ་སྐྱེ། རྒྱུ་ཀུན་འབྱུང་རྣམས་རྟོགས་པར་བཤད་དོ། །དེ་ལྟར་སྦྱོར་ན་འདིར་རྒྱུ་ཞེས་པ་རྩ་བ་ལ་བཤད་པ་མང་ཞིང༌། སྲིད་པའི་རྩ་བ་ཕྲ་རྒྱས་ཞེས་འབྱུང་བས་ཐོག་མའི་མ་རིག་པ་དང༌། དེ་ནས་ཀུན་འབྱུང་གི་སྐབས་འདིར་མང་ཚིག་དང་ཟློས་སྒྲ་དུ་མ་འབྱུང་ཞིང༌། ལས་ལས་འཇིག་རྟེན་སྣ་ཚོགས་སྐྱེས། །ཞེས་འབྱུང་བས་འཕེན་བྱེད་ལས་དང༌། དེ་ནས་སྲེད་ལེན་གཉིས་རྐྱེན་དུ་མདོ་སོགས་དུ་མར་གསལ་ཞིང༌། དེས་གསོས་བཏབ་ནས་ལས་ནུས་པ་མཐུ་ཅན་དུ་གྱུར་པ་ལ་སྲིད་པར་བཞག་པ་ཡིན་པས། དེ་ལ་རབ་སྐྱེ་ཞེས་སྦྱར་ན་ཚིག་གི་ནུས་པའང་ཐོན་པ་འདྲ་ཞིག་འབྱུང་ལ། གོང་གི་གཙང་བར་སྲེད་པ་དང་སྟོང་བའི་རྣམ་པ་སྦྲེལ་བ་ཡང་ང་རྒྱལ་གྱི་གཉེན་པོར་ཁམས་ཀྱི་རབ་དབྱེ་བསྒོམ་པར་གསུངས་པ་དང་སྦྱར་ནས་བཤད་པ་ཅུང་ཟད་བྱེད་ནུས་མོད་ཀྱང་གཞུང་སྤྱི་བབས་ལས་དེ་ལྟར་མི་འབྱུང་བས་སྙིང་ཁམས་ཆེར་མི་རུང་སྟེ། རྒྱལ་བ་བྱམས་པ་མགོན་པོའི་རྒྱུད་བླ་མ་ལས། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་ཁྲིམས་སུ་བཅས་པའི་ཕྱིར་རོ། ། ༈ གསུམ་པ་འགོག་པའི་བཞི་ནི། སྡུག་བསྔལ་གཏན་ཟད་པའི་བྲལ་བ་ཆོས་ཅན། འགོག་པའི་རྣམ་པ་ཡིན་ཏེ། དགག་བྱ་སྡུག་བསྔལ་སྤངས་པའི་བྲལ་བ་ཡིན་པའི་ཕྱིར། ཞི་བ་ཡིན་ཏེ། སྤང་བྱ་

― GTD002_Page_0904 ―

^{[མ་དཔེ་གཟིགས་ན་འདིར་གནོན།]}

[Full Size]

ཉོན་མོངས་སྤངས་པའི་བྲལ་བ་ཡིན་པའི་ཕྱིར། གྱ་ནོམ་པ་ཡིན་ཏེ། དེ་ལྟར་སྡུག་བསྔལ་དང་ཉོན་མོངས་མཐའ་དག་སྤངས་པའི་འཕྲལ་ཕུགས་ཀུན་ཏུ་དགེ་ཞིང་གཙང་བ་ཡིན་པའི་ཕྱིར། ངེས་པར་འབྱུང་བ་ཡིན་ཏེ། དེ་དག་སྤངས་པ་སླར་མི་ལྡོག་པའི་ཆོས་ཅན་གྱི་ཐར་པ་ཡིན་པའི་ཕྱིར། དེ་དག་སྟོན་པར། རྣམ་འགྲེལ་ལས། དེ་ནི་གཏན་དུ་བ་མིན་ཏེ། །ནས། སྤོང་ལ་དེ་ནི་རྟག་པར་སྨྲོས། །ཞེས་འབྱུང་ལ། ཀུན་ལས་བཏུས་སུ་འགོག་པ་ཉོན་མོངས་དང་ཞི་བ་སྡུག་བསྔལ་དང་བྲལ་བའི་ཆ་ནས་གསུངས་སོ། ། ༈ བཞི་པ་ལམ་གྱི་བཞི་ནི། བདག་མེད་མངོན་སུམ་དུ་རྟོགས་པའི་ཤེས་རབ་ཆོས་ཅན། ལམ་ཡིན་ཏེ། ཐེག་པ་གསུམ་གྱིས་བགྲོད་པ་གཅིག་པའི་ཐར་ལམ་ཡིན་པའི་ཕྱིར། རིག་པ་ཡིན་ཏེ། ཉོན་མོངས་པ་མ་རིག་པའི་དངོས་ཀྱི་འགལ་ཟླའི་གཉེན་པོ་ཡིན་པའི་ཕྱིར། སྒྲུབ་པ་ཡིན་ཏེ། སེམས་ལོག་པར་འཕྲོ་བ་བཀག་ནས་གནས་ལུགས་ཀྱི་སྟེང་དུ་སྒྲུབ་སྟེ། དེ་མངོན་སུམ་དུ་རྟོགས་པའི་ཡེ་ཤེས་ཡིན་པའི་ཕྱིར། ངེས་འབྱིན་ཡིན་ཏེ། སླར་མི་ལྡོག་པའི་ཐར་པའི་གནས་སུ་ཕྱིན་བྱེད་ཡིན་པའི་ཕྱིར། དེ་དག་སྟོན་པར། རྣམ་འགྲེལ་ལས། བཤད་ཟིན་ལམ་དེ་གོམས་པ་ལས། །ཞེས་པ་ནས། ཐལ་བ་བཞིན་དུ་མ་ངེས་ཕྱིར། །ཞེས་གསུངས་སོ། །དེ་དག་ནི་སོ་སོའི་ཁྱད་ཆོས་རྣམས་སྒྲུབ་ཚུལ་ཡིན་ལ། འགོག་ལམ་རང་ལྡོག་ནས་སྒྲུབ་ཚུལ་སྦྱོར་ངག་ཏུ་དྲིལ་ན་འདི་ཡིན་ཏེ། ༈ དང་པོ་ནི་རང་ཉིད་འགྲིབ་བྱེད་ཀྱི་མི་མཐུན་ཕྱོགས་སྟོབས་ལྡན་ཡོད་ན། དེ་འཕེལ་བ་ལས་རང་ཉིད་རིམ་གྱིས་གཏན་ཟད་དུ་འགྲོ་བ་ཡོད་པས་ཁྱབ་སྟེ། དཔེར་ན་མེ་དང་ཉེ་བའི་གྲང་འབྲས་

― GTD002_Page_0905 ―

^{[མ་དཔེ་གཟིགས་ན་འདིར་གནོན།]}

[Full Size]

ཟད་པ་མཐོང་བ་བཞིན། སྡུག་བསྔལ་གྱི་ཕུང་བོ་འདི་ཡང་ཟད་པ་ཡོད་དེ། འདིའི་རྩ་བ་བདག་འཛིན་ལ་གནོད་བྱེད་སྟོབས་ལྡན་བདག་མེད་རྟོགས་པའི་ཤེས་རབ་དམིགས་པའི་ཕྱིར། དེ་སྐད་དུ། འགྲིབ་དང་ཕུལ་བྱུང་བརྟེན་པ་ཀུན། །མི་མཐུན་ཕྱོགས་དང་བཅས་ཉིད་ཕྱིར། །དེ་གོམས་པ་ལས་བདག་འགྱུར་བས། །ལ་ལར་ཟག་པ་ཟད་པར་འགྱུར། །ཞེས་སོ། །འདིའི་བདག་འཛིན་ཞེས་པ་ཆོས་ཀྱི་བདག་འཛིན་ལ་ཁ་སྤོས་ཏེ་ཐམས་ཅད་མཁྱེན་པ་སྒྲུབ་པའི་སྦྱོར་ངག་ཀྱང་རྣམ་འགྲེལ་ཊཱིཀ་ཆེན་དང་ཚད་མའི་བརྗེད་བྱང་དུ་གསུངས་ལ། སྟོབས་ལྡན་ཞེས་པའི་དོན་ནི་སེམས་ཀྱི་རང་བཞིན་འོད་གསལ་བ། ཞེས་འབྱུང་བ་ལྟར་རང་བཞིན་ལ་ཞུགས་མ་ཞུགས་ཀྱི་དབང་གིས་རྒྱབ་རྟེན་ཡོད་མེད་ཡིན་གྱི་གནས་སྐབས་ཀྱི་མངོན་ལྐོག་ལྟ་བུ་མིན་ཏེ། ཐུབ་དགོངས་ལས། འོ་ན་སྐྱོན་དང་ལྡན་པ་ལ་ཡོན་ཏན་སྦྱོར་བ་ཇི་ལྟ་བ་བཞིན་དུ་ཡོན་ཏན་དང་ལྡན་པ་ལ་སྐྱོན་སྦྱོར་བས་འཁོར་བ་ལས་ངེས་པར་འབྱུང་བ་མེད་དོ་ཞེ་ན། མ་ཡིན་ཏེ། ནས། ཡོན་ཏན་རྣམས་དངོས་པོའི་རང་བཞིན་ཡིན་པ་ཉིད་ཀྱི་ཕྱིར་དང༌། སྐྱོན་རྣམས་ནི་ཕྱིན་ཅི་ལོག་པའི་ཕྱིར་རོ་ཞེས་དང༌། ལེགས་བཤད་སྙིང་པོ་ལས། དངོས་པོའི་དེ་ཁོ་ན་ཉིད་ཀྱང་འཐད་པའི་སྒྲུབ་པའི་རིགས་པའི་སྒྲུབ་བྱེད་དང་ལྡན་པའི་ཕྱིར་རོ། །ཞེས་པའི་དོན་དུ་ཤེས་དགོས་སོ། ། ༈ ལམ་བདེན་སྒྲུབ་བྱེད་ནི། བདག་མེད་རྟོགས་པའི་ཤེས་རབ་ཆོས་ཅན། གོམས་བྱེད་ཀྱི་ཡན་ལག་དང་མ་བྲལ་བར་བྱས་ན་གོམས་བྱའི་དོན་ལ་གསལ་སྣང་མཐར་ཐུག་པར་འགྱུར་ཏེ། དེ་ལྟར་གོམས་པར་བྱས་ཟིན་འབད་རྩོལ་བསྐྱར་མ་ལ་མི་ལྟོས་པའི་སེམས་ཀྱི་ཆོས་ཡིན་པའི་

― GTD002_Page_0906 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། དཔེར་ན་འདོད་ཆགས་བཞིན། དེ་སྐད་དུ་ཡང༌། གོམས་ལས་ཁྱད་པར་འགྱུར་ན་ཡང༌། །ནས། གོམས་ལས་བརྩེ་བའི་བདག་ཉིད་དེ། །ཆགས་བྲལ་ཆགས་དང་ཡིད་ལོག་བཞིན། །ཞེས་སོ། །དེ་ལྟར་ན་བདེན་བཞིའི་བླང་དོར་ཕྱིན་ཅི་མ་ལོག་པའི་སྒོ་ནས་ཐར་པ་དང་ཐམས་ཅད་མཁྱེན་པའི་གོ་འཕང་ཞིག་སྒྲུབ་པར་འདོད་ནས་ལམ་གྱི་འགེངས་གཤོག་པ་ས་སྡེ་དང༌། དེ་དག་གི་གནད་རིགས་པས་སྒྲུབ་པ་དཔལ་ཆོས་ཀྱི་གྲགས་པའི་གཞུང་ལུགས་རྣམས་ལ་རིང་དུ་འདྲིས་པར་བྱ་དགོས་པ་དཔྱོད་ལྡན་རྣམས་ཀྱིས་ཐུགས་ལ་བཅངས་པ་མཁྱེན་མཁྱེན་ཞེས་གསོལ་བ་འདེབས་པ་ལགས། ༈ གཉིས་པ་དེ་དག་རྟོགས་པའི་རིམ་པ་ནི། བསྡུ་བ་ལས། དེ་ལ་ཤེས་པ་མངོན་པར་རྟོགས་པ་ནི། བདེན་པ་མཚན་ཉིད་མི་འདྲ་བ་དག་ལ་ཤེས་པ་འབྱུང་བའི་གོ་རིམ་གྱིས་འབྱུང་ངོ༌། །ཞེས་གསུངས་ཤིང༌། མཚན་ཉིད་འདྲ་མི་འདྲའི་དོན་ཡང༌། དེ་ཉིད་ལས། སྡུག་བསྔལ་གྱི་བདེན་པ་ནི་མཚན་ཉིད་གཉིས་ཀྱིས་ཡོངས་སུ་ཤེས་པར་བྱ་བ་ཡིན་ཏེ། རང་གི་མཚན་ཉིད་དང༌། སྤྱིའི་མཚན་ཉིད་ཀྱིས་སོ། །དེ་ལས་གཞན་པ་དག་ནི་རང་གི་མཚན་ཉིད་ཁོ་ནས་ཏེ་ཞེས་གསུངས་ཏེ་འགོག་ལམ་དང་ཀུན་འབྱུང་གསུམ་ནི་རང་གི་མཚན་ཉིད་ཁོ་ན་དང་སྦྱར་བས། ཁྱད་ཆོས་བཞི་ཚན་རྣམས་དངོས་ཤུགས་ཅི་རིགས་པའི་སྒོ་ནས་ཅིག་ཅར་རྟོགས་པར་འགྱུར་ལ། སྡུག་བདེན་གྱི་ཁྱད་ཆོས་བཞི་ནི་རིམ་ཅན་ཁོ་ན་ཡིན་ནོ། །དེ་སྐད་དུ། རྣམ་འགྲེལ་ལས། སྟོང་ཉིད་ལྟ་བས་གྲོལ་འགྱུར་གྱི། །བསྒོམ་པ་ལྷག་མ་དེ་དོན་ཡིན། །དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས། །ཞེས་གསུངས་སོ། །ཁ་ཅིག་དེའི་དོན་དུ་བསམ་ནས་སྟོང་པ་

― GTD002_Page_0907 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་མེད་གཉིས་རྟོགས་པའི་བློ་ནི་གྲོལ་ལམ་དངོས་གཞི་ཡིན་ལ་གཞན་བཅུ་བཞི་སྨིན་བྱེད་ཡིན་པས་དེའི་སྔོན་དུ་འགྲོ་དགོས་ཟེར། ལ་ལས་བདག་འཛིན་ལྷན་སྐྱེས་ཀྱི་ཞེན་ཡུལ་བཀག་པའི་བདག་མེད་ཕྲ་མོ་རྟོགས་པ་ལ་དེ་དག་སྔོན་དུ་འགྲོ་དགོས་པའི་དོན་ཡིན་གྱི། འདིའི་སྟོང་བདག་མེད་གཉིས་ནི་ཀུན་བཏགས་ཀྱི་ཞེན་ཡུལ་བཀག་ཙམ་ཡིན་ལ། འགོག་བདེན་གྱི་ཡང་སྔོན་དུ་རྟོགས་དགོས་ཏེ། སྡུག་བསྔལ་གྱི་རྩ་བ་བདག་འཛིན་སྤོང་ནུས་སུ་ཤེས་པ་ལ། དེ་ལ་གནོད་བྱེད་ཡོད་ཚུལ་ཤེས་དགོས་ཤིང༌། དེ་ལ་དེས་བཟུང་བ་ལྟར་མེད་ཚུལ་ཤེས་དགོས་པའི་ཕྱིར་ཟེར། འདིས་ནི་ལུགས་སྔ་མ་ལེགས་པར་ཁེགས་ཤིང༌། སྨྲ་བ་བོ་རང་ཉིད་ལ་ཡང་མཚུངས་ཏེ། ལམ་རིམ་ལས། ཀུན་བཏགས་ཀྱི་མ་རིག་པ་ནི། གྲུབ་མཐའ་སྨྲ་བ་དེ་དག་ཁོ་ན་ལ་ཡོད་པས་འཁོར་བའི་རྩ་བར་མི་འཐད་པའི་ཕྱིར། ཞེས་གསུངས་པས་ན་སྡུག་བསྔལ་གྱི་རྩ་བར་གྱུར་པའི་བདག་འཛིན་ནི་ལྷན་སྐྱེས་ལས་འོས་མ་འདས་ཤིང༌། དེ་ལྟ་ན་འགོག་བདེན་རྟོགས་ཁ་མ་དེས་དེས་བཟུང་བ་མི་འཐད་པར་རྟོགས་ཀྱང་ཞེན་ཡུལ་མ་ཁེགས་པ་ནི་ཡ་མཚན་ནོ། །གཞན་ཡང༌། རྣམ་འགྲེལ་ཐར་ལམ་གསལ་བྱེད་དང་རྣམ་ངེས་དར་ཊཱིཀ་གཉིས་ཀར། ཀུན་འབྱུང་སྤོང་ནུས་སུ་མཐོང་བ་བདག་མེད་པར་རྟོགས་པ་ལ་རག་ལས་པས་ཞེས་དང༌། ཕར་ཕྱིན་ལམ་བསྒྲིགས་ལས། དེ་ནས་སྡུག་བསྔལ་གྱི་རྩ་བ་བདག་འཛིན་སྤོང་ནུས་མི་ནུས་བརྟགས་པ་ན། བདག་ཅུང་ཟད་ཀྱང་མེད་པར་མཐོང་ནས་བདག་འཛིན་སྤོང་ནུས་པར་ཁོང་དུ་ཆུད་དེ་ཞེས་སོགས་ལུང་དང༌། འགོག་བདེན་དེ་

― GTD002_Page_0908 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་ཉིད་དུ་བཤད་པ་དང༌། སེམས་རང་བཞིན་གྱིས་འོད་གསལ་བའི་རྟགས་ཀྱིས་དྲི་མ་གློ་བུར་བར་སྒྲུབ་པ་དང་ལམ་བདེན་གྱི་ཁྱད་ཆོས་རྣམས་སྒྲུབ་པའི་ཚེ་རྩོད་གཞིར་བདག་མེད་རྟོགས་པའི་ཤེས་རབ་བཟུང་བ་སོགས་རིགས་པས་ཀྱང་ཁེགས་ཤིང༌། ཡོངས་སུ་གྲགས་པ། ལམ་རིམ་བསྡུས་དོན་ལས་ཀྱང༌། ཀུན་འབྱུང་འཁོར་བའི་འཇུག་རིམ་མ་བསམ་ན། །འཁོར་བའི་རྩ་བ་གཅོད་ཚུལ་མི་ཤེས་པས། །ཞེས་རྣམ་བཅད་དེ་ལྟར་གསུངས་པས་ཀུན་འབྱུང་བསམ་པ་ན་འཁོར་བའི་རྩ་བ་གཅོད་ཚུལ་ཤེས་པ་ཡོངས་གཅོད་ལ་གྲུབ་པའི་ཕྱིར། འོ་ན་རྒྱལ་ཚབ་རྗེའི་ཚད་མའི་བརྗེད་བྱང་ལས། སྟོང་ཉིད་ལྟ་བས་གྲོལ་འགྱུར་གྱི། །བསྒོམ་པ་ལྷག་མ་དེ་དོན་ཡིན། །ཞེས་བཤད་པའི་རྣམ་པ་ལྷག་མ་རྣམས་ནི་བདག་མེད་རྟོགས་པའི་ཤེས་རབ་བསྐྱེད་པའི་ཐབས་ཀྱི་རྒྱུར་ཡོངས་སུ་སྦྱོང་བྱེད་ཀྱི་ཡན་ལག་ཡིན་ཏེ། ཀུན་འབྱུང་སོགས་ལ་ཕྱིན་ཅི་ལོག་ཏུ་སྒྲོ་འདོགས་པའི་སྒྲོ་འདོགས་བསལ་ནས་བདག་མེད་གོམས་པར་བྱེད་པའི་ཕྱིར་རོ། །ཞེས་གསུངས་པ་ཅི་ཞེ་ན་བཤད་པར་བྱ་སྟེ། འདིའི་རྩ་བའི་མདོ་ལས། དགེ་སློང་དག་གཟུགས་རྟག་པ་ཡིན་ནམ་མི་རྟག་པ་ཡིན། བཙུན་པ་མི་རྟག་པ་ལགས་སོ། །གང་མི་རྟག་པ་དེ་བདེ་བ་ཡིན་ནམ་སྡུག་བསྔལ་ཡིན། བཙུན་པ་སྡུག་བསྔལ་བ་ལགས་ཏེ། གང་མི་རྟག་པ་དེ་ནི་སྡུག་བསྔལ་བ་རྣམ་པར་འཇིག་པའི་ཆོས་ཅན་ལགས་སོ། །དེ་ལ་འདི་ནི་ངའོ་འདི་ནི་ངའི་བདག་གོ་ཞེས་པ་ལྟར་རུང་ངམ། བཙུན་པ་མ་ལགས་སོ། །ཞེས་མི་རྟག་སྡུག་བསྔལ་གཉིས་ལས་གཞན་སྔོན་དུ་མ་གསུངས་ཤིང༌། འདི་ཡང་དེ་དང་སྦྱོར་དགོས་པ་ནི་གོང་དུ་དྲངས་པ་ལྟར་འཕྲོ་དེ་མ་ཐག་ཏུ། དེ་ཕྱིར་ཞེས་དང༌། གསུངས་

― GTD002_Page_0909 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པས་འགྲུབ་བོ། །དེའི་རྒྱུ་མཚན་གྱིས་ཐར་ལམ་གསལ་བྱེད་དང་ཊཱིཀ་ཆེན་གཉིས་ཀར་ཡང་བསྒོམ་པ་ལྷག་མ་ཞེས་པའི་ཐད་དུ་འདུས་བྱས་མི་རྟག་པར་རྟོགས་པ་དང་ཟག་བཅས་སྡུག་བསྔལ་དུ་རྟོགས་པ་གཉིས་ལས་གཞན་མ་གསུངས་པ་དང༌། བརྗེད་བྱང་འདི་ཉིད་ལས་ཀྱང༌། མི་རྟག་པ་དང་སྡུག་བསྔལ་གཉིས་ངེས་དགོས་པར་གསུངས་པ་ནི། སྔར་བཤད་པ་ལྟར་བདག་མེད་ངེས་པའི་ཕྱོགས་ཆོས་བསྒྲུབ་པའི་ཡན་ལག་ཏུ་འགྱུར་བ་ལ་དགོས་པ་ཡིན་ཞིང༌། རྣམ་པ་ལྷག་མ་རྣམས་བདག་མེད་པའི་རྣམ་པ་སྦྱོང་བྱེད་དུ་བཤད་པའི་དོན་ཡང་དེ་ཉིད་ཡིན་ཏེ་འཆད་པར་འགྱུར་རོ། །ཞེས་གསུངས་པ་ཤིན་ཏུ་མཐུན་པའི་ཕྱིར་རོ། །འོ་ན་ཀུན་འབྱུང་ལ་སྒྲོ་འདོགས་པ་སོགས་བསལ་དགོས་པར་གསུངས་པ་ཅི་སྙམ་ན་སྐྱོན་མེད་དེ། སྡུག་བསྔལ་རྒྱུ་མེད་དུ་འཛིན་པ་སོགས་ནི་ཀུན་འབྱུང་ལ་བརྟེན་པའི་སྒྲོ་འདོགས་ཡིན་པས། གོང་དུ་རྣམ་འགྲེལ་དངོས་ཟིན་དང་སྦྱར་ཏེ་རེས་འགའ་སྐྱེ་བའི་རྟགས་སོགས་ཀྱིས་འགོག་ཚུལ་བཤད་པ་ཡང་འདིའི་ཕྱོགས་ཆོས་སྒྲུབ་པའི་ཡན་ལག་ཏུ་འགྱུར་བའི་དོན་ཡིན་ལ། དེའི་རིགས་པའི་གནད་ནི་མི་རྟག་སྡུག་བསྔལ་གཉིས་ཀྱིས་སྒྲུབ་ཚུལ་དུ་འདུས་པའི་ཕྱིར། ལོགས་སུ་མ་བྱས་ཀྱང་འགལ་བ་མེད་པས་ལུང་སྔ་མ་རྣམས་དང་མི་མཐུན་པ་མེད་དོ། །སོགས་སྒྲ་སྨོས་པ་ཙམ་གྱིས་འགོག་ལམ་གྱི་ཁྱད་ཆོས་ཀྱང་སྡུད་དགོས་དོན་མེད་ལ་དེའི་སྒོ་ནས་གོམས་པར་བྱེད་པ་ལ་དེའི་སྒོ་ནས་གསར་རྟོགས་དགོས་པའི་ཁྱབ་པ་ཚངས་པས་ཀྱང་མི་འགྲུབ་བོ། །གཞན་ཡང་སྡུག་བསྔལ་བདེན་པའི་ཁྱད་ཆོས་ཀྱི་སྟོང་བདག་མེད་གཉིས་ཀུན་བཏགས་ཀྱི་

― GTD002_Page_0910 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེན་ཡུལ་བཀག་ཙམ་ཁོ་ནར་བཤད་པ་མི་འཐད་དེ། འདི་གཉིས་བདག་མེད་རགས་པ་ཁོ་ནར་བཤད་ན་ཡང་མི་འཐད། འདིར་བསྟན་སྒྲོ་འདོགས་དེ་བློ་ཀུན་བཏགས་ཁོ་ནར་བཤད་ན་ཡང་མི་འཐད་པའི་ཕྱིར། དང་པོ་གྲུབ་སྟེ། འདིའི་སྟོང་པ་ལ་ཉོན་མོངས་པའི་དངོས་གཉེན་བར་ཆད་མེད་ལམ་གྱི་འཛིན་སྟངས་སུ་བྱ་རྒྱུའི་བདག་མེད་ཅིག་ཡོང་ཞིང༌། དེ་ལ་འཁོར་བའི་རྩ་བ་བདག་འཛིན་ལྷན་སྐྱེས་ཀྱི་ཞེན་ཡུལ་བཀག་ཙམ་ཞིག་དགོས་པའི་ཕྱིར་ཏེ། ཀུན་བཏུས་དར་ཊཱིཀ་ལས། སྟོང་པ་ནི་གང་ཞིག་མངོན་སུམ་དུ་རྟོགས་ནས་ཉོན་སྒྲིབ་སྤོང་ནུས་པའི་གང་ཟག་གི་བདག་མེད་ཡིན་ལ་ཞེས་གསུངས་པའི་ཕྱིར། གཉིས་པ་གྲུབ་སྟེ། ཚད་མའི་བརྗེད་བྱང་ལས། སྒྲོ་འདོགས་བཅུ་དྲུག་པོ་དེ་དག་ཕལ་ཆེར་ཀུན་བཏགས་ཀྱིས་བསྡུས་པ་ཡིན་ནོ། །ཞེས་གསུངས་པ་གང་ཞིག །ཕྱི་མ་བཅུ་གཉིས་ལ་ཀུན་བཏགས་ལས་འོས་མེད་ཅིང༌། དང་པོ་བཞི་ཡང་མཐའ་གཅིག་ཏུ་ཀུན་བཏགས་ཡིན་ན་ཕལ་ཆེར་ཞེས་སྨོས་དོན་མེད་པའི་ཕྱིར། འོ་ན། དེ་ཉིད་ལས། སྔར་བདག་མེད་སྒྲུབ་པའི་རྟགས་སུ་བཀོད་པའི་ཕུང་བོ་དང་རང་བཞིན་གཅིག་ཐ་དད་ཀྱིས་སྟོང་པ་ནི། སྡུག་བསྔལ་བདེན་པའི་ཁྱད་ཆོས་སུ་བསྟན་པའི་སྟོང་པ་བདག་མེད་དང་དོན་གཅིག་ལ། ངོ་བོ་དང་དོན་གཞན་གྱི་བདག་ཏུ་སྒྲོ་འདོགས་པའི་ཀུན་བཏགས་ཀྱི་བདག་འཛིན་གྱི་ཞེན་ཡུལ་བཀག་པ་ཡིན་ཞིང༌། བསྒྲུབ་བྱར་བཟུང་བ་ནི་བདག་འཛིན་ལྷན་སྐྱེས་ཀྱི་ཞེན་ཡུལ་བཀག་པའི་བདག་མེད་དོ། །ཞེས་གསུངས་པ་ཇི་ལྟར་དྲངས་ཞེ་ན། དེ་ནི་གཙོ་ཆེ་བའི་དོན་དུ་སྔར་དྲངས་པ་ཉིད་ཀྱིས་ཤེས་སོ། །གཙོ་ཆེ་ཚུལ་ཡང་འདི་ཡིན་ཏེ་སྤྱིར་རང་གི་ཕུང་སོགས་ལ་དབང་སྒྱུར་བ་

― GTD002_Page_0911 ―

^{[མ་དཔེ་གཟིགས་ན་འདིར་གནོན།]}

[Full Size]

པོར་འཛིན་པ་ཙམ་ཞིག་ནི་ངར་འཛིན་མཐའ་དག་ལ་ཡོད་ཅིང༌། ཐལ་འགྱུར་བ་མ་གཏོགས་པས་ནི། མཆོག་གཞན་དོན་དུ་གཉེར་ཕྱིར་དང༌། །ཞེས་སོགས་ལྟར་ངར་འཛིན་ལ་བདག་དེ་ཕུང་བོ་ཟོང་ལྟར་བརྗེ་བ་བོར་ཞེན་པ་ཡོད་པས་ངོ་བོ་ཐ་དད་ཀྱི་འཛིན་ཚུལ་ཚང་བར་འདོད་ཀྱང༌། དེ་ནི་བློ་ལྷན་སྐྱེས་ཀྱི་སྣང་ཚུལ་ཡིན་གྱི་དཔྱད་ནས་བཞག་པ་མ་ཡིན་ལ། འདིར་ནི་སྟོང་བདག་མེད་གཉིས་ཀྱི་སྒྲུབ་བྱེད་དང༌། བདག་མེད་སྒྲུབ་པའི་ཚེ་ངོ་བོ་གཅིག་ཐ་དད་ཕྱེ་ནས་འགོག་པ་གཉིས་གཅིག་ཏུ་བྱས་པ་རིགས་པའི་འཕུལ་གནད་གཅིག་ཏུ་འགྲོ་བའི་དབང་དུ་བྱས་པ་ཡིན་པས། དེ་ལྟར་དཔྱད་ནས་རྣམ་པར་འཇོག་པ་ནི་འཐད་འཛིན་ཀུན་བཏགས་སུ་འགྲོ་སྟེ་འདི་དག་གི་ཚུལ་ཤིན་ཏུ་གལ་ཆེ་ཡང་ཞིབ་པར་གཞན་དུ་བཤད་འདོད་པས་འདིར་མ་སྤྲོས། ༈ གསུམ་པ། དེ་དག་གོམས་པའི་ལམ་བགྲོད་ཚུལ་ནི། ཐོག་མར་རགས་པའི་མི་རྟག་སོགས་བསྒོམས་པས་ཚེ་འདི་ཡུན་རིང་དུ་མི་གནས་ཤིང་ཤི་ནས་ཀྱང་གར་འགྲོ་གཏོལ་མེད་ལ། གལ་ཏེ་ངན་སོང་དུ་སྐྱེས་ན་དེའི་སྡུག་བསྔལ་བཟོད་གླགས་མེད་པའི་ཚུལ་བསམས་ཏེ། དེ་ལས་སྐྱོབ་པའི་སྐྱབས་དཀོན་མཆོག་ལ་ཡིད་ཆེས་པའི་སྐྱབས་འགྲོ་ཤུགས་དྲག་པོ་དང༌། དགེ་བཅུའི་བླང་དོར་ལ་བརྩོན་པ་སོགས་ཆུང་ངུ་དང་ཐུན་མོང་པའི་ལམ་ལ་བློ་ལེགས་པར་སྦྱོང་ཞིང༌། དེ་རྗེས་གནས་སྐབས་དགེ་བའི་དབང་གིས་ལྷ་མིའི་མངོན་མཐོ་ཙམ་ཞིག་ཐོབ་ཀྱང་ཕུགས་འཁོར་བ་འདི་ལས་གཏན་དུ་ཐར་པ་ཞིག་མ་བྱུང་ན་སྲིད་པའི་བདེ་བ་དེ་ནི་རི་གཟར་གྱི་འབབ་ཆུ་ལྟར་

― GTD002_Page_0912 ―

^{[མ་དཔེ་གཟིགས་ན་འདིར་གནོན།]}

[Full Size]

སྐད་ཅིག་ཀྱང་མི་སྡོད་པར་འགྲོ་བས་རིམ་གྱིས་ཟད་དེ་སླར་ཡང་ལྟུང་བའི་ཚུལ་མི་རྟག་པ་དང་ཁྱབ་པ་འདུ་བྱེད་ཀྱི་སྡུག་བསྔལ་གཉིས་ཀྱི་སྒོ་ནས་བསམ་པས་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་པ་ན། དེ་ལྟ་བུའི་སྡུག་བསྔལ་གྱི་ལྗོན་པ་ཆེན་པོ་དེ་ཉིད་རྒྱུ་གང་ལས་བྱུང་སྙམ་དུ་དཔྱད་པས་སྲེད་པའི་བརླན་ལས་སྐྱེ་བར་ཤེས་ཏེ་ཀུན་འབྱུང་ལ་འཇིག་ཅིང༌། དེ་ཡང་རྐྱེན་ཙམ་ལས་རྩ་བ་མཐར་ཐུག་པ་མ་ཡིན་པས་ཕུགས་ལེགས་པར་བཙལ་བ་ན་བདག་འཛིན་ལ་ཐུག་པར་ཤེས་ཏེ། དེ་ཉིད་སྤོང་ནུས་མི་ནུས་དཔྱོད་ཅིང༌། དེ་ཡང་རྒྱབ་རྟེན་ཡོད་མེད་ལ་ལྟོས་པས་དེའི་ཚུལ་བདག་མེད་སྒྲུབ་པའི་རིགས་པ་རྣམས་ཀྱིས་གཏན་ལ་ཕབས་ཏེ། དོན་དང་མི་མཐུན་ཞིང་རྒྱབ་རྟེན་མེད་པར་ནམ་མཐོང་བ་ན་རིང་བོར་མི་ཐོགས་པར་དེ་སྤོང་ནུས་དང༌། དེའི་རྗེས་ཐོག་ཉིད་དུ་དེ་སྤོང་བྱེད་ལམ་བདེན་ཀྱང་མངོན་དུ་བྱ་ནུས་སུ་མཐོང་བར་འགྱུར་རོ། །འོན་ཀྱང་ཐེག་པ་མཆོག་གི་རིགས་ཅན་རྣམས་ནི་རང་ཁོ་ན་སྡུག་བསྔལ་གྱིས་མནར་ཚུལ་དང་དེ་ལས་ཐར་པའི་ཐབས་ཙམ་ཞིག་དཔྱོད་པར་མི་བྱེད་ཀྱི། ལམ་སྒྲོན་ལས། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་པ་ལྟར། རང་ཉིད་འཁོར་བའི་སྡུག་བསྔལ་གྱིས་མནར་ཚུལ་ལ་དམིགས་པའི་ཡིད་འབྱུང་ཤུགས་དྲག་པ་དེ་ཙམ་དུ། དེ་ལ་དཔགས་ནས་གཞན་སྡུག་བསྔལ་གྱིས་མནར་བ་ན་མི་བཟོད་པའི་སྙིང་རྗེ་ཤུགས་དྲག་སྐྱེ་ལ་དེ་ཅི་ཙམ་ཤུགས་དྲག་པ་དེ་ཙམ་དུ་དེ་དག་སྒྲོལ་བ་ཁུར་དུ་ཁྱེར་བའི་ལྷག་བསམ་ཤུགས་དྲག་ཅིང༌། དེ་ཡང་ད་ལྟ་རང་ལ་ནུས་པ་མེད་པར་མཐོང་ནས་ནམ་མཁའི་མཐའ་ཁྱབ་ཀྱི་སེམས་

― GTD002_Page_0913 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་བྱང་ཆུབ་ཀྱི་སེམས་རིན་པོ་ཆེ་འབྱུང་ལ། དེའི་ཚེ་ཐེག་པ་ཆེན་པོའི་ཚོགས་ལམ་དུ་ཞུགས་ཤིང༌། དེ་ནས་ཀྱང་དབུས་མཐའ་ལས། གནས་ངན་ལེན་ཕྱིར་སྲེད་རྒྱུའི་ཕྱིར། །གཞི་ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བའི། །དྲན་པ་ཉེར་བར་བཞག་པ་བསྒོམ། །ཞེས་དང༌། རྒྱན་ལས། དྲན་པ་ཉེར་གཞག་ནས་བཟུང་སྟེ། །ཞེས་པ་ལྟར་བདེན་པ་བཞི་ལ་བརྟེན་པའི་དྲན་པ་ཉེར་གཞག་བཞིས་བསྡུས་པའི་ཚོགས་ལམ་ཆུང་འབྲིང་ཆེ་གསུམ་རིམ་གྱིས་བགྲོད་དེ། དེའི་འོག་ཏུ། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན་ཞེས་པ་ལྟར་བདེན་བཞིའི་གནས་ལུགས་ལ་ཞི་ལྷག་ཟུང་འབྲེལ་ཐོབ་པ་ན་སྦྱོར་ལམ་དུ་འཕོས་པ་ཡིན་པས་དེའི་སྐབས་སུ་ཡང་སྐབས་དང་པོར་བཤད་པའི་རྣམ་པ་བཅུ་གཉིས་དང༌། སྐབས་བཞི་པར་བཤད་པའི་རྣམ་པ་རྣམས་ཡ་མ་བྲལ་བར་བྱས་ཏེ་གོམས་པ་ལས་དྲོད་རྩེ་བཟོད་མཆོག་བཞི་རིམ་གྱིས་འབྱུང་ཞིང༌། དེའི་འོག་ཏུ། བདེན་དང་བདེན་ལ་བཟོད་པ་དང༌། །ཞེས་སོགས་ལྟར་བདེན་བཞིའི་གནས་ལུགས་མངོན་སུམ་དུ་མཐོང་བའི་མཐོང་ལམ་ཐོབ་ནས་དོན་དམ་པའི་ས་དང་པོ་རབ་ཏུ་དགའ་བ་ལ་འཇུག་ཅིང༌། མཐོང་ཟིན་གྱི་དོན་དེ་ཉིད་ཡང་དང་ཡང་དུ་གོམས་པས་དྲི་མ་མེད་པ་སོགས་ས་ལྷག་མ་རྣམས་ཀྱང་རིམ་གྱིས་བགྲོད་དེ་དྲི་མ་ཕྲ་མོ་རྣམས་ལམ་གཞན་གྱིས་ཀྱང་སྦྱངས་ནས་མཐར་གཙང་བདེ་རྟག་བདག་དམ་པའི་ཕར་ཕྱིན་བཞིས་བསྡུས་པ་འབྲས་བུ་ཆོས་ཀྱི་སྐུ་མངོན་དུ་བྱས་ཏེ་འཕྲིན་ལས་ལྷུན་གྱིས་གྲུབ་པའི་སྒོ་ནས་ལུས་ཅན་ཡོངས་ལ་ཕན་བདེའི་སྒོ་བརྒྱ་འབྱེད་པ་ཡིན་ནོ། །སྨྲས་པ། ལྷ་མིའི་

― GTD002_Page_0914 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོན་པ་ཤཱཀྱའི་རྒྱལ་བོ་དེས། །འགྲོ་བ་མ་རིག་གཉིད་ལས་སློང་བའི་ཕྱིར། །ཐར་པ་དམ་པའི་ལྡིང་ཁང་རྩེ་མོ་ནས། །བདེན་བཞིའི་ཆོས་ཀྱི་རྔ་སྒྲ་དང་པོར་བསྒྲགས། །དེ་སླད་གང་ཞིག་སྡུག་ཀུན་འགོག་ལམ་ཞེས། །བགྲང་བ་ཙམ་གྱིས་མི་ངོམས་འཇུག་ལྡོག་ཚུལ། །ཤེས་འདོད་སྐྱེ་བོ་ཡོད་ན་སྒྲོན་མ་འདི། །བཟུང་སྟེ་ཐར་པའི་ལམ་བཟང་བསྟེན་པར་རིགས། །འདིར་འབད་ལས་བྱུང་ལེགས་བྱས་གངྒཱ་མ། །རྣམ་དཀར་ཀླུང་ཕྲན་སྟོང་དང་བཅས་པ་དེས། །དུག་ཅན་འགྲོ་བློའི་དྲི་མ་རབ་སྦྱངས་ནས། །མཐར་ཐུག་བྱང་ཆེན་རྒྱ་མཚོར་འཇུག་གྱུར་ཅིག། །ཅེས་བདེན་བཞིའི་རྣམ་གཞག་ཐར་འདོད་འཇུག་ངོགས་མཁས་པའི་དགའ་སྟོན་ཞེས་བྱ་བ་འདི་ནི་དལ་འབྱོར་དོན་ལྡན་དུ་བགྱིད་པའི་ཐབས་ཚུལ་ལ་གཅིག་ཏུ་གཞོལ་བ་རང་གི་གམ་བཅར་དཀའ་བཅུ་བ་ངག་དབང་མཆོག་ལྡན་གྱིས་སྔ་མོ་ནས་འདི་ལྟ་བུ་ཞིག་བྲི་དགོས་ཞེས་ཡང་ཡང་བསྐུལ་བར་བརྟེན་ཆོས་སྨྲ་བ་དཀོན་མཆོག་བསྟན་པའི་སྒྲོན་མེས་རང་ལོ་ཉེར་དྲུག་པ་ལ་ཆོས་གྲྭ་ཆེན་པོ་བཀྲ་ཤིས་འཁྱིལ་གྱི་ཉེ་འདབས་དབེན་གནས་ཡིད་དགའ་ཆོས་འཛིན་དུ་བྲིས་པའོ། །འདིས་ཀྱང་འཇམ་མགོན་བསྟན་པའི་སྙིང་པོ་ཕྱོགས་དུས་ཀུན་ཏུ་རྒྱས་པར་གྱུར་ཅིག།། །