གུང་ཐང་དཀོན་མཆོག་བསྟན་པའི་སྒྲོན་མེའི་གསུང་འབུམ།

གུང་ཐང་དཀོན་མཆོག་བསྟན་པའི་སྒྲོན་མེའི་གསུང་འབུམ།

གླེགས་བམ་གསུམ་པ།

གུང་ཐང་དཀོན་མཆོག་བསྟན་པའི་སྒྲོན་མེ།

Nitartha International

Images scanned by BDRC

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཀར་ཆག

― GTD003_Page_0001 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བླ་མ་དམ་པ་གུང་ཐང་འཇམ་པའི་དབྱངས་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་གསུང་འབུམ་ག་བའི་དཀར་ཆག་བཞུགས་སོ།།

― GTD003_Page_0002 ―

^{[མ་དཔེ་གཟིགས་ན་འདིར་གནོན།]}

[Full Size]

དཀོན་མཆོག་ཐུགས་རྗེའི་བདག་ཉིད་ཟླ་ཤེལ་ཁམས། །མདོ་སྔགས་བསྟན་པའི་ཀུནྡ་བཞད་པའི་གཉེན། །ཀུན་རྨོངས་མུན་པ་སེལ་བའི་སྒྲོན་མེ་མཆོག །རྗེ་བཙུན་བླ་མ་གང་དེ་གཙུག་ན་མཆོད། །བརྒྱད་ཁྲི་བཞི་སྟོང་གསུང་རབ་གངྒཱའི་ཀླུང་། །རྣམ་དཔྱོད་ཧུབ་ཀྱིས་དྲངས་ནས་སླར་སྐྱུགས་པས། །འགྲོ་རྒྱུད་ལས་ཉོན་དྲི་འཁྱུད་ཛ་ཧུ་ན། །འཇམ་མགོན་དྲིན་ལས་ལམ་རིམ་མཆོག་འདི་བསྔགས། །༧རྗེ་བཙུན་བླ་མ་དམ་པ་འཇམ་པའི་དབྱངས་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་གསུང་འབུམ་ ༼ག༽ པ་ལ། རྟེན་འབྲེལ་གྱི་རྣམ་བཞག་ལུང་རིགས་བང་མཛོད་ལ་གྲངས། ༣༤ རྣམ་ཐར་སྒོ་གསུམ་གྱི་རྣམ་པར་བཞག་པ་ལེགས་བཤད་རྒྱ་མཚོའི་རྦ་རླབས་ལ། ༡༡ དམིགས་པ་བརྟག་པའི་འགྲེལ་པ་ཕྱོགས་གླང་དགོངས་རྒྱན་ལ། ༥ རིགས་ལམ་འཕྲུལ་གྱི་ལྡེ་མིག་ལ། ༡༡ གྲུབ་མཐའ་བཞིའི་འདོད་ཚུལ་སོགས་དྲིས་ལན་སྣ་ཚོགས་ཀྱི་སྐོར་ཞལ་ལུང་བདུད་རྩིའི་ཐིགས་ཕྲེང་ལ། ༢༢ བསྔོ་བའི་རྒྱལ་པོ་བསྟན་འབར་མའི་དགོངས་དོན་རྒྱ་ཆེར་འགྲེལ་པ་ལེགས་བཤད་བསྟན་པའི་སྒྲོན་མེ་ལ། ༥༡ བསྟན་པའི་འཇུག་སྒོ་སྐྱབས་འགྲོའི་ཁྲིད་ཡིག་ཕན་བདེའི་ལམ་བཟང་གསལ་བའི་སྒྲོན་མེ་ལ། ༢༡ བྱང་ཆུབ་ལམ་གྱི་རིམ་པའི་སྔོན་འགྲོ་སྦྱོར་བའི་ཆོས་དྲུག་ལག་ཏུ་ལེན་ཚུལ་གསལ་བར་བཀོད་པ་ལམ་བཟང་སྒྲུབ་པའི་འཇུག་ངོགས་ལ། ༡༩ ལམ་རིམ་བདེ་ལམ་གྱི་བརྒྱུད་འདེབས་ལ། ༡ ཡོངས་འཛིན་

― GTD003_Page_0003 ―

^{[མ་དཔེ་གཟིགས་ན་འདིར་གནོན།]}

[Full Size]

རིན་པོ་ཆེ་ཡེ་ཤེས་རྒྱལ་མཚན་ནས་བདེ་ལམ་གྱི་ཁྲིད་གནང་བ་རྗེ་བཙུན་དཀོན་མཆོག་བསྟན་པའི་སྒྲོན་མེ་དཔལ་བཟང་པོས་ཟིན་བྲིས་གནང་བ་གདུང་སེལ་བདུད་རྩིའི་ཐིགས་པ་ལ། ༦༨ བྱང་ཆུབ་བདེ་ལམ་གྱི་དམིགས་སྐོར་ཆ་ཚང་བར་ཚིགས་བཅད་དུ་བསྡེབས་པ་ལམ་མཆོག་སྙིང་པོ་ལ། ༨ བདག་གཞན་མཉམ་བརྗེ་བསྒོམ་ཚུལ་ལ། ༦ ཟབ་མོ་ལྟ་བའི་ཟིན་བྲིས་ཐར་ལམ་སྣང་བ་ལ། ༢༢ དགེ་ལྡན་ཕྱག་རྒྱ་ཆེན་པོའི་ཟིན་བྲིས་ཞལ་ལུང་བདུད་རྩིའི་ཐིགས་ཕྲེང་ལ། ༢༩ བྱང་ཆུབ་ཀྱི་སེམས་གཉིས་བསྒོམ་ཚུལ་ཐེག་པ་མཆོག་གི་འཇུག་ངོགས་ལ། ༡༠ ལམ་གྱི་གཙོ་བོ་རྣམ་གསུམ་རྩ་ཚིག་གི་སྟེང་ནས་གཞུང་བསྲངས་ཏེ་ཉམས་སུ་ལེན་ཚུལ་ལ། ༥ བླ་མའི་རྣལ་འབྱོར་དགའ་ལྡན་ལྷ་བརྒྱའི་ཁྲིད་ཀྱི་ཟིན་བྲིས་ལ། ༡༠ ཟབ་ལམ་བླ་མའི་རྣལ་འབྱོར་དགའ་ལྡན་ལྷ་རྒྱའི་ཟབ་གནད་ཡོངས་སུ་རྫོགས་པ་ཐོ་ཙམ་དུ་བཀོད་པ་ལ། ༨ དགའ་ལྡན་ལྷ་རྒྱ་མའི་གཞུང་བསྲངས་ཏེ་མདོ་སྔགས་ཆ་ཚང་བར་ཉམས་སུ་ལེན་ཚུལ་དགའ་ལྡན་ཞིང་དུ་བགྲོད་པའི་ནོར་བུའི་ཐེམ་སྐས་ལ། ༡༡ རྗེ་བཙུན་བྱམས་པ་མགོན་པོ་ལ་བརྟེན་པའི་འཕོ་བའི་རྣམ་པར་་བཞག་པ་དགའ་ལྡན་ཞིང་དུ་བགྲོད་པའི་བདེ་ལམ་ལ། ༡༣ སྲང་རྒྱུད་ལུགས་ཀྱི་འཕོ་བའི་གདམས་པའི་ངག་འདོན་ཁྲིགས་ཆགས་སུ་བསྡེབས་པ་ལ། ༣ ཟབ་ལམ་བླ་མའི་རྣལ་འབྱོར་གྱི་མན་ངག་སྙིང་པོའི་རྩ་ཚིག་གི་འགྲེལ་པ་སྙན་བརྒྱུད་

― GTD003_Page_0004 ―

^{[མ་དཔེ་གཟིགས་ན་འདིར་གནོན།]}

[Full Size]

གསང་བའི་ལྡེ་མིག་ལ། ༣༩ གསང་བདེ་འཇིགས་གསུམ་སོགས་ལྷག་ལྷ་དུ་མ་དང་འབྲེལ་བའི་བླ་མའི་རྣལ་འབྱོར་དངོས་གྲུབ་ཀུན་འབྱུང་ལ། ༤༢ མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཞིང་མཆོག་སྒོ་འབྱེད་རྩ་བའི་བླ་མ་དང་རྗེ་བླ་མ་དབྱེར་མེད་ཀྱི་བླ་མའི་རྣལ་འབྱོར། ཀུན་མཁྱེན་བླ་མའི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར། ཟབ་ལམ་བླ་མའི་འབྱོར། བླ་མགོན་དབྱེར་མེད་ཀྱི་བླ་མའི་རྣལ་འབྱོར་གཉིས། མགོན་པོ་གྲིབ་སེལ་ལ་བརྟེན་པའི་བླ་མའི་རྣལ་འབྱོར་བཅས་ལ། ༡༥ དཀར་ཆག་ལ་ ༢ བཅས་ཁྱོན་ཤོག་གྲངས། ༤༦༦ བཞུགས། སརྦ་མངྒ་ལཾ།། །།

རྟེན་འབྲེལ་གྱི་རྣམ་བཞག་ལུང་རིགས་བང་མཛོད།

― GTD003_Page_0005 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་འབྲེལ་གྱི་རྣམ་བཞག་ལུང་རིགས་བང་མཛོད་ཅེས་བྱ་བ་བཞུགས་སོ། །

― GTD003_Page_0006 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་མཉྫུ་གྷོ་ཥཱ་ཡ། སྲིད་གསུམ་འཛིན་མའི་ཁྱོན་ལས་རབ་འཕགས་ཀྱང། །ཞི་བའི་མཁའ་ལ་ཞེན་པའི་གནས་མེད་པ། །སྐྱེ་དགུའི་མགོན་དུ་བརྩེ་བའི་ལྡིང་འཁོར་མཁན། །མི་བསྐྱོད་དགྱེས་བཞད་རྡོ་རྗེ་གཙུག་གིས་མཆོད། །གཏི་མུག་མུན་སེལ་གློག་འཕྲེང་དྲ་བ་ཅན། །མཐར་འཛིན་འཆིང་བརྒྱ་གཅོད་པའི་རལ་གྲི་ཆེ། །རྟེན་འབྱུང་སྟོང་པར་གཟིགས་པའི་མཉམ་ཉིད་བློ། །དམར་སེར་འོད་དུ་འབར་བ་དེ་ལ་འདུད། །འཇམ་དབྱངས་མཁྱེན་པ་ཟླ་ཤེལ་བདུད་རྩིའི་གཉེན། །གཞུང་ལུགས་གདེངས་ཅན་བྱེ་བ་རོལ་པའི་གནས། །རིགས་ལམ་ཆུ་བོའི་འཁྲི་ཤིང་རོལ་གར་ཅན། །ལེགས་བཤད་རྒྱ་ཚོའི་དགའ་སྟོན་དེང་འདིར་སྤེལ། །སྨག་རུམ་གློག་ལྟར་གཡོ་བའི་ཚེ་འདི་སླ། །འབྱོར་ཡང་མི་རིང་དྲན་པའི་ཡུལ་དུ་འགྱུར། །བརྣག་

― GTD003_Page_0007 ―

^{[མ་དཔེ་གཟིགས་ན་འདིར་གནོན།]}

[Full Size]

དཀའ་ཕྱི་མའི་མཐའ་དེ་རྒྱང་རིང་བས། །རྣམ་གྲོལ་ཕྱིར་ནི་ཐོས་པས་འདིར་ཞུགས་ཤིག། །འདིར་ཞི་བ་མཆོག་གི་སྒོ་གཅིག་པུ་སྟོང་པའི་དེ་ཉིད་མཐའ་བྲལ་རྟེན་འབྱུང་གི་དཀའ་གནད་བསྡུས་ཏེ་འཆད་པ་ལ། འཕྲོས་སྦྱོར་མཐའ་དཔྱད་པ་གསུམ། དང་པོ་ནི། དེ་ནས་སེང་གེ་རྣམ་བསྒྱིངས་ཞེས་སོགས་རྐང་པ་གཉིས་ལས་འཕྲོས། འཕྲོས་ཚུལ་ནི་སྤྱིར་སེང་གེ་རྣམ་བསྒྱིངས་ལ་མཐོང་རྩེ་ལ་དབང་བའི་ཕྱིར་བསྒོམ་པ་དང་། ཐོད་རྒལ་སྦྱོར་བའི་དེ་གཉིས་ཡོད་ཅིང། དེའི་ཐོད་རྒལ་ལ་ས་གཉིས་པ་ནས་འཇུག་པར་གསེར་འཕྲེང་དང། དྲུག་པ་ནས་འཇུག་པར་རྣམ་བཤད་གསུངས་སོ། །དྲུག་ཚན་དྲུག་གི་མཐོང་རྩེ་ཡང་དང་པོའི་སེང་གེ་རྣམ་བསྒྱིངས་ཡིན་མོད་ཀྱི། འདིར་མཐོང་སྤང་གི་འཇིགས་པ་ཟད་པར་སྤང་བའི་དབང་དུ་བྱས་ཏེ་བར་ཆད་མེད་ལམ་

― GTD003_Page_0008 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོགས་ནས། སེང་གེ་རྣམ་བསྒྱིངས་ཞེས་བྱ་བ་མཐོང་ལམ་རྣམ་གྲོལ་ལམ་ལ་འཇུག་ཅིང་། དེའི་རྗེས་ཐོབ་ཏུ་ཀུན་བྱང་གི་རྟེན་འབྲེལ་ཕྲུགས་བཞིར་བསྒོམ་ཚུལ་འཆད་པར། རྟེན་ཅིང་འབྲེལ་འབྱུང་ཞེས་སོགས་ཀྱི་གཞུང་འདི་བྱུང་བའི་ཕྱིར། འདི་ལ་གསེར་འཕྲེང་ལས། འདིའི་རྗེས་ཐོབ་སྒོམ་ལམ་དུ་ཤེར་སྒྲོན་ལས་བཤད་པ་གཞུང་གཞན་དང་མཐུན་ནོ། །ཞེས་གསུངས་པ་ཡང་གཞན་དང་མཐུན་པར་བཤད་ཙམ་ཡིན་གྱི་རང་ལུགས་མཛད་པ་མིན་ཏེ། རྣམ་བཤད་ལས། འདིར་བཤད་པ་ནི་བྱང་ཆུབ་སེམས་དཔའི་རྒྱུད་ལ་བསྐྱེད་པར་བྱ་བ་ཤེས་མཐོང་གིས་བལྟས་ནས་འདའ་བར་བྱ་བའི་མཐོང་ལམ་དེ་ཉིད་བཤད་པ་ཡིན་ནོ། །ཞེས་གསུངས་པའི་ཕྱིར། འགྲེལ་པར། དེ་ཉིད་ཡང་དང་ཡང་དུ་སྒོམ་པར་བྱེད་དོ་ཞེས་པའི་དོན་ཡང་རྟེན་འབྲེལ་མཉམ་རྗེས་གཉིས་ཀར་བསྒོམ་བའི་དོན་མིན་གྱི། མཐོང་རྩེ་དེ་ཉིད་མཉམ་གཞག་ཏུ་དོན་དམ་ལ་རྟོག་པའི་སྒོ་ནས་བསྒོམ་པར་མ་ཟད། རྗེས་ཐོབ་ཏུ་རྟེན་འབྲེལ་ལ་རྟོག་པའི་སྒོ་ནས་བསྒོམ་པར་གསུངས་པ་ཡིན་པའི་ཕྱིར། གཉིས་པ་སྦྱོར་བ་ནི། བྱང་སེམས་མཐོང་ལམ་པ་ཆོས་ཅན། ཁྱོད་ཀྱིས་རྟེན་འབྲེལ་སྒོམ་ཚུལ་ཡོད་དེ། མ་རིག་པའི་རྐྱེན་གྱིས་འདུ་བྱེད་འབྱུང་བ་སོགས་ལུགས་འབྱུང་དང་། རྒ་ཤི་སྐྱེ་བ་ལས་བྱུང་བ་སོགས་ལུགས་ལྡོག་སྟེ་ཀུན་ཉོན་

― GTD003_Page_0009 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་གཉིས་དང། གཉེན་པོ་འཕགས་ལམ་སྐྱེས་པ་ན་ཐོག་མའི་མ་རིག་པ་མི་འབྱུང་བས། དེས་བསྐྱེད་པའི་ལས་གསར་བསགས་མི་འབྱུང་ཞིང། དེ་ལ་བརྟེན་པའི་ཡན་ལག་ལྷག་མ་རྣམས་མི་འགྲུབ་པ་ལུགས་འབྱུང་དང། དེ་དག་གི་ཕྱི་མ་ཕྱི་མ་སྔ་མ་ལ་རག་ལས་པ་རྣམ་བྱང་གི་ལུགས་ལྡོག་སྟེ་བཞིར་བསྒོམ་པའི་ཕྱིར། བསྒོམ་ཚུལ་དེར་མ་ངེས་ཏེ། དྲི་བ་ལྷག་བསམ་རབ་དཀར་དང། ལམ་རིམ་ལྟར་ཆུང་ངུ་དངོས་སམ་ཐུན་མོང་བ་ལ་བློ་སྦྱོང་སྐབས་ངན་འགྲོའི་སྡུག་བསྔལ་སྤོང་བའི་ཕྱིར་དུ། ཡན་ལག་དང་པོ་ལས་འབྲས་ལ་རྨོངས་པའི་མ་རིག་པའི་དབང་གིས་བསོད་ནམས་མ་ཡིན་པ་གསོག་ཚུལ་སོགས་དེའི་ཡན་ལག་བཅུ་གཉིས། འབྲིང་གིས་བདག་ཏུ་ཞེན་པའི་མ་རིག་པའི་དབང་གིས་རང་འཁོར་བར་འཁོར་ཚུལ་དང། ཆེན་པོས་སེམས་ཅན་ཐམས་ཅད་ཡན་ལག་བཅུ་གཉིས་ཀྱི་སྒོ་ནས་འཁོར་ཚུལ་བསམ་སྟེ་སྙིང་རྗེ་བསྐྱེད་པ་འཇུག་པ་ལྟར་ཡིན་པའི་ཕྱིར། འདིས་ཐེག་པ་གསུམ་དང་འབྲེལ་བའི་སྒོམ་ཚུལ་ཡང་ཤེས་སླ། དོན་དམ་དང་ཀུན་རྫོབ་པའི་དབང་དུ་བྱས་པའི་སྒོམ་ཚུལ་ཡང་ས་ལུ་ལྗང་པའི་མདོ་ལས། སུས་རྟེན་ཅིང་འབྲེལ་བར་འབྱུང་བ་རྟག་པ་དང་། སྲོག་མེད་པ་ཞེས་སོགས་ཀྱིས་གསུངས་ཤིང། ཁ་ཅིག་སྔ་མ་ཐ་སྙད་

― GTD003_Page_0010 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྲ་མོ་ལ་སྦྱོར་བ་མི་རིགས་ཏེ། དེ་རྒྱས་པར་བསྒོམ་ན་ཆད་མཐར་འགྲོ་བས་མཐའ་གཉིས་སེལ་བ་ལ་གཉིས་ཀ་དགོས་པར་ཀ་ཤིས་བཤད་པས་སོ། །ཨ་བྷྱས་མ་རིག་པ་འགག་པས་འདུ་བྱེད་འགག་པ་སོགས་ཀུན་ཉོན་ལུགས་ལྡོག་ཏུ་བཤད་པ་ལ་དགོངས་ཚོད་རྣམ་བྱང་ལུགས་མཐུན་དུ་འགྲོ་བས་གསེར་འཕྲེང་ལས་བཀག་ཅིང། སྒྲས་ཟིན་ཡང་མི་རུང་སྟེ། རང་རྒྱུ་རང་འབྲས་ཀྱི་དབང་དུ་བྱས་ན་རྒྱུ་འགག་མ་ཐག་འབྲས་བུ་སྐྱེ་བར་བཤད་པ་དང་འགལ་ལ། འགག་པའི་དོན་སྤངས་པ་ལ་བྱེད་ན་མི་རིགས་ཏེ། འཕང་འབྲས་རྣམས་སྲིད་སོགས་ཀྱི་རྗེས་སུ་སྤང་དགོས་པའི་ཕྱིར། དེ་ལ་རྣམ་བྱང་གི་ཡན་ལག་བཅུ་གཉིས་མི་འགལ་ཏེ། འདི་སྔར་ཡོད་འགག་པ་ལ་མི་བྱེད་པའི་ཕྱིར། འཕགས་པ་ཐམས་ཅད་དེ་ཡིན་ནོ། །འོན་ཀྱང་རྣམ་བྱང་གི་རྟེན་འབྲེལ་དེའི་ཡན་ལག་བཅུ་གཉིས་གང་རུང་མི་དགོས་ཏེ། ཉན་ཐོས་ཚོགས་ལམ་དེ་ཡིན་པའི་ཕྱིར། ཀུན་ཉོན་ལ་ཡང་རིགས་འདྲ། དེ་ལྟར་སྒོམ་ཚུལ་བཞིར་ཕྱེ་བ་ཡང། སྐྱེ་རྒ་གཉིས་སྡུག་བདེན་གྱི་གཙོ་བོ་ཡིན་པས་འབྲས་བུའི་ཆ་ནས་ལུགས་ལྡོག་གཉིས་ཀྱིས་སྡུག་བདེན་དང་འགོག་བདེན། གཞན་གཉིས་ཀྱི་རྒྱུའི་ཆ་ནས་སེམས་པ་ཀུན་འབྱུང་དང་ལམ་ལ་མཁས་ཆེད་ཡིན་པའི་ཕྱིར། སའི་དངོས་གཞི་ལས། ཅིའི་ཕྱིར་རྟེན་ཅིང་འབྲེལ་པར་འབྱུང་བ་རྒ་ཤི་ནས་བཟུང་སྟེ་ལུགས་ལས་བཟློག་པའི་གོ་རིམ་དུ་བསྟན་ཅེ་ན། བདེན་པའི་ཚུལ་བསྟན་པའི་དབང་དུ་བྱས་ཏེ། འདི་ལྟར་སྐྱེ་བ་དང་རྒ་ཤི་ནི་སྡུག་བསྔལ་

― GTD003_Page_0011 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་བདེན་པས་རབ་ཏུ་ཕྱེ་བ་ཡིན་ནོ། །ཞེས་གསུངས་པའི་ཕྱིར། ལུང་འདིའི་དོན་དུ་བསམས་ཏེ། ཀུན་བཏུས་འགྲེལ་བར། རྒ་ཤི། རྒ་ཤི་ཀུན་འབྱུང། རྒ་ཤི་འགོག་པ། རྒ་ཤི་འགོག་པ་དེར་འགྲོ་བའི་ལམ། ཞེས་རྒ་ཤི་གཅིག་པུ་ཡང་བདེན་བཞིར་སྦྱར་བ་གཞུང་གི་དགོངས་པ་མིན་ནོ། །གསུམ་པ་མཐའ་དཔྱད་པ་ལ། རྟེན་འབྲེལ་གྱི་རྣམ་བཞག་སྤྱིར་བསྟན་པ་དང་། ཀུན་ཉོན་ཕྱོགས་ཀྱི་རྟེན་འབྲེལ་བྱེ་བྲག་ཏུ་བཤད་པ་གཉིས། དང་པོ་ལ་མཚན་ཉིད། དབྱེ་བ། འདོད་ཚུལ་གསུམ། དང་པོ་ནི། རང་གི་འདོགས་བྱེད་ལ་ལྟོས་ནས་གྲུབ་པ་རྟེན་འབྱུང་གི་མཚན་ཉིད་ཡིན་ཏེ། རྟེན་འབྱུང་གི་སྐད་དོད་པྲ་ཏཱི་ཏྱ་ས་མུདྤཱ་དཿ ཞེས་འབྱུང་བས་པྲ་ཏཱི་ཞེས་པ་ཉེར་བསྒྱུར་གྱི་དབང་གིས་དུ་མར་འཇུག་སྟེ། པྲ་ཏྲི་མོ་ཀྵ་ཞེས་པའི་སྐབས་སུ་ཟློས་པའམ་སོ་སོ་ལ་འཇུག་པས་སོ་སོ་ཐར་པར་བསྒྱུར་བ་དང་། དེ་བཞིན་དུ་ཧ་ར་དང་ཕྲད་ན་མཆོད་པ། བནྡྷ་དང་ཕྲད་ན་འབྲེལ་བ་ལ་འཇུག་ཅིང་། འདིར་ཨི་ཏི་དང་ཕྲད་པས་ཕྲད་ལྟོས་རྟེན་འབྲེལ་གསུམ་ལ་འཇུག་པའི་ཕྱིར། ས་མུདྤཱ་དཿ འབྱུང་བ་སྟེ་གྲུབ་པ་དང་འདུས་བྱས་ལ་སྦྱར་ན་སྐྱེ་བ་ལ་ཡང་འཇུག་ཅིང། དེ་མ་བསྣན་ན་རྟེན་འབྱུང་གི་དོན་མི་རྫོགས་པས། ཁ་ཅིག་རང་གི་ཆ་ཤས་ལ་ལྟོས་ནས་གྲུབ་པ་རྟེན་འབྲེལ་གྱི་མཚན་ཉིད་དུ་འདོད་པ་ནི་འདུས་བྱས་ཀྱི་མཚན་ཉིད་འདུ་བའི་མཚན་ཉིད་དུ་བཞག་པ་དང་འདྲ་སྟེ། རྟེན་འབྲེལ་ཞེས་པ་རྟེན་འབྱུང་ཞེས་པའི་ཟུར་གཅིག་ཡིན་པའི་ཕྱིར།

― GTD003_Page_0012 ―

^{[མ་དཔེ་གཟིགས་ན་འདིར་གནོན།]}

[Full Size]

གལ་ཏེ་སྤྱིའི་དོན་ཕྱོགས་རེ་ལ་སྦྱར་ཆོག་ན་ཕྲད་ལྟོས་གཉིས་ཀྱང་དེ་དང་འདྲ་བས་དེ་ལྟར་སྦྱོར་དགོས་ལ། དེ་ནི་སྣང་མུན་དང་ཚེ་སྔ་ཕྱི་དང་ལྷན་ཅིག་གནས་པའི་རྟ་གླང་སོགས་ཀྱིས་མ་ངེས་པས། རྣམ་གྲངས་ཡིན་ཀྱང་དོན་གཅིག་ཡིན་མི་དགོས་སོ། །སྔོན་གྱི་སློབ་དཔོན་ཁ་ཅིག །པྲ་ཏཱི་ཟློས་སྒྲར་བྱས་ནས་རྒྱུ་སོ་སོ་ལས་སོ་སོར་འབྱུང་བ་ལ་བཤད་ཀྱང་གཞི་གཅིག་ལ་སྦྱར་དུ་མེད་པས་རང་ལུགས་ནི་གཟུགས་སོགས་རྒྱུ་ལ་བརྟེན་ཅིང་སྐྱེ་འགག་མཉམ་པའི་ཚུལ་གྱིས་འབྲེལ་བར་འབྱུང་བ་ལ་གསུངས་ཏེ། ཞིབ་པར་ཀུན་མཁྱེན་བླ་མའི་གསུང་ལ་བལྟའོ། །གཉིས་པ་དབྱེ་བ་ལ། འདུས་མ་བྱས་དང། འདུས་བྱས་རྟེན་འབྱུང་གཉིས། རང་རྒྱུ་ལ་མ་བརྟེན་ཀྱང་འདོགས་བྱེད་ལ་ལྟོས་ནས་གྲུབ་པ་སྔ་མའི་མཚན་ཉིད། རྐྱེན་གསུམ་ལ་བརྟེན་ནས་བྱུང་བ་ཕྱི་མའི་མཚན་ཉིད། རྐྱེན་གསུམ་ནི། རྣམ་པར་འབྱེད་པའི་མདོ་ལས། འདི་ཡོད་པས་འདི་འབྱུང་། འདི་སྐྱེས་པའི་ཕྱིར་འདི་སྐྱེ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད། ཅེས་སོགས་ཀྱིས་གསུངས་པའི་དོན་ཀུན་བཏུས་ལས། མཚན་ཉིད་ཇི་ལྟ་བུ་ཞེ་ན། གཡོ་བ་མེད་པའི་རྐྱེན་ལས་བྱུང་བ་དང། མི་རྟག་པའི་རྐྱེན་ལས་བྱུང་བ་དང། ནུས་པའི་རྐྱེན་ལས་བྱུང་བའི་ཕྱིར་རོ། །ཞེས་པའི་ཚིག་གསུམ་གྱིས་རིམ་པར་བཀྲལ་ཏེ། ཚངས་པ་དང་། དབང་ཕྱུག་དང། ཁྱབ་འཇུག་པ་ལྟར། ལྷ་དེ་དག་གི་བློའི་གཡོ་བ་ལས་བྱུང་བར་ལྟ་བ་བཟློག་པའི་ཕྱིར་དུ། སྤྱིར་རྒྱུ་རྐྱེན་ཡོད་པ་ཙམ་གྱིས་འབྲས་བུ་འབྱུང་བ་ཡིན་པས།

― GTD003_Page_0013 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་སྔོན་དུ་བཏང་ནས་རང་དགར་བྱེད་པ་པོ་གཞན་མེད་ཅེས་གཡོ་བ་མེད་པའི་རྐྱེན་བསྟན། དེ་དག་གིས་ལྷ་རྟག་པ་དང་། གྲངས་ཅན་གྱིས་རྩ་བའི་རང་བཞིན་ལས་སྐྱེ་བར་འདོད་པ་འགོག་པའི་ཕྱིར་མི་རྟག་པའི་རྐྱེན་བསྟན་ཏེ། རྐྱེན་ཡིན་ན་རང་ཉིད་ཀྱང་རྒྱུ་ལས་གློ་བུར་དུ་སྐྱེས་ཤིང་དུས་གཉིས་པར་འགག་ནས་འབྲས་བུ་འབྱིན་པ་དགོས་ཀྱི། རྟག་པ་ཡིན་ན་འབྲས་བུ་རྟག་ཏུ་སྐྱེད་པའམ་འབྲས་བུ་ལ་སྐབས་མི་འབྱེད་པའི་ཕྱིར་རོ། །རྒྱང་ཕན་གྱིས་རྒྱུ་མེད་དང་བྲམ་ཟེ་མང་པོས་རྒྱུ་འབྲས་འཆོལ་བར་སྨྲ་བ་དགག་པའི་དོན་དུ་རྒྱུ་གང་ཡིན་ལས་འབྲས་བུ་ཐམས་ཅད་མི་འབྱུང་སྟེ། འདུ་བྱེད་མ་རིག་པ་ལས་འབྱུང་བ་ལྟ་བུ་རང་སྐྱེད་པའི་ནུས་པ་དང་ལྡན་པའི་རྗེས་སུ་མཐུན་པའི་རྒྱུ་ཞིག་གིས་སྐྱེད་དགོས་ཞེས་ནུས་པའི་རྐྱེན་བསྟན་པའི་ཕྱིར། མདོ་འདིའི་དོན་མཛོད་འགྲེལ་ལས། མ་རིག་པ་ཡོད་ན་འདུ་བྱེད་འབྱུང་དེ་ལས་ལྷག་མ་རྣམས་སྐྱེ་བའི་ཡན་ལག་བརྒྱུད་པ་དང་། སྔོན་མཐའི་གཉིས་ལས་བར་གྱི་བརྒྱད་འབྱུང་ཞིང་དེ་ལས་ཕྱི་མཐའི་གཉིས་སྐྱེ་བ་ཚེ་བརྒྱུད་པ་དང་། མ་རིག་པ་ལས་འདུ་བྱེད་དངོས་སུ་འབྱུང་ཞིང་ལྷག་མ་བརྒྱུད་ནས་སྐྱེ་བ་རྐྱེན་བྱེད་ཚུལ་ལ་སྦྱར་བ་སྟེ་གསུམ་བཤད་ཀྱང་གསུམ་ག་མི་འཐད་དེ། མ་རིག་པའི་རྐྱེན་གྱིས་འདུ་བྱེད་ཅེས་སོགས་དང་ཟློས་ཤིང་ཕྱིའི་རྟེན་འབྱུང་ལ་སྦྱར་དུ་མེད་པའི་ཕྱིར་རོ། །སའི་དངོས་གཞིར་མ་རིག་པའི་ས་བོན་ཡོད་ན་མངོན་གྱུར་ཀྱང་འབྱུང་ལ། དེ་སྐྱེས་ན་ལས་ཀྱང་སྐྱེ་བ་ལ་སྦྱར་རོ། །ས་ལུ་ལྗང་བའི་མདོར་ཕྱི་ནང་གི་རྟེན་འབྲེལ་རྣམས་

― GTD003_Page_0014 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་ཉིད་ལྔས་བཤད་དེ། རྒྱུ་མེད་པར་ལྟ་བ་བསལ་བའི་ཕྱིར་རྒྱུ་དང་བཅས་པ་ལས་འབྱུང་བའི་མཚན་ཉིད་དང། མི་མཐུན་པའི་རྒྱུ་རྟག་པ་རིལ་པོ་གཅིག་པུ་ལས་སྐྱེ་བ་འགོག་པའི་ཕྱིར་མི་རྟག་པ་དུ་མའི་རྒྱུ་ལས་འབྱུང་བའི་མཚན་ཉིད་དང་། བདག་ལྟ་འགོག་པའི་ཕྱིར་བདག་མེད་པར་འབྱུང་བའི་མཚན་ཉིད་དང། ནུས་མེད་རྟག་པ་ལས་སྐྱེ་བ་འགོག་པའི་ཕྱིར་ནུས་པའི་རྐྱེན་ལས་འབྱུང་བའི་མཚན་ཉིད་དང། དབང་ཕྱུག་སོགས་ཀྱི་གཡོ་བ་ལས་བྱུང་བ་འགོག་པའི་ཕྱིར་བྱ་བ་མེད་པའི་རྐྱེན་ལས་འབྱུང་བའི་མཚན་ཉིད་རྣམས་སུ་ཡོད་པའི་ཕྱིར། འོན་ཀྱང་དབང་ཕྱུག་གི་རྩོལ་བ་ལས་བྱུང་བ་ཡོད་པའི་ཞིབ་ཆ་དགོས་སོ། །དེ་དག་སྟོན་པར། ས་ལུ་ལྗང་བའི་མདོ་ལས། ཅིའི་ཕྱིར་རྟེན་ཅིང་འབྲེལ་བར་འབྱུང་བ་ཞེས་བྱ་ཞེ་ན། སྨྲས་པ། རྒྱུ་དང་བཅས་རྐྱེན་དང་བཅས་པ་ལ་བྱ་ཡི། རྒྱུ་མེད་རྐྱེན་མེད་པ་ལ་ནི་མ་ཡིན་ནོ། །ཞེས་སོགས་གསུངས་པའི་ཕྱིར། འདིར་ཡང་འདུས་བྱས་རྟེན་འབྱུང་གི་དབང་དུ་བྱས་པ་ཡིན་ཏེ། ལུགས་འདིར་གཞི་གྲུབ་ན་རྟེན་འབྱུང་ཡིན་པས་ཁྱབ་པའི་ཕྱིར། རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེའི་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར། གསུམ་པ་འདོད་ཚུལ་ནི། ལེགས་བཤད་སྙིང་པོ་ལས། ཕྱི་རོལ་པ་རྟེན་འབྲེལ་ཁས་མི་ལེན་པས་ཆོས་བདེན་གྲུབ་ཏུ་འདོད་པ་ཞེས་དང། རིགས་པ་དྲུག་ཅུ་པའི་འགྲེལ་པར། མུ་སྟེགས་ཅན་རྟེན་ཅིང་

― GTD003_Page_0015 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲེལ་བར་འབྱུང་བ་མ་ཡིན་པར་སྨྲ་བ་ཞེས་སོགས་ལྟར་གཞན་སྡེ་རྣམས་རྟེན་འབྲེལ་གྱི་དོན་མི་འདོད་ལ། དེར་མ་ཟད་ཐ་སྙད་ཙམ་ཡང་མི་འདོད་དེ། ཕྱི་རོལ་བརྡ་སྤྲོད་པས་རྩོད་ཚུལ་མཛོད་འགྲེལ་གནས་གསུམ་པ་ལས། གལ་ཏེ་འབྱུང་བའི་སྔོན་རོལ་ན། །ཕྲད་ན་མེད་ཕྱིར་རུང་མ་ཡིན། །ཞེས་མེད་པ་ཕྲད་པར་མི་རུང་ཞིང། ཡོད་པ་ཕྲད་རྗེས་འབྱུང་བ་མི་དགོས་པར་སྨྲ་བའི་ཕྱིར་རོ། །རང་སྡེ་དངོས་སྨྲ་བ་ནི། མཛོད་འགྲེལ་ལས། སྡེ་པ་གཞན་དག་ན་རེ། དེ་གཞིན་གཤེགས་པ་རྣམས་བྱུང་ཡང་རུང། མ་བྱུང་ཡང་རུང། ཆོས་འདི་ནི་གནས་པ་ཁོ་ནའོ། །ཞེས་པ་ལྟར་ཡོད་སྨྲ་བདུན་གྱི་ནང་ཚན་ས་སྟོན་སྡེ་པ་རྣམས་རྟེན་འབྲེལ་རྟག་པར་འདོད་ཀྱང། གཞན་ཐམས་ཅད་ཀྱིས་འདུས་བྱས་སུ་འདོད་པས་བདེན་མེད་སྒྲུབ་པ་ལ་འགལ་རྟགས་སུ་སྨྲའོ། །རྣམ་བྱང་ཕྱོགས་ཀྱི་རྟེན་འབྲེལ་ཞེས་པའི་ཐ་སྙད་ཙམ་ཞིག་འདོད་ཀྱང། རྟེན་འབྲེལ་གང་ཡིན་འབྲེལ་པ་ཅན་གྱི་རྟེན་འབྲེལ་དུ་འདོད་དེ། རྒྱུ་དང་འབྲས་བུ་འབྲེལ་བར་འབྱུང་བས་དེ་ལྟར་བརྗོད་པའི་ཕྱིར། བྱེ་སྨྲས་སྐད་ཅིག་མའི་རྟེན་འབྲེལ། གནས་སྐབས་པའི་རྟེན་འབྲེལ། རྒྱུན་ཆགས་པའི་རྟེན་འབྲེལ་གསུམ་བསྣན་ནས་བཞིར་བཤད་ལ། ཆོས་མངོན་པ་ལས་དེའི་སྟེང་དུ་སེམས་ཅན་ལ་སྟོན་མི་སྟོན་གཉིས་ཏེ་དྲུག་བཤད་དོ། །དང་པོ་ནི། ཤེས་པ་སྐད་ཅིག་མ་གཅིག་གི་སྐྱེ་འགག་གནས་གསུམ་གྱི་ཆ་ལ་རྫོགས་པར་འདོད་དེ། དཔེར་ན། ཆགས་པའི་དབང་གིས་སྲོག་གཅོད་

― GTD003_Page_0016 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དུས་ཀྱི་རྨོངས་པ་ནི་མ་རིག་པ། ལས་དེ་དང་མཉམ་དུ་འཇུག་པའི་སེམས་པ་དེ་འདུ་བྱེད། དེ་འཁོར་དུ་ལྡན་པའི་སེམས་དེ་རྣམ་ཤེས། ཕུང་པོ་གཞན་བཞི་ནི་མིང་གཟུགས། དབང་པོ་དྲུག་ནི་སྐྱེ་མཆེད། དེ་ཡུལ་དང་ཕྲད་པ་རེག་པ། དེ་ཉམས་སུ་མྱོང་བ་ཚོར་བ། དེའི་སྐབས་ཀྱི་ཆགས་པ་ནི་སྲེད་པ། དེ་དང་མཚུངས་ལྡན་གྱི་ངོ་ཚ་མེད་པ་སོགས་ལེན་པ། ལུས་ལས་དངོས་གཞི་ནི་སྲིད་པ། དེ་སྐྱེས་པ་སྐྱེ་བ། སྨིན་པ་དང་ཞིག་པ་རྒ་ཤིར་འདོད་པ་མཛོད་འགྲེལ་སོགས་དུ་མར་གསུངས་པས། སྐྱེ་རྒ་མ་གཏོགས་དུས་མཉམ་མོ། །ཁ་ཅིག །སྲོག་གཅོད་པ་ནི་འདུ་བྱེད་ཅེས་དང་། དེས་ཀུན་ནས་བསླངས་པའི་ཆགས་པ་ནི་ལེན་པ། ལས་དེ་ནུས་པ་མཐུ་ཅན་དུ་གྱུར་པ་སྲིད་པ་ཞེས་བཤད་པ་ནི་གོང་མའི་ཤན་ཞུགས་པའི་གཏམ་མོ། །གནས་སྐབས་པ་ནི། ཡན་ལག་དེ་དང་དེའི་སྐབས་ཀྱི་ཟག་བཅས་ཉེར་ལེན་གྱི་ཕུང་པོས་བསྡུས་པའི་གཟུགས་སོགས་ཕུང་པོ་ལྔ་ལ་འཇོག་སྟེ། འཁོར་ཡོད་ཀྱང་རྒྱལ་པོ་འབྱོན་ཞེས་གྲགས་པ་ལྟར་ཐོག་མའི་མ་རིག་པ་མངོན་དུ་གྱུར་དུས་ཀྱི་འཁོར་བས་བསྡུས་པའི་གཟུགས་སོགས་མ་རིག་པའི་རྟེན་འབྲེལ་དང་། གནས་སྐབས་ཀྱི་མ་རིག་པ་ལ་འཇོག་པའི་ཕྱིར། དེ་ཡང་དུས་གསུམ་ལ་རྨོངས་པ་བཟློག་པའི་ཕྱིར་དུ་ཚེ་གསུམ་ལ་སྦྱར་ཏེ། སྐྱེས་ནས་མྱོང་འགྱུར་གྱི་ལས་དབང་གིས་བླངས་པའི་མངལ་སྐྱེས་ཀྱི་ཚེ་ཡོངས་རྫོགས་གསུམ་ལ་འབྲས་བུ་གསུམ་རིམ་གྱིས་འཐོབ་པ་ལྟ་བུ་ལ་མཚོན་ན། རྒྱུན་ཞུགས་ཐོབ་པའི་རྟེན་ལ་རྒྱུན་ཞུགས་རང་ཉིད་སྐྱེ་བ་

― GTD003_Page_0017 ―

^{[མ་དཔེ་གཟིགས་ན་འདིར་གནོན།]}

[Full Size]

འཕེན་བྱེད་དང་ཚར་གཅིག་པའི་སྲེད་ལེན་སྲིད་པའི་རྟེན་འབྲེལ་གསུམ་འགྲུབ་དགོས་ཤིང། དེའི་དང་པོ་གཉིས་ཕྱིར་འོང་སྐྱེ་བ་འཕེན་བྱེད་དང་ཚར་གཅིག་པའི་མ་རིག་པའི་རྟེན་འབྲེལ་ཡིན་པས་ལུགས་འདིར་དེ་ལ་འཛིན་ཚུལ་ཡོད་མི་དགོས་ཏེ། ས་དེའི་མ་རིག་པ་སྲེད་པ་དང་མཚུངས་ལྡན་ལྟ་བུས་ཀྱང་ཐོག་མའི་མ་རིག་པ་བྱེད་པའི་ཕྱིར་དང། འཛིན་ཚུལ་ཅན་གྱི་ཉོན་མོངས་ནི་མཐོང་སྤང་ཡིན་ཞིང། འཕགས་པ་ལ་ཡང་འཕེན་བྱེད་ལས་གསར་བསགས་ཡོད་པའི་ཕྱིར། གསེར་ཕྲེང་ལས། འདི་ལ་མཛོད་པ་རྣམས་དེའི་རྒྱུད་ལ་གོང་མའི་ཉོན་མོངས་ཡོད་པས། ས་གོང་མའི་ཉོན་མོངས་གང་ཡོད་དེས་ཀུན་ནས་བསླངས་པའི་ལས་གསོག་པར་འདོད་ཀྱང། ཞེས་དང་། མཛོད་པ་ལྟར་ན། ས་དེ་དང་དེར་སྐྱེ་བའི་ཉོན་མོངས་མ་སྤངས་ན་འཕགས་པས་ཀྱང་དེས་ཀུན་ནས་བསླངས་པའི་ལས་འཕེན་པར་འདོད་པ་འདྲའོ། །ཞེས་གསུངས་པའི་ཕྱིར། སྲེད་ལེན་འདི་གཉིས་ལས་གསར་གསོག་གི་ཀུན་སློང་ཡིན་པས། གྲུབ་མཐའ་གོང་མ་ལྟར་སྔར་བསགས་ལ་གསོས་འདེབས་བྱེད་མིན་ཏེ། རྒྱུན་ཞུགས་ཀྱི་སྐྱེ་བ་བྱུང་ཟིན་ཅིང། ཕྱི་མ་འཕེན་བྱེད་ཀྱི་ལས་དེ་དུས་མ་གྲུབ་པའི་ཕྱིར་ཏེ། ཕྱི་མའི་འདུ་བྱེད་དེ་སྔ་མའི་སྲིད་པ་ཡིན་པའི་ཕྱིར། མཛོད་ལས། མ་རིག་ཉོན་མོངས་སྔོན་གནས་སྐབས། །འདུ་བྱེད་དག་ནི་སྔོན་ལས་ཀྱི། །ཞེས་གསུངས་པའི་ཕྱིར། དེ་ལྟར་ཚེ་དང་པོ་ལ་གཉིས་རྫོགས་ཤིང། བར་བ་ལ་བརྒྱད། ཕྱི་མ་ལ་གཉིས་འབྱུང་སྟེ། མཛོད་ལས།

― GTD003_Page_0018 ―

^{[མ་དཔེ་གཟིགས་ན་འདིར་གནོན།]}

[Full Size]

སྔོན་དང་ཕྱི་མཐར་གཉིས་གཉིས་དང། །བར་དུ་བརྒྱད་ཡོངས་རྫོགས་ལྡན་ལོ། །ཞེས་གསུངས་པས་སོ། །བར་བ་བརྒྱད་ཡོད་དེ། མཛོད་ལས། རྣམ་ཤེས་མཚམས་སྦྱོར་ཕུང་པོ་ཡིན། །མིང་དང་གཟུགས་ནི་དེ་ཕན་ཆད། །སྐྱེ་མཆེད་དྲུག་དོད་ཚུན་ཆད་དོ། །དེ་ནི་གསུམ་འདུས་ཚུན་ཆད་དོ། །རེག་པ་བདེ་སྡུག་ལ་སོགས་ཀྱི། །རྒྱུ་ཤེས་ནུས་པ་ཚུན་ཆད་དོ། །ཚོར་འཁྲིག་ཚུན་ཆད་སྲེད་པ་ནི། །ལོངས་སྤྱོད་འཁྲིག་པ་ཆགས་ཅན་གྱིས། །ཉེ་བར་ལེན་པ་ལོངས་སྤྱོད་རྣམས། །ཐོབ་པར་བྱ་ཕྱིར་ཡོངས་རྒྱུག་པ། །དེ་སྲིད་འབྲས་བུ་འབྱུང་འགྱུར་བའི། །ལས་བྱེད་དེ་ནི་སྲིད་པ་ཡིན། །ཞེས་པ་ལྟར་རོ། །ཚེ་གསུམ་པ་ཕྱིར་མི་འོང་གི་སྐྱེ་བ་དེར་ཉིང་མཚམས་སྦྱར་མ་ཐག་པའི་ཕུང་པོ་ལྔ་ཕྱིར་འོང་སྐྱེ་བ་འཕེན་བྱེད་དང་ཚར་གཅིག་ཀྱང་ཡིན། གསུམ་པ་རྣམ་ཤེས་ཀྱི་རྟེན་འབྲེལ་ཡང་ཡིན་མོད་ཀྱི། དེ་དང་ཚར་གཅིག་པའི་གསུམ་པར་མི་རུང་སྟེ། བཅུ་གཅིག་པ་ཡིན་པའི་ཕྱིར། དེ་བཞིན་དུ་ཕྱི་མའི་མིང་གཟུགས་ནས་ཚོར་བའི་བར་ཀྱང་ཚེ་བར་མའི་རྒ་ཤི་ཡིན་ཏེ། མཛོད་ལས། ཉིང་མཚམས་སྦྱོར་བ་སྐྱེ་བ་ཡིན། །ཚོར་བའི་བར་ནི་རྒ་ཤི་ཡིན། །ཞེས་གསུངས་པའི་ཕྱིར། དེ་ལྟར་ལས་རང་རང་དང་ཚར་གཅིག་པའི་སྲེད་ལེན་སོགས་ལས་དེས་རྣམ་སྨིན་འབྱིན་པའི་གྲོགས་སུ་མི་འོང་ཞིང་། སྐྱེ་རྒ་གཉིས་ཀྱང་ལས་དེའི་རྣམ་སྨིན་མ་ཡིན་པས། ཚར་གཅིག་པའི་ཡན་ལག་བཅུ་གཉིས་ཀྱི་དང་པོ་གཉིས་རྒྱུ་དང་། དེ་ནས་ལྔ་འབྲས་བུ། སྲེད་སོགས་གསུམ་རྒྱུ་དང་། སྐྱེ་རྒ་གཉིས་འབྲས་བུར་

― GTD003_Page_0019 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་པའི་རྒྱུ་འབྲས་ཚར་རེ་རེས་ཀྱང་འཁོར་ཚུལ་ཆ་ཚང་རེ་རྫོགས་པར་འདོད་དོ། །རྒྱུན་ཆགས་པ་ནི། ཚེ་གསུམ་གྱི་ཕུང་པོའི་རྒྱུན་ལ་བཞག་པ་སྟེ་དོན་སྔ་མ་དང་འདྲའོ། །གཉིས་པ་བྱེ་བྲག་ཏུ་བཤད་པ་ལ། མཚན་ཉིད། དབྱེ་བསྡུ། རྐྱེན་དུ་འགྱུར་ཚུལ། བྱེད་ལས། ཚེ་དུ་ལ་རྫོགས། ས་མཚུངས། བསྒོམ་ཚུལ། སྒོམ་པའི་ཕན་ཡོན་དང་བརྒྱད། དང་པོ་ནི། རང་གི་རྒྱུ་རྐྱེན་ལ་ལྟོས་ནས་བྱུང་བ་དེ། སྐབས་འདིར་བསྟན་གྱི་རྟེན་འབྱུང་གི་མཚན་ཉིད། གཉིས་པ་ལ། ཡན་ལག་སོ་སོའི་དབྱེ་བ་དང། བསྡུ་བ་གཉིས། དང་པོ་ལ་འཕེན་བྱེད་ཀྱི་རྒྱུ། འཕངས་པའི་འབྲས་བུ། འགྲུབ་བྱེད་ཀྱི་རྒྱུ། གྲུབ་པའི་འབྲས་བུ་བཤད་པ་བཞི། དང་པོ་ལ་གསུམ་ལས། མ་རིག་པ་བཤད་པ་ལ་དགག་བཞག་སྤངས་གསུམ། དང་པོ་ནི། ཁ་ཅིག་མ་རིག་པ་ལ་ཉོན་མོངས་ཅན་གྱིས་ཁྱབ་པར་འདོད་པ་མི་འཐད་དེ། ལས་འབྲས་ཕྲ་མོ་མེད་པར་འཛིན་པ་ལྟ་བུ་མ་ཡིན་པར་དེ་ལ་རྨོངས་ཙམ་དང་། བདེན་འཛིན་གྱི་མ་རིག་པ་ལྟ་བུ་ཤེས་སྒྲིབ་ཏུ་གྱུར་པའི་མ་རིག་པ་དུ་མ་དགྲ་བཅོམ་གཉིས་ལ་ཡང་ཡོད་པའི་ཕྱིར། མ་རིག་པ་ལ་དུག་གསུམ་ནང་ཚན་གྱི་གཏི་མུག་དགོས་པར་འདོད་པ་ཡང་འདིས་ཁེགས་ཏེ། དུག་གསུམ་རྩ་ཉོན་ཡིན་པའི་ཕྱིར། ཁ་ཅིག་གིས། རིག་པ་ཡེ་ཤེས་ཀྱི་འགལ་ཟླ་མི་མཐུན་པའི་ཕྱོགས་ལ་མ་རིག་པས་ཁྱབ་ཟེར་ན། འཇིག་ལྟ་དང་མཚུངས་ལྡན་གྱི་རྨུགས་རྒོད་སོགས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། བདག་འཛིན་ཡིན་པའི་ཕྱིར། འཇིག་ལྟ་ཆོས་ཅན།

― GTD003_Page_0020 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱོད་དང་མཚུངས་ལྡན་ལྔས་མཚུངས་པའི་རྨུགས་རྒོད་སོགས་ལྔ་ཡོད་པར་ཐལ། ཁྱོད་རྩ་ཉོན་ཡིན་པའི་ཕྱིར། ཁྱབ་སྟེ། ཀུན་བཏུས་ལས། རྨུགས་པ་དང་རྒོད་པ་དང་མ་དད་པ་དང་ལེ་ལོ་དང་བག་མེད་པ་ནི་ཉོན་མོངས་ཐམས་ཅད་དང་མཚུངས་པར་ལྡན་ནོ། །ཞེས་གསུངས་པའི་ཕྱིར། རྣམ་གཡེང་དང་རྒོད་པའི་རྒྱུའི་ཁྱད་པར་གྱི་ཞིབ་ཆ་ཤེས་དགོས། ཡང་སྟག་ལོ་ན་རེ། འཇིག་ལྟ་མ་རིག་པ་མ་ཡིན་པར་ཐལ། མངོན་པ་གོང་འོག་གཉིས་ཀའི་ལྟ་བ་དང་ལྟ་མིན་སོ་སོར་བཤད་པ་དེ་དཀྲུགས་མི་རིགས་པའི་ཕྱིར་ཟེར། འོ་ན། ས་ལུ་ལྗང་པའི་མདོ་ལས། དེ་ལ་མ་རིག་པ་གང་ཞེ་ན། ཁམས་དྲུག་པོ་འདི་དག་ཉིད་གཅིག་པུར་འདུ་ཤེས་པ་དང། རིལ་པོར་འདུ་ཤེས་པ་དང། རྟག་པར་འདུ་ཤེས་པ་དང་། བརྟན་པར་འདུ་ཤེས་པ་དང། ཐེར་ཟུག་ཏུ་འདུ་ཤེས་པ་དང། ཞེས་པ་ནས། ང་ཞེས་བྱ་བ་དང། བདག་ཅེས་བྱ་བར་འདུ་ཤེས་པ་དེ་ལྟ་བུ་ལ་སོགས་པ་མི་ཤེས་པ་རྣམ་པ་སྣ་ཚོགས་པ་འདི་ནི་མ་རིག་པ་ཞེས་བྱའོ། །ཞེས་པའི་དོན་མ་གྲུབ་པར་ཐལ། ཚིག་ཐ་མ་གཉིས་ཀྱིས་འཇིག་ལྟ་ངོས་བཟུང་ཞིང། དེ་ཡང་བདག་འཛིན་ཕྲ་མོ་ཡིན་པས། གསུམ་ལྡན་གྱི་བདག་འཛིན་སྟངས་སུ་མི་བྱེད་ཀྱང་དེས་བཟུང་ཚུལ་ལ་ཆ་མེད་པའི་གཅིག་པུ། རྫས་ཡོད་ཀྱི་རིལ་པོ། མི་འཇིག་པའི་རྟག་པ་གསུམ་དང། ཚེ་སྔ་མ་ནས་ཡོད་ཅིང་སླར་ཡང་མི་འགག་པར་ཕྱི་མར་འགྲོ་བའི་ཐེར་ཟུག་གི་འཛིན་ཚུལ་སོགས་ཚང་བའི་འཇིག་ལྟ་ཞིག་ཐོག་མའི་མ་རིག་པར་གསུངས་པ་མ་ཡིན་པའི་ཕྱིར། དེ་བཞིན་

― GTD003_Page_0021 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་མདོ་སྡེ་ས་བཅུ་པ་ལས་ཀྱང་། འཇིག་རྟེན་ན་ཉེས་པར་སྤྱད་པ་གང་ཇི་སྙེད་པ་དེ་ཐམས་ཅད་ནི་བདག་ཏུ་མངོན་པར་ཞེན་པ་ལས་བྱུང་སྟེ། ཞེས་སོགས་ཡན་ལག་བཅུ་གཉིས་ཀྱི་ཐོག་མར་གསུངས་པ་འབྲེལ་མེད་པར་ཐལ་ལོ། །དེ་སྐད་དུ་ཡང་ཊཱིཀ་ཆེན་རིགས་པའི་རྒྱ་མཚོ་ལས། དེས་ན་མདོ་དེས་འཇིག་ལྟ་མ་རིག་པར་མི་འགྲུབ་བོ་ཞེས་ཟེར་བ་ནི་འཐད་པ་མ་ཡིན་ཏེ། འདི་ལྟར་ཡན་ལག་བཅུ་གཉིས་ཀྱི་དང་པོ་སྟོན་པ་སྐབས་སུ་བབ་པའི་ས་བཅུ་པའི་མདོ་དང་། མ་རིག་པ་རང་གི་ངོ་བོ་ཡན་ལག་ཏུ་སྟོན་པ་བོར་ནས་དེ་ལས་དོན་གཞན་པའི་འཇིག་ལྟ་ནི་ཡན་ལག་ཏུ་སྟོན་པར་རིགས་པ་མ་ཡིན་པར་ཐལ། དེ་ལྟར་ན་བཅོམ་ལྡན་འདས་སྨྲ་བ་པོ་མི་མཁས་པར་འགྱུར་བའི་ཕྱིར། ཞེས་གསུངས་པས་སོ། །བྱས་པ་ལ་ཁོ་ན་རེ། འཇིག་ལྟ་ཆོས་ཅན། མ་རིག་པ་མ་ཡིན་པར་ཐལ། རང་གྲོགས་མ་རིག་པ་དང་མཚུངས་ལྡན་ཡིན་པའི་ཕྱིར་ན་མ་ཁྱབ། དེ་ཆོས་ཅན། ཉོན་མོངས་མ་ཡིན་པར་ཐལ། རང་གྲོགས་ཉོན་མོངས་དང་མཚུངས་ལྡན་ཡིན་པའི་ཕྱིར། ཁྱབ་པ་འགྲིགས། གོང་གི་རྟགས་གྲུབ་སྟེ། མཛོད་ལས། ལྟ་བ་དེ་དང་མཚུངས་ལྡན་ཕྱིར། །ཞེས་གསུངས་པའི་ཕྱིར། འདིའི་རྩ་བའི་མདོ་ལས་ཀྱང་མཚུངས་ལྡན་དུ་བཤད་མོད་ཀྱིས། མ་རིག་པ་ལས་ལོགས་སུ་སྟོན་པ་མ་ཡིན་ཏེ། པ་ལ་ཤ་དང་ལྡན་པའི་ནགས་ཞེས་པ་ལྟར་འཇིག་ལྟ་མ་རིག་པའི་ཕྱོགས་གཅིག་ཏུ་བསྡུས་ནས་བསྟན་པ་ཡིན་པའི་ཕྱིར། ཡང་ཁོ་ན་

― GTD003_Page_0022 ―

^{[མ་དཔེ་གཟིགས་ན་འདིར་གནོན།]}

[Full Size]

རེ། ལྟ་མིན་གྱི་མ་རིག་པ་ལ་འཇིག་ལྟ་དང་མཚུངས་ལྡན་གྱིས་ཁྱབ་པར་ཐལ། དེ་རང་དང་མཚུངས་པར་ལྡན་པའི་གྲོགས་ལྟ་མིན་གྱི་མ་རིག་པ་དང་མཚུངས་ལྡན་ཡིན་པའི་ཕྱིར་ན་མ་ཁྱབ་སྟེ། དགྲ་བཅོམ་པའི་རྒྱུད་ལ་ཡང་བདེན་འཛིན་དུ་གྱུར་པའི་ཤེས་འཆལ་ཡོད་ལ། དེ་ཤེས་རབ་ཀྱི་རྫས་ཡིན་ཀྱང་འོ་མ་རུལ་བ་ལྟར་གང་དང་མཚུངས་ལྡན་དུ་སོང་བའི་སྟོབས་ཀྱིས་འཆལ་བར་འགྱུར་བའི་ལྟ་མིན་གྱི་མ་རིག་པ་ཡོད་པའི་ཕྱིར་དང། གཞན་ཡང་ཐེ་ཚོམ་ཁོང་ཁྲོ་གཉིས་དང་། སྒྲ་རྟག་འཛིན་རྟོག་པ་དང་མཚུངས་ལྡན་གྱི་མ་རིག་པས་ཀྱང་མ་ངེས་པའི་ཕྱིར། དང་པོ་གྲུབ་སྟེ། ཀུན་བཏུས་ལས། ལྟ་བ་ནི་ཁོང་ཁྲོ་བ་དང་ཐེ་ཚོམ་དང་མཚུངས་པར་ལྡན་པ་མ་ཡིན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། བདག་འཛིན་ཕྲ་མོ་མ་ཡིན་པའི་ཕྱིར་ཏེ། རྟག་འཛིན་དེ་དང་མཚུངས་ལྡན་ལྔ་མཚུངས་ཡིན་པའི་ཕྱིར། འདི་ལ་མཁས་པའི་དབང་པོ་འགའ་ཞིག་སེམས་སེམས་བྱུང་ལ་མཚུངས་ལྡན་ལྔ་མཚུངས་མི་དགོས་ཏེ། བསྡུ་བ་ལས། ཅིའི་ཕྱིར་མཚུངས་པར་ལྡན་པ་དག་ཅེས་བྱ་ཞེ་ན། སྨྲས་པ། རྫས་མཚུངས་པ་དང། ཡུལ་མཚུངས་པ་དང་། དུས་མཚུངས་པ་དང། བྱ་བ་བྱེད་པ་མཚུངས་པ་ཉིད་ཀྱི་ཕྱིར་རོ། །ཅིའི་ཕྱིར་རྣམ་པ་དང་བཅས་པ་ཞེས་བྱ་ཞེ་ན། སྨྲས་པ། རྣམ་པ་དུ་མ་འཇུག་པའི་ཕྱིར་རོ་ཞེས་དང་། སའི་སྟོད་འགྲེལ་ལས། རྣམ་པ་དུ་མ་སྟེ་ཞེས་བྱ་བ་ནི་ཡུལ་གྱི་མཚན་ཉིད་ཐ་དད་པས་འཛིན་པ་ཐ་དད་པའི་ཕྱིར་རྣམ་པ་ཐ་དད་པ་ལ་བྱ་སྟེ་ཞེས་དང། བློ་བརྟན་

― GTD003_Page_0023 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་དབུས་མཐའི་འགྲེལ་བཤད་ལས། དེ་དག་ཀྱང་གནས་དང། དམིགས་པ་དང་། རྫས་དང་། དུས་མཚུངས་པ་ཉིད་ཀྱིས་མཚུངས་པར་ལྡན་པ་ཡིན་གྱི། རྣམ་པར་ཤེས་པ་དང་ཁྱད་པར་མེད་པར་ཐལ་བར་འགྱུར་བས་རྣམ་པ་མཚུངས་པ་ནི་མ་ཡིན་ནོ་ཞེས་གསུངས་པའི་ཕྱིར་ཞེས་འཆད་དོ། །ཁ་ཅིག །མཚུངས་ལྡན་ལྔ་མཚུངས་ཡིན་ཀྱང་ཞེན་སྟངས་མཚུངས་མི་དགོས་ཏེ། ལྟ་མིན་གྱི་མ་རིག་པ་ལ་འཛིན་ཚུལ་མི་ཡོང་བའི་ཕྱིར། ལམ་རིམ་ལས། སློབ་དཔོན་ཐོགས་མེད་སྐུ་མཆེད་ནི། ཡང་དག་པའི་དོན་ལ་ཕྱིན་ཅི་ལོག་ཏུ་འཛིན་པ་དང། རྨོངས་ཙམ་གཉིས་ལས་ཕྱི་མར་བཞེད་དེ། མདོར་ན་ལོག་པར་རྟོག་པ་དང་མ་རྟོགས་པའི་བློ་གཉིས་ལས་མ་རྟོགས་པའི་བློའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལུགས་དེར་ལྟ་བ་མ་རིག་པར་མི་བཞེད་པས་མ་རིག་པ་ལ་རང་སྟོབས་ཀྱིས་རྨོངས་ཙམ་མ་གཏོགས་ལོག་པར་རྟོག་པ་མེད་པའི་དོན་ཡིན་པའི་ཕྱིར། ཡང་ན་དམིགས་རྣམ་ངེས་ཅན་གྱི་བློ་དང་མཚུངས་ལྡན་རྣམས་ལ་འཛིན་ཚུལ་ཡོད་ཅིང། སྤྱིར་ལྟ་མིན་གྱི་མ་རིག་པ་ལ་ཞེན་ཚུལ་མེད་པའི་དོན་དུ་རུང་ངོ་། །ཡང་ཁ་ཅིག །མཐར་ལྟ་སོགས་བཞི་ཡང་མ་རིག་པ་ཡིན་པར་ཐལ། འཇིག་ལྟ་ལ་དེའི་ཕྱིར་ཟེར་ན་ཚད་ལྡན་གྱི་གཞུང་གང་ནས་ཀྱང་དེ་དག་མ་རིག་པར་མ་བཤད་པས་རེ་ཞིག་མ་ཁྱབ། དེས་ན་འཛིན་ཚུལ་ཅན་གྱི་ཉོན་མོངས་ལ་མ་རིག་པ་དང་མཚུངས་ལྡན་མི་དགོས་པ་རྟོགས་སླ། ཁ་ཅིག་ན་རེ། མ་རིག་པ་ལ་ལོག་རྟོག་གིས་ཁྱབ་པར་ཐལ།

― GTD003_Page_0024 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལ་ལོག་ཤེས་ཀྱིས་ཁྱབ་པའི་ཕྱིར་ན་མ་ཁྱབ། འདོད་མི་ནུས་ཏེ། དགྲ་བཅོམ་པས་ལོག་རྟོག་སྤངས་པའི་ཕྱིར་དང། ཐེ་ཚོམ་དང་མཚུངས་ལྡན་གྱི་མ་རིག་པའང་ཡོད་པའི་ཕྱིར། ཁྱབ་སྟེ། ཐེ་ཚོམ་གྱིས་ལོག་པར་བཟུང་བ་མ་ཡིན་པས་ལོག་རྟོག་ཏུ་མི་འགྲོ་བའི་ཕྱིར། གཞན་དུ་བདེན་པར་ཡོད་དམ་མེད་སྙམ་པའི་ཐེ་ཚོམ་དེ་བདེན་འཛིན་དུ་འདོད་དགོས་པས། ཐེ་ཚོམ་མཐོང་སྤང་ཉོན་མོངས་མ་ཡིན་པར་འགྱུར་རོ། །གོང་གི་རྟགས་གྲུབ་སྟེ། སྔོན་གྱི་མཐའ་མི་ཤེས་པ་སོགས་མ་རིག་པ་སུམ་ཅུ་ལ་ཐེ་ཚོམ་དང་མཚུངས་ལྡན་ཤས་ཆེ་བའི་ཕྱིར། རྣམ་པར་འབྱེད་པའི་མདོའི་འགྲེལ་བཤད་ལས། དེ་ལ་སྔོན་གྱི་མཐའ་དང་ཕྱི་མའི་མཐའ་མི་ཤེས་པ་གཉིས་ཐེ་ཚོམ་དང་མཚུངས་པར་ལྡན་པ་ཡིན་པར་གསུངས་པ། ཞེས་གསུངས་པའི་ཕྱིར། ལུང་འདིས་ཀྱང་ཁྱབ་པ་བསྟན་པ་མ་ཡིན་ཏེ། དེ་དག་རེ་རེ་ལ་ཡང་དོན་ལ་དཔྱད་པ་གཏན་མ་ཞུགས་པ་དང། ཞུགས་ཀྱང་དཔྱད་པ་མ་རྫོགས་པའི་སྐབས་དང་། བསམ་ངོར་དཔྱད་པ་རྫོགས་ཀྱང་གནས་དོན་མ་རྙེད་པའི་མ་རྟོགས་པ་གསུམ་དང་མཚུངས་ལྡན་རེ་ཡོད་པ་གང་ཞིག །མེད་པར་ལྟ་བའི་ལོག་ལྟ་དང་མཚུངས་ལྡན་རེ་ཡོད་པའི་ཕྱིར། ཡང་ཁ་ཅིག །ཐོག་མའི་མ་རིག་པ་དང་འཁོར་རྩ་དོན་གཅིག་ཟེར་ན། འཇིག་ལྟ་ཕྲ་མོར་གྱུར་པའི་འཐད་འཛིན་གྱི་ཐོག་མའི་མ་རིག་པ་ཆོས་ཅན། འཁོར་བའི་རྩ་བ་ཡིན་པར་ཐལ། ཐོག་མའི་མ་རིག་པ་ཡིན་པའི་ཕྱིར། འདོད་མི་ནུས་ཏེ། ལམ་རིམ་ལས། ཀུན་བཏགས་ཀྱི་མ་

― GTD003_Page_0025 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་པ་ནི་གྲུབ་མཐའ་སྨྲ་བ་དེ་དག་ཁོ་ན་ལ་ཡོད་པས་འཁོར་བའི་རྩ་་བར་མི་འཐད་པའི་ཕྱིར་རོ། །ཞེས་གསུངས་པའི་ཕྱིར། ཁ་ཅིག །རྩ་རྟགས་མ་གྲུབ་སྟེ། མཐོང་སྤང་དུ་གྱུར་པའི་ཐོག་མའི་མ་རིག་པ་མེད་པའི་ཕྱིར། དེར་ཐལ། ཐོག་མའི་མ་རིག་པ་བྱས་པ་ལས་ལྷག་པའི་འཁོར་རྩ་བྱེད་ལུགས་མེད་པའི་ཕྱིར་ཟེར་བ་མི་འཐད་པར་ཐལ། མཐོང་སྤང་དུ་གྱུར་པའི་ཡན་ལག་བཅུ་གཉིས་ཡོད་པའི་ཕྱིར་ཏེ། རྒྱུན་ཞུགས་ཀྱིས་སྤངས་པའི་དེ་བཅུ་གཉིས་དང་། རྒྱུན་ཞུགས་ཀྱི་རྒྱུད་ལ་དེའི་ནང་ཚན་ཅི་རིགས་འབྱུང་ཡང། ཕྱིར་མི་འོང་ལ་མི་འབྱུང་བའི་དེ་བཅུ་གཉིས་དང་། དགྲ་བཅོམ་ཁོ་ནས་སྤངས་པའི་ཡན་ལག་བཅུ་གཉིས་ཡོད་པའི་ཕྱིར། རྣལ་འབྱོར་སྤྱོད་པའི་ས་ལས། རྒྱུན་དུ་ཞུགས་པས་ཡན་ལག་དུ་ཞིག་སྤོང་ཞེ་ན། ཐམས་ཅད་ཀྱི་ཕྱོགས་གཅིག་སྟེ་གང་ཡང་རུང་བ་དང་། རིལ་གྱིས་སྤོང་བ་ནི་མ་ཡིན་ནོ། །ཕྱིར་མི་འོང་བས་ཡན་ལག་དུ་ཞིག་སྤོང་ཞེ་ན། འདོད་པ་ན་སྤྱོད་པ་ཐམས་ཅད་དོ། །དགྲ་བཅོམ་པས་ཡན་ལག་དུ་ཞིག་སྤོང་ཞེ་ན། ཁམས་གསུམ་ན་སྤྱོད་པ་ཐམས་ཅད་དོ། །ཞེས་གསུངས་པའི་ཕྱིར། འདིས་མཐོང་སྤང་དུ་གྱུར་པའི་ཡན་ལག་དང་པོ་ཡོད་པར་གསུངས་ཀྱང་ཐོག་མའི་མ་རིག་པ་ཡོད་པར་མ་གསུངས་ཞེས་བཤད་པ་ཀུན་མཁྱེན་བླ་མའི་དགོངས་པར་མི་སྣང་ངོ་། །དོན་གསང་མཁན་པོས་ཐོག་མའི་མ་རིག་པ་མཐོང་སྤང་ཁོ་ནར་འདོད་པའང་མི་འཐད་པར་འདིས་ཤེས་སླ། གཞན་ཡང་། བདེན་

― GTD003_Page_0026 ―

^{[མ་དཔེ་གཟིགས་ན་འདིར་གནོན།]}

[Full Size]

འཛིན་དུ་གྱུར་པའི་མ་རིག་པ་ལྷན་སྐྱེས་ཆོས་ཅན། ཐོག་མའི་མ་རིག་པ་ཡིན་པར་ཐལ། འཁོར་བའི་རྩ་བ་མཐར་ཐུག་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །ཞེས་སོགས་དང། སྟོང་ཉིད་བདུན་ཅུ་པ་ལས། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང། །ཞེས་གསུངས་པའི་ཕྱིར། གཞན་ཡང་འཕགས་རྒྱུད་ཀྱི་འཇིག་ལྟ་ལྷན་སྐྱེས་ཆོས་ཅན། ཐོག་མའི་མ་རིག་པ་ཡིན་པར་ཐལ། འཁོར་བའི་རྩ་བ་ཡིན་པའི་ཕྱིར། རྟགས་གྲུབ་སྟེ། རང་གི་རིགས་འདྲ་བརྒྱུད་མར་བྱུང་བའི་དབང་གིས་སྔོན་གང་ཟག་དེ་ཉིད་རང་དབང་མེད་པར་སྲིད་རྩེ་ནས་མནར་མེད་ཀྱི་བར་དུ་འཁོར་བའི་ཕྱིར། ཁྱབ་སྟེ། དེ་ལྟར་རྒྱུན་ལ་བསམས་ནས་མ་བཞག་ན། རང་རྒྱུད་ཀྱི་མ་རིག་པ་དེ་དེའི་གནས་སྐབས་ཀྱི་འཁོར་བའི་རྩ་བར་མི་རིགས་ཤིང་། དེའི་དབང་གིས་སླར་འཁོར་བ་ལ་ཡང་བྱེད་མི་རུང་སྟེ། འཁོར་རྩ་རྒྱུད་ལ་མེད་པའི་སོ་སྐྱེ་ཡང་འཇོག་དགོས་པ་ཧ་ཅང་ཐལ་བའི་ཕྱིར། རྩ་བར་འདོད་ན། དེ་ཆོས་ཅན། རང་རྒྱུད་ལྡན་དེས་ཁྱོད་ཀྱི་ཞེན་ཡུལ་མེད་པར་མངོན་སུམ་དུ་མ་རྟོགས་པར་ཐལ། ཁྱོད་ཐོག་མའི་མ་རིག་པ་ཡིན་པའི་ཕྱིར། ཁྱབ་སྟེ། དེའི་ཞེན་ཡུལ་མངོན་སུམ་གྱིས་སུན་མ་ཕྱུང་བར་དུ་ལས་འདུ་བྱེད་ཀྱང་དེ་ཕྱིན་ཆད་མི་ནུས་པ་གང་ཞིག །འཕེན་བྱེད་ལས་དངོས་སུ་ཀུན་ནས་སློང་བྱེད་མ་ཡིན་པ་ལ་དེའི་དོན་མ་ཚང་བའི་ཕྱིར། དང་པོ་

― GTD003_Page_0027 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་སྟེ། རིགས་ངེས་བྱང་སེམས་སྦྱོར་ལམ་ཆོས་མཆོག་ཆེན་པོ་བ་དེས་འཕེན་བྱེད་ཀྱི་ལས་གསོག་པ་མི་སྲིད་ཀྱང། འཕེན་བྱེད་ལས་གསོག་པ་པོར་འདོད་དགོས་ཤིང། དེ་ཕན་ཆད་མི་སྟོབས་ཅན་གྱིས་སྟོབས་ཆུང་བརྡུང་བ་ལྟར་བདག་འཛིན་གྱི་དབང་དུ་མི་འགྲོ་བའི་ཕྱིར། ལམ་རིམ་ལས། དེས་ན་འཁོར་བར་འཕེན་བྱེད་ཀྱི་ལས་གསོག་པ་པོ་ནི། ཐེག་ཆེན་སྦྱོར་ལམ་ཆེན་པོ་ལ་གནས་པ་མན་ཆད་ཀྱི་སོ་སོ་སྐྱེ་བོ་ཐམས་ཅད་དོ། །ཞེས་གསུངས་པའི་ཕྱིར། དེའི་རྒྱུ་མཚན་ཡང་མཐོང་ལམ་གྱིས་མ་བཤིག་པས་དུམ་བུར་མ་བྱས་པ། སྒོམ་ལམ་གྱིས་མ་བཅོམ་པས་གསོད་ལྡོང་དུ་མ་བྱས་པ། ས་བོན་ཡོད་པས་བག་ལ་ཉལ་གྱི་རྗེས་སུ་འབྲེལ་བ་སྟེ་ཁྱད་པར་གསུམ་གྱིས་སོ་སྐྱེ་དང་རྗེས་སུ་འབྲེལ་པར་མདོ་ལས་གསུངས་སོ། །ཟུར་ཕྱི་མ་གྲུབ་སྟེ། རྟེན་འབྲེལ་མདོ་འགྲེལ་ལས། བདེན་པ་མཐོང་ལ་འཕེན་པ་མེད། །སྲེད་དང་བྲལ་ལ་འབྱུང་བ་མེད། །ཅེས་གསུངས་པའི་ཕྱིར། འདི་ལ་སྤེལ་སྒོམ་གྱིས་མི་གནོད་དེ། འབྲས་བུ་ཆེ་བར་འཕེན་བྱེད་དེ་ཟག་མེད་ཀྱི་བར་དུ་བཅུག་ནས་ཁ་བསྒྱུར་བ་ཙམ་ཡིན་པར་དོན་གསང་ལས་གསུངས་པའི་ཕྱིར་རོ། །རྟགས་གཉིས་པ་གྲུབ་སྟེ། མདོ་འགྲེལ་ལས། འདུ་བྱེད་རྣམས་ཀྱི་རྐྱེན་ཉིད་དུ། །མ་རིག་བསྟན་པ་རྣམ་གཉིས་ཏེ། །ཉོན་མོངས་གཞན་ལྡན་སྤྱི་ཡི་རྐྱེན། །དེ་མེད་པ་ནི་གཙོ་བོའི་རྐྱེན། །ཞེས་མི་དགེ་བ་རྣམས་ལ་སྤྱིའི་རྐྱེན་དང་། འཕེན་བྱེད་དགེ་བའི་ལས་ཀྱི་གཙོ་བོའི་རྐྱེན་བྱེད་དགོས་པར་གསུངས་

― GTD003_Page_0028 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། དེས་ན་རྩ་བའི་ཁྱབ་པ་སོ་སྐྱེ་ལ་ཡང་སྦྱོར་མི་རུང་སྟེ། དེ་ལ་འཇིག་ལྟ་ལྷན་སྐྱེས་ཤིན་ཏུ་ལྐོག་གྱུར་པ་ཡོད་པའི་ཕྱིར་དང། མངོན་གྱུར་གཞིར་བཞག་ཀྱང་ལས་གསོག་པའི་སྦྱོར་བ་ལ་མི་གནས་པ་ཡོད་པའི་ཕྱིར་རོ། །འདི་དག་གིས་ཐོག་མའི་མ་རིག་པ་དང། འཁོར་རྩ་ལ་མུ་བཞི་བརྩི་ཚུལ་ཡང་ཤེས་སླ། མདོ་འགྲེལ་གྱི་དོན་ལ་ཁ་ཅིག །དགེ་བའི་དུས་ཀྱི་ཀུན་སློང་ལ་མ་རིག་པ་མེད་པས། ཐོག་མའི་མ་རིག་པས་དེའི་རྒྱུ་ཉོན་མོངས་ཀྱི་ནང་ནས་གཙོ་བོའི་རྐྱེན་བྱེད། མི་དགེ་བ་ལ་སྤྱིའི་རྐྱེན་ཙམ་བྱེད་ཟེར་བ་མི་འཐད་དེ། དགེ་བའི་དུས་ཀྱི་ཀུན་སློང་ལ་ལས་འབྲས་ལ་རྨོངས་པའི་མ་རིག་པ་མེད་ཀྱང་། སྲིད་འབྱོར་བདེ་བའི་རང་བཞིན་དུ་འཛིན་པ་དང་། དངོས་གཞི་ཐར་པར་འཛིན་པ་ལྟ་བུ་དེ་ཁོ་ན་ཉིད་བདེན་བཞི་ལ་རྨོངས་པའི་མ་རིག་པ་ཡོད་པའི་ཕྱིར། ཀུན་བཏུས་ལས། རྨོངས་པ་ནི་རྣམ་པ་གཉིས་ཏེ། འབྲས་བུ་རྣམ་པར་སྨིན་པ་ལ་རྨོངས་པ་དང་། དེ་ཁོ་ནའི་དོན་ལ་རྨོངས་པའོ། །ཞེས་པ་ནས་དེ་ཁོ་ནའི་དོན་ལ་རྨོངས་པས་ནི་བསོད་ནམས་དང་མི་གཡོ་བ་རྣམས་སོ། །ཞེས་དང་། རྒྱལ་སྲས་མ་ལས། དེ་ཁོ་ནའི་དོན་ཞེས་བྱ་བ་ནི་འཕགས་པའི་བདེན་པ་བཞི་པོ་དག་གོ །ཞེས་གསུངས་པའི་ཕྱིར། ཁྱབ་སྟེ། གསེར་ཕྲེང་ལས། དེ་ལྟར་གསུངས་པ་ཡང་དུས་ཀྱི་ཀུན་སློང་ལ་དགོངས་ཀྱི། རྒྱུའི་ཀུན་སློང་ནི་དེ་ཁོ་ན་ཉིད་ལ་རྨོངས་པ་གཅིག་པུ་སྟེ། ཞེས་གསུངས་པའི་ཕྱིར། དུས་ཀྱི་ཀུན་སློང་ལ་མཚུངས་ལྡན་གྱིས་ཁྱབ་པར་འདོད་པའང་

― GTD003_Page_0029 ―

^{[མ་དཔེ་གཟིགས་ན་འདིར་གནོན།]}

[Full Size]

འདིས་ཁེགས་ཏེ། དགེ་བ་ཉོན་མོངས་ཅན་མེད་པའི་ཕྱིར་རོ། །བྱས་པ་ལ་ཁོ་ན་རེ། རྒྱུའི་ཀུན་སློང་ལ་ལས་འབྲས་ལ་རྨོངས་པའི་མ་རིག་པ་མེད་པར་ཐལ། གསེར་ཕྲེང་གི་ལུང་དེའི་ཕྱིར་ན་མ་ཁྱབ་སྟེ། རྒྱུའི་ཀུན་སློང་གི་ཐོག་མའི་མ་རིག་པ་ལ་དགོངས་པའི་ཕྱིར། འདོད་མི་ནུས་ཏེ། རྒྱུ་ཡང་ཡིན་ཀུན་སློང་ཡང་ཡིན་པའི་དེ་ཡོད་པའི་ཕྱིར། ཁྱབ་སྟེ། གང་སྤེལ་ལས། རྒྱུ་ཡང་དེ་ཡིན་ཀུན་སློང་ཡང་དེ་ཡིན་པས་རྒྱུའི་ཀུན་ནས་སློང་བའོ། །ཞེས་གསུངས་པའི་ཕྱིར། ཡང་ཁོ་ན་རེ། རྒྱུའི་ཀུན་སློང་ཞེས་པ་རྒྱུ་ཡིན་ཙམ་ལ་མི་བྱེད་པར་ཐལ། དེ་ལ་ཐོག་མའི་མ་རིག་པ་ཞེས་པའི་ཐོག་མའི་དོན་ཚང་དགོས་པའི་ཕྱིར། དེར་ཐལ། འཕེན་བྱེད་མི་དགེ་བའི་རྒྱུ་ལས་འབྲས་ལ་རྨོངས་པའི་མ་རིག་པ་ཡང་དེའི་དུས་ཀྱི་ཀུན་སློང་ཡིན་པའི་ཕྱིར། ས་ལུ་ལྗང་པའི་འགྲེལ་པར། རྒྱུ་དང་འབྲས་བུ་ལ་རྨོངས་པའི་རྒྱུ་ལས་བྱུང་བའི་འདུ་བྱེད་རྣམས་ནི་བསོད་ནམས་མ་ཡིན་པ་ཉིད་དུ་འདོད་དེ་ཞེས་གསུངས་པའི་ཕྱིར་ན་མ་ཁྱབ་ཟེར། མདོ་འགྲེལ་གྱི་ལུང་དོན་འཐད་ལྡན་ཡོད་དེ། འདུ་བྱེད་ཀྱི་རྐྱེན་ཆགས་སོགས་ཀྱང་ཡོད་ན། མ་རིག་པ་ཉིད་བསྟན་མི་རིགས་སོ་སྙམ་ན་མ་ཡིན་ཏེ། གཙོ་བོའི་རྐྱེན་གྱི་དབང་དུ་བྱས་པའི་ཕྱིར་ཏེ། ཆགས་སོགས་ཀུན་འབྱུང་བ་ཡང་འདིའི་རྐྱེན་གྱིས་ཡིན་པས། དེས་བསྐྱེད་པའི་ལས་གཉིས་ཀྱི་གཙོ་བོའི་རྐྱེན་ཡང་འདིས་བྱེད་པ་མི་འགལ་བའི་ཕྱིར་ཏེ། བློན་པོའི་བྲན་ཡང་རྒྱལ་པོའི་དབང་དུ་འགྲོ་དགོས་པ་བཞིན་འདི་ལས་ཉོན་དེ་

― GTD003_Page_0030 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཀའི་སྤྱིའི་རྐྱེན་ཡིན་པས་གཉིས་ཀར་དབང་བྱེད་པའི་ཕྱིར། དེ་དང་མི་ལྡན་པའི་ཟག་བཅས་དགེ་བ་ལ་སྤྱིའི་མིང་མི་ཐོབ་ཀྱང་གཙོ་བོ་ཡིན་ཏེ། དེ་གསོགས་མི་གསོགས་འདི་ལ་རག་ལས་པས་སོ། །ཞེས་པའི་དོན་ཡིན་པའི་ཕྱིར། ཁ་ཅིག །དུས་ཀྱི་ཀུན་སློང་ལ་མ་རིག་པ་དགོས་ཟེར་ན། དེ་མི་འཐད་པར་ཐལ། མཛོད་ལས། གསོད་དང་གནོད་སེམས་ཚིག་རྩུབ་པོ། །ཞེ་སྡང་གིས་ནི་མཐར་ཕྱིན་བྱེད། །ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་རྫོགས་པར་འདོད། །ལོག་པར་ལྟ་བ་གཏི་མུག་གིས། །ལྷག་མ་གསུམ་གྱིས་རྫོགས་པར་འདོད། །ཅེས་པ་ལྟར། རྫོགས་བྱེད་དུས་ཀྱི་ཀུན་སློང་ངེས་ཅན་ཡིན་ཀྱང་། སྦྱོར་བྱེད་ཀུན་བཏུས་ལྟར་སྲོག་གཅོད་ལ་ཡང་ཤ་ལ་ཆགས་པ་དང། དགྲ་ཤ་གློན་པ་དང་། ཕྱུགས་ཀྱི་མཆོད་སྦྱིན་ལྟ་བུ་ཆགས་སྡང་རྨོངས་པ་གསུམ་གས་བྱེད་པ་ཡོད་པའི་ཕྱིར། གཉིས་པ་རང་ལུགས་ལ། མ་རིག་པའི་ངོ་བོ་དང་། གྲུབ་མཐའ་སོ་སོའི་འདོད་ཚུལ་གཉིས། དང་པོ་ནི། རིག་པའི་འགལ་ཟླ་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པ་མ་རིག་པའི་མཚན་ཉིད། ཟུར་སོ་སོའི་དོན་ཡོད་དེ། མ་རིག་པའི་སྐད་དོད་ཨ་བིདྱ་ཞེས་པའི་བིདྱ་རིག་པ་ལ་འཇུག་ཅིང་། དེ་ཨས་བཀག་པ་ལ་དགག་ཚུལ་མདོ་འགྲེལ་ལས། ཡོད་པ་དག་ནི་འགོག་པ་དང། །གཞན་པ་ཉིད་དང་འདྲ་བ་དང། །སྨད་དང་ཉུང་དང་བྲལ་དོན་དང། །གཉེན་པོ་དག་ལ་འདི་ཡོད་དོ། །ཞེས་པའི་དགག་སྒྲ་བདུན་གྱི་གང་ལ་བྱེད་ཅེ་

― GTD003_Page_0031 ―

^{[མ་དཔེ་གཟིགས་ན་འདིར་གནོན།]}

[Full Size]

ན། ཤེས་རབ་མེད་པ་དང། མ་ཡིན་པ་དང། འདྲ་བ་དང། སྨད་པ་ཙམ་དང་། ཆུང་བ་དང། མ་སྐྱེས་པ་སྟེ་དགག་སྒྲ་དང་པོ་དྲུག་ལ་མི་བྱེད་པར། ཆགས་པ་དང་ཆགས་མེད་ལྟ་བུ་འགལ་ཟླའི་གཉེན་པོ་ལ་བྱེད་པར་གོ་ཆེད་དུ་རིག་པའི་འགལ་ཟླ་ཞེས་སྨོས་ཤིང་། ལྷག་མས་སེམས་སེམས་བྱུང་གཞན་མ་རིག་པ་ཡིན་པ་འགོག་པའི་ཕྱིར། བཞི་པའི་ཙམ་སྒྲ་དབུ་མ་པ་ལ་སྦྱོར་དགོས་པ་ཀུན་མཁྱེན་བླ་མའི་དགོངས་པ་སྟེ། དབུ་མ་པ་ཐག་ཁྲ་སྦྲུལ་འཛིན་དང་དཔེ་སྦྱར་ཞིང་སེམས་ཙམ་པས་མུན་པ་ཙམ་དང་སྦྱར་བ་ཡང་དེས་ཤེས་སོ། །དེ་ལ་དབྱེ་ན། ཤེས་སྒྲིབ་དང་། ཉོན་སྒྲིབ་ཏུ་གྱུར་པའི་མ་རིག་པ་གཉིས་ཡོད་ཅིང། ཕྱི་མ་ལ་གང་ཟག་གི་བདག་འཛིན་དང། དེ་མ་ཡིན་པ་གཉིས། གང་ཟག་གི་བདག་མེད་རྟོགས་པའི་རིག་པའི་འགལ་ཟླ་མི་མཐུན་ཕྱོགས་ཀྱི་གཙོ་བོར་གྱུར་པའི་སེམས་བྱུང་རྨོངས་པ་དེ། གང་ཟག་གི་བདག་འཛིན་དུ་གྱུར་པའི་མ་རིག་པའི་མཚན་ཉིད། གཙོ་བོ་སྨོས་པས་རྨོངས་ཙམ་འགོག །བདག་འཛིན་དེ་ལ་ཡང་། ལྟ་མིན་དང་ལྟ་བ་གཉིས་ཡོད་དེ། དང་པོ་ནི། འཇིག་ལྟ་དང་མཚུངས་ལྡན་གྱི་མ་རིག་པ་ལྟ་བུའོ། །འདི་ལ་རྟེན་འབྲེལ་ཆེན་མོར་གཞན་རྒྱུད་ཀྱི་གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་མ་རིག་པ་བཞག་པ་ཁས་བླངས་མི་ནུས་སམ་སྙམ་སྟེ་རང་སྟོབས་ཀྱིས་ལོག་པར་འཛིན་པ་ཤེས་འཆལ་ཁོ་ན་ལ་སྦྱར་བའི་ཕྱིར། ལྟ་བ་ལྔ་གང་རུང་མ་ཡིན་པའི་

― GTD003_Page_0032 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་ངན་དུ་མ་ཞིག་འོང་བར་སྣང་ངོ་། །འཇིག་ལྟ་ལ་ཡང་གཟུགས་རང་རྐྱ་ཐུབ་པའི་བདག་ཏུ་ལྟ་བ་ནས་རྣམ་ཤེས་དེ་ལྟར་ལྟ་བའི་བར་བདག་ཏུ་ལྟ་བ་ལྔ་དང་། རང་རྐྱ་བའི་བདག་ལ་གཟུགས་ལྡན་པར་ལྟ་བ། གཟུགས་རང་རྐྱ་བའི་བདག་གིར་ལྟ་བ། གཟུགས་ལ་རང་རྐྱ་བའི་བདག་གནས་པར་ལྟ་བ་སོགས་བདག་གིར་ལྟ་བ་བཅོ་ལྔ་ཀུན་བཏུས་ལས་གསུངས་སོ། །ཞེ་སྡང་དང་མཚུངས་ལྡན་གྱི་མ་རིག་པ་མཐའ་གཅིག་ཏུ་བདག་འཛིན་མ་ཡིན་པ་ལ་བཤད་ཀྱང་། དབུ་མ་པ་ལྟར་ན་ཞིབ་ཆ་དགོས། ཡན་ལག་དང་པོ་ལ་ཡང་རྒྱུ་དང་དུས་ཀྱི་ཀུན་སློང་གཉིས་ཡོད་ཅིང་། རང་གིས་ཀུན་ནས་བསླང་བྱར་གྱུར་པའི་ཡན་ལག་གཉིས་པའི་ཀུན་སློང་གི་ཐོག་མར་བྱུང་བའི་འཇིག་ལྟའི་རིགས་གནས་ཀྱི་སེམས་བྱུང་རྨོངས་པ་དེ། ཐོག་མའི་མ་རིག་པའི་མཚན་ཉིད། རིགས་གནས་སྨོས་པས་ལྟ་མིན་སྡུད་ཅིང་། ཀུན་སློང་ཙམ་ལ་དུ་མ་ཡོད་པས་དེར་མ་ངེས་ཏེ། བདག་སྔོན་བྱུང་ངམ་མ་བྱུང་། སླར་འབྱུང་ངམ་མི་འབྱུང་སྙམ་དུ་ཐེ་ཚོམ་པ་དང། དབྱེ་བ་མེད་པར་དེ་གཉིས་ལ་རྨོངས་ཙམ་སྟེ། སྔོན་དང་ཕྱི་མཐའ་དང་གཉིས་ཀ་ལ་རྨོངས་པ་གསུམ་དང་། རང་གཞན་གྱི་རྒྱུད་ཀྱི་ང་ལ་བདག་ཏུ་ཞེན་པ་དང། གཉིས་ཀ་ལ་རྨོངས་ཙམ་གཅིག་སྟེ། ནང་དང་ཕྱི་དང་གཉིས་ཀ་ལ་རྨོངས་པ་གསུམ་དང་། ལས་དང་རྣམ་སྨིན་མི་འཆོལ་བར་འགྲུབ་པ་ལ་རྨོངས་པ་དང་། དབང་ཕྱུག་བྱེད་པོར་འཛིན་པ་ལྟ་བུ་ལས་དང་རྣམ་སྨིན་དང་གཉིས་ཀ་

― GTD003_Page_0033 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་རྨོངས་པ་སྟེ་གསུམ་དང་། དཀོན་མཆོག་གསུམ་ལ་རྨོངས་པའི་གསུམ་དང་། བདེན་བཞི་ལ་སོ་སོར་ལོག་ཞུགས་བཞི་བཞིའི་སྒོས་རྨོངས་པ་བཞི་དང་། ཀུན་ཉོན་གྱི་རྒྱུ་ཡན་ལག་སྔ་མས་ཕྱི་མ་སྐྱེད་ཅིང་ཕྱི་མ་སྔ་མ་ལས་འབྱུང་ཚུལ་དང་། རྣམ་བྱང་གི་རྒྱུ་དམ་པ་བསྟེན་པ། ཆོས་མཉན་པ། ཚུལ་བཞིན་ཡིད་ལ་བྱེད་པ། སྔོན་གོམས་པ་དང་བཞི་ལས་འབྲས་བུ་བྱང་ཕྱོགས་སོ་བདུན་འབྱུང་བ་ལ་རྨོངས་པ་དང་། དྲན་ཉེ་ཡང་དག་སྤོང་བ་རྫུ་འཕྲུལ་གྱི་རྐང་པ་དབང་པོ་སྟོབས་བྱང་ལག་འཕགས་ལམ་ཡན་ལག་སྟེ། བྱང་ཕྱོགས་སྡེ་ཚན་བདུན་ནི་དགེ་སོགས་ཡིན་ཅིང། དེའི་མི་མཐུན་ཕྱོགས་མི་ཤེས་པ་དང་། ལེ་ལོ་དང། གཡེང་བ་དང་། མི་མོས་པ་དང་། དྲན་ཤེས་བཞིན་ཉམས་པས་སྟོབས་ཆུང་བ་དང་། མཐོང་སྤང་དང་སྒོམ་སྤང་རྣམས་མི་དགེ་བ་དང་ཁ་ན་མ་ཐོ་བ་དང་བཅས་པ་སོགས་ལ་རྨོངས་པ་ནས་བྱང་ཕྱོགས་རྣམས་མ་དག་ས་བདུན་དུ་མི་མཐུན་ཕྱོགས་དང་འདྲེས་པར་འབྱུང་ཡང་། དག་ས་ལ་དེ་ལྟར་མ་ཡིན་པའི་རྣམ་དབྱེ་ལ་རྨོངས་པའི་བར་རྒྱུ་དང་ཡང་དག་པར་འབྱུང་བ་དང་དགེ་མི་དགེ་ཁ་ན་མ་ཐོ་བ་དང་བཅས་མ་བཅས་བསྟེན་བྱ་ཡིན་མིན་ངན་པ་དང་གྱ་ནོམ་ནག་པོ་དང་དཀར་པོ་དང་རྣམ་པར་དབྱེ་བ་དང་བཅས་པ་ལ་རྨོངས་པ་སྟེ་བཅུ་གསུམ་དང་། སྐྱེ་མཆེད་དྲུག་ཇི་ལྟ་བ་བཞིན་ཤེས་པར་རློམ་པའི་མངོན་པའི་ང་རྒྱལ་དང་མཚུངས་ལྡན་གྱི་མ་རིག་པ་སྐྱེ་མཆེད་དྲུག་ལ་རྨོངས་པ་གཅིག་རྣམས་སུ་ཡོད་པའི་ཕྱིར། འདི་དག་

― GTD003_Page_0034 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་བདུན་དུ་འདུ་སྟེ། དུས་ལ་རྨོངས་པ་གསུམ་དང་། དངོས་པོ་ལ་གསུམ། འཕོ་བ་ལ་གསུམ། མཆོག་ལ་གསུམ། དེ་ཁོ་ན་ཉིད་ལ་བཞི། ཀུན་བྱང་ལ་བཅུ་གསུམ། མངོན་པའི་ང་རྒྱལ་ཅན་གྱི་ཀུན་རྨོངས་གཅིག་ཡོད་པའི་ཕྱིར། སའི་དངོས་གཞིར་ཀུན་བྱང་གི་བཅུ་གསུམ་བསྡོམས་ནས་ལྷག་མ་བཅུ་དགུ་འཁོར་བར་འཇུག་ལྡོག་ལ་སྦྱར་ཏེ་ངོས་འཛིན་ཡང་སྔར་དང་མི་འདྲ་བ་ཅུང་ཟད་ཡོད་དོ། །སུམ་ཅུ་པོ་དེ་ལ་མ་རྟོགས་ལོག་རྟོག་ཐེ་ཚོམ་གསུམ་དང་མཚུངས་ལྡན་རེ་དང་། དེ་ལ་ཆུང་འབྲིང་ཆེ་གསུམ་རེ། དེ་རེ་རེ་ལ་ཐོས་བསམ་སྒོམ་པའི་གེགས་གསུམ་རེ་སྟེ་བརྒྱད་བརྒྱ་དང་བཅུ་འབྱེད་ཚུལ་དང་དབྱེ་བའི་རྣམ་གྲངས་སྟོན་པར། མདོ་ལས། མི་ཤེས་པ་དང་མི་མཐོང་བ་དང་མངོན་པར་མི་རྟོགས་པ་དང་རྨོངས་པ་དང་ཀུན་ཏུ་རྨོངས་པ་དང་མུན་པའི་རྣམ་པ་ཞེས་བྱ་བ་འདི་ནི་མ་རིག་པ་ཞེས་བྱའོ། །ཞེས་གསུངས་ཏེ། དེ་ལ་དགོངས་ནས་འགྲེལ་པས་ཀྱང་། མི་ཤེས་པ་ལ་སོགས་པ་ནི་རྣམ་གྲངས་སོ། །ཞེས་བཤད་དོ། །མདོའི་དོན་ནི། དང་པོ་གསུམ་གྱིས་ཐོས་བསམ་སྒོམ་པ་ལ་གེགས་བྱེད་པའི་མ་རིག་པ་གསུམ་བྱེད་ལས་དང་མཐུན་པའི་མིང་གིས་བསྟན་ཅིང། ཕྱི་མ་གསུམ་ནི་ཐེ་ཚོམ་ལོག་རྟོག་མ་རྟོགས་པ་དང་མཚུངས་ལྡན་གསུམ་དང་། ཆུང་འབྲིང་ཆེ་གསུམ་དང་། གཟུགས་མེད་གཟུགས་དང་འདོད་པའི་སས་བསྡུས་གསུམ་ལ་ཡང་སྦྱར་བའི་སྦྱོར་ཚུལ་སོ་སོའི་དབང་དུ་མ་བྱས་ན་མི་འགལ་ལོ། །གཉིས་པ་གྲུབ་མཐའ་སོ་སོའི་འདོད་ཚུལ་ལ། སྤྱི་དང་། མ་

― GTD003_Page_0035 ―

^{[མ་དཔེ་གཟིགས་ན་འདིར་གནོན།]}

[Full Size]

འདྲེས་པའི་མ་རིག་པ་འདོད་ཚུལ་གཉིས། དང་པོ་ནི། བྱེ་སྨྲ་དང་སེམས་ཙམ་པ་གཉིས་ན་རེ། དབུ་མ་པ་ཁྱོད་ཀྱིས་མ་རིག་པ་ཞེས་པའི་དགག་སྒྲ་སྨད་པ་ལ་བྱས་ནས་ཤེས་རབ་ངན་པ་ཞིག་མ་རིག་པར་འདོད་པ་མི་འཐད་པར་ཐལ། དེ་ལྟ་མ་ཡིན་པའི་ཕྱིར་ཞེས་སྟོན་པར། མཛོད་ལས། ཤེས་རབ་ངན་པའོ་མིན་ལྟའི་ཕྱིར། །ཞེས་བྱུང་། གལ་ཏེ་ལྟ་བའི་ཀུན་སྦྱོར་དང་མ་རིག་པའི་ཀུན་སྦྱོར་འགལ་ཡང་འདིར་མ་རིག་པར་འདོད་པའི་ཤེས་རབ་ངན་པ་དེ་ལྟ་བ་ལས་གཞན་ཞིག་གོ་ཞེས་ཀྱང་སྨྲ་མི་ནུས་ཏེ། ལྟ་བ་ནི་མ་རིག་དེ་དང་མཚུངས་ལྡན་དུ་ཡོད་ལ། ཡང་དེ་ལས་ལོགས་སུ་ཤེས་རབ་ཀྱི་རྫས་ཤིག་བཞག་ན་རྫས་མཚུངས་ཉམས་པའི་ཕྱིར། མཛོད་ལས། ལྟ་བ་དེ་དང་མཚུངས་ལྡན་ཕྱིར། །ཞེས་བྱུང། རྟོག་དཔྱོད་སོགས་ལ་ཞིབ་ཆ་དགོས། གཞན་ཡང་། འཇིག་ལྟ་ཆོས་ཅན། མ་རིག་པ་མ་ཡིན་པར་ཐལ། མདོ་ལས་མ་རིག་པས་ཉེ་བར་ཉོན་མོངས་ཅན་དུ་གྱུར་པའི་ཤེས་རབ་ཅེས་མ་རིག་པས་ཉོན་མོངས་ཅན་དུ་བྱ་རྒྱུ་ལ་གསུངས་པའི་ཕྱིར། མཛོད་ལས། ཤེས་རབ་ཉོན་མོངས་བསྟན་ཕྱིར་རོ། །ཞེས་བྱུང་། བསྡུ་བ་ཡང་དེ་དང་མཐུན་ཞིང་། ལུང་དེ་དག་རྟེན་འབྲེལ་ཆེན་མོར་འབྲུ་སྣོན་ཚུལ་དེ་ཉིད་ལ་བལྟའོ། །དཔལ་ལྡན་ཆོས་གྲགས་དང་ཟླ་བ་སོགས་ཀྱིས་དེ་བཀག་ཚུལ་ནི། ཐོག་མའི་མ་རིག་པ་དེས་བདག་མེད་རྟོགས་པའི་ཤེས་རབ་ཀྱི་ལོག་ཕྱོགས་མ་བཟུང་ན་དེ་གཉིས་འཛིན་སྟངས་དངོས་འགལ་དུ་མི་འགྲོ་བས་དྲུངས་འབྱིན་

― GTD003_Page_0036 ―

^{[མ་དཔེ་གཟིགས་ན་འདིར་གནོན།]}

[Full Size]

མི་ནུས་ཤིང་། རང་ཉིད་འདོད་པའི་དཔེ་དང་ཡང་འགལ་ཏེ། མཛའ་བའི་འགལ་ཟླ་ལ་དགྲ་ལྟ་བུ་དགོས་ཀྱི་བར་མ་ཞིག་མི་ཡོང་ལ། རྫུན་ཚིག་གི་འགལ་ཟླ་ལ་ཡང་བདེན་ཚིག་དགོས་པའི་ཕྱིར། དེས་ན་འཇིག་ལྟ་མ་རིག་པ་ཡིན་ཏེ། རིག་པ་ཡེ་ཤེས་དང་འཛིན་སྟངས་དངོས་སུ་འགལ་བའི་སྒོ་ནས་དེའི་མི་མཐུན་ཕྱོགས་སུ་སོང་བའི་ཕྱིར། རྣམ་འགྲེལ་ལས། རིག་པའི་མི་མཐུན་ཕྱོགས་ཕྱིར་དང། །སེམས་བྱུང་ཉིད་ཀྱིས་དམིགས་པའི་ཕྱིར། །ལོག་པར་དམིགས་ཉིད་མ་རིག་པར། །གསུངས་ཕྱིར་གཞན་ནི་རིགས་མ་ཡིན། །ཞེས་གསུངས་པའི་ཕྱིར། རྐང་པ་གཉིས་པས་དགག་སྒྲའི་དོན་བསྟན་ཅིང་ཕྱི་མ་གཉིས་སྔར་བཤད་ཟིན་ཏོ། །གཉིས་པ་མ་འདྲེས་པའི་མ་རིག་པ་འདོད་ཚུལ་ལ། བྱེ་སྨྲ་རྣམས་ལྟ་བ་ལྔ་དང་། ལྟ་མིན་གཞན་བཞི། ཁྲོ་སོགས་བཅུ་གང་དང་ཡང་མཚུངས་ལྡན་མ་ཡིན་པའི་མ་རིག་པ་ཞིག་ལ་འདོད་དོ། །དེ་སྐད་དུ་ཡང་། མཛོད་ལས། མི་དགེ་ལ་ནི་མ་འདྲེས་དང། །ལྟ་དང་ལྡན་ལ་ཉི་ཤུ་འབྱུང། །ཞེས་བྱུང་། འབྱུང་ཚུལ་ནི། དེ་དང་མཚུངས་ལྡན་གྱི་སེམས་དེ་ཆོས་ཅན། ཁྱོད་ཀྱི་འཁོར་དུ་སེམས་བྱུང་ཉི་ཤུ་འབྱུང་སྟེ། སེམས་ཀྱི་ས་མང་བཅུ། ཉོན་མོངས་པའི་ས་མང་དྲུག །མི་དགེ་བའི་ས་མང་གཉིས། རྟོག་དཔྱོད་གཉིས་དང་བཅས་པ་འབྱུང་བའི་ཕྱིར། མཛོད་ལས། ཚོར་དང་སེམས་པ་འདུ་ཤེས་དང། །འདུན་དང་རེག་དང་བློ་གྲོས་དྲན། །ཡིད་ལ་བྱེད་དང་མོས་པ་དང། །ཏིང་ངེ་འཛིན་སེམས་ཐམས་ཅད་ལ། །ཞེས་དང་།

― GTD003_Page_0037 ―

^{[མ་དཔེ་གཟིགས་ན་འདིར་གནོན།]}

[Full Size]

རྨོངས་དང་བག་མེད་ལེ་ལོ་དང། །མ་དད་པ་དང་རྨུགས་དང་རྒོད། །ཉོན་མོངས་ཅན་ལ་རྟག་ཏུ་འབྱུང། །ཞེས་གསུངས་པའི་ཕྱིར། ཟུར་ཕྱི་མ་གཉིས་གྲུབ་སྟེ། འཇིག་ལྟ་མཐར་ལྟ་གཉིས་དང་མཚུངས་ལྡན་ཅི་རིགས་ལས་གཞན་པའི་འདོད་ཉོན་ཡིན་པའི་ཕྱིར། ཁམས་གོང་ན་དེའི་འཁོར་དུ་བཅུ་དྲུག་དང་བཅུ་བདུན་བཅོ་བརྒྱད་ཡང་འབྱུར་ངོ་། །སེམས་ཙམ་པས་གཙོ་བོར་ཉོན་ཡིད་འཁོར་ལ་འདོད་ཀྱང་མ་ངེས་ཏེ། ཀུན་བཏུས་ལས། མ་རིག་པ་མ་འདྲེས་པ་གང་ཡིན་པ་དེ་ནི་འདོད་པའི་ཁམས་ན་ཡིད་མི་བདེ་བ་དང་། བཏང་སྙོམས་དང་མཚུངས་པར་ལྡན་ནོ། །ཞེས་གསུངས་ཤིང་། ཉོན་ཡིད་འཁོར་ལ་ཡིད་མི་བདེ་མེད་པས་མཛོད་ལྟར་འཇུག་ཤེས་གཅིག་ཀྱང་འདོད་པར་མངོན་ནོ། །མ་འདྲེས་པའི་དོན་ཡང་མཛོད་ལས་མཚུངས་ལྡན་མ་འདྲེས་པ་ལ་བཤད་ཅིང། བཙུན་པ་ངོ་བོ་ཉིད་མེད་པས་སངས་རྒྱས་ཁོ་ནར་ཡོད་པ་ལ་དེའི་ཆོས་མ་འདྲེས་པར་བཤད་པ་ལྟར་ཉོན་ཡིད་ཁོ་ན་ལ་ཡོད་པས་རྟེན་མ་འདྲེས་པར་བཤད། དོན་གསང་མཁན་པོས་འདིས་རང་སྟོབས་ཀྱིས་ཆགས་སོགས་འདྲེན་ཀྱང་གཞན་གྱིས་འདི་འདྲེན་མི་ནུས་པའི་ཕྱིར་མཐུ་མ་འདྲེས་པའམ་རྫས་མ་འདྲེས་པ་ལ་བཤད་དོ། །ཕྱི་མ་མི་འཐད་དེ། དེ་དག་ཕན་ཚུན་བརྟེན་ནས་འཇུག་པས་འདི་ཁོ་ནས་དྲངས་ཞེས་བཞག་ཏུ་མེད་པའི་ཕྱིར། དེས་ན་ཉོན་ཡིད་འཁོར་གཞིར་བཞག་ལ་སྔ་མ་ཉིད་རྗེ་བླ་མས་འཐད་ཕྱོགས་སུ་མཛད་དོ། །རྩོད་སྤོང་ལ་ཁོ་ན་རེ། འཇིག་ལྟ་ལ་མཐོང་སྤང་མེད་པར་

― GTD003_Page_0038 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ། དེ་ལ་ཉོན་ཡིད་འཁོར་གྱིས་ཁྱབ་པའི་ཕྱིར་ན་མ་གྲུབ་སྟེ། མཐོང་སྤང་ཀུན་སྦྱོར་གསུམ་ཡོད་པའི་ཕྱིར་དང་། འཇིག་ལྟ་ལ་ཀུན་བཏགས་དང་ལྷན་སྐྱེས་གཉིས་མི་འབྱེད་པ་བྱེ་སྨྲའི་ལུགས་སུ་གསུངས་པའི་ཕྱིར། ཡང་ཁོ་ན་རེ། ཐོག་མའི་མ་རིག་པའི་མཚན་ཉིད་དེ་མི་འཐད་པར་ཐལ། དེ་ལ་གཉིས་པ་འདུ་བྱེད་ཀྱི་དངོས་རྒྱུས་མ་ཁྱབ་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་གཉིས་བར་དུ་སྦྱོར་མཐའི་ཡིད་བྱེད་ཀྱིས་ཆོད་པ་ཡོད་ལ། མི་དགེ་བའི་རྩ་བ་གསུམ་ཅི་རིགས་ཀྱིས་ཆོད་པའང་ཡོད་པའི་ཕྱིར། ཡང་ཁོ་ན་རེ། འཇིག་ལྟ་ཆོས་ཅན། རྩ་ཉོན་དྲུག་གི་གྲངས་འདྲེན་གྱི་མ་རིག་པ་ཡིན་པར་ཐལ། དེའི་ནང་ཚན་གང་ཞིག །མ་རིག་པ་ཡིན་པའི་ཕྱིར་ན་མ་ཁྱབ། ཡང་ཁོ་ན་རེ། མ་འདྲེས་པའི་མ་རིག་པ་ལ་ཉོན་ཡིད་འཁོར་དགོས་པར་ཐལ། ཉོན་ཡིད་མེད་ན་མ་འདྲེས་པའི་མ་རིག་པ་མེད་པར་ཐལ་བ་འཕངས་ཚུལ་ཡོད་པའི་ཕྱིར་ན་མ་ཁྱབ། རྟག་ཏུ་མངོན་གྱུར་དུ་འཇུག་པའི་དེ་མེད་པར་ཐལ་བ་འཕངས་པ་ཡིན་པའི་ཕྱིར། ཡང་ཁོ་ན་རེ། རང་རྒྱུད་ཀྱི་མ་རིག་པའི་དབང་གིས་འཁོར་བར་འཁོར་བའི་གང་ཟག་མེད་པར་ཐལ། དེ་དེའི་རྒྱུད་ཀྱི་འཁོར་བའི་རྒྱུ་མ་ཡིན་པའི་ཕྱིར་ན་མ་ཁྱབ། ཡང་ཁོ་ན་རེ། མ་རིག་པའི་རྒྱུ་མེད་པར་ཐལ། འདིར་དངོས་སུ་མ་བསྟན་པའི་ཕྱིར་ན་མ་ཁྱབ་སྟེ། འདིར་མ་རིག་པ་དང་པོར་བསྟན་པ་འཁོར་བའི་རྩ་བ་དེ་ལ་ཐུག་པར་ཤེས་ཆེད་ཡིན་པའི་ཕྱིར། དེ་བཞིན་དུ་སྨྲེ་སྔགས་སོགས་སློང་བའི་ཡིད་ཚོར་མྱ་ངན་དང། དེ་ལས་གཞན་པའི་ཡིད་

― GTD003_Page_0039 ―

^{[མ་དཔེ་གཟིགས་ན་འདིར་གནོན།]}

[Full Size]

མི་བདེ་སོགས་སྐྱོ་བ་སྐྱེད་པའི་ཆེད་ཙམ་དུ་གསུངས་ཀྱང་རྒ་ཤིའི་འོག་ཏུ་ཡན་ལག་གཞན་མ་གསུངས་པས་ཕྱི་མཐའ་བཟུང་བར་མི་འགྱུར་བ་ཤེས་སླ། དགྲ་བཅོམ་པའི་རྒྱུད་ལ་འཁོར་བ་ལྡན་མི་ལྡན་སོགས་ཀུན་མཁྱེན་བླ་མའི་གསུང་ལ་བལྟའོ། །གཉིས་པ་འདུ་བྱེད་བཤད་པ་ལ། དགག་བཞག་སྤངས་གསུམ། དང་པོ་ནི། མཛོད་ལྟར་ལུས་ངག་གི་ལས་གཟུགས་ཅན་ཁོ་ན་བསམ་པའི་ལས་དང། ཡིད་ལས་སེམས་པའི་ལུས་སུ་འདོད་ཟེར་ན། མི་འཐད་པར་ཐལ། ཡིད་ལས་ཀྱང་མཐར་ཐུག་གྲུབ་པའི་ཚེ་བསམ་པའི་ལས་སུ་འཇོག་པའི་ཕྱིར། ཀུན་བཏུས་ལས། བསམ་པའི་ལས་གང་ཞེ་ན། ལུས་དང་ངག་དང་ཡིད་ཀྱི་ལས་སོ། །ཞེས་གསུངས་པའི་ཕྱིར། གཞན་ཡང་། དེ་མི་འཐད་པར་ཐལ། ལས་སྤྱི་ཙམ་གཟུགས་ཅན་དུ་སུས་ཀྱང་མི་འདོད་ལ། ལུས་ངག་གི་ལས་གཟུགས་ཅན་དུ་འདོད་པ་ཡང་བྱེ་སྨྲ་དང་ཐལ་འགྱུར་བ་གཉིས་ལས་མེད་པའི་ཕྱིར། རྩ་ཤེ་ཊཱིཀ་ཆེན་ལས། གཞུང་གཞན་ལས་བྱེ་བྲག་ཏུ་སྨྲ་བས་ལུས་ངག་གི་ལས་གཟུགས་ཅན་དུ་འདོད་པ་བཀག་ནས། ལུས་ངག་གི་བྱ་བ་ལ་འཇུག་པའི་དུས་ཀྱི་སེམས་པ་ལ་བཤད་མོད་ཀྱང་ཟླ་བས་གཟུགས་ཅན་དུ་བཞེད་དོ། །ཞེས་གསུངས་པའི་ཕྱིར། ལུང་འདིའི་དོན་དུ་བསམས་ནས་ལུས་ཀྱི་རྣམ་པར་རིག་བྱེད་དང་མཉམ་དུ་འཇུག་པའི་སེམས་པ་ཁོ་ན་ལུས་ལས་ཞེས་སོགས་སྨྲ་བའང་འཐད་དེ། རྣམ་འགྱུར་གྱིས་རྫུན་བྱས་པ་ངག་ལས་དང།

― GTD003_Page_0040 ―

^{[མ་དཔེ་གཟིགས་ན་འདིར་གནོན།]}

[Full Size]

ངན་སྔགས་ཀྱིས་སྲོག་བཅད་པ་ལུས་ལས་ཡིན་པའི་ཕྱིར། ཁ་ཅིག་ན་རེ། བྱེ་སྨྲའི་ལུགས་ལ་ངག་ལས་སུ་གྱུར་པའི་བསྟན་བཅོས་ཡོད་པར་ཐལ། མཛོད་ལས། ངག་རྣམ་རིག་བྱེད་ནི་ངག་སྒྲ། །ཞེས་དེ་ལ་ངག་སྒྲ་ཞིག་བཞག་པའི་ཕྱིར་ན་དེའི་ལུགས་ལ་འགལ་ཁྱབ་བོ། །དཔེ་སྟོན་སྡེ་པ་ན་རེ། བརྣབ་སེམས་གནོད་སེམས་ལོག་ལྟ་གསུམ་ལས་ཡིན་པར་ཐལ། མདོ་ལས། ལས་རྣམ་པ་གསུམ་བྱས་ཤིང་བསགས་པ་ཡིན་ཞེ་ན། འདི་ལྟ་སྟེ། དགེ་སློང་ལ་ལ་བརྣབ་སེམས་དང་ལྡན་པ་ཡིན། ཞེས་སོགས་ཀྱིས་དེ་གསུམ་ལས་ལོགས་སུ་ཡིད་ལས་མ་བཤད་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། ལས་ཉོན་གཉིས་འགལ་བའི་ཕྱིར་དང་། མཛོད་ལས། གསུམ་ལམ་བདུན་ནི་ལས་ཀྱང་ཡིན། །ཞེས་མི་དགེ་བཅུ་སེམས་པ་འཇུག་པའི་གཞི་ཡིན་པས། ལས་ལམ་ཡིན་པར་མཚུངས་ཀྱང། ཕྱི་མ་གསུམ་ལས་མ་ཡིན་པར་གསུངས་པའི་ཕྱིར། ལས་གྲུབ་པ་ལས། ལས་ཀྱང་ཡིན་ལ་བདེ་འགྲོ་དང་ངན་འགྲོའི་ལམ་ཡང་ཡིན་པས་ལས་ལམ་དུ་འཇོག་ཚུལ་གཅིག་ཀྱང་གསུངས་སོ། །ཁོ་ན་རེ། སེམས་པ་ཡིན་ན་ལས་ལམ་མ་ཡིན་དགོས་པར་ཐལ། ལམ་རིམ་ལས། སེམས་པ་ནི་ལས་ཡིན་ལ་ལས་ཀྱི་ལམ་ནི་མ་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། སྲོག་གཅོད་པའི་ཀུན་སློང་གི་སེམས་པ་ལ་དགོངས་པའི་ཕྱིར། ཡང་གོ་ཤཱཀ་སོགས་ན་རེ། ལས་དཀར་དང་། དགེ་བའི་ལས་དོན་གཅིག །ལས་ནག་དང་།

― GTD003_Page_0041 ―

^{[མ་དཔེ་གཟིགས་ན་འདིར་གནོན།]}

[Full Size]

མི་དགེ་བའི་ལས་དོན་གཅིག་ཟེར་ན། ཞེ་སྡང་གིས་ཀུན་ནས་བསླངས་ཏེ་སྲོག་གཅོད་པའི་ཕྱིར་སྦྱིན་པ་བཏང་བའི་ལས་ཆོས་ཅན། དགེ་བ་ཡིན་པར་ཐལ། དཀར་པོའི་ལས་ཡིན་པའི་ཕྱིར་ཏེ། ངོ་བོ་སྦྱིན་པའི་ལས་ཡིན་པ་གང་ཞིག །སྦྱིན་པ་ངོ་བོ་ཉིད་ཀྱིས་དགེ་བར་བཤད་པའི་ཕྱིར། འདོད་མི་ནུས་ཏེ། རྣམ་སྨིན་ནག་པའི་ལས་ཡིན་པའི་ཕྱིར་ཏེ། རྣམ་སྨིན་དཀར་ནག་བསམ་པ་དཀར་ནག་ལ་རག་ལས་པའི་ཕྱིར། རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་གསུངས་པའི་ཕྱིར། འདིའི་དོན་འདོད་པའི་སས་བསྡུས་ཀྱི་དུག་གསུམ་བྱེ་བྲག་པ་གཅིག་ལ་དགོངས་པས་གཏི་མུག་ཐམས་ཅད་མ་ཡིན་ཏེ། བསོད་ནམས་དང་མི་གཡོ་བའི་ལས་ཀྱི་ཀུན་སློང་གི་འཇིག་ལྟ་ཡོད་ལ། དགྲ་བཅོམ་པའི་རྒྱུད་ཀྱི་བདག་འཛིན་ཡང་གཏི་མུག་ཏུ་བཤད་པའི་ཕྱིར། བྱས་པ་ལ་ཁོ་ན་རེ། དེ་ཆོས་ཅན། བསམ་པ་ནག་ལ་སྦྱོར་བ་དཀར་བའི་ལས་མ་ཡིན་པར་ཐལ། སྦྱོར་བ་ནག་པའི་ལས་ཡིན་པའི་ཕྱིར། དེར་ཐལ། སྦྱོར་བ་ནག་ལ་དངོས་གཞི་དཀར་བའི་ལས་ཡིན་པའི་ཕྱིར་ན་གྲགས་ཚོད་དང་མཐུན་ཆེད་མ་ཁྱབ་བོ། །འདོད་མི་ནུས་ཏེ། དཀར་ནག་འདྲེས་ཚུལ་དེ་ལྟར་ཡིན་པ་ཀུན་བཏུས་ལས། བསམ་པ་ནག་ལ་སྦྱོར་བ་དཀར་བའམ། སྦྱོར་བ་ནག་ལ་བསམ་པ་དཀར་བའོ། །ཞེས་གསུངས་པའི་ཕྱིར། ཕན་སེམས་ཀྱིས་བུ་

― GTD003_Page_0042 ―

^{[མ་དཔེ་གཟིགས་ན་འདིར་གནོན།]}

[Full Size]

སློབ་ལ་མཐོ་འཚམས་པ་སོགས་ལས་ནག་ཡིན་ཀྱང་དགེ་བར་མི་འགལ་བ་འདིས་ཤེས་སོ། །དེ་ལ་ཁོ་ན་རེ། ཕན་སེམས་ཀྱིས་ཀུན་ནས་བསླངས་པའི་དེ་ཆོས་ཅན། དཀར་ཆོས་ཀྱང་མ་ཡིན་པར་ཐལ། དཀར་བའི་ལས་མ་ཡིན་པའི་རྒྱུ་མཚན་འཐད་པའི་ཕྱིར་ན་མ་ཁྱབ། འདོད་མི་ནུས་ཏེ། རིགས་རྒྱན་ལས། སྤྱད་པ་ལས་བདེ་བ་དཀར་ཆོས་ཀྱི་མཚན་ཉིད། ཅེས་གསུངས་པའི་ཕྱིར། འདིར་ཁ་ཅིག །ལས་དཀར་དང་དཀར་བའི་ལས་ཀྱི་ཁྱད་འབྱེད་པ་ནི། སྔོན་གྱི་མཁས་པ་ཐམས་ཅད་ལས་མཛངས་པའི་གཏམ་མོ། །འདི་དང་མཛོད་ཀྱི་བཤད་པ་མི་མཐུན་ཏེ། མཛོད་ལས། མི་དགེ་གཟུགས་དང་འདོད་གཏོགས་པའི། །དགེ་བ་རྣམས་ནི་རིམ་བཞིན་དུ། །ནག་དང་དཀར་དང་གཉིས་ཀའི་ལས། །ཞེས་ངོ་བོའི་སྒོས་མི་འཇོག་པར་རྒྱུད་ལ་སྦྱར་ཏེ་འདོད་པར་མི་དགེ་བ་ཤུགས་ཆེ་བས་མི་དགེ་བ་གང་ཡིན་གཅིག་ཏུ་ནག་པ་དང། འདོད་པའི་བདེ་འགྲོར་འཕེན་བྱེད་ཕལ་ཆེར་མི་དགེ་བ་དང་འདྲེས་པར་ལྡན་ཞིང། འབྲས་དུས་ཀྱང་བདེ་སྡུག་འདྲེས་མར་མྱོང་བས་དཀར་ནག་འདྲེས་མ་དང། གཟུགས་སུ་སྐྱེ་བ་འཕེན་བྱེད་རྣམས་གཅིག་ཏུ་དཀར་བར་འདོད་ཀྱང། གཟུགས་མེད་མ་བཤད་པ་ནི་འདིར་གང་ན་སྒོ་གསུམ་གྱི་ལས་དང། རྣམ་སྨིན་ཡང་བར་སྲིད་དང་སྐྱེ་སྲིད་གཉིས་ཀ་ཡོད་པའི་ལས་ཀྱི་དབྱེ་བ་འཆད་པའི་སྐབས་ཡིན་པའི་ཕྱིར། ལུང་དེའི་དཀར་ནག་འདྲེས་མ་ལ་དགེ་བས་ཁྱབ་ཀྱང། ཀུན་བཏུས་ཀྱི་དེ་ལ་མ་ཁྱབ་བོ། །ཁ་ཅིག་ན་རེ། ཀུན་སློང་ལ་ཕན་

― GTD003_Page_0043 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཡོད་པའི་སྲོད་གཅོད་ཀྱི་ལས་ལ་བསམ་པ་དཀར་ལ་སྦྱོར་བ་ནག་པའི་ལས་ཀྱིས་ཁྱབ་པར་ཐལ། དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་ཅན་བསད་པའི་ལས་དེ་སྲོག་གཅོད་ཀྱི་ལས་ཡིན་ཀྱང་དགེ་བར་གསུངས་པའི་ཕྱིར་ན་མ་ཁྱབ། ཁ་ཅིག་རྟགས་མ་གྲུབ་སྟེ། དེ་སྲོག་གཅོད་ཀྱི་ལས་མ་ཡིན་པའི་ཕྱིར། གཞན་དུ་ན་སངས་རྒྱས་ལ་ཡང་ཡོད་པར་ཐལ་ལོ་ཞེས་ཟེར། འོ་ན། ས་མཐོན་པོ་ལ་ལུས་ངག་གི་བདུན་མ་གནང་བར་ཐལ། དེའི་ཚེ་དེ་དག་བྱེད་པ་མི་སྲིད་པའི་ཕྱིར། རྩ་བར་འདོད་མི་ནུས་ཏེ། ཕན་སེམས་ཙམ་ཡོད་ཀྱང་དེ་བསད་པས་རང་གིས་བསོད་ནམས་འཐོབ་སྙམ་ན་ལས་འབྲས་ལ་རྨོངས་པའི་མ་རིག་པས་ཀུན་ནས་བསླངས་པས་མི་དགེ་བར་འགྲོ་བ་དཔེར་ན་དགེ་སློང་མ་སྐྱོང་མས་ཆོམ་རྐུན་དྲུག་ཅུ་བསད་པས་ཕམ་པ་བྱུང་བ་ལྟ་བུ་ཡིན་པའི་ཕྱིར། ཁ་ཅིག །མི་དགེ་བའི་ལས་གང་ཞིག །རྣམ་སྨིན་འབྱིན་ན་རྣམ་སྨིན་མྱོང་ངེས་ཀྱི་ལས་ཡིན་པས་ཁྱབ་ཟེར་ན། མི་འཐད་པར་ཐལ། བྱས་ལ་མ་བསགས་པའི་མི་དགེ་བའི་ལས་ཀྱང་གཉེན་པོས་མ་བཅོམ་ན་རྣམ་སྨིན་ཆུད་མི་ཟ་བ་གང་ཞིག །དེ་མ་ངེས་པའི་ལས་ཡིན་པའི་ཕྱིར། རྣལ་འབྱོར་སྤྱོད་པའི་ས་ལས་མ་ངེས་པའི་ལས་ནི་བསམས་བཞིན་དུ་བྱས་ལ། མ་བསགས་པ་གང་ཡིན་པའོ། །ཞེས་གསུངས་པའི་ཕྱིར། ཡང་ཁ་ཅིག །ངེས་པའི་ལས་ཡིན་ན་རྣམ་སྨིན་མྱོང་ངེས་ཡིན་པས་ཁྱབ་ཟེར་ན། མ་སྐྱེས་དགྲས་ཕ་བསད་པའི་

― GTD003_Page_0044 ―

^{[མ་དཔེ་གཟིགས་ན་འདིར་གནོན།]}

[Full Size]

མཚམས་མེད་ལས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། མཚམས་མེད་ལས་ཡིན་པའི་ཕྱིར། ཁྱབ་སྟེ། མཚམས་མེད་དུ་འགྱུར་བ་ལ་ཕ་མ་གླིང་གསུམ་གྱི་སྐྱེས་པ་བུད་མེད་གང་རུང་ཡིན་ཞིང་། གསོད་མཁན་ཡང་ཟ་མ་སོགས་མ་ཡིན་པ་ཞིག་གིས་འདུ་ཤེས་མ་འཁྲུལ་བའི་སྒོ་ནས་བསམས་བཞིན་དུ་བྱས་ཏེ་དངོས་གཞི་རྫོགས་དགོས་པའི་ཕྱིར་དང། ངེས་པའི་ལས་ཀྱི་དོན་དེ་ཡིན་པའི་ཕྱིར། རྣལ་འབྱོར་སྤྱོད་པའི་ས་ལས། ངེས་པའི་ལས་ནི་བསམས་བཞིན་དུ་བྱས་པ་དང་། བསགས་པ་གང་ཡིན་པའོ། །ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། རྟོག་གེ་འབར་བ་ལས། རྒྱུར་གྱུར་པའི་སེམས་པས་མངོན་པར་འདུ་བྱས་པ་ནི། སེམས་པའི་ཁྱད་པར་གཞན་ཐོབ་པ་ན་ཡོངས་སུ་ཟད་པར་འགྱུར་ཏེ། ཇི་ལྟར་སོར་མོའི་ཕྲེང་བ་དང་། མ་སྐྱེས་དགྲ། ཞེས་སོགས་དང། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་པ་དག། །ཕྱིས་ནས་བག་དང་ལྡན་པ་ཉིད་གྱུར་ན། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་འཕྲེང་མཐོང་ལྡན་བདེ་བྱེད་བཞིན། །ཞེས་གསུངས་པའི་ཕྱིར། དེས་ན་དམྱལ་བར་དར་གྱི་ཕོ་ལོང་བརྡབ་པ་ཙམ་སྐྱེས་ཚུལ་བསྟན་པ་ནི་ལས་འབྲས་ལ་ཡིད་ཆེས་སྐྱེད་པའི་ཕྱིར་ཡིན་ལ། དེའི་རྣམ་སྨིན་གྱི་དམྱལ་བའི་སྡུག་བསྔལ་མ་མྱོང་ཡང་འབྲས་བུ་ཙམ་མ་ལུས་པར་དག་པ་མ་ཡིན་པའི་ཞིབ་ཆ་དགོས། འདི་ལ་ཁ་ཅིག །མ་སྐྱེས་དགྲ་ལ་མཚམས་མེད་མ་བྱུང་བར་ཐལ། ཡབ་མ་ཤི་

― GTD003_Page_0045 ―

^{[མ་དཔེ་གཟིགས་ན་འདིར་གནོན།]}

[Full Size]

གོང་ནས་གསོད་སེམས་ལོག་པའི་ཕྱིར། འོད་ལྡན་ལས། མ་སྐྱེས་དགྲས་གསོན་པའི་སྒྲ་ཞིག་ཡོད་ན་མགུ་བའི་རྫས་སྦྱིན་པར་དམ་བཅས་པ་དང་། གཟུགས་ཅན་སྙིང་པོ་ཤིན་ཏུ་མྱུར་བར་འོངས་པ་རྣམས་ཀྱི་སྒྲ་ཐོས་པས་ཤི་བར་གྱུར་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། སྙིང་རྗེ་སྐྱེས་ཀྱང་གསོད་སེམས་མ་ལོག་པའི་ཕྱིར། དེ་ཉིད་ལས། རབ་ཏུ་སྡང་བའི་གནས་སྐབས་ན་སྦྱོར་བ་བྱས་པ་ནི་སྙིང་བརྩེ་བའི་གནས་སྐབས་ན་ཡོངས་སུ་རྫོགས་ན་ཆུང་ངུ་ཉིད་ཡིན་པས་མ་སྐྱེས་དགྲ་ལ་མཚམས་མེད་པ་ཆུང་ངུ་ཉིད་བྱུང་བའི་འགལ་བ་མེད་དོ། །ཞེས་གསུས་པའི་ཕྱིར། ཡང་ཁ་ཅིག །གང་ཟག་གཅིག་བསད་པས་མཚམས་མེད་གཉིས་འབྱུང་བ་ཡོད་པར་ཐལ། གཙུག་ཕུད་ཅན་ལ་དགྲ་བཅོམ་བསད་པའི་དེ་བྱུང་བ་གང་ཞིག །ཕ་བསད་པའི་དེ་ཡང་བྱུང་བའི་ཕྱིར་ན་མ་ཁྱབ་སྟེ། མཛོད་འགྲེལ་ལས། དགྲ་བཅོམ་པ་མ་ཡིན་པའི་འདུ་ཤེས་ཀྱིས་དགྲ་བཅོམ་པ་བསད་ན་མཚམས་མེད་པར་འགྱུར་ཏེ། ཞེས་དང་། གང་གིས་ཕ་དགྲ་བཅོམ་པ་བསད་ན་ཡང་མཚམས་མེད་པ་ནི་གཅིག་ཁོ་ནར་འགྱུར་ཏེ། རྟེན་གཅིག་པའི་ཕྱིར། ཞེས་གསུངས་ཤིང། ལུང་ལས་གཉིས་སུ་གསུངས་པ་ཡང་སྒོ་གཉིས་ནས་སྤྱོས་པ་ཙམ་ཡིན་པར་བཤད་དོ། །འདུལ་བའི་རྗེས་འབྲང་གི་མངོན་པ་བ་རྣམས་གཙུག་ཕུད་ཅན་ལ་དགྲ་བཅོམ་བསད་པའི་མཚམས་མེད་མ་བྱུང་བར་འདོད་དེ། འོད་ལྡན་ལས། ལུས་གཅིག་ལ་

― GTD003_Page_0046 ―

^{[མ་དཔེ་གཟིགས་ན་འདིར་གནོན།]}

[Full Size]

དགྲ་བཅོམ་པའི་ཆོས་མེད་པར་ནོར་བས་བསད་ན་མཚམས་མེད་པར་འགྱུར་ན་མི་རུང་གི །འོན་ཀྱང་ཕམ་པ་ནི་སུས་ཀྱང་བཟློག་པར་དཀའོ། །ཞེས་གསུངས་པའི་ཕྱིར། མཚམས་མེད་ལྷག་མ་རྣམས་འབྱུང་མི་འབྱུང་གི་ཁྱད་པར་ཡང། མཛོད་ལས། མཚན་ནི་གཞན་དུ་གྱུར་ཀྱང་འགྱུར། །གང་གི་ཟླ་མཚན་ལས་བྱུང་མ། །སངས་རྒྱས་བརྡེག་པར་སེམས་ལ་མིན། །བསྣུན་འོག་དགྲ་བཅོམ་པ་ལ་མིན། །ཞེས་གསུངས་ཏེ་གོ་སླའོ། །ཡང་ཁ་ཅིག །དགེ་འདུན་འཁོར་ལོའི་དབྱེན་ལ་མནར་མེད་དུ་སྐྱེ་བ་འཕེན་བྱེད་ཀྱིས་ཁྱབ་པར་ཐལ། དབྱེན་གྱི་མཚམས་མེད་ལ་དེས་ཁྱབ་པའི་ཕྱིར་ན་མ་ཁྱབ། འདོད་མི་ནུས་ཏེ། མ་སྒྲིབ་ལུང་མ་བསྟན་ཡིན་པའི་ཕྱིར། དེ་ལ་ཁ་ཅིག །དབྱེན་གྱི་མཚམས་མེད་ལ་ཡང་འཕེན་བྱེད་ལས་ཀྱིས་མ་ཁྱབ་པར་ཐལ། ཚེ་གཅིག་ལ་མཚམས་མེད་དུ་མ་བསགས་ན་གཅིག་མ་གཏོགས་རྫོགས་བྱེད་ཡིན་པའི་ཕྱིར། མཛོད་ལས། ལྷག་པའི་གནོད་པ་ལྷག་པར་འགྱུར། །ཞེས་གསུངས་པའི་ཕྱིར་ཟེར་ན། དེ་བྱེ་སྨྲའི་ལུགས་ཡིན་ཞིང་། དེའི་དབང་དུ་བྱས་ཀྱང་མི་གནོད་དེ། དབྱེན་གྱི་མཚམས་མེད་ལྕི་ཤོས་ཡིན་པའི་ཕྱིར། གོང་མ་ལྟར་ན་ཤིན་ཏུ་མི་འཐད་པར་ཐལ། མྱོང་འགྱུར་གསུམ་ཚེ་དེ་དང་དེ་ལ་འགོ་བརྩམས་པས་ཆོག་གི །རྣམ་སྨིན་རྫོགས་མི་དགོས་པས་མཚམས་མེད་གཞན་རྣམས་ཀྱང་འཕེན་བྱེད་དུ་བཞག་ཆོག་པའི་ཕྱིར། དེ་ལྟ་མ་ཡིན་ན། གང་དག་འགོག་བྱམས་ཉོན་མོངས་མེད། །མཐོང་དང་དགྲ་

― GTD003_Page_0047 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོམ་འབྲས་ལངས་པ། །དེ་ལ་ཕན་གནོད་བྱས་པ་ཡིས། །འབྲས་བུ་འཕྲལ་དུ་མྱོང་བར་འགྱུར། །ཞེས་སོགས་ཀྱིས་བཤད་པའི་ལས་སྟོབས་ཅན་དུ་མ་ལ་སྐུར་བ་བཏབ་པར་འགྱུར་ཏེ། མིའི་སྡུག་བསྔལ་ཐམས་ཅད་བསྡོམས་ཀྱང་དམྱལ་བའི་སྡུག་བསྔལ་གྱི་ཆར་མི་འགྲོ་བའི་ཕྱིར། མཛོད་འགྲེལ་ལས་སོ། །བྱེ་སྨྲ་ལྟར་ན་ཚེ་དེ་དང་དེར་རྫོགས་དགོས་པས་ལས་གཅིག་གིས་ལུས་དུ་མ་འཕེན་པ་མེད་དེ། སྐྱེས་ནས་མྱོང་འགྱུར་སོགས་འཆོལ་བར་འགྱུར་བའི་ཕྱིར། མཛོད་ལས། གཅིག་གིས་སྐྱེ་བ་གཅིག་འཕེན་བྱེད། །ཡོངས་རྫོགས་བྱེད་པ་དུ་མ་ཡིན། །ཞེས་གསུངས་པས་སོ། །དེས་ན་མཐོང་ཆོས་མྱོང་འགྱུར་ལ་འཕེན་བྱེད་ལས་མེད་དེ། མཛོད་ལས། གསུམ་གྱི་རིས་ནི་འཕེན་པར་བྱེད་ཅེས་མྱོང་འགྱུར་ཕྱི་མ་གཉིས། མ་ངེས་པའི་ལས་དང་གསུམ་དམིགས་ཀྱིས་བསལ་བའི་ཕྱིར། སྐྱེས་ནས་མྱོང་འགྱུར་འཇོག་ཚུལ་ཡང་བསགས་པའི་ཚེ་ལ་ལྟོས་ནས་འཇོག་པ་མི་འཐད་དེ། འབྲས་བུ་རིམ་གྱིས་པའི་ཕྱིར་མི་འོང་སྐྱེས་འདའ་བ་དེས་ཕྱིར་མི་འོང་མ་ཐོབ་གོང་དུ་དངོས་གཞི་མ་ཐོབ་པའི་ཕྱིར་གསུངས། དོན་གསང་ལས། བར་ཆད་མེད་ལམ་ཁོ་ནའི་གོང་དུ་ཡང་སྐྱེ་བ། ཞེས་གསུངས་པ་མཆིམས་ཊཱིཀ་ཏུ་རང་ལུགས་མཛད་ཅིང། ནོར་བཟང་བ་སོགས་ཀྱང་དེ་ལ་འཕེན་བྱེད་བཞག་ནས་རྫོགས་བྱེད་དངོས་གཞི་ལ་ལྟོས་པར་བཤད་པ་ལྟར་ན་མ་ངེས་ཀྱང་། ཀུན་མཁྱེན་བླ་མའི་གསུང་དང་བསྟུན་ན་དེ་ལ་འཕེན་

― GTD003_Page_0048 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་མེད་དམ་སྙམ་སྟེ་དཔྱད། རང་ལུགས་ལ། རང་དང་མཚུངས་ལྡན་གྱི་སེམས་ཡུལ་ལ་གཡོ་ཞིང་སྐུལ་བར་བྱེད་པའི་སེམས་པས་རབ་ཏུ་ཕྱེ་བ་དེ། ལས་ཀྱི་མཚན་ཉིད། ལས་ལ་བག་ཆགས་ཡོད་དེ། བཅུ་པ་སྲིད་པ་བག་ཆགས་ཡིན་པའི་ཕྱིར། རྟེན་འབྲེལ་མདོ་འགྲེལ་ལས། བག་ཆགས་ཀྱི་གནས་སྐབས་ལ་སྲིད་པའི་མིང་ཐོབ་པ་ཡིན་ནོ། །ཞེས་གསུངས་ཤིང། འདི་ཙམ་དབུ་སེམས་ཀུན་མཐུན་པར་དབུ་མའི་མཐའ་དཔྱོད་དུ་གསུངས་པའི་ཕྱིར་དང་། སོ་ཐར་གྱི་སྡོམ་པ་ལ་སྤོང་བའི་སེམས་པ་ས་བོན་དང་བཅས་པ་བཞག་པའི་ཕྱིར་རོ། །རང་གི་རྒྱུའི་ཀུན་སློང་ཐོག་མའི་མ་རིག་པས་ཀུན་ནས་བསླངས་ཤིང་སྲིད་པར་འཕེན་བྱེད་ཀྱི་སེམས་པའི་རིགས་སུ་གནས་པ་དེ། གཉིས་པ་འདུ་བྱེད་ཀྱི་ལས་ཀྱི་མཚན་ཉིད། དེ་ལ་དབྱེ་ན། སྒོ་གསུམ་གྱི་གསུམ་དང། ངོ་བོའི་སྒོས་དཀར་བའི་ལས་སོགས་གསུམ་དང། རྣམ་སྨིན་གྱི་སྒོས་འདོད་པའི་བདེ་འགྲོ་དང་། ངན་འགྲོ་དང། ཁམས་གོང་མར་འཕེན་བྱེད་ཀྱི་བསོད་ནམས་དང་། བསོད་ནམས་མ་ཡིན་པ་དང། མི་གཡོ་བའི་ལས་གསུམ་བཤད་ཀྱང་། བསོད་ནམས་མ་ཡིན་པ་ལ་འབྲས་གནས་དང་པོ་གཉིས་ཀྱིས་གསར་དུ་བསགས་པའི་མི་དགེ་བ་ལྟ་བུ་ཡོད་པས་འཕེན་བྱེད་ལས་སུ་མ་ངེས་ཤིང་། སྤྱིར་མི་གཡོ་བའི་ལས་ཀྱང་བསོད་ནམས་ཀྱི་ལས་ཡིན་པའི་ཞིབ་ཆ་དགོས། མི་གཡོ་བའི་དོན་ཡང། རྟེན་འབྲེལ་མདོ་འགྲེལ་ལས། བསམ་གཏན་དང་གཟུགས་མེད་དག་ལ་འདིས་གཡོ་བར་མི་

― GTD003_Page_0049 ―

^{[མ་དཔེ་གཟིགས་ན་འདིར་གནོན།]}

[Full Size]

ནུས་པས་མི་གཡོ་བ་ཡིན་ཏེ། ས་འོག་མའི་ཉོན་མོངས་དེ་དག་གིས་མི་བསྒུལ་བའི་ཕྱིར་རོ། །ཞེས་པ་ལྟར་རམ། རྣམ་སྨིན་ཁམས་དང་འགྲོ་བ་གཞན་དུ་མི་གཡོ་བ་ལ་ཡང་བཤད་དོ། །སྐྱེ་བ་འགྲུབ་ཚུལ་གྱི་སྒོ་ནས་ལས་གཅིག་གིས་ལུས་དུ་མ་འཕེན་པ་མ་འགགས་པ་རྩྭ་ཐུན་དུ་གྱུར་པའི་ཚེ། རང་སངས་རྒྱས་སྟེང་གནས་བསམ་ཤེས་ལ་བསོད་སྙོམས་གཅིག་ཕུལ་བས་ལྷར་ལན་བདུན་དང་། འཁོར་བསྒྱུར་དུ་ལན་བདུན་སྐྱེས་ནས་མཐར་ཤཱཀྱའི་རིགས་སུ་སྐྱེས་པ་ལྟ་བུ་དང། ལས་དུ་མས་ལུས་གཅིག་འཕེན་པ། མི་ཕལ་བར་སྐྱེ་བ་འཕེན་བྱེད་དུ་མ་ལ་སྲིད་ལེན་ཚར་གཅིག་གིས་གསོས་བཏབ་ནས་འཁོར་བསྒྱུར་དུ་སྐྱེས་པ་ལྟ་བུ་ཡིན་ལ། གཅིག་གིས་གཅིག་འཕེན་པ་དང་། དུ་མས་དུ་མ་འཕེན་པ་གཉིས་ནི་གོ་བར་ཟད་དོ། །རྣམ་སྨིན་འགྲུབ་དུས་ཀྱི་སྒོ་ནས་མཐོང་ཆོས་མྱོང་འགྱུར་སོགས་གསུམ་ཡོད་ཅིང་། སྐྱེས་ནས་མྱོང་འགྱུར་ལ་ཡང་མཚམས་མེད་ལྔ་དང་། རིམ་བཞིན་དེའི་ཆར་གཏོགས་ཉེ་བའི་མཚམས་མེད་ལྔ་ཡོད། བསགས་ཚུལ་གྱི་སྒོ་ནས་བྱས་ལ་མ་བསགས་པ་སོགས་བཞི། དང་པོ་ལ་ཡང་། སའི་དངོས་གཞིར། རྨི་ལམ་དང་། མ་ཤེས་པ་དང། བསམས་བཞིན་མ་ཡིན་པ་དང། དྲག་པོ་མིན་ལ་རྒྱུན་ཆགས་མ་ཡིན་པ་དང། ནོར་བ་དང། བརྗེད་པ་དང་། མི་འདོད་བཞིན་དུ་བྱས་པ་དང། རང་བཞིན་གྱིས་ལུང་དུ་མ་བསྟན་པ་དང། འགྱོད་པས་བསལ་བ་དང། གཉེན་པོས་

― GTD003_Page_0050 ―

^{[མ་དཔེ་གཟིགས་ན་འདིར་གནོན།]}

[Full Size]

བསལ་བ་སྟེ་བཅུ་གསུངས་ལ། བསྡུ་བར། མི་མཁས་པས་བྱས་པ་དང། རྨི་ལམ་དུ་བྱས་པ་དང་། ཆེད་དུ་མ་བྱས་པ་དང་། མི་འདོད་བཞིན་དུ་བྱས་པ་དང་། ལན་གཅིག་ཁོ་ན་བྱས་ཤིང་སྟོབས་བཞིས་སྲབ་མོར་བྱས་པ་དང་། འཇིག་རྟེན་པའི་ཆགས་བྲལ་གྱིས་ས་བོན་ཉམས་སྨད་པ་དང་། འདས་ལམ་གྱིས་ཡང་དག་པར་བཅོམ་པ་སྟེ་བརྒྱད་གསུངས་སོ། །བསགས་ལ་མ་བྱས་པ་ནི། གསོད་སེམས་ཡུན་རིང་བརྩམས་ཀྱང་སྲོག་མ་བཅད་པ་དང། བྱས་བསགས་ཚང་བ་ནི། སྦྱོར་དངོས་མཇུག་གསུམ་ཚང་བའི་སྲོག་གཅོད་ཀྱི་ལས་ལྟ་བུ། མ་བྱས་མ་བསགས་པ་ནི། གསོད་སེམས་སྐད་ཅིག་བྱས་ཀྱང་འགྱོད་པས་བཅོམ་པ་ལྟ་བུའོ། །ཡིད་ལས་ལ་མུ་གཉིས་པ་མེད་ཅིང། དང་པོ་ལས་ཀྱང་ཆེད་དུ་མ་བྱས་པ་དང། མི་འདོད་བཞིན་དུ་བྱས་པ་གཉིས་མེད་པར་ལམ་རིམ་ལས་གསུངས་སོ། །ལས་སོ་སོའི་སྦྱོར་བས་རྣམ་སྨིན་དང་། དངོས་གཞིས་རྒྱུ་མཐུན། མཇུག་གིས་བདག་འབྲས་འབྱིན་པར་མཛོད་ལས་གསུངས་ཤིང་རྒྱུ་མཐུན་ལ་ཡང་བྱེད་པ་རྒྱུ་མཐུན་དང། མྱོང་བ་རྒྱུ་མཐུན་གཉིས་གསུངས་སོ། །རྩོད་སྤོང་ལ་ཁོ་ན་རེ། གསོད་སེམས་ཡུན་རིང་བརྩམས་ཀྱང་སྲོག་མ་བཅད་པའི་ལས་དེ་ཆོས་ཅན། བསགས་ལ་མ་བྱས་པའི་ལས་མ་ཡིན་པར་ཐལ། ཡིད་ལས་ཡིན་པའི་ཕྱིར་ན་མ་ཁྱབ་སྟེ། ཡིད་ལས་བསགས་ལ་མ་བྱས་པ་མེད་པའི་དོན་ཡིན་པའི་ཕྱིར་དང་། འདི་གནོད་སེམས་བྱས་བསགས་ཚང་བའི་ལས་ཡིན་ཀྱང་སྲོག་གཅོད་བསགས་ལ་མ་བྱས་པའི་ལས་ཡིན་པའི་

― GTD003_Page_0051 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར། འདིས་མཚོན་ནས་རྨི་ལམ་ན་བྱས་པ་མངོན་ཞེན་གྱིས་གསོས་མ་བཏབ་པའི་བྱས་ལ་མ་བསགས་པ་དང་། གསོས་བཏབ་པའི་བྱས་བསགས་ཚང་བ་རྣམས་ཀྱང་ཡིད་ལས་སུ་འགྲོ་བ་ཤེས་པར་གྱིས། དེ་ལ་ཁོ་ན་རེ། རྨི་ལམ་གྱི་ལས་ལ་བྱས་བསགས་ཚང་བ་མེད་པར་ཐལ། བསྡུ་བས་དེ་བྱས་ལ་མ་བསགས་པར་གསུངས་པའི་ཕྱིར་ན་མ་ཁྱབ་སྟེ། ལས་མེད་ལ་སོགས་ཀླན་ཀ་ཡི། །ཞེས་སོགས་དབུ་སེམས་རྩོད་ཚུལ་ཡོད་པའི་ཕྱིར། ཡང་ཁ་ཅིག །མཚམས་མེད་སོགས་བཤགས་སྡོམ་གྱིས་དག་པ་མེད་པར་ཐལ། དེ་མེད་པར་བྱེ་སྨྲས་འདོད་པའི་ཕྱིར་ན་མ་ཁྱབ། རྟགས་གྲུབ་སྟེ། གྲུབ་མཐའ་གོང་མས་འདག་པར་བཤད་པ་ལས་འབྲས་ལ་སྐུར་འདེབས་སུ་འགྱུར་ཞེས་སྐྱོན་བརྗོད་པར་རྟོག་གེ་འབར་བ་ལས་གསུངས་པའི་ཕྱིར། ཡང་ཁ་ཅིག། །དགྲ་བཅོམ་པའི་རྒྱུད་ལ་ངོ་ཚ་མེད་པ་དང་། ཁྲེལ་མེད་པ་གཉིས་ཡོད་པར་ཐལ། དེ་ལ་མི་དགེ་བའི་ལས་ཡོད་པ་གང་ཞིག །མཛོད་ལས། མི་དགེ་ལ་ནི་ཁྲེལ་མེད་དང། །ངོ་ཚ་མེད་པའོ། །ཞེས་དེ་གཉིས་མི་དགེ་བའི་ས་མང་དུ་བཤད་པ་ལྟར་ཀུན་བཏུས་ལས་ཀྱང་བཤད་པའི་ཕྱིར་ན་མ་ཁྱབ་སྟེ། མི་དགེ་བ་ཡོད་ཀྱང་མི་དགེ་བའི་སེམས་ཡོད་མི་དགོས་པའི་ཕྱིར། གལ་ཏེ་ལས་སེམས་པ་ཡིན་བཞིན་པར་འགྲོ་ན་གྲུབ་མཐའ་སོ་སོས་ལས་འགགས་ཀྱང་འབྲས་བུ་འབྱིན་ནུས་པའི་སྐྱོན་སྤོང་སྣ་ཚོགས་མཛད་པ་འབྲེལ་མེད་པར་འགྱུར་རོ། །ཡང་ཁ་ཅིག །གོང་འཕོ་དང་རྒྱུད་གཅིག་པའི་

― GTD003_Page_0052 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུན་ཞུགས་ཆོས་ཅན། དངོས་གཞི་རྒྱུད་ལྡན་ཡིན་པར་ཐལ། གོང་མར་སྐྱེ་བ་འཕེན་བྱེད་ཀྱི་ལས་རྒྱུད་ལྡན་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། སྤེལ་སྒོམ་གྱི་ནང་ཚན་གནས་གཙང་གི་སྐྱེ་བ་འཕེན་བྱེད་ཀྱི་ལས་སུ་བསྒྱུར་རྒྱུའི་འབྲས་བུ་ཆེ་བར་འཕེན་བྱེད་ལས་རྒྱུད་ལྡན་ཡིན་པའི་ཕྱིར། དོན་གསང་ལས། མི་གཡོ་བའི་ལས་བསམ་གཏན་སྤེལ་མ་དང་མཚུངས་པར་ལྡན་པ། ཞེས་སོགས་གསུངས་པའི་ཕྱིར། འགའ་ཞིག་གནས་གཙང་དུ་སྐྱེ་བའི་རྒྱུ་ཙམ་དུ་བསྒྱུར་བ་ཡིན་གྱི་གནས་གཙང་སྐྱེ་བ་འཕེན་བྱེད་ཀྱི་ལས་མི་བཞག་གོ་གསུངས་པ་ནི། ཀུན་མཁྱེན་བླ་མའི་གསུང་དུ་མ་དང་འགལ་ཞིང། རིགས་པས་ཀྱང་མི་འགྲུབ་སྟེ། གཟུགས་ཀྱི་སྐྱེ་སྲིད་བཅུ་བདུན་ཡོད་པའི་ཕྱིར། ཡང་ཁ་ཅིག །ལས་གཅིག་གིས་འཁོར་བསྒྱུར་སྟོང་འཕངས་པའི་དང་པོ་དང། ཐ་མ་འཕེན་བྱེད་དོན་གཅིག་པར་ཐལ། དེའི་ཡིན་པ་ཡོད་པའི་ཕྱིར་ན་མ་ཁྱབ་སྟེ། སྔ་མ་གང་དང་གང་འཕངས་པ་དེ་འཕེན་བྱེད་མ་ཡིན་པར་འགྱུར་བའི་ཕྱིར་ཏེ། འདུ་བྱེད་དང་བཅུ་པ་སྲིད་པ་ལ་མུ་བཞི་བརྩི་ཚུལ་ཡོད་པའི་ཕྱིར། ཡང་ཁ་ཅིག །ཚིག་རྩུབ་ཀྱི་རྣམ་སྨིན་ལ་བུད་མེད་ཀྱི་སྐྱེ་བ་ཡོད་པར་ཐལ། སྡེ་སྣོད་གསུམ་པ་ཞིག་ཚིག་རྩུབ་ཀྱི་དབང་གིས་སྐྱེ་བ་ལྔ་བརྒྱར་བུད་མེད་དུ་གྱུར་པར་གསུངས་པའི་ཕྱིར་ན་མ་ཁྱབ་སྟེ། སྐྱེས་པར་འཕེན་བྱེད་དེ་དེར་བསྒྱུར་བའི་དོན་ཡིན་པའི་ཕྱིར། འདིས་ཚེ་ཐུང་ངུར་གྱུར་པ་དང་ཚེ་ཐུང་ངུ་མི་གཅིག་པ་སོགས་འཕེན་རྫོགས་ཀྱི་ཞིབ་ཆ་ཤེས་སོ། །ཡང་ཁ་ཅིག། །

― GTD003_Page_0053 ―

^{[མ་དཔེ་གཟིགས་ན་འདིར་གནོན།]}

[Full Size]

མཚམས་མེད་ལས་ཀྱི་སྦྱོར་དངོས་གཉིས་ཀའི་ཡིན་པ་ཡོད་པར་ཐལ། ཕ་བསད་པའི་མཚམས་མེད་ལས་ཀྱི་སྦྱོར་བ་ལ་དགྲ་བཅོམ་བསད་པའི་མཚམས་མེད་ཡོད་པའི་ཕྱིར་ན་མ་ཁྱབ། ཡང་ཁ་ཅིག །གཞན་གྱིས་བྱས་པའི་ལས་ཀྱི་འབྲས་བུ་ལ་ལོངས་སྤྱོད་པ་མེད་པར་ཐལ། ལས་མ་བྱས་པ་དང་མི་འཕྲད་པའི་ཕྱིར་ན་མ་ཁྱབ། འདོད་མི་ནུས་ཏེ། རྣལ་འབྱོར་སྤྱོད་པའི་ས་དབུ་མའི་མཐའ་དཔྱོད་དུ་དྲངས་པ་ལས་དེ་འདྲ་ཡོད་པར་གསུངས་ཤིང། ལམ་རིམ་ལས་ཀྱང། སྟོན་པས་ཚོགས་གྲངས་མེད་པ་བསགས་པའི་འབྲས་བུ་ལ་ལོངས་སྤྱོད་པ་རྣམས་ཀྱིས་དེའི་རྒྱུ་ཐམས་ཅད་བསགས་མི་དགོས་ཀྱང་ཆ་གཅིག་བསགས་དགོས་པ་ཡིན་ནོ། །ཞེས་གསུངས་པའི་ཕྱིར། གསུམ་པ་རྣམ་ཤེས་ཀྱི་རྟེན་འབྲེལ་ལ་དགག་བཞག་སྤང་གསུམ། དང་པོ་ནི། ཁ་ཅིག་ན་རེ། གསུམ་པ་རྣམ་ཤེས་ཀྱི་རྟེན་འབྲེལ་ལ་རྣམ་ཤེས་ཚོགས་དྲུག་ཡོད་པར་ཐལ། མདོ་སྡེ་འདི་ལས། རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་གོ །ཞེས་གསུངས་པའི་ཕྱིར་ན་མ་ཁྱབ་སྟེ། སེམས་ཙམ་པ་ལྟར་ན་ཀུན་གཞི་རྣམ་ཤེས་དྲུག་གི་གནས་ཡིན་པས་དེ་ལ་དགོངས་ཤིང། དབུ་མ་པ་ལྟར་ན་གསུམ་པ་རྣམ་ཤེས་སྨོས་པའི་ཟླ་ལ་རྣམ་ཤེས་སྤྱིའི་དབྱེ་བ་བཤད་པ་ཡིན་པའི་ཕྱིར། མཛོད་ཀྱི་རྗེས་འབྲང་ཁ་ཅིག། །འདི་སྒྲ་ཇི་བཞིན་དུ་འདོད་དེ། གང་སྤེལ་ལས། སྲིད་པ་བར་མ་ཡང་རྣམ་པར་ཤེས་པ་དྲུག་དང་ལྡན་པའི་ཕྱིར། དེ་ལྟར་བཤད་ན་རྣམ་པར་ཤེས་པ་

― GTD003_Page_0054 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ཞེ་ན། རྣམ་པར་ཤེས་པའི་ཚོགས་དྲུག་གོ །ཞེས་བཤད་པ་དེ་འཐད་པ་ཡིན་ནོ། །ཞེས་གསུངས་པའི་ཕྱིར། འོན་ཀྱང་བར་དོར་འབྲས་དུས་ཀྱི་རྣམ་ཤེས་བཞག་པ་མི་འཐད་པར་ཐལ། རྟེན་འབྲེལ་མདོ་འགྲེལ་ལས། ཅིའི་ཕྱིར་རྣམ་པར་ཤེས་པའི་རྐྱེན་གྱིས་སྲིད་པ་བར་མའི་མིང་དང་གཟུགས་རྣམ་པར་མ་བཞག་ཅེ་ན། འདུ་བྱེད་ནི་སྐྱེས་པའི་དབང་དུ་བྱས་ཏེ། ཞེས་གསུངས་པའི་ཕྱིར། ཡང་ཁ་ཅིག །བྱེ་སྨྲས་རྒྱུ་དུས་ཀྱི་རྣམ་ཤེས་ཁས་མི་ལེན་ཀྱང་། ལས་ཀྱི་བག་ཆགས་བསྒོ་གཞིའི་རྣམ་ཤེས་ཁས་ལེན་ཟེར་ན། འོ་ན། མདོ་སྡེ་པས་ཆོས་ཉིད་ཀྱི་བསམ་གཏན་ཐོབ་ཅེས་པའི་དོན་ཐོས་བསམ་སོགས་ལ་མ་ལྟོས་པར་སྔོན་གོམས་པའི་བག་ཆགས་སྨིན་པར་བཤད་པའི་ཕྱོགས་སློབ་དཔོན་གྱིས་བཟུང་བ་ལ་བྱེ་སྨྲས་སྐྱོན་མ་བརྗོད་པར་ཐལ། དེས་བག་ཆགས་ཁས་ལེན་པའི་ཕྱིར། འདོད་མི་ནུས་ཏེ། རྒྱལ་སྲས་མ་ལས། སློབ་དཔོན་གྱིས་ས་བོན་ནུས་པའི་ཁྱད་པར་གྱིས་མཚན་ཉིད་ཡིན་པར་བཤད་པ་དེས་སུན་འབྱིན་པར་བྱེད། ཅེས་གསུངས་པའི་ཕྱིར། ཁ་ཅིག་བག་ཆགས་མི་འདོད་ཀྱང་ས་བོན་འདོད་ཟེར་བ་ཡང་དཔྱད་དགོས་དེ། དགྲ་བཅོམ་པའི་རྒྱུད་ལ་ཉོན་མོངས་སྐྱེ་བ་ས་བོན་ལ་མི་ལྟོས་པར་འདོད་པའི་ཕྱིར་དང་། རྒྱལ་སྲས་མ་ལས། ནུས་པ་དང། ས་བོན་དང། བག་ཆགས་ཞེས་བྱ་བ་འདི་ནི་དོན་གཅིག་གོ །ཞེས་གསུངས་པའི་ཕྱིར། འདི་ཤེས་སྒྲིབ་ཁས་ལེན་པའི་ལུགས་ལ་མི་རུང་

― GTD003_Page_0055 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་། །གཞན་ཡང་། རྩ་ཤེ་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགག་ན་འགག་གྱུར་པས། །འབྲས་བུ་ཇི་ལྟར་སྐྱེད་པར་འགྱུར། །ཞེས་པ་ལྟར། གཞན་སྡེས་བརྩད་པའི་ལན་དུ་བྱེ་སྨྲ་ཁ་ཅིག་ཐོབ་པ་དང། ཁ་ཅིག་ཆུད་མི་ཟ་བ་ཁས་བླངས་ནས་སྐྱོན་སྤོང་བྱེད། ཁ་ཆེ་བ་དང་མདོ་སྡེ་པས་རྣམ་ཤེས་ཀྱི་རྒྱུན་དང་། སེམས་ཙམ་པས་ཀུན་གཞི། རང་རྒྱུད་པས་ཡིད་ཀྱི་རྣམ་ཤེས། ཐལ་འགྱུར་བས་ཞིག་པ་ཁས་བླངས་ནས་སྐྱོན་སྤོང་བྱས་པ་མ་ཡིན་པར་ཐལ། བྱེ་སྨྲས་དེ་ལྟར་འདོད་དགོས་པ་བག་ཆགས་ཁས་མ་བླངས་བའི་དབང་གིས་མ་ཡིན་པའི་ཕྱིར། ཡང་ཁ་ཅིག །རྒྱུ་དུས་ཀྱི་རྣམ་ཤེས་བཅུ་པ་སྲིད་པའི་བར་དང། འབྲས་དུས་ཀྱི་རྣམ་ཤེས་ཉིང་མཚམས་སྦྱར་མ་ཐག་ཁོ་ནར་འཇོག་ཟེར་ན། རྒྱུ་དུས་ཀྱི་རྣམ་ཤེས་དེ་ཚར་གཅིག་པའི་མིང་གཟུགས་ཀྱི་བར་དུ་མི་འགྲོ་བར་ཐལ། གནས་སྐབས་པའི་བཤད་པ་གྲུབ་མཐའ་ཐམས་ཅད་ལ་སྦྱོར་རིགས་པ་དེའི་ཕྱིར། འདོད་ན། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་པའི་རྣམ་ཤེས་ལ་འབྲས་དུས་ཀྱི་རྣམ་ཤེས་གཅིག་ཀྱང་ཡོད་པར་ཐལ་ལོ། །འདོད་ན། འདུ་བྱེད་ཀྱི་རྐྱེན་གྱིས་རྣམ་ཤེས་ཞེས་པའི་རྣམ་ཤེས་ལ་ཡང་དེ་ཡོད་པར་ཐལ། དེ་དང་ཕྱི་མ་དོན་གཅིག་པའི་ཕྱིར། འདོད་མི་ནུས་ཏེ། རྟེན་འབྲེལ་མདོ་འགྲེལ་ལས། འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་དེ་ཉིད་འདུ་བྱེད་ཀྱི་རྐྱེན་གྱིས་

― GTD003_Page_0056 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་གྱི། ཉིང་མཚམས་སྦྱོར་བའི་རྣམ་པར་ཤེས་པ་ནི་མ་ཡིན་ནོ། །ཞེས་གསུངས་པའི་ཕྱིར། གཞན་ཡང་། དེ་མི་འཐད་པར་ཐལ། འབྲས་དུས་ཀྱི་རྣམ་ཤེས་དང། བཞི་པ་མིང་གཟུགས་དུས་མཉམ་དུ་གྲུབ་པ་གང་ཞིག །ཡ་མཐའ་ཡང་འཆི་སྲིད་བར་དུ་ཡོད་པའི་ཕྱིར། རྟེན་འབྲེལ་མདོ་འགྲེལ་ལས། ཉིང་མཚམས་སྦྱོར་བའི་རྣམ་པར་ཤེས་པ་དང་བཞི་པ་མིང་གཟུགས་དུས་མཉམ་དུ་གྲུབ་ཅིང་། ཞེས་དང་། ཡང་དེ་ཉིད་ལས། རྣམ་པར་ཤེས་པ་གང་ཡིན་པ་དང། དེ་ལས་གཞན་པའི་མིང་གཟུགས་རྣམས་རྒྱུན་གྱིས་འཇུག་སྟེ། ནམ་མ་ཤིའི་བར་དུ་གཅིག་ལ་གཅིག་བརྟེན་པའི་རྒྱུན་རྗེས་སུ་འཇུག་པ་ཉིད་ཀྱི། ཞེས་གསུངས་པའི་ཕྱིར། འགའ་ཞིག་ལུང་སྔ་མ་ལ་བརྟེན་ནས་རྟེན་འབྲེལ་མདོ་འགྲེལ་ལྟར་ན། ཡན་ལག་གསུམ་པ་ལ་འབྲས་དུས་ཀྱི་རྣམ་ཤེས་མེད་གསུངས་པ་མི་འཐད་དེ། ཀླུ་སྒྲུབ་ཀྱི་ས་ལུ་ལྗང་པའི་འགྲེལ་པ་ལས། སྲིད་པ་བར་མའི་ཕུང་པོ་ལ་བརྟེན་ནས་དང་པོར་མིང་གཟུགས་མངོན་པར་འགྲུབ་པ་ཞེས་དང་། ཀ་ཤིའི་འགྲེལ་པར་ཡང་རྣམ་པར་ཤེས་པ་དང་དུས་མཉམ་དུ་མིང་དང་གཟུགས་ཀྱི་མྱུ་གུ་མངོན་པར་འགྲུབ་སྟེ། ཞེས་གསུངས་པའི་ཕྱིར། དེ་དག་ལྟར་ན་ཡང་མེད་ཅེས་བཤད་དགོས་པ་ལ། རང་ཉིད་ཀྱིས་ཁས་ལེན་བཞིན་དུ་ཚད་ལྡན་གྱི་གཞུང་ཐམས་ཅད་ལས་བཀག་པར་སྨྲ་བ་ནི་ལྷུན་གྱིས་གྲུབ་པའི་འགལ་འདུའོ། །ཡང་ཁ་ཅིག །རྒྱུ་དུས་དང་འབྲས་དུས་ཀྱི་རྣམ་ཤེས་གཉིས་རྫས་རྒྱུན་ཐ་དད་ཟེར་བ་མི་འཐད་པར་ཐལ། མདོ་འགྲེལ་

― GTD003_Page_0057 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་ནི་སྲིད་པ་བར་མའི་རྒྱུན་གྱིས་མའི་མངལ་དུ་འཇུག་པ་ཉིད་ཡིན་པར་རིག་པར་བྱ་སྟེ། དེ་དང་འབྲེལ་བའི་ཕྱིར་རོ། །ཞེས་གསུངས་པའི་ཕྱིར། འདི་ལ་དཔགས་ན་སེམས་ཙམ་པས་འབྲས་དུས་ཀྱི་རྣམ་ཤེས་ལ་རྒྱུ་དུས་ཀྱི་དེས་ཁྱབ་པར་འདོད་དགོས་ལ། རང་རྒྱུད་པས་ཀྱང་མི་འགལ་བར་འདོད་དོ། །འོན་ཀྱང་རང་རྒྱུད་པ་ལྟར་ན་ལས་ཐམས་ཅད་ཀྱི་བག་ཆགས་བསྒོ་གཞི་གཅིག་ཁོ་ན་མ་ཡིན་ཏེ། ས་མཚུངས་ཀྱིས་གནོད་པའི་ཕྱིར། རང་ལུགས་ལ། རང་དང་ཚར་གཅིག་པའི་འཕེན་བྱེད་ལས་ཀྱི་བག་ཆགས་བསྒོ་གཞི་དང། འཕང་འབྲས་ཅི་རིགས་ཀྱིས་བསྡུས་པའི་རིགས་སུ་གནས་པའི་ཡིད་ཀྱི་རྣམ་ཤེས་དེ། གསུམ་པ་རྣམ་ཤེས་ཀྱི་རྟེན་འབྲེལ་གྱི་མཚན་ཉིད། དེ་ཡང་ལམ་རིམ་ལས། འདིར་གཙོ་བོ་ནི་ཀུན་གཞི་ཁས་ལེན་པ་རྣམས་ལྟར་ན་ཀུན་གཞི་ཡིན་ལ། ཁས་མི་ལེན་པ་རྣམས་ལྟར་ན་ཡིད་ཀྱི་རྣམ་ཤེས་སོ། །ཞེས་གསུངས་པ་ལྟར་ངོས་འཛིན་མི་མཐུན་ཞིང་། དབྱེ་ན། རྒྱུ་དུས་དང་། འབྲས་དུས་ཀྱི་དེ་གཉིས། ས་མཚམས་གྲུབ་མཐའ་གོང་འོག་གི་ཁྱད་པར་སྔར་བཤད་ཟིན། རྩོད་སྤོང་ལ་ཁོ་ན་རེ། བྱེ་སྨྲས་བག་ཆགས་འདོད་པར་ཐལ། མཛོད་ལས། བསྒོམ་པའོ་སེམས་ལ་བསྒོ་ཕྱིར་རོ། །ཞེས་དང་། གནས་བརྒྱད་པར། དྲན་དང་ཤེས་བཞིན་བདག་ཉིད་གསུམ། །ཞེས་སོགས་ཀྱི་འགྲེལ་བར་བག་ཆགས་གསུངས་པའི་

― GTD003_Page_0058 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ན་མ་ཁྱབ་སྟེ། མདོ་སྡེ་པའི་ལུགས་ཡིན་པའི་ཕྱིར། ཡང་ཁ་ཅིག །འཕགས་སེང་སོགས་ཀྱང་ཡན་ལག་གསུམ་པ་ཀུན་གཞིར་བཞེད་པར་ཐལ། ཉི་སྣང་ལས། ཀུན་གཞིའི་རྣམ་པར་ཤེས་པ་ལ་སོགས་པ་ཤེས་བྱ་རྣམ་པ་བཅུས་བསྡུས་པའི་ཞེས་སོགས་དང། སློབ་དཔོན་གྱི་སྡུད་འགྲེལ་ལས། ཀུན་གཞིའི་རྣམ་པར་ཤེས་པ་ལ་ཆོས་ཐམས་ཅད་ཀྱི་བག་ཆགས་བརྟེན་པས། ཞེས་གསུངས་པའི་ཕྱིར་ན་མ་ཁྱབ་སྟེ། ཡིད་ཤེས་ལ་དེའི་ཐ་སྙད་མཛད་ཙམ་ཡིན་པའི་ཕྱིར་ཏེ། ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས་ཀྱང་དེའི་ཐ་སྙད་ཙམ་གསུངས་ཤིང། སྔགས་ལས་ཀྱང་དེ་འདྲ་གསུངས་པ་རྣམས་ཀུན་གཞི་དངོས་ལ་མི་བྱེད་པའི་ཕྱིར། མཁས་གྲུབ་ཀྱི་བརྟག་གཉིས་རྣམ་བཤད་ལས། ཀུན་གཞི་དང་ཉོན་ཡིད་ཀྱི་ཐ་སྙད་རྒྱུད་དང་གྲུབ་ཆེན་གྱི་གཞུང་དུ་མ་ལས་གསུངས་པ་ཡོད་ཅིང་། ཆོས་ཉིད་ལ་ཀུན་གཞི་དང། རླུང་ལ་ཉོན་ཡིད་ཀྱི་ཐ་སྙད་མཛད་པ་སོགས་དུ་མ་ཡོད་པས་ཚིག་ཙམ་གྱིས་འཁྲུལ་བར་མི་བྱའོ། །ཞེས་གསུངས་པའི་ཕྱིར། །གཉིས་པ་འཕངས་པའི་འབྲས་བུ་བཤད་པ་ལ་སོ་སོའི་ངོ་བོ་ནི། རང་དང་ཚར་གཅིག་པའི་གསུམ་པ་རྣམ་ཤེས་ཀྱི་སྟེང་གི་ས་བོན་སྨིན་པའི་རྣམ་སྨིན་གྱི་གཙོ་བོ་གང་ཞིག །ལས་དེས་འཕངས་པའི་ཡན་ལག་བཞིའི་དང་པོའི་རིགས་གནས་ཀྱི་ཉེ་བར་ལེན་པའི་ཕུང་པོ་དེ། བཞི་པ་མིང་གཟུགས་ཅི་རིགས་ཀྱི་རྟེན་འབྲེལ་གྱི་མཚན་ཉིད། དབྱེ་ན་ཁམས་གསུམ་གྱི་མིང་གི་རྟེན་འབྲེལ་གསུམ་ཡོད་ཅིང་། ཕྱི་

― GTD003_Page_0059 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འདོད་གཟུགས་གཉིས་ན་ཡོད། དེ་ལ་ཡང་དབྱེ་བ་མངལ་གྱི་གནས་སྐབས་ལྔ་སོགས་དང། གཞན་ཡང་འབྱུང་བཞིའི་ཁམས་དང། སྒྲ་མ་གཏོགས་པའི་འབྱུང་འགྱུར་བཞི་སོགས་མདོ་ལས་གསུངས་སོ། །ས་མཚམས་ནི། སའི་དངོས་གཞིར། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་ཀྱང་བྱ་ལ། མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་ཞེས་ཀྱང་བྱ་སྟེ། ད་ལྟར་གྱི་དུས་ན་ཚེ་ཇི་སྲིད་བར་མདུང་ཁྱིམ་གྱི་ཚུལ་དུ་འཇུག་གོ །ཞེས་པ་ལྟར་ཡིན་པས་མདོ་འགྲེལ་ལས། མིང་དང་གཟུགས་ནི་སྐྱེ་མཆེད་དྲུག་ལ་ཐུག་པའི་བར་དུ་ཡིན་གྱི། དེ་ཕན་ཆད་ནི་མ་ཡིན་ནོ། །ཞེས་གསུངས་པ་ཡང་སྐྱེ་མཆེད་ཀྱི་རྐྱེན་དུ་མདོ་ལས་དངོས་སུ་བསྟན་པའི་མིང་གཟུགས་ལ་དགོངས་སོ། །གལ་ཏེ་ལྔ་པའི་སྔོན་དུ་མ་གྲུབ་ན་བཞི་པར་མི་རུང་སྙམ་དུ་མི་སེམས་ཏེ། འདིའི་གྲངས་ནི་མདོ་ལས་བསྟན་རིམ་གྱི་དབང་དུ་བྱས་པའི་ཕྱིར། གཞན་དུ་ན་བཞི་པ་སྲེད་པ་ཞེས་བཤད་དགོས་པར་འགྱུར་རོ། །རང་དང་ཚར་གཅིག་པའི་གསུམ་པ་རྣམ་ཤེས་ཀྱི་སྟེང་གི་ས་བོན་སྨིན་པའི་སྐྱེ་སྲིད་ཀྱི་ཁྱད་པར་རྫོགས་པའི་ཕུང་པོ་གང་ཞིག །ལས་དེས་འཕངས་པའི་ཡན་ལག་བཞིའི་གཉིས་པའི་རིགས་གནས་ཀྱི་ཉེ་བར་ལེན་པའི་ཕུང་པོ་དེ། ལྔ་པ་སྐྱེ་མཆེད་ཀྱི་རྟེན་འབྲེལ་གྱི་མཚན་ཉིད། དེ་ལ་ལུས་དང་ཡིད་ནི་དང་པོ་ནས་ཡོད་པས་འདིའི་མཚམས་རྫུས་སྐྱེས་མ་གཏོགས་པ་གསུམ་ལ་སྐྱེ་མཆེད་དང་པོ་བཞི་ཅི་རིགས་གྲུབ་པའམ།

― GTD003_Page_0060 ―

^{[མ་དཔེ་གཟིགས་ན་འདིར་གནོན།]}

[Full Size]

དེའི་ཚོད་དུ་སླེབ་པ་ནས་འཇོག་པར་སའི་དངོས་གཞིར་གསུངས་སོ། །འདི་ལ་བྱེ་སྨྲས་འདོད་ཚུལ་ནི། གང་སྤེལ་ལས། ཁ་ཅིག་དབང་པོ་ཚང་ལ་ཁ་ཅིག་དབང་པོ་མ་ཚང་སྟེ། ཡོངས་སུ་རྫོགས་པར་བྱེད་པའི་ལས་མང་བའི་ཕྱིར་དང་། འཕེན་པར་བྱེད་པའི་ལས་འདྲ་བའི་ཕྱིར། དེ་ལྟ་མ་ཡིན་ན་འགའ་ཡང་དབང་པོ་མ་ཚང་བར་མི་འགྱུར་རོ། །ཞེས་སྐྱེ་མཆེད་དང་པོ་བཞི་རྫོགས་འབྲས་ཁོ་ན་ཡིན་ལ་མི་དང་རིས་མཐུན་པའི་ལུས་དང་ཡིད་ཀྱི་སྐྱེ་མཆེད་སྤྱི་ཙམ་པ་འཕངས་འབྲས་སུ་འདོད་དོ། །ཡན་ལག་ལྔ་པའི་ཡུལ་དབང་རྣམ་ཤེས་གསུམ་འདུས་པའི་རྐྱེན་གྱིས་ཡུལ་ཡིད་འོང་སོགས་ཅི་རིགས་རང་སྟོབས་ཀྱིས་གཅོད་པའི་ཉེར་ལེན་གྱི་ཕུང་པོར་གྱུར་པའི་སེམས་བྱུང་དེ། དྲུག་པ་རེག་པའི་མཚན་ཉིད། འཕེན་བྱེད་བསོད་ནམས་ཀྱི་ལས་ཀྱི་འཕངས་འབྲས་རེག་པ་དྲུག་ཀ་ཡོད་ཀྱང་། ཁམས་གོང་ན་སས་བསྡུས་ཀྱི་དྲི་རོ་མེད་པའི་ཕྱིར། སྣ་དང་ལྕེའི་འདུས་ཏེ་རེག་པ་གཉིས་མེད་ལ། བསམ་གཏན་གཉིས་པ་ཡན་གྱི་མིག་རྣ་ལུས་ཀྱི་རེག་པ་གསུམ་ཡང་དང་པོའི་སས་བསྡུས་ཡིན་ཏེ། དེ་དག་རྟོག་དཔྱོད་དང་མཚུངས་ལྡན་དུ་འབྱུང་ཞིང། གཉིས་པ་ཡན་ལ་རྟོག་དཔྱོད་མེད་པའི་ཕྱིར། སྤྱིར་རེག་པ་ལ་སེམས་བྱུང་རེག་པ་དང་། རེག་བྱ་དང་། ཡུལ་དབང་རྣམ་ཤེས་གསུམ་རྒྱུ་དང་འབྲས་བུའི་ངོ་བོར་འདུས་པ་ལ་རེག་པར་བཤད་པ་གསུམ་ཡོད་པའི་རེག་པ་དངོས་ནི་དང་པོ་ཡིན་ཀྱང་། ས་ལུ་ལྗང་པས་གསུམ་པ་ལ་གསུངས་པ་ནི་རྒྱུ་མིང་འབྲས་ལ་བཏགས་པའོ། །རང་དང་ཚར་གཅིག་པའི་དྲུག་པ་རེག་

― GTD003_Page_0061 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་རྐྱེན་གྱིས་དེས་ཡོངས་སུ་བཅད་པའི་ཡུལ་གསུམ་ཅི་རིགས་རང་སྟོབས་ཀྱིས་མྱོང་བའི་མྱོང་བར་གྱུར་པའི་ཉེར་ལེན་གྱི་ཕུང་པོ་དེ། བདུན་པ་ཚོར་བའི་རྟེན་འབྲེལ་གྱི་མཚན་ཉིད། དབྱེ་ན་གསུམ་གང་སྐྱེས་ན་མི་འབྲལ་བར་འདོད་པ་སྐྱེ་བའི་རིགས་གནས་ཀྱི་སེམས་བྱུང་མྱོང་བ་དེ་ཚོར་བ་བདེ་བའི་མཚན་ཉིད། དེས་གཞན་གཉིས་ཀྱང་ཤེས་སླ། འདིར་སྡོམ་བརྩོན་ལ་ལ་འདོད་ཆགས་ཀྱིས་ཚོར་བདེ་མྱོང་ཚེ་འབྲལ་འདོད་སྐྱེ་བས་མ་ངེས་སོ་སྙམ་ན། འབྲལ་འདོད་དེ་ནི་དྲན་ཤེས་བཞིན་ལས་སྐྱེས་པ་ཡིན་གྱི་ཚོར་བ་དེ་ལས་མིན་པས་མི་གནོད་དོ། །ཚོར་བ་དེ་དག་ལས་བཏང་སྙོམས་ནི་དགེ་མི་དགེ་གཉིས་ཀའི་རྣམ་སྨིན་ལ་ཡོང་སྟེ། བསམ་གཏན་བཞི་པ་ཡན་གྱི་ཚོར་བ་ཐམས་ཅད་བཏང་སྙོམས་ཡིན་ཅིང་། མི་དགེ་བའི་དེ་ལ་ཡང་ཀུན་གཞི་འདོད་པ་རྣམས་དེའི་འཁོར་གྱི་ཚོར་བ་འཇོག་ཅིང་། འདིར་ཡང་དམྱལ་བར་སྐྱེས་ནས་དེའི་སྡུག་བསྔལ་མ་མྱོང་བ་གཅིག་བཤད་པའི་ཕྱིར་རོ། །བསམ་གཏན་གཉིས་པ་ཡན་གྱི་རྣམ་སྨིན་གྱི་ཚོར་བ་ཡིད་ཚོར་ཁོ་ནར་འདོད་པ་སོགས་རེག་པ་དང་འདྲ་ལ། གོང་འོག་མི་མཐུན་པའི་ཆ་འདི་ཡོད་དེ། མཛོད་པས་ངན་འགྲོར་འཕེན་བྱེད་ཀྱི་འཕངས་འབྲས་ལ་རེག་ཚོར་དང་པོ་ལྔ་ལས་མ་བཤད་ཀྱང་འདིར་འབྲས་དུས་ཀྱི་རྣམ་ཤེས་ཡིད་ཤེས་ཁོ་ནར་འདོད་པས་འཕངས་འབྲས་ལ་ཚོགས་དྲུག་ཀ་ཡོད་དོ། །གསུམ་པ་འགྲུབ་བྱེད་ཀྱི་རྒྱུ་བཤད་པ་ལ། སོ་སོའི་ངོ་བོ་ནི། ཚོར་བ་གསུམ་

― GTD003_Page_0062 ―

^{[མ་དཔེ་གཟིགས་ན་འདིར་གནོན།]}

[Full Size]

གང་རུང་ལ་དམིགས་ནས་སྐྱེས་ཤིང། བདེ་བ་དང་མི་འབྲལ་བ་དང་སྡུག་བསྔལ་དང་འབྲལ་བ་དང་། བཏང་སྙོམས་ལས་མི་ཉམས་པ་ཅི་རིགས་སུ་སྲེད་པའི་རིགས་གནས་གང་ཞིག །ཚར་གཅིག་པའི་ལེན་པ་འདྲེན་བྱེད་ཀྱི་འདོད་ཆགས་དེ། བརྒྱད་པ་སྲེད་པའི་མཚན་ཉིད། འདིའི་ཚོར་བ་ལ་ཡན་ལག་འདུན་པ་ཞེས་སྦྱར་བ་མ་དག་པར་མངོན་ཏེ། དེ་ནི་ཚེ་སྔ་མའི་ལས་ཀྱི་འཕངས་འབྲས་ཡིན་པས་སྲེད་སོགས་ཉོན་མོངས་དང་མཚུངས་ལྡན་མི་རུང་ཞེས་འོག་ནས་ཀྱང་བཤད་ཅིང། སྲེད་པའི་རྐྱེན་གྱིས་ཚོར་བ་ནི་སྲེད་པ་ལྟར་སྐྱེ་བ་ཕྱི་མའི་སར་གཏོགས་དགོས་པ་ཁམས་སོ་སོའི་སྲེད་པའི་མཚན་ཉིད་ཀྱིས་ཀྱང་ཤེས་པའི་ཕྱིར་དང། རྟེན་འབྲེལ་མདོ་འགྲེལ་ལས། ས་གང་ཡིན་པའི་ཚོར་བ་གང་ཡིན་པ་དེ་ཡང་ས་དེ་ཉིད་ཀྱི་སྲེད་པའི་རྐྱེན་ཡིན་ནོ། །ཞེས་པ་ལྟར་འགྲེལ་བཤད་ལས་ཀྱང་གསུངས་པས་སོ། །དབྱེ་བ་དམིགས་ཡུལ་དང་། ཁམས་ཀྱིས་ཕྱེ་ན་གསུམ་གསུམ་དང། སྤྱིར་སྲེད་པ་ཙམ་ལ་འདོད་སྲེད་སོགས་གསུམ་ཀྱང་བཤད་དེ། དེ་ཡང་ཆོས་མངོན་པར། འདོད་པའི་སྲེད་པ་འདོད་སྲེད། གོང་མ་གཉིས་ཀྱི་སྲེད་པ་སྲིད་སྲེད། ཕུང་པོ་རྒྱུན་ཆད་པར་སྲེད་པ་འཇིག་སྲེད། ཅེས་འཆད་ཀྱང་ལུགས་འདིར་རྣམ་འགྲེལ་ལྟར་བདེ་བ་ཐོབ་འདོད་ཀྱི་འདོད་སྲེད། སྡུག་བསྔལ་དང་འབྲལ་འདོད་ཀྱི་འཇིག་སྲེད། སྐྱེ་གནས་ཀྱི་ལུས་སོགས་འདོད་པའི་སྲིད་སྲེད་ཅེས་འདོད་དོ། །དེ་ལས་དང་པོ་གཉིས་ལ་བརྒྱད་པ་སྲེད་པ་རེ་ཡོད་ཀྱང་ཕྱི་མ་ལ་མེད་དེ། བརྒྱད་པ་སྲེད་

― GTD003_Page_0063 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ནི་ཚོར་བ་ཁོ་ན་ལ་དམིགས་ནས་འབྲལ་བའམ་མི་འབྲལ་བར་འདོད་ཙམ་ཡིན་ལ། དེའི་ཕྱིར་དུ་འདོད་ཡོན་དང། ལྟ་བ་སོགས་ལ་ཆགས་པ་དང་། མ་འོངས་པའི་སྲིད་པ་ལ་འདུན་པ་སོགས་ནི་སྲེད་པ་དེ་ཉིད་འཕེལ་ཏེ་ལེན་པར་འཕོས་པའི་སྐབས་ཡིན་པའི་ཕྱིར། ཀ་ཤིའི་མདོ་འགྲེལ་ལས། སྡུག་པའི་དངོས་པོ་ལ་སྨོན་པའི་རྣམ་པ་ནི་ལེན་པའོ། །ཞེས་དང་། རྣམ་འགྲེལ་ལས། སྲིད་འདོད་རྒྱུ་ཡིན་གང་གི་ཕྱིར། །མི་རྣམས་ཡུལ་གྱི་ཁྱད་པར་ནི། །ཡོངས་འཛིན་དེ་ཐོབ་བསམ་པས་བྱས། །ཞེས་གསུངས་པའི་ཕྱིར། འདིས་དགུ་པ་ལེན་པ་སོགས་སྲེད་པ་གཞན་ལ་ཚོར་བར་དམིགས་པས་མ་ཁྱབ་པ་ཤེས་སོ། །འོན་ཀྱང་སྲེད་པ་ལ་ཚོར་བ་གསུམ་གང་རུང་གིས་དམིགས་རྐྱེན་བྱས་པ་དགོས་ལ། གདུང་བས་ཀྱང་དམིགས་རྐྱེན་བྱས་ནས་འབྲལ་འདོད་ཀྱི་སྲེད་པ་སྐྱེས་པ་ནི་དེ་ལ་སྲེད་པ་མིན་ནོ། །བཏང་སྙོམས་ཀྱིས་མི་འབྲལ་བར་སྲེད་པའི་རྐྱེན་བྱེད་པ་ཡང་བསམ་གཏན་བཞི་པ་ཡན་གྱི་དབང་དུ་བྱས་ཏེ། འདོད་པའི་བཏང་སྙོམས་ཀྱིས་ཀྱང་མངོན་པར་དགའ་བའི་སྲེད་པའི་རྐྱེན་ཁོ་ན་བྱེད་པར་མདོ་འགྲེལ་ལས་གསུངས་པའི་ཕྱིར། རང་དང་ཚར་གཅིག་པའི་བརྒྱད་པ་སྲེད་པའི་རྐྱེན་གྱིས་བྱུང་ཞིང་། ཚོར་བ་ཅི་རིགས་དང་ལྡན་པའམ་འབྲལ་བའམ་མི་འབྲལ་བའི་ཆེད་དུ་འདོད་ཡོན་སོགས་ཅི་རིགས་ལ་ལྷག་པར་ཆགས་པའི་སྒོ་ནས་རང་དང་ཚར་གཅིག་པའི་ལས་ལ་གསོས་འདེབས་བྱེད་ཀྱི་སྲེད་པ་དེ།

― GTD003_Page_0064 ―

^{[མ་དཔེ་གཟིགས་ན་འདིར་གནོན།]}

[Full Size]

དགུ་པ་ལེན་པའི་མཚན་ཉིད། དབྱེ་ན། ཚེ་འདི་ཙམ་གྱི་བདེ་བ་དོན་དུ་གཉེར་བའི་ཁྱིམ་པའི་དབང་དུ་བྱས་ཏེ་འདོད་པ་ཉེ་བར་ལེན་པ་དང། ཕྱི་རོལ་བའི་རབ་བྱུང་སོགས་ཕྱི་མའི་དོན་བསྒྲུབ་འདོད་ཀྱང་ལོག་པར་ཞུགས་པའི་དབང་དུ་བྱས་ཏེ་ལྟ་བ་དང་། ཚུལ་ཞུགས་དང་། བདག་སྨྲ་ཉེ་བར་ལེན་པ་གསུམ་གསུངས་སོ། །དེ་ལ་དམིགས་པའི་ཁྱད་པར་ནི། རྩ་ཤེ་ཊཱིཀ་ཆེན་ལས། འདོད་ཡོན་ལྔ་དང་། འཇིག་ལྟ་མ་གཏོགས་པའི་ལྟ་ངན་རྣམས་དང་། ལྟ་ངན་འབྲེལ་བའི་ཚུལ་ཁྲིམས་བརྟུལ་ཞུགས་ངན་པ་དང་། འཇིག་ཚོགས་ལྟ་བ་བཞི་ལ་དམིགས་ནས་འདུན་ཞིང་ཆགས་པ་ཞེས་ཚུལ་ཞུགས་ཀྱི་ལྟ་བ་གཉིས་པའི་དམིགས་པ་དང་། ཚུལ་ཞུགས་ངན་པ་གསུམ་པའི་དམིགས་པར་གསུངས་ལ། སའི་དངོས་གཞིར། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་གང་ཞེ་ན། ཚུལ་ཁྲིམས་དང་བརྟུལ་ཞུགས་ལ་ལོག་པར་ཞུགས་པ་ལ་འདུན་པ་དང། འདོད་ཆགས་གང་ཡིན་པའོ། །ཞེས་གསུངས་པས་དེ་གཉིས་དམིགས་པ་མི་འགལ་ལམ་དཔྱད་པར་བྱའོ། །འཇིག་ལྟ་ལ་བདག་སྨྲ་ཞེས་བཏགས་པའི་དགོས་པ་ནི། མདོ་འགྲེལ་ལས། བདག་ཏུ་ལྟ་བ་ནི་གཞི་ཅན་མ་ཡིན་པའི་ཕྱིར། ཉེ་བར་ལེན་པའི་ཕུང་པོ་ལྔ་ལ་བདག་གོ་ཞེས་སྨྲས་ཤིང་བཏགས་པ་ཡིན་ནོ། །ཞེས་ཞེན་པ་ཙམ་དུ་གོ་ཆེད་ཡིན་པར་གསུངས་སོ། །འདིས་འཁྲུལ་ནས་འཇིག་ལྟ་བདག་སྨྲ་ཉེ་བར་ལེན་པར་མི་བཟུང་སྟེ། བྱེ་སྨྲས་ཉོན་མོངས་ཐམས་ཅད་ལེན་

― GTD003_Page_0065 ―

^{[མ་དཔེ་གཟིགས་ན་འདིར་གནོན།]}

[Full Size]

པ་འདི་བཞིས་བསྡུས་པར་འདོད་ཀྱང་། ལུགས་འདིར་བདག་སྨྲ་ཉེ་བར་ལེན་པ་འདོད་པ་འདོད་ཆགས་ཡིན་པའི་ཕྱིར། དེས་ན་ཐུབ་བསྟན་བྱི་དོར་སོགས་ལས་འདུན་པ་ཉོན་མོངས་ཅན་དང། འདོད་ཆགས་གཉིས་སེམས་བྱུང་རིགས་ཐ་དད་པར་གསུངས་པ་ཡང་ཕྱི་མར་སྔ་མས་མ་ཁྱབ་པ་ལ་དགོངས་སོ། །རང་དང་ཚར་གཅིག་པའི་འཕེན་བྱེད་ལས་ལ་སྲེད་ལེན་གྱིས་གསོས་བཏབ་སྟེ་ཡང་སྲིད་འགྲུབ་པའི་ནུས་པ་མཐུ་ཅན་དུ་སོང་བའི་རིགས་གནས་ཀྱི་ལས་དེ་བཅུ་པ་སྲིད་པའི་མཚན་ཉིད། རིགས་གནས་སྨོས་པས་མཚམས་མེད་སོགས་ལས་སྟོབས་ཅན་འགའ་ཞིག་གྲུབ་ཙམ་ནས་བཅུ་པ་སྲིད་པ་ཡིན་པ་སྡུད། དེས་ན་སྔར་བག་ཆགས་སུ་བཤད་པའང་སྲེད་ལེན་གྱིས་གསོས་པའི་སྲིད་པ་གཞིར་བཞག་པ་ཤེས་སླ། འདི་ལ་བར་སྲིད་དང་སྐྱེ་སྲིད་འགྲུབ་བྱེད་གཉིས་ཡོད་ཀྱང། བཅུ་པ་སྲིད་པ་ཐམས་ཅད་ལ་མ་ཡིན་ཏེ། གཟུགས་མེད་ཉེར་འགྲོའི་ཕྱིར་མི་འོང་སོགས་མངོན་པར་འགྲུབ་པའི་ཀུན་སྦྱོར་དང་། སྐྱེ་བའི་ཀུན་སྦྱོར་སྤངས་མ་སྤངས་ལ་མུ་བཞི་གསུངས་པའི་ཕྱིར། མཚམས་མེད་དེ་ཉིད་ཕྱིས་ཀྱི་སྲེད་ལེན་ལ་ལྟོས་ཀྱང་དང་པོ་ནས་འགྲུབ་བྱེད་ཀྱི་ངོ་བོར་སོང་ཟིན་ལ། དེ་དང་གྲུབ་འབྲས་ཀྱི་བར་དུ་སྐྱེ་སྲིད་གཞན་གྱིས་ཆོད་པར་འབྱུང་བ་འདིའི་དམིགས་བསལ་ཡིན་ཞིང། འགྲུབ་བྱེད་གསུམ་གྲུབ་ནས་གྲུབ་འབྲས་གཏན་མི་འབྱིན་པ་ནི་སྤྱིར་ཡང་སྲིད་དེ། བར་དོ་ནས་ལྡོག་པ་ཀུན་བཏུས་སུ་གསུངས་པ་ལྟར་གྲུབ་མཐའ་གོང་མ་རྣམས་འདོད་

― GTD003_Page_0066 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། ཁ་ཅིག །སྐྱེ་བ་འགྲུབ་པ་སྲེད་ལེན་ལ་ལྟོས་པར་མ་ངེས་ཏེ། དམྱལ་བའི་སྡུག་བསྔལ་ལ་སྨོན་པ་མེད་པའི་ཕྱིར་དང། སྡུག་བསྔལ་གྱིས་མནར་ཏེ་ལུས་འདོར་བར་འདོད་པ་དེ་དག་ཕུང་པོ་ལ་སྲེད་པ་མེད་ཀྱང་སྐྱེ་བ་འགྲུབ་པའི་ཕྱིར་དང་། ཁམས་གོང་མ་ནས་འདོད་པར་སྐྱེ་བའི་སྔ་རོལ་ཏུ་འདོད་ཉོན་མངོན་གྱུར་འབྱུང་ན། མཛོད་ལས། ས་འཕོས་ཉམས་པ་དག་གིས་གཏོང། །ཞེས་ས་འཕོས་པས་གཏོང་བར་བཤད་པ་དེ་བཞག་ཏུ་མེད་པར་འགྱུར་བའི་ཕྱིར་རོ་ཞེ་ན་སྐྱོན་མེད་དེ། འཆི་ཚེ་གྲང་ཉམས་སྐྱེས་ནས་ཚ་བ་འདོད་པས་ཚ་དམྱལ་དུ་འཕེན་པའི་ལས་ལ་གསོས་འདེབས་པར་མཛངས་བླུན་ལས་གསུངས་ཤིང་། སྔར་བསགས་དུས་ཀྱི་སྲེད་པ་དང་ཆ་འདྲ་བའི་ཆགས་པས་གསོས་འདེབས་པ་འཇུག་ཊཱིཀ་ཆེན་མོར་གསུངས་པའི་ཕྱིར། གཉིས་པ་ཡང་མིན་ཏེ། དེ་ལ་འཇིགས་སྐྲག་སོགས་འབྱུང་བས་བདག་སྲེད་མ་ལོག་པར་ཤེས་ཤིང། དེའི་བར་དུ་ཕུང་པོ་ལ་སྲེད་པ་མི་ལྡོག་པའི་ཕྱིར། གསུམ་པ་ཡང་མིན་ཏེ། དེའི་ཚེ་སྲེད་ལེན་འབྱུང་བའི་ཕྱིར། མདོ་འགྲེལ་ལས། འཆི་བའི་གནས་སྐབས་ན་དེས་བག་ཆགས་དག་འཇུག་པ་རྙེད་པས། ཞེས་དང་། འགྲེལ་བཤད་ལས། ས་འོག་མའི་འདུན་པ་དང་འདོད་ཆགས་ཀྱིས་བག་ཆགས་ཀྱི་འཇུག་པ་རྙེད་པ་ནི་ལེན་པ་ཡིན་ལ། ཞེས་གསུངས་པའི་ཕྱིར། འོན་ཀྱང་མཛོད་དང་མི་འགལ་ཏེ། སྐྱེས་ཐོབ་ཀྱི་བསམ་གཏན་དེ་ཤི་འཕོས་པ་ན་གཏོང་བའི་ཕྱིར་རོ། །བཞི་པ་གྲུབ་འབྲས་བཤད་པ་ལ། རང་དང་ཚར་གཅིག་པའི་སྲིད་པའི་རྟེན་

― GTD003_Page_0067 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲེལ་གྱི་གྲུབ་འབྲས་གང་ཞིག །འགྲོ་བ་རིགས་དྲུག་ཅི་རིགས་ཀྱི་སྐྱེ་བའི་རིས་མཐུན་གྲུབ་ཟིན་མ་དོར་བའི་ཉེར་ལེན་གྱི་ཕུང་པོ་དེ་བཅུ་གཅིག་པ་སྐྱེ་བའི་རྟེན་འབྲེལ་གྱི་མཚན་ཉིད། ཟུར་ཕྱི་མས་བར་དོའི་ཕུང་པོ་གཅོད། དབྱེ་བ་མདོ་ལས། འདིར་གང་སྐྱེ་བ་དང་། ཤིན་ཏུ་སྐྱེ་བ་དང་། འཕོས་པ་དང་། མངོན་པར་འབྱུང་བ་དང། རབ་ཏུ་བྱུང་བ་ཞེས་ལྔ་གསུངས་ཤིང། དེར་མ་ཤི་ཚུན་གྱི་གནས་སྐབས་ཐམས་ཅད་འདུས་པའི་ཕྱིར་ས་མཚམས་མཛོད་དང་མི་མཐུན་ནོ། །མིར་ཆགས་པའི་རྒྱུད་ལ་ཡང་མིའི་སྐྱེ་བ་ཡོད་ཀྱང་མིའི་ལུས་རྟེན་མེད་དེ། དེ་མིའི་རྒྱུད་ཀྱི་ཆོས་ཡིན་པའི་ཕྱིར། སྐྱེ་སྲིད་འགྲུབ་པའི་ཕུང་པོའི་རིས་མཐུན་མ་དོར་བར་ན་ཚོད་གཞན་དུ་གྱུར་པའི་ཆ་ནས་བཞག་པའི་ཉེར་ལེན་གྱི་ཕུང་པོ་དེ་བཅུ་གཉིས་པ་རྒ་བའི་རྟེན་འབྲེལ་གྱི་མཚན་ཉིད། དེ་ལ་རྩ་བའི་དབྱེ་བ་བདུན་དང་། ཡན་ལག་གི་དབྱེ་བ་བཅོ་བརྒྱད་ཡོད། སྐྱེ་སྲིད་དུ་ཉིང་མཚམས་སྦྱར་བའི་ཕུང་པོའི་རིགས་མཐུན་འདོར་བཞིན་པའི་ཆ་དེ། ཡན་ལག་བཅུ་གཉིས་པ་ཤི་བའི་རྟེན་འབྲེལ་གྱི་མཚན་ཉིད། འདིར་རྒ་ཤི་གཉིས་གཅིག་ཏུ་བགྲང་བ་ནི་རིམ་གྱིས་འབྱུང་བར་མ་ངེས་པའི་རྒྱུ་མཚན་གྱིས་ཡིན་པར་གསེར་འཕྲེང་ལས་གསུངས་སོ། །གཉིས་པ་བསྡུ་ཚུལ་ལ་དུ་མ་ཡོད་དེ། འཕེན་བྱེད་ཀྱི་རྒྱུ་སོགས་བཞི་དང་། ཡང་རྟེན་འབྲེལ་མདོ་འགྲེལ་ལས། གང་གིས་འཕེན་དང་ཇི་ལྟར་གང། །དེ་སྒྲུབ་བྱེད་དང་དེ་ལ་ཡང། །ཉེས་དམིགས་གང་ཡིན་དེ་དག་རྣམས། །

― GTD003_Page_0068 ―

^{[མ་དཔེ་གཟིགས་ན་འདིར་གནོན།]}

[Full Size]

ཡན་ལག་བཅུ་གཉིས་རྣམས་ཀྱིས་བསྟན། །ཞེས་བདུན་དུ་བསྡུ་ཚུལ་གསུངས་ཏེ། དང་པོ་གཉིས་ཀྱིས་རྣམ་ཤེས་ལ་བག་ཆགས་བསྒོས་པའི་ཚུལ་གྱིས་མིང་གཟུགས་སོགས་བཞི་འཕེན་ཞིང་། སྲེད་ལེན་གཉིས་ཀྱིས་ལས་ཀྱི་བག་ཆགས་སྲིད་པར་བྱས་ཏེ་གྲུབ་པའི་སྐྱེ་བ་ལ་ཉེས་དམིགས་ཀྱི་ཡན་ལག་རྒ་ཤི་འབྱུང་བའི་ཕྱིར། ཉོན་མོངས་གསུམ་མམ་ལམ་གསུམ་དུ་བསྡུ་ཚུལ་ཡང། དབུ་མ་རྟེན་འབྲེལ་སྙིང་པོ་ལས། བཅུ་གཉིས་ཆོས་ནི་གསུམ་དུ་འདུ། །དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཞིང། །ལྷག་མ་བདུན་ནི་སྡུག་བསྔལ་ཡིན། །གསུམ་པོ་དག་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང། །གསུམ་འབྱུང་སྲིད་པའི་འཁོར་ལོ་དེ། །ཉིད་ནི་ཡང་དང་ཡང་དུ་འཁོར། །ཞེས་པ་ལྟར་མཛོད་ལས་ཀྱང་བཤད་ལ། ཀུན་བཏུས་སུ། འདུ་བྱེད་གང་ཡིན་པ་དང། རྣམ་པར་ཤེས་པ་གང་ཡིན་པ་དང། སྲིད་པ་གང་ཡིན་པ་འདི་ནི་ལས་ཀྱི་ཀུན་ནས་ཉོན་མོངས་པར་བསྡུའོ། །ཞེས་གསུངས་སོ། །གསུམ་པ་རྐྱེན་དུ་འགྱུར་ཚུལ་ནི། རིག་པས་རིག་པ་ལ་རྐྱེན་བཞི་བྱེད་ཅིང་། གཟུགས་ཅན་ལ་བདག་རྐྱེན་ཁོ་ན་དང། གཟུགས་ཅན་གྱིས་དེ་ལ་དམིགས་རྐྱེན་བདག་རྐྱེན་གཉིས་ཀ་དང་། གཟུགས་ཅན་ལ་རྒྱུ་བདག་གཉིས་བྱེད་དེ། གཟུགས་ཅན་ལ་དེ་མ་ཐག་རྐྱེན་ཐལ་འགྱུར་བ་མ་གཏོགས་པས་མི་འདོད་དོ། །སའི་དངོས་གཞིར། མ་རིག་པས་ཀྱང་འདུ་བྱེད་ཀྱི་རྒྱུ་རྐྱེན་མི་བྱེད་པར་གསུངས་

― GTD003_Page_0069 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དགོངས་པ་གསེར་འཕྲེང་ལས། དེ་ནི་དོན་དམ་པའི་རྒྱུ་རྐྱེན་ཀུན་གཞི་ཉིད་ཡིན་པ་ལ་དགོངས་ལ། ཀུན་བཏུས་སུ། ཐ་སྙད་པའི་རྒྱུ་རྐྱེན་གྱི་དབང་དུ་མཛད་པས་སོ། །ཞེས་རྐྱེན་བཞིར་ཕྱེ་བའི་རྒྱུ་རྐྱེན་ཉེར་ལེན་ལ་བྱེད་ཅིང་དེ་ནི་ཀུན་གཞིའི་སྟེང་གི་བག་ཆགས་སྨིན་པ་ལས་སྐྱེ་དགོས་པ་སའི་དངོས་གཞིའི་དགོངས་པ་དང། ཀུན་བཏུས་ལས་བཞི་ག་བྱེད་གསུངས་པ་སྤྱིའི་ཐ་སྙད་ཙམ་དུ་རྒྱུ་རྐྱེན་ཡིན་པ་ལ་དགོངས་པར་གསུངས་སོ། །བཞི་པ་བྱེད་ལས་ལ་འདྲ་བའི་བྱེད་ལས་ཡན་ལག་ཕྱི་མ་ཕྱི་མ་སྐྱེད་པ་དང་། མི་འདྲ་བའི་བྱེད་ལས་དབུས་མཐའ་ལས། སྒྲིབ་པའི་ཕྱིར་དང་འདེབས་པའི་ཕྱིར། །འཁྲིད་པའི་ཕྱིར་དང་ཀུན་འཛིན་ཕྱིར། །རྫོགས་བྱེད་ཕྱིར་དང་གསུམ་གཅོད་ཕྱིར། །ཉེ་བར་སྤྱོད་ཕྱིར་སྡུད་པའི་ཕྱིར། །སྦྱོར་བའི་ཕྱིར་དང་མངོན་དུའི་ཕྱིར། །སྡུག་བསྔལ་ཕྱིར་ནི་འགྲོ་ཉོན་མོངས། །ཞེས་ཡན་ལག་ཐ་མ་གཉིས་མ་གཏོགས་གྲངས་བཞིན་ནོ། །ལྔ་པ་ཚེ་དུ་ལ་རྫོགས་ཚུལ་ནི། འཕེན་བྱེད་གསུམ་དང་འགྲུབ་བྱེད་གསུམ་ཚེ་སོ་སོར་བྱུང་ན་ཚེ་གསུམ་འགྱངས་ཀྱང་དེ་ལས་བུལ་བ་མི་སྲིད་དེ། གསེར་ཕྲེང་ལས། འཕེན་འགྲུབ་ཀྱི་བར་དུ་ཚེ་དུ་མས་ཆོད་ཀྱང་རྟེན་འབྲེལ་གཞན་གྱི་ཚེ་ཡིན་ལ། འཕེན་བྱེད་དེའི་རྟེན་འབྲེལ་གྱི་ཚེ་མ་ཡིན་པས་ཉེས་པ་མེད་དོ། །ཞེས་གསུངས་པའི་ཕྱིར།དྲུག་པ་ས་མཚུངས་ནི། ལུགས་འདིར་ཕལ་ཆེར་ས་མཚུངས་ཀྱང་ཀུན་གཞི་འདོད་པ་རྣམས་འདོད་པར་རྒྱུ་

― GTD003_Page_0070 ―

^{[མ་དཔེ་གཟིགས་ན་འདིར་གནོན།]}

[Full Size]

སྙོམས་འཇུག་བསྒྲུབ་པ་ན་ཉོན་ཡིད་འཁོར་གྱི་མ་རིག་པས་ཐོག་མའི་མ་རིག་པ་བྱས་ཚེ་ཡན་ལག་དང་པོ་འདོད་པའི་སས་བསྡུས་ཡིན་ལ། རྒྱུ་དུས་ཀྱི་རྣམ་ཤེས་ཀྱང་ཀུན་གཞི་ཡིན་པས་སྟོད་ཆ་འདོད་པའི་སས་བསྡུས་ཤིང། ལྷག་མ་ཐམས་ཅད་གོང་སས་བསྡུས་པར་འདོད་ལ། གོང་ས་ནས་འོག་སར་འཕེན་བྱེད་ལས་མི་གསོག་པ་གྲུབ་མཐའ་ཀུན་མཐུན་ནོ། །བདུན་པ་ལ་སྒོམ་ཚུལ་སྔར་ལྟར་ལ། བརྒྱད་པ་བསྒོམ་པའི་ཕན་ཡོན་ནི། སྤང་བླང་གི་འཇུག་ལྡོག་ཚུལ་བཞིན་དུ་བྱས་ཏེ་ཐར་པ་བླ་ན་མེད་པའི་གྲོང་ཁྱེར་དུ་ཞུགས་ནས་ལུས་ཅན་ཡོངས་ལ་ཕན་བདེའི་སྒོ་བརྒྱ་འབྱེད་པ་ཡིན་ནོ། །སྨྲས་པ། རྟེན་འབྱུང་ཡངས་པའི་ཁོར་ཡུག་གསལ་བྱེད་ཅིང། །བློ་གསལ་བློ་ཡི་འདབ་བརྒྱ་རྒོད་པའི་གཉེན། །ལུང་རིགས་འོད་བརྒྱ་འབར་བའི་གཟི་བྱིན་ཅན། །ཐུབ་བསྟན་ནམ་མཁའི་རྒྱན་འདི་བསྐྲུན་པ་ཡི། །ལེགས་བྱས་སྙིང་པོ་མ་ཕམ་ཚ་ཟེར་གྱིས། །བཞད་པའི་གསུང་གི་རྗེས་འགྲོ་རྐང་དྲུག་ཚོགས། །བཤད་སྒྲུབ་སྦྲང་རྩིར་རྣམ་རོལ་ཟག་མེད་ཀྱིས། །དགའ་བའི་མྱོས་ལྡན་རྩེ་བས་གར་བསྒྱུར་ཤོག །དེ་ཚེ་རྣམ་ཀུན་མཆོག་ལྡན་སྟོང་པའི་མཁར། །རྟེན་འབྱུང་ཆུ་འཛིན་གླལ་བའི་སྒྲ་དབྱངས་ཀྱིས། །སྐལ་བཟང་བློ་གསལ་བྱེ་བའི་མདོངས་མཐའ་མ། །དོན་གཉིས་གཏོས་བཟང་འཛིན་པས་སྒེག་གྱུར་ཅིག །ཅེས་པ་འདི་ནི་བསྟན་པའི་གསལ་བྱེད་མཆོག་སྤྲུལ་གྲགས་པ་རྒྱལ་མཚན་གྱི་འཛིན་ཆོས་སུ། ༸བཙུན་པ་དཀོན་མཆོག་བསྟན་པའི་

― GTD003_Page_0071 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲོན་མེས་རང་ལོ་ཉེར་གསུམ་པ་ལ་དཔལ་ལྡན་འབྲས་སྤུངས་སུ་བྲིས་པའོ།། །།

རྣམ་ཐར་སྒོ་གསུམ་གྱི་རྣམ་བཞག

― GTD003_Page_0073 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་ཐར་སྒོ་གསུམ་གྱི་རྣམ་པར་བཞག་པ་ལེགས་བཤད་རྒྱ་མཚོའི་རྦ་རླབས་ཞེས་བྱ་བ་བཞུགས་སོ། །

― GTD003_Page_0074 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཞི་སྒོ་གཉིས་སུ་མེད་པ་མི་འགྱུར་དག་པ་དོན་དམ་དབྱིངས་ཀྱི་མཁར། །ཞི་བའི་རོ་ལ་རྗེས་ཆགས་དམན་རྟོག་ར་རིའི་དྲི་མ་དང་བྲལ་ཞིང། །ཞི་འགྱུར་མཛད་པའི་བསིལ་ཟེར་འབུམ་དུ་སྤྲོ་བའི་རྩེ་དགའ་ལྷུར་ལེན་པ། །ཞི་བ་མཆོག་བརྙེས་ཐུབ་པའི་ཟླ་བ་ལུས་ཅན་བདེ་འབྱུང་གཙུག་ན་རྒྱལ། །གང་གིས་ལེགས་ཕྱེ་རྣམ་པར་ཐར་པའི་སྒོར། །རང་ཉིད་དངོས་སུ་འཇུག་པར་མ་ནུས་ཀྱང། །བློ་མིག་དག་པས་རིང་ནས་མཐོང་གྱུར་ཏེ། །ཐར་འདོད་མགྲོན་ལ་མ་ནོར་སྦྲན་པར་བྱ། །དེ་ལ་འདིར་ཐེག་པ་གསུམ་གྱི་དགྲ་བཅོམ་མཐའ་དག་གི་གཤེགས་ཤུལ། ཐར་པ་འདོད་པའི་སྐྱེ་བོ་མ་ལུས་པའི་འཇུག་ངོགས་བདེ་བར་གཤེགས་པའི་གསུང་རབ་ཐམས་ཅད་ཀྱི་གནད་དོན། ཡུལ་ཅན་རྣམ་པར་ཐར་པའི་སྒོ་གསུམ་གྱི་རྣམ་གཞག་ཕྱེ་སྟེ་བཤད་པ་ལ་གསུམ། གང་ལས་གསུངས་པའི་ཁུངས་དགོད་པ་དང་། དེའི་དོན་གྲུབ་མཐའ་སོ་སོས་བཀྲལ་ཚུལ་དང་། དེ་དག་གི་མཐའ་ཅུང་ཟད་དཔྱད་པའོ། །དང་པོ་ལ་ཡང་འདིར་བཀོད་པའི་རྩ་བའི་མདོ་དངོས་ཀྱི་དོན་དང་། རྣམ་གྲངས་མདོ་རྒྱུད་གཞན་ལས་གསུངས་ཚུལ་གཉིས། དང་པོ་ནི། འཕགས་པ་ཡུལ་འཁོར་སྐྱོང་གིས་ཞུས་པ་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མ་ཤེས་པས་ནི་འགྲོ་བ་འཁྱམས་གྱུར་

― GTD003_Page_0075 ―

^{[མ་དཔེ་གཟིགས་ན་འདིར་གནོན།]}

[Full Size]

པ། །དེ་དག་ཐུགས་རྗེ་མངའ་བས་ཐབས་ཚུལ་དང། །རིགས་པ་བརྒྱ་དག་གིས་ནི་འཛུད་པར་མཛད། །ཅེས་གསུངས་ཏེ། ཆོས་རྣམས་རང་གི་ངོ་བོ་བདེན་པས་སྟོང་པའི་སྟོང་པ་ཉིད་དང་། ཞི་བ་སྟེ་རྒྱུ་བདེན་པས་སྟོང་པའི་མཚན་མ་མེད་པ་དང་། འབྲས་བུ་བདེན་པའི་སྐྱེ་བ་མེད་པས་སྨོན་པ་མེད་པ་སྟེ། ཡུལ་རྣམ་པར་ཐར་པའི་སྒོ་གསུམ་པོ་འདི་ཁོང་དུ་མ་ཆུད་པའི་སྟོབས་ཀྱིས་ང་དང་ང་ཡིར་འཛིན་པའི་དབང་དུ་སོང་སྟེ་ལས་སྣ་ཚོགས་སོགས་པ་ལ་འཇུག་ཅིང། དེའི་མཐུས་འཁོར་བ་སྡུག་བསྔལ་གྱི་རྒྱ་མཚོ་འདིར་མགལ་མེའི་འཁོར་ལོ་བཞིན་དུ་འཁོར་བའི་འགྲོ་བ་འདི་དག་ལ་སྟོན་པ་ཐུགས་རྗེའི་བདག་ཉིད་ཅན་དེས་ཐུགས་བརྩེ་བས་དགོངས་ཏེ། རེ་ཞིག་བདག་ཡོད་པར་སྟོན་པ་སོགས་ཐབས་ཀྱི་ཚུལ་མི་འདྲ་བ་དང་། རྟེན་འབྱུང་སོགས་རིགས་པའི་རྣམ་གྲངས་བརྒྱ་ཕྲག་གི་སྒོ་ནས་གོང་དུ་བཤད་པའི་རྣམ་ཐར་སྒོ་གསུམ་པོ་དེར་འཛུད་པར་མཛད་པ་ཡིན་ཏེ། དེ་ལྟར་ན་དྲང་ངེས་ཀྱི་སྡེ་སྣོད་ཇི་སྙེད་ཅིག་བཀའ་སྩལ་པ་ཐམས་ཅད་ཀྱང་སྒོ་འདི་ནས་ཞུགས་ཏེ་རིམ་གྱིས་ཐར་པའི་གྲོང་ཁྱེར་དུ་བགྲོད་པའི་ཐབས་སུ་གྱུར་པ་ཤ་སྟག་ཡིན་ནོ། །གཉིས་པ་ནི། འོད་སྲུང་གི་ལེའུ་ལས། གང་དག་སྟོང་པ་ཉིད་ཀྱིས་ཆོས་རྣམས་སྟོང་པར་མི་བྱེད་དེ། ཆོས་རྣམས་ཉིད་སྟོང་པ་དང་། གང་མཚན་མ་མེད་པས་ཆོས་རྣམས་མཚན་མ་མེད་པར་མི་བྱེད་དེ། ཆོས་རྣམས་ཉིད་མཚན་མ་མེད་པ་དང། གང་སྨོན་པ་མེད་པས་ཆོས་རྣམས་སྨོན་པ་མེད་པར་མི་བྱེད་དེ། ཆོས་

― GTD003_Page_0076 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་ཉིད་སྨོན་པ་མེད་པར་གང་དག་དེ་ལྟར་སོ་སོར་རྟོག་པ་དེ་ནི་འོད་སྲུང་དབུ་མའི་ལམ་ཆོས་ལ་སོ་སོར་ཡང་དག་པར་རྟོག་པ་ཞེས་བྱའོ་ཞེས་དང་། ཤེར་ཕྱིན་གྱི་མདོ་ལས། ཆོས་ཐམས་ཅད་ངོ་བོ་ཉིད་མ་མཆིས་པ། སྐྱེ་བ་མ་མཆིས་པ། འགགས་པ་མ་མཆིས་པ་ཞེས་སོགས་རྣམ་གྲངས་དུ་མར་གསུངས་ཤིང་། ཏིང་ངེ་འཛིན་རྒྱལ་པོར་ཡང་། སྲིད་གསུམ་རྨི་ལམ་དང་འདྲ་སྙིང་པོ་མེད། །མྱུར་དུ་འཇིག་ཅིང་མི་རྟག་སྒྱུ་མ་བཞིན། །འོང་བ་མེད་ཅིང་འདི་ནས་འགྲོ་བའང་མེད། །རྒྱུན་རྣམས་རྟག་ཏུ་སྟོང་ཞིང་མཚན་མ་མེད། །ཅེས་རྒྱུ་ལས་སྐྱེ་བ་དང་། འབྲས་བུའི་ངོ་བོར་འགྲོ་བ་དང་། དེའི་བར་དུ་གནས་པའི་རྒྱུན་རང་གི་ངོ་བོ་གསུམ་ག་བདེན་པས་སྟོང་པ་སྟེ་རྒྱུ་འབྲས་ངོ་བོ་གསུམ་ལ་སྦྱར་བའི་རྣམ་ཐར་སྒོ་གསུམ་དང། ཡང་། སེམས་དམྱལ་འཇིགས་པ་ང་ཡིས་བསྟན་བྱས་ཏེ། །སེམས་ཅན་སྟོང་ཕྲག་དུ་མ་སྐྱོ་བྱས་ཀྱང། །གང་དག་ཤི་འཕོས་ངན་སོང་རྟག་འགྲོ་བའི། །འགྲོ་བ་དེ་དག་ནམ་ཡང་ཡོད་མ་ཡིན། །ཞེས་གང་དུ་སྐྱེ་བ་དང་། དེར་སྐྱེ་བ་པོ་དང། དེའི་སྐྱེ་བ་སྟེ་གསུམ་ག་བདེན་པས་སྟོང་པ་བྱ་བྱེད་ལས་གསུམ་ལ་སྦྱར་བའི་རྣམ་ཐར་སྒོ་གསུམ་གསུངས་སོ། །དེ་བཞིན་དུ་རྒྱུད་ཀྱང། རྣམ་སྣང་མངོན་བྱང་ལས། སེམས་ནི་རང་དངོས་མེད་ཕྱིར་དང། །རྒྱུ་དང་འབྲས་བུ་སྤང་བའི་ཕྱིར། །ཞེས་རྒྱུ་འབྲས་ངོ་བོ་གསུམ་ལ་སྦྱར་བ་དང་། འདུས་པའི་རྩ་རྒྱུད་ལེའུ་གཉིས་པར། དངོས་པོ་མེད་པས་སྒོམ་པ་མེད། །བསྒོམ་པར་བྱ་བ་བསྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པ་འོ། །ཞེས་བྱ་

― GTD003_Page_0077 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་ལས་གསུམ་ལ་སྦྱར་ནས་གསུངས་ཏེ། མདོར་ན་འཁོར་གསུམ་མི་དམིགས་པར་སྟོན་པ་མཐའ་དག་ཀྱང་རྣམ་ཐར་སྒོ་གསུམ་སྟོན་པ་ཡིན་པས། མདོ་སྔགས་གཉིས་ཀའི་ལམ་གྱི་སྲོག་ཏུ་ཤེས་པར་བྱའོ། །གཉིས་པ་གྲུབ་མཐའི་འདོད་ཚུལ་ལ་གཉིས་ལས་དང་པོ་གྲུབ་མཐའ་འོག་མའི་ལུགས་ནི། མཛོད་ལས། མཚན་མེད་ཞི་བའི་རྣམ་པ་དང། །སྟོང་ཉིད་བདག་མེད་སྟོང་ཉིད་དུ། །འཇུག་པའོ་སྨོན་པ་མེད་པ་ནི། །དེ་ལས་གཞན་བདེན་རྣམ་པ་ཅན། །ཞེས་འགོག་བདེན་གྱི་ཁྱད་ཆོས་འགོག་པ། ཞི་བ། གྱ་ནོམ། ངེས་འབྱུང་བཞི་རྟོགས་པའི་མཚན་མེད་ཀྱི་ཏིང་ངེ་འཛིན་དང། སྟོང་བདག་མེད་གཉིས་རྟོགས་པ་སྟོང་པ་ཉིད་ཀྱི་ཏིང་ངེ་འཛིན་དང་། སྡུག་བདེན་གྱི་རྣམ་པ་ལྷག་མ་མི་རྟག་སྡུག་བསྔལ་གཉིས་དང་། རྒྱུ། ཀུན་འབྱུང་། རྐྱེན། རབ་སྐྱེ་སྟེ་ཀུན་འབྱུང་གི་རྣམ་པ་བཞི་དང། ལམ། རིགས་པ། སྒྲུབ་པ། ངེས་འབྱིན་ཏེ་ལམ་བདེན་གྱི་རྣམ་པ་བཞི་རྣམས་རྟོགས་པའི་སྨོན་མེད་ཀྱི་ཏིང་ངེ་འཛིན་དང་གསུམ་གསུངས་སོ། །ལམ་གྱི་བཞི་རྟོགས་པ་མཚན་མེད་དུ་མ་བཤད་པ་ནི། ལུགས་འདིར་མཚན་མེད་ཀྱི་དམིགས་པ་ལ་གཟུགས་སོགས་ཡུལ་ལྔ་དང་། ཕོ་མོ་གཉིས་དང་། འདུ་བྱས་ཀྱི་མཚན་ཉིད་སྐྱེ་འགག་གནས་གསུམ་སྟེ་བཅུ་ཆར་གྱི་མཚན་མ་དང་བྲལ་བ་ཞིག་དགོས་ཤིང་ལམ་ལ་དེ་མ་ཚང་བའི་ཕྱིར་དང་། ལམ་སུན་འབྱིན་པའི་ལམ་གསུམ་གྱི་སྒོ་ནས་ཟག་མེད་ལམ་བདེན་ལ་ཡང་སྨོན་པ་བཀག་སྟེ་ལྷག་མེད་དུ་འཇུག་པའི་ཚེ་ཆུ་ཐོན་པའི་གཟིངས་ལྟར་འདོར་དགོས་པའི་རྒྱུ་མཚན་གྱིས་སྨོན་མེད་དུ་བཤད་པ་ཡིན་པའི་ཕྱིར་ཏེ། མཛོད་འགྲེལ་ལས།

― GTD003_Page_0078 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་མ་བཅུ་དང་བྲལ་བའི་ཕྱིར་མཚན་མ་མེད་པ་ཡིན་ནོ། །དེ་ལ་དམིགས་པའི་ཏིང་ངེ་འཛིན་ནི་མཚན་མ་མེད་པའི་ཏིང་ངེ་འཛིན་ཡིན་ཏེ། ཞེས་དང་། ལམ་ཡང་གདོན་མི་ཟ་བར་གཟིངས་ལྟ་བུར་དོར་བར་བྱ་བ་ཡིན་པ་ཉིད་ཀྱི་ཕྱིར། དེའི་རྣམ་པ་ཅན་གྱི་ཏིང་ངེ་འཛིན་ནི་སྨོན་པ་མེད་པ་ཡིན་ཏེ། དེ་ལས་འདའ་བ་མངོན་དུ་ཕྱོགས་པའི་ཕྱིར་རོ། །ཞེས་གསུངས་པས་སོ། །འདིར་དབང་པོ་མཚན་མར་མ་སྨོས་པ་ནི་ཡིད་འཕྲོག་པར་མི་བྱེད་པའི་གནད་ཀྱིས་ཡིན་པར་གང་སྤེལ་ལས་གསུངས་སོ། །གཉིས་པ་གྲུབ་མཐའ་གོང་མའི་ལུགས་ལ་ཐེག་ཆེན་ཐུན་མོང་མ་ཡིན་པ་དཔལ་ལྡན་ཐལ་འགྱུར་བའི་ལུགས་ནི་གོང་དུ་སྨོས་པ་ལྟར་འཁོར་གསུམ་བདེན་པས་སྟོང་པའི་རྣམ་ཐར་སྒོ་གསུམ་པོ་དེ་ཉིད་ཡིན་ལ། ཐུན་མོང་བ་ནི། འགྲེལ་ཆུང་དོན་གསལ་ལས། སྟོང་པ་དང་བདག་མེད་པའི་རྣམ་པའི་ངོ་བོ་ཉིད་ནི་རྣམ་པར་ཐར་པའི་སྒོ་དང་པོའོ། འགོག་པ་དང་ལམ་གྱི་བདེན་པའི་རྣམ་པའི་ངོ་བོ་ཉིད་ནི་གཉིས་པའོ། །མི་རྟག་པ་དང་སྡུག་བསྔལ་བ་དང་ཀུན་འབྱུང་བའི་བདེན་པའི་རྣམ་པའི་ངོ་བོ་ཉིད་ནི་གསུམ་པ་སྟེ་ཞེས་གཞན་རྣམས་མཛོད་དང་མཐུན་ཡང་ལམ་གྱི་བཞི་རྟོགས་པ་མཚན་མེད་དུ་བཤད་པ་ནི་ཁྱད་པར་རོ། །དེའི་རྒྱུ་མཚན་ཡང་། གསེར་ཕྲེང་ལས། ལམ་གྱི་བཞི་དེར་མ་བཤད་པ་ནི་གཟུགས་ལ་སོགས་པའི་དངོས་པོའམ་ཡུལ་གྱི་མཚན་མ་བཅུ་ལ་མཚན་མར་བྱས་ནས་དེ་འགོག་པའི་ཉན་ཐོས་ཀྱི་ལམ་གྱི་དབང་དུ་བྱས་པས། འདིར་ཡུལ་ཅན་མཚན་མའི་རྣམ་རྟོག་བྲལ་བྱེད་དང་བྲལ་བའི་དབང་དུ་བྱས་པས་མི་

― GTD003_Page_0079 ―

^{[མ་དཔེ་གཟིགས་ན་འདིར་གནོན།]}

[Full Size]

འགལ་ལོ། །ཞེས་གསུངས་ཤིང་གཙོ་བོ་ལྷག་མེད་ཀྱི་ཚེ་བེམ་རིག་རྒྱུན་འཆད་མི་དགོས་པ་ལ་ཐུག་གོ །ཐེག་ཆེན་ཐུན་མོང་བས་བཤད་ཚུལ་འདི་ཁོ་ནར་ངེས་པ་ཡང་མ་ཡིན་ཏེ། མདོ་སྡེ་རྒྱན་ལས། ཏིང་འཛིན་གསུམ་གྱི་སྤྱོད་ཡུལ་ནི། །བདག་མེད་རྣམ་པ་གཉིས་པོ་དང། །བདག་ཏུ་འཛིན་པའི་རྟེན་དང་ནི། །དེ་རྟག་ཉེར་ཞི་ཡིན་ཞེས་བྱ། །ཞེས་བདག་མེད་གཉིས་རྟོགས་པ་སྟོང་ཉིད་ཀྱི་ཏིང་ངེ་འཛིན་དང། བདག་ཏུ་འཛིན་པའི་རྟེན་ཉེ་བར་ལེན་པའི་ཕུང་པོ་ལྔ་ལ་ཉེས་དམིགས་སུ་ལྟ་བ་སྨོན་མེད་ཀྱི་ཏིང་ངེ་འཛིན་དང། རྟེན་དེ་གཏན་དུ་ཉེ་བར་ཞི་བའི་མྱང་འདས་ལ་ཕན་ཡོན་དུ་ལྟ་བ་མཚན་མེད་ཀྱི་ཏིང་ངེ་འཛིན་དུ་གསུངས་སོ། །བསྡུ་བ་ལས། ཀུན་བཏགས་པའི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་སྟོང་པ་ཉིད་རྣམ་པར་བཞག་གོ །གཞན་གྱི་དབང་གི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་སྨོན་པ་མེད་པ་རྣམ་པར་བཞག་གོ །ཡོངས་སུ་གྲུབ་པའི་ངོ་བོ་ཉིད་ལ་བརྟེན་ནས་ནི་རྣམ་པར་ཐར་པའི་སྒོ་མཚན་མ་མེད་པ་རྣམ་པར་བཞག་གོ །ཞེས་གསུངས་པ་ཡང་འདི་དང་གནད་གཅིག་སྟེ། རིམ་བཞིན་བདག་གཉིས་སུ་ཀུན་བཏགས་པ་ལྟར་རྣམ་པར་མི་རྟོག་པ་དང་། མ་དག་པའི་གཞན་དབང་ལ་རྒྱབ་ཀྱིས་ཕྱོགས་པ་དང་། ཆོས་དབྱིངས་ཀྱི་རང་བཞིན་མྱང་འདས་ལ་དགའ་བའི་རྣམ་ཅན་དུ་བཞག་པའི་ཕྱིར། རྒྱན་ལས། རྣམ་པར་མི་རྟོག་རྒྱབ་ཀྱིས་ཕྱོགས། །རྟག་ཏུ་དགའ་དང་ལྡན་པ་འོ། །ཞེས་སོ། །ཏིང་ངེ་འཛིན་གསུམ་པོ་འདི་ཆོས་ཀྱི་སྡོམ་

― GTD003_Page_0080 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིས་འགྲུབ་ཚུལ་ཡང། རྒྱན་ལས། ཏིང་ངེ་འཛིན་གྱི་རྒྱུ་ཉིད་དུ། །ཆོས་ཀྱི་སྡོམ་ནི་རྣམ་པ་བཞི། །ཞེས་དང་། དབྱིག་འགྲེལ་ལས། དེ་ལ་འདུ་བྱེད་ཐམས་ཅད་ནི་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ་ཞེས་བྱ་བ་ནི་སྨོན་པ་མེད་པའི་ཏིང་ངེ་འཛིན་གྱི་རྒྱུའི་དངོས་པོར་བསྟན་ཏོ། །ཆོས་ཐམས་ཅད་ནི་བདག་མེད་པའོ་ཞེས་བྱ་བ་ནི་སྟོང་པ་ཉིད་ཀྱིའོ། །མྱ་ངན་ལས་འདས་པ་ནི་ཞི་བའོ་ཞེས་བྱ་བ་ནི་མཚན་མ་མེད་པའི་ཏིང་ངེ་འཛིན་གྱིའོ། །ཞེས་གསུངས་ཏེ་ཞིབ་པར་དེ་དག་ཏུ་བལྟའོ། །གསུམ་པ་མཐའ་དཔྱད་པ་ལ། ཁ་ཅིག་ན་རེ། ཁྱོད་ཀྱིས་དྲངས་པའི་ཡུལ་འཁོར་སྐྱོང་གིས་ཞུས་པའི་ལུང་དེ་མི་འཐད་པར་ཐལ། ལུང་དེ་ཡུལ་འཁོར་སྐྱོང་གིས་ཞུས་པའི་མདོར་མེད་པའི་ཕྱིར་ན། མཁས་པ་ཁ་ཅིག་བོད་དུ་འགྱུར་བའི་མདོ་འདིར་མེད་ཀྱང་དབུ་མ་སྣང་བ་སོགས་སུ་དྲངས་པ་འདིར་བཀོད་པ་ཡིན་པས་མི་འགལ་ཟེར། གཉིས་ཀ་མི་འཐད་པར་ཐལ། ཡུལ་འཁོར་སྐྱོང་ཞུས་བོད་དུ་འགྱུར་བ་འདིར་ཡང་དེ་ཡོད་པའི་ཕྱིར། དེར་ཐལ། ཡུལ་འཁོར་སྐྱོང་གིས་ཞུས་པ་ཆུང་ངུ་ལོགས་སུ་བཞུགས་པ་དེར་མེད་ཀྱང་དཀོན་མཆོག་བརྩེགས་པའི་ཆོས་ཀྱི་རྣམ་གྲངས་བཅོ་བརྒྱད་པ་ཡུལ་འཁོར་སྐྱོང་ཞུས་ཀྱི་ལེའུའི་ནང་དུ་ཡོད་པའི་ཕྱིར་ཏེ། དེ་ཉིད་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་ཏེ། །ཐུགས་རྗེའི་ཐབས་ཚུལ་རིགས་པ་བརྒྱ་དག་གིས། །དེ་དག་རྣམས་ནི་འཛུད་པར་མཛད་པ་ལགས། །ཞེས་འབྱུང་བ་དང་སྔ་མ་གཉིས་འགྱུར་ཁྱད་ཙམ་ལས་གཅིག་ཏུ་སྣང་བའི་ཕྱིར་རོ། །ཡང་ཁ་ཅིག །དངོས་པོ་མེད་པས་སྒོམ་པ་མེད་ཅེས་

― GTD003_Page_0081 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་ཀྱིས་བྱ་བྱེད་ལས་གསུམ་ལ་སྦྱར་བའི་རྣམ་ཐར་སྒོ་གསུམ་ཁོ་ན་བསྟན་ཟེར་ན་དེ་མ་ཡིན་པར་ཐལ། ཚིགས་བཅད་འདི་ལ་ཚུལ་བཞིའི་བཤད་པ་འབྱུང་བ་ལས་ཡིག་དོན་གྱི་སྐབས་སུ་མཐའ་བཞི་བཀག་པའི་སྒོ་ནས་ལས་སུ་གྱུར་པ་བསྒོམ་བྱའི་དེ་ཁོ་ན་ཉིད་དང། བྱེད་པ་པོ་སྒོམ་མཁན་གྱི་གང་ཟག་དང། དེས་དེ་བསྒོམ་པའི་བྱ་བ་སྟེ། བྱ་བྱེད་ལས་གསུམ་བདེན་པས་སྟོང་པ་ལ་བཤད་ཀྱང་། སྤྱི་དོན་གྱི་སྐབས་སུ་རྒྱུ་འབྲས་ངོ་བོ་གསུམ་ལ་སྦྱར་བའི་ཕྱིར། སྒྲོན་གསལ་ལས། གང་ཡང་རྒྱུ་དང་འབྲས་བུའི་རྣམ་པ་ལ་མངོན་པར་ཞེན་ནས་བསྒོམ་ན། དེ་ཡང་རིགས་པ་མ་ཡིན་ཏེ། ཞེས་སོགས་དང་། ཤཱུ་ནྱ་ཏའི་སྔགས་དོན་བཤད་པའི་ཐད་ཀྱི་སྒྲུབ་ཐབས་ཀུན་བཟང་ལས། ངོ་བོ་ཉིད་དང་བྲལ་ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་ཕྱིར་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་གསུངས་པའི་ཕྱིར། ཁྱབ་སྟེ། རྩ་རྒྱུད་ཀྱི་ལུང་དེ་དང། ཤཱུ་ནྱ་ཏའི་སྔགས་དོན་གཉིས་གཅིག་ཏུ་འགྲོ་དགོས་པའི་ཕྱིར། མདོར་བྱས་ལས། དངོས་པོ་མེད་པས་སྒོམ་པ་མེད། །ཅེས་པ་ནས། ཚིགས་བཅད་འདི་ཡིས་རྒྱུ་མི་རྒྱུའི། །བདག་ཉིད་ཆེ་རྣམས་སྟོང་པར་བསྒོམ། །ཆོ་གའི་སྦྱོར་བ་འདི་ཡིས་ནི། །ཡེ་ཤེས་ས་གཞིར་བྱིན་གྱིས་བརླབས། །ཞེས་གསུངས་པའི་ཕྱིར། ཡང་ཁོ་ན་རེ། ཁྱོད་ཀྱིས་བྱ་བྱེད་ལས་གསུམ་ལ་སྦྱོར་ཚུལ་དེ་མི་འཐད་པར་ཐལ། དེ་བཞིན་ཉིད་དེ་དེ་གསུམ་དུ་ཕྱེ་བའི་ལས་མ་ཡིན་པའི་ཕྱིར། དེར་ཐལ། དེ་བྱ་བྱེད་ལས་གསུམ་དུ་ཕྱེ་བའི་ནང་གི་བྱ་བ་ཡིན་

― GTD003_Page_0082 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར་ཏེ། དེ་བསྒོམ་བྱ་དང་སྒོམ་བྱེད་གཉིས་སུ་ཕྱེ་བའི་ནང་གི་བསྒོམ་པར་བྱ་བ་ཡིན་པའི་ཕྱིར་ན་མ་ཁྱབ། གོང་དུ་འདོད་ན། ཚད་མས་གཞལ་བྱ་རྟོགས་པ་ལྟ་བུའི་ཚེ་གཞལ་བྱ་དེ་བྱ་བ་དང་། ཚད་མ་བྱེད་པར་འཇོག་ཅིང། སྲོག་གཅོད་ལྟ་བུ་ལ་ཡང་བསད་བྱ་དེ་བྱ་བ་དང་། གསོད་པ་པོ་དེ་བྱེད་པར་འཇོག་རིགས་པར་ཐལ། དེ་ལ་ཡང་གཞལ་བྱ་དང་བསད་བྱ་ཞེས་བྱ་བའི་ཚིག་འབྱུང་བའི་ཕྱིར། ཁྱབ་པ་ཁས། འདོད་མི་ནུས་ཏེ། གསེར་ཕྲེང་ལས། ལས་སུ་བྱ་བ་གང་བསད་པར་བྱ་བ་དང་བྱེད་པ་པོ་གང་གིས་གསོད་པ་པོ་དང་། བྱ་བའི་རང་བཞིན་བསད་པ་སྟེ། ཞེས་དང་། རྣམ་འགྲེལ་ཊཱིཀ་ཆེན་ལས། འབྲས་བུ་ནི་མཚོན་བྱ། ཚད་མ་ནི་མཚན་ཉིད། གཞལ་བྱ་ནི་ཚད་མ་དང་། འབྲས་བུ་དེ་གཉིས་ཀྱིས་སྒྲོ་འདོགས་བཅད་པར་བྱ་བའི་ཡུལ་ལོ། །དེ་དག་ནི་རིམ་པ་བཞིན་བྱ་བ་དང་། བྱེད་པ་དང་། ལས་ཀྱི་བདག་ཉིད་དུ་བརྗོད་དོ། །ཞེས་བསད་བྱ་དང་གཞལ་བྱ་གཉིས་ལས་སུ་གསུངས་པའི་ཕྱིར། གཞན་ཡང་། ཚད་མ་མདོ་ལས། བྱ་བ་མེད་པའང་མ་ཡིན་ནོ། །ཞེས་དང་། དེའི་རང་འགྲེལ་ལས། འདི་ལ་ཕྱི་རོལ་པ་རྣམས་ཀྱི་བཞིན་དུ་ཚད་མ་ལས་འབྲས་བུ་དོན་གཞན་དུ་གྱུར་པ་ནི་མེད་ཀྱི། ཞེས་བྱ་བ་རྫས་གཞན་མེད་ཀྱང་བྱ་བ་གཏན་མེད་དུ་མི་འགྱུར་བའི་སྐྱོན་སྤོང་མཛད་པ་འབྲེལ་མེད་པར་ཐལ། བྱ་བ་དེ་བྱེད་པ་ལས་རྫས་གཞན་དུ་མ་གྲུབ་པའི་ཁས་བླང་རང་ལ་མེད་པའི་ཕྱིར། དེར་ཐལ། ཁྱོད་ཀྱིས་བསད་བྱ་དེ་བྱ་བར་བཞག་པ་གང་ཞིག །བསད་བྱ་དེ་གསོད་པ་པོའི་བདག་ཉིད་དུ་ཁས་ལེན་པ་བཞད་གད་ཡིན་པའི་ཕྱིར། བྱས་པ་ལ་ཁོ་ན་རེ། སྐྱོན་དེ་མི་འཇུག་པར་ཐལ།

― GTD003_Page_0083 ―

^{[མ་དཔེ་གཟིགས་ན་འདིར་གནོན།]}

[Full Size]

ཚད་མ་མདོར་གསུངས་པ་དེ་ཚད་འབྲས་ཀྱི་དབང་དུ་བྱས་པ་ཡིན་གྱི་བྱ་བྱེད་ཀྱི་རྣམ་བཞག་གཞན་ལ་དེ་སྦྱོར་མི་དགོས་པའི་ཕྱིར་ཟེར་ན་གཏན་མི་འཐད་པར་ཐལ། བྱ་བྱེད་ལས་གསུམ་དུ་ཕྱེ་བ་ཐམས་ཅད་ལ་བྱ་བ་དེ་བྱེད་པ་ལས་ལྡོག་ཆོས་ཙམ་ཐ་དད་དུ་ཡོད་ཀྱང་། རྫས་ཐ་དད་མེད་པར་བྱེད་པ་དེས་ལས་དེ་བསྒྲུབ་པའི་ཆ་ཙམ་ལ་བཏགས་ནས་འཇོག་དགོས་པ་མཐུན་པའི་ཕྱིར་ཏེ། དཔེར་ན་སྟ་རེས་ཤིང་བཅད་པའི་ཚེ། སྟ་རེ་ལས་དོན་གཞན་དུ་ཤིང་བཅད་པའི་བྱ་བ་ཡོད་ན་སྟ་རེས་ཤིང་བཅད་པ་མ་ཡིན་པར་འགྱུར་བའི་ཕྱིར་ཞེས་སྟོན་པ་ལ། རྣམ་འགྲེལ་ལས། ཆོས་ཐ་དད་པ་ཁས་ལེན་ཕྱིར། །དངོས་སུ་ཐ་དད་མེད་པར་འདོད། །བྱ་བ་བྱེད་པའི་ཐ་སྙད་དག །ཐམས་ཅད་དེ་ལྟར་རྣམ་པར་གནས། །ཞེས་དང་། ལྷས་ཀྱང་ཐམས་ཅད་དེ་ལྟའི་རྣམ་པ་ཅན། ཉེ་བར་བཏགས་པའི་རང་བཞིན་ཡིན་གྱི། དངོས་པོ་ལ་བརྟེན་པ་ཅན་ནི་མ་ཡིན་ནོ། །ཞེས་གསུངས་པའི་ཕྱིར། ཡང་ཁ་ཅིག །བྱ་བྱེད་ལས་གསུམ་ལ་སྦྱར་ནས་འཁོར་གསུམ་མི་དམིགས་པ་བཞག་ཀྱང་རྣམ་ཐར་སྒོ་གསུམ་འཇོག་པ་མི་འཐད་པར་ཐལ། དེ་དེ་གསུམ་དང་སོ་སོར་སྦྱོར་ཚུལ་མེད་པའི་ཕྱིར་ན་མ་གྲུབ་སྟེ། བསྒོམ་བྱ་བདེན་པས་སྟོང་པ་མཚན་མེད་དང། སྒོམ་བྱེད་བདེན་པས་སྟོང་པ་སྨོན་མེད་དང་། བསྒོམ་པ་བདེན་པས་སྟོང་པ་སྟོང་པ་ཉིད་དུ་འཇོག་དགོས་པའི་ཕྱིར། དང་པོ་གྲུབ་སྟེ། གསེར་ཕྲེང་ལས། རྣམ་པར་ཐར་པའི་སྒོ་མཚན་མ་མེད་པ་རྫོགས་པར་བསྒོམ་པ་ཉིད་ཀྱིས་སེམས་ཅན་གྱི་གཟུགས་ནས་རྣམ་མཁྱེན་གྱི་བར་ལ་

― GTD003_Page_0084 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་མར་འཛིན་པ་སྤོང་བར་གནས་པ་སྟེ། ཞེས་ཡུལ་ལ་བདེན་ཞེན་བཀག་པའི་ལྡོག་ཆ་ནས་གསུངས་པའི་ཕྱིར་དང་། འཇུག་པར། ཇི་ལྟར་དེ་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པར་སྐྱེ་འགྱུར་ལྟར། །ཞེས་གསུངས་པ་ལྟར། འདི་པའི་ལུགས་ཀྱི་ཡུལ་དེ་རྒྱུར་འཇོག་དགོས་ཤིང། རྒྱུ་དང་མཚན་མ་རྣམ་གྲངས་སུ་འབྱུང་བས། དེའི་སྒོ་ནས་ཀྱང་བཤད་ཆོག་པའི་ཕྱིར། གཉིས་པ་གྲུབ་སྟེ། ཀུན་བཟང་ལས། རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་དང། བྱང་ཆུབ་ཀྱི་ཚོགས་ལས། མཚན་མ་ཐམས་ཅད་ལོག་པར་གྱུར་པའི་ཕྱིར། །མཁས་པ་ཅི་ཕྱིར་སྨོན་ལམ་འདེབས་པར་འགྱུར། །ཞེས་མཚན་མེད་ཀྱི་སྐབས་སུ། ཡུལ་གྱི་ངོ་བོ་ལ་བདེན་པར་ཞེན་པའི་རྟོག་པའམ་མཚན་མ་བཀག་པ་དེ་ཉིད་རྒྱུ་མཚན་དུ་བྱས་ནས་ཡུལ་དེ་ལ་དམིགས་པའི་སྨོན་པ་སྟེ་འདུན་པ་སོགས་ཡུལ་ཅན་ལ་བདེན་ཞེན་བཀག་པའི་སྨོན་མེད་ཀྱི་རྣམ་ཐར་གསུངས་པའི་ཕྱིར། གསུམ་པ་གྲུབ་སྟེ། བསྒོམ་པའི་བྱ་བ་ནི་བསྒོམ་བྱ་སྒོམ་བྱེད་གཉིས་ཚོགས་ཀྱི་སྟེང་ནས་འཇོག་དགོས་པས་དེ་བདེན་སྟོང་དུ་གཞན་གཉིས་ཀྱང་འདུ་ལ། བསྒོམ་བྱ་བདེན་སྟོང་དང་། སྒོམ་བྱེད་བདེན་སྟོང་གཉིས་གཅིག་གཅིག་གི་ནང་དུ་མི་འདུ་བའི་ཕྱིར། ཁྱབ་སྟེ། སྒོ་གསུམ་དུ་ཕྱེ་བ་དེ་དང་དེའི་སྐབས་ཀྱི་སྟོང་པ་ཉིད་དེར་གཞན་གཉིས་ཀྱང་འདུ་བ་ཞིག་དགོས་ཀྱི། དེ་མ་བྱུང་ན། བཞི་བརྒྱ་པ་ལས། ཞི་སྒོ་གཉིས་པ་མེད་པ་དང་ཞེས་སོགས་ཀྱིས་གནོད་པའི་ཕྱིར། སྔགས་རིམ་ལས། སྟོང་ཉིད་དང། མཚན་མེད་

― GTD003_Page_0085 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། སྨོན་མེད་གསུམ་བརྗོད་པ་སྒྲའི་དབང་གིས་ཐ་དད་དུ་བཞག་གི་དོན་དམ་པར་ངོ་བོས་སྟོང་པ་ཁོ་ནར་གཞན་གཉིས་འདུས་པར་གསུངས་པ་ནི། ཞེས་གསུངས་པའི་ཕྱིར། དེ་ལ་ཁོ་ན་རེ། རྣམ་ཐར་སྒོ་གསུམ་དུ་ཕྱེ་བའི་ཚེ། གཞན་གཉིས་སྟོང་པ་ཉིད་དུ་འདུ་དགོས་པ་མི་འཐད་པར་ཐལ། བུམ་པ་ལྟ་བུའི་རྒྱུ་འབྲས་ངོ་བོ་གསུམ་ལ་སྦྱར་བའི་ཚེ་མཚན་མེད་སྨོན་མེད་གཉིས་སྟོང་པ་ཉིད་དུ་འདུ་ཚུལ་མེད་པའི་ཕྱིར། དེར་ཐལ། དེའི་ནང་གི་མཚན་མེད་ལ་བུམ་པའི་རྒྱུའི་སྟེང་གི་སྟོང་ཉིད་དགོས་ཤིང་སྨོན་མེད་ལ་འབྲས་བུའི་སྟེང་གི་སྟོང་ཉིད་དགོས་པའི་ཕྱིར་ཏེ། དེའི་རྒྱུ་བདེན་པར་མེད་པ་མཚན་མེད་དང། འབྲས་བུ་བདེན་པར་མེད་པ་སྨོན་མེད་དུ་འཇོག་དགོས་པའི་ཕྱིར་ན་མ་ཁྱབ་སྟེ། དེ་ཁོ་ནར་མ་ངེས་པའི་ཕྱིར། དེར་ཐལ། བུམ་པ་དོན་དམ་པར་རྒྱུ་ལས་མ་སྐྱེས་པ་དང་། དེའི་དོན་དམ་པར་འབྲས་བུ་མི་སྐྱེད་པ་གཉིས་ཀ་ཡང་རིམ་བཞིན་མཚན་མེད་དང་སྨོན་མེད་དུ་འཇོག་དགོས་པའི་ཕྱིར། དེར་ཐལ། གཞི་བུམ་པ་གཅིག་པུ་ལ་ཡང་བདེན་པར་ཞེན་པའི་ཚེ་རྒྱུ་ལས་སྐྱེས་པའི་ཆ་ནས་བདེན་པར་ལྟ་བ་དང་། འབྲས་བུ་སྐྱེད་པའི་ཆ་ནས་བདེན་པར་ལྟ་བ་སོགས་སྣ་ཚོགས་འབྱུང་བས། དེ་འགོག་ཆེད་དུ་རྣམ་ཐར་སྒོ་གསུམ་གྱི་དབྱེ་བ་མཛད་པའི་ཕྱིར། ཚངས་པས་ཞུས་པ་ལས། བཅོམ་ལྡན་འདས། གང་དག་ཆོས་འགའ་ཞིག་སྐྱེ་བའམ་འགག་པར་འཚལ་བ་དེ་དག་ནི་སངས་རྒྱས་འབྱུང་བ་མ་ལགས་སོ། །བཅོམ་ལྡན་འདས། གང་དག་འཁོར་བ་དངོས་པོས་འཚོལ་བ་དེ་དག་ནི་འཁོར་བ་ལས་འདའ་བ་མ་ལགས་སོ། །ཞེས་

― GTD003_Page_0086 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་གསུངས་པའི་ཕྱིར། ཁ་ཅིག་གོང་དུ་མ་ཁྱབ་སྟེ། བུམ་པ་དོན་དམ་པར་རྒྱུ་ལས་མ་སྐྱེས་པ་ཡང་བུམ་པའི་སྟེང་གི་སྟོང་ཉིད་མ་ཡིན་པའི་ཕྱིར་ཏེ། བུམ་པ་གཞན་སྐྱེ་མེད་པ་བུམ་པའི་སྟོང་ཉིད་མ་ཡིན་པའི་ཕྱིར། དབུ་མའི་མཐའ་དཔྱོད་ལས། མྱུ་གུ་གཞན་སྐྱེ་མེད་པ་སྟོང་ཉིད་མ་ཡིན་པར་ཐལ། དེ་མྱུ་གུའི་སྟོང་ཉིད་མ་ཡིན་པའི་ཕྱིར་ན་མ་ཁྱབ། མྱུ་གུ་སྐྱེ་བའི་སྟོང་ཉིད་ཡིན་ཀྱང་མྱུ་གུའི་སྟོང་ཉིད་མ་ཡིན་པའི་ཕྱིར། ཞེས་གསུངས་པའི་ཕྱིར་རོ་ཟེར་ན་མ་ཁྱབ་སྟེ། གཞན་སྐྱེ་འཇོག་ཚུལ་ནི་སྐྱེ་བ་བཏགས་ཡོད་ཙམ་གྱིས་མ་ཚིམ་པར་བདག་ལས་ཡིན་ནམ། གཞན་ལས་ཡིན་ཞེས་རིགས་པས་དཔྱད་ནས་བཞག་པ་ཡིན་ལ། དེ་ལྟར་སྐྱེ་བའི་བཏགས་དོན་བཙལ་མཐར་དཔྱད་བཟོད་དུ་མ་གྲུབ་པ་སྐྱེ་བའི་སྟེང་གི་སྟོང་ཉིད་ཡིན་པ་ལ་དགོངས་པའི་ཕྱིར། ཁྱོད་ལྟར་ན་གང་ཟག་དོན་དམ་པར་མ་སྐྱེས་པ་དེ་ཡང་དེའི་སྐྱེ་བའི་སྟེང་གི་སྟོང་ཉིད་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཀྱི་བདག་མེད་ཕྲ་མོ་ཡིན་པར་ཐལ་ལོ། །འདོད་ན། གང་ཟག་རང་བཞིན་གྱིས་གྲུབ་པ་ཅུང་ཟད་ཀྱང་མེད་པར་མཐོང་ནས། དེ་དོན་དམ་པར་སྐྱེས་མ་སྐྱེས་ཐེ་ཚོམ་ཟ་བ་ཞིག་ཡོད་པར་ཐལ། བདག་མེད་གཉིས་ཀྱི་རྟོགས་རིམ་འཐད་པའི་ཕྱིར། འདོད་ན། རི་བོང་རྭ་གཏན་མེད་པར་མཐོང་ནས་དེ་སྐྱེས་མ་སྐྱེས་ཐེ་ཚོམ་ཟ་བ་ཞིག་ཀྱང་ཡོད་པར་ཐལ་ལོ། །གཞན་ཡང་། གང་ཟག་དོན་དམ་པར་མ་སྐྱེས་པ་དེ་གང་ཟག་གི་སྟེང་གི་སྟོང་ཉིད་ཡིན་པར་ཐལ། གང་ཟག་དེ་རང་གི་རྒྱུ་རྐྱེན་རྟེན་འབྲེལ་ཚོགས་པ་ལ་བརྟེན་ནས་འབྱུང་བ་དེ་དེའི་སྟེང་གི་ཐ་སྙད་ཕྲ་མོ་ཡིན་པའི་ཕྱིར་ཏེ། སྟོང་པ་དང་

― GTD003_Page_0087 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་འབྱུང་དོན་གཅིག་ཏུ་སོང་བ་དེ་བདེན་གཉིས་ཟུང་འཇུག་གི་དོན་ཡིན་པའི་ཕྱིར། ཁོ་ན་རེ། དེ་ལྟར་ཡིན་པར་ཐལ། བུམ་པ་བདེན་གྲུབ་ཀྱི་གཅིག་ཏུ་མེད་པ་དེ་གཅིག་གི་སྟོང་ཉིད་ཡིན་པའི་ཕྱིར། དེར་ཐལ། བདེན་གྲུབ་ཀྱི་གཅིག་མེད་པ་གཅིག་གི་སྟོང་ཉིད་ཡིན་པའི་ཕྱིར་ན་འགལ་ཁྱབ་བོ། །ཁྱོད་རང་ལ་བུམ་པ་བདེན་གྲུབ་ཀྱི་གཅིག་ཏུ་མེད་པ་དང། ཀ་བ་བདེན་གྲུབ་ཀྱི་གཅིག་ཏུ་མེད་པ་གཉིས་སྟོང་གཞི་གཅིག་པར་ཐལ། འདོད་པའི་ཕྱིར་བྱས་པ་ལ། དེ་བུམ་པ་གཅིག་གི་སྟེང་གི་སྟོང་ཉིད་ཡིན་ཟེར་ན། ཀ་བུམ་གཉིས་བདེན་གྲུབ་ཀྱི་གཅིག་ཏུ་མེད་དེ་ཀ་བུམ་གཉིས་གཅིག་གི་སྟོང་ཉིད་ཡིན་པ་སོགས་འབྲེལ་མེད་ཁོ་ན་སྨྲ་དགོས་པར་འགྱུར་རོ། །ཡང་ཁ་ཅིག །བྱེ་སྨྲའི་ལུགས་ལ་རྣམ་ཐར་སྒོ་གསུམ་འཇོག་མི་རིགས་པར་ཐལ། དེས་སྟོང་ཉིད་ཁས་མི་ལེན་པའི་ཕྱིར། དེར་ཐལ། དེ་བསྒོམ་བྱར་ཁས་མི་ལེན་པའི་ཕྱིར་ཏེ། འཚང་རྒྱ་བ་ལ་ཡང་དེ་བསྒོམ་མི་དགོས་པར་འདོད་པའི་ཕྱིར། སྤྱོད་འཇུག་དར་ཊཱིཀ་ལས། ཉན་ཐོས་སྡེ་པ་ཁ་ཅིག་སངས་རྒྱས་ཐོབ་པ་ལ་ཡང་སྟོང་ཉིད་རྟོགས་མི་དགོས་པར་མ་ཟད། ཆོས་ཀྱི་བདག་མེད་ཀྱི་མིང་ཙམ་ཡང་ཁས་མི་ལེན་ཅིང། ཞེས་གསུངས་པའི་ཕྱིར་ན་མ་ཁྱབ་སྟེ། རང་གིས་འདོད་པའི་བདེན་བཞི་ཁྱད་ཆོས་བཅུ་དྲུག་དང་བཅས་པར་མ་འདུས་པའི་སྟོང་པ་ཉིད་ཅིག་བསྒོམ་རྒྱུ་མེད་པར་འདོད་པའི་དོན་ཡིན་པའི་ཕྱིར་ཏེ། སྤྱོད་འཇུག་ལས། བདེན་པ་མཐོང་བས་གྲོལ་འགྱུར་གྱི། །སྟོང་ཉིད་མཐོང་བས་ཅི་ཞིག་བྱ། །ཞེས་སོགས་རྩོད་ཚུལ་གྱི་འབྲེལ་གྱིས་ཤེས་པའི་ཕྱིར། ཞིབ་པར་བདེན་བཞིའི་རྣམ་གཞག་ཏུ་བཤད་

― GTD003_Page_0088 ―

^{[མ་དཔེ་གཟིགས་ན་འདིར་གནོན།]}

[Full Size]

ཟིན་པས་མ་སྤྲོས། ཡང་ཁ་ཅིག་ན་རེ། མདོ་སྡེ་རྒྱན་གྱི་བཤད་ཚུལ་དེ་འགྲེལ་པས་བཤད་ཚུལ་ལས་ལོགས་སུ་འགོད་མི་རིགས་པར་ཐལ། དེ་གཉིས་ལ་ཁྱད་པར་མེད་པའི་ཕྱིར། དེར་ཐལ། རྒྱན་ལས་ཀྱང་སྡུག་ཀུན་གཉིས་སྨོན་པ་མེད་པའི་ཏིང་ངེ་འཛིན་གྱི་ཡུལ་དང། སྟོང་བདག་མེད་གཉིས་སྟོང་པ་ཉིད་ཀྱི་ཏིང་འཛིན་དང། འགོག་བདེན་མཚན་མ་མེད་པའི་ཏིང་ངེ་འཛིན་གྱི་ཡུལ་དུ་བཤད་པའི་ཕྱིར་ན་མ་ཁྱབ། འདོད་མི་ནུས་ཏེ། རྒྱན་ལས་སྟོང་པ་ཉིད་ཀྱི་ཏིང་ངེ་འཛིན་གྱི་ཡུལ་ལ་ཆོས་ཀྱི་བདག་མེད་བཤད་ཀྱང་། འགྲེལ་པས་མ་བཤད། ལམ་བདེན་མཚན་མེད་ཀྱི་ཡུལ་དུ་འགྲེལ་པས་བཤད་ཀྱང་། རྒྱན་གྱིས་མ་བཤད་པའི་ཕྱིར། དང་པོ་གྲུབ་སྟེ། དབྱིག་འགྲེལ་ལས་སྟོང་པ་ཉིད་ཀྱི་ཏིང་ངེ་འཛིན་ནི་གང་ཟག་དང་ཆོས་ལ་བདག་མེད་པའོ། །ཞེས་གསུངས་པའི་ཕྱིར་དང་། འགྲེལ་པའི་བཤད་ཚུལ་ཀུན་བཏུས་དང་མཐུན་ཞིང། དེ་ཐེག་པ་ཆེ་ཆུང་ཐུན་མོང་གི་དབང་དུ་བྱས་པའི་ཕྱིར། གསེར་ཕྲེང་ལས་སོ། །གཉིས་པ་གྲུབ་སྟེ། འགྲེལ་པར་བདེན་བཞིའི་ཁྱད་ཆོས་བཅུ་དྲུག་གི་ནང་ནས་ཆ་ཕྱེ་བ་ཡིན་ལ། རྒྱན་གྱི་སྐབས་ནས་ཆོས་ཀྱི་སྡོམ་བཞི་དང་མཚན་ཉིད་གསུམ་ལ་སྦྱར་བ་སྔར་ལྟར་ཡིན་གྱི། ཁྱད་ཆོས་བཅུ་དྲུག་དང་སྦྱར་བ་མིན་པས་ལམ་གྱི་བཞི་རྟོགས་པ་དེ་གང་དུའང་འགྲེལ་པ་འགྲེལ་བཤད་རྣམས་ལས་མ་གསུངས་པའི་ཕྱིར། བྱས་པ་ལ་ཁོ་ན་རེ། མཚན་ཉིད་གསུམ་དང་སྦྱོར་ཚུལ་བསྡུ་བར་གསུངས་པ་དང་། དེ་མི་མཚུངས་པར་ཐལ། བསྡུ་བས་རྣམ་ཐར་གསུམ་མཚན་ཉིད་གསུམ་གྱི་ཡུལ་ཅན་དུ་གསུངས་པ་གང་ཞིག །འདིར་བཤད་པའི་སྟོང་པ་ཉིད་ཀྱི་ཏིང་ངེ་འཛིན་དེ་

― GTD003_Page_0089 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་བཏགས་ཀྱི་ཡུལ་ཅན་དུ་མི་རུང་བའི་ཕྱིར། དང་པོ་གྲུབ་སྟེ། མཆིམས་མཛོད་ལས། རྣམ་པར་གཏན་ལ་དབབ་པ་བསྡུ་བ་ལས་ནི་ཀུན་བཏགས་དང་གཞན་དབང་དང་ཡོངས་གྲུབ་ཀྱི་ཡུལ་ཅན་གསུམ་གྱི་དབང་དུ་བྱས་ནས་སྟོང་ཉིད་སྨོན་མེད་མཚན་མེད་ཀྱི་ཏིང་ངེ་འཛིན་དང་གསུམ་གསུངས་སོ། །ཞེས་གསུངས་པའི་ཕྱིར་ཟེར་ན། བསྡུ་བའི་དོན་གོང་དུ་བཤད་པ་ལྟར་ཀུན་བཏགས་ཀྱིས་ཀུན་བཏགས་པ་ལྟར་རྣམ་པར་མི་རྟོག་པ་དང་། འདི་པས་མྱང་འདས་ཡོངས་གྲུབ་ཏུ་འདོད་པས་མཚན་མེད་ཡོངས་གྲུབ་ལ་བརྟེན་པའི་དོན་ཡང་དེ་ལྟར་བྱས་ན་རྒྱན་དང་ཤིན་ཏུ་འགྲིག་པའི་ཕྱིར། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། སྟོང་པ་ཉིད་ཀྱི་ཏིང་ངེ་འཛིན་གྱིས་ནི་ཀུན་བཏགས་ཀྱི་གང་ཟག་དང་ཆོས་ལ་བདག་མེད་པའི་སྟོང་པ་ཉིད་ལ་དམིགས་པའི་ཕྱིར། ཞེས་དང། འགོག་པའི་བདེན་པ་ཡོངས་སུ་གྲུབ་པའི་མཚན་ཉིད་ལ་ནི་མཚན་མ་མེད་པའི་ཏིང་ངེ་འཛིན་གྱིས་དམིགས་ཏེ། ཞེས་གསུངས་པའི་ཕྱིར། དེས་ན་མཆིམས་མཛོད་ལས། ཐོས་བསམ་ལས་བྱུང་བ་དང། འཇིག་རྟེན་པའི་སྒོམ་བྱུང་དང་། འཇིག་རྟེན་ལས་འདས་པའི་སྒོམ་བྱུང་གི་ཏིང་ངེ་འཛིན་གསུམ་རིམ་པ་ལྟར་སྟོང་པ་ཉིད་ལ་སོགས་པ་དང་། སྟོང་པ་ཉིད་ཀྱི་ཏིང་ངེ་འཛིན་ལ་སོགས་པ་དང། རྣམ་པར་ཐར་པའི་སྒོ་སྟོང་པ་ཉིད་ལ་སོགས་པ་ཡིན་ནོ། །ཞེས་གསུངས་སོ། །ཞེས་དང་པོར་སྒོམ་བྱུང་དང་། གཉིས་པར་འཇིག་རྟེན་ལས་འདས་པའི་སྒོམ་བྱུང་དོར་ནས་གསུངས་པ་འདི་ཡང་དཔྱད་དགོས་ཏེ། བསྡུ་བར་རང་

― GTD003_Page_0090 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ལས། གང་དུ་སྟོང་པ་ཉིད་དང་། སྨོན་པ་མེད་པ་དང་། མཚན་མ་མེད་པ་བྱེ་བྲག་མེད་པར་གསུངས་པ་དེར་ནི་དེ་དག་ཐོས་པ་དང་། བསམ་པ་དང་། བསྒོམ་པ་ལས་བྱུང་བ་ཉིད་ཡིན་པར་བལྟ་བར་བྱའོ། །གང་དུ་དེ་དག་ཏིང་ངེ་འཛིན་གྱི་སྒྲ་ཁོ་ནར་གསུངས་པ་དེར་ནི། དེ་དག་སྒོམ་པ་ལས་བྱུང་བ་འཇིག་རྟེན་པ་དང་། འཇིག་རྟེན་ལས་འདས་པ་ཉིད་ཡིན་པར་བལྟ་བར་བྱའོ། །གང་དུ་དེ་དག་རྣམ་པར་ཐར་པའི་སྒོའི་སྒྲ་ཁོ་ནར་གསུངས་པ་དེར་ནི་དེ་དག་འཇིག་རྟེན་ལས་འདས་པ་ཉིད་ཡིན་པར་བལྟ་བར་བྱའོ། །ཞེས་སྔ་མ་སྔ་མ་སྤྱི་དང། ཕྱི་མ་ཕྱི་མ་བྱེ་བྲག་ཡིན་གྱིས། ནང་ཕན་ཚུན་འགལ་བ་མ་ཡིན་པའི་ཕྱིར། འདིར་རྣམ་ཐར་སྒོ་གསུམ་དང་། མིང་། རྒྱུ་མཚན། རྣམ་རྟོག །དེ་བཞིན་ཉིད། ཡང་དག་པའི་ཡེ་ཤེས་ལྔ་སྦྱོར་ཚུལ་སོགས་དུ་མ་ཡོད་ཀྱང་། ཤེས་འདོད་ན་བསྡུ་བ་སོགས་སུ་བལྟ་དགོས་ཏེ། ཤོག་བྱང་གསུམ་གྱིས་གཞུང་ལུགས་རྒྱ་མཚོའི་ཕ་རོལ་ཏུ་སོན་པ་མི་སྲིད་དོ། །ཁ་ཅིག་ན་རེ། སེམས་ཙམ་ལྟར་ན་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་ཆོས་ཀྱི་བདག་མེད་རྟོགས་པའི་ལམ་གཅིག་མི་འཇོག་པར་ཐལ། དེའི་ལུགས་ལ་ཐར་པ་ཐོབ་པ་ལ་ཆོས་ཀྱི་བདག་མེད་རྟོགས་མི་དགོས་པའི་ཕྱིར་ན་མ་ཁྱབ། ཁྱབ་པར་ཐལ། ཐར་པ་ཐོབ་པ་ལ་ཐོག་མར་དེ་ནས་འཇུག་དགོས་པའི་རྒྱུ་མཚན་གྱིས་རྣམ་པར་ཐར་པའི་སྒོ་ཞེས་བཤད་པ་ཡིན་པའི་ཕྱིར་ན་ཡང་མ་ཁྱབ། ཁྱོད་རང་ལ་འོ་ན། ཐེག་ཆེན་མཐོང་ལམ་བར་ཆད་མེད་ལམ་དེ་ཐར་ལམ་ཡང་མ་ཡིན་པར་ཐལ། ཐར་པ་ཐོབ་པ་ལ་དེ་ནས་བགྲོད་མི་དགོས་པའི་ཕྱིར་དང་། ཐར་ལམ་གྱི་སྒྲ་དོན་ཡོད་

― GTD003_Page_0091 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར། ཁྱབ་པ་འགྲིག །དམན་ལམ་སྔོན་སོང་བའི་དེ་ཐར་ལམ་ཡིན་མིན་དང་། དེ་ཐར་པ་དོན་གཉེར་གྱི་གང་ཟག་ཡིན་མིན་སོགས་སྤྲོ་སླ། ཡང་ཁ་ཅིག་བདེན་བཞིའི་ཁྱད་ཆོས་སོགས་ལ་སྦྱར་ནས་འཇོག་པ་འདི་ཐུན་མོང་བའི་ལུགས་ཁོ་ན་དང་། རྒྱུ་འབྲས་ངོ་བོ་གསུམ་སོགས་ལ་སྦྱར་ཏེ་སྟོང་ཉིད་གཅིག་པུ་ལ་རྣམ་ཐར་སྒོ་གསུམ་གྱི་ཆ་འབྱེད་པ་ཐེག་ཆེན་ཐུན་མོང་མ་ཡིན་པའི་ལུགས་ཁོ་ན་ཟེར་ན། དེ་མི་འཐད་པར་ཐལ། སེམས་ཙམ་པས་ཀྱང་འགོག་རྒྱུའི་དགག་བྱ་ལ་ཁྱད་པར་ཡོད་པ་མ་གཏོགས། སྟོང་ཉིད་གཅིག་པུ་ལ་རྣམ་ཐར་སྒོ་གསུམ་འབྱེད་ཚུལ་གཅིག་འདོད་པའི་ཕྱིར། དེར་ཐལ། དེས་འཁོར་བའི་སྐྱེ་བ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་བཀག་པའི་སྨོན་མེད་དང། འཁོར་བ་འགག་པའམ་ཟད་པའི་ཞི་བ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པ་བཀག་པའི་མཚན་མེད་དང། དེ་གཉིས་ཀར་མཉམ་པའི་དབྱེ་གཞི་སྟོང་པ་ཉིད་དང་གསུམ་འདོད་པ་གང་ཞིག །དེས་ཆོས་གཞན་ལ་ཡང་འདྲ་བའི་ཕྱིར་ཏེ། བྱང་ས་ལས། འདུ་བྱས་ལ་མི་མཐུན་པར་བདེན་པར་སྨོན་པ་ལས་ནི་སྨོན་པ་མེད་པའི་ཏིང་ངེ་འཛིན་རྣམ་པར་བཞག་གོ །འདུ་མ་བྱས་མྱ་ངན་ལས་འདས་པ་ལ་སྨོན་ཅིང་ཡང་དག་པར་མངོན་པར་དགའ་བར་འཛིན་པ་ལས་ནི་མཚན་མ་མེད་པའི་ཏིང་ངེ་འཛིན་རྣམ་པར་བཞག་གོ །མེད་པ་ཁོ་ནའི་དངོས་པོ་གང་ཡིན་པ་དེ་ལ་ནི། བྱང་ཆུབ་སེམས་དཔའ་སྨོན་པའམ་མི་སྨོན་པར་མི་བྱ་བར་དེ་མེད་པ་ཁོ་ན་ཡང་དག་པ་ཇི་ལྟ་བ་

― GTD003_Page_0092 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་དུ་བལྟ་བར་བྱ་སྟེ། ལྟ་བ་དེའི་དབང་དུ་བྱས་ནས་སྟོང་པ་ཉིད་ཀྱི་ཏིང་ངེ་འཛིན་རྣམ་པར་བཞག་པར་རིག་པར་བྱའོ། །ཞེས་གསུངས་པའི་ཕྱིར། ཁྱབ་སྟེ། འདིས་འདུ་བྱས་ཞེས་པ་འཁོར་བ་ལ་བྱེད་དགོས་པ་འོག་མའི་ཤུགས་ཀྱིས་ཤེས་ཤིང་། མེད་པ་ཁོ་ནའི་དངོས་པོ་གང་ཡིན་པ་དེ་ལ་ཞེས་པས། གོང་དུ་འཁོར་འདས་གཉིས་ཆོས་བདག་གིས་དབེན་པ་སོ་སོར་བཤད་ནས་འདིར་བསྡོམས་ཏེ་མཉམ་པ་ཉིད་དུ་སྟོན་པ་ཡིན་པའི་ཕྱིར། དེར་ཐལ། གང་དུ་མཉམ་པའི་སྟོང་ཉིད་མི་འདྲ་ཡང་། སྲིད་ཞི་མཉམ་ཉིད་ཀྱི་སྦྱོར་བ་ཙམ་ཞིག་འདི་པས་ཀྱང་འདོད་པའི་ཕྱིར། གཞན་ཡང་མི་འཐད་པར་ཐལ། ཐལ་འགྱུར་བས་ཀྱང་རྣམ་ཐར་སྒོ་གསུམ་གང་རུང་ལ་དོན་དམ་རྣམ་ཅན་གྱིས་ཁྱབ་པ་ཁས་མི་ལེན་པའི་ཕྱིར། དེར་ཐལ། དེས་སྨོན་མེད་ཀྱི་དེ་ལ་ཟག་བཅས་སྡུག་བསྔལ་དུ་རྟོགས་པ་ཞིག་བཞག་པའི་ཕྱིར། རྣམ་བཤད་དགོངས་པ་རབ་གསལ་ལས། སྨོན་པ་མེད་པའི་མཚན་ཉིད་ནི། འདུ་བྱེད་སྡུག་བསྔལ་གྱི་བདག་ཉིད་ཅན་རྣམས་ལ་སྡུག་བསྔལ་དུ་་ཡང་དག་པར་རྗེས་སུ་ལྟ་བ། ཞེས་གསུངས་པའི་ཕྱིར། འོན་ཀྱང་སྡུག་བསྔལ་གྱི་གནས་ལུགས་དེ་ཁོ་ན་ཉིད་རྟོགས་པ་དང་གཉིས་ཚོགས་ཀྱི་སྟེང་ནས་འཇོག་དགོས་ཀྱི། ཟག་བཅས་སྡུག་བསྔལ་དུ་རྟོགས་པ་ཙམ་གྱིས་དེར་མི་འགྲོ་སྟེ། ལུགས་འདིར་ཕྲ་བའི་བདག་མེད་མ་རྟོགས་ན་ཐར་ལམ་དུ་སླེབ་པར་མི་འཇོག་པའི་ཕྱིར། འདི་པས་ཟག་བཅས་སྡུག་བསྔལ་དུ་འཇོག་ཚུལ་འདི་ལ་རྟེན་འབྱུང་གི་གནད་ཕྲ་མོ་ཞིག་ཡོད་པའི་རྒྱུ་མཚན་གྱིས་ཡིན་ཏེ། བཞི་བརྒྱ་པ་དང་མཛོད་འགྲེལ་རྩོད་ཚུལ་གྱི་སྟེང་ནས་ཤེས་དགོས་སོ། །དེ་ལ་ཁ་ཅིག་ན་རེ། ཟག་བཅས་

― GTD003_Page_0093 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་དུ་རྟོགས་པ་ལ་རྣམ་ཐར་གྱི་སྒོ་ཞིག་འཇོག་མི་རིགས་པར་ཐལ། ཟག་བཅས་བདེ་བར་འཛིན་པ་དེ་འཁོར་བའི་རྩ་བ་མ་ཡིན་པའི་ཕྱིར། ཁྱབ་སྟེ། རང་འཁོར་རྩར་འཇོག་པ་དང། རང་དང་འཛིན་སྟངས་དངོས་འགལ་གྱི་ཡེ་ཤེས་དེ་ཞི་སྒོར་འཇོག་པ་དོན་གཅིག་པའི་ཕྱིར། དེར་ཐལ། འཁོར་རྩ་ཡིན་ན། རང་དང་འཛིན་སྟངས་དངོས་འགལ་གྱི་འཕགས་པའི་ཡེ་ཤེས་དེ་རྣམ་པར་ཐར་པའི་སྒོ་ཡིན་པས་ཁྱབ་པའི་ཕྱིར་ན་མ་ཁྱབ། རྟགས་གྲུབ་སྟེ། གྲུབ་མཐའ་རྩ་བར། འཁོར་རྩ་གསུམ་དང་ཞི་སྒོ་གཅིག་པ་འགལ། །ཞེས་འགལ་བ་བརྗོད་ཚུལ་ཡོད་པའི་ཕྱིར། ཐུན་མོང་བ་ལྟར་ན་ཡང་ཐར་པ་གཏན་མེད་དུ་འཛིན་པ་སོགས་བློ་ཀུན་བཏགས་ཡིན་པས་འཁོར་རྩར་མི་འཐད་ཀྱང་། དེའི་ཞེན་ཡུལ་བཀག་པའི་ཡེ་ཤེས་རྣམ་པར་ཐར་པའི་སྒོར་འདོད་པ་སྔར་བཤད་ཟིན་ཏོ། །ཁ་ཅིག་ན་རེ། རྣམ་པར་ཐར་པའི་སྒོ་ཞེས་པའི་སྒྲ་དོན་རང་སའི་ཉོན་མོངས་དང་མ་འདྲེས་པའི་ཆ་ནས་འཇོག་པར་ཐལ། གསེར་ཕྲེང་ལས། རང་སའི་ཀུན་དཀྲིས་ལས་ཐར་ཞིང་དེ་དང་མ་འདྲེས་པའི་ཆ་ནས་རྣམ་ཐར་དུ་འཇོག་གོ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་རྣམ་ཐར་བརྒྱད་ཅེས་པའི་རྣམ་ཐར་གྱི་སྒྲ་དོན་ཡིན་གྱི། རྣམ་པར་ཐར་པའི་སྒོ་ཞེས་པའི་རྣམ་ཐར་གྱི་སྒྲ་དོན་མ་ཡིན་པའི་ཕྱིར། དེར་ཐལ། འདིའི་སྒྲ་དོན་ནི། རྣམ་ཐར་ཞེས་པ་ཐར་པ་ལ་བྱས་ནས། དེར་འཇུག་པའི་སྒོ་ཡིན་པས་ན་རྣམ་པར་ཐར་པའི་སྒོ་ཞེས་བཤད་པའི་ཕྱིར། མཛོད་འགྲེལ་ལས། ཐར་པའི་སྒོ་ཡིན་པའི་ཕྱིར་རྣམ་པར་ཐར་པའི་སྒོ། ཞེས་སོ། །སྨྲས་པ། ཟབ་གསང་ཆོས་ཀྱི་དེ་ཉིད་སྨྲ་བའི་

― GTD003_Page_0094 ―

^{[མ་དཔེ་གཟིགས་ན་འདིར་གནོན།]}

[Full Size]

ཁ། །ཟོབ་ཀྱིས་མ་བཅད་ལྷག་པའི་ལྷས་ཕྱེ་བར། །གཞུང་བཟང་སྤྲིན་གྱི་སྒྲ་དང་ལྷན་ཅིག་ཏུ། །རིགས་ལམ་གློག་ཕྲེང་དྲ་བས་རྣམ་པར་གཡོ། །འཇམ་དཔལ་དབྱངས་དངོས་འཇམ་མགོན་བླ་མ་ཡི། །ལེགས་བཤད་དགོངས་དོན་ལེགས་པར་འགྲེལ་རྣམས་ཀྱང། །རྣམ་ཐར་སྒོ་གསུམ་རྣམ་པར་བཞག་པ་འདི། །ཁོ་བོའི་སྐལ་བ་ཁོ་ནར་བཞག་གམ་སྙམ། །འདིར་འབད་ལེགས་བྱས་དུང་དང་ཀུ་མུ་དའི། །མཛེས་པ་ཕམ་བྱེད་དེ་ཡིས་བདག་ཅག་ཀུན། །རྣམ་པར་ཐར་པའི་སྒོ་ལ་རབ་ཞུགས་ཏེ། །ཞི་བ་མཆོག་གི་ཁྲི་ལ་དབང་བར་ཤོག །ཅེས་རྣམ་ཐར་སྒོ་གསུམ་གྱི་རྣམ་པར་བཞག་པ་ལེགས་བཤད་རྒྱ་མཚོའི་རྦ་རླབས་ཞེས་བྱ་བ་འདི་ནི། སྔ་སོར་དཔལ་ལྡན་འབྲས་སྤུངས་སུ་དོན་གཉེར་ཅན་འགའ་ཞིག་གིས་བསྐུལ་ངོར་ཅུང་ཟད་བྲིས་པའི་ཐོག །ཐོས་བསམ་གླིང་གི་གཞུང་གསར་འཛིན་གྲྭའི་དགེ་འདུན་རྣམས་ནས་འདི་ལྟ་བུ་ཞིག་དགོས་ཚུལ་གྱི་བསྐུལ་མ་བྱུང་བར་བརྟེན། ཀུན་མཁྱེན་བླ་མའི་ལེགས་བཤད་བཻཌཱུརྱ་དཀར་པོའི་གན་མཛོད་ཀྱི་ཁ་སྐོངས་སུ་དམིགས་ཏེ། ཆོས་སྨྲ་བའི་བཙུན་པ་དཀོན་མཆོག་བསྟན་པའི་སྒྲོན་མེས་རང་ལོ་ཉེར་བདུན་པ་ལ་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པ་འདིས་ཀྱང་། འཇམ་མགོན་བསྟན་པའི་སྙིང་པོ་ཕྱོགས་དུས་ཀུན་ཏུ་རྒྱས་པར་གྱུར་ཅིག། །།དགེ་ལེགས་འཕེལ། །

དམིགས་པ་བརྟག་པའི་འགྲེལ་པ་ཕྱོགས་གླང་དགོངས་རྒྱན།

― GTD003_Page_0095 ―

^{[མ་དཔེ་གཟིགས་ན་འདིར་གནོན།]}

[Full Size]

དམིགས་པ་བརྟག་པའི་འགྲེལ་པ་ཕྱོགས་གླང་དགོངས་རྒྱན་ཞེས་བྱ་བ་བཞུགས་སོ། །

― GTD003_Page_0096 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་པར་གཟུང་འཛིན་དམིགས་པའི་རྒྱ། །རྣམ་གྲོལ་སངས་རྒྱས་ལ་བཏུད་ནས། །མཁས་པར་བརྟེན་ཏེ་མཁས་པའི་གཞུང། །མཁས་པའི་དགོངས་པ་བཞིན་བཤད་བྱ། །གང་བཤད་པར་བྱ་བའི་ཆོས་ནི་དམིགས་པ་བརྟག་པའོ། །མཚན་དང་འགྱུར་ཕྱག་ནི། རྒྱ་གར་སྐད་དུ། ཨཱ་ལཾ་བ་ན་བ་རཱཀྵི། བོད་སྐད་དུ། དམིགས་པ་བརྟག་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཞེས་ཏེ་སླའོ། །དོན་དངོས་ནི་འདི་ལྟར། གཞན་གྱི་དམིགས་པའི་མཚན་ཉིད་སྐྱེས་འདྲ་བ་འགོག་པར་དཔེའི་སྒོ་ནས་ཁྱབ་པ་འགོག་པ་ཆེན་པོ་གཉིས་སོགས་ཀྱིས་སྣ་ཚོགས་པར་གསུངས་ལ། ཕྱོགས་ཆོས་འགོག་པ་འདི་ལྟ་སྟེ། དམིགས་པ་འདི་ནི་ངེས་པར་འཛིན་པ་ཡིན་ན་ཕྲ་བ་དག་ཇི་ལྟར་འཛིན། རྣམ་པར་སྐྱེད་དམ། བུས་ཕའི་གཟུགས་འཛིན་པ་ལྟར་ཕྱི་མར་འདོད་དགོས་ཀྱང། དེ་ནི་སྐབས་འདིར་དོན་དུ་མི་ཕན་ཏེ། དེས་ནི། དབང་པོ་རྣམ་པར་རིག་པའི་རྒྱུ། །ཕྲ་རབ་རྡུལ་དེ་དག་ཡིན་པར་འགྲུབ་ཏུ་ཆུག་མོད་ཁྱོད་ཀྱི་ངོར་བདག་གིས་མི་འགོག་ཅིང། དེ་ལས་ཉེས་པ་ཆེས་མངོན་སུམ་པ་སྒྲུབ་སླ་བ་འདི་སོ་ན་འདུག་སྟེ། བརྟག་པའི་ཕྱོགས་སྔ་མ་མ་བླངས་པ་ཉིད་ཀྱིས་ཁྱོད་ལྟར་ཡང་། དེ་མི་སྣང་བའི་ཕྱིར་དབང་ཤེས་དེས། དམིགས་པའི་བདག་ཉིད་ངེས་པར་འཛིན་པའི་ཡུལ་ནི། །རྡུལ་ཕྲན་མ་ཡིན་ཏེ་དེ་རྒྱུ་ཙམ་ཡིན་ཡང་མི་སྣང་བའི་དངོས་སུ་ཚུལ་གཅིག་དང་དེའི་

― GTD003_Page_0097 ―

^{[མ་དཔེ་གཟིགས་ན་འདིར་གནོན།]}

[Full Size]

སྒོ་ནས་རྣམ་པར་སྐྱེད་པའི་རྒྱུའང་མ་ཡིན་པས་དོན་གྱིས་རྟགས་གཉིས་ཀ་ཉམས་ཏེ་དམིགས་པར་མི་རུང་བ་དབང་པོ་བཞིན། ཞེས་གཞི་བསལ་ལོ། །འདུས་པའང་མིན་པར་གསུང་བ། རེ་རེ་བ་བསལ་ཞིང་མི་སྣང་བར་བཤད་པའི་འོས་མེད་ཀྱི་རིགས་པས་སྣང་ཞིང་ལྷག་མར་ལུས་པའི་སྤྱི་སྒྲ་གང་ནི་སྐབས་འདིར་འདུས་པ་སྟེ། དེའང་ཤེས་པ་ཚོགས་པ་ལས་ཕྱིའི་རྡུལ་ཚོགས་པ་མ་ཡིན་ཀྱང་། བག་ཆགས་ཀྱི་དབང་ལས་དེ་ལྟར་སྣང་བའི་ཕྱིར་ལྟར་ཞེས་སྨོས་སོ། །དེ་ལ་ནི་སྔ་མ་ལས་བཟློག་ནས་སྣང་བ་དེ་འཐད་དུ་ཆུག་ཀྱང་འདུས་པ་དེ་ལས་དབང་པོའི་ཤེས་པ་སྐྱེ་བ་མིན་པས་ཡང་ཚུལ་གཅིག་ཤོས་ཉམས་ཏེ་དམིགས་པ་མིན་ནོ། །མི་སྐྱེད་དེ་རྫས་སུ་མེད་པའི་ཕྱིར་ཟླ་གཉིས་བཞིན། འདིས་ཆོས་ཅན་ཕྱོགས་སྔའི་ཞེ་ལ་བཞག་པའི་སྟེང་ནས་ཡིན་པས་དཔེ་ལ་སྦྱོར་ཚུལ་ཡང། ཁ་ཅིག་ཏུ་ཟླ་གཉིས་སྣང་ལ་དེའང་ཟླ་བ་གཉིས་པས་སྐྱེད་དུ་མེད་པའི་ཕྱིར་དབང་པོ་ཉམས་པ་ཁོ་ནས་ཡིན་པ་ལྟར་ཕྱི་རོལ་བསགས་པའི་འདུས་པ་ལྟར་སྣང་བའང་དེ་ལ་དེ་བསྐྱེད་པའི་ནུས་པའི་རྫས་ཡོད་པ་མ་ཡིན་ཡང་ནང་དུ་ཡིད་བདག་ལྟའི་བག་ཆགས་ཀྱིས་ཉམས་པ་ལས་ཡིན་ཏེ་དཔེ་འདི་ནི་འགལ་བ་སྤོང་བ་ལའང་ནུས་པ་ཅན་ནོ། །དེ་ནས་དེ་ལྟར་ཕྱི་རོལ་ཕྲ་རགས་གཉིས་ཀ་ཡང་། །བློ་ཡི་དམིགས་རྐྱེན་ནམ་དམིགས་ཡུལ་དུ་མི་རུང་ངོ་ཞེས་བསྡུས་སོ། །རྒྱས་པར་སྐྱོན་སྤོང་དགག་པ་སོགས་

― GTD003_Page_0098 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྲོས་དོན་ནི་ཕ་ཁོལ་སོགས་ཁ་ཅིག་རྡུལ་ཕྲན་རང་གི་རྣམ་པས་མི་སྣང་ཡང་། ཇི་ལྟར་ཏིལ་ལ་སྣུམ་བཞིན་ཚོགས་པར་ཡོད་པའི་རྫས་དེ་ནི། རེ་རེ་བ་ལའང་ཅུང་ཟད་ཡོད་དགོས་པས་ན་དེ་ལའང་འདུས་པའི་རྣམ་པ་དག་ཡོད་ཅིང་དེ་ནི་ཤེས་པ་རང་གི་རྣམ་ལྡན་དུ་བསྒྲུབ་པར་རམ་སྐྱེད་པར་བྱེད་པ་ཡིན་པར་འདོད་དོ། །དེ་ལ་རགས་པའི་རྣམ་པ་སྣང་དུ་རུང་བ་ཅན་ཡོད་ན་གོ །དེའི་ཆོས་སུ་མཚུངས་པའི་ཕྱིར། ཕྲ་བའི་རྣམ་པ་དེའང་ཅིའི་ཕྱིར་བསྟན་དུ་མེད་ཅེས་བྱ་བའི་སྐྱོན་སྤོང་བར་འདོད་ནས། འགའ་ཞིག་ལ་མངོན་སུམ་དུ་ཡིན་པས་ཐམས་ཅད་དུ་ག་ལ་དགོས། དེས་ན་རྡུལ་ཕྲན་ཉིད་ཀྱི་རྣམ་པ་ནི་རྣམ་རིག་གི །དོན་མིན་ཀྱང་མཚུངས་པའི་ཉེས་པ་མེད་དེ་ས་ལ་ཡོད་པའི་ཁ་དོག་བསྟན་དུ་ཡོད་ལ། དེའི་བདག་ཉིད་སྲ་བ་ཉིད་ལ་སོགས་ས་དེར་ཡོད་པའི་ཆོས་སུ་མཚུངས་ཀྱང་དབང་པོའི་ནུས་པ་སོ་སོར་ངེས་པ་ཉིད་ཀྱིས་མཐོང་བ་མ་ཡིན་པ་བཞིན་དུ་རྣམ་པའང་ཆ་གཉིས་སུ་རུང་ངོ་། །ཞེས་བྱ་བ་ནི་ཕྱོགས་སྔ་མས་སོ། །འཐད་པ་མ་ཡིན་ཏེ། དེ་དག་ལྟར་ན་བུམ་པ་དང་། ཁམ་ཕོར་དང་ཀ་བ་སོགས་བློ་ལ་ཤར་བའི་ཚེ་རྣམ་པ་མཚུངས་པར་འགྱུར་རོ། །ཅིའི་ཕྱིར་ན་བློ་ནི་རང་དགར་མ་ཡིན་པའི་ཡུལ་ལ་རང་གི་ངོ་བོའི་རྗེས་སུ་བྱེད་ཅིང། ཡུལ་རྡུལ་ཕྲན་ནི་ངོ་བོ་མཚུངས་པ་ཁོ་ནར་དབྱེ་བ་མེད་པའི་ཕྱིར་བློ་སྣ་ཚོགས་པར་མི་རིགས་སོ། །མང་ཉུང་ཡོད་པས་མི་འགྲུབ་སྟེ། ངོ་བོ་ལ་དབྱེ་བ་མེད་ན་བུམ་པ་ཆེ་ཆུང་དུ་འགྱུར་གྱི་ཁམ་ཕོར་གྱི་བློར་མི་འགྱུར་རོ། །གལ་ཏེ་རྣམ་པའི་དབྱེ་བ་ཁ་ཞབས་སོགས་མི་འདྲ་བས་ཁྱད་པར་དབྱེའོ། །སྙམ་ན་དབྱིབས་ཀྱི་ཁྱད་པར་དེ་ལྟ་བུ་ནི་རྡུལ་ཕྲན་

― GTD003_Page_0099 ―

^{[མ་དཔེ་གཟིགས་ན་འདིར་གནོན།]}

[Full Size]

ཆར་དབྱེ་བ་སོགས་ཀྱི་རྣམ་པ་བསྒྱུར་དུ་མེད་པའི་ཚུགས་ཅན་གྱི་རྫས་ཡོད་འདི་ལྟ་བུ་ལ། བཞག་ཏུ་མེད་དེ་ཚད་ཀྱི་དབྱེ་བ་མི་འདྲ་བ་མེད་པར་ཆུང་བའི་མཐར་གཏུགས་པར་མཚུངས་པའི་ཕྱིར་རོ། །གཟུགས་ཀྱི་ཆ་དབྱེར་མེད་པ་ལ་བཀོད་པའི་ཁྱད་པར་མི་རུང་བ། དེ་ཕྱིར་རྣམ་པའི་དབྱེ་བ་དེ་སྐབས་འདིའི་རྫས་སུ་མེད་པའི་ཀུན་རྫོབ་ཁོ་ན་ལ་ཡོད་དེ། །ཆ་དབྱེར་རུང་བའི་ཕྱིར། རྡུལ་ཕྲན་ལ་དེ་མི་རུང་སྟེ། རྡུལ་ཕྲན་གྱི་ཆ་སོ་སོར་ཡོངས་སུ་བསལ་ན་ནི། །དེར་སྣང་གི་ཤེས་པ་ཉམས་ཏེ་གཟུགས་སྣང་འགག་པར་འགྱུར་བའི་ཕྱིར། དེ་ལྟར་གཞན་གྱི་བ་བཀག་ནས་གྲགས་པའི་གནོད་པ་སྤངས་པའི་ཕྱིར། རང་ལ་འཐད་པའི་དམིགས་པ་སྟོན་པ་ནི། དམིགས་པ་གང་ཞེ་ན། ནང་གི་འཛིན་པའི་རང་མདངས་དེ་ཉིད་ཤེས་བྱའི་དངོས་པོ་ལ་བཞག་གི་གཞན་དུ་མེད་པ་ནི་ཞེས་པའི་ངེས་གཟུང་ངོ་། །རང་ལ་བྱ་བ་འགལ་བའི་ཕྱིར་ཇི་ལྟར་སྣང་ཞེ་ན། ཇི་ལྟར་གནས་པའི་རྣམ་པའི་སྣང་བ་མ་ཡིན་ཏེ། མེ་ལོང་ལ་ཟླ་གཟུགས་ཤར་བ་ན་ནམ་མཁའི་ཁམས་ཀྱང་ཤར་བས་བྱེད་པ་ལས་ཟླ་བ་རྒྱང་སྟེ་ཆད་པའི་རྣམ་པར་འབྱུང་བ་ཇི་ལྟར་བར་ཕྱི་རོལ་ལྟར་སྣང་བའི་ཚུལ་གྱིས་གཟུང་བར་གྱུར་ཀྱང་དངོས་པོ་ལ་ནང་དུ་གནས་པ་གང་ཡིན་པ་དེ་ནི། དོན་ཞེས་བྱ་བ་སྟེ་ཡུལ་དུ་མར་འཇུག་ཀྱང་འདིར་སྐབས་ཀྱི་དབང་ལས་དམིགས་རྐྱེན་ཡིན་ནོ། །དེའང་རྒྱུ་མཚན་གང་གི་ཕྱིར་ན། མངོན་པར་བརྗོད་པའི་བག་ཆགས་གོམས་པ་ལས་གཟུང་བ་དང་འཛིན་པའི་ཚུལ་དུ་རྣམ་པར་ཤེས་པ་ཡུལ་དེའི་དངོས་པོའི་རྣམ་པར་སྐྱེད་པའི་

― GTD003_Page_0100 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་དང་། ཡུལ་དེ་མེད་ན་མི་སྐྱེ་བའི་ཆ་ནས་དེའི་རྐྱེན་ཉིད་དོ་ཞེས་ཀྱང་བཤད་པ་ཡིན་པའི་ཕྱིར་རོ། །གཏན་ཚིགས་གཉིས་ལས་རིམ་པར་བདག་ཉིད་ལ་བྱེད་པ་འགལ་བའི་སྐྱོན་དང་དུས་མཉམ་པ་ནི་བ་ལང་གི་རྭ་ལྟར་ཕན་ཚུན་རྐྱེན་དུ་མི་རུང་བའི་ཧ་ཅང་ཐལ་བ་བསུ་ནས། དེ་གཉིས་དུས་གཅིག་ཅིང་བདག་ཉིད་གཅིག་པའི་ཆ་ཡིན་ནའང་མེ་ལྟར་རང་ལ་བྱ་བ་ཅུང་ཟད་འཇུག་པ་སྲིད་ཀྱང་དབྱེ་བ་གཏན་མེད་པའི་ཚུལ་གྱིས་མ་ཡིན་པ་སྔར་གཟུང་འཛིན་དུ་འགྱུར་ཚུལ་བཤད་པའི་ཤུགས་ཀྱིས་ཀྱང་ཤེས་པས་ལན་འདིར་མི་སྟོན་ལ་ཕྱི་མ་ནི་ཡོད་མེད་རྗེས་སུ་འགྲོ་ལྡོག་གི་ངེས་པ་མི་འཁྲུལ་པའི་ཕྱིར་ན་རྐྱེན་དུ་གདགས་པ་ཡིན་ནོ། །དེ་ལྟར་དམིགས་རྐྱེན་བཏགས་པ་བ་སྟེ་སྣང་བའི་དམིགས་རྐྱེན་རྣམ་པར་བཞག་ནས། རང་གི་འདོད་པའི་གཙོ་བོ་ཉིད་སྟོན་པ་ནི་ཀུན་གཞིའི་སྒྲར་བསྟན་པའི་ཡིད་ལ་ཤེས་པ་སྔ་མས་གང་ཡུལ་གྱི་རྣམ་པར་སྐྱེད་པའི་ནུས་པ་བཞག་པ་དེས་ནི་ཕྱི་མ་ཡུལ་གྱི་རྣམ་པར་འཇོག་པའི་ཕྱིར་རིམ་གྱིས་ཕྱི་མ་ཕྱི་མའི་དམིགས་རྐྱེན་ཡིན་ཏེ་འདི་ནི་དངོས་ཀྱི་དོན་ནོ། །གལ་ཏེ་བྱད་བཞིན་དང་མེ་ལོང་ཇི་ལྟ་བར་ཕྱིའི་གཟུགས་དང་མིག་ལས་རྣམ་པར་ཤེས་པ་བསྐྱེད་ན། ཁྱོད་ལ་དམིགས་པ་ནི་ནང་ཁོ་ན་ལས་མདུན་དུ་གྱུར་པ་མེད་པའི་ཕྱིར། ཇི་ལྟར་ཤེས་པ་སྐྱེད་ཅེ་ན། ཡུལ་དང་ལྷན་ཅིག་པའི་དབང་པོ་འབྱུང་བའི་བདག་ཉིད་ཀྱི་བེམ་པོར་སྨྲ་བ་ཁྱེད་དག་ལ་ཡུལ་ཡང་དེ་དང་མཐུན་པ་ཕྱིའི་བེམ་པོ་ཞིག་ཏུ་འགྱུར་མོད་ཀྱང་། ཁོ་བོ་ཅག་ནི་དམིགས་པ་དེ་དང་ལྷན་ཅིག་བྱེད་པས་དབང་པོའང་ཁྱོད་ལྟར་མི་སྨྲ་ཡི། འབྲས་བུ་ལས་རྒྱུའི་ཆོས་རྗེས་སུ་དཔོག་

― GTD003_Page_0101 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཚེ་ན་ཡིད་ཀྱི་སྟེང་དུ་མིག་ཤེས་ཐུན་མོང་མ་ཡིན་པར་འགྲུབ་པའི་ནུས་པ་ཡི། ངོ་བོ་ཞིག་ཡོད་པར་ལས་འགག་ཀྱང་འབྲས་བུ་འབྱིན་པར་སྒྲུབ་པའི་རིགས་པ་སོགས་ཀྱིས་འགྲུབ་ལ། དེ་ལྟ་བུ་གང་ཡིན་པ་དེ་ནི་དབང་པོའང་ཡིན་པར་འདོད་དོ། །འང་སྒྲས་ནུས་པ་གཅིག་ཏུ་བཞག་པ་མ་ཡིན་གྱི་གཉིས་ཀ་ནུས་པར་མཚུངས་པ་སྟོན་ཏོ། །དུལ་ལྷས་ནུས་པ་རྒྱུ་ཙམ་ལ་བཤད་ཀྱང་འོག་དང་སྦྱར་ན་དཔྱད་གཞིར་སྣང་། ཁྱེད་ཅག་དབང་པོ་འབྱུང་བའི་བདག་ཉིད་ལས་བཟློག་སྟེ་ནུས་པར་འདོད་ནའང། ནུས་པ་རྟེན་མེད་པ་ནི་མི་གནས་པས་རྟེན་འབྱུང་བའི་ཁྱད་པར་ཞིག་དགོས་སོ་ཞེས་པའི་རྩོད་པ་བསུས་ཏེ། རྣམ་པར་ཤེས་པའི་རྟེན་གྱི་དབང་པོ་ནུས་པར་བཞག་པ་དེ་ཡང་ཁོ་བོ་ཅག་རྣམ་པར་རིག་པ་ཙམ་དུ་སྨྲ་བ་རྣམས་ལ་འགར་ཡང་མི་འགལ་ཏེ། ནུས་པ་ཤེས་པ་ལ་གནས་ཤིང་ཤེས་པའང་ནུས་པ་ལས་འབྱུང་བའི་ཕྱིར་ཁྱེད་ཅག་ལྟར་ཕྱི་ནས་ཚོལ་བའི་ངལ་བ་མི་དགོས་སོ། །མཇུག་བསྡུ་བ་ནི། དེ་ལྟར་ཡུལ་གྱི་རྣམ་པའི་ངོ་བོ་ཉིད་ཀྱི་ཤེས་པ་དང་། དབང་པོའི་ངོ་བོ་ཉིད་ཀྱི་ནུས་པ་གཉིས་ནི་རེས་མོས་ཀྱི་ཚུལ་དུ་སྐྱེ་འགག་དུས་མཉམ་པའི་འབྲེལ་བའི་སྒོ་ནས་ཕན་ཚུན་གྱི་རྒྱུ་ཅན་དང་། ཚུལ་དེ་ཉིད་ཀྱིས་ཐོག་མ་མེད་པའི་དུས་ནས་རིམ་པར་འཇུག་པ་ཡིན་པས། སྔར་ལྟར་རྒོལ་བ་དག་གི་ཕུགས་བཙལ་ཏེ་དཔྱད་པས་ཀྱང་སུན་དབྱུང་བར་ནུས་པ་མ་ཡིན་ནོ། །གཞན་གྱི་དམིགས་པ་ནི་གཟུང་དོན་གྱི་ངོ་བོ་ཡིན་ལ་དེ་ནི་འདི་བའི་ཆོས་ཀྱི་བདག་སྟེ་དེ་འགོག་པར་བྱེད་པའི་དམིགས་པ་བརྟག་པ་སློབ་དཔོན་

― GTD003_Page_0102 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱོགས་ཀྱི་གླང་པོས་མཛད་པ་འདི་ནི་གྲུབ་པའི་མཐའི་རྩ་བ་ཆེས་མཆོག་ཏུ་གྱུར་པ་ཞིག་སྟེ་དེའི་དོན་བཤད་པ་རེ་ཞིག་རྫོགས་སོ། །ཚུལ་འདི་ནི༸བཙུན་པ་དཀོན་མཆོག་བསྟན་པའི་སྒྲོན་མེས་རང་ལོ་ཉེར་དྲུག་པ་ལ་གཞུང་འདིར་ཞིབ་དཔྱོད་ཅུང་ཟད་བགྱིས་སྐབས་ཡིད་ལ་ཤར་ཚོད་ཀྱི་རིམ་པ་རྣམས་བརྗེད་དུ་ཕངས་པས་སྤྲོས་པ་རྒྱ་ཆེ་བ་དོར་ཏེ་ཐོ་ཙམ་སུག་བྲིས་སུ་བགྱིས་པའོ། །༈ ཁྱབ་པ་སྒྲུབ་པ་ལ་ཚད་མ་གསུམ་སྔོན་དུ་འགྲོ་དགོས་ཏེ། རྟགས་ཀྱི་མཚན་གཞི་ངོས་འཛིན་པའི་ཚད་མ་འམ་རྟགས་ཀྱི་ངོ་བོ་ངེས་པའི་ཚད་མ། དགག་བྱའི་ཆོས་དང་བསྒྲུབ་བྱའི་ཆོས་དངོས་འགལ་དུ་ངེས་པའི་ཚད་མ། རྟགས་དགག་བྱའི་ཆོས་ལ་འགོག་པར་བྱེད་པའི་ཚད་མའམ། རྟགས་དང་དགག་བྱའི་ཆོས་ཀྱི་གཞི་མཐུན་འགོག་པའི་ཚད་མ། གསུམ་དགོས་པའི་ཕྱིར། གལ་ཏེ་ཚད་མ་དང་པོ་མེད་པར་ཕྱི་མ་གཉིས་ཡོད་པ་ཙམ་གྱིས་རྗེས་སུ་འགྲོ་ལྡོག་གི་ཁྱབ་པ་འགྲུབ་ན། རི་བོང་རྭ་ཆོས་ཅན། མི་རྟག་པར་ཐལ། ཁྱོད་རྩོད་གཞིར་བཟུང་སྟེ། རྟག་པ་མ་ཡིན་པར་ཐལ། མི་རྟག་པ་ཡིན་པའི་ཕྱིར། ཞེས་འཕངས་པའི་ཚེ། ཁྱོད་ཀྱི་སྟེང་དུ་དེའི་རྗེས་སུ་འགྲོ་ལྡོག་གི་ཁྱབ་པ་ངེས་པའི་ཚད་མ་ཡོད་པའི་ཕྱིར། དེར་ཐལ། རྟག་མི་རྟག་དངོས་འགལ་ཡིན་པས་ཚད་མ་གཉིས་པས་གྲུབ་པ། གང་ཞིག་མི་རྟག་པ་ཡིན་ན། རྟག་པ་ལ་ཡོད་པ། ཁེགས་པའི་ཚད་མ་གསུམ་པ་གྲུབ་པའི་ཕྱིར། ཁ་ཅིག །རྟག་མི་རྟག་དངོས་འགལ་ཡིན་པའི་རྟགས་མ་གྲུབ་སྟེ། རི་བོང་རྭ་རྟག་པ་མ་ཡིན་ལ། མི་རྟག་པ་འང་མ་ཡིན་པའི་ཕྱིར། ཁྱབ་སྟེ། རྟག་མི་རྟག་དངོས་འགལ་ཡིན་ན་རྟག་པ་མ་ཡིན་ཚེ་མི་རྟག་པ་ཡིན་དགོས་པའི་ཕྱིར་ཞེ་ན། འོ་ན་གང་ཟག་གི་བདག་རྟག་པ་ཡིན་པར་ཐལ། དེ་མི་རྟག་པ་མ་

― GTD003_Page_0103 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པའི་ཕྱིར། ཁྱབ་པ་ཁས། འདོད་ན། གང་ཟག་གི་བདག་མེད་པ་མ་ཡིན་པར་ཐལ། གང་ཟག་གི་བདག་རྟག་པ་ཡིན་པའི་ཕྱིར། རྟགས་ཁས། ཚད་མ་བར་བ་མེད་པ་ཕྱི་མ་གཉིས་ཡོད་པ་ཙམ་གྱིས་རྗེས་སུ་འགྲོ་ལྡོག་གི་ཁྱབ་པ་འགྲུབ་ན། དཔེར་ན་ཇ་དཀར་པོ་ལས་གཞན་ཞེས་པས་ནག་པོ་དང་། གསེར་མདངས་སེར་པོ་ལས་གཞན་ཞེས་པས་སྔོན་པོར་གོ་བ་ལྟ་བུའི་སྐབས་ཡོད་པ་ལ་བསམ་ནས། ཞེ་འདོད་སྔོན་པོར་སྒྲུབ་འདོད་དེ། ཨིནྡྲ་ནཱི་ལའི་ཁ་དོག་ཆོས་ཅན། སེར་པོ་ལས་གཞན་ཡིན་པར་ཐལ། སེར་པོ་མ་ཡིན་པའི་ཕྱིར་ཞེས་འཕང་བའི་ཚེ། ཞེ་འདོད་ལྟར་གྱི་ཁྱབ་པ་འགྲུབ་པར་ཐལ། སེར་པོ་མ་ཡིན་པས་ཚད་མ་དང་པོ་འགྲུབ། སེར་པོ་མ་ཡིན་པས་སེར་པོ་ཁེགས་པས་ཚད་མ་གསུམ་པ་འགྲུབ་པའི་ཕྱིར། འདོད་མི་ནུས་ཏེ། སེར་པོ་མ་ཡིན་པའི་རྟགས་ཀྱིས་བསྒྲུབ་བྱའི་ཆོས་སེར་པོ་ལས་གཞན་དེ་ལ་སྔོན་པོ་ཡོད་ཀྱང་། གཞི་གྲུབ་ཚད་སྔོ་སེར་གཉིས་སུ་མ་འདུས་པས། དེར་སྔོན་པོ་ལས་གཞན་ཡང་ཡོད་པའི་ཕྱིར། མ་གྲུབ་ན། དུང་ཆོས་ཅན། སྔོན་པོ་ཁོ་ན་ལ་ཡོད་པར་ཐལ། གཞི་གྲུབ་པ་གང་ཞིག །སེར་པོ་ལ་ཁེགས་པའི་ཕྱིར། ཞེས་པ་ཡིན་ཏེ། ཞེ་འདོད་ཀྱི་དབང་གིས་འདིའི་བསྒྲུབ་བྱའི་ཆོས་སྔོན་པོ་དང་། དགག་བྱའི་ཆོས་སྔོན་པོ་ལས་གཞན་ཡིན་ལ། དངོས་ཟིན་གྱི་བསྒྲུབ་བྱའི་ཆོས་སེར་པོ་ལས་གཞན་དང་། ཞེ་འདོད་ཀྱི་དགག་བྱའི་ཆོས་སྔོན་པོ་ལས་གཞན་གཉིས་མི་འགལ་བའམ། རྩོད་ཚེ་སེར་པོ་ལས་གཞན་པའི་སྔོན་པོ་དང་སེར་པོ་དངོས་འགལ་མ་ཡིན་པས། དགག་ཆོས་དང་བསྒྲུབ་ཆོས་མི་འགལ་བར་གསུངས་པ་ཡིན་ཏེ། ཁ་ཅིག །བདེན་གྲུབ་མིན་ཡང་བདེན་མེད་ཡིན་མི་དགོས་ཟེར་བ་ལྟ་བུ་ལོག་རྟོག་འགོག་པའི་དགོས་པ་ཤིན་ཏུ་ཆེ་བས། བསྒྲུབ་བྱའི་ཆོས་ཉི་ཚེ་བ་

― GTD003_Page_0104 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་དུ་མ་སོང་བར། ལོག་རྟོག་གི་མཐའ་ཁེགས་པ་ལ་དགག་བྱའི་ཆོས་དེ་དང་དངོས་འགལ་དུ་ཞུགས་པ་ཞིག་ངེས་པར་དགོས་སོ། །ཚད་མ་ཕྱི་མ་མེད་པར་དང་པོ་གཉིས་ཡོད་པ་ཙམ་གྱིས་རྗེས་སུ་འགྲོ་ལྡོག་གི་ཁྱབ་པ་འགྲུབ་ན། གཞལ་བྱ་ཆོས་ཅན། མི་རྟག་པ་ཁོ་ན་ལ་ཡོད་པར་ཐལ། ཁྱོད་ཀྱི་རྟགས་ཀྱིས་བུམ་པ་མི་རྟག་པར་སྒྲུབ་པའི་རྗེས་སུ་འགྲོ་ལྡོག་གི་ཁྱབ་པ་འགྲུབ་པའི་ཕྱིར། དེར་ཐལ། ཁྱོད་གཞི་གྲུབ་པས་ཚད་མ་དང་པོ་གྲུབ་པ། གང་ཞིག །རྟག་མི་རྟག་དངོས་འགལ་ཡིན་པས་ཚད་མ་གཉིས་པ་གྲུབ་པའི་ཕྱིར། འདི་ནི་སྐྱབས་མགོན་མཆོག་སྤྲུལ་རིན་པོ་ཆེ་ནས་རྟགས་རིགས་གསན་སྦྱོང་སྐབས། ཐད་འདིར་ཡིག་ཆ་རྣམས་ཚིག་རིས་མི་མཐུན་ཞིང་། ལྷག་པར་རིགས་རྒྱན་གྱི་ཚིག་རྣམས་དཀའ་བ་ཞིག་འདུག་གསུང་བར། བློ་ལ་ཤར་ཚོད་འཕྲལ་དུ་ཕུལ་བའོ།། །།

རིགས་ལམ་འཕྲུལ་གྱི་ལྡེ་མིག

― GTD003_Page_0105 ―

^{[མ་དཔེ་གཟིགས་ན་འདིར་གནོན།]}

[Full Size]

རིགས་ལམ་འཕྲུལ་གྱི་ལྡེ་མིག་ཅེས་བྱ་བ་བཞུགས་སོ། །

― GTD003_Page_0106 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །སྤྱི་དང་བྱེ་བྲག་གཉིས་ཀྱི་ནང་ནས་བྱེ་བྲག་དང་། རྟག་དངོས་གཉིས་ཀྱི་ནང་ནས་རྟག་པ་ཡིན་བྱས་པ་ལ། ཁོ་ན་རེ། དེ་མི་འཐད་པར་ཐལ། སྤྱི་ཡིན་པའི་ཕྱིར། མ་གྲུབ་ན། སྤྱི་ཡིན་པར་ཐལ། ཁྱོད་ཀྱི་བྱེ་བྲག་ཡོད་པའི་ཕྱིར། མ་གྲུབ་ན། ཁྱོད་ཀྱི་བྱེ་བྲག་ཡོད་པར་ཐལ། ཤེས་བྱ་དེ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཁྱོད་ཀྱི་བྱེ་བྲག་ཡིན་པར་ཐལ། ཁྱོད་ཀྱི་བྱེ་བྲག་ཡིན་པར་ཁས་ལེན་རིགས་པའི་ཕྱིར། མ་གྲུབ་ན། ཤེས་བྱའི་བྱེ་བྲག་ཡིན་པར་ཁས་ལེན་རིགས་པར་ཐལ། བྱེ་བྲག་ཡིན་པར་ཁས་ལེན་རིགས་པའི་ཕྱིར། མ་གྲུབ་ན། དངོས་འགལ། ཡང་ཁོ་ན་རེ། ཁྱོད་སྤྱི་ཡིན་པར་ཐལ། ཁྱོད་ཀྱི་བྱེ་བྲག་ཡོད་པའི་ཕྱིར། མ་གྲུབ་ན། དེར་ཐལ། གཞི་གྲུབ་ན་ཁྱོད་ཀྱི་བྱེ་བྲག་མ་ཡིན་པས་མ་ཁྱབ་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཁྱོད་ཀྱི་བྱེ་བྲག་མ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེ་ལ་འདོད་ལན་བཏབ་པས་ཤེས་བྱའི་བྱེ་བྲག་མ་ཡིན་པར་འདོད་ཅེས་བརྩི་རིགས་པ་གང་ཞིག །ཤེས་བྱའི་བྱེ་བྲག་ཡིན་པའི་ཕྱིར། རྟགས་དང་པོ་གྲུབ་སྟེ། ཤེས་བྱ་ཆོས་ཅན། ཁྱོད་ཀྱི་བྱེ་བྲག་ཡོད་པར་ཐལ། གཞི་གྲུབ་པའི་ཕྱིར། ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས། ཤེས་བྱའི་བྱེ་བྲག་

― GTD003_Page_0107 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་པར་འདོད་ཅེས་རྩི་རིགས་པ་གང་ཞིག །དེའི་རིགས་འགྲོས་ཀྱིས་ཤེས་པའི་ཕྱིར། དེ་བཞིན་དུ་སྒྲ་མི་རྟག་པ་ཡང་སྐྱོན་དུ་འཕེན་ནོ། །ཡང་ཁོ་ན་རེ། རྟག་དངོས་གཉིས་ཀྱི་ནང་ནས་རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། དངོས་པོ་ཡིན་པར་ཐལ། རྒྱུ་ཡིན་པའི་ཕྱིར། མ་གྲུབ་ན། རྒྱུ་ཡིན་པར་ཐལ། འབྲས་བུ་སྐྱེད་བྱེད་ཡིན་པའི་ཕྱིར། མ་གྲུབ་ན། དེར་ཐལ། འབྲས་བུ་ཡོད་པའི་ཕྱིར་རོ། །གོང་དུ་མ་ཁྱབ་ཟེར་ན། འབྲས་བུ་སྐྱེད་པའི་དོན་བྱེད་པ་ཡིན་པར་ཐལ། འབྲས་བུ་སྐྱེད་བྱེད་ཡིན་པའི་ཕྱིར། འདོད་ན། དོན་བྱེད་ནུས་པ་ཡིན་པར་ཐལ། འབྲས་བུ་སྐྱེད་པའི་དོན་བྱེད་ནུས་པ་ཡིན་པའི་ཕྱིར། འདོད་ན། དངོས་པོ་ཡིན་པར་ཐལ་ལོ། །ཡང་ཁོ་ན་རེ། དངོས་པོ་ཡིན་པར་ཐལ། ཤེས་པ་ཡིན་པའི་ཕྱིར། མ་གྲུབ་ན། དེར་ཐལ། ཚད་མ་ཡིན་པའི་ཕྱིར། དེར་ཐལ། རྗེས་དཔག་ཚད་མ་ཡིན་པའི་ཕྱིར། དེར་ཐལ། རྗེས་དཔག་ཡོད་པའི་ཕྱིར། མ་ཁྱབ་ན། རྗེས་དཔག་རྟག་དངོས་གང་རུང་ཡིན་པར་ཐལ། རྗེས་དཔག་ཡོད་པའི་ཕྱིར། འདོད་ན། དེ་བེམ་ཤེས་གང་རུང་ཡིན་པར་ཐལ་བ་དང་། ཚད་མ་དང་ཚད་མིན་གང་རུང་ཡིན་པར་ཐལ་བ་སོགས་འཕེན་ནོ། །སླ། གཞན་ཡང་། དངོས་པོ་ཡིན་པར་ཐལ། ལས་བསགས་པའི་ཕྱིར། དེར་ཐལ། ལས་དགེ་མི་དགེ་བསགས་ནས་འཁོར་བར་སྐྱེ་བ་ལེན་པའི་ཕྱིར། དེར་ཐལ། དེ་ལྟར་འཁོར་བའི་ཚུལ་

― GTD003_Page_0108 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་བཅོམ་ལྡན་འདས་ཀྱི་བཞེད་པ་གང་ཞིག །ཁྱོད་ཀྱིས་ཁས་ལེན་དགོས་པའི་ཕྱིར། གོང་དུ་མ་ཁྱབ་ན། མི་དགེ་བའི་ལས་གསོག་པར་ཐལ། སྤྱིར་ལས་གསོག་པའི་རྒྱུ་མཚན་ཡོད་པའི་ཕྱིར། འདོད་ན། རྫུན་སྨྲ་བར་ཐལ། འདོད་པའི་ཕྱིར། འདོད་ན། རྫུན་སྨྲ་ཞེས་ཁས་ལེན་པའི་ཁས་ལེན་དེ་རྣམ་དག་ཡིན་པར་ཐལ། རྫུན་སྨྲ་བའི་ཕྱིར། འདོད་ན། རྫུན་སྨྲ་ཞེས་ཁས་ལེན་རིགས་པར་ཐལ། དེ་འདྲ་བའི་ཁས་ལེན་དེ་ཁས་ལེན་རྣམ་དག་ཡིན་པའི་ཕྱིར། འདོད་མི་ནུས་ཏེ། དེ་ལྟར་ཁས་ལེན་མི་རུང་བའི་ཕྱིར། དེར་ཐལ། དེ་ལྟར་ཁས་ལེན་ན་ཉེས་པ་འབྱུང་བའི་ཕྱིར། དེར་ཐལ། རྫུན་མི་སྨྲ་བར་དམ་བཅས་ན་ཕན་ཡོན་འབྱུང་བའི་ཕྱིར། དེར་ཐལ། མི་དགེ་བཅུ་མི་བྱེད་པར་དམ་བཅས་ན་ཕན་ཡོན་འབྱུང་བའི་ཕྱིར། གཞན་ཡང་ངག་སྨྲ་བར་ཐལ། རྫུན་ཚིག་སྨྲ་བའི་ཕྱིར། འདོད་ན། སྐྱེས་བུ་ཡིན་པར་ཐལ། ངག་སྨྲ་བའི་ཕྱིར། བྱས་པ་ལ་ཁོ་ན་རེ། བདེན་ཚིག་ཀྱང་མི་སྨྲ་བར་ཐལ། སྐྱེས་བུ་མ་ཡིན་པའི་ཕྱིར། ཁྱབ་པ་ཁས། འདོད་ན། རྟག་དངོས་གཉིས་ཀྱི་ནང་ནས་དངོས་པོ་ཡིན་ཞེས་མི་སྨྲ་བར་ཐལ། འདོད་པའི་ཕྱིར། འདོད་ན། དེ་ལྟར་ཁས་མི་ལེན་པར་ཐལ། དེ་ལྟར་མི་སྨྲ་བའི་ཕྱིར། འདོད་ན། དངོས་སུ་འགལ་ལོ། །གཞན་ཡང་དངོས་པོ་ཡིན་པར་ཐལ། གཟུགས་ཡིན་པའི་ཕྱིར། དེར་ཐལ། སྒྲ་ཡིན་པའི་ཕྱིར། དེར་ཐལ། ཡོད་པར་ཐལ། ཡོད་པའི་ཕྱིར་ཞེས་པའི་

― GTD003_Page_0109 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ་འགྱུར་ཡིན་པའི་ཕྱིར། མ་གྲུབ་ན། དེར་ཐལ། ཡོད་མེད་གང་རུང་ཡིན་པའི་ཕྱིར། བྱས་པ་ལ་ཁོ་ན་རེ། ཤེས་བྱ་ཆོས་ཅན། ཡོད་པར་ཐལ། ཡོད་པའི་ཕྱིར་ཞེས་པའི་ཐལ་འགྱུར་ཡིན་པར་ཐལ། ཡོད་པ་ཡིན་པའི་ཕྱིར། ཁྱབ་པ་ཁས་ཟེར་ན། ཁྱབ་མེད་ཀྱི་ལན་ཐེབས་པ་ཡིན་ཏེ། ཐལ་འགྱུར་དེ་ལ་ཁྱབ་མེད་ཀྱི་ལན་བཏབ་པའི་ཚེ། ཡོད་པ་ཡིན་ན། ཤེས་བྱ་ཆོས་ཅན། ཡོད་པར་ཐལ། ཡོད་པའི་ཕྱིར་ཞེས་པའི་ཐལ་འགྱུར་ཡིན་པས་མ་ཁྱབ་ཅེས་བརྩི་རིགས་ཤིང་། དེ་ལྟར་ཁས་མ་བླངས་པའི་ཕྱིར། ཡང་ཁོ་ན་རེ། རི་བོང་རྭ་ཆོས་ཅན། ཡོད་པར་ཐལ། ཡོད་པའི་ཕྱིར་ཞེས་པའི་ཐལ་འགྱུར་ཡིན་པར་ཐལ། མེད་པ་ཡིན་པའི་ཕྱིར། ཁྱབ་པ་ཁས་ཟེར་ན། རྟགས་མ་གྲུབ་པ་ཡིན་ཏེ། དེ་ལྟར་འཕངས་པའི་ཚེ་རྩོད་གཞི་སྦུབས་སུ་འཚང་སོང་བས་མེད་པ་ཡིན་པར་རྟགས་མ་གྲུབ་ཅེས་བརྩི་དགོས་པ་ཡིན་པའི་ཕྱིར། གཞན་ཡང་རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། དེར་ཐལ། དང་པོར་སེམས་བསྐྱེད། བར་དུ་ཚོགས་བསགས། མཐར་སངས་རྒྱས་ནས་ཆོས་འཁོར་བསྐོར་བའི་ཡུལ་དང། དེའི་གདུལ་བྱ་དང་། དེ་ཐོས་པའི་རྣ་ཤེས་ཚད་མ་རེ་རེ་ནས་ཡོད་པའི་ཕྱིར། མ་ཁྱབ་ན། ཆོས་འཁོར་བསྐོར་བར་ཐལ། དེ་བསྐོར་བར་རྟོགས་པའི་ཚད་མ་ཡོད་པའི་ཕྱིར། རྟགས་ཁས་བྱས་པ་ལ། བསྐོར་བ་རྟོགས་པའི་ཚད་མ་ཡོད་ཀྱང་། བསྐོར་བར་རྟོགས་པའི་ཚད་མ་མེད་ཟེར་ན། ཆོས་འཁོར་ཆོས་ཅན། བསྐོར་བར་ཐལ། ཆོས་འཁོར་ཡིན་པའི་ཕྱིར། ༈ ཡང་དེ་ཆོས་ཅན། བསྐོར་བར་ཐལ། རང་སྐོར་མཁན་སྟོན་པ་ཤཱཀྱ་ཐུབ་པས་བསྐོར་བའི་ཕྱིར། མ་ཁྱབ་ན། འོ་ན་སངས་རྒྱས་ཀྱིས་གསུངས་པས་གསུང་བའི་གོ་མི་ཆོད་པར་ཐལ་ལོ། །བྱས་པ་ལ་ཁོ་ན་རེ། སངས་

― GTD003_Page_0110 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་པར་ཐལ། ཆོས་འཁོར་བསྐོར་བའི་ཕྱིར། འདོད་ན། ཉོན་མོངས་སྤངས་པར་ཐལ། སངས་རྒྱས་པའི་ཕྱིར། འདོད་ན། ཉོན་མོངས་གཏན་ནས་མི་སྐྱེ་བར་བྱས་པར་ཐལ། ཉོན་མོངས་ས་བོན་དང་བཅས་པ་སྤངས་པའི་པྱིར། འདོད་ན། ཉོན་མོངས་ཆོས་ཅན། མ་སྐྱེས་པར་ཐལ། གཏན་ནས་མི་སྐྱེ་བར་བྱས་ཟིན་པའི་ཕྱིར། དེར་ཐལ། རྣམ་མཁྱེན་རྒྱུད་ལ་སྐྱེས་ཟིན་པའི་ཕྱིར་ཟེར་ན། འོ་ན་ད་ལོའི་ལོ་འདི་འགགས་ཟིན་པར་ཐལ། ལོ་རྗེས་མ་གྲུབ་ཟིན་པའི་ཕྱིར། ཁྱབ་པ་འགྲིག །མ་གྲུབ་ན། ལོ་རྗེས་མ་ཆོས་ཅན། གྲུབ་ཟིན་པར་ཐལ། ལོ་ཡིན་པའི་ཕྱིར། བྱས་པ་ལ་ཁོ་ན་རེ། དམ་བཅའ་བ་འདིའི་སྐྱེ་བ་ཕྱི་མ་ཆོས་ཅན། གྲུབ་ཟིན་པར་ཐལ། གང་ཟག་ཡིན་པའི་ཕྱིར། འདོད་ན། སྐྱེ་བ་འདིའི་འཆི་སྲིད་ཕྲ་མོ་གྲུབ་ཟིན་པར་ཐལ། ཕྱི་མའི་བར་དོ་གྲུབ་ཟིན་པའི་ཕྱིར། འདོད་ན། སྦྱང་ཆོག་དང་དགེ་རྩ་ཡང་བྱས་ཟིན་པར་ཐལ་ལོ། །ཟེར་ན། འོ་ན་དམ་བཅའ་བ་འདིའི་སྐྱེ་བ་འདི་ཆོས་ཅན། གང་ཟག་ཡིན་པར་ཐལ། འདོད་པའི་ཕྱིར། འདོད་ན། དམ་བཅའ་བའི་སྐྱེ་བ་འདི་ཆོས་ཅན། རབ་བྱུང་ཡིན་པར་ཐལ། འདོད་པའི་ཕྱིར། འདོད་ན། རབ་བྱུང་མ་ཡིན་པར་ཐལ། འཁོར་བ་ཡིན་པའི་ཕྱིར། དེར་ཐལ། ལས་ཉོན་གྱི་དབང་གིས་བླངས་པའི་སྐྱེ་བ་ཡིན་པའི་ཕྱིར། མ་གྲུབ་ན། འདིའི་སྐྱེ་བ་འདི་མིའི་སྐྱེ་བ་ཡང་མ་ཡིན་པར་ཐལ། དེ་མི་ཡིན་པའི་ཕྱིར། ཁྱབ་སྟེ། མིའི་སྐྱེ་བ་བླང་བྱ་དང། མི་དེ་ལེན་པ་པོ་ཡིན་པའི་ཕྱིར། ཟེར་ན། འོ་ན་འདིའི་སྐྱེ་བ་སྔ་ཕྱི་བར་གསུམ་ཆོས་ཅན། ལས་གསོག་པ་པོ་དང། རྣམ་སྨིན་མྱོང་བ་པོ་མ་ཡིན་པར་ཐལ། གང་ཟག་མ་ཡིན་པའི་ཕྱིར། འདོད་ན། སྐྱེ་བ་སྔ་མས་

― GTD003_Page_0111 ―

^{[མ་དཔེ་གཟིགས་ན་འདིར་གནོན།]}

[Full Size]

བསགས་པའི་ལས་ཀྱི་རྣམ་སྨིན་སྐྱེ་བ་ཕྱི་མས་མི་མྱོང་བར་ཐལ། སྔ་མས་ལས་མི་གསོག་པ་གང་ཞིག །ཕྱི་མས་རྣམ་སྨིན་མི་མྱོང་བའི་ཕྱིར། རྟགས་རེ་རེ་ནས་ཁས། གཞན་ཡང་། རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། ཁྱོད་དངོས་པོ་ཡིན་པར་ཐལ། བྱེ་བྲག་སྨྲ་བའི་ལུགས་ལ་དངོས་པོ་ཡིན་པའི་ཕྱིར། མ་གྲུབ་ན། བྱེ་བྲག་སྨྲ་བའི་ལུགས་ལ་དངོས་པོ་ཡིན་པར་ཐལ། བྱེ་བྲག་སྨྲ་བའི་ལུགས་ལ་ཡོད་པ་ཡིན་པའི་ཕྱིར། ཁྱབ་སྟེ། དེའི་ལུགས་ལ་ཡོད་པ་དང་དངོས་པོ་གཉིས་དོན་གཅིག་ཡིན་པའི་ཕྱིར། གོང་དུ་མ་ཁྱབ་ཟེར་ན། འོ་ན་བྱེ་བྲག་སྨྲ་བའི་ལུགས་ལ་དངོས་པོ་ཡིན་ན། དངོས་པོ་ཡིན་པས་ཁྱབ་པར་ཐལ། དེའི་ལུགས་ལ་དངོས་པོ་དང་དངོས་མེད་གཉིས་ཀ་ཡིན་པའི་མུ་གཅིག་མེད་པའི་ཕྱིར། དེར་ཐལ། དེའི་ལུགས་ལ་དངོས་པོ་དང་དངོས་མེད་གཉིས་ཕན་ཚུན་སྤང་འགལ་ཡིན་པའི་ཕྱིར། ཁོ་ན་རེ། བུམ་པ་ཁྱོད་དང་གཅིག་ཡིན་ན། ཀ་བ་ཁྱོད་དང་གཅིག་མ་ཡིན་པས་ཁྱབ་ཟེར་ན། བུམ་པ་ཡོད་པ་གང་ཞིག །མི་རྟག་པ་མི་རྟག་པ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཡོད་པ་གང་ཞིག །མི་རྟག་པ་མི་རྟག་པ་དང་གཅིག་ཡིན་པར་ཐལ། བུམ་པ་ཡོད་པ་གང་ཞིག །མི་རྟག་པ་མི་རྟག་པའི་ལྡོག་པ་ཡིན་པའི་ཕྱིར། མ་གྲུབ་ན། དེར་ཐལ། བུམ་པ་ཡོད་པ་གང་ཞིག སྐད་ཅིག་མ་མི་རྟག་པའི་མཚན་ཉིད་ཡིན་པའི་ཕྱིར། བྱས་པ་ལ་ཁོ་ན་རེ། བུམ་པ་ཡོད་པ་གང་ཞིག སྐད་ཅིག་མ་མི་རྟག་པ་དང་ཡིན་ཁྱབ་མཉམ་ཡིན་པར་ཐལ། བུམ་པ་ཡོད་པ་གང་ཞིག །སྐད་ཅིག་མ་མི་རྟག་པའི་མཚན་

― GTD003_Page_0112 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཡིན་པའི་ཕྱིར། འདོད་ན། བུམ་པའི་དགག་གཞི་ཆོས་ཅན། བུམ་པ་ཡོད་པ་གང་ཞིག །སྐད་ཅིག་མ་ཡིན་པར་ཐལ། མི་རྟག་པ་ཡིན་པའི་ཕྱིར། འདོད་ན། དེ་ཆོས་ཅན། བུམ་པ་ཡོད་པར་ཐལ། བུམ་པ་ཡོད་པ་གང་ཞིག །སྐད་ཅིག་མ་ཡིན་པའི་ཕྱིར། འདོད་མི་ནུས་ཏེ། བུམ་པའི་དགག་གཞི་ཡིན་པའི་ཕྱིར། དེ་ལ་ཁོ་ན་རེ། བུམ་པ་ཡོད་པ་གང་ཞིག །སྐད་ཅིག་མ་ཡིན་ན་བུམ་པ་ཡིན་པས་ཁྱབ་པར་ཐལ། དེ་མི་རྟག་པ་དང་ཡིན་ཁྱབ་མཉམ་མ་ཡིན་པའི་རྒྱུ་མཚན་ཡོད་པའི་ཕྱིར། འདོད་ན། སྤྱི་ཆོས་ཅན། དེར་ཐལ། དེའི་ཕྱིར། བྱས་པ་ལ་ཁོ་ན་རེ། བུམ་པ་ཡོད་པ་གང་ཞིག །སྐད་ཅིག་མ་ཡིན་ན་བུམ་པ་ཡིན་པས་ཁྱབ་པའི་ཕྱིར་ཏེ། བུམ་པ་ཡོད་པ་གང་ཞིག །བུམ་པ་ལས་གཞན་པའི་འདུ་བྱས་ཡིན་ན་གང་དྲན་དྲན་ཡིན་པས་ཁྱབ་པའི་ཕྱིར། དེར་ཐལ། བུམ་པ་ཡོད་པ་གང་ཞིག །ཀ་བ་ཡིན་ན་གང་དྲན་དྲན་ཡིན་པས་ཁྱབ་པའི་ཕྱིར། དེར་ཐལ། བུམ་པ་ཡོད་པ་དང་ཀ་བ་གཉིས་ཀའི་གཞི་མཐུན་པ་ཡིན་ན་གང་དྲན་དྲན་ཡིན་པས་ཁྱབ་པའི་ཕྱིར། གཞན་ཡང་། ཁྱོད་རང་ལྟར་ན་ཤེས་བྱ་ཆོས་ཅན། བུམ་པ་རྟག་པ་ཡིན་པར་ཐལ། བུམ་པ་ཡོད་པ་གང་ཞིག །དངོས་པོ་མ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། བུམ་པ་ཡོད་པ་གང་ཞིག །དངོས་པོ་མ་ཡིན་པར་ཐལ། བུམ་པ་ཡོད་པ་གང་ཞིག །རྟག་པ་ཡིན་པའི་ཕྱིར། རྟགས་དོན་གྱིས་ཁས། ཡང་ཁོ་ན་རེ། ཁྱོད་མ་ཡིན་པ་ཡོད་ན། ཁྱོད་མ་ཡིན་པ་བྱེ་བྲག་ཡིན་པས་ཁྱབ་ཟེར་ན། མེད་པ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། མེད་པ་མ་ཡིན་པ་མ་ཡིན་ཞིང། ཤེས་བྱ་ཡིན་པའི་གཞི་མཐུན་པ་དུ་

― GTD003_Page_0113 ―

^{[མ་དཔེ་གཟིགས་ན་འདིར་གནོན།]}

[Full Size]

མ་མ་གྲུབ་པའི་ཕྱིར། ཡང་ཁོ་ན་རེ། ཡོད་པ་གང་ཞིག །ཁྱོད་མ་ཡིན་པ་ཡོད་ན། ཁྱོད་མ་ཡིན་པ་བྱེ་བྲག་ཡིན་པས་ཁྱབ་ཟེར་ན། ཀ་བུམ་གཉིས་ཆོས་ཅན། དེར་ཐལ། དེའི་ཕྱིར། ཁོ་ན་རེ། ཡིན་པ་སྲིད་པའི་ཤེས་བྱ་གཞིར་བཞག་ཟེར་ན། བུམ་པ་དང་གཅིག་ཆོས་ཅན། དེར་ཐལ། དེའི་ཕྱིར། ཁ་ཅིག་གཞི་གྲུབ་ན་ཁྱོད་ཡིན་པས་ཁྱབ་ན། ཁྱོད་ཀྱི་ཡིན་པ་ཡོད་པས་ཁྱབ་ཟེར་ན། རང་དང་གཅིག་ཆོས་ཅན། དེར་ཐལ། དེའི་ཕྱིར། འདོད་ན། རང་དང་གཅིག་གི་ཡིན་པ་མེད་པར་ཐལ། བུམ་པ་དེ་ཡིན་དགོས་ལ་མ་ཡིན་པའི་ཕྱིར། མ་གྲུབ་ན། བུམ་པ་རང་དང་གཅིག་མ་ཡིན་པར་ཐལ། བུམ་པ་རང་དང་ཡིན་ཁྱབ་མཉམ་མ་ཡིན་པའི་ཕྱིར། མ་གྲུབ་ན། དེར་ཐལ། བུམ་པ་ཡིན་ན་རང་ཡིན་པས་མ་ཁྱབ་པ་གང་ཞིག །རང་ཡིན་ན་བུམ་པ་ཡིན་པས་མ་ཁྱབ་པའི་ཕྱིར། དང་པོ་གྲུབ་སྟེ། གསེར་བུམ་ཟངས་བུམ་གཉིས་པོ་དེ་ཡིན་པའི་ཕྱིར། གཉིས་པ་གྲུབ་སྟེ། ཤེས་བྱ་དེ་ཡིན་པའི་ཕྱིར། རང་གི་ལུགས་ལ་ཡིན་མིན་གཉིས་ཀྱི་ནང་ནས་མ་ཡིན་པ་དང། གཅིག་དང་ཐ་དད་གཉིས་ཀྱི་ནང་ནས་གཅིག་ཡིན་བྱས་པ་ལ་ཁོ་ན་རེ། གང་དྲན་དྲན་ཡིན་པར་ཐལ། མ་ཡིན་པ་དེ་ཡིན་པ་གང་ཞིག །ཡིན་པ་དེ་མ་ཡིན་པའི་ཕྱིར། གཞན་ཡང་མ་ཡིན་པ་ཡིན་པ་དང་། ཡིན་པ་གཉིས་ཀ་ཡིན་པར་ཐལ། དེ་གཉིས་གང་རུང་ཡིན་པ་གང་ཞིག །དེ་གཉིས་གང་རུང་ཡིན་ན་གཉིས་ཀ་ཡིན་དགོས་པའི་ཕྱིར། དང་པོ་ཁས། གཉིས་པ་གྲུབ་སྟེ། དེ་གཉིས་དོན་གཅིག་ཡིན་ཁྱབ་མཉམ་ཡིན་པའི་ཕྱིར། འདོད་ན། མ་ཡིན་པ་ཡིན་པ་དང། ཡིན་པ་ལས་

― GTD003_Page_0114 ―

^{[མ་དཔེ་གཟིགས་ན་འདིར་གནོན།]}

[Full Size]

ལོག་པ་གཉིས་ཀ་ཡིན་པར་ཐལ། མ་ཡིན་པ་ཡིན་པ་དང་། ཡིན་པ་མ་ཡིན་པ་གཉིས་ཀ་ཡིན་པའི་ཕྱིར། ཁྱབ་སྟེ། ཡིན་པ་མ་ཡིན་པ་དང། ཡིན་པ་ལས་ལོག་པ་གཉིས་ཀ་དོན་གཅིག་ཡིན་པའི་ཕྱིར། འདོད་ན། མ་ཡིན་པ་ཆོས་ཅན། ཡིན་པ་དང་། ཡིན་པ་ལས་ལོག་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར། གཞན་ཡང་འཐད་མི་འཐད་གཉིས་ཀྱི་ནང་ནས་མི་འཐད་པ་ཡིན་པར་ཐལ། ཡིན་མིན་གཉིས་ཀྱི་ནང་ནས་མ་ཡིན་པ་ཡིན་པའི་ཕྱིར། འདོད་ན། འཇིག་རྟེན་པའི་ཐ་སྙད་ཐམས་ཅད་དང་འགལ་རིགས་པར་ཐལ། གང་འཐད་པ་དེ་མི་འཐད་ལ། གང་མི་འཐད་པ་དེ་འཐད་ཅེས་ཁས་ལེན་རིགས་པའི་ཕྱིར། རྟགས་སོང་། ཡང་ཁོ་ན་རེ། ཁྱོད་དང་གཅིག་ཡིན་ན་ཡོད་པས་ཁྱབ་ཟེར་ན། རྟག་པར་རྟོགས་པའི་ཚད་མ་རྟག་པར་རྟོགས་པའི་ཚད་མ་ཆོས་ཅན། ཡོད་པར་ཐལ། ཁྱོད་དང་གཅིག་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། ཁྱོད་གཞི་གྲུབ་པའི་ཕྱིར། རྩ་བར་འདོད་ན། རྟག་པར་རྟོགས་པའི་ཚད་མ་རྟག་པར་རྟོགས་པའི་ཚད་མ་མེད་པར་ཐལ། རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། དངོས་པོར་རྟོགས་པའི་ཚད་མ་ཡོད་པར་ཐལ། དངོས་པོ་ཡིན་པའི་ཕྱིར། དེར་ཐལ། ཤེས་པ་ཡིན་པའི་ཕྱིར། ཁོ་ན་རེ། བུམ་པ་ཁྱོད་དང་གཅིག་ཡིན་ན། ཁྱོད་བུམ་པ་དང་གཅིག་ཡིན་པས་ཁྱབ་ཟེར་ན། མ་ཡིན་པ་ལས་ལོག་པ་བུམ་པ་མ་ཡིན་པ་ལས་ལོག་པ་ཆོས་ཅན། ཁྱོད་བུམ་པ་དང་གཅིག་ཡིན་པར་ཐལ། བུམ་

― GTD003_Page_0115 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཁྱོད་དང་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན་བུམ་པ་མ་ཡིན་པ་ལས་ལོག་པ་བུམ་པ་མ་ཡིན་པ་ལས་ལོག་པ་དང་གཅིག་ཡིན་པར་ཐལ། བུམ་པ་མ་ཡིན་པ་ལས་ལོག་པ་དང་གཅིག་གི་ཡིན་པ་འཇོག་རྒྱུ་ཡོད་པའི་ཕྱིར། མ་གྲུབ་ན། བུམ་པ་མ་ཡིན་པ་ལས་ལོག་པ་ཆོས་ཅན། ཁྱོད་དང་གཅིག་གི་ཡིན་པ་ཡོད་པར་ཐལ། ཁྱོད་གཞི་གྲུབ་པའི་ཕྱིར། ཡང་ཁོ་ན་རེ། ཤེས་བྱ་ཁྱོད་ཀྱི་བྱེ་བྲག་ཡིན་ན། ཁྱོད་ཤེས་བྱའི་སྤྱི་ཡིན་པས་ཁྱབ་ཟེར་ན། རྟག་པར་རྟོགས་པའི་ཚད་མ་མི་རྟག་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེའི་རྟགས་གྲུབ་པར་ཐལ། དེ་ལ་རྟགས་མ་གྲུབ་ཀྱི་ལན་བཏབ་པའི་ཚེ་ན་ཤེས་བྱ་རྟག་པར་རྟོགས་པའི་ཚད་མ་མི་རྟག་པའི་བྱེ་བྲག་ཡིན་པར་རྟགས་མ་གྲུབ་ཅེས་བརྩི་རིགས་པ་གང་ཞིག །ཤེས་བྱ་རྟག་པར་རྟོགས་པའི་ཚད་མ་མི་རྟག་པའི་བྱེ་བྲག་ཡིན་པའི་ཕྱིར། མ་གྲུབ་ན། དེར་ཐལ། ཤེས་པ་ཡིན་པའི་ཕྱིར། རྩ་བར་འདོད་མི་ནུས་ཏེ། གང་ཟག་གི་བདག་མེད་ཡིན་པའི་ཕྱིར། བྱས་པ་ལ་ཁོ་ན་རེ། རྗེས་དཔག་ཚད་མ་ཆོས་ཅན། མི་རྟག་པའི་བྱེ་བྲག་ཡིན་པར་ཐལ། ཤེས་པ་ཡིན་པའི་ཕྱིར། འདོད་ན། རྗེས་དཔག་ཚད་མ་ཆོས་ཅན། ཁྱོད་མ་ཡིན་ཞིང་མི་རྟག་པ་ཡིན་པའི་གཞི་མཐུན་པ་དུ་མ་གྲུབ་པར་ཐལ། ཁྱོད་མི་རྟག་པའི་བྱེ་བྲག་ཡིན་པའི་ཕྱིར། འདོད་ན། ཁྱོད་མ་ཡིན་ཞིང་མི་རྟག་པ་ཡིན་པའི་གཞི་མཐུན་པ་མེད་པར་ཐལ། མི་རྟག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། དེར་ཐལ། གཞི་གྲུབ་ན་རྗེས་དཔག་ཚད་མ་ཡིན་པས་ཁྱབ་པའི་ཕྱིར། དེར་ཐལ། རྗེས་དཔག་ཡོད་པས་ཁྱབ་པའི་ཕྱིར། ཁ་

― GTD003_Page_0116 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིག་གཅིག་དང་ཐ་དད་གཉིས་ཀྱི་ནང་ནས་གཅིག་ཏུ་ཁས་ལེན་མི་རིགས་པར་ཐལ། ཤེས་བྱ་གཅིག་དང་ཐ་དད་གཉིས་ཀྱི་ནང་ནས་གཅིག་ཏུ་ཁས་ལེན་མི་རིགས་པའི་ཕྱིར། དེར་ཐལ། ཤེས་བྱ་དུ་མར་ཁས་ལེན་པའི་ཕྱིར། དེར་ཐལ། ཤེས་བྱ་གྲངས་མེད་པར་ཁས་ལེན་པའི་ཕྱིར། དེར་ཐལ། སེམས་ཅན་གྲངས་མེད་པར་ཁས་ལེན་པའི་ཕྱིར། དེར་ཐལ། སེམས་ཅན་གྱི་སྐྱེ་བ་སྔ་མ་གྲངས་མེད་པར་ཁས་ལེན་དགོས་པའི་ཕྱིར། དེར་ཐལ། དེ་ལྟར་རིགས་པའི་ཡ་མཐའ་ཐུག་མེད་དུ་སྒྲུབ་པའི་ཕྱིར། གཞན་ཡང་འདིའི་སྐྱེ་བ་སྔ་མ་ཆོས་ཅན། གཅིག་ཁོ་ན་ཡིན་པར་ཐལ། གཅིག་ཡིན་པའི་ཕྱིར། འདོད་ན། དམ་བཅའ་བ་འདི་ཆོས་ཅན། ཁྱོད་ཀྱི་འཁོར་བའི་ཡ་མཐའ་ཡོད་པར་ཐལ། ཁྱོད་ཀྱིས་སྔར་འཁོར་བར་སྐྱེ་བ་གཅིག་ཁོ་ན་བླངས་པའི་གང་ཟག་ཡིན་པའི་ཕྱིར། དེར་ཐལ། ཁྱོད་ཀྱིས་སྔར་བླངས་པའི་འཁོར་བའི་སྐྱེ་བ་གཅིག་ཁོ་ན་ཡིན་པའི་ཕྱིར། བྱས་པ་ལ་ཁོ་ན་རེ། ཤེས་བྱ་ཆོས་ཅན། གཅིག་ཡིན་པར་ཐལ། མཚོན་བྱ་ཡིན་པའི་ཕྱིར་ཟེར་ན། ཐ་དད་ཆོས་ཅན། དེར་ཐལ། དེའི་ཕྱིར། འདོད་ན། དུ་མ་གཅིག་ཡིན་པར་ཐལ། ཐ་དད་གཅིག་ཡིན་པའི་ཕྱིར། གཉིས་གཅིག་ཡིན་པར་ཐལ། དུ་མ་གཅིག་ཡིན་པའི་ཕྱིར། འདོད་ན། བརྒྱ་སྟོང་སོགས་ཀྱང་གཅིག་ཡིན་པར་ཐལ་ལོ། །འདོད་ན། བརྒྱ་སྟོང་སོགས་ལ་མང་ཉུང་མེད་པར་ཐལ་ལོ། །དེ་རེ་རེ་ནས་གཅིག་ཡིན་པའི་ཕྱིར། ཁོ་ན་རེ། དེ་མི་འདྲ་བར་ཐལ། གཉིས་གཅིག་མ་ཡིན་པའི་ཕྱིར། དེར་ཐལ། མི་གཉིས་གཅིག་མ་ཡིན་པའི་ཕྱིར། མ་གྲུབ་ན། མི་གཉིས་གཅིག་མ་ཡིན་པར་ཐལ། མི་གཉིས་མི་གཅིག་མ་ཡིན་པའི་ཕྱིར་ཟེར་ན། འོ་ན་

― GTD003_Page_0117 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱོད་ང་དང་འདྲ་བར་ཐལ། མི་དུ་མ་མི་གཅིག་ཡིན་པའི་ཕྱིར། བྱས་པ་ལ་ཁོ་ན་རེ། མི་གཅིག་ཡིན་པར་ཐལ། མི་ཡོད་པའི་ཕྱིར་ཟེར་ན། འོ་ན་གཞི་གྲུབ་ན་མི་གཅིག་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། ཁྱི་རྒན་རྒྱ་བོ་ཆོས་ཅན། མི་གཅིག་ཡིན་པར་ཐལ། འདོད་པའི་ཕྱིར། འདོད་ན། དགེ་སློང་རྣམ་དག་གཅིག་ཡིན་པར་ཐལ། འདོད་པའི་ཕྱིར། འདོད་ན། ཆོས་འཁོར་སྐོར་མཁན་གཅིག་ཡིན་པར་ཐལ་ལོ། །གཞན་ཡང་ལྷན་ཅིག་མི་གནས་འགལ་གྱི་དངོས་འགལ་ཆོས་ཅན། གཅིག་ཡིན་པར་ཐལ། དངོས་སུ་གནོད་བྱ་གནོད་བྱེད་དུ་ཞུགས་པའི་སྒོ་ནས་རྒྱུན་ནུས་མཚུངས་སུ་འགྲོགས་སུ་མི་རུང་བའི་དངོས་པོ་དེ་ཁྱོད་ཀྱི་མཚན་ཉིད་ཡིན་པའི་ཕྱིར། འདོད་ན། དངོས་སུ་གནོད་བྱ་གནོད་བྱེད་དུ་ཞུགས་པའི་དངོས་པོ་གཅིག་ཡིན་པར་ཐལ་ལོ། །འདོད་ན། གནོད་བྱ་གནོད་བྱེད་གཅིག་ཡིན་པར་ཐལ་ལོ། །འདོད་ན། སྤང་བྱ་གཉེན་པོ་གཅིག་ཡིན་པར་ཐལ་ལོ། །འདོད་ན། འཁོར་འདས་གཅིག་ཡིན་པར་ཐལ་ལོ། །བྱས་པ་ལ་ཁོ་ན་རེ། གནོད་བྱ་གནོད་བྱེད་འགལ་བ་ཡིན་པར་ཐལ། ཐ་དད་གང་ཞིག། །གཞི་མཐུན་མི་སྲིད་པའི་ཕྱིར། དང་པོ་ཁས། གཉིས་པ་གྲུབ་སྟེ། དེའི་གཞི་མཐུན་ཡིན་ན་དེ་གཉིས་རེ་རེ་ནས་ཡིན་དགོས་པའི་ཕྱིར། འདོད་ན། དེ་ཆོས་ཅན། ཡིན་པ་མི་སྲིད་པའི་ཤེས་བྱ་ཡིན་པར་ཐལ། འགལ་བ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཡིན་ན་གང་དྲན་དྲན་ཡིན་པས་ཁྱབ་པར་ཐལ། ཁྱོད་ཡིན་པ་མི་སྲིད་པའི་ཤེས་བྱ་ཡིན་པའི་ཕྱིར། འདོད་ན། ཚ་རེག་དང་གྲང་རེག་

― GTD003_Page_0118 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་གནོད་བྱ་གནོད་བྱེད་མ་ཡིན་པར་ཐལ་ལོ། །འདོད་ན། མེ་དུ་གཉིས་རྒྱུ་འབྲས་མ་ཡིན་པར་ཐལ་ལོ། །འདོད་པའི་ཕྱིར། འདོད་མི་ནུས་ཏེ། རྟེན་བྱུང་འབྲེལ་ཡིན་པའི་ཕྱིར། དེར་ཐལ། རྟེན་བྱུང་འབྲེལ་གྱི་ཡིན་པ་ཡོད་པའི་ཕྱིར། དེར་ཐལ། འབྲེལ་བ་ཡིན་ན་བདག་གཅིག་འབྲེལ་ཡིན་པས་མ་ཁྱབ་པའི་ཕྱིར་ཏེ། རྒྱུ་འབྲས་ཐམས་ཅད་འབྲེལ་མེད་དོན་གཞན་མ་ཡིན་པའི་ཕྱིར་ཟེར་ན། འོ་ན་ཚ་རེག་གྲང་རེག་གཉིས་པོ་དེ་གནོད་བྱ་གནོད་བྱེད་ཡིན་ཀྱང་། གནོད་བྱ་གནོད་བྱེད་གཉིས་ཀ་མ་ཡིན་པའི་ཞིབ་ཆ་འབྱེད་རིགས་པར་ཐལ། འདོད་པའི་ཕྱིར། འདོད་ན། ལྷ་ལུང་དཔལ་རྡོར་དང་རྒྱལ་པོ་གླང་དར་མ་གཉིས་གསོད་བྱ་གསོད་བྱེད་ཡིན་པར་ཐལ། འདོད་པའི་ཕྱིར། འདོད་ན། འཁོར་བསྒྱུར་གསོ་སྦྱོང་འཕགས་དང་རྒྱལ་བུ་ང་ལས་ནུ་གཉིས་ཕ་བུ་ཡིན་པར་ཐལ། དེ་གཉིས་རྒྱུ་འབྲས་ཡིན་ཚུལ་ཡོད་པའི་ཕྱིར། འདོད་ན། ཕ་བུའི་ཡིན་པ་ཡོད་པར་ཐལ་ལོ། །འདོད་ན། ཕ་དང་བུ་མོའི་ཡིན་པ་ཡང་ཡོད་པར་ཐལ་ལོ། །འདོད་ན། བྱ་རོག་དང་འུག་པའི་ཡིན་པ་ཡོད་པ་དང། ཀ་བ་དང་བུམ་པའི་ཡིན་པ་ཡོད་པ་སོགས་ཡིན་པ་མི་སྲིད་པ་ཐམས་ཅད་ཀྱི་ཡིན་པ་ཡོད་པར་ཐལ། དེ་ཡོད་ཀྱང་དེ་གཉིས་ཀའི་ཡིན་པ་མེད་པས་ཞིབ་ཆ་འབྱེད་རིགས་པའི་ཕྱིར། རྟགས་ཁས། འཁོར་གསུམ། ཡང་ཁ་ཅིག །བརྒྱ་གཅིག་མ་ཡིན་པར་ཐལ། རྡུལ་ཕྲ་རབ་བརྒྱ་གཅིག་མ་ཡིན་པའི་ཕྱིར། མ་གྲུབ་ན། རྡུལ་ཕྲ་རབ་བརྒྱ་ཆོས་ཅན། ཁྱོད་རྡུལ་ཕྲ་རབ་གཅིག་ཡིན་པར་ཐལ། ཁྱོད་རྡུལ་ཕྲ་རབ་གཅིག་དང་བོངས་ཚོད་མཉམ་པའི་གཟུགས་གཅིག་ཡིན་པའི་ཕྱིར། མ་གྲུབ་ན། དེ་ཆོས་ཅན། རྡུལ་ཕྲ་རབ་གཅིག་ལས་ཆེ་བར་ཐལ།

― GTD003_Page_0119 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་དེ་དང་བོངས་ཚོད་མི་མཉམ་ཚུལ་ཡོད་པའི་ཕྱིར། འདོད་ན། རྡུལ་ཕྲ་རབ་ལས་ཆེ་བའི་རྡུལ་ཕྲ་རབ་ཡོད་པར་ཐལ། བུམ་པའི་རྡུལ་ཕྲ་རབ་ཐམས་ཅད་པོ་དེ་ཡིན་པའི་ཕྱིར། འདོད་ན། བུམ་པ་ལས་ཆེ་བའི་རྡུལ་ཕྲ་རབ་ཡོད་པར་ཐལ། རི་རབ་ཀྱི་ཚོགས་པའི་རྡུལ་ཕྲ་རབ་ཐམས་ཅད་པོ་དེ་ཡིན་པའི་ཕྱིར། དེར་ཐལ། དེ་བུམ་པའི་གོ་སར་མི་ཤོང་བའི་ཕྱིར། འདོད་ན། ཁང་པ་ཀ་བཞི་མ་གཅིག་ལས་ཆེ་བའི་མི་གཅིག་གླིང་འདིར་ཡོད་པར་ཐལ། གླིང་འདིའི་མི་ཐམས་ཅད་དེར་མི་ཤོང་བའི་ཕྱིར། གཞན་ཡང་ཟླ་བ་གཅིག་ལས་རིང་བའི་དུས་མཐའི་སྐད་ཅིག་མ་གཅིག་ཡོད་པར་ཐལ། ལོ་འདིའི་བརྩི་གཞིར་གྱུར་པའི་དུས་མཐའི་སྐད་ཅིག་མ་ཐམས་ཅད་པོ་དེ་ཡིན་པའི་ཕྱིར། དེར་ཐལ། དེའི་འགོ་ཚུགས་ནས་མཇུག་རྫོགས་པའི་བར་ལ་ཟླ་བ་བཅུ་གཉིས་འགོར་དགོས་པའི་ཕྱིར། དེར་ཐལ། ཟླ་བ་དང་པོའི་ཚེས་གཅིག་དང་དེ་གཉིས་གྲུབ་པ་དུས་མཉམ་གང་ཞིག །བཅུ་གཉིས་པའི་གནམ་སྟོང་དང་དེ་གཉིས་རྫོགས་པ་དུས་མཉམ་ཡིན་པའི་ཕྱིར། བྱས་པ་ལ། དེ་ཆོས་ཅན། ཁྱོད་གྲུབ་པ་དང་འགག་པ་གཉིས་ཀྱི་འགག་པ་སྔ་བར་ཐལ། བཅུ་གཉིས་པའི་གནམ་སྟོང་རྫོགས་ཚེ་འགགས་པ་གང་ཞིག །ཟླ་བ་དང་པོའི་ཚེས་གཅིག་གི་ཉིན་གྲུབ་དགོས་པའི་ཕྱིར་ཟེར་ན། འོ་ན། སྐྱེ་བ་དང་འཆི་བ་གཉིས་ཀྱི་སྔ་མ་འཆི་བ་ཡིན་པར་ཐལ། ཤི་མ་ཐག་སྐྱེ་བ་ལེན་དགོས་པའི་ཕྱིར། ཁྱབ་པ་འགྲིག །འདོད་མི་ནུས་ཏེ། མདོ་ལས། སྐྱེ་བའི་རྐྱེན་གྱིས་རྒ་ཤི་ཞེས་གསུངས་པའི་ཕྱིར། དེ་ལ་ཁོ་ན་རེ། ལོ་ཡང་དུས་མཐའི་སྐད་ཅིག་མའི་ཡུན་ཚད་ཅན་མ་ཡིན་པར་ཐལ། ཁྱོད་ཀྱི་སྒྲུབ་ཚུལ་འཐད་པའི་ཕྱིར།

― GTD003_Page_0120 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་མི་ནུས་ཏེ། དེ་སྐད་ཅིག་མ་ཡིན་པའི་ཕྱིར། ཁྱབ་སྟེ། སྐད་ཅིག་གིས་འཇིག་ཅེས་པའི་སྐད་ཅིག་དེ་དུས་མཐའི་སྐད་ཅིག་མ་ལ་བྱེད་པའི་ཕྱིར་ན་མ་ཁྱབ་སྟེ། ལོ་རྫོགས་པར་གྲུབ་ཟིན་པས་སྐད་ཅིག་མ་ལས་མི་སྡོད་པའི་ཕྱིར། བྱས་པ་ལ་ཁོ་ན་རེ། ལོ་རྫོགས་པར་གྲུབ་དུས་མེད་པར་ཐལ། ཟླ་བ་བཅུ་གཉིས་མཉམ་དུ་གྲུབ་དུས་མེད་པའི་ཕྱིར་ན། མ་ཁྱབ་སྟེ། ཟླ་བ་བཅུ་གཉིས་པའི་གནམ་སྟོང་གི་ཉིན་ལོ་རྫོགས་པར་གྲུབ་པའི་ཕྱིར། དེ་ལ་ཁོ་ན་རེ། བཅུ་གཉིས་པའི་གནམ་སྟོང་གི་དུས་ཆོས་ཅན། ཟླ་བ་བཅུ་གཉིས་ཅན་གྱི་ལོ་དེ་རྫོགས་པར་གྲུབ་ཟིན་པར་ཐལ། ལོ་རྫོགས་པར་གྲུབ་པ་གང་ཞིག །ལོ་ལ་ཟླ་བ་བཅུ་གཉིས་ཀྱི་བདག་ཉིད་ཅན་གྱིས་ཁྱབ་པའི་ཕྱིར། དེར་ཐལ། ཞག་གསུམ་མི་ལོངས་པའི་ལོ་གཅིག་མེད་པའི་ཕྱིར། གོང་དུ་འདོད་ན། དེའི་ཚེ་ཟླ་བ་བཅུ་གཉིས་རྫོགས་པར་གྲུབ་པར་ཐལ། དེའི་བདག་ཉིད་ཅན་གྱི་ལོ་རྫོགས་པར་གྲུབ་པའི་ཕྱིར། འདོད་ན། དུས་དེ་ཆོས་ཅན། ཟླ་བ་བཅུ་གཉིས་གྲུབ་པར་ཐལ། རྫོགས་པར་གྲུབ་པའི་ཕྱིར། འདོད་ན། དེ་དུས་ཟླ་བ་དང་པོ་ཡོད་པར་ཐལ་ལོ། །དེ་གྲུབ་པའི་ཕྱིར་ཟེར་ན། ཞག་གསུམ་མི་ལོངས་པའི་ལོ་གཅིག་ཡོད་པར་ཐལ། ཞག་གསུམ་མ་ལོན་པར་ལོ་གཉིས་ལོན་པ་ཡོད་པའི་ཕྱིར། དེར་ཐལ། དེའི་གནམ་སྟོང་ལ་སྐྱེས་པའི་བྱིས་པ་དེ་ལོ་གསར་གྱི་ཚེས་གཅིག་གི་ཚེ་ལོ་གཉིས་ལོན་པའི་ཕྱིར། ཡང་ཁོ་ན་རེ། བུམ་པའི་ཚོགས་པ་ན་ཡོད་པའི་རྡུལ་ཕྲ་རབ་ཐམས་ཅད་རྡུལ་མ་ཡིན་པར་ཐལ། དེ་ཐམས་ཅད་ཅེས་པ་ཚོགས་པའི་སྤྱི་ཙམ་ལ་བྱེད་པའི་ཕྱིར། དེར་ཐལ། ཤེས་བྱ་ཐམས་ཅད་རྟག་པ་ཡིན་ཚུལ་ཡོད་པའི་ཕྱིར་ཟེར་ན། དེ་མི་འཐད་པར་ཐལ། དེ་ཐམས་ཅད་ཅེས་པ་ཚོགས་པའི་

― GTD003_Page_0121 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་རགས་པ་ལའང་བྱེད་པ་མི་འཐད། ཚོགས་ཙམ་གྱི་ཆའམ་འབྲེལ་བ་ལ་བྱེད་ན་བཏགས་ཡོད་དུ་འགྱུར་བའི་ཕྱིར། དང་པོ་མ་གྲུབ་ན། དེ་ཐམས་ཅད་བུམ་པ་ཡིན་པར་ཐལ། འདོད་པའི་ཕྱིར། འདོད་ན། དེ་ཐམས་ཅད་ལ་ཞབས་མཆུ་སོགས་ཡོད་པར་ཐལ། འདོད་པའི་ཕྱིར། འདོད་ན། འདིའི་ལུས་ཀྱི་རྡུལ་ཕྲ་རབ་ཐམས་ཅད་ཡན་ལག་ལྔ་ལྡན་ཡིན་པར་ཐལ་ལོ། །འདོད་ན། གང་ཟག་ལ་ཡོད་ན། གང་ཟག་ཐམས་ཅད་ལ་ཡོད་པས་ཁྱབ་པར་ཐལ། གང་ཟག་ཐམས་ཅད་ཅེས་པ་སྤྱི་ལྡོག་ཙམ་ལ་བྱེད་པའི་ཕྱིར། འདོད་ན། གང་ཟག་ཐམས་ཅད་ལ་ཡན་ལག་གྲངས་མེད་ཡོད་པར་ཐལ། གང་ཟག་ལ་དེ་ཡོད་པའི་ཕྱིར། དེར་ཐལ། གང་ཟག་གི་མ་ཡིན་པའི་ལུས་ཀྱི་ཡན་ལག་མེད་པའི་ཕྱིར། གོང་དུ་འདོད་ན། དེ་ཐམས་ཅད་ལ་སྡོམ་པ་ཡོད་པར་ཐལ། གང་ཟག་ལ་དེ་ཡོད་པའི་ཕྱིར། དེར་ཐལ། གང་ཟག་གི་རྒྱུད་ཀྱིས་བསྡུས་པའི་སྡོམ་པ་ཡོད་པའི་ཕྱིར། དེར་ཐལ། དམ་བཅའ་བ་འདིའི་རྒྱུད་ཀྱི་སྡོམ་པ་དེ་དེ་ཡིན་པའི་ཕྱིར། དེར་ཐལ། དེ་སྐྱེས་བུའི་ཤེས་རྒྱུད་ཀྱིས་བསྡུས་པའི་སྡོམ་པ་ཡིན་པའི་ཕྱིར། རང་ལུགས་ལ་ཡོད་མེད་གཉིས་ཀྱི་ནང་ནས་ཡོད་པ་ཡིན་བྱས་པ་ལ། མི་འཐད་པར་ཐལ། མེད་པ་ཡིན་པའི་ཕྱིར། དེར་ཐལ། བུམ་པ་མེད་པར་རྟོགས་པའི་ཚད་མ་ཡོད་པའི་ཕྱིར་ཟེར་ན་མ་ཁྱབ་སྟེ། བུམ་པ་མེད་པ་ཡོད་པའི་ཕྱིར། གཞན་ཡང་བུམ་པ་མེད་པ་ཆོས་ཅན། མེད་པར་ཐལ། ཆད་མཐའ་ཡིན་པའི་ཕྱིར། དེར་ཐལ། སྐུར་འདེབས་ཀྱི་མཐའ་ཡིན་པའི་ཕྱིར། དེར་ཐལ། བུམ་པ་མེད་པར་བལྟ་བའི་ལྟ་བ་སྐུར་འདེབས་ཀྱི་ལྟ་བ་ཡིན་པའི་ཕྱིར། ཁྱབ་སྟེ། བུམ་པ་མེད་

― GTD003_Page_0122 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བལྟ་བ་དེའི་ཞེན་ཡུལ་གང་ཞིག །དེའི་ཞེན་ཡུལ་ལ་སྐུར་འདེབས་ཀྱི་མཐའ་གཅིག་དགོས་པའི་ཕྱིར། དེར་ཐལ། དེའི་ཞེན་ཡུལ་འཇོག་རྒྱུ་ཡོད་པའི་ཕྱིར། གོང་དུ་འདོད་ན། དེ་ཆོས་ཅན། ཚད་མའི་གཞལ་བྱ་མ་ཡིན་པར་ཐལ། ལོག་ཤེས་ཀྱི་འཛིན་སྟངས་ཡིན་པའི་ཕྱིར། ཁྱབ་སྟེ། འགལ་བ་ལ་མི་འཁྲུལ་བའི་ཚད་མ་མེད་པའི་ཕྱིར། གཞན་ཡང་ཡོད་པ་ཁོ་ན་ཡིན་པར་ཐལ། ཡོད་པ་ཡིན་པའི་ཕྱིར། འདོད་ན། མེད་པ་མེད་པར་ཐལ། ཡོད་པ་ཁོ་ན་ཡིན་པའི་ཕྱིར། འདོད་ན། མེད་པ་ཆོས་ཅན། ཡོད་པར་ཐལ། མདུན་གྱི་གཞི་འདིར་ཡོད་པའི་ཕྱིར། མ་གྲུབ་ན། མདུན་གྱི་གཞི་འདིར་མེད་པ་ཡོད་པར་ཐལ། རྒྱ་གར་རྡོ་རྗེ་གདན་དེ་དེ་ཡིན་པའི་ཕྱིར། བྱས་པ་ལ་ཁོ་ན་རེ། མདུན་གྱི་གཞི་འདིར་མེད་པ་ཡོད་ཀྱང་མེད་པ་མདུན་གྱི་གཞི་འདིར་མེད་ཟེར་ན། འོ་ན་མདུན་གྱི་གཞི་འདིར་མེད་པའི་བུམ་པ་ཡོད་པར་ཐལ། འདོད་པའི་ཕྱིར། འདོད་ན། མདུན་གྱི་གཞི་འདིར་ས་བོན་ལས་མ་སྐྱེས་པའི་མྱུ་གུ་ཡོད་པར་ཐལ་ལོ། །འདོད་ན། འདིར་མ་བརྩིགས་པའི་ཕོ་བྲང་ནང་དུ་མ་སྐྱེས་པའི་རྒྱལ་པོ་འཁོར་བཅས་ཡོད་པར་ཐལ་ལོ། །གཞན་ཡང་མེད་པ་ཆོས་ཅན། ཁྱོད་རི་རབ་དང་བོངས་ཚོད་མཉམ་པར་ཐལ། རི་རབ་ཀྱི་རྩེ་མོ་ན་ཁྱོད་ཀྱི་རྩེ་མོ་ཡོད་པ་གང་ཞིག །རྒྱ་མཚོའི་གཏིང་དུ་ཁྱོད་ཀྱི་མཇུག་མ་ཡོད་པའི་ཕྱིར། གཞན་ཡང་ཡོད་པ་མ་ཡིན་པར་ཐལ། གཞལ་བྱ་མ་ཡིན་པའི་ཕྱིར། དེར་ཐལ། རང་མཚན་མ་ཡིན་པ་གང་ཞིག །སྤྱི་མཚན་མ་ཡིན་པའི་ཕྱིར། རྟགས་གཉིས་པ་མ་གྲུབ་ཟེར་ན། འོ་ན། རྟོག་པའི་སྣང་ཡུལ་ཡིན་པར་ཐལ། སྤྱི་མཚན་ཡིན་པའི་ཕྱིར། འདོད་ན། ཆོས་གང་ཡང་རུང་བའི་དོན་སྤྱི་ཡིན་པར་ཐལ།

― GTD003_Page_0123 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོག་པའི་སྣང་ཡུལ་ཡིན་པའི་ཕྱིར། བྱས་པ་ལ་ཁོ་ན་རེ། ཤེས་བྱ་ཆོས་ཅན། དེར་ཐལ། དེའི་ཕྱིར་ཟེར་ན། འོ་ན་ཁྱོད་རང་ལ་ཤེས་བྱ་ཆོས་ཅན། ཁྱོད་སྣང་ཡུལ་དུ་བྱེད་པའི་རྟོག་པ་ཡོད་པར་ཐལ། ཁྱོད་རྟོག་པའི་སྣང་ཡུལ་ཡིན་པའི་ཕྱིར། འདོད་ན། དེ་མི་འཐད་པར་ཐལ། རྟོག་པ་སྤྱི་ལྡོག་མ་དེའི་སྣང་ཡུལ་ཡིན་པའང་མི་འཐད། རྟོག་པ་བྱེ་བྲག་པ་དེའི་སྣང་ཡུལ་ཡིན་པའང་མི་འཐད་པའི་ཕྱིར། དང་པོ་མ་གྲུབ་ན། ཤེས་བྱ་སྣང་ཡུལ་དུ་བྱེད་པའི་རྟོག་པ་དང་། ནམ་མཁའ་སྣང་ཡུལ་དུ་བྱེད་པའི་རྟོག་པ་གཉིས་དོན་གཅིག་ཡིན་པར་ཐལ། དེ་གཉིས་ཀ་ལ་རྟོག་པ་སྤྱི་ཙམ་པ་མ་གཏོགས་འཇོག་རྒྱུ་མེད་པའི་ཕྱིར། འདོད་ན། དེ་འདྲ་བའི་རྟོག་པ་མངོན་གྱུར་དུ་རྒྱུད་ལ་ལྡན་པའི་གང་ཟག་གི་ཡིན་པ་མེད་པར་ཐལ། དེ་ལ་སྤྱི་ལྡོག་གིས་ཁྱབ་པའི་ཕྱིར། འདོད་ན། སྐྱེ་འཕགས་སུའི་རྒྱུད་ནའང་མེད་པར་ཐལ་ལོ། །གོང་གི་རྟགས་གཉིས་པ་མ་གྲུབ་ན། དེ་ལ་རྟོག་པ་བྱེ་བྲག་པ་གཅིག་མེད་པར་ཐལ། ཤེས་བྱ་འཛིན་པའི་རྟོག་པ་དེ་མ་ཡིན་པ་གང་ཞིག །ཆོས་གཞན་འཛིན་པའི་རྟོག་པ་གཅིག་མེད་པའི་ཕྱིར། དང་པོ་མ་གྲུབ་ན། ཁྱོད་དེའི་སྣང་ཡུལ་མ་ཡིན་པར་ཐལ། དེའི་ཞེན་ཡུལ་ཡིན་པའི་ཕྱིར། རྟགས་ཁས། ཡང་རྟོག་པ་དེ་ཁྱོད་ལ་འཁྲུལ་བར་ཐལ། ཁྱོད་རྟོག་པ་དེའི་སྣང་ཡུལ་ཡིན་པའི་ཕྱིར། ཡང་རྟོག་པ་དེ་ཁྱོད་ལ་མ་འཁྲུལ་བར་ཐལ། དེ་རྟོག་པ་དོན་མཐུན་གང་ཞིག །ཁྱོད་དེའི་ཞེན་ཡུལ་ཡིན་པའི་ཕྱིར། རྟགས་གཉིས་པ་མ་གྲུབ་ན། ཆོས་གཞན་འཛིན་པའི་རྟོག་པ་མེད་པར་ཐལ། བུམ་པ་རྟོགས་པའི་རྟོག་པ་གཅིག་མེད་བདག་མེད་རྟོགས་པའི་རྟོག་པ་གཅིག་ཀྱང་མེད་པས་དེའི་ཞེན་ཡུལ་ངོས་

― GTD003_Page_0124 ―

^{[མ་དཔེ་གཟིགས་ན་འདིར་གནོན།]}

[Full Size]

བཟུང་ནས། དེ་དང་ཤེས་བྱ་གཉིས་འདྲེས་རུང་དུ་འཛིན་ཚུལ་མེད་པའི་ཕྱིར། ཡང་ཁོ་ན་རེ། ཡོད་མེད་གཉིས་ཀྱི་ནང་ནས་མེད་པ་མ་ཡིན་པར་ཐལ། མིག་ཤེས་ཚད་མས་མངོན་སུམ་དུ་རྟོགས་ཤིང། རྣ་ཤེས་ཚད་མས་མངོན་སུམ་དུ་རྟོགས་པ་གང་ཞིག །དེ་ལྟར་མངོན་སུམ་དུ་མཐོང་བཞིན་དུ་སྐུར་བ་འདེབས་མི་རུང་བའི་ཕྱིར། ཟེར་ན། འོ་ན་གཟུགས་ཀྱི་སྐྱེ་མཆེད་དང་སྒྲའི་སྐྱེ་མཆེད་གཉིས་ཀ་ཡིན་པར་ཐལ། མིག་ཤེས་ཀྱི་གཟུང་བྱ་དང་རྣ་ཤེས་ཀྱི་མཉན་བྱ་གཉིས་ཀ་ཡིན་པའི་ཕྱིར་ཟེར་ན། མ་ཁྱབ་སྟེ། མིག་ཤེས་ཀྱི་གཟུང་བྱ་ལ་གཟུགས་ཀྱི་སྐྱེ་མཆེད་ཀྱིས་མ་ཁྱབ་པ་གང་ཞིག །རྣ་ཤེས་ཀྱི་མཉན་བྱ་ཡང་སྒྲ་དང་དོན་གཅིག་མ་ཡིན་པའི་ཕྱིར། དང་པོ་གྲུབ་སྟེ། དམ་བཅའ་བ་འདིས་བ་ལང་དཀར་ཟལ་མངོན་སུམ་དུ་རྟོགས་པའི་ཕྱིར། ཁྱབ་སྟེ། དེ་མངོན་སུམ་དུ་རྟོགས་བྱེད་མངོན་སུམ་བཞི་ལས་དབང་མངོན་ཡིན་གྱི། མངོན་ཤེས་ལྔ་ལྟ་བུའི་དམིགས་བསལ་ཅན་མ་གཏོགས་ཚུར་མཐོང་གི་ཡིད་མངོན་ལ་སྣང་ལ་མ་ངེས་པས་ཁྱབ་པའི་ཕྱིར། གཉིས་པ་གྲུབ་སྟེ། འདོན་བཞིན་པ་མ་ཡིན་པའི་གང་ཟག་གི་རྒྱུད་ཀྱི་མངོན་རྟོགས་རྒྱན་རྣ་ཤེས་ཀྱི་མཉན་བྱ་མ་ཡིན་པ་གང་ཞིག །སྒྲ་ཡིན་པའི་ཕྱིར། དང་པོ་གྲུབ་སྟེ། དེ་ཐོས་པའི་རྣ་ཤེས་ཚད་མ་མེད་པའི་ཕྱིར། དེར་ཐལ། དབང་མངོན་གྱིས་ཡུལ་དུས་མཉམ་པ་འཛིན་པ་གང་ཞིག །དེས་དེ་ཐོས་བཞིན་པ་ཡིན་ན། སྒྲ་དེ་ཡང་གྲགས་བཞིན་པ་ཡིན་དགོས་པའི་ཕྱིར། དེར་ཐལ། དེའི་ཚོགས་པའི་རྡུལ་རྣམས་ལུས་ཀྱི་ཚོགས་པ་དང་གོ་ས་གང་དུ་ཡོད་པ་སོགས་ཤིན་ཏུ་དཔྱད་དཀའ་བའི་ཕྱིར། གཉིས་པ་མ་གྲུབ་ན། དེ་ཆོས་ཅན། སྒྲ་ཡིན་པར་ཐལ། ཐར་ལམ་ཕྱིན་ཅི་མ་ལོག་པར་སྟོན་པའི་རྗོད་བྱེད་རྣམ་དག་ཡིན་པའི་ཕྱིར་རོ། །སྨྲས་པ།

― GTD003_Page_0125 ―

^{[མ་དཔེ་གཟིགས་ན་འདིར་གནོན།]}

[Full Size]

གཞུང་དོན་ཟབ་མོའི་ལུས་ཀྱི་རྩལ་རྫོགས་ཀྱང། །རིགས་ལམ་འཕྲུལ་གྱི་མཆེ་སྡེར་མི་ལྡན་པ། །རྒོལ་ངན་གླང་པོ་འཇོམས་པར་མི་ནུས་པས། །ཚིག་འཁྲིའི་སྦྱོར་བ་འགའ་ཟུང་གཏམ་དུ་སྨྲས། །ཁྱད་པར་གཞི་དང་མ་འབྲེལ་སྤྱི་ལྡོག་མ། །རྣམ་པ་གཞི་མེད་སྐྱེས་བུའི་དོན་མིན་ལོ། །ངེས་བཟུང་མེད་ལ་མེད་ཅེས་སྨྲ་བ་ཡང། །མི་རུང་མིང་ཙམ་དབུ་མའི་འཕྲུལ་འདེགས་ཡིན། །ཞེས་ཉམས་དགའ་བའི་ཚུལ་དུ་སྨྲས་པའོ། །ཞེས་པ་འདི་ནི་འདྲེན་མཆོག་དམ་པ་མཆོག་སྤྲུལ་རིན་པོ་ཆེ༸གུང་ཐང་འཇམ་པའི་དབྱངས་བཀྲ་ཤིས་འཁྱིལ་གྱི་ཁྲིར་བཞུགས་སྐབས། རིགས་པའི་བརྡར་ཤ་ཆོད་པའི་ཕྱིར་བསྡུས་གྲྭ་པ་རྣམས་ལ་སྲོད་ཆོས་སུ་གནང་བ་ལས་བསྡུས་གྲྭ་པ་རྣམས་ཀྱིས་ཟིན་བྲིས་སུ་བགྱིས་པའོ། །འདིས་ཀྱང་རྒྱལ་བའི་བསྟན་པ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །རིགས་པའི་མཆེ་སྡེར་མེད་པ་སྤང་སེང་དང། །གཞུང་ལུགས་རལ་བ་བྱི་བའི་འདམ་སེང་གིས། །ཐུབ་བསྟན་གངས་རི་སྐྱོང་བར་མི་ནུས་པས། །ལུང་རིགས་གཉིས་འཛོམ་གངས་ཀྱི་སེང་གེར་མཛོད། །

གྲུབ་མཐའ་བཞིའི་འདོད་ཚུལ་སོགས་དྲིས་ལན་སྣ་ཚོགས་སྐོར།

― GTD003_Page_0127 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་མཐའ་བཞིའི་འདོད་ཚུལ་སོགས་དྲིས་ལན་སྣ་ཚོགས་ཀྱི་སྐོར་ཞལ་ལུང་བདུད་རྩིའི་ཐིགས་འཕྲེང་ཞེས་བྱ་བ་བཞུགས་སོ། །

― GTD003_Page_0128 ―

^{[མ་དཔེ་གཟིགས་ན་འདིར་གནོན།]}

[Full Size]

ཡེ་ཤེས་གཟིགས་པ་དག་པས་སྐལ་བ་བཞིན། །ཡོངས་སུ་བཀྲི་མཛད་སྟོན་པ་རྡོ་རྗེ་འཆང། །ལེགས་གསུང་དེ་འཛིན་ཚོགས་བཅས་ལ་བཏུད་ནས། །བསྟན་པའི་རིམ་པ་ཇི་བཞིན་དགོད་པར་བྱ། །དེའང་གྲུབ་མཐའ་བཞི་དང་མདོ་སྔགས་གཉིས་ལ་གོང་འོག་གི་རིམ་པ་དང་ཕན་ཚུན་འགལ་མེད་གྲོགས་སུ་འགྲོ་བར་ཡོངས་སུ་གྲགས་ཀྱང་རྣ་བར་བྱང་བ་ཙམ་ལས་དོན་དུ་དམན་མཆོག་གི་རིམ་པ་ཇི་ལྟར་ཡིན་ངེས་པ་གཏིང་ཚུགས་པ་དཀའ་བར་སྣང་སྟེ། གྲུབ་མཐའ་བཞི་གའང་ཁུངས་རྒྱལ་བའི་བཀའ་ལ་བརྟེན་པར་ཁྱད་མེད། རིགས་པས་ལེགས་པར་དཔྱད་དེ་འདི་ལས་དམན་ལྷག་ཏུ་སོང་ན་རྟག་ཆད་ཀྱི་མཐར་ལྟུང་བས། གཞི་ལམ་འབྲས་བུའི་གནས་ཚུལ་འདི་ཁོ་ནར་གནས་སོ་སྙམ་དུ་བློ་ངོར་ཐག་ཆོད་དེ་རང་གི་གྲུབ་པའི་མཐའ་བཞག་པ་དེ་ཁོ་

― GTD003_Page_0129 ―

^{[མ་དཔེ་གཟིགས་ན་འདིར་གནོན།]}

[Full Size]

ན་དབུ་མའི་ལམ་སྲོལ་དུ་འདོད་ཅིང། གཞན་རྣམས་མཐར་ལྷུང་ཚུལ་གྱི་དགག་པ་བྱེད་པའང་འདྲ་བས་གཞན་ཟེར་ཙམ་གྱི་རྗེས་སུ་འབྲང་ན་བཞི་ག་རང་ལུགས་སུ་ཁས་ལེན་པའམ། རེ་རེ་ལ་གཞན་གསུམ་གསུམ་གྱིས་དགག་པ་བརྗོད་པས་གང་ཡང་ཁས་ལེན་མི་རུང་བར་འགྱུར་རོ། །རྒྱལ་བའི་བཀའ་ལ་བརྟེན་ནས་དམན་མཆོག་འབྱེད་དོ་སྙམ་ན་དེར་གདུལ་བྱའི་དབང་གིས་སྣ་ཚོགས་གསུངས་ཏེ་གྲུབ་མཐའ་བཞིར་འགྲོ་བའང་དེའི་སྟོབས་ཀྱིས་ཡིན་པས། དེ་ཉིད་དྲང་ངེས་འབྱེད་པའི་གཞི་དང་བསྒྲུབ་བྱར་འགྱུར་གྱི་སྒྲུབ་བྱེད་དུ་མི་འགྱུར་རོ། །གཞན་དག་ན་རེ། རྒྱལ་བ་ཉིད་ཀྱི་བཀའ་ལ་དྲང་ངེས་འབྱེད་པར་ལུང་བསྟན་པ་ཞིག་གི་རྗེས་སུ་འབྲང་ངོ་སྙམ་ན་དེ་ལྟར་བྱེད་དགོས་མོད་ཀྱང་དེ་ལྟར་ལུང་བསྟན་པའི་ཤིང་རྟ་ཆེན་པོ་གཉིས་སུ་ཡོད་ལ་

― GTD003_Page_0130 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་གཉིས་ཀྱིས་ཀྱང་དབུ་སེམས་ཀྱི་ལུགས་སོ་སོར་འགྲེལ་པས་གང་གི་རྗེས་སུ་འབྲང་། གལ་ཏེ་འཕགས་པ་ཐོགས་མེད་ཀྱི་སེམས་ཙམ་དུ་བཀྲལ་བ་གདུལ་བྱའི་དབང་ཡིན་གྱི་དགོངས་པ་ཀླུ་སྒྲུབ་དང་མཐུན་པས་དབུ་མའི་ལུགས་ལ་བརྟེན་ནོ་སྙམ་ན། འོ་ན་ཀླུ་སྒྲུབ་ཀྱིས་དབུ་མར་བཀྲལ་བ་གདུལ་བྱའི་དབང་ཡིན་གྱི་དགོངས་པ་སེམས་ཙམ་དུ་གནས་སོ་ཞེས་སྨྲས་ན་ཅིས་འགོག །བྱང་ཆུབ་སེམས་འགྲེལ་སོགས་སེམས་ཙམ་དུ་བཀྲལ་བ་མང་ལ། རྩ་ཤེ་དང་བཞི་བརྒྱ་པ་སོགས་ཀྱང་སེམས་ཙམ་པའི་ལུགས་སུ་དེའི་སློབ་དཔོན་ཕལ་ཆེར་བཞེད་དོ། །ཡང་གལ་ཏེ་ཤིང་རྟ་ཆེན་པོ་གཉི་ག་ལུང་བསྟན་མོད་ཀྱང་ཀླུ་སྒྲུབ་ཀྱིས་རྟག་ཆད་གཉི་གའི་མཐའ་མ་ལུས་པར་བཀག་སྟེ་བསྟན་པའི་སྙིང་པོ་མཐར་ཐུག་གསལ་བར་བྱེད་པར་མདོ་རྒྱུད་དུ་མ་ལས་ལུང་བསྟན་པ་ལྟ་བུ་འཕགས་པ་ཐོགས་མེད་ལ་མི་འབྱུང་ཞིང། རྒྱུད་བརྟག་གཉིས་སུ་བསྟན་པའི་རིམ་པར་མས་རིམ་ནས་སློབ་ཚུལ་གསུངས་པའི་ཚེ་དབུ་མ་པའི་ལུགས་གོང་མར་བྱས་པ་སོགས་ཀྱིས་དབུ་མ་པ་མཆོག་ཡིན་པར་འགྲུབ་བོ་ཞེ་ན་དེ་ཡིན་དུ་ཆུག་ཀྱང་གྲུབ་མཐའ་གཞན་གསུམ་གའི་གོ་རིམ་གང་གི་སྒོ་ནས་འབྱེད། དོན་སྨྲས་གཟུགས་ཤེས་གཉི་ག་བདེན་གྲུབ་ཏུ་འདོད་པ་འཁོར་ལོ་དང་པོ་དང་མཐུན་ཡང། སེམས་ཙམ་པས་ཤེས་པ་བདེན་གྲུབ་དང་ཕྱི་དོན་གཏན་མེད་དུ་འདོད་པ་རྟག་ཆད་གཉི་གའི་མཐར་ལྷུང་སྟེ་བདེན་པ་གཉིས་

― GTD003_Page_0131 ―

^{[མ་དཔེ་གཟིགས་ན་འདིར་གནོན།]}

[Full Size]

ཆར་ལས་ཉམས་པ་དང་། ཆོས་མངོན་པ་དང་ཤེར་མདོ་གཉི་གའི་དགོངས་པ་ལས་ཉམས་པར་འཕགས་པ་ལྷ་དང་ཟླ་བས་གསུངས། ལེགས་ལྡན་སོགས་ཀྱིས་ཀྱང་སེམས་ཙམ་པ་དང་སྒོ་མ་བསྟུན་པར་མདོ་སྡེ་པ་དང་སྒོ་བསྟུན་པས་སེམས་ཙམ་པ་ལས་དོན་སྨྲ་མཆོག་ཏུ་མི་འགྱུར་རམ་བྱེ་སྨྲས་རང་རིག་མི་འདོད་ལ། མདོ་སྡེ་པས་རང་གིས་རང་མྱོང་བའི་འཛིན་རྣམ་ཡན་གར་བ་ཞིག་བཞག་པ་ལྟ་བུ་སྐབས་དུ་མར་བྱེ་སྨྲའི་ལུགས་དེ་དོན་དང་མཐུན་པའང་མང་བས་དེ་གཉིས་ཀྱང་གང་མཆོག་ཏུ་བྱེད། སྐབས་འགར་གཅིག་ཤོས་ལས་དམན་ཡང་སྐབས་འགར་གཅིག་ཤོས་ལས་མཆོག་ཏུ་འགྲོ་བས་སྒོ་རེ་རེ་ཙམ་གྱིས་སྤྱིར་བཏང་གི་མཆོག་དམན་དབྱེ་མི་ནུས་ལ། ཟེར་ལུགས་ཙམ་འོག་མ་བཟང་ཡང་དོན་ལ་མཆོག་ཏུ་མ་སོང་བའང་ཡོད་དེ་འོག་ཏུ་འཆད་དོ། །འོན་ཏེ་བདག་མེད་ཀྱི་ལྟ་བའི་སྒོ་ནས་འབྱེད་དོ་སྙམ་ན་ལྟ་བའི་གོ་བ་གཏིང་ཚུགས་པ་ཞིག་ལ་དེ་ལྟར་ཡིན་མོད་ཀྱང་རང་ཅག་ལྟ་བུ་ལ་གང་གི་ལྟ་བ་མཆོག་ཡིན་པའང་གྲུབ་མཐའི་མཆོག་དམན་གྱི་སྒོ་ནས་ཚུར་བསྒྲུབ་དགོས་པས་སྒྲུབ་བྱེད་བསྒྲུབ་བྱ་དང་མཚུངས་སོ། །དེས་ན་དོན་ཕྲ་རགས་སྣ་ཚོགས་པ་ཞིག་གི་སྟེང་ནས་དཔྱད་ན་གཅིག་གིས་གཅིག་ལ་ངེས་པ་བསྐྱེད་ནས་སྤྱི་བབ་ཀྱི་དོན་རྟོགས་པ་ཞིག་འབྱུང་སྟེ། དཔེར་ན་བྱིས་པ་ཆུང་ངུ་ནར་སོན་པ་ན་བྱ་བ་མཐའ་དག་ལ་ཤུགས་གོང་འཕེལ་དུ་འགྲོ་བ་ཞིག་

― GTD003_Page_0132 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་གི །གཞན་རྣམས་ལ་རང་སོར་གནས་ནས་བྱ་བ་གཅིག་ཁོ་ནར་ཤུགས་རྒྱས་ལུགས་མེད་པ་བཞིན། ནང་གི་བློའི་མཐུ་འང་སྤྱོད་འཇུག་ལས། དེ་ལ་འཇིག་རྟེན་ཕལ་པ་ནི། །རྣལ་འབྱོར་འཇིག་རྟེན་གྱིས་གནོད་ཅིང། །རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །གསུངས་པ་བཞིན་རིམ་གྱིས་ཁྱད་ཞུགས་པ་ན་ཡུལ་གང་ལ་དཔྱོད་པ་ཞུགས་པའི་ཚེའང་གོང་མས་འོག་མ་ཟིལ་གྱིས་གནོན་པ་ཞིག་འབྱུང་ངོ་། །དམ་པ་གོང་མ་རྣམས་གྲུབ་མཐའི་རྣམ་གཞག་མཛད་པའང་འདི་གསུངས་པ་ཡིན་མོད་ཀྱང། ལུགས་རང་རང་གི་འདོད་ཚུལ་སོ་སོར་སྡེ་ཚན་དུ་བྱས་པ་ལས། གཞི་རེ་རེར་མཚོན་ཏེ་གྲུབ་མཐའ་སོ་སོའི་འཇོག་མཚམས་ཕྲ་རགས་དོད་ཚུལ་ལྷན་དུ་སྦྱར་ཏེ་མ་གསུངས་ལ། བློ་དམན་པས་རང་སྟོབས་ཀྱིས་གོང་འོག་ལྷུ་བསྒྲིག་དཀའ་བས། འདིར་གཞི་ལམ་འབྲས་བུའི་ཆ་སོ་སོར་གོང་འོག་གི་ལུགས་སྲོལ་ཤན་སྦྱར་ཏེ་གོ་བ་ཚོལ་ལུགས་ཀྱི་ཕྱོགས་ཙམ་བཤད་པར་བྱའོ། །བཅིང་གྲོལ་ཐམས་ཅད་ཀྱི་གཞི་བདག་ལ་བྱེད་དགོས་པས་དེར་ཕྱི་ནང་ཐམས་ཅད་མི་མཐུན་ཞིང། ལྷག་པར་ནང་པ་རྣམས་དེའི་འཇོག་མཚམས་སྒྲུབ་ཕྱོགས་ཐལ་ཆེས་ན་ཆོས་ཐམས་ཅད་བདག་མེད་པའི་ཕྱག་རྒྱར་འགལ་བ་དང་། དགག་ཕྱོགས་ཐལ་ཆེས་ན་ལས་འབྲས་ཀྱི་གཞི་སྟོར་བས་མངོན་མཐོའི་སྒོའང་ཁེགས་པར་འགྱུར་རོ་སྙམ་ནས་ཤིན་ཏུ་ཟོན་བྱས་ཏེ་རང་རང་གི་བློ་དང་འཚམ་པའི་འཇོག་མཚམས་རེ་བྱེད་དོ། །འདི་ཐམས་ཅད་ཀྱིས་གང་ཟག་འཇོག་ཚུལ་རྟེན་སའི་ཁུངས་

― GTD003_Page_0133 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་མདོ་ལས། ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་འོ། །ཞེས་པ་འདི་ལ་བྱེད་པ་ཁྱད་མེད་ཀྱང་ཚིག་གི་ནུས་པ་འདོན་ལུགས་མི་འདྲ་སྟེ། དོན་སྨྲ་ཕལ་ཆེར་ཕུང་པོ་རྣམས་ཞེས་པ་ཡ་གྱལ་གྱི་ཕུང་པོ་ལྔ་ལ་བྱེད་དགོས་ཤིང། ཡ་གྱལ་ལ་བརྟེན་ནས་ཚོགས་པ་འཇོག་དགོས་པས་ལུང་གི་དོན་དེ་ལྟ་བུའི་ཕུང་པོའི་ཚོགས་ཙམ་དེ་ཉིད་གང་ཟག་ཏུ་འཇོག་དགོས་པ། ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་ཞེས་པ་འདིས་གསལ་བར་བསྟན་ཟེར། སེམས་ཙམ་པ་རྣམས་གང་ཟག་གི་བཏགས་དོན་རྙེད་རྒྱུ་ཞིག་ཡོད་དགོས་ལ། ཕུང་པོ་ལས་ལོགས་སུ་ཡོད་ཚུལ་མི་སྲིད་པས་ཕུང་པོའི་ནང་འདི་ནས་ཚོལ་ཞིང་རྙེད་དགོས་པ། ཕུང་པོ་རྣམས་བརྟེན་ནས། །ཞེས་པའི་དོན་ཡིན་ལ། དེའི་ནང་ནས་བཙལ་བའི་ཚེ་གཞན་རྣམས་གང་ཟག་གི་མཚན་གཞིར་མི་རུང་བས། ཀུན་གཞི་ཁོ་ན་འཇོག་དགོས་པ་ལུང་དེའི་དོན་རིགས་པས་སྒྲུབ་ཚུལ་ཡིན་ཟེར། རང་རྒྱུད་པ་རྣམས་གང་ཟག་ཕུང་པོ་རྣམས་ལ་བརྟེན་ནས་འཇོག་པར་གསུངས་པས། འཇོག་བྱེད་གཞན་ཞིག་དགོས་པ་ཤུགས་ལ་ཐོན་ཅིང། དེ་གང་ལ་བྱེད་ན་རྟོག་པ་ཙམ་གྱིས་འཇོག་མི་ནུས་པས། ཡུལ་གྱི་རང་མཚན་ལ་མ་འཁྲུལ་བའི་བློ་གནོད་མེད་ཅིག་ལ་སྣང་བའི་དབང་གིས་འཇོག་དགོས། འོན་ཀྱང་དེར་སྣང་ཙམ་གྱིས་མི་ཆོག་པར་གདགས་གཞི་དེའི་ངོས་ནས་ཀྱང་

― GTD003_Page_0134 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་དགོས་ཏེ། དེའི་ངོས་ནས་གྲུབ་མ་གྲུབ་ལ་མི་ལྟོས་ན་མིའི་ཕུང་སོགས་འགྲོ་བ་གཞན་གྱི་གདགས་གཞིར་ཐལ་བའི་སྐྱོན་འབྱུང་བས། འདིར་ཕུང་པོ་རྣམས་བརྟེན་ཞེས་པ་དེ་ལ་དགག་ཕྱོགས་ནས་འཇོག་བྱེད་གཞན་ལ་ལྟོས་མེད་དུ་མ་གྲུབ་པ་དང། སྒྲུབ་ཕྱོགས་གདགས་གཞི་རང་གི་ངོས་ནས་ཀྱང་གྲུབ་དགོས་པས་གོ་དོན་གཉིས་ཡོད་ཅེས་ཟེར་རོ། །ཐལ་འགྱུར་བས་མདོ་ལུང་དེ་ཉིད་ཀྱི་སྒོ་ནས་དེ་ཐམས་ཅད་འགོག་པར་བྱེད་དེ། དེའང་དོན་སྨྲ་ལ། ཁྱོད་ཀྱིས་ཕུང་པོའི་ཚོགས་ཙམ་དེ་ཉིད་ཕུང་པོར་འཇོག་པ་མི་འཐད་པར་ཐལ། ཕུང་པོའི་ཚོགས་ཙམ་དེ་ལ་བརྟེན་ནས་གང་ཟག་འཇོག་དགོས་པའི་ཕྱིར། ཁྱབ་སྟེ། ལྷས་སྦྱིན་ལ་བརྟེན་ནས་ལྡང་བ་ལ་ལྷས་སྦྱིན་ལས་གཞན་ཞིག་དགོས་ཀྱི། རང་ཉིད་རང་ཉིད་ལ་བརྟེན་ནས་ལྡང་ཚུལ་མེད་པའི་ཕྱིར། ཕུང་པོ་ལ་བརྟེན་ནས་གང་ཟག་འཇོག་ཀྱང་ཕུང་པོའི་ཚོགས་ཙམ་ལ་བརྟེན་ནས་གང་ཟག་འཇོག་པར་མདོ་ལས་མ་གསུངས་ཟེར་ནའང་མི་འཐད་དེ། ཡན་ལག་ཚོགས་ཙམ་ལ་བརྟེན་ནས་ཤིང་རྟ་འཇོག་པར་མདོ་ལས་དངོས་སུ་གསུངས་པ་གང་ཞིག །དེ་གཉིས་དཔེ་དོན་འབྱོར་དགོས་པའི་ཕྱིར། གཞན་ཡང་ཤིང་རྟའི་ཡན་ལག་ཚོགས་ཙམ་ཤིང་རྟ་ཡིན་པར་ཐལ། ཕུང་པོའི་ཚོགས་ཙམ་གང་ཟག་ཡིན་པའི་ཕྱིར། འདོད་ན་བྱ་བྱེད་གཅིག་ཏུ་ཐལ་བའམ་མདོ་དང་དངོས་སུ་འགལ་བར་འགྱུར་རོ། །སེམས་ཙམ་པ་ལ། ཁྱོད་ཀྱིས་ཕུང་པོར་ཆ་ཕྱེ་སྟེ་ནང་ནས་རྣམ་ཤེས་གཅིག་པུ་གང་ཟག་གི་མཚན་གཞིར་འཇོག་པ་མི་རིགས་པར་ཐལ། མདོ་ལས་དེའི་མཚན་གཞི་སྟོན་པ་ན་ཆ་མ་ཕྱེ་བར་ཕུང་པོ་

― GTD003_Page_0135 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་ཞེས་ཁྱད་མེད་དུ་གསུངས་པ་དང་འགལ་བའི་ཕྱིར། ཕུང་པོ་རྣམས་ཞེས་གསུངས་ཀྱང་དེའི་ནང་ནས་རིགས་པས་བཙལ་བ་ན་འོས་མེད་ཀྱིས་ཀུན་གཞིའི་སྟེང་དུ་འབབ་པས། སྤྱི་སྒྲ་བྱེ་བྲག་ལ་གཙོ་བོར་སྦྱར་ཏེ་ཀུན་གཞི་བསྟན་པ་ཡིན་ཟེར་ནའང་མདོ་དང་འགལ་ཏེ། མདོར། དེ་ཉིད་གང་ཟག་ཏུ་མ་གསུངས་པར་དེ་ལ་བརྟེན་ནས་གང་ཟག་འཇོག་པར་གསུངས་པའི་ཕྱིར། ཞེས་འགོག་གོ །རང་རྒྱུད་པ་ལ། ཁྱོད་ཀྱིས་གང་ཟག་གདགས་གཞིའི་ཕུང་པོ་རྣམས་ཀྱི་ངོས་ནས་གྲུབ་པར་འདོད་པ་མི་འཐད་པར་ཐལ། མདོ་ལས་གདགས་གཞིའི་ཕུང་པོ་རྣམས་ལ་བརྟེན་ནས་འཇོག་པར་གསུངས་པའི་ཕྱིར། ཁྱབ་སྟེ། གདགས་གཞིའི་ངོས་ནས་བཞག་ན་གདགས་གཞིའི་ཕྱོགས་སུ་གཏོགས་ཀྱི། བཏགས་ཆོས་སུ་མི་འགྲོ་བའི་ཕྱིར། དཔེར་ན་ཚུར་རི་ཕར་རི་ལ་ལྟོས་པས་ཕར་རིའི་ངོས་ནས་གྲུབ་ལུགས་མེད་པ་དང་། རིང་པོ་ཐུང་ངུ་ལ་ལྟོས་པས་ཐུང་ངུའི་ངོས་ནས་གྲུབ་ལུགས་མེད་པ་བཞིན་ཡིན་པའི་ཕྱིར། ༈ སྒྱུ་མའི་དཔེའང་མདོ་ལས་མང་དུ་འབྱུང་བས་གྲུབ་མཐའ་བཞི་ཀས་ཁས་ལེན་ཡང་དཔེར་བཀོད་ཚུལ་མི་འདྲ་སྟེ། བྱེ་སྨྲ་རྣམས་སྒྱུ་མའི་རྟ་གླང་སོགས་སྐབས་དེར་ཡོད་ཀྱང་སྤྲུལ་པ་བསྡུས་པ་ན་མེད་འགྲོ་བ་བཞིན། ཚེ་འདིའི་ལུས་ལོངས་སྤྱོད་རྣམས་འཆི་བའི་ཚེ་འདོར་བའི་མི་རྟག་པ་རགས་པའམ་རྒྱུན་གྱི་མི་རྟག་པའི་དཔེར་བྱེད། མདོ་སྡེ་པ་རྣམས་སྤྲུལ་པའི་བཀོད་པ་རྣམས་སྐད་ཅིག་སྐད་ཅིག་གིས་འགྱུར་བ་བཞིན་ཕྱིས་འབྱུང་གི་རྒྱུ་ལ་མི་ལྟོས་པར་སྐྱེས་ཙམ་ནས་འཇིག་

― GTD003_Page_0136 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཆོས་ཅན་གྱི་སྐད་ཅིག་ལ་མི་རྟག་པའི་དཔེར་བྱེད། སེམས་ཙམ་པ་རྣམས་རྡེའུ་ཤིང་གི་ངོས་ནས་རྟ་གླང་དུ་མེད་ཀྱང་སྔགས་རྫས་ཀྱིས་བསླད་པའི་ཤེས་པའི་སྣང་ཆ་ཙམ་ཡིན་པ་ལྟར་ཕྱི་རོལ་དོན་གྱི་ངོས་ནས་མ་གྲུབ་པར་ནང་སེམས་ཀྱི་བདག་ཉིད་ཙམ་དུ་གནས་པའི་དཔེར་བྱེད། དབུ་མ་པ་རྣམས་བློ་ལ་སྣང་བའི་དབང་གིས་བཞག་པ་མ་གཏོགས་བདེན་པར་མ་གྲུབ་པའི་དཔེར་བྱེད། འོན་ཀྱང་རང་རྒྱུད་པས་ཆོས་རྣམས་གདགས་གཞིའི་ངོས་ནས་གྲུབ་པར་འདོད་པས་དཔེའི་སྐབས་སུ་སྒྱུ་མའི་རྟ་གླང་ཡང་སྤྲུལ་གཞིའི་ངོས་ནས་གྲུབ་པར་འདོད་དེ། དེ་སྤྲུལ་གཞིའི་ངོས་ནས་སྣང་མི་དགོས་ན་སྤྲུལ་གཞི་མེད་པར་སྔགས་རྫས་ཀྱིས་བསླད་པ་ཁོ་ནས་རྟ་གླང་དུ་སྣང་བར་ཐལ་བའི་སྐྱོན་འབྱུང་ཞེས་ཟེར་རོ། །ཐལ་འགྱུར་བས་དེ་ཉིད་རྟ་གླང་དུ་སྣང་བ་དེའི་ངོས་ནས་གྲུབ་པའི་དབང་གིས་མིན་གྱི། བློས་དེ་ལ་རྟ་གླང་དུ་བཏགས་མ་བཏགས་ཀྱི་དབང་གིས་ཡིན་ཏེ། དཔེར་ན་རི་བོང་རྭ་འཛིན་རྟོག་པས་རི་བོང་གི་རྭ་འཛིན་ཡང་མོ་གཤམ་གྱི་བུ་མི་འཛིན་པ་ཡུལ་ཡོད་མེད་ཀྱི་དབང་མ་ཡིན་པར་རྟོག་པས་དེར་བཏགས་མ་བཏགས་ཙམ་གྱི་དབང་གིས་ཡིན་པ་བཞིན་ནོ། །དེར་མ་ཟད་རྡེའུ་ཤིང་གི་ངོས་ནས་རྟར་སྣང་བ་སྐྱེད་པ་ཡིན་ན་མིག་མ་བསླད་ཀྱང་དེར་སྣང་དགོས་ལ། བསླད་པའི་ཚེའང་རྟ་ཁོ་ནར་སྣང་དགོས་ཀྱི་སྤྲུལ་གཞི་དེ་ཉིད་གླང་དུ་སྣང་བ་འབྱུང་མི་སྲིད་པར་འགྱུར་ཏེ། བློས་བཏགས་པ་ཁོ་ནས་མི་ཆོག་པར་སྤྲུལ་གཞི་ཁོ་རང་གི་ངོས་ནས་རྟར་སྣང་བའི་ཕྱིར་རོ། །སྒྲུབ་ཚུལ་འདི་དག་ནི་འཇུག་པར། དེ་ཉིད་དུ་འདི་ཇི་ལྟར་སྐྱེ་མེད་

― GTD003_Page_0137 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང། །མོ་གཤམ་བུ་ལྟར་གང་ཕྱིར་འཇིག་རྟེན་གྱི། །མཐོང་བའི་ཡུལ་དུ་མི་འགྱུར་མ་ཡིན་པ། །དེ་ཡི་ཕྱིར་ན་སྨྲ་འདི་མ་ངེས་པའོ། །ཞེས་པའི་སྒྲུབ་ཚུལ་ཡིན་ནོ། །༈ གཞན་སྡེ་ལའང་མངོན་མཐོའི་ལམ་ཙམ་ཡོད་ལ། འོན་ཀྱང་དེའི་ནང་ནས་རྒྱང་འཕེན་ནི་ད་ལྟ་རང་ལ་དངོས་སུ་སྣང་བའི་མིའི་འགྲོ་བ་འདི་ཙམ་མ་གཏོགས་ཁམས་གོང་མ་དང་ལྷ་ལ་སོགས་པའི་མངོན་མཐོ་གཞན་དང་། སྐྱེ་བ་སྔ་ཕྱི་སོགས་དབང་པོའི་མངོན་སུམ་གྱི་ཡུལ་ལས་འདས་པ་རྣམས་མེད་དོ་ཞེས་སྐུར་བ་འདེབས་ལ། དེའི་རྒྱུ་མཚན་གྱིས་རྗེས་དཔག་ཚད་མའང་མི་འདོད་དོ། །དེས་ན་བློའི་མཐུ་ཤིན་ཏུ་ཞན་པས་གྲུབ་མཐའི་ཐ་ཤལ་དུ་རང་སྡེར་མ་ཟད་གཞན་སྡེ་ཕལ་ཆེར་ཡང་འདོད་དོ། །དེ་བཞིན་དུ་ནང་པའི་གྲུབ་མཐའ་བཞིས་ངེས་ལེགས་ཀྱི་ལམ་གཏན་ལ་འབེབས་པ་ཡིན་ཀྱང་བྱེ་སྨྲ་བློའི་མཐུ་ཤིན་ཏུ་ཞན་པས་ངེས་ལེགས་ཀྱི་ཡོན་ཏན་མཐར་ཐུག་པ་ཕལ་མོ་ཆེ་བློར་མ་ཤོང་བས་སྣང་ཚོད་ཙམ་གཙོ་བོར་བྱས་ཏེ་བསམ་གྱིས་མི་ཁྱབ་པའི་གནས་ཕལ་ཆེར་ལ་སྐུར་པ་འདེབས་པར་བྱེད་དོ། །དེའང་སྨོན་ལམ་དང་། ཏིང་ངེ་འཛིན་དང། དབང་འབྱོར་བའི་དབང་གིས་སྐྱེ་བ་ལེན་ཚུལ་རྣམས་དང་། མ་རིག་བག་ཆགས་ཀྱི་ས་དང། ཟག་མེད་ལས་ཀྱི་དབང་གིས་སྐྱེ་བ་ལེན་ཚུལ་སོགས་བློར་མ་ཤོང་བས་སྐྱེ་བ་ཞིག་ལེན་ཕྱིན་ལས་ཉོན་གྱི་དབང་གིས་སྐྱེ་དགོས་པར་འདོད། དེའི་རྒྱུ་མཚན་གྱིས་རྒྱལ་བུ་གཞོན་ནུ་དོན་གྲུབ་ལྟ་བུའང་སོ་སྐྱེར་འདོད་ལ། སངས་རྒྱས་ཀྱི་སྐུ་གཟུགས་ཀྱང་སྡུག་བདེན་དུ་

― GTD003_Page_0138 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་པ་དང་། ཕུང་པོའི་བདུད་བཅོམ་པ་ལ་ལྷག་མེད་དུ་འདའ་དགོས་པ་དང་། སྐྱེ་བ་ལེན་སའི་ཞིང་ཡང་ལས་ཉོན་གྱིས་བསྐྱེད་པ་ཁོ་ན་མ་གཏོགས་དག་ཞིང་མི་འདོད། རྒྱུ་མཚན་སྔ་མ་དང་ཕྱི་མཐའ་གཏུགས་པ་མེད་པར་བཞུགས་པ་བློས་མ་འཆུན་པའི་དབང་གིས་སངས་རྒྱས་དང་དགྲ་བཅོམ་རྣམས་ལྷག་མེད་དུ་འཕོས་པ་ན་བེམ་རིག་གཉི་ག་རྒྱུན་ཆད་པར་འདོད། གྲངས་མེད་གསུམ་དུ་ཚོགས་བསགས་པའི་འབྲས་བུ་ལོ་འགའ་ལས་མི་གནས་པ་རྒྱུ་འབྲས་གོ་ལོག་ཏུ་སོང་བ་ཡིན་ལ་སངས་རྒྱས་རང་ཉིད་མ་བཞུགས་ཀྱང་དེས་གདུལ་བྱ་གཞན་སྨིན་གྲོལ་ལ་བཀོད་པ་དང་། དེས་ཀྱང་གཞན་དང་གཞན་སྨིན་གྲོལ་ལ་བཀོད་པས་མཛད་པ་རྒྱུན་མི་འཆད་པ་ཡིན་ཞེས་སྐྱོན་སྤོང་ཞིག་བྱེད་མོད་ཀྱང་། ཕྱི་མ་ཕྱི་མས་རྒྱུ་གཞི་ནས་སྒྲུབ་དགོས་པས་སངས་རྒྱས་སྔ་མའི་མཛད་པ་ཉི་ཚེ་བ་ཙམ་དུ་ཐལ་བའི་སྐྱོན་སྤོང་མི་ནུས་པས་བསམ་མི་ཁྱབ་ཀྱི་གནས་ལ་སྐུར་འདེབས་སུ་སོང་བ་ཡིན། ཆོས་ཐམས་ཅད་དུས་གཅིག་ཏུ་བློ་གཅིག་གིས་རྟོགས་ཚུལ་བློས་མ་འཆུན་པས་རྣམ་མཁྱེན་མི་འདོད་ཅིང། འོ་ན་བདག་ཅག་གི་སྟོན་པ་ཐམས་ཅད་མཁྱེན་པ་མ་ཡིན་པར་ཐལ་ལོ་ཟེར་བ་ལ། མི་ཤེས་པའི་རྒྱུ་བཞི་སོགས་སྤངས་ཏེ་སྒྲིབ་བྱེད་མེད་པས་གང་ལ་དགོངས་པ་གཏད་ཀྱང་མཁྱེན་ཐུབ་པ་ཐམས་ཅད་མཁྱེན་པར་འགྲོ་ཚུལ་ཡིན་ཞེས་སྐྱོན་སྤོང་བྱེད་ཀྱང་། ཤེས་བྱ་མཐའ་ཡས་པ་ལ་སོ་སོར་རིམ་པ་བཞིན་དགོངས་པ་གཏད་དགོས་ན་ཐམས་ཅད་མཁྱེན་ཚུལ་ཞིག་མི་སྲིད་པའི་སྐྱོན་སོ་ན་གནས་སོ། །ཞིང་གཞན་གྱི་སྟོན་པ་རྣམས་ཕྱིའི་སྐྱེ་

― GTD003_Page_0139 ―

^{[མ་དཔེ་གཟིགས་ན་འདིར་གནོན།]}

[Full Size]

མཆེད་དུ་སྨྲ་བའང་སྐྱེ་བའི་བཀོད་པ་སྣ་ཚོགས་སུ་སྟོན་ཚུལ་བློས་མ་འཆུན་པའི་དབང་གིས་ཡིན་པས། དེ་ལྟར་ན་ཞིང་འདིའི་བདག་ཅག་གི་སྟོན་པ་གང་ཟག་ཏུ་ཁས་བླངས་པའང་ཞེན་ཕྱོགས་ཙམ་དུ་ཟད་དེ། ཞིང་གཞན་ན་ཡོད་པའི་བྱེ་སྨྲ་རྣམས་ཞིང་དེའི་སྟོན་པ་གང་ཟག་ཡིན་ལ། འདི་དག་ཕྱིའི་སྐྱེ་མཆེད་ཡིན་ཟེར་བས་དེ་གཉིས་ལ་བདེན་རྫུན་གྱི་ཁྱད་འོང་དོན་མེད་དོ། །མདོར་ན་ཀུན་སློང་སྐྱོན་ཅན་མ་ཡིན་པ་མ་གཏོགས་སངས་རྒྱས་ཀྱི་སྐུ་གསུང་ཐུགས་མཛད་པ་དང་བཅས་པ་རྒྱ་ཆེ་བའི་རིགས་བློར་མ་ཤོང་བས་འདོད་ཚུལ་ཕལ་ཆེར་སྐུར་འདེབས་ཁོ་ནར་འགྲོ། ༈ དོན་སྨྲས་ཕྱི་དོན་འདོད་ལ། སེམས་ཙམ་པས་མི་འདོད་པས་དེ་ལ་འོག་མའི་ལུགས་བཟང་བ་དང་། སེམས་ཙམ་པས་ཀུན་བཏགས་རྟོག་པས་བཏགས་ཙམ་དུ་འདོད་ལ་རང་རྒྱུད་པས་མི་འདོད་པས་དེའི་ཆ་ནས་སེམས་ཙམ་པའི་ལུགས་བཟང་བར་མི་འགྲོའམ་སྙམ་ན་མ་ཡིན་ཏེ། དོན་སྨྲ་དང་སེམས་ཙམ་གཉིས་ཕྱི་དོན་ཡོད་མེད་རྩོད་པའི་ཞེ་ཕུགས་ནི། བུམ་པ་ལྟ་བུ་སེམས་ཀྱི་བག་ཆགས་སྨིན་པ་སོགས་གང་ལའང་མ་ལྟོས་པར་རྡུལ་ཕྲ་རབ་བསགས་པའི་སྟེང་ནས་རྟོག་པའི་ཞེན་གཞིར་ཚུགས་ཐུབ་ཏུ་ཚུར་ལིང་ངེར་གྲུབ་རྒྱུ་ཡོད་པ་ཞིག་ལ་བསམས་པ་ཡིན་པས་དེ་ཐལ་འགྱུར་བའི་ལུགས་ལའང་མེད་པས་དོན་ལ་བསམ་ན་སེམས་ཙམ་པ་བདེན་ཞིང། སློབ་དཔོན་དབྱིག་གཉེན་ལྟ་བུ་མདོ་སྡེ་པ་ལས་སེམས་ཙམ་པར་གྱུར་པའི་ཚེ་དགག་བྱ་དེ་ཁེགས་ནས་བློ་ཁ་ཇེ་མཐོར་སོང་བ་ཡིན་ནོ། །སེམས་ཙམ་པས་ཀུན་བཏགས་

― GTD003_Page_0140 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོག་པས་བཏགས་ཙམ་ཡིན་ཟེར་མོད་ཀྱང་། ཙམ་སྒྲས་རྒྱུ་ལས་སྐྱེས་པ་དང་འཕགས་པའི་མཉམ་གཞག་ཡེ་ཤེས་ཀྱི་ཡུལ་དུ་གྲུབ་པ་ཙམ་ཁེགས་པ་མ་གཏོགས་ཡུལ་སྟེང་ན་གྲུབ་རྒྱུ་ཞིག་ཡོད་པ་ཁེགས་པར་མ་གོ །རང་རྒྱུད་པས་ཙམ་སྒྲའི་ནུས་པ་ཡུལ་སྟེང་ན་གྲུབ་རྒྱུ་ཞིག་ཡོད་པ་ཁེགས་ཚུལ་ཤར་ཏེ་ཀུན་བཏགས་དེར་ཁས་མ་བླངས་པ་ཡིན་པས་དེ་གཉིས་ཀྱང་ཕྱི་མ་བློ་ཁ་མཐོ་བའི་རྟགས་ཡིན་ནོ། ། ༈ མདོ་སྔགས་ལ་གཞོལ་ཚུལ་དྲིས་པའི་ལན་ནི། དཔེར་ན་ཐང་དམའ་མོ་ནས་རི་རྩེར་འགྲོ་བའང་ཐང་སྟོད་ཇེ་མཐོ་དང་རི་ཞོལ་ཇེ་དམའ་དགོས་ཀྱི། དེ་མིན་ན་འགྲོ་ལུགས་མེད་པ་ལྟར། མདོ་སྔགས་ལ་གཞོལ་ཚུལ་ཡང་མདོའི་བཤད་པ་ཇེ་ཟབ་ཇེ་མཐོར་སོང་སྟེ། ཐེག་པ་འོག་མར་ཉོན་མོངས་ལམ་གྱི་གྲོགས་སུ་འགྲོ་བར་གསུངས་པ་མེད་ཀྱང་། ལྷག་བསམ་བསྐུལ་བར་བྱང་སེམས་ལ་དེ་གྲོགས་སུ་འགྲོ་བ་ཡོད་པར་གསུངས། ལུས་ངག་གི་བདུན་ཡང་གནང་སྟེ། སྔགས་ཀྱི་ཆགས་པ་ལམ་དུ་བྱེད་ཚུལ་དང་མངོན་སྤྱོད་ལྟ་བུ་མིན་ཡང་དེར་ཕྱོགས་པའི་རྟགས་ཡིན། མདོ་གཞན་ལ་སྦས་དོན་ཟེར་བ་མེད་ཀྱང་ཤེར་མདོར་ཡོད་པ་དེ་མདོའི་ཡང་རྩེ་ཡིན་པས་སྔགས་ཀྱི་ཚུལ་བཞི་སོགས་ལ་ཕྱོགས་པའི་རྟགས་ཡིན། ཚུལ་བཞིའང་དང་པོ་ཚིག་དོན་ནས་ཡར་འཁྲིད་པ་བྱིས་པ་ཆུང་ངུར་མཛུབ་རྩེ་བསྟན་ནས་མིག་ཁྲིད་དེ་ཟླ་བ་སྟོན་པ་དང་འདྲ་བར་གསུངས་པས། ཡིག་སྤྱི་གཉིས་མདོ་ལ་ཚང་ཡོད་པས་དེ་སྔགས་ལ་འཁྲིད་བྱེད་ཡིན་པ་དེས་ཀྱང་ཤེས། ཡང་སྔགས་ཀྱི་ཁྱད་ཆོས་གཙོ་བོ་ལྷའི་རྣལ་འབྱོར་དང་རླུང་འདུལ་ཐབས་གཉིས་ཡིན་ལ། མདོ་རྣམས་དེའི་

― GTD003_Page_0141 ―

^{[མ་དཔེ་གཟིགས་ན་འདིར་གནོན།]}

[Full Size]

སྔ་མར་གཞོལ་ཚུལ་བྱེ་སྨྲས་སངས་རྒྱས་ཀྱི་གཟུགས་སྐུ་བེམ་པོར་འདོད་ཅིང་ལྷག་མེད་ཀྱི་ཚེ་བེམ་རིག་རྒྱུན་ཆད་པས་ད་ལྟ་སྐྱབས་སུ་སོང་ཚེ་སྨོན་ལམ་གྱི་མཐུས་བྱིན་རླབས་འཇུག་པས། ཤི་བ་ལ་ཡང་བྱིན་རླབས་ཡོད། །ཅེས་པ་ལྟར་ཡིན་གྱི། ཡུལ་དངོས་དེ་མེད་པར་འདོད། མདོ་སྡེ་པས་གཟུགས་སྐུ་སངས་རྒྱས་སུ་འདོད་པས་སྔ་མ་ལས་དགའ་འང་སྐུ་དེ་བསྒོམ་པ་མ་བཤད། འོན་ཀྱང་འདུལ་བ་ལུང་ལས་སྟོན་པའི་སྐུ་བྲི་བར་གསུངས་པ་འདི་གཉི་གས་བྱེད་ལ། དེ་བསྒོམ་པའི་དམིགས་རྟེན་ཡིན་པས་རྟེན་འབྲེལ་གྱི་སྒོ་ཙམ་ཞིག་ཡོད། ཕར་ཕྱིན་ཐེག་པས། ཡེ་ཤེས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །ཅེས་པ་དང་། གང་ཞིག་ཐུབ་པའི་ཟླ་བ་ཡིད་བྱེད་པ། །དེ་ཡི་མདུན་ན་ཐུབ་པ་རྟག་ཏུ་བཞུགས། །ཞེས་མདུན་དུ་བསྒོམ་པ་བཤད་ཀྱང་རང་དེར་བསྒོམ་པ་མ་བཤད། བྱ་རྒྱུད་ལ་བདག་བསྐྱེད་ཡོད་མེད་གཉིས་འབྱུང་བའང་མདོའི་གདུལ་བྱ་ཡར་ཁ་འདྲེན་ཐབས་ཡིན་ཏེ། བདག་བསྐྱེད་མེད་པ་དང་། ཡོད་ཀྱང་དམ་ཚིག་པ་ཙམ་བསྒོམ་པ་དང་། དེར་ཡེ་ཤེས་པ་བསྲེ་བ་རིམ་པ་བཞིན་རྟ་ལ་ཟན་སློབ་པ་ལྟར་བྱེད་དགོས་པས་མདོ་སྔགས་མཐུད་མཚམས་ལྟ་བུ་དེར་རིམ་པས་ཕྲ་སྦོམ་བཏང་བ་ཡིན། འདུལ་བ་ལུང་ལས་སྟོན་པའི་སྐུ་ལ་ཞབས་གདུབ་དང་རྣ་རྒྱན་མ་གཏོགས་པའི་རྒྱན་འབུལ་བར་གསུངས་པས་ཐེག་དམན་ལྟར་ནའང་ལྷའི་རྣམ་པར་སྒྱུར་རྒྱུའི་ཕྱོགས་ཙམ་ཡོད་ལ། ཕར་ཕྱིན་ཐེག་པར་ལོངས་སྐུའང་བཤད་པ་དང་། བྱ་རྒྱུད་ཀྱི་གཙོ་བོ་དམ་ཚིག་གསུམ་བཀོད་ཀྱི་

― GTD003_Page_0142 ―

^{[མ་དཔེ་གཟིགས་ན་འདིར་གནོན།]}

[Full Size]

དཀྱིལ་འཁོར་སོགས་སྔགས་སྤྱི་འགྲོ་ལྟར་ལ་གཙོ་བོ་སྤྲུལ་སྐུའི་རྣམ་པར་ཡོད་པ་དང་། རྣལ་འབྱོར་རྒྱུད་ཀྱི་ལྷ་སྣམ་ལ་རབ་བྱུང་གི་རྣམ་པ་ཅན་བཀོད་པ་སོགས་ཀྱང་སྔ་མ་སྔ་མའི་འགྲོས་དེ་ཡིན་ནོ། །སྤྱོད་རྒྱུད་ཀྱིས་ཡེ་ཤེས་པ་གཞུག་པའི་ཚུལ་གཙོ་བོ་དང་། རྣལ་འབྱོར་རྒྱུད་ཀྱིས་དེར་ཕྱག་རྒྱ་བཞིས་རྒྱས་འདེབས་པ་བཅས་ཇེ་ཟབ་ཏུ་བཏང་། བླ་མེད་ཀྱིས་བསྐྱེད་པ་ཙམ་དུ་མ་ཟད་སྐུ་གསུམ་ལམ་འཁྱེར་གྱི་ཚུལ་དུ་བསྐྱེད་ལ། དེ་ལས་ལྷག་པ་ལུས་སེམས་ཕྲ་རགས་ཕྱེ་སྟེ་ཡེ་ཤེས་ཀྱི་སྐུར་ལྡང་ཚུལ་གསུངས་སོ། །རླུང་གི་རྣལ་འབྱོར་ལ་མདོ་རྣམས་གཞོལ་ཚུལ་བྱེ་སྨྲས་དབུགས་འབྱུང་རྔུབ་སྒོམ་ཚུལ། བགྲང་བ་ལ་སོགས་རྣམ་པ་དྲུག །ཅེས་པ་ཙམ་ཞིག་ཡོད་ལ། མངོན་པ་གོང་མས་དེ་ལས་རྒྱས་སུ་བཏང་ཚུལ་བསམ་གཟུགས་ཆེན་མོ་ལྟར་ཡིན། དེ་ལས་ལྷག་པ་རླུང་དང་སྦྲགས་ཏེ་གཏོང་ལེན་གྱི་སྒོ་ནས་བདག་གཞན་མཉམ་བརྗེ་སྒོམ་ཚུལ་སྤྱོད་འཇུག་ཏུ་གསུངས་པ་དེ་སྔགས་དངོས་མིན་ཀྱང་སྔགས་ཀྱི་འབྲས་བུ་ལམ་བྱེད་དང་སྒོ་མཐུན་པའི་མན་ངག་ཡིན་པས་གསང་བའི་དམ་པ་ཞེས་གསུངས། རྒྱུད་སྡེ་འོག་མར་རླུང་ལ་བརྟེན་ནས་བདེ་དྲོད་བསྐྱེད་པ་དང་། དེའི་རང་གདངས་སྔགས་ཀྱི་སྒྲར་གྲག་པ་སོགས་གསུངས་ལ། བླ་མེད་ཀྱིས་དེའི་འབྱུང་འཇུག་གནས་གསུམ་སྔགས་སུ་བྱེད་པའི་རྡོར་བཟླས་ཀྱི་སྒོ་ནས་རླུང་དབུ་མར་གཞུག་པའི་མན་ངག་མཐར་ཐུག་པ་གསུངས་སོ། ། ༈ དེ་བཞིན་དུ་སངས་རྒྱས་རྗེས་སུ་དྲན་པའི་དོན་ཡང་གྲུབ་མཐའ་འོག་མས་ཡོན་ཏན་དང་བཀའ་དྲིན་རྗེས་སུ་དྲན་པ་ལ་བྱེད། ཐེག་ཆེན་ཐུན་མོང་བས་ཡེ་ཤེས་ཀྱི་

― GTD003_Page_0143 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱན་གྱིས་གཟིགས་བཞིན་པར་བཞུགས་པ་དཔང་པོའི་ཚུལ་གྱིས་ལྷ་རྗེས་སུ་དྲན་པ་ལ་བྱེད། གསང་སྔགས་ཀྱིས་རང་ལྷར་རྗེས་སུ་དྲན་ནས་ང་རྒྱལ་དང་གསལ་སྣང་བསྐྱེད་པ་ལ་བྱེད་དོ། །༈ སེམས་སེམས་བྱུང་རྫས་མཚུངས་ཞེས་པའི་དོན་གང་ཡིན་དྲིས་པའི་ལན་ནི། རྫས་མཚུངས་དེ་གཉིས་རྫས་རེ་རེ་བར་མཚུངས་ཞེས་པ་ཡིན་ལ། འདིར་ཉམས་ལེན་དང་འབྲེལ་བའི་གོ་རྒྱུ་ཆེན་པོ་ཞིག་ཡོད་དེ། སེམས་ཀྱི་ངོ་བོ་གསལ་རིག་ཙམ་ངོས་ཟིན་ཡང་། སེམས་བྱུང་སོ་སོ་ངོས་མ་ཟིན་ན་རྨུགས་པ་སོགས་གཏི་མུག་གི་ཆ་འགའ་ཞིག་ཏིང་འཛིན་དུ་འཁྲུལ་བ་དང། འདོད་ཆགས་ཀྱི་ཆར་གཏོགས་འགའ་ཞིག་བྱམས་སྙིང་རྗེ་དད་པ་སོགས་སུ་ནོར། ལྟ་ངན་ལ་ཤེས་རབ་ཏུ་ནོར་བ་སོགས་རྟོག་པ་འོག་འགྱུའི་དབང་གིས་རྒྱལ་ཁ་བློན་གྱིས་བསྒྱུར་བ་བཞིན་སེམས་དགེ་མི་དགེ་གང་དུ་སོང་ཡོད་ཤེས་དཀའ་བས་དམ་པ་རྣམས་ཉམས་ལེན་བྱེད་པ་ལ་ཀུན་བཏུས་སམ། མ་མཐའ་ཕུང་པོ་ལྔའི་རབ་བྱེད་ལྟ་བུ་རེར་སྦྱང་དགོས་པར་གསུང་ཞིང་སེམས་སེམས་བྱུང་གི་ངོས་འཛིན་མང་པོ་གསུངས་པའི་རྒྱུ་མཚན་དེ་ཡིན་ནོ། །བློན་པོའི་ནང་ནས་ཀྱང་སྐབས་དེར་ཕན་གནོད་གང་བྱེད་པའི་གཙོ་བོ་རང་དེ་ཤེས་ནས་ཐབས་བྱེད་དགོས་པ་ལྟར། སེམས་བྱུང་མང་པོ་ཡོད་ཀྱང་རང་སྟོབས་ཀྱིས་ཡུལ་མྱོང་བའི་ཆ་དེ་བྱེད་མཁས་ཚོར་བ་རྫས་གཅིག་པོ་དེ་ཁོ་ན་ཡིན། འདི་འདིའོ་ཞེས་སྤུ་རིས་འབྱེད་མཁན་འདུ་ཤེས་གཅིག་པུ་ཡིན་པ་ལྟ་བུ་མཛུབ་མོ་འཛུག་ས་གཅིག་དགོས་ལ། ཁྱད་པར་གནས་ལུགས་ལ་རྨོངས་ཏེ་

― GTD003_Page_0144 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་རྩ་བྱེད་མཁན་དང་། གནས་ལུགས་རང་སྟོབས་ཀྱིས་རྟོགས་ཏེ་འཁོར་བ་ལས་གྲོལ་བྱེད་གང་ཡིན་རྩ་བར་བཅར་ནས་ངོས་ཟིན་པ་ཞིག་མེད་ན་སྤོང་གཉེན་ངོ་འཕྲོད་པའི་སྒོམ་ཚུལ་གནད་ཐོག་ཏུ་ཁེལ་བ་ཞིག་མི་འོང་ངོ་། །འཕགས་ཡུལ་གྱི་གྲུབ་མཐའ་སྨྲ་བ་རྣམས་ཀྱང་དགོས་དོན་འདི་ཐུགས་ལ་བཞག་པའི་དབང་གིས་སེམས་ཙམ་པ་ལུང་གི་རྗེས་འབྲང་རྣམས་གནས་ལུགས་སྒྲིབ་བྱེད་མ་རིག་པ་ལྟ་མིན་གྱི་དེ་ཁོ་ནར་ངེས་ཀྱི། ལྟ་བར་གྱུར་པ་གཅིག་སྟེ་མ་རིག་པ་གཉིས་བྱུང་ན་རྫས་མཚུངས་ཉམས་ཟེར་དོན། དཔེར་ན་མི་གཅིག་ལ་རྐུས་བཙུགས་ཡོད་པའི་ཚེ་ཡང་ཕྱོགས་གཞན་གྱི་མི་གཅིག་ལ་རྐུས་དེ་བཙུགས་ན་ངེས་མེད་དུ་འགྲོ་བ་བཞིན། སྲིད་རྩ་གང་ཡིན་བཙལ་བཙལ་ཏེ་ཐོག་ཅིག་མ་རིག་པར་ངོས་ཟིན་ཡོད་པ་དེ་གཏད་སོ་མེད་པར་འགྲོ་དོགས་པ་ཡིན། སེམས་ཙམ་པ་རིགས་པའི་རྗེས་འབྲང་དང་དབུ་མ་པ་སོགས་ཀྱིས་ལན་འདེབས་ཚུལ་ཡང། བྱ་བ་ཁྱད་མེད་པའི་མ་རིག་པ་གཉིས་སེམས་གཅིག་གི་འཁོར་དུ་བཞག་ན་རྫས་མཚུངས་ཉམས་པ་བདེན་ཡང་། འདིར་ལྟ་མིན་རང་སྟོབས་ཀྱིས་གནས་ལུགས་སྒྲིབ་པ་ཙམ་བྱེད། འཇིག་ལྟས་རང་སྟོབས་ཀྱིས་ཕྱིན་ཅི་ལོག་ཏུ་འཛིན་པས་བྱ་བ་མི་འདྲ་ཞིང་། དེའི་ནང་ནས་ཀྱང་སྐྱོན་ཆེ་ཤོས་འཇིག་ལྟས་བྱེད་པ་ཡིན་ཏེ། མུན་ཁྲོད་དུ་ཐག་པ་དཔྱིས་ཕྱིན་པར་མ་མཐོང་བ་ལས་ཀྱང་སྦྲུལ་དུ་མཐོང་བ་དེ་ཉིད་ཀྱིས་འཇིགས་སྐྲག་སྐྱེད་པ་བཞིན། རྨོངས་ཙམ་ལས་ཀྱང་འཇིག་ལྟ་དེ་ཉིད་ཆགས་སྡང་སོགས་ཀྱི་རྒྱུའི་གཙོ་བོ་ཡིན་པས། རྣམ་འགྲེལ་ལས། ལོག་པར་དམིགས་ཉིད་མ་རིག་པ། །གསུངས་

― GTD003_Page_0145 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིང་འཇུག་པའི་དགོངས་པའང་དེ་དང་འདྲ་ལ། མདོ་སྡེ་རྒྱན་ལས། གང་ཕྱིར་ཡོད་པ་མི་མཐོང་མེད་མཐོང་བ། །དེ་འདྲའི་མུན་ནག་རྣམ་པ་དེ་གང་ཞིག །གསུངས་པའི་དཔེའི་ནུས་པའང་འདིས་ཐོན་ནོ། །འཕགས་ཡུལ་གྲུབ་མཐའ་བཞིའི་མཁས་པ་ཀུན་གྱིས་དཔྱད་པ་མང་པོ་མཛད་པའི་དགོས་དོན་གཙོ་བོ་འཁོར་རྩ་གཅོད་ཐབས་འདི་རང་ཡིན་པས་བློའི་ནུས་པའི་ཁྱད་ཀྱིས་རིམ་པ་བཞིན་ཇེ་ཞིབ་ཏུ་སོང་སྣང་སྟེ། བྱེ་སྨྲ་རྣམས་སྲེད་པས་ཡུལ་ལ་འཇུག་ཚུལ་ཙམ་མཐོང་ནས་དེ་འཁོར་རྩར་འཇོག་པ་མ་གཏོགས་བདག་འཛིན་གྱིས་འཁོར་རྩ་བྱེད་ལུགས་བློས་མ་འཆུན་ཞིང། སྲེད་པ་ནི་སྤང་བྱ་གཞི་བཅས་ཞེས་ཡུལ་འདོད་པའི་དངོས་པོ་དོན་དུ་ཡོད་པ་ཞིག་ལ་ཡིད་འོང་གི་རྣམ་པར་ཞེན་པ་ཡིན་པས། སྤང་བྱ་གཞི་མེད་བདག་འཛིན་ལྟ་བུ་འཛིན་སྟངས་དངོས་འགལ་དུ་ཞུགས་པའི་གཉེན་པོའི་སྒོ་ནས་ཞེན་ཡུལ་དྲུངས་ཕྱུང་སྟེ་སྤོང་ཚུལ་མེད། དེའི་སྟོབས་ཀྱིས་དགྲ་བཅོམ་ཐོབ་ནའང་ཡུལ་འདོད་པའི་དངོས་པོ་དང་ཕྲད་པའི་རྐྱེན་གྱིས་འབྲས་བུ་ལས་ཉམས་པའང་འཇོག་དགོས་བྱུང་བ་ཡིན། དེ་ལ་ཕ་རོལ་པོས་ཐར་པ་ལ་ཡིད་བརྟན་མེད་པར་ཐལ་བ་འཕང་བའི་ལན་དུ། འབྲས་ལས་ཉམས་པ་འཆི་བ་མེད། །ཅེས་སྐྱོན་སྤོང་ཞིག་བྱེད་མོད་ཀྱང་མི་འགྲིག་པའི་རྩ་བ་འཁོར་རྩ་ངོས་མ་ཟིན་པ་དེ་ཡིན། སྤང་བྱའི་གཙོ་བོ་ངོས་མ་ཟིན་པས་སྤོང་བྱེད་གཉེན་པོའང་ངེས་བཟུང་མེད་པར་སྦྱོར་ལམ་ཐ་མའི་ཚེ་མི་རྟག་སྡུག་བསྔལ་སོགས་གང་གཙོ་བོར་བསྒོམ་

― GTD003_Page_0146 ―

^{[མ་དཔེ་གཟིགས་ན་འདིར་གནོན།]}

[Full Size]

ནའང་མཐོང་ལམ་སྡུག་བསྔལ་ཆོས་བཟོད་དེ་དེའི་རྣམ་ལྡན་དུ་སྐྱེ་ཞེས་ཟེར། མདོ་སྡེ་པས་འཁོར་རྩ་ལ་བདག་འཛིན་དགོས་པའི་ཕྱོགས་ཤིག་ཤེས་ཀྱང་བདག་འཛིན་རགས་པ་ཙམ་ལས་ངོས་མ་ཟིན། དེ་བཞིན་དུ་གཉེན་པོའི་གཙོ་བོ་བདག་མེད་བསྒོམ་དགོས་པར་བསམས་ཀྱང་དེ་མངོན་སུམ་དུ་འཆར་ཚུལ་བློར་མ་བདེ་བས་ཆོས་བཟོད་ཀྱིས་མི་རྟག་སོགས་སྣང་ཡུལ་དུ་བྱས་པའི་ཤུགས་ལ་རྟོགས་ཟེར། སེམས་ཙམ་པས་དེའི་སྟེང་དུ་ཐེག་ཆེན་ལུགས་ཀྱི་སྤང་བྱ་ཁྱད་པར་ཞིག་ཡོད་དགོས་ཤིང་། དེའང་ཐམས་ཅད་མཁྱེན་པ་ཐོབ་པ་ལ་གེགས་བྱེད་པའི་ཤེས་སྒྲིབ་ཅེས་ཆོས་ཐམས་ཅད་ཀྱི་སྟེང་དུ་ལོག་པར་ཞུགས་ནས་སྒྲོ་འདོགས་མཁན་ཞིག་ཡོད་དགོས་པར་བསམས་ནས་ཆོས་ཀྱི་བདག་འཛིན་རགས་པ་ཞིག་བསྣན་ཏེ་གང་ཟག་གི་བདག་འཛིན་དང་དེ་གཉི་ག་འཁོར་བའི་རྩ་བར་འདོད། འདིས་མདོ་སྡེ་པ་ལྟར་ཆོས་བཟོད་ཀྱི་འཛིན་སྟངས་ལ་འདུས་བྱས་ཤིག་མ་བཞག་ཀྱང་རྗེས་བཟོད་ལ་བཞག་པ་འོག་མའི་ཤན་གྱིས་ད་དུང་གཏད་སོ་ཞིག་མ་བྱུང་བའི་རྟགས་སུ་སྣང་། རང་རྒྱུད་པས་བདེན་འཛིན་གྱིས་འཁོར་རྩ་བྱེད་པའི་ཕྱོགས་རྟོགས་ནའང་བདེན་འཛིན་ཕྲ་མོ་ངོས་མ་ཟིན་ཞིང། ཐེག་པ་གསུམ་ཤེས་རབ་ཀྱི་རྟོགས་རིགས་ཐ་དད་པ་དང་། དེའི་དབང་གིས་གྲུབ་མཐའ་འོག་མས་འདོད་པའི་བདག་འཛིན་དེ་ཚོའང་འཁོར་བའི་རྩ་བར་བཞག་སྟེ་གཅིག་ཆོད་ཅིག་བྱེད་མ་ཐུབ། ཐལ་འགྱུར་བས་ཐམས་ཅད་མཁྱེན་པ་འཐོབ་པ་ལ་གེགས་བྱེད་ཀྱི་ཤེས་སྒྲིབ་ཅིག་ཟུར་དུ་ཡོད་ནའང། ཐེག་པ་

― GTD003_Page_0147 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་པོ་གང་གི་དབང་དུ་བྱས་རུང་ཐར་པ་ཐོབ་པ་ལ་གེགས་བྱེད་ཀྱི་གཙོ་བོ་འཁོར་བའི་རྩ་བ་བདེན་འཛིན་ཕྲ་མོས་བྱེད་པ་འདྲ་ཞིང་། དེ་གཅོད་བྱེད་བདེན་མེད་བསྒོམ་པའང་འདྲ་བས་ཞི་སྒོ་གཅིག་པུ་འདི་ཁོ་ན་ཡིན་ཞེས་འཇོག་ཐུབ་པ་བྱུང་སྟེ། རིམ་པ་བཞིན་རྐུན་མ་ངོས་འཛིན་པ་ལ་དང་པོ་ཕྱོགས་ཙམ་ཡང་མ་ཤེས་པ་དང་། ཕྱོགས་ཙམ་ཤེས་ཀྱང་གྲོང་ངོས་མ་ཟིན་པ་དང་། དེའི་ནང་ནས་མི་འགའ་ལ་དོགས་པ་སྐྱེས་པ་དང་། གཅིག་རང་ལ་མཛུབ་མོ་འཛུག་ཐུབ་པ་ལྟ་བུ་གནད་ལ་ཐག་ཇེ་ཉེར་འགྲོ་ཚུལ་གྱི་ཁྱད་ཞུགས་པ་འདི་མཐོང་ན་ཐམས་ཅད་ལ་དད་པ་སྐྱེ་ཞིང་། གྲུབ་མཐའི་གོ་རིམ་ལ་ངེས་པ་དང་གོང་མ་གོང་མ་ལ་ལྷག་པར་ཡིད་ཆེས་རྙེད་ཅིང། བཅོམ་ལྡན་འདས་ཀྱིས་གདུལ་བྱའི་རིམ་པ་གཟིགས་ཏེ་ཆོས་བསྟན་ཚུལ་ལ་དད་པ་ལྷག་པར་ཐོབ་པ་འབྱུང་ངོ་། །འཁོར་རྩ་འཇོག་ཚུལ་མ་འདྲ་བའི་དབང་གིས་ཐར་ལམ་སྒྲུབ་པའི་རྟེན་གྱི་རིགས་འཇོག་ཚུལ་ཡང་མི་འདྲ་སྟེ། བྱེ་སྨྲས་སྲེད་པ་འཁོར་རྩ་བྱས་པས་རིགས་ཀྱི་ངོ་བོ་འདོད་ཆུང་ཆོག་ཤེས་ལ་བཤད་དོ། །སེམས་ཙམ་པས་འཁོར་འདས་ཐམས་ཅད་ཀུན་གཞིའི་སྟེང་ནས་འབྱུང་དགོས་པས་རིགས་ཀྱང་དེའི་སྟེང་གི་ཟག་མེད་ཡེ་ཤེས་སྐྱེ་རུང་གི་ནུས་པ་ཞིག་བཞག་གོ །ཐལ་རང་གཉིས་སེམས་ཀྱི་གནས་ལུགས་བདེན་སྟོང་ལ་རིགས་སུ་འཇོག་པ་འདྲའང་དེ་མཐོང་སྒོམ་གྱི་སྤང་བྱའི་དྲི་མས་དག་པའི་ཆ་རིམ་པར་འགོག་བདེན་དུ་འགྲོ་ལུགས་དང་། འགོག་པ་དེ་ཉིད་རང་སྟེང་དུ་མཐོང་ཚུལ་སོགས་ཐལ་འགྱུར་བ་ལྟ་

― GTD003_Page_0148 ―

^{[མ་དཔེ་གཟིགས་ན་འདིར་གནོན།]}

[Full Size]

བུའི་འཇོག་ཚུལ་བདེ་མོ་ཞིག་མ་ཐུབ་པ་ཐེག་པ་གསུམ་གའི་ཤེས་རབ་ཀྱི་རྟོགས་རིགས་སོ་སོར་བཞག་པའི་དབང་གིས་ཡིན་ཏེ། ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་སོགས་ཀྱི་རྩོད་ལན་ཡང་ཐེག་པ་གསུམ་གས་སེམས་ཀྱི་ཆོས་ཉིད་དེ་ག་བསྒོམ་པར་འདྲའང་ཟིན་བྱེད་ཐབས་ཀྱི་ཆ་སོགས་མ་འདྲ་བས་སྟོབས་ཆེ་ཆུང་དང་མཆོག་དམན་བྱུང་བ་ཡིན་ཞེས་ལན་འདེབས་རྒྱུ་བཞག་ནས། ནམ་མཁས་གཟུགས་ཅན་ཀུན་ལ་གོ་འབྱེད་པ་ལྟར་སེམས་བདེན་སྟོང་དེས་ཀྱང་ཐེག་པ་གསུམ་གའི་ལམ་ལ་གོ་འབྱེད་པས་རྟེན་བྱེད་པར་འདྲའང་ལམ་རང་རང་གི་ངོ་བོ་མ་འདྲ་བ་ཡིན་ཞེས་ལན་འདེབས་ལ། ཐལ་འགྱུར་བས་གཞལ་ན་རྒྱུ་བྱེད་པའི་རིགས་སུ་འགྱུར་ཚུལ་ཞིག་མེད་པར་རྟེན་བྱེད་ཚུལ་དེ་ཙམ་ཞིག་ཡིན་ཚེ་ཉོན་མོངས་རྣམས་ཀྱང་སྐྱེ་བ་ལ་གོ་འབྱེད་པས་དེའི་འང་རྟེན་དུ་ཐལ་བ་སོགས་འབྲེལ་མེད་ཀྱི་སྐྱོན་འཇུག་གོ །རྒྱུ་མཚན་འདི་ལ་བརྟེན་ནས་འཕགས་པ་གྲོལ་སྡེས་ཉི་སྣང་རང་རྒྱུད་པའི་གཞུང་དུ་བྱས་ནས་མཛད་ཀྱང་རྩོད་ལན་གྱི་ཐད་འདི་དག་ཐལ་འགྱུར་བ་དང་སྒོ་བསྟུན་པ་ཡིན། བཞི་བརྒྱ་པར། ཆོས་ཀྱི་དབྱིངས་ལ་དབྱེར་མེད་ཕྱིར། །ཁྱེད་ལ་ཐེག་པའི་དབྱེ་བ་མེད། །གསུངས་པའང་ཆོས་དབྱིངས་སུ་རོ་གཅིག་པའི་གཏན་ཚིགས་ཀྱིས་མཐར་ཐུག་ཐེག་པ་སོ་སོ་བ་མེད་པར་བསྒྲུབས་པ་ཡིན་ན་འཁོར་འདས་ཀྱང་སོ་སོ་བ་མེད་པར་འགྱུར་བས། དེའི་དོན་གང་ལ་དམིགས་ནས་གཙོ་བོར་བསྒོམས་པས་དེའི་ངོ་བོར་དྲི་མ་ཟད་པའི་ཆོས་དབྱིངས་འདྲ་བའི་དོན་དུ་བྱེད་དགོས་ཏེ། དེ་ལྟར་བྱས་ན་མངོན་

― GTD003_Page_0149 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་རྒྱན་གྱི་དེ་དང་ཚིག་དོན་གཉི་ག་ཤིན་ཏུ་འདྲའོ། །སེམས་ཙམ་མན་ཆད་རིགས་བདེན་གྲུབ་ཏུ་འདོད་པའི་རྒྱུ་མཚན་གྱིས་མཐར་ཐུག་ཐེག་པ་གསུམ་དུ་བཞག་པ་ཡིན་ནོ། །དབུ་མ་པས་སེམས་དྲི་མས་བསླད་པའང་བདེན་གྲུབ་མ་ཡིན་པར་ལྟོས་གྲུབ་བཅོས་སུ་ཡོད་པའི་གནད་ཀྱིས་སེམས་ཅན་ཐམས་ཅད་སངས་རྒྱ་ངེས་སུ་བཞེད་ཅིང་། རྣམ་འགྲེལ་རྗེས་འབྲང་གི་སེམས་ཙམ་རྣམས། རྟག་ཉིད་ཕྱིར་རམ་ཐབས་མེད་ཕྱིར། །ཞེས་སོགས་མཐར་ཐུག་ཐེག་པ་གཅིག་ཏུ་བསྒྲུབས་པའང་དབུ་མ་པའི་རིགས་པའི་འགྲོས་འདི་ལ་གཞོལ་བ་ཡིན་ཏེ། དགག་བྱའི་ཁྱད་ཙམ་མ་གཏོགས། སྣ་ཚོགས་སྣང་ཅན་དོན་རྣམས་ལ། །ཞེས་སོགས་གཅིག་དུ་བྲལ་གྱི་རིགས་པ་དང། རེས་འགའ་བ་ཉིད་ཡིན་པས་ན། །ཞེས་སོགས་ལྟོས་གྲུབ་ཀྱི་རིགས་པས་སྒྲུབ་ཚུལ་རྩ་འཇུག་སོགས་དང་འགྲོས་མཐུན་པ་ཤིན་ཏུ་མང་ངོ་། །རིགས་འདོད་ཚུལ་མི་མཐུན་པ་འདིའང་ལེགས་པར་གོ་ན་ཉམས་ལེན་དུ་འཆར་ཚུལ་ཞིག་ཡོད་དེ། ལས་དང་པོ་བ་ལ་སེམས་བདེན་སྟོང་རིགས་ཡིན་ཟེར་བ་ལས་འདོད་ཆུང་ཆོག་ཤེས་འཕགས་པའི་རིགས་སུ་བསྟན་ཏེ། རིགས་ཞེས་པ་རྩ་བའི་རྒྱུའམ་ས་བོན་དང་ཁམས་ཀྱི་དོན་ཡིན་པས་ཐར་པའི་གོ་འཕང་ཞིག་འདོད་ན་འདོད་ཆུང་ཆོག་ཤེས་ལ་གནས་དགོས་ཀྱི། གཞི་དེ་མེད་པར་ཐར་ལམ་སྒྲུབ་ཚུལ་གཏན་མེད་ཅེས་བཤད་ན་བློ་འཁུལ་ཚབས་ཆེ་བས་དོན་དུ་འགྱུར་རོ། །འདི་ལ་དགོངས་ནས་པད་དཀར་དུའང་ཆོས་གོས་

― GTD003_Page_0150 ―

^{[མ་དཔེ་གཟིགས་ན་འདིར་གནོན།]}

[Full Size]

ངན་ངོན་ཙམ་གྱིས་ཆོག་ཤེས་པ་སོགས་བཞི་ལ་འཕགས་པའི་རིགས་སུ་གསུངས་སོ། །གཞན་ལྟ་ཅི། ཕུང་པོ་ལྔར་ཕྱེ་བ་དང་། གཟུགས་ཤེས་ལྡན་མིན་འདུ་བྱེད་གསུམ་དུ་བྱས་པ་ཚུན་ཆད་ཀྱི་སྟེང་ནའང་གྲུབ་མཐའ་གོང་འོག་ཕྲ་རགས་ཀྱི་ཁྱད་པར་ཞིག་དོད་ཡོད་པ་ཤེས་ཏེ། བྱེ་མདོ་གཉིས་ཕྱི་དོན་བེམ་པོའི་འཇོག་ཚུལ་འདི་གཙོ་བོར་བྱེད་ཅིང་བློར་བདེ་བས་དོན་སྨྲ་བ་ཞེས་ཟེར་ཏེ། བདེན་པ་གཉིས་ཀྱི་འཇོག་ཚུལ་ཡང་བུམ་པ་ལྟ་བུ་བཅོམ་གཞིག་བྱར་ཡོད་པ་དང་རྡུལ་ཕྲན་ལྟ་བུ་དེ་ལྟར་བྱེད་ཚུལ་མེད་པ་ལ་བྱེ་སྨྲས་བཤད་དོ། །སེམས་ཙམ་པས་ཕྱི་དོན་བེམ་པོ་བཀག་ནས་ནང་ཤེས་པའི་འཇོག་ཚུལ་གཙོ་བོར་བྱེད། འདུ་བྱེད་ཅེས་པ་དཔེར་ན་རི་ར་བ་ཁང་ཁྱིམ་མི་དང་ཕྱུགས་སོགས་དུ་མ་ཞིག་ཚོགས་ཙམ་ལ་རྒྱ་གར་ཞེས་བཏགས་པ་ལྟ་བུ་རིགས་མཐུན་མི་མཐུན་མང་པོ་ཞིག་འདུས་པའི་སྟེང་ནས་འཇོག་དགོས་པས་འདུ་བྱེད་དང་བཏགས་ཡོད་དུ་བཤད་ལ་དེ་གྲུབ་མཐའ་འོག་མ་རྣམས་ཀྱིས་ཁས་མི་ལེན་པ་མིན་ཡང་དོན་དབུ་མ་པས་བདེན་སྟོང་འཇོག་ལུགས་དང་ཤིན་ཏུ་འགྲིགས་ལ། རེའི་ནང་ནས་ཀྱང་ཐལ་འགྱུར་བས་རྟོག་པས་བཏགས་ཙམ་དུ་བཞག་པ་དང་ལྷག་པར་འགྲིག་གོ །གཞིའི་འཇོག་ཚུལ་གང་གི་སྐབས་སུའང་བློའི་འཇུག་པ་རྩིང་ཞིབ་ཀྱིས་མི་མཐུན་པ་ཤིན་ཏུ་མང་སྟེ། བྱེ་སྨྲ་རྣམས་ནམ་མཁའ་འཇོག་ཚུལ་ཡང་ཐོགས་རེག་བཀག་ཙམ་ལ་འཇོག་མ་ཤེས་པར་སྣང་མུན་གྱི་རྫས་ཤིག་ལ་འདོད། བོད་ཀྱི་དབུ་མ་པ་ཆེན་པོར་རློམ་པ་མང་པོས་

― GTD003_Page_0151 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་སྟོང་ཉིད་ཀྱི་ངོ་བོ་དགག་བྱ་བདེན་གྲུབ་བཀག་ཙམ་ལ་འཇོག་མ་ཐུབ་པར་སྒྲུབ་པའི་ཆ་རེ་ནན་གྱིས་བཙལ་ནས་བཞག་པ་ནི་བདེན་པར་མེད་ཙམ་དེ་ཡེ་མེད་ལྟ་བུ་ཞིག་ཏུ་སོང་སྟེ་འཛིན་རྒྱུ་མ་བྱུང་བ་མེད་དགག་གི་སྤྱི་མ་ཤར་བའི་སྐྱོན་བྱེ་སྨྲ་ལ་འབྱུང་རྒྱུ་དེ་བྱུང་བ་ཡིན་ནོ། །མདོ་སྡེ་པ་རྣམས་མེད་དགག་དང་སེལ་བ་ཙམ་ཞིག་འཇོག་ཐུབ་ཀྱང་དེ་དང་འདུས་བྱས་རྣམས་ཡོད་པར་འཇོག་ཚུལ་བློ་ངོར་འཆར་དཀའ་སླ་དང་ཉེ་རིང་གི་ཁྱད་ཆེན་པོ་ཞིག་གྱུར་ཏེ། འདུས་བྱས་རྣམས་མངོན་སུམ་གྱི་དངོས་ཡུལ་དང་མངོན་གྱུར་དུ་འདོད་ལ། འདུས་མ་བྱས་རྣམས་རྟོག་པའི་སྣང་ཆ་ཙམ་དུ་འདོད། མི་རྟག་པའང་བྱེ་སྨྲས་འཇིག་རྟེན་གྱི་གྲགས་ཚོད་ལྟར་བུམ་པ་ཐོ་བས་བཅོམ་པའམ། མི་ཚེ་འཕོས་པ་ལྟ་བུ་ལ་འཇིག་པར་འཇོག་ཅིང་སྐད་ཅིག་གིས་འཇིག་པ་འཇོག་ཚུལ་མ་ཤེས་ལ། འདུས་བྱས་ཐམས་ཅད་མི་རྟག་པར་འཇོག་དགོས་པས་ལོངས་སྐུ་དང་འོག་མིན་གྱི་ཞིང་ལྟ་བུ་འཁོར་བ་མ་སྟོངས་བར་དུ་རྒྱུན་གནས་པ་ཁས་ལེན་མ་ཐུབ་པ་ཡིན། མདོ་སྡེ་པས་འཇིག་པ་ཕྱིས་འབྱུང་གི་རྒྱུ་ལ་མི་ལྟོས་པའི་གཏན་ཚིགས་ཀྱིས་འདུས་བྱས་ཐམས་ཅད་སྐད་ཅིག་གིས་འཇིག་པར་འདོད་ཀྱང། གྲུབ་མཐའ་གོང་མས་བྱ་རྫོགས་ཀྱི་སྐད་ཅིག་མ་གཅིག་ལ་ཆ་སུམ་བརྒྱ་དང་དྲུག་ཅུ་རེ་ལྔ་འབྱེད་པར་ཕར་ཕྱིན་ལམ་སྒྲིག་ལས་གསུངས་པ་ལྟ་བུའི་དུས་ཀྱི་ཐུང་མཐའ་ཞིག་འཇོག་མི་ཐུབ་པས་དེའི་ཆ་ནས་ཀྱང་ཕྲ་རགས་ཡོད་ལ། མདོ་ལས་མི་རྟག་པའི་དོན་མེད་པ་དང་མ་

― GTD003_Page_0152 ―

^{[མ་དཔེ་གཟིགས་ན་འདིར་གནོན།]}

[Full Size]

མཆིས་པའི་དོན་དུ་གསུངས་པའི་སྟེང་ནས་དབུ་སེམས་གཉིས་ལའང་གོ་ཚུལ་ཕྲ་རགས་ཡོད་དོ། ། ༈ ཡང་སྒྲོན་གསལ་ལས། འོད་གསལ་བའི་ཡེ་ཤེས་ལས་བྱུང་བས་ན་ཡེ་ཤེས་ཀྱིས་བཏགས་པའོ། །འདིའི་དོན་ཐེག་པ་ཆེན་པོའི་མདོ་སྡེ་ལས་ཀྱང་དགོངས་པས་བཤད་པས་སྟོན་ཏེ། སྐྲ་ཙམ་ཁྱོན་གཅིག་ལ་ཡང་སངས་རྒྱས་ནི། །རྣམ་མང་གངྒཱའི་ཀླུང་གི་བྱེ་སྙེད་བཞུགས། །ཞེས་བྱ་བ་དང་། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །ཅེས་བྱ་བ་གསུངས་པར་ལྷའི་དེ་ཁོ་ན་ཉིད་སྟོན་པ་ཡིན་ཏེ་ངེས་པའི་དོན་ཏོ། །ཞེས་ལེའུ་དྲུག་པར་གསུངས་ཀྱང་། དེའི་དོན་མཆན་གྱིས་འགྲེལ་པའི་ཚེ། ཟུང་འཇུག་གི་སྐུ་འདི་ལ་དགོངས་པའི་གཞིར་བྱས་ནས་བཤད་པས་ཏེ་སྒྲ་གཞན་གྱིས་སྟོན་གྱི། དངོས་སུ་མ་ཡིན་ནོ། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་ཊཱིཀྐར་ཡང་། སྐྲ་ཙམ་ཁྱོན་ལ་ཞེས་སོགས་ཀྱི་མདོ་སྡེས་ཟུང་འཇུག་གི་སྐུ་བསྟན་པར་གསུངས་པའང་སྐྲ་རྩེ་ཙམ་གྱི་ཁྱོན་ན་སངས་རྒྱས་གངྒཱའི་ཀླུང་གི་བྱེ་མའི་གྲངས་དང་མཉམ་པར་བཞུགས་པ་རྣམས་ཟུང་འཇུག་གི་སྐུ་བརྙེས་པ་ལ་དགོངས་པ་ཡིན་གྱི། མདོ་དེས་ཟུང་འཇུག་གི་ལྷའི་སྐུ་བསྟན་པར་བཞེད་པ་མིན་ཏེ། ཞེས་གསུངས་ལ། འདི་དང་དབུ་མ་འཇུག་པར། ཐུབ་དབང་དུས་གཅིག་ཁོ་ནར་དེའི་རྒྱུ་མཐུན། །ཞེས་སོགས་ཕྱོགས་གཅིག་ཏུ་བྱས་པའི་དཔྱད་གཞི་ཆེ་བ་ཞིག་ཡོད་དམ་སྙམ་སྟེ། དགོངས་པ་རབ་གསལ་དུ་འབྲས་བུའི་ས་འཆད་སྐབས་སྐུའི་རྣམ་

― GTD003_Page_0153 ―

^{[མ་དཔེ་གཟིགས་ན་འདིར་གནོན།]}

[Full Size]

གཞག་ལ་ཆོས་སྐུ་ལོངས་སྐུ་རྒྱུ་མཐུན་པའི་སྐུ་གསུམ་དུ་བྱས་ནས་གསུངས་ཀྱང་། སྤྲུལ་སྐུའི་རྣམ་གཞག་འོག་ཏུ། སླར་ཡང་མི་གཡོ་སྐུ་མངའ་ཞེས་སོགས་ཀྱིས་སྟོན་པར་གསུངས་པས། འདིར་རྒྱུ་མཐུན་པའི་སྐུ་ཞེས་པ་དེ་སྐུ་གང་ལ་བྱེད་དཔྱད་དགོས་སོ། །འདིར་རྒྱུ་མཐུན་པའི་དོན་དགོངས་པ་རབ་གསལ་ལས། ཆོས་ལོངས་ཀྱི་རྒྱུ་མཐུན་པ་སྟེ་གསུངས་ཤིང། རང་འགྲེལ་དུའང། ཆོས་ཀྱི་སྐུ་ལས་བྱུང་བའམ་གཟུགས་ཀྱི་སྐུའི་མཐུ་ལས་བྱུང་ཡང་རུང་སྟེ། ཇི་སྐད་བཤད་པའི་སྐུ་ལས་གཞན་དུ་གྱུར་པ་རྒྱུ་མཐུན་པའི་སྐུ་ཞེས་གསུངས་པས། གོང་དུ་བཤད་མ་ཐག་པའི་ཆོས་སྐུ་ནི་ཡེ་ཤེས་ཀྱི་ཚོགས་དང་། གཟུགས་སྐུ་བསོད་ནམས་ཀྱི་ཚོགས་ཀྱི་འབྲས་བུ་ཡིན་ལ། ཚོགས་དེ་གཉིས་ཀྱང་ཡ་བྲལ་དུ་མ་སོང་བར་ཟུང་དུ་འཇུག་དགོས་ལ། དེ་དང་མཐུན་པར་འབྲས་བུ་ཆོས་གཟུགས་གཉིས་ཀྱང་སོ་སོར་སོང་བ་ཙམ་གྱིས་མི་ཆོག་པར་ཟུང་དུ་འཇུག་དགོས་པས་དེ་ལ་རྒྱུ་མཐུན་པའི་སྐུ་ཞེས་བཤད་དེ། སྔགས་ཀྱི་ཐེག་པ་བཞིན་སྐུ་ཐུགས་ཟུང་འཇུག་གི་ཐ་སྙད་དངོས་སུ་མ་སྦྱར་ཡང་དོན་དེའི་སྟེང་དུ་འབབ་པར་སྣང་ངོ་། །གོང་དུ་ཆོས་སྐུ་ལས་བྱུང་བའམ་ཞེས་གདམ་ངའི་ཚིག་ལྟ་བུ་གསུངས་པའང་གང་རུང་གི་དོན་མིན་གྱི། རྒྱུ་དེ་གཉི་གས་ཁྱད་མེད་དུ་བསྒྲུབ་པའི་དོན་ཡིན་ཞིང་། དངོས་ཟིན་སྐུ་གཉིས་ལས་འབྱུང་བར་གསུངས་པའང་སྐུ་གཉི་ག་འགྲུབ་བྱེད་ལས་འབྱུང་བའི་དོན་ནམ། ཡང་ན་ཚོགས་པ་འཇོག་པ་ཡ་གྱལ་ལ་བརྟེན་ནས་འབྱུང་བའམ་འཇོག་པའི་དོན་དུ་གོ་

― GTD003_Page_0154 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་སོ། །འཇུག་པའི་གསུང་ཚུལ་འདི་དག་སྒྲོན་གསལ་དུ་བཟང་སྤྱོད་ཀྱི་ལུང་དྲངས་པ་དེ་དང་ཤིན་ཏུ་མཚུངས་ཏེ། སངས་རྒྱས་བྱང་སེམས་ཀྱི་མཛད་པ་སྐྱེས་རབས་མཐའ་དག་བ་སྤུའི་ཁུང་བུ་གཅིག་དང་རྡུལ་ཕྲ་རབ་གཅིག་གི་གོ་སར་སྐད་ཅིག་མ་གཅིག་གི་ཡུན་ཚད་ལ་སྟོན་ཚུལ་གསུངས་པ་རྣམས། སྐྲ་ཙམ་ཁྱོན་ལ་དུས་གསུམ་ཚད་སྙེད། ཅེས་དང་། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཞེས་སོགས་ཚིག་རིས་བཞིན་བཀོད་པར་སྣང་ངོ་། །དེ་ལྟར་འོངས་པའི་རྒྱུ་མཚན་ཡང་། དག་པ་འདི་ནི་བཞེད་པ་འཇུག་པ་ཡི། །རྡུལ་གཅིག་ཡུལ་ལ་མཐའ་གཏུགས་འཇིག་རྟེན་དང། །འཇིག་རྟེན་མཐའ་ཡས་ཕྱོགས་ཁྱབ་རྡུལ་སྟོན་མོད། །རྡུལ་རགས་མི་འགྱུར་འཇིག་རྟེན་ཕྲ་མི་འགྱུར། །གསུངས་ལ་ངེས་དོན་དགོངས་པ་རབ་གསལ་དུ། མཛད་པ་འདི་ནི་བཞེད་པ་ཙམ་གྱིས་འཇུག་པ་ཞེས་ཐུགས་ལ་དགོངས་པ་ཙམ་གྱིས་ཆོག་པར་གསུངས་པའི་རྒྱུ་མཚན། སློབ་པའི་དུས་ལྷན་སྐྱེས་ཀྱི་བདེ་བས་རླུང་སེམས་འདོད་དགུར་སྒྱུར་ཚུལ་ལ་གོམས་པ་མཐར་ཕྱིན་པའི་དབང་གིས་ཡིན་པས། ཡང་དག་མཐའ་དཔྱིས་ཕྱིན་པ་སྔགས་ལ་རག་ལས་པར་གསུངས་པ་ལས་ཀྱང། སེམས་ཅན་མཐའ་དག་གི་རེ་བ་ཅིག་ཅར་དུ་རྫོགས་པར་བྱེད་ནུས་པའི་ཐབས་རྣམ་པ་ཐམས་ཅད་པ་འདི་ངོ་བོ་ཙམ་མདོ་ལས་བཤད་ཀྱང་། འགྲུབ་ཚུལ་གྱི་གནད་དཔྱིས་ཕྱིན་པར་གོ་བ་སྔགས་ལ་རག་ལས་སོ། །རྨ་བྱའི་མདོངས་ནི་གཅིག་པུ་ཡི། །རྒྱུ་ཡི་དབྱེ་བ་སྣ་ཚོགས་པ། །ཀུན་མཁྱེན་མིན་པའི་ཤེས་བྱ་

― GTD003_Page_0155 ―

^{[མ་དཔེ་གཟིགས་ན་འདིར་གནོན།]}

[Full Size]

མིན། །དེ་ཤེས་པས་ནི་ཀུན་མཁྱེན་སྟོབས། །ཞེས་གསུངས་པའི་ཀུན་མཁྱེན་དེས་ཀྱང་དངོས་པོ་ལ་ཟུང་འཇུག་གི་སྐུ་བརྙེས་ཡོད་པ་ཁྱད་མེད་ཀྱང་འདིར་དེ་འདྲ་ཁུངས་སུ་མ་དྲངས་པར་སྔ་མ་དྲངས་པ་ནི། ཕར་ཕྱིན་ཐེག་པར་ཡང་ཆོས་སྐུ་དང་རྣམ་པ་མཐུན་པའི་ལམ་བསྒོམ་པ་ཡོད་པས་བརྟག་པ་མཐའ་བཟུང་གིས་དེ་རྐྱང་པ་བསྒོམས་ཏེ་གོམས་པ་མཐར་ཕྱིན་ན་ཆོས་ཐམས་ཅད་མཁྱེན་པ་ལ་གེགས་བྱེད་ཀྱི་སྒྲིབ་པ་ཟད་པ་འབྱུང་ཞིང་སྒྲིབ་བྱེད་མེད་ན་རྣམ་པ་ཐམས་ཅད་མཁྱེན་པ་དང་མཁྱེན་པས་ཤེས་བྱ་ཐམས་ཅད་ལ་ཁྱབ་པ་འབྱུང་མོད་ཀྱང། གཟུགས་སྐུས་ཐམས་ཅད་ལ་ཁྱབ་པ་དང་གང་འདོད་ཀྱི་བཀོད་པ་སྟོན་པ་ལ་གཟུགས་སྐུ་དང་རྣམ་པ་མཐུན་པའི་ལྷའི་རྣལ་འབྱོར་དང་། ཁྱད་པར་དུ་ཤིན་ཏུ་ཕྲ་བའི་རླུང་གི་ཉེར་ལེན་ལས་སྒྱུ་མའི་སྐུ་བསྒྲུབ་པ་འདི་མེད་པར་བརྟག་པ་མཐའ་བཟུང་གིས་ཀྱང་འབྱུང་ལུགས་མེད་པ་མདོ་ཕྱོགས་རང་གི་རིགས་པའི་འགྲོས་ཀྱིས་ཀྱང་འགྲུབ་པས། རྗེའི་མཆན་བུར་ཟུང་འཇུག་གི་སྐུ་ཐོབ་པ་ལ་དགོངས་གསུངས་པ་དེའང་དངོས་པོ་ལ་ཐོབ་ཡོད་པ་ཙམ་གྱི་དོན་མ་ཡིན་པར། ཞིབ་ཏུ་དཔྱད་ན་འབྲས་བུ་འདི་འདྲ་ཞིག་འབྱུང་བ་ལ་དེའི་རྒྱུ་མཐུན་འདི་འདྲ་ཞིག་སྔོན་དུ་འགྲོ་བ་མེད་མི་རུང་ཡིན་པར་འདུག་སྙམ་པའི་གོ་བ་སྐྱེད་ལུགས་ཁྱད་པར་བ་ཞིག་ཡོད་པར་མངོན་ནོ། །རང་རེས་དགེ་བ་གང་བྱེད་བློའི་མཐུ་ཆུང་ལ་མི་མཐུན་ཕྱོགས་སྟོབས་ཆེ་བས་སྒྱིད་ལུག་པར་ཡང་སངས་རྒྱས་ཀྱི་མཐུ་བསམ་གྱིས་མི་ཁྱབ་པས་མི་འགྲུབ་པ་ཅིའང་མི་སྲིད་

― GTD003_Page_0156 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་འདི་དང་། ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་ཞལ་གྱིས་བཞེས་པ་སོགས་བསམ་ན་དེ་ལ་རྒྱབ་རྟེན་བྱར་ཡོད་པས་ཡིད་ཞུམ་མི་དགོས་པར་སྙིང་སྟོབས་དང་སྤྲོ་བ་འཕེལ་བར་འགྱུར་རོ། །དྲིས་ལན་འདི་རྣམས་བཀའ་དྲིན་མཚུངས་མེད་རྗེ་བཙུན་བླ་མ་འཇམ་པའི་དབྱངས་ཉིད་ཀྱི་ཞལ་སྔ་ནས་ལ་ཕྲན་སྔགས་རམས་པ་རཏྣ་ཨཱ་ནནྟ་བདག་གིས་གྲུབ་མཐའ་བཞིའི་འདོད་ཚུལ། སེམས་སེམས་བྱུང་གི་རྣམ་གཞག་མདོ་སྔགས་ལ་གཞོལ་ཚུལ་སོགས་ཀྱི་རྣམ་གཞག་བདག་ལྟ་བུའི་བློ་དམན་པ་དག་གི་བློ་ངོར་འདུམ་བདེ་ཞིང་འཆར་སླ་བའི་ལེགས་བཤད་ཅིག་ཅིས་ཀྱང་ཐུགས་རྗེས་གཟིགས་ཞེས་ཡང་ཡང་གསོལ་བ་བཏབ་པ་ལྟར་དགྱེས་བཞིན་དུ་ཐུགས་བརྩེ་བ་ཆེན་པོས་བཀའ་སྩལ་པ་རྣམས་གསུང་རིམ་བཞིན་ཐད་ཀ་ཐད་ཀར་ཟིན་རིས་སུ་བཏབ་པ། སླར་ཡང་གོང་འོག་བསྡེབས་ཏེ་ཡི་གེར་བཀོད་པ་འདིའང་ཚེ་རབས་ཀྱི་འཕྲེང་བར་རྗེ་བཙུན་བླ་མ་འཇམ་པའི་དབྱངས་ཀྱིས་འབྲལ་མེད་དགྱེས་བཞིན་རྗེས་སུ་འཛིན་པའི་རྒྱུར་གྱུར་ཅིག། །།༈ དེའང་ཐུན་རེ་བཞིན་ཀུན་སློང་གི་སྟེང་ནས་བསྟན་པ་ཡོངས་རྫོགས་ཀྱི་གནད་ཚང་བར་བྱེད་ཚུལ་དགོས་ཟེར་བ་ལ་གྲྭ་པ་ཐམས་ཅད་མ་ལུས་པར་འཚོགས་པ་ལ་གྲྭ་ཚང་ཡོངས་རྫོགས་ཟེར་བ་བཞིན་སོ་སོ་བར་སོང་ན་རྫོགས་མཐའ་མེད་པས་ཉམས་ལེན་སྣ་གཅིག་ལའང་ཐམས་ཅད་རྫོགས་པ་དགོས། འོ་ན་དམིགས་སྐོར་ཕྱི་མ་རྣམས་མི་དགོས་སམ་སྙམ་ན་མ་ཡིན་ཏེ། ཨ་གར་སོ་ལྔ་ཐུན་གཅིག་ལ་སྦྱོར་བ་སྣ་ཚང་

― GTD003_Page_0157 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་རླུང་ནད་ཚབས་ཅན་དེ་ཐུན་གཅིག་གིས་མི་སེལ་བར་མང་པོ་བསྟུད་ནས་འཐུང་དགོས་པ་དང་འདྲ། རེ་རེ་ལའང་ཐམས་ཅད་ཚང་དགོས་པའི་རྒྱུ་མཚན་ནི། བསྟན་པ་ཡོངས་སུ་རྫོགས་མ་རྫོགས་ཞེས་པ་གདུལ་བྱའི་སྐྱོན་མཐའ་དག་སྤོང་བའི་ཐབས་དང། ཡོན་ཏན་མཐའ་དག་སྒྲུབ་པའི་ཐབས་ཚང་མ་ཚང་ཡིན་ལ། སྐྱོན་ཀུན་ཟད་ཡོན་ཏན་ཀུན་རྫོགས་ནི་སངས་རྒྱས་ཁོ་ན་ཡིན་པས། སངས་རྒྱས་སྒྲུབ་པའི་ཐབས་རྣལ་མར་འགྲོ་བ་ལ་བསྟན་པ་ཡོངས་སུ་རྫོགས་དགོས་པ་ཡིན། བསམ་སྦྱོར་དེ་འདྲ་ཞིག་བྱུང་ན་དེ་ལ་རྣམ་ཀུན་རྫོགས་པའི་སྦྱོར་བ་ཟེར། འོ་ན་སངས་རྒྱས་ཐོབ་པར་བྱའོ་སྙམ་པ་རང་གིས་ཆོག་གམ་སྙམ་ན། དེ་བསམ་ཚུལ་ལ་ཐུག་ཡོད། རྒྱུའི་བསམ་མནོ་ཅི་ཡང་མེད་པར་འབྲས་བུ་སངས་རྒྱས་ཐོབ་ན་སྙམ་པས་མི་ཆོག །དབུས་སུ་འགྲོ་བར་ཐག་ཆོད་པ་ལ་ལམ་དང་ཆ་རྐྱེན་ལམ་གྲོགས་ཐམས་ཅད་ཀྱི་འདང་ཞིག་ཡོད་དགོས། སྐས་གདང་མང་པོ་འཛེག་པའི་དུས་མཐོ་དམན་གྱི་ཁྱད་ཡོད་ཀྱང་གོམ་པ་འདེགས་པའི་བྱ་བ་དང་། ཁང་ཐོག་ཏུ་འགྲོ་འདོད་ཀྱི་འཕེན་པ་ལ་ཁྱད་ཅི་ཡང་མེད་པ་བཞིན། དངོས་གཞིའི་དམིགས་སྐོར་ལ་གོ་རིམ་ཡོད་ཀྱང་ཀུན་སློང་གི་བསམ་སྦྱོར་སྣ་གཅིག་པོ་དེས་འཁྱོང་དགོས། ལྷའི་གོས་དེ་བསྒྲིལ་ན་སེན་མོའི་བར་དུ་ཚུད། ཁ་ཕྱེ་ན་ལུས་ཀུན་ཁེབས་པ་ཞིག་ཡོད་ཟེར་བ་བཞིན། སངས་རྒྱས་ཐོབ་པར་བྱ་སྙམ་པའི་ཀུན་སློང་དེའང་རྒྱས་བསྡུས་བྱེད་ཚུལ་ཤེས་དགོས་ཏེ། སངས་

― GTD003_Page_0158 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་ཐོབ་པར་བྱ་ཞེས་པ་ཡོན་ཏན་ཀུན་རྫོགས་པར་བྱ་ཞེས་པ་ཡིན་ལ། དེ་རྫོགས་པ་ལ་སྲང་མདའི་མཐོ་དམན་བཞིན་སྐྱོན་ཀུན་སྤོང་དགོས། སྐྱོན་ལ་སྒོ་གསུམ་དུ་ཡོད་ཅིང་། དེར་ཡང་ཕྲ་རགས་གཉིས་རེ་ཡོད་པས། རགས་པ་མདོས་སྦྱོང་ཞིང་། ཕྲ་བ་སྔགས་ཀྱིས་སྦྱོང་དགོས་ལ། རགས་པ་མ་སྦྱངས་པར་ཕྲ་བ་སྦྱོང་ཚུལ་མེད་པས་སྔོན་ལ་མདོ་དང་། ཕྲ་བ་སྔགས་ལ་མ་བརྟེན་པར་སྦྱང་མི་ནུས་པས་སྔགས་ཏེ་གཉི་ག་ཚང་དགོས་པ་དེ་ཡིན། རགས་པའང་ལུས་ངག་གི་ཉེས་སྤྱོད་གཙོ་བོར་སྦྱོང་ཞིང་སྡོམ་བྱེད་སོ་ཐར་ཡིན་ལ། དེའི་རྩ་བ་ཆུང་འབྲིང་གི་ལམ་གྱིས་འཁོར་བ་སྤྱི་བྱེ་བྲག་གི་སྡུག་བསྔལ་བསམས་ནས་ངེས་འབྱུང་རྣམ་དག་སྐྱེ་བ་ལ་ཐུག་ཡོད། ཡིད་ཀྱི་ཉེས་པའི་རྩ་བ་ངར་འཛིན་ཡིན། དེས་རྩ་བ་བྱས་ཏེ་རང་གཞན་སོ་སོར་བཅད་ནས་ཆགས་སྡང་གིས་བླང་དོར་གོ་ལོག་པས་ཕུང་ཁྲོལ་ཐམས་ཅད་བྱས་པ་ཡིན་པས་ངར་འཛིན་དེ་དོན་དམ་བྱང་ཆུབ་ཀྱི་སེམས་ཀྱིས་སྦྱོང་། བློ་ངན་ཕྱི་མ་ཐམས་ཅད་བྱམས་སྙིང་རྗེའི་རྩ་བ་ཅན་ཀུན་རྫོབ་བྱང་ཆུབ་ཀྱི་སེམས་ཀྱིས་སྦྱོང་བས་སྐྱེས་བུ་ཆེན་པོའི་ལམ་ཐུན་མོང་བ་དེར་ཚང། སྐྱོན་ཕྲ་མོ་སྤོང་བར་སྔགས་ཀྱིས་སྣོན་པ་འདེབས་དགོས་ལ། དེའང་མཚན་བཅས་ཀྱིས་ལུས་ངག་དང་། མཚན་མེད་ཀྱིས་ཡིད་ཀྱི་ཉེས་པ་སྦྱོང་ཚུལ་ཡང་ཤེས་དགོས་ལ། མཐར་གཏུགས་ན་ལུས་ཀྱི་ཉེས་པ་སྦྱོང་བྱེད་བསྐྱེད་རིམ་ཕྲ་རགས། ངག་གི་ཉེས་པ་སྦྱོང་བྱེད་ཀུན་རྫོབ་སྒྱུ་མའི་རྫོགས་རིམ། ཡིད་ཀྱི་ཉེས་པ་སྦྱོང་

― GTD003_Page_0159 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་དོན་དམ་འོད་གསལ་གྱི་རྫོགས་རིམ་ཡིན། ཟུང་འཇུག་ནི་དེ་གཉིས་ཚོགས་པ་ལ་འཇོག་པས་ལོག་ན་མེད། དེ་ལྟར་སྒོ་གསུམ་གྱི་སྐྱོན་ཕྲ་རགས་ཟད་པར་སྤངས་ཏེ་སྐུ་གསུང་ཐུགས་རྡོ་རྗེ་གསུམ་གྱི་བདག་ཉིད་དུ་གྱུར་པ་ནི་སྐུ་གསུམ་དབྱེར་མི་ཕྱེད་པ་སངས་རྒྱས་ཀྱི་གོ་འཕང་ཡིན། འབྲས་བུ་དེ་འདྲ་བ་ཞིག་ཐོབ་པའི་ཕྱིར་དེ་དང་རྗེས་སུ་མཐུན་པའི་རྒྱུ་ཚོགས་ཀྱང་མ་ཚང་བ་མེད་པ་ཞིག་བྱའོ་སྙམ་དུ་མིག་རྒྱང་བསྲིངས། ཡིད་རྒྱ་བསྐྱེད་དེ། ཤིན་ཏུ་གོམས་པའི་ལམ་སྲང་ལ་བསམ་མནོ་བཏང་བ་བཞིན་དམིགས་འོག་ཏུ་རུག་གེ་ཚུད་པ་ཞིག་བྱུང་ན་ཀུན་སློང་རང་ལ་ལམ་རིམ་ཚང་བ་དང། བསྟན་པའི་གནད་རྫོགས་པ་བྱ་བ་དེ་བྱུང་བ་ཡིན་ནོ། །༈ ཡིག་ཆུང་སྐོར་ལ། བརྐྱང་ཕྱག་ནི་མདོ་སྡེ་རྣམས་སུ་སྡོང་པོ་རྩ་བ་ནས་བཅད་པ་བཞིན་ལུས་ཐམས་ཅད་ས་ལ་ཕབ་པའི་ཕྱག་བྱ་བར་གསུངས་པ་དེ་ཉིད་ཡིན་པས། ཅི་ནུས་སུ་ས་ལ་ལུས་བསྙལ་དུ་རུང་སྟེ། ཡོངས་འཛིན་རིན་པ་ཆེ་སོགས་ཀྱང་དེ་ལྟར་མཛད་ཀྱི་འདུག་ལ། སྔོན་བླ་མ་བྱམས་པ་རིན་པོ་ཆེས་ཀྱང་ཕྱག་གི་ཕན་ཡོན་ལུས་ཀྱིས་གང་ནོན་པའི་རྡུལ་གྲངས་དང་མཉམ་པ་འབྱུང་ཚུལ་འདི་ཚོ་ལ་བལྟས་ན་རྐང་ལག་ད་ལྟའི་འདི་ལས་རིང་ཙམ་ཡོད་ན་སྙམ་པ་འཆར་གསུང་གིན་ཡོད་འདུག་པས། ལག་པ་ཤིན་ཏུ་བརྐྱངས་ཏེ་ཐལ་མོ་སྦྱར་ན་རུང། འདི་ལ་ས་སྐྱའི་བཀའ་འབུམ་དུ་ཡན་ལག་བདུན་གྱི་ཕྱག་ཏུའང་གསུངས་སོ། །༈ སྤྱིར་སྟོང་མཆོད་དང་

― GTD003_Page_0160 ―

^{[མ་དཔེ་གཟིགས་ན་འདིར་གནོན།]}

[Full Size]

བརྒྱད་བརྒྱ་པའི་མཆོད་པ་སོགས་རྣམ་རྒྱལ་མའི་གཟུངས་མདོ་ན་གསལ་བས་གྲགས་ཆེ་ལ་ཕྱིས་སུ་ཐུའུ་བཀྭན་རིན་པོ་ཆེས་སྨན་བླར་སྦྱར་ཏེ་གསུངས་འདུག་པས། བདག་གིས་ཀྱང་ཐུགས་རྗེ་ཆེན་པོར་སྦྱོར་ཚུལ་དེ་ཉིད་བྲིས་པ་ཡིན། ལྷ་གཞན་ལའང་དེའི་རིགས་པ་སྦྱར་ན་ཚོགས་རྒྱ་ཆེན་གསོག་པའི་རྐྱེན་དུ་འགྲོ་བ་ལས་དགག་བྱ་ཡོད་དོན་མི་འདུག །འོན་ཀྱང་སྒྲོལ་མ་ལ་མཎྜལ་བཞི་པ་ལྟ་བུ་རང་རང་གི་ལུགས་ཀྱི་མཆོད་ཚུལ་མི་འདྲ་བ་ཡོད་པ་དེར་དེ་ཉིད་གཙོ་བོར་བྱས་ན་ཕྱག་བཞེས་ཀྱི་རྒྱུན་མི་ཉམས་ཤིང་དང་བ་འདྲེན་པའི་ཁྱད་ཡོད། ༈ སྨན་བླའི་མདོ་ཆོག་སྐབས་བུམ་ཆོག་མེད་པར་འོད་ཟེར་སྤྲོ་བསྡུས་རང་གཞན་གྱི་ཉེས་པ་ཐམས་ཅད་སྦྱངས་པའི་དམིགས་པ་བྱེད་པ་མདོ་ལུགས་ཤེར་ཕྱིན་གྱི་གླེང་གཞིའི་སྐབས་ལྟ་བུ་ཡིན་པས་འགལ་བ་མེད། ༈ ཉི་མ་སྦས་པའི་ལུགས་ཀྱི་སྒྲོལ་མའི་དབང་ངམ་རྗེས་གནང་ཐོབ་ཡོད་ན་ལུགས་གཉི་གའི་སེང་ལྡེང་ནགས་སྒྲོལ་གྱི་སྐུ་མདོག་ཕྱག་མཚན་སོགས་འདྲ་བས་དེ་གཞིར་བཞག་ལ་བསྙེན་པ་བླ་མེད་ལྟར་བྱས་ན་ལེགས། ༈ ཐ་མ་ཁའི་ཉེས་པ་སྦྱོང་ཐབས་རྟེན་ལ་བདུག་སྤོས་གང་ལེགས་འབུལ་བ། ཁྲུས་གསོལ་བྱེད་པ། ཡིག་བརྒྱ་དང་ཚུལ་ཁྲིམས་རྣམ་དག་གི་གཟུངས་བཟླ་བ་སོགས་བསམ་པ་དག་པས་བྱས་ན། གང་ཞིག་སྔོན་ཆད་བག་མེད་གྱུར་པ་ཡང། །ཕྱི་ནས་བག་དང་ལྡན་པ་ཉིད་གྱུར་ན། །ཟླ་བ་སྤྲིན་བྲལ་ལྟ་བུར་རྣམ་མཛེས། གསུངས་པ་དེ་ཡིན་པས་ཤིན་ཏུ་ལེགས་སོ། ། ༈ སྲིད་པའི་རྩ་བ་མ་རིག་ཞིང་

― GTD003_Page_0161 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཡིས། །ལས་ཀྱི་ས་བོན་རྣམ་ཤེས་ཞིང་དུ་བཏབ། །སྲེད་དང་ལེན་པའི་ཆུ་ལུད་ཀྱིས་གསོས་པས། །ས་བོན་སྟོབས་རྒྱས་སྲིད་པའི་ངོ་བོར་འཕོས། །དེ་ལས་སྐྱེ་བའི་རང་བཞིན་མིང་གཟུགས་ཀྱི། །མྱུ་གུ་འབུས་ཤིང་སྐྱེ་མཆེད་སྡོང་བུར་འདྲིལ། །རེག་པའི་མེ་ཏོག་ཚོར་བའི་འབྲས་སྨིན་ཡང། །རྒ་ཤིས་བརྔས་ཏེ་སླར་ཡང་སྲིད་པར་འདེབས། །ཇི་སྲིད་བདག་མེད་མེ་ཡིས་མ་བཅོམ་པ། །དེ་སྲིད་སྐྱེ་ཤིའི་འཁོར་ལོ་བསྐོར་དགོས་པས། །གནས་ལུགས་ཟབ་མོར་བག་ཆགས་ཅི་ཐེབས་ཀྱིས། །སྲིད་པའི་རྩ་བ་དྲུངས་ནས་འབྱིན་པར་ཤོག །འདིའང་མཚམས་ཀྱི་ཐུན་གསེང་ཞིག་ཏུ་རྟེན་འབྲེལ་ཡན་ལག་བཅུ་གཉིས་ཀྱི་རིམ་པས་འཁོར་བར་འཁོར་ཚུལ་ལས་འཕྲོས་ཏེ་ཐོལ་བྱུང་དུ་གསུངས་པ་ཕྲན་རཏྣ་ཨཱ་ནནྟ་བདག་གིས་འཕྲལ་དུ་ཡི་གེར་བཀོད་པའོ།། །། ༈ ན་མོ་གུ་རུ་རཏྣ་ཏྲ་ཡཱ་ཡ། ནངས་པར་མལ་ལས་ལྡང་བ་ན་མདང་མ་ཤི་བར་ལང་རྒྱུ་བྱུང་བ་བླ་མ་དཀོན་མཆོག་གི་ཐུགས་རྗེ་ཡིན། སྤྱིར་ཚེ་ལྷག་གང་ཡོད་དང་ཁྱད་པར་དེ་རིང་གི་ཉི་མ་འདིར་སྡིག་པས་མ་གོས་ཤིང་དགེ་བ་འབད་ནས་ཆུད་ཟོས་སུ་མ་སོང་བ་བྱེད་སྙམ་པའི་འཕེན་པ་དང་། དེ་ལྟར་འོངས་པ་དཀོན་མཆོག་མཁྱེན་སྙམ་དུ་གསོལ་བ་འདེབས། སྐྱབས་འགྲོ་བྱེད་པ་ལ་མདུན་གྱི་ནམ་མཁར་མཆོད་སྤྲིན་འཁྲིགས་པའི་དབུས་སུ་བསྟན་པའི་བདག་པོ་ཐུབ་པའི་དབང་པོ་དང་ངོ་བོ་དབྱེར་མ་མཆིས་པའི་འཇམ་མགོན་བླ་མ་ཙོང་ཁ་པ་ཆེན་པོ་ཕྱག་གཉིས་ཆོས་འཁོར་གྱི་ཕྱག་རྒྱས་པད་སྡོང་གི་སྟེང་དུ་གླེགས་རལ་

― GTD003_Page_0162 ―

^{[མ་དཔེ་གཟིགས་ན་འདིར་གནོན།]}

[Full Size]

བསྣམས་པ། ཆོས་གོས་རྣམ་གསུམ་དང་པཎ་ཞྭ་གསོལ་བའི་ཐུགས་ཀར་རྗེ་བཙུན་བྱམས་མགོན་གསེར་གྱི་མདོག་ཅན་ཆོས་འཁོར་གྱི་ཕྱག་རྒྱ་མཛད་པ། དབུའི་སྟེང་དུ་བླ་མ་ཐུབ་དབང་གི་ངོ་བོ་བྱང་ཆུབ་མཆོད་རྟེན་ཡོད་པ། རྗེ་བླ་མའི་མགྲིན་པར་སྤྱན་རས་གཟིགས་དང་ལྟེ་བར་རྗེ་བཙུན་སྒྲོལ་མ་མཐའ་སྐོར་དུ་དངོས་བརྒྱུད་ཀྱི་བླ་མ་ཡི་དམ་མཁའ་འགྲོ་ཆོས་སྲུང་དང་བཅས་པས་བསྐོར་ནས་བཞུགས་པ། ཐམས་ཅད་རང་ལ་དགྱེས་པའི་ཚུལ་གྱིས་གཟིགས་པར་བསམས། རང་གི་མཐའ་སྐོར་དུ་ཕ་མ་རིགས་དྲུག་གི་སེམས་ཅན་ཐམས་ཅད་གསལ་བཏབ་སྟེ་འཁོར་བ་སྤྱི་བྱེ་བྲག་གི་སྡུག་བསྔལ་ལ་འཇིགས་ཤིང་སྐྲག་པ་དང་། མདུན་གྱི་སྐྱབས་ཡུལ་རྣམས་ལ་དེ་ལས་སྐྱོབ་པའི་ནུས་པ་ཡོད་པར་ཡིད་ཆེས་ཤིང་། ད་རེས་སྐྱབས་ཁྱད་པར་ཅན་རྣམས་ཀྱི་ཞབས་ནས་ལན་གཅིག་ཟིན་པའི་དུས་འདིར་གཏན་གྱི་བདེ་བའི་བློ་གདེང་ཡོད་པ་ཞིག་བྱེད་དགོས་པར་འདུག་སྙམ་སྟེ་སྐྱབས་འགྲོ་བྱ། ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་ཐམས་ཅད་རི་རབ་གླིང་བཞི་མཁོ་དགུའི་དཔལ་འབྱོར་དང་བཅས་པའི་རྣམ་པར་སྤྲུལ་ཏེ་ཕུལ་བས་ཞིང་བདག་གིར་བཞེས་ནས་དེའི་སེམས་ཅན་ཐམས་ཅད་སྨིན་གྲོལ་ལ་བཀོད་པར་བསམས། ཕྱག་བསྐོར་སོགས་ཀྱི་ཚེའང་སྐྱབས་ཡུལ་ནམ་མཁའ་གང་བ་ལ་རང་དང་སེམས་ཅན་ཐམས་ཅད་ཀྱིས་ལྷན་དུ་བྱས་པར་བསམས་ན་དེའི་ཚོད་ཀྱི་འགྱུར་ཆེའོ། །མཇུག་ཏུ་སྐྱབས་ཡུལ་རྣམས་དབུས་ཀྱི་རྗེ་བླ་མ་ལ་བསྡུས་ཏེ་དེ་རྒྱལ་བ་ཀུན་གྱི་མཁྱེན་བརྩེ་ནུས་པའི་ངོ་བོ་རིགས་

― GTD003_Page_0163 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་གཅིག་ཏུ་བསྡུས་པར་བལྟས་ལ་བདུད་རྩི་འབེབ་སྦྱང་གི་དམིགས་པ་དང་བཅས་དམིགས་བརྩེ་མ་འདོན། བྱམས་པས་དམ་བཅའི་གཟུངས་བཟླ་བའི་ཚེ་དེའི་ཐུགས་ཀའི་བྱམས་མགོན་གྱི་ཐུགས་ཀར་མཻཾ་ཡིག་ལ་གཟུངས་ཀྱིས་བསྐོར་བ་ལས་འོད་ཟེར་འཕྲོས། རང་གཞན་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ས་ལམ་གྱི་རྟོགས་པ་ཁྱད་པར་ཅན་སྐྱེ་བར་བྱིན་གྱིས་བརླབས་པར་བསམས་ལ་གཟུངས་བཟླ། མཇུག་ཏུ་འདི་ནས་འཕོ་བའི་ཚེ་བྱམས་མགོན་གྱི་དྲུང་དུ་སྐྱེ་བ་དང་། མ་འོངས་པ་ན་ཚེ་ལོ་བརྒྱད་ཁྲིའི་དུས་བྱམས་མགོན་འཇིག་རྟེན་དུ་བྱོན་པའི་ཚེ་སྲས་ཀྱི་ཐུ་བོར་འགྱུར་བའི་སྨོན་ལམ་དང་དེ་ལྟར་ཞལ་གྱིས་བཞེས་པའི་དམིགས་པ་བྱ། མ་ཎི་བཟླ་བའི་ཚེ་མགྲིན་པའི་སྤྱན་རས་གཟིགས་ཀྱི་ཐུགས་ཀར་ཧྲཱིཿ ཡིག་ལ་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས་རིགས་དྲུག་སོ་སོའི་གནས་སུ་སོང་སྟེ་རང་རང་གི་སྡུག་བསྔལ་ལས་ཐར་པར་བྱས། འཕགས་པའི་གོ་འཕང་ལ་བཀོད་དེ་ཐམས་ཅད་ཀྱིས་མགྲིན་གཅིག་ཏུ་གཟུངས་འུར་འུར་སྒྲོགས་པར་བསམས་ལ་བཟླ། སྒྲོལ་མ་འདོན་ཚེ་ལྟེ་བར་བཞུགས་པའི་རྗེ་བཙུན་སྒྲོལ་མའི་ཐུགས་ཀར་ཏཾ་ཡིག་ལས་སྒྲོལ་མ་ཉེར་གཅིག་གི་ལྷ་ཚོགས་མར་མེའི་འཕྲེང་བ་ལྟར་བྱུང་ཞིང། གཞན་ཡང་སྤྲུལ་པའི་བཀོད་པ་དཔག་ཏུ་མེད་པ་མཁའ་ཁྱབ་ཏུ་སྤྲོས་ཏེ་རང་གཞན་སེམས་ཅན་ཐམས་ཅད་འཇིགས་པ་ཆེན་པོ་བརྒྱད་སོགས་ལས་བསྐྱབ། མཆོག་

― GTD003_Page_0164 ―

^{[མ་དཔེ་གཟིགས་ན་འདིར་གནོན།]}

[Full Size]

དང་ཐུན་མོང་གི་དངོས་གྲུབ་སྩལ་བར་བསམས་ལ་འདོན། ཁྱད་པར་དུ་ཤོ་ལོ་ཀ་རེ་རེའི་སྐབས་སྒྲོལ་མ་དེ་དང་དེས་ཐུན་མོང་མ་ཡིན་པར་བྱིན་གྱིས་བརླབས་པའི་དམིགས་པ་བྱ། རྒྱུན་དུའང་སྐྱབས་ཡུལ་དེ་རྣམས་ཡིད་ངོར་མ་བརྗེད་པར་བྱས་ལ་ཅི་ཟ་ཅི་འཐུང་གི་ཕུད་འབུལ་བ་སོགས་ཚོགས་གསོག་པའི་ཞིང་དང་སྒོ་གསུམ་བླང་དོར་གྱི་དཔང་པོར་བྱེད། ཚེ་གཟུངས་བཟླ་ན་སྤྱན་རས་གཟིགས་ཀྱི་རིགས་བདག་འོད་དཔག་མེད་དེ་ཚེ་དཔག་མེད་དུ་བསྒྱུར་བའི་ཐུགས་ཀའི་སྔགས་འཕྲེང་ལས་འཆི་མེད་ཚེའི་བདུད་རྩིའི་རྒྱུན་བབས་པར་བསམས་ནས་བཟླ། དགའ་ལྡན་ལྟ་བུར་ཡིད་སྨོན་བྱེད་ན་གང་དུ་སྡོད་པའི་གནས་དེ་དགའ་ལྡན་གྱི་ཞིང་ཡིན་སྙམ་པ་དང་། གང་དུ་འགྲོའང་དགའ་ལྡན་དུ་འགྲོ་སྙམ་པ་དང་། དགེ་བ་གང་བྱས་དེའི་རྒྱུར་བསྔོ་ལ་ཉལ་བའི་ཚེ་རྗེ་བླ་མའང་ཐུགས་ཀའི་བྱམས་མགོན་ལ་བསྡུས་ཏེ་དེའི་ཞབས་ལ་མགོ་གཏད་ནས་དད་པའི་ངང་དུ་གཉིད་ལ་འགྲོ་བ་བྱེད། བྱམས་མགོན་གྱི་འཕོ་བ་སྦྱོང་ན་རྗེ་བླ་མ་རང་གི་སྤྱི་བོར་བྱོན། རང་ཉིད་དེའི་ཐུགས་ཀའི་བྱམས་མགོན་ལ་ཡར་ཐིམ། དེ་དགའ་ལྡན་དུ་གཤེགས་པའི་ཐུགས་ཀ་ནས་ཕྱིར་ཐོན་ཏེ་པངྨའི་སྦུབས་སུ་སྐྱེས་པར་བསམས། བདེ་བ་ཅན་དུ་གཙོ་བོར་འཕེན་པ་གཏོང་ན་འགྲོ་འདུག་གི་དམིགས་པ་བསྔོ་བའི་ཁ་བསྒྱུར་སོགས་འདྲ་ལ། གཉིད་དུ་འགྲོ་ཁར་རྗེ་བླ་མ་མགྲིན་པའི་སྤྱན་རས་གཟིགས་ལ་ཐིམ། དེ་རིགས་བདག་འོད་དཔག་མེད་ལ་ཐིམ་པའི་ཞབས་ལ་མགོ་གཏད་པའམ། སྤྱན་རས་གཟིགས་ཀྱི་ཞབས་

― GTD003_Page_0165 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་མགོ་གཏད་དེ་བདེ་བ་ཅན་དུ་འཁྲིད་པའི་ས་མཁན་མཛད་དུ་གསོལ་སྙམ་པའི་དད་གདུང་དྲག་པོ་བསམ་གཏན་ཉལ་སྒོམ་གྱི་མན་ངག་བཞིན་བྱ། དགེ་རྩ་གང་བྱས་ཀྱི་མཇུག་ཏུ། ཤེས་ཀྱི་ཁེ་འདོད་པ་དང་གྲགས་པ་དང། །ཞེས་སོགས་དོན་མེད་པའི་འཁོར་བའི་ཕུན་ཚོགས་ཀྱི་རྒྱུར་མི་འགྱུར་བའི་སྨོན་ལམ་དང་། འཇམ་དཔལ་དཔའ་བོས་ཞེས་སོགས་དང། དུས་གསུམ་གཤེགས་པའི་ཞེས་སོགས་རྒྱལ་བས་བསྔགས་པའི་སྨོན་གནས་ཀུན་གྱི་རྒྱུར་འགྲོ་བའི་སྨོན་ལམ་དང་། མཆོག་གསུམ་བསླུ་བ་མེད་པའི་ཐུགས་རྗེས་དེ་བཞིན་དུ་གྱུར་ཅིག་སྙམ་པས་བདེན་པ་བདར་བ་སོགས་བྱའོ། །བྱམས་མགོན་ཐུགས་ཀར་བསྒོམ་པ་བཀའ་གདམས་གླེགས་བམ་དང་ལྷོ་བྲག་པའི་གསུང་གིས་འགྲུབ་ལ། སྤྱན་རས་གཟིགས་མགྲིན་པར་བསྒོམ་པ་རིགས་གསུམ་སྤྱི་སྒྲུབ་ཀྱི་མན་ངག་དང། སྒྲོལ་མ་ལྟེ་བར་བསྒོམ་པ་བླ་མེད་ཀྱི་རྒྱུད་དུ་མའི་དགོངས་པ་ཡིན་པས་ཡིད་ཆེས་པའི་གནས་སུ་བྱའོ། །ཞེས་པ་འདི་ནི་དད་བརྩོན་ལྷག་བསམ་དང་ལྡན་པ་ཇ་སག་ཐུ་རྒྱལ་པོའི་སྲིང་མོ་དབང་ལྡན་དབང་མོ་བུ་ཁྲིད་ཀྱིས་འདི་རྣམས་འདོན་ཐབས། རྒྱུན་གྱི་ཉམས་ལེན། འགོ་མཇུག་ཏུ་ཀུན་སློང་འཆོས་ཚུལ་སོགས་ཚང་ཞིང་འཁྱེར་བདེ་བ་ཞིག་དགོས་ཚུལ་བསྐུལ་མ་བྱུང་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྨྲས་པའི་ཡི་གེ་པའང་སྔགས་རམས་པ་དཀོན་མཆོག་ཀུན་དགའོ།། །།༈ ལྕགས་སྦྲུལ་ཟླ་༡༡ཚེས་༧ལ་གུ་ཤྲི་སྐལ་

― GTD003_Page_0166 ―

^{[མ་དཔེ་གཟིགས་ན་འདིར་གནོན།]}

[Full Size]

བཟང་གིས་སྐུ་ཞབས་རིན་པོ་ཆེའི་འཁྲུངས་རབས་གསོལ་འདེབས་ཤིག་དབྱངས་ངེས་པ་བྱ་དཀའི་མཛེས་རྒྱན་གྱིས་བརྩམས་ཡོད་པ་གཟིགས་ནས་དེ་ལས་འཕྲོས་ཏེ་ཞལ་རྩེད་ཀྱི་ཚུལ་དུ། རྒྱལ་བས་ཡང་ཡང་བསྔགས་མཛད་གྲགས་པ་དང། །ཐལ་རང་ཐ་དད་མཛད་པ་སངས་རྒྱས་བསྐྱངས། །ཚད་མས་སྨྲ་ངན་ཚལ་རབ་ཕམ་མཛད་གླང། །མཐའ་བྲལ་ལྟ་བ་གསལ་མཛད་ཟླ་བ་གྲགས། །འཇམ་དབྱངས་ལྷག་ལྷར་མཛད་པ་དགྲ་ལས་རྒྱལ། །བཀའ་གདམས་བསྟན་པ་རྒྱས་མཛད་རཏྣ་གསལ། །འཇམ་དབྱངས་བླ་མར་གདམས་མཛད་པཉྩཱ་སྱ། །བསྟན་དགྲ་ཐལ་བར་རླག་མཛད་རྒྱལ་མཚན་ཞབས། །ལྷག་པར་ཟབ་གསང་གདམས་པ་རྒྱས་མཛད་འཕགས། །གཞན་ལ་ཕན་མཛད་རཏྣ་ས་ར་དང། །མཐའ་དག་བསྟན་ལ་མངའ་མཛད་འཇམ་དབྱངས་བཞད། །བདག་ཅག་ལྷག་པར་བསྐྱངས་མཛད་ཨ་བྷ་ཡ། །སླར་ཡང་རྒྱས་མཛད་ས་ར་ཞབས་པད་བརྟན། །རང་ཅག་རྣམས་ལ་ཟབ་རྒྱས་གདམས་པ་སྩལ། །སངས་རྒྱས་བསྟན་པ་ཕ་མཐར་རབ་རྒྱས་པས། །ལས་ཅན་དད་ལྡན་ཐམས་ཅད་ས་མ་ཛཿ །བླ་མ་རྣམས་ལ་བཅའ་ལག་གང་བཟང་བསྟབས། །གྲྭ་བ་ཐམས་ཅད་གྲྭ་ཇ་མང་ཇས་བརྒྱག །ཇ་མར་རྩམ་པ་མཐའ་དག་ཆར་ལྟར་བབས། །རྟག་བརྟན་རང་དབང་ལྡན་ན་དགའ་བ་ལ། །ཞེས་དང། ༈ ཡང་། ཟབ་རྒྱས་མན་ངག་མཐའ་ཡས་རྒྱ་གར་ནས། །གངས་ཅན་ས་ལ་སྤྱན་དྲངས་དར་མ་གྲགས། །འཇམ་

― GTD003_Page_0167 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱངས་བླ་མས་བཀའ་ཕབ་གསང་སྔགས་བསྟན། །ཕ་མཐར་རྒྱས་མཛད་པྲཛྙ་པཉྩ་སྱ། །སླར་ཡང་འཇམ་དཔལ་དབྱངས་གང་ཨཱ་ས་ནར། །མངའ་མཛད་སངྒྷ་གཞན་ཕན་ཟླ་དང་བྲལ། །ཡང་དག་ལམ་བཟང་གདམས་པ་ཉམས་བླངས་ནས། །གཞན་ལ་གསལ་མཛད་ངག་དབང་བསྟན་རྒྱན་ཞབས། །ཁ་བཤད་མཁས་པས་རཏྣ་ཤཱ་ས་ན། །གཞན་ལ་གསལ་ཡང་རང་རྩ་གསལ་བར་དཀའ། །ངག་དབང་སྐལ་བཟང་དབྱངས་གཞན་སྤངས་བྱས་ནས། །འཇམ་དབྱངས་བླ་མར་རྣམ་ཐར་བརྩམས་པ་ལ། །བལྟས་ནས་སྨྲས་པ་བཤད་བྱ་གཞན་ཟབ་ཀྱང། །བཤད་ཐབས་འདྲ་ལ་མཁས་རྣམས་བལྟས་ན་གསལ། །ཐ་སྐད་གཏམ་ལ་གང་བྱས་ལས་སླ་ཡང། །ནང་ལ་སྦྱར་ན་ཐམས་ཅད་དཀའ་བར་སྣང། །སྒྲ་ཚད་སྙན་ངག་བཀའ་བསྟན་རབ་འབྱམས་ལ། །སྦྱངས་ཀྱང་ཐ་མལ་བསམ་པ་རང་སར་གནས། །དྷརྨས་མཱན་གང་ལ་དྷཱ་ར་ཡ། །མནྟྲས་མཱ་ན་ག་ཙམ་ཏ་ར་ཎཿ །ཞེས་པ་གཉིས་འཕྲལ་དུ་ལྗགས་རྩོམ་གནང། ༈ འཇམ་དབྱངས་བླ་མ་འགྲན་བྲལ་ཞལ་སྔ་ནས། །བཀྱལ་ཀ་བྱས་ནས་ཐལ་མར་བཀའ་སྩལ་པ། །གཞན་རྣམས་བསྐལ་པར་མཱ་ནར་བརྣག་ན་ཡང། །ཆ་ཤས་ཙམ་ཡང་འཆར་དཀའ་དཔྱད་ན་གསལ། །ཞེས་ཀྱང་སྨྲས་སོ། །༈ འཇམ་མགོན་སྨྲ་བའི་ཟླ་བར་ཕྱག་བགྱིས་ཏེ། །ཟླ་ཟེར་ཕོག་པས་རིན་ཆེན་འབྱུང་གནས་ནི། །

― GTD003_Page_0168 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྱུར་བའི་ངོ་མཚར་རླབས་འཕྲེང་རྟོགས་འདོད་ན། །དང་པོ་ཡི་གེ་གཅིག་ལ་ལྕི་ཡང་ཟུང། །གཉིས་བཞི་གསུམ་བརྒྱད་བཞི་ལ་བཅུ་དྲུག་དང། །ལྔ་ལ་སོ་གཉིས་དྲུག་ལ་རེ་བཞི་སོགས། །ཉིས་འགྱུར་འཕེལ་ཞིང་དེ་སྙེད་ཚིག་རྐྱང་དང། །ཉིས་འགྱུར་བཞི་འགྱུར་ཚུལ་དུ་ལྕི་ཡང་དགོད། །གསུམ་གྱི་གྱེན་གཤར་གསུམ་པའི་འཕྲེད་གྲལ་བརྒྱད། །མ་ཡ་ར་ས་ཏ་ཛ་བྷ་ན་སྟེ། །བྷ་ཐོག་ཛ་དབུས་ས་མཐའ་མ་ཀུན་ལྕི། །ཡ་ཐོག་ར་དབུས་ཏ་མཐའ་ན་ཀུན་ཡང། །ཡར་བལྟས་ཐ་མ་ལྕི་ན་ཕྱེད་ཡན་དང། །གཉིས་ལྕི་དེའི་སྟོང་གསུམ་ལྕི་དེ་ཡིའང་སྟོད། །མཐའ་ཡས་སྨད་དེ་གཉིས་ཡང་དེ་ཡིའང་སྨད། །མཐའ་ཡང་གཉིས་ལྕི་སྨད་ཆའི་སྟོད་ལ་སོགས། །གནས་ཀྱི་རིམ་པར་ཡང་བས་གོང་ནས་ཕབ། །གནས་དེར་ལྕི་ན་བཏང་སྙོམས་ཉིད་དུ་འཇོག །དོན་འདི་མ་མཐོང་རི་མོའི་རྗེས་འདེད་པ། །མུན་ནང་རྩིག་པར་འཁྱུད་དེ་སོང་བ་འདྲ། །རེ་བཞི་པ་ལ་དོར་བྱའི་གནས་དྲུག་སྟེ། །སོ་གཉིས་བཅུ་དྲུག་བརྒྱད་བཞི་གཉིས་གཅིག་གོ །ཛ་སའི་མཐའ་ནི་སོ་གཉིས་གནས་ཡིན་ལ། །ལྕི་བས་སྟོད་དུ་ཤེས་ཀྱི་བགྲང་མི་དགོས། །དེ་གོང་གཉིས་པ་བཅུ་དྲུག་གསུམ་པ་བརྒྱད། །བཞི་པ་བཞི་ཡི་གནས་རྣམས་ཡང་བས་ན། །ཐུར་དུ་ཕབ་སྟེ་ཉེར་བརྒྱད་གོང་དུ་འཕུད། །གཉིས་གནས་ལྕི་བས་བཏང་སྙོམས་གཅིག་གི་གནས། །ཡང་བས་སྔ་མར་བསྣན་ནས་ཉེར་དགུ་པོ། །གོང་ཕུད་སུམ་ཅུ་པ་ཡི་སྟེང་དུ་འབབ། །མ་ཏའི་མཐའ་ནི་ཡང་བས་སུམ་ཅུ་གཉིས། །གོང་དུ་ཕུད་དེ་

― GTD003_Page_0169 ―

^{[མ་དཔེ་གཟིགས་ན་འདིར་གནོན།]}

[Full Size]

སྨད་ཀྱི་གྲངས་སུ་ཤེས། །དེ་གོང་བཅུ་དྲུག་ཡན་གྱི་གནས་ལྔ་པོ། །ལྕི་ཕྱིར་དོར་དུ་མེད་པས་སོ་གསུམ་མོ། །གལ་ཏེ་ཡ་ཏ་ཡིན་ན་གཅིག་གི་གནས། །ཡང་ཕྱིར་གོང་དུ་བསྣན་ཏེ་སོ་བཞིར་འགྱུར། །རེ་གཅིག་བྱེད་ན་གཅིག་དང་གཉིས་ཀྱི་གནས། །ལྕི་ཡི་གཞན་ཀུན་གོང་ཕུད་ཏ་ན་འོ། །པྲ་སྟཱར་ཅི་ཙམ་མང་ཡང་ཀུན་ལྕི་བའི། །སྔོན་རོལ་ཏ་ན་བྱུང་ན་རེ་གཅིག་དང། །མ་ཛའི་བརྒྱད་གནས་ཡང་བས་ཞེ་གཅིག་བྱེད། །བདུན་སོགས་རིམ་བཞིན་བརྒྱ་དང་ཉེར་བཞིའི་གནས། །ཉིས་བརྒྱ་ང་དྲུག་ལྔ་བརྒྱ་བཅུ་གཉིས་དང། །ཆིག་སྟོང་ཉེར་བཞི་ཉིས་སྟོང་ཞེ་བརྒྱད་ཀྱི། །གནས་སོགས་འདོར་ལེན་སྔ་མས་ཤེས་པར་བྱ། །སྡེབ་ལེགས་ཉུང་ངུའི་ཚིག་གིས་སྡེབ་སྦྱོར་ཀུན། །བསྡེབས་ཚུལ་ཤེས་འདི་རིགས་པའི་འཕྲུལ་གྱིས་བསྡེབས། །བསྡེབས་པའི་དགེ་བས་བློ་གསལ་ངང་མོ་བརྒྱ། །སྡེབས་གཅིག་རིག་གནས་རྒྱ་མཚོར་འཕུར་བར་ཤོག །ཅེས་དཀོན་མཆོག་བསྟན་སྒྲོན་གྱིས་འདི་སྐོར་བལྟ་མ་མྱོང་ཡང། ཡི་གེ་གསུམ་པའི་པྲསྟཱ་ར་ཞིག་གི་སྟེང་ནས་དཔྱད་དེ་བཀོད་པ་ཡིན་པས་ཐ་སྙད་མཁན་པོ་རྣམས་ཀྱིས་ཡང་དག་པར་མཛོད་ཅིག ། ༈ རཏྣཱ་ཀ་རས་པྲསྟཱ་ར། །འགོད་ཚུལ་མིང་སོགས་བཤད་པ་ཡི། །ཞར་ལ་ལྕི་ཡང་དཔེར་བརྗོད་ཀྱང། །བསྟན་ཕྱིར་ཡ་མཚན་ཆེ་ཞེས་གྲགས། །བོད་ཡིག་འདོགས་མེད་རྐྱང་པ་ཙམ། །མང་འདུས་དོན་སྟོན་མི་ནུས་ཀྱང། །སྔོན་རྗེས་འཇུག་ཅན་ལྕི་དང་གཞན། །ཡང་བར་བྱས་ཏེ་དཔེར་མཚོན་ན། །ཡིག་

― GTD003_Page_0170 ―

^{[མ་དཔེ་གཟིགས་ན་འདིར་གནོན།]}

[Full Size]

བདུན་མཐའ་ནས་གས་བརྒྱན་ཅིང། །གཞན་གཉིས་མས་མཚན་ཀུན་ལྕིར་བཞག །དེའི་མིང་དབྱར་རྔའི་མིང་ཞེས་བསྒྲགས། ། ༈ ན་ན་ལ་ནི་རེ་རེ་སྟེ། །དེ་ནི་རྔ་སྒྲ་ཆེ་རུ་སྨྲ། །མཐའ་ཡང་ཏ་སྟེ་ཐོག་ཡང་ཡ། །དེའི་མིང་རྫ་རྔ་ཞེས་བརྗོད་བྱ། ། ༈ རེ་རེ་ན་ཛ་དབུས་ལྕི་གའང་། །ཐ་མ་དེ་ལ་དབྱར་རྔ་གདགས། །ན་ཛ་ག་ཡི་དབུས་ལྕི་གང། །ཛ་སྟེ་ག་ནི་རྗེས་མ་ཡིན། །མཐའ་ཡང་དེ་རྗེས་གཉིས་མཉམ་ཏ་མ་ན། །དེའི་མིང་ཆུ་སྐྱེས་བཞད་པའི་གེ་ས་ར། ། ༈ ཐོག་ལྕི་ཐ་མ་ལྕི་གཉིས་བྷ་ས་དག །འདི་ལ་ཤ་བ་རྒྱ་བོའི་རྭ་ཅོ་ཟེར། ། ༈ ལྕི་ཡང་གོ་རིམ་དུ་སྤེལ་ཛ་ཏའང་ཛ། །དེའི་མིང་དྲི་ཟའི་བུ་མོའི་གླུ་དབྱངས་སོ། ། ༈ རྗེས་བཞི་ཡང་ཞིང་སྔོན་ལྕི་མ་ཏ་ན། །འཐུང་བའི་གཅོད་རྒན་ལག་གི་ཌཱ་མ་རུ། །ཀུན་ལྕི་འོ་མཐའ་མ་ལྕི་ཟུང་མས་དག །དཀར་གསལ་འོད་ཀྱི་རྩེ་དགའི་དྲ་བ་འགྱེད། །རྟོགས་པར་སླ་ཕྱིར་དོན་ཆེན་མིན། །མང་པོར་མཁོ་ཕྱིར་དོན་ཆུང་མིན། །བོད་སྐད་བྱས་ཕྱིར་རྒྱ་ལུགས་མིན། །སྡེབ་སྦྱོར་བྱས་ཕྱིར་བོད་ལུགས་མིན། །ཅི་ཡང་མིན་པའི་རོལ་རྩེད་འདི། །གང་ཡང་མིན་པའི་སྒོམ་པས་སྨྲས། །ཞེས་པའང་མཚམས་ཀྱི་ཐུན་གསེང་ཞིག་ཏུ་སྡེབ་སྦྱོར་གྱི་བརྗོད་བྱ་ཟབ་མི་ཟབ་ཀྱི་བཀའ་མཆིད་ཅིག་ལས་འཕྲོས་ཏེ་ཞལ་རྩེད་ཀྱི་ཚུལ་དུ་སྩལ་བ་ཕྲན་རཏྣ་ཨཱ་ནནྟས་བརྗེད་དུ་ཕངས་ནས་ཡི་གེར་བཀོད་པའོ།། །།

བསྟན་འབར་མའི་འགྲེལ་པ་ལེགས་བཤད་བསྟན་པའི་སྒྲོན་མེ།

― GTD003_Page_0171 ―

^{[མ་དཔེ་གཟིགས་ན་འདིར་གནོན།]}

[Full Size]

བསྔོ་བའི་རྒྱལ་པོ་བསྟན་འབར་མའི་དགོངས་དོན་རྒྱ་ཆེར་འགྲེལ་པ་ལེགས་བཤད་བསྟན་པའི་སྒྲོན་མེ་ཞེས་བྱ་བ་བཞུགས་སོ། །

― GTD003_Page_0172 ―

^{[མ་དཔེ་གཟིགས་ན་འདིར་གནོན།]}

[Full Size]

རྨད་བྱུང་ཐུགས་རྗེ་ཆེན་པོའི་དབང་གྱུར་ཏེ། །ཕྱིན་དྲུག་བསྡུ་བཞིའི་སྤྱོད་པ་མཐར་སོན་པས། །མི་འཇིགས་བཞི་ལྡན་གོ་འཕང་མཆོག་བརྙེས་པ། །སྟོན་པ་མཉམ་མེད་དེ་ལ་མགོས་ཕྱག་འཚལ། །གང་གིས་མཐའ་ཡས་བསྐལ་པར་རབ་བསྒྲུབས་པ། །མཁའ་མཉམ་འགྲོ་བའི་སྡུག་བསྔལ་མུན་སེལ་ཞིང། །མངོན་མཐོ་ངེས་ལེགས་ལམ་བཟང་གསལ་བྱེད་མཆོག །བསྟན་པ་རིན་ཆེན་སྒྲོན་མེ་འདི་ཁོ་ན། །དེ་ཉིད་རིང་དུ་འབར་བར་སྨོན་པ་ནི། །དུས་གསུམ་རྒྱལ་བའི་བཞེད་དགོངས་མཐར་ཐུག་དང། །རྣམ་དག་སྨོན་པའི་ཆུ་བོ་མ་ལུས་པ། །གཅིག་ཏུ་འཁྱིལ་པའི་ཡིད་བཞིན་རྒྱ་མཚོ་ཡིན། །དེ་ཕྱིར་ལྷ་མིའི་སྟོན་པ་མཆོག་དེ་ཡི། །དཔལ་གྱི་མགུར་ནས་ལེགས་གསུང་སྨོན་ཚིག་གི །དཔག་བསམ་མྱུ་གུ་དོན་གྱི་ཡལ་གའི་ཕྱོགས། །རྫོགས་པའི་དགེ་མཚན་ཀུན་ཏུ་སྤྲོ་བར་བྱ། །དེའང་

― GTD003_Page_0173 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐལ་བཟང་རྣམ་འདྲེན་བཞི་པ་མཉམ་མེད་ཤཱཀྱའི་རྒྱལ་པོ་དེ་ཉིད་ཀྱིས་བསྐལ་པ་ཆེན་པོ་གྲངས་མེད་པ་དུ་མར་བྱ་དཀའ་བའི་སྤྱོད་པ་དཔག་ཏུ་མེད་པ་ཉམས་སུ་བཞེས་ཏེ། བླ་ན་མེད་པའི་བྱང་ཆུབ་ཀྱི་གོ་འཕང་མངོན་དུ་མཛད་པའང། ཉན་རང་རྣམས་ཀྱིས་ཞི་བདེ་བསྒྲུབས་པ་བཞིན་དུ་རྒྱུ་དང་འབྲས་བུའི་གནས་སྐབས་གང་དུའང་རང་དོན་ཡིད་བྱེད་ཀྱི་དྲི་མ་ཕྲ་མོ་ཙམ་ཡང་མེད་པར་སེམས་ཅན་གྱི་དོན་འབའ་ཞིག་ཡིན་ལ། སེམས་ཅན་གྱི་དོན་ཡང་ཉི་ཚེ་བ་ཙམ་གྱིས་མི་ཆོག་པས་ཐབས་ཀྱི་རྣམ་པ་ཡོངས་སུ་རྫོགས་པ་ནི་རྒྱལ་བའི་སྲས་པོ་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་ཞེས་དང་། སྔགས་རིམ་ཆེན་མོ་ལས། བསྟན་པ་ཁོ་ན་ལྷར་བཅས་འགྲོ་བ་ཡི། །བདེ་ལེགས་ཀུན་གྱི་རྩ་བར་ཡིད་ཆེས་ནས། །ཞེས་

― GTD003_Page_0174 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པ་ལྟར། སངས་རྒྱས་ཀྱི་བསྟན་པ་ཁོ་ན་སེམས་ཅན་མཐའ་དག་གི་སྡུག་བསྔལ་མ་ལུས་པ་སེལ་བའི་ཐབས་དང་། བདེ་བ་མ་ལུས་པ་སྒྲུབ་པའི་ཐབས་སུ་གྱུར་པ་ཡིན་ཏེ། འགྲོ་བ་རྣམས་ཐོག་མེད་ནས་ལྷན་སྐྱེས་སུ་གོམས་པ་ནི་དུག་གསུམ་གྱི་ཕྱོགས་ཁོ་ན་ཡིན་པས། དེའི་དབང་གིས་སྡུག་བསྔལ་འབའ་ཞིག་ལས་མི་འབྱུང་ལ། འབྲས་བུ་བདེ་བའི་ཆ་ཐམས་ཅད་ནི་རྒྱུ་དགེ་བ་འབའ་ཞིག་ལས་འབྱུང་ཞིང་། དེའི་སྒྲུབ་ཚུལ་རང་སྟོབས་ཀྱིས་ཤེས་མི་ནུས་པས། སངས་རྒྱས་ཀྱི་བསྟན་པ་འབའ་ཞིག་ལ་བརྟེན་ནས་བླང་དོར་གྱི་རྣམ་དབྱེ་ཤེས་ཤིང་ལག་ཏུ་བླང་དགོས་པའི་ཕྱིར་རོ། །དེས་ན་རྒྱལ་བ་ཀུན་གྱི་དགོངས་བཞེད་མཐར་ཐུག་པ་དང། ལུས་ཅན་ཀུན་གྱི་འདོད་དོན་མ་ལུས་པ་འགྲུབ་པའི་སྒོ་གཅིག་པུར་གྱུར་པ་ཐུབ་པའི་བསྟན་པ་རིན་པོ་ཆེ་ཡུན་དུ་གནས་པའི་ཕྱིར་སྨོན་པའི་ཚིགས་སུ་བཅད་པ་བསྟན་འབར་མ་ཞེས་ཡོངས་སུ་གྲགས་པ་འདི་ཉིད་ཀྱི་དོན་འཆད་པ་ལ་གསུམ། རྟོགས་ལྡན་འཇུག་པའི་ཡན་ལག་ཏུ་བསྔོ་བའི་དགོས་པ་བཤད་པ། དགོས་པ་དེ་ལྡན་གྱི་བསྔོ་བ་ཇི་ལྟར་མཛད་ཚུལ་བཤད་པ། བསྔོ་བའི་གཞུང་གི་ཚིག་དོན་དངོས་བཤད་པའོ། །དང་པོ་ལ་བསྔོ་བ་སྤྱིའི་དགོས་པ་དང་། ཁྱད་པར་དུ་བསྟན་པ་རྒྱས་པའི་ཕྱིར་བསྔོ་བའི་དགོས་པ་བཤད་པ་གཉིས། དང་པོ་ནི། བརྒྱད་སྟོང་འགྲེལ་ཆེན་ལས། ཡོངས་སུ་བསྔོ་བ་ནི་ཆུད་མ་ཟོས་པ་ཡིན་ཏེ། ཆོས་ཀྱི་དབྱིངས་དང་འདྲ་བར་ཟད་པ་མེད་པའི་ཕྱིར་རོ། །ཞེས་

― GTD003_Page_0175 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། འགྲེལ་ཆུང་དོན་གསལ་ལས། བསྔོ་བ་ཡིད་ལ་བྱེད་པས་ནི་གསེར་མགར་གྱིས་རྒྱན་ལ་སོགས་པ་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་བྱེད་དོ། །ཞེས་དགེ་བའི་རྩ་བ་ཆུད་མི་ཟ་ཞིང་གོང་དུ་འཕེལ་བའི་ཐབས་བླ་ན་མེད་པར་བསྔགས་ལ། མདོ་ལས་ཀྱང། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས་སོ། །ལུང་འདི་ཉིད་བློ་གྲོས་རྒྱ་མཚོས་ཞུས་པའི་མདོ་ལས་འབྱུང་བར་གྲགས་ཆེའང་། བོད་དུ་འགྱུར་བའི་མདོ་དེར་མི་སྣང་ལ། བློ་གྲོས་མི་ཟད་པའི་མདོར་དོན་དེ་ཇི་ལྟ་བ་ཚིག་ལྷུག་ཏུ་འབྱུང་བས་བརྟག་དགོས། སྤྱིར་དགེ་བ་སྒྲུབ་ཚུལ་ཕྱི་རོལ་པའི་གཞུང་དུའང་བཤད་མོད་ཀྱང་། སེམས་ཅན་གྱི་དོན་དུ་བསྔོ་བས་ཁ་བསྒྱུར་བའི་ཐབས་མཁས་འདི་ནི་རྒྱལ་བའི་བསྟན་པ་འབའ་ཞིག་གི་ཁྱད་ཆོས་ཡིན་ཏེ། ཁྱད་པར་འཕགས་བསྟོད་ལས། བསོད་ནམས་ཞེས་པའི་ཚོགས་དག་ནི། །སེམས་ཅན་རྣམས་ལ་ཡོངས་བསྔོ་བར། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་འབྱུང་བ་ལྟར་རོ། །དེར་མ་ཟད་རང་དོན་གྱི་འཁྲི་བ་མེད་པར་གཞན་དོན་འབའ་ཞིག་ཏུ་བསྔོ་བ་ནི་ཐེག་ཆེན་ཁོ་ནའི་སྒོས་ཆོས་ཡིན་པས། ཉན་ཐོས་ཐེག་པ་དེ་

― GTD003_Page_0176 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ནི། །བྱང་ཆུབ་སེམས་དཔའི་སྨོན་ལམ་དང། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔའ་ག་ལ་འགྱུར། །ཞེས་གསུངས་ལ། སྤྱོད་འཇུག་ཏུ། བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་བཏང་སེམས་ཀྱིས། །སྦྱིན་པའི་ཕ་རོལ་ཕྱིན་གསུངས་ཏེ། །ཞེས་ལུས་ལོངས་སྤྱོད་གཏོང་བར་མ་ཟད། དེ་དག་བཏང་བའི་དགེ་བའང་གཞན་དོན་ཁོ་ནར་བསྔོས་ཏེ་ཡིད་ཀྱིས་སེམས་ཅན་ལ་གཏོང་བ་ནི་སྦྱིན་པའི་ཕར་ཕྱིན་ཡོངས་སུ་རྫོགས་པའི་སྒོ་བླ་ན་མེད་པར་བསྔགས་པའང་རྩ་བ་འདི་ལ་ཐུག་གོ །འོ་ན་བསྔོ་བ་དང་སྨོན་ལམ་ལ་ཁྱད་པར་ཅི་ཡོད། འདི་དེ་གཉིས་ཀྱི་གང་ཡིན་སྙམ་ན། གཙང་ཆུང་ཆོས་གྲགས་སོགས་ཀྱིས། གང་གིས་བསྔོ་བའི་རྒྱལ་པོ་འདི་ཐོས་ནས། །ཞེས་སོགས་ལ་བརྟེན་ཏེ་དེ་གཉིས་དོན་གཅིག་པར་འདོད་ཀྱང་། དབུས་མཐའ་ལས། མི་ཟད་པ་དང་རྟག་འཇུག་དང། །ཞེས་པའི་ཐད་ཀྱི་དབྱིག་འགྲེལ་ལས། ཡོངས་སུ་བསྔོ་བས་སྦྱིན་སོགས་ཀྱི་དགེ་བ་མི་ཟད་པར་བྱེད་དོ། །སྨོན་ལམ་གྱིས་ནི་སྦྱིན་སོགས་བྱེད་པ་དང་མཐུན་པའི་སྐྱེ་བ་ཡོངས་སུ་འཛིན་པས་ཚེ་རབས་ཐམས་ཅད་དུ་སངས་རྒྱས་འབྱུང་བ་མཉེས་པར་བྱེད་ཅིང་སྦྱིན་སོགས་ཀྱི་བྱ་བ་ལ་རྟག་ཏུ་འཇུག་པ་འཐོབ་བོ། །ཞེས་བསྔོ་བས་སྔར་བྱས་ཀྱི་དགེ་བ་སྤེལ་བ་དང་། སྨོན་ལམ་ནི་སླར་དགེ་བ་ལ་འཇུག་པའི་རྒྱུར་འགྱུར་བས་བྱེད་ལས་ཀྱི་སྒོ་ནས་སོ་སོར་གསུངས་པ་དང་། སྤྱོད་འཇུག་དར་ཊཱིཀ་ལས། བསྔོ་བ་དང་སྨོན་ལམ་ཁྱད་པར་ཆེར་མེད་མོད་ཀྱི། འདོད་བྱའི་འབྲས་བུ་དོན་གཉེར་གྱི་འདུན་པས་ཁྱད་པར་དུ་བྱས་པ་སྨོན་ལམ་དང་། རྒྱུའི་དགེ་བ་རྣམས་འབྲས་བུ་དེའི་རྒྱུར་འགྱུར་

― GTD003_Page_0177 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་འདུན་པས་ཁྱད་པར་དུ་བྱས་པ་བསྔོ་བའོ། །ཞེས་སོགས་ཁུངས་ཐུབ་དུ་མས་སྨོན་ལམ་ལ་བསྔོ་བྱའི་རྫས་ཁྱད་གཞིར་བྱས་པས་མ་ཁྱབ་ཅིང། བསྔོ་བ་ལ་བསྔོ་བྱའི་རྫས་དེ་ཉིད་ཁྱད་པར་གྱི་གཞིར་བཟུང་ནས། དེའི་སྟོབས་ཀྱིས་འདི་དང་འདི་ལྟར་གྱུར་ཅིག་ཅེས་སྨོན་པ་ཞིག་དགོས་པས། སྨོན་ལམ་དང་བསྔོ་བ་གཉིས་སྤྱི་དང་བྱེ་བྲག་གི་ཚུལ་ལྟ་བུར་གསུངས་པ་དེ་དག་གང་ལྟར་ནའང་། གཞུང་འདི་ནི་བསྔོ་སྨོན་གཉི་གར་འཇོག་དགོས་པར་མངོན་ནོ། །གཉིས་པ་ཁྱད་པར་དུ་བསྟན་པ་རྒྱས་པའི་ཕྱིར་བསྔོ་བའི་དགོས་པ་ནི། བུ་མོ་དཔལ་ཕྲེང་གིས་ཞུས་པའི་མདོ་ལས། བཅོམ་ལྡན་འདས་བྱང་ཆུབ་སེམས་དཔའི་སྨོན་ལམ་གངྒཱའི་ཀླུང་གི་བྱེ་མ་སྙེད་གང་ལགས་པ་དེ་ཐམས་ཅད་ཀྱང་འདི་ལྟར་དམ་པའི་ཆོས་ཡོངས་སུ་གཟུང་བའི་སྨོན་ལམ་ཆེན་པོ་གཅིག་གི་ཁོངས་སུ་འདུས་ཤིང་ཁོངས་སུ་ཆུད་དེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་དེ་ལྟར་ཡུལ་ཆེ་བ་ལགས་སོ། །ཞེས་དང། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་ཆོས་ཀྱི་སྒོ་བརྒྱད་ཁྲི་བཞི་སྟོང་སྡུད་པ་ལགས་སོ། །ཞེས་སོགས་གསུངས་པ་ལྟར། གང་སྨོན་པའི་ཡུལ་དུ་གྱུར་པ་དེ་ཐམས་ཅད་སངས་རྒྱས་ཀྱི་བསྟན་པ་ལུང་དང་རྟོགས་པའི་ཆོས་ཁོ་ན་ལ་བརྟེན་ནས་འབྱུང་དགོས་པས། རྩ་བ་དེ་ཉིད་རྒྱས་པའི་དོན་དུ་བསྔོས་ན་ཡན་ལག་གཞན་ཐམས་ཅད་འགྲུབ་པས། དོན་འདི་ལ་དགོངས་ནས་རྗེ་བདག་ཉིད་ཆེན་པོས་ཀྱང་། རྒྱལ་སྲས་སྨོན་ལམ་གངྒཱའི་ཀླུང་རྣམས་ནི། །དམ་ཆོས་འཛིན་པའི་སྨོན་ལམ་ནང་འདུས་

― GTD003_Page_0178 ―

^{[མ་དཔེ་གཟིགས་ན་འདིར་གནོན།]}

[Full Size]

པར། །གསུངས་ཕྱིར་དགེ་རྩ་ཇི་སྙེད་བསགས་པ་ནི། །ཀུན་ཀྱང་ཐུབ་བསྟན་རྒྱས་པའི་རྒྱུ་རུ་བསྔོས། །ཞེས་གསུངས་སོ། །ལུང་དང་རྟོགས་པའི་དམ་ཆོས་འཛིན་པ་ནི་དེ་ལྟར་དོན་ཆེ་བའི་རྒྱུ་མཚན་གྱིས་ཕན་ཡོན་ཡང་དགེ་བའི་རྩ་བ་གཞན་ཐམས་ཅད་ལས་ལྷག་པར་གསུངས་ཏེ། དེ་བཞིན་གཤེགས་པའི་སྐུའི་གསང་བའི་མདོ་ལས། སེམས་ཅན་ཀུན་གྱི་བསོད་ནམས་ཀྱི། །ཕུང་པོ་ཇི་སྙེད་ཡོངས་བཟུང་བ། །དེ་སྙེད་བྱང་ཆུབ་སེམས་དཔའ་ཡི། །བྱང་ཆུབ་སེམས་ལ་རབ་ཏུ་འབྱུང། །བྱང་ཆུབ་སེམས་ཀྱི་བསོད་ནམས་ཀྱི། །ཕུང་པོ་ཇི་སྙེད་བརྗོད་པ་བས། །དམ་པའི་ཆོས་ནི་ཡོངས་འཛིན་ན། །དེ་ནི་བསོད་ནམས་ཆེས་མང་ངོ་། །དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་མཛད་ཀྱང། །མཐའ་མར་ཕྱིན་པར་འགྱུར་མ་ལགས། །ཞེས་ཕན་ཡོན་ཚད་ལས་འདས་པར་གསུངས་པའི་ཚུལ་ལ་ཡིད་ཆེས་བསྐྱེད་དེ་འདུན་པ་ཤུགས་དྲག་པོའི་སྒོ་ནས་སྨོན་པ་ཚུན་ཆད་ཀྱིས་དེའི་རྗེས་སུ་སློབ་པར་བྱ་དགོས་སོ། །གཉིས་པ་དགོས་པ་དེ་ལྡན་གྱི་བསྔོ་བ་ཇི་ལྟར་མཛད་པའི་ཚུལ། ཐུབ་དབང་ཐུགས་རྗེའི་བདག་ཉིད་ཆེན་པོ་དང་ལྡན་པ་དེ་ཉིད་ཀྱིས་སློབ་པའི་གནས་སྐབས་སུ་ཚོགས་གཉིས་ཀྱི་སྤྱོད་པ་མཐའ་ཡས་པ་བསྒྲུབས་པ་རྣམས་བསྟན་པ་རྒྱས་པའི་ཕྱིར་བསྔོས་པར་མ་ཟད། སྟོན་པ་རང་ཉིད་སྐྱེ་དགུ་ཚེ་ལོ་བརྒྱ་པའི་དུས་སུ་བྱོན་ནའང་། དགུང་ལོ་བརྒྱད་ཅུ་ལས་མ་བཞུགས་པར་སྐུ་ཚེའི་ལྷག་མའང་བསྟན་པ་གནས་པའི་རྒྱུར་བྱིན་གྱིས་བརླབས་ནས་དེའི་དོན་དུ་བསྟན་འབར་མ་གཟུངས་དང་བཅས་པ་འདི་ཉིད་གསུངས་པ་ཡིན་ཏེ། ཟླ་བ་སྙིང་པོའི་མདོར། འདི་ནས་

― GTD003_Page_0179 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ཟླ་བ་ཞེས་སོགས་ཀྱིས་བསྟན་པའི་གནས་ཚད་དང་འཇིག་ཚུལ་སོགས་དྲིས་པ་ལ། ང་ལ་ལྷན་ཅིག་ཚོགས་ཉོན་ས་གསུམ་ནི། །ཞེས་སོགས་ཀྱིས་དགེ་སྦྱོང་ཁྱིམ་པའི་ལས་ལ་བརྩོན་པ་སོགས་བསྟན་པ་ཉམས་པ་དང་། དེའི་དབང་གིས་འཇིག་རྟེན་རྒུད་པར་འགྱུར་བའི་རྒྱུ་མང་དུ་གསུངས་ལ། མི་བཟད་དེ་ཡི་ཚེ་ན་ནི། །ཆོས་གནས་ཞི་བས་བདེ་འགྱུར་ཞིང། །ཞེས་པ་ནས། བྱང་ཆུབ་མྱུར་དུ་འཐོབ་པར་འགྱུར། །ཞེས་བསྟན་པ་སླར་གསོ་བ་དོན་ཆེ་ཚུལ་དང། བྱམས་པ་ལ་སོགས་སྐལ་བ་ནི། །ཞེས་སོགས་ཀྱིས་སེམས་དཔའ་ཆེན་པོ་དེ་དག་གིས་སྙིགས་མའི་དུས་བསྟན་སླར་གསོ་བ་དཀའ་འང་ཅི་ནུས་སུ་སྤེལ་བར་ཞལ་གྱིས་བཞེས་ལ། སླར་ཡང་བཅོམ་ལྡན་འདས་ཀྱིས། སྣང་བ་འཛིན་ཅིང་དཔལ་གྱུར་པ། །ཞེས་པ་ནས། བཏང་སྙོམས་ཅན་དག་འགྲེ་བར་འགྱུར། །ཞེས་པའི་བར་གྱིས་སྤྱིར་བསྟན་པ་ཉམས་པའི་རྒྱུ་དུ་མ་དང་། ཁྱད་པར་དུ་ཀཽ་ཤམྦིའི་རྒྱལ་པོ་བཟོད་དཀའ་དང་། འཛམ་གླིང་གི་རྒྱལ་པོ་གཞན་གསུམ་འཐབ་པའི་རྐྱེན་གྱིས་བསྟན་པ་ནུབ་ཚུལ་སོགས་གསུངས་ལ། དེ་ནས། སྔོན་གྱི་རྒྱལ་བའི་མཛད་པ་བཞིན། །ང་ཡིས་ཕྱི་དུས་བགོས་པར་བྱ། །དོན་དུ་འཚོ་བ་བཏང་བྱས་ནས། །གཟི་མདངས་གསུམ་པོ་བསྲིང་བར་བྱ། །ང་ཡི་ཚེ་འདིའི་ཆ་གསུམ་པ། །སེམས་ཅན་རྒྱུར་ཡང་གཏང་བར་བྱ། །ཞེས་པ་ནས། དེ་ཕྱིར་སྣོད་མིན་སྣོད་འགྱུར་ཕྱིར། །ཆ་གསུམ་པ་ཡི་སྲོག་བཏང་བྱས། །དེ་དག་བདེ་བར་འགྱུར་བ་དང། །ལྷ་དང་མི་རྣམས་འཕེལ་གྱུར་ཅིག །ཅེས་པའི་བར་གྱིས་སྐུ་ཚེའི་ལྷག་མའང་བསྟན་པའི་འཕེལ་རྒྱས་ཀྱི་དོན་དུ་བསྔོས་

― GTD003_Page_0180 ―

^{[མ་དཔེ་གཟིགས་ན་འདིར་གནོན།]}

[Full Size]

ལ། དེ་ནས། སེམས་ཅན་དོན་དུ་བདག་གིས་སྔོན། །ཞེས་སོགས་བསྟན་འབར་མ་ཡོངས་རྫོགས་སྔགས་དང་བཅས་པ་གསུངས་ཏེ། དང་པོ་ཐུགས་བསྐྱེད་པ་ནས་བཟུང་དཀའ་བ་སྤྱད་པ་མཐའ་དག་ཀྱང་བསྟན་པ་རྒྱས་པའི་རྒྱུར་བསྔོ་བར་མཛད་དོ། །འདི་ནི་སྟོན་པའི་མཛད་པ་ཐམས་ཅད་ཀྱི་ནང་ནས་ཀྱང་ངོ་མཚར་རྨད་དུ་བྱུང་བའི་ཁྱད་ཆོས་བླ་ན་མེད་པ་ཞིག་ཡིན་ཏེ། རྟོག་གེ་འབར་བ་ལས། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་དང་། དམ་པའི་ཆོས་གནས་པ་ལ་སོགས་པ་སྐལ་བ་དང་ལྡན་པའི་གདུལ་བྱ་རྣམས་ལ་སྟོན་པར་མཛད་དོ། །ཞེས་དང་། ཀུན་མཁྱེན་འཇམ་དབྱངས་བཞད་པའི་སྐབས་བརྒྱད་པའི་མཐའ་དཔྱོད་དུ། འདིར་ཤིང་དྲུང་དུ་གཤེགས་པ་མ་བགྲངས་པར་དམ་པའི་ཆོས་གནས་པ་མཛད་ཆེན་དུ་བགྲང་བའི། ཞེས་པ་ནས། བསྟན་འབར་མ་དང་བསྟན་པ་འབར་བའི་སྔགས་གསུངས་པའི་ཕྱིར། ཞེས་འབྱུང་བ་ལྟར་རོ། །འོན་ཀྱང་རྟོག་གེ་འབར་བའི་སྐབས་གཞན་དུ། དཀའ་བ་སྤྱད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་ཞེས་ལན་དུ་མར་འབྱུང་བས། མཐའ་གཅིག་ཏུ་ཤིང་དྲུང་དུ་གཤེགས་པ་མི་འདྲེན་པར་བཞེད་པའང་མིན་པར་སྣང་སྟེ། མཛད་པ་བཅུ་གཉིས་ཀྱི་འདྲེན་ཚུལ་ལ་ཡོངས་གྲགས་རྒྱུད་བླ་མའི་དངོས་ཟིན་ལྟར་དང་། དེར་ཅུང་ཟད་མི་འདྲ་བ་རིན་ཆེན་ཕྲེང་བ་ལས། ཆོས་ཀྱི་འཁོར་ལོ་བསྐོར་བ་དང། །ལྷ་རྣམས་ཀུན་ལས་བབས་པ་དང། །དེ་བཞིན་དུ་ནི་མྱ་ངན་ལས། །འདས་པ་སྟོན་པའི་མཛད་པ་ཡིན། །ཞེས་ལྷ་ལས་བབས་པ་གཅིག་ཏུ་བགྲང་བ་དང། ཐེག་

― GTD003_Page_0181 ―

^{[མ་དཔེ་གཟིགས་ན་འདིར་གནོན།]}

[Full Size]

བསྡུས་ལས། བཟོའི་གནས་ལ་སྦྱངས་པ་དང་། བདུད་འདུལ་བ་གཉིས་དངོས་སུ་མ་བགྲང་བར། མུ་སྟེགས་ཅན་གྱི་གན་དུ་གཤེགས་པ་དང་། ཞེས་དེ་དག་གི་ལྟ་བ་སུན་དབྱུང་བའི་ཕྱིར་མུ་སྟེགས་ལྷག་སྤྱོད་སོགས་ཀྱི་དྲུང་དུ་ཕེབས་ནས་ཐར་ལམ་ཚོལ་བའི་ཚུལ་བསྟན་པ་གཅིག་ཏུ་བགྲང་། མདོ་འགའ་ཞིག་ཏུ་བསྟན་པ་གནས་པ་གཅིག་ཏུ་བགྲང་ལ། ལ་ལར་བསྟན་པ་ནུབ་པའང་གཅིག་ཏུ་བགྲང་སྟེ། བུ་སྟོན་ཆོས་འབྱུང་ལས། ཐབས་ལ་མཁས་པ་ཞེས་པ་ལ་སོགས་པའི་མདོ་ལས། དམ་པའི་ཆོས་ནུབ་པ་ལ་མཁས་པ་ཞེས་ཆོས་ནུབ་པ་ལའང་མཛད་པ་གཅིག་ཏུ་གསུངས་ཏེ། ཆོས་དོན་དུ་མི་འགྱུར་བ་ན་ནུབ་པར་བསྟན་པས། སེམས་ཅན་ལ་ཆོས་སྤོང་གི་ལས་མི་འབྱུང་བར་བྱ་བའི་ཕྱིར་ཡིན་ཏེ། ཞེས་པ་ལྟ་བུ་ཅི་རིགས་ཡོད་ཅིང། མཆོག་གི་སྤྲུལ་སྐུ་སོ་སོ་ལའང་རང་རང་གི་མཛད་པ་སྟོན་ཚུལ་མི་འདྲ་བ་དུ་མ་གསུངས་པས། རྣམ་པ་གཅིག་ཁོ་ནར་ཁ་ཚོན་གཅོད་མི་དགོས་སོ། །ད་ལྟ་བཀའ་འགྱུར་གྱི་གྲངས་སུ་བཞུགས་པའི་ཟླ་བའི་སྙིང་པོས་ཞུས་པའི་མདོ་འདི་ནི་མགོ་མཇུག་ཏུའང་། ཟླ་བའི་སྙིང་པོས་ཞུས་པའི་མདོ་ལས་བསྟན་པ་གནས་པ་དང་འཇིག་པའི་ཚུལ་ལུང་བསྟན་པ་ཞེས་འབྱུང་བས། མདོ་དེའི་ནང་ནས་ཁོལ་བུར་བཏོན་པ་མ་གཏོགས། མདོ་ཡོངས་རྫོགས་མིན་པར་ཤེས་ལ། འདིར་ཉུང་ངུ་ཞིག་ལས་མེད་ཀྱང་། བུ་སྟོན་ཆོས་འབྱུང་དུ་བམ་པོ་གཉིས་ཞེས་འབྱུང་བས། སྔར་འདི་ལས་མང་བ་ཞིག་ཀྱང་འགྱུར་ཡོད་པར་སྣང་ངོ་། །ཇོ་བོས་མདོ་ཀུན་བཏུས་སུ་མདོ་དེའི་ལུང་བམ་པོ་གཅིག་ལྷག་པའི་ཚོད་ཙམ་དྲངས་ཡོད་པས།

― GTD003_Page_0182 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་འབར་མ་སྔགས་དང་བཅས་པ་དེའི་ནང་ནས་བླངས་པ་ཡིན་ལ། རྒྱལ་པོ་བཞིས་གཡུལ་བཀྱེ་ཚུལ་སོགས་ཕྱོགས་ཙམ་འདྲའང་མི་མཐུན་པ་མང་བར་སྣང་བས། གཉིས་ཀ་ཚིགས་བཅད་ལྷུག་སོགས་ཀྱི་འགྱུར་ཁྱད་ཙམ་ཡིན་ནམ། མདོ་མི་གཅིག་པ་གང་ཡིན་དཔྱད་དགོས་པར་སྣང་ངོ་། །གསུམ་པ་གཞུང་དངོས་ཀྱི་དོན་ལ། དང་པོར་ཐུགས་བསྐྱེད་པའི་སྐབས་ལས་བརྩམས་ཏེ་མདོར་བསྟན་པ། བར་དུ་ཚོགས་བསགས་པའི་སྐབས་ལས་བརྩམས་ཏེ་རྒྱས་པར་བཤད་པ། མཐར་སངས་རྒྱས་པའི་སྐབས་ལས་བརྩམས་ཏེ་དོན་བསྡུ་བ་གསུམ། དང་པོ་ནི། སེམས་ཅན་དོན་དུ་བདག་གིས་སྔོན། །དཀའ་བ་གང་ཞིག་སྤྱད་གྱུར་དང། །བདག་གི་བདེ་བ་བཏང་བ་ཡིས། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སངས་རྒྱས་བཅོམ་ལྡན་འདས་ཉིད་ཀྱིས་སྔོན་སློབ་པའི་གནས་སྐབས་སུ་བསྐལ་པ་ཆེན་པོ་གྲངས་མེད་པ་དུ་མར་ཤིན་ཏུ་བྱ་དཀའ་ཞིང་བཟོད་གླགས་མེད་པའི་གདུང་བ་དྲག་པོ་དུ་མ་རང་གི་སྟེང་དུ་བླངས། ཆེས་ཡིད་དུ་འོང་ཞིང་ཉམས་སུ་བདེ་བའི་ཟས་ནོར་ལོངས་སྤྱོད་གཉེན་འཁོར་འབངས་ལ་སོགས་པའི་བདེ་འབྱོར་ཐམས་ཅད་ལྟོས་པ་མེད་པར་གཞན་ལ་གཏོང་བར་མཛད་པ་ནི་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་རིན་པོ་ཆེའི་སྟོབས་ཡིན་ཏེ། དད་པའི་སྟོབས་བསྐྱེད་པའི་མདོ་ལས། སྙིང་རྗེ་ཆེན་པོ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཆེད་དུ་སྡུག་བསྔལ་སྐྱེ་བ་མི་ལེན་པ་ཅིའང་མེད་དོ། །བདེ་བ་མི་འདོར་བ་ཅིའང་མེད་དོ། །ཞེས་གསུངས་སོ། །བྱང་ཆུབ་ཏུ་སེམས་བསྐྱེད་ཚུལ་གྱི་ནང་ནས་ཀྱང་། སྤྱོད་འཇུག་ལས་གསང་བའི་དམ་

― GTD003_Page_0183 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཞེས་བྱང་སེམས་དབང་པོ་ཡང་རབ་ཀྱི་ཆོས་སུ་བསྔགས་པ་བདག་གཞན་མཉམ་བརྗེའི་བསམ་པ་ཁྱད་པར་ཅན་གྱི་བྱེད་ལས་ཁོ་ན་ཡིན་ཏེ། རྗེ་བདག་ཉིད་ཆེན་པོས། གང་ཟག་གཞན་ཕལ་མོ་ཆེས་སྙིང་ཐག་པ་ནས་རྗེས་སུ་ཡི་རང་བ་ཙམ་ཡང་བྱ་བར་དཀའ་ལ། འཇིག་རྟེན་ཐམས་ཅད་དང་མི་མཐུན་པའི་གཏམ་གྱི་གཞིར་གྱུར་པ་བདག་པས་གཞན་གཅེས་པའི་བྱང་ཆུབ་ཀྱི་སེམས་ཞེས་སྐབས་དུ་མར་གསུངས་ལ། མཉམ་མེད་ཇོ་བོ་ཆེན་པོས་ཀྱང། སྤྱོད་པའི་མཆོག་འཇིག་རྟེན་དང་མི་མཐུན་པ་ཡིན་ཞེས་གསུངས་ཏེ། འཇིག་རྟེན་ཕལ་པ་རྣམས་ཀྱིས་གང་དོན་དུ་གཉེར་བྱར་བྱེད་པའི་བདེ་དགའ་ཐམས་ཅད་མཆིལ་མའི་ཐལ་བ་བཞིན་དུ་འདོར་ཞིང་། གཞན་གྱིས་ཐོས་ནའང་སྐྲག་པ་སྐྱེ་བའི་དཀའ་ཐུབ་ཀྱི་སྤྱོད་པ་དུ་མར་བུང་བ་པངྨའི་ཚལ་ལ་འཇུག་པ་བཞིན་དུ་དགྱེས་དགུར་གཞོལ་བ་ནི་བདག་པས་གཞན་གཅེས་པའི་བསམ་པ་ཁྱད་པར་ཅན་གྱི་གཞན་དབང་དུ་གྱུར་པ་འབའ་ཞིག་གི་མཐུ་ཡིན་ནོ། །འོ་ན་མདོར་བསྟན་ནི་རྒྱས་བཤད་ཀྱི་དོན་ཐམས་ཅད་ལ་ཁྱབ་པ་ཞིག་དགོས་ལ། དང་པོར་ཐུགས་བསྐྱེད་པ་དེ་ཉིད་གྲངས་མེད་གསུམ་གྱི་ཚོགས་ལ་སོགས་པ་ས་ལམ་གོང་མ་ཐམས་ཅད་ཀྱི་སྔོན་འགྲོ་ཡིན་ཀྱང་ཁྱབ་བྱེད་མ་ཡིན་པས་མདོར་བསྟན་དུ་མི་འཐད་དོ་སྙམ་ན་སྐྱོན་མེད་དེ། དེ་ཐེག་ཆེན་ལམ་གྱི་འཇུག་སྒོ་ཡིན་ཀྱང་ཐོག་མར་འཇུག་པའི་སྒོ་ཙམ་དུ་བྱས་པས་མི་ཆོག་པར། ལམ་གྱི་མགོ་མཇུག་ཐམས་ཅད་དུ་བསམ་པ་ཁྱད་པར་ཅན་དེ་ཉིད་ཁོ་ན་གཞུང་ཤིང་ངམ་གཞིར་བྱས་ནས་འགྲོ་དགོས་པས། རྗེ་བླ་མའི་ཉམས་མགུར་ལས། སེམས་བསྐྱེད་ཐེག་

― GTD003_Page_0184 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོག་ལམ་གྱི་གཞུང་ཤིང་སྟེ། །ཞེས་གསུངས་ཤིང་། པཎ་ཆེན་ཐམས་ཅད་མཁྱེན་པས་ཕྱག་ཆེན་རྩ་བ་ལས་ཀྱང་། འཇུག་པའི་སྒོ་དང་གཞུང་ཤིང་ཕྱིར། །ཞེས་ཁྱད་པར་གཉིས་ཀ་གསུངས་སོ། །དེས་ན་མདོར་བསྟན་རྒྱས་བཤད་ཀྱི་ཚུལ་འདི་ལྟར་སྦྱོར་བ་རྒྱལ་བ་བྱམས་པའི་མན་ངག་ཡིན་ཏེ། མདོ་སྡེ་རྒྱན་ལས། གང་ཕྱིར་དང་པོར་ངེས་པར་བྱ་བ་འདི་དཀའ་སྟེ། །དེ་ནི་བསྐལ་པ་སྟོང་ཕྲག་དུ་མར་བསྒྲུབ་པར་དཀའ། །ཞེས་དང་པོ་སེམས་བསྐྱེད་ཀྱི་ས་བོན་འདེབས་པ་དང། བར་དུ་ཚོགས་གཉིས་ཀྱི་སྤྱོད་པས་དང་པོར་བཏབ་པའི་ས་བོན་དེ་ཉིད་སྨིན་ཅིང་རྒྱས་པར་བྱེད་པར་གསུངས་ལ། མངོན་རྟོགས་རྒྱན་ལས་ཀྱང། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་མདོར་བསྟན་གྱི་སྐབས་སུ་སྤྱོད་པའི་རྟེན་གྱི་དབང་དུ་བྱས་པའི་སེམས་བསྐྱེད་གསུངས་ཀྱང་། རྒྱས་བཤད་ཀྱི་ཚེ་སློབ་མི་སློབ་ཀྱི་སྐབས་ཐམས་ཅད་བསྡུས་ཏེ་འགྲེལ་པ་དོན་གསལ་ལས། སེམས་བསྐྱེད་པའི་རབ་ཏུ་དབྱེ་བ་ནི་ལས་དང་པོ་པའི་ས་ནས་བརྩམས་ཏེ་སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་གསུངས་པ་ལྟར་རོ། །དེ་ལྟར་ཐུབ་པ་སངས་རྒྱས་བཅོམ་ལྡན་འདས་ཉིད་ཀྱིས་དང་པོར་བྱང་ཆུབ་ཏུ་ཐུགས་བསྐྱེད་པ་ནས་བཟུང་བསྐལ་པ་མཐའ་ཡས་པའི་བར་དུ་རང་གི་སྡུག་བསྔལ་ཁྱད་དུ་བསད་ནས་དཀའ་ཐུབ་ཆེན་པོ་ཉམས་སུ་བཞེས། རང་བདེའི་ཞེན་པ་རྩད་ནས་ཕྱུངས་ཏེ་ལུས་སྲོག་ལོངས་སྤྱོད་ཐམས་ཅད་གཞན་ལ་གཏོང་བར་མཛད་པ་ནི་སེམས་ཅན་རྣམས་འཁོར་བ་ལས་སྒྲོལ་བའི་ཐབས་ཁོ་ན་ཡིན་ཅིང། འགྲོ་བ་འཁོར་བ་ལས་

― GTD003_Page_0185 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲོལ་བྱེད་ཆོ་འཕྲུལ་གཞན་གཉིས་ནི་གནས་སྐབས་སུ་དད་པ་བསྐྱེད་པའི་སྨིན་བྱེད་ཙམ་དུ་འགྱུར་ཡང་གྲོལ་བྱེད་དངོས་གཞིར་མི་འགྲོ་ལ། གྲོལ་བྱེད་དངོས་གཞི་རྗེས་སུ་བསྟན་པའི་ཆོ་འཕྲུལ་གྱི་སྒོ་ནས་གདུལ་བྱའི་རྒྱུད་ལ་ཡང་དག་པའི་ལམ་ཁྱད་པར་ཅན་སྐྱེད་པ་འབའ་ཞིག་ཡིན་པས། དེས་ན་བསྐལ་པ་དུ་མར་ཐུགས་ལ་བརྣག་པའི་དགོངས་པ་མཐར་ཐུག་པ་གདུལ་བྱའི་དོན་སྒྲུབ་པའི་ཐབས་ཀྱི་མཆོག་སྲིད་པའི་འཆིང་བ་འགྲོལ་བྱེད་ལྷག་པའི་བསླབ་པ་གསུམ་དང་། དེ་བརྗོད་བྱར་བྱེད་པ་སྡེ་སྣོད་གསུམ་གྱིས་བསྡུས་པའི་བསྟན་པ་རིན་པོ་ཆེ་འདི་ཉིད་འཁོར་བ་ཇི་སྲིད་གནས་ཀྱི་བར་དུ་རྒྱུན་ཆད་མེད་པར་འབར་ཞིང་གནས་པར་གྱུར་ཅིག །ཅེས་དང་པོར་ཐུགས་བསྐྱེད་པའི་ཚུལ་གྱི་བསམ་པ་ཕུན་སུམ་ཚོགས་པས་བདེན་པ་བདར་ཏེ་སྨོན་ལམ་མཛད་ཅིང་ཤིས་པར་བརྗོད་པ་ཡིན་ནོ། །མཁས་པའི་དབང་པོ་རིན་ཆེན་དོན་གྲུབ་ཀྱིས་བསྟན་འབར་མའི་ཊཱིཀྐར་རྒྱ་འགྲེལ་གྱི་ལུགས་བཞིན་ཚིག་རེ་རེ་ནས་གཏོར་ཏེ་འབྲུ་གཉེར་བའི་བཤད་པ་གནང་འདུག་པས། སེམས་ཅན་ནི་རྣམ་པར་རྟོག་པས་སེམས་པར་བྱེད་ཅིང་དེའི་དབང་དུ་གྱུར་པ་ལས་བཏགས་སོ། །ཞེས་གསུངས་འདུག་ནའང། འཕགས་པའི་ཉི་ཁྲི་སྣང་བར། ཞུམ་པའི་བདག་ཉིད་ཅན་ཡིན་པས་ན་སེམས་ཅན་ནོ། །ཞེས་དང་། རྒྱན་སྣང་ལས། འཇིགས་པའི་བདག་ཉིད་ཅན་ཡིན་པས་ན་སེམས་ཅན་ནོ། །ཞེས་གསུངས་ཤིང་། རྒྱུད་བླ་མར། མ་དག་མ་དག་དག་པ་དང། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང། །དེ་བཞིན་གཤེགས་པ་

― GTD003_Page_0186 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་བརྗོད་དོ། །ཞེས་རིགས་ཀྱི་དྲི་མ་དག་མ་དག་གི་སྒོ་ནས་ཀྱང་སེམས་ཅན་གྱི་སྒྲ་འཇུག་ཚུལ་ཞིག་གསུངས་པས། ངེས་ཚིག་གི་བཤད་པ་དུ་མ་ཞིག་བྱར་ཡོད་པར་སྣང་ངོ་། །ཐུབ་པའི་དབང་པོ་ཉིད་ཀྱིས་ཐོག་མར་ཐུགས་བསྐྱེད་ཚུལ་ཡང། བསྐལ་བཟང་ལས་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ་ཤཱཀྱ་ཐུབ་པ་ཆེན་པོའི་དྲུང་དུ་ཐུགས་བསྐྱེད་པ་དང་། ཕུང་པོ་གསུམ་པའི་མདོར་ཚོང་དཔོན་གྱི་བུ་མངོན་དགར་གྱུར་པའི་ཚེ་དེ་བཞིན་གཤེགས་པ་མཛེས་པ་ཆེན་པོའི་དྲུང་དུ་ཐུགས་བསྐྱེད་པ་དང་། པད་དཀར་ལས་བྲམ་ཟེ་རྒྱ་མཚོའི་རྡུལ་དུ་འཁྲུངས་པ་ན་སངས་རྒྱས་རིན་ཆེན་སྙིང་པོའི་དྲུང་དུ་ཐུགས་བསྐྱེད་པ་དང་། གསང་བ་བསམ་གྱིས་མི་ཁྱབ་པར་འཁོར་ལོས་སྒྱུར་བ་ཡུལ་འཁོར་སྲུང་གི་སྲས་དོན་ཀུན་གྲུབ་པར་འཁྲུངས་པའི་ཚེ་དེ་བཞིན་གཤེགས་པ་རིན་ཆེན་སྣ་ཚོགས་བཀོད་པའི་རྒྱལ་པོའི་དྲུང་དུ་བསྐྱེད་པ་དང་། འཁྲི་ཤིང་ལས་རྒྱལ་པོ་རབ་གསལ་དུ་གྱུར་པའི་ཚེ་ཐུགས་བསྐྱེད་པར་གསུངས་པ་བཞིན་དུ་ཨ་བྷྱཱ་ཀ་རས་ཀྱང་བཤད་པ་སོགས་ཚུལ་མི་འདྲ་བ་དུ་མ་ཞིག་འབྱུང་བ་དང། ཐམས་ཅད་ལ་ཐུན་མོང་དུ་གྲགས་ཆེ་བ་ནི་དྲིན་ལན་བསབ་པའི་མདོར་དམྱལ་བའི་ཤིང་རྟ་འདྲེན་པའི་གྱད་དུ་འཁྲུངས་པ་ན་རང་གི་གྲོགས་སྡུག་བསྔལ་གྱིས་མནར་བ་མ་བཟོད་པར། དེའི་སྡུག་བསྔལ་གྱི་སྐལ་བའང་རང་ཐོག་ཏུ་ལེན་པར་དགོངས་པའི་སྒོ་ནས་ཐུགས་བསྐྱེད་པར་བཤད་པ་འདི་ཉིད་ཡིན་ལ། དེ་ནི་འདིའི་དངོས་ཟིན་ལྟར་སེམས་ཅན་གཞན་དོན་དུ་དཀའ་བ་དང་དུ་ལེན་ཅིང། རང་གི་བདེ་དགའ་དེ་ལ་གཏོང་བ་བདག་གཞན་བརྗེ་བའི་སྒོ་ནས་སེམས་བསྐྱེད་ཚུལ་དང་ཤིན་ཏུ་འབྲེལ་ལོ། །གཉིས་པ་བར་དུ་ཚོགས་

― GTD003_Page_0187 ―

^{[མ་དཔེ་གཟིགས་ན་འདིར་གནོན།]}

[Full Size]

བསགས་པའི་སྐབས་ལས་བརྩམས་ཏེ་རྒྱས་པར་བཤད་པ་ལ། རང་རྒྱུད་སྨིན་བྱེད་ཕ་རོལ་ཏུ་ཕྱིན་པ་དྲུག་ལ་བསླབ་ཚུལ་ལས་བརྩམས་པ་དང་། གཞན་རྒྱུད་སྨིན་བྱེད་བསྡུ་བ་བཞི་ལ་བསླབ་ཚུལ་ལས་བརྩམས་པ་གཉིས། དང་པོ་ཕར་ཕྱིན་དྲུག་ཏུ་དབྱེ་བའི་རྒྱུ་མཚན་ལ། རྒྱལ་ཚབ་བྱམས་པ་མགོན་པོས། མངོན་མཐོ་ལ་ལྟོས་པའི་གྲངས་ངེས། དོན་གཉིས་སྒྲུབ་པ་ལ་ལྟོས་པའི་གྲངས་ངེས། གཞན་དོན་རྣམ་པ་ཐམས་ཅད་ལ་ལྟོས་པའི་གྲངས་ངེས། ཐེག་ཆེན་མཐའ་དག་སྡུད་པ་ལ་ལྟོས་པའི་གྲངས་ངེས། ཐབས་ཀྱི་རྣམ་པ་ཡོངས་སུ་རྫོགས་པ་ལ་ལྟོས་པའི་གྲངས་ངེས། བསླབ་པ་གསུམ་ལ་ལྟོས་པའི་གྲངས་ངེས་ཏེ་དྲུག་གསུངས་པ་རེ་རེས་ཀྱང་ལམ་གྱི་གནད་ལ་ངེས་པ་སྟེར་བའི་དགོས་པ་ཆེན་པོ་ཡོད་ལ། དེའི་ནང་ནས་སྐབས་འདིར་ནི་བསླབ་པ་གསུམ་ལ་ལྟོས་པའི་གྲངས་ངེས་ཀྱི་སྟེང་ནས་བཤད་དགོས་ཏེ། ཐུབ་པའི་དབང་པོ་ཉིད་ཀྱིས་གང་གི་དོན་དུ་བསྔོ་བ་མཛད་པའི་བསྟན་པ་རིན་པོ་ཆེ་དེའང་རྟོགས་པའི་བསྟན་པ་བསླབ་པ་གསུམ་དང། དེ་བརྗོད་བྱར་བྱེད་པ་སྡེ་སྣོད་གསུམ་སྟེ་ལུང་རྟོགས་ཀྱི་དམ་ཆོས་དེ་གཉིས་ལས་མ་འདས་པས། རྒྱལ་བ་ཉིད་ཀྱིས་སྔོན་སློབ་པའི་གནས་སྐབས་སུ་བསླབ་པ་གསུམ་པོ་དེ་དག་ལ་ནན་ཏན་དུ་བསླབ་པའི་རྒྱུ་འབྲས་རྟེན་འབྱུང་གི་བདེན་པ་མི་བསླུ་བས། དེ་དང་རྗེས་སུ་མཐུན་པར་རྗེས་འཇུག་གདུལ་བྱ་རྣམས་ཀྱི་རྒྱུད་ལའང་གཙོ་བོ་བསླབ་པ་གསུམ། དེ་བརྗོད་བྱར་བྱེད་པ་སྡེ་སྣོད་གསུམ་དང་བཅས་པའི་ལུང་རྟོགས་ཀྱི་བསྟན་པ་རྒྱས་པའི་ཕྱིར་དུ་བསྔོ་བ་མཛད་པ་ཡིན་པའི་ཕྱིར་རོ། །དེས་ན་མདོ་སྡེ་རྒྱན་ལས།

― GTD003_Page_0188 ―

^{[མ་དཔེ་གཟིགས་ན་འདིར་གནོན།]}

[Full Size]

བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ནི་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་པ་ལྟར། ཚུལ་ཁྲིམས་ཀྱི་བསླབ་པའི་ཁོངས་སུ་བསྡུས་ཏེ་ཕར་ཕྱིན་དང་པོ་གསུམ་ལ་བསླབ་ཚུལ། བསླབ་པ་གསུམ་གར་ཁྱད་མེད་དུ་གལ་ཆེ་བ་བརྩོན་འགྲུས་ལ་བསླབ་ཚུལ། ཏིང་ངེ་འཛིན་གྱི་བསླབ་པའི་ངོ་བོ་བསམ་གཏན་ལ་བསླབ་ཚུལ། ཤེས་རབ་ཀྱི་བསླབ་པའི་ངོ་བོ་ཤེས་རབ་ཀྱི་ཕར་ཕྱིན་ལ་བསླབ་ཚུལ་དང་བཞི། དང་པོ་ལ་ཚུལ་ཁྲིམས་ཀྱི་ཚོགས། ཚུལ་ཁྲིམས་ཀྱི་ངོ་བོ། ཚུལ་ཁྲིམས་ཀྱི་འཁོར་རམ་གྲོགས་ལ་བསླབ་ཚུལ་གསུམ་དུ་ཡོད་དེ། རྒྱན་གྱི་དབྱིག་འགྲེལ་ལས། ལྷག་པའི་ཚུལ་ཁྲིམས་ཀྱི་བསླབ་པ་ནི་ཕ་རོལ་ཏུ་ཕྱིན་པ་དང་པོ་གསུམ་སྟེ། ཚོགས་དང་བཅས་པ་དང་། འཁོར་དང་བཅས་པ་གཟུང་བའི་ཕྱིར་རོ། །ཞེས་དང་། ལམ་རིམ་ཆེན་མོ་ལས། ཚུལ་ཁྲིམས་ཀྱི་བསླབ་པའི་ངོ་བོ་ནི་ཚུལ་ཁྲིམས་ཡིན་ལ། དེའང་ལོངས་སྤྱོད་ལ་མི་ལྟ་བའི་སྦྱིན་པ་ཡོད་ན་ཡང་དག་པར་ལེན་པས་དེ་ནི་ཚུལ་ཁྲིམས་ཀྱི་ཚོགས་སོ། །ཡང་དག་པར་བླངས་པའང་གཤེ་བ་ལ་སླར་མི་གཤེ་བ་ལ་སོགས་པའི་བཟོད་པས་བསྲུང་བས་དེ་ནི་དེའི་འཁོར་རོ། །ཞེས་གསུངས་སོ། །རིན་ཆེན་དོན་གྲུབ་ཀྱི་འགྲེལ་པར་ཚུལ་ཁྲིམས་ཀྱི་ཚོགས་ཀྱི་རྗེས་སུ། ཚུལ་བཞིན་སྒྲུབ་པའི་རྒྱུ་ཐོས་པ་དང་ཞེས་ཐོས་པ་བཙལ་ཚུལ་གྱི་ས་བཅད་དེ་ལས་ལོགས་སུ་མཛད་སྣང་ཡང་། འདིར་དེའི་ཚོགས་ཀྱི་ཁོངས་སུ་བྱས་ན་བདེ་སྟེ། ཚོགས་ཀྱི་སྐད་དོད་སམ་བྷ་ར་ཞེས་པ་ཡང་དག་པར་འགྲུབ་བྱེད་ལ་འཇུག་ཅིང་།

― GTD003_Page_0189 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱིན་པའི་སྟོབས་ཀྱིས་ཚུལ་ཁྲིམས་རྣམ་པར་དག་པ་འབྱུང་ཚུལ་གོང་དུ་དྲངས་པ་བཞིན་ཡིན་ལ། ཐོས་པའི་སྟོབས་ཀྱིས་ཚུལ་ཁྲིམས་རྣམ་པར་དག་པ་འབྱུང་ཚུལ་ནི་སྐྱེས་རབས་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་བཟློག་པར་འགྱུར། །ཐོས་པས་དོན་མ་ཡིན་པ་སྤོངས། །ཐོས་པས་མྱ་ངན་འདས་པ་འཐོབ། །ཅེས་གསུངས་པ་བཞིན། བཅས་རང་གི་ཉེས་པས་མ་གོས་པའི་ཚུལ་ཁྲིམས་རྣམ་པར་དག་པ་འབྱུང་བ་ལ་ལྟུང་བའི་སྒོ་དང་པོ་ནི་མི་ཤེས་པ་ཡིན་པས། དེ་ཉིད་ཐོས་པའི་སྒྲོན་མེས་བསལ་ཏེ་བླང་དོར་གྱི་ཆོས་རྣམས་ལེགས་པར་ཤེས་ན་སྒོ་གསུམ་མི་དགེ་བའི་ཕྱོགས་ལས་བཟློག་ཅིང། སྤྱོད་པ་མཐའ་དག་ཚུལ་དང་མཐུན་པ་མྱང་འདས་ཀྱི་རྒྱུར་འགྲོ་བ་ཞིག་འབྱུང་བས། ཚུལ་ཁྲིམས་ཀྱི་ཚོགས་ལ་སྦྱིན་པ་ལས་ཀྱང་ཐོས་པ་གཙོ་བོ་ལྟ་བུ་ཡིན་ཏེ། ལྷག་བསམ་བསྐུལ་བའི་མདོ་ལས། མང་དུ་ཐོས་པ་ཡོངས་སུ་ཚོལ་བ་མེད་པ་དེ་དག་ནི་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་མ་ཡིན་ནོ། །ཞེས་དང་། རིན་པོ་ཆེ་སྣ་བདུན་གྱི་མཆོད་རྟེན་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བཀང་ན་དེས་ནི་ང་མཉེས་པར་བྱ་བ་མ་ཡིན། རི་མོར་བྱས་པ་མ་ཡིན། བཀུར་སྟིར་བྱས་པ་མ་ཡིན་གྱི། བྱམས་པ་གལ་ཏེ་བྱང་ཆུབ་སེམས་དཔའ་ཐ་ན་ཕ་རོལ་ཏུ་ཕྱིན་པ་དྲུག་དང་ལྡན་པའི་ཚིག་བཞི་པའི་ཚིགས་སུ་བཅད་པ་གཅིག་ཙམ་འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། འཆང་བ་དེ་ནི་ང་ལ་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་

― GTD003_Page_0190 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་པར་འགྱུར་རོ། །དེ་ཅིའི་ཕྱིར་ཞེ་ན། བྱམས་པ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་མང་དུ་ཐོས་པ་ལས་བྱུང་བ་ཡིན་གྱི། དངོས་པོ་ཡོངས་སུ་འཛིན་པ་ལས་བྱུང་བ་ནི་མ་ཡིན་པའི་ཕྱིར་རོ། །ཞེས་ངེས་པར་འབྱུང་བ་ཐར་པའི་རྒྱུ་ཚོགས་ལ་སྦྱིན་པ་ལས་ཐོས་པ་གཙོ་བོར་གསུངས་པའི་ཤུགས་ཀྱིས་ངེས་པར་འབྱུང་བའི་ཚོགས་ལ་ཐོས་པ་གཙོ་ཆེ་བར་འགྲུབ་སྟེ། ཐོས་པ་གནད་དུ་འགྲོ་བ་ཞིག་མེད་ན་རབ་བྱུང་གི་སྡོམ་པ་སོགས་བླངས་ཀྱང་རྣམ་པར་དག་པ་ཞིག་མི་འབྱུང་བ་གསལ་བར་གསུངས་པའི་ཕྱིར་རོ། །དེས་ན་འདིར་ཚུལ་ཁྲིམས་ཀྱི་ཚོགས་ལ་གཉིས། སྦྱིན་པ་ལ་བསླབ་ཚུལ་དང་། ཐོས་པ་ལ་བསླབ་ཚུལ་ལོ། །དང་པོ་ལ་གཉིས། ཡུལ་དམན་པ་ལ་སྦྱིན་པ་དང་། ཡུལ་ཁྱད་པར་ཅན་ལ་མཆོད་པའི་ཚུལ་ལོ། །དང་པོ་ལའང་དམན་པ་ལ་ལྷག་པར་བརྩེ་བ་བསམ་པ་ཕུན་སུམ་ཚོགས་པའི་ཚུལ་དང་། ཡོད་དགུ་མཐའ་དག་གཏོང་བ་སྦྱོར་བ་ཕུན་སུམ་ཚོགས་པའི་ཚུལ་གཉིས། དང་པོ་ནི། ངས་སྔོན་ནད་པའི་ཆེད་དག་ཏུ། །རང་གི་འཚོ་བ་ཡོངས་བཏང་བས། །སེམས་ཅན་ཕོངས་པ་བསྐྱབ་པའི་ཕྱིར། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སྦྱིན་པའི་ཞིང་ཁྱད་པར་ཅན་དུ་འགྱུར་ཚུལ་ལ། འགྲོ་དང་སྡུག་བསྔལ་ཕན་འདོགས་དང། །ཡོན་ཏན་རྣམས་ཀྱི་ཞིང་ཁྱད་འཕགས། །ཞེས་དབྱེ་བ་གཉིས་གསུངས་ཤིང་། ཉམ་ཐག་པའི་ཞིང་གི་ནང་ནས་ཀྱང་ནད་པ་ནི་ལྷག་པར་སྙིང་རྗེའི་ཡུལ་དུ་གྱུར་པ་ལ་དགོངས་ཏེ། འདུལ་བའི་མདོར། ནད་པ་དང་ཕ་མ་དག་ནི་ཁྱིམ་པ་ཡིན་ན་ཡང་ངོ་། །ཞེས་རྟེན་རབ་བྱུང་གིས་ཀྱང་བཀུར་སྟི་རིམ་

― GTD003_Page_0191 ―

^{[མ་དཔེ་གཟིགས་ན་འདིར་གནོན།]}

[Full Size]

གྲོ་བྱ་བའི་ཡུལ་དུ་གསུངས་ལ། འོད་ལྡན་ལས་ཀྱང། ནད་པ་སྙིང་བརྩེ་འཁོར་ནི་དག་པ་དང། །ཞེས་བླ་མ་བརྩེ་བའི་བདག་ཉིད་ཅན་དུ་དཔོག་བྱེད་ཀྱི་གཙོ་བོ་ནད་པར་སྙིང་བརྩེ་བ་ལ་གསུངས་སོ། །ཁྱད་པར་བྱང་ཆུབ་སེམས་དཔའི་སྦྱིན་པ་ནི་ཡུལ་གྱི་ནང་ནས་ཀྱང་གང་ཉམ་ཐག་པ་དེ་གཙོ་བོར་བྱེད་པ་ཞིག་དགོས་ཀྱི། རྣམ་སྨིན་མཆོག་ལ་རེ་བས་ཡུལ་གང་བཟང་བ་གཙོ་བོར་བྱེད་པ་ནི་རྒྱལ་སྲས་ཀྱི་སྦྱིན་པའི་མི་མཐུན་ཕྱོགས་སུ་འགྱུར་ཏེ། དེ་ནི་ཕ་རོལ་པོ་ལ་ཐབས་ཀྱིས་བུ་ལོན་བཀལ་བ་དང་འདྲ་བས། བྱ་ཤིང་རྟ་མོའི་སྐྱེས་རབས་ལས། དེ་སྟེ་ཕན་བཏགས་ལན་འདོད་ན། །བུ་ལོན་ཆགས་བྱས་ཕན་མ་བཏགས། །ཞེས་དང་། བཞི་བརྒྱ་བར། འདི་བྱིན་པ་ཡི་སྦྱིན་པ་ལ། །འབྲས་བུ་ཆེན་པོ་འབྱུང་འགྱུར་ཞེས། །སྦྱིན་དང་ལེན་པར་བྱེད་པ་ནི། །ཚོང་སོགས་བཞིན་དུ་སྨད་པར་འགྱུར། །ཞེས་གསུངས་ལ། ཡོན་ཏན་མཐའ་ཡས་པར་བསྟོད་པ་ལས། གང་ཞིག་སྐྱེ་བ་དམན་དང་ཕོངས་པ་རེ་བའི་བསམ་ལྡན་མཐོང་ན་ཡང། །བརྩེ་མེད་འབྲས་བུ་འདོད་པས་སྣོད་ལྡན་ཡོན་ཏན་དག་དང་ལྡན་འཚོལ་བ། །བསམ་བརླག་དེ་ནི་སྦྱིན་པ་བྱེད་ཀྱང་སློང་བ་དག་དང་མཚུངས་སོ་ཞེས། །དེ་སླད་ཁྱོད་ནི་ཐུགས་རྗེས་སློང་བ་རྣམས་ལ་སྦྱིན་པར་བྱེད་ལ་ཞུགས། །ཞེས་གསུངས་ཤིང་། དཔལ་ལྡན་ཟླ་བས་ཀྱང། སྣོད་དམ་སྣོད་མིན་དེ་དག་ལ། །མཉམ་པར་སེམས་སྙོམས་པས་གཏོང་བའི། །ཞེས་གསུངས་སོ། །བྱང་སེམས་ཀྱི་བསླབ་བྱར་ཡང། ནད་པའི་རིམ་གྲོ་བྱ་བ་སྤོང། །ཞེས་ནད་ཀྱིས་

― GTD003_Page_0192 ―

^{[མ་དཔེ་གཟིགས་ན་འདིར་གནོན།]}

[Full Size]

ཉམ་ཐག་པ་ཡལ་བར་དོར་ན་ཉེས་པ་ལྕི་བ་ཞིག་འབྱུང་བར་བཤད་ལ། སྟོན་པ་ཐུགས་རྗེ་ཅན་ཉིད་ཀྱིས་ཀྱང་དགེ་སློང་བྲོ་འཚལ་བ་མི་གཙང་བའི་ཁྲོད་དུ་བྱིང་བ་གཟིགས་ཏེ་རང་གིས་ཕྱག་བསྟར་ནས་རིམ་གྲོ་མཛད་ཚུལ་འདུལ་བ་ལུང་སོགས་ལས་འབྱུང་ངོ་། །སྔོན་སློབ་པའི་དུས་ནའང་རྒྱལ་པོ་ཡེ་ཤེས་སྟོབས་ཀྱི་སྲས་མོ་ཡེ་ཤེས་ལྡན་དུ་གྱུར་པའི་ཚེ། བསྟན་པའི་ཐ་མ་ལ་ཆོས་སྨྲ་བའི་མཆོག་ཏུ་གྱུར་པ་དགེ་སློང་ཡང་དག་བློ་གྲོས་བྱ་བ་ཞིག་བཞུགས་པ་དེ་འབྲུམ་བུ་མེ་དཔལ་ནག་པོའི་ནད་གསོ་དཀའ་བས་ཐེབས་པའི་ཚེ། རྒྱལ་བོའི་རྨི་ལམ་དུ་མིའི་ཤ་གསར་པ་དང་ཁྲག་གིས་སྨན་བྱས་ན་འཚོ་བར་འགྱུར་རོ་ཞེས་ལྷས་ལུང་བསྟན་པའི་ཚུལ་འཁོར་གྱི་ཚོགས་སུ་བསྒྲགས་ཀྱང་དང་དུ་ལེན་པ་མ་བྱུང་བ་ན། ཡེ་ཤེས་ལྡན་གྱིས་རང་གི་ཤ་དང་ཁྲག་ཕངས་པ་མེད་པར་བཏང་སྟེ་དགེ་སློང་གི་ནད་གསོ་བར་མཛད་པ་དང། ཚོང་དཔོན་གྱི་བུ་ཆུ་འབེབས་སུ་གྱུར་པའི་ཚེ་རང་གི་ཕའི་དྲུང་ནས་གསོ་རིག་བསླབ་སྟེ་སྐྱེ་བོ་དཔག་མེད་ནད་ལས་ཐར་པར་བྱས་ཤིང། འཆི་ལ་ཐུག་པའི་ཉ་ཁྲི་ཕྲག་གཅིག་གི་སྲོག་བསྐྱབས་པ་སོགས་སེམས་ཅན་ཕོངས་པ་ལས་བསྐྱབས་པ་དང་། བརྒྱ་བྱིན་མིག་བཟད་བྱ་བར་འཁྲུངས་པའི་ཚེ་འཛམ་བུའི་གླིང་དུ་ནད་ཀྱི་བསྐལ་པ་ཆེན་པོ་བྱུང་ནས་མི་རྣམས་སྡུག་བསྔལ་གྱིས་གཟིར་བ་ན། བརྒྱ་བྱིན་གྱིས་ནམ་མཁའ་ནས་ཀུ་རུའི་གྲོང་དང་ཉེ་བར་སྲོག་ཆགས་དེས་པ་བྱ་བ་ཡོད་པས། དེའི་ཤ་ལ་སུས་ཟོས་པ་དེ་ནད་ལས་ཐར་པར་འགྱུར་རོ་ཞེས་བསྒྲགས་ནས་རང་ཉིད་དེར་བསམ་བཞིན་སྐྱེ་བ་བཞེས་ཏེ། སྨོན་ལམ་གྱི་དབང་གིས་སྐུ་ཤ་མི་ཟད་པར་བྱིན་གྱིས་བརླབས་ནས་དེ་དག་གི་ནད་ཞི་བར་བྱས་པ་དང་། གཞན་

― GTD003_Page_0193 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་སེང་གེ་རལ་པ་ཅན་དུ་འཁྲུངས་པའི་ཚེ་ཚོང་པ་ལྔ་བརྒྱ་དུག་སྦྲུལ་གྱིས་བསྐོར་ནས་འཆི་ལ་ཐུག་པའི་སྲོག་བསྐྱབས་པ་སོགས་གང་སྡུག་བསྔལ་གྱིས་གཟིར་བ། མགོན་དང་སྐྱབས་མེད་པ་རྣམས་ཀྱི་ཆེད་དུ་རང་གི་འཚོ་བའི་དངོས་པོ་སྲོག་དང་། དེའི་རྟེན་ལུས་ཀྱི་ཤ་ཁྲག །བརྟེན་པའི་རྐྱེན་ལོངས་སྤྱོད་འཁོར་གཡོག་ལ་སོགས་པ་མཐའ་དག་ཕངས་པ་མེད་པར་ཡོངས་སུ་བཏང་སྟེ་སེམས་ཅན་རྣམས་ཕོངས་པ་ལས་བསྐྱབ་པར་བྱས་པ་དེའི་བདེན་པའི་སྟོབས་ཀྱིས་འགྲོ་བ་མ་ལུས་པའི་ཕོངས་པ་སེལ་བའི་སྨན་གཅིག་པུ་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་ལམ་མཛད་པ་ཡིན་ནོ། །ཡང་ན་རྐང་པ་གསུམ་པའི་དོན་འགྲེལ་ཚུལ། ནད་པ་སོགས་ཀྱི་དོན་དུ་རང་གི་སྲོག་ཀྱང་གཏོང་བར་མཛད་པ་དེའང་ལན་དང་རྣམ་སྨིན་ལ་རེ་བ་མེད་པར་སྦྱིན་ཡུལ་དེ་ཉིད་ཀྱིས་ཐོག་དྲངས་པའི་མཁའ་མཉམ་སེམས་ཅན་ཐམས་ཅད་ཕོངས་པ་མ་ལུས་པ་ལས་བསྐྱབ་པའི་ཕྱིར་དུ་ཡིན་པས། བདོག་པ་འབྲས་བུ་དང་བཅས་པ་གཏོང་བའི་དོན་དུ་སྦྱར་ན་ལེགས་ཏེ། དཔལ་ལྡན་ཟླ་བས། བརྩེ་བས་སྦྱིན་དང་སྦྱིན་པའི་འབྲས། །གཉི་ག་གཅིག་ཅར་དོན་གཉེར་ལ། །གཏོང་བའི་སྦྱིན་གང་སེར་སྣ་མེད། །ཅེས་དང་། སྤྱོད་འཇུག་ལས། བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་བཏང་སེམས་ཀྱིས། །ཞེས་གསུངས་པ་ལྟར་རོ། །གཉིས་པ་ཡོད་དགུ་མཐའ་དག་གཏོང་བ་སྦྱོར་བ་ཕུན་སུམ་ཚོགས་པའི་ཚུལ་ནི། བུ་དང་བུ་མོ་ཆུང་མ་དང། །ནོར་དང་གླང་ཆེན་ཤིང་རྟ་དང། །རིན་ཆེན་བྱང་ཆུབ་ཕྱིར་བཏང་བས། །བསྟན་པ་ཡུན་རིང་

― GTD003_Page_0194 ―

^{[མ་དཔེ་གཟིགས་ན་འདིར་གནོན།]}

[Full Size]

འབར་གྱུར་ཅིག །ཅེས་བྱུང་། དེའང་ཐུབ་པའི་དབང་པོ་ཉིད་རྒྱལ་བུ་ཐམས་ཅད་སྒྲོལ་དུ་གྱུར་པ་ན་གླང་པོའི་མཆོག་སྦྱིན་པར་བཏང་ཞིང། དེའི་རྐྱེན་གྱིས་རྒྱལ་པོས་ཡུལ་ནས་སྤྱུགས་པའི་ལམ་དུའང་ཤིང་རྟ་དང་། མཐར་སྲས་སྲས་མོ་བཙུན་མོའི་བར་དུ་སློང་མཁན་བྱུང་བ་རྣམས་ལ་ཞུམ་པ་མེད་པར་དེ་ཐམས་ཅད་གང་འདོད་དུ་སྩལ་བ་དང་། འཁོར་ལོས་བསྒྱུར་བ་ནམ་མཁའི་སྐྱེ་བ་བཞེས་པའི་ཚེ་བང་མཛོད་མཐའ་དག་སྲས་དང་བཙུན་མོར་བཅས་པ་སྦྱིན་པར་བཏང་བ་དང་། རྒྱལ་པོ་དཔལ་གྱི་སྡེར་གྱུར་པའི་ཚེ་བྲམ་ཟེ་ཁྱེའུས་བསླངས་པ་ལ་བཙུན་མོ་རྒྱལ་བའི་འོད་གནང་ཞིང་། གཞན་ཡང་ཀླུའི་རྒྱལ་པོ་གཏེར་སྟོན་དུ་གྱུར་པའི་ཚེ་ལོ་བྱེ་བ་ཁྲག་ཁྲིག་འབུམ་ཕྲག་བདུན་ཅུ་རྩ་བདུན་གྱི་བར་དུ་རིན་པོ་ཆེའི་གཏེར་དཔག་ཏུ་མེད་པ་སེམས་ཅན་རྣམས་ལ་བྱིན་ནས་དབུལ་བའི་སྡུག་བསྔལ་བསལ་བ་དང་། ཚོང་དཔོན་ཟིལ་གྱིས་མི་ནོན་པར་སྐྱེས་པའི་ཚེ་ཕྱི་ནང་གི་ནོར་རྫས་རླབས་ཆེ་བ་ཐམས་ཅད་སྦྱིན་པར་བཏང་ནས་མཐར་ཐག་པ་གཅིག་དང་ཟོར་བ་གཅིག་ལས་མ་ལུས་ཀྱང་། ད་དུང་ཞུམ་པ་མེད་པར་ཉིན་རེ་བཞིན་རྩྭ་བརྔས་ནས་དེའི་རིན་སྦྱིན་པར་བཏང་ཞིང་། རི་བོང་དུ་གྱུར་པའི་ཚེ་རྩྭ་དང་འབྲས་བུ་ཚུན་ཆད་སྦྱིན་པར་བཏང་བ་སོགས་བདོག་པའི་དངོས་པོ་མཆོག་དམན་གང་ལའང་ཀུན་འཛིན་གྱི་འཆིང་བ་མེད་པར་གཞན་ལ་གཏོང་བར་མཛད་ཅིང། དེ་ལྟར་གཏོང་བའི་དགོས་པའང་སེམས་ཅན་ཐམས་ཅད་སྲིད་ཞིའི་རྒུད་པ་མ་ལུས་པ་ལས་སྐྱོབ་པའི་དོན་དུ་བླ་ན་མེད་པའི་བྱང་ཆུབ་བསྒྲུབ་པའི་ཕྱིར་ཁོ་ན་ཡིན་ཏེ། ལུང་ལས། བསོད་ནམས་འདི་ཡིས་ཐམས་ཅད་གཟིགས་པ་ཡི། །གོ་འཕང་ཐོབ་

― GTD003_Page_0195 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་སྐྱོན་གྱི་དགྲ་བཏུལ་ཏེ། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་སྨོན་པ་མཛད་ཚུལ་ཡང་ཡང་འབྱུང་བ་བཞིན་ཡིན་ནོ། །བྱང་ཆུབ་ཀྱི་སྒྲ་དོན་ནི། མཛོད་ལས། ཟད་དང་མི་སྐྱེ་ཤེས་པ་ནི། །བྱང་ཆུབ་ཅེས་པའི་དངོས་ཟིན་ཙམ་ཞིག་ཐུན་མོང་བ་ལ་སྦྱར་དུ་རུང་ཡང། དེའི་འདོད་ཚུལ་དངོས་གཞི་ནི་འགྲེལ་པ་དོན་གསལ་ལས། གང་དག་དངོས་པོ་འཇིགས་པའི་བསམ་པས་ཟད་པ་ལ་ཟད་དོ་སྙམ་པའི་ཤེས་པ་དང་། ཞེས་པ་ནས། བྱང་ཆུབ་ཀྱང་ཟད་པ་དང་མི་སྐྱེ་བ་ཤེས་པ་ཡིན་པར་བརྗོད་པ་དེ་དག་ལ་ཞེས་པའི་ཕྱོགས་སྔ་མ་ཡིན་པས་རང་ལུགས་སུ་མི་རུང་ངོ་། །དེས་ན་སྐབས་འདིའི་བྱང་ཆུབ་ཆེན་པོ་དངོས་ཀྱི་དོན་ནི། རྒྱུད་བླ་མར། སངས་རྒྱས་ཉིད་ནི་དབྱེར་མེད་པ། །དག་པའི་ཆོས་ཀྱིས་རབ་ཕྱེ་བ། །ཉི་མཁའ་བཞིན་ཏེ་ཡེ་ཤེས་དང། །སྤངས་པ་གཉིས་ཀྱི་མཚན་ཉིད་དོ། །ཞེས་དང། དེའི་དར་ཊཱིཀ་ལས། བྱང་ཆུབ་ཉིད་ནི་སངས་རྒྱས་ཀྱི་ཡོན་ཏན་ཐམས་ཅད་དང་རང་གི་ངོ་བོའི་སྒོ་ནས་དབྱེར་མེད་པའི་ཡེ་ཤེས་དང་རང་བཞིན་གྱིས་དག་པ་དང་གློ་བུར་གྱི་དྲི་མས་དག་པའི་ཆོས་ཀྱིས་རབ་ཏུ་ཕྱེ་བ་སྟེ། སྤངས་པ་དང་རྟོགས་པ་ཞེས་གསུངས་པ་ལྟར། མཉམ་རྗེས་དབྱེར་མེད་པས་བདེན་གཉིས་ཅིག་ཅར་མངོན་སུམ་དུ་གཟིགས་པ་རྣམ་པ་ཐམས་ཅད་མཁྱེན་པའི་ཡེ་ཤེས་རྟོགས་པ་བྱང་ཆུབ་དང་། སྒྲིབ་གཉིས་ཟད་པར་སྤངས་པའི་དག་པ་གཉིས་ལྡན་གྱི་དབྱིངས་སྤངས་པ་བྱང་ཆུབ་གཉིས་སུ་ཡོད་ལ། སྔ་མ་ནི་

― GTD003_Page_0196 ―

^{[མ་དཔེ་གཟིགས་ན་འདིར་གནོན།]}

[Full Size]

མངོན་རྟོགས་རྒྱན་ལས་ཀྱང་། དྲི་མ་ཟད་དང་མི་སྐྱེ་བས། །ཡེ་ཤེས་བྱང་ཆུབ་ཅེས་བརྗོད་དོ། །ཞེས་གསལ་བར་གསུངས་སོ། །རྡོ་རྗེ་ཐེག་པར་དེ་ལྟ་བུའི་ཡེ་ཤེས་དང་དག་པའི་སྒྱུ་མའི་སྐུ་དབྱེར་མི་ཕྱེད་པ་ལ་བྱང་ཆུབ་རྡོ་རྗེ་ཞེས་ཟུང་འཇུག་གི་རྣམ་གྲངས་སུ་གསུངས་པ་སོགས་མང་དུ་ཡོད་ཀྱང་མ་སྤྲོས་པས། བྱང་ཆུབ་ཀྱི་རྣམ་བཞག་འདི་དག་དཔྱིས་ཕྱིན་པར་ཤེས་འདོད་ན་རྡོ་རྗེའི་གནས་ལྔ་པ་བྱང་ཆུབ་ཀྱི་ལེའུའི་ཐད་ཀྱི་རྒྱུད་བླ་རྩ་འགྲེལ་སོགས་ལས་ཤེས་པར་བྱའོ། །དེའང་ཤོ་ལོ་ཀ་སྔ་མའི་སྐབས་སུ། སེམས་ཅན་ཕོངས་པ་བསྐྱབ་པའི་ཕྱིར། །ཞེས་དགོས་པའི་གཙོ་བོ་གཞན་དོན་ལ་དམིགས་པར་བསྟན་ཅིང། གཞན་དོན་ཕུན་སུམ་ཚོགས་པ་སྒྲུབ་པ་ལ་ཐོག་མར་རང་གིས་བྱང་ཆུབ་མངོན་དུ་བྱེད་དགོས་པས། འདིར་བྱང་ཆུབ་ཕྱིར་བཏང་ཞེས་རང་དོན་བྱང་ཆུབ་ལ་དམིགས་པར་གསུངས་པ་འདི་གཉིས་ནི་གཞན་ཐམས་ཅད་ཀྱི་སྐབས་སུའང་སྦྱར་དགོས་སོ། །དེ་ལྟར་གཞན་དོན་དུ་བྱང་ཆུབ་ཐོབ་པར་འདོད་པའི་བསམ་པ་སེམས་བསྐྱེད་དེ་ཉིད་སྤྱོད་པ་མཐའ་དག་གི་གཞི་རྟེན་དུ་འབྱུང་བས། དེ་ལ་རྟེན་དམ་པ་ཞེས་ཐེག་བསྡུས་སུ་བཤད་ཅིང། འགྱུར་ལ་ལར་གནས་དམ་པ་ཞེས་ཀྱང་འབྱུང་ངོ་། །བདེ་དགེ་མཐའ་དག་འབྲས་བུ་དང་བཅས་ཏེ་གཏོང་བ་ནི་ཐེག་བསྡུས་ལས། དངོས་པོ་དམ་པ་ཡིན་ཏེ་མཐའ་དག་ཀུན་ཏུ་གཏོང་བའི་ཕྱིར་རོ། །ཞེས་དམ་པ་དྲུག་གི་ནང་ནས་དངོས་པོ་དམ་པའི་དོན་དུ་གསུངས་ལ། དེ་ནི་སྦྱིན་སོགས་ཕར་ཕྱིན་དྲུག་ལྡན་དུ་བྱེད་ཚུལ་གྱི་ནང་ནས། སྦྱིན་པའི་སྦྱིན་པའི་ཕར་ཕྱིན་ནས། སྦྱིན་པའི་སྦྱིན་པའི་གོ་སྒྲུབ་ཀྱི་དོན་ཡིན་ཏེ། གོ་སྒྲུབ་ཀྱི་མདོ་ལས། བྱང་ཆེན་ཤེར་

― GTD003_Page_0197 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིན་ལ་སྤྱོད་པའི་ཚེ་སྦྱིན་པ་གང་ཡོངས་སུ་གཏོང་བ་དེ་དག་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས་ཡོངས་སུ་གཏོང་སྟེ། ནས། སྦྱིན་པ་ཡོངས་སུ་གཏོང་བའི་སྦྱིན་པའི་ཕ་རོལ་ཏུ་ཕྱིན་པའི་གོ་ཆའོ། །ཞེས་གསུངས་པ་ལྟར་རོ། །གཉིས་པ་ཡུལ་ཁྱད་པར་ཅན་ལ་མཆོད་པའི་ཚུལ་ནི། བདག་གིས་སངས་རྒྱས་རང་སངས་རྒྱས། །ཉན་ཐོས་ཕ་དང་མ་དང་ནི། །དྲང་སྲོང་དག་ལ་མཆོད་བྱས་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཡུལ་ཁྱད་པར་ཅན་ལ་སྦྱིན་པ་མཛད་པའི་རྣམ་གྲངས་མང་ཡང། འདིའི་དངོས་ཟིན་གྱི་གོ་རིམ་དང་སྦྱར་ན། བྲམ་ཟེ་ཁྱེའུ་སྤྲིན་དུ་འཁྲུངས་པའི་ཚེ་སངས་རྒྱས་མར་མེ་མཛད་ལ་རལ་པ་གདན་དུ་བཏིང་སྟེ་བཀུར་སྟི་བྱས་པའི་ཚེ་བྱང་ཆུབ་ཏུ་ལུང་བསྟན་ཅིང་མི་སྐྱེ་བའི་ཆོས་ལ་བཟོད་པ་ཐོབ་པ་དང། བྲམ་ཟེ་སྒྲ་རྣམ་པར་གྲག་པར་སྐྱེས་པའི་ཚེ་སངས་རྒྱས་སྒྲིབ་མེད་ལ་གསེར་གྱི་ཁང་བརྩེགས་ཁྱད་དུ་འཕགས་པ་ཕུལ་ནས་སྨོན་ལམ་བཏབ་པ་དང། བྲམ་ཟེ་ཟླ་དགས་སངས་རྒྱས་མྱ་ངན་ཐམས་ཅད་དང་བྲལ་བ་ལ་མཆོད་ཅིང་འགྲོ་བ་ཀུན་གྱི་དོན་དུ་སྨོན་ལམ་བཏབ་པས། དེས་འོད་ཀྱིས་སྟོང་གསུམ་ཁྱབ་པར་མཛད་དེ། སེམས་ཅན་དཔག་ཏུ་མེད་པ་བྱང་ཆུབ་ལས་ཕྱིར་མི་ལྡོག་པར་མཛད་པ་སོགས་མདོར་ན། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང། །ཞེས་མཛོད་ལས་གསུངས་པ་དང། ལུང་སྨན་གྱི་གཞི་ལས་འབྱུང་བ་སོགས་ཐེག་པ་ཆེ་ཆུང་གི་སྡེ་སྣོད་ཀུན་ལས་གྲངས་མེད་གསུམ་དུ་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་རིམ་གྲོ་བྱས་ཚུལ་

― GTD003_Page_0198 ―

^{[མ་དཔེ་གཟིགས་ན་འདིར་གནོན།]}

[Full Size]

མཐའ་ཡས་པ་གསུངས། དེ་བཞིན་དུ་རྒྱལ་པོ་གསེར་མདོག་གིས་བང་མཛོད་མཐའ་དག་སྦྱིན་པར་བཏང་ནས་རང་གིས་གསོལ་རྒྱུ་བྲེ་གང་ཙམ་ལུས་པའང་རང་སངས་རྒྱས་ལ་ཕུལ་བ་དང། ཚོང་དཔོན་སྦྱིན་པ་ལ་དཔའ་བས་རང་སངས་རྒྱས་ལ་བསོད་སྙོམས་དབུལ་བའི་ལམ་ཁར་བདུད་ཀྱིས་དམྱལ་བ་སྤྲུལ་ནས་བཀག་ཀྱང་བཟློག་མ་ནུས་པར་དེ་ལ་ཕུལ་བ་ལྟ་བུ་རང་སངས་རྒྱས་ལ་བསྙེན་བཀུར་བྱས་པ་དང། སངས་རྒྱས་ཉན་ཐོས་དང་བཅས་པ་ལ་བསྙེན་བཀུར་བའི་རྣམ་གྲངས་ལུང་ལས་གསུངས་པ་མང་ཞིང། དགེ་སྦྱོང་བཞི་ལ་ཟན་ཆངས་ཤིག་ཕུལ་བས་རྒྱལ་སྲིད་ཀྱི་དཔལ་འབྱོར་ཐོབ་སྟེ་སྦྱིན་པ་ལ་དགྱེས་པའི་ཚུལ་ཟན་དྲོན་ཆངས་པ་ཕུལ་བའི་སྐྱེས་རབས་ལྟ་བུ་དང། ཐ་ན་ཉན་ཐོས་ཀྱི་ཆ་ལུགས་འཛིན་པའི་རྔོན་པ་ལའང་གུས་པར་བྱས་ཚུལ་སེང་གེ་ཡི་དམ་བརྟན་པའི་སྐྱེས་རབས་ལྟར་ཡིན་ལ། དེ་བཞིན་དུ་རྒྱལ་བུ་སུ་ཤ་དེ་བར་གྱུར་པའི་ཚེ་རང་གི་ལུས་ཀྱི་ཤ་ཐམས་ཅད་ཀྱིས་ཕ་མ་ལ་བསྙེན་བཀུར་བྱས་པ་དང། རི་བོང་དུ་སྐྱེས་པའི་ཚེ་དྲང་སྲོང་བསམ་གཏན་བསྒོམ་པ་ལ་མཆོད་པའི་དོན་དུ་རང་གི་ལུས་བཏང་བ་སོགས་རེ་རེ་ནས་སྨོས་ཀྱིས་མི་ལང་ངོ་། །དེ་ལྟར་སངས་རྒྱས་བཅོམ་ལྡན་འདས་རྣམས་དང། བསེ་རུ་ལྟ་བུའམ་ཚོགས་སྤྱོད་ཆེ་ཆུང་གི་རང་སངས་རྒྱས། ཞུགས་གནས་བརྒྱད་ཀྱིས་བསྡུས་པའི་ཉན་ཐོས་སོགས་ཡོན་ཏན་གྱི་ཞིང། ཕ་མ་སོགས་ཕན་འདོགས་པའི་ཞིང། བདེན་ཚིག་གྲུབ་པ་ལྷ་མིའི་དྲང་སྲོང་ལ་སོགས་པ་བསོད་ནམས་ཀྱི་ཞིང་གོང་མར་གྱུར་པ་རྣམས་ལ་སྒོ་གསུམ་གུས་པའི་སྒོ་ནས་མཆོད་ཅིང། དེའང་གོང་དུ་སྨོས་པ་བཞིན་གཞན་དོན་དང་བྱང་ཆུབ་ལ་དམིགས་པའི་བསམ་པ་ཁྱད་པར་ཅན་གྱི་རྩིས་ཟིན་པ་ཁོ་

― GTD003_Page_0199 ―

^{[མ་དཔེ་གཟིགས་ན་འདིར་གནོན།]}

[Full Size]

ན་ཡིན་པས་དེས་ན་ཐེག་པ་གསུམ་དང་འཇིག་རྟེན་གསུམ་སོགས་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་མ་ལུས་པ་འབྱུང་བའི་སྒོ་གཅིག་པུ་རྒྱལ་བའི་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་པ་སྔར་བཞིན་ནོ། །དེ་དག་སོ་སོའི་སྒྲ་དོན་ཅུང་ཟད་བཤད་ན། སངས་རྒྱས་བཅོམ་ལྡན་འདས་ནི་སྐྱབས་འགྲོ་བདུན་ཅུ་པ་ལས། ཤེས་བྱ་ལ་ནི་བློ་རྣམ་རྒྱས། །རྨོངས་པའི་ཟུམ་པ་བཅོམ་པས་ན། །སངས་རྒྱས་པདྨ་ལྟར་རྣམ་རྒྱས། །ཞེས་དང། གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་མ་རིག་པ་བག་ཆགས་དང་བཅས་པ་ཟད་པར་སྤངས་པས་ན་སངས་པ་དང། མཁྱེན་པའི་སྐད་ཅིག་མ་གཅིག་གིས་ཀྱང་ཇི་ལྟ་ཇི་སྙེད་མཐའ་དག་ལ་ཁྱབ་པས་ན་རྒྱས་ཞེས་བྱའོ། །བཅོམ་ལྡན་འདས་ནི་རྒྱུད་བརྟག་གཉིས་ལས། དབང་ཕྱུག་ལ་སོགས་ཡོན་ཏན་དང། །ལྡན་ཕྱིར་བཅོམ་ལྡན་འདས་ཞེས་བྱ། །ཡང་ན་ཉོན་མོངས་ལ་སོགས་བདུད། །བཅོམ་ཕྱིར་བཅོམ་ལྡན་འདས་ཞེས་བརྗོད། །ཅེས་བདུད་བཞི་བཅོམ་པས་ན་བཅོམ་ཞེས་བྱ་ལ། དབང་ཕྱུག་སོགས་ཡོན་ཏན་དྲུག་དང་ལྡན་པས་ལྡན་ཞེས་བཤད་དེ། ཡོན་ཏན་དྲུག་ནི་སམྦུ་ཊ་ལས། དབང་ཕྱུག་དང་ནི་གཟུགས་བཟང་དང། །དཔལ་དང་གྲགས་དང་ཡེ་ཤེས་དང། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་སྐལ་ཞེས་བྱ། །ཞེས་པ་ལྟར་རོ། །འདས་ཞེས་པ་འཇིག་རྟེན་པའི་ལྷ་ཆེན་པོ་དག་ལས་ཁྱད་པར་དུ་བྱས་པའི་ཕྱིར་ལོ་ཙཱ་བས་བླ་ཐབས་སུ་བསྣན་པར་གྲགས་ལ། ཏཱ་ར་ནཱ་ཐས་ཚེ་མདོའི་ཊཱིཀྐར་བྷ་ག་ཞེས་

― GTD003_Page_0200 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ག་ལ་ཡི་གེ་བསྣན་ནས། ག་ཏི་ཞེས་པ་འཇིག་རྟེན་པའི་ས་ལས་རིང་དུ་སོང་བ་ལ་འཇུག་པས་འདས་པའི་དོན་ཡང་ཡོད་པར་བཤད་དོ། །སྡོམ་གསུམ་རབ་དབྱེ་ལས། དེ་ནས་ཚིག་ལ་འཁྲུལ་པ་ཡི། །རྣམ་དབྱེ་ཅུང་ཟད་བཤད་ཀྱིས་ཉོན། །བཅོམ་ལྡན་འདས་ཀྱིས་བཤད་པ་ལ། །བཞི་བཅོམ་དྲུག་ལྡན་བཤད་པ་དང། །ཞེས་བཅོམ་པ་དང་ལྡན་པའི་དོན་སོ་སོར་བཤད་པ་ལ་དགག་པ་མཛད་ཅིང། མཁས་འཇུག་ཏུའང་དེའི་སྐད་དོད་བྷ་ག་ཝན་ཞེས་པ་བདུད་བཞི་བཅོམ་པ་དང་སྐལ་བ་དྲུག་དང་ལྡན་པ་གཉི་ག་ལ་འཇུག་ཀྱང། བོད་སྐད་ཀྱི་མིང་ནི་དེ་གཉི་གར་མི་འཇུག་ལ། གལ་ཏེ་འཇུག་ན་མིང་རིལ་པོ་གཉི་ག་ལ་འཇུག་དགོས་ཀྱི། མིང་གཏོར་ནས་སོ་སོར་བཤད་པ་ནི་སྒྲ་ཤེས་པ་ཞིག་གིས་མཐོང་ན་བཞད་གད་ཀྱི་གནས་སུ་འགྱུར་ཞེས་དགག་པ་མཛད་འདུག་ནའང། བོད་སྐད་ལ་རྒྱ་སྐད་དང་འདྲ་བའི་ནུས་པ་མེད་པས་ཚིག་གཅིག་གིས་དོན་གཉིས་ཀ་གོ་མི་ཐུབ་ལ། བཅོམ་པ་ཞེས་སམ་ལྡན་པ་ཞེས་པ་ཙམ་ཞིག་ཏུ་བསྒྱུར་ན་ནུས་པ་ཆུང་བས། བྷ་ག་ཝན་གྱི་སྒྲ་འཇུག་པའི་དོན་དེ་གཉིས་ཀ་གོ་བའི་ཕྱིར་མིང་གཅིག་གི་སྒྲ་ཟུར་ནང་དུ་གཉི་གའི་སྒྲ་ཟུར་ཚང་བ་བྱས་ཏེ་བཅོམ་ལྡན་ཞེས་བསྡུས་ནས་བསྒྱུར་བ་ལོ་པཎ་གྱི་བཀས་བཅད་ལྟར་ཡིན་པས་འགལ་བ་མེད་དོ། །དེ་བཞིན་དུ་བུདྡྷ་ཡང་སངས་པ་དང་རྒྱས་པ་གཉིས་ཀ་ལ་འཇུག་པས་ལོ་པཎ་རྣམས་ཀྱིས་མུན་པ་སངས་པའམ། པདྨའི་འདབ་མ་རྒྱས་པ་ལྟ་བུ་ལ་བུདྡྷའི་སྒྲ་བྱུང་བའི་ཚེ། སྐབས་ཐོབ་དེ་ཉིད་དུ་སངས་པའམ་རྒྱས་པ་ཞེས་སོ་སོར་བསྒྱུར་ཀྱང། སངས་རྒྱས་ལ་སྒྲ་འདི་བྱུང་བའི་ཚེ་དེ་སངས་པ་

― GTD003_Page_0201 ―

^{[མ་དཔེ་གཟིགས་ན་འདིར་གནོན།]}

[Full Size]

དང་རྒྱས་པ་གང་རུང་ཞིག་ཁོ་ནར་བསྒྱུར་ན་གོ་རྒྱུ་ཆུང་ཞིང་གཞན་དུ་ནོར་ས་འབྱུང་བས། ངེས་ཚིག་གི་དོན་གཉིས་ཀའི་ཟུར་ཚང་བ་བྱས་ནས་སངས་རྒྱས་ཞེས་བསྒྱུར་བ་ཡིན་ཏེ། གསེར་འཕྲེང་ལས། སངས་རྒྱས་ལ་དེ་གཉིས་ཀའི་སྒྲ་དོན་བཤད་དུ་ཡོད་པ་རྒྱུ་མཚན་དུ་བྱས་ནས་སངས་རྒྱས་ཞེས་བསྡོམས་ནས་བསྒྱུར་རོ། །ཞེས་གསུངས་པའི་ཕྱིར། རང་སངས་རྒྱས་ནི་མཛོད་འགྲེལ་ལས། ལུང་མེད་པར་བདག་གཅིག་པུའི་ཕྱིར་སངས་རྒྱས་པས་རང་སངས་རྒྱས་ཞེས་གསུངས་པ་བཞིན། ལུང་ལ་མ་བརྟེན་པར་བདག་ཉིད་གཅིག་པུའི་ཕྱིར་སངས་རྒྱས་པ་སྟེ། དེ་ཁོ་ན་ཉིད་ཁོང་དུ་ཆུད་པས་ན་རང་སངས་རྒྱས་ཞེས་བཤད་དེ། དེའི་སྐད་དོད་པྲ་ཏྱེ་ཀ་བུདྡྷ་ཞེས་པའི་བུདྡྷ་སངས་རྒྱས་དང་དེ་ཉིད་ཁོང་དུ་ཆུད་པ། དེ་ཐམས་ཅད་རྟོགས་པ་སོགས་དུ་མར་འཇུག་པས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །ཞེས་པའང་ཉན་ཐོས་དེ་ཉིད་རྟོགས་འབྲིང་ཞེས་བསྒྱུར་ན་ལེགས་པར་གསུངས་པ་བཞིན་ནོ། །ཡང་པྲ་ཏྱེ་ཀ་བུདྡྷ་ཞེས་པའི་པྲ་ཏི་རྐྱེན། ཨེ་ཀ་གཅིག །བུདྡྷ་རྟོགས་པ་བྱས་ཏེ། དུར་ཁྲོད་ཀྱི་རུས་གོང་ལྟ་བུ་ལ་དམིགས་ནས་རྟེན་འབྲེལ་ལུགས་འབྱུང་ལུགས་ལྡོག་སོགས་ཀྱིས་རྐྱེན་རྣམས་རྟོགས་པས་ན་རྐྱེན་རྟོགས་ཞེས་ཀྱང་གསུངས་ཏེ། གཟུངས་རྒྱལ་གྱིས་ཞུས་པའི་མདོ་ལས། རང་སངས་རྒྱས་རྣམས་ཀྱི་རྣམ་པར་གྲོལ་བ་ནི་རྐྱེན་ཁོང་དུ་ཆུད་པའོ། །ཞེས་སོ། །དགོངས་པ་ལུང་སྟོན་ལས། རྐྱེན་དང་ཉན་ཐོས་རྣམས་ཀྱི་དང། །མདོ་དང་གསང་སྔགས་སྤྱོད་རྣམས་ཀྱི། །ཞེས་དང། རྐྱེན་དང་ཉན་ཐོས་ཀྱིས་གཞིག་དཀའི། །བཛྲ་

― GTD003_Page_0202 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་ནི་བཞི་པར་འགྱུར། །ཞེས་པ་ལྟ་བུ་རང་རྒྱལ་ལ་རྐྱེན་གྱི་སྒྲ་ཙམ་སྦྱར་ནས་གསུངས་པའང་མང་ངོ་། །ཉན་ཐོས་ནི་པད་དཀར་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་མི་བཟད་ཉན་ཐོས་འདྲ། །ཞེས་བྱང་ཆུབ་མཆོག་གི་ལམ་དང་འབྲས་བུ་རྣམས་སངས་རྒྱས་ལས་མཉན་ནས་རང་གི་ཆེད་དུ་ཉམས་སུ་མི་ལེན་པར་གཞན་ལ་སྒྲོག་པར་བྱེད་པས་ཐོས་སྒྲོག་གམ་ཉན་ཐོས་ཞེས་གཙོ་བོར་ལུང་ལ་ཆེད་དུ་བརྟེན་པའི་ཆ་ནས་ཀྱང་བཏགས་པ་ཡིན་ཏེ། གཟུངས་རྒྱལ་གྱི་མདོ་ལས། ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ། །ཞེས་སོ། །ཕ་མ་ནི་གང་ཟག་གཞན་ལ་ཞིང་ཁྱད་པར་ཅན་དུ་མི་འགྱུར་ཡང། རང་ལ་ཆོས་སྒྲུབ་པའི་ལུས་སྦྱིན་པའི་བཀའ་དྲིན་གྱི་སྒོ་ནས་ཞིང་ཁྱད་པར་ཅན་དུ་འགྱུར་ཏེ། སྔོ་བསངས་ཅན་གྱི་ཡལ་འདབ་ལས། དགེ་བའི་གནས་སུ་གྱུར་པ་ལུས་དག་གི །རྒྱུར་གྱུར་ཕ་མ་དག་ནི་མཁས་རྣམས་ཀྱིས། །བླ་མ་ཡིས་ཀྱང་མཆོད་འོས་ཞེ་སར་འོས། །ཞེས་པ་ལྟར་རོ། །དྲང་སྲོང་ནི་སྤྱིར་ལུང་ལས། དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་དང། རྒྱུད་བླ་མར། དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །ཞེས་སངས་རྒྱས་སོགས་ཐེག་པ་གསུམ་གྱི་འཕགས་པ་རྣམས་ལའང་དྲང་སྲོང་གི་སྒྲ་འཇུག་ལ། དེའི་དབང་དུ་བྱས་ཏེ་ཟླ་བའི་ཚིག་གསལ་ལས། དོན་དམ་པ་ཐུགས་སུ་ཆུད་པས་ན་དྲང་སྲོང་ངོ་། །ཞེས་གསུངས་ཀྱང། འདིར་སྐབས་ཐོབ་ཀྱི་དབང་གིས་འཇིག་རྟེན་པའི་དྲང་སྲོང་བདེན་ཚིག་གྲུབ་པ་རྣམས་

― GTD003_Page_0203 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བཤད་ཅིང། དེའང་ཁྱིམ་གྱི་འདུ་འཛི་དང་གཡེང་བ་སྤངས་ཏེ་དབེན་པར་སོང་ནས་ཏིང་ངེ་འཛིན་བསྒོམས་པས་བསམ་གཏན་ལ་སོགས་པའི་ཡོན་ཏན་གོང་མ་ཐོབ་པ། སྨོན་པའི་ཚིག་གིས་ཀྱང་གཞན་གྱི་དགོས་པ་སྒྲུབ་ནུས་ལ། ངན་པའི་སྤྱོད་པ་གཡོ་སྒྱུ་སོགས་མེད་པར་ཤེས་རྒྱུད་དྲང་པོར་སྲོང་བས་ན་དྲང་སྲོང་ཞེས་བྱ་སྟེ། ཇི་སྐད་དུ། འཁོར་བས་སྐྱོ་སྟེ་ནགས་སུ་སོང། །བསམ་གཏན་ཐོབ་སྟེ་མངོན་ཤེས་འཆར། །དེ་ལ་མི་ཡི་དྲང་སྲོང་ཟེར། །བསམ་གཏན་མ་ཐོབ་གྲོང་དུ་བབས། །སྙན་ངག་སོགས་འཚོ་བྲམ་ཟེའི་རིགས། །ཞེས་འབྱུང་བ་ལྟར་རོ། །གཉིས་པ་ཐོས་པ་ལ་བསླབ་ཚུལ་ནི། བསྐལ་པ་བྱེ་བ་དུ་མར་བདག །སྡུག་བསྔལ་སྣ་ཚོགས་མྱོང་གྱུར་ཅིང། །བྱང་ཆུབ་དོན་དུ་ཐོས་བཙལ་བས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་སྔོན་རྒྱལ་པོ་ཁ་དོག་དམ་པར་གྱུར་པའི་ཚེ་ཚིགས་བཅད་གཅིག་གི་དོན་དུ་སྲས་དང་བཙུན་མོ་ལ་སོགས་པ་བཏང་བ་དང། རྒྱལ་པོ་ག་ན་ཤ་པ་ལིར་གྱུར་པའི་ཚེ་ཚིགས་བཅད་གཅིག་གི་དོན་དུ་སྐུ་ལ་མར་མེ་སྟོང་བཙུགས་པ་དང། རྒྱལ་པོ་བྱི་ལིང་གར་ལི་ཏར་གྱུར་པའི་ཚེ་ཚིགས་བཅད་གཅིག་གི་དོན་དུ་སྐུ་ལ་ལྕགས་གཟེར་སྟོང་བཏབ་པ་དང། རྒྱལ་བུ་ད་མ་གམ་ཆོས་ཀྱི་དོན་དུ་མེ་འོབས་སུ་མཆོང་བ་དང། དྲང་སྲོང་གི་སྟོན་པ་ཨུཏ་ཏ་ལིས་རང་གི་པགས་པས་ཤོག་བུ་དང། རུས་པས་སྨྱུ་གུ། ཁྲག་སྣག་ཚར་བྱས་ཏེ་ཆོས་ཉན་ཅིང་བྲིས་པ་སོགས་དཔེར་ན་འཕགས་པ་རྟག་ངུས་ཀྱང་ཤེར་ཕྱིན་ཉན་པའི་དོན་དུ་རང་གི་ཤ་ཁྲག་ཐམས་ཅད་བཏང་བ་སོགས་ཐོས་པའི་དོན་དུ་ཆེས་བྱ་དཀའ་བའི་

― GTD003_Page_0204 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་པ་དཔག་ཏུ་མེད་པ་སྤྱད་ཚུལ་ཤེར་མདོར་འབྱུང་བ་ལྟ་བུ་འདུལ་བ་ལུང་དང་མདོ་སྡེ་མཛངས་བླུན་སོགས་ལས་རྒྱ་ཆེར་འབྱུང་ལ། མདོར་ན་སློབ་དཔོན་དཔའ་བོས་སྐྱེས་རབས་ཕལ་ཆེར་གྱི་དོན་བསྡུས་པའི་སྐབས་སུ། དེ་ལྟར་བཅོམ་ལྡན་འདས་དེས་བདག་ཅག་གི་ཕྱིར་བྱ་དཀའ་བ་མང་པོས་དམ་པའི་ཆོས་འདི་བསྒྲུབས་པ་ཡིན་པས་རིམ་གྲོ་བསྐྱེད་དེ་དམ་པའི་ཆོས་མཉན་པར་བྱའོ། །ཞེས་གསུངས་པ་ལྟར། བྱང་ཆུབ་སྒྲུབ་པ་ལ་ཐོས་པ་གཙོ་ཆེ་བར་དགོངས་ནས་བསྐལ་པ་དཔག་ཏུ་མེད་པར་དེའི་དོན་དུ་དཀའ་སྤྱད་མཐའ་ཡས་པ་ཞིག་ལྷུར་བཞེས་ཤིང། ཐོས་དོན་སྒྲུབ་པ་ལ་སྦྱར་བས་ཉིང་དགོས་མཐར་ཐུག་པ་མངོན་དུ་མཛད་པ་དེའི་བདེན་པའི་སྟོབས་ཀྱིས་ཀྱང་རྗེས་འཇུག་གི་གདུལ་བྱ་རྣམས་རྙེད་བཀུར་སྙན་གྲགས་སོགས་ལ་རེ་བ་མ་ཡིན་པར། ཐེག་པ་གསུམ་གྱི་བྱང་ཆུབ་དོན་དུ་གཉེར་བ་ངེས་འབྱུང་གི་བསམ་པ་ཁྱད་པ་ཅན་གྱི་རྩིས་ཟིན་པའི་ཚུལ་ཁྲིམས་རྣམ་པར་དག་པ་གཞིར་བཟུང། ཐོས་བསམ་སྒོམ་གསུམ་ཡ་མ་བྲལ་བར་བྱས་ཏེ། ཀློག་པ་ཐོས་བསམ་དང་སྤོང་བ་བསམ་གཏན་གཉིས་ཀྱི་སྒོ་ནས་རྒྱལ་བའི་བསྟན་པ་རིན་པོ་ཆེ་འཕེལ་ཞིང་རྒྱས་པར་གྱུར་ཅིག་ཅེས་སྨོན་པ་མཛད་པ་ཡིན་ནོ། །དེའང་འདིའི་བསྐལ་པ་ནི་བར་བསྐལ་ཙམ་ལ་བྱེད་པ་མ་ཡིན་གྱི། མངོན་པ་མཛོད་ལས། དེ་ལྟར་འཇིག་རྟེན་ཆགས་པ་འདི། །བར་གྱི་བསྐལ་པ་ཉི་ཤུར་གནས། །ཆགས་པ་དང་ནི་འཇིག་པ་དང། །ཞིག་ནས་འདུག་པ་དག་མཉམ་མོ། །ཞེས་པ་ལྟར། གནས་བསྐལ་ལ་ཡ་ཐོག་རིང་མོ། མ་ཐོག་རིང་མོ། བར་གྱི་ཁུག་པ་བཅོ་བརྒྱད་དེ་

― GTD003_Page_0205 ―

^{[མ་དཔེ་གཟིགས་ན་འདིར་གནོན།]}

[Full Size]

བར་བསྐལ་ཉི་ཤུ་འབྱུང་བ་བཞིན། འཆགས་བསྐལ། འཇིག་བསྐལ། སྟོང་བསྐལ་རེ་རེ་ལ་ཡང་བར་བསྐལ་ཉི་ཤུ་རེ་སྟེ། བར་བསྐལ་བརྒྱད་ཅུ་པོ་གཅིག་ཏུ་བསྡོམས་པ་ནི་བསྐལ་ཆེན་གཅིག་ཡིན་ནོ། །དེ་ལྟ་བུའི་བསྐལ་ཆེན་བྱེ་བ་དུ་མ་སྟེ། འདིའི་བྱེ་བ་ནི་འབུམ་ཕྲག་བརྒྱ་ལ་བྱེ་བར་བྱེད་པ་དེ་ཙམ་མ་ཡིན་གྱི། བྱེ་བའི་སྐད་དོད་ཀོ་ཊི་ཞེས་པ་རབ་དང་རྩེ་མོ་སོགས་ལ་འཇུག་པས། འདིར་གྲངས་ཀྱི་རྩེ་མོའམ་ཡ་མཐར་སོན་པ་གྲངས་མེད་ལ་བྱ་སྟེ། དཔེར་ན་ནོར་རིན་ཐང་འདི་ཙམ་རི་ཞེས་ཚད་གཟུང་དུ་མེད་པ་ལ་རྒྱ་གར་ན་བྱེ་བ་རི་ཞེས་འདོགས་པར་རྣ་བ་བྱེ་བ་རིའི་རྟོགས་བརྗོད་ལས་འབྱུང་བ་བཞིན་ནོ། །སྡུག་བསྔལ་གྱི་སྒྲ་དོན་ནི་པྲ་སྟི་དགེ་བཤེས་ཀྱི་ཊཱིཀྐར། སྡུག་པ་ནི་ཡིད་དུ་འོང་བ་དང། བསྔལ་བ་ནི་ངལ་བར་བྱས་པ་སྟེ་ཆད་པས་གཏུགས་པའི་དོན་ནོ། །ཞེས་འབྱུང་ལ། འོན་ཀྱང་སྡུག་བསྔལ་གྱི་སྐད་དོད་དུཿ ཁ་ཞེས་པའི་དུར྄་ནི་ངན་པ་ཐོབ་པ་སོགས་དོན་ལྔ་ལ་འཇུག་པར་ཉེར་བསྒྱུར་ཉི་ཤུའི་འགྲེལ་པར་བཤད་ཅིང། ཏཱ་ར་ནཱ་ཐས་བགྲོད་དཀའ་སོགས་དོན་དགུ་ལ་འཇུག་པར་བཤད། ཁ་ནི་ཀུན་མཁྱེན་འཇམ་དབྱངས་བཞད་པའི་ཀ་ལཱ་པའི་ཊཱིཀ་ཆེན་ལས། ཁད྄་འཚེ་བ་ལ་འོས། ཁད྄་བཞག །ཊ་བྱིན། ཊ་ལ་དབྱི་འོས་ཊི་ཕྱིས། ཊ྄་ཡིག་དེའི་ཁྱད་དོན། ཉེར་བསྒྱུར་དུར྄་སྔོན་དུ་བཞག། །དུཿ ཁ་ཞེས་འཚེ་བའམ། ཡོངས་སུ་འཇོམས་པ་དང། མྱོང་བའམ་ཟ་བ་སོགས་ལ་འཇུག་པར་གསུངས་པས། དེ་དག་བསྡོམས་ན་དུཿ ཁ་

― GTD003_Page_0206 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པ་ངན་པ་སྟེ། མི་འདོད་པའི་གདུང་བས་ཉེ་བར་འཚེ་ཞིང་ཡོངས་སུ་འཇོམས་པའམ། ངན་མྱོང་སྟེ་གདུང་བ་ཉམས་སུ་མྱོང་བ་ལ་འཇུག་གོ །དེས་ན་བོད་སྐད་ཀྱི་དབང་དུ་བྱས་པའི་སྒྲ་བཤད་ཚུལ་ཡང། སྡུག་ཅེས་པ་སིམ་གདུང་གཉིས་ལ་བདེ་སྡུག་ཏུ་བཤད་པའི་སྐབས་བཞིན་བྱས་ཏེ། བསྔལ་ཞེས་པ་གདུང་བ་དེ་ཉིད་ཀྱིས་བཅོམ་ཞིང་ཉམ་ཐག་པར་བྱས་པ་ལ་སྦྱར་ན་རྒྱ་སྐད་ཀྱི་ངེས་ཚིག་དང་ཡང་མཐུན་པས་ལེགས་སམ་སྙམ་སྟེ་དཔྱད་པར་བྱའོ། །དཀའ་སྤྱད་ཀྱི་སྡུག་བསྔལ་ཁྱད་དུ་བསད་ནས་ཐོས་པ་བཙལ་བ་དེའང་ཐོས་པ་རྣམ་དག་ཏུ་འགྲོ་མི་འགྲོ་རྩ་བའི་ཀུན་སློང་ལ་རག་ལས་པས། འདིར་བྱང་ཆུབ་དོན་དུ་ཐོས་བཙལ་ཞེས་གསུངས་པ་དོན་དང་དགོས་པ་ཤིན་ཏུ་ཆེ་སྟེ། ཐོག་མར་ཐོས་པ་ལ་འཇུག་པའི་ཚུལ་འབྲས་བུ་བྱང་ཆུབ་ཐོབ་འདོད་ཀྱི་འདུན་པ་ཤུགས་དྲག་པོ་སྐྱེ་བ་ན། དེ་འཐོབ་པ་ལ་དེའི་རྒྱུ་ཀུན་བྱང་གི་བླང་དོར་ཕྱིན་ཅི་མ་ལོག་པ་ཞིག་བྱེད་དགོས་ཤིང། བླང་དོར་གོ་མ་ལོག་པ་ཞིག་འབྱུང་བའང་དཀོན་བརྩེགས་ལས། དགེ་བ་དང་ནི་སྡིག་པའི་ཆོས། །ཐོས་པ་མེད་པར་ཤེས་མི་འགྱུར། །ཞེས་གསུངས་པ་བཞིན་ཐོས་པ་ལ་རག་ལས་པས། དེ་ལྟ་བུའི་སྒྲུབ་པ་ལྷུར་ལེན་གྱི་ཕྱིར་དུ་ཐོས་པ་བཙལ་དགོས་ཀྱི། ནང་གི་ཉོན་མོངས་པའི་གཉེན་པོར་ཅུང་ཟད་ཀྱང་མི་འགྲོ་བར་རྙེད་བཀུར་དང་མཁས་པའི་གྲགས་པ་ཙམ་ཞིག་གི་ཕྱིར་ཐོས་པ་ཚོལ་བ་ནི་བཙལ་ཚུལ་ཕྱིན་ཅི་ལོག་ཏུ་གྱུར་པ་ཡིན་ཞིང། དེ་ལྟ་བུའི་སྒོ་ནས་གཞུང་གི་ཚིག་རིས་ཙམ་ཤེས་ཀྱང། ཐོས་དོན་རྒྱུད་ལ་སྦྱར་བའི་ཉམས་ལེན་བྱེད་རྒྱུ་ཞིག་མེད་ན་མང་དུ་ཐོས་པའི་དོན་མ་ཚང་ཞིང། དེ་ནི་ཆོས་ཤེས་པ་དང་

― GTD003_Page_0207 ―

^{[མ་དཔེ་གཟིགས་ན་འདིར་གནོན།]}

[Full Size]

མཁས་པའི་གྲངས་སུ་མི་འགྲོ་སྟེ། འོད་སྲུང་གིས་ཞུས་པའི་མདོ་ལས། ཐོས་དང་ལྡན་ཡང་ཚུལ་བཞིན་མ་ཡིན་པའི། །ཉོན་མོངས་འབྱུང་བའི་ནད་ནི་མི་སེལ་ན། །དེ་ཡིས་ཐོས་ལ་བརྩོན་པ་དོན་མེད་ཡིན། །ཞེས་དང། ལང་གཤེགས་ལས། མང་དུ་ཐོས་པ་ཞེས་བྱ་བ་ནི་དོན་ལ་མཁས་པ་ཡིན་གྱི། ཚིག་ལ་མཁས་པ་ནི་མ་ཡིན་ནོ། །ཞེས་དང། ཆོས་ཐམས་ཅད་འབྱུང་བ་མེད་པའི་མདོ་ལས། ཚིག་དང་སྨྲ་ལ་མཁས་ཤིང་མི་མཁས་དེ། །ཆོས་ཀྱི་རང་བཞིན་ཡོངས་སུ་མ་ཤེས་ན། །ཚིག་གི་དག་པས་བྱང་ཆུབ་འཚང་མི་རྒྱ། །ཞེས་གསུངས་ལ། མདོ་སྡེ་རྒྱན་ལས་ཀྱང། ཐོས་པས་ཆོག་པར་འཛིན་སྤོང་བ། །དེ་ནི་ཆོས་ཤེས་པ་ཞེས་བརྗོད། །ཅེས་གཞུང་གི་ཚིག་ཐོས་པ་ཙམ་གྱིས་ཆོག་མི་ཤེས་པར། གང་ཐོས་པ་དེ་ཐམས་ཅད་བྱང་ཆུབ་སྒྲུབ་པའི་ཡན་ལག་ཏུ་ཉམས་སུ་ལེན་དགོས་པར་གོ་བ་ནི་ཆོས་ཀྱི་གནད་ཤེས་པ་ཡིན་པར་གསུངས་སོ། །ཚུལ་དེ་ལྟ་བུ་ཞིག་བྱུང་ན་རྒྱལ་བ་བྱམས་པ་མགོན་པོས། འདི་ན་དང་པོར་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང། །ཚུལ་བཞིན་ཡིད་ལ་བྱེད་ལས་ཡང་དག་དོན་ཡུལ་ཡེ་ཤེས་འབྱུང། །ཞེས་དང། སྐྱེས་རབས་ལས། ཐོས་པའི་རྗེས་འཇུག་སྒྲུབ་པ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་པར་འགྱུར། །ཞེས་སོགས་དང། མཁས་མཆོག་དབྱིག་གི་གཉེན་པོས་ཀྱང། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་གྱི་རྒྱལ་བའི་བསྟན་པ་ལ་སློབ་པའི་རིམ་པ་རྒྱལ་

― GTD003_Page_0208 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་དགོངས་པ་མ་ནོར་བ་དེ་བྱུང་བ་ཡིན་ལ། དེའི་ནང་ནས་ཀྱང་མཉམ་མེད་ཇོ་བོ་ཆེན་པོ་དང། རྗེ་བླ་མའི་མན་ངག་གི་གནད་བླ་ན་མེད་པའི་ཐབས་མཁས་ཀྱི་འཕྲུལ་འདེགས་ལ་བརྟེན་ནས་ཐོས་བསམ་སྒོམ་གསུམ་ཅིག་ཅར་དུ་སྒྲུབ་པ་ཞིག་འབྱུང་སྟེ། བཀའ་གདམས་གླེགས་བམ་ལས། ང་ཐོས་དུས་ཚེ་ན་བསམ་སྒོམ་བསྡོ། །ང་བསམ་དུས་ཚེ་ན་ཐོས་སྒོམ་བསྡོ། །བསྒོམ་དུས་ཚེ་ན་ཐོས་བསམ་བསྡོ། །ང་གཅིག་ཏུ་མ་ལུས་བསྡོམས་བྱས་ནས། །ཆོས་ལམ་དུ་ཁྱེར་ནས་འགྲོ་ཤེས་པ། །ང་བཀའ་གདམས་ཕྱོགས་ཆར་མ་ལྷུང་བས། །དོན་རྒྱ་འབག་བཞིན་དུ་འཕྲུལ་ཤེས་པས། །ལེགས་ཀུན་ཏུ་གཏོགས་ཏེ་བཀའ་གདམས་ཡིན། །ཞེས་གསུངས་པ་ལྟར། གསུམ་ག་གདན་ཐོག་གཅིག་ཏུ་འདྲིལ་བ་ཞིག་འབྱུང་བས། ཁ་ཅིག་ཐོས་པའི་ཕྱོགས་ཙམ་བཟུང་སྟེ་སྒོམ་པ་ལ་བླུན་སྒོམ་ཞེས་སྨོད་པ་དང། ལ་ལ་སྒོམ་པའི་ཕྱོགས་ཙམ་བཟུང་སྟེ་ཐོས་པ་ལ་ཕྱིའི་གོ་རྒྱ་གཅོད་པ་ཙམ་དང་ཤགས་འགྱེད་པ་ཞེས་སྨོད་པ་སོགས་ཆོས་སྤོང་གི་སྒོ་ཁེགས་ཏེ་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་ཤེས་པ་ཞིག་འབྱུང་ངོ་། །དེ་དག་གི་དོན་ཧྲིལ་གྱིས་དྲིལ་ན་ལམ་རིམ་ཆེན་མོ་ལས། སངས་རྒྱས་ཐོབ་པ་ལ་འཐོབ་བྱེད་ཀྱི་ལམ་ལ་སློབ་དགོས། སློབ་པ་ལ་ཤེས་དགོས། ཤེས་པ་ལ་ཐོས་དགོས་ཞེས་ཐབས་དང་ཐབས་བྱུང་དུ་འབྲེལ་བའི་ཚུལ་འདི་མང་དུ་ཐོས་པ་འཚོལ་བ་རྣམས་ཀྱིས་སྙིང་ལ་འཆང་བར་རིགས་སོ། །གཞན་ཡང་གང་ལ་ཐོས་པ་བྱ་བའི་ཡུལ་དང། ཇི་ལྟར་ཐོས་པ་བྱེད་པའི་ཚུལ་སོགས་མཐའ་ཆོད་པར་ཤེས་འདོད་ན། མདོ་སྡེ་རྒྱན་གྱི་མོས་པ་དང་ཆོས་ཚོལ་བ།

― GTD003_Page_0209 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་བཤད་པ། སྒྲུབ་པ། གདམས་ངག་གི་ལེའུ་ལྔ་རྩ་འགྲེལ། དེའི་ཐད་ཀྱི་བྱང་ས་དང་བཅས་པ། རྣམ་པར་བཤད་པའི་སྒོ་བསྡུ་བ་དང། ཀུན་ལས་བཏུས་པ་ཐ་མ། རྣམ་བཤད་རིགས་པ་སོགས་ལས་ཤེས་པར་བྱའོ། །གཉིས་པ་ཚུལ་ཁྲིམས་ཀྱི་ངོ་བོ་ལ་བསླབ་པའི་ཚུལ་ནི། བདག་གི་ཚུལ་ཁྲིམས་བརྟུལ་ཞུགས་དང། །དཀའ་ཐུབ་ཡུན་རིང་བསྟེན་བྱས་ཤིང། །ཕྱོགས་བཅུའི་སངས་རྒྱས་ངས་མཆོད་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཚུལ་ཁྲིམས་ཀྱི་ཕར་ཕྱིན་ལ་ལྷག་པར་བསླབ་ཚུལ་ནི་སྲོག་གཅོད་ཀྱི་ལས་ལས་གཏན་དུ་ལོག་ཅིང། དེའི་བདེན་སྟོབས་ཀྱིས་ཕྱི་ནང་གི་གནོད་པ་ཞི་བ། ལེགས་པར་ཕ་རོལ་ཏུ་ཕྱིན་པ་དང། ཉའི་རྒྱལ་པོ། སྲེག་པའི་ཕྲུ་གུ་སོགས་ཀྱི་སྐྱེས་པའི་རབས་དང། བརྒྱ་བྱིན་དུ་གྱུར་པའི་ཚེ་ལྷ་མིན་གྱི་དཔུང་གིས་བདས་ཀྱང། ཤིང་ཤལ་མ་ལའི་སྟེང་གི་མཁའ་ལྡིང་གི་ཕྲུ་གུ་ལ་གནོད་ཀྱིས་དོགས་ནས་རང་སྲོག་ལ་མ་གཟིགས་པར་ཕྱིར་ལོག་པ་ལྟ་བུ་དང། བྲམ་ཟེའི་སློབ་དཔོན་གྱིས་རྐུ་བ་ཆོས་སུ་བསྟན་ཀྱང་དེར་གཏན་ནས་མ་ཞུགས་པ་ལྟ་བུ་མ་བྱིན་ལེན་སྤངས་ཚུལ། ལོག་གཡེམ་སྤངས་ཚུལ་མྱོས་བྱེད་མའི་སྐྱེས་རབས་དང། གཞན་ཡང་ཁྱིམ་ནི་བཙོན་ར་དང་འདྲ་བར་གཟིགས་ཏེ་དཔལ་འབྱོར་མཐའ་དག་མཆིལ་མའི་ཐལ་བ་བཞིན་དུ་སྤངས་ནས་ཚངས་པར་སྤྱོད་པའི་བརྟུལ་ཞུགས་ལྷུར་བཞེས་པའི་ཚུལ། སྟོན་པ་ལྐུག་འཕྱེའི་སྐྱེས་རབས། རྒྱལ་རིགས་ཕྱུག་པོའི་སྐྱེས་རབས།

― GTD003_Page_0210 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོང་དཔོན་དུ་སྐྱེས་པའི་རབས་སོགས་མཐའ་ཡས་སོ། །དེ་ལྟར་དུས་ཤིན་ཏུ་རིང་པོར་དཀའ་སྤྱད་དྲག་པོ་བཟོད་པར་བྱས་ཏེ། ཡང་དག་པའི་ཚུལ་ཁྲིམས་དང་བརྟུལ་ཞུགས་ལས་ཆ་ཙམ་ཡང་མི་འདའ་བར་བསྲུངས་ནས། སྔོན་གྱི་རྒྱལ་བ་རྣམས་མཉེས་པར་བྱས་པ་དེའི་སྟོབས་ཀྱིས་སྒོ་གསུམ་གྱི་ཉེས་སྤྱོད་སྡོམ་པའི་ཚུལ་ཁྲིམས་དང། དེ་བརྗོད་བྱར་བྱེད་པ་འདུལ་བའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་རྒྱས་པར་སྨོན་ལམ་མཛད་པའོ། །དེའང་ཚུལ་ཁྲིམས་ཀྱི་སྒྲ་དོན་མདོ་སྡེ་རྒྱན་གྱི་དབྱིག་འགྲེལ་ལས། བསིལ་བ་ཐོབ་པར་བྱེད་པས་ན་ཚུལ་ཁྲིམས་ཏེ། དེ་དང་ལྡན་པ་ལ་ཡུལ་གྱི་མཚན་མའི་ཉོན་མོངས་པས་ཡོངས་སུ་གདུངས་པ་མེད་པའི་ཕྱིར་རོ། །ཞེས་དང། བློ་བརྟན་གྱི་འགྲེལ་བཤད་ལས། ཤཱི་ལ་ཞེས་འབྱུང་སྟེ། ཤཱི་ནི་བསིལ་བའི་དོན་ལ། ལ་ནི་ཐོབ་པའམ་ལེན་པའི་དོན་ཏོ། །ཚུལ་ཁྲིམས་དང་ལྡན་པ་རྣམས་ཚེ་འདིར་ཡུལ་ལ་ཆགས་པའི་དོན་དུ་འདོད་ཆགས་དང་ཞེ་སྡང་ལ་སོགས་པའི་རྒྱུས་ལུས་དང་ངག་གི་སྒོ་ནས་བྱ་བ་སྣ་ཚོགས་ཀྱི་སྡུག་བསྔལ་བའི་གདུང་བར་བྱེད་པ་མི་འཐོབ་པར་འགྱུར་བ་དང་། དེའི་རྒྱུས་ཚེ་རབས་གཞན་དུའང་ངན་སོང་གི་གནས་སུ་མི་མྱོང་ཞིང། ལྷ་དང་མིའི་བསིལ་བའི་བདེ་བ་འཐོབ་པར་འགྱུར་བ་དང། མཇུག་ཏུ་མྱ་ངན་ལས་འདས་པའི་བདེ་བའི་བསིལ་བ་འཐོབ་པར་བྱེད་པས་ན་ཚུལ་ཁྲིམས་ཞེས་བྱའོ། །ཞེས་སོ། །འདི་ནི་ཤཱི་ལ་ཞེས་པར་ཡི་གེ་བསྣན་པའི་ངེས་ཚིག་གི་བཤད་ཚུལ་ཡིན་ལ། བོད་སྐད་ལྟར་ཚུལ་དང་ཁྲིམས་ཞེས་སོ་སོར་བཤད་ན་ཚུལ་ནི་རྣམ་བཤད་རིགས་པ་ལས། ཚུལ་གྱི་སྒྲ་ནི་བདེན་པ་དང། །ལམ་དང་འབྲེལ་འབྱུང་རིག་པ་དང། །ངེས་

― GTD003_Page_0211 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱེད་ཆ་དང་མྱ་ངན་འདས། །ཐབས་དང་རིགས་པ་ཉིད་ལ་ཡོད། །ཅེས་པ་ལྟར་དོན་བརྒྱད་དང། སྨྲ་སྒོ་ལྟར་དོན་བཅུ་ལ་འཇུག་ཀྱང། འདིར་གཙོ་བོ་རྒྱུད་རྡོ་རྗེ་རྩེ་མོ་ལས། ཚུལ་ཞེས་བྱ་བ་དོན་ཅི་ཡིན། །གང་དུ་དྲི་མ་མེད་གྱུར་པ། །དེ་ནི་དེ་ཡི་ཚུལ་དུ་བརྗོད། །ཅེས་དྲི་མ་ཟད་པའི་མྱང་འདས་ཀྱི་གོ་འཕང་སྒྲུབ་པ་དང་རྗེས་སུ་མཐུན་པའི་སྤྱོད་པ་ལ་ཚུལ་ཞེས་བྱ་སྟེ། མངོན་པ་མཛོད་སོགས་སུ་ཚངས་པའི་ཚུལ་ཞེས་བཤད་པ་དང་དོན་གཅིག་གོ །ཁྲིམས་ནི་རྒྱལ་པོའི་བཀའ་ཁྲིམས་ལས་ཡུལ་གྱི་སྐྱེ་བོ་རྣམས་འདའ་མི་ནུས་པ་བཞིན། ཐར་པ་དོན་དུ་གཉེར་བ་རྣམས་ཚུལ་དེ་ལས་འདར་མི་རུང་བའི་དོན་ནོ། །བརྟུལ་ཞུགས་ནི། པྲ་སྟི་དགེ་བཤེས་ཀྱི་ཊཱིཀྐར། བརྟུལ་བ་ནི་བསྡུས་པ་སྟེ། ལུས་ངག་གི་འཇུག་པ་གཅིག་ཏུ་ངེས་པར་བྱས་པའོ། །ཞུགས་པ་ནི་དེ་ལྟར་ངེས་པར་བྱས་པ་དེ་ཉིད་ལས་མི་འདའ་བར་ཞུགས་པའོ། །དེའང་ནང་པ་ལ་གྲགས་པ་ནི་ཚུལ་ཁྲིམས་དང། ཕྱི་རོལ་པ་ལ་གྲགས་པ་ནི་བརྟུལ་ཞུགས་ཞེས་པའོ། །ཞེས་གསུངས་པས། སྒྲ་བཤད་དེ་ལྟར་བྱས་ཆོག་ཀྱང། ཚུལ་ཁྲིམས་བརྟུལ་ཞུགས་ཞེས་པ་ཕྱི་ནང་གཉིས་ལ་སོ་སོར་སྦྱར་བ་དཔྱད་དགོས་ཏེ། དཔུང་བཟང་གི་རྒྱུད་ལས། དེ་ཡི་བརྟུལ་ཞུགས་དང་པོར་ངས་བཤད་དོ། །ཞེས་དང། དེ་བཞིན་ཕྱག་བཅས་བཟླས་དང་བརྟུལ་ཞུགས་ཀྱི། །ཞེས་པ་ལྟ་བུ་ཚུལ་ཁྲིམས་ཀྱང་བརྟུལ་ཞུགས་སུ་བསྡུས་ནས་གསུངས་པ་དང། མིག་རྣམ་པར་སྦྱོང་བའི་གཟུངས་ལས། ཚུལ་ཁྲིམས་ཀྱི་བདེན་པ་དང། བརྟུལ་ཞུགས་ཀྱི་བདེན་པ་དང། ཞེས་སོ་

― GTD003_Page_0212 ―

^{[མ་དཔེ་གཟིགས་ན་འདིར་གནོན།]}

[Full Size]

སོར་གསུངས་པ་དང། བླ་མ་ལྔ་བཅུ་པར། བརྟུལ་ཞུགས་ཅན་གྱིས་ཀུན་བྱ་སྟེ། །ཞེས་པ་ལྟ་བུ་ནང་པའི་གཞུང་ལས་བརྟུལ་ཞུགས་ཀྱི་སྒྲས་བསྟན་པ་མཐའ་ཡས་ཤིང། ཕྱི་རོལ་བའི་གཞུང་མཛོད་འགྲེལ་དུ་དྲངས་པ་ལས། གང་དག་སྐྱེས་བུ་གང་ཟག་གང་ཞིག་བ་ལང་གི་ཚུལ་ཁྲིམས་དང། རི་དྭགས་ཀྱི་ཚུལ་ཁྲིམས་དང། བྱ་གག་གི་ཚུལ་ཁྲིམས་ཡང་དག་པར་བླངས་ཏེ་གནས་པ་དེ་ནི། ཞེས་པ་ལྟ་བུ་ཚུལ་ཁྲིམས་ཀྱི་སྒྲས་བཤད་པའང་མང་བས་བརྡ་འདོགས་ཚུལ་ཕྱི་བ་དང་ནང་པའི་ཁྱད་མིན་ནོ། །འོ་ན་ཚུལ་ཁྲིམས་བརྟུལ་ཞུགས་ཞེས་གཉིས་ཀ་སྨོས་པ་ཅི་ཡིན་ཞེ་ན། ཚུལ་ཁྲིམས་ནི་སྒོ་གསུམ་གྱི་ཉེས་སྤྱོད་སྡོམ་པས་སྤྱི་ཡིན་ལ། བརྟུལ་ཞུགས་ནི་དེ་དང་མཐུན་པར་འཇུག་པ་ལུས་ངག་གི་ཀུན་སྤྱོད་ལ་གཙོ་བོར་བྱེད་པས་བྱེ་བྲག་ལྟ་བུ་ཡིན་ཏེ། དཔེར་ན་ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་ཞེས་པའི་ཚུལ་ཁྲིམས་དེ་ལུས་ངག་ཡིད་གསུམ་གའི་སྒོ་ནས་ལྟ་བ་ངན་པའི་རྗེས་སུ་སློབ་པའི་བསམ་སྦྱོར་གཉིས་ཀ་དང། བརྟུལ་ཞུགས་གཙོ་བོར་ལུས་ངག་གི་ཀུན་སྤྱོད་དང་ཆ་ལུགས་སོགས་ལ་བཞག་པ་བཞིན་ཡིན་པའི་ཕྱིར། ཀུན་བཏུས་དར་ཊཱིཀ་ལས། ལྟ་ངན་གྱིས་ཀུན་ནས་བསླང་བའི་ཚུལ་ཁྲིམས་དང། ཐ་མལ་པའི་སྤྱོད་པ་སྤངས་ནས་གཡང་གཞི་འཆང་བ་སོགས་ལུས་ངག་གི་འཇུག་པ་ངེས་པར་བྱེད་པའི་བརྟུལ་ཞུགས། ཞེས་སོ། །དཀའ་ཐུབ་ཅེས་པའི་དཀའ་བ་བྱ་དཀའ་བའི་སྤྱོད་པ་ལ་བྱས་ཏེ། དེར་འཇུག་ཕོད་ཅིང་སྒྲུབ་ནུས་པ་ཐུབ་པའི་དོན་དུ་བཤད་པའང་མི་རུང་བ་མེད་ཀྱང། ཁྱད་པར་འཕགས་བསྟོད་ཀྱི་འགྲེལ་པ་སོགས་སྔོན་གྱི་གཞུང་

― GTD003_Page_0213 ―

^{[མ་དཔེ་གཟིགས་ན་འདིར་གནོན།]}

[Full Size]

མང་པོའི་ཚིག་གི་ནུས་པར་བརྟགས་ན་ཆགས་སྡང་སོགས་ཉོན་མོངས་སྐྱེ་བའི་རྐྱེན་དྲག་པོས་གདུངས་ཏེ་བཟོད་དཀའ་བ་ནི་འདིའི་དཀའ་བའི་དོན་དང། དེའི་དབང་དུ་མི་འཆོར་བས་དྲན་ཤེས་བཞིན་བག་ཡོད་དང་བཟོད་པ་ལ་སོགས་པས་དེ་ཉིད་ཕར་ཟིལ་གྱིས་གནོན་པ་ནི་ཐུབ་པའི་དོན་དུ་བྱས་ན་ལེགས་ཏེ། རྗེ་བླ་མའི་ཉམས་མགུར་དུ། ཉོན་མོངས་གདུང་བའི་དཀའ་ཐུབ་ཀུན་གྱི་ཕུལ། །ཞེས་ལུང་ལས་བཟོད་པ་དཀའ་ཐུབ་ཀྱི་མཆོག་ཏུ་གསུངས་པའི་དོན་དེ་ལྟར་བཀྲལ་ཞིང། སྔོན་ཤཱཀྱའི་གཞོན་ནུ་རིགས་གཟུགས་འབྱོར་པས་ཁེངས་པའི་གདུག་རྩུབ་ཅན་གདུལ་དཀའ་བ་རྣམས་གཞོན་ནུ་དོན་ཐམས་ཅད་གྲུབ་པས་ཟིལ་གྱིས་མནན་པས་ཤཱཀྱ་ཐུབ་པར་བཏགས་པ་བཞིན་ནོ། །དེ་ལྟ་བུའི་དཀའ་ཐུབ་ཀྱི་སྤྱོད་པ་དེའང་དུས་ཉི་ཚེ་བ་ཙམ་མ་ཡིན་པར་བསྐལ་པ་ཆེན་པོ་དུ་མའི་བར་གྱི་ཡུན་ཤིན་ཏུ་རིང་པོར་བསྟེན་པར་བྱས་ཤིང་ཕྱོགས་བཅུའི་རྒྱལ་བ་ཐམས་ཅད་མཆོད་པར་མཛད་དོ། །འདིར་བསྟེན་བྱས་ཤིང་ཞེས་པའི་དོན་པྲ་སྟི་དགེ་བཤེས་ཀྱི་ཊཱིཀྐར། ཤིང་ཞེས་བྱ་བ་ནི་སྡུག་པ་སོགས་དང། ལྷན་ཅིག་པ་དང་ལྷག་བཅས་སོགས་ལ་འཇུག་པ་ལས་འདིར་ནི་ལྷན་ཅིག་པའི་དོན་ཅན་ཏེ། བསྟེན་པར་བྱས་པ་དང་ལྷན་ཅིག་ཏུའམ། བསྟེན་པར་བྱས་བཞིན་དུ་ཞེས་བྱ་བའོ། །ཞེས་དཔེར་ན་འགྲོ་བཞིན་དུ་ཁ་ཏོན་བྱེད་ཅེས་པ་ལྟ་བུ། བྱ་བ་ངོ་བོ་ཐ་དད་པ་གཉིས་ལྷན་ཅིག་ཏུ་བསྒྲུབ་པ་ལ་བཤད་ཅིང། མཆོད་པའང་བསྙེན་བཀུར་སོགས་ལ་གཙོ་བོར་

― GTD003_Page_0214 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་དོ། །འདིའང་ཅུང་ཟད་དཔྱད་དགོས་ཏེ། རྙེད་པ་དང་བཀུར་སྟིས་མཆོད་ཚུལ་ནི། གོང་དུ། བདག་གིས་སངས་རྒྱས་རང་སངས་རྒྱས། །ཉན་ཐོས་ཕ་དང་མ་དང་ནི། །དྲང་སྲོང་དག་ལ་མཆོད་བྱས་པས། །ཞེས་སྦྱིན་པའི་སྐབས་སུ་བཤད་ཟིན་པས་འདིར་སྒྲུབ་པའི་མཆོད་པ་ལ་བྱས་ན་འབྲེལ་གྱི། སྔ་མ་དང་ཁྱད་མེད་ན་ཟློས་སྐྱོན་དུ་འགྱུར་རོ། །སངས་རྒྱས་ལ་མཆོད་ཅེས་སྨོས་ཚད་མཆོད་པའི་ཡོ་བྱད་ཅིག་ཕུལ་བ་ཁོ་ནར་གོ་མི་དགོས་ཏེ། མཆོད་པའི་སྐད་དོད་པཱུ་ཛ་ཞེས་པ་མཉེས་པར་བྱེད་པའི་དོན་ཡིན་པས། རྒྱལ་བ་རྣམས་ཀྱིས་ཇི་ལྟར་གསུངས་པ་བཞིན་དུ་ཚུལ་ཁྲིམས་ཡང་དག་པར་བླངས་ནས་ཉམས་པ་མེད་པར་བསྲུངས་ཏེ་རང་གི་སེམས་རྒྱུད་འདུལ་ཞིང་བྱང་ཆུབ་ཀྱི་སྤྱོད་པ་ལས་ལྷག་པའི་མཆོད་པ་མེད་པའི་ཕྱིར་ཏེ། ཡབ་སྲས་མཇལ་བའི་མདོ་ལས། སྤྱད་པ་སྤྱོད་ཡུལ་གང་མོས་པ། །དེ་དག་སྟོན་པ་མཆོད་པ་སྟེ། །མཆོད་པ་དེ་ནི་བླ་ན་མེད། །ཅེས་དང། བདུད་རྩི་གསང་བའི་རྒྱུད་ལས། མཉེས་པའི་དོན་གྱིས་མཆོད་པ་སྟེ། །སྤོས་སོགས་ཕུལ་བས་མཉེས་པ་མེད། །རང་སེམས་ལས་སུ་རུང་བ་དག །མཉེས་པའི་མཆོད་པ་ཆེན་པོ་འོ། །ཞེས་དང། སེམས་ཅན་མགུ་བར་བྱེད་པའི་བསྟོད་པ་ལས། དེས་ན་སེམས་ཅན་ཕན་པ་བྱས་ན་ང་ལ་མཆོད་པའི་མཆོག །གང་གི་ཡིད་ནི་མགུ་བར་བྱེད་པ་མཆོད་པ་ཡིན་པས་སོ། །ཞེས་སོགས་དང། སྐྱེས་རབས་ལས་ཀྱང། ཕན་པའི་ལན་དུ་མཆོད་པ་བྱ་བ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། །ཞེས་གསུངས་པ་ལྟར་རོ། །དེས་ན་ཚུལ་ཁྲིམས་བསྲུངས་པ་དེ་ཉིད་རྐང་པ་གསུམ་པའི་སྐབས་ཀྱི་མཆོད་པ་ལའང་

― GTD003_Page_0215 ―

^{[མ་དཔེ་གཟིགས་ན་འདིར་གནོན།]}

[Full Size]

བཞག་སྟེ་གཉིས་ཀ་དོན་གཅིག་ཏུ་བྱས་ན་ལེགས་སོ། །གསུམ་པ་ཚུལ་ཁྲིམས་ཀྱི་འཁོར་རམ་གྲོགས་བཟོད་པ་ལ་བསླབ་ཚུལ་ནི། བཟོད་བརྟུལ་རྟག་ཏུ་བསྟེན་བྱས་ཤིང། །སེམས་ཅན་ཉོན་མོངས་སྙིགས་མ་ཡི། །སེམས་ཅན་ངན་བཟོད་བྱས་གྱུར་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཐུབ་པའི་དབང་པོ་ཉིད་སྔོན་དྲང་སྲོང་བཟོད་པར་སྨྲ་བའི་སྐྱེ་བ་བཞེས་པའི་ཚེ་རྒྱལ་པོ་གདུག་པས་ཕྱག་ཞབས་ཐམས་ཅད་རིམ་པ་བཞིན་བཅད་ཀྱང་ཁྲོ་བའི་སེམས་ཅུང་ཟད་ཙམ་ཡང་མ་སྐྱེས་པ་དང། བྲམ་ཟེའི་རིགས་ཤིག་ཏུ་འཁྲུངས་ཏེ་དབེན་པར་གཤེགས་པ་ན་སྔོན་གྱི་ཆུང་མའང་རབ་ཏུ་བྱུང་ནས་རྗེས་སུ་འབྲངས་པ་རྒྱལ་པོ་ཞིག་གིས་ཕྲོགས་ཏེ་བསྙས་ཐབས་དུ་མ་སྨྲས་ཀྱང་ཁྲོ་བའི་སེམས་མ་སྐྱེས་པ་དང། སྤྲེའུ་དང་། བྱ་ཤིང་རྟ་མོ། རི་དྭགས་ཤ་ར་བྷ། རི་དྭགས་རུ་རུ་རྣམས་སུ་གྱུར་པའི་ཚེ་རང་གིས་ཕར་བསྐྱབས་པ་ལ་དྲིན་གཟོ་མེད་པར་གནོད་པ་བྱེད་པ་ལའང་མི་ཁྲོ་ཞིང། ཕར་གནོད་ལན་དུ་ཕན་པ་བསྒྲུབ་པ་དང། ཁྱུ་མཆོག་ཏུ་འཁྲུངས་པའི་ཚེ་སྤྲེའུ་མི་བསྲུན་པས་རྟག་ཏུ་མཐོ་བརྩམས་ཀྱང་ལན་ཡེ་མི་མཛད་པ་སོགས་ཤིན་ཏུ་སྙིགས་མ་བདོ་བའི་དུས་ཀྱི་སེམས་ཅན་སྤྱོད་པ་ངན་པ། ཉོན་མོངས་པའི་གདོན་གྱིས་བརླམས་པ་རྣམས་ཀྱིས་མི་འཚམ་པའི་བྱ་བ་དུ་མས་སྒོ་མཐའ་དག་ནས་ཡང་དང་ཡང་དུ་གཙེས་ཀྱང་བཟོད་པའི་གོ་ཆ་རྟག་ཏུ་བསྟེན་ནས་ཁྲོ་བ་སྐད་ཅིག་ཀྱང་མ་ཤོར་བར། དེ་ཐམས་ཅད་ལ་མ་བུ་གཅིག་པ་ལྟ་བུའི་བྱམས་པའི་ཐུགས་ཀྱིས་དགོངས་པར་མཛད་པ་དེའི་བདེན་པའི་སྟོབས་ཀྱིས་ལུས་

― GTD003_Page_0216 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་ཡོངས་ལ་ཕན་པ་མ་ལུས་པ་འབྱུང་བའི་སྒོ་གཅིག་པུ་བསྟན་པ་རིན་པོ་ཆེ་དར་ཞིང་རྒྱས་པར་སྨོན་པའོ། །དེའང་གཞུང་ལས་བཟོད་པའི་སྔོན་འདིར་བརྩོན་འགྲུས་འབྱུང་བ་ནི་སྤྱོད་འཇུག་ལས། བརྩོན་གང་དགེ་ལ་སྤྲོ་བ་འོ། །ཞེས་པ་ལྟར་བརྩོན་འགྲུས་ཀྱི་ངོ་བོ་དགེ་བ་ལ་སྤྲོ་བ་ཡིན་ཞིང། སྦྱིན་སོགས་གང་ལ་སློབ་ཀྱང་དེ་དང་དེར་སྤྲོ་བ་ཞིག་མེད་མི་རུང་དུ་དགོས་པས། གཅིག་ནི་གསུམ་ཆར་ལ་ཡང་གཏོགས། །ཞེས་པ་ལྟར། བརྩོན་འགྲུས་ནི་དེ་ཐམས་ཅད་ལ་ཁྱབ་བྱེད་ལྟ་བུར་འགྲོ་བ་ལ་དགོངས་ནས་གོ་རིམ་འཆོལ་ཏེ་གསུངས་པ་ཡིན་ལ། སྤྱིར་ཕྱིན་དྲུག་གི་རིམ་པ། སྐྱེ་རིམ་དང། དམན་མཆོག །རགས་ཕྲ་གསུམ་གྱི་སྒོ་ནས་ངེས་ཚུལ་རྒྱན་ལས་འབྱུང་བ་བཞིན། འདིར་ཡང་སྤྱི་བབ་དང་བསྟུན་ནས་བཤད་པ་ཡིན་པས་སྐྱོན་དུ་མི་འགྱུར་ཏེ། དགོས་པ་དེ་འདྲ་ཡོད་ན་ལྟག་འོག་བསྣོར་ནས་འཆད་དུ་རུང་བར་སྤྱན་རས་གཟིགས་བརྟུལ་ཞུགས་སོགས་ཀྱིས་བཤད་དོ། །དེའང་བཟོད་བརྟུལ་ནི་བཟོད་པའི་བརྟུལ་ཞུགས་སམ་གོ་ཆ་ཡིན་ལ། དེའང་གནོད་པ་ལན་རེ་ཙམ་བཟོད་པ་མ་ཡིན་པར་རྟག་ཏུ་བཟོད་པའི་གོ་ཆ་མི་ལྷོད་པས་ན་རྟག་ཏུ་བསྟེན་བྱས་ཞེས་སྨོས་སོ། །སེམས་ཅན་ཉོན་མོངས་སྙིགས་མ་ཡི། །ཞེས་པ་ནི། ཉོན་མོངས་ཤིན་ཏུ་རགས་ཤིང་རྒྱས་པའི་སེམས་ཅན་ནམ། ཉོན་མོངས་པའི་སྙིགས་མ་བདོ་བའི་དུས་ཀྱི་སེམས་ཅན་ཞེས་པ་ཡིན་ལ། ཉོན་མོངས་པའི་དོན་ནི་ཀུན་བཏུས་ལས། ཆོས་གང་འབྱུང་བ་ན་རབ་ཏུ་མ་ཞི་བའི་མཚན་ཉིད་དུ་འབྱུང་སྟེ། དེ་བྱུང་བས་སེམས་ཀྱི་རྒྱུད་རབ་ཏུ་མ་ཞི་བར་འབྱུང་བ་དེ་ཉོན་མོངས་པའི་མཚན་ཉིད་

― GTD003_Page_0217 ―

^{[མ་དཔེ་གཟིགས་ན་འདིར་གནོན།]}

[Full Size]

དོ། །ཞེས་གསུངས་ལ། མ་ཞི་བར་བྱེད་ཚུལ་རྒྱལ་སྲས་མ་ལས། དེའང་རྣམ་པ་དྲུག་སྟེ། འདི་ལྟར་རྣམ་པར་གཡེང་བས་རབ་ཏུ་མ་ཞི་བ་དང། ཕྱིན་ཅི་ལོག་གིས་རབ་ཏུ་མ་ཞི་བ་དང། རྒོད་པས་རབ་ཏུ་མ་ཞི་བ་དང། རྨུགས་པས་རབ་ཏུ་མ་ཞི་བ་དང། བག་མེད་པས་རབ་ཏུ་མ་ཞི་བ་དང། འཛེམ་པ་མེད་པས་རབ་ཏུ་མ་ཞི་བའོ། །ཞེས་ཡང་དག་པའི་ལམ་ལ་འཇུག་ཏུ་མི་སྟེར་ཞིང། ཕྱིན་ཅི་ལོག་གི་ཡུལ་ལ་རང་དབང་མེད་པར་སྦྱོར་བས་ན་སེམས་ལས་སུ་མི་རུང་བར་བྱེད་དོ། །མདོར་ན་སེམས་ཉོན་མོངས་པའི་གཞན་དབང་དུ་སོང་བ་ནི་སྡུག་བསྔལ་གྱི་བདེན་པའི་དོན་ཡིན་ཞིང། ཉོན་མོངས་ཀྱི་རྙོག་པ་དང་བཅས་པ་དེ་ཉིད་མ་ཞི་བའམ་འཁོར་བའི་དོན་ཡང་ཡིན་ལ། སེམས་ཉོན་མོངས་ཀྱི་རྙོག་པ་དང་བྲལ་བ་ནི་ཞི་བའམ་ཐར་པ་དང་འགོག་པའི་བདེན་པའི་དོན་ཡིན་ཏེ། འཁོར་བ་དང་མྱང་འདས་ཞེས་པ་རང་གི་སེམས་འདི་ཉིད་ཉོན་མོངས་དང་བྲལ་མ་བྲལ་ཙམ་ལ་འཇོག་གི། གཞན་སྡེའི་འདོད་པ་བཞིན་རྟག་པ་རང་བྱུང་གི་དབང་ཕྱུག་ལྟ་བུའི་འཁོར་རྩ་དང། ཐར་པ་གཟུགས་ཅན་ལྟ་བུ་ལོགས་ཤིག་ན་མེད་པའི་ཕྱིར། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སེམས་ཅན་མེད་ཅིང་སངས་རྒྱས་མེད། །ཅེས་དང། ས་ར་ཧས། སེམས་བཅིངས་ན་ནི་འཆིང་འགྱུར་ཏེ། །དེ་ཉིད་གྲོལ་ན་ཐེ་ཚོམ་མེད། །ཅེས་གསུངས་སོ། །སྤྱོད་འཇུག་ལས་ཀྱང། གང་གིས་ཆོས་ཀྱི་གཙོ་བོ་མཆོག །སེམས་ཀྱི་གསང་འདི་མ་ཤེས་ན། །བདེ་འཐོབ་སྡུག་བསྔལ་གཞོམ་འདོད་ཀྱང། །

― GTD003_Page_0218 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་དག་དོན་མེད་གྱི་ནར་འཁྱམས། །ཞེས་གསུངས་ཏེ། དེ་དག་གི་དགོངས་པའི་གནད་དྲིལ་བ་ཀུན་བཏུས་དར་ཊཱིཀ་ལས། སེམས་ཀྱི་རྒྱུད་རབ་ཏུ་མ་ཞི་བར་བྱེད་པས་རབ་ཏུ་ཕྱེ་བའོ། །རྒྱུད་ཞི་བ་ནི་འགོག་བདེན་ཡིན་ལ། དེ་བྱེད་པ་ནི་ལམ་བདེན་དང། སེམས་རྒྱུད་རབ་ཏུ་མ་ཞི་བ་ནི་སྡུག་བསྔལ་བདེན་པ་ཡིན་ལ། དེ་བྱེད་པའི་གཙོ་བོ་ནི་ཉོན་མོངས་སོ། །ཞེས་གསུངས་ཏེ་ལེགས་བཤད་བླ་ན་མེད་པར་སྣང་ངོ་། །སྙིགས་མ་ཞེས་པ་སྐབས་ཐོབ་ཀྱི་དབང་གིས་ཆེས་ཉག་ཕྲ་བ་ལ་འཇུག་པ་དང། ཆེས་རགས་ཤིང་ལྷག་པར་བདོ་བ་ལ་འཇུག་ཚུལ་གཉིས་ཡོད་དེ། པད་དཀར་ལས། བསྐལ་པའི་སྙིགས་མ་ལས་བྱུང་ངམ། སེམས་ཅན་གྱི་སྙིགས་མའམ། ཉོན་མོངས་པའི་སྙིགས་མའམ། ལྟ་བའི་སྙིགས་མའམ། ཚེའི་སྙིགས་མ་ཞེས་སྙིགས་མ་ལྔ་བཤད་པས། བསྐལ་བའམ་དུས་ཀྱི་སྙིགས་མ་དང་ཚེའི་སྙིགས་མ་ནི་དཔེར་ན་ཆུ་མིག་སྐམ་པའི་ལྷག་མ་ཅུང་ཟད་ཅིག་ལུས་པ་ལ་སྙིགས་མ་ཟེར་བ་བཞིན། ཟད་པའི་མཐར་ལུས་པ་ལ་བཤད། ཉོན་མོངས་པ་དང་ལྟ་བའི་སྙིགས་མ་ནི། དཔེར་ན་ཚོན་བཏུལ་བའི་ནང་ནས་རྡོ་དང་བྱེ་མ་སོགས་རགས་པ་བསལ་བ་ལ་སྙིགས་མ་ཟེར་བ་བཞིན་དུ་ཤིན་ཏུ་རགས་ཤིང་ལྷག་པར་བདོ་བ་ལ་བྱེད་དོ། །དེ་དག་སོ་སོའི་ཁྱད་པར་ནི་སློབ་དཔོན་མ་ཏི་ཙི་ཏྲའི་རྩོད་པའི་དུས་ཀྱི་གཏམ་ལས། བཅུད་རྣམས་སས་འཐུང་དངོས་རྣམས་སྟོབས་ཆུང་ལྷ་རྣམས་ཆར་ནི་འབེབས་མི་བྱེད། །རླུང་རྣམས་རབ་ཏུ་དྲག་ལྡང་ལོ་ཏོག་རྣམས་ནི་མི་སྨིན་སྐྱེ་མི་འགྱུར། །སྐྱེས་ལ་སེར་འབབ་ས་རྣམས་རྩོད་པའི་དུས་ཀྱིས་དབང་བསྒྱུར་འབྲས་བུ་མེད། །ཅེས་པ་ལྟར་

― GTD003_Page_0219 ―

^{[མ་དཔེ་གཟིགས་ན་འདིར་གནོན།]}

[Full Size]

སྣོད་བཅུད་མཐའ་དག་གི་བཀྲག་མདངས་དང་བཅུད་ཉམས་ཤིང་། ཕྱི་ནང་གི་ཉེར་འཚེ་དུ་མ་རུ་འཛིང་བས་དུས་ཀྱི་སྙིགས་མ་དང། ཡང་དེ་ཉིད་ལས། ཡོན་ཏན་མཁས་ལ་མི་བཀུར་ནོར་ལྡན་རྣམས་ནི་མཆོད་བྱ་མིན་པར་མཆོད། །སྐྱེ་རྨོངས་མཆོད་བྱེད་གཤིན་རྗེའི་འཇིག་རྟེན་སྡུག་བསྔལ་ངེས་འཁྲིད་གང་གིས་བཟློག །ཅེས་པ་ལྟར། སྐྱེ་བོ་རྣམས་རང་བཞིན་གྱིས་དམ་པ་མ་ཡིན་པའི་ཕྱོགས་ལ་དགའ་ཞིང། དམ་པ་རྣམས་ཀྱི་རྗེས་སུ་མི་འཇུག་པར་གདུལ་དཀའ་བ་སེམས་ཅན་སྙིགས་མའི་དོན་དང། ཡང། སྡིག་ལ་དགའ་ཞིང་སྟོབས་ལྡན་གཡོ་ཅན་རྣམས་ཀྱིས་དམ་ཆོས་བསྣུབ་པར་འགྱུར། །ཞེས་སོགས་ལྟར་ཆགས་སྡང་གཡོ་སྒྱུ་ཕྲག་དོག་སོགས་ཉོན་མོངས་པ་ཤིན་ཏུ་རགས་པས་སྡིག་པ་མི་བཟད་པ་ལ་ཚམ་ཚོམ་མེད་པར་འཇུག་པ་ཉོན་མོངས་སྙིགས་མ་དང། ཉོན་མོངས་པའི་ནང་ནས་ཀྱང་བདེ་ལེགས་ཐམས་ཅད་ཀྱི་རྩ་བ་གཅོད་བྱེད་ལས་འབྲས་ལ་སྐུར་བ་འདེབས་པའི་ལྟ་ངན་རྒྱས་པ་ནི་ལྟ་བ་སྙིགས་མའི་དོན་ཡིན་ཏེ། སྤྱིར་རྟག་ཆད་ཀྱི་ལྟ་བ་གཉིས་ཀ་ལྟ་ངན་ཡིན་ཀྱང། རྟག་ལྟས་དགེ་རྩ་མི་གཅོད་པར་མ་ཟད། བཞི་བརྒྱ་པར། དམ་པ་མིན་ལ་བདག་འཛིན་མཆོག། །ཅེས་པ་ལྟར། ལས་འབྲས་ལ་ཡིད་ཆེས་བསྐྱེད་པ་དང། དགེ་བའི་ལས་ཀྱི་རྐྱེན་བྱེད་པའང་སྲིད་ཅིང། ཆད་ལྟ་ནི་མཛོད་ལས། མེད་པར་ལྟ་བས་རྩ་བ་གཅོད། །ཅེས་པ་ལྟར། དགེ་རྩ་གཅོད་བྱེད་ཡིན་པས་ལྟ་བའི་སྙིགས་མའང་གཙོ་བོར་དེ་ལ་འཇོག་དགོས་སོ། །མཁན་པོ་བོ་དྷི་སཏྭའི་ཞལ་ཆེམས་ལའང། སྙིགས་མ་ལྔའི་

― GTD003_Page_0220 ―

^{[མ་དཔེ་གཟིགས་ན་འདིར་གནོན།]}

[Full Size]

ནང་ནས་ལྟ་བའི་སྙིགས་མ་ཞེས་བྱ་བ་སྟོང་ཉིད་ལ་དགའ་བ་ཡོང་བར་མདོ་ལས་གསུངས། ཞེས་པའང། སྟོང་ཉིད་ཅེས་པའི་སྒྲ་ཙམ་ལ་ཞེན་ནས་འཁོར་འདས་བཅིངས་གྲོལ་མཐའ་དག་རི་བོང་གི་རྭ་བཞིན་གཏན་མེད་དུ་འཛིན་ཅིང། ཐ་སྙད་པའི་ཤེས་པ་ཐམས་ཅད་འཁྲུལ་བ་ཡིན་པས་དེའི་ངོར་ཡོད་པས་ཡོད་གོ་མི་ཆོད་པར་སྨྲ་བ་དང། ཁ་ཅིག་ལྟ་བ་བསྒོམ་པའི་ཚེ་ཅི་ཡང་ཡིད་ལ་མི་བྱེད་པར་སྟོང་སང་ཧད་པོ་ཙམ་ལ་འཇོག་ཅིང། དེ་ཉིད་ལྟ་བའི་ཡང་རྩེར་རློམ་པ་སོགས་སྤྱོད་ཕྱོགས་རས་སུ་བོར་ནས་ལྟ་བ་ལྟར་སྣང་རེ་ཙམ་གཙོ་བོར་བྱེད་པ་དང་དེའི་རྗེས་སུ་མོས་པ་མང་དུ་འབྱུང་བ་ནི་ལྟ་བ་སྙིགས་མར་སོང་བའི་དོན་ཡིན་ནོ། །ཚེ་སྙིགས་མ་ནི་ཚེ་ལོ་མར་འགྲིབ་པས་མི་རྣམས་ཚེ་ཚད་ཐུང་ཞིང། ནད་རིམས་གདོན་བགེགས་ལ་སོགས་པ་དུས་མ་ཡིན་པའི་འཆི་རྐྱེན་ཤིན་ཏུ་མང་བས་ཚེ་ཚད་དེར་ཡང་སྡོད་པ་ཉུང་སྟེ། མ་ཏི་ཙི་ཏྲས། འགྲོ་ལ་ནད་འཕེལ་བ་ནི་དེ་དང་དེ་དག་འབྱུང་པོ་རྣམས་ཀྱིས་བཏང། །ཞེས་དང། སྨན་རྣམས་གང་ཡང་ནུས་མེད་དེ་བཞིན་ཁྱད་པར་རྣམས་ནི་རབ་ཏུ་ཉམས། །ཀྱེ་ཧུད་སྡུག་བསྔལ་རྩོད་པའི་དུས་ནི་ཉེར་གནས་བསོད་ནམས་གཉེར་བ་ནགས་སུ་སོང། །ཞེས་པ་ལྟར་རོ། །དེ་ལྟར་རྩོད་ལྡན་སྙིགས་མ་ལྔ་བདོ་བའི་དུས་ཡིན་ཀྱང་། རྩ་བ་ཉོན་མོངས་སྙིགས་མ་ལ་ཐུག་པས། འདིར་དེ་ཉིད་དངོས་སུ་བསྟན་ཏེ་གཞན་བཞི་ཤུགས་ལ་འཕངས་སོ། །སེམས་ཅན་ངན་བཟོད་ཅེས་པ་ནི། ཇི་ལྟར་བྱས་ཀྱང་མགུ་བར་མི་ནུས་པའི་སེམས་ཅན་གདུག་པའི་རང་བཞིན་ཤིན་ཏུ་བྱེད་པ་ངན་པའམ། ཡང་ན་ཕ་རོལ་པོ་ཤིན་ཏུ་དམན་ཞིང་

― GTD003_Page_0221 ―

^{[མ་དཔེ་གཟིགས་ན་འདིར་གནོན།]}

[Full Size]

ཉམ་ཆུང་བས་རང་ལ་གནོད་པ་བསྐྱལ་བ་ན་དཀའ་ཚེགས་མེད་པར་ཕྱིར་བཟློག་ནུས་བཞིན་དུ་དམན་ཆ་བླངས་ནས་ཁུར་བའི་དོན་ཏེ། ཤེས་རབ་སྡོང་བུ་ལས། མཐུ་ཆེན་བཅོས་སུ་མི་རུང་ལ། །བཟོད་པ་བྱར་ཡང་ཅི་ཞིག་ཡོད། །དུལ་བ་ཞི་བའི་སྤྱོད་པ་ལ། །བཟོད་པ་བྱ་ཡང་ཅི་ཞིག་དགོས། །ཞེས་དང། མ་ཧེའི་སྐྱེས་རབས་ལས། མཐུ་ཆེན་བཅོས་སུ་མི་རུང་ལ། །བཟོད་པ་ཅི་ཞིག་བྱར་ཡོད་མོད། །མཐུ་ཆུང་འཁྲུལ་པ་དག་ལ་ནི། །མཐུ་ཡོད་བཞིན་དུ་བཟོད་ན་རུང། །ཞེས་དང་། མཐུ་སྟོབས་ཆུང་བས་བརྙས་ཐབས་བྱས་པ་ལ། །དང་དུ་ལེན་པ་ཡོན་ཏན་རྣམས་ཀྱི་མཆོག །ཅེས་གསུངས་པ་ལྟར་རོ། །གཉིས་པ་བསླབ་པ་གསུམ་གར་ཁྱད་མེད་དུ་གལ་ཆེ་བ་བརྩོན་འགྲུས་ལ་བསླབ་ཚུལ་ནི། བདག་སྔོན་བརྩོན་འགྲུས་དང་ལྡན་པས། །རྟག་ཏུ་བརྟན་ཅིང་ཕ་རོལ་གནོན། །སེམས་ཅན་ཐམས་ཅད་བསྒྲལ་དོན་དུ། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་དགེ་སློང་གྲགས་པའི་འོད་དུ་འཁྲུངས་པའི་ཚེ་སངས་རྒྱས་དོན་ཡོད་གཤེགས་ཀྱི་སྤྱན་སྔར་ཚིགས་སུ་བཅད་པས་བསྟོད་བཞིན་དུ་རང་ལུས་སྒྲོན་མེར་བྱས་ནས་ཕུལ་བ་དང། ཡང་སྐྱེ་བ་གཅིག་གི་ཚེ་དེ་བཞིན་གཤེགས་པ་སྐར་རྒྱལ་མེའི་ཁམས་ལ་སྙོམས་པར་ཞུགས་པ་མཐོང་ནས་ཞག་བདུན་གྱི་བར་ཞབས་ཡ་གཅིག་གིས་འགྲེང་སྟེ། སྐྱེས་བུ་ཁྱུ་མཆོག་ཁྱོད་འདྲ་ཞེས་སོགས་ཀྱིས་བསྟོད་པ་མཛད། གྲུབ་མཐའ་འོག་མ་རྣམས་ཕྱིན་དྲུག་རིམ་ཅན་དུ་རྫོགས་པར་འདོད་པས། མཛོད་ལས། སྐར་རྒྱལ་བསྟོད་པའི་བརྩོན་འགྲུས་

― GTD003_Page_0222 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས། །ཞེས་དེའི་ཚེ་བརྩོན་འགྲུས་ཀྱི་ཕར་ཕྱིན་རྫོགས་པར་བཤད་དོ། །གཞན་ཡང་མདོ་ལས་མ་ཕམ་པ་བདག་ཅག་གི་སྟོན་པ་ལས་བསྐལ་པ་དྲུག་ཅུས་ཐུགས་བསྐྱེད་པ་སྔའང། སྟོན་པ་ཉིད་སློབ་པའི་གནས་སྐབས་སུ་བརྩོན་འགྲུས་ཧ་ཅང་ཤུགས་དྲག་པས་དེའི་སྔོན་དུ་སངས་རྒྱས་པར་གསུངས་པ་དང་། འཇམ་པའི་དབྱངས་ཀྱི་བཀའ་བཞིན་རྗེ་བླ་མས་སྨོན་ལམ་མཛད་པའི་སྐབས་སུའང། རླབས་པོ་ཆེའི་བརྩོན་འགྲུས་ཀྱི་སྒོ་ནས་བྱང་ཆུབ་ཆེན་པོ་བརྙེས་པ་མཉམ་མེད་ཤཱཀྱའི་རྒྱལ་པོ་ཞེས། སློབ་པའི་གནས་སྐབས་སུ་རྒྱལ་སྲས་ཀུན་གྱི་ཁྲོད་ན་བརྩོན་འགྲུས་ཁྱད་དུ་འཕགས་པའི་དཔེར་མཛད་པ་བཞིན་ནོ། །དེ་ལྟར་བྱ་བ་ངན་ཞེན་གྱི་ལེ་ལོ་སོགས་སྤངས་ཏེ་རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་འཇུག་པར་སྤྲོ་བའི་བརྩོན་འགྲུས་དང་ལྡན་ཞིང། སྙིང་སྟོབས་ཤིན་ཏུ་བརྟན་པ་རྡོ་རྗེ་རྒྱལ་མཚན་གྱི་མདོ་ལས་གསུངས་པ་བཞིན་ཕ་རོལ་མི་མཐུན་པའི་ཕྱོགས་ཉོན་མོངས་སོགས་ཟིལ་གྱིས་གནོན་པའི་ང་རྒྱལ་གྱི་གདེང་དང་ལྡན་པས་སྐད་ཅིག་ཙམ་ཡང་སྒྱིད་ལུག་དང་ཞུམ་པ་མེད་པར་བྱ་དཀའ་བའི་སྤྱོད་པ་མཐའ་དག་ལ་སློབ་པར་མཛད་དེ། དེ་ཐམས་ཅད་ཀྱང་རང་དོན་ཡིད་བྱེད་ཀྱིས་མ་བསླད་པར། སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བའི་དོན་འབའ་ཞིག་ཏུ་བྱས་པ་ཡིན་པས། དེའི་བདེན་པའི་སྟོབས་ཀྱིས་ཐར་པའི་གླིང་དུ་བགྲོད་པའི་གྲུ་གཟིངས་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་པའོ། །དེའང་བརྩོན་འགྲུས་ཀྱི་མི་མཐུན་ཕྱོགས་ནི་སྤྱོད་འཇུག་ལས། ལེ་ལོ་ངན་ལ་ཞེན་པ་དང། །སྒྱིད་ལུག་བདག་ཉིད་བརྙས་པ་འོ། །ཞེས་པ་ལྟར་བྱ་བ་ངན་པ་ལ་ཞེན་ནས་ཡང་དག་པའི་སྒྲུབ་པ་ལ་འཇུག་འདོད་མེད་པ་དང།

― GTD003_Page_0223 ―

^{[མ་དཔེ་གཟིགས་ན་འདིར་གནོན།]}

[Full Size]

དེར་འཇུག་འདོད་ཀྱང་བདག་ལྟ་བུས་ག་ལ་ནུས་སྙམ་དུ་བདག་ཉིད་བརྙས་ཤིང་སྒྱིད་ལུག་པ་གཉིས་ཡིན་པས། དང་པོའི་གཉེན་པོར་དགེ་བ་ལ་འབད་དགོས་པའི་རྒྱུ་མཚན་སྒོ་དུ་མ་ནས་བསམས་ཏེ་དེ་ལ་འཇུག་པར་སྤྲོ་བའི་བརྩོན་འགྲུས་བསྐྱེད་དགོས་པར་གསུངས་པ་རྐང་པ་དང་པོའི་དོན་དང་གཅིག་ལ། དེ་བརྩོན་འགྲུས་བསྐྱེད་པའི་ཐབས་སུ་སྟོབས་བཞི་གསུངས་པའི་ནང་ནས་དང་པོ་མོས་པའི་སྟོབས་ཡིན་ནོ། །རྐང་པ་གཉིས་པའི་སྐབས་སུ་ཞུམ་ཞིང་སྒྱིད་ལུག་པའི་གཉེན་པོ་བརྟན་པའི་སྟོབས་ཀྱི་སྒོ་ནས་སྒྲུབ་པ་མཐར་འབྱིན་ཚུལ་གསུངས་པ་ཡིན་ཞིང། སྟོབས་འདིར་ང་རྒྱལ་གྱི་སྟོབས་ཞེས་ཀྱང་བཤད་དེ། ཇི་སྐད་དུ་བྱང་ཆུབ་ལམ་རིམ་ཆེན་མོ་ལས། མོས་པའི་སྟོབས་ཀྱིས་བརྩོན་འགྲུས་མ་སྐྱེས་པ་བསྐྱེད་ཅིང། སྐྱེས་ཟིན་མི་ལྡོག་པའི་རྒྱུར་བརྟན་པའི་སྟོབས་སམ་ང་རྒྱལ་གྱི་སྟོབས་བསྒྲུབ་ནས་ཞེས་དང། བརྟན་པའི་སྟོབས་ནི་གང་ལ་བརྩོན་འགྲུས་བརྩམས་པ་དེ་ལས་མི་ལྡོག་པར་མཐར་འབྱིན་པའོ། །ཞེས་དང་། དམ་བཅའ་མཐར་ཕྱིན་པར་འདོད་པས་ང་རྒྱལ་གསུམ་བསྒོམ་པར་བྱ་སྟེ། ཞེས་གསུངས་སོ། །འདིར་ཕ་རོལ་གནོན་ཞེས་གསུངས་པ་དང། སྤྱོད་འཇུག་དང་ལམ་རིམ་གྱི་ང་རྒྱལ་བསྒོམ་པར་གསུངས་པ་དོན་གཅིག་སྟེ། ང་རྒྱལ་ནི་ཕ་རོལ་ཟིལ་གྱིས་གནོན་པ་ཁེངས་པའི་རྣམ་པར་འཇུག་ལ། འདིར་ཡང་སྤྱོད་པ་བྱ་དཀའ་བ་ཅི་འདྲ་ཞིག་ཡིན་ཀྱང་བདག་གིས་ཅིའི་ཕྱིར་མི་ནུས་སྙམ་པ་དང། སེམས་ཅན་གཞན་གྱིས་མ་ནུས་ཀྱང་བདག་གིས་ངེས་པར་ནུས་སྙམ་པ་དང་། ཉོན་མོངས་སོགས་མི་མཐུན་པའི་ཕྱོགས་མཐའ་

― GTD003_Page_0224 ―

^{[མ་དཔེ་གཟིགས་ན་འདིར་གནོན།]}

[Full Size]

དག་ཀྱང་བདག་གིས་ཅིའི་ཕྱིར་དྲུངས་ནས་འབྱིན་མི་ནུས་སྙམ་དུ་རང་གིས་རང་ཉིད་གཟེངས་བསྟོད་ནས་དཔའ་བསྐྱེད་པ་སྐབས་འདིའི་ཕ་རོལ་གནོན་ཚུལ་དང་ང་རྒྱལ་སྒོམ་ཚུལ་ཡིན་པའི་ཕྱིར་ཏེ། སྤྱོད་འཇུག་ལས། རྡོ་རྗེ་རྒྱལ་མཚན་ཆོ་ག་ཡིས། །བརྩམས་ནས་ང་རྒྱལ་བསྒོམ་པར་བྱ། །ལས་དང་ཉོན་མོངས་ནུས་པ་སྟེ། །གསུམ་པོ་དག་ལ་ང་རྒྱལ་བྱ། །ཞེས་དང། བདག་གིས་ཀུན་ལས་རྒྱལ་བྱ་སྟེ། །བདག་ལས་སུ་ཡང་རྒྱལ་མི་བྱ། །རྒྱལ་བ་སེང་གེའི་སྲས་བདག་གི །ང་རྒྱལ་འདི་ལ་གནས་པར་བྱ། །ཞེས་དང། ལམ་རིམ་ལས། གཞན་ལ་རེ་བ་བཀག་ནས་རང་གཅིག་པུས་བྱེད་པར་གོ་བགོ །དེའང་གཞན་གྱིས་རང་ལྟར་བྱ་བར་མི་ནུས་ཀྱི། རང་གིས་ནུས་སོ་སྙམ་དུ་གདེང་འཆའ། དེ་ལྟར་མཐོང་ནས་སྒྲུབ་པའི་ཚེའང་ཉོན་མོངས་ཕར་ལ་གཞོམ་གྱི། དེས་ཚུར་ལ་ནམ་ཡང་འཇོམས་མི་ནུས་པར་བྱེད་པའི་བློའི་བརྟན་པ་བསྐྱེད། ཅེས་སོ། །དེ་ལྟར་རྩ་བའི་ཚིག་གི་བརྟན་པ་ཞེས་པས་ལས་དང་ནུས་པའི་ང་རྒྱལ་གཉིས་བསྟན། ཕ་རོལ་གནོན་ཞེས་པས་ཉོན་མོངས་ལས་ང་རྒྱལ་བ་བསྟན་པ་ཡིན་ནོ། །སྤྱིར་བརྩོན་འགྲུས་བསྐྱེད་ཚུལ་ལ་སྟོབས་བཞི་གསུངས་ཀྱང། འདིར་མོས་པ་དང་བརྟན་པའི་སྟོབས་གཉིས་སུ་བསྡུས་ནས་གསུངས་པ་ཡིན་ཏེ། མངོན་རྟོགས་རྒྱན་ལས། མ་ཞེན་ཡོངས་སུ་མི་ངལ་དང། །ཞེས་སྒྲུབ་པ་མི་ཉམས་པ་དང་འཕེལ་བའི་རྒྱུ་གཉིས་སུ་བསྡུས་ནས་གསུངས་པ་བཞིན་ནོ། །པྲ་སྟི་དགེ་བཤེས་ཀྱི་ཊཱིཀྐར། སེམས་ཅན་ཐམས་ཅད་བསྒྲལ་བྱས་པས། །ཞེས་འགྱུར་བཅོས་ནས་གསུང་སྣང་ཡང། གོང་དུ་། སེམས་ཅན་ཕོངས་པ་བསྐྱབ་པའི་ཕྱིར། །ཞེས་པ་དང་འདྲ་བར་ཀུན་སློང་གི་ཁྱད་པར་ལ་

― GTD003_Page_0225 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱར་ཏེ། བསྒྲལ་དོན་ཞེས་པ་རང་སོར་བཞག་ན་ལེགས་སམ་སྙམ་མོ། །གསུམ་པ་ཏིང་ངེ་འཛིན་གྱི་བསླབ་པའི་ངོ་བོ་བསམ་གཏན་ལ་བསླབ་ཚུལ་ནི། བསམ་གཏན་རྣམ་ཐར་གཟུགས་མེད་དང། །ཏིང་འཛིན་གངྒཱའི་བྱེ་སྙེད་པ། །བསྒོམས་པས་དེ་མཐུས་བདག་གི་ནི། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སྔོན་གྱི་གླིང་བཞི་ལ་དབང་བའི་རྒྱལ་པོ་བརྟན་པས་བྱིན་ཞེས་བྱ་བར་འཁྲུངས་པའི་ཚེ། དེ་བཞིན་གཤེགས་པ་གཟི་བརྗིད་ཚོགས་ཀྱི་རྒྱལ་པོའི་སྤྱན་སྔར་ཏིང་ངེ་འཛིན་རྒྱལ་པོའི་མདོ་ཐོས་ནས་རྒྱལ་སྲིད་ཀྱི་འབྱོར་པ་རླབས་པོ་ཆེ་སྤངས་ཏེ་རབ་ཏུ་བྱུང་ནས་དབེན་པར་བསམ་གཏན་བསྒྲུབས་པ་དང། སྟོབས་ཀྱི་འཁོར་ལོས་བསྒྱུར་བ་སྒྲོན་མ་སྣང་བྱེད་དང། རྒྱལ་པོ་འཇིག་རྟེན་སྣ་ཚོགས་ལ་མངོན་པར་དགའ་བ་སོགས་སུ་གྱུར་པའི་ཚེའང་རྒྱལ་སྲིད་སྤངས་ཏེ་དཀའ་ཐུབ་ཀྱི་ནགས་སུ་བསམ་གཏན་དང་ཚད་མེད་བཞི་རྣམས་བསྒོམས་པ་དང། རྒྱལ་པོ་ཀུན་ཏུ་གོ་བྱེད་དུ་གྱུར་པའི་ཚེ་ཁྱིམ་ལ་གནས་བཞིན་དུའང་འདོད་པ་ལ་འདུན་པ་སོགས་སྤངས་ཏེ། བུད་མེད་བརྒྱད་ཁྲིའང་བསམ་གཏན་དང་ཚད་མེད་ལ་བཀོད་པ་དང། བྲམ་ཟེ་གནག་ལྷས་སྐྱེས་ཀྱིས་རྒྱལ་པོ་རྒྱལ་ཕྲན་འབངས་ལ་སོགས་པ་ཐམས་ཅད་རིམ་གྱིས་བསྡུས་ཏེ་རབ་ཏུ་བྱུང་ནས་ཏིང་ངེ་འཛིན་བསྒོམ་པ་ལ་སྦྱར་བ་སོགས་མཐའ་ཡས་སོ། །དེ་ལྟར་གཟུགས་ཀྱི་ཁམས་ཀྱི་བསམ་གཏན་བཞི་དང་རྣམ་པར་ཐར་པ་བརྒྱད། གཟུགས་མེད་པའི་སྙོམས་པར་འཇུག་པ་བཞི་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་ཏིང་ངེ་འཛིན་གངྒཱའི་ཀླུང་གི་བྱེ་མའི་རྡུལ་གྲངས་དང་མཉམ་པ་བརྗོད་

― GTD003_Page_0226 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་མི་ལང་བ་རང་གིས་ཉམས་སུ་བླངས་ནས་གོམས་པར་བྱས་ཤིང། གཞན་དག་ཀྱང་ཚུལ་དེ་ལ་འགོད་པར་མཛད་པ་དེའི་བདེན་པའི་སྟོབས་ཀྱིས་ཁམས་གསུམ་གྱི་ཉོན་མོངས་མངོན་གྱུར་དང་ས་བོན་ཅི་རིགས་པར་སྤོང་བའི་གཉེན་པོ་ལྷག་པའི་ཏིང་ངེ་འཛིན་དང། དེ་བརྗོད་བྱར་བྱེད་པ་མདོ་སྡེའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་འཕེལ་ཞིང་རྒྱས་པར་སྨོན་པའོ། །དེའང་བསམ་གཏན་གྱི་སྒྲ་དོན། བོད་སྔ་མ་ཁ་ཅིག་བསམ་པ་བརྟན་པར་བྱེད་པས་བསམ་གཏན་ཞེས་ཟེར་བ་ནི། ཡི་གེའི་དོན་ལའང་མ་ཞུགས་པར་རྗེ་བདག་ཉིད་ཆེན་པོས་གསུངས་པ་བཞིན་རྟོགས་སླ་ལ། རིན་ཆེན་དོན་གྲུབ་ཀྱི་ཊཱིཀྐར་བསམ་པ་ནི་དམིགས་པ་ཡིད་ལ་བྱེད་ཅིང་གཏོད་པའི་སེམས་དང། གཏན་ཞེས་པ་རྒྱུན་ལ་འཇུག་པས། སེམས་དམིགས་པ་ལ་གཏད་པའི་རྒྱུན་དེ་ཉིད་ལས་མི་གཡེལ་བའོ། །ཞེས་འབྱུང་བའང་དཔྱད་པར་བྱ་བའི་གནས་ཏེ། འདིའི་སྐད་དོད་དྷྱཱ་ན་ཞེས་པ་ངེས་ཚིག་དང་བྱིངས་སྒྲུབ་ཀྱི་བཤད་ཚུལ་གཉིས་ཡོད་པས། སྔ་མ་ལྟར་ན། དྷ་ལ་ར་བསྣན་པས་དྷཱ་ར་འཛིན་པ་དང། ན་ལ་མ་གོང་དུ་བསྣན་པས་མཱ་ན་ཡིད་ལ་འཇུག་པས། ཡིད་འཛིན་པས་ན་བསམ་གཏན་ཞེས་བཤད་དགོས་ཏེ། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། བསམ་གཏན་གྱི་སྒྲ་རྒྱ་གར་སྐད་དུ་དྷྱཱ་ན་ཞེས་འབྱུང་སྟེ། དྷ་ལ་ཡ་བཏགས་ཡོད་པ་རའི་དོན་དུ་དྲངས་ན་འཛིན་པའི་དོན་དུ་འགྲོ་སྟེ། སེམས་ཕྱི་རོལ་ཏུ་གཡེང་བ་ནང་དུ་འཛིན་པར་བྱེད་པས་ན་བསམ་གཏན་ཞེས་བྱའོ། །ཞེས་རྒྱན་རྩ་འགྲེལ་གྱི་སྐབས་སུ་ངེས་ཚིག་གི་བཤད་པ་གཙོ་བོར་མཛད་དོ། །བྱིངས་སྒྲུབ་ཀྱི་དབང་དུ་མཛད་ན་བྱིངས་མདོར། དྷྱཻ་སེམས་པ་

― GTD003_Page_0227 ―

^{[མ་དཔེ་གཟིགས་ན་འདིར་གནོན།]}

[Full Size]

ལའོ་ཞེས་པ་ལྟར། སེམས་པའི་བྱིངས་ལས་སྒྲུབ་པའི་ཚེ། འདིས་སེམས་པར་བྱེད་པའམ་དྲན་པ་གཏོད་པས་ན་བསམ་གཏན་ཞེས་བཤད་དགོས་ཏེ། ཉན་ས་ལས། དམིགས་པ་ལ་ཡང་དག་པར་གཏོད་པ་དང། དྲན་པ་རྩེ་གཅིག་ཏུ་གཏོད་པའི་ཕྱིར་བསམ་གཏན་ཞེས་བྱའོ། །ཞེས་དང། མཛོད་འགྲེལ་ལས། བསམ་གཏན་ཞེས་བྱ་བའི་དོན་ཅི་ཞེ་ན། འདིས་སེམས་པར་བྱེད་པས་ན་བསམ་གཏན་ཏེ། ཞེས་སྐུ་མཆེད་གཉིས་ཀས་གཙོ་བོར་བྱིངས་སྒྲུབ་ཀྱི་དབང་དུ་བྱས་ནས་གསུངས་སོ། །དེས་ན་བསམ་གཏན་ཞེས་པ་རྒྱུན་ལ་བྱས་ནས་བསམ་པ་རྒྱུན་ཆགས་པ་ཞེས་བཤད་པ་ནི་བཤད་ཚུལ་གང་དང་ཡང་མི་འབྲེལ་བས། གཏན་པའམ་གཞི་ལ་བྱས་ན་ལེགས་སམ་སྙམ་སྟེ། འདུལ་བའི་མདོར་གོས་ཕྱི་རོལ་ཏུ་མི་ལྟུང་བར་གང་དུ་བཞག་ནས་དྲས་ཤིང་དྲུབ་པའི་གཞི་ལ་དེའི་གཏན་པ་དང། སྒོ་གླེགས་ཀྱི་འཁོར་ཤིང་འཛིན་བྱེད་ལ་འཁོར་གཏན་ཞེས་བཏགས་པ་ལྟར། བསམ་པའམ་ཡིད་ཕྱི་རོལ་ཏུ་མི་གཡེང་བར་ནང་དུ་འཛིན་པར་བྱེད་པ་ལ་བྱས་ན་ངེས་ཚིག་གི་བཤད་ཚུལ་དང་འགྲིག་གོ །རྣམ་ཐར་ནི། སྤྲུལ་པའི་ལམ་གཟུགས་ཅན་གཟུགས་ལ་ལྟ་བ། གཟུགས་མེད་གཟུགས་ལ་ལྟ་བ། གཟུགས་སྡུག་པའི་རྣམ་ཐར་ཏེ་གསུམ། མཐོང་ཆོས་བདེ་གནས་ཀྱི་ལམ་གཟུགས་མེད་བཞིའི་རྣམ་ཐར་བཞི། འགོག་པའི་རྣམ་ཐར་ཏེ་བརྒྱད་དོ། །འདི་དག་ལ་རྣམ་ཐར་ཞེས་པ་ནི་རྣམ་ཐར་སྒོ་གསུམ་གྱི་སྒྲ་དོན་དང་མི་མཚུངས་ཏེ། གསེར་འཕྲེང་ལས། རང་སའི་ཀུན་དཀྲིས་ལས་ཐར་ཞིང་དེ་དང་མི་འདྲེས་པའི་ཆ་ནས་རྣམ་ཐར་དུ་

― GTD003_Page_0228 ―

^{[མ་དཔེ་གཟིགས་ན་འདིར་གནོན།]}

[Full Size]

འཇོག་གོ །ཞེས་པ་ལྟར། རང་སའི་ཀུན་དཀྲིས་ཀྱི་བསླད་པས་མ་གོས་པ་ཙམ་ལ་བྱེད་དོ། །གཟུགས་མེད་ནི། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད། སྲིད་རྩེའི་སྙོམས་འཇུག་རྣམས་སོ། །ཏིང་ངེ་འཛིན་ནི་མངོན་པ་གོང་འོག་གཉིས་ཀར་སེམས་རྩེ་གཅིག་པ་ཞེས་མཐུན་པར་གསུངས་ཀྱང། ཀུན་བཏུས་ལས། ཤེས་པའི་རྟེན་བྱེད་པའི་ལས་ཅན་ནོ། །ཞེས་ཡང་དག་པའི་ཤེས་རབ་འདྲེན་བྱེད་དགེ་སེམས་ཁོ་ནའི་འཁོར་དུ་འབྱུང་བས་ཡུལ་ངེས་སུ་གསུངས་ལ། མཛོད་ལས་དགེ་མི་དགེའི་སེམས་ཐམས་ཅད་ཀྱི་འཁོར་དུ་འཇུག་པས་སེམས་ཀྱི་ས་མང་དུ་གསུང་སོ། །འདིའི་སྒྲ་དོན་ནི། ས་མཱ་དྷིཿ ཞེས་པ་ཡང་དག་པར་འཛིན་པའི་དོན་ཡིན་ལ། བྲ་སྟི་དགེ་བཤེས་ཀྱི་ཊཱིཀྐར། ཏིང་ངེ་འཛིན་ནི་དམིགས་པ་གཅིག་སེམས་སྦྲེངས་ཆགས་སུ་ཚུག་གེ་འཛིན་པ་སྟེ། ཏིང་ངེ་ཞེས་བྱ་བ་ནི་དམིགས་པ་ལ་སེམས་གནས་ཚུལ་གཏན་ཆགས་པའི་ཉམས་ཀྱི་མིང་ཡིན། ཏིང་ངེ་། སྦྲེང་ངེ་། ཚུག་གེ་ཞེས་བྱ་བ་རྣམས་རྣམ་གྲངས་ཡིན་ཞིང། དོན་དུ་དམིགས་པ་དེ་གར་སྡོད་པའི་ངང་དུ་སྟར་ཆགས་པ་དང། རྒྱུན་ཆགས་པ་དང། བར་མ་ཆད་པ་ཞེས་བྱ་བ་ཡིན་ནོ། །ཞེས་གསུངས་སོ། །གངྒཱ་ནི་རིག་བྱེད་ཀྱི་གཞུང་ལས་སྐལ་ལྡན་ཤིང་རྟས་ཚངས་པ་དཀའ་ཐུབ་ཀྱིས་མཉེས་པར་བྱས་ཏེ་དེའི་རལ་པ་ནས་ཕབ་པར་གྲགས་ཀྱང། དངོས་པོ་ལ་མཚོ་མ་དྲོས་པ་ནས་བབས་པ་སྟེ། དེའང་རྗེ་བཙུན་མི་ལས་གངས་ཏེ་སེ་རི་བོ་གངས་ཅན་དང་། མཚོ་མ་ཕམ་མ་དྲོས་པ་ཡིན་པར་གསུངས་ཤིང། བཅོམ་རལ་སོགས་ཀྱིས་ཀྱང་དེ་བཞིན་དུ་བཤད་པ་ལྟར་ན། ཡར་ཆབ་གཙང་པོའི་རྒྱུན་ལ་གངྒཱར་

― GTD003_Page_0229 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་དགོས་ཤིང། ས་པཎ་སོགས་ཀྱིས་དེར་མདོ་ལས་གསུངས་པའི་ཁྱད་པར་རྣམས་མ་ཚང་བ་དང། གངས་ཅན་དང་ཏེ་སེ་ལ་སྐད་དོད་ཀྱང་སོ་སོར་འབྱུང་བས་མི་འཐད་ཅེས་དགག་པ་མཛད་པ་གཅིག་ཏུ་ཁ་ཚོན་གཅོད་དཀའ་འང། ཏེ་སེ་ལས་གཞན་སྤོས་ངད་ལྡང་དང་རྒྱ་མཚོའི་འགྲམ་ཚུན་ཆད་དུ་རི་བོ་གངས་ཅན་གྱི་མཚན་གཞི་ཞིག་སྟོན་རྒྱུ་དཀའ་བར་སྣང་ངོ་། །དེའི་བྱེ་མ་སྙེད་གསུངས་པ་ནི་མཐའ་ཡས་པའི་དོན་ཏེ། བྱང་ཆུབ་སེམས་དཔའི་ཏིང་ངེ་འཛིན་སྤྱི་ཙམ་དུ་མ་ཟད། བསམ་གཟུགས་བརྒྱད་ཀྱི་ནང་ནས་རེ་རེ་ལ་བརྟེན་པའི་ཏིང་ངེ་འཛིན་གྱི་སྒོའང་མཐའ་ཡས་པས། ཉན་རང་སོགས་ཀྱི་བློ་ཡུལ་ལས་འདས་པའི་ཕྱིར། ཀུན་བཏུས་ལས། བསམ་གཏན་དང་པོས་བསྡུས་པའི་ཏིང་ངེ་འཛིན་ཇི་སྙེད་པ་སངས་རྒྱས་དང་བྱང་ཆུབ་སེམས་དཔའ་རྣམས་སྙོམས་པར་འཇུག་པ་དེ་དག་གི་མིང་ཡང་ཉན་ཐོས་དང་རང་སངས་རྒྱས་རྣམས་ཀྱིས་མི་ཤེས་སོ། །བསམ་གཏན་དང་པོས་བསྡུས་པ་ཇི་ལྟ་བར་བསམ་གཏན་ལྷག་མ་རྣམས་དང། ཞེས་པ་ནས་དེ་ནི་བསམ་གཏན་གྱི་ཕ་རོལ་ཏུ་ཕྱིན་པ་ལ་བརྟེན་ནས་སོ། །ཞེས་གསུངས་པའི་ཕྱིར། དེའི་རྒྱུ་མཚན་ཕར་ཕྱིན་ཐེག་པའི་ལུགས་ཀྱི་གཟུགས་སྐུ་སྒྲུབ་པ་ལ་སེམས་ཅན་གྱི་ཁམས་མཐའ་ཡས་པ་བཞིན་དུ་དེའི་དོན་སྒྲུབ་པའི་གཟུགས་སྐུའི་བཀོད་པའང་མཐའ་ཡས་པ་ཞིག་དགོས་ལ། དེ་དང་རྣམ་པ་མཐུན་པར་རྒྱུ་བསོད་ནམས་ཀྱི་ཚོགས་དང་ཏིང་ངེ་འཛིན་གྱི་སྒོའང་མཐའ་ཡས་པ་ཞིག་དགོས་པས། དེ་ལ་རྒྱ་ཆེ་བའི་ལམ་ཞེས་བཤད་ཅིང། སྐུའི་ཡོན་ཏན་བརྗོད་པ་ནའང། ཕུན་ཚོགས་དགེ་ལེགས་བྱེ་བས་བསྐྲུན་

― GTD003_Page_0230 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཞེས་མང་ཚིག་སྨོས་པ་ཡིན་ནོ། །རྡོ་རྗེ་ཐེག་པའི་སྐབས་སུ་ཁ་སྦྱོར་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །ཅེས་པ་ལྟར་ཏིང་ངེ་འཛིན་གྱི་སྒོ་དེ་སྙེད་སོ་སོར་བསྒོམ་པ་ལ་མ་ལྟོས་པའི་ཐབས་མཁས་ཀྱི་སྒྲུབ་ཚུལ་ཞིག་ཡོད་པར་སྣང་ཡང་སྐབས་མ་ཡིན་པས་མ་སྤྲོས། གོམས་པ་ཞེས་པ་དང་བསྒོམ་ཞེས་པ་ཁྱད་པར་མེད་དེ། འགྲེལ་བཤད་ཚིག་གསལ་ལས། སྒོམ་པར་བྱེད་པ་ཞེས་བྱ་བ་ནི་ཡིད་དེའི་སྐལ་བ་ཅན་དུ་བྱེད་པའམ། དེའི་ངོ་བོ་བྱེད་པའོ། །ཞེས་ཡིད་ལ་འདྲིས་པར་བྱེད་པའི་དོན་ཡིན་པས། ལོ་ཙཱ་བ་རྣམས་ཀྱིས་རེས་འགའ་བསྒོམ་པའི་ལམ་ཞེས་བསྒྱུར་ཅིང། མཐོང་དང་གོམས་པའི་ལམ་དག་ལ། །ཞེས་པ་ལྟ་བུ་སྐབས་ལ་ལར་གོམས་པའི་ལམ་དུའང་བསྒྱུར་རོ། །བཞི་པ་ཤེས་རབ་ཀྱི་བསླབ་པའི་ངོ་བོ་ཤེས་རབ་ཀྱི་ཕར་ཕྱིན་ལ་བསླབ་ཚུལ་ནི། ཡེ་ཤེས་དོན་དུ་བདག་གིས་སྔོན། །དཀའ་ཐུབ་ནགས་དག་བསྟེན་བྱས་ཤིང། །བསྟན་བཅོས་དུ་མ་ཉེར་བསྟེན་པས། །བདག་གི་བསྟན་པ་འབར་གྱུར་ཅིག །ཅེས་བྱུང་། དེའང་བྲམ་ཟེ་ཤེས་རབ་སྣ་ཚོགས་སུ་གྱུར་པའི་ཚེ་ཇི་ལྟ་ཇི་སྙེད་ཀྱི་གནས་ལ་བློ་གྲོས་ཐོགས་པ་མེད་པས་འཇིག་རྟེན་གྱི་བཟོའི་བསྟན་བཅོས་ཚུན་ཆད་ནས། མཐའ་བྲལ་གྱི་ལྟ་བའི་བར་རང་གི་ཐུགས་སུ་ཆུད་ཅིང་གཞན་ལ་འདོམས་པས་རྗེས་སུ་བཟུང་བ་དང། དགེ་སློང་སྡེ་སྦྱིན་གྱིས་ཤེས་རབ་ཕུན་སུམ་ཚོགས་པའི་དོན་དུ་རང་གི་ལག་པ་སྒྲོན་མེར་སྦར་ནས་སངས་རྒྱས་ལ་ཕུལ་བས་ཆོས་ཀྱི་རང་བཞིན་མཉམ་པ་ཉིད་ཀྱི་ཏིང་ངེ་འཛིན་ཐུགས་ལ་འཁྲུངས་པ་དང། དྲང་སྲོང་ཕྱི་མའི་མཐའ་སྒྲུབ་པ་ལ་མཁས་པས་རྟེན་འབྱུང་གི་དེ་ཁོ་ན་ཉིད་རྟོགས་ཏེ་སོ་

― GTD003_Page_0231 ―

^{[མ་དཔེ་གཟིགས་ན་འདིར་གནོན།]}

[Full Size]

སོའི་སྐལ་བ་བཞིན་དུ་བསྟན་པས། སེམས་ཅན་དཔག་ཏུ་མེད་པ་མི་སྐྱེ་བའི་ཆོས་ལ་བཟོད་པ་ཐོབ་པ་དང། གཞོན་ནུ་ཞི་བའི་བློ་གྲོས་ཀྱིས་དེ་བཞིན་གཤེགས་པ་ཁྲིད་མཛད་ལ་སྟོང་པ་ཉིད་ཀྱི་དོན་ལས་བརྩམས་ཏེ་དྲི་བ་མང་དུ་ཞུས་ནས་གཏན་ལ་ཕབ་པས་སྲོག་ཆགས་བྱེ་བ་ཕྲག་དྲུག་གིས་ཆོས་ཉིད་ཟབ་མོ་ཁོང་དུ་ཆུད་པ་སོགས་ཡང་དག་པའི་ཤེས་རབ་ལ་བསླབ་ཚུལ་གྱི་སྐྱེས་པའི་རབས་ཀྱང་རྣམ་གྲངས་ཤིན་ཏུ་མང་ངོ་། །དེ་ལྟར་ཡང་དག་པའི་ལྟ་བ་ཚོལ་བའི་རྒྱུའང། ལྟ་བ་ལ་ཤེས་འདོད་ཡོད་པ་ཙམ་གྱིས་མོས་མནོའི་ཨུ་ཚུགས་དང། རྟོག་གེའི་རིགས་པས་དཔྱད་པ་ཁོ་ནས་རྟོགས་མི་ནུས་པས། དེའི་རྒྱུ་ཚོགས་ཚང་བར་བསྒྲུབས་པ་སྔོན་དུ་གཏོང་དགོས། ཚོགས་ཀྱི་དབྱེ་བ་མང་དུ་གསུངས་ཀྱང་མདོར་བསྡུ་ན། ལྷན་ཅིག་བྱེད་རྐྱེན་དཀའ་ཐུབ་ཀྱི་ནགས་སུ་འདོད་ཆུང་ཆོག་ཤེས་བག་ཡོད་པའི་བརྟུལ་ཞུགས་ལ་གནས་ཏེ་ཚོགས་གསོག་སྒྲིབ་སྦྱོང་ལ་འབད་པ་དང། ཉེར་ལེན་གྱི་རྒྱུ་ཟབ་མོའི་ལྟ་བ་སྟོན་པའི་གསུང་རབ་དགོངས་འགྲེལ་དང་བཅས་པ་སོགས་ཡང་དག་པའི་བསྟན་བཅོས་དུ་མ་ལ་ཐོས་བསམ་ཚུལ་བཞིན་དུ་བྱེད་པ་གཉིས་ཡ་མ་བྲལ་བ་དགོས་པས། ཐུབ་པའི་དབང་པོ་ཉིད་ཀྱིས་རྒྱུ་ཚོགས་མ་ཚང་བ་མེད་པ་དེ་ལྟ་བུའི་སྒོ་ནས་རྟག་ཆད་སྤྲོས་པའི་མཐའ་དང་བྲལ་བ་ཟབ་མོ་དབུ་མའི་ལྟ་བ་བཙལ་ཏེ་གོམས་པ་མཐར་ཕྱིན་པར་མཛད་པ་དེའི་བདེན་པའི་སྟོབས་ཀྱིས་ལྷག་པ་ཤེས་རབ་ཀྱི་བསླབ་པ་དང། དེ་བརྗོད་བྱར་བྱེད་པ་མངོན་པའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་དར་ཞིང་རྒྱས་པར་སྨོན་པའོ། །དེའང་ཡེ་

― GTD003_Page_0232 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ཀྱི་སྒྲ་དོན་ནི། བྲ་སྟི་དགེ་བཤེས་ཀྱི་ཊཱིཀྐར། ཡེ་ནི་ཐོག་མ་དང་གཞི་དང་ཇི་ལྟ་བའི་དོན་ལ་འཇུག་གོ །ཤེས་ནི་ཡེ་ནས་ཤེས་པ་སྟེ་ཞེས་གསུངས་ལ། བོད་སྔ་མ་མང་པོས་ཀྱང་དེ་ལྟར་ཐོག་མའམ་གདོད་མའི་ཤེས་པ་ལ་ཡེ་ཤེས་སུ་བཤད་པས། སྡོམ་གསུམ་རབ་དབྱེར། ཡེ་ཤེས་ཀྱི་ནི་བཤད་པ་ལ། །གདོད་མའི་ཤེས་པར་འཆད་པ་དང། །ཞེས་ཚིག་ལ་འཁྲུལ་བའི་གྲངས་སུ་གསུངས་ནས་དགག་པ་མཛད་དོ། །རྒྱ་སྐད་དུ་ཛྙཱ་ན་ཞེས་པའི་ཛྙཱ་རྟོག་པ་དང། ན་དགག་སྒྲར་བྱས་ཏེ་རྟོག་བྲལ་གྱི་རིག་པར་སྒྲོན་གསལ་ལས་གསུངས་ལ། ལག་སྨིས་ཛྙཱ་རྟོག་པ་དང་ན་དགག་སྒྲར་བྱས་ཀྱང་འགོག་ཚུལ་དེ་དང་མི་འདྲ་བར། སེམས་ཙམ་པས་འདོད་པའི་ཡེ་ཤེས་རང་རིག་པ་དེ་འདྲ་མེད་པའི་དོན་དུ་བཤད་པར་རྗེས་རིམ་པ་གཉིས་པའི་ཟིན་བྲིས་སུ་གསུངས། དེ་ལྟར་བྱས་ཀྱང་ཡེ་དང་ཤེས་ལ་སོ་སོར་སྦྱར་བ་མི་འཐོབ་པས། ཀུན་མཁྱེན་འཇམ་དབྱངས་བཞད་པས་ཀ་ལཱ་པའི་ཊཱིཀ་ཆེན་དུ་ཡེ་ཤེས་ཀྱི་སྐད་དོད་བྱིངས་སྒྲུབ་མཛད་པར་ཡང། ཤེས་པའི་དོན་གྱི་ཁོང་དུ་ཆུད་པ་ཙམ་ལས། ཡེ་ཞེས་པའི་དོན་ཟུར་པ་མ་བྱུང་ལ། མཁས་འཇུག་ཏུའང་ཡེ་ཤེས་དང། ཕྱག་རྒྱ་དང། གོ་རིམ་ལ་སོགས་པ་ལ་རྒྱ་གར་ན་ཡེ་དང། ཕྱག་དང། གོ་ལ་སོགས་པའི་སྒྲ་མེད་ཀྱང། བོད་ལ་ཚིག་སྦྱར་བ་བདེ་བའི་དོན་དུ་བསྣན་ནས་བསྒྱུར། ཞེས་གསུངས། རྒྱན་སྣང་ལས། ཡོངས་སུ་ཤེས་པའི་ཕ་རོལ་ཏུ་ཕྱིན་པ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །ཞེས་མ་ལུས་པའམ་རྫོགས་པའི་དོན་དུ་གསུངས་ཀྱི། གདོད་མའི་དོན་དུ་མ་གསུངས་པས། སྒྲ་དོན་གང་འཐད་བློ་ལྡན་རྣམས་ཀྱིས་དཔྱད་པར་བྱའོ། །རྒྱ་སྐད་ལ་ཡེ་དང་ཕྱག་སོགས་ཀྱི་སྐད་

― GTD003_Page_0233 ―

^{[མ་དཔེ་གཟིགས་ན་འདིར་གནོན།]}

[Full Size]

དོད་མེད་ན། ཕྱག་ཆེན་ཐིག་ལེ་ལས། ཕྱག་ནི་སྟོང་པའི་ཡེ་ཤེས་ཏེ། །རྒྱ་ནི་འཁོར་བའི་ཆོས་ལས་གྲོལ། །ཞེས་འབྱུང་བ་ཅི་ཡིན་ཞེ་ན། འདི་དང་རྣམ་སྣང་མངོན་བྱང་ལས། དཀྱིལ་ནི་སྙིང་པོའོ། །འཁོར་ལོ་ནི་ལེན་པའོ། །ཞེས་པ་ལྟ་བུ་དག་ལོ་ཙཱ་བ་རྣམས་ཀྱིས་གོ་བདེ་བའི་ཐབས་ཙམ་དུ་དགོངས་ནས་ཅུང་ཟད་བསྒྱུར་ཆེས་པར་སྣང་སྟེ། འདི་འདྲའི་སྐབས། མུ་ནི་སྟོང་པའི་ཡེ་ཤེས་ཏེ། །དྲ་ནི་འཁོར་བའི་ཆོས་ལས་གྲོལ། །ཞེས་དང། མཎྜ་ནི་སྙིང་པོའོ། །ལ་ནི་ལེན་པའོ། །ཞེས་སྐད་དོད་རང་སོར་བཞག་ན་ཚིག་དོན་གཉི་ག་ལ་འགྲིག་པར་སྣང་ངོ་། །ཤེས་རབ་ཕུན་སུམ་ཚོགས་པ་སྒྲུབ་ཚུལ་གསུངས་པའི་སྐབས་འདིར་དཀའ་ཐུབ་ཀྱི་ནགས་བསྟེན་པ་དང། མང་དུ་ཐོས་པ་གཉིས་གསུངས་པའི་རྒྱུ་མཚན་ནི། འབྲས་བུ་ལྷག་མཐོང་སྒྲུབ་པ་ལ་རྒྱུ་དེ་གཉིས་གཙོ་ཆེ་བའི་དབང་གིས་ཡིན་ཏེ། དཔེར་ན་ལོ་ཏོག་ཕུན་སུམ་ཚོགས་པ་སྐྱེ་བ་ལ། ཚྭ་སྒོ་ཅན་དང་གསེག་མ་ལྟ་བུ་མ་ཡིན་པའི་ཞིང་ས་གཤིན་པ་དང། ཆུ་ལུད་དྲོད་གཤེར་སོགས་ཀྱི་རྐྱེན་འཛོམ་པ། དེར་ས་བོན་གྲུང་པོ་བཏབ་པ་གསུམ་ཚང་དགོས་པ་བཞིན། ལྷག་མཐོང་གི་རྟོགས་པ་སྐྱེ་བ་ལ་རྙེད་བཀུར་འདུ་འཛི་སོགས་ཀྱི་གཡེང་བ་མེད་པས་སེམས་ལས་སུ་རུང་བ་དང་། ཚོགས་བསགས་སྒྲིབ་སྦྱོང་སོགས་ཀྱི་རྐྱེན་འཛོམ་པ། ཟབ་མོའི་དོན་ལ་ཐོས་བསམ་གྱིས་དཔྱད་པ་ཚུལ་བཞིན་དུ་བྱེད་པ་གསུམ་དགོས་པས། ལྷན་ཅིག་བྱེད་རྐྱེན་དང་པོ་གཉིས་ནི་དཀའ་ཐུབ་ཅེས་སོགས་ཀྱིས་བསྟན་ཅིང། གསུམ་པ་ཉེར་ལེན་གྱི་རྒྱུ་ནི་བསྟན་

― GTD003_Page_0234 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོས་དུ་མ་ཞེས་སོགས་ཀྱིས་བསྟན་ཏོ། །དང་པོའི་དོན་བཞིན་རྗེ་བཙུན་འཇམ་དབྱངས་ཀྱིས་རྗེ་བླ་མར་གདམས་པ་ལས་ཀྱང། དེ་ཡི་གྲོགས་རྣམས་ཀུན་ལ་འབད། །བསེ་རུ་ལྟ་བུར་གནས་པར་བྱ། །འདུ་འཛི་དག་ཀྱང་སྤང་བར་བྱ། །ནང་དུ་མཉམ་པར་གཞག་པར་བྱ། །ཞེས་གསུངས་ཤིང། བསླབ་བཏུས་སུའང། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་གནས་པར་བྱ། །ཞེས་གསུངས་ཏེ། འདི་བྱུང་ན་སྒོམ་རིམ་ལས་བཤད་པའི་ཞི་གནས་ཀྱི་ཚོགས་དྲུག་ཀྱང་ཚང་བར་འགྱུར་ལ། ཞི་གནས་ཀྱི་ཚོགས་དེ་དག་ནི་ལྷག་མཐོང་གི་སྐབས་སུའང་མེད་མི་རུང་གི་རྒྱུ་ཡིན་ནོ། །ངེས་དོན་གྱི་བསྟན་བཅོས་རྣམས་ལ་ཐོས་བསམ་དང་དཔྱད་པ་མང་དུ་བྱེད་པ་ནི་ལྟ་བའི་ཐུན་མོང་མ་ཡིན་པའི་ཉེར་ལེན་ཡིན་པས། དེ་མེད་པར་གནས་ལུགས་མཐར་ཐུག་གི་དོན་རྟོགས་པར་འདོད་པ་ནི། ས་བོན་མ་བཏབ་པར་སྟོན་ཐོག་རེ་བ་བཞིན་ཕྱིན་ཅི་ལོག་ཁོ་ན་ཡིན་ཏེ། བོད་འདིར་དེ་ལྟ་བུའི་ཚུལ་གྱིས་ལྟ་བ་ཚོལ་བ་དང་རྙེད་པར་རློམ་པ་མང་དུ་བྱུང་བ་རྣམས་འཇམ་མགོན་བླ་མས་རིགས་ལམ་དྲི་མ་མེད་པ་བརྒྱ་ཕྲག་གི་སྒོ་ནས་དགག་པར་མཛད་དོ། །ཚུལ་འདི་ནི་རྒྱལ་བ་བྱམས་པ་མགོན་པོས་ཀྱང་གསལ་བར་གསུངས་ཏེ། རྒྱུད་བླ་མ་ལས། གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ཅིང། །ཁྲིམས་ཀྱིས་མཐོ་རིས་བསྒོམ་པས་ཉོན་མོངས་སྤོང་བྱེད་ལ། །ཤེས་རབ་ཉོན་མོངས་ཤེས་བྱ་ཀུན་སྤང་དེ་ཡི་ཕྱིར། །འདི་མཆོག་ཉིད་དེ་དེ་ཡི་རྒྱུ་ནི་འདི་ཐོས་ཡིན། །ཞེས་དང། ཤེས་རབ་མཆོག་ཡིན་དེ་གཞི་ནི། །ཐོས་པ་དེ་ཕྱིར་ཐོས་པ་མཆོག །ཅེས་ཕྱིན་དྲུག་དང། གཞི་གསུམ་དང། བསླབ་པ་གསུམ་སོགས་ཀྱི་ནང་ནས་མཆོག་

― GTD003_Page_0235 ―

^{[མ་དཔེ་གཟིགས་ན་འདིར་གནོན།]}

[Full Size]

དང་གཙོ་བོར་གྱུར་པ་ཤེས་རབ་ཡིན་ལ། དེའི་རྒྱུའི་གཙོ་བོ་ཐོས་པ་ཡིན་པར་གསུངས་པ་དང། གཞུང་འདིར་ཤེས་རབ་ཀྱི་སྐབས་སུ་བསྟན་བཅོས་དུ་མ་ལ་ཐོས་པ་གཙོ་བོར་གསུངས་པ་གཉིས་དགོངས་པ་གཅིག་ཏུ་སྣང་ངོ་། །གཉིས་པ་གཞན་རྒྱུད་སྨིན་བྱེད་བསྡུ་བ་བཞི་ལ་བསླབ་ཚུལ་ལས་བརྩམས་ཏེ་བསྔོ་བ་ལ་གཉིས། བསྡུ་བ་བཞི་སོ་སོར་བསླབ་ཚུལ་དང། བསྡུ་བ་བཞིའི་སྒོ་ནས་སློབ་ལམ་སྤྱིའི་དོན་བསྡུ་བའོ། །དང་པོ་ནི། བསྡུ་བ་བཞི་པོ་འདི་དག་བྱང་ཆུབ་སེམས་དཔས་གཞན་དོན་སྒྲུབ་ཚུལ་གྱི་ཐབས་རྨད་དུ་བྱུང་བ་ཡིན་ཏེ། མདོ་སྡེ་རྒྱན་ལས། དང་པོས་སྣོད་གྱུར་དངོས་པོ་སྟེ། །གཉིས་པ་ཡིས་ནི་མོས་པ་ཡིན། །གསུམ་པ་ཡིས་ནི་བསྒྲུབ་པ་སྟེ། །བཞི་པས་རྣམ་པར་སྦྱོར་བ་འོ། །ཞེས་ཐོག་མར་སྦྱིན་པའི་གཡབ་མོས་འཁོར་དུ་བསྡུས་ནས་ཆོས་ཉན་པའི་སྣོད་རུང་དུ་བྱེད། སྙན་སྨྲས་ཆོས་ཉན་པ་སོགས་ལ་མོས་པར་བྱེད། དོན་སྤྱོད་ཀྱིས་ཉན་བཤད་བྱས་པའི་ཆོས་བསྒྲུབ་ཏུ་གཞུག། །དོན་མཐུན་པས་ཕ་རོལ་པོ་ལ་ཡིད་ཆེས་བསྐྱེད་དེ་ཡུན་རིང་པོར་སྒྲུབ་པ་ལས་ཕྱིར་མི་ལྡོག་པར་འབད་པས་སྒྲུབ་པ་མཐར་ཕྱིན་པར་བྱེད་དོ། །ཆོས་ཡང་དག་པར་སྡུད་པ་ལས། བྱང་ཆུབ་སེམས་དཔའ་རྣམས་ཀྱིས་དགའ་བར་བྱེད་པའི་ཆོས་བཞི་སྟེ། བཞི་གང་ཞེ་ན། ལན་དུ་ཕན་འདོགས་པ་ལ་མི་རེ་བའི་སྦྱིན་པ་དང། སེམས་ཅན་ཐམས་ཅད་ལ་མཉམ་པའི་སེམས་ཀྱིས་སྙན་པར་སྨྲ་བ་དང། སེམས་ཅན་ཐམས་ཅད་ཀྱི་དོན་མ་ལགས་པ་སེལ་ཅིང་དོན་སྒྲུབ་པས་དོན་སྤྱོད་པ་དང། སེམས་ཅན་ཐམས་ཅད་

― GTD003_Page_0236 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དགའ་བའི་བདག་ཉིད་ཀྱིས་དོན་མཐུན་པ་སྟེ། བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་དགའ་བར་བགྱི་བའོ། །ཞེས་དགའ་བར་བྱེད་པའི་ཆོས་སུ་གསུངས་པའང་བསྡུ་བའི་དོན་ཡིན་ཏེ། རྣམ་བཤད་རིགས་པ་ལས་བསྡུ་བའི་སྒྲ་འཇུག་ཚུལ་དུ་མ་ཞིག་གསུངས་པའི་ནང་ནས། དགའ་བ་ལ་འཇུག་པ་བསྡུ་བའི་དངོས་པོ་བཞི་ལྟ་བུར་གསུངས་པའི་ཕྱིར་རོ། །བསྡུ་བ་བཞི་པོ་དེའང་ཚུར་བསྡུས་ན། ཟང་ཟིང་གིས་སྡུད་པ་དང། ཆོས་ཀྱིས་སྡུད་པ་གཉིས་སུ་འདུ་སྟེ། རྒྱན་ལས། ཟང་ཟིང་དང་ནི་ཆོས་ཀྱིས་ཏེ། །དམིགས་པས་ཆོས་ལ་སོགས་པ་ཡི། །བསྡུ་བ་གཉིས་ཀྱི་སྒོ་ནས་ནི། །བསྡུ་བའི་དངོས་པོ་བཞི་འདོད་དོ། །ཞེས་དང་པོ་ཟང་ཟིང་གིས་སྡུད་པ་དང། ཕྱི་མ་གསུམ་ཆོས་ཀྱིས་སྡུད་ཚུལ་ཡིན་པས། བྱང་ཆུབ་སེམས་དཔས་དེ་གཉི་གའི་སྒོ་ནས་སློབ་མ་བསྡུ་བ་ཞིག་དགོས་སོ། །འོན་ཀྱང་སློབ་མའི་ངོས་ནས་ཆོས་ཀྱིས་སྡུད་པ་གཙོ་བོར་བྱེད་ཀྱི། ཟང་ཟིང་གི་སྡུད་པ་ལ་ཆེར་མི་ལྟོས་པ་ཞིག་དགོས་ཏེ། རྒྱན་ལས། དེ་ཆོས་བགོ་སྐལ་ལ་སྤྱོད་ཡོན་ཏན་ལྡན། །བཤེས་གཉེན་རབ་ཏུ་སྟེན་བྱེད་ཟང་ཟིང་མིན། །ཞེས་གསུངས་པ་ལྟར་རོ། །གོང་དུ་རྒྱལ་སྲས་ཀྱི་སྤྱོད་པ་ཐམས་ཅད་ཕར་ཕྱིན་དྲུག་ཏུ་བསྡུས་པར་བཤད་པས། བསྡུ་བ་བཞི་ལོགས་སུ་མི་དགོས་སྙམ་ན་སྐྱོན་མེད་དེ། བསྡུ་བ་བཞིའང་ཕར་ཕྱིན་དྲུག་པོ་དེར་མ་འདུས་པ་མིན་པའི་ཕྱིར། ལམ་རིམ་ལས། བསྡུ་བ་བཞིའང་དེར་འདུ་སྟེ་སྦྱིན་པ་འདུ་བ་ནི་སླ་ལ། ཚིག་སྙན་པ་ནི་ཕྱིན་དྲུག་ལས་བརྩམས་ཏེ་གདུལ་བྱ་ལ་འདོམས་པ་ཡིན་ཞིང། དོན་སྤྱོད་པ་ནི་གདམས་པའི་དོན་དེ་ལ་གཞན་བཀོད་པ་ཡིན་ལ་

― GTD003_Page_0237 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་མཐུན་པ་ནི་རང་གིས་ཀྱང་གདུལ་བྱ་དང་འདྲ་བར་སྒྲུབ་པ་ཡིན་པའི་ཕྱིར་རོ། །ཞེས་གསུངས་ཤིང་། བློ་གྲོས་མི་ཟད་པའི་མདོར་མཁོ་བ་སྦྱིན་པ་སྦྱིན་པས་བསྡུས། སྙན་སྨྲ་ཚུལ་ཁྲིམས་དང་བཟོད་པས་བསྡུས། དོན་སྤྱོད་པ་བརྩོན་འགྲུས་ཀྱིས་བསྡུས། དོན་མཐུན་པ་གཞན་གཉིས་ཀྱིས་བསྡུས་པར་ཡང་གསུངས་སོ། །འོན་ཀྱང་བསྡུ་བ་བཞིའི་ས་བཅད་ལོགས་སུ་བྱེད་པའི་རྒྱུ་མཚན་ནི། དཔེར་ན་གྲུ་གཟིངས་གཅིག་གིས་རང་ཉིད་ཆུ་བོ་ལས་བརྒལ་བ་དང། གཞན་སྒྲོལ་བའི་བྱ་བ་གཉིས་བྱེད་པ་ལྟར། ལམ་གྱི་ལུས་གཅིག་པོ་དེ་ཉིད་ཀྱིས་རང་རྒྱུད་སྨིན་པར་བྱེད་ཚུལ་ཕར་ཕྱིན་དྲུག་གི་རིམ་པས་བསྟན་ལ། གཞན་སྨིན་པར་བྱེད་ཚུལ་བསྡུ་བ་བཞིའི་རིམ་པས་བསྟན་པའི་ཕྱིར་ཏེ། བྱང་ས་ལས། ཕ་རོལ་ཏུ་ཕྱིན་པ་རྣམས་ཀྱིས་ནི་བདག་གི་སངས་རྒྱས་ཀྱི་ཆོས་ཡོངས་སུ་སྨིན་པར་བྱེད་དོ། །བསྡུ་བའི་དངོས་པོ་རྣམས་ཀྱིས་ནི་སེམས་ཅན་ཐམས་ཅད་ཡོངས་སུ་སྨིན་པར་བྱེད་དོ། །ཞེས་སོ། །དེས་ན་ཐོག་མར་རང་རྒྱུད་ལེགས་པར་བཏུལ་བའི་སྒོ་ནས་གཞན་རྗེས་སུ་འཛིན་པར་འདོད་པ་རྣམས་ཀྱིས་གཞན་དོན་སྒྲུབ་པའི་ཐབས་ཉི་ཚེ་བ་ཙམ་མ་ཡིན་པར་བསྡུ་བ་བཞི་ག་ཚང་དགོས་ཏེ། རྒྱན་གྱི་དབྱིག་འགྲེལ་ལས། འཁོར་སྡུད་པ་ལ་ཞུགས་པ་དེ་དག་ཐམས་ཅད་ཀྱིས་ནི་འདི་ལྟ་སྟེ། བསྡུ་བའི་དངོས་པོ་བཞིའི་ཐབས་ཁོ་ན་ལ་ཡང་དག་པར་བརྟེན་ཏེ་འདི་ནི་ཐམས་ཅད་ཀྱི་དོན་ཀུན་འགྲུབ་པར་བྱེད་པ་དང། ཐབས་བཟང་པོ་ཡིན་པར་སངས་རྒྱས་རྣམས་ཀྱིས་རབ་ཏུ་བསྔགས་སོ། །ཞེས་འབྱུང་བ་བཞིན་ནོ། །དེས་ན་བསྡུ་བའི་

― GTD003_Page_0238 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་པོ་ལ་བསླབ་པའི་ཚུལ་ལ་བཞི་ལས། དང་པོ་མཁོ་བ་སྦྱིན་པ་ནི། བརྩེ་བའི་རྒྱུ་ཡིས་ཤ་ཁྲག་དང། །འཚོ་བ་ཡོངས་སུ་བཏང་གྱུར་ཅིང། །ཡན་ལག་ཉིང་ལག་བཏང་བ་ཡིས། །ཆོས་ཚུལ་རྣམ་པར་འཕེལ་གྱུར་ཅིག །ཅེས་བྱུང་། དེའང་སྔོན་འཁོར་ལོས་བསྒྱུར་བ་ནོར་ཅན་དུ་གྱུར་པའི་ཚེ་སྨོན་ལམ་གྱི་མཐུས་རང་གི་ཤ་ཁྲག་འཛད་མེད་དུ་བྱས་ནས་ལོ་ཁྲིའི་བར་དུ་སེམས་ཅན་རྣམས་ལ་སྦྱིན་པར་བཏང་བ་དང། འཁོར་སྒྱུར་དཔལ་གྱི་སྡེས་བྲམ་ཟེ་ལ་ལུས་ཀྱི་ཕྱེད་བྱིན་པ། སྙིང་སྟོབས་ཆེན་པོས་སྟག་མོ་ལ་ལུས་བྱིན་པ། རྒྱལ་པོ་ཟླ་འོད་ཀྱིས་བྲམ་ཟེ་དྲག་པོའི་མིག་ལ་དབུ་བྱིན་པ། བསོད་ནམས་སྟོབས་ཀྱིས་རྒྱལ་པོའི་ཆད་པས་ཕོག་པའི་མི་འགའ་ཞིག་ལ་རང་གི་ཡན་ལག་རྣམས་བཅད་ནས་གནང་སྟེ་བདེན་སྟོབས་ཀྱིས་སྦྱོར་བར་མཛད་པ། བྲམ་ཟེ་སྐར་མ་ལ་དགའ་བས་བྲམ་ཟེ་འགའ་ཞིག་ལ་རང་གི་མིག་དང་རྣ་བ་སོགས་སྩལ་བ། བྱམས་པའི་སྟོབས་ཀྱིས་གནོད་སྦྱིན་ལ་ཤ་ཁྲག་སྩལ་བ། གླང་པོ་ཆེར་འཁྲུངས་པའི་ཚེ་ལུས་སྦྱིན་པར་བཏང་བ་སོགས་མཐའ་ཡས་སོ། །དེ་ལྟར་འདོད་པའི་འདམ་དུ་བྱིང་ཞིང་སྡུག་བསྔལ་གསུམ་གྱིས་མནར་བའི་འགྲོ་བ་རྣམས་ལ་བརྩེ་བ་སྙིང་རྗེ་ཆེན་པོའི་གཞན་དབང་དུ་གྱུར་པའི་རྒྱུའམ་བྱེད་པ་ལ་བརྟེན་ནས་རང་གི་ལུས་ཀྱི་ཤ་དང་ཁྲག །འཚོ་བའི་དངོས་པོ་སྲོག་དང། དེའི་རྐྱེན་ཡོ་བྱད་དང་བཅས་པ་ཐམས་ཅད་ཕངས་པ་མེད་པར་ཡོངས་སུ་བཏང་ཞིང། ཐ་ན་ཕྱག་ཞབས་ལ་སོགས་པའི་ཡན་ལག་འདོད་པ་ལ་ཡན་ལག །སོར་མོ་ལྟ་བུའི་ཉིང་ལག་འདོད་པ་ལ་ཉིང་ལག་སོགས་གང་འདོད་དུ་བྱིན་ནས་རེ་བ་ཚིམ་པར་མཛད་དེ། རང་གི་འཁོར་དུ་བསྡུས་ནས་ཞི་བ་འདོད་ཆགས་དང་

― GTD003_Page_0239 ―

^{[མ་དཔེ་གཟིགས་ན་འདིར་གནོན།]}

[Full Size]

བྲལ་བའི་ཆོས་ལ་བཀྲི་བར་མཛད་པའི་རྒྱུ་ཕུན་སུམ་ཚོགས་པ་དེའི་བདེན་པའི་སྟོབས་ཀྱིས་འབྲས་དུས་སུའང་ཆོས་ཀྱི་ཚུལ་ཏེ། ལམ་སྲོལ་བཟང་པོ་ཕྱོགས་དུས་ཀུན་ཏུ་མི་ཉམས་པར་འཕེལ་ཞིང་རྒྱས་པར་སྨོན་པའོ། ། འདིར་བརྩེ་བའི་རྒྱུ་ཡིས་ཞེས་སྨོས་པ་ནི། རྒྱན་ལས། རྩ་བ་སྙིང་རྗེ་མེད་གྱུར་ན། །དཀའ་སྤྱད་བཟོད་པ་ཉིད་མི་འགྱུར། །ཞེས་པ་ལྟར། སྙིང་རྗེ་བཟོད་གླགས་མེད་པ་ཞིག་མེད་ན་མགོ་དང་རྐང་ལག་གཏོང་བ་ལྟ་བུའི་དཀའ་སྤྱད་ལ་འཇུག་མི་ནུས་པར་ཤེས་པ་དང་། ཀུན་སློང་གི་གཙོ་བོ་ངོས་བཟུང་བའི་ཕྱིར་ཡང་ཡིན་ཏེ། སྤྱིར་གཏོང་སེམས་ཀྱི་ཀུན་སློང་ལ་ཡོན་ཏན་མཐོང་བའི་དད་པ་དང། བཀའ་དྲིན་དྲན་པའི་གུས་པ། ཕན་ཡོན་ལ་དམིགས་པའི་འདུན་པ་སོགས་དུ་མ་ཡོད་ཀྱང། བྱང་ཆུབ་སེམས་དཔའ་རྣམས་ལ་བརྩེ་བས་ཀུན་ནས་བསླང་བ་གཙོ་ཆེ་ལ། དེའི་རྒྱུ་མཚན་གྱིས་གང་ཟག་གཞན་དང་ཐེག་པ་གཞན་ལ་ལྟོས་ཏེ་དམན་པའི་ཞིང་ལས་ཡོན་ཏན་གྱི་ཞིང་མཆོག་ཏུ་བསྔགས་ཀྱང་། བྱང་སེམས་ལ་དེ་ལས་བཟློག་སྟེ་གསུངས་པའི་ཕྱིར། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། ཉན་ཐོས་དང་འཇིག་རྟེན་པའི་ཚུལ་གྱིས་ནི་སློང་བའི་ཞིང་པས་སྡུག་བསྔལ་གྱི་ཞིང་དམ་པ་ནས། ལོག་པར་སྤྱོད་པའི་ཞིང་པས་ཡོན་ཏན་དང་ལྡན་པའི་ཞིང་དམ་པར་བཞག་གོ །དེ་ལྟ་མོད་ཀྱི་བྱང་ཆུབ་སེམས་དཔའ་ནི་སླར་བཟློག་པ་སྟེ། ཡོན་ཏན་དང་ལྡན་པའི་ཞིང་པས་ལོག་པར་སྤྱོད་པའི་ཞིང་དམ་པ་ཡིན་པ་ནས། སྡུག་བསྔལ་བའི་ཞིང་པས་ཀྱང་སློང་བའི་

― GTD003_Page_0240 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་དམ་པ་ཡིན་ཏེ། དེ་བས་ན་བྱང་ཆུབ་སེམས་དཔའ་རྣམས་ནི་ཞིང་གོང་མ་བཞི་པོ་རྣམས་ལ་གཏོང་བར་བྱེད་དོ། །གལ་ཏེ་གོང་མ་བཞི་པོ་མེད་ན་ལྔ་པ་སྟེ་ཡོན་ཏན་གྱི་ཞིང་ལ་གཏོང་བར་བྱེད་དོ། །ཞེས་གསུངས་སོ། །འདིའི་སྐོར་གྱི་སྐྱེས་རབས་རྣམས་ཀྱང་སློང་བའི་ཞིང་དང་སྡུག་བསྔལ་གྱི་ཞིང་ལ་བརྟེན་པ་ཤས་ཆེ་ལ། མདོ་སྡེ་རྒྱན་ལས་ཚད་མེད་ཀྱི་སྐབས་སུ་སྙིང་རྗེ་དང་སྦྱིན་པ་གཉིས་ཤས་ཆེར་སྦྱར་ནས་གསུངས་པའང་དགོངས་པ་འདི་དང་གཅིག་པར་སྣང་ངོ་། །དེར་མ་ཟད་འདིར་མཁོ་བ་སྦྱིན་པའི་སྐབས་སུ་སྙིང་རྗེ་དང། སྙན་སྨྲའི་སྐབས་སུ་བྱམས་པ་ཚིག་ཟིན་ལ་ཐོན་ཅིང། ཐེག་པ་གསུམ་གྱི་བྱང་ཆུབ་ཟག་མེད་ཀྱི་བདེ་བ་ལ་འགོད་པས་དགའ་བ་ཚད་མེད་དང། རྣམས་ཞེས་པའི་མང་ཚིག་གིས་བཏང་སྙོམས་ཚད་མེད་ཀྱང་དོན་གྱིས་འཐོབ་པས། འདི་དག་ལ་ཚད་མེད་བཞིའི་བཤད་པའང་བྱར་ཡོད་པར་སྣང་ནའང་མང་གིས་དོགས་པས་མ་བྲིས། བརྩེ་བའི་སྒྲ་དོན་རྒྱ་སྐད་ལ་ཀ་རུ་ཎ་ཞེས་པ་བདེ་འགོག་ལ་འཇུག་པས་ཐུན་མོང་དང་ཐུན་མོང་མ་ཡིན་པའི་བཤད་ཚུལ་སྣ་ཚོགས་ཡོད་ལ། སྐབས་ལ་ལར་བདེ་སྡོམ་དུའང་བཤད་དོ། །བོད་སྐད་སོར་བཞག་གི་ཚེ་ལྕགས་སྲེག་ལྟ་བུ་ལེན་མི་ཕོད་པར་སྐྱི་གཡའ་བ་ལ་ཤ་བརྩེ་བའམ་ལུས་བརྩེ་བ་ཟེར་བ་བཞིན། སེམས་ཅན་སྡུག་བསྔལ་གྱིས་མནར་བ་མཐོང་བ་ན་མི་བཟོད་པ་སྐྱེས་པ་ལ་སེམས་སམ་སྙིང་བརྩེ་བ་ཞེས་ཟེར་བར་བཤད་དོ། །ལྷག་མའི་ཚིག་དོན་རྣམས་ནི་གོ་སླ། གཉིས་པ་སྙན་སྨྲ་ནི། བདག་སྔོན་སྡིག་པའི་སེམས་ཅན་རྣམས། །བྱམས་པས་གསལ་བར་སྨིན་བྱས་ཤིང། །ཞེས་དང།

― GTD003_Page_0241 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་སྤྱོད་པ་སྟོན་པར། ཐེག་པ་གསུམ་ལ་རབ་བཀོད་པས། །ཆོས་ཀྱི་མཆོད་སྦྱིན་རྒྱས་གྱུར་ཅིག །ཅེས་བྱུང། དེའང་སྔོན་ཀླུའི་རྒྱལ་པོ་རྔ་ཞེས་བྱ་བར་འཁྲུངས་པའི་ཚེ་རང་གི་ནུ་བོ་ཉེ་རྔ་དང་ལྷན་ཅིག་ཏུ་བྱོན་པ་ན། ཀླུའི་རྒྱལ་པོ་རྔ་སྒྲས་ཡང་དང་ཡང་དུ་བརྙས་སྨོད་དང་ཚིག་རྩུབ་དྲག་པོས་སྤྱོས་པ་ཉེ་རྔས་མ་བཟོད་པར་དེ་དང་འཁོན་པར་བརྩམས་པ་ན། རྔས་འཇམ་ཞིང་ཡིད་དུ་འཐད་པའི་ཚིག་དུ་མས་གྲོས་བཏབ་ནས་ཞི་ཞིང་དུལ་བར་བྱས་པ་དང། རྒྱལ་བུ་ཟླ་བར་གྱུར་པའི་ཚེ་སྲིན་པོ་རྐང་ཁྲ་ཞེས་བྱ་བ་སྐྱེ་བོ་སྟོང་ཕྲག་དུ་མའི་སྲོག་འཕྲོག་པར་བྱེད་པ་ཤིན་ཏུ་རྔམ་ཞིང་རྩུབ་པའི་གདུག་པ་ཅན་ལའང་ཐབས་མཁས་ཀྱི་སྒོ་ནས་གསུང་གླེང་མཛད་པས་ཕ་རོལ་པོ་བློ་སྣ་འགྱུར་ཏེ། སྔར་བྱས་ཀྱི་ལས་ལ་འགྱོད་པ་དྲག་པོ་སྐྱེས་ནས་ཆོས་ཀྱི་སྣོད་དུ་གྱུར་ཅིང། གསོད་པའི་ཕྱིར་གོ་རར་བཅུག་པའི་རྒྱལ་རིགས་མང་པོའང་སྲོག་ཐར་པར་མཛད་པ་ལྟ་བུ་ཐབས་མཁས་ཀྱིས་སྙན་པར་སྨྲ་བའི་སྒོ་ནས་གདུག་པ་ཅན་རྣམས་སྨིན་པར་བྱས་པའི་རྣམ་ཐར་དང། བྱང་ཆུབ་སེམས་དཔའ་དཔའ་བའི་སྟོབས་ཀྱིས་བདུད་ཤུགས་འཆང་རྫུ་འཕྲུལ་གྱིས་བཏུལ་ཏེ་ལྷ་མི་དཔག་ཏུ་མེད་པ་བླ་མེད་བྱང་ཆུབ་ལ་བཀོད་པ་དང། རྒྱལ་པོ་བསོད་ནམས་སྟོབས་ཀྱིས་སེམས་ཅན་བགྲང་ལས་འདས་པ་དགེ་བ་བཅུ་དང་བྱང་ཆུབ་གསུམ་ལ་བཀོད་པ། བརྒྱ་བྱིན་ལེགས་པར་སྣང་བྱེད་ཀྱིས་གནོད་སྦྱིན་འཇིགས་སུ་རུང་བར་སྤྲུལ་ནས་སྤྲུལ་པའི་མི་སྡིག་པ་བྱེད་པ་རྣམས་ཟ་བ་སོགས་ཀྱི་འཇིགས་པ་དུ་མ་བསྟན་ཏེ་འཛམ་བུ་གླིང་པ་མཐའ་དག་བཙན་ཐབས་སུ་དགེ་བ་བཅུ་ལ་སྦྱོར་བར་

― GTD003_Page_0242 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པ་སོགས་དོན་སྤྱོད་པའི་རྣམ་ཐར་དང་འབྲེལ་བའི་སྐྱེས་རབས་མཐའ་ཡས་སོ། །དེ་ལྟར་བཅོམ་ལྡན་འདས་ཉིད་ཀྱིས་སྔོན་སྡིག་པ་མི་དགེ་བའི་ཕྱོགས་ལ་ཞེན་པའི་སེམས་ཅན་ཤིན་ཏུ་གདུལ་དཀའ་བ་རྣམས་ཀྱང་རང་རང་གི་ཁམས་དང་མཐུན་པར་ཐོག་མར་འཇིག་རྟེན་གྱི་གཏམ་སྙན་པོ་ཚུན་ཚད་ཀྱི་སྒོ་ནས་བློ་བྲིད་དེ། རང་དང་སེམས་མཐུན་པར་གྱུར་པ་ན་ཐབས་མཁས་ཀྱིས་རིམ་པས་ཆོས་ཀྱི་ཕྱོགས་སུ་ཁ་ལོ་བསྒྱུར་ཏེ། དོན་སྤྱོད་པ་དངོས་གཞིའི་ཚེ་སོ་སོའི་སྐལ་བ་དང་འཚམ་པར་ཉན་རང་བྱང་སེམས་ཀྱི་ཐེག་པ་གསུམ་ལ་འགོད་པར་མཛད་པ་དེའི་བདེན་པའི་སྟོབས་ཀྱིས་ཐར་འདོད་ཀུན་གྱི་རེ་བ་ཚིམ་པར་བྱེད་པའི་ཆོས་ཀྱི་མཆོད་སྦྱིན་དམ་པ་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་སྨོན་པའོ། །དེའང་སྡིག་པའི་སེམས་ཅན་ཞེས་པ་རིན་ཆེན་དོན་གྲུབ་ཀྱི་ཊཱིཀྐར་སྡིག་པའི་ལྟ་བ་ལ་ཞེན་པའི་སེམས་ཅན་ལ་བཤད་ཀྱང། རྣམ་བཤད་རིགས་པ་ལས། སྡིག་པ་ནི་ཐ་ཆད་ཀྱི་དོན་གྱིས་ན་ཉེས་པར་སྤྱད་པ་ཡིན་ཏེ་ཞེས་པ་ལྟར། སྒོ་གསུམ་བག་མེད་པས་ཉེས་སྤྱོད་ལ་ཞུགས་པའི་སེམས་ཅན་ལ་བྱས་ན་བདེའམ་སྙམ། བྱམས་པས་གསལ་བར་སྨིན་ཞེས་པ་བདེ་བ་ལྡན་འདོད་ཀྱི་ཀུན་སློང་བསྟན་ལ། རྣམ་པ་གཅིག་ཏུ་ཡིད་འོང་གི་བྱམས་པ་ནི་མས་བུ་གཅིག་པ་མཐོང་བ་བཞིན་སེམས་ཅན་ཐམས་ཅད་ཡིད་འོང་གི་རྣམ་པར་ལྟ་བ་ཡིན་ཞིང། ནང་གི་ཀུན་སློང་དེའི་རང་མདངས་ཀྱིས་ཕྱིའི་རྣམ་འགྱུར་ལའང་ཁྲོ་གཉེར་མེད་པར། བཞིན་གྱི་མདངས་གསལ་ཞིང་འཛུམ་པ་ཞིག་འབྱུང་བ་ཆོས་ཉིད་ཡིན་པས། གཞན་ལ་གཏམ་སྨྲ་བའི་དུས་ཀྱི་རྣམ་པའང་བསྟན་པ་ཡིན་ཏེ། ལམ་རིམ་ལས། སྙན་སྨྲ་ནི་ཁྲོ་གཉེར་མེད་ཅིང་བཞིན་གྱི་མདངས་

― GTD003_Page_0243 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་བར་འཛུམ་པ་སྔོན་དུ་བཏང་སྟེ། ཞེས་སོ། །དེས་ན་གཞན་དང་གཏམ་སྨྲ་བ་སོགས་ཀྱི་ཀུན་སྤྱོད་ཀྱང་ཕ་རོལ་པོའི་ཡིད་དང་མཐུན་ཞིང་དོན་དུ་འགྱུར་བ་ཞིག་གལ་ཆེ་བས། གནས་འདི་ལ་གཟབ་པར་བྱ་དགོས་ཏེ། ས་སྐྱའི་ལེགས་བཤད་ལས། རྨ་གཞན་མཁས་ན་འཚོ་སྲིད་ཀྱི། །ཉེས་པའི་ཚིག་རྨ་འདྲུད་པ་མེད། །ཁྭ་ཡིས་འུག་པ་དམའ་ཕབ་པས། །བསྐལ་པའི་བར་དུ་འགྲས་ལ་ལྟོས། །ཞེས་དང། སྨྲ་མང་ཉེས་པ་འཛིན་པའི་རྒྱུ། །མི་སྨྲ་ཉེས་པ་སྤོང་བའི་གཞི། །ནེ་ཙོ་སྨྲ་བས་གཟེབ་ཏུ་བཅུག །འདབ་ཆགས་ལྐུག་པ་བདེ་བར་རྒྱུ། །ཞེས་པ་ལྟར་ཚིག་ངན་གྱིས་དོན་མེད་པར་གཞན་དང་འཁོན་ཞུགས་ཏེ་དགྲར་སྡང་བ་དང། རང་ཉིད་ལ་ཕྱི་མར་རྣམ་སྨིན་ལྕི་ཞིང་ཚེ་འདིར་ཡང་སོས་མི་བདེ་བ་སྣ་ཚོགས་འབྱུང་བས་རང་གཞན་གཉིས་ཀ་ཕུང་བྱེད་ཀྱི་རྒྱུར་འགྲོའོ། །ཚུལ་འདི་དག་ནི་ཇོ་བོ་ཡབ་སྲས་ཀྱི་ཞུས་ལན་ནོར་བུའི་འཕྲེང་བའི་ལེའུ་ཉེར་གསུམ་ལས། ངག་གི་ཉེས་པས་དགྲ་བོ་འགུག །ངག་གི་ཉེས་པས་བཤེས་དང་འབྲལ། །ངག་གི་ཉེས་པས་ལྕེ་དག་ལ། །རྨོ་འདོར་སྟོང་གིས་རྨོད་ཅེས་ཐོས། །ལ་ལ་དག་ལ་བསྟོད་བྱས་ཀྱང། །དོགས་པ་བསླད་ནས་མཚང་ལ་འཕོག །ཅེས་དང། ཀུ་རེའི་ཐ་མ་འཐབ་མོར་འགྲོ། །ངག་གི་ཐ་མ་ལུས་གཉིས་རྩོད། །ལུས་ཀྱི་ཐ་མ་སྲོག་དང་འབྲལ། །སྲོག་གི་ཐ་མ་ངན་འགྲོར་འགྲོ། །ཞེས་སོགས་ཀྱིས་འཕྲལ་ཕུགས་ཀུན་ཏུ་ཉེས་དམིགས་ཆེ་ཚུལ་དང། གཉིས་པ་གཞན་ལ་སྨྲ་བའི་ཚེ། །ངག་དེ་མགྲིན་པར་བསྐྱིལ་བྱས་ནས། །དེ་

― GTD003_Page_0244 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་རེ་ལྟོས་འདུག་མི་འདུག །ཅེས་པ་ནས། དོན་དང་ལྡན་ནམ་མི་ལྡན་ལྟ། །འགྲོ་ན་སྨྲ་སྒོར་བཏང་བར་བྱ། །མི་འགྲོ་མགྲིན་པའི་ཨཱཿ ལ་བསྟིམ། །ཞེས་དྲན་ཚད་འཕྲལ་དུ་ཁར་མི་འདོན་པར་ཚིག་གི་སྐྱོན་ཡོན་དང། དགོས་པ་ཡོད་མེད་སོགས་བརྟག་ནས་སྨྲ་དགོས་པ་དང། རྣམ་གཡེང་བདུད་ཀྱིས་བྱིན་བརླབས་ནས། །མང་པོའི་ནང་དུའང་ལྷང་ངེར་ལབ། །དེར་འཚོགས་ཐམས་ཅད་ཐུགས་ཁྲེལ་ནའང། །འཕྲལ་ནི་བཞད་གད་བསླུ་ཞིང་བསྟོད། །ཅེས་འགའ་ཞིག་མང་པོའི་ནང་དུ་ཅོལ་གཏམ་སྨྲས་པ་ན། ཕ་རོལ་པོ་རྣམས་ཞེ་ཁྲེལ་ཡང་འཕྲལ་ལ་ངོ་བསྟོད་དང་བཞག་གད་ཐེག་གེ་བྱས་པས། ཁོས་གཏམ་དེ་ལམ་དུ་སོང་སྙམ་ནས་ང་རྒྱལ་སྐྱེས་ཏེ། ཕྱིར་ཡང་སྨྲ་བ་ཇེ་མང་གིས་ཤིན་ཏུ་འཆལ་བར་འགྱུར་བ་སྲིད་པས། དེ་འདྲ་ལ་ལྷག་པར་ཟོན་བྱེད་དགོས་པ་སོགས་གཏམ་སྨྲ་ཚུལ་ལེགས་ཉེས་ཀྱི་རྣམ་དབྱེ་ཤིན་ཏུ་ཞིབ་པར་གསུངས། སྤྱོད་འཇུག་ལས་ཀྱང། རྟག་ཏུ་འཛུམ་པའི་བཞིན་དུ་གྱིས། །ཁྲོ་གཉེར་ངོ་ཟུམ་ཡོངས་ཐོངས་ཏེ། །འགྲོ་བའི་བཤེས་དང་གསོང་བོར་གྱིས། །ཞེས་དང། སོར་མོའི་བརྡ་ནི་མི་བྱ་སྟེ། །གུས་དང་བཅས་པའི་གཡས་པ་ཡི། །ལག་པ་དག་ནི་ཀུན་གྱིས་ཀྱང། །ལམ་ཡང་དེ་ལྟར་བསྟན་པར་བྱ། །ཞེས་གཞན་དང་ཕྲད་པ་ན་རྟག་ཏུ་བཞིན་འཛུམ་བག་དང་བཅས་ཤིང། ཕ་རོལ་པོ་ལམ་གར་འགྲོ་ལྟ་བུ་དྲིས་པ་ལ་སྟོན་པའི་ཚེའང་མཛུབ་མོ་ཀེར་ནས་སྟོན་པ་ལྟ་བུ་མ་གུས་པའི་རྣམ་འགྱུར་མི་བྱེད་པར། ལག་པ་གཡས་པའི་ཐལ་མོ་བཀན་ཏེ་གུས་པའི་རྣམ་འགྱུར་དང་བཅས་སྟོན་པ་ལྟ་བུ་སྤྱོད་ལམ་གྱི་ཆ་མཐའ་དག་ནས་གཞན་གྱི་སེམས་མགུ་བ་ཞིག་བྱེད་

― GTD003_Page_0245 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་པ་བྱང་ཆུབ་སེམས་དཔའ་རྣམས་ཀྱི་དམ་ཚིག་ཡིན་ནོ། །སེམས་ཅན་སྡུད་པར་བྱེད་པའི་ཐབས་ཀྱང་ཟས་ནོར་སོགས་བྱིན་ནས་ཀུན་གྱི་རེ་བ་སྐོང་བ་ཤིན་ཏུ་དཀའ་ལ། སྙན་པར་སྨྲ་བ་ནི་བྱ་སླ་ཞིང་དོན་ཆེ་བས་ཐབས་མཁས་རྨད་དུ་བྱུང་བ་ཡིན་ཏེ། ས་པཎྚི་ཏས། བྱམས་པས་ཁྱབ་པའི་ཚིག་སྨྲ་བ། །བསྒྲུབ་སླ་གཞན་དགའ་སྡུད་པའི་མཆོག །ནོར་གྱིས་མགུ་བར་སུ་ཡིས་ནུས། །ལུས་སྲོག་བཏང་ཡང་ཕྱེད་མི་ཚིམ། །ཞེས་གསུངས་པ་ལྟར་རོ། །བྱམས་པས་གསལ་བར་སྨིན་བྱས་ཞེས་པ་ལ། སྨིན་པའི་དོན་དང་སྨིན་པ་བརྒྱད་ཀྱི་དབྱེ་བ་སོགས་རྒྱན་གྱི་ཡོངས་སུ་སྨིན་པའི་ལེའུ་ལས་འབྱུང་བ་དེར་བལྟ་ཞིང། འདིར་སྐབས་དོན་ནི་ཆོས་ཉན་པའི་སྣོད་རུང་དུ་གྱུར་པ་ལ་བྱའོ། །ཐེག་པ་གསུམ་ལ་རབ་བཀོད་ཅེས་པའི་ཐེག་པའི་སྒྲ་དོན་ནི། འགའ་ཞིག་གིས་ཐེག་མི་ཐེག་སྒོམ་པ་པོའི་བློའི་སྟོབས་དང་འཚམ་པའི་ཁུར་ཆེ་ཆུང་ལྟ་བུ་ཞིག་ལ་བཤད་པ་དང། ལ་ལ་ཐེག་པ་མཆོག་དམན་གྱི་འབྱེད་བྱེད་མཐའ་བྲལ་རྟེན་འབྱུང་གི་དེ་ཁོ་ན་ཉིད་རྟོགས་པའི་ལྟ་བ་གོ་ནུས་མི་ནུས་ཀྱི་སྒོ་ནས་འབྱེད་པར་འདོད་པ་མི་འཐད་དེ། དང་པོ་སྒྲ་དོན་བཤད་ཚུལ་མི་འཐད་པ་ནི། འདུལ་བའི་གོས་གཞིའི་སྐབས་སུ་ཐེག་པ་ཞེས་པ་ཁྱོགས་དང་ཤིང་རྟ་སོགས་ལ་བཤད། ཐུབ་དགོངས་ལས་འཇུག་སྒྲུབ་ཀྱི་ཐད་དུ་གླང་པོ་ཆེ་སོགས་ལ་བཤད་པ་གང་ལྟར་ཡང་དེ་ལ་ཞོན་ནས་སྒྲོད་བྱེད་ཅིག་ལ་འཇུག་པས། སྡུད་པ་ལས་ཀྱང། དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །གང་ཞིག་ཞོན་ནས་ཕྱོགས་སུ་འགྲོ་བ་དམིགས་སུ་མེད། །ཅེས་དང། སྤྱོད་འཇུག་ལས། བྱང་ཆུབ་

― GTD003_Page_0246 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །ཞེས་པ་ལྟར། ཐེག་པ་དེ་ལ་ཕར་ཞོན་ནས་རང་གི་བྱང་ཆུབ་ཏུ་སྒྲོད་པར་བྱེད་དགོས་ཀྱི། ཚུར་རང་གིས་ཁུར་ནས་འགྲོ་བར་མ་བཤད་དོ། །དེས་ན་སྔགས་རིམ་ལས། ཐེག་པ་ནི་འདིར་འདོང་བ་འབྲས་བུ་དང། འདིས་འདོང་བ་རྒྱུའི་ཐེག་པ་སྟེ་བགྲོད་པས་ན་ཐེག་པའོ། །ཞེས་གསལ་བར་གསུངས་པ་ཉིད་ཚད་མར་བྱ་ཡི། ཡོད་པ་བཞག་ནས་མེད་པ་ལས་བཙལ་བར་མི་བྱའོ། །ཐེག་པའི་འབྱེད་ཆོས་ལྟ་བའི་སྒོ་ནས་བཞག་པའང་ཤིན་ཏུ་མི་འཐད་དེ། དཔལ་ལྡན་ཟླ་བས་ལུང་བདུན་དང་རིགས་པ་གསུམ་གྱི་སྒོ་ནས་ཐེག་པ་གསུམ་པོ་གང་གིའང་འཕགས་པའི་གང་ཟག་ལ་རྟེན་འབྱུང་གི་དེ་ཁོ་ན་ཉིད་མངོན་སུམ་དུ་རྟོགས་པས་ཁྱབ་པར་གསུངས་པ་ནི་རྒྱལ་བའི་དགོས་པ་མཐར་ཐུག་པ་ཡིན་པས། དེ་ཐེག་པ་ཆེན་པོར་འཇོག་བྱེད་ཡིན་ན་ཉན་རང་འཕགས་པ་ཐམས་ཅད་ཀྱང་ཐེག་ཆེན་པར་འགྱུར་ལ། དེ་འདོད་ན་ཐེག་དམན་འཕགས་པ་མི་སྲིད་པས། ཐེག་པ་གསུམ་གྱི་དབྱེ་བ་འབྱེད་བྱེད་ཀྱང་མི་དགོས་པར་འགྱུར་རོ། །དེས་ན་ལྟ་བས་འབྱེད་ཅེས་པ་ནི་གྲུབ་མཐའི་རྣམ་དབྱེ་ཡིན་པས། གྲུབ་མཐའ་དང་ཐེག་པའི་རྣམ་དབྱེ་མ་ནོར་བ་དགོས་ཏེ། ཐེག་པ་ཆེ་ཆུང་གི་དབྱེ་བ་ནི་བསམ་པ་སེམས་བསྐྱེད་སོགས་ཐབས་ཀྱི་སྒོ་ནས་འབྱེད་པ་མ་གཏོགས། ཤེས་རབ་ལྟ་བའི་སྒོ་ནས་འབྱེད་པར་ཚད་ལྡན་སུས་ཀྱང་མ་བཤད་ལ། ཁྱད་པར་དུ་རྗེ་བླ་མའི་སྔགས་རིམ་ལས། སྤྱིར་ཐེག་པ་ཆེ་ཆུང་སྟོང་པ་ཉིད་ཀྱི་ཤེས་རབ་ཀྱིས་མི་འབྱེད་པར་ཐབས་ཀྱིས་འབྱེད་དགོས་ལ། ཁྱད་པར་དུ་ཐེག་པ་ཆེན་པོ་ལ་གཉིས་སུ་ཕྱེ་བའང་ཟབ་མོ་རྟོགས་པའི་ཤེས་རབ་

― GTD003_Page_0247 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་མི་འབྱེད་ཀྱི། ཐབས་ཀྱིས་དབྱེ་དགོས་ཤིང། ཞེས་གསུངས་པའི་ཕྱིར་རོ། །ཆོས་ཀྱི་མཆོད་སྦྱིན་རྒྱས་གྱུར་ཅིག །ཅེས་པ། སྤྱིར་མཆོད་སྦྱིན་གྱི་སྒྲ་དོན་ཡོན་ཏན་གྱི་མགྲོན་ལ་མཆོད་པ་དང། སྙིང་རྗེའི་མགྲོན་ལ་སྦྱིན་པར་བཤད་པ་ལྟར་འདིར་ཡང་དམ་པའི་ཆོས་བཤད་སྒྲུབ་གཉིས་ཀྱི་སྒོ་ནས་འཕེལ་བས་རྒྱལ་བ་རྣམས་ལ་མཆོད་པ་དང། སེམས་ཅན་ལ་ཕན་བདེ་སྟེར་བས་སྦྱིན་པར་འགྲོ་བ་ལ་བཤད་པའང་མི་རུང་བ་མེད་ལ། རྒྱན་སྣང་ལས། རྣམ་པར་གསལ་བ་ཉིད་དུ་ཤེས་པར་བྱ་བས་ན་ཆོས་ཀྱི་མཆོད་སྦྱིན་སྦྱིན་པའོ། །ཞེས་པ་ལྟར། མཆོད་སྦྱིན་རྒྱ་ཆེན་པོའི་ཚེ་ནོར་བཟང་དགུ་ཐམས་ཅད་ལྷུག་པར་གཏོང་བ་བཞིན། འདིར་ཡང་ཆོས་ཀྱི་དོན་ཟབ་ཅིང་རྒྱ་ཆེ་བ་མཐའ་དག་མ་སྦས་ཤིང་དཔེ་མཁྱུད་མེད་པར་སྙན་པར་སྨྲ་བའི་སྒོ་ནས་གདུལ་བྱ་ལ་གསལ་བར་སྟོན་པའི་དོན་དུ་བྱས་ན་སྐབས་ཀྱི་དོན་དང་ཡང་འབྲེལ་བས་ཤིན་ཏུ་ལེགས་སམ་སྙམ། བཞི་པ་དོན་མཐུན་པ་ནི། བདག་སྔོན་ཐབས་ཤེས་གྱུར་པ་ན། །སེམས་ཅན་ལྟ་ངན་ལས་བསྒྲལ་ཅིང། །ཡང་དག་ལྟ་ལ་བཀོད་བྱས་པས། །ཆོས་ཚུལ་རྣམ་པར་འཕེལ་གྱུར་ཅིག །ཅེས་བྱུང། བྲ་སྟི་དགེ་བཤེས་ཀྱི་ཊཱིཀྐར། ཐེག་པ་གསུམ་ལ་རབ་བཀོད་ཅེས་པའང་སྙན་སྨྲའི་ཁོངས་སུ་བསྡུས་ནས་ཤོ་ལོ་ཀ་འདི་དོན་སྤྱོད་པ་ལ་སྦྱར་ཏེ། དོན་མཐུན་པ་ཤུགས་ཀྱིས་འཐོབ་པ་ལས་གཞུང་དང་དངོས་སུ་སྦྱར་རྒྱུ་མེད་པར་གསུངས། སྤྱིར་སྙན་སྨྲ་ལ་འཇིག་རྟེན་དང་ལྡན་པ་དང། ཆོས་བསྟན་པ་དང་ལྡན་པ་གཉིས་གསུངས་པས་ཐེག་པ་གསུམ་གྱི་ཆོས་སྟོན་པ་སྙན་སྨྲའི་ཁོངས་སུ་མི་

― GTD003_Page_0248 ―

^{[མ་དཔེ་གཟིགས་ན་འདིར་གནོན།]}

[Full Size]

འདུ་བ་མིན་ཡང། དེར་ཐེག་པ་གསུམ་ལ་བཀོད་ཅེས་པའི་ཚིག་གི་ནུས་པ་དོན་སྤྱོད་པ་ལ་སྦྱར་ན་བདེ་བ་དང། འདིར་ཐབས་ཤེས་གྱུར་པ་ན་ཞེས་པའང། གཞན་གྱི་དོན་བྱེད་པ་ལ་ཐོག་མར་དོན་དེ་ཉིད་རང་གིས་བསླབ་ནས་ཁོང་དུ་ཆུད་པའམ་མངོན་དུ་བྱས་པ་དགོས་པའི་དོན་དུ་གསལ་ལ། དེ་ནི་དོན་མཐུན་ཚུལ་ཡིན་པས་འདི་བཞིན་བཤད་པར་བྱའོ། །དེའང་སྔོན་ཀུན་ཏུ་རྒྱུ་བྱང་ཆུབ་ཏུ་གྱུར་པའི་ཚེ་རྒྱལ་པོ་ཞིག་གི་མཆོད་གནས་སུ་གྱུར་ནས་རྒྱལ་པོ་དེ་ཉིད་ཆོས་ལ་བཙུད་པ་སྡིག་བློན་རྣམས་ཀྱིས་མ་བཟོད་པར་ཕྲ་མ་བྱས་པའི་རྐྱེན་གྱིས་རྒྱལ་པོའི་གུས་པ་ལྷོད་པར་གྱུར་པ་ན། དེ་ལ་ཁྲོས་པ་མིན་ཡང་དེ་དག་འདུལ་བ་ལ་ཐོག་མར་རང་ཉིད་ཀྱིས་ཡོན་ཏན་ཁྱད་པར་ཅན་མངོན་དུ་བྱེད་དགོས་པར་གཟིགས་ནས་ཡུལ་དེར་མ་བཞུགས་པར་དབེན་པར་གཤེགས་ཏེ་བསམ་གཏན་བཞི་དང་མངོན་ཤེས་ལྔ་བསྒྲུབ་པར་མཛད། དེ་ནས་དུས་ལ་བབས་པ་ན་སྤྲུལ་བའི་སྤྲེའུའི་པགས་པ་གྱོན་ནས་ཕེབས་པར་བློན་པོ་རྣམས་ཀྱིས་སྨད་པའི་ཚེ། རྐྱེན་དེ་ཉིད་ལས་བརྩམས་ཏེ་རིགས་པ་སྣ་ཚོགས་པའི་སྒོ་ནས་རྒྱུ་མེད་པར་སྨྲ་བ་དང། དབང་ཕྱུག་རྒྱུར་ལྟ་བ་དང། ལས་ཁོ་ན་ལས་བྱུང་བར་ལྟ་བ་དང། རྒྱལ་རིགས་ཀྱི་གཞུང་ལ་བརྟེན་པ་སོགས་ཀྱི་ལྟ་བ་ངན་པ་ཐམས་ཅད་སོ་སོར་སུན་ཕྱུངས་ཏེ་རྒྱལ་བློན་འཁོར་བཅས་ཡང་དག་པའི་ལྟ་བ་ལ་བཀོད་པ་དང། ཚངས་པའི་འཇིག་རྟེན་དུ་ལྷའི་དྲང་སྲོང་ཆེན་པོར་འཁྲུངས་པའི་ཚེ། ཡུལ་ལུས་འཕགས་པོའི་རྒྱལ་པོ་ཡན་ལག་སྦྱིན་ཞེས་བྱ་བ་ཆད་ལྟ་ལ་ཞུགས་ནས་སྡིག་པ་སྣ་ཚོགས་སྤྱོད་པ་རྫུ་འཕྲུལ་གྱིས་བཏུལ་ཏེ་ལྟ་བ་ཕུན་

― GTD003_Page_0249 ―

^{[མ་དཔེ་གཟིགས་ན་འདིར་གནོན།]}

[Full Size]

སུམ་ཚོགས་པ་ལ་སྦྱར་བ་དང། འཕགས་པ་ཤཱ་རིའི་བུ་མུ་སྟེགས་ཀུན་ཏུ་རྒྱུར་གྱུར་པའི་ཚེ། ཐུབ་པའི་སྐུ་ཚེ་སྔ་མ་ཞིག་གིས་དེ་ལྟ་ངན་ལས་བསྒྲལ་བར་པད་དཀར་ལས་གསུངས་པ་སོགས་སྐྱེ་བ་དུ་མར་གདུལ་བྱ་རྣམས་འཇིག་རྟེན་དང་འཇིག་རྟེན་ལས་འདས་པའི་ཡང་དག་པའི་ལྟ་བ་ལ་བཀོད་ཚུལ་མདོ་སྡེ་རྣམས་སུ་རྒྱ་ཆེར་འབྱུང་ངོ་། །ལྟ་ངན་འགོག་པ་དང་ལྟ་བ་རྣམ་དག་ལ་འགོད་པ་འདི་ནི་ཚད་མ་རྣམ་འགྲེལ་ལས། ཐབས་བྱུང་དེ་རྒྱུ་ལྐོག་གྱུར་པས། །དེ་འཆད་པ་ནི་དཀའ་བ་ཡིན། །ཞེས་དང། རང་ཉིད་ངེས་ཤིང་གཞན་དག་ལ། །ངེས་པ་སྐྱེད་པར་འདོད་པ་ཡི། །ཞེས་གསུངས་པ་བཞིན། སྦྱིན་གཏོང་སོགས་དང་མི་འདྲ་བར། དོན་དེ་ཉིད་རང་གིས་ལེགས་པར་རྟོགས་པ་སྔོན་དུ་སོང་བའི་སྒོ་ནས་གཞན་ལ་སྟོན་དགོས་པས། འདིར་ཡང། བདག་སྔོན་ཐབས་ཤེས་གྱུར་པ་ན། །ཞེས་གསུངས་ཏེ་དོན་མཐུན་པའི་ཚུལ་དང་ཤིན་ཏུ་མཐུན་ནོ། །དེ་ལྟར་རིགས་པ་བཞི་སོགས་ཀྱི་སྒོ་ནས་ལས་རྒྱུ་འབྲས་དང། རྟེན་འབྱུང་གི་རྣམ་གཞག་སོགས་ཡང་དག་པའི་ལྟ་བ་ཕྲ་རགས་ཐམས་ཅད་ལ་ཐེ་ཚོམ་མེད་པའི་ངེས་པ་རྙེད་ཅིང། ཇི་ལྟར་རྟོགས་པའི་དོན་དེ་ཉིད་ཡང་དང་ཡང་དུ་གོམས་པར་མཛད་དེ། རང་གིས་ཇི་ལྟར་ངེས་པ་བཞིན་དུ་གདུལ་བྱ་རྣམས་ལ་བསྟན་པ་ན་ལུང་དང་རིགས་པའི་སྒོ་ནས་ངེས་པ་རྙེད་ཅིང། ལྷག་པར་སློབ་དཔོན་རང་ཉིད་ཀྱིས་སྒྲུབ་པ་ནན་ཏན་དུ་བྱེད་པའི་ཚུལ་མཐོང་ནས། འདི་ལས་འབྲས་བུ་ཕུན་སུམ་ཚོགས་པ་ཞིག་འབྱུང་བར་གདོན་མི་ཟའོ་སྙམ་དུ་ཡིད་ཆེས་རྙེད་དེ། སློབ་དཔོན་གྱི་རྣམ་ཐར་བཞིན་བརྩོན་པ་རྒྱུན་

― GTD003_Page_0250 ―

^{[མ་དཔེ་གཟིགས་ན་འདིར་གནོན།]}

[Full Size]

ཆགས་སུ་བསྟེན་པས་དེ་དག་ཀྱང་སྨིན་ཅིང་གྲོལ་བར་གྱུར་པ་དེའི་བདེན་པའི་སྟོབས་ཀྱིས་རྒྱལ་བའི་ཆོས་ཚུལ་ཕུན་སུམ་ཚོགས་པ་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག་ཅེས་སྨོན་པ་མཛད་པའོ། །དེའང་ཐབས་ཤེས་ཞེས་པ་ནི། ཐབས་དེ་ཉིད་ཚད་མའི་སྒོ་ནས་ཤེས་པ་ཁོ་ན་ལ་མི་བྱེད་དེ། རྒྱན་ལས་སྐྱབས་འགྲོའི་ཐུན་མོང་མ་ཡིན་པའི་ཁྱད་ཆོས་བཞིའི་ནང་ནས་རྟོགས་པའི་དོན་ས་གོང་མ་གོང་མ་ལ་རིམ་གྱིས་བགྲོད་པ་ལ་གསུངས་པ་དང། རྣམ་འགྲེལ་དུའང། གཤེགས་པ་རྟོགས་པའི་དོན་ཕྱིར་ཞེས་ལམ་གོང་མ་མངོན་དུ་མཛད་པ་ལ་རྟོགས་པའི་སྒྲ་འཇུག་པར་གསུངས་པ་བཞིན། སྐབས་འདིའི་ཤེས་ཞེས་པའང་ཐབས་ཁྱད་པར་ཅན་དེ་དག་མངོན་དུ་མཛད་པ་ལའང་བྱར་རུང་ངོ་། །དེ་ལྟར་ན་སྦྱིན་སོགས་ཀྱི་སྤྱོད་པ་ལ་བསླབ་ཚུལ་དེ་ཐམས་ཅད་དོན་མཐུན་པའི་རྣམ་ཐར་ཡིན་ཏེ། ཡོན་ཏན་མཐའ་ཡས་པར་བསྟོད་པ་ལས། འགའ་ཞིག་རང་ཉིད་མ་དུལ་བཞིན་དུ་རིགས་པར་ལྡན་པའི་ཚིག་སྨྲ་ཡང། །རང་གི་ཚིག་དང་འགལ་བར་བྱེད་པས་གཞན་དག་འདུལ་བར་མི་ནུས་ཞེས། །ཁྱོད་ཀྱིས་དགོངས་ནས་དེ་སླད་འགྲོ་བ་མཐའ་དག་ཐུགས་ལ་བཞག་མཛད་ནས། །རེ་ཞིག་བདག་ཉིད་མ་དུལ་བ་ཉིད་འདུལ་བར་མཛད་ཕྱིར་རྩོམ་པ་ལགས། །ཞེས་རང་རྒྱུད་འདུལ་བར་མཛད་པ་དེ་ཉིད་དོན་མཐུན་པའི་གཙོ་བོར་གསུངས་པས། སེར་སྣ་སྤངས་ཏེ་སྦྱིན་པ་གཏོང་བར་མཛད་པ་ནི་གཞན་སྦྱིན་པ་ལ་འགོད་པའི་སྐབས་ཀྱི་དོན་མཐུན་པ་དང། ཉེས་སྤྱོད་སྤངས་ནས་ཚུལ་ཁྲིམས་བསྲུང་བ་ནི་གཞན་ཚུལ་ཁྲིམས་ལ་འགོད་པའི་

― GTD003_Page_0251 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་ཀྱི་དོན་མཐུན་པ་ཡིན་པ་སོགས་ཀུན་ལ་འདྲ་བའི་ཕྱིར་རོ། །འདིའི་སྐབས་ཀྱི་ལྟ་ངན་ནི་ལས་རྒྱུ་འབྲས་སོགས་ལ་སྐུར་པ་འདེབས་པའི་ཆད་ལྟ་ལ་གཙོ་བོར་བྱེད་ཅིང། ཡང་དག་པའི་ལྟ་བའང་དེ་དང་འཛིན་སྟངས་དངོས་སུ་འགལ་བ་ལས་འབྲས་ཀྱི་རྣམ་གཞག་སོགས་ངེས་པའི་ལྟ་བ་ལ་བྱའོ། །ཁ་ཅིག་ཡང་དག་པའི་ལྟ་བ་བྱས་ཚད་སྟོང་ཉིད་ཀྱི་ལྟ་བ་ཁོ་ན་ལ་བྱེད་པ་མི་འཐད་དེ། བཤེས་སྤྲིངས་ལས། གལ་ཏེ་མཐོ་རིས་ཐར་པ་མངོན་བཞེད་ན། །ཡང་དག་ལྟ་ལ་གོམས་པ་ཉིད་དུ་མཛོད། །གང་ཟག་ལོག་པར་ལྟ་བ་དགེ་སྤྱད་ཀྱང། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་མཐོ་རིས་ཐོབ་པ་ལ་ཡང་དག་པའི་ལྟ་བ་མེད་མི་རུང་དུ་གསུངས་ཤིང། དེ་ལ་སྟོང་ཉིད་ཀྱི་ལྟ་བ་དགོས་པ་ཧ་ཅང་ཐལ་བས། ལས་འབྲས་ལ་ཡིད་ཆེས་ཀྱི་དད་པ་དང་མཚུངས་པར་ལྡན་པའི་ལྟ་བ་ལ་བྱའོ། །རེད་མདའ་བའི་བཤེས་སྤྲིངས་ཊཱིཀྐ་ལས་ཀྱང་། འདིར་ཡང་དག་པའི་ལྟ་བ་ནི་གཉིས་ཏེ། ཀུན་རྫོབ་ཀྱི་ཡུལ་ཅན་དང། དོན་དམ་པའི་ཡུལ་ཅན་ནོ། །དང་པོ་ནི་ཕྱི་མར་ལས་དང་འབྲས་བུའི་འབྲེལ་བ་ལ་ཡིད་ཆེས་པའོ། །གཉིས་པ་ནི་ཆོས་རྣམས་ཀྱི་དེ་ཁོ་ན་ཉིད་སྟོང་པ་ཉིད་རྟོགས་པའི་ཤེས་རབ་བོ། །ཡང་དག་པའི་ལྟ་བ་དང་པོ་ནི་མཐོ་རིས་ཀྱི་རྒྱུ་ཡིན་ལ། གཉིས་པ་ནི་ཐར་པའི་རྒྱུ་ཡིན་ནོ། །ཞེས་གསུངས་ཤིང། དེར་མ་ཟད་འདུལ་བའི་མདོར་ཚུལ་ཁྲིམས་དང་ཆོ་ག་དང་ལྟ་བ་ཕུན་སུམ་ཚོགས་པ་ཞེས་པའི་ལྟ་བའང། ལས་དང་འབྲས་བུའི་འབྲེལ་བ་ལ་ཡིད་ཆེས་པ་ལ་བྱེད་པས།

― GTD003_Page_0252 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་མེད་པར་ཚུལ་ཁྲིམས་རྣམ་པར་དག་པའང་འབྱུང་ཐབས་མེད་དེ། འཇམ་དཔལ་རྩ་རྒྱུད་ལས། ཇི་ལྟར་ཡང་དག་པའི་ལྟ་བ་མེད་པ་ལ་སྡོམ་བརྩོན་མེད་པ་དང་ཞེས་གསུངས་པ་བཞིན་ནོ། །དེས་ན་འདིར་ཡང་དག་པའི་ལྟ་བ་ཚུལ་ཁྲིམས་ཀྱི་རྒྱུའི་གཙོ་བོར་བཤད་པ་དང། བཤེས་སྤྲིངས་ལས་མཐོ་རིས་ཀྱི་རྒྱུའི་གཙོ་བོར་བཤད་པ་གནད་གཅིག་ཏུ་སྣང་ངོ་། །གདུལ་བྱ་ལ་ཡང་དག་པའི་ལྟ་བ་སྟོན་པའི་ཚེ་ལུང་རིགས་ཀྱིས་བསྒྲུབ་ནས་ངེས་པ་རྙེད་པར་བྱར་ཡོད་ཀྱང། ད་དུང་རང་ཉིད་ཀྱིས་ནན་ཏན་དུ་གོམས་པར་མཛད་པ་ནི་གདུལ་བྱ་ལ་ཡིད་ཆེས་བསྐྱེད་པའི་ཐབས་དང། སྒྲུབ་པ་ལ་སྐུལ་བྱེད་ཀྱི་མཆོག་ཏུ་གྱུར་པ་ཡིན་ཏེ། ཆེད་དུ་བརྗོད་པའི་ཚོམས་ལས། བདག་ཉིད་དང་པོར་རིགས་པར་གནས་བྱས་ནས། །ཕྱི་ནས་བདག་བཞིན་གཞན་དག་གདུལ་བར་བྱ། །བདག་ཉིད་དང་པོར་རིགས་པར་གནས་བྱས་ན། །ཕྱི་དུས་འདུལ་ཚེ་མཁས་པ་ཉོན་མི་མོངས། །ཞེས་དང། ལམ་རིམ་ཆེན་མོ་ལས། དེའང་རང་གིས་མ་བསྒྲུབས་ན་གཞན་ལ་འཇུག་ལྡོག་འདི་ལྟར་བྱ་དགོས་སོ་ཞེས་བཤད་པ་ན། ཁྱོད་རང་ཡང་དོན་དེ་མ་སྒྲུབས་ན་གཞན་ལ་དེ་སྒྲུབས་ཞེས་ཅིའི་ཕྱིར་སྨྲ། ཁྱོད་ཀྱང་ད་དུང་གཞན་གྱིས་བཅོས་དགོས་སོ་ཞེས་ཟེར་ནས་བསྒྲུབ་ཏུ་མི་ཉན་ལ། རང་གིས་བསྒྲུབས་པ་ཞིག་ཡིན་ན་བདག་ཅག་གང་ལ་བཙུད་པའི་དགེ་བ་དེ་ལ་ཁོང་རང་ཡང་གནས་པར་བྱེད་པས་ན། འདི་བསྒྲུབས་ན་བདག་ཅག་ལ་ཕན་པ་དང་བདེ་བར་འགྱུར་ངེས་སྙམ་ནས་གསར་དུ་འཇུག་ཅིང། ཞུགས་ཟིན་པ་རྣམས་ཀྱང་མི་ལྡོག་པར་བརྟན་པར་འགྱུར་ཞེས་གསུངས་ཏེ། གོང་དུ་དྲངས་པ་བཞིན་མདོ་སྡེ་རྒྱན་གྱི། བཞི་པས་རྣམ་པར་སྦྱོང་

― GTD003_Page_0253 ―

^{[མ་དཔེ་གཟིགས་ན་འདིར་གནོན།]}

[Full Size]

པའོ། །ཞེས་པའི་སྦྱོང་ཚུལ་ཡང་དེ་ཡིན་ནོ། །པོ་ཏོ་བ་ཆེན་པོའི་ཞལ་ནས་ཀྱང། ངས་ད་ལྟ་རི་རྩེ་ཡ་ཀི་ན་གསེར་གྱི་ཁྲོན་པ་བརྡོལ་ནས་ཡོད་ཀྱི། ཁྱེད་རང་ལེན་དུ་སོང་བྱས་ཀྱང་ངའི་ངག་འཁྱལ་དུ་གོ་ནས་ཁྱེད་འགྲོར་མི་ཉན་ང་རང་གིས་རིངས་པར་ཕྱིན་ན་ཁྱོད་ཚོ་ངའི་གཞུག་ན་ཡར་དྲིལ་ཡོང། དེ་བཞིན་དུ་བླ་མ་རང་ཆོས་བཞིན་མི་བྱེད་པར་གཞན་ལ་ཆོས་བཤད་ཀྱང་ལག་ལེན་བྱེད་མཁན་མི་ཡོང་ལ། བླ་མ་རང་གིས་ཆོས་བཞིན་བྱས་ན་གཞན་ཡང་རྗེས་སུ་སློབ་པ་བག་རེ་ཡོང། ཞེས་གསུངས་པས། ཆོས་སྟོན་པ་པོའི་དགེ་བའི་བཤེས་གཉེན་དུ་འཇོག་པའང་ངག་གིས་བཤད་པ་ཁོ་ན་ལ་མི་བྱེད་པར། ལག་ལེན་དུ་འདེབས་པ་བཟང་པོའི་མིག་ལྟོས་ཀྱི་ཡུལ་དུ་འགྲོ་བ་ཞིག་གལ་ཆེ་སྟེ། མདོ་མྱང་འདས་ལས། བདག་བྱང་ཆུབ་ལ་ནན་ཏན་དུ་བྱེད་པས་གཞན་ཡང་བྱང་ཆུབ་ལ་ནན་ཏན་བྱེད་དུ་འཇུག་པ་སྟེ། དེ་བས་ན་དགེ་བའི་བཤེས་གཉེན་ཞེས་བྱའོ། །ཞེས་གསུངས་པའི་ཕྱིར། དེ་ལྟར་དོན་མཐུན་པའི་སྒོ་ནས་གདུལ་བྱ་རྣམས་ཆོས་སྒྲུབ་པའི་ཕན་ཡོན་ལ་ཡིད་ཆེས་བསྐྱེད་པ་དེ་ཉིད་སྐབས་འདིར་གང་ལ་འགོད་རྒྱུའི་ཡང་དག་པའི་ལྟ་བའི་གཙོ་བོ་ཡིན་ནོ། །གཉིས་པ་བསྡུ་བ་བཞིའི་སྒོ་ནས་སློབ་ལམ་སྤྱིའི་དོན་བསྡུ་བ་ནི། བདག་གིས་སེམས་ཅན་བསྡུ་དངོས་བཞིས། །ཉོན་མོངས་མེ་ལས་ཐར་བྱས་ཤིང། །བདག་གིས་འཕེལ་སྡིག་ཕམ་བྱས་པས། །བདག་འཁོར་ཡུན་རིང་གནས་གྱུར་ཅིག། །ཅེས་བྱུང། དེའང་སྐྱེས་པའི་རབས་ཀྱི་མཚན་གཞི་གོང་དུ་སྨོས་པ་རྣམས་དང་

― GTD003_Page_0254 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་ཡང་མདོ་སྡེ་དང་འདུལ་བའི་སྡེ་སྣོད་དག་ལས་རྒྱ་ཆེར་འབྱུང་བ་བསྐལ་པ་ཆེན་པོ་གྲངས་མེད་པ་དུ་མར་སྙིང་རྗེ་དང། སྨོན་ལམ་དང། ཏིང་ངེ་འཛིན་དང། དབང་འབྱོར་པ་སོགས་ཀྱི་སྒོ་ནས་སྐྱེ་བའི་ཕྲེང་བ་དཔག་ཏུ་མེད་པ་བཞེས་ཏེ། རྒྱལ་སྲས་ཀྱི་སྤྱོད་པ་མ་ལུས་པའི་སྤྱི་སྡོམ་ཆེན་པོ་ཕ་རོལ་ཏུ་ཕྱིན་པ་དྲུག་ལ་ལེགས་པར་བསླབ་པས་རང་རྒྱུད་སྨིན་པར་བྱས། རང་གིས་གང་ལ་བསླབ་པར་བྱས་པ་དེ་དང་དོན་མཐུན་པར་གདུལ་བྱ་རྣམས་ཀྱང་སྤྱོད་དུ་གཞུག་པའི་ཕྱིར་ཐོག་མར་སྦྱིན་པས་འཁོར་དུ་བསྡུས་ཏེ་སོ་སོའི་སྐལ་བ་དང་འཚམ་པའི་ཆོས་ཀྱི་བདུད་རྩིས་དེ་དག་གི་རྒྱུད་ཀྱི་ཉོན་མོངས་པའི་མེ་དཔུང་མངོན་གྱུར་ཤུགས་དྲག་པོ་དང། ཆེས་སྟོབས་འཔེལ་བའི་སྡིག་སྤྱོད་ཚན་པོ་ཆེ་བཟློག་དཀའ་བ་རྣམས་ཉམས་སྨད། དེ་ནས་རྣམ་པར་མི་རྟོག་པའི་ཡེ་ཤེས་སྐྱེ་བའི་སྣོད་རུང་དུ་སྒྲུབ་པ་སྨིན་བྱེད་ཀྱི་ལམ་དང། ལས་དང་ཉོན་མོངས་པ་དེ་དག་ས་བོན་དང་བཅས་ཏེ་སྤོང་བ་གྲོལ་བྱེད་ཀྱི་ལམ་ལ་རིམ་པ་བཞིན་བཀོད་དེ། གཞན་དོན་རྣམ་པ་ཐམས་ཅད་མ་ཚང་བ་མེད་པར་བསྒྲུབས་པ་དེའི་བདེན་པའི་སྟོབས་ཀྱིས་གང་ཞིག་སྨིན་གྲོལ་གྱི་ལམ་ལ་བཀོད་པའི་གདུལ་བྱ་དེ་དག་གིས་ཐོས་བསམ་སྒོམ་པའི་བྱ་བ་རྣམས་གེགས་མེད་དུ་མཐར་ཕྱིན་ཅིང། དེ་དག་གིས་ཀྱང་གདུལ་བྱ་གཞན་དང་གཞན་སྨིན་གྲོལ་གྱི་ལམ་ལ་བཀོད་དེ། སྟོན་པའི་རྗེས་སུ་སློབ་པའི་གདུལ་བྱའི་བརྒྱུད་པ་འཁོར་བ་མ་སྟོངས་ཀྱི་བར་ཡུན་དུ་གནས་ཤིང་འཕེལ་བར་གྱུར་ཅིག་ཅེས་སྨོན་པ་མཛད་པའོ། །བསྡུ་བ་བཞིའི་རིམ་པས་སེམས་ཅན་རྣམས་འཁོར་དུ་བསྡུས་ནས་སྨིན་ཅིང་གྲོལ་བར་བྱེད་པ་ནི་སློབ་པའི་ལམ་

― GTD003_Page_0255 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་བྱ་བ་ཐམས་ཅད་མདོར་བསྡུས་པའི་སྡོམ་ཡང་ཡིན་ཏེ། ཤེར་ཕྱིན་གྱི་མདོར། དེ་དག་གི་ལམ་གྱི་བྱ་བའང་བྱ་ལ་ཞེས་པའི་ཐད་ཀྱི་འགྲེལ་ཆུང་ལས། འབྲས་བུ་སེམས་ཅན་མ་བསྡུས་པ་སྡུད་པ་ཅན་ཞེས་དང། གསེར་འཕྲེང་ལས། མ་བསྡུས་པ་སྡུད་པ་དང། སོགས་པས་བསྡུས་པ་སྨིན་པ་དང། སྨིན་པ་གྲོལ་བ་དང། གྲོལ་བ་མཐར་ཕྱིན་པར་བྱེད་པ་ཅན་ནོ། །ཞེས་གསུངས་པའི་ཕྱིར། ལམ་རིམ་ལས་ཀྱང། བྱང་སེམས་ཀྱི་སྤྱོད་པ་ལ་མཐའ་ཡས་ཀྱང་སྡོམ་ཆེ་བ་ནི་ཕར་ཕྱིན་དང་བསྡུ་བཞི་ཡིན་ཏེ། བྱང་སེམས་ལ་རང་གི་རྒྱུ་ཚོགས་སྨིན་པར་བྱ་བ་དང། སེམས་ཅན་གྱི་རྒྱུད་སྨིན་པར་བྱ་བ་གཉིས་ལས་མེད་ལ། དེ་གཉིས་ཕར་ཕྱིན་དང་བསྡུ་བས་བསྒྲུབ་པའི་ཕྱིར། ཞེས་སོ། །དེ་གཉིས་ཀ་རྒྱལ་སྲས་ཀྱི་སྤྱོད་པའི་སྡོམས་སུ་གསུངས་པའང། གོང་མའི་སྙོམས་འཇུག་རྣམས་བསམ་གཏན་བཞི་དང་གཟུགས་མེད་བཞིས་བསྡུས་ཞེས་པ་ལྟ་བུ་དོན་སོ་སོ་བའི་སྡེ་ཚན་གཉིས་མ་ཡིན་ཀྱི། གཉི་གས་ཀྱང་ཕན་ཚུན་གཅིག་གིས་གཅིག་བསྡུས་སོ། །བསྡུ་བཞི་ཕྱིན་དྲུག་གིས་བསྡུས་ཚུལ་གོང་དུ་བཤད་པ་བཞིན་ཡིན་ལ། ཕྱིན་དྲུག་བསྡུ་བཞིས་བསྡུ་ཚུལ་ནི། བློ་གྲོས་མི་ཟད་པའི་མདོ་ལས་བསྡུ་བ་བཞི་མི་ཟད་པའི་སྐབས་སུ་སྦྱིན་པའི་བསམ་སྦྱོར་སོགས་དེའི་ཉམས་ལེན་མཐའ་དག་བསྡུ་བ་བཞི་ལས་མ་འདས་ཚུལ་རྣམ་གྲངས་དུ་མར་གསུངས་པ་དེ་ཕར་ཕྱིན་གཞན་ལྔ་ལའང་འདྲའོ། །ཉོན་མོངས་པ་མེ་དང་དཔེ་སྦྱར་བ་ནི། བྱེ་བྲག་ཁོང་ཁྲོ་ལྟ་བུ་ལ་སྦྱར་བའི་ཚེ་དགེ་རྩ་སྲེག་པ་སོགས་ཀྱི་ཆ་ནས་ཡིན་ལ། འདི་ནི་

― GTD003_Page_0256 ―

^{[མ་དཔེ་གཟིགས་ན་འདིར་གནོན།]}

[Full Size]

ཉོན་མོངས་སྤྱི་ལ་སྦྱོར་ཚུལ་དཔེར་ན་མེ་དང་ཉེ་བར་གནས་ན་དེའི་འོད་ཀྱིས་གདུངས་ཏེ་མི་བཟོད་པ་བཞིན། ཆགས་སྡང་སོགས་ཀྱི་ཉོན་མོངས་པ་གང་མངོན་དུ་གྱུར་ཀྱང། དེས་ཤེས་རྒྱུད་གདུངས་ཤིང་མི་བཟོད་པར་བྱེད་པས་མེ་དང་འདྲ་ལ། སངས་རྒྱས་ཀྱི་གསུང་ནི་གདུང་བ་དེ་ཐམས་ཅད་སེལ་བའི་ཆུ་ལྟ་བུར་བཤད་དེ། དབུ་མ་སྙིང་པོ་ལས། ཙན་དན་པས་ལྷག་གསུང་གི་ཆུས། །ལུས་ཅན་ཡིད་ཀྱི་ཉོན་མོངས་མེས། །རབ་ཏུ་གདུངས་པ་ཞི་བར་བྱེད། །ཅེས་དང། རྟོག་གེ་འབར་བ་ལས། བདེ་བར་གཤེགས་པའི་གསུང་གིས་ཤིན་ཏུ་ཞི་བར་བྱས་པས་ཉོན་མོངས་པའི་མེའི་གདུང་བ་ནི་གཏན་མི་འབྱུང་བའི་ཆོས་ཅན་དུ་འགྱུར་ཏེ། ཞེས་གསུངས་པ་ལྟར་རོ། །རྐང་པ་གསུམ་པར། བདག་གིས་འཕེལ་སྡིག་ཕམ་ཞེས་པའི་སྡིག་པའང། དགེ་སྡིག་གཉིས་སུ་ཕྱེ་བའི་སྡིག་པ་ཁོ་ན་ལ་བྱེད་མི་དགོས་ཀྱི། འཁོར་བར་འཕེན་པའི་ཟག་བཅས་ཀྱི་ལས་དགེ་མི་དགེ་ཐམས་ཅད་ལ་བྱར་རུང་སྟེ། དཔེར་ན། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང། །ཞེས་སོགས་རྐང་པ་བཞིས་སྡུག་ཀུན་སྤོང་ཚུལ་དང། འགོག་ལམ་མངོན་དུ་བྱ་ཚུལ་རིམ་བཞིན་བསྟན་པར་གསུངས་པ་ལྟ་བུ། འབྲས་བུ་སྡུག་བསྔལ་བའི་རང་བཞིན་ཅན་གྱི་འཁོར་བ་འགྲུབ་པར་བྱེད་པའི་རྒྱུ་རྣམས་ལ་སྡིག་པ་དང་མི་དགེ་བའི་སྒྲས་བསྟན་པའི་སྐབས་མང་ལ། དེར་མ་ཟད་འཁོར་བ་རང་ཉིད་ལའང་མི་དགེ་བའི་སྒྲ་འཇུག་པའི་ཕྱིར་ཏེ། མཛོད་འགྲེལ་ལས། འཁོར་བ་ནི་སྡུག་བསྔལ་ཐམས་ཅད་འཇུག་པའི་བདག་ཉིད་ཀྱིས་མཆོག་ཏུ་མི་བདེ་བའི་ཕྱིར་དོན་དམ་པར་མི་དགེ་བ་ཡིན་ནོ། །ཞེས་གསུངས་པའི་ཕྱིར། དེ་ལྟར་ཀུན་

― GTD003_Page_0257 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་བདེན་པ་སྤྱི་ལ་བྱས་ན་དེའི་འཕེལ་བ་ཕམ་པར་བྱས་ཚུལ་ཡང་རྐང་པ་སྔ་མའི་ཉོན་མོངས་མེ་ལས་ཐར་བྱས་ཞེས་པ་དང་ཤིན་ཏུ་འགྲིག་སྟེ། མཛོད་ལས། དེ་བཞིན་ཤུན་པ་བཞིན་དུ་འདོད། །ལས་ནི་ཤུན་བཅས་འབྲས་དང་འདྲ། །ཞེས་ཉོན་མོངས་པ་ཤུན་པ་དང། ལས་ནི་དེའི་ནང་གི་འབྲས་དང་འདྲ་བས། འབྲས་ཤུན་པ་དང་མ་བྲལ་ན་སྐྱེ་ཞིང་འཕེལ་བར་ནུས་ལ། དེ་དང་བྲལ་ན་འཕེལ་མི་ནུས་པ་བཞིན། ལས་ཀྱང་ཉོན་མོངས་དང་མ་བྲལ་ན་འཕེལ་ཞིང་སྐྱེ་སྲིད་འཕེན་པར་ནུས་ལ། གྲོགས་ཉོན་མོངས་དང་བྲལ་ན་དེ་ལྟར་མི་ནུས་པའི་ཕྱིར་ཏེ། མཛོད་འགྲེལ་ལས། ཉོན་མོངས་ཐོབ་པའི་ཤུན་པ་དང་བཅས་པའི་ལས་སྐྱེ་བ་གཞན་དུ་སྐྱེ་བར་ནུས་ཀྱི། འབའ་ཞིག་ནི་མ་ཡིན་ནོ། །ཞེས་དང། རྣམ་འགྲེལ་ལས། སྲིད་པའི་སྲེད་ལས་རྣམ་བརྒལ་བའི། །ལས་གཞན་འཕེལ་ནུས་མ་ཡིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་གསུངས་པའི་ཕྱིར། གསུམ་པ་མཐར་སངས་རྒྱས་པའི་སྐབས་ལས་བརྩམས་ཏེ་དོན་བསྡུ་བ་ནི། བདག་གིས་མུ་སྟེགས་ཅན་གཞན་དག །ལྟ་བའི་ཆུ་ལས་བསྒྲལ་བྱས་ཤིང། །ཡང་དག་ལྟ་ལ་བཀོད་བྱས་པས། །བདག་འཁོར་རྟག་ཏུ་གུས་གྱུར་ཅིག །ཡུན་རིང་བསྟན་པ་འབར་གྱུར་ཅིག །ཅེས་བྱུང། དེའང་ཆེས་སྙིགས་མ་བདོ་ཞིང་ཁྱད་པར་དུ་ལྟ་བའི་སྙིགས་མར་གྱུར་ཏེ། མུ་སྟེགས་ཀྱི་སྟོན་པ་དྲུག་ལ་སོགས་པས་ལྟ་ངན་སྣ་ཚོགས་པ་བཟུང་ནས་སྐྱེ་བོ་རྣམས་ལམ་མ་ཡིན་པ་ལ་སྦྱར་ཏེ་ཤིན་ཏུ་གདུལ་དཀའ་བར་གྱུར་པའི་དུས་སུ། ལྷའི་བུ་དམ་པ་ཏོག་དཀར་པོ་འཛམ་གླིང་དུ་འབྱོན་པར་

― GTD003_Page_0258 ―

^{[མ་དཔེ་གཟིགས་ན་འདིར་གནོན།]}

[Full Size]

བརྩམས་པའི་ཚེ། ལྷ་རྣམས་ཀྱིས་ད་ལྟ་འཛམ་བུ་གླིང་ན་མི་མཐུན་པའི་ལྟ་ངན་སྣ་ཚོགས་པ་བཟུང་སྟེ་ཤིན་ཏུ་གདུལ་དཀའ་བས་འབྱོན་པའི་དུས་མིན་ཞེས་བཤོལ་བཏབ་པ་ལ། ཇི་ལྟར་དུང་གི་སྒྲས་རོལ་མོ་གཞན་ཐམས་ཅད་ཟིལ་གྱིས་གནོན་པ་ལྟར། སྨྲ་བ་ངན་པ་དེ་དག་ཐམས་ཅད་ཕམ་པར་བྱའོ་ཞེས་འཇིགས་པ་མེད་པ་སེང་གེའི་སྒྲ་བསྒྲགས་ཏེ། འཇིག་རྟེན་དུ་བྱོན་ནས་ཇི་ལྟར་ཞལ་གྱིས་བཞེས་པ་དེ་བཞིན་དུ་མི་འཇིགས་པ་བཞིའི་སྒོ་ནས་ཆོས་ཀྱི་འཁོར་ལོ་རང་དབང་དུ་བསྐོར་ཏེ། མུ་སྟེགས་ཅན་ལ་སོགས་པའི་ལྟ་བ་ངན་པ་ཐམས་ཅད་ཕམ་པར་མཛད་ཅིང། སོ་སོའི་སྐལ་བ་དང་འཚམ་པར་གང་ཟག་དང་ཆོས་ཀྱི་བདག་མེད་པའི་ལྟ་བ་ཕྲ་རགས་རྣམས་ལ་རིམ་པ་བཞིན་དུ་འགོད་པར་མཛད། འཁོར་བར་འཆིང་བྱེད་ཀྱི་ལས་དང་ཉོན་མོངས་པའི་དྲ་བ་ཡང་དག་པའི་ཡེ་ཤེས་ཀྱི་རལ་གྲིས་བཅད་ནས། སྔོན་བསྐལ་པ་ཆེན་པོ་གྲངས་མེད་པ་ཇི་སྙེད་ཅིག་ཏུ་འགྲོ་བ་རྣམས་འཁོར་བའི་རྒྱ་མཚོ་ལས་བསྒྲལ་བར་བྱའོ་ཞེས་དམ་བཅས་ཤིང། ཐུགས་ལ་བརྣག་པའི་དོན་དེ་ཉིད་ཇི་ལྟར་དགོངས་པ་བཞིན་དུ་བསྒྲུབ་པར་མཛད་པ་དེའི་བདེན་པའི་མཐུས་ཐུབ་པའི་དབང་པོ་ཉིད་ཀྱི་རྗེས་སུ་སློབ་པའི་འཁོར་རྣམས་ལྟ་བའི་དབང་གིས་མི་མཐུན་པ་མེད་པར། སྟོན་པ་དང་བསྟན་པ་གཅིག་ཏུ་ཡིད་ཆེས་པའི་སྒོ་ནས། སྟོན་པས་ཇི་ལྟར་གསུངས་པ་བཞིན་དུ་གུས་པས་བསྒྲུབ་པ་དང། དེ་ལ་བརྟེན་ནས་བསྟན་པ་རིན་པོ་ཆེ་ཡུན་རིང་དུ་གནས་པར་སྨོན་པའོ། །མདོ་རང་ལ་ཤོ་ལོ་ཀ་འདིའི་མཐར་ཡུན་རིང་བསྟན་པ་ཞེས་སོགས་མེད་ཀྱང། དགོས་པའི་གཙོ་བོ་ཡིན་པས་དགོངས་པ་བླངས་ཏེ་དམ་

― GTD003_Page_0259 ―

^{[མ་དཔེ་གཟིགས་ན་འདིར་གནོན།]}

[Full Size]

པ་རྣམས་ཀྱིས་སྦྱར་བར་མཛད་པ་བཞིན་བྱས་པ་ལེགས་སོ། །རིན་ཆེན་དོན་གྲུབ་ཀྱི་ཊཱིཀྐར། ལྟ་བའི་མུ་དང་ཐར་པའི་སྟེགས་སམ། ཡང་དག་པའི་ལྟ་བའི་སྟེགས་ལ་གནས་པས་ན་མུ་སྟེགས་ཞེས་པའང་འཐད་པ་འདྲའོ། །ཞེས་བཤད་པ་དང། སྟག་ལོའི་གྲུབ་མཐའ་ཀུན་ཤེས་ཀྱི་རང་འགྲེལ་ལས། ཐར་པའི་མུ་དང་སྟེགས་ལ་གནས་པས་མུ་སྟེགས་ཞེས་བྱ་བས་ན་འཇིག་རྟེན་ཕལ་པ་ལས་ནི་ཆེས་མཆོག་ཏུ་གྱུར་ཏེ། ཞེས་བཤད་པ་རྣམས་ཀྱི་ཁུངས་རྟེན་ས་ནི། ཁྱད་པར་འཕགས་བསྟོད་ཀྱི་འགྲེལ་པ་ལས། མུ་སྟེགས་ནི་ཐར་པ་དང་མཐོ་རིས་ཀྱི་ལམ་སྟེ། དེ་སྟོན་པར་བྱེད་པའི་བསྟན་བཅོས་ལ་མུ་སྟེགས་ཞེས་བྱ་ལ། དེ་བྱེད་པས་ན་མུ་སྟེགས་བྱེད་དོ་ཞེས་པ་འདི་ཉིད་ཡིན་སྣང་ཡང། དེ་ནི་ཤེས་བྱེད་དུ་མི་འགྲོ་སྟེ། དེས་འཇུག་ངོགས་སུ་ཁྲུས་བྱེད་པ་སོགས་ཐར་པའི་ལམ་ཡིན་པར་བསྟན་པ་མ་ཡིན་གྱི། དེ་དག་གིས་དེ་ཐར་པའི་ལམ་དུ་བྱེད་པའམ་ཁས་ལེན་པར་བསྟན་པ་ཡིན་ལ། དེ་ཐར་ལམ་དུ་བྱེད་མཁན་ཡོད་པས་ཐར་ལམ་ཡིན་དགོས་པ་ཧ་ཅང་ཐལ་བའི་ཕྱིར་དང། ཐར་པའི་རྒྱུར་འདོད་ཅེས་པའི་ཐར་པའང་ཉོན་མོངས་ཟད་པའི་ཐར་པ་དངོས་གནས་པ་ཁོ་ན་ལ་བྱེད་མི་དགོས་ཀྱི། ལང་གཤེགས་ལས་གཞན་སྡེ་རྣམས་ཀྱིས་ཐར་པ་འཇོག་ཚུལ་རིགས་མང་པོ་ཞིག་གསུངས་པ་བཞིན། བདེ་འགྲོའི་རྒྱུར་འགྲོ་བ་ལ་བསམ་ནས་ཐར་པའི་རྒྱུ་ཞེས་བཤད་པའང་ཡོད་པའི་ཕྱིར། གྲུབ་མཐའ་ཆེན་མོ་ལས། དེར་ཞུགས་པ་ཐར་པ་སྟེ་བདེ་འགྲོའི་རྒྱུར་སྨྲ་

― GTD003_Page_0260 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་བྱེད་པས་མུ་སྟེགས་བྱེད་ཅེས་བྱ་ཡི། ཞེས་གསུངས་པའི་ཕྱིར། འདིར་སྨྲ་བ་ཞེས་པས། ཁྱད་པར་འཕགས་བསྟོད་ཀྱི་འགྲེལ་པར། དེ་བྱེད་པས་མུ་སྟེགས་ཞེས་པ་དེའི་དོན་གསལ་བར་མཛད་པ་ཡིན་ནོ། །འདི་ལྟར་བྱས་ན་གཞི་འགྲེལ་ལས་གང་དག་ལ་ཆུ་ཀླུང་དུ་འཇུག་པའི་ཐར་ལམ་ཡོད་པ་འདི་དག་ནི་མུ་སྟེགས་ཅན་ནོ། །ཞེས་དང། སྤྱན་རས་གཟིགས་བརྟུལ་ཞུགས་ཀྱིས། མུ་སྟེགས་བྱེད་ཅེས་བྱ་བ་ནི། གང་དག་ཆོས་ཀྱི་ཕྱིར་འཇུག་ངོགས་སུ་འཇུག་པར་བྱེད་པ་སྟེ། ཞེས་གསུངས་པ་སོགས་ཀྱི་དགོངས་པའང་ཆུ་ཀླུང་དུ་འཇུག་པ་ལ་ཐར་ལམ་ཡོད་པར་སྨྲ་བ་དང། དེ་ནི་དྷརྨཱ་ཞེས་པ་མྱང་འདས་སམ། ཐར་པ་དང་བསོད་ནམས་སོགས་གང་དུའང་སྦྱར་ཆོག་པས་མ་ཕྱེ་བར་ཆོས་ཀྱི་རྒྱུར་སྨྲ་བ་ཞེས་བཤད་པ་ཡིན་ཏེ། དགོངས་པ་ཤིན་ཏུ་མཐུན་ནོ། །ཡང་ཁ་ཅིག་དེ་ཐར་པར་འཇུག་པའི་སྟེགས་མིན་ན། སྒྲ་སྦྱོར་བམ་གཉིས་ལས། ཏཱིརྠ་ཀ་ནི། ཏཱིརྠཾྱབིངྱ་ཏེ་ཏཱི་ནྲ་ཀཿ ཞེས་བྱ་སྟེ། མཚོའི་འགྲམ་ནི་མཚོར་འཇུག་པའི་སྟེགས་འཆའ་བ་དང་འདྲ་བར། དཀའ་ཐུབ་དང་རྣལ་འབྱོར་སོགས་སྣ་ཚོགས་སྤྱོད་ཅིང་མྱང་འདས་ཀྱི་རྒྱ་མཚོར་འཇུག་པའི་སྟེགས་འཆའ་བས་ན་མུ་སྟེགས་ཅན་ཞེས་བྱ། ཞེས་གསུངས་པ་ཇི་ལྟར་དྲང་ཞེ་ན། དེ་ནི་ཐུན་མོང་གི་གྲགས་པ་དང་སྒོ་བསྟུན་པའི་སྒྲ་བཤད་ཙམ་ཡིན་པས། སྒྲ་བཤད་པའི་ཚེ་དེ་ལྟར་བཤད་ཀྱང་དོན་ངོ་བོ་ལ་དེ་བཞིན་ཁས་ལེན་མི་རུང་བ་དུ་མ་ཡོད་པའི་ཕྱིར། ཚངས་པ་ལ་བྱེད་པོ་དང། འཕྲོག་བྱེད་ལ་ཁྱབ་འཇུག་ཅེས་སྒྲ་བཤད་པའི་ཚེ་འཇིག་རྟེན་གྱི་བྱེད་པ་པོ་ཡིན་པ་དང། སྣོད་བཅུད་ཐམས་ཅད་ལ་ཁྱབ་པ་ཞེས་བཤད་ཀྱང་

― GTD003_Page_0261 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་བོ་ལ་དེ་ལྟར་མ་ཡིན་པ་བཞིན་ནོ། །འོ་ན་སྟག་ལོ་དང་འདི་གཉིས་ཀྱིས་བཤད་ཚུལ་ཡང་སྒྲ་བཤད་ཙམ་ཡིན་མོད་སྙམ་ན། དེ་མ་ཡིན་ཏེ། ཡང་དག་པའི་ལྟ་བ་གོ་བའི་དབང་གིས། འཇིག་རྟེན་ཕལ་པ་ལས་ཁྱད་པར་དུ་གྱུར་ཅེས་དང། ཕལ་པ་ལས་ནི་ཆེས་མཆོག་ཏུ་གྱུར་ཏེ། ཤེས་བྱའི་གནས་ལུགས་ལ་དཔྱོད་པ་ལ་སོགས་པས་སོ། །ཞེས་ཐར་པའི་སྟེགས་སུ་འགྱུར་བའི་རྒྱུ་མཚན་དང་བཅས་བསྒྲུབས་པས་ཁོ་རང་རྣམས་རང་ལུགས་སུ་བཞེད་པར་མངོན་ནོ། །ཡང་ཕྱི་རོལ་པའི་ལྟ་བ་དག་ཡང་དག་པའི་ལྟ་བ་གོ་བའི་སྟེགས་སུ་མི་འགྱུར་ན། མདོ་དང་བསྟན་བཅོས་རྣམས་སུ་དེའི་ཚུལ་མང་དུ་གསུངས་པ་དགོས་མེད་དུ་ཐལ་ལོ་ཞེ་ན་སྐྱོན་མེད་དེ། ལས་ཉོན་རྣམས་ཐར་པར་བགྲོད་པའི་གྲོགས་མིན་ཡང་ཐར་པར་སྒྲོད་ཚུལ་སྟོན་པ་ལ་སྤང་བྱ་དེ་དག་སྔོན་དུ་བཤད་དགོས་པ་ལྟར། ཕྱི་བའི་ལྟ་བ་རང་གི་ངོ་བོའི་སྒོ་ནས་དེའི་སྟེགས་མིན་ཡང། ཡང་དག་པའི་ལྟ་བར་འཇུག་པ་ལ་གོལ་ས་དེ་དག་ངོ་ཤེས་པར་བྱས་ནས་སྤངས་ཏེ། ལམ་ཡང་དག་པ་འཚོལ་དགོས་པའི་རྒྱུ་མཚན་གྱིས་མང་དུ་གསུངས་པ་ཡིན་པའི་ཕྱིར། ཀུན་མཁྱེན་འཇིགས་མེད་དབང་པོའི་གྲུབ་མཐའ་རིན་ཆེན་ཕྲེང་བ་ལས། ལྟ་བ་ངན་པའི་མུ་ལ་སྟེགས་འཆའ་བའི། །ཕྱི་རོལ་གྲུབ་མཐའི་རང་བཞིན་མ་ལུས་པ། །ལེགས་པར་ཤེས་ཏེ་སྤོང་བར་བྱེད་པ་ནི། །ཐར་པའི་གྲོང་དུ་འཇུག་པའི་ཐེམ་སྐས་སོ། །ཞེས་དང། རྗེ་བཙུན་བློ་བཟང་ཆོས་ཀྱི་ཉི་མའི་གྲུབ་མཐའ་ཤེལ་གྱི་མེ་ལོང་ལས། དེ་ཕྱིར་ལྟ་ངན་མུ་ལ་སྟེགས་འཆའ་བའི། །ཕྱི་རོལ་

― GTD003_Page_0262 ―

^{[མ་དཔེ་གཟིགས་ན་འདིར་གནོན།]}

[Full Size]

གྲུབ་མཐའི་རྣམ་གཞག་ལེགས་ཤེས་ནས། །སྤོང་བར་བྱེད་པར་ཐར་པའི་གྲོང་ཁྱེར་དུ། །འཇུག་པའི་ཐེམ་སྐས་ཉིད་ཅེས་མཁས་རྣམས་གསུངས། །ཞེས་པ་ལྟར་རོ། །དེར་མ་ཟད་ཆོས་ཀྱི་དེ་ཉིད་འབྱེད་པའི་རྣམ་དཔྱོད་ཅན་རྣམས་ཀྱིས་གཞན་སྡེའི་གཞུང་ལ་ཇི་ཙམ་དཔྱད་པ་བཞིན་གྱིས་མི་གཙང་བའི་ཁྲོན་པ་རློག་པ་ལྟར་ཞེན་པ་ལྡོག་ཅིང། སངས་རྒྱས་ཀྱི་བསྟན་པ་ལ་གུས་པར་འགྱུར་ཏེ། ཁྱད་པར་འཕགས་བསྟོད་ལས། མུ་སྟེགས་གཞན་གྱི་གཞུང་ལུགས་ལ། །ཇི་ལྟ་ཇི་ལྟར་རྣམ་བསམ་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་སེམས་འདི་དད་པར་གྱུར། །ཅེས་སོ། །དེ་བཞིན་དུ་རྗེ་བླ་མའི་གསུང་དང་མི་མཐུན་པ་རྣམས་ལ་བལྟས་པ་ན། བློ་གྲོས་ཕུལ་ཏུ་ཕྱིན་པ་ཞིག་ཡོད་ཚེ་རྗེའི་གསུང་ལ་ལྷག་པར་ཡིད་ཆེས་སྐྱེ་བས་གཞན་ལ་འགྲམ་ཆུ་མི་ལྡང་བ་ཞིག་འབྱུང་ཡང། ད་ལྟ་ཐམས་ཅད་གཟུགས་བརྙན་ཁོ་ནར་སོང་བས་ཆོས་ཀྱི་ཆེ་བ་འདོན་ཚུལ་ཀུན་བྱང་གི་འཇུག་ལྡོག་ལས་བརྩམས་ཏེ་དཔྱད་པ་གསུམ་དང་རིགས་པ་བཞིའི་རྣམ་དབྱེ་ཅི་ཡང་མི་དགོས་པར། བཤད་པ་པོས་ངའི་འདི་ཟབ་མོ་ཁྱད་ཆོས་ཅན་ཞིག་ཡིན་ནོ་ཞེས་དམ་བཅས་པ་ཁོ་ནས་ཆོག་པ་དག་ལ་ལུང་རིགས་རྣམ་དག་གིས་དགོས་པ་ཅི་ཡང་སྒྲུབ་ཏུ་མེད་དོ། །ཡང་རིན་ཆེན་དོན་གྲུབ་ཀྱི་ཊཱིཀྐར་ཤོ་ལོ་ཀ་འདིའང་སློབ་པའི་གནས་སྐབས་དང། དེའི་ནང་ནས་ཀྱང་བསྡུ་བཞིའི་དོན་སྤྱོད་ལ་སྦྱར་བར་གོང་དུ། བདག་སྔོན་ཐབས་ཤེས་གྱུར་པ་ན། །སེམས་ཅན་ལྟ་ངན་ལས་བསྒྲལ་ཅེས་པ་དེ་ཉིད་དོན་སྤྱོད་པར་སྦྱར་ཡོད་པ་དང་ཟློས་ཀྱིས་དོགས་ནས། ཟློས་སྤོང་དུ་སྔ་མ་ནི་གྲུབ་མཐའ་ལ་མ་ཞུགས་པའི་འཇིག་རྟེན་ཕལ་པའི་རྒྱུད་ཀྱི་ལྟ་ངན་

― GTD003_Page_0263 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་བསྐྱབ་པ་དང། ཕྱི་མ་མུ་སྟེགས་ཀྱི་གྲུབ་མཐས་བསླད་པའི་ལྟ་ངན་ལས་བསྐྱབ་པ་ལ་བཤད་དོ། །དེ་ནི་བཤད་པའི་རིམ་པ་དང། དོན་གྱི་རིམ་པ་གང་བྱས་ཀྱང་མི་འཐད་དེ། བཤད་ཚུལ་སྔར་བསྡུ་བཞི་སོ་སོར་རྒྱས་པར་བཤད་པ། མཇུག་དོན་བསྡུ་བ་དང་བཅས་སོང་ཟིན་ནས། ཡང་རྒྱས་བཤད་ལ་འཇུག་ན་གོང་འོག་འཆོལ་བ་ཡིན་པའི་ཕྱིར་དང། དོན་གྱི་དབང་དུ་བྱས་ནའང་མུ་སྟེགས་ཀྱི་གྲུབ་མཐས་བསླད་པའི་བདག་ཏུ་ལྟ་བ་ནི་གནས་སྐབས་སུ་སྒྲོ་བཏགས་པ་ཙམ་ཡིན་པས་སྤོང་སླ་ལ་སྤང་བྱ་ཀུན་བཏགས་དང་མཐོང་སྤང་ཡིན། གྲུབ་མཐས་བཏགས་པ་ལ་མ་ལྟོས་པར་འཇིག་རྟེན་རང་དགའ་བ་ལ་འབྱུང་བའི་བདག་ལྟ་ནི་ལྷན་སྐྱེས་འཁོར་བའི་རྩ་བ་མཐར་ཐུག་ཡིན་པས་སྤོང་དཀའ་ཞིང་སྒོམ་སྤང་ཡིན་པའི་ཕྱིར། འཇུག་པ་ལས། གང་དག་དུད་འགྲོར་བསྐལ་མང་བསྐྱལ་གྱུར་པ། །དེས་ཀྱང་མ་སྐྱེས་རྟག་འདི་མ་མཐོང་ལ། །ངར་འཛིན་དེ་དག་ལ་ཡང་འཇུག་མཐོང་སྟེ། །ཞེས་པ་རྩ་འགྲེལ་ཐམས་ཅད་དང། ལམ་རིམ་ལས། ཀུན་བཏགས་ཀྱི་མ་རིག་པ་ནི་གྲུབ་མཐའ་སྨྲ་བ་དེ་དག་ཁོ་ན་ལ་ཡོད་པས་འཁོར་བའི་རྩ་བར་མི་རིགས། ཞེས་གསུངས་པའི་ཕྱིར། དེས་ན་སྔར་ཀུན་བཏགས་ལས་བསྐྱབས་ནས། དེ་རྗེས་ལྷན་སྐྱེས་ལས་སྐྱོབ་དགོས་ཀྱི། གོ་རིམ་བཟློག་མི་རིགས་སོ། །རང་ལུགས་སྔ་མ་སློབ་པའི་སྐབས་དང། ཕྱི་མ་སངས་རྒྱས་ནས་ཀྱང་ལྟ་ངན་ཐམས་ཅད་ཟིལ་གྱིས་མནན་པ་ལ་སྦྱར་ཏེ། གཉིས་ཀར་ཀུན་བཏགས་ལྷན་སྐྱེས་ཐམས་ཅད་བཞག་ཆོག་པས་ཟློས་སྤོང་གི་ངལ་བ་མི་དགོས་སོ། །ཁོང་གིས། མུ་སྟེགས་ཅན་གཞན་དག་ཅེས་པའི་གཞན་གྱི་སྒྲས་སེམས་ཅན་ཕལ་

― GTD003_Page_0264 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལས་གཞན་དུ་བསྟན་གསུངས་པའང། ཁོང་དུས་ཕྱིས་ཡི་གེའི་རྣམ་དབྱེ་སོགས་ལ་རྩོད་མེད་ཀྱི་པཎྚི་ཏར་བྱེད་ཀྱིན་འདུག་པས་གོ་ཚུལ་གཅིག་ཡོད་ལས་ཆེའང། གཞུང་སྤྱི་སྐད་དུ་མུ་སྟེགས་ཅན་ལ་གཞན་དང་གཞན་སྡེ་སོགས་སུ་བཤད་པ་དེ། ནང་པ་ལ་ལྟོས་ཏེ་གཞན་དུ་བཞག་པ་ལས་སེམས་ཅན་ཕལ་པ་ལ་ལྟོས་ཏེ་གཞན་དུ་བཞག་པ་ཞིག་མ་མཐོང་བར་མ་ཟད། ཕལ་པ་ལ་ལྟོས་ཏེ་གཞན་དུ་འཇོག་ན་དམ་པར་འགྱུར་རམ་ཡང་སྙམ་མོ། །ཡང་ཁ་ཅིག་འདི་སྐད་ཅེས། འདི་སངས་རྒྱས་ཀྱི་མཛད་པ་དང་སྦྱོར་ན། སངས་རྒྱས་ཀྱི་མཛད་པ་ལ་མཛད་པ་བཅུ་གཉིས་སོགས་མང་དུ་ཡོད་པས། གཞན་མ་སྨོས་པར་མུ་སྟེགས་སོགས་ཀྱི་ལྟ་བ་ངན་པ་ལས་བསྐྱབ་པ་ཁོ་ན་ཅིའི་ཕྱིར་སྨོས་ཤེ་ན། འདི་གནད་ཤིན་ཏུ་ཆེ་སྟེ། བསྔོ་བ་འདིའི་ལུས་ཡོངས་སུ་རྫོགས་པའི་བརྗོད་དོན་ནི་བསྟན་པ་རྒྱས་པ་ཁོ་ནའི་ཕྱིར་ཡིན་ལ། བསྟན་པ་དེ་ཉིད་བསྟན་པ་སྐྱོན་མེད་འགྱུར་བའི་རྩ་བ་སྟོན་པ་པོ་ལ་རག་ལས་ཤིང། སྟོན་པའང་སྟོན་པར་འཇོག་པ་བསྟན་པའི་སྲོལ་ཐོག་མར་ཕྱེ་བ་དེའི་སྒོ་ནས་འཇོག་དགོས་པའི་ཕྱིར། སྟོན་པའི་མིང་གིས་བཏགས་པ་ནི་བདག་ཅག་གི་སྟོན་པ་གཅིག་པུ་མ་ཡིན་གྱི། བདག་ལྟའི་ཞེན་ཡུལ་སྒྲུབ་པའི་སྟེང་ནས་རང་གི་རྗེས་འཇུག་ལ་ཐར་ལམ་ལྟར་སྣང་སྟོན་པ་མུ་སྟེགས་པའི་སྟོན་པ་དང། བདག་ལྟའི་ཞེན་ཡུལ་འགོག་པའི་སྒོ་ནས་སོ་སོའི་སྐལ་བ་དང་འཚམ་པར་བདེན་པ་བཞི་དང་སྟོང་པ་རྟེན་འབྱུང་སོགས་ཀྱི་ཐར་ལམ་སྟོན་པ་བདག་ཅག་གི་སྟོན་པ་གཉིས་སུ་ཡོད་ཀྱང། བདག་ཅག་གི་སྟོན་པས་མི་འཇིགས་པ་བཞིའི་སྒོ་ནས་དམ་པའི་ཆོས་ཀྱི་སེང་གེའི་སྒྲ་བསྒྲགས་པ་ན། མུ་སྟེགས་ཀྱི་སྟོན་པས་བཤད་པ་ཐམས་ཅད་བྱིས་པའི་རྡོལ་གཏམ་

― GTD003_Page_0265 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་སྙིང་པོ་མེད་པ་དང་མ་འབྲེལ་བ་ཁོ་ནར་གྱུར་ཏེ། ཉི་མའི་འོད་ཀྱིས་མེ་ཁྱེར་བཞིན་དུ་སྨྲ་བ་ངན་པའི་ལྟ་བ་ཐམས་ཅད་ཟིལ་གྱིས་གནོན་པས་ན་བདག་ཅག་གི་སྟོན་པ་གཅིག་པུ་ངེས་པ་དོན་གྱི་སྟོན་པ་དང། ཚད་མའི་སྐྱེས་བུ། སྨྲ་བའི་དམ་པ་སོགས་སུ་འགྲུབ་ལ། དེ་གྲུབ་ན་དེའི་བསྟན་པ་ཁོ་ན་ཐར་འདོད་ཀྱི་འཇུག་ངོགས་སུ་གྲུབ་པའི་ཕྱིར། རྩ་ཤེ་ལས། རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་ཞེས་དང། བུདྡྷ་པཱ་ལི་ཏ་ལས། བཅོམ་ལྡན་འདས་ཀྱིས་ཕྱི་རོལ་པ་ཕས་ཀྱི་རྒོལ་བ་ཐམས་ཅད་བྱིས་པ་བསླུ་བ་དང་འདྲ་བར་ཐུགས་སུ་ཆུད་ནས། ཞེས་པ་ནས། སྨྲ་བ་རྣམས་ཀྱི་དམ་པ་ཞེས་དང་། ཚིག་གསལ་ལས། དེ་བཞིན་གཤེགས་པ་ཉག་གཅིག་དོན་ཕྱིན་ཅི་མ་ལོག་པར་གསུངས་པ་ཉིད་དུ་གཟིགས་ཤིང་། ཕ་རོལ་པའི་སྨྲ་བ་ཐམས་ཅད་བྱིས་པའི་རྡོལ་ཐབས་སྨྲ་བ་དང་འདྲ་བར་ཞེས་སོགས་དང། རིགས་པ་དྲུག་ཅུ་པའི་འགྲེལ་པར་ཡང། སངས་རྒྱས་བཅོམ་ལྡན་འདས་ཉིད་ནི་རྟེན་ཅིང་འབྲེལ་བར་འབྱུང་བ་གསུང་བ་ཉིད་ལ་རྒྱུ་ཡིན་ཅིང། རྟེན་ཅིང་འབྲེལ་བར་འབྱུང་བ་གསུང་བ་ཉིད་ནི་སངས་རྒྱས་བཅོམ་ལྡན་འདས་ཉིད་ལ་རྒྱུ་ཡིན་ཏེ། ཞེས་གསུངས་ཤིང། དེ་དག་གི་དོན་བསྡུས་ནས་རྗེ་བླ་མས། སྟོན་པ་ཞེས་བྱ་ཁྱོད་ཉིད་དེ། །ཝ་སྐྱེས་ལ་ནི་སེང་གེ་བཞིན། །མུ་སྟེགས་ཅན་ལའང་གཅམ་བུའི་ཚིག །ཅེས་གསུངས་ལ། མདོ་དང་རྣམ་འགྲེལ་གྱིས་ཀྱང་ལུགས་འབྱུང་ལུགས་ལྡོག་གཉིས་ཀྱིས་བདེན་བཞིའི་བླང་དོར་རང་དབང་དུ་སྟོན་པའི་སྒོ་ནས་གདུལ་བྱ་ཡང་དག་པའི་ལམ་མ་ནོར་བ་ལ་འཁྲིད་པ་ཁོ་ན་སྟོན་པ་ཚད་མའི་སྐྱེས་བུ་མཐར་ཐུག་པར་འཇོག་

― GTD003_Page_0266 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་དུ་གསུངས་སོ། །འདིས་མཛད་པ་གཞན་རྣམས་མ་བསྡུས་པའི་སྐྱོན་མེད་དེ། སྨྲ་ངན་མཐའ་དག་ཟིལ་གྱིས་གནོན་པའི་ཆོས་འཁོར་བསྐོར་བའི་མཛད་པ་བསྟན་པ་ན། བྱང་ཆུབ་པའི་མཛད་པ་ཡན་ཆད་ནི་ཆོས་འཁོར་བསྐོར་བའི་སྦྱོར་བ་ཡིན་པའི་ཕྱིར་དང། མཛད་པ་ཐམས་ཅད་ལས་མཆོག་དང་གཙོ་བོར་གྱུར་པ་གསུང་གི་མཛད་པ་ཡིན་པའི་ཕྱིར་རོ། །མུ་སྟེགས་ཀྱི་ལྟ་བའི་དབྱེ་བའང་ལེགས་ལྡན་ཆེ་ཆུང་སོགས་ཀྱིས་བཤད་པ་ལྟར་ལྟ་བ་ལྔ་བརྒྱ་བདུན་ཅུ་དང་། སུམ་བརྒྱ་དྲུག་ཅུ་རྩ་གསུམ། ལྟ་བའི་རྩ་བ་བརྒྱ་རྩ་བཅུ། ཡ་མཚན་གྱི་ལྟ་བ་གོ་དྲུག །ལྟ་ངན་རེ་གཉིས། དམ་པ་མ་ཡིན་པའི་ལྟ་བ་ཉེར་བརྒྱད། འཇིག་ལྟ་ཉི་ཤུ། འཇིག་རྟེན་ཕ་རོལ་སྨྲ་བ་བཅུ་དྲུག །ལུང་མ་བསྟན་གྱི་ལྟ་བ་བཅུ་བཞི་ལ་སོགས་པ་རྣམ་གྲངས་ཤིན་ཏུ་མང་ཡང། དེ་ཐམས་ཅད་ལམ་ལོག་པར་ཞུགས་པའི་དབང་གིས་འཁོར་བའི་རྒྱ་མཚོར་འཁྱེར་བྱེད་ཡིན་པས་ཆུ་བོ་ཞེས་བཤད་དེ། ཀུན་བཏུས་ལས། ཆུ་བོ་ནི་བཞི་སྟེ། འདོད་པའི་ཆུ་བོ་དང། སྲིད་པའི་ཆུ་བོ་དང། ལྟ་བའི་ཆུ་བོ་དང། མ་རིག་པའི་ཆུ་བོའོ། །ཞེས་པ་ནས། ལོག་པས་ཚངས་པར་སྤྱོད་པ་ཚོལ་བ་ལ་ཞུགས་པ་ནི་ཐ་མ་གཉིས་ཏེ། ཞེས་དང། མཛོད་རང་འགྲེལ་ལས། འཁྱེར་བར་བྱེད་པའི་ཆུ་བོ་དག་ཡིན་ནོ། །ཞེས་གསུངས་པའི་ཕྱིར། དེ་ལྟར་ལྟ་བ་ངན་པའི་ཆུ་བོ་བསྒྲལ་ནས་གང་ལ་འགོད་པར་བྱ་བ་ཡང་དག་པའི་ལྟ་བའི་གཙོ་བོ་ནི་སྟོང་པ་རྟེན་འབྱུང་དང། རྟེན་འབྱུང་སྟོང་པའི་དོན་དུ་མཐོང་བ་རྟག་ཆད་སྤྲོས་པའི་མཐའ་བརྒྱད་དང་བྲལ་བའི་དབུ་མའི་ལྟ་བ་མཐར་ཐུག་པ་ཡིན་ཀྱང། ཐོག་མ་ཁོ་ན་ནས་དེ་ལ་བཀོད་པ་མ་ཡིན་གྱི། སོ་སོའི་བློ་ཚོད་དང་སྦྱར་ཏེ། རིན་ཆེན་འཕྲེང་བ་ལས།

― GTD003_Page_0267 ―

^{[མ་དཔེ་གཟིགས་ན་འདིར་གནོན།]}

[Full Size]

བརྡ་སྤྲོད་པ་དག་ཇི་ལྟ་བུར། །ཡི་གེ་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཅི་ཙམ་བཟོད་པའི་ཆོས་སྟོན་ཏོ། །ཁ་ཅིག་ལ་ནི་སྡིག་པ་ལས། །རྣམ་པར་བཟློག་ཕྱིར་ཆོས་སྟོན་ཏེ། །ཁ་ཅིག་བསོད་ནམས་འགྲུབ་བྱའི་ཕྱིར། །ཁ་ཅིག་ལ་ནི་གཉིས་བསྟེན་པ། །ཁ་ཅིག་ལ་ནི་གཉིས་མི་བསྟེན། །ཟབ་མོ་ཁུ་འཁྲིག་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་དང། བཞི་བརྒྱ་པ་ལས། བསོད་ནམས་མིན་པ་དང་པོར་བཟློག །བར་དུ་བདག་ནི་བཟློག་པ་དང། །ཐ་མ་ལྟ་ཞིག་ཀུན་བཟློག་པ། །ཞེས་སོགས་ཀྱི་དོན་བསྡུས་ཏེ་ཀུན་མཁྱེན་འཇམ་དབྱངས་བཞད་པས། དང་པོར་ལས་འབྲས་སོགས་ཀྱིས་བསོད་མིན་བཟློག །བར་དུ་མི་རྟག་སོགས་ཀྱིས་བདག་གཉིས་བཟློག །ཐ་མར་དེ་ཉིད་མངོན་དུ་གྱུར་རིམ་གྱིས། །ལྟ་ཀུན་དྲི་བཅས་འཇོམས་པར་མདོ་སྔགས་བཞེད། །ཅེས་གསུངས་པ་ལྟར་ཡིན་པས། དེ་བཞིན་བྱས་ན་ཡང་དག་པའི་ལྟ་བ་ལ་འགོད་པར་གསུངས་པའི་ཁོངས་འདིར་དགོངས་འགྲེལ་ལྟར་ན་འཁོར་ལོ་གསུམ་དང། གཟུངས་རྒྱལ་གྱི་མདོ་ལས་ནོར་བུ་སྦྱོང་བའི་དཔེས་གདུལ་བྱ་བཀྲི་བའི་རིམ་པ་གསུམ་དུ་བཤད་པ་ལྟར། ཆོས་ཀྱི་ཕུང་པོ་ཇི་སྙེད་ཅིག་གསུངས་པ་ཐམས་ཅད་བསྡུས་ཏེ་བསྟན་པ་ཡིན་ནོ། །བཅོམ་ལྡན་འདས་ཀྱི་གཞན་ལ་ཕན་པའི་མཛད་པ་ཆོ་འཕྲུལ་རྣམ་པ་གསུམ་གྱིས་བསྡུས་པ་མཐའ་ཡས་པ་ཞིག་ཡོད་ཀྱང། སྙིང་པོར་གྱུར་པ་ནི་འགྲོ་བ་རྣམས་ཀྱི་སྲིད་པའི་ཟུག་རྔུ་མ་ལུས་པ་རྒྱུན་གཅོད་བྱེད་ཀྱི་ཡང་དག་པའི་ལྟ་བ་འདི་ཉིད་ཡིན་ལ། སྟོན་པར་འཇོག་བྱེད་ཀྱི་གཙོ་

― GTD003_Page_0268 ―

^{[མ་དཔེ་གཟིགས་ན་འདིར་གནོན།]}

[Full Size]

བོའང་འདི་ཡིན་པས། གདུལ་བྱ་གང་ལ་ལྟ་བ་དེ་ཉིད་ལེགས་པར་བསྟན་པ་ན། དེ་ལ་སྟོན་པའི་བྱ་བ་བྱས་ཟིན་པ་ཡིན་ཏེ། མདོ་ལས། སྲིད་པའི་ཟུག་རྔུ་གཅོད་བྱེད་ལམ། །ངས་ནས་ཁྱེད་ཅག་རྣམས་ལ་བསྟན། །ཁྱེད་ཅག་རྣམས་ཀྱིས་བསྒྲུབ་བྱ་སྟེ། །དེ་བཞིན་གཤེགས་པ་སྟོན་མཛད་ཡིན། །ཞེས་སོ། །དེ་ལྟར་སྟོན་པ་ཐུགས་རྗེ་ཅན་གྱིས་ཐུགས་བརྩེ་བའི་སྒོ་ནས་སྟོན་པའི་བྱ་བ་མཛད་པ་དེའི་རྟེན་འབྲེལ་ལམ་བདེན་པས། རྗེས་འཇུག་རྣམས་སློབ་མའི་བྱ་བ་དེས་གསུངས་པའི་ཆོས་ཚུལ་བཞིན་དུ་སྒྲུབ་པར་སྨོན་པ་ནི། བདག་འཁོར་རྟག་ཏུ་གུས་གྱུར་ཅིག །ཅེས་སོ། །དད་པ་དང་གུས་པ་ནི་ལག་པ་ཐལ་མོ་སྦྱར་ཏེ་མིག་ཟིམ་ཟིམ་བྱས་པ་ཙམ་ལ་མི་འཇོག་གི། དད་གུས་རྣལ་མ་སྐྱེས་པའི་ཚད་ནི་རྐྱེན་ཅི་འདྲ་ཞིག་ཐོག་ཏུ་བབས་ཀྱང་ཆོས་མི་གཏོང་བ་ཞིག་དགོས་པའི་ཕྱིར་ཏེ། རིན་ཆེན་འཕྲེང་བ་ལས། འདུན་དང་ཞེ་སྡང་འཇིགས་པ་དང། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ཞེས་འགྲོ་བ་བཞིས་ཆོས་ལས་མི་འདའ་བ་དང་། ཐེག་ཆེན་ལྟར་ན་ཅི་བྱས་གཞན་དོན་དུ་འགྲོ་བ་ཞིག་བྱུང་བའི་ཚེ་སངས་རྒྱས་ལ་མཆོག་ཏུ་གུས་པའི་ཚད་ཡིན་ཏེ། བྱང་ཆུབ་སེམས་དཔའི་སྡེ་སྣོད་དུ་གནས་བརྟན་བཅུ་དྲུག་ལ་སངས་རྒྱས་ཀྱིས་བཀའ་སྩལ་པ་རྣམས་ཀྱི་དོན་མགོན་པོ་ཀླུ་སྒྲུབ་ཀྱིས་མདོར་བསྡུས་པ་སེམས་ཅན་མགུ་བར་བྱེད་པའི་བསྟོད་པ་ལས། ང་ལ་གུས་པ་སེམས་ཅན་དོན་ཏེ་གུས་པ་གཞན་དག་མིན། །གང་གིས་སྙིང་རྗེ་མ་བཏང་དེ་ཡིས་ང་ལ་གུས་པ་སྟེ། །ཞེས་གསུངས་པ་བཞིན་ནོ། །དེ་ལྟར་སྟོན་པ་དང་བསྟན་པ་ལ་གཅིག་ཏུ་གུས་ཤིང་ཡིད་ཆེས་པར་གྱུར་པ་ན། ལྟ་བ་དང་

― GTD003_Page_0269 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་པ་མི་མཐུན་པ་མེད་པར་དགེ་འདུན་ཞེས་བྱ་བའི་མཚན་དང་དོན་མཐུན་པ་ཞིག་འབྱུང་ཞིང། དེ་ལ་བརྟེན་ནས་བཤད་སྒྲུབ་ཀྱི་བསྟན་པའི་བྱ་བ་རྣམས་གོང་དུ་འཕེལ་བ་དང། དེའི་སྟོབས་ཀྱིས་སྐྱེ་དགུའི་ཕན་བདེ་མ་ལུས་པ་རྒྱས་པར་འགྱུར་བ་ནི། སོ་སོར་ཐར་པའི་མདོ་ལས། དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །ཞེས་དང། མཁས་གྲུབ་སྨྲ་བའི་ཉི་མས། སྐྱེ་དགུ་རྣམས་ཀྱི་ཕན་བདེ་ནི། །མ་ལུས་རྒྱལ་བའི་བསྟན་ལས་འབྱུང། །བསྟན་པའི་ཆུ་བོ་འཕེལ་བའི་གཞི། །དགེ་འདུན་ཆུ་གཏེར་ཆེན་པོ་སྟེ། །ཞེས་གསུངས་པ་ལྟར་རོ། །དེ་ལྟ་བུའི་དགེ་འདུན་རྣམས་ཐུགས་མཐུན་ཞིང་བར་ཆད་མེད་པར་འཁོར་ལོ་གསུམ་གྱི་བྱ་བ་ལ་བརྩོན་པ་ནི་ལེགས་ཚོགས་ཀུན་གྱི་གཞི་རྟེན་ཡིན་པ་ལ་དགོངས་ཏེ། རྒྱལ་སྲས་ཞི་བ་ལྷས་ཀྱང། གཙུག་ལག་ཁང་རྣམས་ཀློག་པ་དང། །ཁ་ཏོན་གྱིས་རྒྱས་ལེགས་གནས་ཤོག། །རྟག་ཏུ་དགེ་འདུན་མཐུན་པ་དང། །དགེ་འདུན་དོན་ཡང་འགྲུབ་པར་ཤོག །ཅེས་གསུངས་སོ། །སྨྲས་པ། བསྟན་པའི་བདག་པོ་སྟོན་པ་རྫོགས་སངས་རྒྱས། །བསྟན་པའི་བདག་ཉིད་ལུང་རྟོགས་དམ་པའི་ཆོས། །བསྟན་པའི་སྲོལ་འཛིན་འཕགས་པའི་དགེ་འདུན་རྣམས། །བསྟན་འགྲོའི་དགེ་ལེགས་སྤེལ་བའི་ཤིས་པ་སྩོལ། །རྒྱལ་བས་གང་ལ་བསྟན་པ་གཏད་པའི་ཡུལ། །སྤྲུལ་པའི་དགྲ་བཅོམ་འཕགས་པའི་གནས་བརྟན་རྣམས། །བསྟན་འདི་འཛིན་སྐྱོང་སྤེལ་བའི་ཐབས་མཁས་ཀྱི། །འཕྲིན་ལས་སྒོ་བརྒྱ་དབྱེ་བའི་དུས་ལ་བབས། །ཐུབ་པའི་

― GTD003_Page_0270 ―

^{[མ་དཔེ་གཟིགས་ན་འདིར་གནོན།]}

[Full Size]

ཉི་མ་དངོས་ཀྱི་གདུལ་བྱའི་མཐའ། །རྫོགས་པས་ཆོས་དབྱིངས་ནུབ་རིར་གཞོལ་བ་ན། །སྙིགས་མའི་འགྲོ་ལ་རྗེས་ཆགས་ཕྱི་བཞིན་དུ། །གཟིགས་པའི་གསུང་གི་འོད་དམར་འདི་སྤྲོས་སོ། །བསྔོ་བའི་རྒྱལ་པོ་འདི་ནི་ཕྱོགས་ཀུན་ཏུ། །རླུང་ལྟར་གྲགས་པས་ཐོས་པ་དོན་ལྡན་ཡང། །བརྗོད་དོན་ལེགས་པར་སེམས་པ་དང་བཅས་ན། །ལྷག་པར་བསོད་ནམས་མི་ཟད་གཏེར་དུ་འགྱུར། །དེ་ཕྱིར་བདག་གིས་འདིར་འབད་དགེ་བའི་མཐུས། །མཁའ་མཉམ་འགྲོ་བའི་མ་རིག་མུན་སེལ་ཞིང། །མངོན་མཐོ་ངེས་ལེགས་ལམ་བཟང་སྣང་བྱེད་པ། །བསྟན་པའི་སྒྲོན་མེ་ཡུན་དུ་གསལ་གྱུར་ཅིག །བསྟན་པའི་བདག་པོ་རྒྱལ་བ་ཡབ་སྲས་ཀྱི། །ཕུལ་བྱུང་མཛད་འཕྲིན་གྲགས་པས་ས་ཁྱབ་ཅིང། །སྐྱེས་སྤྲུལ་མཐའ་དག་དམ་པའི་མཚན་དོན་དང། །མཐུན་པར་སྤྱོད་པས་ས་སྟེང་མཛེས་གྱུར་ཅིག །མཐའ་དབུས་ཕྱོགས་ཀྱི་དགེ་འདུན་སྡེ་རྣམས་ཀུན། །བག་ཡོད་ཆོས་མཐུན་འཚོ་བས་ཆོག་ཤེས་ཤིང། །གེགས་མེད་བཤད་སྒྲུབ་ལས་ལ་གཞོལ་བ་ཡིས། །ལྷག་བསམ་རྣམ་དཔྱོད་འགྲན་བཞིན་འཕེལ་བར་ཤོག །བདག་ཀྱང་མ་འོངས་སྐྱེ་བའི་འཕྲེང་བ་རུ། །དཀོར་རྫས་གཞལ་བའི་སྲང་དུ་མི་འགྱུར་བར། །འཁོར་ལོ་གསུམ་གྱིས་རྒྱལ་བསྟན་འཛིན་བཟོད་པ། །ཀུན་མཁྱེན་བླ་མའི་རྣམ་ཐར་སྐྱོང་གྱུར་ཅིག །དུས་མཐའ་འདིར་ཡང་ཐུབ་བསྟན་རྫོགས་པའི་ཁུར། །རང་ཉིད་གཅིག་པུས་འཁྱེར་ལ་མི་ངལ་བ། །ཡབ་རྗེ་འཇིགས་མེད་དབང་པོར་སྙིང་ནས་འདུད། །བརྩེ་ལྡན་དེ་ཡི་བཞེད་པ་འགྲུབ་གྱུར་ཅིག །ཅེས་བསྔོ་བའི་རྒྱལ་པོ་བསྟན་འབར་མའི་དགོངས་དོན་རྒྱ་ཆེར་འགྲེལ་པ་ལེགས་བཤད་བསྟན་

― GTD003_Page_0271 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྒྲོན་མེ་ཞེས་བྱ་བ་འདི་ནི། སྔ་སོར་དགོན་པའི་ཁྲིར་སྡོད་སྐབས་ཀུན་མཁྱེན་མཆོག་གི་བཀས་བཅད་ལྟར་ལོ་རེ་བཞིན་གླིང་བསྲེའི་སྐབས་སུ་བཀའ་པོད་ལྔའི་སྟེང་ནས་བཤད་པ་བྱེད་དགོས་པས། ལོ་དང་པོར་ས་བཅད་ཞིབ་རྒྱས། གཉིས་པ་དང་ལྔ་བར་དཀའ་གནད་དོགས་གཅོད་དང་བཅས་པའི་གཟབ་བཤད། གསུམ་པར་བཀའ་པོད་སོ་སོའི་ཆོས་འབྱུང་དང་སྦྲགས་པ། བཞི་པར་བཀའ་པོད་ལྔ་ཀ་ལམ་གྱི་ལུས་གཅིག་ཏུ་དྲིལ་བ། དྲུག་པར་བསྟན་འབར་མའི་བརྗོད་དོན་བསླབ་པ་གསུམ་དུ་བསྡུས་ཤིང། དེ་སྟོན་པ་མདོ་འདུལ་གཉིས་དང་ལུང་གི་མངོན་པ་གོང་འོག་རིགས་པའི་མངོན་པ་སྟེ་བཀའ་པོད་ལྔར་འགྱུར་ཚུལ་གྱི་སྟེང་ནས་བཤད་པ་བྱས་པར་བརྟེན། རྣམ་དཔྱོད་ཅན་འགའ་ཞིག་གིས་དེའི་ནང་ནས་བསྟན་འབར་མ་རང་རྐྱང་གི་བཤད་པ་རྣམས་ལོགས་སུ་བཀོལ་བའི་ཊཱིཀྐ་ཞིག་དགོས་ཞེས་བསྐུལ་མ་བྱུང་ཡང་རིམ་འགྱངས་སུ་ལུས་པ་ཉེ་ཆར་པ་རོན་སུ་ཉིད་ཤོག་ནས་གཞུང་བརྒྱ་སྨྲ་བའི་དབང་པོ་རྡོ་རམས་པ་ངག་དབང་རབ་བརྟན་དང། ཧལ་ཧ་དར་ཧན་པཻ་ལིའི་ཤོག་ནས་ལྷག་བསམ་དང་རྣམ་དཔྱོད་ཕུལ་དུ་བྱུང་བ་ཏཱ་བླ་མ་དཀོན་མཆོག་ཆོས་འཛིན་གཉིས་ཀྱིས་ནན་ཏན་དུ་བསྐུལ་བའི་ངོར། དབུས་འགྱུར་བསྟན་པའིསྲོག་ཤིང་སྙན་བརྒྱུད་མན་ངག་གི་མཛོད་འཛིན་པ་དམིགས་པ་མེད་པའི་ཐུགས་རྗེ་ཅན་༸རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོ་དང། མདོ་སྨད་སྲིན་པོའི་ཡུལ་ལྟ་བུ་འདིར་ཡང་ཐུགས་བསྐྱེད་ཀྱི་གོ་ཆ་བཙན་པོ་བགོས་ཏེ་ཐུབ་བསྟན་ཡོངས་སུ་རྫོགས་པ་འཁོར་ལོ་གསུམ་གྱི་སྒོ་ནས་འཛིན་སྐྱོང་སྤེལ་བར་བྱེད་པ་ལ་སའི་སྟེང་

― GTD003_Page_0272 ―

^{[མ་དཔེ་གཟིགས་ན་འདིར་གནོན།]}

[Full Size]

ན་འགྲན་པའི་ཟླ་དང་བྲལ་བ་ངེས་པ་དོན་གྱི་ཐམས་ཅད་མཁྱེན་པ་ཆེན་པོ་༸རྗེ་བཙུན་དཀོན་མཆོག་འཇིགས་མེད་དབང་པོ་རྣམ་གཉིས་ཀྱི་ཞབས་རྡུལ་སྤྱི་བོར་བསྟེན་པའི་༸བཙུན་པ་དཀོན་མཆོག་བསྟན་པའི་སྒྲོན་མེས་རབ་བྱུང་བཅུ་བཞི་པའི་བགྲང་བྱ་གཉིས་པ་ས་ཕོ་འབྲུག་གི་ལོ་ཁྲུམས་སྟོད་ཀྱི་ཟླ་བར་དབེན་གནས་ཡིད་དགའ་ཆོས་འཛིན་ནས་མཚམས་ཀྱི་ཐུན་གསེང་དུ་སྦྱར་བའི་ཡི་གེ་པ་ནི་གཙུག་ལག་ལྟ་བའི་བློ་མིག་དང་ལྡན་པ་དགེ་སློང་དཀོན་མཆོག་ཀུན་དགས་བགྱིས་པ་འདིས་ཀྱང་བསྟན་པ་རིན་པོ་ཆེ་ཡུན་རིང་དུ་འབར་བར་གྱུར་ཅིག། །།དགེའོ། །

བསྟན་པའི་འཇུག་སྒོ་སྐྱབས་འགྲོའི་ཁྲིད་ཡིག

― GTD003_Page_0273 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་པའི་འཇུག་སྒོ་སྐྱབས་འགྲོའི་ཁྲིད་ཡིག་ཕན་བདེའི་ལམ་བཟང་གསལ་བའི་སྒྲོན་མེ་ཞེས་བྱ་བ་བཞུགས་སོ། །

― GTD003_Page_0274 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་རཏྣ་ཏྲ་ཡཱ་ཡ། མཁྱེན་དང་བརྩེ་བ་འཕྲིན་ལས་ཕུན་ཚོགས་སྟོན་པ་མཉམ་མེད་རྫོགས་སངས་རྒྱས། །ལུང་དང་རྟོགས་པའི་བསྟན་པ་རིན་ཆེན་སྲིད་ཞིའི་གདུང་སེལ་དམ་པའི་ཆོས། །རིག་དང་གྲོལ་བའི་ཡོན་ཏན་བརྒྱད་ལྡན་འཕགས་པ་ཕྱིར་མི་ལྡོག་པའི་ཚོགས། །ལུས་དང་ངག་ཡིད་གུས་པས་མཆོད་དོ་འབྲལ་མེད་བྱང་ཆུབ་བར་དུ་སྐྱོངས། །གང་ལ་བརྟེན་ན་ནམ་ཡང་མི་སླུ་བའི། །སྐྱབས་ཀྱི་དམ་པ་མཆོག་གསུམ་དབང་གི་རྒྱལ། །དད་པའི་རྒྱལ་མཚན་རྩེ་མོར་ལེགས་མཆོད་ནས། །དངོས་གྲུབ་གྲུ་ཆར་འབེབས་རྣམས་སྐལ་བ་བཟང། །དེ་སླད་མོས་བརྩོན་དགེ་བའི་བློ་གྲོས་ཀྱི། །བགྲོད་པ་མི་དམན་ཞི་བའི་མགྲོན་རྣམས་ལ། །ཕན་བདེའི་ལམ་བཟང་འཇུག་ངོགས་གསལ་བའི་ཕྱིར། །ལེགས་བཤད་གཏམ་གྱི་སྒྲོན་མེ་སྦར་བར་བྱ། །དེའང་འཇམ་མགོན་བླ་མ་ཙོང་ཁ་པའི་ཞལ་ནས། དལ་བའི་

― GTD003_Page_0275 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་འདི་ཡིད་བཞིན་ནོར་ལས་ལྷག །འདི་འདྲ་རྙེད་པ་ད་རེས་ཙམ་ཞིག་ཡིན། །རྙེད་དཀའ་འཇིག་སླ་ནམ་མཁའི་གློག་དང་འདྲ། །ཚུལ་འདི་བསམ་ནས་འཇིག་རྟེན་བྱ་བ་ཀུན། །སྦུན་པ་འཕྱར་བ་བཞིན་དུ་རྟོགས་གྱུར་ནས། །ཉིན་མཚན་ཀུན་ཏུ་སྙིང་པོ་ལེན་པ་དགོས། །ཞེས་གསུངས་པ་ལྟར། དལ་འབྱོར་ཚང་བའི་རྟེན་བཟང་འདི་ལྟ་བུ་ནི་རྒྱུ་དཔེ་ངོ་བོ་གང་གི་སྒོ་ནས་བསམས་ཀྱང་རྙེད་ཚུལ་མི་སྲིད་པ་ཙམ་དུ་དཀོན་ལ། དོན་ཤིན་ཏུ་ཆེ་སྟེ་ཡིད་བཞིན་གྱི་ནོར་བུ་རིན་པོ་ཆེས་ཀྱང་ཚེ་འདིར་དབུལ་བ་སེལ་བ་ཙམ་མ་གཏོགས་ཕྱི་མར་ཕན་པ་ཅུང་ཟད་ཀྱང་མི་ནུས་ལ། རྟེན་འདིའི་སྟེང་ནས་རང་གིས་འབད་ཐུབ་ན་ཟུང་འཇུག་རྡོ་རྗེ་འཆང་གི་གོ་འཕང་ཡང་ཚེ་གཅིག་ཉིད་ལ་འགྲུབ་པས་གཏན་གྱི་བདེ་སྐྱིད་མཐའ་དག་བསྒྲུབ་ནུས་སོ། །རྙེད་དཀའ་དོན་ཆེ་བའི་རྟེན་བཟང་བླ་མ་མཆོག་གསུམ་གྱི་ཐུགས་རྗེར་ལན་གཅིག་

― GTD003_Page_0276 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོབ་པ་འདིའང་འགལ་རྐྱེན་རུ་འཛིངས་པ་རླུང་དམར་ནང་གི་མར་མེ་བཞིན་ནམ་འཆི་ཆ་མེད་པས་མྱུར་བ་མྱུར་བར་གཏན་དུ་ཕན་ངེས་ཀྱི་སྙིང་པོ་ཞིག་ལེན་དགོས་ལ། ཚེ་འདིའི་ཟས་ནོར་ལོངས་སྤྱོད་མངའ་ཐང་སྙན་གྲགས་སོགས་ཅི་ཙམ་རྒྱས་ཀྱང་འཆི་བའི་ཚེ་རྨི་ལམ་གྱི་དགའ་སྟོན་ལྟར་དྲན་པའི་ཡུལ་དུ་བཞག་ནས་འགྲོ་བ་མ་གཏོགས་སྙིང་པོ་ཅིའང་མེད་པ་ནས་ཀྱི་སྦུན་པ་ལོ་བརྒྱར་ཕྱར་ཡང་ནང་ན་སྙིང་པོ་ལེན་རྒྱུ་མེད་པ་དང་འདྲ། དེའི་ཚེ་ཕན་ངེས་པ་དེ་གང་ཡིན་ན་སྤྱོད་འཇུག་ལས། བསྐལ་པ་དུ་མར་རང་དགོངས་མཛད་པ་ཡི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །ཞེས་གསུངས་པ་ལྟར། སྟོན་པ་ཐུགས་རྗེ་ཅན་དེས་རང་ཅག་གི་དོན་དུ་དང་པོར་ཐུགས་བསྐྱེད། བར་དུ་བྱ་དཀའ་བའི་སྤྱོད་པ་དཔག་ཏུ་མེད་པ་སྤྱད། མཐར་རྣམ་པ་ཐམས་ཅད་མཁྱེན་པའི་ཡེ་ཤེས་མངོན་དུ་མཛད་དེ་མ་བུ་གཅིག་པ་ལྟ་བུའི་བརྩེ་བ་ཆེན་པོའི་སྒོ་ནས་སྟོན་པར་མཛད་པའི་ལུང་རྟོགས་ཀྱི་བསྟན་པ་རིན་པོ་ཆེ་འདི་གཉིས་མ་གཏོགས་གཞན་མེད་པས་དེ་ལ་ངེས་པར་འཇུག་དགོས། དེར་འཇུག་ཚུལ་ཡང་རང་གིས་གང་འདོད་བྱས་པས་མི་ཆོག་པར་ཆོས་ཀྱི་སརྒ་མ་ལོག་པ་ཞེས་འཇུག་སྒོ་མ་ནོར་བ་ཞིག་ནས་ཚུལ་བཞིན་དུ་འཇུག་དགོས། དེའང་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས། དང་པོ་བསྟན་དང་ཐེག་ཆེན་ལ། །འཇུག་པའི་སྒོ་དང་གཞུང་ཤིང་ཕྱིར། །ཁ་ཙམ་ཚིག་ཙམ་མ་ཡིན་པའི། །སྐྱབས་འགྲོ་སེམས་

― GTD003_Page_0277 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐྱེད་ནན་ཏན་བྱ། །ཞེས་སོགས་ལྟར་བསྟན་པ་སྤྱིའི་འཇུག་སྒོ་སྐྱབས་འགྲོ། ཐེག་ཆེན་ཐུན་མོང་བའི་འཇུག་སྒོ་སེམས་བསྐྱེད། སྔགས་ཀྱི་ཐུན་མོང་མ་ཡིན་པའི་འཇུག་སྒོ་དབང་ཡིན་པར་གསུངས་པས། ཐོག་མ་ཁོ་ནར་རྒྱལ་བའི་བསྟན་པ་ལ་འཇུག་པའི་སྒོ་གཅིག་པུ་ཕན་བདེ་ལེགས་ཚོགས་མ་ལུས་པའི་འབྱུང་གནས་སྐྱབས་འགྲོ་རྣམ་པར་དག་པའི་རྨང་གཞི་ཟིན་པ་ཞིག་བྱེད་དགོས་སོ། །དེས་ན་འདི་ལ་བཞི། སྐྱབས་སུ་འགྲོ་དགོས་པའི་རྒྱུ་མཚན། སྐྱབས་སུ་འགྲོ་བའི་ཚུལ། སྐྱབས་སུ་སོང་བའི་ཕན་ཡོན། སྐྱབས་འགྲོའི་བསླབ་བྱའོ། །དང་པོ་ནི། བདག་དང་མ་རྒན་སེམས་ཅན་དེ་དག་ཐམས་ཅད་དུས་ཐོག་མ་མེད་པ་ཞིག་ནས་ད་ལྟའི་བར་དུ་སྤྱིར་འཁོར་བ་དང་ཁྱད་པར་ངན་སོང་གསུམ་ལ་གཏན་གྱི་སྡོད་གནས་སུ་བྱས་ཏེ་ཡུན་རིང་ལ་ཤུགས་དྲག་པའི་སྡུག་བསྔལ་བསམ་ལས་འདས་པ་ཞིག་མྱོང་འདུག་ཏུ་ཟིན་ཀྱང་ད་དུང་གཉེན་པོས་བཙན་ཆོད་ཅིག་མ་བྱུང་ན། མྱང་བས་སྡུག་བསྔལ་གྱི་གཏིང་དང་མཐར་ཐོན་པ་ཞིག་ཡོང་མི་སྲིད་པར་འདུག །ད་རེས་རྟེན་འབྲེལ་ཕུན་སུམ་ཚོགས་པའི་དུས་འདིར་རང་གིས་རང་མ་བསླུས་པ་བྱས་ཏེ་འཁོར་བའི་སྡུག་བསྔལ་ཐམས་ཅད་སྤངས་པའི་ཐར་པ་མཆོག་བླ་མ་སངས་རྒྱས་ཀྱི་གོ་འཕང་ཞིག་ཐོབ་པར་མ་བྱས་ན་ཟངས་རྦབ་རི་རྐེད་ནས་འགྲིལ་བ་བཞིན་འདི་ནས་རྡོག་སྣ་ཞིག་འདྲེད་དེ་སླར་ངན་སོང་གི་གཏིང་དུ་ལྷུང་ཕྱིན། དེ་ནས་ཐར་པ་དང་ཐམས་ཅད་མཁྱེན་པ་ལྟ་

― GTD003_Page_0278 ―

^{[མ་དཔེ་གཟིགས་ན་འདིར་གནོན།]}

[Full Size]

ཞོག །བདེ་འགྲོའི་སྒྲ་ཙམ་ཡང་བསྐལ་པ་མུ་མཐའ་ཡས་པར་ཐོས་དཀའ་བའི་སྡུག་བསྔལ་གྱི་གཡང་ས་བརྒྱུད་མ་ནས་བརྒྱུད་མར་ལྷུང་ངེས་ཏེ་རྒྱས་སྲས་ཞི་བ་ལྷས། དེ་ལྟའི་དགེ་བ་ཉམ་ཆུང་ཉིད་ལ་རྟག །སྡིག་པ་སྟོབས་ཆེན་ཤིན་ཏུ་མི་བཟད་པ། །ཞེས་གསུངས་པ་བཞིན། རང་ཅག་རྣམས་དགེ་བ་གང་བྱས་ཤུགས་ཆུང་ལ། སྡིག་པ་གང་བྱས་ཤུགས་ཆེ་ཞིང་ཡན་ལག་མ་ཚང་བ་མེད་ལ་གྲངས་ཀྱང་ཤིན་ཏུ་མང་བས། རྒྱུ་དེ་ལ་དཔག་ན་ཕྱི་མའི་འགྲོ་ས་ངན་སོང་ལས་མ་འདས་པ་ནི། བཞི་བརྒྱ་པ་ལས། ཕལ་མོ་ཆེར་ནི་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོ་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ། །ཞེས་གསུངས་པ་ལྟར་རོ། །དེར་སྐྱེས་ན་གཞན་དབང་ཁོ་ནར་སོང་སྟེ་ཐར་མི་ཐུབ་པའི་ཚུལ་ཡང་དཔལ་ལྡན་ཟླ་བས། གང་ཚེ་རང་དབང་འཇུག་ཅིང་མཐུན་གནས་པ། །གལ་ཏེ་འདི་བདག་འཛིན་པར་མི་བྱེད་ན། །གཡས་སར་ལྷུང་བས་གཞན་དབང་འཇུག་འགྱུར་བ། །དེ་ལས་ཕྱི་ནས་གང་གིས་སློང་བར་འགྱུར། །ཞེས་གསུངས་པ་བཞིན་ཏེ། དེའི་ཚེ་སངས་རྒྱས་བྱང་སེམས་རྣམས་ཀྱིས་བརྩེ་བས་གཟིགས་ཀྱང་རང་གི་ལས་ཀྱིས་བསྒྲིབས་པས་སྐྱོབ་ཐབས་དང་བྲལ་ཞིང་སྐྱབས་ཀྱི་སྣང་བ་མི་འཆར་བར་སྡུག་བསྔལ་དང་འཇིགས་སྐྲག་གི་སྣང་བ་འབའ་ཞིག་ཤར་ཏེ་བྱ་ཐབས་དང་བྲལ་བའི་ཚུལ། སྤྱོད་འཇུག་ལས། སུ་ཞིག་འཇིགས་ཆེན་འདི་ལས་བདག །ལེགས་པར་སྐྱོབ་པར་བྱེད་འགྱུར་ཞེས། །བྲེད་ཤ་ཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་འཚོལ་བར་བྱེད། །ཕྱོགས་བཞིར་སྐྱབས་མེད་མཐོང་ནས་ནི། །དེ་ནས་ཀུན་ཏུ་ཡིད་མུག་འགྱུར། །གནས་དེར་སྐྱབས་ཡོད་

― GTD003_Page_0279 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཡིན་ན། །དེ་ཚེ་བདག་གིས་ཇི་ལྟར་བྱ། །དེ་བས་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །ཞེས་གསུངས་པ་ལྟར་ཡིན་པས། ད་ལྟ་བདེ་འགྲོ་ངན་འགྲོ་གཉིས་ཀྱི་སོ་མཚམས། ཁེ་ཉེན་སྐྱིད་སྡུག་ཀུན་གྱི་འདམ་ཁ་རང་ལག་ན་ཡོད་པའི་དུས་འདིར་བློ་བདེ་བའི་གདེང་ཐོབ་པ་ཞིག་བྱེད་དགོས། དེའང་རང་སྟོབས་ཀྱི་ནུས་པ་ཅིའང་མེད་པས་ལྷ་དཀོན་མཆོག་གསུམ་གྱི་ཞབས་ལ་འཇུས་ནས་སྐྱིད་སྡུག་ལེགས་ཉེས་ཅི་བྱུང་ཡང་ཁྱེད་མཁྱེན་སྙམ་དུ་བློ་འགེལ་དགོས་ཏེ། སློབ་དཔོན་ཕྱོགས་ཀྱི་གླང་པོས། །གཏིང་མཐའ་མེད་པའི་འཁོར་བ་ནི། །རྒྱ་མཚོའི་ནང་ན་རྣམ་པར་གནས། །འདོད་ཆགས་ལ་སོགས་མི་བཟད་པའི། །ཆུ་སྲིན་གྱིས་ནི་ལུས་ཟོས་པས། །དེ་རིང་གང་ལ་སྐྱབས་སུ་མཆི། །ཞེས་དྲི་བའི་ཚུལ་གྱིས་གསུངས་ལ། ལན་དུ་སློབ་དཔོན་དཔའ་བོས། གང་ཞིག་ལ་ནི་ཉེས་པ་ཀུན། །གཏན་ནས་ཡོང་ཡེ་མི་མངའ་ཞིང། །གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང། །དེ་བསྟོད་དེ་ནི་བཀུར་བ་དང། །དེ་ཡི་བསྟན་ལ་གནས་པའི་རིགས། །ཞེས་རང་ལ་སེམས་ཤིག་ཡོད་ན་སངས་རྒྱས་བཅོམ་ལྡན་འདས་དང། དེས་བསྟན་པའི་ཆོས། དེ་སྒྲུབ་པའི་དགེ་འདུན་རྣམས་ལ་སྐྱབས་སུ་འགྲོ་དགོས་པར་གསུངས་སོ། །གཉིས་པ་སྐྱབས་སུ་འགྲོ་བའི་ཚུལ་ལ་གསུམ། གང་ལ་སྐྱབས་སུ་འགྲོ་བའི་ཡུལ་ངོས་བཟུང་བ། དེ་ལ་སྐྱབས་སུ་འགྲོ་བའི་དོན་གཏན་ལ་དབབ་པ།

― GTD003_Page_0280 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཇི་ལྟར་ལག་ཏུ་ལེན་པའི་ཚུལ་དངོས་སོ། །དང་པོ་ནི། སྤྱིར་འཇིགས་པ་སྣ་རེ་སེལ་བ་ལ་སངས་རྒྱས་བྱང་སེམས་དང་ཉན་ཐོས་ཀྱི་གང་ཟག་རེ་རེ་ཙམ་ལ་སྐྱབས་སུ་སོང་བས་ཆོག་པ་རྒྱ་མཚོར་ཚོང་པ་མང་པོ་གང་པོ་ལ་སྐྱབས་སུ་སོང་བས་འཇིགས་པ་ལས་ཐར་པ་ལྟ་བུའི་ལོ་རྒྱུས་དུ་མ་ཡོད་པ་ལྟར་ཡིན་ཀྱང། ཐར་པའི་གོ་འཕང་སྒྲུབ་པ་ལ་སྐྱབས་དཀོན་མཆོག་གསུམ་ག་ངེས་པར་ཚང་དགོས་ཏེ། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་དང། དཔེ་ཆོས་འགྲེལ་པ་ལས། རྒྱ་གར་དུ་འགྲོ་བ་ལ་རང་དང་འདྲ་བའི་མི་གསུམ་དགོས་ཟེར་བ་ལྟར། འོ་སྐོལ་ཐར་པའི་བྱང་ཆུབ་འཚོལ་བ་ལ་སྟོན་པ་སངས་རྒྱས་ལ་བརྟེན་དགོས། ལམ་བསྟན་པའི་ཆོས་ལ་བརྟེན་དགོས། དེ་སྒྲུབ་པའི་གྲོགས་དགེ་འདུན་ལ་བརྟེན་དགོས། ཞེས་གསུངས་ཤིང། དཔེར་ན་ནད་གསོ་བ་ལ་སྨན་དང་སྨན་པ་ནད་གཡོག་གསུམ་གང་རུང་རེ་ཡོད་པས་མི་ཆོག་པར་གསུམ་ག་ཚང་དགོས་པ་ལྟར། ཉོན་མོངས་པའི་ནད་ཞི་བའི་ཐར་པའི་གོ་འཕང་འཐོབ་པ་ལ། ཐབས་དེ་སྟོན་པའི་སངས་རྒྱས། ཐབས་དངོས་གཞི་ཆོས། དེ་སྒྲུབ་པའི་གྲོགས་དགེ་འདུན་གསུམ་ག་ཚང་དགོས་སོ། །སྐྱབས་གསུམ་སོ་སོའི་ངོ་བོ་ནི་རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་རང་དོན་གཞན་དོན་གྱི་ཡོན་ཏན་བརྒྱད་དང། བསམ་མེད་གཉིས་མེད་རྟོགས་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གི་ཆགས་བྲལ་བ། །བདེན་གཉིས་མཚན་ཉིད་

― GTD003_Page_0281 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་དེ་ཆོས། །ཞེས་འགོག་ལམ་གྱི་ཡོན་ཏན་བརྒྱད་དང། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་རིག་གྲོལ་གྱི་ཡོན་ཏན་བརྒྱད་དང་ལྡན་པའི་སྒོ་ནས་རིམ་བཞིན་སོ་སོའི་ངོ་བོ་ལེགས་པར་ངོས་ཟིན་པ་དགོས་ཀྱི། རྟེན་གྲལ་དུ་བཞུགས་པའི་གསེར་སྐུ་ལྟ་བུར་གོ་བའམ། མི་མངོན་ནམ་མཁའི་དབྱིངས་ན་བཞུགས་ཡོད་ཟེར་བ་ལྟ་བུས་གར་ཡང་མི་ཕྱིན་ཞེས་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་གསུངས་སོ། །འོན་ཀྱང་སོ་སོར་སྤྲོས་ན་མང་དོགས་པས་རྒྱུད་བླའི་འགྲེལ་པ་རྣམས་སུ་ཤེས་པར་བྱའོ། །གཉིས་པ་སྐྱབས་འགྲོའི་དོན་གཏན་ལ་དབབ་པ་ནི། དེའང་སྐྱབས་འགྲོའི་ཚིག་བཀླགས་པ་ཙམ་ལ་སྐྱབས་འགྲོར་མི་འཇོག་གི །སྐྱབས་འགྲོའི་ངོ་བོ་ནི་པཎ་ཆེན་ཐམས་ཅད་མཁྱེན་པའི་དྲིས་ལན་བློ་བཟང་བཞད་པའི་སྒྲ་དབྱངས་ལས། སྐྱབས་འགྲོའི་ངོ་བོ་ཨི་ཐི་བ། །བདག་ཉིད་ལྷག་པར་འཇིགས་པ་དང། །དཀོན་མཆོག་སྐྱོབ་པའི་ནུས་ལྡན་དུ། །ཤེས་ལས་བྱུང་བའི་སྐྱབས་འགྲོ་ལ། །ཐམས་ཅད་མཁྱེན་པ་ཁྱོད་ཉིད་བཞེད། །ཅེས་གསུངས་ཏེ། རང་སྡུག་བསྔལ་གྱིས་འཇིགས་པ་ནི་སྐྱབས་འགྲོ་གནད་དུ་འགྲོ་བའི་རྒྱུའི་དབང་དུ་བྱས་པ་ཡིན་གྱི། །སྐྱབས་འགྲོའི་ངོ་བོ་དངོས་གཞི་དཀོན་མཆོག་གསུམ་གྱི་ཡོན་ཏན་ལེགས་པར་ཤེས་ནས་ཡིད་ཆེས་ཀྱི་ཤེས་རབ་དང་དད་པ་སོགས་ལ་འཇོག་དགོས་པའི་ཚུལ། ཀུན་མཁྱེན་འཇམ་དབྱངས་བཞད་པས། དཀོན་མཆོག་གསུམ་གྱི་ཁྱད་པར་དང་ཡོན་ཏན་ཤེས་པ་དང་ཁས་བླང་སོགས་ཀྱིས་

― GTD003_Page_0282 ―

^{[མ་དཔེ་གཟིགས་ན་འདིར་གནོན།]}

[Full Size]

བསྡུས་པའི་ཤེས་རབ་གཙོ་འཁོར་ཅི་རིགས་དེ་སྐྱབས་འགྲོའི་ངོ་བོ་ཡིན། ཞེས་གསུངས་ལ། ལམ་རིམ་ཆེན་མོ་ལས་ཀྱང། ཇི་ཙམ་གྱིས་སྐྱབས་སུ་སོང་བའི་ཚུལ་ནི། བསྡུ་བ་ནས་གསུངས་པ་བཞི་སྟེ། ཡོན་ཏན་ཤེས་པ་དང། ཁྱད་པར་ཤེས་པ་དང། ཁས་བླངས་པ་དང། གཞན་དུ་མི་སྨྲ་བས་སྐྱབས་སུ་སོང་བའོ། །ཞེས་གསུངས་པ་ལྟར་རོ། །དེས་ན་དེ་རྣམས་ཀྱི་དོན་ཅུང་ཟད་བསྡུས་ཏེ་བརྗོད་པ་ལ་བཞི་ལས། དང་པོ་སངས་རྒྱས་ཀྱི་ཡོན་ཏན་ནི་སྐུ་མཚན་དཔེས་སྤྲས་ཤིང་མཐོང་ན་མི་མཐུན་པ་མེད་པ་སྟེ། དཔེ་ལ་བསྟོད་པ་ལས། ཁྱོད་སྐུ་མཚན་གྱིས་སྤྲས་གྱུར་པ། །མཛེས་གྱུར་མིག་གི་བདུད་རྩི་ནི། །སྤྲིན་མེད་སྟོན་གྱི་ནམ་མཁའ་ལ། །སྐར་མའི་ཚོགས་ཀྱིས་སྤྲས་པ་འདྲ། །ཞེས་སོགས་ལྟར་མཚན་དང་དཔེ་བྱད་ཀྱིས་བརྒྱན་ཅིང། ཉོན་མོངས་མེད་པ་དང་སྨོན་གནས་མཁྱེན་པའི་བྱེད་པ་མངོན་རྟོགས་རྒྱན་ལས་གསུངས་པ་བཞིན་སྐུ་མཐོང་བ་ཙམ་གྱིས་ཉོན་མོངས་ཞི་ཞིང་ཐར་པའི་ས་བོན་བསྐྲུན་པ་སྟེ། མདོ་ལས་ཀྱང། ཆོས་ཀྱི་སྐུས་རབ་ཏུ་ཕྱེ་བས་ན་མཐོང་བས་ཀྱང་སེམས་ཅན་རྣམས་ཀྱི་དོན་བྱེད་དོ། །ཐོས་པ་དང་རེག་པས་ཀྱང་སེམས་ཅན་རྣམས་ཀྱི་དོན་བྱེད་དོ། །ཞེས་གསུངས་ཤིང། རྒྱུའི་དབང་དུ་བྱས་ན་མདོ་སྡེ་བསྐལ་བཟང་དང་དབུ་མ་རིན་ཆེན་འཕྲེང་བ་སོགས་སུ་བསོད་ནམས་ཀྱི་འགྱུར་ཁྱད་མཐའ་ཡས་པ་གསུངས་སོ། །གསུང་གི་ཡོན་ཏན་ནི་མདོ་སྡེ་རྒྱན་རྩ་འགྲེལ་དང་ས་སྡེ་དབུ་མ་སྙིང་པོ་སོགས་སུ་འབྱུང་བ་ལྟར་གསུང་དབྱངས་ཡན་ལག་དྲུག་ཅུའི་ཁྱད་པར་རྣམས་དང་གཙོ་བོར་གྱུར་པ་ནི་བདེན་པ་པོའི་ལེའུ་ལས། འདི་ལྟར་སེམས་ཅན་ཀུན་གྱིས་ངེས་པའི་ཚིག །མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་

― GTD003_Page_0283 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཀྱང་འདེབས། །ཞེས་གསུངས་པ་ལྟར། གསུང་དབྱངས་གཅིག་གི་སྒོ་ནས་ཀྱང་ནམ་མཁའི་མཐའ་ཀླས་པའི་སེམས་ཅན་མོས་པ་ཐ་དད་པ་རྣམས་ཀྱི་ཐེ་ཚོམ་དང་རྨོངས་པའི་དྲ་བ་བཅད་དེ་གང་ལ་གང་འཚམས་ཀྱི་ཡང་དག་པའི་རྟོགས་པ་སྐྱེད་ནུས་པ་ནི་གཞན་དོན་སྒྲུབ་པའི་སྒོ་མཆོག་ཏུ་གྱུར་པ་ཡིན་ནོ། །ཐུགས་ཀྱི་ཡོན་ཏན་བདེན་གཉིས་རེས་འཇོག་ཏུ་མ་སོང་བར་ཇི་ལྟ་ཇི་སྙེད་ཀྱི་རྣམ་པ་མཐའ་དག་ཆགས་ཐོགས་མེད་པར་ཅིག་ཅར་མངོན་སུམ་དུ་གཟིགས་པའི་མཁྱེན་པ་དང། ཐུགས་བརྩེ་བ་ཆེན་པོའི་གཞན་དབང་དུ་གྱུར་ཏེ་དུས་རྒྱུན་ཆད་མེད་པར་འགྲོ་བ་ཀུན་ལ་བུ་བཞིན་དུ་དགོངས་ཤིང། དེའི་དབང་གིས་འཕྲིན་ལས་ཅུང་ཟད་ཀྱང་དུས་ལས་ཡོལ་བ་མེད་པར་གདུལ་བྱ་ལ་འཇུག་པའི་ཚུལ་གསལ་རྒྱལ་གྱི་བུ་མོ་རྡོ་རྗེ་མའི་ལོ་རྒྱུས་མདོ་མཛངས་བླུན་སོགས་ལས་འབྱུང་བ་ལྟར་རོ། །ད་ལྟ་རང་ཅག་འཁོར་བར་ལྷུང་སྟེ་སྡུག་བསྔལ་དུ་མས་ནོན་པ་འདིའང་སངས་རྒྱས་ཀྱིས་མ་དགོངས་པ་མིན་ཀྱང་དེས་སྐྱོབ་པ་ལ་རྒྱུ་རྐྱེན་གཉི་ག་འཛོམ་དགོས་པ་ལ་རྒྱུ་རང་གིས་མ་བསྒྲུབས་པས་ལན་པ་ཡིན་ཏེ། བསྔགས་འོས་བསྔགས་བསྟོད་ལས། ཕྱི་ཡི་ཡན་ལག་སྟོབས་ཀུན་ནི། །ཁྱོད་ཀྱིས་ཡང་དག་བསྒྲུབས་ལགས་ཏེ། །ནང་གི་སྟོབས་དག་མ་ཚང་བས། །བྱིས་པ་རྣམས་ནི་སྡུག་བསྔལ་བསྟེན། །ཞེས་གསུངས་ཤིང། བྲག་ཕུག་བྱང་བསྟན་དུ་ཉི་མ་མི་འཆར་བ་དང་དམུས་ལོང་གིས་ཉི་འོད་མི་མཐོང་བ་ཉི་མ་ལ་འོད་མེད་པས་ལན་པ་མ་ཡིན་པར་རང་རང་གི་སྐྱོན་ཡིན་པ་བཞིན་ནོ། །སངས་རྒྱས་ཀྱི་ཡོན་ཏན་ལེགས་པར་གོ་ན་ཆོས་

― GTD003_Page_0284 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུང་བརྒྱད་ཁྲི་བཞི་སྟོང་བཀའ་དང་བསྟན་བཅོས་ཐམས་ཅད་ཀྱིས་དེའི་ཡོན་ཏན་ལ་ལས་ནི་ངོ་བོའི་སྒོ་ནས་བརྗོད། ལ་ལས་རྒྱུ། ལ་ལས་འབྲས་བུའི་སྒོ་ནས་བརྗོད་པས་སངས་རྒྱས་ཀྱི་རྣམ་ཐར་འབའ་ཞིག་ཏུ་གོ་བར་འགྱུར་ཏེ། སྔོན་ཇོ་བོ་ཆེན་པོས་ཀྱང་བོད་ན་མདོ་རྒྱུད་མང་པོ་བལྟ་རྒྱུ་མེད་པས་ངའི་དད་པ་ཉམས་སོང་ཞེས་གསུངས་པ་ནི། མདོ་སྡེ་ཇི་ཙམ་མང་དུ་བལྟས་པ་བཞིན་དད་པ་རྒྱས་པའི་དོན་ཡིན་ནོ། །མདོར་ན་སངས་རྒྱས་བཅོམ་ལྡན་འདས་དེ་རང་ཉིད་འཇིགས་པ་ཐམས་ཅད་ལས་ནི་གྲོལ། གཞན་འཇིགས་པ་ལས་སྒྲོལ་བའི་ཐབས་ལ་ནི་མཁས། ཀུན་ལ་ཐུགས་རྗེ་ཆེན་པོ་ཉེ་རིང་མེད་པར་ནི་འཇུག །ཕན་བཏགས་པ་དང་མ་བཏགས་པ་ཐམས་ཅད་ཀྱི་དོན་མཛད་པ་སྟེ་ཁྱད་པར་བཞིའམ། མཁྱེན་བརྩེ་ནུས་གསུམ་གྱི་སྒོ་ནས་སྐྱབས་སུ་འོས་པའི་རྒྱུ་མཚན་ཤེས་དགོས་ལ། རྣམ་དཔྱོད་ཅན་རྣམས་ཀྱིས་ཚད་མ་རྣམ་འགྲེལ་ལས་ལུགས་འབྱུང་ལུགས་ལྡོག་གཉིས་ཀྱི་སྒོ་ནས་སྟོན་པ་ཚད་མའི་སྐྱེས་བུར་སྒྲུབ་ཚུལ་སོགས་རྒྱ་ཆེར་བསམ་སྟེ་ངེས་པ་གཏིང་ཚུགས་པར་བྱའོ། །དེ་ལྟར་སངས་རྒྱས་ཀྱི་ཡོན་ཏན་ཤེས་ན་དེ་ཆོས་ཀྱི་མཐུ་ལས་འབྱུང་བར་ཤེས་ནས་ཆོས་ལ་གུས་པ་སྐྱེ་ཞིང། ཆོས་དེ་ཚུལ་བཞིན་དུ་སྒྲུབ་པ་བོ་དགེ་འདུན་ཡིན་པས་དགེ་འདུན་ལའང་གུས་པར་འགྱུར་རོ། །གཉིས་པ་ཁྱད་པར་ཤེས་པ་ནི། དཀོན་མཆོག་གསུམ་རེ་རེ་ལའང་ཡོན་ཏན་ཚད་མེད་པས་གང་རུང་རེ་ཁོ་ནར་སྐྱབས་སུ་སོང་བས་ཆོག་གམ་སྙམ་ན་དེས་མི་ཆོག་སྟེ། གདུལ་བྱའི་དོན་དུ་འགྱུར་ཚུལ་གྱི་སྒོས་ཆོས་མི་འདྲ་བ་མེད་མི་རུང་རེ་སོ་སོར་ཡོད་དོ་ཞེས་གོ་བའི་ཕྱིར་ཁྱད་པར་འདི་གསུངས་པ་ཡིན་ནོ། །དེའང་རྒྱུད་བླ་མ་ལས། སྟོན་པ་བསྟན་པ་བསླབ་དོན་གྱི། །ཐེག་པ་གསུམ་དང་བྱེད་

― GTD003_Page_0285 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་གསུངས་ཤིང། དེའི་དོན་ཁ་བསྐངས་ཏེ་བསྡུ་བར། མཚན་ཉིད། འཕྲིན་ལས། མོས་པ། སྒྲུབ་པ། རྗེས་སུ་དྲན་པ། བསོད་ནམས་འཕེལ་བ་ལས་གྱུར་པའི་ཁྱད་པར་དྲུག་གསུངས་པ་རྣམས་ལམ་རིམ་ལས་ཤེས་པར་བྱའོ། །གསུམ་པ་ཁས་ལེན་པ་ནི། དཀོན་མཆོག་གསུམ་ལ་ཡོན་ཏན་དང་ཁྱད་པར་དེ་ལྟ་བུ་ཡོད་པར་ཤེས་པ་ཙམ་མ་ཡིན་པར། དེ་ལྟར་ཤེས་པ་ན་སྨན་པ་མཁས་པའི་ཡོན་ཏན་མཐོང་བའི་ནད་པ་ཉམ་ཐག་བཞིན་དེ་རང་གི་མགོན་སྐྱབས་སུ་འཛིན་པ་ཞིག་དགོས་ཏེ། དེའང་སངས་རྒྱས་ནི་རང་ལ་སྐྱབས་སྟོན་པ་པོར་འཛིན། ཆོས་ནི་སྐྱབས་དངོས་སུ་འཛིན། དགེ་འདུན་ནི་སྐྱབས་སྒྲུབ་པའི་ཟླ་གྲོགས་སུ་འཛིན་པ་ཡིན་ནོ། །བཞི་པ་གཞན་དུ་མི་སྨྲ་བ་ནི། སྐྱབས་སུ་བཟུང་བ་དེའང་མཐའ་གཅིག་ཏུ་དཀོན་མཆོག་གསུམ་ཁོ་ན་ལ་སྐྱབས་སུ་འཛིན་པ་ཡིན་གྱི། མུ་སྟེགས་པའི་སྟོན་པ་སོགས་སྐྱབས་གཞན་དང་གཉིས་འཛིན་མི་བྱེད་པ་སྟེ། ཁྱད་པར་འཕགས་བསྟོད་ལས། བདག་ནི་སྟོན་པ་གཞན་སྤངས་ནས། །བཅོམ་ལྡན་ཁྱོད་ལ་སྐྱབས་སུ་མཆི། །དེ་ཅིའི་སླད་དུ་ཞེ་ན་ཁྱོད། །སྐྱོན་མི་མངའ་ལ་ཡོན་ཏན་ལྡན། །ཞེས་དང། མུ་སྟེགས་གཞན་གྱི་གཞུང་ལུགས་ལ། །ཇི་ལྟ་ཇི་ལྟར་རྣམ་བསམས་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་སེམས་འདི་དད་པར་གྱུར། །དེ་ལྟར་ཐམས་ཅད་མཁྱེན་མིན་པའི། །གྲུབ་མཐའི་སྐྱོན་གྱིས་བརླག་སེམས་ལྡན། །བསམ་རླག་རྣམས་ཀྱི་སྐྱོན་མེད་པའི། །སྟོན་པ་ཁྱོད་ཀྱང་མི་མཐོང་ངོ་། །ཞེས་གསུངས་

― GTD003_Page_0286 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལྟར། སྟོན་པ་དང་བསྟན་པ་གཞན་གྱི་སྐྱོན་མཐོང་ནས་རྒྱབ་ཀྱིས་ཕྱོགས་པ་ཞིག་མེད་པར་ཐམས་ཅད་ལ་དག་སྣང་སྦྱོང་བའི་ཟོབ་བྱེད་པ་ནི་རང་གི་སྟོན་པ་ལ་བློ་མ་ཁེལ་ཞིང་ཡོན་ཏན་མ་མཐོང་བ་ཡིན་ནོ། །དེ་ལྟར་ན་ཁྱད་པར་འདི་བཞིས་སྔ་མ་སྔ་མ་ལ་ཞིབ་ཆ་འདོན་ཚུལ་ཤེས་ན་གོ་རྒྱུ་ཤིན་ཏུ་ཆེའོ། །འདི་དག་ནི་སྐྱབས་འགྲོ་ཐམས་ཅད་ལ་མེད་མི་རུང་གི་ཁྱད་པར་ཡིན་ཞིང། ཐེག་ཆེན་གྱི་སྐྱབས་འགྲོར་འགྱུར་བ་དེའི་སྟེང་དུ་མདོ་སྡེ་རྒྱན་ལས། ཀུན་ཏུ་འགྲོ་དང་ཁས་ལེན་རྟོགས་དང་ཟིལ་གནོན་པར། །དབྱེ་བའི་རང་བཞིན་དོན་རྣམས་བཞི་ཡི་ཁྱད་པར་གྱིས། །ཐེག་པ་མཆོག་ཕྱིར་སྐྱབས་རབ་སོང་བ་གང་ཡིན་པ། །དེ་ཉིད་སྐྱབས་སུ་སོང་བ་རྣམས་ཀྱི་མཆོག་ཅེས་བྱ། །ཞེས་མདོར་བསྟན་ཅིང། གང་ཞིག་སེམས་ཅན་ཐམས་ཅད་བསྒྲལ་བར་ཞུགས་པ་དང། །ཞེས་སོགས་ཀྱིས་རྒྱས་པར་བཤད་པའི་ཁྱད་པར་རྣམས་ཚང་དགོས་སོ། །མདོར་ན་སྐྱབས་འགྲོའི་གདམས་པ་ནི་ཐམས་ཅད་ལ་གལ་ཆེ་བ་དང། སྐྱེས་བུ་མཆོག་འབྲིང་དམན་པ་གང་ཡིན་ཀྱང་རང་གི་བློ་ཚོད་དང་འཚམ་པར་བྱར་ཡོད་ཅིང། སོ་སོའི་ཉམས་ལེན་ཐམས་ཅད་སྐྱབས་འགྲོའི་ཁོངས་སུ་བསྡུས་ནས་བྱས་ཆོག་པའི་མན་ངག་ཁྱད་པར་ཅན་ཡིན་ཏེ། གཞུང་ལུགས་ལ་མ་སྦྱངས་པའི་ཐ་མལ་བ་རྣམས་ཀྱང་མཆོག་གསུམ་བསླུ་བ་མེད་པར་དམ་པ་རྣམས་ཀྱིས་གསུངས་པ་ལ་ཡིད་ཆེས་བྱས་ནས་སྐྱིད་སྡུག་ཅི་བྱུང་ཡང་ཁྱེད་མཁྱེན་སྙམ་པ་བྱས་ན་སྐྱབས་སུ་འགྲོ་ཚུལ་ཞིག་ཡིན་ན་དེར་ཡང་ཕན་ཡོན་ཆེ་སྟེ། རྒྱུད་རྟོག་པ་གསུམ་པ་ལས། ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །གསུངས་པ་ལྟར་

― GTD003_Page_0287 ―

^{[མ་དཔེ་གཟིགས་ན་འདིར་གནོན།]}

[Full Size]

རོ། །སྐྱེས་བུ་ཆུང་ངུའི་ལམ་ལ་བློ་སྦྱང་བ་རྣམས་ནི་མི་རྟག་པ་དང་ངན་འགྲོའི་སྡུག་བསྔལ་བསམ་པས་རྒྱུ་བྱས་དངོས་གཞི་དཀོན་མཆོག་གསུམ་ལ་སྐྱབས་སུ་འགྲོ་ཞིང་དེའི་བསླབ་བྱ་ལས་འབྲས་ཀྱི་བླང་དོར་ལ་འབད་ན་ཆུང་ངུའི་ཆོས་སྐོར་ཐམས་ཅད་དེར་འདུ། འབྲིང་གིས་འཁོར་བའི་སྡུག་བསྔལ་བསམ་པའི་ངེས་འབྱུང་གིས་རྒྱུ་བྱས་ཏེ་སྟོན་པ་སངས་རྒྱས་ཀྱི་རྗེས་སུ་ཞུགས་ནས་ལམ་བསླབ་པ་གསུམ་ལ་སློབ་དགོས་པས་དེ་ཐམས་ཅད་ཀྱང་སྐྱབས་འགྲོའི་ཁོངས་སུ་འདུ། སྐྱེས་བུ་ཆེན་པོ་རྣམས་ནི་ཕར་ཕྱིན་བསྡུ་བ་ལས། སེམས་ཅན་རྣམས་ལ་སྙིང་བརྩེ་ཞིང། །བདེ་གཤེགས་ཡོན་ཏན་ཐོབ་མོས་ན། །དེ་བཞིན་གཤེགས་པ་ཐམས་ཅད་ལ། །མདོར་བསྡུས་སྐྱབས་སུ་སོང་བ་ཡིན། །བྱང་ཆུབ་མཆོག་གི་ཕྱོགས་ཀྱི་ཆོས། །བདག་དོན་མ་ཡིན་གཞན་དོན་དུ། །སྙིང་རྗེ་ཆེན་པོ་སྤྱོད་བྱེད་ན། །ཆོས་ལ་སྐྱབས་སུ་སོང་བ་ཡིན། །ཞེས་སོགས་ལྟར་སྙིང་རྗེས་ཡིད་བསྐྱོད་དེ་གཞན་དོན་དུ་རང་གི་འབྲས་སྐྱབས་སུ་གྱུར་པའི་སངས་རྒྱས་དེ་ཉིད་གཙོ་བོར་དོན་དུ་གཉེར་ཞིང། དེའི་རྒྱུར་ཐབས་ཤེས་ཟུང་དུ་འཇུག་པའི་རྒྱལ་སྲས་ཀྱི་སྤྱོད་པ་ལ་སློབ་པ་ཡིན་པས་དེའང་སྐྱབས་འགྲོའི་ཁོངས་སུ་འདུ། གསང་སྔགས་རྡོ་རྗེ་ཐེག་པའི་སྐབས་སངས་རྒྱས་འབྲས་སྐྱབས་སུ་བཟུང་བ་ཙམ་གྱིས་ཀྱང་མི་ཆོག་པར་དེ་ལ་ད་ལྟ་ནས་ང་རྒྱལ་བཞག་སྟེ་འབྲས་བུ་ལམ་བྱེད་ཀྱི་ཚུལ་དུ་བསྒོམ་ཞིང་མཚན་བཅས་མཚན་མེད་རིམ་གཉིས་སོགས་ཀྱི་ཆོས་ལ་སློབ་པ་དང། དགེ་འདུན་ཡང་དཔའ་བོ་མཁའ་འགྲོ་རྣམས་ཕོ་ཉའི་གྲོགས་སུ་བསྟེན་ཅིང་ཆོས་སྲུང་རྣམས་ཀྱིས་འཕྲིན་

― GTD003_Page_0288 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་སྒྲུབ་པ་དང། རང་གིས་ཀྱང་འཕྲིན་ལས་བཞིའི་སྒོ་ནས་གཞན་དོན་མཁའ་ཁྱབ་ཏུ་བསྒྲུབ་པའི་རྟེན་འབྲེལ་ད་ལྟ་ནས་བསྒྲིགས་པ་ཡིན་པས་དེ་ཐམས་ཅད་ཀྱང་སྐྱབས་འགྲོའི་ཉམས་ལེན་ལས་མ་འདས་ཤིང། མདོར་ན་ལུང་རྟོགས་ཀྱི་བསྟན་པ་ཐམས་ཅད་སྐྱབས་འགྲོའི་ཆོས་སྐོར་དུ་གཏོགས་པ་ཡིན་ཏེ། རྒྱུད་བླ་དར་ཊཱིཀ་ལས། སྐྱབས་འགྲོ་འདི་ལ་གོ་བ་ལེགས་པར་ཆགས་ན་གསུང་རབ་དགོངས་འགྲེལ་དང་བཅས་པ་མ་ལུས་པ་སྐྱབས་འགྲོ་བཅས་པའི་ཡན་ལག་ཏུ་ཤེས་པར་འགྱུར་རོ། །ཞེས་གསུངས་པའི་ཕྱིར། དེས་ན་སངས་རྒྱས་ཀྱིས་ཉེ་རིང་མཛད་པ་མིན་ཡང་རང་རང་གིས་སྐྱབས་སུ་འགྲོ་ཚུལ་རྒྱ་ཆེ་ཆུང་གི་དབང་གིས་གནས་སྐབས་ཀྱི་འཇིགས་པ་ཕྲན་ཚེགས་དང་ངན་སོང་འཁོར་བ་སོགས་ལས་སྐྱོབ་ཚུལ་གྱི་རིམ་པ་དུ་མ་བྱུང་བ་ཡིན་ཏེ། མདོ་སྡེ་རྒྱན་ལས། འཚེ་བ་དག་ནི་ཐམས་ཅད་དང། །ངན་སོང་དང་ནི་ཐབས་མིན་དང། །འཇིག་ཚོགས་ཐེག་པ་དམན་པ་ལས། །སྐྱོབ་ཕྱིར་སྐྱབས་ཀྱི་དམ་པ་འོ། །ཞེས་གསུངས་པ་ལྟར་རོ། །༈ གསུམ་པ་དེ་ཇི་ལྟར་ལག་ཏུ་ལེན་པའི་ཚུལ་དངོས་ནི། ཇོ་བོ་གསེར་གླིང་པའི་རྣམ་ཐར་ལས་འབྱུང་བ་ལྟར་གནས་ཁང་བྱི་དོར་ལེགས་པར་བྱས། ས་གཞིར་མེ་ཏོག་སིལ་མ་དགྲམ། དྲི་ཞིམ་པོའི་ཆུས་ཆག་ཆག་གདབ། སྟེགས་བཟང་པོ་ལ་བསྟན་པའི་བདག་པོས་གཙོ་བྱས་པའི་སངས་རྒྱས་བྱང་སེམས་ཀྱི་སྐུ་བརྙན་བྲིས་འབུར་ཅི་རིགས་སོགས་སྐུ་གསུང་ཐུགས་ཀྱི་རྟེན་གང་འབྱོར་བཤམ། དེ་དག་གི་མདུན་དུ་ཇི་ལྟར་འབྱོར་བའི་མཆོད་པ་རྣམས་གཡོ་མེད་ཅིང་བཀོད་པ་ལེགས་པར་མཛེས་པ་གཙང་སྦྲ་ཐོན་པ་བཤམ། བདེ་བའི་སྟན་ལ་སྤྱོད་

― GTD003_Page_0289 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་ཚུལ་མཐུན་གྱིས་འཁོད་དེ་རང་རྒྱུད་ལ་བརྟགས་ནས། ད་རེས་མི་ལུས་ཐོབ་ཀྱང་བློ་བདེ་བའི་གདེང་ཚད་སེམས་ལ་འཛིན་རྒྱུ་ཅིའང་མ་བྱས། ཉེས་ལྟུང་སྒོ་དུ་མ་ནས་བསགས་པ་ནི་མཐའ་ཡས་པས་ནམ་དབུགས་ཀྱི་རྒྱུ་བ་འདི་འགག་མ་ཐག་ངན་སོང་དུ་ལྟུང་བ་ལས་འོས་མི་འདུག་ཅིང། དེར་སྐྱེས་ན་སྡུག་བསྔལ་བཟོད་གླགས་མེད་པའི་ཚུལ་བསམ་སྟེ་ཤིན་ཏུ་འཇིགས་ཤིང་སྐྲག་པ་དང། དེ་ནས་རང་གི་གཡས་སུ་ཕ། གཡོན་དུ་མ། མཐའ་སྐོར་དུ་རིགས་དྲུག་གི་སེམས་ཅན་མཐའ་ཡས་པས་བསྐོར་བ། དེ་ཐམས་ཅད་ཀྱང་དྲིན་ཅན་གྱི་མ་ཤ་སྟག་ཡིན་ཚུལ་དང་རང་ཉམས་ལ་དཔག་པའི་སྙིང་རྗེ་ཤུགས་དྲག་པོ་བསྐྱེད་དེ། དེ་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་དགེ་སེམས་ཁྱད་པར་ཅན་དེའི་ངང་ནས་སྐྱབས་ཡུལ་གསལ་གདབ་པ་ནི། རང་གི་མདུན་གྱི་ཐད་དྲང་གི་ནམ་མཁའི་གནས་སུ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ་ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་གཙུག་ཏོར་དང་ལྡན་པ། ཞལ་གཅིག་ཕྱག་གཉིས་ཀྱི་གཡས་ས་གནོན་དང་གཡོན་མཉམ་གཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པ། སྐུ་ལ་ཆོས་གོས་གསུམ་མཛེས་པར་གསོལ་བ། འོད་ཀྱི་ཕུང་པོའི་དཀྱིལ་ན་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་ཐུགས་ཀར་རྒྱལ་བ་རྡོ་རྗེ་འཆང། དེའི་ཐུགས་ཀར་ཧཱུཾ་ཡིག་སྔོན་པོ་འོད་ཟེར་འཕྲོ་བ། ཐུབ་དབང་གི་རྒྱབ་ངོས་

― GTD003_Page_0290 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་སྟེང་དུ་སེང་ཁྲི་པད་ཟླ་ཉི་མའི་གདན་ལ་རྒྱལ་བ་རྡོ་རྗེ་འཆང་ལ་ཉམས་ལེན་བྱིན་རླབས་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པ། གཡས་ཕྱོགས་སུ་རྗེ་བཙུན་བྱམས་པ་ལ་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། གཡོན་ཕྱོགས་སུ་རྗེ་བཙུན་འཇམ་དབྱངས་ལ་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། མདུན་དུ་དྲིན་ཅན་རྩ་བའི་བླ་མ་ལ་ཆོས་འབྲེལ་ཡོད་པའི་བླ་མ་རྣམས་ཀྱིས་བསྐོར་ནས་བཞུགས་པ། དེ་དག་གི་མཐའ་སྐོར་དུ་ཡི་དམ་སངས་རྒྱས་བྱང་སེམས་དཔའ་བོ་དཔའ་མོ་བསྟན་སྲུང་ཡེ་ཤེས་པའི་ཚོགས་རྣམས་ཀྱིས་བསྐོར་ནས་བཞུགས་པ། དེ་དག་རང་རང་གི་མདུན་ན་གདན་ཁྲི་ཕུན་ཚོགས་ལ་རང་རང་གིས་གསུངས་པའི་ལུང་གི་ཆོས་རྣམས་འོད་ཀྱི་རང་བཞིན་ཅན་གྱི་པོ་ཏིའི་རྣམ་པར་ཡོད་པ། དེ་དག་གི་ཕྱི་རོལ་ཏུ་གང་ལ་གང་འདུལ་གྱི་སྤྲུལ་པའི་བཀོད་པ་བསམ་གྱིས་མི་ཁྱབ་པ་ཕྱོགས་བཅུར་འཕྲོ་བ། ཐམས་ཅད་ཀྱང་རང་ཉིད་ལ་དགྱེས་པའི་ཉམས་དང་བཅས་ཏེ་བཞུགས་པར་བསམ། རང་དང་སེམས་ཅན་ཐམས་ཅད་ཀྱང་འཁོར་བའི་སྡུག་བསྔལ་ལ་འཇིགས་པ་དང་དཀོན་མཆོག་གི་ཡོན་ཏན་མཐོང་བའི་སྒོ་ནས་མགྲིན་གཅིག་ཏུ་སྐྱབས་འགྲོ་བྱེད་པར་བསམས་ཏེ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོར་གྱུར་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཞེས་དང་།

― GTD003_Page_0291 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། བླ་མ་ཐུབ་པའི་དབང་པོ་དང་དངོས་བརྒྱུད་ཀྱི་བླ་མ་རྣམས་ཀྱི་སྐུ་ལས་བདུད་རྩིའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས་ཉེས་ལྟུང་སྡིག་སྒྲིབ་ཐམས་ཅད་དང། ཁྱད་པར་དུ་བླ་མའི་སྐུ་ལ་བསྡོ་བ་གསུང་བཅག་པ་ཐུགས་དཀྲུག་པ་ལ་སོགས་བླ་མ་ལ་བརྟེན་པའི་ཉེས་པ་ཐམས་ཅད་དག །ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་བླ་མའི་སྐུ་གསུང་ཐུགས་ཀྱི་བྱིན་རླབས་རང་གཞན་ཐམས་ཅད་ལ་ཞུགས་པས་བླ་མའི་སྐྱབས་འོག་ཏུ་ཆུད་སོང་སྙམ་པ་བྱ། དེ་ནས། སངས་རྒྱས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། རྡོ་རྗེ་འཆང་སོགས་སངས་རྒྱས་ཐམས་ཅད་ཀྱི་སྐུ་ལས་བདུད་རྩིའི་རྒྱུན་བབས། རང་གཞན་ཐམས་ཅད་ཀྱི་ལུས་སེམས་ལ་ཞུགས་པས་སྡིག་སྒྲིབ་སྤྱི་དང། ཁྱད་པར་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ། སྐུ་བླུས་ཟོས་པ། ལེགས་ཉེས་ཀྱི་དཔྱད་བརྟགས་པ། གཙུག་ལག་ཁང་དང་མཆོད་རྟེན་བཤིག་པ་སོགས་སངས་རྒྱས་ལ་བརྟེན་ནས་བསགས་པའི་སྡིག་སྒྲིབ་དག །སངས་རྒྱས་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་རང་གཞན་ཐམས་ཅད་ལ་ཞུགས་པས་དེའི་སྐྱབས་འོག་ཏུ་ཆུད་པར་བསམ། ཆོས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། ཆོས་

― GTD003_Page_0292 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་ཏི་རྣམས་ལས་བདུད་རྩིའི་རྒྱུན་བབས། རང་གཞན་ཐམས་ཅད་ཀྱི་ལུས་སེམས་ལ་ཞུགས་པས་སྡིག་སྒྲིབ་སྤྱི་དང་ཁྱད་པར་དུ་གསུང་རབ་རྣམས་ཟོང་དུ་བྱས་པ། གཏའ་མར་བཅུག་པ། ས་སྒྲེ་མོ་ལ་བཞག་པ། འགོམ་ཡུག་བྱས་པ་སོགས་དང། ལྷག་པར་ཡང་ཆོས་དང་ཆོས་སྨྲ་བ་ལ་སྨད་པ། བཤད་སྒྲུབ་ཀྱི་གེགས་བྱས་སོགས་ཆོས་སྤོང་གི་ལས་ངན་སྡིག་སྒྲིབ་ཐམས་ཅད་དག་ནས་དེའི་སྐྱབས་འོག་ཏུ་ཆུད་པའི་དམིགས་པ་བྱེད། དགེ་འདུན་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པའི་ཚེ། བྱང་སེམས་ཉན་རང་དཔའ་བོ་དཔའ་མོ་བསྟན་སྲུང་ཡེ་ཤེས་པའི་ཚོགས་རྣམས་ཀྱི་སྐུ་ལས་བདུད་རྩིའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། དགེ་འདུན་གྱི་དབྱེན་བྱས་པ། དགེ་འདུན་གྱི་དཀོར་ལ་འབག་པ། སྐུར་བ་བཏབ་པ་སོགས་དགེ་འདུན་དཀོན་མཆོག་ལ་བརྟེན་ནས་བསགས་པའི་སྡིག་སྒྲིབ་ཐམས་ཅད་དག །དགེ་འདུན་དཀོན་མཆོག་གི་སྐྱབས་འོག་ཏུ་ཆུད་སོང་སྙམ་དུ་བསམ་ལ་དགའ་བ་སྐྱེད། ཡི་དམ་ཆོས་སྲུང་རྣམས་ལོགས་སུ་བྱེད་ན། ཡི་དམ་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། ཡི་དམ་རྣམས་ཀྱི་སྐུ་ལས་བདུད་རྩིའི་རྒྱུན་བབས། རང་གཞན་ཐམས་ཅད་ཀྱི་ལུས་སེམས་ལ་ཞུགས་པས། རིགས་ལྔ་སྤྱི་བྱེ་བྲག་གི་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་བྱང་ཞིང་དག་ནས་ཡི་དམ་རྣམས་ཀྱི་བྱིན་རླབས་ཞུགས་ཏེ་རིམ་གཉིས་ཀྱི་རྟོགས་པ་ཁྱད་པར་

― GTD003_Page_0293 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་རྣམས་སྐྱེ་བའི་སྣོད་རུང་དུ་གྱུར་པར་བསམ། དཔལ་མགོན་དམ་པ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། མགོན་པོ་ཕྱག་དྲུག་པ་སོགས་ཆོས་སྲུང་རྣམས་ཀྱི་སྐུ་ལས་འོད་ཟེར་མེ་འོད་ལྟ་བུ་འཕྲོས་ནས་རང་གི་ལུས་ལ་ཞུགས་པས་སྡིག་སྒྲིབ་ནད་གདོན་ཐམས་ཅད་བསྲེགས་ཏེ་རོ་མེད་དུ་བྱས། ཆོས་སྲུང་རྣམས་ཀྱི་བྱིན་རླབས་རང་གི་ལུས་སེམས་ལ་ཞུགས་པས་ཕྱིན་ཆད་ནད་རིམས་གདོན་བགེགས་སོགས་གང་གིས་ཀྱང་མི་ཚུགས་པའི་བསྲུང་བ་ཆེན་པོར་གྱུར་པའི་དམིགས་པ་བྱེད། མདོ་ལུགས་ཁོ་ན་ལྟར་བྱེད་ན་གོང་མ་རྣམས་ཀྱི་ཚེའང་བདུད་རྩི་འབེབ་སྦྱང་མི་བྱེད་པར་དེ་དག་ལས་འོད་འཕྲོས་ཏེ་རང་ལ་ཕོག་པས་བྱིན་གྱིས་བརླབས་པ་དང། ཞལ་ནས། ཁྱེད་ཅག་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་བའི་མགོན་སྐྱབས་དཔུང་གཉེན་ངེད་རྣམས་ཀྱིས་བྱའོ། །ཞེས་གསུང་ལྷང་ལྷང་བྱོན་ནས་ཞལ་གྱིས་བཞེས་པར་བསམ་ལ་དགའ་བ་དང། སླར་ཡང་ལུས་ཀྱི་བ་སྤུ་གཡོ་ཞིང་མིག་ནས་མཆི་མ་འཁྲུག་པའི་དད་པ་ཤུགས་དྲག་པོ་གསལ་བཏབ་ཀྱིན་སྐྱབས་འགྲོ་བྱེད། དེ་ལྟར་སོ་སོར་བྱས་ཏེ་ཐུན་མོང་དུ་སྐྱབས་སུ་འགྲོ་ཞིང་སེམས་བསྐྱེད་པ་ནི་དཔེར་ན་དམག་ལ་སོགས་པའི་འཇིགས་པ་ཆེན་པོ་བྱུང་བའི་ཚེ་བཟའ་ཚང་གི་དཔོན་དེས་རང་གཅིག་པུ་ཅི་ཐར་མི་བྱེད་པར་གཉེན་བཤེས་རྣམས་ཀྱི་མགོ་འདོན་པ་ལྟར་སེམས་ཅན་རྣམས་ཀྱི་དོན་གཙོ་བོར་ཡིད་ལ་བཞག་སྟེ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །

― GTD003_Page_0294 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་བར་དུ་བདག་ནི་སྐྱབས་སུ་མཆི། །ཞེས་ལན་གང་མང་བརྗོད་ཅིང་གསོལ་བ་ཤུགས་དྲག་ཏུ་བཏབ་པས། ཚོགས་ཞིང་ཐམས་ཅད་ཀྱི་སྐུའི་ཆ་ལས་བདུད་རྩིའི་རྒྱུན་བབས། རང་གཞན་ཐམས་ཅད་ཀྱི་ལུས་སེམས་ལ་ཞུགས་པས་སྡིག་སྒྲིབ་ཐམས་ཅད་དག །ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་དཀོན་མཆོག་གསུམ་གྱི་བྱིན་རླབས་རང་གཞན་ཐམས་ཅད་ལ་ཞུགས་པར་བསམ། དེ་ནས། བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གང་མང་བརྗོད་ཅིང་སེམས་བསྐྱེད་ཤུགས་དྲག་ཏུ་བསྒོམས་པས། ཐུབ་པའི་དབང་པོའི་སྐུ་ལས་རང་འདྲ་གཉིས་པ་ཞིག་ཆད་ནས་རང་ཉིད་ལ་ཐིམ་པས་རང་ཉིད་ཀྱང་ཐུབ་པའི་དབང་པོའི་སྐུར་ལམ་གྱིས་གྱུར། རང་ཉིད་ཐུབ་དབང་དུ་གྱུར་པའི་སྐུ་ལས་འོད་ཟེར་འཕྲོས། མཐའ་སྐོར་ན་ཡོད་པའི་ཕ་མ་སེམས་ཅན་ཐམས་ཅད་ལ་ཕོག་པས་སོ་སོའི་སྡིག་སྒྲིབ་དང་སྡུག་བསྔལ་ཐམས་ཅད་སྦྱངས་ནས་ཐམས་ཅད་ཐུབ་དབང་གི་གོ་འཕང་ལ་བཀོད་པར་བསམས་ཏེ་སེམས་བསྐྱེད་འབྲས་བུ་ལམ་བྱེད་ཀྱི་ཚུལ་དུ་བསྒོམ། འདི་ཙམ་ཤེར་མདོའི་གླེང་གཞི་སོགས་སུ་སྐད་ཅིག་དེར་ངན་སོང་སྟོངས་པར་གསུངས་པ་དང་མཐུན་ཅིང། གཙུག་ན་རིན་ཆེན་གྱི་མདོ་ལས་བདག་གི་ལུས་སེམས་ཅན་ཐམས་ཅད་ཀྱི་ལུས་སུ་མོས། སེམས་ཅན་ཐམས་ཅད་ཀྱི་ལུས་སངས་རྒྱས་ཀྱི་སྐུའི་གནས་སུ་མོས་པར་གསུངས་པ་དང་དོན་མཐུན་པས་མདོ་ལུགས་རྐྱང་པ་ལའང་འགལ་བ་མེད་པར་རྗེ་བཙུན་ཡེ་ཤེས་རྒྱལ་མཚན་དཔལ་

― GTD003_Page_0295 ―

^{[མ་དཔེ་གཟིགས་ན་འདིར་གནོན།]}

[Full Size]

བཟང་པོའི་ཞལ་ནས་གསུངས་སོ། །དེ་ནས་མཁའ་འགྲོ་མ་རྡོ་རྗེ་གུར་གྱི་རྒྱུད་ལས་གསུངས་པའི་རྒྱུན་བཤགས་སམ་ཡན་ལག་བདུན་པར་གྲགས་པ། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ཀྱང་འདིའི་དཀྱུས་སུ་འདོན་སྲོལ་ཡོད་པ་བཞིན་བྱེད་ན་ཚིག་རིས་ཀྱི་རིམ་པ་ལྟར། ཐམས་ཅད་ཀྱི་གཞི་རྟེན་ཞིང་ས་ལྟ་བུའི་སྐྱབས་འགྲོ་དང་ཞིང་ལ་རྡོ་དང་གསེག་མ་སོགས་སེལ་བ་བཞིན་དུ་འགལ་རྐྱེན་སྡིག་པ་བཤགས་པ་དང། དེར་ཆུ་ལུད་འདྲེན་པ་ལྟར་རྗེས་སུ་ཡི་རང་གི་སྒོ་ནས་མཐུན་རྐྱེན་ཚོགས་བསགས་པ་དང། དེ་ནས་ས་བོན་ལྟ་བུའི་བྱང་ཆུབ་ཀྱི་སེམས་བསྐྱེད་པ་དང། དེ་རྗེས་སེམས་ཅན་ཐམས་ཅད་ཀྱི་ཉེར་འཚོའི་རྟེན་དུ་གྱུར་པའི་བྱང་ཆུབ་ཀྱི་སྤྱོད་པའི་ལོ་ཏོག་སྤེལ་བ་སོགས་ཀྱི་དམིགས་རྣམ་རྒྱུད་འཁུལ་ངེས་བྱ། དེ་ནས་ཚད་མེད་པ་བཞི་བསྒོམ་པ་ནི་སེམས་བསྐྱེད་ཀྱི་དམིགས་རྣམ་དེ་ཉིད་ཇེ་རྒྱས་སུ་གཏོང་བ་ཡིན་ཏེ། སེམས་བསྐྱེད་སྐབས་སེམས་ཅན་ཐམས་ཅད་ཀྱི་དོན་བྱའོ་སྙམ་པའི་དོན་ནི་སྡུག་བསྔལ་སེལ་བ་དང་བདེ་བ་བསྒྲུབ་པ་གཉིས་ལས་མ་འདས་ཤིང། སྡུག་བསྔལ་སེལ་བར་འདོད་པ་ལ་སྙིང་རྗེ། བདེ་བ་བསྒྲུབ་པར་འདོད་པས་བྱམས་པ། བདེ་བའང་ཟག་བཅས་ཀྱི་བདེ་བ་ཙམ་ལ་ཡིད་བརྟན་མེད་པ་མཐར་བསླུ་བའི་ཆོས་ཅན་ཡིན་པས། ཟག་མེད་ཀྱི་བདེ་དགའ་ནམ་ཡང་མི་ཉམས་པ་ཞིག་ལ་འགོད་པར་འདོད་པ་དགའ་བ། དེའང་ཕྱོགས་རིས་ཅན་མ་ཡིན་པར་དགྲ་གཉེན་བར་མ་ཀུན་ལ་སྙོམས་པ་ཞིག་དགོས་པས་བཏང་སྙོམས་ཏེ་བཞིར་ཕྱེ་བ་ཡིན་ནོ། །དེས་ན་དེ་སྒོམ་ཚུལ་ནི། མ་རྒན་སེམས་ཅན་འདི་རྣམས་

― GTD003_Page_0296 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོག་མ་མེད་པ་ནས་བདེ་བ་ཁོ་ན་འདོད་ཀྱང་དེའི་རྒྱུ་མ་བསྒྲུབས་པས་བདེ་བ་རྣལ་མ་ཞིག་དང་མ་ཕྲད་པར་འདུག །ད་ལྟ་བདེ་བར་རློམ་པ་བག་རེ་ཡོད་ནའང་མྱུར་དུ་སྡུག་བསྔལ་དུ་འགྱུར་ནས་འགྲོ་བས་བདེ་བ་དང་བདེ་བའི་རྒྱུ་དང་ལྡན་ན་ཅི་མ་རུང་། ལྡན་པར་གྱུར་ཅིག་ཅེས་བྱམས་པ་དང་། འདི་རྣམས་ཐོག་མེད་ནས་སྡུག་བསྔལ་གྱི་རྒྱུ་འབའ་ཞིག་བསྒྲུབས་པས་སྡུག་བསྔལ་དཔག་ཏུ་མེད་པ་མྱངས་ཤིང་ད་ལྟའང་མྱོང་བཞིན་དུ་དེའི་རྒྱུ་སྒྲུབ་པར་འདུག་པས་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ན་ཅི་མ་རུང། བྲལ་བར་གྱུར་ཅིག་སྙམ་པའི་སྙིང་རྗེ་དང། འདི་རྣམས་སྡུག་བསྔལ་མེད་པའི་བདེ་བ་དང་བདེ་བའི་རྒྱུ་ཐམས་ཅད་དང་མ་བྲལ་ན་ཅི་མ་རུང། མི་འབྲལ་བར་གྱུར་ཅིག། །དེ་ལྟ་བུ་བྱུང་ན་དགའ་འོ་ཨང་སྙམ་དུ་དགའ་བ་དང་འདི་རྣམས་ཀྱིས་ཐོག་མེད་ནས་ཕན་ཚུན་དུ་འགའ་ཞིག་ལ་ཉེ་བར་བཟུང། འགའ་ཞིག་ལ་རིང་བར་བཟུང་ནས་ཆགས་སྡང་གིས་ལས་ངན་སྣ་ཚོགས་བསགས་པའི་དབང་གིས་སྤྱིར་འཁོར་བ་དང། ཁྱད་པར་ངན་འགྲོའི་སྡུག་བསྔལ་དཔག་མེད་མྱོང་བར་འདུག། །འདི་རྣམས་ཕན་ཚུན་ལ་ཉེ་རིང་དུ་བཟུང་སྟེ་ཆགས་སྡང་གི་སེམས་དང་བྲལ་ནས་བཏང་སྙོམས་ལ་གནས་ན་ཅི་མ་རུང། གནས་པར་གྱུར་ཅིག །བདག་གིས་ཀྱང་འདི་རྣམས་ལས་ཁ་ཅིག་ལ་ཉེ་བ་དང། ཁ་ཅིག་ལ་རིང་བར་བཟུང་ནས་ཆགས་སྡང་མི་བྱེད་པར་ཐམས་ཅད་ལ་སེམས་སྙོམས་པར་བྱའོ། །ཞེས་བཏང་སྙོམས་ཀྱི་དམིགས་པ་རྣམས་གསལ་བཏབ་ལ། ངག་ཏུ། མ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་

― GTD003_Page_0297 ―

^{[མ་དཔེ་གཟིགས་ན་འདིར་གནོན།]}

[Full Size]

བར་གྱུར་ཅིག །སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཚད་མེད་བཞི་ཤུགས་དྲག་ཏུ་བསྒོམས་པས་ཚོགས་ཞིང་ཐམས་ཅད་ཀྱི་སྐུ་ལས་བདུད་རྩིའི་རྒྱུན་དཔག་ཏུ་མེད་པ་བྱུང་ནས་ཕ་མ་སེམས་ཅན་ཐམས་ཅད་ལ་ཕོག་པས་ཉེ་རིང་ཆགས་སྡང་ལ་སོགས་པའི་སྡིག་སྒྲིབ་ལས་ཉོན་ཐམས་ཅད་དང་དེས་བསྐྱེད་པའི་སྡུག་བསྔལ་ལ་སོགས་པ་སྦྱངས། ཟག་པ་མེད་པའི་བདེ་བ་ཕུན་སུམ་ཚོགས་པ་ཐོབ་ཅིང་ཚད་མེད་བཞི་ལ་གནས་པར་གྱུར་སོང་སྙམ་དུ་བསམ་མོ། །བཏང་སྙོམས་ནི་དཀོན་མཆོག་བརྩེགས་པའི་ཆོས་ཀྱི་རྣམ་གྲངས་བྱང་ཆུབ་སེམས་དཔའི་སྡེ་སྣོད་ལས་འབྱུང་བ་ལྟར་རྒྱ་ཆེ་བས་མཇུག་ཏུ་བཞག་པ་ཡིན་ཀྱང། ཤེར་ཕྱིན་གྱི་མདོ་དང་མངོན་པར་རྟོགས་པའི་རྒྱན་ལས་རྣམ་རྫོགས་སྦྱོར་བའི་དྲོད་ཀྱི་སྐབས་སུ་མཉམ་པའི་སེམས་སོགས་བཅུ་གསུངས་པ་ལྟར་ཇོ་བོའི་མན་ངག་གིས་སེམས་སྙོམས་པ་སྔོན་དུ་འགྲོ་དགོས་པས། ངག་ཏུ་བརྗོད་སྐབས་ཀྱང། སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་པ་སྔོན་དུ་བླངས་ནས་འདོན་པའི་ཕྱག་བཞེས་ཀྱང་ཡོད་པས་གང་མོས་བྱ། དེ་ནས་ཟབ་རྒྱས་ཀྱི་ལམ་ལ་བཤར་སྒོམ་དང་འབྲེལ་བའི་དད་པས་ཀུན་ནས་བསླངས་ཏེ། གང་གིས་རྟེན་ཅིང་ཞེས་སོགས་འདོན། ཁྲུས་གསོལ་བྱེད་ན་ཁྲུས་ཁང་གསལ་བཏབ་སྟེ་དེར་སྤྱན་དྲངས་ལ་ལྷ་རྣམས་ཀྱིས་བདུད་རྩིས་གང་བའི་བུམ་པ་ཐོགས་ནས་

― GTD003_Page_0298 ―

^{[མ་དཔེ་གཟིགས་ན་འདིར་གནོན།]}

[Full Size]

སྐུ་ཁྲུས་གསོལ་བ་དང། ལྷ་རྫས་ཀྱི་ན་བཟའ་དང་རྒྱན་འབུལ་བའི་དམིགས་པ་སོགས་ཚིག་རིས་ལྟར་བྱ། སྤྲོ་ན་ཡན་ལག་བདུན་པ་རྒྱས་པར་བྱས་ལ་མཎྜལ་སོ་བདུན་མའམ་བདུན་མ་དབུལ། ཡོན་ཏན་གཞིར་གྱུར་མའམ་དོན་ཆེན་པོ་གསུམ་གྱི་སྒོ་ནས་གསོལ་བ་གདབ། ཐུན་བསྡུ་བའི་ཚེ། བླ་མ་ཐུབ་པའི་དབང་པོའི་ཐུགས་ཀ་ནས་འོད་ཟེར་འཕྲོས། མཐའ་སྐོར་ན་བཞུགས་པའི་ཚོགས་ཞིང་རྣམས་ལ་ཕོག་པས་ཐམས་ཅད་འོད་དུ་ཞུ་ནས་ཐུབ་དབང་ལ་ཐིམ། ཐུབ་དབང་རང་གི་སྨིན་མཚམས་སུ་ཐིམ་པས་རྒྱུད་བྱིན་གྱིས་བརླབ་པའི་མོས་པ་བྱའོ། །མཇུག་ཏུ་དགེ་བ་རྣམས་བཟང་པོ་སྤྱོད་པ་སོགས་ཀྱི་སྒོ་ནས་གནས་སྐབས་དང་མཐར་ཐུག་གི་སྨོན་གནས་རྣམས་སུ་འདུན་པ་དྲག་པོས་བསྔོ་བ་དང་སྨོན་ལམ་བྱའོ། །གསུམ་པ་སྐྱབས་སུ་སོང་བའི་ཕན་ཡོན་ལ། རྡོ་རྗེ་འཛིན་པ་དཀོན་མཆོག་རྒྱལ་མཚན་གྱི་ལམ་རིམ་ལས། སྐྱབས་འགྲོས་སངས་རྒྱས་སར་ཆུད་སྡོམ་པ་ཀུན། །སྐྱེ་བའི་རྟེན་དུ་འགྱུར་ཞིང་སྔོན་བསགས་ཀྱི། །ལས་སྒྲིབ་ཐམས་ཅད་སྲབ་ཅིང་ཟད་པར་འགྱུར། །སྐྱབས་སོང་བསོད་ནམས་བློ་ཡིས་གཞལ་མི་ནུས། །ངན་འགྲོར་མི་ལྷུང་མི་དང་མི་མིན་གྱི། །བར་ཆད་དག་གིས་མི་ཚུགས་ཅི་བསམ་འགྲུབ། །མྱུར་དུ་འཚང་རྒྱའི་ཕན་ཡོན་བརྒྱད་བསམ་ནས། །ཉིན་དང་མཚན་དུ་སྐྱབས་འགྲོ་ལན་གསུམ་བྱ། །ཞེས་པ་ལྟར་བརྒྱད་ལས། དང་པོ་ནང་པ་སངས་རྒྱས་པར་ཚུད་པ་ནི། སྤྱིར་ཕྱི་པ་དང་ནང་པའི་ཁྱད་པར་འཇོག་ཚུལ་མང་པོ་བཤད་ཀྱང། མཉམ་མེད་ཇོ་བོ་ཆེན་པོ་དང་ཤཱནྟི་པ་གཉིས་ཀྱིས་སྐྱབས་འགྲོའི་སྒོ་ནས་འཇོག་པར་གསུངས། ཇོ་བོ་ཆེན་པོ་

― GTD003_Page_0299 ―

^{[མ་དཔེ་གཟིགས་ན་འདིར་གནོན།]}

[Full Size]

བོད་ཀྱི་རྒྱལ་བློན་རྣམས་ཀྱིས་དཀའ་ཚེགས་ཆེན་པོས་སྤྱན་དྲངས་སྐབས་ཀྱང་བོད་སྟོན་རྣམས་གསང་སྔགས་ཟབ་མོའི་ཆོས་འདི་ལས་ལྷག་པ་མེད་ཟེར་བའི་ཁ་པོ་ཅན་ཞིག་གསུང་དུ་རེའང། ཇོ་བོ་ཆེན་པོས་མ་མཛངས་ཀྱིས་བུ་གསོ་བའམ། ནད་པ་ལུས་ཟུངས་གསོ་བ་བཞིན་སློབ་མའི་རྒྱུད་ཚོད་དང་འཚམ་པ་ཞིག་དགོས་པར་གཟིགས་ནས་སྐྱབས་འགྲོ་ལས་འབྲས་ཀྱི་ཆོས་སྐོར་འདི་ཁོ་ན་གསུང་བས་མཚན་ལའང་བླ་མ་སྐྱབས་འགྲོ་བ་དང་ལས་འབྲས་པར་གྲགས་པ་བྱུང་སྟེ། དེ་ཙམ་གྱིས་ཀྱང་བསྟན་པའི་མིག་ལྟོས་དང་རྗེས་འཇུག་གི་ཉམས་ལེན་ལ་ཕན་པ་ཆེན་པོ་བྱུང་ངོ་། །བླ་མ་དགེ་བའི་བཤེས་གཉེན་ཆེན་པོར་རློམ་ཞིང་ཀུན་གྱིས་དེ་ལྟར་བཀུར་ནའང་ནང་དུ་སྐྱབས་འགྲོ་རྣམ་དག་ཅིག་མེད་ན་ཕྱི་ནང་གོ་འཛོལ་ནས། གནས་བརྟན་ཞལ་མར་གཟིགས་ཤིག་འདུག་སྟེ་སངས་རྒྱས་བསྟན་པའི་སྒོ་ནང་དུ་མ་ཚུད་འདུག་ཅེས་པའི་དཔེར་འགྲོ་ཉེན་ཡོད་ཅེས་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་གསུངས་སོ། །གཉིས་པ་སྡོམ་པ་ཐམས་ཅད་ཀྱི་རྟེན་དུ་འགྱུར་བ་ནི་མཛོད་འགྲེལ་ལས། སྐྱབས་སུ་འགྲོ་བ་རྣམས་ནི་སྡོམ་པ་ཡང་དག་པར་བླངས་པ་ཐམས་ཅད་ལ་སྒོར་གྱུར་པ་ཡིན་ནོ། །ཞེས་དང་། རྩ་བར། གཞན་ལ་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་སྡོམ་པ་གོང་འོག་ཀུན་གྱི་རྟེན་མེད་མི་རུང་དུ་གསུངས་ཏེ། ས་བོན་མང་ཉུང་གང་འདེབས་ཀྱང་རང་ཚོད་ཀྱི་ཞིང་ས་རེ་དགོས་པ་ཁྱད་མེད་པ་ལྟར་སྡོམ་པ་སོ་སོ་ལ་རྟེན་རྒྱ་ཆེ་ཆུང་གི་སྐྱབས་འགྲོ་རེ་གཞིར་བྱེད་དགོས་པས། འབོག་ཆོག་རྣམས་ལས་སྐྱབས་འགྲོ་

― GTD003_Page_0300 ―

^{[མ་དཔེ་གཟིགས་ན་འདིར་གནོན།]}

[Full Size]

རྩོམ་བྱེད་དུ་བྱས་ཞེས་པའི་དོན་ཡང་དེ་ཡིན་ནོ། །གསུམ་པ་སྔོན་བསགས་པའི་སྡིག་སྒྲིབ་ཟད་པར་འགྱུར་བ་ནི། ལམ་རིམ་ཆེན་མོ་ལས། ཕག་ཏུ་སྐྱེ་བར་འགྱུར་བའི་ལྷའི་བུས་སྐྱབས་འགྲོ་བྱས་པས་དེར་མ་སྐྱེས་པ་ལྟ་བུ་སྟེ་སྐྱབས་འགྲོ་བྱས་པས་ངན་འགྲོའི་རྒྱུ་དག་པའི་ཕྱིར་རོ། །ཞེས་གསུངས་ཏེ། སྡིག་པ་ཚན་པོ་ཆེ་བྱས་ནས་ངན་འགྲོའི་གཡང་སར་ལྟུང་དུ་ཉེ་བའང་ལྷ་དཀོན་མཆོག་གསུམ་གྱི་ཞབས་ལ་འཆང་དུ་ཡོད་པའི་དུས་འདིར་བློ་འགེལ་ནུས་ན་འཇིགས་པ་དེ་ལས་ཐར་པ་ལ་ཚེགས་མེད་པས་འབད་རིགས་པ་ནི། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ན་ཡང། །དཔའ་ལ་བརྟེན་ནས་འཇིགས་པ་ཆེན་པོ་ལྟར། གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །ཞེས་གསུངས་པ་ལྟར་རོ། །བཞི་པ་བསོད་ནམས་རྒྱ་ཆེན་པོ་གསོག་པ་ནི། ཕར་ཕྱིན་བསྡུས་པ་ལས། སྐྱབས་སོང་བསོད་ནམས་གཟུགས་ཡོད་ན། །ཁམས་གསུམ་འདི་ཡང་སྣོད་དུ་ཆུང། །རྒྱ་མཚོ་ཆེན་པོ་ཆུ་ཡི་གཏེར། །ཕུལ་གྱིས་གཅལ་བར་གཞལ་མི་ནུས། །ཞེས་གཟུགས་སུ་གྲུབ་ན་ནམ་མཁའི་ཁྱོན་ལའང་མི་ཤོང་བར་གསུངས་སོ། །དེའི་རྒྱུ་མཚན་ནི་འཆི་མེད་རྔ་སྒྲའི་གཟུངས་ལས། སངས་རྒྱས་བཅོམ་ལྡན་བསམ་མི་ཁྱབ། །དམ་པའི་ཆོས་ཀྱང་བསམ་མི་ཁྱབ། །འཕགས་པའི་དགེ་འདུན་བསམ་མི་ཁྱབ། །བསམ་མི་ཁྱབ་ལ་དད་རྣམས་ཀྱི། །རྣམ་པར་སྨིན་པའང་བསམ་མི་ཁྱབ། །ཅེས་དང་། སྤྱན་རས་གཟིགས་ཀྱི་མདོ་ལས། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སངས་རྒྱས་ཀྱི་ཆོས་ཐམས་ཅད་ཚད་མེད་པ་དེ་བཞིན་དུ་དེ་བཞིན་གཤེགས་པ་ལ་

― GTD003_Page_0301 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོན་ཕུལ་བའང་ཚད་མེད་དོ། །མཐའ་ཡས་སོ། །བསམ་གྱིས་མི་ཁྱབ་བོ། །མཚུངས་པ་མེད་དོ། །གྲངས་མེད་དོ། །ཞེས་ཡུལ་དཀོན་མཆོག་གི་ཡོན་ཏན་དང་ཐུགས་རྗེ་བསམ་གྱིས་མི་ཁྱབ་པའི་དབང་གིས་དེ་ལ་བརྟེན་པའི་བསོད་ནམས་ཀྱི་ཕུང་པོའང་བསམ་གྱིས་མི་ཁྱབ་པ་དང་ཟད་པ་མེད་པར་གསུངས་ཏེ། བློ་གྲོས་མི་ཟད་པའི་མདོ་ལས་ཀྱང་མི་ཟད་པའི་སྒྲ་དོན་གྱི་སྐབས་ཆེད་དུ་བྱ་བ་སེམས་ཅན་ཟད་མི་ཤེས་པ་དང་དམིགས་ཡུལ་བྱང་ཆུབ་ཀྱི་ཡོན་ཏན་ཟད་མི་ཤེས་པའི་དབང་གིས་དེ་ལ་བརྟེན་པའི་དགེ་རྩ་རྣམས་མི་ཟད་པར་གསུངས་པ་དང་རྒྱུ་མཚན་འདྲའོ། །དེས་ན་བསོད་ནམས་ཀྱི་ཞིང་ས་མཚུངས་ཟླ་མེད་པ་ནི་དཀོན་མཆོག་གསུམ་ཁོ་ནར་ངེས་ཏེ། ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་འགའ་ཡོད་མ་ཡིན། །ཞེས་སོ། །ལྔ་པ་ངན་འགྲོར་མི་ལྟུང་བ་ནི། མདོ་ལས། གང་དག་སངས་རྒྱས་སྐྱབས་དོང་བ། །དེ་དག་ངན་འགྲོར་འགྲོ་མི་འགྱུར། །མི་ཡི་ལུས་ནི་སྤངས་ནས་སུ། །དེ་དག་ལྷ་ཡི་ལུས་འཐོབ་བོ། །ཞེས་ཆོས་དང་དགེ་འདུན་ལའང་སྦྱར་ནས་གསུངས་པ་དང་ངན་འགྲོར་སྐྱེས་ཟིན་པའི་རྗེས་སུ་དཀོན་མཆོག་ལ་སྐྱབས་སུ་སོང་ནའང་དེ་ལས་མྱུར་དུ་ཐར་པར་འགྱུར་བའི་ཚུལ། ངན་སོང་སྦྱོང་རྒྱུད་ལས། ཨེ་མའོ་སངས་རྒྱས་ཀྱེ་སངས་རྒྱས། །ཨེ་མའོ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་བཞག །ཅེས་ཆེད་དུ་བརྗོད་པ་བྱས་པ་བཞིན་ནོ། །དྲུག་པ་མི་དང་མི་མ་ཡིན་གྱི་བར་ཆད་

― GTD003_Page_0302 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་མི་ཚུགས་པ་ནི། མདོ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང། །ཀུན་དགའ་དང་ནི་མཆོད་གནས་ཀྱི། །ལྗོན་ཤིང་རྣམས་ལ་སྐྱབས་འགྲོ་སྟེ། །སྐྱབས་དེ་གཙོ་བོ་མ་ཡིན་ཞིང། །སྐྱབས་དེ་མཆོག་གྱུར་མ་ཡིན་ལ། །སྐྱབས་དེ་ལ་ནི་བརྟེན་ནས་ཀྱང། །སྡུག་བསྔལ་ཀུན་ལས་མི་འགྲོལ་ཞིང། །གང་ཚེ་གང་ཞིག་སངས་རྒྱས་དང། །ཆོས་དང་དགེ་འདུན་སྐྱབས་སོང་ལ། །ཞེས་པ་ནས། སྐྱབས་དེ་ལ་ནི་བརྟེན་ནས་ཀྱང། །སྡུག་བསྔལ་ཀུན་ལས་གྲོལ་བར་འགྱུར། །ཞེས་དང། རྒྱལ་པོ་མྱ་ངན་མེད་ཀྱིས་ཀླུ་བཏུལ་བའི་ལེའུ་ལས། ཀྱེ་མ་དཀོན་མཆོག་གསུམ་མཆོད་པའི། །འབྲས་བུ་ཅི་འདྲ་འདི་གཟིགས་ཤིག །རྒྱ་མཚོའི་ནང་ན་གནས་པའི་ཀླུ། །བདག་གིས་བཏུལ་ཅིང་འདི་དབང་བགྱིས། །ཆུ་དང་མཁའ་ལ་འགྲོ་བའི་ཀླུ། །བསོད་ནམས་ཀྱིས་ནི་ངས་ཕམ་བྱས། །ས་ལ་གནས་པའི་དགྲ་ཡི་ཚོགས། །བསོད་ནམས་ཀྱིས་ནི་ཟད་པར་བྱེད། །ཅེས་ཆོས་རྒྱལ་མྱ་ངན་མེད་ལ་རྒྱ་མཚོའི་ཀླུ་རྣམས་ཀྱིས་ཐོ་བརྩམས་པའི་ཚེ་དཀོན་མཆོག་མཆོད་པའི་སྟོབས་ཀྱིས་དེ་དག་གིས་མ་ཚུགས་ཤིང་ཚུར་དབང་དུ་འདུས་པ་དང། དགེ་བསྙེན་ཞིག་ལ་མུ་སྟེགས་པའི་ངན་སྔགས་མཁན་ཞིག་གིས་རླུང་ཞགས་བཏང་བའི་ཚེ་དཀོན་མཆོག་ལ་སྐྱབས་སུ་སོང་བས་རླུང་ཞགས་གཏོང་མཁན་ལ་ཕྱིར་ལོག་པའི་གཏམ་རྒྱུད་ལྟ་བུ་ཡིན་ནོ། །བདུན་པ་ཅི་བསམ་འགྲུབ་པ་ནི། ཆོས་ལྡན་གྱི་བྱ་བ་གང་སྒྲུབ་པའི་ཐོག་མར་དཀོན་མཆོག་ལ་མཆོད་ཅིང་སྐྱབས་སུ་སོང་ནས་འགྲུབ་པར་གསོལ་བ་བཏབ་ན་བདེ་བླག་ཏུ་འགྲུབ་པར་འགྱུར་བས། དམ་པ་རྣམས་བསྟན་བཅོས་རྩོམ་པ་སོགས་ཀྱི་ཐོག་མར་མཆོད་བརྗོད་

― GTD003_Page_0303 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པའི་དགོས་པའང་དེ་ཡིན་ལ། དེའི་རྒྱུ་མཚན་ནི་སྐྱབས་སུ་སོང་བས་བསོད་ནམས་རླབས་པོ་ཆེ་གསོག་པ་དང། བསོད་ནམས་ཀྱི་དབང་གིས་འདོད་དོན་སྨོན་པ་བཞིན་འགྲུབ་པ་ཡིན་ཏེ། རྒྱ་ཆེར་རོལ་པ་ལས། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡིས་བསམ་པ་རྣམས་ཀྱང་འགྲུབ། །ཅེས་དང། སའི་སྙིང་པོ་འཁོར་ལོ་བཅུ་པའི་མདོ་ལས། འཇིག་རྟེན་དག་ནི་བདེ་ཞིང་སྐྱིད་པ། །དེ་ཀུན་དཀོན་མཆོག་མཆོད་ལས་འབྱུང་བས། །དེ་བས་བདེ་ཞིང་སྐྱིད་པ་འདོད་པས། །དཀོན་མཆོག་མཆོད་ལ་རྟག་ཏུ་བརྩོན་བྱ། །ཞེས་བདེ་སྐྱིད་ལེགས་ཚོགས་ཐམས་ཅད་འགྲུབ་པ་དཀོན་མཆོག་ཁོ་ནར་རག་ལས་པར་གསུངས་སོ། །བརྒྱད་པ་མྱུར་དུ་འཚང་རྒྱ་བ་ནི། ལམ་རིམ་ཆེན་མོར། སེང་གེས་ཞུས་པ་ལས། དད་པས་མི་ཁོམ་སྤོང་བར་འགྱུར། །ཞེས་གསུངས་པ་ལྟར་དལ་བ་ཁྱད་པར་ཅན་རྙེད་ཅིང་སྐྱབས་དང་མཇལ་ནས་ལམ་ཁྱད་པར་ཅན་ལ་སློབ་ལ་དེས་ནི་རིང་པོར་མི་ཐོགས་པར་འཚང་རྒྱའོ། །ཞེས་གསུངས་ཏེ། རྒྱན་ལས་ཆོས་སྐུའི་འཕྲིན་ལས་ཀྱི་སྐབས་སུ་དང་པོར་འགྲོ་བ་ཞི་བའི་འཕྲིན་ལས་ཞེས་ངན་སོང་གསུམ་སོགས་མི་ཁོམ་པའི་གནས་ལས་དྲངས་ཏེ་མཐོ་རིས་ཀྱི་ཡོན་ཏན་བདུན་དང་ལྡན་པའི་རྟེན་བཟང་པོ་ལ་བཀོད་ནས་རིམ་གྱིས་མི་གནས་པའི་མྱང་འདས་ལ་འགོད་དགོས་པར་གསུངས་པ་དང་གནད་འདྲ་ཞིང། དེ་ཐམས་ཅད་ཀྱང་དཀོན་མཆོག་གི་ཐུགས་རྗེ་ཁོ་ན་ལ་བརྟེན་པ་ཡིན་ཏེ། ཆོས་རྒྱལ་མྱ་ངན་མེད་ཀྱིས། མཐོ་རིས་ཐོབ་བྱེད་ངན་སོང་སྤོང། །མི་ཡིས་རྟག་ཏུ་བསྟེན་

― GTD003_Page_0304 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་སྟེ། །ཨེ་མའོ་སངས་རྒྱས་ཨེ་མའོ་ཆོས། །ཨེ་མའོ་བསྟན་པ་ཕུན་སུམ་ཚོགས། །ཞེས་གསུངས་ཤིང། སངས་རྒྱས་ལ་བརྟེན་པའི་བསོད་ནམས་ཅུང་ཟད་ཙམ་ཞིག་ཡིན་ཀྱང་མཐར་བྱང་ཆུབ་ཀྱི་རྒྱུར་ངེས་པར་འགྲོ་སྟེ། མདོ་སྡེ་པད་དཀར་ལས། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་འདུད་པ་དང། །དེ་བཞིན་ལན་གཅིག་ལུས་ཀྱང་འདུད་པ་དང། །གང་གི་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་གསུངས་པ་ལྟར་རོ། །འདི་དག་ནི་མན་ངག་ནས་འབྱུང་བའི་ཕན་ཡོན་འདུས་ཆེ་ལ་དངོས་ཟིན་གོ་བདེ་བའི་དབང་གིས་བླ་མ་རྣམས་ཀྱིས་ཁྲིད་རྒྱུན་ལ་གཙོ་བོར་གསུངས་པ་བཞིན་བཀོད་པ་ཡིན་ཞིང། བསྡུ་བ་ལས། བསོད་ནམས་ཆེན་པོ་འཐོབ་པ། སངས་རྒྱས་རྗེས་སུ་དྲན་པའི་དགའ་བ་དང་མི་འབྲལ་བ། ཏིང་ངེ་འཛིན་བརྟན་པོ་རྙེད་པ། ཤེས་རབ་ཀྱི་མཐུས་སྲིད་པ་ལས་གྲོལ་བ་བཞི་དང། དཀར་ཕྱོགས་ཀྱི་ལྷ་ལ་སོགས་པའི་སྲུང་བ་ཆེན་པོ་དང་ལྡན་པ། གྲོགས་ངན་སོགས་ལ་བརྟེན་ནས་བསགས་པའི་སྡིག་པ་ཟད་པ། སྐྱེས་བུ་དམ་པའི་གྲངས་སུ་ཚུད་པ། ལྷ་རྣམས་དགའ་བར་འགྱུར་བ་དང་བཞི་སྟེ་བརྒྱད་གསུངས་སོ། །དེ་ལྟར་ཕན་ཡོན་རྣམས་ལ་བློ་ལེགས་པར་གོམས་ན་ཚ་བས་གདུངས་པའི་གླང་པོ་ཆེ་པད་མཚོར་འཇུག་པ་བཞིན་གཞན་གྱིས་བསྐུལ་མི་དགོས་པར་ངང་གིས་སྐྱབས་འགྲོ་ལ་འཇུག་པ་དང། དེའི་བསླབ་བྱ་རྣམས་ལའང་ཁུར་གྱི་འདུ་

― GTD003_Page_0305 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་མེད་པར་རྒྱན་དུ་གོ་བས་སྲུང་བ་ལ་ཚེགས་མེད་པ་ཞིག་འབྱུང་ངོ་། །བཞི་པ་སྐྱབས་འགྲོའི་བསླབ་བྱ་ནི། དཀོན་མཆོག་གི་ཐུགས་རྗེ་དང་བྱིན་རླབས་བསམ་གྱིས་མི་ཁྱབ་ཀྱང། དེར་སྐྱབས་སུ་སོང་བ་ཙམ་གྱིས་མི་ཆོག་གི་སྐྱབས་འགྲོའི་བསླབ་བྱ་ལ་ལེགས་པར་སློབ་དགོས་ཏེ། དཔེར་ན་དགྲ་མ་རུངས་པས་གཙེས་པའི་ཚེ་རྒྱལ་པོ་ཆེན་པོ་སོགས་ལ་མགོན་བཙལ་ན་དེས་སྐྱོབ་ནུས་ཀྱང། རྒྱལ་པོ་དེ་ཉིད་ཀྱི་བཀའ་ཁྲིམས་མ་བརྩིས་ན་དེར་ཡང་ཆད་པ་འཕོག་པ་བཞིན། དཀོན་མཆོག་ལ་སྐྱབས་སུ་སོང་ཡང་དེའི་བསླབ་བྱ་ལས་འབྲས་ཀྱི་བླང་དོར་སོགས་སངས་རྒྱས་ཀྱི་བཀའ་ཁྲིམས་བཞིན་དུ་མ་བསྲུངས་ན་དཀོན་མཆོག་གིས་ཀྱང་སྐྱོབ་ཐབས་དང་བྲལ་འགྲོ་བ་ཆོས་ཉིད་ཡིན་པས་བསླབ་བྱའི་རིམ་པ་འདི་ལ་ནན་ཏན་སྙིང་པོར་བྱས་ཏེ་འབད་དགོས་སོ། །དེའང་བསྡུ་བ་ལས། བཤེས་གཉེན་དམ་པ་བསྟེན་པ། དེ་ལས་ཆོས་ཉན་པ། ཆོས་ཀྱི་དོན་ཡིད་ལ་བྱེད་པ། དེ་ཐར་པའི་རྒྱུར་འགྲོ་ངེས་སུ་བསྒྲུབ་པ་བཞི་དང། སྒོ་གསུམ་བག་མེད་དུ་མི་གཏོང་བ། བསླབ་གཞི་ཅི་ནུས་སུ་འཛིན་པ། སྙིང་རྗེའི་དབང་གིས་སེམས་ཅན་གཞན་ཡང་དེ་ལ་སྦྱོར་བ། བཀའ་དྲིན་རྗེས་སུ་དྲན་ནས་རྟག་ཏུ་དཀོན་མཆོག་མཆོད་པ་ལ་བརྩོན་པ་དང་བཞི་སྟེ་བརྒྱད་གསུངས་སོ། །འདི་རྣམས་ནི་གྲོང་ཁྱེར་ཆེན་པོའི་ལྕགས་རི་བཞིན་མཐའ་ནས་བསྲུང་སྟེ་ཉེས་ལྟུང་འགོག་ཚུལ་རྒྱ་ཆེན་པོའི་དབང་དུ་བྱས་པ་ཡིན་ལ། ལས་དང་པོ་པར་གནད་ཐོག་ཏུ་མེ་བཙའ་བཏབ་པ་བཞིན་འབྱུང་ཉེ་བའི་དགག་བྱ་རྣམས་དམིགས་ཕུག་སྟེ་འགོག་ཚུལ་དང་

― GTD003_Page_0306 ―

^{[མ་དཔེ་གཟིགས་ན་འདིར་གནོན།]}

[Full Size]

ལག་ལེན་ཡང་འཕྲལ་དུ་གང་གཙོ་ངོས་བཟུང་ནས་བསྟན་ན་ཕན་ཆེ་བས་འདིར་མན་ངག་ནས་འབྱུང་བ་བཞིན་བཤད་པ་ལ་གཉིས། སོ་སོའི་བསླབ་བྱ་དང། ཐུན་མོང་གི་བསླབ་བྱའོ། །དང་པོ་ལ་གཉིས། དགག་པའི་བསླབ་བྱ་དང། སྒྲུབ་པའི་བསླབ་བྱའོ། །དང་པོ་ནི། མྱ་ངན་ལས་འདས་པ་ལས། གང་ཞིག་གསུམ་ལ་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གསོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་པ་མིན། །ཞེས་གསུངས་པ་ལྟར། སངས་རྒྱས་ལ་སྐྱབས་སུ་སོང་བས་འཇིག་རྟེན་པའི་ལྷ་ལ་གཏན་གྱི་སྐྱབས་མི་འཚོལ། དེའང་ཚངས་པ་དང་དབང་ཕྱུག་སོགས་ལའང་གཏན་གྱི་སྐྱབས་མི་འཚོལ་ན། ཡི་དྭགས་ཀྱི་རིགས་སུ་གྱུར་པའི་ལྷ་འདྲེ་ལ་སྐྱབས་མི་འཚོལ་བ་ལྟ་ཅི་སྨོས། གཞི་བདག་སོགས་ལ་གཏོར་མ་གཏོང་བའི་ཚེ་སྙིང་རྗེའི་བསམ་པ་དང་གནས་སྐབས་ཀྱི་གྲོགས་འཚོལ་བའི་བསམ་པས་གཏོང་ཞིང་ཕུགས་ཀྱི་རེ་ལྟོས་མི་འཆའ་བ་གལ་ཆེ་སྟེ། གནས་སྐབས་ཀྱི་བྱ་བ་ཕྲན་བུ་རེའི་གྲོགས་བྱས་པ་ལ་མགོ་འཁོར་ཏེ་གཏན་གྱི་འདུན་མའི་རྩ་བ་འཕྱུགས་ན་ཉེན་ཤིན་ཏུ་ཆེ། ཆོས་ལ་སྐྱབས་སུ་སོང་ན་ཆོས་དང་མཐུན་དགོས་ཤིང། དེའང་བཞི་བརྒྱ་པ་ལས། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་ཆོས་ཀྱི་ངོ་བོ་མི་འཚེ་བར་གསུངས་པ་ཡིན་པས། བསླབ་བྱའང་སེམས་ཅན་ལ་གནོད་འཚེ་སྤོང་ཞིང་མུ་སྟེགས་ཅན་གྱི་གཞུང་སོགས་ལོག་པའི་ཆོས་ལ་ཡིད་བརྟན་མི་འཆའ།

― GTD003_Page_0307 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་འདུན་ལ་སྐྱབས་སུ་སོང་བས་གྲོགས་མུ་སྟེགས་ཅན་དང་མི་འགྲོགས་ཤིང། ལས་འབྲས་ལ་ཡིད་མི་ཆེས་ཤིང་ཆོས་ལ་སྐུར་བ་འདེབས་པའི་མི་དང་མཛའ་གྲོགས་མི་བྱེད་དེ། དམ་ཚིག་ཉམས་པ་དང་འགྲོགས་ན་དེའི་ཉམས་གྲིབ་ཀྱིས་ཡོན་ཏན་ཐམས་ཅད་འགྲིབ་ཅིང་དངོས་གྲུབ་ཀྱི་སྒོ་འགག་པར་གསུངས་སོ། །གཉིས་པ་སྒྲུབ་པའི་བསླབ་བྱ་ནི། སངས་རྒྱས་ཀྱི་སྐུ་གཟུགས་རི་མོར་བྲིས་པ་དང་འབུར་དུ་དོད་པ་གང་ལའང་བཟང་ངན་དང་ལེགས་ཉེས་སོགས་ཀྱི་སྐྱོན་མི་གདགས་པར་བདག་འཁོར་བ་ལས་སྒྲོལ་བའི་སྟོན་པ་ཐུགས་རྗེ་ཅན་དེའི་སྐུའོ་སྙམ་དུ་གུས་པ་བསྐྱེད་ཅིང་ཕྱག་དང་མཆོད་པ་སོགས་བྱ། ད་ལྟ་རང་ཅག་ལ་ཆོས་སྟོན་པ་སོགས་མི་མཛད་པ་ནི་རང་གི་ལས་སྣང་མ་དག་པའི་དབང་གིས་མ་མཐོང་བ་ཡིན་གྱི་སྟོན་པའི་ནུས་པ་མེད་པ་མིན་ཏེ། སར་གནས་ཀྱི་སེམས་དཔའ་རྣམས་ལ་སངས་རྒྱས་ཀྱི་སྐུ་བརྙན་མཐའ་དག་གིས་ཆོས་སྟོན་པ་སོགས་མཛད་པར་མདོ་སྡེ་རྒྱན་ལས་གསུངས་སོ། །དེས་ན་བཟོ་དང་རྒྱུ་སོགས་ལ་མ་ལྟོས་པར་སྐྱབས་ཡུལ་མཆོག་ཏུ་འཛིན་དགོས་ཏེ་བཤེས་སྤྲིངས་ལས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང། །བགྱིས་པ་ཅི་འདྲ་ཡང་རུང་མཁས་པས་མཆོད། །ཅེས་གསུངས་སོ། །དམ་པའི་ཆོས་ཚིག་བཞི་པ་ཞིག་ཡན་ཆད་ལ་འགོམ་ཡུག་དང་ས་སྒྲེ་བོ་ལ་འཇོག་པ་དང་བཟང་ངན་གྱི་སྐྱོན་རྟོག་སོགས་སྤོང་ཞིང། བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བར་བྱེད་པའི་སྐྱབས་དངོས་དེ་འདིའོ་སྙམ་དུ་གུས་པ་བསྐྱེད་ཅིང་ཕྱག་དང་མཆོད་པ་སོགས་བྱ། ད་ལྟ་གཞུང་

― GTD003_Page_0308 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་ལ་ཅུང་ཟད་སྦྱངས་པར་རློམ་པ་འགའ་ཞིག་ཆོས་དཀོན་མཆོག་ལ་འགོག་ལམ་གང་རུང་གིས་ཁྱབ་པ་རྒྱུ་མཚན་དུ་བྱས་ནས་ལུང་གི་ཆོས་རྣམས་སྐྱབས་ཡུལ་དུ་མི་བརྩི་བ་ཤིན་ཏུ་མི་རུང་སྟེ། རྒྱུད་ལས། བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པས་འཇིགས་པ་རྣམས་ཀྱི་རྒྱལ་བྱེད་ཚལ། །སྲིད་པའི་འབྱོར་བ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །ཞེས་ཆོས་དཀོན་མཆོག་གི་ཐད་དུ་ལུང་གི་ཆོས་གསུངས་པ་འདི་གོ་དགོས། ད་ལྟ་འདི་ལ་ཆོས་དཀོན་མཆོག་དང་སྐྱབས་དངོས་བྱས་ནས་རང་རྒྱུད་ལ་མ་བསྟེན་པར་འགོག་ལམ་གྱིས་བསྡུས་པའི་ཆོས་དཀོན་མཆོག་དངོས་དེ་རྒྱུད་ལ་སྐྱེ་ཐབས་མེད་པས་འདི་གལ་ཆེ་ཞེས་སྐྱབས་མགོན་རྡོ་རྗེ་འཆང་དཀོན་མཆོག་འཇིགས་མེད་དབང་པོས་གསུངས་སོ། །དེ་ལྟར་རང་གི་རྒྱུད་ཚོད་དང་མཐུན་པར་ཆོས་དཀོན་མཆོག་འགྲུབ་པའི་ཚུལ་འདི་ནི་རྗེ་ཐམས་ཅད་མཁྱེན་པའི་དགོངས་པ་རྨ་མེད་པ་ཡིན་ཏེ། ལམ་རིམ་ལས། མཐའི་ཆོས་དཀོན་མཆོག་དེའང་ལས་དང་པོ་བའི་དུས་ཀྱི་སྐྱོན་ཕྱོགས་རེ་ཙམ་སྤོང་བའི་སྤངས་པ་དང་ཡོན་ཏན་ཕྱོགས་རེ་ཙམ་སྒྲུབ་པའི་རྟོགས་པ་གཉིས་གོང་ནས་གོང་དུ་ཁྱད་ཞུགས་པར་སོང་བ་ལ་འཇོག་གི་དེ་ལས་གཞན་གློ་བུར་དུ་འབྱུང་བ་མིན་ནོ། །ཞེས་གསུངས་པའི་ཕྱིར། དགེ་འདུན་ལ་སྐྱབས་སུ་སོང་ནས་དགེ་འདུན་གྱི་རྟགས་ཙམ་འཆང་བ་ཡན་ཆད་ཐམས་ཅད་ལ་མ་གུས་པ་སྤང་ཞིང། དགེ་སློང་བཞི་སྡེ་ཡན་ཆད་ལ་བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བར་བྱེད་པའི་གྲོགས་དགེ་འདུན་དེ་འདིའོ་སྙམ་དུ་གུས་པ་བསྐྱེད་ཅིང་བསྙེན་བཀུར་ལ་བརྩོན་པར་བྱ་སྟེ་ཚུལ་འཆལ་

― GTD003_Page_0309 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་སྦྱོང་གི་རྟགས་འཆང་བ་ལའང་བརྙས་སྨོད་བརྡེག་འཚོག་སོགས་བྱས་ན་སྟོན་པ་དང་བསྟན་པ་ལ་མ་གུས་པའི་ཉེས་པ་ཆེན་པོར་འགྱུར་བའི་ཚུལ་ནམ་མཁའི་སྙིང་པོའི་མདོ་དང། སའི་སྙིང་པོའི་མདོ། ཟླ་བ་སྙིང་པོའི་ལེའུ་སོགས་ལས་གསུངས་པ་དང། སྙིང་རྗེ་པད་དཀར་ལས་བསྐལ་བཟང་སངས་རྒྱས་སྔ་མ་རྣམས་ཀྱི་བསྟན་པ་ལ་རབ་བྱུང་གི་རྟགས་ཙམ་འཆང་བའང་སངས་རྒྱས་མོས་པ་ཚུན་ཆད་ལ་གྲོལ་བར་གསུངས་པའི་ཕན་ཡོན་དང་ཉེས་དམིགས་ཀྱི་སྒོ་དུ་མ་ནས་བསམས་ཏེ་གཟབ་དགོས་སོ། །དགེ་བཤེས་སྟོན་པ་དང་རྣལ་འབྱོར་པ་ཆེན་པོས་ལྷན་པ་སེར་པོ་རེ་འགོམ་པའི་སར་ཡོད་པའང་མི་འགོམ་པར་སྤྲུགས་ནས་གཙང་སར་སྐྱེལ་བའི་ཕྱག་ལེན་ལྟར་བསླབ་སྟེ། རང་ཉིད་དཀོན་མཆོག་ལ་གུས་པ་དེ་ཙམ་དུ་འགྲོ་བ་རྣམས་ཀྱང་རང་ལ་ཆེས་ཆེར་གུས་པར་འགྱུར་བའི་ཕྱིར་ཏེ། ཏིང་ངེ་འཛིན་རྒྱལ་པོ་ལས། ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲ་ཐོབ་པར་འགྱུར། །ཅེས་སོ། །ལྷག་པར་ད་ལྟ་ཆགས་སྡང་གི་ཞེ་རུས་འཐེན་པ་ལ་བསྟན་པའི་བྱ་བར་སྒྲོ་བཏགས་ཏེ་ཁྱེད་ཚོ་དང་ངེད་ཚོ་ཞེས་སྡེ་རིས་སུ་བཅད་ནས་འཁྲུགས་པ་བྱེད་པ་ལེགས་ཚོགས་ཀྱི་རྩ་བ་གཅོད་པའི་ཉེས་དམིགས་ཤིན་ཏུ་ཆེའོ། །གཉིས་པ་ཐུན་མོང་གི་བསླབ་བྱ་ལ་དྲུག་ལས་དང་པོ་ནི། སྐྱབས་འགྲོའི་ཁྱད་པར་རྣམས་ཡང་ཡང་གསལ་བཏབ་ནས་སྐྱབས་འགྲོ་མཚན་ཉིད་ཚང་བ་ལ་གོམས་པར་བྱེད་པའོ། །གཉིས་པ་ནི། ཅི་ཟ་ཅི་འཐུང་གི་ཕུད་ཀྱིས་མཆོད་པ་སྟེ། དེ་ཐམས་ཅད་དཀོན་མཆོག་གི་བཀའ་དྲིན་དུ་རྗེས་སུ་དྲན་པ་ཞིག་བྱུང་ན་གང་

― GTD003_Page_0310 ―

^{[མ་དཔེ་གཟིགས་ན་འདིར་གནོན།]}

[Full Size]

བཟང་ས་ནས་དཀོན་མཆོག་ལ་འབུལ་དགོས་པ་ཞིག་འབྱུང་ངོ་། །གསུམ་པ་ནི། དཀོན་མཆོག་གི་ཡོན་ཏན་དང་བཀའ་དྲིན་མཐོང་བ་ན་སེམས་ཅན་གཞན་རྣམས་ཀྱང་སྙིང་བརྩེ་བས་དེའི་སྐྱབས་འོག་ཏུ་འཇུག་པའི་ཐབས་ཅི་ནུས་སུ་བྱེད་དོ། །བཞི་པ་ནི། བྱ་བ་ཅི་འདྲ་ཞིག་བྱེད་པ་དང་དགོས་པ་ཅི་ཞིག་མཐོང་ཡང་དཀོན་མཆོག་གསུམ་ལ་བརྟེན་པ་དང། དེ་དག་དང་རྗེས་སུ་མཐུན་པའི་དཀོན་མཆོག་མཆོད་པ་སོགས་བྱ་ཡི། དེ་དག་དང་མི་མཐུན་པའི་བོན་ལ་སོགས་པ་ལ་རྣམ་པ་ཐམས་ཅད་དུ་བརྟེན་དུ་མི་རུང་བས་དུས་ཐམས་ཅད་དུ་དཀོན་མཆོག་ལ་བློ་ཁེལ་བར་བྱ། ཁ་ཅིག་ཆོས་པས་སྨན་འཐུང་ན་སྐྱབས་འགྲོའི་བསླབ་བྱ་དང་འགལ་བར་སྨྲ་བ་ནི་གནད་མ་གོ་བ་ཡིན་ཏེ། དཀོན་མཆོག་གིས་མ་ཕན་པར་སྨན་གྱིས་ཕན་པ་ལྟ་བུར་གོ་ན་མི་རུང་བ་ཡིན་གྱི། སྨན་གཏན་ནས་མི་འཐུང་ན་ཟས་ཐམས་ཅད་ཀྱང་སྨན་བཞིས་བསྡུས་པས་དགེ་སློང་གིས་ཟས་ཀྱང་ཟ་མི་རུང་བར་འགྱུར་ལ། སྨན་བསྟེན་ཚུལ་ལུང་སྨན་གྱི་གཞི་ལས་ཀྱང་གསུངས་ཡོད་པས། དེས་ན་སྨན་དེའང་སངས་རྒྱས་ཀྱི་ཐུགས་རྗེ་དང་འཕྲིན་ལས་ཀྱི་ཆ་ཤས་སུ་གོ་ནས་བསྟེན་དུ་རུང་བར་འཇམ་མགོན་ས་པཎ་གྱིས་ཐུབ་པའི་དགོངས་པ་རབ་ཏུ་གསལ་བ་ལས་གསུངས་སོ། །ལྔ་པ་ནི། སྔར་བཤད་པའི་ཕན་ཡོན་རྣམས་བསམས་ཏེ་ཉིན་མཚན་དུས་དྲུག་ཏུ་སྐྱབས་འགྲོ་བྱེད་པའོ། །དྲུག་པ་ནི། སྲོག་གི་ཕྱིར་ཡང་སྐྱབས་འགྲོ་མི་གཏོང་བ་སྟེ། ཚུལ་ཁྲིམས་ཡང་དག་པར་ལྡན་པའི་མདོ་ལས། སྲོག་དང་བྲལ་ཞིང་ཤི་བ་ནི་སླ་ཡི།

― GTD003_Page_0311 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཁྲིམས་ཉམས་ཤིང་ཞིག་པ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། སྲོག་དང་བྲལ་ཞིང་ཤི་བས་ནི་སྐྱེ་བ་འདི་ཉིད་ཀྱི་ཚེ་ཟད་པར་འགྱུར་གྱི། ཚུལ་ཁྲིམས་ཉམས་ཤིང་ཞིག་པས་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤངས་ཏེ་རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །ཞེས་གསུངས་པ་བཞིན་ལུས་སྲོག་ལོངས་སྤྱོད་ནི་གདོན་མི་ཟ་བར་འབྲལ་བས། དེ་དག་གི་ཕྱིར་དུ་དཀོན་མཆོག་བཏང་ན་ནི་ཚེ་རབས་ཀུན་ཏུ་སྡུག་བསྔལ་བརྒྱུད་མར་འབྱུང་བའི་ཕྱིར་ཅི་ལ་བབ་ཀྱང་སྐྱབས་མི་བཏང་ངོ་སྙམ་དུ་དམ་འཆའ་ཞིང། བཞད་གད་ཙམ་གྱི་ཕྱིར་དུའང་སྐྱབས་གཏོང་བའི་ཚིག་སྨྲ་བར་མི་བྱ་བ་ལིའི་རྒྱལ་པོའི་རྣམ་ཐར་བཞིན་བྱ། ཁ་ཙམ་གྱིས་ཀྱང་དཀོན་མཆོག་གཏོང་བའི་ཚིག་མི་སྨྲ་བར་མ་ཟད། སྐྱིད་སྡུག་བྱ་བྱེད་ཀུན་གྱི་ཚེ་དཀོན་མཆོག་མཁྱེན་རང་ཟེར་བ་ཞིག་ལ་བསླབ་ན་འཆི་ཁའི་ཚེའང་དཀོན་མཆོག་དྲན་པ་ཞིག་ངེས་པར་འབྱུང་ལ་དེ་བྱུང་ན་ཕྱི་མ་ངན་སོང་དུ་མི་གཏོང་བ་ཐག་ཆོད་པར་མ་ཟད། དེའི་རྣམ་སྨིན་དང་རྒྱུ་མཐུན་གྱིས་ཚེ་རབས་ཕྱི་མ་ཐམས་ཅད་དུ་དཀོན་མཆོག་གསུམ་དང་མི་འབྲལ་ཞིང་དེའི་སྐྱབས་འོག་ཏུ་ཚུད་པས་ལེགས་ཚོགས་ཐམས་ཅད་ལྷུན་གྱིས་གྲུབ་པ་ཞིག་འབྱུང་ངོ་། །དེས་ན་བསྟན་པ་མཐའ་དག་གི་འཇུག་སྒོ་དང་གཞུང་ཤིང་དམ་པར་གྱུར་པ་བྱ་སླ་ལ་དོན་ཆེ་བའི་གདམས་པའི་སྙིང་པོ་འདི་ལྟ་བུ་ལ་ཉམས་ལེན་གྱི་མཐིལ་དུ་བྱེད་པ་ནི་དལ་བའི་རྟེན་བཟང་དོན་ལྡན་དུ་སྒྲུབ་པའི་

― GTD003_Page_0312 ―

^{[མ་དཔེ་གཟིགས་ན་འདིར་གནོན།]}

[Full Size]

ཐབས་ཀྱི་ཡང་རྩེ་རྒྱལ་བ་སྲས་བཅས་ཀྱིས་བསྔགས་པའི་ཡུལ་དུ་གྱུར་པ་ཡིན་ནོ། །སྨྲས་པ། དཀོན་མཆོག་རྣམ་གསུམ་འདུས་པའི་ངོ་བོ་ཉིད། །འཇིགས་པ་ཀུན་སེལ་སྐྱོབ་པ་ཟླ་མེད་པ། །ཐུབ་དབང་གཉིས་པ་ཆོས་ཀྱི་རྒྱལ་པོ་དེས། །ད་དུང་བྱང་ཆུབ་བར་དུ་བརྩེ་བས་སྐྱོངས། །གང་གི་ཐུགས་རྗེ་ག་པུར་ཟེགས་མ་ཡིས། །སྲིད་ཞིའི་ཚ་གདུང་རྒུད་པ་འཕྲོག་བྱེད་པའི། །སྐྱབས་ཀྱི་དམ་པ་མཆོག་གསུམ་ཀུནྡའི་གཉེན། །ལུས་ཅན་བདེ་འབྱུང་གཙུག་ན་མཛེས་གྱུར་ཅིག །མི་བཟད་སྲིད་པའི་འབྲོག་དགོན་ཉམ་ང་བར། །ལས་ཉོན་གཅན་གཟན་གདུག་པས་གཙེས་པ་རྣམས། །མཆོག་གསུམ་བྱིན་རླབས་ཐུགས་རྗེའི་གྲོང་ཁྱེར་དུ། །འཇུག་པའི་ལམ་བཟང་མ་ནོར་བསྟེན་པ་གཅེས། །ཅི་ཡང་མི་གསལ་བསྡུས་པའི་ཚེས་གཅིག་ཟླ། །མ་ཡིན་འབྲིང་དུ་བཀོད་པའི་ཟླ་ཕྱེད་འདིས། །རིགས་འགྲེས་རྫོགས་པར་མཚོན་ལ་ཚིག་ཚོགས་ཆ། །གང་ན་སྒྱིད་ལུག་སྒྲ་གཅན་སྡང་གིས་དོགས། །འདིར་འབད་དགེ་བས་མ་རྒན་འགྲོ་བ་རྣམས། །དཀོན་མཆོག་གསུམ་གྱིས་འབྲལ་མེད་རྗེས་འཛིན་ཅིང། །བསྟན་པའི་སྙིང་པོ་ཚུལ་བཞིན་སྒྲུབ་པ་ཡིས། །སྟོན་པ་མཆོག་དེའི་གོ་འཕང་མྱུར་ཐོབ་ཤོག །ཅེས་བསྟན་པའི་འཇུག་སྒོ་སྐྱབས་འགྲོའི་ཁྲིད་ཡིག་ཕན་བདེའི་ལམ་བཟང་གསལ་བའི་སྒྲོན་མེ་ཞེས་བྱ་བ་འདི་ནི། བསྟན་པའི་སྦྱིན་བདག་དད་སྟོབས་དང་ལྡན་པ་ཨ་བ་ག་ཏཱ་བཻ་ལི་མཧཱ་བ་ལིའི་ཧ་ཐོན་སྐལ་བཟང་སྐྱིད། ཙ་ཁི་རོག་ཆི་རཏྣ། ཐའི་ཇི་དཔལ་མཆོག །པུནྱཻ་ཐུ་ས་ལག་ཆིའི་དཔོན་མོ་བསམ་འཕེལ་རྣམས་དགོན་པར་མཇལ་དུ་

― GTD003_Page_0313 ―

^{[མ་དཔེ་གཟིགས་ན་འདིར་གནོན།]}

[Full Size]

འོངས་ཏེ་སྐྱབས་འགྲོའི་ཁྲིད་སོགས་སྐབས་བཤད་པ་ཇི་ལྟར་བྱས་པ་བཞིན་ཡི་གེར་འཁོད་པ་ཞིག་དགོས་ཞེས་ཧ་ཐོན་སྐལ་བཟང་སྐྱིད་ཀྱིས་བསྐུལ་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་སུག་བྲིས་བགྱིས་པ་ལས་ཤོག་བུར་འབེབས་པ་པོ་སྔགས་རམས་པ་དཀོན་མཆོག་ཀུན་དགས་བྱས་པ་འདིས་ཀྱང་བསྟན་པ་དང་འགྲོ་བ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། །།

ལམ་རིམ་སྔོན་འགྲོ་སྦྱོར་བའི་ཆོས་དྲུག་ལག་ཏུ་ལེན་ཚུལ།

― GTD003_Page_0315 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་ལམ་གྱི་རིམ་པའི་སྔོན་འགྲོ་སྦྱོར་བའི་ཆོས་དྲུག་ལག་ཏུ་ལེན་ཚུལ་གསལ་བར་བཀོད་པ་ལམ་བཟང་སྒྲུབ་པའི་འཇུག་ངོགས་ཞེས་བྱ་བ་བཞུགས་སོ། །

― GTD003_Page_0316 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་དག་ལམ་གྱི་བགྲོད་པ་མཐར་ཕྱིན་ཏེ། །དཔལ་ལྡན་སྐུ་བཞིའི་གོ་འཕང་མཆོག་བརྙེས་ནས། །ལམ་བཟང་དེ་ཉིད་འགྲོ་ལ་གསལ་མཛད་པ། །བླ་མ་ཐུབ་དབང་བརྒྱུད་པར་བཅས་ལ་འདུད། །ཟབ་རྒྱས་ཉམས་ལེན་བཀོད་པ་སྣ་ཚོགས་པའི། །ཁང་བཟང་ཀུན་ལ་རྨང་གཞི་བརྟན་པོ་བཞིན། །མེད་མི་རུང་གི་སྔོན་འགྲོ་སྦྱོར་བའི་ཆོས། །ལག་ཏུ་བླང་བའི་རིམ་པ་འདིར་བཤད་བྱ། །དེའང་དཔལ་ཆོས་ཀྱི་གྲགས་པས། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔག་པ་གང་ཡིན་ཏེ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་གསུངས་པ་ལྟར་རྒྱུ་ཚོགས་མ་ཚང་བ་མེད་པ་ཞིག་བསྒྲུབས་ན་འབྲས་བུ་དེ་ཉིད་མི་འགྲུབ་པའི་ཐབས་མེད་པ་ཞིག་ཡིན་གྱི། རྒྱུ་མ་བསྒྲུབས་པར་འབྲས་བུ་འདོད་ཀྱང་དོན་མེད་དེ། དཔེར་ན་སྟོན་གྱི་ལོ་

― GTD003_Page_0317 ―

^{[མ་དཔེ་གཟིགས་ན་འདིར་གནོན།]}

[Full Size]

ཏོག་ཕུན་སུམ་ཚོགས་པ་ཞིག་འདོད་ཕྱིན་དཔྱིད་དུས་ནས་རྨོས་གླང་གསོ་བ་དང་ཆུ་ལུད་འདྲེན་པ་སོགས་ལ་འབད་དགོས་ཀྱི། དེ་དག་གལ་ཆུང་དུ་བྱས་ནས་ཡལ་བར་དོར་ཏེ་ལོ་ཏོག་རྩིས་སུ་བྱས་ཀྱང་སྐྱེ་བའི་ཐབས་མེད་པ་བཞིན་ནོ། །དེས་ན་སྤྱིར་ཉམས་ལེན་མཐའ་དག་དང། ཁྱད་པར་བྱང་ཆུབ་ལམ་གྱི་རིམ་པའི་ཉམས་ལེན་བྱེད་པར་འདོད་པ་རྣམས་ཀྱིས་སྔོན་འགྲོ་སྦྱོར་བའི་ཆོས་དྲུག་གིས་རྨང་གཞི་ཟིན་པ་ཞིག་ངེས་པར་བྱ་དགོས་ཏེ། ཡོན་ཏན་རིན་པོ་ཆེ་སྡུད་པ་ལས། རྒྱུ་རྣམ་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་རྫོགས་པའི་བྱང་ཆུབ་སྒྲུབ་པའི་རྒྱུའི་

― GTD003_Page_0318 ―

^{[མ་དཔེ་གཟིགས་ན་འདིར་གནོན།]}

[Full Size]

གཙོ་བོ་བཞི་གསུངས་པས། དངོས་གཞི་ནི་སྟོང་པར་གནས་ཞེས་དོན་དམ་བྱང་ཆུབ་ཀྱི་སེམས་དང། སེམས་ཅན་མི་གཏོང་ཞེས་པས་ཀུན་རྫོབ་བྱང་ཆུབ་ཀྱི་སེམས་གཉིས་ཟུང་དུ་འཇུག་པའི་སྐྱེས་བུ་ཆེན་པོའི་ལམ་རྣམས་བསྟན། ཇི་སྐད་སྨྲས་བཞིན་བྱེད་ཅེས་པས་ལམ་གྱི་རྩ་བ་བཤེས་གཉེན་ཚུལ་བཞིན་དུ་བསྟེན་ནས་དེས་ཇི་སྐད་གསུངས་པ་བཞིན་དུ་རིམ་གྱིས་སློབ་ཚུལ་དང། བདེ་གཤེགས་བྱིན་རླབས་ཅན་ཞེས་པས་ཞིང་ཁྱད་པར་ཅན་ལ་བརྟེན་ནས་ཚོགས་གསོག་སྒྲིབ་སྦྱོང་སོགས་བྱས་ཏེ། ལམ་གྱི་རྟོགས་པ་སྐྱེ་བའི་སྣོད་རུང་དུ་སྒྲུབ་པའི་སྔོན་འགྲོ་སྦྱོར་བའི་ཆོས་འདི་དག་བསྟན་པ་ཡིན་ནོ། །དོན་དེ་ཉིད་གསལ་བར་བྱེད་པ་ལ་བསྟན་བཅོས་མངོན་པར་རྟོགས་པའི་རྒྱན་ལས། སངས་རྒྱས་སོགས་དམིགས་དད་པ་དང། །ཞེས་སོགས་ཀྱིས་ལམ་གྱི་རིམ་པ་ཐམས་ཅད་དད་སོགས་ལྔར་བསྡུས་ཏེ་བསྟན་པས། རྐང་པ་དང་པོའི་ཚེ་འཁོར་བ་སྤྱི་བྱེ་བྲག་གི་སྡུག་བསྔལ་ལ་འཇིགས་ནས་སྐྱབས་སུ་འགྲོ་བའི་ཆུང་འབྲིང་ཐུན་མོང་གི་ལམ་བསྟན་པ་ཡིན་ལ། སྐྱབས་འགྲོ་སེམས་བསྐྱེད་དང་ཚོགས་ཞིང་གསལ་བཏབ་སྟེ་ཡན་ལག་བདུན་པ་འབུལ་བ་སོགས་སྔོན་འགྲོའི་ཆོས་ཀྱང་བསྟན་པ་ཡིན་ཏེ། བརྒྱད་སྟོང་འགྲེལ་ཆེན་ལས་བྱང་ཆུབ་སེམས་དཔའ་ཕྱོགས་གཙང་མར་སྐྱིལ་མོ་ཀྲུང་བཅས་ཏེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དམིགས་པ་སྔོན་དུ་འགྲོ་

― GTD003_Page_0319 ―

^{[མ་དཔེ་གཟིགས་ན་འདིར་གནོན།]}

[Full Size]

བས། ཞེས་སོགས་ཀྱིས་དེའི་དགོངས་པ་བཀྲལ་བ་ཡིན་ཞིང། དེར་ཕྱོགས་གཙང་མར་ཞེས་པས་གནས་ཁང་བྱི་དོར་བྱས་ཤིང་སྐུ་གསུང་རྟེན་གྱི་རྟེན་དགྲམ། མཆོད་པ་ལེགས་པར་བཤམས་ནས་དང་བ་འདྲེན་པ་ཞིག་བྱེད་དགོས་པ་དེ་བསྟན། སྐྱིལ་མོ་ཀྲུང་བཅས་ཞེས་པས་ལུས་གནད་ལྷག་མ་རྣམས་དང་ཀུན་སློང་ལ་བརྟག་ཚུལ་བསྟན། ལྷག་མས་སྐྱབས་འགྲོ་སེམས་བསྐྱེད་དང་ཚོགས་གསོག་ཚུལ་སོགས་བསྟན་པར་ཤིན་ཏུ་གསལ་བའི་ཕྱིར་རོ། །དེས་ན་སྔོན་འགྲོ་སྦྱོར་བའི་ཆོས་དྲུག་པོ་འདི་དག་ནི་ཤེར་ཕྱིན་གྱི་མདོའི་དོན་མངོན་པར་རྟོགས་པའི་རྒྱན་གྱི་མན་ངག་བྱང་ཆུབ་ལམ་གྱི་རིམ་པ་ལས་གསལ་བར་བྱས་པའི་ཉམས་ལེན་གྱི་སྤྱི་སྡོམ་ཆེན་པོ་ཡིན་པ་ཤེས་པར་བྱའོ། །དེས་ན་འདི་ལ་དྲུག །གནས་ཁང་བྱི་དོར་བྱས་ཤིང་སྐུ་གསུང་ཐུགས་ཀྱི་རྟེན་དགྲམ་པ། མཆོད་པ་གཡོ་མེད་ཅིང་བཀོད་པ་མཛེས་པར་བཤམ་པ། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་དེ་སྐྱབས་འགྲོ་སེམས་བསྐྱེད་བྱ་བ། ཚོགས་ཞིང་གསལ་གདབ་པ། ཡན་ལག་བདུན་པ་འབུལ་བ། འདོད་པའི་དོན་ལ་གསོལ་བ་གདབ་པའོ། །དང་པོ་ནི། གནས་ཁང་བྱི་དོར་བྱེད་པའང་མཛེས་ཆོས་ཙམ་མ་ཡིན་པར་དེར་ཚོགས་ཞིང་རྣམས་སྤྱན་འདྲེན་པའི་དོན་དུ་བཀུར་སྟིའི་བསམ་པ་དང། སྤྱོད་ཡུལ་ཡོངས་སུ་དག་པའི་མདོ་ལས་

― GTD003_Page_0320 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་བ་ལྟར་རང་གཞན་གྱི་རྒྱུད་ཀྱི་སྒྲིབ་པའི་ཉལ་ཉིལ་རྣམས་བསལ་བར་མོས་པ་དང། རྒྱལ་སྲས་ཀྱི་སྤྱོད་པའི་སྡོམ་ཆེན་པོ་རྫོགས་སྨིན་སྦྱང་གསུམ་གྱི་ཡ་གྱལ་སངས་རྒྱས་ཀྱི་ཞིང་སྦྱོང་བའི་རྒྱུར་དམིགས་པ་སོགས་ཀུན་སློང་ཇི་ཙམ་རྒྱ་ཆེ་བ་བཞིན་ཕྱགས་མ་རེ་རེ་བརྒྱབ་པ་ལའང་ཕན་ཡོན་ཚད་མེད་པ་འབྱུང་སྟེ། རྟག་ངུས་ཆོས་འཕགས་ལ་བཀུར་སྟི་བྱ་བའི་ཕྱིར་ས་རྡུལ་གནོན་བྱེད་ལ་རང་གི་ལུས་ཀྱི་རྩ་བོ་ཆེ་རྣམས་གཏར་ནས་ཁྲག་གིས་ཆག་ཆག་བྱས་པ་དང། ལམ་ཆུང་བས་རྡུལ་ཕྱིས་དྲི་མ་ཕྱིས་ཞེས་པའི་ཚིག་གཉིས་པོ་བརྗོད་བཞིན་དུ་ཕྱག་བདར་བྱས་ཏེ་བདེན་པ་མཐོང་བའི་ལོ་རྒྱུས་བཞིན་ནོ། །ཕྱག་བདར་བྱེད་ཚུལ་ཡང་ཆུ་གཙང་གིས་ཆག་ཆག་ལེགས་པར་གདབ་ལ་རྡུལ་མི་ལྡང་བ་བྱེད་ཅིང་། དུག་གསུམ་གྱི་རྡུལ་དང་དེས་བསྐྱེད་པའི་ལས་སྒྲིབ་ཀྱི་དྲི་མའམ། ཡང་ན་དེས་བསྒོས་པའི་བག་ཆགས་ཤེས་སྒྲིབ་ཀྱིས་བསྡུས་པ་རྣམས་བསལ་བར་མོས་ནས་ངག་ཏུའང་ཚིག་དེ་གཉི་ག་བརྗོད་བཞིན་པར་ཕྱག་བདར་བྱས་ན་རྟེན་འབྲེལ་གྱི་སྒོ་ཡོད་པར་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་གསུངས་སོ། །སྐུ་གསུང་ཐུགས་རྟེན་དགྲམ་ཚུལ་ནི། རྒྱུའི་བཟང་ངན་དང་གསར་རྙིང་སོགས་གཙོ་བོར་མི་བྱེད་པར་བསྟན་པའི་བདག་པོ་དང་རང་གི་དྲིན་ཅན་རྩ་བའི་བླ་མ་རྗེ་བདག་ཉིད་ཆེན་པོ་སོགས་ཀྱི་སྐུ་རྣམས་དབུས་དང་གོང་དུ་འབབ་པར་བྱས། ཡི་དམ་སངས་རྒྱས་བྱང་སེམས་ཆོས་སྲུང་སོགས་ཀྱང་གོ་རིམ་བཞིན་དུ་བསྒྲིག །སྡུད་པ་ཡན་ཆད་ཤེར་མདོ་རེ་མེད་མི་རུང་ཡིན་ཞིང། རྒྱུད་སྡེ་དང་ཐེག་པའི་གོ་རིམ་བཞིན་བཞུགས་སྟབས་བདེ་ན་དེ་བཞིན་བྱེད་ལ། ལྟ་གྲུབ་མི་མཐུན་པའི་དཔེ་

― GTD003_Page_0321 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་དེའི་གྲངས་སུ་མི་གཞུག །ཐུགས་ཀྱི་རྟེན་ཡང་སཙྪ་ཡན་ཆད་ཅི་འབྱོར་རེ་ངེས་པར་དགོས་སོ། །གལ་ཏེ་སྐུ་གསུང་ཐུགས་རྟེན་གྱི་རིགས་ཅིའང་མ་འབྱོར་ན་ཤིང་ངམ་གཡམ་པ་ལྟ་བུའི་མཎྜལ་གྱི་སྟེང་དུ་དྲི་བཟང་གི་ཆུས་བྱུགས་ལ་ཚོམ་བུ་ལྔ་སོགས་བཀོད་དེ། དེའི་སྟེང་དུ་སྐྱབས་ཡུལ་རྣམས་བཞུགས་པར་མོས་པ་བྱས་ན་ཆོག་པས་འདི་ལ་སྒྲུབ་པའི་མཎྜལ་ཞེས་ཟེར་རོ། །ཁྲིད་ཡིག་སྔ་མ་འགའ་ཞིག་ཏུ་ཚོམ་བུ་ལྔའི་དབུས་མར་བླ་མ། ཤར་དུ་ཡི་དམ། ལྷོར་སངས་རྒྱས། ནུབ་ཏུ་བྱང་སེམས་ཉན་རང། བྱང་དུ་མཁའ་འགྲོ་ཆོས་སྲུང་རྣམས་གསལ་འདེབས་པར་བཤད་པ་བཞིན་བྱས་ཀྱང་ཆོག །འོག་གི་ཚོགས་ཞིང་གསལ་འདེབས་ཚུལ་དང་གོ་རིམ་མི་མཚུངས་ཀྱང་སྐྱོན་མེད་དེ། འདི་ནི་སྐུ་གསུང་ཐུགས་རྟེན་དགྲམ་རྒྱུའི་དོད་དང་མཚོན་བྱེད་ཙམ་ཡིན་པས་ཐད་ཀ་ཐད་ཀར་ཇི་བཞིན་འགྲིག་མི་དགོས་སོ། །གཉིས་པ་ནི། མཆོད་པའི་ཀུན་སློང་ཁེ་འདོད་གྲགས་འདོད་ཚེ་འདིའི་བདེ་སྐྱིད་སོགས་ཀྱི་ཆེད་དུ་དམིགས་ན་ཀུན་སློང་གཡོ་ཅན་ཡིན་པས་དེ་ལས་བཟློག་སྟེ་ཐར་པ་དང་ཐམས་ཅད་མཁྱེན་པའི་རྒྱུར་དམིགས་པ་དང། བཤམ་ཚུལ་ཡོན་ཆབ་ལྟ་བུ་ལ་མཚོན་ན་རྒྱལ་པོ་ཆེན་པོའི་གསོལ་དཔོན་བཞིན་ཐོག་མཐར་ཕྲ་ལ་བར་དུ་སྦོམ་པ་ཁ་མཐོ་དམན་རན་པ་ཞིག་དགོས་ཀྱི། བོ་ན་ཚུལ་ཁྲིམས་འཆལ་བ། མ་གང་ན་ལོངས་སྤྱོད་དབུལ་བ། ཡ་ཡོར་སོང་ན་ལམ་ལོག་པར་གོལ་བ། རྒྱུ་གང་ངན་ལ་བྱས་ན་རང་གི་ཕུན་ཚོགས་ཐམས་ཅད་འགྲིབ་པ་སོགས་ཉེན་ཤིན་ཏུ་ཆེ་བས། ལོང་བས་མིག་ལྡན་ལ་མགོ་བསྐོར་གཏོང་བ་

― GTD003_Page_0322 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་བུ་བྱར་མི་རུང་བར་གསུངས་སོ། །མཆོད་པ་འབུལ་བའི་ཚེ། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནི། ཏ་ཐཱ་ག་ཏཱ་ཡ། ཨརྷ་ཏྱེ་སམྱཀ་སཾ་བུདྡྷ་ཡ། ཏངྱ་ཐཱ། ཨོཾ་བཛྲེ་བཛྲེ་མཧཱ་བཛྲེ། མཧཱ་ཏེ་ཛ་བཛྲེ། མཧཱ་བིངྱཱ་བཛྲེ། མཧཱ་བོ་དྷི་ཙིཏྟ་བཛྲེ། མཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨྨ་ཨ་ཝ་ར་ཎཱ་བི་ཤོ་དྷ་ན་བཛྲེ་སྭཱཧཱ། ཞེས་དེ་བཞིན་གཤེགས་པ་རྡོ་རྗེ་རབ་འཇོམས་ཀྱི་གཟུངས་སམ་མཆོད་པའི་སྤྲིན་གྱི་གཟུངས་བརྗོད་བཞིན་པར་ཕུལ་ན་ཕྱོགས་བཅུའི་སངས་རྒྱས་ཐམས་ཅད་ཀྱི་སྤྱན་སྔར་མཆོད་པའི་སྤྲིན་གྱི་ཕུང་པོ་ནམ་མཁའ་གང་བ་འབྱུང་བར་གསུངས་པས་གལ་ཤིན་ཏུ་ཆེའོ། །གསུམ་པ་ནི། ཡུན་རིང་པོར་སྒོམ་སྒྲུབ་བྱེད་པ་ལ་རླན་སོགས་ཀྱིས་མི་གནོད་པའི་ཕྱིར་རླུང་རྒྱུ་ཚུལ་ཡོད་པའི་ཁྲི་དྲྭ་བ་ཅན། དེའི་འོག་ཏུ་ས་དཀར་གྱིས་གཡུང་དྲུང་གཡས་སྐོར་དུ་བྲིས། སྟེང་དུ་རྩྭ་དུར་བ་རྩེ་མོ་དབུས་དང་རྩ་བ་ཕྱིར་བསྟན་ནས་དགྲམ། ཉུང་ངུ་ལས་མེད་ན་རྩེ་མོ་མདུན་དང་རྩ་བ་རྒྱབ་ཏུ་བསྟན་པས་ཆོག་ཅིང། དགུན་དུས་ལྟ་བུར་མ་རྙེད་ན་དེའི་རྩ་བ་བརྐོས་པ་བཏིང་བས་ཀྱང་ཆོག་པར་གསུངས་སོ། །དེའི་སྟེང་དུ་འབོལ་གདན་མདུན་དམའ་ལ་རྒྱབ་ཅུང་ཟད་མཐོ་བ་བཏིང་། ཕྱེད་སྐྱིལ་བྱེད་ཚུལ་ནི་རྐང་པ་གཡོན་པ་ནང་དང་གཡས་པ་ཕྱིར་བྱས་ལ་གཉི་གའི་རྐང་མགོ་གཅིག་གཅིག་གི་འོག་ཏུ་ཤོར་བ་ལྟ་བུ་མ་ཡིན་པར་གསང་གནས་ཀྱི་ཚད་དུ་སླེབ་པ་བྱ། ལག་པ་ལྟེ་འོག་སོར་བཞི་ཙམ་ན་གཡས་པ་སྟེང་དང་གཡོན་པ་འོག་ཏུ་བྱས་ཏེ་མཐེ་བོང་གཉིས་ཀྱི་རྩེ་ཅུང་ཟད་སྦྱར་བ་མཉམ་གཞག་གི་ཕྱག་རྒྱ་བྱ། རྐེད་པ་དྲང་བོར་བསྲང། མགྲིན་པ་ཅུང་ཟད་དགུག །སོ་དང་མཆུ་རང་ལུགས་སུ་བཞག །ལྕེ་རྩེ་རྐན་ལ་ཅུང་ཟད་སྦྱར། མགོ་མ་ཡོ་བར་ཐད་ཀར་

― GTD003_Page_0323 ―

^{[མ་དཔེ་གཟིགས་ན་འདིར་གནོན།]}

[Full Size]

བཟུང་། མིག་ཧ་ཅང་མི་དབྱེ་ཧ་ཅང་མི་ཟུམ་པ་སྣ་རྩེ་དང་ལྟེ་བའི་བར་གྱི་ནམ་མཁའ་ལ་གཏད། ཕྲག་པ་གཉིས་མཐོ་དམན་མེད་པར་བྱ། འདི་བདུན་དང་འོག་ནས་འབྱུང་བའི་རླུང་ཆམ་ལ་འབེབ་པ་སྟེ་རྣམ་སྣང་གི་ཆོས་བརྒྱད་དང་ལྡན་པར་བྱ། དེའང་ལུས་ཀྱི་སྤྱོད་ལམ་ཚུལ་མཐུན་བྱུང་ན་རྩ་རྣམས་རང་སོར་གནས་ཤིང་དེ་ལ་བརྟེན་པས་རླུང་དྲང་པོར་རྒྱུ་བའི་སྟོབས་ཀྱིས་སེམས་གསལ་ཞིང་བརྟན་པ་འབྱུང་ངོ་། །སྒྲ་བསྒྱུར་མར་པས་བོད་ཀྱི་མན་ངག་ཟབ་ཟབ་ཐམས་ཅད་བསྡོམས་ཀྱང་ངའི་སྡོད་ཚུལ་གཅིག་པུར་མི་དོ་ཞེས་གསུངས་པའི་རྒྱུ་མཚན་ཡང་དེ་ཡིན་ལ། ལུས་གནད་དེར་ཡང་ཕྱི་ནང་གསལ་བའི་དགོས་པ་གསུམ་གསུམ་ཡོད་ཚུལ་སོགས་འཇམ་མགོན་ས་པཎ་གྱིས་གསུངས་སོ། །དེ་ནས་ཁ་ནང་དུ་བསྐོར་ལ་ཀུན་སློང་འཆོས་པ་གལ་ཆེ་སྟེ། མཉམ་མེད་ཇོ་བོ་ཆེན་པོས། རྩ་བ་སྨན་ཡིན་ན་ཡལ་ག་དང་ལོ་མའང་སྨན་ཡིན། རྩ་བ་དུག་ཡིན་ན་ཡལ་ག་དང་ལོ་མའང་དུག་ཡིན་གསུངས་པ་བཞིན། འོག་གི་དགེ་སྦྱོར་མཐའ་དག་གནད་དུ་འགྲོ་མི་འགྲོ་ཐོག་མའི་ཀུན་སློང་འཆོས་ཚུལ་གྱི་ལེགས་ཉེས་འདི་ཁོ་ན་ལ་ལྟོས་ཡོད་པས། ཆོས་ཀྱི་དབུའི་རྒྱ་གར་སྐད་བཞིན་དུ་སྒོམ་གྱི་ཐོག་མའི་མགོ་འཛུགས་འདི་ནས་རྟེན་འབྲེལ་མ་འཕྱུག་པ་ཞིག་དགོས་པར་པཎ་ཆེན་ཐམས་ཅད་མཁྱེན་པས་གསུངས་སོ། །དེས་ན་བློ་ཁ་ནང་དུ་ཕྱོགས་ཏེ་རང་རྒྱུད་ལ་བརྟག་པའི་ཚེ་ཚེ་འདིའི་བདེ་སྐྱིད་སྙན་གྲགས་ལ་སོགས་པ་དོན་དུ་གཉེར་བའི་བསམ་པ་མངོན་དུ་གྱུར་ན་ཀུན་སློང་མ་དག་པ་ཡིན། ཕྱི་མར་བདེ་འགྲོ་ལྷ་མིའི་མངོན་མཐོ་ཙམ་ཞིག་དང། རང་ཁོ་ནའི་ཆེད་དུ་

― GTD003_Page_0324 ―

^{[མ་དཔེ་གཟིགས་ན་འདིར་གནོན།]}

[Full Size]

དམན་པའི་མྱང་འདས་དོན་དུ་གཉེར་བའི་བསམ་པ་ཡོད་ན་དེའང་ཀུན་སློང་མ་དག་པ་ཡིན་པས། རླུང་འགྲོ་འོང་ལ་བརྟེན་ནས་ཀུན་སློང་མ་དག་པ་དེ་སྦྱང་བར་བྱའོ། །དེའི་ཚུལ་ནི་སྣ་བུག་ནས་རླུང་ཕྱིར་བཏང་བའི་ཚེ་ཀུན་སློང་གི་རྟོག་པ་ངན་པ་མཐའ་དག་དུ་བ་ནག་པོའི་རྣམ་པར་ཕྱིར་ཐོན་ནས་ནམ་མཁའི་དབྱིངས་སུ་ཡལ་སོང་སྙམ་དུ་བསམ་པ་དང། ནང་དུ་རྔུབ་པའི་ཚེ་བླ་མ་སངས་རྒྱས་སྲས་དང་བཅས་པའི་མཁྱེན་བརྩེ་ནུས་གསུམ་གྱི་ཡོན་ཏན་ཐམས་ཅད་འོད་དཀར་པོའི་རྣམ་པར་རང་གི་སྣ་བུག་ནས་ཞུགས་ཏེ་སྙིང་གར་ཐིམ་པས་དགེ་སེམས་ཁྱད་པར་ཅན་མངོན་དུ་གྱུར་པའི་མོས་པ་བྱ། དེའང་རླུང་སྣ་བུག་གཡས་ནས་དལ་བུས་རྔུབ་སྟེ་གཡོན་ནས་དལ་བུས་ཕྱིར་གཏོང་བ་ལན་གསུམ། གཡོན་ནས་རྔུབ་སྟེ་གཡས་ནས་འབུད་པ་གསུམ། གཉི་ག་ནས་རྡུབ་སྟེ་གཉི་ག་ནས་ཕྱིར་གཏོང་བ་གསུམ་བྱ། འདི་ལ་རླུང་རོ་དགུ་ཕྲུགས་སུ་བསལ་བ་ཟེར། དེ་ནས་སྣ་བུག་གཉི་ག་ནས་རླུང་ནང་དུ་རྔུབ་པ་དང་ཕྱིར་གཏོང་བའི་ཁུག་པ་ཉེར་གཅིག་བགྲང་ངོ་། །དེ་ནས་འཁོར་བའི་རྒྱ་མཚོ་གཏིང་དང་མཐའ་མེད་པ་འདིར་ཐོག་མ་མེད་པ་ཞིག་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པས་མནར་ཞིང། ད་དུང་ཡང་ཇི་ཙམ་ཞིག་མྱོང་དགོས་པའི་མཐའ་མི་ཟིན་ལ། དེ་བཞིན་དུ་སེམས་ཅན་ཐམས་ཅད་ཀྱང་སྡུག་བསྔལ་མཐའ་ཡས་པས་མནར་ཚུལ་དང་སྡུག་བསྔལ་ཅན་གྱི་སེམས་ཅན་དེ་དག་ཀྱང་རང་ལ་འབྲེལ་མེད་པ་ཞིག་མ་ཡིན་པར་ཡང་ནས་ཡང་དུ་མར་གྱུར་ཏེ་གནོད་པ་ཐམས་ཅད་ལས་བསྐྱབས། ཕན་པ་ཐམས་ཅད་ལ་སྦྱར་བའི་དྲིན་མོ་ཆེ་ཤ་སྟག་ཡིན། དེས་ན་དེ་དག་གི་སྡུག་བསྔལ་སེལ་བའི་ཁུར་བདག་ལ་བབས་ཀྱང་ད་ལྟ་ནི་

― GTD003_Page_0325 ―

^{[མ་དཔེ་གཟིགས་ན་འདིར་གནོན།]}

[Full Size]

ནུས་པ་ཅིའང་མེད། དེ་ཐམས་ཅད་ཀྱི་དོན་བྱེད་ནུས་པ་རྫོགས་པའི་སངས་རྒྱས་ཉག་ཅིག་ཡིན་པས། བདག་གིས་འདི་དག་གི་ཕྱིར་དུ་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ་སྙམ་དུ་བསམས་ལ་སྐྱབས་ཡུལ་གསལ་གདབ་པ་ནི། རང་གི་སྨིན་མཚམས་ཀྱི་ཐད་ཀྱི་མདུན་གྱི་ནམ་མཁར་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་ཁར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ། ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་དབུ་གཙུག་ཏོར་དང་ལྡན་པ། ཞལ་གཅིག་ཕྱག་གཉིས་གཡས་ས་གནོན། གཡོན་མཉམ་གཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པ། སྐུ་ལ་ཆོས་གོས་ངུར་སྨྲིག་གི་མདོག་ཅན་གསོལ་བ། མཚན་དཔེས་བརྒྱན་པའི་དྭངས་གསལ་འོད་ཀྱི་རང་བཞིན་ཅན། སྐུ་ལས་སྐྱེས་པའི་འོད་ཀྱི་ཕུང་པོའི་དབུས་ན་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། དེ་ཉིད་ཀྱི་མཐའ་སྐོར་དུ་དངོས་དང་བརྒྱུད་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་ནས་བཞུགས་པ། དེ་དག་རང་རང་གི་མདུན་ན་གདན་ཁྲི་ཕུན་སུམ་ཚོགས་པ་ལ་རང་རང་གིས་གསུངས་པའི་ལུང་གི་ཆོས་རྣམས་འོད་ཀྱི་རང་བཞིན་ཅན་གྱི་པོ་ཏིའི་རྣམ་པ་བྲག་རི་བརྩིགས་པ་བཞིན་དུ་ཁྲ་ཆེམ་མེ་ཡོད་པ། རང་གི་མཐའ་སྐོར་དུ་ཕ་མ་རིགས་དྲུག་གི་སེམས་ཅན་སའི་དྲེག་པ་བཞིན་སྨུག་ཤིག་གེ་ཡོད་པ་ཐམས་ཅད་ཀྱང་འཁོར་བའི་སྡུག་བསྔལ་ལ་འཇིགས་པ་དང། དཀོན་

― GTD003_Page_0326 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོག་གསུམ་གྱི་ཡོན་ཏན་མཐོང་ནས་བློ་ལིངས་ཀྱིས་ཁེལ་བའི་དད་པ་ཤུགས་དྲག་པོ་སྐྱེས་པར་བསམས་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་བརྒྱ་སྟོང་སོགས་བརྗོད། དེའི་ཚེ་དངོས་བརྒྱུད་ཀྱི་བླ་མ་རྣམས་དང། ཡི་དམ་སངས་རྒྱས་རྣམས་དང། ཆོས་པོ་ཏི་རྣམས་དང། བྱང་སེམས་ཉན་རང་མཁའ་འགྲོ་ཆོས་སྲུང་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས་རང་གཞན་ཐམས་ཅད་ཀྱི་ལུས་སེམས་ལ་ཞུགས་པས་ཐོག་མེད་ནས་བསགས་པའི་སྡིག་སྒྲིབ་སྤྱི་དང། ཁྱད་པར་དུ་བླ་མའི་སྐུ་ལ་བསྡོས་པ་དང་གསུང་བཅག་པ་ཐུགས་དཀྲུགས་པ་སོགས་བླ་མ་ལ་བརྟེན་པ་དང་། དེ་བཞིན་གཤེགས་པའི་སྐུ་བརྙན་བཤིག་པ་སོགས་སངས་རྒྱས་ལ་བརྟེན་པ་དང། ཆོས་སྤོང་གི་ལས་སོགས་ཆོས་ལ་བརྟེན་པ་དང། དགེ་འདུན་གྱི་དབྱེན་བྱས་པ་སོགས་དགེ་འདུན་ལ་བརྟེན་པའི་ཉེས་པ་ཐམས་ཅད་སྦྱངས་ཏེ་དེ་དང་དེའི་བྱིན་རླབས་ཞུགས་ནས་སྐྱབས་འོག་ཏུ་ཆུད་སོང་སྙམ་པའི་མོས་པ་རིམ་བཞིན་བྱེད། དེ་ནས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །ཞེས་ལན་གང་མང་བརྗོད་ཅིང་དམིགས་པ་ནི། ཚོགས་ཞིང་ཐམས་ཅད་ཀྱི་སྐུའི་ཆ་ལས་བདུད་རྩི་སྣ་ལྔའི་རྒྱུན་

― GTD003_Page_0327 ―

^{[མ་དཔེ་གཟིགས་ན་འདིར་གནོན།]}

[Full Size]

བབས། དཀོན་མཆོག་གསུམ་ལ་བརྟེན་པའི་སྡིག་སྒྲིབ་ཐམས་ཅད་སྦྱངས་ཏེ་གསུམ་གའི་བྱིན་རླབས་མ་ལུས་པ་ཐོབ་པའི་དམིགས་པ་བྱེད། དེ་རྗེས། བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གང་མང་བརྗོད་ཅིང་དམིགས་པ་ནི། སྦྱིན་པ་ལས་བྱུང་བ་དང། ཚུལ་ཁྲིམས་ལས་བྱུང་བ་དང། བསྒོམས་པ་སོགས་ལས་བྱུང་བའི་དགེ་བའི་རྩ་བ་འདི་ལ་བརྟེན་ནས་བདག་གིས་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་ཤོག་ཅིག །བདག་གིས་མ་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་སྦྱིན་སོགས་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞི་ལ་སོགས་པའི་རྒྱལ་སྲས་ཀྱི་སྤྱོད་པ་མཐའ་དག་ལ་ཚུལ་བཞིན་དུ་བསླབ་པར་བྱའོ་སྙམ་དུ་སྨོན་འཇུག་གི་སེམས་བསྐྱེད་ཤུགས་དྲག་བསྒོམས་པས་བླ་མ་ཐུབ་པའི་དབང་པོ་ལས་རང་འདྲ་གཉིས་པ་ཞིག་ཆད་ནས་རང་ཉིད་ལ་ཐིམ་པས། རང་ཉིད་ཀྱང་བླ་མ་ཐུབ་པའི་དབང་པོའི་སྐུར་ལམ་གྱིས་གྱུར། རང་ཐུབ་པའི་དབང་པོར་གསལ་བའི་སྐུ་ལས་འོད་ཟེར་འཕྲོས། མཐའ་སྐོར་ན་ཡོད་པའི་སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱང་ཐུབ་པའི་དབང་པོའི་གོ་འཕང་ལ་བཀོད་པར་གྱུར་པའི་མོས་པ་བྱས་ཏེ་སེམས་བསྐྱེད་འབྲས་བུ་ལམ་ཁྱེར་གྱི་ཚུལ་དུ་བསྒོམ། དེ་ནས་ཚད་མེད་བཞི་བསྒོམ་པ་ནི། སེམས་ཅན་ཐམས་ཅད་ཉེ་རིང་ཆགས་སྡང་དང་བྲལ་བའི་

― GTD003_Page_0328 ―

^{[མ་དཔེ་གཟིགས་ན་འདིར་གནོན།]}

[Full Size]

བཏང་སྙོམས་ལ་གནས་པར་གྱུར་ཅིག་སྙམ་དུ་བཏང་སྙོམས་ཚད་མེད་དང། བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་སྙམ་དུ་བྱམས་པ་ཚད་མེད་དང། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་ཅེས་སྙིང་རྗེ་ཚད་མེད་དང། སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག་སྙམ་དུ་དགའ་བ་ཚད་མེད་བསྒོམས་ལ། དེ་རེ་རེའི་སྐབས་སུའང་དེ་ལྟར་གྱུར་ན་ཅི་མ་རུང་སྙམ་པ་དང། དེ་ལྟར་གྱུར་ཅིག་སྙམ་པ་དང། དེ་ལྟར་བདག་གིས་བྱའོ་སྙམ་པ་དང། དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ་སྙམ་པ་སྟེ་ཁྱད་པར་བཞི་བཞི་ཚང་བར་བྱ་ཞིང་བདུད་རྩི་འབེབ་སྦྱང་གི་དམིགས་པས་རང་གཞན་སེམས་ཅན་ཐམས་ཅད་ཚད་མེད་བཞི་ལ་གནས་པར་གྱུར་སོང་སྙམ་དུ་མོས་པ་བརྟན་པོ་བྱེད། དེ་ནས་ཁྱད་པར་གྱི་སེམས་བསྐྱེད་ནི། མ་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་ལམ་ཟབ་མོ་བླ་མ་ལྷའི་རྣལ་འབྱོར་གྱི་སྒོ་ནས་བྱང་ཆུབ་ལམ་གྱི་རིམ་པའི་ཁྲིད་བསྒོམ་པ་ལ་འཇུག་པར་བྱའོ་སྙམ་པ་ལན་མང་དུ་བྱས་ལ་ཚོགས་ཞིང་རྣམས་རིམ་གྱིས་བསྡུས་ཏེ་སྨིན་མཚམས་བྱིན་རླབས་འཇུག་པའི་སྒོ་ནས་ཐིམ་པར་བསམ་མོ། །འཇམ་དཔལ་ཞལ་ལུང་གི་འཁྲིད་ལུགས་ལྟར་ན་དལ་འབྱོར་གྱི་ཆོས་སྐོར་མན་ཆད་ལ་ལྟོས་ཏེ་སྦྱོར་བའི་ཆོས་དྲུག་འབྱུང་ཡང། བཤེས་གཉེན་བསྟེན་ཚུལ་གྱི་དམིགས་སྐོར་གཙོ་བོར་བྱེད་པའི་ཚེ་སྦྱོར་བའི་ཆོས་སྔ་མ་དེ་གསུམ་པོ་ཙམ་ཡིན་གྱི། མཚམས་འདི་ནས་དངོས་གཞིར་འཇོག་དགོས། དེའི་ཚུལ་ཡང་བར་འདིར་བཤེས་གཉེན་

― GTD003_Page_0329 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟེན་པའི་ཕན་ཡོན། མ་བསྟེན་པའི་ཉེས་དམིགས། རྩ་བ་དད་པ་སྦྱངས་ཤིང་བཀའ་དྲིན་རྗེས་སུ་དྲན་ཏེ་བསམ་པས་བསྟེན་ཚུལ་གྱི་དམིགས་རྣམ་ལེགས་པར་བསྐྱངས་ལ། དེ་ནས་སྦྱོར་བས་བསྟེན་ཚུལ་བཀུར་སྟི་དང་རིམ་གྲོ་དང་རྙེད་པ་དབུལ་བ་སོགས་ཀྱི་ཚབ་ཏུ་ཚོགས་ཞིང་གསལ་བཏབ་ནས་ཕྱག་འཚལ་བ། སྐུ་ཁྲུས་གསོལ་བ། མཆོད་པ་འབུལ་བ་སོགས་བྱས་པ་ཡིན་པས་ཕྱི་མ་གསུམ་ལ་སྦྱོར་བའི་ཐ་སྙད་མི་འཐོབ་བོ། །དེ་བཞིན་དུ་བདེ་ལམ་གྱི་ཁྲིད་རྒྱུན་འདིའི་དབང་དུ་བྱས་ཀྱང་སྦྱོར་བའི་ཆོས་དྲུག་ཙམ་ལ་ཐུན་གྱི་དངོས་གཞི་ཚང་བར་བྱས་ཏེ་བསྐྱངས་ནའང་རུང་བས། དེ་འདྲའི་སྐབས་སུའང་དང་པོ་གསུམ་སྦྱོར་བ་དང། ཚོགས་ཞིང་གསལ་འདེབས་པ་མན་ཆད་ལ་དངོས་གཞིར་འཇོག་དགོས་སོ། །དེ་ལ་བཞི་པ་ཚོགས་ཞིང་གསལ་འདེབས་ཚུལ་ནི། སྔ་མ་བཞིན་རང་གི་མདུན་གྱི་ཐད་དྲང་གི་ནམ་མཁའི་གནས་སུ་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་མཐོ་ཞིང་ཡངས་པ་ཞིག་གི་སྟེང་ཁར་སྣ་ཚོགས་པད་ཟླ་ཉི་མའི་དཀྱིལ་འཁོར་གྱི་གདན་ལ། ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་དབུ་གཙུག་ཏོར་དང་ལྡན་པ། ཞལ་གཅིག་ཕྱག་གཉིས་གཡས་ས་གནོན། གཡོན་མཉམ་གཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པ། སྐུ་ལ་ཆོས་གོས་ངུར་སྨྲིག་གི་མདོག་ཅན་མཛེས་པར་གསོལ་བ། མཚན་དཔེས་བརྒྱན་པའི་དྭངས་གསལ་འོད་ཀྱི་རང་བཞིན་ཅན། སྐུ་ལས་སྐྱེས་པའི་འོད་ཀྱི་ཕུང་པོའི་དཀྱིལ་ན་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་

― GTD003_Page_0330 ―

^{[མ་དཔེ་གཟིགས་ན་འདིར་གནོན།]}

[Full Size]

པ། བླ་མ་ཐུབ་པའི་དབང་པོའི་ཐུགས་ཀ་ནས་འོད་ཟེར་བླ་མའི་གྲངས་དང་མཉམ་པ་སྟེང་ཕྱོགས་སུ་འཕྲོས་པའི་སྣེ་མོར་སེང་ཁྲི་པད་ཟླའི་གདན་ལ་རྒྱལ་བ་རྡོ་རྗེ་འཆང་ལ་ཉམས་ལེན་བྱིན་རླབས་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པ། གཡས་ཕྱོགས་སུ་འོད་ཟེར་འཕྲོས་པའི་སྣེ་མོར་པད་ཟླའི་གདན་ལ་རྗེ་བཙུན་བྱམས་པ་ལ་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། གཡོན་ཕྱོགས་སུ་འོད་ཟེར་འཕྲོས་པའི་སྣེ་མོར་པད་ཟླའི་གདན་ལ་རྗེ་བཙུན་འཇམ་དབྱངས་ལ་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་པ། མདུན་ཕྱོགས་སུ་འོད་ཟེར་འཕྲོས་པའི་སྣེ་མོར་སེང་ཁྲི་པད་ཟླའི་གདན་ལ་དྲིན་ཅན་རྩ་བའི་བླ་མ་ལ་རང་ལ་དངོས་སུ་ཆོས་འབྲེལ་ཡོད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསམས་ལ། མདུན་གྱི་རྩ་བའི་བླ་མ་དེ་ནི་ཞལ་མཇལ་དུས་ཀྱི་རྣམ་པ་ཅན་དུ་བྱེད། ཚོགས་ཞིང་ཐམས་ཅད་དོན་ངོ་བོ་གཅིག་ཀྱང་རྟེན་འབྲེལ་གྱི་དབང་གིས་རྩ་བའི་བླ་མའི་རྣམ་པ་དེ་ཉིད་བྱིན་རླབས་འཇུག་པའི་ཡུལ་གྱི་ཉེ་ཤོས་ཡིན་པས། ཕྱག་མཚན་ཡང་ཤེས་རབ་རྒྱས་པར་འདོད་ན་གླེགས་རལ། ཚེ་སྤེལ་བར་འདོད་ན་བདུད་རྩིས་གང་བའི་བུམ་པ། ལོངས་སྤྱོད་ཀྱི་དོན་ལ་བདུད་རྩིས་གང་བའི་ལྷུང་བཟེད། ནད་ཞི་བའི་དོན་དུ་བདུད་རྩིའི་རྒྱུན་འབེབས་བཞིན་པའི་ཨ་རུ་ར་གསེར་མདོག །ཏིང་ངེ་འཛིན་གཙོ་བོར་བསྒོམ་ན་མཉམ་གཞག །སྔགས་ཀྱི་རྟོགས་པ་རྩལ་དུ་འདོན་ན་རྡོར་དྲིལ་བསྣམས་པ་སོགས་སུ་བྱ་ཞིང། ལས་སོ་སོ་ལ་སྐུ་མདོག་ཀྱང་དེ་མཐུན་བྱར་རུང་ངོ་། །དེའི་མཐར་གསལ་འདེབས་རྒྱུའི་ཆོས་འབྲེལ་ཅན་གྱི་བླ་མ་ཞལ་བཞུགས་པ་རྣམས་ལ་གདན་གོས་འབོལ་

― GTD003_Page_0331 ―

^{[མ་དཔེ་གཟིགས་ན་འདིར་གནོན།]}

[Full Size]

བརྩེགས་པ་དང་། འདས་པ་རྣམས་ལ་པད་ཟླའི་གདན་བྱེད་ཅིང། ཚིགས་བཅད་གཅིག་གིས་འབྲེལ་ཐོགས་པ་ཡན་ཆད་གྲངས་བརྩིས་ཏེ་མ་ཆད་པ་ཤིན་ཏུ་གལ་ཆེའོ། །བླ་མ་རྣམས་ཀྱི་ཕྱི་རོལ་ཏུ། གཡས་སུ་གསང་འདུས། གཡོན་དུ་བདེ་མཆོག །མདུན་དུ་འཇིགས་བྱེད། རྒྱབ་ཏུ་དུས་འཁོར། མཚམས་རྣམས་སུ་རྒྱུད་སྡེ་བཞིའི་ཡི་དམ་གཞན་རྣམས་དང་དེའི་མཐའ་སྐོར་དུ་བསྐལ་བཟང་གི་སངས་རྒྱས་སྟོང་སོགས་ལོངས་སྤྲུལ་རྣམས་དང། ཉེ་བའི་སྲས་བརྒྱད་སོགས་བྱང་ཆུབ་སེམས་དཔའ་རྣམས་དང། རང་རྒྱལ་བཅུ་གཉིས། གནས་བརྟན་བཅུ་དྲུག་སོགས་ཉན་རང་རྣམས་ལེགས་པར་གསལ་གདབ། དེ་དག་གི་མདུན་དུ་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་རང་ལ་སྤྱན་ཧུ་རེ་བར་གཟིགས་ནས་བཞུགས་པ། རྒྱབ་དང་གཡས་གཡོན་དུ་ཆོས་སྐྱོང་སྲུང་མ་ཡེ་ཤེས་པ་རྣམས་དང། དེ་དག་གི་ཕྱོགས་བཞིར་རྒྱལ་ཆེན་བཞི་འཁོར་དང་བཅས་པ་རྣམས་བསྟན་པ་བསྲུང་བའི་ཚུལ་དུ་རང་རང་གི་གདན་ལ་བཞུགས་པ་གསལ་གདབ་བོ། །ཚོགས་ཞིང་དེ་ཐམས་ཅད་ཀྱི་ཐུགས་ཀར་རྒྱལ་བ་རྡོ་རྗེ་འཆང་ཡུམ་བཅས། དེའི་ཐུགས་ཀར་ཧཱུཾ་ཡིག་སྟེ་སེམས་དཔའ་སུམ་བརྩེགས་ཅན་དུ་བསྒོམས་ན་དགོས་པ་ཤིན་ཏུ་ཆེ་ལ། སེམས་དཔའ་སུམ་བརྩེགས་མ་བྱས་ཀྱང་ཆད་པའི་སྐྱོན་དུ་མི་འགྱུར་རོ། །ཉན་རང་སོགས་ཀྱི་ཐུགས་ཀར་རྡོ་རྗེ་འཆང་བསྒོམས་པ་མ་འབྲེལ་སྙམ་དུ་བསམ་མི་རིགས་ཏེ། དེ་ཐམས་ཅད་རྩ་བའི་བླ་མ་གཅིག་པུའི་རྣམ་འཕྲུལ་ཡིན་པས་སྤངས་རྟོགས་མཆོག་དམན་མེད་ཅིང། འོག་ཏུ་སོ་སོའི་གནས་ལྔར་

― GTD003_Page_0332 ―

^{[མ་དཔེ་གཟིགས་ན་འདིར་གནོན།]}

[Full Size]

རིགས་ལྔའི་ངོ་བོ་འབྲུ་ལྔ་བསྒོམ་པར་གསུངས་པ་དང་ཡང་མཚུངས་པས་སོ། །དེ་དག་རང་རང་གི་མདུན་ན་གདན་ཁྲི་ཕུན་སུམ་ཚོགས་པ་ལ་རང་རང་གིས་གསུངས་པའི་ལུང་གི་ཆོས་རྣམས་འོད་ཀྱི་རང་བཞིན་ཅན་གྱི་པོ་ཏིའི་རྣམ་པར་ཡོད་པ། དེ་དག་གི་ཕྱི་རོལ་ཏུ་གང་ལ་གང་འདུལ་གྱི་སྤྲུལ་པའི་བཀོད་པ་བསམ་གྱིས་མི་ཁྱབ་པ་ཕྱོགས་བཅུར་འཕྲོ་བ་རྒྱལ་པོ་ཆེན་པོའི་ཕོ་ཉའི་འགྲོ་འོང་བཞིན་བར་མཚམས་མེད་པ་ལྟ་བུར་བསམས་ན་མ་འོངས་པའི་དུས་སུ་ལྷུན་གྱིས་གྲུབ་པའི་འཕྲིན་ལས་མཁའ་ཁྱབ་ཏུ་འཕྲོ་བའི་རྟེན་འབྲེལ་གྱི་སྒོ་ཤིན་ཏུ་ཆེའོ། །དེ་ནས་གཙོ་འཁོར་དེ་ཐམས་ཅད་ཀྱི་སྤྱི་བོར་མེ་ལོང་ལྟ་བུའི་ཡེ་ཤེས་དང་རྣམ་པར་སྣང་མཛད་ཀྱི་ངོ་བོ་ཨོཾ་དཀར་པོ། མགྲིན་པར་སོ་སོར་རྟོག་པའི་ཡེ་ཤེས་དང་འོད་དཔག་མེད་ཀྱི་ངོ་བོ་ཨཱཿ དམར་པོ། ཐུགས་ཀར་ཆོས་དབྱིངས་ཡེ་ཤེས་དང་མི་བསྐྱོད་པའི་ངོ་བོ་ཧཱུཾ་སྔོན་པོ། ལྟེ་བར་མཉམ་ཉིད་ཡེ་ཤེས་དང་རིན་འབྱུང་གི་ངོ་བོ་སྭཱ་སེར་པོ། གསང་གནས་སུ་བྱ་སྒྲུབ་ཡེ་ཤེས་དང་དོན་འགྲུབ་ཀྱི་ངོ་བོ་ཧཱ་ལྗང་གུས་མཚན་པར་བསམས། དེ་ནས་བླ་མ་ཐུབ་པའི་དབང་པོའི་ཐུགས་ཀའི་ཧཱུཾ་ལས་འོད་ཟེར་འཕྲོས་ཏེ། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་ཏེ་བསྟིམ། བླ་མ་དམ་ཚིག་པ་ལ་བླ་མ་ཡེ་ཤེས་པ་དང། གསང་འདུས་དམ་ཚིག་པ་ལ་གསང་འདུས་ཡེ་ཤེས་པ་བསྟིམ་པ་ཙམ་མ་ཡིན་པར། ཚོགས་ཞིང་གི་གཙོ་བོའི་བླ་མ་ཐུབ་པའི་དབང་པོ་ནས་མཐའི་རྒྱལ་ཆེན་བཞིའི་བར་རེ་རེ་ལའང་ཚོགས་ཞིང་ཐམས་ཅད་ཀྱི་ཡེ་ཤེས་པ་ཆ་ཚང་བ་རེ་བསྟིམ་པ་ཡིན་ཏེ། དེ་ལྟར་བྱས་ན་གནས་སྐབས་དེ་དག་ལ་

― GTD003_Page_0333 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོག་དམན་དུ་འཛིན་པའི་འདུ་ཤེས་ལྡོག་སྟེ་བླ་མ་གཅིག་པུའི་རྣམ་འཕྲུལ་དུ་མཐོང་ནས་དད་པ་དང། རང་ཉིད་སྲིད་ཞིའི་རྒུད་པ་ལས་སྐྱོབ་པའི་ཕྱིར་རྣམ་པ་མི་འདྲ་བ་སྣ་ཚོགས་པ་ཞིག་བཟུང་བ་ཡིན་པར་གོ་ནས་གུས་པ་ཇེ་ཆེར་འགྲོ་ལ། ལམ་དུས་སུ་འདི་ལྟར་བསྐྱངས་པའི་སྟོབས་ཀྱིས་འབྲས་བུའི་དུས་ན་རིགས་རེ་རེ་ལའང་རིགས་ཐམས་ཅད་ཚང་བའི་དམ་པ་རིགས་བརྒྱ་སོགས་འབྱུང་བ་ཡིན་ནོ། །ཡེ་ཤེས་པ་སྤྱན་འདྲེན་པའི་ཚེ་སྤྲོ་ན། མ་ལུས་སེམས་ཅན་ཞེས་སོགས་ཀྱི་ཚིགས་བཅད་ཀྱང་བརྗོད་ལ། དེ་ནས་ཛཿ ཧཱུཾ་བཾ་ཧོཿ ཞེས་དགུག་གཞུག་བཅིང་མཉེས་བྱས་ཏེ་དབྱེར་མེད་དུ་བསྟིམ། དེའང་སྤྱིར་ཐོག་མེད་ནས་བསགས་པའི་སྡིག་ལྟུང་ཚན་ཆེ་ཞིང། ཁྱད་པར་དཀོར་སྒྲིབ་སོགས་ཀྱིས་ནོན་པའི་དབང་གིས་སྒོམ་སྒྲུབ་ལ་ཞུགས་པའི་ཚེ་ནག་ཐོམ་གྱིས་སོང་ནས་སེམས་མི་གསལ་བ་ལ་ཁྲུས་གསོལ་སོགས་བྱས་ན་ཕན་ཤིན་ཏུ་ཆེ་བས། དེའི་བྱེད་ཚུལ་ནི། ཚོགས་ཞིང་རྣམས་ཀྱི་མདུན་དུ་ཁྲུས་ཀྱི་ཁང་པ་རིན་པོ་ཆེ་སྣ་ཚོགས་ལས་གྲུབ་ཅིང་། རྒྱ་ཕིབས་རིམ་པ་གསུམ་དང་ལྡན་པ། ནེའུ་གསིང་མེ་ཏོག་བཀྲ་བས་ཕྱོགས་ཀུན་མཛེས་ཤིང། རིན་པོ་ཆེའི་ལྗོན་ཤིང་རྣམ་པ་སྣ་ཚོགས་པས་ཡོངས་སུ་བསྐོར་བ། ཁང་པའི་ཕྱོགས་བཞིར་སྒོ་རེ་རེ་དང། སྒོ་སོ་སོའི་མདུན་དུ་ཁྲུས་ཀྱི་རྫིང་བུ་གྲུ་བཞི་པ་མེ་ཏོག་སྣ་ཚོགས་པས་བརྒྱན་ཅིང། འོག་གཞི་གསེར་གྱི་ཕྱེ་མ་བརྡལ་བ། ཕྱོགས་རེར་རིན་པོ་ཆེའི་ཐེམ་སྐས་འབབ་སྟེགས་ཀྱི་རྣམ་པར་ཡོད་པ། ནང་དུ་དྲི་ཞིམ་པོའི་ངད་ལྡང་བའི་སྤོས་ཆུས་ཡོངས་སུ་གང་བ་རེ་རེ་ཡོད་པ། ཁང་

― GTD003_Page_0334 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དབུས་སུ་སེང་ཁྲི་སོགས་སྔར་ལྟར་གསལ་བཏབ་ལ། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཞེས་སོགས་བརྗོད་པས་ཚོགས་ཞིང་རྣམས་ན་བཟའ་མེད་པར་ཁྲུས་ཁང་གི་ནང་དུ་ཁྲི་རྣམས་ལ་འཁོད་པར་བསམ། རང་གི་ཐུགས་ཀ་ནས་ལྷ་མོ་བུམ་པ་ཐོགས་པ་དཔག་ཏུ་མེད་པ་སྤྲོ་བའམ། ཡང་ན་རང་ལུས་ལྷ་གྲངས་མཉམ་པར་སྤྲུལ་ནས་ཐམས་ཅད་ཀྱིས་ལག་ཏུ་བུམ་པ་ཐོགས་ཏེ་རྫིང་བུ་རྣམས་ལས་ཆུ་བླངས་ནས་ཁྲུས་གསོལ་བས་འགྲོ་བའི་སྣང་ངོར་དྲི་མ་ཐམས་ཅད་དག་ཅིང། ཐུགས་རྒྱུད་ལ་བདེ་སྟོང་གི་ཡེ་ཤེས་ཁྱད་པར་ཅན་བསྐྲུན་པར་བསམས་ཏེ་ཚིགས་བཅད་རྒྱས་བསྡུས་ཅི་རིགས་པས་ཁྲུས་གསོལ་ཞིང། དེ་དག་སྐུ་ལ་ཞེས་སོགས་ཀྱིས་སྐུ་དབྱི་བ་སྤེལ་མར་བྱ། དེ་ནས་དྲི་ཞིམ་པོའི་ལྡེ་གུས་སྐུ་ལུས་ལ་བྱུགས་པར་མོས་ཤིང། སྟོང་གསུམ་ཀུན་ཏུ་ཞེས་སོགས་དང། སྤྲུལ་སྐུ་རྣམས་ལ་ཆོས་གོས་རྣམ་གསུམ། ལོངས་སྐུ་རྣམས་ལ་ལྷའི་གོས་ཀྱི་སྟོད་གཡོགས་སྨད་གཡོགས་དང་རིན་པོ་ཆེའི་རྒྱན། ཁྲོ་བོ་རྣམས་ལ་སྟག་ཤམ་རུས་རྒྱན་སོགས་ཕུལ་བར་བསམས་ལ། སྲབ་འཇམ་ཡང་པ་ཞེས་སོགས་དང། རྒྱལ་བ་མཚན་དཔེའི་ཞེས་སོགས་བརྗོད། བདག་དང་འགྲོ་ལ་ཞེས་པ་ནས་བཞུགས་སུ་གསོལ་ཞེས་བརྗོད་པ་དང་མཉམ་དུ་ཚོགས་ཞིང་རྣམས་བྱ་ཁྱུ་འཕུར་བ་བཞིན་འུར་དིར་གྱིས་བྱོན་པ་སྔར་གྱི་རང་རང་གི་ཁྲི་ལ་བཞུགས་ཤིང། ཁྲུས་ཁང་མི་དམིགས་པར་གྱུར་པར་བསམ། ཁྲུས་གསོལ་འདི་བྲེལ་དུས་མ་བྱས་ཀྱང་ཆོག་པ་ཡིན་ནོ། །དེ་ནས་ལྔ་པ་བསག་སྦྱང་གི་གནད་བསྡུས་པ་ཡན་ལག་བདུན་པ་མཎྜལ་དང་བཅས་པ་འབུལ་བ་ལ་

― GTD003_Page_0335 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་འཚལ་བ་ནི། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། །མཐའ་ཡས་འགྲོ་བའི་རེ་བ་སྐོང་བའི་གསུང། །མ་ལུས་ཤེས་བྱ་ཇི་བཞིན་གཟིགས་པའི་ཐུགས། །ཤཱཀྱའི་གཙོ་བོ་དེ་ལ་ཕྱག་འཚལ་ལོ། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། །མཆོག་སྡེ་དུལ་བའི་སྡེ་དང་གྲགས་པའི་སྡེ། །སེང་བཟང་ཀུ་སཱ་ལི་གཉིས་གསེར་གླིང་པ། །རྒྱ་ཆེན་སྤྱོད་པའི་བརྒྱུད་ལ་ཕྱག་འཚལ་ལོ། །འཇམ་དབྱངས་ཡོད་མེད་ཕྱོགས་འཇིག་ཀླུ་སྒྲུབ་དང། །ཟླ་བ་གྲགས་པ་རིགས་པའི་ཁུ་བྱུག་ཆེ། །སངས་རྒྱས་དགོངས་སྐྱོང་འཕགས་པ་ཡབ་སྲས་ཏེ། །ཟབ་མོ་ལྟ་བའི་བརྒྱུད་ལ་ཕྱག་འཚལ་ལོ། །ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང། །མཆོག་གཟིགས་ཏེ་ལོ་པ་དང་ནཱ་རོ་པ། །དཔལ་མཆོག་ཌོཾ་བྷི་པ་དང་ཨ་ཏི་ཤ། །ཉམས་ལེན་བྱིན་རླབས་བརྒྱུད་ལ་ཕྱག་འཚལ་ལོ། །ཞེས་སོགས་ལམ་རིམ་བླ་མ་བརྒྱུད་པ་དང། སངས་རྒྱས་བྱང་སེམས་རྣམས་ལ་ཕྱག་འཚལ་གང་འགྲུབ་བྱ། རྒྱས་པར་བྱེད་ན་ལམ་མཆོག་སྒོ་འབྱེད་ཀྱི་གསོལ་བ་འདེབས་ཞེས་པ་ཕྱག་འཚལ་དུ་བསྒྱུར་ཅིང། ཚིགས་བཅད་གཞན་ཡང་ཅི་རིགས་པ་བསྣན་ཏེ་ཕྱག་དངོས་སུ་འཚལ་ན་ཐོག་མར། ན་མོ་མཉྫུ་ཤྲི་ཡེ། ན་མཿ སུ་ཤྲི་ཡེ། ན་མོ་ཨུཏྟ་མ་ཤྲི་ཡེ་སྭཱཧཱ། ཞེས་ཕྱག་སྟོང་འགྱུར་གྱི་སྔགས་འདིའང་ལན་གསུམ་ཙམ་བརྗོད་ན་

― GTD003_Page_0336 ―

^{[མ་དཔེ་གཟིགས་ན་འདིར་གནོན།]}

[Full Size]

ལེགས་སོ། །ཕྱག་འཚལ་ཚུལ་ནི་ལུས་ཐམས་ཅད་ས་ལ་ཕབ་པའི་བརྐྱང་ཕྱག་ཏུ་གྲགས་པའམ། ཡང་ན་ཡན་ལག་ལྔའི་ཕྱག་བྱ་སྟེ། དེའང་རྐང་པ་གཉིས་གཤིབ། ཐལ་མོ་རབ་སྤྱི་བོར། འབྲིང་མགྲིན་པར། ཐ་མ་སྙིང་གར་སྦྱར། དེའང་བཅར་བཅར་པོར་སྦྱར་བ་མུ་སྟེགས་ཀྱི་ལུགས་ཡིན་པ་དང། སངས་རྒྱས་མི་བཞུགས་པའི་ཞིང་དུ་སྐྱེ་བར་འགྱུར་བས་དེ་ལྟ་བུ་མ་ཡིན་པར་མཛུབ་རྩེ་རྣམས་སྦྱར་ལག་པའི་མཐིལ་མ་སྦྱར་བ་བྱ། ཕན་ཡོན་སྤྱི་གཙུག་བལྟར་མི་མངོན་པ་འགྲུབ། དེ་ནས་བརྐྱང་ཕྱག་དང་བསྐུམ་ཕྱག་གང་ཡང་རུང་སྟེ་ཡན་ལག་ལྔ་ས་ལ་ཕབ་ནས་བཙལ་དགོས་ཀྱི། མགོ་ས་ལ་མི་ཐུག་པར་སྒུར་ཙམ་བྱས་ན་དམྱལ་བ་མགོ་འཕྱངས་སུ་སྐྱེ་ཞིང་ཐར་ནས་ཀྱང་སྒུར་སྐྱོན་ཅན་དུ་འགྱུར། ཚུལ་མཐུན་དུ་ཕྱག་བཙལ་བའི་ཕན་ཡོན་ལུས་ཀྱིས་ཇི་ཙམ་ནོན་པའི་རྡུལ་གྱི་གྲངས་དང་མཉམ་པར་འཁོར་སྒྱུར་དུ་སྐྱེ་བར་གསུངས་པས་སླ་ཆོས་སུ་མ་སོང་བར་ཚུལ་དང་མཐུན་པ་བྱེད་དགོས་སོ། །དེ་ནས་རང་གི་ལུས་གྲངས་མེད་པ་སོགས་སུ་སྤྲུལ་པར་མོས་ལ། ཇི་སྙེད་སུ་དག་ཅེས་སོགས་གདོན་ཞིང། མཆོད་པའི་སྐབས་སུ་གཞན་ནས་འབྱུང་བའི་ཆུ་གཉིས་ཉེར་སྤྱོད་འདོད་ཡོན་རྒྱལ་སྲིད་སྣ་བདུན་སོགས་ཀྱི་མཆོད་འཕྲེང་ཅི་རིགས་པའང་བསྣན་ནས་བྱས་ཆོག་ལ། བླ་མཆོད་སོགས་ནས་འབྱུང་བ་ལྟ་བུ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཆ་ཚང་བར་བྱས་ནའང་ཕུན་སུམ་ཚོགས་པའི་ཡན་ལག་ཏུ་འགྱུར་རོ། །སྔགས་ཀྱི་སྐབས་ཀུན་བཟང་མཆོད་སྤྲིན་ཞེས་པ་བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་མཆོད་པའི་ཡོ་བྱད་མཐའ་ཡས་པའི་

― GTD003_Page_0337 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་པར་ཤར་བ་ལ་ཟེར་ཞིང་། མདོ་ལུགས་ཀྱི་ཀུན་ཏུ་བཟང་པོའི་མཆོད་པ་འབུལ་ཚུལ་ནི་པདྨ་འདབ་མ་སྟོང་དང་ལྡན་པའི་ལྟེ་བར་རང་ཉིད་ཀུན་ཏུ་བཟང་པོ། འདབ་མ་སྟོང་ལ་ཀུན་ཏུ་བཟང་པོ་སྟོང། དེ་ཐམས་ཅད་ཀྱི་ལག་པ་ཐལ་མོ་སྦྱར་བའི་བར་དུ་ནོར་བུ་རིན་པོ་ཆེ་རེ་རེ། དེ་དག་ལས་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་འཕྲོས་པས་སངས་རྒྱས་ཀྱི་ཞིང་རབ་འབྱམས་འགེངས་པར་བསམས་ནས་འབུལ་བ་ལ་བྱེད་དོ། །ལས་དང་པོ་པ་ལ་འདི་ཕན་ཤིན་ཏུ་ཆེའོ། །སྡིག་པ་བཤགས་པའི་སྐབས་ལྟུང་བཤགས་དང་སྤྱི་བཤགས་སོགས་བྱས་ན་ལེགས་ལ། དེའང་གཙོ་བོར་སྟོབས་བཞི་ཚང་དགོས་པས་རྟེན་གྱི་སྟོབས་ནི་སྔར་ཚོགས་ཞིང་གསལ་བཏབ་པ་དེས་འགྲུབ་ལ། རྣམ་པར་སུན་འབྱིན་པའི་སྟོབས་ནི་ཚེ་ཐོག་མ་མེད་པ་ནས་སྡིག་ལྟུང་དཔག་ཏུ་མེད་པ་བསགས་པ་རྒྱལ་པོའི་གན་མཛོད་བཞིན་དུ་སྣ་རེ་རེ་ལ་བལྟས་ནའང་འཁོར་བ་ཐོག་མེད་ནས་འདི་ཁོ་ན་བསགས་པར་འདུག་སྙམ་པའི་ཚོད་ལྟ་བུ་བསམ་ལས་འདས་པ་ཞིག་ཡོད་ཅིང། སྐྱེ་བ་འདིར་ཡང་སྡོམ་པ་གསུམ་སོགས་ཁས་བླང་རྒྱ་ཆེ་ལ་བསྲུང་བ་སྣ་གཅིག་ཀྱང་སེམས་ལ་འཛིན་རྒྱུ་མེད་པས་དབུགས་འགྱུ་བ་འདི་ཆད་མ་ཐག་འགྲོ་ས་དམྱལ་བ་ལས་མེད་པ་རང་གི་མྱོང་ཐོག་ནས་ཐག་ཆོད་པར་འདུག །ཁ་སང་ཙམ་ལ་ཤི་ཡོད་ན་ད་ཚོད་དམྱལ་བའི་ལྕགས་ཁང་དུ་མེ་དམར་འུར་རུ་རུ་སྡུག་བསྔལ་གྱི་ཆོ་ངེ་ལྷང་ལྷང་འདེབས་བཞིན་པར་ཡོད་པས་བྱ་ཐབས་མེད་ཀྱང། ད་དུང་མ་ཤི་བ་འདི་ཁ་རྗེ་ཆེ་བས་འཇིགས་པ་དེ་ལས་སྐྱོབ་པའི་སྐྱབས་

― GTD003_Page_0338 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིག་མྱུར་བ་མྱུར་བར་མ་བཙལ་བའི་ཐབས་རང་མི་འདུག་སྙམ་དུ་བསམ། གཉེན་པོ་ཀུན་ཏུ་སྤྱོད་པའི་སྟོབས་བསླབ་བཏུས་ལས་མང་དུ་གསུངས་པས། ཐུན་མཚམས་སོགས་ཅི་རིགས་པར་དེ་ཐམས་ཅད་ལག་ལེན་དུ་ཐེབས་པ་དགོས་ཀྱང། དངོས་གཞིའི་སྐབས་འདིར་ལྟུང་བཤགས་སོགས་གང་བྱེད་པ་དེའི་ཚེ་རྣམ་སྨིན་ལ་འཇིགས་པ་དང། འོན་ཀྱང་གཉེན་པོ་དེས་དེ་སེལ་ནུས་པར་ཡིད་ཆེས་པ་སོགས་བློ་འཁུལ་ངེས་པ་དགོས་སོ། །ཉེས་པ་ལས་སླར་ལྡོག་པའི་སྟོབས་ནི། སྔར་བྱས་པའི་སྡིག་པ་ལ་འགྱོད་པའི་སྒོ་ནས་ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་དྲག་པོ་བྱ་ལ། ཕྱིན་ཆད་སྤོང་འདོད་མེད་པའང་ཡོད་ཀྱང་ལག་ལེན་ལ་མི་འགེལ་བཞིན་དུ་ཕྱིན་ཆད་སྡོམ་མོ་ཞེས་ཁས་ལེན་པ་ནི་ཉེས་པ་མི་འདག་པའི་སྟེང་དུ་རྫུན་གྱི་ཉེས་པར་འགྱུར་བས། སྡིག་ལྟུང་འཕྲལ་དུ་སྤོང་ཐུབ་པ་རྣམས་ནི་ངོས་ཟིན་མ་ཐག་སྤོང་སྡོམ་ཚུལ་བཞིན་དུ་བྱ་ལ། གལ་ཏེ་འཕྲལ་དུ་སྤོང་མི་ནུས་པ་རྣམས་ཀྱང་ཇི་མི་སྙམ་པར་མི་འཇོག་པར་ལོ་ཟླ་བའི་བར་རམ་ཉིན་ཞག་རེའི་བར་དུ་མི་བྱེད་སྙམ་དུ་སྡོམ་སེམས་བྱ་ཞིང་ལག་ཏུ་བླངས་པ་དང། བདག་གིས་མྱུར་དུ་འདི་ལྟ་བུ་སྤོང་ནུས་པར་ཤོག་ཅིག་སྙམ་དུ་སྨོན་པ་སོགས་བྱས་ནས་རིམ་གྱིས་གོམས་པར་བྱས་ན་སྐབས་ཤིག་དངོས་སུ་སྤོང་ཐུབ་པ་ངེས་པར་འབྱུང་ངོ་། །དེར་མ་ཟད་བློའི་གཏིང་ན་སྤོང་ཐུབ་སྙམ་པ་མེད་ཀྱང་སྐབས་དེར་བློ་བཅོས་ནས་སྤོངས་ཐུབ་སྙམ་པ་ཙམ་བྱས་ནའང་ལྟུང་ཐུན་བྱིན་རླབས་བྱས་པས་ལས་ལ་མི་བསྒྲིབས་པ་ལྟར་སྡིག་པ་དག་པ་ལ་ཕན་ཆེ་བས་ཐབས་མ་བྱུང་ན་འདི་ཙམ་རེ་ཡིན་ཀྱང་བྱ་དགོས་པར་སྐྱབས་མགོན་རྡོ་རྗེ་

― GTD003_Page_0339 ―

^{[མ་དཔེ་གཟིགས་ན་འདིར་གནོན།]}

[Full Size]

འཆང་ཆེན་པོས་གསུངས་སོ། །བཤགས་པའི་སྐབས་འདིར་སྔར་བྱས་ཀྱི་ཉེས་པ་ལ་ཉེས་པར་མཐོང་བའི་རྣམ་པར་སུན་འབྱིན་པ་དང། ཕྱིན་ཆད་སྡོམ་པ་སླར་ལྡོག་པའི་སྟོབས་གཉིས་པོ་འདི་གལ་ཆེ་བའི་དབང་གིས་བཤགས་པ་ཕལ་ཆེར་གྱིས་ཀུན་ཏུ་མཐོང་སྡོམ་དྲིས་པ་ཡིན་པས་དོན་འདི་གོ་བའང་གནད་ཤིན་ཏུ་ཆེའོ། །ཁ་ཅིག་འཁོར་བ་ཐོག་མ་མེད་པ་ནས་སྡིག་པ་བསགས་པ་ལ་མཐའ་མེད་པས་བཤགས་བསྡམས་ཕྲན་ཚེགས་རེས་གོ་མི་ཆོད་སྙམ་པ་ནི་ལས་འབྲས་བསམ་ཚུལ་མིན་གྱི། གཉེན་པོ་ལ་ཡིད་མ་ཆེས་པའི་སྐུར་འདེབས་ཡིན་པས་ཉེས་དམིགས་ལྷག་པར་ཆེ་སྟེ། ཉེས་དམིགས་འབྱུང་བར་ཡང་སངས་རྒྱས་ཀྱིས་གསུངས་པ་ཡིན་ལ། བཤགས་ན་འདག་པར་ཡང་དེས་གསུངས་པ་ཡིན་པས་ཡིད་ཆེས་བྱེད་ན་གཉི་ག་ལ་བྱེད་དགོས་ཚུལ་བེའུ་བུམ་སྔོན་མོའི་འགྲེལ་པར་གསུངས་པ་བཞིན་ནོ། །དེ་ནས་རྗེས་སུ་ཡི་རང་ནི་ཚོགས་མྱུར་དུ་རྫོགས་པའི་ཐབས་མཁས་ཁྱད་པར་ཅན་ཡིན་ཏེ། འགྲེལ་ཆུང་དོན་གསལ་ལས། རྗེས་སུ་ཡི་རང་ཡིད་ལ་བྱེད་པས་ནི་རང་གཞན་གྱིས་དགེ་བ་བྱས་པ་མཉམ་པ་ཉིད་འཐོབ་བོ། །ཞེས་གཞན་གྱི་དཀའ་སྤྱད་དྲག་པོའི་སྒོ་ནས་ལོ་དང་བསྐལ་པ་མང་པོར་བསྒྲུབས་པའི་དགེ་བ་དང། དེ་ལ་སྙིང་ཐག་པ་ནས་རྗེས་སུ་ཡི་རང་བྱས་པའི་ཚེ་བློའི་འགྱུར་བ་གཅིག་གིས་དེ་དང་མཉམ་པའི་བསོད་ནམས་འཐོབ་ནུས་པས་བྱ་སླ་ཞིང་དོན་ཆེ་ལ། དེར་མ་ཟད་ཡོན་ཏན་རིན་པོ་ཆེ་སྡུད་པ་ལས་ཉན་རང་སོགས་ཀྱི་དགེ་རྩ་མཐའ་དག་བྱང་ཆུབ་སེམས་དཔའི་རྗེས་སུ་ཡི་རང་གཅིག་གིས་ཟིལ་གྱིས་གནོན་པར་གསུངས་ཏེ། འདི་

― GTD003_Page_0340 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དགོངས་ནས་དབུས་མཐའ་རྣམ་འབྱེད་དུ་དམ་པ་བཅུ་གཉིས་ཀྱི་ནང་ནས་རྗེས་སུ་ཡི་རང་ལ་ཚེགས་མེད་པ་དམ་པ་ཞེས་གསུངས་སོ། །དེས་ན་རང་ཅག་བྱང་ཆུབ་སྒྲུབ་པར་ཁས་འཆེ་བ་རྣམས་ཀྱིས་གཞན་གྱི་དགེ་བ་ལ་ཕྲག་དོག་མེད་པར་རྗེས་སུ་ཡི་རང་བསྒོམ་དགོས་ཏེ། དཔེར་ན་མུ་གེའི་ཚེ་ཕ་གཅིག་གིས་བུ་མང་ཞིག་གསོ་དགོས་པ་ལ། དེའི་ནང་ནས་གཅིག་གིས་རང་སྟོབས་ཀྱིས་འཚོ་བ་རྙེད་ན་འདིས་རང་མགོ་ཐོན་པ་འོང་བར་འདུག་སྙམ་དུ་རང་གིས་རྙེད་པ་ལས་ཀྱང་དགའ་བ་ལྷག་པར་སྐྱེ་བ་བཞིན་ནོ། །དེས་ན་གནས་མ་ཡིན་པ་དམག་འཁྲུག་དང་གཡོ་སྒྱུའི་སྤྱོད་པ་སོགས་ལ་རྗེས་སུ་ཡི་རང་གོ་ལོག་བྱས་ཏེ་དོན་མེད་པར་རང་རྒྱུད་སྡིག་པས་གང་བ་མི་བྱེད་ཅིང། དགེ་བ་ཆུང་ངུ་ཞིག་ལ་མི་བརྙས་པར་རྗེས་སུ་ཡི་རང་བྱེད་དགོས་ཚུལ་རྣམས་བསམ་སྟེ། ཕྱོགས་བཅུའི་རྒྱལ་བ་ཀུན་དང་ཞེས་སོགས་བརྗོད། དེ་ནས་དངོས་སུ་མཎྜལ་གྱི་སྟེང་དུ་ཚོམ་བུ་འཁོར་ལོ་རྩིབས་བརྒྱད་པ་ལྟ་བུ་དགོད་ལ། ཡིད་ཀྱིས་རང་ཉིད་ཚངས་པ་ཆེན་པོར་མོས་ཏེ་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས། ཆོས་འཁོར་བསྐོར་བར་བསྐུལ་ཞིང་ཞལ་གྱིས་བཞེས་པར་བསམས་ལ། གང་རྣམས་ཕྱོགས་བཅུའི་ཞེས་སོགས་དང། ཡང་མཎྜལ་ཁ་གསོས་ཏེ་ལག་ཏུ་ཐོགས་ལ་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་རྡོ་རྗེས་མཚན་པ་ཕུལ་བར་བསམ་ཞིང་མྱ་ངན་ལས་མི་འདའ་བར་གསོལ་བ་བཏབ་ནས་ཞལ་གྱིས་བཞེས་པའི་དམིགས་རྣམ་དང་བཅས། མྱ་ངན་འདའ་སྟོན་ཞེས་སོགས་དང། གནས་སྐབས་སུ་སྒྲུབ་བཞིན་པའི་དགེ་རྩ་འདིས་མཚོན་དུས་གསུམ་གྱི་དགེ་ཚོགས་མཐའ་དག་ཆུད་མི་ཟ་ཞིང་འབྲས་

― GTD003_Page_0341 ―

^{[མ་དཔེ་གཟིགས་ན་འདིར་གནོན།]}

[Full Size]

བུ་དམན་པའི་རྒྱུར་མི་འགྱུར་བར་མཁའ་མཉམ་སེམས་ཅན་ཐམས་ཅད་ཀྱི་དོན་དུ་བླ་མེད་བྱང་ཆུབ་ཁོ་ནའི་རྒྱུར་བསྔོ་བའི་འདུན་པ་དྲག་པོ་དང་བཅས། ཕྱག་འཚལ་བ་དང་ཞེས་སོགས་བྱ། དེའང་ཡན་ལག་བདུན་པོ་འདིའི་ནང་ནས་ཕྱག་འཚལ་བ་ང་རྒྱལ་གྱི་གཉེན་པོ། མཆོད་པ་སེར་སྣའི། བཤགས་པ་དུག་གསུམ་གྱི། རྗེས་སུ་ཡི་རང་ཕྲག་དོག་གི །ཆོས་འཁོར་བསྐོར་བར་བསྐུལ་བ་ཆོས་སྤོང་གི། མྱ་ངན་ལས་མི་འདའ་བར་གསོལ་བ་འདེབས་པ་བླ་མའི་ཐུགས་དཀྲུག་པ་སོགས་ཀྱི། བསྔོ་བ་ལོག་ལྟའི་གཉེན་པོར་འགྲོ་བ་སོགས་རང་རང་གི་ཐུན་མོང་མ་ཡིན་པའི་སྤང་གཉེན་སྦྱོར་ལུགས་དང་དགོས་པ་སྒྲུབ་ཚུལ་འགངས་ཆེ་བ་རེ་ཡོད་ལ། རྒྱལ་སྲས་ཀྱི་སྤྱོད་པ་ཐམས་ཅད་ཀྱང་ཡན་ལག་བདུན་པོ་འདིར་མ་འདུས་པ་མེད་པར་རྗེ་ངག་དབང་བྱམས་པའི་གསུང་ཟིན་བྲིས་སུ་འབྱུང་བ་ལྟར་ཡིན་པས་ཆ་ཐམས་ཅད་ནས་ནན་ཏན་སྙིང་པོར་བྱ་དགོས་སོ། །དྲུག་པ་འདོད་པའི་དོན་ལ་གསོལ་བ་གདབ་པ་ནི། དཔེར་ན་ཡུལ་གྱི་རྒྱལ་པོ་སོགས་ལ་ཞུ་དོན་གལ་ཆེ་བ་ཞིག་བྱེད་པའི་ཚེ་གསོལ་སྟོན་སོགས་དྲངས་ཟིན་པའི་རྗེས་སུ་རང་གི་སྙིང་ནོར་གཅེས་པ་ཞིག་ཕུལ་ཏེ་ཞུ་བ་བྱེད་པ་བཞིན། འདིར་ཡང་འདོད་དོན་ལ་གསོལ་བ་འདེབས་པའི་ཐོག་མར་མཎྜལ་འབུལ་བ་ལ། རྒྱུ་ནི་གསེར་དངུལ་ཟངས་སོགས་རིན་པོ་ཆེ་དང། མ་འབྱོར་ན་ཤིང་རྡོ་སོགས་ལས་བྱས་པ་ཆེ་ཆུང་གི་ཚད་རང་གིས་རྒྱུན་དུ་འབུལ་རྒྱུ་ལ་ཁྲུ་གང་སོགས་ཆེན་པོ་བྱུང་ན་ལེགས། དེ་ལྟ་བུའི་སྟེང་དུ་བ་བྱུང་གིས་བྱུགས། རང་གི་མཐེབ་སྲིན་གྱིས་དྲི་བཟང་གི་ཆུ་བླངས་ལ་མཐེ་བོང་དབུས་སུ་

― GTD003_Page_0342 ―

^{[མ་དཔེ་གཟིགས་ན་འདིར་གནོན།]}

[Full Size]

བཞག་སྟེ་སྲིན་ལག་གིས་ཤར་ལྷོ་ནས་ནུབ་བྱང་གི་བར་དང། དེ་ནས་སྲིན་ལག་དབུས་སུ་བཞག་སྟེ་མཐེ་བོས་ནུབ་བྱང་ནས་ཤར་ལྷོའི་བར་བསྐོར། མཎྜལ་གྱི་དབུས་སྟོང་པར་བཞག་ན་སངས་རྒྱས་མི་བཞུགས་པའི་ཞིང་དུ་སྐྱེ་བར་གསུངས་པས། དེ་མ་ཐག་དབུས་སུ་ཚོམ་བུ་གཅིག་བཞག །དེ་ནས་ཨོཾ་བཛྲ་བྷུ་མི་ཞེས་སོགས་ཀྱི་སྐབས་སུ་ཚིག་རིས་བཞིན་གསེར་དཀྱིལ་ལྕགས་རི་དང་བཅས་པའི་དབུས་སུ་རི་རབ། སྟེང་དུ་ཉི་ཟླ། ཕྱོགས་སུ་གླིང་དང་གླིང་ཕྲན། རྒྱལ་སྲིད་སྣ་བདུན། གཞན་ཡང་ལུས་ལོངས་སྤྱོད་དགེ་རྩ་དང་བཅས་པ་གཅིག་ཏུ་བསྡོམས་ནས་ཕུལ་བས་དགྱེས་བཞིན་བཞེས་ཏེ་ཞིང་ཁམས་རྣམས་སུ་སྤྲུལ་པའི་བཀོད་པ་སྟོན་པར་བསམ། མཎྜལ་ཉེར་གསུམ་མ་འདི་ནི་འདུས་པའི་རྩ་རྒྱུད་ལེའུ་བརྒྱད་པ་ལས་གསུངས་པ་ཡིན་ཞིང། ཡོངས་གྲགས་ལྟར་སྒེག་སོགས་ལྷ་མོ་རྣམས་བསྣན་པ་འདི་འགྲོ་མགོན་འཕགས་པའི་དུས་མཛད་པ་ཡིན་ལ། བློས་ལྕོགས་ན་སྤྱོད་འཇུག་ཏུ། ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །ཞེས་གསུངས་པ་ལྟར་ཞིང་ཁམས་མཐའ་ཡས་པ་བློས་བླངས་ཏེ་ཕུལ་ན་དེའི་ཚོད་ཀྱིས་བསོད་ནམས་ཀྱི་ཚོགས་རྫོགས་ཚབས་ཆེ་ལ། ཕྱི་ནང་གསང་བ་དེ་ཁོ་ན་ཉིད་ཀྱི་མཎྜལ་ཚང་བར་བྱས་ན་ཤིན་ཏུའང་ལེགས་སོ། །དེ་ནས། དཔལ་ལྡན་རྩ་བའི་བླ་མ་ནས། སྩལ་ཏུ་གསོལ། །ཞེས་བརྗོད་པས། མདུན་གྱི་རྩ་བའི་བླ་མ་ལས་རང་འདྲ་གཉིས་པ་ཆད་དེ་སྤྱི་བོར་བྱོན། རང་དང་ཁ་ལྟ་ཕྱོགས་མཐུན་པར་བཞུགས་པའི་སྐུ་ལས་བདུད་རྩིའི་རྒྱུན་བབས་པས་བླ་མ་ལ་བརྟེན་པའི་ཉེས་ཚོགས་སྦྱངས། རྐང་པ་ཕྱི་མ་ལན་གཉིས་པ་བརྗོད་པས་དེའི་བྱིན་རླབས་ཞུགས་ཤིང། དེ་ནས་ཚོགས་ཞིང་རྣམས་

― GTD003_Page_0343 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ངའི་བུ་འདི་བརྩེ་བས་རྗེས་སུ་ཟུངས་ཤིག་ཅེས་ངོ་ཆེན་བྱེད་པར་བསམ་ཞིང། འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མ་ཕམ་མགོན། །རྒྱལ་བས་ལུང་བསྟན་འཕགས་པ་ཐོགས་མེད་ཞབས། །སངས་རྒྱས་བྱང་སེམས་གསུམ་ལ་གསོལ་བ་འདེབས། །སངས་རྒྱས་བྱང་སེམས་གསུམ་ལ་གསོལ་བ་འདེབས། །ཞེས་རྐང་པ་ཕྱི་མ་ལན་གཉིས་སུ་བརྗོད་པས་དང་པོའི་ཚེ་ཚོགས་ཞིང་སྤྱི་དང་ཁྱད་པར་དུ་དེ་གསུམ་གའི་སྐུ་ལས་བདུད་རྩིའི་རྒྱུན་བབས་པས་ཐོག་མེད་ནས་བསགས་པའི་ཉེས་ལྟུང་སྡིག་སྒྲིབ་ཐམས་ཅད་དང། ཁྱད་པར་དུ་བྱམས་སྙིང་རྗེ་བྱང་ཆུབ་ཀྱི་སེམས་སོགས་རྒྱ་ཆེ་བའི་ལམ་གྱི་རིམ་པ་རྒྱུད་ལ་སྐྱེ་བ་ལ་གེགས་བྱེད་ཀྱི་དྲི་མ་ཐམས་ཅད་སྦྱངས། ལན་གཉིས་པའི་ཚེ་དེ་གསུམ་ལས་རང་འདྲ་གཉིས་པ་རེ་ཆད་དེ་རང་ལ་ཐིམ་པས་རྒྱ་ཆེ་བའི་ལམ་གྱི་རིམ་པ་དེ་དང་དེ་སྐྱེ་བའི་སྣོད་རུང་དུ་བྱིན་གྱིས་བརླབས་བྱུང་སྙམ་དུ་བསམ། དེ་བཞིན་དུ་རྩ་བའི་བླ་མའི་བར་རང་གིས་ཐོབ་ཚུལ་གྱི་བརྒྱུད་རིམ་ལྟར་གྱི་གསོལ་འདེབས་བྱེད་ཅིང། ཟབ་མོ་ལྟ་བརྒྱུད་ཀྱི་སྐབས་སུ་བདག་གཉིས་སུ་མཚན་མར་འཛིན་པ་སོགས་ཟབ་མོའི་ལམ་གྱི་གེགས་བྱེད་སྦྱངས་པའི་དམིགས་པ་བྱེད་པ་ཙམ་མ་གཏོགས་འདྲའོ། །དེ་ནས་བྱིན་རླབས་སྤུངས་ཞུས་ཀྱི་ཚེའང། གུས་པ་ཆེན་པོས་བསྟེན་པར་བྱིན་གྱིས་རློབས། །ཞེས་པ་ལན་གཉིས་བརྗོད་པ་ན། དང་པོའི་སྐབས་སུ་བཤེས་གཉེན་ལ་མ་གུས་པ་སོགས་ཀྱི་ཉེས་ལྟུང་རྣམས་སྦྱངས་ཤིང། གཉིས་པའི་ཚེ་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནུས་པའི་རྟོགས་པ་ཁྱད་པར་ཅན་

― GTD003_Page_0344 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེས་པར་བསམ། དེས་མཚོན་ཏེ་ཆོས་སྐོར་འོག་མ་རྣམས་ལའང་དེ་དང་དེའི་གེགས་བྱེད་སྦྱངས་ཤིང། དེ་དང་དེའི་རྟོགས་པ་སྐྱེ་རུང་དུ་བྱིན་གྱིས་བརླབས་པར་བསྒོམ་ཚུལ་གྱི་དམིགས་ཕྱེད་དགོས་སོ། །ཐུན་མོང་ལམ་སྦྱངས་སྣོད་དུ་གྱུར་པ་ན། །ཞེས་སོགས་ཀྱི་སྐབས་སུ་དམིགས་རྣམ་སྐྱོང་ཚུལ་ནི། སྔར་ཚོགས་ཞིང་ཐམས་ཅད་སེམས་དཔའ་སུམ་བརྩེགས་སུ་གསལ་བཏབ་ཡོད་ན་དེས་འཐུས་ཤིང། མེད་ན་ཉམས་ལེན་བྱིན་རླབས་བརྒྱུད་པའི་བླ་མ་རྣམས་རྡོ་རྗེ་འཆང་ལ་ཐིམ། དེ་ཐུབ་དབང་གི་སྤྱི་གཙུག་ནས་མར་བྱོན་ཏེ་ཐུགས་ཀར་ཡེ་ཤེས་སེམས་དཔའི་ཚུལ་དུ་བཞུགས་པ། དེའི་ཐུགས་ཀར་ཡི་དམ་གང་ཡང་རུང་བའི་རྟེན་བརྟེན་པའི་དཀྱིལ་འཁོར་གསལ་གདབ། བླ་མའི་ཕུང་ཁམས་སྐྱེ་མཆེད་སོགས་ཀྱང་བླ་མཆོད་ལྟར་རིགས་ལྔ་ཡུམ་བཞི་སོགས་ཀྱི་ངོ་བོར་བསམས་ལ། དེ་ནས་ཏིང་ངེ་འཛིན་གྱི་དབང་བཞི་ལེན་ཚུལ་ལ་རྒྱས་བསྡུས་གཉིས་ལས། དང་པོ་ནི། སླར་ཡང་ཡན་ལག་བདུན་པ་དང་མཎྜལ་མདོར་བསྡུས་དབུལ། བྱང་སྡོམ་དང་སྔགས་སྡོམ་གཟུང། དེ་ནས་ཚོགས་ཞིང་རྣམས་ཀྱིས་དབང་བསྐུར་བའི་དགོངས་པ་མཛད། བླ་མ་ཐུབ་དབང་དབྱེར་མེད་པའི་ཐུགས་ཀ་ནས་ལྷ་མོ་བདུད་རྩིས་གང་བའི་བུམ་པ་ཐོགས་པ་དཔག་ཏུ་མེད་པ་སྤྲོས་པ་རྣམས་ཀྱིས་བུམ་པའི་ཆུས་རང་གི་སྤྱི་བོ་ནས་དབང་བསྐུར་བས་ལུས་ཀྱི་ནང་ཐམས་ཅད་གང་། སྡིག་སྒྲིབ་ཐམས་ཅད་དག །བུམ་པའི་དབང་ཐོབ། གཙོ་བོའི་ཐུགས་ཀའི་རྡོ་རྗེ་འཆང་ཡབ་ཡུམ་སྙོམས་པར་ཞུགས་པའི་བྱང་སེམས་དཀར་དམར་རང་གི་ལྕེ་ཐོག་ཏུ་བཞག་པ་མྱང་བས་རྒྱུད་ལ་བདེ་སྟོང་གི་ཡེ་ཤེས་ཁྱད་པར་ཅན་སྐྱེས། རང་ཉིད་སྐད་ཅིག་གིས་རྒྱལ་བ་ཤཱཀྱ་ཐུབ་པ་

― GTD003_Page_0345 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་དཔའ་སུམ་བརྩེགས་ཅན་དུ་གྱུར་པས་གསང་བའི་དབང་ཐོབ། གཙོ་བོས་ཐུགས་ཀའི་རྡོ་རྗེ་འཆང་གི་ཐུགས་ཀ་ནས་རིག་མ་སྤྲོས་ཏེ། རང་གི་སྙིང་གའི་རྡོ་རྗེ་འཆང་གི་ཡུམ་ལ་ཐིམ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པས་བྱང་ཆུབ་ཀྱི་སེམས་སྤྱི་བོ་མགྲིན་པ་སྙིང་ག་ལྟེ་བ་གསང་གནས་རྣམས་སུ་སླེབ་པས་དགའ་བ་བཞི་དང། ཁྱད་པར་དུ་བདེ་སྟོང་དབྱེར་མེད་ལྷན་སྐྱེས་ཀྱི་དགའ་བ་ཁྱད་པར་ཅན་རྒྱུད་ལ་སྐྱེས་ཏེ་ཤེས་རབ་ཡེ་ཤེས་ཀྱི་དབང་ཐོབ། དེ་ནས་བླ་མ་ཤཱཀྱ་ཐུབ་པའི་ཞལ་ནས། ཁྱོད་ཀྱིས་དབང་གསུམ་པ་ཐོབ་པའི་སྐབས་སུ་རང་དང་རིག་མ་གཉིས་ཀྱི་ལུས་འདོད་ལྷ་ཡབ་ཡུམ་དུ་སྣང་བཞིན་པའི་དུས་ན་སེམས་ལྷན་ཅིག་སྐྱེས་པའི་དགའ་བས་དེ་ཁོ་ན་ཉིད་ཀྱི་དོན་ངེས་པ་གཉིས་མཉམ་དུ་ཡོད་པ་དེ་བཞིན་དུ། དོན་འདི་གོམས་པར་བྱས་པ་ལས་མཐར་རླུང་སེམས་ཙམ་ལས་གྲུབ་པའི་ལོངས་སྤྱོད་རྫོགས་པའི་ཡེ་ཤེས་ཀྱི་སྐུ་རང་སྣང་གི་རིག་མ་དང་ཁ་སྦྱོར་བའི་ལུས་ཅན་དང། དེའི་དུས་ཉིད་ན་ཐུགས་ལྷན་ཅིག་སྐྱེས་པའི་དགའ་བ་དང་སྟོང་པ་ཉིད་གཉིས་རོ་གཅིག་ཏུ་ཞུགས་པའི་འོད་གསལ་ཐམས་ཅད་སྟོང་པ་གཉིས་ངོ་བོ་དབྱེར་མི་ཕྱེད་པའི་གཉིས་སུ་མེད་པའི་ཡེ་ཤེས་ཟུང་འཇུག་གི་གོ་འཕང་མངོན་དུ་བྱེད་དེ། དེ་ནི་ཐོབ་བྱ་དོན་གྱི་དབང་བཞི་པ་ཡིན་ནོ་ཞེས་ཟུང་འཇུག་གི་དོན་གདམས་པ་ན་རང་གི་རྒྱུད་ལ་གོ་བ་ལེགས་པར་སྐྱེས་ཏེ་ཚིག་དབང་ཐོབ་པའི་མོས་པ་བྱེད། དབང་བཞིས་ལེན་ཚུལ་བསྡུས་པ་བྱེད་ན་སྡོམ་བཟུང་མི་དགོས་ཤིང། བླ་མའི་སྤྱི་བོའི་ཨོཾ་ལས་འོད་དང་བདུད་རྩི་དཀར་པོའི་ཚོགས་བྱུང་། རང་གི་སྤྱི་བོར་ཐིམ་པས་ལུས་ཀྱི་སྒྲིབ་

― GTD003_Page_0346 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དག་ནས་བུམ་དབང་ཐོབ། ལུས་ལྷར་བསྒོམས་པ་ལ་དབང་བར་བྱས་ཤིང་སྤྲུལ་སྐུ་འགྲུབ་པའི་ནུས་པ་བཞག །མགྲིན་པའི་ཨཱཿ ལས་འོད་དང་བདུད་རྩི་དམར་པོའི་ཚོགས་བྱུང། རང་གི་མགྲིན་པར་ཐིམ་པས་ངག་གི་སྒྲིབ་པ་དག་ནས་གསང་དབང་ཐོབ། སྔགས་བཟླ་བ་ལ་དབང་བར་བྱས་ཤིང་ལོངས་སྐུ་འགྲུབ་པའི་ནུས་པ་བཞག །ཐུགས་ཀའི་ཧཱུཾ་ལས་འོད་དང་བདུད་རྩི་སྔོན་པོའི་ཚོགས་བྱུང། རང་གི་སྙིང་གར་ཐིམ་པས་ཡིད་ཀྱི་སྒྲིབ་པ་དག་ནས་ཤེར་དབང་ཐོབ། ཏིང་ངེ་འཛིན་བསྒོམ་པ་ལ་དབང་ཞིང་ཆོས་སྐུ་འགྲུབ་པའི་ནུས་པ་བཞག །དེའི་གནས་གསུམ་ལས་འོད་ཟེར་དཀར་དམར་མཐིང་གསུམ་ཅིག་ཅར་བྱུང། རང་གི་གནས་གསུམ་དུ་ཐིམ་པས་སྒོ་གསུམ་གྱི་སྒྲིབ་པ་དག་ནས་དབང་བཞི་པ་ཐོབ། འབྲས་བུ་ཟུང་འཇུག་འགྲུབ་པའི་ནུས་པ་བཞག་པར་བསམ། དེ་ལྟར་ལམ་བཟང་ཞེས་སོགས་ཀྱི་སྐབས་སུ་ཆོས་སྲུང་རྣམས་ལས་རང་འདྲའི་སྤྲུལ་པ་ཆེ་ཆུང་དཔག་མེད་སྤྲོས་ཏེ་ཞལ་ནས་རིགས་ཀྱི་བུ་ཁྱོད་ཀྱི་འགལ་རྐྱེན་ཐམས་ཅད་ངས་སེལ། མཐུན་རྐྱེན་ཐམས་ཅད་ངས་སྒྲུབ་ཅེས་གསུང་ལྷང་ལྷང་བྱོན་ནད་གདོན་སོགས་ཤ་ཁྲག་གི་རྣམ་པར་ཞལ་དུ་གསོལ། རང་གི་གནས་ལྔར་ཐིམ་པས་བར་ཆད་གང་གིས་ཀྱང་མི་ཚུགས་པར་བྱིན་གྱིས་བརླབས་བྱུང་སྙམ་དུ་ང་རྒྱལ་བརྟན་པོ་བྱེད། མཚོན་ཆའང་བདུད་རྩིར་ཞུ་བར་བསམ། དེ་ནས་སྐྱེ་བ་ཀུན་ཏུ་ཞེས་སོགས་ཀྱིས་དོན་བསྡུས་ནས་སྨོན་པས་རྒྱས་འདེབས་བྱ། དེ་རྗེས་ཚོགས་ཞིང་བསྡུ་བ་ནི། བླ་མ་ཐུབ་པའི་དབང་པོའི་ཐུགས་ཀ་ནས་འོད་ཟེར་འཕྲོས་ཏེ་མཐའ་སྐོར་ན་བཞུགས་པའི་ཞི་ཁྲོ་རབ་འབྱམས་ཐམས་ཅད་ལ་ཕོག་པས་མཐའ་

― GTD003_Page_0347 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་རིམ་གྱིས་འོད་དུ་ཞུ་སྟེ། རྒྱ་ཆེན་སྤྱོད་བརྒྱུད་དང། ཟབ་མོ་ལྟ་བརྒྱུད་དང། ཉམས་ལེན་བྱིན་རླབས་བརྒྱུད་དང། ཆོས་འབྲེལ་དངོས་ཐོབ་ཀྱི་བླ་མ་རྣམས་ལ་ཐིམ། དེ་རྣམས་ཀྱང་འོག་མ་འོག་མ་ནས་རིམ་གྱིས་ཞུ་སྟེ། རྒྱ་ཆེན་སྤྱོད་བརྒྱུད་བྱམས་པ་དང། ཟབ་མོ་ལྟ་བརྒྱུད་འཇམ་དབྱངས་ལ་ཐིམ། ཉམས་ལེན་བྱིན་རླབས་བརྒྱུད་པའི་བླ་མ་རྣམས་ཀྱང་རྡོ་རྗེ་འཆང་ལ་ཐིམ། ཆོས་འབྲེལ་དངོས་ཐོབ་ཀྱི་བླ་མ་རྣམས་ཀྱང་དྲིན་ཅན་རྩ་བའི་བླ་མ་ལ་ཐིམ། བྱམས་འཇམ་དབྱངས་གཉིས་ཐུབ་དབང་ལ་ཐིམ་ཞིང། གདན་པད་ཟླ་གཉིས་ཀྱང་ཐུབ་པའི་སེང་ཁྲི་ལ་ཐིམ། དྲིན་ཅན་རྩ་བའི་བླ་མའང་ཐུབ་པའི་དབང་པོའི་ཐུགས་ཀར་ཐིམ། རྡོ་རྗེ་འཆང་ཐུབ་པའི་དབང་པོའི་སྤྱི་བོ་ནས་བྱོན། ཐུགས་ཀར་ཡེ་ཤེས་སེམས་དཔའ་རྡོ་རྗེ་འཆང་སྔར་བཞུགས་པ་ལ་ཐིམ། ཐུབ་པའི་དབང་པོའི་སེང་ཁྲི་པད་ཟླ་ལ་ཐིམ། མཐར་ཐུབ་པའི་དབང་པོའང་རང་གི་སྤྱི་བོའི་དྲིན་ཅན་རྩ་བའི་བླ་མ་ལ་ཐིམ་པས། རང་གི་སྤྱི་བོར་སེང་ཁྲི་པད་ཟླ་ཉི་མའི་དཀྱིལ་འཁོར་གྱི་གདན་ལ། ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་༝ རྡོ་རྗེ་སྐྱིལ་ཀྲུང་གིས་བཞུགས་པར་མོས་ལ། ཕུན་ཚོགས་དགེ་ལེགས་༝ མགོས་ཕྱག་འཚལ། །དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང། །འཁོར་བ་མ་སྟོངས་བར་དུ་ལེགས་བཞུགས་ནས། །འགྲོ་ལ་ཆོས་ཀྱི་འཁོར་ལོ་བསྐོར་བ་དང། །བདག་གཞན་དགེ་རྣམས་བྱང་ཆུབ་

― GTD003_Page_0348 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་པོར་བསྔོ། །གླིང་བཞི་ཉི་ཟླ་རི་རབ་རིན་ཆེན་བདུན། །རིན་ཆེན་མཎྜལ་ཀུན་བཟང་མཆོད་པའི་ཚོགས། །བླ་མ་ཡི་དམ་དཀོན་མཆོག་གསུམ་ལ་འབུལ། །ཐུགས་རྗེས་བཞེས་ནས་བྱིན་གྱིས་བརླབ་ཏུ་གསོལ། །ཞེས་ཡན་ལག་བདུན་པ་མཎྜལ་དང་བཅས་པ་ཕུལ་ཏེ་ཕུར་ཚུགས་གསོལ་འདེབས་བྱ་བ་ནི། སྐུ་བཞིའི་བདག་ཉིད་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །སྒྲིབ་བྲལ་ཆོས་སྐུའི་བདག་ཉིད་བླ་མ་ལྷ། །ཐུབ་དབང་༝ བདེ་ཆེན་ལོངས་སྐུའི་བདག་ཉིད་༝༝ སྣ་ཚོགས་སྤྲུལ་སྐུའི་༝༝ བླ་མ་ཀུན་འདུས་བླ་མ་ལྷག་པའི་༝༝ ཡི་དམ་ཀུན་འདུས་༝༝ སངས་རྒྱས་ཀུན་འདུས་༝༝ དམ་ཆོས་ཀུན་འདུས་༝༝ དགེ་འདུན་ཀུན་འདུས་༝༝ མཁའ་འགྲོ་ཀུན་འདུས་༝༝ ཆོས་སྐྱོང་ཀུན་འདུས་༝༝ སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་པ་ཞིག་མྱོང་བ་འདི་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་མ་བསྟེན་པས་ལན་པར་འདུག་པས། ད་བདག་དང་མ་སེམས་ཅན་ཐམས་ཅད་ཀྱིས་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་༝ ཁྱད་པར་དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་ཏུ་བསྟེན་པ་ལ་གེགས་བྱེད་ཀྱི་སྡིག་སྒྲིབ་ནད་གདོན་དང་བཅས་པ་ཐམས་ཅད་བྱང་ཞིང་

― GTD003_Page_0349 ―

^{[མ་དཔེ་གཟིགས་ན་འདིར་གནོན།]}

[Full Size]

དག །ལུས་དྭངས་གསལ་༝ ཁྱད་པར་དུའང་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནུས་པའི་རྟོགས་པ་ཁྱད་པར་ཅན་རང་གཞན་སེམས་ཅན་ཐམས་ཅད་ཀྱི་རྒྱུད་ལ་སྐྱེས་པར་བསམ། འདི་ནི་བཤེས་གཉེན་བསྟེན་ཚུལ་གྱི་སྔོན་འགྲོ་སྦྱོར་བའི་དབང་དུ་བྱས་པ་ཡིན་ལ། དམིགས་སྐོར་བྱེ་བྲག་ཏུ་མ་བཅད་པར་ལམ་རིམ་སྤྱི་ཙམ་གྱི་སྔོན་འགྲོར་བྱེད་པའམ། རེ་ཞིག་ཆོས་དྲུག་པོ་འདི་ཙམ་སྐྱོང་བ་ཡིན་ན། བདག་དང་མ་སེམས་ཅན་ཞེས་པ་ནས། སྣ་ཚོགས་པ་ཞིག་མྱོང་བ་འདི་ལམ་གྱི་རིམ་པའི་རྟོགས་པ་ཚུལ་བཞིན་དུ་མ་སྐྱེས་པས་ལན་པར་འདུག་པས། ད་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་ལམ་གྱི་རིམ་པའི་རྟོགས་པ་མཐའ་དག་ཚུལ་བཞིན་དུ་སྐྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་སྤྱི་བོའི་བླ་མ་ལྷའི་སྐུའི་ཆ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས་ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང། ཁྱད་པར་དུ་ལམ་གྱི་རིམ་པའི་རྟོགས་པ་སྐྱེ་བ་ལ་གེགས་བྱེད་ཀྱི་སྡིག་སྒྲིབ་ནད་གདོན་དང་བཅས་པ་ཐམས་ཅད་བྱང་ཞིང་དག། །ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལ་སོགས་པའི་ཡོན་ཏན་ཐམས་ཅད་འཕེལ་ཞིང་རྒྱས། དགེ་བའི་བཤེས་གཉེན་སངས་རྒྱས་དངོས་སུ་མཐོང་བ་ནས་ཟུང་འཇུག་གི་བར་གྱི་ལམ་གྱི་རྟོགས་པ་མཐའ་དག་རང་གཞན་སེམས་ཅན་ཐམས་ཅད་ཀྱི་རྒྱུད་ལ་སྐྱེས་པར་བསམ་མོ། །དེ་ནས་བླ་མ་རྒྱལ་བ་ཤཱཀྱ་ཐུབ་

― GTD003_Page_0350 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་ལན་མང་དུ་གསོལ་བ་བཏབ་པས་བླ་མ་ཐུབ་པའི་དབང་པོའི་སྐུ་ལས་རང་འདྲ་གཉིས་པ་ཞིག་ཆད་ནས་རང་ཉིད་ལ་ཐིམ་པས་རང་ཐུབ་པའི་དབང་པོའི་སྐུར་ལམ་གྱིས་གྱུར། རང་ཐུབ་པའི་དབང་པོར་གསལ་བའི་སྐུ་ལས་འོད་ཟེར་འཕྲོས་མཐའ་སྐོར་ན་ཡོད་པའི་སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱང་ཐུབ་པའི་དབང་པོའི་གོ་འཕང་ལ་བཀོད། རང་དང་སེམས་ཅན་ཐམས་ཅད་ཐུབ་པའི་དབང་པོར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨ་དཀར་པོ་ཧཱུཾ་སེར་པོས་མཚན་པའི་མཐའ་སྐོར་དུ་ཨོཾ་མུ་ནེ་མུ་ནེ་མཧཱ་མུ་ན་ཡེ་སྭཱཧཱ། ཞེས་པས་བསྐོར་བ་ལ་དམིགས་ནས་བཟླས་པ་ཅི་མང་བྱ། མཇུག་ཏུ། དགེ་བ་འདི་ཡིས་མྱུར་དུ་བདག །བླ་མ་སངས་རྒྱས་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་བར་བྱའོ། །ཐུན་མཚམས་སུའང་དངོས་གཞིའི་སྐབས་ཀྱི་དམིགས་རྣམ་གྱི་རྩི་མ་ཡལ་བར་བྱ་ཞིང་ལམ་རིམ་ཆེ་ཆུང་སོགས་ལ་བལྟ་བ་དང་། དྲན་ཤེས་བཞིན་དང་ལྡན་པས་སྒོ་གསུམ་བག་ཡོད་པར་བྱས་ཏེ། སླར་ཡང་ཐུན་རྗེས་མ་ལ་ཞུགས་ན་ལན་རེ་བཞིན་གྱི་སྐྱེད་ཐོན་པས་ཉམས་རྟོགས་གོང་དུ་འཕེལ་ཏེ་དལ་འབྱོར་དོན་དང་ལྡན་པར་འགྱུར་རོ། །ཟབ་རྒྱས་གདམས་པའི་ཆུ་བོ་འདུས་པའི་བཅུད། །ལམ་བཟང་ཚུལ་བཞིན་སྒྲུབ་པའི་འཇུག་ངོགས་མཆོག །སྒྲུབ་པར་སླ་ཞིང་ཤིན་ཏུ་དོན་ཆེ་བ། །སྦྱོར་བའི་ཆོས་དྲུག་ལག་ཏུ་བསྟར་བའི་ཚུལ། །ཞལ་ཤེས་མན་ངག་དུ་མས་རབ་བརྒྱན་ཏེ། །ཤིན་ཏུ་གསལ་

― GTD003_Page_0351 ―

^{[མ་དཔེ་གཟིགས་ན་འདིར་གནོན།]}

[Full Size]

བར་བཀོད་པའི་དགེ་བ་འདིས། །བདག་སོགས་འགྲོ་ཀུན་བྱང་ཆུབ་ལམ་བཟང་དུ། །ཞུགས་ནས་སྒྲུབ་པའི་རྒྱལ་མཚན་ཟིན་པར་ཤོག །ཅེས་བྱང་ཆུབ་ལམ་གྱི་རིམ་པའི་སྔོན་འགྲོ་སྦྱོར་བའི་ཆོས་དྲུག་ལག་ཏུ་ལེན་ཚུལ་གསལ་བར་བཀོད་པ་ལམ་བཟང་སྒྲུབ་པའི་འཇུག་ངོགས་ཞེས་བྱ་བ་འདི་ནི་ཧལ་ཧ་ཁུ་རེ་ཆེན་མོའི་གྲྭ་རིགས་དད་ལྡན་དགེ་སློང་དཀོན་མཆོག་སངས་རྒྱས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།

ལམ་རིམ་བདེ་ལམ་གྱི་བརྒྱུད་འདེབས།

― GTD003_Page_0353 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་རིམ་བདེ་ལམ་གྱི་བརྒྱུད་འདེབས་བཞུགས་སོ། །གྲུབ་པའི་དབང་ཕྱུག་འཇམ་དཔལ་རྒྱ་མཚོའི་ཞབས། །མཁས་གྲུབ་བསྟན་པའི་ཉི་མ་དགེ་ལེགས་དཔལ། །སྙན་བརྒྱུད་གདམས་པའི་མཛོད་འཛིན་བ་སོ་རྗེ། །ཟླ་མེད་བླ་མ་གསུམ་ལ་གསོལ་བ་འདེབས། །ཟུང་འཇུག་སྐུ་བརྙེས་ཆོས་ཀྱི་རྡོ་རྗེ་དང། །སྐུ་གསུམ་མངོན་གྱུར་རྒྱལ་བ་དབེན་ས་པ། །ལུང་རྟོགས་མངའ་བདག་སངས་རྒྱས་ཡེ་ཤེས་ཞབས། །མཁས་གྲུབ་དམ་པ་གསུམ་ལ་༝ བློ་བཟང་ཆོས་ཀྱི་རྒྱལ་མཚན་འཛིན་པའི་རྗེ། །དེ་ཡི་ཐུགས་སྲས་དྲུང་པ་རྟ་ཕུག་པ། །ལམ་བཟང་གསལ་མཛད་དགེ་ལེགས་རྒྱ་མཚོའི་དཔལ། །བསྟན་པའི་སྒྲོན་མེ་གསུམ་ལ་༝ ངག་གི་དབང་ཕྱུག་རྗེ་བཙུན་ཙོང་ཁ་པའི། །མདོ་སྔགས་ལེགས་བཤད་ཆོས་ཀྱི་རྒྱ་མཚོ་ཆེ། །བྱམས་པས་འགྲོ་ལ་སྤེལ་བའི་སྙིང་སྟོབས་ཅན། །བཀའ་དྲིན་མཚུངས་མེད་ཞབས་ལ་༝ སྣང་བ་མཐའ་ཡས་བློ་བཟང་ཡེ་ཤེས་སོགས། །རྒྱལ་ཀུན་སྤྱི་གཟུགས་བཤེས་གཉེན་དུ་མ་ཡིས། །རྗེས་བཟུང་བསྟན་པའི་རྒྱལ་མཚན་འཛིན་པའི་རྗེ། །དྲིན་ཅན་བླ་མའི་ཞབས་ལ་༝ རྒྱལ་བ་གཉིས་པ་འཇམ་མགོན་ཙོང་ཁ་པའི། །མདོ་སྔགས་གཞུང་ལུགས་མཐའ་དག་སྤེལ་སླད་དུ། །རླབས་ཆེན་སྨོན་ལམ་མཆོག་གིས་བསྐྲུན་པའི་སྐུ། །དཀོན་མཆོག་བསྟན་པའི་སྒྲོན་མེར་༝ སྐྱབས་གསུམ་ཀུན་འདུས་བླ་མ་རྡོ་རྗེ་འཆང། །གང་ལ་གང་འདུལ་བཤེས་གཉེན་ཚུལ་བཟུང་ནས། །མཆོག་དང་ཐུན་མོང་དངོས་གྲུབ་སྩོལ་མཛད་པའི། །དྲིན་ཅན་བླ་མ་རྣམས་ལ་༝།

བདེ་ལམ་ཟིན་བྲིས་གདུང་སེལ་བདུད་རྩིའི་ཐིགས་པ།

― GTD003_Page_0355 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་འཛིན་རིན་པོ་ཆེ་ཡེ་ཤེས་རྒྱལ་མཚན་ནས་བདེ་ལམ་གྱི་ཁྲིད་གནང་བ་རྗེ་བཙུན་དཀོན་མཆོག་བསྟན་པའི་སྒྲོན་མེ་དཔལ་བཟང་པོས་ཟིན་བྲིས་སུ་གནང་བ་གདུང་སེལ་བདུད་རྩིའི་ཐིགས་པ་ཞེས་བྱ་བ་བཞུགས་སོ། །

― GTD003_Page_0356 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བླ་མ་དམ་པ་ཐུབ་དབང་རྡོ་རྗེ་འཆང་དང་དབྱེར་མ་མཆིས་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། །ཡེ་ཤེས་ཞུགས་ཀྱིས་སྲིད་པའི་ཚང་ཚིང་བསྲེགས། །བརྩེ་ཆེན་བསེར་བུས་སྐྱེ་བའི་མཁའ་ལ་རོལ། །སྟོབས་ལྡན་འཇིགས་མེད་སེངྒེའི་སྒྲ་སྒྲོགས་པ། །འདྲེན་མཆོག་དམ་པའི་ཞབས་རྡུལ་གཙུག་གིས་མཆོད། །གང་གསུང་ལེགས་བཤད་རླབས་འཕྱུར་ཐུབ་བསྟན་ཀུན་གསལ་འགེངས་པ་ཡིས། །མ་དག་དྲི་མ་རབ་བཀྲུས་སྐལ་བཟང་ལྷ་རྣམས་ངོམས་པར་མཛད། །དེར་ནི་བདག་ཀྱང་བསོད་ནམས་སྐལ་བར་བློ་ཆུང་སྙིམ་པས་ནི། །ཚིག་གི་བདུད་རྩི་ཐོབ་གང་བསྟེན་སླད་རིན་ཆེན་བུམ་བཟང་བགྱིད། །དེ་ཡང་རྒྱལ་སྲས་ཆེན་པོ་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་

― GTD003_Page_0357 ―

^{[མ་དཔེ་གཟིགས་ན་འདིར་གནོན།]}

[Full Size]

མ་བསྒྲུབས་ན། །ཕྱིས་འདི་ཡང་དག་འབྱོར་བར་ག་ལ་འགྱུར། །ཞེས་གསུངས་པ་ལྟར། རང་ཅག་རྣམས་རེས་འགའ་ཡར་སྲིད་པའི་རྩེ་མོ་དང། རེས་འགའ་མར་དམྱལ་བའི་གཏིང་དུ་ལྷུང་སྟེ་རྣམ་པར་ཤེས་པ་འདི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདིར་ཐོག་མ་མེད་པ་ནས་འཁྱམས་ཤིང་། ད་ལམ་བླ་མའི་ཐུགས་རྗེ་ལས་མིའི་རྟེན་ལན་གཅིག་ཐོབ་སྟེ་དགེ་བའི་བཤེས་གཉེན་གྱིས་ཡར་ལ་ཁྲིད་པའི་ཚེ་དལ་འབྱོར་ལ་སྙིང་པོ་མི་ལེན་པར། ཚེ་འདིའི་ཆེ་ཐབས་འཁོར་གཡོག་སྙན་གྲགས་སོགས་བསྒྲུབ་པར་དཀའ་ཞིང། ཐ་མར་འདོར་དགོས་པའི་དོན་མེད་ཀྱི་ལས་ལ་འབད་པ་ནི། རྡོ་བརྡར་བའི་གཏམ་རྒྱུད་དང་འདྲ་སྟེ། ནོར་བུ་ལེན་པའི་ཚོང་པ་རྒྱ་མཚོའི་གླིང་ནས་ཆས་པའི་ཚེ་མི་ཞིག་རྗེས་སུ་སྡོད་པ་ལ། གྲོགས་རྣམས་ཀྱིས་ཁྱོད་ངེད་ཅག་དང་འགྲོགས་ཏེ་མ་སོང་ན་ཁྱོད་ཀྱིས་སླར་གྲོགས་མི་རྙེད་པས་ཁྱོད་

― GTD003_Page_0358 ―

^{[མ་དཔེ་གཟིགས་ན་འདིར་གནོན།]}

[Full Size]

མྱ་ངན་གྱི་ཐང་འདིར་སྡུག་བསྔལ་བར་འགྱུར་རོ་ཟེར་བ་ལ། དེ་མི་འགྲོ་བར་རྡོ་བརྡར་རྒྱུ་ཡིན་ཟེར། བརྡར་ནས་ཅི་བྱེད་དྲིས་པས་གྲུ་བཞི་བྱེད་ཟེར། དེས་ཅི་བྱེད་དྲིས་པས་འདི་བསྐྱུར་གྱི་ཡིན་ཟེར་བ་ལྟར་དོན་མེད་ཀྱི་ལས་ལ་ཆགས་ནས་གཏན་གྱི་འདུན་མ་སྟོར་བ་ཡིན་པས་དེ་ལྟར་མ་སོང་བར་སྙིང་པོ་ཞིག་ལེན་དགོས་ཏེ། ད་ལྟར་རང་ཅག་ཡར་མངོན་མཐོ་ཨེ་བསྒྲུབ། ཐར་པ་དང་ཐམས་ཅད་མཁྱེན་པ་ཨེ་བསྒྲུབ། མར་དམྱལ་བར་ལྟུང་དུ་ཨེ་འཇུག །གང་བྱེད་ཀྱང་འདམ་ག་རང་ལ་ཡོད་པའི་དུས་ཡིན་པས། འདམ་ག་མ་ནོར་བ་ཞིག་དགོས། དེ་ལ་ཡང་རྒྱ་གར་དུ་འགྲོ་བ་ལ་རྒྱ་གར་བྱ་བ་གང་ན་ཡོད། ཁ་གང་དུ་བལྟས་ནས་འགྲོ། གོམ་པ་གང་དུ་འདོར་ཤེས་དགོས་པ་ལྟར། འདིར་ཡང་དལ་འབྱོར་ལ་སྙིང་པོ་ལེན་ཚུལ་ཤེས་དགོས། དེ་ཡང་ལམ་དུ་འགྲོ་བ་ལ་མིག་ཡོད་པས་མི་ཆོག་པར། སྟོན་མཁན་དགོས་པ་བཞིན་དུ་བླ་མའི་མན་ངག་ལ་ངེས་པར་བསྟེན་དགོས་ཏེ། དཔེ་ཡོད་པ་ཙམ་གྱིས་ཤེས་མི་ནུས་ཤིང། ཐོས་པ་ཙམ་གྱིས་མི་ཆོག་སྟེ། པོ་ཏི་ལྔ་ལ་བསླབས་ཀྱང་རང་ལ་མ་བསྐོར་བ་དང་བསྐོར་ཀྱང་གོ་རིམ་སོགས་ཀྱི་གནད་མི་ཤེས་པའི་རྒྱུ་མཚན་གྱིས་བླ་མའི་མན་ངག་ཉན་པ་ངེས་པར་གལ་ཆེ་སྟེ། ཆོས་གྲྭར་བློ་འཁུལ་བ་ལྟ་བུ་གཅིག་པུར་ལོ་བརྒྱར་བསྡད་ཀྱང་མི་ཡོང་། སྔོན་འཕན་ཡུལ་དུ་ཕར་ཕྱིན་ལ་མཁས་པའི་དགེ་བཤེས་ཤིག་ཡོད་པས་ཁོང་ལ་ཆོས་ཉན་མཁན་མེད། པོ་ཏོ་བས་བྱ་སྒྲུང་གསུངས་པ་

― GTD003_Page_0359 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུན་ཆད་ཀུན་གྱིས་ཉན་པས། དགེ་བཤེས་དེས་ཡང་ན་ངའི་ཕར་ཕྱིན་འདི་པོ་ཏོ་བས་བཤད་ཆོག་པ། ཡང་ན་ང་ལ་ཉན་ཆོག་པ་གསུངས་པ། པོ་ཏོ་བས་གསན་ནས་ཁོང་བདེན་ཏེ་ངས་ཁ་ནང་དུ་བསྐོར་བས་ཡིན་གསུང་བ་ལྟར། ཁ་ཕྱིར་བལྟས་ཀྱི་ཐོས་པ་ཙམ་གྱིས་མི་ཆོག་པས་བསྒོམ་ཚུལ་གྱི་མན་ངག་བླ་མའི་ཞལ་ནས་ཐོས་དགོས། བླ་མས་བཤད་བྱའི་ཆོས་དེ་ཡང་རྒྱལ་བའི་བཀའ་དང་མི་འགལ། ཤིང་རྟ་ཆེན་པོའི་གཞུང་དང་མི་འགལ། དམ་པ་གོང་མའི་མན་ངག་དང་མི་འགལ། སྒྲོ་མ་བཏགས་སྐུར་བ་མ་བཏབ་པར་འཆད་དགོས་ཏེ། དགུན་དུས་ཀྱི་སྔོ་ཚོས་མདོག་ལེགས་ཀྱང་ཁར་ཟར་མི་ཉན་པས་གཞན་དང་མི་མཐུན་པ་དེ་འདྲར་མ་སོང་བ་གལ་ཆེ་ལ། ༈ འདིར་བཤད་པ་བྱ་བའི་ཆོས་ནི། དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་གཞུང་ལམ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། རྣམ་པ་ཐམས་ཅད་མཁྱེན་པའི་སར་བགྲོད་པའི་སྐྱེ་བོ་མཆོག་གི་ཆོས་ལུགས། དཔལ་ཨ་ཏི་ཤ་དང་ཆོས་ཀྱི་རྒྱལ་བོ་ཙོང་ཁ་པ་ཆེན་པོའི་ཐུགས་ཀྱི་བཅུད་ཕྱུང་བའི་མན་ངག་བྱང་ཆུབ་ལམ་གྱི་རིམ་པ་འདི་ནི་རྗེ་བདག་ཉིད་ཆེན་པོས། རབ་འབྱམས་གསུང་རབ་ཀུན་ལ་བལྟ་བའི་མིག །སྐལ་བཟང་ཐར་པར་བགྲོད་པའི་འཇུག་ངོགས་མཆོག །ཅེས་གསུངས་པ་ལྟར། མིག་ཆུང་ཡང་ནམ་མཁའ་དང་ས་གཞི་ཐམས་ཅད་མཐོང་ནུས་

― GTD003_Page_0360 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བཞིན་དུ་བྱང་ཆུབ་ལམ་རིམ་འདི་ལ་བརྟེན་ནས་སྡེ་སྣོད་གསུམ་དང་གསང་སྔགས་རྒྱུད་སྡེ་རྣམས་ཀྱང་བདེ་བླག་ཏུ་མཐོང་ནུས་ཤིང། སྐལ་ལྡན་གྱི་གདུལ་བྱ་སངས་རྒྱས་ཀྱི་སར་བགྲོད་པའི་འཇུག་ངོགས་ཀྱང་འདི་ཁོ་ན་ཡིན་ཏེ། སྟོད་ལུང་པའི་ཞལ་ནས། ངས་ལམ་རིམ་སྐྱོ་སང་སང་བ་ཞིག་བཤད་པ་ན་སྟོང་གསུམ་གྱི་གླེགས་བམ་རྣམས་ངེད་ཀྱི་སྙིང་དུ་ཞུགས་སོང་སྙམ་དུ་འདར་ཡོང་གསུངས་ཏེ། དོན་འདི་ལ་དགོངས་ནས། གསུང་རབ་ཀུན་གྱི་སྙིང་པོ་བསྡུ་བསྡུ་བ། །ཞེས་དཔེར་ན་འོ་མ་ཡང་ཡང་བསྐོལ་ཏེ་བསྐོལ་ཐག་ཆད་པ་ལ་བསྐོལ་བསྐོལ་ཟེར་བ་ལྟར། རྒྱལ་བའི་གསུང་རབ་ཐམས་ཅད་ཀྱི་དོན་རྗེ་བཙུན་བྱམས་མགོན་གྱིས་རྣལ་འབྱོར་པ་གཅིག་གི་ཉམས་ལེན་གྱི་རིམ་པར་བསྡུས་ཤིང། དེའི་རྗེས་སུ་འཕགས་པ་ཐོགས་མེད་དང་མཉམ་མེད་ཇོ་བོ་གཉིས་ཀྱིས་བསྡུས་ལ། དེ་ནས་སླར་རྗེ་བདག་ཉིད་ཆེན་པོས་བྱང་ཆུབ་ལམ་གྱི་རིམ་པར་བསྡུས་ཏེ་གསུང་རབ་རབ་འབྱམས་ཀྱི་གནད་མ་ཚང་བ་མེད་པར་འདུས་ཤིང་དེ་ལས་ལྷག་པ་བསྡུ་རྒྱུ་མེད་པས། ཆོས་འདི་འདྲ་དང་མཇལ་བའི་དུས་འདིར་ཅིས་ཀྱང་ཉན་བསམ་བྱེད་དགོས་ཏེ། དེ་སྔ་ཡན་ཆད་ཀྱི་བྱ་བ་ཐམས་ཅད་ལས་རོ་ལ་སོང་བ་ཡིན་པས། ད་ནི་སློབ་དཔོན་ཡེ་ཤེས་ཞབས་ཀྱི་མན་ངག་ཏུ་གར་འཁྲབ་པ་སོགས་ལ་ཡང་ལྟད་མོ་བལྟ་ན། དུས་གསུམ་གྱི་རྒྱལ་བ་རྣམས་གཤེགས་པའི་ལམ་འདི་ལ་ལྟད་མོའི་ཚུལ་གྱིས་ཡང་ཅིའི་ཕྱིར་མི་ཉན་གསུང་བ་ལྟར་སྒོ་དུ་མ་ནས་བསམ་སྟེ་ཉན་དགོས། ཉན་ཚུལ་ཡང་མདོ་ལས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་ཞེས་སོགས་གསུངས་ཀྱང། པུས་མོའི་ལྷ་ང་ས་ལ་འཛུགས་མི་དགོས་

― GTD003_Page_0361 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་རྒྱུ་མཚན་ངེད་ཅག་བོད་རྣམས་ཀྱི་ལུས་གྱོང་པོ་ལས་སུ་མི་རུང་བ་ཡིན་པས། བླ་མ་གོང་མ་རྣམས་ཀྱིས་གནང་བ་བྱིན་པ་ཡིན་ལ། མིག་བླ་མའི་བཞུགས་ཁྲིའམ་ཞལ་གང་རུང་ལ་བལྟས་ཏེ། ནད་པ་ཉམ་ཐག་པས་སྨན་པས་ཅི་གསུང་ཡོང་སྙམ་དུ་དེའི་གདོང་ལ་ཧྲིག་གེ་བལྟ་བ་ལྟར་གུས་པ་དང་བཅས་ཏེ་ཉན་པ་ལས། དཔེ་ཆ་ཞུ་དག་བྱེད་པའི་ཚེ་ཐ་ན་བའི་སྔོན་འཇུག་དང། གའི་སྔོན་འཇུག་ཙམ་རེ་མ་དག་པ་ཡང་འཕྲལ་དུ་བཅོས་པ་ལྟར། བླ་མའི་གསུང་ལ་འདི་གཞུང་དང་མཐུན་པར་འདུག །འདི་གཞུང་དང་མི་མཐུན་པར་འདུག་ཟེར་བ་ལྟ་བུའི་སྐྱོན་རྟོག་གི་རིགས་གཏན་མི་རུང་བས་སྐྱོན་དེ་དག་དང་བྲལ་བའི་སྒོ་ནས་ཉན་དགོས་ལ། ཉན་པར་བྱ་བའི་ཆོས་འདིའི་ཐོག་མར་རྗེ་བཙུན་བླ་མ་ཞེས་སྨོས་ལ། འདི་ལ་གོ་རྒྱུ་བཟང་པོ་ཞིག་ཡོད་དེ། རང་ཅག་རྣམས་ལྟ་ཅི་སྨོས། ས་བཅུའི་བྱང་ཆུབ་སེམས་དཔའ་ཆེན་པོ་མངོན་ཤེས་དང་རྫུ་འཕྲུལ་མཐའ་ཡས་པ་ལ་མངའ་འབྱོར་བ་འོད་ཟེར་ཆེན་པོའི་དབང་བསྐུར་ཐོབ་པ་དེ་དག་ལ་ཡང་དགེ་བའི་བཤེས་གཉེན་གྱིས་གདམས་ངག་བསྟན་ཏེ་ཀུན་མཁྱེན་ཡེ་ཤེས་མངོན་དུ་བྱེད་དགོས་པས། ལེགས་ཚོགས་ཐམས་ཅད་འབྱུང་བ་བླ་མ་སྔས་མགོར་ཡོད་པ་ལ་རག་ལས་པ་གོ་བའི་ཆེད་ཡིན་ནོ། །འདི་ལ་འགའ་ཞིག་མདོ་ཕྱོགས་སུ་དེ་ལྟར་ཡིན་ཀྱང། གསང་སྔགས་ཀྱི་བསྐྱེད་རྫོགས་བསྒོམས་ནས་འཚང་རྒྱ་བ་ལ་བླ་མ་མི་དགོས་སྙམ་ན། དེ་འདྲ་མ་ཡིན་ཏེ། དཔལ་མགོན་ཀླུ་སྒྲུབ་ཀྱི་རིམ་ལྔའི་རིམ་པ་གསུམ་པ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་

― GTD003_Page_0362 ―

^{[མ་དཔེ་གཟིགས་ན་འདིར་གནོན།]}

[Full Size]

མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་དེ་ཐོབ་པར་འགྱུར། །ཞེས་གསུངས་པ་ལྟར། སྔགས་ཀྱི་རྟོགས་པ་མཐོན་པོའི་སྐབས་སུ་ཡང་བླ་མ་འབྲལ་མེད་དུ་བསྟེན་དགོས་ལ། དེར་མ་ཟད་འཕགས་པ་སྤྱན་རས་གཟིགས་ཀྱི་དབུར་འོད་དཔག་མེད་བསྒོམས་པ་དང། རྗེ་བཙུན་བྱམས་པས་རང་གི་དགེ་བའི་བཤེས་གཉེན་རྒྱལ་བ་ཤཱཀྱ་ཐུབ་པ་མཆོད་རྟེན་གྱི་རྣམ་པར་སྤྱི་བོར་བཀུར་བ་ཡིན་ཞིང། དེའི་འོག་ཏུ་ཐུབ་དབང་རྡོ་རྗེ་འཆང་ཞེས་སྨོས་པ་ནི། འདིར་མདོ་སྔགས་གཉིས་ཀའི་ལམ་གྱི་ཉམས་ལེན་ཐམས་ཅད་ཆ་ཚང་ལ་མ་ནོར་བར་སྟོན་པ་གོ་བའི་ཆེད་དུ་ཡིན་ནོ། །དེ་ནས་འདིར་སྐལ་ལྡན་གྱི་སྐྱེས་བུ་ཞེས་སྣོད་ལྡན་གྱི་གདུལ་བྱ་ངོས་བཟུང་བ་ཡིན་ལ། འདིར་སྐལ་བ་དང་ལྡན་པའི་ཚད་ནི། དཔེར་ན་རྒྱུད་གྲྭར་ཞུགས་ཏེ་དེའི་ཆོས་དང་ཟང་ཟིང་གི་སྐལ་བ་ཐོབ་པ་ལ་ཐོག་མར་དེར་འཇུག་པའི་འགལ་རྐྱེན་དང་བྲལ་ཞིང་། མཐུན་རྐྱེན་ཆ་ཚང་བར་འཛོམས་དགོས་པ་ལྟར། ཆོས་ཉན་པའི་སྐལ་བ་ཐོབ་པ་ལ་ཡང་ཉན་པ་པོའི་སྣོད་ཀྱི་ཁྱད་པར་ཐམས་ཅད་ཚང་དགོས་ལ། དེ་ཡང་བསྡུས་ན་སྣོད་ཀྱི་སྐྱོན་གསུམ་སྤངས་པ་དང་མཚན་ཉིད་གསུམ་དུ་འདུ་བ་ནི། བོན་པོ་འདྲེ་མཆོད་པའི་གཏམ་རྒྱུད་དང་འདྲ་སྟེ། སྔོན་བོན་པོ་རྣམས་ཚོགས་ནས་འདྲེ་མཆོད་པ་ནི། གྲངས་བགྲངས་ནས་མི་ཚང་མ་བགྲངས་ན་ཆད་འགྲོ་ཟེར་ནས་ཁ་མ་འཆམ་པར། བོན་པོ་ལྷ་མོ་ཐར་བྱ་བས། ཡར་དཀོན་མཆོག་གསུམ་པོ་མཆོད། མར་འགྲོ་བ་རིགས་དྲུག་མཆོད། བར་གྱི་ཡུལ་ལྷ་གཞི་བདག་མཆོད། དེར་མ་འདུས་པ་ཡོད་དམ་ཟེར་ཏེ། གཏོང་ཡུལ་ཐམས་ཅད་དེར་འདུས་པ་བཞིན། སྣོད་ཀྱི་སྐྱོན་ཡོན་ཐམས་ཅད་དེ་དྲུག་ཏུ་འདུས་ཤིང་། དེ་

― GTD003_Page_0363 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དང་པོ་སྣོད་ཀྱི་སྐྱོན་གསུམ་ལས། སྣོད་ཁ་སྦུབ་པ་ལྟ་བུར་མ་སོང་བར་ཆོས་ཉན་འདོད་ཡོད་པ་ཡོད་ཀྱང་སྣོད་དྲི་མ་ཅན་དུ་མ་སོང་བ་ཤིན་ཏུ་དཀོན་ཏེ། བྱང་ཆུབ་ལམ་རིམ་ཉན་པ་གནད་དུ་སོང་སྟེ་བློ་སྐྱེད་ཅིག་ངེས་པར་བྱུང་བ་ཡིན་ན་ག་རེ་ངས་ཉི་མ་དེ་རིང་ཡན་ཆད་ཆོས་བྱེད་ཁུལ་བྱས་ཀྱང་ཆོས་རྣམ་དག་ཏུ་སོང་བ་གཅིག་ཀྱང་མི་འདུག །ད་ནི་རང་གིས་རང་མ་བསླུས་པར་ཆོས་བྱེད་ཚུལ་ལ་མ་འཆུག་པ་ཞིག་བྱེད་དགོས་པར་འདུག་སྙམ་དུ་བློ་གཏིང་ནས་འགྱུར་བ་ཞིག་ཡོང། དེ་བྱུང་ན་བློ་སྐྱེད་བྱུང་བ་ཡིན། དེ་འདྲ་མ་ཡིན་པར་རྒྱལ་བ་གོང་མས་ལམ་རིམ་ཆེན་མོའི་བཤད་ལུང་གནང་སྐབས་འཕན་པོ་ཞིག་ལ། འགའ་ཞིག་གིས་ཁྱོད་ལ་བློ་སྐྱེད་བྱུང་ངམ་དྲིས་པས་ཚད་མེད་བྱུང་ཟེར། གང་བྱུང་ཞེས་དྲིས་པས། རྨའི་ཕྱ་མཁར་ཟེར་བ་དེ་ང་ཚོའི་ལྷུན་གྲུབ་རྫོང་ཡིན་པ་རེད་ངོ་མཚར་ལ་ཟེར། དེ་ཡིན་འང་ཡིན་དུ་ཆུག །མིན་ནའང་མིན་དུ་ཆུག་ཁྱད་ཅི་ཡོད། དོན་མེད་པ་དེ་འདྲར་མ་སོང་བར་བློ་སྐྱེད་ལེན་ཤེས་པ་དགོས། དེའི་འོག་ཏུ་སྣོད་ཀྱི་མཚན་ཉིད་གསུམ་ནི། བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བཤད། །ཅེས་གསུངས་པ་ལྟར་ཡིན། དེ་ཡང་གཟུ་བོར་གནས་པ་ནི། བློ་ཕྱོགས་སུ་མ་ལྷུང་བ་ལ་ཟེར་ཞིང། དེ་ཡང་གོ་དཀའ་སྟེ་ཇི་ལྟར་ཡིན་ན་ད་ལྟ་རང་འདོད་འབའ་ཞིག་བསྒྲུབས་ཤིང་བསྒྲུབ་ཀྱང་ནུས་པ་དང། བླ་མས་བཀོད་པ་རྣམས་བསྒྲུབ་ཀྱང་མི་འདོད་ལ། སྒྲུབ་དཀའ་བ་ལྟར་འདུག་པ་འདི་བློ་རང་གི་ཕྱོགས་སུ་བཏང་བས་ལན་པ་ཡིན་པས། དེ་ལས་བཟློག་སྟེ་རང་ཕྱོགས་སུ་མི་གཏོང་བར།

― GTD003_Page_0364 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མའི་ཕྱོགས་སུ་གཏོང་བ་ཞིག་དགོས་པ་ཡིན། དེ་ནས་མཚན་ཉིད་གཉིས་པ་ལེགས་ཉེས་འབྱེད་པའི་བློ་གྲོས་དང་ལྡན་པ་ཡང་ངེས་པར་དགོས་ཏེ། དེ་མེད་ན་ཅི་བྱས་ཀྱང་ཕྱིན་ཅི་ལོག་ཏུ་འགྲོ་བ་སྔོན་གླེན་པ་ཞིག་ལ་ཕས་བསླབས་ནས་སྒོ་ལ་བེ་རྡོ་རེད་གྱིས་བྱས་པས་ཤིང་མཐོང་ཚད་ལ་དེ་ཟེར་ཏེ་ལྷག་ཏུ་གླེན་རྟགས་བསྟན་པ་ལྟ་བུ་ཡིན། གསུམ་པ་ཆོས་ལ་དོན་གཉེར་ཡོད་པ་ཡང་དཀའ་སྟེ། ཁ་ནས་ཆོས་ལ་དོན་གཉེར་ཡོད། དྲག་ཟེར་མོད་ཀྱང། དེ་ཙམ་གྱིས་མི་ཡོང། མཚོ་འཁྱག་པ་ན་ངང་པ་ཕྱི་མིག་ཙམ་ཡང་མི་བལྟ་བར་འགྲོ་བ་བཞིན། འཁོར་བ་ལ་ཕྱི་མིག་མི་བལྟ་བར་རྒྱབ་ཀྱིས་ཕྱོགས་ཏེ་ཐར་པ་དོན་གཉེར་གྱི་བློ་སྐྱེས་པ་ཞིག་དགོས། དེ་ལ་འགའ་ཞིག་གིས་ད་ལྟ་བསྟན་པ་ཉམས་པའི་ཐ་མར་བསྒོམ་བྱས་ཀྱང་དེ་འདྲ་མི་ཡོང། དེས་ན་སྒོམ་བྱེད་པ་ལས་བསྐོར་བ་དང་ཁ་ཏོན་གྱིས་ཟེར་བ་ཤིན་ཏུ་མི་རུང་སྟེ། བསྟན་པའི་ཐ་མ་ཅུང་ཟད་ཙམ་ལ་ཐུག་པའི་སྐབས་འདི་ལ་མི་བྱེད་ན། བསྟན་པ་ནུབ་ནས་ཅི་བྱེད། དེས་ན་ད་ལྟ་ལྷག་ཏུ་འབད་དགོས་པའི་དུས་ཡིན་ཏེ། སྔོན་སངས་རྒྱས་འོད་སྲུང་གི་བསྟན་པ་ལ་ཀོའུ་དཱི་ནྱའི་སྐྱེ་བའི་དགེ་སློང་གཅིག་དང་བཅས་པའི་དགེ་སློང་བཅུ་དྲུག་རི་བོ་རིལ་བའི་དབྱིབས་སུ་སོང་སྟེ་བསམ་གཏན་དང་ཀློག་པ་ལ་བརྩོན་པར་གནས་པའི་ཚེ། ལྷ་རྣམས་ཀྱིས་འོད་སྲུང་མྱ་ངན་ལས་འདས་ནས་ཞག་བདུན་ལོན་ཏེ་བསྟན་པའང་ནུབ་ན། ཁྱེད་ཅག་འབྲས་བུ་མེད་པའི་སྦུན་པ་འཕྱར་བས་ཅི་རུང་ཞེས་སྦྲན་པས། ལྔ་དེ་མ་ཐག་ཏུ་གྲོང་དུ་བབས། དྲུག་གིས་རང་བྱང་ཆུབ་མངོན་དུ་བྱས། ཕྱིས་ལྔ་ཡང་གྲོང་དུ་ཆས་པས་ལམ་ཀར་ཚོང་པ་ཞིག་གི་གླང་ཉམ་ཆུང་བས་འགྲོ་མི་ནུས་

― GTD003_Page_0365 ―

^{[མ་དཔེ་གཟིགས་ན་འདིར་གནོན།]}

[Full Size]

པར་རེས་དབྱུག་པས་བསྣུན། རེས་སྣ་ནས་ཁྲིད་འགྲོ་བ་ལ། དེ་དག་གིས་ཁྱོད་དེ་འདྲ་བྱས་ན་གླང་ཤི་ཡོང། དལ་བུས་རྗེས་ནས་སོང་ཞིག་བྱས་པས། ཁྱེད་རྣམས་དེ་སྐད་མ་ཟེར། ང་མགྲོན་པོས་བོར་སོང་ཟེར། ཁོང་རྣམས་ཀྱི་ཐུགས་ལ་འདིས་ཀྱང་བསྐུལ་མ་བཏབ་པར་འདུག །ངེད་རྣམས་སངས་རྒྱས་འོད་སྲུང་ཉན་ཐོས་དང་བཅས་པས་བོར་བར་སྣང་བས་ད་ནི་རྒྱལ་བ་མྱ་ངན་ལས་འདས་ཀྱང། ཚུལ་ཁྲིམས་མྱ་ངན་ལས་མ་འདས་པས་བརྩོན་འགྲུས་བརྩམ་པར་བྱའོ་སྙམ་སྟེ་སྨྲས་པ། ཐུབ་པ་ཆེན་པོ་འོད་སྲུང་གི །གལ་ཏེ་ཆོས་ནི་ནུབ་གྱུར་ཀྱང། །ཡང་དག་སངས་རྒྱས་ཀྱིས་བཤད་པའི། །བརྩོན་འགྲུས་དོར་བར་མི་བྱ་འོ། །ཞེས་སླར་ཡང་རི་ལ་བསྒོམ་པ་ན་བཞི་ཤི་ནས་ཀོའུ་དཱི་ནྱ་གཅིག་པུར་ལུས་པའི་ཚེ། འདི་སྙམ་དུ། ཀྱེ་མ་སངས་རྒྱས་འོད་སྲུང་དགེ་སློང་ཉི་ཁྲི་དང་བཅས་པ་མཐོང་ན། ད་འཛམ་གླིང་ན་སྣམ་སྦྱར་གྱི་རྒྱལ་མཚན་འཛིན་པ་བདག་གཅིག་པུར་ལུས་པ་ལྟར་བདག་གིས་ཚེ་འདིར་ཡོན་ཏན་ཅུང་ཟད་ཀྱང་མ་ཐོབ་ཀྱི། རྒྱལ་བ་ཤཱཀྱ་ཐུབ་པའི་བསྟན་པ་ལ་དགྲ་བཅོམ་མངོན་དུ་བྱས་ཏེ་སྣམ་སྦྱར་གྱི་རྒྱལ་མཚན་འཛིན་པའི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པའི་དོན་བཞིན་དུ་འགྲུབ་པ་ལྟ་བུ་ཡིན་པས་བསྟན་པའི་ཐ་མ་འདི་འདྲ་ལ་ལྷག་པར་སྙིང་སྟོབས་བསྐྱེད་དེ་བསྒོམ་པ་ལ་དོན་གཉེར་བྱེད་པ་གལ་ཆེའོ། །དེ་ལྟ་བུའི་མཚན་ཉིད་གསུམ་དང་ལྡན་པའི་གདུལ་བྱ་དེ་ཉིད་སངས་རྒྱས་ཀྱི་སར་འཁྲིད་པའི་ཐབས་ཟབ་མོ་བྱང་ཆུབ་ལམ་གྱི་རིམ་པའི་ཁྲིད་ལ་གཉིས།

― GTD003_Page_0366 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་གྱི་རྩ་བ་བཤེས་གཉེན་བསྟེན་ཚུལ་དང། བསྟེན་ནས་བློ་སྦྱངས་པའི་རིམ་པའོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ། སྦྱོར་དངོས་མཇུག་གསུམ། དང་པོ་སྦྱོར་བ་ལ་ཡང་སྦྱོར་བའི་ཆོས་དྲུག་ལས། ༈ དང་པོ་ནི། གནས་ཁང་བྱི་དོར་བྱས་ཤིང་སྐུ་གསུང་ཐུགས་ཀྱི་རྟེན་བཀྲམ་པ་སྟེ། འདི་ལ་ཀུན་སློང་གི་ཁྱད་པར་ཡང་བདག་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་རྒྱལ་བ་འོད་དཔག་མེད་ཀྱི་ཞིང་ལྟར་ལྗན་ལྗིན་མེད་པ་གསལ་ཞིང་ཡིད་དུ་འོང་བར་གྱུར་ཅིག་སྙམ་དུ་བསམ་ན་སངས་རྒྱས་ཀྱི་ཞིང་སྦྱོང་དུ་འགྲོ་སྟེ་སངས་རྒྱས་ཀྱི་ཞིང་སྣ་ཚོགས་རྣམ་པར་དག་པ་ལ་བཀོད་པའི་འཕྲིན་ལས་སྐབས་སུ་འགྲེལ་བཤད་ཚིག་གསལ་དུ་དྲི་མ་མེད་པར་གྲགས་པས་བསྟན་པའི་མདོ་དྲངས་ཏེ་སངས་རྒྱས་ཀྱི་ཞིང་ཡོངས་སུ་སྦྱོངས་པར་འདོད་པས་ནི། རང་གི་སེམས་ཡོངས་སུ་སྦྱང་བར་བྱའོ། །ཞེས་གསུངས་པའི་ཕྱིར། དེར་མ་ཟད་འདུལ་བ་ལུང་ལས། ཕྱག་དར་གྱི་ཕན་ཡོན་ལྔ་གསུང་ཞིང་། དེའི་སྒོ་ནས་གྲུབ་པ་ཐོབ་པ་ཡང་ལམ་ཆུང་བ་ལྟ་བུ་ཡིན་ཏེ། སྔོན་བྲམ་ཟེའི་རིགས་ལས་འཁྲུངས་པའི་འཕགས་པ་གནས་བརྟན་ལམ་བརྟན་ལ་ནུ་བོ་ལམ་ཆུང་བའམ་ལམ་ཕྲན་བརྟན་བྱ་བ་ཞིག་བྱུང་སྟེ། བྲམ་ཟེའི་ལུགས་ལ་ཐོག་མར། ཨོཾ་བྷུ་རུ་བྷུ་བ་སྭཱཧཱ། ཞེས་པའི་སྔགས་སློབ་པའི་སྲོལ་ཡོད་པ་ལྟར་བསླབ་པ་ན་ཁོང་ཧ་ཅང་རྟུལ་བས་ཨོཾ་བརྗོད་དུས་བྷུ་བརྗེད། བྷུ་བརྗོད་དུས་ཨོཾ་བརྗེད་པས་བྲམ་ཟེ་རྣམས་ཀྱིས་ཕུ་བོའི་དྲུང་དུ་བསྐྱལ། ཕུ་བོས་ཀློག་སོགས་བསླབས་

― GTD003_Page_0367 ―

^{[མ་དཔེ་གཟིགས་ན་འདིར་གནོན།]}

[Full Size]

པས་གང་ཡང་མ་ལོབ་པས་ཁྱོད་འདྲ་བས་དགེ་འདུན་གྱི་དད་རྫས་མི་འཇུ་ཞེས་ཕྱིར་བཏོན་པ་ན་ཁོང་ཡིད་སྐྱོ་ནས། ད་ང་དགེ་སྦྱོང་དགེ་སྦྱོང་མ་ཡིན། བྲམ་ཟེ་བྲམ་ཟེ་མ་ཡིན་ཞེས་ངུས་པའི་ཚེ་སངས་རྒྱས་ཀྱིས་མཁྱེན་ཡང་མ་མཁྱེན་པ་ལྟར་མཛད་ནས་ཁྱོད་ཅི་ལ་ངུས་དྲིས་པས། བདག་ཕུ་བོས་ཕུད་དེ་བདག་ཁྱིམ་པ་ཡང་མ་ལགས། རང་ཏུ་བྱུང་བ་ཡང་མ་ལགས་ཞུས་པས། ཁྱོད་ཀྱི་ཕུ་བོས་བསྟན་པ་འདི་སྒྲུབ་པ་ཡང་མ་ཡིན། གྲངས་མེད་གསུམ་དུ་ཚོགས་བསགས་པ་ཡང་མ་ཡིན་པས། ངའི་རྗེས་ལ་འགྲོ་གསུང་བར་བདག་ཚིག་གཅིག་ཀྱང་མི་ཟིན་ལགས་ཞུས་པས། ཕྱགས་མ་རྒྱག་ཤེས་སམ་གསུང། ཤེས་ལགས་ཞུས་པས་རྡུལ་སྤོང་དྲི་མ་སྤོང་བྱ་བ་འབད་པས་སློབ་ཏུ་བཅུག་སྟེ། དེ་འདོན་བཞིན་དུ་དགེ་འདུན་གྱི་ཀུན་དགའ་ར་བར་གད་རྒྱག་ཏུ་བཅུག་གོ །དེའི་ཚེ་ཤར་ངོས་ཕྱགས་པ་ན་ནུབ་རྡུལ་གྱིས་གང། ནུབ་ངོས་ཕྱགས་པ་ན་ཤར་རྡུལ་གྱིས་གང་སྟེ་མི་ཟད་པར་བྱིན་གྱིས་བརླབས་ཀྱང་སྟོན་པའི་བཀའ་ཡིན་སྙམ་དུ་འབད་པས་ཕྱེད་ཕྱགས་པའི་ཚོད་ཙམ་ན་སྒྲིབ་པ་དག་པའི་དབང་གིས་འདི་སྙམ་དུ་སྟོན་པས་དོན་མེད་པ་ཞིག་མི་གསུང་བས་འདི་ལ་དགོངས་གཞི་ཞིག་ཡོད་འགྲོ་སྙམ་དུ་དཔྱད་པས། རྡུལ་འདི་ས་རྡུལ་མ་ཡིན་འདོད་ཆགས་རྡུལ། །རྡུལ་འདི་ས་རྡུལ་མ་ཡིན་ཞེ་སྡང་རྡུལ། །རྡུལ་འདི་ས་རྡུལ་མ་ལགས་གཏི་མུག་རྡུལ། །ཞེས་སོགས་ཀྱི་དོན་དུ་གོ་ནས། འཁོར་བའི་རྩ་བ་དུག་གསུམ་དང། དེའི་རྩ་བ་བདག་འཛིན་དུ་ཤེས་ཤིང། དེའི་ཞེན་ཡུལ་དྲུངས་ཕྱུངས་ཏེ་གཉེན་པོ་བདག་མེད་རྟོགས་པའི་ཤེས་རབ་བསྐྱེད་

― GTD003_Page_0368 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ཕྱགས་མ་ལག་པར་ཐོགས་བཞིན་དུ་བདེན་པ་མཐོང་བ་ལྟ་བུ་ཡིན་པས་ཐོག་མར་གནས་ཁང་བྱི་དོར་བྱས། དེའི་རྗེས་སུ་སྐུ་གསུང་ཐུགས་ཀྱི་རྟེན་རྣམས་ལེགས་པར་བཀྲམ་ཞིང་འདི་ལ་སངས་རྒྱས་ཀྱི་སྐུ་རེ་འབྲལ་སྤང་གི་ཚུལ་དུ་ངེས་པར་དགོས་ཏེ། བླ་མ་གོང་མ་རྣམས་ཀྱིས་ཀྱང་ཤཱཀྱའི་བཙུན་པ་གསུངས་པ་ལྟར་རང་ཅག་སངས་རྒྱས་ཀྱི་མི་ཡིན་པའི་བརྡ་མཚོན་བྱེད་ཀྱང་ཡིན། དཔེར་ན་ཅུན་གར་ཧོང་ཐེ་ཇིའི་དམག་མི་རྣམས་ཀྱིས་གཞན་ལ་མགོ་མི་འདོགས། ཧོང་ཐེ་ཇིའི་མི་ཡིན་ཟེར་བའི་བརྡར་དེས་གནང་བའི་མདའ་དར་ཚོན་ཅན་རེ་འཛིན་པ་ཡིན་ཟེར་བའི་དཔེ་དང་འདྲ། དེ་ལྟར་ཐུབ་པའི་སྐུ་རེ་འཆང་ན་མི་མ་ཡིན་སོགས་ཀྱིས་གླགས་མི་རྙེད་པས་བསྲུང་བའང་དེ་ལས་ཟབ་པ་མེད་དེ། བསྲུང་བ་ཟབ་ཟབ་འདྲ་བ་གཞན་ལ་ངེས་པ་མི་ཡོང་ཨ་ན་ལེའི་དཔེ་ལ་འགྲོ་ཉེན་ཡོད་དེ། སྔོན་མི་ཞིག་གིས་ངའི་ལུག་ལ་སྐྱོན་མི་འོང། ཨ་ན་ལེ་བཏགས་ཡོད་ཟེར། རྗེས་ནས་སྤྱང་ཀིས་ལུག་བསད་པས་གཞན་ཞིག་གིས་ཨ་ན་ལེ་གང་བྱས་དྲིས་པས། ཨ་ན་ལེ་རང་ཡང་ཆོམ་ཆོམ་དུ་ཟོས་ནས་མི་འདུག་ཟེར་བ་ལྟ་བུ་འོང་བས་བསྲུང་བ་གང་བྱུང་གིས་མི་ཆོག །མཚམས་ཐོ་བྱ་བ་ཡང་བར་ཆད་བསྲུང་བའི་ཆེད་ཡིན་པས་འདི་འདྲའི་སྐབས་སུ་ཕྱོགས་བཞིར་མཚམས་ཐོ་རེ་རེ་ངེས་པར་བཙུག །དེ་ཡང་རྒྱལ་པོ་ཆེན་པོ་བཞིར་བསྐྱེད་དེ། ཁྱེད་རྣམས་ཀྱིས་བདག་གིས་བྱང་ཆུབ་ལམ་རིམ་བསྒོམ་པའི་འགལ་རྐྱེན་བར་ཆད་རྣམས་འདིའི་ནང་དུ་མ་གཏོང་ཞིག །དེའི་མཐུན་རྐྱེན་ལེགས་ཚོགས་ཐམས་ཅད་སྒྲུབས་ཤིག་ཅེས་འཕྲིན་ལས་བཅོལ། རབ་བྱུང་ན་རྒྱལ་སྲས་དངུལ་ཆུ་ཆོས་རྫོང་བའི་མཚམས་ཐོ་འདྲ་བ་དགོས་ཏེ། ཁོང་

― GTD003_Page_0369 ―

^{[མ་དཔེ་གཟིགས་ན་འདིར་གནོན།]}

[Full Size]

གིས་རིམ་པ་གསུམ་བཞག་ནས་ཕྱི་མ་འདི་ཚུན་ཆད་དུ་ཚེ་འདིའི་སྣང་ཤས་སྐད་ཅིག་ཙམ་ཡང་མངོན་དུ་གྱུར་ཏེ་ཤི་གྱུར་ན་ཆོས་སྐྱོང་སྲུང་མ་རྣམས་ཀྱིས་དེ་མ་ཐག་ཚར་ཆོད་ཅིག །དེ་བཞིན་དུ་བར་མ་ཚུན་ཆད་དུ་བདག་འཛིན་འགོང་པོ། ནང་མ་ཚུན་ཆད་དུ་རང་དོན་ཡིད་བྱེད་ཀྱི་བློ་མངོན་དུ་གྱུར་ཏེ་ཤི་གྱུར་ན་དམ་ཅན་ཆོས་སྲུང་རྣམས་ཀྱིས་ཚར་ཆོད་ཅིག་ཅེས་འཕྲིན་ལས་བཅོལ་བ་ཡིན། ང་རང་ཚོས་མཚམས་ཐོ་འཇོག་ལུགས་ནི། བླ་མ་བྱམས་པའི་གསུང་ལས། རང་རེས་ནང་དུ་བསམ་ངན་འབའ་ཞིག་བསམ་སྟེ། ནང་འདིར་བྱམས་སྙིང་རྗེ་སོགས་ཡོད་ན་མི་འགྲིག་གོ་ཞེས་དོན་གྱིས་ཆོས་ལ་མཚམས་ཐོ་བཞག་པ་འདྲ་བར་འདུག་གསུངས་པ་ལྟ་བུར་མ་སོང་བ་དགོས། གཉིས་པ་མཆོད་པ་གཡོ་མེད་ཅིང་བཀོད་པ་མཛེས་པར་བཤམས་པ་ལ། འདིར་གཡོ་མེད་པ་ཞེས་པ་ཡང་གུ་ཡངས་པོར་བྱས་ན་གཉིས་སྣང་འཁྲུལ་པའི་བག་ཆགས་ཀྱི་བར་འདིའི་སྐབས་ཀྱི་གཡོ་ལ་ཡོང་བས་གནད་ཤིན་ཏུ་ཟབ་པ་ཡིན། འདི་ལ་འགའ་ཞིག་གིས་དེ་འདྲ་ཡིན་ན་ལམ་རིམ་འདི་ཧ་ཅང་རྒྱ་ཆེ་བས་ཡོང་ས་མི་འདུག་ཟེར་བ་ནི། ངང་ཐུང་བའི་རྟགས་ཡིན་ཏེ་བླ་མ་བྱམས་པའི་ཞལ་ནས། ང་ཚོས་མི་ཚེ་ཧྲིལ་པོ་ལ་བསྒོམས་ཀྱང་མ་འོངས་པ་དེ། ཁྱེད་ཚོས་ཆོས་ཐུན་གཅིག་གཉིས་ཤིག་ལ་ཡོང་ན་ལྟས་ངན་ཡིན་གསུངས་པ་ལྟར་ཡིན་ཏེ། དཔེར་ན་ཀ་ཁ་ནས་བཟུང་སྟེ་སྒྲའི་རྣམ་དབྱེ་ཚུན་ཆད་ལ་མཁས་པར་སྦྱངས་པའི་དྲུང་ཡིག་མཁས་པའི་དྲུང་དུ། སྙུ་གུ་ཙམ་ཡང་འཛིན་མི་ཤེས་པའི་གསར་དུ་ཡི་གེ་སློབ་མཁན་ཞིག་གིས་དེ་རིང་རང་ཡིག་མཁན་

― GTD003_Page_0370 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་འདྲ་ཞིག་བྱེད་དགོས་སྙམ་པས་གང་ཡང་མི་ཡོང་བས་ངང་བསྲིང་སྟེ་གོམས་ན་འགྲུབ་པ་ཡིན། བླ་མ་བྱམས་པའི་ཞལ་ནས་ཀྱང། ངས་ལམ་རིམ་ཚར་བདུན་ཉན་པས་བསྒོམ་ཚུལ་ལྷུ་འགྲིག་ཙམ་བྱུང་གསུང་བ་ལྟ་བུ་ཡིན། ངང་མ་བསྲིང་ན་ལ་གསུམ་རྒྱབ་པའི་དཔེ་ལ་འགྲོ་ཉེན་ཡོད་དེ། སྔོན་བསམ་ཡས་སུ་ལ་གསུམ་རྒྱབ་པ་ཟེར་བ་ཞིག་བྱུང་བ་རྩོད་པ་ཕམ་པས་ང་རྒྱ་གར་པཎ་ཆེན་ཞིག་གི་དྲུང་དུ་གཏུགས་དགོས་པར་འདུག་ཟེར་ཏེ། ཆོས་གྲྭ་དེ་ནས་འཕྲལ་དུ་ཐོན་ཏེ་བསམ་ཡས་མདའི་མཆོད་རྟེན་དཀར་ཆུང་ཟེར་བའི་བར་དུ་ཕྱིན་ནས་ཕྱིར་ལོག་པ་ལྟ་བུར་མ་སོང་བ་དགོས། དེ་བཞིན་དུ་ཐ་ན་ཕྱགས་མ་རྒྱག་ཚུལ་ཡན་ཆད་ལ་ཡང་ཉོན་མོངས་པའི་ལྗན་ལྗིན་ནས་བཟུང་གཉིས་སྣང་འཁྲུལ་བའི་བག་ཆགས་ཀྱི་བར་རྣམས་ཕྱགས་རྒྱུའི་ཕྱགས་མ་དང། དེ་ཕྱགས་ཚུལ་སོགས་བསམ་ན་དེ་ཙམ་ལ་ཡང་བསྟན་པའི་གནད་ཐམས་ཅད་འདུ་བས་གྲུ་བཞི་ལམ་དུ་འཁྱེར་ཤེས་པ་ཟེར་བའི་དོན་བཞིན་འོང་བས་བསམ་པའི་ཁྱད་པར་དེ་ལྟ་བུ་ལ་རིམ་གྱིས་སློབ་དགོས། དེའི་རྗེས་སུ་བཀོད་པ་མཛེས་པ་ནི། གང་མ་ཆེ་བ། ཁ་མ་དམས་པ། ཏིང་གི་ཁའི་རི་མོའི་ཚོད་ཙམ་ཞིག་ཏུ་འོང་བ་དགོས་ཏེ། གང་ཆེ་ན་ཐོས་བསམ་སོགས་བྱེད་པའི་ཚེ་སེམས་མི་བརྟན་པ་དང། དམའ་ན་ལོངས་སྤྱོད་ཀྱིས་ཕོངས་པར་འགྱུར་བས་ཚོད་རན་པ་དང། དེ་ཡང་པཎ་ཆེན་བློ་བཟང་ཡེ་ཤེས་ཀྱིས་མཆོད་ཏིང་ལ་ལག་རྗེས་བབས་ན་ལེགས་པར་ཕྱིས། སྤོས་ཀྱིས་བདུག་སྟེ་མཆོད་པ་འབུལ་བའི་ཕྱག་བཞེས་ལྟར་གཙང་སྦྲས་ཐོན་པ་ཤིན་ཏུ་གལ་ཆེ། འདི་ལ་མ་འབྱོར་ན་མཐའ་གཅིག་ཏུ་ལི་ཏིང་དགོས་པའི་ངེས་པ་

― GTD003_Page_0371 ―

^{[མ་དཔེ་གཟིགས་ན་འདིར་གནོན།]}

[Full Size]

མེད། རྗེ་སྒྲུབ་ཁང་བས་ཁོང་གི་གསོལ་ཕོར་ཡང་ཡང་བཀྲུས་ཏེ་མཆོད་པ་ཕུལ། རང་ལ་དགོས་པའི་ཚེ་གཡར་པོའི་ཚུལ་དུ་ཞུས་ནས་བཞེས་པ་ལྟ་བུ་ཡིན་པས་བསམ་པས་འགྲུབ་ན་མཆོད་པའི་ཡོ་བྱད་ཀྱིས་མི་ཐོགས་པས། ལན་གྲངས་ཡང་དྲུག་གམ། མ་མཐའ་གསུམ་རེ་མ་ཕུལ་ན་རི་ཁྲོད་པའི་རྐང་དྲང་བ་ཡིན་པས་མཆོད་པ་ལེགས་པར་བཤམ་མོ། །གསུམ་པ་བདེ་བའི་སྟན་ལ་ལུས་འདུག་ལུགས་བརྒྱད་དམ། སྤྱོད་ལམ་གང་བདེར་གནས་ནས་རང་རྒྱུད་ལ་ལེགས་པར་བརྟགས་ཏེ་དགེ་སེམས་ཁྱད་པར་ཅན་གྱི་ངང་ནས། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་རྒྱུད་དང་འདྲེས་ངེས་སུ་བྱ་བ་ནི། དཔེར་ན་སྔོན་སྟོན་པ་ཐུགས་རྗེ་ཅན་གྱིས་རྡོ་རྗེ་ལྟ་བུའི་ཏིང་ངེ་འཛིན་མངོན་དུ་མཛད་པའི་ཚེ་ས་ཕལ་པས་མི་ཐེག་པས། ཕྱོགས་བཅུའི་རྒྱལ་བ་རྣམས་ཀྱིས་དེའི་འོག་དབང་ཆེན་གསེར་གྱི་ས་གཞི་ལ་ཐུག་གི་བར་དུ་མི་ཤིགས་པའི་རྡོ་རྗེར་བྱིན་གྱིས་བརླབས་པས། མཚན་ཡང་རྡོ་རྗེ་གདན་ཞེས་གྲགས་པ་དེར་ངས་བདུད་བྱེ་བ་འབུམ་ཕྲག་བཅུ་བཏུལ་ཏེ་སངས་རྒྱས་མ་ཐོབ་བར་དུ་སྟན་འདི་ལས་མི་ལྡང་ངོ་ཞེས་དམ་བཅས་པ་ལྟར་རང་ཅག་རྗེས་འཇུག་རྣམས་ཀྱིས་ཀྱང། འབོལ་གདན་བདེ་བའི་འོག་ཏུ་གཡུ་དྲུང་གཡས་སྐོར་དུ་འདྲི་བ་རྟེན་འབྲེལ་གྱི་གནད་ཆེ་སྟེ། རྒྱ་སྐད་ལ་བཛྲ་ཞེས་པ་བོད་སྐད་དུ་རྡོ་རྗེ་དང་གཡུང་དྲུང་གཉིས་ཀར་འཇུག་ཀྱང་འདིར་གཡུང་དྲུང་དུ་བསྒྱུར་བ་ཡིན་པས་སྟན་དེ་ལྟ་བུ་ལ་འཁོད་དེ། འདི་སྙམ་དུ་ག་རེ། པཎ་ཆེན་ཐམས་ཅད་མཁྱེན་པས། ཕར་ལྟོས་དཔོན་མེད་ཚུར་ལྟོས་

― GTD003_Page_0372 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོག་མེད་ཅིང། །འདུལ་རྒྱུའི་དགྲ་མེད་སྐྱོང་རྒྱུའི་གཉེན་མེད་པར། །དབེན་པའི་གནས་སུ་རང་སེམས་མི་འདུལ་ན། །ཁྱོད་ལ་བྱ་རྒྱུ་ཅི་ཡོད་མ་ཎི་པ། །ཞེས་གསུངས་པ་ལྟར་འཇིག་རྟེན་གྱི་བྱ་བ་ཐམས་ཅད་བཞག་ནས། ཚེ་ལ་ཚད་བཟུང་སྟེ་བྱང་ཆུབ་ལམ་རིམ་འདི་ཁོ་ན་རང་ཨེ་ཡོང་ཞིག་ལྟ་དགོས་པར་འདུག །འཇིག་རྟེན་ཡང་གྲ་མ་ཆག་ཙམ་ཞིག་དང། དེའི་སྟེང་ནས་ཆོས་ཤིག་ཀྱང་བྱེད་དགོས་སྙམ་དུ་རྐང་པ་གཉིས་འཛུགས་བྱས་པས་གང་ཡང་མི་ཡོང་བར་སྣང་བས། སྙིགས་དུས་ཀྱི་ཚེ་ཐུང་འདི་ལ་ཆོས་ལམ་རིམ་འདི་རང་ཡོང་བ་ཞིག་བྱ་སྟེ། དང་པོར་ཚེ་འདིའི་སྣང་ཤས། དེ་ནས་བདག་འཛིན་འགོང་པོ། དེ་ནས་གཉིས་སྣང་འཁྲུལ་པའི་བར་ཐམས་ཅད་གཞོམ་པར་བྱའོ་སྙམ་དུ་དམ་བཅས་ཏེ། ཀུན་སློང་དེ་ལྟ་བུའི་སྒོ་ནས་དགེ་སྦྱོར་ལ་འཇུག་པ་ཞིག་བྱུང་ན། བླ་མ་བྱམས་པའི་ཞལ་ནས། ཀུན་སློང་རང་ལ་ལམ་རིམ་ཡོངས་སུ་རྫོགས་པ་ཡིན་ཞེས་གསུངས་པ་ལྟ་བུ་ཡིན་ལ། འདི་ནི་རྒྱལ་བ་བྱམས་པས་ཀྱང། ཉན་ཐོས་ཞི་བ་ཚོལ་རྣམས་ཞེས་སོགས་ཀྱི་སྐབས་ནས། དང་པོར་ངན་འགྲོའི་སྡུག་བསྔལ་ཞི་བའི་ཞི་བ་དང། དེ་ནས་ཉོན་མོངས་མཐའ་དག་ཞི་བའི་ཞི་བ་དང། དེ་ནས་ཀྱང་རིམ་གྱིས་ཁྲིད་དེ་རང་དོན་ཡིད་བྱེད་ཀྱང་སྤངས་ནས་རང་གཞན་ཐམས་ཅད་ཀྱི་དོན་ཕུན་སུམ་ཚོགས་པ་སྒྲུབ་པར་གསུངས་པ་དང་གནད་གཅིག་ལ། དཔལ་ལྡན་ཟླ་བས་ཀྱང། སེམས་ཉིད་ཀྱིས་ནི་སེམས་ཅན་འཇིག་རྟེན་དང། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། །ཅེས་གསུངས་པ་ལྟར་ཆོས་ཐམས་ཅད་སེམས་ཀྱི་འཕྲུལ་ཡིན་པས། ཐོག་མར་ཀུན་སློང་བཅོས་པ་

― GTD003_Page_0373 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིན་ཏུ་གལ་ཆེ་ལ། ཀུན་སློང་གི་ཁྱད་པར་ཡང། སྒོམ་པ་རིན་ཆེན་བླ་མའི་གསུང་ལས། ལམ་རིམ་འདི་ཁག་མདོག་ཁ་མོ་ཡོད་དེ། ཁག་རྒྱུ་མི་འདུག །གོ་རྒྱུ་ཚིག་གསུམ་རེད། མིག་རྒྱ་བསྲིང། ཡིད་རྒྱ་བསྐྱེད། ཁོང་སོ་གློད་གསུངས་པ་ལྟར། ཐོག་མར་འཕེན་པ་གཏོང་བའི་ཚེ་མིག་རྒྱ་བསྲིང་སྟེ་ཡ་གི་སངས་རྒྱས་ཀྱི་ས་ལ་དམིགས་པ་ཡིན་ན། དེ་དང་མཐུན་པའི་བཤེས་གཉེན་ཡང་ངེས་འབྱེད་ཆ་མཐུན་གྱི་སྐབས་སུ་ཡོངས་འཛིན་གྱི་ཁྱད་པར་འཕགས་པར་བཤད་པ་དེ་ལྟ་བུའི་དགེ་བའི་བཤེས་གཉེན་ཞིག་དང། གྲོགས་ཀྱང་ཕྱིར་མི་ལྡོག་པའི་རྟགས་ཀྱི་སྐབས་ནས་བཤད་པ་ལྟ་བུ་ཞིག་ཚོལ་ཞིང་མངོན་མཐོ་དང་ཐར་པ་སོགས་དེས་ཞར་བྱུང་དུ་འགྲུབ་འགྲོ་བ་ཡིན་ཏེ། དཔེར་ན་བར་ཁམས་དང། ཆབ་མདོ་དང། རྒྱ་ནག་ཏུ་འགྲོ་འདོད་པའི་ཚོང་པ་གསུམ་ལམ་གྲོགས་ཀྱང་དེ་དང་དེའི་བར་དུ་འགྲོ་བ་རེ་ཚོལ་ཞིང། ཐུང་ངུ་རྣམས་ལམ་རིང་པོའི་ཞར་ལ་འགྲོ་བ་ལྟ་བུ་ཡིན་པས། དེ་ལྟ་བུའི་དགེ་སེམས་ཁྱད་པར་ཅན་ཞིག་གསལ་བཏབ་སྟེ། དེའི་ངང་ནས་སྐྱབས་ཡུལ་གསལ་འདེབས་ཚུལ་ཡང་འཇམ་དཔལ་ཞལ་ལུང་སོགས་ལས་བྱ་ནམ་མཁའ་ལ་འཕུར་བ་ལྟར་བྱོན་པའི་མོས་པ་བྱེད་པར་གསུངས་ཀྱང། འདིར་རང་གི་མདུན་གྱི་ཐད་དྲང་གི་ནམ་མཁའི་གནས་སུ་སེང་ཁྲི་པད་ཟླ་ཉི་མའི་གདན་ལ་གཙོ་བོ་རྒྱལ་བ་ཤཱཀྱ་ཐུབ་པ་སོགས་སྐྱབས་ཡུལ་རྣམས་ཚིག་རིས་ལྟར་མདུན་ན་བཞུགས་བཞིན་པ་གསལ་འདེབས་པ་ཡིན་ལ། འོན་ཀྱང་པོ་ཏི་རྣམས་རང་རང་གི་མདུན་དུ་བཞུགས་པར་ཚིག་ཟིན་ལ་གསུངས་ཀྱང་གསལ་འདེབས་

― GTD003_Page_0374 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཚེ་གཡས་ཕྱོགས་སུ་པདྨའི་སྡོང་བུ་ལ་བདུད་རྩིའི་ཟིལ་པ་ཁྲོམ་མེ་བ་ཡིག་འབྲུ་རྣམས་ཀྱང་རང་སྒྲ་སྒྲོགས་ཤིང་བདུད་རྩི་འཛག་བཞིན་པ་ཞིག་གསལ་བཏབ་སྐྱབས་ཡུལ་རྣམས་ཀྱང་རང་ལ་དགྱེས་པའི་མོས་པ་བྱེད། འདི་ལ་བླ་མ་བྱམས་པའི་ཞལ་ནས། སངས་རྒྱས་བྱང་སེམས་རྣམས་ངེད་ཅག་ལ་ཐུགས་དགའ་ནས་དགྱེས་པ་མིན། སྡུག་དྲགས་ནས་བརྩེ་བས་མ་བཟོད་པར་དགྱེས་པ་ཡིན་ཏེ་ང་སྔོན་གཙང་ལ་སོང་སྐབས། པཎ་ཆེན་བློ་བཟང་ཡེ་ཤེས་ཀྱིས་ཁོང་ལོ་རྒས་པས་ཁྱོད་ཀྱིས་འདི་ཚོ་ལ་ལམ་རིམ་ཡག་པོ་ཞིག་ཤོད་གསུངས་ནས་བཤད་པས། དེ་ནས་པཎ་ཆེན་གྱིས་རྒྱུན་པར་གཟིམས་ཆུང་ནས་དབུ་ཏོག་ཙམ་ཏོག་ཙམ་རེ་གཟིགས་པ་ལ། གཞན་རྣམས་པཎ་ཆེན་ཞབས་འཆག་གནང་བ་རེད་ཟེར་ཡང་ངས་དཔག་པ་ན་ད་ཅི་དྲག་ང་ནི་ན་སོ་རྒས་སོང། ཁོང་ཚོ་ནི་གང་བྱས་ཀྱང་འདྲེན་ནུས་པ་རང་མི་འདུག་སྙམ་དུ་ཐུགས་ཀྱིས་མ་བཟོད་པར་འདུག་གསུངས་པ་ལྟ་བུ་ཡིན། བླ་མ་རིན་པོ་ཆེ་དེ་སྐབས་དགུང་ལོ་བཅུ་བདུན་ཡིན་ཞིང་ལམ་རིམ་གསན་པའི་ཐོག་མ་དེ་ཡིན་ཀྱང་ཐུགས་ལ་དེ་ལས་འཇགས་པ་མ་བྱུང་གསུངས། ཡང་བླ་མ་གྲུབ་པའི་དབང་ཕྱུག་གི་ཞལ་ནས། དགྱེས་རྒྱུ་ཆེན་པོ་མེད་དེ་ཅུང་ཟད་ཡོད། དེ་ཅི་ཡིན་ན། སྔོན་ཐོག་མ་མེད་པ་ནས་ངན་སོང་གསུམ་དུ་འཁྱམས་ཏེ་དགེ་བློ་ཅུང་ཟད་ཙམ་ཡང་སྐྱེ་རྒྱུ་མ་བྱུང་བ་ལ། ད་རེས་མི་ལུས་ལན་གཅིག་ཐོབ། དགེ་བའི་བཤེས་གཉེན་དང་མཇལ་ནས་མ་མཐའ་བསྒོམ་ཁུལ་ཙམ་བྱས་ཏེ་བཅོས་མ་ཙམ་ཀྱིས་ཀྱང། མ་སེམས་ཅན་ཐམས་ཅད་སངས་རྒྱས་ཀྱི་ས་ལ་བདག་གིས་

― GTD003_Page_0375 ―

^{[མ་དཔེ་གཟིགས་ན་འདིར་གནོན།]}

[Full Size]

འགོད་པར་བྱའོ་ཞེས་པའི་ཚིག་ཙམ་ཟེར་ཤེས་པ་བྱུང་བ་ཡང་ཡ་མཚན་ཆེ། ད་ནི་བླུན་པོ་ཆུ་སྣ་འདྲ་བ་རྒོད་པའི་ཁ་ལ་བལྟས་ན་རྒོད་བྲོ། ངུ་བའི་ཁ་ལ་བལྟས་ན་ངུ་བྲོ་བ། བློ་སྐད་ཅིག་སྐད་ཅིག་གིས་འགྱུར་འགྲོ་བ་ཡིན་པས་བཅོས་མ་འདི་ཙམ་ཞིག་བསྒོམ་སོང་ན་མཐར་དགའ་མོ་ཨེ་ཡོང་སྙམ་དུ་དགྱེས་པ་ཡིན་གསུངས། དེ་ལྟར་སྐྱབས་ཡུལ་རྣམས་གསལ་བཏབ་སྟེ། དེ་དག་གི་མདུན་དུ་གཙོ་བོ་རང་ཉིད་དང། གཡས་གཡོན་དུ་ཚེ་འདིའི་ཕ་མ་སོགས་དང། དེ་དག་གི་མཐའ་སྐོར་དུ་འགྲོ་བ་རིགས་དྲུག་གི་སེམས་ཅན་ཐམས་ཅད་སྨུག་ཤིག་གེ་ཡོད་པའི་མོས་པ་བྱས་ཏེ་སྐྱབས་འགྲོ་བྱེད་དགོས། སྐྱབས་འགྲོ་བྱེད་པ་ཡང་དགའ་དགའི་རྩེད་མོ་ལྟ་བུས་མི་ཡོང་བས། རྣམ་པར་ཤེས་པ་སྲིད་རྩེ་ནས་མནར་མེད་ཀྱི་བར་དུ་འཁོར་ཚུལ་མིག་མཆི་མ་ཀོར་རེ་སེམས་འཇིགས་ཡེ་རེ་བ་ཞིག་གི་ངང་ནས། བླ་མ་ལ་སྐྱབས་སུ་མཆིའོ་ཞེས་སོགས་ཐུན་མོང་བའི་སྐྱབས་འགྲོ་སྔོན་དུ་བཏང་སྟེ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་ཐུན་མོང་མ་ཡིན་པའི་སྐྱབས་འགྲོ་བྱེད་དགོས། ཕྱི་མ་འདི་ལ་ཐུན་མོང་མ་ཡིན་པའི་སྐྱབས་འགྲོ་ཟེར་བའི་རྒྱུ་མཚན་ཡང། དཔེར་ན་བཟའ་ཚང་གི་བདག་པོས་གཞན་ལ་མགོ་འདྲེན་ཞུ་བ་ན། རང་གཅིག་པུ་ཙམ་ཞིག་མ་ཡིན་པར། ངེད་བཟའ་ཚང་ལྟོས་བཅས་ཐམས་ཅད་ཁྱེད་ཀྱིས་ཤེས་ཟེར་བ་ལྟར། འདིར་ཡང་རང་གཅིག་པུའི་དོན་མ་ཡིན་པར། སེམས་ཅན་ཐམས་ཅད་ཀྱིས་ཆེད་དུ་བྱང་ཆུབ་མ་ཐོབ་བར་དུ་སྐྱབས་སུ་སོང་བས་སྐྱབས་འགྲོ་ཐུན་མོང་མ་

― GTD003_Page_0376 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པ་ལ་སོང་བ་ཡིན། དེ་ལྟར་སྐྱབས་སུ་སོང་བའི་མཐར་ཐུབ་དབང་ལས་རང་འདྲ་གཉིས་པ་ཞིག་ཆད་ནས་རང་ལ་ཐིམ། རང་ཐུབ་པའི་དབང་པོའི་སྐུར་ལམ་གྱིས་བཞེངས་པའི་ཐུགས་ཀ་ནས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཐུབ་པའི་དབང་པོའི་སྐུར་གྱུར་པའི་མོས་པ་བྱས་ཏེ། སེམས་བསྐྱེད་འབྲས་བུ་ལམ་བྱེད་ཀྱི་ཚུལ་དུ་བསྒོམ་པ་འདི་བྱིན་རླབས་ཀྱི་ཁྱད་ཆེ་ཞིང། གསང་སྔགས་རྡོ་རྗེ་ཐེག་པ་ལ་བག་ཆགས་འཇོག་པའི་དགོས་པ་ཤིན་ཏུ་ཆེན་པོའང་ཡོད་དོ། །སེམས་བསྐྱེད་འབྲས་བུ་ལམ་བྱེད་ཀྱི་ཚུལ་འདི་ཙམ་ཞིག་དབང་མ་ཐོབ་པ་རྣམས་ལ་ཡང། གསང་སྒྲོགས་སུ་མི་འགྲོ་སྟེ། ཤེར་ཕྱིན་གྱི་མདོར་ཡང་ཤེར་མདོ་གསུངས་པའི་ཚེ་བཅོམ་ལྡན་འདས་ཀྱིས་སྐུ་ལས་འོད་ཟེར་སྤྲོ་བསྡུ་བྱས་པས་སྣོད་བཅུད་ཐམས་ཅད་སྦྱངས་ཏེ་སྐད་ཅིག་མ་དེ་ལ་སྡུག་བསྔལ་མཐའ་དག་རྒྱུན་ཆད་པར་གསུངས་པ་དང། རྒྱན་ལས་ཀྱང། སེམས་ཅན་འཇིག་རྟེན་དེ་བཞིན་དུ། །སྣོད་ཀྱི་འཇིག་རྟེན་མ་དག་པ། །དེ་ལ་དག་པར་སྒྲུབ་པ་ཡིས། །ཞེས་སྣོད་བཅུད་གཉིས་ཀ་སྦྱངས་པར་གསུངས་པ་སོགས་མདོ་ཕྱོགས་སུ་ཡང་ཚུལ་དེ་ཙམ་ཞིག་གསུངས་པ་མང་དུ་ཡོད་པས་སྐྱོན་མེད་ལ། དེ་ནས་ཚད་མེད་བཞི་བསྒོམ་ཞིང། དེའི་མཐར་སྐྱབས་འགྲོའི་ཚོགས་ཞིང་འདི་ལ་བསྡུ་བ་དང་མི་བསྡུ་བའི་ལུགས་གཉིས་ཡོད་ཀྱང། བྱིན་རླབས་ཀྱི་ཁྱད་ཀྱིས་བསྡུས་ན་ལེགས་པས་བསྡུ་ཚུལ་ཡང་འོད་ཀྱི་རྣམ་པར་ཞུ་སྟེ་སྨིན་མཚམས་སུ་བསྡུས་ན་དེར་ཡེ་ཤེས་ཀྱི་སྤྱན་ཡོད་པ་བྱིན་རླབས་འཇུག་པའི་སྒོ་ཡིན་པས་གནད་ཤིན་ཏུ་ཆེའོ། །བཞི་པ་ཚོགས་ཞིང་གསལ་འདེབས་པ་ནི། སྔར་

― GTD003_Page_0377 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་དུ་གསེར་ལས་གྲུབ་པའི་ཁྲི་མཐོ་ཞིང་ཡངས་པ་སེང་ཆེན་བརྒྱད་ཀྱིས་བཏེག་པ། སེང་གེ་རྣམས་ཀྱང་རི་མོར་བྲིས་པ་ལྟ་བུ་མིན་པར་དངོས་གནས་པ་དབུགས་ལྷེམ་ལྷེམ་བྱེད་པ་རེ་གསལ་འདེབས་དགོས་ཏེ། དེའི་རྒྱུ་མཚན་བཅོམ་ལྡན་འདས་ཐུན་མོང་བ་ལྟར་ན་རྡོ་རྗེ་གདན་དུ་སངས་རྒྱས་ཀྱང། ཐུན་མོང་མ་ཡིན་པ་ལྟར་ན་འོག་མིན་དུ་སངས་རྒྱས་ཏེ་དང་པོར་རྡོ་རྗེ་དབྱིངས་ཀྱི་དཀྱིལ་འཁོར་དུ་རྒྱུད་གསུངས་པའི་ཚེ། ས་བཅུ་པའི་བྱང་ཆུབ་སེམས་དཔའ་རྣམས་ཀྱིས་སེང་གེའི་རྣམ་པ་བཟུང་བ་ཡིན་ལ། དེ་ལྟ་བུའི་ཁྲི་དེའི་དབུས་སུ་སེང་ཁྲི་ཆུང་བ་ཞིག་ལ་སྔར་ལྟར་རྒྱལ་བ་ཤཱཀྱ་ཐུབ་པ་གསལ་བཏབ། དེའི་ཐུགས་ཀ་ནས་འོད་ཟེར་རྒྱབ་ཀྱི་སྟོད་ཕྱོགས་སུ་འཕྲོས་པའི་རྩེ་མོར་རྒྱལ་བ་རྡོ་རྗེ་འཆང་ལ་འབྲོམ་སྟོན་ལ་སོགས་པའི་ཉམས་ལེན་བྱིན་རླབས་ཀྱི་བརྒྱུད་དམ། བཀའ་གདམས་ཐིག་ལེ་བཅུ་དྲུག་གི་བླ་མ་བརྒྱུད་པས་བསྐོར་བ། མདུན་དུ་འཕྲོས་པའི་རྩེ་མོར་རྩ་བའི་བླ་མ་ལ་ཆོས་འབྲེལ་ཡོད་པའི་བླ་མ་རྣམས་ཀྱིས་བསྐོར་བ། དཔུང་པའི་ཐད་ཀྱི་གཡས་གཡོན་གཉིས་སུ་འཕྲོས་པའི་རྩེ་མོར་རྒྱ་ཆེན་སྤྱོད་བརྒྱུད་དང། ཟབ་མོ་ལྟ་བརྒྱུད་ཀྱི་བླ་མ་རྣམས་གྲལ་ཤར་རེ་རེ་བྱས་ཏེ་ཞལ་ཐུབ་དབང་ལ་ཕྱོགས་ནས་བཞུགས་པའི་སྤྱན་ཟུར་གྱིས་རང་ལ་གཟིགས་པ། དེ་དག་གི་ཕྱི་རོལ་ཏུ་སངས་རྒྱས་བྱང་སེམས་རང་རྒྱལ་ཉན་ཐོས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་དང། དེའི་ཕྱོགས་བཞིར་རྒྱལ་ཆེན་བཞི་ཁ་ཕྱིར་ཕྱོགས་ཏེ་བར་ཆད་བསྲུང་བའི་ཚུལ་གྱིས་བཞུགས་པ་གསལ་འདེབས་པ་འདི་ལ་རྒྱུད་སྡེ་

― GTD003_Page_0378 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིའི་ལྷ་ཚོགས་རྣམས་མ་འདུས་པ་མེད་པས་བཀའ་གདམས་པ་རྣམས་ཡི་དམ་རྒྱུད་སྡེ་བཞིའི་དཀྱིལ་འཁོར་ཞེས་གསུངས་པ་ཡིན། ཚོགས་ཞིང་དེ་རྣམས་ཀྱང་སྐུ་འདྲ་དང་བྲིས་སྐུ་ལྟ་བུ་མ་ཡིན་པར། སྟོན་པ་ཡང་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ་ཞེས་སོགས་གསུང་བཞིན་པ་དང། བྱམས་པ་ཡང་ཤེས་རབ་ཀྱི་ཕ་རོལ་ཕྱིན་པ་ཞེས་སོགས་དང། འཇམ་དབྱངས་ཡང་སྟོང་པ་ཉིད་ཀྱི་སྒྲ་ལྷང་ལྷང་གསུང་བཞིན་པ་དེ་ལྟ་བུ་ཐམས་ཅད་ལ་ལེགས་པར་གསལ་འདེབས་དགོས་པ་ཡིན་ལ། དེ་དག་གི་ཕྱི་རོལ་ཏུ་གང་ལ་གང་འདུལ་གྱི་སྤྲུལ་པའི་བཀོད་པ་བསམ་གྱིས་མི་ཁྱབ་པ་སྤྲུལ་པ་འགའ་ཞིག་ཚུར་བསྡུ་ཞིང་འགའ་ཞིག་ཕར་སྤྲོ་བ་དཔེར་ན་རྒྱལ་པོའི་མི་འགའ་ཞིག་དོན་འགྲུབ་ནས་འོང་བ་དང། ལ་ལ་ཕར་འགྲོ་བ་ལྟ་བུ་སྤྲུལ་པ་སྣེ་འཛིང་བས་ནམ་མཁའི་ཁམས་གང་བར་སྤྲོ་བ། དེ་དག་ཐམས་ཅད་ཀྱི་སྤྱི་བོ་ཨོཾ་དཀར་པོ་སོགས་གསལ་བཏབ་སྟེ། བདུད་རྩི་འབེབས་སྦྱང་བྱེད་ཚུལ་ཡང། རྒྱུད་བླ་མ་ལས་གསུངས་པ་ལྟར། ཡེ་ཤེས་ལྔའི་ནང་ནས་མེ་ལོང་ཡེ་ཤེས་གཟུགས་སུ་ཤར་བ་སྤྱི་བོའི་ཨོཾ་དཀར་པོ་ཡིན་པས་དེ་ལས་བདུད་རྩི་འབེབས་སྦྱང་བྱས་པས། རང་གཞན་གྱི་ནད་གདོན་ཞི་བ་སོགས་ཞི་བའི་ལས་རྣམས་འགྲུབ་ཅིང། སོར་རྟོག་ཡེ་ཤེས་ཀྱི་ངོ་བོ་གསུང་རྡོ་རྗེའི་ས་བོན་མགྲིན་པའི་ཨཱཿ དམར་པོ་ལས་དབང་དང། དེ་བཞིན་དུ་ཐུགས་ཀའི་ཧཱུཾ་སྔོན་པོ་ལས་དྲག་པོ་དང། རིན་འབྱུང་གི་ས་བོན་ལྟེ་

― GTD003_Page_0379 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་སྭཱ་སེར་པོ་ལས་ཚེ་བསོད་རྒྱས་པ་དང། གསང་བའི་ཧཱ་ལྗང་གུ་ལས་ལས་རབ་འབྱམས་འགྲུབ་པ་ཡིན་པས་བདུད་རྩི་འབེབས་སྦྱང་འདི་ཤིན་ཏུ་གནད་ཆེའོ། །འདིར་བདུད་རྩིའི་སྐད་དོད་ཨ་མྲྀ་ཏ་ཞེས་པའི་མྲྀ་འཆི་བ་ལ་འཇུག་ཅིང། ཨ་དགག་ཚིག་ཡིན་པས་དེ་ཉིད་ཨས་བཀག་སྟེ་འཆི་བ་མེད་པ་ལ་འཇུག་པ་ཡིན། བདུད་རྩི་འབེབས་སྦྱང་གི་གདམས་པ་འདི་ལས་ཟབ་པ་རྒྱུད་ལ་ཡང་མེད་པས་འདི་ལེགས་པར་བསྐྱང་ན་དབང་སྡུད་སོགས་ལ་ཡང་ལྷ་མོ་རིག་བྱེད་མའི་མེ་ཏོག་གི་མདའ་གཞུ་ལས་ཀྱང་འདི་ཟབ་པ་ཡིན། དེས་ན་བྱང་ཆུབ་ལམ་རིམ་གྱི་ཉམས་ལེན་འདི་གནད་དུ་འགྲོ་བ་ཞིག་བྱུང་ན། གཞན་སུ་ལ་ཡང་རེ་མི་དགོས་ཏེ། དཔེར་ན་སྔོན་འབྲོམ་སྟོན་རྒྱལ་བའི་འབྱུང་གནས་ཞིང་ལ་གཤེགས་ནས་བཀའ་གདམས་སྐུ་མཆེད་གསུམ་གྲོང་ཆོག་སོགས་ལ་མི་ཕེབས་པར་དམ་བཅས་ཏེ་ཕན་ཚུན་གཅིག་གིས་གཅིག་མི་སྤོང་བར་བཞུགས་པའི་དུས་ལན་གཅིག་པོ་ཏོ་བའི་རྨི་ལམ་དུ། ནོར་བུ་འཚོང་མཁན་བྱུང་བས་ཉོ་དགོས་དགོངས་ཙ་ན་རང་གི་ཨ་འབག་ཏུ་ནོར་བུ་རིན་ཐང་མེད་པ་མང་པོ་འདུག་པ་མཐོང་སྟེ། ང་ལ་འདི་འདྲ་ཡོད་བཞིན་དུ་ཅི་ལ་ཉོ་སྙམ་ནས་མ་ཉོས་སད་ནས་དེ་རང་བདེན། ང་ལ་འབྲོམ་གྱི་གདམས་པ་མངོན་མཐོ་སྒྲུབ་བྱེད་ཀྱི་ཐབས་ཡང་ཡོད། དེར་མ་ཟད་ཐར་པ་བསྒྲུབ་ན་ཡང་ང་ལ་ཡོད། ཐམས་ཅད་མཁྱེན་པ་བསྒྲུབ་ན་ཡང་ང་ལ་ཡོད་པས་གཞན་ལས་ཅི་བཙལ་དགོངས་པ་ལྟ་བུ་ཡིན། ཡང་སྐབས་འདིར་བླ་མ་ཐུབ་པའི་དབང་པོའི་ཐུགས་ཀ་ནས་འོད་ཟེར་འཕྲོས་ཏེ་ཡེ་ཤེས་པ་རྣམས་སྤྱན་འདྲེན་པར་མཛད་པ་ལ་དགོས་པ་ཅི་ཡོད།

― GTD003_Page_0380 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུབ་དབང་རྟག་ཏུ་བཞུགས་པ་མ་ཡིན་ནམ། ཞེ་ན་འདིའི་དགོས་པ་ནི། མི་ཕལ་ཆེར་གྱིས་བསམ་པ་ལ་རྒྱལ་བ་འོད་དཔག་མེད་དེ་བདེ་བ་ཅན་བྱ་བའི་ཐག་རིང་པོ་ཞིག་ན་བཞུགས་ཡོད་སྙམ་པ་དང། བྱམས་མགོན་ཡང་ཡ་གི་རི་རབ་ཀྱི་རྩེ་མོ་ཐག་རིང་ཞིག་ན་བཞུགས་པས། འདི་ནས་བོས་ཀྱང་མི་གསན་སྙམ་པ་ལྟ་བུའི་ལོག་རྟོག་འཆར་བ་བཟློག་པའི་ཆེད་དུ་སྤྱན་འདྲེན་བྱས་ཏེ་བཛྲ་ས་མཱ་ཛཿ ཞེས་སོགས་བརྗོད་ཚེ་ང་རང་གི་མདུན་ན་བཞུགས་ཡོད་སྙམ་པ་སྐྱེ་བའི་དབང་གིས་དེ་ལྟར་བྱས་པ་ཡིན་གྱི་སྤྱན་མ་དྲངས་ཀྱང་ཐུབ་དབང་མདུན་ན་བཞུགས་པ་རིགས་པ་དྲི་མ་མེད་པས་འགྲུབ་པ་ཡིན་ཏེ། སློབ་དཔོན་དཔའ་བོས། མཁྱེན་པའི་སྐད་ཅིག་གཅིག་གིས་ཀྱང། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་གསུངས་པ་ལྟར་སངས་རྒྱས་ཀྱི་མཁྱེན་པས་མ་ཁྱབ་པའི་ཤེས་བྱ་མེད་ལ། དེས་གར་ཁྱབ་ཏུ་ཡེ་ཤེས་དེ་ཉིད་སྡོད་སའི་རྟེན་ཞིག་དགོས་པས། སྐུས་ཁྱབ་པ་ཡིན་ན་རང་རེའི་མདུན་ན་ཡང་ཅིའི་ཕྱིར་མེད། དེ་ཡང་སྔོན་བྱུང་གི་དཔེ་དང་སྦྱར་ན་གོ་བདེ་བས། དེའི་ཚུལ་ནི། སྔོན་འཕགས་པ་ཐོགས་མེད་ཀྱིས་བྱམས་མགོན་ལོ་བཅུ་གཉིས་བསྒྲུབས་ཀྱང་ཞལ་མ་གཟིགས་པས། ཐུགས་སྐྱོ་ནས་ཕྱིར་ཐོན་པ་ན་ཁྱི་མོ་རོ་སྨད་འབུས་གཡེང་བ་ཞིག་གཟིགས་ཏེ། སྙིང་རྗེ་ཚད་མེད་པ་ཞིག་འཁྲུངས་ནས་ག་རེ་འབུ་བསལ་ན་འབུ་འཆི། མ་བསལ་ན་ཁྱི་འཆི་བར་འདུག་དགོངས་ནས་རང་གི་བརླ་ཤ་སྤུ་གྲིས་བཅད་དེ་དེར་འབུ་རྣམས་གཞུག་བཞེད་དེ་སྤྱན་བཙུམ་ནས་ལྗགས་ཀྱིས་འབུ་རྣམས་བླངས་པའི་ཕྱིར་བཙལ་བ་ན་མ་རྙེད། སྤྱན་ཕྱེ་བས་བྱམས་མགོན་འོད་འདོམ་གང་བ་ཞིག་བཞུགས་པ་མཐོང་

― GTD003_Page_0381 ―

^{[མ་དཔེ་གཟིགས་ན་འདིར་གནོན།]}

[Full Size]

ནས། ཡུས་ཀྱིས་ངུས་ཏེ། རྗེ་བཙུན་ཐུགས་རྗེ་རེ་ཆུང། ངས་དེ་ཙམ་བསྒྲུབས་ཀྱང་ཞལ་མི་སྟོན་པ་ཞུས་པས། ང་ཁྱོད་དང་འབྲལ་མ་མྱོང་སྟེ་ཁྱོད་ལས་སྒྲིབ་ཆེ་བས་ང་མ་མཐོང་བ་ཡིན་གསུངས་པ་ལྟ་བུ་དང། ཙནྡྲ་གོ་མིས་དབུ་ལ་སྤྱན་རས་གཟིགས་བཞུགས་པ་ཐམས་ཅད་ལ་བསྟན་ཀྱང་སུས་མ་མཐོང་བ་ལྟ་བུ་ཡིན་ལ། དེ་ལྟར་སྤྱན་དྲངས་ཁྲུས་གསོལ་བ་དགོས་པ་ཤིན་ཏུ་ཆེ་སྟེ། མིའི་རིགས་ལ་དད་པ་བཟང་པོ་ཡོད་ཀྱང་། སེམས་ལ་མུན་པ་བབས་པ་ལྟར་གང་ཡང་མི་འཆར་བ་ཞིག་དང། དབང་པོ་རྣོ་ཡང་དད་པ་མེད་པ་གཉིས་ཡོད་པ་ལས། སྔ་མ་དཀོར་སྒྲིབ་ཡིན་པས་དེ་སྦྱོང་བ་ལ་ཡང་འདི་ལས་ཟབ་པ་མེད། ཁྲུས་གསོལ་བྱེད་ཚུལ་ཡང་རེ་འགའ་ཚོགས་ཞིང་རྣམས་ཁྲུས་ཁང་དུ་བབས་ནས་ཁྲུས་མཛད་དེ་ནག་ནོག་ཐམས་ཅད་བཀྲུས་ནས་རང་གྲལ་དུ་བཞུགས་པ་དང། རེ་འགའ་མེ་ལོང་ལ་གཟུགས་བརྙན་ཤར་བ་ལ་རང་གི་ཐད་ཀ་ནས་ལྷ་མོ་རྣམས་ཀྱི་འགའ་ཞིག་གིས་བུམ་པ་དང། འགའ་ཞིག་གིས་མེ་ལོང་བཟུང་སྟེ་ཁྲུས་གསོལ་བ་གང་བྱས་ཀྱང་རུང་ངོ་། །ལྔ་པ་བསགས་སྦྱང་གི་གནད་བསྡུས་པ་ཡན་ལག་བདུན་པ་མཎྜལ་དང་བཅས་པ་འབུལ་བ་ལ། ཐོག་མར་ཕྱག་འཚལ་བའི་ཕན་ཡོན་ནི། མདོ་སྡེ་ལས་དགེ་སློང་དག །དགེ་སློང་གིས་འདི་ལྟར་ཡན་ལག་ཐམས་ཅད་ཀྱིས་ཕྱག་འཚལ་ཏེ་སེམས་དང་བར་བྱེད་པ་ལ་ལྟོས། དགེ་སློང་དག་ལུས་འདིས་ཇི་ཙམ་ནོན་པའི་འོག་དཔག་ཚད་བརྒྱད་ཁྲི་བཞི་སྟོང་ན་དབང་ཆེན་གསེར་གྱི་ས་གཞི་ལ་ཐུག་པའི་བར་ཕྱེ་མ་ཇི་སྙེད་ཡོད་པ་དེ་སྙེད་དུ་འཁོར་ལོས་བསྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་འགྱུར་རོ། །ཞེས་གསུངས་ལ། བླ་མ་

― GTD003_Page_0382 ―

^{[མ་དཔེ་གཟིགས་ན་འདིར་གནོན།]}

[Full Size]

བྱམས་པའི་ཞལ་ནས་ཀྱང་། འདི་འདྲ་ལ་བལྟས་ན་རྐང་ལག་ཀྱང་འདི་ལས་རིང་ཙམ་ཡོད་ན་སྙམ་པ་སྐྱེ་བར་འདུག་གསུངས་པ་དང། དེར་མ་ཟད་ཕྱག་འཚལ་བ་མཚན་བཟང་གི་རྒྱུར་འགྱུར་ཞིང་དཀོན་མཆོག་གི་སྐྱབས་འོག་ཏུ་ཆུད་པའི་རྟགས་ཀྱང་ཡིན་ཏེ། དཔེར་ན་འཇིག་རྟེན་ན་དམག་འཐབ་པའི་ཚེ་དམག་ཕྱག་ཕུལ་བ་དང། ཕ་རོལ་པོས་ཀྱང་རང་གི་མངའ་འོག་ཏུ་དྲངས་ཏེ་ཁོ་ངའི་མི་ཡིན་ཞེས་བདག་ཏུ་འཛིན་པ་ལྟ་བུ་ཡིན། ཕྱག་འཚལ་ལུགས་ཀྱང་རྗེ་སྒྲུབ་ཁང་པའི་ཞལ་ནས། བླ་མ་ལ་རྡུལ་གཙུབ་པ་འདྲ་བ་མ་བྱེད་གསུངས་ཤིང། བླ་མ་བྱམས་པས་ཀྱང་ཁྱེད་ཚོའི་ཕྱག་འཚལ་ལུགས་དེ་བྲང་བརྡུང་ནས་ད་ཅི་དྲག་ཟེར་བ་འདྲར་འདུག་གསུངས་པ་དེ་ལྟར་མ་སོང་བ་ཕྱག་འཚལ་ལུགས་ལ་མཁས་པར་བྱ་དགོས། རྗེ་མི་ལ་ཡང་བྲག་ཕུག་ཅིག་ཏུ་རང་བསྡད་པ་ཡིན། ཕྱག་ལྟ་བུའི་ཉམས་ལ་ཡང་ཁྱད་པར་དུ་འཕགས་པ་ཞིག་ཡོད་དེ། རྔོག་ཆོས་རྡོར་གྱིས། འཆད་པ་པོ་ང་ཉན་པོ་ང་ཞེས་སོགས། ཀྱཻ་རྡོར་བརྟག་གཉིས་ཀྱི་གླེང་གཞི་འཆད་པའི་ཚེ་རྗེ་བཙུན་མི་ལས་རྒྱང་རིང་པོ་ནས་བརྐྱང་ཕྱག་བཙལ་བས། རྔོག་གིས་བོད་གླེན་པ་ལ་དེ་འདྲའི་ཕྱག་མི་ཡོང་། ནཱ་རོ་པཎ་ཆེན་གྱི་ཕྱག་ལྟ་བུ་བྱུང་གསུངས་པ་ལྟར་བསྟན་འཛིན་དམ་པ་རྣམས་ཀྱིས་ཀྱང་ཕྱག་ཐུགས་དམ་གྱི་མཐིལ་དུ་བཞེས་པ་ཡིན། རྗེ་བདག་ཉིད་ཆེན་པོས་ཀྱང་སྟོད་ལུང་དུ་སྡེ་སྣོད་འཛིན་པ་བདུན་བརྒྱ་ཙམ་ལ་འཆད་ཉན་མང་དུ་མཛད་པའི་ཚེ། རྗེ་བཙུན་འཇམ་པའི་དབྱངས་ཀྱིས། དམུ་རྒོད་གདུལ་དཀའི་སེམས་ཅན་འདི་རྣམས་ལ། །བཤད་པས་ཕན་ཐོགས་ཆེན་པོ་ག་ལ་འགྱུར། །དེ་བས་སྒྲུབ་པ་ལྷུར་བླང་དབེན་པ་བསྟེན། །

― GTD003_Page_0383 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གཞན་གཉིས་ཀ་འཚེངས་པའི་ལམ་རྙེད་སྙམ། །ཞེས་བསྐུལ་བ་དང་མཉམ་དུ་མཐོ་མཐོ་རླུང་ལ་བསྐུར། དམའ་དམའ་ཆུ་ལ་བསྐུར་སྟེ་འོལ་ཁ་བསམ་གཏན་གླིང་དུ་ཕེབས་ནས་ལྟུང་བཤགས་སོ་ལྔ་རེ་ལ་ཐུན་རེ་མཛད་དེ་བརྐྱང་ཕྱག་འཚལ། རྡོའི་མཎྜལ་ཡང་མང་དུ་ཕུལ་བས་ཕྱག་ངར་ལ་རྨ་མང་དུ་བཏོན། དེ་ནས་རིང་པོ་མ་ལོན་པར་ཐོག་མར་ཀླུ་དབང་རྒྱལ་པོའི་ཞལ་གཟིགས། དེ་ནས་རིམ་གྱིས་སངས་རྒྱས་སོ་ལྔ་དང་པཎ་གྲུབ་མང་པོའི་ཞལ་གཟིགས། དེ་བཞིན་དུ་པཎ་ཆེན་བློ་བཟང་ཡེ་ཤེས་ཀྱང་ཕྱག་ཐུགས་དམ་གྱི་གཙོ་བོར་མཛད་ལ། བླ་མ་བྱམས་པའི་གསུང་ལས་ཀྱང། མི་ཚོ་ནི་མཚན་མོ་ཡང་ཙོག་པུར་བསྡད། དེ་ནས་གཉིད་ཆུང་རང་བརྒྱབ། དེ་འདྲ་བྱེད་ཀྱི་ཡོད་པ་རེད། ང་ནི་དགེ་སྦྱོར་ཤི་མིན་གསོན་མིན་དེ་འདྲ་བྱེད་ཀྱི་མེད། བརྐྱང་ཕྱག་ཝ་མོ་འཁྱུག་པ་འདྲ་བ་སུམ་བརྒྱ་རེ་བཙལ་ཏེ་རྐང་ལག་བརྐྱང་ནས་ཉལ་སྡོད་ཀྱི་ཡོད་གསུངས་པ་བཞིན། སྐུ་ན་ཤིན་ཏུ་བགྲེས་པའི་དུས་ནའང་ཕྱག་ལ་དེ་ཙམ་གྱིས་བརྩོན་པ་མཛད་པ་ཡིན། འདི་ལ་འགའ་ཞིག་གིས་ཕྱག་འཚལ་བ་སོགས་དབང་པོ་རྟུལ་པོའི་ལུགས་སྲོལ་ཡིན། དབང་རྣོན་གྱིས་སེམས་ཀྱིས་དགེ་སྦྱོར་བྱེད་པ་ཡིན་ཟེར་བ་གཏན་ནས་མི་རིགས་ཏེ། མདོ་སྡེ་ས་བཅུ་པ་ལས། ཀྱཻ་རྒྱལ་པོའི་སྲས་དག །ཞེས་པ་ནས། འོད་ཟེར་གྱིས་དྲ་བའི་དཀྱིལ་འཁོར་ཆེན་པོར་བྱས་ནས་དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བ་འོད་ཤིན་ཏུ་གསལ་བ་ཞེས་བྱ་བ་རབ་ཏུ་བྱེད་དེ། མཆོད་པ་དང་རིམ་གྲོ་བྱ་བ་དེ་ལ་སེམས་དང་པོ་བསྐྱེད་པ་ཡན་ཆད་ས་

― GTD003_Page_0384 ―

^{[མ་དཔེ་གཟིགས་ན་འདིར་གནོན།]}

[Full Size]

དགུ་པ་ཐོབ་པའི་བར་དག་གིས་དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱས་པ་བརྒྱའི་ཆར་ཡང་ཉེ་བར་མི་འགྲོ་ཞེས་སོགས་ཀྱིས་ས་གོང་མ་གོང་མའི་སྐབས་སུ་ལུས་ངག་གི་དགེ་སྦྱོར་ཡང་ཆེས་གོང་འཕེལ་དུ་འགྲོ་བར་གསུངས་ཤིང། བྱང་ས་ལས་ཀྱང་བྱང་ཆུབ་སེམས་དཔའ་དེ་ལ་དེ་བཞིན་གཤེགས་པའམ། དེ་བཞིན་གཤེགས་པའི་མཆོད་རྟེན་ལ་ན་བཟའ་དང། ཞལ་ཟས་དང། གཟིམ་ཆ་དང། གདན་དང། སྙུན་གྱི་གསོས་སྨན་དང། ཡོ་བྱད་རྣམས་དང། གུས་པར་སྨྲ་བ་དང། ཕྱག་འཚལ་བ་དང། སྔོན་དུ་ལྡང་བ་དང། ཐལ་མོ་སྦྱར་བ་དང། ཞེས་པ་ནས་བྱང་ཆུབ་སེམས་དཔའི་མཆོད་པ་རྣམ་པ་བདུན་རྒྱ་ཆེན་པོ་ཞེས་བྱའོ། །ཞེས་ཕྱག་དང་མཆོད་པ་འདི་དག་རྒྱལ་སྲས་རྣམས་ཀྱི་ཉམས་ལེན་དུ་གསལ་བར་གསུངས་པའི་ཕྱིར་རོ། །དེ་ནས་མཎྜལ་ཞེས་པ་བོད་སྐད་དུ་བསྒྱུར་ན་ཞིང་ཁམས་ལ་འཇུག་ཅིང། དེའི་དམིགས་པ་སྐྱོང་བ་ལ་འཇིག་རྟེན་གྱི་ཚུལ་ཤེས་དགོས་པས། དེ་ཡང་བསྐལ་པ་འདིའི་གོང་དུ་བསྐལ་པ་འཛིན་པ་ཞེས་བྱ་བ་སྟོང་སྟེ། རླུང་སྤུ་འགུལ་བ་ཙམ་ཡང་མེད་པར་ནམ་མཁའ་སྟོང་སང་དུ་གནས་པའི་ཚེ་གཙང་མའི་གནས་ནས་རླུང་བྱུང་སྟེ་རླུང་རྣམས་འཁྲིགས་ཏེ་རླུང་གི་དཀྱིལ་འཁོར་རྡོ་རྗེ་ཕ་ལམ་གྱིས་ཀྱང་རི་མོ་ཙམ་བྲི་བར་མི་ནུས་པ་ལྟ་བུ་དེའི་སྟེང་དུ་གནས་གཙང་མའི་གནས་ནས་ཆར་གྱི་རྒྱུན་བབས་པ་རྒྱ་མཚོར་འཁྱིལ་བ་བསྲུབ་པ་ལས་ཁམས་རབ་ལས་རི་རབ་དང། འབྲིང་ལས་གསེར་གྱི་རི་བདུན་བྲེ་ཆེན་གྱི་ནང་དུ་བྲེ་ཆུང་བཅུག་པ་ལྟར་ཡོད་ཅིང། དེའི་ཕྱི་རོལ་ཏུ་བ་ཚྭ་ཅན་གྱི་རྒྱ་མཚོ་ཞེས་བྱ་བ་འཐུང་བ་ཙམ་གྱིས་ལྕེ་འགས་པར་འགྱུར་བ་ཡོད་ལ།

― GTD003_Page_0385 ―

^{[མ་དཔེ་གཟིགས་ན་འདིར་གནོན།]}

[Full Size]

དེའི་མཐའ་སྐོར་ཁམས་ཐ་མ་ལས་གྲུབ་པའི་འཁོར་ཡུག་གི་ལྕགས་རིས་བསྐོར་བའི་ནང་དུ་གླིང་དང་གླིང་ཕྲན་རྣམས་ཀྱིས་རྩ་བ་གསེར་གྱི་ས་གཞི་ལ་ཐུག་པའི་རྩེ་མོ་བག་ཙམ་སྟེང་དུ་ཐོན་ཏེ། མཐའ་ཆུས་བསྐོར་བའི་བར་གྱི་སྐམ་ལ་གླིང་ཞེས་གྲགས་པ་ཡིན། ཚུལ་དེ་ལྟར་འཛམ་གླིང་བྱེ་བ་ཕྲག་བརྒྱ་པོ་གསེར་གཞི་གཅིག་གི་སྟེང་དུ་རྔའི་སྟེང་ན་རྔ་ཡབ་ཀྱིས་བསིལ་བ་གཏོར་བ་ལྟར་ཡོད་ཅིང་དེ་དག་གི་ལོངས་སྤྱོད་ཀྱི་གཙོ་བོ་རིན་པོ་ཆེའི་རི་བོ་སོགས་ཡིན་པས་གླིང་རང་རང་དུ་འགོད་དགོས་ལ། འཁོར་ལོ་སོགས་ཀྱང་འཁོར་བསྒྱུར་དེ་ཉིད་ཚེས་བཅོ་ལྔ་ལ་ཁ་ཤར་དུ་འཁོར་ཏེ་འདུག་པའི་ཚེ་འཁོར་ལོ་ཤར་ནས་འབྱུང་བ་སོགས་ཡིན་པས་ཕྱོགས་དེ་དང་དེའི་སྟེང་གི་ནམ་མཁའ་ལ་གསལ་འདེབས་པ་ཡིན། འདི་ཡན་ཆད་རྒྱུད་སྡེ་ལས་གསལ་བར་གསུངས་ཤིང། ཀུན་རིག་གི་ལྷ་མོ་འགའ་ཞིག་བཅུག་པ་འདི་འགྲོ་མགོན་ཆོས་རྒྱལ་འཕགས་པས་བོད་ཀྱི་མངའ་བདག་གནང་བའི་ཚེ་བཅུག་པ་ཡིན་ལ། རྒྱལ་བ་རྡོ་རྗེ་འཆང་གི་མཎྜལ་ནི། ཞིང་འདི་རིན་ཆེན་སྣ་བདུན་གྱིས། །ཞེས་སོགས་ཤོ་ལོ་ཀ་གཅིག་པོ་འདི་ཡིན། འབུལ་ཚུལ་ཡང་དང་པོ་གླིང་བཞི་རི་རབ་ཙམ་དང། དེ་ནས་རིམ་གྱིས་སྟོང་གསུམ་སོགས་འབུལ་བ་ཡིན་ཏེ། སྤྱོད་འཇུག་ལས། ནམ་མཁའ་རབ་འབྱམས་ཁམས་ཀྱི་མཐའ་གཏུགས་པ། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །ཞེས་པ་ལྟ་བུ་དང། མི་ལས་ཀྱང་

― GTD003_Page_0386 ―

^{[མ་དཔེ་གཟིགས་ན་འདིར་གནོན།]}

[Full Size]

མར་པ་ལ་དངོས་པོ་ཅུང་ཟད་ཡོད་པ་ཕུལ་ནས་དེའི་སྟེང་དུ་ལུས་ངག་ཡིད་གསུམ་མཎྜལ་དུ་ཕུལ་ཏེ་མཎྜལ་ལ་དེ་ལས་ལྷག་པ་མེད་པས་དེ་འདྲ་ལ་ཡང་རིམ་གྱིས་བློ་སྦྱོང་དགོས། འདི་ལ་ཐོག་མར་མཎྜལ་བྱེད་ཚུལ་ཡང་ནང་དུ་བ་བྱུང་ལྔའམ། དེ་མ་བྱུང་ན་ས་གཙང་མའི་རྩྭ་དང་མེ་ཏོག་སོགས་ཀྱིས་འཚོ་བའི་འབྲིའི་ལྕི་བ་དང། ཆུ་སར་མ་ལྷུང་བ་དང། ཞོ་འོ་མ་མར་ལྔ་སྦྱར་བས་བྱུགས། མཎྜལ་གྱི་འབྲུ་རྣམས་ཀྱང་དྲི་བཟང་གིས་ཁ་བསྒྱུར་ཏེ་ཚོམ་བུ་འགོད་ཚུལ་ཡང། ཤར་རང་དང་བླ་མ་གང་རུང་ལ་བསྟན་ཀྱང་ཁྱད་མེད་དེ། བླ་མ་བྱམས་པས། འབུལ་རོག་བྱས་ན་དེ་རང་རྟགས་གསུངས་ལྟ་བུ་ཡིན་ལ། མཎྜལ་ཕུལ་བའི་ཕན་ཡོན་ཡང། ཇོ་བོ་ཆེན་པོས་མུ་སྟེགས་གདུགས་བཅུ་གསུམ་པ་ཞིག་དང་བརྩད་པ་ན་སྒྲའི་དཀའ་གནད་ཅིག་མ་མཁྱེན་པས་སྒྲོལ་མ་ལ་ཞུར་བཞེད་དེ་བྱ་མ་བུམ་ནས་ཆབ་བཞེས་ཏེ་ནང་དུ་ཕེབས་པ་ན། མུ་སྟེགས་པས་ཀྱང་ཁམས་སང་ལ་འགྲོ་བར་འདུག་སྙམ་ནས་བཏང་བས་ནང་དུ་ཕེབས་ཏེ་ད་ལྟ་རྒྱལ་བའི་གཟིམས་ཆུང་དུ་བཞུགས་པའི་ལུང་བསྟན་སྒྲོལ་མ་བྱ་བ་འདིའི་མདུན་དུ་མཎྜལ་ཕུལ་བས་མཎྜལ་གྱི་ཕྱེད་ཙམ་ན་སྒྲའི་དཀའ་གནད་ཐམས་ཅད་ཐུགས་ལ་ལམ་གྱིས་ཤར་ཏེ་མུ་སྟེགས་ཕམ་པར་མཛད་པ་ལྟ་བུ་ཡིན། དྲུག་པ་གསོལ་བ་འདེབས་པ་མན་ངག་བཞིན་རྒྱུད་དང་འདྲེས་ངེས་སུ་བྱ་བ་ནི། ལམ་མཆོག་སྒོ་འབྱེད་འདི་ཉིད་ལམ་རིམ་གྱི་རྟོགས་པའི་སྒོ་འབྱེད་ཡིན་པས་འདིའི་སྒོ་ནས་གསོལ་བ་འདེབས་པ་ལ། དང་པོ། དཔལ་ལྡན་རྩ་བའི་བླ་མ་རིན་པོ་ཆེ། །ཞེས་སོགས་ཤོ་ལོ་ཀ་གཅིག་པོ་

― GTD003_Page_0387 ―

^{[མ་དཔེ་གཟིགས་ན་འདིར་གནོན།]}

[Full Size]

འདིའི་མཇུག་ཏུ། གསོལ་འདེབས་ལན་གཉིས་ལས་དང་པོའི་ཚེ་རྩ་བའི་བླ་མ་ལས་བླ་མ་གཉིས་པ་ཆད་དེ་སྤྱི་བོར་ངོ་ཆེན་གྱི་ཚུལ་དུ་བཞུགས་པ་དང། གཉིས་པའི་ཚེ། བླ་མ་དེ་གཉིས་ལས་བདུད་རྩི་འབེབས་སྦྱང་བྱས་པས་བླ་མ་ལ་སྐྱོན་རྟོག་གི་བློ་དང། ཚེ་འདིར་ཤི་སྦར་འཐམ་པ་སོགས་ལམ་གྱི་གེགས་བྱེད་ཐམས་ཅད་སྦྱངས་རང་འདྲ་གཉིས་པ་ཞིག་ཆད་ནས་རང་ལ་ཐིམ་པས་རྒྱུད་བྱིན་གྱིས་བརླབས་ཏེ་ལམ་གྱི་རྟོགས་པ་ཁྱད་པར་ཅན་སྐྱེ་བའི་སྣོད་རུང་དུ་བྱས་པར་བསམ། དེ་བཞིན་དུ་འདྲེན་པ་མཉམ་མེད་ཅེས་སོགས་ལ་ཡང་གསོལ་འདེབས་གཉིས་གཉིས་བྱ་དགོས་ལ། འདི་དག་གི་ཚེ་སྤྱི་བོའི་རྩ་བའི་བླ་མ་དེས་ཀྱང་སྐྱབས་ཡུལ་དེ་རྣམས་ལ་ཁྱེད་རྣམས་ཀྱིས་ངའི་བུ་འདི་ལ་ཐུགས་བརྩེ་བས་གཟིགས་ཤིག་ཅེས་ངོ་ཆེན་བྱེད་པའི་མོས་པ་དང། རང་གིས་ཀྱང་སྙིང་ཐག་པ་ནས་གསོལ་བ་བཏབ་པས་དང་པོའི་ཚེ་ཚོགས་ཞིང་སྤྱི་དང། ཁྱད་པར་སངས་རྒྱས་བྱང་སེམས་གསུམ་ལས་བདུད་རྩིའི་རྒྱུན་བབས་ནད་གདོན་སྡིག་སྒྲིབ་ཐམས་ཅད་དང། ཁྱད་པར་དུ་རྒྱ་ཆེ་བའི་ལམ་གྱི་རིམ་པ་སྐྱེ་བ་ལ་གེགས་བྱེད་སྦྱངས། གཉིས་པའི་ཚེ་སངས་རྒྱས་བྱང་སེམས་གསུམ་ལས་རང་འདྲ་གཉིས་པ་རེ་ཆད་དེ་རང་ལ་ཐིམ་པས་ཚེ་དང་བསོད་ནམས་སོགས་ཡོན་ཏན་ཐམས་ཅད་རྒྱས། ཁྱད་པར་རྒྱ་ཆེ་བའི་ལམ་གྱི་རིམ་པ་རྒྱུད་ལ་སྐྱེས་པར་བསམ་ཞིང། ཟབ་མོ་ལྟ་བརྒྱུད་ཀྱི་བླ་མ་རྣམས་ལ་ཡང་གསོལ་བ་བཏབ་པས། ཟབ་མོའི་ལམ་གྱི་གེགས་བྱེད་སྦྱངས། དེའི་རྟོགས་པ་ཁྱད་པར་ཅན་སྐྱེས་པར་བསམ་མོ། །དེ་

― GTD003_Page_0388 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་དུ་ཡོན་ཏན་གཞི་གྱུར་མའི་སྐབས་སུ་ཡང་བླ་མས་ངོ་ཆེན་བྱེད་པ་སྔར་ལྟར་ལ་བདུད་རྩི་འབེབས་སྦྱང་གི་ཚེ་སྐབས་ཐོབ་ཀྱི་རྟོགས་པ་དེ་དང་དེའི་གེགས་བྱེད་སྦྱངས་ནས་དེ་དང་དེའི་རྟོགས་པ་ཁྱད་པར་ཅན་སྐྱེས་པར་བསམ་ལ། དེ་ལྟར་ལམ་བཟང་ཞེས་པའི་ཤོ་ལོ་ཀ་གཅིག་པོ་འདིར་གཙོ་བོ་ཆོས་སྐྱོང་རྣམས་ལས་བདུད་རྩི་འབེབས་སྦྱང་བྱ། འདི་ཡན་ཆད་ལ་གསོལ་བ་འདེབས་པ་གཉིས་གཉིས་བྱེད་པ་སྔར་ལྟར་རོ། །ཤོ་ལོ་ཀ་ཐ་མའི་སྐབས་སུ་གལ་ཏེ་ཚེ་འདི་ལ་འདི་ལྟར་འགྲུབ་པ་ཞིག་མ་བྱུང་ན་ཡང་སྐྱེ་བ་རྗེས་མ་ལ་ཅིས་ཀྱང་བླ་མའི་ཐུགས་རྗེ་ལ་བརྟེན་ནས་འདི་ལྟར་འགྲུབ་པ་ཞིག་བྱའོ་སྙམ་དུ་སྨོན་པ་བགྱིད། དེ་ལྟར་གསོལ་བ་འདེབས་པ་འདི་ལ་བྱིན་རླབས་དཔུང་ཞུས་ཟེར་བའི་རྒྱུ་མཚན་ཡང་དཔེར་ན་དམག་དུ་མ་འཚོགས་པ་ལ་དམག་དཔུང་དུ་གྲགས་པ་ལྟར་བྱིན་རླབས་ཀྱི་ཚོགས་མཐའ་དག་བསྡུས་ནས་ཞུས་པས་དཔུང་ཞུས་སུ་བཏགས་པ་ཡིན། རྗེ་བདག་ཉིད་ཆེན་པོས་ཀྱང་རྭ་སྒྲེང་གི་ཇོ་བོ་དབུ་ཡོན་མའི་མདུན་དུ་ཟླ་བ་གཅིག་ལ་གསོལ་བ་བཏབ་པས་ལམ་རིམ་བླ་བརྒྱུད་ཀྱི་བླ་མ་རྣམས་ཀྱི་ཞལ་གཟིགས་ནས་མཐར་ཐམས་ཅད་ཇོ་བོ་ལ་ཐིམ། ཇོ་བོའི་ཞལ་ནས་བསྟན་པ་ལ་བྱ་བ་རྒྱ་ཆེན་པོ་གྱིས་གསུངས་པས། རྗེའི་ཐུགས་ལ་བསྟན་པ་ལ་བྱ་བ་རྒྱ་ཆེན་པོ་བྱེད་པ་ལ་ལམ་གྱི་ལུས་ཡོངས་སུ་རྫོགས་པ་ཞིག་བྱེད་དགོས་པར་འདུག་དགོངས་ནས་ལམ་རིམ་ཆེན་མོ་མཛད་པ་ཡིན་པས། འདི་ལ་སྐུལ་བ་པོ་གཞན་ཡང་ཡོད་ཀྱང་གཙོ་བོར་ཇོ་བོའི་གསུང་དེ་ལ་བརྟེན་པ་ལྟ་བུ་ཡིན་པས་གསོལ་བ་འདེབས་པ་འདི་ལ་ནན་ཏན་སྙིང་པོར་བྱེད་དགོས་སོ། །འདི་ལ་འགའ་ཞིག་ད་ལྟ་ཆོས་གྲྭ་འགྲིམ་པ་ལྟ་བུའི་སྐབས་སུ་མི་ནུས་སྙམ་ན།

― GTD003_Page_0389 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་འདྲའི་སྐབས་སུ་ཡང་བློས་མ་བཏང་བར་མདོར་བསྡུས་ཏེ། རྗེས་ཡང་དགོན་དུ་མཛད་པ་ལྟར་བཤེས་གཉེན་ལ་མ་གུས་པ་ནས་བདག་གཉིས་སུ་མཚན་མར་འཛིན་པའི་བར་གྱི་ཕྱིན་ཅི་ལོག་གི་བློ་སྣ་མཐའ་དག་འགག་པ་དང། བཤེས་གཉེན་ལ་དད་པ་ནས་ཟུང་འཇུག་གི་བར་ལམ་གྱི་རྟོགས་པ་མཐའ་དག་སྐྱེ་བ་དང། འགལ་རྐྱེན་ཕྱི་ནང་གི་བར་དུ་གཅོད་པ་མཐའ་དག་ཞི་བར་བྱིན་གྱིས་བརླབ་ཏུ་གསོལ་ཞེས་དོན་ཆེན་པོ་གསུམ་གྱི་སྒོ་ནས་གསོལ་བ་འདེབས་ཤིང། མདོར་ན་རང་ལ་ན་ཚ་ལྟ་བུ་ཞིག་བྱུང་བའི་ཚེ་ཡང་འདི་བྱང་ཆུབ་ལམ་རིམ་བསྒོམ་པའི་བར་ཆད་ཞིག་ཡིན་ན་མྱུར་དུ་ཞི་བར་བྱིན་གྱིས་བརླབ་ཏུ་གསོལ། གྲོགས་ཤིག་ཡིན་ན་ད་དུང་གོང་དུ་འཕེལ་བར་བྱིན་གྱིས་བརླབ་ཏུ་གསོལ། ཞེས་བློ་གཏད་དེ་གསོལ་བ་འདེབས་དགོས། དེ་ལྟར་གསོལ་བ་བཏབ་པས་ཚོགས་ཞིང་རྣམས་རིམ་གྱིས་བསྡུས་ཏེ། གཙོ་བོ་རྒྱལ་བ་ཤཱཀྱ་ཐུབ་པ་དང། རྡོ་རྗེ་འཆང་དང། རྩ་བའི་བླ་མ་དང། བྱམས་འཇམ་དབྱངས་ལྔ་ལ་གསལ་སྣང་འདོན། དེ་ནས་མཐར་ཐམས་ཅད་ཐུབ་དབང་ལ་ཐིམ། དེ་ཡང་ཚུར་རང་གི་སྤྱི་བོའི་བླ་མ་ལ་ཐིམ། དེ་ཉིད་ཐུབ་དབང་གི་རྣམ་པར་གསལ་བཏབ་སྟེ་སྐྱབས་གནས་ཀུན་འདུས་པའི་བདག་ཉིད་བླ་མ་ཐུབ་དབང་རྡོ་རྗེ་འཆང་དེ་ལ་དམིགས་ནས། ཡན་ལག་བདུན་པ་མདོར་བསྡུས་ཕུལ་ཏེ། སངས་རྒྱས་ཞེས་ཀྱང་ཁྱོད་རང། ཡི་དམ་ཞེས་ཀྱང་ཁྱོད་རང། ཆོས་སྐྱོང་ཞེས་ཀྱང་ཁྱོད་རང་སྙམ་དུ་ཕུར་ཚུགས་གསོལ་འདེབས་བྱའོ། །སྦྱོར་བའི་

― GTD003_Page_0390 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་དྲུག་འདི་ནི། མངོན་རྟོགས་རྒྱན་ལས། སངས་རྒྱས་རྣམས་ལ་ལྷག་པར་བྱས། །དེ་ལ་དགེ་བའི་རྩ་བ་བསྐྲུན། །ཞེས་སོགས་ཀྱི་དགོངས་པ་ཡིན་ཞིང་འདི་ལམ་གྱི་ལུས་ཀྱང་ཡོངས་སུ་རྫོགས་པ་ཡིན། འོན་ཀྱང་འགའ་ཞིག་གིས་སྦྱོར་བ་ལ་དེ་འདྲའི་མང་པོ་ཞིག་བྱེད་དགོས་ན། དངོས་གཞི་ལ་སླེབ་དུས་ག་ལ་ཡོང་སྙམ་ན། སྦྱོར་བ་དེ་ལེགས་པར་གྲུབ་པ་ཞིག་བྱུང་ན་དེ་ལས་ལྷག་པ་དངོས་གཞི་ལ་ཡོང་རྒྱུ་གང་ཡོད། འདིའི་ཀུན་སློང་བཅོས་པའི་ཁུངས་སུ་ཡང་ལམ་རིམ་རྫོགས་པ་ཡིན་ཞིང། གལ་ཏེ་སྦྱོར་བ་འདི་དཔྱིས་ཕྱིན་པ་ཞིག་མ་བྱུང་ན་དེ་བཞག་ནས་སེམས་བསྐྱེད་ལ་མཆོངས་ས་ག་ལ་ཡོད། དེའི་རྒྱུ་མཚན་གྱིས་དང་པོར་ཐུན་ལ་འཇུག་དུས་ཡང་ཚམ་ཚོམ་དུ་མི་འཇུག་པར་དང་པོ་འདི་ཉམས་སུ་ལེན། དེ་ནས་འདི་ཉམས་སུ་ལེན་སྙམ་ནས་རིམ་གྱིས་བསྒོམ་པ་ལས། གང་ཐུག་ཐུག་ནས་བསྒོམ་ན་འཕྲལ་དུ་ཡོང་ཡོང་འདྲ་ཡང་དུས་དེར་སླེབ་པ་ན་མི་ཡོང་བ་ཕྲ་མེན་མའི་སོ་ནམ་འདྲ་བ་ཡིན། ཡང་འགའ་ཞིག་གིས་ལམ་རིམ་དེ་དེ་ཡིན་ན་བྱེད་རྒྱུ་མང་པོ་ཞིག་རེད་དེ་ལས་སྔགས་རེ་བགྲངས་ན་དགའ་ཟེར་བ་ཡང་མི་རིགས་ཏེ། སྔགས་དེ་ཡང་ལས་སླ་པོ་མེད། ཉིད་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་སོགས་རིགས་ལྔ་སོ་སོའི་དམ་ཚིག་བཅུ་དགུ་དང། སྤྱིའི་དམ་ཚིག་བགྲང་ལས་འདས་པ་རྣམས་བསྲུང་ངོ་ཞེས་བླ་མ་ཡི་དམ་དཔང་པོར་བཞག་སྟེ་མནའ་ཆུ་འཐུང་ནས་མནའ་བསྐྱལ་དགོས་པ་ཡིན། མཎྜལ་ཡང་ལན་དྲུག་ཏུ་འབུལ་དགོས་ཤིང་། བླ་མ་ལྔ་བཅུ་པ་ལས་ཀྱང་མཐའ་ཡས་པ་ཞིག་གསུངས་པས། དེ་བས་ལམ་རིམ་འདི་ལ་མནའ་

― GTD003_Page_0391 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་བསྐྱེལ་མི་དགོས། ཉམས་སུ་ལེན་ཡང་བདེ་བ་ཡིན། དེར་མ་ཟད་འཇིག་རྟེན་ན་ཐུད་ཚོན་པོ་ཡོང་བ་མར་གྱི་བཀའ་དྲིན་ཡིན་ཟེར་བ་ལྟར་གསང་སྔགས་ཟབ་པ་དེ་ཡང་འདིའི་བཀའ་དྲིན་ཡིན། འོ་ན། འཇམ་དཔལ་མཚན་བརྗོད་ལས། སྐད་ཅིག་གཅིག་གིས་རྫོགས་སངས་རྒྱས། །ཞེས་སྐད་ཅིག་མ་གཅིག་ལ་འཚང་རྒྱ་ནུས་པའི་ཆོས་བཤད་པ་ཅི་ཡིན་ཞེ་ན། སྐད་ཅིག་མ་གཅིག་ལ་འཚང་རྒྱ་ནུས་པའི་ཆོས་ཡོད་དེ། རྡོ་རྗེ་ལྟ་བུའི་ཏིང་ངེ་འཛིན་དེ་ཡིན་མོད། དེ་ལ་ཡང་ས་བཅུ་པ་སོགས་བགྲོད་ནས་འགྲོ་དགོས་པ་ཡིན། དེར་མ་ཟད་བོད་ལ་གྲུབ་ཐོབ་མི་ལ་རས་པ་ལྟ་བུ་མ་བྱུང་མོད་དེ། དེས་ཀྱང་ལྷོ་བྲག་མར་པའི་དྲུང་དུ། ཉམས་མགུར་ཕུལ་བ་ལས། བདེ་ལེགས་ཐམས་ཅད་ཀྱི་འབྱུང་གནས་བླ་མ་ཡིན་པར་འདུག་པས་ཅི་གསུང་དང་དུ་ལེན་ཅིང་དམ་ཚིག་མ་ཉམས་པ་བྱེད་པ་འདི་གནད་ཀ་དང་པོ་ཡིན་པར་གོ་ལགས། དེའི་རྗེས་དལ་འབྱོར་རྙེད་དཀའ་དང། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་རྣམས་རྟག་ཏུ་བསམ་པས་བློ་རང་དབང་མེད་པར་འཁུལ་ནས་འཁོར་བ་ལས་ཐར་པར་འདོད་པའི་བསམ་པའི་རྟེན་སོ་སོར་ཐར་པའི་སྡོམ་པ་གང་ཡང་རུང་བ་གཅིག་ལ་བརྟེན་དགོས་ཏེ། ཞེས་པ་ནས། རྡོ་རྗེ་ཐེག་པའི་ལམ་རིམ་གྱིས་ལྟ་བ་ཡིན་པར་གོ་ལགས་ཞེས་སོགས་གཉིས་ཀར་རིམ་གྱིས་བསླབ་པར་གསུངས་པའི་ཕྱིར། ཡང་འགའ་ཞིག་གིས་སྤྱིར་དེ་འདྲ་དགོས་ནའང། ད་ལྟ་ཐོས་པ་བྱེད་པའི་ཚེ་ཕྱག་དང་མཎྜལ་སོགས་དེ་འདྲའི་མང་པོ་མི་ཁོམ་ཟེར་

― GTD003_Page_0392 ―

^{[མ་དཔེ་གཟིགས་ན་འདིར་གནོན།]}

[Full Size]

ན་འོ་ན་ཇ་འཐུང་བ་ཨེ་ཁོམ། དེ་ལ་ཡང་ཇ་ཉོས། ཆུ་བླང་། སྦུད་པ་གཏོང་དགོས་མོད། དཀའ་ལས་ཆེན་པོ་དེ་འདྲ་ལ་ཁོམ་ནས། མཎྜལ་རེ་འབུལ་བ་ལ་མི་ཁོམ་པ་འདྲ་བ་འདི་རང་ཚོ་བསོད་ནམས་དམན་པའི་རྟགས་ཡིན་པས། དེའི་དབང་དུ་མ་བཏང་བར་གོམས་སོང་ན། ཇི་སྐད་དུ། གོམས་ན་སླ་བ་མ་ཡིན་པའི། །དངོས་དེ་གང་ཡང་ཡོད་མ་ཡིན། །ཞེས་པ་ལྟར་སྐབས་ཤིག་ནས་དཀའ་ཚེགས་མེད་པར་འགྲུབ་ཡོང་སྟེ། བླ་མ་ཞང་གིས་རྟའི་ཡོབ་ལ་ཞབས་བཞག་ནས་ཆིབས་པའི་བར་ལ་ལམ་རིམ་ཚར་རེ་བསྒོམ་གི་ཡོད་གསུངས་པ་དང། རྗེ་དོན་ཡོད་མཁས་གྲུབ་པས། ཐུན་རེ་རེ་ལ་ཡང་ལམ་རིམ་ཆ་ཚང་བ་རེ་བསྒོམ་གི་ཡོད་གསུངས་པ་ལྟ་བུ་ཡིན། འཇིག་རྟེན་གྱི་དཔེ་ལ་མཚོན་ན་ཡང། ཡར་བཀྲ་ཤིས་ལྷུན་པོར་འགྲོ་བའི་ལམ་ལྟ་བུ་བཤད་ན་མང་ཞིང་བཤད་དཀའ་ཞིང། དེར་སོང་བའི་རྒྱུས་ཡོད་ཅིག་གིས་བསམ་ན་འཕྲལ་དེ་ལ་ཐམས་ཅད་ལམ་གྱིས་ཤར་ཡོང་བ་ལྟར་བྱང་ཆུབ་ལམ་རིམ་འདི་བཤད་པའི་ཚེ་རྒྱ་ཆེ་བས་བཤད་དཀའ་ཡང་འདྲིས་ནས་ཉམས་སུ་ལེན་པ་ལ་དཀའ་ཚེགས་མེད་པར་བདེ་བླག་ཏུ་འོང་བ་ཡིན་ནོ། །གཉིས་པ་དངོས་གཞི་ལ་བཞི། བསྟེན་བྱ་བླ་མའི་མཚན་ཉིད། དེ་བསྟེན་པའི་ཕན་ཡོན། མ་བསྟེན་པའི་ཉེས་དམིགས། ཇི་ལྟར་བསྟེན་པའི་ཚུལ་ལོ། །དང་པོ་ནི། བླ་མའི་སྐད་དོད་གུ་རུ་ཞེས་པ་སྒྲ་ཐད་བསྒྱུར་བྱས་ན་གོང་མ་ལ་འཇུག་པས་དོན་གྱིས་བློ་སྣ་གོང་དུ་འཁྲིད་མཁན་ཞིག་ལ་བླ་མ་ཟེར་བ་ཡིན། དེ་ལ་ཡང་མདོ་སྡེ་རྒྱན་ལས་བཤད་པ་ལྟར། སྡེ་སྣོད་གསུམ་ལ་མཁས་ཤིང་བསླབ་པ་གསུམ་ལ་བསླབ་པ་སྙིང་རྗེ་ཆེ་ཞིང་དཀའ་

― GTD003_Page_0393 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱད་ལ་བཟོད་པ་སོགས་ཀྱི་ཡོན་ཏན་དང་ལྡན་པ་ཞིག་བཙལ་དགོས་ལ། གལ་ཏེ་དེ་འདྲ་མ་བྱུང་ཡང་ཚེ་འདི་ཕྱི་གཉིས་ཀྱི་ནང་ནས་ཕྱི་མ་གཙོ་ཆེ་ཟེར་བ་ཞིག་ངེས་པར་གལ་ཆེ་སྟེ། ཆོས་མི་དགོས་དགུ་དགོས་ཀྱིས་མཚན་མོ་ཞུས་ནས་ཉིན་པར་མ་ཞུས་ཁུལ་བྱས་སྡོད་དགོས་པ་དེ་འདྲར་མ་སོང་བ་དགོས། གཉིས་པ་བསྟེན་པའི་ཕན་ཡོན་ནི། རྒྱ་བོད་ཀྱི་པཎ་གྲུབ་ཇི་སྙེད་ཅིག་གི་ནང་ནས་ཇོ་བོའི་འཕྲིན་ལས་ནམ་མཁའ་དང་མཉམ་པ་དེ་བཤེས་གཉེན་བསྟེན་ཚུལ་ལས་བྱུང་བ་ཡིན། དེའི་ཚུལ་ཡང་ཇོ་བོས་བླ་མ་གསེར་གླིང་པའི་མཚན་ཙམ་ཡང་སྨོས་མི་ཕོད་པས་སྐུ་ཚེ་དེ་ལ་སྨོས་མ་མྱོང། གཞན་གྱིས་གསེར་གླིང་པ་ཆོས་ཀྱི་གྲགས་པ་ཞེས་སྨོས་ན་དེ་མ་ཐག་བཀག་སྟེ་བཞེངས་ནས་ཕྱག་མང་པོ་བཙལ་ཇ་བར་རེ་ལ་སྤྱན་ཆབ་བཏོན་ནས་བཞུགས་པ་ཡིན། གཞན་གྱིས་དེའི་རྒྱུ་མཚན་དྲིས་པས་ང་ལ་སེམས་བཟང་པོ་ཨེན་གཅིག་བྱུང་བ་འདི་ཁོང་གི་བཀའ་དྲིན་ཡིན་གསུངས། འབྲོམ་ཀྱང་བཤེས་གཉེན་བསྟེན་ཚུལ་འགངས་ཆེ་བས་འཕྲིན་ལས་རྒྱས་པ་ཡིན་གྱི། ཐོས་རྒྱ་འབྲོམ་ལས་ནག་ཚོ་ཆེ་ནག་ཚོ་བོད་ལ་བཀའ་དྲིན་ཤིན་ཏུ་ཆེ་ལ། ཐོས་པས་ངོམས་པ་མེད་པའི་ཚུལ་ནི། ཛྙཱ་ན་ཨ་ཀར་བལ་པོར་ཕེབས་པའི་དུས་ནག་ཚོས་རྗེས་གནང་ཞིག་ཞུ་བཞེད་ནས་མ་སོང་ན་རྗེས་གནང་མི་ཐོབ་པར་འདུག །སོང་ན་ཇོ་བོ་ཤིན་ཏུ་བགྲེས་འདུག་སྙམ་ནས་འབྲལ་མ་ཕོད་པར་བཤུམ་པ་ཇོ་བོས་མཁྱེན་ནས། ལོ་ཙཱ་བ་ཆོས་ཕྱིར་སོང་བ་ལ་ཉེས་པ་མེད་གསུང་བ་ལྟ་བུ་ཡིན། ཡང་ལན་གཅིག་ཇོ་བོའི་སློབ་མ་རྣམས་གྲོས་

― GTD003_Page_0394 ―

^{[མ་དཔེ་གཟིགས་ན་འདིར་གནོན།]}

[Full Size]

བགྲོས་ནས་ཇོ་བོ་མ་བཞུགས་ན་རྒྱལ་ཚབ་སུ་ལ་བྱེད། ཅེས་པས། སྒོམ་པ་རིན་ཆེན་བླ་མས། ཀ་བ་ཤཱཀྱ་རྒྱལ་མཚན་ཨ་མཆོད་ཡིན། འབྲོམ་གཡོག་པོ་ཡིན། ནག་ཚོ་ཚུལ་ཁྲིམས་རྒྱལ་བ་དྲུང་ཡིག་ཡིན་པས། ང་རང་འོས་སྙམ། ཁུ་སྟོན་གྱིས་ཤེས་བྱ་ཐམས་ཅད་སྲང་ལ་གཞལ་ཐུབ་པས་ཨ་བུ་ཁུ་སྟོན་ཡིན་སྙམ་པས། ཀ་བ་ཤཱཀྱ་རྒྱལ་མཚན་གྱིས་ངས་བསམ་ན་ཁྱོད་ཚོ་ཡོན་ཏན་ཅན་ཚོ་ལ་མི་ཡོང་བ་འདྲ། འབྲོམ་སྟོན་འདི་ལ་འོས་ཡོད་འགྲོ་ཟེར། སྒོམ་པ་རིན་ཆེན་བླ་མ་རང་བཞིན་དྲང་བས་དེ་ཅི་ཡིན་ངས་ཀྱང་ཇོ་བོའི་ཆོས་ཚིག་གཅིག་ཀྱང་མ་ལུས་པར་ཉན་པ་ཡིན་གསུངས་ནས་ཇོ་བོ་ལ་ཞུས་པས་འབྲོམ་གྱིས་གསུངས། ཡང་སྒོམ་པ་རིན་ཆེན་བླ་མས་དེ་ཅི་ཡིན་ཞུས་པས་ངས་བྱིན་གྱིས་བརླབས་པ་ཡིན་གསུངས་ཤིང། མདོར་ན་བླ་མ་རྣམས་ཀྱི་སྐུ་ཚེ་འཕྲིན་ལས་ཐམས་ཅད་བཤེས་གཉེན་བསྟེན་ཚུལ་ཁོ་ན་ལ། འདིར་རྟེན་འབྲེལ་གྱི་གནད་མ་ལོག་པ་དགོས། དེར་མ་ཟད་བླ་མའི་གཡོག་འབའ་ཞིག་བྱས་ཏེ་གྲུབ་པ་ཐོབ་པ་ཡང་དཔེར་ན་བྱ་ཡུལ་བ་ལྟ་བུ་ཡིན་ཏེ། བྱ་ཡུལ་བ་ནི་སྟོད་ལུང་པའི་ཉེ་གནས་ཡིན་པས། ལན་གཅིག་སྟོད་ལུང་པས་ཁྲིད་ནས་སྤྱན་སྔ་བ་མཇལ་དུ་ཕེབས་པའི་ཚེ། སྤྱན་སྔ་བས་འདི་སུ་ཡིན་གསུང་བ་ལ། སྟོད་ལུང་པས་ངའི་ཉེ་གནས་ཡིན་ཞུས་པས། ཁྱོད་བསོད་ནམས་ཆེ་འདི་ལྟ་བུའི་བཙུན་ཆུང་ཤེས་རབ་ཅན་ཞིག་ཉེ་གནས་ལ་ཡོད་པ་གསུངས་པས་ཁོང་གི་ཐུགས་ལ་བླ་མས་བཞེད་པར་འདུག་དགོངས་ནས་སྒོར་ཕེབས་ཏེ། བྱ་ཡུལ་བའི་སྐེ་ལ་ཁ་བཏགས་བཏགས་ཏེ་ཕུལ་བས་འབུལ་ནུས་སམ་གསུངས། བློས་

― GTD003_Page_0395 ―

^{[མ་དཔེ་གཟིགས་ན་འདིར་གནོན།]}

[Full Size]

བླངས་ནས་ཕུལ་བ་ལགས་ཞུས་པས་ཐུགས་ཤིན་ཏུ་མཉེས་ཤིང། བྱ་ཡུལ་བས་ཀྱང་བླ་མའི་ཞབས་ཕྱི་གང་འགྱུར་ཞུས། འོན་ཀྱང་ཚོགས་ཆོས་ཀྱི་སྐལ་བ་མ་ཆད་པ་དགོས་ཞུས་པས་གནང་སྟེ་ཞབས་ཕྱི་ཁོ་ན་ཞུས། དེ་ཡང་བསྙེན་རྫོགས་བྱས་ན་རུང་ཆུ་འདེབས་པ་སོགས་བླ་མའི་ཞབས་ཕྱི་བསྒྲུབ་པ་ལ་གནོད་དོགས་ནས་དགེ་ཚུལ་ཙམ་བསྒྲུབས་ཏེ་བཞུགས་སྐབས་དགེ་བཤེས་འགའ་ཞིག་གིས་ཁོང་ཤེས་རབ་ཆེན་པོ་ཡིན་པས་ཐོས་པ་ཞིག་བྱས་ན་གཞན་དང་མི་འདྲ་བ་ཞིག་ཡོང་བར་ཡོད་ཀྱང། སྤྱན་སྔ་བས་ཐབ་གཡོག་བྱས་པས་མ་བྱུང་ཟེར་བ་ཁོང་གིས་གསན་ནས་ངའི་བླ་མའི་ཞབས་ཕྱི་ཞུས་པ་དེ་ཆོས་ཡིན་པ་ཁོང་ཚོས་མ་གོ་བར་འདུག་ཅེས་བཀའ་བཀྱོན་གནང་ཞིང། ལན་གཅིག་ཐལ་བ་གཟན་དུ་བླུག་ནས་འཕོས་ལ་ཕྱིན་པས་སྐས་ལ་རྐང་པ་བཞག་ཙམ་ན་ཏིང་ངེ་འཛིན་དུ་སོང་སྟེ་ཞག་གཅིག་ལོན་པའི་རྗེས་སུ་གཞན་གྱིས་བསླངས་དགོས་པ་བྱུང་ཞིང། དེའི་རྒྱུ་མཚན་གྱིས། བཤེས་གཉེན་ཚུལ་བཞིན་བསྟེན་མཛད་གཞོན་ནུ་འོད། །ཅེས་གསུངས་པ་ཡིན་ལ། རང་རེ་ཚོ་ནི་བླ་མ་བྱམས་པའི་ཞལ་ནས། བླ་མ་བསྟེན་པ་ལ་ཁྱིམ་པ་རྣམས་ལས་ཀྱང་ང་རང་ཚོ་སྡུག་པར་འདུག །ཁྱིམ་པ་ཚོས་ལེགས་ཉེས་ཅི་བྱུང་ཡང་བླ་མ་མཁྱེན་ཟེར། ང་རང་ཚོས་ང་ཕོ་རྒོད་པོ་ཡིན་ཟེར། གསུངས་པ་ལྟ་བུར་སོང་བ་ཤས་ཆེ་བས་དེ་ལྟར་མ་སོང་བར་བསམ་སྦྱོར་གཉིས་ཀའི་སྒོ་ནས་ཚུལ་བཞིན་དུ་བསྟེན་དགོས། དེ་ལ་ཡང་ཁ་ནས་ཁྱོད་ཀྱིས་ཤེས་པས་མི་ཆོག །དཔེར་ན། སྔོན་འཕན་ཡུལ་དུ་བུད་མེད་ཁ་བྱང་མ་ཞིག་གིས་སྔགས་པ་ཞིག་བསྲུང་བ་ལ་

― GTD003_Page_0396 ―

^{[མ་དཔེ་གཟིགས་ན་འདིར་གནོན།]}

[Full Size]

བོས་ཏེ་ཁང་པའི་ཕུགས་སུ་བཞག་ནས་ཁ་ནས་ཚེ་འདིའི་དོན་ཡང་ཁྱོད་ཤེས། ཕྱི་མ་ཡང་ཁྱོད་ཤེས། ཁྱོད་མིན་རེ་ས་སྐྱབས་གནས་མེད་དོ་བྱས་ཀྱང། སེམས་ལ་འདིས་བརྐུས་མི་ཡོང་ངམ་སྙམ། འོན་ཀྱང་མོ་རང་སྡོད་ཐབས་མ་བྱུང་བས་བུ་མོ་གླེན་མ་ཞིག་ཡོད་པ་བལྟར་བཅུག་པས་མོས་བལྟ་མ་འདོད་པར། སྒོ་ཐེམ་ལ་བསྡད་དེ་ཨ་མ་བོས་ནས། ང་ཚོས་ཇོ་བོ་མི་རྐུ་བར་འདུག །ཙོག་གེ་འདུག་ཟེར་བ་ལྟ་བུ་ཡིན་པས། སྙིང་ཐག་པ་ནས་བློ་བཀལ་ཏེ་བསྟེན་དགོས། གསུམ་པ་མ་བསྟེན་པའི་ཉེས་དམིགས་ནི། གལ་ཏེ་བསྟེན་ཚུལ་མ་ལེགས་པ་ཅུང་ཟད་ཙམ་བྱུང་ནའང་ཤིན་ཏུ་མི་རུང་སྟེ། སློབ་དཔོན་ཡེ་ཤེས་ཞབས་ཀྱིས་གྲུབ་ཆེན་བོ་དྷི་ས་ཏྭའི་སློབ་མ་གྲུབ་ཆེན་བརྒྱད་ཅུའི་ནང་གི་ཕག་ཚང་པ་ལ་ཕག་མོའི་དབང་ཞུས་ནས་རྗེས་ཤིག་ན། ཡེ་ཤེས་ཞབས་པཎྚི་ཏ་མང་པོ་དང་ལྷན་ཅིག་ཏུ་བཞུགས་པའི་ཚེ། ཕག་ཚང་པ་སྤྲང་པོའི་ཆ་བྱད་དུ་འོང་བ་ཁོང་གིས་བཞེངས་ན་པཎྚི་ཏ་ཚོ་ལ་ངོ་ཚ། སྡོད་པ་ལ་བླ་མ་ཕེབས་བྱུང་སྙམ་དུ་བྱེད་ཐབས་ཟད་དེ་མ་མཐོང་ཁུལ་བྱས་པས་དེ་མ་ཐག་སྤྱན་གཅིག་ས་ལ་ལྟུང་སྟེ་ཡེ་ཤེས་ཞབས་སྤྱན་གཅིག་པར་གྲགས་ཤིང། དེ་ཙམ་མ་ཡིན་པར་བཤགས་པ་ཡང་མང་དུ་འབུལ་དགོས་པར་བྱུང་ལ། དེར་མ་ཟད་བླ་མ་དང་དམ་ཚིག་ཉམས་པའི་གང་ཟག་གིས་དཀོན་མཆོག་ལ་མཆོད་པ་ཕུལ་ཀྱང་ལས་འབྲས་མི་བསླུ་བའི་དབང་གིས་ཕུལ་བའི་བསོད་ནམས་ཙམ་ཐོབ་པ་མ་གཏོགས། དེའི་མཆོད་པ་དཀོན་མཆོག་གིས་མི་བཞེས་ཤིང་། དམ་ཉམས་གཞན་གྱི་རྫས་དང་འདྲེས་ན་ཡང་བཤགས་

― GTD003_Page_0397 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བྱེད་དགོས་ལ། བླ་མ་དང་དམ་ཚིག་གཙང་བ་ཞིག་བྱུང་ན། སློབ་དཔོན་ཡེ་ཤེས་ཞབས་ཀྱིས་མན་ངག་ལྟར་ཕྱོགས་བཅུའི་སངས་རྒྱས་རྣམས་ལ་མཆོད་པ་མ་ཕུལ་ཡང་བླ་མ་མཆོད་པའི་ཚེ་སངས་རྒྱས་ཐམས་ཅད་དེའི་སྐུ་ལུས་ལ་ཞུགས་ནས་མཆོད་པ་ལེན་པ་ནི། ང་ནི་དེའི་ལུས་ཞུགས་ནས། །སྒྲུབ་པོ་མཆོད་པ་ལེན་པར་བྱེད། །ཅེས་གསུངས་པ་ལྟ་བུ་ཡིན་པས། བླ་མ་དང་དམ་ཚིག་མ་ཉམས་པ་གལ་ཆེའོ། ། ༈ བཞི་པ་ཇི་ལྟར་བསྟེན་པའི་ཚུལ་ལ་གཉིས། བསམ་པས་བསྟེན་ཚུལ་དང། སྦྱོར་བས་བསྟེན་ཚུལ་ལོ། །དང་པོ་ལ་གཉིས། རྩ་བ་དད་པ་སྦྱང་བ་དང། བཀའ་དྲིན་རྗེས་སུ་དྲན་ཏེ་གུས་པར་བྱའོ། །དང་པོ་ནི། སྤྱི་བོའི་བླ་མའི་ཐུགས་ཀ་ནས་ཆོས་འབྲེལ་ཡོད་པའི་བླ་མ་རྣམས་སྤྲོས་ཏེ་མདུན་དུ་བཞུགས་པ་ལ་དམིགས་ནས་འདི་རྣམས་རྒྱལ་བ་རྡོ་རྗེ་འཆང་གིས་ང་འདྲེན་པའི་སླད་དུ་དགེ་བའི་བཤེས་གཉེན་གྱི་རྣམ་པ་བཟུང་བ་ཡིན་པར་འདུག །དེར་མ་ཟད་ཡར་འཁྲིད་པ་ལ་མིའི་ལུས་རྟེན་དགོས་པས་ཕ་མ་སོགས་ཀྱང་བླ་མའི་སྤྲུལ་པ་ཡིན་པར་འདུག་སྙམ་དུ་བསམ། དེ་ལྟར་ཐམས་ཅད་ལ་དག་སྣང་སྦྱངས་པ་ན་གང་ལ་དད་པ་མི་སྐྱེ་བ་དེ་ཉིད་རྩ་བའི་བླ་མའི་སྤྲུལ་པར་མོས་ཏེ་བླ་མ་ཐམས་ཅད་ཐུགས་རྒྱུད་གཅིག་ཏུ་བསམ་ན་དད་པ་སྐྱེ་སླ་བས་འདི་སྙམ་དུ། ག་རེ་སྔོན་འཕགས་པ་སྤྱན་རས་གཟིགས་ཀྱིས་ཆོས་རྒྱལ་སྲོང་བཙན་སྒམ་པོར་སྤྲུལ་ནས་བོད་རྣམས་ལ་ན་མོ་བུདྡྷ་ཡ་ཞེས་པ་འདི་ཡང་སློབ་དཀའ་བར་བྱུང་བ་རེད། དེ་བཞིན་དུ་རྩ་བའི་བླ་མ་འདིས་ཀྱང་དང་པོ་ཀློག་

― GTD003_Page_0398 ―

^{[མ་དཔེ་གཟིགས་ན་འདིར་གནོན།]}

[Full Size]

གི་སློབ་དཔོན་དེའི་རྣམ་པ་བཟུང་ནས་ཀློག་བསླབ། དེ་ནས་རབ་བྱུང་སྒྲུབ་མཁན་དེའི་རྣམ་པ་བཟུང་ནས་རབ་ཏུ་བྱུང་སྟེ་སྟོན་པའི་སྐུར་བཟོས་པར་འདུག་སྙམ་དུ་བསམ་དགོས་ལ། དེར་མ་ཟད་བསླབ་བཏུས་ལས་གསུངས་པ་ལྟར་དགོས། གཞན་དང་ཁ་འཐབ་པ་ན་མི་གཞན་གྱིས་ཁྱེད་སྟོན་པའི་ན་བཟའ་གྱོན་མཁན་ཞིག་གིས་དེ་འདྲ་མ་གསུང་ཟེར་བྱུང་ན་དེ་ཡང་བླ་མའི་སྤྲུལ་པར་འཛིན་དགོས་ཏེ། བླ་མའི་སྤྲུལ་པ་གར་ཡོད་མི་ཤེས། དཔེར་ན་སྔོན་རས་ཆུང་བ་དབུས་སུ་ཕེབས་ནས་ལྷ་ལྕམ་དང་འཕྲད་པའི་ཚེ། རྗེ་བཙུན་གྱིས་དེ་དང་ཕྲལ་བའི་ཕྱིར་སྤྲང་བོའི་རྣམ་པར་ཕེབས་པ་ལ་རས་ཆུང་བ་གཏོང་ཕོད་ཆེས་པས་གཡུ་ལེགས་པ་ཞིག་ཡོད་པ་བྱིན་པར་ལྷ་ལྕམ་ཁྲོས་ཏེ་ཐུག་པའི་སྐྱོགས་ཀྱིས་བརྡུང་བས། ཁོང་ཐུགས་སྐྱོ་སྟེ། རྒྱན་ཆ་མང་པོ་འདོགས་མྱོང་སྟེ། །ཚོད་མའི་རྒྱན་ཆ་འདོགས་མ་མྱོང། །གསུངས་ནས་དེར་མ་བཞུགས་པར་རྗེ་བཙུན་གྱི་དྲུང་དུ་ཕེབས་པས་དབང་ཞིག་གནང་བ་དང་ཕྲད་པ་ན་རྗེ་བཙུན་གྱིས་རས་ཆུང་བ་ལ་དབང་ཡོན་མི་དགོས་གསུངས་པས། ཁོང་གི་ཐུགས་ལ་ངས་མི་ལེགས་པ་འགའ་ཞིག་བྱས་ཡོད་པས་ང་དབང་གྲལ་ནས་འཕུད་རྒྱུ་ཡིན་ཡོང་དགོངས་ཙ་ན། རྗེ་བཙུན་གྱིས་སྔར་གྱི་གཡུ་དེ་བཏོན་ནས་བྱུང་བས་སྤྲང་པོ་བླ་མའི་སྤྲུལ་བར་འདུག་སྙམ་ནས་ངོ་ཚ་ཞིང་འཇིགས་སྐྲག་ཚད་ལས་འདས་པ་བྱུང་བ་ལྟ་བུ་དང། ཡང་སྔོན་པཎ་ཆེན་བློ་བཟང་ཡེ་ཤེས་ཞིང་དུ་གཤེགས་པའི་ལོ་བླ་མ་རིན་པོ་ཆེ་བོད་དུ་ཕེབས་ཏེ་བཞུགས་སྐབས། རྩེ་དྲུང་ཞིག་གིས་མར་ཞིག་ཁྱེར་ཡོང། རི་ཁྲོད་པ་དགའ་མོ་ཞིག་ཡོད་པ་རེད་ཟེར་ནས་མར་འདི་ང་ལ་དཔོན་

― GTD003_Page_0399 ―

^{[མ་དཔེ་གཟིགས་ན་འདིར་གནོན།]}

[Full Size]

པོས་བསྐུར་བྱུང་ཟེར་བས་སེམས་ལ་ད་ང་དགའ་མོ་ཡོད་པ་འདྲ་མི་དབང་གིས་ཡང་མཁྱེན་ཡོད་པ་རེད་སྙམ་པ་བྱུང། ཕྱི་ཉིན་བཀའ་ཆོས་ལ་ཕྱིན་པས་བླ་མའི་གསུངས་ནས། འདི་ན་གླེན་པ་ལ་ལ་བླ་མའི་ཐུགས་རྗེས་མར་རྡོག་རེ་ཡོང་ན་ཡང་བླ་མའི་ཐུགས་རྗེ་ཡིན་པ་མི་ཤེས་པ་གསུང་སྟེ་བཀའ་བཀྱོན་པས་འདི་ཡིན་གསུང་ཨེ་ཡོང་སྙམ་དུ་ངོ་ཚ་ཞིང་སྐྲག་ནས་ས་ལ་ཐིམ་འགྲོ་བ་འདྲ་བ་ཞིག་བྱུང། མི་དབང་གིས་ང་འདྲ་བ་ཞིག་ག་ལ་མཁྱེན། དེ་ཡང་བླ་མའི་སྤྲུལ་པ་ཡིན་པར་འདུག་གསུངས་པ་ལྟ་བུ་ཡིན། ཡང་སྐབས་འདིར་དེ་ལྟར་བསྒོམ་པ་ཡང་མིག་བཙུམ་ནས་སངས་རྒྱས་ཡིན་ཞེས་པ་ཙམ་གྱིས་མི་ཆོག། །དཔྱད་སྒོམ་བྱེད་པ་རྗེ་བླ་མའི་ཁྱད་ཆོས་ཡིན་པས་རིགས་པ་དྲི་མ་མེད་པས་དཔྱད་དེ་སྐྱོན་ལྟར་སྣང་བ་གང་ཡིན་པ་དེ་འདོན་དགོས་ཀྱི་བཀབ་ནས་བསྡད་པས་མི་ཡོང་བས། དེ་ལ་ཡང་ཐོག་མར་བླ་མ་འདི་རྣམས་སངས་རྒྱས་ཡིན་ནམ་ཞེས་རང་གིས་རང་ལ་དྲི་དགོས། དྲིས་པའི་ཚེ་འདི་སྙམ་དུ་སངས་རྒྱས་ནི་སྐྱོན་ཀུན་ཟད་ཡོན་ཏན་ཀུན་ལྡན་ཡིན་ན། འདི་རྣམས་སངས་རྒྱས་རང་མ་ཡིན་ཏེ། གཉེན་ལ་ཆགས་ཤིང་དགྲ་ལ་སྡང་བ་དང། ཐ་ན་མན་ཛི་ཁ་གང་ཡང་གཞན་ལ་གཏོང་མི་ནུས་པས་འཛིན་ཆགས་ཆེན་པོ་འདི་འདྲ་བ་འདུག་པ་སྙམ་ན། འོ་ན་དེ་དག་ཁྲོ་བ་སོགས་དངོས་གནས་ཡིན་པའི་ཐག་ཨེ་ཆོད་དྲིས་པ་ལ། དངོས་གནས་ཡིན་རྟགས་མངོན་སུམ་དུ་མཐོང་རྒྱུ་འདུག་པ་སྙམ་ན། འོ་ན་རྡོ་རྗེ་འཇིགས་བྱེད་ལ་ཁྲོ་བ་ཡོད་དམ། ཡོད་དོགས་མེད་ཟེར་ན། དེ་ཡང་མཐོང་ཚོད་ལ་ཁ་གདངས་མིག་བགྲད། མེ་ཡང་འབར་ཏེ་ཤིན་ཏུ་ཁྲོས་པ་ལྟར་འདུག་པ་ཅི་

― GTD003_Page_0400 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ཞེས་པ་ལ་དེ་གཉིས་མི་མཚུངས། འཇིགས་བྱེད་ཀྱི་དེ་ཚུལ་བསྟན་ཡིན་ཟེར་ན། འོ་ན་ཁྱོད་ཀྱི་བླ་མ་རྣམས་ལ་ཚུལ་སྟོན་རྒྱུ་མི་སྲིད་པ་ཨེ་ཡིན་ཁྱོད་ཀྱི་བླ་མའི་མཛད་པ་སྐྱོན་གྱི་རྣམ་པར་སྣང་ཚད་དངོས་གནས་པ་ཡིན་དགོས་ན། ཁྱོད་ཀྱི་བླ་མའི་ནང་ན་སངས་རྒྱས་མིན་པ་གཅིག་ཀྱང་མེད་དགོས་ན་མེད་རང་ཟེར་བ་རྣམ་རྟོག་ཡང་ཟ་ཞིང་སངས་རྒྱས་ཐམས་ཅད་ཀྱིས་ཡལ་བར་དོར་བ་དེ་འདྲ་མི་སྲིད་པས། རྗེས་སུ་འཛིན་མཁན་གྱི་སངས་རྒྱས་ཤིག་ངེས་པར་ཡོད་སྙམ་དུ་ཐག་བཅད་ནས་བསྒོམ་ན་སྐྱོན་རྟོགས་ཀྱི་བློ་ཁེགས་སླའོ། །ཡང་འདི་དཔེ་ལ་མཚོན་ན་འབྲས་སྤུངས་ལྟ་བུ་ན་སངས་རྒྱས་ཡོད་དམ་མེད། དེ་རིང་མང་པོ་ཡོད་དྲག་ཟེར་ན་གང་ཡིན་ཞལ་མར་གཟིགས་ཀྱི་བླ་མ་ཚོའམ། དགེ་བསྐོས་སམ་བཙུན་ཆུང་ཚོའི་བར་སུ་ཡང་མིན་ན། ད་ཤུལ་ན་སངས་རྒྱས་ཡིན་པ་སུ་ཡོད། ཡོད་འགྲོ་སྟེ་མི་ཤེས་ཟེར་ན། མི་ཤེས་ན་མིན་རང་སྙམ་དུ་བཟུང་ན་སྐྱོན་རྟོགས་སུ་འགྲོ་བས་འདི་དག །ཚད་མ་རྣམ་འགྲེལ་ལས། ཚད་མ་རྣམས་ནི་མི་འཇུག་པ། །ཞེས་སོགས་གསུངས་པ་ལྟར་མི་སྣང་བ་མི་དམིགས་པའི་རྟགས་ཀྱི་སྒོ་ནས་དཔྱད་དེ་སྐྱོན་རྟོགས་འགོག་དགོས་པ་ཡིན། ཡང་དཔེར་ན་སྐུ་རྟེན་ཐ་མལ་པ་ཞིག་ལའང་ལྷ་བབས་པ་ན་ཕྱག་འཚལ་ཞིང་ཞབས་དབང་ཡན་ཆད་ཞུ་བ་དང། ཆོས་སྐྱོང་དེ་དངོས་སུ་བཟུང་ནས་ལེགས་ཚོགས་ཀྱི་འཕྲིན་ལས་བཅོལ་བ་བཞིན་དུ་བླ་མས་ཆོས་འཆད་པ་ན་ཡང་དེ་ལ་ཕྱོགས་བཅུའི་རྒྱལ་བ་ཐམས་ཅད་འཇུག་པ་ཡིན་པས་རྒྱལ་བ་ཐམས་ཅད་ཀྱི་བདག་ཉིད་དུ་འགྲུབ་ཅིང། དེར་མ་ཟད་བསྟན་རིམ་ལས་བླ་མ་སངས་རྒྱས་ཡིན་པའི་རྒྱུ་མཚན་གསུམ་གསུངས་ཏེ། དཔེར་ན་མིག་ཤེས་

― GTD003_Page_0401 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་བདག་རྐྱེན་མིག་དབང་གིས་བྱེད་པ་ལྟར། བླ་མ་ཡང་རྣམ་ཀུན་མཁྱེན་པའི་ཡེ་ཤེས་ཀྱི་བདག་རྐྱེན་ལས་བྱུང་བ་ཡིན་པས་བདག་རྐྱེན་གྱི་སྒོ་ནས་སངས་རྒྱས་སུ་འགྲུབ། བྱིན་རླབས་ཀྱི་སྒོ་ནས་སངས་རྒྱས་སུ་འགྲུབ་ཚུལ་ནི། བརྒྱད་སྟོང་པ་ལས། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ངེས་པར་འབྱུང་བར་འགྱུར་བ་དེ་བཞིན་དུ་ཁྱོད་སྤོབས་པར་གྱིས་ཤིག་གསུངས་པ་ལ། ཤཱ་རིའི་བུས་རང་སྟོབས་ཀྱིས་སྟོན་ནམ། སངས་རྒྱས་ཀྱི་མཐུས་སྟོན་སྙམ་དུ་དོགས་པ་ཞུས་པའི་ལན་དུ། ཚེ་དང་ལྡན་པ་ཤཱ་རིའི་བུ་ཉན་ཐོས་རྣམས་ནི་གང་ཅི་སྨྲ་བ་དང། སྟོན་པ་དང། ཉེ་བར་སྟོན་པ་དང། བརྗོད་པར་བྱེད་པ་དང། གསལ་བར་བྱེད་པ་དང། ཡང་དག་པར་གསལ་བར་བྱེད་པ་དེ་དག་ཐམས་ཅད་ནི་དེ་བཞིན་གཤེགས་པའི་སྐྱེས་བུའི་མཐུ་ཡིན་པར་རིག་པར་བྱའོ། །ཞེས་སོགས་ཀྱི་སྒོ་ནས་བསྒྲུབ། ཡང་མཛད་པའི་སྒོ་ནས་སངས་རྒྱས་སུ་འགྲུབ་པ་ནི། སངས་རྒྱས་ཀྱི་མཛད་པ་རྣམས་ཀྱི་ནང་ནས་མཆོག་ཏུ་གྱུར་པ་ནི་གསུང་གི་མཛད་པ་སྟེ་རྒྱལ་བའི་གསུང་རབ་རྣམས་ཡིན་ལ། བླ་མ་ནི་དེ་སྒྲོག་པ་པོ་ཡིན་པས་དེའི་སྒོ་ནས་ཀྱང་སངས་རྒྱས་སུ་འགྲུབ་པ་ཡིན་ནོ། །རིགས་པའི་རྣམ་གྲངས་གཞན་གྱི་སྒོ་ནས་བསྒྲུབ་ཚུལ་ཡང་དཔེར་ན་ཟངས་གཅིག་ལས་མི་གཙང་བའི་སྣོད་དང། དེ་བཅོམ་ནས་ཀ་ཏོ་ར་དང། དེ་ནས་ཡང་ཐུབ་པའི་སྐུ་ཞིག་བཞེངས་ནས་

― GTD003_Page_0402 ―

^{[མ་དཔེ་གཟིགས་ན་འདིར་གནོན།]}

[Full Size]

གསུང་འབྱོན་པ་བྱུང་ན་ཁམ་ཆེ་བར་བརྩི་མོད། དེ་བས་འཚང་རྒྱ་རུང་གི་ཁམས་རང་བཞིན་གནས་རིགས་ཡོད་པ་ཞིག་གིས་ཆོས་བསྟན་ན་སངས་རྒྱས་སུ་ངེས་པར་འཛིན་འོས་སོ། །དེ་ལྟར་དད་པ་སྦྱངས་པ་ལ་འབད་པས་རྩ་བ་ཚུགས་པ་ཞིག་བྱུང་ན། རྨོག་ལྕོག་པའི་ཞལ་ནས། སྤྱན་རས་གཟིགས་དཀར་ན་དཀར། ཀྱཻ་རྡོ་རྗེ་རང་སྔོ་ན་སྔོ། རྗེ་བཙུན་མ་རང་དམར་ན་དམར། ང་བླ་མའི་སྣང་བ་དང་འབྲལ་མ་མྱོང་བས་ཚེ་གཅིག་གི་སངས་རྒྱས་དེའམ། དེ་ཡོང་བ་འདྲ་གསུངས་པ་ལྟར་ཕན་ཡོན་ཤིན་ཏུ་ཆེའོ། །༈ གཉིས་པ་བཀའ་དྲིན་རྗེས་སུ་དྲན་ཏེ་གུས་པར་བྱ་བ་ནི། མདུན་དུ་བླ་མ་རྣམས་གསལ་བར་དམིགས་ནས། བདག་གིས་ངན་འགྲོའི་སྡུག་བསྔལ་མཐའ་དག་སྤངས་པའི་བླ་མ་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པའི་ལམ་ཁོང་དུ་ཆུད་པ་འདི་རྣམས་ཀྱི་བཀའ་དྲིན་ཡིན། དེར་མ་ཟད་མིའི་ལུས་རྟེན་ཐོབ་པ་དང། ཟས་ཁམ་གཅིག་བྱུང་བ་ཡང་འདི་རྣམས་ཀྱི་བཀའ་དྲིན་ཡིན་སྙམ་དུ་བསམ། འདི་ལ་འགའ་ཞིག་གིས་ཆོས་ཤིག་བྱུང་ན་བླ་མའི་ཐུགས་རྗེ་ཡིན་ཤས་ཆེ་སྟེ། ཟས་ནོར་སོགས་ཨ་བུ་རང་ལ་ཕོ་སྐྱེས་པས་བྱུང་བ་ཡིན་ཟེར། ཡང་སྒོམ་དུས་ན་མོས་བློ་དེ་འདྲ་དགོས་ཀྱང་དངོས་གནས་རང་མིན་ཟེར། འོ་ན་ཡང་སངས་རྒྱས་ཀྱི་བཀའ་བདེན་ནམ་མི་བདེན། བདེན་ན་ལས་འབྲས་བདེན་དགོས། དེ་བདེན་ན་འཇུག་པར་གནས་དང་གནས་མིན་སྟོབས་ཀྱི་སྐབས་ནས་བཤད་པ་དང། དེར་མ་ཟད་ཟས་ཁམ་གཅིག་ཟ་བ་ལ་ཡང་ཟ་རྒྱུའི་ཟས་ཏེ་སྦྱིན་པའི་འབྲས་བུ་དང། དེ་ཡང་བདེ་འགྲོའི་རྟེན་ལ་སྤྱོད་པའི་རྟེན་དེ་ཚུལ་

― GTD003_Page_0403 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྲིམས་ཀྱི་འབྲས་བུ་དང། གཞན་གྱིས་གནོད་འཚེ་མེད་པར་ལོངས་སྤྱོད་པ་བཟོད་པའི་འབྲས་བུ་དང། ཆ་ཚང་བར་ལོངས་སྤྱོད་པ་བརྩོན་འགྲུས་ཀྱི་འབྲས་བུ་དང། འཇིགས་སྐྲག་སོགས་ཀྱི་དབང་གིས་སེམས་ཡེར་ཡེར་པོ་མ་ཡིན་པར་རྣལ་དུ་གནས་ནས་ལོངས་སྤྱོད་པ་བསམ་གཏན་གྱི་འབྲས་བུ་དང་། ཟས་ཀྱི་ལེགས་ཉེས་འབྱེད་པ་ཤེས་རབ་ཀྱི་འབྲས་བུར་འདོད་དགོས་ན། དེ་དག་ལ་ཡང་དང་པོ་སྟོན་མཁན་ཞིག་དགོས་ཏེ། རང་ཅག་ལོང་བ་ཡིན་པས་བཤེས་གཉེན་མིག་ཅན་ཞིག་གིས་ཁྲིད་ནས་འབྲས་བུ་འདི་མི་འདོད་ན་རྒྱུ་འདི་འདྲ་ཞིག་ལ་སློབ་དགོས་ཞེས་མ་བསྟན་ན་མི་ཤེས་པས་དེ་དག་ཀྱང་བླ་མའི་བཀའ་དྲིན་ཡིན། དོན་འདི་ལ་དགོངས་ནས། རྗེ་བླ་མས། འཇིག་རྟེན་འཇིག་རྟེན་འདས་པའི་དགེ་ལེགས་ཀྱི། །ཡོན་ཏན་ཀུན་གྱི་རྩ་བ་དྲིན་ཅན་རྗེ། །ཞེས་གསུངས་པ་ལྟར། འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཐམས་ཅད་ཀྱི་རྩ་བ་ཡིན་པས། ཆོས་སྐོར་འདིའི་མིང་ལ་ཡང་ལམ་གྱི་རྩ་བ་བཤེས་གཉེན་བསྟེན་ཚུལ་ཞེས་རྗེ་བདག་ཉིད་ཆེན་པོས་བརྡ་གསར་དུ་བཏགས་པ་ཡིན་ལ། དེ་ལྟར་མངོན་མཐོ་དང་ཐར་པ་དང་ཐམས་ཅད་མཁྱེན་པར་བགྲོད་པའི་ལམ་གྱི་རྩ་བ་ཡིན་པར་མ་ཟད། རང་ཅག་སྡོད་པའི་ས་གཞི་འདི་ཡང་བླ་མའི་ཐུགས་རྗེ་ལས་བྱུང་བ་ཡིན་ཏེ། མཛོད་ལས། ལས་ལས་འཇིག་རྟེན་སྣ་ཚོགས་སྐྱེས། །ཞེས་གསུངས་པ་ལྟར། འཛམ་བུ་གླིང་འདི་ལྟ་བུ་ཡང་མིའི་སེམས་ཅན་རྣམས་ཀྱི་སྤྱི་མཐུན་གྱི་ལས་ལས་བྱུང་བ་ཡིན་ལ། རང་རེས་ཀྱང་བླ་མས་བསྟན་པ་ལ་བརྟེན་ནས། དེ་

― GTD003_Page_0404 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཞལ་འདེབས་བྱས་པའི་དབང་གིས་གནས་འདི་ལ་ལོངས་སྤྱོད་རྒྱུ་བྱུང་བ་ཡིན་སྙམ་དུ་སྒོ་དུ་མ་ནས་བཀའ་དྲིན་དྲན་ཏེ་གུས་པར་བྱའོ། །འདིར་གུས་པ་ཞེས་པ་དང། གོང་དུ་དད་པ་ཞེས་པ་མི་འདྲ་སྟེ་གུས་པ་ནི་བཀའ་དྲིན་དྲན་ནས་གཅེས་པར་འཛིན་པའི་སེམས་བྱུང་གཅེས་སྤྲས་ཀྱི་རྣམ་པ་ཅན་ཞིག་ཡིན་ལ། དད་པ་ལ་བཀའ་དྲིན་དྲན་ཡང་མི་དགོས་ཤིང། སེམས་བྱུང་དང་བའི་རྣམ་པ་ཅན་ཞིག་ཡིན་ནོ། །གཉིས་པ་སྦྱོར་བས་བསྟེན་ཚུལ་ནི། མདོ་སྡེ་རྒྱན་ལས། བཀུར་སྟི་རྙེད་པ་དག་དང་རིམ་གྲོ་དང། །བསྒྲུབ་པའི་སྒོ་ནས་བཤེས་གཉེན་བསྟེན་པར་བྱ། །ཞེས་གསུངས་པ་ལྟར། ལུས་སྲོག་ལོངས་སྤྱོད་སོགས་ལ་ལྟོས་པ་མེད་པར་ལུས་ངག་གིས་བསྙེན་བཀུར་ཞིང་ཟང་ཟིང་གི་དངོས་པོ་དབུལ་བ་དང། ཁྱད་པར་བཀའ་བཞིན་བསྒྲུབ་པའི་མཆོད་པས་མཉེས་པར་བྱའོ། །དེ་ལ་དང་པོ་ལུས་ངག་གིས་བསྙེན་བཀུར་བའི་ཚུལ་ནི་དཔེར་ན་བླ་མ་བྱམས་པས། རྗེ་སྒྲུབ་ཁང་པའི་མེ་ཤིང་མི་ཁུར་གསུམ་གྱི་ཚོད་ཙམ་ཁུར་ཏེ་ཕེབས་པ་དང། པད་དཀར་འཛིན་པ་པོ་ཏ་ལར་བཞུགས་སྐབས་ཁོང་བཤེས་གཉེན་ཆེན་པོ་ཡིན་ཀྱང་རྒྱལ་ཡུམ་གྱི་ཞབས་ཕྱིར་མངག་སྟེ་ཕེབས་པ་ན་རྟས་འཕངས་ནས་སྒྲོག་རུས་ཆག་སྟེ་ན་ཚ་བཟོད་གླགས་མེད་པ་བྱུང་བར་འདི་སྙམ་དུ། མི་ལ་རས་པས་བདག་མེད་མའི་གཡོག་དེ་ཙམ་བྱས་འདུག་ན་ངས་བླ་མའི་ཞབས་ཕྱི་ཞུས་པ་ལ་ཡུས་ཆེ་རྒྱུ་མི་འདུག་སྙམ་དུ་དགོངས་པས་ཐུགས་ལ་རྟོགས་པ་ཁྱད་པར་ཅན་འཁྲུངས་ཤིང་རྟས་འཕང་བ་ཡང་བླ་མས་འཕང་དུ་བཅུག་པ་ཡིན་པར་འདུག་གསུངས་པ་ལྟ་བུ་དགོས་ལ། ངག་གི་བསྙེན་

― GTD003_Page_0405 ―

^{[མ་དཔེ་གཟིགས་ན་འདིར་གནོན།]}

[Full Size]

བཀུར་བླ་མའི་བསྔགས་པ་བརྗོད་པ་སོགས་ནི་སྐབས་དང་མ་བསྟུན་ན། མ་དད་པ་ཅན་གྱི་སར་བརྗོད་ཚེ་འཁྲུགས་པའི་རྒྱུར་འགྱུར་བས་མི་རུང་། ཟང་ཟིང་གི་དངོས་པོ་འབུལ་བ་ནི། བསོད་ནམས་བསགས་པའི་ཆེད་དང། བློ་འདྲིས་པའི་ཁྱད་ཀྱང་ཡོད་དེ། པོ་ཏོ་བའི་ཞལ་ནས། ཇ་སུན་རེ་ཕུལ་མ་ཕུལ་འགྲོ་ལུགས་ཀྱང་མི་འདྲ་གསུངས་པ་ལྟར། ཟང་ཟིང་གི་བསྙེན་བཀུར་བྱས་པ་དེ་བླ་མའི་དྲུང་དུ་འགྲོ་བ་ལ་ཡང་སྤོབས་པ་མཐོ་བར་ཡོང་བས་སློབ་མས་ནོར་རྫས་ཅི་འབྱོར་འབུལ་དགོས་ལ། འོན་ཀྱང་བླ་མའི་ངོས་ནས་དེ་ལ་མི་ལྟ་བ་ཞིག་མ་བྱུང་ན་ཚྭ་དང་ཚྭ་རྐྱལ་ལྟ་བུར་འགྲོ་སྟེ། དབྱར་དུས་རླན་ཆེ་སར་ཚྭ་རྐྱལ་བར་བླུག་སྟེ་བཞག་ན་ཚྭ་འཇུ་ཞིང་རྐྱལ་བ་རུལ་ཏེ་གཉིས་ཀ་ཆུད་ཟོས་ལ་འགྲོ་བ་ལྟ་བུ་ཡིན། འོན་ཀྱང་བསྙེན་བཀུར་དེ་དག་གལ་ཏེ་མ་འབྱོར་ཀྱང་ཉེས་པ་མེད་ལ། གཙོ་བོར་གྱུར་པ་ནི་བཀའ་བཞིན་སྒྲུབ་པའི་མཆོད་པ་ཡིན་ཞིང། དེའི་ནང་ནས་ཀྱང་ལམ་གྱི་ལུས་ཡོངས་སུ་རྫོགས་པར་ཉམས་སུ་ལེན་པ་འདི་ཡིན་པས། དམིགས་སྐོར་རེ་རེ་ལ་ཡང་ལམ་རིམ་ཆ་ཚང་རེ་རྫོགས་པ་ཡིན་ཏེ། བྱང་ཆུབ་ལམ་རིམ་འདིའི་འགྲོ་ལུགས་ཤེས་ན་རི་མཐོན་པོའི་རྩེར་ཕྱིན་པས་ཕྱོགས་ཐམས་ཅད་མཐོང་བ་ལྟར་ཐུན་རེ་རེ་ལའང་སྐྱེས་བུ་གསུམ་གྱི་ལམ་ཐམས་ཅད་བསྒོམ་ཚུལ་ཉམས་འོག་ཏུ་ཆུད་ནུས་པས། གྲུ་བཞི་ལམ་དུ་འཁྱེར་ཤེས་པ་དེ་འབྱུང་གི་འདི་ལ་དགོངས་ནས། རྗེ་བླ་མས། ཚུལ་འདི་ཐུན་རེ་སྟོན་དང་ཉན་པས་ཀྱང། །དམ་ཆོས་འཆད་དང་ཐོས་པའི་ཕན་ཡོན་སོགས། །རླབས་ཆེན་

― GTD003_Page_0406 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུད་པར་ངེས་པས་དེ་དོན་བསམ། །ཞེས་གསུངས་སོ། །སྦྱོར་བས་བསྟེན་ཚུལ་འདི་དག་ཐུན་མཚམས་ཀྱི་བྱ་བ་ཡིན་པ་དང། རྗེས་ཐོབ་ཏུ་དྲན་པར་བྱ་བའི་ཕྱིར་ཐུན་དངོས་གཞིའི་ཚེ་ཡང་དམིགས་པ་བསྐྱངས་ཏེ་བསྒོམས་ནས་འདྲིས་པར་བྱ་དགོས་ཏེ། མངོན་རྟོགས་རྒྱན་ལས། མཐོང་དང་གོམས་པའི་ལམ་དག་ལ། །ཞེས་གསུངས་པ་དང། ཡང་སྐབས་འགའ་ཞིག་ཏུ། མཐོང་དང་བསྒོམ་པའི་ལམ་དག་ལ། །ཞེས་འབྱུང་ཞིང། འགྲེལ་བཤད་ཚིག་གསལ་དུ་ཡང་གོམས་ཞེས་པ་དང། བསྒོམ་ཞེས་པ་ཁྱད་མེད་དུ་གསུངས་པ་ལྟར་སེམས་འདྲིས་སུ་བཅུག་ནས་གོམས་པར་བྱས་པ་ལ་བསྒོམ་ཟེར་བ་ཡིན། དེ་ཡང་ཡུན་ཐུང་ངུ་རེ་ཙམ་མ་ཡིན་པར་པོ་ཏོ་བའི་རྣམ་ཐར་ལྟ་བུ་ཞིག་དགོས། པོ་ཏོ་བ་དགུང་ལོ་ཕྲ་མོའི་དུས་ན་འཕན་ཡུལ་དུ་བསྒོམ་པ་ཞིག་ཤི་བའི་རོ་ལ་འཇའ་ཟུག་པ་གཟིགས་ནས། གཞན་ཞིག་ལ་དེ་གང་ཡིན་ཞེས་དྲིས་པས། གྲུབ་ཆེན་ཞིག་གཤེགས་པའི་གདུང་ལ་འཇའ་ཟུག་པ་རེད་ཟེར། འོ་ན་ང་ཡང་བསྒོམས་ནས་ཤི་དུས་རོ་ལ་འཇའ་ཟུག་པ་ཞིག་བྱེད་དགོས་དགོངས་ནས། མི་དེ་ལ་སྒོམ་བྱེད་པ་ལ་ག་འདྲ་དགོས་དྲིས་པས། བསྒོམ་པ་ལ་ཐོག་མར་ཐོས་པ་བཙལ་ནས་སྒོམ་ཚུལ་ཤེས་དགོས་ཏེ། མ་བྱུང་ན་སྒོམ་ཐག་མཆན་ཁུང་བས་ཐུང་བ་ཡོང་ཟེར། ཆོས་སུ་ལ་ཞུས་པ་དགའ་བྱས་པས་ཇོ་བོའི་སློབ་མ་འབྲོམ་སྟོན་ལ་ཞུས་པ་དགའ་ཟེར། དེ་ནས་ཁོང་འབྲོམ་གྱི་དྲུང་དུ་ཕེབས་པའི་ལམ་བར་བསམ་མནོ་ལ་ལམ་རིམ་དེ་ཟླ་བ་གཅིག་གམ་གསུམ་མམ། ཧ་ཅང་འགྱང་ན་ལོ་གཅིག་གིས་སྒྲོ་འདོགས་ཆོད་ནས་གོ་བ་ཞིག་ཡོང་འགྲོ། དེ་

― GTD003_Page_0407 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ལྷོ་ཁ་ཕྱོགས་སུ་ཕ་སྐད་མ་སྐད་མི་གོ་བ་ཞིག་ཏུ་ཕྱིན་ནས། བསྒྲུབ་པ་བྱ་དགོས་སྙམ་པ་ཐུགས་ལ་ཤར་ཏེ་འབྲོམ་ལ་མཇལ། དེ་རྗེས་ལོ་གཅིག་གཉིས་ལྟ་ཞོག་འབྲོམ་གཤེགས་ཁའི་བར་དེར་བཞུགས་ནས་ལམ་རིམ་ཡང་ཡང་གསན་ཏེ་སྒྲོ་འདོགས་བཅད་ནས་ཐུགས་ལ་འདྲིས་པར་བྱས་ཤིང། འབྲོམ་གཤེགས་ཁར་ཡང་པོ་ཏོ་བའི་པང་དུ་དབུ་བཞག་ནས་བཞུགས་པའི་ཚེ་པོ་ཏོ་བའི་སྤྱན་ཆབ་འབྲོམ་གྱི་སྙན་ཁུང་དུ་སོང་བས་ཞལ་ནས། ཇོ་བོ་མྱ་ངན་མ་བྱེད་བསམ་པ་བཟང་པོ་གྱིས་གསུངས། དགེ་བཤེས་གཞན་ཞིག་གིས་བསམ་པ་བཟང་པོ་གང་ལ་ཟེར་ཞུས་པས། བསམ་པ་བཟང་པོ་བྱང་ཆུབ་ཀྱི་སེམས་ལ་ཟེར་ཞེས་ལན་གཉིས་གསུངས་ཏེ། དེ་ཡང་ཡིད་ལ་བཅགས་ནས་འདྲིས་དགོས་པའི་བརྡ་ཡིན། དེ་དག་ཐམས་ཅད་ཀྱི་དོན་ཧྲིལ་གྱིས་དྲིལ་ན་བླ་མས་སློབ་མ་སྐྱོང་བ་ཡང་མ་མཛངས་ཀྱིས་བུ་སྐྱོང་བ་ལྟ་བུ་ཞིག་དང། སློབ་མས་ཀྱང་བུ་མཛངས་ཀྱིས་ཕ་མ་ལ་སྲི་ཞུ་བྱེད་པ་ལྟར་བླ་མ་བསྟེན་པ་ཞིག་དགོས་ཏེ། བུ་ཆུང་ངུ་ལ་དང་པོ་མའི་ནུ་ཞོ་མིན་པ་སྟེར་མི་རུང། དེའི་རྗེས་སུ་འཇུ་སླ་ཞིང་ཆུང་རིམ་ནས་སྟེར་དགོས་པ་བཞིན་དུ་ཟབ་མོ་སྟོང་ཉིད་ཀྱི་རིམ་པ་སྟོན་པ་ལས། དང་པོ་དལ་འབྱོར་རྙེད་དཀའ། འཆི་བ་མི་རྟག་པ། ལས་འབྲས་སོགས་གཙོ་བོར་སྟོན་དགོས་ཀྱི། དང་པོ་ནས་སྟོང་ཉིད་བསྟན་ན་ལས་འབྲས་ལ་སྐུར་བ་བཏབ་སྟེ་ཆད་མཐར་ལྟུང་བའམ། འཆི་བའམ། འདྲེས་ཁྱེར་བ་གང་རུང་ཞིག་ཡོང་བས། རིམ་གྱིས་འཁྲིད་དགོས། དེ་ཡང་ཤིང་རྟ་ཆེན་པོ་ཞིག་གི་རྗེས་སུ་འབྲང་དགོས་ལ། སློབ་དཔོན་ཀླུ་སྒྲུབ་ཀྱི་རིན་

― GTD003_Page_0408 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་འཕྲེང་བ་ལས། དང་པོར་མངོན་པར་མཐོ་ཐོབ་པའི། །ཕྱིས་ནི་ངེས་པར་ལེགས་པ་འབྱུང། །ཞེས་རྒྱུ་དད་ཤེས་གཉིས་ཀྱིས་མངོན་མཐོ་ནས་རིམ་གྱིས་འཁྲིད་ཚུལ་ཞིག་དང། མདོ་ཀུན་བཏུས་སུ། སངས་རྒྱས་འབྱུང་བ་ཤིན་ཏུ་རྙེད་པར་དཀའ། །སངས་རྒྱས་འབྱུང་བ་དེ་ཤིན་ཏུ་རྙེད་དཀའ་བར་ཅིས་མངོན་ཞེ་ན་མདོ་སྡེ་ཚད་མར་གྱུར་པ་དུ་མ་ལས་ཤེས་ཏེ། དམ་པའི་ཆོས་པདྨ་དཀར་པོ་ལས་འབྱུང་བ་ཞེས་སོགས་ཀྱིས་སངས་རྒྱས་འབྱུང་དཀའ་ཞིང། དལ་འབྱོར་རྙེད་དཀའ་བར་བསྒྲུབས་ཏེ། དལ་འབྱོར་རྙེད་དཀའ་ནས་འཁྲིད་ཚུལ་ཞིག་ཀྱང་གསུངས་ལ། འཕགས་པ་ཐོགས་མེད་ཀྱིས་རྗེ་བཙུན་བྱམས་པའི་མན་ངག་ལ་བརྟེན་ནས་ཐོག་མར་རིགས་ནས་འཁྲིད་ཚུལ་འདི་ཉན་སར་གསུངས་ཤིང་དེའི་ཁུངས་ནི་རྒྱན་གྱི་སྐབས་སུ་རིགས་ནས་འཁྲིད་ཚུལ་དེ་ཉིད་གསུངས་པ་ཡིན་ཏེ། མདོ་སྡེ་རྒྱན་གྱིས་བཤད་པ་འདི་མངོན་རྟོགས་རྒྱན་ལྟར་ལམ་མཐོན་པོའི་སྐབས་ཀྱི་རིགས་མ་ཡིན་པར་འདི་ནི་བསོད་ནམས་ཆ་མཐུན་དང་ཐར་པ་ཆ་མཐུན་གཉིས་ཀྱི་ནང་ནས་བསོད་ནམས་ཆ་མཐུན་གྱི་སྐབས་ཀྱི་རིགས་ཐོག་མར་སད་རྒྱུ་དེ་ཡིན་པས། དེ་ཉིད་རིམ་གྱིས་ཕྱིའི་རྐྱེན་དགེ་བའི་བཤེས་གཉེན་དང། ནང་གི་རྐྱེན་དལ་འབྱོར་རྙེད་དཀའ་བསམ་པ་སོགས་ཀྱིས་གསོས་བཏབ་སྟེ། རིམ་གྱིས་ལམ་ལ་འཇུག་ཚུལ་གསུངས་པ་ཡིན་པས། དེ་དག་གང་རུང་གིས་རྗེས་སུ་འཁྲིད་དགོས་ལ་སློབ་མས་བླ་མ་བུ་མཛངས་པ་ལྟར་བསྟེན་ལུགས་ཀྱང། དཔེར་ན་བྱིས་པ་རྣམས་ཐལ་རྩེད་བྱེད་པའི་ཚེ་ཕས་མཐོང་ནས་བསྡིགས་པ་ན་མ་རབས་རྣམས་ལག་པའི་ཐལ་བ་ཤོབ་སྟེ་འཕོས་ནས་ངུས་ཏེ་བྲོས་ཏེ་འགྲོ་ཞིང། ཡ་

― GTD003_Page_0409 ―

^{[མ་དཔེ་གཟིགས་ན་འདིར་གནོན།]}

[Full Size]

རབས་ཤིག་ཡིན་ན་ཐལ་བ་བཟུང་ནས་ཕའི་དྲུང་དུ་བཅར་ཏེ་ལག་པ་གཡོན་གྱི་མཛུབ་མོའི་སེན་མོ་ཁར་བཅུག །གཡས་པས་ཐལ་བ་མི་མངོན་པར་ཕྱུར་ཕྱུར་ས་ལ་ཕོས་ན་སྐབས་ཤིག་ཕས་གཅེས་གཅེས་བྱས་པ་དང། གཟོད་ངུས་ཡོང་བ་ལྟར་བླ་མས་བསྡིག་བརྡུང་སོགས་ཇི་འདྲ་ཞིག་བྱས་ཀྱང་བླ་མ་ལ་བཅར་དུ་རང་འགྲོ་བ་ཞིག་དགོས། དེ་ལྟར་རྩ་བ་དད་པ་བརྟན་པར་བྱས་ཏེ། དེ་ནས་རིམ་གྱིས་སློབ་ཚུལ་འདི་ནི་མགོན་པོ་བྱམས་པའི་མན་ངག་ཀྱང་ཡིན་ཏེ། མངོན་རྟོགས་རྒྱན་ལས། སངས་རྒྱས་སོགས་དམིགས་དད་པ་དང། །ཞེས་སོགས་ཀྱིས་རྩ་བ་དད་པར་གསུངས་ཤིང། དེ་ལ་ཡང་ཉི་ཁྲི་སྣང་བར་གསུངས་པ་ལྟར། སངས་རྒྱས་བྱང་སེམས་སོགས་མཐོང་ནས་ཡིད་དད་པར་བྱེད་པ་དང་བའི་དད་པ་དང། ལས་དགེ་སྡིག་གི་བླང་དོར་ལ་ཡིད་ཆེས་པའི་ཡིད་ཆེས་ཀྱི་དད་པ་དང། འབྲས་བུ་གོང་མ་ཐོབ་པར་འདོད་པའི་མངོན་འདོད་ཀྱི་དད་པ་གསུམ་ཡོད་ཅིང། ཕྱི་མ་ཡང་ངན་འགྲོའི་སྡུག་བསྔལ་གྱིས་འཇིགས་ནས་མངོན་མཐོའི་རྟེན་བཟང་འདོད་པའི་མངོན་འདོད་དང། བདེན་བཞིའི་བླང་དོར་ལ་ཡིད་ཆེས་ནས་འཁོར་བ་མཐའ་དག་ལས་ཐར་པ་དོན་དུ་གཉེར་བའི་མངོན་འདོད་དང། དེ་ཙམ་གྱིས་ཀྱང་མ་ཚིམ་པར་གཞན་དོན་དུ་ཐམས་ཅད་མཁྱེན་པ་དོན་དུ་གཉེར་བའི་མངོན་འདོད་དེ་དད་པ་བསྒོམ་ཚུལ་ལ་ཡང་ལམ་གྱི་ལུས་རྫོགས་པར་ཤེས་ན་དད་པ་ལ་མཁས་པ་ཡིན་ལ། འདི་ནི་རྒྱན་སྣང་གི་སྐབས་བརྒྱད་པའི་མཚམས་སྦྱོར་དུ་གང་གི་ཚེ་གཡོ་དང་སྒྱུ་ཐམས་ཅད་རྣམ་པར་སྤངས་པ་ལ་སོགས་པའི་ཡིད་ལ་བྱེད་པ་རྣམས་ཀྱིས་ཇི་སྐད་དུ་

― GTD003_Page_0410 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་པས་རིམ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཆོས་ཐམས་ཅད་སྒྱུ་མ་དང་འདྲ་བ་ཉིད་དུ་རྣམ་པ་ཐམས་ཅད་མཁྱེན་པ་ཉིད་ཀྱི་རྗེས་སུ་རིག་པར་བྱེད་པ་ཞེས་པའི་དགོངས་པ་མཐར་ཐུག་ཡིན་ནོ། །གསུམ་པ་མཇུག་ཏུ་ཇི་ལྟར་བྱ་བ་ནི། དེ་ལྟར་ཐུན་དངོས་གཞིའི་དམིགས་རྣམ་ལེགས་པར་བསྐྱངས་པ་གྲུབ་ནས་ཐུན་འཇོག་ཁར་ཡང་ཚམ་ཚོམ་དུ་མི་འཇོག་པར་ཐུན་དེར་བྱས་པ་རྣམས་ལ་ལུགས་བཟློག་ཏུ་བསམ་བློ་རེ་བཏང་སྟེ་དམིགས་རིམ་གྱི་ཐོག་མར་སྐྱོང་རྒྱུ་རྣམས་དང་། དེའི་རྗེས་སུ་སྐྱོང་རྒྱུ་རྣམས་གོ་རིམ་མཐར་ཆགས་སུ་བླ་མས་གང་བཀོད་པ་ལྟར་བྱུང་ཨེ་འདུག་བལྟ་དགོས་ཤིང་དེ་འདི་ལ་སེང་གེ་རྣམ་པར་རྩེ་བའི་ཏིང་ངེ་འཛིན་ཞེས་ཟེར། དེ་ལྟར་བལྟས་པ་ན་ལེགས་པ་ཞིག་བྱུང་འདུག་ན་རང་ལ་གཟེངས་བསྟོད་དེ་དགའ་བ་བསྒོམ། ད་དུང་ཡང་དེ་ལྟར་བྱེད་སྙམ་དུ་འཕེན་པ་བཏང། མ་བྱུང་ན་ཁྱོད་ཀྱིས་སྔར་ཡང་འདི་བྱས་པས་འདི་ལས་མ་བྱུང་བ་རེད། ད་ཁྱོད་ལ་ད་ལན་ཆོས་ཤིག་མ་བྱུང་ན་ད་ནམ་ཡོང་ཞེས་རང་གིས་རང་ལ་རྫིག་རྫིག་གཏོང་བ་འབན་གུང་རྒྱལ་གྱི་རྣམ་ཐར་ལྟ་བུ་དགོས། ཁོང་གིས་དགེ་སྦྱོར་ལམ་དུ་སོང་བའི་ཚེ་ཕྱག་གཡོན་པས་གཡས་པ་བཟུང་ནས་དགེ་སློང་ཚུལ་ཁྲིམས་རྒྱལ་བ་ཁྱོད་ཡག་པོ་བྱུང་གསུང་ནས་གཟེངས་བསྟོད། མ་བྱུང་ཚེ་གཡོན་པ་ནས་བཟུང་སྟེ་འབན་ནག་གུང་རྒྱལ་གསུངས་ནས་རྫིག་རྫིག་གཏོང་བ་ཡིན། ཡང་ཐུན་མཚམས་སུ་ལྡང་བའི་ཚེ་ཧར་ལང་མི་བྱེད་པར་སྤྱི་བོའི་བླ་མ་ཐུབ་དབང་ལ་དམིགས་ཏེ་བླ་མ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་སོགས་གསོལ་བ་ཡང་ཡང་བཏབ། མུ་ནེའི་སྔགས་སོགས་བགྲངས་ནས་ལྡང་བར་

― GTD003_Page_0411 ―

^{[མ་དཔེ་གཟིགས་ན་འདིར་གནོན།]}

[Full Size]

བྱའོ། །གཉིས་པ་ཐུན་མཚམས་སུ་ཇི་ལྟར་བྱ་བ་ནི། དབང་པོའི་སྒོ་སྡོམ་པ་སོགས་དང། ཁྱད་པར་བཤེས་གཉེན་བསྟེན་ཚུལ་སྟོན་པའི་གསུང་རབ་ལ་བལྟ་བ་སོགས་ཐུན་མཚམས་ཀྱི་བྱ་བ་འོག་ནས་འབྱུང་བ་ལྟར་རོ། །༈ གཉིས་པ་བརྟེན་ནས་བློ་ཇི་ལྟར་སྦྱང་བའི་རིམ་པ་ལ་གཉིས། དལ་འབྱོར་ལ་སྙིང་པོ་བླང་བའི་ཕྱིར་བསྐུལ་བ་དང། སྙིང་པོ་ཇི་ལྟར་ལེན་པའི་ཚུལ་ལོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་ནི། ཕུར་ཚུགས་གསོལ་འདེབས་སོགས་སྔར་ལྟར་རོ། །གཉིས་པ་དངོས་གཞི་ལ་གསུམ། དལ་འབྱོར་གྱི་ངོ་བོ་ངོས་བཟུང་བ་དང། དེ་དོན་ཆེ་བར་བསམ་པ་དང། རྙེད་དཀའ་བར་བསམ་པའོ། །དང་པོ་སྤྱི་བོར་བླ་མ་ལྷ་སྒོམ་བཞིན་པའི་ངང་ནས་ཞེས་སོགས་གསུངས་ཏེ། དེའི་རྒྱུ་མཚན་ཡང་བཤེས་གཉེན་བསྟེན་ཚུལ་གོང་དུ་ཚར་གཅིག་བསྒོམས་ནས་བསྐྱུར་འཇོག་པ་མ་ཡིན་པར། འདི་དག་གི་སྐབས་སུ་ཡང་བཤེས་གཉེན་བསྟེན་ཚུལ་གོང་ནས་གོང་དུ་ཇེ་རྒྱས་སུ་གཏོང་དགོས་པ་གོ་བའི་ཆེད་ཡིན་པས། དེའི་དམིགས་རྣམ་གྱི་རྩི་མ་ཡལ་བའི་མུ་ནས་འདི་སྙམ་དུ། ག་རེ་ཆོས་སྒྲུབ་པ་ལ་ཁོམ་པས་ན་དལ་བ་དང། དེའི་མཐུན་རྐྱེན་ཚང་བས་འབྱོར་པ་སྟེ། དལ་འབྱོར་གྱི་ཆོས་བཅོ་བརྒྱད་དང་ལྡན་པའི་རྟེན་བཟང་པོ་འདི་འདྲ་ཐོབ་པ་ཡ་མཚན་ཆེ། བདག་ད་ལྟར་དམྱལ་བར་མ་སྐྱེས་པ་ཡང་བླ་མའི་བཀའ་དྲིན་ཡིན། གལ་ཏེ་དམྱལ་བར་སྐྱེ་ཡོད་ན་ལྕགས་ཀྱི་སླ་ང་དམར་པོའི་ནང་དུ་སྲིན་འབུ་

― GTD003_Page_0412 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷུང་བ་ལྟར་སྡུག་བསྔལ་གྱི་ཚོར་བ་དང་འཇིགས་སྐྲག་ཁོ་ན་མངོན་དུ་གྱུར་ཏེ། མཛོད་ལས། དམྱལ་སེམས་ལུང་མ་བསྟན་དུ་བཤད་པ་ལྟར། དགེ་སྡིག་གི་བློ་གང་ཡང་མངོན་དུ་འགྱུར་བའི་སྐབས་མེད་པ་ལ། ད་ལྟ་བདག་དམྱལ་བ་ཡི་དྭགས་སོགས་མི་ཁོམ་པ་བརྒྱད་གང་དུ་ཡང་མ་སྐྱེས་པར་བླང་དོར་འབྱེད་ནུས་ཤིང། ཆོས་སྒྲུབ་པ་ལ་རང་དབང་བྱུང་བ་འདི་བླ་མའི་ཐུགས་རྗེ་ཁོ་ན་ཡིན་སྙམ་དུ་བསམ། དེ་ལ་མི་ཁོམ་པ་བརྒྱད་ནི། དམྱལ་བ་ཡི་དྭགས་དུད་འགྲོ་ལྷ་ཚེ་རིང་པོ་སྟེ། མི་མ་ཡིན་པའི་མི་ཁོམ་པ་བཞི་དང། མིའི་མི་ཁོམ་པ་བཞི་སྟེ་བརྒྱད་ཡིན་ལ། དེ་ཡང་ལམ་རིམ་དུ་དུད་འགྲོ་སྔར་གསུངས་པ་ནི་ཆོས་སྒྲུབ་པ་ལ་ཡི་དྭགས་ལས་ཀྱང་དུད་འགྲོ་གླེན་ལྐུག་སྣོད་དུ་མི་རུང་བའི་རྒྱུ་མཚན་གྱིས་ཡིན་པས། ཁ་ཅིག་དཔེ་མ་དག་ཟེར་བ་མི་འཐད་དེ་སའི་དངོས་གཞིའི་དགོངས་པ་ཡིན་ནོ། །དེ་ཡང་དལ་བ་ཞེས་པ་སྡོད་ཁོམ་པ་ཙམ་ལ་ཟེར་བ་མིན་མགར་བ་ཤི་བའི་ལག་ཆ་དགོས་པ་མེད་པ་ལྟར་རམ། སོག་མའི་ཁྲེས་པོའི་སྡོམ་ཐག་ཆད་ན་ཕྱོགས་ཐམས་ཅད་དུ་འཐོར་འགྲོ་བ་ལྟར་ཚེ་འདིའི་སྣང་ཤས་ཀྱི་འཆིང་ཐག་ཆད་ནས་གང་ལ་ཡང་མི་ཆགས་པར་སྐྱོ་ཆམ་མེ་ཕྱི་མ་ཕན་ཆད་ཀྱི་དོན་བསམ་རྒྱུ་མ་བྱུང་ན་མདོ་ལས་བཤད་པའི་མི་ཁོམ་པ་དགུ་པ་ཡིན་པས། རང་གིས་རང་མི་ཁོམ་པའི་གྲལ་དུ་མ་བཅུག་པ་དགོས་ཏེ་སྤྱན་སྔ་བློ་གྲོས་རྒྱལ་མཚན་གྱིས། ངས་སྟན་ཆུང་འབོལ་བདེའི་སྟེང་དུ་ཨོམ་ཚུགས་བྱས་ནས་ཁྲེལ་རྒོད་བྱེད་པ་ཡིན། ཡར་མདུར་མདུར། མར་མདུར་མདུར། དགོས་པ་ཅི་ཡོད་གསུངས་ཤིང། པཎ་ཆེན་བློ་བཟང་ཆོས་ཀྱི་རྒྱལ་མཚན་འབྲས་སྤུངས་སུ་བཞུགས་སྐབས་མི་མང་པོས་འགྲོ་འདུག་སྣ་

― GTD003_Page_0413 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་བྱེད་པ་གཟིགས་ནས། འདི་སྐད་ཅེས། གནས་བཟང་པོ་དགའ་ལྡན་ལྷ་ཡུལ་ཡོད། །ཟས་ཞིམ་པོ་ལྷ་ཡི་བདུད་རྩི་ཡོད། །གྲོགས་བཟང་པོ་ལྷ་དང་བླ་མ་ཡོད། །ཆོས་རྣམ་དག་བྱས་ན་ང་འདྲ་ཡོང། །གསུངས་ནས་ཐུགས་སྐྱོ་སྐྱོ་མཛད། དེས་ན་རང་རང་དལ་བ་ཞིག་འདོད་ན་ཕུ་ཆུང་བ་ལྟ་བུ་ཞིག་དགོས་ཏེ། ཕུ་ཆུང་བའི་ཞལ་ནས། ཁོ་མ་མགུ་བས་ཁོ་མི་ཡོང། ཁོ་མི་ཡོང་བས་བློ་བདེ་གསུངས་པ་ལྟར་གཞན་གྱིས་འཇིག་རྟེན་གྱི་བྱ་བ་སོགས་བཅོལ་ཀྱང་མ་བསྒྲུབས་པས་ཁོ་མ་མགུ་ནས་ཕྱིན་ཆད་འདྲིས་བཤེས་ཀྱི་འབྲེལ་ཆད་འགྲོ། དེ་འདྲ་དང་འདྲིས་འགྲོགས་མེད་པས། རང་གཅིག་པུ་བྱ་བ་ཉུང་ཞིང་བློ་བདེ་འབོལ་ལེ་དགེ་སྦྱོར་བྱེད་རྒྱུ་བྱུང་ན་དལ་འབྱོར་ཐོབ་པ་ཡིན་པས་དལ་འབྱོར་ཡང་ལས་སླ་བོ་མེད། རང་རང་གིས་ཐོབ་ཡོད་མེད་ལེགས་པར་དཔྱད་དགོས། འབྱོར་པ་བཅུ་ནི་ཉན་ས་ལས། དེ་ལ་བདག་གི་འབྱོར་བ་གང་ཞེ་ན། མིར་གྱུར་པ་དང། ཞེས་པ་ནས། གཞན་གྱི་ཕྱིར་རྗེས་སུ་སྙིང་བརྩེ་བར་བྱེད་པའོ། །ཞེས་འབྱོར་བ་བཅུ་གསུངས་པ་ནི། སྟོན་པ་ཞལ་བཞུགས་དུས་ཀྱི་དབང་དུ་བྱས་པ་ཡིན་ལ། སྤྱིར་བཏང་གི་བཅུ་ནི་རྗེས་མཐུན་པ་ཡིན་ཞིང། དེ་ཡང་རང་འབྱོར་གཞན་འབྱོར་ལྔའོ། །འདི་དག་ལས་ཐ་མ་གཉིས་རྟོགས་དཀའ་བས་དེའི་ཚུལ་ནི། དེ་རྗེས་འཇུག་ཅེས་པ་དམ་པ་གོང་མ་འདི་དང་འདིས་འདི་ལྟར་ཉམས་སུ་བླངས་པས་ཡོན་ཏན་འདི་ལྟ་བུ་ཐོབ་ཅེས་གཞན་མིག་ལྟོས་བྱེད་པའམ། དཔེར་བྱེད་རྒྱུ་ཡོད་པ་དང། གཞན་ཕྱིར་སྙིང་བརྩེ་བ་སྦྱིན་བདག་སོགས་ཀྱིས་བརྩེ་བས་

― GTD003_Page_0414 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུན་རྐྱེན་དུས་སུ་བསྒྲུབ་པའོ། །གཉིས་པ་དོན་ཆེར་བསམ་པ་ནི། འདི་ལྟར་བདག་གི་ལུས་འདི་ལ་བརྟེན་ནས། ངན་སོང་ལས་གྲོལ་བའི་མངོན་མཐོའི་རྟེན་ཞིག་བསྒྲུབ་འདོད་ན་ཡང་དེའི་རྒྱུ་སྐྱེས་བུ་ཆུང་ངུའི་ལམ་གྱིས་བསྡུས་པའི་སྦྱིན་སོགས་ལས་སློབ་ནུས། ཐར་པ་བསྒྲུབ་འདོད་ན་ཡང་ཐར་པར་བགྲོད་པའི་ལམ་གྱི་གཙོ་བོ་བསླབ་པ་གསུམ་སོགས་འབྲིང་དང་ཐུན་མོང་བའི་ལམ་རྣམས་ཀྱང་བསྒྲུབ་ནུས་ལ། དེ་ལས་ལྷག་པ་གཞན་དོན་དུ་སངས་རྒྱས་བསྒྲུབ་པར་འདོད་ན་ཡང་སྙིགས་དུས་ཀྱི་ཚེ་ཐུང་གཅིག་ལ་བསྒྲུབ་ནུས་པར་འདུག །མདོར་ན་དལ་འབྱོར་གྱི་རྟེན་འདི་དོན་ཤིན་ཏུ་ཆེ་སྟེ། བྱང་ཆུབ་ལམ་གྱི་རིམ་པའི་ལུས་ཡོངས་སུ་རྫོགས་པ་རྟེན་འདི་ལ་འགྲུབ་ནུས་པར་འདུག་སྙམ་དུ་བསམ་དགོས་ཤིང། དེའི་རྒྱུ་མཚན་གྱིས་བདེ་བ་ཅན་གྱི་བྱང་སེམས་རྣམས་ཀྱང་ཞིང་འདིར་སྐྱེ་བར་སྨོན་ལམ་འདེབས་པ་ཡིན། དེར་མ་ཟད་རྟེན་འདི་ལ་དགེ་སྡིག་གང་བྱས་ཀྱང་སྟོབས་ཆེ་ཞིང་ཡར་འགྲོ་མར་འགྲོའི་སོ་མཚམས་ཡིན། དཔེར་ན་འཕན་ཡུལ་གྱི་བྲོ་པ་འགའ་ཞིག་བྲོ་འཁྲབ་ཏུ་སོང་བར་ལྟད་མོ་བ་མང་པོ་འདུས་པའི་ཚེ་བྲོ་འཁྲབ་པའི་སྔོན་དུ་འཐེན་རྒྱུ་ཞིག་ཡོད་པ་མ་ཡོང་བས། དེའི་ཚབ་ཡག་ན་ཡག་གྱི་གཞི། ཉེས་ན་ཉེས་ཀྱི་གཞི། ཡག་གཞི་ཉེས་གཞི་ཁྱོད་ལ་ཕྱག་འཚལ་ལོ་ཞེས་གཞས་འཐེན་པ། བཀའ་གདམས་པ་ཞིག་གིས་གསན་ནས། དེ་རང་བདེན་ང་ཚོའི་རྟེན་ཡག་གཞི་ཉེས་གཞི་རང་ཡིན་པས། ཚིག་དེ་མ་བརྗེད་པ་གྱིས་གསུངས་པ་ལྟར། བདེ་འགྲོ་ངན་འགྲོ་གཉིས་ཀྱི་སོ་མཚམས་ལེགས་ཉེས་གཉིས་ཀྱི་གཞི་མ་

― GTD003_Page_0415 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པས་རྡོག་སྣ་མ་འདྲེད་པ་གལ་ཆེ། གསུམ་པ་རྙེད་དཀའ་བར་བསམ་པ་ལ། རྒྱུའི་སྒོ་ནས་རྙེད་དཀའ་བ། ངོ་བོའི་སྒོ་ནས་རྙེད་དཀའ་བ། དཔེའི་སྒོ་ནས་རྙེད་དཀའ་ཚུལ་གསུམ་ལས། རྒྱུའི་སྒོ་ནས་རྙེད་དཀའ་ཚུལ་ནི། དལ་འབྱོར་ཚང་བའི་རྟེན་ལྟ་ཞོག །མི་ལུས་ཙམ་ཐོབ་པ་ལ་ཡང་ཚུལ་ཁྲིམས་བསྲུང་དགོས་ན་འགྲོ་བ་ཕལ་ཆེར་མི་དགེ་བ་བཅུ་ལ་ཤས་ཆེར་སྤྱོད་པས། བདེ་འགྲོ་ཙམ་ཡང་ཐོབ་དཀའ་སྟེ། སྔོན་ཇོ་བོ་བོད་དུ་ཕེབས་སྐབས་ཉེས་བྱས་གཅིག་བྱུང་བ་དེ་མ་ཐག་ང་ལ་བྱ་བ་ཆེན་པོ་ཞིག་བྱུང་ཞེས་ཚོང་པ་རྣམས་བསྐོར་ཏེ་འབྲལ་མེད་མཆོད་རྟེན་གྱི་དྲུང་དུ་བཤགས་པ་བྱས་ནས་ད་གཤེགས་ན་ཡོང། ངས་དེ་མ་བཤགས་པར་ཤི་ན་ང་ངན་འགྲོར་ལྟུང་བ་ཡིན་གསུངས་ཏེ། ཉེས་པ་བྱུང་ནས་སྔ་དྲོའི་ཡུན་ཙམ་ལ་ཡང་འགྲོགས་མ་མྱོང་བ་ཡིན་པས་དེ་འདྲ་ཞིག་ལ་འབད་དགོས། བརྒྱ་ལ་གོས་ཀྱང་སྣར་ཐང་པའི་དགེ་ཚུལ་ལྟར་སྡོམ་སེམས་དྲག་པོས་ཕྱིན་ཆད་དེ་ལས་གཏན་དུ་ལྡོག་པ་ཞིག་བྱེད་དགོས། དེའི་ལོ་རྒྱུས་ནི་ཁོང་གི་བླ་མ་འདུལ་ཁྲིམས་ལ་ཤིན་ཏུ་གཅེས་སྤྲས་ཆེས་པས་ཁོང་ལ་ཕྱི་དྲོའི་ཁ་ཟས་སོགས་མ་ཟ། ཞེས་ཡང་ཡང་གསུངས་ཀྱང། ཁོང་གིས་ཀྱང་བསྲུང་མ་ནུས་པར་སྦས་ནས་ཟ་བ་ལ་ལན་གཅིག་པག་རྫིའི་ཐོག་ཏུ་བླ་མ་ཕེབས་བྱུང་བས་ལྷ་བཤོས་ཤིག་བཅོས་པས་ཅང་མི་གསུངས་པར་ཕུགས་སུ་ཕེབས་སོང་བ་དང། ཅི་ཡིན་སྙམ་སྒོའི་གསེབ་ནས་བལྟས་པས་བླ་མ་བཤུམས་བཞིན་དུ་བཞུགས་པ་མཐོང་ནས། ངའི་དོན་དུ་བླ་མས་ཐུགས་

― GTD003_Page_0416 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྲལ་འདི་ཙམ་ཞིག་མཛད་པ་རེད། ད་ངས་བླ་མའི་བཀའ་བཞིན་དུ་བཅས་མཚམས་སྲོག་གི་ཕྱིར་ཡང་མི་འདའ་བ་ཞིག་མ་བྱས་ན་ཡོང་རྒྱུ་མ་རེད་དགོངས་ཏེ། དེ་ནས་བཟུང་སྟེ་ཚུལ་ཁྲིམས་མིག་འབྲས་བཞིན་དུ་བསྲུང་བ་སྣར་ཐང་པའི་དགེ་ཚུལ་ཞེས་ཚུལ་ཁྲིམས་རྣམ་པར་དག་པའི་དཔེ་ལ་བྱེད་པ་ཡིན། དེས་ན་དལ་འབྱོར་ཚང་བའི་རྟེན་རྣམ་པར་དག་པ་ཞིག་ཐོབ་པ་ལ་རྒྱུ་དེ་འདྲ་བ་ཞིག་དགོས་པ་ལ། རང་གིས་རང་ཕྱི་མ་བདེ་འགྲོ་ངན་འགྲོ་གང་དུ་སྐྱེ་ལུང་བསྟན་ཆོག་པ་ཡིན། ཁྱད་པར་རབ་ཏུ་བྱུང་བ་གསང་སྔགས་ཀྱི་སྡོམ་ལྡན་རྣམས་ཀྱིས་ལྷག་པར་ཡང་ཚུལ་ཁྲིམས་བསྲུང་བ་ལ་འབད་དགོས་ཏེ། དེས་ཐ་ན་ཉེས་བྱས་ཕྲ་མོ་ཞིག་ལ་ཁྱད་གསོད་བྱས་ན་ཡང་བདེ་གཤེགས་བཀའ་འདས་ཀྱི་རྩ་ལྟུང་འབྱུང་ལ། དེ་ལྟ་ཞོག །རང་ལ་ཐ་མལ་བའི་འདུ་ཤེས་ཀྱིས་ཟས་ཁམ་གཅིག་ཟོས་ན་སྦོམ་པོ་གཅིག་འབྱུང་ཞིང་སོ་ཐར་ཕམ་བཞི་ལས་སྔགས་ཀྱི་སྦོམ་པོ་གཅིག་ལྕི་བ་ཡིན། གནད་འདི་མ་གོ་བས་ཕྱི་དྲོ་ཨོཾ་ཨཱཿ ཧཱུཾ་གིས་བྱིན་གྱིས་བརླབས་ནས་ཟོས་ཆོག་ཟེར་ཡང། སངས་རྒྱས་ཀྱིས་ཨོཾ་ཨཱཿ ཧཱུཾ་མི་མཁྱེན་པ་ཡང་མ་ཡིན། དགེ་སློང་རྣམས་ལ་ཐུགས་རྗེ་ཆུང་ནས་མ་བསླབ་པ་ཡང་མ་རེད། ཡིན་ཀྱང་དེ་འདྲ་གནང་མི་འདུག་པས་དེ་དག་གི་རྗེས་སུ་མ་འབྲངས་པར་སྒོ་ཐམས་ཅད་ནས་ཚུལ་ཁྲིམས་གཙང་སང་ངེ་བ་ཞིག་བསྲུང་དགོས་ལ། འོན་ཀྱང་དེ་འདྲ་ཤིན་ཏུ་དཀོན་པར་སྣང་བས་རྒྱུ་དེ་ལ་དཔག་པས་འབྲས་བུ་བདེ་འགྲོ་ཐོབ་པ་ཤིན་ཏུ་དཀོན་པ་ཡིན། ངོ་བོའི་སྒོ་ནས་རྙེད་དཀའ་ཚུལ་ནི། ངན་འགྲོ་ལ་ལྟོས་ནས་བདེ་འགྲོ་ཙམ་ཐོབ་པ་ཡང།

― GTD003_Page_0417 ―

^{[མ་དཔེ་གཟིགས་ན་འདིར་གནོན།]}

[Full Size]

སྲིད་མཐའ་ཡིན། དེ་དག་སྒྲུབ་བྱེད་གཞན་མི་དགོས་མིག་གིས་བལྟས་པས་ཤེས་ཏེ། རྒྱལ་དབང་ལྔ་པ་ཆེན་པོས། དབྱར་དུས་ཀྱི་ཤིང་ཕུང་རེ་རེའི་སྟེང་ན་ཡང་སེམས་ཅན་གྱི་རིགས་འཛམ་བུ་གླིང་གི་ལྷ་མི་ལས་མང་གསུངས་ཤིང། རྟའི་སྦང་རེ་རེ་ལ་ཡང་སྲིན་བུ་ཇི་སྙེད་ཅིག་འདུག་པ་དེ་ཐམས་ཅད་དུད་འགྲོ་ཡིན། དེ་འདྲ་ལ་དཔག་ན་རང་གི་ངོ་བོའི་སྒོ་ནས་རྙེད་དཀའ་བར་འཆར་སླའོ། །དཔེའི་སྒོ་ནས་རྙེད་དཀའ་བ་ནི། དལ་འབྱོར་ཚང་བའི་རྟེན་འདི་ཉིན་མོའི་སྐར་མ་ལྟ་བུར་ཤིན་ཏུ་དཀོན་པ་ཡིན་ཏེ། དེ་ཡང་འདུལ་བ་ལུང་ནས་གསུངས་པ་ལྟར། རྒྱ་མཚོའི་གཏིང་དུ་རུས་སྦལ་ལོང་བ་ལོ་བརྒྱ་བརྒྱ་ནས་རྒྱ་མཚོའི་སྟེང་དུ་མགོ་ཏོག་ཙམ་བྱེད་པ་ཞིག་ཡོད་ལ། ཡང་རྒྱ་མཚོའི་ཁར་གསེར་གྱི་གཉའ་ཤིང་བུ་ག་གཅིག་པ་རླུང་གིས་བདས་ཏེ་ལོ་བརྒྱ་རེ་ལ་ཤར་ནས་ལྷོར་འགྲོ་ཡང་ལོ་བརྒྱ་རེ་ལྷོ་ནས་བྱང་དུ་འགྲོ་བ་ཞིག་ཡོད་པ་དེའི་བུ་ག་དེར་རུས་སྦལ་གྱི་མགྲིན་པ་ཆུད་པ་ནི་ཤིན་ཏུ་དཀོན་ཏེ། གཉའ་ཤིང་དེ་རྟག་ཏུ་ས་དེར་ཡོད་ན་རུང་ཡང་དེ་ནི་མི་སྡོད། རུས་སྦལ་དེ་རྒྱུན་པར་སྟེང་དུ་འདོན་པ་ཞིག་བྱུང་ན་ཕྲད་མོད་དེ། དེ་ཡང་ལོ་བརྒྱ་རེ་ནས་མིན་པ་མི་འདོན། མིག་ཡོད་ན་གཉའ་ཤིང་དེར་འོང་བས་ཐོན་ཆོག་ཀྱང་མིག་མེད་པས། དེ་གཉིས་ཕྲད་པ་མི་སྲིད་པའི་ཚོད་ཙམ་ཡིན་ན་དལ་འབྱོར་ཐོབ་པ་ཡང་དེ་དང་འདྲ། དེས་ན་རྙེད་པར་དཀའ་ཞིང་རྙེད་ན་དོན་ཆེ་བའི་དལ་འབྱོར་ཚང་བའི་རྟེན་བཟང་པོ་ལན་གཅིག་ཐོབ་པའི་དུས་འདིར་ཆུད་ཟོས་ལ་གཏོང་མི་རུང་སྟེ། པོ་ཏོའི་དཔེ་ཆོས་ལས། སྲིན་བུས་ཕྱག་འཚལ་རྐྱང་ལ་ཞོན། །གཙང་བའི་ཉ་དང་

― GTD003_Page_0418 ―

^{[མ་དཔེ་གཟིགས་ན་འདིར་གནོན།]}

[Full Size]

སྣེ་འུ་ཟན། །གསུངས་པ་ལྟར། སྔོན་ལོ་ཉེས་བྱུང་བའི་ཚེ་དུད་ཚང་གཅིག་གིས་སྣེའུ་ཟན་བྱས་ནས་ཟོས་པས། བྱིས་པ་ཞིག་གིས་རང་གི་སྐལ་བ་རྒྱབ་ཏུ་བཞག་ནས། ཕའི་སྐལ་བ་ལས་ཟོས་རྒྱབ་ཀྱི་མར་ཟན་ཁྱིས་ཁྱེར་བས་ངུས་པས་ན། མ་ངུ་བྱས་པས། རྒྱ་མ་ལན་གཅིག་གི་སྣེའུ་ཟན་ཁྱིས་ཁྱེར་ན་ངུ་དྲག་ཟེར་བའི་དཔེ་བཞིན་རང་རེས་ཀྱང་རྒྱ་མ་ལན་གཅིག་གི་རྟེན་བཟང་འདི་ཆུད་ཟོས་ལ་སོང་ན་ཕངས་པས་སྙིང་པོ་ཞིག་ལེན་དགོས། སྙིང་པོ་ལེན་ཚུལ་ཡང་བླ་མ་སངས་རྒྱས་འབྲལ་མེད་དུ་བསྟེན་པ་ནས་བཟུང་ཐེག་པ་མཆོག་གི་གདམས་པའི་སྙིང་པོ་བྱང་ཆུབ་ལམ་གྱི་རིམ་པའི་ལུས་ཆ་ཚང་བ་ཞིག་ཉམས་སུ་བླང་སྟེ་ཚེ་གཅིག་ཉིད་ལ་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་དུ་བསམ། དེ་ལྟར་དལ་འབྱོར་དོན་ཆེ་ཞིང་རྙེད་དཀའ་བས་སྙིང་པོ་ལེན་འདོད་སྐྱེས་ཏེ་དལ་འབྱོར་གྱི་ཆོས་སྐོར་ཡག་པོ་རང་གཅིག་ཤེས་པ་ལ་ཉན་ས་ལས་གསུངས་པ་ལྟར་བདེ་བ་འདོད་ན་ཆོས་ལ་རག་ལས་པས་སྒྲུབ་དགོས་པ་དང། ཕྱི་ནང་གི་རྐྱེན་ཚང་བས་བསྒྲུབ་ནུས་པ་དང། ཕྱི་མར་དལ་འབྱོར་རྙེད་དཀའ་བས་ཚེ་འདིར་བསྒྲུབ་དགོས་པ་དང། ནམ་འཆི་ལ་ངེས་པ་མེད་པས་ད་ལྟ་ཉིད་དུ་བསྒྲུབ་དགོས་པ་བཞི་ལ་བློ་ལེགས་པར་སྦྱངས་དགོས། དེ་ལྟར་མ་བསམས་ན་ང་ཚོ་ཁ་ནས་ཆོས་ཟེར་ཡང་སྦྱིན་བདག་ཅིག་གིས་ཁྱེད་དེ་རིང་ཕེབས་ན་གསེར་སྲང་ལྔ་སྟེར་ཟེར་བྱུང་ན། བླ་མའི་ཆོས་ཉན་གྱི་གྲལ་ཡོད་ཀྱང་ཐབས་ཀྱིས་བཤོལ་ཏེ་ཆོས་གྲྭ་ནས་ཐོན་འགྲོ་བ་ཐེ་ཚོམ་རང་མེད། སྔོན་ཇོ་བོ་གཤེགས་ནས་སྐུ་གདུང་བཞེངས་པའི་ཨ་ཙ་ར་མ་ནུ་ཟེར་བ་ཞིག་ཡོད་པ་ཚེས་བཅོ་ལྔའི་ཟླ་བ་ལ་

― GTD003_Page_0419 ―

^{[མ་དཔེ་གཟིགས་ན་འདིར་གནོན།]}

[Full Size]

བལྟས་ནས་ངུས་པས། དགེ་བཤེས་ཤིག་གིས་ཁྱོད་ཅི་ལ་ངུས་དྲིས་པས། ང་ཚོའི་ཡུལ་ན་ད་ལྟ་ཀ་ལི་འཁྲབ་ནས་སྐྱིད་པོ་རང་ཡོད་ཟེར། དགེ་བཤེས་དེས་ཁྱོད་སངས་རྒྱ་བ་དང། བལ་ཡུལ་དུ་སླེབ་པ་གཉིས་གང་འདམ་བྱས་པས། འདམ་རྒྱུ་རང་བྱུང་ན་བལ་ཡུལ་དུ་སླེབ་པ་རང་འདམ་དྲག །དེ་ལ་བཀའ་གདམས་པ་རྣམས་ཀྱིས་ང་ཚོ་ཁས་གསང་མ་གསང་གི་ཁྱད་མ་གཏོགས། བདེན་པ་མ་ནུ་རང་བདེན་ཏེ་ང་ཚོ་བཟང་རྫུས་སྒྲིབ་པ་ཡིན་གསུངས། དེས་ན་ཐོག་མར་དལ་འབྱོར་གྱི་ཆོས་སྐོར་ལ་མྱོང་བ་ཐོན་པ་ཞིག་བྱུང་ན་ལྷག་མ་རྣམས་དཀའ་ལས་མེད་པར་སྐྱེ་སྟེ། དོལ་པོ་བས་དལ་འབྱོར་ལོ་གསུམ་ལ་བསྒོམ་པས་དེ་ནས་ཐམས་ཅད་རང་ཤུགས་ཀྱིས་ཡོང་བ་དང། སྒྲུབ་ཁང་པ་ལན་གཅིག་སྦྲང་མ་ཞིག་རེ་རེ་འཕུར་ཡང་ས་ལ་ལྷུང་དེ་ལྟར་བྱེད་པ་གཟིགས་ནས་ཅི་ཡིན་དགོངས་ཏེ་བརྟགས་པས་སྦྲང་མའི་ལྟོ་བར་གྲོག་མ་འབྱར་བ་མཁྱེན་ནས། སྦྲང་མ་ལ་མིག་ཡང་ཡོད། གཤོག་པ་ཡང་ཡོད། འདི་ལ་དེ་གང་མེད་དེ་འོན་ཀྱང་ལས་ཀྱི་དབང་གིས་འདི་འདིས་ཁར་ཆུད་པ་རེད། ལས་འབྲས་བསླུ་བ་མེད་པ་བྱ་བ་འདི་འདྲ་ཞིག་ཡིན་པར་འདུག་དགོངས་ནས་དེ་མ་ཐག་ལམ་རིམ་གྱི་རྟོགས་པ་ཐམས་ཅད་འཁྲུངས་པ་ལྟ་བུ་ཡིན་པས་སྐྱེ་རན་ན་སྐྱེ་བ་ལ་དཀའ་ལས་མེད། དང་པོར་འདི་ལ་མ་སྦྱངས་པར་ཧམ་པ་བྱས་ཏེ་གསང་སྔགས་ལྟ་བུ་ལ་འཇུག་མི་རུང་བས་འཇུག་སྒོ་འདི་ནས་ཡར་འཁྲིད་དགོས་ཏེ། པོ་ཏོ་བས། ནད་གཡོག་བྱེད་ལུགས་ལ་བལྟས་ནས་ཆོས་བྱེད་ལུགས་གོ །ནད་པ་ལ་ནད་ལོག་བརྒྱབ་དོགས་ནས་ཟས་རིམ་གྱིས་

― GTD003_Page_0420 ―

^{[མ་དཔེ་གཟིགས་ན་འདིར་གནོན།]}

[Full Size]

སྟེར་བ་བཞིན་དུ་ང་ཚོ་ལ་ནད་ལོག་བརྒྱབ་དོགས་ནས་འབྲོམ་སྟོན་གྱིས་རིམ་གྱིས་བསླབ་པ་རེད་གསུངས་པ་དང། ཁ་རག་སྒོམ་ཆུང་བས། བྱ་ཚང་བྱེད་ལུགས་ལ་བལྟས་ནས་པོ་ཏོ་བས་ང་ཚོ་ལ་ལམ་རིམ་རིམ་གྱིས་གསུངས་པ་དེ་རང་བདེན་པར་འདུག་གསུངས་ཏེ། ཁོང་གིས་གཟིགས་ཙ་ན་བྱེའུ་ཞིག་གིས་འཇིམ་པའི་ར་བ་བཟོ་བ་ལ་དཀའ་ལས་ཆེ་བར་འདུག་དགོངས་ནས་ཁོ་རང་གིས་འཇིམ་པ་ཆེན་པོ་ཞིག་གླན་པས་དེ་མ་ཐག་ལྷུང་སོང་བ་དང། ག་རེ་འདོད་དབང་དུ་མི་འདུག །ཐོག་མར་རན་པ་གླན། དེ་ནས་ཆུང་རིམ་ནས་བརྩིག་དགོས་པར་འདུག །འདི་ལ་བལྟས་ན་བྱང་ཆུབ་ལམ་རིམ་ལ་ཐོག་མར་སེམས་རྒྱུད་འདི་བརླན་དགོས་པར་གདའ་གསུངས་པ་ལྟར་འདི་ཅིས་ཀྱང་སྔོན་དུ་འགྲོ་དགོས་ལ། དེར་མ་ཟད་སྔགས་ཀྱི་རྟོགས་པ་མཐོན་པོའི་ཚེ་ཡང་དལ་འབྱོར་རྙེད་དཀའ་བསམ་དགོས་པར་འདུས་པ་ལུགས་གཉིས་ཀྱི་ནང་ནས་ཡེ་ཤེས་ཞབས་ལུགས་ཀྱི་སྒྲུབ་ཐབས་ཀུན་བཟང་དུ་གསུངས་ཤིང། ཡིག་མཁན་གྱི་རིགས་ལས་འཁྲུངས་པའི་རྣལ་འབྱོར་པ་ཆེན་པོ་ལཱུ་ཨི་པ་ལ། ཡང་རྡོ་རྗེ་རྣལ་འབྱོར་མས། རྐང་པ་བརྐྱང་བ་སྤངས་ནས་ནི། །འཁོར་བའི་མངག་གཞུག་དོར་ནས་སུ། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསམ་པར་བྱ། །ཞེས་བསྐུལ་བ་ལྟ་བུའོ། །གསུམ་པ་མཇུག་ཏུ་ཇི་ལྟར་བྱ་བ་ནི་གོང་བཞིན་ནོ། །གཉིས་པ་ཐུན་མཚམས་སུ་ཇི་ལྟར་བྱ་བ་ནི་ཡང་སྔར་བཞིན་ལ། ཁྱད་པར་དུ་དལ་འབྱོར་གྱི་ཆོས་སྐོར་སྟོན་པའི་གསུང་རབ་རྣམས་བལྟ་ཞིང། དལ་འབྱོར་ཐོབ་པ་འདི་ནི་ཤིན་ཏུ་དཀའ་ཞེས་འཕྲེང་བ་ལ་བགྲངས་ནས་འདོན་དགོས་ཏེ།

― GTD003_Page_0421 ―

^{[མ་དཔེ་གཟིགས་ན་འདིར་གནོན།]}

[Full Size]

དཔེར་ན་སྔོན་རབས་ཆད་ཅིག་རང་ལ་བུ་མེད་པས་སེམས་སྡུག་དྲགས་ནས་ཁང་སྟེང་དུ་ཐོན་ཏེ། ངའི་བུ་ངའི་བུ་ཞེས་བོས་པས། གྲོང་པ་རྣམས་ཀྱིས་ཁྱོད་ལ་བུ་མེད་པ་ལ་སུ་འབོད་པ་ཡིན་ཞེས་པས། ང་ལ་བུ་མེད་པས་ཀ་འབོད་པ་ཡིན་ཟེར། དེ་བཞིན་དུ་གྲུབ་ཆེན་གྱི་གཞུང་འདི་དག་ཡང་ཡང་བརྗོད་ན་སེམས་ལ་ཕན་ཁྱད་ཆེའོ། །༈ གཉིས་པ་སྙིང་པོ་ཇི་ལྟར་ལེན་པའི་ཚུལ་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བའོ། །དང་པོ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་ནི། སྐྱབས་གནས་ཀུན་འདུས་ཞེས་སོགས་ཕལ་ཆེར་སྔར་ལྟར་རོ། །གཉིས་པ་དངོས་གཞི་ལ་བཞི། འཆི་བ་མི་རྟག་པ་བསམ་པ། ངན་འགྲོའི་སྡུག་བསྔལ་བསམ་པ། དཀོན་མཆོག་གསུམ་ལ་སྐྱབས་འགྲོ་སྦྱང་བ། ལས་འབྲས་ལ་ཡིད་ཆེས་ཀྱི་དད་པ་བསྐྱེད་པའོ། །དང་པོ་ནི། སྤྱི་བོར་བླ་མ་ལྷ་སྒོམ་བཞིན་པའི་ངང་ནས་ཞེས་སོགས་གསུངས་ཏེ། སྔར་བཤད་པའི་བཤེས་གཉེན་བསྟེན་ཚུལ་དང། དལ་འབྱོར་གྱི་ཆོས་སྐོར་ལམ་སྤྱིའི་ཁོག་ཀྱང་ཡིན་ལ། ལམ་གྱི་རྩ་བ་ཡང་ཡིན། འགོ་ཡང་ཡིན་པས། སྐྱེས་བུ་གསུམ་གྱི་ལམ་གྱི་རིམ་པ་དངོས་གཞིའི་མཚམས་འདི་ནས་ཚུགས་པ་ཡིན། འདིར་སྐྱེས་བུ་གསུམ་གྱི་ཐ་སྙད་ནི།

― GTD003_Page_0422 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་པར་གཏན་ལ་དབབ་པ། བསྡུ་བ། བྱང་ས། མཛོད་རང་འགྲེལ་སོགས་ལས་གསུངས་པ་ལྟར། ཇོ་བོའི་ལམ་སྒྲོན་ལས། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། །བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །ཆུང་ངུ་འབྲིང་དང་མཆོག་གྱུར་པའི། །སྐྱེས་བུ་གསུམ་དུ་ཤེས་པར་བྱ། །དེ་དག་མཚན་ཉིད་རབ་གསལ་བའི། །སོ་སོའི་དབྱེ་བས་བྲི་བར་བྱ། །ཞེས་གསལ་བར་གསུངས་ལ། སྤྱིར་གང་ཟག་ཅེས་པ་དང། སྐྱེས་བུ་ཞེས་པ་ཁྱད་མེད་ཀྱང། འདིར་གང་ཟག་གསུམ་མི་ཟེར་བར་སྐྱེས་བུ་གསུམ་ཟེར་བའི་རྒྱུ་མཚན་ནི། སྐྱེས་བུའི་སྐད་དོད་པུ་རུ་ཥ་ཞེས་པ་ཐད་བསྒྱུར་བྱས་ན་ནུས་ལྡན་ལ་འཇུག་པས། བློའི་ནུས་པ་ཆུང་འབྲིང་ཆེ་གསུམ་གྱི་སྒོ་ནས་བཞག་པར་ཤེས་པའི་ཆེད་ཡིན་ཏེ། འདི་གསུམ་ལ་ཤེས་རབ་ཆུང་འབྲིང་ཆེ་གསུམ་གྱི་ཐ་སྙད་ཀྱང་ཡོད་དོ། །འདིར་པུ་རུ་ཥ་སྐྱེས་བུ་ལ་བསྒྱུར་བ་དོན་འགྱུར་ཡིན་ཏེ། དཔེར་ན་སུམ་རྟགས་སོགས་སུ་ཡི་གེ་ཕོ་མོ་མ་ནིང་གི་རྟགས་བཤད་པའི་ཚེ་པུ་ལིངྒ་ཞེས་པུ་སྐྱེས་པ་ལིངྒ་རྟགས་ལ་འཇུག་པ་ལྟ་བུ་ཡིན། འདིར་ཐུན་མོང་བ་ཞེས་སྨོས་པའང་ཆུང་འབྲིང་དངོས་ལ་འཁྲིད་མི་རུང་བ་གོ་ཆེད་ཡིན། དེ་ལ་དང་པོ་འཆི་བ་མི་རྟག་པ་བསྒོམ་པ་ལ་ཡང། འཆི་བ་མི་རྟག་པ་བསྒོམ་པའི་བློ་ངོས་བཟུང་བ། དེ་མ་བསྒོམས་པའི་ཉེས་དམིགས། བསྒོམ་པའི་ཕན་ཡོན། ཇི་ལྟར་བསྒོམ་པའི་ཚུལ་དངོས་དང་བཞི། དང་པོ་ནི། འགའ་ཞིག་རང་གི་བུ་ལ་སོགས་པ་རྣམས་ཀྱི་མགོ་མི་ཐོན་དོགས་ཤིང་། རང་ཡང་གཉེན་བཤེས་ཟས་ནོར་སོགས་དང་འབྲལ་གྱིས་དོགས་ནས་སྐྲག་པ་དེ་འདྲ་ཆོས་ལ་

― GTD003_Page_0423 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་མ་སྦྱངས་པའི་སྐྲག་ལུགས་ཡིན་པས་ཨ་བོ་སོགས་ལའང་ཡོད་པ་དེ་བསྒོམ་ཀྱང་སྐྱོན་ཡིན། འོ་ན་ག་འདྲ་ཞིག་བསྒོམ་དགོས་ན། ཆོས་དང་མཐུན་པ་ནི་ཕྱི་ནང་གི་རྟེན་འབྲེལ་ལེགས་ཚོགས་ཐམས་ཅད་ཚང་བའི་དལ་འབྱོར་གྱི་ལུས་བཟང་པོ་འདི་ལ་ཕྱི་མ་ཕན་ཆད་ཀྱི་དོན་ཞིག་བསྒྲུབ་སྟེ། ངན་འགྲོའི་སྒོ་ཁེག་པ་ཞིག་མ་བྱས་པར་ལུས་འདི་ཤོར་སོང་ན་ཅི་དྲག་སྙམ་པ་ནི་འཆི་བ་དྲན་ལུགས་ཡིན་པས། ངོ་ཤེས་དགོས་པས་འདི་དབུར་རྙེད་པར་དཀའ་ཞིང། རྙེད་ན་དོན་ཆེ་བའི་དལ་འབྱོར་གྱི་རྟེན་འདི་མྱུར་དུ་འཇིག་སྟེ་ཞེས་དལ་འབྱོར་སྦྱར་བའང་འཆི་བ་མི་རྟག་པ་བསམ་ལུགས་ཤེས་པའི་ཆེད་དུའོ། །གཉིས་པ་མ་བསམས་པའི་ཉེས་དམིགས་ནི། འཆི་བ་མ་བསམས་པའི་དབང་གིས་ཀོ་རློན་གྱི་ཞྭ་རིམ་གྱིས་དམ་དུ་འགྲོ་བ་ལྟར། ཚེ་འདིའི་སྣང་ཤས་དམ་དུ་སོང་ནས་སྡོད་རྒྱུའི་འཕེན་པ་དེ་རང་སྐྱེས་ཏེ། གནས་བཟང་པོ་དང་ཟས་གོས་གྲོགས་མགོ་འདྲེན་སོགས་མང་པོ་ཞིག་ཚོལ་བ་ཡིན། དཔེར་ན་ཁམས་ཀྱི་ཚོང་པ་ཞིག་གིས་ཡང་ལྷ་སར་ཡུན་རིང་སྡོད་རྩིས་ཡོད་ན་དེ་ལུགས་ཀྱི་གྲ་མང་པོ་ཞིག་བསྒྲིགས་པ་དང་འདྲ། དེ་ལྟ་བུའི་རྟག་འཛིན་དེའི་དབང་གིས་དགོན་གཞི་རྙེད་པ་སོགས་ལ་བརྟེན་ནས། བླ་མ་དང་དམ་ཚིག་ཉམས་པ་སོགས་ཀྱང་འབྱུང་ཞིང། གནས་གང་དུ་བསྡད་ཀྱང་ཚེར་དོང་དུ་བསྡད་པ་ལྟར་གཡས་ནས་དགྲ། གཡོན་ནས་དགྲ་ལྡང་སྟེ། གྲྭ་རྐྱང་ཚོ་ལ་ཡང་ཁམས་ཚན་དགེ་རྒན་གྱིས་འདི་བྱས་གཞན་ཞིག་གིས་ཅིག་བྱས་ཟེར་ནས་མི་བདེ་བ་སྣ་ཚོགས་ཤིག་ཡོང་བ་འདི་རང་གི་ངོས་ནས་

― GTD003_Page_0424 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུན་རིང་སྡོད་རྩིས་ཀྱི་གྲ་མང་པོ་ཞིག་བསྒྲིག་དགོས་པས་ལན་པ་ཡིན། དཔེར་ན་སྔོན་རྒན་མོ་ཞེ་ངན་མ་གྲོང་གི་མི་ཐམས་ཅད་དང་འཐབ་པ་ཞིག་ཡོད་པ་ཐམས་ཅད་དང་འཐབ་འཐབ་ནས་གྲོང་དེ་ལས་ཕྱིར་ཐོན་ཏེ། སྡུག་གྲོང་བརླག་གྲོང་འདི་ན་ང་ལ་མ་འཐབ་པ་སུ་ཡོད་ཟེར་ཏེ་དོན་ལ་རང་གི་སྐྱོན་བསྒྲགས་པ་ལྟ་བུར་ཡིན་པས། རྟག་འཛིན་འདི་ཅིས་ཀྱང་གཞོམ་དགོས་ཏེ། མདོ་དྲན་པ་ཉེར་གཞག་ལས་ཀྱང་། ཕྱིན་ཅི་ལོག་བཞིའི་ནང་ནས་རྟག་འཛིན་འདིས་སྡུག་ཏུ་བཅུག་པར་གསུངས་པའི་ཕྱིར་རོ། །གསུམ་པ་འཆི་བ་བསམ་པའི་ཕན་ཡོན་ནི། དེ་ལྟར་བསམ་པས་འཇིག་རྟེན་འདིའི་བྱ་བྱེད་ཐམས་ཅད་སྙིང་པོ་མེད་པས། བསླུ་བྲིད་འབའ་ཞིག་ཏུ་མཐོང་ནས་དགོས་དགོས་མང་པོ་མེད་པར་ལྷོད་ཤིག་སྟེ་འགྲོ་བ་ནི། རྗེ་མི་ལས། ཚེ་ཐུང་ནམ་འཆི་ཆ་མེད་ལ། །དབྱངས་གདངས་སྙན་པོ་བསླབ་ལོང་མེད། །གསུངས་པ་ལྟ་བུ་ཞིག་ཡོང་སྟེ། དཔེར་ན་སང་འགྲོ་ཐག་ཆོད་པའི་ཚོང་པ་ཞིག་ལ་གནས་བཟང་ངན་སོགས་ལ་ལྟོས་པ་མེད་པར་དེ་ན་འ་འུར་ཅི་ཡོད་ཀྱང་མི་ལྟ་ཞིང་བྲེལ་ཚུབ་ཚུབ་འགྲོ་བ་ལྟ་བུ་ཡིན། བཞི་པ་དེ་ཇི་ལྟར་བསྒོམ་པ་ནི། ངེས་པར་འཆི་བ་སོགས་རྩ་བ་གསུམ་དང། རྒྱུ་མཚན་དགུ། ཐག་བཅད་པ་གསུམ་གྱི་སྒོ་ནས་བསྒོམ་དགོས་པས། དང་པོ་ངེས་པར་འཆི་བ་ཡང་རྒྱུ་མཚན་གསུམ་སྟེ། དང་པོ་ནི། འཆི་བ་དེ་རྐྱེན་གང་གིས་ཀྱང་བཟློག་པར་མི་ནུས་ཏེ། རི་རབ་དང་རྒྱ་མཚོ་སོགས་སུ་བྲོས་པས་ཀྱང་མི་ཐར། འཁོར་འབངས་ལོངས་སྤྱོད་སོགས་ཀྱིས་བཟློག་ཐབས་ཤིག་ཡོད་ན་འཁོར་བསྒྱུར་རྣམས་འཆི་

― GTD003_Page_0425 ―

^{[མ་དཔེ་གཟིགས་ན་འདིར་གནོན།]}

[Full Size]

བ་མི་ཡོང་བ་དེ་དག་ཀྱང་ཚེ་འཕོས་ཤིང། དེར་མ་ཟད་དྲང་སྲོང་རྫུ་འཕྲུལ་ཅན་རྣམས་དང། སྔོན་གྱི་གྲུབ་ཆེན་ཚོ་དང་སྟོན་པ་ཐུགས་རྗེ་ཅན་ཡང་སྐུ་མྱ་ངན་ལས་འདས་ན་རང་ཅག་ཚོ་ལྟ་ཅི་སྨོས། གཉིས་པ་ནི། ལྷག་མ་ལྟག་ཆུ་ཆད་པའི་རྫིང་བུ་བཞིན་དུ་ཚེ་ལ་བསྣོན་པ་མེད་ཅིང། འབྲི་བྱེད་བར་མ་ཆད་དང་བཅས་པས་ངེས་པར་འཆི་སྟེ། དཔེར་ན། མི་ཞིག་གཡང་དུ་འཛེགས་པའི་ལམ་ནས་རྩྭ་ཕུང་ཞིག་ལ་འཇུས་པའི་རྩྭ་ཕུང་དེ་ལ་བྱི་བ་དཀར་ནག་གཉིས་ཀྱིས་རྩྭ་རེ་རེ་ཕྱུང་ནས་རིམ་གྱིས་ཟོས་ན་རྩྭ་ཕུང་དེ་མྱུར་དུ་ཟད་དེ་གཡང་ལ་ལྷུང་འགྲོ་བ་བཞིན་དུ་ཚེ་ཡང་ཉིན་མཚན་གཉིས་ཀྱིས་རེ་མོས་སུ་བྱས་ནས་ཧྲིབ་ཧྲིབ་ཟད་འགྲོ་བ་ཡིན། གསུམ་པ་གསོན་པའི་ཚེ་ཡང་ཆོས་བྱ་ལོང་མེད་པར་ངེས་པར་འཆི་སྟེ་ད་ལྟ་དར་ལ་བབ་ནས་ལོ་སུམ་ཅུ་ཙམ་ལ་སླེབ་པ་ཞིག་ཡིན་ན་ལྔ་བཅུ་སྡོད་ཐུབ་ཡོད་དུ་ཐུག་ཀྱང་བཅུ་གཉིད་ལ་འགྲོ། ལྷག་མའི་ལྔ་ཟས་ལ་འགྲོ། ལྔའི་ཕྱེད་འགྲོ་འདུག་སོགས་ལ་འགྲོ། དེས་ན་ཤུལ་དུ་ལོ་གཉིས་ཙམ་ལུས་ལ། དེ་ཡང་ཆོས་སྒྲུབ་མཁན་ཞིག་གི་དབང་དུ་བྱས་པ་མ་གཏོགས་གཞན་ལ་ངེས་པ་མེད། དེ་ལ་ཡང་བླ་མ་བྱམས་པའི་གསུང་ལས། ཉི་ཤུ་མན་ཆད་ལ་གང་ཟག་ཁྱད་པར་ཅན་མ་གཏོགས་ཆོས་སྒྲུབ་བློ་ཡོང་བ་ཤིན་ཏུ་དཀའ། ཉི་ཤུ་ནས་བག་ཆགས་གང་ཡོད་སད་འགྲོ། དེ་ནས་མ་བྱུང་ན་བཞི་བཅུ་ནས་སྡུག་ཏུ་འགྲོ་གསུངས་པ་ལྟ་བུ་ཡིན། དེ་ལྟར་ངེས་པར་འཆི་བས་ཚེ་འདིའི་བསླུ་བྲིད་ལ་མ་ཆགས་པར་ཆོས་བྱ་བར་ཐག་བཅད་དེ་བསམ། གཉིས་པ་ནམ་འཆི་ངེས་མེད་ལའང་རྒྱུ་མཚན་གསུམ་སྟེ། སྤྱིར་སྒྲ་མི་སྙན་པ་རྣམས་ལོ་སྟོང་ངེས་

― GTD003_Page_0426 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཐུབ་ཅིང། སྐྱེ་བ་དེའི་འོག་རོལ་ཏུ་ངན་སོང་དུ་སྐྱེ་བ་མི་སྲིད་ལ་ང་ཡི་བར་འཛིན་པའང་མེད། གཞན་ཐམས་ཅད་ཀྱི་ཚེ་ལ་ངེས་པ་མེད་ཅིང་ལྷག་པར་འཛམ་བུ་གླིང་པ་རྣམས་ལ་ངེས་པ་མེད་པ་དང། གནས་ཁང་རྡིབ་པ་དང། མཛའ་བོས་བསླུས་པ་སོགས་འཆི་རྐྱེན་མང་ཞིང་གསོན་རྐྱེན་ཉུང་བ་དང། རྐྱེན་གང་ཡང་མི་བཟོད་པས་ལུས་འདི་ཆུའི་ལྦུ་བ་ལྟར་ཉམ་ཆུང་བས་ནམ་འཆི་ལ་ངེས་པ་མི་འདུག །སང་གི་གྲ་བསྒྲིགས་ཀྱང་དེའི་སྔོན་ཁོང་མདང་གཤེགས་སོང་ཟེར་བ་ཞིག་མི་ཡོང་བའི་ངེས་པ་ཅི་ཡོད། རང་ལོ་ལྔ་དང་བཅུའི་དུས་ན་ཡོད་པ་དང་ན་ཚོད་མཉམ་པ་རྣམས་བགྲང་ན་ཡང་ད་ལྟ་འདི་ཙམ་ཞིག་མི་འདུག །བདག་ཀྱང་དེ་དང་འདྲ་བས་ད་ལྟ་ཉིད་ནས་ཆོས་ཤིག་བྱའོ་སྙམ་དུ་ཐག་གཅོད་དགོས། དེ་ལྟར་ནམ་འཆི་ངེས་མེད་འདི་ལ་མྱོང་བ་སྐྱེས་ན། བླ་མ་བྱམས་པས། དགུང་དུས་ཞབས་ཕྱི་བས་སྒོ་བརྒྱབ་ནས་སོང་དུས། སང་ང་གཉིས་ཕྲད་མི་ཡོང་སྙམ་པ་ཡོད་གསུངས། རྗེ་གྲུབ་པའི་དབང་ཕྱུག་གིས། ང་ལ་ཞག་གཅིག་ལས་ལྷག་སྡོད་རྩིས་མེད་གསུངས་པ་ལྟ་བུ་ཡིན། །གསུམ་པ་འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན་པ་ལ་རྒྱུ་མཚན་གསུམ་སྟེ། གཉེན་བཤེས་ཡོད་ཀྱང་འཁྲིད་ས་མེད་པ་དང། ནོར་ཅི་ཙམ་ཡོད་ཀྱང་ཕན་པ་མེད་པ་རྒྱལ་པོ་མྱ་ངན་མེད་ཀྱི་གཏམ་རྒྱུད་ལྟ་བུ་སྟེ། རྒྱལ་པོ་མྱ་ངན་མེད་ནི་སངས་རྒྱས་མྱ་ངན་ལས་འདས་ནས་ད་ལྟའི་བར་དུ་སྟོབས་ཀྱི་འཁོར་བསྒྱུར་བྱུང་བ་དེ་གཅིག་པུ་ཡིན། དེ་ཡང་ལས་གང་བྱས་པ་ཡིན་ན་སྔོན་སངས་རྒྱས་བྱོན་པའི་ཚེ་བྱིས་པ་གཉིས་རྩེད་མོ་རྩེ་བའི་ཚེ་སངས་རྒྱས་འབྱོན་པ་མཐོང་ནས་བསོད་ནམས་ཆ་མཐུན་གྱི་དགེ་རྩ་ཡོད་པའི་དབང་གིས་

― GTD003_Page_0427 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ལ་བསོད་སྙོམས་འབུལ་འདོད་སྐྱེས་ཀྱང་སངས་རྒྱས་ཀྱི་སྐུ་ལུས་ཁྲུ་བཅུ་དྲུག་ཡོད་པས་མ་སླེབ་པ་དང། གཅིག་གིས་སྟེགས་བྱས་ཏེ་ཕུལ་བས་སངས་རྒྱས་ཀྱི་ཕྱག་བསྣར་ནས་ལྷུང་བཟེད་དུ་དེས་ཕུལ་བའི་ཐལ་བ་བླངས་ཏེ་ཀུན་དགའ་བོ་ལ་གནང་ནས་འདི་ཆུས་སྐྱོ་མ་གྱིས་ལ་དགེ་འདུན་གྱི་ཀུན་དགའ་ར་བའི་སེར་ཀ་གང་ཡོད་དུ་བླུགས་ཤིག །འདིས་ང་ལ་དད་པ་ཆེན་པོས་ཕུལ་བས་མྱ་ངན་ལས་འདས་ནས་ལོ་བརྒྱ་ན་སྟོབས་ཀྱི་འཁོར་ལོས་བསྒྱུར་བའི་རྒྱལ་པོ་ཨ་ཤོ་ཀ་ཞེས་བྱ་བར་འགྱུར་རོ་ཞེས་ལུང་བསྟན་ཏེ། མིང་འདི་བོད་སྐད་དུ་བསྒྱུར་ན་ཤོ་ཀ་མྱ་ངན་ཡིན་ལ། ཨ་དགག་ཚིག་ཡིན་པས་མྱ་ངན་མེད་བྱ་བ་ཡིན། དེ་ནས་སྟོན་པས་ལུང་བསྟན་པ་བཞིན་ལྷོ་ཕྱོགས་སུ་འཁྲུངས་ཏེ་འཛམ་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བསྒྱུར་ཀྱང་མཐར་མྱ་ངན་ལས་འདའ་ཁར་ཐམས་ཅད་ཀྱིས་རྒྱལ་པོ་གསར་པ་ལ་བཀུར་སྟི་བྱས་ནས་ཁོང་ལ་མིག་གིས་བལྟ་བ་ཙམ་ཡང་མ་བྱས། ཁོང་གི་སྔས་མགོར་དགྲ་བཅོམ་པ་ལྔ་བརྒྱ་བཞུགས་པ་ལ་བསྙེན་བཀུར་གྱིས་ཞེས་ཡང་ཡང་བསྐུལ་ཀྱང། བློན་པོ་རྣམས་ཀྱིས་རྒྱལ་པོ་གསར་པ་ལ་དགོས་ཞེས་མ་མཉན། རྒྱལ་པོ་མྱ་ངན་མེད་ལ་སྙིང་ཉེ་བའི་བློན་པོ་ཞིག་གིས་ཨ་རུ་ར་རློན་པ་ཞིག་བྱིན་པ་དགྲ་བཅོམ་པ་ལྔ་བརྒྱ་ལ་ཕུལ་བས། ཁོང་གི་བསོད་ནམས་རྫོགས་ཕྱིར་དུ་དགྲ་བཅོམ་ལྔ་བརྒྱས་ཨ་རུ་ར་གཅིག་བགོ་བཤའ་བྱས་ཏེ། འཆི་ཁར་ཨ་རུ་ར་གཅིག་ལས་དབང་རྒྱུ་མ་བྱུང་བ་ལྟ་བུ་ཡིན། དེར་མ་ཟད་ལྷན་ཅིག་སྐྱེས་པའི་ཤ་རུས་ཀྱང་འབྲལ་དགོས། འཆི་གྲབས་སུ་ཚེ་འདིའི་ཕུན་ཚོགས་

― GTD003_Page_0428 ―

^{[མ་དཔེ་གཟིགས་ན་འདིར་གནོན།]}

[Full Size]

གང་ལ་ཡང་མ་ཆགས་པའི་ཆོས་རྣམ་དག་ཁོ་ན་ཞིག་བྱ་དགོས་ཀྱི། ཆོས་ཡང་ཡོང་འཇིག་རྟེན་ཡང་ཡོང་བ་ཞིག་འདོད་པས་གང་ཡང་མི་འགྲུབ་སྟེ། བཀའ་གདམས་གོང་མ་རྣམས་ཀྱི་གསུང་ལས། སྤུ་བྲང་ལག་པས་མི་ཐེག་པ་གཅིག་དང། བུབ་རྐྱལ་ཆུ་ཐུབ་པ་གཉིས་མི་ཡོང། ཤར་ལ་འགྲོ་བ་དང། ནུབ་ལ་འགྲོ་བ་གཉིས་ཀྱང་དུས་གཅིག་ཏུ་མི་ཡོང་གསུངས་པ་ལྟ་བུ་ཡིན། དེར་མ་ཟད་ཆོས་འཇིག་རྟེན་ཐམས་ཅད་ཚང་དགོས་ན་རྐང་བཞི་ལག་བཞིའི་དཔེ་ལ་འགྲོ་ཉེན་ཡོད་དེ། སྔོན་ཐ་ག་པ་ཞིག་ཐག་ཤིང་ཚོལ་དུ་ནགས་སུ་ཕྱིན་པས་ཤིང་ཐམས་ཅད་ལ་ཕངས་སེམས་སྐྱེས་ནས་གཅོད་མ་ནུས་པས། ཤིང་གི་ལྷ་དེ་མགུ་ནས་ཁྱོད་ལ་དངོས་གྲུབ་ཅི་དགོས་ཞེས་དྲིས་པས། ཁོའི་སེམས་ལ་ངས་རྐང་ལག་བཞིའི་འདི་ཙམ་ཞིག་འཐག་ན་བརྒྱད་ཡོད་ཚེ་དེ་ལས་ཀྱང་མང་པོ་ཞིག་འཐག་ནས་རྔན་པ་ཐོབ་པར་འདུག་སྙམ་སྟེ་རྐང་ལག་བརྒྱད་པ་ཞིག་ཞུས་པས། ལྷས་ཀྱང་དངོས་གྲུབ་དེ་བྱིན་པས་གྲོང་བ་ཐམས་ཅད་ཀྱིས་འདྲེ་ཡིན་པར་འདུག་ཅེས་དེད་ནས་ཡུལ་བཏོན་པ་ལྟ་བུར་མ་སོང་བར་ཆོས་ཁོ་ནའི་སྒོ་ནས་འཆི་གྲབས་ཚགས་སུ་ཆུད་ནས་འཆི་བ་ལ་མི་འཇིགས་པ་ཞིག་བྱ་དགོས་ཏེ། བཀའ་གདམས་པ་རྣམས་ཀྱི་གསུང་སྒྲོས་ལས། རྒྱུན་དུ་འཆི་བ་ལ་འཇིགས་དགོས། འཆི་ཁར་མི་འཇིགས་པ་དགོས་གསུང་སྟེ། འཆི་ཁར་མི་འགྱོད་པ་དཀའ་མོ་ཡིན། ད་ལྟ་འགའ་ཞིག་གིས་ང་ཤི་ཡང་འགྱོད་རྒྱུ་མེད། ཟེར་བ་ལས་རྒྱུ་འབྲས་དང། ངན་སོང་གི་སྡུག་བསྔལ་སོགས་ངོས་མ་ཟིན་པའི་གླེན་གཏམ་ཡིན་ཏེ། དཔེར་ན་སྔོན་བླ་མ་གྲུབ་པའི་དབང་ཕྱུག་གིས་ལམ་རིམ་གནང་སྐབས་སྡུག་བསྔལ་

― GTD003_Page_0429 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒོམ་གསུངས་པ་ལ་ཨ་བོ་རྒད་པོ་ཞིག་ཡོད་པ་དེས་བླ་མ་ལ་ཞུས་པ། སྒོམ་ད་བསྒོམ་པ་ཡིན་ཏེ་སྡུག་བསྔལ་མི་འདུག་ཟེར་བའི་དཔེ་ལ་སོང་བ་ཡིན། མི་རྟག་པ་བསྒོམ་ཚུལ་སྟོན་པའི་མདོ་སྡེ་རྣམས་ལས་རྒྱལ་པོ་ལ་གདམས་པ་ལས་རྒྱས་པ་མེད་ལ། དེ་ཉིད་བསླབ་བཏུས་སུ་དྲངས་པ་ལས་ཀྱང་། རྒྱལ་པོ་ཆེན་པོ་འདི་ལྟ་སྟེ་དཔེར་ན་རི་དྭགས་ཀྱི་རྒྱལ་པོ་སེང་གེ་རི་དྭགས་ཀྱི་ཚོགས་ཀྱི་ནང་དུ་ཞུགས་ནས་རི་དྭགས་བཟུང་སྟེ་ཇི་ལྟར་འདོད་པ་བཞིན་དུ་བྱ་བ་བྱེད་དོ། །རི་དྭགས་དེ་ནི་སྟོབས་ཆེན་པོས་ཁ་མི་བཟད་པས་བཟུང་བས་དབང་མེད་པར་འགྱུར་རོ། །རྒྱལ་པོ་ཆེན་པོ་དེ་བཞིན་དུ་འཆི་བདག་གི་གསལ་ཤིང་གིས་ཟུག་སྟེ། རྒྱགས་པ་དང་ནི་བྲལ། མགོན་ནི་མེད། སྐྱབས་ནི་མེད། དཔུང་གཉེན་ནི་མེད། ཅེས་པ་ནས། འཇིག་རྟེན་འདི་ནི་འདོར། འཇིག་རྟེན་ཕ་རོལ་ཏུ་ནི་འགྲོ །སྐྱས་ཆེན་པོ་ནི་འདེགས། མུན་པ་ཆེན་པོར་ནི་ཞུགས། གཡང་ས་ཆེན་པོར་ནི་ལྷུང་། དགོན་པ་ཆེན་པོར་ནི་འགྲོ། ལས་ཀྱི་རླུང་གིས་ནི་བདས། ཞེས་སོགས་ཤིན་ཏུ་གསལ་ལ་ཉན་ས་ལས་འདི་ལྟ་སྟེ། འགྱུར་བའི་རྣམ་པ་དང། འཇིགས་པའི་རྣམ་པ་དང། འབྲལ་བའི་རྣམ་པ་དང། ཉེས་པའི་རྣམ་པ་དང། ཞེས་སོགས་མི་རྟག་པ་ལྔ་གསུངས་པ་ལྟར་བསྟན་རིམ་དུ་ཡང་གསུངས་པ་རྣམས་བསྡུས་ན་སྐད་ཅིག་མའི་མི་རྟག་པ། རྒྱུན་གྱི་མི་རྟག་པ། གློ་བུར་གྱི་མི་རྟག་པ་གསུམ་དུ་འདུ་བས་དེ་དག་ལེགས་པར་བསམ་སྟེ་སྐད་ཅིག་ཀྱང་མི་སྡོད་པའི་ངང་ཚུལ་གོ་དགོས། འདི་ལ་འགའ་ཞིག་གིས་མཐར་འཇིག་མོད་ཀྱང་ད་ལྟ་སྡོད་པའི་སྐབས་ཡིན་སྙམ་ན། ད་ལྟ་

― GTD003_Page_0430 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་སྡོད་པའི་སྐབས་མིན་ཏེ། ཚོམས་ལས། ཆུ་ཀླུང་རྟག་ཏུ་འབབ་པའི་རྒྱུན། །ལྡོག་པ་མེད་པའི་ཇི་ལྟ་བ། །དེ་བཞིན་མི་ཡི་ཚེ་འགྲོ་བ། །སླར་ནི་ལྡོག་པར་འགྱུར་བ་མེད། །ཅེས་སོགས་ཀྱིས་ཆུ་ཀླུང་དང་། ཤན་པའི་དྲུང་དུ་འཁྲིད་པའི་ལུག་ལྟར་སྐད་ཅིག་སྐད་ཅིག་གིས་ཚེ་ཟད་ནས་འཆི་བ་ལ་ཉེ་རུ་འགྲོ་བར་གསུངས་ཤིང། དེའི་རྒྱུ་མཚན་གྱིས་སྦྱངས་པའི་ཡོན་ཏན་བཅུ་གཉིས་ཀྱི་ནང་ནས་གནས་ཤིང་དྲུང་པ་ཡང་ཉི་ཟླ་ལ་སོགས་པའི་འགྲོ་ཚུལ་ལ་བརྟེན་ནས་མི་རྟག་པ་བསྒོམ་པ་ཡིན་ནོ། །གཉིས་པ་ངན་འགྲོའི་སྡུག་བསྔལ་བསམ་པ་ནི། དེ་ལྟ་ངེས་པར་འཆི་ལ་ནམ་འཆི་ཡང་ངེས་པ་མི་འདུག །ཤི་ནས་ཀྱང་མེད་དེ་མི་འགྲོ་ཞིང་བར་དོ་འགྲིམ་དགོས་ལ། བར་དོ་དེ་ཡང་རྣམ་འགྲེལ་ལས། ལུས་ཅན་ཡིན་ཡང་ཕྲ་བའི་ཕྱིར། །འགའ་ཞིག་ལ་ལར་ཐོགས་མེད་དེ། །ཆུ་བཞིན་གསེར་ལ་དངུལ་ཆུ་བཞིན། །ཞེས་གསུངས་པ་ལྟར། ལས་ཀྱི་རླུང་གིས་བདས་པ་ན་གང་ལའང་ཐོགས་པ་མེད་པར་བསམ་པ་ཙམ་གྱིས་འཇིག་རྟེན་གྱི་ཁམས་གྲངས་མེད་པ་ཡང་བརྒལ་ནུས་པས་སྐྱེ་བ་ཞིག་ངེས་པར་ལེན་ཞིང། སྐྱེ་བ་དེ་ཡང་བདེ་འགྲོ་ངན་འགྲོ་གཉིས་ལས་མ་འདས། ངན་སོང་ནི་སྡུག་བསྔལ་བསམ་གྱིས་མི་ཁྱབ་པ་ཡོད་པས། དང་པོ་དམྱལ་བའི་སྡུག་བསྔལ་བསམ་ཚུལ་ནི། འདི་འོག་དཔག་ཚད་སུམ་ཁྲི་ཉིས་སྟོང་ན་ཡང་སོས་ཡོད། དེའི་འོག་ཏུ་བཞི་སྟོང་བཞི་སྟོང་གིས་ཆོད་པ་ན་གཞན་བདུན་ཡོད་ལ། དེའི་ཐད་ཐད་དུ་འདི་ནས་སུམ་ཁྲི་ཉིས་སྟོང་ན་ཆུ་བུར་ཅན་ཡོད་ཅིང། ཆུ་བུར་རྡོལ་བ་སོགས་བདུན་གྱི་བར་དུ་དཔག་ཚད་ཉིས་སྟོང་རེས་ཆོད་པ་ན་ཚ་དམྱལ་

― GTD003_Page_0431 ―

^{[མ་དཔེ་གཟིགས་ན་འདིར་གནོན།]}

[Full Size]

བདུན་གྱི་ཐད་ནས་དཔག་ཚད་ཁྲི་ཕྲག་རེ་རེས་བར་དུ་བཅད་དེ་ཡོད། འདི་ལ་འོ་ན་ཐད་ཀར་ཡོད་ན་བར་དུ་བཞི་སྟོང་དང། ཉིས་སྟོང་གིས་ཆོད་ལུགས་གང་ཡིན་ཞེ་ན། ཚ་དམྱལ་གྱི་གནས་ཐང་ལྟར་ཡོད་ལ། གྲང་དམྱལ་གྱི་གནས་གངས་རི་ལ་དཔག་ཚད་ཉིས་སྟོང་ཡོད་པས། གངས་རིའི་རྩེ་དང་གོང་མའི་འོག་གཞིའི་བར་ལ་ཉིས་སྟོང་ལས་མ་བྱུང་བ་ཡིན། དམྱལ་བ་པ་དེ་དག་ལུས་ཀྱང་ཤིན་ཏུ་ཆེ་ལ། ལུས་ཇི་ལྟར་ཆེ་བ་དེ་ལྟར་དུ་སྡུག་བསྔལ་ཡང་ཤིན་ཏུ་ཆེ་སྟེ། དཔེར་ན་མུ་སྟེགས་སྟོན་པ་རྫོགས་བྱེད་ཀྱིས་ཆོས་ལོག་བསྟན་པས་དམྱལ་བར་སྐྱེས་པའི་ལྕེ་ལ་དཔག་ཚད་ལྔ་བརྒྱ་ཡོད་པའི་སྟེང་དུ་ཐོང་གཤོལ་སྟོང་གིས་རྨོས་རྒྱག་པ་ལྟ་བུ་ཡིན་ཞིང། ཤེར་ཕྱིན་གྱི་མདོར་ཡང་ཆོས་སྤོང་བའི་ལས་ཀྱི་རྣམ་སྨིན་གྱི་ལུས་ཀྱི་ཚད་ཤཱ་རིའི་བུས་དྲིས་པ་ལ་སྟོན་པས་དཔེ་ཚད་བརྗོད་ན་ཁྲག་སྐྱུགས་ཏེ་འཆི་བར་འགྱུར་རོ་ཞེས་ལུས་ཚད་མ་གསུངས་པར་སྡུག་བསྔལ་ཙམ་ཞིག་གསུངས་སོ། །དེ་ཡང་རྒྱ་མཚོ་ཆེན་པོར་ཆུ་བོ་བཞི་རྟག་ཏུ་བབས་ཀྱང་འཕེལ་བར་མི་འགྱུར་བ་དམྱལ་བའི་ཤུགས་ཀྱིས་བསྐམ་པ་ཡིན་པར་མཛངས་བླུན་ན་གསུངས་ལ། ཚ་དམྱལ་ན་སྣང་བ་ཡོད་ཀྱང། གྲང་དམྱལ་རྣམས་གངས་རིའི་སྦུབས་རྒྱ་མཚོའི་འཁྱག་རོམ་ན་ཁ་བ་བུ་ཡུག་འཚུབས་པའི་དབུས་སུ་ཕན་ཚུན་གྱི་གཟུགས་ཀྱང་མི་མཐོང་བར་མུན་པས་ཁྱབ་ཅིང་སྲིན་འབུ་མཆུ་ཅན་རྣམས་ཀྱིས་སྙིང་ལ་ཐུག་གི་བར་དུ་ཟ་བ་ཡོད། ང་རང་ཚོ་ད་ལྟ་དགུན་ལྷགས་པ་ཆེ་བའི་དུས་ཞག་གཅིག་གཅེར་བུར་འདུག་པའམ། སྤོས་མེ་ཞིག་ཀྱང་མི་བཟོད་ན་ཅི་དྲག་

― GTD003_Page_0432 ―

^{[མ་དཔེ་གཟིགས་ན་འདིར་གནོན།]}

[Full Size]

སྡུག་བསྔལ་དེ་འདྲ་བཟོད་གླགས་ག་ལ་ཡོད། དམྱལ་བའི་སྡུག་བསྔལ་འདི་ལྐོག་གྱུར་ཡིན། དེ་ལས་ཡི་དྭགས་ཀྱི་སྡུག་བསྔལ་དངོས་སུ་མཐོང་རྒྱུ་ཡོད་དེ་ཡི་དྭགས་རྣམས་ནི་ཟས་གང་ཡང་མ་རྙེད་པས་ཤིན་ཏུ་བཀྲེས་པས་ལྟོ་བའི་མེ་དྲོད་མཆེད་དེ་ཁ་ནས་མེ་འབར་བ་འཇིག་རྟེན་ན་འདྲེ་མེ་ཟེར་བ་འདི་ཡིན། དུད་འགྲོ་ཡང་ད་ལྟ་མི་ཡུལ་ན་ཡོད་པ་འདི་ཚོ་དྲག་ཤོས་ཡིན་མོད་དེ། རྟ་བོང་སྒལ་པ་ཅན་དང། ལམ་སྲང་གི་ཁྱི་ངུ་བ་ཚོ་ལ་བལྟས་ན་ཚ་གྲང་བརྡུང་བརྡེགས་བཀྲེས་སྐོམ་སོགས་ཀྱི་སྡུག་བསྔལ་ཅི་འདྲ་འདུག །ད་ལྟ་ང་རང་ཚོ་མིས་དགའ་མི་དགའ་དང། ཐ་ན་མིག་ལྟ་བུ་བལྟ་ལུགས་ལ་ཡང་ཁོས་ང་ལ་མིག་དཀར་ཤས་ཆེ་བ་བལྟས་བྱུང་ཟེར། ཟས་ལ་ཡང་གཙང་མི་གཙང་སྣ་ཚོགས་ཟེར་མོད། དེ་འདྲ་ཞིག་ཏུ་སྐྱེས་ཡོད་ན། གཙང་མི་གཙང་དང་གཏམ་བཟང་ངན་ཞིག་ཨེ་འདུག །ད་ལྟ་མིའི་ལུས་རྟེན་འདིའི་ཡོལ་བ་བཏང་བ་བཞིན་དུ་བར་བཅད་ནས་བསྡད་པ་ཡིན། དབུགས་འདི་ངར་གྱིས་ཆད་ནས་དེ་འདྲ་ཞིག་ཏུ་སྐྱེས་འགྲོ་བ་ལ་དཀའ་ལས་གང་ཡང་མེད། སྔོན་འཇམ་དབྱངས་བཞད་པ་དང་། མངའ་རིས་སྐུ་སྐྱེས་གཉིས་དགེ་འཕེལ་དུ་སྒྲུབ་པ་བརྒྱབ་ནས་བཞུགས་སྐབས། བེའུ་གཅིག་འབེ་འབེ་ཟེར་ཞིང་ཡོད་པ་ལ་འཇམ་དབྱངས་བཞད་པས་དེ་ཅི་ཟེར་གསུངས་པ་ལ། མངའ་རིས་པ་ཁོང་ཞལ་བརྒྱག་ཞིང་མངོན་ཤེས་ལྔ་ཡོད་པས་ཁོང་གིས་གསུངས་ནས། དགེ་ལྡན་པའི་བླ་མ་དམ་ཅན་ཆོས་རྒྱལ་གྱིས་སྙིང་ཟ་རྒྱུ་ཞིག་རེད་གསུངས་པ་དང། སྔོན་བཀྲ་ཤིས་ལྷུན་པོར་པཎ་ཆེན་བློ་བཟང་ཡེ་ཤེས་ཀྱི་སྐབས་སུ་ཁྱི་དགེ་སློང་བྱ་བ་སྤུ་མདོག་ཆོས་གོས་དང་འདྲ་ཞིང་ཚོགས་ཚོགས་པ་ན་དགའ་

― GTD003_Page_0433 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་གྲྭ་པ་དང་འཚང་ཀ་བརྒྱབ་ཡོང་སྟེ་སྒོ་རག་ཏུ་བཀག་ནས་མ་བཏང་བ་དང་ཡར་བལྟས་ནས་ངུ་སྐད་ལྷང་ལྷང་འདོན་པ་གྲྭ་པ་ཞིག་གི་སྐྱེ་མཐའ་དངོས་སུ་བྱུང་བ་ཡིན། དེས་ན་ངན་འགྲོའི་སྡུག་བསྔལ་བསམ་པ་ཡང་དཔེ་ཀློག་པ་ལྟར་བྱས་པས་མི་ཡོང། རང་དེར་སྐྱེས་པའི་ཉམས་བྱེད་དགོས་ཏེ། སྔོན་ཇོ་བོའི་སློབ་མ་ཞིག་གིས་རང་སྡིག་པ་ར་སྒོག་ཏུ་བསྒོམ་པས་སྡིག་པ་ར་ཙ་ཞིག་གིས་བརྡུང་བའི་སྣང་བ་བྱུང་བ་ན་དམིགས་པ་གསལ་དྲག་པའི་དབང་གིས་རྩིབ་མ་ཆག་པ་དང། ཇོ་བོའི་བླ་མ་དྷརྨཱ་རཀྵི་ཏས་གཟིགས་པར་མི་ཞིག་གིས་ཁྱི་ལ་དབྱུག་པ་བརྒྱབ་པས་བླ་མ་འགྱེལ་བ་ཟོག་པོ་སྙམ་པ་ལ་སྐྲངས་པ་བསྟན་པས་དབྱུག་པའི་རྗེས་ཤད་ཀྱིས་བྱུང་བ་ལྟ་བུ་ཡིན། གསུམ་པ་སྐྱབས་སུ་འགྲོ་བ་ལ། ཕྱི་ནང་གི་ཡན་ལག་རྣམས་ཚང་དགོས་ལ། དེ་ཡང་སློབ་དཔོན་དཔའ་བོས། ཕྱི་ཡི་ཡན་ལག་སྟོབས་ཀུན་ནི། །ཁྱོད་ཀྱིས་ཡང་དག་བསྒྲུབས་ལགས་ཏེ། །ནང་གི་སྟོབས་དག་མ་ཚང་བས། །བྱིས་པ་རྣམས་ནི་སྡུག་བསྔལ་བསྟེན། །ཞེས་གསུངས་པ་ལྟར། ཕྱིའི་ཡན་ལག་སྟོན་པས་བསྒྲུབས་ཟིན་པ་ཡིན་ཏེ། སྟོན་པ་ཐུགས་རྗེ་ཅན་རང་འཇིགས་པ་ཐམས་ཅད་ལས་གྲོལ། གཞན་སྒྲོལ་བའི་ཐབས་ལ་མཁས་པ་ཉེ་རིང་མེད་པར་སེམས་ཅན་གྱི་དོན་མཛད་པའི་སྐྱབས་དེ་ལྟ་བུ་ཡོད་པས་ཕྱིའི་རྐྱེན་ཚང་བ་ཡིན། དེ་ནི་ནང་གི་རྐྱེན་ངན་འགྲོའི་སྡུག་བསྔལ་གྱིས་འཇིགས་ཤིང་དེ་ལས་སྐྱོབ་པའི་ནུས་པ་དཀོན་མཆོག་ལ་ཡོད་པར་ཡིད་ཆེས་ཏེ་བློ་བཀལ་ནས་སྐྱབས་སུ་འགྲོ་དགོས། དེ་ལ་ཐོག་མར་སངས་རྒྱས་ཟེར་

― GTD003_Page_0434 ―

^{[མ་དཔེ་གཟིགས་ན་འདིར་གནོན།]}

[Full Size]

བ་གང་ལ་ཟེར་ངོ་ཤེས་དགོས་ཏེ། བླ་མ་རིན་པོ་ཆེ་རི་ཁྲོད་དུ་བཞུགས་སྐབས་སྡེ་པ་སངས་རྒྱས་རྒྱ་མཚོའི་དུས་ཀྱི་དྲུང་འཁོར་ཞིག་ཡོད་པ་དེས་ང་ཚོ་སངས་རྒྱས་ལ་སྐྱབས་འགྲོ་ཡག་པོ་བྱེད་པ་ཡིན་ཟེར། སངས་རྒྱས་ཟེར་བ་ཅི་འདྲ་ཞིག་ཡིན་དྲིས་པས། མི་མངོན་ནམ་མཁའི་དབྱིངས་ན་ཤེལ་གྱི་ཁང་པར་འོད་དཀར་ཁྱིལ་ལེ་ཡོད་ཟེར་ཏེ། ཤེལ་སྒོ་ཅན་གྱི་སྐུ་འདྲ་ལྟ་བུར་གོ་བ་དེ་འདྲར་མ་སོང་བ། རིགས་པས་དཔྱད་ནས་ཡིད་ཆེས་པ། དཔེར་ན་སྔོན་པོ་ཏོ་བ་སྟོད་ལུང་དུ་བཞུགས་པའི་ཚེ་རྒད་པོ་ཞིག་གིས་ཁྱོད་ཚོའི་སངས་རྒྱས་ཟེར་བ་དེ་ཡོད་རང་ཡོད་ངེས་ཤིག་ཨེ་ཡོད། ཡོད་ན་དེ་ཇི་འདྲ་ཞིག་ཡིན་ཟེར་བ་ལ། པོ་ཏོ་བས་ཁྱོད་ཚོའི་གོང་མ་གཏེ་བོ་རྣ་གོང་ཟེར་བ་དེ་བྱུང་བ་ཨེ་བདེན་བྱས་པས་དེ་བདེན་དྲག་ཟེར། རྒྱུ་མཚན་ཅི་ཡོད་དྲིས་པས་མི་རབས་བདུན་རྒྱུད་ཚུན་ཆད་ས་ཚིག་སོགས་དང། ཕ་མེས་ཀྱིས་བྱས་པའི་ལག་རྗེས་ད་ལྟ་ཡང་འདི་འདྲ་ཡོད་ཟེར། པོ་ཏོ་བས་འོ་ན་ངེད་ཅག་གི་སྟོན་པ་སངས་རྒྱས་རྒྱལ་པོའི་རིགས་སུ་འཁྲུངས་ནས་བྱང་ཆུབ་ཏུ་སེམས་བསྐྱེད། དེ་ནས་ཚོགས་བསགས་མཐར་སངས་རྒྱས་ནས་ཆོས་འཁོར་བསྐོར་བའི་གསུང་རབ་ད་ལྟ་ཡང་བཞུགས་པ་འདི་ཡིན། སྟོན་པ་ཐུགས་རྗེ་ཅན་དེ་ནས་རིམ་གྱིས་བརྒྱུད་དེ་ཇོ་བོ་ཨ་ཏི་ཤ། །དེ་ནས་འབྲོམ་ལ་གདམས་ངག་ཐམས་ཅད་གནང་ཞིང་། དེའི་སློབ་མ་ང་ཡིན་གསུངས་པས་ཁོ་ཡིད་ཆེས་པ་ལྟ་བུ་དགོས་ཀྱི། པོ་ཏོ་བས། གནས་བརྟན་ཞལ་མར་གཟིགས་ཤིག་འདུག་སྟེ་སངས་རྒྱས་བསྟན་པའི་སྒོ་ནང་དུ་མ་ཆུད་གདའ་གསུངས་པ་ལྟ་བུ་མཐོ་སྟེ་དགེ་འདུན་གྱི་ཁྲོད་ན་ཞལ་མར་གཟིགས་

― GTD003_Page_0435 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་དམའ་སྟེ་བསྟན་པའི་སྒོར་མ་ཚུད་པ་དེ་ལྟ་བུར་མ་སོང་བ་དགོས། རང་ཅག་ཚོ་ནི་ཁ་ནས་སྐྱབས་སུ་སོང་ཡང་སངས་རྒྱས་ལ་ཡིད་མི་ཆེས་པའི་རྟགས་སུ་སངས་རྒྱས་ཀྱི་མཁྱེན་པ་ལས། མདུན་གྱི་མོ་འདེབས་པའི་མོ་མ་རྣོ་ཤོས་ཙམ་དུ་མི་བརྩི་སྟེ། དེས་མོ་བཏབ་ནས་རྩུབ་ཟེར་ན་སྙིང་འདར་ཆུམ་མེ་འགྲོ། མཛངས་བླུན་སོགས་ནས་ལས་འབྲས་ཇི་ཙམ་བཤད་པ་རྣམས་ཁ་ནས་ཤོབ་ཤོབ་འདོན་ཀྱང་ཡིད་ལ་བསམ་ནས་ཅི་ཡང་མི་བརྩི། དེ་བཞིན་དུ་བྱིན་རླབས་ལ་བྱང་བའི་བོན་པོ་དང། ཐུགས་རྗེ་ལ་ཁྱིམ་མཚེས་ཨ་མ་རྒན་མོའི་ཚོད་དུ་ཡང་མི་བརྩི་བར་འདུག་ཅེས་པོ་ཏོ་བས་གསུངས་པ་ལྟ་བུ་ཡིན། དེ་ནས་སྙིང་ཐག་པ་ནས་སངས་རྒྱས་ལ་ཡིད་ཆེས་པའི་དད་པ་ཞིག་སྐྱེད་པ་ལ་རིགས་པ་བཞིའི་སྒོ་ནས་བསྒྲུབ་དགོས། དེ་ཡང་སངས་རྒྱས་རྣམས་ཀྱིས་སྔོན་སློབ་པ་ལམ་དུ་བྱ་དཀའ་བའི་རྒྱལ་སྲས་ཀྱི་སྤྱོད་པ་མཐའ་དག་ལ་བསླབས་ནས་སངས་རྒྱས་པ་དེ་བྱ་བ་བྱེད་པའི་རིགས་པ་ཡིན། འགོ་བཤེས་གཉེན་བསྟེན་ཚུལ་ནས་འབྲས་བུ་སངས་རྒྱས་ཀྱི་སའི་བར་སྔ་མ་སྔ་མ་ལ་བརྟེན་ནས་ཕྱི་མ་འབྱུང་དགོས་པས། རྒྱུ་ཚོགས་ཚང་བ་ལ་རག་ལས་པ་འདི་ལྟོས་པའི་རིགས་པ་ཡིན། ཐམས་ཅད་མཁྱེན་པ་བསྒྲུབ་པ་ལ་ཐར་པ་བསྒྲུབ་དགོས་ཤིང། དེ་ལ་བདག་འཛིན་སྤོང་ནུས་སུ་བསྒྲུབ་དགོས་པ་ནི། རྣམ་འགྲེལ་ལས། ངེས་པ་དང་ནི་སྒྲོ་འདོགས་ཡིད། །གནོད་བྱ་གནོད་བྱེད་དངོས་པོའི་ཕྱིར། །ཞེས་གསུངས་པ་ལྟར། བདག་ཏུ་ལྟ་བའི་ཞེན་ཡུལ་ཡོད་མེད་དཔྱད་ནས་དེ་དང་འཛིན་

― GTD003_Page_0436 ―

^{[མ་དཔེ་གཟིགས་ན་འདིར་གནོན།]}

[Full Size]

སྟངས་དངོས་འགལ་དུ་སོང་བའི་ཤེས་རབ་ཀྱིས་དེའི་ཞེན་ཡུལ་མེད་པར་རྟོགས་དགོས་ཏེ། དཔེར་ན་ཁང་པ་ཞིག་ཏུ་མཎྜལ་ལྟ་བུ་ལུས་སམ་སྙམ་པའི་ཚེ་ཡོད་མེད་བཙལ་ནས་མེད་པར་ངེས་པ་བསྐྱེད་པ་ལྟ་བུ་འཐད་སྒྲུབ་ཀྱི་རིགས་པས་བསྒྲུབ་དགོས་པ་ཡིན། རིགས་པ་དེ་དག་གིས་ལེགས་པར་གཏན་ལ་ཕབས་ཏེ་རང་གི་ངོས་ནས་བློ་བཀལ་ན་སངས་རྒྱས་ལ་བསྙེལ་བ་མེད་དེ། དཔེར་ན་གསལ་རྒྱལ་གྱི་བུ་མོ་རྡོ་རྗེ་མ་བྱ་བ་སྐྲ་རྟ་རྔོག་འདྲ་ཞིང་གཟུགས་ཤིན་ཏུ་མི་སྡུག་པ་ཞིག་ཡོད་པ་དེ་གཞན་ལ་སྟོན་པ་ངོ་ཚ་ནས་ཁང་པར་བཅུག་ནས་སྒོ་བཅད་ཕྱིར་འདོན་དུ་མ་བཅུག་པའི་ཚེ། དེས་འདི་སྙམ་དུ་སངས་རྒྱས་བཅོམ་ལྡན་འདས་བྱ་བ་དུས་གསུམ་ཆགས་ཐོགས་མེད་པར་མཁྱེན་པ་ཞིག་འཇིག་རྟེན་ན་བཞུགས་ན། བདག་གནས་སྐབས་འདི་ལྟ་བུར་གྱུར་པ་ལ་ཅིའི་ཕྱིར་མི་དགོངས་སྙམ་པས་དེ་མ་ཐག་སངས་རྒྱས་བྱོན་པ་མཐོང་ནས་དད་པ་ཤུགས་དྲག་པོ་སྐྱེས་པས་གཟུགས་མཛེས་ཤིང་ཡིད་དུ་འོང་བར་གྱུར་པ་དང། སོ་ཕྲེང་ཅན་སློབ་དཔོན་ངན་པའི་དབང་དུ་སོང་ནས་ཞག་བདུན་ལ་མི་སྟོང་གསོད་པར་ཁས་བླངས་ཏེ་དགུ་བརྒྱ་དང་དགུ་བཅུ་གོ་དགུ་བསད་པ་ན་མི་ཐམས་ཅད་ཕྱོགས་ཕྱོགས་སུ་བྲོས་ནས་མ་རྙེད་པའི་ཚེ་མས་བརྩེ་གདུང་གིས་མ་བཟོད་པས་ཟས་སྐྱེལ་དུ་ཕྱིན་པ་གསོད་པར་བརྩམས་པའི་ཚེ་མ་བསད་ན་ཚེ་འདིར་བདེན་པ་མཐོང་མི་ནུས་པར་གཟིགས་ནས། དེ་མ་ཐག་དགེ་སློང་ཐ་མལ་པའི་གཟུགས་སུ་བྱོན་པ་དང། མ་བཞག་ནས་དགེ་སློང་དེ་རྩལ་ཅི་ཡོད་ཀྱིས་དེད་ཀྱང་དགེ་སློང་དལ་བུས་བྱོན་པའི་རྗེས་མ་ཟིན་པར་སྡོད་ཅིག་ཅེས་སྨྲས་པ་དང། དགེ་སློང་དེས་ང་ནི་རྟག་ཏུ་སྡོད་ཀྱང་ཁྱོད་མི་སྡོད་པར་

― GTD003_Page_0437 ―

^{[མ་དཔེ་གཟིགས་ན་འདིར་གནོན།]}

[Full Size]

འདུག་གསུངས་ལ། དེ་ཅི་ཡིན་ཞེས་དྲིས་པས། ཁྱོད་ནི་གྲོགས་ངན་པས་བསླུས་ནས་སྡིག་པ་ཚབས་པོ་ཆེ་བསགས་ཏེ་ངན་འགྲོར་འགྲོ་བས་མི་སྡོད་པ་ཡིན་གསུངས་པ་དང། འགྱོད་པ་ཤུགས་དྲག་པོ་སྐྱེས་ནས་སྡིག་པ་ལས་ལྡོག་པའི་གཏམ་རྒྱུད་འདི་དག་བསམ་ན་སངས་རྒྱས་ཀྱི་མཁྱེན་པ་ཐོགས་པ་མི་མངའ་ཞིང། ཐུགས་རྗེ་བསྙེལ་བ་མི་མངའ་བའི་ཚུལ་ལ་ངེས་པ་འདྲོང་བའི་ཁྱད་ཆེའོ། །མདོར་ན་སངས་རྒྱས་ཀྱི་ཡོན་ཏན་དཔྱིས་ཕྱིན་པ་ཤེས་པ་ལ། པོ་ཏོ་བས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པའི་ཡོན་ཏན་འཆད་བྱེད་ཡིན་གསུངས་ཏེ། རྒྱུའི་ཡོན་ཏན་སྟོན་པ་མདོ་སྡེ་ས་བཅུ་པ་སོགས་དང། འབྲས་བུའི་ཡོན་ཏན་གསང་བ་བསམ་གྱིས་མི་ཁྱབ་པ་དང་ཤེར་མདོ་རྒྱ་ཆེར་རོལ་པ་སོགས་དང། འཕྲིན་ལས་ཀྱི་ཡོན་ཏན་མཛངས་བླུན་སོགས་ཀྱིས་སྟོན་པས་སངས་རྒྱས་ཀྱི་ཡོན་ཏན་ལ་མཚུངས་པ་གསལ་བྱེད་ཀྱི་དཔེ་མེད་ཅིང་མཐའ་མེད་པ་ནམ་མཁའ་འདྲ་བར་འཇུག་པ་དང། སྐབས་གསུམ་པ་སོགས་ནས་གསུངས་པ་ལྟ་བུ་ཡིན། དེས་ན་འབྲས་བུ་སངས་རྒྱས་ཀྱི་ཡོན་ཏན་ཀུན་དེ་འདྲ་ཞིག་ཡིན་པ་ལ་དཔག་ནས་རྒྱུ་ལའང་ལྟ་སྒོམ་སྤྱོད་པའི་ཆ་ཐམས་ཅད་ཡོངས་སུ་རྫོགས་པར་གོ་དགོས་ཀྱི། འགའ་ཞིག་དང་པོ་ནས་སྟོང་ཉིད་བསྒོམ་པས་འཚང་རྒྱ་ཟེར་བ་ནི། སྔོན་མི་གཉིས་ཀྱིས་པག་བརྫིས་ནས་མར་ཁུ་བཅུས་ཏེ་ཟོས་པ་ན་གཅིག་ཧམ་པ་ཆེ་བས་ཆེན་པོ་རེ་བླངས་ནས་ཡང་ཡང་ཆད། གཅིག་ཤོས་ཀྱིས་ཉུང་ངུ་རེ་བླང་བས་མང་པོ་ཐོབ་པ་ལྟ་བུ་ཡིན། དེའི་ཕྱིར་རྒྱུ་དང་འབྲས་བུ་སོགས་སྒོ་དུ་མ་ནས་སངས་

― GTD003_Page_0438 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་ལ་ཡིད་ཆེས་རྙེད་ན་ཆོས་དགེ་འདུན་གཉིས་ལ་ཡང་ཡིད་ཆེས་ཞར་ལ་འབྱུང་བ་ཡིན། འོན་ཀྱང་འདི་གསུམ་གྱི་ནང་ནས་སྐྱབས་དངོས་ནི་ཆོས་ཡིན་ཏེ། སྟོན་པ་བླ་མེད་སངས་རྒྱས་རིན་པོ་ཆེ་ཞེས་སོགས་ཀྱིས་སངས་རྒྱས་ལ་སྟོན་པ་བླ་མེད་དང། ཆོས་ལ་སྐྱོབ་པ་བླ་མེད་དང། དགེ་འདུན་ལ་འདྲེན་པ་བླ་མེད་ཅེས་གསུངས་ཤིང་འདྲེན་པ་བླ་མེད་ཟེར་བ་ཡང་ཐམས་ཅད་མཁྱེན་པར་བགྲོད་པའི་ལམ་གྱི་གྲོགས་ཁྱད་པར་ཅན་ལ་བྱ་བ་ཡིན་པས། ཉན་ཐོས་སོགས་ཀྱིས་མི་ཡོང་སྟེ། རྒྱན་ལས་ཕྱིར་མི་ལྡོག་པའི་རྟགས་ཀྱི་སྐབས་ནས་བཤད་པ་ལྟར་གྱི་ཕྱིར་མི་ལྡོག་པའི་དགེ་འདུན་ཞིག་དགོས། དེས་མཚོན་ནས་ཚོགས་ལམ་པ་དང་སྦྱོར་ལམ་པའི་སྐྱབས་མི་གཅིག་ཅིང་རིམ་པ་བཞིན་ཡོངས་འཛིན་སོགས་སྐྱབས་ཀྱི་སྒོ་ནས་ཁྱད་པར་འཕགས་ཚུལ་ཤེས་དགོས། མདོར་ན་རྒྱུ་སྐྱབས། འབྲས་སྐྱབས། ཕྱིའི་སྐྱབས། ནང་གི་སྐྱབས། ཀུན་རྫོབ་པའི་བརྡར་མཚོན་པའི་སྐྱབས་སོགས་ལེགས་པར་ངེས་ནས་སྐྱབས་སུ་སོང་ན། ནང་པ་སངས་རྒྱས་པའི་གྲལ་ཡང་དེ་ནས་ཚུད་པ་ཡིན་ཏེ། ཇོ་བོའི་རྣམ་ཐར་ལས། ཕྱི་ནང་གི་ཁྱད་པར་སྐྱབས་འགྲོས་འབྱེད་པར་གསུངས་པ་ལྟ་བུ་ཡིན་ཞིང་ཕན་ཡོན་གཞན་ཡང་བསམ་གྱིས་མི་ཁྱབ་སྟེ། དཔེར་ན་སྔོན་རྐུན་མ་ཞིག་གིས་དགེ་སློང་ལ་རས་བཟང་པོ་ཞིག་ཡོད་པ་མཐོང་ནས་མཚན་མོ་རས་ཐོངས་ཞེས་པས་སྐར་ཁུང་ནས་ལག་པ་རྐྱོངས་དང་སྟེར་བྱས་པས། ལག་པ་གཅིག་བརྐྱངས་པ་དང། ང་ལ་འདི་སྦྱིན་བདག་གིས་ལག་པ་གཉིས་ཀའི་བྱིན་པ་ཡིན་པས། ཁྱོད་ཀྱི་ལག་པ་གཉིས་ཀས་ལོངས་བྱས་པས་གཉིས་ཀ་བརྐྱངས་པ་དང་བཅིངས་ནས་ཀ་བ་ལ་བཏགས་ཏེ། ཕྱིར་ཐོན་ནས་

― GTD003_Page_0439 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་དབྱུག་པ་ཐེངས་གསུམ་བརྒྱབ་སྟེ་བཏང་བས། རྐུན་མ་དེའི་སེམས་ལ་སངས་རྒྱས་ཐུགས་རྗེ་ཅན་གྱིས་སྐྱབས་འགྲོ་ཚིག་གསུམ་དུ་བསྡུས་པ་དེ་དྲག །བཞི་ཡོད་ན་ང་དོ་ནུབ་ཤི་ཡོད་སྙམ་ནས་དད་པ་སྐྱེས་ཏེ། སྐྱབས་འགྲོའི་ཚིག་བརྗོད་བཞིན་དུ་ཟམ་འོག་ཏུ་བསྡད་པ་ན་ཟམ་སྟེང་ནས་མི་མ་ཡིན་ཞིག་འགྲོ་བ་འགྱེལ་ནས་འགྲོ་མ་ནུས་པས་ཅི་ཡིན་བརྟགས་པས་དེའི་སྐྱབས་འགྲོའི་ཚིག་བརྗོད་པར་ཤེས་ནས་མི་མ་ཡིན་ཡང་དད་པ་སྐྱེས་ཏེ། རྐུན་མའི་བསམ་པ་དེ་ཙམ་ལ་ཡང་ཕན་ཡོན་དེ་འདྲ་ཡོད་ན་བློ་བཀལ་ནས་སྐྱབས་སུ་སོང་ན་ལྟ་ཅི་སྨོས། དེར་མ་ཟད་འབྲོམ་སྟོན་ལ་དད་པའི་རྐུན་མ་ཞིག་རྐུར་འགྲོ་བའི་ཚེ་འབྲོམ་བསྒོམས་ནས་དགྱེས་ཉམས་བྱུང་ན་དོན་འགྲུབ། མི་དགྱེས་པའི་ཉམས་བྱུང་ན་དོན་མི་འགྲུབ་སྟེ། དེ་ཡང་ཡིད་ཆེས་ཀྱི་སྟོབས་ཡིན་ནོ། །དེ་ལྟར་སྐྱབས་དངོས་བཟུང་སྟེ་བློ་བཀལ་ནས་སྐྱབས་སུ་སོང་བའི་འོག་ཏུ་དེའི་བསླབ་བྱ་ལ་སློབ་དགོས། བསླབ་བྱ་ཡང་གཏན་ལ་དབབ་པ་བསྡུ་བ་ལས་འབྱུང་བ་དང། མན་ངག་ལས་འབྱུང་བ་སོགས་མཐའ་ཡས་ཀྱང་བསྡུ་ན་དགག་སྒྲུབ་ཀྱི་བསླབ་བྱ་གསུམ་གསུམ་དུ་འདུ་བས། དེའི་ཚུལ་ཡང་སངས་རྒྱས་ལ་སྐྱབས་སུ་སོང་ནས་འཇིག་རྟེན་གྱི་ལྷ་གཞན་ལ་སྐྱབས་སུ་འགྲོ་བ་དང་ཕྱག་འཚལ་བ་མི་རུང་ལ། འོན་ཀྱང་ཁྱད་གསོད་ཡང་བྱེད་མི་རུང་བས་གཏོར་མ་བྱིན་ནས་འཕྲིན་ལས་བཅོལ་བ་ལ་ཉེས་པ་མེད།

― GTD003_Page_0440 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོག་ལ་ཡང་ཟན་བྱིན་ནས་ལས་བཅོལ་བ་ལྟ་བུ་ཡིན། ཡང་སངས་རྒྱས་ཀྱི་སྐུ་འདྲ་ལ་སྟོན་པའི་འདུ་ཤེས་འཇོག་དགོས་པས་བཟང་ངན་དང། རིན་གཅོད་པ་སོགས་མི་རུང་ཞིང། འགྱེད་སོགས་ལ་གཏོང་བ་ཡང་མི་རུང་སྟེ། དཔེར་ན་རོང་བ་མགར་གྱིས་གསེར་ཞོ་གསུམ་ཕུལ་ནས་འཇམ་དབྱངས་ཀྱི་སྐུ་འདྲ་ཞིག་བླུས་ཏེ་ཇོ་བོ་ལ་སྤྱན་འབེབས་ཞུས་ནས་འདི་བཟང་ངན་ཇི་ལྟར་ལགས་ཞུས། རྗེ་བཙུན་གྱི་སྐུ་ལ་མི་ལེགས་པ་མི་ཡོང་བཟོ་འབྲིང་ཙམ་དུ་འདུག་གསུངས་པ་ལྟ་བུ་ཡིན་པས། སྐུ་འདྲ་སོགས་བླུ་ཚེ་ཡང་ང་ལ་དངོས་པོ་འདི་ཙམ་ཡོད་འདུག་པས་དེ་ཁྱེད་ལ་བྱིན་ན་ང་ལ་སྐུ་འདི་ཨེ་སྟེར་ཟེར་བ་མ་གཏོགས་རིན་ཐང་གཅོད་མི་རུང། དེ་བཞིན་དུ་ཆོས་ལ་ཡང་མ་གུས་པའི་རིགས་བྱེད་མི་རུང་སྟེ། ཆོས་ནི་སངས་རྒྱས་ཀྱིས་ཀྱང་བཀུར་བའི་འོས་ཡིན། སྔོན་བཅོམ་ལྡན་འདས་ཀྱིས་ཤེར་མདོ་གསུངས་པའི་ཚེ་སེང་གེའི་ཁྲི་རང་ཉིད་ཀྱིས་བཤམས་པ་ལ་གཡས་སྐོར་དུ་བསྐོར་ཏེ་ཕྱག་འཚལ་ནས་ཁྲི་ལ་བཞུགས་པ་ཡང་ཆོས་ལ་གུས་པ་བྱས་པ་ཡིན། དེ་བཞིན་དུ་ཇོ་བོ་མངའ་རིས་སུ་བཞུགས་པའི་སྐབས། ཇོ་བོ་ལ་མི་དད་པའི་སྔགས་པ་ཞིག་གིས་དཔེ་ཞུ་དག་བྱེད་པའི་ཚེ་སོ་དྲེག་བྱུགས་པ་གཟིགས་ནས་སྐུ་ལུས་འདར་ཏེ། ཨ་ཙ་མ་ཨ་ཙ་མ་མི་རུང་གསུངས་པས་ཁོ་དད་དེ་ཆོས་ཉན་པ་དང། ཁྲི་ནམ་མཁའ་བཟང་གིས་དཔེ་ཆ་ལ་ལྟེབ་ཆགས་ཤོར་བ་གཟིགས་ན་ཨ་ལས་བཟང་པོ་ཁྱོད་དེ་འདྲ་མི་བྱེད་གསུངས་ནས་སྐུ་འདར་བ་ཡོང་བ་ཡིན། དེར་མ་ཟད་ས་ལ་གླེགས་བམ་བཞག་ན་སའི་ལྷ་མོ་བརྟན་མ་ཡིད་སྐྱོ་ནས་ཨ་ཁ་སྟོན་པས་སེམས་བསྐྱེད་

― GTD003_Page_0441 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་བསགས་ནས་བྱུང་བའི་ལུང་གི་ཆོས་རྗེས་འཇུག་རྣམས་ཀྱིས་འདི་ལྟར་བྱེད་པ་རེད་ཟེར་ཏེ་ཤིན་ཏུ་མྱ་ངན་བྱེད་པ་ཡིན་པས། ས་སྒྲེན་མོའི་སྟེང་དུ་བཞག་མི་རུང་ཞིང་གླེགས་བམ་ཁྱེར་བ་མཐོང་ན་ཡང་ལྡང་དགོས། གལ་ཏེ་མ་ནུས་ན་ཡིད་ཀྱི་ཕྱག་བྱ་ཞིང། ཡིག་འཁྱར་རྣམས་ལ་ད་ལྟ་ཕལ་ཆེར་ལ་ཆོས་ཚིག་འབྱུང་བས་ཆུ་སོགས་ལ་སྦྱང་བ་མ་གཏོགས་མི་གཙང་བའི་ཕྱོགས་སུ་འདོར་བ་སོགས་མི་རུང་བས། པཎ་ཆེན་བློ་བཟང་ཡེ་ཤེས་ཀྱིས་ལོ་རེ་རེའི་ཞུ་ཡིག་སོགས་བསགས་ནས་ཆུ་གཙང་མར་སྦྱང་བའི་ཕྱག་སྲོལ་ལྟ་བུ་ཡིན། དགེ་འདུན་ལ་སྐྱབས་སུ་སོང་ནས་འབྲོམ་གྱི་རྣམ་ཐར་ལྟར་བྱེད་དགོས་ཏེ། འབྲོམ་གྱིས་ལྷན་པ་སེར་པོ་ལམ་ཁར་ལྷུང་བ་ཚུན་ཆད་བླངས་ནས་དབུ་ལ་འཇོག་ཅིང། བླ་མ་གྲུབ་པའི་དབང་ཕྱུག་གིས་ཀྱང་ལྷན་པ་དམར་སེར་ལམ་དུ་ལྷུང་བ་བླངས་ནས་གཙང་སར་སྐྱེལ་བ་ཡིན། མདོར་ན་ཡར་དཀོན་མཆོག་གི་ཞིང་སོགས་ལ་བཀུར་བཟོས་ཇི་འདྲ་ཞིག་བྱས་ན་རང་ལ་ཡང་དེ་འདྲ་ཞིག་ཡོང་བས། མདོ་ལས་ཀྱང། ཇི་འདྲ་བ་ཡི་ལས་བྱས་པ། །འབྲས་བུ་དེ་འདྲ་འབྱུང་བར་འགྱུར། །གསུངས་པ་ཡིན་ཏེ། དཔེར་ན་ལན་གཅིག་འབྲོམ་སྟོན་པ་གཅིག་པུར་ཕྱོགས་གཅིག་ནས་ཕེབས་པའི་ཚེ་སྔགས་པ་ཞིག་གིས་ཀཱ་རི་དང་ལྷམ་འཛིན་བཅུག་པ་བསྣམས་ནས་ཕེབས་ཚེ་མདུན་ན་སེར་སྦྲེང་བྱེད་པ་མཐོང་ནས། སྔགས་པས་དེ་ཅི་རེད་ཅེས་དྲིས་པས་ང་ལ་སེར་སྦྲེང་བྱེད་པར་འདུག་གསུངས་པས། ཁོ་སྐྲག་ནས་ཀཱ་རི་འཕངས་ཏེ་བྲོས་པ་ལྟ་བུ་ཡིན། འབྲོམ་

― GTD003_Page_0442 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར་འོག་ན་ཆུ་ལས་མེད་པ་ཞིག་དགོས་པ་ལ། ང་ཚོས་ནི་ཨ་བུ་ང་ད་དབྱུག་པ་མདུང་རྩེས་པས་མ་བྱུང་བ་ཡིན། ཡང་ལན་གཅིག་ཇོ་བོས་སཙྪ་དགུ་རེ་འདེབས་པས། ས་རང་ཉིད་ཀྱིས་བརྫིས་པ་ན། འབྲོམ་གྱིས་ངས་བརྫི་ཞུས་པས་ངའི་ལག་པ་ཅི་ལ་བསྐོས་པ་ཡིན་གསུངས་པ་ལ། འོ་ན་ངའི་ལག་པ་གང་ལ་བསྐོས་པ་ཡིན་ཞུས་ནས་བརྫིས་པ་ལྟ་བུ། བླ་མ་དཀོན་མཆོག་ལ་བཀུར་བཟོས་ཅི་ནུས་སུ་བསྒྲུབ་དགོས། བཞི་པ་ལས་འབྲས་ལ་ཡིད་ཆེས་ཀྱི་དད་པ་སྦྱང་བ་ནི་གོང་དུ་བཤད་པ་ལྟར་སྐྱབས་འགྲོའི་བསླབ་བྱ་མཐའ་ཡས་ཀྱང། གཙོ་བོ་ནི་སྡིག་སྤོང་དགེ་སྒྲུབ་སོགས་ལས་འབྲས་ཀྱི་རྣམ་གཞག་གཙོ་བོར་བསམ་པ་འདི་ཉིད་ཡིན་ཏེ། དེའི་རྒྱུ་མཚན་སྐྱབས་དངོས་ནི་ཆོས་ཡིན་ལ། ཆོས་ཀྱི་སྐད་དོད་དྷ་ར་ངེས་ཚིག་གིས་བཤད་ན་འཛིན་པ་ལ་འཇུག་པས། ངན་སོང་ལས་འཛིན་པ་ཞེས་པའི་དོན་ཡིན་ལ། དེ་ཡང་ལས་འབྲས་ཀྱི་བླང་དོར་ཚུལ་བཞིན་དུ་བྱེད་པ་ལ་རག་ལས་སྐྱབས་འགྲོའི་འོག་ཏུ་ལས་འབྲས་བཤད་པ་ཡིན་ནོ། །འདི་ལ་ཡང་ལས་ངེས་པའི་ཚུལ། ལས་འཕེལ་ཆེ་བ། ལས་མ་བྱས་པ་དང་མི་ཕྲད་པ། ལས་བྱས་པ་ཆུད་མི་ཟ་བ་བཞི་ལས། ལས་ངེས་པའི་ཚུལ་ནི། དམྱལ་བའི་གནས་སུ་རླུང་བསེར་བུ་ལངས་པ་ནས་དགྲ་བཅོམ་པས་ཟང་ཟིང་མེད་པའི་ཚོར་བ་སྡུག་བསྔལ་གྱི་བར་ཐམས་ཅད་རྒྱུ་དགེ་སྡིག་གཉིས་ཀྱི་འབྲས་བུར་ངེས་པ་ཡིན་ལ། ལས་འཕེལ་ཚུལ་ནི། དཔེར་ན་བྲམ་ཟེ་སོ་ཀ་པ་ལ་སྟོན་པའི་ཆོས་གོས་རྡོལ་པ་བསྟན་པ་ན། དེས་ལྷན་པ་ཞིག་ཕུལ་བ་འགྲིག་པས་དགའ་བར་འབྲས་བུ་རྒྱ་ཆེན་པོ་བྱང་ཆུབ་སོགས་སུ་ལུང་བསྟན་པ་ན་ལོག་ལྟ་

― GTD003_Page_0443 ―

^{[མ་དཔེ་གཟིགས་ན་འདིར་གནོན།]}

[Full Size]

མཁན་ཞིག་གིས་འདིའི་ངོ་འཛིན་ཡིན་གྱི་དེ་འདྲ་མི་སྲིད་སྙམ་དུ་ལོག་ལྟ་སྐྱེས་པའི་ཚེ། བཏབ་ཤིང་ནྱ་ཀྲོ་ཏའི་ཡལ་གས་དཔག་ཚད་ཀྱི་བར་དུ་ཁྱབ་པར་ནུས་པ་ལ་ཡང། ས་བོན་ཡུངས་འབྲུ་ཙམ་ལས་མེད་པའི་དཔེས་ལོག་ལྟ་སེལ་བར་མཛད་པ་ལྟ་བུ་དང། གཞན་ཡང་ཞིང་ལ་བརྟེན་ནས་སྟོབས་ཆེ་བ། ཕ་མ་དང་བླ་མ་ལ་བསྙེན་བཀུར་བ་ལྟ་བུ། བསམ་པས་སྟོབས་ཆེ་བ་བྱང་ཆུབ་ཀྱི་སེམས་ཀྱི་རྩིས་ཟིན་པ། དངོས་པོ་སྟོབས་ཆེ་བ་སྦྱིན་པ་ལ་ལྟོས་ཏེ་ཚུལ་ཁྲིམས་བསྲུང་བ་ཕན་ཡོན་ཆེ་བ་ལྟ་བུ། རྟེན་གྱིས་སྟོབས་ཆེ་བ་ཁྱིམ་པ་བྱང་སེམས་ཀྱིས་མར་ཁུ་རྒྱ་མཚོ་ལྟ་བུ་ལ་མར་མེ་བྱས་ཏེ་ཕུལ་བ་ལས་དགེ་སློང་བྱང་སེམས་ཀྱིས་སྣུམ་གྱིས་བསྐུས་པས་རས་སྦར་དེ་མར་མེ་ཕུལ་བ་བསོད་ནམས་ཆེ་བ་ལྟ་བུ་ཡིན་ལ། མྱུར་ལམ་དུ་དུས་ཀྱི་སྟོབས་ཆེ་བའི་ཁྱད་པར་ཞིག་ཀྱང་གསུངས་པ་ནི། ཤ་ར་བས་ང་ཚོ་ལ་སྙིགས་མ་དུས་བཟང་དུ་སོང་བ་ཡིན་གསུངས་པ་དང་གནད་གཅིག་གོ །གཞན་ཡང་ལས་ཀྱི་དབྱེ་བ་མཐའ་ཡས་ཀྱང་ཆེ་ལོང་བཅུར་བསྡུས་པས་ཕྱི་མ་གསུམ་ནི་ལས་མ་ཡིན་ཏེ། ལས་ནི་ཁབ་ལེན་གྱིས་ལྕགས་ལེན་པ་དང་སྤོས་ཤེལ་གྱིས་རྡུལ་འཛིན་པ་བཞིན་དུ་སེམས་སྡོད་དུ་མི་འཇུག་པའི་བྱེད་ལས་ཅན་གྱི་སེམས་བྱུང་ཞིག་ཡིན་ལ། དེ་གསུམ་ནི་གཙོ་བོ་ཡིད་ཀྱི་རྣམ་ཤེས་ཡིན་པའི་ཕྱིར་རོ། །དེ་དག་ལ་སོ་སོར་ཕྱེ་ན་སྲོག་གཅོད་གཅིག་ལ་ཡང་བསམ་ལས་འདས་ཏེ། མཛོད་ལས། དམག་ལ་སོགས་པ་དོན་གཅིག་ཕྱིར། །གསུངས་པ་ལྟར། དགེ་སློང་བརྒྱས་མི་གཅིག་གསོད་པའམ་གསོད་དུ་བཅུག་ན་ཐམས་ཅད་ལ་ཕམ་པ་འབྱུང་

― GTD003_Page_0444 ―

^{[མ་དཔེ་གཟིགས་ན་འདིར་གནོན།]}

[Full Size]

བས་སྡོམ་པ་གཏོང་འགྲོ་བ་ཡིན་ལ། གཞན་ཡང་སྲོག་གཅོད་ཀྱི་ཉེས་པ་འབྱུང་བའི་སྒོ་ཤིན་ཏུ་མང་སྟེ། བླ་མ་བྱམས་པས་ང་ཚོ་ལ་ནུས་པ་མེད་པ་རང་གི་ཕོ་སྐྱེས་པ་མིན། ནུས་པ་ཞིག་ཡོད་ན་མི་ཚོ་ལ་བསྟན་བཤིག་ཟེར་ཡོང་སྟེ། མཐུ་གཏད་སོགས་ཀྱིས་ཕ་རོལ་པོ་ཤི་ན་སྡོམ་པ་ཤོར་ནས་དོན་ལ་རང་རྒྱུད་ཀྱི་བསྟན་པ་བཤིག་པ་ཡིན། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །གསུངས་པ་ལྟར། རང་རྒྱུད་ཀྱི་ལུང་རྟོགས་ཀྱི་ཆོས་གཉིས་ལ་བསྟན་པ་ཟེར་བ་མ་གཏོགས། བསྟན་པ་ཟེར་བ་ཟུར་དུ་ཡོད་པ་མིན། འོ་ན་རྒྱུད་སྡེ་བཞིར་མངོན་སྤྱོད་ཀྱི་ལས་གསུངས་པ་མ་ཡིན་ནམ་ཞེ་ན། རྒྱུད་སྡེར་མ་ཟད་མདོ་ལས་ཀྱང་བྱང་ཆུབ་སེམས་དཔས་མངོན་སྤྱོད་ཀྱི་ལས་ཀྱིས་འདུལ་དགོས་པའི་བསྟན་དགྲ་སོགས་ལ་དེ་ལྟར་མ་བྱས་ན་ཉེས་བྱས་སུ་འགྱུར་བར་སྡོམ་པ་ཉི་ཤུ་པར་གསུངས་པ་དང། དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་ཅན་སྙིང་རྗེས་ཀུན་ནས་བསླང་སྟེ་བསད་པས་ཚོགས་རྒྱ་ཆེན་པོ་རྫོགས་པར་གསུངས་པ་ལྟ་བུ་ཡོད་ནའང་དེ་ལྟར་བྱེད་པ་ལ་སྙིང་རྗེ་ཁོ་ནས་ཀུན་ནས་བསླང་བ་དགོས་ཏེ། ཁ་སྦྱོར་དབྱེ་བའི་ཆོ་ག་སོགས་སུ་ཡང། སྙིང་རྗེས་དགྲ་བགེགས་སྒྲོལ་ཞེས་འབྱུང་བ་ལྟ་བུ་ཡིན། དེ་ལྟར་སྲོག་གཅོད་ཀྱི་དབྱེ་བ་མང་བས། དེ་བསྲུང་བ་ལ་ཡང་ཆུ་ཚགས་འཆང་བ་ཚུན་ཆད་ཀྱིས་བསྲུང་དགོས་ལ། དེའི་ཆར་གཏོགས་ཀྱང་ས་བརྐོ་ཤིང་གཅོད་སོགས་ཡོད་པས་བསྔོ་བགྲང་ཙམ་ཡང་དཀའ་བ་ལ། ཇི་ལྟར་བསྲུང་སྙམ་ན་སྐྱོན་མེད་དེ། དེ་ཐམས་ཅད་བསྡུས་ནས་རང་གི་སྒོ་གསུམ་བསྲུང་བས་ཉེས་

― GTD003_Page_0445 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྒོ་ཐམས་ཅད་ཅིག་ཅར་དུ་ཁེགས་ནུས་པ་ཡིན། དེས་ན་མཁས་གྲུབ་རྗེས། ལོ་གསུམ་ལ་སྐྱེས་བུ་ཆུང་ངུ་རྫོགས་ན། ཕོ་རྒོད་པ་ཡིན་གསུངས་པ་ལྟར་ངང་མ་ཐུང་བར་སྐྱེས་བུ་ཆུང་ངུ་དང་ཐུན་མོང་བའི་ལམ་ལ་བློ་ལེགས་པར་སྦྱངས་ཏེ་སྒོ་གསུམ་མི་དགེ་བ་ལས་བཟློག་ཐུབ་པ་ཞིག་བྱུང་ན་འདུལ་བ་ལུང་དུ་གསུངས་པ་ལྟར་འཆི་ཁར་རང་ཉིད་བདེ་འགྲོར་འགྲོ་བ་ལུང་སྟོན་ཐུབ་པ་ཞིག་ཡོང་གསུངས། གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་ཡང་ཆུང་ངུ་དང་ཐུན་མོང་བའི་ལམ་རིམ་སྟོན་པའི་གསུང་རབ་ལ་བལྟ་བ་དང་། ཆོས་མཐུན་གྱི་གྲོགས་ལ་ཆོས་དང་མཐུན་པའི་གཏམ་བྱ་དགོས་ཏེ་ལུགས་ཀྱི་བསྟན་བཅོས་ལས་གསུངས་པ་ལྟར། རམ་དང་བ་བླ་བསྲེས་ན་ལྗང་ཡོང་བ་བཞིན་དུ་བློ་གྲོས་ཁྱད་པར་ཅན་སྐྱེ་བས་དགོས་པ་ཆེའོ། །གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ་ནི། དེ་ལྟར་སྐྱེས་བུ་ཆུང་ངུའི་ལམ་ལ་བློ་ལེགས་པར་སྦྱངས་པས་རང་ཉིད་བདེ་འགྲོར་འགྲོ་བ་ལུང་སྟོན་ཐུབ་པ་ཙམ་བྱུང་ཡང་། དེས་མི་ཆོག་པར་སྐྱེས་བུ་འབྲིང་དུ་ཁྲིད་དགོས་པས་དེ་ལ་གཉིས། ཐར་པ་དོན་གཉེར་གྱི་བློ་སྐྱེད་པ་དང་། ཐར་པར་བགྲོད་པའི་ལམ་གྱི་རང་བཞིན་གཏན་ལ་དབབ་པའོ། །དང་པོ་ལ་གཉིས། ཐུན་གྱི་ངོ་ལ་བོ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། སྐྱབས་གནས་ཀུན་འདུས་ཞེས་སོགས་ཕལ་ཆེར་སྔར་བཞིན་ནོ། །གཉིས་པ་དངོས་གཞི་ལ་

― GTD003_Page_0446 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས། འཁོར་བ་སྤྱིའི་སྡུག་བསྔལ་བསམ་པ་དང། སོ་སོའི་སྡུག་བསྔལ་བསམ་པའོ། །དང་པོ་ནི། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་སྟེན་པར་བྱེད་པ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་གསུངས་པ་ལྟར། དང་པོར་སྡུག་བདེན། དེ་ནས་ཀུན་འབྱུང་། དེ་ནས་འགོག་བདེན། དེ་ནས་ལམ་བདེན་བཤད་པ་ནི། ཉམས་ལེན་ལ་འཇུག་རིམ་གྱི་དབང་དུ་བྱས་པ་ཡིན་ཏེ། དཔེར་ན་ནད་མི་འདོད་ན་སྨན་པ་མཁས་པ་བསྟེན་ནས་བཅོས་པ་ལ་འཇུག་པ་བཞིན་དུ། སྡུག་བསྔལ་ལ་མི་འདོད་པའི་བློ་ཡོད་ན། དེ་སྤོང་བ་ལ་འཇུག་པས། ཐོག་མར་ཁྱབ་པ་འདུ་བྱེད་ཀྱི་སྡུག་བསྔལ་བསམ་དགོས། དེའི་རྒྱུ་མཚན་གྱིས་བདེ་ལམ་འདིར་ཡང། ཁྱབ་པ་འདུ་བྱེད་ཀྱི་སྡུག་བསྔལ་འཆད་པའི་ཚེ། དཔེར་ན་མི་ནག་ཅན་ཟླ་བ་གཅིག་ནས་གསོད་ངེས་ཞིག་གནས་སྐབས་ངོ་ཆེན་ལ་བརྟེན་ནས་དབྱུག་པས་བསྣུན་པའི་སྡུག་བསྔལ་མེད་ཀྱང་གསོད་པ་ལ་ཇེ་ཉེར་འགྲོ་བས། བདེ་བའི་བློ་སྐྱེ་བའི་སྐབས་མེད་པ་དཔེར་མཛད་ནས་གསུངས་པ་ལྟར། རང་ཅག་འཁོར་བའི་བཙོན་རར་བཟུང་སྟེ་རྣམ་པར་ཤེས་པ་ཕུང་པོ་ལ་བཅིངས་ནས་ལས་ཉོན་གྱིས་གཞན་དབང་དུ་སོང་བ་འདི་ཉིད་ཁྱབ་པ་འདུ་བྱེད་ཀྱི་སྡུག་བསྔལ་གྱི་མཚན་ཉིད་ཡིན་ཏེ། འདིར་འཁོར་བ་ཞེས་པ་དང། བཅིང་བ་ཞེས་པ་སྐད་དོད་གཅིག་གོ །དེ་ཡང་དཔེར་ན་སྔོན་གཉའ་ལམ་གྱི་མཚན་ཉིད་པ་ཚོས། རྗེ་མི་ལ་ལ། གཞན་

― GTD003_Page_0447 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་གི་མཚན་ཉིད་གང་ཡིན། འགལ་རྟགས་ཀྱི་མཚན་ཉིད་གང་ཡིན་ཞེས་སོགས་དྲིས་པས་ལན་དུ། རྗེ་མི་ལས། རང་དབང་མ་འདུས་པ་གཞན་དབང་གི་མཚན་ཉིད། ཁྱོད་ཆོས་དང་རྒྱབ་འགལ་དུ་སོང་བ་འགལ་རྟགས་ཀྱི་མཚན་ཉིད། ངན་སོང་དུ་འདྲིལ་བ་འབྲེལ་རྟགས་ཀྱི་མཚན་ཉིད། ངས་སྒོམ་ཚད་མ་བྱས་པ་ལ་ཁྱོད་ཚོས་ཕྲག་དོག་ཚད་མ་སྐྱེས། སྐུར་བ་ཚད་མ་བཏབ། ངན་སོང་ཚད་མར་སྐྱེས་པ་ཚད་མའི་མཚན་ཉིད་ཡིན་གསུངས་ཏེ། གྲུབ་ཆེན་གྱི་གསུང་འདི་གནད་ཆེའོ། །དེས་ན་ཐོག་མར་འཁོར་བ་གང་ལ་ཟེར་ལེགས་པར་དཔྱད་ནས་ངོས་མ་ཟིན་ན། སྔོན་སྨན་ཁང་པའི་གྲྭ་པ་ཞིག་རྗེ་དོན་ཡོད་མཁས་གྲུབ་པའི་དྲུང་དུ་མཇལ་བའི་ཚེ། ཁྱོད་གང་ནས་ཡིན་དྲིས་པས། ང་སྨན་ཁང་པའི་གྲྭ་པ་ཡིན་ཟེར་བ་ལ། སྨན་ཁང་པའི་གྲྭ་པ་གསུངས་ནས་ཐུགས་མཉེས་མཉེས་གནང་བས་ཁོས་ཞུ་རིན་མེད་ཞུས་པ་ལ། ཞུ་རིན་ཡོད་དྲག་གྲུབ་ཆེན་སྨན་ཁང་པའི་གྲྭ་པ་གསུངས་པས། བདག་འཁོར་བར་མ་འཁྱམས་ཙམ་ལགས་ཞུས་པ་ལ། བླ་མས་ང་ཚོ་ནི་འཁོར་བའི་གཏིང་དུ་འཁྱམས་པ་ལ་ཁྱོད་ཞེད་པོ་རེད་གསུངས། ཕྱིས་སུ་བླ་མ་བྱམས་པ་དང་ཁོང་གཉིས་གསུང་བགྲོས་གནང་སྐབས་ཁོས་འཁོར་བར་མ་འཁྱམས་པ་དེ་དོར་མ་ཕུད་པ་རེད་གསུངས་པ་ལྟ་བུར་མ་སོང་བར་ངོས་ཟིན་དགོས། ངོས་འཛིན་ཡང་ང་རང་ཚོ་སྡོད་པའི་ཁང་པ་སོགས་ལ་བྱེད་པ་མིན། གང་ལ་བྱ་བ་ཡིན་སྙམ་ན། རྣམ་འགྲེལ་ལས། སྡུག་བསྔལ་འཁོར་བ་ཅན་ཕུང་པོ། །ཞེས་དང། མཛོད་

― GTD003_Page_0448 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། གང་དག་ཟག་བཅས་ཉེར་ལེན་པའི། །ཕུང་པོ་དེ་དག་འཐབ་བཅས་ཀྱང། །ཞེས་གསུངས་པ་ལྟར། ཉེར་ལེན་གྱི་ཕུང་པོ་ལ་ཡང་ཟེར་ཞིང། དེ་ཡང་དཔེར་ན་ཙན་དན་ལས་བྱུང་བའི་མེ་ལ་ཙན་དན་གྱི་མེ་དང། ནས་ལས་བཙོས་པའི་ཆང་ལ་ནས་ཆང་ཟེར་བ་ལྟར། རྒྱུ་ལས་ཉོན་གཉིས་ཀྱིས་ཉེར་ལེན་བྱས་ནས་བླངས་པའི་ལུས་ལ་ཉེར་ལེན་གྱི་ཕུང་པོ་ཞེས་རྒྱུ་མིང་འབྲས་ལ་བཏགས་པ་ཡིན། དེ་ལྟར་དང་པོ་འཁོར་བ་ངོས་བཟུང་ནས་དེའི་རྒྱུ་སྡུག་བསྔལ་བསམ་པ་ལ་སྡུག་བསྔལ་བརྒྱད་དང། དྲུག་དང་། གསུམ་སོགས་ལས། འདིར་ངེས་མེད་དྲུག་གཙོ་བོར་གསུངས་ཤིང། དེ་ཡང་མངོན་རྟོགས་རྒྱན་ལས། མེད་པའི་རྣམ་པ་ཞེས་དང། ཤེར་མདོ་ལས། རབ་འབྱོར་གྱིས་གསོལ་པ། བཅོམ་ལྡན་འདས་ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་ཞུས་པ་ལ་མ་མཆིས། ཞེས་པ་ཞེ་ས་ཡིན་པས། ལན་དུ་བཅོམ་ལྡན་འདས་ཀྱིས་རབ་འབྱོར་ནམ་མཁའ་མེད་པའི་ཕྱིར་རོ་ཞེས་གསུངས་པ་ལྟར། འཁོར་བའི་ཕུན་ཚོགས་དང་དགྲ་གཉེན་སོགས་འདུས་བྱས་སོ་ན་མི་གནས་པས་ཅུང་ཟད་ཙམ་ཡང་མི་སྡོད་པར་སྐད་ཅིག་ལ་འགྱུར་ནས་འགྲོ་བ་ཡིན། མ་བརྟགས་མ་དཔྱད་པའི་ཚེ་ན་དེ་རིང་མཐོང་བའི་རི་འདི་ཁ་སང་གི་རི་དེ་ཡིན་ཡིན་འདྲ་བ་འཆར་ཡང། རྣམ་འགྲེལ་ལས་གསུངས་པ་ལྟར། འཇིག་པ་ཕྱིས་འབྱུང་གི་རྒྱུ་ལ་ལྟོས་མེད་ཀྱི་རིགས་པས་བསྒྲུབ་ན་སྐད་ཅིག་ཙམ་ཡང་སྡོད་པའི་མཐུ་མེད་པར་འགྲུབ་ཅིང་དེ་ལྟར་སྐད་ཅིག་གིས་འཇིག་པའི་མི་རྟག་པ། སྐྱེས་བུ་ཆུང་ངུའི་སྐབས་ཀྱི་

― GTD003_Page_0449 ―

^{[མ་དཔེ་གཟིགས་ན་འདིར་གནོན།]}

[Full Size]

མི་རྟག་པ་གཉིས་མི་གཅིག་སྟེ། འདི་ནི་སྐད་ཅིག་མའི་མི་རྟག་པ་ཡིན་ལ། གཅིག་ཤོས་རྒྱུན་གྱི་མི་རྟག་པ་ཡིན་ནོ། །དེ་ལྟར་འཁོར་བ་འདི་ན་དགྲ་གཉེན་སོགས་ལ་ཡིད་བརྟན་མེད་པར་མ་ཟད་འཁོར་བའི་ཕུན་ཚོགས་ཅི་ཙམ་ཐོབ་ཀྱང་ངོམས་པ་མེད་པར་སླར་ཡང་སྲེད་པ་འདྲེན་པ་ཝ་སྐྱེས་ཀྱི་རྣམ་ཐར་ལྟ་བུ་ཡིན་ཏེ། སྔོན་ཝ་ཞིག་གིས་ཚོང་པ་ལྔ་བརྒྱ་ཤི་བའི་ཤུལ་དུ་ཕྱིན་ནས་གཞན་རྣམས་ལ་རིམ་གྱིས་ཟ་དགོས་སྙམ་ནས་སེར་སྣ་བྱས་ཏེ། ཐོག་མར་གཞུ་ཟོས་པས་གཞུ་རྒྱུད་ཆད་དེ་གཞུ་འཕར་ནས་གཞུ་མཆོག་གིས་སྣ་ལ་བཏང་ནས་ཤི་བའི་གཏམ་རྒྱུད་ལྟ་བུ་ཡིན། འཁོར་བའི་ཕུན་ཚོགས་དང་ལུས་ཕུན་སུམ་ཚོགས་པ་ཅི་ཙམ་ཐོབ་ཀྱང་ཡིད་བརྟན་མེད་པ་ནི། ཉི་ཟླ་སོགས་སུ་སྐྱེས་ཏེ་རང་འོད་ཀྱིས་འཇིག་རྟེན་གསལ་ནུས་པ་ཡང་མུན་ཁྲོད་དུ་རང་གི་ལག་པ་བརྐྱང་བསྐུམ་ཙམ་ཡང་མི་མཐོང་བར་སྐྱེ་བ་དང། རྒྱལ་པོ་ང་ལས་ནུས་གླིང་བཞི་ལ་དབང་བསྒྱུར་ཏེ་སུམ་ཅུ་རྩ་གསུམ་དུ་བརྒྱ་བྱིན་སོ་དྲུག་དང་ལྷན་ཅིག་ཏུ་བསྡད་ནས་མཐར་འཇིག་རྟེན་གྱི་གཏམ་དཔེ་ལ་བསོད་ནམས་ཟད་ཁ་བསམ་ངན་སྐྱེས་ཟེར་བའི་དཔེ་ལྟར། བརྒྱ་བྱིན་ལ་བསམ་ངན་སྐྱེས་པའི་དབང་གིས་འཛམ་གླིང་དུ་ལྷུང་བ་ལྟ་བུ་ཡིན། མདོར་ན་མདོ་མྱང་འདས་ལས་གསལ་བར་གསུངས་པ་ལྟར་འཁོར་བའི་བདེ་སྡུག་ལ་འདི་མ་མྱོང་བྱ་བ་གཅིག་ཀྱང་མེད་ཅིང། སེམས་ཅན་གཅིག་གིས་རང་གི་མ་བྱས་ནས་འོ་མ་འཐུང་བ་དང། ཡི་དྭགས་སུ་སྐྱེས་ནས་རྣག་ཁྲག་འཐུང་བ་དང། རྐུན་མ་བྱས་པས་མགོ་བཅད་པ་སོགས་ཀྱང་བསམ་ལས་འདས་ཏེ།

― GTD003_Page_0450 ―

^{[མ་དཔེ་གཟིགས་ན་འདིར་གནོན།]}

[Full Size]

དཔེར་ན་ཁྱིམ་བདག་དཔལ་སྐྱེས་བྱ་བ་རྒས་ཤིང་འཁོག་པ་བཟའ་མི་རྣམས་ཀྱིས་མནར་བས་ཡིད་སུན་པ་རབ་ཏུ་བྱུང་བ་དང། ལས་གཞོན་རིམ་ནས་བྱེད་དགོས་ཤིང། ཁོ་བསླབ་པ་གཞོན་པས་ཐམས་ཅད་ཀྱིས་མངག་པ་ན་ཡིད་སྐྱོ་ནས་དབེན་པ་ཞིག་ཏུ་སོང་སྟེ་ཆོས་གོས་རྣམ་གསུམ་ཤིང་ལྗོན་པ་ཞིག་ལ་བཀལ་ནས། རྒྱལ་བྱེད་ཚལ་ཕྱོགས་སུ་ཕྱག་གསུམ་བཙལ་ཏེ། བདག་ནི་སངས་རྒྱས་སྤོང་བ་མ་ལགས། །ཆོས་དང་དགེ་འདུན་སྤོང་བ་མ་ལགས། །བདག་ལུས་འདིས་མནར་བས་ལུས་དོར་ཏེ་སྐྱེ་བ་ཕྱི་མ་གཞོན་ནུ་ནས་བསྟན་པ་དང་མཇལ་ཏེ་རབ་ཏུ་བྱུང་བར་ཤོག་ཅེས་སྨོན་ལམ་བཏབ་ནས་གཡང་ལ་མཆོང་བ་དང། མོའུ་འགལ་གྱི་བུའི་མངོན་ཤེས་ཀྱིས་མཁྱེན་ནས་དེ་མ་ཐག་རྫུ་འཕྲུལ་གྱིས་ནམ་མཁའ་ནས་བླངས་ཏེ་ཅི་ཡིན་དྲིས་པ་ལ་རྒྱུ་མཚན་གསོལ་བས། ངའི་ཆོས་གོས་ཀྱི་གྲྭ་ལ་འཇུས་ཤིག་གསུངས་ནས། རྫུ་འཕྲུལ་གྱིས་རྒྱ་མཚོའི་འགྲམ་དུ་ཕྱིན་ནས་རུས་པའི་རི་ཆེན་པོ་ཞིག་འདུག་པའི་རྩིབ་མའི་སྟེང་དུ་ཞག་བདུན་འགྲོ་དགོས་པ་དེ་འདྲ་ཞིག་གི་སྟེང་དུ་བཞུགས་པ་ལ་དཔལ་སྐྱེས་ཀྱིས་འདི་ཅི་ཡིན་ཞུས་པས། འདི་ཁྱོད་ཀྱི་སྐྱེ་བ་སྔ་མ་ཆུ་སྲིན་དུ་སྐྱེས་པའི་རུས་པ་ཡིན། དེ་ཡང་ཆུ་སྲིན་རྣམས་རང་བཞིན་གྱིས་གཉིད་ཆེ་བས་ལོ་མང་པོ་གཉིད་དེ་སད་པ་ན་ཤིན་ཏུ་བཀྲེས་པས་ཁ་གདངས་པ་ན་དཔག་ཚད་གཅིག་ཚུན་ཆད་ཀྱི་རྒྱ་མཚོ་ཁར་སོང་བ་དང། སོ་བཙིར་ཏེ་ཆུ་ཕྱིར་བཏོན་ནས་སྲོག་ཆགས་ཐམས་ཅད་ཟ་བ་ལ། ལན་ཅིག་ཆུ་སྲིན་དེའི་ཁ་གདངས་པ་དང་ཚོང་བ་མང་པོ་ཞིག་དེར་སླེབ་པ་འཛོམས་པས་ཐམས་ཅད་སྐྲག་ནས་སངས་རྒྱས་ལ་སྐྱབས་སུ་མཆིའོ། །ཞེས་བསྒྲགས་པ་ཆུ་སྲིན་གྱིས་ཐོས་ཏེ་སྔོན་གྱི་

― GTD003_Page_0451 ―

^{[མ་དཔེ་གཟིགས་ན་འདིར་གནོན།]}

[Full Size]

བག་ཆགས་སད་ནས་དེ་མ་ཐག་ཁ་བཙུམས་ཏེ། གཞན་ལ་གནོད་འཚེ་སྤངས་པས། ཆུ་སྲིན་དེ་ཉིད་མུ་གེས་ཤི་བ་དང། རྒྱ་མཚོར་རོ་ཞག་ཏུ་གནས་མི་སྲིད་པས་རླུང་གིས་བདས་ཏེ་འཕང་བའི་རུས་པ་འདི་ཡིན་ཞེས་བསྟན་པས་ལས་འབྲས་ལ་ཡིད་ཆེས་དང། ལུས་ལོངས་སྤྱོད་སོགས་ལ་ངེས་པ་མེད་ཚུལ་ལ་ངེས་ཤེས་གཏིང་ནས་འདྲོངས་ཏེ་འཁོར་བ་མཐའ་དག་ལ་ཞེན་པ་ལོག་ནས་བདེན་པ་མཐོང་ཞིང་རྫུ་འཕྲུལ་ཀྱང་ཐོབ་སྟེ། ཚུར་ལམ་བྱ་མ་བུ་བཞིན་དུ་མཁན་པོའི་རྗེས་སུ་འབྲང་སྟེ་བྱོན་པ་ལྟ་བུ་ཡིན། དེ་ལྟར་ངེས་མེད་དྲུག་སོགས་ཀྱི་འཁོར་བ་ལ་ཡིད་བརྟན་མེད་ཚུལ་མ་བསམས་པར་ཁྱབ་པ་འདུ་བྱེད་ཀྱི་སྡུག་བསྔལ་གོ་མི་ནུས་ཏེ། རྣམ་འགྲེལ་ལས། མི་རྟག་ལས་ནི་སྡུག་བསྔལ་དང། །སྡུག་བསྔལ་ལས་ནི་བདག་མེད་གསུངས། །ཞེས་གསུངས་པ་ལྟར་ཁྱབ་པ་འདུ་བྱེད་ཀྱི་སྡུག་བསྔལ་གོ་བ་ལ་ཡིད་བརྟན་དུ་མི་རུང་ན་མི་རྟག་པའི་ངང་ཚུལ་གོ་དགོས་པ་ཡིན། དེས་ན་མི་རྟག་པ་སྒོ་དུ་མ་ནས་བསམ་དགོས་ཏེ། ཇོ་བོ་རྗེས། མི་རྟག་པ་ཆུ་འགྲམ་དུ་བསྒོམ་ན་ཆུ་རིབ་རིབ་འགྲོ་བ་འདི་རང་བཟང་བར་འདུག་གསུངས། རྣལ་འབྱོར་པ་ཆེན་པོ་ཐུན་མཚམས་སུ་རི་རྩེར་ཕེབས་ནས་དུར་ཁྲོད་སོགས་སུ་གཟིགས་ཏེ། ཞབས་འབྲིང་བ་ལ་སུ་དང་སུ་ཤི་ཞེས་དྲིས་ནས་མི་རྟག་པ་བསྒོམ་པ་དང། ཤིང་དྲུང་པས་སྔར་བཤད་པ་ལྟར་རྒྱུ་སྐར་སོགས་ལ་བལྟས་ནས་བསྒོམ་པ་ཡིན་པས་དམིགས་པ་གང་བདེ་ནས་བསྐྱངས་ཏེ། མི་རྟག་པའི་ངང་ཚུལ་མཐོང་ནས་དེ་རྟོག་པའི་བློ་བཅོས་མིན་ཞིག་སྐྱེས་ན།

― GTD003_Page_0452 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་བ་འདི་ཐམས་ཅད་བཅོས་མ་དང། མགོ་བསྐོར་དུ་གོ་བས་འཁོར་བའི་ཚང་ཚིང་འདོར་བ་ཡིན། དེའི་རྒྱུ་མཚན་ནི། རྗེ་བླ་མས། དེ་ལྟར་གོམས་པས་འཁོར་བའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང། །ཉིན་མཚན་ཀུན་ཏུ་ཐར་པ་དོན་གཉེར་བློ། །བྱུང་ན་དེ་ཚེ་ངེས་འབྱུང་སྐྱེས་པ་ལགས། །ཞེས་གསུངས་པ་ལྟར། ཐར་པ་དོན་གཉེར་གྱི་བློ་རྣལ་མ་ཞིག་སྐྱེ་བ་ལ་འཁོར་བ་མེ་འོབས་ལྟར་མཐོང་བའི་སྐྱོ་ཤས་དྲག་པོ་དགོས་ཤིང། དེ་ཡང་འཁོར་བའི་བདེ་བ་ཐོབ་ཀྱང་ཡིད་བརྟན་མི་རུང་བ་འཇིག་པའི་རང་བཞིན་ཅན་དུ་མཐོང་བའི་བློ་འདིས་འདྲེན་དགོས་ཏེ། དཔེར་ན་བཀའ་བསྟན་འགྱུར་རྣམས་སུ་རྒྱལ་བ་སྲས་དང་བཅས་པ་ཐམས་ཅད་མི་རྟག་པས་སྣ་དྲངས་ནས་ཐར་པའི་གྲོང་ཁྱེར་དུ་གཤེགས་པར་གསུངས། ཉན་ཐོས་ཆེན་པོ་རྣམས་དང། གྲུབ་ཆེན་ཚོ་ཡང་དེ་ལྟར་གཤེགས་པ་ཡིན་ལ། དེ་ལྟར་ཐར་པ་ཐོབ་པ་ལ་མི་རྟག་པ་རྟོགས་དགོས་པར་མ་ཟད། ཉན་ཐོས་ཀྱི་ཐར་པ་ཆ་མཐུན་གྱི་དགེ་རྩ་རྒྱུད་ལ་སྐྱེ་བ་ལ་ཡང་མི་རྟག་པ་ལ་མྱོང་བ་ཐོན་དགོས་ཤིང། བྱང་སེམས་ཀྱི་ཐར་པ་ཆ་མཐུན་གྱི་དགེ་རྩ་སྐྱེ་བ་ལ་དེ་ལས་ཀྱང་ལྷག་པ། མངོན་རྟོགས་རྒྱན་ལས། མཚན་མེད་རབ་ཏུ་སྦྱིན་ལ་སོགས། །ཡང་དག་བསྒྲུབ་ལ་མཁས་པ་ནི། །ཞེས་པ་ལྟར། མི་རྟག་པ་ནས་བཟུང་སངས་རྒྱས་ཀྱི་ལམ་གྱི་བར་ལ་མྱོང་བ་ཐོན་དགོས་ཏེ། རྒྱལ་བུ་གཞོན་ནུ་དོན་གྲུབ་ཡང་གྲོང་ཁྱེར་གྱི་ཕྱི་རོལ་ཏུ་བྱོན་པའི་ཚེ། རྒ་ན་འཆི་བ་སོགས་གཟིགས་པས་རྐྱེན་བྱས་ཏེ་མི་རྟག་པས་སྣ་དྲངས་པ་ཡིན། ཡང་འགའ་ཞིག་གིས་མི་རྟག་པས་སྣ་འདྲེན་པ་ཙམ་ཡིན་མོད་ཀྱང་ལམ་མཐོན་པོར་མི་དགོས་

― GTD003_Page_0453 ―

^{[མ་དཔེ་གཟིགས་ན་འདིར་གནོན།]}

[Full Size]

སྙམ་ན་མ་ཡིན་ཏེ། རྡོ་རྗེ་འཇིགས་བྱེད་ལ་ཡང་དུར་ཁྲོད་བར་མཚམས་མེད་པས་བསྐོར་བ་དང། མི་མགོ་སྐམ་རློན་གྱི་དོ་ཤལ་གྱིས་བརྒྱན་པ་ཡང་མི་རྟག་པའི་མཚོན་བྱེད་ཡིན། དེར་མ་ཟད་ཡུམ་རྣམས་ལ་ཡང་རོ་ལངས་མ་དང། བདག་མེད་མ་དང། ཆོས་དབྱིངས་མ་ཞེས་མིང་འདོགས་པའི་རྒྱུ་མཚན་ཡང་དེ་ཡིན་པས། མི་རྟག་པ་འདི་ལམ་མཐོ་དམན་ཐམས་ཅད་དུ་གལ་ཆེའོ། །གཉིས་པ་སོ་སོའི་སྡུག་བསྔལ་བསམ་པ་ལ། སྡུག་བསྔལ་བརྒྱད་གསུངས་ཏེ། དེ་ཡང་ས་སྡེར་འཁོར་བ་སྤྱི་ལ་སྦྱར་ཡང། འདིར་མིའི་དབང་དུ་བྱས་སོ། །དེ་ལ་དང་པོ་སྐྱེས་པའི་སྡུག་བསྔལ་ནི། དགའ་བོ་མངལ་འཇུག་གི་མདོ་ལས། མི་གཙང་བ་རྣམ་པ་མང་པོས་ཡོངས་སུ་གང་བ། སྲིན་བུའི་རིགས་སྟོང་ཕྲག་མང་པོའི་གནས། ཞེས་གསུངས་པ་ལྟར། མངལ་གྱི་གནས་ཕོ་བ་ལོང་ཀའི་བར་མི་གཙང་བའི་ཁྲོད་དུ་མས་ཟས་ཟོས་པའི་བཅུད་ལྟེ་བའི་བུ་ག་ནས་སོང་བས་འཚོ་ཞིང། མས་ཟས་ཀྱི་ཚ་གྲང་དང་སྤྱོད་ལམ་མ་གཟབ་པས་སྡུག་བསྔལ་ཚད་མེད་པ་མྱོང་ཞིང། བཅིངས་པ་ལྔས་བཅིངས་པ་ལྟ་བུར་སྡུག་བསྔལ་བཟོད་གླགས་མེད་པས། རྒྱ་ཆེར་རོལ་བ་ལས། དམྱལ་བའི་སྡུག་བསྔལ་གྱིས་ཀྱང་འདིའི་བཅུ་དྲུག་གི་ཆར་ཡང་མི་ཕོད་པར་གསུངས་སོ། །མངལ་དུ་ཞུགས་ནས་སྐབས་ཤིག་ན་རིམ་གྱིས་བགེགས་རིགས་སྟོང་ཕྲག་བརྒྱད་ཅུ། གནོད་རིགས་སུམ་བརྒྱ་དྲུག་ཅུ། ནད་རིགས་བཞི་བརྒྱ་རྩ་བཞི་སོགས་ཀྱང་ལུས་ལ་འཇུག་པ་ཡིན། མདོར་ན་ལས་ཀྱི་ནུས་པ་བསམ་གྱིས་མི་ཁྱབ་པས། ཕ་མའི་ཁུ་ཁྲག་དང་རྣམ་ཤེས་འདྲེས་པའི་

― GTD003_Page_0454 ―

^{[མ་དཔེ་གཟིགས་ན་འདིར་གནོན།]}

[Full Size]

མེར་མེར་པོ་ཞིག་ནས་རིམ་གྱིས་གཏམ་སྨྲ་བ་སོགས་ནུས་པ་འདི་འདྲ་ཞིག་བྱུང་བ་འདི་ཡ་མཚན་ཏེ། ཤིང་སྐམ་ཞིག་ལ་མིར་སྤྲུལ་ནས་གཏམ་སྨྲ་ཞིང་མིའི་བྱ་བ་བྱེད་པ་དང་ཁྱད་མེད། འདི་ལྟར་བསམ་ན་སངས་རྒྱས་ཀྱི་རྫུ་འཕྲུལ་གྱི་ནུས་པ་དང། སེམས་ཅན་གྱི་ལས་ཀྱི་ནུས་པ་འདྲ་བ་ཡིན། རྒ་བའི་སྡུག་བསྔལ་ཡང། ཀ་མ་བའི་ཞལ་ནས། རྒས་པ་ཁད་ཀྱིས་ཁད་ཀྱིས་འོང་བས་དྲག་དུས་གཅིག་ལ་འོང་ན་སྲན་ཐབས་མེད་གསུངས་པ་ལྟར་ད་ལྟ་ལང་ཚོ་དར་ལ་བབ་པའི་གཞོན་ནུ་ཞིག་གློ་བུར་དུ་རྒས་ཤིང་འཁོག་པ་ལང་མི་ནུས་པ་ཞིག་ཏུ་སོང་ན་གཉེན་མཛའ་བཤེས་ཐམས་ཅད་མྱ་ངན་བྱེད། ཐབས་སྡུག་པ་ཅི་འདྲ་ཡོང། འཇིག་རྟེན་ན་ཡང་ལྷ་རྒས་པ་གྲལ་གཤམ་ཟེར་བ་ལྟ་བུ་ཡིན། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས། ལང་ན་ཤིང་རྩ་གནམ་དུ་བསྒྲེང་བ་འདྲ། །འདུག་ན་ས་ལ་འབེབས་ཆེན་རྒྱག་པ་འདྲ། །ཞེས་གསུངས་ཤིང། མཁས་གྲུབ་རྗེའི་རྟོགས་བརྗོད་དུ་ཡང་དེ་ལྟར་གསུངས་པ་ལྟ་བུ་ཡིན། ན་བའི་སྡུག་བསྔལ་ནི། བཞི་བརྒྱ་པ་ལས། འགལ་བ་རྣམས་ལ་བདེ་འོ་ཞེས། །རྣམ་པ་ཀུན་ཏུ་རིགས་མ་ཡིན། །ཞེས་གསུངས་པ་དང། བསླབ་བཏུས་སུ་ཡང། ལུས་ཀྱི་ནང་དུ་འབྱུང་བཞི་སྦྲུལ་མི་མཐུན་པ་བཞི་ལྟར་གནས་པར་གསུངས་པ་བཞིན་དུ་ལུས་ཀྱི་འབྱུང་བཞི་འཁྲུགས་པ་ལས་མི་འདོད་པའི་དཔྱད་སྣ་ཚོགས་བསྟེན་དགོས་ལ། འཆི་བ་ཡང་ད་ལྟ་ཕལ་ཆེར་དུས་མིན་དུ་འཆི་སྟེ། དུས་མ་ཡིན་པའི་འཆི་རྐྱེན་ཡང་མཚན་མོ་རྒྱུ་བ་དང། དེའི་ནང་ནས་ནམ་ཕྱེད་མི་མ་ཡིན་རྒྱུ་བའི་དུས་ཡིན་པས་དེ་འདྲ་ལ་ཕྲད་པ་སོགས། འཆི་རྐྱེན་དགུ་པོ་

― GTD003_Page_0455 ―

^{[མ་དཔེ་གཟིགས་ན་འདིར་གནོན།]}

[Full Size]

གང་རུང་གི་དབང་གིས། ཚེ་འདིའི་དཔལ་འབྱོར་ཐམས་ཅད་དང་བྲལ་ནས་གཅིག་པུར་འགྲོ་བ་སོགས་ཀྱི་སྡུག་བསྔལ་མྱོང་དགོས། གཞན་ཡང་གཉེན་སྡུག་པ་མིག་ལྟར་བཏོན་འགྲོ་ཞིང། དགྲ་མི་སྡུག་པ་ཡང་གང་ནས་ཡོང་ངེས་པ་མེད་དེ། མིག་བལྟ་ལུགས་ཙམ་གྱིས་ཀྱང་དགྲར་འགྱུར་བས་དེ་འདྲ་བྱུང་ན་འདི་སྙམ་དུ་རྟེན་འབྲེལ་གྱི་ཆོས་ཉིད་ལ་ཡང་དཀར་ནག་གཉིས་ལས་དཀར་པོ་བཟང་བས་མིག་དཀར་པོས་བལྟས་པ་དགའ་དྲག་བསམ་ན་ཕན་པོ་ཡོང། གཞན་གྱིས་ངན་སྨྲས་སོགས་བྱས་བྱུང་ན་ཡང་ཀོང་པོ་འོན་པ་ལྟ་བུ་ཞིག་དགོས་ཏེ། ཁོང་གི་རྩར་བཟང་ངན་གང་བཤད་ཀྱང་འོན་རྫུ་བྱས་ནས་བསྡད་པས་མི་རྣམས་ཀྱིས་འོན་པར་འདུག་སྙམ་སྟེ་མཚན་ལ་ཡང་ཀོང་པོ་འོན་པ་ཟེར། ཁོང་གི་ཡོན་ཏན་རྒྱ་ཆེ་ཞིང། ཤེས་རབ་བཟང་པོ་ཞིག་ཡོད་པས། པོ་ཏོ་བས་འདིས་མ་གོ་ན་ཕངས་པ་དགོངས་ནས་ཆོས་གསུངས་སྐབས་གསུང་མཐོན་པོ་གནང་བས། ཁོང་གི་ཐུགས་ལ་བླ་མ་འོ་བརྒྱལ་བར་འདུག་དགོངས་ཏེ། མི་གཞན་མེད་དུས་ཤིག་བླ་མའི་རྩར་ཕྱིན་ནས། བླ་མ་ལགས། ང་ལ་རྣ་བ་གསང་པོ་ཡོད་ཞུས་པ་ལྟ་བུ་ཡིན་ལ། དེ་ནི་རྒྱལ་སྲས་ཞི་བ་ལྷའི་དགོངས་པ་ཡིན་ཏེ། སྤྱོད་འཇུག་ལས། གཤེ་དང་འགྱེད་དང་བཅས་གྱུར་པ། །དེ་ཚེ་ཤིང་བཞིན་གནས་པར་བྱ། །དེ་ཚེ་བདག་གིས་ཤིང་བཞིན་དུ། །ཟུངས་ཐུབ་པར་ནི་གནས་པར་བྱ། །ཞེས་དང། བསླབ་བཏུས་ལས། འཐབ་པ་དང་རྩོད་པའི་ནང་དུ་བདག་བེམ་པོ་ལྟ་བུ་དང། ལུག་ལྟར་ལྐུག་པར་བྱའོ། །ཞེས་གསུངས་ཤིང་། དེར་

― GTD003_Page_0456 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཟད་འཕགས་པ་གང་པོས་དགྲ་བཅོམ་ཐོབ་ནས་སྟོན་པ་ལ་ཞུས་ཏེ། མཐའ་འཁོབ་ཏུ་ཕེབས་པའི་ཚེ། སྟོན་པའི་ཞལ་ནས་མཐའ་འཁོབ་དེའི་མི་རྣམས་ཤིན་ཏུ་གདུག་རྩུབ་པས་ཁྱོད་ཀྱིས་དེར་བག་ཡོད་པར་གྱིས་ཤིག་གསུངས་པ་ན། སྟོན་པའི་བཀའ་བཞིན་འཚལ་ལོ། །འོན་ཀྱང་བདག་ལ་ཉེས་པར་མི་འགྱུར་ཏེ། དེ་དག་གིས་བདག་ལ་བསྡིགས་པ་ནི། འདི་དག་གིས་མ་བརྡུངས་པ་བཀའ་དྲིན་ཆེ་སྙམ་དུ་བསམ་མོ། །བརྡུང་བ་ན་འདི་དག་གིས་བདག་མ་བསད་པ་བཀའ་དྲིན་ཆེའོ་སྙམ་དུ་བསམ་མོ། །ཞེས་ཞུས་པ་ལྟ་བུ་དགོས། འདོད་པའི་དངོས་པོ་བཙལ་ཀྱང་མི་རྙེད་ཅིང་མི་འདོད་པ་ཐོག་ཏུ་འབབ་པའི་སྡུག་བསྔལ་ནི། ནོར་རྫས་ལྟ་བུ་ལུས་སྲོག་ཐེད་ལ་བོར་ཏེ་འཚོལ་དགོས་ཤིང་བཙལ་ནས་ཆས་ཀ་ཆེན་པོ་ཞིག་བསགས་ཀྱང་ཕན་མི་ཐོགས་ཏེ། དཔེར་ན་སྔོན་བླ་མ་ཕྱུག་པོ་ཞིག་གིས་བཅའ་ལག་ཐམས་ཅད་སྒམ་སོ་སོར་བཅུག་ནས་སྒོ་ལྕགས་བརྒྱབ། ལྡེ་མིག་རྣམས་གསེར་སྒམ་ཆུང་ངུ་ཞིག་ཏུ་བཅུག་ནས། དེའི་ལྡེ་མིག་ཆབ་རིལ་ལ་བཏགས་ཡོད་པ་ལས། ཕྱིས་ཁོ་རང་དབུགས་ངར་ངར་ཆད་པའི་ཚེ་ཞབས་ཕྱིས་སྒོ་བརྒྱབ་སྟེ་ལྡེ་མིག་བླངས་ནས་གསེར་དངུལ་སོགས་སྦས་ཏེ་ལྡེ་མིག་ཆབ་རིལ་ལ་བཏགས། སྒོ་ཕྱེ་ནས་ཕྱིར་བཏོན་ཏེ་གཟོད་ངུས་པ་ལ། མི་ཚོས་དེ་འདྲ་མ་བྱེད་ཆས་ཀ་ཚོ་བླངས་ནས་དགོངས་རྫོགས་བྱེད་དགོས་ཟེར་ཙ་ན། ཁྱོད་ཚོས་ལྟོས། ང་ནི་སྡུག་དྲགས་ནས་ལྟ་ཡང་མི་ནུས་ཟེར། ཡང་མི་ཆས་ཀ་ཅན་ཞིག་ཤི་བར་ཟླ་གྲོགས་རྣམས་ཚོགས་ཚེ་ཆས་ཀ་ཅུང་མཐོང་རྒྱུ་མེད་པ་དང། ཁོང་རྣམས་མཚར་ནས་གཅིག་གཅིག་ལ་བལྟ་ཞིང་འདིས་སྦས་ཡོད་པ་ཡིན་ནམ་ཟེར་བའི་ཚེ། གཅིག་གིས་ཡོད་དོན་མེད་ཟེར།

― GTD003_Page_0457 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོད་དྲག་ཁོ་ཆས་ཀ་ཆེ་བའི་དཔེ་ལ་བྱེད་པ་ཡིན་མོད་བྱས་པས། དེ་མེད་པ་བཅོམ་ལྡན་འདས་ཀྱིས་གསུངས་འདུག་ཟེར། གང་ན་བྱས་པས། ཁོས་ཇི་ལྟར་མི་ཤི་དེ་ཡིས་འགྲོ་རྒྱུ་མེད་པ་ལྟར་ཞེས་པའི་ཚིག་དེ་ལ་བཅོས་བརྒྱབ་ནས། སྡུད་པ་ན། མི་དེ་ཤི་ན་རྒྱུ་དེ་ཐམས་ཅད་མེད་པར་འགྱུར། །ཟེར་བ་ལྟ་བུ་ཡིན། ཤི་དུས་ལྡེ་མིག་སུས་འཁྱེར་མི་ཤེས་པས། ད་ལྟ་རང་ལ་དབང་ཡོད་དུས་དཀོན་མཆོག་ལ་མཆོད་པ་སོགས་བྱ་དགོས། གཞན་མ་བྱུང་ཡང་རང་གིས་ཁ་ཟས་བཟང་པོ་རེ་བྱས་ནས་དགེ་སྦྱོར་ཅི་ནུས་བྱེད་དགོས། དེའི་འོག་ཏུ་ལྷ་མ་ཡིན་གྱི་སྡུག་བསྔལ་བསམ་པ་ལ། སྤྱིར་ལྷ་མ་ཡིན་ནི་འགྲོ་བ་རིགས་དྲུག་གི་གྲངས་སུ་ཟུར་དུ་བཤད་ཀྱང་སྲིད་པའི་འཁོར་ལོ་ཆ་ལྔ་པ་བྲི་བའི་ཚེ། འགྲོ་བ་ལྔས་བསྡུས་པ་མདོ་དང་མཐུན་ཏེ། བསྡུས་ཚུལ་ཡང་མདོ་དྲན་པ་ཉེར་གཞག་ལས་དུད་འགྲོར་བསྡུས་ཤིང། ལྷར་བསྡུ་ཚུལ་གཅིག་ཀྱང་ཡོད་དེ། སྔོན་ལྷ་རྣམས་ཀྱིས་བདུད་རྩི་རྙེད་ནས་ལོངས་སྤྱོད་པའི་ཚེ་ལྷ་གཤིས་ངན་ཞིག་གིས་ཆང་འཐུང་ནས་ར་བཟི་སྟེ། ལྷ་རྣམས་ལ་འཁྲུགས་པ་བྱས་པས་ལྷ་རྣམས་ཀྱིས་ཁྱོད་ལྷ་མ་ཡིན་ནོ་ཞེས་བརྗོད་ནས་བསྐྲད་པས་ལྷ་མ་ཡིན་དུ་གྲགས་ཤིང། དེའི་རྒྱུད་པ་ལ་རབ་རྒོད། སྒྲ་གཅན། ཐགས་བཟང་རིས་སོགས་ཡོད་ལ། དེ་ཡང་ལས་ཀྱི་དབང་གིས་ལྷ་མ་ཡིན་གྱི་རིགས་སུ་སྐྱེས་ཙམ་ནས་ལྷའི་དཔལ་འབྱོར་ལ་ཕྲག་དོག་མི་བཟོད་པ་སྐྱེས་ཏེ་འཐབ་ཏུ་སོང་བ་ན། ཀླུ་རྒྱལ་དགའ་བོ་ཉེ་དགའ་བོ་སོགས་ཆུ་མཚམས་ན་ཡོད་པས་འགྲོར་མི་འཇུག་ཅིང། གལ་ཏེ་འཛམ་གླིང་ན་སྡིག་པ་སྟོབས་

― GTD003_Page_0458 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེ་ན། དེ་གཉིས་ཀྱིས་འགོག་མི་ནུས་པས། ཡར་སོང་ནས་ལྷ་དང་འཐབ་པ་ན་ལུས་དྲལ་བ་སོགས་ཀྱི་སྡུག་བསྔལ་དྲག་པོ་མྱོང་ཞིང། ཁྱད་པར་དུ་ལྷའི་དབང་པོ་བརྒྱ་བྱིན་ལ་གླང་ཆེན་ས་ལ་རབ་བརྟན་བྱ་བ་མདོག་སྤྲིན་དང་འདྲ་ཞིང། མཆེ་བ་སོ་གཉིས་ཡོད་པ། དེ་རེ་རེའི་རྩེ་མོར་པདྨ་སོ་གཉིས་རེ་ལ་མཆོད་པའི་ལྷ་མོ་རྣམས་སྤྲོས་ནས་མཆོད་པ་བྱེད་ཅིང། ལྷ་མ་ཡིན་དང་འཐབ་པའི་ཚེ་མཆོད་པ་རྣམས་བསྡུས་ཏེ་སྣ་ལྗགས་ཀྱིས་ལྷ་མ་ཡིན་རྣམས་ལ་བརྡབ་པའི་ཚེ་བྱེ་མའི་ཆངས་བུ་བཞིན་དུ་འཐོར་བ་སོགས་ཀྱི་སྡུག་བསྔལ་བསམ་ལས་འདས་པ་ཡོད། དེའི་ཚེ་སྒྲ་གཅན་ཡང་ཁྲོས་ནས་ངན་སྐད་བརྒྱབ་པ་ད་ལྟའི་རི་དུར་ཟེར་བ་འདི་ཡིན་ཞིང། སྐབས་འགའ་ཞིག་ཏུ་ནམ་མཁའ་ནས་རྡུལ་མང་འབབ་པ་ཡང་ལྷ་མ་ཡིན་རྣམས་ཀྱིས་རི་འཕང་བ་ན། གླང་ཆེན་གྱིས་སྣ་བཤུག་བྱས་པས་རྡུལ་ཕྲ་རབ་ཀྱི་རང་བཞིན་དུ་སོང་བ་དེ་ནམ་མཁའ་ནས་བབས་པ་ཡིན། དེར་མ་ཟད་ཉི་ཟླ་གཟའ་འཛིན་ཡང་ལྷ་དང་ལྷ་མ་ཡིན་འཐབ་པས་ཉི་ཟླའི་འོད་ཀྱིས་ཡར་བལྟ་མ་ནུས་པ་ན་སྒྲ་གཅན་གྱི་ལག་པས་བཀབ་པ་ཡིན་གསུངས། དེ་ནས་འདོད་ལྷའི་སྡུག་བསྔལ་བསམ་ཚུལ་ཡང། འདོད་ལྷའི་ཉེར་ལེན་གྱི་ཕུང་པོ་གྲུབ་པ་ལ་བརྟེན་ནས་ལྷ་མ་ཡིན་དང་འཐབ་པའི་ཚེ་ཡན་ལག་བཅད་པ་སོགས་ཀྱི་སྡུག་བསྔལ་མཐའ་ཡས་ལ་འོན་ཀྱང་མགོ་བཅད་ན་འཆི་བ་མ་གཏོགས་རྐང་ལག་སོགས་བཅད་ཀྱང་སྐད་ཅིག་གཉིས་པར་འབྱར་ནུས་པ་ཡིན། དེ་ཡང་ལྷ་ལ་རྒྱུན་པར་རྫི་མ་འཁྲབ་པ་མེད་ཅིང། སངས་རྒྱས་ཀྱི་སྐུ་ལ་ཁྲུས་ཆུ་མི་ཆགས་པ་བཞིན་དུ་ལུས་ལ་ཁྲུས་ཆུ་མི་ཆགས་ལ། འཆི་ལྟས་ཕོག་པའི་ཚེ་དེ་དག་འབྱུང་ཞིང་ལུས་དྲི་མི་ཞིམ་པས་ལྷ་གཞན་རྣམས་ཀྱིས་

― GTD003_Page_0459 ―

^{[མ་དཔེ་གཟིགས་ན་འདིར་གནོན།]}

[Full Size]

སྣ་བཀབ་ནས་བྲོས་འགྲོ་ཞིང། ལྷའི་མིང་ལ་སྐབས་གསུམ་པ་ཟེར་བ་ལྟར་འཆི་ཁར་ངན་སོང་སོགས་སུ་སྐྱེ་བ་མཐོང་བར་སེམས་ཀྱི་སྡུག་བསྔལ་བཟོད་གླགས་མེད་པ་དམྱལ་བའི་སྡུག་བསྔལ་ལས་ཀྱང་ལྷག་པ་ཡོད། ཁམས་གོང་མ་གཉིས་ན་སྡུག་བསྔལ་གྱི་སྡུག་བསྔལ་དངོས་མེད་ཅིང། གཟུགས་ཁམས་ན་ཡང་དྲི་རོ་གཉིས་མེད་ན་ཡང། དེའི་རྒྱུ་མཚན་གྱིས་རོ་མྱོང་བའི་ལྕེ་དབང་མེད་ཀྱང་སྨྲ་བའི་ལྕེ་ཡོད་པ་མངོན་པ་མཛོད་ལས་གསུངས། མདོར་བསྡུ་ན་ཉེར་ལེན་གྱི་ལུས་ཤིག་གྲུབ་ཕྱིན་ཆད་སྡུག་བསྔལ་གྱི་རང་བཞིན་ལས་མ་འདས་ཏེ། ཟག་བཅས་ཀྱི་ཚོར་བ་བདེ་བ་ཡང་རང་ཚོ་ལ་བདེ་བར་སྣང་ཡང་ངོ་བོ་སྡུག་བསྔལ་ཡིན་པས་འགྱུར་བའི་སྡུག་བསྔལ་དུ་བཤད་པ་ཡིན་ཏེ། སྡུག་བསྔལ་གྱི་སྡུག་བསྔལ་ཆུའི་གཉེར་མ་ལྟར་གཅིག་རྗེས་སུ་གཅིག་འབྱུང་བས་སྔ་མ་འགག་ཙམ་གྱི་ཆ་ལ་ཚོར་བ་བདེ་བར་བཏགས་པ་ཡིན་གྱི། དངོས་པོའི་གནས་ཚོད་ལ་བདེ་བ་ཡིན་ན་བཟའ་བཏུང་སོགས་ཇི་ཙམ་སྤྱོད་པ་དེ་ལྟར་དུ་བདེ་བ་འཕེལ་དགོས་པ་ལ་དེས་ནི་སྡུག་བསྔལ་འདྲེན་པ་ཡིན་ཏེ། དཔེར་ན་གཞི་ཀ་རྩེའི་གཉེར་པ་རྣམས་ཀྱིས་བཞུགས་གྲལ་སོ་ནམ་ལེགས་པོ་མ་བྱུང་བ་རྣམས་ལ་ཆང་གང་སྡུག་སྡུག་ནས་མང་པོ་བླུད་དེ་འཐུང་དགོས་པའི་སྡུག་ལས་གཏོང་བ་དང། སྔོན་རྒྱལ་པོ་ཞིག་གིས་ཁོས་ཆོས་ལུགས་ལྟར་བྱེད་རྒྱུ་ཡིན་ཟེར་ཞེས་མི་གསོད་ཙ་ན། ཁྱོད་འགྲོ་འདོད་དམ་འདུག་འདོད་དམ། ཟའམ་འཐུང་ངམ་ཞེས་དྲིས་ནས་འདུག་ཟེར་ན་ཉལ་དུ་བཅུག་སྟེ་ལང་དུ་མི་འཇུག་པར་མལ་དེར་འཆི་དགོས་པ་དང། འགྲོ་ཟེར་ན་སྐད་ཅིག་

― GTD003_Page_0460 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་སྡོད་དབང་མེད་པར་སོང་སོང་ནས་འཆི་དགོས་པ་དང། ཟ་ཟེར་ན་འཆི་བའི་བར་དུ་ཟར་འཇུག་པ་ལྟ་བུ་ཡིན་པས་རྣམ་པ་བདེ་བར་སྣང་ཡང། ངོ་བོ་སྡུག་བསྔལ་ལས་མ་འདས་པ་ཀུན་བཏུས་ལས་དེ་ལ་སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ་ཞེས་གསུངས་པ་ལྟར་འཁོར་བའི་གནས་དང་ལོངས་སྤྱོད་འདི་ཐམས་ཅད་ཀྱང་ཁྱབ་པ་འདུ་བྱེད་ཀྱི་སྡུག་བསྔལ་ཡིན། འོན་ཀྱང་སོ་སོའི་སྐྱེ་བོ་རྣམས་ཀྱིས་བདེ་བ་དང་དོན་དུ་གཉེར་བྱར་འཁྲུལ་ནས་སྡུག་བསྔལ་དུ་མི་རིགས་པ་ནི། བཞི་བརྒྱ་པ་ལས། བྱིས་པ་ལག་མཐིལ་འདྲ་བ་ཡི། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་ལྡན་པ་ནི། །དེ་ཡིས་ཤིན་ཏུ་ཡིད་ཀྱང་འབྱུང། །ཞེས་གསུངས་པ་ལྟར། དཔེར་ན་སྤུ་ཉག་ལག་མཐིལ་དུ་ཡོད་ཀྱང་མི་ཤེས་ལ། དེ་མིག་ཏུ་སོང་བ་ན་མིག་གི་དབང་པོ་ཤིན་ཏུ་དྭངས་པ་ཡིན་པས་མི་བཟོད་པ་ལྟར་སོ་སྐྱེ་རྣམས་ཀྱིས་ཁྱབ་པ་འདུ་བྱེད་ཀྱི་སྡུག་བསྔལ་འདི་ཉིད་རིག་དཀའ་ཞིང། འཕགས་པ་རྣམས་ཀྱིས་འདིའི་ཉེས་དམིགས་མངོན་སུམ་དུ་གཟིགས་པས་འདི་ལ་འཕགས་པའི་བདེན་པ་ཞེས་ཀྱང་བཤད་པ་ཡིན། འོན་ཀྱང་རིགས་པ་དུ་མས་དཔྱད་ནས་ཁྱབ་པ་འདུ་བྱེད་ཀྱི་སྡུག་བསྔལ་འདི་ལ་གོ་བ་ཆགས་པ་ཞིག་མཛད་དགོས། དེ་མ་བྱས་ན་བེ་བུམ་སྔོན་པོ་ལས་གསུངས་པ་ལྟར། དཔེར་ན་ཁྱིས་བྱ་དེད་པ་ན་ཉེ་འཁོར་དུ་སླེབ་པ་དང་བྱ་འཕུར་བའི་ཤུལ་དེར་ས་ལ་བསྣམས་ནས་ཟ་རྒྱུ་ཞིག་རྙེད་ཁུལ་བྱེད་པ་ལྟར་ཡོད་མདོག་ཁ་པོ་བྱས་ནས་ཁྱི་རྫི་བྱེད་དགོས་པ་ཡོང་བས་དེ་ལྟར་མ་སོང་བར་གོ་བ་རྙེད་པ་ཞིག་

― GTD003_Page_0461 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་ན་འདི་ཤིན་ཏུ་གནད་ཆེ་བར་ཡོད། གསུམ་པ་མཇུག་ཏུ་ཇི་ལྟར་བྱ་བ་དང། གཉིས་པ་ཐུན་མཚམས་སུ་ཇི་ལྟར་བྱ་བ་སོགས་ཕལ་ཆེར་སྔར་བཞིན་ནོ། །གཉིས་པ་ཐར་པར་བགྲོད་པའི་ལམ་གྱི་རང་བཞིན་གཏན་ལ་དབབ་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། སྐྱབས་གནས་ཀུན་འདུས་ཞེས་སོགས་ཕལ་ཆེར་གོང་བཞིན་ནོ། །གཉིས་པ་དངོས་གཞི་ནི། དེ་ལྟར་ངེས་མེད་དྲུག་ལ་སོགས་པའི་སྒོ་ནས་སྡུག་བསྔལ་འཁོར་བའི་ཉེས་དམིགས་བསམས་ནས་འཁོར་བ་སྤང་འདོད་ན་དེའི་རྒྱུ་ངོས་ཟིན་པར་བྱས་ཏེ་སུན་དབྱུང་དགོས་པ་ནི། རྣམ་འགྲེལ་ལས། འདི་ཡུལ་སུན་ཕྱུང་མེད་པར་ནི། །དེ་སྤོང་བ་ནི་ནུས་མ་ཡིན། །ཞེས་དང། ཡུལ་ལ་བདག་མེད་མཐོང་བ་ནི། །སྲིད་པའི་ས་བོན་འགག་པར་འགྱུར། །ཞེས་གསུངས་པ་ལྟར། རྒྱུ་བཟློག་དགོས་པ་ཡིན་པས། ཀུན་འབྱུང་འཁོར་བའི་འཇུག་རིམ་བསམ་དགོས་ཤིང། ཀུན་འབྱུང་ལ་ཡང་ལས་ཉོན་གཉིས་ཡོད་ཀྱང་ཉོན་མོངས་གཙོ་བོ་ཡིན་ཏེ། དགྲ་བཅོམ་པ་ལ་ཡང་འཁོར་བར་སྐྱེ་བྱེད་ཀྱི་ལས་དུ་མ་ཡོད་མོད་ཀྱང་ལྷན་ཅིག་བྱེད་རྐྱེན་ཉོན་མོངས་མ་ཚང་བའི་སྟོབས་ཀྱིས་ནས་སྐམ་ལྟར་སྐྱེ་བ་འགྲུབ་མི་ཐུབ། དེས་ན་ཉོན་མོངས་པའི་རྒྱུ་དང་ངོ་བོ་བྱེད་ལས་འདི་དག་ལེགས་པར་ངོ་ཤེས་པ་ཞིག་བྱས་ཏེ། དེ་ལ་དགྲར་བཟུང་ནས་བྱ་ར་བྱས་ཏེ་རྟག་ཏུ་འགོག་པ་ཞིག་དགོས་པར། སྤྱོད་འཇུག་ལས། ཁྱོད་ཀྱིས་ཁོ་བོ་གར་བརླག་པའི། །སྔོན་གྱི་དུས་དེ་གཞན་ཡིན་ཏེ། །ངས་མཐོང་ད་ཁྱོད་

― GTD003_Page_0462 ―

^{[མ་དཔེ་གཟིགས་ན་འདིར་གནོན།]}

[Full Size]

གང་དུ་འགྲོ། །ཁྱོད་ཀྱི་དྲེགས་པ་ཀུན་གཞོམ་བྱ། །ཞེས་གསུངས་པ་བཞིན་དུ། བདག་འཛིན་ལ་འཁོན་དུ་བཟུང་ནས་འཐབ་དགོས་པས་འཐབ་པའི་ཚེ་ཡང་མི་དཔའ་བོ་རྣམས་རང་གི་ཁྲག་མཐོང་བ་ན་སྙིང་སྟོབས་ཆེར་སོང་སྟེ་ད་ནི་འཆི་བར་འདུག་པ་ལ་འཆི་ཐེངས་གཅིག་ལས་མི་ཡོང་ཟེར་བ་བཞིན་སྙིང་སྟོབས་ཤུགས་དྲག་བསྐྱེད་དགོས་ཏེ། སྤྱོད་འཇུག་ལས། ལ་ལ་བདག་གི་ཁྲག་མཐོང་ན། །དཔའ་བརྟན་ལྷག་པར་སྐྱེ་བར་འགྱུར། །ལ་ལ་གཞན་གྱི་ཁྲག་མཐོང་ན། །བོག་ཅིང་བརྒྱལ་བར་འགྱུར་བ་ཡོད། །དེ་ནི་སེམས་ཀྱི་ངང་བརྟན་དང། །སྡར་མའི་ཚུལ་ལས་གྱུར་པ་ཡིན། །ཞེས་གསུངས་པ་ལྟ་བུ་ཡིན་ལ། དེ་ཡང་དགེ་བཤེས་སྙུག་རུམ་པ་ཉོན་མོངས་སྐྱེ་ཚེ་དྲག་སྔགས་བཟླས་པ་དང། མ་མཐའ་སྐེ་གཅུ་བ་ཚུན་ཆད་ཀྱིས་ཀྱང་བཟློག་དགོས་གསུངས་ཤིང། བདག་འཛིན་ཤགས་འདེབས་སུ་ཡང། ཐོག་མར་བདག་འཛིན་གྱིས་ཁྱེད་རྣམས་ལ་ཟས་གཏམ་སོགས་ཡོང་བ་ངའི་དྲིན་ཡིན། ང་མེད་ན་ཁྱེད་བླ་མ་ཚོས་ཀྱང་སྦྱིན་བདག་ལ་གོ་རིམ་ལྟར་གྱིས་ཇ་གྲལ་ཙམ་ཡང་གཏོང་མི་ཤེས། ཐམས་ཅད་ངའི་བཀའ་དྲིན་ཡིན། འོན་ཀྱང་ཐམས་ཅད་ཀྱིས་ང་འཕུད་རྒྱུ་ཡིན་ཟེར་ཡོང་སྟེ། སུས་ཀྱང་འཕུད་མི་ཐུབ། སྨྲས་པ་བཞིན་རང་ཅག་ལ་བདག་མེད་རྟོགས་པའི་ཤེས་རབ་དཀའ་བས་ཉོན་མོངས་འགོ་གནོན་དཀའ་ལ་གལ་ཏེ་སྐྱེས་ཀྱང། སྔོན་མི་ཞིག་དམག་འཐབ་སར་གོ་མཚོན་ཐོགས་ཏེ་སོང་བ་ལས་འཐབ་པར་དགྲ་འདུལ་བ་ལྟ་ཞོག །རྨོག་རང་གིས་མནར་བ་ལྟར་གཉེན་པོ་ཤུགས་ཆུང་ཞིང། ཉོན་མོངས་སྟོབས་ཆེ་བས་བདག་འཛིན་དང་ཐུག་ན་དཀའ་ཡང། བློ་སྦྱོང་

― GTD003_Page_0463 ―

^{[མ་དཔེ་གཟིགས་ན་འདིར་གནོན།]}

[Full Size]

མཚོན་ཆའི་འཁོར་ལོ་ལས། གནོད་བྱེད་གདུག་པའི་མགོ་ལ་ཆེམས་སེ་ཆེམས། །དགྲ་བདག་གཤེད་མའི་སྙིང་ལ་མཱ་ར་ཡ། །ཞེས་བདག་འཛིན་འགོང་བོ་འདི་ཉིད་ཐལ་བར་རློགས་ཤིག་ཅེས་ཡི་དམ་ཆོས་སྲུང་ལ་བསྐུལ་བར་མཛད་པ་ལྟར་བྱས་ནའང་ཤིན་ཏུ་ཕན་ནོ། །བླ་མ་བྱམས་པའི་ཞལ་ནས། དེ་མ་ཐག་ཡར་ལངས་ཏེ་ཕྱག་འཚལ་ཞིང་མཎྜལ་ཕུལ་ནས་གསོལ་བ་འདེབས་པ་སོགས་བྱ་དགོས་གསུངས། དེ་ལ་ཉོན་མོངས་སྐྱེ་བའི་རྒྱུ་ནི། མཛོད་ལས། ཕྲ་རྒྱས་སྤངས་པ་མ་ཡིན་དང། །ཡུལ་ནི་ཉེ་བར་གནས་པ་དང། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་གསུངས་པ་ལྟར། རྒྱུ་གསུམ་དུ་འདུ་སྟེ། ཉེར་ལེན་ཕྲ་རྒྱས་མ་སྤངས་པའམ་གོ་སླ་བར་བྱས་ན་ས་བོན་མ་སྤངས་པ་དང། ཕྱིའི་ལྷན་ཅིག་བྱེད་རྐྱེན་ཡུལ་ཡིད་དུ་འོང་བ་སོགས་ཉེ་བར་གནས་པ་དང། ནང་གི་ལྷན་ཅིག་བྱེད་རྐྱེན་སྡུག་པ་སོགས་སུ་ལྟ་བའི་ཚུལ་མིན་ཡིད་བྱེད་གསུམ་ཡོད་ལ། གཞན་ཡང་བཤེས་གཉེན་ངན་པ་དང། ཆོས་ལོག་གྲོགས་ངན་སོགས་ལ་བརྟེན་ནས་འབྱུང་ཞིང། རྐྱེན་དེ་ལས་བྱུང་བའི་ཉོན་མོངས་དེ་ལ་ཡང་ཇི་ལྟ་བུ་ཡོད་ཅེས་ན། མཛོད་ལས། སྲིད་པའི་རྩ་བ་ཕྲ་རྒྱས་དྲུག །ཅེས་གསུངས་པ་ལྟར། ཉོན་མོངས་དང་ཕྲ་རྒྱས་དོན་གཅིག་ཅིང། དེ་ལ་གཙོ་བོ་འདོད་ཆགས་སོགས་དྲུག་ཡོད་པ་ལས། འདོད་ཆགས་ནི་རས་ལ་སྣུམ་ཕོག་པ་ལྟར་ཟག་བཅས་ཀྱི་ཡུལ་ཡིད་དུ་འོང་བ་ལ་ཞེན་ནས་འཐབ་པའི་བྱེད་ལས་ཅན་ཞིག་ཡིན་ཞིང་འགྲོ་བ་རྣམས་ཁམས་གསུམ་

― GTD003_Page_0464 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་འཁྱམས་པའང་འདིས་བྱེད་པ་ཡིན་ལ། འདོད་ཆགས་དང་ཆགས་པ་མི་གཅིག་གོ །ཁོང་ཁྲོ་ནི་གཞི་དགྲ་ལ་དམིགས་ཏེ་ཀུན་ནས་མནར་བར་སེམས་པ་རྩུབ་པའི་རྣམ་པ་ཅན་མེ་དང་མཚུངས་པ་ཞིག་ཡིན་ཞིང། འདི་ལ་བླ་མ་བྱམས་པའི་ཞལ་ནས། ཞེ་སྡང་འདི་མེ་རང་ཡིན། ཁོ་རྒྱས་ཙ་ན་ཐོག་མར་ལག་མཐིལ་རྔུལ་ནས་ལག་གཉིས་ཕུར་ཡོང་། དེ་ནས་རིམ་གྱིས་མཆེད་པས་མཆན་ཁུང་དྲོས། དེ་ནས་ལུས་རྔུལ་ཞིང་མགོ་ན་རླངས་པ་འབྱུང་བ་དེ་ནང་ན་མེ་དངོས་སུ་འབར་བའི་རྟགས་ཡིན་གསུངས། འདི་དང་ཁྲོ་བ་མི་གཅིག་ལ་འཚིག་པ་དང་ཡང་མི་གཅིག །ཚིག་པ་ནི་འཇིག་རྟེན་ན་ཚིག་པ་ཟོས་ཟེར་བ་དེ་ཡིན་ཞིང་རྡེག་འཚོག་བྱེད་ལས་ཅན་ཞིག་ཡིན། ང་རྒྱལ་ནི། སེམས་མཐོ་བའི་རྣམ་པ་ཅན་རི་མཐོན་པོའི་རྩེ་ནས་མར་བལྟས་པ་ལྟ་བུ་དང་། ཐེ་ཚོམ་ནི། ལམ་གསུམ་གྱི་སུམ་མདོར་གང་ལ་འགྲོ་དགོས་གཏོལ་མེད་པར་ཡིད་ཚོམ་པ་ལྟ་བུ་ཡིན་ཞིང་། མ་རིག་པ་ནི། རྒན་མོ་ལོང་བ་ལྟ་བུ་བློ་མི་གསལ་བའི་རྣམ་པ་ཅན་ཞིག་ཡིན་ལ། དེ་ལྟ་བུའི་རྨོངས་ཙམ་དེ་དང་ལོག་པར་རྟོག་པ་གཉིས་ལས་གང་འཁོར་བའི་རྩ་བར་བཞེད་ཚུལ་ལ་མི་མཐུན་པའི་ལུགས་གཉིས་བྱུང་སྟེ། ཐོགས་མེད་སྐུ་མཆེད་ཀྱིས་རྨོངས་ཙམ་འཁོར་བའི་རྩ་བར་བཞེད་ཅིང། སློབ་དཔོན་ཟླ་བ་གྲགས་པ་དང། དཔལ་ཆོས་ཀྱི་གྲགས་པ་སོགས་ནི་ཕྱིན་ཅི་ལོག་ཏུ་འཛིན་པ་འཁོར་བའི་རྩ་བར་བཞེད་དེ། དབུ་མ་འཇུག་པ་ལས། དང་པོ་ང་ཞེས་བདག་ལ་ཞེན་གྱུར་ཅིང། །བདག་གིས་འདི་ཞེས་དངོས་ལ་ཆགས་བསྐྱེད་པས། །ཞེས་གསུངས་ཤིང་། དེ་དང་

― GTD003_Page_0465 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུན་པར་བདེ་ལམ་འདིར་ཡང། ཤེས་པ་ཁོ་རང་གི་ངོས་ནས་ལུང་མ་བསྟན་ཡིན་པ་ལ། དང་པོར་བདག་དང་བདག་གི་བ་ལ་དམིགས་ནས་རང་བཞིན་གྱིས་གྲུབ་པར་འཛིན་པའི་བློ་སྐྱེ། དེ་བདག་ཏུ་བཟུང་བ་ལ་བརྟེན་ནས་རང་ཕྱོགས་ལ་ཆགས་པ་དང། ཞེས་སོགས་ཀྱིས་ཕྱིན་ཅི་ལོག་ཏུ་འཛིན་པ་རྩ་བར་གསུངས་ཤིང། འདིར་དང་པོ་ཞེས་གསུངས་པ་ཡང་ཉོན་མོངས་སྐྱེས་པའི་ཡ་མཐའ་ལ་ཟེར་བ་མིན་པར། བདག་ཏུ་འཛིན་པ་འདི་ཉོན་མོངས་ཐམས་ཅད་ཀྱི་གཞི་རྩ་བྱེད་པ་ལ་ཨ་མ་ལྟ་བུ་ཡིན་ཏེ། གཞོན་ནུ་མ་བདུན་གྱི་རྟོགས་བརྗོད་ལས། ལྟ་བ་ཀུན་གྱི་མར་གྱུར་པའི། །འཇིག་ཚོགས་ལྟ་བ་འབྱིན་པར་བྱེད། །ཅེས་གསུངས་པ་ལྟ་བུའོ། །དེས་ན་ཉེས་ཚོགས་ཐམས་ཅད་ཀྱི་རྩ་བ་འདི་ཉིད་ཡིན་པས་ངོས་ཟིན་པ་ཞིག་བྱ་དགོས་ཀྱི། སྔོན་བླ་མ་རིན་པོ་ཆེ་སྐུ་ན་ཕྲ་མོའི་ཚེ་བསྡུས་གྲྭ་འགྲིམ་སྐབས་དགེ་བཤེས་གྲགས་ཆེ་བ་ཞིག་ལ་འཇིག་ལྟ་ཟེར་བ་ཅི་ཡིན་དྲིས་པས་ལྟ་བ་འཇིག་ཟིང་ཟིང་ཟེར་བ་ཡིན་ཞེས་པ་ལྟ་བུར་མ་སོང་བ་དགོས་པས། འཇིག་ལྟའི་དོན་ནི་སྐད་ཅིག་གིས་འཇིག་ཅིང་ཕུང་པོ་ལྔ་པོ་འདི་ལས་ཉོན་གཉིས་ཀྱིས་བཅིངས་ནས་ཚོགས་པ་འདི་ལ་དམིགས་ནས་ངའོ་སྙམ་པ། དཔེར་ན་མར་རིལ་ལྟ་བུའི་རིལ་རིལ་པོ་གང་གིས་ཀྱང་མི་ཤིགས་པ་ལྟ་བུ་ཞིག་ཏུ་འཛིན་པའི་ཤེས་རབ་ཉོན་མོངས་ཅན་ཞིག་ཡིན་ལ། མཐར་ལྟ་ནི་དེས་བཟུང་བ་དེ་ལ་ཞེན་ནས་རྟག་ཆད་གང་རུང་དུ་ལྟ་བ་ཡིན་ཞིང། འཇིག་ལྟ་ལ་ཡང་སྔ་མ་ལྟ་བུ་ཞིག་དགོས་པས། བདག་འཛིན་ཐམས་ཅད་འཇིག་ལྟ་ཡིན་མི་དགོས་

― GTD003_Page_0466 ―

^{[མ་དཔེ་གཟིགས་ན་འདིར་གནོན།]}

[Full Size]

སོ། །དེ་ལྟར་རྩ་བ་བདག་འཛིན་གྱིས་བདག་ཏུ་བཟུང་བ་ལ་བརྟེན་ནས་རང་གཞན་སོ་སོ་བར་རིས་སུ་བཅད་པ་ལ་བརྟེན་ནས་རྩ་བའི་ཉོན་མོངས་རྣམས་སྐྱེས་ཤིང། དེ་ལས་ཉེ་ཉོན་རྣམས་རྒྱས། དེའི་དབང་གིས་ལས་བསགས་ཏེ་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་སྲིད་པའི་འཁོར་ལོ་བསྐོར་ཏེ་སྡུག་བསྔལ་གྱི་ཕུང་པོ་འདི་གྲུབ་ནས་འཁོར་བར་མི་འདོད་བཞིན་དུ་སྡུག་བསྔལ་སྣ་ཚོགས་ཤིག་མྱོང་བ་ཡིན། དེའི་རྒྱུ་མཚན་གྱིས་བདེན་བཞི་ལ་རྟེན་འབྲེལ་ཡན་ལག་བཅུ་གཉིས་ཀྱི་སྣོན་པ་བྱེད་ཚུལ་ཡང་དེའི་དབང་གིས་ལས་བསགས་ནས། ཞེས་སོགས་གསུངས་པ་ཡིན་ཏེ། བདེ་ལམ་འདི་རྡོ་རྗེའི་ཚིག་ཡིན་པས་དོན་བསྡུས་ནས་དེ་ཙམ་གསུངས་པ་ལྟར་ཡིན། དེ་ལ་ཡན་ལག་བཅུ་གཉིས་ལས། དང་པོ་མ་རིག་པ་ལ་ལས་འབྲས་ལ་རྨོངས་པ་དང། སེམས་ཀྱི་གནས་ལུགས་ལ་རྨོངས་པ་གཉིས་ཡོད་པས་སྔ་མས་ངན་འགྲོར་འགྲོ་ཞིང། ཕྱི་མས་བདེ་འགྲོར་འཕེན་བྱེད་ལས་ཀྱང་གསོག་ལ། དེ་གཉིས་ཀྱི་ནང་ནས་ཡང་རྩ་བ་ནི་ཕྱི་མ་ཡིན། དེ་ལས་ལས་འབྲས་ལ་རྨོངས་པ་འབྱུང་ཞིང། དེ་ཉིད་ཀྱི་ལས་འབྲས་ལ་རྨོངས་པའི་མ་རིག་པ་ལ་ཁྱབ་ཡོད་པས། ལས་འབྲས་ལ་རྨོངས་པ་དེའི་ཡན་ལག་ཙམ་ཡིན་ཏེ། བཞི་བརྒྱ་པ་ལས། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་འགྱུར་བ། །ཞེས་གསུངས་པ་ལྟར། དཔེར་ན་ལུས་དབང་གིས་སྐྲ་རྩེ་ནས་རྐང་མཐིལ་གྱི་བར་ཐམས་ཅད་ལ་ཁྱབ་པ་ལྟ་བུ་ཡིན། མིག་དབང་ལ་ཡང་ལུས་དབང་གིས་ཁྱབ་པ་ཡིན་ཏེ། མིག་ཏུ་རྡུལ་སོང་ན་ཚ་བ་སྟེ། དེ་ལ་ལུས་དབང་གིས་ཁྱབ་ཡོད་པའི་རྟགས་ཡིན། ཡན་ལག་

― GTD003_Page_0467 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པ་འདུ་བྱེད་ཀྱི་ལས་ཀྱིས་འཁོར་བའི་རྒྱུ་གསོག་པའམ་འདུ་བྱེད་པས་ན་གཉིས་པ་འདུ་བྱེད་ཀྱི་ལས་ཡིན་ཟེར། དེ་ལ་བསོད་ནམས་དང་བསོད་ནམས་མ་ཡིན་པ་མི་གཡོ་བའི་ལས་དང་གསུམ་ཡོད་ལ། དེ་གང་ཡིན་ཀྱང་སྡུག་བསྔལ་གྱི་རང་བཞིན་གྱི་འཁོར་བ་འདི་ལས་ནི་མ་འདས་པ་ཡིན་པས། འདི་དག་གི་སྒོ་ནས་ཀྱང་ཁྱབ་པ་འདུ་བྱེད་ཀྱི་སྡུག་བསྔལ་བསྒོམ་ཚུལ་རྒྱས་སུ་འགྲོ་བ་ཡིན། གསུམ་པ་རྣམ་ཤེས་ལ་ལས་ཀྱི་བག་ཆགས་རྣམ་ཤེས་ཀྱི་སྟེང་དུ་བསྒོས་པའི་རྒྱུ་དུས་དང། དེའི་འབྲས་བུ་རྣམ་ཤེས་ཀྱིས་མྱོང་བའི་འབྲས་དུས་ཀྱི་རྣམ་ཤེས་གཉིས་ཡོད། མིང་གཟུགས་ལ་མིང་གཞིའི་ཕུང་པོ་ནི་གཟུགས་བསྟན་དུ་མེད་པར་མིང་ཙམ་ཡིན་པས་མིང་གི་རྟེན་འབྲེལ་ཟེར། དེའི་འོག་ཏུ་ལྔ་པ་སྐྱེ་མཆེད་དང་དེ་ནས་དྲུག་པ་རེག་པ་ནི། ཡུལ་དབང་རྣམ་ཤེས་གསུམ་འདུས་ནས་ཡུལ་ཡོངས་སུ་གཅོད་པ་སྟེ། དཔེར་ན། མེ་ལྟ་བུས་རེག་པའི་ཚེ་ཚ་ཀར་རེ་མི་འདོད་པའི་རྣམ་པར་གཅོད་པ་ཡིན་ཞིང། ཚོར་བ་ནི། དེས་ཡུལ་བཅད་པ་ལྟར་ཚ་རེག་སོགས་མི་འདོད་པའི་རྣམ་པར་མྱོང་ལ། སྲེད་པ་ནི་འདི་འདྲ་ཞིག་བྱུང་ན་སྙམ་པ་དང། ལེན་པ་ནི། ཅི་ནས་ཀྱང་དགོས་པར་འདུག་སྙམ་ནས་ཚོལ་བར་བྱེད་པ་སྟེ། དེ་དག་གི་སྟོབས་ཀྱི་ལས་ཀྱི་ནུས་པ་མཐུ་ཅན་དུ་སོང་བ་སྲིད་པ་ཡིན་ཞིང། དེ་ལ་བརྟེན་ནས་སྐྱེ་བ་དང། ན་ཚོད་གཞན་དུ་འགྱུར་བས་རྒ་བ་དང། ཤི་བའི་རྟེན་འབྲེལ་འབྱུང་ངོ་། །འདི་དག་བཅོམ་ལྡན་འདས་ཀྱིས་མ་ག་དྷའི་ལྷོ་ཕྱོགས་སུ་འབྲས་ས་ལུ་ལྗང་པའི་དཔེས་གསུངས་ལ། དེར་ཀླུ་སྒྲུབ་ཀྱིས་འགྲེལ་བའང་མཛད་དེ།

― GTD003_Page_0468 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་དག་གི་སྐབས་ནས། མ་རིག་པ་ཞིང་འདེབས་མཁན་དང། ལས་ས་བོན། རྣམ་ཤེས་ཞིང་ས་དང། སྲེད་པ་ཆུ་དང། ལེན་པ་ལུད་དང་དཔེ་སྦྱར་ཏེ། རྒྱུ་འབྲས་ཚར་གཉིས་པོ་སྤེལ་ནས་ཞིང་དང་འདྲ་བར་གསུངས་སོ། །ཡང་སྲིད་ལེན་སྐྱེ་ཚུལ་དེ་ལྟར་ཡིན་ན་ངན་འགྲོར་སྐྱེ་བས་དེ་ལ་སྲེད་པ་ཇི་ལྟར་འབྱུང་ཞེ་ན། དེ་ནི་མདོ་སྡེ་མཛངས་བླུན་ལས། ཁ་ན་མ་ཐོ་བ་ཆེན་པོ་བྱས་ན་ཤིན་ཏུ་འབར་བའི་སེམས་ཅན་དམྱལ་བར་ལྟུང་བར་འགྱུར་ཏེ། མི་དེ་རླུང་ངམ་གྲང་ནད་ཀྱིས་གཟིར་བས་ཡིད་ལ་མེ་འདོད་པར་བསམ་པའོ། །མེའི་ནང་དུ་འགྲོ་བར་བསམ་མ་ཐག་ཏུ་ཚེའི་དུས་བྱས་ནས་ཤིན་ཏུ་འབར་བའི་སེམས་ཅན་དམྱལ་བར་འགྲོའོ། །ཞེས་སོགས་རྒྱས་པར་གསུངས་པ་ལྟར། ཚ་དམྱལ་དུ་སྐྱེ་ན་གྲང་བའི་སྣང་བ་བྱུང་སྟེ་དྲོ་ན་སྙམ་པ་དང། གྲང་དམྱལ་དུ་སྐྱེ་ན་དྲོ་བའི་སྣང་བ་འབྱུང་སྟེ་གྲང་ན་སྙམ་པ་འབྱུང། གཞན་ཡང་ངན་འགྲོར་སྐྱེ་བའི་སྔ་ལྟས་སུ་རང་བཞིན་འགྱུར་ཏེ་སྣང་བ་དགྲར་ལངས་ཤིང་ལག་པ་གནམ་དུ་རྐྱོང་བ་དང། མིག་ཡར་འཁྲབ་པ་དྲོད་སྟོད་ནས་བསྡུ་བ་སོགས་འབྱུང་སྟེ། ངན་འགྲོའི་བར་དོ་ཐུར་དུ་འགྲོ་བ་ཡིན་པས་དེའི་སྣང་བ་ཁོ་ལ་ཤར་ནས་ས་འོག་ཏུ་བྱིང་འགྲོ་བའི་ཉམས་འབྱུང་བ་ཡིན། དེ་འདྲའི་སྐབས་ཕ་རོལ་པོ་མི་འདོད་བཞིན་ཏུ་དཀོན་མཆོག་ལ་མཆོད་པ་ཕུལ་ཟེར་བའམ། ཟས་ཟོ་ཞིག་ཟེར་མི་རུང་སྟེ། དེའི་རྐྱེན་གྱིས་ཁྲོས་ནས་དེ་འདྲའི་མིང་ཡང་མི་ཐོས་པ་ཅིག་ཏུ་གྱུར་ན་སྙམ་པ་སྐྱེ་ནས་དུད་འགྲོ་དང། ཡི་དྭགས་སོགས་སུ་སྐྱེ་བའི་ལས་ལ་གསོས་འདེབས་པ་ཡིན་ཏེ། ཚེ་དེར་དགེ་སྡིག་གང་བྱས་ཀྱང་ཕྱི་མའི་སྐྱེ་བ་གཅིག་པོ་དེ་འཆི་ཁར་

― GTD003_Page_0469 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་གང་མངོན་གྱུར་པ་དེས་ཐུབ་པ་ལས་འབྲས་མི་བསླུ་བའི་ཆོས་ཉིད་ཡིན་པའི་རྒྱུ་མཚན་གྱིས་འཕེན་བྱེད་དང་འཕངས་འབྲས་མ་གཏོགས། འགྲུབ་བྱེད་གྲུབ་འབྲས་ཀྱི་བར་སྐྱེ་བ་གཞན་གྱིས་ཆོད་མི་སྲིད་ལ། དེའི་ཕྱིར་ན་བར་དུ་བསྐལ་པ་བརྒྱ་སོགས་ཀྱིས་ཆོད་ཀྱང་རྫོགས་ཚུལ་ཚེ་གཉིས་སམ། མ་མཐའ་གསུམ་ལ་རྫོགས་པ་ཡིན། དེ་ལྟར་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་སྡུག་བསྔལ་དུ་མའི་འབྱུང་གནས་སུ་གྱུར་པའི་སྲིད་པའི་བཙོན་ར་ཆེན་པོ་འདིར་རྣམ་པར་ཤེས་པ་རང་དབང་མེད་པར་འཁྱམས་ནས་སྡུག་བསྔལ་མཐའ་ཡས་པ་ཞིག་མྱོང་བ་འདི་ཐམས་ཅད་རྩ་བ་མཐར་གཏུགས་ན་རྒྱུ་ཀུན་འབྱུང་གི་གཙོ་བོ་བདག་ཏུ་འཛིན་པའི་མ་རིག་པར་འདུག་པས་འཁོར་བའི་སྡུག་བསྔལ་རྩ་བ་ནས་སྤང་བའི་འགོག་པ་དོན་དུ་གཉེར་དགོས། འགོག་པ་ལ་ཡང་ཐུན་མོང་བ་དང། ཐུན་མོང་མ་ཡིན་པ་གཉིས་ཡོད་པ་ལས། འདིར་ཕྱི་མ་སྟེ་མི་གནས་པའི་མྱ་ངན་ལས་འདས་པའམ། བླ་མ་སངས་རྒྱས་ཀྱི་གོ་འཕང་ཞིག་ཅི་ནས་ཀྱང་ཐོབ་པར་བྱ་དགོས། དེ་ལ་ཡང་དང་པོར་དེ་ཐོབ་ནུས་མི་ནུས་བརྟགས་ནས་ནུས་ན་དོན་དུ་གཉེར་བ་ལ་འཇུག་དགོས་པས། དེ་ཡང་རྗེ་དགེ་འདུན་གྲུབ་ཀྱིས། དགྲ་ནང་ན་འདུག་པའི་བདག་འཛིན་ཐུལ། །གསུངས་པ་ལྟར། ཐར་པ་ཐོབ་པའི་བགེགས་ཀྱི་གཙོ་བོ་བདག་འཛིན་ཡིན་པས། དེ་ལ་དགྲར་བལྟས་ནས་སྤོང་མི་ཐུབ་ན་ངལ་བ་འབྲས་མེད་ཡིན་པས་ཐོག་མར་སྤོང་ཐུབ་མི་ཐུབ་ལྟ་དགོས། དེ་ཡང་ཇི་ལྟར་ལྟ་བ་ཡིན་ན་འཁྲུལ་མ་འཁྲུལ་ལྟ་དགོས་པ་ཡིན་ཏེ། མ་འཁྲུལ་ན་མིག་ཤེས་མ་

― GTD003_Page_0470 ―

^{[མ་དཔེ་གཟིགས་ན་འདིར་གནོན།]}

[Full Size]

འཁྲུལ་བས་བལྟས་ཀྱིན་གསལ་དུ་འགྲོ་བ་ལྟ་བུ་ཡིན་པས་སྤོང་མི་ནུས་ལ་འཁྲུལ་བ་ཞིག་ཡིན་ན་སེལ་བའི་ཐབས་བྱས་པས་སེལ་ནུས་པས་དེ་སྦྱང་བ་ལ་འབད་དགོས་ཏེ། དཔེར་ན་མཁྲིས་ནད་ཅན་ལ་ས་གཞི་སེར་པོར་སྣང་བ་དང། ཡང་ཚ་བ་དང་མཁྲིས་པ་སོགས་རྒྱས་པའི་རྟགས་སུ་སྨྱོས་པ་མིན་ཡང་ཁྲག་རྒྱས་པས་མིག་རྨར་སོང་ནས་རྩ་ཕྲ་མོ་རྣམས་འཁྲབ་སྟེ་རྟ་རྒྱུག་པ་དང། ར་ལུག་སོགས་སུ་སྣང་སྟེ་འདི་ན་ར་ལུག་སོགས་འདུག་ཟེར་བ་ལ། དེ་འདྲ་མེད་ཅེས་སྨྲས་པ་དང། ཡོད་མེད་བརྩད་པ་སོགས་ཀྱིས་སྣང་བ་དེ་ལྡོག་མི་ནུས་པས་སྨན་བསྟེན་ཏེ། ནང་གི་མཁྲིས་ནད་སྦྱངས་པས་གསལ་དུ་འགྲོ་བ་ལྟར་འདིར་ཡང་ཀུན་འབྱུང་གི་ནད་ཞི་བའི་ཞི་བ་མྱང་འདས་ཐོབ་པར་བྱ་བའི་ཕྱིར་ལམ་ལ་སློབ་དགོས་ལ། ཐར་པར་བགྲོད་པའི་ལམ་གྱི་གཙོ་བོ་ནི་ལམ་བསླབ་པ་གསུམ་ཡིན་པའི་རྒྱུ་མཚན་གྱིས་བདེ་ལམ་འདིར་ཡང། དེའི་ཕྱིར་ལམ་བསླབ་པ་རིན་པོ་ཆེ་གསུམ་ལ་སློབ་པར་བྱའོ་ཞེས་ལམ་བདེན་བསྟན་པ་ཡིན་ཏེ། འདི་ནི་རྡོ་རྗེ་ཚིག་ཡིན་པས་བདེན་པ་བཞི་ཡང་དེ་ལྟར་གོ་རིམ་བཞིན་དུ་གསུངས་པ་ཡིན། དེ་ལས་ལྷག་པ་སངས་རྒྱས་འཇིག་རྟེན་དུ་བྱོན་ཡང་གསུང་རྒྱུ་མེད་དེ། སངས་རྒྱས་ཀྱིས་ཐོག་མར་ཆོས་འཁོར་བསྐོར་བའི་ཚེ་ཡང་བཀའ་དང་པོ་བདེན་བཞིའི་ཆོས་འཁོར་བསྐོར་ཏེ། འཁོར་བའི་ཉེས་དམིགས་དང་ཞི་བའི་ཕན་ཡོན་གསུངས་པ་ཡིན་ལ། འདུལ་བ་ལུང་ལས་གསུངས་པ་ལྟར་མཆོག་ཟུང་ཡང་རྫུ་འཕྲུལ་གྱིས་དམྱལ་བའི་གནས་རྣམས་སུ་ཕེབས་ནས་སླར་མི་ཡུལ་དུ་ངན་སོང་གི་སྡུག་བསྔལ་སོགས་བསྟན་ཏེ། གདུལ་བྱ་རྣམས་

― GTD003_Page_0471 ―

^{[མ་དཔེ་གཟིགས་ན་འདིར་གནོན།]}

[Full Size]

ཐར་པར་འཁྲིད་པར་མཛད་པའི་ཚེ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཐམས་ཅད་དུ་མཆོག་ཟུང་ལྟ་བུ་མི་འབྱུང་བས། སྒོ་ཁང་དུ་འཁོར་བའི་འཁོར་ལོ་ཆ་ལྔ་པ་ཁོར་ཡུག་ཏུ་རྟེན་འབྲེལ་ཡན་ལག་བཅུ་གཉིས་ལུགས་འབྱུང་དང་ལུགས་ལྡོག་ཀྱང་བྲིས་ཤིག་གསུངས་པ་ལྟར། སྲིད་པའི་འཁོར་ལོ་ཡང་བདེན་བཞི་སྟོན་བྱེད་ཡིན་ཏེ། དམྱལ་བ་སོགས་བྲིས་པས་སྡུག་བསྔལ་གྱི་སྡུག་བསྔལ། མི་བྲིས་པས་འགྱུར་བའི་སྡུག་བསྔལ། སྟེང་དུ་ཚོན་སྣ་བཞིའི་རི་མོ་བྲིས་པས་ཁྱབ་པ་འདུ་བྱེད་ཀྱི་སྡུག་བསྔལ་སྟེ། དེ་དག་གིས་སྡུག་བསྔལ་མཚོན་ཞིང། དབུས་སུ་འདོད་ཆགས་མཚོན་བྱེད་ཕུག་རོན། ཞེ་སྡང་མཚོན་བྱེད་སྦྲུལ། གཏི་མུག་མཚོན་བྱེད་ཕག་སྟེ་དེ་དག་གིས་ཀུན་འབྱུང། དེའི་ཕྱི་རོལ་ཏུ་བར་སྲིད་ཁ་དོག་དཀར་སེར་ནག་པོ་སྟེང་དང། ཐད་ཀ་དང། ཐུར་དུ་འགྲོ་བ་རྣམས་དང། ཕྱི་རིམ་ལ་མ་རིག་པ་རྒན་མོ་ལོང་བ་ལྟ་བུ། འདུ་བྱེད་རྫ་མཁན་གྱི་འཁོར་ལོ་ལྟ་བུ། རྣམ་ཤེས་ཁང་སྟོང་ནང་གི་སྤྲེའུ་ལྟ་བུ། མིང་གཟུགས་ལ་གྲུ་ལྟ་བུ་ཞེས་པ་དང། མདུང་ཁྱིམ་ལྟ་བུ་ཞེས་བཤད་པ་གཉིས་ཡོད་པ་ལས་མདུང་ཁྱིམ་ནི། མདུང་གསུམ་རྩེ་བཅིངས་ནས་སྟེང་དུ་གོས་སོགས་བཀབ་སྟེ་ས་ལ་ཕུབ་པ་ན་གཅིག་ལ་གཅིག་བརྟེན་ཏེ་སྡོད་པ་ལྟར་ཕུང་པོ་རྣམས་ཕན་ཚུན་གཅིག་གིས་གཅིག་ལ་བརྟེན་ཏེ་གནས་པས་ཕྱི་མ་འཆར་བདེ། སྐྱེ་མཆེད་གྲོང་སྟོང་དང་འདྲ་སྟེ། གྲོང་སྟོང་དེར་རྒྱང་ནས་བལྟས་ན་ཁྲ་རུག་གེ་བདག་

― GTD003_Page_0472 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་ཡོད་ཡོད་འདྲ་ཡང་དོན་ལ་མེད་པ་ལྟར་སྐྱེ་མཆེད་དྲུག་ཀྱང་ལས་ཀྱི་དབང་གིས་ཆགས་པ་ཡིན་གྱི། དེ་ལ་དབང་བསྒྱུར་བའི་བདག་མེད་དེ། འདི་ལྟ་བུ་གོ་བ་ལ་ཡང་ཤིན་ཏུ་ཕན་ནོ། །རེག་པ་འོ་བྱེད་པ། ཚོར་བ་མིག་ལ་མདའ་ཕོག །སྲེད་པ་ཆང་འཐུང་བ། ལེན་པ་སྤྲེའུ་ཤིང་ཐོག་ལེན་པ། སྲིད་པ་སྦྲུམ་མ་བཙའ་བ་ལྟ་བུ་དང་སྐྱེ་བ་རྒ་ཤི་རྣམས་བྲི། དེ་ཐམས་ཅད་མི་རྟག་པས་ཟ་བར་མཚོན་བྱེད་དུ་སྲིན་པོའི་ཁར་ཆུད་པ་འབྲི་དགོས། འགའ་ཞིག་གིས་སྲིན་པོའི་རྐང་ལག་བརྐྱངས་པའི་ལྟོ་བའི་ཐད་དུ་སྔགས་པའི་བསྲུང་འཁོར་ལྟ་བུ་ཞིག་བྲིས་འདུག་པ་དེ་འདྲ་མི་རུང་། འདི་ལ་ཡན་ལག་ལྔས་བཟུང་བ་ཞེས་རྐང་ལག་གི་སོར་མོ་ཐམས་ཅད་ཀྱིས་བཅུམ་ཞིང་ཁར་བཅུག་པའི་མ་མཆུ་ཡང་མི་མཐོང་བ་ཞིག་འབྲི་དགོས་པ་ཡིན། དེའི་སྟེང་དུ་འགོག་བདེན་མཚོན་བྱེད་ཟླ་བའི་དཀྱིལ་འཁོར་དང། ཐུབ་པའི་སྐུ་ཕྱག་མཛུབ་བརྐྱངས་ནས་དེ་སྟོན་པ་བྲི་ཞིང། འོག་ཏུ་མྱང་འདས་དེར་བགྲོད་པའི་ལམ་བདེན་སྟོན་པའི་ཚིགས་བཅད། བརྩམ་པར་བྱ་ཞིང་དབྱུང་བར་བྱ། །ཞེས་སོགས་བྲིས་ནས་ཁྱིམ་པ་འོང་བ་སོགས་ལ་དེ་དག་སྟོན་ཤེས་པའི་སྐུ་གཉེར་ཀྱང་འཇོག་དགོས་ཏེ། རི་མོ་ཙམ་གྱིས་ཀྱང་བསྟན་པ་ལ་ཕན་གནོད་ཆེན་པོ་འབྱུང་བ་ཡིན། དེ་ཡང་དཔེར་ན་སྔོན་རྒྱལ་པོ་གཟུགས་ཅན་སྙིང་པོ་ལ་མ་མཐོང་བའི་གྲོགས་མཆེད་སྒྲ་སྒྲོག་གི་རྒྱལ་པོ་ཨུ་ཏྲ་ཡ་ནས་ནོར་བུའི་ཁྲབ་རེག་ན་བདེ་བ་དུག་འཇིལ་བར་བྱེད་པ་སོགས་ཡན་ལག་ལྔ་ལྡན་ཞིག་སྐྱེས་སུ་བསྐུར་བ་ན་བློན་པོ་རྣམས་ཀྱིས་རིན་ཐང་མ་ཐེབས་པས། རྒྱ་གར་ན་རིན་ཐང་མི་ཆོད་པ་

― GTD003_Page_0473 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལ་གསེར་སྲང་བྱེ་བ་རི་ཟེར་བའི་སྲོལ་ཡོད་པ་ལྟར་ཞུས་པའི་ཚེ་རྒྱལ་པོས་དེའི་དོད་མཚུངས་པའི་སྐྱེས་བསྐུར་རྒྱུ་མ་རྙེད་པ་དང། སེམས་ཁོང་དུ་ཆུད་ནས་གོས་ངན་པ་གྱོན་ཏེ་མུན་པའི་ཁང་བུར་ཞུགས་པའི་ཚེ། བྲམ་ཟེ་དབྱར་བྱེད་ཀྱིས་སྟོན་པ་ལ་ཞུས་ཤིག་ཅེས་རྒྱལ་པོ་ལ་གྲོས་བཏབ་པས་སྟོན་པར་ཞུས་པ་ན། སངས་རྒྱས་ཀྱི་སྐུ་བྲིས་ལ་སྐུར་ཅིག་གསུངས་པས་ལྷ་བྲིས་པ་རྣམས་ཚོགས་པ་དང། སངས་རྒྱས་ཀྱི་སྐུ་ནི་གསེར་གྱི་གཞོང་པར་མར་མེ་སྦར་བའམ། ཉི་མ་ལྟར་འོད་ལྷམ་མེ་བ་ལྟར་མི་བཟོད་པ་ཡིན་པས་བྲི་མ་ནུས་པ་ན་ཡང་རྒྱལ་པོ་ཡིད་སྐྱོ་སྟེ། སངས་རྒྱས་ཀྱིས་སྐྱེས་བཟང་པོ་ཞིག་གནང་ན། དེ་ཡང་བྲི་མི་ནུས་པ་སྙམ་པས། སངས་རྒྱས་ཀྱི་སྐུ་ལས་རས་གཞིའི་སྟེང་དུ་འོད་བཏང་ནས་བྲིར་བཅུག་ཅིང། མཐར་ཡན་ལག་བཅུ་གཉིས་ལུགས་འབྱུང་ལྡོག་གི་རི་མོ་དང། འོག་ཏུ་རྟེན་འབྲེལ་གྱི་ཚིགས་བཅད་བྲིས་ཏེ་རིན་པོ་ཆེའི་སྒྲོམ་དུ་བཅུག་སྟེ་སྔར་ཡི་གེ་བསྐུར་ནས། འཇིག་རྟེན་གསུམ་ན་ཆེས་ཁྱད་དུ་འཕགས་པའི་སྐྱེས་བསྐུར་ཡོད་པས། དཔག་ཚད་ཕྱེད་དང་གསུམ་ལམ་མཛེས་པར་གྱིས། བདག་ཉིད་དཔུང་གི་ཚོགས་བཞི་དང་བཅས་པས་བསུས་ལ། ས་ཕྱོགས་ཡངས་པོར་བཀུར་སྟི་ཆེན་པོས་དབྱེར་མཛོད་ཅིག །ཅེས་པ་ཨུ་ཏྲ་ཡ་ནས་མཐོང་སྟེ། ཁྲོས་ནས་འདིས་ང་ལ་བརྙས་པར་འདུག་པས་དམག་ཤོམ་ཞིག་ཅེས་སྨྲས་པ་ན། བློན་པོ་རྣམས་ཀྱིས་གཟུགས་ཅན་སྙིང་པོ་བདག་ཉིད་ཆེན་པོ་ཡིན་པས། སྐྱེས་ངན་ངོན་ཞིག་མི་བསྐུར་བས་ཐོག་མར་བརྟགས་ནས་

― GTD003_Page_0474 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་མ་དགྱེས་ན་དེ་ལྟར་བགྱིའོ། །ཞེས་གསོལ་ནས་སྨྲ་བ་བཞིན་བསུས་ཏེ། ཞལ་ཕྱེ་བའི་ཚེ་ཡུལ་དབུས་ཀྱི་ཚོང་པ་དག་གིས་མཐོང་ནས་ཐམས་ཅད་ཀྱིས། སངས་རྒྱས་ལ་ཕྱག་འཚལ་ལོ། །ཞེས་བསྒྲགས་པས་རྒྱལ་པོའི་བག་ཆགས་སད་ནས་ལུས་ཀྱི་བ་སྤུ་གཡོ་བའི་དད་པ་ཐོབ་ཅིང། རྟེན་འབྲེལ་གྱི་རི་མོ་དང་ཡི་གེ་རྣམས་བསྟན་པས་མཚན་མོ་དེ་ཉིད་ལ་ཡན་ལག་བཅུ་གཉིས་ལུགས་འབྱུང་ལྡོག་ཏུ་བསམ་པས་རྒྱུན་ཞུགས་ཀྱི་འབྲས་བུ་ཐོབ་སྟེ་ཆེད་དུ་བརྗོད་པ། རིང་ན་བཞུགས་པའི་སངས་རྒྱས་ཀྱི། །ཤེས་རབ་མིག་ནི་རྣམ་པར་སྦྱངས། །གང་ལ་དེ་འདྲའི་གསོས་མངའ་བ། །སྨན་པའི་མཆོག་ལ་ཕྱག་འཚལ་ལོ། །ཞེས་བརྗོད་པ་ལྟ་བུ་ཡིན། ཡང་རི་མོ་ཙམ་གྱིས་ཀྱང་བསྟན་པར་གནོད་པ་སྲིད་དེ། དཔེར་ན་སྔོན་རྒྱལ་པོ་སྲོང་བཙན་སྒམ་པོའི་དུས་མཁན་པོ་བོ་དྷི་སཏྭས་བོད་ལ་རབ་བྱུང་འོང་མི་འོང་གི་ཉམས་སད་པའི་ཕྱིར་དུ་མི་བདུན་རབ་ཏུ་བྱུང་བ་ལ་སད་མི་མི་བདུན་དུ་གྲགས་པ་དེ་རྣམས་ཀྱིས་བླང་དོར་ཚུལ་བཞིན་དུ་བྱས་པས། དེ་མ་ཐག་ལམ་ལ་འཇུག་ཐུབ་པ་བྱུང་སྟེ། རབ་བྱུང་ཡོང་བར་འདུག་གསུངས་ཤིང་རབ་བྱུང་ཡང་གཞི་ཐམས་ཅད་ཡོད་པར་སྨྲ་བའི་ལུགས་འདི་རང་བཟང་བར་འདུག་གསུངས་ནས་དེ་ཀ་བཙུག་སྟེ། ལྟ་བ་ཀླུ་སྒྲུབ་དང། སྤྱོད་པ་ཞི་འཚོའི་ལུགས་བྱེད་དགོས་པར་བཀས་བཅད་པས་ཇོ་བོ་ཡང་ཕལ་ཆེན་སྡེ་པ་འཛུག་ཏུ་མ་བཅུག་ཅིང། དེ་ལྟར་དང་པོ་མཁན་ཆེན་ཞི་འཚོས་བསྟན་པ་དག་ཐེར་མཛད་བཞིན་པའི་དུས་ཙ་ན་མཁན་ཆེན་ཚེའི་རིག་འཛིན་བརྙེས་པ་ཡིན་ཡང་བོད་བསོད་ནམས་དམན་པས་རྟ་མཁྲས་ཀྱིས་བཀྲོང། རྒྱལ་

― GTD003_Page_0475 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་ཡང་གྲོངས་ཏེ་གླང་དར་མས་བསྟན་པ་བསྣུབ་པར་འདོད་དེ། ཐོག་མར་ཇོ་བོ་བྱེ་མའི་འོག་ཏུ་སྦས་ཇོ་བོ་བཞུགས་པའི་ཁང་པའི་སྒོ་ལ་ཞལ་ཞལ་བྱས་ཏེ་སྟེང་དུ་རབ་བྱུང་ཆང་གི་བུམ་པ་ཐོགས་པ་བྲིས་ཏེ་བཀྲ་མི་ཤིས་པའི་རྟེན་འབྲེལ་བསྒྲིགས་པས་ཁོ་རང་གི་འདོད་པ་ལྟར་བྱེད་ཐུབ་པ་བྱུང་ཞིང། དེར་མ་ཟད་སློབ་དཔོན་དབྱིག་གཉེན་ཚེའི་རིག་འཛིན་བརྙེས་པའི་གྲུབ་ཐོབ་ཅིག་ཡིན་ཀྱང་ཁ་ཆེ་འདུས་བཟང་དང་རྩོད་པ་བཤོལ་པའི་ཕྱིར་བལ་པོར་ཕེབས་ཏེ། མཆོད་རྟེན་གོ་མ་ས་ལ་ག་དྷ་ལ་བསྐོར་བ་མཛད་པའི་ཚེ། བལ་པོ་ཧང་དུ་ཟེར་བ་རབ་བྱུང་གི་རྟགས་ཆ་ལུགས་འཆང་བ་ཞིག་གིས་ཆང་གི་བུམ་པ་ཐོགས་ནས་འགྲོ་བ་གཟིགས་ཏེ། ཐུགས་སྐྱོ་རང་དྲགས་ནས་ཀྱེ་མ་སངས་རྒྱས་ཀྱི་བསྟན་པ་ནུབ་ནས་བཀྲ་མི་ཤིས་པའི་ལྟས་འདི་འདྲ་བྱུང་ན་ང་བདག་བསྡད་པས་ཅི་བྱ་དགོངས་ཏེ། རྣམ་རྒྱལ་མའི་གཟུངས་དབུ་ཞབས་བཟློག་ནས་གསུངས་པ་སྐུ་ཚེ་བསྡུས་ཏེ་མྱ་ངན་ལས་འདས་པའི་མཆོད་རྟེན་ཡང་ད་ལྟ་དེར་བཞུགས་པ་ལྟ་བུ་ཡིན། དེས་ན་སྒོ་དུ་མ་ནས་བདེན་བཞིའི་བླང་དོར་ལ་ཚུལ་བཞིན་དུ་འབད་དེ། ལམ་བསླབ་པ་གསུམ་ཁྱད་པར་བསྲུང་ན་ཕན་ཡོན་ཆེ་ཞིང། མ་བསྲུངས་ན་ཉེས་དམིགས་ཆེ་བས་རང་གིས་ཁས་བླངས་པའི་ཚུལ་ཁྲིམས་འདི་ལ་ལྟུང་བས་མ་གོས་པར་གཙང་སང་ངེ་བ་ཞིག་བསྲུང་དགོས། དེ་ལ་ཡང་ལྟུང་བ་འབྱུང་བའི་སྒོ་བཞི་ཡོད་དེ། དང་པོ་མི་ཤེས་པ་ལྟུང་བ་འབྱུང་བའི་སྒོ་ཡིན་པས། དེའི་གཉེན་པོར་བསླབ་བྱ་རྣམས་གཞན་ལས་ལེགས་པར་ཉན་ཞིང། བློའི་ནུས་པ་ཡོད་ན་མདོ་རྩ་བ་དང་།

― GTD003_Page_0476 ―

^{[མ་དཔེ་གཟིགས་ན་འདིར་གནོན།]}

[Full Size]

དེའི་རྒྱ་ཆེར་འགྲེལ་སོགས་ལ་བལྟ་དགོས་ཏེ་རྗེ་རིན་པོ་ཆེས་ཡང་དེ་དག་ཐུགས་འཛིན་གནང་བ་ཡིན། དེ་མ་བྱུང་ན་གླེང་འབུམ་སོགས་བལྟ་ཞིང། དེ་ཡང་མ་བྱུང་ན་པཎ་ཆེན་བློ་བཟང་ཆོས་རྒྱན་གྱིས་མཛད་པའི་སྡོམ་ཚིག་དང། བླ་མ་རིན་པོ་ཆེ་རང་གིས་མཛད་པའི་སྡོམ་ཚིག་སོགས་ལ་བལྟ་དགོས། དེར་མ་ཟད་འདུལ་བའི་བརྗོད་བྱ་མཐའ་དག་སྡོམ་པ་མ་ཐོབ་པ་ཐོབ་པར་བྱེད་པའི་ཐབས་སོགས་གསུམ་དུ་འདུས་པས་འབོག་ཆོག་སོགས་ཀྱང་གཞན་གྱི་མཁན་སློབ་སོགས་བྱེད་མཁན་ཞིག་མིན་པས་བལྟ་མི་དགོས་པ་མིན། རང་གིས་དང་པོ་ཅི་ཞིག་ཁས་བླངས་ཡོད་ཤེས་པའི་ཕྱིར་དུ་ཐམས་ཅད་ཀྱིས་བལྟ་དགོས་ལ། དེ་ལྟར་བརྟགས་པ་ན་དང་པོ་ཕ་མས་བཏགས་པའི་མིང་དང། གོས་དང་སེམས་གསུམ་ཀ་ཉོན་མོངས་པ་ཡིན་པས་བརྗེ་བ་གསུམ་གྱིས་སྒོ་ནས་དེ་ཐམས་ཅད་བོར་ཏེ་འཁོར་བ་ལ་ཕྱི་མིག་མི་བལྟ་ཞིང། གཤེ་ཡང་ལན་དུ་མི་གཤེ །ཁྲོ་ཡང་ལན་དུ་མི་ཁྲོ་ཞེས་ཁས་བླང་བ་དེ་བྱུང་ན་ཕན་ཡོན་ཆེ་ལ། མ་བྱུང་ཡང་འགལ་བ་མེད་པ་དེ་འདྲ་མིན། མཁན་སློབ་དགེ་འདུན་དང་བཅས་པ་དཔང་དུ་བཞག་ནས་ཁས་བླངས་པས། མེད་མི་རུང་དུ་བསྲུང་དགོས་པ་ཡིན། བསླབ་བྱ་ཡང་ཤིན་ཏུ་གྲངས་མང་བས་རྟག་ཏུ་བསྔོ་བགྲངས་བྱེད་དགོས། དེ་ནས་མ་གུས་པ་ལྟུང་བ་འབྱུང་བའི་སྒོ་ཡིན་པས། སྟོན་པ་དང། དེའི་བཅས་པའི་བསླབ་པ། གྲོགས་ཚངས་པ་མཚུངས་པར་སྤྱོད་པ་རྣམས་གུས་པར་བྱ་དགོས་ཏེ། རྒྱུད་སྡེ་རྣམས་སུའང་དགེ་སློང་རྡོ་རྗེ་འཛིན་པ་ཡོད་བཞིན་དུ་ཁྱིམ་པ་རྡོ་རྗེ་འཛིན་པས་རབ་གནས་སོགས་བྱ་མི་རུང་བར་གསུངས་

― GTD003_Page_0477 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིང་། སྔོན་གྱིས་བཀས་བཅད་དུ་ཡང་རབ་བྱུང་མཐོང་ན་སྟན་ལས་ལྡང་དགོས་པ་དང། རབ་བྱུང་ཡོད་པར་ཁྱིམ་པས་དབང་བསྐུར་སོགས་ཀྱིས་ལས་བྱེད་མི་རུང་བར་བཀས་བཅད་ཅིང། དེར་མ་ཟད་མངའ་བདག་ཁྲི་རལ་པ་ཅན་གྱིས་རང་གི་རལ་པར་དར་ཡུག་བཏགས་པ་དགེ་འདུན་གྱི་ལམ་དུ་བཏིང་བ་སོགས་བཀུར་བཟོས་བསམ་གྱིས་མི་ཁྱབ་པ་མཛད་པ་ལྟ་བུ་ཡིན་ལ། ཚུལ་ཁྲིམས་རྣམ་པར་དག་པ་ཞིག་བྱུང་ན་ཡོན་ཏན་ཐམས་ཅད་ཀྱི་མཆོག་ཏུ་གྱུར་པ་ཡང་དེ་ཡིན་ཏེ། སྒོམ་པ་བས། གཤེགས་ཁར་ཡེ་ཤེས་འབར་ལ་ཡེ་འབར་ཁྱོད་ལ་མི་རྣམས་ཀྱིས་ཁྱོད་ཀྱི་བླ་མ་ལ་ཡོན་ཏན་ཅི་ཡོད་ཅེས་འདྲིར་བྱུང་ན། མངོན་ཤེས་དང། ལྷག་མཐོང་སོགས་ཡོད་ཅེས་སྨྲས་ན་མི་འགྲིག་གོ །ལས་འབྲས་ལ་ཡིད་ཆེས་ནས་ཚུལ་ཁྲིམས་རྣམ་པར་དག་པ་བསྲུང་བ་ཞིག་ཡིན་གྱིས་ཤིག་གསུངས་པ། ཚུལ་ཁྲིམས་དག་པ་ལ་ཡོན་ཏན་གྱི་མཆོག་ཏུ་འཛིན་པ་ཞིག་དགོས་ཀྱང། ད་ལྟ་དུས་སྙིགས་མར་སོང་བས་མངོན་ཤེས་ཡོད་ཟེར་བ་དང། ལྷ་མཐོང་ཡོད་ཟེར་བ་ལ་མཆོག་ཏུ་རྩི་བ་འདི་གཏན་ནས་མི་རུང་སྟེ། དེ་འདྲ་ཕལ་ཆེར་འདྲེས་ཁྱེར་བའི་རྟགས་ཡིན། སྔོན་ཇོ་བོ་ཡེར་པར་བཞུགས་སྐབས་ཇོ་བོ་དར་ཡུག་པ་ཟེར་བ་འདྲེས་བྱིན་གྱིས་བརླབས་པ་ཞིག་གིས་ལུང་བསྟན་ཐོགས་མེད་དུ་བརྒྱབ་པས་མི་རྣམས་དད་པར་གྱུར་པ་ལ། ལན་གཅིག་ཇོ་བོའི་དྲུང་དུ་མཇལ་བར་ཕྱིན་པས། ཁུ་སྟོན་གྱིས་ཇོ་བོ་ལ་མི་མ་ཡིན་འདི་བསྐྲད་པར་མཛད་དགོས་ཞུས་པ་ལ། ཇོ་བོས་ཁྱོད་ཀྱིས་དྲི་བ་གྱིས་དང། ངས་

― GTD003_Page_0478 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐྲད་གསུངས་པས་ཁུ་སྟོན་གྱི་ཞལ་དུ་བཙག་དང་རམ་བཟུང་ནས་དར་ཡུག་པ་ལ། ཁྱེད་མངོན་ཤེས་ཐོགས་མེད་དུ་འདུག་ཟེར་བ་ངས་ཐོས། ད་ཇོ་བོ་རིན་པོ་ཆེ་འདི་ལོ་ག་ཙམ་བཞུགས། སྐུ་ཚེ་འདིའི་རྗེས་མ་གང་དུ་འཁྲུངས་ཞེས་སོགས་དྲིས་པ་ལ། ད་ལོ་འདི་སྙེད་ཅིག་བཞུགས། སྐུ་ཚེ་རྗེས་མ་ལ་དགའ་ལྡན་དུ་ཕེབས་ཞེས་སོགས་དཔྱིས་ཕྱིན་པར་ཐོགས་མེད་དུ་བཤད་བྱུང་བས་དེ་མ་ཐག་ཇོ་བོས་མི་མ་ཡིན་བསྐྲད་ནས་ཁུ་སྟོན་ལ་བརྡ་བྱས་པ་དང། ཁུ་སྟོན་གྱིས་ངའི་ཁ་ནང་ན་ཅི་འདུག་དྲིས་པས་གང་ཡང་ཤོད་རྒྱུ་མ་བྱུང་བ་ན། ཁྱོད་ཀྱིས་ཕྱིན་ཆད་མི་རྣམས་མ་བསླུ་ཞིག་གསུངས་ནས་བཏང་བ་ལྟ་བུ་ཡིན། དེའི་རྒྱུ་མཚན་གྱིས་མངོན་ཤེས་ཐར་ཐོར་ཡོད་པ་དང། རྡོ་ལ་ལག་རྗེས་བཞག་པ་ལྟ་བུས་ཐར་པ་ཐོབ་པ་ལ་མི་ཕན་ཞིང་། ངན་སོང་ལས་མི་འདྲོངས་པས་ཡ་མཚན་ཆེ་རྒྱུ་མེད། ཙ་རིའི་ར་ལུག་སོགས་ཀྱིས་ཀྱང་ཡོན་ཏན་གང་ཡང་མ་ཐོབ་མོད། དེས་རྩྭ་ཨ་ཝ་དང། ཀླུ་བདུད་རྡོ་རྗེ་ཟོས་པའི་སྟོབས་ཀྱིས་རྡོ་ལ་རྗེས་གང་འདོད་དུ་ཡོང་བ་ཡིན། མངོན་ཤེས་རྫུ་འཕྲུལ་ཡོད་ཀྱང་རང་གར་སྟོན་མི་རུང་སྟེ། སྔོན་འབྲོམ་སྟོན་པ་སྐུ་ཁམས་མ་བདེ་བའི་ཚེ་རྣལ་འབྱོར་པ་ཆེན་པོས་གསང་ཕུ་ནས་རྭ་བསྒྲེང་བར་དུ་རྫུ་འཕྲུལ་གྱིས་ཐལ་བྱུང་དུ་ཕེབས་ནས་བསྙུང་འདྲི་བྱས་པ་ལ་འབྲོམ་གྱིས་ཁྱེད་ཀྱིས་ངོ་ཚ་བའི་གནས་དེ་ལ་ཡོན་ཏན་དུ་འཛིན་ནམ་གསུངས་བཀའ་བཀྱོན་གྱིས་ཚར་བཅད་པ་ལྟ་བུ་ཡིན། དེས་ན་ཡོན་ཏན་ཐམས་ཅད་ཀྱི་མཆོག་ཏུ་གྱུར་པ་ལེགས་ཚོགས་ཀུན་གྱི་འབྱུང་གནས་བསྟན་པའི་རྩ་བ་ཚུལ་ཁྲིམས་ཡིན་པས། ཚུལ་ཁྲིམས་ལ་གུས་པས་

― GTD003_Page_0479 ―

^{[མ་དཔེ་གཟིགས་ན་འདིར་གནོན།]}

[Full Size]

གཅེས་སྤྲས་སུ་བྱེད་དགོས་ཏེ། སྟོན་པས་ཀྱང་ངའི་ཉན་ཐོས་ཚུལ་ཁྲིམས་སྲུང་མཁན་གང་ན་ཡོད་པ་དེར་སྣང་བ་ཡོད། འོད་ཡོད། དེས་ན་ང་ལ་སེམས་ཁྲལ་མེད་གསུངས་པ་ལྟ་བུ་ཡིན་པས་བསླབ་པ་ལ་དད་པར་བྱ་དགོས། དད་པ་མེད་ན་དབང་པོ་རྣོ་ཡང་དབང་པོ་དགྲར་ལངས་པ་ལྷ་སྦྱིན་ལྟ་བུ་ཡིན་པས། སྟོན་པ་དང་བསླབ་པ་ལ་མ་གུས་པར་དགག་དགོས། དེའི་འོག་ཏུ་བག་མེད་པ་ལྟུང་བ་འབྱུང་བའི་སྒོ་ཡིན་པས། དེའི་གཉེན་པོར་དྲན་ཤེས་བཞིན་དང། ངོ་ཚ་དང། ཁྲེལ་ཡོད་སོགས་བསྐྱེད་ནས་སྒོ་གསུམ་ལ་དྲན་པ་ཉེ་བར་བཞག་སྟེ། འགྲོ་འདུག་སོགས་ཀྱི་སྤྱོད་ལམ་ཐམས་ཅད་བག་དང་ལྡན་པར་བྱ་དགོས་ཏེ། དཔེར་ན་འགྲོ་བའི་ཚེ་ཆང་ཚོང་མ་དང། སྨད་ཚོང་མ་དང། རྒྱལ་པོའི་ཕོ་བྲང་དུ་འགྲོར་མི་རུང་བས། ཡུལ་ཡིན་མིན་བརྟགས་པ་དང། ཆུ་ཚགས་འཆང་ཚུལ་སོགས་ལའང་ཆུའི་སྲོག་ཆགས་རྣམས་ལ་མི་གནོད་པར་བྱ་ཞིང། སྡུད་པ་ལས། བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད། །ཅེས་སོགས་ཆུ་ལ་སྦྱིན་པའི་ཚིགས་བཅད་སོགས་འདོན་དགོས་ལ། རྔུལ་གཟན་སོགས་འཚོ་བའི་ཡོ་བྱད་བཅུ་གསུམ་འཆང་དགོས་པས། རྔུལ་གཟན་ལ་ཡང་ད་ལྟ་འགའ་ཞིག་གིས་རྡུལ་གཟན་ཟེར་ཏེ། དེ་ཚུན་ཆད་ནས་བསྟན་པའི་ཟུར་ཉམས་པར་འདུག་པས་དེ་འདྲ་མི་རུང། རྔུལ་གཟན་ཟེར་བ་ཉིན་མོ་ཆོས་གོས་ཀྱི་ནང་དུ་གྱོན་རྒྱུ་དང། རྔུལ་གཟན་གྱི་གཟན་མཚན་མོ་གྱོན་རྒྱུ་དེ་ཡིན། དེ་བཞིན་དུ་ཤམ་ཐབས་ཡང་མཐང་གོས་ཀྱི་འོག་ཏུ་ཉིན་མོ་གྱོན་རྒྱུ་

― GTD003_Page_0480 ―

^{[མ་དཔེ་གཟིགས་ན་འདིར་གནོན།]}

[Full Size]

ལྕགས་རི་དང། ཚལ་བུ་མེད་པ་མ་གཏོགས་དབྱིབས་མཐང་ཤམ་དང་འདྲ་བ་ཞིག་ཡིན་པས། ད་ལྟའི་སྨད་གཡོགས་ཟེར་བ་འདི་ནི་མཐང་ཤམ་དང་དབྱིབས་མི་མཚུངས་པ་དེ་ཡིན། དེ་ནས་གསེར་དངུལ་སོགས་རིན་པོ་ཆེ་ལ་ཡང་མི་རུང་བའི་དངོས་པོས་བྱིན་རླབས་བྱ་དགོས། དེ་ལྟར་བྱས་ན་ནོར་རྫས་སོགས་ཅི་ཙམ་ཡོད་ཀྱང་སྐྱོན་དུ་མི་འགྱུར་ཏེ། དཔེར་ན་ཕུར་བུ་ལྕོག་དང། རྗེ་དོན་ཡོད་མཁས་གྲུབ་པ་གཉིས་གསུང་སྒྲོག་གནང་སྐབས་ཕུར་བུ་ལྕོག་ནས་ད་ལྟ་བོད་ན་ཚེ་བློས་བཏང་ཞིག་ཨེ་ཡོད་གསུངས་པ་ལ། དོན་ཡོད་མཁས་གྲུབ་པས་དེ་ཡོད་དེ། པཎ་ཆེན་བློ་བཟང་ཡེ་ཤེས་ཡིན་གསུངས་པ་ལྟར་རང་ལ་བྱུང་བ་ལ་ངེས་པ་མེད། རང་གི་ངོས་ནས་དགེ་འདུན་ནམ་དཀོན་མཆོག་སོགས་གཞན་ལ་བསྔོས་ནས། རང་ཉིད་ཀྱིས་བདག་ཏུ་མ་བཟུང་ན་དེ་ཆོས་པ་ཡིན། དེ་ཡང་ལན་གཅིག་ལྷ་བཟང་གིས་པཎ་ཆེན་བློ་བཟང་ཡེ་ཤེས་ལ་རྡོ་ཚད་བརྒྱ་ཕུལ་བའི་ཚེ། པཎ་ཆེན་གྱི་ཞབས་ཕྱི་རྣམས་ནས། ང་ཚོ་ལ་ད་ལོ་རྡོ་ཚད་བརྒྱ་ཕུལ་བའི་འབུལ་བ་འདི་ལས་ཆེ་བ་ཡོང་མ་མྱོང་ཟེར་བ་ལ། པཎ་ཆེན་གྱིས་རྡོ་ཚད་ཟེར་བ་ག་འདྲ་ཡིན་གསུངས་ནས། མི་རྣམས་ཀྱིས་དེ་ལ་སྐུར་བ་ཞུས་པ་ལྷ་བཟང་གིས་གསན་ནས། མིན་ནི་བླ་མ་བོག་ཏོ་པཎ་ཆེན་ཞེས་ཐལ་མོ་སྦྱར་ཏེ་གསེར་དང་བོང་བ་མཉམ་པ། ནམ་མཁའ་དང་ལག་མཐིལ་མཉམ་པ་ཟེར་བ་དེ་ཡིན་གསུངས་ནས། ལྷག་པར་གུས་པ་ཆེར་སོང་བ་ལྟ་བུ་ཡིན། ངོ་ཚ་དང་ཁྲེལ་ཡོད་ཀྱི་ཁྱད་པར་རང་རྒྱུ་མཚན་དུ་བྱས་ནས་ང་ལ་དགེ་སློང་ཟེར་གི་ཡོད། དགེ་བཤེས་ཟེར་གི་ཡོད། ངས་མིང་ལ་བདག་བྱེད་དགོས་སྙམ་

― GTD003_Page_0481 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་ཉེས་པ་ལ་འཛེམ་པ་ངོ་ཚ་ཤེས་པ་དང་སྟོན་པའི་ཡེ་ཤེས་ཀྱི་སྤྱན་གྱིས་གཟིགས་ཡོད་པས་ཐུགས་ཁྲེལ་ཡོང་སྙམ་ནས་ཉེས་པ་ལ་འཛེམ་པ་ལ་ཁྲེལ་ཡོད་པ་སྟེ། འདི་གཉིས་ཡོད་ན་སྡོམ་པ་ལ་ངོ་ལྐོག་མི་འབྱུང། དེ་ལྟར་མ་ཡིན་པར་སྡོམ་པ་ལ་ངོ་ལྐོག་བྱུང་ན་རང་གིས་ཡིན་མདོག་བྱས་ཀྱང་། དཀར་ཕྱོགས་ལ་དགའ་བའི་ལྷ་དང་བརྒྱ་བྱིན་སོགས་ཀྱིས་བསྟན་པའི་ཆོམ་རྐུན་པ་ཟེར་བ་ཡིན་ལ། དམ་པ་རྣམས་ཀྱིས་སྨད་པའི་གནས་དང། ཐམས་ཅད་ཀྱིས་མཆིལ་མ་འདོར་བའི་ཡུལ་དུ་གྱུར་པ་ཡིན་པས། སྤྱན་སྔ་བ་བློ་གྲོས་རྒྱལ་མཚན་གྱིས། ཞབས་བསིལ་གྱི་སྣོད་དུ་འགྲོ་ཉེན་ཡོད་གསུངས་པ་ལྟ་བུ་ཡིན། བཞི་པ་ཉོན་མོངས་མང་བ་ལྟུང་བ་འབྱུང་བའི་སྒོ་ཡིན་ཏེ། མདོ་སྡེ་རྒྱན་ལས། ཉོན་མོངས་ཀྱིས་ནི་བདག་འཇོམས་སེམས་ཅན་འཇོམས་ཤིང་ཚུལ་ཁྲིམས་འཇོམས། །གསུངས་པ་ལྟར་ཡིན་ལ། དེ་ཡང་འདོད་ཆགས་ཤས་ཆེའི་གཉེན་པོར་མི་སྡུག་པ་བསྒོམ་དགོས་པས། ཐོག་མར་རང་གི་དཔྲལ་བར་རྨ་ཞིག་བྱུང་སྟེ་དེ་ཆེར་སོང་བ་ལས་རྣག་ཁྲག་སོགས་འཛག་པ་དང། འདུལ་བ་ལུང་ནས་བཤད་པ་ལྟར་གྱི་འདུ་ཤེས་བཅུ་ཡང་བསྒོམ་དགོས་ཤིང། ང་རྒྱལ་གྱི་གཉེན་པོར་ཁམས་ཀྱི་རབ་དབྱེ་བསྒོམ་དགོས་ཏེ། དེ་ལྟར་བྱས་པས་རིལ་འཛིན་འཇོམས་སླ་བ་ཡིན། དེ་ལྟར་ལྟུང་བའི་སྒོ་བཞི་ཁེགས་ནས་ཚུལ་ཁྲིམས་རྣམ་པར་དག་པ་ཞིག་བསྲུང་བ་ལ་ཚུལ་ཁྲིམས་ཀྱི་ཕན་ཡོན་ཤེས་དགོས་པས། ཚུལ་ཁྲིམས་ཀྱི་ཕན་ཡོན་ནི། རྗེ་བླ་མས།

― GTD003_Page_0482 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཁྲིམས་ནི་བརྒྱ་བྱིན་གྱི་རྒྱལ་མཚན་དང། ཚོང་པའི་ཚོང་དཔོན་ལྟ་བུར་གསུངས། ལྷ་རྣམས་དང་ལྷ་མ་ཡིན་འཐབ་པ་ན། ཕམ་ན་བརྒྱ་བྱིན་གྱིས་རྒྱལ་མཚན་མི་བསྒྲེང་ཞིང། རྒྱལ་ན་བསྒྲེང་བ་ལྟར་ཚུལ་ཁྲིམས་ཀྱི་རྒྱལ་མཚན་ནི། ཉོན་མོངས་པ་ལས་རྒྱལ་བའི་ཐར་པ་ཐོབ་པའི་སྔ་ལྟས་ཡིན་པས་སངས་རྒྱས་ཀྱིས་གསུངས་པ་བཞིན་དུ་བྱས་ན་མངོན་མཐོ་དང། ཐར་པ་དང། ཐམས་ཅད་མཁྱེན་པ་ཐོབ་ནུས་ལ། དེ་ལྟར་མ་བྱས་ན་ཐོབ་མི་སྲིད་དེ། རྒྱུད་བླ་མ་ལས། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས། །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་གསུངས་པ་ལྟར། སངས་རྒྱས་ནི་བླང་དོར་གྱི་གནས་གང་ལ་ཡང་འཁྲུལ་བ་མེད་པ་ཡིན་པས། དེས་གསུངས་པ་ལྟར་ལམ་བསླབ་པ་རིན་པོ་ཆེ་གསུམ་ལ་བསླབ་པར་བྱའོ། །གསུམ་པ་མཇུག་ཏུ་ཇི་ལྟར་བྱ་བ་ནི་སྔར་བཞིན་ཡིན་ལ། གཉིས་པ་ཐུན་མཚམས་སུ་ཡང་སོ་སོར་ཐར་པའི་དབང་དུ་བྱས་པའི་བསླབ་བྱ་རྣམས་བལྟ་དགོས། དེ་ཡང་སོ་སོར་ཐར་པའི་སྐད་དོད་ནི་པྲ་ཏི་མོཀྵ་ཞེས་པའི་པྲ་ཏི་ཡང་རྣམ་འགྲེལ་ལས། པྲ་མ་ན་པྲ་ཏི་ཀ་ཞེས་པ་དང་པོ་ལ་འཇུག་པ་དང། གཞན་ཡང་མཆོག་དང་སོ་སོ་ལ་འཇུག་ཚུལ་གསུམ་སོགས་ཡོད་པ་ལས། འདིར་སོ་སོ་ལ་འཇུག་པ་གོ་བ་བཟང་སྟེ། དཔེར་ན་ལས་དགེ་སྡིག་སོ་སོར་བྱས་པའི་འབྲས་བུ་སོ་སོར་མྱོང་བས། སོ་སོ་སྐྱེ་བོ་ཞེས་བཤད་པ་བཞིན་

― GTD003_Page_0483 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་ཡང་རང་རང་གིས་ཚུལ་ཁྲིམས་བསྲུང་ན་རང་རང་སོ་སོར་ཐར་ནུས་ལ། དེ་མ་བསྲུངས་པ་རྣམས་ཐར་པར་མི་ནུས་པས་སོ་སོར་ཐར་པ་ཞེས་བཤད་པ་ཡིན། གཞན་ཡང་དབང་པོའི་སྒོ་སྡོམ་པ་དང། ཟས་ཀྱི་ཚོད་རིག་པ་དགོས་ལ། དབང་པོ་སྡོམ་པ་དང། དབང་པོ་དགག་པ་གཉིས་མི་གཅིག་སྟེ། དབང་པོ་དགག་པ་ནི་མཐོང་བ་དང། ཐོས་སུ་མི་འཇུག་པ་ཡིན་ལ། དབང་པོ་སྡོམ་པ་ནི་དེ་ལ་ཡིད་ཀྱིས་ཆགས་པ་འགོག་པ་ཡིན་ཏེ། རྗེ་མི་ལས་ཚོ་དྲུག་བསྡུས་པར་འཇོག་པའི་གདམས་ངག་གསུངས་པ་དང་གནད་གཅིག་སྟེ། འདི་ནི་ཉན་སའི་ཡང་མན་ངག་ཡིན་ནོ། །ཟས་ཀྱི་ཚོད་རིག་པ་དགོས་པས། ཤ་བས་ཞིང་ཟོས་པའི་དཔེར་མ་སོང་བ་དགོས་ཏེ། སྔོན་ཤ་བ་ཞིག་གིས་ཞིང་དུ་སོང་ནས་ཚོད་མ་ཟིན་པར་ཟ་ཆེ་བས་འགྲོ་མ་ཐུབ་པ། དགེ་སློང་ཞིག་གིས་མཐོང་སྟེ་གཟན་གྱིས་ཐང་གཅིག་བཏད་ནས། མི་ང་རུ་སོང་བ་མ་གཏོགས་ཁྱེད་སྐུ་ཚེ་རིང་པོ་རང་མི་ཡོང་བར་འདུག་ཟེར་བ་ལྟ་བུར་འགྲོ་ཉེན་ཡོད་པས། ཟས་ཀྱི་ཚོད་རིག་པ་སོགས་ཐུན་མཚམས་ཀྱི་བྱ་བ་འདི་དག་ཐར་པ་ཆ་མཐུན་གྱི་དགེ་རྩ་བསྐྱེད་པའི་ཐབས་ཀྱང་བླ་ན་མེད་པ་ཡིན་ནོ། །གསུམ་པ་སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བ་ནི། དེ་ལྟར་དགེ་བའི་བཤེས་གཉེན་ལ་བརྟེན་ནས་བློ་སྦྱངས་པས། ཐོག་མར་དལ་འབྱོར་ལ་མྱོང་བ་ཐོན་ཏེ་བློ་ནང་ནས་ཆོས་ལ་བསྐུལ་བ་ཞིག་དགོས། དེ་ནས་སྐྱེས་བུ་ཆུང་ངུའི་མི་རྟག་པ་དང། ངན་སོང་གི་སྡུག་བསྔལ་ལ་མྱོང་བ་ཐོན་པའི་ཚེ། དེས་འཇིགས་སྐྲག་

― GTD003_Page_0484 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་དེ་ལས་ཐར་པ་ཞིག་བྱུང་ན་སྙམ་པ་མ་གཏོགས་བསམ་རྒྱུ་མེད་ཅིང། ང་ངན་སོང་དུ་མ་སྐྱེས་པ་ཞིག་བྱུང་ན་དེས་ཆོག་པ་སྙམ་པའི་ཚོད་ཙམ་སྐྱེ། དེའི་ཚེ་བཤེས་གཉེན་མཁས་པས་རིམ་གྱིས་ཡར་འཁྲིད་དགོས། འཁྲིད་ཚུལ་ཡང་སྟོན་པས་གཅུང་དགའ་བོ་བྱ་བ་ཆུང་མ་བུཎྜ་རི་ཀ་ཟེར་བ་ལ་ལྷག་པར་ཆགས་པས་རབ་ཏུ་བྱུང་བར་མི་འདོད་པ་ལ། བཅོམ་ལྡན་འདས་ཀྱིས་ཁྱོད་རབ་ཏུ་བྱུང་བར་འདོད་དམ་གསུངས་པ་ལ་སངས་རྒྱས་ནི་གཟི་བརྗིད་ཆེ་བས་བཀའ་ལས་འགོང་བར་མ་ནུས་པར་རབ་ཏུ་བྱུང་ངོ་ཞེས་ཞུས་ཏེ། ཕྱི་རོལ་ཏུ་འདྲེག་མཁན་གྱིས་སྐྲ་བྲེག་པར་བརྩམ་པ་ན། ང་མི་རིང་བར་སྟོབས་ཀྱི་འཁོར་བསྒྱུར་དུ་འགྱུར་བས། དེའི་ཚེ་ཁྱོད་ཀྱི་ལག་པ་གཅོད་དོ་ཞེས་བསྡིགས་པ་དང་སྐྲག་ནས་འབྲེག་མཁན་ཀྱང་སྦས་སོ། །དེ་ནས་སྟོན་པ་རང་ཉིད་ཀྱིས་ཆུ་བླུག་སྟེ་སྐྲ་བྲེག་ནས་རབ་ཏུ་བྱུང་སྟེ་དགེ་འདུན་གྱི་ཁང་སྐྱོང་དུ་བསྒོས་པས། སྟོན་པ་འཁོར་བཅས་བསོད་སྙོམས་ལ་གཤེགས་ཤུལ་དུ་ཕྱག་དར་བྱས་ནས་ཡུལ་དུ་འགྲོ་སྙམ་པའི་ཚེ། སྟོན་པས་ཕྱག་དར་ཟིན་པ་མེད་པར་བྱིན་གྱིས་བརླབས་པའི་སྟོབས་ཀྱིས་མ་ནུས་པ་དང། འཕྲོ་བཤོལ་ཏེ་ལམ་པོ་ཆེ་ནས་སོང་ན་སྟོན་པ་འབྱོན་པ་དང་འཕྲད་ཀྱིས་དོགས་ནས། གསང་ལམ་ཞིག་ཏུ་ཕྱིན་པས་སྟོན་པའི་མངོན་ཤེས་ཀྱིས་གཟིགས་ནས་ལམ་དེ་ནས་ཚུར་འབྱོན་པ་མཐོང་སྟེ། ཡལ་གའི་ཕག་ཏུ་ཡིབ་སྟེ་གནས་པས། སྟོན་པ་ལམ་དེ་ནས་ཚུར་བྱོན་པ་ན་ཡལ་ག་རྣམས་གྱེན་དུ་འཕགས་པས། སྟོན་པས་དགའ་བོ་ལ་གཟིགས་ཏེ་ཚུར་ཤོག་གསུངས། ངོ་ཚ་བཞིན་

― GTD003_Page_0485 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་སྟོན་པའི་རྗེས་སུ་འབྲང་སྟེ་འོང་བ་ལ། སྟོན་པས་རྫུ་འཕྲུལ་གྱིས་སུམ་ཅུ་རྩ་གསུམ་གྱི་གནས་བལྟར་བཅུག་པས་དེ་ལ་སྨོན་པ་སྐྱེས་ཏེ་ཚུལ་ཁྲིམས་བསྲུང་བའི་ཚེ་སྟོན་པས་དགེ་སློང་རྣམས་ལ། ཁྱེད་གཅུང་དགའ་བོ་དང་ལྷན་ཅིག་ཏུ་སྟན་ལ་འདུག་པ་དང། གཏམ་འདྲི་བར་མ་བྱེད་ཅིག །དེ་ཅིའི་ཕྱིར་ན་ཁྱེད་ཅག་གི་ལམ་མི་གཅིག་པ་ཡིན་ཏེ། དགའ་བོ་ནི་ལྷའི་དཔལ་འབྱོར་འདོད་པས་ཚངས་པར་སྤྱོད་པ་ཡིན་ལ། ཁྱེད་ཅག་ནི་ཐར་པ་འདོད་པ་ཡིན་ནོ་ཞེས་གསུངས་པས། དགེ་སློང་རྣམས་ཀྱིས་དེ་ལྟར་བྱས་པའི་ཚེ་དགའ་བོ་ཡིད་སྐྱོ་ནས་རིམ་གྱིས་འབྲིང་གི་ལམ་དངོས་ལ་ཚུད་དེ་མཐར་དགྲ་བཅོམ་ཐོབ་པ་དང། ཀུན་དགའ་བོའི་ཚ་བོ་གཞོན་པས་རྣམ་གཡེང་གི་དབང་དུ་སོང་ནས་ཐོས་བསམ་སྒོམ་པ་སོགས་ལ་བརྩོན་པར་མི་བྱེད་པའི་ཚེ། མོའུ་འགལ་གྱི་བུས་ལྷ་གནས་དང་། དམྱལ་བ་སོགས་རིམ་གྱིས་བསྟན་པས་འཁོར་བ་མཐའ་དག་ལ་ཡིད་འབྱུང་སྟེ་དགྲ་བཅོམ་པ་ཐོབ་པ་ལྟ་བུའི་འཁྲིད་ཚུལ་ཞིག་དགོས། དེ་ལྟར་འཁོར་བ་མཐའ་དག་ལ་ཡིད་ལོག་སྟེ་མེ་འབར་བའི་འོབས་ལྟར་མཐོང་བ་ན་ཐར་པ་ཁོ་ན་དོན་དུ་གཉེར་ཞིང། དེས་ཆོག་པའི་ཚོད་ཙམ་གྱི་བློ་སྐྱེས་ནས་དེ་ལས་གཞན་བསམ་རྒྱུ་མེད་པ་ཞིག་ཡོང་བས། དེའི་ཚེ་ཞི་བའི་རྒུད་པར་ལྟུང་ཉེན་ཆེ་བའི་རྒྱུ་མཚན་གྱིས་འདིར་ཡང་དང་པོ་གང་ཡང་མ་བྱས་པའི་དུས་ན། བྱང་ཆུབ་ཀྱི་སེམས་ཀྱི་བཟོ་ལྟ་འདྲ་བ་ཞིག་བཟོས་པ་ཡིན་ལ། དེས་ཟིན་པའི་ཐེག་པ་ཆེན་པོའི་ཉམས་ལེན་

― GTD003_Page_0486 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་ཡང་འགྲོ་ཞིང། དང་པོ་ནས་གོལ་ས་བཅད་པས་ཐེག་དམན་དུ་མི་ལྟུང་བའི་ཐབས་ཡིན་ཏེ། དཔེར་ན་ལྷ་བྲིས་པས་ཐོག་མར་ཚངས་ཐིག་བཏབ་སྟེ། དེ་ནས་རིམ་གྱིས་སྐྱ་བྲིས་གྲུབ་ཟིན་པ་དང། གཟོད་ཚོན་གཏོང་བའི་འགོ་རྩོམ་པ་ལྟ་བུ་ཡིན། ཚུལ་འདི་དག་གཙུག་ན་རིན་ཆེན་གྱི་མདོ་དང། རྒྱུད་བླ་མར་གསལ་ལ། མངོན་རྟོགས་རྒྱན་ལས་ཀྱང་། དང་པོར་སེམས་བསྐྱེད་དང། དེ་ནས་གདམས་ངག་གི་སྐབས་སུ་བདེན་བཞི་དང་སྐྱབས་འགྲོ་སོགས་བསྟན་ཞིང། སྐབས་གསུམ་པར་འབྲིང་གི་མི་རྟག་སོགས་རྟོགས་པའི་གཞི་ཤེས་བསྟན་པ་དང་གནད་གཅིག་གོ །འབྲིང་ལས་གོང་དུ་འཁྲིད་དགོས་པའི་རྒྱུ་མཚན་ཡང། རང་དོན་གཙོ་བོར་དོན་དུ་གཉེར་བ་རྣམས་ཀྱི་ནང་ནས་དྲག་ཤོས་ཉན་ཐོས་མཆོག་ཟུང་ལྟ་བུ་ཡིན་ལ། དེ་དག་ཀྱང་གཞན་དོན་ལྟ་ཞོག །རང་དོན་ཙམ་ཡང་མ་རྫོགས་པ་ཡིན་ཏེ། མཆོག་ཟུང་གིས་དམྱལ་བའི་གནས་རྣམས་ལ་གཟིགས་པའི་ཚེ། མུ་སྟེགས་པའི་སྟོན་པ་རྫོགས་བྱེད་ཀྱིས་རང་གི་སློབ་མ་རྣམས་ལ་འཕྲིན་བསྐུར་བ་དེ་དག་ལ་གསུངས་པའི་ཚེ། འདིས་ངེད་ཅག་གི་སྟོན་པ་ལ་སྐུར་བ་བཏབ་བོ་ཞེས་མོའུ་འགལ་གྱི་བུ་ལ་བརྡུང་སྟེ་ཕྱག་ཞབས་ཐམས་ཅད་འདམ་བུ་ལྟར་བཅོམ་ནས་བཀྲོངས་པ་ཡིན་ལ། བྱང་ཆུབ་སེམས་དཔའ་རྣམས་ནི་ཆོས་ཉིད་མངོན་སུམ་དུ་གཟིགས་པ་ནས་བཟུང་སྟེ། དེ་ལྟ་བུའི་རྒུད་པ་ཐམས་ཅད་ལས་གྲོལ་བ་ཡིན་ཏེ། རྒྱུད་བླ་མ་ལས། འཕགས་པས་ན་དང་རྒ་བ་དང། །འཆི་བའི་སྡུག་བསྔལ་རྩད་ནས་སྤངས། །ཞེས་གསུངས་པ་ལྟར་ཡིན་པས། དེས་ན་བཤེས་

― GTD003_Page_0487 ―

^{[མ་དཔེ་གཟིགས་ན་འདིར་གནོན།]}

[Full Size]

གཉེན་མཁས་པས་ཐེག་པ་ཆེན་པོར་འཁྲིད་དགོས་ཏེ། པོ་ཏོ་བས། རབ་བརྒལ་གཅིག་ལ་རྫེ་བཅང་གཉིས་མིན། དང་པོ་ཉིད་ནས་ཐེག་ཆེན་འཇུག་བྱ་གསུངས་པ་བཞིན་དང་པོ་ནས་ཐེག་པ་ཆེན་པོའི་ལམ་དུ་འཇུག་དགོས་སོ། །འདི་ལ་གཉིས། བྱང་ཆུབ་ཏུ་སེམས་བསྐྱེད་ཚུལ་དང། སེམས་བསྐྱེད་ནས་སྤྱོད་པ་ལ་སློབ་ཚུལ་ལོ། །དང་པོ་ལ་གཉིས། བྱང་ཆུབ་ཏུ་སེམས་བསྐྱེད་པ་དངོས་དང། སེམས་བསྐྱེད་ཆོ་གས་བཟུང་བའི་ཚུལ་ལོ། །དང་པོ་ལ་ཡང། རྒྱུ་འབྲས་མན་ངག་བདུན་གྱི་སྒོ་ནས་སེམས་བསྐྱེད་ཚུལ་དང། བདག་གཞན་མཉམ་བརྗེའི་སྒོ་ནས་བྱང་ཆུབ་ཏུ་སེམས་བསྐྱེད་ཚུལ་གཉིས་ཏེ། སྔ་མ་ནི་ཤེར་ཕྱིན་གྱི་མན་ངག་ཡིན་ཞིང་བསྒོམ་རིམ་ལས་གསུངས་པ་ལྟར་ཇོ་བོ་རྗེས་གསལ་བར་མཛད་པ་ཡིན་ལ། བདག་གཞན་མཉམ་བརྗེའི་སྒོ་ནས་སེམས་བསྐྱེད་ཚུལ་འདི་སྡོང་པོ་བཀོད་པ་ལས་གསུངས་པ་བཞིན་ཀླུ་སྒྲུབ་ཀྱིས་རིན་ཆེན་འཕྲེང་བ་མདོ་ཀུན་བཏུས་གཞན་ཕན་ཚིགས་བཅད་སོགས་ལས་གསུངས་ཤིང། རྗེ་བཙུན་འཇམ་དབྱངས་ཀྱི་མན་ངག་ལ་བརྟེན་ནས། རྒྱལ་སྲས་ཞི་བ་ལྷའི་སྤྱོད་འཇུག་དང། བསླབ་བཏུས་གཉིས་སུ་གསལ་བར་མཛད་པ་ཡིན་ཞིང་འདི་གཉིས་ཀྱི་ཁྱད་པར་ནི་གཞན་འདྲ་ཡང། ཡིད་འོང་གི་རྒྱུའི་དྲིན་དྲན་ལུགས་མི་འདྲ་བར་དགོངས་པ་རབ་གསལ་ལས་གསུངས་པ་ལྟར། སྔ་མ་ལ་མར་གྱུར་ཚུལ་སོགས་ཀྱི་སྒོ་ནས་དྲིན་བསམ་སྟེ་ཡིད་འོང་གི་ཁྱད་པར་བྱམས་པ་བསྐྱེད་པ་ཡིན་ལ། གཉིས་པས་དུས་གསུམ་དུ་ཕན་བཏགས་ཚུལ་བསམ་

― GTD003_Page_0488 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་དེ་བསྐྱེད་པ་ཡིན་ཏེ། དེ་ལ་དང་པོ་རྒྱུ་འབྲས་མན་ངག་བདུན་གྱི་སྒོ་ནས་སེམས་བསྐྱེད་པ་ནི། སྔོན་དུ་སེམས་ཅན་ཐམས་ཅད་ལ་སེམས་སྙོམས་པ་སྒྲུབ་སྟེ། མར་ཤེས་ནས་བྱང་ཆུབ་ཀྱི་སེམས་ཀྱི་བར་བསྒོམ་པ་ཡིན་པས། འདི་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། སྐྱབས་གནས་ཀུན་འདུས་ཞེས་སོགས་སྔར་བཞིན་ལ། དེ་ནས་བདག་དང་མ་སེམས་ཅན་ཐམས་ཅད་ཀྱི་རྒྱུད་ལ་སེམས་ཅན་ཐམས་ཅད་ལ་ཉེ་རིང་ཆགས་སྡང་དང་བྲལ་བའི་སེམས་སྙོམས་པ་དང། མར་ཤེས་དྲིན་དྲན། དྲིན་གཟོ། བྱམས་སྙིང་རྗེ། བྱང་ཆུབ་ཀྱི་སེམས་ཀྱི་རྟོགས་པ་ཁྱད་པར་ཅན་སྐྱེ་བར་བྱིན་གྱིས་བརླབ་ཏུ་གསོལ། ཞེས་སོགས་ཀྱིས་གསོལ་བ་འདེབས་དགོས་ཤིང། འདི་ནས་བཟུང་སྟེ་བདག་དང་མ་སེམས་ཅན་ཐམས་ཅད་འཁོར་བར་སྐྱེས་ནས་ཡུན་རིང་ལ་ཤུགས་དྲག་པའི་སྡུག་བསྔལ་སྣ་ཚོགས་མྱོང་བ་ཞེས་མི་ཟེར་རོ། །དེའི་རྒྱུ་མཚན་ཡང་འཁོར་བའི་སྡུག་བསྔལ་མྱོང་བ་བྱང་ཆུབ་ཀྱི་སེམས་མ་བསྒོམས་པས་ལན་པ་མ་ཡིན་ཏེ། ཉན་རང་དགྲ་བཅོམ་རྣམས་ཀྱིས་ཀྱང་བྱང་ཆུབ་ཀྱི་སེམས་མ་བསྒོམས་ཀྱང་འཁོར་བ་ལས་ཐར་པ་ལྟ་བུའོ། །གཉིས་པ་དངོས་གཞི་ནི། སྤྱི་བོར་བླ་མ་ལྷ་སྒོམ་བཞིན་པའི་ངང་ནས་ཞེས་སོགས་གསུངས་ཏེ། དེའི་དགོས་པ་ནི། འདིར་ཡང་བཤེས་གཉེན་ལྷག་པར་གལ་ཆེ་བ། རྒྱན་ལས། དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། །ཞེས་སོགས་དང། ཡོངས་འཛིན་གྱི་ཁྱད་པར་

― GTD003_Page_0489 ―

^{[མ་དཔེ་གཟིགས་ན་འདིར་གནོན།]}

[Full Size]

འཕགས་ཚུལ་སྔར་བཤད་པ་ལྟར་གོ་བའི་ཆེད་ཡིན་ནོ། །དེ་ནས་ཐོག་མར་བཏང་སྙོམས་བསྒྲུབ་པ་ལ། སྤྱིའི་དམིགས་པ་བསྐྱངས་པས་གར་ཡང་མི་ཕྱིན་པས། བྱེ་བྲག་ཏུ་དམིགས་དགོས་ཞེས་རྗེ་བདག་ཉིད་ཆེན་པོས་གསུངས་པ་ལྟར། ཐོག་མར་མ་ལ་དམིགས། དེ་ནས་གཉེན་དང། རིམ་གྱིས་དགྲ་ལ་དམིགས་ཏེ་བསྒོམ་དགོས་ལ། དེའི་ཚེ་སྐྱེ་དཀའ་བར་བྱུང་ན་འདི་སྙམ་དུ་ཇི་རང་དྲག །སེམས་ཅན་གཅིག་ལ་སེམས་སྙོམས་པ་མི་སྐྱེ་ན་ནམ་མཁའི་མཐས་ཁྱབ་པའི་སེམས་ཅན་ཐམས་ཅད་ལ་ཇི་ལྟར་སྐྱེ། རང་ཉིད་ལ་ཅིས་ཀྱང་སེམས་སྙོམས་པ་མ་སྐྱེས་པའི་ཐབས་མི་འདུག་སྙམ་དུ་སྒོ་དུ་མ་ནས་འབད་དེ་བཏང་སྙོམས་བསྒྲུབ་དགོས། བཏང་སྙོམས་བསྒྲུབ་པའི་ཚེ་ཡང་སུ་ལ་དགའ་ཞིང། སུ་ལ་མི་དགའ། དགའ་དོན་ཡང་མེད་ལ་སྡང་དོན་ཡང་མི་འདུག་སྙམ་དུ་བཏང་སྙོམས་བསྒོམ་ན་འདིར་བཤད་པའི་བཏང་སྙོམས་འདིའི་ཐུན་མོང་མིན་པའི་དགྲ་ཡིན་ཞིང། བྱང་སེམས་ཀྱི་སྡོམ་ལྡན་ཞིག་ཡིན་ན་རྩ་ལྟུང་ཡང་ཕོག་ལ། དེ་ནི་ཚངས་པའི་ཅོད་པན་མ་ལྟར། མ་བརྟགས་བཏང་སྙོམས་ཡིན་པས་དེ་འདྲ་མི་རུང། འོ་ན་ཇི་ལྟར་སྒོམ་ཞེ་ན། སེམས་ཅན་ཐམས་ཅད་ལ་མར་མ་གྱུར་པ་གཅིག་ཀྱང་མེད་པས་གཉེན་ཡིན་པ་རྒྱུ་མཚན་དུ་བྱས་ནས་དགྲ་གཉེན་ཀུན་ལ་སེམས་སྙོམས་པ་བསྒྲུབ་པ་ཡིན་ལ། དེ་ལྟ་བུའི་བཏང་སྙོམས་དེ་ནི། གསང་འདུས་བླ་བརྒྱུད་ལས། བཏང་སྙོམས་ས་གཞི་བྱམས་པའི་ཆུས་བརླན་ཞིང། །ཞེས་པ་ལྟར། རྒྱུ་འབྲས་མན་ངག་བདུན་གྱི་རྩ་བའི་ས་གཞི་ལྟ་བུ་ཡིན་པས་དེའི་གྲངས་སུ་མི་འདྲེན་

― GTD003_Page_0490 ―

^{[མ་དཔེ་གཟིགས་ན་འདིར་གནོན།]}

[Full Size]

ལ། དེ་བདུན་གྱི་གྲངས་འདྲེན་ཚུལ་ཡང་རྒྱུ་དྲུག་དང། འབྲས་བུ་གཅིག་གམ། ཡང་ན་རྒྱུ་ལྔ་དང་འབྲས་བུ་ལྷག་བསམ་དང་སེམས་བསྐྱེད་གཉིས་སོ། །ཡང་ན་སྙིང་རྗེ་ནི་འཇུག་པ་ལས་གསུངས་པ་ལྟར། ཐོག་མཐའ་བར་གསུམ་དུ་གལ་ཆེ་བ་གཞུང་ཤིང་ལྟ་བུ་ཡིན་པས། དེ་དངོས་གཞིར་བྱས་ཏེ། དེས་སྦྱོར་བ་ལ་བཞི་དང། འབྲས་བུ་ལ་གཉིས་སུ་བྱེད་པ་རྒྱན་དང་འཇུག་པ་བསྡོམ་པའི་མན་ངག་ཡིན་ནོ། །དེ་ལ་དང་པོ་མར་ཤེས་བསྒོམ་པ་ཡང། རྒྱུ་མཚན་མེད་པར་སེམས་ཅན་ཐམས་ཅད་མའོ་སྙམ་དུ་མིག་བཙུམ་ནས་མུ་དེ་ཙམ་ཡིན་ནམ་འཁྲུལ་འདེགས་བཞིན་དུ་གཞན་ཞིག་ཡོད་ཅེས་དྲི་བ་ལྷག་བསམ་རབ་དཀར་ལས་གསུངས་པ་ལྟར། ཐོག་མར་དྲིས་ནས་རིགས་པས་བསྒྲུབ་དགོས་ཤིང། སྒྲུབ་ཚུལ་ནི། དྲིས་ལན་བློ་བཟང་བཞད་པའི་སྒྲ་དབྱངས་ལས། སྒོ་རྩའི་ཁྱི་སོགས་སེམས་ཅན་རྣམས། །མར་ཤེས་བསྒོམ་ཚུལ་རྣམ་འགྲེལ་ལས། །སྐྱེ་བ་ཡོངས་སུ་ལེན་པ་ན། །ཞེས་སོགས་རིག་པས་ཐོག་མའི་མཐའ། །མེད་པར་བསྒྲུབ་པའི་ལུང་རིགས་ཀྱི། །ཐབས་མཁས་འཁྲུལ་གྱིས་བསྒོམ་ཞེས་གསོལ། །ཞེས་གསུངས་པ་ལྟར། རྣམ་འགྲེལ་གྱི་རིགས་པའི་སྐྱེ་བའི་ཡ་མཐའ་ཐུག་མེད་དུ་བསྒྲུབ་དགོས་པ་ཡིན། དགེ་ལེགས་འཕེལ། །

བྱང་ཆུབ་བདེ་ལམ་གྱི་དམིགས་སྐོར་ལམ་མཆོག་སྙིང་པོ།

― GTD003_Page_0491 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་བདེ་ལམ་གྱི་དམིགས་སྐོར་ཆ་ཚང་བར་ཚིགས་བཅད་དུ་བསྡེབས་པ་ལམ་མཆོག་སྙིང་པོ་ཞེས་བྱ་བ་བཞུགས་སོ། །

― GTD003_Page_0492 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་གཤེགས་ཐུགས་རྗེ་མངའ་བ་ཤཱཀྱའི་ཏོག །མ་ཕམ་འཇམ་དབྱངས་ཤིང་རྟ་ཆེ་གཉིས་དང། །ཇོ་འབྲོམ་རྒྱལ་བ་གཉིས་པ་བརྒྱུད་པར་བཅས། །བྱང་ཆུབ་བར་དུ་འབྲལ་མེད་མགོན་མཛོད་ཅིག །གསུང་རབ་ཀུན་གྱི་སྙིང་པོ་གཅིག་བསྡུས་པ། །ཆེ་བ་བཞི་ལྡན་བྱང་ཆུབ་ལམ་རིམ་ཞེས། །སྐལ་ལྡན་ཐར་འདོད་ཡོངས་ཀྱི་འཇུག་ངོགས་དེར། །སྦྱོར་དངོས་རྗེས་གསུམ་ཚང་བའི་ཉམས་ལེན་བྱ། །དེའང་གནས་ཁང་བྱི་དོར་བྱས་ཤིང་སྐུ་གསུང་ཐུགས་ཀྱི་རྟེན་དགྲམ། མཆོད་པའི་སྤྲིན་གྱི་གཟུངས་འདོན་བཞིན་དུ་མཆོད་པ་གཡོ་མེད་ཅིང་བཀོད་པ་མཛེས་པར་བཤམས་ལ་དེ་མ་ཐག་འབྲུ་གསུམ་བརྗོད་དེ་ཆབ་ཀྱིས་བྲན་པའམ། དཀོན་མཆོག་གི་བདེན་པས་བྱིན་གྱིས་བརླབ་པར་བསམ། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་ཅིང། དེ་དག་ཀྱང་དགོས་དོན་སེམས་ཀྱི་འཁྱེར་སོ་དང་བཅས་པ་དགོས་པས་ཚིགས་བཅད་ཀྱི་དོན་དྲན་བཞིན་པའི་སྒོ་ནས་བརྗོད་དེ། ༈ ཆོས་མཐུན་སྒྲུབ་གནས་གཙང་བྱས་ཉམས་དགའ་བར། །མཆོག་གསུམ་རྟེན་གྱི་གཟི་འོད་འབར་བའི་དྲུང། །བཀོད་ལེགས་ཕུལ་བྱུང་མཆོད་སྤྲིན་བསྟར་བ་ཡིས། །གཞན་དོན་གཞིར་གྱུར་རྒྱལ་བའི་ཞིང་སྦྱོང་བྱ། །སྤྱོད་ལམ་དག་པས་ལུས་ཀྱི་སྐྱོན་སྦྱངས་ཤིང། །ཀུན་སློང་མི་དགེའི་སྐྱོན་གྱིས་མ་སྦགས་པར། །དགེ་སེམས་ཁྱད་པར་ཅན་གྱིས་ཟིན་པ་ཡིས། །རྣམ་དག་སྒོམ་སྒྲུབ་རྩ་བ་ཚུགས་པར་

― GTD003_Page_0493 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ། །མདུན་དུ་སེང་ཁྲི་པད་ཟླ་ཉི་མའི་སྟེང། །རྩ་བའི་བླ་མ་ཐུབ་དབང་རྡོ་རྗེ་འཆང། །དངོས་བརྒྱུད་བླ་མ་ལྷར་བཅས་དཀོན་མཆོག་གསུམ། །བདག་སོགས་མགོན་དུ་དགྱེས་བཞིན་བཞུགས་པར་གྱུར། །ཐོག་མ་མེད་ནས་སྲིད་འདིར་ཆེས་མནར་ཡང། །ད་དུང་སྡུག་བསྔལ་གཏིང་མཐའ་མི་མངོན་པས། །ད་ནི་བསླུ་མེད་མཆོག་གསུམ་ལ་བརྟེན་ཏེ། །ཅིས་ཀྱང་བཙན་ས་ཟིན་པར་བྱེད་དགོས་པས། །༈ རྗེ་བཙུན་བླ་མ་རྣམས་ལ་སྐྱབས་སུ་མཆི། །སྟོན་པ་སངས་རྒྱས་རྣམས་ལ་སྐྱབས་སུ་མཆི། །སྐྱོབ་པ་དམ་ཆོས་རྣམས་ལ་སྐྱབས་སུ་མཆི། །འདྲེན་པ་དགེ་འདུན་རྣམས་ལ་སྐྱབས་སུ་མཆི། །ཡི་དམ་ལྷ་ཚོགས་རྣམས་ལ་སྐྱབས་སུ་མཆི། །དམ་ཅན་ཆོས་སྲུང་རྣམས་ལ་སྐྱབས་སུ་མཆི། །ལན་གསུམ། ཉམ་ཐག་མ་རྒན་འགྲོ་རྣམས་བསྒྲལ་བའི་ཕྱིར། །བདག་གིས་བྱང་ཆུབ་མཆོག་ཏུ་སེམས་བསྐྱེད་ཅིང། །ཟབ་མོ་བླ་མའི་ལམ་གྱིས་སྲོག་བཟུང་སྟེ། །བྱང་ཆུབ་ལམ་བཟང་མྱུར་དུ་བསྒྲུབ་པར་བྱ། །ལན་གསུམ། བླ་མ་ལྷ་ཡི་ཐུགས་རྗེའི་འོད་འཕྲོས་པས། །འགྲོ་ཀུན་ཐུབ་པའི་དབང་པོའི་སྐུར་བཞེངས་ཤིང། །དེ་ནས་སྐྱབས་ཡུལ་མཐའ་དག་གཅིག་བསྡུས་ཏེ། །སྨིན་མཚམས་ནས་ཐིམ་བྱིན་གྱིས་བརླབ་པར་གྱུར། །སླར་ཡང་སེང་ཁྲི་པད་ཟླ་ཉི་མའི་སྟེང། །བླ་མ་ཐུབ་པའི་

― GTD003_Page_0494 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་པོའི་ཕྱོགས་བཞི་རུ། །བརྒྱུད་པ་གསུམ་དང་དངོས་ཀྱི་བླ་མའི་ཚོགས། །རྒྱུད་སྡེ་རྣམ་བཞིའི་ཡི་དམ་དཀྱིལ་འཁོར་ལྷ། །སངས་རྒྱས་བྱང་སེམས་ཉན་ཐོས་རང་རྒྱལ་དང། །དཔའ་བོ་མཁའ་འགྲོ་ཆོས་སྲུང་རྒྱལ་ཆེན་བཞི། །འགོག་ལམ་རང་བཞིན་གསུང་རབ་གླེགས་བམ་བཅས། །དཔག་ཡས་སྤྲུལ་པའི་བཀོད་པ་སྤྲོ་བཞིན་བཞུགས། །སོ་སོའི་གནས་ལྔར་ཡི་གེ་ལྔས་བརྒྱན་པའི། །ཧཱུཾ་གིས་སྤྱན་དྲངས་རབ་འབྱམས་ལྷའི་འཁོར་ལོ། །རྫོགས་པར་བསྟིམ་པས་སྤངས་རྟོགས་དབྱེར་མེད་པས། །སྐྱབས་གནས་མ་ལུས་འདུས་པའི་ངོ་བོར་གྱུར། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་དབྱི་འོ། །མཆོག་གསུམ་ཀུན་འདུས་བླ་མ་ལྷ་ཚོགས་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཐུགས་རྗེ་མངའ་བ་རྒྱལ་བ་སྲས་བཅས་ལ། །བདག་ཉིད་བྲན་དུ་འབུལ་ལོ་བརྩེ་བས་བཞེས། །སྔོན་ཆད་བཀའ་དང་འགལ་རྣམས་སྙིང་ནས་བཤགས། །སྲིད་ཞིའི་དགེ་བ་ཀུན་ལ་རྗེས་ཡི་རང། །ཉམ་ཐག་འགྲོ་ལ་ཕན་བདེའི་ལམ་སྟོན་ཕྱིར། །འཁོར་བ་མ་སྟོངས་བར་དུ་བཞུགས་སུ་གསོལ། །བདག་ལ་དུས་གསུམ་དགེ་བ་ཅི་ཡོད་པ། །མ་རྒན་རིགས་དྲུག་ཡོངས་ལ་བསྔོས་པ་ཡིས། །རང་རང་སྡུག་བསྔལ་རྒྱུ་བཅས་ལས་གྲོལ་ཏེ། །བླ་མེད་བདེ་བ་མཆོག་ལ་རེག་གྱུར་ཅིག །ས་གཞི་སྤོས་ཀྱིས་

― GTD003_Page_0495 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པད་ཟླའི་སྟེང་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། །མཐའ་ཡས་འགྲོ་བའི་རེ་བ་སྐོང་བའི་གསུང། །མ་ལུས་ཤེས་བྱ་ཇི་བཞིན་གཟིགས་པའི་ཐུགས། །རྣམ་འདྲེན་ཤཱཀྱ་སེང་གེར་གསོལ་བ་འདེབས། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། །མཆོག་སྡེ་དུལ་བའི་སྡེ་དང་གྲགས་པའི་སྡེ། །སེང་བཟང་ཀུ་སཱ་ལི་གཉིས་གསེར་གླིང་པ། །རྒྱ་ཆེན་སྤྱོད་པའི་བརྒྱུད་ལ་གསོལ་བ་འདེབས། །འཇམ་དབྱངས་ཡོད་མེད་ཕྱོགས་འཇིག་ཀླུ་སྒྲུབ་དང། །ཟླ་བ་གྲགས་པ་རིག་པའི་ཁུ་བྱུག་ཆེ། སངས་རྒྱས་དགོངས་སྐྱོང་འཕགས་པ་ཡབ་སྲས་ཏེ། །ཟབ་མོ་ལྟ་བའི་བརྒྱུད་ལ་གསོལ་བ་འདེབས། །ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང། །མཆོག་གཟིགས་ཏེ་ལོ་པ་དང་ནཱ་རོ་པ། དཔལ་མཆོག་ཌོཾ་བྷི་པ་དང་ཨ་ཏི་ཤ །ཉམས་ལེན་བྱིན་རླབས་བརྒྱུད་ལ་གསོལ་བ་འདེབས། །ལྷ་ཆོས་བདུན་ལྡན་བཀའ་གདམས་རིམ་བྱོན་དང། །ཁྱད་པར་རྒྱལ་བ་གཉིས་པ་ཡབ་སྲས་སོགས། །ཡང་དག་ལམ་བཟང་ཇི་བཞིན་གསལ་མཛད་པའི། །དངོས་བརྒྱུད་བླ་མ་རྣམས་ལ་གསོལ་བ་འདེབས། །བཤེས་ལ་མི་གུས་དལ་འབྱོར་ཆུད་གཟོན་ཞིང། །

― GTD003_Page_0496 ―

^{[མ་དཔེ་གཟིགས་ན་འདིར་གནོན།]}

[Full Size]

འཆི་བ་མི་དྲན་ཚེ་འདིའི་བདེ་ཐབས་བསྒྲུབ། །ངན་འགྲོར་མི་འཇིགས་ཡང་དག་སྐྱབས་མི་འཚོལ། །ལས་འབྲས་མི་སེམས་བླང་དོར་ལོག་པར་བསྒྲུབ། །འཁོར་བ་བདེར་འཛིན་དེ་རྒྱུ་ལས་ཉོན་སྤེལ། །ཐར་པར་མི་སྤྲོ་བསླབ་གསུམ་སྟེན་མི་བྱེད། །མ་རྣམས་ཡལ་བོར་རང་ཉིད་གཅེས་པར་འཛིན། །བདག་ཏུ་མངོན་ཞེན་སྔགས་ལ་མི་མོས་སོགས། །ཕྱིན་ཅི་ལོག་གི་བློ་སྣ་མཐའ་དག་རྣམས། །མྱུར་དུ་འགག་པར་བྱིན་གྱིས་བརླབ་ཏུ་གསོལ། །བཤེས་ལ་དད་གུས་དལ་འབྱོར་སྙིང་པོ་ལེན། །འཆི་བ་རྗེས་དྲན་ཚེ་འདིའི་འདུན་མ་བསྐྱུངས། །ངན་འགྲོའི་འཇིགས་དྲན་དཀོན་མཆོག་སྐྱབས་སུ་འཛིན། །ལས་འབྲས་བསམས་ནས་བླང་དོར་ཚུལ་བཞིན་བསྒྲུབ། །འཁོར་བའི་སྐྱོན་མཐོང་ལས་ཉོན་སྤོང་བར་འདོད། །ཐར་པ་དོན་གཉེར་རྣམ་དག་བསླབ་གསུམ་བསྟེན། །མ་རྣམས་གཅེས་འཛིན་རང་ཉིད་ཡལ་བར་འདོར། །བདག་མེད་དོན་མཐོང་སྔགས་ལ་མོས་པ་སོགས། །ཕྱིན་ཅི་མ་ལོག་བློ་སྣ་མཐའ་དག་རྣམས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཁྱད་པར་བྱམས་དང་སྙིང་རྗེ་སེམས་བསྐྱེད་དང། །ཕྱིན་དྲུག་ལ་སོགས་རྒྱ་ཆེན་སྤྱོད་པའི་ལམ། །སྙིང་པོ་ལམ་དུས་ཀུན་རྫོབ་སྒྱུ་མའི་ལུས། །ཡང་སྙིང་འབྲས་བུའི་དུས་ཀྱི་རྡོ་རྗེའི་སྐུ། །བདག་མེད་གནས་ལུགས་ཇི་བཞིན་མཐོང་བ་ཡི། །ཞི་ལྷག་གཉིས་སོགས་ཟབ་མོ་ལྟ་བའི་ལམ། །སྙིང་པོ་དཔེ་དང་དོན་གྱི་འོད་གསལ་གཉིས། །ལམ་སྙིང་བདེ་སྟོང་དབྱེར་མེད་ཆོས་སྐུ་སྟེ། །ཟབ་དང་རྒྱ་ཆེའི་ལམ་བཟང་སྙིང་པོར་བཅས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་བདུད་རྩི་འབེབས་སྦྱང་དང་

― GTD003_Page_0497 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྲགས་ཏེ་གསོལ་འདེབས་བྱ། སྤྲོ་ན་ཁྲུས་གསོལ་གྱི་འཕྲོར། ཇི་སྙེད་སུ་དག །ཅེས་སོགས་ཀྱིས་ཡན་ལག་བདུན་པ་དང། མཎྜལ་ལེགས་པར་ཕྱིས། འབྲུ་རྣམས་དྲི་བཟང་གིས་བརླན་ལ་སྔགས་བཏབ་སྟེ་སོ་བདུན་མའམ། ཉེར་གསུམ་མ་རྒྱས་པར་དབུལ། ལམ་མཆོག་སྒོ་འབྱེད་དང་བྱིན་རླབས་སྤུངས་ཞུས་ཀྱི་སྟེང་ནས་གསོལ་འདེབས་བྱས་ཀྱང་ལེགས་སོ། །དེ་ནས་ཚོགས་ཀྱི་ཞིང་རྣམས་གཙོ་བོར་ཐིམ། །ཁྱད་པར་རྡོ་རྗེ་འཆང་དབང་ཐུགས་ཀ་རུ། །སྤྱན་དྲངས་སེམས་དཔའ་གསུམ་གྱི་བདག་ཉིད་ནི། །སླར་ཡང་རང་གི་སྤྱི་བོར་བཞུགས་པར་གྱུར། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །བདག་ལུས་ལོངས་སྤྱོད་དུས་གསུམ་དགེ་ཚོགས་བཅས། །རིན་ཆེན་མཎྜལ་ཀུན་བཟང་མཆོད་སྤྲིན་འདི། །བློ་ཡིས་བླངས་ནས་བླ་མ་ལྷ་ལ་འབུལ། །ཐུགས་རྗེས་བཞེས་ནས་བྱིན་གྱིས་བརླབ་ཏུ་གསོལ། །བླ་མ་ཡི་དམ་དཀོན་མཆོག་རྣམ་གསུམ་སོགས། །སྐྱབས་གནས་མ་ལུས་འདུས་པའི་ངོ་བོ་ཉིད། །མགོན་པོ་ཁྱོད་མིན་རེ་ས་གཞན་མེད་པས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ལྟར་གསོལ་བ་བཏབ་པས་སྐུ་ལུས་ལས། །འོད་དང་བདུད་རྩི་སྣ་ལྔའི་རྒྱུན་བབས་པས། །བདག་སོགས་འགྲོ་ཀུན་ཉེས་པའི་ཚོགས་སྦྱངས་ནས། །རྟོགས་པ་ཁྱད་འཕགས་རྒྱུད་ལ་སྐྱེ་བར་གྱུར། །དེ་དག་ནི་སྦྱོར་བའི་རིམ་པའོ། །༈ དངོས་གཞི་ནི། ཐུབ་པས་དུས་མཐར་ཐ་མལ་ཚུལ་འཛིན་

― GTD003_Page_0498 ―

^{[མ་དཔེ་གཟིགས་ན་འདིར་གནོན།]}

[Full Size]

པར། །གསུངས་བཞིན་སྐལ་བ་མཉམ་པའི་སྐུར་བསྟན་ནས། །བསྟན་པའི་སྙིང་པོ་རྫོགས་པར་འདོམས་མཛད་པ། །རྒྱལ་བ་ཀུན་ལས་ལྷག་པའི་བཀའ་དྲིན་ཅན། །འདི་ཉིད་ཁོ་ན་ལེགས་ཚོགས་རྩ་བ་རུ། །ཡིད་ཆེས་རྙེད་པས་སྐྱོན་རྟོག་ཀུན་སྤངས་ཏེ། །སེམས་དགུས་བསྟེན་ཅིང་རྙེད་དང་བཀུར་སྟི་དང། །ཁྱད་པར་བཀའ་བཞིན་སྒྲུབ་པས་མཉེས་པར་བྱ། །དེ་ལྟ་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །མི་ཁོམ་སྐྱོན་བྲལ་མཐུན་རྐྱེན་ཀུན་ཚང་བའི། །དལ་འབྱོར་འདིས་ནི་མངོན་མཐོ་ངེས་ལེགས་ཀུན། །འགྲུབ་པས་ཡིད་བཞིན་ནོར་ལས་དོན་ཆེ་ལ། །རྒྱུ་དཔེ་ངོ་བོ་གང་ནས་བསམ་ན་ཡང། །རྙེད་ཐབས་མེད་དེ་བླ་མའི་དྲིན་ལས་ནི། །ལན་གཅིག་རྙེད་ཀྱང་སྔོན་ཆད་དོན་མེད་འདས། །ད་ནི་ཚེ་ལྷག་ཅུང་ཟད་གནས་ཀྱི་བར། །དོན་ལྡན་ཆོས་ཀྱིས་སྙིང་པོ་བླང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཕྱི་རྐྱེན་བཤེས་གཉེན་དམ་པའི་མགོན་དང་བཅས། །ནང་ནས་དལ་འབྱོར་རྙེད་དཀའི་ལྕག་གིས་བསྐུལ། །སྙིང་པོ་ལེན་འདོད་རྣལ་མ་སྐྱེས་པ་ན། །དེ་ཡི་ཐབས་ཚུལ་མ་ནོར་ཚང་བ་གཅེས། །དེ་ཡང་བློ་སྟོབས་སྤེལ་ཕྱིར་འོག་མ་དང། །ཐུན་མོང་ལམ་ལ་སྔོན་དུ་མ་སྦྱངས་པར། །གོང་མའི་རྟོགས་པ་སྐྱེ་བའི་སྐབས་མེད་པས། །དང་པོར་ཚེ་འདིའི་སྣང་ཤས་བཟློག་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཤིན་ཏུ་མི་བཟད་སྟོབས་ལྡན་འཆི་བདག་ནི། །གློ་བུར་སྟེང་དུ་བབ་ཅིང་ཟློག་ཏུ་མེད། །ཉམ་ཆུང་སྲོག་གི་མར་མེ་

― GTD003_Page_0499 ―

^{[མ་དཔེ་གཟིགས་ན་འདིར་གནོན།]}

[Full Size]

རྐྱེན་མང་གི །བུ་ཡུག་འཚུབ་པས་ནམ་གསོད་ཆ་མེད་ལ། །སྐབས་དེར་ཚེ་འདིའི་ཕུན་ཚོགས་མཐའ་དག་གིས། །བསླུས་ནས་ཤུལ་དུ་བསྐྱུར་ཏེ་འགྲོ་དགོས་ཤིང། །དེ་ཚེ་ཕན་པ་ཆོས་ལས་གཞན་མེད་པས། །རྣམ་དག་ཆོས་ཤིག་དེ་རིང་ཉིད་ནས་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྒོ་གསུམ་སྡིག་ལ་གཞོལ་བའི་ངང་ཚུལ་འདིས། །ཕྱི་མའི་སྐྱེ་གནས་ངན་འགྲོར་ཐག་ཆོད་ཅིང། །ད་ལྟ་ལུས་ལ་མེ་ཐིག་ཕོག་པ་འམ། །ཞག་འགའ་ཙམ་གྱི་བཀྲེས་སྐོམ་མི་བཟོད་ན། །མི་ལོ་དཔག་མེད་བཙོ་བསྲེག་དམྱལ་བ་དང། །ལོ་བརྒྱར་ཆུ་ཐིགས་མི་མྱོང་ཡི་དྭགས་གནས། །གཅིག་ལ་གཅིག་ཟ་གླེན་ལྐུག་དུད་འགྲོ་སོགས། །བཟོད་ཐབས་མེད་པས་དེ་རྒྱུ་སྤང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འཇིགས་ཆེན་དེ་ལས་སྐྱོབ་པར་བྱེད་པ་ནི། །སྲིད་པའི་ལྷ་ཆེན་རྣམས་ཀྱང་མི་ནུས་པས། །གང་ལ་བརྟེན་ན་བསླུ་བ་མེད་པ་ནི། །འཇིགས་པ་ཀུན་སྤངས་གཞན་སྒྲོལ་ཐབས་ལ་མཁས། །ཉེ་རིང་མི་མངའ་སྐྱབས་གནས་དཀོན་མཆོག་གསུམ། །ཁོ་ནར་ཡིད་ཆེས་སྐྱབས་འགྲོ་ལ་འབད་ཅིང། །དེ་ཡི་ཕན་ཡོན་མཐོང་བས་ཡིད་དྲངས་ཏེ། །གནང་བཀག་བསླབ་བྱ་ཉམས་པ་མེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །བསླབ་བྱའི་གཙོ་དང་འཇིགས་པའི་སྐྱབས་དངོས་ནི། །དཀར་ནག་ལས་ཀྱི་བླང་དོར་ཉིད་ཡིན་པས། །

― GTD003_Page_0500 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་འབྲས་འཆོལ་མེད་ངེས་ཤིང་འཕེལ་ཆེ་བར། །ཡིད་ཆེས་རྙེད་པས་མི་དགེ་བཅུ་ལ་སོགས། །ཆེ་ཕྲ་མཐའ་དག་སྤོང་ཞིང་བརྒྱ་ལམ་ན། །སྡིག་ལྟུང་ཕྲ་མོས་གོས་ཀྱང་ཕྱིར་བཅོས་དང། །སྟོབས་བཞིའི་གནད་ཚང་བཤགས་པས་མྱུར་སྦྱངས་ཏེ། །རྣམ་སྨིན་རྟེན་བཟང་འགྲུབ་པའི་གདེང་ཐོབ་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དགེ་བཅུའི་ལམ་གྱིས་བདེ་འགྲོའི་རྟེན་ཐོབ་ཀྱང། །འཁོར་བ་འདི་ལས་གཏན་དུ་མ་ཐར་ན། །བཙོན་རའི་ནང་དུ་ཡུད་ཙམ་ངལ་བསོས་བཞིན། །ཡིད་བརྟན་མེད་པར་སླར་ཡང་འཁོར་བ་འདིར། །ལམ་གསུམ་ཟོ་ཆུན་འཕྱན་པ་ལྟར་འཁྱམས་ནས། །མཐའ་མེད་ངན་སོང་སྡུག་བསྔལ་མྱོང་དགོས་པས། །འདུ་བྱེད་སྡུག་བསྔལ་རང་བཞིན་ཉེར་ལེན་གྱི། །སྲིད་ལས་ཐར་འདོད་ངེས་འབྱུང་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྡུག་བསྔལ་དེ་ཡང་ལས་ཉོན་བདག་འཛིན་ལས། །རིམ་པར་འབྱུང་ཚུལ་ལུགས་འབྱུང་ལུགས་ལྡོག་གི །རྟེན་འབྲེལ་བསམས་ནས་སྲིད་རྩ་གཅོད་པའི་ཕྱིར། །བདེན་པ་བཞི་ཡི་བླང་དོར་ལ་འབད་ཅིང། །ཁྱད་པར་གཉེན་པོའི་བསླབ་པ་གཉིས་ཀྱི་རྒྱུ། །བསྟན་པའི་གཞི་མ་ལྷག་པའི་ཚུལ་ཁྲིམས་ནི། །དྲན་ཤེས་བག་ཡོད་བརྟན་པོས་ལེགས་བསྲུངས་ཏེ། །ཉེས་མེད་ཐར་པའི་རྒྱལ་མཚན་ཚུགས་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཆགས་སྡང་འཁྲུལ་པས་དགྲ་གཉེན་ཕྱོགས་རིས་སུ། །བཅད་ཀྱང་ཁྱད་པར་མེད་པར་འགྲོ་

― GTD003_Page_0501 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ཀུན། །ཐོག་མེད་དུས་ནས་འཁོར་བར་འཁྱམས་པའི་ཚེ། །ཡང་དང་ཡང་དུ་བདག་གི་མ་བྱས་ཏེ། །གནོད་པ་ཀུན་བསྲུངས་ཕན་པ་ཀུན་ལ་སྦྱར། །གཞལ་དཀའི་དྲིན་གྱིས་བསྐྱངས་པ་ཤ་སྟག་ཡིན། །དེས་ན་ཡལ་བར་འདོར་བ་མི་རིགས་པས། །ཕན་པ་བསྒྲུབ་ལ་དྲིན་དུ་གཟོ་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འགྲོ་བ་མ་ལུས་སྡུག་པའི་བུ་བཞིན་དུ། །ཡིད་འོང་རྣམ་པའི་བྱམས་སེམས་སྐྱེས་པ་ན། །དེ་ཡི་སྡུག་བསྔལ་མི་བཟོད་གཅེས་པའི་བུ། །མེ་འོབས་ལྟུང་ལ་བརྩེ་བའི་མ་བཞིན་དུ། །ཤུགས་དྲག་སྙིང་རྗེ་ཆེན་པོའི་དབང་གྱུར་ཏེ། །མ་ལུས་བདེ་སྒྲུབ་སྡུག་བསྔལ་སེལ་བ་ཡི། །ཁུར་ཆེན་ཞུམ་པ་མེད་པར་རང་སྟེང་དུ། །བླངས་པས་ལྷག་བསམ་རྣམ་དག་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །སྡུག་བསྔལ་མི་འདོད་བདེ་བས་མི་ངོམས་པ། །བདག་དང་གཞན་ལ་ཁྱད་པར་ཡོད་མིན་ཡང། །རང་གཅེས་འཛིན་པས་ཉེས་དམིགས་ཀུན་སྐྱེད་པ། །མ་རྣམས་གཅེས་འཛིན་ལེགས་ཚོགས་རྒྱུར་མཐོང་ནས། །གཏོང་ལེན་དམིགས་པས་གཞན་གྱི་སྡིག་སྡུག་ཀུན། །རང་གི་སྟེང་དུ་ལེན་ཞིང་རང་ཉིད་ཀྱི། །བདེ་དགེ་མ་ལུས་འགྲོ་ལ་གཏོང་བ་ཡི། །ཐབས་མཁས་རླབས་ཆེན་སྤྱོད་པའི་འཕྲུལ་འདེགས་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ཡང་བླ་མེད་བྱང་ཆུབ་མ་ཐོབ་ན། །

― GTD003_Page_0502 ―

^{[མ་དཔེ་གཟིགས་ན་འདིར་གནོན།]}

[Full Size]

དམན་པའི་དགྲ་བཅོམ་རྣམས་ཀྱང་གཞན་གྱི་དོན། །ལྟ་ཅི་རང་གི་དོན་ཡང་མ་རྫོགས་པས། །འཆིང་བ་ཀུན་ལྡན་བདག་འདྲ་སྨོས་ཅི་འཚལ། །དེས་ན་འབད་རྩོལ་མེད་པར་ལྷུན་གྲུབ་པའི། །སྐུ་གསུང་ཐུགས་ཀྱི་མཛད་པའི་ཆ་རེས་ཀྱང། །འགྲོ་བ་དཔག་མེད་སྒྲོལ་ནུས་སངས་རྒྱས་ཀྱི། །གོ་འཕང་ཐོབ་འདོད་སེམས་མཆོག་བསྐྱེད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ནས་བླ་མ་ཐུབ་པའི་དབང་པོའི་རྗེས་སུ་ཟློས་པར་དམིགས་ནས། སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །ཇི་ལྟར་སྔོན་གྱི་བདེ་གཤེགས་གྱིས། །བྱང་ཆུབ་ཐུགས་ནི་བསྐྱེད་པ་དང། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང། །བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པ་ལན་གསུམ་གྱིས་སྨོན་འཇུག་མཉམ་དུ་ལེན་པའམ། སངས་རྒྱས་ཆོས་ཚོགས་མ་ཚར་གསུམ་གྱིས་སེམས་བསྐྱེད་གཟུང་ལ། ཨེ་མ་ལོང་བས་ནོར་བུ་རྙེད་པ་བཞིན། །རིན་ཆེན་སེམས་མཆོག་རྙེད་འདི་སྐལ་བ་བཟང། །ད་ནི་ཕན་ཡོན་བསམ་ཞིང་དུས་དྲུག་ཏུ། །སེམས་བསྐྱེད་བཟུང་སྟེ་སེམས་ཅན་བློས་མི་སྤོང། །དེ་ཉིད་འཕེལ་ཕྱིར་དཀོན་མཆོག་མཆོད་ལ་བརྩོན། །ནག་ཆོས་བཞི་སྤངས་དཀར་ཆོས་བཞི་ལ་སློབ། །མདོར་ན་ཇི་ལྟར་ཁས་བླངས་བསླབ་བྱ་ཀུན། །སྲོག་དང་བསྡོས་ཏེ་རྟག་ཏུ་བསྲུང་བར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །

― GTD003_Page_0503 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་དང་བསམ་སྦྱོར་རྣམ་པར་དག་པ་ཡིས། །ལུས་དང་ལོངས་སྤྱོད་དགེ་བའི་འབྲས་བུར་བཅས། །མ་ལུས་ཞེན་པ་མེད་པར་གཏོང་བའི་སེམས། །སྤེལ་བས་སྦྱིན་པའི་ཕར་ཕྱིན་རྫོགས་བྱེད་ཅིང། །རང་གིས་ཁས་བླངས་སྡོམ་གསུམ་བཅས་མཚམས་ཀྱི། །ཉེས་ལྟུང་མཐའ་དག་སྡོམ་པའི་ཚུལ་ཁྲིམས་དང། །དགེ་བ་ཆོས་སྡུད་སེམས་ཅན་དོན་བྱེད་ཀྱི། །ཚུལ་ཁྲིམས་རྣམས་ལ་ཚུལ་བཞིན་བསླབ་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩའི་ཆུ་ཡིས་བྱིན་གྱིས་རློབས། །གནོད་བྱེད་ཀུན་ལ་བཟོད་པའི་གོ་བགོས་ཏེ། །སྡུག་བསྔལ་རྐྱེན་ངན་མཐའ་དག་ལམ་དུ་སློང། །ཟབ་མོའི་ཆོས་ལ་མི་སྐྲག་སློབ་པ་སོགས། །རྣམ་གསུམ་བཟོད་པའི་ཕར་ཕྱིན་སྒོམ་བྱེད་ཅིང། །སེམས་ཞུམ་བྱ་བ་ངན་ལ་ཞེན་པ་སོགས། །གཡེང་བ་ཀུན་སྤངས་སྙིང་སྟོབས་གོ་བགོས་ཏེ། །དགེ་ཆོས་སྡུད་ཅིང་མཁའ་མཉམ་འགྲོ་བའི་དོན། །སྒྲུབ་པ་ལྷུར་ལེན་བརྩོན་པའི་སྟོབས་བསྐྱེད་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཉེས་པ་ལྔ་སྤངས་འདུ་བྱེད་བརྒྱད་ཀྱི་སྒོས། །དམིགས་པའི་རྟེན་ལ་གཡོ་མེད་ཏིང་འཛིན་མཆོག །བྱིང་རྒོད་སྐྱོན་བྲལ་དྭངས་གསལ་ངར་དང་བཅས། །ཤིན་སྦྱངས་སྟོབས་ལྡན་ཞི་གནས་སྒྲུབ་བྱེད་ཅིང། །དགག་བྱའི་སྣང་ཚུལ་མྱོང་བས་ངོས་བཟུང་སྟེ། །དྲི་མེད་རིགས་པས་སྤྲོས་པའི་མཐའ་བཀག་ནས། །ཟབ་མོའི་གནས་ལུགས་ཇི་བཞིན་ངེས་པ་ཡི། །སོ་སོར་རྟོག་པའི་ལྷག་མཐོང་བསྐྱེད་པར་བྱ། །དེ་ལྟར་ནུས་

― GTD003_Page_0504 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །འཁྲུལ་སྣང་རྫུན་པའི་རང་མཚང་རིག་པ་ཡིས། །གདོད་མའི་དངོས་པོ་རྟག་པའི་མཐའ་འགོག་ཅིང། །གདོད་ནས་སྟོང་པས་ཆད་པའི་མཐའ་བཀག་སྟེ། །སྣང་ཙམ་བྱ་བྱེད་བསྙོན་མེད་འགྲུབ་ནུས་པས། །བདེན་གཉིས་ཟུང་འཇུག་ཆོས་ཀུན་དགོངས་པའི་མཐིལ། །ཀླུ་སྒྲུབ་ལུགས་བཟང་ཇི་བཞིན་ངེས་བྱེད་ཅིང། །རང་གིས་ཇི་ལྟར་ཉམས་སུ་བླངས་པ་བཞིན། །བསྡུ་བ་བཞི་ཡིས་འགྲོ་རྣམས་སྨིན་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །དེ་ལྟར་ཐུན་མོང་ལམ་གྱིས་རྒྱུད་སྦྱངས་ཏེ། །དེ་ཉིད་བཅུ་ལྡན་རྡོ་རྗེ་སློབ་དཔོན་ལ། །བརྟེན་ནས་ཟབ་གསང་རྡོ་རྗེ་ཐེག་པ་ཡི། །འཇུག་སྒོ་རྣམ་དག་དབང་གིས་སྨིན་བྱས་ཏེ། །བླ་མ་ལྷར་བཅས་དཔང་དུ་ལེགས་བཞག་ནས། །ཇི་ལྟར་ཁས་བླང་དམ་ཚིག་སྡོམ་པ་ཀུན། །སྲོག་དང་བསྡོས་ཏེ་ཚུལ་བཞིན་བསྲུང་བ་ཡིས། །དངོས་གྲུབ་གཉིས་ཀྱི་རྩ་བ་ཚུགས་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །གཞི་ཡི་འཆི་བ་བར་དོ་སྐྱེ་བ་གསུམ། །ལམ་དང་འབྲས་བུའི་དུས་ཀྱི་སྐུ་གསུམ་དུ། །སྒྱུར་བྱེད་བསྐྱེད་རིམ་ཕྲ་རགས་རྣལ་འབྱོར་གྱིས། །ཐ་མལ་སྣང་ཞེན་དྲི་མ་ཀུན་སྦྱོང་ཞིང། །རྡོ་རྗེ་ལུས་ལ་གནད་དུ་བསྣུན་པ་ཡིས། །ཞུགས་གནས་ཐིམ་པའི་འོད་གསལ་ཕྱག་རྒྱ་ཆེ། །ཀུན་རྫོབ་སྒྱུ་མའི་སྐུ་དང་ཟུང་འཇུག་པའི། །རྫོགས་རིམ་སྤྱོད་དང་བཅས་ལ་བསླབ་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་

― GTD003_Page_0505 ―

^{[མ་དཔེ་གཟིགས་ན་འདིར་གནོན།]}

[Full Size]

བདུད་རྩིའི་ཆུ་ཡིས་བྱིན་གྱིས་རློབས། །མདོར་ན་བཤེས་གཉེན་དམ་པའི་དེད་དཔོན་གྱིས། །ཡོངས་བཟུང་ཚུལ་ཁྲིམས་དག་པའི་གྲུ་གཟིངས་མཆོག །གསུང་རབ་ཀུན་ལ་ཕྱོགས་རེར་མ་གྱུར་པའི། །ཐོས་བསམ་སྒོམ་པའི་དྲི་བཞོན་གྱིས་བསྐུལ་ཏེ། །མྱུར་བ་མྱུར་བར་སྐུ་གསུམ་གོ་འཕང་མཆོག །ཡིད་བཞིན་ནོར་བུའི་གླིང་དུ་ཕྱིན་གྱུར་ནས། །མཐའ་ཡས་འགྲོ་བ་སྲིད་མཚོ་ལས་བསྒྲལ་ཏེ། །བདེ་ཆེན་ཐར་པའི་ས་ལ་འགོད་པར་བྱ། །དེ་ལྟར་ནུས་པར་བླ་མ་ལྷག་པའི་ལྷས། །ཐུགས་རྗེ་བདུད་རྩིའི་ཆུ་ཡིས་བྱིན་གྱིས་རློབས། །ཞེས་རིམ་པ་བཞིན་གྱི་ཚིག་དོན་དང་བདུད་རྩི་འབེབས་སྦྱང་གི་དམིགས་རྣམ་སོགས་བདེ་ལམ་གྱི་ཞལ་ཤེས་ཇི་ལྟ་བ་བཞིན་དུ་དལ་བུའི་སྒོ་ནས་བློ་འབྱོངས་ངེས་སུ་བྱ། མཇུག་ཏུ། དགེ་འདིས་མཚོན་ནས་དུས་གསུམ་དང་འབྲེལ་བའི། །བདག་གཞན་དགེ་བའི་རྩ་བ་ཇི་སྙེད་པ། །དེ་དག་ཐམས་ཅད་སྐྱེ་ཞིང་སྐྱེ་བ་རུ། །བྱང་ཆུབ་མཆོག་གི་རྗེས་སུ་མི་མཐུན་པའི། །ཤེས་ཀྱི་ཁེ་འདོད་པ་དང་གྲགས་པ་དང། །འཁོར་དང་ལོངས་སྤྱོད་རྙེད་དང་བཀུར་སྟིའི་རྒྱུར། །སྐད་ཅིག་ཙམ་ཡང་ནམ་ཡང་མི་སྨིན་པར། །བླ་མེད་བྱང་ཆུབ་ཁོ་ནའི་རྒྱུར་གྱུར་ཅིག །རྒྱལ་སྲས་སྨོན་ལམ་གངྒཱའི་ཀླུང་རྣམས་ནི། །དམ་ཆོས་འཛིན་པའི་སྨོན་ལམ་ནང་འདུས་པར། །གསུངས་ཕྱིར་དགེ་རྩ་ཇི་སྙེད་བསགས་པ་ནི། །ཀུན་ཀྱང་ཐུབ་བསྟན་རྒྱས་པའི་རྒྱུ་རུ་བསྔོ། །བདག་གིས་ཇི་སྙེད་བསགས་པའི་དགེ་བ་འདིས། །ཞེས་སོགས་བསྔོ་སྨོན་རྣམ་པར་དག་པས་མཚམས་སྦྱར་ཏེ་རྒྱལ་བའི་བསྟན་པ་ཡོངས་སུ་རྫོགས་པ་ལ་བག་ཆགས་ཅི་ཐེབས་ཀྱི་སྒོ་ནས་དལ་བའི་རྟེན་ལ་སྙིང་པོ་བླང་བར་བྱའོ། །

― GTD003_Page_0506 ―

^{[མ་དཔེ་གཟིགས་ན་འདིར་གནོན།]}

[Full Size]

སྨྲས་པ། གསུང་རབ་འོ་མའི་རྒྱ་མཚོ་ཆེ། །བསྲུབས་པའི་མར་གྱི་ཉིང་ཁུ་དང། །མན་ངག་གེ་སར་བཅུད་བསྡུས་པའི། །སྙིང་པོ་སྦྲང་རྩིའི་ཐིགས་པ་བཞིན། །བྱང་ཆུབ་ལམ་གྱི་རིམ་པ་ཡི། །དམིགས་སྐོར་ཚང་ཞིང་མདོར་བསྡུས་པ། །བསྙད་པའི་དགེ་འདིས་འགྲོ་བ་ཀུན། །ཡང་དག་ལམ་ལ་སྤྱོད་གྱུར་ཅིག །ཅེས་པ་འདི་ནི་སྔར་བྱང་ཆུབ་བདེ་ལམ་གྱི་དོན་ཚིགས་བཅད་དུ་བསྡེབས་པ་ཤིན་ཏུ་ཉུང་ངུ་ཞིག་བྲིས་ཡོད་པ་དེ་ལས་ཅུང་ཟད་རྒྱས་པ་ཞིག་དགོས་ཚུལ། བ་རོན་སུ་ཉིད་ཤོག་ནས་དད་བརྩོན་བློ་གྲོས་ཀྱི་ནོར་དང་ལྡན་ཞིང་སྒྲུབ་པ་ལ་གཞོལ་བ་གུ་ཤྲི་བློ་བཟང་དཀོན་མཆོག་གིས་བསྐུལ་བ་ལྟར། དོན་ཚན་གལ་ཆེ་བ་དུ་མས་ཟུར་བསྐངས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་བྲིས་པའོ།། །།

བདག་གཞན་མཉམ་བརྗེ་སྒོམ་ཚུལ།

― GTD003_Page_0507 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་གཞན་མཉམ་བརྗེ་སྒོམ་ཚུལ་བཞུགས་སོ། །

― GTD003_Page_0508 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་བྷྱཿ བདག་གཞན་མཉམ་བརྗེ་བསྒོམ་པ་ལ། མཉམ་པ་བསྒོམ་པ། བརྗེ་བ་བསྒོམ་པ་གཉིས། དང་པོ་ནི། རང་གཅེས་པར་བཟུང། གཞན་ཡལ་བར་དོར་ཏེ་རང་གཞན་གཉིས་གཅེས་མི་གཅེས་མི་མཉམ་པ་འདི་མི་རིགས་ཏེ། རང་དང་སེམས་ཅན་ཐམས་ཅད་རྨི་ལམ་ཚུན་ཆད་དུ་བདེ་བ་འདོད་པར་མཉམ། སྡུག་བསྔལ་མི་འདོད་པར་མཉམ་པའི་ཕྱིར། བདག་འཛིན་ན་རེ། དེ་ལྟར་འདོད་པ་མཉམ་ནའང་སོ་སོའི་བདེ་བ་རང་རང་གིས་བསྒྲུབ་དགོས་ཀྱི། རྒྱུད་ཐ་དད་ཡིན་པས་རང་གིས་སེམས་ཅན་ཐམས་ཅད་ལ་ཕན་པ་བྱེད་དོན་མེད་ཟེར་ན། རྒྱུད་ཐ་དད་ཡིན་ཀྱང་གཞན་གྱི་གནོད་པ་སེལ་བ་དང་བདེ་བ་སྒྲུབ་དགོས་པ་ཡོད་དེ། །མ་བུ་གཉིས་རྒྱུད་ཐ་དད་ཡིན་ཀྱང་གཅིག་གི་དོན་གཅིག་ཤོས་ཀྱིས་སྒྲུབ་དགོས་པ་བཞིན་ནོ། །བདག་འཛིན་ན་རེ། དེ་གཉིས་ཕན་ཚུན་གཅེས་པའི་དབང་གིས་ཡིན་པས། སེམས་ཅན་གཞན་ལ་དེ་ལྟར་བྱེད་དོན་མེད་ཟེར་ན། སེམས་ཅན་ཐམས་ཅད་ཀྱིས་སྔོན་འཁོར་བ་ཐོག་མ་མེད་པར་སྐྱེ་བའི་ཡ་མཐའ་ཐུག་པ་མེད་པ་བླངས་པའི་དུས་སུ་མ་ལན་གྲངས་དཔག་ཏུ་མེད་པ་ཞིག་བྱས་ཏེ། དེ་ལྟའི་མས་ཇི་ལྟར་དྲིན་གྱིས་བསྐྱངས་པ་བཞིན་དུ་ཕན་པ་ཐམས་ཅད་ལ་སྦྱར། གནོད་པ་ཐམས་ཅད་ལས་བསྐྱབས། རང་སྲོག་ལས་ཀྱང་གཅེས་པར་བྱས་ཏེ། ཐ་ན་ནུ་ཞོ་འཐུངས་པའང་རྒྱ་མཚོའི་ཆུ་ལས་ལྷག་པ་ཞིག་བཏུང་ཡོད་པས་ད་ལྟའི་མ་

― GTD003_Page_0509 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་དུ་གཅེས་པར་བྱེད་དགོས་སོ། །བདག་འཛིན་ན་རེ། དེའི་དུས་སུ་གཅེས་ཡོད་ཀྱང་ད་ལྟ་ཕན་ཚུན་ངོ་མི་ཤེས་ལ། དེར་མ་ཟད་འགའ་ཞིག་གིས་དགྲར་བཟུང་ནས་གནོད་པ་ཅི་འཁྱོལ་བྱེད་པས་གཅེས་པའི་འོས་མེད་དོ་ཟེར་ན། སྔོན་གྱི་དུས་རིང་པོ་མུ་མཐའ་ཡས་པ་ཞིག་ཏུ་གཅེས་པར་བསྐྱངས་པའི་རྩིས་མེད་པར་ད་ལྟའི་ཡུད་ཙམ་ཞིག་གི་དགའ་མི་དགའི་རྐྱེན་ཕྲན་ཚེགས་ལ་ཁོན་དུ་འཛིན་པ་མ་རབས་ཀྱི་སྤྱོད་པ་ཡིན་ཏེ། མ་བུ་ཚེ་ཧྲིལ་པོར་ཕན་ཚུན་ཤིན་ཏུ་གཅེས་ཀྱང། རྒས་དུས་ཉིན་གཅིག་ནད་དང་གདོན་གྱིས་འཁྲུལ་ཏེ་ཚིག་ངན་སོགས་གནོད་འཚེ་བྱེད་ནའང་བུ་དེས་ལྷག་པར་གཅེས་སྤྲས་བྱེད་དགོས་ཀྱི། དེ་རིང་བདག་ལ་མི་གཅེས་པར་འདུག་ཅེས་ཡལ་བར་བོར་ན་འཇིག་རྟེན་ཐམས་ཅད་ཀྱིས་གལ་ཆེ་བའི་དུས་ཕན་མི་ཐོགས་པའི་བུ་ངན་ཞེས་ཁྲེལ་མེད་དུ་བརྩི་བ་བཞིན་ནོ། །བདག་འཛིན་ན་རེ། གལ་ཏེ་གཅེས་པའི་དབང་དུ་བཏང་ཡང་དེས་ཕ་རོལ་ལ་ཕན་ཐོགས་རྒྱུ་མེད་པས་རང་གི་སེམས་ངལ་བ་ཙམ་དུ་ཟད་དོ་ཟེར་ན། ཕན་སེམས་བསྐྱེད་པ་ཙམ་གྱིས་ཆུས་སྐོམ་སོད་པ་བཞིན་འཕྲལ་དུ་ངོམས་རྒྱུ་མེད་ཀྱང་སྤྱིར་མི་ཕན་པ་མིན་ཏེ། སྔར་ཕན་སེམས་ཀྱི་སྒོ་མ་དོད་པས་སུ་ལའང་ཕན་མ་ཐོགས་པ་ཡིན། ཕན་སེམས་སྦྱོང་ཐུབ་ན་ལེགས་ཉེས་ཐམས་ཅད་སེམས་ཀྱི་རྗེས་སུ་འབྲང་ཡོད་པས། སེམས་དེའི་སྟོབས་ཀྱིས་ནུས་པའང་ཇེ་ཆེར་

― GTD003_Page_0510 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲོ། བསམ་སྦྱོར་གཉིས་གཅིག་གྲོགས་སུ་གཅིག་སོང་ནས་སྟོབས་རྒྱས་ཏེ་ནམ་ཞིག་དུས་སྐད་ཅིག་མ་གཅིག་ལ་སྐུའི་འོད་ཟེར་རེ་རེས་ཀྱང་སེམས་ཅན་དཔག་ཏུ་མེད་པ་ལ་ཕན་འདོགས་ནུས་པ་ཞིག་འབྱུང་། ད་ལྟ་འགྲོ་བ་ཀུན་གྱི་སྐྱབས་གནས་སུ་གྱུར་པའི་སངས་རྒྱས་བཅོམ་ལྡན་འདས་རྣམས་ཀྱང་སྔོན་རང་ཅག་དང་སྐལ་བ་མཉམ་པ་འཆིང་བ་ཀུན་ལྡན་ནུས་པ་ཅི་ཡང་མེད་པ་རེས་བློ་སྦྱངས་ནས་དོན་གཉིས་ལྷུན་གྱིས་གྲུབ་པ་འདི་ལྟ་བུར་གྱུར་པ་ཡིན་ནོ། །བདག་འཛིན་ན་རེ། དེ་ལྟར་སྦྱངས་ན་མཐའ་ཞིག་ཏུ་ཕན་རྒྱུ་ཡོད་སྲིད་ཀྱང་དེའི་བར་དུ་འགྲོ་ཐུབ་པའི་གདེང་མེད། གནས་སྐབས་ཕན་སེམས་བྱས་པ་ཙམ་གྱིས་ཕ་རོལ་པོའི་ལུས་སེམས་གང་ལའང་ཕན་ཐོགས་རྒྱུ་མེད་པས་བྱེད་མི་སྤྲོ་ཟེར་ན། གནས་སྐབས་སུའང་ཕན་རྒྱུ་ཡོད་དེ། རང་ལ་དཔལ་འབྱོར་ཕུན་སུམ་ཚོགས་པ་བྱུང་བར་མི་གཞན་ཞིག་དགའ་བར་བྱས་ན་རང་གིས་སེམས་ལ་ཕན་པ་བཞིན། སེམས་ཅན་ཐམས་ཅད་བདེ་བ་ལ་རང་གི་དགའ་བ་བསྒོམ་ན་དེས་སེམས་ཅན་ཐམས་ཅད་མགུ་བར་འགྱུར་ཞིང། སེམས་དགའ་བ་དེའང་ཕན་བཏགས་པ་ཡིན་པའི་ཕྱིར། བདག་འཛིན་ན་རེ། རང་གིས་ཕན་སེམས་བྱས་ཀྱང་སེམས་ཅན་གྱིས་དེ་མི་ཤེས་པས་དགའ་བའང་མི་སྐྱེའོ་ཟེར་ན། དཀར་ཕྱོགས་སྐྱོང་བའི་ལྷ་སོགས་དེ་ཤེས་མཁན་ཡང་གྲངས་མེད་པ་ཞིག་ཡོད་ལ། དངོས་སུ་མ་ཤེས་ཀྱང་རྟེན་འབྲེལ་གྱི་ཆེ་བས་བྱམས་པ་བསྒོམས་པའི་གང་ཟག་དེ་མཐོང་ཙམ་ཉིད་ནས་མི་མ་ཡིན་གདུག་པ་ཅན་རྣམས་ཀྱང་དགའ་བ་སྐྱེ་བའི་ལོ་རྒྱུས་མང་ལ། སྦྲུལ་གདུག་པས་གནོད་པ་མ་བྱས་ཀྱང་མཐོང་ཙམ་ནས་མི་

― GTD003_Page_0511 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་བ་ནང་གི་ཁོང་ཁྲོའི་སྟོབས་ཡིན་པ་བཞིན་ནོ། །ཡང་བདག་འཛིན་ཁྱོད་ཀྱིས་ཕན་སེམས་དེས་ལུས་སེམས་གང་ལའང་ཕན་རྒྱུ་མེད་པས་བྱེད་དོན་མེད་ཟེར་བ་བདེན་ན། ཚིག་རྩུབ་ལ་སོགས་པས་ལུས་ལ་གནོད་རྒྱུ་མེད་ཅིང། སེམས་གཟུགས་ཅན་མ་ཡིན་པ་ལ་དེ་ལས་ཀྱང་གནོད་རྒྱུ་མེད་པས་དེ་ལ་ཁོང་ཁྲོ་བྱ་དོན་མི་འདུག་སྙམ་དུ་སྔོན་ལ་བསམ་དགོས་སོ། །བདག་འཛིན་ན་རེ། ཕན་སེམས་ཀྱིས་ལུས་སེམས་གང་ལའང་གནས་སྐབས་ཕན་རྒྱུ་མེད་པ་དང། ཚིག་རྩུབ་ཀྱིས་གནོད་རྒྱུ་མེད་པ་གཉིས་ཀ་མགོ་མཚུངས་པས་གཉི་ག་བཏང་སྙོམས་སུ་བྱོས་ཤིག་ཟེར་ན། དེ་གཉིས་མི་མཚུངས་ཏེ། གནོད་པ་ལ་ཁོན་དུ་བཟུང་བའི་རྣམ་སྨིན་དང་རྒྱུ་མཐུན་གྱིས་སྡུག་བསྔལ་ཁོ་ན་འདྲེན་ལ། ཕན་སེམས་ཀྱིས་དགའ་བ་བརྒྱུད་མར་འཕེལ་བས་བདེ་བ་འདོད་ཅིང་སྡུག་བསྔལ་མི་འདོད་ན་རང་གཅེས་པ་བཞིན་དུ་གཞན་ལ་གཅེས་པར་བཟུང་སྟེ་ཕན་སེམས་སྦྱོང་དགོས་སོ། །༈ གཉིས་པ་བརྗེ་བ་བསྒོམ་པ་ནི། རང་གཞན་གཉིས་གཅེས་པར་མཉམ་པ་ཙམ་གྱིས་མི་ཆོག་སྟེ། སྔར་རང་ཁོ་ན་གཅེས་པར་བཟུང། གཞན་ཡལ་བར་དོར་བས་འཁོར་བའི་ཉེས་དམིགས་འདི་ཐམས་ཅད་བྱུང་བ་ཡིན། གཟོད་འཁོར་བ་ཕྲ་རགས་ཀྱི་ཉེས་དམིགས་ཟད་པར་སྤངས་པའི་བླ་མེད་བྱང་ཆུབ་འཐོབ་པ་ལ་སྲང་མདའི་མགོ་མཇུག་གཉིས་མཐོ་དམན་གོ་བཟློག་པ་བཞིན། སྔར་གཅེས་པར་འཛིན་རྒྱུ་དང་ཡལ་བར་འདོར་རྒྱུའི་བསམ་ཚུལ་དེ་གཉིས་གོ་ས་བརྗེས་

― GTD003_Page_0512 ―

^{[མ་དཔེ་གཟིགས་ན་འདིར་གནོན།]}

[Full Size]

ནས། རང་ཡལ་བར་དོར་ཞིང་གཞན་ཁོ་ན་གཅེས་པར་འཛིན་དགོས་སོ། །རང་གཅེས་པར་བཟུང་ནས་རང་བདེ་བའི་ཐབས་སྒྲུབ་མོད། དེས་སྡུག་བསྔལ་ཐམས་ཅད་ཇི་ལྟར་སྐྱེད་སྙམ་ན། གཅེས་ཤིང་ཕན་པའི་ཟོལ་གྱིས། གནོད་པ་ཁོ་ན་སྒྲུབ་པ་ཡིན་ཏེ། རང་གཅེས་འཛིན་གྱི་དབང་གིས་རང་གི་ལུས་ལོངས་སྤྱོད། གཉེན་མཛའ་བཤེས། གཡོག་འཁོར་ཡུལ་ཁམས་སོགས་ཐམས་ཅད་ལ་ཞེན་ཆགས་སྐྱེད། དེ་ཇི་ཙམ་རྒྱ་ཆེ་བ་བཞིན་དེ་དག་ལ་གནོད་པ་དང་གནོད་ཀྱིས་དོགས་པའི་ཞེ་སྡང་ཕྲག་དོག་གཡོ་སྒྱུ་སོགས་ཉོན་མོངས་པ་མཐའ་དག་འདྲེན་ཞིང། ལས་ངན་པ་སྣ་ཚོགས་བསགས་ཏེ་འཁོར་བའི་སྡུག་བསྔལ་ཐམས་ཅད་སྐྱེད་པ་ཡིན། སྟོང་གསུམ་གྱི་སྐྱེ་བོ་ཐམས་ཅད་དགྲར་ལངས་ཀྱང་དམྱལ་བའི་མེ་ནང་དུ་འཕེན་མི་ནུས། དམྱལ་བའི་མེ་ནང་དུ་འཁྲིད་མཁན་ཡང་རང་གཅེས་འཛིན་འདི་ཉིད་ཡིན་ཏེ། དང་པོར་དེའི་དབང་གིས་ལས་བསགས་པར་མ་ཟད། འཆི་ཁའི་ཚེའང་གྲང་བའི་སྣང་བ་བྱུང་སྟེ་རང་གཅེས་འཛིན་གྱིས་དྲོ་བར་འདོད་ནས་དམྱལ་བའི་མེ་ནང་དུ་འཇུག་ཚུལ་མདོ་སྡེ་ལས་གསུངས་པ་བཞིན་ནོ། །དེར་མ་ཟད་རང་གཅེས་འཛིན་མངོན་གྱུར་ཤུགས་དྲག་པོ་ཞིག་སྐྱེས་ཕྱིན་ཕུང་ཁྲོལ་ཆེན་པོ་ཞིག་ངེས་པར་སྐྱེད་པས། བཀའ་གདམས་གོང་མ་རྣམས་རང་གཅེས་འཛིན་ལ་ཕུང་བྱེད་འུག་པའི་མགོ་ཅན་ཞེས་ལྟས་ངན་གྱི་མཐར་ཐུག་ཏུ་བརྩི་ཞིང། བློ་སྦྱོང་མཚོན་ཆ་འཁོར་ལོ་ལས་ཀྱང། ཕུང་བྱེད་རྟོག་པའི་མགོ་ལ་ཆེམས་སེ་ཆེམ། །དགྲ་བདག་གཤེད་མའི་སྙིང་ལ་མཱ་ར་ཡ། །ཞེས་ཕན་བདེའི་སྲོག་

― GTD003_Page_0513 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་རྒོལ་བའི་གཤེད་མ་རང་གཅེས་འཛིན་ཡིན་པར་གསུངས་སོ། །གཞན་གཅེས་འཛིན་གྱི་ཡོན་ཏན་བསམ་པ་ལ་སྔོན་དུ་ལས་འབྲས་ལ་ཡིད་ཆེས་རྙེད་དགོས་པས། དེའི་ཚུལ་ནི། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་སོགས་ལྟ་བུའི་ལུང་གིས་ཀྱང་སྒྲུབ་ཏུ་ཡོད་མོད། ལུང་ཙམ་མ་གཏོགས་དཔྱད་པས་ངེས་པ་མ་རྙེད་ན་ཡིད་ཆེས་བརྟན་པོ་མི་འབྱུང་བས། ད་ལྟ་མཐོང་བ་མངོན་གྱུར་ལའང་དཔྱིད་ས་བོན་ཕར་མ་བཏབ་ན་སྟོན་ལོ་ཏོག་ཚུར་སྡུད་རྒྱུ་མི་ཡོང་བ་དང། ས་བོན་མ་ཚིག་མ་རུལ་བ་དགོས་ལ། དེའང་ནས་བཏབ་པ་ལས་ནས། གྲོ་བཏབ་པ་ལས་གྲོ་འབྱུང་བ་མ་གཏོགས་འཆོལ་ནས་མི་སྐྱེ་བ་བཞིན་དུ། གཞན་ལ་སྦྱིན་པ་བཏང་བ་ལས་ལོངས་སྤྱོད་འབྱུང་བ་དང། ཚུལ་ཁྲིམས་བསྲུངས་ཏེ་རང་གི་སྒོ་གསུམ་གཙང་མར་བྱས་པས་བདེ་འགྲོའི་རྟེན་གཙང་མ་ཐོབ་པ་དང། བཟོད་པ་བསྒོམས་ཏེ་སེམས་ཅན་ལ་གནོད་འཚེ་སྤངས་པས་སེམས་ཅན་གྱི་ཡིད་དུ་འོང་བའི་གཟུགས་མཛེས་པ་འགྲུབ་པ་སོགས་རྒྱུ་སྔོན་སོང་ལས་དེ་དང་རྗེས་སུ་མཐུན་པའི་འབྲས་བུ་འབྱུང་སྟེ། འདི་རང་སྡེ་ཐམས་ཅད་དང། ཆད་སྨྲ་རྒྱང་འཕེན་པ་མ་གཏོགས་པའི་གཞན་སྡེ་རྣམས་ཀྱང་ཁ་མཐུན་ནོ། །དེ་ལྟར་ན་སྦྱིན་པའི་ས་བོན་འདེབས་པ་ལ་ཞིང་ས་ལྟ་བུ་གཏོང་ཡུལ་གྱི་སེམས་ཅན་ལ་ལྟོས་ཤིང། དེ་བཞིན་དུ་ཚུལ་ཁྲིམས་ཀྱིས་གཞན་གནོད་གཞི་བཅས་ལས་ལྡོག་པ་དང། བཟོད་པས་དགེ་སྦྱོང་གི་ཆོས་བཞི་དང་དུ་ལེན་པ་སོགས་ཕྱིན་དྲུག་དང་ཚོགས་གཉིས་ཀྱི་སྤྱོད་པ་ཐམས་

― GTD003_Page_0514 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་གཞི་སེམས་ཅན་ལ་བརྟེན་ནས་འགྲུབ་དགོས་པས། འབྲས་བུ་ཆོས་གཟུགས་ཀྱི་སྐུ་གཉིས་ཀྱང་སེམས་ཅན་གྱི་བཀའ་དྲིན་ལ་བརྟེན་ནས་འཐོབ་དགོས་པར་ཤེས་སོ། །མདོར་ན་སྟོན་པ་ཤཱཀྱའི་རྒྱལ་པོ་དང་རང་ཅག་རྣམས་གདོད་མ་ནས་མཆོག་དམན་དུ་གྲུབ་པ་ཞིག་མ་ཡིན་པར། སྔོན་འཁོར་བ་ཐོག་མ་མེད་པའི་དུས་ནས་ཁྱད་མེད་དུ་འཁོར་བར་འཁྱམས་ཏེ། རེས་འགའ་རང་ཅག་རྣམས་རྒྱལ་པོ་དང་ཁོང་དེའི་བྲན་བཞོན་པ་ཚུན་ཆད་དུ་གྱུར། རེས་འགའ་དེ་ལས་གོ་བཟློག་སྟེ་ཆུ་ཁོལ་བ་བཞིན་བླ་འོག་ཡང་ཡང་བརྗེས་པའི་མཚམས་ཤིག་ནས་ཁོང་ཐེག་པ་ཆེན་པོའི་རིགས་སད་དེ་གཞན་གཅེས་འཛིན་གྱི་བློ་སྐྱེས། ཁྱད་པར་དུ་རང་གི་ཟླ་བོས་དམྱལ་བར་མེའི་ཤིང་རྟ་འདྲེན་མ་ནུས་པར་ཡོད་པ་དེ་བརྩེ་བས་མ་བཟོད་པར་རང་གི་སྟེང་དུ་ལེན་པར་བརྩམས་པས་སྡིག་པ་ཟད་དེ་མཐོ་རིས་སུ་སྐྱེས། དེ་ནས་བཟུང་བདེ་ནས་བདེ་བར་འགྲོ་བའི་མགོ་ཚུགས་ཏེ་ད་ལྟ་དོན་གཉིས་ལྷུན་གྱིས་གྲུབ་པ་མ་ལུས་འགྲོ་བའི་མགོན་སྐྱབས་གཅིག་པུར་གྱུར་པ་འདི་བྱུང་བ་ཡིན། རང་ཅག་རྣམས་རང་གཅེས་འཛིན་གྱི་དབང་དུ་གྱུར་ཏེ་འཇིག་རྟེན་ཁམས་ན་ཟས་ནོར་ལོངས་སྤྱོད་མངའ་ཐང་སྙན་གྲགས་སོགས་ཕུན་སུམ་ཚོགས་པ་མིག་གིས་མཐོང་ཚད་དང་རྣ་བས་ཐོས་ཚད་ཐམས་ཅད་རང་གཅིག་པུས་ཐོབ་ན་སྙམ་སྟེ་དེ་ཁོ་ན་འདོད་ཀྱང། བདེ་སྐྱིད་ཐམས་ཅད་འཇའ་ཚོན་བསྙེགས་པ་བཞིན་ཇེ་རིང་དུ་སོང། སྡིག་སྡུག་ཐམས་ཅད་ཉི་རྒས་ཀྱི་གྲིབ་སོ་བཞིན་ཚུར་འདུས། སྡུག་བསྔལ་མངོན་གྱུར་པ་དང་སྡུག་བསྔལ་གྱི་བག་ལ་ཉལ་སྣ་ཚོགས་པའི་ཁུར་

― GTD003_Page_0515 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་ནོན་ཅིང་གར་འགྲོའི་གཏོལ་མེད་པ་འཁོར་བའི་གཏིང་རྡོར་གྱུར་ནས་ཤིན་ཏུ་ཉམ་ཐག་པ་འདི་བྱུང་བ་ཡིན། དེ་ལྟར་ན་རང་གཅེས་པར་བཟུང་བ་དང་གཞན་གཅེས་པར་བཟུང་བ་གཉིས་ཀྱི་གདམ་ག་མ་ནོར་བ་གང་ཡིན་དང། སྐྱོན་ཡོན་གྱི་ཁྱད་པར་རྫོགས་པའི་སངས་རྒྱས་རྣམས་དང་རང་ཅག་ལ་མཆོག་དམན་གྱི་ཁྱད་ཅི་ཙམ་དོད་ཡོད་པ་འདིས་ཤེས་སོ། །མངོན་པར་རྫོགས་པར་སངས་རྒྱས་ཞེས་པའང་ཉི་མའི་འོད་དང་འཇའ་ཚོན་བཞིན་གསལ་ལམ་མེ་བ། འོད་ལྷང་ངེ་བ་ཞིག་ཏུ་སོང་ནས་ནམ་མཁའི་དཀྱིལ་ན་འཇའ་གུར་འཁྱིལ་ལེ་བཞུགས་ཡོད་པ་ལྟ་བུ་ཞིག་ཏུ་ཕལ་ཆེར་གྱིས་གོ་འདུག་པ་དོན་མེད། གཞན་ཕན་གྱི་བསམ་པ་ཡོངས་སུ་རྫོགས་པ་རང་ལ་སངས་རྒྱས་སུ་བཞག་པ་ཡིན་ཏེ། སྡུད་པ་ལས། དེ་བཞིན་བྱང་ཆུབ་ཆེད་དུ་བྱང་ཆུབ་མཆོག་ཞུགས་པ། །འགྲོ་བ་ཀུན་ལ་བྲན་གྱུར་བཞིན་དུ་གནས་པར་བྱ། །ཞེས་འགྲོ་བའི་དོན་ཁོ་ནར་གཞོལ་བའི་རྒྱལ་སྲས་ཀྱི་སྤྱོད་པ་མཐར་ཐུག་པ་ལ་སྐད་ཅིག་མའི་སྦྱོར་བར་གསུངས་ཤིང་། བདག་གི་བདེ་བ་བཏང་ནས་རེ་བ་མེད་སེམས་ཀྱིས། །སེམས་ཅན་གཞན་གྱི་དགོས་ལ་ཉིན་མཚན་མངོན་པར་བརྩོན། །བུ་གཅིག་པ་ལ་མ་ནི་རིམ་གྲོ་བྱེད་པ་ལྟར། །བསམ་པ་ཐག་པས་རྣམ་པར་སྐྱོ་མེད་གནས་པར་བྱ། །ཞེས་བརྒྱད་པ་ཆོས་སྐུའི་དོན་ཡང་གཏོང་ལེན་མཐར་ཕྱིན་ཏེ་འཁོར་བ་མ་སྟོངས་བར་དུ་ལྷུན་གྱིས་གྲུབ་པའི་འཕྲིན་ལས་ཀྱི་སྒོ་ནས་འགྲོ་བའི་དོན་ལ་སྐྱོ་བ་མེད་པར་བཞུགས་པ་གཙང་བདེ་རྟག་བདག་དམ་པའི་ཕ་རོལ་ཏུ་ཕྱིན་པ་ལ་

― GTD003_Page_0516 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་སོ། །སྡུད་འགྲེལ་གཞན་ལ་སྣ་ཚོགས་ཡོད་ཀྱང། སྐབས་ཕྱི་མ་གཉིས་མཚམས་འབྱེད་ཚུལ་སློབ་དཔོན་གྱིས་འདི་ལྟར་མཛད་པ་ཤིན་ཏུ་ངོ་མཚར་ཆེའོ། །དེ་ལྟར་རང་གཅེས་འཛིན་རྒུད་པ་ཀུན་གྱི་འབྱུང་གནས་དང། གཞན་གཅེས་འཛིན་ཡོན་ཏན་ཀུན་གྱི་གཏེར་དུ་མཐོང་བཞིན་དུ་ཐར་པའི་དགའ་ཚལ་ལ་རྒྱབ་ཀྱིས་ཕྱོགས་ནས་དམྱལ་བའི་མེ་འོབས་སུ་མཆོངས་ན་གདོན་གྱིས་བརླམས་ཏེ་སྨྱོས་པ་དང་སྙིང་ལ་བདུད་ཞུགས་པ་ཡིན་པས། རྒྱལ་བ་སྲས་དང་བཅས་པ་ལ་གདུང་དབྱངས་དྲག་པོས་འོ་དོད་ཀྱིས་བོས་ཏེ། བདག་རྣམས་ཀུན་ཏུ་ཕུང་བར་བྱེད་པའི་དགྲ་བོ་གདུག་པ་ཅན་འདི་ཐལ་བར་བརླག་པར་མཛོད་ཅིག་ཅེས་གསོལ་བ་བཏབ་པ་ན། དེ་དག་གི་མཁྱེན་བརྩེ་ནུས་གསུམ་གྱི་སྤྲིན་ཕུང་འཁྲིགས་པ་ལས་དོན་དམ་པ་བྱང་ཆུབ་ཀྱི་སེམས་སྟོང་ཉིད་རྟོགས་པའི་ཡེ་ཤེས་ཀྱི་ངོ་བོ་གནམ་ལྕགས་འབར་བའི་ཐོག་མདའ་བརྒྱུད་མར་སྤྲོས་ཏེ་བདག་འཛིན་འགོང་པོ་ཐལ་བའི་རྡུལ་ཕྲན་བཞིན་དུ་བརླག །ཡང་ཀུན་རྫོབ་བྱང་ཆུབ་ཀྱི་སེམས་བྱམས་སྙིང་རྗེའི་རང་བཞིན་གྱི་བདུད་རྩིའི་རྒྱུན་བབ་སྟེ་རང་གི་ཤེས་རྒྱུད་ལ་ཞུགས་པས་བདག་གཞན་བརྗེ་བ་བྱང་ཆུབ་ཀྱི་སེམས་ཀྱི་ངོ་བོར་ལྷན་གྱིས་སོང། དེ་དག་གི་ཐུགས་རྗེ་བྱིན་རླབས་དང་རང་གི་རླུང་སེམས་དབྱེར་མེད་དུ་འདྲེས་པས་གཏོང་ལེན་སོགས་ཇི་ལྟར་འདོད་པ་བཞིན་བྱེད་པ་ལ་ལས་སུ་རུང་ཞིང། ནམ་མཁའི་མཐའ་ཁྱབ་ཏུ་སྤྲོས་ནས་སེམས་ཅན་ཐམས་ཅད་ཀྱི་དོན་སྒྲུབ་པའི་ནུས་པ་ཅན་དུ་གྱུར་ཏེ། རང་གི་བདེ་དགེ་ཐམས་ཅད་སེམས་ཅན་སོ་སོ་ལ་དོན་དུ་གང་འགྱུར་གྱིས་

― GTD003_Page_0517 ―

^{[མ་དཔེ་གཟིགས་ན་འདིར་གནོན།]}

[Full Size]

ཟས་གོས་གནས་མལ། གྲོགས་མཛའ་བཤེས། ཆོས་སྟོན་པའི་སློབ་དཔོན་སོགས་རྣམ་པ་སྣ་ཚོགས་སུ་གྱུར་ནས་མངོན་མཐོ་ངེས་ལེགས་ཀྱི་བདེ་བ་ལ་བཀོད། དེ་དག་གི་སྡིག་སྡུག་ལས་ཉོན་བག་ཆགས་དང་བཅས་པ་དབུགས་རྔུབ་པ་དང་ལྷན་དུ་ཚུར་དྲངས་ཏེ་རང་གི་སེམས་སྟེང་དུ་སྤུང་བའི་དམིགས་པ་སོགས་གཏོང་ལེན་གཉིས་པོ་སྤེལ་མར་བྱའོ། །འདི་ནི་ཧལ་ཧ་ཁུ་རེ་ཆེན་མོའི་གྲྭ་པ་དད་བརྩོན་ལྡན་པ་དགེ་སློང་དཀོན་མཆོག་སངས་རྒྱས་ཀྱིས་བདག་གཞན་མཉམ་བརྗེ་སྒོམ་ཚུལ་ཞིག་དགོས་ཟེར་བར། སྤྱོད་འཇུག་གི་བསམ་གཏན་གྱི་ལེའུ་བཞིན་ལུས་བྱ་ཁྱིའི་ཟས་ལ་གཅེས་པར་བྱེད་དོན་མེད་པས་གྲུའི་བློ་བཞག་སྟེ་སྙིང་པོ་ལེན་ཚུལ་དང། རང་གི་ཕུན་ཚོགས་ལ་ཕྲག་དོག་འགྲན་སེམས་སྒོམ་ཚུལ་སོགས་དམིགས་སྐོར་མི་འདྲ་བ་མང་ཞིང། སང་གི་སྡུག་བསྔལ་དེ་རིང་ལ་ལེན་པ་སོགས་བློ་སྦྱོང་བའི་མན་ངག་གི་སྐྱོང་ཚུལ་དུ་མ་ཡོད་ཀྱང། འདི་ནི་ཤར་སྒོམ་ཐུན་གཅིག་གི་སྐྱོང་ཚུལ་ཙམ་ཞིག་གྱུ་རུ་ལུགས་སུ། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།

ཟབ་མོ་ལྟ་བའི་ཟིན་བྲིས་ཐར་ལམ་སྣང་བ།

― GTD003_Page_0519 ―

^{[མ་དཔེ་གཟིགས་ན་འདིར་གནོན།]}

[Full Size]

ཟབ་མོ་ལྟ་བའི་ཟིན་བྲིས་ཐར་ལམ་སྣང་བ་ཞེས་བྱ་བ་བཞུགས་སོ། །

― GTD003_Page_0520 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་རྨོངས་མུན་སེལ་ཡེ༷་ཤེ༷ས་ཀུན་དའི་གཉེན། །ལས་ཉོན་གདུག་པའི་སྒྲ་གཅན་ལས་རྒྱ༷ལ་ཀྱང། །རྗེས་ཆགས་རི་དྭགས་གཟུགས་ཀྱིས་རྗེས་མཚ༷ན་པ། །དཔལ་ལྡན་བླ་མ་སྲིད་ཞིའི་དཔལ་དུ་གྱུར། །གང་གི་ཞལ་གྱི་བུམ་བཟང་ལས། །འཕོས་པའི་ལེགས་བཤད་བདུད་རྩིའི་རྒྱུན། །དད་དང་ཤེས་རབ་སྙིམ་པ་ཟུང། །སྦྱར་ཏེ་བླང་བ་འདི་ལྟར་རོ། །ཕན་བདེ་མ་ལུས་པའི་འབྱུང་གནས་དམ་པ་བསྐལ་པ་བྱེ་བ་བརྒྱ་སྟོང་མང་པོའི་བར་དུ་མིང་ཙམ་ཡང་ཐོས་པར་དཀའ་བ། རྒྱལ་བའི་བསྟན་པ་རིན་པོ་ཆེའི་སྙིང་པོའི་འང་སྙིང་པོར་གྱུར་པ། འཇམ་མགོན་བླ་མ་ཙོང་ཁ་པ་ཆེན་པོས་ལུང་དང་རིགས་པ་དྲི་མ་མེད་པས་དག་ཐེར་མཛད་པ་ཟབ་མོ་དབུ་མའི་ལྟ་བ་འདི་གསན་པ་ལ། ལྟད་མོ་ལྟ་བ་ལྟ་བུ་བྱས་པས་ཀྱང་མི་ཡོང། ཆོས་འདི་འདྲ་ཉམས་སུ་ལེན་ག་ལ་ནུས་ཏེ་སྐལ་བ་

― GTD003_Page_0521 ―

^{[མ་དཔེ་གཟིགས་ན་འདིར་གནོན།]}

[Full Size]

བཟང་བཟང་ཙམ་བྱེད་སྙམ་པས་ཀྱང་མི་ཡོང་། རང་གི་སེམས་དང་ཆོས་གཉིས་སྦྱར་ནས་སེམས་ལ་ཞུ་དག་གཏོང་བ་དེ་རང་གིས་རྩིས་བྱས་ནས་ཉན་དགོས། དེ་ལ་དང་པོ་དུད་འགྲོ་དང་ཁྱད་ཞུགས་མ་ཞུགས་བལྟ་དགོས། གྱེད་གྱེད་བྱས་ནས་འགྲོ་བ་ཙམ་ཞིག་གིས་དུད་འགྲོ་ལས་ཁྱད་ཞུགས་པའི་གོ་མི་ཆོད། ཡ་གི་ཚངས་པ་དང་དབང་པོའི་གོ་འཕང་ཐོབ་ཀྱང་སྲིད་པ་ལས་མ་འདས་འདུག །སྲིད་པ་ལས་མ་འདས་ཕྱིན་ཕུགས་སྡུག་བསྔལ་ལས་ཐར་པ་མི་འདུག་སྙམ། སྲིད་པ་ལས་བློ་ལོག་སྟེ་སྲིད་པའི་རྩ་བ་དྲུངས་ནས་འབྱིན་འདོད་པ་ཞིག་སྐྱེས་ན་ཆུང་ངུ་ལས་ཁྱད་ཞུགས་པ་ཡིན། དེའི་འོག་ཏུ་ནམ་མཁའི་མཐས་ཁྱབ་པའི་མ་རྒན་ཐམས་ཅད་སྡུག་བསྔལ་གྱིས་མནར་ཚུལ་བསམས་ཏེ། དེ་ཐམས་ཅད་ཀྱི་དོན་ཁུར་དུ་འཁྱེར་བ་བྱུང་ན་ཉན་རང་ལས་ཁྱད་ཞུགས་

― GTD003_Page_0522 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཡིན། དེ་ལྟར་མ་ཡིན་པར་སྔགས་བླ་མེད་ཀྱི་ཆོས་མཐོན་པོ་ཡར་ཟད་ཅིག་ཉམས་སུ་བླངས་ཀྱང་ཐེག་ཆེན་ལྟ་ཞོག་ཐར་པའི་རྒྱུ་ཙམ་ལའང་མི་འགྲོ། དེས་ན་རང་གི་རྒྱུད་ལ་ལེགས་པར་བརྟགས་ནས་ཉན་དགོས། དེའི་རྒྱུ་མཚན་གྱིས་རྗེ་ཐམས་ཅད་མཁྱེན་པས་འཆད་ཤེས་པ་གཅིག་གིས་བཤད་ཉན་ཤེས་པ་གཅིག་གིས་ཉན་ན་ཆོས་གྲྭར་བློ་འཁུལ་བ་ལྟ་བུ་དབེན་པར་ལོ་བརྒྱར་ཡང་མི་ཡོང་གསུང་སྟེ། སྐྱེས་རབས་སུ་རྒྱལ་བུ་ཟླ་བས་སུ་ཏ་སའི་བུ་ལ་ཆོས་བསྟན་པའི་ཚེ་དེ་ཉིད་ཀྱིས། བདག་གི་སྤྱོད་པ་ངན་པའི་གཟུགས། །ཆོས་ཀྱི་མེ་ལོང་ནང་མཐོང་ན། །ཡིད་ལ་གདུང་བ་རབ་བསྐྱེད་དེ། །ཞེས་པ་ལྟ་བུ། དཔེར་ན་སྣ་མེད་ཅིག་ལ་མེ་ལོང་བསྟན་ན་སྐྱུག་བྲོ། ང་འདི་འདྲ་ཞིག་ལ་སོང་ཡོད་རྒྱུ་རེད་སྙམ་ནས་རང་ལ་ཞེན་ལོག་སྐྱེ་བ་ལྟར་ཆོས་ཉན་པའང་ཁ་ཕྱིར་བལྟས་ཀྱི་ཆོས་ལ་མ་བཏང་བར་ཚུར་ལ་ལོག་སྟེ་རང་སེམས་ལ་ཞུ་དག་གཏོང་དགོས། དེ་ལ་བཤད་པར་བྱ་བ་ནི། རྗེ་བླ་མས། ཤེས་རབ་ཟབ་མོའི་དེ་ཉིད་ལྟ་བའི་མིག །ཅེས་སོགས་གསུངས་པ་ལྟར། སྟོང་ཉིད་རྟོགས་པའི་ཤེས་རབ་ནི། དུས་གསུམ་གྱི་རྒྱལ་བ་སྲས་བཅས་ཐམས་ཅད་ཀྱི་ཤེས་རབ་ཀྱི་མིག་གཅིག་པུ་ཡིན་ཞིང་འདི་མེད་ན། སྡུད་པ་ལས། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་གསུངས་པ་

― GTD003_Page_0523 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར། ཕར་ཕྱིན་དང་པོ་ལྔ་ལ་ཇི་ཙམ་བསླབས་ཀྱང། ལོང་བས་གྲོང་ཁྱེར་བགྲོད་མི་ནུས་པ་ལྟར། བསོད་ནམས་ཙམ་ཞིག་འབྱུང་ཡང་ཐར་པའི་གྲོང་ཁྱེར་དུ་བགྲོད་མི་ནུས་པས། ཐར་པར་བགྲོད་འདོད་པ་རྣམས་ཀྱིས་ཤེས་རབ་ཀྱི་ཕར་ཕྱིན་ལ་སློབ་པ་ལ་བརྩོན་པ་དུ་མས་འབད་པར་བྱ་དགོས་སོ། །དྲུག་པ་ཤེས་རབ་ལ་སློབ་ཚུལ་ལ། ཤེས་རབ་ཀྱི་དབྱེ་བ་གསུམ་སྟེ། དོན་དམ་པ་གནས་ལུགས་དེ་ཁོ་ན་ཤེས་པའི་ཤེས་རབ། ཀུན་རྫོབ་གནས་ལྔ་རིག་པའི་ཤེས་རབ། སེམས་ཅན་གྱི་དོན་བྱེད་ཚུལ་ཁ་ན་མ་ཐོ་བ་མེད་པ་ཤེས་པའི་ཤེས་རབ་བོ། །དང་པོ་མེད་ན་མཐོང་ལམ་ཙམ་ཡང་མི་སྐྱེ་ཞིང། གཉིས་པ་ནང་རིག་པའི་ཐར་པར་བགྲོད་ཚུལ་བཤད་པ་དེ་ལ། གཏན་ཚིགས་རིག་པས་དཔྱད་དེ་དངོས་སྟོབས་ཀྱི་རིགས་པ་འཇུག་པ་རྣམས་དངོས་སྟོབས་ཀྱིས་ཡིད་ཆེས་ཀྱི་ལུང་འཇུག་པ་རྣམས་ཡིད་ཆེས་ཀྱི་རིགས་པས་བསྒྲུབས་ནས་སྒྲོ་འདོགས་གཅོད་དགོས། དེ་ལ་དང་པོ་ཐལ་འགྱུར་གྱི་སྒོ་ནས་ལོག་རྟོག་གི་དབལ་འཇོམས་དགོས། ཐལ་འགྱུར་ལ་སྒྲུབ་བྱེད་འཕེན་ནུས་པའི་ཐལ་འགྱུར་ཡང་དག་དང། ཕ་རོལ་ལ་བརྗོད་པའི་སྐྱོན་རང་ལ་འཁོར་བའི་འབྲས་མཚུངས་ཀྱི་ལྟག་ཆོད་གཉིས་ཡོད་པ་ལས་ཐལ་འགྱུར་ཡང་དག་ཅིག་བཀོད། དེ་ནས་སྒྲུབ་ངག་གིས་ཐེ་ཚོམ་དོན་འགྱུར་བསྐྱེད་དེ། གཟོད་རྟགས་ཡང་དག་

― GTD003_Page_0524 ―

^{[མ་དཔེ་གཟིགས་ན་འདིར་གནོན།]}

[Full Size]

འགོད་དགོས་ལ། སྒྲ་མི་ཤེས་ན་རང་ཚོས་དོན་ཐམས་ཅད་ཡི་གེའི་སྟེང་ནས་གཏན་ལ་འབེབས་དགོས་པས། སྒྲའི་རྣམ་དབྱེ་བརྒྱད་ལ་སོགས་པ་མ་ཤེས་ཚེ། བ་དང་གའི་སྔོན་འཇུག་ཙམ་རེ་ནོར་བས་ཀྱང་འཁྲུལ་བ་སྐྱེ་བས་གཞན་རྗེས་འཛིན་ལྟ་ཞོག །རང་གི་སྒྲོ་འདོགས་ཀྱང་མི་ཆོད་པས། བྱམས་མགོན་གྱིས་མདོ་སྡེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་པར་མི་འགྱུར་ཏེ། །ཞེས་སོགས་གསུངས་སོ། །ཤེས་རབ་དེ་རྣམས་ལས་འདིར་གཙོ་བོར་སྐབས་སུ་བབས་པ་གནས་ལུགས་རྟོགས་པའི་ཤེས་རབ་བསྐྱེད་པ་ལ་རྒྱུ་ཚོགས་ཚང་དགོས། དེ་ལ་ཐོག་མར་དེའི་ཕན་ཡོན་ཤེས་དགོས་པས། དེ་ནི་ཡུལ་འཁོར་སྐྱོང་གིས་ཞུས་པ་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་པ། །དེ་དག་ཐུགས་རྗེ་མངའ་བས་ཐབས་ཚུལ་དང། །རིགས་པ་བརྒྱ་དག་གིས་ནི་འཛུད་པར་མཛད། །ཅེས་དང། རྗེ་བླ་མས། ཨེ་མའོ་ཁྱོད་ཀྱི་བསྟན་པ་ནི། །ཞེས་སོགས་གསུངས་པ་ལྟར་རྒྱལ་བས་མདོ་སྡེ་རྣམས་སུ་འགའ་ཞིག་ན་གཟུངས་ཀྱི་ཕན་ཡོན་ཁོ་ནས་ཆོག་ཚོད་ལྟ་བུ་དང། ཚེ་སྒྲུབ་ལྟ་བུ་དང་དབང་སྡུད་དང། རྫས་ཐབས་སྣ་ཚོགས་ཤིག་གསུངས་འདུག་པ་རྣམས་ཀྱང། རེ་ཞིག་གདུལ་བྱ་དེ་དག་དེ་ཙམ་ལས་ལྷག་སྟོན་པའི་སྣོད་དུ་མི་རུང་བས་རང་ལ་ཕན་ཚོད་ཙམ་རེ་གསུངས་པ་ཡིན་ཏེ། ཇི་ལྟར་ནད་པ་ན་བ་ལ། །ཞེས་སོགས་གསུངས་པ་ལྟར། དཔེར་ན་ཚ་བ་

― GTD003_Page_0525 ―

^{[མ་དཔེ་གཟིགས་ན་འདིར་གནོན།]}

[Full Size]

ཧ་ཅང་གཏིང་དུ་སོང་བ་ལ་དང་པོ་ག་བུར་ཉེར་ལྔ་ལྟ་བུའི་ཚ་སྨན་གཏོང་མི་རུང་བས། དང་པོར་སྡུད་པའི་ཐབས་བྱས་ནས་ཚ་སྨན་རྗེས་སུ་གཏོང་བ་ལྟར་གནས་སྐབས་དེ་འདྲ་རེ་ཙམ་བསྟན་ནས་མཐར་སྟོང་པ་དང་རྟེན་འབྱུང་ཟུང་དུ་འཇུག་པའི་ལམ་འདི་ནས་ཁྲིད་དེ་མི་གནས་པའི་མྱང་འདས་ལ་འགོད་པའི་ཐབས་ཤ་སྟག་ཡིན། འདི་ནི་མདོ་སྡེ་པད་དཀར་ལས་དཔེ་དང་བཅས་གསུངས་ཏེ། སེམས་ཅན་ཐམས་ཅད་འཚང་རྒྱ་ངེས་ཁོ་ན་ཡིན་ན་མཐར་ཐུག་ཐེག་པ་གསུམ་དུ་བསྟན་པ་དེ་ཆོས་ལ་དཔེ་མཁྱུད་བྱས་པ་དང། སྟོན་པ་ཐུགས་རྗེ་ཆུང་བར་མི་འགྱུར་རམ་ཞེས་རྒྱལ་བ་རང་ཉིད་ཀྱིས་རྩོད་པ་བཀོད་ནས། ལན་དུ་དཔེར་ན་ཁྱིམ་མཐའ་མེས་བསྐོར་བའི་ནང་ན་བྱིས་པ་མནོ་བསམ་མེད་པ་ཞིག་རྩེ་བཞིན་དུ་ཡོད་པ་ཕས་མཐོང་ནས་ཁྱིམ་མེས་འཚིག་པར་འདུག་ཚུར་ཤོག་བྱས་ཀྱང་མི་ཉན་ལ། ཚུར་ཤོག་རྟ་ཞོན་བྱས་ཀྱང་སྐྲག་ནས་མི་ཡོང་བའི་ཚེ། དེ་ར་ལུག་སོགས་ལ་དགའ་ཞིང་ཞོན་ཐུབ་ཙམ་ཡོད་ན་ཚུར་ཤོག །ར་ཞོན་ཞེས་བོས་ནས་ཚུར་འོང་བ་དང། རྟ་སྤྲིན་གྱི་ཤུགས་ཅན་ལ་བསྐྱོན་ཏེ་བྲོས་ན་ཕ་དེས་རྫུན་སྨྲས་པ་མ་ཡིན་ལ། བུ་དེ་བསྡོས་པའང་མ་ཡིན་པ་དེ་བཞིན་དུ་རང་རེ་བློ་མཐུ་ཆེས་ཞན་པ་གར་འགྲོ་གཏོལ་མེད་པ་ཞིག་ལ་ཁྱོད་གནས་ལུགས་བསྒོམ་ལ་མི་གནས་པའི་མྱང་འདས་ལ་སོང་ཞིག་བྱས་པས་བློས་འཆུན་པ་རང་མེད་པས། དང་པོར་ཚེ་འདིའི་སྣང་ཤས་ལྡོག་ཐབས་དང། དེ་ནས་འཁོར་བ་ལས་བློ་ལོག་ཐབས་དང། དེ་ལྟར་

― GTD003_Page_0526 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་སྦྱངས་ནས་ཟབ་མོ་རྟེན་འབྱུང་གི་དོན་སྟོན་པ་མ་གཏོགས། དང་པོ་ནས་བསྟན་ན་སྟོན་མཁན་ལའང། བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང། །ཞེས་པ་ལྟར། བྱང་སེམས་ཀྱི་ལྟུང་བ་ལྕི་ཤོས་ཤིག་འབྱུང་བས། སྙིང་རྗེ་ཟེར་མདོག་དང། ངོ་འཛིན་ལྟ་བུས་གང་བྱུང་ལ་བཤད་མི་རུང། དེ་ལྟར་བྱས་ན་གནས་ལུགས་རང་བཞིན་མེད་པའི་དོན་བསྒོམ་སྟེ་རྟོགས་པ་ལྟ་ཞོག་ཐེ་ཚོམ་སྐྱེས་ནའང། བཞི་བརྒྱ་པ་ལས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཙམ་ཡང་སྐྱེ་མི་འགྱུར། །ཐེ་ཚོམ་ཟོས་པ་ཙམ་གྱིས་ཀྱང། །སྲིད་པ་ཧྲུལ་པོར་བྱེད་པར་འགྱུར། །ཞེས་དང། པཎ་ཆེན་བློ་བཟང་ཆོས་རྒྱན་གྱིས། ཆོས་ཟབ་མོའི་དོན་ལ་སོམ་ཉིས་ཀྱང། །གཞི་སྲིད་པ་ཧྲུལ་པོར་བྱེད་དོ་གསུངས། །ཞེས་པ་ལྟར་དེ་ཙམ་གྱིས་ཀྱང་སྲིད་པའི་ཚང་ཚིང་ཐམས་ཅད་ཞིག་འགྲོ་བའི་ཉམས་ཡོད་དོ། །སྟོང་ཉིད་རྟོགས་པའི་ཕན་ཡོན་ཤེས་པ་ལ་དེའི་ནང་ནས་ཀྱང་ཞི་སྒོ་གཉིས་པ་མེད་པ་ཤེས་དགོས། དེ་ནི་ཀླུ་སྒྲུབ་ཀྱིས། སངས་རྒྱས་རང་སངས་རྒྱས་རྣམས་དང། །ཉན་ཐོས་རྣམས་ཀྱིས་ངེས་བསྟེན་པའི། །ཐར་པའི་ལམ་ནི་གཅིག་ཉིད་ཁྱོད། །ཅེས་སོགས་དང། ཡུམ་ལས་འདས་པའི་སངས་རྒྱས་རྣསས་ཀྱང་འདི་ལས་གཤེགས། ད་ལྟར་གྱི་སངས་རྒྱས་རྣམས་ཀྱང་འདི་ལས་གཤེགས། མ་འོངས་པའི་སངས་རྒྱས་རྣམས་ཀྱང་འདི་ནས་གཤེགས་པར་འགྱུར། ཉན་རང་རྣམས་ཀྱང་ལམ་འདི་ཁོ་ནས་ཞི་བར་བགྲོད་དགོས་གསུངས། སྡུད་པ་ལས་ཀྱང། རྒྱལ་བ་འདས་དང་མ་བྱོན་ད་ལྟར་གང་

― GTD003_Page_0527 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་པ། །ཞེས་སོགས་གསུངས་པ་ལྟར། འཁོར་བ་རྩ་བ་ནས་ཟད་པ་ལ་ཐར་པ་ཟེར་བ་ཡིན་ལ། འཁོར་བའི་རྩ་བ་མཐར་ཐུག་བདེན་འཛིན་གྱི་མ་རིག་པ་འདི་ཡིན་ཞིང། འདི་སྤོང་བ་ལ་གཉེན་པོ་གནས་ལུགས་རྟོགས་པའི་ཤེས་རབ་མེད་མི་རུང་དུ་དགོས་པའི་གནད་ཀྱིས་འདི་ལ་ཐེག་གསུམ་བགྲོད་གཅིག་གི་ལམ་ཟེར་བ་ཡིན་པས། འདིའི་ཕན་ཡོན་ཤེས་པར་བྱས་ཏེ་དོན་གཉེར་ཡོད་པ་ཞིག་དགོས། དོན་གཉེར་ཡོད་ཅེས་བཤད་པས་མི་ཆོག །འཇུག་པ་ལས། དེ་ལ་དེ་ཡི་རྗེས་སུ་འགྲོ་བའི་ཡོན་ཏན་འབྱུང། །ཞེས་སོགས་དང། རྩ་ཤེ་ཊཱིཀ་ཆེན་ལས་འབྲས་རྟགས་ཀྱིས་ཤེས་དགོས་པར་གསུངས་པ་ལྟར། སྟོང་པ་ཉིད་ལ་མོས་པའི་རྟགས་སུ་ག་རེ་ངས་བླ་མ་མཚན་ཉིད་དང་ལྡན་པ་ལྟ་བ་ཕྱིན་ཅི་མ་ལོག་པ་སྟོན་མཁན་ཞིག་བསམ་སྦྱོར་གཉིས་ཀྱིས་ཚུལ་བཞིན་དུ་མ་བསྟེན་ན་ལྟ་བ་གོ་བའི་ཐབས་མི་འདུག་སྙམ་དུ་བཤེས་གཉེན་བསྟེན་ཚུལ་ལ་མྱོང་བ་བརྟན་དུ་འགྲོ་བ་དགོས། དེ་བཞིན་དུ་སྦྱིན་པ་མ་བཏང་ན་ཕྱི་མ་དབུལ་བའི་སྡུག་བསྔལ་གྱིས་མནར་ཏེ་ཆོས་འདི་ཉམས་སུ་ལེན་རྒྱུ་མི་ཡོང་བར་འདུག །ཚུལ་ཁྲིམས་མ་བསྲུངས་ན་བདེ་འགྲོ་ཙམ་ཡང་མི་ཐོབ་པས་འདི་ཐོས་རྒྱུའང་ག་ལ་ཡོང། བཟོད་པ་མ་བསྒོམས་ན་ཕྱི་མ་ལུས་མི་མཛེས་པས་བླ་མ་ཐུགས་མཉེས་རྒྱུ་མ་རེད་སྙམ་དུ་སྒོ་མཐའ་དག་ནས་བསམས་ཏེ་སྤྱོད་པའི་ཆ་ཐམས་ཅད་འདིའི་ཡན་ལག་ཏུ་བསྡུས་ཏེ་ལག་ལེན་ལ་ཐེབས་པ་ཞིག་དགོས། ལྟ་བ་ལ་དོན་གཉེར་ཡོད་ཡོད་

― GTD003_Page_0528 ―

^{[མ་དཔེ་གཟིགས་ན་འདིར་གནོན།]}

[Full Size]

འདྲའང་སྤྱོད་ཕྱོགས་ལ་སྣང་མེད་བྱས་ན་ཉེས་ཚབས་ཤིན་ཏུ་ཆེ་སྟེ། རྩ་ཤེ་ལས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང། །རིག་སྔགས་ཉེས་པར་བསྒྲུབ་པ་བཞིན། །ཞེས་གསུངས་པ་ལྟ་བུ་ཡིན། དེས་ན་འདི་ལ་བླ་མ་བྱམས་པའི་གསུང་ནས། དུག་སྦྲུལ་གསོད་པའི་ཐོག་མར་ཁོང་ཁྲོ་དྲག་པོ་བསླང་ན་དུག་ཐམས་ཅད་ལྕེ་རྩེ་དང་མཇུག་མའི་རྩེ་ལ་འགྲོ་བས་མགོ་མཇུག་བཅད་ན་བར་དེ་སྨན་མཆོག་ཏུ་གྱུར་པ་ཞིག་ཡིན་ཀྱང། དེ་འདྲ་མ་བྱས་པར་རེག་ན་ལུས་ལ་དུག་ཞུགས་པ་ཁྲག་དང་འདྲེས་ཏེ། དེ་མ་ཐག་སྤྱི་གཙུག་ནས་རྐང་མཐིལ་གྱི་བར་ཁྱབ་ནས་སྦོས་ཏེ་འཆི་བ་ཡིན། རིག་སྔགས་ནི་གྲུབ་ཆེན་བརྒྱད་ཀྱི་ནང་ཚན་རལ་གྲི་སྒྲུབ་པའི་ཚེ་སྐབས་ཤིག་ན་རལ་གྲི་འགུལ་བའི་ཚེ་འཛིན་ཤེས་ན་དེས་ལྷ་ཡུལ་སོགས་སུ་འགྲོ་ནུས་ཀྱང། མ་ཤེས་ན་རང་གི་སྐེ་གཅོད་པ་ལྟར་ཉེན་ཁ་ཧ་ཅང་ཆེ་བས། རྗེ་བླ་མས་ཀྱང་མཐུན་སྣང་དུ་ལྟ་བ་མ་དགོངས་པའི་ཚུལ་མཛད་དེ། འཇམ་པའི་དབྱངས་ལ་སྤྱིར་གསུང་རབ་ཐམས་ཅད་གདམས་ངག་ཏུ་འཆར་བ། ཁྱད་པར་དུ་ཟབ་མོ་དབུ་མའི་ལྟ་བ་རྙེད་པའི་ཕྱིར་གསོལ་བ་ཡང་ཡང་བཏབ་པས་སྐབས་ཤིག་ན། ཤེས་རབ་སྙིང་པོར། གཟུགས་སྟོང་པའོ། །ཞེས་སོགས་སྟོང་ཉིད་བཞི་སྐོར་གྱི་དོན་ལ་ཐུགས་གཏད་པས། བོད་སྔ་རབས་ཀྱི་ལྟ་བ་ཅི་ཡང་བཟུང་དུ་མེད་པ་དེ་ཀ་ཐུགས་ལ་བདེ་བ་འདྲ་བ་ཞིག་བྱུང་སྟེ། ཐུགས་དེ་ཀའི་མུ་ལ་ཏིང་ངེ་འཛིན་དུ་སོང་ནས། ཚོགས་གྲོལ་ཚེ་གཞན་

― GTD003_Page_0529 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་ཀྱིས་སློང་དགོས་པ་བྱུང་ནས། འཇམ་པའི་དབྱངས་ལ་ངའི་ལྟ་བ་འདི་ཐལ་རང་གང་གི་ལྟ་བར་འདུག་ཞུས་པས་གང་ཡང་མིན་གསུངས། འོ་ན་ད་ཅི་འདྲ་ཞིག་བྱེད་དགོས་ཞུས་པས་ཐེག་པ་ཆེན་པོའི་གཞུང་ལ་ལྟ་རྟོག་གྱིས། དེའི་ནང་ནས་ཀླུ་སྒྲུབ་ཁོ་ན་ཐེག་ཆེན་གྱི་བསྟན་པ་འདི་ལ་དབང་དུ་གྱུར་པ། ཚད་མར་གྱུར་པ་ཡིན་པས་དེའི་གཞུང་རྣམས་དང། ཟླ་གྲགས་འདི་སྟེང་ཕྱོགས་ཀྱི་འཇིག་རྟེན་གྱི་ཁམས་ཚད་མེད་པ་འདས་པའི་ཞིང་གཅིག་ནས་ཀླུ་སྒྲུབ་ཀྱི་བསྟན་པ་འཛིན་པའི་ཕྱིར་སྐྱེ་བ་བཞེས་པ་ཡིན་པས། དེའི་གཞུང་ལ་དཔྱད་པ་ཞིབ་ཏུ་གྱིས་གསུངས། གསེར་འཕྲེང་ཡང་རྗེའི་སྔ་རྩོམ་ཡིན་པས་ལྟ་བ་སྔ་རབས་པའི་ཅི་ཡང་བཟུང་དུ་མེད་པ་དེ་ཀ་གཙོ་བོར་བྱས་ཡོད་ལ། ཡང་བོད་སྔ་རབས་པ་འགའ་ཞིག་ཆོས་ཉིད་སྒྲུབ་པ་རང་དབང་བར་འདོད་པ་ནི་ཐ་ཆད་ཡིན་པས་དེ་ལས་སྔ་མ་དགའོ། །དེ་ནས་རྗེ་བླ་མས་དེ་ལྟར་མཛད་ཀྱང་ད་དུང་ལྟ་བ་མ་དགོངས་ནས། ད་ཅིས་ཀྱང་མངའ་བདག་མཻ་ཏྲི་པ་དང། སློབ་དཔོན་ཀླུའི་བྱང་ཆུབ་སོགས་ད་ལྟར་རྒྱ་གར་ན་བཞུགས་ཡོད་པས་དེ་དག་གི་དྲུང་དུ་གཏུགས་ཏེ་ལྟ་བ་རྙེད་པ་ཞིག་མ་བྱས་པའི་ཐབས་མི་འདུག་དགོངས་ནས། མཐོ་མཐོ་རླུང་ལ་བསྐུར། དམའ་དམའ་ཆུ་ལ་བསྐུར་ཏེ་སྡེ་སྣོད་འཛིན་པ་སྟོང་ཕྲག་ལྷག་ཙམ་མིག་མཆི་མ་ཙར་རེ་ཤུལ་དུ་བཞག་ནས། ལྷོ་གྲོ་བོ་ལུང་དུ་ཕེབས་ཏེ་ལྷོ་བྲག་ནམ་མཁའ་རྒྱལ་མཚན་ལ་ལམ་རིམ་གསན། དེའི་སྐབས་སུ་ལྷོ་བྲག་གྲུབ་ཆེན་གྱིས་ཕྱག་རྡོར་

― GTD003_Page_0530 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བློ་བཟང་གྲགས་པ་འདི་རྒྱ་གར་དུ་འགྲོ་བ་ངས་འགོག་མི་ནུས་པར་འདུག་པས་ཅི་བྱས་ན་དགའ་ཞུས་པ་ལ་ཕྱག་རྡོར་གྱིས་ཁོང་རྒྱ་གར་ལ་ཕེབས་ན་རྡོ་རྗེ་གདན་གྱི་མཁན་པོ་ཡོང་ཞིང། རྒྱ་གར་ལ་ཉི་མ་ཤར་བ་འདྲ་བ་ཡོང། འོན་ཀྱང་སླར་འཁོར་མི་ནུས་པས་བོད་ཁམས་མུན་པའི་གླིང་དུ་འགྲོ། ལྟ་བའང་ཐུགས་དེ་ཙམ་གནང་མི་དགོས་མྱུར་དུ་རྟོགས་འོང་གསུངས་པ་ཁོང་གིས་རྗེ་ལ་ལན་བསྐྱར་དེའི་ཚེ་རྗེས་འཇམ་དབྱངས་ལ་བདག་གཅིག་པུར་བསྒོམ་པ་དགའམ། འཁོར་རྣམས་ཁྲིད་པ་དགའ་ཞུས་པར་གཞན་རྣམས་ཞོག་ལ། འཁོར་དག་པ་རྣམ་བརྒྱད་ཁྲིད་གསུངས་པ་ལྟར་བྱོན་ནས་འོལ་ཁ་ཆོས་ལུང་དུ་ལྟུང་བཤགས་སོ་ལྔ་རེ་ལ་ཐུན་གཅིག་བྱས་པའི་ཐུན་བཞི་ཆག་མེད་མཛད། འཚོ་བའང་ཤུག་པའི་འབྲུ་མ་གཏོགས་རྩམ་པ་གཏན་མི་བཞེས་པའི་ཚེ། སྦྱིན་བདག་རྣམས་ཀྱིས་ནན་གྱིས་གསོལ་ནས་རྗེས་ཅུང་ཟད་བཞེས་ཤིང་ཉིན་མཚན་མེད་པར་དཀའ་སྤྱད་མཛད་པའི་ཚེ། མནལ་ལམ་དུ་སངས་རྒྱས་བསྐྱངས་ཡིན་ཟེར་བའི་བཙུན་པ་སྔོ་སེང་ངེ་བ་ཞིག་གིས་གླེགས་བམ་སྔོན་པོ་ཞིག་དབུ་ཐོག་ཏུ་བཞག་ནས་ལན་གསུམ་བྱིན་རླབས་བྱེད་པ་བྱུང་བས། ཕྱི་ཉིན་རྒྱུས་མེད་པའི་གྲྭ་པ་ཞིག་གིས་བུདྡྷ་པཱ་ལི་ཏའི་དཔེ་ཁྱེར་བྱུང་ནས་འདི་ལ་གཟིགས་ཟེར་བས། དེའི་ནང་གི་རབ་བྱེད་བཅོ་བརྒྱད་པ་དང་དུས་བརྟགས་པའི་ཐད་ལ་ཞིབ་དཔྱོད་མཛད་པ་ན་བཏགས་ཡོད་མིང་རྐྱང་ཙམ་དང། དེ་ལ་རྒྱུ་འབྲས་རྟེན་འབྱུང་གི་རྣམ་གཞག་འགལ་མེད་དུ་འཇོག་ཚུལ་ཐུགས་སུ་ཆུད་དེ་རྒྱལ་བ་ལ་ཤེས་ནས་དད་པ་ཐོབ་

― GTD003_Page_0531 ―

^{[མ་དཔེ་གཟིགས་ན་འདིར་གནོན།]}

[Full Size]

པས། བསྟོད་པ་ལེགས་བཤད་སྙིང་པོ་ཆུང་བ་འདི་མཛད་པ་ཡིན། ད་ལྟ་རང་ཚོ་དཔེ་ཀློག་ཐེབས་ཆག་ཙམ་རེ་བྱས་ནས་ལྟ་བ་ལས་སླ་མདོག་ཁ་བོ་ཁ་ནས་རང་བཞིན་མེད་ཟེར་ཤེས་པ་ཙམ་དང། བསམ་པའི་ཚེ་སྟོང་སང་ཙམ་འཆར་བ་འདི་ལ་ལྟ་བའི་དྲི་ཙམ་ཡང་མེད། འཇུག་པ་ལས། འདི་ནི་གསན་རྒྱ་ཆེ་ཡང་གཞན་གྱི་ཐུགས་སུ་ཆུད་མི་འགྱུར། །ཞེས་དང། དེའི་ཐད་ཀྱི་རང་འགྲེལ་ལས། སྔོན་གྱི་སློབ་དཔོན་ཕྱོགས་གླང་དང་ཆོས་སྐྱོང་ཞེས་པ་ནས། ཁོ་བོ་དེ་སྐད་དུ་སྨྲའོ། །ཞེས་སོགས་ཀྱི་རྗེས་སུ་འབྲང་སྟེ། དབྱིག་གཉེན་སོགས་ཀྱིས་མ་རྟོགས་ཟེར་བཞིན་དུ་རང་ཚོས་ཤེས་ཁུལ་བྱེད་པ་ཧམ་པ་ཧ་ཅང་ཆེས་པ་ཡིན། དེས་ན་ལྟ་བ་ལ་ཧམ་པ་བྱས་ཀྱང་རེ་བ་མེད་པས་ཐོག་མར་རྒྱུ་ཚོགས་ཕུན་སུམ་ཚོགས་པ་ཞིག་བྱེད་དགོས། ཚོགས་ལའང་སྒོམ་རིམ་ལས་བཤད་པ་ལྟར་གྱི་ཐེག་ཆེན་གྱི་བཤེས་གཉེན་བསྟེན་པ་དང། ཟབ་མོའི་མདོ་སྡེ་སོགས་ལ་ཐོས་བསམ་བྱེད་པ་དང། ཚུལ་བཞིན་ཡིད་ལ་བྱེད་པ་གསུམ་གྱི་སྟེང་དུ་རྗེ་བཙུན་འཇམ་པའི་དབྱངས་ཀྱིས་རྗེ་ལ་གསུངས་པའི་མན་ངག །དཔེར་ན་ཁྱིམ་བརྩིས་ནས་སའི་གཏིང་ནས་དྲོད་ལང་བའི་ཚེ་ནས་འདེབས་པ་ལྟར། བླ་མའི་བྱིན་རླབས་སེམས་ལ་ཞུགས་ནས་ལྟ་བའི་ས་བོན་སྒྲུབ་དགོས་པས། བླ་མ་དང་ལྷག་པའི་ལྷ་དབྱེར་མེད་དུ་བྱས་ནས་གསོལ་བ་ཤུགས་དྲག་ལ་རྒྱུན་རིང་དུ་འདེབས་པ། རམ་པ་སོགས་རྩྭ་ཡན་མ་བསལ་ན་ངན་པ་ཤུགས་ཆེ་འགྲོ་བ་ལྟར་ཚོགས་གསོག་སྒྲིབ་སྦྱོང་མ་བྱས་

― GTD003_Page_0532 ―

^{[མ་དཔེ་གཟིགས་ན་འདིར་གནོན།]}

[Full Size]

ན་ཉོན་མོངས་དང་ཚེ་འདིའི་སྣང་ཤས་ཁ་རྒྱལ་འགྲོ་བས་བསགས་སྦྱང་སྒོ་དུ་མ་ནས་འབད་པ། ས་བོན་ལྟ་བུ་ལྟ་བའི་ཉེར་ལེན་གྱི་རྒྱུ་མེད་མི་རུང་བ་ཤིང་རྟ་ཆེན་པོ་ཀླུ་སྒྲུབ་ཡབ་སྲས་ཀྱི་གཞུང་ལ་ཆེད་དུ་གཉེར་ནས་བལྟ་ཞིང་དྲི་མ་མེད་པའི་རིགས་པས་དཔྱད་པ་གསུམ་ཚང་དགོས། ལྷག་པའི་ལྷའང་སྤྱིར་སངས་རྒྱས་རྣམས་ལ་མཆོག་དམན་མེད་ཀྱང། རང་རང་ལ་བྱིན་རླབས་ཀྱི་བཀའ་བབ་རེ་ཡོད་པས། འཇམ་དབྱངས་ལ་བརྟེན་དགོས། ཡི་དམ་ཡང་བདེ་གསང་འཇིགས་གསུམ་ཡ་མ་བྲལ་བ་ཞིག་དགོས་ལ། ཆོས་སྐྱོང་ཡང་དགེ་སྡིག་གི་ཤན་འབྱེད་ཆོས་རྒྱལ་ཡིན་པས་སྐྱེས་བུ་ཆུང་ངུའི་སྐོར་ལ་ཆོས་རྒྱལ་དང། འབྲིང་ལ་ཚུལ་ཁྲིམས་ཀྱི་ཆོས་སྐྱོང་རྣམ་སྲས་དང། ཆེན་པོ་ལ་རྒྱལ་བ་ཐམས་ཅད་ཀྱི་ཐུགས་རྗེའི་ངོ་བོ་སྤྱན་རས་གཟིགས་ཡིན་པས། དེ་ཁྲོ་བོའི་རྣམ་པར་བཞེངས་པ་མགོན་པོ་བསྟེན་དགོས་ཀྱང་ལྟ་བའི་སྐབས་འདིར་ལྷག་ཏུ་ཆོས་རྒྱལ་བསྟེན་དགོས་ཏེ། རྗེའི་མདུན་ནའང་ཆོས་རྒྱལ་འབྲལ་མེད་དུ་བཞུགས་ཏེ། རྒྱལ་ཚབ་མཁས་གྲུབ་གང་མདུན་ན་གནས་སྐབས་དེར་མི་བཞུགས་པ་རེའི་རྣམ་པ་བཟུང་སྡོད་པས། འཕྲལ་དུ་མི་ཤེས་ཀྱང་དགའ་མི་དགའི་རྣམ་འགྱུར་མང་པོ་བྱེད་པ་ཞིག་ཡོད། ལན་ཅིག་སྦྱིན་བདག་ཅིག་གི་གཡོག་ཏུ་དར་རྩེ་མདོར་སོང་བ་ན་མི་ཞིག་གིས་རྩ་བ་གསེར་གྱི་གཞི་ལ་ཐུག་པའི་བྲག་གི་རྩེ་མོ་ས་ལ་ཐོན་པ་ཐབ་རྡོ་བྱེད་ཟེར་ནས་བསྒུལ་བ་མཐོང་ནས་བགད་པས་ས་ཐམས་ཅད་ཡོམ་ཡོམ་བྱེད་པས་ཡིད་མ་ཆེས་ཏེ་སླར་ཤེས་པ་ལྟ་བུ་ཡིན།

― GTD003_Page_0533 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་རྒྱལ་གྱི་ནང་ནས་ཀྱང་ནང་སྒྲུབ་གཙོ་བོར་བྱེད་དགོས། རྒྱུ་མཚན་དེའི་གནད་ཀྱིས་ལྷག་མཐོང་གི་སྐབས་འདིར་བླ་མའི་རྣལ་འབྱོར་རེ་བཤད་པའི་ཕྱག་སྲོལ་ཡོད་པས། རིགས་གསུམ་སྤྱི་སྒྲུབ་ཀྱི་བླ་མའི་རྣལ་འབྱོར་འདི་ཤིན་ཏུ་གནད་ཆེ། སྔོན་བླ་མ་བྱམས་པས་ར་ཁ་བྲག་ཏུ་རིགས་གསུམ་སྤྱི་སྒྲུབ་ཀྱི་བླ་མའི་རྣལ་འབྱོར་འདི་གཙོ་བོར་མཛད་པས། མནལ་ལམ་དུ་རལ་གྲི་ཞིག་ཕྱག་ལ་འོང་བ་རྨིས། དེ་ནས་བཟུང་སྟེ་གོ་བ་ལེགས་པོ་བྱུང། འོན་ཀྱང་ཡུ་བ་མེད་པ་འདམ་རྫབ་ཀྱི་ནང་ཞིག་ནས་རྙེད་པ་དེ་ཚེ་མཇུག་འདི་ལ་དཀོར་ཆེན་པོ་ཡོང་བའི་རྟགས་རེད། འདི་འདྲ་མ་བྱས་ན་ཡ་མེད་ཅིག་ཡོང་བ་ཡོད་དེ་གསུང་གི་ཡོད། དེ་ལ་བླ་མའི་རྣལ་འབྱོར་སྐྱོང་ཚུལ་ནི། སྐྱབས་སེམས་སྔོན་དུ་བཏང་ནས། རང་གི་མདུན་གྱི་ནམ་མཁར་འཇའ་འོད་ཀྱི་གུར་ཁང་སེང་ཁྲི་པད་ཟླའི་གདན་ལ་རྒྱལ་བ་ཙོང་ཁ་པ་སྐུ་མདོག་དཀར་ལ་དམར་བའི་མདངས་ཆགས་པ་དབུ་ལ་པཎ་ཞྭ་གསེར་གྱི་མདོག་ཅན་རྩེ་མོ་ཤིན་ཏུ་རྣོ་བ་ནམ་མཁའ་ལ་རེག་པའི་ཚོད་ལྟ་བུ། ཕྱག་གཉིས་ཐུགས་ཀར་ཆོས་འཁོར་གྱི་ཕྱག་རྒྱས་ཨུཏྤ་ལའི་ཡུ་བ་བཟུང་བ་དཔུང་བ་གཡས་པའི་ཐད་ཀྱི་ཨུཏྤ་ལའི་སྟེང་ན་རྒྱལ་བ་ཐམས་ཅད་ཀྱི་ཡེ་ཤེས་ཀྱི་ངོ་བོ་ཤེས་རབ་ཀྱི་རལ་གྲི་འོད་ཀྱིས་འཇིག་རྟེན་ཐམས་ཅད་གསལ་ནུས་པ་མེ་དམར་ལམ་ལམ་འབར་བ། གཡོན་པའི་སྟེང་ན་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་མཐིང་ཤོག་ལ་གསེར་གྱིས་བྲིས་པ་སེམས་བསྐྱེད་ནས་བཟུང་

― GTD003_Page_0534 ―

^{[མ་དཔེ་གཟིགས་ན་འདིར་གནོན།]}

[Full Size]

སྟེ་འཕྲིན་ལས་ཉེར་བདུན་གྱི་ཐ་མ་མི་གནས་པའི་མྱང་འདས་ལ་འགོད་པའི་བར་དངོས་པོ་བརྒྱད་དོན་བདུན་ཅུ་པོ་ལྷང་ལྷང་སྒྲོགས་པ་རང་གིས་ཀྱང་ཐོས་བཞིན་པ་ཞིག་གསལ་གདབ། སྐྲ་མཚམས་ཀྱི་ཐད་ཀྱི་མགོའི་ནང་གི་དཀྱིལ་དྲང་ཐད་དུ་པད་ཟླའི་གདན་ལ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་ངོ་བོ་འཇམ་པའི་དབྱངས་སྐུ་མདོག་དམར་སེར་གཡས་རལ་གྲི་འཕྱར་ཞིང། གཡོན་བརྒྱད་སྟོང་པའི་གླེགས་བམ་བསྣམས་པ་གསལ་གདབ། འཇམ་དབྱངས་ཨ་ར་པ་ཙ་འདི་འཇམ་དབྱངས་ཐམས་ཅད་ཀྱི་རིགས་ཀྱི་བདག་པོ་ཡིན། མགྲིན་པར་ཨོལ་མདུད་ཀྱི་ཐད་དུ་གངས་རིའི་མགོན་པོ་འཕགས་མཆོག་སྤྱན་རས་གཟིགས་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་ཏེ་ཁ་བ་ཅན་པའི་གདུལ་བྱ་མགོན་མེད་པ་འདི་རྣམས་ཐུགས་རྗེས་གཟིགས་ཤིག་ཅེས་ཕྱོགས་བཅུའི་རྒྱལ་བ་སྲས་བཅས་ར་མདར་སྦྲན་པ། གཡས་གཉིས་པར་ཤེལ་འཕྲེང་བསྣམས་ཏེ་གདུལ་བྱ་འདི་རྣམས་ལས་བློ་ཁ་ཡར་འཁོར་བ་ཞིག་ནམ་ཡོང་ན་སྙམ་དུ་འདྲེན་པར་མཛད་པ། གཡོན་གཉིས་པར་འདམ་རྫབ་ལས་སྐྱེས་པའི་པདྨའང་འདམ་ལས་ཐོན་ཙམ་ནས་དྲི་མས་ཅུང་ཟད་ཀྱང་མི་གོས་པ་ལྟར་ལྟ་བའང་འཁོར་བའི་སྐྱོན་གྱིས་གོས་པ་མེད་ཅེས་པའི་བརྡར་གསེར་གྱི་པདྨ་བསྣམས་པ། ཕྱོགས་བཅུའི་སངས་རྒྱས་ཐམས་ཅད་ལས་ཀྱང་ཁྱེད་ཅག་བོད་རྣམས་ལ་ཐུགས་རྗེ་ཆེན་པོ་རང་ཉིད་བཀའ་དྲིན་ཆེ་བར་མཚོན་བྱེད་དུ་རི་དྭགས་སིལ་སྙན་གྱི་པགས་པས་ནུ་མ་གཡོན་པ་བཀབ་པ་ཞིག་གསལ་བཏབ། རི་དྭགས་འདི་གངས་

― GTD003_Page_0535 ―

^{[མ་དཔེ་གཟིགས་ན་འདིར་གནོན།]}

[Full Size]

དང་གཡའི་མཚམས་ལ་སྡོད་པ། སྟོབས་ཀྱི་ངོས་ནས་སུས་ཐུབ་ས་མེད་པ་ཞིག་ཡིན་ཀྱང་སྙིང་རྗེ་ཧ་ཅང་ཆེ་བས། འདི་གསོད་ཙ་ན་སོང་ནས་མི་རྣམས་རལ་ཁ་བཀྱེ་བ་མི་བཟོད་པར་བར་དུ་འཚང་ཡོང་བའི་ཚེ་གསོད་པ་ཡིན། འདིའི་པགས་པ་ལ་རྐང་པ་རེག་པ་ཙམ་གྱིས་ཀྱང་སེམས་བྱམས་ཏིང་ངེ་འགྲོ་བས་ཇོ་བོས་ཀྱང་གདན་དུ་བཏིང་བ་ཡིན། ཐུགས་ཀར་པད་ཉིའི་གདན་ལ་ཕྱག་ན་རྡོ་རྗེ་ཁྲོས་པའི་རྣམ་པ་ཅན་གཡས་གསེར་གྱི་རྡོ་རྗེ་བཟུང་ཞིང། གཡོན་སྡིགས་མཛུབ་མཛད་པ། སྐུ་ལ་མེ་འབར་བཞིན་པ་ཞིག་གསལ་བཏབ་སྟེ་རང་བཞིན་གྱི་གནས་ནས་རང་འདྲའི་ཡེ་ཤེས་པ་སྤྱན་དྲངས་ནས་བསྟིམ། ཕྱོགས་བཅུའི་རྒྱལ་བ་སྲས་བཅས་ཀྱང་སྤྱན་དྲངས་ཏེ་ཡན་ལག་བདུན་པ་མཎྜལ་དང་བཅས་པ་ཕུལ། དགའ་ལྡན་ལྷ་བརྒྱ་མ་དང། དཔལ་ལྡན་ས་གསུམ་མའི་མཇུག་ཏུ་དམིགས་བརྩེ་མ་བཞི་སྐོར་རམ་ལྔ་སྐོར་བྱེད། དམིགས་བརྩེ་མ་འདི་རྗེས་རེད་མདའ་བ་ལ་ཕུལ་བའི་ཚེ་ང་ལ་མི་འོས་ཁྱེད་ཁོ་ན་ལ་འོས་གསུངས་ནས་རྗེ་ལ་ཕྱིར་ཕུལ་བ་ཡིན་ཞིང་ལམ་ཆ་ཚང་བའི་གསོལ་འདེབས་ཡིན་པས་ཆུང་ངུར་འཛིན་མི་རུང། སྔོན་བླ་མ་བྱམས་པ་གཙང་ལ་ཕེབས་སྐབས་ལམ་དུ་འགའ་ཞིག་གིས་བླ་མ་ཐུགས་བྲེལ་ཆེ་བས་ཆོས་ཆུང་ཆུང་ཆུང་ཆུང་ཞིག་ལས་ཞུ་མི་ནུས། དམིགས་བརྩེ་མ་ཞིག་གནང་ན་ཞུས་པས། ཁྱེད་ཚོ་ལ་ཆུང་སོང་བ་རེད་པས། ང་ལ་དམིགས་བརྩེ་མ་ལས་ཆེ་བའི་ཆོས་མེད་གསུངས་ནས་བཀའ་བཀྱོན་གྱིས་ཚར་བཅད་པ་ལྟ་བུ་ཡིན།

― GTD003_Page_0536 ―

^{[མ་དཔེ་གཟིགས་ན་འདིར་གནོན།]}

[Full Size]

ཆ་ཚང་ལུགས་ཀྱང་མཐར་ཐུག་གི་འབྲས་བུ་ཆོས་གཟུགས་གཉིས་ལས་མ་འདས་ཤིང་གཟུགས་སྐུའི་རྒྱུ་གང་ཡིན་སྙིང་རྗེར་འདུས་པ་ཡིན། དེའི་ཚུལ་ཡང་ཆེ་ཆུང་གི་ལམ་རྣམས་སྙིང་རྗེ་ཆེན་པོ་མ་སྐྱེས་པ་སྐྱེད་པའི་ཐབས་དང། སེམས་བསྐྱེད་སོགས་རྒྱལ་སྲས་ཀྱི་ལམ་རྣམས་སྙིང་རྗེ་གོང་འཕེལ་དུ་བྱེད་པའི་ཐབས་དང། སངས་རྒྱས་པའི་འཕྲིན་ལས་ཉེར་བདུན་ཡང་འདིའི་བྱེད་ལས་ཁོ་ནར་འདུས་པ་ཡིན། ཆོས་སྐུ་འགྲུབ་བྱེད་ཡེ་ཤེས་ཀྱི་ཚོགས་ཡིན་ཞིང། གཙོ་བོ་སྟོང་ཉིད་གཟིགས་པའི་མཁྱེན་པ་ཡིན་ཀྱང། རྣམ་འགྲེལ་ལས། སྟོང་ཉིད་ལྟ་བས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུང། །ཞེས་པ་ལྟར་མི་རྟག་སོགས་རྟོགས་པའི་ཤེས་རབ་རྣམས་ཀྱང་དེའི་ཡན་ལག་ཏུ་འདུ་བ་ཡིན། སོ་སོ་སྐྱེ་བོས་མི་རྟག་པ་ཕྲ་རགས་དང། བདག་མེད་ཕྲ་རགས་སོགས་བསྒོམ་པ་ན་མི་རྟག་པ་ཁོ་རང་བདེན་ཡང་མཚན་འཛིན་གྱི་གཞི་ལ་ཞུགས་པས་དྲི་མ་དང་བཅས་པ་ཡིན་ཞིང་འཕགས་པ་སློབ་པ་རྣམས་ཀྱང་རྗེས་ཐོབ་ཀྱི་ཚེ་ཡུལ་དྲུག་རང་བཞིན་གྱིས་གྲུབ་པར་སྣང་བའི་དྲི་མ་མ་ཟད་པས། གཉིས་སྣང་འཁྲུལ་པའི་བག་ཆགས་མ་ལུས་པར་ཟད་པའི་དྲི་མ་མེད་པའི་མཁྱེན་པ་འདི་ཐོབ་པ་ལ་སངས་རྒྱ་དགོས། དེ་ལ་ཐོག་མར་བདུད་འདུལ་དགོས་པས་བདུད་ཀྱང་རལ་པ་ཅན་ཞིག་དགོས་པ་མ་ཡིན་པར། ཕར་ཕྱིན་སོགས་ནས་བཤད་པ་ལྟར་གྱི་བདུད་བཞི་ཐོག་མར་རང་གིས་བཅོམ་ནས་གཞན་དག་ཀྱང་བདུད་བཞི་འཇོམས་པའི་ནུས་པ་ལ་

― GTD003_Page_0537 ―

^{[མ་དཔེ་གཟིགས་ན་འདིར་གནོན།]}

[Full Size]

འགོད་པ་སྟེ། མདོར་ན་མཁྱེན་བརྩེ་ནུས་གསུམ་གྱི་མཛད་པ་མཐར་ཕྱིན་པའི་སྒོ་ནས་བསྟོད་དེ་གསོལ་བ་འདེབས་པ་ཡིན། བདུད་རྩི་འབེབས་སྦྱང་བྱེད་ཚུལ་ཡང། ཐོག་མར་རྗེའི་སྐུ་ལས་བདུད་རྩི་དཀར་པོའི་རྒྱུན་བབས་འགལ་རྐྱེན་བར་ཆད་ཐམས་ཅད་དང་ཁྱད་པར་དུ་ཆོས་བྱང་ཆུབ་ལམ་གྱི་རིམ་པ་འདི་ཉམས་སུ་ལེན་པ་ལ་བར་དུ་གཅོད་པའི་ནད་གདོན་སྡིག་སྒྲིབ་ཐམས་ཅད་བྱང་ཞིང་དག་པའི་མོས་པ་བྱེད། འདི་ལ་རྗེ་དགེ་ལེགས་རྒྱ་མཚོས། ངེས་པར་བྱེད་རྒྱུ་ཡིན་ན། དང་པོར་ཡིག་བརྒྱ་འབུམ་བསགས་དགོས། དེ་བྱས་ན་རྨི་ལམ་དུ་གོས་གསར་པ་གྱོན་པ། བླ་མ་མཐོང་བ། སྐྱུགས་པ་སོགས་བྱུང་ན་སྡིག་པ་དག་པའི་རྟགས་ཡིན་ཞིང། སྡིག་པ་དག་པའི་རྟགས་ལ་འཁྲུ་བ་རྨིས་པ་འདི་ལྷག་ཏུ་བཟང་བ་ཡིན། དེའི་འོག་ཏུ་བྱིན་རླབས་ཞུགས་པའི་པྱིར། མཎྜལ་བསགས་ཏེ། རྨི་ལམ་དུ་བླ་མ་དགྱེས་ཉམས་ཆེན་པོ་བྱེད་པ་སོགས་བྱིན་རླབས་ཞུགས་པའི་མཚན་མ་ནམ་བྱུང་གི་བར་འབད། དེའི་རྗེས་ལ་རྗེའི་སྐུ་ལས་འོད་ཟེར་དམར་སེར་གྱི་རྒྱུན་བབས་མི་ཤེས་པའི་མུན་པ་ཐམས་ཅད་སངས། བློ་གྲོས་ཀྱི་སྣང་བ་ཕུན་སུམ་ཚོགས་པ་ཐོབ་པའི་མོས་པ་བྱེད། དེའི་མཐར་འཇའ་འོད་ཀྱི་གུར་ཁྱིམ་ཡང་མཐའ་ནས་བསྡུས། སེང་ཁྲིའང་ཡར་བསྡུས་ཏེ་རྗེ་ལ་ཐིམ། རྗེ་བླ་མ་རང་གི་སྤྱི་བོ་ནས་མར་ཕེབས་སྙིང་པདྨ་འདབ་བརྒྱད་ཀྱི་དབུས་སུ་བཞུགས་པར་མོས་ལ། བཟའ་བཏུང་སོགས་ཀྱི་ཚེའང་རང་གིས་ཟ་སྙམ་པ་མ་ཡིན་པར་རྗེ་ལ་ཕུལ་སྙམ་པ་བྱེད་དགོས། འདྲེན་པ་

― GTD003_Page_0538 ―

^{[མ་དཔེ་གཟིགས་ན་འདིར་གནོན།]}

[Full Size]

མཉམ་མེད་མ་འདིའང་རིགས་གསུམ་སྤྱི་སྒྲུབ་ཀྱི་ཇ་མཆོད་ཡིན་པས། འདིའི་ཚེ་གྲྭ་ས་སོགས་ན་ཇ་ཕོར་མགྲིན་པའི་ཐད་དུ་འཛིན་དགོས་པའི་རྒྱུ་མཚན་ཡང་དེ་ཡིན། རིགས་གསུམ་སྤྱི་སྒྲུབ་འདིའི་མན་ངག་ནི་གལ་ཏེ་གདོན་ཆེ་བའི་ངོ་དང། བར་ཆད་ཞི་བ་སོགས་གཙོ་བོར་བྱེད་ན་ཕྱག་རྡོར་གྱི་ཐུགས་ཀར་ཉི་མའི་གདན་ལ་དབུས་སུ་ཧཱུཾ་ཡིག་དང་མཐར་བཛྲ་པཱ་ཎིས་བསྐོར་བ་ལ་དམིགས་ཏེ། བཛྲ་པཱ་ཎི་དྲག་ཏུ་བཟླས་པས་སྔགས་འཕྲེང་ལས་མེ་འོད་འཕྲོས་གདོན་བགེགས་ཐམས་ཅད་བྱ་སྒྲོ་མེ་ལ་བསྲེག་པ་ལྟར་གཞོབ་ཐུལ་གྱིས་སོང་བའི་མོས་པ་བྱེད། ཡང་བྱམས་སྙིང་རྗེ་དང་འཁོར་བ་ལ་སྐྱོ་ཤས་བྱང་ཆུབ་ཀྱི་སེམས་སོགས་ལམ་རིམ་ལ་མྱོང་བ་ཐོན་པ་ཞིག་གཙོ་བོར་འདོད་ན་ཐུགས་རྗེ་ཆེན་པོའི་ཐུགས་ཀར་ཟླ་བའི་སྟེང་དུ་ཧྲཱིཿ འི་མཐར་མ་ཎིས་བསྐོར་བ་ལ་དམིགས་ཏེ་མ་ཎི་འདྲེན་དགོས། མཚན་ཉིད་པ་ཚོའང་མ་ཎི་ལ་སྣང་ཆུང་བྱེད་མི་རུང། འཇམ་དབྱངས་ཆོས་རྗེས་ཀྱང་ཉི་མ་རེ་ལ་མ་ཎི་ཁྲི་ཚར་ཆག་མེད་ཡིན། ངེད་ཅག་ཁ་བ་ཅན་པ་ཚོ་ཐུགས་རྗེ་ཆེན་པོ་རང་ལ་མ་བརྟེན་པར་འགྲོ་ནུས་པའི་རེ་བ་མེད། མ་ཎིའི་མཇུག་ཏུ་ཧྲཱིཿ སྦྱོར་མི་རུང། དེ་བྱས་ན་ཡི་གེ་བདུན་དུ་འགྲོ་ཞིང་འདི་ལ་རྒྱུད་སྡེ་རྣམས་སུའང་གཟུངས་ཡི་གེ་དྲུག་པ་སྟེ་ཡི་གེ་དྲུག་གིའང་སྦྱང་གཞི་འགྲོ་བ་རིགས་དྲུག་དང་། སྦྱོང་བྱེད་ཀྱི་ལམ་ཕར་ཕྱིར་དྲུག་འབྲས་བུ་རྒྱལ་བ་རིགས་དྲུག་འབྱུང་ཞིང་ཡིག་འབྲུ་འདི་དྲུག་ཀྱང་སྣང་མཛད་ནས་མི་བསྐྱོད་པའི་བར་རྒྱལ་བ་དྲུག་གིས་གསུངས་པ་ཡིན། དེས་ན་མ་ཎི་པདྨ་ཞེས་པ་རྒྱ་སྐད་ཀྱི་མཚན་ཡིན་ཞིང། དེའང་མ་ཎི་

― GTD003_Page_0539 ―

^{[མ་དཔེ་གཟིགས་ན་འདིར་གནོན།]}

[Full Size]

ནོར་བུ་དང་པདྨ་བོད་ལ་མེད་པས་སྐད་ཟུར་དུ་མ་བྱུང་ངོ་། །མེ་ཞེས་པའི་རིང་ཆ་ནི་བྱིས་པས་མ་ལ་འབོད་པའི་ཚེ་གདངས་རིང་པོར་འབོད་པ་ལྟར། ཨེ་ཞེས་པ་རྣམ་དབྱེ་བརྒྱད་པ་བོད་པའི་སྒྲ་ཡིན་པས། ཀྱཻ་ཞེས་བོས་ནས་ཧཱུཾ་ཞེས་པ་ཐུགས་ཀྱི་ས་བོན་ཡིན་པས་ཐུགས་རྒྱུད་བསྐུལ་ཏེ་ཐུགས་རྗེས་གཟིགས་ཞེས་པ་ལ། ཅི་བྱེད་དགོས་ཤེ་ན་ཨོ་ལ་ཡི་གེ་ཕྲལ་བའི་ཨ་ཨུ་མ་གསུམ་འབྱུང་ཞིང། དེས་སྐུ་གསུང་ཐུགས་གསུམ་མཚོན་པས་སྐུ་གསུང་ཐུགས་ཀྱི་དངོས་གྲུབ་སྩོལ་ཞེས་པ་ཡིན་ནོ། །ཤེས་རབ་རྒྱ་ཆེ་བ་འདོད་ན་འཇམ་དབྱངས་ཀྱི་ཐུགས་ཀར་དྷཱིཿའི་མཐར། ཨ་ར་པ་ཙས་བསྐོར་བ་ལ་དམིགས་ནས། ཨ་ར་པ་ཙ་བཟླའོ། །ལྷག་མཐོང་གི་ཚོགས་གཉིས་པ་ཟབ་མོའི་མདོ་སྡེ་སོགས་ལ་ཐོས་བསམ་བྱས་ནས་ལྟ་བ་ཚོལ་ཚུལ་ནི། ལྟ་བ་རྟོགས་པ་ལ་བདེན་གཉིས་ལ་དྲང་ངེས་འབྱེད་དགོས། དེ་གཉིས་ཀྱང་གླང་གི་རྭ་ལྟ་བུ་མ་ཡིན་པར་མེའི་ཚ་བ་དང་མེ། ཆུའི་རླན་དང་ཆུ་ལྟར་ངོ་བོ་དབྱེར་མེད་ཀྱང་བློས་སྤུ་རིས་འབྱེད་དགོས་པ་ཞིག་ཡིན། དེ་ལ་ཐོག་མར་དྲང་ངེས་འབྱེད་དགོས་པས་དེའི་ཚུལ་ལ་མདོ་སྡེ་དགོངས་འགྲེལ་ལས་མཚན་ཉིད་གསུམ་ལ་སྦྱར་ནས་གསལ་བར་གསུངས་པའི་དགོངས་པ། དབུས་མཐའ་དང་མདོ་སྡེ་རྒྱན་བཞིན་ཐོགས་མེད་ཀྱིས་བཀྲལ་ཚུལ། བློ་གྲོས་མི་ཟད་པའི་མདོའི་དོན་ཀླུ་སྒྲུབ་དང་མཐུན་པར་རྒྱུད་བླ་མར་ཡང་སེམས་རང་བཞིན་གྱིས་གྲུབ་པའི་སྟོང་པ་རིགས་སུ་གསུངས་པ་ནི། སློབ་དཔོན་གྱི་ཆོས་སྒྲ་གསུམ་པ་ཆོས་དབྱིངས་

― GTD003_Page_0540 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟོད་པ་སོགས་གནད་གཅིག་པར་མངོན་རྟོགས་རྒྱན་གྱི་དགོངས་པ་མཐར་ཐུག་པའང། གཞན་གྱི་ཆོས་རྣམས་ཀྱང་ཡོད་ལ། །ཞེས་སོགས་ཀྱིས་རང་བཞིན་གྱིས་ཡོད་པར་འདོད་བཞིན་དུ་སྒྲིབ་པ་ཟད་པར་འདོད་པ་འདི་ཁོ་བོ་རྒོད་བྲོའོ། །ཞེས་ཐལ་འགྱུར་བའི་ལུགས་སུ་ངེས་པར་གནས་ཀྱང། བདག་ཉིད་ཆེན་པོ་སློབ་དཔོན་སེང་གེ་བཟང་པོས་ཕྱོགས་གཅིག་སེམས་ཙམ་དང་མཐུན་ཞིང། ཕྱོགས་གཅིག་དབུ་མར་བཀྲལ་ཅིང་གཞན་ཡང་སྒྲིབ་པའི་འཇོག་ལུགས་མཐར་ཐུག་ཐེག་པ་གསུམ་དང་གཅིག་གྲུབ་སོགས་ཐམས་ཅད་ཀྱང་རྩ་བ་ལྟ་བའི་འདོད་ཚུལ་ལ་ཐུག་གོ །དྲང་ངེས་འབྱེད་པའང་རང་ཚོའི་བློ་སྟོབས་ཀྱིས་འབྱེད་པའི་རེ་བ་མེད་དེ་དཔེར་ན་མདོ་སྡེ་དགོངས་འགྲེལ་ལས། ཆོས་རྣམས་རང་བཞིན་གྱིས་མེད་ན་གཏན་ནས་མེད་དགོས་པས་ཐམས་ཅད་ལ་སྐུར་བ་བཏབ་སྟེ་ཆད་པའི་མཐའ་ལ་འགྲོ་ཞེས་རིགས་པ་བརྒྱ་ཕྲག་གིས་བཀག་ནས་གཉིས་སྟོང་གི་ཤེས་པ་བདེན་གྲུབ་ཏུ་རིགས་པས་རྩལ་བཏོན་ནས་བསྒྲུབས་ལ། ཡང་བློ་གྲོས་མི་ཟད་པར་ཆོས་རང་བཞིན་གྱིས་ཡོད་པར་འཛིན་པའི་མ་རིག་པ་འདི་འཁོར་བའི་རྒུད་པ་ཐམས་ཅད་ཀྱི་གཞི་རྩ་ཡིན་པས་འདིའི་ཡུལ་འགོག་དགོས་གསུངས། ཡང་འཁོར་ལོ་དང་པོའི་སྐབས་ནས་ཕྱི་རོལ་གྱི་དབང་ཤེས་ལ་སྣང་བ་འདིའང་འདི་ཀ་ལྟར་བདེན་པར་གྲུབ་ཅེས་འཇིག་རྟེན་སྣང་ཚོད་དང་བསྟུན་ནས་གསུངས་ཏེ། འཇིག་རྟེན་ན་ངས་མིག་གིས་མཐོང་། ལུས་ཀྱིས་རེག །གཟུགས་སུ་གྲུབ་ཅེས་བདེན་པའི་ཚད་ལ་བྱེད་པ་ལྟ་བུ་ཡིན་ལ།

― GTD003_Page_0541 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་དག་ཀྱང་མདོ་ཡིན་མཉམ་ལ་ང་ཚོས་སོ་སོར་འབྱེད་མི་ནུས་གཞན་ཞིག་གི་རྗེས་སུ་འབྲང་དགོས། དེའང་ཁོས་འབྱེད་ཟེར་ཚད་ཀྱི་རྗེས་སུ་འབྲང་མི་རུང། འཇིག་རྟེན་གྱི་དཔེ་ལ། ཟོང་ངས་འཁུར་ལ་མ་བསྐུར། ཆོས་ངས་བཤད་ལ་མ་ཉན་ཟེར་བ་ལྟར་ང་ལ་ཉོན་ངས་བཤད་ཟེར་མཁན་དེ་ལ་སྐྱོན་ཞིག་ཡོད་པས། རྒྱལ་བ་རང་ཉིད་ཀྱིས་ལུང་བསྟན་པ་ལྟ་བུའི་རྗེས་སུ་འབྲང་དགོས་ན། དེས་ཀྱང་། བདག་ལས་མ་ཡིན་གཞན་ལས་མིན། །ཞེས་སོགས་ང་ཚོས་བལྟས་ན་སྐྱེ་བ་གཏན་མེད་བཤད་པ་ལྟ་བུ་གོ་མི་ནུས་པས། དེའི་དགོངས་པའང་གཞན་ཞིག་ལ་བརྟེན་དགོས་ན། དེའི་དགོངས་པ་འདྲེན་མཁན་འགའ་ཞིག་ནི་ཕྱི་དོན་མེད་ཀྱང་རྣམ་ཤེས་ཙམ་ཞིག་རང་བཞིན་གྱིས་ཡོད་ལ། འོན་ཀྱང་བདེན་པར་མ་གྲུབ་ཅེས་འདོད། ལ་ལ་ནི་ཤེས་རབ་སྒྲོན་མེར་ཁོ་བོ་ཅག་ནི་རྣམ་པར་ཤེས་པ་གང་ཟག་གི་སྒྲ་དངོས་སུ་འདོག་གོ་ཞེས་རྣམ་ཤེས་རང་བཞིན་གྱིས་ཡོད་ལ། དེར་མ་ཟད་ཕྱི་དོན་ཡང་རང་བཞིན་གྱིས་གྲུབ་བོ། །འོན་ཀྱང་དོན་ཤེས་གཉིས་པོ་བདེན་པར་མེད་མཉམ་དུ་འདོད། འགའ་ཞིག་ནི་ཕར་བཏགས་ཙམ་ལས་ཡུལ་རང་ངོས་ནས་གྲུབ་པ་རྡུལ་ཙམ་ཡང་མེད་པར་འདོད་པའི་ལུགས་མི་འདྲ་བ་སྣ་ཚོགས་པ་ཡོད་དོ། །འོ་ན་འདིར་དྲང་ངེས་འབྱེད་ཚུལ་གང་གི་རྗེས་སུ་འབྲང་ཞེ་ན། ཀླུ་སྒྲུབ་ཀྱི་དགོངས་པ་ལྟར་བློ་གྲོས་མི་ཟད་པའི་མདོའི་རྗེས་སུ་འབྲང་དགོས་ལ། དེས་དྲང་ངེས་འཇོག་ལུགས་ནི་མ་ཡིན་པ་ལ་ཡིན་པར་སྟོན་པ་རྣམས་དྲང་དོན་

― GTD003_Page_0542 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་པར་མ་ཟད་ལས་འབྲས་སོགས་ཡིན་པ་ལ་ཡིན་པར་སྟོན་པའང་དྲང་དོན་ཡིན་ནོ། །དེའི་རྒྱུ་མཚན་ཅི་ཞེ་ན་དེ་ཙམ་གྱིས་དེའི་ངོ་བོ་རྫོགས་པ་མ་ཡིན་ཏེ། ཀུན་རྫོབ་པའི་ངོ་བོ་ཙམ་རྫོགས་ཀྱང། དོན་དམ་པའི་ངོ་བོ་གནས་ལུགས་སྟོང་པ་ཉིད་ལ་ད་དུང་ཡར་འཁྲིད་དགོས་པས་དྲང་དོན་དུ་གསུངས་སོ། །དྲང་དོན་འདི་ལ་རྒྱ་ཆེ་བའང་ཟེར། དེ་ལ་འོ་ན་ཀ་བ་ལྟ་བུ་དྲང་དོན་ཡིན་ཡང་རྒྱ་ཆེ་རྒྱུ་ཅི་ཡོད་སྙམ་ན་ཀ་བ་ལའང། རྒྱུ་འབྲས་བུ་སྤྱི་བྱེ་བྲག་སྒྲ་སྤྱི་དོན་སྤྱི་རྫས་ལྡོག་རང་འཛིན་ཤེས་པ་མིང་གི་རྣམ་གྲངས་སོགས་མི་འདྲ་བའི་ངོ་བོ་རྣམ་པ་སྣ་ཚོགས་པ་བློ་ཡུལ་ལས་འདས་པ་ཞིག་ཡོད་དོ། །མདོ་སྡེ་པ་སོགས་ཀ་བུམ་རྣམས་ཀྱང་ངེས་དོན་ཁོ་ནར་འདོད་དེ། དེའི་རྒྱུ་མཚན་ཡང། ཚད་མ་བསླུ་མེད་ཅན་ཤེས་པ། །ཞེས་དབང་མངོན་གྱིས་བཟུང་བ་འདི་ལས་ལྷག་སངས་རྒྱས་ཀྱིས་ཀྱང་གཟིགས་ཚུལ་མེད་པས་ཚད་མ་མཐར་ཐུག་ཏུ་བཟུང་སྟེ་འདི་ལ་སྣང་བ་འདི་ཀ་ཇི་ལྟ་བ་བཞིན་བདེན་ཟེར་རོ། །འདིར་ཀླུ་སྒྲུབ་ཀྱི་རྗེས་འབྲང་རྣམས་ཀྱི་ནང་ནས་ཀྱང་ཨཱརྻ་དེ་བ་ནི་ཀླུ་སྒྲུབ་དང་ཁྱད་པར་མེད་པས་གཞུང་ཕྱི་མོའི་དབུ་མ་པ་ཆེན་པོ་ཀླུ་སྒྲུབ་ཡབ་སྲས་གཉིས་སུ་གྲགས་ཤིང་དེའི་འོག་ཏུ་རྗེ་བཙུན་འཇམ་དབྱངས་ཀྱིས་རྗེ་ལ་ལུང་བསྟན་པ་ལྟར་འཁྲུལ་བ་མེད་པ་སངས་རྒྱས་བསྐྱངས་དང། ཟླ་གྲགས་ཞི་བ་ལྷ་གསུམ་དགོངས་པ་ཤིན་ཏུ་མཐུན་ཞིང་ཀླུ་སྒྲུབ་ཀྱི་བཞེད་པ་མ་ནོར་བ་ཡིན་ཏེ། རྗེ་བླ་མས། ཟླ་བ་ལས་འོངས་ལེགས་བཤད་འོད་དཀར་གྱིས། །བློ་མིག་ཀུན་དའི་ཚལ་རབ་ཕྱེ་བའི་ཚེ། །སངས་རྒྱས་བསྐྱངས་ཀྱིས་བསྟན་པའི་ལམ་མཐོང་

― GTD003_Page_0543 ―

^{[མ་དཔེ་གཟིགས་ན་འདིར་གནོན།]}

[Full Size]

ནས། །ཀླུ་སྒྲུབ་ལུགས་བཟང་གཙོ་བོར་མི་འཛིན་སུ། །ཞེས་གསུངས་སོ། །རྒྱ་གར་མཁས་པ་རྣམས་ཀྱི་ངག་རྒྱུན་ལའང། མཁའ་ལ་ཉི་ཟླ་རྣམ་གཉིས། ས་ལ་གསལ་བ་རྣམ་གཉིས་ཞེས་རྒྱུད་ཀྱི་དགོངས་པ་འགྲེལ་པ་སྒྲོན་གསལ་དང། དབུ་མའི་ལྟ་བ་འགྲེལ་པ་ཚིག་གསལ་གཉིས་ཉི་ཟླ་ལྟར་གསལ་བར་གྲགས་ཀྱང་ང་ཚོ་ལ་དོན་གསལ་བའི་རེ་བ་མེད། ཚིག་ཙམ་ཡང་ཁ་ལ་མི་ཡོང་བས་གྱོང་པོ་བོད་པས་སོག་སྐད་ལབ་པ་འདྲ་བ་ཞིག་ཡོད། འོ་ན་ང་ཚོས་གང་ལ་ལྟ་དགོས་ན་དེ་གསུམ་གྱི་མན་ངག་ཇོ་བོ་རྗེ་ལ་མངའ་ཞིང། དེ་ཐམས་ཅད་རྗེ་བཙུན་ཙོང་ཁ་པ་ལ་མངའ་སྟེ། གོང་དུ་བཤད་པ་ལྟར་བླ་མ་འཇམ་པའི་དབྱངས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པས་མཉེས་པར་བྱས་ནས་དཔྱིས་ཕྱིན་པར་ཐུགས་སུ་ཆུད་པ་ཡིན་པས་རྗེའི་གསུང་ཚོ་ལྟ་དགོས། བློ་གྲོས་ཅུང་ཟད་ཡོད་ན་ཟབ་མོ་དབུ་མའི་ལྟ་བ་རྗེས་གསུངས་པ་འདི་ལས་གསལ་དུ་བཏང་ནས་སྟོན་ལུགས་མ་ནས་རང་མེད། རྗེའི་གསུང་རྩ་འཇུག་གི་རྣམ་བཤད་ཆེན་མོ་གཉིས་དང། ལེགས་བཤད་སྙིང་པོ། ལམ་རིམ་ཆེ་ཆུང་སོགས་ལྟ་དགོས། ལྷག་ཏུ་ལམ་རིམ་ཆུང་བ་འདི་རྗེ་ཞིང་གཤེགས་ཁར་ངེད་ཅག་བློ་དམན་པ་ཚོ་ལ་ཐུགས་བརྩེ་བས་དགོངས་ཏེ། སྔ་མ་རྣམས་ཀྱི་གནད་བསྡུས་ནས་གོ་སླ་བར་གསུངས་པ་ཡིན་པས་འདི་ཙམ་རེ་འཛིན་དགོས། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་དགུང་ལོ་གསུམ་གྱི་སྟེང་ནས་ལམ་རིམ་ཆེན་མོ་ཐུགས་ལ་བཟུང་སྟེ་ཞལ་འདོན་

― GTD003_Page_0544 ―

^{[མ་དཔེ་གཟིགས་ན་འདིར་གནོན།]}

[Full Size]

གནང་བ་རེད། གྲུབ་པའི་དབང་ཕྱུག་བློ་བཟང་རྣམ་རྒྱལ་གྱིས་དབུའི་སྟེང་གི་བྲག་བར་ལ་ལམ་རིམ་ཆེན་མོ་ཞིག་དང། སྔས་ལ་ལམ་རིམ་ཆུང་ངུ་ཞིག་བཞག་སྟེ་དེ་ལ་གཏུགས་ནས་གཟིམས་པ་ཡིན། ང་ཚོ་དེ་འདྲ་རེ་ལ་མགོ་གཏུགས་ནས་འཆི་རྒྱུ་བྱུང་ན་ངན་སོང་དུ་བཏང་མི་ཡོང། དཔེ་ཆའང་གང་བྱུང་ལ་བལྟས་ན། ད་ལྟ་ལྟ་བ་སྙིགས་མའི་སྐབས་འདིར་བློ་སྣ་ཕྱིན་ཅི་ལོག་ཏུ་འགྲོ་སླ་བས་གང་རུང་རུང་ལྟ་མི་ཉན། བདེ་ལམ་དང་འཇམ་དཔལ་ཞལ་ལུང་བླ་མའི་མན་ངག་རྣམས་ཀྱི་ལྡེ་མིག་བྱས་ནས་རྒྱན་འཇུག་གཉིས་སོགས་སྔར་བཤད་པ་དེ་རྣམས་ཀྱི་དགོངས་པ་རྟོགས་པའི་ཕྱིར་དཔྱད་པ་ཞིབ་ཏུ་བྱ་དགོས་སོ། །༈ རྒྱུ་ཚོགས་གསུམ་པ་ཚུལ་བཞིན་ཡིད་ལ་བྱེད་པ་ནི། བླ་མ་བྱམས་པས་གཙང་པས་བག་ཐུག་འཐུང་བ་འདྲ་བ་ཞིག་དགོས་གསུངས་ཏེ། གཙང་པ་རྣམས་བག་རིལ་གྱི་ཐུག་པ་འཐུང་ཚེ་ལག་པ་གཡས་ལ་ཤིང་ཐུར་རྩེ་མོ་ཅན་རེ་བཟུང་ནས་བག་རིལ་གཅིག་དམིགས་འོག་ཏུ་བཅུག་པ་དང་གཅིག་ལ་འཛུགས་པ་ལྟར་དང་པོ་སྐྱེས་བུ་ཆུང་ངུའི་ལམ་རྣམས་ཉམས་འོག་ཏུ་ཚུད་པ་བྱས། དེའི་ཚེ་ནའང་སེམས་ཀྱི་ཕུགས་ལ་འདིས་ཆོག་པ་མེད། འབྲིང་དང་ཆེན་པོར་འགྲོ་དགོས་པ་ཡོད་བསམ། འབྲིང་ལ་སློབ་པའི་ཚེའང་ད་དུང་སྐྱེས་བུ་ཆེན་པོའི་སྐོར་དང། དེའི་འང་སྙིང་པོའི་སྙིང་པོ་ཟབ་མོ་དབུ་མའི་ལྟ་བ་ལ་འགྲོ་དགོས་པ་ཡོད་སྙམ་ནས་འདི་ཞེ་ཕུགས་སུ་བཞག་སྟེ་ལམ་སྔ་མ་རྣམས་ཉམས་འོག་ཏུ་ཚུད་པ་དགོས་སོ། །རྒྱུ་ཚོགས་ཐུན་མོང་བ་དང་ཐུན་མོང་མ་ཡིན་པ་འདི་དག་ཞལ་ལུང་དུ་གསལ་བར་མ་བགྲངས་

― GTD003_Page_0545 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིང་། ཞལ་ལུང་འདིར་ཞལ་འཕངས་མཛད་པའི་ལུགས་སྲོལ་གཉིས་བྱུང་སྟེ། མཁས་གྲུབ་རྗེ་ནས་བརྒྱུད་པའི་སྦྱོར་བ་ལ་ཐུན་མོང་བ་ལྟ་བའི་དོགས་གཅོད་ཆེན་མོ་ནས་གསུངས་པ་དང། ཐུན་མོང་མ་ཡིན་པ་དགའ་ལྡན་ཕྱག་རྒྱ་ཆེན་པོ་ནས་གསུངས་པ་ལྟར། ནང་པར་ཆུད་པའི་སྒོ་གཅིག་པུ་སྐྱབས་འགྲོ་དང། ཐེག་ཆེན་ཐུན་མོང་མ་ཡིན་པའི་འཇུག་སྒོ་སེམས་བསྐྱེད་གཉིས་བསྡོམས་པ་དང། སྡིག་པ་སྦྱོང་བའི་སྒོ་རྡོ་རྗེ་སེམས་དཔའི་བསྒོམ་བཟླས་དང། ཚོགས་གསོག་པའི་སྒོ་མཎྜལ་དང། བྱིན་རླབས་འཇུག་པའི་སྒོ་བླ་མའི་རྣལ་འབྱོར་དང་བཞི་གསུངས་ཤིང། རྗེ་ཤེས་རབ་སེང་གེ་ནས་བརྒྱུད་པ་ནི་སེམས་ཅན་ཐམས་ཅད་ཕ་མར་ཤེས་པ་སོགས་ལྟ་ཁྲིད་དྲན་པ་བཞི་ལྡན་དུ་གྲགས་པ་མདོ་སྔགས་གཉིས་ཀ་འདྲེས་པའི་ལྟ་བ་སྐྱོང་ལུགས་ཤིག་ཡིན་ཞིང་འདི་འང་མིང་ཙམ་མ་གཏོགས་དོན་སྔ་མ་དང་འདྲའོ། །དེ་ལ་འོ་ན་རྒྱུ་ཚོགས་དེ་རྣམས་ཀྱི་སྒོ་ནས་སྟོང་ཉིད་རྟོགས་པའི་ལྷག་མཐོང་ཞིག་ང་ཚོའི་རྒྱུད་ལ་སྐྱེད་ནུས་སམ་ཞེ་ན། ང་ཚོས་ཀྱང་ཟབ་མོ་སྟོང་པ་ཉིད་དེ་རྟོགས་ཐུབ་མོད། འོན་ཀྱང་དཀའ་བ་དྲག་པོ་སྤྱད་དགོས་པས་རྟོགས་པ་ཤིན་ཏུ་དཀའ། དཀའ་བ་དེའང་ང་ཚོ་ཁོ་ན་ལ་དཀའ་བ་མ་ཡིན། སངས་རྒྱས་ཞལ་བཞུགས་པའི་དུས་ནའང་གདུལ་བྱ་རྣམས་འདི་ལ་འགོད་པ་ཤིན་ཏུ་དཀའ་བར་གཟིགས་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །ཞེས་སོགས་ཀྱི་ཚིགས་སུ་བཅད་པ་གསུངས་ཏེ།

― GTD003_Page_0546 ―

^{[མ་དཔེ་གཟིགས་ན་འདིར་གནོན།]}

[Full Size]

ཞག་ཞེ་དགུར་ཆོས་མི་གསུངས་པའི་ཚུལ་མཛད་པ་ནི། ཚངས་པ་ཆེན་པོས་ཁྱོད་ཀྱིས་སྔོན་བསྐལ་པ་གྲངས་མེད་པ་མང་པོའི་བར་དུ་བླ་ན་མེད་པའི་བྱང་ཆུབ་བསྒྲུབས་ནས་ད་འགྲོ་བ་ལོང་བ་ཉམ་ཐག་པ་མགོན་མེད་སྐྱབས་མེད་གླིང་དང་དཔུང་གཉེན་མེད་པ་འདི་རྣམས་ཡལ་བར་བོར་ནས་བཏང་སྙོམས་སུ་མཛད་པ་མི་རིགས་པས། གདུལ་བྱ་རྣམས་ལ་བདུད་རྩིའི་སྒོ་མོ་དབྱེ་ཞིང་ཆོས་ཀྱི་སྒྲོན་མེ་སྦར་དུ་གསོལ་ཞེས་གསོལ་བ་ཡང་ཡང་བཏབ་ནས་གསུངས་པ་ཡིན་ལ། རྩ་ཤེས་ལས་ཀྱང་། དེ་ཕྱིར་ཞན་པའི་ཆོས་འདི་ཡི། །གཏིང་རྟོགས་དཀའ་བར་མཁྱེན་གྱུར་ནས། །ཐུབ་པའི་ཐུགས་ནི་ཆོས་བསྟན་ལས། །རབ་ཏུ་ལོག་པར་གྱུར་པ་ཡིན། །ཞེས་གསུངས་སོ། །རང་རེ་ཆོས་ཟབ་མོ་སྟོང་ཉིད་ཀྱི་དོན་ལྟ་ཞོག །ལུས་འདི་མི་གཙང་བའི་རང་བཞིན་ཅན་ཡིན་པར་མངོན་སུམ་གྱིས་གྲུབ་པར་འདུག་ཀྱང་ད་དུང་རྟོགས་མི་ནུས་ཤིང། སྐྱེས་བུ་ཆུང་ངུའི་སྐབས་ཀྱི་མི་རྟག་པ་དེའང་རྟོགས་མི་ནུས་ན། མི་རྟག་པ་ཕྲ་མོ་རྟོགས་པའི་གོ་སྐབས་ག་ལ་ཡོད། དེས་ན་སྟོང་ཉིད་རྟོགས་པའི་ཐབས་ལ་རིམ་གྱིས་སློབ་དགོས་པས་དང་པོར་བསམ་ཚུལ་ནི། འཇུག་པ་ལས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ཞེས་སོགས་ལྟར། འཁོར་བའི་གནས་སུ་སྡུག་བསྔལ་སྣ་ཚོགས་ལ་སྦྱོར་བར་བྱེད་མཁན་སུ་ཡིན་སྙམ་ན། སེམས་ཉིད་ཀྱིས་ནི་སེམས་ཅན་འཇིག་རྟེན་དང། །ཞེས་སོགས་ལྟར། སེམས་ཀྱིས་བྱས་པ་ཡིན་ལ་སེམས་དེའང་ཉོན་མོངས་པའི་དབང་དུ་སོང་བ་ཡིན་པས།

― GTD003_Page_0547 ―

^{[མ་དཔེ་གཟིགས་ན་འདིར་གནོན།]}

[Full Size]

ཉེས་པ་ཐམས་ཅད་ཀྱི་རྩ་བ་བདག་འཛིན་འདི་ལ་དགྲར་བལྟས་ཏེ་མི་ལུས་ཁྱད་པར་ཅན་ཐོབ་པའི་དུས་འདིར་འདི་ལས་ཐར་པ་ཞིག་མ་བྱས་པའི་ཐབས་མི་འདུག་སྙམ་དུ་སྐྱོ་ཤས་ཤུགས་དྲག་པོ་བསྐྱེད་ནས་བསྒོམ་པ་མ་གཏོགས་དགའ་དགའི་ཉམས་ལྟ་བུའི་ངང་ནས་བྱས་པས་གང་ཡང་མི་ཡོང་བས། སྙིང་ནང་གི་དགྲ་བོ་འདི་དྲུངས་འབྱིན་དགོས། དེ་ཡང་རྣམ་འགྲེལ་ལས། འདི་ཡུལ་སུན་ཕྱུང་མེད་པར་ནི། །ཞེས་སོགས་ལྟར་བདེན་འཛིན་དེའི་ཞེན་ཡུལ་ཡོད་མེད་བརྟགས་ཏེ་ཡོད་ན་བལྟས་ཀྱིན་གསལ་དུ་འགྲོ་བས་གླགས་མི་ཁེལ། གལ་ཏེ་མེད་བཞིན་དུ་ང་མ་རིག་པས་བསྒྲིབས་ནས་ཡོད་པར་འཁྲུལ་བ་ཡིན་ན། རིགས་པས་དཔྱད་དེ་བློ་ངན་འདིའི་ཡུལ་སུན་འབྱིན་དགོས། དེ་ལ་དགག་བྱ་ངེས་པའི་གནད། ཁྱབ་པ་ངེས་པའི་གནད་སོགས་བཞི་གསུངས་པ་ལས། དང་པོར་དགག་བྱ་ངོས་ཟིན་པ་གལ་ཆེ། དེའང་བླ་མ་དམ་པ་གཅིག་ནས་གཅིག་ཏུ་བརྒྱུད་པ། རྒྱལ་བའི་བཀའ་དང་མཐུན་པ། ཤིང་རྟ་ཆེན་པོའི་ལུང་རིགས་ཀྱིས་ཐོན་པ་ཞིག་བསྟེན་པ་མ་གཏོགས། རི་བོང་ཅལ་རྒྱུག་མི་རུང། དགག་བྱ་ངོས་འཛིན་ཚུལ་ནི། འཇུག་པ་ལས། རང་ཁྱིམ་རྩིག་ཕུག་སྦྲུལ་གནས་མཐོང་བཞིན་དུ། །ཞེས་སོགས་ལྟར། སྦྲུལ་གྱི་འཇིགས་པ་སེལ་བ་ལ་དེ་ན་སྦྲུལ་མེད་པར་ཤེས་པའམ་ཡང་ན་འདོར་དགོས་ཏེ། གཞན་གྱིས་འཇིགས་པ་སེལ་མི་ནུས་པ་བཞིན་དུ། རང་གི་མཎྜལ་ཁང་པ་གཞན་ཞིག་ཏུ་ལུས་ཡོད་སྙམ་པའི་ཚེ་སེམས་ངོ་

― GTD003_Page_0548 ―

^{[མ་དཔེ་གཟིགས་ན་འདིར་གནོན།]}

[Full Size]

ནའང་དེ་ན་ཀོར་རེ་ཡོད་པའི་ཉམས་འཆར་བ་ན། བཙལ་བ་ན་མེད་པར་ཐག་ཆོད་པ་ལྟར། དགག་བྱ་བཙལ་ནས་མེད་པར་ཤེས་དགོས་པ་ཡིན། ཚོལ་ལུགས་མ་ཤེས་ན། འདུལ་བ་ལུང་ལས་གསུངས་པ་ལྟར། སྔོན་རྐུན་མ་ཞིག་གིས་མིའི་ལྷམ་བརྐུས་ནས་མགོ་ལ་གྱོན་ཏེ་བདག་པོས་བཙལ་བའི་ཚེ་ཁྱོད་ལ་ལྷམ་ཡོད་དོགས་མེད། ཡོད་ན་ང་འདྲ་བོ་བྱས་ནས་མགོ་ལ་གྱོན་དགོས་རྒྱུ་རེད་ཅེས་བཤད་ཀྱང་ད་དུང་མ་ཤེས་པར་བཙལ་བ་བཞིན་དུ་ངལ་བ་འབྲས་མེད་དུ་འགྱུར་བས། འཇིག་རྟེན་ན་རྐུན་མ་ནགས་ལ་སོང་བའི་རྗེས་སྤང་ལ་གཅོད་པའི་དཔེར་སོང་བ་ཡིན། དེའི་རྒྱུ་མཚན་གྱིས་བདེན་པར་གྲུབ་ན་འདི་འདྲ་ཞིག་ཏུ་གྲུབ་དགོས་རྒྱུ་རེད་སྙམ་དུ་སེམས་ཐོག་ནས་རྣམ་པ་འཆར་རྒྱུ་ཞིག་མ་བྱུང་ན། འཁོར་བའི་རྩ་བ་འཇིག་ལྟ་ཡིན། འཇིག་ལྟ་དེས་ངའོ་སྙམ་དུ་བཟུང་བ་ཡིན་ཞེས་པ་ཙམ་གྱིས་ལྟ་བ་ལ་གང་ཡང་མི་ཕན་ཏེ། མཁས་གྲུབ་ཐམས་ཅད་མཁྱེན་པས་རྐུན་མ་ངོས་འཛིན་པའི་ཚེ་བཙུན་པ་ཞིག་ཡིན་བྱས་པ་ལ་གང་འདྲ་ཞིག་ཟེར་བྱུང་ཚེ་མཛུབ་མོ་འཛུགས་ཐུབ་པ་ཞིག་དགོས་ཀྱི་བཙུན་པ་མགོ་རིལ་རིལ་ཞིག་བྱས་པས་མི་ཕན་པ་ལྟ་བུ་ཡིན་གསུངས། འདི་ལ་ཕྱག་ཆེན་གྱི་ཁྲིད་སོགས་གཏོང་ཚེ་བླ་མ་གོང་མ་ཚོའི་ཕྱག་སྲོལ་ལ་དགག་བྱ་ངོས་འཛིན་གྱི་ཁྲིད་ཕོག་ནས་དེའི་དགོང་མོ་བསྒོམ་དུ་བཅུག་སྟེ་ཕྱི་ཉིན་ཉམས་སྣང་འདྲི་བའི་ཕྱག་སྲོལ་ཡོད། དེ་ཙམ་ན་སྣང་ཚུལ་སྣ་ཚོགས་པ་ཡོང་སྟེ་ལ་ལ་ང་ཟེར་བ་དེ་མགོ་ནང་ན་མཁྲེགས་པོ་རིལ་རིལ་ཞིག་འདུག་ཟེར་བ་དེ་བསམ་མནོ་གཏོང་

― GTD003_Page_0549 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཚེ་མིག་ཧ་ཅང་བཙུམ་དྲགས་པས་མགོའི་ནང་ལ་ན་རིལ་ལི་བ་ཞིག་ཡོང་བ་ཡིན། ལ་ལ་སྙིང་ནང་ན་ཡར་གཟུངས་གཞུག་ཕུལ་བ་འདྲ་བ་ཞིག་འདུག་ཟེར་བ་དེ་བསྒྲིམ་དྲགས་པས་རླུང་ཡར་འཕྱུར་ཏེ་སྟོད་འཚང་བ་ཡིན། ལ་ལ་ནག་ཐོམ་མེ་བ་ཞིག་འདུག་ཟེར་བ་དེ་མིག་བཙུམ་པའི་སྐྱོན་གྱིས་མུན་པ་སྣང་བ་ཡིན། ལ་ལ་ཕུང་པོ་འདི་རང་ང་རེད་ཟེར་བ་དེ་སྔ་མ་ཚོ་ལས་དགའ་འང། ང་ངོས་ཟིན་པ་གཏན་མིན་ཏེ། འཇུག་པར། དེ་ཕྱིར་ཕུང་པོ་འདུས་ཙམ་བདག་མ་ཡིན། །ཞེས་ཕུང་པོ་བདག་མིན་པར་ཐག་བཅད་དེ་གསུང་ཞིང་ཕུང་པོ་གདགས་གཞི་ཡིན་ལ་གདགས་གཞི་ཡིན་ན་བཏགས་ཆོས་སུ་འགལ་བའི་ཕྱིར་ན། འདི་ལ་ང་ཡིན་པ་ཞིག་ངོས་ཟིན་དགོས་སོ། །དེ་ལའང་དགག་བྱ་རགས་པ་ཚོ་སྔར་འགོག་དགོས་ཏེ། རིན་ཆེན་འཕྲེང་བ་ལས། བསོད་ནམས་མིན་པ་དང་པོར་བཟློག །ཅེས་པ་ནས། ཐ་མར་ལྟ་ཞིག་ཀུན་བཟློག་པ། །ཞེས་གསུངས་སོ། །དེ་ལ་རྟག་གཅིག་རང་དབང་ཅན་གྱི་བདག་འདོད་ཚུལ་ནི། དེ་རིང་གི་དངོས་པོ་འདི་རྣམས་ཁ་སང་གི་དེ་མ་ཡིན་པ་ཙམ་གཞན་སྡེའི་མཁས་པ་ཚོས་ཤེས་ཀྱང་སྒྲ་ལྟ་བུ་ནམ་མཁའི་ཡོན་ཏན་ཡིན་ལ། ནམ་མཁའ་རྟག་ཏུ་འགྱུར་བ་མེད་པས་སྒྲ་ཡང་རྐྱེན་དང་ཕྲད་ཚེ་གསལ་བར་འགྱུར་བ་མ་གཏོགས་རྟག་ཏུ་ནམ་མཁའ་དང་འདྲེས་ནས་སྡོད་པར་འདོད་ལ། དེ་བཞིན་དུ་སྐྱེ་འཆི་ལ་སོགས་པ་འདི་ཐམས་ཅད་རྩ་བའི་རང་བཞིན་དེའི་རྣམ་འགྱུར་ཡིན་

― GTD003_Page_0550 ―

^{[མ་དཔེ་གཟིགས་ན་འདིར་གནོན།]}

[Full Size]

པས། རྟག་ཏུ་ཐམས་ཅད་དེའི་ངོ་བོར་བག་ལ་ཞ་བའི་ཚུལ་གྱིས་ཡོད་པ་ལ་རྐྱེན་གྱི་དབང་གིས་སྐབས་སྐབས་སུ་གསལ་བར་འདོད་དོ། །རང་ཅག་རྣམས་ལ་ཁ་སང་གི་མི་དེ། དེ་རིང་གི་མི་འདི་ཡིན་སྙམ་པ་ངང་གིས་འབྱུང་བས། དེ་མངོན་པ་མཛོད་སོགས་ལས་སྐྱེ་གནས་འཇིག་གསུམ་གྲུབ་བདེ་རྫས་གཅིག་ཏུ་གསུངས་པའི་རིགས་པ་རྣམས་ཀྱིས་འགོག་དགོས། རང་རྐྱ་ཐུབ་པའི་རྫས་ཡོད་དུ་འཛིན་ཚུལ་འདི་རྣམ་འགྲེལ་རང་ལ་ཤིན་ཏུ་གསལ་ཞིང། དེའང་ང་དེ་ཕུང་པོ་ལ་དབང་སྒྱུར་བ་པོར་འཛིན་པ་ཡིན་ལ། ལུས་ལ་དབང་སྒྱུར་བ་པོར་བཟུང་བ་གང་གིས་ཤེས་ན། ལུས་གཅོང་ནད་ཅན་ཞིག་ལ་གཟུགས་ཕུང་ནད་མེད་པ་ཞིག་གིས་ཁྱོད་ཀྱི་ལུས་ང་དང་ཨི་བརྗེ་ཟེར་ན། བརྗེ་འདོད་ངེས་པར་སྐྱེ་སྟེ་ཚོང་བའི་ཚོང་ཟོག་ལྟར་སྡུག་པོ་ཕར་བྱིན་ནས་བཟང་པོ་ལེན་པར་འདོད་པ་དེ་དབང་བྱར་བཟུང་བའི་རྟགས་ཡིན། དེ་བཞིན་དུ་སེམས་ཀྱང་དཔེར་ན་མི་བློ་རྟུལ་པོ་ཞིག་ལ་བལྟས་པ་ཙམ་གྱིས་ལམ་ལམ་ཤེས་པའི་ཤེས་རབ་ཅན་ཞིག་གིས་དེ་ཟེར་བྱུང་ཚེ། བརྗེ་འདོད་སྐྱེ་བའང་དབང་བྱའི་རྫས་ལྟ་བུ་བཟུང་བའི་རྟགས་ཡིན་ནོ། །དེ་ལྟ་བུའི་བདག་མེད་རགས་པ་བྱེ་མདོའི་ལུགས་ཀྱི་དེ་ཙམ་རེ་ཤེས་རྒྱུ་བྱུང་ནའང་འགངས་ཤིན་ཏུ་ཆེ། ༈ དེ་ནས་སེམས་ཙམ་པའི་ཕྱི་དོན་མེད་པར་བཤད་པ་ཁས་ལེན་མི་ལེན་གང་ལྟར་ཡང་ཕྱི་རོལ་དོན་གྱི་ངོས་ནས་བདེན་པར་གྲུབ་རྒྱུ་མེད་པར་བཤད་པ་འདི་གནད་ཤིན་ཏུ་ཆེ་བས་རྗེས་ཀྱང་འདི་ལ་བསྔགས་བརྗོད་རྒྱ་ཆེན་པོ་མཛད་དོ། །སེམས་ཙམ་པའི་ཕྱི་དོན་མི་འདོད་

― GTD003_Page_0551 ―

^{[མ་དཔེ་གཟིགས་ན་འདིར་གནོན།]}

[Full Size]

ལུགས་ནི། ཡུལ་ཐམས་ཅད་ཀུན་གཞིའི་སྟེང་གི་བག་ཆགས་སྨིན་པའི་ཆ་ཙམ་མ་གཏོགས་དོན་གྱི་ངོས་ནས་གྲུབ་པ་གང་ཡང་མེད་བྱས་ཙ་ན་དོན་སྨྲས་ཀྱང་བྱ་ཐབས་མ་རྙེད་ནས་ཀ་བ་ལྟ་བུ་ལ་ལག་པས་འཇུས་ཏེ་འདི་ཅི་ཡིན་ཟེར་ན། འདི་ནི་བརྗོད་དུ་མེད་པའི་དངོས་པོ་ཡིན་ཟེར། དེའི་དོན་ནི་ཕྱི་ན་ཡོད་ཡོད་ལྟར་སྣང་ཡང་ནང་སེམས་ཀྱི་བདག་ཉིད་ལས་ལོགས་སུ་བརྗོད་དུ་མེད་པ་ཡིན། འོ་ན་ང་ཚོའི་སྐྱབས་གནས་སངས་རྒྱས་བཅོམ་ལྡན་འདས་ཀྱང་ང་ཚོའི་སེམས་ཀྱི་བདག་ཉིད་དུ་འདོད་དགོས་པར་འདུག་པས་དེ་འདྲ་མི་རུང་སྙམ་ནས་སངས་རྒྱས་དང། ཡང་དམྱལ་བའི་སྡུག་བསྔལ་སོགས་གཞན་རྒྱུད་ཀྱི་ཆོས་རྣམས་རང་རེའི་སེམས་ཀྱི་བདག་ཉིད་དུ་གྲུབ་མི་དགོས་ཞེས་འཆད་པ་ལ། དཔལ་ཆོས་ཀྱི་གྲགས་པས་རྒྱུད་གཞན་གྲུབ་པ་དམིགས་ཀྱིས་བསལ་ནས་མཛད་པ་ཡིན། སེམས་ཙམ་འདོད་ཚུལ་འདིའི་གནད་བསྡུས་ན་སྔོན་འཛིན་མིག་ཤེས་སོགས་བློ་གང་དང་གང་ལ་ཡུལ་སྣང་ཙམ་དེ་ཀ་ཤེས་པ་དེའི་ངོ་བོར་སྒྲུབ་འདོད་པ་ཡིན་ཞིང། སེམས་ཙམ་གྱི་ལྟ་བ་འདི་ལ་བརྟེན་ནས་ཀྱང་ཤཱན་ཏི་བ་སོགས་གྲུབ་ཆེན་མང་དུ་བྱུང་བས་གནད་ཤིན་ཏུ་ཆེའོ། །༈ དེ་ནས་དབུ་མའི་ལྟ་བ་མཐར་ཐུག་གི་དགག་བྱ་ངོས་འཛིན་པ་ནི། བཞི་བརྒྱ་པའི་འགྲེལ་བར་རྟོག་པ་ཡོད་པ་ཁོ་ནས་ཡོད་པ་ཉིད་དང། ཞེས་སོགས་ཀྱིས་བཤད་པའི་དགག་བྱ་དེ་ཉིད་གང་ཟག་དང་ཆོས་ལ་སྦྱར་བའི་སྟོང་ཉིད་ཙམ་མ་གཏོགས་དགག་བྱ་ལ་ཕྲ་

― GTD003_Page_0552 ―

^{[མ་དཔེ་གཟིགས་ན་འདིར་གནོན།]}

[Full Size]

རགས་མེད་ཀྱང་དམིགས་པའི་གནད་ཀྱིས་བློ་ལ་འཆར་དཀའ་སླ་ཡོད་དོ། །འཛིན་པ་གཉིས་ཀྱི་སྐྱེ་རིམ་ཡང། རིན་ཆེན་ཕྲེང་བ་ལས། ཇི་སྲིད་ཕུང་པོ་འཛིན་ཡོད་པ། །ཞེས་སོགས་ལྟར། ཕུང་པོའི་རང་བཞིན་གྲུབ་པར་འཛིན་པའི་ཆོས་ཀྱི་བདག་འཛིན་འདིས་གཞི་བྱས་ནས་གང་ཟག་གི་བདག་འཛིན་སྐྱེ་བ་ཡིན། དེའི་རྒྱུ་མཚན་གྱིས་ཕུང་པོ་ཁོ་རང་བདག་མ་ཡིན་ཀྱང་བདག་གི་འདོགས་གཞི་ཡིན་ལ། བདག་ཀྱང་གཞི་ཕུང་པོ་ལྔ་པོ་དེ་ལ་ཕར་བཏགས་ཙམ་གྱི་བཏགས་ཡོད་མིང་རྐྱང་ཙམ་ཞིག་ཡིན་པར་འཇུག་ཊཱིཀ་ཆེན་མོར་གསུངས་སོ། །དེ་ལ་བཏགས་ཙམ་ཡིན་པ་དེ་དཔེ་ཇི་ལྟ་བུ་ཡིན་ན། རབ་འབྱམས་པ་ཟེར་བ་ཚོའང་བུ་ཚ་ཆུང་ངུའི་དུས་ན་རབ་འབྱམས་པ་མི་ཟེར། ཆོས་སྒོར་ཞུགས་སློབ་གཉེར་བྱས། བྱ་བ་མང་པོ་ཞིག་བྱས་ནས་མིང་ལ་རབ་འབྱམས་པ་བཏགས་པ་དང། མི་ཚོས་ཀྱང་རབ་འབྱམས་པ་ཟེར། ཁོ་རང་ལའང་ང་རབ་འབྱམས་པ་ཡིན་སྙམ་པ་སྐྱེ་སྟེ་འདི་ལ་བླ་མ་བྱམས་པའི་གསུང་ལས། ང་སྔ་མོ་ལྷ་རམས་པ་བྱས་ཚར་ཙ་ན། ང་སེ་རའི་ལྷ་རམས་པ་ཡིན་སྙམ་ང་རྒྱལ་ཆེན་པོ་ཡོད། དེ་ནས་པཎ་ཆེན་ལ་མཇལ་ཕྱིན་ཚེ། མི་ཚོས་ཁྱེད་རང་གནས་སྐོར་བ་ཡིན་ན་འདིར་སྡོད་ཟེར་སྙིང་རྗེ་ནས་གནས་ཚང་རེ་གཏོང་བ་ཙམ་མ་གཏོགས་ལྷ་རམས་པའི་མིང་ཡང་མི་འདུག་གསུངས། དེ་བཞིན་དུ་ང་ཟེར་རྒྱུ་ཕུང་པོ་ལ་ལྟོས་ཏེ་ཕར་བཏགས་པ་མ་གཏོགས། ཁོ་རང་གི་ངོས་ནས་ཚུར་བཏོན་ཡོང་རྒྱུ་མེད། འདི་ལའང་ལྟོས་ནས་གྲུབ་པ་དང་བརྟེན་ནས་བཏགས་པ་

― GTD003_Page_0553 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་བཤད་པའི་ཕྱི་མ་ཕྲ་ཤོས་ཡིན་ཏེ། ཆོ་ག་རྣམས་སུའང་བརྟེན་ནས་བཏགས་པ་ཡིན་པའི་ཕྱིར་ཞེས་འབྱུང་ངོ་། །འདི་ལ་མཁས་གྲུབ་ནོར་བཟང་རྒྱ་མཚོས་གཞི་གྲུབ་ན་འདུས་བྱས་ཡིན་པས་ཁྱབ་སྟེ། རྟེན་འབྱུང་ཡིན་པས་ཁྱབ་པའི་ཕྱིར། རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །ཞེས་སོགས་གསུངས། འདིར་གསུངས་པའི་ལྟོས་གྲུབ་ཀྱི་དོན་ལའང་དངོས་སྨྲ་བས་སྔ་ཕྱི་བ་དགོས་པར་འདོད་ཀྱང། འདིར་ནི་རྩ་ཤེས་ལས། ཤེས་པ་མེད་ན་ཤེས་བྱ་མེད། །ཤེས་བྱ་མེད་ན་ཤེས་པ་མེད། །ཅེས་དུས་མཉམ་པ་ལ་ལྟོས་གྲུབ་གསུངས་སོ། །རྟེན་འབྲེལ་གྱི་གནད་འདི་ཤེས་ན་སྟོང་པ་གོ་བ་ལ་ཚེགས་མེད་དེ། གྲུབ་པའི་དབང་ཕྱུག་བློ་བཟང་རྣམ་རྒྱལ་གྱིས་ཆོས་གོས་ཀྱི་གྲྭ་ལ་བརྟེན་ནས་སྟོང་ཉིད་རྟོགས་པ་ཡིན། དེའང་དཔེར་ན་སྔ་མོ་བཀྲ་ཤིས་ལྷུན་པོར་མཁའ་འགྲོ་མ་ཡིན་ཟེར་བའི་སྨྱོན་མ་འདྲ་བ་ཞིག་བྱུང་སྟེ། གྲྭ་པ་རྣམས་ཀྱིས་ཕྱི་དྲོའི་ཁ་ཟས་ཟ་བ་མཐོང་ནས་དགོན་པའི་མཐར་སྐད་བཏོན་ཏེ། པཎ་ཆེན་གྱིས་གསན་པ་བྱས་ནས། ལྷན་པ་ཕྲེད་སླན་ཞིག་མ་ཡིན་པ། དགེ་ཚུལ་སློང་གཉིས་ལ་ཁྱད་པར་མི་འདུག་གོ་ཟེར་བ་ལྟར་སྣམ་བུ་སེར་པོ་ཞིག་ལྷན་པ་མང་པོ་བྱས་པ་ན་ངའི་ཆོས་གོས་སྙམ་ཁོའི་ངོས་ནས་ཚུར་ལིང་ངེ་གྲུབ་པ་འདྲ་བ་ཞིག་འཆར་ཡང་བློས་བཟོས་པ་ཡིན། ཁོའི་ངོས་ནས་གྲུབ་ན་ཐམས་ཅད་ལ་དེ་འདྲ་འབྱུང་དགོས་རྒྱུ་ལ་ང་ཚོ་རྒྱུས་ཡོད་ཚོ་མ་གཏོགས། རྒྱ་མི་ཆོས་གོས་ཀྱི་

― GTD003_Page_0554 ―

^{[མ་དཔེ་གཟིགས་ན་འདིར་གནོན།]}

[Full Size]

མིང་ཙམ་ཡང་མི་ཤེས་པ་ཞིག་ལ་བསྟན་ན་དེ་འདྲ་གང་ཡང་སྐྱེས་མི་ཡོང་བས། དེ་འདྲའི་རིགས་པའི་སྒོ་དུ་མ་ནས་བསམ་དགོས། སྔོན་རྒྱུད་པ་འདི་ལ་གྲུབ་པ་ཐོབ་པ་མང་པོ་ཡོང་བས་དེ་འདྲ་ཞིག་གིས་དགེ་བཤེས་ཤིག་ཀ་བ་ལ་བསྙེལ་ནས་ཡོད་པའི་དྲུང་དུ་ཡོང་སྟེ་ང་ལ་ལྟ་ཁྲིད་ཅིག་གནང་དགོས་ཞུས་པར། དགེ་བཤེས་དེས་རྒྱབ་ཀྱི་ཀ་བ་ལ་ཕྱིར་མགོ་རྡེག་རྡེག་བྱས་ནས་རང་རྒྱུད་པ་ཟེར་བ་དེས་འདིའི་སྟེང་ནས་ཀ་བ་རྙེད་རྒྱུ་ཡོད་ཟེར་བ་རེད། ཐལ་འགྱུར་བ་ཟེར་བ་དེས་འདིའི་སྟེང་ནས་རྙེད་རྒྱུ་ཅང་མེད་ཟེར་བ་རེད། ཡིན་ནའང་ངས་ལྟ་བ་ཤེས་ཀྱི་མེད། གཙང་ན་པཎ་ཆེན་བློ་བཟང་ཆོས་རྒྱན་གྱི་སློབ་མ་དྲུང་པ་རྒྱལ་ཚབ་པ་བྱ་བ་ཡོད་པ་རེད། ཁྱེད་རང་དེའི་རྩར་རྒྱུག་གསུང་བ་ལྟར་ཁོང་གིས་ཕྱིན་ནས་ལྟ་ཁྲིད་ཞུས་པས། དྲུང་པའི་ཕྱག་ལེན་ལ་དགག་བྱ་ངོས་འཛིན་གྱི་ཁྲིད་ཕོག་ནས་ཞག་བདུན་སྒོམ་བཅུག་སྟེ་ཉམས་རྟོགས་འབུལ་དགོས་ལ། ཞག་བདུན་ན་ཡོང་མཁན་མ་བྱུང་བ་དང་བླ་མས་གསུངས་ནས། ཨཻ་དགའ་མ་བཟང་ཁོ་གཡང་ལ་མཆོངས་ཡོང་གསུངས་ནས་གྲྭ་པ་གཉིས་མངགས་པས་ཁོ་བྲག་གི་ཕུག་རང་ལ་འཐམ་ནས་བསྡད་འདུག་ཟེར། བླ་མའི་རྩར་ཤོག་བྱས་པས་ང་སྐྲག་གི་ཟེར་ཁོང་གཉིས་ཀྱིས་བསྐྱོར་ནས་བླ་མའི་རྩར་འོང་བ་དང། བླ་མས་ཐ་སྙད་པའི་འཇོག་ཚུལ་གསུངས་པས་དྲག་པ་དང། རྗེ་རིན་པོ་ཆེས་ཆོས་སྡིངས་སུ་ལྟ་ཁྲིད་གནང་བའི་ཚེ། རྗེ་ཤེས་རབ་སེང་གེས་ལྟ་བ་རྟོགས་པ་ན་འཇིགས་སྣང་བྱུང་སྟེ་ཕྱག་གིས་ན་བཟའི་གོང་བར་འཐམ་པ་དང།

― GTD003_Page_0555 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེས་མཁྱེན་ནས་ཐུགས་མཉེས་མཉེས་མཛད་དེ། སྣར་ཐང་པས་ཀུན་རྫོབ་གོང་བ་ལ་བཞག་པ་རེད་གསུངས་ཏེ་སྟོང་པ་རྟེན་འབྲེལ་དུ་ཤར་བའི་དོན་ཡིན། དེའང་དབང་པོ་རྣོ་རྟུལ་གྱི་ཁྱད་ཀྱིས་རྟུལ་པོ་ལ་འཇིགས་ཆུམ་པ་འབྱུང་ཞིང། སྔོན་ནས་གོམས་པ་བསོད་ནམས་ཀྱི་ཤུགས་ཆེ་བའི་དབང་རྣོན་རྣམས་ལ་དབུལ་པོས་གཏེར་རྙེད་པ་ལྟ་བུའི་དགའ་སྤྲོ། དེའི་ཚེ་ནའང་སྤྱོད་འཇུག་ལས། བཏགས་པའི་དངོས་ལ་མ་རེག་པར། །ཞེས་སོགས་ལྟར། དགག་བྱ་ངོས་ཟིན་པའི་སྣང་ཚུལ་དེ་མ་ཤོར་བའི་ངང་ནས་དེ་ལ་གཞི་བྱས་ཏེ་གཅིག་དུ་བྲལ་སོགས་ཀྱིས་དཔྱད་པ་བྱེད་པ་མ་གཏོགས་སྣང་ཚུལ་ཤོར་ནས་དཔྱད་ན་ཀུན་རྫོབ་ལ་དཔྱད་པ་ཐལ་བའི་སྐྱོན་དུ་འགྱུར་ཏེ། འཇུག་པ་ལས། ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་དཔྱད་ཉེས་པས་ཆད་མཐར་འགྱུར་རོ། །ཡང་བུམ་པའི་མཆུའང་བུམ་པ་མ་ཡིན། ལྟོ་བའང་མ་ཡིན་ཟེར་བ་དེ་ནི་ཐ་སྙད་བཤིག་པའི་སྟོང་པ་བློས་བྱས་ཉི་ཚེ་བའི་སྟོང་པ་ཞེས་པ་དེ་ཡིན་ཞིང། དེ་ཙམ་གསུང་རབ་ལ་མ་སྦྱངས་པ་ཚོས་ཤེས་སླ་བས་དེ་འདྲ་མི་རུང། དེར་མ་ཟད་བྱེ་མདོ་ཚོས་ཀྱང་བུམ་པ་བཏགས་ཡོད་ཡིན་ཟེར་མོད་ཀྱང་འཇུག་ཊཱིཀ་ཆེན་མོར་གསུངས་པ་ལྟར་འདི་བའི་བཏགས་ཡོད་ཀྱི་ཕྱོགས་ནའང་མེད་དོ། །དེ་ནས་རིགས་པས་འགོག་ལུགས་ལ་བདག་ཕུང་གཅིག་མ་ཡིན་པ་ལུས་བསྲེག་ཀྱང་བདག་ཕྱི་མར་འགྲོ་བའི་རགས་པས་ཀྱང་འགྲུབ་པས་གོ་སླ་ལ། ཐ་དད་འགོག་ཚུལ་འཇུག་

― GTD003_Page_0556 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལས། གང་དག་རང་མཚན་ཉིད་ཀྱིས་སོ་སོ་བ། །ཞེས་སོགས་ལྟར། སྤྱིར་ང་དང་ཕུང་པོ་ཐ་དད་ཙམ་ཞིག་ཡིན་མོད་ཀྱང། ང་ཚོའི་བློ་ལ་ང་དང་ངའི་ཞེས་ཐ་དད་དུ་སྣང་བའི་སྣང་ཚུལ་འདི་ལྟར་མ་གྲུབ་པས་སེམས་ཀྱི་སྣང་ཚུལ་དང། འཇིག་རྟེན་གྱི་ཐ་སྙད་གཉིས་འདྲེས་ན་བློ་ལ་འཛིང་སྟེ་འཇོག་མི་ཤེས་པས་སོ་སོར་འབྱེད་དགོས། གལ་ཏེ་བློ་ལ་ཐ་དད་དུ་སྣང་བ་འདི་ལྟར་གྲུབ་ན་བདེན་པའི་ཐ་དད་ཡིན་པས་རྣམ་པ་ཀུན་ནས་འབྲེལ་མེད་ཀྱི་ཐ་དད་དུ་འགྱུར་དགོས། རིགས་པ་དེ་དག་གིས་དཔྱད་ནས་རང་གི་ངོ་བོས་མ་གྲུབ་པར་ངེས་པ་ན། དེ་དང་པོ་རིབ་ཙམ་རིབ་ཙམ་རེ་མཉམ་པར་འཇོག་པ་མ་གཏོགས་རྒྱུན་རིང་ན་སྐད་ཅིག་གཉིས་པ་ནས་ནམ་མཁའ་སྟོང་སང་ལྟ་བུའི་སྣང་བར་འགྱུར་ཏེ། ཀུན་རྫོབ་ཀྱི་སྣང་བ་ཡིན་གྱི་གནས་ལུགས་བསྒོམ་པར་མི་འགྲོ་བས་ཏིང་ངེ་འཛིན་དེ་འདྲ་ལ་ཇི་ཙམ་གནས་དགོས་པ་མེད་དེ། དཔེར་ན་སྟོན་པའི་དུས་ན་ལྷག་སྤྱོད་ཀྱིས་སྐྲ་རིང་པོ་བཞག་སྟེ་ཏིང་འཛིན་བསྒོམ་ནས་སྟོན་པ་ཟིལ་གྱིས་གནོན་འདོད་དེ་དབུགས་བཟུང་ནས། ལོ་བཅུ་གཉིས་ཏིང་ངེ་འཛིན་བསྒོམས་ཏེ་ལངས་པ་ན་སྐྲ་ཙི་ཙིས་བཏོག་ནས་མགོ་ཟངས་རྡོག་ལྟར་སོང་བ་མཐོང་བས་ཁྲོས་ནས་ཁྲག་སྐྱུག་སྟེ་ཤི་ནས་དམྱལ་བར་སྐྱེས་པར་མདོ་ཏིང་ངེ་འཛིན་རྒྱལ་པོར་གསུངས་པ་ལྟ་བུ་ཡིན། ལྟ་བ་ཕྱིས་སྐྱོང་བའི་ཚེའང་དབང་རྣོན་གྱིས་དྲན་ཙམ་རེ་བྱས་པས་ཆོག་ཀྱང། དབང་རྟུལ་གྱིས་དགག་བྱ་དེ་གྲུབ་ན་འདི་འདྲ་ཡོད་དགོས་རྒྱུ་ལ་སྙམ་དུ་འགོ་ནས་གསལ་བཏབ་སྟེ་བསྒོམ་དགོས། དེའི་རྗེས་ལ་ཆོས་ཀྱི་བདག་མེད་

― GTD003_Page_0557 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒོམ་པ་སླ་སྟེ། བཞི་བརྒྱ་པར། གཅིག་གི་སྟོང་ཉིད་གང་ཡིན་པ། །ཞེས་སོགས་ལྟར། སྟོང་གཞི་སྤོས་ཙམ་ལས་ངོ་བོ་ལ་ཁྱད་མེད། འདིའང་དཔལ་ལྡན་ཟླ་བའི་ལུགས་སྲོལ་ཡིན་གྱི་གྲུབ་མཐའ་གཞན་ཚོའི་བདག་མེད་གཉིས་མི་འདྲ་བས་རིགས་པའང་གཏན་མི་འདྲའོ། །དེ་ལ་འོ་ན་ཆོས་ཀྱི་བདག་མེད་ཅེས་པའི་ཆོས་དེ་གང་ལ་བྱེད་ན། སྤྱིར་ཆོས་ཀྱི་སྐད་དོད་དྷརྨ་ཞེས་པ་གཟུང་བ་ལ་འཇུག་པས་ཡིད་བློ་རྟོག་པའི་སྣང་ཡུལ་ལ་ཆོས་ཀྱི་སྐྱེ་མཆེད་ཅེས་མངོན་པ་མཛོད་སོགས་ནས་བཤད་པ་དང། དྷཱ་ར་ཞེས་པ་འཛིན་པ་ལ་འཇུག་པས་དགེ་བཅུའི་ཚུལ་ཁྲིམས་ཀྱིས་ངན་འགྲོ་ལས་འཛིན་པས་ཆོས་དང། མི་དགེ་བ་ཆོས་མིན་དུ་བཤད་པ་ལྟ་བུ་ཡོད་ཀྱང། འདིར་ང་ཡིར་བྱ་རྒྱུའི་ཕུང་པོ་ལྔ་དང་ང་གཉིས་ཀྱི་ནང་གི་སྔ་མ་ལ་བྱ་དགོས། དེའི་སྟེང་དུ་གནད་བཞི་སོགས་ཀྱིས་གཏན་ལ་འབེབས་ཚུལ་སྔར་བཤད་པ་དང་ཁྱད་མེད། འདི་ལ་དོགས་པ་འདི་ཡོད་དེ་རང་ངོས་ནས་མེད་བྱས་ན་ཆད་མཐར་འགྲོ་ཉེན་འདུག་པས། རྟོག་བཏགས་མ་ཡིན་པར་ཞེས་སྦྱོར་དགོས་སམ་སྙམ་ན། དེ་འདྲ་བྱས་ན་མ་ཡིན་དགག་ཏུ་འགྲོ་ལ། འདིར་ནི་རང་ངོས་ནས་ཡོད་ན་འདི་འདྲ་ཞིག་ཏུ་ཡོད་རྒྱུ་ལ་མི་འདུག་སྙམ་དུ་དགག་བྱ་བཅད་ཙམ་དེ་ཀ་ཁོ་ན་འཆར་དགོས་པས་སྒྲུབ་པ་དངོས་ཤུགས་གང་ལའང་བསྒྲུབ་མི་རུང། འདི་བློ་ལ་མ་ཤོང་བའི་དོལ་བོ་པ་སོགས་ཀྱིས་དཔལ་ལྡན་ཟླ་བ་སོགས་ལ་རང་སྟོང་ངན་པ་དེ་ཞེས་

― GTD003_Page_0558 ―

^{[མ་དཔེ་གཟིགས་ན་འདིར་གནོན།]}

[Full Size]

བཀག་ནས་རང་ལུགས་རྟག་བརྟན་ཐེར་ཟུག་གི་ཆོས་ཉིད་སྒྲུབ་པ་རང་དབང་བ་ཞིག་ཁས་བླངས་པ་འདི་ལྟ་བ་ཐ་ཆད་ཡིན་ནོ། །རང་ཚོས་ཀྱང་མ་ཡིན་དགག་དང་མེད་དགག་ཅེས་ཁ་ན་བའི་བར་ལ་སྨྲས་ཀྱང་གནད་འདི་འདྲ་ཤེས་པ་ལ་མ་ཕན་ན་ནམ་ཡང་དགོས་པ་མ་བྱུང་བ་ཡིན་ནོ། །དེ་ལྟར་གང་ཟག་དང་ཆོས་རང་བཞིན་མེད་པར་ཤེས་པ་དེ་རྒྱལ་སྲས་ཀྱི་ཉམས་ལེན་གྱི་སྐབས་འདིར་བཤད་པ་ཅི་ཡིན། ཉན་རང་ཚོས་ཀྱང་འདི་རྟོགས་པ་མ་ཡིན་ནམ་ཞེ་ན། གནད་འདི་གོ་བ་ལ་རྩ་ཤེ་ཐེག་ཆེན་གྱི་བསྟན་བཅོས་ཡིན་པའི་རྒྱུ་མཚན་གོ་དགོས། དེའང་ཉན་རང་རྣམས་རང་དོན་དུ་ཉོན་མོངས་ཙམ་ཞིག་སྤོང་འདོད་པ་ཡིན་པས། དེ་ལ་གནད་བཞི་ཙམ་དུ་བསྡུས་ནས་བསྒོམ་པས་ཆོག་པ་ཡིན། དེ་ལ་རྩ་ཤེས་ནས་དུས་བརྟགས་པ། སྐྱེ་འགག་བརྟགས་པ། འགྲོ་འོང་བརྟགས་པ། བྱ་བྱེད་བརྟགས་པ་སོགས་ཀྱི་རིགས་པའི་རྣམ་གྲངས་མཐའ་ཡས་པ་དེ་མི་དགོས་ལ། བྱང་སེམས་ཀྱིས་དེ་ཙམ་མ་ཡིན་པར་སེམས་ལ་ཨ་འཐས་སུ་སོང་བའི་གཉིས་སྣང་འཁྲུལ་བའི་བག་ཆགས་འདི་དྲུངས་འབྱིན་པ་ལ། རིགས་པའང་སྒོ་མཐའ་ཡས་པ་ནས་བསམ་དགོས་པས། རྩ་འཇུག་སོགས་ན་རྣམ་གྲངས་མང་པོ་ཞིག་གསུངས་པ་འདི་རྩོད་ཚེ་ལག་པ་བརྡེབ་པའི་ཡན་ལག་ཙམ་ཡིན་གྱི་སྒྲུབ་པ་སྙིང་པོར་བྱེད་པ་ལ་མི་མཁོ་བསམ་མི་རུང། དེ་འདྲའི་དོགས་པ་སྐྱེ་དོགས་ནས་ཟླ་བས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་ཅེས་སོགས་གསུངས་སོ། །དེའི་ཕྱིར་རིགས་པའི་སྒོ་བརྒྱ་ཕྲག་གིས་

― GTD003_Page_0559 ―

^{[མ་དཔེ་གཟིགས་ན་འདིར་གནོན།]}

[Full Size]

དཔྱད་དགོས་ཤིང་དེའང་ཐད་རེ་ཙམ་མ་ཡིན་པར་ཡང་དང་ཡང་དུ་དཔྱོད་དགོས་ཏེ། དཔེར་ན་མཁས་གྲུབ་ཐམས་ཅད་མཁྱེན་པ་དེ་འཁྲུངས་ཙམ་ནས་བློ་གྲོས་ཐོགས་པ་མེད་པས་མཁས་གྲུབ་ལྷ་དབང་བའི་སྐྱེ་བར་གྲགས་ཤིང་མཚན་ཡང་མཁས་གྲུབ་ཅེས་ཐོགས་པ། དེ་དགུང་ལོ་བཅུ་བདུན་གྱི་དུས་ན་ངམ་རིང་དུ་བོད་ཀྱི་མཁས་པ་ཆེན་པོ་བོ་དོང་ཕྱོགས་ལས་རྣམ་རྒྱལ་གྱིས་ས་པཎ་གྱི་རིགས་གཏེར་བཀག་པའི་ཚེ། བྱང་གི་རིགས་ལྡན་གྱི་བརྒྱུད་པའི་རྒྱལ་པོ་རྣམས་ཀྱང་བཞུགས་པའི་སྐབས་ཡིན་པས། དེ་དག་དཔང་པོར་བྱས་ཏེ་བརྩད་པས། བོ་དོང་པས་སྐབས་ཤིག་ན་རྒྱུ་ལས་མ་སྐྱེས་པའི་འདུས་བྱས་ཁས་ལེན་དགོས་པ་བྱུང་ནས་ཁ་སྐྱེངས་ཏེ། དེ་གྲུབ་མཐའི་ནང་འགལ་རེད་གསུངས་ནས་ཁ་སྤུ་འཐོགས་པས་མཁས་གྲུབ་ཀྱིས་རྒྱུ་ལས་མ་སྐྱེས་པའི་འདུས་བྱས་ཡོད་པ་དང། དེ་མདོ་སྡེ་པའི་ནང་འགལ་ཡིན་པ་དང། ཁ་སྤུ་འཐོགས་པའི་ལས་ལ་བརྩོན་པར་གྱིས་ཤིག་གསུངས་པ། ད་ལྟ་སྡེ་བདུན་ཡིད་ཀྱི་མུན་སེལ་ཕལ་ཆེར་དེ་དུས་ཀྱི་རྩོད་ཚུལ་མཁས་པ་རྣམས་ཀྱིས་ཟིན་བྲིས་བྱས་པ་ལ་ཕྱིས་སུ་སྦྱར་བྱང་སོགས་མཛད་པ་ཡིན། སྐུ་ན་ཕྲ་མོའི་དུས་ན་དེ་ལྟ་བུའི་རིགས་པ་ཡོད་པས་གྲུབ་མཐའ་རྒྱ་མཚོའི་ཕ་རོལ་ཏུ་སོན་སྙམ་པ་ཡོད་ཀྱང། རྗེ་དང་མཇལ་བ་ན་བྱེ་མའི་ཆངས་བུ་ལྟར་ཞིག་འགྲོ་བ་ཤ་སྟག་ཏུ་འདུག་ཅེས་མཁས་གྲུབ་རྗེ་རང་ཉིད་ཀྱིས་གསུངས་པ་དང། རྗེ་བཙུན་འཇམ་པའི་དབྱངས་ཀྱིས་ཀྱང་རྗེ་ལ་ཚིམ་མ་སླ་བར་དཔྱད་པ་ཡང་ཡང་གྱིས་

― GTD003_Page_0560 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པས། སྐྱོང་ཚུལ་མཁས་དགོས། དེ་ལྟར་མཉམ་གཞག་ཏུ་བསྐྱང་བས་རང་སྟོབས་ཀྱིས་རྗེས་ཐོབ་ཏུ་སྒྱུ་མ་རྨི་ལམ་སྐྲ་ཤད་ལྟ་བུར་སྣང་བ་འབྱུང་ངོ་། །སྐྲ་ཤད་ནི་འདུལ་བ་ལུང་ལས་རྒན་པོ་ཞིག་ལ་རབ་རིབ་ཞུགས་པས་ཟས་ལ་སྐྲ་ཡོད་པར་འཁྲུལ་པའི་རྐྱེན་གྱིས་སྐྲན་ཞུགས་པ་ལྟ་བུ་ཡིན། དེ་དང་འདྲ་ཚུལ་རྒན་པོ་ལ་སྐྲ་དེ་བློས་ཕར་བཏགས་ཀྱི་བློ་མེད་ཀྱང། དེ་དོན་གྱི་ངོས་ནས་མེད་པ་མངོན་སུམ་གྱིས་གྲུབ་པ་ཡིན་ནོ། །དེ་ལྟར་མཉམ་རྗེས་གཉིས་ཀར་བསྒོམས་པས་དཔྱད་སྟོབས་ཀྱིས་དྲངས་པའི་གནས་ཆ་དང་ཤིན་སྦྱངས་ཁྱད་པར་ཅན་ཐོབ་པ་ན་དྲོད་དུ་འཕོས་པ་ཡིན། འདི་ལ་ཉི་ཁྲི་སོགས་སུ་དྲོ་བ་ཞེས་འབྱུང་སྟེ། རྒྱ་གར་ན་མེ་ལྕགས་མེད་པས་སྐམ་ཤིང་གྱོང་བའི་ཤིང་བེ་ལོ་ཟེར་བ་དེ་འདྲ་གཉིས། དྲུད་ན་མེ་འབྱུང་བའི་སྔ་ལྟས་སུ་དྲོད་སྐྱེ་བ་ལྟར་མཐོང་ལམ་གྱི་མེའི་སྔ་ལྟས་ཡིན་ནོ། །དེ་ནས་རིམ་གྱིས་བསོད་ནམས་ཀྱི་ཚོགས་རླབས་པོ་ཆེ་དང་ཡ་མ་བྲལ་བའི་སྒོ་ནས། ས་སོ་སོའི་ཡོངས་སྦྱོང་གི་མཐུས་གོང་མ་གོང་མར་འཕོས་ཏེ་སངས་རྒྱས་ཀྱི་སའི་བར་དུ་འགྲོ་བ་ཡིན་ནོ། །ཞེས་པ་འདི་ནི་དཔལ་ལྡན་བླ་མ་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ། སྙན་བརྒྱུད་བསྟན་པའི་མངའ་བདག་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་དགེ་འདུན་འདུས་པ་རྒྱ་མཚོར་ཚོགས་ཆོས་སུ་སྩལ་པ་ན། ཉིན་སྔ་ཕྱིར་ཐོར་བུར་གསུང་བ་རྣམས་སོ་སོའི་ཐད་དུ་བསྡུས་ཤིང་ཚིག་བྱིངས་ཞལ་ནས་ཇི་ལྟར་བྱུང་བ་སྒྲ་མ་ཉམས་པར་བྱས་ཏེ། དམ་པ་གང་གི་ཞབས་

― GTD003_Page_0561 ―

^{[མ་དཔེ་གཟིགས་ན་འདིར་གནོན།]}

[Full Size]

རྡུལ་སྤྱི་བོར་ལེན་པའི་བཙུན་པ་ཆོས་འཛིན་པ་དང་སྨྲ་བ་ལ་མི་འཇིགས་པའི་སྤོབས་པ་དགེ་བ་ཅན། ༸དཀོན་མཆོག་བསྟན་པའི་སྒྲོན་མེས་རང་ལོ་ཉེར་བཞི་པ་ལ་ལྷ་ལྡན་སྤྲུལ་པའི་གཙུག་ལག་ཁང་གི་ཉེ་འདབས་སུ་བྲིས་པའོ། །འདིས་ཀྱང་འཇམ་མགོན་བསྟན་པའི་སྙིང་པོ་ཕྱོགས་དུས་ཀུན་ཏུ་རྒྱས་པར་གྱུར་ཅིག། །།

དགེ་ལྡན་ཕྱག་རྒྱ་ཆེན་པོའི་ཁྲིད་ཀྱི་ཟིན་བྲིས།

― GTD003_Page_0563 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་ལྡན་ཕྱག་རྒྱ་ཆེན་པོའི་ཁྲིད་ཀྱི་ཟིན་བྲིས་ཞལ་ལུང་བདུད་རྩིའི་ཐིགས་ཕྲེང་ཞེས་བྱ་བ་བཞུགས་སོ། །

― GTD003_Page_0564 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མཉྫུ་གྷོ་ཥ་ཧ་ས་བཛྲཱ་ཡ། ཆོས་རྣམས་ཀུན་གྱི་རང་བཞིན་ཕྱག་རྒྱ་སྟེ། །དེ་དང་དབྱེར་མེད་ཡེ་ཤེས་ཕྱག་རྒྱ་ཆེ། །དེ་ཡི་རང་མདངས་སྨིན་ལེགས་ཕྱག་རྒྱ་སྟེ། །དེ་དང་མཉམ་སྦྱོར་བདེ་ཆེན་ཕྱག་རྒྱ་ཆེ། །རྣམ་མང་མིང་གི་རྣམ་གྲངས་མཐའ་ཡས་ཀྱང། །ངེས་དོན་དམ་པའི་ངང་དུ་རོ་གཅིག་པར། །སྟོན་མཛད་བླ་མ་མཆོག་གི་ཞབས་པད་ལ། །བཏུད་ནས་ཞལ་ལུང་ནོར་བུའི་ཕྲེང་བ་སྤེལ། །དེའང་འདི་སྐད་ཅེས་བདག་ཅག་གི་སྟོན་པ་ཐུབ་པའི་དབང་པོ་ཉིད་ཀྱིས་དང་པོར་ཐུགས་བསྐྱེད་པ་ནས་བཟུང་སློབ་པའི་སྤྱོད་པ་མཐའ་དག་དང། སངས་རྒྱས་ནས་ཀྱང་སྐུ་གསུང་ཐུགས་ཀྱི་མཛད་པ་ཐམས་ཅད་གཞན་དོན་ཁོ་ན་ལས། རང་དོན་གྱི་འཁྲི་བ་ཅུང་ཟད་ཀྱང་མེད་ལ། གཞན་དོན་སྒྲུབ་པའི་སྒོ་མཆོག་ཏུ་གྱུར་པ་ནི་རྗེ་བླ་མས་གསུངས་པ་ལྟར་གསུང་གི་མཛད་པ་ཡིན་ཞིང། དེའང་མཐའ་ཡས་པའི་ནང་ནས་ཡང་རྩེ་ནི་འཁོར་ལོ་

― GTD003_Page_0565 ―

^{[མ་དཔེ་གཟིགས་ན་འདིར་གནོན།]}

[Full Size]

བར་བ་ཤེར་ཕྱིན་གྱི་མདོ་སྡེ་འདི་ཉིད་ཡིན་པར་གསུང་བའི་རྒྱུ་མཚན་ཡང། དངོས་བསྟན་སྟོང་ཉིད་ཀྱི་རིམ་པ་རིགས་པའི་རྣམ་གྲངས་མཐའ་ཡས་པའི་སྒོ་ནས་སྟོན་པས་བརྗོད་བྱའི་དབང་གིས་ཡིན་ཞིང། སྔགས་ལུགས་ལ་དེ་ཉིད་འཛིན་སྟངས་སུ་བྱས་པའི་བདེ་སྟོང་དབྱེར་མེད་ཀྱི་ཡེ་ཤེས་སྟོན་པའི་ཆ་ནས་ཡིན་ནོ། །གང་ལྟར་ཡང་ཚོགས་གཉིས་ཀྱི་ནང་ནས་ཡེ་ཤེས་ཀྱི་ཚོགས་ཀྱི་རྩ་བ་དང་། ཐབས་ཤེས་གཉིས་ཀྱི་ནང་ནས་ཤེས་རབ་གཙོ་བོར་གྱུར་པ་ནི་ཡང་དག་པའི་ལྟ་བ་ཡིན་པས། རྗེ་བླ་མས་ཀྱང་། རྗེ་བཙུན་འཇམ་པའི་དབྱངས་ལ་བརྟེན་ནས་དྲིས་ལན་མང་དུ་མཛད་ཅིང། དཀའ་བ་དཔག་ཏུ་མེད་པ་སྤྱད་ནས་གསར་དུ་རྟོགས་པའི་ཚུལ་བསྟན་ཏེ་ལྷག་མཐོང་ཆེ་ཆུང་དགོངས་པ་རབ་གསལ་རྩ་ཤེས་ཊཱིཀ་ཆེན་སོགས་སུ་གསལ་བར་མཛད་པ་ལས། སྔོན་ཆད་བོད་འདིར་གྲུབ་པའི་དབང་ཕྱུག་རྟོགས་པ་ཐུགས་སུ་

― GTD003_Page_0566 ―

^{[མ་དཔེ་གཟིགས་ན་འདིར་གནོན།]}

[Full Size]

འཁྲུངས་པ་ཡོད་ཀྱང་དེ་ཉིད་ཇི་ལྟ་བ་བཞིན་ཚིག་གི་ལམ་ནས་སྟོན་ཤེས་པ་མ་བྱུང་བ་ལྟ་བུ་ཡིན་ལ། རྗེ་རང་གི་སྐུ་དུས་སུ། དབུ་མ་ཆེན་པོ་བྱ་བ་ལས། ཕྱག་ཆེན་གྱི་ཐ་སྙད་དངོས་སུ་མ་མཛད་ཀྱང། རེད་མདའ་བའི་དྲིས་ལན་དུ། ཐུན་མོང་མ་ཡིན་པའི་གདམས་པ་ཞིག་ཡོད་ཀྱང་ད་དུང་སྐབས་སུ་མ་བབ་པས་མ་བཀོད་གསུངས་པ་དེ་དགེ་ལྡན་ཕྱག་རྒྱ་ཆེན་པོ་འདི་ཉིད་ཡིན་པར་ཡོངས་འཛིན་རིན་པོ་ཆེས་གསུངས་སོ། །དེས་ན་འདིའི་བརྒྱུད་པའང་ཉེ་བརྒྱུད་དེའི་དབང་དུ་བྱས་ཏེ་རྡོ་རྗེ་འཆང་ནས་འཇམ་དབྱངས། རྗེ་བླ་མ་སོགས་དབེན་ས་སྙན་བརྒྱུད་ཀྱི་གོ་རིམ་ལྟར་ལ། བ་སོ་བའི་སློབ་མར་གྲུབ་ཆེན་ཆོས་རྡོ་རྗེ་འདི་ཉིད་དང། དཔལ་ལྡན་རྡོ་རྗེ། ཁམས་པ་རིན་ཆེན་རྡོ་རྗེ་སྟེ། རྡོ་རྗེ་མཆེད་གསུམ་ཞེས་དགེ་ལུགས་པའི་གྲུབ་ཐོབ་ཆེན་པོ་གསུམ་བྱུང་བར་གསུང་ཞིང། འདི་མདོ་སྨད་ནས་བཟའ་མི་གཉིས་དབུས་སུ་སོང་བའི་ལམ་ཁར་སྐྱེས་པ་བྱིས་པའི་དུས་ནས་སྐལ་ལྡན་དུ་དགོངས་ཏེ་བསྐྱངས་ཤིང། སླར་སྙན་བརྒྱུད་ཀྱི་གདམས་པའི་བདག་པོར་གྱུར་པ། ད་ལྟའང་སྐུ་ལུས་མ་སྤངས་པར་ཇོ་མོ་ལྷ་རིར་བཞུགས་པ་ལས་དག་རྣམས་ཀྱིས་མཇལ་དུ་ཡོད་པར་གསུང། གནས་བཅུ་པ་དགེ་འདུན་རྒྱལ་མཚན་ནི་ཕྱག་ཆེན་སྐུལ་བ་པོའང་ཡིན་ལ། གཙོ་བོར་རྭ་སྒྲེང་དུ་སྒྲུབ་པ་མཛད། འོག་གི་བློ་བཟང་འཕྲིན་ལས་བྱ་བ་འདི་ལྷ་ཕ་ཞབས་དྲུང་ཞེས་ཐུགས་རུས་ཆེ་ཞིང་ཞལ་ཚ་བས་རྒྱལ་དབང་རྣམ་ཐར་ན་ཟུར་མང་དུ་ཡོད་པ་དེ་ཉིད་ཀྱི་དབོན་པོ་མདོ་སྔགས་ཡོངས་རྫོགས་ཀྱི་མཁས་པ་ཞིག་ཡིན་ཞིང་གྲུབ་དབང་བློ་བཟང་

― GTD003_Page_0567 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་རྒྱལ་ཀྱང་ཕྱག་ཆེན་གྱི་བཀའ་བབ་མཁས་གྲུབ་གཉིས་འཛོམ་གྱི་སྐྱེས་ཆེན་ཁྱད་པར་ཅན་ཡིན་ཏེ། རྣམ་ཐར་རྒྱས་པ་ཡོངས་འཛིན་རིན་པོ་ཆེའི་གསུང་དུ་ཡོད་པ་ལྟར་ཡིན། ཡོངས་གྲགས་ཀྱི་མཚན་ལ་བཀའ་ཆེན་མི་ཞེས་ཟེར། ཡོངས་འཛིན་རིན་པོ་ཆེ་ནི་བྱིས་པ་ཆུང་ངུ་ནས་ངེས་འབྱུང་དང་སྐྱོ་ཤས་ཀྱིས་བསྐུལ་ཏེ་དབེན་པའི་གནས་སུ་སྒྲུབ་པ་གཙོ་བོར་མཛད། དེང་སང་བསྟན་པའི་རྩ་བ་གཞན་དང་མི་འདྲ་བའི་ཡ་མཚན་ཅན་དུ་འདུག་པ་དང་ཆོས་འདིའི་བཀའ་བབ་ཡིན་པའི་གནད་ཀྱིས་བདག་གིས་ཀྱང་ཞུས་ནས་བླ་མཆོད་དང་སྦྲགས་མ་འདི་ཉིད་གནང་བ་ཡིན་གྱི། སྔར་དཔོན་སློབ་བྱམས་པ་རིན་པོ་ཆེ་དང། སྐྱབས་མགོན་པཎ་ཆེན་རིན་པོ་ཆེ་རྣམ་གཉིས་ལས་ཕྱག་ཆེན་གྱི་ཁྲིད་ཐོབ་ཀྱང་བླ་མཆོད་དང་སྦྲགས་མ་མིན་པས། འདི་བླ་མ་ཡོངས་འཛིན་པའི་ཕྱག་ལེན་ལྟར་ལ། རྩ་ཚིག་ལས། ན་མོ་མཧཱ་མུ་དྲཱ་ཡ། ཞེས་ན་མོ་ནི་ཕྱག་འཚལ་བ། མཧཱ་ཆེན་པོ། མུ་དྲཱ་ཕྱག་རྒྱ་སྟེ་བགེགས་ཞི་བ་སོགས་ཀྱི་ཕྱིར་དུ་ཕྱག་རྒྱ་ཆེན་པོ་ལ་ཕྱག་འཚལ་བ་ཡིན། དེ་ནས་ཤོ་ལོ་ཀ་དང་པོ་མཆོད་པར་བརྗོད་པའི་རྐང་པ་དང་པོ། ཀུན་ཁྱབ་ཀུན་གྱི་རང་བཞིན་ཕྱག་རྒྱ་ཆེ། །ཞེས་འདུས་བྱས་འདུས་མ་བྱས་ཀུན་ལ་ཁྱབ་ཅིང། དེ་ཐམས་ཅད་ཀྱི་རང་བཞིན་ནམ་གནས་ལུགས་མཐར་ཐུག་ཏུ་གྲུབ་པ། རྒྱལ་བའི་ཡུམ་ཆེན་མོ་རང་བཞིན་གྱི་ཤེར་ཕྱིན་ཏེ་ཡུལ་ཕྱག་རྒྱ་ཆེན་པོ་དང། རྐང་པ་གཉིས་པས་ཡུལ་ཅན་གྱི་ཕྱག་རྒྱ་ཆེན་པོ་བསྟན་ཏེ། དེ་ཡང་དབྱེར་མེད་ཅེས་གང་དང་དབྱེར་མེད་པ་

― GTD003_Page_0568 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ན་ཡུལ་ཕྱག་རྒྱ་ཆེན་པོ་དེ་དང་དབྱེར་མེད་པ་ཆུ་ལ་ཆུ་བཞག་པ་བཞིན་རོ་གཅིག་ཏུ་གྱུར་པ་དང། བརྗོད་བྲལ་ནི་སྤྱིར་ཆོས་ཉིད་བརྗོད་བྱ་ཡིན་ཀྱང། བུ་རམ་གྱི་རོ་མངར་བ་ལྕེ་ཤེས་ཀྱིས་ཇི་ལྟར་མྱོང་བཞིན་ཚིག་གིས་བརྗོད་དུ་མེད་པ་དང། ལག་པ་མེས་ཚིག་པའི་ཚ་རེག་ལུས་ཀྱིས་ཇི་ལྟར་མྱོང་བ་ལྟར་བརྗོད་དུ་མེད་པ་བཞིན། འདིར་ཡང་མཉམ་གཞག་ཡེ་ཤེས་ཀྱིས་ཇི་ལྟར་གཟིགས་པ་བཞིན་ཚིག་གི་ལམ་ནས་བརྗོད་དུ་མེད་ལ། སེམས་ཀྱི་རྡོ་རྗེ་ཞེས་པའི་ཐ་སྙད་སྔགས་ལུགས་ལ་ཅིས་ཀྱང་ཡོད་ལ། མདོ་ཕྱོགས་སུའང་ཀླུ་སྒྲུབ་ཀྱི་བསྟོད་ཚོགས་སུ་སེམས་ཀྱི་རྡོ་རྗེ་ལ་བསྟོད་པ་ཞེས་དེའི་ཐ་སྙད་མཛད། དབྱིངས་ཞེས་པ་ཡུལ་གྱི་སྒོ་ནས་བཏགས་པ་ཡིན་པས། གཙོ་བོ་ནི་ཕྱི་མ་ཡུལ་ཅན་ཕྱག་རྒྱ་ཆེན་པོ་འདི་ཉིད་ཡིན་པས། དེ་སྟོན་པའི་བླ་མ་མཁས་གྲུབ་སངས་རྒྱས་ཡེ་ཤེས་ལ་ཕྱག་མཛད་པ་ཡིན། ཤོ་ལོ་ཀ་གཉིས་པས་རྩོམ་པར་དམ་བཅས་ཏེ་དབེན་ས་སྙན་བརྒྱུད་ཀྱི་མན་ངག་ལས་རིམ་པར་བྱུང་ཡང་ཆེར་མ་གྲགས་པ། པཎ་ཆེན་རང་གིས་སྤེལ་བ་ཡིན་པས། འདིའི་ཁྲིད་ཉམས་སུ་ལེན་པ་ལ། སྦྱོར་དངོས་མཇུག་གསུམ་ལས། དང་པོ་བསྟན་དང་ཐེག་ཆེན་ལ། །འཇུག་པའི་སྒོ་དང་གཞུང་ཤིང་ཕྱིར། །ཁ་ཙམ་ཚིག་ཙམ་མ་ཡིན་པས། །སྐྱབས་འགྲོ་སེམས་བསྐྱེད་ནན་ཏན་བྱ། །ཞེས་སོགས་དགེ་ལུགས་དང་བཀའ་བརྒྱུད་གོང་མ་རྣམས་ལའང་ཡོངས་སུ་གྲགས་པ་སྔོན་འགྲོའི་ཁྲིད་ཆེན་བཞི་ཞེས། བསྟན་པའི་འཇུག་སྒོ་སྐྱབས་འགྲོ་དང། ཐེག་ཆེན་གྱི་སྒོའམ་གཞུང་ཤིང་སེམས་བསྐྱེད་གཉིས་བསྡོམས་པ་སྐྱབས་འགྲོའི་ཁྲིད། གཉིས་པ་མཎྜལ་ནི་རྩ་བར་དངོས་སུ་མ་ཐོན་ཡང། སེམས་ཀྱི་ཆོས་ཉིད་མཐོང་བ་ཡང། །ཚོགས་བསགས་སྒྲིབ་སྦྱོང་ལ་ལྟོས་པས། །ཞེས་གསུང་

― GTD003_Page_0569 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཤུགས་ལ་བསྟན་ཏེ། ཚོགས་གསོག་པའི་སྒོ་མཎྜལ་གྱི་ཁྲིད། སྡིག་པ་སྦྱོང་བའི་སྒོ་རྡོར་སེམས་བསྒོམ་བཟླས་ཀྱི་ཁྲིད། བྱིན་རླབས་འཇུག་པའི་སྒོ་བླ་མའི་རྣལ་འབྱོར་གྱི་ཁྲིད་རྣམས་སུ་ཡོད་པས་དང་པོ་ལའང་གནས་ཁང་བྱི་དོར་བྱས་ཏེ་སྐུ་གསུང་ཐུགས་ཀྱི་རྟེན་བཀྲམ། མཆོད་པ་གཡོ་མེད་ཅིང་བཀོད་པས་མཛེས་པར་བཤམ་པ་སོགས་ལམ་རིམ་ལས་བྱུང་བ་ལྟར་བྱས། དེ་ནས་འཇམ་ཞིང་འབོལ་བའི་སྟན་རྒྱབ་མཐོ་ཞིང་མདུན་དམའ་བ་དེ་ལྟ་བུ་ལ་རྡོ་རྗེ་སྐྱིལ་ཀྲུང་ངམ་སྐྱིལ་ཀྲུང་ཕྱེད་པས་གནས་ལ་ལུས་དྲང་པོར་བསྲངས་ཏེ་རྣམ་སྣང་གི་ཆོས་བདུན་ལྡན་དུ་བྱ་དགོས་པས་ལུས་སྲོང་ཚད་ནི། སྣ་རྩེ་ནས་རྡེའུ་འཕང་བ་ལྟེ་བའི་ཐད་དུ་འབབ་དགོས་པར་ཡོངས་འཛིན་གསུང། དེའི་དགོས་པའང་ལུས་དྲང་པོར་གནས་པས་རྩ་དྲང་པོར་འོང་དེས་རླུང་དྲང་པོར་རྒྱུ། དེས་རྣམ་རྟོག་གྱ་གྱུ་དེ་འདྲ་མེད་པར་སེམས་རྣལ་དུ་གནས་པ་ཡོང་བ་ཡིན། དེ་ནས་རང་གི་སེམས་ལ་བརྟགས་ཏེ། ཕྱིན་ཅི་ལོག་གི་བློ་སྣ་དེ་འདྲ་རྒྱུ་བར་འདུག་ན་རླུང་རོ་དགུ་ཕྲུགས་ལ་སོགས་པས་བསལ་ཏེ་མནོ་བསམ་ལེགས་པར་གཏོང་དགོས། དེའང་སྐྱབས་འགྲོའི་ཁོངས་འདིར་སྐྱེས་བུ་ཆུང་འབྲིང་གི་ལམ་རིམ་དང། སེམས་བསྐྱེད་ཀྱི་ཁོངས་སུ་རྒྱུ་འབྲས་མན་ངག་བདུན་སོགས་སྐྱེས་བུ་ཆེན་པོའི་ཆོས་སྐོར་འགྲོ་དགོས། ཞེས་བླ་མ་ཡོངས་འཛིན་རིན་པོ་ཆེས་གསུང་ངོ་། །དང་པོ་སྐྱབས་ཡུལ་ཚོགས་ཞིང་གསལ་འདེབས་ཚུལ་ནི། མདུན་གྱི་ནམ་མཁར་དཔག་བསམ་གྱི་ཤིང་ཡལ་ག་དང་ལོ་མ་དང་མེ་ཏོག་འབྲས་བུ་ཕུན་སུམ་ཚོགས་པ་ཡངས་ཤིང་རྒྱ་ཆེ་བ། འདབ་མ་འོག་མ་རྣམས་ཐུར་དུ་འཕྱང་ཞིང། གོང་མ་གོང་མ་རྣམས་གྱེན་དུ་

― GTD003_Page_0570 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱོགས་པའི་རྩེ་མོར་སེང་ཁྲིའི་སྟེང་དུ་རྩ་བའི་བླ་མ་དེ་ཉིད་སྐུའི་རྣམ་པ་སྐབས་འདིར་རྗེ་རིན་པོ་ཆེའི་རྣམ་པར་གསལ་འདེབས་དགོས་ཤིང། དེའི་ཐུགས་ཀར་ཐུབ་དབང། དེའི་ཐུགས་ཀར་རྡོ་རྗེ་འཆང་གསལ་འདེབས་པ་འདི་དབེན་ས་སྙན་བརྒྱུད་ཀྱི་མན་ངག་ཡིན་པས། བླ་མ་ཐུབ་དབང་རྡོ་རྗེ་འཆང་རང་ཟེར་བའི་རྩ་བ་དེ་ལ་ཐུག་པ་ཡིན། དེའི་ཐུགས་ཀ་ནས་གཡས་ཕྱོགས་སུ་འོད་ཟེར་གཅིག་གཉིས་བཞི་སོགས་འཕྲོས་པའི་སྣེ་མོར་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་དང། གཡོན་དུ་རིམ་པ་བཞིན་འཕྲོས་པའི་སྣེ་མོར་ཟབ་མོ་ལྟ་བརྒྱུད། མདུན་དུ་རྩ་བའི་བླ་མ་རྒྱུན་གྱི་སྐུའི་རྣམ་པ་ཆོས་འབྲེལ་ཡོད་པའི་བླ་མ་རྣམས་ཀྱིས་བསྐོར་བ། རྒྱབ་ཏུ་ཉམས་ལེན་བྱིན་རླབས་བརྒྱུད་པ། རིམ་པ་གཉིས་པའི་མདུན་དུ་རྡོ་རྗེ་འཇིགས་བྱེད། གཡས་སུ་གསང་འདུས། རྒྱབ་ཏུ་དུས་འཁོར་རམ་དགྱེས་རྡོར། གཡོན་དུ་འཁོར་ལོ་བདེ་མཆོག་སོགས་བླ་མེད་ཀྱི་ལྷ་ཚོགས། དེའི་འོག་མར་ཀུན་རིག། །དཔལ་མཆོག་རྩེ་མོ་སོགས་རྣལ་འབྱོར་རྒྱུད་ཀྱི་ལྷ་ཚོགས། དེའི་འོག་མར་རྣམ་སྣང་མངོན་བྱང་དང་སྤྱོད་རྒྱུད་དུ་གཏོགས་པའི་ཕྱག་རྡོར་སོགས་སྤྱོད་རྒྱུད་ཀྱི་ལྷ་ཚོགས་དེའི་འོག་ཏུ་ཐུབ་པ་དམ་ཚིག་གསུམ་བཀོད་སོགས་བྱ་རྒྱུད་ཀྱི་ལྷ་ཚོགས། དེའི་འོག་ཏུ་སངས་རྒྱས་སྟོང་ལ་སོགས་པ་ཕྱོགས་བཅུའི་སངས་རྒྱས། དེའི་འོག་ཏུ་ཉེ་བའི་སྲས་ཆེན་བརྒྱད་སོགས་སེམས་དཔའ་དང་སེམས་མ། དེའི་འོག་ཏུ་རང་རྒྱལ་བཅུ་གཉིས་སོགས་རང་རྒྱལ་བ་ཆེན་པོ་རྣམས་དང། དེའི་འོག་ཏུ་གནས་བརྟན་བཅུ་དྲུག་སོགས་ཉན་ཐོས་ཀྱི་ཚོགས། དེའི་འོག་ཏུ་དཔའ་བོ་མཁའ་འགྲོ། དེའི་འོག་ཏུ་ཆོས་སྲུང་སྟེ་རིམ་པ་བཅུ་གཅིག་དང། དེ་དག་གིས་གསུངས་པའི་ཆོས་རྣམས་རང་རང་གི་མདུན་ན་

― GTD003_Page_0571 ―

^{[མ་དཔེ་གཟིགས་ན་འདིར་གནོན།]}

[Full Size]

གླེགས་བམ་གྱི་རྣམ་པར་བཞུགས་པ་གསལ་གདབ་དགོས། རྩོད་པའི་ཚེ་ཆོས་དཀོན་མཆོག་ལ་འགོག་ལམ་གང་རུང་དགོས་ཟེར་ཡང། དམིགས་རྣམ་སྐྱོང་དུས། དེ་མ་གཏོགས་ལུང་གི་ཆོས་རྣམས་ཇ་བསྐོལ་བའི་ཇ་རོ་ལྟ་བུར་སྙིང་པོ་མེད་པར་བཟུང་ན་ཆོས་སྤོང་དུ་འགྲོ་བས། ཀུན་རིག་གི་ཆོ་གར་ཡང། བློ་མཆོག་རྣམས་ཀྱི་ཀུན་དགའ་ར་བ་སྟེ། །ཞེས་སོགས། ལུང་གི་ཆོས་ལ་གཙོ་བོར་གསུངས་པ་བཞིན་བྱ་དགོས། དེ་དག་གི་ཐོག་མར་རང་སྡུག་བསྔལ་གྱིས་མནར་ཚུལ་བསམ་པ་ལ་རག་ལས་པས། དེ་ནི་དཔལ་ཆོས་ཀྱི་གྲགས་པས། སྡུག་བསྔལ་འཁོར་བ་ཅན་ཕུང་པོ། །ཞེས་ལས་ཉོན་གྱི་ཕུང་པོ་འདི་ཀ་རང་སྡུག་བསྔལ་གྱི་མཚན་གཞིར་བཟུང་ནས། དེ་རྒྱུ་མཚན་ཅི་ཡིན་ན། འགྲེལ་རྒྱག་པའི་སྐབས་སུ། དེ་ཆོས་ཅན། སྡུག་བསྔལ་ཡིན་ཏེ། ལས་ཉོན་གྱི་གཞན་དབང་ཅན་ཡིན་པའི་ཕྱིར་ཞེས་ལས་དང་ཉོན་མོངས་པའི་དབང་གིས་སྐྱེ་བ་ཞིག་བླངས་ཕྱིན་ཆད་གནས་སྐབས་སྡུག་བསྔལ་གྱི་སྡུག་བསྔལ་མངོན་གྱུར་པ་ཡོད་མེད་གང་ཡིན་ཀྱང་ཕུགས་སྡུག་བསྔལ་ལས་མ་འདས་པས་འཆིང་བའམ། འཆིང་ཐག་ལྟ་བུ་ཡིན། ཡོངས་འཛིན་རིན་པོ་ཆེས་སྲིད་རྩེ་ནས་མནར་མེད་ཀྱི་བར་གྱི་སྣོད་བཅུད་འདི་ཐམས་ཅད་སྡུག་བསྔལ་ཡིན་གསུངས་པ་ཡིག་ཆ་སོགས་སུ་མི་གསལ་ཡང་གོ་རྒྱུ་ཆེན་པོ་ཞིག་ཡོད་པ་འདྲ། དེས་ན་ང་རང་ཚོའང་ད་ལྟ་སྡུག་བསྔལ་གྱིས་ནོན་ཡོད་པ་ལ་བསམ་བློ་མ་ཐོང་བས་ཡམ་མེ་ཡོམ་མེ་ཞིག་ལས་མ་ཤེས་པ་ཡིན། འགྲོ་བ་གཞན་གྱི་སྡུག་བསྔལ་མི་དགོས། མིའི་མངལ་སྒོ་འགྲིམ་པའི་སྐབས་འདི་ལའང། དང་པོ་མངལ་གྱི་གནས་ཤིན་ཏུ་དོག་ཅིང་མུན་ནག་ལ་

― GTD003_Page_0572 ―

^{[མ་དཔེ་གཟིགས་ན་འདིར་གནོན།]}

[Full Size]

དྲི་ང་བ། ལྗན་ལྗིན་གྱིས་གང་བའི་བཙོན་ར་ལྟ་བུ་ཉམ་ང་བ་དེ་འདྲ་བར་ཡུན་རིང་དུ་གནས་པའི་མཐར་ལས་ཀྱི་རླུང་གིས་བདས་ཏེ་ཕྱི་རོལ་ཏུ་བཙས་པ་ནའང། ཚེར་དོང་དུ་བཅུག་པ་ལྟ་བུ་དང། འཁྱག་དོང་དུ་བཅུག་པ་ལྟ་བུའི་སྡུག་བསྔལ་བཟོད་གླགས་མེད་པར་ཡོད་ལ། ནར་སོན་ནས་ཀྱང་འབྱོར་པ་ཅན་རྣམས་གསོག་བསྲུང་དང། དབུལ་འཕོང་རྣམས་འཚོལ་སྒྲུབ་ཀྱི་སྡུག་བསྔལ་གཉེན་མཛའ་བ་དང་བྲལ་གྱིས་དོགས་པ་དགྲ་སྡང་བ་དང་ཕྲད་ཀྱིས་དོགས་པ་གཞན་ཡང་ནད་ལ་སོགས་པའི་སྡུག་བསྔལ་མཐའ་ཡས་པ་ཞིག་ཡོད་ལ། ད་ལྟ་ངན་སོང་གི་སྡུག་བསྔལ་དངོས་སུ་མ་མྱོང་ཡང་དེར་སྐྱེས་པའི་རྒྱུ་ཚོགས་ཚང་བར་ཡོད་པས་ཤི་མ་ཐག་ཏུ་ངན་འགྲོར་འགྲོ་བ་ལས་འོས་མེད་ཅིང། དེར་སྐྱེས་ན་ལོ་སྟོང་ཕྲག་མང་པོའི་བར་དུ་ཚ་གྲང་བཀྲེས་སྐོམ་གླེན་ལྐུག་སོགས་ཀྱི་སྡུག་བསྔལ་བསམ་གྱིས་མི་ཁྱབ་པ་མྱོང་དགོས་ཚུལ་དང། བརྒྱ་ལ་བདེ་འགྲོར་སྐྱེས་ཀྱང། ལྷ་མ་ཡིན་རྣམས་ལྷ་དང་ཕྲག་དོག་གི་དབང་གིས་འཐབ་པས་ལུས་བཅད་ཅིང་རལ་བའི་སྡུག་བསྔལ། ཁམས་འོག་མའི་ལྷ་ལ་འཆི་ལྟས་ཀྱིས་ཕོག་པ་སོགས་ཀྱི་སྡུག་བསྔལ། ཁམས་གོང་མར་སྡུག་བསྔལ་དངོས་སུ་མེད་ཀྱང་དཔེར་ན་མེ་ལྕགས་དང་སྤྲ་བ་སོགས་ལ་མེ་དངོས་སུ་མེད་ཀྱང་མེའི་ས་བོན་ཡོད་པས་སླར་རྐྱེན་འཛོམས་པ་ན་མེ་འབྱུང་བ་བཞིན། སླར་སྙོམས་འཇུག་གི་འཕེན་པ་ཟད་དེ་ལས་གཞན་གྱི་ས་བོན་སྨིན་པ་ན། ངན་སོང་གསུམ་ལ་སོགས་པར་སྡུག་བསྔལ་འཁོར་མེད་མྱོང་ཚུལ་བསམས་ནས། འཁོར་བ་མཐའ་དག་ལས་ཡིད་ལོག་པའི་ངེས་འབྱུང་ཤུགས་དྲག་པོ་དང། དེ་ལས་སྐྱོབ་པའི་སྐྱབས་དཀོན་མཆོག་གསུམ་ལ་བློ་བཀལ་ནས་སླར་སྐྱེ་སྲིད་དུ་ཉིང་མཚམས་སྦྱོར་

― GTD003_Page_0573 ―

^{[མ་དཔེ་གཟིགས་ན་འདིར་གནོན།]}

[Full Size]

མི་དགོས་པ་ཞིག་མ་བྱས་ན། དལ་འབྱོར་ཐོབ་པ་ཆུད་ཟོས་སུ་སོང་བར་འདུག་སྙམ་དུ་བསམས་ཏེ། རྒྱལ་སྲས་ཞི་བ་ལྷས་ཀྱང། འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམས་མ་བྱས་ན། །དེ་ལས་བསླུས་པ་གཞན་མེད་དེ། །དེ་ལས་རྨོངས་པའང་གཞན་མེད་དོ། །ཞེས་སོགས་གསུངས་པ་ལྟར་རང་གིས་རང་ལ་རྔན་བགྲང་བའམ། ལེ་བདས་ཏེ་སྐྱབས་འགྲོ་སོགས་ལ་བསྐུལ་བ་དང། ཡང་ན་མཐུན་ཕྱོགས་ཀྱི་སྒོ་ནས་བསམས་ཏེ་ཚེ་འདིར་ཆོས་ལ་བརྩོན་འགྲུས་དྲག་པོ་བྱས་པ་ཡིན་ན་རབ་ཚེ་འདིར་འཚང་རྒྱ་བའམ་བར་དོར་འཚང་རྒྱ། དེ་ལྟར་མ་ཡིན་ཡང་དེའི་རྣམ་སྨིན་གྱིས་ཕྱི་མར་དལ་འབྱོར་ཚང་བའི་རྟེན་རྙེད་ཅིང། མྱོང་བ་རྒྱུ་མཐུན་ལ། བཟུང་ན་ཚིག་ཟིན། བསམ་ན་དོན་གོ །བསྒོམ་ན་རྒྱུད་ལ་སྐྱེ་བ་སོགས་ཆོས་སྒྲུབ་པའི་མཐུན་རྐྱེན་ཚང་བ་དང། བྱེད་པ་རྒྱུ་མཐུན་ཆོས་ཀྱི་སྒྲ་ཐོས་པ་ཙམ་གྱིས་དེ་ལ་འཇུག་འདོད་པ་སོགས་སྒོ་ཐམས་ཅད་ནས་བློ་ཁ་ཆོས་ཕྱོགས་སུ་འཁོར་འགྲོ་བས། རིམ་གྱིས་སྐྱེ་བ་བཅུ་དྲུག་སོགས་ན་ངེས་པར་འཚང་རྒྱ་བ་ཞིག་འབྱུང་བ་ཡིན་པས། ཅི་ནས་ཀྱང་འབད་དགོས། དེའང་སྐྱབས་ཡུལ་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་འཕྲིན་ལས། སྐྱོབ་པའི་ནུས་མཐུ་སོགས་རྒྱུ་ཚོགས་ཐམས་ཅད་ཚང་བར་ཡོད་ཀྱང། རང་རེས་བློ་མ་བཀལ་བར་ཐེ་ཚོམ་ཟོས་པའི་དབང་གིས། དེ་རྣམས་ཀྱིས་ཀྱང་སྐྱོབ་ཐབས་དང་བྲལ་བ་ཡིན། དེས་ན་ལྷན་པ་སེར་པོ་གྱོན་པ་ཚུན་ཆད་ལའང་དགེ་འདུན་དཀོན་མཆོག་གི་འདུ་ཤེས་བཞག་སྟེ་སྐྱབས་སུ་འཛིན་དགོས་པར་གསུངས་པས། དེ་ཉིད་གོས་དཀར་པོ་གྱོན་ནས་ལྷན་པ་སེར་པོ་བཏབ་པ་ཙམ་ལ་ཟེར་བ་མ་ཡིན་པར། དོན་

― GTD003_Page_0574 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་ཚུལ་ཁྲིམས་དང་མི་ལྡན་ཡང་དགེ་ཚུལ་སློང་གི་མིང་བཟུང་ནས་གཟན་དམར་སེར་རེ་ཙམ་གྱོན་པ་དེ་ལྟ་བུ་ད་ལྟ་དུས་དབང་གིས་ཤིན་ཏུ་མང་བས་དེ་འདྲ་ལ་སྦྱར་དགོས་སམ་སྙམ་སྟེ། སའི་སྙིང་པོ་འཁོར་ལོ་བཅུ་པའི་མདོ་ལས། དགེ་སློང་ཚུལ་ཁྲིམས་དང་ལྡན་པ་ཕྱག་དང་བསྙེན་བཀུར་སོགས་ཀྱི་ཡུལ་ཡིན་པར་མ་ཟད། ཚུལ་ཁྲིམས་འཆལ་བ་ལུག་ལྟ་བུའི་དགེ་སློང་ཡང་བསོད་ནམས་ཀྱི་ཞིང་དུ་གསུངས་པ་ལྟ་བུ་ཡིན། དེ་ནས་སྐྱབས་འགྲོའི་དམིགས་རྣམ་དངོས་གཞི་ལ། ཚོགས་ལྟ་བུར་དཀྱུས་གཅིག་ཏུ་བྱེད་ཀྱང་། དམིགས་རྣམ་སྐྱོང་ཚེ། དང་པོར་བླ་མ་ལ་སྐྱབས་སུ་མཆིའོ། །ཞེས་པའི་ཚིག་གཅིག་པུ་འདི་ལན་མང་དུ་བསྐྱར་ཏེ་བླ་མའི་སྐུ་ལས་བདུད་རྩི་འབེབས་སྦྱང་བྱས་པས། བླ་མའི་སྐུ་ལ་བསྡོས་པ། གསུང་བཅགས་པ། ཐུགས་དཀྲུགས་པ། མ་དད་བརྙས་སྨོད་ལོག་ལྟ་སྐྱེས་པ་ལ་སོགས་པའི་ཉེས་ལྟུང་ཐམས་ཅད་བྱང་བའི་མོས་པ་དང། དེའི་འོག་ཏུ་སངས་རྒྱས་ལ་སྐྱབས་སུ་མཆིའོ། །ཞེས་ལན་མང་དུ་བརྗོད་པའི་ཚེ། ཡི་དམ་གྱི་ལྷ་ཚོགས་དང་སངས་རྒྱས་སྟོང་ལ་སོགས་པའི་སྐུ་ལས་བདུད་རྩིའི་རྒྱུན་བབས་པས། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང། དེའི་སྐུ་བརྙན་འགོམ་ཡུག་བྱས་པ་སོགས་སངས་རྒྱས་ལ་བརྟེན་པའི་ཉེས་ལྟུང་ཐམས་ཅད་བྱང་བའི་མོས་པ་དང། ཆོས་ལ་སྐྱབས་སུ་སོང་བའི་ཚེ་གླེགས་བམ་རྣམས་ཀྱི་གདོང་དར་ཡི་གེ་སོགས་ནས་བདུད་རྩིའི་རྒྱུན་བབས། དམ་པའི་ཆོས་ཟོང་དུ་བསྒྱུར་བ་གཏའ་མར་བཅུག་པ་ས་སྒྲེ་མོ་ལ་བཞག་པ་སོགས་ཆོས་སྤོང་གི་སྡིག་པ་རྣམས་བྱང་བའི་མོས་པ་བྱེད། དགེ་འདུན་ལ་སྐྱབས་སུ་སོང་བའི་ཚེ་བྱང་སེམས་ཉན་རང་དཔའ་བོ་མཁའ་འགྲོ་ཆོས་སྲུང་དང་བཅས་

― GTD003_Page_0575 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྐུ་ལས་བདུད་རྩིའི་རྒྱུན་བབས་དགེ་འདུན་གྱི་སྡེ་དཀྲུགས་པ་སོགས། དེ་ལ་བརྟེན་པའི་ཉེས་ལྟུང་ཐམས་ཅད་བྱང་བའི་མོས་པ་བྱེད་དགོས་ཤིང། འདི་སྐྱབས་འགྲོ་བཞི་སྐོར་གྱི་དབང་དུ་བྱས་པ་ཡིན་གྱི། ཡི་དམ་ཆོས་སྲུང་སོགས་ལ་ལོགས་སུ་བྱེད་ན་དམིགས་རྣམ་ཡང་ཟུར་དུ་བྱས་ཆོག །དེ་ནས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་ཀྱི་ཚེ་ཐམས་ཅད་ཀྱི་སྐུ་ལས་བདུད་རྩའི་རྒྱུན་བབས་རང་གཞན་སེམས་ཅན་ཐམས་ཅད་ཀྱི་སྒོ་གསུམ་གྱི་ཉེས་ལྟུང་སྦྱངས། མཐར་སྐྱབས་ཡུལ་རྣམས་འོད་དུ་ཞུ་ནས་བླ་མ་ཐུབ་དབང་རྡོ་རྗེ་འཆང་ལ་ཐིམ། དེ་རང་ལ་ཐིམ་པས་རང་ཉིད་ཐུབ་པའི་དབང་པོའི་སྐུར་གྱུར། དེ་ལས་འོད་འཕྲོས་སེམས་ཅན་ཐམས་ཅད་ལ་ཕོག་པས། དེ་ཐམས་ཅད་ཀྱང་ཐུབ་པའི་དབང་པོའི་སྐུར་གྱུར་པའི་དམིགས་པ་བྱ། དེ་ནས་སེམས་བསྐྱེད་ལ་སློབ་ཚུལ་ལ་རྒྱུ་འབྲས་མན་ངག་བདུན་གྱི་སྒོ་ནས་སློབ་ཚུལ་དང། བདག་གཞན་མཉམ་བརྗེའི་སྒོ་ནས་སློབ་ཚུལ་གཉིས་ཡོད་པས་ཕྱི་མ་འདི་ཡིད་འོང་གི་བྱམས་པའི་ཁོངས་སུ་འདུ་ཞེས་ཡོངས་འཛིན་རིན་པོ་ཆེས་གསུང། དང་པོར་མར་ཤེས་བསྒོམ་པ་ལ། འཁོར་བའི་ཡ་མཐའ་ཐུག་མེད་དུ་ཤེས་དགོས། དེ་ལ་རིག་པའི་ཡ་མཐའ་ཐུག་མེད་དུ་སྒྲུབ་དགོས། དེའང་དེ་རིང་གི་ཤེས་པ་འདི་ཁ་སང་གི་ཤེས་པ་དེ་ལས་བྱུང་བར་རྟོགས་དགོས་པས། དེའི་སྒྲུབ་ཚུལ་ནི། དེ་རིང་གི་རིག་པ་འདི་ཁ་སང་གི་རིག་པ་དེ་ལས་བྱུང་བ་ཡིན། ཁ་སང་བྱ་བ་འདི་དང་འདི་བྱེད་དགོས་ཞེས་བསམས་པ་དེ་དེ་རིང་ཡང་དྲན་པ་ནི་རིག་པ་སྔ་མའི་རྒྱུན་ཡིན་པའི་རྟགས་ཡིན། དེ་ལྟར་དཔྱད་ནས་ངེས་པ་རྙེད་ན་ཤིན་ཏུ་ཤུགས་

― GTD003_Page_0576 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེ། གཞུང་ལུགས་ལ་མ་སྦྱངས་པ་རྣམས་ཀྱིས་དེ་འདྲའི་སྒྲུབ་ཚུལ་རྟོགས་དཀའ་བས། འདི་སངས་རྒྱས་ཀྱི་གསུང་བསླུ་བ་མེད་པ་ཡིན་སྙམ་དུ་བློ་ཐག་རྦད་ཀྱིས་བཅད་ནས་ཡིད་ཆེས་པར་བྱ་དགོས་ཏེ། རྒྱུད་རྟོག་པ་གསུམ་པ་ལས། ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་རིང། །ཞེས་གསུངས་པ་ལྟ་བུ་ཡིན། དེ་ལྟར་མར་ཤེས་པ་ན་མ་བྱེད་རེས་ཀྱིས་དྲིན་གྱིས་བསྐྱངས་ཚུལ་བསམས་ཏེ། ད་རེས་བདག་གིས་དྲིན་ལན་འཇལ་དགོས། དེའང་ཟག་མེད་ཀྱི་བདེ་བ་ལ་འགོད་དགོས་ཀྱི། ཟག་བཅས་ཀྱི་བདེ་བ་ཚངས་པ་བརྒྱ་བྱིན་ལ་སོགས་པའི་གོ་འཕང་ནི་ཁོ་རང་ཚོས་ཀྱང་སྔར་ལན་མང་པོའི་བར་དུ་ཐོབ་མོད་ཀྱི་ཡིད་བརྟན་མ་གྱུར་པར་སླར་སྡུག་བསྔལ་མཐའ་ཡས་པ་མྱོང་དགོས་བྱུང་འདུག །དེའང་ད་ལྟ་རང་ལ། དེ་འདྲའི་ནུས་པ་མེད་པས་དེ་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་དགེ་ལྡན་ཕྱག་རྒྱ་ཆེན་པོའི་ཁྲིད་སྙན་བརྒྱུད་ཀྱི་མན་ངག་ཟབ་མོ་འདི་ཉིད་ཉམས་སུ་བླང་བར་བྱའོ་སྙམ་དུ་སེམས་བསྐྱེད། འདིའི་བྱམས་པ་ཡིད་འོང་གི་བྱམས་པ་ཡིན་ལ་བདེ་བ་དང་ལྡན་འདོད་ཀྱི་བྱམས་པ་སྙིང་རྗེའི་རྗེས་སུ་སྐྱེས་པའང་ཡོད་པས། དེ་གཉིས་མི་གཅིག་ཅེས་བླ་མ་རྣམས་གསུང་ཞིང། ཕྱི་མ་ལའང་ཡིད་འོང་གི་རྣམ་པར་མཐོང་དགོས་སམ་སྙམ། ཚད་མེད་བཞི་བསྒོམ་པ་འདིར་དངོས་སུ་མ་གསུངས་ཀྱང། བྱེད་དགོས་པས་དེའི་གོ་རིམ་ཆོ་ག་སོགས་ཕལ་ཆེར་དུ་བཏང་བསྙོམས་ཚད་མེད་རྗེས་ལ་བྱུང་ཡང། དམིགས་རྣམ་སྐྱོང་ཚེ་སྔོན་དུ་བླངས་ཏེ་ཟག་མེད་ཀྱི་བདེ་བ་ལ་འགོད་

― GTD003_Page_0577 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་བར་རིམ་གྱིས་བྱེད་དགོས། གཉིས་པ་མཎྜལ་གྱི་ཁྲིད་ནི། བྱེ་བ་ཕྲག་བརྒྱའི་གླིང་བཞི་ལྷུན་པོར་བཅས། །ཞེས་སོགས་འོག་ནས་འབྱུང་བ་དང་གཅིག་ལ། རྡོར་སེམས་བསྒོམ་བཟླས་ཀྱི་ཁྲིད་ནི། རང་ཐ་མལ་དུ་གནས་པའམ། ཡི་དམ་གྱི་ལྷ་གཞན་དུ་བསྒོམ་པའམ། རྡོར་སེམས་རང་དུ་བསྒོམ་པ་སོགས་འདམ་ག་ཅན་དུ་གསུང་བས་གང་བྱས་ཀྱང་འགལ་བ་མེད་པས་རང་གི་བློ་དང་བསྟུན། དེའི་སྤྱི་བོར་རྡོ་རྗེ་སེམས་དཔའ་ཡབ་ཡུམ་གསལ་བཏབ་པའི་སྐུ་ལས་འོད་ཟེར་དཔག་ཏུ་མེད་པ་འཕྲོས་སངས་རྒྱས་སྲས་བཅས་ཀྱི་བྱིན་རླབས་ཐམས་ཅད་བསྡུས་ཏེ་དེ་ལ་ཐིམ། དེའི་སྐུ་ལས་བདུད་རྩིའི་རྒྱུན་བབས་རང་གི་སྒོ་གསུམ་གྱི་ཉེས་ལྟུང་ཐམས་ཅད་སྦྱངས་འོད་ཟེར་དཔག་ཏུ་མེད་པ་འཕྲོས་པའི་སྣེ་མོར་ཡང་རྡོར་སེམས་ཡབ་ཡུམ་ཟུང་རེ་སྤྲོས་ཏེ་སེམས་ཅན་ཐམས་ཅད་ཀྱི་སྤྱི་བོར་བཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབས། སེམས་ཅན་ཐམས་ཅད་ཀྱི་སྡིག་ལྟུང་སྦྱངས་པའི་མོས་པ་བྱས་ལ་ཡི་གེ་བརྒྱ་པ་འབུམ་ཕྲག་བཟླ་བར་གསུངས་ཏེ། འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་ལྟུང་བ་ཐམས་ཅད་འདག་པར་གསུང་བའི་རྒྱུ་མཚན་གྱིས་ཡིན་ལ། བདུད་རྩི་འབེབས་སྦྱང་གི་དམིགས་རིམ་ཡས་འདེད་མས་འདེད་ཕུང་འདེད་སོགས་ཀྱི་རྣམ་གཞག་རྒྱས་པར་རྫོགས་རིམ་སོགས་ལས་ཤེས་དགོས། བླ་མའི་རྣལ་འབྱོར་གྱི་ཁྲིད་དངོས་གཞིའི་བླ་མའི་རྣལ་འབྱོར་འོག་ནས་བྱུང་བ་དེར་འཐུས། དེ་དག་གིས་སྔོན་འགྲོའི་རིམ་པ་སོང་ཟིན་ནས་ཕྱག་ཆེན་དངོས་གཞིའི་དམིགས་རིམ་ནི། དངོས་གཞི་ཕྱག་རྒྱ་ཆེན་པོ་ལ། །བཞེད་ཚུལ་

― GTD003_Page_0578 ―

^{[མ་དཔེ་གཟིགས་ན་འདིར་གནོན།]}

[Full Size]

མང་དུ་འདུག་ན་ཡང། །མདོ་སྔགས་དབྱེ་བས་གཉིས་སུ་ཡོད། །ཕྱི་མ་རྡོ་རྗེའི་ལུས་འདི་ལ། །གནད་དུ་བསྣུན་སོགས་ཐབས་མཁས་ལས། །བྱུང་བའི་བདེ་ཆེན་འོད་གསལ་ཏེ། །ཞེས་སོགས་གསུང་བའི་མདོ་ལུགས་ཀྱི་ཕྱག་ཆེན་ཞེས་པ་ས་པཎ་གྱི་སྡོམ་གསུམ་རབ་དབྱེར་མི་འཐད་པའི་ཕྱོགས་མཛད་ཅིང། རྒྱལ་དབང་གིས་དགེ་ལུགས་དགེ་ལུགས་རང་བྱས་པ་བཟང་མོད། བཀའ་བརྒྱུད་པའི་ཁྲོད་དུ་འཚང་ནས་ཅི་བྱ་ཞེས། དགེ་ལྡན་བཀའ་བརྒྱུད་ཀྱི་ཐ་སྙད་ཙམ་ཡང་མི་བཞེད་ལ། པཎ་ཆེན་རིན་པོ་ཆེས། མདོ་ཏིང་ངེ་འཛིན་གྱི་རྒྱལ་པོར། ཆོས་རྣམས་ཀུན་གྱི་རང་བཞིན་ཕྱག་རྒྱ་ཆེ། །ཞེས་པ་ཁུངས་སུ་མཛད་ནས་མདོ་ལུགས་ལའང་ཕྱག་ཆེན་གྱི་ཐ་སྙད་ཞལ་གྱིས་བཞེས་ལ། པཎ་ཆེན་བསོད་ནམས་གྲགས་པས་ཀྱང། ཕྱག་རྒྱ་ཆེན་པོ་མཛེས་པར་བྱེད་པའི་རྒྱན་ཞེས་བྱ་བའི་བསྟན་བཅོས་སུ། བརྒྱད་སྟོང་པ་ལས། བརྒྱ་བྱིན་གྱིས་རབ་འབྱོར་ལ་སྨྲས་པ། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེ། གང་ལ་རྣལ་འབྱོར་དུ་བྱེད་པ་ཡིན། རབ་འབྱོར་གྱིས་སྨྲས་པ། ཀཽའུ་ཤི་ཀ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེ་ནམ་མཁའ་ལ་རྣལ་འབྱོར་དུ་བྱེད་པའོ། །བླ་གབ་མེད་པ་ལ་རྣལ་འབྱོར་དུ་བྱེད་པའོ། །ཞེས་གསུངས་པའི་སྔ་མ་ཡུལ་ཕྱག་རྒྱ་ཆེན་པོ་དང། ཕྱི་མ་གནས་ལུགས་རྗེན་པར་གཟིགས་པའི་ཡེ་ཤེས་ཡུལ་ཅན་ཕྱག་རྒྱ་ཆེན་པོའི་ཁུངས་སུ་ཚུད་ལ། དུས་འཁོར་གྱི་སྐོར་འགའ་ཞིག་ཏུ་ལུང་འདི་དྲངས་ནས། འགྲེལ་ཚུལ་གཞན་ཞིག་ཀྱང་བྱས་སྣང་ངོ་། །དེ་དག་གི་ཁུངས་འགོད་པ་ནི་སྔགས་ལུགས་ཀྱི་ཕྱག་རྒྱ་ཆེན་པོའི་

― GTD003_Page_0579 ―

^{[མ་དཔེ་གཟིགས་ན་འདིར་གནོན།]}

[Full Size]

ཁུངས་ཀླུ་སྒྲུབ་ཡབ་སྲས་ཀྱི་གཞུང་རིམ་ལྔ་སོགས་དང་གྲུབ་པ་སྡེ་བདུན་སྙིང་པོ་སྐོར་གསུམ་སྟེ། མགོན་པོ་བདེ་བ་ཆེན་པོས་གསང་བ་གྲུབ་པ་མཛད། དེའི་སློབ་མ་ཡན་ལག་མེད་པའི་རྡོ་རྗེས་ཐབས་ཤེས་གྲུབ་པ་མཛད། དེའི་སློབ་མ་ཨིནྟྲ་བྷུ་ཏིས་ཡེ་ཤེས་གྲུབ་པ་མཛད། དེའི་ལྕམ་ལཀྵིཾ་ཀཱ་རས་གཉིས་མེད་གྲུབ་པ་མཛད། ཌོམྦྷི་ཧེ་རུ་ཀས་ལྷན་ཅིག་སྐྱེས་གྲུབ་མཛད། དཱ་རི་ཀ་པས་གསང་བ་ཆེན་པོའི་དེ་ཁོ་ན་ཉིད་གྲུབ་པ་མཛད། རྣལ་འབྱོར་མ་ཙི་ཏོས་དངོས་པོ་གསལ་བའི་རྗེས་སུ་འགྲོ་བའི་དེ་ཁོ་ན་ཉིད་གྲུབ་པ་མཛད་པ་ཡིན་ལ་སྙིང་པོ་སྐོར་གསུམ་ནི། རྒྱལ་པོ་དོ་ཧ། བཙུན་མོ་དོ་ཧ། དམངས་དོ་ཧ་གསུམ་ཡིན་ཞིང་བུ་སྟོན་ཐམས་ཅད་མཁྱེན་པས་དམངས་དོ་ཧ་གཞུང་ཚད་ལྡན་དང། སྔ་མ་གཉིས་བརྫུས་མར་གསུངས་ལ། གྲུབ་ཆེན་གྱི་གཞུང་ཚད་ལྡན་ཡིན་ཡང་སྒྲ་ཇི་བཞིན་པར་བཟུང་ཆོག་མི་ཆོག་ཅི་རིགས་ཡོད་དོ། །མདོ་ལུགས་ཀྱི་ཕྱག་རྒྱ་ཆེན་པོའི་ཁུངས་ཡུམ་རྒྱས་འབྲིང་བསྡུས་གསུམ་སོགས་དངོས་བསྟན་སྟོང་ཉིད་ཀྱི་རིམ་པ་གཙོ་བོར་སྟོན་པའི་ཤེར་མདོ་རྣམས་ཡིན་ཏེ། ལྟ་བའི་དབྱེ་བ་མཐའ་ཡས་པ་ཞིག་ཡོད་ཀྱང་གནས་ལུགས་ཕྱག་རྒྱ་ཆེན་པོ་འདི་ལ་མ་བརྟེན་པར་ཐེག་པ་གསུམ་པོ་གང་གིས་ཀྱང་ཐར་པ་ཐོབ་མི་ནུས་པས་ཀླུ་སྒྲུབ་ཀྱིས་ཀྱང། ཉན་ཐོས་རང་སངས་རྒྱས་རྣམས་དང། །སངས་རྒྱས་རྣམས་ཀྱིས་ངེས་བསྟན་པའི། །ཐར་པའི་ལམ་ནི་གཅིག་ཉིད་ཁྱོད། །ཅེས་གསུངས་ལ་རྗེ་བླ་མས་ཀྱང་དགའ་ལྡན་བྱང་རྩེར་གུང་རུ་རྒྱལ་མཚན་བཟང་པོ་སོགས་ལ་ཕྱག་ཆེན་གྱི་ཁྲིད་དང། ཡོངས་གྲགས་དབུ་མའི་ལྟ་ཁྲིད་གཉིས་གནང་བས་སྒོམ་གསར་རྙིང་གི་ཐ་སྙད་ཀྱང་བྱུང་ལ། དོན་ལྟ་བ་ལ་ཕྲ་རགས་

― GTD003_Page_0580 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་ཀྱང། བསྒོམ་པའི་ཚེ་སེམས་ཀྱི་ཀུན་རྫོབ་པའི་ངོ་བོ་ཐོག་མར་བཙལ་ཏེ་དེའི་སྟེང་ནས་དོན་དམ་པའི་ངོ་བོ་བཙལ་ན་རྙེད་སླ་བས་སྒོམ་ཚུལ་གྱི་ཁྱད་ཙམ་ཞིག་ཡོད་པ་ཡིན་ནམ་སྙམ། ཕྱག་རྒྱ་ཆེན་པོའི་འདོད་ཚུལ་གྱི་དབྱེ་བའང་བོད་འདིར་སྔོན་ཆད་མཐའ་ཡས་པ་ཞིག་བྱུང་སྟེ། ལྷན་ཅིག་སྐྱེས་སྦྱོར་ག་འུ་མ། །ཞེས་སོགས་གསུངས་པའི་དང་པོ་ལྷན་ཅིག་སྐྱེས་སྦྱོར་ནི་རྗེ་བཙུན་མི་ལ་རས་པའི་ཐུགས་སྲས་ཉི་མ་ལྟ་བུ་མཉམ་མེད་སྒམ་པོ་པ་ཆེན་པོའི་བཞེད་སྲོལ་ཡིན་ཏེ། དེ་ཉིད་ཀྱིས། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །རྣམ་རྟོག་ལྷན་ཅིག་སྐྱེས་པ་ཆོས་སྐུའི་རླབས། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སེམས་དབྱེར་མེད་ལྷན་ཅིག་སྐྱེས་པ་འོ། །ཞེས་དོན་ཚན་བཞིར་བཅད་ནས་གསུངས་ལ། གའུ་མ་ནི་མཁས་གྲུབ་ཁྱུང་པོའི་བཀའ་སྲོལ་ཡིན་ལ། དེའང་ཕལ་ཆེར་མར་པ་དང་དུས་མཚུངས་ཤིང། ཁོང་གི་བཞེད་ཚུལ་མཐར་ཐུག་པའི་ལྟ་བ་ནི་མགོན་པོའི་ཤིས་བརྗོད་བཀའ་རྒྱ་མར། སྣང་སྲིད་རང་གྲོལ་སྒྱུ་མ་རྨི་ལམ་བཞིན། །ཞེས་སོགས་གསུངས་པ་འདི་ཡིན་པས། དེའི་དོན་ཁོང་རང་ཇི་ལྟར་འཆད་ཤེས་དཀའང། ང་ཚོའི་ལུགས་དང་མཐུན་པར་འགྲེལ་ན། སྣང་སྲིད་ཀྱི་ཆོས་འདི་ཐམས་ཅད་བདེན་གྲུབ་ཀྱིས་སྟོང་པས་ན་བདེན་འཛིན་གྱི་འཛིན་ཚུལ་དེ་ཉིད་དངོས་པོ་གང་གིའང། གནས་ལུགས་སུ་མ་ཞུགས་པ་རང་གྲོལ་གྱི་དོན་དང། དེ་ལྟར་བདེན་པས་སྟོང་ཡང་ཀུན་རྫོབ་ཏུ་སྣང་བ་ནི་སྔགས་རྫས་ཚོགས་པ་ལས་རྟ་གླང་མེད་ཀྱང་རྟ་གླང་གི་སྣང་བ་འབྱུང་བ་ལྟ་བུ་ཡིན་ལ། གནས་ལུགས་དེ་ཉིད་འཛིན་སྟངས་སུ་བྱས་ཏེ་རོ་རྐྱང་གི་རྒྱུ་བ་དྷཱུ་ཏཱིར་བཀག་ནས་བསྒོམས་པ་ལས་བྱུང་བའི་ལྷན་སྐྱེས་ཀྱི་བདེ་

― GTD003_Page_0581 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ཆེན་པོའི་ཡེ་ཤེས་རྒྱུན་ཆད་མེད་པ་རྐང་པ་གཉིས་པའི་དོན་དང། དེས་མཉམ་གཞག་གི་ངེས་ངོར་ཀུན་རྫོབ་ཀྱི་སྤྲོས་པ་ཅི་ཡང་ཡིད་ལ་མི་བྱེད་པར་མེད་དགག་སྟོང་སང་དེ་ཁོ་ན་ལ་འཇུག་པ་གསུམ་པའི་དོན་ཡིན་ན། ལྔ་ལྡན་ནི་འབྲི་ཁུང་འཇིག་རྟེན་མགོན་པོས་བཞེད་ཚུལ་ཡིན་ཞིང། དེའང་ཉིད་ཀྱི་གསུང་ལས། བྱང་ཆུབ་སེམས་ཀྱི་རྟ་ཕོ་ལ། །གཞན་ཕན་གྱི་དཀྱུས་ཐོག་མ་བཅད་ན། །ཁྲོམ་ལྷ་མི་འོར་ཆེ་མི་འབྱུང་བས། །སེམས་སྔོན་འགྲོ་འདི་ལ་ནན་ཏན་མཛོད། །ཅེས་སོགས་ཀྱི་སྐབས་ནས་དང་པོ་སྔོན་འགྲོ། དངོས་གཞི་ལྷར་བསྒོམ་པ། མོས་གུས་སྦྱོང་བ། མི་རྟོག་པ་བསྒོམ་པ། མཇུག་བསྔོ་བ་དང་ལྔར་བསྡུས་ནས་གསུངས། རོ་སྙོམས་སྦྱོར་དྲུག་ནི་འགྲོ་མགོན་གཙང་པ་རྒྱ་རས་པ་ནས་བརྒྱུད་པ་ནས་བརྒྱུད་པའི་གདམས་པ་ཡིན་ལ། དེའང་རྣམ་རྟོག་ལམ་འཁྱེར། ཉོན་མོངས་ལམ་འཁྱེར། ན་ཚ་ལམ་འཁྱེར། ལྷ་འདྲེ་ལམ་འཁྱེར། སྡུག་བསྔལ་ལམ་འཁྱེར། འཆི་བ་ལམ་འཁྱེར་རྣམས་སོ། །ཡི་གེ་བཞི་པ་ནི། ཨ་མ་ན་ཡེའི་སྒྲ་ལས་དྲངས་ཏེ། སེམས་ཀྱི་གཞི་རྩ་བཅད་པ། སེམས་ཀྱི་བཞག་ཐབས་བསྟན་པ། སེམས་ཀྱི་གོལ་ས་བཅད་པ། སེམས་ཀྱི་ལམ་འཁྱེར་བསྟན་པ་བཞིར་བསྡུས་ནས་སྟོན་པ་ཡིན་ལ། ཞི་བྱེད་ནི་དམ་པ་སངས་རྒྱས་ཀྱི་བཀའ་སྲོལ། ཤེས་རབ་སྙིང་པོར། སྡུག་བསྔལ་ཐམས་ཅད་ཞི་བར་བྱེད་པའི་སྔགས་ཞེས་པ་ལ་བརྟེན་ནས། མཚན་ཡང་དམ་ཆོས་སྡུག་བསྔལ་ཞི་བྱེད་དུ་བཏགས་ཏེ། རྗེ་བཙུན་མི་ལ་རས་པ་དང་ཁོང་རྣམ་གཉིས་མཇལ་བའི་ཚེ་ཉམས་མགུར་བཞེས་པ་ལས་ཀྱང། དམ་ཆོས་སྡུག་བསྔལ་

― GTD003_Page_0582 ―

^{[མ་དཔེ་གཟིགས་ན་འདིར་གནོན།]}

[Full Size]

ཞི་བྱེད་འདི། །གནོད་སྦྱིན་ཕོ་མོ་བྱུང་ཙ་ན། །བརྟུལ་ཞུགས་འཕྲུལ་འཁོར་འཆའ་བ་ཡིན། །ཞེས་སོགས་ནས། དུས་གསུམ་རྒྱལ་བའི་དགོངས་པ་ལགས། །ཞེས་བསྔགས་བརྗོད་དང་ཞལ་ཕོ་མཛད་པ་དེ་ཡིན། གཅོད་ཡུལ་ནི་མ་ཅིག་ལབ་སྒྲོན་ནས་བརྒྱུད་པ་ཟབ་མོ་གཅོད་ཀྱི་གདམས་པ་ཞེས་ཡོངས་སུ་གྲགས་པ་འདི་ཡིན་ཞིང། དེའི་གཙོ་བོ་ནི་ཀུན་རྫོབ་བྱང་ཆུབ་ཀྱི་སེམས་ཀྱི་སྒོ་ནས་ཚེ་འདིའི་སྣང་ཤས་དང་རང་གཅེས་འཛིན་གཅོད་པ། དོན་དམ་བྱང་ཆུབ་ཀྱི་སེམས་ཀྱི་སྒོ་ནས་བདག་འཛིན་ལྷན་སྐྱེས་ཀྱི་འཛིན་སྟངས་གཅོད་པའམ། འགོག་པར་བྱེད་པ་ཡིན། རྫོགས་ཆེན་ཞེས་པ་དྲི་མ་ཐམས་ཅད་དང་བྲལ་བའི་སེམས་མ་བཅོས་གསལ་ལ་ཧྲིག་གེ་བ་འདི་ཡིན་ཞིང། སྣང་སྲིད་འཁོར་འདས་ཐམས་ཅད་འདིའི་ནང་དུ་རྫོགས་པས་ན་རྫོགས་པ་དང་འདི་ལས་གཞན་དུ་གྲོལ་བྱེད་ཀྱི་ཐབས་མེད་པས་ན་ཆེན་པོ་ཞེས་བཤད་འདུག་ཀྱང་དྲི་མ་ཐམས་ཅད་དང་བྲལ་ལུགས་སོགས་ཇི་ལྟར་ཡིན་མ་ཤེས། འདིའི་གདམས་པ་སློབ་དཔོན་པདྨའི་མན་ངག་ལྟ་བའི་ཕྲེང་བ་ཞེས་བྱ་བ་ཞིག་ཡོད་ལ། རྒྱལ་དབང་གིའང་གསུང་གི་གཙོ་བོ་ཞལ་ལུང་རྣམ་གཉིས་ཟེར་བའི་འཇམ་དཔལ་ཞལ་ལུང་དང། གཅིག་ཤོས་རྫོགས་ཆེན་གྱི་ལྟ་སྒོམ་གཙོ་བོར་སྟོན་པ་རིག་འཛིན་ཞལ་ལུང་ཡིན། དེ་དག་གི་སྟེང་དུ་རང་ལུགས་དབུ་མའི་ལྟ་ཁྲིད་དང་བཅས་པ་འདོད་ཚུལ་མཐའ་ཡས་པ་ཞིག་ཡོད་ཀྱང་ཉམས་མྱོང་ཅན་གྱི་རྣལ་འབྱོར་པ་ཞིག་གིས་བསྒོམ་སོང་བ་ཡིན་ན་དོན་ལ་ཚ་གྲང་ལྟར་འགལ་བ་དེ་འདྲ་མ་ཡིན་པར་དགོངས་པ་གཅིག་ཏུ་འགྲོ་ཞེས། དུས་འཁོར་འགྲེལ་ཆེན་དྲི་མེད་འོད་ལས། ཇི་ལྟར་ས་ལ་རིན་ཆེན་མང། །དབྱེ་བ་ཐ་དད་ཐ་དད་ནི། །ཡུལ་དང་ཡུལ་

― GTD003_Page_0583 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་དབང་གིས་བརྗོད། །རིན་ཆེན་དབྱེ་བ་འགར་ཡང་མེད། །ཅེས་དཔེར་ན་ཡུལ་སོ་སོ་ནས་བྱུང་བའི་བྱུ་རུ་ལས་དེ་དང་དེའི་བྱུ་རུ་ཞེས་སོ་སོར་བྱེད་ཀྱང། དོན་བྱུ་རུ་ཡིན་པར་མཚུངས་པ་དང་འདྲ་བར་གསུང་བ་ཙམ་ལས་རྩ་འགྲེལ་གང་དུའང་དགོངས་པ་གཅིག་ལུགས་འདི་ཡིན་ཞེས་མ་གསུངས་པས་དག་སྣང་སྦྱངས་ནས་གསུང་བ་ཡིན་ནམ་དངོས་གནས་ལ་དེ་དག་བསྒོམ་སྟེ་རླུང་དབུ་མར་བཅུག་ནས་བདེ་སྟོང་སྦྱར་ཏེ་ལམ་གོང་མར་བགྲོད་ཚུལ་ཞིག་ཡོད་པ་ཡིན་དཔྱད་དཀའ་བས། སྐྱབས་མགོན་ཐམས་ཅད་མཁྱེན་པ་བློ་བཟང་དཔལ་ལྡན་ཡེ་ཤེས་དཔལ་བཟང་པོས་སྐུ་འབུམ་དུ་གནང་སྐབས་ཀྱང། ཀུ་རེའི་ཚུལ་དུ། པཎ་ཆེན་ད་སྐབས་མི་བཞུགས་པ་མ་གཏོགས། བཞུགས་ན་དགོངས་པ་གཅིག་ལུགས་འདི་གཅིག་འདྲི་དགོས་པར་འདུག །གཞན་ཕྱོགས་པ་ཚོས་སྟོང་ཉིད་མ་ཡིན་དགག་ཏུ་འདོད། རང་ལུགས་ལ་མེད་དགག་ཡིན་པས་མ་ཡིན་དགག་དང་མེད་དགག་གཉིས་ཇི་ལྟར་གཅིག་ཅེས་གསུངས་སོ། །འོ་ན་འདིར་ཇི་འདྲ་ཞིག་འཆད་རྒྱུ་ཡིན་ན། སྤྱིར་ལྟ་བ་ཚོལ་ལུགས་ལ་གཉིས་ཡོད་དེ། ཐོག་མར་ཡིད་དཔྱོད། དེ་ནས་གཏན་ཚིགས་ཡང་དག་ལ་བརྟེན་པའི་རྗེས་དཔག་སོགས་ཐོས་བསམ་གྱི་སྒོ་ནས་རིམ་གྱིས་བསྒོམ་པ་ལ་འཇུག་པ་ལྟ་ཐོག་ནས་སྒོམ་ཚོལ་བ་དང། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཞེས་སོགས་གསུངས་པ་ལྟར། དང་པོར་ཞི་གནས་བསྒྲུབས་ཏེ། དེ་རྗེས་མཚན་ཉིད་སོ་རིག་གིས་དཔྱད་ནས་ལྟ་བ་ཚོལ་བ་སྒོམ་ཐོག་ནས་ལྟ་བ་ཚོལ་བའི་ལུགས་གཉིས་ཡོད་པ་ལས་འདིར་

― GTD003_Page_0584 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱི་མའི་དབང་དུ་བྱས་ཏེ། བསམ་གཏན་བདེ་བའི་སྟེགས་བུ་ལ། །ལུས་གནད་བདུན་དང་ལྡན་བྱས་ལ། །ཞེས་སོགས་གསུངས་པའི་རྣམ་སྣང་གི་ཆོས་བདུན་ལྡན་འདི་ཕལ་ཆེར་ལ་ཤིན་ཏུ་གལ་ཆེ་ཞིང། བ་ལང་བདག་ལྟ་བུ་གང་ཟག་གི་རིགས་འགའ་ཞིག་ལ་འདི་འདྲ་མི་དགོས་པའང་ཡོད། རླུང་རོ་དགུ་ཕྲུགས་ནི་གཡོན་ནས་རྔུབས་ཏེ་གཡས་ནས་འབུད་པ་གསུམ། གཡས་ནས་རྔུབས་ཏེ་གཡོན་ནས་འབུད་པ་གསུམ། མཉམ་དུ་རྔུབས་ཏེ་མཉམ་དུ་འབུད་པ་གསུམ་དང་བཅས་པ་རྣམས་ཡིན་ལ། རིག་པ་དྭངས་སྙིགས་འབྱེད་པའི་མན་ངག་མཐར་ཐུག་པ་རྫོགས་རིམ་ཡིན་ཞེས་ཡོངས་འཛིན་གསུང། དེ་ནས་སྐྱབས་སེམས་སྔོན་དུ་བཏང་སྟེ་བླ་མའི་རྣལ་འབྱོར་བསྒོམ་དགོས་ལ་དེའང་འགྲེལ་བར། ཟབ་ལམ་བླ་མའི་རྣལ་འབྱོར་ནི་ལམ་གྱི་ཆ་ཡོངས་སུ་རྫོགས་པའི་བླ་མའི་རྣལ་འབྱོར་ཏེ་ཟུར་དུ་བཀོད་པ་ལྟར་ཡིན། ཞེས་ཞལ་འཕངས་མཛད་པ་ནི་ཡོངས་སུ་གྲགས་པའི་བླ་མཆོད་འདི་ཉིད་ཡིན་པས་བླ་མ་མཆོད་པ་ཞེས་པ་དང། བླ་མའི་རྣལ་འབྱོར་ཞེས་པ་ཕལ་ཆེར་དོན་གཅིག་ལ། བཀའ་བརྒྱུད་པ་རྣམས་བླ་སྒྲུབ་དང། རྙིང་མ་པ་རྣམས་རིག་འཛིན་གདུང་སྒྲུབ་ཀྱི་ཐ་སྙད་ཀྱང་བཏགས་སྣང་། འདིར་བླ་མའི་རྣལ་འབྱོར་གྱི་ཁྲིད་བྱེད་པ་ལ་རང་ལ་ཐ་མལ་གྱི་སྣང་ཞེན་སྦྱོང་བའི་ཕྱིར་ལྷའི་ང་རྒྱལ་འཛིན་པ། སྣོད་བཅུད་ལ་ཐ་མལ་གྱི་སྣང་ཞེན་སྦྱོང་བའི་ཕྱིར། སྣོད་ཐམས་ཅད་གཞལ་ཡས་ཁང་དང་བཅུད་ཐམས་ཅད་ལྷ་དང་ལྷ་མོའི་རང་བཞིན་དུ་བསྒོམ་པ། མཆོད་རྫས་ལ་ཐ་མལ་གྱི་སྣང་ཞེན་སྦྱོང་བའི་ཕྱིར་ངོ་བོ་བདེ་སྟོང་གི་ཡེ་ཤེས་ལ་རྣམ་པ་མཆོད་རྫས་སུ་མོས་པ་རྣམས་སྔོན་དུ་

― GTD003_Page_0585 ―

^{[མ་དཔེ་གཟིགས་ན་འདིར་གནོན།]}

[Full Size]

བཏང་སྟེ། ཚོགས་ཞིང་གསལ་འདེབས་པ་ནི། བདེ་སྟོང་དབྱེར་མེད་ལྷ་ལམ་ཡངས་པར་ཞེས་སོགས་ཏེ། བདེ་སྟོང་གི་དོན་ལ་ཨེ་ཝཾ་གྱི་བཤད་པ་སོགས་མང་དུ་བྱར་ཡོད་ཀྱང་བསྡུ་ན། བདེ་བ་དོན་དམ་ལ་ཞུགས་པའི་ཡེ་ཤེས་དང་། སྟོང་པ་སྟོང་གཟུགས་ཀྱི་སྐུ་གཉིས་ངོ་བོ་དབྱེར་མི་ཕྱེད་པ་ཡིན་ཞིང་། ལྷ་ལམ་ལ་ངེས་དོན་གྱི་ལྷ་ལམ་བདེ་སྟོང་གི་ཡེ་ཤེས་དང་། དྲང་དོན་གྱི་ལྷ་ལམ་མངོན་བརྗོད་སོགས་ནས་འབྱུང་བ་ལྟར་ནམ་མཁའ་ལ་བྱ་ཚུལ་གཉིས་སུ་ཡོངས་འཛིན་རིན་པོ་ཆེས་གསུངས་ལ། དཔོན་སློབ་བྱམས་པ་རིན་པོ་ཆེས་ལྷ་ལམ་ཞེས་པ་འཇིག་རྟེན་པའི་ལྷ་རྣམས་རྒྱུ་བའི་ལམ་ཡིན་པར་མ་ཟད། ཚོགས་ཞིང་གི་ལྷ་རྣམས་གང་དུ་གསལ་འདེབས་པའི་གཞི་དང། འབྱོན་བཞུད་ཀྱི་གནས་ཡིན་པས་དེ་ལྟར་བཞག་ཅེས་གསུངས། ཀུན་བཟང་ལ་རྒྱལ་སྲས་ཀུན་བཟང་དང། བྱང་ཆུབ་ཀྱི་སེམས་ལ་ཀུན་ཏུ་བཟང་པོ་ཞེས་བཤད་པ་གཉིས་ཡོད་ཀྱང་འདིར་བདེ་སྟོང་དབྱེར་མེད་ཀྱི་ཡེ་ཤེས་ཀྱིས་ཟིན་པའི་མཆོད་སྤྲིན་ལ་ཀུན་བཟང་མཆོད་སྤྲིན་དུ་བཤད་པ་ཡིན། དཔག་བསམ་གྱི་སྡོང་པོའང་ཟེའུ་འབྲུ་མིག་གིས་མཐོང་ཚད་ཙམ་བྱེད་དགོས་ཀྱི་ཧ་ཅང་མཐོན་པོ་མི་བྱ་ཞེས་ཡོངས་འཛིན་རིན་པོ་ཆེས་གསུངས། གདོང་ལྔ་ནི་རྐང་ལག་བཞི་ཁ་དང་ལྔ་ཆར་གྱིས་རི་དྭགས་འཛིན་པ་སོགས་གདོང་གི་བྱ་བ་བྱེད་ནུས་པའི་ཆ་ནས་བཤད་ཚུལ་གཅིག་དང། གདོང་གི་ཤ་ཚུགས་ལ་འབུར་པོ་ལྔ་ཡོད་པས་དེ་ལྟར་བཤད་པ་སྟེ་གཉིས་ཡོད་ལ། གང་ལྟར་ཡང། སེངྒེ་ནི་རང་ཉིད་གཅན་གཟན་གང་ལའང་མི་འཇིགས་ཤིང། དེ་ལ་ཐམས་

― GTD003_Page_0586 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་སྐྲག་དགོས་པ་ལྟར་བླ་མའང་བདུད་དང་མུ་སྟེགས་ལ་སོགས་པ་ཐམས་ཅད་ལས་རྒྱལ་ཞིང། དེ་དག་གིས་བརྫི་བར་མི་ནུས་པས་སྟོབས་དང། མི་འཇིགས་པ་ལ་སོགས་པའི་མཚོན་བྱེད་དུ་སེངྒེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་གསལ་འདེབས་པ་ཡིན། སེངྒེའང་འབུར་དུ་དོད་པ་དང། རི་མོར་བྲིས་པ་ལྟ་བུ་མ་ཡིན་པར་མིག་སེར་ལྷོག་ལྷོག་པ། དབུགས་ལྷེབ་ལྷེབ་པ་དེ་འདྲ་བྱེད་དགོས་ཞེས་བླ་མ་བྱམས་པ་རིན་པོ་ཆེས་གསུངས། ཚོགས་ཞིང་གསལ་འདེབས་ཚུལ་སྔར་དང་འདྲ་ལ། གཙོ་བོ་ནི་རྗེ་རིན་པོ་ཆེའི་སྐུའི་རྣམ་པ་དང། དེར་མ་ཟད་རྗེ་བླ་མ་གང་དུ་སངས་རྒྱས་པའི་སངས་རྒྱས་དང་མཐུན་པ་ཕྱག་ན་ལྷུང་བཟེད་བདུད་རྩིས་གང་བ་བསྣམས་པ་དེ་འདྲ་དགོས་ཞེས་པཎ་ཆེན་རིན་པོ་ཆེས་གསུངས་སོ། །ཕུང་པོ་རྣམ་དག་བདེ་གཤེགས་ལྔ། །ཞེས་སོགས་ཀྱི་དོན་ནི་སྤྱི་བོར་རྣམ་པར་སྣང་མཛད། མགྲིན་པར་འོད་དཔག་མེད། ལྟེ་བར་རིན་ཆེན་འབྱུང་ལྡན། བརླའི་རྩ་བར་དོན་ཡོད་གྲུབ་པ་ནས་བཟུང་སྟེ། རྐང་མཐིལ་གཉིས་ལ་གནོད་མཛེས་ཀྱི་བར་ལྷ་རྣམས་གསང་འདུས་ནས་འབྱུང་བ་ལྟར་ཆ་སོ་སོར་མེ་ལོང་ནང་གི་གཟུགས་བརྙན་བཞིན་གསལ་འདེབས་པའམ་ཆ་རྣམས་དེ་དང་དེའི་ངོ་བོར་མོས་དགོས་པ་ཡིན། བ་སྤུ་དགྲ་བཅོམ་ཉི་ཁྲི་ཆིག་སྟོང་ཞེས་པའི་དགྲ་བཅོམ་ཐེག་ཆེན་དགྲ་བཅོམ་དང། འོད་ཟེར་ཕྱོགས་སྐྱོང་ཞེས་པ་ཤར་ཕྱོགས་སུ་འཕྲོས་དེ་ཡོངས་སུ་གྱུར་པ་ལས་བརྒྱ་བྱིན་དང། ལྷོ་ཕྱོགས་སུ་འཕྲོས་པ་ཡོངས་སུ་གྱུར་པ་ལས་གཤིན་རྗེ་སོགས་སུ་མོས་པ་ཡིན་ཞེས་ཡོངས་འཛིན་རིན་པོ་ཆེས་གསུངས། འདབ་མ་འོག་མ་རྣམས་ཀྱང་སྔར་བཤད་པ་དང་འདྲ་ལ། གོ་རིམ་དེ་ཁོ་ན་ལྟར་མ་བྱས་

― GTD003_Page_0587 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་ཆོག །དེང་སང་འཇིག་རྟེན་ལས་འདས་པའི་ལྷ་ལས་འཇིག་རྟེན་པ་ལ་ཞེན་ཆེ་བའི་སྟབས་ཀྱིས་དེ་འདྲ་ཚོགས་ཞིང་གི་གྲངས་སུ་འཇོག་ཉེན་ཡོད་པས་གཏན་ནས་མི་རུང། དེ་ནས་ཚོགས་ཞིང་དེ་རྣམས་ཀྱི་ཐུགས་ཀ་ནས་འོད་ཟེར་འཕྲོས་ཏེ་རང་བཞིན་གྱི་གནས་ནས་ཡེ་ཤེས་པ་རྣམས་སྤྱན་འདྲེན་དགོས་པ་ཡིན་ལ། རང་བཞིན་གྱི་གནས་ཞེས་པ་ལོངས་སྐུའི་གནས་ལ་བྱེད་པ་དང། ཆོས་སྐུའི་གནས་ལ་བྱེད་པ་གཉིས་ཡོད་ཅིང། རྣམ་མཁྱེན་གྱིས་ཆོས་ཉིད་ལ་ཁྱབ་ཡོད་པའི་གནད་ཀྱིས་འོད་ཟེར་རྒྱང་རིང་པོར་སྤྲོ་མི་དགོས་པར་གནས་འདི་ལྟ་བུ་མཚོན་ན། རྒྱབ་རི་མདུན་རི་སོགས་ཀྱི་ངོས་ལ་འཕྲོས་ཙམ་བྱས་པས་ཆོག་སྟེ། ནམ་མཁའ་ལ་སྤྲིན་གློ་བུར་དུ་ཐོལ་གྱིས་བྱུང་བ་ན་རྒྱུ་རྐྱེན་མེད་པར་བྱུང་བ་ལྟ་བུ་ཡོང་ཡང། དེར་རྐྱེན་ཕྲ་མོ་ཞིག་ཡོད་པ་ཡིན། དེ་བཞིན་དུ་ཡེ་ཤེས་ཆོས་སྐུ་དང། དེའི་སྟེང་གི་སྟོང་པ་ངོ་བོ་ཉིད་སྐུ་སོགས་ཀྱིས་ཁྱབ་ཡོད་ཅིང། དེ་ལས་གཟུགས་སྐུའི་རྣམ་པ་འཆར་བས་ཐག་རིང་པོར་དེ་འདྲ་བྱེད་མི་དགོས། དེ་ནས། ཛཿ ཧཱུཾ་བཾ་ཧོཿ ཞེས་པའི་སྐབས་སུ་དམ་ཡེ་སོ་སོར་མཐོ་བརྩེགས་ཀྱི་ཚུལ་དུ་གནས་པ་དང། དམ་ཚིག་པ་ལ་བསྟིམས་ཀྱང་མ་འདྲེས་པར་གནས་པ་དང། འོ་ཆུ་འདྲེས་པ་བཞིན་དབྱེར་མེད་དུ་གྱུར་པ་དང། དེའང་མི་དགྱེས་པ་མེད་པར་དགྱེས་བཞིན་བཞུགས་པའི་མོས་པ་བྱེད་པ་འདི་རྣམས་ཆོ་ག་ཐམས་ཅད་མཐུན། དེ་ནས་ཡན་ལག་བདུན་པ་འབུལ་བ་ལ། ཐོག་མར་ཕྱག་འཚལ་བ་ནི། གང་གི་ཐུགས་རྗེས་བདེ་བ་ཆེན་པོའི་དབྱིངས། །ཞེས་སོགས་ཏེ། གང་ཞེས་པ་སྤྱི་སྒྲ་ཡིན་ཀྱང་ཐུགས་རྗེས་ཞེས་བྱེད་ཚིག་གི་ནུས་པས་དེ་ལ་

― GTD003_Page_0588 ―

^{[མ་དཔེ་གཟིགས་ན་འདིར་གནོན།]}

[Full Size]

བརྟེན་ནས་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཟུང་འཇུག་གི་གོ་འཕང་མངོན་དུ་འགྱུར་བ་ཞེས་བླ་མ་ལ་གོ་དགོས་པ་ཡིན། ཤོ་ལོ་ཀ་གཉིས་པ་ནི། མཚན་ཟུར་ལ་བརྟགས་ན་ཆོས་འདི་སྟོན་པའི་བླ་མ་མཁས་གྲུབ་སངས་རྒྱས་ཡེ་ཤེས་ལ་གཙོ་བོར་ཕྱག་འཚལ་བ་ཡིན་ནམ་སྙམ། ལྷར་བཅས་སྟོན་པ་ཞེས་སོགས་དཀོན་མཆོག་གསུམ་འདུས་པའི་ངོ་བོར་བལྟས་ནས་ཕྱག་འཚལ་བ་འདི་གནད་ཆེ་སྟེ། སངས་རྒྱས་ལ་དཀོན་མཆོག་གསུམ་གའི་ངོ་བོར་མོས་པ་གང་དུའང་མ་བཤད། ཆོས་དང་དགེ་འདུན་ལའང་མ་བཤད་ཅིང། བླ་མ་དཀོན་མཆོག་གསུམ་གའི་རྩ་བར་གསུང་བ་དང། བླ་མའི་སྐུ་དགེ་འདུན་དཀོན་མཆོག །གསུང་ཆོས་དཀོན་མཆོག །ཐུགས་སངས་རྒྱས་དཀོན་མཆོག་གསུམ་ཡིན་པར་གསུང་བའང་ཡོད། དེར་མ་ཟད་བླ་མ་ལས་ལོགས་སུ་དཀོན་མཆོག་གསུམ་ཡོད་ན་བླ་མ་ལ་དད་པ་ཞན་དུ་འགྲོ་ཉེན་ཡོད་པས་དེ་ལྟར་འཛིན་མི་རུང། གཉིས་པ་མཆོད་པ་འབུལ་བ་ནི། སྤྱིར་ཡན་ལག་བདུན་ཀ་དང། དེར་མ་ཟད་ཐོས་བསམ་སྒོམ་གསུམ་སོགས་བླ་མ་མཉེས་བྱེད་ཐམས་ཅད་སྒྲུབ་པའི་མཆོད་པ་ཡིན་ཡང། འདིར་ཡོངས་གྲགས་ཀྱི་མཆོད་པའི་རིམ་པ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞི་ལས། དང་པོ་ནི། བཀོད་ལེགས་རིན་ཆེན་འོད་འབར་སྣོད་ཡངས་ལས། །ཞེས་སོགས་ཏེ། དབྱིབས་སོགས་བཀོད་པ་ལེགས་ཤིང་བྱི་དོར་བྱས་པས་འོད་འབར་བ། རྒྱུ་རིན་པོ་ཆེ་ལས་གྲུབ་པ་དེ་ལྟ་བུའི་སྣོད་དུ་མཆོད་ཡོན་སོགས་ཟད་པ་མེད་པར་འབུལ་བ་ཡིན་ཞིང་རྒྱས་པར་བྱེད་ན། ཚིག་གཉིས་པོ་འདིའི་མཇུག་ཏུའང། དྭངས་པའི་སེམས་ཀྱིས་ཕུལ་བྱུང་ཞིང་གི་མཆོག །སྐྱབས་མགོན་ཐུགས་རྗེའི་གཏེར་ལ་དབུལ་བར་བགྱི། །ཨོཾ་གུ་རུ་

― GTD003_Page_0589 ―

^{[མ་དཔེ་གཟིགས་ན་འདིར་གནོན།]}

[Full Size]

བུདྡྷ་བོདྷི་སཏྭ་སརྦ་དྷརྨཱ་པཱ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ། ཨཉྩ་མ་ཎཾ་སོགས་བཅུག་པས་ཆུ་བཞི་དང། རྗེས་མ་སོ་སོའི་མགོ་མཇུག་ཏུའང། སྐྱབས་མགོན་རྗེ་བཙུན་བླ་མ་འཁོར་བཅས་ལ། །སྣ་ཚོགས་མཆོད་སྤྲིན་རྒྱ་མཚོ་འབུལ་བ་ནི། །སྡོང་པོ་སིལ་མ་འཕྲེང་བ་སྤེལ་ལེགས་པའི། །མཛེས་པའི་མེ་ཏོག་ས་དང་བར་སྣང་གང། །དྭངས་པའི་སེམས་ཀྱིས་ཕུལ་བྱུང་ཞིང་གི་མཆོག །སྐྱབས་མགོན་ཐུགས་རྗེའི་གཏེར་ལ་དབུལ་བར་བགྱི། །ཨོཾ་གུ་རུ་བུདྡྷ་བོདྷི་སཏྭ་དྷརྨཱ་པཱ་ལ་ས་པ་རི་ཝཱ་ར་པུཥྤེ་པྲ་ཏཱིཙྪ་ཧཱུཾ་སྭཱཧཱ། ཞེས་པས་མཚོན་ཏེ་སྦྱོར་དགོས་པར་ཡོངས་འཛིན་རིན་པོ་ཆེས་གསུངས། དམིགས་པ་ནི་མེ་ཏོག་གི་སྡོང་པོ་དང། དེ་ལས་བཏོག་པའི་སིལ་མ་ཕྲེང་བར་བརྒྱུས་པ་དཀར་པོ། སྔོན་པོ། དམར་པོ། སེར་པོ་སོགས་འཇའ་ཚོན་གྱི་མདངས་ལྟར་སྤེལ་བ། གཞན་ཡང་མེ་ཏོག་གི་གདུགས་དང། རྒྱལ་མཚན་དང། བླ་རེ་ལ་སོགས་པ་གནས་སྐབས་དེ་ན་མེ་ཏོག་མ་ཡིན་པ་གང་ཡང་མེད་ཚོད་ལྟ་བུ་བློས་སྤྲུལ་དགོས་ལ། སྣང་གསལ་གྱི་ཐད་དུ་རྩེ་དགའ་རྒོད་ཅེས་པའི་དོན། བྱིས་པ་རྩེད་མོ་རྩེ་བ་བཞིན། མར་མེའི་ཚོགས་ཀྱང་གཅིག་གི་འོད་གཅིག་ལ་ཕོག་སྟེ། ཕན་ཚུན་འཛིངས་པའི་དོན་ཡིན་པར་ཡོངས་འཛིན་རིན་པོ་ཆེས་གསུངས། སྣ་ཚོགས་རོལ་མོ་ཞེས་པ་འབུད་བརྡུང་རྒྱུད་དཀྲོལ་གྱི་རོལ་མོའི་རིགས་མཐའ་ཡས་པ་ཡིན་ཞིང། ཕྱིའི་འདོད་ཡོན་གྱི་ལྷ་མོ་ནི། མེ་ལོང་དང་པི་ཝང་ལ་སོགས་པ་བཟུང་ནས་མཆོད་པ་བྱེད་པ་རྣམས་དང། ནང་གི་འདོད་ཡོན་གྱི་ལྷ་མོ་ནི། ལུས་ཀྱི་ཆ་ཤས་སམ་རྒྱུད་དུ་གཏོགས་པའི་འདོད་ཡོན་ལྔའི་སྒོ་ནས་མཆོད་པར་བྱེད་པ་རྣམས་

― GTD003_Page_0590 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན། བྱེ་བ་ཕྲག་བརྒྱའི་ཞེས་སོགས་འདིའི་མཎྜལ་ཡིན་ཞིང། དབེན་ས་སྙན་བརྒྱུད་ཀྱི་ཆོས་འདི་དག་ཞུ་བའི་ཚེའང་མཎྜལ་ཉེར་གསུམ་མ་འདི་རང་འབུལ་བ་ཕྱག་ལེན་ཡིན་གསུངས། དངོས་བཤམས་ཡིད་སྤྲུལ་ཡིད་བཞིན་རྒྱ་མཚོའི་ངོགས། །ཞེས་སོགས་ཕལ་ཆེར། འགྲོ་མགོན་འཕགས་པས། ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཞེས་སོགས་དང་ཆ་མཚུངས་པར། རང་གཞན་གྱི་དགེ་ཚོགས་དང། མདོའི་དབང་དུ་བྱས་པའི་བསླབ་པ་གསུམ། སྔགས་ཀྱི་དབང་དུ་བྱས་པའི་རིམ་པ་གཉིས་ལ་སོགས་པ་མཚོ་དང་མེ་ཏོག་དང་འབྲས་བུ་ལ་སོགས་པས་མཛེས་པའི་དགའ་ཚལ་གྱི་གཟུགས་སུ་བཀོད་ནས་ཕུལ་བ་ཡིན་ལ། ཡིད་བཞིན་གྱི་རྒྱ་མཚོ་ཞེས་པ་རྒྱ་མཚོ་ཆེན་པོ་དངོས་གཞི་མ་ཡིན་པར། གླིང་བར་གྱི་མཚོ་ཆུང་ཤིན་ཏུ་མཛེས་ཤིང་ཡིད་དུ་འོང་བ་དགོས་འདོད་ཐམས་ཅད་འབྱུང་བ་དེ་འདྲ་བ་ཞིག་ཡིན་པར་བཤད་ཅིང་ངོགས་ཞེས་པ་དེའི་གོ་སའམ་གཞི་དང་འགྲམ་ལ་བཤད་པ་གཉིས་འབྱུང། ཇའི་མཆོད་པ་འབུལ་བ་ནི་རྒྱ་གར་ན་མེད་ཀྱང་ཇོ་བོ་བོད་དུ་ཕེབས་སྐབས་ཇ་དྲངས་པས་བོད་ཀྱི་རབ་བྱུང་ཚོ་བསོད་ནམས་ཆེ་ཞེས་བསྔགས་བརྗོད་མཛད་པ་བཞིན་འདིར་ཡང་བཞག་གོ །དངོས་གྲུབ་འགུགས་པར་བྱེད་པའི་ལྕགས་ཀྱུ་ལྔ་དང། དངོས་གྲུབ་གསལ་བར་བྱེད་པའི་སྒྲོན་མ་ལྔ་ཞེས་ཤ་ལྔ་བདུད་རྩི་ལྔ་པོ་ཨོཾ་ཨཱཿ ཧཱུཾ་གིས་སྦྱངས་རྟོགས་སྦར་གསུམ་བྱས་ནས་འབུལ་བ་ནང་གི་མཆོད་པ་དང། གསང་བའི་མཆོད་པ་ནི། དབེན་པ་གསུམ་ལ་གནས་པའི་ཞིང་སྐྱེས་ཀྱི་མཁའ་འགྲོ་མ། བསྐྱེད་རིམ་ལ་གནས་པ་སྔགས་སྐྱེས། འོད་གསལ་སོགས་ལ་གནས་པའི་ལྷན་སྐྱེས་ཀྱི་མཁའ་འགྲོ་མ་འགྲེལ་པ་བཞི་སྦྲགས་ནས་འབྱུང་བ་ལྟར་གྱི་སྒྱུ་རྩལ་དྲུག་ཅུ་རྩ་

― GTD003_Page_0591 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་ལ་མཁས་པ་དེ་ལྟ་བུའི་ཕྱག་རྒྱ་ཕུལ་ལ་དེ་ལས་རང་འདྲ་ཆད་དེ་བླ་མའི་ཐུགས་ཀའི་རྡོ་རྗེ་འཆང་གི་ཡུམ་ལ་ཐིམ། དེ་དང་སྙོམས་པར་ཞུགས་པའི་ཟག་མེད་ཀྱི་བདེ་བ་མྱོང་བ་ན་གཙོ་འཁོར་ཐམས་ཅད་ཐུགས་རྒྱུད་གཅིག་པའི་གནད་ཀྱིས་གཞན་རྣམས་ཀྱང་དེས་ཚིམ་པར་འགྱུར་ཞེས་གསུང། དེ་ཁོ་ན་ཉིད་ཀྱི་མཆོད་པ་ནི། བརྟན་གཡོ་ཐམས་ཅད་ལ་ཁྱབ་ཅིང་དེ་དག་ཀུན་གྱི་རང་བཞིན་ནམ་སྡོད་ལུགས་སུ་གྲུབ་པ་རྟག་ཆད་སྤྲོས་པའི་མཐའ་ཐམས་ཅད་དང་བྲལ་བའི་དབྱིངས་སྟོང་ཉིད་དང་དབྱེར་མེད་དུ་ཞུགས་པའི་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཡིན་ནོ། །དེ་ནས་སྨན་འབུལ་བ་དང་ལུས་བྲན་དུ་འབུལ་བ་ནི། ཉོན་མོངས་བཞི་བརྒྱ་རྩ་བཞི་ཞེས་སོགས་བྱུང། གསུམ་པ་སྡིག་པ་བཤགས་པ་ནི་ཐོག་མེད་དུས་ནས་ཞེས་སོགས་ཏེ། འདི་ལ་ཡོངས་འཛིན་རིན་པོ་ཆེས། དཔེར་ན་ཆང་འཐུང་མཁན་ཞིག་གིས་སྔ་མ་ལ་འགྱོད་སེམས་ཀྱིས་བཤགས་པ་བྱེད་ཀྱང་སྡོམ་སེམས་མེད་ན་གཏན་ནས་འདག་མི་ཐུབ་པས་སྡོམ་སེམས་གལ་ཆེ་ལ། དེའང་ཞེ་ཕུགས་སུ་སླར་གཅོད་མི་ཐུབ་སྙམ་པ་ཡོད་ཀྱང་གནས་སྐབས་དེ་ལ་བློ་བཅོས་ནས་ཐག་རྦད་ཀྱིས་བཅད་དེ་སྡོམ་སེམས་བྱས་ན་སླར་རྫུན་དུའང་མི་འགྲོ་ལ། རྡོ་རྗེ་འཆང་གི་བཅས་དབང་ཡིན་པས། དེ་ལྟར་བྱེད་ཀྱང་བྱེད་དགོས་ཏེ། དགེ་འདུན་གྱི་ལས་བྱེད་པའི་ཚེ་ནའང་ལྟུང་མཐུན་གྱི་བྱིན་རླབས་བྱས་པས་ལྟུང་བ་དེས་ལས་ལ་མི་སྒྲིབ་པར་འགྱུར་བ་ལྟ་བུ་ཡིན་ཞེས་གསུངས་པ་གཞན་ལ་ཇི་ལྟར་ཡིན་རུང། ང་རང་ལ་བློ་སྐྱེད་ཆེ་བར་བྱུང། རྗེས་སུ་

― GTD003_Page_0592 ―

^{[མ་དཔེ་གཟིགས་ན་འདིར་གནོན།]}

[Full Size]

ཡི་རང་གི་ཡན་ལག་ནི། ཆོས་རྣམས་རང་བཞིན་ཞེས་སོགས་ཏེ། རྗེས་སུ་ཡི་རང་བྱས་པས་བྱེད་པ་པོ་དང་དགེ་རྩ་ཆ་མཉམ་དུ་ཐོབ་པ་སྔོན་བཅོམ་ལྡན་འདས་ལ་རྒྱལ་པོ་ཞིག་གིས་བསོད་སྙོམས་དྲངས་པ་དང། དེ་ལ་དབུལ་པོ་ཞིག་གིས་རྗེས་སུ་ཡི་རང་བྱས་པ་གཉིས་ཀས་བསོད་ནམས་མཚུངས་པར་ཐོབ་པར་གསུངས་པ་ལྟ་བུ་ཡིན་ཏེ། འགྲེལ་པ་དོན་གསལ་ལས། རྗེས་སུ་ཡི་རང་ཡིད་ལ་བྱེད་པས་ནི་རང་གཞན་གྱི་དགེ་བ་བྱས་པ་མཉམ་པ་ཉིད་འཐོབ་བོ་ཞེས་གསུངས། ཆོས་འཁོར་བསྐོར་བར་བསྐུལ་བའི་ཚེ་འཁོར་ལོ་ལྟ་བུ་དངོས་སུ་ཡོད་ན་ཕུལ་ཀྱང་ལེགས། ལྷག་མ་གོ་སླ། དེ་ནས་ས་གསུམ་པ་དང་ཕྱག་ཆེན་གསོལ་འདེབས་སོགས་ལོང་སྐབས་དང་སྦྱར་ནས་འདོན་ལ། ལྷག་པར་ཡང། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང། །དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །བདུད་དཔུང་མ་ལུས་འཇོམས་མཛད་གསང་བའི་བདག །གངས་ཅན་མཁས་པའི་གཙུག་རྒྱན་ཙོང་ཁ་པ། །སངས་རྒྱས་ཀུན་དངོས་བློ་བཟང་གྲགས་པ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཞེས་དབེན་ས་སྙན་བརྒྱུད་ནས་འབྱུང་བའི་གསོལ་འདེབས་འདི་ཉིད་ནན་ཏན་དུ་བཟླ། དེ་ནས་ཡོན་ཏན་འབྱུང་གནས་ཞེས་སོགས་ཤཱཀྱ་འོད་ཀྱིས་འདུལ་བ་སུམ་བརྒྱ་པར། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ཞེས་སོགས་གསུངས་པ་དང་དོན་མཐུན་པར་སོ་ཐར་དང་འབྲེལ་བའི་གསོལ་འདེབས། གང་དང་ལྡན་ན་ཞེས་སོགས་མདོ་སྡེ་རྒྱན་བཞིན་བྱང་སེམས་དང་འབྲེལ་བའི་གསོལ་འདེབས། སྒོ་གསུམ་ལེགས་བསྡམ་ཞེས་སོགས་སྡོམ་འབྱུང་དང་བླ་མ་ལྔ་བཅུ་པ་ལྟར་རྡོ་རྗེ་ཐེག་པའི་སློབ་དཔོན་གྱི་མཚན་ཉིད་དང་ལྡན་པའི་སྒོ་

― GTD003_Page_0593 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་གསོལ་བ་འདེབས་པ། དེའི་འོག་ཏུ་ཕྱི་ནང་གསང་བ་དེ་ཁོ་ན་ཉིད་ཀྱི་ཡོན་ཏན་བརྗོད་པའི་སྒོ་ནས་གསོལ་བ་འདེབས་པ་ལ་དང་པོ་ནི། སངས་རྒྱས་གྲངས་མེད་སོགས་དང། གཉིས་པ་ནི་ཁྱོད་ཀྱི་ཕུང་ཁམས་སྐྱེ་མཆེད་སོགས་བྱུང་ལ། བདེ་གཤེགས་སྐུ་གསུམ་ཞེས་སོགས་ཤོ་ལོ་ཀ་འདི་ཕྱིའི་ཡོན་ཏན་ལ་སྦྱར་བ་དང་ནང་གི་ཡོན་ཏན་ལ་སྦྱོར་ལུགས་གཉིས་ཡོད། ཀུན་མཁྱེན་ཡེ་ཤེས་ཞེས་སོགས་གསང་བ་དང། སྒྲིབ་མེད་ལྷན་སྐྱེས་ཞེས་སོགས་དེ་ཁོ་ན་ཉིད་ཀྱི་ཡོན་ཏན་བརྗོད་པའི་སྒོ་ནས་གསོལ་བ་འདེབས་པ་ཡིན་ལ། མཚམས་འདིར་ཚོགས་ཞིང་གཞན་ཐམས་ཅད་རྩ་བའི་བླ་མ་ལ་བསྡུས་ཏེ། དེ་ལ་ཕུར་ཚུགས་གསོལ་འདེབས་བྱེད་པའི་ལུགས་ཀྱང་ཡོད་ལ། ཁྲིད་རྒྱུན་འདིར་འོག་ནས་སྡུད་པ་ཡིན། ཕུར་ཚུགས་གསོལ་འདེབས་ནི། རྩ་བའི་བླ་མ་དེ་ཉིད་ལ་བླ་མའང་ཁྱེད་རང་ཡིན། ཡི་དམ་ཡང་ཁྱེད་རང་ཡིན། མཁའ་འགྲོ་ཆོས་སྲུང་སོགས་ཀྱང་ཁྱེད་རང་ཡིན་པས། རེ་ས་གཞན་ན་མེད་དོ་སྙམ་དུ་བློ་བཀལ་ནས་གསོལ་བ་འདེབས་པ་ཡིན་ལ། དེ་ལྟར་བྱས་པའི་ཚེ་བླ་མའི་སྤྱི་བོའི་ཨོཾ། མགྲིན་པའི་ཨཱཿ ཐུགས་ཀའི་ཧཱུཾ་རྣམས་ལས་བདུད་རྩི་དཀར་དམར་མཐིང་ག་སོ་སོ་དང་ཅིག་ཅར་བྱུང་བས། ལུས་ངག་ཡིད་གསུམ་སོ་སོ་དང་བསྡོམ་པའི་ཉེས་ལྟུང་སྦྱངས། སྐུ་གསུང་ཐུགས་སོ་སོ་དང་གསུམ་ཆར་གྱི་བྱིན་རླབས་ཞུགས། བུམ་དབང་གསང་དབང་ཤེས་རབ་ཡེ་ཤེས་ཀྱི་དབང་དབང་བཞི་པ་རྣམས་ཐོབ་ཅིང། མཐར་བླ་མ་ལས་རང་འདྲ་གཉིས་པ་ཞིག་ཆད་ནས་རང་ལ་ཐིམ་པའི་དམིགས་པ་བྱ། དེ་ནས་

― GTD003_Page_0594 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་གྱི་ཆ་ཡོངས་སུ་རྫོགས་པ་ལ་གཤར་སྦྱང་བྱེད་ཅིང་བྱིན་རླབས་ཞུ་བ་ནི། ཞིང་མཆོག་དམ་པ་ཞེས་སོགས་ཏེ། འདི་དག་སོ་སོའི་སྐབས་སུ་བདུད་རྩི་འབེབས་སྦྱང་བྱས་ཀྱང་ཆོག་ལ། སྐྱེས་བུ་ཆུང་འབྲིང་སོགས་ཀྱི་ཆོས་སྐོར་སོ་སོར་བཅད་ནས་བྱས་ཀྱང་ཆོག་པས་རང་གི་བློ་དང་བསྟུན། དོན་ནི་མདོར་བསྡུས་ན། ཡོན་ཏན་ཐམས་ཅད་ཀྱི་རྩ་བ་བཤེས་གཉེན་དམ་པས་རྗེས་སུ་འཛིན་པ་དང། དལ་འབྱོར་ལན་གཅིག་ཐོབ་པའི་དུས་འདིར་རྙེད་བཀུར་སྙན་གྲགས་འདུ་ལོང་ཚོང་ཁེ་སྤོག་འགྲོ་བསྡད་སོགས་དོན་མེད་ཀྱི་བྱ་བ་མང་པོས་མི་གཡེང་བར་དོན་ལྡན་ཆོས་ཀྱི་སྒོ་ནས་སྙིང་པོ་ལེན་དགོས་པ་དང། ད་ལྟ་ངན་སོང་དུ་སྐྱེས་མེད་ཀྱང་དེའི་ལས་བསགས་ཡོད་པས། དཔེར་ན་རྐུས་བྱས་པའི་མི་དེ་གནས་སྐབས་ཁྲིམས་ལ་ཕོག་མེད་ཀྱང་སླར་གཅོད་པ་དང་འདྲ་ཞིང། དེ་ལས་སྐྱོབ་པའི་ནུས་པ་དཀོན་མཆོག་གསུམ་ཁོ་ན་ལ་ཡོད་ལ། དེའང་རང་གིས་སྐྱབས་འགྲོའི་བསླབ་བྱ་ལས་འབྲས་ཀྱི་སྤང་བླང་སོགས་ཚུལ་བཞིན་མ་བྱས་ན། དེ་དག་གིས་ཀྱང་སྐྱོབ་ཐབས་མེད་ཚུལ་བསམ་པ་སོགས་ཆུང་ངུ་དང་ཐུན་མོང་བའི་ལམ་རྣམས་རྒྱུད་ལ་སྐྱེ་བར་བྱིན་གྱིས་རློབས་ཞེས་གསོལ་བ་འདེབས། དེའང་བྱིན་ནི་བླ་མའི་སྐུ་གསུང་ཐུགས་ཀྱི་གཟི་བྱིན་ནམ་ནུས་པ་ཡིན་ཞིང། རློབས་ཞེས་པ་རང་རྒྱུད་ཀྱི་ཕྱིན་ཅི་ལོག་གི་བློ་སྣ་སོགས་དེ་ལས་གཞན་དུ་བསྒྱུར་བའམ་ཟིལ་གྱིས་མནན་པའི་དོན་ཡིན་ལ། དེས་འོག་མ་ཐམས་ཅད་ལའང་འདྲ། དེ་ནས་འཁོར་བ་མཐའ་དག་ལ་ཞེན་པ་ལོག་པའི་ངེས་འབྱུང་སྐྱེས་ཏེ་ལམ་བསླབ་པ་གསུམ་ལ་སློབ་པ་འབྲིང་གི་ཆོས་སྐོར་ཡིན་ཞིང། དེ་ལའང་ཚུལ་ཁྲིམས་ནི་གཙོ་བོ་ཡིན་ཏེ།

― GTD003_Page_0595 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཁྲིམས་རྣམ་དག་ཅིག་བསྲུང་བ་ལ་དྲན་ཤེས་བཞིན་བརྟན་པོ་རྒྱུན་ཆགས་སུ་བསྟེན་དགོས་ཤིང། དེ་ལྟ་བུའི་དྲན་པ་བརྟན་པོ་ཞིག་ཡོད་ན། དེ་ནས་ཏིང་ངེ་འཛིན་ལ་ཁ་སྤོས་ཀྱང་བསྒྲུབ་སླ་བ་ཡིན་ཞེས་ཡོངས་འཛིན་གསུང་ལ། ཏིང་ངེ་འཛིན་ཡོད་ན། ཤེས་རབ་འབྱུང་ཚུལ་རླུང་གིས་མ་བསྐྱོད་པའི་མར་མེ་གསལ་ཆ་དང་ལྡན་པ་ལྟ་བུ་ཡིན་ཚུལ་ལམ་རིམ་སོགས་ནས་འབྱུང་བ་ལྟར་ཡིན། དེ་ནས་ཆེན་པོའི་ཆོས་སྐོར་ནི། ཉམ་ཐག་འགྲོ་བ་འདི་ཀུན་བདག་གི་མ། །ཞེས་སོགས་ཏེ། སྙིང་རྗེ་ཆེན་པོ་ནི་ཐེག་ཆེན་ལམ་གྱི་རྩ་བ་ཡིན་པར་མདོ་རྒྱུད་ཐམས་ཅད་ནས་གསུང་ཞིང། དཔལ་ལྡན་ཟླ་བས་ཀྱང། ཐོག་མཐའ་བར་གསུམ་དུ་གལ་ཆེ་ཚུལ་གྱི་སྒོ་ནས་འདི་ལ་མཆོད་བརྗོད་མཛད་པ་ཡིན། དེ་ནས་སེམས་བསྐྱེད་ཚུལ་ལ་ལུགས་གཉིས་ཡོད་པས། འདིར་བདག་གཞན་མཉམ་བརྗེའི་སྒོ་ནས་སེམས་བསྐྱེད་ཚུལ་གཙོ་བོར་གསུངས་ཏེ་དེ་ནི་རིམ་པ་མང་པོ་བྱེད་མི་དགོས་ཤིང། གཏོང་ལེན་གྱི་དམིགས་པ་སོགས་འཆར་བདེ་ལ་ཤུགས་ཆེ་བ་ཡིན། ཡོངས་འཛིན་རིན་པོ་ཆེས་སྤྱོད་འཇུག་ཏུ། བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་པའི་དོན་བདག་གཞན་མཉམ་བརྗེ་འདི་ཉན་རང་དང་དེར་མ་ཟད་སེམས་དཔའ་དབང་རྟུལ་རྣམས་ལའང་གསང་དགོས་པ་ཡིན་གསུང་ཞེས་འགའ་ཞིག་ཟེར་ཡང། ཡིག་ཆ་ཚོར་བལྟས་ན་བྱང་སེམས་ཡིན་ན་བདག་གཞན་མཉམ་བརྗེའི་བྱང་ཆུབ་ཀྱི་སེམས་ཀྱང་རྒྱུད་ལ་སྐྱེས་པས་ཁྱབ་པ་ལྟ་བུ་ཞིག་འདུག་པས་སྔ་མ་ཉམས་མྱོང་གི་གསུང་ཁྱད་པར་ཅན་ཞིག་

― GTD003_Page_0596 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ནམ་དཔྱད་དགོས། དེའང་རང་ཅག་རྣམས་བདེ་བ་ཇི་ཙམ་སྤྱད་ཀྱང་ངོམས་པ་མེད་ལ་སྡུག་བསྔལ་ཅུང་ཟད་ཙམ་ཡང་མི་འདོད་པར་འདྲ་བ་ལ། རང་གཅེས་པར་འཛིན་པའི་གཅོང་ནད་ཤུགས་དྲག་ལ་གསོར་མེད་པ་འདིས་ཟིན་པའི་དབང་གིས་ངན་སོང་གསུམ་གྱི་སྡུག་བསྔལ་ལ་སོགས་པ་མི་འདོད་པ་ཐམས་ཅད་སྣ་དྲངས་ཡོང་ཚུལ་དང། གཞན་གཅེས་པར་བཟུང་བའི་སྟོབས་ཀྱིས་ཡོན་ཏན་ཐམས་ཅད་འབྱུང་སྟེ་རང་ཅག་རྣམས་ཐོག་མེད་ནས་རང་དོན་ཁོ་ན་བྱས་པས་རང་དོན་ཅུང་ཟད་ཙམ་ཡང་མ་གྲུབ་ལ། སངས་རྒྱས་བཅོམ་ལྡན་འདས་ཀྱིས་སློབ་པ་ལམ་དུ་རང་དོན་ཡལ་བར་དོར་ཏེ་གཞན་དོན་འབའ་ཞིག་མཛད་པས་མཐར་རང་དོན་ཕུན་སུམ་ཚོགས་པའང་དེ་ཉིད་ཀྱིས་བརྙེས་འདུས་པ་སོགས་རང་གཅེས་འཛིན་གྱི་ཉེས་དམིགས་དང་གཞན་གཅེས་འཛིན་གྱི་ཕན་ཡོན་སྒོ་དུ་མ་ནས་བསམས་ཏེ་གཏོང་ལེན་སྦྱོང་དགོས་ལ། དངོས་གཞིའི་དམིགས་པ་ནི། སེམས་ཅན་ཐམས་ཅད་ཀྱི་སྡིག་སྡུག་མ་ལུས་པ་སྣ་བུག་གཡོན་པ་ནས་ཚུར་བསྡུས་ཏེ། རང་གི་སེམས་སྟེང་དུ་ནག་ཕུང་ངེ་གནས་ནས་རང་ལ་སྨིན་པ་དང། རང་གི་བདེ་དགེ་ཐམས་ཅད་སྣ་བུག་གཡས་ནས་ཕྱིར་འཕྲོས་ཏེ་སེམས་ཅན་ཐམས་ཅད་ཀྱི་སེམས་ལ་ཞུགས་པས་དེ་དག་ཐམས་ཅད་བདེ་བས་ཚིམ་པར་བསྒོམ་དགོས། སྤྱིར་རང་ཅག་རྣམས་རྒྱུན་དུ་རང་གཅེས་པར་འཛིན་ཅིང། གཞན་ཡལ་བར་འདོར་བ་ཡིན་པ་ལ་འདིར་བློ་དེ་གཉིས་གོ་ས་བརྗེས་ནས་རང་ཡལ་བར་འདོར་ཞིང་གཞན་གཅེས་པར་འཛིན་པས་བདག་གཞན་མཉམ་བརྗེ་ཞེས་བཤད་པ་ཡིན་གྱི། བདག་གཞན་ཡིན་སྙམ་པ་དང་གཞན་བདག་ཡིན་སྙམ་དུ་བསྒོམ་པ་གཏན་མིན། འདི་ཡན་ཆད་ཀྱི་བདག་

― GTD003_Page_0597 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་མཉམ་བརྗེའི་སྐོར་ཕལ་ཆེར་སོང་ཞིང། དེ་ནས། སྣོད་བཅུད་སྡིག་པའི་འབྲས་བུས་ཡོངས་གང་སྟེ། །ཞེས་སོགས་ཀྱི་དོན་མི་དགེའི་ལས་ཀྱི་རྣམ་སྨིན་སྣོད་བཅུད་ཐམས་ཅད་ལ་སྨིན་ཏེ་ཆར་ཆུ་དུས་སུ་མི་འབབས་ཤིང་ལོ་ཏོག་མི་སྨིན་པ་འཐབ་རྩོད་འཁྲུག་ལོང་མང་བ་གཅན་གཟན་གདུག་པས་གཙེས་པ། ནད་རིམས་སྣ་ཚོགས་འབྱུང་བ་སོགས་མི་འདོད་པ་སྣ་དགུ་འཛིངས་པའང་ཞུམ་པ་མེད་པར་དེ་ཐམས་ཅད་སྔོན་ལས་ངན་བསགས་པའི་འབྲས་བུ་ཡིན། ད་ལན་མྱོང་ནས་དག་སོང་ན་བཟང་སྙམ་དུ་རྐྱེན་ངན་ལམ་དུ་འཁྱེར་བ་དང། མདོར་ན་བཟང་ངན་གྱི་སྣང་བ་ཅི་ཞིག་བྱུང་ཡང་འཕེན་པའི་སྟོབས་དང་དཀར་པོ་ས་བོན་གྱི་སྟོབས་སོགས་སྟོབས་ལྔ་དང་སྦྱོར་བ་བཞིའི་སྒོ་ནས་དེ་ཐམས་ཅད་བྱང་ཆུབ་ཀྱི་གྲོགས་སུ་བསྒྱུར་ཏེ། བློ་སྦྱོང་དོན་བདུན་མ་སོགས་ནས་བྱུང་བ་ལྟར་བློ་སྦྱོང་གི་དམ་ཚིག་བཅུ་བདུན་ལ་སོགས་པ་ཐམས་ཅད་ཚུལ་བཞིན་དུ་བསྲུང་ནུས་པར་བྱིན་གྱིས་རློབས་ཞེས་པའོ། །དེ་ནས་སྨོན་སེམས་ནི། གཏོང་ལེན་རླུང་ལ་ཞེས་སོགས་དང། དུས་གསུམ་རྒྱལ་བ་ཞེས་སོགས་ནི་འཇུག་སེམས་ཡིན་ལ། འདི་ཡན་ཆད་ཀྱིས་སྤྱོད་པ་སྤྱི་བསླབ་ཀྱི་རིམ་པ་སོང་ཟིན་ནས། སོ་སོར་འཆད་པ་ལ། ལུས་དང་ལོངས་སྤྱོད་ཅེས་སོགས་བྱུང་བས་ཤེས་རབ་ཀྱི་ཕར་ཕྱིན་མཉམ་གཞག་གི་གནས་སྐབས་ལ་སྦྱར་ཏེ། མཚན་ཉིད་སོ་སོར་རིག་པ་ཡིད་བྱེད་ཀྱི་དཔྱད་སྟོབས་ཀྱིས་དྲངས་པའི་ཤིན་སྦྱང་གི་བདེ་བས་ཟིན་པའི་ལྷག་མཐོང་ཐོབ་ནས་མཉམ་གཞག་གི་ཚེ་དགག་བྱ་བདེན་གྲུབ་བཅད་ཙམ་གྱི་སྟོང་པ་ལ་མཉམ་པར་བཞག་

― GTD003_Page_0598 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ནམ་མཁའ་ལྟ་བུའི་རྣལ་འབྱོར་སྐྱོང་ཞིང། དེ་ལས་ལངས་པའི་རྗེས་ཐོབ་ཏུ་སྣོད་བཅུད་ཀྱི་ཆོས་འདི་ཐམས་ཅད་སྒྱུ་མ་དང་རྨི་ལམ་དང་ཆུ་ཟླ་ལྟ་བུར་བློ་ལ་སྣང་བ་ཙམ་ཞིག་མ་གཏོགས་རང་ངོས་ནས་མ་གྲུབ་པར་ལྟ་བ་སྒྱུ་མ་ལྟ་བུའི་རྣལ་འབྱོར་དང། མདོར་ན་ཆོས་འདི་ཐམས་ཅད་མིང་དང་རྟོག་པས་ཕར་བཏགས་ཙམ་ཞིག་བསྙོན་མེད་དུ་ཡོད་པས་ལས་རྒྱུ་འབྲས་སོགས་རྟེན་འབྲེལ་གྱི་རྣམ་གཞག་ཐམས་ཅད་འཐད་ལྡན་དུ་བཞག་ཆོག་ལ། དེ་དག་གང་ཡང་རིགས་པས་དཔྱད་ན་དོན་དམ་པར་གྲུབ་པ་རྡུལ་ཙམ་ཡང་མེད་པས་སྟོང་པ་དང་རྟེན་འབྱུང་གཉིས་པོ་འདི་ཕན་ཚུན་གཅིག་གྲོགས་སུ་གཅིག་འགྲོ་བས་སྣང་བ་སྟོང་པའི་གྲོགས་སུ་འཆར་བ་དང་སྟོང་པ་སྣང་བའི་གྲོགས་སུ་འཆར་བ་ཞིག་དགོས་ཀྱི། དེ་གཉིས་ཚ་གྲང་ལྟར་འགལ་བར་བཟུང་ན་ཀླུ་སྒྲུབ་ཡབ་སྲས་ཀྱི་དགོངས་པར་གཏན་མི་འགྲོ་བས། རྗེ་བདག་ཉིད་ཆེན་པོས། རྟེན་འབྱུང་གི་རྣམ་གཞག་འདི་ཐམས་ཅད་འཁྲུལ་ངོ་ཙམ་དུ་སྐྱེལ་མི་དགོས་པར་དངོས་གནས་ལའང་ཚད་གྲུབ་ཏུ་བཞག་ཆོག་སྟེ། ཐ་སྙད་པའི་ཚད་མའང་ཚད་མ་ཡིན་པའི་ཕྱིར་གསུངས། དེ་ལ་སྟག་ཚང་ལོ་ཙཱ་བས་གྲུབ་མཐའ་ཀུན་ཤེས་སུ། མ་དག་འཁྲུལ་པའི་སྣང་བ་ཚད་གྲུབ་ཏུ། །རིགས་པ་དུ་མས་བརྟགས་ནས་ཁས་ལེན་པ། །དེ་ལ་འགལ་བའི་ཁུར་ཆེན་འདི་ལྟར་ཡོད། །ཅེས་སོགས་སྐྱོན་བརྗོད་མང་དུ་བྱས་ལ། དེའི་བློ་རྩེ་ནི་དབུ་མ་འཇུག་པར། མ་བརྟགས་གྲགས་པར་གཏི་མུག་ལས་ཡིན་ནོ། །ཞེས་འཇིག་རྟེན་རང་དགའ་བའི་རྒྱུད་ཀྱི་མ་བརྟགས་མ་དཔྱད་པའི་ཐ་སྙད་པའི་ཚད་མ་ཐམས་ཅད་གཏི་མུག་ཡིན་པར་

― GTD003_Page_0599 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་འདུག་སྙམ་དུ་དགོངས་པར་སྣང་ཡང། རང་ལུགས་ནི་དེ་དག་གིས་ཡུལ་དེའི་གནས་ལུགས་མཐོང་མི་ནུས་པའི་ཆ་ནས་གཏི་མུག་ཏུ་བཤད་པ་ཡིན་གྱི། གཏི་མུག་མཚན་ཉིད་པ་མིན་ནོ། །དེ་ལྟར་ཐུན་མོང་བའི་ལམ་སྔོན་དུ་བཏང་ནས། ཐུན་མོང་མ་ཡིན་པ་སྔགས་ཀྱི་ལམ་ལ། དང་པོ་འཇུག་སྒོ་དབང་དང་དེའི་དམ་ཚིག་བསྲུང་བ་ནི། དེ་ནས་རྡོ་རྗེ་འཛིན་པའི་ཞེས་སོགས་བྱུང། སྐྱེ་ཤི་བར་དོ་ཞེས་སོགས་བསྐྱེད་རིམ་ཡིན་ཞིང་འདིའི་སྐབས་ཀྱི་ལྷ་སྐུ་ཐམས་ཅད་ཡིད་ངོའི་ལྷ་སྐུ་ཡིན་གྱི་དངོས་གནས་པར་ལྡང་མི་ནུས་ལ། སྤྱིར་ལྷ་སྐུར་བསྐྱེད་རྒྱུ་དེའང་ད་ལྟའི་ལུས་རྟེན་ཤ་ཁྲག་གདོས་བཅས་འདི་སྟོང་པར་སྦྱངས་ནས་འོད་ཁྲུ་གང་བ་ལྟ་བུ་ཞིག་ཏུ་གྱུར་ཏེ། དེའི་ངང་ནས་ལྷ་སྐུ་གསལ་འདེབས་དགོས་པར་མཁས་གྲུབ་རིན་པོ་ཆེས་གསུངས་ལ། གོ་རམས་པ་སོགས་འགའ་ཞིག་གིས། རྣམ་སྨིན་གྱི་ཕུང་པོ་འདི་ག་ལྷ་སྐུར་སྒོམ་མི་རུང་ན། ཕུང་པོ་སངས་རྒྱས་ལྔ་བདག་ཉིད། །དེ་ལ་སྨོད་པ་བརྒྱད་པ་ཡིན། །ཞེས་རྩ་ལྟུང་དུ་བཤད་པ་དང་འགལ་ཞེས་ཟེར། དང་པོ་ནས་གདོས་བཅས་ཀྱི་ལུས་འདི་ལྷར་བསྒོམ་པ་མིན་ཡང། རྗེས་སུ་སངས་རྒྱས་པ་ན་དག་པའི་སྒྱུ་མའི་སྐུ་དེ། ཐ་མལ་གྱིས་མཐོང་མི་ནུས་པས། རགས་པའི་ཟ་མ་ཏོག་ལ་འདྲེན་དགོས་ཤིང། དེའི་སྣོད་ལྟ་བུ་ཡིན་པས་དེའང་སངས་རྒྱས་པར་འདོད་དགོས་སམ་སྙམ། རྫོགས་རིམ་ནི། རྩ་བའི་བླ་མ་དེ་ཉིད་སྙིང་གར་བསམས་ཏེ་རོ་རྐྱང་གི་རྒྱུ་བ་དྷཱུ་ཏཱིར་བཀག་ནས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་དོན་དམ་འོད་གསལ་དང་ཀུན་རྫོབ་སྒྱུ་མའི་

― GTD003_Page_0600 ―

^{[མ་དཔེ་གཟིགས་ན་འདིར་གནོན།]}

[Full Size]

སྐུ་གཉིས་ཟུང་དུ་འཇུག་པའི་རྫོགས་རིམ་གྱི་རྟོགས་པ་ཁྱད་པར་ཅན་སྐྱེ་བ་དང། གལ་ཏེ་སྔགས་ཀྱི་ཚོགས་ལམ་ཙམ་ཡང་ཚེ་འདིར་རྒྱུད་ལ་སྐྱེད་པར་མ་ནུས་ན་སྔར་བཤད་པའི་སྟོབས་ལྔ་དང་འཕོ་བའི་གདམས་པ་སྦྱར་ནས་དག་པའི་ཞིང་ཁམས་བདེ་བ་ཅན་ལྟ་བུར་སྐྱེ་བའི་འདུན་པ་བྱ་དགོས། འཕོ་བའི་གདམས་པ་ནི་གཙོ་བོར་སམ་བྷུ་ཊ་སོགས་བླ་མེད་མ་གཏོགས་རྣལ་འབྱོར་རྒྱུད་མན་ཆད་ལས་བཤད་པ་མེད་ཀྱང་ད་ལྟར་འོད་དཔག་མེད་རྗེ་བཙུན་བྱམས་མགོན་སོགས་ཀྱི་འཕོ་བ་བྱེད་པ་འདི་བླ་མ་གོང་མ་རྣམས་ཀྱིས་བླ་མེད་ཀྱི་མན་ངག་གིས་རྒྱས་བཀབ་པ་ཡིན་ཞེས་ལྕང་སྐྱ་རིན་པོ་ཆེས་གསུངས། ལྷག་མ་ནི་ཚེ་རབས་རྗེས་འཛིན་གྱི་སྨོན་ལམ་ཡིན་ཞིང། མཐར་ཚོགས་ཞིང་གཞན་ཐམས་ཅད་བསྡུས་ཏེ། དབུས་ཀྱི་བླ་མ་རྡོ་རྗེ་འཆང། གཡས་ཀྱི་བྱམས་པ། གཡོན་གྱི་འཇམ་དབྱངས། རྒྱབ་ཀྱི་རྡོ་རྗེ་འཆང། མདུན་གྱི་རྩ་བའི་བླ་མ་གཉིས་པ་དང། ལྔ་པོ་དེར་བསྡུས་ནས་རེ་ཞིག་གི་བར་དུ་དེ་ལ་དམིགས་པ་གཏོད། མཐར་གཞན་བཞི་པོ་དབུས་ཀྱི་བླ་མ་ལ་བསྟིམ་སེང་ཁྲི་གདན་ལ་བསྟིམ། རྩ་བའི་བླ་མ་དབུ་མའི་ལམ་ནས་མར་བསྟིམས་ཏེ་ནུ་མ་གཉིས་ཀྱི་བར་སྙིང་གི་དཀྱིལ་མི་ཤིགས་པའི་ཐིག་ལེའི་དབུས་སུ། ཤིན་ཏུ་ཕྲ་བའི་རླུང་སེམས་དང་ངོ་བོ་དབྱེར་མེད་དུ་བསྒོམ་པ་ཡིན་ལ། འདིའི་རླུང་ནི་སྲོག་འཛིན་ཡིན་ཞིང། དེའི་རང་མདངས་དཀར་པོ་ཡིན་པས། བླ་མའང་སྐུ་མདོག་དཀར་པོར་བསྒོམ་དགོས། དེ་ལྟར་བླ་མ་དང་རང་སེམས་དབྱེར་མེད་དུ་གྱུར་ཅིང། དེའི་བྱིན་རླབས་ཞུགས་པའི་སྣང་བ་བན་བུན་ཟར་ཟིར་ངོས་བཟུང་དུ་མེད་ལ་འདི་འདྲ་ཞིག་ཨེ་འགྲུབ་སྙམ་པའི་རེ་བ་དང། གནོད་པ་སོགས་ཀྱིས་

― GTD003_Page_0601 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིགས་པའི་དོགས་པ་མེད་ཅིང། འདས་པའི་རྗེས་མི་གཅོད་མ་འོངས་པའི་སྔོན་མི་བསུ་བར་བློ་མ་བཅོས་གསལ་ལ་ཧྲིག་གེ་བ་དེ་གའི་ངང་དུ་མཉམ་པར་འཇོག་དགོས་ལ། དེའང་བརྒྱལ་བ་དང་གཉིད་མཐུག་པོ་ལོག་པ་ལྟ་བུའི་ཡིད་བྱེད་བཀག་པ་ཙམ་ཞིག་བསྐྱངས་ན་ཧྭ་ཤང་གི་ལྟ་བ་རྗེ་ཡབ་སྲས་སོགས་ཀྱིས་གཙོ་བོར་འགོག་རྒྱུ་དེ་ཡིན་པས། འདིར་སེམས་དམིགས་པ་ལ་གནས་མི་གནས་ལྟ་བའི་དྲན་པ་རྒྱུན་ཆགས་བྲེང་ངེ་བ་དང། མ་བརྟགས་ན་མི་ཤེས་ལ་བརྟགས་ན་མི་འཆར་དགུ་འཆར་སྣ་ཚོགས་བྱེད་པའི་རྟོག་པ་འོག་འགྱུ་སོགས་ཀྱི་བར་ཆད་ཡོད་མེད་ལྟ་བའི་ཤེས་བཞིན་བསྟེན་དགོས་ཏེ། འདིར། འགྱུར་བ་རིག་པའི་ཤེས་བཞིན་བསྡོགས། །ཞེས་ཉེར་བསྡོགས་ཀྱི་དེ་དང་འདྲ་བར་བ་འཕུལ་ཅན་ཡིན་པས་གྲབས་སམ་སྟ་གོན་བྱེད་པའི་དོན་ཡིན། དྲན་པའི་དོན་མངོན་པ་ཀུན་བཏུས་སོགས་སུ་འདྲིས་པའི་དངོས་པོ་ལ་དམིགས་པ་སོགས་ཁྱད་པར་གསུམ་གསུངས་ཀྱང། ཡུལ་གསར་རྟོགས་ཀྱི་སེམས་ཀྱི་འཁོར་དུ་འབྱུང་བའི་དྲན་པ་ལ་ཞིབ་ཆ་དགོས་སམ་སྙམ། དེ་ལྟར་སེམས་ཀྱི་ངོ་བོ་གསལ་ཞིང་རིག་པ་དེ་ལ་བསྒྲིམས་ཏེ་བལྟས་པ་ན་རྣམ་རྟོག་གློ་བུར་བ་ཐོལ་གྱིས་བྱུང་བའི་ཚེ་རྣམ་རྟོག་དེ་ཉིད་མི་འགོག་པར་དེའི་ངོ་བོ་ལ་ཅེར་གྱིས་བལྟས་པས་དེ་ཉིད་སེམས་ཀྱི་ངོ་བོར་འགྲོ་བས་བླ་མ་ཞང་གིས། སེམས་ལས་རྣམ་རྟོག་འཕྲོ་བ་འདི་ཆོས་སྐུ་ལས་ཆོས་སྐུ་འཕྲོ་བ་དང། སྟོང་ཉིད་ལས་སྟོང་ཉིད་འཕྲོ་བ་ཡིན་གསུངས་ཤིང། རྗེ་བཙུན་མི་ལ་རས་པའི་དྲུང་དུ་ལྕམ་ས་ལེ་འོད་ཀྱིས་རྟོགས་པ་ཕུལ་བ་ལས་ཀྱང། ཨང་གེ་བླ་མ་རིན་པོ་ཆེ། །ནམ་

― GTD003_Page_0602 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་བསྒོམ་དུ་བདེ་ལགས་ཏེ། །ལྷོ་སྤྲིན་བསྒོམ་དུ་ཅུང་མ་བདེ། །ལྷོ་སྤྲིན་བསྒོམ་པའི་གདམས་པ་ཞུ། །ཞེས་ཞུས་པར་རྗེ་བཙུན་གྱིས། ནམ་མཁའ་བསྒོམ་དུ་བདེ་ལགས་ན། །ལྷོ་སྤྲིན་ནམ་མཁའི་ཆོ་འཕྲུལ་ཡིན། །ནམ་མཁའ་རང་གི་ངང་དུ་ཞོག །ཅེས་ནམ་མཁའ་ལས་བྱུང་བའི་སྤྲིན་དེ་ནམ་མཁའི་ངང་དུ་འགྲོ་བ་བཞིན་རྣམ་རྟོག་ཀྱང་སེམས་ཀྱི་རང་མདངས་ཡིན་པས་རྣམ་རྟོག་ཟུར་དུ་མི་འགོག་པར་རྩ་བའི་སེམས་ལྷན་སྐྱེས་མ་བཅོས་པ་དེའི་ངང་དུ་བཞག་ནས་བསྒོམ་དགོས་གསུངས་པ་ལྟར་རམ། ཡང་ན་རལ་སྐོར་མཁན་བཞིན་དུ། །རྣམ་རྟོག་ཅི་སྐྱེས་རྦད་རྦད་གཅོད། །ཅེས་གསུངས་ཏེ། འདུལ་བ་ལུང་ལས་འབྱུང་བ་བཞིན་རལ་སྐོར་མཁན་བྱ་བ་གཞན་གྱིས་མཚོན་ཆ་ཅི་འཕང་ཡང་རལ་གྲི་བསྐོར་ནས་གཅོད་ནུས་པ་བཞིན། རྣམ་རྟོག་གང་སྐྱེས་དེ་མ་ཐག་ངོས་བཟུང་ནས་འགོག་ཐུབ་པ་ཞིག་དགོས། རལ་སྐོར་མཁན་དེ་རྒྱ་གར་ན་ཡོད་ཀྱང་བོད་དུ་མེད་ལ་རྒྱ་ནག་ནའང་ཡོད་པར་ལྕང་སྐྱ་རིན་པོ་ཆེས་གསུངས། དེ་ལྟར་རྣམ་རྟོག་བཀག་པའི་མཐར་ཏིང་ངེ་འཛིན་ཇི་ལྟར་སྐྱོང་ཚུལ་ནི་ལབ་སྒྲོན་གྱིས། ཧྲིམ་གྱིས་བསྒྲིམ་ལ་ལྷོད་ཀྱིས་གློད། །སེམས་ཀྱི་འཇོག་ས་དེ་ན་གདའ། །ཞེས་གསུངས་ཏེ། དེའང་དང་པོར་གཅིག་བསྒྲིམ། དེ་ནས་ཡང་ལྷོད་པ་ལྟ་བུ་མ་ཡིན་པར་གནས་སྐབས་གཅིག་པོ་དེ་ལ་གྲིམ་ལྷོད་ཀྱི་ཆ་གཉིས་ཀ་ཚང་དགོས་པ་ཡིན་ཏེ། ཧ་ཅང་བསྒྲིམ་དྲགས་ན་སེམས་འཕྲོས་ཏེ་རྒོད་པའི་དབང་དུ་འགྲོ་ཞིང། ཧ་ཅང་ལྷོད་ན་བྱིང་བ་སྐྱེ་སྟེ། ཙནྡྲ་གོ་མིའི་བཤགས་བསྟོད་ལས། བརྩོན་པ་བསྟེན་ན་རྒོད་པ་སྐྱེ་འགྱུར་ཞིང། །དེ་སྤངས་ན་ནི་ཞུམ་པ་སྐྱེ་འགྱུར་བས། །ཞེས་གསུངས་པ་ལྟར་ཡིན་པས་དྲན་ཤེས་ཀྱི་ཤུགས་མ་

― GTD003_Page_0603 ―

^{[མ་དཔེ་གཟིགས་ན་འདིར་གནོན།]}

[Full Size]

ཡལ་བར་ཁོང་ནས་གྲིམ་ཆ་དང་ལྡན་ཡང་ཕྱི་ལྷོད་པ་དེ་འདྲ་ཞིག་དགོས་སོ། །རྒྱུ་མཚན་འདི་དག་གི་གནད་ཀྱིས་སྔ་རབས་པ་རྣམས་གློད་རབ་ལ་སྒོམ་རབ་ཅེས་བཤད་པ་དེ་རྗེ་ཡབ་སྲས་ཀུན་གྱིས་རྩལ་དུ་བཏོན་ནས་དགག་པ་མཛད་པ་ཡིན་ལ། མཉམ་མེད་དྭགས་པོ་ལྷ་རྗེའི་གསུང་ལ་ལར་ཡང་དེ་ལྟར་བཤད་པ་འབྱུང་སྟེ། ཞི་གནས་གསར་སྒྲུབ་སོགས་ཀྱི་སྐབས་སུ་ཡིན་ན་མི་རུང་ཡང། སྔགས་ཀྱི་རྟོགས་པ་མཐོན་པོར་སོང་བའི་སྐབས་སུ་དེ་འདྲའི་དུས་ཤིག་ཀྱང་ཡོད་དམ་སྙམ། འཇུར་བུས་བཅིངས་པའི་སེམས་ཉིད་ནི། །གློད་ན་གྲོལ་བར་ཐེ་ཚོམ་མེད། །ཅེས་པ་འདི་ས་ར་ཧའི་གསུང་ཡིན་ཞིང། དཔེར་ན་སྐུད་པ་ལྟ་བུ་ཧ་ཅང་གྲིམ་དྲགས་པས་མདུད་པ་བྱུང་བ་དེ་གློད་ན་རང་བབས་སུ་ཞིག་འགྲོ་བ་བཞིན། སེམས་རྣམ་རྟོག་གིས་བཅིངས་པའང་མ་བཅོས་པར་བཞག་ན་སེམས་ཀྱི་ངོ་བོར་རང་ཡལ་དུ་འགྲོ་སྟེ་དོན་སྔ་མ་དང་གནད་གཅིག །དེ་ལྟར་ཁོང་ནས་གྲིམ་ཆ་མ་ཤོར་ཡང་ཧ་ཅང་བསྒྲིམ་མ་དྲགས་པར་སེམས་རང་བབས་སུ་ལྷོད་ཆམ་གྱིས་བཞག་ན་རྣམ་རྟོག་ཐམས་ཅད་རང་ཞིར་འགྲོ་ལ། སྔར་བཤད་པ་བཞིན་རྣམ་རྟོག་ཆོས་སྐུར་བལྟས་ནས་མི་འགོག་པ་དང། རལ་སྐོར་མཁན་བཞིན་དུ་རྣམ་རྟོག་གང་སྐྱེས་དེ་མ་ཐག་རྦད་ཀྱིས་གཅོད་པ་གང་གི་སྒོ་ནས་ཡིན་ཀྱང། རྣམ་རྟོག་རང་ཡུལ་དུ་སོང་སྟེ་སེམས་ཀྱི་ངོ་བོ་སྟོང་སང་ངེ་གསལ་ལེ་ཧྲིག་གེ་བ་རྒྱུན་ཆགས་སུ་མཐོང་བ་དེའི་ཚེ། རྟོག་པ་གནས་འགྱུ་འདྲེས་པ་ཞེས་བཀའ་བརྒྱུད་ཀྱི་སྒོམ་ཆེན་རྣམས་ལ་གྲགས་ཤིང་གནས་འགྱུ་རིགས་གསུམ་གྱི་ཐ་སྙད་ཀྱང་མཛད་དོ། །ཡང་སྐྱོང་ཚུལ་གཅིག་ལ་

― GTD003_Page_0604 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་རྟོག་ཅི་སྐྱེས་ཀྱང་མི་འགོག་པར་རྣམ་རྟོག་དེ་གའི་ངོ་བོ་དེ་གང་དུ་འཕྲོ་གང་ལས་འཕྲོ་བལྟས་ཏེ་རང་བབས་སུ་བཞག་ནས་བསྒོམ་ན་མཚམས་ཤིག་ནས་རྣམ་རྟོག་དེ་ཉིད་ཀྱང་རང་སོ་མི་ཟིན་པར་རྩ་བའི་སེམས་དེའི་སྟེང་དུ་ཚུར་འཁོར་ནས་ཡོང་སྟེ། དཔེར་ན་ཚོང་པ་རྒྱ་མཚོར་འགྲོ་བའི་ཚེ་ཆུ་སྲིན་ལ་སོགས་པའི་འཇིགས་པ་ཡོད་མེད་བལྟ་བའི་ཆེད་དུ་ཕུག་རོན་བཟུང་སོང་བ་དེ་རྒྱ་མཚོའི་ཁར་བཏང་ན་འཁོར་འཁོར་ནས་འབབ་ས་མ་རྙེད་པར་སྔར་གྱི་གྲུ་ནང་དེར་ལོག་འོང་བ་ལྟ་བུ་ཡིན་ཏེ། ཇི་ལྟར་གཟིངས་ནས་འཕུར་བའི་བྱ་རོག་ནི། །ཕྱོགས་རྣམས་བསྐོར་ནས་སླར་ཡང་དེར་འབབ་བཞིན། །ཞེས་དོ་ཧ་ལས་གསུངས། གཞན་ཡང་སེམས་ཀྱི་བཞག་ཐབས་གཙོ་བོ་དྲུག་གསུངས་ཏེ། སྤྲིན་དང་བྲལ་བའི་ཉི་བཞིན་བཞག །མཁའ་ལ་ཁྱུང་ཆེན་ལྡིང་བཞིན་བཞག །རྒྱ་མཚོ་ཆེན་པོའི་འཇིངས་བཞིན་བཞག །བུ་ཆུང་ལྷ་ཁང་བལྟས་བཞིན་བཞག །མཁའ་ལ་བྱ་འཕུར་རྗེས་བཞིན་བཞག །རས་བལ་བརྡལ་བ་བཞིན་དུ་བཞག །ཅེས་སེམས་ཀྱི་ངོ་བོ་འོད་གསལ་བ་དེ་ཉིད་བྱིང་རྒོད་སོགས་རྣམ་རྟོག་གིས་མི་སྒྲིབ་པར་འཇོག་པ་དང། ཁྱུང་ཆེན་ནམ་མཁའ་ལྡིང་དེས་མཁའ་ལ་ནམ་འཕང་བཅད་ནས་འགྲོ་བའི་ཚེ་གཤོག་པ་ལྷེབ་ལྷེབ་ལྷེབ་མི་བྱེད་པར་ལྷོད་དིང་ངེ་འགྲོའང་ཁོང་དུ་གྲིམ་ཆའི་ཤུགས་དང་ལྡན་པ་བཞིན་གྲིམ་ལྷོད་འཚམ་ཞིང་གསལ་ངར་དང་ལྡན་པར་འཇོག་པ་དང། གསུམ་པ་ནི། ཆུ་ཅི་ཙམ་ཆེ་བ་ཙམ་གྱིས་རླབས་འབྱུང་བ་ཡུན་རིང་ལ་བྱུང་བའི་ཚེ་ཐག་རིང་པོར་འགྲོ་བ་ཡིན་པས་རྒྱ་མཚོ་ཆེན་པོར་ཉི་མ་བདུན་བདུན་ན་རླབས་རེ་རེ་འབྱུང། དེའང་ཁ་ནས་རླུང་གིས་ཅུང་ཟད་བསྐྱོད་པ་མ་

― GTD003_Page_0605 ―

^{[མ་དཔེ་གཟིགས་ན་འདིར་གནོན།]}

[Full Size]

གཏོགས་གཏིང་གཡོ་མི་ནུས་པ་བཞིན། སེམས་རྣམ་རྟོག་ཕྲ་མོས་ཅུང་ཟད་གཡོས་ཀྱང། རགས་པས་མི་གཡོ་བར་འཇོག་པ་དང། བྱིས་པ་ཆུང་ངུ་ལྷ་ཁང་དུ་སོང་བ་ན་ཆེ་བ་རགས་རིམ་ཙམ་ཞིག་མཐོང་བ་ལས་རི་མོའི་ཞིབ་ཆ་སོགས་ཀྱི་རྟོག་དཔྱོད་མི་འཇུག་པ་བཞིན་སེམས་སྒོ་ལྔའི་དབང་ཤེས་ཀྱི་རྗེས་སུ་མི་འབྲང་བར་འཇོག་པ་དང། ནམ་མཁའ་ལ་བྱ་འཕུར་བ་ན་རྗེས་བསྟན་རྒྱུ་མེད་པ་ལྟར་སེམས་ལ་རེ་དོགས་མང་པོས་འཆིང་བ་མེད་པར་འཇོག་པ་དང། རས་བལ་བརྡལ་བ་ན་ལྷོད་ལྷོད་པོར་འདུག་པ་ལྟར་སེམས་མ་གཡོས་པའི་ངང་ལ་ལྷོད་ཆམ་གྱིས་མཉམ་པར་འཇོག་པ་རྣམས་ཡིན་ཞིང། ལས་དང་པོ་པའི་སྐབས་འདིར་དེའི་ནང་ནས་ཀྱང་བུ་ཆུང་ལྷ་ཁང་བལྟ་བ་ལྟ་བུའི་བསྒོམ་ཚུལ་དེ་གནད་ཆེ། སྔ་རབས་པའི་སྒོམ་ཆེན་ཕལ་ཆེར་ལ་སེམས་ཀྱི་བཞག་ཐབས་གཙོ་བོ་འདི་དག་མ་གཏོགས། སེམས་གནས་དགུ་དང། ཉེས་པ་ལྔ་སྤོང་བའི་གཉེན་པོར་འདུ་བྱེད་བརྒྱད་བསྟེན་པ། སྟོབས་དྲུག་དང་ཡིད་བྱེད་བཞིའི་འགྲུབ་ཚུལ་སོགས་ཀྱི་རྣམ་གཞག་ཆེར་མ་མཛད་ཀྱང་སྔར་བཤད་པ་རྣམས་ཉམས་མྱོང་གི་སྒོ་ནས་གསུངས་པ་ཡིན་འདུག། །དེ་ལྟར་བསྒོམས་པའི་འབྲས་བུ་ལ་ཇི་འདྲ་བ་ཞིག་འབྱུང་རྒྱུ་ཡིན་ན། མཉམ་གཞག་ངོ་བོ་གང་གིས་ཀྱང། །མ་བསྒྲུབས་དྭངས་ཤིང་གསལ་བ་དང། །ཞེས་སོགས་གསུངས་ཏེ། སེམས་ཀྱི་ངོ་བོ་གང་གིས་མ་བསྒྲིབས་པ། རྩིག་ངོས་ཀྱི་རྡུལ་ཕྲ་རབ་ཚུན་ཆད་ཀྱང་འཆར་བའི་ཚོད་ལྟ་བུའི་དྭངས་ཤིང་གསལ་ལ། ཡུལ་གྱི་རྣམ་པ་འདི་འཆར་ལ་འདི་མི་འཆར་བྱ་རྒྱུ་མེད་པ་སྣ་ཚོགས་སུ་འཆར་

― GTD003_Page_0606 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཧྲིག་གེ་བ། དབྱིབས་དང་ཁ་དོག་ལ་སོགས་པའི་དབྱིབས་གཟུགས་ཅན་གང་དུའང་མ་གྲུབ་པའི་སྟོང་སང་ངོས་བཟུང་མེད་པ་དེ་ལྟ་བུ་མངོན་སུམ་དུ་མཐོང་བ་ནི། སེམས་ངོ་འཕྲོད་པ་དང། སེམས་ཀྱི་ཆོས་ཉིད་མཐོང་བ་ཡིན་པས། འདི་ནི་དཔེར་ན་གཞན་ལ་ཟན་ཆངས་སྟེར་བ་བཞིན་དུ་སངས་རྒྱས་ཀྱི་གོ་འཕང་སྦར་བཅང་དུ་གཏོད་པའི་གདམས་པ་བླ་ན་མེད་པ་ཡིན་ཞེས་ཟེར། རང་ལུགས་ལ། དེས་སེམས་ཀྱི་ཀུན་རྫོབ་པའི་ངོ་བོ་ཙམ་ཞིག་མཐོང་བ་དང། སེམས་གནས་སྒྲུབ་པའི་ཐབས་ཙམ་ཞིག་ཡིན་ལ། སེམས་གནས་མཚན་ཉིད་པ་ཞིག་གྲུབ་ནའང། དངོས་གཞི་དང་ཉེར་བསྡོགས་སོགས་ཞི་ལྷག་གི་ཡོན་ཏན་ཐམས་ཅད་ཀྱི་གཞི་ཡིན་པས་ཤིན་ཏུ་གལ་ཆེ། དེས་ན་འདིར་དེ་ལྟ་བུའི་ཞི་གནས་སྒྲུབ་ཚུལ་གསུངས་པའང་གཞན་ལུགས་ཤེས་པ་ཙམ་གྱི་ཕྱིར་མིན་གྱི། འོག་ཏུ་འཆད་རྒྱུའི་སེམས་ཀྱི་དོན་དམ་པའི་ངོ་བོ་དེ་ཉིད་ལ་འཇུག་སླ་བ་དང། དེ་འདྲའི་ལྷག་མཐོང་འགྲུབ་པའི་གཞིའི་ཞི་གནས་ཁྱད་པར་ཅན་སྔོན་དུ་བསྒྲུབ་པའི་ཕྱིར་ཡིན་ནོ། །དེའང་བཀའ་རྒྱུད་པ་སྔ་མ་རྣམས་དབང་རྣོན་དང་པོ་ནས་ཕྱག་རྒྱ་ཆེན་པོ་འདི་ལ་ཁྲིད་ཆོག་པ་ཅིག་ཅར་བ་དང། དམིགས་རིམ་འོག་མ་ནས་གོ་རིམ་བཞིན་བྱས་ཏེ་མཐར་ཕྱག་རྒྱ་ཆེན་པོའི་རྟོགས་པ་བསྟན་ཆོག་པ་ལ་རིམ་གྱིས་པ་ཞེས་པའི་ཐ་སྙད་བཏགས་ལ། འོན་ཀྱང་ལམ་གོང་མ་སྐྱེ་བའི་སྔོན་འགྲོར་ཐུན་མོང་ལམ་སྦྱང་འོག་མ་ལ་བློ་སྦྱོང་དགོས་པར་རྗེ་བཙུན་མི་ལས་ཀྱང་མགུར་འབུམ་སོགས་སུ་གསུངས་པས། སྤྱིར་དབང་པོ་རྣོ་རྟུལ་སུ་ཡིན་ཡང་ལམ་ཐུན་མོང་བས་རྒྱུད་སྦྱངས་པ་སྔོན་དུ་འགྲོ་དགོས་ལ། ཚེ་རབས་སྔ་མར་སྦྱངས་པ་སྔོན་

― GTD003_Page_0607 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་སོང་བ་ཡིན་ན་ཚེ་འདི་རང་ལ་ཐོས་བསམ་སོགས་ཆེར་མ་བྱས་ཀྱང་སྔ་མའི་བག་ཆགས་སད་ནས་རྟོགས་པ་ཁྱད་པར་ཅན་སྐྱེ་བ་ཡོད་དེ། དཔེར་ན་སྔོན་འགྲོ་མགོན་ཕག་མོ་གྲུབ་པ་དེ་ཉིད་དང་པོར་གཞུང་ལུགས་ལ་སྦྱངས་པ་མཛད་པའི་ཚེ། འཁོར་བའི་རྩ་བ་འདི་གང་ལ་ཐུག་པ་ཡིན་སྙམ་དུ་དགོངས་པའི་ཚེ་ཐག་ཆོད་པ་ཞིག་མ་བྱུང་བར། ཕྱ་པ་ཆོས་ཀྱི་སེངྒེའི་དྲུང་དུ་ཕེབས་ནས་དྲིས་པར། ཐོག་མའི་མ་རིག་པ་ཡིན་གསུང་ཡང་སྒྲོ་འདོགས་མ་ཆོད། ས་ཆེན་གྱི་དྲུང་དུ་ཞུས་པས་རླུང་སེམས་ངོ་བོ་ཐ་དད་དུ་འཛིན་པ་འདི་ཡིན་གསུངས་ཏེ། དེས་ཀྱང་སྒྲོ་འདོགས་མ་ཆོད། དེ་ནས་དྭགས་ལྷ་སྒམ་པོར་མཉམ་མེད་དྭགས་པོ་ལྷ་རྗེའི་དྲུང་དུ་ཕེབས་པས་ཁོང་གིས་ཁྱེད་རང་ལ་ཐག་མ་ཆོད་པ་ཅི་ཡོད་དྲིས་ཤིག་གསུང་བས། འཁོར་བའི་གཞི་རྩ་མཐར་ཐུག་པ་དེ་གང་ཡིན་ཞུས་པ་ན་དེ་ལ་མི་ཤེས་རྒྱུ་ཅི་ཡོད། ད་ལྟའི་ཐ་མལ་གྱི་ཤེས་པ་འདི་ག་ཡིན་གསུང་བས། ཐུགས་ལ་གཏིང་ནས་འཕྲོད་པ་ཞིག་བྱུང་སྟེ་སྔོན་གྱི་བག་ཆགས་སད་པའི་བྱིན་རླབས་དང་དགའ་སྤྲོ་མོས་གུས་སྨྲ་མི་ཤེས་པ་ལྟ་བུས་ཡིད་གཡོས་ཏེ་དྲན་མེད་དུ་བརྒྱལ་ཞིང། དེ་ཀ་རང་ལ་ཕྱག་རྒྱ་ཆེན་པོའི་རྟོགས་པ་ཁྱད་པར་ཅན་འཁྲུངས་པར་བཤད་པ་ལྟ་བུ་ཡིན། རྗེ་བདག་ཉིད་ཆེན་པོའི་བླ་མ་དབུ་མ་པ་ཆེན་པོ་དེ་ཉིད་ཀྱིས་ཀྱང་སྔར་བཀའ་བརྒྱུད་པའི་བླ་མ་འབའ་ར་བ་བྱ་བའི་དྲུང་ནས་སེམས་ཀྱི་ངོ་སྤྲོད་ཕྱག་རྒྱ་ཆེན་པོ་འདི་ཉིད་ཀྱི་ཁྲིད་ཅིག་གསན་ལ། ཞིབ་ཏུ་བརྟག་ན་སེམས་གནས་སྒྲུབ་ཚུལ་ཙམ་ཞིག་ཏུ་འདུག་ཅེས་རྣམ་ཐར་དད་པའི་འཇུག་ངོགས་ལས་ཟུར་ཙམ་གསུངས། སེམས་གནས་

― GTD003_Page_0608 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲུབ་པའི་སྐབས་འདིར་མདོ་ལུགས་ཀྱིས་རྣམ་རྟོག་ཕྲ་མོ་མི་འགོག་ཀྱང། སྔགས་ལུགས་ལ་དེ་འགོག་པའི་གནད་ཀྱིས་ཞི་གནས་སྒྲུབ་པ་སོགས་ལ་ནུས་པ་ཆེ་བ་ཡིན་ཞེས་ཡོངས་འཛིན་གསུང། གཉིས་པ་རང་ལུགས་ཀྱི་ཕྱག་ཆེན་གཙོ་བོ་སེམས་ཀྱི་དོན་དམ་པའི་གནས་ལུགས་གཏན་ལ་དབབ་པ་ལ། རྩོམ་པར་དམ་བཅའ་བ་ནི། ད་ནི་སེམས་ཀྱི་ཆོས་ཉིད་ལ། །ངོ་སྤྲོད་ཇི་ལྟར་བྱ་བའི་ཚུལ། །ཞེས་པ་ནས། རྩ་བའི་བླ་མའི་ཞལ་གདམས་འགོད། །ཅེས་རྩ་བའི་བླ་མ་མཁས་གྲུབ་ཆེན་པོ་སངས་རྒྱས་ཡེ་ཤེས་ཀྱི་ཞལ་ལས་འོངས་པའི་གདམས་པ་གནས་ལུགས་ཕྱག་རྒྱ་ཆེན་པོའི་མན་ངག་གསལ་བར་འགོད་པར་བྱའོ། །ཞེས་གསུངས་ནས་དངོས་གཞི་ལ། ངེས་དཀའ་སླའི་དབང་གིས་བདག་མེད་གཉིས་ལ་འཇུག་རིམ་སྤྱིར་བཤད་པ་དང་མཐུན་པར་དང་པོར་གང་ཟག་གི་སྟེང་དུ་གཏན་ལ་འབེབས་ཚུལ་དང། དེ་ནས་སེམས་ཀྱི་སྟེང་དུ་གཏན་ལ་འབེབས་ཚུལ་གཉིས་ཡོད་པས། དང་པོ་ནི། སྔར་གྱི་མཉམ་གཞག་ངང་ཉིད་ལས། །མ་གཡོས་དྭངས་པའི་ཆུ་ནང་དུ། །ཇི་ལྟར་ཉ་ཆུང་འཁྱུག་པ་ལྟར། །ཕྲ་མོའི་ཤེས་པས་སྒོམ་པ་པོའི། །སྐྱེས་བུའི་རང་བཞིན་མཛངས་པར་བརྟག །ཅེས་སོགས་གསུངས་ཏེ། དཔེར་ན་ཆུ་བོ་ཆེན་པོའི་གཏིང་ནས་ཉ་ཆུང་འཁྱུག་ཀྱང། དེས་ཆུ་གཡོ་མི་ནུས་པ་བཞིན། སྔར་བཤད་པའི་ཞི་གནས་ཀྱི་སྒོམ་དེ་ལས་མ་གཡོས་པར་མཉམ་པར་བཞག་བཞིན་པའི་ངང་དེ་ནས་ཤེས་པའི་ཟུར་གཅིག་གིས་ང་རང་བཞིན་གྱིས་གྲུབ་མ་གྲུབ་དང། གྲུབ་ན་ཇི་ལྟར་གྲུབ་དགོས་ཚུལ་དང། དེ་ལ་གནོད་བྱེད་ཇི་ལྟར་འཇུག་པ་སོགས་དཔྱད་པ་འབྱེད་དགོས་ལ། དཔྱད་ཚུལ་ནི། དཔལ་མགོན་འཕགས་པ་ཀླུ་སྒྲུབ་

― GTD003_Page_0609 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས། སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་ན་སྐྱེས་བུ་གང། །ཞེས་སོགས་གསུངས་ཏེ། རང་རེའི་སྣང་ཚུལ་འདི་ལ་ངའམ་སྐྱེས་བུ་ཞེས་པ་ཚུགས་ཐུབ་ཧྲིང་ཧྲིང་པོར་ཡོད་པ་འདྲ་བ་ཞིག་འབྱུང་ཡང། ཕར་བཙལ་ན་ཤ་རུས་སོགས་ཀྱི་ས་ཁམས་ཚོའང་ང་མིན། ལུས་ཀྱི་ཁྲག་ཆུ་སེར་སོགས་དང། དྲོད་དང་དབུགས་དང། ནམ་མཁའ་ཁམས་སུ་གཏོགས་པ་ལུས་ཀྱི་བུ་ག་ལ་སོགས་པ་འདི་དག་གང་ཡང་ང་མིན་ལ། འདི་ཐམས་ཅད་བསལ་བའི་ཤུལ་ན་འདི་ང་ཡིན་ཟེར་བའི་ལུས་རྒྱུ་ཞིག་ཀྱང་མེད་པས། དེས་ན་སྐྱེས་བུ་ཞེས་པ་ས་ཆུ་མེ་རླུང་ནམ་མཁའ་རྣམས་ཀྱི་ཁམས་དྲུག་འདུས་པ་ལ་མིང་དང་རྟོག་པས་ཕར་བཏགས་པ་མ་གཏོགས། ཁོ་རང་གི་ངོས་ནས་ཚུར་གྲུབ་རྒྱུ་ཅུང་ཟད་ཙམ་ཡང་མི་འདུག་སྙམ་དུ་བསྒོམ་ཞིང་ཤུགས་ཞན་དུ་སོང་བ་ནའང་སྔར་གྱི་རྒྱུ་མཚན་དྲན་ཙམ་བྱས་ཏེ། དེ་ལ་འཇོག་པ་མཉམ་གཞག་ནམ་མཁའ་ལྟ་བུའི་བསྒོམ་ཚུལ་ཡིན་ཞིང། སྐྱེས་བུ་ཁམས་དྲུག་འདུས་པའི་ཕྱིར། །ཡང་དག་མ་ཡིན་ཞེས་པ་འདིས་རྗེས་ཐོབ་ཀྱི་སྒོམ་ཚུལ་བསྟན་ཞེས་འགྲེལ་པར་གསུངས་ལ། དེའི་ཚུལ་ནི་སྔར་བཤད་པ་བཞིན་ཁམས་དྲུག་སོ་སོ་བའང་ང་མིན། འདུས་པའང་ང་མིན། དེ་ལས་ལོགས་སུའང་ང་མེད་ལ། འོན་ཀྱང་ལས་གསོག་པ་པོ་དང། རྣམ་སྨིན་མྱོང་བ་པོའི་ང་ཙམ་ཞིག་ཡོད་དགོས་པས། དེ་ནི་དཔེར་ན་སྒྱུ་མ་མཁན་གྱིས་སྒྱུ་མ་སྤྲུལ་པའི་ཚེ་རྡེའུ་ཤིང་རང་གི་ངོས་ནས་རྟ་གླང་མེད་ཀྱང་མིག་བསླད་པ་དང་སྔགས་རྫས་ཀྱི་དབང་གིས་རྟ་

― GTD003_Page_0610 ―

^{[མ་དཔེ་གཟིགས་ན་འདིར་གནོན།]}

[Full Size]

གླང་གི་སྣང་བ་ཙམ་ཞིག་འབྱུང་བ་བཞིན། གདགས་གཞི་ཁམས་དྲུག་པོ་དེ་ལ། འདོགས་བྱེད་མིང་དང་རྟོག་པས་ཕར་བཏགས་ཙམ་པ། བློ་ལ་སྣང་ཙམ་པ་དེ་ཀ་ཙམ་ཞིག་ངའོ་སྙམ་དུ་སྒྱུ་མ་དང་རྨི་ལམ་དང་ཆུ་ཟླ་ལྟ་བུར་བསྒོམ་པས་རྗེས་ཐོབ་ཀྱི་རྣལ་འབྱོར་སྐྱོང་ཚུལ་ཡིན་ནོ། །གཉིས་པ་སྐབས་འདིའི་དམིགས་པའི་གཙོ་བོ་སེམས་ཀྱི་སྟེང་དུ་གཏན་ལ་འབེབས་ཚུལ་ནི། ཡང་ན་མཉམ་པར་བཞག་པའི་ངང། །གཟུགས་སུ་མ་གྲུབ་སྟོང་སང་ངེ་། །ཞེས་སོགས་གསུངས་ཏེ། སེམས་འདི་ལུས་ཀྱི་སྟོད་སྨད་སོགས་ཆ་འདི་ན་ཡོད། དབྱིབས་དང་ཁ་དོག་ལ་སོགས་པའི་ཁྱད་པར་འདི་འདྲ་ཞིག་ཡིན་ཞེས་པ་ལྟ་བུའི་ངོས་བཟུང་གང་ཡང་མེད་པ། དངོས་གནས་ལ་སྟོང་ཉིད་མིན་ཡང་ཕར་བརྟག་ན་སྟོང་སང་ངེ་བ་ཞིག་ལས་མེད་པས་བཀའ་བརྒྱུད་གོང་མ་རྣམས་རྒྱར་མ་ཆད་པ། ཕྱོགས་སུ་མ་ལྷུང་བ་ཞེས་ཟེར་ལུགས་ཕལ་ཆེར་ནམ་མཁའ་དང་ཕྱོགས་མཚུངས་ལྟ་བུ་ཞིག་མཛད་ལ། དེ་ལྟར་ངོས་བཟུང་མེད་པ་ཞིག་ཡིན་ཡང། རང་དགར་མ་བརྟགས་མ་དཔྱད་པར་བཞག་ན་མི་འཆར་དགུ་འཆར་བ། སྲིད་རྩེ་ནས་མནར་མེད་ཀྱི་བར་གྱི་བདེ་སྡུག་ལེགས་ཉེས་ཐམས་ཅད་བྱེད་པ་པོ་ཡིན་པས། སྔོན་ཆད་རང་ཅག་ཕར་སེམས་ཀྱི་དབང་དུ་སོང་བ་ཡིན། ད་ནི་སེམས་དེ་ཚུར་རང་གི་དབང་དུ་འདུས་པ་ཞིག་བྱེད་དགོས་པས། སེམས་ངོ་སྤྲོད་པ་དང་སེམས་ལ་དམིགས་པ་ཞེས་འདི་ཉིད་གཙོ་བོར་རྩལ་དུ་འདོན་པའི་རྒྱུ་མཚན་ཡང་དེ་ཡིན། སེམས་དམིགས་རྟེན་དུ་བྱེད་པ་དེའི་ཚེ་སེམས་ཀྱི་ངོ་བོ་རགས་རིམ་ཙམ་ཞིག་ཤར་བ་ན། དེ་ཙམ་གྱིས་ཆོག་ཤེས་བྱས་ཏེ་དེ་ལ་དམིགས་ནས་བསྒོམ་ན་གསལ་ཆ་རིམ་གྱིས་འབྱུང་བས་དེ་ལྟར་བྱེད་དགོས་ཀྱི།

― GTD003_Page_0611 ―

^{[མ་དཔེ་གཟིགས་ན་འདིར་གནོན།]}

[Full Size]

དང་པོ་ནས། གསལ་ཆ་ཅན་ཞིག་ལ་གཙོར་འདོན་བྱས་ན་དམིགས་རྟེན་མི་རྙེད་པས་དེ་འདྲ་མི་རུང་ཞེས་ཡོངས་འཛིན་རིན་པོ་ཆེས་གསུང། དེའང་སེམས་ལ་དམིགས་པ་འདི་སྤྱིར་ཞི་གནས་ཀྱི་དམིགས་པ་ལ་ཁྱབ་པའི་དམིགས་པ། ཉོན་མོངས་རྣམ་སྦྱོང་གི་དམིགས་པ། སྤྱད་པ་རྣམ་སྦྱོང་གི་དམིགས་པ། མཁས་པའི་དམིགས་པ་རྣམས་སུ་ཡོད་ཅིང། དང་པོ་ལའང་རྣམ་རྟོག་དང་བཅས་པའི་གཟུགས་བརྙན། རྣམ་རྟོག་མེད་པའི་གཟུགས་བརྙན། དངོས་པོའི་མཐའ། དགོས་པ་ཡོངས་གྲུབ་དང་བཞི། དངོས་པོའི་མཐའ་ལའང། ཇི་ལྟ་བ་ལ་ལྟོས་པའི་དངོས་པོའི་མཐའ་དང། ཇི་སྙེད་པ་ལ་ལྟོས་པའི་དངོས་པོའི་མཐའ་གཉིས་ཡོད་པའི་ནང་ནས་ཇི་སྙེད་པ་ལ་ལྟོས་པའི་དངོས་པོའི་མཐའ་ཡིན་ཞེས་ཡོངས་འཛིན་གསུང། དེའང་སེམས་ཀྱིས་སེམས་ལ་དམིགས་པ་ཡིན་ན། ཐལ་འགྱུར་བའི་ལུགས་ཀྱིས་རང་རིག་འགོག་པའི་སྐབས་སུ། སྐྱེས་བུ་ཡང་ཟོར་ཅི་ཙམ་ཆེའང་རང་གིས་རང་གི་ཕྲག་པ་ལ་ཞོན་མི་ནུས་པ་དང། སོར་མོས་རང་གི་རྩེ་མོ་ལ་རེག་མི་ནུས་པ་དང། མར་མེས་རང་ཉིད་གསལ་མི་ནུས་པ་སོགས་ཀྱི་དཔེའི་སྒོ་ནས་བྱ་བྱེད་གཅིག་ཏུ་ཐལ་བའི་སྐྱོན་བརྗོད་པ་དེ་འདི་ལའང་འདྲ་བས་ཇི་ལྟར་ཡིན་དཔྱད་གཞི་ཆེ། ཡོངས་འཛིན་རིན་པོ་ཆེས་སེམས་ཀྱི་དོན་སྤྱི་ལ་དམིགས་པ་ཡིན་གསུངས་པ་སྔར་གྱི་སྐྱོན་དེ་ཁེགས་ཙམ་འདུག་ལ། ལྕང་སྐྱ་རིན་པོ་ཆེས་ཀྱང་འདི་སྐོར་ཡོངས་འཛིན་རིན་པོ་ཆེ་ལ་དྲི་བ་ཞིག་མཛད་སྣང། ང་རང་གིས་བསམ་ཚོད་ལ་དང་པོར་སེམས་ཀྱི་སྤྱི་ཙམ་ཞིག་འཆར་

― GTD003_Page_0612 ―

^{[མ་དཔེ་གཟིགས་ན་འདིར་གནོན།]}

[Full Size]

བཅུག་ནས། དེ་ཕྱིན་སྐད་ཅིག་ཕྱི་མ་ཕྱི་མས་སྔ་མ་ལ་དམིགས་པར་བྱས་ན་གོ་རྒྱུ་ཅུང་ཞིག་དགའ་འམ་སྙམ། དེ་ལྟར་སེམས་ཀྱི་ངོ་བོ་གསལ་སྟོང་ཧྲིག་གེ་བ་རིགས་འདྲའི་རྒྱུན་ཆད་པ་མེད་ཅིང་ཡུལ་སྣ་ཚོགས་སུ་འཕྲོ་བ་དེ་ཉིད་ངོས་ཟིན་པར་བྱས་ཏེ། དེའི་སྟེང་དུ་གནས་ལུགས་ཕྱག་རྒྱ་ཆེན་པོ་གཏན་ལ་འབེབས་པའི་རིགས་པས་སྒྲུབ་ཚུལ་ནི། རྒྱལ་སྲས་ཞི་བ་ལྷས། རྒྱུད་དང་ཚོགས་ཞེས་བྱ་བ་ནི། །ཕྲེང་བ་དམག་སོགས་བཞིན་དུ་རྫུན། །ཞེས་གསུངས་ཏེ། དེ་ལ་དཔེ་ནི་སྐུད་པ་གཅིག་ལ་ཕྲེང་རྡོག་བརྒྱ་དང་བརྒྱད་བརྒྱུས་པའི་ཚེ་ཕྲེང་བའོ་ཞེས་དེའི་སྟེང་ནས་ཚུར་གྲུབ་གྲུབ་འདྲ་བ་ལ། ཕྲེང་རྡོག་སོ་སོར་བསལ་ན་ཕྲེང་བ་ངོས་འཛིན་རྒྱུ་མེད་པ་དང། གོ་མཚོན་ཐོགས་པའི་མི་བརྒྱ་ཙམ་ཞིག་འདུས་པ་ན་དམག་ཅེས་རང་ངོས་ནས་གྲུབ་བསྡད་པའི་དམག་ཡོད་ཡོད་འདྲ་བས། དམག་མི་རྣམས་སོ་སོར་སོང་བའི་ཤུལ་ན་དམག་ཅིག་ལུས་རྒྱུ་མེད་པ་ལྟར་སེམས་ཞེས་བྱ་བ་འདིའང་རྒྱུད་དམ་རྒྱུན་སྐད་ཅིག་སྔ་ཕྱི་མང་པོ་ཞིག་ཚོགས་ཙམ་གྱི་སྟེང་ལ་བློས་ཕར་བཞག་པ་ཙམ་ཞིག་ལས་སྐད་ཅིག་སོ་སོར་བསལ་བའི་ཤུལ་ན་ལུས་རྒྱུ་མེད་ལ་འདི་ལ་པཎ་ཆེན་ཐམས་ཅད་མཁྱེན་པས་རིགས་པ་འདི་ཉིད་བསྣན་ནས་གསུངས་ཏེ། དཔེར་ན་ཁང་པ་ཀ་བ་བཞི་མ་ཞིག་གི་ནང་ན་ཁང་པ་དེའི་ཀ་བ་སྤྱི་ཙམ་པ་ཞིག་ཡོད་དགོས་ཏེ། དེ་ཀ་བ་བཞི་ཀའི་དབྱེ་གཞི་ཡིན་པའི་ཕྱིར། འོན་ཀྱང་ཀ་བ་བཞི་པོ་དེ་རེ་རེ་ནས་ཕྱེ་ན་དབྱེ་གཞིའི་ཀ་བ་མིན་ཏེ་དབྱེ་ཆོས་ཡིན་ལ། དབྱེ་ཆོས་སུ་འགྲོ་བའང་དབྱེ་གཞི་ཞིག་ཡོད་པ་ལ་ལྟོས་དགོས་པས་མིང་གིས་བཏགས་ཙམ་གྱི་སྟེང་ནས་འཇོག་དགོས་ལ། ཁྲི་ཆེན་ངག་དབང་མཆོག་ལྡན་གྱིས་ཀྱང། མཚན་

― GTD003_Page_0613 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་པའི་རྫས་སྤྱི་མ་ཟེར་བ་འདི་སྟོང་ཉིད་གོ་བ་ལ་ཕན་ཤིན་ཏུ་ཆེ་གསུང་། དབེན་ས་པ་སངས་རྒྱས་ཡེ་ཤེས་ཀྱི་ཞལ་གདམས་ཉམས་མགུར་ལས་ཀྱང། གང་ཤར་རྣམ་རྟོག་འཛིན་པར་ཡོངས་རིག་ན། །དོན་དམ་ཆོས་དབྱིངས་གཞན་ལ་ལྟོས་མེད་འཆར། །ཞེས་སོགས་ཚིག་ཉུང་ཞིང་དོན་རྒྱ་ཆེ་བ་ཤོ་ལོ་ཀ་འདིའི་ནང་དུ་ཕྱག་ཆེན་གྱི་གནད་ཡོངས་སུ་རྫོགས་པར་འདུས་ལ། ཚིག་དོན་ནི། ད་ལྟ་ང་རང་ཚོ་ལ་གང་སྣང་བ་འདི་ཐམས་ཅད་བདེན་འཛིན་གྱིས་བསླད་པའི་འཁྲུལ་སྣང་ཤ་སྟག་ཡིན་ཏེ། རང་རེ་ལ་སྣང་བའི་ཚེ་ཡུལ་གང་དང་གང་ཡིན་ཀྱང་ཁོ་རང་གི་ངོས་ནས་ཚུར་སྣང་བ་ལྟ་བུ་ཞིག་མ་གཏོགས་བློས་ཕར་བཏགས་པའི་ཉམས་མེད་ལ། དོན་དུ་བཞི་བརྒྱ་པའི་འགྲེལ་པར་རྟོག་པ་ཡོད་པ་ཁོ་ནས་ཡོད་པ་ཉིད་དང། རྟོག་པ་མེད་པར་ཡོད་པ་ཉིད་མེད་པ་ཞེས་སོགས་གསུངས་པ་ལྟར། རྟོག་པས་ཕར་བཏགས་ཙམ་མ་གཏོགས་འཇོག་རྒྱུ་མེད་ལ། རྟོག་པས་ཕར་བཏགས་པ་ཙམ་དེ་ཡོད་པས་ཡོད་པར་འཇོག་ཀྱང་དགོས་ཏེ། བུདྡྷ་པཱ་ལི་ཏར་གསུངས་པ་བཞིན། བྱིས་པ་གཉིས་ཀྱིས་ལྷ་ཁང་བལྟས་པ་ན་གཅིག་གིས་འཁོར་ལོ་ཐོགས་པ་འདི་ནི་སྲེད་མེད་ཀྱི་བུའོ། །རྩེ་གསུམ་ཐོགས་པ་འདི་ནི་དབང་ཕྱུག་གོ་ཟེར་བ་ལ། གཅིག་ཤོས་ཀྱིས་དེ་མ་ཡིན་ཏེ། འཁོར་ལོ་ཐོགས་པ་འདི་ནི་དབང་ཕྱུག་གོ །རྩེ་གསུམ་ཐོགས་པ་འདི་ནི་སྲེད་མེད་ཀྱི་བུའོ་ཞེས་གཉིས་ཀ་མ་མཐུན་པར་ཀུན་ཏུ་རྒྱུ་ཞིག་ལ་དྲིས་པ་ན། དེས་འཁོར་ལོ་ཐོགས་པ་འདི་ནི་ཁྱབ་འཇུག་གམ་སྲེད་མེད་ཀྱི་བུ་ཡིན། རྩེ་གསུམ་ཐོགས་པ་འདི་དབང་ཕྱུག་

― GTD003_Page_0614 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ཞེས་ལན་བཏབ་པས་དེ་གཉིས་ཀྱི་དོགས་པ་སེལ་ནུས་ལ་ལན་ཡང་དོན་མཐུན་དུ་འགྲོ་བས། དེ་ལྟར་འདེབས་དགོས་ཀྱི་འཁོར་ལོ་ཐོགས་པ་འདི་ཁྱབ་འཇུག་མིན་ཁྱབ་འཇུག་གི་རི་མོ་ཡིན་ཞེས་ཁྱད་པར་འབྱེད་མི་དགོས་པ་བཞིན་དུ། མ་བརྟགས་མ་དཔྱད་པའི་བློ་ལྷན་སྐྱེས་འདིས་ཕར་བཏགས་ཙམ་དེས་ཚིམ་པར་བྱས་ནས་ཐ་སྙད་པའི་རྣམ་གཞག་ཐམས་ཅད་བསྙོན་མེད་དུ་འཇོག་དགོས་ཀྱི། ཀུན་རྫོབ་ཀྱི་ཆོས་རྣམས་ཀྱི་འཇོག་མཚམས་ལ་དོན་དམ་གྱི་དཔྱད་པ་བྱས་ན་ཅུང་ཟད་ཀྱང་རྙེད་རྒྱུ་མེད་པས་འཇོག་མི་ཐུབ་ཚེ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱི་མགུར་འདིའི་གསུང་ཟིན་ལྟར་ན་རྟོག་པས་བཏགས་ཙམ་སྔོན་ལ་རྟོགས་ནས། དེའི་ཤུགས་ཀྱིས་སྟོང་ཉིད་རྟོགས་འགྲོ་བ་ལྟ་བུ་ཞིག་འདུག་ཀྱང་སྤྱིར་བདེན་གཉིས་ཀྱི་རྟོགས་རིམ་ལ། དོན་དམ་བདེན་པ་སྔར་རྟོགས་དགོས་པས་འདི་གསར་རྟོགས་ཀྱི་དུས་ལ་སྦྱོར་རམ། རྗེས་སུ་བསྒོམ་པའི་སྐབས་ལ་སྦྱོར་དཔྱད་དགོས། ཕ་དམ་པས། སྟོང་ཉིད་ངང་དུ་རིག་པའི་མདུང་སྐོར་བྱ། །ཞེས་སོགས་གསུངས་པའང་འདི་དང་གནད་གཅིག །གསུམ་པ་རྗེས་སུ་བསྔོ་བས་མཚམས་སྦྱར་བ་ནི། རྗེས་ནི་ཕྱག་ཆེན་བསྒོམ་པ་ལས། །ཞེས་སོགས་སླ། དེ་ལྟར་མཉམ་གཞག་གིས་བསྒོམས་ནས་རྗེས་ཐོབ་ཏུ་ལངས་པ་ན། དེའི་རྣལ་འབྱོར་སྐྱོང་ཚུལ་ནི། དེ་ལྟར་གོམས་ནས་ཚོགས་དྲུག་གི་ཞེས་གསུངས་ཏེ། འཇུག་ཤེས་དྲུག་ལ་ཡུལ་གང་སྣང་བ་ནའང་དགག་བྱའི་སྣང་ཚུལ་དང་མ་འདྲེས་པ་ཞིག་གཏན་མེད་པས། རྩོད་པའི་ཚེ་འདི་ལ་སྣང་བའི་བུམ་པ་ཡོད་ལ་སྣང་བ་ལྟར་གྱི་བུམ་པ་མེད་ཅེས་ཞིབ་ཆ་འབྱེད་ཀྱང། ཞེ་ཕུགས་སུ་བུམ་པ་ཁོ་རང་གི་ངོས་

― GTD003_Page_0615 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ཚུར་གྲུབ་གྲུབ་འདྲ་བའི་སྣང་བ་ལིང་ངེ་བ་དེ་གཞིར་བཞག་ནས། དེའི་སྟེང་དུ་བུམ་པ་ཡོད་ལ་བདེན་གྲུབ་བམ་རང་མཚན་ཟེར་བའི་ཟུར་དུ་འགོག་རྒྱུ་ཞིག་ཡོད་པར་བཟུང་ན་དགག་བྱ་གཏན་ནས་མི་ཁེགས་པས་ད་ལྟ་མི་སྣང་བ་འདི་ག་རང་དགག་བྱའི་སྣང་བ་ཡིན་གསུང་ལ། འབྲས་སྤུངས་གཙང་པ་དགེ་བཤེས་ཀྱིས་ཀྱང་ཐ་སྙད་པའི་ཚད་མ་རྣམས་སྣང་བ་ལོག་ཤེས་དང་འཛིན་སྟངས་ལ་ཚད་མ་ཡིན་གསུངས་ཞེས་འགའ་ཞིག་ཟེར། འོན་ཀྱང་ཐ་སྙད་པའི་ཚད་མའི་ངོར་ཡོད་པས་ཡོད་གོ་ཆོད་དགོས་ཏེ། རྗེ་བཙུན་འཇམ་པའི་དབྱངས་ཀྱིས་ཀྱང་རྗེ་བླ་མ་ལ་སྣང་ཕྱོགས་དང་སྟོང་ཕྱོགས་གཉིས་ཀྱི་ནང་ནས་སྣང་ཕྱོགས་ལ་རྩིས་སུ་བྱེད་དགོས་གསུངས་པ་དང། རྗེ་བླ་མས་ཀྱང་སྟོང་ཉིད་ལ་ཅི་ཙམ་ངེས་པ་རྙེད་པ་དེ་ཙམ་གྱིས་སྣང་བ་རྟེན་འབྱུང་གི་རྣམ་བཞག་ལ་ངེས་པ་བརྟན་དུ་འགྲོ་བས་སྣང་བས་སྟོང་པ་མི་འགོག་ཅིང་སྟོང་པས་སྣང་བ་མི་འགོག་པར་སྣང་སྟོང་གཉིས་ཕན་ཚུན་གཅིག་གཅིག་གི་གྲོགས་སུ་འཆར་བ་ཞིག་བྱུང་ན་ཀླུ་སྒྲུབ་ཡབ་སྲས་ཀྱི་དགོངས་དོན་རྙེད་པ་ཡིན་པར་གསུངས་ཏེ། དཔལ་མགོན་འཕགས་པ་ཀླུ་སྒྲུབ་ཀྱིས། དབུ་མ་རྩ་བའི་མཆོད་བརྗོད་སོགས་སུའང། སྟོང་པ་དང་རྟེན་འབྱུང་དོན་གཅིག་ཏུ་གསུངས་པ་འདི་ནི་བསྟོད་པའི་སྒོ་བླ་ན་མེད་པ་དང་ཤིན་ཏུ་ངོ་མཚར་ཆེ་བའི་གནས་ཡིན་པས། དེའི་སྒོ་ནས་བསྔགས་པ་མཛད་པ་ཡིན་ལ། རྟེན་འབྲེལ་གྱི་རྣམ་བཞག་འདི་ལ་བརྟེན་ནས་བཏགས་པའི་རྟེན་འབྲེལ་དང། བརྟེན་ནས་བྱུང་བའི་རྟེན་འབྲེལ་གཉིས་ཡོད་པས་ཐལ་འགྱུར་བ་རང་ལུགས་ཀྱི་རྟེན་འབྲེལ་འཇོག་མཚམས་

― GTD003_Page_0616 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྲ་ཤོས་སྔ་མ་ཡིན་ཞེས་ཡོངས་འཛིན་གསུང། མདོར་བསྡུ་ན། རྗེ་བདག་ཉིད་ཆེན་པོས་ལམ་གྱི་གཙོ་བོ་རྣམ་གསུམ་དུ། སྣང་བ་རྟེན་འབྲེལ་བསླུ་བ་མེད་པ་དང། །ཞེས་སོགས་གསུངས་པ་ལྟར། ལས་དགེ་སྡིག་ལས་འབྲས་བུ་བདེ་སྡུག་འབྱུང་བ་སོགས་རྒྱུ་འབྲས་རྟེན་འབྲེལ་བསླུ་བ་མེད་པའི་སྣང་ཕྱོགས་དང། བདེན་གྲུབ་རྣམ་པར་བཅད་པའི་སྟོང་པ་གཉིས་པོ་གཅིག་གིས་གཅིག་ལ་མི་གནོད་པར་སྣང་བས་ཡོད་མཐའ་སེལ་ཞིང་། སྟོང་པས་མེད་མཐའ་སེལ་བ་སྣང་བཞིན་དུ་སྟོང་ལ་སྟོང་བཞིན་དུ་སྣང་བས་སྣང་སྟོང་ཟུང་འཇུག་རྟག་ཆད་སྤྲོས་པའི་མཐའ་ཐམས་ཅད་དང་བྲལ་བའི་དབུ་མའི་ལམ་བཟང་འདི་ནི་རྒྱལ་བའི་དགོངས་པ་མཐར་ཐུག་པ་ཡིན་ལ། རྗེ་བླ་མ་ཙོང་ཁ་པ་ཆེན་པོ་དེ་ཉིད་ཀྱིས་ཀྱང། རྗེ་བཙུན་འཇམ་པའི་དབྱངས་ཡུན་རིང་དུ་བསྟེན་ཏེ་གསོལ་བ་ཤུགས་དྲག་ཏུ་བཏབ། དཀའ་བ་དཔག་ཏུ་མེད་པ་སྤྱད། སྔོན་རྒྱལ་བ་དབང་པོའི་ཏོག་གི་སྤྱན་སྔར་ཡང་ལུགས་བཟང་འདི་ཉིད་སྤེལ་བའི་སྨོན་ལམ་རླབས་པོ་ཆེའི་མཐུ་གྲུབ་པ་ལ་བརྟེན་ནས་གངས་ཅན་གྱི་ལྗོངས་འདིར་བསྟན་པའི་སྙིང་པོ་དྲི་མ་མེད་པ་འདི་ཉིད་ཆེས་ཆེར་གསལ་བར་མཛད། འོན་ཀྱང་ཕྱག་རྒྱ་ཆེན་པོའི་འཁྲིད་ཚུལ་འདི་ནི་སྙན་བརྒྱུད་ཁོ་ན་ལས་ཆེས་ཆེར་མ་གྲགས་པ་པཎ་ཆེན་ཐམས་ཅད་མཁྱེན་པས་རྩ་འགྲེལ་གཉིས་ཀ་གསུངས་ཏེ་དར་རྒྱས་སུ་མཛད་ཅིང། དེ་རྗེས་སྐྱིད་ཤོད་ཞབས་དྲུང་ངག་དབང་བསྟན་འཛིན་འཕྲིན་ལས་མདོ་སྨད་དུ་ཕེབས་ཏེ། ཁོང་གིས་ཀྱང་སྤེལ་བར་མཛད་པས་དར་རྒྱས་ཆེ་ལ། བར་སྐབས་ནས་ཕྱོགས་འདིར་ཉམས་ཆག་ཏུ་སོང་ཡང། དེང་སང་ཡོངས་འཛིན་རིན་པོ་ཆེས་འདིའི་ཁྲིད་ཡང་ཡང་གནང་བའི་བཀའ་

― GTD003_Page_0617 ―

^{[མ་དཔེ་གཟིགས་ན་འདིར་གནོན།]}

[Full Size]

དྲིན་གྱིས་ཐམས་ཅད་ལ་ཉམས་ལེན་ཇི་ལྟར་ཡིན་རུང་། ཕྱག་ཆེན་ཞེས་དོན་གཉེར་བྱེད་པ་འདི་བྱུང་བ་ཡིན། བདག་གིས་ཀྱང་ཁོང་ཆོས་འདིའི་བཀའ་བབ་ཡིན་པའི་རྒྱུ་མཚན་གྱིས་ཞུས་ནས་ཉམས་ལེན་ཆེར་མ་ཐུབ་ཀྱང་གཤར་སྦྱང་ཙམ་རེ་བྱས་པ་ཡིན་པས་རི་ཁྲོད་དུ་སྒྲུབ་པ་ཉམས་ལེན་གནང་མཁན་རྣམས་ཀྱིས་གཙོ་མཛད་ཚང་མས་རྒྱུན་པར་ཐུགས་ཉམས་སུ་བཞེས་ཏེ་ལམ་གྱི་ལུས་ཡོངས་སུ་རྫོགས་པ་ལ་བག་ཆགས་ཅི་ཐེབས་ཀྱི་སྒོ་ནས་དལ་འབྱོར་ཐོབ་པ་དོན་ལྡན་དུ་མཛད་དགོས་ཞེས་འདོམས་པར་མཛད་དོ། །ཕྱག་ཆེན་གྱི་རིམ་པའང། ཆོས་ཐུན་ལྔར་གནང་བས། དང་པོ་ལ་བཤད་པ་ཚར་གཉིས་དང་ཕྱི་མའི་མགོར་རེ་རེ་སྟེ་གསུམ་གསུམ་མཛད། ཆོས་ཐུན་གྱི་མགོར་ཤེར་སྙིང་དང་བདུད་བཟློག །དེ་ནས་ཕྱག་ཆེན་གསོལ་འདེབས་ལྷུན་འགྲུབ་སྐུ་གསུམ་མ་དང་མཎྜལ། མཇུག་གི་མཎྜལ་གྱི་རྗེས་སུ་ཕྱག་ཆེན་སྨོན་ལམ་དང་ལམ་རིམ་སྨོན་ལམ། ཆོས་ཐུན་གཉིས་པའི་མགོར་འཇིགས་བྱེད་ཀྱི་གཏོར་མགྲོན་བསྐྱེད་ནས། གཏོར་མ་འབུལ་ཞིང་དེ་རྗེས་ཆོས་རྒྱལ་གཏོར་འབུལ་བྱེད། ཆོས་ཐུན་ཐ་མའི་རྗེས་སུ། ཚོགས་མང་ནས་བླ་མཆོད་གསུང་ཞིང་ཡོན་ཏན་འབྱུང་གནས་ཀྱི་མགོར། མཁས་གྲུབ་སངས་རྒྱས་ཡེ་ཤེས་ཀྱིས་གསུངས་པའི་ཚོགས་འཁོར་བཀྲས་ལྷུན་སྔགས་པོད་དུ་གསལ་བ་ལྟར་བྱས་ཏེ། དེ་རྗེས་ཆོས་རྒྱལ་ལ་གཏོར་མ་ཕུལ། དེ་ནས་ཡོན་ཏན་འབྱུང་གནས་ཞེས་སོགས་དཀྱུས་ལྟར་འདོན་དགོས་པས་ཕྱག་ལེན་གྱི་རིམ་པ་འདིའང་མ་འཆོལ་བར་བྱེད་པ་ཤིན་ཏུ་གལ་ཆེའོ། །

― GTD003_Page_0618 ―

^{[མ་དཔེ་གཟིགས་ན་འདིར་གནོན།]}

[Full Size]

སྨྲས་པ། ཞལ་ལུང་བྱིན་རླབས་ཉི་མ་འོད་པོ་ཆེ། །བརྗེད་ངས་ཆུ་འཛིན་དྲ་བས་བསྒྲིབ་གྱུར་ཀྱང། །རང་བཟོའི་ཟིན་བྲིས་མེ་འོད་ཀྱིས་བསྟོད་པ། །ཐུབ་བསྟན་ལེགས་བཤད་པདྨོའི་དགྲ་རུ་ཆེ། །དེ་སླད་དབྲི་བསྣན་ངལ་བ་རིང་སྤངས་ཏེ། །ཇི་ལྟར་གསུང་བཞིན་ལྷུག་པར་བཀོད་པ་ཡི། །དགེ་བས་བདག་གཞན་འགྲོ་བ་མ་ལུས་པ། །ལམ་བཟང་འདི་ཡིས་མྱུར་དུ་གྲོལ་གྱུར་ཅིག །ཅེས་ཕྱག་ཆེན་གྱི་ཁྲིད་རིམ་ཟིན་བྲིས་སུ་བཏབ་པ་འདི་ནི་ཡོངས་རྫོགས་བསྟན་པའི་མངའ་བདག་ངེས་པ་དོན་གྱི་ཐམས་ཅད་མཁྱེན་གཟིགས་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོའི་ཞབས་དྲུང་དུ་ཁལ་ཁ་ཆེ་ཆེན་ཧཱན་གྱི་བླ་མ་མཁས་པའི་དབང་པོ་ཡེ་ཤེས་རྒྱ་མཚོ་པས་འདིའི་ཁྲིད་ཞུས་སྐབས་བདག་གིས་ཀྱང་མནོས་པ་ལས་གསུང་བཤད་རགས་རིམ་དྲན་ཚོད་རྣམས་རང་གི་དྲན་པ་གསོ་ཕྱིར་དང། ཁལ་ཁ་བླ་མས་ཀྱང་ཟིན་བྲིས་ཤིག་ཅི་ནས་ཀྱང་བྲི་དགོས་ཞེས་བསྐུལ་མ་བྱུང་བར་བརྟེན། ༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པ་འདིས་ཀྱང་སྙན་བརྒྱུད་ཀྱི་བསྟན་པ་ཕྱོགས་དུས་ཀུན་ཏུ་རྒྱས་པར་གྱུར་ཅིག །༈ རྒྱས་པར་ན་བླ་མ་མཆོད་པའི་མཇུག་ཏུ་ཞབས་སེན་འོད་ཆགས་བརྟན་པར་བཞུགས་སུ་གསོལ། ཞེས་པའི་མཐར། ༈ དངོས་གྲུབ་གཏེར་ཆེན་བླ་མ་རྡོ་རྗེ་འཆང། །སྙིང་གར་སིམ་པས་དགའ་བདེས་མྱོས་པའི་སེམས། །གསལ་སྟོང་འཛིན་མེད་མ་བཅོས་གཉུག་མ་ཡིས། །ཀུན་རྟོག་གནས་ལུགས་རྟོགས་པར་བྱིན་གྱིས་རློབས། །སྐད་ཅིག་རྒྱུན་གྱི་ཕྲེང་བར་རང་སེམས་ཞེས། །མིང་བརྡས་ཕར་བཏགས་ཙམ་ལས་དོན་སྟེང་ནས། །གྲུབ་པའི་བདེན་དངོས་ཆ་ཙམ་མ་དམིགས་པས།

― GTD003_Page_0619 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་པའི་ངང་ཚུལ་རྟོགས་པར་བྱིན་གྱིས་རློབས། །དབྱིངས་རིག་དབྱེར་མེད་དོན་གྱི་ཕྱག་རྒྱའི་མདངས། །སྨིན་ལེགས་དགའ་མར་རོལ་པའི་བདེ་བ་ཆེས། །བཞིན་ལེགས་རོལ་གར་གཟུགས་སྐུའི་བཀོད་པ་འབུམ། །འགྱེད་པས་འགྲོ་ཀུན་སྲིད་ལས་སྒྲོལ་བར་ཤོག། །བསྡུ་ན། དགའ་ལྡན་ལྷ་བརྒྱ་མ་ལྟ་བུའི་རྗེས་ལ། དཔལ་ལྡན་རྩ་བའི་བླ་མ་ནས་བསྩལ་དུ་གསོལ་ཞེས་པའི་མཐར། ༸དངོས་གྲུབ་གཏེར་ཆེན་ཞེས་སྦྱོར། ཞེས་པ་འདི་ནི་ཆ་ཧར་ནས་ལམ་འདི་ལ་མོས་པའི་ཕུན་ཚོགས་དཔལ་ལྡན་ཞེས་པའི་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ།། །། དགེའོ། །

བྱང་ཆུབ་ཀྱི་སེམས་གཉིས་སྒོམ་ཚུལ་ཐེག་མཆོག་འཇུག་ངོགས།

― GTD003_Page_0621 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་ཆུབ་ཀྱི་སེམས་གཉིས་སྒོམ་ཚུལ་ཐེག་པ་མཆོག་གི་འཇུག་ངོགས་ཞེས་བྱ་བ་བཞུགས་སོ། །

― GTD003_Page_0622 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་པའི་བདག་པོ་ཐུབ་དབང་རྡོ་རྗེ་འཆང། །ཟབ་རྒྱས་གདམས་པའི་བཀའ་བབས་བྱམས་འཇམ་དབྱངས། །ཀུན་གྱི་ཞལ་སྐྱིན་བླ་མའི་ཞབས་པད་ལ། །བཏུད་ནས་ཐེག་པ་མཆོག་ལ་འཇུག་པ་སྤྲོ། །དེའང་སངས་རྒྱས་བཅོམ་ལྡན་འདས་ཀྱིས་དཀའ་བ་དུ་མས་བྱང་ཆུབ་མངོན་དུ་མཛད་དེ་འཇིག་རྟེན་དུ་བྱོན་པ་ནི་རང་ཅག་རྗེས་སུ་གཟུང་བ་ཁོ་ནའི་ཕྱིར་ཡིན། རང་ཅག་ཀྱང་སྲིད་པའི་རྒྱ་མཚོ་གཏིང་དང་མཐའ་མེད་པར་འཁྱམས་པ་ལས་ད་རེས་སྟབས་ལེགས་ཀྱིས་དལ་འབྱོར་ལན་གཅིག་ཐོབ་སྟེ་བསྟན་པ་དང་མཇལ་བ་འདི་དོན་ལྡན་དུ་བྱེད་ན་སྟོན་པའི་རྗེས་སུ་སློབ་དགོས། དེ་ལ་སྟོན་པ་རང་ཉིད་གང་ནས་གཤེགས་པའི་ལམ་ཐབས་ཤེས་ཀྱི་སྤྱོད་པ་ཟུང་དུ་འཇུག་པ་དེ་ཉིད་ནས་ཞུགས་ཏེ་སངས་རྒྱས་ཀྱི་སར་བགྲོད་དགོས། ཉན་རང་རྣམས་ཀྱང་སངས་རྒྱས་ཀྱི་རྗེས་འཇུག་ཏུ་བཞག་པ་ནི། འཁོར་བ་ལས་རྒྱབ་ཀྱིས་ཕྱོགས་པའི་ཐར་པར་རིགས་མཚུངས་པ་ཙམ་ཡིན་གྱི། སངས་རྒྱས་ཀྱི་རྗེས་དངོས་ལ་འཇུག་ན་དེའི་ལམ་མམ་ཐེག་པར་བགྲོད་དགོས་ལ། དམན་པའི་བྱང་ཆུབ་ཐོབ་ཟིན་པའི་རྗེས་སུ་གཟོད། སངས་རྒྱས་ཐེག་པ་འདི་ནི་བཙལ་བར་གྱིས། །ཞེས་དེའི་ལམ་ལ་འཇུག་པར་བསྐུལ་དགོས་སོ། །དེ་དག་གིས་དང་པོ་ནས་དོན་དུ་མ་གཉེར་བས་གཞན་དོན་ཕུན་སུམ་ཚོགས་པའི་གནས་མེད་ལ། རང་དོན་ཡང་མཐར་མ་ཕྱིན་ཏེ། མོའུ་འགལ་གྱི་བུ་ཆེན་པོ་ལྟ་བུའང་ལས་ཀྱིས་

― GTD003_Page_0623 ―

^{[མ་དཔེ་གཟིགས་ན་འདིར་གནོན།]}

[Full Size]

ནོན་པས་ཀུན་ཏུ་རྒྱུ་རྣམས་ཀྱིས་ཕྱག་ཞབས་འདམ་བུ་ལྟར་བཅོམ་སྟེ་འདས་པ་དང། ལེགས་འོང་མུ་གེས་གྲོངས་པ་ལྟ་བུ་གནས་ངན་ལེན་གྱི་ལྷག་མས་མནར་བའི་ལོ་རྒྱུས་མང་ངོ་། །དེའི་ཕྱིར་རྒྱན་ལས། ལམ་གྱི་རྣམ་པ་མ་ཚང་ཞིང་ཆེད་དུ་བྱ་བ་ལོག་པར་གསུངས་པས། སྐྱེ་བོ་བློ་གྲོས་དང་ལྡན་པ་འཁོར་བ་ཕྲ་རགས་ཀྱི་ཕ་རོལ་ཏུ་བརྒལ་བར་འདོད་པ་དག་གིས་སྐུ་གཉིས་འགྲུབ་བྱེད་ཀྱི་སྒྲུབ་པའི་ངོ་བོ་ཀུན་རྫོབ་བྱང་ཆུབ་ཀྱི་སེམས་དང། དེ་ཁོ་ན་ཉིད་དོན་དམ་བྱང་ཆུབ་ཀྱི་སེམས་ཀྱི་གཤོག་ཡངས་དཀར་པོ་རྒྱས་པ་ལ་བརྟེན་ནས་རྒྱལ་བའི་ཡོན་ཏན་རྒྱ་མཚོའི་ཀློང་དུ་ཕྱིན་པར་བྱེད་དགོས་སོ། །དེས་ན་འདི་ལ་གསུམ། ཀུན་རྫོབ་བྱང་ཆུབ་ཀྱི་སེམས་སྒོམ་ཚུལ། དོན་དམ་བྱང་ཆུབ་ཀྱི་སེམས་སྒོམ་ཚུལ། དེ་གཉིས་ཟུང་དུ་འཇུག་པའི་ཚུལ་ལོ། །དང་པོ་ནི། དེའང་སངས་རྒྱས་ཐོབ་པར་འདོད་པ་ཙམ་གྱིས་ཐེག་པ་ཆེན་པོའི་སེམས་བསྐྱེད་དུ་མི་འགྱུར་ཏེ། རང་དོན་དུ་དེ་འདོད་ན་རང་སངས་རྒྱས་ཀྱི་སེམས་བསྐྱེད་དུ་འགྱུར་བས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དགོས་པའི་གཙོ་བོ་སྐོམ་པ་སེལ་བའི་ཆུ་ལྟ་བུ་ནི་གཞན་དོན་ཡིན་ལ། དེ་འཐུང་བའི་ཐབས་སུ་ཕོར་པ་ཚོལ་བ་བཞིན་སངས་རྒྱས་སྒྲུབ་པ་དེའི་ཡན་ལག་ཏུ་དགོས་པ་ཡིན་ནོ། །གཞན་དོན་ཡང་ཕྱོགས་རེ་བ་ཙམ་གྱིས་མི་ཆོག་པས། དམྱལ་བ་བཙོ་བསྲེག་གིས་སྡུག་བསྔལ་བ་ནས་བཟུང་། ས་བཅུ་པར་ཤེས་

― GTD003_Page_0624 ―

^{[མ་དཔེ་གཟིགས་ན་འདིར་གནོན།]}

[Full Size]

བྱའི་སྒྲིབ་པ་ཕྲ་མོ་ལས་མ་གྲོལ་བའི་བར་ཐམས་ཅད་ཀྱི་དོན་ལ་ཚང་བར་དམིགས་པ་ཡུམ་ལས་གསུངས་པ་ལྟ་བུ་དང། ནང་གསེས་ཀྱིས་དགྲ་གཉེན་བར་མ་ལྟ་བུའི་ཁྱད་མ་དོད་པས་ཉེ་རིང་སྙོམས་པ་ཞིག་གལ་ཆེའོ། །ད་ལྟ་སེམས་ལ་ཉེ་རིང་གི་ཁྱད་འབྱུང་བ་ནི་ད་ལྟའི་དགྲ་གཉེན་འདི་ལ་གཏན་དུ་བར་བཟུང་བའི་སྟོབས་ཡིན་ཞིང། དེ་ནི་འཁོར་བ་གཏིང་མཐའ་མེད་པར་འཁྱམས་ཚུལ་མ་བསམས་པས་ལན་པ་ཡིན་ཏེ། གཞོན་ནུ་མ་བདུན་གྱི་རྟོགས་བརྗོད་ལྟར་ད་ལྟ་གཉེན་དུ་སྣང་བ་འདི་དག་གིས་དགྲ་བྱས་ཏེ་མགོ་བཅད་པའང་སྟོང་གསུམ་དུ་མི་ཤོང། ད་ལྟ་དགྲར་སྣང་བ་འདི་དག་གིས་མ་བྱས་ཏེ་ནུ་ཞོ་འཐུངས་པའང་རྒྱ་མཚོའི་ཆུ་ལས་ལྷག། །ད་དུང་ཡང་འདི་སྣང་ཡུད་ཀྱིས་འགགས་ནས་དགྲ་གཉེན་གོ་ལོག་པ་ཇི་ལྟར་འགྲོ་མི་ཤེས། དེས་ན་གང་ལ་ནི་ཆགས་པར་བྱ། གང་ལ་ནི་སྡང་བར་བྱ། དེ་འདྲ་བྱེད་དོན་མེད་པར་མ་ཟད། ཆགས་སྡང་འདིས་སྡིག་པ་དང་སྡུག་བསྔལ་ཐམས་ཅད་ཀྱི་རྩ་བ་བྱས། སེམས་བསྐྱེད་བསྒོམ་པའི་ཐོག་མ་སེམས་སྙོམས་པ་ཙམ་སྐྱེ་བའི་གོ་སྐབས་མི་སྟེར་བས། ཐར་པ་དང་ཐམས་ཅད་མཁྱེན་པ་སྒྲུབ་པའི་སྒོ་འགག་བྱེད་དུ་ཤེས་པར་བྱས་ལ་དམིགས་ཡུལ་སྤུ་རིས་ཕྱེ་སྟེ་སྒོམ་རིམ་མཁས་པས་མཐར་སེམས་ཅན་ཐམས་ཅད་ཀྱི་བར་དུ་བསྒོམ། དེ་གོམས་པ་ན་རིགས་པའི་ཡ་མཐའ་ཐུག་པ་མེད་པས་སྐྱེ་བའི་ཡ་མཐའ་ཐུག་པ་མེད་པ་དང། དེའི་རྟགས་ཀྱིས་སེམས་ཅན་ཐམས་ཅད་ལ་མར་མ་གྱུར་པ་མེད་ཅིང། གྱུར་པའང་གྲངས་ཀྱིས་མི་ཆོད་ཚུལ་རིགས་པའི་འཕྲུལ་གྱིས་བསྒོམས་ཏེ། མཚན་མོ་རྒྱང་རིང་པོར་ཁྱི་ངུ་བ་ལྟ་བུའི་ཚེའང་མ་རྒན་གྱིས་བོས་བྱུང་སྙམ་

― GTD003_Page_0625 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལྟ་བུ་ཚུན་ཆད་བྱེད། མ་ནམ་བྱས་པ་ན་མངལ་དང་བཙས་པའི་གནས་སྐབས་ཀུན་ཏུ་ནོར་བུ་རིན་པོ་ཆེ་རྙེད་པ་ལྟ་བུའི་དགའ་ཚོར་གྱིས་རང་སྲོག་ལས་ཀྱང་གཅེས་པར་བསྐྱངས་ཏེ་འཁོས་ཀ་གང་ཡོད་ཀྱིས་ཕན་པ་ཐམས་ཅད་ལ་སྦྱར། གནོད་པ་ཐམས་ཅད་ལས་བསྐྱབས། ཁྱད་པར་ཚེ་འདིའི་མ་ལྟ་བུར་མཚོན་ན་བྱིས་པ་རློན་པ་ན་བུན་གྱི་འབུ་ལྟ་བུ་ཞིག་དལ་འབྱོར་ཚང་བའི་མི་གྲལ་དུ་བཙུད་པའི་དྲིན་བསམ་གྱིས་མི་ཁྱབ། འོན་ཀྱང་དེ་དག་ནི་དངོས་སུ་དྲིན་གྱིས་བསྐྱང་ཚུལ་ཙམ་ཡིན། བརྒྱུད་ནས་ཞིབ་ཏུ་བསམ་ན་ལེགས་ཚོགས་ཐམས་ཅད་མ་རྒན་སེམས་ཅན་གྱི་བཀའ་དྲིན་ཁོ་ན་ཡིན་ཏེ། དལ་འབྱོར་གྱི་རྟེན་ཐོབ་པ་འདིའང་རྒྱུ་ཚུལ་ཁྲིམས་ཀྱི་འབྲས་བུ་ཡིན་ཞིང། དེ་ནི། སྡོམ་པ་སེམས་ཅན་ཐམས་ཅད་ལས། །ཞེས་པ་ལྟར། ཞིང་ས་སེམས་ཅན་གཞིར་བྱས་ཏེ་དེ་ལ་གནོད་པ་གཞི་བཅས་སྤོང་བ་ལས་སྐྱེ་བ་ཡིན། ཟས་ཁམ་གཅིག་ཡན་ཆད་ཀྱི་ལོངས་སྤྱོད་ཐམས་ཅད་སྦྱིན་འབྲས་ཡིན་པས་སྦྱིན་ཡུལ་གྱི་སེམས་ཅན་ལ་བརྟེན་ནས་འབྱུང་དགོས། ལུས་དང་སྤྱོད་པ་གཞན་གྱི་ཡིད་དུ་འོང་བས་རང་ལ་དགའ་བ་སོགས་བཟོད་པའི་སྟོབས་ཡིན་ལ། དེ་བཟོད་པའི་ཡུལ་ལ་ལྟོས་པ་སོགས་སེམས་ཅན་ལ་མ་བརྟེན་པར་བྱུང་བ་གཅིག་ཀྱང་མེད། རྫོགས་པའི་སངས་རྒྱས་ཀྱི་གོ་འཕང་སྒྲུབ་པའང། དེའི་གཞུང་ལམ་ཕ་རོལ་ཏུ་ཕྱིན་པ་དྲུག་གིས་བསྡུས་པའི་ཚོགས་གཉིས་རྫོགས་པ་སེམས་ཅན་ལ་ལྟོས་ཏེ། སངས་རྒྱས་ཀྱི་ཆོས་འགྲུབ་པའི་རྒྱུར་འགྲོ་བ་རྒྱལ་བ་རྣམས་དང་སེམས་ཅན་ཁྱད་མེད་པར་གསུངས་སོ། །དྲིན་ཆེ་བར་

― GTD003_Page_0626 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ཀྱང་དྲིན་གཟོ་མི་བྱེད་པ་ཤིན་ཏུ་སྨད་པའི་གནས་ཁྲེལ་མེད་ཀྱི་སྤྱོད་པ་ཡིན། རང་ཅག་དང་ཐུབ་པའི་དབང་པོ་གཉིས་མ་རྒན་འདི་དག་གིས་སྔོན་ཚད་མེད་པའི་དྲིན་གྱིས་བསྐྱངས་པར་འདྲ་བ་ལ། ཐུབ་པས་དཀའ་བ་བརྒྱ་ཕྲག་གིས་དྲིན་གཟོ་ཇི་ཙམ་ཞིག་མཛད་འདུག །རང་ནི་དེ་ཐམས་ཅད་ཡལ་བར་དོར་ནས་བསྡད་པའི་ལ་ཡོག་གིས་ད་ལྟ་ཐུབ་པ་སངས་རྒྱས་ལ། རང་ཅག་སྡུག་བསྔལ་གྱི་རྒྱ་མཚོར་ལུས་པ་འདི་བྱུང་བར་སྣང། ད་ནི་ཡ་རབས་ཀྱི་སྤྱོད་པས་ཁྲེལ་ངོ་ཚ་བསྲུང་སྟེ་དྲིན་གཟོ་ཞིག་བྱེད་དགོས། དེའང་ཟག་བཅས་ཀྱི་བདེ་བ་ཕྲན་ཚེགས་རེ་ལ་སྦྱར་ཡང་སྐོམ་པ་ལ་ཚྭ་ཆུ་བླུད་པ་བཞིན་ཕན་ཆུང་ལ་གནོད་པའི་རྒྱུར་འགྲོ་ཉེན་ཆེ། མ་རྒན་འདིས་རང་གནོད་པ་ཀུན་དང་བྲལ་བ། བདེ་བ་ཀུན་དང་ལྡན་པ་ཞིག་བྱེད་འདོད་ནས་ཤེས་ཚོད་དང་ནུས་ཚོད་ཀྱིས་འབད་པ་ཡིན་མོད་ཀྱང། ཕུགས་ཀྱི་ཕན་གནོད་མོ་རང་གིས་མ་ཤེས་པར་སྣང། བདག་གིས་ཀུན་བྱང་གི་སྐྱོན་ཡོན་མཐོང་བ་ཡིན་པས་གནས་སྐབས་ཀྱི་བསླུ་བྲིད་བྱིས་པའི་མགོ་སྐོར་ལྟ་བུ་མ་ཡིན་པར་གཏན་དུ་ཕན་ཐོགས་ངེས་པའི་དྲིན་གཟོ་ཞིག་བྱེད་དགོས་སྙམ་དུ་བསམ་སྟེ། གཞན་དོན་དོན་དུ་གཉེར་བའི་གོལ་ས་འགོག་བྱེད་བཏང་སྙོམས་དང། སྐུལ་མ་འདེབས་བྱེད་ཡིད་འོང་གི་རྣམ་པར་སྒྲུབ་པ་གཉིས་ཀྱིས་གཞི་བརྟན་པར་བྱ། དེ་ནས་དོན་དུ་གཉེར་བྱའི་ངོ་བོ་གཞན་དོན་ནི་བདེ་བ་ལ་འགོད་པ་དང་སྡུག་བསྔལ་སེལ་བ་གཉིས་ལས་མ་འདས་ཏེ། རང་ཉམས་ལ་དཔག་ན་རྨི་ལམ་ཚུན་ཆད་དུ་བདེ་བ་འདོད་ཅིང་སྡུག་བསྔལ་མི་འདོད་པའི་ངང་ཚུལ་འདི་སེམས་ཅན་ཐམས་ཅད་ལའང་མཚུངས་སོ། །འོན་ཀྱང་འདི་དག་བདེ་བ་མཚན་ཉིད་པས་ཤིན་ཏུ་ཕོངས་ཏེ། ཟག་མེད་ཀྱི་བདེ་བ་ཅུང་ཟད་ཀྱང་མེད། ད་ལྟ་ཁོང་

― GTD003_Page_0627 ―

^{[མ་དཔེ་གཟིགས་ན་འདིར་གནོན།]}

[Full Size]

རང་རྣམས་ལ་ཡོད་པའི་བདེ་བར་རློམ་པ་འདི་དག་ནི་ཡུན་བསྲིངས་ཏེ་འཕེལ་ན་སྡུག་བསྔལ་གྱི་རང་མཚང་སྟོན་པའི་འགྱུར་བའི་སྡུག་བསྔལ་ལམ། སྡུག་བསྔལ་གྱི་ཚང་འཆའ་བའི་ཁྱབ་པ་འདུ་བྱེད་ཀྱི་སྡུག་བསྔལ་ཁོ་ནར་སྣང། དེས་ན་འདི་དག་ཐམས་ཅད་ཟག་མེད་ཀྱི་བདེ་བ་དང་ལྡན་ན་ཅི་མ་རུང། ལྡན་པར་གྱུར་ཅིག །རང་གི་བདེ་དགེ་ཐམས་ཅད་འདི་དག་ལ་བཏང་ནས་ཀྱང་འདི་དག་བདེ་བ་དང་ལྡན་པར་བྱའོ་སྙམ་དུ་བསམ། རང་གི་དགེ་བ་རང་ལ་དགོས་མོད་སྙམ་ན། སྔོན་ཡང་རང་གཅེས་པར་བཟུང་ལེགས་པ་ཐམས་ཅད་རང་ལ་དགོས་སྙམ་པ་བྱས་པས་རྒུད་པ་ཐམས་ཅད་བྱུང། སྟོན་པས་རང་ཡལ་བར་དོར་ཏེ་གཞན་གཅེས་པར་བཟུང་བས་དོན་གཉིས་ཕུན་སུམ་ཚོགས་པ་བྱུང། འདམ་ག་མ་ནོར་བ་ཁོང་གི་དེ་ཡིན་པར་སྣང་བས། བློ་ངན་བདག་འཛིན་འགོང་པོ་འདིའི་དབང་དུ་མི་གཏོང་བར་ལུས་སྲོག་ཡལ་བར་དོར་ནས་སེམས་ཅན་ལ་ཕན་བདེ་བསྒྲུབ་པར་བྱའོ་ཞེས་བྱམས་པ་བསྒོམ། དེ་ལྟ་ནའང་ནད་དྲག་པོས་གཟེར་བཞིན་པ་དང། ཡན་ལག་མེས་བསྲེག་བཞིན་པས་ཟས་ཀྱི་ཞིམ་མངར་མི་མྱོང་བ་བཞིན། ཡུན་རིང་ལ་ཤུགས་དྲག་པའི་སྡུག་བསྔལ་བརྒྱ་ཕྲག་དུ་མས་ནོན་པ་འདི་དང་མ་བྲལ་བར་བདེ་བའི་གོ་སྐབས་སྐད་ཅིག་ཀྱང་ག་ལ་ཡོད། སྒོ་གསུམ་ཉོན་མོངས་ཀྱི་དབང་དུ་ཤོར་བས་ཅི་བྱས་ཐམས་ཅད་ངན་སོང་དུ་ལྟུང་བའི་རྒྱུ་ལས་མ་འདས། ངན་སོང་གསུམ་གྱི་གཡང་ས་གཏིང་ཟབ། དེར་ལྷུང་ན་སྡུག་བསྔལ་དྲག་པོ་སྐད་ཅིག་མ་གཅིག་ལའང་བཟོད་གླགས་མེད་རུང་མི་བཟོད་བཞིན་དུ་ཐ་ན་བརྒྱལ་བ་དང་འཆི་བའི་དབང་ཡང་མེད་པར་བསྐལ་པ་

― GTD003_Page_0628 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེན་པོ་སའི་རྡུལ་གྲངས་དང་མཉམ་པའི་བར་དུ་ལས་མ་ཟད་ན་ངན་སྐད་ཙིར་རེ་ཉམ་ཐག་བཞིན་དུ་སྡོད་དགོས། མ་རྒན་དྲིན་མོ་ཆེ་དམྱལ་བའི་མེ་ནང་དུ་བསྐྱུར་ནས། བདག་སོས་བདེར་སྡོད་ཐབས་ཇི་ལྟར་ཡོད། མ་རྒན་གྱི་ལུས་སེམས་ལ་སྡུག་བསྔལ་གང་ཡོད་རང་གི་ཐོག་ཏུ་སྤོས་ཏེ། མ་རྒན་སྡུག་བསྔལ་མེད་པར་ལྷོད་ཆམ་གྱིས་འགྲོ་བ་ཞིག་བྱུང་ན་ཅི་མ་རུང། སྡུག་བསྔལ་ཕྲ་རགས་ཐམས་ཅད་དང་བྲལ་བར་གྱུར་ཅིག། །སྡུག་བསྔལ་གྱི་ཁུར་བདག་གི་ཕྲག་པར་བླངས་ནས་མ་རྒན་སྡུག་བསྔལ་དང་བྲལ་བར་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་བླ་མ་ཐུབ་པའི་དབང་པོའི་ཐུགས་ཀའི་འོད་ཟེར་གྱིས་སེམས་ཅན་ཐམས་ཅད་ཀྱི་སྡིག་སྡུག་མཐའ་དག་ལྷག་མེད་དུ་ཕྲལ་ནས་མདུན་གྱི་ནམ་མཁར་བཀུག་ལ་རང་གི་དབུགས་ཚུར་རྔུབ་པས་དྲངས་ཏེ་གཅེས་འཛིན་གྱི་ཐོག་ཏུ་ཕབ། དབུགས་ཕྱིར་གཏོང་བ་ན་རྒྱལ་བ་སྲས་བཅས་ཀྱི་ཐུགས་རྗེའི་འོད་ཟེར་གྱིས་སྣ་དྲངས་ཏེ་རང་གི་བདེ་དགེ་ཐམས་ཅད་རྒྱལ་བའི་བྱིན་རླབས་ཟད་མི་ཤེས་པ་དང་རོ་མཉམ་དུ་འདྲེས་པས་མཁའ་ཁྱབ་ཀྱི་འགྲོ་བ་མཐའ་དག་བདེ་བ་མ་ཚང་བ་མེད་པ་ལ་བཀོད་པའི་དམིགས་པ་སོགས་གཏོང་ལེན་སྤེལ་མར་བྱ། དེ་ལྟར་བྱམས་སྙིང་རྗེ་ཡུན་དུ་བསྒོམས་པས་ཤུགས་རྫོགས་ཏེ་སེམས་ཅན་གྱི་དོན་མཐའ་དག་རང་གཅིག་པུའི་སྟེང་དུ་ལྷུང་བ་ལྟ་བུར་སོང་བ་ན། སྟོབས་བཅུ་མངའ་བ་སངས་རྒྱས་ཀྱི་གོ་འཕང་ཞིག་ཐོབ་པར་མ་བྱས་པའི་ཐབས་རང་མི་འདུག་སྙམ་དུ་སངས་རྒྱས་ཐོབ་འདོད་ནི་གཞན་དོན་དོན་གཉེར་དེའི་ཤུགས་ཀྱིས་དྲངས་ནས་འོང་བ་ཞིག་དགོས་ཀྱི། བྱང་ཆུབ་དོན་གཉེར་དེ་ལས་ལོགས་སུ་དམིགས་ཀྱིས་བཀར་ནས་བསྒོམ་དགོས་པ་བྱུང་ན་སེམས་བསྐྱེད་སྒོམ་ཚུལ་མ་མཁས་པ་ཡིན་ནོ། །སྐུ་

― GTD003_Page_0629 ―

^{[མ་དཔེ་གཟིགས་ན་འདིར་གནོན།]}

[Full Size]

གསུང་ཐུགས་ཀྱི་ཡོན་ཏན་ཤེས་པར་བྱས་ནས་བསྒོམ་དགོས་མོད་ཀྱང། གཞན་དོན་བདེ་བླག་ཏུ་སྒྲུབ་པ་ལ་ཀུན་ཏུ་བཟང་པོའི་འོད་ཟེར་དེ་ལྟ་བུ་ཞིག་དགོས་པར་མཐོང་ནས་དེའི་ཡན་ལག་ཏུ་བཙལ་བ་ཡིན་གྱི། ངོ་མཚར་ཆེ་བ་གཙོ་བོར་བཟུང་སྟེ་རང་ལ་དེ་འདྲ་ཞིག་བྱུང་ན་སྙམ་དུ་བསམ་པ་མིན་ནོ། །སེམས་བསྐྱེད་པ་ཙམ་ལའང་སྡིག་པ་སྦྱོང་བ་དང་བསོད་ནམས་འཕེལ་བའི་ནུས་པ་མཐའ་ཡས་པ་རྡོ་རྗེ་རིན་པོ་ཆེའི་དཔེ་ལྟར་ཉན་རང་གི་དགེ་ཚོགས་ཟིལ་གྱིས་གནོན་ནུས་པ་ནི། དམིགས་ཡུལ་བྱང་ཆུབ་དང་སེམས་ཅན་གཉི་ག་ཟད་མི་ཤེས་པའི་དབང་ཡིན་ལ། དེའི་སྡོམ་པ་བཟུང་སྟེ་འཇུག་སེམས་བསྐྱེད་ན་དུས་དང་སྤྱོད་པའང་མི་ཟད་པ་ལ་དམིགས་པས་དཔག་ཏུ་མེད་པ་བཞི་ཚང་སྟེ་ཕན་ཡོན་ལྷག་པར་ཆེའོ། །དེའི་རྒྱུ་མཚན་གྱིས་སྨོན་སེམས་འཕེལ་བའི་ཐབས་ལ་འཇུག་སེམས་ལས་ལྷག་པ་མེད་པར་གསུང་སྟེ། འཕེན་པའི་དབང་གིས་དུས་ནམ་གྱི་ཚེའང་བསོད་ནམས་རྒྱུན་ཆད་མེད་པར་འཕེལ་ལ། དེ་ནས་བཟུང་མགྲོན་པོ་ལམ་དུ་ཆས་པ་དང་འདྲ་བས་གྲངས་མེད་གསུམ་གྱི་མགོ་བརྩམས་པ་ཡིན་ནོ། །གཉིས་པ་དོན་དམ་བྱང་ཆུབ་ཀྱི་སེམས་སྒོམ་ཚུལ་ནི། སངས་རྒྱས་སྒྲུབ་པ་ལ་ཐུན་མོང་མ་ཡིན་པའི་ས་བོན་ལྟ་བུ་སེམས་བསྐྱེད་ཡིན་མོད་ཀྱང། བློ་སྔོན་དུ་གཏོང་བ་རྣམས་ནི་དེ་ལ་སངས་རྒྱས་ཐོབ་དགོས་པ་དང། ཐོབ་ནུས་པ་གཉིས་ངེས་དགོས་སོ། །དང་པོ་ནི། རང་མ་གྲོལ་བར་གཞན་དགྲོལ་མི་ནུས་ཤིང། རང་ཉིད་གྲོལ་བ་ལ་འཆིང་བྱེད་རྩ་བ་མཐར་ཐུག་དེ་ཆོད་དགོས། གྲུབ་མཐའ་ཐམས་ཅད་ཀྱང་རྩ་བ་འདི་ངོས་འཛིན་པ་ལ་ཐག་ཉེ་རིང་གིས་མཆོག་དམན་བྱུང་སྟེ། ཤེར་ཕྱིན་གྱི་དགོངས་པ་ཇི་

― GTD003_Page_0630 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་བ་ཀླུ་སྒྲུབ་ཡབ་སྲས་ཀྱིས་ཞི་སྒོ་གཉིས་པ་མེད་པར་བཀྲལ་བ་འདི་ཡིན་པས། རྒུད་པ་ཀུན་གྱི་རྩ་བ་བདེན་པར་འཛིན་པ་ཡིན། དེ་དྲུངས་འབྱིན་པ་ལ་དངོས་ཀྱི་འགལ་ཟླ་བདག་མེད་རྟོགས་པའི་ཤེས་རབ་ཀྱི་སྣང་བ་འདི་ཁོ་ན་དགོས། ཉེས་པའི་ཚོགས་ཀྱིས་མི་བརྫི་ཞིང་ཕར་ཟིལ་གྱིས་གནོན་པ་ལ་དགེ་བ་གཞན་ལས་འདིའི་ཆར་གཏོགས་ཙམ་ཡང་སྟོབས་ཆེ་བ་ནི་གསེར་སོགས་ཀྱི་འོད་དང་མེ་འོད་ལྟར་གྲོགས་སྟོབས་དང་རང་སྟོབས་ཀྱི་ཁྱད་པར་ཡིན། ཐེག་པ་གསུམ་གའི་ཐུན་མོང་ཡིན་ཀྱང་བག་ཆགས་ཀྱི་དྲི་མ་ཕྲ་མོ་ལྟ་བའི་དཔྱད་པ་མཐའ་ཡས་པས་གོས་ཀྱི་དྲི་མ་ཕྲ་མོ་སྦྱོང་བ་ལྟ་བུ་ཡིན་པས། ཐེག་ཆེན་ལས་དེ་ལྷག་པར་ཚང་ཞིང་རྒྱས་པར་བསྟན་ལ་བསྟན་པ་བཞིན་བསྒོམ་དགོས། གཉིས་པ་འཐོབ་ནུས་པ་ནི་ལམ་ཤེས་ཀྱི་ཡན་ལག་གསུངས་པས་ཀྱང་ཤེས་ཏེ། རྐྱེན་སེམས་བསྐྱེད་ཀྱི་ཆུས་བྲན་པ་མེད་མི་རུང་དུ་དགོས་ལ། དེ་བྱས་ན་རྒྱུ་རིགས་ཀྱིས་ཁྱབ་ཡོད་པས་འབྲས་བུ་སངས་རྒྱས་ངེས་པར་འཐོབ་པ་རྣམ་འགྲེལ་ལས་རྟག་པ་མ་ཡིན་པ་སོགས་ཀྱི་གཏན་ཚིགས་ཀྱིས་ཐེག་པ་གཅིག་ཏུ་བསྒྲུབས་པའང་མཐར་གཏུགས་ན་སེམས་བདེན་པར་མེད་པ་ལ་ཐུག་སྟེ། རང་བཞིན་ལ་སླད་པ་མ་ཞུགས་པས་བཅོས་སུ་རུང་བ་འདི་ལ་དགོངས་ནས། རང་བཞིན་གྱིས་ཡོངས་སུ་མྱ་ངན་ལས་འདས་པ་ཞེས་གསུངས་སོ། །དེ་ལྟར་གསུངས་པའི་ཆོས་ཀྱི་ནང་ན་ཀུན་ཉོན་ཕྱོགས་ཀྱང་ཡོད་རུང་དེ་རྣམ་དག་གི་ཆོས་སུ་འགྱུར་མི་དགོས་ཏེ། གསེར་གྱི་གཡའ་བཞིན་སྦྱངས་པ་ན་མེད་འགྲོ་བ་གློ་བུར་བའི་དྲི་མ་ཡིན་པ་དེ་ཉིད་དེ་རང་བཞིན་གྱིས་ཡོངས་སུ་མྱ་ངན་ལས་འདས་པའི་དོན་ཡིན་ནོ། །དེ་ལྟར་དགོས་ནུས་གཉི་ག་མཐོང་བ་ན་ཀུན་རྫོབ་སེམས་བསྐྱེད་ལ་སྤྲོ་བ་འཕེལ་

― GTD003_Page_0631 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་། དོན་དམ་སེམས་བསྐྱེད་བསྒོམ་པ་ལ་འབད་པས་འཇུག་པར་འགྱུར་རོ། །དོན་དམ་སེམས་བསྐྱེད་མཚན་ཉིད་པ་ཁྱད་པར་གསུམ་དང་ལྡན་པ་ནི་ས་རབ་ཏུ་དགའ་བ་ནས་འོངས་ཀྱང། དེའི་རིགས་འདྲ་ལས་དང་པོ་བའི་སྐབས་ནས་བཙལ་ཏེ་སྐྱོང་དགོས་སོ། །སྐྱོང་ཚུལ་ལ་འགལ་ཟླ་དམིགས་པ་དང་འབྲེལ་ཟླ་མ་དམིགས་པའི་སྒྲུབ་ཚུལ་མང་ཡང། གོང་མ་རྣམས་གཅིག་དུ་བྲལ་གྱི་སྒྲུབ་ཚུལ་འདི་འཆར་སླ་བས་གཙོ་བོར་མཛད་པ་བཞིན་བྱེད་ན། སྒྲུབ་བྱེད་ལ་གནད་བཞི་སྟེ། དགག་བྱ་ངེས་པའི་གནད། ཁྱབ་པ་ངེས་པའི་གནད། གཅིག་བྲལ་ངེས་པའི་གནད། དུ་བྲལ་ངེས་པའི་གནད་དོ། །མདའ་བརྡེག་པ་ལ་འབེན་མཐོང་དགོས་པ་བཞིན། ཐོག་མར་དགག་བྱ་ངོས་ཟིན་པ་ཤིན་ཏུ་གལ་ཆེ་སྟེ། དགག་བྱ་རགས་པའམ་ཕྱོགས་རེ་ཙམ་ལས་མ་ཟིན་ན། དེ་འབད་པས་ཁེགས་ཀྱང་དགག་བྱའི་ལྷག་མ་ལུས་པས་བདེན་འཛིན་དྲུངས་འབྱིན་མི་ནུས། དགག་བྱ་ཐལ་ཆེས་ཏེ་ཐ་སྙད་པའི་དོན་རྣམས་ཀྱང་དགག་བྱར་བཟུང་ན་དེ་བཀག་པ་ཆད་ལྟར་འགྲོ་བས་ཉེན་ཤིན་ཏུ་ཆེའོ། །ཕུང་པོ་ལས་དོན་གཞན་དང། ཕུང་པོའི་དབྱིབས་ཚོགས་པ་སོགས་ངར་འཛིན་པ་གྲུབ་མཐའི་སྒྲོ་བཏགས་ཁོ་ན་ལས་ལྷན་སྐྱེས་སུ་མི་འབྱུང་ལ། ལུས་ཀྱི་ཁོང་ན་གནས་པ་སོགས་ཀྱང་ཉམས་ཀྱི་འཆར་སྒོ་ཙམ་ཡིན་ནོ། །རེས་འགའ་རྐྱེན་དབང་གིས་ལུས་སེམས་རེ་རེ་བ་བདག་ཏུ་སྣང་བ་ལྟ་བུ་འབྱུང་ཡང། རྒྱུན་ཆགས་སུ་ཡོད་པའི་ལྷན་སྐྱེས་ཀྱི་ངའི་སྣང་ཚུལ་མཚན་ཉིད་པ་ནི་ལུས་སེམས་ཚོགས་ཙམ་གྱི་སྟེང་འདི་ན་མིང་གིས་ཕར་བཏགས་ཙམ་མ་ཡིན་པའི་ང་ཞིག་ཚུགས་ཐུབ་ཏུ་ཡོད་

― GTD003_Page_0632 ―

^{[མ་དཔེ་གཟིགས་ན་འདིར་གནོན།]}

[Full Size]

པར་སྣང་བ་ཡིན་ཏེ། དཔེར་ན་རང་ལ་གཞན་གྱིས་བསྟོད་པ་དང། གཞི་མེད་པའི་སྐྱོན་བཀལ་བ་ལྟ་བུའི་ཚེ་མཐོ་དམན་དུ་བྱེད་རྒྱུའི་ང་ཞིག་ལིང་ངེ་ཡོད་ཡོད་ལྟ་བུར་འཆར་བ་ངོས་ཟིན་སླའོ། །དེའི་སྣང་ཚུལ་དེ་ཤུགས་མ་ཡལ་བའི་ངང་ནས་བློའི་ཟུར་གཅིག་གིས་དེས་ང་ཇི་ལྟར་བཟུང་འདུག་པ་བལྟ་དགོས། སེམས་ཅན་རྣམས་ནི་རྣམ་པར་ཤེས་པ་རྒྱུད་རེ་རེ་བར་གསུངས་ཀྱང་འཛིན་སྟངས་མི་མཐུན་པའི་བློ་སྟོབས་མཚུངས་ལ་དགོངས་ཀྱི། ལམ་དུ་འགྲོ་བ་ལྟ་བུའི་ཚེའང་ལམ་དང་འགྲོ་བའི་བྱ་བ། གཞན་ལ་བྱ་ར་བྱེད་པ་གཏམ་སྨྲ་བ་སོགས་ཀྱི་རྣམ་རིག་དུ་མ་ལྷན་ཅིག་འབྱུང་བར་མི་འགལ་བར་མྱོང་བས་གྲུབ་བོ། །མང་པོ་ཞིག་འདི་ལ་སེམས་ངོ་མཐོང་བ་ཞེས་ཟེར་བ་ཡིན་དུ་ཆུག་ཀྱང། སེམས་དང་ཆོས་ཉིད་གཉིས་དོན་གཅིག་ཏུ་བྱས་ཏེ་བདེན་པ་མཐོང་བ་དང་ཆོས་སྐུའི་རང་ཞལ་མཐོང་བ་ཞེས་ཟེར་ཞིང་དེ་ཙམ་གྱིས་ཆོག་ཤེས་བྱས་ཏེ། གནད་ཕྱི་མའི་དཔྱད་པ་རྣམས་ཆེད་དུ་དོར་ནས་ཙོམ་འཇོག་བྱས་པས་འདུ་ཤེས་རགས་པའི་རྣམ་རྟོག་ཅུང་ཟད་ཁེགས་ཏེ་མི་རྟོག་པར་སོང་བ་ལ་སྒོམ་གྱི་ཡང་རྩེ་བྱེད་ཀྱང་དེ་ཙམ་གྱིས་གར་ཡང་མི་ཕྱིན་ནོ། །དེ་ལྟར་དགག་བྱ་ངོས་བཟུང་སྟེ་དེ་ཉིད་གཅིག་དུ་བྲལ་གྱི་རིགས་པས་འགོག་པ་ལ། བདེན་པའི་གཅིག་དང་དུ་མ་གང་རུང་དུ་མ་གྲུབ་ན་བདེན་པར་གྲུབ་ལུགས་མེད་པའི་ཁྱབ་མཐའ་ཟིན་པ་དགོས་ཀྱི། དེ་གང་རུང་མ་ཡིན་པའི་གྲུབ་ལུགས་ཤིག་ཡོད་ན་དེ་གཉིས་ཙམ་བཀག་པས་མཐའ་མི་ཆོད་པས་དོན་མེད་པའི་ཕྱིར་རོ། །དེས་ན་ཁྱབ་པ་ངེས་པའི་གནད་འདི་བསམ་དགོས་ལ། དེའང་སྤྱིར་ཆོས་དེ་ཡོད་ན་གཅིག་དང་དུ་མ་གང་

― GTD003_Page_0633 ―

^{[མ་དཔེ་གཟིགས་ན་འདིར་གནོན།]}

[Full Size]

རུང་དུ་ཡོད་དགོས་ཏེ། སོ་སོ་བ་ཡིན་ན་ཐ་དད་དང་མིན་ན་གཅིག་ཏུ་འགྱུར་བས་ཡིན་མིན་གཉིས་ཁ་ཚོན་ཆོད་པའི་ཕྱིར། སྤྱི་ལ་དེ་ལྟར་ཁྱབ་པ་གྲུབ་ན་བྱེ་བྲག་བདེན་པར་ཡོད་ནའང་བདེན་པའི་གཅིག་དང་དུ་མ་གང་རུང་དུ་ཡོད་དགོས་པའི་ཁྱབ་པ་འགྲུབ་བོ། །དེ་ལྟར་ཁྱབ་པ་ངེས་པ་ན་བདག་ཕུང་པོའི་སྟེང་དུ་བདེན་པར་ཡོད་ཡོད་འདྲ་བ་འདི་ཕུང་པོ་དང་བདེན་པའི་གཅིག་ཏུ་ཡོད་དམ། དེ་དང་བདེན་པའི་ཐ་དད་དུ་ཡོད་ཅེས་དཔྱད་དགོས་སོ། །དེ་ལ་དང་པོ་གཅིག་བྲལ་དུ་སྒྲུབ་པ་ནི། བདག་ཕུང་གཉིས་བདེན་པའི་གཅིག་ཡིན་ན་བདག་གཅིག་ཡིན་པས་ཕུང་པོ་ལྔའང་གཅིག་ཏུ་འགྱུར་བའམ། ཡང་ན་ཕུང་པོ་ལྔ་སོ་སོར་ཡོད་པས་བདག་ཀྱང་ལྔར་འགྱུར་བ་དང། ཕུང་པོ་འདོར་བ་ན་བདག་ཀྱང་ཆད་དེ་སྐྱེ་བ་ཕྱི་མ་མེད་པའམ། ཡང་ན་ཕུང་པོའང་ཕྱི་མར་འགྲོ་བར་འགྱུར་བ་དང། ཕུང་པོ་བླང་བྱ་ཡིན་པས་བདག་ཀྱང་བླང་བྱར་འགྱུར་བའམ། བདག་ལེན་པ་པོ་ཡིན་པས་ཕུང་པོའང་ལེན་པ་པོར་འགྱུར་བ་དང། དེ་ལྟར་ན་ལུས་ལེན་པ་པོ་དང་རྣམ་སྨིན་མྱོང་བ་པོ་ཞིག་ལས་འབྲས་ཀྱི་རྟེན་གཞིར་དགོས་པར་བསམས་ནས་བདག་ཁས་བླངས་པ་དོན་མེད་པར་འགྱུར་བ་དང། བདག་གི་བདག་གམ་ཕུང་པོའི་ཕུང་པོ་ཞེས་པ་དང་ཁྱད་མེད་པའི་བདག་གི་ཕུང་པོ་ཞེས་པའི་ཐ་སྙད་ཀྱང་འབྲེལ་མེད་དུ་འགྱུར་རོ། །བདག་ཕུང་བདེན་པར་ངོ་བོ་གཅིག་ཀྱང་ལྡོག་པ་ཐ་དད་པས་སྐྱོན་དེ་དག་མེད་དོ་སྙམ་ན། རྫུན་པའི་རྣམ་གཞག་ལ་ངོ་བོ་གཅིག་ལ་ལྡོག་པ་ཐ་དད་པའི་རྣམ་གཞག་བྱས་ཆོག་ཀྱང། བདེན་གྲུབ་ཀྱི་གཅིག་ནི་དཔྱད་བཟོད་ཀྱི་གཅིག་ཡིན་པས་བུམ་པ་དང་བུམ་པ་

― GTD003_Page_0634 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་སྒོ་གང་ནས་ཚུལ་ཇི་ལྟར་དཔྱད་ཀྱང་གཅིག་མ་གཏོགས་སོ་སོར་འབྱེད་རྒྱུ་མེད་པ་བཞིན། བདེན་གྲུབ་ལ་ངོ་བོ་གཅིག་ན་ལྡོག་པའང་གཅིག །རྫས་དང་ནུས་པ་མིང་དོན་ཐམས་ཅད་གཅིག་དགོས་ཏེ། ངོ་བོ་གཅིག་ཏུ་སྣང་ལ་ལྡོག་པ་ཐ་དད་དུ་གནས་པ་ནི་སྣང་ཚུལ་དང་གནས་ཚུལ་མ་མཐུན་པ་ཡིན་ཞིང། དེ་རྫུན་པའི་རྫུན་ཚུལ་ཡིན་པའི་ཕྱིར་རོ། །རིགས་པའི་འཕུལ་འདི་དབུ་མའི་རིགས་པས་སྒྲུབ་ཚུལ་གྱི་སྐབས་ཀུན་ཏུ་ཤེས་དགོས། གཉིས་པ་བདེན་པའི་དུ་བྲལ་སྒྲུབ་པ་ནི། དེ་ལ་གཅིག་ནི་མེད་པས་ཀྱང། །ཞེས་སོགས་གཅིག་མེད་པའི་རྟགས་ཀྱིས་དུ་མ་མེད་པར་སྒྲུབ་པ་ཡ་གྱལ་བཀག་པས་ཚོགས་པ་ཁེགས་ལུགས་ནི་དགག་བྱ་ཐམས་ཅད་ལ་འདྲ་བས། དེས་འདིའི་གཏིང་མི་དཔོག་ཅིང་སྐབས་འདིར་སྒྲུབ་ལུགས་དང་མི་མཚུངས་ཏེ། འདིར་དུ་བྲལ་སྒྲུབ་པ་ནི་གང་ཟག་ཕུང་པོ་དང་བདེན་པའི་ཐ་དད་དུ་གྲུབ་པ་བཀག་པ་ཡིན་ལ། གང་ཟག་ཆོས་ཅན། ཕུང་པོ་དང་བདེན་པའི་ཐ་དད་དུ་མེད་དེ། བདེན་པའི་གཅིག་ཏུ་མེད་པའི་ཕྱིར་བྱས་ན་ཁྱབ་པ་འགལ་བར་འགྲོའོ། །དེས་ན་བདེན་པའི་ཐ་དད་དུ་མེད་ཚུལ་ནི། བདེན་པའི་ཐ་དད་ཡིན་ན་དཔྱད་བཟོད་ཀྱི་ཐ་དད་ཡིན་དགོས་ལ། དེ་ལྟ་ན་ངོ་བོ་དང་རྫས་དང་བྱེད་ལས་སོགས་སྒོ་ཐམས་ཅད་ནས་ཐ་དད་པའི་འབྲེལ་མེད་དོན་གཞན་དུ་འགྱུར་ཏེ། སྒོ་གཅིག་ནས་ཐ་དད་ཀྱང་གཅིག་ནས་ཐ་མི་དད་པ་ནི་སྣ་ཚོགས་སུ་སྨྲ་བའི་མི་བཞིན་རྫུན་པའི་རྣམ་གཞག་ཡིན་པའི་ཕྱིར་རོ། །དེ་ལྟར་འབྲེལ་མེད་ཀྱི་ཐ་དད་ཡིན་ན་ཕུང་པོ་ན་རྒས་དོར་བ་སོགས་ཀྱིས་བདག་ན་བ་སོགས་སུ་མི་འགྱུར་བས་བདག་ལ་ཕུང་པོའི་མཚན་ཉིད་སྐྱེ་འཆི་སོགས་མེད་པར་

― GTD003_Page_0635 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ་བ་དང། དེ་འདོད་ན་གཞན་གྱི་ཕུང་པོ་དང་འདྲ་བས་ཕན་གནོད་ཀྱིས་བདེ་སྡུག་ཏུ་མི་འགྱུར་བར་ཐལ་བ་དང། རྟ་གླང་ལུག་གསུམ་ཚོགས་ནས་རྟ་གླང་གཉིས་སོང་ཡང་ལུག་ཤུལ་དུ་ཡོད་པ་བཞིན་ཕུང་པོ་ལྔ་སོ་སོར་བསལ་བའི་ཤུལ་ན་བདག་སྟོན་རྒྱུ་ཡོད་དགོས། གཞན་དང་གཞན་མིན་གྱི་ལྡན་ཚུལ་སོགས་ཀྱང་གཅིག་ཐ་དད་ཀྱི་རིགས་པ་འདིས་ཁེགས་སོ། །ཚོགས་པའི་སྟེང་ནས་དཔྱད་ཚུལ་འདི་རྒྱུན་ལ་སྦྱར་ནའང་ཚེ་སྔ་ཕྱི་རྒན་གཞོན་སོགས་བདེན་པའི་གཅིག་ཏུ་གྲུབ་ན་གཅིག་གི་ཚེ་ཀུན་ཡོད་པ་གྲངས་ཅན་བཞིན་རྩྭ་རྩེར་གླང་ཆེན་བརྒྱ་གནས་པའི་སྐྱོན་སོགས་སུ་འགྱུར། ཐ་དད་ན་བྱམས་པ་དང་ཉེ་སྦས་བཞིན་འབྲེལ་མེད་པས་ལས་ཆུད་ཟ་བའམ། མ་བྱས་པ་དང་ཕྲད་པའི་སྐྱོན་དུ་འགྱུར་རོ། །དེ་བཞིན་དུ་ལུས་ཡན་ལག་ལྔ་ཀ་དང་གཅིག་གམ་ཐ་དད། ཤེས་པ་སྐད་ཅིག་སྔ་ཕྱི། ལྡན་མིན་ལོ་ལྟ་བུ་ཟླ་བ་བཅུ་གཉིས། ནམ་མཁའ་ཤར་ནུབ་ཀྱི་ཆ་ལྟ་བུ་ལ་སྦྱར་ཏེ་ཆ་ཅན་གང་ཡིན་དེ་ཆ་མང་པོར་ཐལ་བའམ། ཆ་ཤས་རེ་རེ་བཞིན་ཆ་ཅན་ཚང་བ་རེར་ཐལ་བ་དང། ཡང་ན་ཆ་ཆ་ཅན་འབྲེལ་མེད་པར་ཐལ་བ་སོགས་སྔ་མ་དང་འདྲ་སྟེ། སྟོང་ཉིད་ནི་ཟབ་ཆེས་པ་ལས་ཆོས་ཐམས་ཅད་ཀྱི་སྟེང་དུ་དགག་བྱས་སྟོང་ཚུལ་མི་འདྲ་བ་ཅི་ཡང་མེད་པར་རོ་གཅིག་པས། ལྟ་བའི་དཔྱད་ལུགས་ཀྱང་དམིགས་ཡུལ་ཁ་སྤོ་བ་ཙམ་ལས་གཞན་མི་འདྲ་བ་མེད་དོ། །དེ་ལྟར་བདེན་པའི་གཅིག་དང་དུ་མ་གང་དུའང་མ་གྲུབ་པར་རྟོགས་པ་དེ་བདག་མེད་རྟོགས་པ་ཡིན་པར་འདོད་པ་མི་འཐད་དེ། དེ་གཏན་ཚིགས་རྟོགས་པའི་བློ་ཡིན་

― GTD003_Page_0636 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཕྱིར་རོ། །ཁ་ཅིག་དེ་གང་དུའང་མ་གྲུབ་པར་རྟོགས་པ་ནི་དེ་རྒྱུ་མཚན་དུ་བཀོད་དེ་གཟོད་དགག་བྱའི་སྣང་ཚུལ་གསལ་བཏབ་ནས་འདི་མ་གྲུབ་བོ་སྙམ་དུ་རྟོགས་ཟེར་བ་མི་འཐད་དེ། དེ་བྱས་ན་ཀུན་རྫོབ་ཀྱི་སྣང་བ་དང་འདྲེས་ཏེ་དགག་བྱ་བཅད་ཙམ་དུ་མི་འཆར་བའི་ཕྱིར། དཔེར་ན་འགྲོ་ས་ལུང་པ་གཉིས་ལས་མེད་ས་ཞིག་ཏུ་བ་ལང་བོར་བ་བཙལ་ཏེ། ལུང་པ་སྔ་མར་མེད་རྗེས་མར་ཡང་མེད་པ་མཐོང་ཙམ་ནས་བཙལ་རྒྱུའི་བ་ཡིད་ལ་བཞག་ཡོད་པ་དེ་མི་འདུག་གོ་སྙམ་པ་ལྷང་གིས་སྐྱེ་བ་བཞིན། དགག་བྱའི་སྣང་ཚུལ་སྔར་ནས་ཞེ་ལ་བཞག་བཞིན་པར་གཅིག་དུ་བྲལ་གྱིས་དཔྱད་པ་ཡིན་པས་དུ་བྲལ་རྟོགས་མ་ཐག་ཞེ་ལ་བཞག་པའི་དགག་བྱ་དེ་གཞིར་བྱས། དེ་མི་འདུག་སྙམ་སྟོང་ཆམ་གྱིས་འགྲོ་བ་བྱུང་ན་ལྟ་བ་རྙེད་པ་ཡིན་ནོ། །དེའི་ཚེ་དབང་རྣོན་གོམས་པ་ཆེ་བ་ལ་གཅེས་ནོར་རྙེད་པ་ལྟ་བུ་དང། རྟུལ་པོ་ལ་གཅེས་ནོར་སྟོར་བ་ལྟ་བུའི་འཇིགས་སྐྲག་འབྱུང་ཡང་སྐྱོན་མིན་ནོ། །མཉམ་གཞག་དེ་ལས་ལངས་པ་ན་རྗེས་ཐོབ་སྒྱུ་མ་ལྟ་བུའི་སྣང་བ་འཆར་ཏེ། ད་ལྟ་ཡུལ་གང་སྣང་ཡང་ཁོ་རང་གི་ངོས་ནས་ཚུར་གྲུབ་པའི་ཉམས་ངེས་ཅན་དུ་འཆར་བ་བཞིན་དེའི་ཚེ་ཕྱིའི་ཡུལ་སྣང་ཙམ་ནས་མིང་དང་རྟོག་པས་ཕར་བཏགས་པའི་ཐ་སྙད་ཙམ་དུ་འཆར་རོ། །ལྷག་མར་ལུས་རྒྱུ་མིང་ཙམ་ལས་མེད་ཀྱང་དེ་ལ་བྱ་བྱེད་སོགས་བསྙོན་མེད་དུ་འགྲུབ་པའི་རྟེན་འབྱུང་གི་སྣང་བ་ཆེས་ངོ་མཚར་བར་མཐོང་ནས་བླང་དོར་ལ་ལྷག་པར་བརྩོན་པ་བྱུང་ན་སྟོང་པ་རྟེན་འབྱུང་གི་དོན་དུ་མཐོང་བས་ཆེས་རྨད་དུ་བྱུང་བ་ཡིན་ནོ། །རྟེན་འབྱུང་གི་རྣམ་གཞག་འབྲས་བུ་རྒྱུ་ལ་ལྟོས་པ་ཙམ་ཞིག་ནི་དངོས་སྨྲ་རྣམས་ཀྱང་ཤེས་

― GTD003_Page_0637 ―

^{[མ་དཔེ་གཟིགས་ན་འདིར་གནོན།]}

[Full Size]

པས། འདིར་སྣམ་བུའི་སྣལ་མ་ཞེས་པ་ལྟ་བུ་རྒྱུའང་འབྲས་བུ་ལ་ལྟོས་པ་བརྟེན་ནས་བཏགས་པའི་ཐ་སྙད་ཕྲ་མོ་རྟོགས་དགོས་སོ། །དང་པོར་ལྟ་ཐོག་ཏུ་འཇོག་ཡུན་རིང་ན་མ་ཡིན་དགག་ཏུ་འཆོར་ཉེན་ཆེ་བས། བསྐྱར་ནས་གནད་བཞིས་བསྒོམས་པས་ལང་ལ་མ་ཤོར་བ་བྱ། དབང་རྣོན་གྱིས་ལྟ་བ་རིགས་པས་གཏན་ལ་ཕབ་སྟེ་ངེས་པ་བརྟན་པ་ན་དྲན་ཤེས་ཀྱིས་བྱིང་རྒོད་བཀག་ནས་ཞི་གནས་སྒྲུབ་པ་ལྟ་ཐོག་ནས་སྒོམ་ཚོལ་ལུགས་ཡིན་ལ། རྟུལ་བོ་དང་རྣམ་རྟོག་ཁུག་དཀའ་བ་རྣམས་ཀྱིས་དང་པོར་རིགས་པའི་དཔྱད་པ་མང་པོ་མི་དགོས་པར་ནང་དུ་ཕྱོགས་པ་སེམས་ལྟ་བུ་ལ་དམིགས་པའི་ཞི་གནས་བསྒྲུབས་ཏེ་གྲུབ་པ་ན་ལྟ་བ་ཚོལ་བ་ཕྱག་ཆེན་གྱི་ཁྲིད་སོགས་ནི་སྒོམ་ཐོག་ནས་ལྟ་བ་ཚོལ་ལུགས་ཡིན་ནོ། །གང་ལྟར་ཡང་དཔྱད་འཇོག་སྟོབས་མཚུངས་སུ་སོང་སྟེ་དཔྱད་སྟོབས་ཀྱིས་གཡོ་བ་མེད་པའི་ཏིང་ངེ་འཛིན་ལྷག་པར་བརྟན་པ་འགྲུབ་པ་ན་ཞི་ལྷག་ཟུང་འབྲེལ་དུ་འགྱུར་ཞིང་སྦྱོར་ལམ་དྲོད་དུ་སླེབས་པ་ཡིན་ཏེ། འོན་ཀྱང་དོན་སྤྱིའི་གཉིས་སྣང་མི་ཁེགས་པས་ཡུན་དུ་གོམས་པར་བྱས་ཏེ་གཟུང་འཛིན་གྱི་རྣམ་རྟོག་རིམ་པར་ཉམས་སྨད་པས་གཉིས་སྣང་ཇེ་ཕྲ་ཇེ་ཕྲར་སོང། མཐར་གཉིས་སྣང་མ་ལུས་པར་འགག་སྟེ་ཆུ་ལ་ཆུ་བཞག་པ་བཞིན་རོ་གཅིག་ཏུ་ཞུགས་པའི་སྒོ་ནས་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་སྙིང་རྗེའི་སྙིང་པོ་ཅན་ནི་དོན་དམ་བྱང་ཆུབ་ཀྱི་སེམས་དངོས་ཡིན་ལ། དེ་ནམ་སྐྱེས་པ་ནས་དོན་དམ་པའི་ས་ལ་སླེབ་ཅིང། གྲུ་བོ་ཆེ་རྒྱ་མཚོར་ཞུགས་པ་བཞིན་ཡོན་ཏན་བརྒྱ་ཕྲག་བཅུ་གཉིས་སོགས་ཀྱི་སྒོ་ནས་ས་གོང་མ་གོང་མ་བདེ་བླག་ཏུ་གནོན་པར་

― GTD003_Page_0638 ―

^{[མ་དཔེ་གཟིགས་ན་འདིར་གནོན།]}

[Full Size]

འགྱུར་རོ། །གསུམ་པ་དེ་གཉིས་ཟུང་དུ་འཇུག་པའི་ཚུལ་ནི། ཐོབ་བྱའི་འབྲས་བུ་ཆོས་གཟུགས་ཀྱི་སྐུ་གཉིས་སུ་ངེས་ལ། དེ་གཉིས་འགྲུབ་བྱེད་བསོད་ནམས་དང་ཡེ་ཤེས་ཀྱི་ཚོགས་གཉིས་ལས་མ་འདས་ཤིང། ཚོགས་གཉི་གའང་བྱང་ཆུབ་ཀྱི་སེམས་གཉིས་ཀྱི་ལག་ལེན་དུ་འདུའོ། །དེ་ཉམས་སུ་ལེན་པའི་ཚེ་སོ་སོ་བར་སོང་ན་བོགས་མི་ཕྱིན་པས་ཕན་ཚུན་གཅིག་གིས་གཅིག་ཟིན་པར་བྱས་པས་སྲིད་ཞི་གཉི་གའི་མཐའ་འགོག་ཅིང་ཤིན་ཏུ་ནུས་ལྡན་དུ་འགྱུར་བའི་ཕྱིར། སྦྱིན་ལ་སོགས་པའི་བསོད་ནམས་འདི་དག་ནི། །ཤེས་རབ་མགོན་བཅས་ལྷག་པར་མཐུ་ལྡན་འགྱུར། །ཞེས་དཔའ་བོས་གསུངས་ཏེ། ཕར་ཕྱིན་གང་ལ་སློབ་ཀྱང་དེ་སྒྲུབ་ཚུལ་དང་ཕན་ཡོན་དང་ཉེས་དམིགས་མཐའ་དག་ལ་མཁས་པས་དེའི་ཉམས་ལེན་གནད་ཚང་ཞིང་མཐར་ཕྱིན་པ་ཞིག་འབྱུང། ཚད་མེད་བཞིའང་ཤེས་རབ་ཀྱིས་ཟིན་པས་འདོད་ཆགས་དང་སྒྱིད་ལུག་གཡེང་བ་སོགས་ཀྱི་སྐྱོན་དང་མ་འདྲེས་པའི་རྣམ་དག་ཏུ་འགྱུར་ལ། ཐབས་ཀྱི་སྤྱོད་པ་དེ་དག་ཉོན་མོངས་པའི་ཕྱོགས་ཀྱིས་བརྫི་མི་ནུས་པའང་ཤེས་རབ་ཀྱི་མཐུ་ཁོ་ན་ཡིན་པས། རྒྱན་ལས་སྦྱིན་པ་ནས་བསམ་གཏན་གྱི་བར་ལྔ་པོ་རེ་རེའི་མཐར། ཡེ་ཤེས་ཀྱིས་ཡོངས་ཟིན་པས་འཇིག་རྟེན་དག་ན་མི་ཟད་བཞག། །ཅེས་གསུངས་སོ། །བྱང་ཆུབ་ཀྱི་སེམས་གཉིས་གཅིག་གིས་གཅིག་ཟིན་པའི་ཟུང་དུ་འཇུག་ཚུལ་འདི་ལྟར་དོན་ལས་ཡོངས་སུ་སྨིན་པ་ན་མར་མེ་དང་དེའི་འོད་བཞིན་བློ་གཅིག་གི་ངོ་བོ་ལ་དེ་གཉིས་དབྱེར་མི་ཕྱེད་པར་སྒྲུབ་ཚུལ་རྡོ་རྗེ་ཐེག་པའི་ལམ་གྱི་རྟོགས་པ་སྐྱེ་བས། དེས་རིང་པོར་མི་ཐོགས་པར་བྱང་ཆུབ་ཀྱི་སེམས་རྡོ་རྗེ་ཞེས་བྱ་བ་ཟུང་འཇུག་རྒྱལ་བ་རྡོ་རྗེ་འཆང་གི་གོ་འཕང་མངོན་དུ་བྱེད་པར་འགྱུར་རོ། །རྟག་

― GTD003_Page_0639 ―

^{[མ་དཔེ་གཟིགས་ན་འདིར་གནོན།]}

[Full Size]

ཆད་མཐའ་བྲལ་བདེན་པ་གཉིས་ཀྱི་གཞིར། །བྱང་ཆུབ་སེམས་གཉིས་ཟུང་དུ་འཇུག་པའི་ལམ། །ཡོངས་སུ་གོམས་པས་སྐུ་ཐུགས་ཟུང་འཇུག་འབྲས། །ལྷུན་གྲུབ་མཁའ་མཉམ་འགྲོ་བའི་དཔལ་གྱུར་ཅིག །ཅེས་བྱང་ཆུབ་ཀྱི་སེམས་གཉིས་སྒོམ་པའི་ཚུལ་ཐེག་པ་མཆོག་གི་འཇུག་ངོགས་ཞེས་བྱ་བ་འདི་ནི། ཨོར་དུ་སུ་ཨོ་ཐོག་ཤོག་ནས་མང་དུ་ཐོས་ཤིང་སྒྲུབ་པ་ལྷུར་བྱེད་པ་སྨན་པ་བླ་ཟུར་བཀའ་འགྱུར་བ་དཀོན་མཆོག་རབ་རྒྱས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།ལམ་གཙོའི་ཟིན་བྲིས་གསང་བའི་ལྡེ་མིག་ནི། མཆོད་བརྗོད་ཀྱིས་རྩ་བ་བཤེས་གཉེན་བསྟེན་ཚུལ་དང་སྦྱོར་བའི་ཆོས་དྲུག་བསྟན། རྒྱལ་བའི་གསུང་རབ་ཀུན་གྱི་སྙིང་པོའི་དོན། །ཞེས་སོགས་ལམ་གྱི་གཙོ་བོ་གསུམ་ལ་སོ་སོར་སྦྱོར་ཚུལ་དང་ཐུན་མོང་དུ་སྦྱོར་ཚུལ་གཉིས། བཤད་ཚེ་གོ་རིམ་ཡོད་ཀྱང་བསྒོམ་ཚེ་གཅིག་གིས་གཅིག་ཟིན་དགོས་པ་རྗེས་མ་གཉི་གའི་མཚམས་སྦྱར་གྱིས་ཤེས་ཏེ། དེ་མ་བྱས་ན་དང་པོའི་ངེས་འབྱུང་དེ་ཐེག་ཆེན་གྱི་ལམ་དུ་མི་འགྲོ། ཆོས་སྒྲུབ་འདོད་ཙམ་རེ་ཀུན་ལ་ཡོད་ཀྱང་ཕྱི་བཤོལ་གྱིས་བསླུས་པས་དལ་འབྱོར་དང་མི་རྟག་པ་སྦྲེལ་ནས་གསུངས། འཁོར་བའི་སྡུག་བསྔལ་ཐམས་ཅད་ལས་མི་དགེ་བ་ལས་བྱུང་བའི་འཁོར་བའི་ཉེས་དམིགས་དང་ལམ་འབྲས་སྦྲེལ་ནས་གསུངས། ཇོ་བོའི་ལུགས་དང་ཞི་ལྷའི་ལུགས་བསྲེས་པའི་སེམས་སྒོམ་ཚུལ་གསུངས་ཏེ། མ་རྣམས་ཞེས་པའི་རྣམས་ཀྱི་སྒྲས་སེམས་སྙོམས་པ་དང། མ་ཞེས་པས་མར་ཤེས་ཚིག་སྔ་མའི་སྙིང་རྗེ་དང་།

― GTD003_Page_0640 ―

^{[མ་དཔེ་གཟིགས་ན་འདིར་གནོན།]}

[Full Size]

ངང་ཚུལ་ལ་སྔར་ཕན་བཏགས་པའི་ངང་ཚུལ་མར་ཤེས་ཀྱི་དྲིན་བསམ་ལུགས་དང། སླར་ཕན་འདོགས་པ་མཉམ་བརྗེ་དྲིན་དྲན་ལུགས་གཉིས་ཀྱི་ཕྱི་མ་འཁྲུལ་ཆེ་སྟེ། ཞིང་བཟང་པོ་ལ་ནས་བཏབ་མ་ཐུབ་ཀྱི་སེམས་ཁྲལ་མ་གཏོགས་འདི་ལ་མང་པོ་བཏབ་ཅེས་དྲིན་དུ་རྩི་བ་མེད་པ་ལྟར་སེམས་ཅན་གྱི་དོན་བསྒྲུབ་ཀྱང་ཡུས་མི་འབྱུང་བ་ཡིན། རྒྱུ་ལས་བྱུང་བའི་རྟེན་འབྲེལ་ལས་ཀྱང། ལུགས་འདིར་མདུང་ཁྱིམ་གྱི་ཚུལ་དུ་རྒྱུ་མང་འབྲས་བུ་ལ་བརྟེན་པས་ལྟོས་ནས་བཏགས་པའི་རྟེན་འབྲེལ་གཙོ་བོར་མཛད་དེ་བཏགས་པའི་ཚུལ་ཡང། སྔར་བཀྲ་ཤིས་མི་ཟེར་བའི་མི་གཅིག་ལ་རང་གིས་བཀྲ་ཤིས་ཞེས་བཏགས་ནས་ཞག་ཤས་སོང་བ་ན་དེ་ལ་ཕར་བཏགས་པའི་བློ་མེད་པར་དེའི་ངོས་ནས་བཀྲ་ཤིས་གྲུབ་པ་འདྲ་ཞིག་སྐྱེ་བའི་ངང་ཚུལ་ཕྲ་མོ་འདི་རྟོགས་དཀའ་སྟེ། གླེགས་བམ་ལས་ངེས་ངེས་འདྲ་བ་ན་གྲུབ་མཐའ་འོག་མ་ཚོའི་བདག་མེད་བཤད་པའི་དོན་བློ་ངོར་ཨེ་འདུག་མས་ནས་བལྟས་ཏེ་མི་འདུག་ན་ལྟ་བའི་ཕྱོགས་ན་མེད་དོ། །དོན་དམ་རྟོགས་པའི་ཤེས་རབ་མེད་ན་གཞན་གཉིས་ཀྱིས་མི་ཐར་པ་བཤད་ནས་དངོས་ལ་རྟེན་འབྲེལ་གསུངས་པ་འདི་གོ་ན་གོ་ལ། མིན་ན་གནས་ལུགས་རྟོགས་པའི་སྐབས་མེད་པ་ལ་དགོངས་ཤིང་སྣང་བས་ཡོད་མཐའ་སེལ་བས་ཀྱང་ཡིན་ཏེ། དེས་མེད་མཐའ་སེལ་བ་མཐོང་བ་ལ་མི་སྐུར་བའི་རྒྱང་འཕེན་ཡང་འདོད་ན་འདི་ནི་ཐུན་མོང་མ་ཡིན་ནོ། །ཚིག་ཉུང་ཡང་ཡོངས་འཛིན་རིན་པོ་ཆེའི་གསུང་གི་ཉིང་ཁུ་བསྡུས་པ་ཡིན་པས་གཅེས་པར་ཟུངས་ཤིག། །། །

ལམ་གཙོ་རྣམ་གསུམ་ཉམས་སུ་ལེན་ཚུལ།

― GTD003_Page_0641 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་གྱི་གཙོ་བོ་རྣམ་གསུམ་རྩ་ཚིག་གི་སྟེང་ནས་གཞུང་བསྲངས་ཏེ་ཉམས་སུ་ལེན་ཚུལ་བཞུགས་སོ། །

― GTD003_Page_0642 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་སེར་རང་འོད་ངུར་སྨྲིག་གོས་ཀྱིས་བཀླུབས། །བྲག་ཆ་བཞིན་དུ་རང་སྒྲས་རང་ལ་འདོམས། །སྒྱུ་འཕྲུལ་མཐའ་ཡས་འགྲོ་བའི་མགོན་མཛད་པ། །འཇམ་དབྱངས་བླ་མ་དེ་ཡིས་རྟག་སྐྱོངས་ཤིག །དེའང་ལམ་གྱི་གཙོ་བོ་རྣམ་གསུམ་རྩ་ཚིག་གི་སྟེང་ནས་གཞུང་བསྲངས་ཏེ་ཉམས་ལེན་སྙིང་པོར་བྱེད་པར་འདོད་པའི་གང་ཟག་གིས་རྗེ་བླ་མ་གཙོ་བོར་གྱུར་པའི་སྐྱབས་ཡུལ་གསལ་བཏབ་སྟེ་སྐྱབས་འགྲོ་སེམས་བསྐྱེད་རྒྱུད་དང་འདྲེས་ངེས་བྱས་ནས་སྐྱབས་ཡུལ་རྣམས་རང་ལ་བསྟིམ། སླར་ཡང། བཀའ་དྲིན་གསུམ་ལྡན་འཇམ་དབྱངས་བླ་མ་ལ། །བྱིན་རླབས་ཉེ་བརྒྱུད་རྣམས་དང་མཐའ་སྐོར་དུ། །བླ་མ་ཡི་དམ་རྒྱལ་བ་སྲས་བཅས་ཀྱིས། །བསྐོར་བའི་རབ་འབྱམས་སྐྱབས་ཡུལ་བཞུགས་པར་གྱུར། །ཅེས་རྩ་བའི་བླ་མ་ནས་འཇམ་དབྱངས་ཉིད་ཀྱི་བར་བྱིན་རླབས་ཉེ་བརྒྱུད་ཀྱི་བླ་མ་རྣམས་མཐོ་བརྩེགས་སུ་བཞུགས་པ་ཐམས་ཅད་འཇམ་དབྱངས་དམར་སེར་གྱི་རྣམ་པ་ཅན། སྟེང་དུ་རྡོ་རྗེ་འཆང། གཡས་གཡོན་དུ་རྒྱ་ཆེན་སྤྱོད་བརྒྱུད། ཟབ་མོ་ལྟ་བརྒྱུད་སོགས་ཀྱི་བླ་མ། གཞན་ཡང་རྒྱུད་སྡེ་བཞིའི་ཡི་དམ། སངས་རྒྱས་བྱང་སེམས་ཉན་རང་ཆོས་སྲུང་དང་བཅས་པའི་སྐྱབས་ཡུལ་མ་ཚང་བ་མེད་པ་ཚོགས་ཀྱི་ཞིང་དུ་གསལ་བཏབ་ལ། རྒྱས་པར་ན་མཁྱེན་སྲིད་མ་ཡོངས་རྫོགས་དང་ཇི་སྙེད་སུ་དག་མ་

― GTD003_Page_0643 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་བྱ། བསྡུ་ན། རབ་འབྱམས་ཞིང་གི་རྡུལ་སྙེད་ལས་འདས་པའི། །གྲངས་མེད་རྒྱལ་བ་རྣམས་ཀྱི་ཡེ་ཤེས་སྐུ། །མཐའ་ལས་གཅིག་བསྡུས་འཇམ་མགོན་ངོ་བོ་ཉིད། །རྗེ་བཙུན་བླ་མ་རྣམས་ལ་ཕྱག་འཚལ་ལོ། །ཞེས་ཕྱག་བྱ་ཞིང་རྐང་པ་ཐ་མ་གཅིག་པུས་ཀྱང་ཆོག །དེ་ནས། དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །ས་གཞི་སྤོས་ཀྱིས་ནས། ཞིང་ལ་སྤྱོད་པར་ཤོག། །བདག་སོགས་སྲིད་པའི་བཙོན་ར་ལས་ཐར་ཏེ། །ཡང་དག་ལམ་བཟང་བདེ་བླག་བགྲོད་པའི་ཕྱིར། །ཕྱིན་ཅི་ལོག་གི་རྟོག་པའི་འཆིང་བ་ཀུན། །ཟབ་རྒྱས་གདམས་པའི་རལ་གྲིས་བཅད་དུ་གསོལ། །ཞེས་གསོལ་བ་བཏབ་པ་ན་ཚོགས་ཞིང་ཐམས་ཅད་དང་གཙོ་བོ་རྩ་བའི་བླ་མ་འཇམ་པའི་དབྱངས་དེ་ཉིད་ཞལ་འཛུམ་པ་དང་བཅས་གསུང་ཚངས་པའི་དབྱངས་ཀྱིས། རྒྱལ་བའི་གསུང་རབ་ཀུན་གྱི་སྙིང་པོའི་དོན། །རྒྱལ་སྲས་དམ་པ་རྣམས་ཀྱིས་བསྔགས་པའི་ལམ། །སྐལ་བཟང་ཐར་འདོད་རྣམས་ཀྱི་འཇུག་ངོགས་དེ། །ཇི་ལྟར་ནུས་བཞིན་བདག་གིས་བཤད་པར་བྱ། །གང་དག་སྲིད་པའི་བདེ་ལ་མ་ཆགས་ཤིང། །དལ་འབྱོར་དོན་ཡོད་བྱ་ཕྱིར་བརྩོན་པ་ཡིས། །

― GTD003_Page_0644 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱལ་བ་དགྱེས་པའི་ལམ་ལ་ཡིད་རྟོན་པའི། །སྐལ་ལྡན་དེ་དག་དང་བའི་ཡིད་ཀྱིས་ཉོན། །ཞེས་སྟོན་པར་ཞལ་གྱིས་བཞེས་ཤིང་མཉན་པར་བསྐུལ་བྱུང་སྙམ་པ་བྱས་ལ་རྗེས་སུ་ཟློས་པའི་ཚུལ་གྱིས་རང་གིས་གདོན། འདི་འོག་མ་རྣམས་ཀྱི་སྐབས་སུའང་འདྲ། དེ་ནས་ཐོག་མར་སྲིད་པའི་འཆིང་བ་ཇི་ལྟར་གཅོད་ཞུས་པ་ལ། སྲིད་པ་འདིར་གཞན་ཞིག་གིས་དབང་མེད་དུ་བཅིང་བ་མིན། རང་སྲིད་པའི་ཕུན་ཚོགས་ལ་ཞེན་པ་འདིས་བསླུས་ཏེ། དཔེར་ན་ཕྱེ་མ་ལེབ་ཀྱིས་མར་མེའི་ནང་ན་བདེ་བ་ཞིག་ཡོད་སྙམ་ནས་གཞན་གྱིས་བཀག་ཀྱང་མི་ཁེགས་པར་དེར་མཆོངས་ཏེ་སྡུག་བསྔལ་བ་དང་འདྲ་བས་ངེས་འབྱུང་སྐྱེད་དགོས་སོ་ཞེས་གདམས་པར་མོས་ལ། རྣམ་དག་ངེས་འབྱུང་མེད་པར་སྲིད་མཚོ་ཡི། །བདེ་འབྲས་དོན་གཉེར་ཞི་བའི་ཐབས་མེད་ལ། །སྲིད་ལ་བརྐམ་པ་ཡིས་ཀྱང་ལུས་ཅན་རྣམས། །ཀུན་ནས་འཆིང་ཕྱིར་ཐོག་མར་ངེས་འབྱུང་བཙལ། །ཞེས་གདོན། འོ་ན་ངེས་འབྱུང་བསྐྱེད་ལུགས་གང་ཡིན་ཞུས་པ་ལ། དལ་འབྱོར་དང་མི་རྟག་པ་སྦྲེལ་ནས་ཚེ་འདིའི་སྣང་ཤས་བཟློག །ལས་འབྲས་ནམ་ཡང་མི་བསླུ་བ་དང་འཁོར་བ་མཐའ་ངན་ཚུལ་སྦྲགས་ཏེ་ཕྱི་མའི་སྣང་ཤས་བཟློག་ནས་འཁོར་བའི་ཕུན་ཚོགས་གང་ལའང་མ་ཆགས་པའི་ངེས་འབྱུང་སྐྱེད་དགོས་ལ། དེའང་ལན་རེ་སྐྱེ་སྐྱེ་འདྲ་བས་མི་ཆོག་གི །ཡུན་དུ་སེམས་ལ་གོམས་ནས་རྨི་ལམ་ཚུན་ཆད་དུ་དྲན་པ་ཞིག་དགོས་སོ་ཞེས་གདམས་པར་མོས་ཤིང། དལ་འབྱོར་རྙེད་དཀའ་ཚེ་ལ་ལོང་མེད་པ། །ཡང་ཡང་གོམས་པས་ཚེ་འདིའི་སྣང་ཤས་

― GTD003_Page_0645 ―

^{[མ་དཔེ་གཟིགས་ན་འདིར་གནོན།]}

[Full Size]

བཟློག །ལས་འབྲས་མི་བསླུ་འཁོར་བའི་སྡུག་བསྔལ་རྣམས། །ཡང་ཡང་གོམས་པས་ཕྱི་མའི་སྣང་ཤས་བཟློག །དེ་ལྟར་གོམས་པས་འཁོར་བའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང། །ཉིན་མཚན་ཀུན་ཏུ་ཐར་པ་དོན་གཉེར་བློ། །བྱུང་ན་དེ་ཚེ་ངེས་འབྱུང་སྐྱེས་པ་ལགས། །ཞེས་གདོན། ངེས་འབྱུང་དེ་ཙམ་གཙོ་བོར་བསྒོམ་པས་ཆོག་གམ་ཞུས་པ་ལ། ངེས་འབྱུང་དེ་ཡང་རྣམ་དག་སེམས་བསྐྱེད་ཀྱིས། །ཟིན་པ་མེད་ན་བླ་མེད་བྱང་ཆུབ་ཀྱི། །ཕུན་ཚོགས་བདེ་བའི་རྒྱུ་རུ་མི་འགྱུར་བས། །བློ་ལྡན་རྣམས་ཀྱིས་བྱང་ཆུབ་སེམས་མཆོག་སྐྱེད། །ཅེས་སེམས་བསྐྱེད་དགོས་པར་གདམས་བྱུང་སྙམ་པ་བྱེད། བླ་མེད་བྱང་ཆུབ་ཐོབ་བྱེད་སེམས་བསྐྱེད་དགོས་ན་དེ་ཇི་ལྟར་བསྐྱེད་ཞུས་པ་ལ། སངས་རྒྱས་ཐོབ་འདོད་ཙམ་གྱིས་མི་ཆོག །གཙོ་བོ་སེམས་ཅན་ལ་སྙིང་རྗེ་བསྒོམ་ན་དེའི་ཡན་ལག་ཏུ་སངས་རྒྱས་ཐོབ་འདོད་དེ་སྙིང་རྗེའི་རང་སྟོབས་ཀྱིས་དྲངས་འོང་དུས་སེམས་བསྐྱེད་སྐྱེས་པ་ཡིན་ཞེས་བསྟན་བྱུང་སྙམ་པ་དང་བཅས། ཤུགས་དྲག་ཆུ་བོ་བཞི་ཡི་རྒྱུན་གྱིས་ཁྱེར། །བཟློག་དཀའ་ལས་ཀྱི་འཆིང་བ་དམ་པོས་བསྡམས། །བདག་འཛིན་ལྕགས་ཀྱི་དྲ་བའི་སྦུབས་སུ་ཚུད། །མ་རིག་མུན་པའི་སྨག་ཆེན་ཀུན་ནས་འཐིབས། །མུ་མེད་སྲིད་པར་སྐྱེ་ཞིང་སྐྱེ་བ་རུ། །སྡུག་བསྔལ་གསུམ་གྱིས་རྒྱུན་ཆད་མེད་པར་མནར། །གནས་སྐབས་འདི་འདྲར་གྱུར་པའི་མ་རྣམས་ཀྱི། །ངང་ཚུལ་བསམས་ནས་སེམས་མཆོག་བསྐྱེད་པར་མཛོད། །

― GTD003_Page_0646 ―

^{[མ་དཔེ་གཟིགས་ན་འདིར་གནོན།]}

[Full Size]

ཅེས་གདོན། དེ་གཉིས་ཀྱི་སྟེང་དུ་ལམ་གྱི་སྣོན་པ་གཞན་ཅི་འདྲ་དགོས་ཞུས་པ་ལ། གནས་ལུགས་རྟོགས་པའི་ཤེས་རབ་མི་ལྡན་ན། །ངེས་འབྱུང་བྱང་ཆུབ་སེམས་ལ་གོམས་བྱས་ཀྱང། །སྲིད་པའི་རྩ་བ་གཅོད་པར་མི་ནུས་པས། །དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད། །ཅེས་ཡང་དག་པའི་ལྟ་བ་དགོས་པ་དང། ལྟ་བ་དེ་ཇི་ལྟར་སྐྱོང་ཞུས་པ་ལ། སྣང་སྟོང་གཉིས་ཉེ་རིང་མི་བྱ་བར་འགལ་མེད་ཟུང་དུ་འཇུག་ཚུལ་ལ་ངེས་པ་གཏིང་ཚུགས་པ་ཞིག་དགོས། དེ་བྱུང་ན་རྒྱལ་བ་དགྱེས་པའི་ལམ་བཟང་རྙེད་པ་ཡིན་ནོ་ཞེས་དབུགས་དབྱུང་བར་བསམ་ཞིང། གང་ཞིག་འཁོར་འདས་ཆོས་རྣམས་ཐམས་ཅད་ཀྱི། །རྒྱུ་འབྲས་ནམ་ཡང་བསླུ་བ་མེད་མཐོང་ཞིང། །དམིགས་པའི་གཏད་སོ་གང་ཡིན་ཀུན་ཞིག་པ། །དེ་ནི་སངས་རྒྱས་དགྱེས་པའི་ལམ་ལ་ཞུགས། །སྣང་བ་རྟེན་འབྲེལ་བསླུ་བ་མེད་པ་དང། །སྟོང་པ་ཁས་ལེན་བྲལ་བའི་གོ་བ་གཉིས། །ཇི་སྲིད་སོ་སོར་སྣང་བ་དེ་སྲིད་དུ། །ད་དུང་ཐུབ་པའི་དགོངས་པ་རྟོགས་པ་མེད། །ནམ་ཞིག་རེས་འཇོག་མེད་པར་ཅིག་ཅར་དུ། །རྟེན་འབྲེལ་མི་བསླུར་མཐོ་བ་ཙམ་ཉིད་ནས། །ངེས་ཤེས་ཡུལ་གྱི་འཛིན་སྟངས་ཀུན་འཇིག་ན། །དེ་ཚེ་ལྟ་བའི་དཔྱད་པ་རྫོགས་པ་ལགས། །གཞན་ཡང་སྣང་བས་ཡོད་མཐའ་སེལ་བ་དང། །སྟོང་པས་མེད་མཐའ་སེལ་ཞིང་སྟོང་པ་ཉིད། །རྒྱུ་དང་འབྲས་བུར་འཆར་བའི་ཚུལ་ཤེས་ན། །མཐར་འཛིན་ལྟ་བས་འཕྲོག་པར་མི་འགྱུར་རོ། །ཞེས་དལ་བུས་གདོན། དེ་ནས་ཡང་དག་པའི་ལམ་ལ་ངེས་པ་ཁྱད་པར་ཅན་རྙེད་

― GTD003_Page_0647 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་སྙམ་པའི་དགའ་བ་དང། དེ་རྗེ་བླ་མའི་བཀའ་དྲིན་དུ་ཤེས་པའི་དད་པ་དང། སླན་ཆད་ཀྱང་ལམ་འདི་ལ་ཉམས་ལེན་སྙིང་པོར་བྱའོ་སྙམ་པའི་སྤྲོ་བ་རྣམས་ཕན་ཚུན་འགྲན་པ་བཞིན་དུ་འཕེལ་བ་ན་རྗེ་བླ་མས་ཀྱང། དེ་ལྟར་ལམ་གྱི་གཙོ་བོ་རྣམ་གསུམ་གྱི། །གནད་རྣམས་རང་གིས་ཇི་བཞིན་རྟོགས་པའི་ཚེ། །དབེན་པ་བསྟེན་ནས་བརྩོན་འགྲུས་སྟོབས་བསྐྱེད་དེ། །གཏན་གྱི་འདུན་མ་མྱུར་དུ་སྒྲུབས་ཤིག་བུ། །ཞེས་ཤིན་ཏུ་དགྱེས་པའི་ཉམས་དང་བཅས་སྒྲུབ་པ་ལ་བསྐུལ་བར་མོས་ཤིང། སླར་ཡང་རྗེ་བླ་མའི་ཞབས་ལ་འཇུས་ཏེ་བླ་མ་ཐུགས་རྗེ་ཅན་ཁྱེད་ཀྱི་བཀའ་བཞིན་དུ་བསྒྲུབ་པར་བགྱིའོ། །བདག་གི་དུས་གསུམ་གྱི་དགེ་ཚོགས་ཐམས་ཅད་ཀྱང་ཁྱོད་ཀྱིས་བཀའ་སྩལ་པ་འདི་བཞིན་དུ་འགྲུབ་པའི་རྒྱུར་གྱུར་ཅིག །ནམ་ཡང་འབྲལ་བ་མེད་པར་རྗེས་སུ་བཟུང་སྟེ་སྒྲུབ་པ་མཐར་ཐོན་པར་བྱིན་གྱིས་བརླབ་ཏུ་གསོལ་ཞེས་གསོལ་བ་དྲག་ཏུ་བཏབ་པ་ན། ཚོགས་ཞིང་རྣམས་མཐའ་ནས་བསྡུས་ཏེ་རྩ་བའི་བླ་མ་ལ་ཐིམ། དེ་རང་ལ་ཐིམ་པས་བྱིན་གྱིས་བརླབ་པར་བསམ་ཞིང། དགེ་བ་འདི་ཡིས་སྐྱེ་བ་ཐམས་ཅད་དུ། །འདྲེན་མཆོག་བླ་མ་ཁྱོད་དང་མི་འབྲལ་ཞིང། །མགོན་པོ་ཁྱོད་ཀྱི་ཐུགས་ཀྱི་བཅུད་ཕྱུང་བའི། །ལེགས་བཤད་བདུད་རྩིའི་རོ་ཡིས་འཚོ་བར་ཤོག །གཞན་ཡང་བདག་གིས་བགྱིས་དང་བགྱིད་འགྱུར་བའི། །ལེགས་པར་སྤྱད་པ་ཇི་སྙེད་མཆིས་པ་ཀུན། །ཁྱོད་ཀྱིས་དགྱེས་བཞིན་རྗེས་སུ་འཛིན་པ་དང། བཀའ་བཞིན་སྒྲུབ་པ་ཁོ་ནའི་རྒྱུར་གྱུར་

― GTD003_Page_0648 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིག །ཅེས་སོགས་བསྔོ་བས་མཚམས་སྦྱར་བར་བྱའོ། །ཞེས་པ་འདི་ནི་ཨུ་ཅུ་མུ་ཆིན་ཤོག་ནས་དཔྱོད་ལྡན་རབ་འབྱམས་པ་དཀོན་མཆོག་སྐལ་ལྡན་གྱིས་བསྐུལ་བའི་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །། ༈ སྒྲིབ་བྲལ་བདེ་གཤེགས་ཐུགས་ཀྱི་མེ་ལོང་ངོས། །དྷཱིཿ ཧཱུཾ་ཡི་གེའི་རྣམ་རོལ་ཡེ་ཤེས་ལྷ། །རྒྱལ་ཀུན་མེས་པོར་གྱུར་ཀྱང་གཞོན་ནུའི་ཚུལ། །མགོན་པོ་མཁྱེན་པའི་གཏེར་གྱིས་རིང་དུ་སྐྱོངས། །ཕྱི་མའི་ཚེ་རབས་མི་ལྟུང་ཕྲེང་བ་ཀུན། །འཇམ་མགོན་བདུད་རྩིའི་འོད་དང་འགྲོགས་པ་ལས། །བྱིན་རླབས་སྣང་བའི་དཔལ་ཡོན་གྱིས་བསྐྱངས་ཏེ། །ཡང་དག་ལམ་གྱི་མཁའ་དབྱིངས་བགྲོད་གྱུར་ཅིག །ཀུན་བྱང་བླང་དོར་མཐའ་ཀླས་འཛིན་མའི་ཁྱོན། །བློ་གྲོས་ནམ་མཁའི་ཁམས་ཀྱིས་ཀུན་ཁྱབ་ཅིང། །གཏིང་ཟབ་ཆོས་ཀྱི་དེ་ཉིད་འབྱེད་པ་ཡི། །གཏུགས་པ་མེད་པའི་ཤེས་རབ་ཐོབ་གྱུར་ཅིག །མ་རྟོགས་ལོག་པར་རྟོག་པའི་དྲ་བ་ཀུན། །གཅོད་པའི་ཤེས་རབ་རལ་གྲིའི་རྣོ་རྒྱུན་གྱིས། །དངོས་པོར་འཛིན་པའི་འཆིང་བ་དྲུངས་ཕྱུང་སྟེ། །རྣམ་པར་གྲོལ་བའི་གླིང་དུ་འཇུག་གྱུར་ཅིག །གསུང་རབ་ཀུན་གྱི་དེ་ཉིད་ལེགས་རྟོགས་ནས། །འཇིགས་བྲལ་འཆད་རྩོད་རྩོམ་པའི་རྣམ་དཔྱོད་ཀྱིས། །མི་ནུབ་བསྟན་པའི་རྒྱལ་མཚན་ལེགས་བསྒྲེངས་ནས། །འགྲོ་ལ་ཕན་བདེའི་དགའ་སྟོན་འགྱེད་གྱུར་ཅིག །འཁྲུལ་བྲལ་བློ་བཟང་རྒྱལ་བའི་བསྟན་པ་ལ། །ངོམས་པ་མེད་པའི་ཐོས་པ་མཐར་ཕྱིན་ཏེ། །

― GTD003_Page_0649 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་དག་སྒྲུབ་པ་སྙིང་པོར་བྱེད་པ་ཡིས། །ཐོས་བསམ་སྒོམ་པའི་ཤེས་རབ་འཕེལ་གྱུར་ཅིག །མདོར་ན་བླང་དོར་ལྟ་བའི་མིག་གཅིག་པུ། །རྣམ་པར་འབྱེད་པའི་ཤེས་རབ་མཆོག་ཐོབ་ནས། །མ་ནོར་ཐེག་མཆོག་ལམ་བཟང་རིམ་བགྲོད་དེ། །རྣམ་ཀུན་མཁྱེན་པའི་གླིང་དུ་འཇུག་གྱུར་ཅིག །ཅེས་པ་འདི་ནི་དད་བརྩོན་ལྷག་བསམ་དགེ་བ་རབ་འབྱམས་པ་བློ་བཟང་རབ་བརྟན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །།

བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་ཁྲིད་ཀྱི་ཟིན་བྲིས།

― GTD003_Page_0651 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མའི་རྣལ་འབྱོར་དགའ་ལྡན་ལྷ་བརྒྱའི་ཁྲིད་ཀྱི་ཟིན་བྲིས་བཞུགས་སོ། །

― GTD003_Page_0652 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱལ་བ་བྱམས་པ་མགོན་པོས། སངས་རྒྱས་རྣམས་ལ་ལྷག་པར་བྱས། །དེ་ལ་དགེ་བའི་རྩ་བ་བསྐྲུན། །དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། །ཞེས་གསུངས་པ་ལྟར། རྒྱལ་བའི་གསུང་རབ་ཐམས་ཅད་ཀྱི་རབ་དང་ཕུལ་དུ་གྱུར་པ་བཅོམ་ལྡན་འདས་ཀྱི་དགོངས་པའི་གཏད་སོ་མཐར་ཐུག་ཕ་རོལ་ཏུ་ཕྱིན་པའི་དོན་ཟབ་མོ་འདི་ཉིད་ཐོས་བསམ་སྒོམ་གསུམ་གྱིས་གཏན་ལ་འབེབས་པ་ལ་བཀའ་གདམས་གླེགས་བམ་ཆེན་མོར་རྗེ་བཙུན་འཇམ་པའི་དབྱངས་དང་རྗེ་བླ་མས་དྲིས་ལན་གྱི་སྒོ་ནས་གསུངས་པ་ལྟར་བླ་མའང་གང་བྱུང་གིས་མི་རུང་བས་དཔེར་ན་རྒྱ་མཚོའི་གླིང་དུ་འགྲོ་བའི་ཚེ་དེད་དཔོན་ལམ་རྒྱུས་མཁས་པ། སྙིང་སྟོབས་དང་ལྡན་པ། སྙིང་རྗེ་དང་ལྡན་པ། ཕྱིར་མི་ལྡོག་པ་དེ་ལྟ་བུ་ཞིག་བསྟེན་དགོས་པ་ལྟར། འདིར་ཡང་མ་གི་ཐར་པ་ཆ་མཐུན་ནས་བཟུང་ཐམས་ཅད་མཁྱེན་པའི་ཡེ་ཤེས་ཀྱི་བར་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་ལ་མཁས་ཤིང་གཞན་ལ་འདོམས་པའི་ཐུགས་རྗེ་དང་ལྡན་པ་ཞིག་དགོས། ཡི་དམ་ཡང་བདེ་གསང་འཇིགས་གསུམ་ཡ་མ་བྲལ་བ་ཞིག་དང། ཆོས་སྐྱོང་ཡང་སྐྱེས་བུ་གསུམ་གྱི་ལམ་གྱི་འགྲོས་དང་མཐུན་པ་ཞིག་དགོས། དེའི་ནང་ནས་ཀྱང་རྗེ་བླ་མ་ལ་བརྟེན་པའི་བླ་མའི་རྣལ་འབྱོར་ནི་ཐམས་ཅད་ལས་ཁྱད་པར་འཕགས་པ་ཡིན་པས་དོན་གང་ཞིག་སྒྲུབ་ཀྱང་འདི་ལས་ལྷག་པ་མེད་དེ།

― GTD003_Page_0653 ―

^{[མ་དཔེ་གཟིགས་ན་འདིར་གནོན།]}

[Full Size]

སྔོན་རྗེ་ཤེས་རབ་སེང་གེའི་སློབ་མ་འདུལ་ནག་པ་དཔལ་ལྡན་བཟང་པོ་དང་འདུལ་འཛིན་བློ་གྲོས་སྦས་པ་གཉིས་ལ་འདུལ་དཀར་ནག་ཏུ་གྲགས་པའི་ནང་ཚན་འདུལ་ནག་པ་དེ་སྲད་ཀྱི་ལུང་པའི་ཕུར་བཞུགས་པའི་མདའ་ན་མི་ཚང་སྟོབས་ཆེ་ཞིག་ཡོད་པའི་བུ་རྒྱལ་འགོང་གིས་ཟིན་ཏེ་གང་གིས་ཀྱང་གླགས་མ་ཁེལ་བ་ན། ཕྱུགས་རྫི་དེས་ང་ཚོའི་ལུང་པའི་ཕུ་འདིར་རེས་འགའ་གཡག་ཆེན་པོ་ཞིག་འདུག །རེས་དགེ་སློང་ཞིག་འདུག །དེ་རང་བཞིན་པ་ཞིག་མིན་པ་འདྲ་བས་ཁོང་ལ་ཞུས་ན་ཐབས་རེ་ཡོད་དམ་ཞེས་གྲོས་བཏབ་པ་ལ་བརྟེན་ནས་དེ་དག་གིས་གསོལ་བ་བཏབ་པ་ན། དང་པོར་ཞལ་གྱིས་མ་བཞེས། ནན་གྱིས་ཞུས་པས་སྲད་རྒྱུད་འདེབ་པའི་དུས་ལ་བབ་པའི་སྔ་ལྟས་སུ་གཟིགས་ནས། འོ་ན་ངས་ཕན་མི་ཕན་བལྟས་ཏེ་ཕན་ན་ཡོང་བས་ཆོག། །དང་པོར་ངའི་ལྷམ་དང་འཕྲེང་རྡོག་འདི་རྣམས་ཁྱེར་ལ་རྒྱལ་འགོང་ཞུགས་ས་ལྷམ་སྟེང་དུ་ཞོག །འཕྲེང་རྡོག་རྣམས་སྐར་ཁུང་དུ་ཞོག་ལ་ཅི་ཟེར་ལྟོས་ཤིག་གསུང་བ་ལྟར་བྱས་པས། རྒྱལ་འགོང་དེས་སྐད་ངན་བཏོན་ཏེ་སྟེང་ནས་རི་རབ་ལྷུན་པོས་མནན་བྱུང། སྒོ་ཐམས་ཅད་ཁྲོ་བོ་འཇིགས་སུ་རུང་བས་བཀག་འདུག །ད་གང་དུ་འགྲོ་ཞེས་སྡུག་སྐད་བཏོན་པའི་ཚུལ་ཞུས་ཏེ་སྤྱན་དྲངས་ནས་བླ་མས་དམ་ལ་བཏགས་ཏེ་དམིགས་བརྩེ་མས་གར་

― GTD003_Page_0654 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱབ་ཀྱི་ཕྱོགས་སུ་མི་སྡོད་པའི་དམ་བཅའ་གྱིས། གལ་ཏེ་མི་བྱེད་ན་ཐལ་བའི་རྡུལ་དུ་བརླག་གོ་ཞེས་གསུངས་པས། རྒྱལ་འགོང་དེས་ཁྱེད་བྱང་ཆུབ་སེམས་དཔའ་ཡིན་པས་རྒྱལ་འགོང་ལའང་ཐུགས་རྗེས་གཟིགས་དགོས། སྟོད་ཛ་ཏིའི་མེ་ཏོག་སྐྱེ་བའི་ས་ནས། ཤར་རྒྱ་མཚོའི་མཐའི་བར་དུ་དམིགས་བརྩེ་མས་མ་ཁྱབ་ས་མི་འདུག་པས་བདག་གང་དུ་འགྲོ་ཞེས་གསོལ་བ་བཏབ་པ་ན། དགའ་ལྡན་ལྷ་བརྒྱ་མའི་སྒོ་ནས་དམིགས་བརྩེ་མ་བགྲང་མཁན་གར་ཡོད་ལ་གནོད་པ་མི་བྱེད་པའི་དམ་བཅའ་གྱིས་གསུངས་ཏེ་དམ་ལ་བཏགས་པས། རང་རེ་རི་བོ་དགེ་ལུགས་པ་རྣམས་སྐུ་རིམ་བྱེད་ཀྱང་འདི་ལས་ལྷག་པ་མེད། ཁྲི་ཆེན་ནམ་མཁའ་བཟང་ཞིང་གཤེགས་ཚེ་གསེར་ཁྲིའི་སྟེང་ནས་ཕྱག་ཁྲི་ལ་བརྡབ་སྟེ། ངའི་བྱ་བ་ཐམས་ཅད་ལ་དམ་ཅན་ཆོས་རྒྱལ་ཁྱོད་དཔང་པོ་ཡིན། ད་རེས་ཀྱང་ངས་བཟློག་པ་བྱས་ན་སེ་གོལ་གཅིག་གཏོགས་པའི་ཡུན་ལ་ཁོང་ཚོ་ཐམས་ཅད་བརླག་ཐུབ་སྟེ། དགའ་ལྡན་ཡིད་དགའ་ཆོས་འཛིན་དུ་དགེ་སློང་བྱས་འགྲོ་བ་མ་གཏོགས་འབའ་རང་བྱས་ནས་མི་འགྲོ་གསུངས་ནས་དེ་འཕྲལ་ཐེ་བོ་ཁང་དུ་ཕེབས་ཏེ་ང་ལ་ཆོ་ག་མང་པོ་མི་དགོས། ཞག་ཞེ་དགུའི་རིང་ལ་དམིགས་བརྩེ་མ་བགྲོངས་གསུངས་ནས་སྐུ་འདས་པ་ཡིན། དེར་མ་ཟད་ཐ་ན་སད་སེར་བསྲུང་བ། ཆར་འབེབས་ཆར་གཅོད་ཚུན་ཆད་ཀྱང་འདིའི་ལས་ཚོགས་ཀྱིས་མི་ཐུབ་པ་མི་སྲིད་པས་འདི་ལ་ནན་ཏན་སྙིང་པོ་མཛད་དགོས། དེ་ལའང་ཐུན་གྱི་ངོ་བོ་ལ་ཇི་ལྟར་བྱ་བ། ཐུན་མཚམས་སུ་ཇི་ལྟར་བྱ་བའི་ཚུལ་གཉིས། དང་པོ་ལ་སྔོན་འགྲོ་

― GTD003_Page_0655 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱོར་བ་ལ་ཇི་ལྟར་བྱ་བ་དང། དངོས་གཞི་ལ་ཇི་ལྟར་བྱ་བ་དང། མཇུག་ཏུ་ཇི་ལྟར་བྱ་བའི་ཚུལ་གསུམ། དང་པོའང་བསྟན་པའི་འཇུག་སྒོ་སྐྱབས་འགྲོ་དང། ཐེག་པ་ཆེན་པོའི་ལམ་གྱི་གཞུང་ཤིང་སེམས་བསྐྱེད་གཉིས། དང་པོ་ནི་སྦྱོར་བའི་ཆོས་དྲུག་སྔོན་དུ་བཏང་སྟེ། རང་གི་མདུན་གྱི་ནམ་མཁར་པདྨའི་སྡོང་པོ་ཡངས་ཤིང་རྒྱ་ཆེ་བའི་སྟེང་དུ་སེང་གེས་བཏེག་པའི་རིན་པོ་ཆེའི་ཁྲི་ལ་དབུས་སུ་རྗེ་བླ་མ། མཐའ་སྐོར་སངས་རྒྱས་བྱང་སེམས་ནམ་མཁའི་ཁམས་གང་བ་ལྟ་བུའི་ཚོགས་ཞིང་གསལ་བཏབ་སྟེ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་བདུན་སོགས་བརྗོད། དེ་ནས་སེམས་བསྐྱེད་ཐུན་མོང་བའི་མཇུག་ཏུ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་མ་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་མྱུར་བ་ཉིད་དུ་ཐོབ་པར་བྱ། དེའི་ཕྱིར་དུ་ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་བླང་བར་བྱའོ། །ཞེས་ལམ་ལ་དམིགས་པའི་སེམས་བསྐྱེད་དམ། ཁྱད་པར་སེམས་བསྐྱེད་དེ་བྱ། དེ་ནས་སངས་རྒྱས་ཀྱི་མཛོད་སྤུའི་གནས་སྨིན་མཚམས་ནི་བྱིན་

― GTD003_Page_0656 ―

^{[མ་དཔེ་གཟིགས་ན་འདིར་གནོན།]}

[Full Size]

རླབས་འཇུག་པའི་སྒོ་ཡིན་པས་ཚོགས་ཞིང་རྣམས་དེར་བསྡུའོ། །གཉིས་པ་དངོས་གཞི་ལ་དགའ་ལྡན་གྱི་གནས་གསལ་བཏབ་སྟེ་དགའ་ལྡན་ནས་རྗེ་བླ་མ་ཡབ་སྲས་གསུམ་སྤྱན་འདྲེན་པ། ཡན་ལག་བདུན་པ་མཎྜལ་དང་བཅས་པ་དབུལ་བ། རྣམ་ཐར་གསོལ་འདེབས་ཀྱི་སྒོ་ནས་ཡོན་ཏན་དྲན་ཏེ་གསོལ་བ་གདབ་པ། མཚན་སྔགས་བགྲངས་ནས་འདོད་བྱའི་དོན་ལ་སྨོན་ལམ་གདབ་པ་བཞི། དང་པོ་ལ་དགའ་ལྡན་གསལ་འདེབས་པ་དང། སྤྱན་འདྲེན་ཚུལ་གཉིས། དང་པོ་ནི། བ་ཚྭ་ཅན་གྱི་རྒྱ་མཚོའི་ནང་ནས་དབང་ཆེན་གསེར་གྱི་ས་གཞིའི་བོག་ཙམ་རེ་སྟེང་དུ་ཐོན་པའི་ལྷོ་ཕྱོགས་འདི་ཤིང་རྟའི་དབྱིབས་ལྟ་བུ། ནུབ་ཕྱོགས་ཟླུམ་པོ་སྒོ་ང་ལྟ་བུ། བྱང་གྲུ་བཞི་ཤོ་ལྟ་བུ། ཤར་ཚེས་བརྒྱད་ཀྱི་ཟླ་བ་ལྟ་བུ་ཞིག་ཡོད་ལ། ལྷུན་པོའི་མདངས་ཕོག་ལུགས་ཀྱིས་མངོན་པར་སྐབས་ཡོད་ཀྱི་གཟུགས་བར་སྣང་སྐྱ་སེང་ལ་ནམ་མཁར་གྲགས་པ་འདིའང་མདོག་མི་འདྲ་བས་གླིང་སོ་སོའི་ཆུ་མདོག་ཀྱང་མི་འདྲ་ལ། དེ་ཐམས་ཅད་ཀྱི་བྱང་ཕྱོགས་གསེར་རི་བདུན་དང་རོལ་མཚོ་བདུན་བརྒལ་བའི་དབུས་ན་རི་རབ་ཡོད་ཅིང། དེའི་བང་རིམ་རྣམས་ལ་རྒྱལ་ཆེན་རིས་བཞི་དང། རྩེ་མོར་སུམ་ཅུ་རྩ་གསུམ། དེའི་སྟེང་དུ་འཐབ་བྲལ། དེའི་སྟེང་དུ་དགའ་ལྡན་ཡོད་ལ། དེའི་ཕྱོགས་གཅིག་ན་བྱམས་མགོན་གྱི་ཕོ་བྲང་རྒྱལ་མཚན་མཐོན་པོ་གྲོང་ལས་དགོན་པའི་ཚུལ་དུ་གནས་པའི་མདུན་ན་ཆོས་སྟོན་པའི་ཀུན་དགའ་ར་བ་ཡིད་དགའ་ཆོས་འཛིན་བྱ་བ་མཐའ་སྐོར་དུ་དགོས་འདོད་འབྱུང་བའི་དཔག་བསམ་གྱི་ལྗོན་པ་དང་གསེར་

― GTD003_Page_0657 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་བྱེ་མ་བརྡལ་བའི་ཁྲུས་ཀྱི་རྫིང་བུ་དུ་མས་བསྐོར་བའི་དབུས་ན་ཁྲི་ཆེན་པོའི་སྟེང་དུ་ཁྲི་ཆུང་ལ་རྒྱལ་བ་བྱམས་པ་མགོན་པོ་འཁོར་ལོས་བསྒྱུར་བའི་འདུག་སྟངས་སམ་བཟང་པོའི་བཞུགས་སྟངས་མཛད་པའི་ཐུགས་ཀ་གསེར་གྱི་རི་བོ་ཉི་མ་འབུམ་གྱིས་བྱུགས་པ་ལྟ་བུ། འཇིག་རྟེན་ཐམས་ཅད་འོད་ཀྱིས་འགེངས་ནུས་པ་དཔལ་གྱི་བེའུ་དང་བཀྲ་ཤིས་ཀྱི་རི་མོ་ཡོད་པའི་ནང་ན་མེ་ལོང་ངོས་ཀྱི་གཟུགས་བརྙན་ལྟར་རྗེ་ཡབ་སྲས་གསུམ་བཞུགས་པ། གཡས་ན་དཔལ་ལྷ་གཅིག་དཱི་པཾ་ཀཱ་ར་ལྷའི་བུའི་རྣམ་པ་བཟུང་བ་ལྷའི་བུ་ནམ་མཁའ་དྲི་མ་མེད་པ་དང། གཡོན་ན་རང་ཅག་གི་རྗེ་བླ་མའི་རྣམ་རོལ་ལྷའི་བུ་འཇམ་དཔལ་སྙིང་པོ་དང། མཐའ་སྐོར་དུ་འཕགས་པ་ཐོགས་མེད་སྐུ་མཆེད་སོགས་དགའ་ལྡན་དུ་བྱོན་པའི་རྒྱལ་སྲས་གྲངས་མེད་པ་རྣམས་བཞུགས་པའི་རྣམ་པ་གསལ་འདེབས་པ་ནི་ཡང་དག་པའི་མཐའ་མངོན་དུ་བྱེད་པའི་སྔོན་འགྲོ་རྫོགས་སྨིན་སྦྱངས་གསུམ་གྱི་ཡ་གྱལ་ཞིང་སྦྱོང་བ་ལ་འགྲོ་བ་ཤོ་ལོ་ཀ་དང་པོ་འདིའི་ཐུན་མོང་མ་ཡིན་པའི་མན་ངག་ཡིན་ཞིང། འོག་མ་རྣམས་ལའང་ཐུན་མོང་མ་ཡིན་པའི་མན་ངག་རེ་རེ་ཡོད་དོ། །དེ་ནས་སྤྱན་འདྲེན་ཚུལ་ནི་རང་ཉིད་གནས་དེར་ཕྱིན་པའི་ཉམས་བཏོན་ཏེ་ཀྱེ་མ་བདག་ལ་ཚེ་འདིར་ནི་ཞིང་འདིར་འོངས་ཏེ་ཁྱེད་རྣམས་དངོས་སུ་མཇལ་བའི་སྐལ་བ་མི་འདུག་པས་ངའི་མགོན་སྐྱབས་དང་དཔུང་གཉེན་དམ་པར་འཛམ་བུའི་གླིང་དུ་འབྱོན་དགོས་ཞེས་གདུང་ཤུགས་དྲག་པོའི་སྒོ་ནས། དགའ་ལྡན་ལྷ་བརྒྱའི་ཞེས་སོགས་

― GTD003_Page_0658 ―

^{[མ་དཔེ་གཟིགས་ན་འདིར་གནོན།]}

[Full Size]

དལ་བུར་གདངས་སྙན་པོས་བསྒྲགས་ན་དགའ་ལྡན་ནས་གསན་ཏེ་ལག་ངར་བསྐུམ་པ་ལས་བརྐྱང་པ་བཞིན་དུ་སྐད་ཅིག་དེ་ཉིད་ལ་ཕེབས་མི་ཕེབས་དོགས་པ་ཙམ་ཡང་ཅི་ལ་དགོས་ཏེ། ཚོགས་ལམ་ཆེན་པོ་ནས་ཆོས་རྒྱུན་གྱི་ཏིང་ངེ་འཛིན་ཐོབ་སྟེ། ཤའི་མིག་གིས་དཔག་ཚད་བརྒྱ་སོགས་མཐོང་ཞིང། ལྷའི་རྣ་བས་དེ་སྙེད་ཀྱི་སྒྲ་ཐོས་ན། རྗེ་བླ་མས་ཡེ་ཤེས་ཀྱིས་མ་གཟིགས་པ་ག་ལ་སྲིད། དེ་ནས་གཉིས་པ་ཡན་ལག་བདུན་པ་མཎྜལ་དང་བཅས་པ་དབུལ་བ་ལ། སྤྱིར་གཞུང་ཐམས་ཅད་དུ་མྱ་ངན་ལས་མི་འདའ་བར་གསོལ་བ་འདེབས་པ་རྗེས་སུ་འབྱུང་ཡང། འདིར་སྔོན་དུ་བཀོད་པ་མན་ངག་ཡིན་ཏེ། དཔེར་ན་ནད་པ་ཉམ་ཐག་པ་སྨན་པ་དུ་མས་བོར་ནས་འཆི་བར་ཐག་ཆོད་ཀྱང་རང་ཉིད་ལ་གསོན་པའི་རེ་བ་ཡོད་པ་ཞིག་ཡུལ་མི་ཐམས་ཅད་ཀྱིས་སྨན་པའི་རྒྱལ་པོ་ལྟ་བུར་བསྔགས་ཤིང་ཐམས་ཅད་ལ་ཕན་པ་རླབས་ཆེ་བའི་སྨན་པ་མཁས་པ་འགྲན་ཟླ་མེད་པ་གཅིག་དང་ཕྲད་བྱུང་ན་དང་པོ་རང། ང་ནད་འདི་ལས་མ་གྲོལ་གྱི་བར་དུ་ཁྱེད་བཞུགས་ནས་ནད་འདི་སེལ་གྲོགས་མཛད་དགོས་ཞེས་ཞུས་པ་ལྟར། རང་རེ་སྙིགས་མ་ལྔ་བདོ་བའི་དུས་ཀྱི་གདུལ་བྱ་དམུ་རྒོད་འདུལ་དཀའ་བ་སངས་རྒྱས་བྱང་སེམས་ཐམས་ཅད་ཀྱིས་ཡལ་བར་དོར་བ་མགོན་མེད་པ་སྐྱབས་མེད་པ་ངེད་རྣམས་ལ་རེ་ས་ཁྱེད་མིན་པ་མེད་པས། ངེད་ཅག་གི་མགོན་དུ་བྱང་ཆུབ་མ་ཐོབ་བར་དུ་བཞུགས་དགོས་ཞེས་གསོལ་བ་འདེབས་པ་ཡིན་ལ། གསལ་འདེབས་ཚུལ་ཡང་མདུན་དུ་སྨིན་མཚམས་ཀྱི་ཐད་ཀྱི་ནམ་མཁར་སེང་ཁྲི་ཆེ་ཆུང་གསུམ་གསལ་

― GTD003_Page_0659 ―

^{[མ་དཔེ་གཟིགས་ན་འདིར་གནོན།]}

[Full Size]

བཏབ་པའི་དབུས་མ་ལ་རྗེ་བླ་མ་དབུ་ཞྭ་གསེར་གྱི་མདོག་ཅན་རྩེ་མོ་ནམ་མཁའ་ལ་རེག་པའི་ཚོད་ཅིག་གསལ་འདེབས་དགོས། དེའི་རྒྱུ་མཚན་ཡང་བོད་འདིར་མཁས་གྲུབ་མང་པོ་ཞིག་བྱོན་ཀྱང་ལྟ་བ་རྗེ་ལས་མཐོ་བ་མེད་པའི་གནད་ཀྱིས་ཡིན་ཞིང། དེ་བཞིན་དུ་རྒྱལ་ཚབ་མཁས་གྲུབ་གཉིས་ཀྱང་སྐུའི་རྣམ་པ་གསལ་འདེབས་ལུགས་ལ་རྟེན་འབྲེལ་གྱི་གནད་ཤིན་ཏུ་ཆེ་བས། རྒྱལ་ཚབ་རྗེ་སྐུ་ན་ཡ་ཟད་བགྲེས་པའི་རྣམ་པ་ཅན་སྐུ་མདོག་སྔོ་བསངས། སྤྱན་གཞུ་སྤྱན་ཚུལ་གྱིས་བཞུགས་པ་ཞིག་གསལ་བཏབ་ན་གསུང་རབ་ཐམས་ཅད་ལམ་གྱི་རིམ་པར་འཁྱེར་བ་ལ་ནང་བྱན་ཚུད་པ་སོགས་ཀྱི་དགོས་པ་ཆེ་ཞིང། མཁས་གྲུབ་རྗེ་ནི་ལང་ཚོ་དར་ལ་བབ་པ་སྐུ་མདོག་དཀར་ལ་དམར་བའི་མདངས་ཆགས་ཤིང་སྤྱན་འབུར་ཚུགས་སུ་གཟིགས་ཏེ། ཅུང་ཟད་འགྱིང་བའི་ཚུལ་གྱིས་བཞུགས་པ་ཞིག་གསལ་བཏབ་ན་མཁས་གྲུབ་རྗེ་སྤྱིར་བླ་མའི་གསུང་ཐམས་ཅད་དང། ཁྱད་པར་ཟབ་མོ་དབུ་མའི་ལྟ་བ་དང་གསང་སྔགས་རྡོ་རྗེ་ཐེག་པའི་ཕྱོགས་ལ་ཕས་རྒོལ་གྱི་ཀླན་ཀ་གང་བྱུང་ཡང་རྩོད་ངག་སེང་གེའི་ང་རོ་རེ་རེས་ཀྱང་ཟློག་པར་བྱེད་པ་ལ་ས་ཆེན་པོ་འདིའི་སྟེང་ན་འགྲན་པའི་ཟླ་དང་བྲལ་བ་ཡིན་པས་གནད་ཤིན་ཏུ་ཆེ་སྟེ། ཁྲི་ཆེན་རྡོ་རྗེ་འཆང་གི་གསུང་ལས་སྔོན་རྗེ་ཐམས་ཅད་མཁྱེན་པས་དགའ་ལྡན་འདེབས་པའི་ཚེ་འདུལ་འཛིན་པ་ལག་གི་བླར་བསྐོས་ཏེ། རྡོ་བཏེག་པའི་མཐའ་ལས་བྱུང་བའི་རུང་ཁང་བྱིན་རླབས་སོགས་མཛད་ཅིང། གཙུག་ལག་ཁང་གི་གཞི་བཏིང་དབུས་མ་གཏོགས་པའི་ལོགས་རིས་སོགས་ཀྱི་ཞལ་བཀོད་

― GTD003_Page_0660 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་ནས། རྗེ་རང་ཉིད་ལྷ་ལྡན་སྨོན་ལམ་འཛུགས་པ་དང། རིམ་ལྔ་གསལ་སྒྲོན་རྩོམ་པ་སྟེ་མཛད་ཆེན་གཞན་གཉིས་ཀྱི་སྟ་གོན་ལ་འོལ་ཁར་གཤེགས་པའི་ཤུལ་དུ་ལོགས་རིས་ཕལ་ཆེར་གྲུབ་ནས། དབུས་ལ་གང་འབྲི་མ་ཤེས་པ་དང་བུ་ཆེན་རྣམས་བཀའ་བགྲོས་ཐོག་ནས་བསྟན་པའི་བདག་པོ་ཡིན་པས་ཐུབ་དབང་གི་སྐུ་འབྲི་བར་མཛད། རྗེས་སླར་གཟིགས་ཏེ་ཁྱེད་ཅག་ལ་ཆོས་སྟོན་པའི་བླ་མ་འདྲ་མེད་དམ་གསུངས་ནས་དགྱེས་པར་མ་གྱུར་པའི་གནད་ཀྱིས་དགའ་ལྡན་མ་དགོན་ཡིན་ཀྱང་སེར་འབྲས་ལྟ་བུའི་འཕེལ་རྒྱས་མ་བྱུང་བ་ཡིན་པས་འདི་ཙམ་ལའང་རྟེན་འབྲེལ་མ་ལོག་པ་གལ་ཆེའོ། །གཉིས་པ་ཕྱག་འཚལ་བ་ནི། ཤེས་བྱའི་ཁྱོན་ཀུན་འཇལ་བའི་ཞེས་སོགས་འདི་ཚད་ལས་འདས་པའི་བསྟོད་པ་ཡིན་ཏེ། འདིར་ཁྱོན་ཀུན་ཞེས་པ་ཆེས་མང་ཞིང་འབྱམས་ཀླས་པའི་དོན་མ་ཡིན་པར། སློབ་དཔོན་དཔའ་བོས། མཁྱེན་པའི་སྐད་ཅིག་གཅིག་གིས་ཀྱང། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་པ་ལྟར་གཞི་བུམ་པ་ལྟ་བུ་ཀུན་རྫོབ་པའི་ཆོས་ལ་གཟིགས་པའི་ཚེ་ནའང་དེའི་ཆོས་ཉིད་རྗེན་པར་གཟིགས་ཤིང། གནས་ལུགས་དེ་བཞིན་ཉིད་གཟིགས་པའི་ཚེ་ནའང་སྟོང་གཞི་ཀུན་རྫོབ་པའི་སྣང་བ་མི་འགོག་པར་མཉམ་རྗེས་ངོ་བོ་གཅིག་ཏུ་སོང་བ་སངས་རྒྱས་ཁོ་ན་མ་གཏོགས་པ་ལ་མི་སྲིད་པས། ད་ལྟའི་སྙན་ངག་མཁན་གཞན་རྣམས་ངལ་བ་བརྒྱ་ཕྲག་མང་པོ་བྱས་ཀྱང་བསྟོད་པ་འདི་འདྲ་འོང་བའི་རེ་བ་མེད་དོ། །སྐལ་བཟང་རྣ་བའི་རྒྱན་གྱུར་ཅེས་པའི་སྐལ་བཟང་ནི་བྱང་ཆུབ་སེམས་དཔའ་ཡིན་ཏེ། དབང་བསྐུར་བའི་ཚེ་

― GTD003_Page_0661 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོལ་བའི་ཕྱི་འཇུག་གི་རིགས་དང་མོས་པ་དྲི་བའི་སྐབས་སུ། ཁྱོད་སུ་ཡིན་ཅི་ལ་དགའ་ཞེས་ཁྱོད་ཚེ་འདིའི་བདེ་བ་ཙམ་དོན་དུ་གཉེར་བའི་གང་ཟག་ཡིན་ནམ། ངན་འགྲོའི་སྡུག་བསྔལ་གྱིས་འཇིགས་ནས་ལྷ་ལུས་མི་ལུས་ཙམ་འདོད་མཁན་ཞིག་ཡིན་ནམ། འཁོར་བ་མཐའ་དག་ལ་ཞེན་པ་ལོག་ནས་རང་ཉིད་ཐར་པ་ཙམ་འདོད་མཁན་ཞིག་ཡིན་ནམ། མཁའ་ཁྱབ་ཀྱི་སེམས་ཅན་ཐམས་ཅད་སྒྲོལ་བར་འདོད་པའི་རྒྱལ་སྲས་བྱང་ཆུབ་སེམས་དཔའ་ཞིག་ཡིན་ཞེས་དྲིས་པའི་ལན་དུ། སྐལ་བཟང་བདག་བདེ་བ་ཆེན་པོ་ལའོ། །ཞེས་བྱང་ཆུབ་སེམས་དཔའ་སྐལ་བ་བཟང་པོ་བདེ་བ་ཆེན་པོའི་ཡེ་ཤེས་དོན་དུ་གཉེར་མཁན་ཞིག་ཡིན་ཞེས་ལན་བཏབ་པས་ཤེས་སོ། །དེ་ལྟ་བུའི་བྱང་ཆུབ་སེམས་དཔའ་ས་བཅུ་པ་མན་ཆད་ཐམས་ཅད་ཀྱི་རྣ་བའི་རྒྱན་དུ་གྱུར་པ་ནི་རྗེ་བླ་མའི་གསུང་རྣམས་ཡིན་ཏེ། སྔ་རབས་པ་འགའ་ཞིག་གི་གསུང་རྣམས་སྤྱོད་པའི་ཆ་ནས་དགའ་རབ་ཡོད་ཀྱང་ལྟ་བའི་སྐོར་གནད་དུ་མ་སོང་བའི་དབང་གིས་བདག་ཉིད་ཆེན་པོ་རྣམས་ཀྱིས་གཟིགས་ན་ལྟ་བའི་ཆ་ནས་མི་དགྱེས་པས་རྣ་བའི་རྒྱན་དུ་མི་འགྱུར་ལ། ཁ་ཅིག་ལྟ་བའི་སྐོར་དགའ་རབ་ཡོད་ཀྱང་མངོན་པ་གོང་འོག་གི་ཆོས་རྣམས་ཀྱི་རང་སྤྱིའི་མཚན་ཉིད་དང་འདུལ་བའི་ལག་ལེན་སོགས་ལ་མ་སྦྱངས་པའི་ཆ་ནས་རྣ་བའི་རྒྱན་དུ་མི་འགྱུར། དཔེར་ན་པཎ་ཆེན་བློ་བཟང་ཡེ་ཤེས་དཔལ་བཟང་པོ་དེ་ཉིད་སྐུ་ན་ཕྲ་མོའི་ཚེ་མཚན་ཉིད་ཞབས་ཕྱི་དགེ་བཤེས་འཇམ་དབྱངས་ཆོས་འཕེལ་ཟེར་བ་དེས་མཛོད་ཀྱི་བགྲོ་གླེང་

― GTD003_Page_0662 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུལ་ཏེ་ཁས་ལེན་ཤོར་བ་ན་པཎ་ཆེན་རིན་པོ་ཆེའི་ཕྱག་མཛོད་དེ་ན་མ་ཁང་བར་འདུག་ཟེར་བའི་དཔེ་ལྟ་བུ་ཡོད་མོད། རྗེ་བླ་མའི་གསུང་རབ་རྣམས་ལ་མདོ་སྔགས་གང་གི་ཐད་ནས་སུ་འདྲ་ཞིག་གིས་དཔྱད་ཀྱང་མི་འཐད་པའི་ཆ་ཕྲ་མོ་ཙམ་ཡང་མེད་པས་རྒྱལ་བའི་སྲས་པོ་ཐམས་ཅད་ཀྱི་ཐུགས་འཕྲོག་པར་འགྱུར་རོ། །གྲགས་པའི་དཔལ་གྱིས་ཞེས་པ་འདིའི་གྲགས་པ་ནི། སྙན་པའི་བ་དན་འཇིག་རྟེན་གསུམ་ན་གྲགས། །ཞེས་པ་ལྟར་མི་སྙན་པ་མཐའ་དག་ཟད་པའི་སྙན་གྲགས་ལ་བྱེད་དགོས་ལ། མོའུ་མགལ་གྱི་བུ་ལྟ་བུའི་བདག་ཉིད་ཆེན་པོའང་གནས་ངན་ལེན་གྱི་དྲི་མ་མ་ཟད་ཅིང། ས་བཅུ་པའི་བྱང་ཆུབ་སེམས་དཔའ་འོད་ཟེར་ཆེན་པོའི་དབང་བསྐུར་ཐོབ་པ་རྣམས་ཀྱང་གཉིས་སྣང་འཁྲུལ་བའི་བག་ཆགས་མ་ཟད་པའི་ཆ་ནས་མི་སྙན་པ་བརྗོད་དུ་ཡོད་པས་འདི་ནི་རྒྱལ་བ་ཉག་གཅིག་གི་ཡོན་ཏན་ཡིན་ནོ། །དེ་དག་གི་གོ་རིམ་ཡང་སྐུའི་ཡོན་ཏན་སྔར་བརྗོད་པ་སྤྱིའི་ལམ་སྲོལ་ཡིན་མོད་ཀྱང། འདིར་ཐུགས་ལ་ཐོག་མར་བསྟོད་པ་མན་ངག་ཡིན་ཏེ། རྒྱལ་བ་ཐམས་ཅད་ཀྱི་མཁྱེན་རབ་གཅིག་ཏུ་བསྡུས་པའི་རང་གཟུགས་ནི་རྗེ་བཙུན་འཇམ་པའི་དབྱངས་ཡིན་ཞིང། རྗེ་བླ་མ་འཇམ་དབྱངས་དངོས་ཡིན་པའི་གནད་ཀྱིས་བྱིན་རླབས་འཇུག་པའི་ཚེའང་ཐོག་མར་ཐུགས་ཀྱི་བྱིན་རླབས་ཞུགས་ཏེ་ཤེས་རབ་སྐྱེ་བ་ཆོས་ཉིད་ཡིན་ཞིང། དེ་ནས་ངག་ལ་ཞུགས་ཏེ་ཚིག་དོན་དང་ངེས་ཚིག་སོགས་ལ་ཐོགས་པ་མེད་པའི་སྤོབས་པ་སྐྱེ། དེ་ནས་ལུས་ལ་ཞུགས་ཏེ་མཁས་མང་

― GTD003_Page_0663 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱ་མཚོ་ལྟ་བུའི་དབུས་སུ་ལེགས་བཤད་ཀྱི་ང་རོ་སྒྲོགས་པ་ལ་བག་ཚ་བ་མེད་པའི་གཟི་བརྗིད་སྐྱེའོ། །འདིའི་གནད་ཀྱིས་ཡི་དམ་རྡོ་རྗེ་འཇིགས་བྱེད་ལ་དྲི་ཆབ་འབུལ་བའི་ཚེ་གཞན་དང་མི་མཐུན་པར་སྔར་བླང་བ་ཡིན་ཏེ། དེ་ནི་ཐུགས་ཀྱི་མཆོད་པ་ཡིན་པས་ཐུགས་ཀྱི་བྱིན་རླབས་དང་པོར་འཇུག་པའི་རྟེན་འབྲེལ་ཡིན་ནོ། །མཆོད་པ་དཀྱུས་ན་གསལ་ཞིང། བཤགས་པ་སྡོམ་པ་གསུམ་གྱི་བཅས་མཚམས་ལས་བརྩམས་ཏེ་བྱེད་པ་འདིའང་རང་རེ་རི་བོ་དགེ་ལུགས་པའི་ཐུན་མོང་མ་ཡིན་པའི་ཁྱད་ཆོས་ཡིན་ཏེ། རྗེ་བཙུན་བླ་མ་ཙོང་ཁ་པ་ཆེན་པོའི་འཕྲིན་ལས་ཐམས་ཅད་ཀྱི་ནང་ནས་ཀྱང་སྡོམ་པ་གསུམ་གྱི་བཅས་མཚམས་ལ་དག་ཐེར་མཛད་པ་འདི་ཉིད་གཙོ་བོ་ཡིན་ནོ། །རྗེས་སུ་ཡི་རང་ནི། སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཞེས་སོགས་ཏེ། ད་ལྟ་རྩོད་ལྡན་སྙིགས་མ་ལྔ་བདོ་བའི་དུས་འདིར་གསུང་རབ་རབ་འབྱམས་ལ་ཐོས་པ་རྒྱ་མཚོའི་ཕ་རོལ་ཏུ་སོན་ཅིང་ཐོས་པའི་དོན་ལ་སྒྲུབ་པ་སྙིང་པོར་མཛད་པ་ནི་ཐ་སྙད་རིག་པའི་གཞུང་ལས་ཕུལ་བྱུང་གི་རྒྱན་དུ་གྲགས་པ་ལྟར་བླ་ན་མེད་པའི་ཡོན་ཏན་ཡིན་ཞིང། ཆོས་བརྒྱད་སྤངས་པའི་ཚུལ་ལ་སྔོན་སྟོད་ལུང་དུ་སྡེ་སྣོད་འཛིན་པ་བརྒྱད་བརྒྱ་ཙམ་ལ་ཆོས་ཀྱི་དགའ་སྟོན་སྩོལ་བའི་ཚེ། རྗེ་བཙུན་འཇམ་པའི་དབྱངས་ཀྱིས་དཔའ་བོ་རྡོ་རྗེ་ལ་ལན་བསྐུར་ཏེ་གསུངས་པ་རྣམས་བསྐྱར་ནས་ཡང་དཔའ་བོ་རྡོ་རྗེས་ཐུགས་དོགས་ཟོས་ཏེ་འཇམ་དབྱངས་ལ་ཞུས་པ་ཆོས་རྗེ་བློ་བཟང་པས་

― GTD003_Page_0664 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་པའི་བྱ་བ་རླབས་ཆེན་པོ་འདི་འདྲ་གནང་བའི་ཚེ་ངས་བཤོལ་ན་ང་ལ་མིས་ཁ་བཏང་ཡོང་བས་དེ་མི་གསུང་བ་ཞུ་ཞུས་ཙ་ན། བསྟན་པ་ལ་ཕན་མི་ཕན་ཁྱོད་ཀྱིས་མི་ཤེས། ད་ལྟའི་ཁ་བཤད་ཡམ་ཡམ་འདིས་གར་ཡང་མི་ཕན། འདིའི་མུ་བྱས་ན་ཁོ་རང་འདས་པའི་འོག་ཏུ་བསྟན་ལ་ཕན་རྒྱུ་མེད་པས་འདི་ཙམ་གྱིས་མི་ཡོང་མཁའ་ཁྱབ་ཀྱི་སེམས་ཅན་གྱི་རྩིས་གཏོང་དགོས། ཁྱོད་རང་ལ་མིས་ཁ་གཏོང་ཤས་ཆེ་སྟེ་བཟོད་པ་བསྒོམས་གསུང། དེ་ནས་རྗེ་རིན་པོ་ཆེས་ཀྱང་སྡེ་སྣོད་འཛིན་པ་དེ་སྙེད་ཅིག་མིག་མཆི་མ་ཙ་རེ་ཤུལ་དུ་བཞག་ནས་འཁོར་དག་པ་རྣམ་བརྒྱད་ཁྲིད་དེ། རྟོགས་ལྡན་འཇམ་དཔལ་རྒྱ་མཚོ་བ་ནི་ཚེ་རབས་མང་པོར་འཇམ་པའི་དབྱངས་ཀྱིས་རྗེས་སུ་བཟུང་སྟེ་འཇམ་པའི་དབྱངས་ལ་མི་དང་མི་ལབ་པ་ལྟར་བྱ་བ་ཐམས་ཅད་ཞུས་ནས་བྱེད་པའི་སྐུ་ཐང་ཞིག་འབྲལ་མེད་དུ་ཡོད་ལ། གཞན་ཐམས་ཅད་འབྲལ་སྤང་ཐུབ་དབང་གི་སྐུ་མ་གཏོགས་པ་སྐུ་གསུང་ཐུགས་རྟེན་རྣམས་ཀྱང་བཞག་སྟེ་འོལ་ཁར་གཤེགས་པའི་ཚེ་ཡབ་སྲས་ཐམས་ཅད་ཀྱི་སྐུ་ཆས་བསྡོམས་ཀྱང་གསེར་ཞོ་གང་དུ་མི་ལོང་ལ། དེའི་ཚེ་ལྟུང་བཤགས་སོ་ལྔ་རེ་ལ་ཐུན་རེ་མཛད་དེ་བཤགས་སྦྱང་དང། ཕྱག་ངར་རྡོལ་རྡོལ་དུ་མཎྜལ་ཕུལ་བས་སྐུ་ཚེ་གང་ཕྱག་རྨ་རོར་སོང་བ་དེ་ལྟ་བུའི་དཀའ་སྤྱད་དྲག་པོ་མཛད་པའི་ཚེ། དང་པོར་ཀླུ་དབང་རྒྱལ་པོ་དང་ལྟུང་བཤགས་ཀྱི་ལྷ་སོ་ལྔ་དང་པཎ་གྲུབ་ཞལ་གཟིགས། འོན་ཀྱང་ད་ལྟའི་རང་ཚོ་ལྟ་བུའི་རྨི་ལམ་དུ་བུད་མེད་ནག་ཧྲིང་ཧྲིང་ཞིག་རྨིས་ན་དཔལ་ལྡན་ལྷ་མོ་ཞལ་གཟིགས་བྱུང་ཟེར་

― GTD003_Page_0665 ―

^{[མ་དཔེ་གཟིགས་ན་འདིར་གནོན།]}

[Full Size]

མཁན་ལྟ་བུ་མ་ཡིན་པར། རྒྱུད་སྡེ་ནས་དང་པོར་ཟིལ་གྱིས་གནོན་པའི་ལྟ་སྟངས་སོགས་དང་དཀའ་གནད་ལ་དྲི་བ་སོགས་ཀྱིས་བརྟག་དགོས་པར་གསུངས་པས། དང་པོར་འཇམ་དཔལ་རྒྱ་མཚོ་བ་ལ་ཉམས་སྣང་དེ་དག་དངོས་ཡིན་མིན་འཇམ་དབྱངས་ལ་དྲིར་བཅུག་པའི་ཚེ། འཇམ་དབྱངས་ཀྱིས་དེ་ཉམས་སྣང་ཡིན་ཀྱང་རྟེན་འབྲེལ་གྱི་གནད་ཆེ་བས་གསོལ་བ་ཐོབས་གསུངས་པ་བཞིན་མཛད་པའི་མཐར་བུདྡྷ་པཱ་ལི་ཏ་རབ་བྱེད་བཅོ་བརྒྱད་པའི་དུས་ཐ་སྙད་ཙམ་དུ་ཡོད་པར་གསུང་བའི་ཐད་དུ་ལྟ་བའི་ངེས་པ་རྙེད་དེ་མདོ་སྔགས་གཉི་གའི་ལམ་ལ་སྒྲོ་འདོགས་ལྷག་མ་མ་ལུས་པར་ཆོད་དོ། །ཆོས་འཁོར་བསྐུལ་བ་དཀྱུས་ལྟར་ལ། བསྔོ་བ་འདིའང་རྗེའི་ཐུན་མོང་མ་ཡིན་པའི་ཕྱག་སྲོལ་ཡིན་ཏེ། དང་པོར་རྒྱ་ཆེན་ཐོས་པ་མང་དུ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། །གསུངས་པ་ལྟར་རྒྱལ་སྲས་ཀྱི་སྨོན་ལམ་རླབས་པོ་ཆེ་ཐམས་ཅད་སྡུད་པའི་ཤིན་ཏུ་འགངས་ཆེ་བ་ནི་བསྟན་པའི་སྙིང་པོ་འདི་ཉིད་རྒྱས་པའི་ཕྱིར་དུ་བསྔོ་བ་འདི་ཡིན་ནོ། །གསུམ་པ་རྣམ་ཐར་གསོལ་འདེབས་ཀྱི་སྒོ་ནས་གསོལ་བ་འདེབས་པ་ནི། དཔལ་ལྡན་ས་གསུམ་འགྲོ་བའི་མིག་གཅིག་པུ། །ཞེས་པ་ནས། མཆོག་གི་དངོས་གྲུབ་བརྙེས་ལ་གསོལ་བ་འདེབས། །ཞེས་པའི་བར་གྱི་དོན་བསྡུ་ན། རྗེ་བླ་མ་ནི། བློ་དང་བཟང་གི་མཚན་ཅན་སྐྱེས་བུ་འབྱུང། །ཟེར་བ་ལྟ་བུ་ས་

― GTD003_Page_0666 ―

^{[མ་དཔེ་གཟིགས་ན་འདིར་གནོན།]}

[Full Size]

འོག་ནས་ཐོན་པའི་ཆོས་དེ་འདྲ་ལ་རེ་མ་དགོས་པར་འཇམ་དཔལ་རྩ་རྒྱུད་སོགས་ནས་ལན་བརྒྱ་ཕྲག་ཏུ་ལུང་བསྟན་ཅིང། མདོ་སྡེ་རྒྱན་ལས་ཀྱང། དེ་ལྟར་བློ་བཟང་སྐྱོ་བ་མེད་ལྡན་བརྩེ་བ་ཅན། །སྙན་པར་རབ་གྲགས་ཆོ་ག་བཟང་ཤེས་ལྡན་པ་ཡི། །བྱང་ཆུབ་སེམས་དཔའ་ལེགས་པར་སྨྲ་བ་ཡིན་པ་དེ། །བཤད་པའི་སྐྱེ་བོའི་ནང་ན་ཉི་མ་བཞིན་དུ་ལྷམ། །ཞེས་མཚན་སྒྲ་གསལ་བར་ལུང་བསྟན་པའི་དོན་བཞིན་མདོ་སྨད་དུ་བལྟམས་པའི་ལྟེ་བ་བཅད་པའི་ཁྲག་ལས་ཙན་དན་གྱི་སྡོང་པོ་ཡལ་གའི་སྟེང་ན་སེང་གེའི་ང་རོའི་སྐུ་འབུམ་ཕྲག་བཞུགས་པ་སྐྱེ་བའི་རྫུ་འཕྲུལ་གྱི་བཀོད་པ་གཅིག་པུ་བོད་ཀྱི་མཁས་གྲུབ་གསེར་གྱི་རི་བོ་འདྲ་བ་ཇི་སྙེད་བྱོན་པའི་ཁྲོད་ན་མ་བྱུང་སྟེ། རྗེ་བླ་མ་ལས་ལྷག་པ་ལྟ་ཞོག །རྗེ་བླ་མ་འདྲ་བ་ཞིག་ཀྱང་བྱོན་ཡོད་ན་བསྟན་དགོས་པ་ལ་མེད་པའི་ཕྱིར་ཏེ། མར་པ་མི་ལ་སོགས་གྲུབ་པའི་དབང་ཕྱུག་ཆེན་པོ་ཡིན་ཀྱང་འདུལ་བའི་སྐོར་སོགས་གསལ་བར་མཛད་པའི་གཏམ་མི་སྣང་ཞིང། འདི་ལྷོ་བྲག་མར་པའི་ཕར་ཕྱིན་ཡིན་ཟེར་བའང་མ་མཐོང་ངོ་། །དེ་བཞིན་དུ་ཁ་ཅིག་སྤྱོད་ཕྱོགས་མ་ཚང། ལ་ལར་ལྟ་བའི་སྐོར་མ་ཚང། ལ་ལར་མདོ་ཕྱོགས་དགའ་འང་སྔགས་ཕྱོགས་མ་ཚང་མོད། ཁམས་གསུམ་འགྲོ་བའི་བླ་མ་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ནི་མདོ་ཕྱོགས་ཀྱི་གཞུང་ཆེན་མོ་མཐའ་དག་དང། གསང་སྔགས་རྒྱུད་སྡེ་བཞིའི་གནད་མ་ལུས་པ་ལ་ནང་བྱན་ཚུད་པའི་གསུང་རབ་ལམ་རིམ་ཆེ་ཆུང། རྩ་འཇུག་གི་རྣམ་བཤད་གཉིས། ལེགས་བཤད་སྙིང་པོ། ལེགས་བཤད་

― GTD003_Page_0667 ―

^{[མ་དཔེ་གཟིགས་ན་འདིར་གནོན།]}

[Full Size]

གསེར་འཕྲེང་། སྔགས་རིམ་ཆེན་མོ། རིམ་ལྔ་གསལ་སྒྲོན། སྦས་དོན་ཀུན་གསལ་སོགས་འགྲན་ཟླ་མེད་པའི་ལེགས་བཤད་རྣམས་ད་ལྟའང་བཞུགས་ཡོད་པས། འདི་འདྲ་ཚོར་དཔགས་ནས་འབྲས་བུའི་རྟགས་ཀྱིས་རྗེ་བླ་མ་ལ་དད་པ་གཏིང་ཚུགས་པ་ཞིག་བྱུང་ན་སུས་ཀྱང་གཞན་དུ་དྲངས་མི་ནུས་པའི་ཁྱད་པར་ཤིན་ཏུ་ཆེ་སྟེ། ཐམས་ཅད་མཁྱེན་པ་བློ་བཟང་བསྐལ་བཟང་རྒྱ་མཚོའི་གསུང་ལས་རྗེ་བླ་མ་ལ་ཤེས་ནས་དད་པ་ཐོབ་པ་གསུངས་པ་དེ་གནད་ཤིན་ཏུ་ཆེའོ། །བཞི་པ་མཚན་སྔགས་ཀྱི་སྒོ་ནས་གསོལ་བ་བཏབ་སྟེ་འདོད་དོན་ལ་སྨོན་ལམ་གདབ་པ་ནི། དམིགས་མེད་བརྩེ་བའི་ཞེས་སོགས་སོ། །འདིའི་དོན་ལ་ཕྱི་མཚུངས་པ་གསལ་བྱེད། ནང་ཡོན་ཏན་དེ་ལྡན། གསང་བ་ལྷག་པའི་ལྷ་དང་ངོ་བོ་དབྱེར་མེད་དུ་བསམས་ནས་གསོལ་བ་འདེབས་ཚུལ་གསུམ་དང། ཁྱད་པར་མཁས་གྲུབ་ཤེས་རབ་སེང་གེ་ནས་བརྒྱུད་པའི་ཤེས་རབ་བློ་འཕེལ་མན་ངག་གཉིས་ཡོད་ལ། དེའང་རྒྱལ་བ་ཐམས་ཅད་ཀྱི་ཐུགས་རྗེ་གཅིག་ཏུ་བསྡུས་པའི་རང་གཟུགས་མཚུངས་པ་མེད་པ་ནི་མགོན་པོ་སྤྱན་རས་གཟིགས་ཡིན་ཞིང། མཁྱེན་པའི་ངོ་བོ་མཚུངས་ཟླ་མེད་པ་འཇམ་དབྱངས་ཡིན་པ་ལྟར། རྗེ་བླ་མའང་གངས་ཅན་གྱི་མཁས་གྲུབ་ཐམས་ཅད་ཀྱི་གཙུག་རྒྱན་ཟླ་མེད་པ་ཡིན་ལ། ཡང་རྣམ་པ་གཅིག་ཏུ་ན་རྗེ་བླ་མ་ལ་བརྩེ་བ་དང་མཁྱེན་པའི་བདག་ཉིད་དེ་གཉིས་ཀྱི་ཡོན་ཏན་ཇི་ཙམ་པ་རྫོགས་པར་མངའ་བ་དང། ཡང་རིགས་གསུམ་མགོན་པོའི་ངོ་བོ་ཡིན་

― GTD003_Page_0668 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ངེས་དོན་ཏེ། བཀའ་གདམས་གླེགས་བམ་ལས་རིགས་གསུམ་མགོན་པོ་ཐུགས་རྒྱུད་གཅིག་པར་ལན་གྲངས་དུ་མར་གསུངས་ཤིང། དེར་མ་ཟད། སྤྲུལ་པ་གཅིག་ནི་རྒྱ་གར་གནས་ཆེན་འགྲིམ། །སྤྲུལ་པ་གཅིག་ནི་ལྷ་སྲིན་འདུལ་དུ་འགྲོ། །སྤྲུལ་བ་གཅིག་ནི་མདོ་སྨད་ཁམས་སུ་འགྲོ། །ཞེས་ཇོ་བོ་རྗེ། པདྨ་སམྦྷ་ཝ། རང་ཅག་གི་རྗེ་བླ་མ་གསུམ་ཐུགས་རྒྱུད་གཅིག་པར་གསུངས་པ་དང། ཀླུ་སྒྲུབ་ཀྱང་རྗེ་བླ་མ་དང་ཐུགས་རྒྱུད་གཅིག་པར་བཤད་པ་ཡོད་དོ། །གཉིས་པ་ཤེས་རབ་བློ་འཕེལ་གྱི་གདམས་པ་ཉམས་སུ་ལེན་ཚུལ་ནི། མ་དག་འཁྲུད་ཅིང་མི་ཤེས་བསལ། །ཞེས་འཇམ་དབྱངས་ཆོས་སྐོར་ལས་བྱུང་བ་ལྟར། མདུན་གྱི་རྗེ་བླ་མ་ཡབ་སྲས་གསུམ་གའི་ཐུགས་ཀ་ནས་འོད་ཟེར་གསུམ་འཕྲོ་བ་སྤྱི་བོར་གཅིག་ཏུ་འདྲེས་ནས་ཟུག་པ་ནང་སྦུ་གུ་ཁོང་སྟོང་དུ་ཡོད་པ་ལས་བདུད་རྩིའི་རྒྱུན་བབ་པའི་མོས་པ་བྱེད། བདུད་རྩིའི་མདོག་ཀྱང་བད་ཀན་ཅན་གྱིས་སྔོན་པོ་དང། རླུང་ནད་ཅན་གྱིས་མར་ཁུའི་མདོག་ལྟ་བུར་གསལ་གདབ། དེ་ལྟར་ནད་གདོན་སྡིག་སྒྲིབ་ཐམས་ཅད་བྱང་ཞིང་དག་པའི་མོས་པ་བྱས་ཏེ་སྡིག་སྒྲིབ་དག་པའི་མཚན་མ་ནམ་བྱུང་གི་བར་བསྒོམ་མོ། །གཉིས་པ་མི་ཤེས་པ་བསལ་བ་ལ། སྐུའི་སྒོ་ནས་ཤེས་རབ་ཆེ་བ། གསུང་གི་སྒོ་ནས་ཤེས་རབ་གསལ་བ། ས་བོན་གྱི་སྒོ་ནས་མྱུར་བ། ཕྱག་མཚན་གྱི་སྒོས་ཟབ་པ། གླེགས་བམ་གྱི་སྒོས་འཆད་པ། རལ་གྲིའི་སྒོ་ནས་རྩོད་པ། གླེགས་རལ་གཉི་གའི་སྒོ་ནས་རྩོམ་པའི་ཤེས་རབ་སྒྲུབ་ཚུལ་སོགས་དུ་མ་ཡོད། འདི་

― GTD003_Page_0669 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་སྒོ་མང་གྲྭ་ཁང་དུ་མངོན་རྟོགས་རྒྱན་གྱི་བཤད་ལུང་གནང་སྐབས་ཡོངས་འཛིན་གྱི་ཐད་དུ་དགའ་ལྡན་ལྷ་བརྒྱ་མ་དང་སྦྱར་ནས་བཤད་པ་གང་གནང་བའི་རིམ་པ་ཁོལ་བུར་བཏོན་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་ཟིན་བྲིས་སུ་བགྱིས་པའོ། །དགེ་ལེགས་འཕེལ།། །།

བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་ཟབ་གནད་ཐོ་ཙམ་བཀོད་པ།

― GTD003_Page_0671 ―

^{[མ་དཔེ་གཟིགས་ན་འདིར་གནོན།]}

[Full Size]

ཟབ་ལམ་བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་ཟབ་གནད་ཡོངས་སུ་རྫོགས་པ་ཐོ་ཙམ་དུ་བཀོད་པ་བཞུགས་སོ། །

― GTD003_Page_0672 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་ལྡན་གནས་སུ་ཕྱི་བཞིན་བཀྲི་བའི་ཕྱིར། །འཇུག་ངོགས་སྟོན་མཛད་འཇམ་དཔལ་སྙིང་པོ་ལ། །བཏུད་ནས་ཚུལ་དེ་རྒྱ་ཆེར་གནས་པ་ལས། །གསང་བའི་སྙིང་པོ་མདོ་རུ་བྲི་བར་བྱ། །དེའང་ཡོན་ཏན་ཀུན་གྱི་གཞི་རྟེན་ཟབ་ལམ་བླ་མའི་རྣལ་འབྱོར་ཇི་སྙེད་ཅིག་ཡོད་པ་ལས། རྒྱལ་མཚན་གྱི་ཏོག་ལྟར་མཐོ་བ་དགའ་ལྡན་ལྷ་བརྒྱ་མར་གྲགས་པ་ནི། རེས་འགའ་གསོལ་འདེབས་དབྱངས་ཀྱི་གཟུགས། །ཞེས་དམིགས་བརྩེ་མ་ལ་གསུངས་པ་དང་འདྲ་བར་མཁྱེན་གཏེར་གཞོན་ནུའི་ཡེ་ཤེས་ཀྱི་སྒྱུ་འཕྲུལ་སྔགས་སུ་ཤར་བ་སྤྲུལ་བའི་གླེགས་བམ་ལས་བྱུང་བའི་མན་ངག་འདུལ་ནག་པ་སོགས་ཀྱི་དུས་སྦས་ཆོས་སུ་མཛད་ཀྱང། རྒྱུད་ཆེན་སངས་རྒྱས་རྒྱ་མཚོས་ཁྱབ་བརྡལ་དུ་སྤེལ་བ་ཡིན་ལ། དེའང་རྗེ་བླ་མ་ནི་ལྷོ་བྲག་གྲུབ་ཆེན་གྱིས་བྱམས་མགོན་དུ་གཟིགས་ཤིང་ཕྱག་ན་རྡོ་རྗེས་དེ་ལྟར་ལུང་བསྟན་པ་དང། རྗེས་འཇུག་སྔགས་དང་དབུ་མའི་ལྟ་བ་ལ་ཟུང་འབྲེལ་དུ་སློབ་པའི་དབང་པོ་རྣོ་ཤོས་རྣམས་རྨད་བྱུང་བཀོད་པ་སོགས་སུ་སྨོན་པ་གཙོ་བོར་བྱེད་ཀྱང། གཞི་ཚུལ་ཁྲིམས་རྣམ་པར་དག་པ་དང་བྱམས་སྙིང་རྗེ་སོགས་ལ་རྩལ་དུ་འདོན་པའི་བཀའ་གདམས་ཀྱི་རྣམ་ཐར་འཛིན་པ་བྱིངས་ཀྱིས་རྒྱུ་དེ་དང་མཐུན་པར་དགའ་ལྡན་དུ་སྐྱེ་བ་གཙོ་བོར་བྱེད་དགོས་པའི་རྟེན་འབྲེལ་གྱིས་དགོན་པའི་མིང་དགའ་ལྡན་དུ་བཏགས་ཤིང། དེ་གྲུབ་མཐའ་སྤྱི་ལའང་ཐོགས་པ་

― GTD003_Page_0673 ―

^{[མ་དཔེ་གཟིགས་ན་འདིར་གནོན།]}

[Full Size]

མདོའི་ལུང་བསྟན་དང་མཐུན་ནོ། །བཀའ་གདམས་གོང་མ་རྣམས་ཀྱང་ཇོ་བོ་ཡབ་སྲས་དགའ་ལྡན་དུ་བཞུགས་ཡོད་པས་དེར་སྨོན་པ་མཛད་ཚུལ་གྱི་ལོ་རྒྱུས་མང་བ་ལྟར་ན་དེ་དག་ལའང་དགའ་ལྡན་པ་ཟེར་དགོས་པའི་ཚོད་དུ་ཡོད་པས། བཀའ་གདམས་གླེགས་བམ་དུ་ཡན་ལག་གི་མིང་དེ་མ་མོ་ལ་བཏགས་ན་ལེགས་གསུངས་ཏེ། ཡན་ལག་ནི་བཀའ་གདམས་ཕྱི་མ་དང། མ་མོ་བཀའ་གདམས་སྔ་མ་ལ་བྱེད་དགོས་སོ། །དེས་ན་འདི་ཉིད་ཉམས་སུ་ལེན་པར་འདོད་པས་འདིའི་གཞུང་ལྟར་གྱི་ཞིང་བཀོད་དམ། རྗེ་བླ་མའི་སྐུ་བརྙན་བྲིས་འབུར་ཅི་རིགས་སོགས་བཀྲམ་པའི་མདུན་དུ་མཆོད་པ་གཙང་མར་བཤམ། སྤྱོད་ལམ་ཚུལ་མཐུན་གྱིས་འཁོད། རང་རྒྱུད་ལ་ལེགས་པར་བརྟགས་ཏེ་ཀུན་སློང་རྣམ་པར་དག་པ་གལ་ཆེ་ལ། དེའང་བཱ་ལ་ཧའི་རྟོགས་བརྗོད་ལྟར་ཚེ་འདིའི་ལུས་ལོངས་སྤྱོད་ལ་ཆགས་པ་ནི་དག་པའི་ཞིང་དུ་བགྲོད་པའི་གེགས་ཀྱི་གཙོ་བོ་བྱ་འཕུར་བའི་གཤོག་པར་རྡོ་བཏགས་པ་ལྟ་བུ་ཡིན་པས་མནོག་ཆུང་ཞིང་སྡིག་པ་དུ་མའི་རྒྱུར་འགྱུར་བ་དང་མི་རིང་བར་འདོར་དགོས་པའི་ཚུལ་བསམས་ཏེ་ཞེན་པ་བཅད། ཞིང་གི་ཡོན་ཏན་མཐོང་སྟེ་དེར་སྐྱེ་འདོད་ཀྱི་འདུན་པ་སྦྱོང་བ་ནི་ཞིང་སྦྱོང་བའི་རྒྱལ་སྲས་ཀྱི་སྤྱོད་པ་ཁྱད་པར་ཅན་ཡིན་ལ། ཁྱད་པར་དུ་ཞིང་དེར་སྐྱེ་བའི་རྒྱུ་མེད་མི་རུང་ཡིན་པས་ཡིད་འཁུལ་བ་དགོས་སོ། །དེའང་ཞིང་གི་སྤྱི་མ་ཤར་བར་མི་འབྱུང་བས་འཇིག་

― GTD003_Page_0674 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་སྤྱིའི་ཆགས་ཚུལ་མངོན་པ་གོང་འོག་ལྟར་དང། ཁྱད་པར་ས་བླའི་གནས་འཐབ་བྲལ་གྱི་སྟེང་དུ་དགའ་ལྡན་ཡོད་ཚུལ། དེའི་ཕྱོགས་གཅིག་ན་གྲོང་ལས་དགོན་པའི་ཚུལ་དུ་བྱམས་མགོན་གྱི་ཞིང་ཁམས། དབུས་སུ་ཕོ་བྲང་རྒྱལ་མཚན་མཐོན་པོ། མདུན་ན་ཆོས་སྟོན་པའི་གནས་ཡིད་དགའ་ཆོས་འཛིན། དེར་སེང་གེའི་ཁྲི་ལ་རྗེ་བཙུན་བྱམས་མགོན་བཟང་པོའི་བཞུགས་སྟངས་མཛད་ཅིང་ནམ་མཁའ་དྲི་མ་མེད་པ་དང་སྲས་འཇམ་དཔལ་སྙིང་པོ་སོགས་འཁོར་ཚོགས་གྲངས་མེད་པ་ལ་ཆོས་སྟོན་བཞིན་པར་བཞུགས་པ་སོགས་དག་པའི་ཞིང་གི་སྣོད་བཅུད་ཀྱི་འབྱོར་པ་ཕུན་སུམ་ཚོགས་པ་སྤྱི་འགྲོའི་བཀོད་པ་མདོ་སྡེ་རྣམས་ལས་ཇི་ལྟར་འབྱུང་བ་བཞིན་བསམས་ཏེ་མ་བརྗེད་པའི་དྲན་པས་གང་དུ་འགྲོའང་གནས་དེར་འགྲོ་བ་ཡིན་སྙམ་པ་དང། གནས་ལུས་ལོངས་སྤྱོད་ཀུན་ཀྱང་ཞིང་དེའི་ཁྱད་པར་དུ་བལྟ་བ། མཚན་མོ་མགོ་བྱང་དུ་བལྟས་ཏེ་ཉལ་བའི་ཚེའང་བྱམས་མགོན་གྱི་ཞབས་ལ་མགོ་གཏད་དེ་རང་སེམས་དེའི་ཐུགས་དང་དབྱེར་མེད་དུ་བསྲེས་པའི་ངང་ནས་གཉིད་དུ་འགྲོ་བ་སོགས་བྱས་ན་དགོས་པ་སྔ་མའི་སྟེང་སྔགས་ཀྱི་ཐེག་པའི་སྨིན་བྱེད་དང་འཕོ་བའི་སྦྱོང་ཐབས་སུའང་འགྱུར་རོ། །དེ་ལྟར་ཡུན་དུ་གོམས་པས་བློ་དེའི་ངོར་ཧྲིལ་གྱིས་འགྲོ་བ་ཞིག་བྱས་ན་ཐུན་ལ་འཇུག་ཁར་གསལ་ཐེབས་སླ་ཞིང་དགེ་རྩ་ཀུན་དེས་ཟིན་པ་འབྱུང་ངོ་། །ཐུན་ལ་འཇུག་ཁར་མདུན་དུ་པད་སྡོང་ཡངས་ཤིང་རྒྱ་ཆེ་བའི་ལྟེ་བར་རང་གི་རྩ་བའི་བླ་མ་དང་དབྱེར་མེད་ཀྱི་རྗེ་ཡབ་སྲས་གསུམ་ལ་སྐྱབས་ཡུལ་མ་ཚང་བ་མེད་པས་བསྐོར་བ་དང། རང་གི་མཐར་ཕ་མ་རིགས་དྲུག་གི་འགྲོ་བ་ཀུན་ཚོགས་

― GTD003_Page_0675 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བསམས་ལ། འཁོར་བ་སྤྱི་བྱེ་བྲག་གི་སྡུག་བསྔལ་བསམས་ནས་འཇིགས་ཤིང་སྐྲག་པ་དང། དཀོན་མཆོག་ལ་དེ་ལས་སྐྱོབ་པའི་ནུས་པ་ཡོད་ཚུལ་གྱི་ཡོན་ཏན་བསམས་ཏེ་སྐྱབས་འགྲོ་གང་མང་དང། རང་གིས་བླ་མ་ལྷའི་གོ་འཕང་མངོན་དུ་བྱས་ཏེ་མ་རྒན་རྣམས་སྒྲོལ་བར་འདོད་པའི་སེམས་བསྐྱེད་ཤུགས་དྲག་པོ་ཚད་མེད་བཞིའི་ཚུལ་གྱིས་བསྒོམ། དངོས་གཞི་ལ་སྤྱན་འདྲེན་པ། ཚོགས་གསོག་པ། གསོལ་བ་འདེབས་པ་གསུམ་ལས། དང་པོ་ནི་དགའ་ལྡན་ལྷ་བརྒྱའི་ཞེས་སོགས་ཚིགས་བཅད་བརྗོད་པ་ན་བྱམས་མགོན་གྱི་ཐུགས་མཚན་དཔལ་གྱི་བེའུ་ཁྲ་སེང་ངེ་བའི་ནང་ནས་རྗེ་ཡབ་སྲས་གསུམ་ཀ་སྤྲིན་དཀར་པོ་ཞིག་ཐོལ་གྱིས་བྱུང་བའི་སྟེང་དུ་བཞུགས་ཏེ་ཡུད་ཀྱིས་བྱོན་པར་མོས། སྤྱིར་ཆོས་གཟུགས་ཀྱི་སྐུས་ཀུན་ཏུ་ཁྱབ་པས་མོས་པའི་རྐྱེན་ཙམ་ལས་འགྲོ་འོང་ལ་མ་ལྟོས་པ་དུས་ཀྱི་ཁམས་ལྟ་བུ་དང། མེ་ལོང་དྭངས་པ་ཟླ་བར་བསྟན་པས་སྐད་ཅིག་དེ་ཉིད་ལ་ནང་དུ་འཆར་བ་ཐེ་ཚོམ་མེད་པ་ལྟར་རང་གིས་མོས་པ་བྱས་ཙམ་ན་བྱོན་ཡོད་པ་ཐེ་ཚོམ་མེད་སྙམ་དུ་ཐག་ཆོད་པ་ཞིག་བློ་འཁུལ་བ་ལ་མེད་མི་རུང་ཡིན་ནོ། །འོན་ཀྱང་འདི་ལྟར་སྤྱན་འདྲེན་པའང་ལོངས་སྐུ་ལས་གཟུགས་སྐུར་བཞེངས་པ་དང། སྟོང་པ་བདེ་བར་ཤར་བའི་ཆུ་འཛིན་དང་རླུང་གི་ཉེར་ལེན་ལས་ལྷའི་སྐུར་ལྡང་ཞིང་འགྲོ་བའི་དོན་དུ་འབྱོན་པའི་རྟེན་འབྲེལ་དུ་འགྱུར་ལ་དེའི་སྨིན་བྱེད་ཀྱི་རྒྱུར་ཡང་གཞོལ་བ་ཡིན་ནོ། །གཉིས་པ་ཚོགས་གསོག་པ་ནི་ཡན་ལག་བདུན་ལས། དང་པོར་ནད་པ་ཉམ་ཐག་སྨན་པ་ལ་གདུང་བ་ལྟར་ལེགས་ཚོགས་ཀུན་གྱི་རྩ་བ་བླ་མ་ཁོ་ནར་ཐུག་པ་ཤེས་ནས་དེ་དང་མི་

― GTD003_Page_0676 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲལ་བ་ཁོ་ན་གལ་ཆེ་བར་མཐོང་བའི་ཤུགས་ཀྱིས་མྱ་ངན་ལས་མི་འདའ་བར་གསོལ་བ་འདེབས་པ་སྔོན་དུ་བྱས་ཏེ། མདུན་གྱི་ནམ་མཁར་ཞེས་སོགས་བརྗོད་ཅིང། སྨིན་མཚམས་མདའ་གང་གི་ཐད་ཀྱི་ནམ་མཁར་སེང་ཁྲི་པད་ཟླ་དང་བཅས་པ་ཆེ་ཆུང་གསུམ་གྱི་དབུས་མར་རྗེ་བླ་མ་སྐུ་མདོག་ཐབས་ཤེས་ཟུང་དུ་འཇུག་པའི་རང་འོད་ཀྱིས་དཀར་ལ་དམར་བའི་མདངས་ཆགས་པ། རྒྱུ་དང་འབྲས་བུའི་ཐེག་པ་དང་སྟོང་པ་དང་རྟེན་འབྱུང་གི་ཆོས་ཚུལ་ཕྱོགས་རེ་བ་མ་ཡིན་པར་ལུ་གུ་རྒྱུད་དུ་འབྲེལ་བར་སྟོན་པའི་ཆོས་ཀྱི་འཁོར་ལོའི་ཕྱག་རྒྱ་ཅན། འགྲོ་བ་རྣམས་ལ་མཉེས་གཤིན་པའི་བྱམས་པ་དང་སྙིང་རྗེ་ཨུཏྤལ་ལ་བརྟེན་ཏེ་ཡེ་ཤེས་ཀྱི་རལ་གྲིས་མི་ཤེས་པའི་འཆིང་བ་གཅོད་ལ། གླེགས་བམ་གྱིས་ཡང་དག་པའི་ལམ་བགྲོད་ཚུལ་མ་ནོར་བར་སྟོན་པ། ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་མཚོན་པའི་ཆོས་གོས་རྣམ་གསུམ་གསོལ་ཞིང། རྒྱལ་བའི་དགོངས་པ་མཐའ་དག་བསྲེགས་བཅད་བརྡར་བ་བཞིན་དཔྱད་པ་གསུམ་གྱིས་གཏན་ལ་འབེབས་པར་མཚོན་པའི་གསེར་མདོག་ཅན་གྱི་པཎ་ཞྭ་གོང་ན་མེད་པའི་ལྟ་བའི་དབྱིངས་སུ་བསྙེགས་པས་རྩེ་མོ་རྣོ་ཞིང་མཐོ་བ། སྐྱིལ་ཀྲུང་རྣམ་པ་བཞིའི་ཚུལ་གྱིས་ཟུང་འཇུག་མངོན་དུ་མཛད་པས་རྡོ་རྗེ་སྐྱིལ་མོ་ཀྲུང་གིས་བཞུགས་པ། གདུལ་བྱའི་སྐལ་བ་ཇི་ལྟ་བར་སྤྲོ་ཞིང་སྡུད་པའི་འོད་ཀྱི་དཀྱིལ་འཁོར་ཅན། དམིགས་པ་མེད་པའི་སྙིང་རྗེས་འཛུམ་པའི་ཉམས་དང་ལྡན་པ། གཡས་སུ་རྒྱལ་ཚབ་རྗེ་ཡར་བགྲེས་ཞི་དུལ་གྱི་རྣམ་པ། གཡོན་དུ་མཁས་གྲུབ་རྗེ་དར་ལ་བབ་ཅིང་མཁས་པའི་འགྱིང་བག་ཅན། གཉི་ག་ཆོས་འཆད་གླེགས་བམ། གླེགས་བམ་རྣམས་གསུང་

― GTD003_Page_0677 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་ཀུན་གྱི་རྩེ་མོ་ཤེར་མདོའམ། གནས་སྐབས་གང་ལ་ཉམས་ལེན་ལྷུར་བྱ་བ་དེར་མོས་ན་རྟེན་འབྲེལ་གྱི་ཁྱད་ཆེའོ། །ཕྱག་འཚལ་བ་ནི། ཤེས་བྱའི་ཁྱོན་ཀུན་སོགས་ཏེ། རྣམ་གྲངས་མང་པོ་ཞིག་མཁྱེན་པ་ལས་སངས་རྒྱས་སུ་བཞག་པ་མིན་གྱི། གཞི་གཅིག་ལའང་ཇི་ལྟ་ཇི་སྙེད་ཀྱི་རང་བཞིན་གཉིས་འབྱུང་བ་དེ་ཉིད་མངོན་པར་བྱང་ཆུབ་པའི་དོན་དུ་མདོ་ལས་གསུངས་པས། སངས་རྒྱས་ཉག་ཅིག་གི་མ་འདྲེས་པའི་ཆོས་ཡིན་ནོ། །སྟོན་པ་པོ་ཆོས་ཀྱི་མངའ་བདག་ཏུ་གྱུར་ཀྱང་གདུལ་བྱའི་སྐལ་བ་གཙོ་ཆེ་བས། མདོ་སྔགས་ཟུང་དུ་འཇུག་པ་རྒྱལ་བའི་དགོངས་པ་ཡོངས་སུ་རྫོགས་པ་ལ་སྤྱོད་པའི་གདུལ་བྱ་བློ་མཆོག་རྣམས་དང་སྣོད་བཅུད་འཚམ་པས་རྣ་བའི་རྒྱན་དུ་གྱུར་པ་གསུང་གི་ཡོན་ཏན། སྒོ་གང་ནས་ཀྱང་ཞུམ་པར་མི་འགྱུར་བ་གྲགས་པའི་གཟི་བྱིན་གྱིས་ཀུན་ལས་མངོན་པར་འཕགས་པ་སྐུའི་ཡོན་ཏན་ཏེ། འདིའི་གོ་རིམ་ནི་མགོན་པོ་འཇམ་དབྱངས་རྒྱལ་བ་ཀུན་གྱི་ཐུགས་ཡེ་ཤེས་ཀྱི་ངོ་བོར་གྱུར་པའི་ཆ་ནས་དེ་གཅོ་བོར་བྱས་ཏེ། འཇམ་དཔལ་གཤིན་རྗེའི་གཤེད་ལའང་ཐུགས་ཀྱི་མཆོད་པ་སྔོན་དུ་བྱས་པ་དང་ཐུགས་རྡོ་རྗེའི་ལྷ་ཚོགས་སྔར་བསྟིམ་པ་བཞིན་ཏེ། བྱིན་རླབས་འཇུག་པའང་ཆོས་དོན་རྟོགས་ཤིང་དེའི་འཆད་པ་སོགས་ལ་དབང་འབྱོར་བ་དང་དེ་ལས་གཟི་བྱིན་རྒྱས་པར་འགྱུར་རོ། །དེ་གསུམ་ནི་ཆོས་ཀྱི་སྐུས་རབ་ཏུ་ཕྱེ་བས་མས་རིམ་བཞིན་མཐོང་ཐོས་དྲན་པ་དོན་ལྡན་དུ་འགྱུར་ཏེ། དེ་ལྟར་སེམས་པ་དང་སྒོ་གསུམ་གྱི་ཕྱག་གིས་རྡོ་རྗེ་གསུམ་ཡང་འགྲུབ་པར་འགྱུར་རོ། །ཡིད་འོང་མཆོད་ཡོན་སོགས་ཀྱིས་མཆོད་པ་དངོས་སུ་

― GTD003_Page_0678 ―

^{[མ་དཔེ་གཟིགས་ན་འདིར་གནོན།]}

[Full Size]

བཤམས་ཤིང་ཡིད་ཀྱིས་སྤྲུལ་པ་བླ་ན་མེད་པ་ནམ་མཁའི་མཐས་གཏུགས་པ་དང། ཀུན་ཏུ་བཟང་པོར་སྤྲུལ་ཞིང་དེའི་སྨོན་པའི་མཐུ་ལས་བྱུང་བ། ཀུན་ཏུ་བཟང་པོའི་སེམས་ཀྱིས་ཟིན་པའི་མཆོད་པའི་སྤྲིན་འཁོར་གསུམ་ཡོངས་སུ་དག་པ་དབུལ་ཞིང་། འདིའི་མན་ངག་ཐུན་མོང་མ་ཡིན་པ་ནི་བླ་མ་ཐུབ་དབང་རྡོ་རྗེ་འཆང་ཞེས་སེམས་དཔའ་སུམ་བརྩེགས་སུ་བསམས་པ་ལ་མཆོད་པའང་ཀུན་ཏུ་བཟང་པོ་བདེ་སྟོང་དབྱེར་མི་ཕྱེད་པའི་བདག་ཉིད་ཕྱི་ནང་གསང་བ་དེ་ཁོ་ན་ཉིད་བཞི་ཆར་གྱི་མཆོད་པ་ཕུལ་ནས་དབང་ལམ་འབྲས་བུའི་རྟེན་འབྲེལ་ཀུན་འགྲིགས་ཤིང་དམ་ཚིག་མཆོག་ཏུ་འགྱུར་རོ། །གང་ཞིག་ཐོག་མེད་སོགས་ཀྱིས་བཤགས་པ་བྱ་སྟེ། མི་བཅུས་དུག་ཟོས་པ་རིམ་པར་ལྡང་བ་ན་འགའ་འང་སྡོད་མི་ཚུགས་པ་བཞིན། མནར་མེད་སོགས་སུ་རང་དང་མཚུངས་པར་སྤྱོད་པ་དུ་མས་གཟིར་བའི་ཚུལ་དང་སྲོག་དབུགས་ཀྱི་འགྱུ་བ་མི་བརྟན་པའི་རང་བཞིན། ཐོག་མེད་ནས་སྡིག་པའི་སྒོ་མཐའ་ཡས་པས་སྣ་རེ་རེ་ལའང་རྒྱལ་པོའི་མཛོད་དུ་བལྟས་པ་བཞིན་བསྐལ་པ་ཀུན་ཏུ་དེ་ཁོ་ན་བསགས་པ་ལྟར་ཡོད་ཚུལ། དེའི་ཀློང་ནས་བདེ་འགྲོར་སླེབ་ཚུལ་མེད་པ་ལ་ཇི་ལྟར་ཕྱིན་སྙམ་དགྲ་མི་ཤ་བོས་བདས་པ་ལྟར་འཇིགས་སྐྲག་དང་འགྱོད་པ་དྲག་པོས་ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྒོ་ནས་ཞིང་ཁྱད་པར་ཅན་མདུན་ན་བཞུགས་པའི་མཐུ་ཁོ་ནས་སྦྱོང་དགོས་པར་འདུག་སྙམ་སྟེ་བཤགས་ཤིང། ཁྱད་པར་དུ་སྡོམ་པ་གསུམ་དང་འགལ་བའི་ཉེས་པ་ནི་སྡིག་པ་དང་ལྟུང་བའི་སྒོ་གཉིས་ནས་རྣམ་སྨིན་མི་བཟད་ཅིང་ལམ་གྱི་རྟོགས་པ་ཕྱིར་བསྲིང་བར་བྱེད་པས་ཉེས་པའི་གཏིང་རྡོར་བསམས་ཏེ་བཤགས་

― GTD003_Page_0679 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིང། གཉེན་པོར་ཡིད་མི་ཆེས་པའང་ལོག་པར་ལྟ་བ་ཡིན་པས་ཞིང་གི་མཐུས་ལྷག་མེད་དུ་དག་སོང་སྙམ་དུ་ཡིད་ཆེས་དང་དགའ་བ་སྐྱེད་ལ། སྡིག་ལྟུང་མི་དམིགས་པར་ལྟ་བའང་སྦྱོང་བའི་ཐབས་ཀྱི་མཆོག་ཏུ་མདོ་ལས་གསུངས་སོ། །ཐུགས་ཀའི་རྡོ་རྗེ་འཆང་དེ་ཉིད་ཞི་བ་རྡོ་རྗེ་སེམས་དཔའ་འགྲོ་བ་སྙེད་དུ་བསྒྱུར་ཏེ་སྤྱི་བོར་བྱོན་པའི་སྦྱོར་མཚམས་ནས་བབས་པའི་བདུད་རྩིའི་རྒྱུན་གྱིས་རིམ་པས་སྒྲིབ་བཞི་དག་ཅིང་ལམ་གྱི་ནུས་པ་འཇོག་པ་དང། སྒྲིབ་པ་མ་ལུས་པར་བྱང་བ་དང་ཡོན་ཏན་རྫོགས་པ་སྲང་མདའི་མཐོ་དམན་བཞིན་ལྷན་ཅིག་པས་སྐུ་བཞི་ཐོབ་པར་མོས་ཏེ་སྔགས་སྡོམ་གསོ་བའི་ཐབས་མཆོག་ཏུ་འགྱུར་རོ། །འདིར་སྔགས་སྡོམ་གསོ་བ་གསུངས་པ་འདིས་སྐབས་གཞན་རྣམས་ཀྱང་སྔགས་དང་འབྲེལ་བ་མཚོན་དགོས་སོ། །རྗེས་སུ་ཡི་རང་བ་ནི། སྙིགས་མའི་དུས་འདིར་ཞེས་སོགས་ཏེ། མི་དགེ་བའི་རྩ་བ་ཅན་གྱི་ཆོས་བརྒྱད་ནི་ལྟ་ཅི་སྨོས་ལ། རང་གཅེས་འཛིན་དང་བཅས་པའི་ཆོས་བརྒྱད་ཁྲ་བོའང་མེད་ཅིང། དངོས་པོར་ཞེན་པའི་བག་ཆགས་ཀྱི་གནས་མེད་པས་ཐ་ན་ཆོས་བརྒྱད་དཀར་པོའང་སྤངས་ཏེ་མཐུན་སྣང་དུའང་ཐོས་བསམ་སྒོམ་གསུམ་གཅིག་ཏུ་དྲིལ་བ་དང། དེ་ཐམས་ཅད་ཀ་རཱི་ཀ་ནས་འདུས་པའི་བར་ལུང་རྟོགས་ཀྱི་བསྟན་པ་མཐའ་དག་ལ་ཕན་པ་མ་ཚང་བ་མེད་པར་འགྱུར་བས་རླབས་ཆེ་བ། གང་ལ་ལྟོས་ན་གཞན་མཐའ་དག་ཕྱོགས་རེ་བ་ཁོ་ནར་འགྲོ་བ་དེ་ལྟ་བུའི་ཚུལ་ལ་རྣམ་པར་ཐར་པ་ཐུན་མོང་མ་ཡིན་པར་ཤེས་པར་རྗེས་སུ་ཡི་རང་བ་སྟེ། འགྲོ་བའང་ལྗོངས་འདི་ཙམ་མ་ཡིན་པར་

― GTD003_Page_0680 ―

^{[མ་དཔེ་གཟིགས་ན་འདིར་གནོན།]}

[Full Size]

ཤམྦྷ་ལ་དང་འགྲོ་ལྡིང་བ་སོགས་སུ་སྤྱོད་པ་མཐའ་ཡས་པར་སྟོན་ལ། ནམ་མཁའི་མཐས་གཏུགས་པར་འགྲོ་བའི་དོན་སྤྱོད་པའི་ཚུལ་ཡང་གསུང་ལས་འབྱུང་བ་ལྟར་རོ། །ཆོས་འཁོར་བསྐོར་བར་བསྐུལ་བ་ནི། རྗེ་བཙུན་བླ་མ་སོགས་ཏེ། ཆོས་སྐུའི་ནམ་མཁར་བདག་པོའི་རྐྱེན་མཁྱེན་བརྩེའི་ཆུ་འཛིན་འཁྲིགས་པ་ལས་སོ་སོའི་སྐལ་བ་བཞིན་ཆོས་ཆར་ཕབ་སྟེ་རིང་ནས་དམ་བཅས་པའི་དགོས་པ་སྒྲུབ་པར་གསོལ་ཞིང། ཡང་སྒྲིབ་པ་མ་ལུས་པར་དག་པ་ཆོས་ཀྱི་སྐུའི་དབྱིངས་སུ་མཁྱེན་པ་སྟོང་པའི་ཡེ་ཤེས་དང་བརྩེ་བ་བདེ་ཆེན་གྱི་ཐབས་དབྱེར་མི་ཕྱེད་པ་ཆུ་འཛིན་གྱི་ཕུང་པོ་བཞིན་དཀྱིལ་འཁོར་གྱི་འཁོར་ལོ་མཐའ་ཡས་པར་དཀྲིགས་པའི་ཀློང་དུ་གདུལ་བྱ་དབང་གིས་སྨིན་པར་བྱེད་ཅིང། ཟབ་པ་མཚན་མ་མེད་པ་དང་རྒྱ་ཆེ་བ་ལྷའི་འཁོར་ལོར་གསལ་བའམ། ཟག་པ་བཅོས་མིན་གྱི་རྫོགས་པའི་རིམ་པ་དང། ཐབས་རྒྱ་ཆེ་བ་སྟོན་པའི་གཟུགས་ཅན་བསྐྱེད་པའི་རིམ་པ། ཡང་ན་ཟབ་པ་འོད་གསལ་གྱི་ཡེ་ཤེས་དང། རྒྱ་ཆེ་བ་སྒྱུ་མའི་སྐུ་ཟུང་དུ་འཇུག་པ་དང་བཅས་པའི་གདམས་པའི་ཆར་གྱིས་སྲིད་པའི་རྩ་བ་གཉིས་ཀྱི་ཚ་གདུང་དང་དབུལ་བ་སེལ་བར་གསོལ་བ་གདབ་བོ། །གསེར་གྱི་འཁོར་ལོ་རྩིབས་སྟོང་སོགས་ཕུལ་ཏེ་གསོལ་བ་བཏབ་པར་མོས་ལ་ཚངས་པའི་གཟུགས་སུ་མོས་ཀྱང་རུང་སྟེ། སྐུལ་བ་པོ་དང་སྡུད་པ་པོར་སྟོན་པའི་རྐྱེན་འབྲེལ་དུའང་འགྱུར་རོ། །བསྔོ་བ་ནི། བདག་གིས་ཇི་སྙེད་སོགས་ཏེ། དགེ་ཚོགས་ཆུད་མི་ཟ་ཞིང་ཁྱད་པར་བྱང་ཆུབ་མཆོག་གི་ཡན་ལག་ཏུ་སྒྱུར་བྱེད་བསྔོ་བ་ཡིན་པས་ནང་པའི་བསྟན་པ་དང་ཐེག་ཆེན་གྱི་ཁྱད་ཆོས་སུའང་གསུངས་སོ། །བསྔོ་བའི་སྡོམས་ཆེན་

― GTD003_Page_0681 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་དམ་ཆོས་འཛིན་པར་བསྔོ་བ་ཡིན་ལ། འདིར་དེའི་ནང་ནས་ཀྱང་བསྐལ་པ་དཔག་མེད་དུ་དམ་བཅས་པ་བཞིན་རྒྱུ་འབྲས་ཀྱི་ཐེག་པ་ཟུང་དུ་འཇུག་པའི་ཆོས་ཚུལ་སྙིང་པོའི་དོན་ཆ་ཚང་བ་འདི་ཉིད་རྒྱས་པར་སྨོན་པ་ཡིན་ཏེ། ད་ལྟ་ཉིད་ནས་ཀྱང་བཀོད་པ་མཐའ་ཡས་པས་ཞིང་རབ་འབྱམས་སུ་འཕེལ་བར་མཛད་པ་དང། དགེ་བའི་དངོས་པོ་དེ་ལྟ་བུའི་སྒྱུ་འཕྲུལ་སྣ་ཚོགས་སུ་སྣང་བར་མོས་པའང་ཐབས་མཁས་ཀྱི་སྒོ་བླ་ན་མེད་པའོ། །གསོལ་བ་གདབ་པ་ནི། ཕྱི་ནང་གསང་བའི་རྣམ་ཐར་གདོན་ཞིང་གསོལ་བ་གདབ་པ་དང། མཚན་སྔགས་བཟླས་ཏེ་གསོལ་བ་གདབ་པ་སོགས་ལས། འདིར་དམིགས་བརྩེ་མའི་སྒོ་ནས་གཙོ་བོར་བྱེད་ན། མཁྱེན་བརྩེ་ནུས་གསུམ་ལ་འཕགས་པ་རིགས་གསུམ་ཆེས་ལྷག་པ་བཞིན། གངས་ཅན་མཁས་པ་ཀུན་ལས་ཆེས་ལྷག་པར་མཚུངས་ཆོས་སྦྱར་བ་ཕྱི་དང་། དེ་གསུམ་གྱི་མཁྱེན་བརྩེ་ནུས་གསུམ་ཇི་ལྟ་བ་ཐུགས་ལ་ལྡན་པར་བལྟ་བ་ནང་དང། དེ་གསུམ་ངོ་བོ་གཅིག་པར་སྒྲུབ་པའི་གླེགས་བམ་གྱི་ལུང་དང་གསང་རྣམ་གྱི་ལོ་རྒྱུས། འགྲོ་བའི་སྐྱབས་སུ་གྱུར་པའི་རྒྱུའི་གཙོ་བོ་གསུམ་ཡ་མི་འབྲལ་བའི་རིགས་པས་ཀྱང་དེ་གསུམ་དང་ངོ་བོ་དབྱེར་མི་ཕྱེད་པར་བལྟ་བ་གསང་བ་སྟེ། དེ་ལའང་རྒྱུད་སོ་སོ་རིགས་གསུམ་གྱི་དབྱེ་བས་ནང་གསེས་ཀྱི་ཕྱི་ནང་གསང་བའི་སྒྲུབ་ཚུལ་གྱི་རིམ་པ་མཐའ་ཡས་པར་འབྱུང་ངོ་། །དེ་ལ་བརྟེན་པའི་ལས་སྦྱོར་ཡང་ཆེས་མང་བ་སྔར་སྙན་བརྒྱུད་དུ་འབྱུང་ལ། ད་ལྟའང་ལས་ཚོགས་ཐོར་བུ་འགའ་ཙམ་ཡོད་ཀྱང་འདིར་བཀའ་བབ་ཀྱི་འཕྲིན་ལས་ཆོས་རབ་

― GTD003_Page_0682 ―

^{[མ་དཔེ་གཟིགས་ན་འདིར་གནོན།]}

[Full Size]

ཏུ་རྣམ་འབྱེད་ཀྱི་ཤེས་རབ་སྒྲུབ་པ་གཙོ་བོའི་དབང་དུ་བྱས་ཏེ། མ་དག་འཁྲུད་ཅིང་མི་ཤེས་བསལ། །སྐུ་ཡིས་ཆེ་ཞིང་གསུང་གིས་གསལ། །ས་བོན་མྱུར་བ་ཕྱག་མཚན་ཟབ། །གླེགས་བམ་རལ་གྲི་གླེགས་རལ་གྱིས། །འཆད་དང་རྩོད་དང་རྩོམ་པ་འོ། །ཞེས་པ་ལྟར་ལ། འགའ་ཞིག་ཏུ་མ་དག་པ་འཁྲུད་པ་སྦྱོར་བ་དང། མི་ཤེས་པ་བསལ་བ་དངོས་གཞིར་བྱས་ཏེ་ཕྱི་མ་བདུན་དེའི་དབྱེ་བ་མཛད་པ་དང། ལ་ལར་བདུད་རྩི་འོད་ཟེར་དང་བཅས་པས་མ་དག་པ་བཀྲུས་ཏེ་གསལ་སང་ངེར་གྱུར་པར་བསྒོམས་པས་དང་པོ་གཉིས་དམིགས་སྐོར་གཅིག་ཏུ་མཛད་ཀྱང། དགོངས་པའི་མཐིལ་ནི་ལས་དང་པོ་བས་མ་དག་པ་བཀྲུས་ཏེ་ཕྱིར་འདོན་པའི་དམིགས་པ་གཙོ་བོ་དང། རྟོགས་པ་གོང་མར་གཞོལ་བ་རྣམས་སྒྲོན་མེས་མུན་པ་བསལ་བ་བཞིན་རང་སར་དག་པ་གཙོ་བོར་བྱ་ལ། ལོག་རྟོག་གི་དྲ་བ་སྐྲ་ཤད་ལྟ་བུ་རྣམས་ཕྱེ་མར་འཐག་སྟེ་མ་རིག་པ་གཅོད་པ་ཞེས་གསུམ་དུ་མཛད་དོ། །སྒོམ་ཚུལ་དངོས་ནི་ཡབ་སྲས་གསུམ་ཀའི་ཐུགས་ཀ་ནས་འོད་ཀྱི་སྦུ་གུ་སྦ་ལྕག་ཙམ་པ་གསུམ་ཐོན་པ་མཚམས་ཤིག་ནས་གཅིག་ཏུ་འདྲེས་ཏེ་རང་གི་སྤྱི་བོར་ཞུགས། དེ་བརྒྱུད་དེ་བདུད་རྩི་འོད་ཟེར་དང་བཅས་པའི་རྒྱུན་བྱུང་བས་དངོས་གཞིའི་རྟོགས་པ་དེ་དང་དེའི་གེགས་བྱེད་ཀྱི་བློ་ངན་རྣམས་གཙོ་བོར་སྦྱངས་པའི་དམིགས་པ་བྱ། ཞི་བ་དཀར་པོ་པད་དཀར་འཛིན། །མཆོག་སྦྱིན་སྐྱབས་སྦྱིན་ཕྱག་རྒྱ་ཅན། །བུམ་ཆུ་མེ་ལོང་ལ་སོགས་ཏེ། །ཞེས་སོགས་རྡོ་རྗེའི་ཚིག་སྦྲམ་བཞིན་ཁ་དོག་སོགས་ཀྱི་དབྱེ་བས་ལས་བཞི་སྒྲུབ་ཚུལ་དང། མར་ཁུའི་མདོག་དང་དཀར་སྔོན་བསིལ་དྲོད་སོགས་ཀྱི་མོས་པས་རླུང་མཁྲིས་

― GTD003_Page_0683 ―

^{[མ་དཔེ་གཟིགས་ན་འདིར་གནོན།]}

[Full Size]

བད་ཀན་གྱི་ནད་སེལ་བ་སོགས་དགོས་པ་དུ་མ་ཞར་བྱུང་དུ་སྒྲུབ་ནུས་སོ། །དངོས་གཞིའི་ཚེ་བདུད་རྩིའི་ཚོགས་པའི་རྡུལ་ཕྲ་རབ་ཚུན་ཆད་འཇམ་དབྱངས་ཞི་ཁྲོ་དང་རྗེ་བླ་མའི་སྐུ། དེ་དག་གི་སྔགས་དང་གསོལ་འདེབས་ཀྱི་སྙིང་པོ། དྷཱིཿ ཧཱུཾ་སོགས་ས་བོན་དང། ཁྱད་པར་དུ་འཇམ་དཔལ་རྩ་རྒྱུད་ལས་ལུང་བསྟན་པ་བཞིན་གྱི་མ་ལ་ཐིག་ལེས་བརྒྱན་ཏེ་ཧཱུཾ་གི་ཀླད་ཀོར་དུ་འགོད་པ་ཐུན་མོང་མ་ཡིན་པའི་མན་ངག་གི་ས་བོན་ཡིན་ལ། དེའི་མཐར་དམིགས་བརྩེ་མ་སོགས་ཀྱིས་བསྐོར་བ་ལས་འོད་ཀྱི་སྤྲོ་བསྡུས་སྣོད་བཅུད་སྒྱུར་སྦྱང་སོགས་སྔགས་ཀྱི་བཟླས་པ་ཇི་ལྟ་བ་བཞིན་བྱས་ན་ལེགས། ཕྱག་མཚན་ནི་གླེགས་རལ་གྲི་གུག་སོགས་དང། འཆད་པའི་དུས་ཀྱི་གླེགས་བམ་ནི་གང་བཤད་བྱ་དེ་ཉིད་ཀྱི་རྩ་འགྲེལ་སོགས་གཙོ་བོར་བྱ། རལ་གྲི་ཆིག་རྐྱང་ངམ་གྱེན་འགྲེང་གི་ཡུ་བའི་སྒོ་ངར་རལ་གྲི་དྲུག་སོགས་ཀྱི་རྩ་བ་ཟུག་པའི་འཁོར་ལོ་མུ་ཁྱུད་མེད་པ་བྱ། ཕྱིར་སྤྲོས་ཏེ་ཕྱིར་རྒོལ་གྱི་ལོག་རྟོག་གཅོད་པའམ་སྤོབས་པ་གཞོམ་པའི་དམིགས་པ་ཞི་དྲག་དགོས་པ་དང་སྦྱོར་ཚུལ་ཤེས་དགོས། བརྩམ་བྱའི་དོན་ལ་རྨོངས་པ་རལ་གྲིས་བཅད་དེ། ཚིག་དོན་ཕུན་སུམ་ཚོགས་པའི་སྤོབས་པ་གླེགས་བམ་གྱིས་བསྐྱེད་པར་མོས་པ་སྟེ། སྐབས་ཐོབ་ཀྱིས་རེ་རེ་གཙོ་བོར་བྱས་པས་ཆོག་གི །བདུན་ཀ་མཐར་ཆགས་སུ་དགོས་པའི་ངེས་པ་མེད་དོ། །འོད་ཀྱི་སྤྲོ་བསྡུ་ཙམ་ཞིག་ཤེར་ཕྱིན་གྱི་གླེང་གཞིར་ཡང་འབྱུང་བས་བདུད་རྩི་འབེབས་སྦྱང་ནི་སྔགས་ཀྱི་ལུགས་ཡིན་ལ། འདིས་ཐུན་མོང་དང་ཐུན་མོང་མ་ཡིན་པའི་སྙིང་རྗེ་མཚོན་ཞིང་འགྲུབ་པ་དང་འོད་ཟེར་གྱིས་

― GTD003_Page_0684 ―

^{[མ་དཔེ་གཟིགས་ན་འདིར་གནོན།]}

[Full Size]

འོད་གསལ་འགྲུབ་ལ། གཞི་ལམ་འབྲས་བུའི་སྐབས་ཀུན་ཏུ་འབྱུང་བ་ལྔའི་ཁམས་དང་དུག་ལྔ་སྦྱོང་ཞིང། ལྡོག་པས་ཕྱེ་བའི་ཡེ་ཤེས་ལྔ་དང་རིགས་ལྔ་འགྲུབ་པ་སོགས་ཀྱི་དོན་དུ་འོད་དང་བདུད་རྩི་ཐམས་ཅད་སྣ་ལྔ་བར་བྱས་པ་ཡིན་ནོ། །རིགས་སོ་སོའི་རྣམ་པ་སྒོམ་པར་འདོད་པས་ཀྱང་གནས་གསུམ་དུ་བསམས་ལ་རང་རང་གི་ས་བོན་སྔགས་འཕྲེང་དང་བཅས་པའི་དམིགས་པ་སྐྱོང་ཞིང། རང་རང་གི་རིགས་ཞི་ཁྲོ་སྣ་ཚོགས་སུ་བསྒྱུར་བས་ལས་སྦྱོར་ཇི་སྙེད་པའང་བྱར་རུང་ངོ་། །དེ་ནས་སྲས་ཀྱི་ཐུ་བོ་གཉིས་གཙོ་བོ་ལ་བསྡུས་པ་རང་གི་སྤྱི་བོར་སྤྱན་འདྲེན། འཕོ་བ་སྦྱོང་བར་འདོད་པས་ཐུགས་ཀའི་ས་བོན་ལ་བལྟས་ཏེ་མོས་འདུན་དྲག་པོ་དང་བཅས་འོད་ཀྱི་ལྕགས་ཀྱུ་དང་རླུང་གི་མདའ་གཞུའི་སྦྱོར་བས་རང་ཉིད་གྱེན་དུ་སྦར་བ་དང་གནས་སུ་འབེབས་པ་སོགས་ཀྱི་དམིགས་པ་མཚམས་འདིར་བྱ། བྱམས་མགོན་དང་རྗེ་བླ་མ་དབྱེར་མི་ཕྱེད་པའི་ངེས་ཤེས་ཀྱིས་དེའི་ཞིང་དུ་འཕོ་འདུན་དྲག་པོས་ཐུགས་རྗེ་བསྐུལ་ཕྱིར་བྱམས་པས་དམ་བཅའི་གཟུངས་བཟླས་ན་ལེགས། དེ་ནས་དེའི་གདན་གྱི་པདྨ་སྙིང་གའི་རྩ་འདབ་དང། ཟླ་ཉིའམ་མངོན་བྱང་བཞིན་དུ་ཟླ་བ་གཅིག་པུར་ཡང་ཚང་དུ་རུང་བས་དེ་མི་ཤིགས་པའི་ཐིག་ལེ་དཀར་དམར་ལ་ཐིམ་པའི་རྒྱུ་དང་རྐྱེན་ལས་གདན་རྫོགས་པར་བསམས། དེར་དབུ་མའི་ལམ་ནས་སྤྱན་འདྲེན་པའང་སྙིང་དབུ་མའི་ཕྱི་རོལ་ཏུ་བསམས་ན་མཐར་རླུང་ཐིམ་པ་ལ་མི་ཕན་པས། དབུ་མ་ཕྲའང་ཁབ་མིག་ཏུ་རི་མཐོང་བ་ལྟར་སྙིང་དེའི་ནང་དུ་ཆུད་པ་བསྒོམ་པར་གསུང། སྙིང་གར་བྱོན་པ་རང་གི་ཤིན་ཏུ་ཕྲ་བའི་རླུང་སེམས་དང་དབྱེར་མེད་དུ་འདྲེས་པ་སྲོག་འཛིན་གྱི་

― GTD003_Page_0685 ―

^{[མ་དཔེ་གཟིགས་ན་འདིར་གནོན།]}

[Full Size]

མདོག་ཅན་དུ་བལྟ་ལ། ཕྱག་རྒྱ་ཆེན་པོ་བསྒོམ་པར་འདོད་ན་བླ་མ་སྙིང་གར་ཐིམ་པའི་ཚེ་མོས་གུས་གདུང་སེམས་ཀྱི་མཐུས་སྐོམ་པས་བདུད་རྩི་མྱང་བ་བཞིན་ངོམས་ཤིང་བདེ་ཆམ་གྱིས་འགྲོ་བ་དེའི་ངང་ལས་ཕྲ་མོའི་ཤེས་པས་སེམས་ཀྱི་རང་བཞིན་ལ་བལྟ་བ་སོགས་གཞུང་བཞིན་དུ་བྱེད། གནས་དང་དམིགས་རྟེན་གྱི་ནུས་པས་ཇི་ཙམ་བསྒོམ་པ་བཞིན་རླུང་ཐིམ་ཕུལ་ཆེ་ཞིང། དེའི་མཐུས་དགའ་བཞི་དང་སྟོང་བཞི་རིམ་པར་འཆར་བས་འོད་གསལ་མངོན་དུ་འགྱུར་ཞིང། དེ་ལས་སྒྱུ་མའི་སྐུར་ལྡང་བ་སོགས་རྫོགས་རིམ་ཟབ་མོའི་གནད་ཐམས་ཅད་ཀྱང་སྒྱུ་འཕྲུལ་འདིས་བདེ་བླག་ཏུ་འགྲུབ་ནུས་ལ། འདི་ལ་ཟབ་གནད་འདི་ལྟར་ཡོད་པ་ནི། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །ཞེས་བླ་མེད་ཀྱི་ཐུན་མོང་མ་ཡིན་པའི་ཆོས་སྐད་དང་བསྲེས་ནས་ཡོད་པ་འདི་ཉིད་ཡིན་པས་བློ་གྲོས་ཅན་རྣམས་ཀྱིས་ཞིབ་མོར་དཔྱད་ན་རྟོགས་པར་འགྱུར་རོ། །མཐར་སྙིང་གའི་པདྨ་ཟུམ་པའི་ཕྱི་རོལ་ནས་འོད་ཟེར་འཕྲེང་ཐག་དང། སྐད་གཉིས་ཅི་རིགས་པའི་དམིགས་བརྩེ་མ། འཇམ་དཔལ་ཞི་ཁྲོའི་སྔགས་སོགས་འཕྲེང་རྡོག་གི་རྣམ་པར་གནས་པས་བསྡམས་པར་བསམས། ནམ་ཡང་གཤེགས་གསོལ་མི་བྱ་བར་ཉིན་རྗེས་མ་རྣམས་སུའང་སྤྱན་འདྲེན་པ་སོགས་ཚང་བར་བྱས་པའི་མཇུག་ཏུ་སྔར་ཡོད་ལ་བསྟིམ་པས་བྱིན་རླབས་བརྟན་པར་འགྱུར་ཞིང་སྲུང་བ་ཆེན་པོར་འགྲོ་བ་དང། ལྷ་རྗེས་སུ་དྲན་པ་དང་མི་འབྲལ་བས་བག་ཡོད་པར་འགྱུར་ཞིང། ཟས་གོས་གནས་མལ་

― GTD003_Page_0686 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་གང་སྤྱད་མཆོད་པར་བསྒྱུར་བས་དཀོར་སྒྲིབ་བྱང་ཞིང་ཚོགས་རྫོགས་པ་དང། དགེ་བའི་བྱ་བ་གང་ལའང་དེས་བོགས་འབྱིན་ཞིང། མདོར་ན་ཚེ་རབས་ཀུན་ཏུ་མི་འབྲལ་བར་རྗེས་སུ་འཛིན་པས་མྱུར་བ་ལས་ཀྱང་ཆེས་མྱུར་བར་བྱང་ཆུབ་འཐོབ་ནུས་སོ། །ཀུན་ཏུ་ཁྱབ་ཅིང་གྲགས་ན་ཡང། །བལྟར་དཀའ་སེམས་ཀྱི་རྡོ་རྗེ་བཞིན། །གྱུར་པའི་ཟབ་གནད་འདི་དཀྲོལ་བ། །བསྟན་དང་འགྲོ་བའི་དཔལ་གྱུར་ཅིག །ཅེས་ཟབ་ལམ་བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་ཟབ་གནད་ཡོངས་སུ་རྫོགས་པ་ཐོ་ཙམ་དུ་བཀོད་པ་འདི་ནི་རྣམ་དཔྱོད་ཡངས་པ་ཨུ་ཅུ་མུ་ཆིན་གུ་ཤྲི་དགེ་སློང་དཀོན་མཆོག་མཁས་གྲུབ་ཀྱིས་ནན་ཆེར་བསྐུལ་ཞིང། སྔ་སོར་བསྟན་པའི་གསལ་བྱེད་ཐུ་མེད་ལོ་ཙཱ་བ་ཞབས་དྲུང་དཀོན་མཆོག་དགེ་ལེགས་རྒྱ་མཚོ་དང། མཁས་པའི་དབང་པོ་བླ་མ་དབུ་མཛད་ཚུལ་ཁྲིམས་རྒྱ་མཚོ་གཉིས་ནས་ཀྱང་སྔགས་ཀྱི་ཟབ་གནད་དང་འབྲེལ་བ་ཞིག་དགོས་ཞེས་བསྐུལ་མ་བགྱིས་ཡོད་པ་བཞིན། ༸ བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།

དགའ་ལྡན་ལྷ་བརྒྱ་མའི་གཞུང་བསྲངས་ཏེ་མདོ་སྔགས་ཉམས་སུ་ལེན་ཚུལ།

― GTD003_Page_0687 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་ལྡན་ལྷ་བརྒྱ་མའི་གཞུང་བསྲངས་ཏེ་མདོ་སྔགས་ཆ་ཚང་བར་ཉམས་སུ་ལེན་ཚུལ་དགའ་ལྡན་ཞིང་དུ་བགྲོད་པའི་ནོར་བུའི་ཐེམ་སྐས་ཞེས་བྱ་བ་བཞུགས་སོ། །

― GTD003_Page_0688 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཀུན་དེ་ཉིད་འབྱེད་པའི་བློ༷་གྲོས་ཉིན་བྱེད་འོད་ཀྱིས་གདུངས་པ་ལས། །འགྲོ་ལ་རྗེས་ཆགས་ཀུན་བཟ༷ང་ཐུགས་རྗེ་གངས་ཀྱི་རི་བོ་བཞུས་པའི་རྒྱུན། །གཟུགས་སྐུ་དབང་ཕྱུག་ཡན་ལག་བརྒྱད་ལྡན་གྲ༷གས་པ༷འི་རླབས་འཕྲེང་རོལ་བ་ཅན། །སྙིགས་མའི་འགྲོ་བ་དུག་ཅན་ཚོགས་ཀྱི་དག་བྱེད་གཅིག་པུ་དེ་ལ་འདུད། །སྲིད་ཞིའི་འཇིགས་སྒྲོལ་བླ་མ་ལྷག་པའི་ལྷ། །དངོས་གྲུབ་འདོད་པ་འཇོ་བའི་ཡི་དམ་སྟེ། །བར་གཅོད་གཡུལ་ལས་སྐྱོབ་པའི་ཆོས་སྲུང་སོགས། །སྐྱབས་ཀྱི་དམ་པ་མཐའ་དག་གཅིག་གྱུར་པ། །མགོན་པོ་འདི་ཡི་ཐུགས་རྗེ་གྲུ་གཟིངས་ལ། །བརྟེན་ནས་སྲིད་ཞིའི་རྒུད་པའི་རྒྱ་མཚོ་ལས། །བརྒལ་ཏེ་ཟུང་འཇུག་ནོར་བུའི་གྲོང་ཁྱེར་དུ། །འཇུག་པར་རིགས་སོ་བློ་ལྡན་སྐལ་བཟང་ཚོགས། །དེ་ཡང་རང་ཅག་གསེར་མདོག་ཅོད་པན་འཆང་བ་ཀུན་གྱི་ལྷག་པའི་ལྷ་སྐལ་གཅིག་པུར་གྱུར་པ་འཇམ་མགོན་བླ་མ་ཙོང་ཁ་པ་ཆེན་པོ་ལ་བརྟེན་པའི་ཟབ་ལམ་བླ་མའི་རྣལ་འབྱོར་ཇི་སྙེད་ཅིག་ཡོད་པ་རྣམས་ཀྱི་ནང་ནས་ཆེས་མཆོག་ཏུ་གྱུར་པ་འཇམ་མགོན་སྙན་བརྒྱུད་ཀྱི་མན་ངག་ཟབ་མོ་དགའ་ལྡན་ལྷ་བརྒྱ་མ་ཞེས་རྒྱ་མཚོའི་མཐས་གཏུགས་པར་འཕྲིན་ལས་ཁྱབ་གདལ་དུ་ཆེ་བ་འདི་ཉིད་ཀྱི་གཞུང་བསྲངས་ཏེ་དེའི་ཁོངས་སུ་མདོ་སྔགས་གཉིས་གའི་ཉམས་ལེན་དང་བསག་སྦྱང་གི་གནད་ཆ་ཚང་བར་བྱས་ཏེ་ལག་ཏུ་བླང་བའི་ཚུལ་ནི། བླ་མའི་རྣལ་འབྱོར་འདི་གའི་ལུགས་ལྟར་གྱི་ཞིང་བཀོད་ཐང་ཀའམ། རྗེ་བླ་མའི་སྐུ་བརྙན་བྲིས་འབུར་ཅི་རིགས་

― GTD003_Page_0689 ―

^{[མ་དཔེ་གཟིགས་ན་འདིར་གནོན།]}

[Full Size]

གཙོ་བོར་གྱུར་པའི་སྐུ་གསུང་ཐུགས་ཀྱི་རྟེན་ལེགས་པར་བཀྲམ། དེའི་མདུན་དུ་གཙང་ཞིང་གྱ་ནོམ་པའི་མཆོད་པ་ཡིད་དུ་འོང་བ་བཤམ། རང་ཉིད་སྟན་བདེ་བ་ལ་རྣམ་སྣང་གི་ཆོས་བདུན་ལྡན་དུ་འཁོད་དེ་རང་རྒྱུད་ལ་དགེ་བ་དང་མི་དགེ་བའི་ཕྱོགས་གང་ཆེ་བརྟག་ལ། དགེ་བར་སོང་འདུག་ན་རླུང་ནང་དུ་རྔུབ། མི་དགེ་བ་ཤས་ཆེ་ན་རླུང་ཕྱིར་འབུད་པ་དང་མཉམ་དུ་ནག་ཕུང་ངེ་ཕྱིར་ཐོན་པའི་མོས་པ་བྱ། དེ་ནས་སྐྱབས་འགྲོའི་ཡུལ་གྱི་ཚོགས་ཞིང་གསལ་གདབ་པ་ནི། ༈ མདུན་དུ་ཀུན་བཟང་མཆོད་སྤྲིན་རྒྱ་མཚོའི་དབུས། །རིན་ཆེན་ལས་གྲུབ་ཡངས་པའི་ཁྲི་སྟེང་དུ། །རྒྱབ་ལ་ཉེ་བར་འོད་འབར་ནོར་བུའི་ཁྲི། །སྣ་ཚོགས་པདྨ་ཉི་ཟླའི་གདན་བཅས་སྟེང། །རྩ་བའི་བླ་མ་འཇམ་དཔལ་སྙིང་པོ་དང། །དབྱེར་མེད་ཐུབ་དབང་བཙོ་མའི་གསེར་གྱི་མདོག །གཙུག་ཏོར་མཛེས་ལྡེམ་ས་གནོན་མཉམ་གཞག་མཛད། །ཞབས་གཉིས་རྡོ་རྗེ་སྐྱིལ་ཀྲུང་ཚུལ་གྱིས་བཞུགས། །གུར་ཀུམ་མདངས་ལྡན་ཆོས་གོས་རྣམ་གསུམ་གསོལ། །ཉིན་བྱེད་ལས་ལྷག་འོད་ཟེར་ཕྱོགས་བཅུར་འཕྲོ། །མཚན་དང་དཔེ་བྱད་གསལ་ལ་རབ་རྫོགས་པའི། །མཛེས་པའི་སྐུ་ནི་བལྟ་བས་ཆོག་མི་ཤེས། །ཡན་ལག་དྲུག་ཅུའི་དབྱངས་དང་ལྡན་པ་ཡི། །སྙན་པའི་གསུང་ནི་ཐོས་པས་ངོམས་པ་མེད། །མཁྱེན་དང་བརྩེ་བའི་གཏེར་དུ་གྱུར་པ་ཡི། །ཟབ་ཡངས་ཐུགས་ནི་གཏིང་མཐའ་གཞལ་ལས་འདས། །ཉེས་

― GTD003_Page_0690 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་དྲི་བྲལ་ལེགས་པའི་ཡོན་ཏན་རྫོགས། །དྲན་པ་ཙམ་གྱིས་སྲིད་ཞིའི་གདུང་བ་སེལ། །རབ་འབྱམས་ཞིང་དུ་བཅུ་གཉིས་མཛད་པ་སོགས། །གང་འདུལ་ངོ་མཚར་སྤྲུལ་པ་སྣ་ཚོགས་སྟོན། །དེ་ཡི་གཡས་གཡོན་པདྨ་ཉི་ཟླའི་གདན། །བླ་མ་བརྒྱུད་པའི་གྲངས་སྙེད་ཚར་དུ་དངར། །སྟེང་དུ་གཡས་སུ་རྒྱ་ཆེན་སྤྱོད་རྒྱུད་དང། །གཡོན་དུ་ཟབ་མོ་ལྟ་རྒྱུད་ཚོགས་རྣམས་བཞུགས། །ཐུབ་དབང་མདུན་དུ་གདན་ཁྲི་ཕུན་ཚོགས་སྟེང། །རྩ་བའི་བླ་མ་མཇལ་དུས་རྣམ་པ་ཅན། །ཆོས་འབྲེལ་མནོས་པའི་དངོས་ཀྱི་བླ་མ་རྣམས། །པདྨ་ཉི་ཟླའི་གདན་ལ་བཞུགས་པས་བསྐོར། །ཐུབ་པའི་དབང་པོའི་རྒྱབ་ཀྱི་སྟེང་གི་ཆར། །དཔལ་ལྡན་རིགས་བརྒྱའི་ཁྱབ་བདག་རྡོ་རྗེ་འཆང། །བྱིན་རླབས་བརྒྱུད་པའི་བླ་མ་མཆོག་རྣམས་ཀྱིས། །བསྐོར་བ་པད་ཉི་ཟླ་བའི་གདན་ལ་བཞུགས། །ཐུབ་དབང་གཙོ་འཁོར་རྣམས་ཀྱི་ཕྱོགས་བཞི་རུ། །གསང་འདུས་འཇིགས་མཛད་དུས་འཁོར་ཧེ་རུ་ཀའི། །དཀྱིལ་འཁོར་ལྷ་ཚོགས་རྣམས་དང་དེ་དག་མཐར། །ཡི་དམ་སངས་རྒྱས་བྱང་སེམས་ཉན་རང་དང། །དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས། །ཞི་ཁྲོ་རབ་འབྱམས་རང་རང་གདན་ལ་བཞུགས། །རྡོ་རྗེ་འཆང་དབང་གཙོ་འཁོར་རྣམས་ཀྱི་མཐར། །འདུལ་མངོན་མདོ་དང་དབང་བཤད་མན་ངག་གི །བརྒྱུད་པའི་བླ་མ་དཔག་ཏུ་མེད་པ་རྣམས། །པད་ཉི་ཟླ་བའི་གདན་ལ་མཛེས་པར་བཞུགས། །དེ་དག་རྣམས་ཀྱི་མདུན་དུ་རང་རང་གིས། །

― GTD003_Page_0691 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པའི་དམ་ཆོས་འོད་ཀྱི་རང་བཞིན་གྱི། །པོ་ཏིའི་རྣམ་པར་གདན་ཁྲི་བཟང་པོའི་སྟེང། །བཞུགས་པའི་སྐྱབས་ཡུལ་ནམ་མཁའ་གང་བ་རྣམས། །དཔག་ཡས་འོད་ཟེར་སྤྲོ་བསྡུའི་རོལ་པ་ཡིས། །རབ་འབྱམས་ཞིང་དུ་འགྲོ་བའི་དོན་མཛད་ཅིང། །རང་ལ་དགྱེས་པའི་ཉམས་ཀྱིས་བཞུགས་པར་གྱུར། །རང་དང་མཐའ་སྐོར་རིགས་དྲུག་འགྲོ་བ་ཀུན། །ཐོག་མེད་ནས་བཟུང་སྲིད་པའི་རྒྱ་མཚོ་འདིར། །བཟོད་དཀའ་ཡུན་རིང་སྡུག་བསྔལ་གྱིས་མནར་ཡང། །ད་དུང་གཏིང་མཐའ་མངོན་པར་མི་སྣང་བས། །དེ་ཡི་སྐྱབས་ཤིག་ད་ལན་བཙལ་དགོས་ཤིང། །དེ་ཡང་དཀོན་མཆོག་རིན་ཆེན་རྣམ་གསུམ་ལ། །བློ་འགེལ་ནུས་ན་ནམ་ཡང་མི་བསླུ་བས། །གདུང་ཤུགས་དྲག་པོས་སྐྱབས་སུ་འགྲོ་བར་བྱ། །བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཁྱད་པར་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ཡབ་སྲས་བརྒྱུད་པ་དང་བཅས་པ་རྣམས་ལ་སྐྱབས་སུ་མཆིའོ། །ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །ཞེས་ལན་གང་མང་བརྗོད་པའི་མཐར། སྐྱབས་ཡུལ་རྣམས་ལས་བདུད་རྩིའི་རྒྱུན་

― GTD003_Page_0692 ―

^{[མ་དཔེ་གཟིགས་ན་འདིར་གནོན།]}

[Full Size]

བབས་པ། །བདག་སོགས་ཀུན་གྱི་སྤྱི་བོ་ནས་ཞུགས་པས། །དེ་དག་ལ་བརྟེན་ཉེས་པའི་ཚོགས་བྱང་ཞིང། །བྱིན་རླབས་མ་ལུས་རྒྱུད་ལ་ཞུགས་པར་གྱུར། །ཅེས་ལན་གཅིག །འབྲས་སྐྱབས་སུ་གྱུར་པའི་དཀོན་མཆོག་གསུམ་ལ་གཙོ་བོར་དམིགས་ནས་སེམས་ཅན་ཐམས་ཅད་ཀྱི་དོན་དུ་དེ་ཐོབ་བྱར་བྱེད་པ་ཐེག་ཆེན་ཐུན་མོང་མ་ཡིན་པའི་སྐྱབས་འགྲོ་དང་སེམས་བསྐྱེད་ཀྱི་དམིགས་རྣམ་གསལ་བཏབ་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ནས། སངས་རྒྱས་འགྲུབ་པར་ཤོག །ཅེས་ལན་གང་མང་བརྗོད་དེ་བྱང་ཆུབ་ཏུ་སེམས་བསྐྱེད་ཅིང་སྤྱོད་པ་ཕྱིན་དྲུག་སོགས་རྒྱལ་སྲས་ཀྱི་སྤྱོད་པ་མཐའ་དག་ལ་བསླབ་པར་བྱའོ་སྙམ་པའི་འདུན་པ་ཤུགས་དྲག་པོ་གསལ་གདབ། མདུན་གྱི་བླ་མ་ཐུབ་པའི་དབང་པོ་ལས། །རང་འདྲ་ཆད་དེ་ཐིམ་པས་བདག་ཉིད་ནི། །ཐུབ་དབང་སྐུར་གྱུར་དེ་ཡི་འོད་ཟེར་གྱིས། །འགྲོ་ཀུན་བྱང་ཆུབ་མཆོག་ལ་བཀོད་པར་གྱུར། །ཅེས་སེམས་བསྐྱེད་འབྲས་བུ་ལམ་བྱེད་ཀྱི་ཚུལ་དུ་བསྒོམ་པ་ལན་གཅིག་བྱ། ཉེ་རིང་རིས་སུ་མ་ཆད་མ་རྒན་རྣམས། །སྡུག་བསྔལ་རྒྱུ་བཅས་ལས་གྲོལ་བདེ་ཐོབ་ཅིང། །ཟག་མེད་དགའ་བས་རོལ་ན་ཅི་མ་རུང། །དེ་བཞིན་གྱུར་ཅིག་དེ་ལྟར་བདག་གིས་བྱ། །དེ་བསྒྲུབ་ནུས་པར་བླ་མ་ལྷག་པའི་ལྷས། །བྱིན་གྱིས་རློབས་ཞེས་གསོལ་བ་བཏབ་པ་ན། །བྱིན་རླབས་བདུད་རྩིའི་རྒྱུན་གྱི་ཆར་བབས་པས། །འགྲོ་ཀུན་ཚད་མེད་བཞི་ལ་གནས་པར་གྱུར། །ཅེས་ཚད་མེད་བཞི་བསྒོམ་པ་ལན་གསུམ་སོགས་བྱ། ནམ་མཁའི་དབྱིངས་སུ་སྤྲིན་ཕུང་ཞི་བ་བཞིན། །ཚོགས་ཞིང་མཐའ་དག་ཐུབ་པའི་དབང་པོ་ལ། །བསྡུས་ཏེ་དེ་

― GTD003_Page_0693 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་རང་གི་སྨིན་མཚམས་ནས། །ཐིམ་པར་བྱིན་རླབས་མ་ལུས་ཐོབ་པར་གྱུར། །ཅེས་ཚོགས་ཞིང་བསྡུ། ནམ་མཁའི་མཐས་གཏུགས་སེམས་ཅན་ཀུན་དོན་དུ། །བདེ་ཆེན་དང་པོའི་མགོན་པོ་བླ་མ་ལྷའི། །གོ་འཕང་མྱུར་བ་མྱུར་བར་ཐོབ་བྱའི་ཕྱིར། །ཟབ་མོ་བླ་མའི་རྣལ་འབྱོར་བསྒོམ་པར་བྱ། །ཞེས་ཁྱད་པར་གྱི་སེམས་བསྐྱེད་ལན་གང་མང་བྱ། འོག་ནས་འབྱུང་བ་བཞིན་སྔགས་ཀྱི་ཉམས་ལེན་དང་འབྲེལ་བར་བྱེད་པ་ལ་རང་ལྷའི་ང་རྒྱལ་ལ་གནས་ཤིང་དེའི་སྒོ་ནས་མཆོད་པ་སོགས་བྱིན་གྱིས་རློབ་པར་བྱེད་དགོས་པས་འདི་ལྟར། རང་བཞིན་རྣམ་དག་སྤྲོས་བྲལ་ཆོས་དབྱིངས་ལས། །རང་ཉིད་རྡོ་རྗེ་འཇིགས་བྱེད་སྐུར་བཞེངས་པའི། །གནས་གསུམ་ཡི་གེ་གསུམ་མཚན་ཧཱུཾ་ཡིག་གི །འོད་ཀྱི་སྣོད་བཅུད་མཆོད་རྫས་དང་བཅས་པའི། །མ་དག་འཁྲུལ་སྣང་ཉེས་པ་ཀུན་སྦྱངས་ནས། །དག་པའི་རྟེན་དང་བརྟེན་པར་ལེགས་འཆར་ཞིང། །མཆོད་རྫས་མཐའ་དག་ཁྱད་པར་གསུམ་ལྡན་གྱི། །ཀུན་བཟང་མཆོད་པའི་སྤྲིན་གྱི་ཕུང་པོར་གྱུར། །ཅེས་མཆོད་པ་བྱིན་གྱིས་བརླབ། དེ་ནས་ཚོགས་ཞིང་གསལ་གདབ་པ་ནི། མདུན་དུ་ཀུན་བཟང་མཆོད་སྤྲིན་རྒྱ་མཚོའི་དབུས། །རིན་ཆེན་ལས་གྲུབ་ཡངས་པའི་ཁྲི་སྟེང་དུ། །རྒྱབ་ལ་ཉེ་བར་འོད་འབར་ནོར་བུའི་ཁྲི། །སྣ་ཚོགས་པདྨ་ཉི་ཟླའི་གདན་དང་བཅས། །གསུམ་གྱི་དབུས་མ་ཅུང་ཟད་མཐོ་བའི་སྟེང། །འཇམ་མགོན་ཆོས་ཀྱི་རྒྱལ་པོ་ཙོང་ཁ་པ། །ཕྱག་གཉིས་ཆོས་འཁོར་ཕྱག་རྒྱས་ཨུཏྤ་ལ། །

― GTD003_Page_0694 ―

^{[མ་དཔེ་གཟིགས་ན་འདིར་གནོན།]}

[Full Size]

བསྣམས་པའི་གཡས་ན་ཤེས་རབ་རལ་གྲི་དང། །གཡོན་པའི་སྟེང་དུ་ཤེར་ཕྱིན་གླེགས་བམ་བསྣམས། །གུར་ཀུམ་མདངས་ལྡན་ཆོས་གོས་གསུམ་གསོལ་ཞིང། །བཙོ་མའི་གསེར་མདོག་པཎ་ཞྭས་དབུ་ལ་མཛེས། །ཞབས་གཉིས་རྡོ་རྗེ་སྐྱིལ་ཀྲུང་ཚུལ་གྱིས་བཞུགས། །གཡས་སུ་སྲས་མཆོག་དར་མ་རིན་ཆེན་དང། །གཡོན་ན་སྨྲ་བའི་ཉི་མ་དགེ་ལེགས་དཔལ། །ཆོས་གོས་གསུམ་གསོལ་པཎ་ཞྭས་གཙུག་མཛེས་ཤིང། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །ཡབ་སྲས་གསུམ་ཆར་མཚན་དཔེའི་དཔལ་རྫོགས་པས། །མཛེས་པའི་སྐུ་ནི་བལྟ་བས་ཆོག་མི་ཤེས། །ཞེས་པ་ནས། གཞན་རྣམས་གོང་ལྟར་ལ། ཡབ་རྗེའི་མདུན་དུ་གདན་ཁྲི་ཕུན་ཚོགས་སྟེང། །ཞེས་པ་དང། འཇམ་མགོན་བླ་མའི་རྒྱབ་ཀྱི་སྟེང་གི་ཆར། །ཞེས་པ་དང། འཇམ་མགོན་འཁོར་བཅས་རྣམས་ཀྱི་ཕྱོགས་བཞི་རུ། །ཞེས་པ་རྣམས་ཚིག་བསྒྱུར་དགོས། དེ་ནས། རབ་འབྱམས་ཞིང་དུ་འགྲོ་བའི་དོན་མཛད་ཅིང། །རང་ལ་དགྱེས་པའི་ཉམས་ཀྱིས་བཞུགས་པར་གྱུར། །དེ་དག་རྣམས་ཀྱི་གནས་ལྔར་ཡི་གེ་ལྔས། །ལེགས་མཚན་ཐུགས་ཀའི་ཧཱུཾ་ལས་འོད་ཟེར་འཕྲོས། །རབ་འབྱམས་ཕྱོགས་བཅུའི་ཞིང་ཁམས་ཐམས་ཅད་ནས། །བླ་མ་ཡི་དམ་རྒྱལ་བ་སྲས་བཅས་དང། །ཁྱད་པར་སྟེང་ཕྱོགས་དགའ་ལྡན་ལྷ་གནས་ལས། །གྲོང་དང་དགོན་པའི་ཚུལ་དུ་བྱས་པ་ཡི། །ཞིང་མཆོག་དམ་པ་ཡིད་དགའ་ཆོས་འཛིན་ཞེས། །མ་ཕམ་མགོན་པོའི་ཐུགས་བསྐྱེད་ལས་གྲུབ་པ། །སྲིད་

― GTD003_Page_0695 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྡུག་བསྔལ་མིང་ཡང་མི་གྲགས་ཤིང། །དག་པའི་ཞིང་གི་སྣོད་བཅུད་འབྱོར་བའི་དཔལ། །མ་ཚང་མེད་པར་ལྷུན་གྱིས་གྲུབ་པའི་དབུས། །ཉི་མ་སྟོང་ཕྲག་འོད་ཀྱི་གདེངས་ཀ་ཅན། །ཆོས་ཀྱི་ཕོ་བྲང་རྒྱལ་མཚན་མཐོན་པོ་རུ། །རྒྱལ་སྲས་རྒྱ་མཚོའི་ཚོགས་ཀྱིས་བསྐོར་བའི་དབུས། །མི་འཇིགས་གདོང་ལྔས་བཏེག་པའི་ནོར་བུའི་ཁྲིར། །བཟང་པོའི་བཞུགས་སྟངས་ཚུལ་གྱིས་འཁོད་པ་ཡི། །དགའ་ལྡན་ལྷ་བརྒྱའི་མགོན་གྱི་ཐུགས་ཀ་ནས། །རབ་དཀར་ཞོ་གསར་སྤུངས་འདྲའི་ཆུ་འཛིན་རྩེར། །ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲགས། །སྲས་དང་བཅས་པ་གནས་འདིར་གཤེགས་སུ་གསོལ། །རྣམ་དག་ཆོས་ཀྱི་དབྱིངས་ལས་མ་གཡོས་ཀྱང། །ཐུགས་རྗེས་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་འཕྲིན་ལས་རྒྱས་མཛད་པ། །དུས་གསུམ་བླ་མ་འཁོར་བཅས་གནས་འདིར་གཤེགས། །ཛཿ ཧཱུཾ་བཾ་ཧོཿ ཡེ་ཤེས་པ་རྣམས་རང་རང་གི་དམ་ཚིག་པ་སོ་སོ་ལ་ཐིམ་པར་གྱུར། མདུན་གྱི་ནམ་མཁར་སེང་ཁྲི་པད་ཟླའི་སྟེང། །རྗེ་བཙུན་བླ་མ་དགྱེས་པའི་འཛུན་དཀར་ཅན། །བདག་བློ་དད་པའི་བསོད་ནམས་ཞིང་མཆོག་ཏུ། །བསྟན་པ་རྒྱས་ཕྱིར་བསྐལ་བརྒྱར་བཞུགས་སུ་གསོལ། །བསྟན་པའི་བདག་པོ་སྟོན་པ་བཅོམ་ལྡན་འདས། །རྒྱལ་བའི་དབང་པོ་བློ་བཟང་གྲགས་པའི་དཔལ། །བཀའ་དྲིན་མཉམ་མེད་ཡོངས་འཛིན་རིན་པོ་ཆེ། །དབྱེར་མེད་ཞབས་ཀྱི་པདྨོར་ཕྱག་འཚལ་ལོ། །

― GTD003_Page_0696 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པ་དོན་ལྡན་ལ་ཕྱག་འཚལ། །ཁྱོད་ཀྱི་ངོ་མཚར་སྤྲུལ་པའི་ཟློས་གར་ལས། །བྱུང་བའི་དངོས་བརྒྱུད་བླ་མ་ཡི་དམ་ལྷ། །སངས་རྒྱས་བྱང་སེམས་ཉན་རང་སྲུང་མར་བཅས། །ཞི་ཁྲོ་རབ་འབྱམས་རྣམས་ལ་ཕྱག་འཚལ་ལོ། །ཡིད་འོང་མཆོད་ཡོན་སྣ་ཚོགས་མེ་ཏོག་དང། །དྲི་ཞིམ་བདུག་སྤོས་སྣང་གསལ་དྲི་ཆབ་སོགས། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི། །བསོད་ནམས་ཞིང་མཆོག་ཁྱེད་ལ་མཆོད་པར་འབུལ། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །རྣམ་དཀར་བཤད་སྒྲུབ་བསླབ་གསུམ་རིམ་གཉིས་སོགས། །རང་གཞན་ཀུན་གྱི་རྣམ་དཀར་དགེ་ཚོགས་ཀྱང། །ཡིད་འོང་མཆོད་པའི་སྤྲིན་དུ་ལེགས་བསྟར་ན། །བཞེས་ཤིང་ཟད་མི་ཤེས་པར་བྱིན་གྱིས་རློབས། །རིགས་ལྔ་ཡུམ་བཞིའི་རང་བཞིན་དམ་རྫས་རྣམས། །རྡོ་རྗེ་གསུམ་གྱི་འོད་ཟེར་སྤྲོ་བསྡུ་ཡིས། །སྦྱངས་རྟོགས་སྦར་བྱས་བདུད་རྩིའི་རྒྱ་མཚོ་ཆེས། །མཆོག་ཏུ་སིམ་ཞིང་དགྱེས་པ་བསྐྱེད་གྱུར་ཅིག །ཞིང་སྔགས་ལྷན་སྐྱེས་ཕྱག་རྒྱའི་ཚོགས་སྤྲོས་ཏེ། །རྡོ་རྗེ་འཆང་དབང་ཡུམ་ལ་ཐིམ་པ་ན། །དེ་དང་སྙོམས་འཇུག་དགའ་བའི་རོལ་བ་ཡིས། །འཁོར་བཅས་ཟག་མེད་དགའ་བས་ཚིམ་གྱུར་

― GTD003_Page_0697 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིག །ཆོས་ཀུན་སྤྲོས་བྲལ་ནམ་མཁའ་ལྟ་བུའི་ངང། །གཟུགས་སྐུའི་འཇའ་ཚོན་ཅིར་ཡང་འཆར་བཟོད་པ། །སྐུ་ཐུགས་ཟུང་འཇུག་ལྷན་སྐྱེས་བདེ་བ་ཆེ། །བྱང་ཆུབ་རྡོ་རྗེའི་མཆོད་པས་དགྱེས་པར་མཛོད། །མདོར་ན་ཕྱི་ནང་ཉེར་སྤྱོད་འདོད་ཡོན་དང། །དབང་བཞི་དང་འབྲེལ་མཆོད་པའི་མཎྜ་ལ། །བློ་ཡིས་བླངས་ཏེ་གུས་པས་འབུལ་ལགས་ན། །ཐུགས་རྗེ་ཆེ་ལྡན་ཉིད་ཀྱི་མཐུས་བཞེས་ཤིག །རབ་རྨོངས་བདག་སོགས་འགྲོ་དྲུག་སེམས་ཅན་རྣམས། །རིང་ནས་གདུལ་དཀའ་སེམས་ཀྱིས་དབང་བསྒྱུར་ཞིང། །སེམས་ཉིད་རྨོངས་པས་བྲན་དུ་བཟུང་བའི་མཐུས། །དཔག་ཡས་སྒོ་གསུམ་སྡིག་པ་ཅི་བགྱིས་པ། །གནོང་ཞིང་འགྱོད་པ་དྲག་པོས་མཐོལ་བགྱིད་ན། །བཅོམ་ལྡན་ཐུགས་རྗེ་མངའ་བ་ཁྱེད་རྣམས་ཀྱིས། །བྱིན་རླབས་མི་ཟད་བདུད་རྩིའི་ཆུ་རྒྱུན་གྱིས། །ལྷག་མེད་བྱང་ཞིང་དག་པར་བྱིན་གྱིས་རློབས། །ཞེས་ཐུགས་རྗེ་བསྐུལ་བའི་དམིགས་པ་དང་བཅས་ལྟུང་བཤགས་དང་བླ་མ་རྡོར་འཛིན་མ། མཇུག་ཏུ། གང་ཞིག་ཐོག་མེད་དུས་ནས་བསགས་པ་ཡི། །ལུས་ངག་ཡིད་ཀྱིས་མི་དགེ་ཅི་བགྱིས་དང། །ཁྱད་པར་སྡོམ་པ་གསུམ་གྱི་མི་མཐུན་ཕྱོགས། །སྙིང་ནས་འགྱོད་པ་དྲག་པོས་སོ་སོར་བཤགས། །ཞེས་པ་ལན་གསུམ་སོགས་བྱ། དེ་ནས། སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱས། །མགོན་པོ་ཁྱོད་ཀྱི་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ་། །རྗེ་བཙུན་བླ་མ་དམ་པ་ཁྱེད་རྣམས་ཀྱིས། །ཆོས་

― GTD003_Page_0698 ―

^{[མ་དཔེ་གཟིགས་ན་འདིར་གནོན།]}

[Full Size]

སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས། །ཇི་ལྟར་འཚམ་པའི་གདུལ་བྱའི་འཛིན་མ་ལ། །ལྷུན་འགྲུབ་ཆོས་ཀྱི་ཆར་པ་དབབ་ཏུ་གསོལ། །བདག་གིས་ཇི་སྙེད་བསགས་པའི་དགེ་བ་འདིས། །བསྟན་དང་འགྲོ་བ་ཀུན་ལ་གང་ཕན་དང། །ཁྱད་པར་རྗེ་བཙུན་བློ་བཟང་གྲགས་པ་ཡི། །བསྟན་པའི་སྙིང་པོ་རིང་དུ་གསལ་བྱེད་ཤོག །ཞིང་ཁམས་འབུལ་བར་ཞུ། ཨོཾ་བཛྲ་བྷུ་མི་ཨཱཿ ཧཱུཾ། ཞེས་པ་ནས། ཞིང་ཁམས་རྣམ་པར་དག་པ་འདི་ཉིད་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཡབ་སྲས་ལ་སོགས་པ་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཉན་རང་ཆོས་སྐྱོང་སྲུང་མ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ས་གཞི་སྤོས་ཀྱིས་སོགས་དང། བདག་གཞན་ལུས་ངག་མ་སོགས་བརྗོད་དེ། རབ་འབྱམས་གསུང་རབ་ཀུན་ལ་བལྟ་བའི་མིག །༝༝གསལ་མཛད་བཤེས་གཉེན་རྣམས་ལ་གསོལ་བ་འདེབས། །སྒྲུབ་པ་པོ་ལ་བུ་ལྟར་གཟིགས་མཛད་ཅིང། །༝༝ཡི་དམ་ལྷ་ཚོགས་རྣམས་ལ་གསོལ་བ་འདེབས། །རླབས་ཆེན་ཚོགས་གཉིས་སྤྱོད་པ་ཡོངས་རྫོགས་ཤིང། །ཉེས་ཀུན་བག་ཆགས་བཅས་པ་དྲུངས་ཕྱུང་སྟེ། །མཁའ་མཉམ་འགྲོ་བ་ཀུན་གྱི་དོན་མཛད་པ། །རྒྱལ་བ་སྲས་བཅས་ཀུན་ལ་གསོལ་བ་འདེབས། །བཤེས་ལ་མི་གུས་དལ་འབྱོར་ཆུད་གཟོན་ཞིང། །འཆི་བ་མི་དྲན་ཚེ་འདིའི་བདེ་ཐབས་བསྒྲུབ། །ངན་འགྲོར་མི་

― GTD003_Page_0699 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིགས་རྣམ་དག་སྐྱབས་མི་འཚོལ། །ལས་འབྲས་མི་སེམས་བླང་དོར་ལོག་པར་བསྒྲུབ། །འཁོར་བ་བདེར་འཛིན་དེ་རྒྱུ་ལས་ཉོན་སྤེལ། །ཐར་པར་མི་སྤྲོ་བསླབ་གསུམ་བསྟེན་མི་བྱེད། །མ་རྣམས་ཡལ་བོར་རང་ཉིད་གཅེས་པར་འཛིན། །བདག་ཏུ་མངོན་ཞེན་སྔགས་ལ་མི་མོས་སོགས། །ཕྱིན་ཅི་ལོག་གི་བློ་སྣ་མཐའ་དག་རྣམས། །མྱུར་དུ་འགག་པར་བྱིན་གྱིས་བརླབ་ཏུ་གསོལ། །བཤེས་ལ་དད་གུས་དལ་འབྱོར་སྙིང་པོ་ལེན། །འཆི་བ་རྗེས་དྲན་ཚེ་འདིའི་འདུན་མ་བསྐྱུངས། །ངན་འགྲོའི་འཇིགས་དྲན་དཀོན་མཆོག་སྐྱབས་སུ་འཛིན། །ལས་འབྲས་བསམས་ནས་བླང་དོར་ཚུལ་བཞིན་བསྒྲུབ། །འཁོར་བའི་སྐྱོན་མཐོང་ལས་ཉོན་སྤོང་བར་འདོད། །ཐར་པ་དོན་གཉེར་རྣམ་དག་བསླབ་གསུམ་བསྟེན། །མ་རྣམས་གཅེས་འཛིན་རང་ཉིད་ཡལ་བར་དོར། །བདག་མེད་དོན་མཐོང་སྔགས་ལ་མོས་པ་སོགས། །ཕྱིན་ཅི་མ་ལོག་བློ་སྣ་མཐའ་དག་རྣམས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །ཁྱད་པར་བྱམས་དང་སྙིང་རྗེ་སེམས་བསྐྱེད་དང། །ཕྱིན་དྲུག་ལ་སོགས་རྒྱ་ཆེན་སྤྱོད་པའི་ལམ། །སྙིང་པོ་ལམ་དུས་ཀུན་རྫོབ་སྒྱུ་མའི་ལུས། །ཡང་སྙིང་འབྲས་བུའི་དུས་ཀྱི་རྡོ་རྗེའི་སྐུ། །བདག་མེད་གནས་ལུགས་ཇི་བཞིན་མཐོང་བ་ཡི། །ཞི་ལྷག་གཉིས་སོགས་ཟབ་མོ་ལྟ་བའི་ལམ། །སྙིང་པོ་དཔེ་དང་དོན་གྱི་འོད་གསལ་གཉིས། །ཡང་སྙིང་བདེ་སྟོང་དབྱེར་མེད་ཆོས་སྐུ་སྟེ། །ཟབ་དང་རྒྱ་

― GTD003_Page_0700 ―

^{[མ་དཔེ་གཟིགས་ན་འདིར་གནོན།]}

[Full Size]

ཆེའི་ལམ་བཟང་སྙིང་པོར་བཅས། །མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། །འཇམ་དབྱངས་བླ་མའི་ཐུགས་ཀའི་ཧཱུཾ་ཡིག་ལས། །འོད་འཕྲོས་རྒྱབ་ཀྱི་རྡོ་རྗེ་འཆང་ལ་ཕོག །དེ་ཡི་ཐུགས་ཀའི་ཧཱུཾ་གི་འོད་ཟེར་གྱིས། །ཚོགས་ཞིང་གཞན་རྣམས་བསྡུས་ནས་དེར་ཐིམ་ཞིང། །དེ་ཉིད་ཡབ་རྗེའི་སྤྱི་བོ་ནས་ཞུགས་ཏེ། །ཡེ་ཤེས་སེམས་དཔའི་ཚུལ་གྱིས་བཞུགས་པར་གྱུར། །དེ་ཉིད་ལ་སླར་ཡང། ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང། །འཁོར་བ་མ་སྟོངས་བར་དུ་ལེགས་བཞུགས་ནས། །འགྲོ་ལ་ཆོས་འཁོར་མ་ལུས་བསྐོར་དུ་གསོལ། །བདག་གཞན་དགེ་རྣམས་བྱང་ཆུབ་ཆེན་པོར་བསྔོ། །ཞེས་ཡན་ལག་བདུན་པ་མདོར་བསྡུས་དང། ས་གཞི་མས་མཎྜལ་ཕུལ། སྐུ་བཞིའི་བདག་ཉིད་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །སྒྲིབ་བྲལ་ཆོས་སྐུའི་བདག་ཉིད་བླ་མ་ལྷ། །ཐུབ་དབང་༝། །བདེ་ཆེན་ལོངས་སྐུའི་བདག་ཉིད་བླ་མ་ལྷ། །ཐུབ་དབང་༝། །སྣ་ཚོགས་སྤྲུལ་སྐུའི་བདག་ཉིད་བླ་མ་ལྷ། །ཐུབ་དབང་༝། །བླ་མ་ཀུན་འདུས་བླ་མ་ལྷག་པའི་ལྷ། །ཐུབ་དབང་༝། །ཡི་དམ་ཀུན་འདུས་༝། །ཐུབ་དབང་༝། སངས་རྒྱས་ཀུན་འདུས་༝། །ཐུབ་དབང་༝། །དམ་ཆོས་ཀུན་འདུས་༝། །ཐུབ་དབང་༝། །

― GTD003_Page_0701 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་འདུན་ཀུན་འདུས་༝། །ཐུབ་དབང་༝། །མཁའ་འགྲོ་ཀུན་འདུས་༝། །ཐུབ་དབང་༝། །ཆོས་སྐྱོང་ཀུན་འདུས་༝། །ཐུབ་དབང་༝། །སྐྱབས་གནས་ཀུན་འདུས་བླ་མ་ལྷག་པའི་ལྷ། །ཐུབ་དབང་རྡོ་རྗེ་འཆང་ལ་གསོལ་བ་འདེབས། །ཁྱད་པར་རྒྱལ་སྲས་ཀུན་ལས་རིགས་གསུམ་མགོན། །མཁྱེན་བརྩེ་ནུས་པས་ཁྱད་པར་འཕགས་པ་བཞིན། །གངས་ཅན་མཁས་ཀུན་གཙུག་གི་རྒྱན་གྱུར་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །མཁྱེན་བརྩེའི་གཏེར་དང་མཐུ་ཆེན་ཐོབ་བཞིན་དུ། །མཁྱེན་པའི་ཡེ་ཤེས་བརྩེ་བའི་ཐུགས་རྗེ་དང། །སྐྱོབ་པའི་ནུས་མཐུ་མཚུངས་ཟླ་མ་མཆིས་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །ངེས་པའི་དོན་དུ་འཕགས་པ་རིགས་གསུམ་མགོན། །ངུར་སྨྲིག་འཆང་བའི་སྐུ་ཡི་རྣམ་རོལ་ཏེ། །རྒྱལ་བའི་བསྟན་པ་ཉི་ལྟར་གསལ་མཛད་པ། །འཇམ་མགོན་བླ་མའི་ཞབས་ལ་གསོལ་བ་འདེབས། །མར་གྱུར་འགྲོ་ལ་རྗེས་ཆགས་སྙིང་རྗེ་དང། །མཐའ་བྲལ་གནས་ལུགས་རྟོགས་པའི་ཤེས་རབ་མཆོག །ཕྱི་ནང་བདུད་སྡེ་འཇོམས་པའི་ནུས་པ་རྣམས། །བདག་སོགས་རྒྱུད་ལ་སྐྱེ་བར་བྱིན་གྱིས་རློབས། །ཞེས་ཕྱི་ནང་གསང་བའི་ཡོན་ཏན་དྲན་པར་བྱས་ཏེ་དམིགས་བརྩེ་མ་ཡོངས་གྲགས་ལྟར་རམ། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང། །དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །བདུད་དཔུང་མ་ལུས་འཇོམས་མཛད་གསང་བའི་བདག །འཇམ་དཔལ་ཁྲོས་

― GTD003_Page_0702 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཟློས་གར་གཤིན་རྗེའི་གཤེད། །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ་གསོལ་བ་འདེབས། །ཞེས་སོགས་ལྟར་གྱི་ལྔ་སྐོར་དྲུག་སྐོར་སོགས་བྱ། འཇམ་མགོན་ཡབ་སྲས་གསུམ་གྱི་ཐུགས་ཀ་ནས། །ཐོན་པའི་འོད་ཀྱི་སྦུ་གུའི་ལམ་བརྒྱུད་དེ། །བདུད་རྩིའི་རྒྱུན་བབས་སྤྱི་བོ་ནས་ཞུགས་པས། །མི་ཤེས་རྨོངས་པའི་དྲི་མ་སྦྱངས་པར་གྱུར། །ཞེས་མ་དག་པ་འཁྲུད་པའི་དམིགས་པ་སྔོན་དུ་བཏང་ལ། བདུད་རྩིའི་རྡུལ་རྣམས་འཇམ་དཔལ་ཞི་ཁྲོ་ཡི། །སྐུ་ཡི་རྣམ་པར་གནས་པས་ལུས་གང་སྟེ། །རབ་འབྱམས་གཞུང་དོན་འབྱེད་ལ་ཐོགས་མེད་པའི། །རླབས་ཆེན་ཤེས་རབ་ཐོབ་པར་བྱིན་གྱིས་རློབས། །བདུད་རྩིའི་རྡུལ་རྣམས་༝། །སྔགས་ཀྱི་རྣམ་པར་གནས་བས་ལུས་གང་སྟེ། །དཀའ་གནད་ཕྲ་ཞིབ་མ་འདྲེས་འབྱེད་པ་ཡི། །ཤེས་རབ་གསལ་བ་ཐོབ་པར་བྱིན་༝། །བདུད་རྩིའི་རྡུལ་རྣམས་༝། །ས་བོན་རྣམ་པར་གནས་པས་ལུས་གང་སྟེ། །ཐེ་ཚོམ་འཆིང་བ་འཕྲལ་དུ་གཅོད་པ་ཡི། །ཤེས་རབ་མྱུར་བ་ཐོབ་པར་༝། །བདུད་རྩིའི་རྡུལ་རྣམས་༝། །ཕྱག་མཚན་རྣམ་པར་གནས་པས་ལུས་གང་སྟེ། །ཟབ་མོའི་དོན་གྱི་གཏིང་མཐའ་དཔོག་པ་ཡི། །ཤེས་རབ་ཟབ་མོ་ཐོབ་པར་༝། །བདུད་རྩིའི་རྡུལ་རྣམས་གང་ཞིག་བཤད་བྱ་ཡི། །གླེགས་བམ་རྣམ་པར་གནས་པས་ལུས་གང་སྟེ། །ཚིག་དོན་ཀུན་ལ་ངེས་པ་མཆོག་སྟེར་བ། །འཆད་པའི་ཤེས་རབ་ཐོབ་པར་༝། །བདུད་རྩིའི་རྡུལ་རྣམས་ཤེས་རབ་རལ་གྲི་ཡི། །

― GTD003_Page_0703 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་ལོའི་རྣམ་པར་གནས་པས་ལུས་གང་སྟེ། །སྨྲ་ངན་ཚོགས་ཀྱི་སྤོབས་པ་འཕྲོག་པ་ཡི། །རྩོད་པའི་ཤེས་རབ་༝། །བདུད་རྩིའི་རྡུལ་རྣམས་གཞུང་གི་གླེགས་བམ་དང། །རལ་གྲིའི་རྣམ་པར་གནས་པས་ལུས་གང་སྟེ། །སྒྲ་དོན་ཕུན་ཚོགས་བློ་གསལ་དགའ་སྐྱེད་པའི། །རྩོམ་པའི་ཤེས་རབ་ཐོབ་པར་བྱིན་གྱིས་རློབས། །ཞེས་དམིགས་སྐོར་བདུན་པོ་རེ་རེའི་མཚམས་སུ་དམིགས་བརྩེ་མ་གྲངས་ཇི་ལྟར་འཚམ་པ་རེ་བཟླས་ཏེ། ཡང་མ་དག་པ་འཁྲུད་པའི་དམིགས་པ་དང་སྦྲགས་ནས་རྗེས་མ་རྗེས་མ་བྱེད་པའམ། ཡང་ན་མ་དག་པ་འཁྲུད་པ་ཚར་གཅིག་གི་མཇུག་ཏུ་དམིགས་སྐོར་བདུན་གྱི་ཚིགས་བཅད་རྣམས་དཀྱུས་གཅིག་ལ་བརྗོད་དེ་དམིགས་བརྩེ་མ་བཟླ་བ་གང་མོས་བྱ། དེ་ནས། ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །ཞེས་སོགས་ཀྱིས་ལམ་ཡོངས་རྫོགས་ལ་གཤར་སྒོམ་བྱ་ཞིང། རྐང་པ་ཐ་མ་ལན་གཉིས་གཉིས་སུ་བརྗོད་པས་དང་པོའི་ཚེ་དེ་དང་དེའི་རྟོགས་པ་སྐྱེ་བ་ལ་གེགས་བྱེད་ཀྱི་དྲི་མ་སྦྱངས་པ་དང། གཉིས་པའི་ཚེ་དེ་དང་དེའི་རྟོགས་པ་སྐྱེས་པའི་དམིགས་པ་བྱ། བདེ་བླག་ཉིད་དུ་འཇུག་པར་བྱིན་གྱིས་རློབས། །ཞེས་པའི་འཕྲོར། སངས་རྒྱས་བྱང་ཆུབ་སེམས་དཔའ་ཀུན། །ཞེས་སོགས་ཀྱིས་སྡོམ་པ་བཟུང་ལ། དེ་ནས། ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །༝༝༝བར་གཅོད་སྲུངས། །ཞེས་པ་ལན་གསུམ་གྱིས་ཕུར་ཚུགས་སུ་གསོལ་བ་བཏབ་པས། རྗེ་ཡབ་སྲས་གསུམ་ཀ་དང་ཁྱད་པར་དུ་རྗེ་བླ་མའི་ཐུགས་ཀའི་རྡོ་རྗེ་འཆང་གི་གནས་གསུམ་ལས་བདུད་རྩིའི་རྒྱུན་བབས་པ་རང་གི་གནས་རྣམས་སུ་ཐིམ་པས་དབང་བཞིའི་རྟོགས་པ་སྐྱེས་པར་བསམས་ལ། རྗེ་བཙུན་བླ་མ་རྡོ་རྗེ་འཆང་དབང་གི །སྤྱི་

― GTD003_Page_0704 ―

^{[མ་དཔེ་གཟིགས་ན་འདིར་གནོན།]}

[Full Size]

བོའི་ཨོཾ་ལས་བདུད་རྩིའི་རྒྱུན་བབས་པས། །ལུས་ཀྱི་སྒྲིབ་སྦྱངས་བསྐྱེད་རིམ་བསྒོམ་པ་དང། །འབྲས་བུ་སྤྲུལ་སྐུ་འགྲུབ་པའི་ནུས་པ་ཐོབ། །མགྲིན་པའི་ཨཱཿ ཡིག་ལས་བྱུང་བདུད་རྩིའི་ཆུས། །ངག་གི་སྒྲིབ་སྦྱངས་སྒྱུ་ལུས་བསྒོམ་པ་དང། །འབྲས་བུ་ལོངས་སྐུ་འགྲུབ་པའི་ནུས་པ་ཐོབ། །ཐུགས་ཀའི་ཧཱུཾ་ཡིག་འོད་དང་བདུད་རྩིའི་ཆུས། །ཡིད་ཀྱི་སྒྲིབ་སྦྱངས་འོད་གསལ་བསྒོམ་པ་དང། །འབྲས་བུ་ཆོས་སྐུ་འགྲུབ་པའི་ནུས་པ་བཞག །སླར་ཡང་གནས་གསུམ་ལས་བྱུང་བདུད་རྩིའི་ཆུས། །སྒོ་གསུམ་སྒྲིབ་སྦྱངས་ཟུང་འཇུག་བསྒོམ་པ་དང། །རྡོ་རྗེ་འཆང་དབང་གོ་འཕང་འགྲུབ་པ་ཡི། །ནུས་པ་བཞག་སྟེ་དབང་བཞི་ཐོབ་པར་གྱུར། །དེ་ཚེ་དངོས་གྲུབ་རྣམ་གཉིས་འགྲུབ་པའི་གཞི། །ཞེས་པ་ནས། རྡོ་རྗེ་འཆང་གི་གོ་འཕང་མྱུར་ཐོབ་ཤོག །དེ་ལྟར་གདུང་ཤུགས་དྲག་པོས་རྩེ་གཅིག་ཏུ། །གསོལ་བ་བཏབ་པས་སྲས་ཀྱི་ཐུ་བོ་གཉིས། །རྗེ་ལ་ཐིམ་ཞིང་དེ་ཉིད་ཚུར་བྱོན་ཏེ། །རང་ལུས་དབུས་ཀྱི་དྷཱུ་ཏཱིའི་སྟོད་ཡངས་པའི། །ཡར་སྣ་ཐལ་གྱིས་ཕྱེ་བའི་ནང་ནས་ཞུགས། །སྙིང་གའི་པདྨའི་དབུས་སུ་རང་སེམས་དང། །དབྱེར་མེད་ཚུལ་གྱིས་བརྟན་པར་བཞུགས་པར་གྱུར། །དཔལ་ལྡན་རྩ་བའི་བླ་མ་ཞེས་སོགས་དང། དེང་ནས་ཇི་སྲིད་བྱང་ཆུབ་སྙིང་པོའི་བར། །སྐད་ཅིག་ཙམ་ཡང་འབྲལ་མེད་རྗེས་བཟུང་སྟེ། །ཕྱིན་ཅི་ལོག་གི་བློ་སྣ་ཀུན་བཀག་ནས། །ཡང་དག་ལམ་བཟང་སྐྱེ་བར་བྱིན་གྱིས་རློབས། །འདི་སྣང་

― GTD003_Page_0705 ―

^{[མ་དཔེ་གཟིགས་ན་འདིར་གནོན།]}

[Full Size]

འགག་ཚེ་དགའ་ལྡན་ཞིང་མཆོག་ཏུ། །མ་ཕམ་མགོན་དང་འཇམ་དཔལ་སྙིང་པོ་སོགས། །ཡབ་སྲས་ཀུན་གྱིས་དགྱེས་བཞིན་རྗེས་བཟུང་སྟེ། །ལམ་བཟང་དགའ་སྟོན་མྱོང་བར་བྱིན་གྱིས་རློབས། །མགོན་ཁྱོད་རྨད་བྱུང་བཀོད་པའི་ཞིང་ཁམས་སུ། །སེང་གེའི་ང་རོར་འཚང་རྒྱའི་ཚུལ་བསྟན་ཚེ། །འཁོར་དུ་སྐྱེས་ནས་ཟབ་མོའི་ལྟ་བ་དང། །གསང་ཆེན་ལམ་བཟང་བགྲོད་པར་བྱིན་གྱིས་རློབས། །མདོར་ན་དུས་དང་གནས་སྐབས་གང་དུ་ཡང། །བླ་མ་ཡི་དམ་དཀོན་མཆོག་གསུམ་གྱི་དངོས། །འདྲེན་པ་ཁྱོད་མིན་སྐྱབས་གཞན་མི་འཚོལ་བས། །འདུ་འབྲལ་མེད་པར་བྱིན་གྱིས་བརླབ་ཏུ་གསོལ། །དེ་ལྟར་གསོལ་བ་བཏབ་པས་དགྱེས་བཞིན་དུ། །སྙིང་དབུས་བཞུགས་ཤིང་དེ་ཡི་འདབ་མ་རྣམས། །ཟུམ་པའི་ཕྱི་ནང་སྔགས་ཀྱིས་བསྡམས་པའི་རྩེར། །མི་ཕྱེད་རྡོ་རྗེའི་རྒྱ་ཡིས་མཚན་པར་གྱུར། །དུས་གསུམ་དགེ་ཚོགས་གཅིག་ཏུ་བསྡོམས་པའི་མཐུས། །སྐྱེ་ཞིང་སྐྱེ་བར་འཇམ་མགོན་བླ་མ་དང། །འབྲལ་མེད་བསམ་དང་སྦྱོར་བས་ལེགས་བསྟེན་ནས། །བདེ་ཆེན་མགོན་པོའི་གོ་འཕང་མྱུར་ཐོབ་ཤོག། །ཐུན་མཚམས་རྣམས་སུ་ཡང་སྙིང་གར་རྗེ་བླ་མ་བཞུགས་ཡོད་སྙམ་པའི་མོས་པ་བྱས་ཏེ་ཟས་གོས་གནས་མལ་སོགས་ལ་ལོངས་སྤྱོད་པ་ན་སྙིང་གའི་རྗེ་བླ་མ་ལ་ཕུལ་བའི་དམིགས་པ་བྱས་པས་དཀོར་སྒྲིབ་སྦྱོང་ཞིང་ཚོགས་རླབས་པོ་ཆེ་ཞར་བྱུང་དུ་རྫོགས་པར་འགྱུར་བ་དང། སྒོ་གསུམ་གྱི་སྤྱོད་པ་གང་ལའང་དེ་ཉིད་དཔང་པོའི་ཚུལ་དུ་བཞུགས་པར་བསམས་པས་ཉེས་སྤྱོད་ལས་

― GTD003_Page_0706 ―

^{[མ་དཔེ་གཟིགས་ན་འདིར་གནོན།]}

[Full Size]

ལྡོག་ཅིང་དགེ་ཚོགས་འཕེལ་བ་དང་ལྷ་རྗེས་སུ་དྲན་པའི་རྣལ་འབྱོར་མཆོག་ཏུ་འགྱུར་ལ། ཚེ་རབས་ཐམས་ཅད་དུ་རྗེ་བླ་མ་དང་མི་འབྲལ་ཞིང་གསང་སྔགས་ཟབ་མོའི་སྨིན་བྱེད་དུ་འགྱུར་བའི་གནད་ཁྱད་པར་ཅན་ཡོད་དོ། །ཐུན་རྗེས་མ་རྣམས་ཀྱི་ཚེའང་དགའ་ལྡན་ནས་སྤྱན་འདྲེན་པ་སོགས་སྔར་དང་འདྲ་ལ། དཔལ་ལྡན་རྩ་བའི་བླ་མ་ཞེས་སོགས་ཀྱི་སྐབས་སྙིང་པདྨ་བུམ་སྐུའི་རྣམ་པ་དེ་ཉིད་ཅུང་ཟད་ཁ་ཕྱེ་བའི་མཚམས་ནས་མར༌ཕབས་ཏེ་སྔར་བཞུགས་པའི་རྗེ་བླ་མ་དེ་ཉིད་ལ་བསྟིམ་པའི་དམིགས་པ་བྱས་ལ། སླར་ཡང་སྔགས་འཕྲེང་གིས་བསྡམས་པ་སོགས་གོང་བཞིན་བྱས་པས་བྱིན་རླབས་བརྟན་པ་སོགས་དགོས་པ་ཤིན་ཏུ་ཆེའོ། །སྨྲས་པ། མིང་ཙམ་ལྷག་མར་གྱུར་པ་ཐུབ་པའི་བསྟན། །ཉི་ལྟར་གསལ་མཛད་འཇམ་དཔལ་སྙིང་པོ་ཞེས། །སྙན་པ་འཇིག་རྟེན་གསུམ་ན་གྲགས་པ་ཡི། །མགོན་དེ་མ་ཕམ་རྒྱལ་བའི་དྲུང་ན་བཞུགས། །དེ་ཡིས་ལེགས་གསུངས་བསྟན་པའི་སྙིང་པོ་ལ། །མོས་པའི་བློ་ཅན་ཡབ་རྗེའི་མདུན་ས་རུ། །བསྙེགས་འདོད་དེ་དག་ནོར་བུའི་ཐེམ་སྐས་འདིར། །དད་བརྩོན་ཟུང་འབྲེལ་གོམ་པ་འདོར་བར་རིགས། །ཚུལ་འདིར་འབད་ལས་ཐོབ་པའི་རྣམ་དཀར་མཐུས། །མ་ནོར་བསྟན་པའི་སྙིང་པོ་དར་བ་དང། །ཟོག་གིས་མ་བསླད་བསྟན་འཛིན་གཙང་མ་ཡིས། །བསྟན་པའི་བྱ་བ་གེགས་མེད་མཐར་ཕྱིན་ཤོག། །ཅེས་དགའ་ལྡན་ལྷ་བརྒྱ་མར་གྲགས་པའི་བླ་མའི་རྣལ་འབྱོར་གྱི་གཞུང་བསྲངས་ཏེ་མདོ་སྔགས་ཆ་ཚང་བར་ཉམས་སུ་ལེན་པའི་ཚུལ་དགའ་ལྡན་ཞིང་དུ་བགྲོད་པའི་ནོར་བུའི་ཐེམ་སྐས་ཞེས་བྱ་བ་འདི་ནི་ཕུལ་དུ་བྱུང་བའི་ལྷག་བསམ་རྣམ་དཔྱོད་དང་ལྡན་པ་ཏཱ་བླ་མ་རབ་འབྱམས་པ་ཀུན་དགའ་རྣམ་རྒྱལ་དང། ཆོས་ཚུལ་འབྱེད་པའི་བློ་མིག་མཆོག་ཏུ་ཡངས་པ་ཀུ་ཤྲཱི་

― GTD003_Page_0707 ―

^{[མ་དཔེ་གཟིགས་ན་འདིར་གནོན།]}

[Full Size]

བཀྲ་ཤིས་རབ་བརྟན་གཉིས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་བིཀྵུ་རཏྣ་ཨཱ་ནནྟའོ།། །།

རྗེ་བཙུན་བྱམས་མགོན་ལ་བརྟེན་པའི་འཕོ་བའི་རྣམ་བཞག

― GTD003_Page_0709 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བྱམས་པ་མགོན་པོ་ལ་བརྟེན་པའི་འཕོ་བའི་རྣམ་པར་བཞག་པ་དགའ་ལྡན་ཞིང་དུ་བགྲོད་པའི་བདེ་ལམ་ཞེས་བྱ་བ་བཞུགས་སོ། །

― GTD003_Page_0710 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་ཨཱརྱ་མཻ་ཏྲི་ཡེ། རིང་ནས་གོམས་པའི་ཐུགས་རྗེའི་ཕྱག་བརྐྱང་སྟེ། །སྲིད་མཚོ་ཉམ་ངའི་གཡང་དུ་ལྷུང་བ་རྣམས། །ཕན་བདེ་པདྨའི་དགའ་ཚལ་ལ་འགོད་པ། །མི་ཕམ་མགོན་གྱིས་བདག་སོགས་འགྲོ་འདི་སྐྱོངས། །དེའང་རྗེ་བཙུན་བྱམས་མགོན་ལ་བརྟེན་པའི་འཕོ་བའི་གདམས་པ་འཆད་པ་ལ། སྤྱིར་འཕོ་བའི་མན་ངག་ཉམས་སུ་ལེན་ཚུལ་ཚིག་ཟིན་ལ་གསལ་བར་བཤད་པ་ནི་ཁ་སྦྱོར་སོགས་མ་རྒྱུད་ཀྱི་སྐོར་ཤས་ཆེ་ལ། འོན་ཀྱང་ཕ་རྒྱུད་གསང་བ་འདུས་པའི་བསྲེ་འཕོའི་གནད་རྣམས་ཀྱང་འདི་དག་དང་དོན་མཐུན་ཞིང། ཁྱད་པར་འཕོ་བའི་གདམས་པ་མཐར་ཐུག་པ་སེམས་དབེན་སྒྲུབ་ཚུལ་གྱི་གཞུང་རྣམས་ཡིན་པར་མཁས་གྲུབ་ཐམས་ཅད་མཁྱེན་པས་བསྐྱེད་རིམ་དངོས་གྲུབ་རྒྱ་མཚོར་གསུངས་པ་ལྟར་ཡིན་ནོ། །རྒྱུད་སྡེ་འོག་མ་རྣམས་སུ་དེའི་རྣམ་གཞག་དངོས་སུ་གསུངས་པ་མེད་ཀྱང། བླ་མ་དམ་པ་གོང་མ་རྣམས་ཀྱིས་དེས་རྒྱས་བཀབ་ནས་འོད་དཔག་མེད་དང་བྱམས་མགོན་སོགས་ལ་བརྟེན་པའི་འཕོ་བའི་རྣམ་གཞག་མཛད་པ་ནི་རྒྱུད་དོན་མན་ངག་གིས་ཕྱེ་བའི་སྲོལ་ཕུལ་དུ་ཕྱིན་པར་སྣང་སྟེ། དགག་བྱ་དང་དགོས་པ་ཕྱོགས་མཐུན་པ་རྣམས་ལ་དབང་གི་རྣམ་གཞག་དང་ལས་ཚོགས་ཅི་རིགས་པ་རྣམས་རྒྱུད་སྡེ་དང་ལྷག་པའི་ལྷ་ཐ་དད་པ་སོ་སོ་ལ་ཕན་ཚུན་དུ་རྒྱས་བཀབ་པ་ནི་འཕགས་བོད་ཀྱི་གཞུང་ཚད་ལྡན་རྣམས་ལས་

― GTD003_Page_0711 ―

^{[མ་དཔེ་གཟིགས་ན་འདིར་གནོན།]}

[Full Size]

མང་དུ་འབྱུང་ངོ་། །དེས་ན་འདིར་དམ་པའི་ཕྱག་བཞེས་བཞིན་རྒྱལ་ཚབ་བྱམས་པ་མགོན་པོ་ལ་བརྟེན་པའི་འཕོ་བའི་གདམས་པ་ཉམས་སུ་ལེན་པ་ལ། རང་གིས་སྐྱོང་ཚུལ། གཞན་ལ་ཁྲིད་འདེབས་ཚུལ། གཤིན་པོའི་དོན་དུ་བྱ་ཚུལ་དང་གསུམ། དང་པོ་ལ་སྦྱོར་དངོས་གཉིས་ལས། སྦྱོར་བ་འགལ་རྐྱེན་དང་བྲལ་ཞིང་མཐུན་རྐྱེན་ཚང་བ་ཞིག་དགོས་ལ། དག་པའི་ཞིང་དུ་བགྲོད་པའི་འགལ་རྐྱེན་གྱི་གཙོ་བོ་ནི་མ་དག་འཁོར་བས་བསྡུས་པའི་ལུས་ལོངས་སྤྱོད་གཉེན་བཤེས་སོགས་ལ་ཆགས་པ་འདི་ཉིད་ཡིན་ཏེ། ཁམས་སོ་སོ་ལ་རང་རང་གི་སྲེད་པས་བདག་གིར་བྱས་མ་བྱས་ཁོ་ན་ཁམས་དེ་དང་དེ་ལས་འདས་མ་འདས་ཀྱི་དོན་དུ་གསུངས་སོ། །རང་གི་ངོས་ནས་ཚེ་འདིའི་ཕུན་ཚོགས་ལ་ཞེན་པ་མ་བཏང་ན། སངས་རྒྱས་བྱང་སེམས་རྣམས་ཅི་ཙམ་ཐུགས་རྗེ་ཆེའང་འདྲེན་པར་མི་ནུས་ཏེ། སྲིན་མོའི་གླིང་དུ་ཆུད་པའི་ཚོང་པ་རྣམས་སྤྱན་རས་གཟིགས་ཀྱི་སྤྲུལ་པ་རྟ་མཆོག་བཱ་ལ་ཧས་འཛམ་བུའི་གླིང་དུ་སྒྲོལ་བར་བཞེད་ཀྱང། ཚོང་དཔོན་མ་གཏོགས་པ་རྣམས་དེ་དག་གི་བསླུ་བྲིད་ལ་ཆགས་པའི་དབང་གིས་ཕྱིར་ལྟུང་སྟེ་སྲིན་མོའི་ཁ་ཟས་སུ་གྱུར་པ་བཞིན་ནོ། །དེས་ན་དལ་འབྱོར་རྙེད་དཀའ་ཞིང་ཚེ་ལ་ལོང་མེད་པའི་ཚུལ་བསམ་སྟེ། དགྲ་འདུལ་གཉེན་སྐྱོང་སོགས་སྨྱོན་པའི་ཟློས་གར་ལྟ་བུའི་ཚེ་འདིའི་སྣང་ཤས་བཟློག་པ་དང། ལས་ངེས་

― GTD003_Page_0712 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དང་འཕེལ་ཆེ་བའི་དབང་གིས་ཕྱི་མར་འགྲོ་ས་ངན་སོང་ལས་འོས་མེད་ཅིང། དེར་སྐྱེས་ན་ཡུན་ཚད་ལས་འདས་པར་སྡུག་བསྔལ་བཟོད་གླགས་མེད་པ་མྱོང་དགོས་ལ། གལ་ཏེ་ཕྱི་མར་ངན་སོང་དུ་མ་ལྷུང་ཡང་འཁོར་བ་འདི་ལས་གཏན་དུ་ཐར་པ་ཞིག་མ་བྱུང་ན། ལས་བྱས་པ་ཆུད་མི་ཟ་བའི་དབང་གིས་སྲིད་པའི་རྩེ་མོའི་བར་དུ་སོང་ཡང་ཕྱིར་ངན་སོང་ངན་འགྲོའི་གཡང་ས་བརྒྱུད་མར་ལྟུང་བ་ལས་མ་འདས་པའི་ཚུལ་བསམས་ཏེ་ཕྱི་མའི་སྣང་ཤས་བཟློག་པ་དང་གཉིས་ཀྱི་སྒོ་ནས་ཁམས་གསུམ་འཁོར་བ་མཐའ་དག་ལ་བཙོན་ར་ལྟ་བུའི་འདུ་ཤེས་ཀྱིས་ཞེན་པ་གཏིང་ནས་ལོག་པ་ཞིག་མེད་མི་རུང་དུ་དགོས་སོ། །མཐུན་རྐྱེན་སྒྲུབ་ཚུལ་ཡང། ཐེག་ཆེན་འཕོ་བའི་མན་ངག་ནི། སྟོབས་ལྔ་ཉིད་ཡིན་ཞེས་ཚེ་འདི་ལ་ཞེན་པ་བཅད་དེ་དག་པའི་ཞིང་དུ་སྐྱེ་འདོད་ཀྱི་འཕེན་པ་ཡང་ཡང་གཏོང་ཞིང། འཕོ་བའི་དམིགས་རྣམ་ཡུན་དུ་གོམས་པར་བྱེད་པ་དང། ཁྱད་པར་ཡོ་བྱད་གང་ཡོད་དགེ་འདུན་ལ་བསྙེན་བཀུར་སོགས་རྣམ་དཀར་གྱི་ཕྱོགས་སུ་བཏང་སྟེ། དེའང་འཕོ་བ་འབྱོངས་བའི་རྒྱུར་སྨོན་ལམ་རྣམ་པར་དག་པས་མཚམས་སྦྱོར་བ་ནི་དག་པའི་ཞིང་དུ་སྐྱེ་བ་འཛིན་པའི་ཐབས་ཀྱི་གཙོ་བོར་གསུངས་སོ། །དེར་སྐྱེ་འདོད་ཀྱི་འདུན་པ་རྣལ་མ་སྐྱེ་བ་ལ་ཞིང་གི་བཀོད་པ་ཡིད་ཡུལ་དུ་འཆར་དགོས་ལ། དེའང་མཛོད་ལས། གནས་ནས་གནས་འོག་ཇི་སྲིད་པ། །དེ་ནས་དེ་ཡི་གོང་དེ་སྲིད། །ཅེས་པ་ལྟར་གྱི་རིགས་པས་གཞལ་ན་འདི་ནས་སྟེང་དུ་དཔག་ཚད་སུམ་འབུམ་ཉི་ཁྲིའི་མཚམས་སུ་ལྷའི་བུ་རབ་དགའ་ལྡན་གྱིས་བསྐྱངས་པའི་དགའ་ལྡན་སྤྱིའི་གནས་ཡོད་ཅིང། དེའི་ངོས་གཅིག་ན་གྲོང་

― GTD003_Page_0713 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་དགོན་པའི་ཚུལ་དུ་དག་པའི་ཞིང་མཆོག་དགའ་ལྡན་ཡིད་དགའ་ཆོས་འཛིན་གྱི་གནས། སྤྱིར་བསྐལ་པ་བཟང་པོའི་སངས་རྒྱས་ཐམས་ཅད་ཀྱིས་སྐྱེ་བ་མངོན་པར་སྐྱེ་བའི་མཛད་པ་སྟོན་པའི་གནས་སུ་ཚོགས་གཉིས་ཀྱི་སྤྱོད་པས་བསྒྲུབས་པ་ཡིན་ལ། བྱེ་བྲག་ད་ལྟའི་དུས་ཀྱི་ཁྱད་པར་དུ་བྱས་པ་འདི་ནི་རྗེ་བཙུན་བྱམས་པ་མགོན་པོའི་ཐུགས་བསྐྱེད་ཀྱི་མཐུ་ལས་གྲུབ་པ་ཡིན་ནོ། །དེའི་སྣོད་བཅུད་ཀྱི་འབྱོར་བ་བསམ་གྱིས་མི་ཁྱབ་པའི་ཚུལ་སྒོས་སུ་སྟོན་པའི་མདོ་བོད་དུ་འགྱུར་བ་མི་སྣང་ཡང། དཀོན་མཆོག་བརྩེགས་པའི་ཆོས་ཀྱི་རྣམ་གྲངས་དུ་མར་སངས་རྒྱས་ཀྱི་ཞིང་མང་པོའི་བཀོད་པ་གསུངས་པ་དང་ཆ་མཚུངས་པས། དེ་དག་གི་རིགས་པའི་འགྲོས་སྦྱར་ཏེ་བསམ་པ་དང། ལྷག་པར་ཞིང་དེའི་དབུས་ན་རྗེ་བཙུན་བྱམས་མགོན་གྱི་བཞུགས་གནས་ཆོས་ཀྱི་ཕོ་བྲང་རྒྱལ་མཚན་མཐོན་པོ་གསེར་གྱི་རྒྱ་ཕིབས་ཉི་མ་སྟོང་གི་འོད་ལས་ལྷག་ཅིང། ནོར་བུའི་དྲ་བ་དྲ་ཕྱེད་དང་དྲིལ་བུ་གཡེར་ཁའི་ཚོགས་ཀྱིས་སྤྲས་པ། ལྷའི་དབང་པོའི་རྣམ་པར་རྒྱལ་བའི་ཁང་བཟང་ལས་ཀྱང་འབུམ་འགྱུར་གྱིས་ལྷག་པ་དང། དེའི་མདུན་དུ་ཆོས་སྟོན་པའི་ཀུན་དགའ་ར་བ་ཐ་གྲུ་ཡངས་ཤིང་རྒྱ་ཆེ་ལ་ཁོར་ཡུག་ཏུ་རིན་པོ་ཆེའི་ལྗོན་ཤིང་གི་ཕྲེང་བས་བསྐོར་བ། གསེར་གྱི་ས་གཞི་ལ་བཻཌཱུརྱའི་མིག་མང་རིས་སུ་བྲིས་ཤིང་མནན་ན་ནེམ་བྱེད་ཅིང། བཏེག་ན་སྤར་བྱེད་པ། དེའི་གོང་དུ་སེང་གེས་བཏེག་པའི་རིན་པོ་ཆེའི་ཁྲིའི་སྟེང་དུ་རྗེ་བཙུན་བྱམས་པ་མགོན་པོ་མཚན་དཔེའི་གཟི་འོད་འབར་ཞིང། ཤེར་ཕྱིན་ཟབ་མོའི་གདམས་པ་རྒྱུན་མི་འཆད་པར་འདོམས་པ་

― GTD003_Page_0714 ―

^{[མ་དཔེ་གཟིགས་ན་འདིར་གནོན།]}

[Full Size]

དང། གཡས་སུ་ནམ་མཁའ་དྲི་མ་མེད་པ་དང། གཡོན་དུ་རྒྱལ་སྲས་འཇམ་དཔལ་སྙིང་པོ་སོགས་རྒྱལ་སྲས་རྒྱ་མཚོས་བསྐོར་ནས་བཞུགས་པའི་བཀོད་པ་ཡང་ཡང་ཡིད་ལ་བྱེད་པ་ནི། དེར་སྐྱེ་འདོད་ཀྱི་འདུན་པ་སྐྱེ་བའི་ཐབས་མཆོག་ཏུ་འགྱུར་བར་མ་ཟད་ཞིང་སྦྱོང་གི་མན་ངག་ཀྱང་བླ་ན་མེད་པར་གསུངས་སོ། །དེ་ལྟར་བློ་སྦྱོང་བའི་དམིགས་རྟེན་དུ་ཞིང་བཀོད་ཀྱི་བྲིས་ཐང་སོགས་བྱུང་ན་ཤིན་ཏུ་ལེགས་ལ། དེ་མ་འབྱོར་ཡང་བྱམས་མགོན་གྱི་སྐུ་བྲིས་འབུར་ཅི་རིགས་སོགས་སྐུ་གསུང་ཐུགས་ཀྱི་རྟེན་ལེགས་པར་བཀྲམ་སྟེ། གཙང་ཞིང་གྱ་ནོམ་པའི་མཆོད་པ་ཕུལ་དུ་ཕྱིན་པ་བཤམ། སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ་སྐྱབས་སེམས་སྔོན་དུ་བཏང་ནས་ཀུན་སློང་རྣམ་པར་དག་པ་ཞིག་གསལ་བཏབ་སྟེ་དངོས་གཞི་ལ་འཇུག་པར་བྱེད་དགོས་སོ། །རང་ཉིད་ལུས་སེམས་བདེ་བ་ཙམ་ཞིག་གི་ཕྱིར་ཞིང་དེར་སྐྱེ་བ་དོན་དུ་གཉེར་བ་ནི་ཀུན་སློང་མ་དག་པ་ཡིན་པས། ཀུན་སློང་འཆོས་ཚུལ་ཡང་བརྟན་པ་མ་ཐོབ་བར་དུ་སྙིགས་མ་བདོ་བའི་གནས་འདི་ལྟ་བུར་སྐྱེ་བ་བླངས་ན། སླར་ཡང་རྐྱེན་དང་གྲོགས་ངན་པ་ཇི་ལྟ་བུ་ཞིག་གི་དབང་དུ་འགྱུར་ངེས་པ་མེད་པས། དེས་ན་སླར་མི་ལྡོག་པའི་དག་ཞིང་ཁྱད་པར་ཅན་ཞིག་ཏུ་སྐྱེ་བ་ལེན་དགོས་པས་དེའི་ནང་ནས་ཀྱང་རང་ཅག་གང་ལ་ལས་འབྲེལ་ཤིན་ཏུ་ཆེ་བ་རྗེ་བཙུན་བྱམས་མགོན་ཡིན་པས། ཞིང་ཁྱད་པར་ཅན་འདི་ཉིད་དུ་སྐྱེ་བ་བླངས་ཏེ་རྒྱལ་བ་མ་ཕམ་མགོན་པོའི་གསུང་གི་བདུད་རྩི་ལ་ལོངས་སྤྱོད་ཅིང། དེས་བསྟན་པའི་དོན་ཟབ་རྒྱས་ཡ་མ་

― GTD003_Page_0715 ―

^{[མ་དཔེ་གཟིགས་ན་འདིར་གནོན།]}

[Full Size]

བྲལ་བའི་ཉམས་ལེན་མཐའ་དག་དང། ཁྱད་པར་དུ་རྒྱ་ཆེ་བའི་ལམ་རིམ་བྱམས་སྙིང་རྗེ་བྱང་ཆུབ་ཀྱི་སེམས་རྣམས་ལམ་གྱི་སྲོག་ཏུ་བྱས། དམིགས་མེད་ཀྱི་ལྟ་བས་རྒྱས་བཏབ་ནས་ལམ་གོང་མ་ཐམས་ཅད་རིམ་གྱིས་བགྲོད་དེ། མཐར་ཐུག་སྐུ་བཞིའི་གོ་འཕང་མངོན་དུ་བྱས་ལ། འཕྲིན་ལས་ཉི་ཤུ་རྩ་བདུན་གྱི་སྒོ་ནས་མཁའ་མཉམ་སེམས་ཅན་ཐམས་ཅད་ཀྱང་བླ་མེད་བྱང་ཆུབ་ཀྱི་གོ་འཕང་ལ་འགོད་པར་བྱའོ་སྙམ་དུ་སེམས་བསྐྱེད་བཅོས་མ་ཚུན་ཆད་ཀྱི་སྒོ་ནས་གསལ་འདེབས་དགོས་སོ། །ཟབ་རྒྱས་ཀྱི་ལམ་གང་ལ་ཐོག་མར་གཙོ་བོར་སློབ་པའང། དབུ་མ་སྙིང་པོ་ལས། ཡང་དག་ཤེས་ཚོལ་སྔོན་བཏང་སྟེ། །དོན་དམ་རྣམ་པར་ངེས་གྱུར་ནས། །ལྟ་ངན་འཐིབ་གནས་འཇིག་རྟེན་ལ། །སྙིང་རྗེ་ཀུན་ཏུ་སྐྱེད་ནས་སུ། །ཞེས་སོགས་ལྟར་དབང་པོ་ཤིན་ཏུ་རྣོན་པོས་ཐོག་མར་ཡང་དག་པའི་ལྟ་བ་བཙལ་ཏེ། དེའི་སྒོ་ནས་སྙིང་རྗེ་ཆེན་པོ་སོགས་ལ་འཇུག་པར་གསུངས། གདུལ་བྱ་ཐུན་མོང་བ་ཤས་ཆེར་གྱི་དོན་དུ་འགྱུར་བ་ནི། དབུ་མ་འཇུག་པ་ལས། སྙིང་རྗེའི་སེམས་དང་གཉིས་སུ་མེད་བློ་དང། །ཞེས་གསུངས་པ་ལྟར། དང་པོར་ཐབས་ཀྱི་ཆ་ལ་མྱོང་བ་བརྟན་པོར་བྱས་ཏེ། གཟོད་དབུ་མའི་ལྟ་བ་ཚོལ་བ་ཡིན་ནོ། །དེར་སྐྱེ་བའི་རྒྱུ་ཚོགས་ཀུན་གྱི་གཙོ་བོར་གྱུར་པ་ནི། དེར་སྐྱེ་འདོད་ཀྱི་ཀུན་སློང་རྣམ་པར་དག་པ་འདི་ཁོ་ན་ཡིན་པས། ཀུན་སློང་གི་ཁྱད་པར་ལ་དེའི་སྣོད་བཅུད་ཀྱི་ཡོན་ཏན་ལུང་རྟོགས་ཀྱི་བསྟན་པ་གང་ལ་གཙོ་བོར་བྱེད་པ་དེ་དང་སྒོ་མཐུན་པའི་རིགས་འདྲའི་གནད་ཚང་བ་ཞིག་མེད་མི་རུང་དུ་དགོས་སོ། །

― GTD003_Page_0716 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་གཞི་ནི། དགའ་ལྡན་ཞིང་མཆོག་ཡིད་དགའ་ཆོས་འཛིན་ནས། །རྒྱལ་ཚབ་བྱམས་པ་མགོན་པོ་ཐུགས་རྗེའི་གཏེར། །རྒྱལ་སྲས་རྒྱ་མཚོའི་འཁོར་དང་བཅས་པ་ཀུན། །བརྩེ་བས་འདིར་གཤེགས་མདུན་གྱི་ནམ་མཁར་བཞུགས། །ཞེས་བརྗོད་པ་ན་སྐད་ཅིག་གིས་དགའ་ལྡན་ནས་རྗེ་བཙུན་བྱམས་མགོན་འཁོར་དང་བཅས་པ་བྱ་ནམ་མཁའ་ལ་འཕུར་བ་བཞིན་ཐོགས་པ་མེད་པར་བྱོན་ཏེ། སྨིན་མཚམས་མདའ་གང་གི་ཐད་ཀྱི་མདུན་གྱི་ནམ་མཁར་སེང་ཁྲི་པད་ཟླ་སོགས་ཀྱི་གདན་ལ་དགྱེས་བཞིན་བརྟན་པར་བཞུགས་པར་བསམས། དེ་ནས། ཇི་སྙེད་སུ་དག་ཅེས་པ་ནས། ཆེན་པོར་བསྔོ། །ཞེས་པའི་བར་གྱིས་ཡན་ལག་བདུན་པ་རྒྱས་པའམ། བསྡུ་ན། གུས་པས་ཕྱག་འཚལ་མཆོད་ཚོགས་མ་ལུས་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རང། །རྟག་ཏུ་བཞུགས་ཤིང་ཆོས་འཁོར་བསྐོར་བར་བསྐུལ། །དགེ་ཚོགས་ཀུན་ཀྱང་བྱང་ཆུབ་ཆེན་པོར་བསྔོ། །ཞེས་བསག་སྦྱང་མདོར་བསྡུས་པ་བྱ། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་བ་བྱམས་པ་མགོན་པོ་རྒྱལ་སྲས་རྒྱ་མཚོའི་ཚོགས་དང་བཅས་པ་ཐམས་ཅད་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཞེས་ལན་བདུན་ནམ་ཉེར་གཅིག་བརྒྱ་རྩ་སོགས་བརྗོད་ཅིང། སྐབས་འདིར་བྱམས་མགོན་གྱི་སྐུ་ལས་བདུད་རྩིའི་རྒྱུན་བབས་པ་རང་གི་སྤྱི་བོ་ནས་ཞུགས། ལུས་ཐམས་ཅད་གང་བས་ཐོག་མེད་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་དང། འདི་སྣང་གི་ཞེན་པ་

― GTD003_Page_0717 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་དག་པའི་ཞིང་དུ་སྐྱེ་བ་དང་འཕོ་བ་འབྱོངས་པ་ལ་གེགས་བྱེད་ཀྱི་དྲི་མ་ཐམས་ཅད་བྱང་ཞིང་དག །དེའི་སྐུ་གསུང་ཐུགས་ཀྱི་བྱིན་རླབས་རྣམས་རང་རྒྱུད་ལ་ཞུགས་པའི་མོས་པ་བྱེད། དེ་ནས། རང་ལུས་ཤེལ་གྱི་བུམ་པ་ལྟར་གསལ་བའི། །དབུས་སུ་དབུ་མ་སྨད་ཕྲ་སྟོད་ཡངས་པ། །ཡར་སྣེ་སྤྱི་བོའི་གཙུག་ཏུ་ཁ་ཕྱེ་ཞིང། །མར་སྣེ་ལྟེ་བའི་འོག་ཏུ་སླེབ་པ་ཡི། །སྙིང་གའི་ཐད་ཀྱི་དྷཱུ་ཏིའི་དབུས་ཉིད་དུ། །ཤིན་ཏུ་ཕྲ་བ་གཉུག་མའི་རླུང་སེམས་དང། །དབྱེར་མེད་དཀར་གསལ་འོད་ཀྱི་ཐིག་ལེའི་གཟུགས། །ཡང་ཞིང་འཕར་ལ་ཁད་པའི་རྣམ་པར་གྱུར། །ཅེས་བརྗོད་ཅིང། རང་གི་ལུས་ཤེལ་གྱི་བུམ་པ་བཞིན་ཕྱི་བལྟས་ནང་གསལ་བའི་དབུས་ཅུང་ཟད་རྒྱབ་གཞུང་ལ་ཉེ་བའི་ཆར་དབུ་མ་རག་དུང་ཁ་གྱེན་བསླང་ལྟ་བུ། མར་སྣེ་ཕུགས་རྡུག་ལྟེ་འོག་སོར་གསུམ་གྱི་ཐད་དུ་སླེབ་པ། ཡར་སྣེ་གྲོ་སོག་བཅད་པ་བཞིན་སྤྱི་བོའི་གཙུག་དང་ཁ་ད་ཆད་ཀྱི་ཚུལ་དུ་བུ་ག་ཡངས་ཧ་རེ་ཡོད་པ། སྙིང་གའི་ཐད་ཀྱི་དབུ་མའི་ནང་དེར་ཤིན་ཏུ་ཕྲ་བའི་རླུང་སེམས་དང་དབྱེར་མི་ཕྱེད་པའི་ཐིག་ལེ་དཀར་པོ་ཁ་དོག་དཀར་ལ་ཅུང་ཟད་དམར་བའི་མདངས་ཆགས་པ་འོད་ཀྱི་རང་བཞིན་ཅན་ཤིན་ཏུ་གསལ་ཞིང་འཚེར་བ། རླུང་ཅུང་ཟད་ཕོག་པ་ཙམ་གྱིས་ཀྱང་བསྐྱོད་ནུས་པའི་ཤིང་བལ་ལྟ་བུ། ཤིན་ཏུ་ཡང་ཞིང་འཕར་ལ་ཁད་འཕུར་ལ་ཁད་པ་ཞིག་ཏུ་བསམས། སྐབས་འདིར་སྔགས་བླ་མེད་ལྟ་བུའི་རྩ་གསུམ་དང་འཁོར་ལོ་བཞིའི་སྒོམ་ཚུལ་ལ་སོགས་པ་མེད་པར། ལུས་ཀྱི་དཀྱིལ་དུ་རྩ་དབུ་མ་སྲོག་ཤིང་གི་ཚུལ་དུ་བསྒོམ་པ་ཙམ་ཡིན་པས་

― GTD003_Page_0718 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་དོན་དེ་ཙམ་གྱིས་འགྲུབ་ཅིང། རྒྱུད་སྡེ་འོག་མ་ལའང་སྦྱར་ཆོག་པར་མངོན། དེའང་ཞལ་ལུང་ལས། ལམ་བཟང་པོ་ཡིས་ཡིད་འོང་གནས། །ལས་ངན་གྱིས་ནི་སྲིད་པར་སྐྱོན། །ཞེས་པ་ལྟར་རྣམ་ཤེས་འཕོ་བའི་སྒོ་ངན་པ་རྣམས་འགོག་པ་གལ་ཆེ་ཞིང། བླ་མེད་ནས་གསུངས་པའི་ལམ་འགོག་བྱེད་ཀྱི་ཡི་གེ་རྣམས་སྐབས་འདིར་མི་འོང་བས། སྒོ་དེ་རྣམས་གོང་དུ་བདུད་རྩི་འབེབས་སྦྱང་བྱས་པའི་མཐར། འོད་དང་བདུད་རྩི་གསེར་ཞུན་མ་ལྟ་བུས་དམ་གྱིས་བཀག་ཅིང། རྣམ་ཤེས་སྒོ་དེ་རྣམས་ནས་འཕོ་མི་ནུས་པར་བྱིན་གྱིས་བརླབས་པའི་མོས་པ་བྱས་པས་འགྲུབ་བོ། །དེ་ནས་བྱམས་མགོན་རང་གི་སྤྱི་བོར་སྤྱན་འདྲེན་པའི་ཕྱིར་གསོལ་བ་འདེབས་པའི་འདུན་པ་དྲག་པོ་དང་བཅས་ཏེ། རྩ་བའི་བླ་མ་སྐྱབས་གསུམ་ཀུན་འདུས་ཀྱི། །ངོ་བོ་བློ་བཟང་རྒྱལ་བའི་དབང་པོ་དང། །དབྱེར་མེད་བྱམས་མགོན་ཐུགས་རྗེའི་གཏེར་ཁྱོད་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །ཞེས་དལ་བུའི་སྒོ་ནས་ལན་གསུམ་མམ་གཅིག་བརྗོད་པས། སྐྱབས་ཡུལ་མཐའ་དག་བསྡུས་ཏེ་བྱམས་མགོན་ལ་ཐིམ་ཞིང། དེ་ཉིད་རང་གི་སྤྱི་བོར་བྱོན་ནས་རིགས་བདག་གི་ཚུལ་དུ་བཞུགས་པའི་དམིགས་པ་བྱས་ལ། དེ་ལྟར་གསོལ་བ་བཏབ་པས་སྐྱབས་ཡུལ་རྣམས། །རིམ་གྱིས་བསྡུས་ཏེ་མ་ཕམ་མགོན་ལ་ཐིམ། །དེ་ཉིད་རང་གི་སྤྱི་བོར་རིགས་བདག་གི །ཚུལ་བཞུགས་དབུ་མ་སྨད་ཡངས་སྟོད་ཕྲ་བའི། །ཐུགས་ཀའི་ཐད་དུ་མཻཾ་ཡིག་གསེར་གྱི་མདོག །ཡེ་ཤེས་ལྔ་ལྡན་བདེ་བའི་རང་བཞིན་ཅན། །འོད་ཟེར་འབར་བ་མཐོང་སྟེ་དེའི་ངོ་བོར། །འཕོ་འདུན་དྲག་པོས་སླར་

― GTD003_Page_0719 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་གསོལ་འདེབས་བྱ། །ཞེས་པའི་ཚིག་རིས་ལྟར་ལ། དེའི་རྩ་དབུ་མའི་མར་སྣེ་དང་རང་གི་རྩ་དབུ་མའི་ཡར་སྣེ་གཉིས་སྲུབ་ཅུང་ཟད་ཀྱང་མེད་པར་འབྱར་ཞིང་དབྱེར་མེད་ལྟ་བུར་གྱུར་པའི་མོས་པ་བྱེད་པ་གལ་ཆེའོ། །དེ་ནས་རང་སེམས་འོད་ཀྱི་ཐིག་ལེ་དེ་ཉིད་ཀྱིས་དབུ་མའི་ལམ་ནས་ཡར་བལྟས་པས་བྱམས་མགོན་གྱི་ཐུགས་ཀ་ན་གཉིས་སུ་མེད་པའི་ཡེ་ཤེས་བདེ་བ་ཆེན་པོའི་རང་བཞིན་མཻཾ་ཡིག་གསལ་ཞིང་དྭངས་པ་འོད་ལམ་མེ་ཡོད་པ་མཐོང་ནས་དེས་ཡིད་ཕྲོགས་ཏེ། རང་ཉིད་ཀྱང་དེར་སླེབ་ནས་དེ་དང་གཅིག་ཏུ་འདྲེ་བ་ཞིག་བྱུང་ན་སྙམ་པའི་འདུན་པ་དྲག་པོ་དང་བཅས། འགྲོ་སྒྲོལ་ཐབས་ཀྱི་རྣམ་པ་མ་ལུས་གཟིགས། །ཀུན་ལ་ཐུགས་རྗེ་ཉེ་རེིང་མེད་པར་འཇུག །གཞན་ཕན་འཕྲིན་ལས་དུས་ལས་མི་ཡོལ་བ། །སྐྱབས་མཆོག་མཚུངས་མེད་ཁྱོད་ལ་གསོལ་བ་འདེབས། །འདི་སྣང་ཞེན་པའི་འཆིང་བ་བཅད་དུ་གསོལ། །ལས་ངན་སྡིག་སྒྲིབ་མ་ལུས་སྦྱང་དུ་གསོལ། །གནད་གཅོད་གཤིན་རྗེའི་འཇིགས་ལས་བསྐྱབ་ཏུ་གསོལ། །འཁྲུལ་སྣང་བར་དོའི་འཕྲང་ལས་བསྒྲལ་དུ་གསོལ། །མི་ཁོམ་ངན་སོང་སྐྱེ་སྒོ་བཅད་དུ་གསོལ། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །ལམ་བཟང་བག་ཆགས་མངོན་དུ་གྱུར་པར་མཛོད། །ཡིད་དགའ་ཆོས་འཛིན་གནས་དེར་དྲང་དུ་གསོལ། །ཞེས་ཕུར་ཚུགས་སུ་གསོལ་བ་འདེབས་པ་གསུམ་མམ་བདུན་སོགས་བྱས་པས་སྤྱི་བོའི་བྱམས་མགོན་གྱི་ཐུགས་ཀ་ནས་འོད་ཟེར་སྡོམ་གྱི་བ་ཐག་ལྟ་བུ་ཞིག་དབུ་མའི་ལམ་ནས་མར་འོངས་རང་སེམས་འོད་ཀྱི་ཐིག་ལེ་ལ་རེག་པས། ཁབ་

― GTD003_Page_0720 ―

^{[མ་དཔེ་གཟིགས་ན་འདིར་གནོན།]}

[Full Size]

ལེན་གྱིས་ལྕགས་ཕྱེ་ལ་རེག་པའམ། ཉ་ལ་ལྕགས་ཀྱུས་བཏབ་པ་བཞིན་དུ་ཡར་དྲངས། ཐུར་སེལ་དྲག་ཏུ་བསྡམ་པས་འོག་ནས་བཏག་པར་བསམ་ལ་ཧིཀ་ཅེས་བརྗོད་པ་ན་སྙིང་གའི་ཐད་ཙམ་དུ་སླེབ་པའི་དམིགས་པ་དང། ཀ་ཞེས་བརྗོད་དེ་སྔར་གྱི་རང་གནས་སུ་ཕབ། ཡང་ཧིཀ་ཅེས་བརྗོད་པས་མགྲིན་པ་དང་མགོ་བོའི་ནང་ཙམ་ཚངས་བུག་གི་བར་དུ་སླེབ་པའི་དམིགས་པ་སོགས་བྱས་ཏེ། ཧིཀ་གསུམ་བདུན་ཉེར་གཅིག་སོགས་འདེབས་ཤིང། དེ་རེ་རེའི་མཐར་ཡང་ཀ་ཞེས་སྔར་གྱི་རང་གནས་སུ་ཕབ། ཚངས་བུག་ནས་ཕྱིར་ཐོན་པའི་དམིགས་པ་ཡང་ཡང་བྱས་ན་ཚེ་ལ་གནོད་པར་གསུངས་པས། ཉིན་རེ་རེར་ཡང་རང་གི་དབུ་མ་ནས་བྱམས་མགོན་གྱི་དབུ་མར་ཞུགས་ཏེ། དེའི་ཐུགས་ཀའི་མཻཾ་ཡིག་ལ་རེག་ཙམ་པ་ལན་རེ་ཙམ་བྱ། དམ་པ་འགའ་ཞིག་ཧིཀ་དང་ཕཊ་གདམ་ང་ཅན་དུ་གསུངས་ཀྱང། ཕྱིས་ཀྱི་བླ་མ་རྣམས་རླུང་གྱེན་དུ་བཟློག་པ་ལ་ཧིཀ་བཟང་བར་གསུངས་ལ། དེའང་ཁ་ནས་ཧིཀ་ཅེས་བརྗོད་པ་ཙམ་མ་ཡིན་པར། དེ་དང་མཉམ་དུ་རླུང་གྱེན་དུ་འདྲེན་པ་སྐྱིག་བུའི་རྣམ་པ་ལྟ་བུ་ཞིག་དགོས་པ་ཡིན་ནོ། །འདིར་རང་སེམས་འོད་ཀྱི་ཐིག་ལེ་གྱེན་དུ་འཕང་བའི་དམིགས་པ་སྐྱོང་ཚུལ་ཡང། འཕེན་བྱ་ཟུར་དུ་བཞག་ནས་རང་ཉིད་འཕེན་པ་པོ་ལོགས་སུ་ཡོད་པ་ལྟ་བུར་བསམ་སྟེ་ཅི་ཙམ་བསྒོམ་ཡང་སྤྱི་གཙུག་ཟ་བ་དང་ཆུ་སེར་འཛག་པ་སོགས་ཀྱི་རྟགས་བྱུང་ནའང། འཕོ་བ་གནད་དུ་སོང་བ་མིན་པར་ཀུན་མཁྱེན་འཇམ་དབྱངས་བཞད་པའི་རྡོ་རྗེས་གསུངས་པས་འདི་གོ་བ་ཤིན་ཏུ་གནད་ཆེ་ལ། དེའང་ང་དང་ངའི་ལུས་ངའི་སེམས་ཞེས་པའི་འཆར་ཚུལ་ཞིབ་ཏུ་བྱས་ན་དབུ་མ་འཇུག་པར། ༈ གང་ཕྱིར་འཇིག་རྟེན་ས་བོན་ཙམ་

― GTD003_Page_0721 ―

^{[མ་དཔེ་གཟིགས་ན་འདིར་གནོན།]}

[Full Size]

བཏབ་ནས། །ཞེས་པའི་རིགས་པ་སྦྱར་ཏེ་རྣམ་བཤད་དགོངས་པ་རབ་གསལ་ལས་བློ་ལྷན་སྐྱེས་ལ་བདག་ཕུང་ཐ་མི་དད་དུ་སྣང་བར་གསུངས་པ་བཞིན་འཆར་བའི་སྐབས་ཀྱང་ཡོད་ལ། རྣམ་འགྲེལ་ལས། མཆོག་གཞན་དོན་དུ་གཉེར་ཕྱིར་དང། །ཞེས་སོགས་ལྟར་ནོར་གྱི་བདག་པོ་བཞིན་བརྗེ་ཚོང་བྱེད་པའི་བདག་པོ་ལྟ་བུ་ཐ་དད་པའི་ཚུལ་དུ་འཆར་བའི་སྐབས་ཀྱང་སྲིད་པས། དབུ་མ་ལུང་རིགས་གཏེར་མཛོད་དུ། རེས་ལུས་ཀྱི་སྟེང་ན་ཡོད་པ་ལྟ་བུ། རེས་སེམས་ཀྱི་སྟེང་ན་ཡོད་པ་ལྟ་བུ་ཞེས་གསུངས་སོ། །དེས་ན་སྐབས་འདིར་ཕྱིའི་ལུས་རྟེན་ནི་རང་དང་ངོ་བོ་ཐ་དད་པའི་གནས་ཁང་ལྟ་བུར་བསམས་ལ། རང་ཉིད་རྣམ་པར་ཤེས་པའི་ངོ་བོ་འོད་ཀྱི་ཐིག་ལེ་དེ་ཉིད་དང་ངོ་བོ་གཅིག་ཏུ་ཡོད་པ། དེ་གྱེན་དུ་འཕང་བའི་ཤུལ་ན་འཕེན་པ་པོའི་ང་ཞིག་ལུས་རྒྱུ་མེད་པ་ལྟ་བུའི་འཆར་ཚུལ་བྱུང་ན་སྐྱོང་ཚུལ་གནད་དུ་སོང་བ་ཡིན་ནོ། །མཇུག་ཏུ་སྤྱི་བོའི་བྱམས་མགོན་འོད་དུ་ཞུ་བ་ཚངས་བུག་ནས་མར་བསྟིམ་པས། དབུ་མའི་ཡར་སྣེའི་ཁ་གསེར་ཞུན་གྱི་ཁུ་བ་ལྟ་བུས་ཡོངས་སུ་བཅད་པར་མོས་ན་བྱིན་རླབས་ཁྱད་པར་ཅན་འཇུག་པ་དང་ཚེ་བསྲིང་བའི་ཐབས་སུའང་འགྱུར་བར་གསུངས་སོ། །ནམ་ཞིག་འཆི་ཁའི་ཚེ་ལག་ལེན་དུ་བྱ་ཚུལ་ནི། ཕྱི་ནང་གི་འཆི་ལྟས་བརྟག་པ་དང། ཟློག་པའི་ཐབས་སོགས་གཞན་ནས་འབྱུང་བ་བཞིན་བྱས་པས། ཟློག་མི་ནུས་པར་ངེས་པ་ན། ཧ་ཅང་ལུས་ཟུངས་མ་ཟད་པའི་མཚམས་སུ་བྱ་དགོས་ཤིང། དེའི་དམིགས་པ་སྐྱོང་ལུགས་གཤིན་པོ་ལ་བྱ་ཚུལ་འོག་ཏུ་འབྱུང་བ་དང་འདྲའོ། །༈ གཉིས་པ་གཞན་ལ་འདེབས་ཚུལ་ནི། ཆོས་ཉན་པའི་ཀུན་སྤྱོད་ཚུལ་དང་མཐུན་པས་

― GTD003_Page_0722 ―

^{[མ་དཔེ་གཟིགས་ན་འདིར་གནོན།]}

[Full Size]

མདུན་དུ་འཁོད་བཅུག་ལ། སངས་རྒྱས་ཆོས་དང་ཞེས་སོགས་སྐྱབས་སེམས་ལན་གསུམ་བྱ་ཞིང། དེའི་ཚེ་སློབ་མས་ཀྱང་བླ་མའི་གསུང་གི་ཚིག་རིས་དང་བསྟུན་ནས་སྐྱབས་སེམས་ཀྱི་དམིགས་པ་སྐྱོང་དགོས་སོ། །དེ་ནས། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཕྱིར་དུ་འཕོ་བའི་གདམས་པ་ཟབ་མོ་འདི་ཉིད་གསན་པར་བྱའོ་སྙམ་པ་དང། ཁྱད་པར་དུས་ཐོག་མ་མེད་པ་ཞིག་ནས་ངན་སོང་གསུམ་དུ་སྡུག་བསྔལ་མཐའ་ཡས་པ་བར་མཚམས་མེད་པར་མྱོང་བ་ལས། ད་རེས་སྟབས་ལེགས་ཀྱིས་ལན་གཅིག་ཐར་ཏེ་དལ་འབྱོར་གྱི་རྟེན་ཁྱད་པར་ཅན་ཐོབ། སངས་རྒྱས་ཀྱི་བསྟན་པ་རིན་པོ་ཆེ་དང་མཇལ་། ཕྱི་ནང་གི་རྟེན་འབྲེལ་ཕུན་སུམ་ཚོགས་པ་འདི་ལྟ་བུ་འགྲིག་པའི་སྐབས་འདིར་མ་མཐའ་འང་ངན་སོང་གི་སྐྱེ་སྒོ་བཅད་དེ། ཕྱིན་ཆད་དེར་མི་ལྟུང་བ་ཞིག་བྱེད་དགོས་ལ། དེའང་མཛོད་ལས། བཟོད་ཐོབ་ངན་སོང་ཡོངས་མི་ལྟུང། །ཞེས་དང། འཕགས་པའི་ཉི་ཁྲི་སྣང་བར། བཟོད་པ་ཐོབ་པ་ནི་ངན་འགྲོ་ཡོངས་སུ་མྱ་ངན་ལས་འདས་པ་ཡིན་ནོ། །ཞེས་མྱང་འདས་བརྒྱད་ཀྱི་གྲངས་སུ་གསུངས་པ་ལྟ་བུ་རྟོགས་པ་གོང་མར་སོན་པའི་སྟོབས་ཀྱིས་ངན་འགྲོའི་སྒོ་ཁེགས་པ་ནི་རང་ཅག་ལྟ་བུར་རེ་ཞིག་འབྱུང་དཀའ་བས། དེས་ན་བཙན་ཐབས་འཚང་རྒྱ་འཕོ་བའི་གདམས་པ་འདི་ལྟ་བུ་ཞིག་གི་སྒོ་ནས་ངན་སོང་ངན་འགྲོའི་སྐྱེ་སྒོ་མཐའ་དག་འགོག་པར་བྱེད་དགོས། དེའང་སངས་རྒྱས་ཐམས་ཅད་ཐུགས་རྗེ་བྱིན་རླབས་ཁྱད་པར་མེད་ཀྱང། མཐུན་པའི་སྨོན་ལམ་མཆོག་ཏུ་རྨད་བྱུང་ཞིང། །སྤྱད་པ་

― GTD003_Page_0723 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་ཚེ་ན་ཡང་མཆེད་གྱུར་ལ། །སྐལ་བཟང་གཅིག་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ཞེས་གསུངས་པ་ལྟར། བསྐལ་པ་བཟང་པོའི་རྣམ་འདྲེན་འདི་དག་ཐུགས་བསྐྱེད་སྨོན་ལམ་ལྷན་ཅིག་པའི་སྟོབས་ཀྱིས་གཅིག་གི་བསྟན་པ་ལ་ཞུགས་ཕྱིན་བསྐལ་བཟང་རྣམ་འདྲེན་གང་ཡང་རུང་བ་ཞིག་གི་བསྟན་པ་ལ་ངེས་ཅན་དུ་སྨིན་ཅིང་གྲོལ་བར་གསུངས། ཁྱད་པར་བདག་ཅག་གི་སྟོན་པ་ཐུབ་པའི་དབང་པོ་དང་རྗེ་བཙུན་བྱམས་མགོན་རྣམ་གཉིས་སློབ་པ་ལམ་གྱི་གནས་སྐབས་སུ་བླ་སློབ། སྐུ་མཆེད། མཛའ་བཤེས་སོགས་ཀྱི་རྣམ་པས་འབྲལ་མེད་ལྟ་བུར་འཁྲུངས་ཚུལ་སྐྱེས་རབས་སོགས་སུ་གསལ་བ་ལྟར་ཡིན་ལ། དེར་མ་ཟད་ད་ལྟའང་བྱམས་མགོན་གྱིས་ཐུབ་པའི་དབང་པོ་མཆོད་རྟེན་གྱི་རྣམ་པར་རྟག་ཏུ་སྤྱི་བོར་བཀུར་བ་ལྟ་བུ་ཐུགས་བསྐྱེད་འབྲེལ་བ་ལྷག་པར་ཆེ་བས། རང་ཅག་ཐུབ་པའི་དབང་པོའི་རྗེས་འཇུག་རྣམས་རྗེ་བཙུན་བྱམས་མགོན་གྱིས་རྗེས་སུ་འཛིན་པའི་རྟེན་འབྲེལ་གྱི་སྒོ་ཁྱད་དུ་འཕགས་པ་ཞིག་ཡོད། དེའི་རྒྱུ་མཚན་གྱིས་བྱམས་པས་ཞུས་པའི་མདོ། བྱམས་པ་ལུང་བསྟན་པའི་མདོ། བྱམས་པ་འབྱུང་བའི་མདོ། བྱམས་པ་སེང་གེའི་སྒྲའི་མདོ་རྣམས་སུ་སངས་རྒྱས་ཤཱཀྱ་ཐུབ་པའི་བསྟན་པ་འདི་ལ་ཐོས་བསམ་ཅུང་ཟད་རེ་བགྱིས་པ་དང། སྐུ་གསུང་ཐུགས་ཀྱི་རྟེན་སྐྱུ་རུ་རའི་འབྲུ་ཚད་ཙམ་བཞེངས་པ། ཉིན་ཞག་གཅིག་ལ་བསླབ་པ་སྣ་རེ་ཙམ་བསྲུང་བ་ཚུན་ཆད་ཀྱང་བྱམས་མགོན་གྱིས་རྗེས་སུ་འཛིན་ཅིང་དེའི་བསྟན་པ་དང་མཇལ་བར་གསུངས། ཇོ་བོ་ཡབ་

― GTD003_Page_0724 ―

^{[མ་དཔེ་གཟིགས་ན་འདིར་གནོན།]}

[Full Size]

སྲས་བཀའ་གདམས་གོང་མ་རྣམས་ཀྱང་བྱམས་མགོན་གྱི་ཞིང་དུ་བྱོན་ཅིང། རྗེས་འཇུག་རྣམས་ལའང་དེར་སྨོན་ལམ་འདེབས་དགོས་ཞེས་ནན་ཏན་དུ་གསུངས། རྗེ་བླ་མའང་སྐུ་ཚེ་རྗེས་མར་དགའ་ལྡན་དུ་འབྱོན་པར་ལྷག་པའི་ལྷ་དུ་མས་ལུང་བསྟན་ཅིང། དེའི་རྟེན་འབྲེལ་གྱིས་དགོན་པའི་མིང་ལའང་དགའ་ལྡན་རྣམ་པར་རྒྱལ་བའི་གླིང་ཞེས་བཏགས་པ་ལ་བརྟེན་ནས་གྲུབ་མཐའ་སྤྱི་ལའང་རི་བོ་དགའ་ལྡན་པ་ཞེས་མཚན་དུ་ཆགས་པ་བྱུང། རྗེ་བླ་མ་ལ་བརྟེན་པའི་བླ་མའི་རྣལ་འབྱོར་ཀུན་གྱི་ནང་ན་བྱིན་རླབས་མི་ཟད་པའི་གཏེར་དུ་གྱུར་པ་དགའ་ལྡན་ལྷ་བརྒྱ་མར་གྲགས་པ་འདི་ཉིད་ཡིན་ཞིང། དེའི་སྐབས་སུའང་དགའ་ལྡན་གྱི་བྱམས་མགོན་གྱི་ཐུགས་ཀ་ནས་སྤྱན་འདྲེན་པ་དང། དེ་ལ་བརྟེན་པའི་འཕོ་བའི་སྐབས་སུའང་སྐུའི་རྣམ་པ་གསལ་འདེབས་ཚུལ་ཙམ་མ་གཏོགས་དགའ་ལྡན་གྱི་གནས་སུ་འཕོ་བར་བྱེད་པ་འདི་དང་གཉིས་ཀ་ཁྱད་པར་མེད། དེས་ན་རང་ཅག་རྗེ་བླ་མའི་བསྟན་པ་རིན་པོ་ཆེ་འདིར་བསམ་སྦྱོར་ཅི་རིགས་པས་འབྲེལ་ཐོགས་པ་རྣམས་ཀྱིས་དགའ་ལྡན་གྱི་གནས་དེར་སྐྱེ་བའི་རྒྱུ་བསྒྲུབས་ན་སངས་རྒྱས་བྱང་སེམས་རྣམས་ཐུགས་བསྐྱེད་འབྲེལ་བའི་སྟོབས་ཀྱིས་ཤིན་ཏུ་ས་ཆོད་ཆེན་པོ་འབྱུང་བས། དེ་ཡིད་ལ་བཞག་ནས་རང་གི་སྒོ་གསུམ་ནུས་པ་གང་ཡོད་ཀྱིས་དེར་སྐྱེ་བའི་རྒྱུ་བསྒྲུབ་པ་དང། སྔོན་ཆད་བགྱིས་པའི་དགེ་ཚོགས་ཇི་སྙེད་ཅིག་ཡོད་པ་ཐམས་ཅད་ཀྱང་བློས་གཅིག་ཏུ་བསྡོམས་ཏེ་ཞིང་མཆོག་དམ་པ་དེ་ཉིད་དུ་སྐྱེ་ཞིང། རྒྱལ་བ་བྱམས་པ་མགོན་པོའི་གསུང་གི་བདུད་རྩི་ངོམས་མེད་དུ་མྱང་ནས། ས་ལམ་གྱི་

― GTD003_Page_0725 ―

^{[མ་དཔེ་གཟིགས་ན་འདིར་གནོན།]}

[Full Size]

རྟོགས་པ་ཁྱད་པར་ཅན་མྱུར་དུ་བགྲོད་པའི་རྒྱུར་བསྔོ་བ་དང། འོག་ནས་འབྱུང་བའི་ཆོ་གའི་ཚིག་རིས་རྣམས་ལའང་ངེད་ཀྱིས་ཇི་ལྟར་བརྗོད་པ་དང་མཐུན་པའི་དམིགས་པ་མ་ཡེངས་པར་བྱས་ཏེ་གསན་པར་ཞུ། དགའ་ལྡན་ཞིང་མཆོག་ཡིད་དགའ་ཆོས་འཛིན་ནས། །ཞེས་པ་ནས། མཆོད་དོ། །སྐྱབས་སུ་མཆིའོ། །ཞེས་སྤྱན་དྲངས་ཏེ་ཡན་ལག་བདུན་པ། བདུད་རྩི་འབེབས་སྦྱང་སོགས་གོང་བཞིན་བྱ། དེ་ནས། ཁྱོད་ལུས་ཤེལ་གྱི་བུམ་པ་ཞེས་དང་། དེ་ཉིད་སློབ་མའི་སྤྱི་བོར་རིགས་བདག་གི །ཞེས་ཚིག་བསྒྱུར་ཏེ་ཚིགས་བཅད་གཞན་རྣམས་སྔར་བཞིན་བྱ་བའམ། ཡང་ན། ཁྱེད་རང་ལུས་དྲང་པོར་བསྲང་སྟེ་གནས་པ་ཤེལ་གྱི་ཕྲུ་མ་བུས་པ་བཞིན་ཕྱི་བལྟས་ནང་གསལ་བའི་དབུས་སུ་རྩ་དབུ་མ་སྨད་ཕྲ་ལ་སྟོད་ཡངས་པ། མར་སྣེ་ལྟེ་འོག་ཏུ་སླེབས་ཤིང། ཡར་སྣེ་སྤྱི་བོའི་གཙུག་ཏུ་རྒྱ་མཐོངས་ཁ་ཕྱེ་བ་ལྟར་ཡངས་ཐ་ལེ་ཡོད་པའི་མར་སྣེའི་ནང་དུ་རང་སེམས་ཀྱི་ངོ་བོ་ཐིག་ལེ་དཀར་ལ་དམར་བའི་མདངས་ཆགས་པ། ཤིན་ཏུ་གསལ་ཞིང་འཚེར་བ་འཕར་ལ་ཁད་པ་ཞིག་ཏུ་གསལ་བཏབ་སྟེ། མདུན་ན་བཞུགས་པའི་རྒྱལ་བ་བྱམས་པ་མགོན་པོ་འཁོར་དང་བཅས་པ་ལ་གདུང་ཤུགས་དྲག་པོས་གསོལ་བ་འདི་བཞིན་འདེབས་པར་མཛོད། རྩ་བའི་བླ་མ་སྐྱབས་གསུམ་ཀུན་འདུས་ཀྱི། །༝༝སྙིང་ནས་གསོལ་བ་འདེབས་སོ་བྱིན་གྱིས་རློབས། །དེ་ལྟར་དུ་གསོལ་བ་བཏབ་པས་འཁོར་གྱི་ཚོགས་རྣམས་མེ་ལོང་ལ་ཧ་བཏབ་པ་བཞིན་མཐའ་ནས་རིམ་པ་བཞིན་གཅིག་ལ་གཅིག་ཐིམ་པའི་ཚུལ་གྱིས་

― GTD003_Page_0726 ―

^{[མ་དཔེ་གཟིགས་ན་འདིར་གནོན།]}

[Full Size]

གཙོ་བོ་ལ་ཐིམ། དེ་ཉིད་ཁྱེད་རང་གི་སྤྱི་བོར་བྱོན་ནས་རིགས་བདག་གི་ཚུལ་དུ་བཞུགས་པའི་སྐུའི་དཀྱིལ་དྲང་ཐད་དུ་རྩ་དབུ་མ་སྨད་ཡངས་ཤིང་སྟོད་ཕྲ་བ། ཐུགས་ཀའི་ཐད་དུ་རྒྱལ་བ་མ་ཕམ་མགོན་པོའི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་མཻཾ་ཡིག་གསེར་གྱི་ཁ་དོག་ལྟ་བུ་གསལ་ཞིང་འོད་ཟེར་ལྔ་འཕྲོ་བས་མཚན་པ། དེའི་དབུ་མའི་མར་སྣེ་དང་ཁྱེད་རང་གི་དབུ་མའི་ཡར་སྣེ་གཉིས་ཤིན་ཏུ་ཁ་མཉམ་པར་སྦྱར་ཏེ་དབྱེར་མེད་ལྟ་བུར་གྱུར་པའི་མོས་པ་དང། རང་སེམས་འོད་ཀྱི་ཐིག་ལེའི་རྣམ་པ་དེ་ཉིད་ཀྱིས་བྱམས་པ་མགོན་པོའི་ཐུགས་ཀའི་ས་བོན་ནོར་བུའི་སྒྲོན་མེ་ལྟ་བུར་ཤིན་ཏུ་འོད་གསལ་བ་དེ་ཉིད་མཐོང་བ་ལ་བརྟེན་ནས་དགའ་བ་དང་དང་བ་ཚད་མེད་པ་སྐྱེ་ཞིང། རང་ཉིད་ཀྱང་དེའི་དྲུང་དུ་སླེབ་ན་སྙམ་པའི་འདུན་པ་ཤུགས་དྲག་ཏུ་བྱེད་པ་དང། དེ་ནས་ངེད་ཀྱི་ཚིག་རིས་བཞིན་ཕུར་ཚུགས་སུ་གསོལ་བ་བཏབ་པའི་མཐར། ངེད་ཀྱིས་ཧིཀ་ཅེས་བརྗོད་པ་ན་རང་སེམས་ཐིག་ལེར་གསལ་བ་དེ་ཉིད་རླུང་གིས་གྱེན་དུ་བཏེགས། བྱམས་མགོན་གྱི་ཐུགས་ཀའི་ས་བོན་ལས་འོད་ཟེར་ལྕགས་ཀྱུ་ལྟ་བུ་ཞིག་བྱུང་ནས་གྱེན་དུ་དྲངས། ཀ་ཞེས་བརྗོད་པ་ན་སླར་ཡང་སྔར་གྱི་རང་གནས་སུ་བབས་པའི་དམིགས་པ་སོགས་སྤེལ་མར་བྱེད་དགོས་པ་ཐུགས་ལ་འཛིན་པར་ཞུ། ཞེས་ཚིག་ལྷུག་པའི་སྒོ་ནས་བརྡ་སྤྲོད་ཅིང། མང་པོ་ལ་ལྷན་དུ་བྱེད་པའི་ཚེ་ཁྱེད་རང་རྣམས་ཞེས་མང་ཚིག་སྦྱར་ན་བདེའོ། །དེ་ནས་འགྲོ་སྒྲོལ་ཐབས་ཀྱི་ཞེས་སོགས་གོང་དང་འདྲ་ལ། འདིའི་སྐབས་སུ་བླ་མས་ཀྱང་ཚིག་རིས་བཞིན་སློབ་མའི་ལུས་ཀྱི་རྩ་གསལ་འདེབས་པ་དང། རྣམ་ཤེས་སྤར་བའི་དམིགས་པ་སོགས་བྱེད་དགོས་སོ། །

― GTD003_Page_0727 ―

^{[མ་དཔེ་གཟིགས་ན་འདིར་གནོན།]}

[Full Size]

མཇུག་ཏུ། འདིས་མཚོན་དགེ་བས་བདག་གཞན་འགྲོ་བ་ཀུན། །ཞེས་སོགས་དང། ས་བཅུའི་དབང་ཕྱུག་རྒྱལ་ཚབ་ཅེས་སོགས་དང། འདི་ནས་ཤི་འཕོས་གྱུར་མ་ཐག །ཅེས་སོགས་བསྔོ་སྨོན་གྱིས་མཚམས་སྦྱར་བར་བྱའོ། །༈ གསུམ་པ་གཤིན་པོ་ལ་བྱ་ཚུལ་ནི་ཆོ་ག་གང་ཡང་རུང་བ་དང་འབྲེལ་བའི་ལྷོ་སྒོ་ལྟ་བུའི་མཇུག་ཡིན་ན་རྣམ་ཤེས་དགུག་པ་ཟུར་དུ་མི་དགོས་ལ། དེ་ལྟར་མིན་ཚེ་ཚིག་ཏུ་དངོས་སུ་བརྗོད་མི་བརྗོད་ཇི་ལྟར་ཡིན་ཀྱང་དཀོན་མཆོག་གསུམ་གྱི་བདེན་སྟོབས་བསྐུལ་ནས་གཤིན་པོའི་རྣམ་ཤེས་བཀུག་པའི་དམིགས་པ་ནན་ཏན་བྱ་བ་ནི་སྔོན་འགྲོར་མེད་མི་རུང་དུ་དགོས་སོ། །དེ་ནས། སྐྱབས་སེམས་དང་སྤྱན་འདྲེན་དཀྱུས་ལྟར་བྱ། བར་དོ་ངོ་སྤྲོད་སྔ་ཕྱིར་བྱེད་ལུགས་ཀྱི་ལག་ལེན་མི་འདྲ་བ་ཅི་རིགས་སྣང་ཡང། ཚོགས་བསག་སྒྲིབ་སྦྱང་བདུད་རྩི་འབེབས་སྦྱང་སོགས་ཀྱི་དམིགས་པ་སྐྱོང་རྒྱུའི་དོན་དུ་མཚམས་འདིར་བྱས་ན་ཕན་ཆེ་བར་སྣང་བས། དེའི་ཚུལ་ནི། འོ་ལགས་སོ། །འཇིག་རྟེན་འདི་ནས་ཕ་རོལ་ཏུ་སོང་ཞིང་ཚེ་ལས་འདས་པ་ཆེ་གེ་མོ་ཞེས་བགྱི་བ་ཁྱོད་ཉོན་ཅིག །འདུལ་བ་ལུང་ལས། སྐྱེས་པའི་ཐ་མ་འཆི་བ་སྟེ། །འདུས་པའི་ཐ་མ་འབྲལ་བ་ཡིན། །ཞེས་དང་རྗེ་བདག་ཉིད་ཆེན་པོས། མི་རྟག་སྲིན་པོས་མ་ཟོས་པའི། །སེམས་ཅན་དེ་ནི་འགའ་མ་མཆིས། །གསུངས་པ་ལྟར། ཁམས་གསུམ་འཁོར་བའི་གནས་འདིར་ལས་ཉོན་གྱི་དབང་གིས་སྐྱེ་བ་ཞིག་བླང་ཕྱིན་སྐྱེ་མཐའ་འཆི་བའི་ཆོས་ལས་མ་འདས་ཤིང། གཉེན་མཛའ་བཤེས་སོགས་དང་ལྷན་ཅིག་ཅི་ཙམ་འགྲོགས་ཀྱང་བརྩེ་བ་མེད་པའི་འཆི་བདག་གི་ཕོ་ཉ་སླེབས་

― GTD003_Page_0728 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ན་ཕན་ཚུན་གཏན་བྲལ་དུ་གྱུར་ནས་མྱ་ངན་ཆེན་པོ་ལྡང་བའང་མཆོག་དམན་བར་མ་ཀུན་གྱི་ཐོག་ཏུ་ཡོད་པའི་འཇིག་རྟེན་སྤྱིའི་ངང་ཚུལ་ཡིན་ཏེ། ཆེད་དུ་བརྗོད་པའི་ཚོམས་ལས། མཛའ་བ་ཡུན་རིང་འཁོད་འཁོད་ནས། །འཆི་བས་སོ་སོར་འབྲལ་འགྱུར་ཏེ། །མྱ་ངན་ཆེན་པོ་ལྡང་བར་འགྱུར། །དེ་ཡང་འཇིག་རྟེན་འདི་ན་ངེས། །ཞེས་སངས་རྒྱས་ཐུགས་རྗེ་ཅན་གྱིས་གསུངས་པ་ལྟར་ཡིན། དེ་ལྟ་བུའི་འཆི་བ་དེ་ད་ལན་ཁྱོད་ཀྱི་ཐོག་ཏུ་བབས་ཏེ། ཚེ་སྔ་མའི་སྣང་བ་ནི་ནུབ། ཕྱི་མ་མ་རྙེད་པས་ད་ལྟ་སྲིད་པ་བར་དོ་ན་གནས་པའི་སྐབས་ཡིན། དེའང་གང་གིས་ཤེས་ན་མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །དབང་པོ་ཀུན་ཚང་ཐོགས་མེད་རྒྱུ། །ལས་ཀྱི་རྫུ་འཕྲུལ་ཤུགས་དང་ལྡན། །མི་ལྡོག་དེ་ནི་དྲི་ཟ་འོ། །ཞེས་གསུངས་པ་ལྟར་གང་དུ་སྐྱེ་འགྱུར་གྱི་ཕྱིའི་ལུས་དང་དབྱིབས་མཚུངས་པ། དབང་པོ་ཀུན་ཚང་ཞིང་ལས་ཀྱི་རླུང་གིས་བདས་ཏེ་སྔོན་བགྲོད་དཀའ་བའི་གནས་རྣམས་ལྟ་ཅི་སྨོས། འཇིག་རྟེན་གྱི་ཁམས་མཐའ་ཡས་པའི་ཕ་རོལ་ཏུའང་སྐད་ཅིག་ཙམ་གྱིས་སླེབ་ནུས་པའི་རྫུ་འཕྲུལ་ལྟ་བུ་ཡོད་པ། དེའི་སྟོབས་ཀྱིས་སྔར་འདྲིས་པའི་གཉེན་དང་མཛའ་བཤེས་ལ་སོགས་པ་ཐམས་ཅད་ཀྱི་རྩར་སོང་སྟེ་གཏམ་ལ་སོགས་པ་སྨྲས་ཀྱང་ལན་མི་སྟེར་ཞིང་ཤི་བའི་གཏམ་བྱེད་པ་སོགས་ཀྱིས་སེམས་ལྷག་པར་སྐྱོ་ཞིང་སྡུག་བསྔལ་བ་དང། ལས་ལས་གྲུབ་པའི་དགྲ་གཉེན་གྱི་སྣང་བ་སྣ་ཚོགས་པས་བློ་སྣ་བྲིད་དེ། རེས་འགའ་དགའ་ཞིང་སྤྲོ་བ་དང། རེས་འགའ་འཇིགས་ཤིང་སྐྱི་གཡའ་བའི་དགའ་སྡུག་གི་སྣང་བ་འགྱུར་ལྡོག་སྣ་ཚོགས་པ་གློ་བུར་གློ་

― GTD003_Page_0729 ―

^{[མ་དཔེ་གཟིགས་ན་འདིར་གནོན།]}

[Full Size]

བུར་དུ་འབྱུང་བའང་ཁྱེད་རང་བར་དོར་གནས་པའི་རྟགས་ཡིན། སྔར་འབྱུང་བ་བཞིའི་རླུང་ཐིམ་པའི་སྟོབས་ཀྱིས་རི་བོ་ཉིལ་བ། རྒྱ་མཚོ་འཁྲུགས་པ། ནགས་ལ་མེ་ཤོར་བ། བསྐལ་པའི་རླུང་གཡོ་བ་ལྟ་བུའི་སྒྲ་ཤིན་ཏུ་ཡ་ང་བ་སྙིང་འགས་པ་ལྟ་བུ་དང། དུག་གསུམ་གྱི་རང་གཟུགས་དཀར་དམར་ནག་པའི་གཡང་ས་ཆེན་པོ་གསུམ་དུ་ལྷུང་བའི་ཉམས་ཤར་བ་དེ་དག་གི་ཚེ་སྔ་མའི་ལུས་རྟེན་དོར་བ་ཡིན་ཏེ། ད་ལྟ་སྔར་དང་མི་འདྲ་བར་ནང་དུ་རགས་པའི་ཁམས་དཀར་དམར་མི་གནས་པའི་སྟོབས་ཀྱིས་ཕྱིའི་ཉི་ཟླ་སོགས་ཀྱི་སྣང་བ་མི་འཆར་ཞིང། ལུས་ལ་གྲིབ་མའང་མེད་པ་འདི་རྟེན་དེ་ཉིད་དོར་ཟིན་པའི་རྟགས་ཡིན། སྤྱིར་ཆོས་ཐམས་ཅད་སྒྱུ་མ་ལྟ་བུ་ཡིན་མོད་ཀྱང། ཁྱད་པར་བར་དོའི་སྐབས་ཀྱི་བདེ་སྡུག་དགའ་འཇིགས་སོགས་ཀྱི་སྣང་བ་འདི་ནི། རྨི་ལམ་དུ་མེས་ཚིག་པ་དང། ལྷའི་དཔལ་འབྱོར་ལ་སྤྱད་པ་བཞིན་དངོས་གནས་ལ་ཕན་གནོད་ཅི་ཡང་འབྱུང་རྒྱུ་མེད་པར་མ་ཟད། དེ་ལ་འཁྲུལ་སྣང་དུ་ངོ་མ་ཤེས་པར་རྗེས་སུ་འབྲངས་ན་སྐྱེ་གནས་ངན་པ་སྣ་ཚོགས་སུ་འཁྲིད་པས་ཤིན་ཏུ་བསྒྲིམ་དགོས། རིགས་དྲུག་སོ་སོར་སྐྱེ་བའི་རྟགས་ཀྱི་སྣང་བ་འཆར་ཚུལ་ཡང། དམྱལ་བར་སྐྱེ་ན་ལྕགས་ཁང་དང་གངས་རིའི་འཁྱག་སྦུབས། ཡི་དྭགས་སུ་སྐྱེ་ན་མྱ་ངམ་གྱི་ཐང་དམར་པོ་སོགས་རང་རང་གི་གནས་ཀྱི་བཀོད་པ་ཤས་ཆེར་འཆར་ལ། ཁ་དོག་ནི་དམྱལ་བའི་བར་དོ་སོལ་བ་ལྟ་བུ། ཡི་དྭགས་ཀྱི་བར་དོ་དུ་བ་ལྟ་བུ། དུད་འགྲོའི་བར་དོ་ཆུ་ལྟ་བུ། འདོད་པའི་ལྷ་མིའི་བར་དོ་གསེར་ལྟ་བུ། གཟུགས་ཁམས་པའི་བར་

― GTD003_Page_0730 ―

^{[མ་དཔེ་གཟིགས་ན་འདིར་གནོན།]}

[Full Size]

དོ་ནི་དཀར་པོར་མངལ་འཇུག་གི་མདོ་ལས་གསུངས། འགྲོ་ཚུལ་ལྷའི་བར་དོ་གྱེན་དང། མིའི་བར་དོ་ཐད་ཀ། །ངན་སོང་གི་བར་དོ་སྤྱིའུ་ཚུགས་སུ་འགྲོ་བར་གསུངས་ལ། མཛོད་འགྲེལ་ལས་ཕྱི་མའི་འགྲོ་བ་དེ་དང་དེའི་འགྲོ་ཚུལ་དང་ཆ་མཚུངས་པར་ཡང་བཤད། ཁྱད་པར་འཁོར་བའི་བཙོན་རའི་ནང་དུ་འཁྲིད་བྱེད་ཀྱི་གཙོ་བོ་སྲེད་པ་ཡིན་པས། བརྫུས་ཏེ་སྐྱེ་ན་གནས་ལ་སྲེད་པ་སྐྱེ། དྲོད་གཤེར་ལས་སྐྱེ་ན་དྲི་རོ་ལ་སྲེད་པ་སྐྱེ། སྒོ་ང་དང་མངལ་ལས་སྐྱེ་ན་རིགས་མཐུན་གྱི་གང་ཟག་མཐོང་སྟེ། ཚུལ་མིན་གྱི་སྤྱོད་པ་ལ་ལོག་པར་ཞེན་པའི་དབང་གིས་མཚམས་སྦྱོར་བ་ཡིན་ཞིང། དེ་ལྟར་སྐྱེ་བ་བླང་ཕྱིན་འཕྲལ་དང་ཡུན་དུ་སྡུག་བསྔལ་ལས་མ་འདས། དེ་བས་ཁྱེད་རང་གི་མགོན་སྐྱབས་སུ་བདག་གིས་བཅོམ་ལྡན་འདས་རྒྱལ་བ་བྱམས་པ་མགོན་པོ་འཁོར་དང་བཅས་པ་མདུན་གྱི་ནམ་མཁར་སྤྱན་དྲངས་ནས་བཞུགས་ཡོད་ཅིང། ཞིང་དང་དངོས་པོ་བསམ་པ་ཕུན་སུམ་ཚོགས་པས་དགེ་རྩ་རྣམ་པར་དག་པ་བྱེད་བཞིན་པ་འདི་ཡིན་པས། ཁྱོད་རང་གིས་ཀྱང་འཁྲུལ་སྣང་གཞན་གྱི་རྗེས་སུ་མ་འབྲངས་པར་དགེ་རྩ་འདི་དག་བློས་བླངས་ཏེ་དགའ་བ་བསྒོམ་པ་དང། ཁྱད་པར་རྒྱལ་བ་བྱམས་པ་མགོན་པོ་ལ་དད་གུས་ཤུགས་དྲག་པོས་གསོལ་བ་རྩེ་གཅིག་ཏུ་བཏབ་ན་བར་དོའི་སེམས་ཅན་ཆུ་ནང་གི་གཟིངས་ལྟར་དུ་ཁ་བསྒྱུར་སླ་བས། ངན་འགྲོའི་སྐྱེ་སྲིད་བཟློག་ནས་ཞིང་ཁྱད་པར་ཅན་དུ་སྐྱེ་བ་ལ་ཐེ་ཚོམ་མེད། དེས་ན་ངེད་ཀྱི་ཚིག་རིས་བཞིན་དུ་ཡན་ལག་བདུན་པའི་དམིགས་རྣམ་དང། རེ་ས་གཞན་ན་མེད་པའི་བློ་ལྟོས་བཅས་ཏེ་ཕུར་ཚུགས་སུ་གསོལ་བ་བཏབ་པའི་མཐར་བྱམས་མགོན་ཁྱེད་རང་གི་སྤྱི་བོར་སྤྱན་

― GTD003_Page_0731 ―

^{[མ་དཔེ་གཟིགས་ན་འདིར་གནོན།]}

[Full Size]

དྲངས་ཏེ། ངེད་ཀྱིས་ཧིཀ་ལན་གསུམ་བཏབ་པའི་ཚེ་བྱམས་མགོན་གྱི་ཐུགས་ཀའི་ས་བོན་དང་དབྱེར་མེད་དུ་བསྟིམ་ཞིང། ཕཊ་ཅེས་བརྗོད་པའི་སྐབས་སུ་བྱམས་པ་མགོན་པོ་སྐད་ཅིག་ཉིད་ལ་དགའ་ལྡན་གྱི་གནས་སུ་གཤེགས། དེའི་ཐུགས་ཀ་ནས་ཕྱིར་ཕྱུང་སྟེ་པདྨའི་སྦུབས་སུ་ཡིད་ལུས་བླངས་ནས་བྱམས་མགོན་གྱི་སྲས་ཀྱི་ཐུ་བོར་འགྱུར་ངེས་པ་ཡིན་པས། དེ་ལྟར་གྱི་འདུན་པ་དང་མོས་གུས་རྩེ་གཅིག་ཏུ་སྐྱོང་བར་ཞུ། ཞེས་བརྗོད། དེའི་ཚེ་རང་ཉིད་ཀྱིས་ཀྱང་མི་རྟག་པའི་ངང་ཚུལ་དང། ཁྱད་པར་དུ་གཤིན་པོ་དེ་ཉིད་བར་དོའི་ལམ་འཕྲང་དམ་པོར་འཇིགས་པའི་དམག་གིས་བསྐོར་བ། རྒྱུས་མེད་ཀྱི་གནས་སུ་གྲོགས་མེད་གཅིག་པུར་འཁྱམས་ཤིང། མགོན་སྐྱབས་དང་དཔུང་གཉེན་མ་མཆིས་པའི་ཚུལ་བསམས་ཏེ་སྙིང་རྗེ་ཤུགས་དྲག་པོ་བསྐྱེད་ན། ཅི་ཙམ་སྙིང་རྗེ་སྐྱེས་པ་བཞིན་གྱི་དེའི་དོན་དུ་དཀོན་མཆོག་ལ་གསོལ་བ་འདེབས་པའི་བློའང་ཤུགས་དྲག་པོ་འབྱུང་བས་དེ་ལྟ་བུ་ཞིག་དགོས་ཀྱི། རྗེ་བཙུན་མི་ལ་རས་པས། མི་ཤི་བ་རོ་ཡི་སྔས་མགོ་ལ། །ནོར་ལེན་འདོད་ཀྱི་བན་བོན་ཅ་ཅོ་འདོན། །ཞེས་པ་ལྟར་གཤིན་པོ་དེའི་རྣམ་པར་ཤེས་པ་ད་ལྟ་གནས་སྐབས་ཅི་འདྲ་ཞིག་ཏུ་ཡོད་སྙམ་པ་ཡིད་ཀྱི་དགུ་ནའང་མེད་པར། གཉེན་བཤེས་སོགས་མགུ་བ་འབའ་ཞིག་ལྷུར་བྱས་ཏེ་རང་གཞན་གཉིས་ཀ་བསླུ་བར་མི་བྱའོ། །དེ་ལྟར་དད་པ་དང་སྙིང་རྗེ་ཟུང་དུ་འཇུག་པའི་བསམ་པ་ཁྱད་པར་ཅན་གྱི་ངང་ནས་ཡན་ལག་བདུན་པ་དང། མཚན་ལན་བདུན་ནམ་ཉེར་གཅིག་སོགས་བརྗོད་དེ་བདུད་རྩི་འབེབས་སྦྱང་སོགས་བྱ་བ་གོང་དང་འདྲ་ལ། ཁྱོད་

― GTD003_Page_0732 ―

^{[མ་དཔེ་གཟིགས་ན་འདིར་གནོན།]}

[Full Size]

ལུས་ཞེས་སོགས་དང་། དེ་ལྟར་ཞེས་སོགས་ཀྱི་ཚིགས་བཅད་ཚན་པ་གཉིས་ངག་ཏུ་མ་བརྗོད་པར་རང་གིས་ཚིག་རིས་བཞིན་དམིགས་པ་བསྐྱངས་པས་འཐུས་སོ། །གསོལ་འདེབས་ཀྱི་ཚིག་རྣམས་གོ་རིམ་བཞིན་དུ་བརྗོད་ཅིང། མཐར་ཧིཀ་གསུམ་དང་ཕཊ་ལན་གཅིག་བརྗོད་པའི་ཚེ་དམིགས་པ་སྐྱོང་ཚུལ་གོང་དུ་བརྡ་སྤྲོད་པའི་སྐབས་བཤད་པ་བཞིན་བྱའོ། །དེ་ནས། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །བཅོམ་ལྡན་མ་ཕམ་མགོན་པོས་མངོན་སུམ་དུ། །ལུང་བསྟན་པ་ཡང་ཚེ་འདས་དེར་ཐོབ་ཤོག །ཅེས་དང། འདིས་མཚོན་དགེ་བས་བདག་གཞན་འགྲོ་བ་ཀུན། །ཞེས་སོགས་དང། འདི་ནས་ཤི་འཕོས་གྱུར་མ་ཐག །ཅེས་སོགས་སྨོན་ལམ་རྣམ་པར་དག་པས་མཚམས་སྦྱར་བར་བྱའོ། །སྟོབས་བཅུ་མངའ་བ་མ་ཕམ་མགོན་པོ་ཡི། །ཐུགས་རྗེ་བྱིན་རླབས་གྲུ་གཟིངས་ལ་བརྟེན་ནས། །མི་བཟད་འཁོར་བའི་མཚོ་ལས་རབ་བརྒལ་ཏེ། །ཞིང་མཆོག་ནོར་བུའི་གླིང་དུ་ཕྱིན་གྱུར་ཅིག །དེ་ནས་བྱམས་མགོན་སྲས་དང་བཅས་པ་ཡི། །ཞལ་བཟང་མིག་གི་བདུད་རྩིར་འགྱུར་བ་དང། །ཟབ་རྒྱས་གདམས་པའི་དགའ་སྟོན་མྱང་བ་ཡིས། །ཡང་དག་ལམ་བཟང་ལུས་སྟོབས་རྒྱས་གྱུར་ཅིག། །ཅེས་རྗེ་བཙུན་བྱམས་པ་མགོན་པོ་ལ་བརྟེན་པའི་འཕོ་བའི་རྣམ་པར་བཞག་པ་དགའ་ལྡན་ཞིང་དུ་བགྲོད་པའི་བདེ་ལམ་ཞེས་བྱ་བ་འདི་ནི་ཁྱ་དགེའི་དགོན་ནས་ཡང་དག་པའི་སྒྲུབ་པ་ལ་གཅིག་ཏུ་གཞོལ་བ་དགེ་སློང་བློ་བཟང་དཀོན་མཆོག་གིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་

― GTD003_Page_0733 ―

^{[མ་དཔེ་གཟིགས་ན་འདིར་གནོན།]}

[Full Size]

དགོན་གསར་དགའ་ལྡན་རབ་རྒྱས་གླིང་དུ་སྦྱར་བའི་ཡི་གེ་པ་ནི་དགེ་སློང་དཀོན་མཆོག་ཀུན་དགའ་འོ།། །།

སྲད་རྒྱུད་ལུགས་ཀྱི་འཕོ་བའི་གདམས་ངག

― GTD003_Page_0735 ―

^{[མ་དཔེ་གཟིགས་ན་འདིར་གནོན།]}

[Full Size]

སྲད་རྒྱུད་ལུགས་ཀྱི་འཕོ་བའི་གདམས་པའི་ངག་འདོན་ཁྲིགས་ཆགས་སུ་བསྡེབས་པ་བཞུགས་སོ། །

― GTD003_Page_0736 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མཻ་ཏྲི་ཡེ། འདིར་སྲད་རྒྱུད་ལུགས་ཀྱི་འཕོ་ཁྲིད་ཟབ་མོ་ཉམས་སུ་ལེན་པར་འདོད་པས། སྟན་བདེ་བ་ལ་ལུས་གནད་བཅས་ཏེ་རླུང་གི་སྐྱོན་བསལ་ཞིང་དགེ་སེམས་ཁྱད་པར་ཅན་གྱི་ངང་ནས་འདི་ལྟར། རང་གི་ཐུགས་ཀ་ནས་འོད་ཟེར་འཕྲོས། ཚོགས་ཞིང་ནམ་མཁའི་ཁམས་གང་བ་སྤྱན་དྲངས། མདུན་གྱི་ནམ་མཁར་བཞུགས་པར་གྱུར། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་རྟག་པར་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ། བདག་གིས་སེམས་ཅན་ཐམས་ཅད་མུ་མཐའ་མེད་པའི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་བསྒྲལ་ཏེ་བླ་ན་མེད་པའི་བྱང་ཆུབ་ཀྱི་སྙིང་པོ་ལ་འགོད་པར་བགྱི། དེའི་ཕྱིར་དུ་ཟབ་ལམ་འཕོ་བའི་གདམས་པ་ཉམས་སུ་བླངས་པར་བགྱིའོ། །མདུན་གྱི་ནམ་མཁར་སེང་ཁྲི་པད་ཟླའི་སྟེང། །བཟང་པོའི་བཞུགས་སྟངས་མཛད་པའི་མ་ཕམ་མགོན། །གསེར་རི་ལྟར་བརྗིད་ཆོས་འཁོར་ཕྱག་རྒྱ་ཅན། །དེ་ཡི་ཐུགས་ཀ་དཔལ་གྱི་བེ་འུའི་ནང། །རྒྱལ་བའི་དབང་པོ་རྗེ་བཙུན་ཙོང་ཁ་པ། །ཆོས་འཆད་ཕྱག་རྒྱས་གླེགས་བམ་རལ་གྲི་བསྣམས། །སྲས་ཀྱི་ཐུ་བོ་གཉིས་དང་བཅས་པ་ཡི། །གནས་གསུམ་ཡི་གེ་གསུམ་གྱིས་མཚན་པ་ལས། །འོད་འཕྲོས་

― GTD003_Page_0737 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་ལྡན་གནས་ནས་བྱམས་མགོན་དང། །རྗེ་བཙུན་བླ་མ་ཡབ་སྲས་རྣམ་པ་གསུམ། །སྤྱན་དྲངས་དམ་ཚིག་པ་དང་དབྱེར་མེད་དུ། །འདྲེས་ཤིང་སྲིད་མཐའི་བར་དུ་བཞུགས་སུ་གསོལ། །ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པས་དོན་ལྡན་ལ་ཕྱག་འཚལ། །ཡིད་འོང་མཆོད་ཡོན་སྣ་ཚོགས་མེ་ཏོག་དང། །དྲི་ཞིམ་བདུག་སྤོས་སྣང་གསལ་དྲི་ཆབ་སོགས། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི། །བསོད་ནམས་ཞིང་མཆོག་ཁྱེད་ལ་མཆོད་པ་འབུལ། །གང་ཞིག་ཐོག་མེད་དུས་ནས་བསགས་པ་ཡི། །ལུས་ངག་ཡིད་ཀྱི་མི་དགེ་ཅི་བགྱིས་དང། །ཁྱད་པར་སྡོམ་པ་གསུམ་གྱི་མི་མཐུན་ཕྱོགས། །སྙིང་ནས་འགྱོད་པ་དྲག་པོས་སོ་སོར་བཤགས། །སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱེད། །མགོན་པོ་ཁྱོད་ཀྱི་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ་། །རྗེ་བཙུན་བླ་མ་དམ་པ་ཁྱེད་རྣམས་ཀྱིས། །ཆོས་སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས། །ཇི་ལྟར་འཚམས་པའི་གདུལ་བྱའི་འཛིན་མ་ལ། །ལྷུན་འགྲུབ་ཆོས་ཀྱི་ཆར་པ་

― GTD003_Page_0738 ―

^{[མ་དཔེ་གཟིགས་ན་འདིར་གནོན།]}

[Full Size]

དབབ་ཏུ་གསོལ། །བདག་གིས་ཇི་སྙེད་བསགས་པའི་དགེ་བ་འདིས། །བསྟན་དང་འགྲོ་བ་ཀུན་ལ་གང་ཕན་དང། །ཁྱད་པར་རྗེ་བཙུན་བློ་བཟང་གྲགས་པ་ཡི། །བསྟན་པའི་སྙིང་པོ་རིང་དུ་གསལ་བྱེད་ཤོག །རང་ལུས་ཤེལ་གྱི་བུམ་པ་ལྟར་གསལ་བའི། །ཚངས་བུག་ནས་བཟུང་ལྟེ་འོག་སོར་བཞིའི་བར། །དབུ་མ་སྨད་ཕྲ་སྟོད་ཡངས་ཟངས་ཐལ་དབུས། །རང་སེམས་ངོ་བོ་རྗེ་བཙུན་རྣམ་པར་བསམ། །ཀྱེ་མ་གནག་དཀའ་སྲིད་པའི་རྒྱ་མཚོ་ལས། །བརྒལ་ཏེ་དགའ་ལྡན་ཆོས་ཀྱི་ཞིང་ཁམས་དེར། །མ་ཕམ་འཇམ་དཔལ་སྙིང་པོ་སྲས་བཅས་ཀྱི། །འཛུམ་ཞལ་མངོན་དུ་གྱུར་ན་ཅི་མ་རུང། །སྟེང་དགའ་ལྡན་ལྷ་བརྒྱའི་མགོན་པོ་མཆོག །རྗེ་མ་ཕམ་ཆོས་ཀྱི་བླ་མ་དང། །དབྱེར་མེད་པ་འདྲེན་མཆོག་ཐམས་ཅད་མཁྱེན། །ཕ་བློ་བཟང་གྲགས་པ་ཡབ་སྲས་ལ། །ཡིད་རྩེ་གཅིག་གུས་པས་གསོལ་བ་འདེབས། །ལམ་ཟབ་མོ་འཕོ་བའི་རྣལ་འབྱོར་གྱིས། །ཞིང་དགའ་ལྡན་མཁའ་སྤྱོད་གནས་མཆོག་དེར། །དུས་ད་ལྟ་ཉིད་དུ་བགྲོད་པ་དང། །རྗེ་བླ་མ་ཡབ་སྲས་ཞལ་མཐོང་ཞིང། །གསུང་བདུད་རྩིའི་དགའ་སྟོན་མྱོང་བ་ལས། །ལམ་ཟབ་མོའི་རྟོགས་པ་མཐར་ཕྱིན་ནས། །མཆོག་མྱུར་དུ་ཐོབ་པར་བྱིན་གྱིས་རློབས། །ཕ་ཁྱེད་ཀྱི་ཐུགས་རྗེ་ལྕགས་ཀྱུ་ཡིས། །འོད་སྦུ་གུའི་ལམ་ནས་སྐད་ཅིག་ལ། །རྗེ་མ་ཕམ་ཆོས་ཀྱི་མདུན་ས་དེར། །དུས་ད་ལྟ་ཉིད་དུ་དྲང་དུ་གསོལ། །ལམ་འཕོ་བ་འབྱོངས་པར་བྱིན་གྱིས་རློབས། །དེ་ལྟར་གདུང་ཤུགས་དྲག་པོས་གསོལ་བཏབ་མཐུས། །བྱམས་མགོན་ཐུགས་ཀའི་རྗེ་

― GTD003_Page_0739 ―

^{[མ་དཔེ་གཟིགས་ན་འདིར་གནོན།]}

[Full Size]

བཙུན་ཡབ་སྲས་ཀྱི། །ཐུགས་ཀ་ནས་བྱུང་འོད་ཟེར་དཀར་པོ་ཡི། །སྦུ་གུ་སྦ་ལྕག་ཙམ་ཞིག་ནར་གྱིས་བྱུང། །རང་གི་སྤྱི་བོ་ཚངས་པའི་བུ་གར་ཟུག །དེ་ནས་སླར་ཡང་ཐུགས་ཀའི་ས་བོན་ལས། །ལྕགས་ཀྱུ་ལྟ་བུའི་འོད་ཟེར་དཀར་པོ་ཞིག །རྒྱངས་ཏེ་བྱུང་ནས་འོད་ཀྱི་སྦུ་གུ་ཡི། །ལམ་དུ་ཞུགས་ནས་དྷུ་ཏཱིའི་ནང་བརྒྱུད་དེ། །སྙིང་དབུས་རང་སེམས་དབྱེར་མེད་རྗེ་བླ་མའི། །ཐུགས་ཀར་བཏབ་སྟེ་འདྲེན་པར་མངོན་ཕྱོགས་ཚེ། །འོག་རླུང་དྲག་ཏུ་འཐེན་པའི་གཞུ་མོ་ལ། །ཧིཀ་གི་མདའ་སྦྱར་མགྲིན་པའི་བར་དུ་སླེབ། །ཧིཀ །སླར་ཡང་སྟེང་རླུང་མནན་ཏེ་རང་གི་གནས། །སྙིང་གའི་ཐད་ཀྱི་དྷུ་ཏཱིའི་དབུས་སུ་ཕབ། །ཀ། །དེ་བཞིན་དུ་སྤྱི་བོའི་བར་དུ་སྤར་ནས་སླར་རང་གནས་སུ་འབེབས་པ་སོགས་རེས་མོས་ཀྱི་ཚུལ་དུ་ཧིཀ་དང་ཀ་སྦྲེལ་བ་ཉེར་གཅིག་སོགས་ཇི་ལྟར་འདོད་པ་སྦྱངས་ལ། མཐར་ཕཊ་ཅེས་བརྗོད་པས་བྱམས་མགོན་གྱི་ཐུགས་ཀའི་རྗེ་བླ་མའི་ཐུགས་ཀར་བསྟིམ་ནས། དེའི་ཐུགས་དང་དབྱེར་མེད་དུ་འདྲེས་པར་མོས་པའི་ངང་ལ་དར་ཅིག་མཉམ་པར་བཞག །སླར་ཡང་དམིགས་རྟེན་རང་གནས་སུ་ཕབ་པའི་མོས་པ་དང་བཅས། ཀ་ཞེས་བརྗོད། དེ་ནས། མདུན་གྱི་ནམ་མཁའི་དབྱིངས་བཞུགས་འཕོ་ཡུལ་རྣམས། །གསེར་ཞུན་ལྟ་བུའི་འོད་དུ་ལྟེམ་ཞུ་ནས། །ཚངས་པའི་བུ་ག་འཁྱིལ་གྱིས་རབ་བཀག་སྟེ། །རང་གི་སྒོ་གསུམ་བྱིན་གྱིས་བརླབས་པར་གྱུར། །འདིར་འབད་ལས་བྱུང་དགེ་ཚོགས་རྒྱ་མཚོའི་མཐུས། །བདག་དང་མཁའ་མཉམ་འགྲོ་བ་མ་ལུས་པ། །ནམ་ཞིག་ཚེ་འདིའི་སྣང་བ་འགག་མ་ཐག །ཡིད་དགའ་ཆོས་འཛིན་གནས་དེར་

― GTD003_Page_0740 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་བར་ཤོག །དེ་ཚེ་འཇམ་མགོན་བླ་མ་ཡབ་སྲས་ཀྱིས། །དབུགས་དབྱུང་གསུང་གི་བདུད་རྩིའི་བཅུད་མྱང་སྟེ། །རྒྱལ་སྲས་སྤྱོད་པ་རྒྱ་མཚོའི་ཟློས་གར་གྱིས། །མཐའ་ཡས་འགྲོ་བ་སྲིད་ལས་སྒྲོལ་བར་ཤོག །ཁྱད་པར་འཇམ་མགོན་བླ་མ་ཡབ་སྲས་ཀྱིས། །ཚེ་རབས་ཀུན་ཏུ་དགེ་བའི་བཤེས་མཛད་ནས། །རྒྱལ་བས་བསྔགས་པའི་ལམ་བཟང་དེ་ཉིད་ལས། །སྐད་ཅིག་ཙམ་ཡང་ལྡོག་པར་མ་གྱུར་ཅིག །ཅེས་སྲད་རྒྱུད་ལུགས་ཀྱི་འཕོ་བའི་གདམས་པ་ཉམས་སུ་ལེན་ཚུལ་ནག་འགྲོས་སུ་བཀོད་པ་འདི་ནི། དད་བརྩོན་བློ་དང་ལྡན་པ་དགེ་འདུན་རབ་རྒྱས་དང་འཇིགས་མེད་དགེ་འདུན་གཉིས་ཀྱིས་བསྐུལ་ངོར ༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ།། །།

ཟབ་ལམ་བླ་མའི་རྣལ་འབྱོར་སྙན་བརྒྱུད་གསང་བའི་ལྡེ་མིག

― GTD003_Page_0741 ―

^{[མ་དཔེ་གཟིགས་ན་འདིར་གནོན།]}

[Full Size]

ཟབ་ལམ་བླ་མའི་རྣལ་འབྱོར་གྱི་མན་ངག་སྙིང་པོའི་རྩ་ཚིག་གི་འགྲེལ་པ་སྙན་བརྒྱུད་གསང་བའི་ལྡེ་མིག་ཅེས་བྱ་བ་བཞུགས་སོ། །

― GTD003_Page_0742 ―

^{[མ་དཔེ་གཟིགས་ན་འདིར་གནོན།]}

[Full Size]

གང་གི་ཐུགས་རྗེའི་གྲུ་གཟིངས་ལ་བརྟེན་ནས། །སྐུ་གསུམ་ནོར་བུའི་གླིང་དུ་ཕྱིན་བྱེད་པ། །སྲས་བཅས་རྒྱལ་ཀུན་འདུས་པའི་ངོ་བོ་ཉིད། །བཀའ་དྲིན་གསུམ་ལྡན་རྩ་བའི་བླ་མར་འདུད། །ཡེ་ཤེས་སྐུ་ཅན་འཇམ་མགོན་བླ་མ་ཉིད། །དགེ་ལྡན་བཀའ་བརྒྱུད་བསྟན་པའི་རྒྱལ་མཚན་མཆོག །བསྒྲེང་ཕྱིར་སླར་ཡང་སྤྲུལ་པས་རྣམ་རོལ་བ། །ཐུགས་རྗེའི་གཏེར་ཆེན་དེ་ཡིས་རྟག་སྐྱོངས་ཤིག །མདོ་རྒྱུད་མན་ངག་པདྨ་འབུམ་སྡེའི་བཅུད། །བཤད་སྒྲུབ་ལྟོ་བར་སྨིན་པའི་ལེགས་གསུང་ཀུན། །ཚང་ལ་མ་ནོར་གདམས་པའི་སྦྲང་རྩི་རུ། །འབབ་པའི་དོན་གྱི་རོ་མངར་འདི་མྱོངས་ཤིག །དེའང་དཔལ་ལྡན་བླ་མ་དམ་པ་དམིགས་པ་མེད་པའི་ཐུགས་རྗེ་ཆེན་པོ་ཅན་དགེ་ལྡན་སྙན་བརྒྱུད་ཀྱི་གདམས་པའི་མཛོད་འཛིན་པ་རྗེ་བཙུན་ཡེ་ཤེས་རྒྱལ་མཚན་

― GTD003_Page_0743 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་བཟང་པོ་ནས། ཀུན་གཟིགས་རྒྱལ་བའི་དབང་པོ་མཆོག་གི་སྐུ་མཆེད་རྗེ་དྲུང་རྣམ་གཉིས་ལ་སྩལ་བ་མདོ་སྔགས་གཉི་གའི་གནད་ཚང་བའི་ཟབ་ལམ་བླ་མའི་རྣལ་འབྱོར་འདི་ཉིད་ཀྱི་དོན་འཆད་པ་ལ། ཀླད། གཞུང་། མཇུག་གི་དོན་གསུམ། དང་པོ་ལ་མཆོད་བརྗོད་དང་རྩོམ་པར་དམ་བཅའ་གཉིས་ལས། དང་པོ་ནི། ན་མོ་གུ་རུ་ཞེས་བྱུང་། དེའང་ན་མོ་ཞེས་པ་འདུད་པའི་དོན་ཡིན་པས། ཕྱག་དང་མཆོད་པ་བསྟོད་པ་སོགས་དུ་མ་ལ་འཇུག་ཅིང་། དེར་མ་ཟད་བདེ་ཆེན་མགོན་པོ་བླ་མ་ལྷའི་གོ་འཕང་ཐུགས་གཉིས་སུ་མེད་པའི་ཡེ་ཤེས་རང་གི་རིག་པ་མངོན་དུ་བྱ་བའི་བར་ལའང་འཇུག་སྟེ། དཔལ་མགོན་ཀླུ་སྒྲུབ་ཀྱིས། ཇི་ལྟར་བསྟོད་ཅིང་ཕྱག་འཚལ་བ། །གང་ལ་བསྟོད་ཅིང་གང་གིས་བསྟོད། །ཇི་ལྟར་ཆུ་ལ་ཆུ་བཞག་དང། །ཇི་

― GTD003_Page_0744 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར་མར་ལ་མར་བཞིན་དུ། །རང་གིས་རང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་སོ། །གུ་རུ་ནི་བླ་མའམ་གོང་མ་ལ་འཇུག་ཅིང་། དེའང་སྐྱེས་རབས་ལས། ཡོན་ཏན་གྱི་ཚོགས་ཀྱིས་བླ་མར་གྱུར་པ། ཞེས་དང་། འཁྲི་ཤིང་ལས། ནོར་བུ་བཞིན་དུ་ཡོན་ཏན་ཉིད་ཀྱིས་བླ་མ་འཐོབ། །ཅེས་པ་ལྟར། ཡོན་ཏན་གྱི་སྒོ་ནས་སྐྱེ་རྒུའི་བླ་མར་གྱུར་པའམ། ཡང་ན། གུ་ཎ་ཨ་ཀཱ་ར་ཞེས་ཡོན་ཏན་གྱི་འབྱུང་གནས་སུ་བཤད་ཅིང་། ཡོན་ཏན་དུ་མ་བསགས་པས་ལྕི་བ་ལའང་བཤད་དོ། །དོན་གྱི་སྙིང་པོར་གྱུར་པ་ནི་སློབ་མའི་བློ་སྣ་གོང་དུ་འཁྲིད་པར་བྱེད་པའི་དོན་གྱིས་བླ་མ་ཞེས་དམ་པ་གོང་མ་རྣམས་ཀྱིས་གསུངས་པ་ལྟར། སངས་རྒྱས་ཀྱི་སའི་བར་ལ་གོང་ནས་གོང་དུ་འཁྲིད་ཅིང་སྐྱེལ་བར་བྱེད་པའི་དེད་དཔོན་གཅིག་པུར་གྱུར་པ་དང་། སྐྱབས་གནས་མ་ལུས་པ་འདུས་པའི་བདག་ཉིད་ཡིན་པ་དང་། འོག་གི་བརྗོད་བྱའི་འགྲོས་སུ་མཐུན་པའི་ཕྱིར་ཡང་བླ་མ་གཅིག་པུ་ལ་མཆོད་པར་བརྗོད་པ་ཡིན་ནོ། །གཉིས་པ་རྩོམ་པར་དམ་བཅའ་བ་ནི། གསུང་རབ་ཀུན་གྱི་སྙིང་པོའི་དོན། །གྲུབ་ཆེན་རྣམས་ཀྱི་ཐུགས་དམ་མཐིལ། །ཟབ་ལམ་བླ་མའི་རྣལ་འབྱོོར་གྱི། །མན་ངག་སྙིང་པོའི་རྩ་ཚིག་བྲི། །ཞེས་བྱུང་། དེའང་ཟབ་ལམ་བླ་མའི་རྣལ་འབྱོར་འདི་ནི་གསུང་རབ་ཀུན་གྱི་སྙིང་པོའི་དོན་དུ་འགྱུར་ཚུལ་ནི། བློ་སྦྱོང་རྩ་

― GTD003_Page_0745 ―

^{[མ་དཔེ་གཟིགས་ན་འདིར་གནོན།]}

[Full Size]

ཚིག་ལས། ཆོས་ཀུན་དགོངས་པ་གཅིག་ཏུ་འབབ། །ཅེས་དང་། རྗེ་བླ་མས། རྒྱལ་བའི་གསུང་རབ་ཀུན་གྱི་སྙིང་པོའི་དོན། །ཞེས་རྒྱལ་བས་ཆོས་ཀྱི་ཕུང་པོ་ཇི་སྙེད་ཅིག་གསུངས་པ་ཐམས་ཅད་འགྲོ་བ་རྣམས་འཁོར་བའི་རྒྱ་མཚོ་ལས་སྒྲོལ་བ་འབའ་ཞིག་གི་ཕྱིར་ཡིན་པས། དེ་ཐམས་ཅད་ཀྱི་སྙིང་པོའི་དོན་བསྡུས་ན་ངེས་འབྱུང་གི་བསམ་པའི་སྟེང་དུ་འབབ་པར་གསུངས་པ་བཞིན། འཁོར་བའི་རྒྱ་མཚོ་ལས་སྒྲོལ་བར་བྱེད་པའི་གྲུ་གཟིངས་བླ་ན་མ་མཆིས་པ་ནི་ཟབ་ལམ་བླ་མའི་རྣལ་འབྱོར་འདི་ཉིད་ཡིན་པས། དེ་ཐམས་ཅད་ཀྱི་སྙིང་པོའི་དོན་འདིའི་ཁོངས་སུ་འདུས་པ་ཡིན་ནོ། །གྲུབ་ཆེན་གོང་མ་རྣམས་ཀྱི་ཐུགས་དམ་གྱི་མཐིལ་ལམ་དངོས་གཞིར་གྱུར་པའང་ཟབ་མོ་བླ་མའི་ལམ་འདི་ཁོ་ན་ཡིན་པ་དེ་དག་གི་རྣམ་ཐར་སོགས་སུ་གསལ་ལ། དེའི་རྒྱུ་མཚན་སྔགས་ཀྱི་སྐབས་སུ། སྒྲོན་གསལ་ལས། ཞི་སོགས་བྱ་བའི་ཆོ་ག་དང། །དེ་བཞིན་གྲུབ་པ་བརྒྱད་དང་ནི། །སངས་རྒྱས་ཀྱང་ནི་མཆོག་ཡིན་ནོ། །ཞེས་ཞི་སོགས་ཀྱི་ལས་འགྲུབ་པ་གྲུབ་པ་ཆུང་ངུ་དང་། རལ་གྲིའི་རིག་འཛིན་སོགས་གྲུབ་པ་འབྲིང་། མཆོག་གི་གོ་འཕང་ལ་གྲུབ་པ་ཆེན་པོར་གསུངས་པ་དང་། ཕར་ཕྱིན་ཐེག་པའི་དབང་དུ་བྱས་ན་མདོ་སྡེ་རྒྱན་ལས། ས་རྣམས་ཐམས་ཅད་མ་གྲུབ་དང། །གྲུབ་པ་དག་ཏུ་ཤེས་པར་

― GTD003_Page_0746 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ། །གྲུབ་པ་དག་ཀྱང་མ་གྲུབ་དང། །གྲུབ་པ་དག་ཏུ་ཡང་འདོད་དོ། །ཞེས་མོས་སྤྱོད་དང་། མ་དག་ས་བདུན། དག་ས་རྣམས་ལ་མ་གྲུབ་པ་དང་གྲུབ་པའི་ཁྱད་པར་ཕྱེ་ལ། དེའི་དགོངས་པར་བྱས་ཏེ་སྡོམ་གསུམ་རབ་དབྱེ་ལས། གྲུབ་ཐོབ་ཆུང་ངུ་མཐོང་ལམ་ཡིན། །གྲུབ་པ་འབྲིང་པོ་ས་བརྒྱད་པ། །གྲུབ་ཐོབ་ཆེན་པོ་སངས་རྒྱས་ས། །ཞེས་གསུངས་པ་སོགས་བཤད་ཚུལ་སྣ་ཚོགས་ཡོད་ཀྱང་། དེ་ཐམས་ཅད་རྩ་བ་བླ་མ་ལ་རག་ལས་པར་ཁྱད་པར་མེད་དེ། གུར་ལས། མིག་སྨན་དང་ནི་རྐང་མགྱོགས་དང། །རལ་གྲི་ས་འོག་གྲུབ་པ་དང། །རིལ་བུ་དང་ནི་མཁའ་སྤྱོད་དང། །མི་སྣང་བ་དང་བཅུད་ཀྱིས་ལེན། །གང་ཕྱིར་ཡེ་ཤེས་རྡོ་རྗེ་ཡང། །མཉེས་པས་མྱུར་དུ་ཐོབ་པར་འགྱུར། །དེ་ཕྱིར་སློབ་དཔོན་དྲུང་གཤེགས་ཏེ། །དེ་བཞིན་གཤེགས་རྣམས་ཕྱག་མཛད་དོ། །ཞེས་ཐུན་མོང་གི་དངོས་གྲུབ་རྣམས་ཀྱང་བླ་མ་ལ་བརྟེན་ནས་འཐོབ་དགོས་པར་གསུངས་ལ། ཁྱད་པར་དུ་ཟུང་འཇུག་གི་གོ་འཕང་རྙེད་པ་བླ་མའི་བཀའ་དྲིན་ཁོ་ན་ལ་ལྟོས་དགོས་ཏེ། བདེ་མཆོག་གི་རྒྱུད་དང་། གྲུབ་ཆེན་མང་པོའི་གསུང་ལས། གང་གི་དྲིན་གྱིས་བདེ་ཆེན་ཉིད། །སྐད་ཅིག་གིས་ནི་ཐོབ་འགྱུར་བ། །བླ་མ་རིན་ཆེན་ལྟ་བུ་ཞེས་མཐུན་པར་གསུངས་པ་དང་། བརྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང། །བདག་གི་བསོད་ནམས་ལས་ཤེས་བྱ། །ཞེས་དང་། མགོན་པོ་བདེ་བ་ཆེན་པོས་གསང་བ་གྲུབ་པ་ལས། བླ་མ་དང་ནི་རྡོ་

― GTD003_Page_0747 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་འཛིན། །གང་གིས་གཉིས་སུ་མེད་པར་མཐོང། །དངོས་གྲུབ་བསྡུས་པའི་མཚན་ཉིད་ཅན། །དེ་ཉིད་དེ་ནི་འདིར་འཐོབ་འགྱུར། །ཞེས་དང་། ཡེ་ཤེས་གྲུབ་པ་ལས། སྐྱ་བ་འཛིན་པ་མེད་པ་ཡི། །གྲུ་ཡིས་ཕ་རོལ་ཕྱིན་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང། །བླ་མ་མེད་ན་སྲིད་མཐར་མིན། །ཞེས་སོགས་གྲུབ་སྙིང་དང་དོ་ཧའི་སྐོར་ཐམས་ཅད་ལས་ཀྱང་བླ་མའི་རྣལ་འབྱོར་ཁོ་ན་ལམ་གྱི་སྲོག་ཏུ་གསུངས་ལ། དཔལ་མགོན་ཀླུ་སྒྲུབ་ཀྱིས་རིམ་ལྔར་རིམ་པ་རེ་རེའི་ཐད་དུའང་དེ་དང་དེ་ཉིད་བླ་མའི་ཞབས་ལ་བརྟེན་ནས་འཐོབ་དགོས་ཚུལ་ཡང་ཡང་གསུངས་པ་བཞིན། གྲུབ་ཆེན་རྣམས་ཀྱིས་གཞན་ལ་འདོམས་པའི་ཚེའང་བླ་མའི་རྣལ་འབྱོར་ཁོ་ན་རྩལ་དུ་བཏོན་ནས་གསུངས་ལ། རང་གི་ཉམས་ལེན་གྱི་མཐིལ་ཡང་འདི་ཉིད་འབའ་ཞིག་གཙོ་བོར་མཛད་དོ། །དེ་ལྟར་ན་རྐང་པ་དང་པོ་གཉིས་ཀྱིས་གདམས་པའི་ཆེ་བ་བསྟན་པ་ཡིན་ཏེ། མདོ་སྔགས་ཐུན་མོང་གི་བརྗོད་བྱའི་དོན་གྱི་སྙིང་པོ་ཐམས་ཅད་འདུས་པར་རྐང་པ་དང་པོས་བསྟན་ལ། ཁྱད་པར་དུ་གྲུབ་པའི་དབང་པོ་རྣམས་ཀྱི་ཞལ་ནས་ཞལ་དང། སྙན་ནས་སྙན་དུ་བརྒྱུད་པ་སྔགས་ཀྱི་ཟབ་གནད་ཐུན་མོང་མ་ཡིན་པ་རྣམས་ཚང་ཚུལ་རྐང་པ་གཉིས་པས་བསྟན། ཡང་ན་ཐར་འདོད་རྣམས་ཀྱིས་གང་ལ་ཐོས་བསམ་སྒོམ་པ་བྱ་བའི་ཡུལ་གྱི་ཆོས་ནི་ཆུ་མགོ་གངས་ལ་ཐུག་པ་བཞིན་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་མདོ་རྒྱུད་རྣམས་སུ་གསུངས་ཤིང། པཎ་གྲུབ་ཚད་མར་གྱུར་པ་རྣམས་ཀྱིས་

― GTD003_Page_0748 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་ཉམས་སུ་བཞེས་པ་ཞིག་དགོས་པས། འདིར་ཡང་དེ་སྟོན་པ་ལ་རྐང་པ་གཉིས་རིམ་བཞིན་བྱུང་སྟེ། ཆོས་ཁུངས་བཙུན་པའི་ཆེ་བ་བསྟན་པ་ཡིན་ནོ། །ཆེ་བ་དེ་ལྡན་གྱི་གདམས་པ་དངོས་ནི། ཟབ་ལམ་བླ་མའི་རྣལ་འབྱོར་གྱི། །མན་ངག་སྙིང་པོའི་རྩ་ཚིག་བྲི། །ཞེས་པས་བསྟན་ཏེ། བླ་མའི་རྣལ་འབྱོར་གྱི་གདམས་པ་འདི་ནི་ཚིག་ཉུང་ཡང་། མདོ་རྒྱུད་དགོངས་འགྲེལ་ཀུན་གྱི་གནད་བསྡུས་པ་དོན་ཤིན་ཏུ་རྟོགས་པར་དཀའ་བས་ན་ཟབ་ལམ་ཞེས་སྨོས་པ་ཡིན། མན་ངག་ནི་ཨུ་པ་དེ་ཤ་ཞེས་པ་ཉེ་བར་རྟོགས་པའམ། བདེ་བླག་ཏུ་རྟོགས་པ་ལ་འཇུག་ཅིང་། དེའང་གདམས་པ་འདི་ཉིད་དཔྱིས་ཕྱིན་པར་ལག་ལེན་དུ་འདེབས་ནུས་ན། ལས་དང་པོ་བའི་ས་ནས་བཟུང་སྟེ་སངས་རྒྱས་ཀྱི་སའི་བར་གྱི་ལུང་དང་རྟོགས་པའི་ཡོན་ཏན་ཐམས་ཅད་བདེ་བླག་ཏུ་འགྲུབ་པའི་མགོ་ཚུགས་པའམ། ཡང་ན་གདམས་པའི་ཚིག་ཉུང་ངུ་འདི་ལ་བརྟེན་ནས་མདོ་སྔགས་གཉི་གའི་གཞུང་ཆེ་བ་ཐམས་ཅད་ཀྱི་བརྗོད་བྱའི་ས་ལམ་གྱི་རིམ་པ་རྣམས་བདེ་བླག་ཉིད་དུ་ཉམས་སུ་བླང་དུ་ཡོད་པས། དེ་ཐམས་ཅད་ཀྱི་མན་ངག་ཏུ་གྱུར་པ་ཡིན་ཏེ། བེའུ་བུམ་སྔོན་མོ་ལས། མན་ངག་ཐམས་ཅད་བསྡུས་པའི་མགོ་ནི། །བཤེས་གཉེན་དམ་པ་མི་བཏང་བ་ཡིན། །ཞེས་དང་། རྗེ་བདག་ཉིད་ཆེན་པོས། མན་ངག་ལ་བརྟེན་ནས་གཞུང་ཆེ་བ་རྣམས་གདམས་ངག་ཏུ་འཆར་བའི། ཞེས་དང་། མན་ངག་མཆོག་ཏུ་གྱུར་པ་ཙམ་གྱིས་དེ་ལ་རིང་དུ་སྦྱངས་ནས་རྒྱུད་སྡེ་སོགས་ཚད་ལྡན་གྱི་གཞུང་ལ་བལྟས་པ་ན། རྒྱུད་དོན་དུ་མ་ཞིག་ལ་ངེས་པ་སྟེར་

― GTD003_Page_0749 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས། ཞེས་གསུངས་པ་ལྟར་རོ། །གཉིས་པ་གསུང་དོན་ལ། ཐོག་མར་བཤད་པའི་གླེང་བསླང་བ་ནི། ཀུན་གཟིགས་རྒྱལ་བའི་དབང་པོ་རྗེ་བཙུན་བློ་བཟང་བསྟན་པའི་དབང་ཕྱུག་འཇམ་དཔལ་རྒྱ་མཚོའི་ཞལ་སྔ་ནས་ཀྱིས་མཛད་པའི་བླ་མ་ཉིད་ཀྱི་རྣམ་ཐར་ལས། བླ་མ་རིན་པོ་ཆེ། ལེགས་ཚོགས་ཐམས་ཅད་ཀྱི་རྩ་བ་ཟབ་ལམ་བླ་མའི་རྣལ་འབྱོར་འདི་ཡིན་འདུག་པས་བླ་མ་གང་དུ་བསྒོམ་པའི་གནས་དང་། བསམ་སྦྱོར་གྱིས་བསྟེན་ཏེ་དད་པ་གསུམ་སྒོམ་ཚུལ། དད་ལྡན་གཞན་གྱིས་ཕྱག་འཚལ་བ་བྱུང་ན་རང་ཉིད་ལ་དེ་ལེན་པའི་ནུས་པ་མེད་པས། དེ་དག་གི་ཕྱག་ཀྱང་བླ་མ་ཉིད་ལ་ཕུལ་ན་རང་གཞན་ཐམས་ཅད་ཀྱི་ཚོགས་རྫོགས་པ་ལ་ཁྱད་ཡོད་འདུག་པས་དེའི་ཚེ་དམིགས་རྣམ་ཇི་ལྟར་བྱེད་ཚུལ། མདོར་ན་བླ་མའི་རྣལ་འབྱོར་ལ་བརྟེན་ནས་མདོ་སྔགས་གཉི་གའི་ལམ་གྱི་གནད་རྣམས་སེམས་ལ་བཅང་ཆོག་པའི་མན་ངག་གི་སྙིང་པོ་ཞིག་སྩལ་དུ་གསོལ་ཞེས་ཞུས་པའི་ལན་དུ་འདི་སྐད་ཅེས་བཀའ་སྩལ་ཏོ། །ཞེས་འབྱུང་བ་ལྟར་ཡིན་པས། འདིར་ཞུ་བའི་ཚེ་གནས་གང་དུ་སྒོམ་པ་ཐོག་མར་འབྱུང་ཡང། ལམ་རིམ་ཆེན་མོ་ལས། བླ་མའི་རྣལ་འབྱོར་ཞེས་ཡོངས་སུ་གྲགས་པའི་གདམས་པའང་སྔར་བཤད་པ་ལྟར་གོ་དགོས་ཀྱི། དམིགས་པ་ཐུན་རེ་ཙམ་བསྐྱངས་པས་ནི་གར་ཡང་མི་ཕྱིན། ཞེས་གསུངས་པ་ལྟར། རྩ་བ་དད་གུས་སྦྱངས་ཏེ་རྒྱུད་འཁུལ་བ་ཞིག་མེད་ན་བླ་མ་སྤྱི་བོར་བསྒོམ་པ་སྐད་བྱས་

― GTD003_Page_0750 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་གནད་དུ་མི་འགྲོ་བས། འདིར་དད་པ་སྒོམ་ཚུལ་སྔོན་དུ་བླངས་ནས་གསུངས་སོ། །དེས་ན་འདི་ལ་གསུམ། རྩ་བ་དད་གུས་སྦྱོང་ཞིང་དེ་ལ་དད་པ་གསུམ་དུ་འཇོག་ཚུལ། སྤྱོད་ལམ་ཐམས་ཅད་བླ་མའི་རྣལ་འབྱོར་དང་སྦྲགས་ཏེ་དོན་ལྡན་དུ་བྱེད་ཚུལ། དེའི་སྟེང་ནས་གསང་སྔགས་ཟབ་མོའི་ཉམས་ལེན་མཐའ་དག་སྦྱོང་ཚུལ་ལོ། །དང་པོ་ལ། རྩ་བ་དད་པ་སྦྱངས་པ། བཀའ་དྲིན་རྗེས་སུ་དྲན་ནས་གུས་པར་བྱ་བ། དེ་དག་དད་པ་སོ་སོར་འཇོག་ཚུལ་དང་གསུམ། དང་པོ་ནི། འདི་ཕྱིའི་ལེགས་ཚོགས་མ་ལུས་པའི། །གཞི་དང་རྟེན་དང་རྩ་བ་ནི། །ལམ་སྟོན་བཤེས་གཉེན་དམ་པ་སྟེ། །དེ་ཡི་རྣལ་འབྱོར་བསྒོམ་ཚུལ་ནི། །མ་ནོར་ལམ་བཟང་སྟོན་བྱེད་པའི། །བཤེས་གཉེན་དམ་པའི་སྐུ་གཟུགས་ལ། །ཕྱོགས་བཅུའི་རྒྱལ་བ་ཀུན་བཞུགས་པར། །ཁྱབ་བདག་རྡོ་རྗེ་འཆང་གིས་གསུངས། །དེ་ཕྱིར་སངས་རྒྱས་ཀུན་འདུས་སུ། །བཅོས་མིན་ངེས་པ་རྙེད་གྱུར་ན། །བཤེས་གཉེན་བསམ་པས་བསྟེན་ཚུལ་གྱི། །གནད་ཀྱི་མན་ངག་དེ་ཉིད་དོ། །ཞེས་བྱུང་། དེའང་རང་ལ་ལམ་མ་ནོར་བར་སྟོན་པའི་དགེ་བའི་བཤེས་གཉེན་ནི་འདི་ཕྱིའི་ལེགས་ཚོགས་ས་དང་ལམ་གྱི་ཡོན་ཏན་མ་ལུས་པ་དང་པོར་རང་རྒྱུད་ལ་སྐྱེད་ཅིང་། སྐྱེས་ཟིན་མི་ཉམས་པར་གོང་འཕེལ་དུ་བྱེད་པའི་གཞི་དང་རྟེན་དང་རྩ་བར་གྱུར་པ་ཡིན་ཏེ། བྱང་ཆུབ་སེམས་དཔའི་སྡེ་སྣོད་ལས། ཕ་རོལ་ཏུ་ཕྱིན་པ་དང་། ས་དང་བཟོད་པ་དང་། ཏིང་ངེ་འཛིན་དང་། མངོན་པརཤེས་པ་དང་། གཟུངས་དང་། སྤོབས་པ་དང་།

― GTD003_Page_0751 ―

^{[མ་དཔེ་གཟིགས་ན་འདིར་གནོན།]}

[Full Size]

བསྔོ་བ་དང་། སྨོན་ལམ་དང་། སངས་རྒྱས་ཀྱི་ཆོས་ཐམས་ཅད་ཐོབ་ཅིང་ཡོངས་སུ་རྫོགས་པ་ནི་བླ་མ་ལ་རག་ལས། བླ་མ་རྩ་བར་གྱུར། བླ་མ་ལས་བྱུང་། བླ་མ་སྐྱེ་གནས་དང་སྐྱེ་མཆེད་དུ་གྱུར། བླ་མས་བསྐྱེད། བླ་མས་སྤེལ། བླ་མ་ལ་བརྟེན། བླ་མ་རྒྱུར་གྱུར་པ་དག་གོ །ཞེས་གསུངས་པའི་ཕྱིར། དེས་ན་བདག་ལེགས་སུ་འདོད་པ་རྣམས་ཀྱིས་ལེགས་ཚོགས་མཐའ་དག་གི་རྩ་བ་བླ་མ་བརྟེན་ཚུལ་གྱི་རྟེན་འབྲེལ་མགོ་ནས་མ་འཕྱུགས་པ་ཞིག་བྱེད་དགོས་ལ། དེའང་ཐོག་མར་དད་པའི་རྨང་གཞི་ཚུགས་པ་ཞིག་མེད་མི་རུང་དུ་གལ་ཆེའོ། །དད་པ་བསྒོམ་པའང་ཡོན་ཏན་ཕྱོགས་རེ་ཙམ་བསྒོམ་པས་མི་ཆོག་གི །རྩ་བའི་བླ་མ་དེ་ཉིད་སངས་རྒྱས་ཀུན་འདུས་ཀྱི་ངོ་བོར་བཅོས་མིན་གྱི་ངེས་པ་བརྟན་པོ་རྙེད་པ་ཞིག་དགོས་སོ། །སངས་རྒྱས་ཀུན་འདུས་ཀྱི་ངོ་བོར་འགྲོ་ཚུལ་ནི། བཤེས་གཉེན་དམ་པའི་སྐུ་གཟུགས་ལ། །ཕྱོགས་བཅུའི་རྒྱལ་བ་ཀུན་བཞུགས་པར། །ཁྱབ་བདག་རྡོ་རྗེ་འཆང་གིས་གསུངས། །ཞེས་པ་སྟེ། འདིའི་དོན་ཡང་། བླ་མའི་སྐུའི་ཕུང་ཁམས་སྐྱེ་མཆེད་རྣམས་གཤེགས་པ་དང་གཤེགས་མ་ལ་སོགས་པའི་ངོ་བོར་གནས་པའི་སྒོ་ནས་བླ་མའི་སྐུ་ལ་དེ་ཐམས་ཅད་ཚང་བ་དང་། གདུལ་བྱའི་ཚོགས་རྫོགས་པའི་ཕྱིར་ཕྱོགས་བཅུའི་རྒྱལ་བ་ཐམས་ཅད་བླ་མའི་སྐུ་ལ་བཞུགས་ནས་སྒྲུབ་པ་པོའི་མཆོད་པ་ལེན་ཅིང་བྱིན་གྱིས་རློབས་པ་གཉི་གའི་དོན་དུ་བྱས་ན་གོ་བ་སྟེར་ཕུལ་ཆེ་ཞིང་རྒྱུད་ཀྱི་དགོངས་པ་དང་འགྲིག་པས་

― GTD003_Page_0752 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལྟར་བྱ་དགོས་ཏེ། དང་པོ་ནི་བཤད་རྒྱུད་རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །དང་པོ་སྐུ་ཡི་རྡོ་རྗེ་ནི། །གཟུགས་ཕུང་ལ་ནི་ཡང་དག་བཞུགས། །ཞེས་སོགས་དང་། དེ་བས་རྡོ་རྗེ་སློབ་དཔོན་གྱི། །ལུས་ལ་རྒྱལ་བ་ཐམས་ཅད་བཞུགས། །མཐོང་ན་དོན་ནི་ཡོད་པ་ཀྱེ། །ཕྱི་མའི་དུས་ན་སེམས་དཔའ་ཆེ། །དེ་བས་སེམས་ཅན་ཐམས་ཅད་ཀྱིས། །ལྷ་ཡི་མཆོད་པའི་ཡོ་བྱད་ཀྱིས། །རབ་ཏུ་འབད་དེ་བླ་མ་བསྟེན། །ཞེས་སོགས་ཀྱིས་ཕུང་པོ་ལྔ་གཤེགས་པ་དང་། ཁམས་བཞི་གཤེགས་མ། སྐྱེ་མཆེད་རྣམས་སེམས་དཔའ་དང་སེམས་མ། ཡན་ལག་རྣམས་ཁྲོ་བོ་བཅུ་སོགས་ཀྱི་བདག་ཉིད་དུ་གསུངས་པའི་ཤུགས་ཀྱིས་གཤེད་སྐོར་ནས་བསྟན་པའི་རྡོ་རྗེ་མིག་ལ་སོགས་པ་དང་། འཁོར་ལོ་སྡོམ་པ་ལྟར་ན། རྣམ་སྣང་རྡོ་རྗེ་དང་། ལྟུང་བྱེད་མ་ལ་སོགས་པ་དང་། དཔའ་བོ་ཉེར་བཞི། དཔའ་མོ་ཉེར་བཞི་ལ་སོགས་པའི་བདག་ཉིད་དུ་འགྲུབ་བོ། །པཎ་ཆེན་ཐམས་ཅད་མཁྱེན་པའི་བླ་མཆོད་ཆོ་གར་ཕུང་ཁམས་སྐྱེ་མཆེད་དང་ཡན་ལག་རྣམས་ལྷའི་བདག་ཉིད་དུ་གསུངས་པའི་ཁུངས་ནི་གཙོ་བོར་བཤད་རྒྱུད་རྡོར་ཕྲེང་ལ་བརྟེན་ཅིང་། བ་སྤུ་དགྲ་བཅོམ་དང་འོད་ཟེར་ཕྱོགས་སྐྱོང་དུ་གསུངས་པ་མན་ཆད་རྡོ་རྗེ་མཁའ་འགྲོ་སོགས་ལ་བརྟེན་པ་ཡིན་ཏེ། རྡོ་རྗེ་མཁའ་འགྲོ་ལས། སངས་རྒྱས་ཀུན་གྱི་རང་བཞིན་སྐུ། །ཡན་ལག་བྱང་ཆུབ་སེམས་དཔའ་སྟེ། །བ་སྤུ་རྣམས་ནི་དགྲ་བཅོམ་ཉིད། །སྤྱི་གཙུག་རིགས་ལྔའི་སངས་རྒྱས་ཏེ། །

― GTD003_Page_0753 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་པ་ནི་ཞབས་ཀྱི་གདན། །འོད་ཟེར་གནོད་སྦྱིན་གསང་བ་སོགས། །དེ་ལྟར་ཡོན་ཏན་ལྡན་པའི་སྐུར། །རྣལ་འབྱོར་ཅན་གྱིས་རྟག་ཏུ་བལྟ། །ཞེས་གསུངས་ཏེ། རྗེ་བདག་ཉིད་ཆེན་པོས་བླ་མ་ལྔ་བཅུ་པའི་ཊཱིཀྐར་ཡང་། འདི་ནི་བླ་མའི་རྣལ་འབྱོར་རྒྱུད་སྡེ་ནས་གསུངས་པའི་ཁྱད་པར་ཅན་ཞིག་གོ །ཞེས་སྐྱབས་གནས་མཐའ་དག་བླ་མའི་སྐུའི་ཆ་ལ་འདུས་པར་སྒོམ་ཚུལ་འདི་ནི་ཤིན་ཏུ་ཟབ་ཅིང་གནད་ཆེ་བའི་བསྔགས་བརྗོད་རྒྱ་ཆེར་མཛད་དོ། །བཀའ་རྒྱུད་པའི་གཞུང་འགའ་ཞིག་ཏུ་བླ་མའི་ཕུང་སོགས་བརྟེན་པ་ལྷའི་བདག་ཉིད་དུ་ཕ་རྒྱུད་ཀྱིས་འགྲུབ་ལ། རྟེན་གཞལ་ཡས་ཁང་གི་ངོ་བོར་མ་རྒྱུད་ཀྱིས་འགྲུབ་བོ་ཞེས་ཁྱད་ཕྱེ་ནས་བཤད་ཀྱང་། རྡོར་འཕྲེང་ལས། ལུས་ནི་གཞལ་ཡས་ཁང་དུ་འགྱུར། །སངས་རྒྱས་ཀུན་གྱིས་ཡང་དག་བསྟེན། །ཞེས་པ་ནས། དེ་དག་གཞལ་ཡས་ཁང་དུ་བསྒོམ། །ཞེས་ལུས་དཀྱིལ་གསུངས་པ་འབྲས་དུས་བླ་མའི་སྐུ་ལ་དངོས་གནས་སུ་འགྲུབ་དགོས་པས། དེའི་ཕུང་སོགས་རྟེན་གཞལ་ཡས་ཁང་གི་ངོ་བོར་ཕ་རྒྱུད་ལས་ཀྱང་མ་གསུངས་པ་མིན་ནོ། །གཉིས་པ་གདུལ་བྱའི་ཚོགས་རྫོགས་པའི་ཕྱིར་སངས་རྒྱས་ཐམས་ཅད་བླ་མའི་སྐུ་ལ་བཞུགས་ནས་མཆོད་པ་ལེན་ཅིང་བྱིན་གྱིས་རློབས་པའི་ཚུལ་ནི། བདེ་མཆོག་རྩ་རྒྱུད་ལས། སློབ་དཔོན་ལུས་སུ་ལེགས་གནས་ནས། །སྒྲུབ་པ་པོ་ཡི་མཆོད་པ་ལེན། །ཞེས་དང་། འཇམ་དཔལ་ཞལ་ལུང་ལས། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་

― GTD003_Page_0754 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་ཏེ། །སྒྲུབ་པོ་གཞན་ལ་མཆོད་པ་ལེན། །ཞེས་སོགས་རྒྱུད་དང་གྲུབ་ཆེན་དུ་མས་གསུངས་ལ། མདོ་ཕྱོགས་ལས་ཀྱང་དེ་ལྟར་གསུངས་ཏེ། མཆིམས་ནམ་མཁའ་གྲགས་ཀྱིས་བསྟན་རིམ་དུ་མདོ་དྲངས་པ་ལས། གང་གི་ང་གནས་ཉོན་མོངས་པའི་གཉེན་པོར་འགྱུར་ཞིང། དཀར་པོའི་ཕྱོགས་ཀྱི་གྲོགས་སུ་འགྱུར་བའི་ཚིག་འབྱུང་བ་དེ་ལ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཞུགས་པར་རིག་པར་བྱའོ། །ཞེས་གསུངས་པ་དང་། བརྒྱད་སྟོང་པ་ལས་གདུལ་བྱ་ལ་ཆོས་སྟོན་པ་ཐམས་ཅད་དེ་བཞིན་གཤེགས་པའི་སྐྱེས་བུའི་མཐུ་ཡིན་པར་གསུངས་པ་སོགས་ཤིན་ཏུ་མང་ངོ་། །དེ་ལྟར་སངས་རྒྱས་ཀུན་འདུས་སུ་བསྒོམ་པའང་འདི་ཉིད་སངས་རྒྱས་ཡིན་ནོ་ཞེས་པའི་མོས་མནོ་ཙམ་གྱིས་མི་ཆོག་པར། རིགས་པས་དཔྱད་དེ་སྐྱོན་རྟོག་གི་བློ་བཀག་ནས་ངེས་པ་རྙེད་པ་ཞིག་དགོས་པས། ཐོག་མར་རང་རྒྱུད་ལ་ཚུར་བསྐོར་ཏེ་བལྟས་པ་ན་སྐྱོན་གྱི་རྣམ་པ་ཞིག་སྣང་རྒྱུ་མེད་པ་ཤིན་ཏུ་དཀའ་ཞིང་། སྣང་བ་དེ་ཉིད་བདེན་ནམ་མི་བདེན་སྙམ་དུ་དཔྱད་པའི་ཚེ། བདེན་པའི་རྒྱུ་མཚན་རང་ལ་མངོན་སུམ་སྣང་བ་ལས་གཞན་མི་རྙེད་པས། དེའི་ཚེ་རང་ཉིད་ལྟ་བུ་སྔོན་བསགས་ཀྱི་བསོད་ནམས་དང་བློ་གྲོས་དམན་ཞིང་། ཕྱིན་ཅི་ལོག་གི་བག་ཆགས་ཨ་འཐས་སུ་སོང་བས། སྒོ་གསུམ་ཉོན་མོངས་པ་དང་མི་དགེ་བའི་བྲན་དུ་གྱུར་པ་ཞིག་གི་ལོག་པའི་སྣང་ཚུལ་ལ་ངེས་པ་མེད་པར་མ་ཟད། སྔོན་གྱི་སྐྱེས་བུ་དམ་པ་མང་པོ་ལ་ལས་དབང་གིས་སྣང་བ་མ་དག་པ་ཤར་ཚུལ་གྱི་

― GTD003_Page_0755 ―

^{[མ་དཔེ་གཟིགས་ན་འདིར་གནོན།]}

[Full Size]

ལོ་རྒྱུས་མང་དུ་ཡོང་བ་ལྟར་ཡིན་པས། སྣང་ཚུལ་འདི་དག་མཁྲིས་ནད་ཅན་གྱིས་དུང་དཀར་སེར་པོར་མཐོང་བ་བཞིན་རང་གི་བློ་སྐྱོན་ཡིན་གྱི། བླ་མ་ལ་སྐྱོན་དེ་ཡོད་ནས་སྣང་བ་མིན་ངེས་སྙམ་དུ་བསམ་པ་དང་། ཡང་བླ་མའི་ངོས་ནས་སྐྱོན་ཀུན་ཟད་ཡོན་ཏན་ཀུན་ལྡན་ཡིན་ཡང་རང་ཅག་ལ་དེ་ལྟ་བུར་མཐོང་བའི་སྐལ་བ་མེད་པས། ངེད་ཅག་རྣམས་དང་སྐལ་བ་མཉམ་པ་ཐ་མལ་བའི་གཟུགས་དང་ཐ་མལ་པའི་སྤྱོད་པ་ལྟ་བུར་བསྟན་པ་ཡིན་ཏེ། བརྟག་གཉིས་ལས། ཕྱི་མའི་དུས་སུ་གྱུར་པ་ན། །དེ་ཉིད་སློབ་དཔོན་གཟུགས་ཀྱི་སྐུ། །ཞེས་དང་། དེའི་བཤད་རྒྱུད་རྡོ་རྗེ་གུར་ལས། གང་ཉིད་རྡོ་རྗེ་སེམས་དཔའ་ཞེས། །དེ་ཉིད་སློབ་དཔོན་གཟུགས་སུ་འཛིན། །སེམས་ཅན་ཕན་གདགས་དམིགས་ནས་ནི། །ཐ་མལ་པ་ཡི་གཟུགས་སུ་གནས། །ཞེས་དང་། ལྔ་བརྒྱ་ཐ་མར་གྱུར་པ་ན། །དེ་ཉིད་སློབ་དཔོན་གཟུགས་སུ་འཛིན། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་སྐྱེད། །ཅེས་སྙིགས་མའི་གདུལ་བྱ་རྣམས་སངས་རྒྱས་ཀྱི་མཛད་པ་མཐུན་སྣང་དུ་སྟོན་པའི་སྐྱབས་ཤིག་བཙལ་ཡང་དངོས་སུ་མི་རྙེད་པས། དེ་བས་རང་ལ་ཆོས་སྟོན་པ་པོའི་སློབ་དཔོན་དེ་ལ་སྔོན་རྒྱལ་བ་རྡོ་རྗེ་འཆང་གིས་ལྔ་བརྒྱ་ཐ་མའི་ཚེ་བཤེས་གཉེན་གྱི་རྣམ་པར་འབྱོན་ཞེས་ཞལ་གྱིས་བཞེས་པ་དེ་ཉིད་ཁོ་ན་ཡིན་ནོ་སྙམ་དུ་སངས་རྒྱས་དངོས་ཀྱི་འདུ་ཤེས་བཞག་ནས་སྟོན་པར་གྱིས་ཤིག་དང། ངེད་དེའི་ཚེ་ཇི་ལྟར་ཞལ་གྱིས་བཞེས་པ་

― GTD003_Page_0756 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་མི་བསླུ་བར་འབྱོན་ནོ་ཞེས་བཀའ་འགྱུར་བ་མེད་པ་རྡོ་རྗེ་ཚིག་གིས་གསུངས་པ་རྣམས་དྲན་པར་བྱས་ཏེ་ཡིད་ཆེས་རྙེད་པར་བྱའོ། །དེས་ན་བླ་མ་སངས་རྒྱས་སུ་མཐོང་བའི་དོན་ཡང་རྣམ་པ་སངས་རྒྱས་ཀྱི་རྣམ་པར་མཐོང་བ་ལ་གཙོ་བོར་མི་བྱེད་ཀྱི། ངོ་བོ་སྐྱོན་ཀུན་ཟད་ཡོན་ཏན་ཀུན་ལྡན་དུ་མཐོང་དགོས་པ་ཡིན་ཏེ། དཔེར་ན་ལེགས་སྐར་དང་ལྷས་སྦྱིན་སོགས་ཀྱིས་ཐུབ་པའི་དབང་པོའི་སྐུ་མཚན་དཔེ་སོགས་ཀྱིས་སྤྲས་པའི་རྣམ་པ་དངོས་སུ་མཐོང་ཡང་། མཛད་པ་སྐྱོན་དུ་མཐོང་སྟེ་དད་པ་མ་སྐྱེས་པ་ཡིན་ལ། རྣམ་པ་རང་ཅག་དང་སྐལ་བ་མཉམ་པར་བསྟན་པའི་ཤ་ཚུགས་འདི་བཞིན་དུ་སྣང་ཡང་། མཛད་པ་ཡོན་ཏན་འབའ་ཞིག་ཏུ་སྣང་ན་དེས་སངས་རྒྱས་སུ་མཐོང་བའི་གོ་ཆོད་པ་ཡིན་ཏེ། ལམ་རིམ་ཆེན་མོ་ལས། དེ་དག་གི་དོན་ནི་ཇི་ལྟར་སངས་རྒྱས་ཡིན་པར་ཤེས་པ་ན། དེ་ལ་སྐྱོན་རྟོག་པའི་བློ་མི་འབྱུང་ཞིང་ཡོན་ཏན་སེམས་པའི་བློ་འབྱུང་བ་ལྟར། བླ་མ་ལའང་ཆེད་དུ་བྱས་ཏེ་སྐྱོན་རྟོག་པ་རྣམ་པ་ཐམས་ཅད་དུ་འདོར་ཞིང་། ཡོན་ཏན་རྟོག་པའི་བློ་སྦྱོང་བའོ། །ཞེས་བླ་མ་སངས་རྒྱས་སུ་ལྟ་བའི་དོན་མཚན་དཔེའི་སྐུ་ཅན་དུ་ལྟ་བ་ལ་གཙོ་བོར་མི་བྱེད་པར། སྐྱོན་ཀུན་ཟད་དུ་ལྟ་བ་ལ་གཙོ་བོར་བྱེད་དགོས་ཚུལ་ཕྱག་ན་རྡོ་རྗེ་དབང་བསྐུར་བའི་རྒྱུད་ཀྱི་ཁུངས་དང་བཅས་ཏེ་ནན་ཏན་དུ་འདོམས་པར་མཛད་པ་ནི། བླ་མ་སངས་རྒྱས་སུ་སྒོམ་ཞེས་རྗེས་སུ་ཟློས་པ་རྣམས་ཀྱིས་ཤིན་ཏུ་གོ་དགོས་པ་ཞིག་གོ །གཉིས་པ་བཀའ་དྲིན་རྗེས་སུ་དྲན་ནས་

― GTD003_Page_0757 ―

^{[མ་དཔེ་གཟིགས་ན་འདིར་གནོན།]}

[Full Size]

གུས་པར་བྱ་བ་ནི། འདི་ཕྱིའི་ལེགས་ཚོགས་ཇི་སྙེད་པ། །དགེ་བའི་བསམ་པ་ཉིད་ལས་འབྱུང། །དགེ་སེམས་སྐྱེས་པ་བླ་མ་ལ། །རག་ལུས་ཕྱིར་ན་ལེགས་ཚོགས་ཀུན། །བླ་མའི་མཐུ་ལས་འབྱུང་བར་ངེས། །ཞེས་བྱུང་། དེའང་འདི་ཕྱིའི་ལེགས་ཚོགས་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་ཀྱི་རྩ་བ་བླ་མ་ཡིན་པ་ནི། རྗེ་བདག་ཉིད་ཆེན་པོས། དེ་ནས་འདི་ཕྱིའི་ལེགས་ཚོགས་ཇི་སྙེད་པའི། །རྟེན་འབྲེལ་ལེགས་པར་འགྲིག་པའི་རྩ་བ་ནི། །ལམ་སྟོན་བཤེས་གཉེན་དམ་པ་ཞེས་དང་། འཇིག་རྟེན་འཇིག་རྟེན་འདས་པའི་དགེ་ལེགས་ཀྱི། །ཡོན་ཏན་ཀུན་གྱི་རྩ་བ་དྲིན་ཅན་རྗེ། །ཞེས་སོགས་མདོ་དང་བསྟན་བཅོས་མཐའ་དག་ནས་གསུངས་ལ། དེའི་རྩ་བར་འགྱུར་བའི་རྒྱུ་མཚན་ནི། རིན་ཆེན་ཕྲེང་བ་ལས། མི་དགེ་བ་ལས་སྡུག་བསྔལ་དང། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང། །སྐྱེ་བ་ཀུན་ཏུ་བདེ་བ་དག །ཅེས་གསུངས་པ་ལྟར། ངན་སོང་གསུམ་གྱི་སྐྱེ་བ་དང་བདེ་འགྲོ་ངན་འགྲོ་གཉི་གའི་རྟེན་ལ་སྡུག་བསྔལ་ཆེ་ཕྲ་གང་ཡོད་ཐམས་ཅད་རང་རྒྱུ་འཕེན་བྱེད་དང་རྫོགས་བྱེད་ཀྱི་མི་དགེ་བ་ཅི་རིགས་པ་ཞིག་གི་འབྲས་བུར་འབྱུང་བ་གནས་ཡིན་གྱི། དགེ་བའི་འབྲས་བུར་འབྱུང་བ་གནས་མ་ཡིན། བདེ་འགྲོའི་སྐྱེ་བ་ཐམས་ཅད་དང་ཡང་བདེ་འགྲོ་ངན་འགྲོ་གཉི་གའི་རྟེན་ལ་གང་བྱུང་གི་བདེ་བ་ཐམས་ཅད་དགེ་བའི་འབྲས་བུར་འབྱུང་བ་གནས་ཡིན་གྱི། མི་དགེ་བའི་འབྲས་བུར་འབྱུང་བ་

― GTD003_Page_0758 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་མ་ཡིན་པས། ཟས་ཁམ་གཅིག་རྙེད་པ་ཚུན་ཆད་ཀྱི་བདེ་བ་ཕྲ་མོ་ནས་བཟུང་སྟེ། ཟག་པ་མེད་པའི་བདེ་བ་ཕུན་སུམ་ཚོགས་པའི་བར་ཐམས་ཅད་རང་རྒྱུ་དགེ་བ་ཁོ་ན་ལས་འབྱུང་ཞིང་། དགེ་བའི་བསམ་པ་རང་རྒྱུད་ལ་སྐྱེ་བ་བླ་མ་ལ་རག་ལས་པ་ཡིན་ཏེ། ད་ལྟ་ཟས་ཁམ་གཅིག་ལོངས་སྤྱོད་པ་འདི་ལའང། ཟས་ཀྱི་རྒྱུ་སྦྱིན་པ་དང་། དེ་བདེ་འགྲོའི་རྟེན་ལ་སྤྱོད་པ་ཚུལ་ཁྲིམས། དེ་ལ་གཞན་གྱིས་གནོད་པ་མེད་པར་བཟོད་པ། དེའི་རྩོལ་སྒྲུབ་སོགས་ལམ་དུ་འགྲོ་བ་བརྩོན་འགྲུས། དེའི་ཚེ་བག་ཕེབས་པར་གནས་པ་བསམ་གཏན། དེ་ལ་ལོངས་སྤྱོད་ཚུལ་ཤེས་པ་ཤེས་རབ་ཀྱི་འབྲས་བུར་གསུངས་ཤིང་། རང་ཅག་རྣམས་ལ་ཐོག་མེད་ནས་ལྷན་སྐྱེས་སུ་གོམས་པས་གསར་དུ་སློབ་མི་དགོས་པ་ནི་ཉོན་མོངས་པ་མི་དགེ་བའི་ཕྱོགས་འབའ་ཞིག་ཡིན་གྱི། དགེ་བའི་ཕྱོགས་ཐམས་ཅད་རེ་རེ་ནས་གསར་དུ་སློབ་དགོས་ལ། དེ་སློབ་པར་བྱེད་པ་དགེ་བའི་བཤེས་གཉེན་ཡིན་པའི་རྒྱུ་མཚན་གྱིས་ལེགས་ཚོགས་ཐམས་ཅད་དེའི་བཀའ་དྲིན་ཁོ་ན་ལས་བྱུང་བར་དཔོག་ནུས་སོ། །དེ་སྐད་དུ་སྤྱོད་འཇུག་ལས། ཇི་ལྟར་མཚན་མོ་མུན་ནག་སྨག་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང། །ཞེས་གསུངས་པ་ལྟར། མི་དགེ་བའི་རྟོག་པ་རྒྱུན་ཆགས་པ་མཚན་མོའི་སྨག་རུམ་ལྟ་བུའི་ཀློང་ནས། དགེ་སེམས་གློག་འགྱུ་བ་ལྟ་བུ་ཡུད་ཙམ་པ་རེ་འབྱུང་བའང་སངས་རྒྱས་ཀྱི་ཐུགས་རྗེ་ཁོ་ན་ལས་འབྱུང་བར་གསུངས་ལ། དེ་ནི་སངས་

― GTD003_Page_0759 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་རྣམས་ཆོས་ཀྱི་སྐུའི་ངོ་བོར་བཞུགས་པ་ཁོ་ནས་མི་ཆོག་གི །རང་ལ་བླང་དོར་སྟོན་པའི་བཤེས་གཉེན་གྱི་རྣམ་པར་བསྟན་པ་དེའི་མཐུ་ལ་བརྟེན་ནས་འབྱུང་བ་ཡིན་ནོ། །ཁྱད་པར་དུ་ཐར་པ་དང་ཐམས་ཅད་མཁྱེན་པར་བགྲོད་པའི་ལམ་ཤེས་པ་ལ་བླ་མ་དམ་པས་དམིགས་བུ་དང་ས་མཁན་མཛད་པ་ཞིག་མེད་མི་རུང་ཡིན་པ་ནི་དགེ་བའི་བཤེས་གཉེན་པོ་ཏོ་བའི་ཞལ་ནས། རྣམ་གྲོལ་སྒྲུབ་པ་ལ་བླ་མ་ལས་གལ་ཆེ་བ་མེད་དེ། ཚེ་འདིའི་བྱ་བ་བལྟས་ནས་བྱས་པས་ཆོག་པ་ལའང་སློབ་མཁན་མེད་པར་མི་འོང་ན། ངན་སོང་ནས་འོངས་མ་ཐག་པ་འགྲོ་མ་མྱོང་བའི་སར་འགྲོ་བ་ལ་བླ་མ་མེད་པར་ག་ན་འོང་། ཞེས་གསུངས་པ་དང། ཡོན་ཏན་རིན་པོ་ཆེ་སྡུད་པ་ལས་ཀྱང་། བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང། །ཞེས་ཡང་དག་པའི་ལམ་བགྲོད་ཚུལ་ཤེས་པ་བླ་མ་ཁོ་ན་ལ་ལྟོས་པར་གསུངས་ཤིང་། གསང་བ་བསམ་གྱིས་མི་ཁྱབ་པའི་མདོར། བླ་མ་ལ་བརྟེན་པ་དང་། བསྙེན་པ་དང་། བསྙེན་བཀུར་བར་བྱའོ། །དེ་ལྟར་དགེ་བའི་ཆོས་ཐོས་པས་བསམ་པ་དགེ་བ་དང་། དེ་ལས་སྦྱོར་བ་དགེ་བར་འགྱུར་རོ། །དེས་དགེ་བའི་ལས་བྱེད་ཅིང་དགེ་བར་འགྲོ་བས་དགེ་བའི་གྲོགས་མགུ་བར་བྱེད་དོ། །ཞེས་སྒོ་གསུམ་དགེ་བ་ལ་གཞོལ་བའི་རྟེན་འབྲེལ་གྱི་མགོ་བླ་མ་ལ་བརྟེན་ནས་ཚུགས་དགོས་པར་གསུངས་སོ། །མདོར་ན་བྱང་ཆུབ་བདེ་ལམ་ལས། འཁོར་བ་དང་ངན་སོང་གི་སྡུག་བསྔལ་སྤངས་བའི་ཐར་པ་མཆོག་ཡང་དག་

― GTD003_Page_0760 ―

^{[མ་དཔེ་གཟིགས་ན་འདིར་གནོན།]}

[Full Size]

པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་བདེ་བླག་ཏུ་སྟེར་བར་བྱེད་པའི་ལམ་ཟབ་མོ་ཁོང་དུ་ཆུད་པ་འདི་དགེ་བའི་བཤེས་གཉེན་འདི་རྣམས་ཀྱི་བཀའ་དྲིན་ཡིན་པས། ཞེས་གསུངས་པ་ལྟར། ཆུང་ངུའི་འདོད་བྱ་ངན་སོང་གི་སྡུག་བསྔལ་ལས་གྲོལ་བའི་བདེ་འགྲོའི་གོ་འཕང་དང་། འབྲིང་གི་འདོད་བྱ་འཁོར་བའི་སྡུག་བསྔལ་ལས་གྲོལ་བའི་ཐར་པའི་གོ་འཕང་ནས་བཟུང་། སྐྱེས་བུ་ཆེན་པོའི་འདོད་བྱ་རྫོགས་པའི་སངས་རྒྱས་ཀྱི་བར་སྒྲུབ་པའི་ཐབས་ཚང་ལ་མ་ནོར་བ། སྔོན་སངས་རྒྱས་བྱང་སེམས་རྣམས་ཀྱིས་དཀའ་བ་བརྒྱ་ཕྲག་གིས་བཙལ་ཅིང་། ལོ་པཎ་རྣམས་ཀྱིས་དཀའ་སྤྱད་མཐའ་ཡས་པའི་སྒོ་ནས་སྤྱན་དྲངས་པའི་གདམས་པ་ཚང་ལ་མ་ནོར་བ། སངས་རྒྱས་དངོས་སུ་བྱོན་ཀྱང་དེ་ལས་ལྷག་པར་གདམས་སུ་མེད་པའི་མན་ངག་གི་སྙིང་པོ་རྣམས་སྒོ་སྐྱེལ་གྱི་ཚུལ་དུ་སྩོལ་བར་མཛད་པའི་བཀའ་དྲིན་བསམ་གྱིས་མི་ཁྱབ་པ་དྲན་ནས་གུས་པར་བྱའོ། །གསུམ་པ་དེ་དག་དད་པ་སོ་སོར་འཇོག་ཚུལ་ནི། རྒྱལ་ཀུན་ངོ་བོར་ལྟ་བ་ནི། །དང་བའི་དད་པ་སྒོམ་ཚུལ་ལོ། །ལེགས་ཚོགས་ཀུན་གྱི་འབྱུང་གནས་སུ། །ལྟ་བ་ཡིད་ཆེས་སྒོམ་ཚུལ་ལོ། །ཅི་གསུང་བཀའ་བཞིན་སྒྲུབ་བྱེད་པ། །མངོན་འདོད་དད་པའི་སྐྱོང་ཚུལ་ལོ། །ཞེས་བྱུང་། དད་པའི་ངོ་བོ་ནི་ཀུན་བཏུས་ལས། དད་པ་གང་ཞེ་ན། ཡོད་པ་ཉིད་དང་། ཡོན་ཏན་ཅན་དང་། ནུས་པ་རྣམས་ལ་མངོན་པར་ཡིད་ཆེས་པ་དང་། དད་པ་དང་འདོད་པ་སྟེ། འདུན་པའི་རྟེན་བྱེད་པའི་ལས་ཅན་ནོ། །ཞེས་ལས་དང་འབྲས་བུའི་གནས་

― GTD003_Page_0761 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་སོགས་ཇི་ལྟར་བཤད་པ་བཞིན་ཡོད་པར་ངེས་པའི་ཡིད་ཆེས་ཀྱི་དད་པ་བུ་ཆུང་མ་ལ་ཡིད་རྟོན་པ་ལྟ་བུ་དང་། དཀོན་མཆོག་གསུམ་སོགས་ཀྱི་ཡོན་ཏན་མཐོང་ནས་དགའ་བ་དང་བའི་དད་པ་ཆགས་ལྡན་གྱིས་གཞོན་ནུ་མ་མཐོང་བ་ལྟ་བུ། འགོག་ལམ་གྱི་བདེན་པ་སོགས་འབད་ན་ཐོབ་ནུས་པར་ཤེས་ནས་དོན་དུ་གཉེར་བ་མངོན་འདོད་ཀྱི་དད་པ་སྐོམ་པ་ཆུ་ཚོལ་བ་ལྟ་བུ་སྟེ་གསུམ་དུ་གསུངས་ལ། དཔེ་ཆོས་ལས། རྐྱེན་གང་གིས་འགོག་པར་མི་ནུས་པ་ཕྱིར་མི་ལྡོག་པའི་དད་པ་ཚ་བས་གདུངས་པའི་གླང་ཆེན་མཚོ་ནང་དུ་འཇུག་པ་ལྟ་བུ་སྟེ་བཞིར་གསུངས་པས། སྔ་མ་གསུམ་ནི་དབང་པོ་རྣོ་རྟུལ་གཉིས་གའི་ཐུན་མོང་གི་དད་པ་སྐྱེ་ཚུལ་ཡིན་ལ། ཕྱི་མ་ནི་དབང་རྣོན་ཆོས་ཀྱི་རྗེས་འབྲང་གི་དད་པ་སྐྱེ་ཚུལ་ཡིན་ཏེ། རྗེ་བླ་མས་ཀྱང་། བདག་ཡིད་ཁྱོད་ཀྱི་རྗེས་སུ་ཕྱོགས་པ་ནི། །ཉི་མས་གདུངས་པའི་གླང་ཆེན་པད་མཚོར་བཞིན། །ཞེས་གསུངས་སོ། །ལེགས་ཚོགས་ཀྱི་རྩ་བ་ཚུགས་པ་ལ་དད་པ་འདི་དག་གི་སྒོམ་ཚུལ་མ་ནོར་བ་ཤེས་པར་བྱས་ནས་རྒྱུད་ལ་སྐྱེ་ངེས་པ་ཞིག་རྣམ་པ་ཐམས་ཅད་དུ་གལ་ཆེ་སྟེ། ཇོ་བོ་ཡབ་སྲས་ཀྱི་ཞུས་ལན་ནོར་བུའི་ཕྲེང་བ་ལས། དད་པ་ས་ཡི་དང་པོ་ཡིན། །དད་པ་ལམ་གྱི་མགོ་བོ་སྟེ། །དད་པ་ཕན་བདེའི་མྱུ་གུ་ཡིན། །དད་པས་དགེ་བའི་ལོ་ཏོག་འབྱིན། །ཞེས་སོགས་ལྟར་ལམ་གྱི་སྔོན་འགྲོ་ལ་དད་པ་ལས་གལ་ཆེ་བ་མེད་ཅིང་། ཆོས་བཅུ་བའི་མདོ་ལས། གང་གིས་འདྲེན་པ་ངེས་འབྱུང་ལ། །དད་པ་ཐེག་པའི་མཆོག་ཡིན་ཏེ། །ཞེས་དང་། དཀོན་མཆོག་

― GTD003_Page_0762 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲོན་མེ་ལས། དད་པ་སྔོན་འགྲོ་མ་ལྟར་སྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །ཞེས་ཡོན་ཏན་མ་སྐྱེས་པ་སྐྱེད་ཅིང་། སྐྱེས་ཟིན་གོང་དུ་སྤེལ་བའི་རིམ་པས། མཐར་ཐུག་སྐུ་གསུམ་གྱི་གྲོང་ཁྱེར་དུ་འཇུག་བའི་བར་གྱི་རྒྱུའི་གཙོ་བོར་གསུངས་སོ། །དེར་མ་ཟད་མངོན་རྟོགས་རྒྱན་གྱི་བརྗོད་དོན་མཐའ་དག་ལམ་གྱི་རིམ་པར་བསྒྲིགས་པའི་མདོར་བསྟན་ལྟ་བུ་ནི། སངས་རྒྱས་སོགས་དམིགས་དད་པ་དང། །ཞེས་སོགས་རྐང་པ་དྲུག་པོ་འདི་ཡིན་ལ། དེའི་ནང་ནས་རྐང་པ་དང་པོས་ཐེག་པ་ཐུན་མོང་དང་ཐུན་མོང་མ་ཡིན་པའི་སྐྱབས་འགྲོ་ཁྱད་པར་བཞི་ལྡན་གསུངས་པའི་ཁོངས་དེར་སྐྱེས་བུ་གསུམ་གའི་ལམ་གྱི་གནད་འདུས་པ་ཡིན་ཏེ། ཕར་ཕྱིན་ལམ་བསྒྲིག་ལས། དཀོན་མཆོག་གསུམ་རྒྱུ་དང་འབྲས་བུས་བསྔུས་པ་ལ་དང་བའི་དད་པ་དེའི་ཡུལ་དུ་ཐེག་ཆེན་གྱི་རྒྱུ་འབྲས་ཀྱི་ཆོས་མ་ལུས་པ་འགྱུར་བས། དེ་ལྟ་བུའི་དད་པ་སྐྱེས་ན་སྐབས་འདིར་བསྟན་པའི་དད་པ་ལ་མཁས་པ་ཞེས་བྱའོ། །དོན་གཉེར་གྱི་འདུན་པ་ནི་དད་བའི་རྗེས་སུ་བྱེད་པས་དད་པ་ལམ་གྱི་རྩ་བར་སྟོན་པའང་དེ་ཡིན་ནོ། །ཞེས་གསུངས་པ་བཞིན། འཁོར་བ་ཐོག་མ་མེད་པས་སེམས་ཅན་ཐམས་ཅད་མར་གྱུར་ཚུལ་སོགས་ལ་ཡིད་ཆེས་ཀྱི་དད་པ་བསྐྱེད་དེ་བྱམས་སྙིང་རྗེ་སྒོམ་ཚུལ་དང་། སངས་རྒྱས་བྱང་སེམས་རྣམས་ཀྱིས་རང་དོན་ཡིད་བྱེད་དང་མ་འདྲེས་པའི་མཛད་པ་སྐྱོན་མེད་པ་ལ་དང་བའི་དད་པ་

― GTD003_Page_0763 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེད་ཅིང། བདག་གིས་ཀྱང་འདྲེན་པ་སྔ་མོ་རྣམས་ཀྱི་རྣམ་ཐར་བཞིན་དུ་བསླབ་ན་དེ་དག་དང་མཉམ་པའི་གོ་འཕང་ཐོབ་ནུས་སུ་མཐོང་སྟེ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་འདོད་པའི་བསམ་པ་བྱང་ཆུབ་ཀྱི་སེམས་རིན་པོ་ཆེ་སྐྱེད་པར་བྱེད་པ་ཡིན་པས། སེམས་དེ་ཉིད་འབྱུང་མི་འབྱུང་རྩ་བ་འདི་དག་ཡོད་མེད་ལ་རག་ལས་པའི་རྒྱུ་མཚན་གྱིས་མངོན་རྟོགས་རྒྱན་ལས་ཀྱང་། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སེམས་བསྐྱེད་ལ་འདོད་པའམ་འདུན་པའི་མིང་གིས་བཏགས་ནས་གསུངས་པ་ཡིན་ཏེ། འགྲེལ་པ་དོན་གསལ་ལས། དགེ་བའི་ཆོས་ལ་འདུན་པའི་མཚན་ཉིད་དོན་དུ་གཉེར་བ་ཡོད་ན་བྱང་ཆུབ་ཏུ་སེམས་བསྐྱེད་པས་རྒྱུས་འབྲས་བུ་བསྟན་པ་ཡིན་ཏེ། ཞེས་དང་། བརྒྱད་སྟོང་འགྲེལ་ཆེན་ལས། འགྲོ་བ་མགོན་མེད་པ་སྡུག་བསྔལ་གྱི་རྒྱ་མཚོར་ནུབ་པ་ལ་མངོན་པར་བལྟས་ནས་དེ་གདོན་པའི་བསམ་པས་དགེ་བའི་ཆོས་ལ་འདུན་པའི་མཚན་ཉིད་ཅན་གྱི་དོན་དུ་གཉེར་བ་ཡོད་ན་འཚང་རྒྱ་བ་ཉིད་ཀྱི་ཕྱིར་བྱང་ཆུབ་ཀྱི་སེམས་བསྐྱེད་པ་ཡིན་པས། འདིར་རྒྱུས་འབྲས་བུ་བསྟན་པ་ཡིན་ནོ། །ཞེས་གསུངས་པའི་ཕྱིར། འདིར་གཙོ་བོ་ཐེག་ཆེན་ཐུན་མོང་མ་ཡིན་པའི་སྐྱབས་འགྲོ་ཁྱད་པར་བཞི་ལྡན་གསུངས་པ་ཡིན་ཀྱང། དེ་ལ་སྔོན་དུ་འབྲིང་དང་ཐུན་མོང་བའི་སྐྱབས་འགྲོ་འབྱུང་དགོས་ཤིང། དེ་ནི་འཁོར་བའི་སྡུག་བསྔལ་གསུངས་པ་ལ་ཡིད་ཆེས་ནས་དེ་ལས་ཐར་

― GTD003_Page_0764 ―

^{[མ་དཔེ་གཟིགས་ན་འདིར་གནོན།]}

[Full Size]

འདོད་དང། འགོག་ལམ་གྱི་ཡོན་ཏན་མཐོང་ནས་ཐོབ་འདོད་ཀྱི་དད་པ་གཉིས་སུ་འདུ། དེའི་སྔོན་དུ་ཆུང་ངུ་དང་ཐུན་མོང་བའི་སྐྱབས་འགྲོ་འོང་དགོས་ལ། དེ་ནི་ངན་སོང་གི་སྡུག་བསྔལ་ལ་འཇིགས་ནས། དེ་ལས་སྐྱོབ་པའི་ནུས་པ་དཀོན་མཆོག་ལ་ཡོད་པར་མཐོང་སྟེ་སྐྱབས་སུ་འགྲོ་བ་ཡིན་ཀྱང་། དེའི་རྩ་བ་ལས་འབྲས་ལ་ཡིད་ཆེས་ཀྱི་དད་པ་ཡོད་མེད་ཁོ་ན་ལ་རག་ལས་པས། སྐྱེས་བུ་ཆུང་ངུའི་ཆོས་སྐོར་འདི་ལ་མངོན་མཐོའི་ཆོས་སྐོར་དང་དད་པའི་ཆོས་སྐོར་ཞེས་ཀྱང་བཤད་དེ། རིན་ཆེན་འཕྲེང་བ་ལས། དེ་ལ་མངོན་མཐོ་བདེ་བ་སྟེ། །ངེས་པར་ལེགས་པ་ཐར་པར་འདོད། །དེ་ཡི་སྒྲུབ་པ་མདོར་བསྡུ་ན། །མདོར་ན་དད་དང་ཤེས་རབ་བོ། །ཞེས་དང་། ཀུན་མཁྱེན་འཇམ་དབྱངས་བཞད་པས་གྲུབ་མཐའ་རྩ་བ་ལས། མངོན་མཐོ་ངེས་ལེགས་སྒྲུབ་བྱེད་དད་ཤེས་གཉིས། །ཞེས་གསུངས་པ་ལྟར་རོ། །དེ་ལྟར་དད་པ་གསུམ་ག་ལམ་གྱི་རྩ་བར་ཤེས་ནས་དེའི་རང་བཞིན་ལེགས་པར་གཏན་ལ་ཕབ་སྟེ་བླ་མའི་རྣལ་འབྱོར་བསྒོམ་པ་འདིར་ཡང་དེ་གསུམ་གྱི་གནད་ཚང་ངེས་པ་ཞིག་བྱེད་དགོས་པས། དེའི་ཚུལ་ནི་གོང་དུ་བཤད་པ་ལྟར་དྲིན་ཅན་རྩ་བའི་བླ་མ་དེ་ཉིད་རྒྱལ་ཀུན་གཅིག་ཏུ་འདུས་པའི་ངོ་བོར་ལྟ་བ་དང་བའི་དད་པ་སྒོམ་ཚུལ་དང་། གནས་སྐབས་མཐར་ཐུག་གི་ལེགས་ཚོགས་མ་ལུས་པ་བླ་མའི་བཀའ་དྲིན་ཁོ་ན་ལ་བརྟེན་ནས་བྱུང་ཚུལ་དཔྱད་པ་གསུམ་གྱིས་དག་པའི་བཀའ་ཚད་མར་གྱུར་པ་རྣམས་ཀྱིས་ལས་གང་ལས་འབྲས་བུ་གང་འབྱུང་བ་གནས་དང་གནས་མ་ཡིན་པའི་ཚུལ་

― GTD003_Page_0765 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པ་ལ་བརྟེན་ནས་བསྒྲུབས་ཏེ་ཡིད་ཆེས་ཀྱི་དད་པ་སྒོམ་ཚུལ་དང་། བླ་མས་རང་ལ་བླང་དོར་འདི་དང་འདི་གྱིས་ཞེས་ཅི་གསུང་བ་ཐམས་ཅད་བཀའ་བཞིན་དུ་བསྒྲུབ་པ་མངོན་འདོད་ཀྱི་དད་པ་སྒོམ་ཚུལ་ཏེ། དངོས་ཟིན་ཙམ་གོ་སླ་ལ། སྔ་མ་གཉིས་ཀྱི་རྒྱུ་མཚན་གོང་དུ་བཤད་ཟིན་པས། འདིར་ཅི་གསུང་བཀའ་བཞིན་སྒྲུབ་བྱེད་པ། །མངོན་འདོད་དད་པའི་སྐྱོང་ཚུལ་ལོ། །ཞེས་གསུངས་པའི་འབྲེལ་ཇི་ལྟར་ཡིན་ཞེ་ན། བླ་མས་གདུལ་བྱ་ལ་བླང་དོར་གྱི་རྣམ་བཞག་སྟོན་པ་དེ་ནི་བྲོ་བའི་གླུ་གཞས་ལྟ་བུ་ཚིག་གང་འགྲིག་ཙམ་བཤད་པ་མ་ཡིན་པར། བསྡུ་བ་བཞིའི་ནང་ནས་དོན་མཐུན་པ་ཞེས་བྱ་བ་རང་ཉམས་དང་སྦྱར་བའི་སྟེང་ནས་ཡིན་ཏེ། ཚད་མ་རྣམ་འགྲེལ་ལས། སྐྱོབ་པ་ཉིད་གཟིགས་ལམ་གསུངས་པ། །ཞེས་དང་། ཆེད་དུ་བརྗོད་པའི་ཚོམས་ལས། བདག་ཉིད་དང་པོར་རིགས་པར་གནས་བྱས་ནས། །ཕྱི་ནས་བདག་བཞིན་གཞན་དག་གདུལ་བར་བྱ། །ཞེས་གསུངས་པ་ལྟར། རང་ཉིད་ཀྱིས་ཇི་ལྟར་གཟིགས་པ་དང་ཇི་ལྟར་ཉམས་སུ་བླངས་པ་དེ་ཁོ་ན་བཞིན་དུ་རྗེས་འཇུག་རྣམས་ལ་འདོམས་པར་མཛད་པ་ཡིན་པས། བླ་མའི་གོ་འཕང་དམ་པ་དེ་ཉིད་མངོན་པར་འདོད་ན་བླ་མ་གང་ནས་གཤེགས་པའི་ལམ་དེ་ཉིད་ནས་བགྲོད་ཅིང་། དེས་འཇུག་ལྡོག་ཇི་ལྟར་མཛད་པ་དེ་བཞིན་དུ་རང་གིས་ཀྱང་སྒྲུབ་དགོས་པའི་ཕྱིར་ཏེ། འབྲས་བུ་དེ་ཇི་ལྟ་བ་འདོད་ལ། རྒྱུ་དེ་ཇི་ལྟ་བ་བཞིན་མི་སྒྲུབ་པ་ནི་

― GTD003_Page_0766 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱབ་འགལ་ཡིན་པའི་ཕྱིར་རོ། །གཉིས་པ་སྤྱོད་ལམ་ཐམས་ཅད་བླ་མའི་རྣལ་འབྱོར་དང་སྦྲགས་ཏེ་དོན་ལྡན་དུ་བྱེད་ཚུལ་ལ། རྣམ་པ་ཀུན་ཏུ་བླ་མའི་རྣལ་འབྱོར་སྒོམ་ཚུལ་དང་། དེའི་སྒོ་ནས་རང་གཞན་གྱི་དོན་སྒྲུབ་པའི་ཐབས་མཁས་ཀྱི་སྒོ་གསུམ་དོན་ལྡན་དུ་བྱེད་ཚུལ་གཉིས། དང་པོ་ནི། མི་འདོད་རྐྱེན་ངན་བྱུང་བ་སོགས། །གལ་ཆེའི་གནས་སྐབས་ཐམས་ཅད་དུ། །བླ་མ་སྤྱི་བོར་བསྒོམ་བྱས་ནས། །ཕུར་ཚུགས་གསོལ་འདེབས་བྱེད་པ་གཅེས། །རྒྱ་ཆེན་བསོད་ནམས་གསོག་འདོད་ཚེ། །བླ་མ་མདུན་དུ་བསྒོམ་བྱས་ནས། །མཆོད་ཚོགས་རྒྱ་མཚོས་མཆོད་པ་གཅེས། །འདི་ཕྱི་བར་དོའི་གནས་སྐབས་སུ། །བླ་མ་སྙིང་དབུས་བསྒོམ་བྱས་ཏེ། །རང་གི་སེམས་དང་བླ་མ་གཉིས། །དབྱེར་མེད་བསྲེ་བ་མན་ངག་གོ །ཞེས་བྱུང་། དེའང་དགོས་པའི་དབང་གིས་བླ་མ་གནས་སོ་སོར་སྒོམ་ཚུལ་ཐ་དད་པའི་རྣམ་གཞག་འདི་ནི་རྒྱུད་དང་གྲུབ་ཆེན་གྱི་དགོངས་པ་ཡིན་ཏེ། ཨ་བྷི་དྷ་ནའི་རྒྱུད་ལས། དྲིན་དང་ལྡན་པའི་བླ་མ་དེ། །སྙིང་གི་དཀྱིལ་ལམ་སྤྱི་བོའི་གཙུག །ཡན་ལག་མཐིལ་དུ་གང་བཀོད་པ། །སངས་རྒྱས་སྟོང་གི་ཡོན་ཏན་ཡང། །གང་ཟག་དེ་ཡིས་འཛིན་པར་འགྱུར། །ཞེས་གསུངས་ལ། ཕྱིས་ཀྱི་དཔེ་ཕལ་ཆེར་དུ་དྲངས་པ་ན། དྲིན་དང་ལྡན་པའི་བླ་མ་དེ། །ལག་པའི་མཐིལ་ལམ་སྙིང་གི་དཀྱིལ། །ལུས་ཀྱི་ཆ་ཤས་གང་བསྒོམས་ཀྱང། །སངས་རྒྱས་སྟོང་གིས་བྱིན་རླབས་ཀྱང། །གང་ཟག་དེ་ཡིས་སྡུད་པར་བྱེད། །ཅེས་འབྱུང་བ་འགྱུར་

― GTD003_Page_0767 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱད་ཡིན་པར་མངོན། དེ་བཞིན་དུ་རྗེ་བཙུན་མི་ལས། བླ་མའི་སྣང་བ་ཤར་ཙ་ན། །འབྲལ་མེད་སྤྱི་བོར་གསོལ་བ་ཐོབ། །བརྗེད་མེད་སྙིང་གི་དཀྱིལ་དུ་བསྒོམ། །ཞེས་དང། རྒྱལ་བ་ཡང་དགོན་པས། མཆོད་ཚོགས་དུས་སུ་མདུན་གྱི་མཁའ། །གསོལ་བ་འདེབས་ཚེ་སྤྱི་བོའི་གཙུག །རྟག་ཏུ་བླ་མ་སྙིང་གི་དབུས། །ཞེས་གསུངས་ལ། པཎ་ཆེན་ཐམས་ཅད་མཁྱེན་པས་དྲིས་ལན་བློ་བཟང་བཞད་བའི་སྒྲ་དབྱངས་ལས་ཀྱང་། བླ་མ་གང་དུ་བསྒོམ་པའི་གནས། །མདུན་ནམ་སྤྱི་གཙུག་སྙིང་གི་དཀྱིལ། །རང་རང་མོས་པ་བཞིན་དུ་སྟེ། །ཞེས་གསུངས་ནས། བླ་མཆོད་ཀྱི་སྐབས་སུ། དང་པོར་མདུན་དང་། རྗེས་སུ་སྤྱི་བོ་དང་སྙིང་གར་རིམ་བཞིན་བསྒོམ་ཚུལ་དེ་གསུམ་ག་ཚང་བར་བྱས་ནས་གསུངས་སོ། །དེ་དག་གི་དགོངས་པ་དང་མཐུན་པར་འདིར་ཡང་སྤྱི་བོ་དང་མདུན་གྱི་ནམ་མཁའ་སྙིང་དབུས་རྣམས་སུ་བསྒོམ་ཚུལ་གསུམ་གསུངས་པས། དང་པོ་ནི་ཕ་རོལ་གྱི་གདོན་བགེགས་ནད་རིམས་ལ་སོགས་པའི་ཕྱི་ནང་གི་ཉེར་འཚེ་དྲག་པོས་གཙེས་པ་ན། དེའི་མགོན་སྐྱབས་དང་དཔུང་གཉེན་དུ་བླ་མ་རང་གི་སྤྱི་བོར་རིགས་ཀྱི་བདག་པོའི་ཚུལ་དུ་གསལ་བཏབ་ནས་ལས་ཉོན་སྡིག་སྒྲིབ་བག་ཆགས་རྣམས་དང་། དེས་བསྐྱེད་པའི་སྡུག་བསྔལ་ལ་སོགས་བྱང་ཞིང་དག་པ་དང་། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ལ་སོགས་པ་འཕེལ་ཞིང་རྒྱས་པའི་ཕྱིར་གསོལ་བ་རྩེ་གཅིག་ཏུ་འདེབས་ཤིང་བདུད་

― GTD003_Page_0768 ―

^{[མ་དཔེ་གཟིགས་ན་འདིར་གནོན།]}

[Full Size]

རྩི་འབེབས་སྦྱང་གི་དམིགས་པ་ལ་སོགས་པ་བྱེད་པ་ཡིན་ནོ། །གནས་སྐབས་ཀྱི་བར་ཆད་སེལ་བའི་ཕྱིར་གསོལ་བ་འདེབས་པ་ནི་སྤྱི་བོར་བསྒོམ་པར་གསུངས་པ་འདི་ནི་ལུས་ཀྱི་གནས་ཀྱི་གཙོ་བོ་སྤྱི་བོ་ཡིན་པས་དེ་དང་བསྟུན་ནས་གཙོ་ཆེ་བའི་དབང་དུ་བྱས་པ་ཡིན་གྱི། མཐའ་གཅིག་ཏུ་ངེས་བཟུང་མིན་ཏེ། གོང་དུ་དྲངས་པའི་རྒྱུད་ལས། ཡན་ལག་མཐིལ་དུ་ཞེས་དང་། ལུས་ཀྱི་ཆ་ཤས་གང་བསྒོམས་ཀྱང་། །ཞེས་གསུངས་པ་བཞིན། དགོས་པའི་དབང་གིས་ལུས་ཀྱི་ཆ་སོ་སོ་ལ་བསྒོམ་ཚུལ་སྣ་ཚོགས་ཤིག་ཡོད་པའི་ཕྱིར། ཀུན་མཁྱེན་འཇམ་དབྱངས་བཞད་པས་འཇིགས་བྱེད་རྫོགས་རིམ་ལས། རླུང་གིས་ཁོལ་བུར་ན་བའི་གེགས་སེལ་ནི། ལུས་ཀྱི་སྟོད་སྨད་གང་རུང་ཁོལ་བུར་ན་བའམ། ཤ་བེམ་པའམ། སྐྲངས་པ་སོགས་བྱུང་ན་རྩ་བའི་དམིགས་རྟེན་བླ་མ་སོགས་དབྱེར་མི་ཕྱེད་པ་དེ་དང། ཞེས་སོགས་ཀྱིས་རྩ་བའི་དམིགས་རྟེན་ལས་འོད་ཟེར་འཕྲོས་ཏེ་སྐྱོན་དེ་རྣམས་སྦྱོང་བའང་བླ་མ་དང་དབྱེར་མེད་དུ་བྱས་པའི་ནུས་མཐུ་ཡིན་པར་གསུངས་ལ། ཡང་སྐྲངས་པ་དེ་བླ་མ་ཡི་དམ་གྱི་ངོ་བོར་བསྒོམ་ལ་ཞེས་དེ་ཉིད་དུ་བླ་མའི་སྐུ་བསྒོམ་པའང་གསུངས་སོ། །གཞན་ཡང་དེ་ཉིད་ལས། སྣང་གྲགས་ཐམས་ཅད་བླ་མའི་གསང་གསུམ་དུ་འཁྱེར་ཤེས་པ་ལ་བསླབ་ཅིང། འདི་ཉམས་འོག་ཏུ་ཆུད་ངེས་བྱུང་ན་གེགས་སེལ་བོགས་འདོན་གང་གི་སྐབས་སུའང་འཁོར་ལོས་བསྒྱུར་བའི་རྒྱལ་པོའི་ནོར་བུ་རིན་པོ་ཆེ་ལག་ཏུ་ཆུད་པ་ལྟ་བུ་འོང། ཞེས་གསུངས་ཏེ། གྲུབ་ཆེན་ཏེ་ལོ་པས་ཀྱང། བོགས་འདོན་ཀུན་གྱི་མཆོག་གྱུར་པ། །བླ་མ་

― GTD003_Page_0769 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིན་ནོ་རྣལ་འབྱོར་པ། །ཞེས་གསུངས་སོ། །ནཱ་རོ་པའི་སྤྱོད་པ་ཆོས་ཀྱི་གླུ་ནཱ་རོའི་རྣམ་འཕྲུལ་གཙང་པ་རྒྱ་རས་ཀྱིས་ལྷོ་བྲག་མཁར་ཆུའི་གཏེར་ནས་བཏོན་པ་རོ་སྙོམས་ཀྱི་གདམས་པ་ལས། ཀུན་ལ་བླ་མའི་རྣལ་འབྱོར་ཤིས། །ཅི་དགུ་ཐམས་ཅད་བླ་མ་ལ། །གསོལ་བ་བཏབ་ལས་འབྱུང་བར་འདུག །ཅེས་ནད་འདོན་གྱི་སྐབས་སུ་གསུངས་པ་ལག་ཏུ་ལེན་པའི་ཚེ། ཚ་བའི་ནད་ལ་མགྲིན་པར་བླ་མའི་ངོ་བོ་ཆུ་ཤེལ་གྱི་མཆོད་རྟེན་ཞིག་བསམས་ཏེ། དེའི་འོད་ཟེར་ག་བུར་ལྟ་བུས་ཚ་བའི་ནད་རྣམས་སྦྱངས་པའི་དམིགས་པ་དང་། དེ་བཞིན་དུ་གྲང་བའི་ནད་ལ་སྙིང་གར་བླ་མའི་ངོ་བོ་མེ་ཤེལ་གྱི་མཆོད་རྟེན། བད་ཀན་གྱི་ནད་ལ་ལྟེ་བར་བླ་མའི་ངོ་བོ་གསེར་གྱི་མཆོད་རྟེན། འདུས་པའི་ནད་ལ་སྤྱི་བོར་བླ་མའི་ངོ་བོ་རླུང་གི་མཆོད་རྟེན་གསལ་བཏབ་སྟེ་སྤྲོ་བསྡུ་སོགས་བྱེད་པར་དེའི་འགྲེལ་པ་རྣམས་སུ་བཤད་དོ། །མི་དང་མི་མ་ཡིན་གྱིས་གཙེས་པ་ལའང། ལྷ་གཞན་ལ་གསོལ་བ་འདེབས་པ་བས་རང་གི་རྩ་བའི་བླ་མ་ལ་གསོལ་བ་བཏབ་ན་བྱིན་རླབས་ཤིན་ཏུ་མྱུར་ཏེ། འབྲོམ་སྟོན་པའི་ཞལ་ནས། རྟེན་གང་ལ་གསོལ་བ་བཏབ་པ་ལས་ཇོ་བོ་ལ་གསོལ་བ་བཏབ་པ་བྱིན་རླབས་ཆེ་བ་བྱུང་། ཞེས་གསུངས་ཤིང་། སྔོན་གཅིག་ལ་མི་མ་ཡིན་གདུག་པ་ཅན་ཞིག་གིས་མཐོ་བརྩམས་ནས་ནུབ་རེ་བཞིན་འོད་དཀར་པོ་ཆེན་པོ་ཞིག་ནམ་མཁའ་ནས་བབས་ཏེ་འཇིགས་སྔངས་ཆེ་བར་བྱུང་བ་ལ་ཁྲོ་བོའི་བཟླས་པ་དང་ཕྱིར་ཟློག་སོགས་ཅི་བྱས་ཀྱང་མ་ཕན་པས། ཐབས་གཞན་མ་རྙེད་པར་

― GTD003_Page_0770 ―

^{[མ་དཔེ་གཟིགས་ན་འདིར་གནོན།]}

[Full Size]

འོད་དེའི་དཀྱིལ་དུ་རྩ་བའི་བླ་མའི་སྐུའི་རྣམ་པ་ཞིག་བསྒོམས་པས་འོད་དེ་ཉིད་ནག་ཐུམ་གྱིས་སོང་སྟེ་ཕྱིན་ཆད་མ་བྱུང་བ་སོགས་དེ་འདྲའི་ལོ་རྒྱུས་མང་ལ། འདི་ཙམ་ནི་ཐ་ན་བདག་ལྟ་བུས་ཀྱང་མྱོང་བས་གྲུབ་པ་ཞིག་གོ །རྒྱ་ཆེན་བསོད་ནམས་གསོག་འདོད་ཚེ། །བླ་མ་མདུན་དུ་བསྒོམ་བྱས་ནས། །མཆོད་ཚོགས་རྒྱ་མཚོས་མཆོད་པ་གཅེས། །ཞེས་པ་ནི། ལམ་རིམ་དང་བླ་མཆོད་ཀྱི་སྐབས་ལྟར་མཐོ་དམན་ཇི་ལྟར་འཚམ་པའི་མདུན་གྱི་ནམ་མཁར་ཚོགས་ཞིང་གི་གཙོ་བོར་བྱས་ནས་བསྒོམ་པའམ། ཡང་ན་ཚོགས་ཞིང་ཀུན་འདུས་པའི་བདག་ཉིད་དུ་བྱས་ནས་བླ་མ་གཅིག་པུ་གསལ་བཏབ་ལ། ལུས་ངག་ཡིད་གསུམ་གྱི་ཕྱག་བྱ་བ་དང་། དངོས་བཤམས་ཡིད་སྤྲུལ་གྱི་མཆོད་ཚོགས་བླ་ན་མཆིས་པ་དང་བླ་ན་མ་མཆིས་པ་མདོ་སྡེ་ནས་འབྱུང་བ་བཞིན་བློས་བླངས་ཏེ་དབུལ་ཞིང་། གཞན་ཡང་ཕྱི་ནང་གི་ཉེར་སྤྱོད་དང་འདོད་ཡོན། དུས་གསུམ་གྱི་དགེ་ཚོགས། སྦྱངས་རྟོགས་སྦར་གསུམ་བྱས་པའི་ནང་མཆོད། ཞིང་སྔགས་ལྷན་སྐྱེས་ཀྱི་ཕོ་ཉ། ཟུང་འཇུག་གི་རྟོགས་པ་སྟེ་དབང་བཞི་དང་འབྲེལ་བའི་མཆོད་པ། ཕྱི་ནང་གསང་བ་དེ་ཁོ་ན་ཉིད་ཀྱི་མཎྜལ་དང་བཅས་པ། སྡིག་ལྟུང་བཤགས་ཤིང་དགེ་བ་ལ་རྗེས་སུ་ཡི་རང་བ། བསྐུལ་ཞིང་མི་འདའ་བར་གསོལ་བ་གདབ་པ། རྗེས་བསྔོ་བ་དང་བཅས་བསག་སྦྱང་གི་གནད་བསྡུས་པ་ཡན་ལག་བདུན་པ་བྱེད་པ་ནི། འདིར་བསོད་ནམས་གསོག་པའི་ཐབས་མཆོག་ཏུ་གྱུར་པའི་མཆོད་པ་འབུལ་ཚུལ་ཡིན་ནོ། །ཡན་ལག་བདུན་དུ་ཕྱེ་བའི་

― GTD003_Page_0771 ―

^{[མ་དཔེ་གཟིགས་ན་འདིར་གནོན།]}

[Full Size]

ནང་གི་མཆོད་པ་དང་གཞན་རྣམས་ལ་ཁྱད་པར་ཅུང་ཟད་ཡོད་ཀྱང་། སྤྱིར་ཡན་ལག་བདུན་པ་མཆོད་པར་འཇོག་དགོས་ཏེ། མཆོད་པའི་སྐད་དོད་པཱུ་ཛ་ཞེས་པ་མཉེས་ཤིང་མགུ་བར་བྱེད་པ་ལ་འཇུག་པས། བླ་མ་མཉེས་བྱེད་ཀྱི་རྣམ་པར་དཀར་བའི་ཆ་ཇི་སྙེད་ཅིག་ཡོད་པ་ཐམས་ཅད་མཆོད་པར་འགྲོ་བའི་ཕྱིར་ཏེ། བདུད་རྩི་གསང་བའི་རྒྱུད་ལས། མཉེས་པའི་དོན་གྱིས་མཆོད་པ་སྟེ། ཞེས་དང་། ཀླུ་སྒྲུབ་ཀྱིས་སེམས་ཅན་མགུ་བར་བྱེད་པའི་བསྟོད་པ་ལས། དེས་ན་སེམས་ཅན་ཕན་པ་བྱས་ན་ང་ལ་མཆོད་པའི་མཆོག །གང་གི་ཡིད་ནི་མགུ་བར་བྱེད་པ་མཆོད་པ་ཡིན་པས་སོ། །ཞེས་གསུངས་པའི་ཕྱིར། དེའང་ཞིང་མཆོག་དམན་གང་ལ་མཆོད་པ་དང་སྦྱིན་པ་བྱས་པས་བསོད་ནམས་རེ་འབྱུང་བ་ཙམ་དུ་འདྲའང། རྒྱ་ཆེ་ཆུང་གི་ཁྱད་པར་ཤིན་ཏུ་ཆེ་བས་དེ་ཐམས་ཅད་ཀྱི་ནང་ནས་བསོད་ནམས་ཤིན་ཏུ་རྒྱ་ཆེ་ཤོས་མཐར་ཐུག་པ་བླ་མ་ལ་མཆོད་པ་ཡིན་པར་གོ་བའི་ཕྱིར། རྒྱ་ཆེན་བསོད་ནམས་གསོག་འདོད་ཚེ། །ཞེས་གསུངས་པ་ཡིན་ཞིང། དེ་ཉིད་གཞན་ཐམས་ཅད་ལས་ཁྱད་པར་དུ་འཕགས་པ་མདོ་རྒྱུད་ཐམས་ཅད་ཀྱི་དགོངས་པའང་ཡིན་ཏེ། གསང་བ་འདུས་པ་ལས། དུས་གསུམ་སངས་རྒྱས་ཀུན་མཆོད་པས། །བླ་མའི་བ་སྤུ་གཅིག་མཆོད་པ། །དེ་ཡི་བསོད་ནམས་ཁྱད་པར་འཕགས། །ཞེས་དང་། རྡོ་རྗེ་སྙིང་པོ་རྒྱན་ལས། དེ་བས་འབད་པ་ཐམས་ཅད་ཀྱིས། །བླ་མ་རྡོ་རྗེ་འཛིན་པ་མཆོད། །རྗེས་སུ་མཐུན་པས་མཉེས་པར་བྱ། །དེ་མཉེས་སངས་རྒྱས་

― GTD003_Page_0772 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་མཉེས། །ཞེས་དང་། རྒྱུད་སྡོམ་འབྱུང་དང་ཀླུ་སྒྲུབ་ཀྱི་རིམ་ལྔ་གཉི་ག་ལས། མཆོད་པ་ཐམས་ཅད་ཡོངས་སྤངས་ཏེ། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །ཞེས་ཕྱོགས་བཅུའི་སངས་རྒྱས་ཐམས་ཅད་མཆོད་པ་བས་བླ་མ་མཆོད་པ་དོན་ཆེ་བར་གསུངས་ལ། དེའི་རྒྱུ་མཚན་ཡང་དེ་གཉི་ག་ལས། འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །མན་ངག་རབ་ཏུ་སྟེར་བའི་ཕྱིར། །རྡོ་རྗེ་སློབ་དཔོན་དེ་བས་ལྷག །ཅེས་བཀའ་དྲིན་གྱི་སྒོ་ནས་ཡིན་པར་གསུངས་སོ། །དེ་དག་གི་དོན་བསྡུས་ཏེ་བླ་མ་ལྔ་བཅུ་པ་ལས། མི་ཟད་དེ་ཉིད་འདོད་པ་ཡིས། །ཅུང་ཟད་ཡིད་འོང་གང་དང་གང། །ཤིན་ཏུ་ཁྱད་པར་གྱུར་པ་ཉིད། །དེ་དང་དེ་ནི་བླ་མར་དབུལ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །ཞེས་གསུངས་སོ། །ལྟོས་ས་ལྟོས་འཇོག་གི་སྒོ་ནས་བསོད་ནམས་འགྱུར་ཆེ་ཚུལ་རྣམ་གྲངས་གཞན་ཡང་ཡོད་དེ། སྙིང་པོ་མདོར་བསགས་ལས། སངས་རྒྱས་ཞིང་སོགས་ཞིང་རྣམས་ལ། །ཁྱད་པར་དུ་ནི་སྦྱིན་པ་སྦྱར། །དམངས་རིགས་སྟོང་ཕྲག་གཉིས་དག་ཀྱང། །བྲམ་ཟེ་གཙང་མ་གཅིག་དང་འདྲ། །བྲམ་ཟེ་སྟོང་ཕྲག་གཉིས་དག་ནི། །དགེ་སློང་གཅིག་ལ་རབ་ཏུ་སྦྱར། །དགེ་སློང་སྟོང་ཕྲག་གཉིས་དག་ནི། །རྡུལ་མེད་པ་ནི་གཅིག་དང་མཉམ། །རྡུལ་མེད་སྟོང་ཕྲག་གཉིས་དག་ནི། །ཡེ་

― GTD003_Page_0773 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་ལྡན་པ་གཅིག་ལ་སྦྱར། །ཡེ་ཤེས་ལྡན་པ་སྟོང་ཕྲག་གཉིས། །སློབ་དཔོན་གཅིག་དང་མཉམ་པར་བརྟག །དེ་ལྟར་སྦྱིན་པའི་ཞིང་བྱས་ནས། །བློ་དང་ལྡན་པས་རྟག་ཏུ་སྦྱིན། །རྣལ་འབྱོར་རྩ་བའི་ཆོས་ལས་ནི། །ཞིང་བཟང་པོ་ལ་ས་བོན་གདབ། །ཅེས་གསུངས་ཏེ། དབང་དོན་དེ་ཉིད་ཡང་གསལ་ལྟར། འདིའི་རྡུལ་མེད་པ་མཐོང་ལམ་དང་། ཡེ་ཤེས་ལྡན་པ་དགྲ་བཅོམ་ལ་སྦྱོར་བའམ། ཡང་མདོར་བསྟན་དུ་སངས་རྒྱས་བྱུང་ཡང་། རྒྱས་བཤད་ཀྱི་ཚེ་གཞན་མ་བྱུང་བས། དེ་གཉིས་ཉོན་མོངས་པའི་རྡུལ་མེད་པའི་ཐར་པ་ཐོབ་པ་དང་ཐམས་ཅད་མཁྱེན་པའི་ཡེ་ཤེས་དང་ལྡན་པ་ཐེག་པ་ཆེ་ཆུང་གི་དགྲ་བཅོམ་གཉིས་ལ་རིམ་བཞིན་སྦྱར་ཀྱང་རུང་ངམ་སྙམ། ཡང་ན་ས་བཅུ་བཞིར་ཕྱེ་བའི་ཚེ་མངོན་བརྗོད་བླ་མ་ལས། དཔེ་མེད་པ་དང་ཡེ་ཤེས་ལྡན། །ཞེས་འབྱུང་བས། ཡེ་ཤེས་ལྡན་རྒྱུན་མཐའི་སྐབས་ལ་མན་སྙེ་ལས་བཤད་པ་དང་སྦྱར་ཀྱང་འགྲིག་སྟེ། འཚང་རྒྱ་ཁ་མའི་བྱང་སེམས་ལ་མཆོད་པ་དང་སངས་རྒྱས་ལ་མཆོད་པ་གཉིས་བསོད་ནམས་མཉམ་པར་མཛངས་བླུན་ལས་གསུངས་ཤིང་། དེ་ལྟར་འདུལ་བ་ལུང་ལས་ཀྱང་གསུངས་ཚུལ་མཛོད་འགྲེལ་དུ་དྲངས་པ་བཞིན་ཡིན་པའི་ཕྱིར་རོ། །མཆོད་ཚོགས་རྒྱ་མཚོ་ཞེས་པ་ནི། བཤད་རྒྱུད་རྡོར་ཕྲེང་སོགས་ལས་འབྱུང་བའི་མཆོད་སྔགས་པཱུ་ཛ་མེ་གྷ་ས་མུ་དྲ་ཞེས་པ་དེ་ཉིད་བཀོད་པ་ཡིན་ཏེ། པཱུ་ཛ་མཆོད་པ་དང་།མེ་གྷ་ཞེས་པ་སྤྲིན་གྱི་མིང་ཡིན་ཀྱང་། དོན་མཆོད་པའི་

― GTD003_Page_0774 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་པོ་དུ་མ་འདུས་པའི་ཚོགས་ལ་བྱེད་དགོས། ས་མུ་དྲ་རྒྱ་མཚོ་ལ་འཇུག་པའང་ཆུ་གཏེར་ལ་མི་གོ་བར་མཐའ་ཡས་པའི་དོན་དུ་བྱེད་དགོས་པའི་ཕྱིར་ཏེ། ཀོ་སཱ་ལའི་རྒྱན་ལས། དེ་རྣམས་ཀྱི་ཚོགས་ནི་སྤྲིན་ནོ། །སྤྲིན་གྱི་ཕུང་པོ་ནི་རྒྱ་མཚོ་སྟེ། རྒྱ་མཚོའི་སྒྲས་ནི་གྲངས་མཐའ་མེད་པ་ཉིད་དུ་སྟོན་ཏོ་ཞེས་དང་། ཀུན་རིག་ཊཱིཀ་ཆེན་ལས། པཱུ་ཛ་མཆོད་པ། མེ་གྷ་སྤྲིན་ཏེ་ཚོགས། ས་མུ་དྲ་རྒྱ་མཚོ་ཞེས་སོགས་གསུངས་པའི་ཕྱིར། དེ་ལྟ་བུའི་མཆོད་པའི་ལས་ལ་གཅེས་པའམ། གཙིགས་སུ་བྱས་ཏེ་ནན་ཏན་དུ་འབད་དགོས་པའི་རྒྱུ་མཚན་ནི། དཔེར་ན་འབྲས་བུ་ལོ་ཏོག་ཕུན་སུམ་ཚོགས་པ་འདོད་ན། དེ་ལ་རེ་བ་བྱས་པ་ཁོ་ནས་མི་ཆོག་པར་ཐོག་མར་ཞིང་བཟང་པོ་ལ་གཅེས་སྤྲས་སུ་བྱས་ནས་ལེགས་པར་རྨེད་དགོས་པ་བཞིན། འབྲས་བུ་དངོས་གྲུབ་ཀུན་གྱི་འབྱུང་ཁུངས་བླ་མ་ཁོ་ན་ཡིན་པས། དེ་ལ་མཆོད་པ་སོགས་ཀྱི་རྟེན་འབྲེལ་ལེགས་པར་བསྒྲིག་དགོས་པའི་ཕྱིར། རྗེ་བདག་ཉིད་ཆེན་པོས། འདི་ཕྱིའི་ལེགས་ཚོགས་ཐམས་ཅད་འབྱུང་བའི་ཞིང་ས་དམ་པ་དུས་བཞི་ཐམས་ཅད་དུ་རྒྱུན་ཆད་མེད་པར་བདེ་ལེགས་ཀྱི་ས་བོན་བཏབ་པས་ཆོག་པ་འདི་ལའང་དད་པའི་གཤོལ་གྱིས་བསོད་ནམས་ཀྱི་ཞིང་རྨེད་པར་གྱུར་ཅིག །ཅེས་མདོ་ལས་གསུངས་པ་ལྟར་བྱ་རྒྱུ་མ་བྱུང་ན་ཆེས་ཤིན་ཏུ་ཕངས་པ་ཡིན་ནོ། །ཞེས་གསུངས་པ་ལྟར་རོ། །བླ་མ་ལ་རྣམ་པ་ཀུན་ཏུ་མཆོད་པར་བྱས་པ་འདི་ནི་བྱས་ན་བསོད་ནམས་ཆེ་བ་ཙམ་མ་ཡིན་གྱི། མ་བྱས་ན་ཉེས་དམིགས་ཤིན་ཏུ་ཆེ་བས་མེད་མི་རུང་དུ་བྱ་དགོས་པ་ཡིན་ཏེ། བླ་མ་ལྔ་བཅུ་པ་

― GTD003_Page_0775 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། མཆོག་ཏུ་དང་བས་དུས་གསུམ་དུ། །དཀྱིལ་འཁོར་མེ་ཏོག་བཅས་ཐལ་མོས། །སྟོན་པ་བླ་མ་བསྙེན་བཀུར་ཞིང། །ཞབས་ལ་སྤྱི་བོས་ཕྱག་བྱ་འོ། །ཞེས་ཉིན་རེ་བཞིན་དུས་གསུམ་དུ་བླ་མ་ལ་ཕྱག་དང་མཎྜལ་སོགས་ཀྱིས་བསྙེན་བཀུར་བྱེད་དགོས་པར་གསུངས་ཏེ། དེའི་རྒྱུ་མཚན་ཡང་དེ་ཉིད་ལས། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་པས། །དུས་གསུམ་དུ་ནི་མངོན་ཕྱག་འཚལ། །ཞེས་རང་ཅག་ལྟ་ཅི། ཕྱོགས་བཅུའི་སངས་རྒྱས་རྣམས་ཀྱིས་ཀྱང་སྔོན་སློབ་པའི་གནས་སྐབས་ཀྱི་བླ་མ་ལ་ཉིན་རེ་རེ་དུས་གསུམ་དུ་བྱོན་ནས་ཕྱག་བྱེད་པར་གསུངས་པའི་ཕྱིར་རོ། །དེ་སྐད་དུའང་འདུས་པའི་རྒྱུད་ཕྱི་མ་ལས། ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་དང་བྱང་ཆུབ་སེམས་དཔའ་ཇི་སྙེད་འཁོད་ཅིང་འཚོ་སྐྱོང་བ་དེ་ཐམས་ཅད་དུས་གསུམ་དུ་ལྷགས་ནས་སློབ་དཔོན་དེ་ལ་དེ་བཞིན་གཤེགས་པ་ཐམས་ཅད་ཀྱིས་མཆོད་པས་ཡང་དག་པར་མཆོད་ནས་སངས་རྒྱས་ཀྱི་ཞིང་དེ་དང་དེར་འགྲོ་ཞིང་། ཞེས་དང་། དོན་དམ་བསྙེན་པ་ལས། དཔག་མེད་སངས་རྒྱས་ཀྱིས་ཀྱང་རྟག་ཏུ་དེ་ལ་མཆོད། །ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་རྟག་ཏུ་དེ་ལ་འདུད། །ཅེས་གསུངས་སོ། །རྒྱུན་དུ་སྙིང་གར་བསྒོམ་པའི་ཚུལ་ནི། འདི་ཕྱི་བར་དོའི་གནས་སྐབས་སུ། །བླ་མ་སྙིང་དབུས་བསྒོམ་བྱས་ཏེ། །རང་གི་སེམས་དང་བླ་མ་གཉིས། །དབྱེར་མེད་བསྲེ་བ་མན་ངག་གོ །ཞེས་འགྲོ་འཆག་ཉལ་འདུག་སོགས་དུས་དང་

― GTD003_Page_0776 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་སྐབས་ཐམས་ཅད་དུ་རང་སེམས་དང་ངོ་བོ་དབྱེར་མེད་དུ་བྱས་ནས་གནས་སྙིང་གར་བསྒོམ་པ་སྟེ། ཐོག་མར་ཉིང་མཚམས་སྦྱོར་བ་དང་། མཐར་འཆི་འཕོ་བ་ཐམས་ཅད་ཀྱང་འདི་ནས་བྱེད་པ་དང་། རྡོ་རྗེའི་ལུས་ལ་གནད་དུ་བསྣུན་པས་མཐར་གཏུག་སའང་འདི་ཡིན་ཞིང་། རྣམ་པར་ཤེས་པ་གནས་པའི་གཙོ་བོའང་ཡིན་པས། སྡེ་པ་འགའ་ཞིག་སྙིང་ལ་ཡིད་དབང་དུ་འདོད་པར་སྡེ་པ་ཐ་དད་བཀླགས་པའི་འཁོར་ལོ་དང་། རྟོག་གེ་འབར་བ་སོགས་ལས་བཤད་དོ། །དེ་ལྟར་བསྒོམ་བའི་དགོས་པ་དང་སྒོམ་ཚུལ་གྱི་གནད་རྣམས་ནི་འོག་ཏུ་འབྱུང་བས་འདིར་མ་སྤྲོས་སོ། །གཉིས་པ་དེའི་སྒོ་ནས་རང་གཞན་གྱི་དོན་སྒྲུབ་པའི་ཐབས་མཁས་ཀྱིས་སྒོ་གསུམ་དོན་ལྡན་དུ་བྱེད་ཚུལ་ནི། དད་ལྡན་གདུལ་བྱས་གསོལ་བཏབ་ཚེ། །རང་སེམས་བླ་མ་དབྱེར་མེད་དུ། །བསྒོམས་ནས་བླ་མའི་ཕྱག་གཡས་ཀྱིས། །གཞན་ལ་བྱིན་རླབས་བྱེད་པར་བསམ། །གཞན་གྱིས་ཕྱག་སོགས་བྱེད་པའི་ཚེ། །བླ་མ་ཉིད་ལ་ཕྱག་བྱེད་པར། །བསམ་ན་རང་གཞན་ཀུན་ལ་ཕན། །ཉོན་མོངས་འཁྲུལ་སྣང་ཤར་བའི་ཚེ། །སྙིང་དབུས་བཞུགས་པ་བླ་མ་རྗེ། །སྤྱོད་ངན་འདི་ཡིས་ཐུགས་ཁྲེལ་ཞེས། །བསམ་ན་དེ་མ་ཐག་ཏུ་བཟློག །དགེ་སེམས་གསར་དུ་སྐྱེས་པའི་ཚེ། །བླ་མའི་བྱིན་རླབས་འདི་འོ་ཞེས། །བསམས་ནས་བཀའ་དྲིན་རྗེས་དྲན་ཏེ། །གུས་པས་མཆོད་ལ་བརྩོན་པར་བྱ། །ཞེས་བྱུང། དེའང་གཞན་གྱིས་རང་ལ་ཕྱག་དབང་ཞུས་པ་ན། དངོས་སུ་རང་གི་ལག་པ་དེའི་མགོར་བཞག་ཀྱང་། བསྒོམ་དོན་ལ་རང་སེམས་དང་བླ་མ་

― GTD003_Page_0777 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱེར་མི་ཕྱེད་པ་དེས་ཕྱག་གཡས་བརྐྱངས་ནས་བྱིན་རླབས་མཛད་པའི་མོས་པ་བྱའོ། །ད་ལྟ་ཕྱག་དབང་དུ་གྲགས་པ་འདིའི་ཁུངས་སམ་མཚོན་དོན་ལྟ་བུ་ནི་ས་བཅུ་པའི་མདོ་ལས། སངས་རྒྱས་བཅོམ་ལྡན་འདས་དེ་དག་གིས་དེ་དག་ཉིད་ན་བཞུགས་བཞིན་དུ་རྫུ་འཕྲུལ་གྱིས་ཕྱག་གཡས་པ་རྣམས་བརྐྱངས་ཏེ་བྱང་ཆུབ་སེམས་དཔའ་རྡོ་རྗེ་སྙིང་པོའི་མགོ་ལ་བྱུགས་པ་མཛད་དོ། །སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེ་སྙིང་པོ་ལ་རེག་མ་ཐག་ཏུ་དེ་ནི་དེའི་མོད་ལ་ཏིང་ངེ་འཛིན་དེ་ལས་ལངས་ནས། ཞེས་སོགས་ལྟར། ཕྱག་གིས་རེག་པའི་སྒོ་ནས་ས་བཅུ་པའི་མདོ་སྡེ་སྟོན་པར་བྱིན་གྱིས་བརླབས་པ་ཡིན་པས། མདོ་འདི་ཉིད་བྱིན་གྱིས་བརླབས་པའི་བཀའི་ནང་ནས་སྐུའི་སྒོ་ནས་བྱིན་གྱིས་བརླབས་པ་ལ་འཇོག་པའི་རྒྱུ་མཚན་ཡང་དེ་ཡིན་ནོ། །རྒྱན་སྟུག་པོ་བཀོད་པར་ཡང་འདི་དང་ཆ་འདྲ་བ་ཞིག་གསུངས་ལ། ཡང་སངས་རྒྱས་རྣམས་ཀྱིས་བྱང་ཆུབ་ཏུ་ལུང་སྟོན་པར་མཛད་པའི་ཚེ་ཕྱག་གཡས་མི་འཇིགས་པའི་ཕྱག་རྒྱ་སློབ་མའི་མགོ་བོར་བཞག་ནས་ལུང་སྟོན་ཅིང་དབུགས་དབྱུང་བར་མཛད་པ་དེའི་རྟེན་འབྲེལ་དང་སྒོ་བསྟུན་པའང་ཡིན་ཏེ། བཤད་རྒྱུད་རྡོ་རྗེ་ཕྲེང་བ་ལས། གཡས་པ་མི་འཇིགས་སྦྱིན་བྱས་ལ། །དབུགས་དབྱུང་བ་ཡི་མཆོག་བྱ་བ། །ཞེས་གསུངས་ཤིང། རྒྱལ་བ་དགེ་འདུན་གྲུབ་ཀྱིས་ཀྱང། ཕྱག་གཡས་བདག་གི་མགོ་ལ་བཞག་བཞིན་དུ། །བླ་མེད་བྱང་ཆུབ་མཆོག་ཏུ་ལུང་བསྟན་ནས། །ཞེས་

― GTD003_Page_0778 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པ་བཞིན་ནོ། །འདི་ལྟ་བུ་ལ་བླ་མའི་བྱིན་རླབས་དང་སློབ་མའི་མོས་གུས་འཛོམ་ན་རྒྱུད་བྱིན་གྱིས་རློབས་པ་ཙམ་དུ་མ་ཟད། དེའི་མཚན་མ་མངོན་སུམ་དུ་སྣང་རྒྱུ་ཡོད་པའང་འབྱུང་སྲིད་དེ། དཔེར་ན་སྣེའུ་ཟུར་པས་དགོན་པ་བ་ལ་དང་པོར་མཇལ་བའི་ཚེ་ཕྱག་དབང་སྩལ་བས་དབུ་ཐོད་ཀྱི་སྟེང་དུ་ཕྱག་རྗེས་བབས་པ་ཕྱིས་སྐུ་འདས་ནས་གདུང་སྦྱངས་ཏེ། དབུ་ཐོད་དོན་སྟེང་པས་གདན་དྲངས་སྐབས་ཀྱང་མཇལ་རྒྱུ་བྱུང་བ་དང་། སེ་ར་ཀུན་མཁྱེན་པའམ་བློ་གྲོས་རིན་ཆེན་སེང་གེས་ཀྱང་རྗེ་རིན་པོ་ཆེར་ཐོག་མར་མཇལ་དུས་ཀྱི་ཕྱག་རྗེས་དབུ་ཐོད་ལ་བབས་པ་ཕྱིས་མཇལ་རྒྱུ་བྱུང་བ་བཞིན་ནོ། །གཞན་གྱིས་རང་ལ་བསྙེན་བཀུར་བ་སོགས་ཀྱི་ཚེ་ཇི་ལྟར་བྱ་བ་ནི། གཞན་གྱིས་ཕྱག་སོགས་བྱེད་པའི་ཚེ། །བླ་མ་ཉིད་ལ་ཕྱག་བྱེད་པར། །བསམ་ན་རང་བཞན་ཀུན་ལ་ཕན། །ཞེས་གསུངས་ཏེ། གཞན་གྱིས་རང་ལ་ཕྱག་བཙལ་བ་ན་དེ་བདག་གིར་བྱས་ཏེ་རློམ་སེམས་སྐྱེས་པས་རང་གི་བསོད་ནམས་ཉམས་པ་མ་གཏོགས་ཕན་པ་ཅི་ཡང་མི་འབྱུང་ལ། དེས་བསྙེན་བཀུར་བསྟབས་པ་དེ་དག་རང་གི་སྙིང་གར་བཞུགས་པའི་བླ་མ་ལ་བསྔོས་ན་རང་གཞན་གཉི་གའི་ཚོགས་རྫོགས་པའི་ཐབས་མཁས་ཀྱི་སྤྱོད་པར་འགྱུར་རོ། །འདིར་ཕྱག་ནི་མཚོན་པ་ཙམ་སྟེ། གཞན་གྱིས་རང་ལ་འཚོ་བ་དྲངས་པ་ནའང་སྙིང་གའི་བླ་མ་ལ་འདྲེན་པའི་དམིགས་པ་དང་། དེ་བཞིན་དུ་གོས་དང་གནས་མལ་ནོར་ལོངས་སྤྱོད་གང་ཞིག་ཕུལ་ཀྱང་དེ་ཉིད་བློས་བླངས་ཏེ་སྙིང་གའི་བླ་མ་ལ་དབུལ་བ་བྱས་ན་ནོར་རྫས་ལ་འདོད་སྲེད་ཆུང་དུ་འགྲོ་ཞིང་དཀོར་གྱི་སྒྲིབ་པ་སྦྱོང་བ་

― GTD003_Page_0779 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། སྦྱིན་བདག་གི་བསོད་ནམས་གོང་འཕེལ་དུ་འགྱུར་བ་སོགས་དགོས་པ་ཤིན་ཏུ་ཆེ་སྟེ། ཞིབ་ཏུ་ཤེས་ཤིང་ལག་ལེན་བྱེད་པར་སྤྲོ་ན་འཕགས་པ་ཐུགས་རྗེ་ཆེན་པོའི་བཀའ་སྲོལ་གྲགས་ཆེ་བ་ལྔའི་ཡ་གྱལ། གཉན་ཚེམ་བུ་པ་དར་མ་འོད་ནས་བརྒྱུད་པ་བསྐྱེད་རྫོགས་ཀྱི་གནད་ཀུན་ཚང་བའི་ཚེམ་བུ་དམར་ཁྲིད་དུ་གྲགས་པ་ན། བཟའ་བ་ཟས་ཀྱི་རྣལ་འབྱོར། བགོ་བ་གོས་ཀྱི་རྣལ་འབྱོར། འདུག་པ་གནས་ཁང་གི་རྣལ་འབྱོར་སོགས་ཆུ་བོ་རྒྱུན་གྱི་རྣལ་འབྱོར་དྲུག་ཏུ་གསུངས་པ་བཞིན་བྱ་དགོས་པས། ཞིབ་པར་ནི་རྗེ་བཙུན་བླ་མ་ཐུགས་རྗེའི་མངའ་བདག་འདི་ཉིད་དང་། ཐམས་ཅད་མཁྱེན་པ་རོལ་པའི་རྡོ་རྗེ་སོགས་ཀྱི་གསུང་ལས་ཤེས་པར་བྱའོ། །དེར་མ་ཟད་བླ་མེད་ཀྱི་རྒྱུད་སྡེ་ཆེ་བ་ཀུན་ནས་ཟས་ལ་ལོངས་སྤྱོད་པའི་ཚེ་ཁ་ཐབ་ཁུང་། ལག་པ་དགང་གཟར། ཟས་རྣམས་བསྲེག་རྫས་ཀྱི་ཚུལ་དུ་མོས་ཏེ་བླ་མ་ཡི་དམ་ལ་ཕུལ་བའི་དམིགས་པ་དང་བཅས་ལོངས་སྤྱོད་དགོས་པ་ནི་འདར་མི་རུང་བ་བཟའ་བའི་དམ་ཚིག་ཏུ་གསུངས་ལ། དེའི་དགོས་པའང་གདན་བཞི་ལས། གང་ཞིག་ཅུང་ཟད་བཟའ་བཏུང་རྣམས། །བསྔོ་བ་བྱས་ནས་བཟའ་བར་བྱ། །འདི་ལྟར་སྤྱོད་པའི་རྣལ་འབྱོར་པ། །བུ་ལོན་དུ་ཡང་མི་འགྱུར་རོ། །ཞེས་གསུངས་ལ། མ་རྒྱུད་ཀྱི་སྒོས་ཆོས་སུ་ལག་པའི་མཆོད་པའམ་ལག་པ་མཆོད་པ་ཞེས་སྔ་མ་ལས་ཁྱད་པར་དུ་གྱུར་པའི་ལྷ་ལ་མཆོད་ཚུལ་གཞན་ཞིག་ཀྱང་གསུངས་སོ། །དེའང་རྙེད་པ་དང་བཀུར་སྟི་ལ་སོགས་པ་འདི་དག་ནི་

― GTD003_Page_0780 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་ཕལ་པ་རྣམས་ཡོན་ཏན་དུ་མཐོང་ནས་ཐོབ་བྱའི་གཙོ་བོར་བྱེད་ཀྱང་། སྐོམ་པས་ཚྭ་ཆུ་འཐུང་བ་བཞིན་དེ་ལ་བརྟེན་པས་སྡུག་བསྔལ་འབའ་ཞིག་ལས་མི་འབྱུང་ལ། སྐྱེས་བུ་དམ་པ་རྣམས་ནི་དེའི་ཉེས་དམིགས་སྒོ་དུ་མ་ནས་གཟིགས་ཏེ་སྲེད་པའི་དབང་དུ་ཅུང་ཟད་ཙམ་ཡང་མི་འགྱུར་བའི་ཕྱིར་ཏེ། བཀུར་སྟིའི་ཚོམས་ལས། དྲེའུ་མོ་རང་གི་མངལ་གྱིས་དང། །འདམ་བུ་སྨིག་མ་འབྲས་བུས་དང། །ཆུ་ཤིང་འབྲས་བུས་ཕུང་བ་ལྟར། །ཕོ་བཤལ་བཀུར་སྟིས་ཕུང་བར་འགྱུར། །ཞེས་གསུངས་ཤིང། སྐྱེས་རབས་ལས་ཀྱང་མང་དུ་འབྱུང་བ་བཞིན། སྐྱེ་བོ་ཐ་ཤལ་རྣམས་ལ་རྙེད་བཀུར་ཅུང་ཟད་ཙམ་འབྱུང་ནའང་དེ་ཉིད་ཀྱིས་དབྱེན་སྤྱོས་ཏེ་བྱ་བ་མ་ཡིན་པ་དུ་མ་ལ་ཞུགས་པས་འདི་ཕྱི་གཉི་ག་རླག་པར་བྱེད་དོ། །སྔོན་འབྲོམ་སྟོན་པ་ཁམས་ནས་ཡར་བྱོན་བའི་ཚེ་འཕྲང་ཁ་བེར་ཆུང་གི་སར་ཕེབས་པས། ཁྱོད་དགེ་བཤེས་ཤིག་ཡིན་ཤས་ཆེའང་། ང་འཕྲང་ཁ་བེར་ཆུང་ཟེར་བའི་མི་ཆེན་ཞིག་ཡིན་པས། དེ་ནས་ཡར་ཕྱག་ཝ་མོ་འཁྱུག་པ་ལྟ་བུ་གསུམ་ཚོལ་ཟེར་བ་ན། འབྲོམ་ཉིད་དམན་ཆ་ཁོ་ན་ལྷུར་བཞེས་པས་ཁོའི་འདོད་པ་བཞིན་མཛད། དེ་ནས་ཁོས་ཆོས་ཀྱི་དྲི་བ་མང་པོ་བྱས་པར་ལན་ཐོགས་མེད་དུ་གནང་བས་འབྲོམ་ཡིན་པར་ཤེས་ཤིང་གཟོད་འགྱོད་པ་སྐྱེས་ནས་བཤགས་པ་བྱས་ཏེ་རྭ་སྒྲེང་གི་དགོན་ས་སོགས་ཀྱང་ཕུལ་བ་ལྟ་བུ། སྐྱེས་བུ་དམ་པ་དང་བྱང་ཆུབ་སེམས་དཔའ་གར་ཡོད་མི་ཤེས་པས། དེ་འདྲ་རེས་རང་ལ་ཕྱག་འཚལ་ཞིང་། རང་གིས་ཀྱང་འོ་ཟོབ་ཀྱིས་དང་དུ་བླངས་ན་རྣམ་སྨིན་ཤིན་ཏུ་ལྕི་སྟེ། མུ་

― GTD003_Page_0781 ―

^{[མ་དཔེ་གཟིགས་ན་འདིར་གནོན།]}

[Full Size]

སྟེགས་རྫོགས་བྱེད་ཀྱི་མཆོད་རྟེན་ལ་ཕྱག་མཆོད་བྱས་པས་དེ་ལ་གནོད་ཚུལ་འདུལ་བ་ལུང་ལས་གསུངས་པ་ལྟར་ཡིན་ན། ད་ལྟ་རང་གཞན་གཉི་གས་བསམ་བཞིན་དུ་བྱས་པ་སྨོས་ཀྱང་མི་དགོས་པའི་ཕྱིར་རོ། །དེས་ན་རྙེད་པ་དང་བཀུར་སྟི་ནི་རལ་གྲིའི་སོ་ལ་ཆགས་པའི་སྦྲང་རྩི་ལྟར་མནོག་ཆུང་ཞིང་གནོད་པ་ཆེ་ལ། ཁྱད་པར་དུ་ཆོས་ཚུལ་བཞིན་སྒྲུབ་པར་འདོད་པའི་ལས་དང་པོ་པ་ཕལ་ཆེར་ལ། དགོས་པའི་ཆོས་ཀྱི་ལོ་ཏོག་མ་འཁྲུངས་པར། མི་དགོས་པའི་གྲགས་སྙན་གྱི་ཐན་སྙེ་ཐོན་པས་སྐྱེ་བོ་ཕལ་པ་གཞན་དག་གིས་དེ་ལ་རེ་བ་ཆེན་པོས་བཀུར་སྟི་བྱེད་ཅིང། རང་ཉིད་ཀྱང་དེས་གཡེང་བར་འགྱུར་བ་ནི། བྲམ་ཟེའི་སྐྱེས་རབས་ལས། དཀའ་ཐུབ་ཅན་དུ་རེ་བ་ཆེན་པོ་ཡིས། །ཡུལ་མི་རྣམས་ཀྱིས་དེ་ལ་མཆོད་པར་ཤོག །ཅེས་པ་ལྟར་གྱི་བྲམ་ཟེའི་དམོད་པའི་སྟེང་དུ་སོང་བ་ཡིན་པས། དགེ་སྦྱོར་གྱི་སད་ལ་དེ་ལས་ཐུ་བ་མེད་དེ། གྲུབ་དབང་སྐལ་ལྡན་རྒྱ་མཚོས། ཁ་ཞིམ་པའི་ཟས་ལ་སྲེད་པ་དང་། །ལུས་འཇམ་པོའི་གོས་ལ་ཞེན་པ་དང། །ཡིད་མཛེས་པའི་གཟུགས་ལ་ཆགས་པ་འདིས། །ཆོས་ཟབ་མོ་ཞར་དང་ཞོར་ལ་ལུས། །ཞེས་གསུངས་པ་ལྟར་རོ། །གནད་འདི་ལ་དགོངས་ཏེ་མཉམ་མེད་ཇོ་བོ་ཆེན་པོས་ཀྱང་། བསོད་ནམས་ཟེར་བའི་འདུ་འཛི་དེ་ཡང་བདུད་ཀྱི་བར་ཆད་ཡིན་པས་སྤོངས། ཞེས་རྙེད་བཀུར་སྙན་གྲགས་སོགས་ལ་བདུད་ལས་སུ་གསུངས་པས། བདག་ལེགས་སུ་འདོད་པ་རྣམས་ཀྱིས་རྨི་ལམ་དང་སྒྱུ་མའི་དགའ་སྟོན་ལྟ་བུའི་སྲིད་པའི་ཕུན་ཚོགས་མཐའ་དག་ལ་ཞེན་པ་རྩད་

― GTD003_Page_0782 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་གཅོད་པ་དང་། ཆོས་སྒྲུབ་པའི་ཕྱིར་དུ་ལུས་འཚོ་ཙམ་གྱི་ཟས་གོས་ལ་བརྟེན་པ་དེའང་བྱང་ཆུབ་ཀྱི་སེམས་ཀྱིས་ཟིན་པར་བྱས་ཏེ་སྤྱོད་ཡུལ་ཡང་དག་པའི་མདོ་ནས་འབྱུང་བ་བཞིན་གཞན་དོན་རྣམ་པ་ཐམས་ཅད་པར་བསྔོ་བ་དང་། རྡོ་རྗེ་ཐེག་པའི་ཐབས་མཁས་ཀྱི་རྩིས་ཟིན་པར་བྱེད་ཚུལ་སྔར་བཤད་པ་བཞིན་བྱས་ན་ཚེགས་ཆུང་ངུས་ཚོགས་རླབས་པོ་ཆེ་རྫོགས་ཤིང། སྒོ་གསུམ་གྱི་སྤྱོད་པ་མཐའ་དག་གསང་སྔགས་ཟབ་མོའི་ལམ་གྱི་ཉམས་ལེན་དུ་འགྱུར་ཏེ། ཀུན་སྤྱོད་ལས། ཡན་ལག་གིས་ནི་བསྐྱོད་པ་དང། །ཚིག་གིས་རབ་འབྱམས་ཇི་སྙེད་པ། །དེ་སྙེད་ཕྱག་རྒྱ་གསང་སྔགས་ཡིན། །ཞེས་དང། རྗེ་བླ་མས། ལུས་ཀྱི་གཡོ་བ་ངག་གི་བརྗོད་པ་དང། །ཡིད་ཀྱི་བསམ་པ་ཀུན་ཀྱང་འབད་མེད་པར། །རླབས་ཆེན་ཚོགས་རྣམས་ཡོངས་སུ་སྡུད་བྱེད་པ། །ཞེས་གསུངས་པ་བཞིན་ནོ། །བླ་མའི་རྣལ་འབྱོར་ལ་བརྟེན་ནས་གཙོ་བོར་རང་རྒྱུད་ཀྱི་ཉོན་མོངས་དང་སྒོ་གསུམ་གྱི་ཉེས་སྤྱོད་འགོག་ཚུལ་ནི། ཉོན་མོངས་འཁྲུལ་སྣང་ཤར་བའི་ཚེ། །སྙིང་དབུས་བཞུགས་པ་བླ་མ་རྗེ། །སྤྱོད་ངན་འདི་ཡིས་ཐུགས་ཁྲེལ་ཞེས། །བསམ་ན་དེ་མ་ཐག་ཏུ་བཟློག །ཅེས་གསུངས་ཏེ། རང་གི་རྒྱུད་ལ་ཚུལ་མིན་ཡིད་བྱེད་ཀྱིས་ཆགས་སྡང་ལ་སོགས་པའི་རྟོག་པ་ངན་པ་སྐྱེས་པའམ། སྒོ་གསུམ་མི་དགེ་བའི་སྤྱོད་པ་ལ་འཇུག་པར་ཕྱོགས་པ་ན། ཀྱེ་མ་བདག་གིས་རྙེད་པར་དཀའ་བའི་དལ་འབྱོར་གྱི་རྟེན་ཐོབ་ཅིང་། སངས་རྒྱས་ཀྱི་བསྟན་པའི་རྗེས་སུ་ཞུགས་ནས་ཆོས་པའི་གཟུགས་བཟུང་སྟེ། ཚུལ་དང་མི་མཐུན་པ་འདི་ལྟར་བསམ་ཞིང་སྤྱད་ན།

― GTD003_Page_0783 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱིར་ཀུན་ཏུ་ཐོགས་པ་མེད་པའི་ཡེ་ཤེས་ཀྱི་སྤྱན་མངའ་བའི་སངས་རྒྱས་བྱང་སེམས་རྣམས་དང། དཀར་པོའི་ཕྱོགས་ཀྱི་ལྷ་རྣམས་ཁྲེལ་བར་འགྱུར་ཞིང་། ཁྱད་པར་རྩ་བའི་བླ་མ་རང་གི་སྙིང་གར་བཞུགས་པ་འདི་ཉིད་ཀྱིས་ཐུགས་ཁྲེལ་བར་གྱུར་ན་མི་རུང་སྙམ་དུ་དེ་ལ་འཛེམ་ནས་སྒོ་གསུམ་བག་ཡོད་པའི་བརྟུལ་ཞུགས་ལ་གནས་ཏེ་ཉེས་སྤྱོད་མཐའ་དག་ལས་ལྡོག་པར་བྱ་དགོས་སོ། །དེ་ལྟར་མོས་པ་ནི་ལྷ་རྗེས་སུ་དྲན་པ་སྒོམ་ཚུལ་ཡིན་ཞིང་། དེ་ལ་བཅོས་མིན་གྱི་མྱོང་བ་རྣལ་མ་ཞིག་སྐྱེས་ན་མི་དགེ་བའི་བྱ་བ་གང་ལའང་འཇུག་མི་ཕོད་པ་དང་། དགེ་བའི་ཆོས་ཐམས་ཅད་ངང་གིས་འགྲུབ་པ་ཞིག་འབྱུང་སྟེ། སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དག། །ཀུན་ཏུ་ཐོགས་མེད་གཟིགས་པར་ལྡན། །དེ་དག་ཐམས་ཅད་སྤྱན་སྔ་ན། །བདག་ནི་རྟག་པར་གནས་སོ་ཞེས། །དེ་ལྟར་བསམས་ནས་ངོ་ཚ་དང། །གུས་དང་འཇིགས་ལྡན་དེ་བཞིན་གནོས། །དེས་ནི་སངས་རྒྱས་རྗེས་དྲན་པའང། །དེ་ལ་ཡང་དང་ཡང་དུ་འབྱུང། །ཞེས་དང་། མྱོས་བྱེད་མའི་སྐྱེས་རབས་ལས། མ་མཐོང་བར་ནི་སྡིག་པ་བྱས་པ་དག །དུག་ཟོས་བཞིན་དུ་བདེ་བར་ཇི་ལྟར་འགྱུར། །ལྷ་དང་རྣལ་འབྱོར་ཅན་གྱི་མི་དག་ནི། །རྣམ་དག་མིག་གིས་མི་མཐོང་མི་སྲིད་དོ། །ཞེས་གསུངས་ལ། དེའི་སྟོབས་ཀྱིས་དགེ་བའི་ཆོས་མཐའ་དག་འགྲུབ་ཚུལ་ཆོས་ཡང་དག་པར་སྡུད་པ་ལས། ལྷ་རྗེས་སུ་དྲན་པས་དགེ་བའི་ཆོས་ཐམས་ཅད་ཡང་དག་པར་གྲུབ་པའི་སེམས་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་

― GTD003_Page_0784 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཞེས་བགྱིའོ། །ཞེས་དང་། ལྷ་རྗེས་སུ་དྲན་པའི་དྲན་པ་ཉེ་བར་བཞག་པ་གང་ཞེ་ན། འདི་ལ་བྱང་ཆུབ་སེམས་དཔའ་ནི་གང་རྣམ་པར་དག་པའི་ལྷ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་དེ་དག་རྗེས་སུ་དྲན་ནོ། །འདི་ལྟར་དེ་དག་རྗེས་སུ་དྲན་ཏེ་སྒྲུབ་པ་དང་། ཡོན་ཏན་དང་། སྐྱེ་བ་དང་། ལོངས་སྤྱོད་དང་། ཀུན་དཔྱོད་པ་དང་། རྩོམ་པ་དང་། རབ་ཏུ་འཐོབ་པ་དང་། ཡོངས་སུ་གྲུབ་པས་ཀྱང་ལྷ་རྗེས་སུ་དྲན་པ་འདི་ནི་ལྷ་རྗེས་སུ་དྲན་པའི་དྲན་པ་ཉེ་བར་བཞག་པ་ཞེས་བྱའོ། །ཞེས་གསུངས་པ་ལྟར་རོ། །འདིར་སྒོ་གསུམ་བག་མེད་ལ་ཞུགས་ན་སྙིང་གའི་བླ་མ་ཐུགས་ཁྲེལ་བར་གསུངས་ནས་འཇིགས་པ་སྐྱེད་པ་ནི། དེ་ཉིད་བསྡུས་པར་དམ་ཚིག་ལས་འདས་ན་སྙིང་ལ་གནས་པའི་རྡོ་རྗེ་སེམས་དཔའི་ཐུགས་ཁྲེལ་ནས་སྙིང་ག་དྲལ་ཏེ་གཤེགས་ཤིང་བྱིན་གྱིས་མི་རློབ་པར་གསུངས་པ་དང་། དམ་ཚིག་ཉམས་པ་དེ་ལ་རྡོ་རྗེ་འཛིན་རྒྱལ་ཁྲོས་ནས་བདུན་རྒྱུད་ཚུན་ཆད་བརླག་པར་ཡང་སྤྱོད་རྒྱུད་ལས་གསུངས་པ་རྣམས་ཕྱོགས་འདྲ་སྟེ། དེའང་བླ་མ་དང་ཡི་དམ་རྣམས་དངོས་གནས་སུ་ཐུགས་ཁྲེལ་བ་མིན་ཡང་། རང་གི་ངོས་ནས་རྟེན་འབྲེལ་རྣམ་པ་གཞན་དུ་གྱུར་པའི་སྟོབས་ཀྱིས་དེ་རྣམས་བདག་ཉིད་ལས་རིང་དུ་འགྱུར་བ་དང་། བྱིན་རླབས་ཀྱི་ངད་ཡལ་བ་ཆོས་ཉིད་ཡིན་ཏེ། དཔེར་ན་ཉི་འོད་ལ་གནས་པའི་སྐྱེས་བུ་ཞིག་བྲག་ཁུང་བྱང་བལྟས་སུ་ཞུགས་པ་ན། ཉི་མའི་ངོས་ནས་མིན་ཡང་རང་གི་སྤྱོད་ལམ་གྱི་བྱེད་པས་ཉི་འོད་དང་འབྲལ་བ་བཞིན་ནོ། །དེས་ན་སྙིང་གའི་རྩ་བའི་བླ་

― GTD003_Page_0785 ―

^{[མ་དཔེ་གཟིགས་ན་འདིར་གནོན།]}

[Full Size]

མ་དེ་ཉིད་དཔང་པོར་བྱས་ཏེ་སྤྱིར་སྒོ་གསུམ་གྱི་མི་དགེ་བའི་བྱ་བ་ཐམས་ཅད་དང་། ཁྱད་པར་སྡོམ་པ་གསུམ་གྱི་བཅས་མཚམས་དང་འགལ་བའི་ཉེས་ལྟུང་ཕྲ་མོས་ཀྱང་མ་གོས་པ་ལ་ནན་ཏན་དུ་འབད་ཅིང་། བརྒྱ་ལ་རང་དབང་མེད་པར་གོས་ནའང་དེ་མ་ཐག་བཤགས་བསྡམ་སོགས་ཀྱིས་དག་པར་བྱས་ཏེ། དངོས་གྲུབ་ཀུན་གྱི་རྩ་བ་དམ་ཚིག་དང་སྡོམ་པ་ཚུལ་བཞིན་དུ་སྲུང་བའི་ཐབས་ལ་འབད་པ་ལྷུར་བྱའོ། །རང་རྒྱུད་ལ་དགེ་སེམས་ནམ་སྐྱེས་པ་ན་བླ་མའི་བཀའ་དྲིན་དུ་བལྟས་ཏེ་སྤེལ་བའི་ཚུལ་ནི། དགེ་སེམས་གསར་དུ་སྐྱེས་པའི་ཚེ། །བླ་མའི་བྱིན་རླབས་འདི་འོ་ཞེས། །བསམས་ནས་བཀའ་དྲིན་རྗེས་དྲན་དེ། །གུས་པས་མཆོད་ལ་བརྩོན་པར་བྱ། །ཞེས་གསུངས། དེའང་གོང་དུ་བཀའ་དྲིན་དྲན་པའི་སྐབས་སུ་བཤད་པ་བཞིན་དགེ་བློ་གང་སྐྱེས་ཐམས་ཅད་བླ་མའི་བཀའ་དྲིན་ཁོ་ན་ལ་བརྟེན་ནས་བྱུང་བ་ཡིན་ཏེ། བླ་མ་ལྔ་བཅུ་པར། དངོས་གྲུབ་སློབ་དཔོན་རྗེས་འབྲང་ཞེས། །རྡོ་རྗེ་འཛིན་པ་ཉིད་གསུངས་པ། །ཞེས་དངོས་གྲུབ་ཀྱི་རྩ་བ་བླ་མ་ལ་རག་ལས་པར་གསུངས་པའི་དངོས་གྲུབ་དེའང། གཙོ་བོར་གང་ལ་བྱེད་ན། ཚེ་བསོད་དཔལ་འབྱོར་རྒྱས་པ་སོགས་ལ་མི་བྱེད་པར། ཤེས་རྒྱུད་ཀྱི་ཉོན་མོངས་པའི་རྟོག་པ་ཤུགས་ཇེ་ཆུང་དང་། དགེ་བའི་བསམ་པ་གོང་འཕེལ་དུ་སོང་བ་ལ་བྱེད་དགོས་པའི་ཕྱིར་ཏེ། མཉམ་མེད་ཇོ་བོ་ཆེན་པོས། དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན། གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན། ཞེས་

― GTD003_Page_0786 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས། དེས་ན་བསྙེན་སྒྲུབ་བཟླས་བརྗོད་སོགས་བྱས་ཏེ་བྱིན་རླབས་ཞུགས་པའི་མཚན་མའང། ཡི་དམ་ལྷའི་ཞལ་གཟིགས་སོགས་གཙོ་བོར་མི་བྱེད་ཀྱི། བློ་སྣ་གོང་དུ་འགྱུར་ཏེ་བྱམས་སྙིང་རྗེ་བྱང་ཆུབ་ཀྱི་སེམས་ཡང་དག་པའི་ལྟ་བ་སོགས་ཀྱི་རྟོག་པ་ཁྱད་པར་ཅན་སྐྱེ་བ་གཙོ་ཆེ་བའི་ཕྱིར། བསྙེན་ཡིག་དངོས་གྲུབ་རྒྱ་མཚོ་ལས། བླ་མ་དང་ཡི་དམ་ལ་དད་པ་དང་ཡིད་ཆེས་ཇེ་འཕེལ། ཆགས་སྡང་སོགས་ཀྱི་ངན་རྟོག་ཇེ་ཆུང་། རྣམ་གཡེང་ཇེ་ཉུང། ཤེས་རྒྱུད་ཇེ་འཇམ། བསམ་པ་ཇེ་བཟང་ལ་སོང་ན་བསྙེན་པ་ལམ་དུ་འགྲོ་བ། བླ་མ་དང་ཡི་དམ་གྱིས་རྗེས་སུ་འཛིན་པ། བྱིན་རླབས་འཇུག་པ། རྟོགས་པ་ཇེ་མཐོར་འགྲོ་བ་རྣམས་ཀྱི་མགོ་ཚུགས་པ་ཡིན། ཞེས་གསུངས་པ་དང་། ཇོ་བོའི་བླ་མ་གྲུབ་ཆེན་རཱ་ཧུ་ལས་ཇོ་བོ་ཆེན་པོ་ལ། ཡི་དམ་གྱི་ཞལ་མཐོང་བ་དང་། དཀྱིལ་འཁོར་མང་པོ་མངོན་སུམ་དུ་གྱུར་པ་དང་། ཐུན་མོང་གི་དངོས་གྲུབ་མང་དུ་ཐོབ་པ་དང་། ཏིང་ངེ་འཛིན་རི་རྒྱུད་ཙམ་ཡོད་པ་སོགས་ཁྱོད་ཀྱི་ཡོན་ཏན་དེ་རྣམས་ཀྱིས་གར་ཡང་མི་ཕྱིན་གྱི། བྱམས་སྙིང་རྗེ་བྱང་ཆུབ་ཀྱི་སེམས་སྦྱོངས། ཐུགས་རྗེ་ཆེན་པོ་སྙིང་རྗེའི་ལྷ་ཡིན་པས་ཡི་དམ་དུ་ཟུངས་ལ་འཁོར་བ་མ་སྟོངས་བར་དུ་སེམས་ཅན་གྱི་དོན་བྱེད་པར་དམ་འཆོས་ཤིག །ཅེས་གསུངས་པ་བཞིན་ནོ། །དེས་ན་དཔེ་ཆོས་ལས། ཕ་མེས་གང་བས་དོན་མ་གྲུབ། །ཅེས་ཞོགས་ཀྱི་མི་གཅིག་གིས་སྔ་རབས་པ་རྣམས་བཟང་ཚུལ་བཤད་པ་ལ། དེའི་བུ་ན་རེ། ང་ནི་ཕ་མེས་གང་བས་ངན་རྒྱུ་མེད་བྱས་པའི་དཔེ་ལྟར། ད་ལྟ་རང་རེ་རྣམས་བླ་མ་གོང་མ་དག་ལས་ཀྱང་རང་

― GTD003_Page_0787 ―

^{[མ་དཔེ་གཟིགས་ན་འདིར་གནོན།]}

[Full Size]

ངན་རྒྱུ་མེད་སྙམ་པའི་མངོན་རློམ་འཆང་སྟེ། ཡོན་ཏན་ཅུང་ཟད་རེ་སྐྱེས་པ་ན་རང་ཕོ་སྐྱེས་པ་ཡིན་སྙམ་པ་ལས། བླ་མའི་བཀའ་དྲིན་ཡིན་སྙམ་པ་མི་འབྱུང་བ་ནི་དངོས་གྲུབ་ཀྱི་གེགས་ཆེ་ཤོས་ཡིན་པས་ཤིན་ཏུ་བག་ཟོན་བྱ་དགོས་སོ། །གསུམ་པ་བླ་མའི་རྣལ་འབྱོར་གྱི་སྟེང་ནས་གསང་སྔགས་ཟབ་མོའི་ཉམས་ལེན་མཐའ་དག་སྐྱོང་ཚུལ་ནི། མདོར་ན་ཡབ་རྗེ་དམ་བའི་བཀའ། །ཞེས་པ་ནས། སྒྱུ་འཕྲུལ་དྲ་བ་ཞེས་སུ་གྲགས། །ཞེས་པའི་བར་གྱིས་གསུངས། དེའང། མདོར་ན་ཡབ་རྗེ་དམ་པའི་བཀའ། །གསུང་རབ་སྙིང་པོའི་མཐར་ཐུག་པ། །གསང་བ་ལས་ཀྱང་ཆེས་གསང་བའི། །མན་ངག་གནད་ཀྱི་དོན་པོ་ནི། །ཞེས་བཤད་བྱའི་གདམས་ངག་གི་ཆེ་བ་བསྟན་པ་སྟེ། དེའང་ཡབ་རྗེ་རྒྱལ་བ་གཉིས་པ་ཉིད་ནི་སྔོན་རྒྱལ་བ་དབང་པོའི་ཏོག་གི་སྤྱན་སྔར་ཟབ་མོའི་ལྟ་བ་དང་གསང་ཆེན་རྡོ་རྗེ་ཐེག་པའི་ལམ་བཟང་སྤེལ་བའི་སྙིང་སྟོབས་ཀྱི་གོ་ཆ་ལྷུར་བཞེས་པའི་དོན་བཞིན། སྤྱིར་རྒྱལ་བའི་བསྟན་པ་མཐའ་དག་ལ་མ་རྟོགས་ལོག་རྟོག་གི་དྲི་མ་བསལ་ནས་ཉིན་མོ་བཞིན་དུ་གསལ་བར་མཛད་ཅིང། ཁྱད་པར་ལྟ་བའི་གནད་ཤིན་ཏུ་ཕྲ་ཞིང་ཕྲ་བ་དང་། རྒྱུད་སྡེའི་དགོངས་དོན་ཤིན་ཏུ་ཟབ་ཅིང་བརླིང་བ་གངས་ཅན་གྱི་ལྗོངས་འདིར་སྔོན་ཆད་མཁས་པ་དང་གྲུབ་པའི་སྐྱེ་བོ་སུས་ཀྱང་ཇི་ལྟ་བ་བཞིན་སྟོན་པར་མ་ནུས་པ་རྣམས་གསལ་བར་ཕྱེ་བའི་བཀའ་སྲོལ་བླ་ན་མེད་པ་འདི་ལ་རྣམ་པ་ཐམས་ཅད་དུ་འཁྲུལ་བའི་ཆ་ཕྲ་མོ་ཙམ་ཡང་མི་སྲིད་ཅིང་། མདོ་སྔགས་ཀྱི་གསུང་

― GTD003_Page_0788 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་དྲི་མ་མེད་པ་མཐའ་དག་གི་སྙིང་པོའི་དོན་མ་ཚང་བ་མེད་པར་འདུ་བས། ཐར་པ་འདོད་པའི་སྐྱེ་བོ་སྐལ་བཟང་རྣམ་དཔྱོད་ཅན་རྣམས་ཀྱི་འཇུག་ངོགས་ཁོ་ན་ཡིན་ལ། དེའི་ནང་ནས་ཀྱང་སྙིང་པོའི་དོན་མཐར་ཐུག་པ་ཟབ་ལམ་བླ་མའི་རྣལ་འབྱོར་སྔགས་ཀྱི་ཐེག་པ་དང་འབྲེལ་བས། སྣོད་མིན་ལ་གསང་བར་འོས་ཤིང། སྔགས་ཀྱི་ནང་ནས་ཀྱང་རྡོ་རྗེའི་ཚིག་གིས་ཤིན་ཏུ་སྦས་པའི་དོན་མཁའ་འགྲོའི་ཁ་རླངས་ཐུ་ལེ་བ། བླ་མ་དམ་པ་རྣམས་ཀྱི་ཞལ་ནས་ཞལ་དང་། སྙན་ནས་སྙན་དུ་བརྒྱུད་པའི་མན་ངག་ཆེས་ཤིན་ཏུ་གསང་བ་མཐའ་དག་གི་གནད་ཀྱང་མ་ཚང་བ་མེད་པར་འདིར་འདུ་བས་ན། རྒྱལ་བ་རྡོ་རྗེ་འཆང་དངོས་སུ་བྱོན་ཀྱང་འདི་ལས་ལྷག་པར་གསུང་དུ་མེད་པའི་གདམས་པའི་སྙིང་པོ་ནི་འདི་ཡིན་ནོ་ཞེས་གདམས་ངག་གི་ཆེ་བ་བརྗོད་ནས་སྣོད་ལྡན་ལ་སྤྲོ་བ་བསྐྱེད་པའོ། །དེའང་ལྟ་བའི་འཇོག་མཚམས་དང་ས་ལམ་གྱི་རྣམ་བཞག་གཞན་ལ་གསར་རྙིང་གི་གྲུབ་མཐའ་མི་མཐུན་པ་ཅི་རིགས་ཡོད་ཀྱང་། བླ་མའི་རྣལ་འབྱོར་ལམ་གྱི་རྩ་བར་འདོད་པ་དང་། དེའི་ཁོངས་སུ་ལམ་གྱི་གནད་ཐམས་ཅད་འདུས་པར་འདོད་པ་ལ་མི་མཐུན་པ་མེད་དེ། དཔེར་ན་ས་སྐྱ་བ་རྣམས་ལམ་འབྲས་རྡོ་རྗེ་ཚིག་རྐང་དུ། ལམ་ཟབ་བླ་མ། འབྲིང་དམ་ཚིག་དང་སྡོམ་པ་ཉི་ཤུ། ཐ་མ་ལུས་སོ་སོར་བརྟག་པའི་འགོག་པ་ཞེས་དབང་པོ་རྣོ་འབྲིང་རྟུལ་གསུམ་གྱིས་ལམ་བགྲོད་ཚུལ་གསུམ་དུ་བྱས་པ་ལས། དབང་པོ་རྣོན་པོས་ནི་ལམ་ཟབ་བླ་མའི་རྣལ་འབྱོར་དེའི་ཁོངས་སུ་དམ་ཚིག་དང་སྡོམ་པ་བསྲུང་བ། རིམ་གཉིས་ཀྱི་ཉམས་ལེན་སོགས་མཐའ་དག་འདུས་ནས་འགྲོ་བས་

― GTD003_Page_0789 ―

^{[མ་དཔེ་གཟིགས་ན་འདིར་གནོན།]}

[Full Size]

ས་བཅད་མི་འདྲ་བ་སོ་སོར་བྱེད་མི་དགོས་པར་གསུངས་ལ། དེར་འདུ་བའི་རྒྱུ་མཚན་གྱི་གནད་ཀྱང་གདན་གསུམ་ཚང་བའི་རྡོ་རྗེ་སློབ་དཔོན་ཞེས། གཤེགས་པ་དང་གཤེགས་མའི་གདན། སེམས་དཔའ་དང་སེམས་མའི་གདན། ཁྲོ་བོ་དང་ཁོ་མོའི་གདན་དང་བཅས་གང་བསྒོམ་པར་བྱ་བའི་དཀྱིལ་འཁོར་གྱི་ལྷ་ཐམས་ཅད་བླ་མའི་སྐུ་ལ་ཚང་བའི་གནད་ཀྱིས་ཡིན་པར་གསུང་། དེ་དག་ལ་གདན་གྱི་སྒྲ་སྦྱར་བ་ནི། གདན་གྱི་སྐད་དོད་སི་ཐ་ཞེས་པ་གདན་དང་གནས་དང་རིགས་སོགས་དུ་མ་ལ་འཇུག་པ་ལས། གཤེགས་པ་དང་གཤེགས་མའི་རིགས་ཞེས་པ་ལྟ་བུར་བསྒྱུར་ན་གོ་བདེའང། འབྲོག་མི་གསང་སྔགས་ལ་དམ་དོག་ཤིན་ཏུ་ཆེ་བས་གོ་དཀའ་བ་བྱས་པ་ཡིན་པར་གསུངས་སོ། །རྙིང་མ་པ་རྣམས་རིག་འཛིན་གདུང་སྒྲུབ་ཅེས་ཟེར་ཞིང་། དེར་ཡང་མཆོག་ཐུན་གྱི་དངོས་གྲུབ་སྒྲུབ་པའི་ལམ་ཐམས་ཅད་ཚང་བའི་རྒྱུ་མཚན་རྩ་གསུམ་དྲིལ་སྒྲུབ་ཀྱི་གནད་ལ་རག་ལས་པར་འདོད་དེ། དེའང་རྩ་བ་གསུམ་ནི་བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། འཕྲིན་ལས་ཀྱི་རྩ་བ་ཆོས་སྐྱོང་ཡིན་ཞིང། དེ་གསུམ་གཅིག་ཏུ་དྲིལ་བའི་ངོ་བོ་བླ་མ་ཡིན་པར་བཤད་དོ། །ཀར་འབྲུག་འབྲི་སྟག་སོགས་བཀའ་རྒྱུད་པ་རྣམས་ནི་བླ་སྒྲུབ་ཀྱི་ཐ་སྙད་འདོགས་ཤིང་། ཉམས་ལེན་ཐམས་ཅད་དེའི་ཁོངས་སུ་བསྡུས་ནས་བྱེད་ལ། དེའང་ཕྱི་ལྟར་བསྟེན་པ། ནང་ལྟར་སྒྲུབ་པ། གསང་བ་ལྟར་ངོ་སྤྲོད་པའི་ས་བཅད་གསུམ་དུ་བྱས་འདུག་པ་ལས། ཕྱི་མ་ཅུང་ཟད་མི་འདྲ་བ་

― GTD003_Page_0790 ―

^{[མ་དཔེ་གཟིགས་ན་འདིར་གནོན།]}

[Full Size]

མ་གཏོགས། གཞན་ནི་མན་ངག་འདིར་གསུངས་པའི་རྩ་བའི་ས་བཅད་གསུམ་དང་ཁོགས་འདྲ་བར་སྣང་ངོ་། །དེར་མ་ཟད་རྒོད་ཚང་བའི་རྣལ་འབྱོར་བཞི་བཤད་དུ། དང་པོ་ལུས་སྤྱོད་གཙོ་བོར་སྟོན། །གཉིས་པ་ངག་སྤྱོད་གཙོ་བོར་སྟོན། །གསུམ་པ་སེམས་སྤྱོད་གཙོ་བོར་སྟོན། །བཞི་པ་ལྷན་སྐྱེས་འབའ་ཞིག་གོ །ཞེས་ཕག་མོ་གྲུ་པས་གསུངས་པ་ལ་བརྟེན་ནས་བླ་མ་ཕྱག་དང་སྐུ་ཁྲུས་ཀྱིས་བསྙེན་བཀུར་བ་སོགས་ལུས་ཀྱི་བྱ་བ་དང་། ངག་གིས་བསྟོད་ཅིང་ཅི་གསུང་བ་སྒྲུབ་པ་དང་། སེམས་ཀྱིས་བླ་མ་ཆོས་སྐུའི་ངོ་བོར་བལྟ་བ་དང་། དེའི་བྱིན་རླབས་ལ་བརྟེན་ནས་སྣོད་བཅུད་མཐའ་དག་ལྷན་སྐྱེས་ཀྱི་བདེ་བའི་རོལ་པར་འཆར་བས། རིམ་པ་བཞིན་དུ་རྒྱུད་སྡེ་བཞིའི་གནད་ཀྱང་བླ་མའི་རྣལ་འབྱོར་ལ་ཚང་བ་དང་། ཡང་དབང་བཞིའི་ནང་ནས་བུམ་དབང་གིས་ལུས་ཀྱི་དྲི་མ་སྦྱོང་ཞིང་ལུས་ལྷ་སྐུར་འགྲུབ་པར་བྱེད་ལ། བླ་མའི་སྐུ་བསྒོམ་ན་དེ་ལས་ཀྱང་མྱུར་ཚབས་ཆེ་བ་དང་། དེ་བཞིན་དུ་ངག་གི་ཉེས་པ་སྦྱོང་ཞིང་ངག་སྔགས་ཀྱི་ངོ་བོར་བྱིན་གྱིས་རློབ་པ་ལ་གསང་དབང་ལས་བླ་མའི་མཚན་སྔགས་བརྗོད་ཅིང་གསོལ་བ་འདེབས་པ་ལྷག་པ་དང་། རྫོགས་རིམ་བསྒོམས་ཏེ་ཡིད་རྡོ་རྗེར་སྒྲུབ་པ་ལ་ཤེར་དབང་ལས་བླ་མ་སེམས་ཀྱི་དཀྱིལ་དུ་ཤར་བ་ལྷག་པ་དང་། བརྗོད་བྲལ་ལྷན་སྐྱེས་ཀྱི་ཡེ་ཤེས་འཆར་བ་ལ་དབང་བཞི་པ་ལས་ཀྱང་བླ་མའི་བྱིན་རླབས་ས་ཆོད་ཆེ་བས། བླ་མའི་རྣལ་འབྱོར་ལ་དབང་བཞིའི་གནད་ལྷག་དང་བཅས་པ་འདུ་བར་བཤད་ནས། དེའི་ཤེས་བྱེད་དུ་དམ་ཚིག་བཀོད་པའི་རྒྱལ་པོའི་རྒྱུད་ལས། མཚན་དང་དཔེ་བྱད་འབར་

― GTD003_Page_0791 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ལྷ། །བསྐལ་པ་འབུམ་དུ་བསྒོམ་པ་བས། །བླ་མ་དྲན་པའི་འབུམ་ཆར་མིན། །བསྙེན་སྒྲུབ་བཟླས་བརྗོད་ས་ཡ་བས། །བླ་མའི་གསོལ་ཚིག་ལན་ཅིག་དགའ། །རྫོགས་པའི་རིམ་པ་བསྐལ་པའི་བར་དུ་ནི། །འདུ་འཛི་གཡེང་བ་སྤངས་ཏེ་བསྒོམ་པ་ལས། །བླ་མ་རང་སེམས་དཀྱིལ་དུ་དར་ཅིག་ཤར་བ་ཙམ། །འབུམ་ཕྲག་ཉི་ཤུ་ཆར་ཡང་མི་ཕོད་དོ། །ཞེས་དང་།ཨཱ་ལི་ཀཱ་ལིའི་ཆུ་ཀླུང་ཆེན་པོའི་རྒྱུད་ལས། བརྗོད་བྲལ་ལྷན་ཅིག་སྐྱེས་བའི་ཡེ་ཤེས་འདི། །ཚོགས་བསགས་སྒྲིབ་པ་དག་པའི་ལག་རྗེས་དང། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་ན་རྨོངས་པར་ཤེས་པར་བྱ། །ཞེས་པ་རྣམས་དྲངས་སྣང་ཡང་། དེ་དག་ཕལ་ཆེར་མདོ་ཕྱོགས་རྐྱང་པའི་བླ་མ་བསྟེན་ཚུལ་གྱི་སྐབས་སུའང་འབྱུང་དགོས་པས། འདྲ་ཆོས་ཅུང་ཟད་ཙམ་ཡོད་པ་རྒྱུ་མཚན་དུ་བྱས་ཏེ། དེ་ཙམ་ལ་སྔགས་ཀྱི་གནད་ཐམས་ཅད་ཚང་བར་བཤད་པ་ཧ་ཅང་ཐལ་ཆེ་བར་སྣང་ངོ་། །དེས་ན་ཟབ་པའི་ཤེས་བྱེད་ལ་འདི་ཤིན་ཏུ་ཟབ་བོ་ཞེས་བཤད་པ་ཁོ་ནས་ཆོག་པ་དེ་དག་གི་ལུགས་ལ་དེ་ལྟར་ཡིན་ཀྱང། རྗེ་བླ་མའི་བཀའ་སྲོལ་འདི་ལ་བསྒྲུབ་བྱ་སྒྲུབ་བྱེད་དུ་མི་འགྱུར་བས། དོན་དེར་མདོ་སྔགས་ཀྱི་ཟབ་གནད་ཐམས་ཅད་འདུས་པར་བསྒྲུབ་པ་ལྟ་བུ་ལའང་། རང་གི་ངོ་བོའི་སྟེང་ན་ཁྱད་ཆོས་དེ་དག་ལྡན་ཚུལ་བསྒྲུབ་པ་རང་བཞིན་གྱི་གཏན་ཚིགས་དང་། ལག་རྗེས་འཇོག་ཚུལ་གྱི་སྒོ་ནས་བསྒྲུབ་པ་འབྲས་བུའི་གཏན་ཚིགས་སོགས་དྲི་མ་མེད་པའི་རིགས་པའི་སྒོ་ནས་ལེགས་པར་འགྲུབ་

― GTD003_Page_0792 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཞིག་དགོས་སོ། །རབ་དགེ་ལྡན་པ་རྣམས་ནི་ཟབ་ལམ་བླ་མའི་རྣལ་འབྱོར་དང་། བླ་མ་མཆོད་པའི་ཆོ་ག་སོགས་ཀྱི་ཐ་སྙད་བྱེད་ཅིང། བླ་མའི་རྣལ་འབྱོར་བསྒོམ་ཚད་ལ་ལམ་གྱི་ཟབ་གནད་ཐམས་ཅད་ཚང་དགོས་པར་མི་བཞེད་དེ། སྒོམ་པ་པོའི་གང་ཟག་ལ་དེ་ཐམས་ཅད་ཀྱི་སྣོད་དུ་རུང་མི་རུང་ཅི་རིགས་ཡོད་པས། དམ་པ་རྣམས་ཀྱིས་ཀྱང་གདུལ་བྱའི་སྐལ་བ་ལ་གཟིགས་ཏེ། རང་རང་དང་འཚམ་པའི་ཉམས་ལེན་བྱེད་ཚུལ་རེ་གསུངས་པ་ཡིན་པའི་ཕྱིར་དང་། གདུལ་བྱ་ཐུན་མོང་བ་ལ་ཚོགས་བཤད་ཀྱི་ཚུལ་དུ་བསྟན་ནས། ཐུན་མོང་མ་ཡིན་པའི་གདུལ་བྱར་སློབ་བཤད་ཀྱི་ཚུལ་དུ་གདམས་པའི་ཚེ་སྔ་མར་མ་བཤད་པའི་ཁྱད་ཆོས་ལྷག་པོ་ཞིག་སྣོན་རྒྱུ་དགོས་པ་རྒྱུད་དང་གྲུབ་ཆེན་ཀུན་གྱི་སྤྱི་ལུགས་ཡིན་པའི་ཕྱིར་རོ། །དེས་ན་སྔར་བཤད་པའི་བླ་མའི་རྣལ་འབྱོར་སྒོམ་ཚུལ་དེའི་སྟེང་དུ་གསང་སྔགས་ཀྱི་གནད་རྣམས་ཚང་བར་བྱས་ཏེ་ཉམས་སུ་ལེན་པ་ལ། བསྐྱེད་རིམ་གྱི་གནད་ཚང་བར་བྱས་ཏེ་ཉམས་སུ་ལེན་ཚུལ་དང་། རྫོགས་རིམ་གྱི་གནད་ཚང་བར་བྱས་ཏེ་ཉམས་སུ་ལེན་ཚུལ་གཉིས། དང་པོ་ནི། རང་སེམས་བླ་མ་ཡི་དམ་གསུམ། །དབྱེར་མེད་གཅིག་ཏུ་བསྲེས་བྱས་ནས། །ཞེས་བྱུང་། དེའང་བླ་མ་དང་ཡི་དམ་གཉིས་ནི་ད་གཟོད་དབྱེར་མེད་དུ་བསྲེ་མི་དགོས་པར། སྔར་ནས་དབྱེར་མེད་དུ་གནས་པས། དེ་ནི་རང་གི་སེམས་ཉིད་འདི་དེ་གཉིས་དང་དབྱེར་མེད་དུ་བསྲེ་དགོས་པ་ཡིན་ནོ། །དེའང་། དཔེར་ན་རྡེའུ་ཆུར་འཕང་བ་ལྟ་བུ་དེའི་ནང་དུ་བཅུག་པ་ཙམ་ལ་བསྲེ་བ་མི་ཟེར་བར། ཆུ་ནང་དུ་ཆུ་

― GTD003_Page_0793 ―

^{[མ་དཔེ་གཟིགས་ན་འདིར་གནོན།]}

[Full Size]

བླུག་སྟེ་དབྱེར་མེད་དུ་སོང་བ་ལ་བསྲེ་བ་ཟེར་བ་བཞིན་འདིར་ཡིད་དབྱེར་མེད་དུ་བསྲེས་ཞེས་པ་ནི། སྐད་ཅིག་དཀྲོང་བསྐྱེད་ལྟ་བུའི་རང་ལྷར་བསྒོམ་པ་ཙམ་ལ་མི་ཟེར་བར། རང་གི་ལུས་ངག་ཡིད་གསུམ་དང་སྐྱེ་ཤི་བར་དོའི་གནས་སྐབས་གསུམ་པོ་དེ་ཉིད་ཡི་དམ་གྱི་ལྷའི་སྐུ་གསུམ་གྱི་ངོ་བོར་བྱེད་པས་ལམ་འཁྱེར་གསུམ་གྱི་གནད་ཚང་བ་ཞིག་དགོས་སོ། །ལྷའི་སྐུ་གསུམ་དང་དབྱེར་མེད་དུ་བསྲེ་བའི་ཐབས་ཀྱི་གཙོ་བོ་རྫོགས་རིམ་ཡིན་ཀྱང་། དེའི་སྨིན་བྱེད་ལ་མོས་ངོ་ཙམ་དུ་དེ་དང་བསྲེ་བའི་བསྐྱེད་རིམ་སྔོན་དུ་འགྲོ་དགོས་པ་དང་། རྫོགས་རིམ་ལ་སློབ་ཚུལ་འོག་ནས་འབྱུང་བའི་སྐབས་ཐོབ་ཀྱི་རིགས་པས་ཀྱང་འདིའི་བསྲེས་པ་བསྐྱེད་རིམ་ལ་བྱེད་དགོས་པར་འགྲུབ་སྟེ། དངོས་པོ་ལ་སྐུ་གསུམ་ལམ་དུ་འཁྱེར་བ་རྫོགས་རིམ་ནས་ཡིན་ནའང་། སྐུ་གསུམ་ལམ་འཁྱེར་གྱི་ཐ་སྙད་བསྐྱེད་རིམ་ལ་གཙོ་བོར་སྦྱར་བ་བཞིན་ནོ། །དེས་ན་སྣོད་བཅུད་འཇིག་པའི་རིམ་པ་དང་མཐུན་པར་སྡུད་རིམ་གྱི་སྒོ་ནས་སྣོད་བཅུད་ཐམས་ཅད་འོད་གསལ་དུ་བསྡུས་ཏེ། རྒྱུད་སོ་སོ་ནས་འབྱུང་བ་བཞིན་སྔགས་གཉིས་དང་ཡི་གེ་གསུམ་སོགས་ཀྱི་དོན་རྣམ་ཐར་སྒོ་གསུམ་དང་བདག་མེད་གཉིས་ཀྱིས་བསྡུས་པའི་དེ་བཞིན་ཉིད་ལ་ང་རྒྱལ་བཞག་སྟེ་འཆི་བ་ཆོས་སྐུའི་ལམ་འཁྱེར་བསྒོམས་པས་ལས་ཉོན་གྱི་འཆི་བ་བཀག་ནས་ལམ་དང་འབྲས་བུའི་ཆོས་སྐུ་བསྒྲུབ་ཅིང་། རང་གི་ཡིད་དང་བླ་མ་ལྷའི་ཐུགས་དབྱེར་མེད་དུ་བསྲེ་བར་བྱེད་དོ། །དེ་ནས་རང་གི་སྨོན་ལམ་

― GTD003_Page_0794 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་འཕེན་པས་ངག་གི་རྩ་བར་གྱུར་པ་ཤིན་ཏུ་ཕྲ་བའི་གཉུག་མའི་རླུང་ལས་རྒྱུ་རྡོ་རྗེ་འཛིན་པ་ལོངས་སྤྱོད་རྫོགས་པའི་སྐུར་བཞེངས་པར་མོས་པ་ནི་བར་དོ་ལོངས་སྐུའི་ལམ་འཁྱེར་ཞེས་བཤད་ལ། རྡོ་རྗེ་ཐེག་པའི་སྐབས་འདིར་ལོངས་སྤྱོད་རྫོགས་པའི་སྐུ་ཞེས་པའང། གཙོ་བོར་གསུང་ལ་བྱེད་པས། དེའི་སྒོ་ནས་རང་གི་ངག་དང་བླ་མ་ལྷའི་གསུང་དབྱེར་མེད་དུ་བསྲེ་བ་ཡིན་ནོ། །ཡིད་ལུས་ཤིན་ཏུ་ཕྲ་བ་དེ་ཉིད་ཐ་མལ་པ་རྣམས་ལ་དངོས་སུ་སྣང་མི་ནུས་པས། རགས་པའི་སྤྲུལ་སྐུར་ལྡང་བར་བྱའོ་སྙམ་དུ་འབྲས་བུ་རྡོ་རྗེ་འཛིན་པ་བསྒོམ་པ་ལ་སྐྱེ་བ་སྤྲུལ་སྐུའི་ལམ་འཁྱེར་ཞེས་བཤད་ཅིང་། དེས་རང་གི་ལུས་དང་བླ་མ་ལྷའི་སྐུ་དབྱེར་མེད་དུ་བསྲེ་བར་བྱེད་དོ། །སྤྱིར་བསྐྱེད་རིམ་རིལ་བོ་སྐུ་གསུམ་གྱི་ནང་ནས་སྤྲུལ་སྐུ་འགྲུབ་བྱེད་དང། ཆོས་སྐུ་གཟུགས་སྐུ་གཉིས་སུ་ཕྱེ་བའི་ནང་ནས་གཟུགས་སྐུ་འགྲུབ་བྱེད། ཐབས་ཤེས་གཉིས་ཀྱི་ནང་ནས་ཐབས་ཀྱི་རྣལ་འབྱོར་ལ་གཙོ་བོར་གསུངས་པ་མང་ཡང་། དེ་ལ་ནང་གསེས་ཀྱིས་ཕྱེ་ན་སྐུ་གསུམ་སྒྲུབ་པའི་སྨིན་བྱེད་དུ་འགྱུར་ཚུལ་སོ་སོར་ཡོད་པ་ལྟར་སྐུ་གསུང་ཐུགས་སོ་སོའི་སྒྲུབ་བྱེད་དུ་འགྱུར་ཚུལ་ཡང་སྔར་བཤད་པ་བཞིན་བྱ་དགོས་ཏེ། དེ་གང་གི་སྨིན་བྱེད་དུ་འགྱུར་བ་ཀུན་རྫོབ་སྒྱུ་མའི་རྫོགས་རིམ་དང་། དོན་དམ་འོད་གསལ་གྱི་རྫོགས་རིམ་གཉིས་དང་། དེའི་སྣོད་རུང་དུ་བྱེད་པའི་གསང་དབང་ཤེས་དབང་གཉིས་ཀྱི་དག་པ་བརྗོད་ཚུལ་ལས་ཀྱང་ཤེས་པར་ནུས་སོ། །ཡང་འདི་སྙམ་དུ། རྒྱུད་སོ་སོ་ནས་ཡི་དམ་ལྷའི་སྐུ་གསུམ་དང་དབྱེར་མེད་

― GTD003_Page_0795 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་སྒྲུབ་པའི་བསྐྱེད་རིམ་བསྒོམ་པར་བཤད་ཀྱང་། དེས་བླ་མའི་སྐུ་གསུམ་དང་དབྱེར་མེད་དུ་བསྒོམ་པར་མི་འགྲུབ་སྙམ་ན། འདི་ནི་གནས་མ་ཡིན་པའི་ལོག་རྟོག་ཆེན་པོ་ཡིན་ཏེ། ནཱ་རོ་པ་ཆེན་པོས། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །ཡི་དམ་བླ་མའི་སྤྲུལ་པ་ཡིན། །གསུངས་པ་བཞིན། ཡི་དམ་ལྷ་བསྒོམ་པའི་ཚེ་ན་དེ་ཉིད་བླ་མའི་ངོ་བོར་བལྟ་བའི་སྒོ་ནས་བསྒོམ་པ་ཞིག་དགོས་ཀྱི། བླ་མ་ལས་དོན་གཞན་དུ་གྱུར་པའི་ཡི་དམ་གྱི་ལྷ་ཞིག་བསྒོམ་རྒྱུ་ཡོད་པར་བཟུང་ན་མི་རུང་བས། དབེན་ས་སྙན་བརྒྱུད་ཀྱི་གདམས་པ་རྣམས་སུ་བླ་མ་ལྷའི་རྣལ་འབྱོར་ཞེས་གསུངས་པའི་རྒྱུ་མཚན་ཡང་དེ་ཡིན་ནོ། །འདི་ནི་རྒྱལ་བ་རྡོ་རྗེ་འཆང་གི་དགོངས་པ་རྨ་མེད་པ་ཡིན་ཏེ། བཤད་རྒྱུད་སྡོམ་འབྱུང་ལས། སློབ་དཔོན་སངས་རྒྱས་ཀུན་རང་བཞིན། །ལྷ་ཡི་སྐུ་ཡི་བདག་ཉིད་ཅན། །དཔའ་བོ་རྡོ་རྗེ་དྲིལ་འཆང་བ། །མཁའ་འགྲོ་བཅས་ལ་གསོལ་བ་གདབ། །ཅེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང། །དེ་བཞིན་གཤེགས་པ་རིན་ཆེན་འབྱུང། །དེ་ནི་ཡེ་ཤེས་རྒྱ་ཚོ་ཆེ། །ཡིད་བཞིན་ནོར་བུ་རིན་ཆེན་སྦྱིན། །ཞེས་དྲུག་པ་རྡོ་རྗེ་འཆང་དང་། རིགས་ལྔས་བསྡུས་པའི་ཡི་དམ་གྱི་ལྷ་ཐམས་ཅད་བླ་མའི་ངོ་བོར་གསུངས་ལ། རྡོ་རྗེ་གུར་ལས་ཀྱང་དེ་བཞིན་དུ་གསུངས་སོ། །དེས་ན་རྒྱུད་སྡེ་བཞི་པོ་གང་གི་ཡི་དམ་ལྷའི་རྣལ་འབྱོར་

― GTD003_Page_0796 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒོམས་ཀྱང་དེ་བླ་མའི་བདག་ཉིད་དུ་བལྟས་ཏེ་དེའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་བྱས་ན་བསྒོམ་ཚུལ་རྣམ་དག་ཏུ་འགྱུར་ཏེ། སློབ་དཔོན་འཇམ་དཔལ་གྲགས་པའི་གསང་བ་སྤྱིའི་ཆོ་ག་སྙིང་པོ་རྒྱན་ལས། རང་གི་ལྷ་ཡི་རྣལ་འབྱོར་གྱིས། །དག་པའི་བླ་མ་བསྟེན་བྱས་ཏེ། །སྐུ་དང་གསུང་ཐུགས་རྒྱལ་བ་ཡི། །རྡོ་རྗེའི་བཟླས་པ་ཉེར་གནས་ན། །རྣམ་དག་ལམ་གྱི་རང་བཞིན་འགྱུར། །ཞེས་བཤད་དོ། །རྒྱུ་མཚན་དེའི་ཕྱིར་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་དངོས་གྲུབ་གདུལ་བྱའི་རྒྱུད་ལ་འཇུག་པའི་རྩ་བའང་བླ་མའི་སྐུ་གསུམ་མམ་སྐུ་གསུང་ཐུགས་གསུམ་ག་བསྒོམ་པ་ལ་རག་ལས་ཏེ། འདུས་པའི་རྩ་རྒྱུད་ལེའུ་བཅུ་བདུན་པ་ལས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དངོས་གྲུབ་རྣམས་ཅི་ལ་གནས། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། སྐུ་གསུམ་གསང་བའི་སྐུ་དང་གསུང་དང་ཐུགས་ནི་རྡོ་རྗེ་སློབ་དཔོན་གྱི་ལུས་དང་ངག་དང་སེམས་རྡོ་རྗེ་ལ་གནས་སོ། །ཞེས་གསུངས་པ་སྙིང་ལ་ཤིན་ཏུ་འཆང་དགོས་སོ། །བསྐྱེད་རིམ་སོ་སོའི་སྐུ་གསུམ་ལམ་འཁྱེར་གྱི་སྐབས་ནས་ཡི་དམ་ལྷའི་སྐུ་གསུམ་གྱི་ངོ་བོར་བྱེད་པར་གསུངས་པ་རྣམས་ཀྱིས་བླ་མའི་སྐུ་གསུམ་གྱི་ངོ་བོར་བྱེད་པར་ཡང་འགྲུབ་པ་ཙམ་དུ་མ་ཟད། བླ་མ་ལ་དེའི་ཐོག་མཐའ་གཉིས་སུ་ཁྱད་པར་ལྷག་པར་འང་གསུངས་ཏེ། དཔེར་ན་ཟངས་དང་གསེར་གྱི་ཕྱེ་མ་འདྲེ་བ་ཐོག་མར་དངུལ་ཆུ་དང་བསྲེ་བ་ལ་རག་ལས་པ་བཞིན། ཡི་དམ་ལྷའི་སྐུ་གསུམ་དང་བསྲེ་བའང། དང་པོར་བླ་མའི་བྱིན་རླབས་ཞུགས་

― GTD003_Page_0797 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལ་ལྟོས་པས། བསྐྱེད་རིམ་གྱི་སྔོན་འགྲོར་ཚོགས་ཀྱི་ཞིང་དུ་བླ་མ་སྤྱན་དྲངས་ཏེ་མཆོད་ཅིང་སྙིང་གའི་རྩ་འཁོར་དང་མི་ཤིགས་པའི་ཐིག་ལེ་ཤིན་ཏུ་ཕྲ་བའི་རླུང་སེམས་རྣམས་མཚོན་པའི་པད་ཉི་ཧཱུཾ་དང་བཅས་པ་ལ་བསྟིམ་པར་མངོན་བརྗོད་བླ་མ་དང་སྡོམ་འབྱུང་སོགས་ལས་གསུངས་པ་བཞིན་ཡིན་ལ། སྐུ་གསུམ་ལམ་འཁྱེར་བསྒོམས་པའི་མཇུག་ཏུའང། དེའི་བྱིན་རླབས་བརྟན་པའི་ཕྱིར་བླ་མའི་ངོ་བོ་རིགས་བདག་གིས་རྒྱས་བཏབ་པ་ཡིན་ནོ། །ནང་གསེས་ཀྱི་དཀྱིལ་འཁོར་སོ་སོ་ལ་མི་འདྲ་བའི་ཁྱད་པར་མང་ཡང་། སྤྱི་ཙམ་དུ་སྐུ་གསུམ་ལམ་འཁྱེར་གྱི་ཁོངས་སུ་གནད་འདུས་པ་འདྲ་བ་རྗེ་བླ་མས་གསུངས་པ་བཞིན་ཡིན་པས། འདིར་ཡང་དེ་གསུམ་གྱི་སྒོ་ནས་རང་སེམས་དང་བླ་མ་ཡི་དམ་དབྱེར་མེད་དུ་བསྲེ་ཚུལ་གྱི་སྤྱི་འགྲོ་ཙམ་སྨོས་པ་ཡིན་གྱི། སོ་སོའི་བསྐྱེད་རིམ་སྒོམ་ཚུལ་མི་འདྲ་བའི་ཁྱད་པར་ཕྲ་ཞིང་ཞིབ་པ་རྣམས་རྗེ་ཡབ་སྲས་ཀྱི་ལེགས་བཤད་རྒྱ་མཚོ་ལྟ་བུ་ལས་ཤེས་དགོས་ལ། སྒོམ་ཐབས་མི་འདྲ་བའི་དབྱེ་འབྱེད་མདོར་བསྡུས་ཙམ་རྡོ་རྗེ་གསུམ་གྱི་སྣང་བར་བཤད་ཟིན་ཏོ། །གཉིས་པ་རྫོགས་རིམ་གྱི་གནད་ཚང་བར་བྱས་ཏེ་སྒོམ་ཚུལ་ནི། གཉིས་སྤངས་མཁའ་དབྱིངས་དབུས་དག་ཏུ། །དྲན་ཤེས་རྒྱ་ཡིས་བཅིངས་བྱས་ན། །བདེ་ཆེན་འོད་གསལ་ཉིན་བྱེད་འཆར། །ཉིན་བྱེད་དེ་ཡི་འོད་ཟེར་གྱིས། །བཅུ་ཕྲག་བཅུ་དང་བཅུ་གཉིས་ཀྱི། །རྒྱན་གྱིས་སྤྲས་པའི་ལྷ་བུ་འབྱུང། །ལྷ་བུ་དེ་ཡི་འོད་སྣང་གིས། །མཁའ་དབྱིངས་ཡོངས་སུ་འགེང་བར་བྱེད། །འོན་ཀྱང་

― GTD003_Page_0798 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་མེས་པོ་སོགས། །མཐུ་ཆེན་གྱིས་ཀྱང་མི་མཐོང་ན། །སྐྱེ་བོ་ཕལ་པས་མཐོང་རེ་སྐན། །དེ་ཕྱིར་དེ་ལྟའི་ཚུལ་འདི་ལ། །སྒྱུ་འཕྲུལ་དྲ་བ་ཞེས་སུ་གྲགས། །ཞེས་བྱུང་། དེའང་རྫོགས་རིམ་ལ་སློབ་ཚུལ་རྒྱུད་སོ་སོའི་ལུགས་སྲོལ་མི་འདྲ་བ་མང་ཡང་། སྒྲོན་གསལ་ལས། འདི་ནི་སྒྲུབ་པའི་ཡན་ལག་མཆོག། །རྒྱུད་ཀུན་གྱི་ནི་དོན་བསྡུས་པའོ། །ཞེས་དང་། རིམ་པ་འདི་ཡི་དབྱེ་བ་ཡི། །སྤྲོས་པའི་རིམ་པ་རྣམ་པ་མང། །ཞེས་རིམ་པ་དང་པོ་དང་བཅས་པའི་རིམ་པ་ལྔ་པོ་འདིའི་ནང་དུ་གསང་འདུས་ཁོ་ན་མ་ཡིན་པར་རྒྱུད་ཐམས་ཅད་ཀྱི་དོན་འདུས་ཤིང་། རྒྱུད་ཐམས་ཅད་ཀྱི་ལམ་རྣམས་འདི་ལས་སྤྲོས་པར་གསུངས་པ་ནི། ལམ་གྱི་དོད་ཐུབ་བྱེད་ལས་ཀྱི་སྒོ་ནས་འདུས་པ་ཡིན་པར་རིམ་ལྔ་གསལ་སྒྲོན་ལས་གསུངས་པ་དང་། མན་ངག་འདི་བླ་མ་མཆོད་པའི་མན་ངག་ཡིན་ལ། དེ་ནི་གཙོ་བོར་འདུས་པ་ལ་བརྟེན་པར་སྣང་བས། འདིར་ཡང་དེ་དང་བསྟུན་ནས་བཤད་པ་ལ། འདུས་པའི་ལུགས་ཀྱི་རིམ་པ་ལྔར་བྱེད་པའི་ཁུངས་ནི། པ་ཚབ་འགྱུར་གྱི་རྩ་རྒྱུད་ལེའུ་དྲུག་པ་ལས། སྔགས་ལ་ངེས་རྟོག་ལུས་ཀྱི་ནི། །ངག་གིས་ཡིད་ལ་བསྐུལ་གྱུར་པས་། བསྒྲུབ་བྱ་རབ་མཆོག་དངོས་གྲུབ་དང། །ཡིད་ནི་དགའ་ཞིང་མགུ་བ་འོ། །ཞེས་པའི་རྐང་པ་དང་པོ་གཉིས་ཀྱིས་རིམ་པ་དང་པོ་ངག་དབེན་རྡོ་རྗེའི་བཟླས་པའི་རིམ་པ་གསུངས་ཏེ། དང་པོས་དེ་སྒྲུབ་བྱེད་ཀྱི་ལུས་དབེན་དང་། གཉིས་པས་ངག་དབེན་གྱི་ཚེ་ཡིད་ལ་སྟེ། སྙིང་གའི་མི་ཤིགས་པར་དམིགས་པ་གཏོད་ཚུལ་གསུངས། དེ་ལྟ་བུའི་ངག་

― GTD003_Page_0799 ―

^{[མ་དཔེ་གཟིགས་ན་འདིར་གནོན།]}

[Full Size]

དབེན་ནི་ལུགས་འདིའི་ཐུན་མོང་མ་ཡིན་པའི་རླུང་སེམས་འདུལ་ཐབས་ཀྱི་གཙོ་བོ་ཡིན་ལ། དེས་རླུང་སེམས་ལས་སུ་རུང་བ་ལ་བརྟེན་ནས་བསྒྲུབ་རྒྱུའི་གཙོ་བོ་ལ། ཨེས་མཚོན་པའི་དཔེ་དོན་གྱི་འོད་གསལ་གཉིས་དང་། ཝས་མཚོན་པ་སྒྱུ་མའི་སྐུ། ཐིག་ལེས་མཚོན་པ་ཟུང་འཇུག་སྟེ་བཞི་ཡོད་པས་དེ་ལ་བསྒྲུབ་བྱ་ཞེས་སྨོས་སོ། །དེ་བཞིའི་ནང་ནས་དང་པོར་ཐོབ་པ་སེམས་དབེན་ནམ། སེམས་དམིགས་ཀྱི་རིམ་པ་ལ་རབ་མཆོག་ཅེས་གསུངས་པ་ནི་ངག་དབེན་ལས་མཆོག་ཏུ་གྱུར་པའི་དོན་དང་། ཡང་པྲ་ཞེས་པ་རབ་དང་དང་པོ་གཉིས་ཀ་ལ་འཇུག་པས། ངག་དབེན་གྱི་སྒོ་ནས་བསྒྲུབ་རྒྱུའི་རིམ་པ་བཞིའི་དང་པོ་ཡིན་པ་ལའང་བཤད་དུ་རུང་ངོ་། །དངོས་གྲུབ་ཅེས་པ་ནི་ལུས་ལྷ་སྐུའི་ངོ་བོར་སྒྲུབ་པར་བྱེད་པའམ་ཚེ་དེ་ཉིད་ལ་སངས་རྒྱས་ཀྱི་གོ་འཕང་སྟེར་བའི་དོན་ཡིན་པས་སྒྱུ་ལུས་སམ་བདག་བྱིན་རླབས་ཀྱི་རིམ་པ་ཡིན་ལ། ཡིད་དག་པ་ནི་དོན་གྱི་འོད་གསལ་ལས། མངོན་པར་བྱང་ཆུབ་པའི་རིམ་པ་དང་། མགུ་བ་ཟུང་འཇུག་གི་རིམ་པ་སྟེ། དེ་ལྟར་སྔར་གསུངས་པའི་དོན་བཤད་རྒྱུད་རྡོ་རྗེ་ཕྲེང་བ་ལ་བརྟེན་ནས་དཔལ་མགོན་ཀླུ་སྒྲུབ་ཀྱིས་གསལ་བར་མཛད་དོ། །སྤྱོད་བསྡུས་ལྟར་ལུས་དབེན་གྱི་རིམ་པ་ཟུར་དུ་བྱས་ན་རིམ་པ་དྲུག་དང་། ལེའུ་དང་པོར་དབེན་པ་དང་པོ་གཉིས་སེམས་དབེན་དུ་བསྡུས་པ་ལྟར་ན་རྫོགས་རིམ་རིམ་པ་བཞིར་འགྱུར་ཡང་དབྱེ་བསྡུ་ཙམ་ཡིན་གྱི། དོན་མི་མཐུན་པ་མེད་པས། འདིར་རིམ་ལྔ་ལྟར་བྱས་ན། གཉིས་སྤངས་མཁའ་

― GTD003_Page_0800 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་དབུས་དག་ཏུ། །དྲན་ཤེས་རྒྱ་ཡིས་བཅིངས་བྱས་ན། །ཞེས་པས་རིམ་པ་དང་པོ་བསྟན། བདེ་ཆེན་འོད་གསལ་ཉིན་བྱེད་འཆར། །ཞེས་པས་རིམ་པ་གཉིས་པའི་དཔེའི་འོད་གསལ་དང་རིམ་པ་བཞི་པའི་དོན་གྱི་འོད་གསལ་གཉིས་ཀ་བསྟན། ཉིན་བྱེད་དེ་ཡི་འོད་ཟེར་གྱིས། །བཅུ་ཕྲག་བཅུ་དང་བཅུ་གཉིས་ཀྱི། །རྒྱན་གྱིས་སྤྲས་པའི་ལྷ་བུ་འབྱུང། །ཞེས་པས་རིམ་པ་གསུམ་པའི་སྒྱུ་ལུས་བསྟན། སྔ་མའི་འོད་གསལ་ཞེས་པ་དེས་དཔེ་དང་དོན་གྱི་འོད་གསལ་རྐྱང་པ་ཙམ་མ་ཡིན་པར་ཟུང་འཇུག་གི་ཡར་གྱུར་པའི་འོད་གསལ་ཀྱང་བསྡུས་ལ། ལྷ་བུ་འབྱུང་ཞེས་པས་ཀྱང་རིམ་པ་གསུམ་པའི་སྒྱུ་ལུས་ཁོ་ན་མ་ཡིན་པར། ཟུང་འཇུག་གི་ཡར་གྱུར་པའི་སྒྱུ་མའི་སྐུའང་བསྡུས་པས། གཉི་ག་བསྡོམས་ནས་རིམ་པ་ལྔ་པ་རྫོགས་པར་བསྟན་ཏེ། དེ་ལྟར་ན་ཚིགས་བཅད་དེ་རྣམས་ཀྱིས་རིམ་པ་ལྔ་ག་གསལ་བར་གསུངས་པ་ཡིན་ནོ། །དེའང་རིམ་པ་དང་པོར་རྡོ་རྗེའི་བཟླས་པའི་རིམ་པ་ཞེས་གསུངས་པ་ནི། རྒྱུད་འདི་ལས་རླུང་དབུ་མར་འཇུག་བྱེད་ཀྱི་གཙོ་བོ་རྡོར་བཟླས་ལ་བྱས་ཏེ་དེ་ཉིད་རྩལ་དུ་བཏོན་ནས་གསུངས་པའི་རྒྱུ་མཚན་གྱིས་སྲོག་རྩོལ་སྤྱི་ལ་བྱེ་བྲག་རྡོར་བཟླས་ཀྱི་མིང་སྦྱར་ནས་གསུངས་པ་ཡིན་གྱི། རྡོར་བཟླས་ཁོ་ནར་མ་ངེས་ཏེ། གོང་དུ། སྔགས་ལ་ངེས་རྟོག་ལུས་ཀྱི་ནི། །ཞེས་པའི་དོན། འདུས་པ་འཕགས་ལུགས་ཀྱིས་བསྐྱེད་རིམ་ཕྲ་མོ་བསྒོམ་པ་དང་འབྲེལ་ཆེ་ཞིང་སྐྱེ་སླ་བའི་རྒྱུ་མཚན་གྱིས་ཐོག་མར་གསང་བའི་རྩ་འཁོར་རམ་དྷུ་ཏཱིའི་མར་སྣེ་ལ་གནད་དུ་བསྣུན་པས་ལུས་དབེན་བསྒོམས་ནས་དེ་རྗེས་སྙིང་གར་

― GTD003_Page_0801 ―

^{[མ་དཔེ་གཟིགས་ན་འདིར་གནོན།]}

[Full Size]

གནད་དུ་བསྣུན་པས་ངག་དབེན་སྲོག་རྩོལ་གྱི་རིམ་པ་སྒོམ་པར་བྱེད་པའི་ཕྱིར་རོ། །དེའང་གཉིས་སྤངས་མཁའ་དབྱིངས་ཞེས་པ་ནི། ལུས་ལ་རྩ་བདུན་ཁྲི་ཉིས་སྟོང་ཡོད་ཀྱང་ཚུར་བསྡུས་ན་གནས་ཉེར་བཞིའི་གྲངས་ཀྱི་རྩ་ཉེར་བཞི་དང་། དེ་བསྡུས་ན་སྙིང་གའི་ཐུན་ཚོད་ཀྱི་རྩ་བརྒྱད་དང་། དེའང་བསྡུས་ན་དབུ་མ་རོ་རྐྱང་གསུམ་དུ་འདུ་ལ། རོ་རྐྱང་གཉིས་ནི་ཁམས་དཀར་དམར་ཤས་ཆེར་འབབ་ཚུལ་དང་། ཆགས་སྡང་གི་ཀུན་རྟོག་གི་རླུང་རྒྱུ་ཚུལ་གྱི་སྒོ་ནས་ཟླ་ཉིའི་སྒྲས་བཤད་ཅིང་། དབུ་མ་ནི་འོད་གསལ་འཆར་བའི་གནས་ཡིན་པ་དང་། གཞན་གཉིས་ཉི་ཟླར་བཤད་པའི་ཟླས་དྲངས་ནས་སློང་བྱེད་དང་བྲལ་བའི་ནམ་མཁའི་དབྱིངས་ཀྱི་སྒྲས་བསྟན་པ་ཡིན་ཏེ། ས་ར་ཧས། ཉི་མ་ཟླ་བ་འཇུག་པ་མེད་གྱུར་པ། །མི་ཤེས་པ་དག་གནས་དེར་སེམས་ནི་དབུགས་ཕྱུངས་ཤིག །ཅེས་དང་། ཇོ་བོ་རྗེའི་ཆོས་ཀྱི་གླུ་ལས། ཉི་མ་ཟླ་བའི་དྲ་བ་འཇོམས། །གཞན་དུ་ནམ་མཁའ་ཆེན་པོའི་སྒོར། །བྷཻ་རམྦྷ་ནི་འཇུག་མི་འགྱུར། །ཞེས་གསུངས་པ་བཞིན་ནོ། །ཡང་ན་གཉིས་སྤངས་ཞེས་པ་དབུ་མ་དང། མཁའ་དབྱིངས་ཞེས་པ། རྩ་རྣམས་ཀུན་གྱི་ནམ་མཁའ་ཆེ། །ཞེས་པ་ལྟར་དེའི་སྦུབས་ལ་བྱས་ཀྱང་རུང་ངོ་། །དེའང་དབུ་མ་རོ་རྐྱང་གསུམ་སྤྱི་བོ་ནས་གསང་བའི་བར་ལ་ཟངས་ཐལ་དུ་ཡོད་ཀྱང་། གནས་གང་བྱུང་ནས་རོ་རྐྱང་གི་རླུང་དབུ་མར་གཞུག་མི་ནུས་པས། གདན་རྩ་འཁོར་ཡོད་ས་རེ་ལ་གནད་དུ་བསྣུན་དགོས་ཏེ། རིམ་ལྔ་

― GTD003_Page_0802 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་སྒྲོན་ལས། དྷུ་ཏཱི་ལ་རོ་རྐྱང་གིས་ལུ་གུ་རྒྱུད་དུ་འཁྱུད་པས་ལུས་ཀྱི་གནད་གང་ན་ཡོད་པའི་གནས་དེར་རོ་རྐྱང་གི་རླུང་དྷུ་ཏཱིར་འཛུད་པའི་སྒོ་རེ་ཡོད་དོ། །ཞེས་གསུངས་པའི་ཕྱིར། འདིར་གནད་དུ་བསྣུན་པའི་ཡུལ་རྩ་འཁོར་གཅིག་ཁོ་ནར་མ་ངེས་པ་ལ་དགོངས་ནས། དབུས་དག་ཅེས་སྨོས་པ་ཡིན་ཏེ། དག་ཅེས་པ་ནི་སྒྲའི་བསྟན་བཅོས་ལས་གཉིས་ཀྱི་ཚིག་ཏུ་བཤད་ཀྱང་། སྨྲ་སྒོ་ལས། དག་དང་རྣམས་ནི་མང་པོའི་ཚིག །ཅེས་པ་ལྟར། བོད་སྐད་དུ་དེ་དག་ཅེས་པ་དང་དེ་རྣམས་ཞེས་པ་མང་ཚིག་ཏུ་འགྱུར་བ་ཁྱད་པར་ཆེར་མེད་པས། འདིར་ཡང་དེ་བཞིན་བྱའོ། །དེའི་རྒྱུ་མཚན་ནི་བླ་མའི་རྣལ་འབྱོར་འདི་ཉིད་རྒྱུད་གཅིག་ཁོ་ནའི་ལུགས་སུ་ཁ་ཚོན་གཅོད་མི་དགོས་པར། རྒྱུད་གང་ཉམས་སུ་ལེན་ཡང་དེའི་བོགས་འདོན་བྱེད་དུ་སྦྱར་ཏེ་སོ་སོའི་ལུགས་བཞིན་ཉམས་སུ་བླངས་པས་ཆོག་ལ། རྒྱུད་དང་གྲུབ་ཆེན་སོ་སོའི་ལུགས་ཀྱིས་ཐོག་མར་རྩ་འཁོར་གང་ལ་གནད་དུ་བསྣུན་པའི་བཞེད་ཚུལ་མི་འདྲ་བ་དུ་མ་ཡོད་པའི་ཕྱིར་ཏེ། འདུས་པ་ལུགས་གཉིས་ལས་འཕགས་ལུགས་ཀྱིས་སྔར་བཤད་པ་ལྟར། དང་པོར་གསང་གནས་དང་། དེ་ནས་སྙིང་གར་གནད་དུ་བསྣུན་པར་བཞེད། ཡེ་ཤེས་ཞབས་ལུགས་ཀྱིས་དང་པོར་སྙིང་ག །དེ་ནས་གསང་གནས། དེ་ནས་ཡང་སྙིང་གར་གནད་དུ་བསྣུན་པར་བཤད། བདེ་མཆོག་ལཱུ་ཨི་པ་དང་ནག་པོ་པའི་ལུགས་ཀྱིས་ཐོག་མར་ལྟེ་བའི་རྩ་འཁོར་དང་། དྲིལ་བུ་ལུགས་ཀྱིས་སྙིང་གའི་རྩ་འཁོར་ལ་བསྣུན་པར་བཞེད།

― GTD003_Page_0803 ―

^{[མ་དཔེ་གཟིགས་ན་འདིར་གནོན།]}

[Full Size]

གཤེད་སྐོར་དང་འཁོར་ལོ་ཆེན་པོ་སོགས་ལ་ཐོག་མར་ལྟེ་བ་དང་། མཚོ་སྐྱེས་ཀྱི་ཀྱེ་རྡོར་སྒྲུབ་ཐབས། མཧཱ་མ་ཡའི་རྒྱུད་སོགས་སུ་སྙིང་གར་བསྣུན་པ་དང་པོར་བྱས། དུས་འཁོར་ལས་གཟུགས་སྒྲུབ་ཀྱི་ཡན་ལག་སོར་བསམ་གཉིས་ཀྱི་དང་པོར་དྷུ་ཏཱིའི་ཡར་སྣེ་ལ་དམིགས་པ་གཏད་ནས་སྦྱོང་བ་སོགས་མི་འདྲ་བ་དུ་མ་ཡོད་ལ། དེ་དག་གང་ཡིན་ཀྱང་བླ་མའི་རྣལ་འབྱོར་གྱི་མན་ངག་འདི་དང་སྦྲགས་ནས་བྱར་རུང་བ་ལ་ཁྱད་པར་མེད་དོ། །ཡང་ན་མན་ངག་འདིའི་རྩ་བའི་གཞུང་ནི་པཎ་ཆེན་ཐམས་ཅད་མཁྱེན་པའི་བླ་མ་མཆོད་བའི་ཆོ་ག་ཡིན་ལ། དེར། སྙིང་གའི་འདབ་བརྒྱད་དྷུ་ཏཱིའི་དབུས་དག་ཏུ། །ཞེས་ཐོག་མ་ནས་སྙིང་གར་གནད་དུ་བསྣུན་པའི་དབང་དུ་མཛད་པ་ཡིན་པས། དག་ཅེས་པ་རྩ་འཁོར་སོ་སོ་ལ་སྦྱོར་མི་དགོས་པར་ཚིག་རྒྱན་ཙམ་དུ་འགྲོ་ལ། འདིའང་དེ་དང་མཐུན་པར་བཀྲལ་ཆོག་སྟེ། སྔར་འཕགས་ལུགས་བཞིན་དང་པོ་འོག་སྒོར་གནད་དུ་བསྣུན་པར་གསུངས་པ་སྐྱེ་སླ་བའི་རིམ་པ་ཙམ་ལས། མཐའ་གཅིག་ཏུ་ངེས་བཟུང་མ་ཡིན་པའི་ཕྱིར་ཏེ། རིམ་ལྔ་གསལ་སྒྲོན་ལས། ལུས་དབེན་གཞན་དུ་ཐ་སྙད་མེད་ཀྱང་དོན་ཡོད་ན་འདྲ་བ་དང་། དོན་མེད་ཀྱང་མི་འགལ་བའི་རྒྱུ་མཚན་དུ་འདིར་བཤད་པ་སྙིང་གར་སྡུད་སླ་བའི་གོ་རིམ་དུ་ཤེས་པར་བྱ། ཞེས་གསུངས་པའི་ཕྱིར་དང་། ཐོག་མ་ནས་སྙིང་གར་གཏོད་པའི་རྒྱུད་དང་གྲུབ་ཆེན་གྱི་བཞེད་སྲོལ་ཚད་ལྡན་མང་ཚུལ་སྔར་བཤད་པ་བཞིན་ཡིན་པའི་ཕྱིར་རོ། །

― GTD003_Page_0804 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར། གཉིས་སྤངས་མཁའ་དབྱིངས་དབུས་དག་ཏུ། །དྲན་ཤེས་རྒྱ་ཡིས་བཅིངས་ཞེས། དྲན་ཤེས་བཞིན་གྱིས་གང་དུ་དམིགས་པ་གཏོད་པའི་ཡུལ་གྱི་རྩ་འཁོར་ཙམ་བཤད་ཀྱང་གང་ལ་བཅིངས་པའི་དམིགས་རྟེན་དངོས་གཞི་མ་བཤད་པའང་། བླ་མཆོད་ཆོ་གར། མགོན་ཁྱོད་ཞབས་སེན་བཀོད་པ་ལས་བྱུང་བ། །ཞེས་གསུངས་པ་དང་སྦྱོར་དགོས་ཏེ། ནང་དུ་དམིགས་པ་གཏོད་པ་ལ་དམིགས་རྟེན་མ་ནོར་བ་ཞིག་གཙོ་ཆེ་ཞིང་། དམིགས་རྟེན་སྣ་ཚོགས་གསུངས་པའི་ནང་ནས་ཀྱང་བླ་མའི་སྐུ་ལ་དམིགས་རྟེན་བྱེད་པ་ནི་བྱིན་རླབས་ཀྱི་གནད་ཀྱིས་གཞན་ལས་ཁྱད་པར་དུ་འཕགས་པས། འདིའི་སྔོན་འགྲོ་སྨིན་བྱེད་བསྐྱེད་རིམ་གྱི་སྐབས་ནས་བླ་མ་དང་རང་སེམས་དབྱེར་མེད་དུ་བྱེད་པར་གསུངས་པའི་ཤུགས་ཀྱིས་འགྲུབ་པའི་ཕྱིར། རྒྱུད་སོ་སོས་དམིགས་རྟེན་མི་འདྲ་བ་གསུངས་ཚུལ་ནི། མངོན་བརྗོད་བླ་མ་ལས་ཐིག་ལེ་དང་། སྡོམ་འབྱུང་ལས་ཧཱུཾ་ཡིག་དཀར་པོ་ལ་དམིགས་པར་གསུངས། རྡོ་རྗེ་ཕྲེང་བ་ལས་ཨ་ཡིག་དང་ཧཱུཾ་ཡིག་གང་རིགས་ལ་དམིགས་པར་གསུངས་ཀྱང་ཐིག་ལེ་དངོས་སུ་མ་གསུངས་ལ། སྒྲོན་གསལ་ལས་ལེའུ་གསུམ་པར། ནམ་མཁའི་དབྱིངས་ཀྱི་དབུས་གནས་པར། །ཟླ་བའི་ཞེས་སོགས་དཀྱིལ་འཁོར་བཞི་བྲི་བར་གསུངས་པའི་ངེས་དོན་དང་། ལེའུ་དྲུག་པར་ནམ་མཁའི་དབྱིངས་ཀྱི་དབུས་སུ་དཀྱིལ་འཁོར་བཞི་བསྒོམ་པར་གསུངས་པའི་དོན་འཆད་པ་ན། ནམ་མཁའི་དབྱིངས་མི་ཤིགས་པའི་ཐིག་ལེ་དང་། དཀྱིལ་འཁོར་

― GTD003_Page_0805 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་འབྱུང་བཞིའི་རླུང་བཞི་ལ་བྱས་ནས། མི་ཤིགས་པའི་ཐིག་ལེ་དང་དེའི་དབུས་སུ་རྡོར་ཕྲེང་ལྟར་གྱི་ཡི་གེ་གཉིས་ཀ་བསྒོམ་པར་གསུངས། དེ་དག་ལ་བརྟེན་ནས་པཎ་ཆེན་ཐམས་ཅད་མཁྱེན་པ་བློ་བཟང་ཡེ་ཤེས་ཀྱིས་རྡོ་རྗེ་འཛིན་པ་བློ་བཟང་རིག་གྲོལ་ལ་གནང་བའི་ཁྲིད་རྒྱུན་དུ་བླ་མའི་ཐུགས་ཀར་ཨ་ཐུང་བསྒོམས་ནས་དེ་ལ་གཙོ་བོར་སེམས་འཛིན་པར་བྱེད་ཀྱང་། དེ་མཐའ་གཅིག་ཏུ་དགོས་པའི་ངེས་པ་མེད་དེ་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོའི་བླ་མཆོད་ཊཱིཀྐ་ལས། སྤྱིར་དམིགས་པའི་གནད་མ་འཕྱུགས་ན་ཡི་གེ་དང་སྐུ་དང་ཐིག་ལེ་གང་ལ་སེམས་བཟུང་ཡང་དོན་འདྲ་བར་གསུངས་ཞེས་པ་ལྟར་ཡིན་པས། པཎ་ཆེན་དེ་ཉིད་ནས་བླ་མ་དོན་ཡོད་མཁས་གྲུབ་པར་གནང་བའི་ཁྲིད་རྒྱུན་དུ་བླ་མའི་སྐུ་རྐྱང་པར་དམིགས་པ་མ་གཏོགས། ཨ་ཡིག་བསྒོམ་པ་ཟུར་དུ་མི་འབྱུང་ངོ་། །བླ་མའི་སྐུ་གཅིག་པུ་བསྒོམ་པ་ལ་ཤིན་ཏུ་ཕྲ་བའི་རླུང་སེམས་མི་ཤིགས་པའི་ཐིག་ལེ་དང་བཅས་པར་གནད་དུ་བསྣུན་པའི་དོན་ཚང་ཚུལ་ནི། ཀུན་མཁྱེན་འཇམ་དབྱངས་བཞད་པའི་རྡོ་རྗེས་འཇིགས་བྱེད་རྫོགས་རིམ་ལས་གསུངས་པ་ལྟར། དེའི་གདན་གྱི་ཐིག་ལེ་གཉིས་མི་ཤིགས་པའི་ཐིག་ལེ་དཀར་དམར་དང་། བླ་མའི་སྐུ་ཤིན་ཏུ་ཕྲ་བའི་རླུང་སེམས་ཀྱི་ངོ་བོར་གསུངས་ལ། སྲོག་འཛིན་གྱི་རང་མདངས་དཀར་པོ་ཡིན་པས། དེའི་ཚེ་བླ་མའི་སྐུའི་ཁ་དོག་ཀྱང་དཀར་པོར་བྱེད་དགོས་པར་སྐྱབས་མགོན་རྡོ་རྗེ་འཆང་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོས་གསུངས་སོ། །དེ་

― GTD003_Page_0806 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟར་གནད་བཞིའི་ནང་ནས་ཤིན་ཏུ་གལ་ཆེ་བ་དམིགས་པའི་གནད་ཁྱད་པར་ཅན་བླ་མའི་སྐུ་ལ་དམིགས་ཏེ་རླུང་འབྱུང་འཇུག་གནས་གསུམ་རྡོ་རྗེ་གསུམ་གྱི་རང་གདངས་སུ་བྱེད་པའི་རྡོ་རྗེའི་བཟླས་པའི་སྒོ་ནས་སྲོག་ཐུར་གཉིས་སྙིང་གར་བསྲེ་བར་བྱེད་པ་ནི་རྒྱུད་སྡེ་ཀུན་གྱི་ནང་ནས་ཁྱད་པར་དུ་དཔལ་གསང་བ་འདུས་པས་རྩལ་དུ་བཏོན་ཏེ་གསུངས་པའི་མན་ངག་གི་སྙིང་པོ་ཆེས་ཤིན་ཏུ་གསང་བའི་མཐར་ཐུག་པ་ཡིན་ཏེ། རྡོར་ཕྲེང་ལས། གསང་བ་མཆོག་ཏུ་གསང་བ་ཡི། །སྦས་པའི་དོན་ནི་ཁྱོད་འདྲི་བ། །རྒྱུད་རྣམས་ཀུན་ཏུ་མ་གསུངས་པ། །རབ་ཏུ་བཤད་ཀྱིས་ཉན་པར་གྱིས། །ཐུགས་ཀྱི་ས་བོན་བདག་པོ་སྟེ། །ཀུན་གྱི་ནང་ནས་རྣམ་རྟོག་མེད། །གང་ཕྱིར་གཙོ་བོ་གཞན་རྣམས་ནི། །འགྲིབ་དང་དེ་བཞིན་འཕྲོག་པར་བྱེད། །ཅེས་དང་། རིམ་ལྔ་གསལ་སྒྲོན་ལས། གསང་བ་ལས་ཀྱང་ཆེས་གསང་བའི་གནས་རྒྱུད་གཞན་དུ་སྦས་པ་ཡིན་པས། ཞེས་པ་ནས། སྙིང་གའི་རྩ་མདུད་གྲོལ་བའི་དྷུ་ཏཱིའི་ནང་དུ་རླུང་བསྲེ་བ་བདག་པོ་ཡིན་ཏེ། རྒྱུ་མཚན་གང་གི་ཕྱིར་ན། སྙིང་གའི་རྩ་མདུད་གྲོལ་བ་ལ་རྣམ་རྟོག་མེད་པ་སྟེ་གཅོད་པར་བྱེད་པའི་མཆོག་ཡིན་པས། ཞེས་གསུངས་པའི་ཕྱིར། དེས་ན་མན་ངག་འདི་ཉིད་དུ། གསང་བ་ལས་ཀྱང་ཆེས་གསང་བའི། །མན་ངག་གནད་ཀྱི་དོན་པོ་ནི། །ཞེས་གསུངས་པ་དེ་གདམས་བའི་ཆེ་བ་འདོན་པའི་འུད་དང་རྟོག་བཟོ་མ་ཡིན་པར་རྒྱལ་བ་རྡོ་རྗེ་འཆང་གིས་གསུངས་པ་བཞིན་གྱི་ཆེ་བ་བརྗོད་པར་སྣང་ངོ་། །དེ་ལྟ་བུའི་རྡོ་རྗེའི་བཟླས་པའི་རིམ་པ་དེ་ལ་བརྟེན་ནས་སེམས་དབེན་གྱི་རིམ་པ་

― GTD003_Page_0807 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་ཚུལ་ནི། བདེ་ཆེན་འོད་གསལ་ཉིན་བྱེད་འཆར། །ཞེས་པས་བསྟན་ལ། འོན་ཀྱང་འདི་དཔེའི་འོད་གསལ་ཁོ་ན་ལ་མི་བྱེད་དེ། དཔེ་དོན་གྱི་འོད་གསལ་གཉིས་ཀ་ཡུལ་སྟོང་ཉིད་མངོན་སུམ་དུ་རྟོགས་མ་རྟོགས་ཀྱི་ཁྱད་པར་ཡོད་ཀྱང་། སྡུད་རིམ་གཉིས་ཀྱི་སྒོ་ནས་སྟོང་པ་གསུམ་རིམ་གྱིས་མངོན་དུ་བྱས་ཏེ། མཐར་ཐམས་ཅད་སྟོང་པ་འོད་གསལ་གྱི་ཚེ་འཆར་བ་འདྲ་བས། འདིར་དཔེ་དོན་གྱི་འོད་གསལ་དེ་གཉིས་ཀ་ཕྱོགས་གཅིག་ཏུ་བསྡོམས་ནས་གསུངས། དེ་བཞིན་དུ་དཔེའི་འོད་གསལ་གྱིས་ལྷན་ཅིག་བྱེད་རྐྱེན་དང་། དེའི་བཞོན་པའི་རླུང་གིས་ཉེར་ལེན་བྱས་ཏེ། འོད་གསལ་དེ་ལས་ལངས་པའི་སྐད་ཅིག་གཉིས་པར་མ་དག་པའི་སྒྱུ་མའི་སྐུར་བཞེངས་པ་དང་། རིམ་པ་བཞི་པའི་དོན་གྱི་འོད་གསལ་དེས་ལྷན་ཅིག་བྱེད་རྐྱེན་དང་། དེའི་བཞོན་པའི་རླུང་གིས་ཉེར་ལེན་བྱས་པ་ལ་བརྟེན་ནས་དག་པའི་སྒྱུ་མའི་སྐུར་ལྡང་བ་གཉིས་ཀ་ངོ་བོ་མཆོག་དམན་ཡོད་ཀྱང་རླུང་སེམས་ཙམ་ལས་བཞེངས་ཚུལ་འདྲ་བས་འདིར་ཕྱོགས་གཅིག་ཏུ་བསྡོམས་ནས་གསུངས། དེར་མ་ཟད་སློབ་པ་མཐའི་དོན་གྱི་འོད་གསལ་ལས་མི་སློབ་པའི་ཟུང་འཇུག་ཁ་སྦྱོར་ཡན་ལག་བདུན་ལྡན་ཟུང་འཇུག་རྡོ་རྗེ་འཆང་གི་སྐུར་བཞེངས་པའི་ཚུལ་ཡང་འདིའི་ཁོངས་སུ་བསྡུས་པར་ཤེས་ན་གསང་སྔགས་རྡོ་རྗེ་ཐེག་པའི་ལམ་འབྲས་བུ་དང་བཅས་པའི་གནད་ཆ་ཚང་བར་སྟོན་པའི་ལེགས་བཤད་ཆེན་པོར་འགྱུར་རོ། །འོད་གསལ་གྱི་སྔོན་དུ་རྗེས་གཞིག་དང་རིལ་འཛིན་གྱི་

― GTD003_Page_0808 ―

^{[མ་དཔེ་གཟིགས་ན་འདིར་གནོན།]}

[Full Size]

སྒོ་ནས་སྡུད་ཚུལ། དེའི་སྟོབས་ཀྱིས་སྟོང་པ་བཞིའམ། ཐམས་ཅད་སྟོང་པ་ཉེར་ཐོབ་ཏུ་བསྡུས་པའི་སྟོང་པ་གསུམ་རིམ་གྱིས་འཆར་ཚུལ། དེ་དག་གི་ཚེ་རགས་པ་ཐིམ་རིམ་དང་། དེའི་རྟགས་འབྱུང་ལུགས། དེ་ཐམས་ཅད་ལ་ལྟ་བས་རྒྱས་གདབ་ཅིང་དགའ་བཞི་རིམ་གྱིས་དྲངས་ཏེ་བདེ་སྟོང་སྦྱོར་ཚུལ་འོད་གསལ་དེ་ལས་སྒྱུ་མའི་སྐུར་ལྡང་ཚུལ་དང་། དེ་དཔེ་བཅུ་གཉིས་ཀྱིས་མཚོན་ལུགས། མ་དག་པའི་སྒྱུ་ལུས་དེ་དོན་གྱི་འོད་གསལ་གྱིས་སྤྱོད་ཚུལ། ཉོན་སྒྲིབ་ཟད་པར་སྤངས་པའི་སྤངས་པ་ཟུང་འཇུག་དང་དག་པའི་སྒྱུ་མའི་སྐུ་མཉམ་དུ་ཐོབ་ཚུལ། སླར་ཡང་དོན་གྱི་འོད་གསལ་མངོན་དུ་བྱས་ཏེ་ཟུང་འཇུག་གི་གཙོ་བོ་བདེན་གཉིས་དབྱེར་མེད་ཟུང་འཇུག་འགྲུབ་ལུགས། དེ་ནས་སྔར་མ་བསླབ་པའི་ལམ་ལ་གསར་སློབ་མེད་ཀྱང་། བསླབ་ཟིན་གོམས་པར་བྱེད་པ་ཡོད་ལ། དེའི་མཐར་ཕྱི་ནང་གི་མངོན་བྱང་གཉིས་སྦྱར་ཏེ་མི་སློབ་པའི་ཟུང་འཇུག་མངོན་དུ་བྱེད་ལུགས་སོགས་ཀྱི་གནད་ཕྲ་ཞིང་ཞིབ་པ་རྣམས་ནི་བདག་ལྟ་བུའི་སྤྱོད་ཡུལ་མ་ཡིན་ཞིང་ཤིན་ཏུ་གསང་བའི་གནས་ཡིན་ལ། ཉུང་ངུའི་ཚིག་ཙམ་གྱིས་མཚོན་པར་ཡང་མི་ནུས་པས། རྗེ་བླ་མའི་གསུང་རབ་རྒྱ་མཚོ་ལྟ་བུ་ལས་བཙལ་བར་བྱའོ། །འདིར་དངོས་ཟིན་གྱི་ཚིག་དོན་ཙམ་རེ་བརྗོད་ན། ཉིན་བྱེད་དེ་ཡི་འོད་ཟེར་གྱིས། །ཞེས་པས་སྒྱུ་ལུས་འགྲུབ་ཚུལ་དང་། ལྷག་མས་སྒྱུ་ལུས་ཀྱི་ཁྱད་ཆོས་བསྟན་པ་ཡིན་ལ། དེའང་འོད་གསལ་ཉི་མ་དང་། སྒྱུ་ལུས་དེའི་འོད་ཟེར་ལ་དཔེ་སྦྱར་ནས་བཤད་པ་མ་ཡིན་གྱི། འོད་ཅེས་པ་སྒྱུ་མའི་སྐུའི་ཉེར་

― GTD003_Page_0809 ―

^{[མ་དཔེ་གཟིགས་ན་འདིར་གནོན།]}

[Full Size]

ལེན་དུ་གྱུར་པའི་འོད་གསལ་གྱི་བཞོན་པའི་རླུང་འོད་ཟེར་ལྔ་པ་དེ་ཉིད་ལ་བྱེད་དགོས་ཏེ། རིམ་ལྔ་ལས། རང་བཞིན་བཅས་འོད་དེ་དང་དེ། །རྣམ་ཤེས་རླུང་དང་ལྡན་པ་ནི། །བདག་བྱིན་བརླབ་པའི་རིམ་གྱིས་ཀྱང། །སེམས་ཅན་དོན་དུ་ལན་འགའ་འགྱུར། །ཞེས་གསུངས་པ་ལྟར་རོ། །སྒྱུ་མའི་སྐུའི་དངོསཀྱི་ཉེར་ལེན་སྟོང་པ་གང་གི་བཞོན་པའི་རླུང་གིས་བྱེད་ཚུལ་ནི། ལག་སྨི་དང་རྗེ་འགོས་སོགས་སྤྱོད་བསྡུས་ཀྱི་དགོངས་པར་བྱས་ཏེ་ལུགས་ཟློག་གི་སྣང་བ་གསུང་བའི་བཞོན་པར་གྱུར་པའི་རླུང་ལ་བཞེད་ཅིང་། སྔགས་རིམ་དང་དབང་དོན་སོགས་སུའང་དེ་དང་སྒོ་བསྟུན་པའི་བཤད་པ་མཛད་དོ། །འོན་ཀྱང་རྗེ་རང་གི་བཞེད་པ་མཐར་ཐུག་པ་ནི་རིམ་ལྔ་གསལ་སྒྲོན་ལྟར་འོད་གསལ་གྱི་མཇུག་ཐོགས་དེ་མ་ཐག་ཏུ་སྒྱུ་མའི་སྐུ་གཉིས་འགྲུབ་དགོས་པས། རང་ལུགས་ནི་དེའི་བཞོན་པའི་རླུང་ལ་བྱའོ། །དེ་ནས་སྒྱུ་མའི་སྐུའི་ཁྱད་ཆོས་སྟོན་པ་ལ། བཅུ་ཕྲག་བཅུ་དང་བཅུ་གཉིས་ཀྱི། །རྒྱན་གྱིས་སྤྲས་པའི་ལྷ་བུ་འབྱུང། །ལྷ་བུ་དེ་ཡི་འོད་སྣང་གིས། །མཁའ་དབྱིངས་ཡོངས་སུ་འགེང་བར་བྱེད། །འོན་ཀྱང་འཇིག་རྟེན་མེས་པོ་སོགས། །མཐུ་ཆེན་གྱིས་ཀྱང་མི་མཐོང་ན། །སྐྱེ་བོ་ཕལ་བས་མཐོང་རེ་སྐན། །ཞེས་གསུངས་ཤིང་། ཚིགས་བཅད་འདི་དག་ནི་འདུས་པའི་རྩ་རྒྱུད་ལེའུ་བཅུ་གཉིས་པར། རྡོ་རྗེ་འཇམ་པ་འདྲ་བར་འགྱུར། །དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འབར་བའི་འོད་དག་གི །རྒྱན་རྣམས་ཀུན་གྱིས་བརྒྱན་པ་ཡི། །དག་པའི་བདག་

― GTD003_Page_0810 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་སྣང་བར་འགྱུར། །ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་སོ། །ཞེས་པའི་ཚིགས་བཅད་འདི་དག་བཀོད་པར་སྣང་ལ། རྒྱུད་ཀྱི་སྐབས་འདིར་དངོས་སུ་གསུང་རྒྱུའི་སྒྱུ་ལུས་ནི་མ་དག་པའི་སྒྱུ་མའི་སྐུ་ཡིན་ཏེ། དེའི་མཇུག་ཐོགས་ཉིད་དུ། རྡོ་རྗེ་མི་ཕྱེད་གསུམ་ལས་བྱུང། །ཞེས་པ་ནས་། རྡོ་རྗེ་འཇམ་པའི་འོད་འདྲ་བར། །དེ་མ་ཐག་ཏུ་དེ་འགྱུར་རོ། །ཞེས་འོད་གསལ་དུ་བཅུག་ནས་དག་པའི་སྒྱུ་མའི་སྐུའི་ངོ་བོར་འགྱུར་དགོས་པར་གསུངས་པའི་ཕྱིར་ཏེ། སྒྲོན་གསལ་ལས། སྒྱུ་མའི་སྐུ་འདི་ཉིད་འོད་གསལ་བས་རྣམ་པར་སྦྱངས་པས་བསྒྲུབ་པར་བྱ་བའི་ཕྱིར། རྡོ་རྗེ་མི་ཕྱེད་ཅེས་བྱ་བ་ལ་སོགས་པ་གསུངས། ཞེས་སོ། །འོན་ཀྱང་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོའི་བླ་མཆོད་ཊཱིཀྐར་ཟུང་འཇུག་གི་དག་པའི་སྒྱུ་མའི་སྐུའི་ཁྱད་ཆོས་སྟོན་བྱེད་དུ་ལུང་དེ་དག་དྲངས་པ་ནི། དེར་གསུངས་པའི་ཁྱད་ཆོས་རྣམས་དག་མ་དག་གི་སྒྱུ་ལུས་གཉིས་ཀ་ལ་ཚང་ཚུལ་ཆ་འདྲ་བའི་རྒྱུ་མཚན་གྱིས་ཡིན་ཏེ། རྩ་རྒྱུད་ལེའུ་བཅོ་ལྔ་པར་དག་པའི་སྒྱུ་མའི་སྐུ་གསུངས་པའི་སྐབས་སུའང། རྒྱན་རྣམས་ཐམས་ཅད་ཡོངས་སུ་རྫོགས། །སྤོས་དང་མེ་ཏོག་རྣམས་ཀྱིས་བརྒྱན། །རྡོ་རྗེ་སེམས་དཔའ་མཆོག་བསྒོམ་ན། །གྲུབ་པ་མྱུར་དུ་ཐོབ་པར་འགྱུར། །འདི་ནི་སྐུ་གསུམ་མཆོག་སྦྱིན་པ། །སངས་རྒྱས་མཚན་གྱིས་མཚན་པར་འགྱུར། །དཔག་ཚད་བརྒྱ་ཡི་ཁྱོན་ཙམ་དུ། །དེ་ཡི་འོད་ཀྱིས་སྣང་བར་འགྱུར། །ཞེས་སྒྱུ་མའི་སྐུ་གཉིས་ཀའི་ཡོན་ཏན་ཐུན་མོང་བ་རྣམས་སྟོན་བྱེད་ཀྱི་ཚིག་རིས་ཀྱང་ཕལ་ཆེར་འདྲ་བས་

― GTD003_Page_0811 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་ཀར་སྦྱར་ཆོག་ལ། དག་པའི་སྒྱུ་མའི་སྐུ་ལའང་སློབ་མི་སློབ་ཀྱི་སྐབས་གཉིས་ཡོད་པས། སྤོས་དང་མེ་ཏོག་ཅེས་སོགས་ཀྱིས་བསྟན་པའི་སྟོབས་དང་མི་འཇིགས་པ་རྣམས་དངོས་དང་རྗེས་མཐུན་གྱི་སྒོ་ནས་དེ་གཉིས་ཀར་ཐུན་མོང་དུ་སྦྱོར་དགོས་ལ། དེ་འདྲ་བའི་མན་ངག་གི་གནད་ཕྲ་བ་རྣམས་བླ་མའི་མན་ངག་ལས་ཤེས་དགོས་པའི་རྒྱུ་མཚན་གྱིས་གོང་འོག་དཀྲུགས་པ་དང་། ཕན་ཚུན་བསྲེས་ནས་བཤད་པའི་སྐབས་དུ་མ་ཡོད་པའི་ཕྱིར། རིམ་ལྔ་གསལ་སྒྲོན་ལས། སྟོབས་བཅུ་ལ་སོགས་པ་ཐོབ་པར་གསུངས་པ་ནི་སློབ་པའི་ཟུང་འཇུག་ལ་རྗེས་མཐུན་པ་དང། མི་སློབ་པ་ལ་དངོས་སུ་ཐོབ་པ་སོགས་ཅི་རིགས་པར་སྦྱར་ཏེ་རིམ་ལྔ་དང་སྤྱོད་བསྡུས་སུ་གསུངས་པའི་ཟུང་འཇུག་ལའང། དེ་གཉིས་ཀ་ལ་ཐུན་མོང་དང་སོ་སོར་བཤད་དགོས་པ་ཡོད་དོ། །ཞེས་གསུངས་པའི་ཕྱིར། འདི་འདྲ་བ་རྒྱུད་ཀྱི་ཚིག་རེ་རེའི་དགོངས་པའང་། མདོ་བསྲེ་དང། མདོར་བྱས། སྤྱོད་བསྡུས། སྒྲོན་གསལ་སོགས་ལས། གཅིག་གིས་བསྐྱེད་རེིམ་ལ་སྦྱར་བ་གཅིག་ཤོས་ཀྱིས་རྫོགས་རིམ་ལ་སྦྱར་བ་ལྟ་བུ་མི་འདྲ་བ་མང་དུ་འབྱུང་ཡང། རྡོ་རྗེའི་ཚིག་རེ་རེས་དོན་སྣ་ཚོགས་སྟོན་པས་འགལ་བ་མེད་པར་རྗེ་བླ་མས་ཡང་ཡང་གསུངས་པ་བཞིན་ཤེས་པར་བྱས་ཏེ། ཕྱོགས་གཅིག་ཁོ་ནར་ཞེན་པས་གཞན་རྣམས་དོར་བར་མི་བྱའོ། །བཅུ་ཕྲག་བཅུ་དང་བཅུ་གཉིས་ཀྱི། །རྒྱན་གྱིས་སྤྲས་པ་ཞེས་པས་རྒྱུད་ཀྱི་གོང་འོག་གཉིས་ཀར། རྒྱན་རྣམས་ཐམས་ཅད་ཡོངས་སུ་རྫོགས། །ཞེས་པའི་དོན་

― GTD003_Page_0812 ―

^{[མ་དཔེ་གཟིགས་ན་འདིར་གནོན།]}

[Full Size]

བཤད་པ་ཡིན་ཏེ། ལེའུ་བཅུ་གཉིས་པའི་སྒྲོན་གསལ་ལས། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པས་ན་རྒྱན་རྣམས་ཀུན་གྱིས་བརྒྱན་པ། ཞེས་དང་། བཅོ་ལྔ་པའི་སྒྲོན་གསལ་ལས། རྒྱན་རྣམས་ཐམས་ཅད་ཡོངས་སུ་རྫོགས། །ཞེས་བྱ་བ་ནི་མཚན་ཐམས་ཅད་ཀྱིས་བརྒྱན་པའོ། །ཞེས་གསུངས་པའི་ཕྱིར། དེར་མཚན་བཟང་མ་གཏོགས་དཔེ་བྱད་དངོས་སུ་མ་གསུངས་ཀྱང། དཔེ་བྱད་ནི་གསེར་ཕྲེང་ལྟར་མཚན་གྱི་འཁོར་ཡིན་པས། འདིར་ཁ་བསྐངས་ཏེ་མཚན་སོ་གཉིས་དཔེ་བྱད་བརྒྱད་ཅུ་དང་བཅས་བརྒྱ་དང་བཅུ་གཉིས་གསུངས་པ་ཡིན་ནོ། །ལྷ་བུ་དེ་ཡི་འོད་སྣང་གིས། །མཁའ་དབྱིངས་ཡོངས་སུ་འགེང་བར་བྱེད། །ཅེས་པ་ནི། ལེའུ་བཅུ་གཉིས་པར། དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འབར་བའི་འོད་དག་གི །ཞེས་དང་། བཅོ་ལྔ་པར། དཔག་ཚད་བརྒྱ་ཡི་ཁྱོན་ཙམ་དུ། །དེ་ཡི་འོད་ཀྱང་སྣང་བར་བྱེད། །ཅེས་པ་གཉིས་ཀྱི་དོན་བསྡུས་པ་ཡིན་ལ། དེར་དཔག་ཚད་བརྒྱ་ཞེས་གསུངས་པ་དང་། འདིར་མཁའ་དབྱིངས་ཐམས་ཅད་འགེང་བར་གསུངས་པ་མི་འགལ་ཏེ། སྒྲོན་གསལ་ལས་དཔག་ཚད་བརྒྱ་ཡི་ཁྱོན་ཙམ་དུ་ཞེས་བྱ་བས་ཉེ་བར་མཚན་པའི་དོན་གྱིས་ན་སྟོང་གསུམ་ལ་སོགས་པའི་འཇིག་རྟེན་གྱི་ཁམས་རྣམས་སུ་དེའི་འོད་ཀྱང་སྣང་བར་བྱེད་པར་འགྱུར་རོ། །ཞེས་གསུངས་པའི་ཕྱིར། འོན་ཀྱང་འཇིག་རྟེན་མེས་པོ་སོགས། །མཐུ་ཆེན་གྱིས་ཀྱང་མི་མཐོང་ན། །སྐྱེ་བོ་ཕལ་པས་མཐོང་རེ་སྐན། །ཞེས་རང་དང་ལམ་འདིའི་འཕགས་པ་མ་གཏོགས། དེ་ལས་གཞན་པའི་སོ་སྐྱེ་འཇིག་རྟེན་མེས་པོའམ། ཚངས་པ་སོགས་

― GTD003_Page_0813 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ཀྱང་མཐོང་མི་ནུས་པར་གསུངས་པ་ནི། རྒྱུད་ལས། ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་སོ། །ཞེས་དང་། དེའི་སྒྲོན་གསལ་མཆན་དང་བཅས་པ་ལས། ཚངས་པ་ལ་སོགས་པའི་ལྷ་རྣམས་ཀྱིས་རྣམས་ཀྱང་སྟེ་ནམ་ཡང་མཐོང་བར་མི་ནུས་ན། སོ་སོ་སྐྱེ་བོ་ཕལ་པ་གཞན་དག་གིས་ལྟ་སྨོས་ཀྱང་ཅི་དགོས། ཞེས་གསུངས་པ་དེ་ཉིད་བཀོད་པ་ཡིན་ནོ། །དེར་མ་ཟད་རྒྱུད་ལས་ཚིགས་བཅད་ཀྱི་མཇུག་ཏུ་རྡོ་རྗེ་འཇམ་པ་མཆོག་གི་དམ་ཚིག་མི་སྣང་བ་ཞེས་བྱ་བའི་ཏིང་ངེ་འཛིན་ཏོ། །ཞེས་པས་ཀྱང་དོན་འདི་ཉིད་བསྟན་པ་ཡིན་ཏེ། མི་སྣང་བ་ཞེས་པས་ལུས་དེ་ཉིད་སེམས་དབེན་མན་ཆད་ཀྱི་སོ་སོ་སྐྱེ་བོས་མཐོང་མི་ནུས་པ་དང་། རྡོ་རྗེ་འཇམ་པ་མཆོག་གི་དམ་ཚིག་ཅེས་པས་དེ་དག་ལ་མི་སྣང་བའི་རྒྱུ་མཚན་ཤིན་ཏུ་ཕྲ་བའི་གཉུག་མའི་རླུང་སེམས་ཙམ་ལས་མ་འདས་པའི་ཡིད་ལུས་སུ་བསྟན་པའི་ཕྱིར་ཏེ། འཇམ་པའི་སྐད་དོད་མཉྫུ་ཞེས་པ་ངེས་ཚིག་གིས་བཤད་ན། མཱ་ནཿ སྭ་བྷཱ་ཝེན་ཞེས་པ་ཡིད་ཀྱི་རང་བཞིན་གྱིས་ཞེས་དང་། ཛུཥྱ་ཏེ་ཞེས་པ་བསྟེན་པར་བྱ་བ་ལ་འཇུག་ཅིང་། དམ་ཚིག་ནི་དེ་ལས་མི་འདའ་བ་ལ་བྱེད་པའི་ཕྱིར། སྒྲོན་གསལ་ལས། ཡིད་ཀྱི་རང་བཞིན་གྱིས་བསྟེན་ཅིང་བསྙེན་པ་ཡིན་པས་འཇམ་པའོ། །ཞེས་སོ། །སྤྱིར་བསྐལ་པ་དང་པོའི་མིའི་ལུས་ལའང་ཡིད་ཀྱི་རང་བཞིན་གྱི་ལུས་སུ་རྣམ་བཞག་རིམ་པར་གསུངས་པ་དང་། རྒྱུད་བླ་མར། ཡིད་ཀྱི་རང་བཞིན་ཕུང་པོ་དང། །ཞེས་སོགས་ལྟར། ཉན་རང་དགྲ་བཅོམ་གྱིས་ཀྱང་ཟག་མེད་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་ལེན་པར་བཤད་པ་ཡོད་ཀྱང་འདི་དང་འདྲ་བའི་གནས་མེད་དེ། དེ་དག་ལ་ཡིད་ལུས་སུ་བཤད་པ་གདོས་བཅས་ཀྱི་ཕུང་པོ་རགས་པ་གཞན་ལ་

― GTD003_Page_0814 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟོས་ཏེ་བཞག་པ་ཡིན་གྱི། ལུས་སེམས་གཉིས་ལ་རགས་པ། ཕྲ་བ། ཤིན་ཏུ་ཕྲ་བ་གསུམ་དུ་བྱས་ཏེ། ཆེས་ཕྲ་བ་དེ་ཉིད་ལྷའི་སྐུར་སྒྲུབ་ཚུལ་ཕར་ཕྱིན་ཐེག་པ་དང་རྒྱུད་སྡེ་འོག་མ་གང་ལའང་མེད་པའི་ཕྱིར་། སྤྱོད་བསྡུས་ལས། གང་མདོ་སྡེ་ལ་སོགས་པའི་ཚུལ་ལ་ཞུགས་པ་དང་། བསྐྱེད་པའི་རིམ་པ་ལ་གནས་པའི་སྒོམ་པ་པོ་རྣམས་ཀྱང་ཆོས་ཐམས་ཅད་སྒྱུ་མ་ལྟ་བུ་དང། རྨི་ལམ་ལྟ་བུ་དང་། གཟུགས་བརྙན་ལྟ་བུ་ཞེས་དཔེར་བརྗོད་ཅིང་ལྷག་པར་མོས་ཀྱང་དེ་རྣམས་དཔེས་བདག་ལ་བྱིན་གྱིས་བརླབ་པའི་མན་ངག་ཡེ་ཤེས་ཙམ་གྱི་ཡིད་ཀྱི་རང་བཞིན་གྱི་ལྷའི་སྐུ་རྫོགས་པར་འགྱུར་བ་ཤེས་པར་མི་འགྱུར་རོ། །ཞེས་དེ་དག་གི་སྤྱོད་ཡུལ་མ་ཡིན་པར་གསུངས་པའི་ཕྱིར་རོ། །དེ་ཕྱིར་དེ་ལྟའི་ཚུལ་འདི་ལ། །སྒྱུ་འཕྲུལ་དྲ་བ་ཞེས་སུ་གྲགས། །ཞེས་མཚན་གྱི་རྣམ་གྲངས་བཤད་པ་ནི་སྤྱིར་སྒྱུ་མའི་སྐུ་གཉིས་ཀ་ལ་འཇུག་ཀྱང། གཙོ་བོར་དོན་གྱི་འོད་གསལ་ལས་བཞེངས་པའི་དག་པའི་སྒྱུ་མའི་སྐུ་ལ་བྱ་དགོས་ཏེ། རིམ་ལྔ་ལས། ཇི་ལྟར་དྭངས་པའི་ཆུ་ཀླུང་ལས། །ཉ་དག་མྱུར་དུ་ལྡང་བར་འགྱུར། །དེ་བཞིན་ཐམས་ཅད་སྟོང་གསལ་ལས། །སྒྱུ་འཕྲུལ་དྲ་བ་འབྱུང་བར་བཤད། །ཅེས་གསུངས་པའི་ཕྱིར། དེའང་ལམ་འདིའི་ཆེད་དུ་བྱ་བའི་གདུལ་བྱའི་ཐོབ་བྱ་མཐར་ཐུག་པ་ནི་འོད་གསལ་དང་སྒྱུ་ལུས་ཟུང་དུ་འཇུག་པའི་རྡོ་རྗེ་འཆང་གི་གོ་འཕང་ཡིན་ཀྱང་། གདམས་ངག་འདིར་མཇུག་སྡུད་པ་ན་སྒྱུ་མའི་སྐུ་གཅིག་པུ་སྨོས་ཏེ་བཞག་པ་ལ་དགོས་པ་ཁྱད་པར་ཅན་ཞིག་ཡོད་དེ། ཐེག་ཆེན་རིགས་ཅན་རྣམས་ཀྱི་འདོད་བྱའི་མཐར་ཐུག་པ་གཞན་དོན་ཡིན་ལ། སངས་རྒྱས་ཀྱི་གོ་འཕང་སྒྲུབ་པ་དེའི་ཡན་ལག་ཏུ་ཡིན་པར་མངོན་རྟོགས་རྒྱན་ལས་གསུངས་པ་བཞིན། འདིར་ཡང་སྒྱུ་འཕྲུལ་དྲ་བའི་བཀོད་པ་

― GTD003_Page_0815 ―

^{[མ་དཔེ་གཟིགས་ན་འདིར་གནོན།]}

[Full Size]

མཐའ་ཡས་པའི་སྒོ་ནས་སེམས་ཅན་གྱི་དོན་རྣམས་ཐམས་ཅད་མ་ཚང་བ་མེད་པར་བསྒྲུབ་པ་ནི་འདོད་བྱའི་དོན་གྱི་སྙིང་པོ་མཐར་ཐུག་པར་ཤེས་པའི་ཆེད་དུ་ཡིན་ནོ། །གསུམ་པ་མཇུག་གི་དོན་ནི། ཚུལ་འདི་འཇམ་མགོན་བླ་མ་ཡི། །སྤྱན་བརྒྱུད་མན་ངག་འཛིན་པ་ཡིས། །སྙིང་གི་བུ་ལ་བརྩེ་བས་གདམས། །ཞེས་གསུངས་ཏེ་གོ་སླའོ། །དེ་ལྟར་ལེགས་ཚོགས་ཐམས་ཅད་ཀྱི་གཞི་རྟེན་བླ་མ་སངས་རྒྱས་དངོས་སུ་མཐོང་བའི་མོས་གུས་བཅོས་མ་མ་ཡིན་པས་ལམ་གྱི་རྩ་བ་ཚུགས་པར་བྱས་ལ། བཀའ་དྲིན་རྗེས་སུ་དྲན་པའི་གུས་པ་ཆེན་པོ་བསྐྱེད་དེ་ཅི་གསུང་མཐའ་དག་དང་། ཁྱད་པར་སྐྱེས་བུ་གསུམ་གྱི་ལམ་གྱི་རིམ་པའི་སྒོ་ནས་བགྲོད་ཚུལ་ཇི་ལྟར་གདམས་པ་རྣམས་བཀའ་བཞིན་དུ་བསྒྲུབ་པ་དང་། དེ་ཐམས་ཅད་ཀྱི་ཚེ་བྱང་ཆུབ་བདེ་ལམ་ལས། སྤྱི་བོར་བླ་མ་ལྷ་སྒོམ་བཞིན་པའི་ངང་ནས་ཞེས་དམིགས་སྐོར་རེ་རེ་བཞིན་དུ་གསུངས་པ་ལྟར་བླ་མའི་རྣལ་འབྱོར་དང་སྦྲགས་ནས་བྱེད་ཅིང། རྗེས་ཀྱི་བྱ་བ་ཐམས་ཅད་ཀྱང་བླ་མའི་རྣལ་འབྱོར་དེའི་ཤུགས་ཀྱིས་ཟིན་པའི་སྒོ་ནས་སྒོ་གསུམ་བག་མེད་པའི་ཕྱོགས་སུ་ཅུང་ཟད་ཀྱང་མ་ཤོར་བར་ཆ་མཐའ་དག་ནས་དོན་ལྡན་དུ་འགྱུར་བར་བྱ། དེ་ལྟར་ལམ་ཐུན་མོང་བས་རྒྱུད་སྦྱངས་པ་སྔོན་དུ་བཏང་སྟེ། བླ་མ་རྡོ་རྗེ་འཆང་གི་དྲུང་ནས་སྔགས་ཀྱི་འཇུག་སྒོ་དབང་རྣམ་པར་དག་པ་ནོད་ཅིང། དངོས་གྲུབ་ཀྱི་རྩ་བ་བླ་མའི་བསྟེན་ཚུལ་གཙོ་བོར་གྱུར་པའི་རྩ་བ་དང་ཡན་ལག་གི་དམ་ཚིག་ཚུལ་བཞིན་དུ་བསྲུང་བ་གཞིར་བྱས་པའི་སྟེང་ནས་སྨིན་བྱེད་བསྐྱེད་རིམ་ལ་སློབ་པ་ནའང་། སྔོན་འགྲོ་ཚོགས་བསགས་པ་ནས་བཟུང་བླ་མའི་རྣལ་འབྱོར་དང་སྦྲགས་ནས་བྱ། དེ་རྗེས་རྫོགས་རིམ་ལ་སློབ་པའི་ཚེ་སྙིང་གའི་རྩ་མདུད་

― GTD003_Page_0816 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱེ་བའང་བླ་མའི་བྱིན་རླབས་ཀྱིས་དབྱེ་ཞིང་། རླུང་སེམས་མཐའ་དག་བླ་མའི་བྱིན་རླབས་ཀྱི་མཐུས་ལས་རུང་དུ་བསྒྲུབ་པ་ལ་བརྟེན་ནས་བདེན་པ་གཉིས་ཀྱི་རྫོགས་རིམ་ལ་སོགས་པའི་རྟོགས་པ་ཁྱད་པར་ཅན་རྣམས་རྒྱུད་ལ་སྐྱེས་ཏེ་ཟུང་འཇུག་ནོར་བུའི་གླིང་དུ་བགྲོད་དགོས་པས། མན་ངག་འདིའི་སྟེང་ནས་ལམ་གྱི་ལུས་ཡོངས་སུ་རྫོགས་པ་ལ་བག་ཆགས་ཅི་ཐེབས་བྱས་ཏེ། དལ་བའི་རྟེན་བཟང་ཐོབ་ཅིང་བསྟན་པའི་སྙིང་པོ་དྲི་མ་མེད་པ་དང་མཇལ་བ་འདི་ཉིད་དོན་དང་ལྡན་པར་བྱའོ། །སྨྲས་པ། འདུལ་འཛིན་བྱེ་བའི་གཙུག་རྒྱན་ཉེ་བར་འཁོར། །དཀའ་ཐུབ་སྤྱོད་པས་མིང་ལ་ཐོས་པ་དགའ། །སྙན་བརྒྱུད་བཀའ་བབ་ཆོས་ཀྱི་རྡོ་རྗེ་རྣམས། །གཅིག་གྱུར་ཡེ་ཤེས་མཚན་ཅན་ཁྱོད་མིན་སུ། །ལོང་བས་ཕྱག་དར་ཁྲོད་ནས་རིན་ཆེན་བཞིན། །སྙིགས་མའི་ཀློང་ནས་བློ་ཆུང་བདག་འདྲས་ཀྱང། །སྙན་བརྒྱུད་ཡིད་བཞིན་ནོར་བུ་རྙེད་པ་འདི། །ཨེ་མ་ཁྱོད་ཀྱི་བཀའ་དྲིན་བསམ་ལས་འདས། །དེ་ཕྱིར་མི་སྨྲ་སྙིང་ལ་འཆང་འོས་ཀྱང། །ཅོལ་ཆུང་སོར་མོའི་རྩེ་ལ་གཡེང་བ་འདིས། །སྐལ་བཟང་བློ་ལྡན་འགའ་ཡི་དོན་འགྱུར་རམ། །ཆུད་ཟོས་ཕྱི་ནང་འབོར་བ་ཆ་མ་མཆིས། །ཟབ་ཅིང་རྒྱ་ཆེའི་གདམས་པ་ནམ་མཁའི་མཐའ། །ཉམ་ཆུང་སྦྲང་བུའི་འདབ་མས་གཞལ་བ་ཡིས། །ནོངས་པར་གྱུར་གང་རྒྱུ་བཅས་སྦྱོར་བ་དང། །དགེ་ཚོགས་བསྟན་འགྲོའི་གསོས་སུ་བྱིན་གྱིས་རློབས། །ཚེ་རབས་ཀུན་ཏུ་ཐེག་མཆོག་བཤེས་གཉེན་གྱིས། །རྗེས་བཟུང་གསུང་གི་གསང་བའི་མཛོད་འཛིན་ཅིང། །འཁྲུལ་བྲལ་བསྟན་པའི་སྙིང་པོ་ཐོས་བསམ་སྒོམ། །མཐར་ཕྱིན་འགྲོ་བའི་དེད་དཔོན་མཆོག་གྱུར་ཅིག །ཅེས་ཟབ་ལམ་

― GTD003_Page_0817 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མའི་རྣལ་འབྱོར་གྱི་མན་ངག་སྙིང་པོའི་རྩ་ཚིག་གི་འགྲེལ་པ་སྙན་བརྒྱུད་གསང་བའི་ལྡེ་མིག་ཅེས་བྱ་བ་འདི་ནི། ལྕང་སྐྱ་ཐམས་ཅད་མཁྱེན་པའི་འཕྲིན་ལས་པ་ཡང་དག་པའི་ལམ་བཟང་འདི་ལ་མཆོག་ཏུ་མོས་པའི་བློ་ཅན་ཛ་སག་ཞབས་དྲུང་ཡེ་ཤེས་བསྐལ་བཟང་གིས་ཡང་ཡང་ནན་གྱིས་བསྐུལ་བའི་ངོར། དབུས་འགྱུར་བསྟན་པའི་སྲོག་ཤིང་བློ་བཟང་སྙན་བརྒྱུད་ཀྱི་བཀའ་བབ་དཔལ་ལྡན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོ་དང་། བཀའི་འཁོར་ལོས་ཐུབ་བསྟན་ཡོངས་ལ་འདོད་དགུར་མངའ་བསྒྱུར་བ་ཁམས་གསུམ་ཆོས་ཀྱི་རྒྱལ་པོ་རྗེ་བཙུན་དཀོན་མཆོག་འཇིགས་མེད་དབང་པོ་རྣམ་གཉིས་ཀྱི་ཞབས་རྡུལ་སྤྱི་བོར་བསྟེན་པའི་བཀའ་དྲིན་ལས། བསྟན་པ་སྤྱི་དང་སྙན་བརྒྱུད་ཀྱི་གདམས་པའི་ཆ་ཤས་ཕྲ་མོ་ཙམ་རྣ་བས་ཐོས་པའི་སྐལ་བ་ཅན་དུ་གྱུར་པ། ༸བཙུན་པ་དཀོན་མཆོག་བསྟན་པའི་སྒྲོན་མེས་རབ་བྱུང་བཅུ་བཞི་པའི་བགྲང་བྱ་གཉིས་པ་རྣམ་བྱུང་གི་ལོ་དབེན་གནས་ཡིད་དགའ་ཆོས་འཛིན་དུ་སྦྱར་བའི་ཡི་གེ་པ་ནི་གཙུག་ལག་འབྱེད་པའི་བློ་མིག་ཅན་བྷི་ཀྵུ་རཏྣ་ཨཱ་ནནྟས་བགྱིས་པ་འདིས་ཀྱང་སྙན་བརྒྱུད་ཟབ་མོའི་བསྟན་པ་འཕེལ་ཞིང་རྒྱས་པར་གྱུར་ཅིག། །།

གསང་བདེ་འཇིགས་གསུམ་སོགས་ལྷག་ལྷ་དུ་མ་དང་འབྲེལ་བའི་བླ་མའི་རྣལ་འབྱོར།

― GTD003_Page_0819 ―

^{[མ་དཔེ་གཟིགས་ན་འདིར་གནོན།]}

[Full Size]

གསང་བདེ་འཇིགས་གསུམ་སོགས་ལྷག་ལྷ་དུ་མ་དང་འབྲེལ་བའི་བླ་མའི་རྣལ་འབྱོར་དངོས་གྲུབ་ཀུན་འབྱུང་ཞེས་བྱ་བ་བཞུགས་སོ། །

― GTD003_Page_0820 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་བཛྲ་དྷཱ་རཱ་ཡ། སྤྱི་བོར་སྣ་ཚོགས་པདྨ་ཉི་མའི་སྟེང༌། །སྐྱབས་གསུམ་ཀུན་འདུས་རྩ་བའི་བླ་མ་དང༌། །དབྱེར་མེད་མི་བསྐྱོད་མགོན་པོ་སྐུ་མདོག་མཐིང༌། །ནག་དཀར་དམར་བའི་ཞལ་གསུམ་ཕྱག་དྲུག་པ། །རྩ་ཕྱག་རྡོར་དྲིལ་འཛིན་པས་ཡུམ་ལ་འཁྱུད། །ལྷག་མ་གཡས་སུ་འཁོར་ལོ་པདྨ་དང༌། །གཡོན་པའི་ཕྱག་གིས་རིན་ཆེན་རལ་གྲི་འཛིན། །རང་འོད་དང་མཚུངས་རེག་བྱ་རྡོ་རྗེ་མར། །མཉམ་སྦྱོར་རྡོ་རྗེ་སྐྱིལ་མོ་ཀྲུང་གིས་བཞུགས། །ལྷ་ཡི་གོས་དང་རིན་ཆེན་རྒྱན་གྱིས་མཛེས། །ཞེས་པའི་འཕྲོར། ཕུང་པོ་ཁམས་དང་སྐྱེ་མཆེད་ཡན་ལག་རྣམས། །སུམ་ཅུ་རྩ་གཉིས་ལྷ་ཡི་ངོ་བོ་ཉིད། །ཅེས་པའམ། བདེ་གཤེགས་ཡབ་ཡུམ་སེམས་དཔའ་ཁྲོ་བོ་སོགས། །སུམ་ཅུ་རྩ་གཉིས་ལྷ་ཡི་འཁོར་ལོར་བཅས། །

― GTD003_Page_0821 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པ་གང་རིགས་སྦྱོར། དེ་ནས། གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །བླ་མ་ཡི་དམ་མཆོག་གསུམ་མ་ལུས་པ། །ཁྱབ་བདག་དཔལ་ལྡན་འདུས་པའི་ལྷ་ཚོགས་ཀྱི། །རྣམ་པར་སྤྱན་དྲངས་དབྱེར་མེད་བརྟན་པར་བཞུགས། །དམ་ཆོས་དཀོན་མཆོག་སྙིང་པོ་བསྟན་པའི་བཅུད། །འཇིག་རྟེན་གསུམ་གྱི་སྒྲོན་མེ་འདུས་པ་ཡི། །ལམ་བཟང་མཆོག་གིས་འགྲོ་ཀུན་འདྲེན་མཛད་པ། །བླ་མ་མི་བསྐྱོད་རྡོ་རྗེ་ལ་ཕྱག་འཚལ། །ཉེར་སྤྱོད་འདོད་ཡོན་བཀྲ་ཤིས་རྟགས་རྫས་སོགས། །ངོ་མཚར་ཀུན་བཟང་མཆོད་སྤྲིན་རབ་འབྱམས་དང༌། །བདེ་སྟོང་པདྨའི་སྣོད་དུ་དམ་རྫས་རྣམས། །སྦྱངས་རྟོགས་སྤར་བྱས་བདུད་རྩིའི་རྒྱུན་གྱིས་མཆོད། །མཚར་སྡུག་ཡིད་འོང་ཕྱག་རྒྱའི་ཚོགས་སྤྲོས་ཏེ། །ཡུམ་ལ་ཐིམ་པས་དགའ་བའི་མཆོག་སྐྱེད་ཅིང༌། །སྟོང་

― GTD003_Page_0822 ―

^{[མ་དཔེ་གཟིགས་ན་འདིར་གནོན།]}

[Full Size]

དང་བདེ་ཆེན་སྒྱུ་འཕྲུལ་དབྱེར་མེད་པ། །དོན་དམ་དེ་ཉིད་མཆོད་པས་དགྱེས་གྱུར་ཅིག །སྡིག་ལྟུང་སྤྱི་དང་རྩ་བ་ཡན་ལག་གི །དམ་ཚིག་ཉམས་ཆག་མ་ལུས་སྙིང་ནས་བཤགས། །ཟབ་ཅིང་རྒྱ་ཆེ་རིམ་གཉིས་རྣལ་འབྱོར་སོགས། །སྐྱེ་འཕགས་དགེ་བའི་ཚོགས་ལ་རྗེས་ཡི་རང༌། །འགོག་མེད་རྡོ་རྗེའི་སྐུ་ལས་མི་གཡོ་ཞིང༌། །གསང་ཆེན་གདམས་པའི་དགའ་སྟོན་སྩལ་དུ་གསོལ། །འདིས་མཚོན་དགེ་བས་བདག་གཞན་འགྲོ་བ་ཀུན། །རིང་མིན་བྱང་ཆུབ་རྡོ་རྗེ་ཉིད་གྱུར་ཅིག །དེ་ནས་སྤྲོ་ན་རིགས་ལྔའི་སྡོམ་གཟུང་སོགས་ཀྱང་བྱ། དེ་ནས་གོང་གི་ཕྱག་འཚལ་གྱི་ཚིག་དེ་གསོལ་འདེབས་སུ་བསྒྱུར་བ་ཅི་འགྲུབ་དང༌། དེའི་ཐུགས་ཀར་ཧཱུཾ་ཡིག་ལ་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས་པས། རྒྱལ་བ་སྲས་བཅས་ཀྱི་བྱིན་རླབས་ཐམས་ཅད་བསྡུས་ཏེ་དེ་ལ་ཐིམ་ཞིང༌། སླར་ཡང་འོད་དང་བདུད་རྩིའི་རྒྱུན་བྱུང་བ་རང་དང་སེམས་ཅན་ཐམས་ཅད་ཀྱི་སྤྱི་བོ་ནས་ཞུགས་པས་ཞེ་སྡང་ལ་སོགས་པའི་ཉོན་མོངས་པ་དང༌། དེས་བསྐྱེད་པའི་ལས་ངན་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག། །མི་བསྐྱོད་པ་ལ་སོགས་པའི་གོ་འཕང་ལ་བཀོད་བྱུང་སྙམ་པའི་སྒོ་ནས། གཙོ་བོ་ཡབ་ཡུམ་གྱི་སྔགས་སམ། ཡང་ན་གཙོ་འཁོར་ཀུན་གྱི་སྔགས་བཟླ། མཇུག་ཏུ་ཡི་གེ་བརྒྱ་པས་ལྷག་ཆད་བསྐང༌། གང་ལ་བརྟེན་ན་སྲིད་ཞིའི་འཇིགས་འཕྲོག་

― GTD003_Page_0823 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང༌། །ལྷན་སྐྱེས་བདེ་བ་མཆོག་གི་དཔལ་སྟེར་བ། །ཐུགས་རྗེའི་བདག་ཉིད་དང་པོའི་མགོན་པོ་ཡིས། །མཆོད་ཆེན་དགའ་སྟོན་མཆོག་གིས་རྗེསབཟུང་སྟེ། །སྒོ་གསུམ་ཉེས་པའི་དྲི་མ་སྦྱང་དུ་གསོལ། །རིམ་གཉིས་ལམ་གྱི་རྟོགས་པ་སྐྱེད་དུ་གསོལ། །རྡོ་རྗེ་གསུམ་དབྱེར་མི་ཕྱེད་བདག་ཉིད་ཀྱི། །སྐུ་བཞིའི་གོ་འཕང་ཐོབ་པར་བྱིན་གྱིས་རློབས། །དེ་ལྟར་གསོལ་བཏབ་སྤྱི་བོའི་ཨོཾ་ཡིག་ལས། །རབ་དཀར་བདུད་རྩིའི་རྒྱུན་གྱིས་དབང་བསྐུར་བས། །ལུས་ཀྱི་སྐྱོན་སྦྱངས་རིམ་པ་དང་པོ་ཡི། །སྤྲུལ་པའི་སྐུ་མཆོག་འགྲུབ་པར་བྱིན་གྱིས་རློབས། །ལོངས་སྤྱོད་འཁོར་ལོའི་ཨཱཿ ལས་ཨ་མྲྀ་ཏ། །དམར་པོའི་རྒྱུན་གྱིས་ངག་གི་སྐྱོན་དག་ཅིང༌། །སྣང་ཕྱོགས་སྒྱུ་མའི་ལམ་གྱི་རླུང་སྔགས་ཀུན། །སྦྱངས་ཏེ་ལོངས་སྐུ་འགྲུབ་པར་བྱིན་གྱིས་རློབས། །ཆོས་ཀྱི་འཁོར་ལོའི་ཧཱུཾ་སྔོན་བདུད་རྩི་ཡིས། །ཡིད་ཀྱི་ཉེས་ཀུན་བསལ་ནས་འཁོར་འདས་ཆོས། །སྟོང་པར་རྟོགས་པའི་འོད་གསལ་ཡེ་ཤེས་ཀྱི། །སྒྲིབ་བྲལ་ཆོས་སྐུ་ཐོབ་པར་བྱིན་གྱིས་རློབས། །འབྲུ་གསུམ་ཐུན་མོང་འོད་དང་བདུད་རྩིའི་མཐུས། །སྒོ་གསུམ་དྲི་མ་ཕྲ་རགས་ཀུན་ཞི་ཞིང༌། །སྐུ་ཐུགས་དབྱེར་མེད་ཡན་ལག་བདུན་ལྡན་གྱི། །ཟུང་འཇུག་གོ་འཕང་འགྲུབ་པར་བྱིན་གྱིས་རློབས། །མདོར་ན་རིགས་ཀུན་བདག་པོ་རྡོ་རྗེ་འཛིན། །ཁྱོད་ལས་ལྷག་པའི་སྐྱབས་

― GTD003_Page_0824 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་མ་མཆིས་པས། །ཚེ་རབས་འཕྲེང་བར་དགྱེས་བཞིན་རྗེས་བཟུང་སྟེ། །ཡང་དག་ལམ་བཟང་བགྲོད་པར་བྱིན་གྱིས་རློབས། །རྒྱུ་ཡི་ཐེག་པའི་ལམ་གྱིས་རྒྱུད་སྦྱངས་ཏེ། །འབྲས་བུ་གསང་ཆེན་ཟབ་མོའི་མྱུར་ལམ་གྱིས། །ཕྲ་རགས་སྲིད་པའི་རྒྱ་མཚོ་ཉེར་བརྒལ་ནས། །མ་ལུས་འགྲོ་བའི་མགོན་དུ་བདག་གྱུར་ཅིག །དེ་ནས་སྤྱི་བོའི་བླ་མ་རྡོ་རྗེ་འཆང་རང་གི་སྤྱི་བོ་ནས་མར་ཞུགས་ཏེ། རང་སེམས་དང་དབྱེར་མེད་དུ་འདྲེས་པར་བསམ་ལ། འཁོར་ལོའི་མགོན་པོ་བླ་མ་རྡོ་རྗེ་འཆང༌། །བདག་གི་སྙིང་གར་པདྨའི་སྟེང་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཞེས་སོགས་དང༌། གཞན་ཡང་ཚེ་རབས་རྗེས་འཛིན་གྱི་སྨོན་ལམ་ཅི་རིགས་པས་མཚམས་སྦྱོར་བྱའོ། །ཞེས་པ་འདི་ཡང་དད་བརྩོན་བློ་དང་ལྡན་པ་སྔགས་རམས་པ་ཆོས་རྒྱ་མཚོས་བསྐུལ་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་བྲག་དཀར་ལྷ་ཞོལ་དུ་བྲིས་པའོ། །ན་མོ་གུ་རུ་ཤྲཱི་ཧེ་རུ་ཀཱ་ཡ། དཔལ་འཁོར་ལོ་སྡོམ་པ་དང་དབྱེར་མེད་དུ་བྱས་ཏེ་ཟབ་ལམ་བླ་མའི་རྣལ་འབྱོར་ཉམས་སུ་ལེན་པར་འདོད་པས་ཀུན་སློང་ལེགས་པར་བཅོས་ཏེ། བླ་མ་ཡི་དམ་མཁའ་འགྲོའི་ཚོགས། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །བདག་ཉིད་ཧེ་རུ་ཀར་གྱུར་ནས། །སེམས་ཅན་ཐམས་ཅད་ཧེ་རུ་ཀའི། །གོ་འཕང་མཆོག་ལ་འགོད་པར་ཤོག །ཅེས་པ་ལན་གསུམ་གྱིས་སྐྱབས་སེམས་སྔོན་དུ་བཏང་ལ། རང་གི་སྤྱི་བོར་སྣ་ཚོགས་པད་ཉིའི་སྟེང༌། །བཀའ་དྲིན་མཉམ་མེད་རྩ་བའི་བླ་མ་དང། །དབྱེར་མེད་དཔའ་བོའི་དབང་ཕྱུག་ཧེ་རུ་

― GTD003_Page_0825 ―

^{[མ་དཔེ་གཟིགས་ན་འདིར་གནོན།]}

[Full Size]

ཀཿ །ནམ་མཁའི་མདངས་ལྡན་སྔོ་ལྗང་དམར་སེར་ཞལ། །ཉི་མའི་སྤྱན་བགྲད་རལ་བའི་ཐོར་ཅོག་བཅིངས། །རྩ་ཕྱག་རྡོར་དྲིལ་འཛིན་པས་ཡུམ་ལ་འཁྱུད། །གཉིས་ཀྱིས་གཏི་མུག་དག་པའི་གླང་ལྤགས་བརྒྱངས། །གཡས་ཀྱི་ལྷག་མས་རིམ་བཞིན་ཌཱ་མ་རུ། །དགྲ་སྟ་གྲི་གུག་མདུང་ཐོགས་གཡོན་པ་བཞིས། །ཁ་ཊྭཱཾ་ཐོད་ཁྲག་ཞགས་པ་ཚངས་མགོ་བསྣམས། །གཡས་བརྐྱངས་འཇིགས་བྱེད་ནག་པོའི་མགོ་བོ་དང༌། །གཡོན་བསྐུམས་དུས་མཚན་དམར་མོའི་ནུ་མ་མནན། །གར་དགུའི་ཉམས་ལྡན་ཕྱག་རྒྱ་དྲུག་གིས་སྤྲས། །སྡེར་འཕྲེང་གྲོལ་བའི་སྟག་ལྤགས་ཤམ་ཐབས་གསོལ། །ཐོད་སྐམ་དབུ་རྒྱན་མགོ་རློན་དོ་ཤལ་འཕྱང༌། །པང་ན་ལྷན་སྐྱེས་དགའ་བའི་མཆོག་སྦྱིན་ཡུམ། །ཕག་མོ་དམར་མོ་རྡོ་རྗེ་ཐོད་ཁྲག་འཛིན། །གཅེར་མོ་སྐྲ་གྲོལ་ཕྱག་རྒྱ་ལྔ་ཡིས་བརྒྱན། །ལང་ཚོ་རྒྱས་ཤིང་ལྷན་ཅིག་མཉམ་པར་སྦྱོར། །ཡེ་ཤེས་མེ་དཔུང་འབར་བའི་དབུས་ན་བཞུགས། །ཕུང་ཁམས་ཀུན་ཀྱང་རྣམ་སྣང་རྡོ་རྗེ་སོགས། །ལྷ་ཡི་རང་བཞིན་གནས་གསུམ་འབྲུ་གསུམ་གྱིས། །མཚན་པའི་ཧཱུཾ་ཡིག་འོད་ཀྱིས་ཡེ་ཤེས་པའི། །འཁོར་ལོ་སྤྱན་དྲངས་དབྱེར་མེད་རོ་གཅིག་གྱུར། །འོད་གསལ་ཡེ་ཤེས་འབར་བའི་གདེངས་ཀ་ཡིས། །ཀུན་རྨོངས་མཐར་མཛད་བརྟན་གཡོའི་དངོས་པོ་ཀུན། །ལྷན་སྐྱེས་བདེ་བའི་འཁོར་ལོར་སྡོམ་བྱེད་པ། །བླ་མ་ཧེ་རུ་ཀ་དཔལ་ལ་ཕྱག་འཚལ། །ཕྱི་ནང་གསང་བ་དེ་ཉིད་མཆོད་པའི་ཚོགས། །དམིགས་མེད་སྒྱུ་མའི་རོལ་པ་ཇི་

― GTD003_Page_0826 ―

^{[མ་དཔེ་གཟིགས་ན་འདིར་གནོན།]}

[Full Size]

བཞིན་དུ། །འབུལ་ཞིང་སྒོ་གསུམ་དམ་ཚིག་ཉམས་ཆག་ཀུན། །སྙིང་ནས་མཐོལ་ལོ་བྱང་ཞིང་དག་བར་མཛོད། །རབ་འབྱམས་འཁོར་ལོ་ལྔ་ཡི་ལྷ་ཚོགས་རྣམས། །སྤྲོས་ཏེ་མཁའ་ཁྱབ་ཞིང་ཁམས་ཐམས་ཅད་དུ། །གང་ལ་གང་འཚམས་སྤྲུལ་པའི་བཀོད་པ་ཡིས། །འགྲོ་ཀུན་སྨིན་ཅིང་གྲོལ་བར་བྱིན་གྱིས་རློབས། །ཞེས་བརྗོད་ཅིང་འོད་ཟེར་སྤྲོ་བསྡུ་དང་སྣོད་བཅུད་སྦྱང་སྒྱུར་སོགས་ཀྱི་དམིགས་པ་གསལ་བཞིན་པའི་ངང་ནས། ཨོཾ་ཨཱཿ གུ་རུ་རཏྣ་ཤཱ་ས་ན་དཱི་པཾ་སིདྡྷི་ཧཱུཾ་ཧཱུཾ། ཞེས་པ་ལྟ་བུ་རང་གི་བླ་མའི་མཚན་སྔགས་དང༌། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་ཤཾ་ཝ་རཾ་སྭཱཧཱ། ཨོཾ་ཧྲཱིཿ ཧ་ཧ་ཧཱུཾ་ཧཱུཾ་ཕཊ། ཅེས་ཡབ་ཀྱི་སྙིང་པོ་དང་ཉེ་སྙིང༌། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ། ཨོཾ་སརྦྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཞེས་ཡུམ་གྱི་སྙིང་པོ་དང་ཉེ་སྙིང་ཅི་འགྲུབ་བཟླ། ཧེ་རུ་ཀའི་ཡིག་བརྒྱ་བརྗོད་དེ་ལྷག་ཆད་བསྐང༌། སྤྲོ་ན་བོད་སྐད་དང་རྒྱ་སྐད་ཅི་རིགས་པའི་རྐང་བརྒྱད་ཀྱིས་བསྟོད། དངོས་གྲུབ་འབྱུང་གནས་བླ་མ་ལྷག་པའི་ལྷས། །ཚེ་རབས་ཀུན་ཏུ་འབྲལ་མེད་རྗེས་འཛིན་ཞིང༌། །ཐུན་མོང་ལམ་གྱི་རྨང་གཞི་བརྟན་པའི་སྒོས། །གསང་ཆེན་ཐེག་པའི་སྣོད་དུ་འགྱུར་བར་ཤོག །དབང་ཐོབ་དམ་ཚིག་སྡོམ་པ་ཚུལ་བཞིན་བསྲུང༌། །རང་ལུས་ལྷ་སྐུར་སྒྱུར་བའི་རྣལ་འབྱོར་དང༌། །ཞུགས་གནས་ཐིམ་པའི་བདེ་ཆེན་འོད་གསལ་ཐུགས། །དབྱེར་མེད་ཟུང་འཇུག་གོ་འཕང་ཐོབ་པར་ཤོག །མདོར་ན་བླ་མ་བཅོམ་ལྡན་ཧེ་རུ་ཀ །གནས་གསུམ་མཁའ་འགྲོའི་ཚོགས་དང་བཅས་པ་ཡིས། །བརྩེ་བས་བུ་བཞིན་འབྲལ་མེད་རྗེས་བཟུང་སྟེ། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །

― GTD003_Page_0827 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་བརྗོད་ཅིང་སྣོད་ཐམས་ཅད་གཞལ་ཡས་ཁང་དང༌། བཅུད་ཐམས་ཅད་འཁོར་ལོ་སྡོམ་པའི་ལྷ་ཚོགས་ཀྱི་རྣམ་པར་གནས་པ་རྣམས་རིམ་གྱིས་བསྡུས་ཏེ་བླ་མ་ཧེ་རུ་ཀ་ལ་ཐིམ། དེ་འོད་དུ་ཞུ་བ་རང་ལ་ཐིམ་པས་རང་ཉིད་ཧེ་རུ་ཀའི་སྐུར་གྱུར། རང་ཡང་སྟོད་སྨད་ནས་རིམ་གྱིས་འོད་དུ་ཞུ་བ་སྙིང་གའི་ས་བོན་ལ་ཐིམ་པའི་མཐར་ནམ་མཁའ་ལ་འཇའ་ཡལ་བ་བཞིན་གྱུར་པར་བསམས་ཏེ་ལྟ་ཐོག་ཏུ་བཞག་ལ། སྣོད་བཅུད་མཐའ་དག་བླ་མའི་སྐུར་བསྡུས་ཏེ། །རང་ལ་ཐིམ་ཞིང་རང་ཉིད་ལྷ་ཡི་སྐུར། །བཞེངས་པ་ནམ་མཁའི་འཇའ་ཚོན་བཞིན་གྱུར་པས། །དམིགས་མེད་འོད་གསལ་ངང་དུ་གནས་པར་གྱུར། །ཅེས་བརྗོད་ཅིང༌། སྲིད་པ་གསུམ་འབར་སོགས་ཀྱི་བསྔོ་བས་མཚམས་སྦྱར་བར་བྱའོ། །ཞེས་པ་འདིའང་དད་བརྩོན་ལྡན་པ་སྔགས་རམས་པ་དཀོན་མཆོག་སེང་གེས་བསྐུལ་ངོརྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ཆོས་བདེན་བདག་ཉིད་བླ་མ་ཧེ་རུ་ཀཿ །ཁྱོད་མིན་སྐྱབས་གཞན་གང་དུའང་མི་འཚོལ་བས། །སྒོ་གསུམ་དྲི་མ་མཐའ་དག་དྲུངས་ཕྱུང་སྟེ། །བདེ་ཆེན་སྐུ་བཞི་ཐོབ་པར་བྱིན་གྱིས་རློབས། །དེ་ལྟར་རྩེ་གཅིག་གསོལ་བ་བཏབ་པ་ན། །སྤྲུལ་བའི་ཕག་མོ་མཁའ་འགྲོ་བཞིར་བཅས་པས། །བུམ་པའི་དབང་བསྐུར་ལུས་ཀྱི་སྒྲིབ་པ་སྦྱངས། །བསྐྱེད་རིམ་ཕྲ་རགས་སྤྲུལ་སྐུ་འགྲུབ་པར་བྱས། །ཧེ་རུ་ཀཿ དང་ཕག་མོ་སྦྱར་བ་ཡི། །གསང་རྫས་མྱང་བས་ངག་གི་སྒྲིབ་པ་དག །ཀུན་རྫོབ་སྒྱུ་མའི་རྫོགས་རིམ་བསྒོམ་པ་དང། །རྒྱལ་གསུང་ལོངས་སྐུ་འགྲུབ་པའི་ནུས་པ་བཞག །ཕག་མོ་རང་ལ་ཕྱག་རྒྱར་གནང་བ་དང། །སྙོམས་པར་ཞུགས་པས་དགའ་བཞིའི་ཡེ་

― GTD003_Page_0828 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་སྐྱེས། །ཡིད་ཀྱི་སྒྲིབ་བྱང་དོན་དམ་འོད་གསལ་གྱི། །རྫོགས་རིམ་ཆོས་སྐུ་དང་བཅས་འགྲུབ་པར་བྱས། །བདེ་ཆེན་ཐུགས་དང་སྒྱུ་འཕྲུལ་དྲ་བའི་སྐུ། །ཟུང་དུ་འཇུག་པའི་དོན་ལ་ངོ་སྤྲད་པས། །སྒོ་གསུམ་སྒྲིབ་བྲལ་ཟུང་འཇུག་རྡོ་རྗེ་འཆང། །འགྲུབ་པའི་ནུས་པ་ཡོངས་སུ་སྨིན་པར་གྱུར། །འདི་རྐང་བརྒྱད་ཀྱི་བསྟོད་བའི་འཕྲོར་བྱ་ཞིང་། དབང་བཞི་ལེན་ཚེ་གོང་གི་སྐྱབས་སེམས་ཀྱི་འཕྲོར་སྐད་ཅིག་དཀྲོང་བསྐྱེད་ཀྱང་ཆོ་གའི་གཞུང་བཞིན་བྱ་དགོས་སོ། །ཞེས་སྔར་བྲིས་པའི་བདེ་མཆོག་གི་བླ་མའི་རྣལ་འབྱོར་ལ་དབང་བཞིའི་ཁ་སྐོང་ཞིག་དགོས་ཞེས་དད་བརྩོན་བློ་དང་ལྡན་པ་འཇིགས་མེད་ཤེས་རབ་དང་སྔགས་རམས་པ་དཀོན་མཆོག་བཤེས་གཉེན་གཉིས་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་བཛྲ་བྷེ་ར་ཝཱ་ཡ། འདིར་ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་ལེན་པར་བྱེད་པ་ལ། སྤྱིར་མདོ་རྒྱུད་ཐམས་ཅད་ལས་བླ་མ་ནི་ཡོན་ཏན་ཀུན་གྱི་གཞི་རྟེན་དང་སྐྱབས་གནས་མཐའ་དག་འདུས་པའི་བདག་ཉིད་དུ་ལན་གྲངས་དུ་མར་གསུངས་པས། ཡི་དམ་ཆོས་སྐྱོང་གང་དང་སྦྲེལ་ནས་ཀྱང་བླ་མའི་རྣལ་འབྱོར་ཉམས་སུ་བླང་དུ་ཡོད་ལ། ཁྱད་པར་དབྱངས་ཅན་བཞད་པ་དགེ་འདུན་རྒྱ་མཚོས། རྒྱལ་བ་ཀུན་གྱི་ཡབ་གཅིག་འཇམ་པའི་དབྱངས། །མ་རུངས་གདུག་པ་འདུལ་མཛད་གཤིན་རྗེའི་གཤེད། །མི་ཡི་གཟུགས་ཀྱི་རྣམ་རོལ་ཙོང་ཁ་པ། །དབྱེར་མེད་བླ་མ་ཡི་དམ་ཞེས་གསུངས་པ་ལྟར། རང་ཅག་རི་བོ་དགེ་ལྡན་པ་རྣམས། བླ་མ་ཡི་དམ་ཆོས་སྐྱོང་ཐམས་ཅད་ངོ་བོ་གཅིག་ཏུ་སྒྲུབ་པ་ལ་རྟེན་འབྲེལ་གྱི་གནད་ཤིན་ཏུ་ཆེ་བས། འདིར་ཡི་དམ་རྡོ་རྗེ་འཇིགས་བྱེད་དང་སྦྱར་ཏེ་བླ་མའི་རྣལ་འབྱོར་ཉམས་སུ་བླང་བའི་ཚུལ་ནི། སྐྱབས་སེམས་སྔོན་དུ་བཏང་སྟེ། དགེ་སེམས་ཁྱད་པར་ཅན་གྱི་ངང་ནས། རང་གི་སྤྱི་བོར་པདྨ་ཉི་ཟླའི་སྟེང། །སྐྱབས་གནས་མ་ལུས་

― GTD003_Page_0829 ―

^{[མ་དཔེ་གཟིགས་ན་འདིར་གནོན།]}

[Full Size]

འདུས་པའི་བདག་ཉིད་མཆོག །བཀའ་དྲིན་གསུམ་ལྡན་རྩ་བའི་བླ་མ་ནི། །རྣམ་པ་ཁམས་གསུམ་ཟ་བྱེད་གཤིན་རྗེའི་གཤེད། །དབུ་དགུ་འབར་བས་ནམ་མཁའི་ཁྱོན་གང་ཞིང། །སོ་བཞིའི་ཕྱག་གིས་མཚོན་ཆ་སྣ་ཚོགས་འཛིན། །བཅུ་དྲུག་ཞབས་ཀྱིས་ས་གསུམ་རྣམ་པར་གནོན། །གཏུམ་དྲག་ཁྲོ་བོའི་ཉམས་ལྡན་ཧ་ཧར་བཞད། །རུས་པའི་རྒྱན་ལྡན་འབར་བའི་ཆས་ཀྱིས་བརྗིད། །ཕྱོགས་ཀྱི་གོས་ཅན་བསྐལ་པའི་མེ་ཡིས་འཁྱུད། །དེ་ཡི་ཐུགས་ཀར་འཇམ་དཔལ་གཞོན་ནུ་དང། །འོད་ཟེར་ལྔ་ལྡན་ཧཱུཾ་གིས་མཚན་པར་གྱུར། །ཐུགས་ཀའི་ཧཱུཾ་ཡིག་འོད་ཀྱིས་གཤིན་རྗེའི་གཤེད། །སྲས་བཅས་རྒྱལ་བས་བསྐོར་བ་སྤྱན་དྲངས་ཏེ། །ཛཿ ཧཱུཾ་བཾ་ཧོཿ དབྱེར་མེད་བསྟིམ་བྱས་ནས། །དབང་བསྐུར་མི་བསྐྱོད་རྒྱལ་པོས་རྒྱས་བཏབ་གྱུར། །མཁྱེན་བརྩེའི་དཀྱིལ་འཁོར་ཡོངས་སུ་རྫོགས་པའི་ཐུགས། །ལུས་ཅན་ཉོན་མོངས་འཆིང་བ་གཅོད་པའི་གསུང། །རླབས་ཆེན་ཚོགས་གཉིས་དཔལ་གྱིས་བརྗིད་པའི་སྐུ། །བླ་མ་གཤིན་རྗེའི་གཤེད་ལ་ཕྱག་འཚལ་ལོ། །འཁོར་འདས་སྤྲོས་བྲལ་ཡེ་ཤེས་རང་བཞིན་ལས། །ཀུན་ཁྱབ་མཆོད་སྤྲིན་མཐའ་ཡས་ལེགས་འབུལ་ཞིང། །ཉེས་ལྟུང་སྡིག་པའི་ཚོགས་རྣམས་ཀུན་བཤགས་ཏེ། །རླབས་ཆེན་དགེ་བ་རྣམས་ལ་རྗེས་ཡི་རང། །བླ་མ་ཡི་དམ་དབྱེར་མེད་འདྲེན་པ་ཁྱོད། །བློ་བཟང་རྒྱལ་བསྟན་ཕྱོགས་མཐར་སྤེལ་བའི་ཕྱིར། །མཐའ་ཡས་འགྲོ་བའི་མགོན་དུ་རྟག་བཞུགས་ནས། །ལེགས་གསུང་བདུད་རྩིའི་དགའ་སྟོན་སྩལ་དུ་གསོལ། །

― GTD003_Page_0830 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ལྟར་བསྐྲུན་པའི་རྣམ་དཀར་དགེ་བའི་མཐུས། །བདག་ཀྱང་དེང་ནས་ཚེ་རབས་ཐམས་ཅད་དུ། །ལམ་མཆོག་སྒྲུབ་པའི་རྟེན་བཟང་རིམ་བརྒྱུད་དེ། །རྣམ་དག་ཆོས་ལ་གཅིག་ཏུ་གཞོལ་བར་ཤོག །དེ་ཚེ་བླ་མ་གཤིན་རྗེའི་གཤེད་པོ་ཡིས། །འབྲལ་བ་མེད་པར་དགྱེས་བཞིན་རྗེས་བཟུང་སྟེ། །བྱིན་རླབས་སྲུང་བའི་འཁོར་ལོ་ལ་བརྟེན་ནས། །དམ་ཆོས་སྒྲུབ་ལ་བར་ཆད་མེད་པར་ཤོག །དེ་ཡི་གསུང་གི་བདུད་རྩིའི་བཅུད་མྱང་སྟེ། །ཐུན་མོང་ལམ་གྱི་རིམ་པས་རྒྱུད་སྦྱངས་ཤིང། །དཔལ་ལྡན་རྡོ་རྗེ་ཐེག་པའི་སྒོར་ཞུགས་ནས། །དམ་ཚིག་སྡོམ་པ་ཚུལ་བཞིན་སྲུང་བར་ཤོག །དེ་ནས་རིམ་གཉིས་ལམ་བཟང་བགྲོད་པ་ཡིས། །ཕྱི་ནང་གསང་བའི་གཤིན་རྗེའི་གཡུལ་བཅོམ་སྟེ། །བླ་མ་ཡི་དམ་གོ་འཕང་མངོན་གྱུར་ནས། །ལུས་ཅན་མཐའ་དག་སྲིད་ལས་སྒྲོལ་བར་ཤོག །ཅེས་དཔལ་རྡོ་རྗེ་འཇིགས་བྱེད་ལ་བརྟེན་པའི་བླ་མའི་རྣལ་འབྱོར་འདི་ནི་ཐུགས་དམ་དགེ་སྦྱོར་ལ་གཅིག་ཏུ་བརྩོན་པ་རབ་འབྱམས་པ་བློ་བཟང་དཀོན་མཆོག་གིས་བསྐུལ་བའི་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །ན་མོ་བཛྲ་བྷཻ་ར་ཝཱ་ཡ། སྐྱབས་སེམས་སྔོན་དུ་བཏང་ལ། རང་གི་སྤྱི་བོར་པདྨ་ཉི་མའི་སྟེང། །ཧཱུཾ་ཡིག་མཐིང་ནག་འོད་ཀྱི་འཕྲོ་འདུ་ལས། །འཇམ་དཔལ་རྡོ་རྗེ་ཁྲོ་བོའི་ཟློས་གར་མཁན། །ཁམས་གསུམ་ཟ་བྱེད་ཕྱི་ནང་གཤིན་རྗེའི་གཤེད། །དུས་མཐའི་མེ་དཔུང་དྲ་བས་འཁྱུད་པ་ཡི། །མིག་སྨན་ལྷུན་པོ་ལིང་ལིང་གཡོ་བ་བཞིན། །གཟི་བྱིན་བཟོད་དཀའ་ཧ་ཧའི་གད་རྒྱངས་ཅན། །འབར་བའི་ཞལ་དགུ་འདྲེན་བྱེད་གློག་དམར་གཡོ། །བདེན་གཉིས་རྭ་གདེངས་དྲི་འཛིན་འཐོར་རླུང་གིས། །སྲིད་པ་

― GTD003_Page_0831 ―

^{[མ་དཔེ་གཟིགས་ན་འདིར་གནོན།]}

[Full Size]

མཐར་བྱེད་མེ་ཡི་རལ་བ་གཟེངས། །གདབ་པའི་མཚོན་གདེངས་གཡས་ཕྱག་བཅུ་དྲུག་གིས། །འདས་པའི་ལྷ་ལ་བསྡིགས་ཤིང་དངོས་གྲུབ་འབེབས། །རོལ་བའི་མཚོན་ཐོགས་གཡོན་རྣམས་སྡིགས་མཛུབ་རྩེ། །ཐུར་ཕྱོགས་འཇིག་རྟེན་པ་རྣམས་སྐྲག་པར་བྱེད། །བརྒྱད་གཉིས་ཞབས་ཀྱིས་ཚངས་དང་ལོག་འདྲེན་སོགས། །དབང་བྱེད་གདེངས་ཅན་བདག་པོས་ག་ཤལ་བྱས། །ཐོད་སྐམ་དབུ་རྒྱན་མི་མགོའི་ཕྲེང་བ་དང། །རུས་པའི་རྒྱན་སྤྲས་ཡན་ལག་སྦོམ་ཞིང་རགས། །རྡོ་རྗེ་རོ་ལངས་མ་དང་མཉམ་སྦྱོར་ཞིང། །ཕུང་ཁམས་རྣམ་དག་རིགས་ལྔ་ཡུམ་བཞི་དང། །བདུད་བཞིའི་དཔུང་འཇོམས་སྒོ་བ་བཞི་དང་བཅས། །བཅུ་གསུམ་ལྷ་ཡི་འཁོར་ལོའི་ངོ་བོ་ཉིད། །དེ་ཡི་གནས་རྣམས་རྡོ་རྗེ་གསུམ་གྱི་བདག །ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །རབ་འབྱམས་རྒྱལ་པའི་འཁོར་བཅས་ཡེ་ཤེས་པ། །སྤྱན་དྲངས་ཛཿ ཧཱུཾ་བཾ་ཧོཿ དབྱེར་མེད་གྱུར། །དམིགས་མེད་རྒྱལ་བ་ཀུན་གྱི་ཡེ་ཤེས་ནི། །བདེ་ཆེན་སྙིང་རྗེ་སྒྱུ་མའི་རོལ་གར་གྱིས། །གཏུམ་དྲག་ཁྲོ་བོའི་རྒྱལ་པོའི་སྐུར་བཞེངས་པ། །བླ་མ་གཤིན་རྗེའི་གཤེད་ལ་ཕྱག་འཚལ་ལོ། །ཕྱི་ནང་ཉེར་སྤྱོད་འདོད་ཡོན་རྣམ་ལྔ་དང། །སྦྱངས་རྟོགས་སྦར་བྱས་རྣམ་ལྔ་བདུད་རྩིའི་བཅུད། །དགའ་བའི་མཆོག་སྦྱིན་མཛེས་སྡུག་ཕྱག་རྒྱ་དང། །བདེ་སྟོང་དབྱེར་མེད་ཟུང་འཇུག་མཆོད་པའི་ཚོགས། །བླ་མ་གཤིན་རྗེའི་གཤེད་པོའི་ལྷ་ཚོགས་ལ། །གུས་པས་འབུལ་ལོ་དགྱེས་པ་ཆེན་པོས་རོལ། །སྐུ་བཞིའི་

― GTD003_Page_0832 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་ཉིད་འཁོར་ལོའི་མགོན་པོ་ཡི། །གནས་གསུམ་སྔགས་ཀྱི་འོད་དང་བདུད་རྩིའི་ཆུས། །ལུས་ངག་ཡིད་ཀྱི་སྒྲིབ་པ་མ་ལུས་པ། །ལྷག་མེད་བྱང་ཞིང་དག་པར་བྱིན་གྱིས་རློབས། །ངེས་འབྱུང་ཡང་དག་ལྟ་དང་བྱང་སེམས་ཀྱིས། །ལེགས་སྦྱངས་རྡོ་རྗེའི་ཐེག་པའི་སྒོར་ཞུགས་ཏེ། །བསྐྱེད་རིམ་གཉིས་དང་རྫོགས་རིམ་རྣལ་འབྱོར་བཞིས། །ཤེས་རྒྱུད་སྨིན་ཅིང་གྲོལ་པར་བྱིན་གྱིས་རློབས། །གང་འདུལ་གཟུགས་སྐུར་སྣང་བ་སྤྲུལ་པའི་སྐུ། །རླུང་སྔགས་དབྱེར་མེད་བདེ་ཆེན་ལོངས་སྤྱོད་རྫོགས། །འོད་གསལ་ཐུགས་དང་གཉིས་སུ་མི་ཕྱེད་པའི། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །ཞེས་བདུད་རྩི་འབེབས་སྦྱང་གི་དམིགས་པ་དང་སྦྲགས་ཏེ་སྔགས་གསུམ་བཟླ། ཡིག་བརྒྱས་ལྷག་ཆད་བསྐང་། གོང་གི་ཕྱག་འཚལ་གྱི་ཚིགས་བཅད་གསོལ་འདེབས་སུ་བསྒྱུར་བ་ལན་འགའ་བརྗོད། དེ་ལྟར་གསོལ་བཏབ་སྤྱི་བོའི་བླ་མ་ལྷ། །དྷཱུ་ཏཱིའི་ལམ་ནས་རང་གི་སྙིང་གར་བྱོན། །ཕྲ་བ་གཉུག་མའི་སེམས་དང་དབྱེར་མེད་པར། །བྱང་ཆུབ་བར་དུ་བརྟན་པར་བཞུགས་སུ་གསོལ། །སྐྱེ་ཞིང་སྐྱེ་བར་འཇམ་དཔལ་ཞི་ཁྲོ་ཡིས། །རྗེས་བཟུང་རྣམ་འབྱེད་ཤེས་རབ་མཆོག་ཐོབ་ཅིང། །མཐའ་དག་བདུད་སྡེའི་གཡུལ་ལས་རྒྱལ་གྱུར་ཏེ། །མ་ལུས་འགྲོ་བའི་མགོན་དུ་འགྱུར་བར་ཤོག །ཅེས་པ་འདི་ནི་དད་བརྩོན་བློ་དང་ལྡན་པ་རབ་འབྱམས་པ་བློ་བཟང་བསྟན་འཛིན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ། །༈ ན་མོ་གུ་རུ་ཤྲཱི་ཧེ་རུ་ཀཱ་ཡ། བླ་མ་དང་རྡོ་རྗེ་སེམས་དཔའ་དབྱེར་མི་ཕྱེད་པའི་

― GTD003_Page_0833 ―

^{[མ་དཔེ་གཟིགས་ན་འདིར་གནོན།]}

[Full Size]

རྣལ་འབྱོར་ལ་བརྟེན་ནས་ཧེ་རུ་ཀའི་ཡིག་བརྒྱ་བཟླ་བར་འདོད་པས་སྐྱབས་སེམས་སྔོན་དུ་བཏང་ལ། སྤྲོས་བྲལ་དབྱིངས་ལས་རང་ཉིད་ཧེ་རུ་ཀཿ །སྐུ་མདོག་སྔོན་པོ་ཞལ་གཅིག་ཕྱག་གཉིས་པ། །རྡོར་དྲིལ་བཟུང་སྟེ་ཕག་མོ་དམར་མོར་འཁྱུད། །གཡས་བརྐྱང་སྟབས་ཀྱིས་བཞུགས་པའི་ཐུགས་ཀ་ཡི། །ཧཱཾུ་ལས་འོད་འཕྲོས་སྣོད་བཅུད་སྐྱོན་ཀུན་སྦྱངས། །དག་པའི་བརྟན་གཡོ་ཟག་མེད་མཆོད་སྤྲིན་དང། །ཨོཾ་ཨཱཿ ཧཱུཾ་གིས་སྦྱངས་རྟོགས་སྦར་བྱས་པས། །ནང་མཆོད་ཟག་མེད་བདུད་རྩིའི་རྒྱ་མཚོར་གྱུར། །རང་གི་སྤྱི་བོར་པཾ་ལས་པདྨ་དང། །ཨ་ལས་ཟླ་བར་ཧཱུཾ་དང་རྡོ་རྗེ་ལས། །བཀའ་དྲིན་མཉམ་མེད་རྩ་བའི་བླ་མ་ནི། །རྣམ་པ་རྡོ་རྗེ་སེམས་དཔའ་ཟླ་བའི་མདོག །རྡོར་དྲིལ་བཟུང་སྟེ་རྡོ་རྗེ་བསྙེམས་མར་འཁྱུད། །སྐྱིལ་ཀྲུང་གིས་བཞུགས་རིན་ཆེན་རྒྱན་གྱིས་སྤྲས། །དར་གྱི་ན་བཟས་བཀླུབས་པའི་གནས་གསུམ་དུ། །ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །ཡེ་ཤེས་པ་རྣམས་སྤྱན་དྲངས་དབྱེར་མེད་བསྟིམ། །སླར་ཡང་དབང་གི་ལྷ་ཚོགས་སྤྱན་དྲངས་ཏེ། །ཟག་མེད་བདུད་རྩིའི་ཆུ་ཡིས་དབང་བསྐུར་ཅིང། །སྤྱི་བོར་མི་བསྐྱོད་རྒྱལ་པོས་རྒྱས་བཏབ་གྱུར། །གང་གི་ཐུགས་རྗེ་བྱིན་རླབས་འོད་སྟོང་གིས། །སྲིད་པའི་སྡུག་བསྔལ་གྲང་རེག་གདུང་བ་དང་། །ལས་ཉོན་སྡིག་སྒྲིབ་མུན་པའི་འཇིགས་འཕྲོག་པ། །བླ་མ་རྡོ་རྗེ་སེམས་དཔའ་ལ་ཕྱག་འཚལ། །དངོས་བཤམས་ཡིད་སྤྲུལ་ཡིད་འོང་མཆོད་པའི་སྤྲིན། །དུས་གསུམ་དགེ་ཚོགས་དང་བཅས་མཆོད་པར་འབུལ། །བརྩེ་བས་བཞེས་ནས་སྔོན་བྱས་དགེ་ཚོགས་

― GTD003_Page_0834 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན། །མི་ཉམས་གོང་དུ་འཕེལ་བར་བྱིན་གྱིས་རློབས། །ཐོག་མ་མེད་ནས་མ་རིག་དབང་གྱུར་ཏེ། །སྒོ་གསུམ་ཉེས་པ་ཇི་སྙེད་བགྱིས་པ་དང། །ཁྱད་པར་སྡོམ་གསུམ་དང་འགལ་ཉེས་ལྟུང་ཀུན། །སྙིང་ནས་འགྱོད་པ་དྲག་པོས་མཐོལ་ལོ་བཤགས། །རྣམ་སྨིན་འབྲས་བུའི་སྡུག་བསྔལ་མི་བཟོད་བཞིན། །དེ་རྒྱུ་སྡིག་ལ་རྔམས་པའི་སྨྱོན་པ་བདག །ཐུགས་རྗེའི་གཏེར་ཆེན་ཁྱོད་ཀྱིས་བརྩེར་དགོངས་ཏེ། །སྲིད་པ་ངན་འགྲོའི་གཡང་ལས་བསྐྱབ་ཏུ་གསོལ། །སེམས་ཉིད་གདོད་ནས་དྲི་མ་ལས་འདས་ཀྱང། །དམ་ཚིག་ཉམས་ཆག་ཉེས་པས་སྦགས་པ་ཀུན། །བླ་མ་ལྷ་ཡི་ཐུགས་རྗེ་བདུད་རྩིའི་ཆུས། །མྱུར་དུ་བྱང་ཞིང་དག་པར་མཛད་དུ་གསོལ། །དེ་ལྟར་གསོལ་བཏབ་ཐུགས་ཀར་ཟླ་བ་ལ། །ཧཱུཾ་མཐར་ཡི་གེ་བརྒྱ་བས་བསྐོར་བ་ལས། །འོད་འཕྲོས་སེམས་ཅན་ཀུན་གྱི་སྡིག་སྒྲིབ་སྦྱངས། །སྲས་བཅས་རྒྱལ་བའི་བྱིན་རླབས་བསྡུས་ཏེ་བསྟིམ། །སླར་ཡང་དེ་ལས་བདུད་རྩིའི་རྒྱུན་བབས་པ། །སྦྱོར་མཚམས་ནས་ཐོན་རང་གི་གཙུག་ནས་ཞུགས། །ལུས་ཀུན་གང་བས་སྒོ་གསུམ་དྲི་མ་སྦྱངས། །རྡོར་སེམས་བྱིན་རླབས་མ་ལུས་ཐོབ་པར་གྱུར། །ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། དྲི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦྦ་སིདྡྷི་མྨེ་པྲ་ཡཙྪ། སརྦྦ་ཀརྨ་སུ་ཙ་མེ། ཙིཏྟཾ་ཤྲཱི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ །བྷ་ག་ཝན་བཛྲ་ཧེ་རུ་ཀ་མ་མེ་མུཉྩ། ཧེ་རུ་ཀོ་བྷ་ཝ་མཧཱ་ས་མ་ཡ་སཏྭ་ཨཱཿ ཧཱུཾ་ཕཊ། ཅེས་ཅི་འགྲུབ་བཟླ། བླ་མ་རྡོར་སེམས་

― GTD003_Page_0835 ―

^{[མ་དཔེ་གཟིགས་ན་འདིར་གནོན།]}

[Full Size]

དགྱེས་པའི་འཛུམ་ཞལ་གྱིས། །ཁྱོད་ཀྱི་སྡིག་ལྟུང་ལྷག་མེད་བྱང་ངོ་ཞེས། །དབུགས་དབྱུང་མཛད་ཅིང་ཐིམ་པས་སྒོ་གསུམ་དང། །དེ་ཡི་སྐུ་གསུང་ཐུགས་གསུམ་དབྱེར་མེད་གྱུར། །དེང་ནས་ཇི་སྲིད་བྱང་ཆུབ་སྙིང་པོའི་བར། །བླ་མ་ལྷ་ཡིས་འབྲལ་མེད་རྗེས་བཟུང་མཐུས། །སྒོ་གསུམ་ཉེས་ལྟུང་དྲི་མས་མ་སྦགས་པར། །ས་ལམ་བགྲོད་པ་མྱུར་དུ་མཐར་ཕྱིན་ཤོག །ཅེས་པ་འདི་ནི་ཨུ་རད་ཤོག་ནས་གུ་ཤྲཱི་དགེ་སློང་དཀོན་མཆོག་དགེ་ལེགས་དང་ཨོར་དུ་སུ་དགེ་སློང་ཐོས་བསམ་གཉིས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་ཨ་མོ་གྷ་སིདྡྷ་ཡེ། དངོས་གྲུབ་གཉིས་ཀྱི་རྩ་བ་དམ་ཚིག་རྣམ་པར་དག་པ་ལ་ལྟོས་པས་དེའི་ཉམས་ཆག་སྐོང་བའི་ཕྱིར་དམ་ཚིག་རྡོ་རྗེའི་བསྒོམ་བཟླས་ཉམས་སུ་ལེན་པའི་ཚུལ་ནི། ཡིད་ཀྱི་རོལ་བ་དྲི་མེད་ཟླ་འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་ཐབས། །རང་གི་ཡིད་ལ་གནས་པར་གྱུར་པ་ཡི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཅིང། །སེམས་དཔའ་དམ་པ་རྣམས་ཀྱི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་ངོ་བོ་ཉིད། །དམ་པའི་ཆོས་ལ་རྟག་ཏུ་སྐྱབས་སུ་མཆི། །འཆིང་བ་རྣམས་ལས་ཡང་དག་གྲོལ་གྱུར་ཅིང། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། །རབ་ཏུ་དགའ་སོགས་ས་ལ་རབ་ཞུགས་པ། །བརྟུལ་ཞུགས་དབང་པོའི་ཚོགས་ལ་སྐྱབས་སུ་མཆི། །བསམ་དང་རྣམ་པར་སྨིན་པ་དག་གྱུར་པས། །སྒྲིབ་པ་ཀུན་གྱི་བག་

― GTD003_Page_0836 ―

^{[མ་དཔེ་གཟིགས་ན་འདིར་གནོན།]}

[Full Size]

ཆགས་ཡང་དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །ཞེས་ཐུན་མོང་མ་ཡིན་པའི་སྐྱབས་འགྲོ་སེམས་བསྐྱེད་ཤུགས་དྲག་ལན་གསུམ་སྔོན་དུ་བཏང་ལ། རང་ཉིད་ཡི་དམ་ལྷ་ཡི་སྐུར་གསལ་བའི། །ཐུགས་ཀར་པཾ་དང་ཨ་ལས་པདྨ་དང། །ཟླ་བའི་གདན་ལ་སྣ་ཚོགས་རྡོ་རྗེ་སྟེང། །ཧཱ་ལས་རལ་གྲི་འཆང་བཟུང་ཧཱས་མཚན་པ། །དེ་ལས་འོད་འཕྲོས་སྲས་བཅས་རྒྱལ་ཀུན་མཆོད། །མ་ལུས་འགྲོ་བའི་དམ་ཚིག་ཉམས་ཆག་སྦྱངས། །ཚུར་འདུས་ཐིམ་པ་ཡོངས་སུ་གྱུར་པ་ལས། །བཅོམ་ལྡན་དམ་ཚིག་རྡོ་རྗེ་སྐུ་མདོག་ལྗང། །ལྗང་ནག་དཀར་བའི་ཞལ་གསུམ་ཕྱག་དྲུག་གིས། །རལ་གྲི་སྣ་ཚོགས་རྡོ་རྗེ་འཁོར་ལོ་གཡས། །གཡོན་ན་དྲིལ་བུ་པད་ལྗང་ནོར་བུ་འཛིན། །རང་འོད་དང་མཚུངས་དམ་ཚིག་སྒྲོལ་མ་ནི། །ཕྱག་གཡས་སྣ་ཚོགས་རྡོ་རྗེ་འཁོར་ལོ་དང། །རྡོ་རྗེས་མཚན་པའི་ཨུཏྤ་ལ་འཛིན་ཅིང། །གཡོན་གསུམ་དྲིལ་བུ་རིན་ཆེན་རལ་གྲི་བསྣམས། །ཐབས་ཤེས་དབྱེར་མེད་ཕན་ཚུན་འཁྱུད་པ་ཡི། །གནས་གསུམ་ཨོཾ་ཨཱཿ ཧཱུཾ་གིས་མཚན་པར་གྱུར། །ཐུགས་ཀའི་ཧཱུཾ་ལས་འོད་འཕྲོས་རྒྱལ་བ་ཀུན། །དམ་ཚིག་རྡོ་རྗེའི་རྣམ་པར་སྤྱན་དྲངས་ཏེ། །ཛཿ ཧཱུཾ་བཾ་ཧོཿ གཉིས་སུ་མེད་པར་བསྟིམ། །སླར་ཡང་རིགས་ལྔ་འཁོར་བཅས་སྤྱན་དྲངས་ཏེ། །དབང་བསྐུར་སྐུ་ལུས་གང་ཞིང་དྲི་མ་དག །ཡབ་ཀྱི་དབུ་ལ་མི་བསྐྱོད་མགོན་པོ་དང། །ཡུམ་ལ་དོན་ཡོད་གྲུབ་པས་རྒྱས་བཏབ་གྱུར། །ཨོཾ་སརྦྦ་ཏ་ཐཱ་ག་ཏ་ཨརྒྷཾ་ནས། ཤཔྟ་པྲ་ཏཱིཙྪ་ཧཱུཾ་སྭཱཧཱ།

― GTD003_Page_0837 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང། །དམ་ཚིག་རྡོ་རྗེ་ལ་ཕྱག་འཚལ། །བཅོམ་ལྡན་དམ་ཚིག་རྡོ་རྗེ་ཡིས། །བདག་དང་སེམས་ཅན་ཐམས་ཅད་ཀྱི། །དམ་ཚིག་ཉམས་ཆག་སྡིག་སྒྲིབ་ཀུན། །བྱང་ཞིང་དག་པར་མཛད་དུ་གསོལ། །ཐུགས་ཀར་ཟླ་དང་སྣ་ཚོགས་རྡོ་རྗེའི་སྟེང། །ཧཱ་ཡིག་སྔགས་འཕྲེང་བཅས་ལས་འོད་འཕྲོས་ཏེ། །སྲས་བཅས་རྒྱལ་བའི་བྱིན་རླབས་ནུས་མཐུ་ཀུན། །བསྡུས་ནས་བསྟིམ་ཞིང་དེ་ལས་བདུད་རྩིའི་རྒྱུན། །བབས་པས་རྡོ་རྗེའི་ཁོང་གཏམས་རྭ་རྩེ་ནས། །ཐོན་ཏེ་སྐུ་གང་ཟག་མེད་བདེ་ཆེན་མྱོང། །དེ་ཡི་བ་སྤུའི་སྒོ་ནས་ཕྱིར་ཐོན་པས། །རང་ལུས་གང་སྟེ་ཉེས་ཀུན་སྦྱངས་པར་གྱུར། །ཨོཾ་ཨཱཿ པྲཛྙཱ་དྷྲྀཀ་ཧཱ་ཧཱུཾ། ཞེས་པ་རྒྱ་སྟོང་སོགས་ཅི་ནུས་སུ་བཟླ། བླ་མའི་ཞབས་བརྟན་དུ་བྱེད་ན་སྔགས་ཅི་ནུས་བཟླས་པའི་མཇུག་ཏུ། དཔལ་ལྡན་བླ་མ་མཚན་འདི་ཞེས་བགྱི་བའི་དམ་ཚིག་ཉམས་ཆག་དང་། དེའི་དབང་གིས་བྱུང་བའི་ནད་སོགས་ཕྱི་ནང་གི་ཉེར་འཚེ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་སྔགས་བརྒྱ་རྩ་རེའི་མཚམས་སུ་སྤེལ་ཚིག་བཏགས་ལ་ཅི་འགྲུབ་བཟླ། འདི་འདྲའི་ཚེ་ཧཱ་ཡིག་གི་མདུན་དུ་བླ་མའི་མཚན་གྱི་ཡི་གེ་དང་པོ་འགོད་ལ། དེ་རང་ངམ་བསྒྲུབ་བྱ་གཞན་ལའང་འདྲའོ། །མཇུག་ཏུ། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །དེ་ལྟར་

― GTD003_Page_0838 ―

^{[མ་དཔེ་གཟིགས་ན་འདིར་གནོན།]}

[Full Size]

གསོལ་བ་བཏབ་པ་ན། །བཅོམ་ལྡན་དམ་ཚིག་རྡོ་རྗེ་ཡིས། །ཁྱོད་ཀྱི་དམ་ཚིག་ཉམས་ཆག་ཀུན། །བྱང་ཞིང་དག་གོ་ཞེས་གསུངས་ནས། །རང་ལ་ཐིམ་པར་གྱུར་པ་ཡིས། །རང་གི་ལུས་ངག་ཡིད་གསུམ་དང། །དམ་ཚིག་རྡོ་རྗེའི་སྐུ་གསུང་ཐུགས། །དབྱེར་མེད་ལྷ་སྐུའི་ངོ་བོར་གྱུར། །ཅེས་བརྗོད་ཅིང་བསམས་ལ། འདིར་ཡང་བླ་མའི་ཞབས་བརྟན་ཡིན་ན། བླ་མར་ཐིམ་པར་གྱུར་པ་ཡི། །བླ་མའི་སྐུ་གསུང་ཐུགས་གསུམ་དང། །ཞེས་བསྒྱུར་ལ། ཕ་མའམ་གཤིན་པོ་སོགས་ཀྱི་དོན་དུ་བྱས་པ་ཡིན་ནའང་། དེ་ལ་ཐིམ་ཞེས་དང་། དེ་ཡི་ལུས་ངག་ཡིད་གསུམ་ཞེས་བསྒྱུར། བཟླ་བའི་སྤེལ་ཚིག་ཀྱང་སྔ་མས་མཚོན་ཏེ་ཤེས་པར་བྱའོ། །ཞེས་པ་འདི་ནི་དད་ལྡན་ངག་དབང་ཤེས་རབ་དང་གོང་འཕེལ་གཉིས་ཀྱིས་འདིའི་ཆོ་ག་ཚིགས་བཅད་དུ་བྱས་པའི་འདོན་བདེ་བ་ཞིག་དགོས་ཞེས་བསྐུལ་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་བཛྲ་དྷཱ་རཱ་ཡ། འདིར་ཟབ་ལམ་བླ་མའི་རྣལ་འབྱོར་ཉམས་སུ་ལེན་པར་འདོད་པས། སྔོན་འགྲོ་སྦྱོར་བའི་ཆོས་རྣམས་ཚགས་སུ་ཚུད་པར་བྱས་ཏེ། རང་དང་སྣོད་བཅུད་ཀུན་ལ་ཐ་མལ་གྱི་སྣང་ཞེན་དང་བྲལ་བའི་སྒོ་ནས། མདུན་གྱི་མཁའ་ལ་དཔག་བསམ་ལྗོན་པའི་རྩེར། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་གསུམ་ངོ་བོ་བླ་མ་ཐུགས་རྗེའི་གཏེར། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །དེ་ཡི་ཐུགས་ཀར་ཐུབ་དབང་རྡོ་རྗེ་འཆང། །བླ་མའི་མཐའ་སྐོར་སྐྱབས་ཡུལ་རབ་འབྱམས་ཀྱིས། །ཡོངས་བསྐོར་ཐུགས་ཀའི་ཧཱུཾ་ལས་འོད་འཕྲོས་ཏེ། །ཡེ་ཤེས་པ་རྣམས་སྤྱན་དྲངས་དབྱེར་མེད་གྱུར། །མཆོག་ཐུན་དངོས་གྲུབ་ཀུན་སྩོལ་དབང་གི་རྒྱལ། །

― GTD003_Page_0839 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱབས་མཆོག་རྣམ་གསུམ་འདུས་པའི་ངོ་བོ་ཉིད། །རྒྱལ་བ་ཀུན་ལས་ལྷག་པའི་བཀའ་དྲིན་ཅན། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །ལུས་དང་ལོངས་སྤྱོད་དགེ་ཚོགས་མ་ལུས་འབུལ། །རྣམ་སྨིན་མི་བཟད་སྡིག་ལྟུང་ཐམས་ཅད་བཤགས། །དགེ་ལ་ཡི་རང་བསྐུལ་ཞིང་གསོལ་བ་ཡི། །དགེ་ཚོགས་དང་བཅས་བྱང་ཆུབ་མཆོག་ཏུ་བསྔོ། །མཎྜལ་དབུལ། ཁྱོད་ནི་བླ་མ་ཁྱོད་ནི་ཡི་དམ། ཞེས་པ་ནས། བར་གཅོད་སྲུངས། །ལན་གསུམ། དུས་གསུམ་སྐྱབས་གནས་ཀུན་འདུས་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །བཤེས་གཉེན་ལ་མ་གུས་པ་དང་ཚེ་འདིའི་སྣང་ཤས་ཀྱི་གདོན་གྱི་དབང་དུ་གྱུར་ཏེ་འཁོར་བ་སྤྱི་དང་བྱེ་བྲག་གི་སྡུག་བསྔལ་མི་སེམས་ཤིང་། སྐྱབས་འགྲོ་ལས་འབྲས་སྡོམ་པ་གསུམ་གྱི་བཅས་མཚམས་སོགས་ལ་མི་བརྩོན་པ་དང་། ཐོག་མེད་ནས་དྲིན་གྱིས་བསྐྱངས་པའི་མ་རྣམས་ཡལ་བར་བོར་ཞིང་། འཁོར་འདས་ཀྱི་དངོས་པོ་ཀུན་ལ་བདེན་པར་ཞེན་པ་ལ་སོགས་པ་ཕྱིན་ཅི་ལོག་གི་བློ་སྣ་མཐའ་དག་ད་ལྟ་ཉིད་དུ་ཞི་བར་བྱིན་གྱིས་བརླབ་ཏུ་གསོལ། ལེགས་ཚོགས་ཀུན་གྱི་རྩ་བ་དགེ་བའི་བཤེས་གཉེན་སངས་རྒྱས་དངོས་སུ་མཐོང་བ་ནས་བཟུང་སྟེ་གནས་ལུགས་རྟོགས་པའི་ཤེས་རབ་ཀྱི་བར་སྐྱེས་བུ་གསུམ་གྱི་ལམ་གྱི་རིམ་པས་བསྡུས་པའི་བློ་སྣ་ཕྱིན་ཅི་མ་ལོག་པ་ཐམས་ཅད་ད་ལྟ་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། དེ་ལྟར་སྒྲུབ་པ་ལ་བར་དུ་གཅོད་པའི་ཕྱི་ནང་གི་ཉེ་བར་འཚེ་བ་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ལན་གསུམ། དེ་ལྟར་གསོལ་བ་བཏབ་པས་

― GTD003_Page_0840 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱབས་ཡུལ་ཀུན། །རིམ་གྱིས་བསྡུས་ཏེ་རྩ་བའི་བླ་མར་ཐིམ། །བླ་མའི་སྐུ་ལས་བདུད་རྩིའི་རྒྱུན་བབས་པས། །ཉེས་ཀུན་བྱང་ཞིང་བྱིན་གྱིས་བརླབ་པར་གྱུར། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་ཞེས་པ་ནས། སྩལ་དུ་གསོལ། །ཚེ་རབས་ཀུན་ཏུ་མགོན་པོ་ཁྱོད་ཉིད་ཀྱིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །ཞེས་སོགས་དང་། ཤེས་ཀྱི་ཁེ་འདོད་པ་དང་ཞེས་པ་ནས། བླ་མེད་བྱང་ཆུབ་ཁོ་ནའི་རྒྱུར་གྱུར་ཅིག །ཅེས་པ་འདི་ནི་དལ་འབྱོར་དོན་ལྡན་དུ་སྒྲུབ་པའི་ཐབས་ལ་གཅིག་ཏུ་གཞོལ་བ་རབ་འབྱམས་པ་དགེ་འདུན་འཇིགས་མེད་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བླ་མའི་རྣལ་འབྱོར་གྱི་དཀྱུས་སུ་ལམ་རིམ་གྱི་དམིགས་སྐོར་བསྡུས་ཏེ་ཤིན་ཏུ་འཇུག་པ་བདེ་བའི་ཚུལ་དུ་བསྡེབས་པའོ། །༈ ན་མོ་གུ་རུ་བཛྲ་ཝ་ར་ཧ་ཡེ། བླ་མ་དང་རྡོ་རྗེ་རྣལ་འབྱོར་མ་དབྱེར་མེད་དུ་བྱས་ཏེ་གསོལ་བ་འདེབས་པར་འདོད་པའི་གང་ཟག་གིས་སྐྱབས་སེམས་སྔོན་དུ་བཏང་ལ། མདུན་གྱི་ནམ་མཁར་ཆོས་འབྱུང་བསྣོལ་མའི་དབུས། །སྣ་ཚོགས་པདྨ་ཉི་མའི་གདན་སྟེང་དུ། །རྩ་བའི་བླ་མ་རྡོ་རྗེ་རྣལ་འབྱོར་མ། །སྐུ་མདོག་བནྡྷུ་ཛི་བ་ཀཿ ལྟར་དམར། །གཅེར་མོ་སྐྲ་གྲོལ་ལང་ཚོ་དར་ལ་བབ། །གཡས་པ་རྡོ་རྗེ་གྲི་གུག་ཐུར་དུ་འཕྱང། །གཡོན་པས་ཐོད་ཁྲག་སྟེང་དུ་བཟུང་ནས་གསོལ། །ཞབས་གཡས་བརྐྱངས་པས་དུས་མཚན་དམར་མོ་དང། །གཡོན་པ་བསྐུམས་ཏེ་འཇིགས་བྱེད་ནག་པོ་མནན། །སྤྱན་གསུམ་དག་པ་མཁའ་སྤྱོད་གནས་སུ་གཟིགས། །ནུ་འབུར་རབ་རྒྱས་བདེ་དགའི་ཉམས་དང་ལྡན། །མི་མགོ་སྐམ་པོའི་དབུ་རྒྱན་དོ་ཤལ་དང། །

― GTD003_Page_0841 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་རྒྱ་ལྔས་བརྒྱན་གཟི་བྱིན་རབ་ཏུ་འབར། །དེ་ཡི་ཐུགས་ཀའི་བཾ་ཡིག་འོད་ཟེར་གྱིས། །ཕྱོགས་བཅུའི་རྒྱལ་ཀུན་རྗེ་བཙུན་རྣལ་འབྱོར་མའི། །རྣམ་པར་སྤྱན་དྲངས་དབྱེར་མེད་ཐིམ་པར་གྱུར། །སངས་རྒྱས་ལས་དཀོན་གསང་ཆེན་གདམས་པའི་མཆོག །བསྟན་པའི་སྙིང་པོ་བདེ་སྟོང་ཟུང་འཇུག་ལམ། །སྐལ་བཟང་འགྲོ་ལ་སྣང་བྱེད་སྒྲོན་མེ་མཆོག །མཁའ་སྤྱོད་དབང་མོའི་ཞབས་ལ་ཕྱག་འཚལ་ལོ། །བཀོད་ལེགས་ཕྱི་ཡི་མཆོད་པ་ཚར་དུ་དངར། །སྦྱངས་རྟོགས་སྦར་བྱས་ནང་མཆོད་བདུད་རྩིའི་མཚོ། །ལྷན་སྐྱེས་བདེ་སྟེར་གསང་བའི་མཆོད་པ་དང། །བདེན་གཉིས་ཟུང་འཇུག་དེ་ཉིད་མཆོད་པ་འབུལ། །སྔོན་བསགས་མི་དགའི་ཕུང་པོ་མཐའ་དག་དང། །ཁྱད་པར་རྩ་བ་ཡན་ལག་དམ་ཚིག་ལས། །འདས་པའི་ཉེས་ཚོགས་སྙིང་ནས་མཐོལ་བཤགས་ན། །བཅོམ་ལྡན་ཐུགས་རྗེས་ལྷག་མེད་བྱང་གྱུར་ཅིག །རྒྱལ་ཡུམ་ཤེས་རབ་ཕ་རོལ་ཕྱིན་པའི་དངོས། །བཅོམ་ལྡན་འདས་མས་ཐུགས་རྗེས་ཉེར་དགོངས་ཏེ། །ནམ་ཡང་འབྲལ་མེད་བུ་བཞིན་རྗེས་འཛིན་ཞིང། །ལམ་བཟང་རྟོགས་པ་སྐྱེ་བར་བྱིན་གྱིས་རློབས། །སྔོན་འགྲོ་ཐུན་མོང་ལམ་གྱིས་རྒྱུད་སྦྱངས་ཏེ། །འཇུག་སྒོ་རྣམ་དག་དབང་གིས་སྨིན་བྱས་ནས། །དམ་ཚིག་སྡོམ་པ་ཚུལ་བཞིན་བསྲུང་བ་ཡིས། །དངོས་གྲུབ་གཉིས་ཀྱི་སྒོ་བརྒྱ་འབྱེད་པར་ཤོག །ཁྱད་པར་རྣལ་འབྱོར་མ་ཡི་ཐུགས་རྗེ་མཐུས། །རྩ་རླུང་ཁམས་ཀྱི་ནུས་པ་ཡོངས་སྨིན་པས། །ལྷན་སྐྱེས་དགའ་བ་མཆོག་དང་སྟོང་པ་ཉིད། །

― GTD003_Page_0842 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱེར་མེད་ལམ་གྱིས་སྲིད་རྩ་འབྱིན་པར་ཤོག །ཅེས་བརྗོད་ཅིང་། རྡོ་རྗེ་རྣལ་འབྱོར་མའི་ཐུགས་ཀའི་སྔགས་འཕྲེང་དང་སྐུའི་ཆ་ལས་བདུད་རྩིའི་རྒྱུན་བབས། རང་གི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་རྩ་ཁམས་བྱིན་གྱིས་བརླབས་ཤིང་བདེ་སྟོང་གི་ཏིང་འཛིན་ཁྱད་པར་ཅན་སྐྱེ་བར་བྱིན་གྱིས་བརླབ་བྱུང་སྙམ་པ་བྱས་ལ། ཨོཾ་ཨཱཿ རཏྣ་ཤཱ་ས་ན་དཱི་པཾ་སིདྡྷི་ཧཱུཾ་ཧཱུཾ། ཞེས་དང་། ཨོཾ་ཨོཾ་ཨོཾ་སརྦྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞྞ་ནཱི་ཡེ། བཛྲ་བཻ་རོ་ཙ་ནཱིཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱཧཱ། ཞེས་ཅི་འགྲུབ་བཟླ། ཡིག་བརྒྱས་ལྷག་ཆད་བསྐང་། བླ་མ་བཅོམ་ལྡན་འདས་མ་ཐུགས་རྗེའི་གཏེར། །ཡི་དམ་མཁའ་འགྲོ་ཆོས་སྐྱོང་ཀུན་གྱི་དངོས། །ཁྱོད་མིན་སྐྱབས་གཞན་ནམ་ཡང་མི་འཚོལ་བས། །བྱང་ཆུབ་བར་དུ་རྗེས་སུ་གཟུང་དུ་གསོལ། །འདི་སྣང་འགགས་ཚེ་བཅོམ་ལྡན་འདས་མས་ཞལ། །མངོན་སུམ་བསྟན་ནས་དག་པ་མཁའ་སྤྱོད་དུ། །ཁྲིད་དེ་གསང་ཆེན་མྱུར་ལམ་ལ་བརྟེན་ནས། །དཔའ་བོའི་དབང་ཕྱུག་གོ་འཕང་མྱུར་ཐོབ་ཤོག །ཅེས་བརྗོད་ཅིང་། རང་གི་སྤྱི་བོ་ནས་མར་བྱོན་ཏེ་སྙིང་གའི་མི་ཤིགས་པའི་ཐིག་ལེ་དང་དབྱེར་མེད་དུ་འདྲེས་པར་བསམས་ལ། ལྷ་མོ་ཚད་མ་དམ་ཚིག་ཚད་མ་དང། །དེས་བརྗོད་གསུང་ཡང་མཆོག་ཏུ་ཚད་མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །ཅེས་བསྔོ་སྨོན་དང་བདེན་སྟོབས་བརྗོད་པས་རྒྱས་གདབ་པར་བྱའོ། །ཞེས་པ་འདི་ནི་མེར་གན་ཤོག་ནས་དད་བརྩོན་བློ་དང་ལྡན་པ་དགེ་སློང་སྐལ་བཟང་ཡར་འཕེལ་གྱིས་བསྐུལ་ངོར་༸བཙུན་པ་དཀོན་མཆོག་བསྟན་

― GTD003_Page_0843 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྒྲོན་མེས་བྲིས་པའོ། །༈ བློ༷་བཟ༷ང་རྒྱལ་བ་ཀུན་གྱི་ཡེ་ཤེས་དང། །དབྱེར་མེད་སྒྲིབ་བྲལ་ཆོ༷ས་སྐུའི་ལྷ་ལམ་ལས། །མཁའ་ཁྱབ་ཞིང་དུ་གང་འདུལ་གཟུགས་ཀྱི༷་སྐུའི། །ཉི༷་མ༷་སྟོང་འབར་ཁྱབ་བདག་རིགས་ཀྱི་མགོན། །རབ་འབྱམས་དཀྱིལ་འཁོར་སྤྲོ་ཞིང་སྡུད་པ་པོ། །དཔལ་ལྡན་བླ་མ་ཧེ་རུ་ཀ་དཔལ་དང། །གཉིས་མེད་ཡེ་ཤེས་རང་འོད་བཅོམ་ལྡན་མ། །གནས་གསུམ་དཔའ་བོ་མཁའ་འགྲོ་ཡོངས་ཀྱི་གཙོ། །སྐུ་མདོག་དམར་པོ་བྱུ་རུའི་འཁྲི་ཤིང་ལ། །མཐར་བྱེད་མེ་ཡི་གདེངས་ཀས་འཁྱུད་པ་བཞིན། །ལང་ཚོའི་དཔལ་འབར་སྐྲ་གྲོལ་གཅེར་མོའི་གཟུགས། །འཁྲིལ་ལྡེམ་རྐེད་སྐབས་ཕྲ་ཞིང་ནུ་འབུར་རྒྱས། །ཁྲོ་ཆགས་སྒེག་པའི་ཉམས་ཀྱིས་སྤྱན་གསུམ་གདངས། །ཚེམས་ཕྲེང་མཆེ་བ་ཟླ་བའི་མྱུ་གུ་གཙིགས། །ཕྱག་གཡས་རྡོ་རྗེ་གྲི་གུག་ཐུར་དུ་བརྐྱངས། །གཡོན་པ་ཐོད་ཁྲག་སྟེང་དུ་བཟེད་ཅིང་གསོལ། །མཆན་ཁུང་གཡོན་པར་ཁ་ཊྭཱཾ་ག་ཡིས་མཚན། །རུས་པའི་རྒྱན་སྤྲས་མགོ་རློན་དོ་ཤལ་འཕྱང། །བརྐྱང་བསྐུམ་ཞབས་ཀྱིས་འཇིགས་བྱེད་དུས་མཚན་བཅས། །མནན་ཏེ་མདུན་གྱི་ནམ་མཁར་བཞུགས་པ་ཡི། །གནས་གསུམ་ཡི་གེ་གསུམ་མཚན་ཧཱུཾ་ཡིག་ལས། །སྤྲོས་པའི་འོད་ཀྱིས་རང་འདྲའི་ཡེ་ཤེས་པ། །བླ་མ་ཡི་དམ་མཁའ་འགྲོའི་ཚོགས་དང་བཅས། །སྤྱན་དྲངས་དབྱེར་མེད་བརྟན་པར་བཞུགས་སུ་གསོལ། །བློ༷་ཆེན་ཀུན་བཟ༷ང་བདེ་ཆེན་ཐབས་ཀྱི་བདག །མཚན་འཛིན་དམིགས་མེད་ཤེས་རབ་ཆོ༷ས་ཀྱི༷་དབྱིངས། །དབྱེར་མེད་ལྷན་ཅིག་

― GTD003_Page_0844 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེས་དགའི་ཉི༷་འོད་ཀྱིས། །སྐྱོང་མཛད་བཅོམ་ལྡན་མ༷་ལ་ཕྱག་འཚལ་ལོ། །དངོས་བཤམས་ཡིད་སྤྲུལ་ཕྱི་ནང་གསང་བ་ཡི། །མཆོད་ཚོགས་བདེ་སྟོང་དབྱེར་མེད་ངང་དུ་འབུལ། །སྤྱི་དང་བྱེ་བྲག་དམ་ཚིག་ཉམས་ཆག་ཀུན། །འགྱོད་པས་བཤགས་སོ་ཡོངས་སུ་དག་པར་མཛོད། །གསང་ཆེན་སྤྱོད་ལ་དགའ་བས་ཡི་རང་ངོ་། །ཟབ་ལམ་ཐེག་མཆོག་ཆོས་ཀྱི་དགའ་སྟོན་སྩོལ། །དགེ་བས་ཐུན་མོང་ལམ་གྱིས་རྒྱུད་སྦྱངས་ཏེ། །རྣལ་འབྱོར་མ་རྒྱུད་ལམ་གྱི་སྣོད་གྱུར་ཅིག །དངོས་གྲུབ་རྩ་བ་དམ་ཚིག་ལ་གནས་ཤིང། །སྨིན་བྱེད་བསྐྱེད་རིམ་ལྷ་ཡི་རྣལ་འབྱོར་ལ། །བརྟེན་ནས་གྲོལ་བྱེད་ཟབ་མོའི་རྫོགས་རིམ་གྱིས། །ཚེ་གཅིག་སངས་རྒྱས་ཐོབ་པར་བྱིན་གྱིས་རློབས། །མདོར་ན་བླ་མ་ཡི་དམ་མཁའ་འགྲོའི་ཚོགས། །ཀུན་གྱི་ངོ་བོར་ཁྱོད་ལ་གསོལ་འདེབས་ན། །ནམ་ཡང་འབྲལ་མེད་བརྩེ་བས་རྗེས་བཟུང་སྟེ། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །དེ་ནས། བློ༷་ཆེན་ཀུན་བཟ༷ང་ཞེས་པའི་ཤླཽ་ཀ་གསོལ་འདེབས་སུ་བསྒྱུར་བ་གང་མང་དང་། གཞན་ཡང་གསོལ་འདེབས་ཅི་རིགས་དང་། ཨོཾ་གསུམ་མའི་སྔགས་རྣམས་ཀྱི་བཟླས་པ་ཅི་འགྲུབ་བྱ། མཇུག་ཏུ། དཔལ་ལྡན་བླ་མ་བཅོམ་ལྡན་མཁའ་འགྲོའི་གཙོ། །བདག་གི་སྙིང་གར་ཞེས་པ་ནས། སྩལ་དུ་གསོལ། །ཞེས་རང་གི་སྙིང་གར་སྤྱན་དྲངས་པས་ཕྲ་བའི་རླུང་སེམས་དང་ངོ་བོ་དབྱེར་མེད་དུ་བཞུགས་པར་བསམས་ལ། ཚེ་རབས་ཕྲེང་བར་བླ་མ་རྗེ་བཙུན་མས། །འབྲལ་མེད་ལྷན་སྐྱེས་དགའ་བས་རྗེས་བཟུང་སྟེ། །ཟུང་འཇུག་སྐུ་བཞིའི་གོ་འཕང་མངོན་གྱུར་ནས། །མཁའ་མཉམ་འགྲོ་བ་སྲིད་ལས་སྒྲོལ་གྱུར་ཅིག །ལྷ་མོ་ཚད་མ་ཞེས་སོགས་སྨོན་ལམ་གཞན་གྱིས་ཀྱང་མཚམས་སྦྱར་བར་བྱའོ། །

― GTD003_Page_0845 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པ་འདི་ནི་མཁྱེན་དཔྱོད་ཡངས་པ་ཆོས་རྗེ་ངག་དབང་རིན་ཆེན་གྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སུག་བྲིས་སུ་བགྱིས་སོ། །ན་མོ་གུ་རུ་བྷྱཿ འདིར་བླ་མའི་རྣལ་འབྱོར་ཉམས་སུ་ལེན་པར་འདོད་པས། སྐྱབས་སེམས་སྔོན་དུ་བཏང་སྟེ། དགེ་སེམས་ཁྱད་པར་ཅན་གྱི་ངང་ནས། མི་འགྱུར་མཆོག་ཡངས་རང་བཞིན་ཀུན་གསལ་མར། །གསེར་འོད་འཁྱུག་པའི་འཇའ་སྤྲིན་དྲ་བའི་དབུས། །སེང་ཁྲི་པད་ཟླ་ཉི་མའི་དཀྱིལ་འཁོར་སྟེང། །རྩ་བའི་བླ་མ་གསུམ་ལྡན་རྡོ་རྗེ་འཛིན། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །རབ་དགྱེས་འཛུམ་པའི་ཉམས་ལྡན་ཐུགས་རྗེའི་གཏེར། །ནམ་མཁའི་མཐའ་ཀླས་ཚོགས་ཞིང་རྒྱ་མཚོར་བཅས། །མོས་བློའི་ཞིང་དུ་བརྟན་པར་བཞུགས་སུ་གསོལ། །ལེགས་བྱས་སྤྲིན་དཀར་ཕུང་པོ་འཁྲིགས་པའི་སྐུ། །ལེགས་བཤད་དབྱར་རྔ་དལ་གྱིས་རྒོད་པའི་གསུང། །མཁྱེན་བརྩེའི་སྦྲང་ཆར་ཁུར་གྱིས་གཏམས་པའི་ཐུགས། །སྐྱབས་མཆོག་མཚུངས་མེད་ཁྱོད་ལ་ཕྱག་འཚལ་ལོ། །ཡེ་ཤེས་སྒྱུ་འཕྲུལ་མེ་ན་ཀ་ཚོགས་ཀྱིས། །ཀུན་ཏུ་བཟང་པོའི་མཆོད་སྤྲིན་ལེགས་བསྟར་ཏེ། །བསོད་ནམས་ཞིང་མཆོག་རྣམས་ལ་གུས་འབུལ་ན། །ཟག་མེད་བདེ་ཆེན་དངོས་པོར་བཞེས་སུ་གསོལ། །ཐོག་མེད་དུས་ནས་སེམས་ཀྱི་དབང་གྱུར་ཅིང། །སེམས་ནི་རྨོངས་པས་བྲན་དུ་བཟུང་བའི་མཐུས། །ཧ་ལ་འབར་འདྲའི་སྡིག་ལྟུང་ཅི་བགྱིས་པ། །དེ་ཀུན་བསམ་པ་ཐག་པས་སོ་སོར་བཤགས། །ཨེ་མ་ཡིད་འོང་འབྲས་བུ་ཀུན་གྱི་གཞི། །མ་སྨད་འཁོར་གསུམ་ཡོངས་དག་དགེ་

― GTD003_Page_0846 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཚོགས། །སྐྱེ་འཕགས་གང་གིས་བགྱིས་པ་དེ་ཀུན་ལ། །ཕྲག་དོག་མེད་པར་སྙིང་ནས་རྗེས་ཡི་རང། །དུག་གསུམ་ནད་ཀྱིས་གཟིར་་བའི་འགྲོ་རྣམས་ཀྱི། །སྐྱོབ་པ་ཟླ་མེད་སྨན་པ་ཁྱོད་ལགས་ན། །བརྩེ་བས་དགོངས་ཏེ་ཟབ་རྒྱས་དམ་ཆོས་ཀྱི། །བདུད་རྩིའི་སྒོ་མོ་དེང་འདིར་དབྱེ་བར་མཛོད། །རྫུ་འཕྲུལ་རྐང་པས་བརྟེན་སླད་བསྐལ་པའི་མཐར། །གཞོམ་གཞིག་བྲལ་བ་ཆོས་ཀྱི་སྐུ་བརྙེས་རྣམས། །རིང་ནས་གོམས་པའི་སྙིང་རྗེའི་མ་མ་ཡིས། །འགྲོ་ཀུན་མི་གཏོང་བརྟན་པར་བཞུགས་སུ་གསོལ། །སྣང་མཐའ་ཡིད་བཞིན་འཁོར་ལོ་བི་ཛ་ཡཱ། །ལ་སོགས་འཆི་མེད་དཔལ་སྟེར་ལྷ་རྣམས་ཀྱི། །ཐུགས་རྗེ་མཐུ་ནུས་བདེན་པའི་བྱིན་གྱིས་ཀྱང། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །དེང་ནས་བཟུང་སྟེ་ཚེ་རབས་ཕྲེང་བའི་བར། །མགོན་པོ་ཁྱོད་ཀྱིས་འབྲལ་མེད་རྗེས་འཛིན་ཞིང། །ཁྱོད་གསུང་ཡན་ལག་བརྒྱད་ལྡན་ཀླུང་རྒྱུན་གྱིས། །ལས་ཉོན་དྲི་མ་དྲུངས་ནས་འབྱིན་པར་ཤོག །ཁྱད་པར་བདེ་ལྡན་ཞིང་དུ་སྐྱེས་གྱུར་ཏེ། །འོད་དཔག་མེད་པས་རྗེས་སུ་འཛིན་པ་དང། །ཞིང་ཁམས་རྒྱ་མཚོར་སྤྲུལ་པའི་བཀོད་པ་ཡིས། །ཚོགས་གཉིས་རབ་རྫོགས་བྱང་ཆེན་མྱུར་ཐོབ་ཤོག །ཅེས་པ་འདི་ནི་དད་བརྩོན་བློ་གྲོས་དང་ལྡན་པ་སྔགས་རམས་པ་བཀྲ་ཤིས་རྒྱ་མཚོས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ། །༈ ན་མོ་གུ་རུ་བྷྱཿ འདིར་ལམ་ཟབ་བླ་མའི་རྣལ་འབྱོར་ཉམས་སུ་ལེན་པར་འདོད་པས། སྐྱབས་སེམས་སྔོན་དུ་བཏང་སྟེ་དགེ་སེམས་ཁྱད་པར་ཅན་གྱི་ངང་ནས། སྒྲིབ་བྲལ་མཁའ་ལ་ཡེ་ཤེས་དབང་པོའི་གཞུ། །སྙིང་རྗེའི་རྒྱུད་དུ་

― GTD003_Page_0847 ―

^{[མ་དཔེ་གཟིགས་ན་འདིར་གནོན།]}

[Full Size]

བཀུག་པའི་ལྡིང་ཁང་དབུས། །སྲིད་པའི་འདམ་གྱིས་མ་གོས་འདབ་བརྒྱའི་རྩེར། །རྩ་བའི་བླ་མ་ངུར་སྨྲིག་འཆང་བའི་ཚུལ། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །དེ་ཡི་གནས་གསུམ་སྔགས་ཀྱིས་མཚན་པ་ཡི། །ཧཱུཾ་ཡིག་འོད་ཀྱིས་སྤྱན་དྲངས་བསོད་ནམས་ཞིང། །དཔག་ཡས་ནམ་མཁའ་ཁྱབ་པར་བཞུགས་སུ་གསོལ། །གང་ལ་བརྟེན་ན་སྲིད་ཞིའི་རྒུད་པ་ཀུན། །དྲུངས་ནས་འབྱིན་མཛད་ཐེག་མཆོག་དགེ་བའི་བཤེས། །བཀའ་དྲིན་མཉམ་མེད་རྩ་བའི་བླ་མ་ལ། །སྒོ་གསུམ་གུས་པས་ལན་བརྒྱར་ཕྱག་བགྱིད་དོ། །དངོས་བཤམས་གཟུངས་རིགས་ཀྱིས་སྤྲུལ་མཆོད་སྤྲིན་གྱིས། །རབ་འབྱམས་རྒྱ་མཚོའི་ཞིང་ཀུན་བཀང་སྟེ་འབུལ། །བཅས་དང་རང་བཞིན་ཁ་ན་མ་ཐོ་བའི། །ཉེས་ལྟུང་དྲི་མའི་ཚོགས་རྣམས་སོ་སོར་བཤགས། །རང་གཞན་སྐྱེ་འཕགས་དུས་གསུམ་དགེ་ཚོགས་ལ། །ཕྲག་དོག་མེད་པར་སྙིང་ནས་རྗེས་ཡི་རང། །བགྲང་ཡས་བསྐལ་པའི་བར་དུ་ཞབས་བརྟན་ཅིང། །ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ། །གང་གི་ཐུགས་རྗེས་བདག་ཀྱང་ཐུན་མོང་དང། །ཐུན་མོང་མིན་པའི་ལམ་གྱི་རིམ་པ་ལ། །ངེས་པ་རྙེད་དེ་ཚུལ་བཞིན་བསྒྲུབ་པ་ཡིས། །ཤེས་རྒྱུད་སྨིན་ཅིང་གྲོལ་པར་བྱིན་གྱིས་རློབས། །འདིར་འབད་ལེགས་བྱས་བདེ་འབྱུང་རལ་པའི་ཀླུང། །བསོད་ནམས་ཀླུང་ཕྲན་སྟོང་གི་རྟེན་གྱུར་ཏེ། །སྒྲིབ་གཉིས་སྒྲིབ་གསུམ་སྒྲིབ་བཞིའི་དྲི་མ་ཀུན། །སྦྱངས་ནས་བྱང་ཆེན་རྒྱ་མཚོར་འཇུག་གྱུར་ཅིག །ཅེས་པ་འདི་ནི་ཨ་རོ་ཧོར་ཆེན་ཤོག་

― GTD003_Page_0848 ―

^{[མ་དཔེ་གཟིགས་ན་འདིར་གནོན།]}

[Full Size]

བློ་བཟང་བློ་གྲོས་ཀྱིས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས། །༈ ན་མོ་གུ་རུ་བྷྱཿ ཆོས་དབྱིངས་བདེ་ཆེན་འཆི་མེད་རོལ་པའི་ལམ། །བརྩེ་ཆེན་སྒྱུ་འཕྲུལ་འཇའ་ཚོན་གུར་ཁང་ན། །གདོང་ལྔའི་ཁྲི་ལ་པདྨ་ཉི་ཟླའི་སྟེང། །སྐྱབས་གསུམ་ཀུན་འདུས་ངོ་བོ་ཐུགས་རྗེའི་གཏེར། །དབུས་སུ་འཇམ་མགོན་བླ་མ་བཙོང་ཁ་པ། །གཡས་སུ་རིགས་ཀུན་ཁྱབ་བདག་འཇིགས་མེད་དབང། །གཡོན་ན་རྗེ་བཙུན་བསྟན་པའི་སྒྲོན་མེ་རྣམས། །སྐུ་མདོག་དཀར་གསལ་ཆོས་གོས་གསུམ་གསོལ་ཞིང། །གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །ཡེ་ཤེས་པ་རྣམས་སྤྱན་དྲངས་དབྱེར་མེད་གྱུར། །ཐར་ལམ་ཇི་བཞིན་སྟོན་མཛད་རྫོགས་སངས་རྒྱས། །སྲིད་ཞིའི་འཇིགས་པ་ཀུན་སེལ་དམ་པའི་ཆོས། །བྱང་ཆུབ་ལམ་གྱི་འདྲེན་པ་དགེ་འདུན་ཏེ། །སྐྱབས་གསུམ་ཀུན་དངོས་ཁྱོད་ལ་ཕྱག་འཚལ་ལོ། །མཁའ་ཁྱབ་ཀུན་བཟང་མཆོད་སྤྲིན་རྒྱ་མཚོས་མཆོད། །མི་བཟད་ཉེས་ལྟུང་མ་ལུས་སྙིང་ནས་བཤགས། །རླབས་ཆེན་རྒྱལ་སྲས་སྤྱོད་ལ་རྗེས་ཡི་རང། །བསྐལ་བརྒྱར་བཞུགས་ཤིང་ཆོས་འཁོར་བསྐོར་བར་བསྐུལ། །འདིས་མཚོན་དགེ་བས་ཚེ་རབས་ཐམས་ཅད་དུ། །བཤེས་གཉེན་རྣམས་ཀྱིས་འབྲལ་མེད་རྗེས་འཛིན་ཞིང། །དལ་འབྱོར་རྙེད་དཀའ་ཚེ་ལ་ལོང་མེད་དང། །སྐྱབས་འགྲོ་ལས་འབྲས་ཚུལ་བཞིན་སེམས་པར་ཤོག །འཁོར་བ་མེ་མདག་འཁྲིགས་པའི་འོབས་འདི་ལ། །སྲེད་པའི་འདུན་པ་ནམ་ཡང་མི་སྐྱེ་བར། །བདེན་བཞིའི་འཇུག་ལྡོག་བསླབ་གསུམ་ཉམས་ལེན་གྱིས། །

― GTD003_Page_0849 ―

^{[མ་དཔེ་གཟིགས་ན་འདིར་གནོན།]}

[Full Size]

སྲིད་པའི་རྒྱ་མཚོ་མྱུར་དུ་སྐེམ་པར་ཤོག །རིང་ནས་ཕ་མར་གྱུར་པའི་འགྲོ་ཀུན་ལ། །རྗེས་ཆགས་སྙིང་རྗེས་དྲངས་པའི་བྱང་ཆུབ་སེམས། །རྒྱལ་སྲས་སྤྱོད་པ་ཕྱིན་དྲུག་བསྡུ་བཞི་སོགས། །ཐེག་མཆོག་ལམ་བཟང་མྱུར་དུ་བགྲོད་པར་ཤོག །ཁྱད་པར་སྲིད་པའི་ནད་བརྒྱ་སེལ་བའི་སྨན། །དངོས་འཛིན་གདོན་ཆེན་འཇོམས་པའི་རིག་སྔགས་གཙོ། །དུས་གསུམ་རྒྱལ་བའི་དགོངས་པ་མཐར་ཐུག་པ། །ཀླུ་སྒྲུབ་ལུགས་བཟང་ཁོང་དུ་ཆུད་པར་ཤོག །སངས་རྒྱས་ལས་ཀྱང་དཀོན་པ་གསང་སྔགས་ཀྱི། །འཇུག་སྒོ་སྨིན་བྱེད་དབང་གིས་རྒྱུད་སྦྱངས་ཏེ། །མཚན་བཅས་མཚན་མེད་རིམ་གཉིས་རྣལ་འབྱོར་སོགས། །རྡོ་རྗེ་ཐེག་པའི་ལམ་བཟང་མཐར་ཕྱིན་ཤོག །མདོར་ན་དུས་གསུམ་དགེ་བ་ཅི་མཆིས་རྣམས། །སྲིད་པའི་ཕུན་ཚོགས་རྒྱུ་རུ་མི་སྨིན་པར། །ཐུན་མོང་ཐུན་མོང་མིན་པའི་ལམ་བགྲོད་ནས། །མཐར་ཐུག་སྐུ་བཞིའི་གོ་འཕང་འཐོབ་ཕྱིར་བསྔོ། །ཞེས་པ་འདི་ནི་མཁྱེན་རབ་ཀྱི་དབང་ཕྱུག་སློབ་ཟུར་བློ་བཟང་རིན་ཆེན་པའི་གསུང་གིས་འདི་ལྟ་བུ་ཞིག་དགོས་ཚུལ་བྱུང་བར་བརྟེན་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་བྷྱཿ འདིར་བླ་མ་དང་མགོན་པོ་འོད་དཔག་ཏུ་མེད་པ་ངོ་བོ་དབྱེར་མི་ཕྱེད་པའི་ཟབ་ལམ་བླ་མ་ལྷའི་རྣལ་འབྱོར་གྱི་སྒོ་ནས་ངན་འགྲོའི་སྐྱེ་སྒོ་བཅད་དེ་ཞིང་མཆོག་བདེ་བ་ཅན་དུ་སྒྲོད་པར་བྱེད་པའི་ཐབས་མཁས་ཀྱི་ལམ་བཟང་ཉམས་སུ་ལེན་པ་ན། ཐོག་མར་རང་དང་རིགས་དྲུག་མཐའ་དག་ཐོག་མེད་ནས་འཁོར་བར་འཁྱམས་ཚུལ་བསམ་པའི་སྐྱོ་ཤས་དང་། དེ་ལས་སྐྱོབ་པའི་ནུས་པ་བླ་མ་དཀོན་མཆོག་ལ་ཡོད་པར་ཡིད་ཆེས་པའི་སྒོ་ནས་སྐྱབས་སེམས་སྔོན་དུ་བཏང་སྟེ། རང་གི་

― GTD003_Page_0850 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱི་གཙུག་བདེ་ཆེན་འཁོར་ལོའི་སྟེང། །རབ་མཛེས་རྨ་བྱས་བཏེག་པའི་ནོར་བུའི་ཁྲིར། །སྐྱོན་བྲལ་པདྨ་ཉི་ཟླའི་གདན་སྟེང་དུ། །རྩ་བའི་བླ་མ་མགོན་པོ་འོད་དཔག་མེད། །འཇའ་ཚོན་རྣམ་བཀྲ་བྱུ་རུའི་ལྷུན་པོ་བཞིན། །སྐུ་མདོག་དམར་གསལ་འོད་བརྒྱའི་དྲ་བ་འགྱེད། །མཉམ་གཞག་བདུད་རྩིས་གང་བའི་ལྷུང་བཟེད་བསྣམས། །དགྱེས་པའི་ཉམས་ལྡན་རྡོ་རྗེ་སྐྱིལ་ཀྲུང་གིས། །བཞུགས་པའི་ཐུགས་ཀའི་ཧཱུཾ་ཡིག་འོད་ཟེར་གྱིས། །བདེ་ལྡན་ཞིང་ནས་རྒྱལ་བ་འོད་དཔག་མེད། །རྒྱལ་སྲས་རྒྱ་མཚོས་བསྐོར་བ་སྤྱན་དྲངས་ཏེ། །དམ་ཚིག་པ་དང་དབྱེར་མེད་ཐིམ་པར་གྱུར། །དངོས་བཤམས་ཡིད་སྤྲུལ་ཀུན་བཟང་མཆོད་པའི་སྤྲིན། །ཁྱད་པར་དུས་གསུམ་དགེ་བའི་ཚོགས་དང་བཅས། །བློ་ཡིས་བླངས་ཏེ་བླ་མ་ལྷར་འབུལ་ན། །མཁའ་མཉམ་འགྲོ་བའི་དོན་དུ་བཞེས་སུ་གསོལ། །ཀུན་རྨོངས་མུན་པར་ཞུགས་པས་མི་དགེའི་ལས། །ཇི་སྙེད་བགྱིས་རྣམས་འགྱོད་པ་དྲག་པོ་ཡིས། །ཐུགས་རྗེ་ཆེ་ལྡན་སྤྱན་སྔར་བཤགས་བགྱེིད་ན། །ཉེས་ཚོགས་བྱང་ཞིང་དག་པར་བྱིན་གྱིས་རློབས། །བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བྱེད་བསྟན་པའི་བདག །དག་པའི་ཞིང་གི་ས་མཁན་སྒྲོན་མེ་མཆོག །བླ་མ་འོད་དཔག་མེད་ལ་གསོལ་བ་འདེབས། །འདི་སྣང་ཞེན་པ་ཆོད་པར་བྱིན་གྱིས་རློབས། །བར་དོའི་འཁྲུལ་སྣང་སེལ་བར་བྱིན་གྱིས་རློབས། །ངན་སོང་སྐྱེ་སྒོ་ཆོད་པར་བྱིན་གྱིས་རློབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །དེ་ལྟར་གསོལ་བ་བཏབ་པས་བླ་མ་ལྷའི། །སྐུ་ལས་བབས་པའི་བདུད་རྩིའི་ཆུ་རྒྱུན་གྱིས། །སྒོ་གསུམ་སྡིག་

― GTD003_Page_0851 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟུང་དྲི་མ་ཀུན་བྱང་ནས། །རང་ལུས་ཤེལ་གྱི་གོང་བུ་བཞིན་དུ་གྱུར། །དེ་ཡི་དབུས་སུ་དབུ་མ་མདའ་སྙུག་ཙམ། །ལྟེ་འོག་ནས་བཟུང་སྤྱི་བོར་ཟུག་པ་ཡི། །སྙིང་གའི་ཐད་དུ་རང་སེམས་ཐིག་ལེའི་གཟུགས། །དཀར་གསལ་འོད་ཀྱི་རང་བཞིན་ཅན་དུ་གྱུར། །རིགས་ཀྱི་བདག་པོ་བླ་མ་འོད་དཔག་མེད། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གནས་ངན་འཁོར་བ་འདི་ལས་དྲང་དུ་གསོལ། །ཞིང་མཆོག་བདེ་བ་ཅན་དེར་ཁྲིད་དུ་གསོལ། །དེ་ལྟར་གསོལ་བ་བཏབ་པས་ཐུགས་ཀ་ནས། །འོད་ཀྱི་ལྕགས་ཀྱུས་རྣམ་ཤེས་གྱེན་དྲངས་ཏེ། །འོད་དཔག་མེད་མགོན་ཐུགས་ཀའི་ཧྲཱིཿ ཡིག་དང། །དབྱེར་མེད་རོ་གཅིག་ངང་དུ་གནས་པར་གྱུར། །སླར་ཡང་བླ་མ་འོད་དཔག་མེད་དང་བཅས། །ཐུར་དུ་བབ་སྟེ་སྙིང་གར་བཞུགས་པ་ཡིས། །དེང་ནས་ཇི་སྲིད་བྱང་ཆུབ་སྙིང་པོའི་བར། །ནམ་ཡང་འབྲལ་བ་མེད་པར་རྗེས་འཛིན་ཤོག །མདོར་ན་དུས་དང་གནས་སྐབས་ཐམས་ཅད་དུ། །བླ་མ་མཆོག་གིས་དགྱེས་བཞིན་རྗེས་འཛིན་ཞིང། །མདོ་སྔགས་ཟུང་འབྲེལ་ལམ་བཟང་རིམ་བགྲོད་ནས། །ཟུང་འཇུག་སྐུ་བཞིའི་གོ་འཕང་མྱུར་ཐོབ་ཤོག །དེ་ཡང་གསོལ་འདེབས་གྲངས་གསོག་བྱེད་ན་བསླུ་མེད་མ་བཟླ་ཞིང་ལས་ལ་སྦྱོར། དངོས་གཞིའི་ཚེ་སླར་ཡང་ཞེས་པའི་ཚིག་རྐང་གཉིས་ཀྱི་དོད་དུ། དེ་ནས་བླ་མ་འོད་དཔག་མེད་དང་བཅས། །བདེ་ལྡན་ཞིང་དེར་ཡུད་ཀྱིས་གཤེགས་གྱུར་ཏེ། །ཞེས་སྦྱོར་རོ། །ཚུལ་འདི་ནི་མི་ཕྱེད་པའི་དད་པ་དང་ལྷག་བསམ་མཆོག་ཏུ་དགེ་བ་རབ་འབྱམས་པ་ངག་དབང་མཆོག་ལྡན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་

― GTD003_Page_0852 ―

^{[མ་དཔེ་གཟིགས་ན་འདིར་གནོན།]}

[Full Size]

བྲིས་པའོ། །༈ བླ་མ་འོད་དཔག་མེད་ལ་ཕྱག་འཚལ་ལོ། །འདིར་རྒྱལ་བ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཉམས་སུ་ལེན་པར་འདོད་པས་སྐྱབས་སེམས་སྔོན་དུ་བཏང་ལ། བླ་མ་དང་མགོན་པོ་འོད་དཔག་མེད་ངོ་བོ་དབྱེར་མི་ཕྱེད་པའི་མོས་གུས་དང་། བདེ་བ་ཅན་གྱི་ཞིང་གི་རྣམ་པ་ཡིད་ངོར་གསལ་བཏབ་སྟེ། ཟབ་ལམ་བླ་མའི་རྣལ་འབྱོར་འདིའི་སྒོ་ནས་ཞིང་དེར་སྐྱེ་བའི་རྒྱུ་ཚོགས་བསྒྲུབ་པར་བྱའོ། །སྙམ་པའི་འཕེན་པ་སོགས་དགེ་སེམས་ཁྱད་པར་ཅན་གྱི་ངང་ནས། མདུན་གྱི་མཁའ་ལ་ཀུན་བཟང་མཆོད་སྤྲིན་དབུས། །ཡིད་འོང་རྨ་བྱས་བཏེག་པའི་ནོར་བུའི་ཁྲིར། །འདབ་སྟོང་པདྨའི་ལྟེ་བར་ཟླ་བའི་སྟེང། །སྐྱབས་གསུམ་ཀུན་འདུས་བླ་མ་འོད་དཔག་མེད། །ཉི་འོད་སྟོང་འབར་བྱུ་རུའི་ལྷུན་པོ་བཞིན། །སྐུ་མདོག་དམར་པོ་ཞལ་གཅིག་ཕྱག་གཉིས་པ། །མཉམ་གཞག་ཕྱག་རྒྱས་དྲང་སྲོང་སྣོད་མཆོག་བསྣམས། །རྡོ་རྗེ་སྐྱིལ་ཀྲུང་ཚུལ་གྱིས་བཞུགས་པ་ཡི། །གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །བདེ་ལྡན་ཞིང་ནས་རང་འདྲའི་ཡེ་ཤེས་པ། །མཐའ་ཡས་རབ་འབྱམས་རྒྱལ་བ་སྲས་དང་བཅས། །སྤྱན་དྲངས་དབྱེར་མེད་གཅིག་ཏུ་འདྲེས་པར་གྱུར། །བསླུ་མེད་དཀོན་མཆོག་གསུམ་གྱི་ངོ་བོ་ཉིད། །བསྟན་པའི་བདུད་རྩིས་ལུས་ཅན་གདུང་བ་སེལ། །ཡང་དག་ཐར་ལམ་གསལ་བའི་སྒྲོན་མེ་མཆོག །བླ་མ་འོད་དཔག་མེད་ལ་ཕྱག་འཚལ་ལོ། །རབ་འབྱམས་མཆོད་སྤྲིན་དགེ་བའི་དངོས་པོར་བཅས། །གུས་པས་འབུལ་ལོ་བརྩེ་བའི་ཐུགས་ཀྱིས་བཞེས། །སྡིག་ལྟུང་མ་ལུས་བཤགས་ཤིང་སྡོམ་བགྱིད་ན། །ཁྱོད་ཀྱི་ཐུགས་རྗེས་བྱང་ཞིང་དག་པར་མཛོད། །

― GTD003_Page_0853 ―

^{[མ་དཔེ་གཟིགས་ན་འདིར་གནོན།]}

[Full Size]

ཟབ་རྒྱས་ཆོས་ཀྱི་འཁོར་ལོ་བསྐོར་བའི་ཕྱིར། །བགྲང་ཡས་བསྐལ་པ་རྒྱ་མཚོར་བརྟན་པར་བཞུགས། །འདིས་མཚོན་དགེ་བའི་དངོས་པོ་ཐམས་ཅད་ཀྱང། །ཁྱོད་ཀྱིས་རྗེས་སུ་འཛིན་པའི་རྒྱུ་རུ་བསྔོ། །ས་གཞི་སྤོས་ཀྱིས་བྱུགས་ཤིང་ཞེས་སོགས་མཎྜལ་གྲངས་གསོག་དང་ལྟུང་བཤགས། གོང་གི་ཕྱག་འཚལ་བའི་ཚིགས་བཅད་དང་། བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་པ་རྣམས་ཀྱི་སྒོ་ནས་བརྒྱ་ཕྱག་ལ་སོགས་པ་གནད་དུ་འགྲོ་ངེས་བྱ། དེ་ནས། སྤྱི་གཙུག་དྷཱུ་ཏཱིའི་ཡར་སྣེ་ཕྱེ་བའི་སྟེང། །དགྱེས་བཞིན་བྱོན་ཏེ་འབྲལ་མེད་བཞུགས་པ་ཡི། །དབུ་མའི་ལམ་ནས་འོད་དང་བདུད་རྩིའི་རྒྱུན། །བབས་པས་རང་རྒྱུད་བྱིན་གྱིས་བརླབ་པར་གྱུར། །ཞེས་འོད་དང་བདུད་རྩིའི་རྒྱུན་བབས་པས་མུན་ཁུང་དུ་སྒྲོན་མེ་སྦར་བ་བཞིན་སྡིག་ལྟུང་ཐམས་ཅད་སངས་ཀྱིས་དག་ནས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་མོས་པ་བྱས་ལ། གོང་གི་ཕྱག་འཚལ་བའི་ཚིག་དེ་གསོལ་བ་འདེབས་ཞེས་པར་བསྒྱུར་ནས་བརྒྱ་སྟོང་སོགས་འདོན། མཐར་བསླུ་མེད་སྐྱབས་མཆོག་བླ་མ་འོད་དཔག་མེད། །མགོན་མེད་བདག་ལ་ཐུགས་རྗེའི་སྤྱན་གྱིས་གཟིགས། །དེང་ནས་བྱང་ཆུབ་བར་དུ་ཁྱོད་མིན་པའི། །རེ་ས་གཞན་མེད་བདག་གི་བཤེས་མཛོད་ཅིག །མི་ཁོམ་ངན་སོང་གསུམ་གྱི་གཡང་ལས་སྐྱོབས། །བཟོད་དཀའ་འཇིགས་རུང་སྲིད་པའི་མཚོ་ལས་སྒྲོལ། །རང་ཉིད་གཅེས་འཛིན་འཆིང་བ་ཀུན་བཅད་དེ། །བྱང་ཆུབ་སེམས་གཉིས་འབྱོངས་

― GTD003_Page_0854 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱིན་གྱིས་རློབས། །དེ་ལྟར་གདུང་ཤུགས་དྲག་པོས་རྩེ་གཅིག་ཏུ། །གསོལ་བ་བཏབ་པས་དྷཱུ་ཏཱིའི་ལམ་བརྒྱུད་དེ། །སྙིང་གར་བྱོན་ནས་ཕྲ་བའི་རླུང་སེམས་དང། །དབྱེར་མེད་ངང་དུ་བརྟན་པར་བཞུགས་པར་གྱུར། །དཔལ་ལྡན་བླ་མའི་རྣམ་པར་ཐར་པ་ལ། །ཞེས་སོགས་དང་། འདི་ལྟར་བསྐྲུན་པའི་རྣམ་དཀར་དགེ་བའི་ཚོགས། །ཞེས་སོགས་ཚེ་རབས་རྗེས་འཛིན་གྱི་སྨོན་ཚིག་དང་། བདེ་སྨོན་ཡོངས་རྫོགས་སམ། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །ཞེས་སོགས་སྨོན་ལམ་གྱིས་མཚམས་སྦྱར་བར་བྱའོ། །ཞེས་པ་འདི་ནི་དད་བརྩོན་ལྡན་པ་དགེ་སློང་དཀོན་མཆོག་མཁས་གྲུབ་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་སྦྱར་བའི་ཡི་གེ་པ་ནི་བྷིཀྵུ་རཏྣ་ཨཱ་ནནྟའོ། །༈ འདིར་མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཉམས་སུ་ལེན་པར་འདོད་པའི་གང་ཟག་གིས་སྐྱབས་སེམས་སྔོན་དུ་བཏང་ལ། མདུན་གྱི་ནམ་མཁར་ཀུན་བཟང་མཆོད་སྤྲིན་དབུས། །ཡིད་འོང་རྨ་བྱས་བཏེག་པའི་ནོར་བུའི་ཁྲིར། །རྩ་བའི་བླ་མ་མགོན་པོ་འོད་དཔག་མེད། །སྐུ་མདོག་དམར་པོ་མཉམ་གཞག་ཕྱག་རྒྱ་ཅན། །མཐའ་སྐོར་དངོས་བརྒྱུད་བླ་མ་ཡི་དམ་ལྷ། །སངས་རྒྱས་སོ་ལྔ་བདེ་གཤེགས་བདུན་ལ་སོགས། །རྒྱལ་དང་རྒྱལ་སྲས་ཉན་རང་ཆོས་སྐྱོང་བཅས། །སྐྱབས་གནས་མ་ལུས་དགྱེས་བཞིན་བཞུགས་པར་གྱུར། །རང་བཞིན་རྣམ་དག་ཆོས་ཀྱི་དབྱིངས་ནས་ཀྱང། །ཐུགས་བསྐྱེད་བདེན་མཐུས་བསྐུལ་ཏེ་རང་རང་གི །ཡེ་ཤེས་པ་རྣམས་སྤྱན་དྲངས་དབྱེར་མེད་དུ། །བསྟིམ་པས་སྐྱབས་གནས་ཀུན་འདུས་ངོ་བོར་གྱུར། །བསླུ་མེད་དཀོ༷ན་མཆོ༷ག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་ཐབས་

― GTD003_Page_0855 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན༷་ནས། །ཐར་ལམ་གསལ་བར་བྱེད་པ༷འི་སྒྲོན༷་མེ༷་མཆོག །མགོན་པོ་འོད་དཔག་མེད་ལ་གུས་ཕྱག་འཚལ། །ནམ་མཁའི་མཐས་གཏུགས་ཞིང་ཁམས་རབ་འབྱམས་ན། །ཡིད་འཕྲོག་མཆོད་པའི་དངོས་པོ་ཅི་མཆིས་པ། །མཐའ་དག་བློ་ཡིས་བླངས་ཏེ་གུས་འབུལ་གྱི། །བདག་ཅག་བསོད་ནམས་རྫོགས་ཕྱིར་བཞེས་སུ་གསོལ། །ཐོག་མ་མེད་ནས་བླང་དོར་གནས་རྣམས་ལ། །རྨོངས་པའི་མུན་པ་སྟུག་པོའི་དབང་གྱུར་ཏེ། །སྒོ་གསུམ་ཉེས་ཚོགས་མཐའ་ཡས་བསགས་པ་རྣམས། །ཐུགས་རྗེ་ཆེ་ལྡན་སྤྱན་སྔར་མཐོལ་ལོ་བཤགས། །དལ་འབྱོར་ལན་གཅིག་རྙེད་ནས་བསྟན་པའི་སྒོར། །ཞུགས་ཀྱང་བག་མེད་སྨྱོན་པའི་སྤྱོད་པ་བཞིན། །སྡོམ་གསུམ་བཅས་མཚམས་ལས་འདས་སྡིག་ལྟུང་ཀུན། །འགྱོད་པས་བཤགས་ཤིང་ཕྱིན་ཆད་སྡོམ་པར་བགྱི། །བསླུ་མེད་བླ་མ་ལྷ་ཡི་ཐུགས་རྗེའི་མཐུས། །ཉེས་ལྟུང་དྲི་མ་མ་ལུས་བྱང་བ་དང། །རང་གཞན་ཀུན་གྱི་རྣམ་དཀར་དགེ་བའི་དངོས། །མཐའ་དག་གོང་ནས་གོང་དུ་འཕེལ་གྱུར་ཅིག །ཁྱད་པར་འདི་སྣང་འགག་པར་ཉེ་བའི་ཚེ། །གནད་གཅོད་གཤིན་རྗེའི་འཇིགས་པ་མི་འབྱུང་ཞིང། །ངན་སོང་ངན་འགྲོའི་གཡང་དུ་མི་ལྟུང་བར། །བདེ་བ་ཅན་གྱི་ཞིང་དེར་ཁྲིད་དུ་གསོལ། །འོད་གསལ་མཁའ་དབྱིངས་དྭངས་པར་སྣང་མཐའ་ཡས། །ཉེ་སྲས་དང་བཅས་དགྱེས་པའི་འཛུམ་བསྟན་ཅིང། །སྙན་པའི་གསུང་གིས་དབུགས་དབྱུང་མཛད་པའི་མཐུས། །དགའ་དང་དད་པའི་ཤུགས་ཀྱིས་འཕོ་བར་ཤོག །མདོར་ན་དུས་འདི་ནས་བཟུང་བྱང་ཆུབ་བར། །འོད་དཔག་མེད་ཀྱིས་དགེ་བའི་བཤེས་

― GTD003_Page_0856 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་དེ། །འབྲལ་མེད་གསུང་གི་བདུད་རྩིས་བསྐྱངས་པ་ཡིས། །ས་ལམ་རྟོགས་པ་མྱུར་དུ་མཐར་ཕྱིན་ཤོག །འདི་ཕྱི་བར་དོའི་གནས་སྐབས་གང་དུ་ཡང། །མགོན་པོ་ཁྱོད་མིན་སྐྱབས་གཞན་མ་མཆིས་པས། །ཐུགས་རྗེ་ལྕགས་ཀྱུས་ནམ་ཡང་མི་གཏོང་བར། །རྗེས་བཟུང་བྱིན་རླབས་དགའ་སྟོན་སྩལ་དུ་གསོལ། །ཞེས་གསོལ་བ་བཏབ་པས་སྐྱབས་ཡུལ་རྣམས་གཙོ་བོ་ལ་ཐིམ་ཞིང་། དེ་ཉིད་རང་ལ་ཐིམ་པས་བྱིན་གྱིས་བརླབ་པར་མོས་ཏེ། ཤཱཀྱའི་དབང་པོ་འདྲེན་པ་འོད་དཔག་མེད། །ཅེས་སོགས་ཀྱི་བསྔོ་བས་མཐའ་བརྒྱན་པར་བྱའོ། །ཞེས་པ་འདི་ནི་དད་བརྩོན་ལྡན་པ་རབ་འབྱམས་པ་དཀོན་མཆོག་ཡར་འཕེལ་དང་། དགེ་སློང་དཀོན་མཆོག་རབ་འབྱོར་གཉིས་ཀྱིས་འདི་ལྟ་བུའི་བླ་མའི་རྣལ་འབྱོར་སྟོབས་བཞིའི་གནད་ཚང་བ་ཞིག་དགོས་ཞེས་བསྐུལ་བ་ལྟར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་ལོ་ཀེ་ཤྭ་རཱ་ཡ། འདིར་བླ་མེད་ཀྱི་ལུགས་དང་འབྲེལ་བར་ཐུགས་རྗེ་ཆེན་པོ་ཕྱག་བཞི་པ་ལ་བརྟེན་པའི་བླ་མའི་རྣལ་འབྱོར་ཟབ་མོ་ཉམས་སུ་ལེན་པར་འདོད་པའི་གང་ཟག་གིས་སྐྱབས་སེམས་སྔོན་དུ་བཏང་ལ་དགེ་བའི་བསམ་པ་ཁྱད་པར་ཅན་གྱི་ངང་ནས། མདུན་གྱི་ནམ་མཁར་རྩ་བའི་བླ་མ་དང། །དབྱེར་མེད་སྤྱན་རས་གཟིགས་མགོན་ཕྱག་བཞི་པ། །རབ་འབྱམས་ཞིང་ནས་བླ་མ་ཡི་དམ་ཀུན། །བྱོན་ཏེ་ཐིམ་པས་ཀུན་འདུས་ངོ་བོར་གྱུར། །ཅེས། མདུན་གྱི་ནམ་མཁར་པད་ཟླའི་གདན་ལ་དྲིན་ཅན་རྩ་བའི་བླ་མ་དང་ངོ་བོ་དབྱེར་མེད་པའི་འཕགས་པ་སྤྱན་རས་གཟིགས་སྐུ་མདོག་དཀར་པོ་རྩ་ཕྱག་གཉིས་ཐལ་མོ་སྦྱར་ཞིང་། འོག་མ་གཉིས་ཀྱིས་ཤེལ་འཕྲེང་དང་པད་དཀར་འཛིན་པ། རིན་པོ་ཆེའི་རྒྱན་དང་དར་གྱི་ན་

― GTD003_Page_0857 ―

^{[མ་དཔེ་གཟིགས་ན་འདིར་གནོན།]}

[Full Size]

བཟའ་ཅན། རྡོ་རྗེ་སྐྱིལ་ཀྲུང་གིས་བཞུགས་པའི་གནས་གསུམ་དུ་ཡི་གེ་གསུམ་གྱིས་མཚན་པ། དེའི་ཐུགས་ཀའི་ཧྲཱིཿ ཡིག་ལས་འོད་ཟེར་དཔག་ཏུ་མེད་པ་ཕྱོགས་བཅུའི་ཞིང་རབ་འབྱམས་ཁྱབ་པར་སྤྲོས་ཏེ་དངོས་བརྒྱུད་ཀྱི་བླ་མ་ཐམས་ཅད་སྤྱན་དྲངས་ནས་ཐིམ་པས་བླ་མ་ཀུན་འདུས། ཡི་དམ་རྒྱུད་སྡེ་བཞིའི་དཀྱིལ་འཁོར་གྱི་ལྷ་ཚོགས་ཐམས་ཅད་སྤྱན་དྲངས་ཏེ་ཐིམ་པས་ཡི་དམ་ཀུན་འདུས་ཀྱི་ངོ་བོར་གྱུར་པར་བསམས་ལ། ཡན་ལག་བདུན་པ་སོགས་ཀྱི་སྒོ་ནས་ཚོགས་གསོག་པ་ནི། སྒོ་གསུམ་མི་ཕྱེད་དད་པས་ཕྱག་འཚལ་ཞིང། །ཕྱི་ནང་གསང་བ་དེ་ཉིད་མཆོད་ཚོགས་འབུལ། །སྡིག་ལྟུང་མ་ལུས་སྙིང་ནས་མཐོལ་ཞིང་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །རབ་འབྱམས་ཞིང་ཁམས་དུས་གསུམ་དགེ་ཚོགས་བཅས། །དབུལ་ཞིང་བླ་མེད་བྱང་ཆུབ་རྒྱུ་རུ་བསྔོ། །སོ་ཐར་བྱང་སེམས་གསང་སྔགས་སྡོམ་པ་ཡི། །བཅས་མཚམས་མཐའ་དག་ཚུལ་བཞིན་བསྲུང་བར་བགྱི། །ཞེས་ཡན་ལག་བདུན་པ་མཎྜལ་དང་བཅས་པ་དབུལ་ཞིང། སྒྲུབ་པའི་མཆོད་པ་མཆོག་ཏུ་གྱུར་པ་སྡོམ་པ་གཟུང་བ་རྣམས་བློ་འཁུལ་ངེས་སུ་བྱ། དེ་ནས། སངས་རྒྱས་ཀུན་འདུས་བླ་མ་ཐུགས་རྗེའིགཏེར། །དམ་ཆོས་ཀུན་འདུས་བླ་མ་ཐུགས་རྗེའི་གཏེར། །དགེ་འདུན་ཀུན་འདུས་བླ་མ་ཐུགས་རྗེའི་གཏེར། །སྐྱབས་གནས་མ་ལུས་འདུས་པའི་ངོ་བོ་ཉིད། །ཁྱོད་མིན་སྐྱབས་གཞན་ནམ་ཡང་མ་མཆིས་པས། །བྱང་ཆུབ་བར་དུ་འབྲལ་མེད་རྗེས་བཟུང་སྟེ། །སྲིད་དང་ཞི་བའི་འཇིགས་ལས་བསྐྱབ་ཏུ་གསོལ། །འདི་སྣང་ཞེན་པའི་དྲི་མ་བསལ་དུ་

― GTD003_Page_0858 ―

^{[མ་དཔེ་གཟིགས་ན་འདིར་གནོན།]}

[Full Size]

གསོལ། །ལས་དང་ཉོན་མོངས་འཆིང་བ་གཅད་དུ་གསོལ། །གཅེས་འཛིན་རྒུད་པའི་འཕྲང་ལས་བསྒྲལ་དུ་གསོལ། །སྐྱེས་བུ་གསུམ་གྱི་ལམ་བཟང་རིམ་བགྲོད་དེ། །བདེ་ཆེན་ཐར་པའི་ས་ལ་དྲང་དུ་གསོལ། །ཞེས་རང་དང་མཐའ་སྐོར་ན་ཡོད་པའི་རིགས་དྲུག་སེམས་ཅན་ཐམས་ཅད་ཀྱིས་རང་རང་འཁོར་བ་ཕྲ་རགས་ཀྱི་སྡུག་བསྔལ་མཐའ་ཡས་པས་མནར་ཚུལ་ལ་བསམས་ནས་འཇིགས་ཤིང་སྐྲག་པ་དང་། མདུན་གྱི་ནམ་མཁར་བཞུགས་པའི་བླ་མ་ཐུགས་རྗེ་ཆེན་པོ་ནི་སྐྱབས་གནས་མ་ལུས་པ་འདུས་པའི་ངོ་བོ་རང་གིས་བློ་བཀལ་ན་སྲིད་ཞིའི་འཇིགས་པ་གང་ལས་ཀྱང་སྐྱོབ་པ་ལ་ཐུགས་རྗེ་དང་ནུས་མཐུ་ཐོགས་པ་མེད་པའི་ཚུལ་བསམས་ཏེ་གདུང་ཤུགས་དྲག་པོས་མགྲིན་གཅིག་ཏུ་གསོལ་བ་བཏབ་པའི་མོས་པ་དང་། ལམ་ཐུན་མོང་དང་ཐུན་མོང་མ་ཡིན་པའི་ལུས་ཡོངས་སུ་རྫོགས་པ་ལ་གཤར་སྒོམ་དང་འབྲེལ་བར་བྱིན་རླབས་ཞུ་བའི་དམིགས་རྣམ་བསྐྱངས་ལ། དེ་ནས་ཐུགས་རྗེ་ཆེན་པོ་དེ་ཉིད་ཀྱི་སྐུ་ལས་རང་འདྲ་གཉིས་པ་སེམས་ཅན་གྱི་གྲངས་དང་མཉམ་པ་སྤྲོས་ཏེ་རང་དང་སེམས་ཅན་ཐམས་ཅད་ཀྱི་སྤྱི་བོར་བཞུགས་པའི་མོས་པ་བྱས་ལ། དེ་ལྟར་གསོལ་བ་བཏབ་པས་གནས་གསུམ་ལས། །འོད་དང་བདུད་རྩི་དཀར་དམར་མཐིང་གའི་ཚོགས། །རིམ་དང་ཅིག་ཅར་བྱུང་ནས་དབང་བསྐུར་བས། །སྒྲིབ་བཞི་དག་ཅིང་དབང་བཞི་ཐོབ་པར་གྱུར། །ཅེས་སྤྱི་བོའི་ཨོཾ་ཡིག་ལས་བདུད་རྩི་དཀར་པོའི་རྒྱུན་བབ་པས་མགྲིན་པའི་རྩ་འཁོར་གྱི་སྟེང་ཡན་ཆད་གང་། ལུས་ཀྱི་སྒྲིབ་པ་སྦྱངས་བུམ་པའི་དབང་ཐོབ་ཅིང་སྤྲུལ་སྐུ་འགྲུབ་པའི་ནུས་པ་བཞག །དེ་བཞིན་དུ་མགྲིན་པའི་ཨཱཿ ཡིག་གི་བདུད་རྩི་དམར་པོས་ངག་གི་སྒྲིབ་པ་སྦྱངས། གསང་དབང་དང་ལོངས་སྐུ་འགྲུབ་པའི་ནུས་པ་བཞག །ཐུགས་ཀའི་ཧཱུཾ་ཡིག་གི་བདུད་རྩི་སྔོན་པོས་ཡིད་ཀྱི་སྒྲིབ་པ་

― GTD003_Page_0859 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱངས། ཤེར་དབང་དང་ཆོས་སྐུ་འགྲུབ་པའི་ནུས་པ་བཞག །དེ་གསུམ་ལས་བདུད་རྩི་མཉམ་དུ་བབ་པས་སྒོ་གསུམ་གའི་དྲི་མ་སྦྱངས། དབང་བཞི་པ་དང་ཟུང་འཇུག་འགྲུབ་པའི་ནུས་པ་བཞག་པར་བསམས། དེ་ནས་སེམས་ཅན་སོ་སོའི་སྤྱི་བོར་བཞུགས་པའི་བླ་མ་སྤྱན་རས་གཟིགས་རྣམས་འོད་དུ་ཞུ་སྟེ་རང་རང་ལ་ཐིམ་པས་དེ་ཐམས་ཅད་སྤྱན་རས་གཟིགས་ཀྱི་སྐུར་གྱུར། དེ་དག་ཀྱང་གཅིག་ལ་གཅིག་ཐིམ་གྱི་ཚུལ་དུ་རིམ་གྱིས་བསྡུས་ཏེ་རང་གི་སྤྱི་བོའི་བླ་མ་སྤྱན་རས་གཟིགས་ལ་ཐིམ། དེ་འོད་དུ་ཞུ་བ་རང་ལ་ཐིམ། རང་གི་སྒོ་གསུམ་དང་བླ་མའི་སྐུ་གསུང་ཐུགས་དབྱེར་མི་ཕྱེད་པར་གྱུར། རང་ཉིད་ཀྱང་སྐུའི་སྟོད་སྨད་ནས་རིམ་གྱིས་འོད་དུ་ཞུ་བས་ནམ་མཁའ་ལ་འཇའ་ཡལ་བ་བཞིན་གྱུར་ཏེ། སྣོད་བཅུད་འཁོར་འདས་ཀྱི་ཆོས་ཀུན་རང་བཞིན་མི་དམིགས་པ་འོད་གསལ་སྟོང་པའི་དབྱིངས་ལ་མཉམ་པར་བཞག་པས་ཡེ་ཤེས་ཀྱི་ཚོགས་བསགས་ཤིང་ཆོས་ཀྱི་སྐུ་ལ་ང་རྒྱལ་བཞག །འོད་གསལ་དེའི་ངང་ལས་མངོན་བྱང་ལྔའི་རིམ་པས་སྤྱན་རས་གཟིགས་ཀྱི་སྐུར་བཞེངས་པ་ལོངས་སྐུ་དང་སྤྲུལ་སྐུའི་ང་རྒྱལ་འཛིན་ཅིང་སྐྱེ་ཤི་བར་དོ་གསུམ་སྦྱངས་ཏེ་རྒྱལ་བའི་སྐུ་གསུམ་དུ་བསྒྱུར་བའི་དམིགས་པ་དང་བཅས། འགྲོ་ཀུན་སྤྱན་རས་གཟིགས་ཀྱི་སྐུར་བསྒྱུར་ཅིང། །རིམ་གྱིས་བསྡུས་ཏེ་འོད་གསལ་སྟོང་པར་གྱུར། །སྟོང་པའི་ངང་ལས་པདྨ་ཟླ་བའི་སྟེང། །ཧྲཱིཿ དང་པད་དཀར་ཡོངས་སུ་གྱུར་པ་ལས། །རང་ཉིད་སྤྱན་རས་གཟིགས་ཀྱི་སྐུར་བཞེངས་པའི། །ཐུགས་ཀའི་ཧྲཱིཿ ཡིག་སྔགས་འཕྲེང་དང་བཅས་པར། །གཟུངས་སྔགས་ཀུན་བསྡུས་འོད་ཀྱི་འཕྲོ་འདུ་ཡིས། །སྣོད་བཅུད་སྦྱངས་བསྒྱུར་བྱིན་གྱིས་བརླབས་པར་གྱུར། །ཅེས་ཐུགས་ཀའི་སྔགས་འཕྲེང་ལས་འོད་ཟེར་འཕྲོས་ཏེ་རྒྱུད་སྡེ་བཞིའི་གསང་སྔགས་དང་

― GTD003_Page_0860 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་སྔགས་ཐམས་ཅད་བསྡུས་ནས་དེ་ལ་བསྟིམ་པས་གཟུངས་སྔགས་ཀུན་འདུས་ཀྱི་ངོ་བོ་གྱུར་པར་བསམས་ལ། སྣོད་བཅུད་ཀུན་གྱི་མ་དག་པའི་ཉེས་པ་སྦྱངས་ཏེ། གཟུགས་སུ་སྣང་བ་ཐམས་ཅད་སྤྱན་རས་གཟིགས་ཀྱི་སྐུ་དང་དག་པའི་ཞིང་ཁམས། སྒྲ་གྲགས་ཚད་འཕགས་པའི་གཟུངས་སྔགས་ཡིད་ཀྱི་དྲན་རྟོག་ཐམས་ཅད་དེའི་ཐུགས་རྣམ་པར་མི་རྟོག་པའི་ཡེ་ཤེས་སུ་མོས་པ་འཁྱེར་སོ་གསུམ་དང་མ་བྲལ་བའི་སྒོ་ནས་གཟུངས་རིང་དང་ཡིག་དྲུག་སོགས་ཅི་འགྲུབ་བཟླས་ལ་ཡིག་བརྒྱས་ལྷག་ཆད་བསྐང་། དགེ་བ་འདི་ཡིས་མྱུར་དུ་བདག །སྤྱན་རས་གཟིགས་དབང་འགྲུབ་གྱུར་ནས། །ཞེས་སོགས་བསྔོ་བས་མཚམས་སྦྱར་བར་བྱའོ། །ཞེས་པ་འདི་ནི་དགེ་སྦྱོར་ལ་མཆོག་ཏུ་གཞོལ་བའི་རི་ཁྲོད་པ་དཀོན་མཆོག་རབ་རྒྱས་ཀྱིས་བླ་མེད་དང་འབྲེལ་པའི་ཐུགས་རྗེ་ཆེན་པོའི་རྣལ་འབྱོར་གྱིས་གཞུང་བསྲངས་ཏེ་བཟླས་བརྗོད་བྱེད་ཚུལ་ཟབ་གནད་ཚང་ཞིང་ཤིན་ཏུ་མདོར་བསྡུས་པ་ཞིག་དགོས་ཞེས་བསྐུལ་བ་ལྟར། གྲུབ་ཆེན་ཚེམ་བུ་བ་དང་རྒྱལ་བ་དབེན་ས་པ་སོགས་ཀྱི་མན་ངག་གུང་བསྒྲིགས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པ་འདིས་ཀྱང་སྐྱེ་བོ་ཀུན་ལ་ཕན་ཐོགས་པར་གྱུར་ཅིག། །༈ ན་མོ་གུ་རུ་ལོ་ཀེ་ཤྭ་རཱ་ཡ། རང་གི་སྤྱི་བོར་པདྨ་ཟླ་བའི་སྟེང་། །བཀའ་དྲིན་མཉམ་མེད་རྩ་བའི་བླ་མ་དང། །དབྱེར་མེད་སྙིང་རྗེའི་ལྷ་མཆོག་སྤྱན་རས་གཟིགས། །སྐུ་མདོག་དཀར་གསལ་ཤེལ་གྱི་རི་བོ་བཞིན། །འཛུམ་པའི་ཞལ་མངའ་རྩ་ཕྱག་ཐལ་མོ་སྦྱར། །ལྷག་མའི་ཕྱག་གིས་ཤེལ་འཕྲེང་པད་དཀར་བསྣམས། །རིན་ཆེན་རྒྱན་ལྡན་དར་གྱི་ན་བཟས་ཀླུབས། །རྡོ་རྗེ་སྐྱིལ་མོ་ཀྲུང་གིས་བཞུགས་པའི་མཐར། །

― GTD003_Page_0861 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་དང་བརྒྱུད་པའི་བླ་མ་ཡི་དམ་ལྷ། །རྒྱལ་དང་རྒྱལ་སྲས་ཉན་རང་སྲུང་ཚོགས་བཅས། །སྐྱབས་ཡུལ་ནམ་མཁའ་གང་བ་བཞུགས་པ་རྣམས། །བསོད་ནམས་ཞིང་དུ་བརྟན་པར་བཞུགས་སུ་གསོལ། །བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ལུང་རྟོགས་བཤད་སྒྲུབ་བསྟན་པའི་དཔལ་གྱུར་ཅིང། །ལས་ཉོན་སྒྲིབ་པའི་མུན་སེལ་སྒྲོན་མེ་མཆོག །བླ་མ་སྤྱན་རས་གཟིགས་ལ་ཕྱག་འཚལ་ལོ། །ཕུན་ཚོགས་བདེ་དགེ་མ་ལུས་མཆོད་པར་འབུལ། །མི་བཟད་སྡིག་ལྟུང་མཐའ་དག་སྙིང་ནས་བཤགས། །རླབས་ཆེན་ཐུགས་རྗེའི་སྤྱོད་ལ་རྗེས་ཡི་རང། །སླད་ཀྱང་ཟབ་རྒྱས་ཆོས་ཆར་དབབ་ཏུ་གསོལ། །ཚེ་འདིའི་སྣང་ཤེས་སྲིད་ལ་ཞེན་པ་དང། །རང་ཉིད་གཅེས་འཛིན་མཚན་མར་ལྟ་བ་སོགས། །ཕྱིན་ཅི་ལོག་གི་བློ་སྣ་ཀུན་འགགས་ཤིང། །ལམ་བཟང་གེགས་མེད་སྐྱེ་བར་བྱིན་གྱིས་རློབས། །ཞེས་བརྗོད་ལ་གོང་གི་ཕྱག་འཚལ་གྱི་ཚིགས་བཅད་གསོལ་འདེབས་སུ་བསྒྱུར་བ་གྲངས་གསོག་དང་། ཐུགས་རྗེ་ཆེན་པོའི་གཟུངས་རིང་ཐུང་གི་བཟླས་པ་ཅི་འགྲུབ་བྱ། དེ་ནས། འདིས་མཚོན་བགྱིས་དང་བགྱིད་འགྱུར་དུས་གསུམ་གྱི། །རྣམ་དཀར་དགེ་ཚོགས་ཇི་སྙེད་མཆིས་པ་ཀུན། །སྲས་བཅས་རྒྱལ་བའི་ཐུགས་བསྐྱེད་རྒྱ་མཚོ་དང་། །འདྲེས་ཏེ་ཀུན་བཟང་སྤྱོད་པ་རྫོགས་གྱུར་ཅིག །རྟག་ཏུ་བཤེས་གཉེན་དམ་པས་རྗེས་བཟུང་ནས། །དེ་ཡི་བཀའ་བཞིན་སྒྲུབ་པ་ལྷུར་བྱེད་ཅིང། །ཁྱད་པར་འཇམ་མགོན་བསྟན་པའི་སྙིང་པོ་ལ། །ཐོས་བསམ་སྒོམ་པས་དུས་ཀུན་

― GTD003_Page_0862 ―

^{[མ་དཔེ་གཟིགས་ན་འདིར་གནོན།]}

[Full Size]

འདའ་བར་ཤོག །འདི་ཕྱིའི་ཕན་བདེའི་ལེགས་ཚོགས་ཀུན་གྱི་གཞི། །དཔལ་ལྡན་བླ་མའི་སྐུ་ཚེ་བརྟན་པ་དང། །སྡེ་འདིར་བསླབ་གསུམ་འཛིན་པའི་དགེ་འདུན་རྣམས། །བཤད་སྒྲུབ་བྱ་བ་གེགས་མེད་མཐར་ཕྱིན་ཤོག །སྒོ་གསུམ་བགྱི་བ་མ་ལུས་བསྟན་འགྲོ་ལ། །འཕྲལ་དང་ཡུན་དུ་ཕན་པའི་རྒྱུར་གྱུར་ཏེ། །མངོན་མཐོ་ངེས་ལེགས་དགའ་སྟོན་ལ་སྦྱོར་བས། །དོན་གཉིས་གེགས་མེད་ལྷུན་གྱིས་གྲུབ་གྱུར་ཅིག །བླ་མ་ལྷག་པའི་ལྷ་མཆོག་སྤྱན་རས་གཟིགས། །བདག་གི་སྙིང་གར་པདྨའི་ཞེས་སོགས་དང་། སྐྱེ་བ་ཀུན་ཏུ། ཞེས་སོགས་བསྔོ་སྨོན་གྱིས་མཚམས་སྦྱོར་ཞིང་། སྒོ་གསུམ་གྱི་བྱ་བ་ཀུན་ལ་དེ་ཉིད་དཔང་པོའི་ཚུལ་དུ་དྲན་པ་དང་། ཟས་གོས་གནས་མལ་གང་ལ་ལོངས་སྤྱོད་པའི་ཚེ་དེ་ལ་དབུལ་བར་སེམས་པ་སོགས་ཚོགས་གསོག་སྒྲིབ་སྦྱོང་ལ་འབད་པར་བྱའོ། །ཞེས་པ་འདི་ནི་བསྟན་པའི་གསལ་བྱེད་དམ་པ་ལུང་བཟང་ནང་སྤྲུལ་པའི་སྐུ་དཀོན་མཆོག་བསྟན་འཛིན་རྒྱ་མཚོའི་ཐུགས་བཞེད་བཞིན༸བཙུན་པ་དཀོན་མཆོག་བསྟན་པའི་སྒྲོན་མེས་དགོན་དེ་ཉིད་དུ་བྲིས་པའོ། །ན་མོ་གུ་རུ་ཨཱརྱ་ལོ་ཀེ་ཤྭ་རཱ་ཡ། གནས་སྤྱི་གཙུག་བདེ་ཆེན་འཁོར་ལོའི་སྟེང། །གདན་སེང་ཁྲི་པདྨ་ཉི་ཟླའི་དབུས། །སྐྱབས་ཀུན་འདུས་རྩ་བའི་བླ་མ་དང། །དབྱེར་མེད་པ་འཕགས་མཆོག་སྤྱན་རས་གཟིགས། །སྐུ་རབ་དཀར་ཤེལ་གྱི་མཆོད་སྡོང་ལ། །དར་སྣ་ཚོགས་དབང་པོའི་གཞུ་ཡིས་སྤྲས། །ཐབས་ཤེས་རབ་ཕྱག་གཉིས་ཐལ་སྦྱར་གྱིས། །མགོན་རྒྱལ་རྣམས་འགྲོ་བའི་དོན་དུ་བསྐུལ། །གཡས་འོག་མས་ཤེལ་དཀར་བགྲང་འཕྲེང་དང། །གཡོན་སྐྱོན་བྲལ་གསེར་གྱི་པདྨ་བསྣམས། །ཡོངས་དུས་

― GTD003_Page_0863 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་རྒྱལ་བའི་ཐུགས་རྗེའི་བདག །མ་འགྲོ་བ་ཀུན་གྱི་མགོན་དང་སྐྱབས། །ཡུལ་གངས་ཅན་འགྲོ་བའི་ལྷ་སྐལ་ཏེ། །མི་བདག་གི་འདི་ཕྱིའི་སྐྱབས་གཅིག་པུ། །མགོན་ཁྱོད་མིན་རེ་ས་གཞན་མེད་ན། །ཐུགས་བརྩེ་བས་བདག་གི་མགོན་མཛོད་ཅིག །ལྷ་དཀོན་མཆོག་གསུམ་གྱི་ཐུགས་རྗེའི་མཁར། །ཆོས་ལུང་རྟོགས་བསྟན་པའི་འོད་སྣང་གིས། །རྒྱུད་རྨོངས་མུན་སེལ་བའི་སྒྲོན་མེ་མཆོག །མགོན་སྤྱན་རས་གཟིགས་ལ་གསོལ་བ་འདེབས། །ལུས་ལོངས་སྤྱོད་དུས་གསུམ་དགེ་ཚོགས་ཀུན། །ཕ་ཐུགས་རྗེའི་གཏེར་ཆེན་ཁྱོད་ལ་འབུལ། །མ་འགྲོ་ཀུན་དོན་དུ་བཞེས་ནས་ཀྱང། །སྡིག་ཉེས་ལྟུང་བྱང་བར་བྱིན་གྱིས་རློབས། །གནས་མཐའ་མེད་འཁོར་བའི་རྒྱ་མཚོའདིར། །ལས་ཉོན་མོངས་གདོན་གྱི་དབང་གྱུར་ཏེ། །དུས་ཐོག་མ་མེད་ནས་འཁྱམས་པ་བདག །མཆོག་ཐར་པའི་གནས་དེར་དྲང་དུ་གསོལ། །ཆོས་ཟབ་ཞི་སྤྲོས་བྲལ་དབུ་མའི་ལམ། །བྱམས་སྙིང་རྗེ་ཆེན་པོས་རྒྱས་བཏབ་སྟེ། །སྲིད་ཞི་བའི་མཐའ་ལ་མི་གནས་པའི། །འབྲས་བྱང་ཆུབ་ཆེན་པོ་མྱུར་ཐོབ་ཤོག །དཔལ་འཆི་བ་མེད་པའི་གནས་ཐོབ་སྟེ། །ཆོས་ཟབ་གསང་བདུད་རྩིའི་དགའ་སྟོན་གྱིས། །མ་མཁའ་མཉམ་འགྲོ་བ་ཐམས་ཅད་ཀྱང། །གཏན་བདེ་བའི་དཔལ་ལ་སྦྱོར་པར་ཤོག །ཅེས་པ་འདི་ནི་དད་བརྩོན་ལྡན་པ་རབ་འབྱམས་པ་འཇམ་དབྱངས་རབ་རྒྱས་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། །༈ མདུན་དུ་པད་ཟླར་སེང་གེ་དཀར་མོའི་སྟེང། །བླ་མའི་ངོ་བོ་འཕགས་

― GTD003_Page_0864 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོག་སེང་གེ་སྒྲ། །གཡས་གཡོན་རྩེ་གསུམ་པདྨའི་སྣོད་ཀྱིས་མཚན། །དཀའ་ཐུབ་རྣམ་པ་རྒྱལ་པོ་རོལ་སྟབས་ཅན། །སྐྱབས་གནས་མ་ལུས་འདུས་པའི་ངོ་བོ་ལ། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །ཨོཾ་ཨཱཿ ཧྲཱིཿ སིདྷ་ནཱ་ད་ཧཱུཾ་ཕཊ། ཅེས་མང་དུ་བཟླས་ལ། བླ་མ་སེང་གེའི་སྒྲ་ཡི་སྐུའི་ཆ་ལས། །བདུད་རྩིའི་རྒྱུན་བབས་རང་གི་ལུས་ཀུན་གང། །སྡིག་ལྟུང་ནད་གདོན་མ་ལུས་ལྷག་མེད་དུ། །བྱང་ཞིང་རྣམ་སྨིན་ཕུང་པོ་འོད་གསལ་དུ། །སྦྱངས་ཏེ་སྟོང་པའི་ངང་ལས་སྐད་ཅིག་གིས། །རང་ཉིད་སྤྱན་རས་གཟིགས་དབང་སེང་གེ་སྒྲ། །གདོང་ལྔའི་གདན་ལ་རོལ་པའི་སྟབས་ཀྱིས་བཞུགས། །སྐུ་མདོག་དཀར་ཞིང་ཤིན་ཏུ་སྐེམ་པའི་ཚུལ། །གཡས་པ་སྐྱབས་སྦྱིན་གཡོན་པ་གདན་ལ་བརྟེན། །མདུན་གྱི་བླ་མ་སྤྱན་རས་གཟིགས་མགོན་ཡང། །འོད་དུ་ཞུ་ནས་རང་དང་དབྱེར་མེད་གྱུར། །ཐུགས་ཀའི་སྔགས་འཕྲེང་འོད་ཀྱི་སྤྲོ་བསྡུ་ཡིས། །སྐྱོན་སྦྱངས་རྒྱལ་ཀུན་བྱིན་རླབས་བསྡུས་པར་གྱུར། །ཅེས་བརྗོད་ཅིང་། ཐུགས་ཀར་ཧྲཱིཿ ལ་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། ཀླུ་དང་ས་བདག་གི་གནོད་པ་སོགས་ནད་རིམས་གདོན་བགེགས་ཉེར་འཚེ་ཐམས་ཅད་སྦྱངས། རྒྱལ་བ་སྲས་བཅས་ཀྱི་བྱིན་རླབས་བསྡུས་ཏེ་ཐིམ་པ་ལས་བདུད་རྩིའི་རྒྱུན་བབས། ལུས་ཐམས་ཅད་གང་བས་ལེགས་ཚོགས་ཀྱི་ཡོན་ཏན་མ་ལུས་པ་རྒྱས་པར་བསམས་ལ་སྔགས་བཟླ། མཇུག་ཏུ་ཡིག་བརྒྱས་ལྷག་ཆད་བསྐང་། དེང་ནས་བྱང་ཆུབ་སྙིང་པོར་མཆིས་ཀྱི་བར། །འཕགས་མཆོག་ཐུགས་རྗེས་འབྲལ་མེད་རྗེས་བཟུང་མཐུས། །དམ་ཆོས་སྒྲུབ་པའི་ཉེར་འཚེ་ཀུན་ཞི་ཞིང། །

― GTD003_Page_0865 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་དག་ལམ་གྱི་བགྲོད་པ་མཐར་ཕྱིན་ཤོག །ཅེས་སོགས་བསྔོ་བས་མཚམས་སྦྱར་བར་བྱའོ། །ཞེས་པ་འདི་ནི་ཨུ་ཅུ་མུ་ཆིན་ཤོག་ནས་དད་བརྩོན་བློ་དང་ལྡན་པ་རབ་འབྱམས་པ་དཔལ་ལྡན་བཀྲ་ཤིས་ཀྱིས་བླ་མའི་རྣལ་འབྱོར་དང་འབྲེལ་བའི་སེང་གེ་སྒྲའི་སྒྲུབ་ཐབས་མདོར་བསྡུས་ཤིག་དགོས་ཞེས་བསྐུལ་བ་ལྟར་༸ བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ངོ་མཚར་མཆོད་སྤྲིན་འཁྲིགས་པ་ནམ་མཁའི་དབྱིངས། །སེང་ཁྲི་པད་ཟླའི་གདན་ལ་བླ་མ་དང། །དབྱེར་མེད་བྱམས་མགོན་བཟང་པོའི་བཞུགས་སྟངས་ཅན། །མཚན་དཔེའི་དཔལ་འབར་ཆོས་འཁོར་ཕྱག་རྒྱ་མཛད། །སྲས་བཅས་རྒྱལ་བས་བསྐོར་ཅིང་གནས་གསུམ་དུ། །འབྲུ་གསུམ་གྱིས་མཚན་ཧཱུཾ་གི་འོད་ཟེར་གྱིས། །དགའ་ལྡན་གནས་ནས་བྱམས་མགོན་ཡེ་ཤེས་པ། །སྤྱན་དྲངས་དབྱེར་མེད་བརྟན་པར་བཞུགས་སུ་གསོལ། །རྒྱལ་ཡུམ་སྦས་དོན་ལམ་གྱི་རིམ་པ་ཀུན། །མ་ནོར་མ་འདྲེས་ཇི་བཞིན་འདོམས་པ་ཡིས། །སྐལ་ལྡན་སྐྱེ་བོ་བྱང་ཆུབ་མཆོག་གི་སར། །འཁྲིད་མཛད་སྐྱབས་ཀྱི་དམ་པར་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་སྤྲིན་རབ་འབྱམས་དང། །བདག་ལུས་ལོངས་སྤྱོད་དུས་གསུམ་དགེ་ཚོགས་བཅས། །བློ་ཡིས་བླངས་ཏེ་གུས་པས་འབུལ་ལགས་ན། །བདག་གི་དོན་སླད་ཉིད་ཀྱི་མཐུས་བཞེས་ཤིག །ངན་སོང་མུ་མེད་མཚན་མོའི་སྨག་རུམ་ནས། །དལ་འབྱོར་གློག་གི་སྣང་བ་སྐད་ཅིག་ཙམ། །ཐོབ་ཀྱང་བག་མེད་སྡིག་ལ་སྤྱོད་པ་ཡི། །རྨོངས་པ་བདག་གི་སྡིག་ལྟུང་སྦྱང་དུ་

― GTD003_Page_0866 ―

^{[མ་དཔེ་གཟིགས་ན་འདིར་གནོན།]}

[Full Size]

གསོལ། །རྒྱུ་མེད་པར་ཡང་འགྲོ་ལ་མཉེས་གཤིན་པ། །བྱམས་མགོན་ཉེ་སྲས་དང་བཅས་ཁྱེད་རྣམས་ཀྱིས། །རྟག་ཏུ་བདག་ཅག་ཁོ་ནའི་དོན་མཛད་པའི། །བཀའ་དྲིན་སྙིང་ནས་དྲན་ཞིང་རྗེས་ཡི་རང། །ཟབ་རྒྱས་ཆོས་ཀྱི་བདུད་རྩིའི་ཆར་ཕབ་སྟེ། །སྒྲིབ་གཉིས་དྲི་མ་དྲུངས་ནས་འབྱིན་པ་དང། །འགྲོ་ཀུན་སྲིད་ཞིའི་མཐའ་ལས་སྒྲོལ་གྱི་བར། །ནམ་ཡང་མི་འདའ་རྟག་པར་བཞུགས་སུ་གསོལ། །འདིས་མཚོན་གཏོང་དང་ཚུལ་ཁྲིམས་ཐོས་བསམ་སྒོམ། །དགེ་བའི་དངོས་པོ་ཇི་སྙེད་མཆིས་པ་ཀུན། །གཅིག་ཏུ་བསྡོམས་ཏེ་སྲས་བཅས་རྒྱལ་ཀུན་གྱི། །རླབས་ཆེན་ཐུགས་བསྐྱེད་རྒྱ་མཚོར་འཇུག་གྱུར་ཅིག །རྟག་ཏུ་མཐོ་རིས་ཡོན་ཏན་བདུན་ལྡན་གྱི། །རྟེན་ཐོབ་བཤེས་གཉེན་དམ་པས་རྗེས་འཛིན་ཅིང། །འདི་སྣང་འཁྲི་བ་ཆོད་པའི་བརྩོན་འགྲུས་ཀྱིས། །བླང་དོར་ཚུལ་བཞིན་སྒྲུབ་པར་བྱིན་གྱིས་རློབས། །མི་བཟད་འཁོར་བའི་སྡུག་བསྔལ་གྱིས་འཇིགས་ཤིང། །དེར་གནས་ཉམ་ཐག་འགྲོ་ལ་རྗེས་བརྩེ་བས། །རིན་ཆེན་བྱང་ཆུབ་མཆོག་ཏུ་སེམས་བསྐྱེད་དེ། །ཐེག་མཆོག་ལམ་བཟང་བགྲོད་པར་བྱིན་གྱིས་རློབས། །ནམ་ཞིག་འདི་སྣང་འགག་པར་རྩོམ་པ་ན། །ཁྱོད་ཞལ་མིག་གི་བདུད་རྩིར་འགྱུར་བ་ཡིས། །ཤུགས་དྲག་དད་པའི་ངང་ནས་ཤི་འཕོས་ཏེ། །ཡིད་དགའ་ཆོས་འཛིན་གནས་སུ་སྐྱེ་བར་ཤོག །མདོར་ན་དེང་ནས་ཇི་སྲིད་བྱང་ཆུབ་བར། །འདྲེན་མཆོག་མ་ཕམ་མགོན་གྱིས་རྗེས་བཟུང་སྟེ། །ས་ལམ་རྟོགས་པ་གེགས་མེད་མྱུར་བགྲོད་ནས། །དཔལ་ལྡན་སྟོབས་བཅུའི་ས་ལ་རེག་གྱུར་ཅིག །ཅེས་པ་

― GTD003_Page_0867 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ནི་བཟང་པོའི་བག་ཆགས་ཀྱི་མཐུ་བརྟས་པ་ཞབས་དྲུང་དཀོན་མཆོག་ཆོས་འབྱོར་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །མདུན་གྱི་ནམ་མཁར་ཀུན་བཟང་མཆོད་སྤྲིན་དབུས། །ནོར་བུའི་འོད་ཆགས་སེང་ཁྲི་པད་ཟླའི་སྟེང། །བཀའ་དྲིན་མཉམ་མེད་རྩ་བའི་བླ་མ་དང། །ངོ་བོ་དབྱེར་མེད་རྒྱལ་ཚབ་བྱམས་པ་མགོན། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །མཚན་དཔེའི་རྒྱན་ལྡན་ཆོས་འཁོར་ཕྱག་རྒྱ་ཅན། །ལྷ་རྫས་གོས་དང་རིན་ཆེན་རྒྱན་གྱིས་སྤྲས། །བཟང་པོའི་བཞུགས་སྟངས་མཛད་པའི་ཐུགས་ཀ་ནས། །འོད་འཕྲོས་དགའ་ལྡན་གནས་ནས་བྱམས་མགོན་ལ། །སྲས་བཅས་རྒྱལ་བས་བསྐོར་བ་སྤྱན་དྲངས་ཏེ། །དབྱེར་མེད་བསྟིམ་པས་སྐྱབས་གནས་ཀུན་འདུས་ཀྱི། །ངོ་བོར་བསོད་ནམས་ཞིང་དུ་བཞུགས་གྱུར་ཅིག །དཀོན་མཆོག་ཀུན་འདུས་ཐུགས་རྗེའི་ཟློས་གར་གྱིས། །ཟབ་རྒྱས་བསྟན་པའི་གནད་ཀུན་གདན་གཅིག་ལ། །སྒྲུབ་པའི་ལམ་བཟང་གསལ་མཛད་སྒྲོན་མེ་མཆོག །བྱམས་མཆོག་བླ་མ་མཆོག་ལ་གུས་ཕྱག་འཚལ། །ལུས་དང་ལོངས་སྤྱོད་དུས་གསུམ་དགེ་ཚོགས་བཅས། །ཀུན་བཟང་མཆོད་པའི་ངོ་བོར་ལེགས་འབུལ་ན། །ཐུགས་རྗེས་བཞེས་ནས་བདག་སོགས་འགྲོ་ཀུན་གྱི། །ཤེས་རྒྱུད་སྨིན་ཅིང་གྲོལ་བར་བྱིན་གྱིས་རློབས། །སྡོམ་གསུམ་བཅས་པའི་མཚམས་ལས་འདས་པ་སོགས། །ཉེས་ཀུན་གནོང་ཞིང་འགྱོད་པས་མཐོལ་བགྱིད་ན། །ཐུགས་རྗེ་ཆེ་ལྡན་བྱིན་རླབས་བདུད་རྩིའི་ཆུས། །

― GTD003_Page_0868 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷག་མེད་བྱང་ཞིང་དག་པར་བྱིན་གྱིས་རློབས། །འདྲེན་པ་ཁྱོད་མིན་སྐྱབས་གཞན་མ་མཆིས་པས། །རྟག་ཏུ་འབྲལ་མེད་བདག་གི་མགོན་མཛད་དེ། །ཟབ་རྒྱས་གདམས་པའི་གྲུ་ཆར་འཇོ་བ་ཡིས། །དགེ་བའི་ལོ་ཏོག་གོང་དུ་སྤེལ་བར་མཛོད། །མ་འོངས་སྐྱེ་བའི་འཕྲེང་བ་ཀུན་ཏུ་ཡང། །དག་པའི་ཞིང་ངམ་དལ་འབྱོར་ཚང་བའི་རྟེན། །རིམ་བརྒྱུད་བཤེས་གཉེན་དམ་པ་མཉེས་བྱས་ནས། །མདོ་སྔགས་ལམ་ལ་ཚུལ་བཞིན་སློབ་གྱུར་ཅིག །མདོར་ན་བླ་མ་ཡི་དམ་ཆོས་སྐྱོང་སོགས། །ཀུན་གྱི་ངོ་བོར་རྩེ་གཅིག་གསོལ་འདེབས་ན། །སྲིད་ཞིའི་འཇིགས་ལས་བསྒྲལ་ཏེ་བླ་མ་ལྷའི། །གོ་འཕང་མྱུར་དུ་ཐོབ་པར་བྱིན་གྱིས་རློབས། །བཀའ་དྲིན་མཉམ་མེད་བླ་མ་ལྷག་པའི་ལྷ། །བདག་གི་སྙིང་གར་པདྨའི་གདན་བཞུགས་ལ། །ཞེས་སོགས་དང་། འདིས་མཚོན་དགེ་བའི་ཞེས་སོགས་དང་། ནམ་ཞིག་རྡོ་རྗེ་གདན་གྱི་ཞེས་སོགས་བྱམས་མགོན་དང་འབྲེལ་བའི་སྨོན་ལམ་ཅི་རིགས་པས་མཚམས་སྦྱར་བར་བྱའོ། །ཞེས་པ་འདི་ནི་ཐོས་བསམ་སྒོམ་པ་ཟུང་དུ་འཇུག་བའི་བསྟན་པའི་གསལ་བྱེད་དམ་པ་རྒྱལ་མཁན་པོ་གྲགས་པ་རྒྱལ་མཚན་པའི་གསུང་གིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་བཛྲ་དྷཱ་རཱ་ཡ། འདིར་འཇམ་མགོན་བླ་མ་ལ་བརྟེན་པའི་ཟབ་ལམ་བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་སྒོ་ནས་རང་གཞན་གྱི་དོན་རླབས་པོ་ཆེ་སྒྲུབ་པར་འདོད་པའི་གང་ཟག་གིས་རྗེའི་སྐུ་བརྙན་བྲིས་འབུར་ཅི་རིགས་ཀྱིས་གཙོས་པའི་སྐུ་གསུང་ཐུགས་ཀྱི་རྟེན་ལེགས་པར་དགྲམ། མདུན་དུ་ཆུ་གཉིས་ཉེར་སྤྱོད་དང་བཅས་པ་ཚར་གསུམ་ཡན་ཆད་དང་། གཞན་ཡང་མར་མེ་བརྒྱ་རྩ་སོགས་

― GTD003_Page_0869 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་པ་གང་རྒྱས། མཎྜལ་དང་བཅས་པ་ལེགས་པར་བསྟར། སྐྱབས་སེམས་རྒྱས་པར་སྔོན་དུ་བཏང་། དཀོན་མཆོག་གསུམ་གྱི་བདེན་པ་དང་། ཆོས་དབྱིངས་རྟེན་འབྲེལ་བསླུ་བ་མེད་བའི་མཐུ་སྟོབས་ཀྱིས་མཆོད་པའི་ཡོ་བྱད་ཐམས་ཅད་ཀུན་ཏུ་བཟང་པོའི་སྨོན་པའི་མཐུ་ལས་སྐྱབས་ཡུལ་རྣམས་ལ་ཟག་པ་མེད་པའི་དགྱེས་པ་སྐྱེད་པར་བྱེད་པའི་མཐུ་དང་ལྡན་པར་གྱུར། ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡ་ནི། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མཧཱ་བཛྲེ། མཧཱ་ཏེ་ཛ་བཛྲེ། མཧཱ་བིདྱཱ་བཛྲེ། མཧཱ་བོ་དྷི་ཙིཏྟ་བཛྲེ། མཧཱ་བོ་དྷི་མནྜོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་བརྗོད་དེ་བྱིན་གྱིས་བརླབ། དགའ་ལྡན་གྱི་ཞིང་གི་བཀོད་པ་ཡིད་ངོར་ལེགས་པར་གསལ་བཏབ་སྟེ། སྟེང་ཕྱོགས་དགའ་ལྡན་གནས་ཀྱི་བྱེ་བྲག་མཆོག །ཡིད་དགའ་ཆོས་འཛིན་རྒྱལ་བའི་མདུན་ས་ནས། །རྣམ་འདྲེན་སྟོབས་བཅུ་མངའ་བ་མ་ཕམ་མགོན། །ཉིན་བྱེད་འབུམ་གྱིས་འཁྱུད་པའི་གསེར་རི་བཞིན། །མཚན་དཔེའི་དཔལ་འབར་གཟི་བརྗིད་ལྷམ་མེ་བ། །རིན་ཆེན་རྒྱན་སྤྲས་ཆོས་འཁོར་ཕྱག་རྒྱ་ཅན། །གདོང་ལྔའི་ཁྲི་ལ་བཟང་པོའི་བཞུགས་སྟངས་མཛད། །དེ་ཡི་ཐུགས་མཚན་དཔལ་གྱི་བེ་འུའི་ནང། །འཇམ་མགོན་བླ་མ་ཡབ་སྲས་ལེགས་བཞུགས་ཤིང། །གཞན་ཡང་སར་གནས་དཔའ་བོ་གྲངས་མེད་སོགས། །འཁོར་ཚོགས་རྒྱ་མཚོས་བསྐོར་བ་ཐམས་ཅད་ཀྱང། །བདག་སོགས་ལྷོ་གླིང་གདུལ་བྱའི་ཚོགས་

― GTD003_Page_0870 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་ལ། །བརྩེ་བའི་ཐུགས་ཀྱིས་མངོན་པར་དགོངས་པ་ཡི། །ཉམས་འགྱུར་དང་བཅས་རྣམ་པ་གསལ་བར་གྱུར། །དགའ་ལྡན་ལྷ་བརྒྱའི་མགོན་གྱི་ཐུགས་ཀ་ནས། །རབ་དཀར་ཞོ་གསར་སྤུངས་འདྲའི་ཆུ་འཛིན་རྩེར། །ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲགས། །སྲས་དང་བཅས་པ་གནས་འདིར་གཤེགས་སུ་གསོལ། །མདུན་གྱི་ནམ་མཁར་སེང་ཁྲི་པད་ཟླའི་སྟེང། །རྗེ་བཙུན་བླ་མ་དགྱེས་པའི་འཛུམ་དཀར་ཅན། །བདག་བློ་དད་པའི་བསོད་ནམས་ཞིང་མཆོག་ཏུ། །བསྟན་པ་རྒྱས་ཕྱིར་བསྐལ་བརྒྱར་བཞུགས་སུ་གསོལ། །དེ་ཡང་སེང་ཁྲི་གསུམ་གྱི་དབུས་མ་ལ། །སྐྱབས་གསུམ་ཀུན་འདུས་འཇམ་མགོན་ཙོང་ཁ་པ། །སྐུ་མདོག་དཀར་ལ་དམར་བའི་མདངས་ཆགས་ཤིང། །ཕྱག་གཉིས་ཐུགས་ཀར་ཆོས་འཁོར་ཕྱག་རྒྱ་ཡིས། །རལ་གྲི་གླེགས་བམ་དང་བཅས་ཨུཏྤལ་བསྣམས། །དྲི་མེད་གསེར་མདོག་པཎ་ཞྭས་གཙུག་མཛེས་ཤིང། །ཆོས་གོས་གསུམ་གསོལ་སྐྱིལ་ཀྲུང་ཚུལ་གྱིས་བཞུགས། །དེ་ཡི་སྤྱི་བོར་སྐུ་ཡི་རྡོ་རྗེའི་དངོས། །ལྷ་མཆོག་སྙིང་རྗེའི་བདག་ཉིད་སྤྱན་རས་གཟིགས། །མགྲིན་པར་གསུང་གི་རྡོ་རྗེའི་ངོ་བོ་ཉིད། །ཤེས་རབ་སྟོང་པའི་རང་བཞིན་འཇམ་པའི་དབྱངས། །ཐུགས་ཀར་ཐུགས་ཀྱི་རྡོ་རྗེའི་བདག་ཉིད་མཆོག །མཐུ་སྟོབས་ནུས་པའི་གཏེར་གྱུར་གསང་བའི་བདག །རིགས་བརྒྱ་རིགས་ལྔ་རིགས་གསུམ་ཀུན་གྱི་དངོས། །ལྷ་མཆོག་གསུམ་དང་དབྱེར་མེད་ངོ་བོ་ཉིད། །གཡས་སུ་ཆོས་ཀྱི་རྒྱལ་པོ་དར་མའི་མཚན། །ཞི་དུལ་ཉམས་ལྡན་ཆོས་འཆད་མཉམ་

― GTD003_Page_0871 ―

^{[མ་དཔེ་གཟིགས་ན་འདིར་གནོན།]}

[Full Size]

གཞག་མཛད། །གཡོན་དུ་སྨྲ་བའི་ཉི་མ་དགེ་ལེགས་དཔལ། །ཆོས་འཆད་མཉམ་གཞག་དང་བཅས་འགྱིང་བའི་ཉམས། །ཡབ་སྲས་གསུམ་གྱི་འོད་ཟེར་འཕྲོ་འདུ་ཡིས། །དངོས་དང་བརྒྱུད་པའི་བླ་མ་ཐམས་ཅད་དང། །ཞི་ཁྲོ་རབ་འབྱམས་ཡི་དམ་འཁོར་ལོའི་ཚོགས། །རབ་འབྱམས་རྒྱལ་དང་རྒྱལ་སྲས་མ་ལུས་པ། །དཔའ་བོ་མཁའ་འགྲོ་ཉན་རང་ཆོས་སྲུང་ཀུན། །སྤྱན་དྲངས་བསོད་ནམས་ཞིང་དུ་བཞུགས་སུ་གསོལ། །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱི་འོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང། །བདེ་བར་གཤེགས་པ་ཐམས་ཅད་བདག་གིས་བསྟོད། །ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པ་དོན་ལྡན་ལ་ཕྱག་འཚལ། །ཞེས་དང།

― GTD003_Page_0872 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་ལྡན་ས་གསུམ་མ་སོགས་རྗེའི་གསོལ་འདེབས་དང་བསྟོད་པ་ཅི་རིགས་འདོན་ཞིང་། སྤྲོ་ན་ཕྱག་འཚལ་བ་དང་སྦྲགས་ཀྱང་རུང་། ཡིད་འོང་མཆོད་ཡོན་ཞེས་པའི་ཤླཽ་ཀ་གཅིག་པུའམ། རྒྱལ་བ་རྒྱ་མཚོ། མ་སོགས་ཀྱི་མཆོད་འཕྲེང་རྒྱས་པ་དང་། འདོད་ཡོན་རྣམ་ལྔ་རིན་ཆེན་སྣ་བདུན་སོགས་ཀྱང་འབུལ། ལྟུང་བཤགས་དང་སྤྱི་བཤགས་སོགས་ཀྱང་བཏོན་ཏེ། གང་ཞིག་ཐོག་མེད་དུས་ནས་ཞེས་པ་མན་ཆད་མཐར་ཆགས་སུ་བྱ། དེ་ནས་མཎྜལ་སོ་བདུན་མ་རྒྱས་པར་ཕུལ་ལ། ས་གཞི་སྤོས་བྱུགས་མ་གྲངས་བསགས་ཏེ་བདུན་ནམ་ཉེར་གཅིག་སོགས་དབུལ། དེ་ནས་བདུད་རྩི་འབེབས་སྦྱང་གི་དམིགས་པ་ཁྲིད་ཡིག་སོགས་ནས་འབྱུང་བ་ལྟར་བྱས་ལ་དམིགས་བརྩེ་མ་བརྒྱ་སྟོང་སོགས་འདོན། དེ་རྗེས། རྗེ་བླ་མའི་གནས་གསུམ་གྱི་རིགས་གསུམ་མགོན་པོ་སོ་སོའི་ཐུགས་ཀར་རིམ་པ་བཞིན་ཟླ་གདན་ལ་ཧྲཱིཿ ཡིག་དང་དྷཱིཿ ཡིག །ཉི་གདན་ལ་ཧཱུཾ་ཡིག་གི་མཐར་རང་རང་གི་སྔགས་ཀྱིས་བསྐོར་བར་མོས་ཏེ། རིགས་གསུམ་མགོན་པོའི་སྙིང་པོ་བགྲང་། ཁྲུས་ལ་སོགས་པའི་སྒོ་ནས་གཞན་གྱི་དོན་སྒྲུབ་པའི་ཚེ་ཐུགས་ཀའི་གསང་བདག་ཁྲོ་བོའི་རྣམ་པ་དེ་ཉིད་རྡོ་རྗེ་རྣམ་པར་འཇོམས་པའི་སྐུར་གྱུར་པར་མོས་ལ། དེའི་ཐུགས་ཀའི་སྔགས་འཕྲེང་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ཏེ། དེའི་སྔགས་བཟླ་ཞིང་བུམ་ཆུ་དེ་ཉིད་ཀྱིས་བཀྲུ་བྱབ་སོགས་དཀྱུས་བཞིན་བྱ། དེས་མཚོན་ཏེ་མགྲིན་པའི་འཇམ་དཔལ་དེ་ཉིད་རྡོ་རྗེ་འཇིགས་བྱེད་ཀྱི་སྐུར་གྱུར་པར་མོས་ལ་དེའི་སྔགས་བགྲང་བ་སོགས་སྐབས་དང་སྦྱར་ན་རུང་བར་གསུངས་སོ། །མཇུག་ཏུ་རྗེ་བླ་མ་རང་གི་སྙིང་གར་བྱོན་པར་མོས་ཏེ། དཔལ་ལྡན་རྩ་བའི་བླ་མ་ཞེས་སོགས་དང་། ཚེ་རབས་རྗེས་འཛིན་གྱི་སྨོན་པ་སོགས་བྱའོ། །

― GTD003_Page_0873 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་པ་འདི་ཡང་དད་བརྩོན་ལྡན་པ་དགེ་སློང་འཇིགས་མེད་བདེ་ཆེན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་མཉྫུ་གྷོ་ཥཱ་ཡ། ཡེ་ཤེས་སྣང་བ་མཆོག་ཏུ་འབར་བའི་གཟིས། །ནང་གི་མུན་པ་སེལ་བའི་ཉིན་མོར་བྱེད། །འཇམ་དབྱངས་ཞབས་ཀྱི་པདྨོ་ལ་བཏུད་ནས། །དེ་ལ་བརྟེན་པའི་བླ་མའི་རྣལ་འབྱོར་བྲི། །དེའང་ཡོན་ཏན་རིན་པོ་ཆེ་སྡུད་པ་ལས། སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བརྟེན་པར་བྱ། །ཅིའི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །ཞེས་གསུངས་པ་ལྟར། སྤྱིར་སྲིད་ཞིའི་ལེགས་ཚོགས་གཞན་ཐམས་ཅད་ནི་བདག་རྐྱེན་སངས་རྒྱས་ཀྱི་འཕྲིན་ལས་ལ་བརྟེན་ཅིང་སངས་རྒྱས་དེ་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་འཁྲུངས། ཤེས་རབ་ཀྱི་ཕ་རོལ་ཏུ་ཕྱིན་པའི་རྟོགས་པ་ནི་དགེ་བའི་བཤེས་གཉེན་གྱིས་རྗེས་སུ་གདམས་པ་ལ་རག་ལས་པས་མདོར་བསྡུ་ན་ལེགས་ཚོགས་ཡོན་ཏན་ཐམས་ཅད་ཀྱི་རྩ་བ་དགེ་བའི་བཤེས་གཉེན་ཁོ་ན་ལ་ཐུག་གོ །དེས་ན་གནས་སྐབས་མཐར་ཐུག་གི་ཕུན་ཚོགས་གང་ཞིག་བསྒྲུབ་ཀྱང་དེའི་རྟེན་འབྲེལ་ཐམས་ཅད་བླ་མ་ལ་བརྟེན་ནས་བསྒྲིག་དགོས་ཏེ། སྟོན་པ་ཡང་དག་པར་རྫོགས་པའི་སངས་རྒྱས་ནས་བཟུང་འཕགས་ཡུལ་པཎ་གྲུབ་རྣམས་དང་ཇོ་བོ་ཡབ་སྲས། འཇམ་མགོན་བླ་མ་ཡབ་སྲས་ཐམས་ཅད་ཀྱང་རྩ་བ་བཤེས་གཉེན་བསྟེན་ཚུལ་གྱི་རྨང་གཞི་བརྟན་པའི་སྟེང་ནས་ས་ལམ་གྱི་རྟོགས་པ་བགྲོད་ཚུལ་དང་བསྟན་འགྲོའི་དོན་ལྷུན་གྱིས་གྲུབ་ཚུལ་རྣམ་ཐར་རྣམས་སུ་གསལ་བ་བཞིན་ནོ། །དེས་ན་བཤེས་གཉེན་བསྟེན་ཚུལ་ནི་དམིགས་སྐོར་

― GTD003_Page_0874 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུན་རེ་ཙམ་གྱིས་མི་རྫོགས་པ་ལམ་རིམ་ཆེན་མོར་གསུངས་པ་བཞིན་ཡིན་པས་སངས་རྒྱས་དངོས་སུ་མཐོང་བའི་དད་པ་དང་རྒྱལ་བ་ཀུན་ལས་བཀའ་དྲིན་ཆེ་ཚུལ་རྗེས་སུ་དྲན་པའི་གུས་པ་ཆེན་པོས་ཡིད་གཏིང་ནས་གཡོས་ཏེ་སྒོ་གསུམ་མཐའ་དག་བླ་མའི་དབང་དུ་བཏང་ཞིང་བྱ་བ་ཐམས་ཅད་བླ་མ་མཉེས་པའི་མཆོད་པར་འགྱུར་བ་ཞིག་བྱུང་ན་མགོ་བཤེས་གཉེན་བསྟེན་ཚུལ་གྱི་སརྒ་མ་ལོག་པ་དང་ལམ་གྱི་རྩ་བ་ཚུགས་པ་ཡིན་པས་གནས་འདི་ལ་ཤིན་ཏུ་གཟབ་པར་བྱའོ། །འདིར་བླ་མའི་རྣལ་འབྱོར་སྒོམ་ཚུལ་གྱི་རིམ་པ་ཙམ་ཞིག་ཟུར་དུ་འགོད་པ་ལ་ལྷག་པའི་ལྷ་སོ་སོ་དང་སྦྱར་བའི་བླ་མའི་རྣལ་འབྱོར་རིགས་སྣ་ཚོགས་ཤིག་ཡོད་ཀྱང་རྗེ་བླ་མའི་གདམས་པ་ཐུན་མོང་མ་ཡིན་པ་རྣམས་ཉམས་སུ་ལེན་སྐབས་བླ་མ་དང་འཇམ་པའི་དབྱངས་ངོ་བོ་དབྱེར་མེད་དུ་བྱས་ན་རྟེན་འབྲེལ་གྱི་སྒོ་ཁྱད་པར་ཅན་ཡོད་ཚུལ་ཡབ་སྲས་རྣམས་ཀྱི་གསུང་རྒྱུན་དུ་མ་ལས་འབྱུང་བ་ལྟར་ཡིན་པས་འདིར་ཡང་དེའི་དབང་དུ་བྱས་ཏེ་ཉམས་སུ་ལེན་པ་ལ། གནས་ཁང་བྱི་དོར་བྱས། ལམ་གཙོའི་ཚོགས་ཞིང་ངམ་འཇམ་པའི་དབྱངས་དང་རྗེ་བླ་མ། རང་གི་རྩ་བའི་བླ་མ་རྣམས་ཀྱི་སྐུ་བརྙན་བྲིས་འབུར་ཅི་རིགས་ཀྱིས་གཙོ་བྱས་པའི་སྐུ་གསུང་ཐུགས་ཀྱི་རྟེན་དགྲམ། ཡོན་ཆབ་དང་མར་མེ་སོགས་དྭངས་ཤིང་གསལ་བའི་མཆོད་པ་ལེགས་པར་བཤམ། སྤྱོད་ལམ་ཚུལ་མཐུན་གྱིས་འཁོད་དེ་དགེ་སེམས་ཁྱད་པར་ཅན་གྱི་ངང་ནས་སྐྱབས་འགྲོ་སེམས་བསྐྱེད་ཚད་མེད་བཞི་རྣམས་ཡོངས་གྲགས་ལྟར་དང་། ཁྱད་པར་མ་སེམས་ཅན་ཐམས་ཅད་ཀྱི་མི་ཤེས་པའི་མུན་པ་དྲུངས་ནས་ཕྱུང་སྟེ་ཡེ་ཤེས་ཀྱི་སྣང་བ་ཕུན་སུམ་ཚོགས་པ་ལ་འགོད་པར་བྱ། དེའི་ཕྱིར་དུ་ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་བླང་བར་བྱའོ། །ཞེས་ཁྱད་པར་གྱི་

― GTD003_Page_0875 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་བསྐྱེད་བྱ། དངོས་གཞི་ཚིགས་སུ་བཅད་པས་བརྗོད་ན་འཇུག་པ་བདེ་བས་འདི་ལྟར། རྣམ་དག་འོད་གསལ་ཆོས་དབྱིངས་ལྷ་ཡི་ལམ། །བདེ་ཆེན་ཡེ་ཤེས་འཇའ་ཚོན་རྣམ་ལྔའི་ཀློང། །མི་འཇིགས་བཞི་ལྡན་གདོང་ལྔ་འབར་བའི་ཁྲིར། །སྲིད་པའི་སྐྱོན་བྲལ་འདབ་སྟོང་རྒྱས་པའི་རྩེར། །ཐབས་ཤེས་དབྱེར་མེད་ཉི་ཟླའི་གདན་སྟེང་དུ། །རྩ་བའི་བླ་མ་མགོན་པོ་འཇམ་པའི་དབྱངས། །ཉི་གཞོན་བྱེ་བ་ཕྲག་བརྒྱས་འཁྱུད་པ་ཡི། །གུར་གུམ་རྡུལ་མང་བརྩེགས་པའི་ལྷུན་པོ་བཞིན། །སྐུ་མདོག་དམར་སེར་ལང་ཚོའི་དཔལ་གྱིས་སྒེག །ཞལ་ཁྱིམ་རབ་རྒྱས་ཨུཏྤལ་སྤྱན་ཟུང་གཡོ། །སྨིན་འཁྱོག་བིམྤའི་མཆུ་སྒྲོས་འཛུམ་ཞིང་མཛེས། །མཐོན་མཐིང་རལ་པའི་ཐོར་ཅོག་སྤྱི་བོར་བཅིངས། །དངོས་འཛིན་འཆིང་བ་དྲུངས་ནས་གཅོད་པ་ཡི། །ཤེས་རབ་རལ་གྲི་གཡས་པའི་ཕྱག་གིས་འཕྱར། །གཡོན་ན་ཆོས་ཀུན་སྙིང་པོ་ཤེར་ཕྱིན་གྱིས། །ཉེ་བར་མཚན་པའི་ཨུཏྤལ་སྡོང་བུ་བསྣམས། །མེ་ཏོག་ཐོད་བཅིང་ནོར་བུའི་དབུ་རྒྱན་དང། །རྣ་ཆ་གདུབ་ཀོར་དོ་ཤལ་ཚོགས་ཀྱིས་མཛེས། །ལྷ་རྫས་དར་གྱི་སྟོད་གཡོགས་ཤམ་ཐབས་བགོས། །རྡོ་རྗེ་སྐྱིལ་མོ་ཀྲུང་གིས་བཞུགས་པ་ཡི། །གནས་ལྔར་བདེ་གཤེགས་ལྔ་དང་ཡེ་ཤེས་ལྔའི། །རང་བཞིན་ཡི་གེ་ལྔ་ཡིས་མཚན་པ་ཡི། །ཧཱུཾ་ཡིག་འོད་ཀྱིས་རང་འདྲའི་ཡེ་ཤེས་པ། །སྲས་བཅས་རྒྱལ་བའི་ཚོགས་བཅས་སྤྱན་དྲངས་ཏེ། །བསྟིམ་པས་སྐྱབས་གནས་ཀུན་འདུས་ངོ་བོར་གྱུར། །སྤྲོས་བྲལ་དབྱིངས་དང་དབྱེར་

― GTD003_Page_0876 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་འོད་གསལ་ཐུགས། །ཟབ་རྒྱས་ཆོས་ཀྱི་དགའ་སྟོན་འགྱེད་པའི་གསུང། །གང་འདུལ་ཅིར་ཡང་འཆར་བ་གཟུགས་ཀྱི་སྐུ། །མི་ཟད་རྒྱན་གྱི་འཁོར་ལོ་དེར་ཕྱག་འཚལ། །གང་གི་ཞབས་སེན་འོད་ཀྱིས་རེག་པ་ཡིས། །མི་ཤེས་རྒུད་པའི་མུན་པ་ཀུན་སེལ་ཞིང། །ཕན་དང་བདེ་བའི་པད་ཚལ་རྒྱས་མཛད་པ། །བླ་མ་འཇམ་པའི་དབྱངས་ལ་ཕྱག་འཚལ་ལོ། །རབ་འབྱམས་རྒྱལ་བ་ཀུན་གྱི་ཡབ་གྱུར་ཀྱང། །རྒྱལ་སྲས་ཚུལ་གྱིས་འགྲོ་ཀུན་སྲིད་ལས་འདྲེན། །ཡེ་ཤེས་ལུས་ཅན་ཐུགས་རྗེའི་གཏེར་ཁྱོད་ལ། །སྒོ་གསུམ་མི་ཕྱེད་དད་པས་ཕྱག་འཚལ་ལོ། །ཀུན་བཟང་སྨོན་པའི་པིར་གྱིས་བྲིས་པ་ཡི། །མཆོད་པའི་རི་མོ་ཞིང་ཁམས་ཀུན་ཁྱབ་པ། །འཁོར་གསུམ་དམིགས་མེད་བློ་ཡིས་འབུལ་ལགས་ན། །ཟག་མེད་བདེ་སྟོང་དགའ་བས་དགྱེས་གྱུར་ཅིག །མ་རིག་དབང་གྱུར་ཉེས་ཚོགས་མཐའ་དག་དང། །ཆོས་དང་བླ་མར་གུས་པ་དམན་པ་སོགས། །ཤེས་རབ་འཆལ་བྱེད་དམ་ཚིག་ཉམས་ཆག་ཀུན། །ཤུགས་དྲག་གདུང་བའི་ཡིད་ཀྱིས་མཐོལ་ལོ་བཤགས། །དུས་གསུམ་དགེ་ཚོགས་ཀུན་དང་ཁྱད་པར་དུ། །མགོན་ཁྱོད་དམིགས་མེད་སྙིང་རྗེའི་དབང་གྱུར་ཏེ། །རྒྱལ་བའི་མཛད་པ་མ་ལུས་བསྒྲུབ་པ་ལ། །སྙིང་ནས་བསམ་པ་ཐག་པས་རྗེས་ཡི་རང། །འགྲོ་བའི་ལས་ཉོན་དྲི་མ་ཀུན་སེལ་བ། །རྗེས་སུ་བསྟན་པའི་ཆོ་འཕྲུལ་བདུད་རྩིའི་ཆུས། །ལུས་ཅན་སྙིང་གི་གདུང་བ་ཀུན་བཅིལ་ཏེ། །ཡང་དག་ལམ་གྱི་རྟོགས་པ་སྐྱེད་པར་མཛོད་། །རིང་ནས་འགྲོ་ལ་རྗེས་སུ་ཆགས་པའི་

― GTD003_Page_0877 ―

^{[མ་དཔེ་གཟིགས་ན་འདིར་གནོན།]}

[Full Size]

གཉེན། །སྲིད་ཞིའི་འཇིགས་ལས་སྒྲོལ་བའི་དེད་དཔོན་མཆོག །མགོན་ཁྱོད་ལས་ལྷག་སྐྱབས་གཞན་མ་མཆིས་པས། །བསྐལ་པ་རྒྱ་མཚོར་བརྟན་པར་བཞུགས་སུ་གསོལ། །འདིས་མཚོན་བདག་གཞན་དགེ་ཚོགས་ཅི་མཆིས་པ། །ཉེས་ཀུན་རྩ་བ་རྨོངས་པའི་གདོན་བཅོམ་སྟེ། །ཡེ་ཤེས་ལྔ་ལྡན་འཇམ་དཔལ་དཔའ་བོ་ཡི། །གོ་འཕང་བདེ་བླག་འཐོབ་པའི་རྒྱུ་རུ་བསྔོ། །དེ་ནས་གོང་གི་ཕྱག་འཚལ་གྱི་ཚིགས་བཅད་གང་ཡང་རུང་བ་གསོལ་འདེབས་སུ་བསྒྱུར་བ་ཅི་མང་བཟླས་ལ། མཐར་འདོད་དོན་ལ་གསོལ་བ་གདབ་པ་ནི། རྣམ་འདྲེན་ཀུན་གྱི་ཡེ་ཤེས་འཇམ་པའི་དབྱངས། །ཁྱོད་ཞབས་གུས་མཆོད་གསོལ་བ་བཏབ་པའི་མཐུས། །ཡང་དག་ལམ་གྱི་རྟོགས་པ་མངོན་གྱུར་ཏེ། །སྐུ་གསུམ་གོ་འཕང་ཐོབ་པར་བྱིན་གྱིས་རློབས། །ཀུན་བྱང་བླང་དོར་གནས་རྣམས་མ་ལུས་པ། །ཇི་བཞིན་འབྱེད་པའི་ཤེས་རབ་རླབས་ཆེ་ཞིང། །ཤིན་ཏུ་དཔག་དཀའི་གནས་ཀུན་འབྱེད་པ་ཡི། །ཟབ་མོའི་ཤེས་རབ་ཐོབ་པར་བྱིན་གྱིས་རློབས། །ཀུ་ཤའི་རྩེ་ལྟར་ཕྲ་ཞིང་མཛངས་པ་ཡི། །ཤེས་རབ་རྣོ་གསལ་མྱུར་བའི་མཚོན་རྣོན་གྱིས། །ཐེ་ཚོམ་དྲ་བ་འཕྲལ་དུ་གཅོད་པ་ལ། །ཐོགས་མེད་སྤོབས་པ་འགྲུབ་པར་བྱིན་གྱིས་རློབས། །མ་རྟོགས་ལོག་རྟོག་དྲི་མ་ཀུན་སེལ་ཞིང། །རྒྱ་ཆེན་གཞུང་ལ་ངེས་པ་བདེ་བླག་སྟེར། །ཡང་དག་ལམ་དུ་ཉེ་བར་འཁྲིད་ནུས་པའི། །འཆད་པའི་ཤེས་རབ་ཐོབ་པར་བྱིན་གྱིས་རློབས། །དངོས་སྟོབས་རིགས་པའི་རྣོ་རྒྱུན་འབར་བ་ཡི། །དགག་སྒྲུབ་གནམ་

― GTD003_Page_0878 ―

^{[མ་དཔེ་གཟིགས་ན་འདིར་གནོན།]}

[Full Size]

ལྕགས་ཕྲེང་བས་རྒོལ་ངན་གྱི། །དམ་བཅའི་བྲག་རི་ཕྱེ་མར་འཐག་བྱེད་པ། །རྩོད་པའི་ཤེས་རབ་ཐོབ་པར་བྱིན་གྱིས་རློབས། །རྗོད་བྱེད་སྙན་འཇེབས་རྣ་བའི་བདུད་རྩི་འགྱེད། །བརྗོད་དོན་ཟབ་ལམ་བྱང་གྲོལ་འཇུག་ངོགས་སྟོན། །ཐུབ་བསྟན་མཛེས་པའི་རྒྱན་དུ་གྱུར་པ་ཡི། །རྩོམ་པའི་ཤེས་རབ་ཐོབ་པར་བྱིན་གྱིས་རློབས། །ཚིག་གི་འཁྲུལ་བ་སེལ་བ་སྒྲ་རིག་དང། །དོན་ལ་སྒྲོ་འདོགས་གཅོད་པ་ཚད་མའི་གཞུང། །སྒོ་གསུམ་རྣམ་དཀར་འདུ་བྱེད་བཟོ་ཡི་གནས། །ཉམ་ཐག་གདུང་སེལ་གསོ་རིག་བདུད་རྩིའི་རྒྱུན། །ཐར་པའི་འཇུག་ངོགས་ནང་དོན་རིག་པ་སྟེ། །རིག་གནས་ཆེན་པོ་རྣམ་ལྔ་སྐར་རྩིས་དང། །མངོན་བརྗོད་ལ་སོགས་རིག་གནས་ཆུང་བར་བཅས། །ཀུན་གྱི་མཐར་སོན་གདུལ་བྱའི་མོས་པ་བཞིན། །རྗེས་འཛིན་མཐུ་དང་ལྡན་པར་བྱིན་གྱིས་རློབས། །བསྟན་པའི་རྩ་བ་འདུལ་བ་འབུམ་སྡེའི་གཞུང། །ལུང་དང་རིགས་པའི་མངོན་པ་དབུ་ཚད་མཛོད། །མདོ་སྡེའི་མཆོག་གྱུར་ཕ་རོལ་ཕྱིན་རྣམས་ཀྱི། །དགོངས་དོན་བདེ་བླག་རྟོགས་པར་བྱིན་གྱིས་རློབས། །ལྷ་དྲུག་གིས་བསྡུས་བྱ་བ་སྤྱོད་པར་བཅས། །ཕྱག་རྒྱ་བཞི་ཡིས་རྒྱས་བཏབ་རྣལ་འབྱོར་རྒྱུད། །བདེན་གཉིས་གཙོར་གྱུར་བླ་མེད་རྣམ་གཉིས་སོགས། །རྒྱུད་དོན་མཐའ་དག་རྟོགས་པར་བྱིན་གྱིས་རློབས། །མདོར་ན་གཞུང་ལུགས་ཀུན་ལ་ཐོས་པས་ཞུགས། །དེ་དོན་ཚུལ་བཞིན་བསམ་པས་སྒྲོ་འདོགས་བཅད། །རྩེ་གཅིག་བསྒོམས་པས་ཇི་བཞིན་མངོན་གྱུར་ཏེ། །མདོ་སྔགས་ལམ་བཟང་བགྲོད་པར་བྱིན་གྱིས་རློབས། །ཐུགས་རྗེའི་

― GTD003_Page_0879 ―

^{[མ་དཔེ་གཟིགས་ན་འདིར་གནོན།]}

[Full Size]

གཏེར་ཆེན་ལྷག་པའི་ལྷ་ཁྱོད་ཀྱི། །བྱིན་རླབས་བདུད་རྩིས་སྙིང་ལ་བྲན་པ་ཡིས། །ལམ་བཟང་སྙེ་མ་གཡུར་དུ་ཟ་བའི་རྩེར། །སྐུ་གསུམ་འབྲས་བུ་སྨིན་པར་བྱིན་གྱིས་རློབས། །དེ་ལྟར་གསོལ་བ་བཏབ་པས་བླ་མ་ལྷ། །སྙིང་གར་བྱོན་ནས་རང་གི་སེམས་ཉིད་དང། །དབྱེར་མེད་བརྟན་པར་བཞུགས་ནས་མཆོག་ཐུན་གྱི། །དངོས་གྲུབ་ཀུན་སྩོལ་རྗེས་སུ་འཛིན་གྱུར་ཅིག །ཚེ་རབས་ཀུན་ཏུ་འཇམ་མགོན་བླ་མ་ཡིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །རྒྱལ་བས་བསྔགས་པའི་ལམ་བཟང་དེ་ཉིད་ལས། །སྐད་ཅིག་ཙམ་ཡང་ལྡོག་པར་མ་གྱུར་ཅིག །ཅེས་པ་འདི་ནི་རྣམ་དཔྱོད་མཆོག་ཏུ་ཡངས་པའི་དགེ་བའི་བཤེས་གཉེན་རྡོ་རམས་པ་དཀོན་མཆོག་ནམ་མཁས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ། །༈ ཀུན་རྟོག་སྤྲོས་དང་བྲལ་བའི་དབྱིངས་ཀྱི་མཁར། །དམར་སེར་དྷཱིཿ ཡིག་འོད་ཀྱི་འཕྲོ་འདུ་ལས། །དཔལ་ལྡན་བླ་མ་རྗེ་བཙུན་མཁྱེན་པའི་གཏེར། །ཡིད་འོང་མཚམས་སྤྲིན་གཞོན་ནུའི་མདངས་ལྡན་ཞིང། །བརྒྱད་གཉིས་ལང་ཚོ་གསར་པའི་དཔལ་གྱིས་སྒེག །ཕྱག་གཡས་རྨོངས་པའི་འཆིང་གཅོད་རལ་གྲི་དང། །གཡོན་ན་གཞུང་མཆོག་ཤེར་ཕྱིན་གླེགས་བམ་བསྣམས། །གནག་སྣུམ་རལ་པའི་ཟུར་ཕུད་ལྔ་ལྡན་ཞིང། །མུ་ཏིག་འཕྲེང་མཛེས་ནོར་བུའི་རྒྱན་གྱིས་སྤུད། །སྐྱིལ་མོ་ཀྲུང་གིས་བཞུགས་པའི་གནས་གསུམ་དུ། །རྡོ་རྗེ་གསུམ་མཚོན་ཡི་གེས་རྒྱས་བཏབ་

― GTD003_Page_0880 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང། །ཁྱད་པར་ཐུགས་ཀའི་དྷཱི་ཡིག་འོད་ཟེར་གྱིས། །མི་འགྱུར་ཆོས་དབྱིངས་བདེ་བའི་ཕོ་བྲང་ནས། །རྒྱལ་དང་རྒྱལ་སྲས་འཇམ་དཔལ་ཞི་ཁྲོའི་ཚོགས། །ཡེ་ཤེས་ལྷ་ཡི་འཁོར་ལོ་སྤྱན་དྲངས་ཏེ། །དབྱེར་མེད་བསོད་ནམས་ཞིང་དུ་བཞུགས་པར་གྱུར། །མ་ལུས་རྒྱལ་བའི་ཡེ་ཤེས་གཅིག་བསྡུས་དངོས། །མ་ནོར་ལམ་བཟང་སྟོན་མཛད་དགེ་བའི་བཤེས། །མ་རིག་མུན་པ་སེལ་བའི་སྒྲོན་མེ་མཆོག །བླ་མ་འཇམ་པའི་དབྱངས་ལ་ཕྱག་འཚལ་ལོ། །ཀུན་རྟོག་ཞེན་པའི་འཁོར་གསུམ་ཡོངས་དག་པ། །ཀུན་བཟང་མཆོད་པའི་སྤྲིན་གྱིས་རབ་འབྱམས་ཞིང། །ཀུན་ཏུ་བཀང་སྟེ་དང་བས་འབུལ་ལགས་ན། །ཀུན་ནས་བརྩེ་བའི་ཐུགས་ཀྱིས་བཞེས་སུ་གསོལ། །མུ་མེད་འཁོར་བར་འཁྱམས་པའི་གནས་སྐབས་སུ། །མ་རིག་འཁྲུལ་པའི་དབང་དུ་གྱུར་པ་ཡིས། །མི་དགེ་སྡིག་པའི་ལས་རྣམས་ཅི་བགྱིས་པ། །མ་ལུས་འགྱོད་པ་དྲག་པོས་མཐོལ་ལོ་བཤགས། །མཁྱེན་བརྩེའི་འོད་ཀྱིས་ཐར་ལམ་གསལ་མཛད་པའི། །རྨད་བྱུང་རྣམ་པར་ཐར་ལ་རྗེས་ཡི་རང། །སླད་ཀྱང་འཁོར་བ་སྲིད་དུ་རྟག་བཞུགས་ནས། །ལེགས་གསུང་ཆོས་ཀྱི་འཁོར་ལོ་བསྐོར་དུ་གསོལ། །འདིས་མཚོན་དུས་གསུམ་དགེ་ཚོགས་བསྡོམས་པའི་མཐུས། །རབ་འབྱམས་རྒྱལ་བའི་ཆོས་ཀྱི་མཛོད་བཟུང་སྟེ། །ནམ་མཁའི་མཐས་གཏུགས་མཁའ་མཉམ་འགྲོ་ཀུན་གྱི། །སྲིད་དང་ཞི་བའི་རྒུད་པ་སེལ་གྱུར་ཅིག །དཀོན་མཆོག་རྒྱལ་བའི་མཁྱེན་རབ་མེ་ཤེལ་ཁམས། །མདོ་སྔགས་བསྟན་པའི་པད་ཚལ་བཞད་པའི་གཉེན། །སྐྱེ་རྒུའི་སྙིང་གི་མུན་སེལ་

― GTD003_Page_0881 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲོན་མེ་མཆོག །བླ་མ་འཇམ་པའི་དབྱངས་ལ་གསོལ་བ་འདེབས། །ཀུན་ཏུ་རྨོངས་པའི་དྲ་བ་བཅད་དུ་གསོལ། །རྣམ་འབྱེད་ཤེས་རབ་སྣང་བ་སྩལ་དུ་གསོལ། །འཆད་རྩོད་རྩོམ་པའི་གཟི་བྱིན་སྐྱེད་དུ་གསོལ། །མྱུར་དུ་མགོན་ཁྱོད་ལྟ་བུར་བྱིན་གྱིས་རློབས། །སྙིང་རྗེ་ཆེ་དང་མཐའ་བྲལ་ལྟ་བ་ཡིས། །སྲིད་དང་ཞི་བའི་གཡང་ས་ཀུན་བཀག་སྟེ། །མི་གནས་མྱ་ངན་འདས་པའི་སར་བགྲོད་ནས། །མ་ལུས་འགྲོ་བ་སྲིད་ལས་སྒྲོལ་གྱུར་ཅིག །ཅེས་རྗེ་བཙུན་འཇམ་དབྱངས་ལ་བརྟེན་པའི་བླ་མའི་རྣལ་འབྱོར་འདི་ནི་བསྟན་པའི་གསལ་བྱེད་སྟག་ལུང་སྤྲུལ་པའི་སྐུ་ནས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ རྣམ་དག་འོད་གསལ་དབྱིངས་ཀྱི་རོལ་པ་ལས། །རྒྱ་ཆེན་ཚོགས་གཉིས་འོ་མའི་ཆུ་གཏེར་དབུས། །སྲིད་པའི་སྐྱོན་བྲལ་འདབ་སྟོང་པད་དཀར་རྩེར། །དམིགས་མེད་སྙིང་རྗེ་ཟླ་བའི་དཀྱིལ་འཁོར་སྟེང། །རྩ་བའི་བླ་མ་རྗེ་བཙུན་མཁྱེན་པའི་གཏེར། །སྐུ་མདོག་དཀར་གསལ་བརྒྱད་གཉིས་ལང་ཚོས་སྒེག །ཨུཏྤལ་སྤྱན་ཡངས་སྨིན་མའི་འཁྲི་ཤིང་མཛེས། །མཆུ་སྒྲོས་འཛུམ་ལྡན་ནོར་བུའི་རྣ་ཆ་གཡོ། །ཕྱག་གཉིས་མཆོག་སྦྱིན་ཆོས་སྟོན་ཕྱག་རྒྱ་ཡི། །ཨུཏྤལ་སྡོང་བུ་ལ་གནས་གླེགས་རལ་འཛིན། །རྡོ་རྗེ་སྐྱིལ་མོ་ཀྲུང་གིས་ལེགས་བཞུགས་ཤིང། །རིན་ཆེན་རྒྱན་དང་དར་གྱི་ན་བཟས་ཀླུབས། །ཐུགས་ཀའི་ཧཱུཾ་ཡིག་འོད་ཀྱིས་ཞིང་ཀུན་ནས། །རབ་འབྱམས་རྒྱལ་བའི་འཁོར་ལོ་སྤྱན་དྲངས་ཏེ། །བསོད་ནམས་ཞིང་དུ་དབྱེར་མེད་བཞུགས་པར་གྱུར། །

― GTD003_Page_0882 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ལས་ཀྱང་དཀོ༷ན་པའི་ཐེག་མཆོ༷ག་ཆོས། །མདོ་སྔགས་ཟུང་འབྲེལ་བསྟ༷ན་པ༷འི་སྒྲོ༷ན་མེ༷་ཡི། །ལུས་ཅན་རྨོངས་པའི་མུན་སེལ་བླ་མ་ལྷ། །དབྱེར་མེད་ཞབས་ཀྱི་པདྨོར་གུས་ཕྱག་འཚལ། །དག་ཅིང་དྲི་མེད་བདུད་རྩིའི་ཆུ་བཞི་དང། །ཉེར་སྤྱོད་རོལ་མོ་འདོད་པའི་ཡོན་ཏན་ལྔ། །བཀྲ་ཤིས་རྟགས་རྫས་རིན་ཆེན་མཎྜ་ལ། །དུས་གསུམ་དགེ་ཚོགས་དང་བཅས་མཆོད་པར་འབུལ། །མི་བཟད་ཉེས་ལྟུང་མ་ལུས་སྙིང་ནས་བཤགས། །རྣམ་དཀར་དགེ་བའི་ཚོགས་ལ་རྗེས་ཡི་རང། །བསྐལ་བརྒྱར་བཞུགས་ཏེ་ཆོས་འཁོར་བསྐོར་བར་བསྐུལ། །དགེ་ཚོགས་ཀུན་མཁྱེན་ཡེ་ཤེས་རྒྱུ་རུ་བསྔོ། །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །ཞེས་པ་ནས། འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་པའི་བར་གྱིས་མཎྜལ་གྲངས་གསོག །གོང་གི་ཕྱག་འཚལ་གྱི་ཚིགས་བཅད་དེ་གསོལའདེབས་སུ་བསྒྱུར་བ་དང་། ཨོཾ་ཝ་ཀྱཻ་དཾ་ན་མཿ ཞེས་པ་གཉིས་ཅི་མང་བཟླས་ལ་བདུད་རྩི་འབེབས་སྦྱང་གི་དམིགས་རྣམ་སྐྱོང་། ཕུལ་བྱུང་བྱམས་དང་སྙིང་རྗེའི་ཕྱག་བརྐྱངས་ཏེ། །ངན་སོང་གཡང་ལས་སྒྲོལ་བའི་འདྲེན་པ་མཆོག །ཡབ་གཅིག་བསྟན་པའི་སྒྲོན་མེ་ཐུགས་རྗེའི་གཏེར། །བཀའ་དྲིན་དྲན་པའི་ཡིད་ཀྱིས་གསོལ་འདེབས་ན། །དལ་འབྱོར་རྙེད་དཀའ་འཇིག་པར་སླ་བ་དང། །ངན་སོང་སྡུག་བསྔལ་བསམ་པའི་འཇིགས་སྐྲག་གིས། །སྐྱབས་འགྲོ་ལས་འབྲས་བླང་དོར་ལ་འབད་ནས། །ངན་སོང་སྐྱེ་སྒོ་ཆོད་པར་བྱིན་གྱིས་རློབས། །བསྟན་པའི་གཞི་མ་སོ་ཐར་ཁྲིམས་ནོད་ཅིང། །ཐར་པའི་གྲོང་དུ་འཇུག་པའི་ལམ་སྟོན་པ། །

― GTD003_Page_0883 ―

^{[མ་དཔེ་གཟིགས་ན་འདིར་གནོན།]}

[Full Size]

ཡབ་གཅིག་བསྟན་པའི་སྒྲོན་མེ་ཐུགས་རྗེའི་གཏེར། །བཀའ་དྲིན་དྲན་པའི་ཡིད་ཀྱིས་གསོལ་འདེབས་ན། །རྣམ་དག་ངེས་འབྱུང་བསམ་པས་རྒྱུད་འཁུལ་ཞིང། །མི་བཟད་ཉེས་པའི་སྒོ་བཞི་ཡོངས་བཀག་སྟེ། །བསླབ་གསུམ་རྣམ་པར་དག་པའི་ཉམས་ལེན་གྱིས། །ཐར་པའི་རྒྱལ་མཚན་ཚུགས་པར་བྱིན་གྱིས་རློབས། །ཐེག་པ་མཆོག་གི་ཚུལ་ཁྲིམས་ལ་བཀོད་དེ། །སྲིད་དང་ཞི་བའི་མཐའ་ལས་ཡོངས་སུ་འཛིན། །ཡབ་གཅིག་བསྟན་པའི་སྒྲོན་མེ་ཐུགས་རྗེའི་གཏེར། །བཀའ་དྲིན་དྲན་པའི་ཡིད་ཀྱིས་གསོལ་འདེབས་ན། །བྱམས་དང་སྙིང་རྗེ་བདག་གཞན་བརྗེ་བའི་བློས། །རིན་ཆེན་བྱང་ཆུབ་སེམས་ཀྱི་རྩ་བརྟན་ཞིང། །ཚོགས་གཉིས་སྤྱོད་པའི་ཡལ་འདབ་རྒྱས་པ་ཡི། །ཐེག་མཆོག་ལམ་བཟང་སྐྱེ་བར་བྱིན་གྱིས་རློབས། །འཇུག་སྒོ་རྣམ་དག་དབང་གིས་སྨིན་བྱས་ཏེ། །གསང་ཆེན་གདམས་པའི་དགའ་སྟོན་ལྷུག་པར་སྩོལ། །ཡབ་གཅིག་བསྟན་པའི་སྒྲོན་མེ་ཐུགས་རྗེའི་གཏེར། །བཀའ་དྲིན་དྲན་པའི་ཡིད་ཀྱིས་གསོལ་འདེབས་ན། །དངོས་གྲུབ་རྩ་བ་དམ་ཚིག་རྣམ་པར་དག །མཚན་བཅས་མཚན་མེད་རིམ་གཉིས་རྣལ་འབྱོར་སོགས། །གསང་ཆེན་ལམ་གྱི་བགྲོད་པ་མཐར་ཕྱིན་ཏེ། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །མདོར་ན་ཇི་སྲིད་བྱང་ཆུབ་སྙིང་པོའི་བར། །འདྲེན་པ་ཁྱོད་ཀྱིས་འབྲལ་མེད་རྗེས་འཛིན་ཅིང། །ཟབ་རྒྱས་གདམས་པའི་བདུད་རྩི་མྱང་བ་ཡིས། །སྟོབས་བཅུ་མངའ་བའི་གོ་འཕང་མྱུར་ཐོབ་ཤོག །ཅེས་པ་འདི་ནི་དད་
བརྩོན་ལྡན་པ་དགེ་སློང་དཀོན་མཆོག་ཆོས་ལྡན་གྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

དགེ་སློང་བློ་བཟང་དཀོན་མཆོག་གིས་བསྐུལ་ངོར།

― GTD003_Page_0884 ―

^{[མ་དཔེ་གཟིགས་ན་འདིར་གནོན།]}

[Full Size]

མུ་ཏིག་ཕྲེང་ལྡན་འོ་མའི་ཆུ་གཏེར་དབུས། །འདབ་མ་སྟོང་ལྡན་པད་དཀར་ལྟེ་བ་ལ། །ཉ་གང་བསིལ་ཟེར་བྱེད་པའི་དཀྱིལ་འཁོར་སྟེང། །རབ་དཀར་དྷཱིཿ ཡིག་འོད་ཀྱི་འཕྲོ་འདུ་ལས། །སྨྲ་བའི་དབང་ཕྱུག་མཚུངས་མེད་མཁྱེན་པའི་གཏེར། །བཀའ་དྲིན་མཉམ་མེད་རྩ་བའི་བླ་མ་དང། །དབྱེར་མེད་རྒྱལ་ཀུན་ཡབ་གཅིག་འཇམ་པའི་དབྱངས། །བཅུ་དྲུག་ལང་ཚོ་གསར་པའི་འཇོ་སྒེག་ཅན། །སྐུ་མདོག་རབ་དཀར་ཕྱག་གཡས་མཆོག་སྦྱིན་གྱིས། །ཤེས་རབ་རལ་གྲིས་མཚན་པའི་ཨུཏྤལ་དང། །གཡོན་པ་ཆོས་འཆད་ཕྱག་རྒྱས་གླེགས་བམ་བསྣམས། །དྲི་མེད་ནོར་བུའི་དོ་ཤལ་གཡོ་ལྡན་ཞིང། །འོད་བརྒྱའི་སྣང་བ་སྤྲོ་བཞིན་བཞུགས་པ་ཡི། །གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །ཡེ་ཤེས་སེམས་དཔའ་སྤྱན་དྲངས་དབྱེར་མེད་དུ། །གྱུར་ཏེ་བསོད་ནམས་ཞིང་དུ་བརྟན་པར་བཞུགས། །ཡིད་འོང་མཚན་དང་དཔེ་བྱད་འབར་བའི་སྐུ། །ཡན་ལག་དྲུག་ཅུའི་སྒྲ་དབྱངས་རྫོགས་པའི་གསུང། །དྲི་མེད་མཁྱེན་རབ་བརྩེ་བའི་ཐུགས་མངའ་བ། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ནམ་མཁའི་མཐའ་ཀླས་མཆོད་སྤྲིན་རྒྱ་མཚོས་མཆོད། །བཅས་རང་ཉེས་ལྟུང་དྲི་མ་སྙིང་ནས་བཤགས། །བསྐལ་བརྒྱར་བཞུགས་ཏེ་ཆོས་འཁོར་བསྐོར་དུ་གསོལ། །འདིས་མཚོན་དགེ་བ་རྫོགས་བྱེད་རྒྱུ་རུ་བསྔོ། །གཞན་ཡང་ལྷུན་པོ་གླིང་བཞི་ཉི་ཟླ་བཅས། །རང་ལུས་ལོངས་

― GTD003_Page_0885 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་དགེ་ཚོགས་ཀུན་འབུལ་ན། །ཟབ་གསལ་མྱུར་བའི་ཤེས་རབ་སྣང་བ་ཡིས། །བདག་བློ་རྨོངས་པའི་དྲ་བ་བསལ་དུ་གསོལ། །ཨོཾ་ཝ་ཀྱཻ་དཾ་ན་མཿ ཞེས་ཅི་འགྲུབ་བཟླ། དེའང་འདིའི་ཀླད་ཀོར་ངེས་ཅན་དུ་ནར་གླག་དགོས་ཏེ། ཝ་ཀྱེ་ངག་ལ་འཇུག་པས་ངག་གི་དབང་ཕྱུག་གམ་དངོས་གྲུབ་དང་། དཾ་ཞེས་པའི་ཡི་གེས་སོ་སོར་ཕྲལ་ན་ད་ན་ཞེས་པ་སྦྱིན་པ་ལ་འཇུག་པ་དེ་ལྟར་སྦྲེལ་དགོས་ལ། རང་གི་སྡེ་པའི་ལྔ་པར་བཀླག །ཅེས་ཀྱང་འབྱུང་བས་སོ། །དེ་ནས་ཡིག་བརྒྱས་ལྷག་ཆད་བསྐང་ལ། ནོར་བུའི་འཁྲི་ཤིང་བཞད་པའི་རྩེ་མོ་ན། །ཟླ་བའི་དཀྱིལ་འཁོར་འཛུམ་པའི་ཞལ་མངའ་བ། །བཅོམ་ལྡན་ངག་གི་དབང་ཕྱུག་མཁྱེན་པའི་གཏེར། །བརྩེ་བས་དགོངས་ཏེ་བདག་རྒྱུད་བྱིན་གྱིས་རློབས། །ཟབ་ཅིང་རྒྱ་ཆེ་ཕ་རོལ་ཕྱིན་པའི་ལམ། །མཐའ་དྲུག་ཚུལ་བཞིའི་རྒྱས་བཏབ་རྡོ་རྗེའི་ཐེག །ཡན་ལག་ཐུན་མོང་རིག་གནས་བཞི་ལ་སོགས། །ཇི་བཞིན་འབྱེད་པའི་ཤེས་རབ་སྩལ་དུ་གསོལ། །འཆད་ལ་མི་འཇིགས་སྤོབས་པའི་ལུས་སྟོབས་རྫོགས། །རྩོད་ངག་ང་རོས་ཕས་རྒོལ་ཀླད་པ་འགེམས། །སྡེབ་ལེགས་རྩོམ་པ་རལ་པའི་ཁུར་འཆང་བའི། །སྨྲ་བའི་སེང་གེ་མཆོག་ཏུ་བདག་གྲུབ་མཛོད། །མདོར་ན་དེང་ནས་སྐྱེ་ཞིང་སྐྱེ་བ་རུ། །འཇམ་དབྱངས་བླ་མ་ཁྱོད་ཀྱིས་རྗེས་བཟུང་སྟེ། །ལེགས་བཤད་བདུད་རྩིའི་དགའ་སྟོན་མྱང་བ་ལས། །ས་དང་ལམ་གྱི་བགྲོད་པ་མཐར་ཕྱིན་ཤོག །ཅེས་འཇམ་དབྱངས་དཀར་པོ་ལ་བརྟེན་པའི་བླ་མའི་རྣལ་འབྱོར་འདི་ནི་དད་བརྩོན་ལྡན་པ་དགེ་སློང་བློ་བཟང་དཀོན་མཆོག་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་

― GTD003_Page_0886 ―

^{[མ་དཔེ་གཟིགས་ན་འདིར་གནོན།]}

[Full Size]

པའོ། ། ༈ འགོག་མེད་མཆོག་ཏུ་དྭངས་པའི་ཡིད་མཁའ་ལ། །རལ་པའི་ཁུར་འཆང་གདོང་ལྔ་འབར་བའི་ཁྲི། །མ་བསྙིགས་འདབ་བརྒྱའི་ཕྲེང་ལྡན་རྣམ་གསུམ་གྱི། །དབུས་སུ་རྒྱལ་ཀུན་ཡབ་གཅིག་འཇམ་པའི་དབྱངས། །ངུར་སྨྲིག་གར་བསྒྱུར་བློ་བཟང་གྲགས་པའི་དཔལ། །གཡས་སུ་ཀུན་མཁྱེན་འཇིགས་མེད་དབང་པོའི་སྡེ། །གཡོན་ན་རྗེ་བཙུན་བསྟན་པའི་སྒྲོན་མེ་རྣམས། །ཐུགས་རྗེའི་འཛུམ་དཀར་སྤྲོ་བཞིན་བཞུགས་པ་ཡི། །ཁོར་ཡུག་དངོས་བརྒྱུད་བླ་མ་ཡི་དམ་སོགས། །སྐྱབས་ཡུལ་མཐའ་ཀླས་སྤྲིན་ལྟར་གཏིབས་པ་རྣམས། །བགྲང་དུ་མེད་པ་རབ་འབྱམས་བསྐལ་པའི་བར། །བདག་ཅག་བསོད་ནམས་ཞིང་དུ་བཞུགས་སུ་གསོལ། །མཁའ་དབྱིངས་གཅིག་ལ་ཉི་ཟླ་རྒྱུ་སྐར་སོགས། །སྣ་ཚོགས་རོལ་པ་ཀུན་ཏུ་སྟོན་པ་ལྟར། །རྣམ་པ་ཐ་དད་སྐྱབས་གནས་ཀུན་གྱི་དངོས། །རྗེ་བཙུན་བླ་མ་རྣམས་ལ་ཕྱག་འཚལ་ལོ། །མིང་གི་ལྷག་མར་གྱུར་པ་རྒྱལ་བའི་བསྟན། །རྒྱལ་བའི་དགོངས་པ་ཇི་བཞིན་འཛིན་པ་ལ། །མ་སྨད་སྙིང་སྟོབས་མཆོག་གི་དཔལ་མངའ་བ། །ཐུབ་བསྟན་རྩ་ལག་གསུམ་ལ་གསོལ་བ་འདེབས། །ནམ་མཁའི་མཐའ་ཀླས་ཀུན་བཟང་མཆོད་པའི་སྤྲིན། །རང་གཞན་དུས་གསུམ་དགེ་བའི་དངོས་པོར་བཅས། །བསོད་ནམས་ཞིང་མཆོག་ཁྱེད་ལ་གུས་འབུལ་ན། །ཐུགས་རྗེས་བཞེས་ནས་བྱིན་གྱིས་བརླབ་ཏུ་གསོལ། །མུ་མེད་འཁོར་བར་འཁྱམས་པའི་འགྲོ་བ་རྣམས། །བླང་དོར་གནས་ལ་ཀུན་ནས་རྨོངས་པའི་མཐུས། །བརྣག་དཀའི་སྡུག་བསྔལ་སྐྱེད་པའི་ལས་བསགས་པ། །ཀུན་ཀྱང་ཁྱོད་ཀྱི་ཐུགས་རྗེས་

― GTD003_Page_0887 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་བར་མཛོད། །ཕུལ་བྱུང་གྲགས་པའི་གཞིར་གྱུར་མཛད་པའི་མཆོག །ལེགས་གསུང་བདུད་རྩིའི་དྲ་བ་འགྱེད་པ་ཡིས། །ལུས་ཅན་ཡིད་ཀྱི་གདུང་བ་རབ་བཅིལ་ནས། །རྣམ་གྲོལ་ཀུནྡའི་སྐྱེད་ཚལ་བཞད་པར་མཛོད་། །ལེགས་བྱས་ཁ་བའི་རྡུལ་བརྩེགས་ཏེ་སེའི་རི། །ལེགས་སྨོན་དྲོད་ཀྱིས་ཞུ་བའི་གངྒཱ་མས། །ཉེས་ལྟུང་དུག་ཅན་དྲི་མ་རབ་སྦྱངས་ནས། །དལ་འབྱོར་ཚང་བའི་རྟེན་བཟང་རྙེད་པར་ཤོག །དེ་ཚེ་འཇམ་མགོན་བླ་མ་ཡབ་སྲས་ཀྱི། །ཞབས་རྡུལ་རྙོག་པ་མེད་པ་གུས་བསྟེན་ནས། །ཚང་ལ་མ་ནོར་བསྟན་པའི་གནད་ཀུན་ལ། །ཐོས་བསམ་སྒོམ་པས་ཚུལ་བཞིན་སློབ་པར་ཤོག །དེ་ལྟར་རྒྱལ་བའི་བསྟན་ལ་སློབ་པ་ན། །ཕྱི་རོལ་ཉེར་འཚེའི་བར་ཆད་མི་འབྱུང་ཞིང། །ཆོས་བརྒྱད་འཆིང་བའི་སླད་པ་མི་འཇུག་པར། །རྣམ་དག་ཆོས་སུ་འགྲོ་བར་བྱིན་གྱིས་རློབས། །སྲིད་གསུམ་མཐའ་དག་དམྱལ་བའི་བཙོན་ར་དང། །སྒྱུ་མའི་གྲོང་ཁྱེར་ལྟ་བུར་མཐོང་བ་ཡི། །ངེས་འབྱུང་བྱང་སེམས་ཡང་དག་ལྟ་བ་ལ། །རྩོལ་མེད་མྱོང་བ་བརྟན་པོ་རྙེད་པར་ཤོག །དེ་ལྟར་ཐུན་མོང་ལམ་གྱིས་རྒྱུད་སྨིན་ཚེ། །དཔལ་ལྡན་བླ་མ་ཐུགས་རྗེའི་གཏེར་ཆེན་རྣམས། །དཀྱིལ་འཁོར་འཁོར་ལོའི་མགོན་པོར་ལེགས་བཞེངས་ཏེ། །གསང་བ་མཆོག་གི་ལམ་དུ་འཁྲིད་པར་ཤོག །དེ་ནས་རིམ་གཉིས་རྣལ་འབྱོར་ལ་བརྟེན་ནས། །ལས་རླུང་རྒྱུ་བ་ཀུན་རྟོག་ཕྲ་མོར་བཅས། །ཡོངས་སུ་དག་པའི་རྟེན་དང་བརྟན་པ་ཀུན། །བདེ་བའི་རོལ་པ་གཅིག་ཏུ་འཆར་བར་ཤོག །མདོར་ན་དེང་ནས་ཚེ་རབས་ཐམས་ཅད་དུ། །ཁྱོད་ཀྱིས་དགྱེས་བཞིན་འབྲེལ་མེད་རྗེས་བཟུང་

― GTD003_Page_0888 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུས། །གཅིག་ཏུ་དགེ་བའི་ལམ་ལ་རབ་ཞུགས་ནས། །ཀུན་མཁྱེན་རྒྱལ་བའི་གོ་འཕང་མྱུར་ཐོབ་ཤོག །ཅེས་པ་འདི་ནི་དད་བརྩོན་རྣམ་དཔྱོད་ལྡན་པ་དཀའ་བཅུ་འཇམ་དབྱངས་བཀྲ་ཤིས་ཀྱིས་མཎྜལ་དང་ཐུབ་པའི་སྐུ་བརྙན་བཅས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། ། ༈ སྐྱབས་སེམས་སྔོན་དུ་བཏང་ལ། སྤྱི་བོར་པདྨ་ཟླ་བའི་སྟེང། །དྲིན་ཅན་རྩ་བའི་བླ་མ་དང་། །དབྱེར་མེད་བཅོམ་ལྡན་ཀླུ་ཡི་དབང། །ནམ་མཁའི་མདངས་ལྡན་ཟླ་བའི་ཞལ། །ཀླུ་རྣམས་དབུགས་འབྱིན་ཕྱག་རྒྱ་ཅན། །ཆོས་གོས་དམར་པོ་གསུམ་གསོལ་ཞིང། །བརྒྱ་རྩ་བཅུ་གཉིས་མཚན་དཔེས་སྤྲས། །རྡོ་རྗེ་སྐྱིལ་ཀྲུང་གིས་བཞུགས་ཤིང། །གནས་རྣམས་འབྲུ་གསུམ་གྱིས་མཚན་པའི་། །ཧཱུཾ་ཡིག་འོད་ཀྱིས་ཡེ་ཤེས་པ། །སྲས་དང་བཅས་པ་སྤྱན་དྲངས་ཏེ། །དབྱེར་མེད་བརྟན་པར་བཞུགས་སུ་གསོལ། །བྱིན་རླབས་བདུད་རྩིའི་ཆར་རྒྱུན་གྱིས། །ཕྱི་ནང་ཉེར་འཚེ་ཀུན་སེལ་ཞིང། །ཕན་བདེའི་དགའ་སྟོན་སྩོལ་མཛད་པ། །ཀླུ་དབང་རྒྱལ་པོར་གུས་ཕྱག་འཚལ། །དངོས་བཤམས་ཡིད་སྤྲུལ་མཆོད་ཚོགས་ཀུན། །དམིགས་མེད་ཐུགས་རྗེས་བཞེས་སུ་གསོལ། །ལས་ངན་ལན་ཆགས་ཀྱིས་བསྐྱེད་པའི། །ཀླུ་གཉན་ས་བདག་གནོད་པ་སོགས། །ཕྱི་ནང་ཉེར་འཚེ་མ་ལུས་པ། །རྒྱུ་བཅས་བྱང་བར་བྱིན་གྱིས་རློབས། ། ཞེས་གསོལ་བ་བཏབ་པས་སྐུ་ལས་བདུད་རྩིའི་རྒྱུན་བབས་ཏེ། ནད་གདོན་སྡིག་སྒྲིབ་ཐམས་ཅད་བྱང་བར་བསམ་ལ། ཏདྱ་ཐཱ། ཨོཾ་ཏ་ཐཱ་ག་ཏ་བྷ་ག་ཝཱན་ནཱ་ག་རཱ་ཛེ་ཤྭ་ར་ཨ་དྷི་ཥྛཱ་ན་ཨ་དྷི་ཥྛི་ཏེ་སྭཱཧཱ། ཞེས་ཅི་འགྲུབ་བཟླ།

― GTD003_Page_0889 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་འདིས་ཚེ་རབས་ཐམས་ཅད་དུ། །དལ་འབྱོར་ཚང་བའི་རྟེན་ཐོབ་ཅིང། །བཅོམ་ལྡན་ཀླུ་དབང་རྒྱལ་པོ་ཡིས། །འབྲལ་མེད་རྗེས་སུ་འཛིན་གྱུར་ཅིག །ཡུལ་ཕྱོགས་འདིར་ཡང་ནད་མུག་སོགས། །ཕྱི་ནང་ཉེར་འཚེ་ཀུན་ཞི་སྟེ། །སྦྲང་རྩི་ཅན་གྱི་ཞིང་ཁམས་ལྟར། །བདེ་སྐྱིད་དཔལ་འབྱོར་རྒྱས་གྱུར་ཅིག །ཅེས་པ་འདི་ནི་མིར་གན་ཤོག་ནས་དད་ལྡན་དགེ་སློང་བློ་བཟང་བསོད་ནམས་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ། ། ༈ རང་གི་སྤྱི་བོར་སེང་ཁྲི་པད་ཟླ་དང། །ཁྲི་སྙན་ས་ལའི་པགས་པའི་གདན་སྟེང་དུ། །སྐྱབས་གསུམ་མ་ལུས་འདུས་པའི་ངོ་བོ་ཉིད། །བཀའ་དྲིན་མཉམ་མེད་རྩ་བའི་བླ་མ་དང། །དབྱེར་མེད་གྲུབ་མཆོག་བཞད་པའི་རྡོ་རྗེ་ནི། །སྐུ་མདོག་སྔོ་བསངས་སྐེམ་ཞིང་གཟི་བྱིན་འབར། །དཀའ་ཐུབ་སྤྱོད་པའི་དྲང་སྲོང་རྣམ་པ་ཅན། །གཡས་པའི་ཕྱག་གི་ཐལ་མོ་འགྲམ་པར་བརྟེན། །གཡོན་ན་བདེ་སྐྱོང་བདུད་རྩིའི་བཅུད་ལྡན་བསྣམས། །ཀར་ཤིའི་རས་དཀར་འདབ་མའི་ན་བཟའ་གསོལ། །ལྕང་ལོ་སིལ་བུར་གྲོལ་བས་སྐུ་སྟོད་ཁེབས། །ཟབ་རྒྱས་གདམས་པའི་གླུ་དབྱངས་ལྷང་ལྷང་སྒྲོགས། །སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་པ་ཡི། །གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །མི་བསྐྱོད་རྒྱལ་བའི་ཞིང་ནས་ཡེ་ཤེས་པ། །འཁོར་བཅས་སྤྱན་དྲངས་དབྱེར་མེད་བསྟིམ་པར་གྱུར། །དཀོན་མཆོག་ཀུན་འདུས་མི་བསྐྱོད་རྒྱལ་བའི་དབང། །གསང་ཆེན་བསྟན་པའི་སྒྲོན་མེ་སྦར་བའི་ཕྱིར། །གྲུབ་པའི་དབང་ཕྱུག་གར་གྱིས་རྣམ་རོལ་བ། །བཞད་པའི་

― GTD003_Page_0890 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་རྗེའི་ཞབས་ལ་ཕྱག་འཚལ་ལོ། །རབ་འབྱམས་ཕྱི་ནང་གསང་བ་དེ་ཉིད་ཀྱི། །མཆོད་ཚོགས་ཀུན་འབུལ་སྡིག་ལྟུང་མ་ལུས་བཤགས། །ཚེ་གཅིག་སངས་རྒྱས་སྒྲུབ་པའི་དཀའ་ཐུབ་ཀྱི། །སྤྱོད་པ་བསམ་མི་ཁྱབ་ལ་རྗེས་ཡི་རང། །ཟབ་རྒྱས་གདམས་པའི་དགའ་སྟོན་མཆོག་སྩོལ་ཅིང། །བསྐལ་པ་རྒྱ་མཚོར་བརྟན་པར་བཞུགས་སུ་གསོལ། །འདིས་མཚོན་དགེ་བས་བདག་སོགས་འགྲོ་ཀུན་ཀྱང། །ཚེ་རབས་འཕྲེང་བར་ཁྱོད་ཀྱིས་རྗེས་འཛིན་ཤོག །གྲུབ་པའི་དཔའ་བོ་ཁྱོད་ཀྱི་རྣམ་ཐར་བཞིན། །མདོ་སྔགས་ལམ་བཟང་གེགས་མེད་མྱུར་བགྲོད་དེ། །མི་བསྐྱོད་རྒྱལ་བའི་གོ་འཕང་མངོན་གྱུར་ནས། །མ་ལུས་འགྲོ་བ་སྲིད་ལས་སྒྲོལ་གྱུར་ཅིག །དེ་ལྟར་གསོལ་བ་བཏབ་པས་ཚངས་བུག་ནས། །སྙིང་ག་ཆོས་ཀྱི་འཁོར་ལོའི་ཟེའུ་འབྲུའི་དབུས། །བྱོན་ནས་དབྱེར་མེད་བརྟན་པར་བཞུགས་པ་ཡིས། །ཡང་དག་ལམ་བཟང་མངོན་དུ་འགྱུར་བར་ཤོག །ཅེས་པ་འདི་ནི་དད་བརྩོན་ལྡན་པ་རི་ཁྲོད་པ་དགེ་སློང་བློ་བཟང་དཀོན་མཆོག་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་མུ་ནི་ཨིནྡྲཱ་ཡ། དེའང་འདི་ཕྱིའི་ལེགས་ཚོགས་མ་ལུས་པ་འབྱུང་བའི་གནས། ཐེག་པ་མཆོག་གི་ལམ་གྱི་ལུས། དངོས་གྲུབ་ཐམས་ཅད་ཀྱི་རྩ་བ། ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་ལེན་པར་འདོད་པས། སྔོན་འགྲོ་སྦྱོར་བའི་ཆོས་རྣམས་ཚགས་སུ་ཚུད་པར་བྱས་ལ། སྲིད་ཞིའི་རྒུད་པ་མ་ལུས་པ་སེལ་ཞིང་། འཕྲལ་དང་ཡུན་གྱི་ཕན་བདེ་མ་ལུས་པ་འབྱུང་བའི་སྒོ་གཅིག་པུ། ལམ་གྱི་རྩ་བ་བཤེས་གཉེན་བསྟེན་ཚུལ་ཕྱིན་ཅི་མ་ལོག་པ་འདི་ལ་རག་ལས་པར་རྒྱལ་བས་མདོ་རྒྱུད་ཐམས་ཅད་ནས་མཐུན་པར་གསུངས་ཤིང་། གྲུབ་པའི་གོ་འཕང་མཐོན་པོར་གཤེགས་པའི་དམ་པ་གོང་མ་ཐམས་ཅད་ཀྱིས་ཀྱང་

― GTD003_Page_0891 ―

^{[མ་དཔེ་གཟིགས་ན་འདིར་གནོན།]}

[Full Size]

སྐུ་ཉམས་སུ་བསྟར་བའི་ཚུལ་བསམ་སྟེ་ངེས་ཤེས་ཐུན་མོང་མ་ཡིན་པ་བསྐྱེད། དེ་ནས་རང་རྒྱུད་ལ་བསྐོར་ཏེ་བརྟག་པ་ན། ཉོན་མོངས་པའི་གདོན་ཆེན་ཕུགས་སུ་ཞུགས་པའི་དབང་གིས། རང་གི་སྣང་ཚུལ་ཐམས་ཅད་བདེན་བདེན་ལྟ་བུ་དང་། བླ་མའི་མཛད་པ་སྐྱོན་དང་བཅས་པར་མཐོང་བའི་ཚེ་བློ་ངན་འདིས་ནི་རང་ཉིད་ཕུང་ཁྲོལ་ཆེན་པོ་ལ་སྦྱོར་བའི་བདུད་ཀྱི་བྱེད་པ་ལྟས་ངན་གྱི་གཙོ་བོ་ཡིན་སྙམ་དུ། དམ་པ་གོང་མ་མང་པོའི་ལོ་རྒྱུས་སོགས་དང་སྦྱར་ལ་རིགས་པའི་རྣམ་གྲངས་དུ་མའི་སྒོ་ནས་བཀག་སྟེ། སངས་རྒྱས་དངོས་སུ་མཐོང་བའི་མོས་པ་དང་། སངས་རྒྱས་ཐམས་ཅད་ཀྱི་འདུལ་བའི་ཞིང་དུ་མ་གྱུར་པ་ན། བླ་མ་འདིས་ནི་རང་དང་སྐལ་བ་འཚམ་པའི་སྐུར་བསྟན་ཏེ་རྒྱལ་བའི་མཛད་པ་ཐམས་ཅད་བསྒྲུབ་པས། བཀའ་དྲིན་གྱི་ངོས་ནས་སངས་རྒྱས་ཐམས་ཅད་ལས་ཀྱང་ལྷག་པ་ཡིན་ནོ་སྙམ་དུ་གུས་པ་བསྐྱེད་ལ། དངོས་གཞི་ནི་སྐྱབས་སེམས་སྔོན་དུ་འགྲོ་བས་ཚིག་དོན་དྲན་བཞིན་པར། མདུན་གྱི་མཁའ་ལ་སེང་ཁྲི་པད་ཟླའི་སྟེང། །སྐྱབས་གསུམ་ཀུན་འདུས་ངོ་བོ་བླ་མ་ལྷ། །གཡས་གཡོན་ཆོས་འཆད་སྐྱབས་སྦྱིན་ཕྱག་རྒྱ་མཛད། །ཆོས་གོས་གསུམ་གསོལ་གསེར་མདོག་པཎ་ཞྭས་མཛེས། །དགྱེས་པའི་ཚུལ་གྱིས་བཞུགས་པའི་མཐའ་སྐོར་དུ། །དངོས་བརྒྱུད་བླ་མ་ཡི་དམ་ལྷ་ཚོགས་དང། །སངས་རྒྱས་བྱང་སེམས་ཉན་རང་ཆོས་སྲུང་སོགས། །མཁའ་དབྱིངས་ཁྱབ་པས་བསྐོར་ཏེ་བརྟན་པར་བཞུགས། །བསླུ་མེད་འདྲེན་པ་དཀོན་མཆོག་གསུམ་གྱི་དངོས། །བཤད་སྒྲུབ་བསྟན་པའི་སྲོག་ཤིང་ཟླ་མེད་པ། །ཐར་འདོད་སྙིང་གི་མུན་སེལ་སྒྲོན་མེ་མཆོག །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །གཞན་ཡང་ཞི་ཁྲོ་རབ་འབྱམས་ལྷ་ཚོགས་ལ། །སྒོ་གསུམ་མི་ཕྱེད་དད་པས་ཕྱག་འཚལ་ཞིང། །དངོས་

― GTD003_Page_0892 ―

^{[མ་དཔེ་གཟིགས་ན་འདིར་གནོན།]}

[Full Size]

བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་ཀུན་ལ་རྗེས་ཡི་རང། །འཁོར་བ་མ་སྟོངས་བར་དུ་རྟག་བཞུགས་ནས། །འགྲོ་ལ་ཆོས་ཀྱི་འཁོར་ལོ་བསྐོར་དུ་གསོལ། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །ཞེས་པ་ནས་སྤྱོད་པར་ཤོག །ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །ཞེས་པ་ནས། བར་གཅོད་སྲུངས། །ལན་གསུམ། བྱིན་རླབས་དངོས་གྲུབ་གཏེར་ཆེན་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ངན་སོང་འཁོར་བའི་གནས་ལས་ཡིད་འབྱུང་བས། །བློ་ཁ་ཆོས་ལ་ཕྱོགས་པར་བྱིན་གྱིས་རློབས། །རིན་ཆེན་བྱང་ཆུབ་སེམས་ཀྱི་རྒྱས་བཏབ་སྟེ། །དམ་ཆོས་ལམ་དུ་འགྲོ་བར་བྱིན་གྱིས་རློབས། །དངོས་འཛིན་གདོན་ཆེན་བདུད་ཀྱི་དཔུང་བཅོམ་སྟེ། །ལམ་ལ་བར་ཆད་མེད་པར་བྱིན་གྱིས་རློབས། །རབ་དཀར་བདུད་རྩིས་བུམ་པའི་དབང་བསྐུར་ཏེ། །རྒྱལ་བའི་གཟུགས་སྐུ་འགྲུབ་པར་བྱིན་གྱིས་རློབས། །བདུད་རྩི་དམར་པོས་གསང་བའི་དབང་བསྐུར་ཏེ། །རྒྱལ་གསུང་ལོངས་སྐུ་འགྲུབ་པར་བྱིན་གྱིས་རློབས། །སྔོན་པོས་ཤེས་རབ་ཡེ་ཤེས་དབང་བསྐུར་ཏེ། །ཐུགས་མཆོག་ཆོས་སྐུ་འགྲུབ་པར་བྱིན་གྱིས་རློབས། །རྣམ་གསུམ་བདུད་རྩིས་བཞི་པའི་དབང་བསྐུར་བས། །སྐུ་ཐུགས་ཟུང་འཇུག་འགྲུབ་པར་བྱིན་གྱིས་རློབས། །མདོར་ན་སྲིད་དང་ཞི་བའི་རྒུད་པ་ཀུན། །མ་ལུས་ལྷག་མེད་ཞི་བར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་མ་ལུས་པ། །བདེ་
བླག་ཉིད་དུ་འགྲུབ་པར་བྱིན་གྱིས་རློབས། །དུས་དང་གནས་སྐབས་ཀུན་ཏུ་ཁྱོད་མིན་པ། །རེ་ས་གཞན་ན་མེད་དོ་ཐུགས་རྗེས་གཟིགས། །དེ་ལྟར་གསོལ་བ་བཏབ་པས་བླ་མ་མཆོག །དགྱེས་བཞིན་དྷཱུ་ཏཱིའི་ལམ་ནས་སྙིང་གར་བྱོན། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །གོང་གི་ཕྱག་འཚལ་གསོལ་འདེབས་སུ་བསྒྱུར་བ་གྲངས་གསོག་དང་། མཐར། ཚེ་རབས་ཀུན་ཏུ་རྗེ་བཙུན་བླ་མ་ཡིས། །ཐེག་མཆོག་བཤེས་གཉེན། ཞེས་སོགས་དང་། དཔལ་ལྡན་བླ་མའི་རྣམ་པར་ཐར་པ་ལ། །ཞེས་སོགས་དང་། སྐྱེ་བ་ཀུན་ཏུ་ཞེས་སོགས་བསྔོ་སྨོན་གྱིས་མཚམས་སྦྱོར་ཞིང་། རྒྱུན་དུའང་སྙིང་དབུས་ཀྱི་བླ་མའི་འདུ་ཤེས་མ་བརྗེད་པས། དེ་ཉིད་དཔང་པོར་བྱས་ཏེ་དགེ་སྡིག་གི་བླང་དོར་ལ་བག་ཟོན་བྱེད་ཅིང་། སྤྱོད་ལམ་ཀུན་ཏུ་དེ་ལ་བརྟེན་པའི་ཚོགས་གསོག་སྒྲིབ་སྦྱོང་གི་ཉམས་ལེན་ཆུ་བོའི་རྒྱུན་གྱི་རྣལ་འབྱོར་ལྟར་བྱའོ། །ཞེས་བླ་མའི་རྣལ་འབྱོར་ཤིན་ཏུ་བསྡུས་པ་མདོ་སྔགས་སྤྱིའི་ལམ་གྱི་འགྲོས་དང་སྦྱར་བ་འདི་ནི་རྣམ་དཔྱོད་མཆོག་ཏུ་ཡངས་པ་རྡོ་རམས་པ་ངག་དབང་རབ་བརྟན་གྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

ལམ་ཐུན་མོང་དང་ཐུན་མིན་གྱི་གནད་ཚང་བའི་བླ་མའི་རྣལ་འབྱོར།

― GTD003_Page_0893 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་ཐུན་མོང་དང་ཐུན་མོང་མ་ཡིན་པའི་གནད་ཚང་བའི་བླ་མའི་རྣལ་འབྱོར་བཞུགས་སོ། །ན་མོ་གུ་རུ་མུ་ནཱི་ནྡྲ་བཛྲ་དྷ་རཱ་ཡ། མདུན་གྱི་ནམ་མཁར་སེང་ཁྲི་པད་ཟླའི་སྟེང། །བཀའ་དྲིན་མཉམ་མེད་རྩ་བའི་བླ་མ་དང། །ངོ་བོ་དབྱེར་མེད་སྟོན་པ་བཅོམ་ལྡན་འདས། །གསེར་གྱི་མདོག་ཅན་ས་གནོན་མཉམ་གཞག་མཛད། །ཐུགས་ཀར་ཁྱབ་

― GTD003_Page_0894 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་དཔལ་ལྡན་ཧེ་རུ་ཀཿ །སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས། །གར་དགུའི་ཉམས་ལྡན་བདེ་སྟོང་རོལ་པས་དགྱེས། །གནས་གསུམ་ཡི་གེ་གསུམ་མཚན་ཧཱུཾ་ཡིག་གིས། །རབ་འབྱམས་རྒྱལ་བའི་འཁོར་ལོ་མ་ལུས་པ། །སྤྱན་དྲངས་དབྱེར་མེད་གཅིག་ཏུ་འདུས་པ་ཡི། །སྐྱབས་གནས་ཀུན་གྱི་བདག་ཉིད་ཐུགས་རྗེའི་གཏེར། །བདག་གི་བསོད་ནམས་ཞིང་དུ་བརྟན་པར་བཞུགས། །ཆེར་སྙིགས་ལྔ་བདོའི་འགྲོ་བ་མགོན་མེད་ལ། །ཐར་པའི་ལམ་བཟང་ཇི་བཞིན་སྟོན་པ་ཡིས། །མ་ལུས་རྒྱལ་བའི་མཛད་པ་སྒྲུབ་མཛད་པ། །བཀའ་དྲིན་མཚུངས་མེད་དམ་པར་གསོལ་བ་འདེབས། །ཁྱད་པར་སངས་རྒྱས་ལས་ཀྱང་དཀོ༷ན་པ་ཡི། །ཐེག་མཆོ༷ག་བསྟ༷ན་པ༷འི་སྙིང་པོ་གསང་སྔགས་ཀྱི། །ལམ་བཟང་གསལ་བར་བྱེད་པའི་སྒྲོ༷ན་མེ༷་མཆོག །འགྲོ་བའི་དེད་དཔོན་དམ་པར་གསོལ་བ་འདེབས། །ལུས་དང་ལོངས་སྤྱོད་དུས་གསུམ་དགེ་ཚོགས་བཅས། །ཀུན་བཟང་མཆོད་པའི་སྤྲིན་དུ་ལེགས་བསྟར་ནས། །རྩེ་གཅིག་དང་བའི་ཡིད་ཀྱིས་འབུལ་ལགས་ན། །དགྱེས་བཞིན་བཞེས་ཏེ་བྱིན་གྱིས་བརླབ་ཏུ་གསོལ། །ལེགས་ཚོགས་རྩ་བ་དམ་པའི་མགོན་གྱིས་བཟུང། །མི་རྟག་ལས་འབྲས་བསམས་ནས་འདི་ཕྱི་ཡི། །སྣང་ཤས་བཟློག་སྟེ་འཁོར་བ་མེ་འོབས་ལྟར། །མཐོང་བའི་ངེས་འབྱུང་སྐྱེ་བར་བྱིན་གྱིས་རློབས། །རང་གཞན་དོན་གཉིས་ཕུན་སུམ་ཚོགས་པའི་རྒྱུ། །རིན་ཆེན་བྱང་ཆུབ་མཆོག་ཏུ་སེམས་བསྐྱེད་ཅིང། །སྲིད་པའི་རྩ་བ་དྲུངས་ནས་འབྱིན་བྱེད་པའི། །ཡང་དག་ལྟ་བ་རྟོགས་པར་བྱིན་གྱིས་རློབས། །ཐ་མལ་སྣང་ཞེན་སྦྱོང་བའི་བསྐྱེད་

― GTD003_Page_0895 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་དང། །རླུང་སེམས་དབུ་མར་གཞུག་བྱེད་དབེན་པ་གསུམ། །ཞུགས་ལས་སྒྱུ་འོད་ཟུང་འཇུག་སྐུར་ལྡང་བའི། །རིམ་གཉིས་རྣལ་འབྱོར་འགྲུབ་པར་བྱིན་གྱིས་རློབས། །མདོར་ན་བློ་བཟང་རྒྱལ་བསྟན་སྙིང་པོའི་བཅུད། །མ་ཚང་མེད་པར་ཐོས་བསམ་བསྒོམ་པ་ཡིས། །ཉམས་སུ་བླངས་ཏེ་བཤད་སྒྲུབ་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཞེས་པའི་མཐར། དཔལ་ལྡན་རྩ་བའི་བླ་མ་ཞེས་སོགས་ཀྱིས་སྙིང་གར་བསྟིམ་ཞིང་ཚེ་རབས་རྗེས་འཛིན་གྱི་སྨོན་པས་མཚམས་སྦྱར་བར་བྱའོ། །ཞེས་ལམ་ཐུན་མོང་དང་ཐུན་མོང་མ་ཡིན་པའི་གནད་ཆ་ཚང་བ་དང་འབྲེལ་བའི་བླ་མའི་རྣལ་འབྱོར་འདི་ནི། ༸འཇམ་མགོན་རྒྱལ་བ་གཉིས་པའི་བསྟན་པའི་རྩ་ལག་དམ་པ་སུམ་པ་མཁན་ཆེན་སྤྲུལ་པའི་སྐུ་རིན་པོ་ཆེ་ནས་གསེར་གྱི་མེ་ཏོག་དང་བཅས་བསྐུལ་མ་གནང་བའི་བཞེད་པ་བཞིན། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ ཆོས་དབྱིངས་སྤྲོས་དང་བྲལ་བ་ལྷ་ཡི་ལམ། །བདེ་ཆེན་སྙིང་རྗེའི་ཆུ་འཛིན་འཁྲིགས་པའི་ཀློང། །མི་འཇིགས་བཞི་ལྡན་གདོང་ལྔ་འབར་བའི་ཁྲི། །སྲིད་པའི་སྐྱོན་བྲལ་ཡིད་འོང་འདབ་བརྒྱ་པ། །ཐབས་ཤེས་ཟུང་འཇུག་ཉི་ཟླའི་གདན་སྟེང་དུ། །ཞི་ཁྲོ་རབ་འབྱམས་སྐྱབས་གནས་མ་ལུས་པ། །དབྱེར་མེད་གཅིག་ཏུ་འདུས་པའི་ངོ་བོ་ཉིད། །བཀའ་དྲིན་གསུམ་ལྡན་བླ་མ་རྡོ་རྗེ་འཆང། །ཞི་ཞིང་དུལ་ལ་དགྱེས་པའི་ཉམས་དང་ལྡན། །ཐུགས་རྗེའི་སྤྱན་གྱིས་མཁའ་མཉམ་འགྲོ་ལ་གཟིགས། །ངེས་དོན་རྡོ་རྗེ་ཐལ་མོའི་སྦྱོར་བ་ཡིས། །བདེན་ཟུང་གཉིས་སུ་མི་བྱེད་རྡོ་རྗེ་འཛིན། །པཎ་ཞྭས་གཙུག་མཛེས་ཆོས་གོས་གསུམ་གསོལ་ཞིང། །མི་ཕྱེད་རྡོ་རྗེ་སྐྱིལ་

― GTD003_Page_0896 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་ཀྲུང་གིས་བཞུགས། །གནས་ལྔར་ཡེ་ཤེས་ལྔ་ཡི་ངོ་བོ་ཉིད། །རིགས་ལྔའི་རང་བཞིན་ས་བོན་ལྔས་མཚན་པའི། །ཧཱུཾ་ཡིག་འོད་ཀྱིས་ལྷུན་གྲུབ་ཆོས་དབྱིངས་ནས། །སྲས་བཅས་རྒྱལ་བའི་དཀྱིལ་འཁོར་ཡེ་ཤེས་པ། །མཐའ་དག་སྤྱན་དྲངས་དབྱེར་མེད་བརྟན་པར་གྱུར། །བློ༷་བཟ༷ང་ཐུ༷བ་བསྟ༷ན་འདབ་བརྒྱའི་གཉེན་གཅིག་པུ། །དབ༷ང་ཕྱུ༷ག་བརྒྱད་ལྡན་འཇི༷གས་མེ༷ད་སྟོབས་བཅུའི་བདག །དཀྱིལ་འཁོར་རྒྱ༷་མཚོ༷་སྤྲོ་ཞིང་སྡུད་མཛད་པ། །ཁྱབ་བདག་འཁོར་ལོའི་མགོན་པོར་གསོལ་བ་འདེབས། །སྙིགས་མའི་འགྲོ་བ་སྤྱི་དང་ཁྱད་པར་དུ། །འཛམ་གླིང་བྱང་ཕྱོགས་འཛིན་མའི་ཁྱོན་ཀུན་ལ། །ཐུབ་བསྟན་སྙིང་པོ་ཉི་ལྟར་གསལ་མཛད་པ། །བཀའ་དྲིན་མཚུངས་མེད་དམ་པར་གསོལ་བ་འདེབས། །རབ་འབྱམས་ཕྱི་ནང་གསང་བ་དེ་ཉིད་ཀྱི། །མཆོད་ཚོགས་མ་ལུས་བློ་ཡིས་བླངས་ཏེ་འབུལ། །རྒྱ་ཆེན་ནམ་མཁའ་མཛོད་ཀྱི་ཏིང་འཛིན་མཐུས། །བྱིན་གྱིས་བརླབས་ཏེ་དགྱེས་བཞིན་བཞེས་སུ་གསོལ། །ཐོག་མེད་ནས་བསགས་སྡིག་ལྟུང་ཐམས་ཅད་དང། །ཁྱད་པར་སྡོམ་གསུམ་བཅས་འགལ་ཉེས་པ་ཀུན། །ཤུགས་དྲག་གདུང་བའི་ཡིད་ཀྱིས་མཐོལ་ལོ་བཤགས། །ལྷག་མེད་བྱང་ཞིང་དག་པར་བྱིན་གྱིས་རློབས། །བདག་གིས་དུས་གསུམ་དགེ་ཚོགས་ཅི་བགྱིས་པ། །དེ་དག་ཐམས་ཅད་སྐྱེ་ཞིང་སྐྱེ་བ་རུ། །མགོན་པོ་ཁྱོད་ཀྱིས་འབྲལ་མེད་རྗེས་འཛིན་ཞིང། །བཀའ་བཞིན་སྒྲུབ་པ་ལྷུར་ལེན་རྒྱུར་གྱུར་ཅིག །ངེས་འབྱུང་བྱང་སེམས་ཟབ་མོའི་ལྟ་བ་སོགས། །ཐུན་མོང་ལམ་སྦྱང་རིམ་པ་སྔོན་འགྲོ་བའི། །གསང་ཆེན་ཐེག་པ་མཆོག་གི་སྒོར་ཞུགས་ཏེ། །དམ་ཚིག་མཐའ་དག་ཚུལ་བཞིན་བསྲུང་གྱུར་

― GTD003_Page_0897 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིག །ཐབས་ཤེས་ཟུང་འབྲེལ་ཟབ་མོའི་མྱུར་ལམ་གྱིས། །རིང་མིན་སྲིད་པའི་རྒྱ་མཚོ་མཐར་བྱས་ཏེ། །བླ་མ་ལྷ་ཡི་གོ་འཕང་མངོན་གྱུར་ནས། །འགྲོ་ཀུན་ཐར་པའི་གླིང་དུ་འཁྲིད་གྱུར་ཅིག །ཅེས་བླ་མ་རང་གི་སྙིང་གར་སྤྱན་དྲངས་པར་བསམས་ལ། དཔལ་ལྡན་བླ་མའི་རྣམ་པར་ཐར་པ་ལ། །ཞེས་སོགས་དང་། སྐྱེ་བ་ཀུན་ཏུ་ཞེས་སོགས་སྨོན་ལམ་གྱིས་མཚམས་སྦྱར་བར་བྱའོ། །ཞེས་བསྟན་འགྲོའི་དཔུང་གཉེན་མཚུངས་ཟླ་མ་མཆིས་པ་རྗེ་བཙུན་དམ་པ་བློ་བཟང་ཐུབ་བསྟན་དབང་ཕྱུག་འཇིགས་མེད་རྒྱ་མཚོ་དཔལ་བཟང་པོའི་ཞལ་སྔ་ནས་ལ་བརྟེན་པའི་བླ་མའི་རྣལ་འབྱོར་འདི་ནི་ཧལ་ཧ་ཁུ་རེ་ཆེན་མོའི་གྲྭ་རིགས་དད་ལྡན་དགེ་སློང་དཀོན་མཆོག་དགེ་ལེགས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ན་མོ་གུ་རུ་བཛྲ་དྷཱ་ར་སུ་མ་ཏི་ཝ་གིནྡྲཱ་ཡ། དག་པ་རབ་འབྱམས་བྱེད་པོ་བདེ་བ་ཆེ། །སྤྲོས་བྲལ་དབྱིངས་སུ་རྩེན་པའི་སྒྱུ་འཕྲུལ་ལས། །འབྱམས་ཀླས་ཀུན་བཟང་མཆོད་སྤྲིན་རྒྱ་མཚོའི་དབུས། །སེང་ཁྲི་པད་ཟླ་ཉི་མའི་གདན་གྱི་སྟེང། །རིགས་ཀུན་ཁྱབ་བདག་རྡོ་རྗེ་སེམས་དཔའི་དངོས། །རྩ་བའི་བླ་མ་ངག་དབང་བློ་བཟང་ཞབས། །ཐལ་མོ་བསྣོལ་ཏེ་ཟབ་རྒྱས་གླེགས་བམ་བསྣམས། །ཆོས་གོས་གསུམ་འཆང་པཎ་ཞྭ་ལེབ་མོར་གསོལ། །རབ་དགྱེས་འཛུམ་པའི་ཉམས་དང་ལྡན་པ་ཡི། །དཔྲལ་མགྲིན་ཐུགས་ཀར་རྡོ་རྗེ་གསུམ་གྱི་དངོས། །ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །སྐྱབས་གནས་མ་ལུས་བསྡུས་ཏེ་ཐིམ་པར་གྱུར། །ཛཿ ཧཱུཾ་བཾ་ཧོཿ མདོ་རྒྱུད་མན་ངག༷་ཀུན་ལ་དབ༷ང་འབྱོར་ཞིང། །བློ༷་གྲོས་བུམ་བཟ༷ང་བསླབ་གསུམ་

― GTD003_Page_0898 ―

^{[མ་དཔེ་གཟིགས་ན་འདིར་གནོན།]}

[Full Size]

བདུད་རྩིས་གཏམས། །ཟབ་ཅིང་རྒྱ་ཆེའི་རྟོགས་པའི་ཀློང་རྡོལ་བ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཆེར་སྙིགས་དམུ་རྒོད་གདུལ་དཀའི་འགྲོ་བ་ལ། །རྒྱལ་ཀུན་ཐུགས་བཅུད་གདམས་པའི་མཆོག་སྩལ་ཏེ། །སྐལ་བ་ཇི་བཞིན་སྲིད་ཞིའི་རྒུད་པ་ལས། །སྒྲོལ་མཛད་སྐྱབས་ཀྱི་དམ་པར་ཕྱག་འཚལ་ལོ། །བསླུ་མེད་ཐུགས་རྗེའི་གཏེར་ཆེན་མགོན་ཁྱོད་ཀྱིས། །འབྲལ་མེད་བྱང་ཆུབ་བར་དུ་རྗེས་འཛིན་ཅིང། །འཁྲུལ་མེད་འཇམ་མགོན་ཞལ་ལུང་བདུད་རྩིའི་ཆུས། །ཐོག་མེད་ལས་ཉོན་དྲི་མ་བྱང་བར་མཛོད། །ལུས་དང་ལོངས་སྤྱོད་དུས་གསུམ་དགེ་བའི་དངོས། །མཐའ་དག་ཞུམ་མེད་བློ་ཡིས་ལེགས་འབུལ་ན། །ཟག་མེད་བདེ་ཆེན་ངང་དུ་རྣམ་རོལ་ཅིང། །མཐར་ཐུག་བྱང་ཆེན་རྒྱུ་རུ་སྨིན་པར་མཛོད། །ས་གཞི་སྤོས་ཀྱིས་བྱུགས་ཤིང་ཞེས་སོགས་ཀྱིས་མཎྜལ་དབུལ། གསོལ་འདེབས་ཀྱི་བཟླས་བརྗོད་བྱ་བར་འདོད་ན། མདོ་རྒྱུད་མན་ངག་ཅེས་སོགས་ཀྱི་ཤླཽ་ཀ་དེ་གྲངས་གསོག་ནས་བཟླ། ཕྲ་རགས་སྲིད་པའི་རྒྱ་མཚོ་བརྒལ་གྱི་བར ། །བླ་མ་ཡི་དམ་ཆོས་སྲུང་ཀུན་གྱི་དངོས། །འདྲེན་པ་ཁྱོད་མིན་སྐྱབས་གཞན་མ་མཆིས་པས། །བརྩེ་ཆེན་ཐུགས་རྗེའི་ཕྱག་གིས་དྲང་དུ་གསོལ། །དངོས་གྲུབ་རྩ་བ་བླ་མའི་མོས་གུས་དང། །ངེས་འབྱུང་བྱང་སེམས་ཡང་དག་ལྟ་བའི་གནད། །ཟབ་ལམ་རིམ་གཉིས་རྣལ་འབྱོར་ལ་སོགས་པ། །ལམ་བཟང་གེགས་མེད་སྐྱེ་བར་བྱིན་གྱིས་རློབས། །མདོར་ན་མགོན་ཁྱོད་ཐུགས་རྗེའི་སྤྲིན་ཕུང་ལས། །མཆོག་ཐུན་དངོས་གྲུབ་གྲུ་ཆར་འཇོ་བ་ཡིས། །ཕན་དང་བདེ་བའི་དགའ་ཚལ་རྒྱས་གྱུར་ཏེ། །བླ་མེད་ཐར་པའི་འབྲས་བཟང་སྨིན་

― GTD003_Page_0899 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་ཅིག །དེ་ནས་བླ་མ་རང་གི་སྤྱི་བོ་ནས་མར་ཕེབས་ཏེ་སྙིང་གར་རང་སེམས་དང་དབྱེར་མེད་དུ་བཞུགས་པའི་མོས་པ་བྱས་ལ། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་ཞེས་སོགས་དང་། ཚེ་རབས་རྗེས་འཛིན་གྱི་སྨོན་པས་མཚམས་སྦྱར་བར་བྱའོ། །རྒྱུན་དུ་ཟས་གོས་གནས་མལ་སོགས་གང་ལ་ལོངས་སྤྱོད་པ་ན་སྙིང་གའི་བླ་མ་ལ་དབུལ་བའི་དམིགས་པ་ཆུ་བོའི་རྒྱུན་གྱི་རྣལ་འབྱོར་བཞིན་དུ་བྱས་ན་དཀོར་སྒྲིབ་སྦྱོང་ཞིང་རང་གཞན་གཉིས་ཀའི་ཚོགས་རྫོགས་པ་དང་། བླ་མ་རྗེས་སུ་དྲན་པ་དང་མི་འབྲལ་ཞིང་དགྱེས་བཞིན་རྗེས་སུ་འཛིན་པའི་རྟེན་འབྲེལ་གྱི་སྒོ་ཁྱད་པར་ཅན་ཡོད་པས་ཐབས་སྣ་ཚོགས་ཀྱི་སྒོ་ནས་དལ་འབྱོར་ལ་སྙིང་པོ་བླང་བར་བྱའོ། །ཞེས་རྗེ་བཙུན་བླ་མ་དམ་པ་གྲུབ་པའི་དབང་ཕྱུག་ཆེན་པོ་ཆོས་བརྒྱད་ཀྱི་སྣང་བ་བཙན་ཆོད་དུ་བྱེད་པའི་རྗེ་བཙུན་མི་ལ་གཉིས་པ་ཀློང་རྡོལ་གྲུབ་པའི་དབང་ཕྱུག་ངག་དབང་བློ་བཟང་པའི་ཞལ་སྔ་ནས་ཀྱི་བླ་མའི་རྣལ་འབྱོར་འདི་ནི། རྗེ་བཙུན་དེ་ཉིད་ལ་རྩེ་གཅིག་ཏུ་མོས་གུས་ཅན་ཁ་ཀྱའི་རབ་འབྱམས་པ་བློ་བཟང་བརྩོན་འགྲུས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་ནས་བྲིས་པའོ། ། ༈ རང་གི་སྤྱི་བོར་པདྨ་ཟླ་བའི་སྟེང། །རྩ་བའི་བླ་མ་མཆོག་དང་དབྱེར་མེད་པའི། །རྡོར་སེམས་དཀར་པོ་ཕྱག་གཉིས་རྡོར་དྲིལ་འཛིན། །གྲི་ཐོད་འཛིན་མཛད་དབྱིངས་ཀྱི་དབང་མོས་འཁྱུད། །དེ་ཡི་ཐུགས་ཀའི་ཧཱུཾ་གི་འོད་ཟེར་གྱིས། །ཡེ་ཤེས་པ་རྣམས་སྤྱན་དྲངས་དབྱེར་མེད་གྱུར། །སླར་ཡང་འོད་འཕྲོས་རྡོ་རྗེ་གསུམ་གྱི་ལྷའི། །ཐུགས་ཀའི་ཡིག་བརྒྱ་དཀར་དམར་མཐིང་གའི་ཚོགས། །སྤྱན་དྲངས་སྤྱི་བོའི་རྡོར་སེམས་གནས་གསུམ་དུ། །འཁོད་པའི་བདུད་རྩིས་ལུས་ཀུན་གང་བར་གྱུར། །མི་བཟད་
ཉེས་ལྟུང་དྲི་མ་ཀུན་སེལ་ཞིང། །མཆོག་ཐུན་དངོས་གྲུབ་མ་ལུས་སྩོལ་མཛད་པ། །བླ་མ་རྡོ་རྗེ་སེམས་དཔར་གུས་ཕྱག་འཚལ། །རང་གཞན་སྡིག་ལྟུང་བྱང་བར་བྱིན་གྱིས་རློབས། །དེ་ལྟར་གསོལ་བཏབ་སྤྱི་བོའི་རྡོར་སེམས་ལས། །འགྲོ་དྲུག་གྲངས་སྙེད་རྡོར་སེམས་ཡབ་ཡུམ་སྤྲོས། །ཀུན་གྱི་སྤྱི་བོར་བཞུགས་པའི་སྦྱོར་མཚམས་ནས། །བདུད་རྩིའི་རྒྱུན་བབས་ཉེས་ཀུན་བྱང་བར་གྱུར། ། དེ་ནས་ཡིག་བརྒྱ་བཟླ། རྡོར་སེམས་འོད་དུ་ཞུ་བས་འགྲོ་བ་ཀུན། །དེ་ཡི་སྐུར་བཞེངས་དེ་དག་ཐམས་ཅད་ཀྱང། །གཅིག་བསྡུས་རང་ལ་ཐིམ་པས་རང་ཉིད་དང། །རྡོར་སེམས་དབྱེར་མེད་གཅིག་ཏུ་འདྲེས་པར་གྱུར། །འདིས་མཚོན་དགེ་བས་ཚེ་རབས་ཀུན་ཏུ་ཡང། །བླ་མ་རྡོ་རྗེ་སེམས་དཔས་རྗེས་བཟུང་སྟེ། །རྣམ་དག་དམ་ཚིག་སྡོམ་པའི་གྲུ་གཟིངས་ལ། །བརྟེན་ནས་ཟུང་འཇུག་ནོར་བུའི་གླིང་བགྲོད་ཤོག །ཅེས་པ་འདི་ནི་ཨོར་དུ་སུ་དར་ཧན་ཤོག་གི་དགེ་སློང་རིན་ཆེན་བཟང་པོ་དང་། དགེ་སློང་དཀོན་མཆོག་ཆོས་འཕེལ་གཉིས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

ཚེ་དཔག་མེད་དང་འབྲེལ་བའི་བླ་མའི་རྣལ་འབྱོར།

― GTD003_Page_0900 ―

^{[མ་དཔེ་གཟིགས་ན་འདིར་གནོན།]}

[Full Size]

ཚེ་དཔག་མེད་དང་འབྲེལ་བའི་བླ་མའི་རྣལ་འབྱོར་བཞུགས་སོ། །བླ་མ་ཚེ་དཔག་ཏུ་མེད་པ་ལ་ཕྱག་འཚལ་ལོ། །མདུན་གྱི་ནམ་མཁར་མཆོད་སྤྲིན་རྒྱ་མཚོའི་དབུས། །རྨ་བྱས་བཏེག་པའི་ཁྲི་ལ་པད་ཟླའི་སྟེང། །བཀའ་དྲིན་མཉམ་མེད་རྩ་བའི་བླ་མ་དང། །གཉིས་སུ་མེད་པ་བཅོམ་ལྡན་ཚེ་མཐའ་ཡས། །ཉི་འོད་སྟོང་འབར་བྱུ་རུའི་ལྷུན་པོ་བཞིན། །སྐུ་མདོག་དམར་གསལ་མཚན་དཔེའི་དཔལ་གྱིས་བརྗིད། །མཉམ་གཞག་ཕྱག་རྒྱས་བདུད་རྩིའི་བུམ་བཟང་བསྣམས། །ལྷ་ཡི་གོས་དང་རིན་ཆེན་རྒྱན་

― GTD003_Page_0901 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་མཛེས། །སྐྱིལ་མོ་ཀྲུང་གིས་བཞུགས་པའི་གནས་གསུམ་དུ། །ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །བདེ་ལྡན་ཞིང་ནས་མགོན་པོ་ཚེ་དཔག་མེད། །སྤྱན་དྲངས་དམ་ཚིག་པ་དང་དབྱེར་མེད་གྱུར། །བསླུ་མེད་དཀོ༷ན་མཆོ༷ག་གསུམ་གྱི་ངོ་བོ་ཉིད། །ངན་སོང་འཇིགས་སྒྲོལ་ལེགས་པའི་ལམ་བསྟ༷ན་ནས། །ཐར་པར་འཁྲིད་མཛད་འགྲོ་བའི་སྒྲོ༷ན་མེ༷་མཆོག །མགོན་པོ་ཚེ་དཔག་མེད་ལ་ཕྱག་འཚལ་ལོ། །དངོས་བཤམས་ཡིད་སྤྲུལ་ངོ་མཚར་མཆོད་པའི་སྤྲིན། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །བློ་ཡིས་བླངས་ཏེ་གུས་པས་འབུལ་ལགས་ན། །བརྩེ་བས་བཞེས་ནས་བྱིན་གྱིས་བརླབ་ཏུ་གསོལ། །སྲིད་ཞིའི་འཇིགས་པ་ཀུན་ལས་སྐྱོབ་པ་དང། །མཆོག་ཐུན་དངོས་གྲུབ་མ་ལུས་འགྲུབ་པའི་ཕྱིར། །རྩེ་གཅིག་གདུང་བའི་ཡིད་ཀྱིས་གསོལ་འདེབས་ན། །ཐུགས་རྗེས་མྱུར་བ་མྱུར་བར་བྱིན་གྱིས་རློབས། །དེ་ལྟར་གསོལ་བ་བཏབ་པས་བུམ་ནང་དང། །ཐུགས་ཀའི་སྔགས་འཕྲེང་འོད་ཀྱིས་རང་གི་ཚེ། །ཉམས་པ་གསོས་ཤིང་བརྟན་གཡོའི་བྱིན་རླབས་བཅུད། །ཚེ་དཔལ་ཀུན་བསྡུས་རང་ལ་ཐིམ་པར་གྱུར། །ཅེས་རྒྱལ་བ་སྲས་བཅས་ཀྱི་བྱིན་རླབས། ལྷ་དང་དྲང་སྲོང་འཁོར་ལོས་བསྒྱུར་བ་སོགས་ཀྱི་ཚེ་དང་བསོད་ནམས་འབྱུང་བ་ལྔའི་བཅུད། རང་གི་ཚེ་སྔར་གོད་པ་རྣམས་དང་བཅས་པ་བསྡུས་ཏེ་སྔགས་འཕྲེང་ལ་ཐིམ་པ་ལས་བདུད་རྩིའི་རྒྱུན་འབེབས་པའམ། དང་པོ་ནས་རང་ལ་བསྟིམ་པས་ལེགས་ཚོགས་ཀྱི་ཡོན་ཏན་ཐམས་ཅད་རྒྱས་ཤིང་། སླན་ཆད་འཚེ་བ་གང་གིས་ཀྱང་མི་ཚུགས་པའི་སྲུང་བ་ཆེན་པོར་

― GTD003_Page_0902 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་པར་བསམས་ལ་གཟུངས་རིང་ཐུང་རྣམས་བཟླ། མཇུག་ཏུ་ཡིག་བརྒྱས་ལྷག་ཆད་བསྐང་། ཚེ་དཔག་མེད་མགོན་བདུད་རྩིར་ཞུ་བའི་རྒྱུན། །ཚངས་བུག་ནས་ཞུགས་ལུས་ཀུན་གང་བ་ཡིས། །མི་ཤིགས་གཡུང་དྲུང་ཚེ་ཡི་རྟེན་གྱུར་ཅིང། །གསང་གསུམ་བྱིན་རླབས་མ་ལུས་ཐོབ་པར་གྱུར། །ཅེས་བརྗོད་ཅིང་དེ་ལྟར་བསམས་ལ། དུས་མིན་འཆི་བའི་མཚན་མ་མཐོང་བ་ན། །དེ་ཡི་མོད་ལ་ཚེ་དཔག་མེད་མགོན་སྐུ། ། ཞེས་སོགས་དང་། ཚེ་རབས་ཀུན་ཏུ་ཚེ་དཔག་མེད་པ་ཡིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །ཞེས་སོགས་སྨོན་པས་མཚམས་སྦྱར་བར་བྱའོ། །ཞེས་པ་འདི་ནི་བསྟན་པའི་གསལ་བྱེད་དམ་པ་ཨ་མོ་སྤྲུལ་པའི་སྐུ་བློ་བཟང་དཀོན་མཆོག་བསྟན་པའི་རྒྱལ་མཚན་གྱིས་བསྐུལ་བ་བཞིན༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ། ། ༈ གནས་སྤྱི་གཙུག་བདེ་ཆེན་འཁོར་ལོའི་སྟེང། །སྐྱབས་དཀོ༷ན་མཆོ༷ག་གསུམ་འདུས་ངོ་བོ་ཉིད། །རྗེ་བློ་བཟང་རྒྱལ་བ་གཉིས་པ་ཡི། །ཆོས་ལུང་རྟོགས་བསྟ༷ན་པ༷འི་སྒྲོ༷ན་མེ༷་མཆོག །སྐུ་ཞི་དུལ་ངུར་སྨྲིག་འཆང་བའི་ཚུལ། །ཕྱག་ཆོས་འཆད་མཉམ་གཞག་ཕྱག་རྒྱ་ཅན། །ཡོངས་སྲས་བཅས་རྒྱལ་བའི་འཁོར་ལོར་བཅས། །མི་བདག་གི་མགོན་དུ་རྟག་པར་བཞུགས། །ཆེས་སྙིགས་མ་བདོ་བའི་དུས་མཐའ་འདིར། །ཡོངས་ཐུབ་བསྟན་སྙིང་པོ་དྲི་མ་མེད། །བཤད་སྒྲུབ་པས་ཉི་ལྟར་གསལ་མཛད་པ། །རྗེ་ཐུགས་རྗེའི་གཏེར་ལ་ཕྱག་འཚལ་ལོ། །ལུས་ལོངས་སྤྱོད་དུས་གསུམ་དགེ་ཚོགས་བཅས། །བློས་བླངས་ཏེ་གུས་པས་འབུལ་ལགས་ན། །ཐུགས་བརྩེ་བ་ཆེན་པོས་

― GTD003_Page_0903 ―

^{[མ་དཔེ་གཟིགས་ན་འདིར་གནོན།]}

[Full Size]

ལེགས་བཞེས་ནས། །མཆོག་ཐར་པའི་རྒྱུ་རུ་བྱིན་གྱིས་རློབས། །དུས་ཡ་མཐའ་གཏུགས་པ་མེད་པ་ནས། །སེམས་ཉོན་མོངས་བྲན་དུ་གྱུར་པ་ཡིས། །ལས་སྡིག་པའི་དངོས་པོ་གང་བགྱིས་པ། །ཡིད་འགྱོད་པས་མཐོལ་ལོ་བྱང་བར་མཛོད། །རྒྱུ་མེད་པར་འགྲོ་ལ་མཉེས་གཤིན་པ། །མགོན་རྒྱལ་བ་སྲས་བཅས་ཐམས་ཅད་དང། །རྗེ་བླ་མའི་རྣམ་པར་ཐར་པ་ལ། །སེམས་རྩེ་གཅིག་དད་པས་རྗེས་ཡི་རང། །དུས་རིང་ནས་འགྲོ་བའི་དུག་གསུམ་གྱི། །ནད་གདུང་བ་སེལ་བའི་ཐུགས་བསྐྱེད་བཞིན། །ཆོས་ཟབ་རྒྱས་བདུད་རྩིའི་གཏེར་ཕྱེ་སྟེ། །ལས་ཉོན་མོངས་ཉེས་ཀུན་སྦྱང་དུ་གསོལ། །དགེ་འདིས་མཚོན་དུས་གསུམ་བསགས་པ་ཡི། །ལས་རྣམ་དཀར་ཕུང་པོ་བསྡོམས་པའི་མཐུས། །ཡོངས་ལེགས་ཚོགས་རྩ་བ་དྲིན་ཅན་རྗེ། །བསམ་སྦྱོར་བས་ཚུལ་བཞིན་བསྟེན་པར་ཤོག །དུས་རྟག་ཏུ་དལ་འབྱོར་རྟེན་ཐོབ་ཅིང། །ཚེ་འདི་སྣང་གདོན་གྱིས་མི་བསླུ་བར། །ལས་རྒྱུ་འབྲས་ངང་ཚུལ་ལེགས་བསམས་ནས། །སྐྱབས་མཆོག་གསུམ་གཙུག་གིས་སྟེན་གྱུར་ཅིག །གནས་འཁོར་བ་གཤིན་རྗེའི་བཙོན་ར་ལ། །ཡིད་གཏིང་ནས་ལོག་པའི་ངེས་འབྱུང་གིས། །ལམ་བསླབ་གསུམ་གྲུ་གཟིངས་ལ་ཞུགས་ནས། །མཆོག་ཐར་པའི་གླིང་དུ་བགྲོད་གྱུར་ཅིག །མ་མཁའ་མཉམ་འགྲོ་བ་མཐའ་དག་ལ། །སྙིང་བརྩེ་བའི་གཞན་དབང་གྱུར་པ་ཡིས། །ལམ་བྱང་ཆུབ་མཆོག་ཏུ་སེམས་བསྐྱེད་དེ། །ཡོངས་རྒྱལ་སྲས་སྤྱོད་ལ་སློབ་གྱུར་ཅིག །རྒྱུའི་ཐེག་པའི་ལམ་གྱིས་རྒྱུད་

― GTD003_Page_0904 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱངས་ཏེ། །ཆོས་ཟབ་གསང་མྱུར་བ་གསང་སྔགས་ཀྱི། །སྒོར་ཞུགས་ནས་དམ་ཚིག་ལེགས་བསྲུང་ཞིང། །ལམ་རིམ་གཉིས་སྤྱོད་ལ་སློབ་གྱུར་ཅིག །ད་མདོར་ན་བློ་དམན་བྱིས་པ་བདག །སྔར་དལ་འབྱོར་ཚང་བའི་རྟེན་ཐོབ་ཀྱང། །དུས་དེ་རིང་ཡན་ཆད་སྟོང་པར་ཟད། །དེང་ཚེ་ལྷག་ཆོས་ཀྱིས་འདའ་བར་ཤོག །མགོན་རྒྱལ་ཀུན་ཐུགས་ཀྱི་བཅུད་བསྡུས་པ། །རྗེ་བློ་བཟང་བསྟན་པའི་སྒོར་ཞུགས་ཀྱང། །སྔོན་ཇི་བཞིན་བསྒྲུབ་པར་མ་ནུས་པས། །ད་ཚུལ་བཞིན་ཉམས་སུ་ལེན་པར་ཤོག །ལམ་འཁྲུལ་བྲལ་ཚང་ལ་མ་ནོར་བ། །རྗེ་བློ་བཟང་རྒྱལ་བའི་བཀའ་རྒྱུད་ཀྱི། །ལམ་བཟང་པོ་ཕྱོགས་བརྒྱར་སྤེལ་བ་ཡིས། །མ་འགྲོ་ཀུན་སྲིད་ལས་སྒྲོལ་གྱུར་ཅིག །ཅེས་པ་འདི་ནི་གཞུང་བརྒྱ་སྨྲ་བའི་དབང་ཕྱུག་གྲྭ་ཚང་འོག་གི་སློབ་ཟུར་ལྷ་རམས་པ་འཕྲིན་ལས་དཔལ་བཟང་། མཁས་བཙུན་བཟང་པོའི་བདག་ཉིད་གྲྭ་ཚང་བླ་མ་ཞབས་དྲུང་འཇམ་དབྱངས་རྒྱ་མཚོ། ལྷག་བསམ་རྣམ་དཔྱོད་ཡངས་པ་གཞུང་ལས་པ་འཇམ་དབྱངས་བཟང་པོ་རྣམས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་གསེར་དགོན་དགའ་ལྡན་དམ་ཆོས་གླིང་དུ་སྦྱར་བའི་ཡི་གེ་པ་ནི་སྔགས་རམས་པ་རཏྣ་ཨཱ་ནནྟའོ།། །།

མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་སོགས།

― GTD003_Page_0905 ―

^{[མ་དཔེ་གཟིགས་ན་འདིར་གནོན།]}

[Full Size]

མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཞིང་མཆོག་སྒོ་འབྱེད་སོགས་བླ་མའི་རྣལ་འབྱོར་གྱི་རིམ་པ་ཕྱོགས་བསྒྲིགས་བཞུགས་སོ། །

― GTD003_Page_0906 ―

^{[མ་དཔེ་གཟིགས་ན་འདིར་གནོན།]}

[Full Size]

སྲིད་མཚོ་ཉམ་ངར་འགྱུ་བའི་འགྲོ་བ་ལ། །རྗེས་ཆགས་ཐུགས་རྗེའི་སྤྱན་ཟུར་གཏོད་བཞིན་དུ། །འཕྲིན་ལས་ཀྱོ་བས་རྟག་ཏུ་གཟས་པ་ཡི། །འདྲེན་མཆོག་སྣང་མཐའ་ཡས་པས་རྗེས་སུ་ཟུངས། །དེའང་མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཉམས་སུ་ལེན་པ་ལ། སྤྱིར་དམིགས་སྐོར་སོགས་ཡིག་ཆུང་དུ་བྱས་པ་བློ་ལ་ངེས་ཐོག །གཞུང་དངོས་གཞི་ངག་འདོན་བྱས་ན་འཇུག་པ་བདེའང་། ཕལ་ཆེར་ཡིག་ཆུང་རྣམས་མི་དགོས་པ་ཞིག་ཏུ་གོ་ནས་དོན་དུ་མི་འགྱུར་བ་མང་ཞིང་། དམིགས་སྐོར་འཕྲལ་དུ་གསལ་མ་ཐེབས་ཀྱང་ཚིག་ཙམ་ཡང་ཡང་བསྐྱར་ན་རིམ་གྱིས་རྒྱུད་ལ་འཆར་བ་འབྱུང་བས། འདིར་དཀྱུས་གཅིག་ཏུ་ངག་འདོན་བྱེད་རྒྱུའི་དབང་དུ་བཏང་སྟེ་ལྷུག་པར་འགོད་པ་ལ། རང་གི་མདུན་གྱི་ནམ་མཁར་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཉན་རང་ཆོས་སྲུང་དང་བཅས་སྐྱབས་ཡུལ་ནམ་མཁའི་ཁམས་གང་བ་བཀྲ་ལམ་

― GTD003_Page_0907 ―

^{[མ་དཔེ་གཟིགས་ན་འདིར་གནོན།]}

[Full Size]

མེ་བཞུགས་པར་གྱུར། རང་དང་རང་གི་མཐའ་སྐོར་ན་གནས་པའི་ཕ་མ་རིགས་དྲུག་གི་སེམས་ཅན་འདི་དག་ཐམས་ཅད་ཐོག་མ་མེད་པ་ནས་ཉོན་མོངས་པ་དུག་གསུམ་གྱི་དབང་དུ་གྱུར་ཏེ། སྡིག་པ་མི་དགེ་བའི་ལས་ས་ཆེན་པོའི་རྡུལ་བཞིན་བསམ་གྱིས་མི་ཁྱབ་པ་ཞིག་བསགས། དེའི་དབང་གིས་དམྱལ་བར་མེ་ནང་དུ་བར་མཚམས་མེད་པར་བཙོ་བསྲེག་འབའ་ཞིག་གི་ངང་ལ་བསྐལ་པ་བྱེ་བ་ཕྲག་ཁྲིག་མང་པོར་གནས་པ་སོགས་སྡུག་བསྔལ་དཔག་ཏུ་མེད་པ་ཞིག་མྱོང་དུ་ཟིན་ཡང་། ད་དུང་དལ་འབྱོར་ཡུད་ཙམ་པ་ལན་གཅིག་ཐོབ་པའི་སྟེང་འདིར་བཙན་ས་ཞིག་མ་ཟིན་ན། འདི་ནས་རྡོག་སྣ་གཅིག་འདྲེད་མ་ཐག་ངན་སོང་གི་གཡང་ས་བརྒྱུད་མ་ནས་བརྒྱུད་མར་ལྷུང་སྟེ་བཟོད་གླགས་མེད་པའི་སྡུག་བསྔལ་ཤུགས་དྲག་ལ་ཡུན་རིང་པོའི་ཕ་མཐར་ཕྱིན་དུས་ཤིག་མི་ཡོང་བར་འདུག །དེས་ན་འཇིགས་པ་ཆེན་པོ་དེ་ལས་སྐྱོབ་པའི་སྐྱབས་ཤིག་ད་ལྟ་ཉིད་དུ་བཙལ་དགོས་ཤིང་། དེའང་སྐྱབས་དཀོན་མཆོག་གསུམ་ལས་གཞན་ན་མེད་དེ། ཁོང་རྣམས་ཀྱི་ངོས་ནས་སྔར་རྒྱུ་ཚོགས་ཐམས་ཅད་བསྒྲུབས་ཡོད་པ་ལ་

― GTD003_Page_0908 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གིས་བློ་མ་གཏད་པས་ལན་པར་འདུག་པས། ད་ནི་སྐྱིད་སྡུག་ལེགས་ཉེས་ཅི་བྱུང་ཡང་ཁྱེད་ཤེས་ཀྱིས་བློ་ལིངས་ཀྱིས་བཀལ་ཏེ། དུས་འདི་ནས་བཟུང་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཁྱད་པར་དུའང་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྲས་ཀྱི་ཐུ་བོ་གཉིས་ལ་སོགས་པ་འཁོར་རྒྱལ་སྲས་རྒྱ་མཚོའི་ཚོགས་དང་བཅས་པ་རྣམས་ལ་སྐྱབས་སུ་མཆིའོ། །ཡང་བླ་མ་ལ་སྐྱབས་སུ་མཆིའོ། །ཞེས་སོགས་གསུམ་མམ་བདུན་སོགས་བྱ། དེ་ནས། ཕུལ་བྱུང་མཛད་པས་འགྲོ་ལ་མི་ཟད་དཔལ་སྟེར་ཞིང། །ལན་གཅིག་དྲན་པས་འཆི་བདག་འཇིགས་པ་རིང་དུ་དོར། །རྟག་ཏུ་བརྩེ་བས་འགྲོ་ལ་བུ་བཞིན་དགོངས་གྱུར་པ། །ལྷ་མིའི་སྟོན་པ་ཚེ་དཔག་མེད་ལ་སྐྱབས་སུ་མཆི། །ཐུབ་པའི་དབང་པོས་ལན་གྲངས་དུ་མ་རུ། །ལེགས་པར་ཡོངས་སུ་བསྔགས་པའི་ཞིང་གི་མཆོག །བདེ་བ་ཅན་དུ་སྐྱེ་ཕྱིར་སྨོན་པ་ཡི། །རེ་བ་ཇི་བཞིན་འགྲུབ་པར་བྱིན་གྱིས་རློབས། །རིགས་དྲུག་དགྲ་གཉེན་བར་མའི་སེམས་ཅན་འདི་དག་ཐམས་ཅད་བདེ་བ་འདོད་ཅིང་སྡུག་བསྔལ་མི་འདོད་པར་མཚུངས་པ་ལ། ད་ལྟ་ནི་སྡུག་བསྔལ་གྱིས་མནར་ཞིང་བདེ་བས་ཤིན་ཏུ་ཕོངས་པར་འདུག །བརྒྱ་ལ་ཟག་བཅས་འཁོར་བའི་བདེ་བ་ཙམ་ཐོབ་ཀྱང་ཡིད་བརྟན་མེད་པས་

― GTD003_Page_0909 ―

^{[མ་དཔེ་གཟིགས་ན་འདིར་གནོན།]}

[Full Size]

བསླུ་བྲིད་ཁོ་ན་ཡིན། དེས་ན་ཉེ་རིང་མེད་པར་སེམས་ཅན་འདི་དག་ཐམས་ཅད་སྡུག་བསྔལ་གྱི་མིང་ཡང་མི་གྲགས་ཤིང་། བདེ་བ་ཕུན་སུམ་ཚོགས་པའི་གནས་ལས་སླར་མི་ལྡོག་པ་དག་པའི་ཞིང་བདེ་བ་ཅན་དུ་ཁྲིད་དེ་རིམ་གྱིས་བླ་ན་མེད་པའི་བྱང་ཆུབ་ལ་འགོད་པར་བྱ། དེའི་ཕྱིར་དུ་བདག་གིས་ལམ་ཟབ་མོ་བླ་མ་ལྷའི་རྣལ་འབྱོར་འདིའི་སྒོ་ནས་འདྲེན་པ་འོད་དཔག་ཏུ་མེད་པའི་གོ་འཕང་མྱུར་བ་མྱུར་བར་མངོན་དུ་བྱེད་ནུས་པ་ཞིག་བྱུང་ན་ཅི་མ་རུང་། དེ་ལྟར་བྱེད་ནུས་པར་ཤོག་ཅིག །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་སྐྱབས་ཡུལ་རྣམས་འོད་དུ་ཞུ་བ་རང་གི་སྨིན་མཚམས་ནས་ཐིམ་པས་རང་ཉིད་རྒྱལ་བ་འོད་དཔག་ཏུ་མེད་པའི་སྐུར་གྱུར། རང་གི་ཐུགས་ཀ་ནས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་པས། དེ་ཐམས་ཅད་ཀྱང་འོད་དཔག་མེད་ཀྱི་སྐུར་གྱུར། ཅེས་ཚད་མེད་པ་བཞིའི་ཚུལ་གྱིས་སེམས་བསྐྱེད་པ་འབྲས་བུ་ལམ་བྱེད་དང་བཅས་གནད་དུ་འགྲོ་ངེས་བྱས་ལ་དེའི་ངང་དུ་དར་ཅིག་བཞག །དཀོན་མཆོག་གསུམ་གྱི་ཐུགས་རྗེའི་བདེན་པ་ཆེན་པོའི་མཐུ་དང་། ཆོས་ཀྱི་དབྱིངས་རྟེན་འབྱུང་བསླུ་བ་མེད་པའི་སྟོབས་ལས་མདུན་གྱི་ནམ་མཁར་ཀུན་བཟང་མཆོད་པའི་སྤྲིན་གྱི་ཕུང་པོ་ཡོངས་སུ་རྫོགས་པའི་དབུས་སུ་རྨ་བྱས་བཏེག་པའི་རིན་པོ་ཆེའི་ཁྲིའི་སྟེང་དུ་པད་ཟླའི་གདན་

― GTD003_Page_0910 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཧྲཱིཿ ཡིག་དམར་པོ་དེ་ཡོངས་སུ་གྱུར་པ་ལས། བཀའ་དྲིན་གསུམ་ལྡན་རྩ་བའི་བླ་མ་དང་ངོ་བོ་དབྱེར་མ་མཆིས་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་བྱི་རུའི་མདོག་ཅན་ཞལ་གཅིག་ཕྱག་གཉིས་མཉམ་གཞག་གི་སྟེང་ན་འཆི་བ་མེད་པའི་ཚེ་དང་ཡེ་ཤེས་ཀྱི་བདུད་རྩིས་གང་བའི་ལྷུང་བཟེད་བསྣམས་པ། དབུ་གཙུག་ཏོར་དང་ལྡན་ཞིང་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། སྐུ་ལ་ཆོས་གོས་དམར་པོ་གསོལ་ཞིང་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོ་བའི་ཀློང་ན་ཤིན་ཏུ་དགྱེས་ཤིང་འཛུམ་པའི་ཉམས་དང་བཅས་ཏེ་རྡོ་རྗེ་སྐྱིལ་མོ་ཀྲུང་གིས་བཞུགས་པ། དེའི་གཡས་སུ་སྤྱན་རས་གཟིགས་དང་གཡོན་དུ་མཐུ་ཆེན་ཐོབ་ལ་སོགས་པ་རྒྱལ་སྲས་བྱང་ཆུབ་སེམས་དཔའི་ཚོགས་ཀྱིས་བསྐོར་བ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། ནུབ་ཕྱོགས་བདེ་བ་ཅན་ནས་མགོན་པོ་འོད་དཔག་མེད་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། འདི་ནས་ནུབ་ཕྱོགས་བདེ་ལྡན་ཞིང་ཁམས་ན། །འཚོ་གཞེས་འགྲོ་བའི་བླ་མ་འོད་དཔག་མེད། །བརྩེ་ལྡན་རྒྱལ་བའི་སྲས་ཀྱི་ཚོགས་བཅས་ལ། །རྒྱང་ནས་འོ་དོད་འབོད་དོ་དགོངས་སུ་གསོལ། །བླང་དོར་གནས་རྣམས་མ་རིག་མཐུག་པོས་བསྒྲིབས། །ཁོང་ཁྲོའི་མཚོན་གྱིས་མཐོ་རིས་སྲོག་འཕྲོག་ཅིང། །འདོད་སྲེད་ཞགས་པས་འཁོར་བའི་བཙོན་རར་བཅིངས། །ལས་ཀྱི་ཆུ་བོས་སྲིད་པའི་རྒྱ་མཚོར་ཁྱེར། །ན་རྒའི་སྡུག་

― GTD003_Page_0911 ―

^{[མ་དཔེ་གཟིགས་ན་འདིར་གནོན།]}

[Full Size]

བསྔལ་རྦ་རླབས་མང་པོས་གཡེངས། །མི་བཟད་འཆི་བདག་ཆུ་སྲིན་ཁར་ཆུད་པས། །མི་འདོད་སྡུག་བསྔལ་ཁུར་གྱིས་ནོན་གྱུར་པ། །མགོན་མེད་བདག་གིས་ཉམ་ཐག་ང་རོ་ཡིས། །ཡིད་ལ་སྨོན་པ་འགྲུབ་པའི་དཔང་པོ་རུ། །ཕོངས་པའི་གཉེན་གཅིག་འདྲེན་པ་འོད་དཔག་མེད། །སྤྱན་རས་གཟིགས་དབང་རྒྱལ་སྲས་མཐུ་ཆེན་ཐོབ། །འཁོར་དང་བཅས་ལ་གུས་པས་གསོལ་འདེབས་ན། །དཔག་མེད་བསྐལ་པར་བདག་ཅག་རྣམས་ཀྱི་ཕྱིར། །ཐུགས་མཆོག་བསྐྱེད་པའི་དམ་བཅའ་མ་བསྙེལ་བར། །འདབ་བཟང་གཙོ་བོ་ལྷ་ཡི་ལམ་ལ་བཞིན། །རྫུ་འཕྲུལ་སྟོབས་ཀྱིས་བརྩེ་བས་འདིར་གཤེགས་ཤིག །ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། །ཡང་དག་ལམ་བཟང་སྟོན་མཛད་རྫོགས་སངས་རྒྱས། །སྲིད་ཞིའི་འཇིགས་པ་ཀུན་སེལ་དམ་པའི་ཆོས། །བླང་དོར་སྒྲུབ་པའི་གྲོགས་གྱུར་དགེ་འདུན་ཏེ། །སྐྱབས་གསུམ་ཀུན་འདུས་ཁྱོད་ལ་ཕྱག་འཚལ་ལོ། །གང་གི་མཚན་ཙམ་ཡིད་ལ་དྲན་པས་ཀྱང། །ཕྲ་རགས་འཁོར་བའི་སྡུག་བསྔལ་ལས་གྲོལ་ཏེ། །ཟག་མེད་བདེ་བ་མཆོག་ལ་སྦྱོར་མཛད་པ། །བླ་མ་འོད་དཔག་མེད་ལ་ཕྱག་འཚལ་ལོ། །བསླུ་མེད་དཀོ༷ན་མཆོ༷ག་གསུམ་འདུས་བསྟ༷ན་པ༷འི་བདག །ངན་སོང་འཇིགས་ལས་སྐྱོབ་པའི་དཔའ་བོ་སྟེ། །དག་པའི་ཞིང་གི་ལམ་སྟོན་སྒྲོ༷ན་མེ༷་མཆོག །བླ་མ་འོད་དཔག་མེད་ལ་ཕྱག་འཚལ་ལོ། །འཇིག་རྟེན་འདི་ན་ཡིད་འོང་དངོས་པོ་ཀུན། །ཞུམ་མེད་བློ་ཡིས་བླངས་ཏེ་དབུལ་བར་བགྱི། །བདག་སོགས་འགྲོ་བའི་བསོད་ནམས་རྫོགས་སླད་དུ། །

― GTD003_Page_0912 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་རྗེའི་གཏེར་ཆེན་ཉིད་ཀྱི་མཐུས་བཞེས་ཤིག །ཁྱད་པར་རང་གཞན་དགེ་བའི་ཆར་གཏོགས་ཀུན། །དབུལ་ལོ་ཁྱོད་ཐུགས་ཟག་མེད་དགེ་བའི་མཚོར། །འདྲེས་ཏེ་ནམ་ཡང་ཆུད་མི་ཟ་བ་དང། །ཁྱོད་བཞེད་འབྲས་བུ་ཀུན་གྱི་རྒྱུར་གྱུར་ཅིག །གཏིང་མཐའ་མེད་པ་ངན་འགྲོའི་གཡང་ས་རུ། །སྡིག་པའི་ལས་ཀྱི་གར་སྟབས་བསྒྱུར་བ་ཡི། །སྨྱོན་པ་བདག་ལ་བརྩེ་བས་ཉེར་དགོངས་ནས། །ཤེས་རྒྱུད་སྡིག་དང་བྲལ་བར་བྱིན་གྱིས་རློབས། །དུག་གསུམ་ནད་ཀྱི་གདུང་སེལ་སྐྱབས་གཅིག་ཁྱོད། །སྐུ་ཡི་བཀོད་པ་གཡོ་མེད་རྟག་བཞུགས་ཏེ། །རིང་ནས་འགྲོ་ལ་ཕན་དགོངས་ཐུགས་བསྐྱེད་བཞིན། །ཟབ་རྒྱས་ཆོས་ཀྱི་སྨན་མཆོག་སྩལ་དུ་གསོལ། །འདི་སྣང་ཞེན་པའི་འཆིང་བ་བཅད་དུ་གསོལ། །དངོས་འཛིན་རྨོངས་པའི་མུན་པ་བསལ་དུ་གསོལ། །གཅེས་འཛིན་འགོང་པོའི་འཇིགས་ལས་བསྐྱབ་ཏུ་གསོལ། །ཡང་དག་ལམ་བཟང་སྒྲུབ་པར་བྱིན་གྱིས་རློབས། །སྣང་བ་མཐའ་ཡས་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང། །བྱང་ཆུབ་སེམས་དཔའི་ཚོགས་ལ་ཡང། །དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་པས། །ཀུན་ཏུ་བཟང་ལ་བདག་ཉིད་འབུལ། །འཇམ་པའི་དབྱངས་ལའང་བདག་ཉིད་ཀྱིས། །བདག་གི་ལུས་ནི་དབུལ་བར་བགྱི། །ཐུགས་རྗེས་སྤྱོད་པ་མ་འཁྲུལ་བ། །སྤྱན་རས་གཟིགས་མགོན་དེ་ལ་ཡང། །ཉམ་ཐག་ང་རོས་འོ་དོད་འབོད། །སྡིག་ལྡན་བདག་ལ་སྐྱབས་སུ་གསོལ། །འཕགས་

― GTD003_Page_0913 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ནམ་མཁའི་སྙིང་པོ་དང། །ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། །སྐྱབས་ཚོལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཞིར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱེད་ཀྱི་བཀའ་ལས་འདས། །ད་ནི་འཇིགས་པ་ཆེ་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱིས། །འཇིགས་པ་མྱུར་དུ་བསལ་དུ་གསོལ། །ཞེས་གསོལ་བ་བཏབ་པས། བླ་མ་རྒྱལ་བ་འོད་དཔག་ཏུ་མེད་པ་ཉེ་སྲས་བརྒྱད་ལ་སོགས་པའི་རྒྱལ་སྲས་རྒྱ་མཚོའི་ཚོགས་དང་བཅས་པ་ཐམས་ཅད་ཀྱི་སྐུ་ལས་བདུད་རྩིའི་རྒྱུན་བབས། རང་དང་སེམས་ཅན་ཐམས་ཅད་ཀྱི་སྤྱི་བོ་ནས་ཞུགས། ཚེ་ཐོག་མ་མེད་པ་ནས་བསགས་པའི་ལས་སྒྲིབ་བག་ཆགས་དང་བཅས་པ་ཐམས་ཅད་སྦྱངས། རྒྱལ་བ་སྲས་བཅས་ཀྱི་བྱིན་རླབས་མ་ལུས་པ་ཐོབ་པར་གྱུར་པར་བསམས་ལ། བསླུ་མེད་དཀོན་མཆོག་ཅེས་སོགས་ཀྱི་ཤོ་ལོ་ཀ་དེ། ཕྱག་འཚལ་ཞེས་པ་གསོལ་འདེབས་སུ་བསྒྱུར་བ་གང་མང་དང་། བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཞེས་གྲངས་གསོག །ཚེ་གཟུངས། ཡིག་དྲུག བཛྲ་པཱ་ཎི་སོགས་བཟླས་ལ་སྤྱིའི་དམིགས་པ་སྔ་མའི་སྟེང་དུ་འཆི་བ་མེད་པའི་ཚེ་དང་། རབ་ཏུ་རྣམ་འབྱེད་ཀྱི་ཡེ་ཤེས། བྱམས་སྙིང་རྗེ་བྱང་ཆུབ་ཀྱི་སེམས། ཆོས་སྒྲུབ་པ་ལ་གདོན་བགེགས་ཀྱིས་མི་ཚུགས་པའི་ནུས་མཐུ་ཐོབ་པ་སོགས་སྐབས་ཐོབ་ཀྱི་དམིགས་པ་གང་མོས་སུ་སྦྱར་ཀྱང་རུང་ངོ་། །མཇུག་ཏུ་ཡི་གེ་བརྒྱ་པ་

― GTD003_Page_0914 ―

^{[མ་དཔེ་གཟིགས་ན་འདིར་གནོན།]}

[Full Size]

ཅི་འགྲུབ་བཟླ། རང་གི་ལུས་ལོངས་སྤྱོད་ཐམས་ཅད་བློས་ལིང་སྐྱུར་གྱིས་སྐྱབས་ཡུལ་རྣམས་ལ་ཕུལ་བར་མོས་ཏེ། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །གནས་ངན་འཁོར་བ་དགྲ་བོའི་བཙོན་རྭ་འདིར། །བདེ་བའི་གོ་སྐབས་ནམ་ཡང་མ་མཆིས་པས། །དེད་དཔོན་མཚུངས་མེད་བླ་མ་ལྷག་པའི་ལྷས། །ཐུགས་རྗེའི་ལྕགས་ཀྱུས་མྱུར་དུ་དྲང་དུ་གསོལ། །ཞེས་གསོལ་བ་བཏབ་པས། འཁོར་རྣམས་གཙོ་བོ་ལ་ཐིམ་ཞིང་། དེ་ཉིད་རང་གི་སྤྱི་བོར་བྱོན་ནས་བཞུགས། དེའི་རྩ་དབུ་མ་སྟོད་ཕྲ་ཞིང་སྨད་ཡངས་པའི་མར་སྣེ་དང་། རང་གི་ལུས་ཀྱང་ཤེལ་སྒོང་བཞིན་དུ་དྭངས་ཤིང་གསལ་བའི་ནང་གི་དབུ་མ་སྨད་ཕྲ་ཞིང་སྟོད་སྦོམ་པའི་ཡར་སྣེ་གཉིས་དབྱེར་མེད་དུ་འདྲེས། བླ་མ་འོད་དཔག་མེད་ཀྱི་ཐུགས་ཀར་ཧྲཱིཿ ཡིག་དང་། རང་གི་སྙིང་གའི་ཐད་ཀྱི་དབུ་མའི་ནང་དུ་རང་སེམས་ཀྱི་ངོ་བོ་ཐིག་ལེ་དཀར་ཞིང་འཚེར་བའི་རྣམ་པ་གསལ་བར་གྱུར། སྐྱབས་གསུམ་ཀུན་འདུས་བླ་མ་ལྷག་པའི་ལྷ། །ཁྱོད་མིན་སྐྱབས་གཞན་མེད་དོ་ཐུགས་རྗེས་གཟིགས། །འདི་སྣང་འཁྲི་བ་ཆོད་པར་བྱིན་གྱིས་རློབས། །ལས་ངན་སྡིག་སྒྲིབ་དག་པར་བྱིན་གྱིས་རློབས། །ངན་སོང་སྐྱེ་སྒོ་ཁེག་པར་བྱིན་གྱིས་རློབས། །ཞིང་མཆོག་བདེ་བ་ཅན་དེར་ཁྲིད་དུ་གསོལ། །ཞེས་གསོལ་བ་བཏབ་པ་ན་ཐུགས་ཀའི་ཧྲཱིཿ ཡིག་གི་འོད་ཟེར་སྡོམ་གྱི་བ་ཐག་ལྟ་བུས་རང་སེམས་ཐིག་ལེར་གསལ་བ་ལ་རེག་པས་ཁབ་ལེན་གྱིས་ལྕགས་ཕྱེ་དྲངས་པ་བཞིན་ཅུང་ཟད་རེ་སྦར་བའི་དམིགས་པ་བྱས་ཏེ་ཧིཀ་དང་། རབ་གནས་སུ་ཕབ་སྟེ་ཀ་ཞེས་བརྗོད་པ་སྤེལ་ནས་ལན་གསུམ་སོགས་

― GTD003_Page_0915 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ། དེ་ནས། བཅོམ་ལྡན་འདས་མགོན་པོ་འོད་དཔག་ཏུ་མེད་པ་དེ་ཉིད་འཆི་མེད་ཚེ་ཡི་བདུད་རྩིའི་རྣམ་པར་འོད་དུ་ཞུ་བ་དབུ་མའི་ལམ་ནས་ཞུགས་ཏེ་ཚངས་པའི་བུ་ག་ཁྲིགས་ཀྱིས་གཏམས་པར་གྱུར། ཅེས་བརྗོད་ཅིང་བསམས། དེ་ནས་རྒྱས་པར་བྱེད་ན། བདག་དང་གཞན་གྱི་དུས་གསུམ་དང་འབྲེལ་བའི་ཞེས་སོགས་བདེ་སྨོན་ཡོངས་རྫོགས་དང་། བསྡུ་ན། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །ནམ་ཞིག་ཚེ་ཡི་འདུ་བྱེད་གཏོང་བ་ན། །འཁོར་ཚོགས་རྒྱ་མཚོས་བསྐོར་བའི་འོད་དཔག་མེད། །མིག་གི་ལམ་དུ་གསལ་བར་མཐོང་གྱུར་ནས། །དད་དང་སྙིང་རྗེས་བདག་རྒྱུད་གང་བར་ཤོག །བར་དོའི་སྣང་བ་ཤར་བར་གྱུར་མ་ཐག །རྒྱལ་སྲས་བརྒྱད་ཀྱིས་མ་ནོར་ལམ་བསྟན་ཏེ། །བདེ་བ་ཅན་དུ་སྐྱེས་ནས་སྤྲུལ་པ་ཡིས། །མ་དག་ཞིང་གི་འགྲོ་བ་འདྲེན་གྱུར་ཅིག །ཇི་སྲིད་ཐུབ་མཆོག་གོ་འཕང་དམ་པ་དེ། །བདག་གིས་མངོན་དུ་མ་བྱས་དེ་སྲིད་དུ། །རྣམ་དག་ལམ་བཟང་སྒྲུབ་པའི་རྟེན་རྙེད་ཅིང། །རབ་ཏུ་འབྱུང་ཞིང་ཚེ་རབས་དྲན་པར་ཤོག །གཟུངས་སྤོབས་ཏིང་འཛིན་མངོན་ཤེས་རྫུ་འཕྲུལ་སོགས། །མཐའ་ཡས་ཡོན་ཏན་དུ་མའི་མཛོད་འཛིན་ཅིང། །མཁྱེན་བརྩེ་ནུས་པ་ཟླ་དང་བྲལ་ཐོབ་ནས། །བྱང་ཆུབ་སྤྱོད་པ་མྱུར་དུ་མཐར་ཕྱིན་ཤོག །དུས་མིན་འཆི་བའི་མཚན་མ་མཐོང་བ་ན། །དེ་ཡི་མོད་ལ་ཚེ་དཔག་མེད་མགོན་སྐུ། །གསལ་བར་མཐོང་ནས་

― GTD003_Page_0916 ―

^{[མ་དཔེ་གཟིགས་ན་འདིར་གནོན།]}

[Full Size]

འཆི་བདག་དཔའ་བཅོམ་སྟེ། །འཆི་མེད་རིག་འཛིན་མྱུར་དུ་ཐོབ་པར་ཤོག །ཚེ་རབས་ཀུན་ཏུ་ཚེ་དཔག་མེད་པ་ཡིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །རྒྱལ་བས་བསྔགས་པའི་ལམ་བཟང་དེ་ཉིད་ལས། །སྐད་ཅིག་ཙམ་ཡང་ལྡོག་པར་མ་གྱུར་ཅིག །སེམས་ཅན་ཡལ་བར་དོར་ནས་རང་དོན་ལ། །རེ་བའི་བློ་ནི་ནམ་ཡང་མི་སྐྱེ་ཞིང། །གཞན་དོན་བསྒྲུབ་པའི་ཚུལ་ལ་མ་རྨོངས་པའི། །ཐབས་ལ་མཁས་པས་གཞན་དོན་ལྷུར་ལེན་ཤོག །བདག་གི་མིང་ཙམ་བརྗོད་དང་དྲན་པས་ཀྱང། །སྡིག་པའི་ལས་ཀྱི་འབྲས་བུས་མནར་བ་ཀུན། །ཕུན་ཚོགས་བདེ་བའི་དཔལ་རབ་འབྱོར་གྱུར་ནས། །ཐེག་མཆོག་བགྲོད་པའི་ཐེམ་སྐས་འཛེགས་གྱུར་ཅིག །རྒྱལ་བའི་སྲས་ཀྱི་རྣམ་ཐར་ཕྱོགས་ཙམ་ཞིག །མཚོན་པར་བྱས་པས་རྒྱལ་སྲས་སྤྱོད་པའི་གེགས། །མ་ལུས་ཞི་ཞིང་མཐུན་པའི་ཚོགས་ཆས་ཀུན། །ཡིད་ལ་བསམ་པ་ཙམ་གྱིས་འགྲུབ་པར་ཤོག །ཤཱཀྱའི་དབང་པོ་འདྲེན་པ་འོད་དཔག་མེད། །མི་ཕམ་འཇམ་དབྱངས་གསང་བདག་སྤྱན་རས་གཟིགས། །བདེ་གཤེགས་འཁོར་བཅས་རྟེན་འབྲེལ་མི་བསླུ་བའི། །བདེན་པས་སྨོན་ལམ་འདི་དག་མྱུར་འགྲུབ་ཤོག ། ཅེས་སོགས་བསྔོ་སྨོན་གྱིས་རྒྱས་གདབ། རྒྱུན་དུ་ཚུལ་ཁྲིམས་མིག་འབྲས་བཞིན་དུ་བསྲུང་བ་སོགས་སྒོ་གསུམ་བག་ཡོད་པའི་བརྟུལ་ཞུགས་ལ་གནས་ཏེ་སྒོ་མཐའ་དག་ནས་དགེ་བའི་ལས་ལ་འབད་པ་དང། དགེ་བ་གང་བྱས་ཐམས་ཅད་ཀྱང་ཞིང་མཆོག་བདེ་བ་ཅན་དུ་སྐྱེ་ཞིང་། བླ་མ་འོད་དཔག་མེད་ཀྱིས་རྗེས་སུ་འཛིན་པའི་རྒྱུར་བསྔོས་ཏེ་གཏན་གྱི་འདུན་མ་སྒྲུབ་བའི་ཐབས་ལ་འབད་པ་ལྷུར་བྱའོ། །ཞེས་མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ཞིང་མཆོག་སྒོ་འབྱེད་
ཅེས་བྱ་བ་འདི་ནི་དད་བརྩོན་བློ་དང་ལྡན་པ་བསོད་ནམས་རིན་ཆེན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

རྩ་བའི་བླ་མ་དང་རྗེ་བླ་མ་དབྱེར་མེད་ཀྱི་བླ་མའི་རྣལ་འབྱོར།

― GTD003_Page_0917 ―

^{[མ་དཔེ་གཟིགས་ན་འདིར་གནོན།]}

[Full Size]

རྩ་བའི་བླ་མ་དང་རྗེ་བླ་མ་དབྱེར་མེད་ཀྱི་བླ་མའི་རྣལ་འབྱོར་བཞུགས་སོ། །མདུན་གྱི་ནམ་མཁར་སེང་ཁྲི་པད་ཟླའི་སྟེང། །བཀའ་དྲིན་གསུམ་ལྡན་རྗེ་བཙུན་བླ་མ་མཆོག །དགྱེས་འཛུམ་ཆོས་འཁོར་ཕྱག་རྒྱས་གླེགས་རལ་བསྣམས། །གནས་གསུམ་ཡི་གེ་གསུམ་གྱིས་མཚན་པར་གྱུར། །དགའ་ལྡན་ལྷ་བརྒྱའི་མགོན་གྱི་ཐུགས་ཀ་ནས། །རབ་དཀར་ཞོ་གསར་སྤུངས་འདྲའི་ཆུ་འཛིན་རྩེར། །ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲགས། །སྲས་དང་བཅས་པ་གནས་འདིར་གཤེགས་སུ་གསོལ། །མཁའ་དབྱིངས་བཞུགས་པའི་རྗེ་བཙུན་བླ་མ་དང། །གསང་གསུམ་སྒྱུ་འཕྲུལ་ངོ་བོ་དབྱེར་མེད་པར། །བདག་བློ་དད་པའི་བསོད་ནམས་ཞིང་མཆོག་ཏུ། །བསྟན་པ་རྒྱས་ཕྱིར་བསྐལ་བརྒྱར་བཞུགས་སུ་གསོལ། །ཤེས་བྱའི་ཁྱོན་ཀུན་ཡངས་པའི་བློ་གྲོས་ཐུགས། །སྐལ་བཟང་རྣ་བའི་རྒྱན་གྱུར་ལེགས་བཤད་གསུང། །གྲགས་པའི་དཔལ་གྱིས་ལྷམ་མེར་མཛེས་པའི་སྐུ། །མཐོང་ཐོས་དྲན་པ་དོན་ལྡན་ལ་ཕྱག་འཚལ། །ཡིད་འོང་མཆོད་ཡོན་སྣ་ཚོགས་མེ་ཏོག་དང། །དྲི་ཞིམ་བདུག་སྤོས་སྣང་གསལ་དྲི་ཆབ་སོགས། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི། །བསོད་ནམས་ཞིང་མཆོག་ཁྱེད་ལ་མཆོད་པ་འབུལ། །གང་ཞིག་ཐོག་མེད་དུས་ནས་བསགས་པ་ཡི། །ལུས་ངག་ཡིད་ཀྱིས་མི་དགེ་བཅུ་བགྱིས་དང། །ཁྱད་པར་སྡོམ་པ་གསུམ་གྱི་མི་མཐུན་ཕྱོགས། །སྙིང་ནས་འགྱོད་པ་དྲག་པོས་སོ་སོར་བཤགས། །སྙིགས་

― GTD003_Page_0918 ―

^{[མ་དཔེ་གཟིགས་ན་འདིར་གནོན།]}

[Full Size]

མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱེད། །མགོན་པོ་ཁྱོད་ཀྱིས་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ་། །རྗེ་བཙུན་བླ་མ་དམ་པ་ཁྱེད་རྣམས་ཀྱི། །ཆོས་སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས། །ཇི་ལྟར་འཚམས་པའི་གདུལ་བྱའི་འཛིན་མ་ལ། །ལྷུན་གྲུབ་ཆོས་ཀྱི་ཆར་པ་དབབ་ཏུ་གསོལ། །བདག་གིས་ཇི་སྙེད་བསགས་པའི་དགེ་བ་འདིས། །བསྟན་དང་འགྲོ་བ་ཀུན་ལ་གང་ཕན་དང། །ཁྱད་པར་རྗེ་བཙུན་བློ་བཟང་གྲགས་པ་ཡི། །བསྟན་པའི་སྙིང་པོ་རིང་དུ་གསལ་བྱེད་ཤོག །ས་གཞི་སྤོས་ཀྱིས༞ སྤྱོད་པར་ཤོག །སྐྱབས་གནས་ཀུན་འདུས་བླ་མ་རིན་པོ་ཆེ། །ཁྱོད་མིན་རེ་ས་གཞན་ན་མ་མཆིས་པས། །སྲིད་དང་ཞི་བའི་རྒུད་པ་ཀུན་སེལ་ཞིང། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། ། དེ་ནས་དམིགས་བརྩེ་མ་དང་། དཀོན་མཆོག་རྣམ་གསུམ་ཐུགས་རྗེ་མེ་ཤེལ་ཁམས། །མདོ་སྔགས་བསྟན་པའི་འདབ་བརྒྱ་བཞད་པའི་གཉེན། །ཐར་འདོད་སྙིང་གི་མུན་སེལ་སྒྲོན་མེ་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། ། ཞེས་པ་ལྟ་བུ་གྲངས་བསགས་ཏེ་རྗེ་བདག་ཉིད་ཆེན་པོ་དང་རང་གི་དྲིན་ཅན་རྩ་བའི་བླ་མ་དབྱེར་མེད་དུ་བྱས་ཏེ་གསོལ་བ་འདེབས། དེ་ནས། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར། ཞེས་སོགས་དང་། མི་རྟག་འཆི་བ་དྲན་པས་རྒྱུད་བསྐུལ་ཏེ། །སྐྱབས་འགྲོ་ལས་འབྲས་བདེན་བཞིའི་བླང་དོར་དང། །ཐེག་མཆོག་སེམས་བསྐྱེད་སྤྱོད་དང་བཅས་པ་ལ། །གེགས་མེད་ཚུལ་བཞིན་སློབ་པར་བྱིན་གྱིས་རློབས། །ཡང་དག་ལྟ་དང་ཉེར་འབྲེལ་སྔགས་ཀྱི་ལམ། །རིམ་

― GTD003_Page_0919 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གཉིས་ཀྱི་བགྲོད་པ་མཐར་ཕྱིན་ཅིང། །མདོར་ན་ཁྱོད་ཀྱིས་འབྲལ་མེད་རྗེས་བཟུང་སྟེ། །ཟུང་འཇུག་གོ་འཕང་བདེ་བླག་ཐོབ་གྱུར་ཅིག ། ཅེས་པ་འདི་ནི་དད་ལྡན་དགེ་སློང་ཚུལ་ཁྲིམས་དར་རྒྱས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ བླ་མ་མཆོག་གསུམ་ཆོས་དབྱིངས་བདེན་པའི་མཐུས། །འདིས་མཚོན་སྡེ་འདིར་རྣམ་དཀར་ཅི་བགྱིས་དང། །དུས་གསུམ་དགེ་ཚོགས་གཅིག་ཏུ་བསྡོམ་བྱས་ནས། །མཁའ་མཉམ་བསྟན་འགྲོའི་དཔལ་དུ་འགྱུར་བ་དང། །ཁྱད་པར་དཀོན་མཆོག་གསུམ་ལ་སྐྱབས་འཚོལ་བའི། །དམིགས་ཡུལ་དེ་ཉིད་རྟག་ཏུ་དལ་འབྱོར་ཐོབ། །རྣམ་དག་བསླབ་གསུམ་རབ་བརྟན་འཛིན་པའི་གཞིར། །ངེས་ལེགས་ཐར་པའི་འབྲས་བཟང་སྨིན་གྱུར་ཅིག ། ཅེས་པ་འདི་ནི་དགོན་འདིར་དྲིན་ཤིན་ཏུ་ཆེ་བ་དཔོན་པོ་དཀོན་མཆོག་རབ་བརྟན་གྱི་ཆེད་དུ་དགེ་སློང་ཚུལ་ཁྲིམས་དར་རྒྱས་ཀྱིས་བསྐུལ་ངོར། བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ རྒྱལ་ཀུན་ཡབ་གཅིག་མཁྱེན་གཏེར་དཀར་པོ་དང། །དབྱེར་མེད་ཐུགས་རྗེའི་བདག་ཉིད་བླ་མ་མཆོག །བྱང་ཆུབ་བར་དུ་བདག་གི་མགོན་མཛད་དེ། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །སྡིག་ལྟུང་རྨོངས་པའི་དྲི་མ་ཀུན་བྱང་ཞིང། །ཟབ་གསལ་མྱུར་བའི་ཤེས་རབ་རྒྱས་པ་དང། །ས་དང་ལམ་གྱི་རྟོགས་པ་མཐར་སོན་ཏེ། །བླ་མེད་བྱང་ཆུབ་ཐོབ་པར་བྱིན་གྱིས་རློབས། །སྐྱེ་བ་ཀུན་ཏུ་ ཞེས་སོགས་བྱ། ཞེས་པ་འདི་ཡང་དད་བརྩོན་ལྡན་པ་དཀོན་མཆོག་དར་རྒྱས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

ཀུན་མཁྱེན་བླ་མའི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར།

― GTD003_Page_0920 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་མཁྱེན་བླ་མའི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར་བཞུགས་སོ། །རྣམ་ཀུན་མཆོག་ལྡན་དབྱིངས་དང་དབྱེར་མེད་པའི། །ཡེ་ཤེས་སྒྱུ་འཕྲུལ་དྲ་བར་བཞེངས་པ་ལས། །གདུལ་བྱའི་མོས་པར་འཚམ་པའི་འཕྲིན་ལས་ཀྱི། །འཇུག་པ་དུས་ལས་མི་ཡོལ་ཐུགས་རྗེའི་བདག །གང་གི་བདེན་སྟོབས་གཟུངས་རིག་མོས་པའི་མཐུས། །མདུན་གྱི་མཁའ་ལ་དཔག་བསམ་ལྗོན་པའི་རྩེར། །པད་ཟླ་ཉི་མའི་གདན་བཅས་སེང་གེའི་ཁྲི། །ཡིད་འཕྲོག་ཚར་དུ་དངར་བའི་དབུས་མ་ལ། །སྐྱབས་གསུམ་ཀུན་འདུས་འཇིགས་མེད་དབང་པོའི་སྡེ། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །གཡས་སུ་རྒྱལ་སྲས་དྲི་མེད་གྲགས་པའི་ཞབས། །དཔལ་ལྡན་སངས་རྒྱས་བསྐྱངས་དང་ཕྱོགས་ཀྱི་གླང། །ཟླ་བའི་ཞབས་དང་གྲུབ་ཆེན་ཛེ་ཏཱ་རི། །གཡོན་དུ་བདག་ཉིད་ཆེན་པོ་རིན་ཆེན་གསལ། །རྗེ་བཙུན་དབུ་མ་པ་དང་ཞྭ་ལུ་པ། །རྒྱུད་ཆེན་རྣམ་གཉིས་འཇམ་དབྱངས་བཞད་པའི་སྡེ། །གཞན་ཡང་མཁའ་ཁྱབ་གདུལ་བྱའི་མོས་པ་བཞིན། །གང་འདུལ་སྤྲུལ་པའི་ཟློས་གར་མཐའ་ཡས་དང། །སྐྱབས་ཡུལ་ཞི་ཁྲོ་རབ་འབྱམས་མ་ལུས་པ། །བདག་སོགས་འགྲོ་བའི་མགོན་དུ་བརྟན་པར་བཞུགས། །ཇི་ལྟར་དྭངས་པའི་མཚོ་ལ་ཟླ་གཟུགས་བཞིན། །གང་ལ་གང་འདུལ་གཟུགས་སྐུའི་རྣམ་རོལ་གྱིས། །མ་ལུས་འགྲོ་བ་སྲིད་ལས་སྒྲོལ་བའི་གཉེན། །སྐྱབས་མགོན་ཐུགས་རྗེའི་གཏེར་ལ་གུས་ཕྱག་འཚལ། །ཀུན་བཟང་མཆོད་པའི་སྤྲིན་གྱི་ཕུང་པོ་ནི། །བདེན་ཚིག་མོས་པའི་ཡིད་མཁར་གཡོ་བ་ཡང། །ལྷན་སྐྱེས་བདེ་བའི་ངང་དུ་རོལ་བ་ཡིས། །བདག་གི་

― GTD003_Page_0921 ―

^{[མ་དཔེ་གཟིགས་ན་འདིར་གནོན།]}

[Full Size]

བསོད་ནམས་ཚོགས་ཆེན་རྫོགས་པར་མཛོད། །ལེགས་བྱས་མཐའ་དག་རང་ལུས་བཅས་འབུལ་ན། །སྔོན་བསགས་དགེ་ཚོགས་ཆུད་མི་ཟ་བ་དང། །སྒོ་གསུམ་སྤྱོད་པ་བླ་མའི་དབང་གྱུར་ཏེ། །རྟག་ཏུ་དོན་དང་ལྡན་པར་བྱིན་གྱིས་རློབས། །མནོག་ཆུང་སྲིད་འབྱོར་སྦྲང་རྩི་ལ་ཆགས་ཏེ། །མི་བཟད་སྡིག་ལྟུང་མཚོན་རྣོན་བལྡག་པ་ཡི། །རྣམ་སྨིན་སྡུག་བསྔལ་བཟོད་དཀའི་ཡིད་ཀྱི་རྨ། །གསོ་བར་མཛོད་ཅིག་ཐུགས་རྗེའི་སྨན་གྱི་བླ། །ཁྱོད་ཞབས་པདྨོ་གུས་པས་བསྟེན་བྱས་ཏེ། །ཟབ་ཅིང་རྒྱ་ཆེན་གདམས་པའི་ཨ་མྲྀ་ཏ། །འདོད་དགུར་སྤྱད་པས་དུག་གསུམ་ས་བོན་བཅས། །དྲུངས་ནས་འབྱིན་པའི་དགའ་སྟོན་མྱོང་བར་ཤོག །གང་གང་སྐྱེ་བའི་ཕྲེང་བ་དེ་དང་དེར། །སྲིད་དང་ཞི་བའི་མཐའ་ལ་ཞེན་པའི་བློ། །བྱིན་རླབས་ཐུགས་རྗེའི་ཕྱག་གིས་ཡོངས་བཟུང་སྟེ། །མི་གནས་ཞི་བའི་ལམ་དེར་དྲང་དུ་གསོལ། །དུས་གསུམ་རྒྱལ་ཀུན་ཐུགས་ཀྱི་གསང་བའི་མཛོད། །ཟབ་ལམ་ལྟ་བས་རྒྱས་བཏབ་རྡོ་རྗེའི་ཐེག །དབང་བཞིའི་སྒོ་འཕར་ཕྱེ་བའི་གྲོང་མཆོག་ཏུ། །རིམ་གཉིས་འབྱོར་པའི་དཔལ་ལ་སྤྱོད་པར་ཤོག །མི་འགྱུར་ལྷན་སྐྱེས་བདེ་བས་རབ་མྱོས་ཤིང། །མཚན་དཔེའི་དཔལ་འབར་མཛེས་སྡུག་ལང་ཚོས་སྒེག །དམིགས་མེད་སྙིང་རྗེའི་འཛུམ་དཀར་སྤྲོ་བ་ཡི། །ཟུང་འཇུག་དང་པོའི་མགོན་པོར་བདག་གྲུབ་མཛོད། །མདོར་ན་སྐྱབས་གནས་མ་ལུས་འདུས་པའི་དངོས། །འདྲེན་པ་ཁྱོད་མིན་སྐྱབས་གཞན་མི་འཚོལ་བས། །འདི་ཕྱིའི་བར་དོའི་འཇིགས་ལས་སྒྲོལ་བ་དང། །རང་གཞན་དོན་གཉིས་འགྲུབ་པར་བྱིན་གྱིས་
རློབས། །དེ་ལྟར་གསོལ་བ་བཏབ་པས་སྐྱབས་ཡུལ་ཀུན། །རིམ་གྱིས་བསྡུས་ཏེ་རྩ་བའི་བླ་མར་ཐིམ། །དེ་ཉིད་དགྱེས་བཞིན་རང་གི་ཚངས་བུག་ནས། །ཞུགས་ཏེ་གཉུག་མའི་སེམས་དང་དབྱེར་མེད་གྱུར། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་གཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །གངས་ཅན་མཁས་གྲུབ་དུ་མས་རྗེས་གཟུང་ཞིང། །ཟབ་རྒྱས་གདམས་པ་བྱེ་བའི་བང་མཛོད་འཛིན། །སྐལ་ལྡན་སྨིན་ཅིང་གྲོལ་མཛད་ཆོས་ཀྱི་རྗེ། །འཇིགས་མེད་དབང་པོའི་ཞབས་ལ་གསོལ་བ་འདེབས། ། ཞེས་ཅི་འགྲུབ་བཟླས་ལ། མཇུག་ཏུ། དཔལ་ལྡན་བླ་མའི་རྣམ་པར་ཐར་པ་ལ། ། ཞེས་སོགས་དང་། སྐྱེ་བ་ཀུན་ཏུ་ཡང་དག་བླ་མ་ཞེས་སོགས་བསྔོ་སྨོན་གྱིས་མཚམས་སྦྱར་བྱའོ། །ཞེས་ཀུན་མཁྱེན་བླ་མ་མཆོག་གི་འཁྲུངས་རབས་དང་འབྲེལ་བའི་བླ་མའི་རྣལ་འབྱོར་འདི་ནི། དད་བརྩོན་དང་ལྡན་པ་དཀོན་མཆོག་ཡར་འཕེལ་གྱིས་འདི་ལྟ་བུ་ཞིག་དགོས་ཞེས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

ཟབ་ལམ་བླ་མའི་རྣལ་འབྱོར།

― GTD003_Page_0922 ―

^{[མ་དཔེ་གཟིགས་ན་འདིར་གནོན།]}

[Full Size]

ཟབ་ལམ་བླ་མའི་རྣལ་འབྱོར་བཞུགས་སོ། །འོད་གསལ་སྤྲོས་དང་བྲལ་བ་ནམ་མཁའི་དབྱིངས། །བདེ་ཆེན་ཐུགས་རྗེའི་ཆུ་འཛིན་རྣམ་རོལ་ལས། །གང་འདུལ་གཟུགས་སྐུར་སྣང་བའི་བླ་མ་ལྷ། །རབ་འབྱམས་རྒྱལ་བའི་ཚོགས་བཅས་འདིར་གཤེགས་ཤིག །གདོང་ལྔས་ཉེར་བཏེགས་འོད་འབར་ནོར་བུའི་ཁྲིར། །ཞི་དུལ་ཆོས་འཆད་མཉམ་གཞག་ཕྱག་རྒྱ་ཅན། །བཀའ་དྲིན་མཉམ་མེད་རྩ་བའི་བླ་མ་སོགས། །ཞིང་གི་མཆོག་རྣམས་བརྟན་པར་བཞུགས་སུ་གསོལ། །དམུ་རྒོད་གདུལ་དཀའ་སྙིགས་མའི་འགྲོ་བ་ལ། །སྐལ་བར་འཚམ་པའི་

― GTD003_Page_0923 ―

^{[མ་དཔེ་གཟིགས་ན་འདིར་གནོན།]}

[Full Size]

ལེགས་བཤད་མཆོག་སྦྱིན་གྱིས། །མཐོ་རིས་ཐར་པའི་བདེ་ལ་སྦྱོར་མཛད་པ། །བཀའ་དྲིན་མཚུངས་མེད་ཞབས་ལ་ཕྱག་འཚལ་ལོ། །ས་གཞི་བར་སྣང་ནམ་མཁའི་ཁྱོན་གང་བའི། །དངོས་བཤམས་ཡིད་སྤྲུལ་མཆོད་པའི་སྤྲིན་ཕུང་སོགས། །རབ་འབྱམས་ཕྱི་ནང་གསང་བའི་མཆོད་ཚོགས་ཀུན། །བདེ་སྟོང་དབྱེར་མེད་ངང་དུ་དབུལ་བར་བགྱི། །ཐོག་མ་མེད་ནས་རྨོངས་པའི་བྲན་གྱུར་མཐུས། །རང་བདེ་འཇོམས་ཤིང་སྡུག་བསྔལ་ཀུན་འདྲེན་པའི། །ཕུང་ཁྲོལ་སྤྱོད་པ་ཇི་སྙེད་བགྱིས་པ་ཀུན། །གནོང་ཞིང་འགྱོད་པ་དྲག་པོས་མཐོལ་ལོ་བཤགས། །འདས་དང་མ་བྱོན་ད་ལྟར་བཞུགས་པ་ཡི། །རབ་འབྱམས་རྒྱལ་བ་སྲས་བཅས་སློབ་མར་བཅས། །ཀུན་གྱི་རྣམ་དཀར་མཛད་པ་མཐའ་དག་ལ། །མཆོག་ཏུ་གུས་པའི་ཡིད་ཀྱིས་རྗེས་ཡི་རང། །ཐར་པའི་ས་མཁན་སྟོན་པ་འཁོར་དང་བཅས། །རྨོངས་པའི་སྐྱེ་བོ་ལྡོངས་པར་མི་མཛད་པར། །ཟབ་རྒྱས་ཆོས་ཀྱི་སྒྲོན་མེ་ལེགས་སྦར་ནས། །བདེ་ཆེན་ཐར་པའི་གྲོང་དེར་འཁྲིད་དུ་གསོལ། །འདིས་མཚོན་དུས་གསུམ་དགེ་བ་ཅི་མཆིས་པ། །མཐའ་དག་རྒྱལ་བའི་ཆོས་ཀྱི་མཛོད་འཛིན་ཅིང། །མཁའ་མཉམ་འགྲོ་བ་སྲིད་ལས་སྒྲོལ་བ་ཡི། །དེད་དཔོན་མཆོག་ཏུ་འགྱུར་བའི་རྒྱུ་རུ་བསྔོ། །ཞེས་ཡན་ལག་བདུན་པ་བྱས་ལ། ས་གཞི་སྤོས་བྱུགས་མ་སོགས་ཀྱིས་མཎྜལ་ཕུལ། བསླུ་མེད་དཀོ༷ན་མཆོ༷ག་ཐུགས་རྗེ་མེ་ཤེལ་ཁམས། །མདོ་སྔགས་བསྟ༷ན་པ༷འི་འདབ་བརྒྱ་བཞད་པའི་གཉེན། །འགྲོ་བའི་མ་རིག་མུན་སེལ་སྒྲོ༷ན་མེ༷་མཆོག །རྗེ་བཙུན་
བླ་མའི་ཞབས་ལ་གསོལ་བ་འདེབས། །ཞེས་པ་ལྟ་བུ་རང་གི་བླ་མའི་གསོལ་འདེབས་ཀྱི་ཚིགས་བཅད་བཟླས་ལ་མཇུག་ཏུ། དཔལ་ལྡན་རྩ་བའི་བླ་མ་རིན་པོ་ཆེ། །ཞེས་སོགས་ཀྱིས་རང་གི་སྙིང་གར་སྤྱན་དྲངས་ཏེ། སྐྱེ་ཞིང་སྐྱེ་བར་རྗེ་བཙུན་བླ་མ་ཡིས། །འབྲལ་བ་མེད་པར་དགྱེས་བཞིན་རྗེས་འཛིན་ཅིང། །གསུང་གི་བདུད་རྩི་ངོམས་མེད་མྱོང་བ་ཡིས། །སྐལ་བཟང་མཆོག་ལ་འདོད་དགུར་སྤྱོད་གྱུར་ཅིག །དེ་ཡི་མཐུ་ལས་རྒྱུ་འབྲས་ཐེག་པ་ཡི། །ལམ་བཟང་སྐས་ཀྱི་གདང་བུ་རིམ་བགྲོད་དེ། །ཁྱབ་བདག་འཁོར་ལོའི་མགོན་པོ་བླ་མ་ལྷའི། །གོ་འཕང་བདེ་བླག་ཉིད་དུ་ཐོབ་གྱུར་ཅིག ། ཅེས་ཚེ་རབས་རྗེས་འཛིན་གྱི་སྨོན་པས་མཚམས་སྦྱོར་བ་སོགས་བྱའོ། །ཞེས་པ་འདི་ཡང་ཨ་ལག་ཤཱ་ཧོ་ཤོའུ་ནས་དད་བརྩོན་ལྡན་པ་ངག་དབང་དཀོན་མཆོག་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། །

བླ་མའི་རྣལ་འབྱོར།

― GTD003_Page_0924 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མའི་རྣལ་འབྱོར་བཞུགས་སོ། །སྤྱི་གཙུག་བདེ་ཆེན་འཁོར་ལོའི་སྟེང། །སེང་ཁྲི་པདྨ་ཉི་ཟླའི་དབུས། །དགྱེས་བཞིན་བཞུགས་ཤིག་དྲིན་ཅན་རྗེ། །བྱིན་གྱིས་རློབས་ཤིག་ཐུགས་རྗེའི་གཏེར། །སྐྱབས་གསུམ་ཀུན་དངོས་མགོན་ཁྱོད་ལ། །སྒོ་གསུམ་གུས་པས་ཕྱག་འཚལ་ཞིང། །གསོལ་བ་འདེབས་སོ་དྲིན་ཅན་རྗེ། །བྱིན་གྱིས་རློབས་ཤིག་ཐུགས་རྗེའི་གཏེར། །ལུས་དང་ལོངས་སྤྱོད་དགེ་ཚོགས་བཅས། །དངོས་བཤམས་ཡིད་སྤྲུལ་མཆོད་ཚོགས་འབུལ། །དགྱེས་བཞིན་བཞེས་ཤིག་དྲིན་༝༝ རྣམ་སྨིན་འབྲས་བུ་མི་བཟད་པའི། །སྒོ་གསུམ་ཉེས་ལྟུང་མ་ལུས་བཤགས། །བྱང་བར་མཛོད་ཅིག་དྲིན་༝༝ འཕྲལ་དང་ཡུན་དུ་བདེ་སྟེར་བའི། །སྔོན་བྱས་དགེ་ལ་རྗེས་ཡི་རང། །སྤེལ་བར་མཛོད་ཅིག་

― GTD003_Page_0925 ―

^{[མ་དཔེ་གཟིགས་ན་འདིར་གནོན།]}

[Full Size]

དྲིན་ཅན་༝༝ མཁའ་མཉམ་འགྲོ་ལ་རྗེས་བརྩེ་བས། །མྱ་ངན་མི་འདའ་སྲིད་མཐའི་བར། །བརྟན་པར་བཞུགས་ཤིག་དྲིན་ཅན་རྗེ་༝༝ ཟབ་རྒྱས་ཆོས་ཀྱི་བདུད་རྩི་ཡིས། །ཉོན་མོངས་ནད་ཀྱིས་གདུངས་པ་ཀུན། །ཞི་བར་མཛོད་ཅིག་དྲིན་ཅན་༝༝ འདི་ལྟར་བསྐྲུན་པའི་དགེ་ཚོགས་མཐུས། །བཟོད་དཀའ་འཁོར་བའི་བཙོན་རྭ་ལས། །ཐར་པར་མཛོད་ཅིག་དྲིན་ཅན་རྗེ་༝༝ ཡང་ཡང་དྲིན་གྱིས་བསྐྱངས་པ་ཡི། །མ་རྣམས་སྲིད་ལས་སྒྲོལ་འདོད་བློ། །སྐྱེ་བར་མཛོད་ཅིག་དྲིན་ཅན་༝༝ བདག་མེད་བདག་ཏུ་གཟུང་བྱས་ཏེ། །ཉེས་ཀུན་བསྐྱེད་པའི་གདོན་ཆེན་འདི། །དབྱུང་བར་མཛོད་ཅིག་དྲིན་ཅན་རྗེ་༝༝ སྐྱེ་ཤིའི་འཁྲུལ་སྣང་ཧ་ལའི་དུག །སྐུ་གསུམ་འཆི་མེད་བདུད་རྩི་རུ། །བསྒྱུར་བར་མཛོད་ཅིག་དྲིན་ཅན་རྗེ་༝༝ ཀུན་རྟོག་ཆུ་འཛིན་སྤང་བའི་མཁར། །ལྷན་སྐྱེས་བདེ་ཆེན་ཉིན་མོར་བྱེད། །འཆར་བར་མཛོད་ཅིག་དྲིན་ཅན་རྗེ་༝༝ མདོར་ན་དེང་ནས་བྱང་ཆུབ་བར། །ཁྱོད་མིན་རེ་ས་གཞན་མེད་དོ། །རྗེས་སུ་ཟུངས་ཤིག་དྲིན་ཅན་རྗེ་༝༝ སྒོ་གསུམ་སྤྱོད་པ་མཐའ་དག་ཀྱང། །དོན་མེད་ལས་སུ་མི་འགྱུར་བར། །ཁྱོད་མཉེས་འབའ་ཞིག་བསྒྲུབ་ནུས་པར། །བྱིན་གྱིས་རློབས་ཤིག་༝༝ ཆོས་ལྡན་སྨོན་པ་མ་ལུས་པའི། །འབྲས་བུ་གེགས་མེད་འགྲུབ་པ་ཡི། །དཔུང་གཉེན་མཛོད་ཅིག་དྲིན་ཅན་རྗེ། །བྱིན་གྱིས་རློབས་ཤིག་ཐུགས་རྗེའི་གཏེར། ། ཅེས་བརྗོད་ཅིང་རྣམ་པ་ཀུན་ཏུ་ཡང་བླ་མའི་སྣང་བ་དང་མི་འབྲལ་བར་བྱའོ། །ཚུལ་འདི་ནི་དད་བརྩོན་རྣམ་དཔྱོད་ལྡན་པ་རབ་འབྱམས་པ་དཀོན་མཆོག་བསྟན་འཛིན་གྱིས་བསྐུལ་ངོར།
བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

བླ་མགོན་དབྱེར་མེད་ཀྱི་རྣལ་འབྱོར།

― GTD003_Page_0926 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མགོན་དབྱེར་མེད་ཀྱི་རྣལ་འབྱོར་བཞུགས་སོ། །ན་མོ་གུ་རུ་ནཱ་ཐཱ་ཡ། འདིར་བླ་མགོན་དབྱེར་མི་ཕྱེད་པའི་རྣལ་འབྱོར་ཉམས་སུ་ལེན་པ་ལ། སྐྱབས་སེམས་སྔོན་དུ་བཏང་སྟེ། དགེ་བའི་འདུན་པ་ཤུགས་དྲག་པོའི་སྒོ་ནས། སྤྱི་བོར་པད་ཉི་ཚོགས་ཀྱི་བདག་པོའི་སྟེང། །ཧཱུཾ་ཡིག་མཐིང་ནག་འོད་ཀྱི་འཕྲོ་འདུ་ལས། །མྱུར་མཛད་ཡེ་ཤེས་མགོན་པོ་ཕྱག་དྲུག་པ། །སྐུ་མདོག་མཐིང་ནག་སྲིན་པོ་ཁྲོས་པའི་ཚུལ། །ཕྱག་གཡས་གྲི་གུག་ཐོད་འཕྲེང་ཌཱ་མ་རུ། །གཡོན་ན་ཐོད་ཁྲག་རྩེ་གསུམ་ཞགས་པ་འཛིན། །སྦྲུལ་གྱི་རྒྱན་སྤྲས་སྟག་ལྤགས་ཤམ་ཐབས་ཅན། །མེ་དཔུང་འབར་བའི་དབུས་ན་བཞུགས་པ་ཡི། །སྤྱི་བོར་སྐྱབས་གསུམ་ཀུན་འདུས་ངོ་བོ་ཉིད། །བཀའ་དྲིན་གསུམ་ལྡན་བླ་མ་ཐུགས་རྗེའི་གཏེར། །ཆོས་འཆད་མཉམ་གཞག་ཕྱག་རྒྱས་གླེགས་བམ་བསྣམས། །དགྱེས་བཞིན་བཞུགས་པ་གཉིས་ཀའི་གནས་གསུམ་དུ། །ཡི་གེ་གསུམ་མཚན་ཧཱུཾ་ཡིག་འོད་ཟེར་གྱིས། །ཆོས་ཀྱི་དབྱིངས་ནས་རང་འདྲའི་ཡེ་ཤེས་པ། །སྲས་བཅས་རྒྱལ་བས་བསྐོར་བ་སྤྱན་དྲངས་ཏེ། །ཐིམ་པས་སྐྱབས་གནས་ཀུན་འདུས་ངོ་བོར་གྱུར། །ཁྱད་པར་ལྷན་སྐྱེས་དགའ་བའི་རོལ་པ་ཡི། །འོད་ཀྱི་དྲ་བས་འབྲེལ་བའི་སྣང་སྟོང་གཟུགས། །གཅིག་དང་དུ་མར་སྣང་ཡང་མི་ཕྱེད་པའི། །བདག་ཉིད་གཅིག་ཏུ་དགྱེས་བཞིན་བཞུགས་པར་གྱུར། །ཐོག་མེད་དུས་ནས་དུག་གསུམ་དབང་གྱུར་ཏེ། །མི་བཟད་སྡིག་ལྟུང་ཇི་སྙེད་བགྱིས་པ་ཀུན། །རྩེ་གཅིག་གདུང་བའི་ཡིད་ཀྱིས་མཐོལ་བཤགས་ན། །བླ་མགོན་དབྱེར་མེད་ཐུགས་རྗེས་བྱང་གྱུར་ཅིག །མཆོག་གསུམ་མཐུ་དང་ཆོས་

― GTD003_Page_0927 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་བདེན་བའི་སྟོབས། །སྔགས་དང་ཏིང་འཛིན་ཕྱག་རྒྱས་སྤྲུལ་པ་ལས། །བཤམས་དང་ཡིད་ཀྱིས་མོས་བཞིན་མཆོད་པའི་སྤྲིན། །མ་ཚང་མེད་པས་ས་གསུམ་ཁྱབ་པ་འདིས། །བླ་མ་མགོན་པོ་དབྱེར་མེད་ཐུགས་དམ་བསྐང། །མཐའ་ཡས་སྐྱབས་གསུམ་འདུས་པའི་ཐུགས་དམ་བསྐང། །དམ་པའི་ཆོས་ཀྱི་བར་ཆད་ཀུན་ཞི་ཞིང། །ཡང་དག་ལམ་བཟང་འགྲུབ་པར་བྱིན་གྱིས་རློབས། །སྐྱེས་བུ་གསུམ་གྱི་ལམ་གྱི་རིམ་པ་ཡིས། །རྒྱལ་བའི་དགོངས་པ་མཐའ་དག་སྒྲུབ་བྱེད་ཅིང། །ཕྱིན་ཅི་ལོག་གི་བློ་སྣ་ཀུན་འགག་སྟེ། །རང་རྒྱུད་སྨིན་ཅིང་གྲོལ་བར་བྱིན་གྱིས་རློབས། །མདོར་ན་དེང་ནས་བྱང་ཆུབ་བར། །ཁྱོད་མིན་རེ་ས་གཞན་མེད་པས། །སྲིད་ཞིའི་འཇིགས་པ་ཀུན་སེལ་ཞིང། །དངོས་གྲུབ་མ་ལུས་སྩལ་ཏུ་གསོལ། །བླ་མ་མགོན་པོ་དབྱེར་མེད་ལ། །བདག་ནི་གུས་པས་སྐྱབས་སུ་མཆི། །བདག་གིས་སེམས་ཅན་ཐམས་ཅད་ཀྱི། །ཉོན་མོངས་མ་ལུས་སེལ་བར་ཤོག །མགོན་པོ་བླ་མ་དབྱེར་མེད་ལ། །བདག་ནི་གུས་པས་སྐྱབས་སུ་མཆི། །བདག་གིས་སེམས་ཅན་ཐམས་ཅད་ཀྱི། །བར་གཅོད་མ་ལུས་སེལ་བར་ཤོག །ཅེས་བདུན་ནམ། ཉེར་གཅིག་གམ། བརྒྱ་སྟོང་སོགས་འདོན། མཇུག་ཏུ། དགེ་བ་འདི་ཡིས་ཚེ་རབས་ཀུན་ཏུ་བདག །རྒྱལ་བའི་དམ་ཆོས་མ་ལུས་འཛིན་པ་དང། །དེ་ཡི་འགལ་རྐྱེན་སེལ་ཞིང་མཐུན་རྐྱེན་ཀུན། །མྱུར་མཛད་མགོན་པོས་གཡེལ་མེད་འགྲུབ་གྱུར་ཅིག །ཁྱད་པར་དུ་ཡང་སྐྱེ་བའི་ཕྲེང་བ་རུ། །བླ་མ་མཆོག་གིས་འབྲལ་མེད་རྗེས་འཛིན་ཞིང། །ངེས་འབྱུང་བྱང་
སེམས་ཡང་དག་ལྟ་བ་སོགས། །རྣམ་དག་ལམ་བཟང་མངོན་དུ་འགྱུར་བར་ཤོག །འདི་སྣང་འགག་ཚེ་བླ་མ་མགོན་པོ་ཡིས། །འཇིགས་རུང་བར་དོའི་གཡང་ས་ལས་བསྒྲལ་ཏེ། །ཞིང་མཆོག་བདེ་བ་ཅན་དང་པོ་ཏ་ལར། །སྐྱེས་ནས་སྐུ་གསུམ་གོ་འཕང་མྱུར་ཐོབ་ཤོག ། ཅེས་སོགས་བསྔོ་སྨོན་བྱ་ཞིང་། བླ་མ་མགོན་པོའི་སྤྱི་བོ་ནས་མར་ཕེབས་ཏེ་དེའི་ཐུགས་ཀར་བཞུགས། མགོན་པོ་ཡང་རང་གི་སྤྱི་བོ་ནས་དབུ་མའི་ལམ་བརྒྱུད་དེ་སྙིང་གར་བྱོན་ནས་བཞུགས་པར་བསམས་ལ་རྒྱུན་དུ་བླ་མ་ལྷའི་སྣང་བ་དང་མ་བྲལ་བའི་སྒོ་ནས་གསོལ་བ་འདེབས་པ་དང་། ཅི་ཟ་ཅི་འཐུང་གི་ཕུད་ཀྱིས་མཆོད་པ། བྱ་བྱེད་ཀུན་ལ་དེ་ཉིད་དཔང་པོར་བཞུགས་ཏེ་བླང་དོར་ཚུལ་བཞིན་བྱེད་པ་སོགས་ཚོགས་གསོག་སྒྲིབ་སྦྱོང་ལ་འབད་པར་བྱའོ། །ཞེས་བླ་མགོན་དབྱེར་མེད་ཀྱི་རྣལ་འབྱོར་རྒྱུན་འཁྱེར་དུ་བྱ་བ་འདི་ནི་དད་བརྩོན་བློ་གྲོས་མཆོག་དང་ལྡན་པ་ཁྱོམ་ཙ་རབ་འབྱམས་པ་འཇིགས་མེད་ཚུལ་ཁྲིམས་ཀྱིས་བསྐུལ་བའི་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་ད་ཚང་ལྷུན་གྲུབ་གླིང་དུ་བྲིས་པའོ། །

བླ་མགོན་དབྱེར་མེད་ཀྱི་རྣལ་འབྱོར་ཉམས་སུ་ལེན་ཚུལ།

― GTD003_Page_0928 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མགོན་དབྱེར་མེད་ཀྱི་རྣལ་འབྱོར་ཉམས་སུ་ལེན་ཚུལ་བཞུགས་སོ། །འདིར་བླ་མགོན་དབྱེར་མེད་ཀྱི་རྣལ་འབྱོར་ཉམས་སུ་ལེན་པར་འདོད་པས་སྐྱབས་སེམས་སྔོན་དུ་བཏང་ལ། རང་གི་སྤྱི་བོར་པད་ཉི་ཚོགས་བདག་སྟེང། །མྱུར་མཛད་སྤྱན་རས་གཟིགས་དབང་ཐུགས་རྗེའི་གཏེར། །སྐུ་མདོག་མཐིང་ནག་སྲིན་པོ་ཁྲོས་པའི་གཟུགས། །ཞལ་གཅིག་ཕྱག་དྲུག་སྤྱན་བགྲད་མཆེ་བ་གཙིགས། །གཡས་ན་གྲི་གུག་ཐོད་ཕྲེང་ཌཱ་མ་རུ། །གཡོན་གྱིས་ཐོད་ཁྲག་རྩེ་གསུམ་ཞགས་པ་འཛིན། །ཐོད་སྐམ་དབུ་རྒྱན་མགོ་རློན་ཕྲེང་བ་འཕྱང། །སྦྲུལ་གྱི་རྒྱན་སྤྲས་སྟག་ལྤགས་ཤམ་ཐབས་གསོལ། །བརྐྱང་བསྐུམ་གར་གྱིས་འགྱིང་བའི་སྤྱི་བོ་རུ། །སྐྱབས་གསུམ་ཀུན་འདུས་བླ་མ་རྡོ་རྗེ་

― GTD003_Page_0929 ―

^{[མ་དཔེ་གཟིགས་ན་འདིར་གནོན།]}

[Full Size]

འཆང། །གསེར་མདོག་ཕྱག་གཉིས་རིན་ཆེན་དྲིལ་བུ་བསྣམས། །ནོར་བུའི་རྒྱན་སྤྲས་སྐྱིལ་ཀྲུང་ཚུལ་གྱིས་བཞུགས། །གཉིས་ཀའི་གནས་གསུམ་ཡི་གེ་གསུམ་མཚན་པའི། །ཧཱུཾ་ཡིག་འོད་ཀྱིས་དངོས་བརྒྱུད་བླ་མ་དང། །ཕྱོགས་བཅུར་བཞུགས་པའི་སྐྱབས་གནས་མ་ལུས་པ། །བསྡུས་ཏེ་དྲིན་ཅན་རྩ་བའི་བླ་མར་ཐིམ། །བླ་མའི་ཐུགས་ཀའི་འོད་ཟེར་སེར་པོ་དང། །མགོན་པོའི་ཐུགས་ཀའི་འོད་ཟེར་སྔོན་པོའི་ཚོགས། །ཕན་ཚུན་འདྲེས་པ་འོད་དང་བདེ་བའི་ངང། །ཐུགས་རྗེ་མཐུ་སྟོབས་དབྱེར་མེད་བདག་ཉིད་གྱུར། །ན་མོ་བུད་དྷཱ་ཡ། ན་མོ་གུ་རུ་ཧེ། བཛྲ་བཱི་ར་བཱི་རེ་ཎ་ཤྲི་ཡེ། ཌཱ་ཀ་ཌཱ་ཀི་ནི། ཛོ་ཀ་ཛོ་ཀི་ནི། སརྦ་བུད་དྷཱ་ཡ། བོ་དྷི་སཏྭ་ཤཱ་ར་ཎཾ་གཙྪ་མི་ཀྱཻ། ཞེས་ལན་གསུམ། བླ་མ་ཡི་དམ་དཀོན་མཆོག་རིན་ཆེན་གསུམ། །མཁའ་འགྲོ་བསྟན་སྲུང་ཐམས་ཅད་འདུས་པའི་དངོས། །འདི་ཕྱིའི་རྒུད་བའི་མུན་སེལ་སྒྲོན་མེ་མཆོག །བསླུ་མེད་སྐྱབས་ཀྱི་དམ་པར་གསོལ་བ་འདེབས། །དུས་འདི་ནས་བཟུང་བྱང་ཆུབ་སྙིང་པོའི་བར། །འདི་ཕྱི་བར་དོའི་གནས་སྐབས་གང་དུ་ཡང། །ཁྱོད་མིན་རེ་བའི་སྐྱབས་གཞན་མ་མཆིས་པས། །འབྲལ་མེད་ཐུགས་རྗེའི་ཕྱག་གིས་བཟུང་དུ་གསོལ། །ཕྱི་རོལ་གདོན་བགེགས་ཉེར་འཚེ་བསལ་དུ་གསོལ། །ཉོན་མོངས་ཀུན་རྟོག་རྒྱུ་བ་བཅད་དུ་གསོལ། །སྐྱེ་ཤི་བར་དོའི་འཕྲང་ལས་བསྒྲལ་དུ་གསོལ། །མི་ཁོམ་ངན་སོང་སྐྱེ་བའི་སྒོ་བཀག་སྟེ། །ཞིང་མཆོག་བདེ་བ་ཅན་དེར་དྲང་དུ་གསོལ། །ཤུགས་དྲག་སྙིང་རྗེ་ཆེན་པོའི་
དབང་གྱུར་ཏེ། །ནམ་མཁའི་མཐས་གཏུགས་མ་རྒན་འགྲོ་བ་རྣམས། །སྒྲོལ་བའི་མཐུ་དང་ལྡན་པར་བྱིན་གྱིས་རློབས། །ཞེས་བརྗོད་ཅིང་དེ་དག་གི་དོན་དྲན་བཞིན་པའི་སྒོ་ནས། བླ་མ་མགོན་པོ་དབྱེར་མེད་ལ། །བདག་ནི་གུས་པས་སྐྱབས་སུ་མཆི། །བདག་གིས་སེམས་ཅན་ཐམས་ཅད་ཀྱི། །ཉོན་མོངས་མ་ལུས་སེལ་བར་ཤོག །མགོན་པོ་བླ་མ་དབྱེར་མེད་ལ། །བདག་ནི་གུས་པས་སྐྱབས་སུ་མཆི། །བདག་གིས་སེམས་ཅན་ཐམས་ཅད་ཀྱི། །བར་ཆད་མ་ལུས་སེལ་བར་ཤོག །ཅེས་པའི་གསོལ་འདེབས་ལན་བརྒྱ་རྩ་སོགས་བྱ། དེ་ནས། སྤྱི་བོའི་མགོན་པོ་དབུ་མའི་ལམ་བརྒྱུད་དེ། །སྙིང་གར་བཞུགས་ཤིང་དེ་ཡི་འདབ་མ་རྣམས། །ཟུམ་པའི་རྩེ་མོར་རྩ་བརྒྱུད་བླ་མའི་དངོས། །འོད་འབར་གསེར་གྱི་རྡོ་རྗེས་མཚན་པར་གྱུར། །དགེ་བ་འདི་ཡིས་ཚེ་རབས་ཀུན་ཏུ་བདག །རྒྱལ་བའི་དམ་ཆོས་མ་ལུས་འཛིན་པ་དང། །དེ་ཡི་འགལ་རྐྱེན་སེལ་ཞིང་མཐུན་རྐྱེན་ཀུན། །མྱུར་མཛད་མགོན་པོས་གཡེལ་མེད་བསྒྲུབ་གྱུར་ཅིག །ཅེས་སོགས་བསྔོ་སྨོན་གྱིས་མཚམས་སྦྱར་བར་བྱའོ། །ཞེས་པ་འདི་ཡང་དད་བརྩོན་བློ་དང་ལྡན་པ་དགེ་སློང་བློ་བཟང་དར་རྒྱས་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

མགོན་པོ་གྲིབ་སེལ་ལ་བརྟེན་པའི་བླ་མའི་རྣལ་འབྱོར་དམ་ཚིག་རྡོ་རྗེའི་བདུད་རྩི་།

― GTD003_Page_0930 ―

^{[མ་དཔེ་གཟིགས་ན་འདིར་གནོན།]}

[Full Size]

མགོན་པོ་གྲིབ་སེལ་ལ་བརྟེན་པའི་བླ་མའི་རྣལ་འབྱོར་དམ་ཚིག་རྡོ་རྗེའི་བདུད་རྩི་ཞེས་བྱ་བ་བཞུགས་སོ། །བླ་མ་མགོན་པོ་དབྱེར་མེད་ཐུགས་རྗེའི་མཐུས། །སྡིག་ལྟུང་བག་ཆགས་བཅས་པ་ཀུན་སྦྱོང་ཞིང། །མཆོག་ཐུན་དངོས་གྲུབ་མ་ལུས་སྒྲུབ་པ་ཡི། །རྣལ་འབྱོར་ཟབ་མོའི་གདམས་པ་འདིར་ཞུགས་ཤིག །དེའང་གྲིབ་སེལ་གྱི་གདམས་པ་གྲུབ་ཆེན་གྱི་གཞུང་ལས།

― GTD003_Page_0931 ―

^{[མ་དཔེ་གཟིགས་ན་འདིར་གནོན།]}

[Full Size]

བཤགས་པ་བྱ་ཞིང་དམ་ཚིག་བསྐང། །དམ་ཚིག་བསྐང་ན་དངོས་གྲུབ་འབྱུང། །ཞེས་པ་ལྟར། མཆོག་ཐུན་མོང་གི་དངོས་གྲུབ་གང་ཞིག་སྒྲུབ་པར་བྱེད་པ་ལའང་དམ་ཚིག་དང་སྡོམ་པ་རྣམ་པར་དག་པས་རྒྱུད་གཙང་བ་ཞིག་གལ་ཆེ་ལ། དམ་ཚིག་ཉམས་ཆག་སྐོང་བར་བྱེད་པའི་ཐབས་ཀྱི་རིམ་པ་མང་ནའང་། སྙིགས་མའི་དུས་འདིར་བླ་མ་ཡི་དམ་ཆོས་སྐྱོང་ཐམས་ཅད་ལ་བརྟེན་པའི་ཉམས་ཆག་ཐམས་ཅད་སྦྱོང་བྱེད་དུ་བླ་མ་མགོན་པོ་དབྱེར་མི་ཕྱེད་པའི་སྒོ་ནས་གྲིབ་སེལ་གྱི་རྣལ་འབྱོར་སྐྱོང་བ་འདི་ལས་ཟབ་པ་མེད་པས། དེའི་ཚུལ་འགོད་པ་ལ། མགོན་པོའི་སྐུ་བྲིས་འབུར་ཅི་རིགས་ཀྱི་རྟེན་དགྲམ་སྟེ་མཆོད་པ་ལེགས་པར་བཤམས། སྐྱབས་སེམས་སྔོན་དུ་བཏང་། ཁྱད་པར་བྱམས་སྙིང་རྗེའི་དམིགས་རྣམ་དང་། བླ་མ་མགོན་པོ་དབྱེར་མི་ཕྱེད་པའི་མོས་གུས་ཤུགས་དྲག་པོའི་སྒོ་ནས། །འདི་ལྟར་གདོན་པར་བྱའོ། །རང་གི་སྤྱི་བོར་ཧཱུཾ་ཡིག་འཕྲོ་འདུ་ལས། །ཡེ་ཤེས་མགོན་པོ་ཞལ་གཅིག་ཕྱག་དྲུག་པ། །སྤྱན་གསུམ་བགྲད་ཅིང་རྣོ་བའི་མཆེ་བ་གཙིགས། །དབུ་སྐྲ་སྨིན་མ་སྨ་ར་མེ་ལྟར་འབར། །གྲི་ཐོད་མགོ་ཕྲེང་རྩེ་གསུམ་ཌཱ་མ་རུ། །ཞགས་པ་འཛིན་ཅིང་སྟག་ལྤགས་ཤམ་ཐབས་གསོལ། །སྦྲུལ་དང་རུས་པའི་རྒྱན་སྤྲས་གཡེར་ཁ་འཁྲོལ། །གཡོན་བརྐྱང་སྟབས་ཀྱིས་མེ་དཔུང་འབར་བའི་དབུས། །པད་ཉི་ཚོགས་ཀྱི་བདག་པོའི་གདན་ལ་བཞུགས། །མ་ཅིག་ལས་མཁན་བཞི་སོགས་འཁོར་གྱིས་བསྐོར། །དེ་ཡི་སྤྱི་བོར་བཀའ་དྲིན་གསུམ་ལྡན་གྱི། །རྩ་བའི་བླ་མ་སྐུ་མདོག་དུང་ལྟར་དཀར། །གཡས་པ་ཤེལ་གྱི་རྡོ་རྗེ་ཐུགས་ཀར་འཛིན། །གཡོན་པ་གསེར་གྱི་དྲིལ་བུ་དཀུར་བརྟེན་པའི། །གནས་གསུམ་ས་བོན་ཡིག་བརྒྱའི་སྔགས་ཀྱི་ཕྲེང། །དཀར་དམར་མཐིང་གས་བསྐོར་བའི་ཧཱུཾ་ཡིག་གིས། །དངོས་བརྒྱུད་བླ་མ་ཡི་

― GTD003_Page_0932 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་ལྷ་ཚོགས་ཀུན། །སྤྱན་དྲངས་རྩ་བའི་བླ་མར་དབྱེར་མེད་བསྟིམས། །རྡོ་རྗེ་གསུམ་གྱི་ལྷ་ཡང་སྤྱན་དྲངས་ཏེ། །འབྲུ་གསུམ་ཡིག་བརྒྱ་བཅས་ལ་ཐིམ་པར་གྱུར། །བློ་བཟང་རྒྱལ་ཀུན་ཐུགས་རྗེའི་ངོ་བོ་ཉིད། །དཀོན་མཆོག་གསུམ་དངོས་བླ་མ་རིན་པོ་ཆེར། །གསོལ་བ་འདེབས་སོ་སྡིག་སྒྲིབ་ཉེས་ལྟུང་ཀུན། །ལྷག་མེད་བྱང་ཞིང་དག་པར་བྱིན་གྱིས་རློབས། །དེ་ལྟར་གསོལ་བ་བཏབས་པས་གནས་གསུམ་གྱི། །སྔགས་ཕྲེང་ལས་བབས་བདུད་རྩིས་སྐུ་ལུས་གང། །བླ་མ་ཡི་དམ་ལྷ་ཚོགས་ལ་བརྟེན་པའི། །དམ་ཚིག་ཉམས་ཆག་མཐའ་དག་བྱང་བར་གྱུར། །གདུལ་བྱའི་དོན་སླད་ཞི་ཁྲོའི་སྐུར་བསྟན་ཡང། །ངེས་དོན་བླ་མ་མགོན་པོ་དབྱེར་མེད་པར། །གསོལ་བ་འདེབས་སོ་སྡིག་སྒྲིབ་ཉེས་ལྟུང་ཀུན། །ལྷག་མེད་བྱང་ཞིང་དག་པར་བྱིན་གྱིས་རློབས། །དེ་ནས་བླ་མགོན་སྐུ་ཡི་འོད་འདྲེས་ཤིང། །བླ་མའི་སྔགས་ཕྲེང་གསུམ་ལས་བདུད་རྩིའི་རྒྱུན། །བབས་ཏེ་མགོན་པོ་འཁོར་བཅས་གནས་གསུམ་གང། །དེ་ལ་བརྟེན་པའི་ཉེས་ཀུན་དག་པར་བྱས། །སླར་ཡང་བླ་མགོན་གཉིས་ཀའི་གནས་གསུམ་གྱི། །ས་བོན་ཡིག་བརྒྱར་བཅས་པའི་བདུད་རྩིའི་ཆུས། །བདག་སོགས་འགྲོ་བ་ཀུན་གྱི་ལུས་གང་སྟེ། །སྒོ་གསུམ་སྡིག་ལྟུང་མ་ལུས་དག་པར་གྱུར། །ཅེས་དམིགས་པ་དང་བཅས་ཏེ་ཡིག་བརྒྱ་བཟླ། འབྲེལ་ནས་འཆར་དཀའ་ན་གོང་གི་བྱང་བར་གྱུར་ཞེས་དང་། དག་པར་བྱས་ཞེས་པའི་མཚམས་གཉིས་སུ་ཡིག་བརྒྱ་ཅི་འགྲུབ་རེ་བཟླས་ཏེ་བླ་མ་དང་མགོན་པོ་ལ་བརྟེན་པའི་དམ་ཚིག་ཉམས་ཆག་སྦྱོང་བའི་དམིགས་པ་སོ་སོར་ཡུན་དུ་བསྐྱངས། དེ་ལྟར་ཡིག་བརྒྱ་ཉེར་གཅིག་གམ་བརྒྱ་རྩ་སོགས་བཟླས་ཏེ། སླར་ཡང་། བློ་

― GTD003_Page_0933 ―

^{[མ་དཔེ་གཟིགས་ན་འདིར་གནོན།]}

[Full Size]

བཟང་རྒྱལ་ཀུན་ཐུགས་རྗེའི་ངོ་བོ་ཉིད། །དཀོན་མཆོག་གསུམ་དངོས་བླ་མ་རིན་པོ་ཆེར། །གསོལ་བ་འདེབས་སོ་མདོ་སྔགས་ལམ་བཟང་ཀུན། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །གདུལ་བྱའི་དོན་སླད་ཞི་ཁྲོའི་སྐུར་བསྟན་ཡང། །ངེས་དོན་བླ་མ་མགོན་པོ་དབྱེར་མེད་པར། །གསོལ་བ་འདེབས་སོ་མདོ་སྔགས་ལམ་བཟང་ཀུན། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །ཞེས་ཤོ་ལོ་ཀ་གཉིས་ཅི་མང་བཟླས། སྲིད་ལས་ངེས་འབྱུང་བློ་ཁ་ཆོས་ལ་ཕྱོགས། །ཆོས་ཀུན་བླ་མེད་བྱང་ཆུབ་ལམ་དུ་འགྲོ། །བདེན་ཞེན་གདོན་དང་ཕྱི་རོལ་ཉེར་འཚེ་སོགས། །ལམ་གྱི་བར་ཆད་ཞི་བར་བྱིན་གྱིས་རློབས། །འཇིག་རྟེན་ཕྱི་མའི་གནས་སུ་འགྲོ་བ་ན། །གནད་གཅོད་བར་དོའི་འཇིགས་སྐྲག་མི་འབྱུང་ཞིང། །འཛུམ་པའི་ཞལ་བསྟན་གསུང་གིས་དབུགས་ཕྱུངས་ཏེ། །བདེ་བ་ཅན་གྱི་གནས་དེར་དྲང་དུ་གསོལ། །མདོར་ན་འདི་ཕྱི་བར་དོ་གང་དུ་ཡང། །མགོན་དང་དཔུང་གཉེན་ཁྱོད་མིན་གཞན་མེད་པས། །ནམ་ཡང་འབྲལ་བ་མེད་པར་རྗེས་གཟུང་སྟེ། །སྲིད་ཞིའི་འཇིགས་པ་ཀུན་ལས་བསྐྱབ་ཏུ་གསོལ། །བླ་མ་མགོན་པོ་དབྱེར་མེད་ཐུགས་རྗེའི་གཏེར། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །དེ་ལྟར་གསོལ་བ་བཏབ་པས་བླ་མ་དང། །མགོན་པོ་དབྱེར་མེད་འདྲེས་ཏེ་རང་ལ་ཐིམ། །གཉུག་སེམས་བླ་མ་མགོན་པོའི་སྐུར་བཞེངས་ཏེ །འདུ་འབྲལ་མེད་པར་སྙིང་དབུས་རྩེན་གྱུར་ཅིག །

― GTD003_Page_0934 ―

^{[མ་དཔེ་གཟིགས་ན་འདིར་གནོན།]}

[Full Size]

ཅེས་སྙིང་གར་གསལ་བཏབ་ནས་སྙིང་པདྨའི་རྣམ་པར་གནས་པའི་འདབ་མ་རྣམས་ཟུམ་པའི་ཕྱི་རོལ་ཏུ་སྔགས་ཕྲེང་གིས་བསྡམ་པ་བརྟན་པར་བྱས་པར་བསམ་ལ། དགེ་བ་འདི་ཡིས་ཚེ་རབས་ཀུན་ཏུ་བདག །ཅེས་སོགས་དང་། སྐྱེ་བ་ཀུན་ཏུ་ཡང་དག་བླ་མ་དང། །ཞེས་སོགས་བསྔོ་བས་མཚམས་སྦྱར་བར་བྱའོ། །ཞེས་ངེས་དོན་གྱི་བཤེས་གཉེན་དམ་པ་བློ་བཟང་དཀོན་མཆོག་པས་མཚོན་རང་གི་རྩ་བའི་བླ་མ་དང་མགོན་པོ་དབྱེར་མི་ཕྱེད་པའི་སྒོ་ནས་གྲིབ་སེལ་གྱི་དམིགས་པ་གཙོ་བོར་བཏོན་པའི་བླ་མའི་རྣལ་འབྱོར་དམ་ཚིག་རྡོ་རྗེའི་བདུད་རྩི་ཞེས་བྱ་བ་འདི་ནི་དད་བརྩོན་ལྡན་པ་དཀོན་མཆོག་དགེ་ལེགས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །། བཀྲ་ཤིས།