སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུ་ཁྱབ་པའི་རྒྱན།
སྟོན་པ་འཇིག་རྟེན་དུ་བྱོན་ཚུལ་གླེངས་པའི་རབ་ཏུ་བྱེད་པ་སྟེ་དང་པོ།
དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་པ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུ་ཁྱབ་པའི་རྒྱན་ཅེས་བྱ་བ་བཞུགས། །
རྒྱལ་རྣམས་ཡེ་ཤེས་གཟུགས་ཀྱི་འཇོ་སྒེག་ངོ་མཚར་གྲུབ་པའི་ཞལ་སྐྱིན་ཅན།
འབར་དང་འཇམ་རྒྱས་ཆགས་པའི་བརྟུལ་ཞུགས་ཤིན་ཏུ་ཤུགས་དྲག་ཐུགས་རྗེའི་བྱིན།
འདྲེན་པ་སྟོང་གི་དབུས་ན་མངོན་མཐོ་ལྷུན་གྲུབ་རིག་འཛིན་པདྨའི་ཞབས།
གྲོང་ཁྱེར་གསུམ་གྱི་འཇིགས་པ་འཕྲོག་གྱིན་གངས་ཅན་བསྟན་འགྲོའི་གཙུག་ན་མཛེས།
གང་ཞིག་རྟེན་ཅིང་འབྲེལ་འབྱུང་ཆོས་ནི་གཅིག་དང་དུ་མར་ཡོད་ཡེ་མ་བཟུང་དངོས་དང་དངོས་མེད་ངོ་བོ་ཉིད། མཁའ་བཞིན་ཤིན་ཏུ་རྣམ་པར་མི་རྟོག་སོ་སོར་རང་གི་རིག་བྱ་ཉིད་དེ་སྤྲོས་པ་ཉེར་ཞི་ཆོས་ཀྱི་སྐུ། མཐའ་གཉིས་དགྲ་བཅོམ་ངེས་པ་ལྔ་ཡི་ཆོས་ཀྱི་རྒྱལ་སྲིད་ཆེན་པོས་འབྱོར་བཁ་སྦྱོར་བདུན་ལྡན་ལོངས་སྤྱོད་རྫོགས། མ་ལུས་མི་ལུས་ལུས་པ་མེད་གང་རྣམ་བྱང་སླད་དུ་སྣ་ཚོགས་སྤྲུལ་པའི་རྗེས་སུ་སོན་པ་དེར་ཕྱག་འཚལ། གྲངས་མེད་གསུམ་གྱི་ཚོགས་གཉིས་པིར་རྩེས་མཚན་དཔེའི་ངོ་མཚར་བྲིས་པའི་གཏམ། བློ་མཆོག་རྣམས་ཀྱི་ཁྱད་པར་མ་ཡིན་ཐུག་མཐའ་མེད་པའི་ཆོས་ཉིད་ནས། རྣམ་པ་ཀུན་གྱི་མཆོག་ལྡན་གང་ལས་གཞར་ཡང་འཕོ་མེད་ཤཱཀྱའི་ཏོག། བྱེ་བ་ཕྲག་བརྒྱའི་ཞིང་གི་འགྲོན་སྣང་རིན་ཆེན་རྣམ་གསུམ་གཙུག་ན་སྤྱོན། འཁོར་བ་མྱང་འདས་ཀ་ནས་རྣམ་དག་སྟོང་ཆེན་ཡེ་ཤེས་ཕྱག་རྒྱའི་དངོས། །ལྷུན་གྲུབ་མཚན་དཔེར་མངའ་དབང་རྫོགས་པའི་དང་པོའི་སངས་རྒྱས་ཀུན་ཏུ་བཟང་། །གང་ལསདུ་མར་མ་ཕྱེད་མི་འབྱེད་རིགས་བརྒྱ་རིགས་ལྔ་རིགས་ཀུན་བདག། ཞི་དང་ཁྲོ་བོའི་རྣམ་འགྱུར་མཐའ་ཀླས་ཚོམ་བུའི་འཁོར་ལོ་ལ་ཕྱག་འཚལ། ཚིག་དང་ཡི་གེའི་སྤྲོས་པ་ཀུན་བྲལ་རྒྱལ་ཐབས་སྤྱི་བླུགས་རིག་པའི་དབང་། གསང་བདག་དཔའ་བོའི་བྱིན་གྱིས་ཐོབ་ལས་སྡེ་གསུམ་འབུམ་ཕྲག་དྲུག་ཅུའི་མཛོད་། ཐུགས་ཀྱི་དཔལ་བེར་བཅུད་དུ་འདྲིལ་ལས་ཐེག་མཆོག་སྟོན་པ་དགའ་རབ་རྗེ། འདས་རྗེས་ཐོབ་པའི་པཎ་གྲུབ་རྣམ་གསུམ་གཙུག་ཏོར་ཛ་ལནྡྷ་རའི་ཏོག། རྒྱལ་རིག་གང་ཟག་འབབ་ལྡན་གྲུང་ལ་བསྟན་པའི་ཆུ་མགོའི་རླབས་ཕྲེང་གཡོ། རིགས་ཅན་ལྔ་དང་གླེགས་བམ་དབང་ཐོབ་ལུང་བསྟན་རྡོ་རྗེ་ཀུ་ཀུ་རཱ། སངས་རྒྱས་གསང་བ་ནཱ་གཱ་རྫུ་སོགས་དཔལ་ཆེན་གྲུབ་པའི་རིག་འཛིན་བརྒྱད། རྣམ་གསུམ་ཡོ་གའི་ཤིང་རྟ་ཆེ་རྣམས་གཙུག་གི་ནོར་བུ་ལས་གཞན། །རྫོགས་པ་ཆེན་པོ་བརྗོད་དུ་མེད་པའི་འཕོ་ཆེན་ཡེ་ཤེས་རྡོ་རྗེའི་ཁམས། །རང་དབང་
གྱུར་ལས་བཅུ་དྲུག་ཡེ་ཤེས་བླ་མའི་སར་གཤེགས་བི་མ་ལ། །གངས་རིའི་ཁྲོད་ན་རྡོ་རྗེའི་ལམ་ལ་རྣལ་དུ་འབྱོར་བའི་ས་མཁན་དུ། །ཐོབ་ལས་འཇའ་ལུས་གྲུབ་མཐའ་སྙོགས་པའི་གྲགས་པ་ནམ་མཁར་ཤོང་བ་མིན། །ཐུབ་བསྟན་སྡེ་སྣོད་ཤིང་རྟའི་སྲོལ་འབྱེད་ཀླུ་སྒྲུབ་ཐོགས་མེད་ཕྱོགས་ཀྱི་གླང་། །འགྲེལ་མཛད་དབྱིག་གཉེན་འཕགས་པ་ལྷ་དང་ཆོས་ཀྱི་གྲགས་པ་འཛམ་གླིང་རྒྱན། །སྒྲ་གཅན་འཛིན་དང་དཔའ་བོ་ཆོས་སྐྱོང་ཡོན་ཏན་འོད་དེ་ཆེན་པོ་བཞི། །ཞི་བའི་ལྷ་དང་ཙནྜ་གོ་མའི་རྣམ་དཔྱོད་རྒྱལ་བསྟན་སྲོག་ཤིང་ཉིད། །འདི་ན་གངས་ཅན་མུན་པའི་གླིང་གི་སྤུན་ཟླར་བྱས་དེ་ཤིན་ཏུ་ཡང་། །བློ་ལ་གདུང་བའི་ཁུང་དུ་ལྕིད་ལ་ཆོས་རྒྱལ་མེས་དབོན་གསུམ་མཉམ་ཡང་། །ཐུགས་བསྐྱེད་དཔུང་པ་བཙན་པོའི་འཁྲུལ་འཁོར་དམ་བཅའི་རི་མོ་མ་སྨད་པས། །ལྗོངས་འདིར་རྒྱལ་བསྟན་ཤིང་རྟའི་ཁ་ལོ་དྲངས་པ་མིན་ནམ་ཁྲི་སྲོང་རྗེ། །སྲིད་ལ་ངེས་འབྱིན་སྡོམ་བརྩོན་ཡོངས་ཀྱི་སྐྱེད་བྱེད་མཁན་པོ་ཞིང་མཚོ། །ཆོས་རབ་འབྱེད་པའི་སྤྱན་མི་འཛུམས་པ་འཇིག་རྟེན་མིག་གཅིག་བཻ་རོ་རྗེ། །རྨ་གཉགས་ལ་སོགས་སྐད་གཉིས་སྨྲ་དབང་བསྟན་པའི་གསལ་བྱེད་ལོ་པཎ་སོགས། །གྲུབ་བརྙེས་དབང་པོ་བཅུ་ཕྲག་གཉིས་དང་ལྷག་བཅས་ལྔ་ཡི་འཁོར་ལོར་འདུད། །རབ་འབྱམས་ཤེས་བྱར་སྲིད་དོ་ཅོག་གི་རིན་ཆེན་སྣ་བདུན་མདུན་ནས་བདར་ཁྱོད་ཕྱོགས་ཀྱི་གླང་བོར་ན་གདོད་འཁྲུལ། །རྒོལ་ངན་རྩོད་པས་ཐལ་བར་རློག་ལ་ཡན་ལག་བཞི་བའི་གཡུལ་ངོ་བཤམས་གང་ཆོས་ཀྱི་གྲགས་པར་འཕྱང་མོ་ཉུག། འཆད་དང་རྩོམ་་པའི་གསེར་འཁོར་རྩིབས་སྟོང་ཐོགས་རྡུགས་མེད་པར་མཁའ་ལ་སེང་འདི་དབྱིག་གཉེན་འམ་ནི་དཔའ་བའི་ཞབས། །ཤིང་རྟའི་ལམ་སྲོལ་མང་བཀུར་ཁྲི་ལ་རྡོ་རྗེ་སྙིང་པོའི་རྒྱལ་རྔ་ལགས་བརྡུང་ཀུན་མཁྱེན་ངག་གི་དབང་པོ་རྒྱལ། །ཤེས་བྱའི་གནས་ལ་མི་མཁྱེན་བྱ་བ་གལ་ཏེ་སྲིད་ན་སྡང་ཞེན་མ་ཡིན་མོད་ལ་ཟ་བའི་དོད་ཟོམ་ཞབས།
ཟུང་འཇུག་གྲུབ་པས་ཧེ་རུ་ཀ་ཡི་བརྟན་པ་ཉེར་འཕྲོག་གཟུངས་དང་ཟད་པར་གསད་གསོའི་དབང་ཕྱུག་ཟུར་མེས་དབོན། །རྒྱུད་དང་སྡེ་སྣོད་རྒྱ་མཚོར་སྤྱོད་ལ་འགྲན་གྱི་དོ་མེད་གཡུང་སྟོན་རྗེ་དང་མངའ་རིས་པཎ་ཆེན་པདྨ་དབང་། །སོ་ཟུར་གནུབས་ཏེ་སྔ་འགྱུར་བསྟན་པའི་བབས་སོ་གསུམ་ལས་ལེགས་འོང་མཁས་དང་གྲུབ་དབང་ཀུན་ལ་ཕྱག་བཙལ་ནས། །འདི་ན་སྐུ་གསུམ་སྟོན་པས་ལེགས་གསུངས་བསྟན་པའི་ངོ་བོ་ལུང་རྟོགས་ཆོས་ཚུལ་མ་ལུས་ལུས་པ་མེད་པའི་སྒོ། །རྣམ་གསུམ་ཡོ་གའི་རྒྱུད་སྡེར་རྫོགས་པ་བཙོ་སྤྱངས་འཛམ་བུ་ཆུ་བོའི་གསེར་ཞུན་སྐལ་བ་མཆོག་གིས་བསྒྲུབ་བྱའི་དངོས། །དམ་ཆོས་འཇིག་པའི་ཆུ་གཏེར་རུམ་དུ་བྱིང་གིས་དོགས་པས་མེ་ཚོགས་སྤུ་གྲིའི་འཁྲུལ་འཁོར་བཟོད་པའི་སྙིང་སྟོབས་ཤུགས། །རང་ཞལ་རྔོམ་པའི་ངོ་མཚར་གཏམ་གྱི་གཟུགས་བརྙན་སྟོན་ན་སུ་ཞིག་ངག་གི་དབང་ཕྱུག་གྲུབ་པ་བདེན་དབང་སྤྱོན། །དེ་ལ་འདི་སྐད་ཅེས། མི་མཇེད་འདི་ན་མཐུ་དབང་དང་དཔལ་འབྱོར་གྱིས་ཤིན་ཏུ་སྙེམས་པ་ཚངས་པ་དང་། དབང་པོས་ཕྱག་བྱས་ཤིང་། དྲང་སྲོང་གྲུབ་པ་མཆོག་གིས་ཀྱང་རབ་ཏུ་བསྟོད་ཅིང་བསྔགས། ལྷ་དང་ལྷ་མིན་དྲི་ཟ་གྲུལ་བུམ་མིའམ་ཅི་ཀླུ་མཆོག་རྣམས་ཀྱིས་ཀྱང་མགོ་བོས་ཕྱག་བྱས་པས། སྲིད་ཞིམ་ལུས་པའི་གཙུག་ཏོར་གྱི་རྩེ་མོར་ཞབས་སེན་ལེགས་པར་བཀོད་ཅིང་། དམིགས་པ་མེད་པའི་ཐུགས་རྗེ་ཆེན་པོའི་ཕྲིན་ལས་ཚད་མེད་པས་སྲིད་པ་གསུམ་གྱི་ཁམས་ཞིང་གི་རྡུལ་སྙེད་དང་འཚམ་པའི་འགྲོ་བ་རྣམས་ཀྱི་མ་འདྲིས་པའི་མཛའ་བཤེས་སུ་གྱུར་བ་ནི་རྒྱལ་བ་བུར་མ་ཤིང་པ་ཉིད་དོ། །དེ་ཉིད་ཀྱིས་ལེགས་པར་གསུངས་པའི་ལུང་དང་རྟོགས་པའི་བསྟན་པ་རིན་པོ་ཆེའི་གྲིབ་བསིལ་ལ་ངལ་བསོའི་དབུགས་འབྱིན་ཐོབ་བ་རྣམས་འཕྲལ་ཡུན་གྱི་ཕན་བདེ་མ་ལུས་པའི་འབྱུང་གནས་གཅིག་པུར་ངེས་པ་ནི་དམ་པའི་ཆོས་ཁོ་ནའོ། ། འདིར་དེ་ཉིད་འཇིག་རྟེན་གྱི་སྒྲོན་མེར་གསལ་བའི་དངོས་པོ་ངེས་པར་བསྟན་པ་ལ་སྤྱི་དོན་རྣམ་པ་དགུ། སྟོན་པ་འཇིག་རྟེན་དུ་བྱོན་ཚུལ།
དེའི་བསྟན་པ་འཕགས་པའི་ཡུལ་དུ་སུ་ཞིག་གིས་བསྐྱངས་པ། བསྟན་པ་དེ་ཉིད་བོད་དུ་བྱོན་ཚུལ། དེ་ལས་སྔ་འགྱུར་རྡོ་རྗེ་ཐེག་པའི་བསྟན་པ་དང་། དེ་འཛིན་བྱེ་དྲག་ཏུ་བཤད་པ། བསྟན་པ་དེ་དག་གི་་ངེས་འབྱེད་གསལ་བའི་འབྲས་བུ། དེ་ལ་བྱ་བ་ལས་ཀྱི་འཁོར་ལོས་ཞབས་ཏོག་ཇི་ལྟར་བྱས་པ། ཆོས་ཀྱི་རྣམ་གྲངས་དོ་སྙེད་ཀྱི་བཞུགས་ཚུལ། དགེ་རྩ་བྱང་ཆུབ་ཏུ་ཡོངས་སུ་བསྔོ་བ་དང་རྣམ་གྲངས་དགུ་ཡིས་སྟོན་ཏོ། །དེ་ལ་དང་པོ་ནི། བདག་ཅག་གི་སྟོན་པ་འདིས་དང་པོར་ཐུགས་བསྐྱེད་པ་ནས་བཟུང་སྟེ་ལམ་ལྔའི་འཁོར་ལོ་མངོན་དུ་མཛད་ནས་འཛམ་བུའི་གླིང་དུ་མཛད་པ་བཅུ་གཉིས་སྟོན་པ་ལ་མི་མཐུན་པ་མེད་དེ་ཐེག་ཆེན་པའི་ཁྱད་པར། ལངྐར་གཤེགས་པ་ལས། འདོད་པའི་ཁམས་དང་གཟུགས་མེད་པ། །སངས་རྒྱས་མངོན་པར་སངས་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་དེར་སངས་རྒྱ། །ཞེས་པས་ལམ་ལྔའི་ཡོན་ཏན་མངོན་དུ་མཛད་པའི་མཐར་སངས་དངོས་འོག་མིན་དུ་རྒྱས་པས་འཛམ་བུའི་གླིང་གི་མཛད་པ་བཅུ་གཉིས་ཚུལ་བསྟན་པ་ཡིན་པར་འདོད་ཅིང་། རྟེན་དེ་ལའང་སྐྱེ་འཕགས་ཀྱི་ཁྱད་པར་ཡོད་པས་ལམ་ལྔའི་འགྲོས་ཀྱང་དེ་དང་མཐུན་པར་བལྟའོ། །སྒྱུ་འཕྲུལ་བླ་མ་ལ་སོགས་པའི་གསང་སྔགས་ཁ་ཅིག་འདི་དང་རྣམ་པ་མཚུངས་པ་ལ་ཁྱད་པར། དཀའ་སྤྱད་ཀྱི་ཚེ་སྐུ་ཆུ་ཀླུང་གི་འགྲམ་ལས་མི་གཡོ་བཞིན་དུ་ཐུགས་རང་སྣང་དོན་གྱི་འོག་མིན་དུ་སངས་རྒྱས་རྣམས་ལས་འོད་ཟེར་ཆེན་པོའི་དབང་ནོང་ནས་དེ་བཞིན་གཤེགས་པའི་ཚུལ་ནི་དེ་ཉིད་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པས་ལོངས་སྤྱོད་དོན་གྱི་ཕྱིར། །སྲོད་དང་ཐོར་ངས་དུས་ཉིད་དུ། །ཉི་ཟླ་ཟ་བའི་དབང་བྱིན་ནས། །རོལ་པའི་ཀ་ར་བསྟན་པ་ཡི། །དེ་བཞིན་དེ་བཞིན་གཤེགས་པའོ། །ཞེས་སོ། །དེ་ལྟར་ཐུན་མོང་དང་ཐུན་མོང་མ་ཡིན་པའི་ལུགས་དེ་དག་ནི་གདུལ་བྱའི་ངོ་ལ་དགོངས་པ་ཚམ་དུ་ཟད་ཀྱི། ངེས་པའི་དོན་དུ་འདི་ནི་
བསམ་པར་མི་ནུས་ཏེ། ཆོས་ཀྱི་སྐུ་ཐོག་མ་མེད་པའི་དུས་ནས་གདོད་མའི་གནས་སུ་མངོན་པར་བྱང་ཆུབ་ཅིང་། དེ་ལས་གཡོས་པ་མེད་བཞིན་དུ་ལོངས་སྤྱོད་རྫོགས་པ་དང་། སྤྲུལ་པའི་སྐུ་ཚད་མེད་པ་གང་འདུལ་གྱི་ངོར་འཆར་ནུབ་ལྟར་སྣང་བའི་ཚུལ་རྡོ་རྗེའི་གནས་ཆེན་པོ་རྣམས་ནས་སྟོན་པ་ཡིན་ཏེ་ཡིད་བཞིན་རིན་པོ་ཆེ་བཀོད་པའི་རྒྱུད་ལས། ཀུན་གྱི་སྔོན་རོལ་སངས་རྒྱས་པ། །རྡོ་རྗེའི་འཛིན་རྒྱལ་གསང་བ་ཆེ། །བསམ་ཡས་ཞིང་དུ་རྣམ་པར་རོལ། །གྲངས་མེད་སྟ་ཕྱི་དུས་ཀུན་དུ། །ཞི་དང་ཁྲོ་ཚུལ་དཔག་མེད་ཅིང་། །རྔོན་དང་སྨད་འཚོང་ལ་སོགས་གཟུགས། །སྣ་ཚོགས་ཚུལ་གྱིས་དོན་མཛད་ཀྱང་། །ད་དུང་བསྐལ་པ་བཟང་པོ་འདིར། །འདྲེན་པ་སྟོང་དུ་བསྒྱུར་མཛད་ཅིང་། །དེ་བཞིན་སྣ་ཚོགས་།ཚུལ་འཆང་བས། །དཔག་མེད་འགྲོ་བའི་དོན་མཛད་དོ། །ཞེས་སོ། །དེ་ལ་འཛམ་བུའི་གླིང་འདིར་མཛད་པ་བཅུ་གཉིས་ཀྱི་དོན་མཛད་པའི་ཚུལ་ནི། རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱི། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་བ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པ་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདའ་བར་སྟོན་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཅེས་པ་ལས། བདག་ཅག་གི་སྟོན་པ་འདི་དགའ་ལྡན་གྱི་ལྷའི་གནས་རིས་བཟང་པོ་ན་ལྷའི་བུ་དམ་པ་ཏོག་དཀར་པོ་ཞེས་བྱ་བར་གྱུར་ནས། །ལྷ་རྣམས་ལ་ཆོས་སྟོན་ཅིང་དེ་རྣམས་དང་ཐབས་ཅིག་གོ། དེའི་ཚེ་འཁོར་གྱི་ཁྱམས་སུ་མར་མེ་མཛད་ཀྱི་ལུང་བསྟན་བསྐུལ་བའི་ཚིགས་སུ་བཅད་པ་རོལ་མོའི་སྒྲ་ལས་ངང་བྱུང་བས། དམ་པ་ཏོག་དཀར་ཆོས་ཀྱིས་མངོན་པར་མཐོ་བའི་ཁང་བཟང་འཁྲི་རབ་ཏུ་བཟང་པོ་
ལ་བཞུགས་ནས། འཛམ་བུའི་གླིང་དུ་སྐྱེ་བ་འཛིན་པའི་མཛད་པ་སྟོན་པ་ལ། གློང་དང་། རིགས་དང་། ཡབ་དང་། ཡུམ་དང་། དུས་དང་ལྔའི་ཁྱད་པར་གྱིས་གཟིགས་པ་ལྔ་ལ་གཟིགས་སོ། །དེ་ལྟར་གཟིགས་ནས་ལྷ་རྣམས་ལ་ཁོ་བོ་འཛམ་བུའི་གླིང་དུ་ལྷ་མོ་སྒྱུ་འཕྲུལ་མའི་ལྷུམས་སུ་ཉིང་མཚམས་སྦྱར་ནས་བདུད་རྩི་ཟབ་མོ་ནི་མངོན་དུ་བྱེད། རྟོག་གེ་བ་བཅོ་བརྒྱད་ནི་ཟིལ་གྱིས་གནོན་པར་བྱེད། འགྲོ་བ་མང་པོ་ནི་རྣམ་པར་བྱང་བ་ལ་འགོད་པར་བྱེད་པའི་གསུང་གིས་དབུགས་ཕྱུང་ནས། བྲམ་ཟེའི་རིག་བྱེད་ཀྱིས་རྗེས་སུ་བསྟན་པའི་གླང་པོ་གཞོན་ནུ་ཐལ་ཀར་གྱི་རྣམ་པས་ཡུམ་གསོ་སྦྱོང་ལ་གནས་པའི་ལྷུམས་སུ་གཤེགས་སོ། །གཤེགས་ནས་ཀྱང་ལྷུམས་དེ་ནི་བལྟ་ན་སྡུག་པ། སྲིད་པའི་འདུ་བྱེད་ཀྱིས་རྣམ་པར་དབེན་པ། རྒྱལ་སྲས་རྣམས་ཀྱིས་ཉེ་བར་སྤྱད་པའི་གཞལ་མེད་ཁང་དུ་བྱིན་གྱིས་བརླབས་ནས་ལྷ་མི་ཁྲི་ཕྲག་བྱེ་བ་མང་པོ་ལ་སྐྱེ་གནས་ཡོངས་སུ་སྦྱོང་བའི་ཆོས་སྟོན་ཏོ། །དེར་ས་བཅུའི་ངེས་པ་མཚོན་པས་ཟླ་བ་བཅུའི་ཕུར་པོ་ནི་རྫོགས། རྣམ་པ་ཉི་ཤུས་བྱང་ཆུབ་པའི་སྐུ་གསེར་གྱི་གཏན་པ་ཕྱིས་བ་ལྟ་བུ་འཇིག་རྟེན་གྱི་བསོད་ནམས་ལུམྦིའི་ཚལ་གྱིས་ཐོབ་པའི་དུས་ལ་བབས་ཏེ། ཡུམ་གྱི་རྩིབ་མའི་སྒོ་འཕར་ནས་ལེན་པ་མེད་པར་རང་བྱོན་ཏོ། །དེའི་ཚེ་རྒྱལ་རིགས་ཀྱི་བུ་སྤྱི་བོ་ནས་དབང་བསྐུར་བའམ། མི་བསྐྱོད་རྡོ་རྗེ་ལ་སོགས་པའི་སངས་རྒྱས་ཐམས་ཅད་རང་གི་ངོ་བོར་གྱུར་བ་རིགས་སང་བའི་མཚོན་བྱེད་ལྷའི་བུ་རྣམས་ནི་ནམ་མཁའི་དབྱིངས་ནས་ཁྲུས་ཀྱི་བྱ་བ་ལ་གཅིག་ཏུ་བརྩོན། བར་སྣང་གི་ལྷ་དག་ནི་བསྟོད་དབྱངས་ཀྱིས་སྲི་ཞུས་རྣམ་པར་གཡེང་། ཚངས་པ་དང་བརྒྱ་བྱིན་གྱིས་གོས་ཟུང་གི་རེག་པ་འཕྲོད་པར་བྱེད། བྱང་ཆུབ་སེམས་དཔའ་བཙས་མ་ཐག་པ་ནས་ཚད་མེད་བཞིའི་ལམ་དུ་ཕྱོགས་པ་ལ་རིངས་པ་སྟོན་ཕྱིར་ཕྱོགས་བཞིར་གོམ་པ་བདུན་བདུན་འདོར་བའི་ཤུལ་ནས་ལྷས་ཕུལ་བའི་པདོྨའི་
གེ་སར་ཀྱང་ལྷམ་མེར་གསལ་ལོ་ཞེས་གྲགས་སོ། །གང་གི་ཚེ་ལུམྦིའི་ཚལ་དུ་མེ་ཏོག་རྣམས་རང་ཁ་བྱེ། གཅུང་དགའ་ལ་སོགས་པའི་ཤཱཀྱ་གཞོན་ནུ་ལྔ་བརྒྱ་དང་། སྔགས་ལྡན་ལ་སོགས་པ་བཞོན་པའི་མཆོག་ལྔ་བརྒྱའང་བཅས། ས་ཆེན་པོ་འདི་རབ་ཏུ་གཡོས་ཤིང་འོད་ཟེར་གྱི་སྣང་བ་ཆེན་པོས་ཁྱབ་པས། ཁམས་ཀྱི་རྒྱལ་ཕྲན་བཞི་པོ་དག་རང་རང་ལ་བུ་བཅས་པའི་རྟགས་སུ་རློམ་པར་བྱེད་དོ། །དེ་ནས་ཀུན་གྱི་བཤེས་གཉེན་དང་། །སྲིན་བུ་གོ་ཆ་ལ་སོགས་པར་ཡི་གེ་དང་། རྩིས་དང་། ཞང་པོ་བཟང་ལེན་ལས་གླང་པོའི་གཉར་ཞོན་པ་སོགས་སྒྱུ་རྩལ་གྱི་གནས་མང་པོ་ལ་མཐའ་གཏུགས་པའི་ཉམས་འོག་ཏུ་ཆུད་པར་མཛད་ཅིང་ཕོ་བྲང་དུ་བཞུགས་སོ། །དེའི་ཚེ་ཡབ་ཀྱིས་ལག་ན་བེ་ཅོན་ལ་སོགས་པའི་ཤཱཀྱའི་རིགས་གསུམ་གྱི་བུ་མོ་བཙུན་མོར་བྱིན་ཞེས་བསྒོ་བ་ལ། ལྷ་བདག་ཅག་གི་རིགས་ནི་གྱད་ཀྱི་འཛིན་སྟངས་ཤེས་པ་ལ་ཡིན་གྱི་གཞན་དུ་མ་ཡིན་ནོ། །དེར་ཡབ་ངོ་གནག་པར་གྱུར་བ་ལ་གཞོན་ནུས་སྨྲས་པ། འཇིག་རྟེན་གསུམ་ན་འཕོང་དང་སྒྱུ་རྩལ་གྱི་གནས་ལ་བདག་ལ་འགྲན་པར་སྤོབས་པ་འགའ་ཡང་མེད་དོ། །ཞེས་རྔོ་ཐོགས་པར་ཞལ་གྱིས་འཆེས་ནས་ཤཱཀྱ་གཏུམ་པོ་གཟུ་ལུམས་ཅན་དག་དང་སྒྱུ་རྩལ་འགྲན་པར་དྲིལ་བསྒྲགས་ནས་གྲོང་ཁྱེར་གྱི་ཕྱི་རོལ་དུ་ཆས་སོ། །དེའི་ཚེ་ཡངས་པ་ཅན་ནས་གཞོན་ནུ་ལ་འབུལ་དུ་ལྷགས་པའི་གླང་པོ་ཆེར་ལྷས་བྱིན་ཤིན་ཏུའང་ཕྲག་དོག་པའི་སེམས་ཀྱིས་ཐལ་མོ་བསྣུན་པ་ཙམ་གྱི་མཐུས་བསད་དོ། །དེ་གཅུང་དགའ་བོས་སྒོ་ཁང་ནས་ཕྱི་རོལ་དུ་སྟོབས་ཀྱིས་བོར་རོ། །གཉིས་ཀའི་མཐུ་སད་ཕྱིར་བྱང་ཆུབ་སེམས་དཔའ་ཤིང་རྟ་ལས་མ་བབས་བཞིན་དུ་ཞབས་ཀྱི་མཐེ་བོས་མཇུག་མ་ནས་བཟུང་སྟེར་བ་བདུན་འདས་པའི་ལྗོངས་སུ་དོར་བ་ལ་ལྷས་བསྟོད་ཅིང་བསྔགས་སོ། །དེ་ནས་ཏཱ་ལའི་ལྗོན་པ་དང་། ལྕགས་ཀྱི་ཕ་གུ་དང་། སླ་ང་རྣམས་བདུན་བདུན་དུ་བརྩེགས་པ་ལ་ཉག་ཕྲན་གྱི་སྦྱོར་བས་གཅོད་ཚབས་འགྲན་པ་ལ་
ཞུགས་པ་ན། ལྷས་བྱིན་གྱིས་ནི་གསུམ། གཅུང་དགའ་བོས་ལྔ། གཞོན་ནུས་ཐམས་ཅད་ལས་ཕྱིར་ཐལ་བའི་ས་ནས་མདའ་ཆུ་ཁྲོན་པ་སྐྱེས་བྱ་བ་ཡན་ལག་བརྒྱད་དང་ལྡན་པའི་ཆུ་མིག་ཀྱང་བྱུང་ངོ། །དེ་བཞིན་དུ་ལང་ཚོའི་སྟོབས་ཀྱི་སྒྱེལ་འགྲན་པ་དང་། གླང་པོའི་གཉར་ཞོན་པ་དང་། ཆུ་ཀླུང་ཆེན་པོར་ངང་པ་ལྟར་གཤེགས་པ་ལ་སོགས་སྒྱུ་རྩལ་དྲུག་ཅུ་རྩ་བཞིའི་གནས་ཐམས་ཅད་ལ་བྱང་ཆུབ་སེམས་དཔའི་གྱད་ཀྱི་འཛིན་སྟངས་ལ་སུས་ཀྱང་སྤོབས་པར་མ་གྱུར་ཏོ། །འཇིག་རྟེན་མཁྱེན་པའི་དབང་པོ་ནི་རཻ་ཞིག་དེ་དང་ངང་ཚུལ་མཐུན་པར་འཇུག་པས་སྐྱེས་བུ་འདུལ་ཞིང་། དབང་པོ་གཞན་དབང་དུ་གྱུར་བའི་ཁ་ན་མ་ཐོ་བ་སྤང་ཕྱིར། བུད་མེད་ཀྱི་སྐྱོན་ལྔ་དང་བྲལ་ཞིང་། ཡོན་ཏན་བརྒྱད་དང་ལྡན་པས་འཚོམ་དང་། གྲགས་འཛིན་མ། རི་དྭགས་སྐྱེས་ཏེ་རང་རང་ལ་འཁོར་ཉི་ཁྲི་ཉི་ཁྲིའི་ཚོགས་དང་བཅས་བཙུན་མོའི་མཆོག་དྲུག་ཁྲི་ཁབ་ཏུ་བཞེས་ནས་འདོད་ཡོན་གྱི་སྣང་བ་ལ་སྒྱུ་མ་ལྟ་བུར་ལོངས་སྤྱོད་དོ། །དེ་ལྟར་སྤྱོད་པའང་ཡང་དག་སློང་བ་ལ་རབ་ཏུ་ཞུགས་ནས་སྲིད་པའི་ཁ་ལོ་ཆོས་སུ་བསྒྱུར་བ་ནི། སིལ་སྙན་གྱི་སྒྲ་ལས་སྔོན་གྱི་སྨོན་ལམ་གྱི་མཐུ་རབ་ཏུ་སད་པར་བསྐུལ་བས། འདུན་པས་ཤིང་རྟའི་ཁ་ལོ་བ་བྱས་ཏེ་གྲོང་ཁྱེར་གྱི་ཕྱོགས་བཞིར་སྐྱོ་སངས་ལ་གཤེགས་པ་ན། སྐྱེ་རྒ་ན་འཆིའི་མཚན་ཉིད་བཞི་གཟིགས་པས་ཐུགས་རབ་ཏུ་སྐྱོ་སྟ་འདི་སྐད་དུ། རྒ་དང་ན་དང་འཆི་འགྱུར་བ། །གལ་ཏེ་འདི་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་བྱེད། །ཅེས་ཕུན་སུམ་ཚོགས་པ་ཡང་རྟག་པ་མ་ཡིན་པ། འགྱུར་བའི་སྡུག་བསྔལ་དང་འགྲོགས་ཤིང་། ཁྱབ་པ་འདུ་བྱེད་ཀྱིས་འཁྱུད་པ། སྡུག་བསྔལ་གྱི་སྡུག་བསྔལ་ཕྱི་བཞིན་འཕྲེང་བའི་ཆོས་ཉིད་ལ་ཤིན་ཏུ་འང་ཐུགས་བྱུང་ནས་ངེས་པར་འབྱུང་བ་ལ་དམ་བཅས་སོ། །དེའི་ཚེ་ཟས་གཙང་མའི་ཚོགས་རྣམས་ནི་གཞོན་ནུ་རབ་ཏུ་འབྱུང་གིས་དོགས་པའི་གྲོང་ཁྱེར་གྱི་ཁོང་
ཡུག་སྤྱན་པབ་དང་མེལ་ཚེས་སྲུང་བ་ལ་བརྩོན་པར་བྱེད་པས་གཤེགས་སུ་མ་སྟེར་བའི་ནུབ་ཐ་མ་ལ། ཡབ་ལ་ཕྱག་གིས་ནི་བཏུད། ཐ་ཚིག་གིས་གཅུད་དེ་ཕ་མས་མ་གནང་བའི་མཐའ་བསལ། ཆིབས་སྔགས་ལྡན་གྱི་སྟེང་ན་རྒྱལ་ཆེན་བཞིའི་སྲི་ཞུ་དང་བཅས་ཏེ་ནམ་མཁའི་དབྱིངས་ནས་གཤེགས་སོ། །དེར་མཆོད་རྟེན་རྣམ་དག་གི་དྲུང་དུ་ཉིད་ཀྱི་དབུ་སྐྲ་ཉིད་ཀྱིས་དོར་ཏེ་རབ་ཏུ་བྱུང་བའི་རྟགས་མ་ཡིན་པ་དོར། ཤ་ནའི་གོས་དང་ངུར་སྨྲིག་བརྗེས་ནས་གསོལ། ཡངས་པ་ཅན་དང་རྒྱལ་པོའི་ཁབ་ཏུ་རྟོག་གེ་བ་གདམས་ངག་ཆེ་བར་གྲགས་པ་རིང་འབུར་དང་ལྷག་སྤྱོད་གཉིས་ལས་ཅི་ཡང་མེད་པ་དང་། སྲིད་རྩེའི་ཏིང་འཛིན་སློབ་དཔོན་གྱི་གོ་འཕང་དེ་སྲིད་ནི་མངོན་དུ་མཛད་ཀྱང་། ཏིང་འཛིན་དང་ཀུན་ཏུ་སྤྱོད་པ་དེ་དག་ནི་སྲིད་པའི་ཉེས་དམིགས་ལས་གྲོལ་བའི་ལམ་མ་ཡིན་པར་མཁྱེན་ནས་ཆུ་ཀླུང་ཆེན་པོ་ནི་རཉྫ་ནའི་འགྲམ་དུ་ལྔ་སྡེ་བཟང་པོ་དང་བཅས་ལོ་དང་པོ་གཉིས་ལ་འབྲས་ཉག་མ་རེ། བར་པ་གཉིས་ལ་ཆུ་ཐིགས་པ་རེ། ཐ་མ་གཉིས་ལ་ཅི་ཡང་མ་གསོལ་བའི་དཀའ་ཐུབ་ཀྱི་ཏིང་ངེ་འཛིན་ལོ་དྲུག་བསྟེན་ནོ། །དེའི་ཚེ་ལྷ་རྣམས་ཀྱིས་ཚིགས་སུ་བཅད་པས་ནི་བསྐུལ། ཕྱོགས་བཅུའི་རྒྱལ་བ་སྲས་དང་བཅས་པས་ནི་ལམ་དམན་པ་ལས་སད་པར་བྱས་ནས་བྱང་ཆུབ་སྙིང་པོར་རབ་ཏུ་བསྐུལ་ལོ། །དེ་རང་ལ་ཞིང་དུབ་པའི་མཐའ་བསལ་བའི་ཕྱིར་རགས་པའི་ཁ་ཟས་ལ་ཅུང་ཟད་སྤྱད་པས་ལྔ་སྡེ་བཟང་པོ་མི་མོས་པར་གྱུར་ཏེ་ཝཱ་རཱ་ཎ་སཱིར་སེང་ངོ། དེ་ནས་མ་གྷ་དྷཱ་རྡོ་རྗེའི་གདན་དུ་བཞུད་པའི་ལམ་ལ་བྲམ་ཟེའི་བུ་མོ་ལེགས་སྐྱེས་མས་བ་མེན་ལྔ་བརྒྱའི་འོ་མ་ཉིང་ཁུར་བསིངས་པས་བསྙེན་བཀུར་བའི་མོད་ལ། སྐུ་ལུས་གསེར་གྱི་གཏན་པ་བྱིས་པ་བཞིན་དུ་གྱུར་ཅིང་། དེའི་བསོད་ནམས་ཆུད་མི་འཛའ་བར་མཛད། ལམ་དུ་རྩྭ་འཚོང་བཀྲ་ཤིས་ལས་རྨ་བྱའི་མགྲིན་པ་ལྟ་བུར་རེག་ན་འཇམ་པའི་རྩྭི་ཕྱག་གང་བཞེས་ནས་རྡོ་རྗེའི་གདན་དུ་བྱོན། སངས་རྒྱས་ཐམས་ཅད་ཀྱི་བྱིན་རླབས་ལས་
རང་བྱུང་བའི་རྡོ་རྗེའི་གདན་བྱང་ཆུབ་ཤིང་གི་སྙིང་པོ་ཅན་དུ་རྩྭའི་་གདིང་བ་ལ་སྐྱིལ་མོ་ཀྲུང་བཅས་ནས། སྟན་འདིར་བདག་གི་ལུས་འདི་བསྐམ་ཡང་རུང་། །པགས་པ་རུས་པའི་ཚོགས་རྣམས་ཞིག་ཀྱང་རུང་། །བསྐལ་མང་རྙེད་དཀའི་བྱང་ཆུབ་མ་ཐོབ་བར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་སོ། །དེ་ལྟར་དམ་བཅའ་བརྟན་པའི་སྲོད་ཀྱ་ཆ་ལ་བདུད་སྡེ་འཇོམས་པའི་ཏིང་ངེ་འཛིན་ལ་མཉམ་པར་བཞག་ནས། བདུད་ཀྱི་གནས་ཐམས་ཅད་དཀྲོགས་ཤིང་སྤ་བཀོང་བའི་འོད་ཟེར་གྱིས་ཁྱབ་པར་མཛད་པས། བདུད་སྡིག་ཏོ་ཅན་སྔོན་པའི་ཆ་བྱད་དུ་རྫུ་ཡིན་ལྷགས་ནས་སེར་སྐྱའི་གྲོང་ནི་ལྷས་བྱིན་གྱིས་མནན། ཕོ་བྲང་བཅོམ། ཤཱཀྱ་རྣམས་ནི་ཁ་བཏགས། ཁྱོད་འདི་ན་ཅིའི་ཕྱིར་འདུག །ལན་དུ། མངོན་པར་སངས་རྒྱས་པའི་སླད་དུའོ། །བདུད་ཀྱིས་སྨྲས་པ། མངོན་པར་རྫོགས་པར་འཚང་རྒྱ་བ་ནི་ཚོགས་དཔག་ཏུ་མེད་པའི་འབྲས་བུ་ཡིན་ན། ཁྱོད་ནི་རྒྱལ་པོའི་བུ་སྐྱིད་བདེར་གནས་པ་ཙམ་མོ། །བྱང་ཆུབ་སེམས་དཔས་ལན་དུ། ཁྱོད་ཀྱིས་གཏན་པ་མེད་པའི་མཆོད་སྦྱིན་ཅིག་ཁོ་ནས་འདོད་པ་ཁམས་ཀྱི་དབང་ཕྱུག་ཐོབ་ན། ངས་བསྐལ་པ་དཔག་ཏུ་མེད་པར་ཚོགས་གཉིས་རྫོགས་པར་བྱས་པས་ཅིའི་ཕྱིར་འཚང་མི་རྒྱ། དགའ་རབ་དབང་ཕྱུག་མཛུབ་མོ་གཉིས་བསྒྲེངས་ཏེ་གཤུང་བའི་ངག །ངས་ནི་འདི་ན་མཆོད་སྦྱིན་གཏན་པ་མེད། །བྱས་པ་ལ་ནི་ཁྱོད་ཉིད་དབང་ཡིན་ན། ཁྱོད་ལ་འདི་ན་དབང་འགའ་ཡོད་མིན་པས། །སྨྲས་ཀྱང་དབང་མེད་ཁྱོད་ནི་ཡེ་ཕམ་ཡིན། །ཞེས་ཟེར་རོ། །དེར་བྱང་ཆུབ་སེམས་དཔས་བསོད་ནམས་བརྒྱ་ལ་གྲུབ་པའི་ཕྱགས་ལ་བསྣུན་ནས། ས་འདི་འགྲོ་བ་ཀུན་གྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གྲི་དབང་སྟེ་བདག་བརྫུན་མེད། །འདི་ལ་ཁྱོད་ནི་བདག་གི་དབང་བྱོས་ཤིག། ཅེས་་གསུངས་མ་ཐག་ཏུ་སའི་ལྷ་མོ་བརྟན་མ་གསེར་བཅོམ་ལྟ་བུའི་ལུས་ཕྱེད་ས་ལས་འཐོན།
ཏེ། རྡུལ་ཕྲ་རབ་གཅིག་བཟུང་ནས། ངས་སའི་དཀྱིལ་འཁོར་ཆེན་པོ་འདི་འདི་ཙམ་གྱི་ཆ་ཤས་སུ་བགྲང་བར་ནུས་ཀྱིས། རིགས་ཀྱི་བུ་འདིས་མགོ་དང་ཡན་ལག་བྱིན་པ་ནི་བགྲང་བར་མི་ནུས་པས་མངོན་པར་རྫོགས་པར་སངས་རྒྱ་བའི་དུས་ལ་བབ་པོ་ཞེས་བརྗོད་ནས་མི་སྣང་བར་གྱུར་བ་དང་། བདུད་སྡིག་ཅན་ཤིན་ཏུ་སྐྱེངས་ཤིང་ཡུལ་ཡུལ་པོར་གྱུར་ནས་རང་གི་གནས་སུ་སོང་ངོ། །སོང་ནས་ཀྱང་བདུད་ཀྱི་དམག་བྱེ་བ་དུང་ཕྱུར་དག་སྦྲན་ནས་སྒྱུ་མ་ལྟ་བུའི་བློ་མཆོག་མ་ཡིན་པ་རྣམས་འཇིགས་ཤིང་སྐྱི་བུང་བར་བྱེད་པའི་གཡུལ་གཤོམས་ཏེ་ལྷགས་སོ། །འདི་ལྟར་ཉོན་མོངས་པའི་དགྲ་བཅོམ་ཞིང་ནམ་མཁའ་ལྟ་བུའི་སེམས་ཀྱིས་རང་གི་ངོ་བོ་ཉིད་མེད་པར་མཐོང་བ་དག་ལ་དཔུང་དང་བཅས་པའི་འཁྲུལ་འཁོར་གྱིས་བརྗི་བར་ནུས་པ་མ་ཡིན་པས། བྱང་ཆུབ་སེམས་དཔའ་ལ་ཁོང་ཁྲོ་བ་དང་བརྟུན་ངས་པའི་རྣམ་པར་རྟོག་པ་ནི་ཅང་མེད་དོ། །བྱམས་པ་ཆེན་པོའི་ཏིང་ངེ་འཛིན་ལ་མཉམ་པར་བཞག་པས། མཚོན་ཆ་འཕངས་པ་ནི་མེ་ཏོག་གི་ཆར་དུ་བབས། མི་སྙན་པའི་སྒྲ་སྐད་ནི་བསྟོད་དབྱངས་ཀྱི་རང་བཞིན་དུ་གྱུར་བས། གཡོན་ཅན་དཔུང་དང་བཅས་པ་འདོད་པའི་དུག་སྡོང་ནི་འགྱེལ། མདའ་ལྔའི་མེ་ཏོག་ནི་ལྷུང་། ཁེངས་པའི་བྲག་རི་ནི་ཉིལ། གཡུལ་གྱི་བརྟུལ་ཞུགས་ནི་སྨད། ཆུ་སྲིན་རྒྱལ་མཚན་ནི་ནུབ། དྲན་པའི་ཤིང་རྟ་ནི་འབྲོས་པ་ལ་རིངས་པས་མགོ་ཡང་རྨོངས་པའི་གནས་སུ་བྱེར་བར་གྱུར་ཏོ། །སླར་ཡང་རང་གི་བུ་མོ་བདུན་མཛེས་མའི་ཆ་བྱད་དུ་བསྒྱུར་ཏེ་ཆགས་པའི་ཟོལ་གྱིས་བསླུ་བར་བརྩམས་ནས་པད་དཀར་མའི་འགྱུར་བ་ནི་རྔོམ། མེན་ཀཱའི་དོ་ཤལ་ནི་འཕྱང་། ལེགས་རྒྱན་མའི་སྐ་རགས་ནི་འཆིང་། སྐྲ་འདྲེས་མའི་གདུ་བུ་ནི་འཁོར་བ་ལ་སོགས་ཕ་རབ་མྱོས་མའི་གཡོ་སྒྱུ་སུམ་ཅུ་རྩ་གཉིས་ཀྱི་ཞགས་པ་འདེབས་པ་ལ་བརྩོན་ན་ཡང་། བྱང་ཆུབ་སེམས་དཔའ་ལ་བ་སྤུའི་རྩེ་མོ་གཡོ་བའི་སྐབས་ཀྱང་མེད་པས་རྒན་མོ་བདུན་དུ་བྱིན་གྱིས་བརླབས་པས་སླར་འགྱོད་དེ་བཟོད་པར་
གསོལ་བས་སོར་ཆུད་དུ་སྩལ་ལོ། །དེ་ནས་མངོན་པར་བྱང་ཆུབ་པའི་དུས་ལ་བབ་སྟེ། དགུང་གི་ཆ་ལ་བསམ་གཏན་བཞི་པའི་ཏིང་ངེ་འཛིན་ཉམས་འོག་ཏུ་བཅུད། ཐོ་རངས་རྒྱལ་རྔ་བརྡུང་དུ་ཉེ་བ་ན་ལྷའི་མིག་དང་ཟག་པ་ཟད་པའི་མངོན་ཤེས་བསྐྱེད་དེ། བདེན་བཞི་མཐར་ཕྱིན་ནས་མངོན་པར་རྫོགས་པར་སངས་རྒྱས་པ་ནས་ཆེན་པོ་འདི་རབ་ཏུ་གཡོས་ཤིང་། དབུ་མ་འོད་གསལ་ཆོས་སྐུའི་ཁང་མཛེས་དམ་པར་གཟུང་འཛིན་དག་བྱའི་ཁམས་རྣམས་མ་ལུས་པ་གཉིས་སུ་མེད་པའི་ཡེ་ཤེས་སུ་བྱང་ཆུབ་པས། འཇིག་རྟེན་ན་ཟླ་བ་སྒྲ་གཅན་གྱིས་བཟུང་། སྒྲ་གཅན་ཟིན་དང་ཀུན་དགའ་བོ་ཡང་བཙས་སོ། །སངས་རྒྱས་པའི་ཞག་བདུན་ཕྲག་བདུན་པ་ལ་ཚོང་དཔོན་ག་གོན་དང་བཟང་སྐྱོང་གིས་སྦྲང་རྩི་ཕུལ་བ། རྒྱལ་ཆེན་བཞིས་རིན་པོ་ཆེ་ནས་རྡོ་བའི་བར་གྱི་ལྷུང་བཟེད་ཕུལ་བ་ལས། རབ་བྱུང་གི་ཆས་ཡིན་པ་དོར་ཏེ་ཐ་མའི་སྣོད་དུ་བཞེས་ནས་ཤིས་པ་བརྗོད་པ་གསུངས། བདུད་རྩི་ཟབ་མོ་རྟོག་གེའི་སྤྱོད་ཡུལ་མ་ཡིན་པར་སྟོན་པའི་སླད་དུ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་འདུག་པས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ཏེ་འཁོར་ལོ་བསྐུལ་བའི་བསོད་ནམས་ཀྱི་ཁྱད་པར་ལའང་དགོངས་པ་མཛད་དོ། །དེར་ཚངས་པས་སྔོན་གྱི་སྨོན་ལམ་རྗེས་སུ་དྲན་ཏེ་དེ་བཞིན་གཤེགས་པའི་དྲུང་དུ་འོངས་ནས། སྨྲ་བའི་ཉི་མ་ཅི་སླད་དེ་རིང་བཏང་སྙོམས་བཞུགས། དམ་པའི་ཆོས་ཀྱི་རྔ་བོ་ཆེ་ནི་བརྡུང་དུ་གསོལ། །དམ་པའི་ཆོས་ཀྱི་དུང་ནི་རབ་ཏུ་འབུད་དུ་གསོལ། །ལ་སོགས་པའི་ཚིགས་སུ་བཅད་པས་བསྐུལ་ཏེ་ཙནྡན་གྱི་ཕྱེ་མས་གཏོར་ནས་བརྒྱ་བྱིན་ཀྱང་སྦྲན་པའི་སླད་དུ་རང་གི་གནས་སུ་སོང་ངོ། །སོང་ནས་ཀྱང་སླར་བརྒྱ་བྱིན་དང་བཅས་ཏེ། དེས་ནོར་བུ་རིན་པོ་ཆེ་ཕུལ་ནས། ཟླ་བ་ཉ་བ་གཟའ་ལས་ཐར་བ་ལྟར། །ཐུབ་པ་ཁྱོད་ཀྱི་ཐུགས་ནི་རྣམ་པར་གྲོལ། །
གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཞེས་ཞུས་པས་མ་གནང་། སླར་ཚངས་པས་ཡང་ཡང་བསྐུལ་ན་བསོད་ནམས་ཀྱི་ཚོགས་ཆེན་པོར་དགོངས་པར་རི་གནས། གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཏེ་སྔོན་ཆད་མ་ག་དྷཱ་ར་དྲི་མ་དང་བཅས་པའི་ཆོས་ཀྱིས་ནོངས་པའི་མཚན་ཉིད་ཤེས་པའི་ཚིགས་སུ་བཅད་པས་བསྐུལ་བས་འཁོར་ལོ་བཞེས་ཏེ་བཀའ་སྩལ་པ། ཚངས་པ་མ་ག་དྷཱ་ཡི་སེམས་ཅན་གང་། །རྣ་བར་ལྡན་ཞིང་དད་དང་ཤེས་རབ་ལྡན། །མི་འཚེ་འདུ་ཤེས་རྟག་ཏུ་ཆོས་ཉན་པ། །དེ་དག་ལ་ནི་བདུད་རྩིའི་སྒོ་དབྱེའོ། །ཞེས་གསུངས་པའི་སྐད་ཅིག་མར། དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བར་གནང་ངོ་ཞེས་པའི་སྒྲ་འོག་མིན་གྱི་བར་དུ་ཐོས་ཏེ་རང་རང་ལ་མངའ་བའི་མཆོད་པའི་ཚོགས་དང་བཅས་ཏེ་ལྷགས་སོ། །དེར་བདུད་རྩི་ཟབ་མོའི་སྣོད་ཀྱི་དང་པོ་འགྱུར་བ་ནི། གདུལ་སླ་བ། སྦྱང་སླ་བ། རྣམ་པར་ཤེས་པ་ལྐོག་ཏུ་མ་གྱུར་བ། ་ཞིག་ལ་དགོངས་མོད་ཀྱི། དེ་ནི་རིང་འཕུར་དང་ལྷག་སྤྱོད་དུ་མཁྱེན་ཀྱང་འཚོ་བའི་འདུ་བྱེད་ལས་ཐལ་ལོ། །འདི་ན་སྔོན་གྱི་སྨོན་ལམ་རྗེས་སུ་དྲན་པས་ལྔ་སྡེ་བཟང་པོ་ལ་གཟིགས་ཏེ་ཝཱ་ར་ཎ་སཱིར་གཤེགས་པ་ན། དགེ་སྦྱོང་གོའུ་ར་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་ཞེས་སུན་ཕྱུང་ནས་ལྔ་སྡེ་རྣམས་ཀྱིས་མི་འདུད་པའི་ཁྲིམས་བཅས་སོ། །དར་ལམ་དུ་བྲམ་ཟེ་ཉེ་བར་འཚོ་ཞེས་བྱ་བ་མ་བརྟགས་ཤིང་བབ་ཅོལ་དུ་སྨྲ་བ་དེ་ན་རེ། གཽ་ཏ་མ་ཁྱོད་ཀྱིས་སུ་ལ་ཚངས་པར་སྤྱད། བཀའ་སྩལ་པ། ང་ལམཁན་པོ་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུར་རྫོགས་སངས་རྒྱས། །བསིལ་གྱུར་ཟག་པ་ཟད་པ་ཡིན། །ཞེས་པ་ལ་སོགས་པའི་དྲི་ལན་རྣམ་པ་གསུམ་བསྩལ་ནས་ཝཱ་རཱ་ཎ་སཱིར་བྱོན་པ་ན། ཉི་མའི་འོད་ཀྱིས་རྒྱུ་སྐར་ལ་བྱ་བ་བཞིན་དུ་ལྔ་སྡེ་བཟང་པོའི་ཁྲིམས་སུ་བཅས་པ་རང་ཞིག། ཚེ་དང་ལྡན་པ་གཽ་ཏ་མ་དབང་པོ་ནི་གསལ་ལ་པགས་པ་ཡོངས་སུ་དག་ན་ཡེ་ཤེས་
མཐོང་བའི་ཁྱད་པར་མངོན་དུ་མཛད་དམ་ཞེས་སྤྱོད་ཡུལ་མཉམ་པར་བལྟ་བ་ལ། ཁྱོད་དེ་བཞིན་གཤེགས་པ་ལ་ཚེ་དང་ལྡན་པ་མ་ཟེར་ཅིག། ཡུན་རིང་པོར་མི་བདེ་བར་གྱུར་ཏ་རེ། ངས་ནི་བདུད་རྩི་ཐོབ་བོ། །སངས་རྒྱས་སོ། །ཐམས་ཅད་མཁྱེན་པའོ། །ཞེས་ལྗོངས་པའི་གནས་གང་ཡིན་པ་མངོན་དུ་བསལ། ས་ཕྱོགས་དེར་རིན་པོ་ཆེའི་ཁྲི་སྟོང་བྱུང་བའི་འདས་པའི་སངས་རྒྱས་གསུམ་གྱི་ཁྲི་ལ་གུས་པས་བཏུང་དེ་བཞི་པའི་སྟེང་དུ་ལྷམ་མེར་བཞུགས་པའི་མོད་ལ་གཞན་རྣམས་སྣང་བ་མེད་པར་གྱུར། སྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ་མཐའ་གཉིས་སྤངས་ནས་དབུ་མའི་ལམ་གྱི་བདེན་པ་བཞིའི་ཆོས་འཁོར་ལན་གསུམ་དུ་ཟློས་པ་རྣམ་པར་ཅུ་གཉིས་སུ་བསྐོར་བས། ལྔ་སྡེ་བཟང་པོ་རང་བྱུང་གི་བསྙེན་པར་རྫོགས་ཏེ། འཇིག་རྟེན་ན་གདུགས་ཟླ་མེད་པའི་དགེ་སློང་གི་དགེ་འདུན་ཆེན་པོར་གྱུར་ཅིང་འཁོར་ཐམས་ཅད་ཀྱིས་བདེན་པ་མཐོང་། དེའང་འདུལ་བའི་སྡེ་སྣོད་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་ལས་བརྩམས་ཏེ། འདུལ་བའི་འདུལ་བ་བཅས་པ་དང་རང་བཞིན་གྱི་རྣམ་པར་གཞག་པ་རྣམས་དང་། འདུལ་བའི་མདོ་སྡེ་ཏིང་ངེ་འཛིན་དང་ཚངས་པར་མཚུངས་སྤྱོད་རྣལ་འབྱོར་དུ་བྱ་བའི་རིམ་པ། འདུལ་བའི་མངོན་པ་དེ་དག་གི་རབ་དབྱེ་རྒྱ་ཆེར་བཤད་པ་ལ་སོགས་སོ། །དེ་ནས་གནས་ཕུན་སུམ་ཚོགས་པ་བྱ་རྒོད་ཕུང་པོའི་རི་ལ། ཤཱ་རིའི་བུ་དང་མཽངྒལ་གྱི་བུ་ལ་སོགས་པ་དགྲ་བཅོམ་པ་ལྔ་སྟོང་ཙམ་དང་། སྐྱེ་དགུའི་བདག་མོ་ལ་སོགས་པ་དགེ་སློང་མ་ལྔ་བརྒྱ་ཙམ་དང་། མགོན་མེད་ཟས་སྦྱིན་དང་དགེ་བསྙེན་མས་ག་ལ་སོགས་པའི་དགེ་བསྙེན་ཕོ་མོའི་ཚོགས་དང་། ལྷ་དང་ཀླུ་དང་དྲི་ཟ་ལ་སོགས་པ་རབ་ཏུ་མང་པོ་སྟེ་ཐུན་མོང་གི་འཁོར་རྣམ་པ་བཞི། ཐུན་མོང་མ་ཡིན་པའི་འཁོར་ས་ཆེན་པོ་རབ་ཏུ་འཐོབ་པའི་བྱང་ཆུབ་སེམས་དཔའ་བཟང་སྐྱོད་དང་། རིན་ཆེན་འབྱུང་ལྡན་དང་། དྲྭ་བ་སྦྱིན་ལ་སོགས་པ་རབ་ཏུ་མང་པོ་རྣམས་ལ་བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་
བསྐོར་རོ། །དེའང་མདོ་སྡེའི་སྡེ་སྣོད་གཙོ་བོར་སེམས་ཀྱི་བསླབ་པ་སྟོན་པ་ལས། མདོ་སྡེའི་འདུལ་བ་བྱང་ཆུབ་སེམས་དཔའི་སྡོམ་པའི་ཚོམས་རྣམ་པར་གཞག་པ་དང་། མདོ་སྡེའི་མདོ་སྡེ་ཟབ་ཅིང་རྒྱ་ཆེ་བའི་ཏིང་ངེ་འཛིན་དང་། མདོ་སྡེའི་མངོན་པས་དང་ལམ་དང་གཟུངས་དང་ཏིང་ངེ་འཛིན་གྱི་རབ་ཏུ་དབྱེ་བ་ཇི་སྙེད་པ་དག་གོ། ལྷའི་གནས་དང་ཀླུའི་གནས་ངེས་པ་མེད་པར། དགེ་སློང་དང་། དགེ་སློང་མ་དང་། ལྷ་དང་། ཀླུ་དང་། བྱང་ཆུབ་སེམས་དཔའ་གྲངས་མེད་པ་ལ་བཀའ་ཐ་མ་ངེས་པ་དོན་གྱི་ཆོས་འཁོར་བསྐོར་ཏེ། དེའང་མངོན་པའི་མདོ་སྡེ་སྣོད་ལྷག་པ་ཤེས་རབ་ཀྱི་བསླང་བ་གཙོ་བོར་སྟོན་པ་ལས། མངོན་པའི་འདུལ་བ་ཚོགས་ཆུང་ཞིང་སླ་བའི་ཐབས་ཀྱིས་ཉོན་མོངས་པ་འདུལ་བ་རྣམས་དང་། མངོན་པའི་མདོ་སྡེ་དེ་ཁོ་ན་ཉིད་ལ་འཇུག་པའི་ཚུལ། མངོན་པའི་མངོན་པ་ཕུང་པོ་དང་། ཁམས་དང་། སྐྱེ་མཆེད་དང་། དབང་པ་དང་། རྣམ་པར་ཤེས་པ་དང་། དེ་བཞིན་གཤེགས་པའི་སྙིང་པོའི་ཁམས་རང་བཞིན་གྱིས་རྣམ་པར་དག་པའི་རབ་ཏུ་དབྱེ་བ་ཆ་དང་བཅས་པའོ། །དེ་དག་ཀྱང་མདོ་སྡེ་ཡོན་ཏན་བཀོད་པ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བདག་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏོ། །དུས་གཅིག་ཉིད་དུ་འཇུག་པ་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམས་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་དབང་པོའི་རིམ་པས་འཁོར་ལོ་གསུམ་ཅིག་ཅར་དུ་ཐོས་པ་དང་། རིམ་གྱིས་འཇུག་པའི་ལས་ཅན་རྣམས་ལ་རིམ་པས་ཐོས་པ་གསུང་སྒྲ་ཚིག་རང་ཚན་ལས་འདས་པས་ཁྱད་ཆོས་ཡིན་ནོ། །ཚུལ་འདིས་ནི་རྒྱལ་བའི་ཕྲིན་ལས་ཚད་མེད་པའི་ཆོས་ཀྱི་སྒོ་དང་། ཐེག་པའི་རྣམ་གྲངས་དང་། གདུལ་བའི་ཐབས་ཚུལ་དང་། དུས་སྔ་ཕྱི་ལ་སོགས་པ་བསམ་པར་མི་ནུས་པའི་གོ་བ་ཡང་དག་བསླངས་པ་ཉིད་དོ། །དེ་ལྟ་བུའི་ཐེག་པ་གསུམ་དང་བཅས་པའི་ཆོས་ཚུལ་རྒྱ་མཚོ་ཚད་མེད་པས། ལ་ལ་ལམ་དང་འབྲས་བུའི་ཆོས་ལ་བཀོད། །ལ་ལ་ནི་ལྷ་དང་
མིའི་བདེ་བ་ལ་བཀོད། ལ་ལ་ནི་གནས་སྐབས་ཀྱི་འཇིགས་པ་ཆེན་པོ་ལས་བསྒྲལ་ཞིང་སྐྱོ་བས། མདོར་ན་ཆོ་འཕྲུལ་ཆེན་པོ་ལ་སོགས་པའི་ཕྲིན་ལས་ཀྱི་རོལ་བ་ཚད་མེད་པས་མཐོང་བ་དང་། ཐོས་པ་དང་། རེག་པ་དང་། དྲན་པ་ཡན་ཆོད་ཀྱི་སེམས་ཅན་ཐམས་ཅད་ལ་ཐར་བ་དང་ཐམས་ཅད་མཁྱེན་པའི་ས་བོན་གསེར་འགྱུར་རྩིའི་འཁྲུལ་འཁོར་ལྟ་བུ་ནི་བཏབ། དངོས་ཀྱི་གདུལ་བར་བྱ་བ་དྲི་ཟ་རབ་དགའ་དང་། ཀུན་ཏུ་རྒྱུ་རབ་བཟང་ཡན་ཆོད་ཐབས་ལ་མཁས་པ་དང་། ཐུགས་རྗེ་ཆེན་པོའི་མུ་ཁྱུད་ཀྱི་ར་བའི་ཁོངས་སུ་ཆུད་པར་མཛད་ནས་གྲོང་ཁྱེར་རྩྭ་ཅན་དུ་ཐ་མའི་མཛད་པ་ལ་དགོངས་ནས་གཤེགས་སོ། །དེར་མཐོང་ན་མི་མཐུན་པ་མེད་པའི་སྐུ་ནི་ཅ་ཅོ་དང་གཞར་མ་ཡིན། གླལ་བ་ལ་སོགས་པའི་ཐ་མལ་གྱི་ཆོས་ཡོངས་སུ་སྤངས་པ་ཞིག་ལ། དཔལ་གྱི་མགུར་ལས་སྤྲིད་པ་ཞིག་ཐོན་པ་སྐྱེ་དགུའི་བདག་མོའི་རྣ་བར་གཟེན་པར་གྱུར་ནས། སངས་རྒྱས་བསྐལ་པ་གྲངས་མེད་པ་གསུམ་དུ་བཞུགས་པར་གྱུར་ཅིག་ཅེས་སྨོན་ལམ་བཏབ་པས། །ས་བླབ་ནས་འོག་མིན་གྱི་བར་དུ་འགྲེམས་པ་བཞིན་དུ་ཐོས་ནས་དེ་དག་ཀྱང་དེ་བཞིན་དུ་སྨོན་ནོ། །དེར་སྐྱེ་དགུའི་བདག་མོ་ལ་ཁྱོད་ཀྱིས་མ་ལེགས་པ་བྱས། བསྟན་པ་ཡུན་རིང་དུ་གནས་པར་གྱུར་ཅིག་མི་ཟེར་བར། སྐྱེས་བུ་ལེ་ལོ་ཅན་མང་པོ་ཆོས་བསྒྲུབ་པའི་གེགས་སུ་གྱུར་གསུངས་པས། བཟོད་པར་གསོལ་བའི་སླད་དུ་དེ་དགྲ་བཅོམ་མ་ལྔ་བརྒྱ་དང་བཅས་མྱ་ངན་ལས་འདས་སོ། །དེའི་ཚེ་མཆོག་ཟུང་གི་དམྱལ་བའི་གནས་པ་ལྟར་བྱོན་པ་ན། མུ་སྟེགས་བྱེད་ཀྱི་སློབ་དཔོན་དང་མཁན་པོ་རྣམས་ཀྱང་ལས་ཀྱི་འབྲས་བུ་ལ་སྤྱོད་དོ། །རང་གི་གྲུབ་པའི་མཐས་ནོངས་པའི་ཚུལ་རྗེས་སུ་འཇུག་པ་དག་ལའང་འཕྲིན་དུ་བྱས་པ་སྔོན་ལ་ཤཱ་རིའི་བུས་བསྐྱར་བ་ཤ་འཁོན་མེད་པས་མ་ཐོས། ཕྱི་ནས་མཽངྒལ་གྱི་བུས་ཁྱོད་ཅག་གི་སློབ་དཔོན་ནི་མནར་མེད་པའི་དམྱལ་བ་ན་ཉམ་ཉེས་པར་གྱུར་ནས་འཕྲིན་འདི་ལྟར་བརྫངས་སོ་ཞེས་
སྨྲས་པ་ན། འདིའུ་ཅག་ལ་སྨྲ་བར་མ་ཟད་མཁན་པོ་དང་སློབ་དཔོན་ལའང་སྨྲ་བར་བྱེད་པས་ཆོམས་ཤིག་ཅེས་སྐུ་ལུས་འདམ་བུ་བཅོམ་པ་ལྟར་བརྡུངས་སོ། །དེར་ཤཱ་རིའི་བུས་ཆོས་གོས་ཀྱི་གྲར་གཏུམས་ཏེ་ཁུར་ནས་གྲོང་ཁྱེར་ཤིང་ཐག་ཅན་དུ་བསྐྱལ། མི་འཚོ་བར་ཤེས་ནས་གྲོགས་པོ་འཆི་བ་ཐོས་པར་ཡང་མི་བྱ་ན། མཐོང་བ་ལྟ་ཅི་སྨོས་ཀྱང་ཅི་དགོས་ཞེས་དཔལ་ན་ལེནྡར་སོང་ནས་དེའི་སྔ་དྲོ་དགྲ་བཅོམ་པ་བཞི་སྟོང་དང་བཅས་མྱ་ངན་ལས་འདས་སོ། །དེའི་ཕྱི་དྲོ་མོངྒལ་གྱི་བུ་དགྲ་བཅོམ་པ་བཞི་བརྒྱ་དང་བཅས་མྱ་ངན་ལས་འདས་སོ། །གཞན་ཡང་དགྲ་བཅོམ་པ་མང་པོ་བུད་ཤིང་ཟད་པའི་མེ་ལྟར་མྱ་ངན་ལས་འདས་སོ། །དེ་ནས་སངས་རྒྱས་ཀྱི་བསྟན་པ་འཁོར་རྣམ་བཞི་དང་བཅས་པ་གནས་བརྟན་འོད་སྲུངས་ཆེན་པོ་ལ་གཏད་དེ། སྐུའི་སྟོང་གཡོགས་བསལ་ནས། དགེ་སློང་དག་དེ་བཞིན་གཤེགས་པའི་སྐུ་ལ་ལྟོས་ཤིག། དེ་བཞིན་གཤེགས་པ་ལ་བལྟ་བ་ནི་རྙེད་པར་དཀའ་སྟེ་ཨུ་དུམ་ཝཱ་ར་བཞིན་ནོ། །དགེ་སློང་དག་ཅང་མ་སྨྲ་ཞིག་དང་། འདི་ལྟར་འདུས་བྱས་ཐམས་ཅད་ནི་འཇིག་པའི་ཆོས་ཅན་ནོ། །ཞེས་ངེས་པར་འབྱུང་བའི་རྒྱུས་གདུལ་བྱ་ལེ་ལོ་ཅན་ཆོས་ལ་བསྐུལ་ནས་ཤིང་སཱ་ལ་ཟུང་གཅིག་གི་སར་དགོངས་པ་ཡོངས་སུ་མྱ་ངན་ལས་འདས་སོ། །དེར་འོད་སྲུངས་ཆེན་པོ་ཀླུ་ཡུལ་ནས་བྱོན། །གདུང་ལ་གསོལ་བ་བཏབ་པས་ཞུགས་རང་འབར་ཏེ་སྐུ་གདུང་བསིལ་བུར་གྱུར། རང་རང་གི་སྐལ་བའི་ཁྱད་པར་དང་འཚམས་པར་ཆ་བརྒྱད་དུ་བགོས་པ་མཆོད་རྟེན་གྱི་སྙིང་པོར་བྱས་སོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། སྟོན་པ་འཇིག་རྟེན་དུ་བྱོན་ཚུལ་གླེངས་པའི་རབ་ཏུ་བྱེད་པ་སྟེ་དང་པོའོ།། །།
འཕགས་པའི་ཡུལ་དུ་སྤྱིར་གྲགས་པའི་བསྟན་སྐྱོང་ཆེན་པོ་དག་ལས་རྒྱན་དྲུག་མཆོག་གཉིས་ལ་སོགས་པའི་རྣམ་ཐར་སྨྲོས་པའི་རབ་ཏུ་བྱེད་པ་སྟེ་གཉིས་པ
སྤྱི་དོན་གཉིས་པ་དེའི་བསྟན་པ་འཕགས་པའི་་ཡུལ་དུ་རྩ་བ་ཇི་ལྟར་ཚུགས་པ་ནི། འཆད་པར་འགྱུར་བའི་བསྟན་སྐྱོང་ཆེན་པོ་རྣམས་ཀྱི་བདག་པོའི་རྐྱེན་
ལས་རྒྱུ་དང་འབྲས་བུའི་ཐེག་པ་མཐའ་ཀླས་པ་ཉིད། སྔོན་དང་ད་ལྟ་ཕྱི་མའི་མུར་ཐུག་གི་བར་གནས་ཤིང་འཕེལ་བར་མཛད་པ་སྟེ། དེའི་ངེས་པའང་། ལེགས་པར་གསུངས་པའི་བཀའ་ལ་བཤད་སྒྲུབ་བྱེད་པ་དང་། དེའི་དོན་མ་ནོར་བ་འཆོས་སྐྱོ་བ་གཉིས་ཀྱི་དོན་དང་ལྡན་པར་འགྲེལ་ཞིང་། གཞན་ལ་འདོམས་པའི་ཕྲིན་ལས་ཚད་མེད་པའི་དབང་གིས་ཡིན་ནོ། །དེ་སྐད་དུའང་། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཅེས་སོ། །གང་གི་ཚེ་རྒྱལ་ཚབ་འོད་སྲུངས་ཆེན་པོ་ལ་སྟོན་པས་བསྟན་པ་ལེགས་པར་གཏད། དེས་ཀྱང་འཁོར་རྣམ་པ་བཞི་བསྐྱངས། ཀུན་དགའ་བོའི་སེམས་ཀྱི་དྲི་མའི་ཆ་ཤས་སྤྱོ་བ་བདུན་དང་བཅས་པས་བསལ། བཀའི་བསྡུ་བ་དང་པོར་བྱས་པའི་ཚེ་ལྷ་དང་མིའི་འཇིག་རྟེན་ཐམས་ཅད་ནི་བདེ། རྒྱལ་པོ་མ་སྐྱེས་དགྲར་གྲགས་པ་ཡང་སྔོན་གྱི་བསོད་ནམས་ཀྱི་འབྲས་བུ་ལ་རང་དབང་དུ་སྤྱོད། སྟོན་པའི་བསྟན་པ་སློབ་མ་དང་བཅས་པ་ལ་གཅིག་ཏུ་གུས་པས་ཕྱི་མའི་བསོད་ནམས་ལ་འདུན་པ་དེའི་ཚེ། རྒྱལ་ཚབ་འོད་སྲུངས་ཆེན་པོས་ཀྱང་ཀུན་དགའ་བོ་ལ་བསྟན་པ་གཏད་ནས་རི་བོ་བྱ་བག་རྐང་ཅན་དུ་སྐུ་གདུང་མི་འཇིག་པར་བྱིན་གྱིས་བརླབས་ནས་མྱ་ངན་ལས་འདས་སོ། །དེར་སྐྱེ་བོ་ཐམས་ཅད་ཀྱང་སྐྱོ་བ་རབ་ཏུ་བསྐུལ་བར་གྱུར་ཏེ། སྟོན་པའི་ཞལ་མཐོང་བའི་དགེ་སློང་སོ་སོ་སྐྱེ་བོ་དག་ནི། སངས་རྒྱས་བཞུགས་པའི་ཚེ་བདག་ཅག་བག་མེད་པར་འཁྱམས་པས་ཁྱད་པར་མ་ཐོབ་བོ་ཞེས་ཡིད་འབྱུང་བས་ཏིང་ངེ་འཛིན་དང་བསླབ་པའི་གནས་ལ་ཤིན་ཏུ་བརྩོན་པར་བྱེད། འཕགས་པ་སློབ་པ་རྣམས་ཀྱང་དེ་བཞིན་ནོ། །སྟོན་པའི་ཞལ་མ་མཐོང་བའི་དགེ་སློང་གསར་བུ་དག་ནི་བདག་ཅག་སྟོན་པའི་ཞལ་མཐོང་བ་ལས་ནི་རིང་དུ་གྱུར། དངོས་སུ་འདོམས་པར་བྱེད་པའང་མཐུ་ཆུང་གིས། བརྩོན་པ་རབ་ཏུ་མ་བསྐྱེད་
ན་རྣམ་པར་འཁྱམས་པར་འགྱུར་རོ་སྙམ་ནས་དགེ་བའི་ཕྱོགས་པ་ཤིན་ཏུ་བརྩོན་པས། འབྲས་བུ་ཐོབ་པ་ཉིན་རེ་བཞིན་ཡང་འཕེལ་བར་གྱུར་ཏོ་ཞེས་གྲགས་སོ། །དེའི་ཚེ་འཕགས་པ་ཀུན་དགའ་བོ་དགེ་སློང་གི་དགེ་འདུན་དང་བཅས་པ་འོད་མའི་ཚལ་ལ་སོགས་པར་བཞུགས་ནས། སྐྱེ་བོའི་ཚོགས་མང་པོ་འབྲས་བུ་རྣམ་པ་བཞི་ལ་བཀོད་པས་འཕགས་པ་ཀུན་དགའ་བོ་ནི་སྟོན་པ་དང་མཚུངས་པའི་ཉན་ཐོས་སོ་ཞེས་ལྷ་དང་མིའི་འཇིག་རྟེན་ན་སྒྲོག་པར་བྱེད་དོ། །རེ་ཞིག་ན་དེད་དཔོན་གྱི་བུ་ཤནའི་གོས་དང་བཅས་བཙས་པ་ཤ་ནའི་གོས་ཅན་དུ་གྲགས་པ་འཕགས་པས་རབ་ཏུ་བྱུང་བར་བསྐུལ་བ་ཐོས་པ་འཛིན་པའི་རྩེ་མོར་གྱུར་བ་ལ་བསྟན་པ་གཏད། རིམ་བཞིན་ཡོངས་སུ་གྲགས་པ་ལུང་ཕྲན་ཚེགས་ཀྱི་བཞེད་པ་བཞིནལེགས་མཐོང་གི་བར་གྱིས་གཏད་རབས་བདུན་ནམ། ཁ་ཆེ་ཕ་རྣམས་ཀྱིས་འདོད་པས་བརྒྱད། ལངྐར་གཤེགས་པའི་འགྲེལ་བ་ལས་དེ་དང་མི་མཐུན་པར་བཤད་ཅིང་། གཏད་རབས་བདུན་ནི་སྟོན་པའི་བསྟན་པ་ལ་བྱ་བརླབས་པོ་ཆེ་འགྲན་ཟླ་སྤངས་པ་ཉིད་དོ། །གཞན་ཡང་ནཱ་རོ་ཏ་བས་དཔལ་དཱི་བཾ་ཀར་ལ་གཏད་པ་ཡན་ཆད་ཀྱི་གཏམ་དུ་གྱུར་བ་དང་ཕྱི་ནས་ཀྱང་མ་ག་དྷཱའི་པཎྜི་ཏས་དབང་བཟང་པོ་དང་དབང་པོས་བྱིན། བྲམ་ཟེའི་པཎྜི་ཏ་བྷ་ཊཱ་ག་ཊི་གསུམ་གྱིས་བྱས་པའི་རྒྱ་གར་གྱི་གཏམ་རྒྱུད་ཐ་དད་པ་དང་། མཁས་པའི་དག་བགྲོས་མང་དུ་བསྣན་པ་དག་ལས་བྱུང་བའི་ཡི་གེ་ངོ་མཚར་གྱི་གཏམ་དུ་སྣང་བདག་ཀྱང་ཡོད་མོད་ཀྱིས་ཐམས་ཅད་བྲི་བར་མ་ནུས་པས་བསྟན་པའི་རྩ་ལག་ཆེན་པོར་གྱུར་བ་དེ་དག་ལ་དད་པ་བླ་ལྷག་ཏུ་བསྐྱེད་པར་བྱས་ནས། འདིར་རེ་ཞིག་ཉན་ཐོས་ཀྱི་བསྟན་པ་ལའང་ཕན་པ་རྒྱ་ཆེན་པོ་བཏགས། ཁྱད་པར་དུ་བློ་མཆོག་རྣམས་ཀྱི་སྤྱོད་ཡུལ་ཐེག་པ་ཆེན་པོའི་གཞུང་ལུགས་གསལ་བར་མཛད་ཅིང་། གང་ཞིག་སངས་རྒྱས་ཀྱི་བསྟན་པ་ལ་དགྲ་ཟླར་ཆས་པའི་འོད་སྲུངས་རྫོགས་བྱེད་ཀྱི་རྗེས་འབྲང་རྟོག་གེ་བ་དྲུག། བྲམ་ཟེ་རྒྱུས་རྒལ་ལ་སོགས་པའི་གཞུང་འཛིན་རྗེས་སྒྲོག་པ་དྲུང་། །རེངས་བྱེད་ཀྱི་བུ་ལྷག་སྤྱོད་ལ་སོགས་པའི་རྗེས་འབྲང་སྙོམས་འཇུག་པ་
དྲུག་སྟེ། འཇིག་ཚོགས་པ་ལྟ་གསུམ་བརྒྱ་དྲུག་ཅུའི་ཚེར་མ་རྣོན་པོས། རྫོགས་པའི་སངས་རྒྱས་ཀྱི་བསྟན་པ་ལ་འབུགས་པར་རྩོམ་པའི་སྙིང་སྟོབས་དང་ལོག་པའི་བློ་གྲོས་མ་རྨོངས་པ་གང་དང་། །མེ་བཞིན་དུ་གདོན་མི་ཟ་བར་བསྲེག་བྱ་ཟ་བ་ཚད་མའི་རིག་པ་དང་། རླུང་བཞིན་དུ་ཐོགས་རྡུགས་སྤངས་པའི་རྫུ་འཕྲུལ་གྱི་ནུས་པ་ཟད་མི་ཤེས་པའི་མཐུས་སྤ་བཀོད་པར་བྱས། ཉམས་སྨད་པར་བྱས། ཚར་བཅད་པར་བྱས་ནས། སངས་རྒྱས་ཀྱི་བསྟན་པ་ལ་སྟོན་པ་གཉིས་པའི་བྱ་བ་བྱས་པས་འཛམ་བུའི་གླིང་གི་རྒྱན་དྲུག་དང་། རྨད་བྱུང་གཉིས། ཆེན་པོ་བཞི་ཞེས་ཉི་མ་དང་ཟླ་བ་ལྟར་གྲགས་པ་དེ་དག་གི་རྟོགས་པ་བརྗོད་པས་མདུན་བསུས། སྤྱི་དང་བྱེ་བྲག་གི་བསྟན་པའི་ཉིན་མོར་བྱེད་པ་དག་གི་རྣམ་པར་ཐར་བ་ཅུང་ཟད་ཀྱང་བརྗོད་པའི་ལན་དུ་དྲང་བར་བྱའོ། །དེ་ལ་རེ་ཞིག་གི་དུས་ན་ཡུལ་ཙམྦ་ཨ་རྩ་ནས་བྱ་བར་ཉི་མའི་རིགས་ཀྱི་རྒྱལ་པོ་ནི་མི་རྟ་ཞེས་བྱ་བ་འབྱོར་བའི་དཔལ་དང་ལྡན་པ་ཞིག་ཡོད་དོ། །དུས་གཞན་ཞིག་ན་དེ་ཚོང་དཔོན་གྱི་ཆུང་མ་དང་འདུས་པ་ལས་སྦྲུམ་པར་གྱུར་ཅིང་། ནམ་ཞིག་རྒྱལ་པོའི་མདུས་ལས་ཡོལ་བའི་མྱ་ངན་བསལ་བའི་ཉིན་སྦྲུམ་པ་གང་ཞིག་བཙའ་བར་བྱས་པས། བུའི་མིང་མྱ་ངན་མེད་ཅེས་བྱ་བར་བཏགས་སོ། །དེ་ནི་དཔའ་བ། རྟུལ་ཕོད་པ། སྒྱུ་རྩལ་དྲུག་ཅུ་དང་། བརྟག་པ་བརྒྱད་ལ་བྱང་ཆུབ་པ། ཁྲོ་ཞིང་གཏུམ་པས་ཉིན་མོའི་དང་པོ་ལ་གསོད་པ་དང་། འཆིང་བ་དང་། བརྡེག་པ་ལ་སོགས་པ་ཆད་པས་གཅོདཔའི་བྱ་བ་རྣམས་མ་བྱས་པར་རྣམ་པར་ཤེས་པ་རྣལ་དུ་མི་ཕེབས་པས་ཁ་ཟས་ཀྱང་ཟ་བར་མི་བྱེད་ཅིང་། སྡིག་པའི་གྲོགས་པོའི་གཞན་དབང་ལས་སྲོག་གི་མཆོད་སྦྱིན་ལ་བརྩོན་པར་བྱེད་དོ། །དེ་རེ་ཞིག་ན་སྔོན་གྱི་སྨོན་ལམ་ལས་དགེ་བའི་བཤེས་གཉེན་གྱིས་ཟིན་པའི་དུས་ལ་བབས་པ་ན། དགྲ་བཅོམ་པ་གྲགས་པ་སློབ་མར་བཅས་པའི་ཐུགས་རྗེ་དང་རྫུ་འཕྲུལ་གྱིས་སྔར་གྱི་སྤྱོད་ཡུལ་ལས་ཤིན་ཏུ་ལྡོག་པར་གྱུར་ནས་སངས་རྒྱས་ཀྱི་བསྟན་པ་ལ་སྲི་ཞུ་འགྲན་ཟླ་མེད་པས་བཀའ་བསྡུ་བ་གཉིས་པའི་ཚེ་སྦྱིན་བདག་ཏུ་གྱུར་ཅིང་། བསྟན་
པའི་ཕྱོགས་སུ་རྒྱལ་སྲིད་གཏོང་བ་ལའང་འཇུངས་པ་དང་སེར་སྣ་སྤངས་པ་དེའི་རྒྱུད་ལས་བྱུང་བ་རྒྱལ་པོ་པདྨ་ཆེན་པོ་དང་དུས་མཉམ་པ་ལས་ཐོག་འཕྱི་བ་ཙམ་ན། ཡུལ་ཨོ་ཌི་བི་ཤར་རྒྱལ་པོ་ཟླ་བ་སྲུང་བ་ཞེས་བྱ་བ་བྱུང་ངོ། །དེའི་ཁྱིམ་དུ་འཕགས་པ་ལག་ན་རལ་གྲི་ཆོག་གོས་གསུམ་པའི་དངོས་པོ་ཅན་དུ་བྱོན་ནས། ཐེག་པ་ཆེན་པོའི་ཆོས་འགའ་ཞིག་བསྟན་ཅིང་གླེགས་བམ་ཞིག་ཀྱང་བཞག་པའདི་ནི་སྟོན་པ་མྱ་ངན་འདས་པའི་ཕྱི་ནས་ཐེག་པ་ཆེན་པོའི་བསྟན་པ་དབུ་བརྙེས་པའི་དང་པོ་ཡིན་ཞེས་གྲགས་སོ། །འདིའི་ཚེ་བསྡུ་བ་གསུམ་པའི་དུས་སུ་སྣང་ཞིང་རིམ་པར་ལྷ་དང་ཀླུ་དང་། དྲི་ཟ་དང་། སྲིན་པོའི་ཡུལ་ལ་སོགས་པ་ནས་འཕགས་པ་དཀོན་མཆོག་བརྩེགས་པ་ལ་སོགས་པའི་ཆོས་ཀྱི་རྣམ་གྲངས་མང་པོའི་གླེགས་བམ་ཡང་བྱོན། བྱམས་པ་དང་རིགས་གསུམ་སེམས་དཔའ་ལ་ཆོས་གསན་པའི་ཐེག་པ་ཆེན་པོའི་དགེ་སློང་མདོ་སྡེ་མང་པོ་འཛིན་པ། བློ་གྲོས་ཐོགས་པ་མེད་པ། རྫུ་འཕྲུལ་དང་མངོན་ཤེས་མངའ་བ། བཟོད་པ་ཐོབ་པ་ཤ་སྟག་ཅིག་ཅང་དུ་བྱུང་བས་སྙན་པའི་གྲགས་པ་ཀུན་ཏུ་ཁྱབ་པ་ན། ཉན་ཐོས་པ་རྣམས་དེའི་སྤྱོད་ཡུལ་དུ་མ་གྱུར་བས། ཐེག་པ་ཆེན་པོ་བཀའ་མ་ཡིན་ནོ་ཞེས་སྐུར་པ་འདེབས་པ་བྱུང་ནའང་། ཉི་མའི་འོད་ཀྱིས་འོད་གཞན་ལ་བྱ་བ་བཞིན་དུ་ཉན་ཐོས་སྟོང་ཕྲག་མང་པོའི་དབུས་ན་ཐེག་པ་ཆེན་པོ་པ་རེ་རེ་ཙམ་གནས་ཀྱང་ཟིལ་གྱིས་མི་ནོན་པའོ། །དེ་ལྟ་ནའང་བསྡུ་བ་གསུམ་པའི་དགོས་དོན་གྱི་གཙོ་བོར་སྨོས་པ་དགེ་སློང་ལྷ་ཆེན་པོའམ། བཟང་པོ་དོན་གཅིག་མིང་གི་རྣམ་གྲངས་སུ་འདོད་པ་དང་། ལྷ་ཆེན་ཤི་བའི་ཕྱི་ནས་བཟང་པོར་བྱུང་བར་སྨྲ་བའང་ཡོད་དེ། ཇི་ལྟར་ཡང་། དེ་མ་བྱུང་བ་ཕན་ཆོད་དུ། འབྲས་བུ་ཐོབ་པའང་ཉིན་རེ་བཞིན་འཕེལ་བར་བྱུང་ལ། དེས་བསྟན་པ་དཀྲུགས་པ་ཕྱིན་ཆད་ནས་དགེ་སློང་རྣམས་རྣལ་འབྱོར་ལ་མི་བརྩོན་པར་རྩོད་པའི་དོན་ཁོ་ན་སེམས་པར་བྱེད་པས་འབྲས་བུ་ཐོབ་པའང་ཤིན་ཏུ་ཉུང་བས་ཉན་ཐོས་པའི་བསྟན་པ་ནི་དར་ལམ་སྨིན་པ་དུས་དེ་ཙམ་ནས་ཡོད་ཅིང་། དེ་དག་གིས་ཐེག་ཆེན་པའི་ཕྱོགས་ལ་ཁ་ཟེར་བར་བྱེད་
པས། ཁྱབ་གདལ་དུ་མེད་ཅིང་བག་ལ་ཉལ་གྱི་ཚུལ་དུ་ཡོད་དོ།། །།གང་གི་ཚེ་ཆེན་པོ་བཞིའི་ཡ་གྱལ་དུ་གྱུར་བ་བྲམ་ཟེ་སྒྲ་གཅན་འཛིན་ནམ། གྲུབ་པའི་དབང་ཕྱུག་ཡོངས་ཀྱི་སྤྱི་མེས་སློབ་དཔོན་ཆེན་པོས་ར་ཧ་འཛམ། །བུའི་མའི་གླིང་དུ་བྲམ་ཟེའི་རིགས་ཀྱི་ལང་ཚོའི་མེ་ཏོར་ཡོངས་སུ་བཟུང་ནས། རིག་བྱད་ཡན་ལག་དང་བཅས་པ་དང་། རིག་པའི་གནས་ཆེན་པོ་བཅོ་བརྒྱད། བརྟག་པ་བརྒྱད་ལ་སོགས་པ་གཙུག་ལག་རྒྱ་མཚོའི་ཕ་རོལ་ཏུ་སོན་ནས་བྲམ་ཟེའི་ཁྱེའུ་ལྔ་བརྒྱ་ལགས་།།།།ཚིག་ག་བཟླབས་པ་ན་རྡོ་རྗེ་རྣལ་འབྱོར་མ་ཆད་འཚོང་མའི་རྣམ་པས་དམ་ཚིག་གི་བདུད་རྩི་སྩལ་བ་རྟོག་པ་མེད་པར་ལོངས་སྤྱད་དོ། །དེར་བྲམ་ཟེའི་རིགས་ལས་ཉམས་སོ་ཞེས་གྲགས་པ་ངན་པའི་ཐེམ་སྐས་ལ་དྲངས་ཏེ་སྨ་དབབ་པར་འདོད་པ་ན་སློབ་དཔོན་ནི་རེ་ཞིག་ནས་དཔལ་གྱི་རིག་ལ་བར་གསང་བའི་བདག་པོས་ཡེ་ཤེས་ཀྱི་དཀྱིལ་འཁོར་མངོན་སུམ་དུ་བསྟན་ནས། ལུང་ལེགས་པར་བྱིན་ཏེ་དངོས་གྲུབ་མཆོག་གི་ཤིང་རྟ་ལ་འཛེགས་པ་ཞིག་པོས། བྲམ་ཟེ་རྣམས་ལ་ཆང་སྐྱུག་པའི་སྦྱོར་བ་མཛད། མཚོའི་སྟེང་དུ་རྡོ་ཆེན་པོ་འཕངས་ཏེ། གལ་ཏེ་ངས་འཐུངས་ན་ནི་བྱིང་ཤིགཁྱོད་རྣམས་ཀྱིས་འཐུངས་ན་འཕྱ་བར་གྱུར་ཅིག། གསུངས་པས་འཕྱོ་བར་གྱུར་ཏོ། །དེ་ནས་རབ་ཏུ་བྱུང་བ་ནི་བསྟན་པ་ཐམས་ཅད་ཀྱི་རྩ་བའོ་སྙམ་དུ་ཤྲཱིན་ལེནྡྲར་བྱོན། འཕགས་པ་གནས་བརྟན་པའི་སྡེ་ལས་རབ་ཏུ་བྱུང་། དགེ་སློང་གི་དངོས་པོར་བསྒྲུབས་ནས་སྡེ་སྣོད་གསུམ་པ་ཆེས་མཆོག་ཏུ་གྱུར། གནས་དེ་ཉིད་དུ་དམ་པའི་ཆོས་འདུལ་བ་སྨྲ་བའི་མཁན་པོར་གྱུར་བར་གྲགས་ནའང་། ཐེག་པ་ཆེན་པོའི་མདོ་སྡེ་དར་རྒྱས་སུ་གྱུར་ཅིང་། བསྟན་པའི་བྱ་བ་རྒྱ་ཆེན་པོ་མཛད། ཕྱག་རྒྱ་ཆེན་པོའི་ཐབས་ཀྱི་ཉེ་རྒྱུ་ནི་སྤྲོས་པ་མེད་པར་རྗེས་སུ་བསྟན་པས་དེའི་རྗེས་སུ་སློབ་པར་བགྱིའོ་སྙམ་ནས་རབ་ཏུ་བྱུང་བའི་བརྟུལ་ཞུགས་ལ་ཞེན་པ་སྤངས། མདའ་འཚོང་གི་བུ་མོ་དངོས་གྲུབ་ཀྱི་རྟེན་དུ་ཉེ་བར་བཟུང་། མདའ་བསྲངས་པས་གནས་ལུགས་ཀྱི་ངོ་བོ་བརྡ་ཐབས་ཀྱིས་མཚོན་པའི་སྤྱོད་པར་ངོ་
འཕྲོད་ནས། ཡུལ་སྣ་ཚོགས་སུ་མདའ་མཁན་མཆོག་གི་ཆ་ལུགས་ཀྱིས་སྤྱོད་དོ། །དེར་རྒྱལ་པོ་ལ་སོགས་པ་སྐྱེ་བོ་མཐའ་ཡས་པས་འཕྱས་པས། ཀྱེ་ལགས་ང་ནི་བྲམ་ཟེ་སྟེ། །སྨྱིག་མཁན་མོ་དང་ལྷན་ཅིག་སྤྱོད། །རིགས་དང་རིགས་མིན་ངས་མ་མཐོང་། །ཞེས་པ་ལ་སོགས་དོ་ཧ་སྤྱོད་པའི་རྡོ་རྗེའི་རྒྱང་གླུ་རོལ་མོར་འཁྲོལ་བས། རྒྱལ་པོ་ལ་སོགས་པ་སྟོང་ཕྲག་ལྔ་མངོན་སུམ་པའི་གནས་ལུགས་ལ་སྦྱར། རིག་པ་འཛིན་པའི་ལུས་སུ་གྱུར་ནས་ནམ་མཁའ་ལ་འགྲོ་ཞིང་མཐར་མི་སྣང་བར་གྱུར་བས་ཕྱོགས་ཐམས་ཅད་ནི་གྲགས་པས་ཁྱབ། འགྲོ་བ་མང་པོའི་དོན་མཛད་ནས་སྐུ་ལུས་མ་སྤངས་པར་སངས་རྒྱས་ཀྱི་ཞིང་དུ་བཞུད་པར་གྲགས་པ་དང་། རྣམ་པ་གཅིག་ཏུ་ཡི་དྭགས་ཀྱི་དོན་དུ་རང་གི་ཕུར་སྦྱངས་པའི་དུད་པས་ཡི་དྭགས་ཀྱི་ཚོགས་མང་པོ་ལྷའི་འཇིག་རྟེན་དུ་སྐྱེ་བར་བྱིན་གྱིས་བརླབས། ངོ་བོ་ཉིད་ཕྱག་རྒྱ་ཆེན་པོའི་ཞིང་དུ་བཞུད་དོ་ཞེས་གྲགས་སོ།། །།དེ་ཉིད་ཀྱི་སློབ་མའི་གཙོ་བོར་གྱུར་ཅིང་སྟོན་པ་དྲང་སྲོང་ཆེན་པོར་ལུང་དུ་བསྟན་པའི་རྒྱལ་ཚབ་ཆེན་པོ་པ། འཛམ་གླིང་མཛེས་པའི་རྒྱན་གྱི་རྩེ་མོ། དཔལ་མགོན་འཕགས་པ་ཀླུ་སྒྲུབ་ནི། ཤྲཱི་པརྦ་ཏའི་ཤར་ཕྱོགས་གྲོང་ཁྱེར་བསོད་ནམས་དང་ལྡན་པའམ། ཡང་ན་ལྷོ་ཕྱོགས་བེདནྷའི་ཡུལ་དུ་བྲམ་ཟེའི་རིགས་སུ་སྦྱེ། །བའི་འཁྲི་ཤིང་བཟུང་། ལྟས་མཁན་རྣམས་ཀྱི་ངག་ལས་དགེ་སློང་བརྒྱ། བྲམ་ཟེ་བརྒྱ། ཕལ་པ་བརྒྱ་རྣམས་ལ་སྟོན་མོ་དྲངས་ན་རིམ་པས་ལོ་བདུན། ཟླ་བ་བདུན། ཞག་བདུན་དུ་འཚོ། དེ་ལས་ཐབས་མེད་ཟེར་བས་དེ་བཞིན་དུ་བྱས། དེ་རྣམས་རྫོགས་སུ་ཉེ་བ་ན། ཕ་མས་མ་བཟོད་དེ་ཡུལ་འཁྱམ་དུ་བཏང་བ་དཔལ་ལྡན་རྒྱུན་སྟེར་གྱི་དྲི་གཙང་ཁང་དུ་སློབ། མཁན་པོ་དྲི་མ་མེད་པའི་གཟིག་རྗིད་ཅན་དང་གཉིས་འཆད་པའང་ཡོད་ཀྱིས། ཕལ་ཆེར་མཐུན་པར་སྒྲ་གཅན་འཛིན་ལས་རབ་ཏུ་བྱུང་། རིག་པ་སྔགས་ཀྱི་དངོས་གྲུབ་བྱིན་པས་རིང་པོར་འཚོ་བའི་བརྟན་པ་ཐོབ། ཐེག་པ་ཆེ་ཆུང་གི་སྡེ་སྣོད་མཐའ་དག་དང་། ཤེས་
པར་བྱ་བའི་གནས་ལ་མི་མཁྱེན་བྱ་བ་ནི་སྤངས། རྒྱུད་སྡེ་མང་པོ་ལ་དབང་འབྱོར་ཞིང་བདེན་པའི་དོན་མངོན་སུམ་དུ་གཟིགས། བསྙེན་པར་རྫོགས་ནས་དགེ་སློང་དཔལ་ལྡན་ཞེས་བྱ་བའི་གྲགས་པའི་རྒྱལ་མཚན་ནི་བཟུང་། ན་ལེནྡྲའི་མཁན་པོར་བྱུང་ནས་དགེ་སློང་གི་དགེ་འདུན་བསླབ་པ་གསུམ་གྱི་རྒྱན་དང་ལྡན་པ་རྣམས་ནི་ལེགས་པར་བསྔགས་ཤིང་། དེ་ལས་ཅིག་ཤོས་སུ་གྱུར་བ་དག་ཀྲྀ་ཀིའི་རྨི་ལྟས་ལ་རང་དབང་དུ་སྤྱོད་པས་དབང་ཆེ་བར་ཡོད་པ་གནས་ལས་བསྐལ་པར་མཛད་པས་སྟོང་ཕྲག་བརྒྱད་ཙམ་བྱུང་བར་གྲགས། བསྟན་པ་ཆོས་བཞིན་དུ་བསྐྱངས། སྔོན་འཕགས་པ་ཉེར་སྤས་ཀྱིས་བསྟན་པ་སྐྱོང་བའི་མཇུག་ཙམ་ན་བྲམ་ཟེ་མོ་ཛབཞེས་བྱ་བ་ལ་བུ་གསུམ་ཡོད་པ་རང་རང་ལ་སྐྱབས་ཐ་དད་པ་ལས་ཆུང་བ་དགེ་བ་ནི་སངས་རྒྱས་ལ་མོས་པས། དེས་རྡོ་རྗེ་གདན་གྱི་དྲི་གཙང་ཁང་བཞེངས། རྟེན་བྱང་ཆུབ་ཆེན་པོ་བཞེངས་པའི་བཟོ་བོ་དང་། རྒྱུ་ཚོགས་རྣམས་སྟ་གོན་དུ་བྱས་ནས་ཞག་བདུན་གྱི་བར་དུ་སུ་ཡང་མ་འོང་ཞེས་བསྒོས་ནས་ནང་དུ་འདུག་པ་ན། དྲུག་པའི་ཉིན་མས་འོངས་ཏེ་སྒོ་བརྡུངས་སོ། །ཞག་དྲུག་ལས་མ་སོང་བས་ནངས་པར་སྒོ་དབྱེའོ་བྱས་པས། མ་ན་རེ། ང་དོ་ནུབ་འཆི་བ་ཡིན། ད་ལྟ་སའི་སྟེང་ན་སངས་རྒྱས་མཐོང་བ་ནི་ང་ལས་མེད། ཕྱིས་གཞན་གྱིས་སྐུ་གཟུགས་ཀྱི་རྣམ་པ་འདྲ་བ་དང་མི་འདྲ་བ་མི་ཤེས་སོ་ཟེར་བས་སྒོ་ཕྱེ། དེར་བཟོ་བོ་རྣམས་ནི་མི་སྣང་སྟེ་ལྷས་སྤྲུལ་པར་གྲགས། མས་ལོགས་པར་བརྟགས་ནས། འདི་ནི་རྣམ་པ་ཐམས་ཅད་ནས་སྟོན་པ་འདྲ་ན། འོད་་ཟེར་མི་སྤྲོ། ཆོས་མི་གསུང་། སྤྱོད་ལམ་གསུམ་མི་མཛད་པས་མི་འདྲ་བའི་ཁྱད་པར་རོ་ཟེར། གཞན་སངས་རྒྱས་དངོས་དང་འདྲ་བའི་སྐུ་གཟུགས་ཡིན་སྐད། ཞག་བདུན་མ་ལོན་པས་བཟོའི་ཁྱད་པར་ཅུང་ཟད་མ་གྲུབ་པ་ཞབས་གཡས་པའི་མཐེ་བོང་ངམ། དབུ་སྐྲ་གཡས་འཁྱིལ། ན་་བཟའ་དང་བ་སྤུ་སྐུ་ལ་མ་རེག་པ་རྣམས་འདོད་ཕྱོགས་ཐ་དད་པར་སྣང་། དེ་ལྟ་བུའི་གཙུག་
ལག་ཁང་ལ་སྲོག་ཆགས་ཀྱི་གནོད་པ་བསུང་བའི་ཕྱིར་རྡོ་རྗེའི་དྲ་མིག་གི་རབས་བསྐོར་བ་དང་། ཁ་ཅིག་བྱང་ཆུབ་ཤིང་ལ་གླང་པོ་ཆེའི་གནོད་པ་བསྲུང་ཕྱིར་དུ་འདོད། མུ་གེ་ཆེན་པོ་ལོ་བཅུ་གཉིས་སུ་བྱུང་བ་ན། མཁན་པོ་ནི་སྒྲུབ་པར་བཞུགས་པས་སྐབས་མ་འཚལ་བར་དགོངས། མག་དྷཱའི་ཡུལ་རྣམས་སྟོངས་པ་ཙམ་བྱུང་ཡང་། སེམས་ཅན་གྱི་ལས་སུ་གཟིགས་ནས། གསེར་འགྱུར་རྩིའི་སྦྱོར་བས་དགེ་འདུན་རྣམས་འཚོ་བས་མི་བྲེལ་བར་མཛད། སློབ་དཔོན་སྒྲུབ་པ་ཐོན་ནས་རྒྱུ་མཚན་དྲིས་ཤིང་ཞུས་པ་ན། ཁྱོད་ཀྱིས་མ་ལེགས་པ་བྱས། ཟན་གྱི་ཆད་འབེབས་པའི་ནུས་པ་ཡོད་པ་ལ། ཁྱོད་སེམས་ཅན་ལ་སྙིང་རྗེ་ཆུང་། བྱང་ཆུབ་སེམས་དཔའི་སྦྱོང་བ་དང་འགལ། སྡིག་སྤྱད་དུ་གཙུག་ལག་ཁང་བརྒྱ་རྩ་བརྒྱད། ལྷ་ཁང་སྟོང་། མཆོད་རྟེན་ཁྲི་ཕྲག་བཞེང་དགོས་གསུངས། དེའི་སླད་དུ་གནོད་སྦྱིན་ཛམྦྷ་ལ་ལས་ནོར་བླངས། ཀུ་རུ་ཀུ་ཝའི་རིག་སྔགས་གྲུབ་པས་ཀླུ་རྒྱལ་འཇོག་པོའི་བུ་མོ་བཀུག་པ་ན། ཆོས་གསུང་པའི་གྲར་བཟང་མོའི་རྣམ་པ་ཅན་གཉིས་འཁོར་མང་པོ་དང་བཅས་ནས་བྱུང་བས་ཙནྡན་ས་མཆོག་གི་དྲེས་དཔག་ཚད་ཙམ་ཁྱབ་པ་བྱུང་། དེའི་རྒྱུ་དྲིས་པས། ངེད་ནི་འཇོག་པོའི་བུ་མོ་ལགས་ཏེ་མི་གྲིབ་བསྲུང་བའི་སླད་དུ་ལུས་ལ་ཙནྡན་ས་མཆོག་གིས་བསྐུས་པའོ། །འོན་སྒྲོལ་མའི་སྐུ་བཞེད་པའི་སླད་དུ་ཙནྡན་ཡང་སྦྱིན་ཅིག། གཙུག་ལག་ཁང་བཞེང་པའི་གྲོགས་ཀྱང་འཚལ་ལོ་གསུངས་པས། ཕ་ལ་བཟླ་ཡི་ཟེར་ནས་སོང་། ནངས་པར་བྱུང་ནས། སློབ་དཔོན་ཉིད་ཀླུ་ཡུལ་དུ་ཕེབས་ན་བཀའ་བཞིན་བྱེད། གཞན་མི་ནུས་སོ་ཟེར། དེར་དོན་ཆེན་པོ་གཟིགས་ནས་གཤེགས་ཏེ་སྐལ་བ་དང་འཚམ་པའི་ཆོས་ཀྱི་འཁོར་ལོ་བསྐོར། སྟོང་ཕྲག་བརྒྱ་བ་དང་ཡི་གེ་ཉུང་ངུ་ལ་སོགས་པ་སྤྱན་འདྲེན་པའི་ཕྲིན་ལས་ཀྱི་སྣང་བ་རྒྱ་ཆེན་པོ་མཛད། དགེ་སློང་བདེ་བྱེད་ཅེས་བྱ་བས་བསྟན་པ་ལ་རྨ་སྲོལ་བཏོད་པའི་ཆེད་དུ་བྱས་པ་རིག་པའི་རྒྱན་ཅེས་བྱ་བའི་གཞུང་ཤློ་ཀ་སྟོང་ཕྲག་བཅུ་གཉིས་ཅན་བྱུང་བ་ཡང་དངོས་
སྟོབས་རིག་པའི་ཤུགས་ཀྱིས་ཚར་བཅད། ཉན་ཐོས་སེནྡྷ་པ་དག་གིས་ཐེག་ཆེན་ལ་རྩོད་པའི་གཞུང་མང་པོ་བྱུང་བ་མི་མངོན་པའི་བུམ་དུ་རྒྱས་བཏབ། རེ་ཞིག་ན་ཛ་ཊ་སཾ་གྷ་རར། མུ་སྟེགས་ཀྱི་རྒོལ་བ་ལྔ་བརྒྱ་ཙམ་རྩོད་པས་ཕམ་པར་བྱས་ཏེ་རང་གི་བསྟན་པ་ལ་བཅུག། སློབ་དཔོན་འདིས་བཞེངས་པའི་མཆོད་རྟེན་གྱིས་ཕྱོགས་ཐམས་ཅད་དུ་ཁྱབ་ཅིང་། ལྷ་ཁང་ཡང་མཆོག་ཏུ་མང་བ་གྲུབ། རི་མང་པོ་གསེར་དུ་བསྒྱུར་བར་བཞེད་པ་རྗེ་བཙུན་མས་མ་འོངས་པ་ན་རྩོད་པར་འགྱུར་བར་ལུང་བསྟན་པས་ཅི་བདེར་བཞག །དེ་ལྟ་ན་ངང་གསེར་གྱི་འབྱུང་ཁུངས་མང་པོ་བྱིན་གྱིས་བརླབས་ཤིང་། རྡོ་ཡང་གསེར་མདོག་ཏུ་གྱུར་བ་ཙམ་ཡོད་སྐད། གླིང་བཞན་དང་མི་མ་ཡིན་གྱི་གནས་སུ་ལོ་སྐོར་ཙམ་འགྲོ་དོན་མཛད། ལམ་ཀ་ན་བྱིས་པ་མང་པོ་བརྩེ་བ་ལས་གཅིག་རྒྱལ་པོར་འགྱུར་བ་ལུང་བསྟན་པ་ཕྱི་ནས་རྒྱལ་པོ་བདེ་སྤྱོད་ཅེས་བྱ་བར་གྲགས། འདི་སློབ་དཔོན་ལ་ཤིན་ཏུ་གུས་ཤིང་། གདམས་པ་ནོད་པ་ལ་བརྟེན་ནས་བཅུད་ལེན་དང་གནོད་སྦྱིན་གྱི་མངག་གཞུག་འགྲུབ། སྟོབས་བཅུ་མངའ་བའི་དགོངས་དོན་གསལ་བར་བྱེད་པའི་བསྟན་བཅོས་ཀྱི་རྒྱལ་པོ་མང་དུ་བསྐྲུན་པ་ནི་ཉི་ཟླ་ལྟ་བུར་གྲགས་པ་ཆེ་ཞིང་ཁྱད་པར་ཐེག་པ་ཆེན་པོ་ནམ་མཁའ་ལྟར་གསལ་བར་མཛད། ཕྱིས་དཔལ་གྱི་རིལ་ལོ་ཉིས་བརྒྱ་ཙམ་གནོད་སྦྱིན་མོའི་འཁོར་དང་བཅས་ཏེ་སྔགས་ཀྱི་སྤྱོད་པས་བཞུགས། རྒྱུད་སྡེ་ཐ་དད་པ་དང་། རིག་འཛིན་རྒྱ་མཚོ་ལྟ་བུའི་ཚོགས་རྗེར་བཞུགས་པས་ཐུན་མོང་བའི་རྣམ་ཐར་གྱི་ལོ་རྒྱུས་དཔོགས་པར་མི་ནུས་ཏེ་པདྨ་གསུང་གི་དཀྱིལ་འཁོར་ན་སློབ་དཔོན་ནཱ་གཱ་རྫུན་ཞེས་ཡོངས་སུ་གྲགས། མདོར་ན་སྡེ་སྣོད་འཛིན་པའི་དབུས་ན་གནས་པའི་ཚེ་རྣམ་པར་ཐར་བ་བརྒྱད། སྦྱངས་པའི་ཡོན་ཏན་བཅུ་གཉིས་ལ་སོགས་པའི་རྒྱན་གྱིས་མཛེས་ཤིང་། སྔགས་ཀྱི་བརྟུལ་ཞུགས་ལས་གྲུབ་པ་ཆེན་པོ་བརྒྱད། ཚར་གཅོད་པ་དང་། རྗེས་སུ་འཛིན་པ་ལ་སོགས་ཏེ་ཐུན་མོང་དང་། ཐུན་མོང་མ་ཡིན་པའི་དངོས་གྲུབ་ཐམས་ཅད་རང་དབང་དུ་གྱུར་ནས་བདེ་
བར་གཤེགས་པའི་གཟུགས་བརྙན་དང་བསྟན་པར་བཅས་པ་ལ་སྲི་ཞུ་དང་། རི་མོར་བྱས་པའི་ཚུལ་ནི་འདི་ལ་འགྲན་ཟླར་འོས་པ་འགའ་ཡང་ཡོད་པར་མ་གྲགས་ཤིང་། མཚན་བཟང་པོ་སོ་གཉིས་གྲུབ་པའི་སྐུ་དེས་ལོ་བརྒྱ་ཕྲག་དྲུག་གི་བར་དུ་བསྟན་པ་ལེགས་པར་བསྐྱངས། མཐར་རྒྱལ་པོ་བདེ་སྤྱོད་ཀྱི་བུ་རབ་ནུས་ཞེས་བྱ་བ་ལ། རང་གི་མས་གོས་བཟང་པོ་སྲུབ་མེད་པ་གཅིག་བྱིན་པ་ན། དེས་འདི་བདག་གི་རྒྱལ་སྲིད་འཛིན་པའི་ཚེ་གྱོན་ནོ། །མན་རེ་ཁྱོད་ཀྱིས་རྒྱལ་སྲིད་འཛིན་པ་མི་འོང་སྟེ། ཡབ་དང་སློབ་དཔོན་ཚེའི་བཅུད་ལེན་སྟབས་གཅིག་ཏུ་གྲུབ་པ་ཡིན་པས་སློབ་དཔོན་དང་སྲོག་གཅིག་གོ། དེས་ན་གཅེན་པོ་རྣམས་ཀྱང་བུ་དང་ཚ་བོའི་བར་རྒྱལ་སྲིད་མ་ཐོབ་པར་འདས་ཟེར་བས། དེ་རྒྱལ་སྲིད་ལ་འདོད་པའི་གདུངས་པས་ཤིན་ཏུ་མི་དགའ་བར་གྱུར་བ་ལ། མ་ན་རེ། འོ་ན་ཐབས་ཡོད། སློབ་དཔོན་བྱང་ཆུབ་སེམས་དཔའ་ཡིན་པས་དབུ་བསླང་ན་སྟེར་མཆི། བུས་ཀྱང་དཔལ་གྱི་རིལ་སློབ་དཔོན་གྱི་དྲུང་དུ་དབུ་བསླང་བའི་ཕྱིར་འོངས་སོ། །དེར་སློབ་དཔོན་གྱིས་ཇི་ལྟར་འདོད་པ་བཞིན་དུ་ཆོད་ཅིག་པར་བསྒོབས། རལ་གྲི་ཤིན་ཏུ་རྣོ་བས་ཀྱང་ཆད་པར་མ་གྱུར་ནས། སྔོན་སྨྱུག་མ་བཅད་པ་ལ་སྐྱེ་བ་བཅད་པའི་ལྟུང་བྱེད་ཀྱི་ལས་ཡོད་པར་གཟིགས་ནས། སྨྱུག་མའི་ཤུན་ལྤགས་ཀྱིས་བྲེགས་པར་བསྒོས། དེས་དེ་བཞིན་དུ་བྱས་པས། ང་ནི་འདི་ནས་བདེ་བ་ཅན་དུ་འགྲོ། །ཕྱི་ནས་ལུས་འདི་ལ་ཡང་འཇུག་པར་འགྱུར། །ཅེས་པའི་སྒྲ་ཡང་བྱུང་། བཅུད་ལེན་གྲུབ་པས་སླར་འགྲིག་གིས་དོགས་ནས་དབུ་དཔག་ཚད་མང་པོས་ཆོད་པའི་སར་འཁྱེར་བར་བརྩམས་པ་ན། ལམ་དུ་གནོད་སྦྱིན་མོས་ཕྲོགས་ཏེ་དབུ་དང་སྐུ་ལུས་གཉིས་ཀར་ལྷ་ཁང་བརྩིགས། སྔར་དེ་གཉིས་ཀྱི་བར་དུ་དཔག་ཚད་བཞི་ཙམ་ཡོད་པ། ད་ལྟ་རྒྱང་གྲགས་མ་ཡོངས་ཙམ་ཡོད་སྐད། སློབ་དཔོན་འདིའི་མཛའ་བཤེས་སུ་གྱུར་བ་བྲམ་ཟེ་མཆོག་སྲེད་ཅེས་བྱ་བ་འཕགས་པ་སྤྱན་རས་གཟིགས་ལས་རིགས་སྔགས་གྲུབ་པ་ཞིག་བྱུང་སྟེ། དེས་སྒྲ་བཱ་ནིང་རྫོགས་པར་ཤེས་པའི་ཀླུ་ཤེ་ཥ་ཞེས་
བྱ་བ་རིག་སྔགས་ཀྱིས་བཀུར་སྟེ་ཡི་གེར་བྲིས་ཤིང་། འགྲེལ་བ་བརྩམས་པ་དང་། རྒྱལ་པོའི་བུ་མོ་དཔྱིད་ལྡན་མ་གཡོ་སྐྱུས་བསྐུས་པ་སོགས་ཀྱིས་འཕྲོས་དོན་ལས་སྒྲ་ཀཱལ་བའི་བྱུང་ཁུངས་སྔ་སོར་གྲགས་པ་ལས་ཐ་དད་པའི་གཏམ་ངོ་མཚར་པའང་ཡོད་དོ། །སློབ་དཔོན་འདིའི་སློབ་མར་གྱུར་བ་ནི་བསམ་གྱིས་མི་ཁྱབ་མོད་ཀྱི་གསར་མའི་ཕྱོགས་ལ་གྲུབ་པའི་རྣལ་འབྱོར་དུ་གྲགས་པ་ནི་ཤ་ཝ་རི་བའོ།། །།འཛམ་བུའི་གླིང་མཛེས་པར་བྱེད་པའི་རྒྱན་གཉིས་པ། ཨཱརྱ་དེ་ཝ་ནི། སྔོན་གྱི་ལོ་རྒྱུས་རྣམས་ལས་པདྨོའི་དབུས་ན་སྐྱེ་བའི་ཟེའུ་འབྲུ་འཛུམས་པར་གྲགས་ནའང་། སློབ་དཔོན་ཟླ་བ་གྲགས་པས་སིངྒ་ལའི་རྒྱལ་པོའི་སྲས་སུ་བཤད་ཅིང་། རྒྱ་གཏམ་ཁུངས་མ་དག་ལའང་དེ་སྐད་དུ་གླེང་ངོ། །དེ་ལ་སིངྒ་ལའི་གླིང་གི་རྒྱལ་པོ་བཉྩ་ཤྲཱི་གི་ཞེས་བྱ་བའི་རིགས་སུ་ལང་ཚོའི་མྱུ་གུ་གསར་པ་བཟུང་། ཆེར་སྐྱེས་ནས་རྒྱལ་ཚབ་ཀྱིས་ལ་ནི་སྤྲོ་བར་མ་གྱུར་ཏེ། མཁན་པོ་ཧེ་མ་དེ་ཝ་ལས་རབ་ཏུ་བྱེད་ཞིང་བསྙེན་པར་རྫོགས། ཨཱརྱ་དེ་ཝ་ཞེས་བྱ་བའི་མཚན་གྱིས་གྲགས་པའི་ཟླ་འོད་གསལ་བར་བྱས། སྡེ་སྣོད་གསུམ་པོ་ཆུབ་པར་བྱས་ནས་ཡུལ་ཐ་དད་པའི་ལྷ་ཁང་དང་མཆོད་རྟེན་དག་བལྟ་བའི་ཕྱིར་འཛམ་བུའི་གླིང་ཀུན་ཏུ་བྱོན། སློབ་དཔོན་ཆེན་པོ་ཀླུ་སྒྲུབ་ཀྱིས་ཞབས་པད་བསྙེན་ཏེ་རྒྱལ་བའི་མྱུ་གུ་ཀུན་གྱིས་འཇུག་པར་འོས་པའི་རིག་པའི་གནས་རྣམ་པ་ལྔ་ལེ་ལག་དང་བཅས་པ་དང་། ཕྱི་ནང་གི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་པར་མཛད། ཐོབ་པར་བྱ་བའི་དངོས་གྲུབ་ཀྱི་གནས་མང་པོའང་མངོན་ཏུ་མཛད་ནས་དོན་གྱི་བསྟན་པའི་བདག་པོ་ཉིད་དུ་བསྐོས། རིའི་ལྷ་དང་། ཤིང་གི་ལྷ་ལ་སོགས་པ་ལས་ཡོ་བྱད་བླངས་ནས་གཙུག་ལག་ཁང་ཉི་ཤུ་རྩ་བཞི་བཞེངས། གནོད་སྦྱིན་མོས་འཚོ་བ་སྦྱར་ནས་ཐེག་པ་ཆེན་པོའི་ཆོས་གཞི་རེ་བཙུགས། ལྷོ་ཕྱོགས་ཀྱི་རྒྱུད་རྣམས་སུ་ཤེས་རབ་རྣམ་པ་གསུམ་གྱི་སྒོ་ནས་སེམས་ཅན་ལ་ཕན་པ་རྒྱ་ཆེན་པོ་མཛད་པ་ལས། རེ་ཞིག་གི་ཚེ། ཤར་ཕྱོགས་ན་
ལི་ནའི་གྲོང་ཁྱེར་ཁོར་ཏ་ཞེས་བྱ་བར་བྱུང་བ། རང་གི་འདོད་པའི་ལྷ་གཙུག་ན་ཟླ་བ་བསྒྲུབས་པས་ཕྱོགས་ཐམས་ཅད་ལས་རྒྱལ་བའི་དངོས་གྲུབ་ཀྱིས་བསྙེམས་པ། བྲམ་ཟེ་ཐུབ་དཀའ་ནག་པོས། གང་ན་སངས་རྒྱས་ཀྱི་བསྟན་པ་གནས་པའི་ཡུལ་དང་ཡུལ་ཕྲན་ཐམས་ཅད་དུ་ཕྱིན་ནས་རྩོད་པའི་རྒོལ་བ་རྩུབ་མོས་ཕལ་ཆེར་ཅང་མི་སྨྲ་བའི་གནས་པ་སྦྱར་རོ། །སྦྱར་ནས་ཀྱང་སླར་ང་རྒྱལ་གྱི་མེ་ལྕེ་་རྣོན་པོ་གཡོས་པར་གྱུར་ཏེ། དཔལ་ན་ལེནྡྲ་ཞེས་བྱ་བ་ནང་པའི་མཁས་པ་ཐམས་ཅད་ཀྱི་བསྟི་བའི་གནས་གལ་བདོར་སོང་ནས། རང་རང་གི་བསྟན་པ་རྒྱལ་བའི་རུ་མཚོན་དུ་བཙུགས་ཏེ་རྩོད་པའི་ཤིང་རྟ་འདྲེན་པར་དུས་བཏབ་བོ། །དེར་ནང་པའི་པཎྜི་ཏ་རྣམས་ནི་བག་འཁུམས་པར་གྱུར་ནའང་། སློབ་དཔོན་འབྱོན་ཐུབ་པའི་ཡུན་སྲིད་ཙམ་དུ་རྩོད་པའི་དུས་བཏབ་པའི་ཚུལ་བྱས་སོ། །དེར་ནག་པོ་ཆེན་པོ་ལ་གཏོར་མ་བྱས་པས་སྤྲུལ་པའི་བྱ་རོག་ཅིག་བྱུང་བའི་མགུལ་བར་སློབ་དཔོན་སྤྱན་འདྲེན་པའི་འཕྲིན་ཡིག་བརྫངས་ཏེ་སོང་ངོ། །དེས་སློབ་དཔོན་ལ་བརྡ་འཕྲོད་དེ་རྐང་མགྱོགས་ཀྱི་རྫས་ལ་བརྟེན་ནས་སྦྱོན་པ་ན་ལམ་དུ་ལྗོན་པའི་ལྷ་མོ་ཟེར་ཏེ་མུ་སྟེགས་ཀྱི་རིགས་ལས་མང་ལ་ཆགས་མ་གཅིག་གིས་དངོས་གྲུབ་ཀྱི་རྫས་ཀྱི་དོན་དུ་དགེ་སློང་མཁས་པའི་མིག་དགོས་ཞེས་བསླངས་པས་སྤྱན་ཡ་གཅིག་དེ་ལ་བྱིན་ཏོ། །དེར་ཐུན་ཚོད་གཅིག་ཁོ་ན་ལན་ལེནྡྲར་ཕེབས་ནས། ནམ་མུ་སྟེགས་ཀྱིས་རྒོལ་བ་ལྷགས་པ་ན། དེ་དག་གི་དཔུང་གཉེན་དུ་གྱུར་བ་སྲིང་མོ་པཎྜི་ཏ་དང་། ནེ་ཙོ་དང་། ཐོད་ལེ་ཀོ་རེ་རྣམས། དགེ་བསྙེན་སྤྱི་་བརྟོལ་ཅན་དང་། བྱི་ལ་དང་། མར་ནག་གི་བུམ་པ་རྣམས་ཀྱིས་བཏུལ། དེའི་ཚེ་སློབ་དཔོན་ལ་མིག་ཡ་གཅིག་པཞས་དཔྱས་གདགས་པར་སྨྲས་པ་ལ། དྲག་པོ་མིག་གསུམ་ལྡན་ཡང་དེ་ཉིད་མཐོང་བ་མེད། བརྒྱ་བྱིན་མིག་སྟོང་ལྡན་ཡང་དེ་ཉིད་མཐོང་བ་མེད། ཨཱ་རྱ་དེ་ཝ་མིག་གཅིག་པ་ནི་གང་ཡིན་དེས། སྲིད་པ་གསུམ་པོ་མ་ལུས་པ་ཡི་དེ་ཉིད་མཐོང་། ཞེས་བྱ་བསྔ་རྒོལ་འཇོམས་པའི་གླེང་གཞིར་བྱས་ནས། སྒྲུབ་པ་དང་། སུན་འབྱིན་པའི་ཚིག་གི་མེ་
ལྕེ་ནི་སྦར། རབ་ཏུ་འབར། ཤིན་ཏུ་འབར་བར་གྱུར་ནས་གཞུང་ལུགས་ངན་པའི་གཏམ་གྱི་ཚང་ཚིང་ནི་བསྲེགས། དབང་ཕྱུག་ཉིད་དང་རྒྱུད་ལ་འཇུག་པའི་བརྟེན་པ་ནི་དྲོགས། འགྲེས་པར་བྱ་བའི་ལམ་ནི་རིགས་སྔགས་ཀྱིས་བཅད། གདུལ་བར་བྱ་བའི་དུས་ལ་ཤིན་ཏུ་བབ་པར་གཟིགས་ནས། གཙུག་ལག་ཁང་དུ་ཐབས་ལ་མཁས་པའི་བཙོན་རར་གཞུག་པར་བྱས་སོ། །དེར་གླེགས་བམ་རྣམས་བཀླགས་པས་རང་ཉིད་ལུང་བསྟན་པའི་མདོ་སྡེ་མཐོང་ནས་སྔར་བསྟན་པ་ལ་བྱ་བ་མ་ཡིན་པར་བྱས་པ་ལ་ཤིན་ཏུ་འགྱོད། སངས་རྒྱས་ལ་དད་པ་ཆེས་ཆེར་འཕེལ་བར་གྱུར་ནས་རབ་ཏུ་བྱུང་སྟེ། སྡེ་སྣོད་གསུམ་འཛིན་པའི་པཎྜི་ཏ་ཆེན་པོ་འགྲན་ཟླས་དབེན་པ་ཉིད་དུ་བྱིན་གྱིས་བརླབས་པ་སློབ་དཔོན་ཆེན་པོ་དཔའ་བོའི་ཞབས་སོ། །དེ་ལྟ་བུའི་སློབ་དཔོན་འཕགས་པས་མཐར་ཡང་ལྷོ་ཕྱོགས་ཀྱི་རྒྱུད་དུ་གཤེགས་ནས་སེམས་ཅན་གྱི་དོན་ཆ་ཆེན་པོ་མཛད། མཐའ་བྲལ་གྱི་དོན་རྒྱས་པར་སྟོན་པ་དབུ་མ་བཞི་བརྒྱ་བ་ལ་སོགས་མདོ་སྔགས་ཀྱི་བསྟན་བཅོས་དཔག་ཏུ་མེད་པ་མཛད་ནས་བསྟན་པ་ལ་ཕན་པརྒྱ་ཆེར་བཏགས། ཡུལ་ཀཉྩི་དང་ཉེ་བའི་རཾ་ག་ནཱ་ཐཱ་ཞེས་བྱ་བར་དབང་ཕྱུག་ཕུན་སུམ་ཚོགས་པའི་དགེ་སློང་སྡེ་སྣོད་གསུམ་པ་སྒྲ་གཅན་འཛིན་བཟང་པོ་ལ་དོན་གྱི་བསྟན་པ་གཏད་དེ་མྱ་ངན་ལས་འདས་སོ། །དེ་ལ་ཆེན་པོ་བཞིའི་ཡ་གྱལ་དུ་གྱུར་ཅིང་སྟོན་པ་མཆོག་ལ་བསྟོད་པ་བྱེད་པར་ལུང་གིས་བསྔགས་པ་སློབ་དཔོན་མ་ཏི་ཙི་ཏྲའམ། དཔའ་བོ་ནི། གྲོང་ཁྱེར་ཁོར་ཏ་ན་ཚོང་དཔོན་གཅིག་ལ་བུ་མོ་བཅུ་ཡོད་དེ། ཐམས་ཅད་ཀྱང་དཀོན་མཆོག་ལ་དད་པ་ལྡན་པ་ཤ་སྟག་གོ། ཐ་ཆུང་གང་ཡིན་པ་བྲམ་ཟེ་ལོངས་སྤྱོད་ཆེན་པོ་སདྡྷ་གུ་ཧྱ་ཞེས་བྱ་བའི་ཁྱིམ་དུ་སོང་བ་ན་བུ་ཞིག་བཙས་པའི་མིང་ནག་པོ་ཞེས་བཏགས་སོ། །ཕ་མ་ལ་ཤིན་ཏུ་གུས་པས་ཕ་ཁོལ་དང་མ་ཁོལ་ཞེས་ཀྱང་གྲགས། རིག་བྱེད་ཡན་ལག་དང་བཅས་པ་ལ་བྱང་བར་གྱུར། མ་སངས་རྒྱས་པ་ལ་དད་པས་ནང་བའི་གྲུབ་མཐའ་ལ་གཞུག་
པར་འདོད་ཀྱང་། ཕའི་དབང་ལས་ཕྱི་རོལ་བའི་གྲུབ་མཐའ་འཛིན་པར་གྱུར། སྔགས་རྒྱུད་ཀྱི་སྦྱོར་བ་དང་། རྟོག་གེ་ལ་ཤིན་ཏུ་རྣོ། ལྷ་དབང་ཕྱུག་ཆེན་པོ་བསྒྲུབས་པས་དངོས་སུ་ལུང་སྟོན་པར་བྱེད་ཅིང་དངོས་གྲུབ་གསུམ་བྱིན། དེས་ཀྱང་རྩོད་པ་ལས་མ་རྒྱལ་ན་དབང་ཕྱུག་རང་ཉིད་སྙིང་ལ་འཇུག་པར་ཁས་འཆེས་སོ། །དེར་བསྙེམས་པ་ཤིན་ཏུ་འཕེལ་ཏེ་ཀཱ་མ་རུ་པ་དང་། ཏི་ར་ཧུ་ཏི་དང་། གཽར་དང་། ཨཽ་ཌ་བི་ཤ་ལ་སོགས་པའི་ཡུལ་རྣམས་སུ་ཕྱིན་ནས་སངས་རྒྱས་པ་རྣམས་རྩོད་པས་ཕམ་པར་བྱས། འགའ་ཞིག་ལྟ་བ་ངན་པ་ལ་བཀོད། ཁ་ཅིག་གི་མང་འཐང་ཕྲོགས། ལ་ལ་མུ་སྟེགས་ལ་ཕྱག་འཚལ་དུ་གཞུག་པ་ལ་སོགས་དམའ་དབབ་བར་བྱས་སོ། །དེར་མ་ནི་དཀོན་མཆོག་གསུམ་ལ་སྐྱབས་སུ་སོང་བ་ཡིན་པས་འདི་སྙམ་དུ། གལ་ཏེ་འདི་ན་ལེནྡྲ་ར་སོང་ན་རྩོད་པའི་ཁྱུ་མཆོག་རིག་སྔགས་གྲུབ་པ་དག་གིས་ཕམ་པར་བྱས་ཏེ། སངས་རྒྱས་པའི་ལམ་ལ་འཇུག་པར་འགྱུར་རོ་སྙམ་ནས། བུ་ཉོན་ཅིག་ཡུལ་གཞན་གྱི་སངས་རྒྱས་པ་རྣམས་ནི་རྟའི་རྣ་བའི་སྦུ་ཙམ། མ་ག་དྡཱའི་་སངས་རྒྱས་པ་རྣམས་ནི་རྟའི་ལུས་དང་མཚུངས་ཏེ། གལ་ཏེ་མ་ག་དྷཱ་པ་ལས་རྒྱལ་བར་མ་གྱུར་བ་དེ་སྲིད་དུ། རྒོལ་བའི་གྲགས་པ་ཐོབ་པར་འདོད་པ་ནི་ཉམ་ཆུང་ངོ་ཞེས་བརྗོད་པས། དེར་མ་ག་དྷཱར་སོང་ངོ། །སོང་ནས་ཀྱང་རྒོལ་བའི་རུ་མཚོན་རྣོན་པོ་ཕྱར་བ་གང་། སློབ་དཔོན་འཕགས་པའི་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་འཐོར་རླུང་དྲག་པོས་ལྷུང་བར་བྱས་པས། །ང་རྒྱལ་གྱི་གདོང་པ་ཤིན་ཏུ་སྨད་པར་གྱུར་ནས་ཆུ་བོ་གང་ྒཱལ་ལྕེབ་པར་རྩོམ་མོ། །འཕགས་པས་དེ་ལས་ལྡོག་པའི་གཏམ་བཤད་མ་ཐག་པ་ཉིད། སྡེ་སྣོད་ཀྱི་གླེགས་བམ་ལས་སྔོན་གྱི་སྨོན་ལམ་བཙན་པོ་སྟོབས་སུ་གྱུར་ནས་རང་གི་ལྟ་བ་ནོར་བ་ནི་གོ། རྒྱུ་འབྲས་ལ་སྐུར་བ་བཏབ་པའི་འགྱོད་པས་བཅིངས་ཏེ་ལྕེ་འདྲེག་པའི་ཕྱིར་སྤུ་གྲི་སྲེལ་བ་ལ་མངོན་དུ་ཕྱོགས་སོ། །དེར་རྗེ་བཙུན་མས་ལུང་བསྟན་ཏེ། ནང་པའི་བསྟན་པ་ལ་ཞུགས་ནས་སངས་རྒྱས་ལ་བསྟོད་པ་མང་
དུ་གྱིས་ཤིག། ལས་ཀྱི་སྒྲིབ་པ་ནི་བྱང་བར་གྱུར་རོ་ཞེས་གསུངས་པས། དེ་སྣོད་གསུམ་འཛིན་པར་གྱུར་ཏེ། བཤགས་པའི་དོན་དུ་བསྔགས་པར་འོས་པ་ལ་བསྔགས་པའི་བསྟོད་པ་དང་། བརྒྱ་ལྔ་བཅུ་པ་ལ་སོགས་པ་མང་པོའང་བརྩམས། དེའི་ཚ་མུ་སྟེགས་བྱེད་དང་། བྲམ་ཟེ་དག་ནི། འདི་ལྟར་བྲམ་ཟེ་རྣམས་ཀྱི་མཆོག་རབ་ཏུ་གྱུར་བ་ཐུབ་དཀའ་ནག་པ་ཡང་རང་གི་གྲུབ་པའི་མཐའ་གྱོ་མོ་དང་གསེག་མ་བཞིན་དུ་བོར་ནས། སངས་རྒྱས་པའི་བསྟན་པ་ལ་འཇུག་པར་བྱེད་ན། གདོན་མི་ཟ་བར་ནང་པའི་གྲུབ་མཐའ་ཡ་མཚན་ཆའོ། །ཞེས་རྒྱུ་དེ་ལས་མུ་སྟེགས་བྱེད་དང་། བྲམ་ཟེའི་ཚོགས་རེ་རེ་ནས་སྟོང་ལྷག་པར་དཔལ་ན་ལེནྡྲ་ཁོ་ནར་ཡང་རབ་ཏུ་བྱུང་། དེས་མཛད་པའི་བསྟོད་པ་རྣམས་ཀྱང་སངས་རྒྱས་ཉིད་ཀྱིས་རྗེས་སུ་བསྟན་པའི་བྱིན་རླབས་ལས་ཡུལ་དང་ཡུལ་ཕྲན་ཐམས་ཅད་དུ་ཁྱབ་ཅིང་། ཐ་ན་ཀླུ་གར་མཁན་དང་། བཞད་གད་མཁན་ཡན་ཆོད་ཀྱིས་སྒྲོག་པར་བྱེད་པས། སྐྱེ་བོ་ཐམས་ཅད་ཀྱི་དད་པའི་བསུང་ཞིང་འགུགས་པར་བྱེད་པའི་དྲིའི་བཞོན་པ་གཅིག་ཏུ་གྱུར། སྐྱེས་བུ་ཆེན་པོ་འདི་ནི་བསོད་ནམས་ཀྱི་མཐུ་ཤིན་ཏུ་ཆེ་བས་ཉིན་རེར་གྲོང་ཁྱེར་དུ་བསོད་སྙོམས་ཀྱི་བྱ་བ་ལ་གཤེགས་ནའང་ཟས་ཀྱི་རྣམ་པ་དཔག་ཏུ་མེད་པ་དག་འབྱོར་བས། བསམ་གཏན་པ་ཉིས་བརྒྱ་ལྔ་བཅུ་དང་། ཀློག་པ་བདེའི་གྲངས། དགེ་སློང་ལྔ་བརྒྱ་འཚོ་བས་བྲེལ་བ་མེད་པར་བྱེད་ཅིང་། སྙན་པར་དངགས་པ་ལས་རྩོམ་པའི་ཁྱུ་མཆོག་ཏུ་གྱུར་བས་བསྟན་བཅོས་ཀྱི་ཚིག་དོན་ཀྱང་ཤིན་ཏུ་བཟང་སྟེ། སློབ་དཔོན་ཆོས་ཀྱི་གྲགས་པའང་མགུ་བར་ནུས། བདག་པོའི་རྐྱེན་དེ་ལས་དེ་བཞིན་གཤེགས་པའི་མཛད་པ་སྙན་དངགས་ཆེན་པོ་ལ་སྦྱར་བ་དང་། དེ་ཙམ་གྱིས་ཐོས་པ་དང་རྩོད་པ་ལྷུར་ལེན་པའི་གནས་ཙམ་ལ་བསྔགས་པ་མ་ཡིན་པར་བྱང་ཆུབ་ཀྱི་སེམས་སྒོམ་པའི་མན་ངག་གཉིས་ལ་སོགས་པ་མཆོག་ཏུ་གྱུར་བའི་དགོངས་འགྲེལ་དང་གཞུང་ཁྱད་དུ་འཕགས་པ་མང་པོས་བསྟན་པའི་བྱ་བརྒྱ་ཆེན་པོ་བྱས། སྐུ་
ཚེའི་སྨད་དུ་གྱུར་བ་ན། རྒྱལ་པོ་ཀ་ནི་ཀས་སྤྱན་འདྲེན་པའི་ཕོ་ཉ་བཅུག་པ་ལ་ལང་ཚོའི་འབྲས་བུ་ཤིན་ཏུ་རྒབས་འབྱོན་པར་མ་གནང་སྟེ་སྤྲིང་ཡིག་མཛད་ནས་རྒྱལ་པོ་དེ་ཆོས། །ལ་བཀོད། རང་གི་སློབ་མ་ཡེ་ཤེས་སྙན་པ་ཞེས་བྱ་བ་དེ་རྒྱལ་པོའི་སློབ་དཔོན་དུ་བརྫངས། མདོ་སྡེ་ལ་སོགས་པའི་གླེགས་བམ་དང་། གཏམ་རྒྱུད་ཀྱི་ཡི་གེའི་རྐྱེན་ལམ་ལྟོས་པར། མཁན་པོ་དང་སློབ་དཔོན་དག་གིས་སྙན་ནས་སྙན་དུ་བརྒྱུད་པའི་སངས་རྒྱས་ཀྱི་སྐྱེས་རབས་བཅུ་ཕྲག་བཅུའི་བདག་ཉིད་ཅན་ཕ་རོལ་ཏུ་ཕྱིན་པ་བཅུ་དང་སྦྱར་ཏེ་རྩོམ་པར་བཞེད་ནས། སུམ་ཅུ་རྩ་བཞི་མཛད་ཟིན་པའི་སྐབས། སྐྱེས་རབས་ཀྱི་དང་པོར་སྟག་མོ་ལུས་སྦྱིན་གྱི་རྟེན་འབྲེལ་ལས་སྐུ་ཚེ་གཞན་དབང་དུ་གྱུར་བའམ། བྱང་ཆུབ་སྤྱོད་པའི་རྣམ་ཐར་ལ་རང་ཉིད་ཀྱང་སྙིང་སྟོབས་ཀྱི་མཐུ་ཚད་མེད་པ་བརྟས་པར་གྱུར་ནས། ནགས་གསེབ་ཏུ་སྟག་མོ་ཕྲུག་གུ་འབྲངས་པ་བཀྲེས་པས་ཉེན་པ་གཟིགས་པས། སྐུ་ལུས་སྦྱིན་པར་བརྩམས་པ་ན་ཅུང་ཟད་བག་ཚ་བའི་རྣམ་པས་ལྷག་པར་སང་སངས་རྒྱས་ལ་དད་པ་བསྐུལ་བའི་ཕོ་ཉར་བྱས། དང་པོར་སྐུ་ལུས་ལས་ཁྲག་ཕྱུང་སྟེ་སྨོན་ལམ་བདུན་ཅུ་པ་བྲིས་ཤིང་སྟག་རྣམས་ལའང་ཐུད། སླར་སྐུ་ལུས་སྦྱིན་པར་བཏང་བས་སྐྱེས་རབས་སོ་བཞི་པའི་འཕྲོ་ལུས་པར་གྲགས། འདོད་པ་གཅིག་ཏུ་བརྩམ་བྱ་ཡོངས་སུ་རྫོགས་མོད་དེ། སློབ་དཔོན་སྟག་གིས་ཟོས་ནས་ཅི་ཞིག་ནང་པོ་ཆ་རྙེད་པ་དེ་ལས་མ་འདུས་ཟེར་བའང་སྣང་སྟེ། ལུང་གི་རྒྱུན་ནི་ཡོད་པས་དེ་དག་དཔྱད་པ་མེད་པར་བཞག་གོ། སློབ་དཔོན་འདི་ཐེག་པ་ཆེན་པོ་བ་ཡིན་ཡང་དེ་ཁོ་ནའི་ཁ་ཟིན་ཀྱང་མ་མཛད། ཀུན་ལ་སྙོམས་པར་ཕན་འདོགས་པས་ཉན་ཐོས་པ་རྣམས་ཀྱང་དང་ཅིང་། ནང་པ་ཀུན་གྱིས་གཙུག་ཏུ་བཀུར་བའི་གྲགས་པ་ཤིན་ཏུ་ཆེའོ། །འདི་རྒྱལ་པོ་ཟླ་བ་སྦས་པའི་བུ་སྙིང་པོ་ཐིག་ལེ་ཞེས་བྱ་བ་ཡུལ་གོ་རར་བྱུང་བ་དེ་དང་ཐོག་མཉམ་པར་གྲགས། དེའི་ཚ་བོའི་བུདྷརྨ་ཙནྡྲས་རྒྱལ་སྲིང་སྐྱོང་བའི་ཚེ་ཏུ་རུ་ཁྐའི་དམག་གིས་མ་ག་དྷཱ་བ་བཅོམ། དཔལ་ན་ལེནྡྲར་ཡང་གནོད་པ་
ཆེན་པོ་བྱུང་། དྷརྨ་ཙནྡྲའི་ཞང་པོའི་པུར་གྱུར་བ་རྒྱལ་པོ་སངས་རྒྱས་ཕྱོགས་ཀྱི་ཚེ། རྒྱ་ནག་གི་ཡུལ་དུ་མདོ་སྡེ་སྨྲ་བ་འགའ་ཞིག་བརྫངས། སྟག་གཟིག་གི་རྒྱལ་པོའི་སྟེང་དུ་གཡུལ་ལས་རྣམ་པར་རྒྱལ་བའི་བདན་ཕྱར་ཏེ་ཉི་འོག་དང་། ནུབ་ཕྱོགས་ཀྱི་རྒྱལ་ཁམས་ཕལ་ཆེར་ལ་ལུང་བསྟང་། སྔར་ཉམས་པར་བྱས་པའི་ཆོས་གཞི་ཐམས་ཅད་སོར་ཆུད་པར་བྱས་ནས་བགྲང་གཞི་བཅུ་ཕྲག་བཞི་ཙམ་དུ་བསྟན་པ་དར་བར་ཡོད་པ་ལ། ན་ལེནྡྲར་་མུ་སྟེགས་ཅན་གྱི་སློང་མོ་བ་གཉིས་ལྷགས་པ། དགེ་ཚུལ་གཟུ་ལུམས་ཅན་དག་གིས་བཤལ་ཆུས་གཏོར། སྒོ་གླེགས་ཀྱི་བར་དུ་བཙིར། ཁྱི་གཏུམ་པོ་དག་རྦད་པས། དེ་གཉིས་བློ་ཤིན་ཏུ་མ་རུངས་པར་གྱུར། གཅིག་གིས་ང་ཚོ་བ་སྦྱར། གཅིག་གིས་ཉི་མ་བསྒྲུབ་པར་དམ་བཅས་སོ། །དེར་སའི་རུམ་དུ་ཞུགས་ཏེ་ལོ་དགུའི་བར་དུ་བསྒྲུབས་ཀྱང་དོན་མ་གྲུབ་ནས་ཕྱིར་འགྲོ་བར་བརྩམས་པས། གྲོགས་པོ་ན་རེ། ཕྱོགས་ཐམས་ཅད་མུ་གེས་ཉམ་ང་ན། ངས་དགའ་བ་དེ་སྙེད་ཀྱིས་འཚོ་བ་སྦྱར་བས་ཁྱོད་སྔགས་མ་གྲུབ་པར་ཕྱི་རོལ་དུ་ནམ་བྱུང་བ་དེའི་ཚེ། མགོ་གཅད་དོ་ཞེས་ཆུ་གྲི་རྣོན་པོ་སྲེལ་བས། དེ་འཇིགས་ཏེ་སླར་ཡང་ལོ་གསུམ་བསྒྲུབས་པས་དོན་སྒྲུབ་སྟེ་སྦྱིན་སྲེག་གི་སྦྱོར་བརྩམས། བསྲེགས་ཐལ་ལས་སྔགས་བཟླས་ཏེ་གཏོར་བ་ཙམ་གྱིས་མེ་རང་འབར་དུ་གྱུར། སངས་རྒྱས་པའི་ཆོས་གཞི་བསྟན་པའི་ལྷ་ཁང་བརྒྱད་ཅུ་རྩ་བཞི་བསྲེགས། ཁྱད་པར་དུ་ཐེགས་ཆེན་པོའི་ཆོས་ཐམས་ཅད་བཞུགས་པའི་དཔལ་ན་ལེནྡྲའི་ལྷ་ཁང་ཆེན་པོ། རཏྣ་ས་ག་ར། རཏྣ་ད་དྷི། རཏྣ་རཎྜ་ཀ་ཞེས་བྱ་བ་གསུམ་ཆར་ཚིག །རཏྣད་དྷི་ཞེས་བྱ་བ་ལ་དགུ་ཐོག་ཡོང་བས་སྟེང་ཁང་གི་གླེགས་བམ་འགའ་ཞིག་ལས་ཆུའི་རྒྱུན་ཆེན་པོ་བབས་ཏེ་འབར་བ་གང་ཞིག་མནལ་བར་གྱུར་བས་གླེགས་བམ་མ་ཚིག་པ་འགའ་ཡང་བྱུང་བ་རིག་པ་འཛིན་པའི་སྡེ་སྣོད་དུ་གྲགས། མུ་སྟེགས་གཉིས་རྒྱལ་པོའི་ཆད་པས་འཇིགས་ཏེ་བྱང་ཕྱོགས་ཧ་ས་མ་ཞེས་
བྱ་བའི་ཡུལ་དུ་བྲོས་ཀྱང་སྡིག་པའི་མཐུས་ལུས་ལ་མེ་འབར་ནས་ཤི། དེ་བཞིན་དུ་སློབ་དཔོན་ཀླུ་སྒྲུབ་ལྷོ་ཕྱོགས་ཀྱི་རྒྱུད་ན་འགྲོ་དོན་མཛད་པའི་ཚེ་ཀླ་ཀློའི་ཆོས་ལུགས་འགོ་བརྩམས་ཤིང་། དཔལ་གྱི་རི་ལ་བཞུགས་པའི་དུས་ཙ་ན། རྒྱལ་པོ་ནེ་མ་ཙནྡྲའི་བློན་པོ་རྒྱལ་བཤེས་ཞེས་བྱ་བས་ངོ་ལོག་བརྩམས་ཏེ་རྒྱལ་སྲིད་ལ་རང་དབང་དུ་བྱས། ན་ལནྡྲར་གྷཎྜེ་བརྡུངས་པའི་སྒྲ་ལ་ཕཊ་ཊཱ་ཡ་ཞེས་བྱུང་བ། བྲམ་ཟེ་སྒྲ་མཁན་རྣམས་ཀྱིས་མུ་སྟེགས་ངན་པ་རྣམས་ཀྱི་ཀླད་པ་འགེམས་ཞེས་པའི་སྒྲར་ཤེས་ནས། བྲམ་ཟེ་རྒྱལ་བ་ཤེས་ལ་སོགས་པ་མུ་སྟེགས་རྣམས་ཀྱིས་དམག་བྱས། ཡུལ་དབུས་ནས་ཛ་ལནྡྷ་རའི་བར་གྱི་གཙུག་ལག་ཁང་མང་པོ་ཞུགས་ལ་སྦྱངས། དགེ་སློང་མང་དུ་ཐོས་པ་འགའ་ཡང་བསད་པ་སོགས། མདོར་ན་ཀླུ་སྒྲུབ་ཡུལ་དབུས་སུ་བསྟན་པ་སྐྱོང་བ་ཡན་ཆད་ལྷ་ཁང་བཞེངས་པ་ལ་སོགས་ཇེ་མང་དུ་སོང་བས་ཡར་འཕེལ་དང་། ལྷོ་ཕྱོགས་ཀྱི་རྒྱུད་ན་འགྲོ་དོན་མཛད་པ་ཙམ་ནས་འགྲིབ་པའི་ཐོག་མ་བརྩམས་པ་སྟེ། དམ་པའི་ཆོས་མངོན་པ་ལ་དགྲ་ལན་གསུམ་བྱུང་ནས་ཐེག་པ་ཆེན་པོའི་གསུང་རབ་སྤྱི་དང་བྱེ་བྲག་པ་ཆ་བཅོ་ལྔར་བཏང་བའི་ཆ་དགུ་མེའི་གནོད་པས་སྦྱངས། ཆ་བཞི་དམག་གི་བྱ་བས་བརླག། ཆག་ཅིག་རང་བཞིན་གྱིས་ནུབ་པས། ཆ་གཅིག་ལས་མ་ལུས་པར་གྲགས། རྒྱུ་མཚན་དེ་ཙམ་ལས་ཀྱང་མདོ་རྒྱུད་སྣ་ཚོགས་པའི་དཔེ་ཡུལ་ཁོལ་བུ་ནས་ལྷགས་པའམ། བས་མཐར་བལྟར་མི་མངོན་པའི་རིག་པ་འཛིན་པ་དག་གིས་རང་གི་རྒྱུད་དམ། ཡི་གེའི་སྲོག་ཏུ་བཟུང་བ་ལས་བོད་ཡུལ་ལ་སོགས་པར་མཆེད་པའང་ཡོད་དེ། ཕྱིས་གཙུག་ལག་ཁང་ཆུང་རེའི་ཆོས་ཀྱི་རྣམ་གྲངས་མཐོང་བ་དག་གིས་རྒྱ་གར་ན་དེའི་ཕྱི་མོ་ཡོད་མེད་ངེས་ངེས་ལྟར་བསྒྲགས་ནས་དམ་པའི་ཆོས་སྤོང་བར་ཞུགས་པ་ལ་སྙིང་པོ་མེད་དེ། དེ་ནི་དམ་པའི་ཆོས་མངོན་པ་ལ་དགྲ་བྱུང་བའི་ཐ་སྙད་ཡོད་པས་དེ་ལྟར་འཐད་ཀྱང་རྒྱུད་ལ་མ་ཡིན་ནོ་སྙམ་ན། དཔུང་བཟང་གིས་ཞུས་པར། གསང་སྔགས་མདོ་སྡེའི་ཚུལ་དུ་བཤད་ཀྱིས་ཉོན། །ཞེས་པ་རིག་པ་འཛིན་པའི་རྒྱུད་
སྡེ་སྣོད་བཞི་པར་བཞག་པ་དེས་ཀྱང་ཤེས་པར་འགྱུར་ལ། དེར་མ་ལྟོས་པ་འདིར་ནི་རཏྣ་ད་དྷ་ཞེས་པའི་སྟེང་ཁང་གིས་གླེགས་བམ་ལས་ཆུ་རྒྱུན་གྱི་མཐུས་མ་ཚིག་པ་ནང་རྒྱུད་སྡེ་ལྔ་དང་གསང་བ་འདུས་པར་འདོད་པ་དེ་ལ་ཅིས་བསྙོན། ལར་གསང་སྔགས་བྱིངས་ཆེ་བྱུང་བའི་དུས་ཚོད་འདི་ཙམ་ནའོ་ཞེས་གཏན་ཚིགས་ཀྱིས་བསྒྲུབས་པར་དཀའ་ནའང་། སྔོན་ཐེག་པ་ཆེན་པོའི་ཆོས་དར་བ་ནས་མི་རིང་བར་རིག་པ་འཛིན་པ་འབུམ་ཕྲག་གཅིག་དང་། ཨཽ་ཊི་ཡ་ནའི་སྐྱེ་བོ་རྣམས་རིག་པ་འཛིན་པའི་གནས་ཐོབ་པ་ཕལ་མོ་ཆེ་བླ་མེད་ཀྱི་ལམ་ལ་བསྟེན་པ་ཡིན་ནོ། །འདི་ལྟར་གསང་བའི་བདག་པོ་ལ་སོགས་པས་སྐལ་བ་དང་ལྡན་པ་ཤིན་ཏུ་མང་པོ་ལ་ཞལ་ཅིག་ཅར་དུ་བསྟན་ནས་སྔགས་ཀྱི་ཐེག་པ་བཤད། དེ་དག་ཐམས་ཅད་འཇའ་ལུས་སུ་དངེས་པས་རྗེས་སུ་གདམས་པ་བཞག་པ་ཆེར་མེད་ལ། འོན་ཀྱང་དགའ་རབ་རྡོ་རྗེ་ལ་སོགས་པས། སློབ་མ་ལ་ཚིག་བརྒྱུད་བྲེང་ཆགས་སུ་གདམས་ཤིང་། ལ་ལ་འདས་རྫས་ཀྱི་ཚུལ་དུ་གདམས་པས་མན་ངག་རྫོགས་པ་ཆེན་པོ་ལ་སོགས་བྱུང་ངོ། །འདི་ལྟར་སྔོན་གྱི་དམ་པ་དེ་དག་ནི་ཤིན་ཏུ་སྒྲམ་ཞིང་གསང་བ་བསྲུང་བ་ལ་མཁས་པས་དངོས་གྲུབ་མ་ཐོབ་ཀྱི་བར་དུ་སུས་ཀྱང་གསང་སྔགས་སྤྱོད་པ་ཡིན་པར་མི་ཤེས་ཏེ། དཔེར་ན་འཕགས་པ་ནཱ་གཱ་རྫུན་བཞིན་ཏོ། །གང་ཆོ་འཕྲུལ་ཆེན་པོ་དང་བཅས་མི་སྣང་བར་གྱུར་བའམ། རྫུ་འཕྲུལ་གྱི་བཀོད་པ་ཆེན་པོ་བཤམས་པ་དེའི་ཚེ། ཨ་ལ་ལ་དེ་ནི་སྔགས་ཀྱི་སྤྱོད་པ་ཅན་ནོ་ཞེས་སླད་ནས་རིག་པར་འགྱུར་བ་ཤ་སྟག་གོ། རྒྱུ་དེས་སློབ་དཔོན་གྱིས་སློབ་མ་ལ་བརྒྱུད་པའི་རིམ་པ་བྲེང་ཆགས་མངོན་ཚན་ཅན་དུ་གདམས་པའི་གནད་དུས་དང་ཐོག་མཉམ་འདི་ལྟའོ་ཞེས་མཚན་ཉིད་དཔག་པར་ནུས་པ་ཁོ་ན་མ་ཡིན་ཏེ། ཡེ་ཤེས་ཀྱི་སྐུ་ཅན་ཡིན་པས་འདས་གྲོངས་ཀྱིས་བསྙེལ་བ་མི་མངའ་ཡང་། བལྟར་མངོན་པ་དང་། མི་མངོན་པའི་བརྟུལ་ཞུགས་ཡམ་ཟུང་ལ་མངའ་བརྙེས་པ་དག་ལ། དུས་བསྒྲིག་པ་དང་། བརྒྱུད་ཐག་ཉེ་འགྱང་ཁོ་
ན་བསམ་པ་ནི་བྱིས་པའི་རྣམ་རྟོག་སྟེ། གང་དུ་ཆོས་དེའི་སྣོད་དུ་གྱུར་བ་མཆིས་ན་དེའི་ཐང་ཀར་རང་ཞལ་བསྟན་ཏེ་རྗེས་སུ་གདམས་པའང་ཡོད་ན་ཡོངས་སུ་གྲགས་པའི་གཏམ་དང་། དེ་ལ་དེར་བསྟེན་གྱི་ཐོག་དང་། སྔ་ཕྱི་བསྒྲིག་པ་སོགས་བློ་གྲོས་ཕུན་ཁུང་ཐུག་པའོ། །དེ་ལྟ་ནའང་ས་ར་ཧ་པ་དང་། ཀླུ་སྒྲུབ་ཡབ་སྲས་དང་། ཤ་ཝ་རི་བའི་བར་དུ་བརྒྱུད་པ་ནས་བརྒྱུད་པར་འདོམས་པ་ཡང་ཡོད་ལ། དེའི་ཕྱིར་རྣལ་འབྱོར་བླ་ན་མེད་པ་ནི་མངོན་ཚན་དུ་སྤྱོད་པ་ཆེར་མེད་ཀྱང་རང་བཞིན་དུ་སྔོན་ལས་ཆེས་དར་བར་གྱུར་བས་གྲུབ་ཐོབ་གྲགས་ཆེར་རྣམས་ཀྱང་དུས་འདི་ཙམ་ནས་བྱོན་ལ། བྱ་སྤྱོད་ཀྱི་སྔགས་རྒྱུད་རྣམས་ནི་ལོ་ཉིས་བརྒྱ་ཙམ་གྱི་བར་དུ་མངོན་ཚན་དུ་སྤྱོད་པར་ཤིན་ཏུ་དར་རོ་ཞེས་གྲགས་སོ།། །།འཛམ་བུའི་གླིང་མཛེས་པར་བྱེད་པའི་རྒྱན་གྱི་དམ་པར་གྱུར་ལ། ཤིང་རྟ་ཆེན་མོའི་ལམ་སྲོལ་འབྱེད་པ་སློབ་དཔོན་ཐོགས་མེད་དང་། དེའི་གཅུང་དབྱིག་གཉེན་ནི། རྒྱལ་པོ་སངས་རྒྱས་ཕྱོགས་ཀྱི་བུ་ཟབ་མོའི་ཕྱོགས་ཞེས་བྱ་བ་རྒྱལ་སྲིད་ལ་གནས་པའི་ཚེ། དགེ་སློང་སྡེ་སྣོད་གསུམ་པ་ཞིག་ང་རྒྱལ་གྱི་རྣམ་པར་སྨིན་པ་ལས་བུད་མེད་དུ་སྐྱེ་བ་བཟུང་བ་བྲམ་ཟེ་མོ་པྲ་ཀཱ་པ་ཤཱི་ལ་ཞེས་བྱ་བ། སྔོན་གྱི་བག་ཆགས་ཀྱི་དབང་ལས་བསྟན་པ་ལ་དད་ཅིང་བློ་གྲོས་རྣོ་བ། བྱང་ཆུབ་ཀྱི་སེམས་སྟོབས་ཆེ་བ་ཞིག་ཡོད་པ་དེ་འདི་སྙམ་དུ། ཀྱེ་མ་བསྟན་པ་ནི་འདི་ལྟར་ཉམ་དམས་པ་བདག་ཅག་ནི་བུད་མེད་དུ་གྱུར་པས་ཅི་བྱང་ཡོད་ཀྱིས། ལུས་ལས་ཁྱེའུ་བསྐྱེད་དེ། དེ་བསྟན་པ་ལ་སྲི་ཞུ་བསྐྱེད་དུ་གཞུག་གོ་སྙམ་ནས། རྒྱལ་རིགས་དང་འདུས་པ་ལས་སློབ་དཔོན་ཐོགས་མེད་དང་། བྲམ་ཟེའི་རིགས་ངང་འདུས་པ་ལས་དབྱིག་གཉེན་འཁྲུངས་སོ། །དང་པོ་ནི་བློ་རྣོ་བའི་ཆོ་ག་རྫོགས་པར་བྱས་ནས། ཆེར་བསྐྱེད་པ་ན། རིག་པའི་གནས་བཅོ་བརྒྱད་མ་ཉིད་ཀྱིས་བསླབས་ཏེ་ཤིན་ཏུ་བྱང་བར་གྱུར་ཏོ། །བུས་རང་གི་རིགས་ཀྱི་ཆོས་འདྲི་བ་ན། བུ་རིགས་ཀྱི་བྱ་བ་བྱེད་པའི་ཕྱིར་བསྐྱེད་པ་ནི་མ ་ཡིན་ཏེ།
བསྟན་པ་ལ་ཕན་པའི་སླད་དུ་བསྐྱེད་པ་ཡིན་ན། རབ་ཏུ་བྱུང་ནས་བློ་སྦྱང་བར་འོས་སོ། །ཞེས་གདམས་པ་ད་ལ་མཉེན་ཏེ་བསྟན་པ་ལ་ཞུགས། བསྙེན་པར་རྫོགས་ནས་ལོ་ལྔའི་བར་དུ་ཀླག་པ་ལ་བརྩོན། ལོ་རེ་རེ་ཚིགས་བཅད་འབུམ་འབུམ་གྱི་ཚིག་དོན་ཐམས་ཅད་ཆུབ་པར་བྱས། སྡེ་སྣོད་གསུམ་དང་ཐེག་པ་ཆེན་པོའི་མདོ་སྡེ་ནི་ཕལ་ཆེར་སླ་ཡང་། ཤེར་ཕྱིན་གྱི་མདོ་ནི་བརྗོད་བྱ་མ་ཟློས་ཤིང་། མ་འཛིངས་པ་དག་དཀའ་བའི་གནས་སུ་གཟིགས། དེའི་དོན་དུ་ལྷག་པའི་ལྷ་བསྒྲུབ་པར་དགོངས། རི་བོ་བྱ་རྐང་ཅན་དུ་གྲགས་པའི་ཕུག་པར་འཕགས་པ་བྱམས་པ་བསྒྲུབས་པས་ལོ་གསུམ་དུ་རྟགས་ཅི་ཡང་མ་ཐོབ་བོ། །དེར་ཐུགས་མུག་ནས་ཕྱིར་ཐོན་པ་ན། བྲག་ངོས་ལ་བྱ་ཚང་བཅས་པ་གཤོག་པས་རེག་པས་ཤིན་ཏུ་ཟད་པ་དག་གཟིགས་པས། རང་གི་བརྩོན་འགྲུས་ཉམ་ཆུང་བར་ཤེས་ཏེ་སླར་ལྡོག་གོ། ཡང་ལོ་གསུམ་གྱི་མཐར་ཡང་དེ་བཞིན་དུ་ཐོན་པ་ན། ཆུ་ཐིགས་ཀྱིས་བྲག་ཟད་པ་གཟིགས་པ་ལས་བརྩོན་འགྲུས་བསྐུལ་ཏེ་ཡང་ལོ་གསུམ་བསྒྲུབས། དེ་ལས་ཐོན་པ་ན། རྒན་པོ་ཞིག་གིས་རས་པ་ལ་འཇམ་པོས་ལྕགས་འཕྱིས་པ་ལས་ཁབ་ཏུ་གྱུར་བ་སྣོང་ཁེངས་པ་ཙམ་བསྟན་པས་དེའི་རྐྱེན་གྱིས་ཡང་ལོ་གསུམ་སྟེ། ཁྱོན་ལོ་བཅུ་གཉིས་སུ་བསྒྲུབས་ཀྱང་ལྟས་སུ་གྱུར་བ་ཅང་མ་མཐོང་བས་སྐྱོ་བ་ལྷག་པར་འཕེལ་ཏེ་ཕྱིར་འཐོན་ཏོ། །དེར་ཁྱི་མོ་མི་ལ་ཟུག་ཅིང་། སྨད་འཐུས་ཟ་བ་ཞིག་གཟིགས་པས། སྙིང་རྗེ་ཚད་མེད་པ་སྐྱེས། འབུ་རྣམས་མ་བསལ་ན་ཁྱི་འདི་ཐར་བར་མི་འགྱུར་ལ། གལ་ཏེ་བསལ་ན་འབུ་རྣམས་འཆི་བར་འགྱུར་སྙམ་ནས། སྤུ་གྲི་རྣོན་པོས་རང་གི་བརླའི་ཤ་ནས་ཕྲལ་ཏེ། དེར་འབུ་གཞུག་གོ་སྙམ་ནས། སྤྱན་བཙུམས་པའི་མོད་ལ་འབུ་རྣམས་བླངས་པ་ན། ཕྱག་ཡུལ་ཡུལ་བ་ལས་ཅང་མ་རྙེད། དེ་ཉིད་དུ་གཟིགས་པ་ན་སྔར་གྱི་ཤུལ་ན་རྗེ་བཙུན་བྱམས་པ་མཚན་དཔེ་རབ་ཏུ་འབར་བ་
ལྷམ་མེར་སྣང་། དེར་ཡུས་པའི་ཚུལ་གྱིས། ཀྱེ་མ་ཡབ་ཅིག་བདག་གི་སྐྱབས། །ངལ་བརྒྱས་འབད་ཀྱང་འབྲས་མ་མཆིས། །ཅི་ཕྱིར་ཆར་སྤྲིན་རྒྱ་མཚོའི་དཔུང་། །གདུང་བས་བསྲེགས་ཏེ་སྐོམ་ཆོད་འབེབས། །བདག་གིས་དེ་ཙམ་དུ་བསྒྲུབས་ཀྱང་ཞལ་མི་སྟོན་བཞེས་སྤྱན་ཆབ་ཕྱུང་བས། །ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ང་ནི་རྟག་ཏུ་ཁྱོད་ཀྱི་མདུན་ན་གནས་ཏེ་ལས་ཀྱི་སྒྲིབ་པས་མ་མཐོང་ངོ། །ད་ལྟའི་སྙིང་རྗེ་ཆེན་པོའི་མཐུ་ནི་དེ་ལྟའོ། །ད་གྲོང་ཁྱེར་གྱི་སྐྱེ་བོ་རྣམས་ལའང་སྟོན་པར་གྱིས་ཤིག་དང་། གསུངས་པ་བཞིན་ཕྲག་པར་ཐོགས་ནས་བསྟན་པས། ཆང་འཚོད་མས་ཁྱི་ཀུ། དབུལ་པོས་ཞབས་མགོ་ཙམ་མཐོང་བར་གྲགས་ཏེ་གཞན་དུ་སུ་ལའང་མཐོང་བའི་སྣོད་ཀྱིས་བསྐལ་བ་ཉིད་དེ། ད་ཅི་འདོད་ཕ་ཡིན་གསུང་བ་ལ། །ཐེག་པ་ཆེན་པོ་དར་བར་གསུངས་པས། །ངའི་ཆོས་གོས་ལ་འཇུས་ཤིག་གསུངས་ནས་ཡུད་ཙམ་ལ་དགའ་ལྡན་གྱི་གནས་སུ་ཁྲིད། ལྷའི་དྲོ་སྐད་ཅིག་སྟེ་དེ་མིའི་ཞག་གིས་གཞལ་བ་སོགས། །བཞུགས་ཡུན་རིང་ཐུང་འདོད་པ་ཐ་དད་པ་སྣང་། ཐེག་པ་ཆེན་པོ་མ་ལུས་དང་། བྱམས་པའི་ཆོས་ལྔ་གསན་པ་ན་དོན་ཚན་ངེས་ཏིང་ངེ་འཛིན་གྱི་སྒོ་མི་འདྲ་བ་རེ་རེ་ཐོབ། ཡུན་རིང་པོར་སྐད་ཅིག་གིས་གཤེགས་པ་དང་། ན་ཚོད་ལ་བགྲེས་རྒུད་མི་མངའ། མཚན་གྱི་རྗེས་མཐུན་པས་སྐུ་ལ་བརྒྱན་པ་སོགས་ས་ཐོབ་པའི་ཡོན་ཏན་ཁྱད་པར་ཅན་མང་པོ་མངའ། མནལ་ལམ་དུ་ཡང་། རང་དོན་ཡིད་བྱེད་ཀྱི་བློ་མེད་ཅིང་། ཏིང་ངེ་འཛིན་གྱི་སྒོ་མཐའ་ཡས་པ་ལ་སྤྱོད་པ་དང་། འཇམ་པ། དུལ་བ། ངེས་པ་ཡང་ཡིན་ལ། གྲུབ་པའི་མཐའ་དང་། སྤྱོད་པ་ངན་པ་ཚར་བཅད་པ་སོགས་ལ་ལྷག་པར་རྣོ་བ་ཞིག་གོ། དེ་ནས་མ་ག་དྡཱའི་ཡུལ་གྱི་ཕྱོགས་ས་ལུ་བ་ན་ཞེས་བྱ་བའི་ནགས་སུ་གཙུག་ལག་ཁང་མཛད་དེ་བཞུགས་ནས་ཚུལ་ཁྲིམས་ཕུན་
སུམ་ཚོགས་ཤིང་། མང་དུ་ཐོས་པའི་སློབ་མ་བརྒྱད་ལ་ཐེག་པ་ཆེན་པོའི་ཆོས་ཟབ་མོ་དག་བསྟན་པས། ཐམས་ཅད་ཀྱང་བཟོད་པ་ཐོབ་ཅིང་རྫུ་འཕྲུལ་མངོན་པར་འདུ་བྱེད་པ་མདོ་སྡེ་རྒྱ་མཚོའི་ཕ་རོལ་ཏུ་སོན་པ་ཤ་སྟག་བྱུང་། དེར་བྱམས་པའི་ཆོས་ལྔ་ཡང་ཡི་གེར་བཀོད། མངོན་པ་ཀུན་ལས་བཏུས་ལ་སོགས་པ་བསྟན་བཅོས་རྒྱ་ཆེན་པོ་མཛད། ཨུཥྨ་པུ་རི་ཞེས་བྱ་བའི་གཙུག་ལག་ཁང་དུ་རྒྱལ་པོ་ཟབ་མོའི་ཕྱོགས་ཀྱིས་སྦྱིན་བདག་བྱས་ཏེ་ཕྱོགས་བཞིའི་དགེ་སློང་ཐམས་ཅད་འདུས་པར་སྡེ་སྣོད་གསུམ་དང་། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་བཤད་པས༑ མདོ་སྡེའི་གནས་ལ་བློ་གྲོས་བྱང་ཞིང་ཐེག་ཆེན་གྱི་རིགས་སད་པ་སྟོང་ཕྲག་ལས་ཐལ་བ་བྱུང་། མངོན་པའི་ཕྱོགས་ཀྱི་བསྟན་པ་བར་སྐབས་སུ་ནུབ་པ་ལྟར་གྱུར་བ་སླར་ཤིན་ཏུ་དར་བའི་གྲགས་པའི་རྒྱལ་མཚན་ཕྱར། དེའི་ཚེ་རྒྱལ་པོ་ཟབ་མོའི་ཕྱོགས་ཀྱི་བསམས་པ། སློབ་དཔོན་འདི་ནི་འཕགས་པ་ཡིན་ཞིང་གཞན་སེམས་ཤས་པར་གྲགས་ན། ཇི་ལྟར་ཡིན་བགམ་པར་བྱའོ་ཞེས་བློན་པོ་རྣམས་དང་། བྲམ་ཟེའི་ཚོགས་དམངས་དང་བཅས་པར་བགྲོས་ཏེ། བསྔགས་པར་འོས་སམ། དམའ་དབབ་པའི་གནས་གང་ཡིན་པ་ཐ་ཚིག་ཏུ་བཀོད་ནས་ཕོ་བྲང་གི་འཁོར་ཁྱམས་སུ་སློབ་དཔོན་འཁོར་བཅས་སྤྱན་དྲངས། ཕུན་སུམ་ཚོགས་པའི་བསོད་ནམས་ཀྱིས་བསྙེན་བཀུར། མ་ཧེ་ནག་པོས་དཀར་གྱིས་བསྐུས་པ་ཁྱིམ་ཕུགས་སུ་སྤས། གསེར་གྱི་བུམ་པ་མི་གཙང་བས་བལྟམས་པ་སྦྲང་རྩིས་བཀབ་སྟེ་རས་ཀྱིས་གཡོགས་པ་ཅན་ལག་ཏུ་ཐོགས་ནས། ཁྱིམ་གྱི་ཕུགས་ན་ནི་གང་། ལག་ཏུ་ཐོགས་པ་ནི་ཅི་ཞེས་དྲིས་པས། སློབ་དཔོན་ནི་ཚིག་གིས་མངོན་པར་ཤེས་པ་ཙམ་མ་ཡིན་པར། དོན་གྱིས་མངོན་པར་ཤེས་པའི་གནས་ལ་མཐར་ཕྱིན་པ་ཞིག་པས་ལྐོག་ཏུ་གྱུར་བ་དེ་ནི་མངོན་དུ་ཤེས་པར་མཛད་དོ། །སླར་ཡང་ལྐོག་གྱུར་ཤེས་པ་ནི་ཟག་པ་དང་བཅས་པའི་ཁམས་ལའང་ཡོད་ན། སེམས་
ཀྱི་ཆོས་ཉིད་ཤེས་སམ་མི་ཤེས་སྙམ་ནས། ཤེར་བྱིན་གྱི་མདོའི་ཚིག་ལ་དྲི་བ་གསུམ། དོན་ལ་དྲི་བ་གསུམ་སྟེ་དྲུག་ཡིད་ཀྱིས་དྲིས་པ་ལ། ལན་ཐོགས་པ་མེད་པར་བཏབ་པས། རྒྱལ་པོ་དང་སྐྱེ་བོའི་ཚོགས་ཐམས་ཅད་ངོ་མཚར་དུ་གྱུར་ཏོ། །སླར་རྒྱལ་པོ་དེ་ཆོས་ཀྱིས་ཡང་དག་པར་བཏུལ་་ནས་ཐེག་པ་ཆེན་པོའི་ཆོས་གཞི་ཉི་ཤུ་རྩ་ལྔ་བྱེད་དུ་བཅུག་གོ། དེའི་ཚེ་གཅུང་དབྱིག་གཉེན་ཉན་ཐོས་པའི་ཕྱོགས་སུ་གནས་པས། ཐེག་པ་ཆེན་པོའི་ཆོས་དང་གང་ཟག་ལ་ཐེ་ཚོམ་ཟ་བའི་སྟིང་ཚིག་སྨྲ་བ་གསན་ནས་ཐབས་ལ་མཁས་པ་དང་ཐུགས་རྗེ་ཆེན་པོའི་ཕྲིན་ལས་མ་རྨད་པས་བཏུལ། ཡུལ་ལྷོ་ཕྱོགས་པའི་བྲམ་ཟེ་བསུ་ན་ག་ཞེས་བྱ་བས། འཕགས་པ་ཐོགས་མེད་ཀྱིས། རྒྱལ་བ་མ་ཕམ་པ་ལས་ལུང་བླངས་ནས་ཐེག་པ་ཆེན་པོའི་ཆོས་སླར་ཡང་དར་བར་བྱེད་དོ་ཞེས་ཐོས་ནས་དགེ་བའི་རྩ་བ་རྒྱ་ཆེན་པོ་བསྐྱེད་པའི་ཕྱིར་སྤྱན་འདྲེན་དུ་འོངས་པ། གང་དང་ལྷན་ཅིག་པར་གཤེགས་པར་བརྩམས་པ་ན། དེའི་མ་ནད་ཀྱིས་བཏབ་བེ་་ཞེས་པའི་ཕོ་ཉ་བྱུང་བས། ཡུལ་དུ་མྱུར་བར་སླེབ་བར་འདོད་པའི་གདུང་བ་བསྐྱེད་པ་ན། སློབ་དཔོན་གྱིས། བྲམ་ཟེ་འདོད་ན་མྱུར་བར་སློབ་པར་བྱེད་པར་བྱེད་དོ་ཞེས་དབུགས་ཕྱུང་ནས་ཟླ་བ་གསུམ་གྱི་ལམ་ཐུན་ཚོད་གཉིས་ལ་བགྲོད་པར་མཛད། ཚོང་དཔོན་དྷ་ན་རཀྵ་ཏ་ཞེས་བྱ་བས་སྤྱན་དྲངས་པའི་ཚེ་ཡང་དེ་བཞིན་དུ་མཛད་ནས་ཡུལ་ཀྲྀཥྞ་ར་ཛ་དང་། ཨོ་རྒྱན་གཉིས་ཀར་ཡུན་རིང་བཞུགས་ཤིང་ཐེག་པ་ཆེན་པོ་དར་བར་མཛད། ཡུལ་དེ་གཉིས་ཀྱི་བར་དུ་མཆོད་རྟེན་བརྒྱ་ཕྲག་རེ་དང་། ལྷ་ཁང་ཉི་ཤུ་རྩ་ལྔ་བཞེངས་ནས་རེ་རེ་ཡང་ཐེག་ཆེན་གྱི་ཆོས་གཞི་རེ་བཙུགས་སོ། །མ་ག་དྷཱ་ར་ཡང་དེ་ཇི་བཞིན་དུ་མཛད། ལན་ཅིག་མཐའ་ཁོབ་ཀྱི་གྲོང་ཁྱེར་ཨ་མོ་རྒྱ་དང་ཉེ་བར་རྒྱལ་ཕྲན་ཞིག་ལ་ཆོས་སྟོན་པའི་ཚེ། གར་ལོག་གི་དམག་བྱུང་ནས། སློབ་མའི་ཚོགས་ལ་བཟོད་པའི་བུར་སྐྱེད་ཅིག་པར་གདམས། ཐམས་ཅད་ཀྱིས་མཉམ་པར་བཞག་པས། མདའ་འཕགས་པ།
རྡུལ་དུ་སོང་། དམག་གི་གཙོ་བོས་སློབ་དཔོན་ལ་རལ་གྲི་བསྣུན་པས་ཀྱང་སྐུ་ལ་གནོད་པ་མེད་ཅིང་། རལ་གྲི་དུམ་བུ་བརྒྱར་ཆག། ཚིག་རྩུབ་ཀྱི་ཚེར་མ་རྣོན་པོས་ཀུན་ནས་གཞར་ཡང་བཟོད་པའི་གོ་ཆ་ལ་ཉམ་ཉེས་པ་མེད་པས། དེ་དག་ཀྱང་དད་དེ་ཕྱག་གིས་བཏུད་ནས་སོང་ངོ། །གཞན་གྱི་བསམ་པ་མཁྱེན་པའི་ཕྱིར། ཆོས་སྟོན་པ་ཐམས་ཅད་སློབ་མས་གང་མི་ཤེས་ཤིང་ཐེ་ཚོམ་གྱི་གནས་སུ་གྱུར་བ་དེ་གསལ་བར་བཀྲལ་ནས་སྟོན་པའི་ཕྱིར། སློབ་དཔོན་འདི་ལས་ཆོས་ཉན་པ་ལ་མི་མཁས་པར་གྱུར་བ་འགའ་ཡང་མེད་ཅིང་། ས་དང་ལམ་གྱི་ཡོན་ཏན་སྐྱེས་པ་ཡང་སྟོང་ཕྲག་མང་པོ་བྱུང་། གྲུབ་མཐའ་ཕྱོགས་རེ་ཙམ་མ་ཡིན་པར་སྒོ་ཐམས་ཅད་ནས་གསུངས་པས་ཐེག་པ་ཆེ་ཆུང་གི་སློབ་མར་གྱུར་བ་གྲངས་མེད། ཁྱད་པར་ཀླུ་སྒྲུབ་ཀྱི་ཚེ་ཡང་དགེ་འདུན་ཕལ་ཆེར་ཉན་ཐོས་ཁོ་ན་མང་ལ། བར་དུ་ཐེག་ཆེན་གྱི་ཆོས་ཤིན་ཏུ་དར་བར་གྱུར་པའི་ཚེ་ཡང་། དེའི་དགེ་སློང་ཁྲི་ཕྲག་དུ་ལོངས་པ་ནི་མེད་ན། སློབ་དཔོན་འདིའི་དུས་དགེ་སློང་ཐེག་པ་ཆེན་པོ་འཛིན་པ་ཁྲི་ཕྲག་མང་པོ་བྱུང་བས་ཐེག་ཆེན་གྱི་བསྟན་པའི་བདག་པོར་གྲགས། སྐུ་ཚེའི་སྨད་ལ་ན་ལེནྡྲར་ལོ་བཅུ་གཉིས་ཙམ་བཞུགས། དགུན་དུ་གྱུར་བའི་ཚེ་ཉིན་རེ་བཞིན་མུ་སྟེགས་ཀྱིས་རྒོལ་བ་ལྷགས་པ་ལ། རིག་པ་སྣ་ཚོགས་ཀྱི་མཚོན་ཆ་རྣོན་པོས་དེ་དག་གི་གྲུབ་པའི་མཐའ་སུན་ཕྱུང་བས། མུ་སྟེགས་སྟོང་ཕྲག་ཏུ་ཉེ་བའང་ནང་པའི་བསྟན་པ་ལ་རབ་ཏུ་གྱུར། གང་ན་དགེ་སློང་ལྟ་བ་ཉམས་པ་དང་མ་བསྡམས་པ་དང་། ཆོ་ག་མ་ཡིན་པ་ཐམས་ཅད་ཚར་བཅད་ནས་དགེ་འདུན་ཤིན་ཏུ་དག་པར་མཛད། ཐེག་པ་ཆེན་པོའི་མངོན་པ་མིང་ཙམ་དུ་གྱུར་བ་དེ་མཆོག་ཏུ་གསལ་བར་མཛད་ནས་རྒྱལ་པོའི་ཁབ་ཏུ་ཞི་བའི་གྲོང་ཁྱེར་དམ་པར་གཟིམས་སོ།། །།འཛམ་གླིང་མཛེས་པའི་རྒྱན་སློབ་དཔོན་མཁས་པའི་དབང་ཕྱུག་དབྱིག་གཉེན་ནི། སྐྱེ་བའི་མྱུ་གུ་བཟུང་བ་ནས་བློ་རྣོ་བའི་ཆོ་ག་བྱས་ཤིང་། ཡི་གེ་དང་།
བརྡ་སྤྱོད་པ་ལ་སོགས་རིག་པའི་མཐུ་སད་པའི་་བར་ནི་གཅེན་དང་མཚུངས་ལ། ན་ལེནྡྲར་རབ་ཏུ་བྱུང་ནས་ཉན་ཐོས་ཀྱི་སྡེ་སྣོད་མ་ལུས་པ་བྱང་བར་མཛད། ཆོས་མངོན་པ་དང་། སྡེ་བ་བཅོ་བརྒྱད་ཀྱི་གྲུབ་པའི་མཐའ། རིགས་པའི་ལམ་གྱི་ཤིང་རྟར་གྱུར་བ་གང་ཡིན་པ་དེའི་རྩེ་སོན་པ་ཉིད་དུ་འཛེག་པའི་སླད་དུ་ཁ་ཆེར་སློབ་དཔོན་སཾ་གྷ་བྷ་དྷར་བསྙེན། བསྟན་བཅོས་བྱེ་བྲག་ཏུ་བཤད་པ་དང་། གྱེས་པ་བཅོ་བརྒྱད་ཀྱི་མདོ་སྡེ་དང་། འདུལ་བའི་གཞུང་མི་འདྲ་བའི་ཁྱད་པར། མུ་སྟེགས་ཅན་དྲུག་པའི་གཞུང་ལུགས་དང་། རྟོག་གེའི་གནས་ཐམས་ཅད་ལ་མཁས་པར་མཛད། དེ་ཉིད་དུའང་ལོ་གྲངས་འགའ་ཞིག་ཏུ་རིགས་པ་དང་། མི་རིགས་པར་རྣམ་པར་བྱེ་ཞིང་ཉན་ཐོས་ཀྱི་སྡེ་སྣོད་སྨྲ་བའི་དབང་ཕྱུག་དམ་པར་གྱུར། སླར་མ་གྷ་དྷཱར་འབྱོན་པར་དགོངས་ནས་ལམ་དུ་གནོད་སྦྱིན་གདུག་པ་དང་། ཆོམ་རྐུན་གྱིས་གནོད་པས་ཉམ་ཉེས་པ་མེད་པར་བརྟོལ། ན་ལེནྡྲར་འཕགས་པ་ཐོགས་མེད་ཀྱིས་མཛད་པའི་ས་སྡེ་ལྔའི་གླེགས་བམ་གཟིགས་པ་ན། ཐོས་པའི་ལང་ཚོ་དར་ཡང་ཉན་ཐོས་ཀྱི་བློ་གྲོས་དཀྱེལ་ཆུང་བས་ཐེག་པ་ཆེན་པོ་ཐུགས་སུ་མ་ཆུད། རྟོག་གེའི་རིག་པ་ནི་དག་པའི་སྣང་བ་དང་མཛའ་བ་མ་ཡིན་པས་ལྷག་པའི་ལྷ་ལ་གསན་པའི་གནས་ལ་ཐེ་ཚོམ་གྱིས་ཀུན་ནས་དཀྲིགས་ཏེ་ཐེག་པ་ཆེན་པོའི་ཆོས་དང་གང་ཟག་ལ་བསྟིང་པའི་ཚིག། ཀྱེ་མ་ཐོགས་མེད་ནགས་སུ་ལོ། །བཅུ་གཉིས་བར་དུ་ཏིང་འཛིན་བསྒྲུབས། །ཏིང་འཛིན་མ་གྲུབ་གླང་ཆེན་གྱིས། །རྒྱབ་ཁལ་ནོན་པའི་གྲུབ་མཐའ་བརྩམས། །ཞེས་སྨྲས་པ་གཅེན་པོས་གསན་ཏེ་འདུལ་བའི་དུས་ཡིན་པར་དགོངས། རང་གི་སློབ་མ་གཉིས་མདོ་སྡེས་བཅུ་པ་དང་། བློ་གྲོས་མི་ཟད་པའི་མདོ་སོ་སོར་འཛིན་དུ་བཅུག་ནས། སྲོད་ཀྱི་དུས་ལ་ནི་བློ་གྲོས་མི་ཟད་པ་ཐོན། ཐོ་རངས་ཀྱི་དུས་ན་ས་བཅུ་པ་ཐོན་ཞིག་པར་གདམས་ནས་གཅུང་གི་དྲུང་དུ་བཏང་ངོ། །དེ་གཉིས་ཀྱིས་ཀྱང་དེ་བཞིན་དུ་བྱས་པས། དབྱིག་གཉེན་གྱིས་རྟོག་པ་བཅུག་ནས་སྲོད་ཀྱི་ཚེ། ཐེག་ཆེན་འདི་རྒྱུ་ལ་
བཟང་སྟེ། འབྲས་བུ་ལ་གཡེལ་ལམ་སྙམ་དུ་དགོངས། །ཐོ་རངས་ས་བཅུ་པ་བཏོན་པས། རྒྱུ་འབྲས་གཉིས་ཀ་ལ་བཟང་བར་ཤེས་ཏེ་དེ་ཉིད་དུ་བློ་མཆོག་དམ་པར་གྱུར། སྔར་སྐུར་བ་བཏབ་པ་རྗེས་སུ་དྲན་ནས་ཤིན་ཏུ་འགྱོད་དེ་ལྕེའི་མྱུ་གུ་ལ། སྤུ་གྲིའི་རག་པ་བརྡེག་པར་གཟས་པ་ན། མདོ་བདོན་པ་གཉིས་ཀྱིས། ལྗགས་བཅད་པས་ག་ལ་འཚལ། སྡིག་པ་བཤགས་པའི་ཐབས་གཅེན་གྱིས་སྟོན་ན་འཕགས་པའི་དྲུང་དུ་གཤེགས་པར་འཚལ་ཞེས་བསྐུལ་བས། ཐོགས་མེད་ཀྱི་དྲུང་དུ་བྱོན། སྐུ་མཆེད་ཆོས་ཀྱི་བགྲོ་གླེང་མཛད་པ་ན། གཅུང་སྤོངས་པ་མྱུར་ལ། གཅེན་མཆིད་ལན་བཟང་བར་བྱུང་། གཅེན་གྱི་གསུང་ལས། ཁྱོད་སྐྱེ་བ་ལྔ་བརྒྱར་པཎྜིི་ཏར་གྱུར་བས་ཤེས་རབ་རྣོ་ལ། ང་ལྷག་པའི་ལྷ་ལ་འདྲི་ཡིན་སྨྲ་བ་ཡིན་ནོ་གསུངས་པས། དེ་ཉིད་བདག་ལའང་བསྟན་དུ་གསོལ་ཞུས་པ་ན། རྗེ་བཙུན་ལ་འདྲི་ཡི་གསུངས་ནས་ཞུས་པས། བྱམས་པས་འདི་སོ་སོ་སྐྱེ་བོ་ཡིན། ཐེག་པ་ཆེན་པོ་ལ་སྐུར་བ་བཏབ་པས་ཚེ་འདི་ལ་ང་མི་མཐོང་། ལས་སྒྲིབ་ཟད་པའི་ཐབས་སུ་ཐེག་ཆེན་གྱི་མདོ་ལ་འགྲེལ་བ་མང་དག་རྩོམས། གཙུག་ཏོར་རྣམ་པར་རྒྱལ་མ་ཡི་དམ་དུ་གྱིས་ཤིག། ཕྱི་མའི་དུས་ན་མཇལ་བར་འགྱུར་རོ། །ཞེས་ལུང་བསྟན་པ་བསྙད་པས་ཤིན་ཏུ་ཡིད་ཆེས་ཏེ། ང་ཡི་ཕུ་བོ་ཀླུ་དང་འདྲ། །ང་ནི་ཆར་སྡོད་བྱ་དང་འདྲ། །ཀླུ་ཡི་རྒྱལ་པོས་ཆར་ཕབ་ཀྱང་། །བྱ་ཡི་མགྲིན་པར་སོང་བ་མེད། །ཅེས་སྨྲས་སོ། །དེ་ལྟར་སྐུ་མཆེད་བགྲོ་གླེང་མཛད་པ་ནས་འདིའི་བར་གྱི་ལོ་རྒྱུས་རྒྱ་གར་བའི་བགྲོས་ཚད་མ་ཡིན་པར་དཀའ་བའི་དགག་སྒྲུབ་ཀྱང་ངེས་པར་མཐོང་སྟེ་མཁས་པའི་བྱ་བ་ཡིན་ལ། འདིར་ནི་རེ་ཞིག་བོད་འདིར་སྔོན་རབས་སུ་གྲགས་པའི་གཏམ་དང་མཐུན་པ་ཉིད་དུ་བྱས་སོ། །གཅེན་ལ་ཐེག་པ་ཆེན་པོའི་མདོ་སྡེ་ཚང་བར་གསན་པ་ཙམ་གྱིས་ཐུགས་སུ་ཆུད། སློབ་དཔོན་གཞན་ལས་སྔགས་ཀྱི་འཇུག་སྒོའང་ནོས་ནས་གཟུངས་དང་། རིག་སྔགས་བཟླས་
པས་གྲུབ། ཡང་དག་པའི་དོན་ཐུགས་སུ་ཆུད་ཅིང་ཏིང་ངེ་འཛིན་ཁྱད་པར་ཅན་ཡང་མངའ། རྒྱལ་བའི་བཀའ་མི་ཡུལ་ན་བཞུགས་སོ་འཚལ་ཐུགས་ལ་ཆུད་པར་གྲགས་པས་སྟོན་པ་མྱ་ངན་ལས་འདས་པའི་གྱི་ནས་སློབ་དཔོན་འདི་ཉིད་ལྟ་བུའི་མང་དུ་ཐོས་པ་མེད་ཅེས་བླེང་། ཉིན་རེ་བཞིན་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་བ་ཆུ་ཚོད་གཅིག་གམ་གཉིས་ཁོ་ནའི་ཡུན་ལ་བཏོན་གྲུབ་པར་མཛད་པས་བུལ་མགྱོགས་ཀྱི་མཐའ་མཚོན་ཏེ། ཉན་ཐོས་ཀྱི་སྡེ་སྣོད་གསུམ་དང་། ཐེག་པ་ཆེན་པོའི་ཆོས་ཀྱི་རྣམས་གྲངས་ཤིན་ཏུ་མང་པོ། གཟུངས་ལྔ་བརྒྱ་དང་བཅས་པ་ལོ་དུས་སུ་ལན་རེ་ཞལ་འདོན་དུ་མཛད་པའི་ཚེ། བྷག་བི་ཧ་ར་ཞེས་བྱ་བརགྲངས་་ཆེན་ཏིལ་མར་གྱིས་བཀའ་བའི་རྫིང་བུའི་ནང་དུ་བཞུགས་ནས་ཉིན་མཚན་སྦྲེལ་མ་བཅོ་ལྔས་ཚར་གཅིག་འདོན་པར་ནུས། དེ་གདུང་ཕྲག་གི་ཕུག་རོན་གཅིག་གིས་ཐོས་པས་ཐར་བའི་ས་བོན་ཐེབས་ཏེ་ཚེ་འཕོས་པ་གང་། སློབ་དཔོན་བློ་གྲོས་བརྟན་པར་གྱུར་ནས་སྐུ་ཚེའི་སྨད་ཀྱི་སློབ་མའི་མཆོག་རྒོལ་ངན་ཚར་གཅོད་ཅིང་། གཞུང་འགྲེལ་སྨྲ་བའི་དབང་ཕྱུག་ཆེན་པོར་གྱུར་ཏོ། །སློབ་དཔོན་དབྱིག་གཉེན་ཐེག་པ་ཆེན་པོར་ལ་ཞུགས་པ། དེའི་ཚེ་ཉན་ཐོས་པ་སོགས་མཁས་པ་ལྔ་བརྒྱ་ཙམ་ཡང་ཐེག་ཆེན་ལ་ཞུགས། ཐོགས་མེད་སྐུ་འདས་པའི་འོག་ཏུ་དཔལ་ན་ལེནྡྲའི་མཁན་པོ་མཛད། བསྟན་པའི་བྱ་བརླབས་པོ་ཆེ་ལ་གཡེལ་བ་མེད་བཞིན་དུ་ཉིན་རེ་བཞིན་ཆོས་སྤྱོད་བཅུ་རྣམ་པ་ཐམས་ཅད་ནས་མ་ཆག་པར་མཛད་ཅིང་། གཞན་སྟོང་ཕྲག་རེ་ཡང་ཉིན་རེར་ཆོས་སྤྱོད་བཅུ་ཚང་བ་ལ་སྦྱོར་བ་དང་། ཁྱད་པར་ཐེག་པ་ཆེན་པོའི་མདོ་སྡེ་མི་འདྲ་བའི་ཆོས་ཐུན་ཉི་ཤུ་རེ་ཆག་མེད་དུ་གསུང་། སྲོད་ཀྱི་དུས་སུ་ཆོས་རྣམས་ཀྱི་སྙིང་པོ་བསྡུས་ཏེ་ག་ལ་བཟུང་བ་དང་། གཞུང་གཟུག་པར་མཛད་ཅིང་། གུང་ཐུན་ལ་ཁམས་ཅུང་ཟད་གསོ་བའི་ངང་ནས་ལྷག་པའི་ལྷ་ལས་ཆོས་གསན་པར་མཛད། ཐོ་རངས་ཡང་དག་པའི་ཏིང་ངེ་འཛིན་ལ་མཉམ་པར་འཇོག། སྔ་ཕྱིར་མུ་སྟེགས་ཅན་གྱིས་རྒོལ་བ་ལྔ་བརྒྱ་ཙམ་ལུང་རིག་གི་འཁྲུལ་
འཁོར་རྣོན་པོས་འཐག་པར་མཛད་ནས། བྲམ་ཟེ་དང་མུ་སྟེགས་བྱེད་སྟོང་ཕྲག་ལྔ་ཙམ་ནང་པའི་བསྟན་པ་ལ་བཙུད། འཁོར་ལོ་དང་པོ་བསྟན་པའི་གཞིར་བཟུང་ནས་ཆོས་རྣམས་མ་ལུས་པའི་མཚན་ཉིད་གཏན་ལ་འབེབས་པ་མཛོད་རྩ་བ་རང་འགྲེལ་དང་བཅས་པ་མཛད་དེ། ཁ་ཆེར་འདུས་བཟང་ལ་རྩ་བ་བསྐུར་བས་མཉེས། འགྲེལ་བ་བསྐུར་བས་རྩ་བ་སུན་འབྱིན་པར་བདུག་ཅེས་མ་མཉེས་ཟེར་བའི་ལོ་རྒྱུས་ཀྱང་བོད་ན་གྲགས། འཁོར་ལོ་དང་པོ་བསྟན་པའི་གཞིར་བཟུང་ནས་ཆོས་རྣམས་མ་ལུས་པའི་མཚན་ཉིད་གཏན་ལ་འབེབས་པ་མཛོད་རྩ་བ་རང་འགྲལ་དང་བཅས་པ་མཛད་དེ། ཁ་ཆེར་འདུས་བཟང་ལ་རྩ་བ་བསྐུར་བས་མཉེས། འགྲེལ་པ་བསྐུར་བས་རྩ་བ་སུན་འབྱིན་པར་འདུག་ཅེས་མ་མཉེས་ཟེར་བའི་ལོ་རྒྱུས་ཀྱང་བོད་ན་གྲགས། འཁོར་ལོ་པར་བའི་དགོངས་འགྲེལ་ཆོས་ཐམས་ཅད་རྣམས་རིག་ཙམ་དུ་སྟོན་པ་ཤེར་ཕྱིན་གྱི་གཞུང་འགྲེལ་དང་། འཁོར་ལོ་ཐ་མ་ངེས་དོན་དུ་བཤད་པ་པྲ་ཀ་རཎ་སྡེ་བརྒྱད་རང་རྐང་དང་། བཀའ་དང་བསྟན་བཅོས་ཀྱི་འགྲེལ་བ་མང་དུ་མཛད། མཐའ་འཁོབ་ཐག་རིང་པོ་རྣམས་སུའང་གཤེགས་ཤིང་ཕལ་ཆེར་མ་ག་དྷཱ་ཉིད་དུ་བཞུགས་ནས་ཐེག་པ་ཆེན་པོའི་ཆོས་གཞིའང་བརྒྱ་རྩ་བརྒྱད་བཙུགས། ལན་ཅིག་ཤར་ཕྱོགས་གཽ་རའི་ཡུལ་དུ་བྱོན་ནས་སྐྱེ་བོ་དཔག་ཏུ་མེད་པ་ལ་མདོ་སྡེ་གསུངས་པས། ལྷས་མེ་ཏོག་གི་ཆར་པ་གསེར་དུ་ཕབ། མུ་ཏོ་བ་རེ་རེས་ཀྱང་། གསེར་གྱི་མེ་ཏོག་བྲེ་བོ་ཆེ་ཙམ་རེ་རྙེད་པ་བྱུང་། ཡུལ་དེར་ཡང་ཆོས་གཞི་བརྒྱ་རྩ་བརྒྱད་བཙུགས། ཨཽ་ཌི་བི་ཤར་བྲམ་ཟེ་མ་ཀྵི་ཀ་ཞེས་བྱ་བས་སྤྱན་དྲངས། ཐེག་ཆེན་གྱི་དགེ་འདུན་སྟོང་ཕྲག་བཅུ་གཉིས་ལ་ཟླ་བ་གསུམ་དུ་དུས་སྟོན་བྱས་པས། བྲམ་ཟེའི་ཁྱིམ་དུ་རིན་པོ་ཆེ་ལྔའི་འབྱུང་ཁུངས་བརྡོལ། རྒྱལ་པོ་ལ་སོགས་ཐམས་ཅད་དད་པར་བྱས་ནས་དེར་ལང་ཆོས་གཞི་བརྒྱ་རྩ་བརྒྱད་བཙུགས། ལྷོ་ཕྱོགས་ལ་སོགས་པའི་ཡུལ་གཞན་མང་པོར་ཡང་ཉིད་ཀྱིས་བཀའ་བསྒོས་ནས་བཙུགས་པའི་ཆོས་གཞི་རྣམས་བསྡོམས་ན་དེ་དང་མཉམ་པར་ཡོང་ཅེས་གྲགས། དེའི་དབང་ལས་ཡུལ་ཐམས་ཅད་ཀྱི་ཐེག་པ་ཆེན་པོའི་དགེ་སློང་བསྡོམས་ན་དྲུག་ཁྲིར་ལོངས་པ་ཙམ་ཡོད་པས་བསྟན་པ་ཤིན་ཏུ་རྒྱ་ཆེ། མདོར་ན་གང་དུ་བཞུགས་པར་མི་མ་ཡིན་གྱིས་མཆོད་པ་དང་། རིན་པོ་ཆེའི་འབྱུང་ཁུངས་བརྡོལ་བ། མངོན་
ཤེས་ཀྱིས་དགེ་མི་དགེའི་གནས་གསལ་པོར་སྟོན་པ། ནད་རིམས་དང་། འབྱུང་བའི་གནོད་པ་བདེན་སྟོབས་བརྗོད་པས་ཞི་ནུས་པ། རིག་སྔགས་ཀྱི་མཐུས་སྐུ་ཚེ་ལ་དབང་ཐོབ་པ་ལ་སོགས་མངའ། མཐར་ཉིད་དང་ལྷན་ཅིག་སྤྱོད་པའི་དགེ་སློང་ཚུལ་ཁྲིམས་དང་ལྡན་ཞིང་མང་དུ་ཐོས་པ་སྟོང་གིས་བསྐོར་ནས་ཐལ་ཡུལ་དུ་བྱོན། དེར་ཡང་ཆོས་གཞི་དང་དགེ་འདུན་མང་པོ་སྤེལ། དལ་པོ་ཧ་རུ་ཞེས་པ་རབ་བྱུང་གི་ཆ་བྱད་ལ་སྡོམ་ཁྲིམས་མེད་པས་ཆོས་གོས་དང་བཅས་ཏེ་ཞིང་རྨོད་པ་གཟིགས་པས། སྟོན་པའི་བསྟན་པ་ཉམས་སོ་ཞེས་ཐུགས་རབ་ཏུ་སྐྱོ་ནས། གཙུག་ཏོར་རྣམ་རྒྱལ་མའི་གཟུངས་ལྡོག་སྟེ་བཏོན་པས། དེ་ཉིད་དུ་སྐུ་མྱ་ངན་ལས་འདས། སློབ་དཔོན་འདི་དང་། བོད་ཀྱི་རྒྱལ་པོ་ལྷ་ཐོ་ཐོ་རི་གཉན་བཙན་ཐེག་མཉམ་པར་གྲགས་སོ།། །།ཆེན་པོ་བཞིའི་ལ་གྱལ་སློབ་དཔོན་ཡོན་ཏན་འོད་ནི། རྒྱལ་པོ་ཟབ་མོའི་ཕྱོགས་མི་རྟག་པར་གྱུར་ནས། ནུབ་ཕྱོགས་མ་རུའི་ཡུལ་དུ་རྒྱལ་པོ་ཤྲཱི་ཧརྴ་ཞེས་བྱ་བ་ལས་དབང་ཤིན་ཏུ་བཙན་པ་ཞིག་བྱུང་ནས། ནུབ་ཕྱོགས་ཀྱི་རྒྱལ་ཁམས་ལ་ལུང་བཏང་། དེའི་ཚེ་ན་སློབ་དཔོན་ཡོན་ཏན་འོད། ཡུལ་བཅོམ་རླག་ཏུ་བྲམ་ཟེའི་རིགས་ཀྱི་མྱུ་གུ་ལས་ལང་ཚོའི་མེ་ཏོག་གསལ་ཏོ། །དེར་རིགས་ཀྱི་ཆེས་རིག་བྱེད་ཡན་ལག་དང་བཅས་པ་ལ་ལེགས་པར་བྱང་བའི་དུས་ཤིག་ན། དེ་ཉིད་ཀྱི་གཙུག་ལག་ཁང་དུ་རབ་ཏུ་བྱུང་ཞིང་བསྙེན་པར་རྫོགས། སློབ་དཔོན་ཆེན་པོ་དཔྱིག་གཉེན་ལས་སྡེ་སྣོད་གསུམ་དང་། ཐེག་པ་ཆེན་པོའི་མདོ་སྡེ་དུ་མ་ལ་སྦྱངས་པ་ཕུལ་དུ་ཕྱིན། སྡེ་པ་ཐ་དད་པའི་འདུལ་བ་བསྟན་བཅོས་དང་བཅས་པ་མཐའ་དག་ལ་མཁྱེན་པའི་སྤྱན་དང་ལྡན། རྟག་ཏུ་འདུལ་བ་འབུམ་སྡེ་ཐུགས་ལ་འདོན་པར་མཛད་ཅིང་། ལྷན་ཅིག་གནས་པའི་དགེ་སློང་སྟོང་ཕྲག་ལྔ་ཡོད་པའང་མ་བསྡམས་པའི་ཉེས་བྱས་ཕྲ་མོ་ཙམ་དང་ཡང་མཛའ་བར་མི་བྱེད་ཅིང་། གལ་ཏེ་བྱུང་སྲིད་ནའང་ཕྱིར་བཅོས་ཀྱིས་དེ་མ་ཐག་ཏུ་སོར་ཆུད་པར་བྱེད་པས། སྔོན་གྱི་དགྲ་བཅོམ་པ་རྣམས་ཀྱིས་བསྟན་པ་སྐྱོང་བའི་དུས་བཞིན་
དུ། ཡུལ་བཅོམ་རླག་གི་གཙུག་ལག་ཁང་ཨ་གྲ་པུ་རི་ཞེས་བྱ་བའི་རྒྱན་དམ་པར་མཛེས་པ་ཉིད་དོ། །དེར་ཚུལ་ཁྲིམས་རྣམ་པར་དག་པའི་བདེན་པ་ནི་ཚད་མེད་པ་ཅིག་པས་ཀླ་ཀློའི་གྲུབ་མཐའ་འཛིན་པ་སྟོང་ཕྲག་བཅུ་གཉིས་འབར་བ་ཆེན་པོ་མེའི་ཀློང་དུ་རེ་ཞིག་རྒྱས་འདེབས་པར་བྱེད་པའི་རྒྱལ་པོ་ལས་ཤུགས་ཅན་ཤྲཱི་ཧརྴས། བློན་པོ་མ་ཏང་ག་ར་ཛ་ཆད་པས་བཅད་དེ་མིག་ཕྱུང་བ་ཡང་སློབ་དཔོན་འདིའི་སྨོན་ལམ་གྱི་བདེན་པས་སོར་ཆུད་པར་མཛད། རྒྱལ་པོ་དེའི་བློ་མར་གྱུར་བས་ཉིན་རེ་བཞིན་ལོངས་སྤྱོད་ཀྱི་འདུ་བ་རྒྱ་ཆེན་པོ་འབྱོར་ཡང་། གང་ཞིག་སྦྱངས་པའི་ཡོན་ཏན་བཅུ་གཉིས་ལ་གནས་པ་ནི། ཟས་ཀྱི་གསུམ། གོས་ཀྱི་གསུམ། གནས་ཁང་གི་ལྔ། འདུག་སྟངས་ཀྱི་གཅིག་སྟེ། སྟོན་པས་ལེགས་པར་བཅས་པའི་གནས་ལས་འདའ་བར་བྱེད་པ་མ་ཡིན་པས་དེ་མ་ཐག་དགེ་བའི་གྲོང་ཁྱེར་ཆེན་པོ་ག་ལ་བ་དེར་དམིགས་པ་མེད་པར་རྒྱས་འདེབས་པར་བྱེད་པ་ལ་སོགས་ཡོན་ཏན་གཞལ་བར་དཀའ་བ་ཞིག་གོ།། །།འཛམ་བུའི་གླིང་མཛེས་པར་བྱེད་པའི་རྒྱན་གཞུང་བྱེད་པ་པོ་སྨྲ་བའི་སེངྒ་གེ་་ཕྱོགས་ཀྱི་གླང་པོ་ནི། རྒྱལ་རིགས་སུ་སྨྲ་བའང་ཡོད་མོད་ཀྱི། འདིར་རྒྱ་གར་པའི་གཏམ་གྱི་རྗེས་སུ་འབྲངས་ནས། ལྷོ་ཕྱོགས་ཀྱི་གྲོང་ཁྱེར་སིངྒ་ག་་བཀྟ་ཞེས་བྱ་བ་ཀ་ཀེའི་ཡུལ་དང་ཉེ་བར་བྲམ་ཟེའི་རིགས་སུ་འཁྲུངས། ཕྱི་རོལ་པའི་གྲུབ་མཐའ་ལ་ལེགས་པར་བྱེད་པ་ཞིག་ཉན་ཐོས་གནས་མ་བུའི་སྡེ་པའི་མཁན་པོར་གྱུར་བ་གླང་པོ་བྱིན་ནས། ཁ་ཅིག་ཏུ་རྒྱལ་བའི་དབང་པོ་ཞེས་བྱ་བ་ལས་རབ་ཏུ་བྱུང་། ཐེག་དམན་གྱི་སྡེ་སྣོད་ཐམས་ཅད་ལ་མཁས་པར་བྱས་ནས་གླང་པོ་བྱིན་ལས་གདམས་ངག་ནོད་པས། བརྗོད་དུ་མེད་པའི་བདག་འཚོལ་བ་བསྟན་ཏོ། །དེ་རྣམ་པར་བརྟགས་ཤིང་བཙལ་བས་ཡོད་པའི་ཕྱོགས་དང་འགལ་ཏེ། ཉིན་མོ་སྐར་ཁུང་ཐམས་ཅད་བསལ། མཚན་མོ་ཕྱོགས་བཞིར་མར་མེ་བཏང་། ལུས་གཅེར་བུར་ཕྱུང་ནས་ཕྱི་ནང་ཀུན་ཏུ་ཡང་ཡང་བལྟ་
བས་བྲེལ་བ་ལྟར་བྱེད་དོ། །དེ་གྲོགས་ཀྱིས་མཐོང་ནས་མཁན་པོ་ལ་བསྙད་པས་མཁན་པོས་དེའི་རྒྱུ་དྲིས་སོ། །བདག་ནི་བརྟུལ་ཞིང་དམན་པས་མཁན་པོ་བསྟན་པའི་དེ་ཉིད་གང་ཡིན་པ་བདག་གིས་མ་མཐོང་སྟེ། སྒྲིབ་བྱེད་ཀྱིས་བསྒྲིབས་སོ་སྙན་ནས་བལྟ་བའོ། །ཞེས་དོན་གྱིས་མཁན་པོའི་འདོད་པ་འགོག་པའི་རིག་པ་བསྟན་པ་དེས་ཀྱང་གོ་ནས། ཁྲོས་པར་གྱུར་ཏེ། ཁོ་བོའི་གྲུབ་མཐའ་ལ་ཟུར་ཟ་བ་ཁྱོད་དེངས་ཤིག་ཅེས་སྒྲོད་པའི་གནས་མ་ཡིན་པ་ཡང་བསྐྲད་དོ། །འདི་ལྟར་དམ་པ་རྣམས་ནི་བག་ཡོད་སྲུང་བ་ལ་མཁས་པ་ཡིན་པས། དེ་ཉིད་དུ་རིག་པས་སུན་དབྱུང་བར་ནུས་མེད་ཀྱང་། སློབ་དཔོན་དུ་གྱུར་བས་འོས་མ་ཡིན་པར་དཔྱད་དེ་ཕྱག་བཅོལ་ནས་ཕྱིར་དོང་ངོ། །རེ་ཞིག་ནས་ན་ལེནྡྲར་སློབ་དཔོན་ཆེན་པོ་དབྱིག་གཉེན་གྱི་དྲུང་དུ་བྱོན་ནས་ཐེག་པ་ཆེ་ཆུང་གི་སྡེ་སྣོད་རྣམ་རིག་དང་ཚད་མ་ལ་ཤིན་ཏུ་མཁས་པར་གྱུར། མདོ་ལྔ་བརྒྱ་ཙམ་བློར་ཆུད། སྔགས་ཀྱི་དངོས་གྲུབ་བརྙེས་པ་ཞིག་ལས་རིག་སྔགས་ནོད་དེ་བསྒྲུབས་པས། འཕགས་པ་འཇམ་དཔལ་མངོན་སུམ་དུ་གཟིགས་ནས་ཆོས་གསན། ཨཽ་ཌི་བི་ཤ་ཞེས་བྱ་བའི་ཡུལ་གྱི་ནགས་ཚལ་དབེན་པའི་ཕྱོགས་བྷེ་ར་སི་ལ་ཞེས་བྱ་བའི་བྲག་ཕུག་ཏུ་བསམ་གཏན་གྱི་བརྟུལ་ཞུགས་རྩེ་གཅིག་ཏུ་བསྟེན་ཏོ། །ལོ་འགའ་ཞིག་འདས་པ་ན། དཔལ་ན་ལེནྡྲར་རང་གིས་འདོད་པའི་ལྷ་མངོན་སུམ་དུ་མཐོང་བའི་རྟོག་གེ་ལ་བྱང་བ་དང་བཅས་པའི་མུ་སྟེགས་ཀྱི་རྒོལ་བར་རྫི་བར་མི་ནུས་པ་དག་ལྷགས་སོ། །དེར་ནང་པ་རྣམས་ཀྱི་རྩོད་པའི་རུ་མཚོན་སྒྲེང་བར་རྔོ་མ་ཐོགས་ནས། སློབ་དཔོན་ཕྱོགས་ཀྱི་གླང་པོ་སྤྱན་དྲངས། བརྒལ་བ་དང་། བརྟག་པ་དང་། བསྒྲུབ་པ་དང་། སུན་འབྱིན་པའི་ཆུ་ཀླུང་ཆེན་པོ་བཞི་རྣམ་པར་འཁྲུགས་པར་གྱུར་ནས་མུ་སྟེགས་ཅན་གྱིས་འདོད་པའི་གཞུང་བསྙེམས་པའི་ཅ་ཅོ་དང་བཅས་པ། ཕྱོགས་ཀྱི་གླང་པོའི་རིགས་པར་སྨྲ་བའི་ཡན་ལག་བདུན་གྱིས་རྣམ་པར་བརྫིས། རབ་ཏུ་བརྫིས་ནས་དེ་དག་སངས་རྒྱས་པའི་གྲུབ་མཐའི་ཕག་ཏུ་ཡིགས་པར་བྱེད་པའི་གནས་ལ་སྦྱར་རོ། །དེར་དགེ་འདུན་
རྣམས་ལ་མདོ་སྡེ་དུ་མ་བཤད་ཅིང་ཆོས་མངོན་པ་ཡང་དར་བར་བྱས། འཁོར་བར་འབྱིན་པའི་རྒྱུའི་གཙོ་བོ་མ་རིག་པས་ལྡོངས་པ་ཉིད་དྲུངས་ནས་འབྱིན་པའི་གཉེན་པོ་རྣམ་འབྱེད་ཀྱི་ཤེས་རབ་བསྐྱེད་པའི་ཆེད་དུ་ཚན་མའི་བསྟན་བཅོས་ཐོར་བུ་བརྒྱ་རྩར་ལོངས་པ་ཡང་བརྩམས། ནམ་ཞིག་ན་རང་གི་བློ་གྲོས་ཐུན་མོང་མན་ཡིན་པའི་ལྕགས་ཀྱུས་དྲངས་པའི་རྟོག་གེའི་ཚུལ་ལུགས་དེ་དག་ཐོར་བུའི་ཚུལ་དུ་འཐོར་བ། ལུས་ཡོངས་སུ་རྫོགས་པའི་དངོས་པོར་གྱུར་བའི་བསྟན་བཅོས་ཚད་མ་ཀུན་ལས་བཏུས་སུ་བྱ་བར་དགོངས། ལྷོ་ཕྱོགས་རི་བོ་འབིགས་བྱེད་དང་ཉེ་བའི་བསྟི་གནས་དེའི་བྲག་ངོགས་སུ་མཆོད་བརྗོད་དང་། བརྩམ་པའི་དམ་བཅའ་ཚིགས་སུ་བཅད་པ། ཚད་མར་གྱུར་བ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ནས། །ཚད་མ་བསྒྲུབ་ཕྱིར་རང་གི་གཞུང་ཀུན་ལས། །བཏུས་ཏེ་སྣ་ཚོགས་འཐོར་རྣམས་འདིར་གཅིག་བྱ། །ཞེས་རྡོ་ཐལ་གྱིས་བྲིས་པས། ས་གཡོ་བ་དང་། འོད་འབྱིན་པ་དང་། སྒྲ་ཆེན་པོ་གྲགས་པར་གྱུར། དེར་མུ་སྟེགས་ཀྱི་སྟོན་པ་ནག་པོ་ཐུབ་རྒྱལ་ཞེས་བྱ་བས་དེའི་ལྟས་ཡིན་པར་ཤེས་ནས། སློབ་དཔོན་བསོད་སྙོམས་ལ་བྱོན་པའི་ཤུལ་དུ་འོངས་ནས་ལན་གཉིས་སུ་བསུབས་སོ། །གསུམ་པའི་ཚེ་སློབ་དཔོན་གྱིས་སྔར་བཞིན་བྲིས་ནས་མཇུག་ཏུ། འདི་ཀུ་རེ་དང་ཀྱལ་ཀའི་ཕྱིར་ཡིན་ན་དགོས་པ་ཆེན་པོ་ཡོད་བསམ་དབྱི་ཞིག། འོན་ཏེ་ཕྲག་དོག་གི་དབང་གིས་ཡིན་ན་བློ་ལ་ཡོད་པའི་ཕྱིར་བསུབ་ཏུ་མེད་དོ། །གལ་ཏེ་རྩོད་པའི་སླད་དུ་ཡིན་ན་ནི། །ལུས་མངོན་དུ་སྟོན་ཅིག། བརྩད་པར་བྱའོ། །ཞེས་བྲིས་པ་ན། ང་མཐོང་སྟེ་ཁོ་ཡང་བསྡད་དོ། །དེར་སློབ་དཔོན་བསོད་སྙོམས་ནས་འཁོར་བ་ན། བསྟན་པ་བྱ་དགར་བཞག་སྟེ། རྩོད་པའི་ལས་ལ་ཞུགས་པས། མུ་སྟེགས་དེ་ལན་མང་པོའི་བར་དུ་ཕམ་པར་གྱུར་ནས། ད་ཁྱོད་སངས་རྒྱས་ཀྱི་བསྟན་པ་ལ་ཞུགས་དགོས་གསུངས་པ་ན། ཁོ་ཁྲོས་ཏེ་རིག་སྔགས་ཀྱིས་བཏབ་པའི་
ཐལ་བ་གཏོར་བས། སློབ་དཔོན་གྱི་ཡོ་བྱད་ཕལ་ཆེར་འཚིག། སློབ་དཔོན་ཡང་འཚིག་ལ་ཁང་དུ་བྱུང་། དེར་ཐུགས་སྐྱོ་སྟེ། ཀྱེ་མ་བདག་གིས་མུ་སྟེགས་འདི་གཅིག་པུའི་དོན་ཡང་བྱ་བར་མི་ནུས་ན། གཞན་དོན་རྒྱ་ཆེན་པོ་ག་ལ་ནུས་སྙམ། ཞེ་བདེ་ལ་མངོན་དུ་དགོངས་ནས་ཐོད་ལེ་ཀོར་ནམ་མཁར་འཕངས་པའི་ཡུན་ལ་སེམས་བསྐྱེད་གཏོང་བར་དམ་བཅས་པ་ན། དེས་ལ་མ་ལྷུང་བའི་བར་ལ་འཕགས་པ་འཇམ་དཔལ་ཞལ་བསྟན་ཏེ། བུ་ཀྱེ་མ་བྱེད་ཐེག་པ་དམན་དང་ཕྲད་ལས་བློ་གྲོས་ངན་པ་བསྐྱེད། ཁྱོད་ཀྱིས་སངས་རྒྱས་མ་ཐོབ་བར་གྱི་དགེ་བའི་བཤེས་སུ་ང་འགྱུར་གྱིས། མུ་སྟེགས་ཚོགས་ཀྱིས་ཁྱོད་ཀྱི་བསྟན་བཅོས་འདི་ལ་གནོད་པར་ནུས་མིན་ཏེ། ཕྱི་མའི་དུས་སུ་བསྟན་བཅོས་ཀུན་གྱི་མིག་གཅིག་ཏུ་ནི་འདི་འགྱུར་རོ། །ཞེས་གསུངས། དེར་སློབ་དཔོན་གྱིས་ཀྱང་ཚིགས་སུ་བཅད་པས་གསོལ་བ་བཏབ་སྟེ། བསྟན་བཅོས་ཆེན་པོ་ཚད་མ་ཀུན་ལས་བཏུས་བརྩམས། གཞན་ཡང་དེའི་རང་འགྲེལ་དང་། དམིགས་པ་བརྟག་པ་རྩ་འགྲེལ་ལ་སོགས་པ་བསྟན་བཅོས་ཀྱི་རིམ་པ་མང་པོ་མཛད། རེ་ཞིག་ན་བྲོ་འཚལ་བར་གྱུར་ཏེ་གྲོང་ཁྱེར་ནས་བསོད་སྙོམས་བླངས་པའི་ཕྱིན་ནགས་ཚལ་གྱི་མཐོངས་ཤིག་ཏུ་བཞུགས་སོ། །དེར་ཅུང་ཟད་མནལ་བར་གྱུར་ཏེ་དེའི་ལམ་དུ་སངས་རྒྱས་མང་པོའི་ཞལ་མཐོང་ཞིང་ཏིང་འཛིན་མང་པོ་ཐོབ། ལྷ་རྣམས་ཀྱིས་མེ་ཏོག་གི་ཆར་བབ། གླང་པོ་ཆེའི་ཚོགས་ཀྱིས་བསིལ་བའི་གྲིབ་མ་ལ་བསྟེན་ཅིང་ཡོད་པ་ན། ཡུལ་དེའི་རྒྱལ་པོ་འཁོར་དང་བཅས་པ་སྐྱོ་སངས་ལ་འོངས་པས་མཐོང་བའི་མོད་ལ་རོལ་མོའི་སྒྲ་བསྒྲགས་པས་མནལ་སད། ཁྱོད་ཕྱོགས་ཀྱི་གླང་པོ་ཡིན་ནམ་ཞེས་འདྲི་བལ། དེ་ལྟར་འདོགས་གསུངས། རྒྱལ་པོ་དད་དེ་ཞབས་ལ་ཕྱག་བྱས། དེ་ནས་ལྷོ་ཕྱོགས་ཀྱི་རྒྱུད་དུ་བྱོན་ནས་ཡུལ་ཐ་དད་པའི་མུ་སྟེགས་ཀྱི་རྒོལ་བ་ཕལ་ཆེར་རིགས་པར་སྨྲ་བས་ཚར་བཅད་པས་རྩོད་པའི་ཁྱུ་མཆོག་ཆེན་པོར་གྲགས། སྔོན་གྱི་ཆོས་གཞི་ཉམས་པ་ཐམས་ཅད་སོར་ཆུད་པར་མཛད།
ཨཽ་ཌིབི་ཤའི་རྒྱལ་པོའི་བློན་པོ་བྷ་དྲས་ལི་ཏ་ཞེས་བྱ་བ་སངས་རྒྱས་ཀྱི་བསྟན་པ་ལ་བཙུད། བྲམ་ཟེ་དེས་གཙུག་ལག་ཁང་ཆེན་པོ་བཅུ་དྲུག་བཞེངས་པ། རེ་རེ་ན་དགེ་འདུན་གྱི་སྡེ་ཆེན་པོའི་བཙུགས། བྲམ་ཟེ་དེའི་སྐྱེད་མོས་ཚལ་ན་ནད་ཐམས་ཅད་གསོ་བར་ནུས་པ་མུཥྚི་ཧིར་ཏ་ག་ཞེས་བྱ་བ་ཨ་ནུ་རའི་བྱེ་བྲག་གི་སྡོར་པོ་ཞིག །སྐྱེ་བོ་མང་པོའི་ཉེར་འཚོར་གྱུར་པ་བསྐམས་པར་གྱུར་བ་ལ། ཚུལ་ཁྲིམས་རྣམ་པར་དག་པའི་སྨོན་ལམ་གྱི་བདེན་པས་སོར་ཆུད་པར་མཛད། ཆོས་ཀྱིས་རྗེས་སུ་བཟུང་བའི་སློབ་མ་ནི། རིག་པའི་གནས་ཐམས་ཅད་ལ་མཁས་ཤིང་། ཀུན་ལས་བཏུས་ཀྱི་འགྲེལ་བ་བྱེད་པོ་དཔལ་ལྡན་ཆོས་ཀྱི་གྲགས་པའི་ཡང་སློབ་དཔོན་དུ་གྱུར་བ་དབང་ཕྱུག་སྡེ་ལ་སོགས་པ་དཔག་ཏུ་མེད་པ་ཡོད་དེ། ཕྱི་བཞིན་འབྲང་བའི་དགེ་སྤྱོད་ནི་གཅིག་ཀྱང་མ་བཟུང་། སྔོན་སྟོན་པའི་དྲུང་ན་གནས་པའི་ཉན་ཐོས་ཆེན་པོ་དེ་དག་བཞིན་དུ་འདོད་པ་ཆུང་ཞིང་ཆོག་ཤེས་པས་སྦྱངས་པའི་ཡོན་ཏན་བཅུ་གཉིས་ལས་ཉམས་པ་མེད་པར་ཡུལ་ཨཽ་ཌིབི་ཤའི་ནགས་ཁྲོད་དབེན་པ་ཅིག་ཏུ་སྐུ་ཡོངས་སུ་མྱ་ངན་ལས་འདས་སོ། །སློབ་དཔོན་ཆེན་པོ་འདི་དང་ཐོག་མཉམ་པར། དབྱིག་གཉེན་གྱི་དངོས་སློབ་བཙུན་པ་དགེ་འདུན་འབངས་དང་འཕགས་པ་རྣམ་གྲོལ་བ་དེ། སྐུ་མཆེད་གཉིས་ཀའི་སློབ་མར་གྱུར་བ་སློབ་དཔོན་ཆོས་འབངས་སོགས་ཀྱིས་ཀྱང་བསྟན་པའི་བྱ་བ་མཛད། དེ་བཞིན་དུ་སངས་རྒྱས་བསྐྱངས་དང་། ལེགས་ལྡན་འབྱེད་གཉིས་སྔ་ཕྱིར་བྱོན་ནས་དབུ་མ་ངོ་བོ་ཉིད་མེད་པར་སྨྲ་བའི་གཞུང་བཙུགས། ཤིང་རྟའི་སྲོལ་འབྱེད་གཉིས་ཀྱི་གཞུང་ནི་ཤིན་ཏུའང་ཐ་དད་དེ། ཐོགས་མེད་ཀྱི་གཞུང་ནི་སེམས་ཙམ་པ་ཁོ་ན་ཡིན་ལ། འཕགས་པ་ཀླུ་སྒྲུབ་ཀྱི་དབུ་མའི་ལམ་དུ་བྱུང་བ་ནི་ཁོ་བོ་ཅག་གི་འདི་ལས་གཞན་དུ་མ་ཡིན་ནོ་ཞེས་མཐའ་གཞན་འགོག་པར་མཛད་པའི་ཐེག་པ་ཆེན་པོ་པའང་འདི་ནས་སྡེ་གཉིས་སུ་ཕྱེས་སོ། །རྨད་དུ་བྱུང་བའི་སློབ་དཔོན་ཆེན་པོ་
ཙནྡྲ་གོ་མི་ནི། དགེ་སློང་སྡེ་སྣོད་གསུམ་པ་ཅིག་རྒྱལ་པོའི་ཕོ་བྲང་དུ་དུས་སྟོན་གྱི་སློང་མོར་འཁྱམས་པ། བསོད་སྙོམས་མ་ཐོབ་བར་སྒོ་བས་བསྐྲད་པ་ལས། ཁ་ཟས་བཅད་པས་བཀྲེས་པས་ཉེན་ཏེ་ཚེ་འཕོས་པའི་ཚེ། ཕྱི་མ་རྒྱལ་པོར་གྱུར་ནས། རབ་ཏུ་བྱུང་བ་རྣམས་ཟས་ཀྱིས་ཚིམ་པར་བྱ་བའི་སྨོན་ལམ་བཏབ་པས། རྒྱལ་པོ་ཤྲཱི་ཧརྴའི་བུ་རྒྱལ་པོ་དང་ཚུལ་དུ་སྐྱེས། དེ་རྒྱལ་སྲིད་ལ་གནས་པའི་ཚེ། ཤར་ཕྱོགས་བར་ནྡྲར་འཕགས་པ་སྤྱན་རས་གཟིགས་ཀྱི་ཞལ་མཐོང་བའི་པཎྜི་ཏ་ཅིག །མུ་སྟེགས་རྒྱང་ཕན་པ་ཅིག་དང་རྩོད་པར་གྱུར་ནས་དེ་སུན་ཕྱུང་བས། མུ་སྟེགས་ན་རེ། རྟོག་གེའི་རིག་པ་ནི་བློས་རྣམ་པར་བརྟགས་པ་ཡིན་པས་གང་སྒྲིན་པ་དེ་རྒྱལ་བའི་ཆོས་ཅན། སྐྱེ་བ་སྔ་ཕྱི་ཡོད་པའི་རྟགས་མངོན་སུམ་དུ་མེད་པས་མི་འདོད་ཟེར་བ་ན། རྒྱལ་པོ་དང་བཅས་པ་དབང་པོར་བཞག་ནས། དཔྲལ་བར་མཚལ་གྱི་ཐིག་ལེ་བཏབ། ཁ་ནང་དུ་མུ་ཏིག་བཅུག་སྟེ་སྐྱེ་བ་མངོན་དུ་སྟོན་པའི་ཕྱིར་འདས་ཤིང་། དེའི་ཕུང་པོ་ཟངས་ཁ་སྦྱོར་དུ་བཅུག་ནས་རྒྱལ་པོས་རྒྱས་འདེབས་པར་བྱས་སོ། །དེ་རྒྱལ་རིགས་ཀྱི་པཎྜི་ཏ་བི་ཤེ་བ་ག་ཞེས་པའི་བུར་སྐྱེ་བར་ཁས་བླངས་པ་བཞིན། དེ་ལ་ཁྱེའུ་མཚན་དང་ལྡན་པ་དཕྲལ་་བར་མཚལ་དང་ཁ་རུ་མུ་ཏིག་ཡོད་པ་བྱུང་ངོ། །རྒྱལ་པོས་སྔར་གྱི་ཕུང་པོ་བལྟས་པ་ན་དཔྲལ་བའི་མཚལ་ཡང་བྱེད། མུ་ཏིག་གི་བཤུལ་ཧ་རེ་འདུག། དེར་མུ་སྟེགས་ཀྱང་ཡིད་ཆེས། ཁྱེའུ་བཙས་མ་ཐག་ནས་མ་ལ་ཕྱག་བྱས་ཏེ། ཟླ་བ་བཅུར་འོ་མ་བརྒྱལ་ཏམ་བྱས་པས། ལྟས་ངན་ནོ་སྙམ་ནས་ཁ་རོག་འདུག་པར་གདམས། དེ་ནས་ལོ་བདུན་དུ་ཅད་མ་སྨྲས་པས། ཡང་སྐུགས་པར་དོགས་སོ། །དེར་མུ་སྟེགས་ཅན་ཞིག་གིས། སྙན་དངགས་ཤིན་ཏུ་དམ་པར་སངས་རྒྱས་པའི་གྲུབ་མཐའ་འགོག་པའི་དོན་བརྩམས་ནས་རྒྱལ་པོ་དང་མཁས་པའི་ཚོགས་ལ་གྲིམས་སོ། །དེར་ཡབ་པཎྜི་ཏས་ཡུན་རིང་དུ་བརྟགས་ཀྱང་རྩོམ་པ་པོའི་མུ་སྟེགས་དེ་ནི་བརྡའ
སྤྲོད་པའི་དབང་ཕྱུག་ཅེས་བྱ་བ་ཀུན་གྱིས་ཐུབ་པར་དཀའ་བ་ཡིན་པས་སྒྲ་དོན་ཇི་བཞིན་པ་མ་འཚལ་ན། ལན་གདབ་པ་ལྟ་ཅི་སྨོས། དེར་ཡབ་ཕྱི་རོལ་དུ་སོང་བའི་ཤུལ་དུ་ཙནྡྲ་ལོ་བདུན་བ་དེས་དཀའ་བ་མེད་པར་ལན་བཏབ་ཚིགས་སུ་བཅད་པ་དང་། ཆན་བུས་དོན་ཀྱང་བཀྲལ་ཏེ་བཞག་གོ། དེ་བས་མཐོང་སྟེ་ཁྱིམ་དུ་སུ་ཞིག་ལྷག་ཞེས་འདྲི་བ་ན། སུ་ཡང་མ་བྱུང་སྟེ་བུ་ལྐུགས་པས་ལྟ་ཞིང་བྲིས་སོ་སྨྲ། ཕས་བུ་ལ་དྲིས་པ་ན་མའི་གདོང་ལ་བལྟ་ཞིང་ཅང་མི་སྨྲའོ། །མས་ཟློས་ཤིག་བྱས་པས། འདི་ནི་བདག་གི་སྟེ། རྒོལ་བ་འདི་བཟློག་པ་ལ་དཀའ་བ་མེད་དོ་ཟེར། ནངས་པར་བུ་ཙནྡྲ་དང་མུ་སྟེགས་གཉིས་བརྩད་པས་ཙནྡྲ་གོ་མི་རྒྱལ་ཏེ་བྱ་དགའ་རྒྱ་ཆེན་པོ་ཡང་ཐོབ་བོ། །དེ་ལྟར་སྒྲ་དང་རྟོག་གེ་ལ་སོགས་པའི་རིག་གནས་ནི་རང་བཞིན་གྱིས་ཤེས་པ་ཅིག་བྱུང་བས། གྲགས་པའི་ཟླ་འོད་ཀྱང་ཀུན་ན་གསལ། སློབ་དཔོན་བློ་གྲོས་བརྟན་པ་ལས། མདོ་སྡེ་དང་མངོན་པའི་སྡེ་སྣོད་ཕལ་མོ་ཆེ་ལན་ཅིག་ཉན་པ་ཙམ་གྱིས་མཁྱེན། རིག་པ་འཛིན་པ་མྱ་ངན་མེད་བྱ་བ་ལས། རིག་སྔགས་ནོད་དེ་བསྒྲུབས་པས་སྤྱན་རས་གཟིགས་དང་། སྒྲོལ་མའི་ཞལ་མངོན་དུ་གཟིགས། མཁས་པའི་དབང་ཕྱུག་ཆེན་པོར་བྱུང་ཏེ། སྨན་དཔྱད་དང་། སྡེབ་སྦྱོར་དང་། བཟོའི་གནས་ལ་བསྟན་བཅོས་མང་དུ་མཛད་ཅིང་། ཁྱད་པར་སྒྲ་རིག་པ་སྟོབས་སུ་གྱུར་ནས་བཤད། བྷ་རེན་དྲའི་རྒྱལ་པོའི་བུ་མོ་ཏཱར་ཞེས་བྱ་བ་བག་མར་བླངས་ཤིང་ལྷན་ཅིག་གནས་སོ། །ལན་ཅིག་དེའི་གཡོག་མོ་ས་ཏཱ་ར་ཞེས་རྗེ་མོ་ལ་བོས་པས། ཡི་དམ་དང་མཚན་མཐུན་པ་ཁྱིམ་ཐབ་ཏུ་མི་རུང་བར་དགོངས་ནས་ཡུལ་གཞན་དུ་འགྲོ་བར་བརྩམས་པ་རྒྱལ་པོས་ཤེས་ཏེ། ངའི་བུ་མོ་དང་ལྷན་ཅིག་མི་འདུག་ན་གངྒཱ་ལ་བསྐྱུར་ཅིག་ཅེས་བསྐྱུར་བ་ན། སློབ་དཔོན་གྱིས་རྗེ་བཙུན་མར་གསོལ་བ་བཏབ་པས། འཕགས་མས་སྤྲུལ་པ་ཡིན་ཟེར།
གངྒཱ་དང་རྒྱ་མཚོ་ཕྲད་མཚམས་ཀྱི་གླིང་ཞིག་ཏུ་ཐོན། སློབ་དཔོན་དེར་བཞུགས་པས་གླིང་གི་མིང་ཙནྡྲ་རྡྭཱི་པར་ཆགས། ད་ལྟའང་གྲོང་ཁྱེར་བདུན་སྟོང་ཙམ་ཤོང་བ་ཡོད་སྐད། དེར་སྤྱན་རས་གཟིགས་དང་། སྒྲོལ་མའི་རྡོ་སྐུ་བཞེངས། དང་པོར་ཉ་བའི་ཚོགས་ཀྱིས་ཤེས་ཤིང་། རིམ་གྱིས་སྐྱེ་བོ་གཞན་བྱུང་བས་གྲོང་རྡལ་དུ་ཆགས། འཕགས་པས་བསྐུལ་བ་བཞིན་གོ་མའི་དགེ་བསྙེན་མཛད་པས་ཙནྡྲ་གོ་མིང་གྲགས། དེ་ནས་ཚོང་པ་རྣམས་དང་འགྲོགས་ཏེ་སིངྒྒ་ལའི་གླིང་དུ་བྱོན། ཡུལ་དེར་ཀླུ་ནད་དར་བ་ལ་འཕགས་པ་སེངྒ་གེ་སྒྲའི་ལྷ་ཁང་བཞེངས་པས་རང་ཞི། བཟོ་དང་སྨན་དཔྱད་ལ་སོགས་པ་རིག་པའི་གནས་མང་པོ་སྤེལ། སྐྱེ་བོ་བླུན་པོ་རྣམས་ལ་ཕན་པ་རྒྱ་ཆེན་པོ་བཏགས། ཡུལ་བདག་གནོད་སྦྱིན་ལས་ནོར་བླངས་ཏེ། ཆོས་གཞི་མང་དུ་བཙུགས། ཐེག་པ་ཆེན་པོའི་ཆོས་ཀྱང་ཅུང་ཟད་བཤད། སླར་འཛམ་བུའི་གླིང་གི་ལྷོ་ཕྱོགས་ཀྱི་རྒྱུད་དུ་བྱོན། བྲམ་ཟེ་མཆོག་སྲེད་ཀྱི་ལྷ་ཁང་ན། ཀླུ་ཤེ་ཥ་ལ་རང་གིས་སྒྲ་ཉན་པའི་བཀོད་པ་དང་། ཀླུས་བྱས་པའི་པ་ཎི་པའི་འགྲེལ་བ་འདུག་པ་གཟིགས་པས། ཚིག་ཉུང་ལ་དོན་མང་བ། ཚང་ལམ་ཟློས་པ་ནི་འགྲེལ་བའི་ཡོན་ཏན་ཡིན་ན། ཀླུ་ནི་རབ་ཏུ་རྨོངས་ཏེ། ཚིག་མང་བ། དོན་ཉུང་བ། ཟློས་པ། མ་རྫོགས་པ་ཞེས་སྨད་ནས། པ་ཎི་པའི་དོན་འགྲེལ་ཙནྡྲ་བྱ་ཀར་ལེ་ལག་དང་བཅས་པ་མཛད་ནས་དེར། ཉུང་ངུ་རྣམ་གསལ་ཡང་དག་རྫོགས། ཞེས་ཀླུ་ལག་ཞུར་བརྟག་པའང་མཛད། དེའི་ཚེ་དཔལ་ན་ལེནྡྲ་ཞེས་གཙུག་ལག་རྒྱ་མཚོས་བསྟེན་པའི་ཀུན་དགའ་འབར། གང་མུ་སྟེགས་ཅན་གྱིས་རྩོད་པ་ལ་འཇིགས་པའི་བརྟུལ་ཞུགས་མ་སྨད་པ་དེ་ནི་ལྕགས་རིའི་ཕྱི་རོལ་དུ་ཆོས་འཆད་ལ། དེ་ལས་གཞན་དུ་གྱུར་བ་ནི་མ་ཡིན་ནོ། །དེར་སློབ་དཔོན་ཙནྡྲ་གོ་མིན་ལེནྡྲར་སོང་བ་ན། དེའི་ཚེ་ལྷོ་ཕྱོགས་ས་མནྟར་སྐུ་འཁྲུངས་ཤིང་ཆུང་ངུ་ཉིད་ནས་རིག་པའི་གནས་རྒྱ་མཚོའི་
ཕ་མཐར་སོན་པ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་སྡེ་སྣོད་མཐའ་དག་གི་མཛོད་འཆང་བ། ལེགས་ལྡན་འབྱེད་ཀྱི་སློབ་མའི་ཚོགས་དང་། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྡྷི་ལས། ཤིང་རྟ་ཆེན་པོ་ཀླུ་སྒྲུབ་ཀྱི་གཞུང་དང་མན་ངག་ལ་ལེགས་པར་སྦྱངས་ནས་མཁས་པའི་དབང་ཕྱུག་ཆེན་པོར་གྱུར་ལ། ཆོས་ཐམས་ཅད་ཀྱི་བདེན་པར་ཞེན་པ་སྒྱུ་མ་དང་རྨི་ལམ་ལྟ་བུའི་ངོ་བོར་རྒྱས་ཐེབས་པས། རི་མོར་བྲིས་པའི་བ་མེ་ན་ལས་འོ་མ་བཞོས་ཏེ་དགེ་འདུན་རྣམས་འོ་ཐུག་གིས་ཚིམས་པར་མཛད་པ་དང་། སྣང་བའི་བདེན་འཛིན་མཉམ་པ་ཉིད་དུ་ཞིག་པས་རྡོའི་ཀ་བ་ལ་ཕྱག་གིས་ཟང་ཐལ་རྩིག་པ་ལ་ཐོགས་མེད་དུ་བཞུད་པ་ལ་སོགས་ཏིང་འཛིན་གྲུབ་པའི་ཡོན་ཏན་དུ་མས་བརྒྱན་པ་དཔལ་ལྡན་ཟླ་བ་གྲགས་པ་ཞེས་སྙན་པའི་རོལ་མོ་ཕྱོགས་བྲལ་འགྲོ་བའི་རྣ་ལུད་དུ་དཔྱངས་པ་དེ་ཉིད། དྲི་གཙང་ཁང་ཆེན་པོ་དེའི་མཁན་པོར་གྱུར་ནས་ཕྱི་རོལ་དུ་ཆོས་འཆད་ཅིང་ཡོད་པའི་ཚེ། སློབ་དཔོན་ཙནྡྲ་གོ་མི་གདུགས་ཀྱི་ཡུ་བ་ལ་བཟུང་ནས་དེའི་མདུན་ན་འགྲེད་བུར་འདུག་གོ། རྒྱ་གར་འཕགས་པའི་ཡུལ་ན་གང་རྩོད་པར་འདོད་པ་ནི་འགྲེང་བུར་གནས། ཆོས་ཉན་པ་ནི་གུས་པའི་ཚུལ་གྱིས་སོ། །རྒྱུ་དེས་ཟླ་བ་གྲགས་པ་ནི་རྩོད་ཟླར་དགོངས་ནས། ཡོན་ཏན་ཅི་ཤེས་དྲིས་པས། སྒྲ་པ་ཎི་པ་དང་། བསྟོད་པ་བརྒྱ་ལྔ་བཅུ་བ་དང་། མཚན་ཡང་དག་པར་བརྗོད་པ་གསུམ་ཤེས་བྱས་པས། འདི་ཁེངས་པ་སྐྱུངས་པ་ལྟར་སྣང་ཡང་། སྒྲ་རིག་པ་དང་། མདོ་དང་། སྔགས་ཐམས་ཅད་ཤེས་པར་ཁས་བླངས་པས་ཙནྡྲ་གོ་མིའམ་སྙམ་དུ་དྲིས་པས། དེ་ལྟར་གྲགས་གསུང་། འོ་ན་མཁས་པ་ཆེན་པོ་ལགས་པས། དགེ་འདུན་གྱིས་བསུ་བ་བྱེད་དགོས། རེ་ཞིག་ཕྱིར་གཤེགས་འཚལ་གསུངས་པས། བདག་དགེ་བསྙེན་ལ་དགེ་འདུན་གྱིས་བསུབ་བྱ་བག་ལ་
འཐང་གསུང་། འདི་ལ་ཐབས་ཤིག་ཡོད་ཀྱི་ཤིང་རྟའི་སྟེང་དུ་འཕགས་པ་འཇམ་དཔལ་བཞུགས་པར་བྱའོ། །དེ་ལ་རྔ་ཡབ་གཡོབ་ཅིང་བྱོན་ཅིག། འཇམ་དཔལ་ལ་བསུབ་བྱས་པའི་རྣམ་པར་འགྱུར་རོ་གསུངས་ནས། ཤིང་རྟ་གསུམ་དུ་བྱས་པའི་དབུས་མ་ལ་འཕགས་པའི་སྐུ་དང་། གཡས་གཡོན་ནས་སློབ་དཔོན་རྣམ་གཉིས་ཀྱིས་རྔ་ཡབ་གཡོབ་ཅིང་བྱོན། མདུན་ནས་དགེ་འདུན་གྱི་ཚོགས་བསུ་བར་བྱོན་པའི་ཚེ། ཙནྡྲ་གོ་མི་ལ་འཇམ་དབྱངས་དེ་སྐུ་དངོས་ཀྱི་སྣང་བར་གྱུར་ནས་ཤློ་ཀ་བཞི་བཅུ་པའི་བསྟོད་པ་དེ་མཛད་པས། འཇམ་དཔལ་དབུ་ཡོན་མཛད་དེ་ཡོན་ཏན་དེ་ཙམ་མངའ་འམ་གསུངས། ལྟད་མོ་ལ་འོངས་པའི་སྐྱེ་བོའི་ཚོགས་མང་པོས་ཀྱང་མཐོང་ནས་དེ་སྐད་དུ་སྨྲས་པས་རང་སར་ལུས་ཏེ་འཇམ་དབྱངས་དབུ་ཡོན་མར་གྲགས། དེར་ཙནྡྲ་ག་མི་དད་པའི་ཤུགས་རྒྱས་པས་ཤིང་རྟའི་ཁ་ལོ་ཅི་དགར་ལུས་པ་ཟླ་གྲགས་ཀྱི་སྔོན་དུ་སོངབས། འདི་ནི་ང་རྒྱལ་ཅན་ཏེ་རྩོད་པར་བྱའོ་སྙམ་དུ་དགོངས་སོ། །དེར་ཙནྡྲ་གོ་མིས་ཐོགས་མེད་ཀྱི་སྲོལ་ལ་བརྟེན་ཏེ་རྣམ་རིག་གི་ཕྱོགས་བཟུང་། ཟླ་གྲགས་ཀྱིས་ཀླུ་སྒྲུབ་ཀྱི་ལམ་སྲོལ་ལ་བརྟེན་ནས་ངོ་བོ་ཉིད་མེད་པར་སྨྲ་བའི་ཕྱོགས་བཟུང་ནས། ལོ་བདུན་གྱི་བར་དུ་བརྒལ་བརྟག་མཛད་དོ། །རྩོད་པའི་དུས་ཙནྡྲ་གོ་མི་ལ་འཕགས་པ་སྤྱན་རས་གཟིགས་ཀྱིས་སློབ་ཀྱིན་ཡོད་པས་ཟླ་བ་གྲགས་པ་རེ་ཞིག་ཕམ་པ་ལྟར་བྱུང་བ་ན། འདི་ལ་རྩོད་པ་སློབ་པ་ཞིག་ཡོད་ངེས་སྙམ། འཕགས་པ་རྡོ་སྐུའི་ལྷ་ཁང་ན་ཙནྡྲ་གོ་མི་བཞུགས་ཀྱིན་ཡོད་པའི་ཕྱི་བཞིན་སོང་སྟེ་གཟིགས་པས། སྤྱན་རས་གཟིགས་ཀྱི་རྡོ་སྐུས་ཙནྡྲ་གོ་མི་ལ་སློབ་དཔོན་གྱིས་སློབ་མ་ལ་བྱ་བ་བཞིན་དུ་རིག་པ་བསླབ་པ་མཐོང་ངོ། །དེར་འཕགས་པ་ཉེ་རིང་མ་མཛད་ཅིག་གསུངས་པས། ཆོས་སློབ་བཞིན་པའི་ཕྱག་མཛུབ་ཀེ་རེ་ལུས་པས་འཕགས་པ་མཛུབ་ཀེར་མར་གྲགས། རྩོད་པ་ཤིན་ཏུ་རྒྱུན་རིང་བས་ལྟད་མོར་ལྷག་
པའི་གྲོང་པའི་ཁྱེའུ་ཕོ་མོ་ཚུན་ཆད་ཀྱིས་ཕྱོགས་ཙམ་རིག་པའི་གླུ་ལེན་པ་བྱུང་ཟེར། མཐར་རྩོད་པ་རང་ཞི་ནས་ཟླ་གྲགས་ཀྱིས་སྤྱན་རས་གཟིགས་ལ་གསོལ་བ་བཏབ་པས། མནལ་ལམ་དུ་ཁྱོད་ནི་འཇམས་དབྱངས་ཀྱིས་བྱིན་གྱིས་བརླབས་པས་མི་དགོས་མོད་ཀྱི། ངས་ཙནྡྲ་གོ་མི་ལ་ཅུང་ཟད་བྱིན་གྱིས་བརླབས་པ་ཡིན་གསུང་། གསང་འདུས་འཕགས་སྐོར་བ་རྣམས་ལ་རང་སའི་ལོ་རྒྱུས་ཀྱང་སྣང་། ཡང་རེ་ཞིག་ན་དབུལ་མོའི་བུ་མོ་ཁྱིམ་ཐབ་ཏུ་འགྲོ་བས་ཆས་མེད་ནས་ཡུལ་སྣ་ཚོགས་སུ་སློང་མོར་འཁྱམས་ཤིང་། མཐར་གྱིས་ཙནྡྲ་གོ་མིར་བསླངས་པས། སྐུ་ལ་གསོལ་བའི་ན་བཟའ་དང་། བརྒྱད་སྟོང་པའི་གླེགས་བམ་གཅིག་ལས་གཞན་གང་ཡང་མེད་པས། དབུལ་ཕོངས་ལ་བརྩེ་བའི་ཐུགས་ཀྱིས་ལོགས་བྲིས་ཀྱི་སྒྲོལ་མའི་སྐུ་ལ་གསོལ་བ་བཏབ་ཅིང་སྤྱན་ཆབ་ཕྱུང་བས། དངོས་སུ་གྱུར་ཏེ་སྐུའི་རྒྱན་རིན་པོ་ཆེ་སྣ་ཚོགས་ལས་གྲུབ་པ་རིན་ཐང་སྤངས་བདག་མགུལ་ནས་ཕུད་དེ་སློབ་དཔོན་ལ་སྩལ་བ་དེ་ལ་ཕྱིན་ཏོ། །དེར་རི་མོའི་སྐུ་བརྙན་རྒྱན་མེད་པར་སོང་བས་སློས་པ་རྒྱན་མེད་མར་གྲགས་ཤིང་། རྒྱན་ཕུད་པའི་ཤུལ་ལམ་མེ་ཡོད་སྐད། དུས་དེར་སློབ་དཔོན་ཟླ་བ་གྲགས་པས་མཛད་པའི་སྒྲའི་བསྟན་བཅོས་ཀུན་ཏུ་བཟང་པོ་ཞེས་བྱ་བ་ཚིགས་སུ་བཅད་པའི་སྒྲ་མདོ་བསྡེབས་ལོགས་པ་དག་གཟིགས་པས། རང་གི་སྒྲ་མདོ་བསྡེབས་མི་ལེགས་པར་མཁྱེན་ནས། འགྲོ་དོན་མི་འབྱུང་ངོ་སྙམ་སྟེ་དཔེ་ཁྲོན་པར་བསྐྱུར་བ་ན། རྗེ་བཙུན་མས། མཁས་པའི་ང་རྒྱལ་གྱིས་བྱས་པའི་བསྟན་བཅོས་ནི་ཕན་ཐོགས་ཆུང་ངུར་འགྱུར་ལ། ཁྱོད་ཀྱིས་ནི་གཞན་བན་གྱིས་བསམ་པ་བཟང་པོས་བྱས་པའི་ཕྱིར་སེམས་ཅན་ལ་ཕན་པར་འགྱུར་བས་དཔེ་ཁྲོན་པ་ནས་ཕྱུང་ཞིག །ཅེེས་ལུང་བསྟན་པ་ལྟར་བླངས་ཟེར། ཁ་ཅིག། ཀུན་ཏ་བཟང་པོ་དར་ཆེ་བར་གྱུར་བ་ན། ཙནྡྲ་གོ་མིས་འཕགས་པ་ལ་བདག་གི་འདི་དར་བར་གསོལ་བ་བཏབ་པས། ཀུན་ཏུ་བཟང་པོ་དར་
འཕྲོ་ཆད་ནས་ཙནྡྲ་བ་དར་བར་གྱུར་ཏོ། །དེར་ཟླ་བ་གྲགས་པ་ཐུགས་ཆད་ནས་བསྟན་བཅོས་ཁྲོན་པ་ལ་འཕངས་པས་ཁྲོན་པའི་མིང་ཙནྡྲ་ཁྲོན་པ་ཆགས་ཟེར། ལོ་རྒྱུས་འདི་གཉིས་བརྗོད་བྱ་དང་བརྗོད་དོན་ཐམས་ཅད་ཐ་དད་པས་རང་རང་གི་རྗེས་སུ་འཇུག་པ་དག་གིས་འདོད་པ་མིན་ན་རུང་སྟེ། ཇི་ལྟར་ཡང་ཁྲོན་པ་དེ་ནས་ཆུ་འཐུངས་ཚད་ཤེས་རབ་ཆེ་བར་གྲགས་པ་མདོ་མཐུན་ནོ། །ཀུན་ཏུ་བཟང་པོ་ནི་ད་ལྟ་མིང་ཙམ་ལས་མི་སྣང་ལ། ཙནྡྲ་པ་ནི་ཕྱི་ནང་ཐམས་ཅད་ཀྱི་སློབ་པར་གྲགས་ཤིང་དར་བ་འདིའོ། །སློབ་དཔོན་འདིས་སྒྲ་དང་། སྙན་དངགས་དང་། མངོན་བརྗོད་དང་། སྡེབ་སྦྱོར་དང་། རྟོག་གེ་དང་། སྨན་དཔྱད་དང་། བཟོའི་གནས་བརྒྱ་རྩ་དང་། སྐར་རྩིས་ལ་སོགས་པའི་བསྟན་བཅོས་ཀྱང་མང་དུ་བརྩམས་ཤིང་། སློབ་མའི་ཚོགས་ལའང་དེ་ཁོ་ན་འཆད་པའི་ཚེ། རྗེ་བཙུན་མས། ཕྱི་རོལ་པའི་ངན་པ་ཐུག་དང་འདྲེས་པའི་བསྟན་བཅོས་ལ་སྣང་ཅིང་། ནང་པའི་ཚུལ་གསུམ་དང་ལྡན་པའི་གནས་ལ་ལེགས་པར་བསྔགས་པ་ནི་འདི་ལྟ་སྟེ། ས་བཅུ་པ་དང་ཟླ་བ་སྒྲོན་མ་དང་། སྡོང་པོས་བརྒྱན་པ་དང་ནི་ལང་ཀར་འཇུག། རྒྱལ་བ་རྣམས་ཀྱི་ཡུམ་གྱུར་གློགས་ཤིག་ཀྱཻ། །སྡེབ་སྦྱོར་ངན་གཡོའི་སྦྱོར་བས་ཁྱོད་ལ་ཅི། །ཞེས་བསྐུལ་བས། ཐུན་མོང་བའི་རིག་པའི་གནས་ལ་བརྩོན་པའི་ཞགས་པ་ལྷོད་དེ། རྨད་དུ་བྱུང་བའི་མདོ་ལྔ་པོ་དག་གཞན་ལ་འདོམས་ཤིང་། རང་ཉིད་ཀྱང་ཉིན་རེར་ཞལ་འདོན་དུ་བགྱིད་པ་དང་། དེ་དག་གི་དོན་བསྡུའི་བསྟན་བཅོས་ཀྱང་མཛད། སྤྱིར་བསྟོད་པ། ནང་རིག་པ། ཕྱི་རོལ་གྱི་བསྟན་བཅོས། བཟོའི་གནས་དང་བཅས་པ་རེ་རེ་ནས་བརྒྱ་རྩ་བརྒྱད་རེ། ཕྲ་མོ་པ་བཞི་བརྒྱ་སུམ་ཅུ་རྩ་གཉིས་བརྩམས། ཐེག་པ་ཆེན་པོའི་བསྟན་བཅོས་བྱང་ཆུབ་སེམས་དཔའི་ལམ་རིམ་མཐའ་དག་གི་བརྗོད་དོན་ལྷོངས་པ་ཞིག་མཛད་པ་འགྲོ་ལྡིང་དང་། སིངྒ་ྒ་ལའི་ཡུལ་ན་དར་
གཞན་ཡང་སྐུ་གསུམ་ལ་འཇུག་པ་དང་། སྡོམ་པ་ཉི་ཤུ་པ་ལ་སོགས་པ་བསྟན་བཅོས་ཀྱང་ཤིན་ཏུ་མང་། མཐར་པོ་ཏ་ལར་གཤེགས་པར་བཞེད་ནས། ཤྲཱི་དྷ་ནའི་གླིང་དུ་བྱོན་པ་ན། སྔོན་ཀླུ་ཤེ་ཥའི་བསྟན་བཅོས་ལ་སྨད་པ་འཁོན་དུ་བཟུང་ནས་རྒྱ་མཚོའི་བླབས་ཀྱིས་གྲུ་གཟིངས་ལ་གནོད་པ་དང་། ཙནྡྲ་གོ་མི་ཕྱུང་ཞིག་ཟེར་བའི་སྒྲ་བྱུང་བས། སྒྲོལ་མ་ལ་གསོལ་བ་བཏབ་པ་ཙམ་གྱིས་གཙོ་འཁོར་སྔ་མཁའ་ལྡིང་ལ་ཆིབས་པ་ནམ་མཁར་བྱོན་ནས་འཇིགས་པ་ལས་བསྒྲལ། ཤྲཱི་དྷ་ན་བདེ་བར་སོན་པས་དཔལ་ལྡན་འབྲས་སྤུངས་ཀྱི་མཆོད་རྟེན་ལ་བསྙེན་བཀུར། སྒྲོལ་མ་དང་། སྤྱན་རས་གཟིགས་ཀྱི་ལྷ་ཁང་སོ་སོ་ནས་བརྒྱ་རྩ་རེ་བཞེངས། རི་བོ་ཏ་ལར་གཤེགས་ནས་སྐུ་ལུས་མ་སྤངས་པར་ད་ལྟ་ཡང་བཞུགས་པར་གྲགས། རེ་ཞིག་ན་སློབ་མ་རྒྱལ་རིགས་རིན་ཆེན་གྲགས་པ་ཞེས་བྱ་བ་དགེ་སློང་ལས་བབས་པ་ཞིག་སྡིག་པ་སྣ་ཚོགས་སྤྱོད་པ་གཟིགས་ནས་སློབ་སྤྲིང་འདི་གདམས་པ་པོ་ཏ་ལ་ནས་ཚོང་པའི་ཚོགས་ལ་བསྐུར་བས། དེ་ཡང་ཆོས་བཞིན་སྤྱོད་པར་གྱུར་ཏོ།། །།ཆེན་པོ་བཞི་ཞེས་གྲགས་པའི་ཡ་གྱལ་དྷརྨ་པཱ་ལའམ་ཆོས་སྐྱོང་ནི། རྒྱལ་པོ་སིངྒྒ་དང་། བྷར་ཥས་རྒྱལ་སྲིད་སྐྱོང་བའི་རུས་སློབ་དཔོན་ཙནྡྲ་གོ་མི་སོགས་དང་དུས་མཉམ་པ་ཙམ་ན། སྙན་ངག་མཁན་གྱི་རིགས་ལས་ལྷོ་ཕྱོགས་ཀྱི་རྒྱུད་དུ་འཁྲུངས། དགེ་བསྙེན་དུ་གནས་པའི་དུས་ནས་རིགས་ཀྱི་ཡོན་ཏན་དང་། ཕྱི་ནང་གི་གཞུང་ལུགས་ཕལ་མོ་ཆེ་མཁྱེན། སློབ་དཔོན་ཆོས་འབངས་ལས་རབ་ཏུ་བྱུང་ཞིང་འདུལ་བ་ཉན། སླར་ཕྱོགས་ཀྱི་གླང་པོ་ལས་སྡེ་སྣོད་ཡན་ལག་དང་བཅས་པ་ཉན་པས་མཁས་པའི་དབང་ཕྱུག་ཆེན་པོར་གྱུར། མདོ་སྡེ་བརྒྱ་རྩ་བརྒྱད་ཞལ་འདོན་དུ་བགྱིད་ཅིང་། རྡོ་རྗེ་གདན་དུ་བྱོན་ནས་ལྷག་པའི་ལྷ་རྣམས་ལ་བསྟོད་པ་མང་པོ་མཛད། འཕགས་པ་ནམ་མཁའི་སྙིང་པོ་
བསྒྲུབས་པས་བྱང་ཆུབ་ཤིང་གི་རྩེ་མོ་ལ་བྱོན་པ་གཟིགས། དེ་ཕྱིན་ཆད་ནས་རྟག་ཏུ་འཕགས་པ་ལ་ཆོས་ཉན་པར་ནུས་ཤིང་། སློབ་མའི་ཚོགས་ལ་བྱང་ཆུབ་སེམས་དཔའི་རྩ་ལྟུང་བྱུང་བ་ཀུན་ལའང་དངོས་སམ། རྨི་ལམ་གང་ཡང་རུང་བར་འཕགས་པ་ནམ་མཁའི་སྙིང་པོའི་མདུན་དུ་ལྟུང་བ་བཤིགས་སུ་འཇུག་ནུས། རང་ཉིད་དགེ་འདུན་དང་བཅས་པའི་འཚོ་བའི་ཡོ་བྱད་ཀྱང་སྦྱིན་བདག་ལ་མི་འཚོལ་བར་ནམ་མཁའ་མཛོད་ལས་བླང་བས་ཆོག་པར་གྲགས། ཟླ་བ་གྲགས་པའི་རྗེས་སུ་དཔལ་ན་ལེནྡྲའི་མཁན་པོ་མཛད། མུ་སྟེགས་ཀྱི་རྒོལ་བ་རྣམས་ཁྲོ་རྒྱལ་དབྱུག་པ་རྣོན་པོའི་མཐུས་པ་སྡིགས་ནས་ངག་གནོན་པར་བྱེད་པ་ཅིག་བྱུང་། དབུ་མ་བཞི་བརྒྱ་པ་རྣམ་རིག་ཏུ་བཀྲལ་བའི་འགྲེལ་བ་ལ་སོགས་པ་བསྟན་བཅོས་མཛད། སྐུ་ཚེའི་མཐར་ལྷོ་ཕྱོགས་གསེར་གླིང་དུ་བྱོན། བཅུད་ཀྱི་ལེན་པའི་དངོས་གྲུབ་ཉེ་བར་བསྒྲུབས་ཏེ། ལེགས་བྲིས་ཀྱི་གནས་གལ་བར་བཞུད་དོ་ཞེས་གྲགས་སོ།། །།རྨད་ཏུ་བྱུང་བའི་སྐྱེས་བུ་ཆེན་པོ་སློབ་དཔོན་ཤཱནྟ་དེ་ཝ་འམ་ཞི་བའི་ལྷ་ནི། ལྷོ་ཕྱོགས་སཽ་དཥྚར་མིའི་བདག་པོ་བྱམས་པའི་གོ་ཆ་ཞེས་བྱ་བའི་སྲས་སུ་སྐྱེ་བའི་ལྗོན་ཤིང་བཟུང་ངོ། །དེར་ནི་བཀུར་བར་འོས་པའི་གནས་ཐམས་ཅད་ལ་གུས་པའི་ཤིང་རྟ་བརྟན་ཞིང་། ཕོངས་པ་དང་མགོན་མེད་པ་ཐམས་ཅད་ལ་བརྩེ་བ་ཆེན་པོ་དང་ལྡན་པས་དེ་ཙམ་ནས་ཐེག་པ་ཆེན་པོའི་རིགས་སད་པ་ཞིག་གོ། སྔོན་གྱི་ལས་འཕྲོའི་མཐུས་གཞོན་ནུ་ནས་མནལ་ལམ་ན་འཕགས་པ་འཇམ་དཔལ་ཞལ་གཟིགས། བསྟན་བཅོས་དང་སྒྱུ་རྩལ་གྱིས་གནས་མང་པོ་ལ་མཁས་པར་གྱུར། རེ་ཞིག་ནས་རྒྱལ་སྲིད་ལ་དབང་བསྐུར་བའི་ཁྲི་བཤམས་པ་ན༑ རྨི་ལམ་དུ་འཕགས་པ་འཇམ་དཔལ་ཁྲི་ལ་བཞུགས་ནས། བུ་གཅིག་འདི་ནི་ང་ཡི་སྟན་ཡིན་ཏེ། །ང་ནི་ཁྱོད་ཀྱི་དགེ་བའི་བཤེས་གཉེན་ཡིན། ཁྱོད་དང་ང་གཉིས་སྟན་གཅིག་ལ་འདུག་པ། །འདི་ནི་རྣམ་པ་ཀུན་ཏུ་རིགས་མ་ཡིན། །ཞེས་འཕགས་པ་འཇམ་དཔལ་གྱིས་ཆོས་ཀྱི་རྒྱལ་སྲིད་ཆེན་པོར་
དབང་བསྐུར་བའི་དོན་གྱིས་གནང་བ་བྱིན་ཏོ། །དེ་བཞིན་དུ་འཕགས་མ་སྒྲོལ་མས་རང་གི་མའི་ཚུལ་བཟུང་ནས། ཁྲུས་ཀྱི་ཕྱིར་ཆུ་ཚན་སྤྱི་བོ་ནས་བླུགས་པས། དེའི་ཚ་བའི་རེག་བྱ་ལ་དྲིས་པ་ན། བུ་རྒྱལ་སྲིད་ནི་དམྱལ་བའི་ཆུ་ཚན་མི་བཟད་པ་ཉིད་དེ། དེས་ཁྱོད་ལ་དབང་བསྐུར་བར་ཉེའོ། །གསུངས་པས་འདི་སྙམ་དུ། ཀྱེ་མ་རྒྱལ་སྲིད་ནི་དུག་གི་སྡོང་པོ་བཞིན་ཏེ། ཐར་བ་དང་ཐམས་ཅད་མཁྱེན་པའི་སྲོག་གི་གཤེད་མ་ཉིད་དོ། །འདི་ནི་ཤིན་ཏུ་མི་རང་ངོ་དགོངས་ནས་ནངས་པར་རྒྱལ་སར་བསྐོ་བ་ལ་ཉེ་བའི་ནུབ་མོ་བྲོས་སོ། །དེར་ཞག་ཉི་ཤུ་རྩ་གཅིག་ཏུ་ཕྱིན་པ་ན་སྐོམ་པས་གདུངས་ཏེ་ནགས་ཀྱི་རྩ་བའི་ཆུ་མིག་ལ་འཐུང་བར་བརྩམས་པ་ན། བུ་མོ་ཞིག་བྱུང་ནས་དེ་ནི་དུག་གི་ཆུ་སྟེ་བཏུང་བར་མི་འོས་སོ། །ཞེས་ལྡོག་ནས་ཆུ་ཞིམ་པོ་བླུད་ཅིང་ནགས་ཀྱི་ཕུག་ན་རྣལ་འབྱོར་བ་ཞིག་འདུག་པའི་དྲུང་དུ་ཁྲིད་དོ། །དེ་ནི་འཇམ་པའི་རྡོ་རྗེ་ཡིན་ཏེ། ས་མཁན་གྱི་བུད་མེད་ནི་སྒྲོལ་མའི། དེར་རྣལ་འབྱོར་བ་དེའི་སྐུ་གསུང་ཐུགས་ཀྱི་རྣམ་པར་ཐར་བ་དུལ་ཞིང་ཟབ་པའི་གནས་ལ་མོས་གུས་ཀྱི་ལང་ཚོ་ཤིན་ཏུ་བརྟས་པར་གྱུར་ནས་རྗེས་སུ་འཛིན་པར་ཞུས་པས། དབང་བསྐུར་ཞིང་རྗེས་སུ་བསྟན་པ་བྱིན་པས་ཏིང་ངེ་འཛིན་དང་ཡེ་ཤེས་ཀྱི་སྒོ་དཔག་ཏུ་མེད་པ་བརྙེས་སོ། །དུས་དེ་སྙེད་ནས་འཕགས་པའི་སྣང་བ་དང་རྟག་ཏུ་འགྲོགས་པས་ཤིང་གི་རལ་གྲི་ཤུབས་དང་བཅས་པ་གཅིག་བཅངས་ཏེ་བརྟུལ་ཞུགས་ཀྱི་རྒྱུ་བ་ལས། །རྒྱལ་པོ་སེངྒེ་ལྔ་པའི་འཁོར་གྱི་ནང་དུ་བཞུགས་ནས། སྒྱུ་རྩལ་གྱི་གནས་ཐམས་ཅད་ལ་ཤིན་ཏུ་མཁས་ཤིང་བློ་གྲོས་ཆེན་པོར་འདུག་ནས་ལྷའི་སྐུ་སྲུང་ཉིད་དུ་ཞལ་འཆེས་སོ། །དེར་བཟོའི་གནས་ཐམས་ཅད་ཀྱང་དར་བར་མཛད། རྒྱལ་སྲིད་ཆོས་བཞིན་དུ་སྐྱོང་དུ་བཅུག་པས། བློན་པོ་གཞན་རྣམས་ཀྱིས་ཕྲག་དོག་བྱས་ཏེ། ལྷ་གཟིགས་སུ་གསོལ། འདི་ནི་གཡོ་ཅན་ཞིག་སྟེ། རལ་གྲི་ཡང་ཤིང་ལས་མེད་ན་ལྷའི་སྐུ་སྲུང་ནུས་མིན་བརྟག་པར་བྱའོ་ཞེས་བཅས་ནས།
རིམ་བཞིན་ཐམས་ཅད་ཀྱིས་མཚོན་ཆ་རྒྱལ་པོའི་སྤྱན་སྔར་སྟོན་པ་ལ་ཞུགས་པ་ན། སློབ་དཔོན་གྱིས་བདག་གི་རལ་གྲི་ནི་བལྟ་བར་མི་བཟོད་དོ། །ཞེས་གསུངས་ཀྱང་ནན་གྱིས་བསྐུལ་ལོ། །འོ་ན་མིག་ཡ་གཅིག་བཀབ་ལ་ལྟོས་ཤིག་གསུངས་ནས་དམ་ཚིག་གི་རལ་གྲི་ཤུབས་ནས་ཕྱུང་མ་ཐག་རལ་གྲིའི་མཐུས་རྒྱལ་པོའི་མིག་ཅིག་ཤོས་ས་ལ་ལྷུང་ངོ། །རྒྱུ་དེ་ཉིད་ཀྱིས་རྒྱལ་པོ་འཁོར་དང་བཅས་པ་སྐྲག་པར་གྱུར་ཏེ་སྐྱབས་སུ་སོང་བས། སླར་མིག་འཕྲུལ་བ་འབྱར་བར་མཛད་པས་མཆོག་ཏུ་དད། བསྙེན་བཀུར་གྱིས་བསྟེན་ནས་བཞུགས་པར་གསོལ་ཡང་མ་གནང་སྟེ་རྒྱལ་སྲིད་ཆོས་བཞིན་བསྐྱང་བ་དང་། ནང་པའི་ཆོས་གཞི་བཅུ་ཕྲག་གཉིས་འཛུགས་པར་བསྒོས་ནས་ཡུལ་དབུས་སུ་བྱོན། དཔལ་ན་ལེནྡྲར་ཙནྡྲ་གོ་མིའི་ཕྱི་མ་མཁན་པོ་རྒྱལ་བའི་ལྷ་་ལས་རབ་ཏུ་བྱུང་། མཚན་ཞི་བའི་ལྷར་བཏགས། དེར་པཎྜི་ཏ་རྣམས་དང་ལྷན་ཅིག་གནས་པ་ལས། ནང་དུ་འཕགས་པ་འཇམ་དཔལ་ལ་ཆོས་གསན་ཞིང་ཏིང་ངེ་འཛིན་གྱི་སྒོ་དཔག་ཏུ་མེད་པ་བརྙེས། བསླབ་པ་ཀུན་ནས་བཏུས་དང་། མདོ་ཀུན་ནས་བཏུས་ལེགས་པར་བརྩམས་པས་མཁས་པའི་ཡང་རྩེར་སོན་པ་ཡིན་ཀྱང་། གཞན་ངོར་ཁ་ཟས་ཀྱང་བྲེའོ་ཆེ་ལྔ་ལྔ་གསོལ། ཉིན་མཚན་དུ་མནལ་ཞིང་། ཐོས་བསམ་སྒོམ་གསུམ་གང་ཡང་མི་བྱེད་པ་ལྟར་བྷུ་ཀུའི་ཚུལ་དུ་བཞུགས་པས། དགེ་འདུན་རྣམས་ན་རེ། དད་རྫས་ཆུད་གསན་པར་བྱེད་པའི་འདུ་ཤེས་གསུམ་པ་འདི་བསྐྲད་པར་འོས་སོ། །དེའི་ཕྱིར་ན་མདོ་རེ་མོས་སུ་བཏོན་ལ་རང་བུད་དུ་འགྲོ་བར་བྱའོ་ཞེས་བགྲོས་ནས། ཆོ་འཕྲུལ་ཟླ་བ་ལ་གསུང་རབ་རེ་མོས་ཀྱིས་འདོན་པའི་སྐབས་སུ་འབྱོན་པར་བསྐུལ་ལོ། དེར་སློབ་དཔོན་གྱིས་ཁོ་བོ་ཅག་གིས་ཅི་ཡང་མི་ཤེས་སོ་ཞེས་ལན་འགའ་གཅོམ་བསྐྱུངས་ནའང་པཎྜི་ཏ་རྣམས་ཀྱིས་ཉམས་སད་པར་བགྲོས་ནས་ནན་གྱིས་བསྐུལ་བས་མཐར་ཞལ་གྱིས་འཆེས་སོ། །དེར་ཕལ་ཆེར་ནི་དམའ་དབབ་པའི་ཕྱིར་ཚོགས་ཤིང་། ལ་ལའང་ཐེ་ཚོམ་གྱི་གནས་ལ་འདུ་བར་
བྱས་པའི་དབུས་སུ་ཁྲི་ཆེན་པོ་བཤམས་སོ། །དེའི་ཚེ་སློབ་དཔོན་ཉིད་བྱོན་ཏེ་ཁྲིའི་སྟེང་དུ་བག་ཚ་བ་མེད་པར་བཞུགས་ནས། མདོ་སྔར་བྱུང་བ་ཞིག་འདོན་ནམ། འོན་ཏེ་སྔར་མ་གྲགས་པ་ཞིག་འདོན་གསུངས་པས། ཐམས་ཅད་ཀྱང་ཆོད་བགམ་པ་ལ་སྤྲོ་བར་གྱུར་ནས་སྔར་མ་གྲགས་པ་ཞིག་འདོན་པར་བསྐུལ་ཏོ། །དེར་བྱང་ཆུབ་སེམས་དཔའི་སྤྱོད་པ་ལ་འཇུག་པ་གསུངས་ནས། གང་ཚེ་དངོས་དང་དངོས་མེད་དག། བློ་ཡི་མདུན་ན་མི་གནས་པ། །ཞེས་པའི་ཚིག་མཚམས་ནས་ནམ་མཁའི་དབྱིངས་་ལ་རྡེ་མཐོར་གཤེགས་ནས་སྐུ་ལུས་མི་སྣང་བར་གྱུར་ནའང་། ཚངས་པའི་དབྱངས་དང་བཅས་པའི་ཆོས་ཀྱི་སྒྲ་ནི་གཞུང་མ་རྫོགས་ཀྱི་བར་དུ་རྒྱུན་ཆད་པར་མ་གྱུར་ཏོ། །དེའི་ཚེ་སྐྱེས་བུ་དམ་པ་འདི་ནི་བློ་གྲོས་མི་ཟད་པའོ་ཞེས་མགྲིན་གཅིག་ཏུ་སྒྲོག་པར་བྱེད་ཅིང་། པཎྜི་ཏ་གཟུངས་ཐོབ་པ་རྣམས་ཀྱིས་བློས་བཟུང་བ་ན། ཁ་ཆེ་བ་རྣམས་ལ་ཤློ་ཀ་སྟོང་ལྷག་པ་ཅིག་བྱུང་། མཆོད་བརྗོད་རང་གི་བློས་སྦྱར། ཡུལ་དབུས་པ་ཟེར་ཏེ་ཤར་བ་རྣམས་ལ་ཤློ་ཀ་བདུན་བརྒྱ་ལས་མ་བྱུང་བ། བཤགས་ལེ་དང་། ཤེས་ལེ་ཆད་པར་གྲགས། མཆོད་བརྗོད་དབུ་མའི་དེ་ཉིད་ལྷན་ཐབས་སུ་བྱས། དབུས་པ་རྣམས་ཀྱིས་མཆོད་པར་བརྗོད་པ་དང་། བརྩམ་པའི་དམ་བཅའ་མེད་པ། རྗེས་སྔགས་ཀྱི་དབང་དུ་བརྩིས་པའི་ཤློ་ཀ་སྟོང་ཡོད་པ་ཅིག་བྱུང་གས། བཞུགས་ཚོགས་ཀྱི་གནས་ལ་ཐེ་ཚོམ་བཀོད་པར་གྱུར་ཏོ། །དེར་ཏྲི་ལིངྐའི་ཆ་གྲོང་ཁྱེར་ཀ་ལིངྐར་གཤེགས་ནས་དེ་ཉིད་དུ་བཞུགས་ཞེས་ཐོས་པས་པཎྜི་ཏ་གསུམ་གྱིས་སོང་ནས། ན་ལེནྡྲར་འབྱོན་པར་ཞུས་པས་མ་གནང་། རང་རང་གིས་གཟུངས་ཀྱིས་བཟུར་བ་ཡི་གེར་བཀོད་པའི་ལུགས་གསུམ་པོ་གང་དག་པ་ཡིན་ཞུས་པས། ཡུལ་དབུས་པ་རྣམས་ཀྱིས་བཟུང་བ་ལྟར་ཡིན་གསུངས། འོ་ན་བསླབ་པ་ཀུན་ལས་བཏུས་དང་། མདོ་ཀུན་ལས་བཏུས་པ་ལྟ་བར་གསུངས་པ་གང་ཡིན་ཞུས་པས། བྲང་ཁང་གི་སྐར་ཁུང་ན་ཤིང་ཤུན་ལ་པཎྜི་ཏའི་ཡི་གེ་ཕྲ་
མོས་བྲིས་པའི་གླེགས་བམ་ཡོད་པ་ལོངས་ཞེས་གསུངས། ཡུལ་དེ་ན་ནགས་ཚལ་དང་བཅས་པའི་གཙུག་ལག་ཁང་ཞིག་མཆིས་པར་དགེ་སློང་ལྔ་བརྒྱ་ཙམ་དང་ལྷན་ཅིག་པར་བཞུགས་པ་ལས་ནགས་ཚལ་གྱི་རི་དྭགས་བྲང་ཁང་དུ་འོངས་པ་རྣམས་རྫུ་འཕྲུལ་གྱིས་དམིགས་པ་མེད་པར་རྒྱས་བཏབ་པས། སློབ་དཔོན་གྱི་བྲང་ཁང་དུ་རི་དྭགས་རྣམས་སོང་བ་མཐོང་ཞིང་། ཕྱིར་བྱུང་བ་མ་མཐོང་ལ། རི་དྭགས་ཀྱི་ཚོགས་ཁ་བྲི་བའང་དགེ་སློང་རྣམས་ཀྱིས་ཤེས་སོ། །དེར་སྐར་ཁུང་ནས་བལྟས་པ་ན་སློབ་དཔོན་ཤ་གསོལ་བ་མཐོང་ནས། དགེ་འདུན་རྣམས་ཀྱིས་རྒོལ་བར་བརྩམས་པ་ན། རི་དྭགས་རྣམས་སླར་གསོས་ཏེ་ཉམས་སྟོབས་དང་ལྡན་པ་དག་ཕྱིར་བྱུང་ནས་ནགས་གསེབ་ཏུ་སོང་ངོ། །སླར་རབ་ཏུ་བྱུང་བའི་རྟགས་ཀྱང་བོར་ཏེ་བླང་དོར་མེད་པའི་སྤྱོད་པ་ལ་གཤེགས་པའི་ཚེ། སྒོ་དྲུང་ཞིག་ཏུ་སྐྱེ་བོ་གཅིག་གིས་འཁྲུད་མདོར་བའི་ཟེགས་མ་སློབ་དཔོན་གྱི་ཞབས་ལ་རེག་པས་ལྕགས་བསྲགས་ལ་ཕོག་པ་བཞིན་དུ་ཁོལ་བར་གྱུར་བ་དེས་མཐོང་ངོ། །ཇེ་ཞིག་ན་བ་ཏི་བི་ཧ་རའི་རྒྱལ་པོའི་ས་ཆར་མུ་སྟེགས་ཀྱི་པཎྜི་ཏ་བདེ་བྱེད་ཅེས་བྱ་བས་འོངས་ནས་ཕྱི་ནང་གྲུབ་མཐའ་ལ་བརྩད་ཅིང་མཐུ་དང་རྫུ་འཕྲུལ་འགྲན་པར་བསྐུལ་བ་ན། ནར་པ་གཞན་རྣམས་བག་ཚ་བར་གྱུར་ཏེ། དེར་སྔར་གྱི་འཁྲུད་མའི་བྱ་བ་མཐོང་བའི་སྐྱེ་བོ་དེས་དེ་དྲན་ནས་ངེས་པར་རྩོད་པ་བཟློག་པ་ཞིག་ངས་ནུས་སོ་སྙམ་ནས་སློབ་དཔོན་གྱི་དྲུང་དུ་ཕྱིན། མུ་སྟེགས་དང་ནུས་པ་འགྲན་པར་ཞུས་པས་ཞལ་གྱིས་བཞེས་པ་བཞིན་དུ་ཡུལ་དེའི་རྒྱལ་པོ་ལའང་བསྙད་དོ། །རྒྱལ་པོས་སྐྱེ་བོ་མང་པོ་འདུས་པའི་དབུས་སུ་ཁྲི་བརྩེགས་ནས་ཕྱི་ནང་གྲུབ་མཐའ་ལ་རྩོད་དུ་བཅུག་པས་སློབ་དཔོན་ཉིད་རྒྱལ་ལོ། །དེར་མུ་སྟེགས་ཀྱིས་ནམ་མཁའ་ལ་རྡུལ་ཚན་གྱི་དཀྱིལ་འཁོར་ཆེན་པོ་སྐད་ཅིག་ལ་བྲིས་པ་ན། སློབ་དཔོན་གྱིས་ཟད་པར་རླུང་གི་ཏིང་ངེ་འཛིན་ལ་མཉམ་པར་བཞག་པས་དཀྱིལ་འཁོར་དང་མུ་སྟེགས་རྣམས་འཐོར་རླུང་དྲག་པོས་བསྐྲད་པ་ཆུ་བོ་ཞིག་མཆིས་པའི་ཕ་རོལ་ཏུ་སོང་ངོ། །ཆེས་ཤིན་ཏུ་དར་
བར་མཛད་ཅིང་ཡུལ་དེ་ལའང་མུ་སྟེགས་ཕམ་པའི་ཡུལ་ཞེས་སྐབས་དེར་གྲགས་ཀྱང་དུས་ཀྱི་སྟོབས་ལས་ད་ལྟ་མིང་དེ་སྐད་དུ་གྲགས་པའི་ངེས་པའང་མེད་ཅེས་མཁས་པ་དག་གློད་དོ། །གཞན་ལང་། །ལྟ་བ་ཁྱད་པར་ཅན་འཛིན་པ་ལྔ་བརྒྱ་དང་། མུ་ཏོབ་སྟོང་ཕྲག་ལ་འཚོ་བ་སྦྱར། འཁྲུག་པ་ཆེན་པོའི་འཐབ་ཟླར་ཞུགས་ནས་རྫུ་འཕྲུལ་གྱིས་བསྡུམས་པ་ལ་སོགས་པ་ངོ་མཚརཅན་གྱིས་མཛད་པའི་གཏམ་བདུན་ཞེས་བགྲང་བའང་ཡོད་ཀྱི། དགོངས་པ་དང་སྤྱོད་ཡུལ་གཞན་ལས་ཁྱད་པར་འཕགས་པའི་ཚུལ། པཎྜི་ཏ་པུ་ཏི་ཙནྡྲས། རྒྱལ་བའི་བསྟན་ལ་བདག་ཉིད་ཆེ། སྐྱེས་བུ་མང་པོ་བྱོན་མོད་ཀྱི། །ཞི་བའི་ལྷ་ཡིས་མཛད་པ་འདྲའི། །ཉམས་དང་དགོངས་པ་ཅན་མི་རྙེད། །ཅེས་གསུངས་པ་བཞིན་ནོ།། །།རིགས་པར་སྨྲ་བ་ཐམས་ཅད་ཀྱི་གཙུག་ཏོར་གྱི་ནོར་བུར་སོན་ཞིང་འཛམ་བུའི་གླིང་མཛེས་པར་བྱེད་པའི་རྒྱན་དྲུག་ལས། གཞུང་འགྲེལ་བར་བྱེད་པའི་སློབ་དཔོན་ཆེན་པོ་དཔལ་ལྡན་ཆོས་ཀྱི་གྲགས་པ་ནི། ལྷོ་ཕྱོགས་རྒྱ་མཚོ་དང་ཉེ་བའི་ཡུལ་ཀཱཉྩི་ན་གར་ཞེས་པའམ། ཕྱི་ནང་ཀུན་ལ་གྲགས་པ་ཏྲི་མལ་ཡའི་ཡུལ་གྱི་མིང་གི་བྱེ་བྲག་ལས་སམ་མཁས་པའི་མདུན་སར་རྒྱལ་དབང་གཙུག་གི་ནོར་བུ་ཞེས་བྱ་བར་རྒྱལ་པོ་སེངྒེ་ལྔ་པ་རྒྱལ་སྲིད་ལ་གནས་པའི་དུས་བྲམ་ཟེའི་རིགས་སུ་སྐྱེ་བའི་མྱུ་གུ་བཟུང་ཞེས་གྲགས་སོ། །ཆུང་ངུ་ནས་བློ་གྲོས་ཤིན་ཏུ་བསྒྲིམས་པས། རིགས་ཀྱི་ཆོས་དང་། ཡབ་མུ་སྟེགས་ཀུན་ཏུ་རྒྱུ་རོ་ཉཱནནྟ་ཞེས་བྱ་བའི་དབང་ལས་མུ་སྟེགས་ཅན་གྱི་གྲུབ་པའི་མཐའ་མ་ལུས་པ་ལ་མཁས་པར་སྦྱངས་པའི་རྩེར་སོན་ཏོ། །དེར་བྲམ་ཟེ་རྣམས་ཀྱིས་ལྷག་པར་ཡང་བསྔགས་པའི་སྐབས་ཤིག། སྟོན་པ་བདེན་པར་གསུང་བའི་གྲུབ་པའི་མཐའ་འགའ་ཞིག་འདྲེན་བྱེད་ཀྱི་ལམ་དུ་དོང་ཟན། རང་གི་སྟོན་པ་ནི་སྐྱོན་དང་བཅས་ཤིང་། བསྟན་བཅོས་དག་ཀྱང་རྣམ་པར་གྲོལ་བའི་ལམ་ལས་ཕྱིར་ཕྱོགས་པའི་མཚང་རིག་པར་གྱུར་ནས། མོས་པའི་ཤིང་རྟ་ལ་དགེ་བསྙེན་གྱི་
ཆ་ལུགས་སུ་འཛེགས་སོ། །བྲམ་ཟེ་རྣམས་ཀྱིས་དེའི་རྒྱུ་དྲིས་པ་ན། བསྔགས་པར་འོས་པའི་གནས་བརྗོད་པས། དེ་དག་གི་གནས་ནས་བསྐྲད་དོ། །དེར་ཡུལ་དབུས་སུ་སློབ་དཔོན་ཆོས་འབངས་ལས་རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་བྱས། མདོ་སྡེ་དང་གཟུངས་སྔགས་བསྡོམས་པའང་ལྔ་བརྒྱ་ཐུགས་ལས་འདོན། རྟོག་གེའི་བསྟན་བཅོས་གཞན་མང་པོ་ཉན་ཡང་ཚིམས་པ་ཐོབ་པར་མ་གྱུར་ནས། དཔལ་ཕྱོགས་ཀྱི་གླང་པོའི་སློབ་མ་དབང་ཕྱུག་སྡེ་ལས་ཚད་མ་ཀུན་ལས་བཏུས་ཚར་གཅིག་ཉན་པས་སློབ་དཔོན་དང་མཉམ། ལན་གཉིས་ཉན་པས་ཕྱོགས་ཀྱི་གླང་པོ་དང་མཉམ་པར་བྱུང་། གསུམ་པའི་ཚེ་དབང་ཕྱུག་སྡེས་ཀྱང་ཕྱོགས་གླང་གི་དགོངས་པ་མ་ལོངས་པའི་འཁྲུལ་བའི་གནས་ཇི་བཞིན་པར་བཟླས་པས། སློབ་དཔོན་ཤིན་ཏུ་མཉེས་ཏེ་ཁྱོད་ནི་ཕྱོགས་ཀྱི་གླང་པོ་དང་མཉམ་མོ། །གྲུབ་མཐའ་ནོར་བ་ཐམས་ཅད་སུན་ཕྱུང་ལ་ཚད་མ་ཀུན་ལས་བཏུས་ཀྱི་འགྲེལ་བའང་གྱིས་ཤིག་པར་གནང་བ་ཐོབ་བོ། །སྔགས་ཀྱི་སློབ་དཔོན་ནི་འདོད་པ་ཐ་དད་ཀྱང་ཌེ༚་གི་པ་འཐད་པར་བྱེད་པས་དེ་ལས་དབང་བསྐུར་བ་ཡང་དག་པར་ནོད་དེ། ལྷག་པའི་ལྷ་བསྒྲུབས་པས་ཧེ་རུ་ཀས་མངོན་སུམ་པར་ཞལ་བསྟན། ཅི་འདོད་གསུང་བ་ན། ཕྱོགས་ཐམས་ཅད་ལས་རྣམ་པར་རྒྱལ་བར་འཚལ་ལོ། །ཞུས་པས་བཞད་སྒྲ་དང་བཅས་མི་སྣང་བར་གྱུར་ཏོ། །དེར་བསྟོད་པ་རྒྱུན་ཆགས་ཀྱང་མཛད། རེ་ཞིག་ན་མུ་སྟེགས་ཅན་ཐམས་ཅད་ཚར་བཅད་པའི་ཕྱིར་གཞན་གཞུང་གི་གྲུབ་མཐའི་གསང་ཚིག་སློབ་པར་བཞེད་ནས། ཁོལ་པོའི་ཆ་ལུགས་སུ་རྫུས་ནས་ལྷོ་ཕྱོགས་ཀྱི་རྒྱུད་ཐམས་ཅད་དུ་བྱོན། མུ་སྟེགས་ཀྱི་གྲུབ་མཐའ་ལ་སུ་མཁས་དྲིས་པས། འགྲན་གྱི་དོ་མེད་གཞོན་ནུ་རོལ་པ་ཡིན་ཟེར། ཆོས་འབྱུང་སྔ་མ་ཚོར་འདི་ཞང་པོ་ཡིན་པར་འདོད་ཅིང་གཞོན་ནུ་མ་ལེན་ཟེར་བ་སོགས་བཀའ་མི་བཙན་པར་གྲགས། མུ་སྟེགས་
འདི་དང་། ལྷ་ཆེན་པོའི་རྗེས་འབྲང་གཉིས་ལ་སོགས་པས་སངས་རྒྱས་བསྐྱངས་དང་། ལེགས་ལྡན་དང་། ཕྱོགས་ཀྱི་གླང་པོའི་སློབ་མ་མང་པོ་རྩོད་པས་དམའ་ཕབ་ནས་མངའ་ཐ་དད་ལོངས་སྤྱོད་ཕྲོགས་པའི་གཏམ་རྒྱུད་ཡོད་དོ། །དེའི་ཚེ་གཞོན་ནུ་རོལ་བ་དེ་རྒྱལ་པོ་ལས་མངའ་ཐད་ཐོབ་པའི་འབྲས་སཱ་ལུའི་ཞིང་ཕུན་སུམ་ཚོགས་པ་དང་། བ་ལང་དང་། མ་ཧེའི་ཚོགས་དང་ལྡན་ཞིང་། བྲན་ཕོ་མོ་ལྔ་བརྒྱ་རེ་རེ་དང་། ཞོ་ཤས་འཚོ་བའི་འཁོར་དང་བཅས་པ་ཡིན་པས། དེའི་གཡོག་ཏུ་ཞུགས་ནས་དེ་ཐམས་ཅད་ཀྱི་ལས་སློབ་དཔོན་གཅིག་པུས་ཟིན་པར་མཛད་པས་མུ་སྟེགས་ཁྱོ་ཤུག་གཉིས་ཤིན་ཏུ་མགུའོ། ཁྱོད་ཅི་འདོད་ཟེར་བ་ལ། གྲུབ་མཐའ་ཉན་པར་འཚལ་ལོ་བྱས་པས་སློབ་མའི་གྲར་བཙུད། གསང་ཚིག་བུ་དང་ཆུར་མ་ལ་མ་གཏོགས་གཞན་ལ་མི་སྟོན་པ་འགའ་ཞིག་ཡོད་པ་དེ་དང་དེ་མགུ་བར་བྱས་ཏེ་ཁོང་དུ་ཆུད་པར་བྱས་པས། གྲུབ་མཐའི་གནད་ཐམས་ཅད་ཤེས། གཞན་ཚུལ་འགོག་པའི་གནད་མ་ལུས་པ་ཉམས་འོག་ཏུ་ཆུད་པའི་མཐར། བྲམ་ཟེ་ནོར་ལ་སྲེད་པས་ཡོན་མ་བྱིན་ན་ཉེས་པར་དཔྱད་ནས། རང་གི་གླ་དངུལ་པཎ་ལྔ་བརྒྱ་བྲམ་ཟེ་རྣམས་ལ་བྱིན། ཕྱོགས་དེའི་གནོད་སྦྱིན་ལས་ཀྱང་གསེར་གྱི་དོང་རྩེ་བདུན་སྟོང་བླངས་པ་གཞོན་ནུ་རོལ་པ་ལ་བྱིན་ནས་དེའི་ནུབ་མོ་བྲོས་ནས་བྱོན་ཏེ། དེར་རྒྱལ་པོ་དུམ་རི་སུ་ཞེས་བྱ་བ་ཡོད་པའི་སར་སྒོ་ཡིག་བཏབ་སྟེ། རྩོད་པར་འདོད་པ་སུ་ཞིག་ཅེས་བསྒྲགས་པས། ལྟ་བ་དྲུག་གི་གྲུབ་མཐའ་འཛིན་པ་ལྔ་བརྒྱ་ཙམ་འདུས། ཟླ་བ་གསུམ་གྱི་བར་དུ་རྩོད་པས། ཐམས་ཅད་ལས་རྣམ་པར་རྒྱལ་བའི་བ་དན་ཕྱར་ཏོ། །དེར་རྒྱལ་པོའི་དབང་གིས་མངའ་བསྒྱུར་ཏེ། ཀུན་ཀྱང་སངས་རྒྱས་ཀྱི་བསྟན་པ་ལ་བཙུད། ལོངས་སྤྱོད་དང་ལྡན་པ་ལྔ་བཅུ་ཙམ་ནང་པའི་ཆོས་གཞིར་ཡང་འཛུགས་སུ་བཅུག་གོ། གཏམ་དེ་བྲམ་ཟེ་གཞོན་ནུ་རོལ་པའི་སྙིང་གི་ཚེར་མར་གྱུར་ནས་
རང་ཉིད་འཁོར་ལྔ་བརྒྱ་དང་བཅས་པ་རྩོད་པའི་ཕྱིར་འོངས་ནས་འདི་སྐད་དུ། གལ་ཏེ་ཁོ་བོ་རྒྱལ་ན་ཆོས་ཀྱི་གྲགས་པའི་སྲོག་མིང་གི་ལྷག་མར་གྱིས་ཤིག། ཆོས་ཀྱི་གྲགས་པ་རྒྱལ་ན་ནི་བདག་ཉིད་ལ་དེ་ཁོ་ནའོ་ཞེས་རྒྱལ་པོ་ལ་བསྒོ་བ་ན། སློབ་དཔོན་གྱིས། བདག་གི་རྩོད་པ་ཉམ་ཉེས་པར་གྱུར་ན་གསོད་དམ། བརྡེག་གམ། འཆིང་བ་ནི་རྒྱལ་པོ་ཉིད་ཤེས་ཀྱི། བདག་རྒྱལ་ན་ནི་གཞོན་ནུ་དོལ་བ་གསང་དུ་མི་འཚལ་ཏེ་ནང་པའི་བསྟན་པ་ལ་འཇུག་པར་བྱའོ་ཞེས་རྩོད་པ་ལས། གཞོན་ནུ་རོལ་བའི་ཐུན་མོང་མ་ཡིན་པའི་དམ་བཅའ་ལྔ་བརྒྱ་ཡོད་པའི་སྟེང་དུ། སློབ་དཔོན་གྱིས་སུན་པ་བྱིན་པའི་རིག་པའི་རྣམ་གྲངས་བརྒྱ་བརྒྱའི་ཆོམ་པོས་རྣམ་པར་བརྟགས་པས། གཞོན་ནུ་རོལ་པ་འཁོར་ལྔ་བརྒྱ་དང་བཅས་པ་ཐལ་བའི་སྐྱོམ་ལ་མངོན་པར་ཞེན་པའི་བརྟུལ་ཞུགས་སྨད་དེ། སངས་རྒྱས་ཀྱི་བསྟན་པ་ལ་གཙོ་བོས་མཆོད་ཅིང་། འཁོར་རྣམས་ཀྱིས་རབ་ཏུ་བྱུང་ངོ། །དེ་བཞིན་དུ་རྩོད་པའི་ཁྱུ་མཆོག་ཀ་ཎ་དཱ་དོ་རུ་སོགས་དང་། འབིགས་བྱེད་ཀྱི་རི་བོའི་ཁོང་ནས་རྒོལ་བའི་བ་སྤུ་གཟིང་བ་ཐམས་ཅད་ཀྱང་མུད་འདུག་པའི་གནས་ལ་སྦྱར་རོ། །སླར་བ་དྲ་ལི་་ཞེས་བྱ་བའི་གནས་སུ་གཤེགས་ནས། དེ་ན་གནས་པའི་མུ་སྟེགས་ཀྱི་ཚོགས་ལའང་རྩོད་པའི་དྲིལ་བསྒྲགས་པས། ཕྱོགས་ལས་རྣམས་དང་རྒྱལ་བའི་མེ་འོད་ཀྱི་མདུན་སར་མུ་སྟེགས་མེ་ཏོག་ཟས་ཅན་ཉེ་བར་ནུས་པ་མ་ཡིན་པས་རི་དྭགས་ཀྱི་དབུས་ན་གཅན་གཟན་ལྷགས་པ་བཞིན་དུ་གྲོས་ཤིང་། འགའ་ཞིག་ནི་བག་ཚ་བའི་མེ་ཏོག་འབུལ་བ་ལ་མངོན་དུ་ཕྱོགས་སོ། །ཡུལ་དེར་སྔོན་གྱི་ཆོས་གཞི་ཉམས་པ་ཐམས་ཅད་ཀྱང་སོར་ཆུད་པར་མཛད། ནགས་ཚལ་གྱི་དབུས་ན་བསམ་གཏན་ཉིད་ལ་གནས་པ་ན། དཔལ་ན་ལེནྡྲར་སཾ་ག་ཨ་ཙཱ་རྱ་ཞེས་པའི་མུ་སྟེགས་ཞིག་གིས་རྩོད་པའི་གཏམ་གྱི་ཚེར་མ་རྣོན་པོ་མངགས་ནས་པཎྜི་ཏ་རྣམས་ཀྱི་རྣ་བ་གཟོན་པར་བྱས་པས། ལྷོ་ཕྱོགས་ནས་སློབ་དཔོན་ཆོས་ཀྱི་གྲགས་པ་སྤྱན་འདྲེན་
པའི་སྟ་གོན་ལ་བརྩོན་ཞིང་། སད་ཕོད་ཙན་རྩོད་པར་བྱའོ་ཞེས་དུས་ཀྱི་གཏན་ཚིགས་བཀོད་དོ། །ཇི་ཙམ་ན་རྒྱལ་པོ་རབ་གསལ་གྱིས་བྲམ་ཟེ་དང་མུ་སྟེགས་ཅན་མཐའ་དག་ཝཱ་རཱ་ཎ་སཱིར་བསྡུར་ཏེ། སའི་བདག་པོ་དང་བཅས་པའི་དབང་པོའི་མདུན་སར་རྩོད་པའི་བྱ་བ་བྱེད་པར་མངོན་དུ་ཕྱོགས་པ་ན། མུ་སྟེགས་ན་རེ། དད་རྒྱལ་ན་ཁྱེད་རྣམས་གངྒཱ་ལ་མཆོད་དམ། མུ་སྟེགས་ལ་འཇུག་གད་མང་གྱིས། ཅི་སྟེ་ཁྱོད་རྣམས་རྒྱལ་ན་ནི་ཁོ་བོ་ཅག་གི་སྲོག་གངྒཱ་ལ་འདོར་བར་བྱེད་པའོ། །ཞེས་བསྒྲོས་ནས། རྩོད་པའི་གཡུལ་ངོ་ཆེན་པོ་བཤོམས་པ་དེའི་ཚེ། སཾ་གར་གྱི་དམ་བཅའ་བ་དང་། ཁས་བླང་བ་དང་། བསྒྲུབ་བར་བྱ་བའི་གྲུབ་བའི་མཐའ་གང་ཡིན་པ་དེ་ནི། དཔལ་ཆོས་ཀྱི་གྲགས་པའི་རིག་པ་རྣོན་པོས་བརྒལ་བ་དང་། བརྟག་པ་དང་། སུན་འབྱིན་པ་དང་། དགག་པར་བྱ་བའི་དཔུང་གི་ཚོགས་ལན་ལག་བཞི་པའི་འཁྲུལ་འཁོར་ཆེན་པོས་ཡང་ནས་ཡང་རུ་ཉམས་དམས་པར་བྱས། ཆབ་བཅད་པར་བྱས། དམའ་དབབ་པར་བྱས་ནས་ཅད་མི་སྨྲ་བར་ཡུལ་ཡུལ་པོའི་གནས་ལ་བཀོད་དོ། །དེའི་ཚེ་སཾ་གར་ཞིང་རྒྱལ་དྲག་པོས་ཁོར་རྣམ་པར་འཁྲུགས་པར་གྱུར་ནས་རང་གི་སློབ་མ་བྷ་ཊ་ཨ་ཙརྱ་ལ་དགེ་སྦྱོང་མགོ་བྲེགས་འདི་ལས་རྒྱལ་བའི་སྙིང་སྟོབས་བསྐྱེད་ཅིག། ཅི་སྟེ་མ་རྒྱལ་ཡང་རུང་སྟེ། ཁོ་བོ་ཅག་ནི་ཁྱོད་ཀྱི་བུར་སྐྱེ་བ་བཟུང་ནས་སླར་ཡང་རྩོད་པའི་བརྟུལ་ཞུགས་ཀྱིས་འཐག་པར་བྱའོ་ཟེར་ཞིང་། སློབ་དཔོན་གྱིས་བཟློག་ཀྱང་མ་ཉན་པས་ཆུ་བོ་གངྒཱ་ལ་ལྕེབས་ཏེ་སྲོག་གི་རྒྱུ་བ་བཏང་ངོ། །དེའི་སློབ་མ་སྔོན་གྱི་རྣམ་པར་དཀར་བའི་ས་བོན་གྱིས་བཟུང་བ་མང་པོ་ཞིག་ནི་སངས་རྒྱས་པའི་གྲུབ་མཐའ་ལ་ཚུད་པར་ནུས་ལ། དེ་ལས་ཅིག་ཤོས་སུ་གྱུར་བ་རྣམས་ནི་རྟག་ཆད་དུ་སྨྲ་བའི་གོམ་པ་བདེ་བླག་ཏུ་འདོར་བས་ཐག་རིང་པོའི་གནས་སུ་བྲོས་པར་གྱུར་ཏོ། །ལོ་དུས་དེ་རྫོགས་པའི་གནས་སྐབས་ན་ཇི་ལྟར་ཟེར་བ་བཞིན་སཾ་གར་ཡང་
། །བྷ་ཊའི་བུར་སྐྱེ་བ་བླངས། བྷ་ཊ་ཨ་ཙ་རྱས་ཀྱང་སླར་ཡང་ལོ་གསུམ་དུ་རང་གི་འདོད་པའི་ལྷ་མཉེས་པར་བྱས། ལོ་གསུམ་དུ་ནང་བའི་གྲུབ་མཐའ་འགོག་པའི་རིག་པ་ལ་བསམས། ལོ་བདུན་པ་ལ་ཡང་སྔར་བཞིན་བསྟན་པ་དབང་དུ་བཙུགས་ནས་རྩོད་པས། དཔལ་ལྡན་ཆོས་ཀྱི་གྲགས་པ་ན་འཕྲོག་བྱེད་དབང་པོ་གངས་ལྡན་གྱི་རི་ལ་ཆས་པ་བཞིན་ཏེ། མུ་སྟེགས་ངན་པའི་གྲུབ་མཐའ་རྣམ་པ་ཀུན་ནས་ཉམ་ཉེས་པར་གྱུར་ཏེ། ངོ་ཚའི་དམ་ཚིག་ནི་འདའ་བར་དཀའ་བ་ཞིག་སྟེ་སློབ་དཔོན་གྱིས་ནན་གྱིས་བཟློག་ཀྱང་མཉན་པར་ཆུ་བོ་གངྒཱར་མཆོངས་ཏེ་ཤིའོ། །དེར་སྨོན་པ་མ་སྟོབས་སུ་གྱུར་བའི་བུས་གར་ཨ་ཙ་རྱའི་སྐྱེ་བ་དང་། དེའི་ཕུ་བོ་བྷ་ཊ་ཨ་ཙརྱ་ཕྱི་མ། བྲམ་ཟེ་རང་གི་གྲུབ་མཐའ་ལ་མངོན་པར་ཞེན་པ་རྣམས་ནི་ཤར་ཕྱོགས་ཀྱི་ཡུལ་ཐག་རིང་པོར་བྲོས། བྲམ་ཟེ་གཟུ་བོར་གནས་པ་ལྔ་བརྒྱ་ཙམ་ནི་བསྟན་པ་ལ་རབ་ཏུ་བྱུང་། ལྔ་བརྒྱ་ཙམ་དཀོན་མཆོག་གསུམ་ལ་བླ་མར་བྱེད་པའི་གནས་སུ་བཀོད། དེའི་ཚེ་མ་གདྷཱའི་བྲམ་ཟེ་གང་བ་ཞེས་བྱ་བ་དང་། བཅོམ་རླག་གི་གང་བ་བཟང་པོ་ཞེས་མངའ་ཐང་དང་ལོངས་སྤྱོད་ཆེ་བ། རང་གི་འདོད་པའི་ལྷས་བྱིན་གྱིས་བརླབས་པའི་རྟོག་གེའི་རིག་པ་ལ་བློ་བྱང་བ་དག་གིས་ཀྱང་ཡང་ནས་ཡང་དུ་རྩོད་པའི་བྱ་བ་ལ་འོངས་པའང་། སློབ་དཔོན་གྱི་རིགས་པར་སྨྲ་བའི་བརྟུལ་ཞུགས་ཀྱིས་ཚར་བཅད་དེ་ནང་པའི་གྲུབ་མཐའ་ལ་སྦྱར་ནས་རང་རང་གི་ཡུལ་སོ་སོར་ཆོས་གཞི་ལྔ་བཅུ་ཡང་བཙུགས། ཕྱོགས་ཐམས་ཅད་ལས་རྣམ་པར་རྒྱལ་བའི་གྲགས་པའི་མུ་ཁྱུད་ཀྱིས་སའི་སྟེང་མ་ལུས་པ་བསྐོར། མ་ག་དྷཱ་དང་ཉེ་བ་དྲང་སྲོང་མ་ཏཾ་གའི་ནགས་སུ་ཡུན་རིང་དུ་བསྟི་བར་མཛད་ནས་རིག་སླགས་མང་པོ་གྲུབ་པར་མཛད། རེ་ཞིག་ན་རི་བོ་འབིགས་བྱེད་ཀྱི་ཁོངས་ན་རྒྱལ་པོ་མེ་ཏོག་གི་བུ་མེ་ཏོག་ཀུན་ཏུ་རྒྱས་པ་ཞེས་བྱ་བ། གྲོང་ཁྱེར་འབུམ་ཕྲག་བཅུ་ལ་དབང་བསྒྱུར་ཞིང་ལོངས་སྤྱོད་ཀྱི་ཁྱད་པར་ལྷ་དང་མཚུངས་པ་ཞིག་ཡོད་པའི་སའི་ཆར་ལྗོངས་རྒྱུ་ཞིང་
གཤེགས། ཅི་ཞིག་ན་རྒྱལ་པོའི་ཕོ་བྲང་དུ་བརྟོལ་བ་ལས་རྒྱལ་པོས་ཁྱོད་ནི་སུ་ཞིག་གོ་ཞེས་དྲིས་སོ། །ཤེས་རབ་ཅན་ནི་ཕྱོགས་ཀྱི་གླང་པོ་སྟེ། ཙནྡྲ་གོ་མི་བརྗོད་པ་རྣམ་པར་དག། སྙན་དངགས་དཔའ་བོ་ལས་བྱུང་སྡེབ་སྦྱོར་མཁས། །ཕྱོགས་ལས་རྣམ་པར་རྒྱལ་བར་མིན་སུ། །ཞེས་གསུངས་པ་ན། ཆོས་ཀྱི་གྲགས་པ་ཡིན་ནམ་དྲིས་པས། དེ་ལྟར་གྲགས་གསུང་། དེར་རྒྱལ་པོས་ཀྱང་གཙུག་ལག་ཁང་མང་དུ་བཞེངས་ནས་ཆོས་ཀྱི་གྲགས་པ་བཞུགས་པར་གསོལ། རྟོག་གེ་རབ་ཏུ་བྱེད་པ་སྡེ་བདུན་གྱི་བསྟན་བཅོས་བརྩམས་ནས། གལ་ཏེ་ཆོས་ཀྱི་གྲགས་པ་ཡི། །སྨྲ་བའི་ཉི་མ་ནུབ་པ་ན། །ཆོས་རྣམས་གཉིད་ལོག་ཡང་ན་ཤི། །ཆོས་མ་ཡིན་རྣམས་ད་གདོད་ལངས། །ཞེས་པའང་རྒྱལ་པོའི་སྒོ་ཁང་དུ་ཡི་གེར་བྲིས། ཡུལ་དེར་དགེ་སློང་ཁྲི་ཕྲག་ཙམ་བྱུང་ཞིང་བསྟན་པ་དར་བར་མཛད། ཆོས་གཞི་ཡང་བཅུ་ཕྲག་ལྔ་བཙུགས། དེ་ནས་མཐའ་ཁོབ་ཀྱི་ཡུལ།།།ཛར་ཐར་བྱོན་ནས། མུ་སྟེགས་བྱེད་དང་བྲམ་ཟེ་མང་པོ་རྒྱལ་བསྟན་གྱི་ཤིང་རྟ་ལ་འཇོག་ཏུ་བཅུག། གོ་ཏ་པུ་རི་ཞེས་བྱ་བའི་ལྷ་ཁང་བཞེངས། ཡུལ་དེ་ན་མུ་སྟེགས་ཤིན་ཏུ་མང་བས་སློབ་དཔོན་གྱི་བྲང་ཁང་ལ་མེ་སྦར་བས། ཕྱོགས་ཐམས་ཅད་མེས་འཚིག་པ་ན། ལྷ་དང་གསང་སྔགས་རྗེས་སུ་དྲན་པས་ནམ་མཁའི་ལམ་ལ་རྫུ་འཕྲུལ་གྱིས་གཤེགས་ནས་དཔག་ཚད་གཅིག་ཙམ་གྱི་སའི་ཆ་ན་ཡོད་པའི་རྒྱལ་པོའི་ཕོ་བྲང་དང་ཉེ་བར་བྱོན། ཇེ་ཞིག་ན་ནང་པའི་བསྟན་པ་ལ་དགྲ་ཟླར་ཆས་པའི་སྙིང་སྟོབས་མ་སྨད་པ་མུ་སྟེགས་སི་ག་ར་ཨ་ཙརྱ་སླར་ཡང་སྐྱེ་བ་བླངས་པ་དེ་ཉིད་ནར་སོན་ནས། སྐྱེ་བ་སྔ་མ་ལས་ཀྱང་བློ་རྣོ་ཞིང་། རྩོད་པའི་གནས་ལ་བྱང་ཆུབ་པ། བུམ་པའི་སྟེང་ན་ལྷ་དབང་ཕྱུག་ཆེན་པོས་གཟུགས་སྟོན་པ་ཅིག་བྱུང་། དེ་ལོ་བཅོ་ལྔའམ་བཅུ་དྲུག་པར་གྱུར་བའི་ཚེ། དཔལ་ཆོས་ཀྱི་གྲགས་པ་ལ་རྩོད་པའི་རྒྱལ་རྔ་བརྡུང་བར་འདོད་དེ། ཝཱ་རཱ་ཎ་སཱིར་སོང་ནས། རྒྱལ་པོ་མ་ཧཱ་ང་ནི་ལ་བསྒོས་ཤིང་ཕྱོགས་ཐམས་ཅད་དུ་དྲིལ་
བསྒྲགས་སོ། །དེར་སློབ་དཔོན་ཡང་ལྷོ་ཕྱོགས་ནས་སྤྱན་དྲངས། བྲམ་ཟེའི་ཚོགས་སྟོང་ཕྲག་ལྔ་ཙམ་དང་བཅས་རྒྱལ་པོ་ལ་སོགས་པའི་སྐྱེ་བོ་དཔག་ཏུ་མེད་པ་དབང་པོ་ལ་བཀོད་ནས། བསྟན་པ་ནི་གང་རྒྱལ་བའི་རུ་མཚོན་དུ་བཙུགས། རྩོད་པའི་འཁོར་ལོ་ཤིན་ཏུ་དར་དྲག་པའི་རྣོ་དབལ་འགྲན་པ་ལ་ཞུགས་སོ། །ཞུགས་ནས་ཀྱང་ཆོས་ཀྱི་གྲགས་པའི་རིགས་ལུང་རྒྱ་མཚོ་ནི་ཉིན་མོར་བྱེད་པའི་དཔལ་དང་འགྲོགས་པས། འགལ་ཟླར་བྱེད་པའི་བྱ་རོག་དགྲ་བོ་རིགས་པར་སྨྲ་བའི་གནས་ལ་ནི་ཤིན་ཏུ་ལྡོངས་པར་གྱུར། དེས་སྲོག་གི་ལྷག་མའང་བདེ་བར་འཚོ་བའི་བརྟན་པ་ཕྲོགས་ཏེ་ཆུ་བོ་གངྒཱའི་དབུས་ག་ལ་བ་དེར་ལྕེབས་སོ། །སླར་བྲམ་ཟེ་གཟུ་ལུམས་ཅན་དེ་དག་ཀྱང་རྣམ་པར་དཔྱོད་པའི་སློ་མཐུ་བརྟས་པར་གྱུར་ནས་རང་གི་གྲུབ་པའི་མཐའ་མུར་འདུག་པའི་མཐའ་གང་ཡིན་པ་འཚལ་ནས་མང་པོ་དག་རབ་ཏུ་བྱུང་། མང་པོ་དག་དགེ་བསྙེན་གྱི་བརྟུལ་ཞུགས་འཛིན་ཏོ། །གཞན་ཡང་ཁ་ཆེའི་ཡུལ་ནས་བྲམ་ཟེའི་རྒྱ་སིངྒ་དང་། དེ་ཝའི་རྒྱ་ཀར་དང་། དེ་ཝ་སིངྷ་ཞེས་བྱ་བ་སྟེ་བྲམ་ཟེའི་སློབ་དཔོན་ཆེན་པོ་གསུམ་ཡང་། དཔལ་ཆོས་ཀྱི་གྲགས་པའི་མདུན་སར་ལྷགས་ནས་དྲང་པོའི་བློས་གྲུབ་མཐའ་ལ་བརྒལ་བརྟག་བྱས་པས། ཆོས་ཀྱི་གྲགས་པའི་རིགས་པར་སྨྲ་བའི་དེ་ཉིད་མཐོང་བས་ནང་པ་ལ་དད་པར་གྱུར་ཏེ། སྐྱབས་སུ་འགྲོ་བ་དང་། བསླབ་པའི་གནས་ལྔ་བླངས། གྲུབ་མཐའ་ཉན་པས་ཚད་མ་སྡེ་བདུན་ལ་བློ་གྲོས་རྣམ་པར་བྱང་སྟེ་བྱང་ཕྱོགས་ཁ་ཆེའི་ཡུལ་དུ་སོང་ནས་ལུགས་སྲོལ་དེ་དར་བར་བྱས་སོ། །སླར་ཡང་ལྷོ་ཕྱོགས་ཀྱི་རྒྱུད་དུ་བྱོན། གང་ན་སངས་རྒྱས་ཀྱི་བསྟན་པ་མདར་བ་དང་། ཉམས་པའི་ཕྱོགས་ཐམས་ཅད་དུ་འགལ་རྐྱེན་དུ་གྱུར་བ་རྩོད་པས་ཚར་བཅད། རྒྱལ་བློན་ལ་སོགས་པ་ཁེངས་དྲེགས་ཅན་དག་ཐུགས་རྗེས་དབང་དུ་བྱས་ནས་དགེ་འདུན་གྱི་སྡེ་དང་ཆོས་གཞི་དཔག་ཏུ་མེད་པ་དར་བར་མཛད། ཉིད་ཀྱིས་བཞེངས་པའི་ལྷ་ཁང་བརྒྱ་རྩ་ཙམ་དང་། གཞན་ལ་བསྐུལ་ཏེ་བཞེས་པ་གྲངས་ལས་འདས། སློབ་དཔོན་འདིའི་ཐུགས་རྗེ་དང་བརྟུལ་ཞུགས་ཀྱི་མཐུ་ཁོ་ནས་སངས་
རྒྱས་ཀྱི་བསྟན་པ་ལ་བཅུག་པའི་དགེ་སློང་དང་། དགེ་བསྙེན་ཡན་ཆད་བསྡོམས་ན་འབུམ་དུ་ཉེ་བ་ཙམ་ཡོད་ནའང་། ཕལ་ཆེར་མཁན་སློབ་གཞན་ལ་གཏད་ནས་ཕྱི་བཞིན་འབྲང་བ་ནི་ལྔ་ལས་མང་བ་མ་བཟུང་ཞེས་གྲགས། སློབ་དཔོན་ཉིད་ཀྱི་སྐུ་ཚེའི་ཐ་མའི་དུས་ཤིག་ན། ཡང་སྔར་གྱི་སཾ་ག་ར་ཨ་ཙརྱ་དེ་ཉིད་བྷ་ཊ་ཨ་ཙརྱ་ཕྱི་མའི་བུ་སྟེ་ཉིད་ཀྱི་སྐྱེ་བ་བར་པའི་ཕུ་པོའི་བུར་སྐྱེ་བ་བླངས། སྔོན་སྦྱངས་ཀྱི་བློ་གྲོས་ལྷག་པའི་སྟོབས་སུ་གྱུར་བས། རང་གི་འདོད་པའི་ལྷས་རྗེས་སུ་བཟུང་བས་མངོན་སུམ་དུ་རིག་པ་སློབ་ཅིང་། རེས་འགའ་ལུས་ལ་ཡོངས་སུ་ཞུགས་ནས་སྔོན་མེད་པའི་གསང་ཚིག་སྟོན་པ་ཞིག་བྱུང་། དེ་ལོ་བཅུ་གཉིས་ལོན་པ་ཙམ་ནས་དཔལ་ཆོས་ཀྱི་གྲགས་པ་ལ་རྩོད་པར་རིགས་པའི་རྣམ་པར་སྟོན་ཏོ། །དེར་བྲམ་ཟེ་རྣམས་ཀྱིས་རང་ཉིད་ཕམ་གྱི་དོགས་ནས་རེ་ཞིག་ཆོས་ཀྱི་གྲགས་པ་ཕམ་པར་ནུས་པའང་དཀའོ། །དེ་བས་གཞན་ལ་རྩོད་པར་གྱིས་ཤིག་དང་། དེས་ནི་ངེས་པར་རྒྱལ་བའི་གྲགས་པ་ཐོབ་པར་འགྱུར་རོ། །སྨྲས་ཀྱང་། ཆོས་ཀྱི་གྲགས་པ་ཚར་མ་བཅད་པ་དེ་སྲིད་དུ་རྩོད་པའི་གྲགས་པ་ཉམ་ཆུང་ངོ་ཞེས་མ་ཉན་པར་དེ་ལྷོ་ཕྱོགས་ཀྱི་རྒྱུད་དུ་སོང་ངོ། །སོང་ནས་ཀྱང་གང་རྒྱལ་བ་དེའི་བསྟན་པ་ལ་ཅིག་ཤོས་ཀྱང་འཇུག་པར་ཆད་ནས་རྩོད་པ་ན། འདི་ན་གང་ཞིག་དེ་བཞིན་གཤེགས་པས་དྲི་ཟ། །རབ་དགའ་ལ་བྱ་བ་བཞིན་དུ་ཚར་བཅད་པ་དང་རྗེས་སུ་འཛིན་པའི་དུས་ལ་ཤིན་ཏུའང་བབ་ནས། མུ་སྟེགས་སྐེྱ་བ་གསུམ་པའི་དམ་བཅའི་རི་ཡོ་ནི་བསུབས། གྲུབ་མཐའི་ལྗོན་ཤིང་ནི་འགྱེལ། ཁས་བླངས་ཀྱི་ཐ་ཚིག་ནི་ཤོར། བརྒལ་བའི་བ་དན་ནི་ལྷུང་བར་གྱུར་ནས་སློབ་དཔོན་ཆོས་ཀྱི་གྲགས་པའི་ལུང་རིག་གི་སྡེར་མོས་བརྫིས་ཤིང་རྣམ་པར་འཐག་པར་བྱས་སོ། །བྱས་ནས་ཀྱང་དེ་ཉིད་དུ་སངས་རྒྱས་ཀྱི་བསྟན་པ་ཐོག་མཐའ་བར་གསུམ་དུ་དགེ་བའི་ཁང་མཛེས་དམ་པར་ཡོངས་སུ་བཅུག་ནས་བྲམ་ཟེ་དགེ་བསྙེན་གྱི་སྤྱོད་པ་ལ་གནས་ཤིང་། རྒྱལ་བའི་བསྟན་པ་ལ་བླ་མར་བྱ་བ་ཞིག་བྱུང་ནས་དེ་ཉིད་ཀྱིས་བཞེངས་པའི་ལྷ་
ཁང་ད་ལྟའང་ཡོད་དོ་ཞེས་གྲགས་སོ། །དེ་ལྟ་བུས་སངས་རྒྱས་ཀྱི་བསྟན་པ་ལྷག་པར་རྒྱས་པར་མཛད་ནས་དུས་ཀྱི་མཐར་ཡུལ་ཀ་ལིངྐར་གཙུག་ལག་ཁང་བཞེངས་ཤིང་སྐྱེ་བོ་མང་པོ་ཆོས་ལ་རབ་ཏུ་བཀོད་ནས་གཟུགས་སྐུའི་བཀོད་པ་རེ་ཞིག་ཞི་བའི་གྲོང་ཁྱེར་ཉིད་དུ་བསྡུས་སོ། །གདུང་དུ། །མ་བྲོད་དུ་ཞུགས་ལ་བཞོན་པས་མེ་ཏོག་གི་ཆར་ཆེན་པོ་བབས། ཕྱོགས་ཐམས་ཅད་དྲི་བཟང་པོ་དང་རོལ་མོས་ཁྱབ་པ་ཞག་བདུན་དུ་བྱུང་། གདུང་ཐམས་ཅད་འཆིང་བུ་འདྲ་བའི་གོང་བུ་གཅིག་ཏུ་འདྲིལ་བ་ལ་ད་ལྟའང་དུས་སྟོན་བྱེད་དོ། །སློབ་དཔོན་འདི་དང་བོད་རྒྱལ་སྲོང་བཙན་སྒམ་པོ་དུས་མཉམ་པར་གྲགས་ཤིང་། དེ་བཞིན་དུ་གྲུབ་པའི་རྣལ་འབྱོར་ཆེན་པོ་ལ་ཝ་བ་དང་། ཨིནྡྲ་བྷཱུ་ཏི་བར་བ་དང་། ཀུ་ཀུ་རཱ་ཛ་དང་། སློབ་དཔོན་མཚོ་སྐྱེས་རྡོ་རྗེ་དང་། ལ་ཡི་ཏ་བཛྲ་རྣམས་འོལ་སྤྱི་ཙམ་དུ་ཐོག་མཉམ་པར་བྱེད་ལ། གཞན་དུ་སྔ་ཕྱི་ཅི་རིགས་པའི་དུས་ཚོང་ལ། སྣང་ཞིང་སྲིད་པའི་ཆོས་སོ་ཅོག་བདེ་བ་ཆེན་པོའི་ཡེ་ཤེས་གཅིག་གི་རོལ་མོར་རྒྱལ་ཐེབས་པས། དང་པོའི་སངས་རྒྱས་དང་། རྡོ་རྗེ་འཆང་ཆེན་དང་། རིགས་ལྔའི་སངས་རྒྱས་དང་། རིགས་གསུམ་སེམས་དཔའ་དང་། རྡོ་རྗེ་རྣལ་འབྱོར་མ་དང་། རྡོ་རྗེ་ཕག་མོ་ལ་སྲོགས་པའི་ཞལ་མངོན་སུམ་དུ་མཐོང་ཞིང་། ལུང་བླངས་པ་ལས་སྐུ་གསུང་ཐུགས་ཡེ་ཤེས་ལྷའི་རོལ་བ་ཆེན་པོར་སྨིན། རྩ་རླུང་ཐིག་ལེ་རྡོ་རྗེ་གསུམ་དུ་རྣམ་པར་དག། གཙང་བ་དང་དམེ་བ་དང་བར་མ་ལ་སོགས་པའི་རྣམ་པར་རྟོག་པ་མཉམ་པ་ཆེན་པོར་བརྡལ། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་དང་། གདོལ་བ་དང་། སྨྱིག་མ་མཁན་དང་། གཡུང་མོ་དང་། ཐགས་མཁན་དང་། ཉ་པ་དང་། རྔོན་པ་དང་། བྱ་གཤོར་བ་ལ་སོགས་པའི་རིགས་དང་རིགས་མིན་གྱི་ཆོས་ཀུན་རྫོབ་ཀྱི་བློས་བཀོད་པའི་མཚན་ཉིད་ལ་རྩིས་སུ་གདབ་པ་ནི་སྤངས། ཕྱིའི་སྣང་བ་དང་། ནང་གི་ཤེས་བྱའི་ཆོས་བདེན་ན་བདེན་པར་རོ་མཉམ། བརྫུན་ན་རྫུན་བར་རོ་མཉམ་པས་སྣང་སེམས་ཁྱབ་གདལ་ཆེན་པོར་འདྲེས་པའི་རྟེན་ཅིང་འབེྲལ་བར་
འབྱུང་བ་ནི་སྒྱུ་མའི་བསླུ་བའམ། མིག་འཕྲུལ་གྱིས་གྱེེད་པས་མཐའ་འཚལ་བ་མ་ཡིན་པར་རྫུ་འཕྲུལ་གྱི་རྐང་པའི་བརྟུལ་ཞུགས་ལ་དབང་འབྱོར་བས་ཆུ་ལ་ངང་པ་བཞིན་བྱ་བ་དང་། ནམ་མཁའ་ལ་མཁའ་ལྡིང་བཞིན་བྱ་བ་དང་། རི་བྲག་ལ་ཐོགས་རེག་སྤངས་པ་དང་། ཟད་པར་གྱི་སྐྱེ་མཆེད་ལ་དབང་ཐོབ་པས་འབྱུང་བ་ལྔ་ལ་གཞན་དབང་དུ་མ་གྱུར་བ་དང་། ཉི་ཟླ་བཙོན་དུ་འཛིན་པ་དང་། ཆུ་བོ་གྱེན་ལ་ལྡོག་པ་དང་། ཕ་ཝང་ནམ་མཁར་འཇོག་པ་དང་། ཚེ་ཉི་ཟླ་དང་མཉམ་པ་དང་། སྐུ་ལ་བགྲེས་རྒུད་སྤངས་པ་དང་། ལུས་མི་སྣང་བ་དང་། ནམ་མཁའ་དང་ས་འོག་ལ་སྤྱོད་པ་དང་། གང་ལ་སྡིགས་མཛུབ་གཏད་པ་ཙམ་གྱིས་རེངས་པ་དང་། ལྐུགས་པ་དང་། མྱོས་པ་དང་། རྨོངས་པ་དང་། བྱེར་བ་དང་། འགས་པ་དང་། ཐོར་བ་དང་། གསད་པ་དང་། གསོ་བ་ལ་སོགས་པའི་རྫུ་འཕྲུལ་ཡ་མ་ཟུང་ལ་དབང་འབྱོར་ཞིང་། མུ་སྟེགས་ཅན་རྩོད་པས་ཚར་གཅོད་པ་དང་། ནུས་པས་སྤ་བཀོད་པ་དང་། ལོག་པར་ལྟ་བ་དབང་དུ་བྱེད་པ་དང་། ཁེངས་དྲེགས་ཅན་ཟིལ་གྱིས་གནོན་པ་དང་། སྐལ་བ་ཅན་རྗེས་སུ་འཛིན་པ་ལ་སོགས་པའི་ཐུགས་རྗེ་དང་། རྫུ་འཕྲུལ་གྱི་བཀོད་པ་ཟད་མི་ཤེས་པས་རྡོ་རྗེ་ཐེག་པའི་བསྟན་པའི་བ་དན་དཀར་པོ་བླ་ན་བསྐྲེངས་པའི་གྲུབ་པའི་དབང་ཕྱུག་གི་ཚོགས་བརྗོད་ཀྱིས་མི་ལང་བ་བྱོན་མོད་ཀྱི། དེ་ལས་སློབ་དཔོན་རྡོ་རྗེ་གདན་པའི་ཚོགས་ཀྱི་འཁོར་ལོ་གཅིག་གཅིག་ཁོ་ནའི་འདུ་བའི་རྟེན་འབྲེལ་ལས་བརྒྱད་ཅུ་ལྷག་བཅས་ཀྱི་འཁོར་ལོར་ཡོངས་སུ་གྲགས་པ་རྣམས་ཀྱིས་མཚོན། སྟོན་པ་བདེ་བར་གཤེགས་པའི་ལུང་དང་རྟོགས་པའི་བསྟན་པ་རིན་པོ་ཆེའི་སྲོག་ཤིང་དམ་པར་གྱུར་བ་མཐའ་ཀླས་པའི་རྣམ་པར་ཐར་བ་ནི་ཡི་གེ་ཉུང་ངུའི་ལམ་དུ་འདྲེན་པར་མ་ནུས་ཀྱང་། དེ་ཙམ་གྱིས་དངོས་པོ་ངེས་པར་བསྟན་པས་གུས་པ་དང་སྤྲོ་བ་བསྐྱེད་པའི་དགོས་པ་དམ་པའི་ལམ་ལ་འཇུག་པར་ནུས་པའོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་ནི་གང་འཛིན་
པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱ་ན་ཅེས་བྱ་བ་ལས། འཕགས་པའི་ཡུལ་དུ་སྤྱིར་གྲགས་པའི་བསྟན་སྐྱོང་ཆེན་པོ་དག་ལས་རྒྱན་དྲུག་མཆོག་གཉིས་ལ་སོགས་པའི་རྣམ་ཐར་སྨྲོས་པའི་རབ་ཏུ་བྱེད་པ་སྟེ་གཉིས་པའོ།། །།
གངས་རིའི་ཁྲོད་དུ་རྒྱལ་བསྟན་ཇི་ལྟར་བྱོན་པའི་རྣམ་གཞག་མདོ་ཙམ་བརྗོད་པའི་རབ་ཏུ་བྱེད་པ་སྟེ་གསུམ་པ།
གསུམ་པ་གངས་རིའི་ཁྲོད་དུ་རྒྱལ་བསྟན་ཇི་ལྟར་བྱོན་པའི་རྣམ་གཞག་ནི། དག་བྱེད་ཀྱི་གཏེར་ཆེན་པོ་བྲི་ནས་ཡུལ་དུ་རུང་བའི་གནས་ལ་རིགས་པར་མི་བྱེད་པ་ལ། ཁ་བ་ཅན་དུ་མཚོ་བྲི་ནས། ཞེས་པས་གནོད་དོ། །འདིར་རི་བྲག་དང་ལྗོངས་བདེ་བ་གཉིས་གང་ལ་ཡུལ་དུ་རུང་བའི་ཐ་སྙད་ཀྱིས་ཕྱེ་བ་མི་འགའ་བར་བྱས་ནས་ཡུལ་དང་མི་ལ་སོགས་པ་གདོད་ནས་ཡོད་པའམ། རྒྱལ་པོ་རུ་བ་ཏི་དཔུང་དང་བཅས་པ་རི་ཁ་བ་ཅན་དུ་བྲོས་པ་ལས་འཕེལ་བ་སོགས་སྐབས་དེ་དང་དེར་བྱུང་བ་ཇི་ལྟར་ཡང་བོད་ཀྱི་རྒྱལ་པོ་རྣམས་ཀྱི་རྒྱུད་ནི། རྒྱ་གར་ན་ཤཱཀྱ་ཆེན་པོ་དང་། ལོ་ཙ་བྱི་དང་། རི་བྲག་པ་སྟེ་ཤཱཀྱ་རིགས་གསུམ་ལས། འཇམ་དཔལ་རྩ་རྒྱུད་ཀྱི་བཞེད་པས་ལི་ཙ་བྱིའི་རིགས་ལས་ཆད་པ་ཞིག་ཆུ་བོ་གངྒཱ་ལས་བརྒྱུད་རི་ཁ་བ་ཅན་གྱི་དབྲག་ཏུ་སླེབས། རེ་ཞིག་ན་ལྷ་རི་གྱང་མཐོའི་རྩེ་ནས་གཟིགས་པས། ཡུལ་ཡར་ཀླུངས་དགེ་བ་ཅུའི་དཔལ་གྱིས་མཛེས་པར་དུ་དཔྱད་ནས་ལྷ་རི་རོལ་པོའི་རྩེ་ལས་བཙན་ཐང་སྒོ་བཞིར་འཐོན། དངོས་ལ་ཁྱོད་སུ་ཞིག་དྲིས་པས། བཙན་པོའོ། །གང་ནས་བྱོན་དྲིས་པར། ནམ་མཁའ་ལ་མཛུབ་མོ་བསྒྲེངས་པས། བོན་རྣམས་དམུ་ཐག་དང་དམུ་སྐས་ལ་བངས་པའི་ལྷ་ཡིན་ཞེས་སྨྲའོ། །དེར་ལྷ་ལས་ཆད་པའི་རྗེར་བཟུང་སྟེ་གཉའ་བར་ཁྲི་བྱས་ནས་བཏེག་པས་གཉའ་ཁྲི་བཙན་པོའོ། །དེ་ལྟར་བཙན་པོ་འོད་སྡེ་ནས་གནམ་གྱི་ཁྲི་བདུན། བར་གྱི་ལྟེང་གཉིས། སའི་ལེགས་དྲུག། ལྡེ་བརྒྱད། བཙན་གསུམ་པའི་བར་ཆབ་སྲིད་བོན་ལུགས་སུ་བསྐྱངས། བཙན་བཞི་བ་ལྷ་ཐོ་ཐོ་རི་གཉན་བཙན་གྱི་དུས་ན་དེ་བཞིན་གཤེགས་པའི་ལུང་བསྟན་གྱི་བདེན་པའི་རྒྱུད་མངས་སྟོང་གི་འགྱུར་བ་བསིལ་ལྡན་འགྲོ་བའི་བསོད་ནམས་ཀྱི་ཟམ་ཏོག་ཏུ་ལྷུང་
བའི་དུས་ལ་བབ་སྟེ། ཕོ་བྲང་ཡུམ་བུ་བླ་སྒང་དུ་ཟམ་ཏོག་བཀོད་པ་དང་། སྤང་སྐོང་ཕྱག་བརྒྱ་པ། གསེར་གྱི་མཆོད་རྟེན་རྣམས་ནམ་མཁའ་ལས་བབས། མཚན་གཉན་པོ་གསང་བར་བཏགས། མཆོད་པ་བྱས་པས་རྒྱལ་པོའི་སྲིད་དང་སྐུ་ཚེ་རབ་ཏུ་འཕེལ། དམ་པ་ཆོས་ཀྱི་དབུ་བརྙེས་པར་གྲགས་ཏེ་གླེགས་བམ་བྱུང་བ་ཙམ་མོ། །འདིའི་ཚེ་རྒྱ་གར་ནས་སྨན་པ་བི་བྱི་དང་། བི་ལྷམ་བྱོན་ནས་གསོ་དཔྱད་ཀྱི་བསྟན་པ་ཡང་བྱུང་། ལ་ལ་ནམ་མཁའ་ལས་བབས་པ་བོན་པོའི་གཏམ་ཡིན་ཟེར་མོད། ནམ་མཁའ་ལས་བབས་ཚད་པོ་ན་ལུགས་ཡིན་ན་འདྲེན་པ་མཆོག་གླང་ཆེན་ཐལ་དཀར་གྱི་རྣམ་པས་ལྷུམས་སུ་ཞུགས་པོ་དང་། གྲོང་ཁྱེར་གསལ་ལྡན་དུ་ལྷ་ལས་བབས་པ་དང་། ཨིནྡྲ་བྷཱུ་ཏིའི་ཕོ་བྲང་གི་ནམ་མཁའ་ལ་སངས་རྒྱས་འཁོར་དང་བཅས་པ་གཤེགས་བཞུད་སོགས་རྫུ་འཕྲུལ་གྱིས་བཀོད་པའང་། ངེས་པའི་དོན་དུ། སངས་རྒྱས་ཡིན། ཆོས་ཡིན། དགེ་འདུན་ཡིན། པོ་ཏི་དང་གླེགས་བམ་གྱི་རང་བཞིན་ཡིན་པ་དེ་ཡང་བོན་ལུགས་སུ་ཐལ་བར་འགྱུར་བས། སངས་རྒྱས་ཀྱི་ཕྲིན་ལས་དང་བསྟན་པའི་བབས་ལུགས་བསམ་གྱིས་མི་ཁྱབ་པའང་དྲན་པར་བྱའོ། །དེ་ནས་རྒྱལ་རབས་ལྔ་པ་གནམ་རི་སྲོང་བཙན་ལ་སྲས་དབུའི་གཙུག་ན་ཨ་མི་ཏཱ་བྷ་ལ་སོགས་པ་ལེགས་པའི་མཚན་དང་ལྡན་ལ། བཟོ་དང་། སྒྱུ་རྩལ་དང་། རིག་པའི་གནས་ལ་མཁས་ཤིང་ཐུགས་སྒམ་པས། བློན་པོ་རྣམས་ཀྱིས་རང་གི་མཚན་ཉིད་ལས་སྲོང་བཙན་སྒམ་པོར་མཚན་གསོལ་བའི་ཆོས་རྒྱལ་བྱོན་ཏོ། །དེས་རང་གི་སྐུ་རིང་ལ་དམ་པ་ཆོས་ཀྱི་སྲོལ་བཏོད་པར་བྱེད་པའི་སླད་དུ། ཐོན་མི་ཨ་ནུའི་བུ་འཁོར་དང་བཅས་པ་རྒྱ་གར་དུ་མངགས་ལྷ་རིག་པའི་སེངྒྒེེེེེེེེེྃ་དང་། བྲམ་ཟེ་་ལི་བྱིན་ལ་ཡིག་རིགས་དང་བརྡ་སྤྲོད་པའི་གཞུང་ལུགས་ལ་སྦྱངས་པ་མཐར་སོན། རྒྱ་གར་གྱི་ཕྱི་མོ་ལྔ་བཅུ་ལ་དབྲི་བསྣན་གྱི་སྒོ་ནས་བོད་ཡིག་སུམ་ཅུར་མཛད། འཕགས་ཡུལ་བརྡ་སྤྲོད་ཀྱི་གཞུང་ཆེན་པོ་བརྒྱད་དང་གྲངས་མཚུངས་སུ་བྱས་ནས་བོད་སྐད་དང་རྗེས་སུ་མཐུན་པའི་བརྡ་
སྤྲོད་ཀྱི་བསྟན་བཅོས་བརྒྱད་མཛད། མདོ་སྡེ་དཀོན་མཆོག་སྤྲིན་བསྒྱུར། བསྟན་པའི་སྲོག་ཡི་གེས་བསྟན་པ་ཡིན་པས་ཐུག་མཐའ་མེད་པའི་བཀའ་དྲིན་དུ་གྱུར། དེ་ལས་རྒྱལ་པོས་ཀྱང་བསླབས་ཏེ། ཟ་མ་ཏོག་བཀོད་པ་ལ་སོགས་པ་བསྒྱུར། ཡི་གེ་དྲུག་མ་དང་། གཤིན་རྗེའི་གཤེད་དང་། ཆོས་སྐྱོང་ལྷ་མགོན་ལ་སོགས་པའི་ཆོས་མང་དུ་བསྟན། རྣལ་འབྱོར་དུ་བྱ་བའི་གནས་ལ་སློབ་ཏུ་བཅུག་པས་གྲུབ་པ་ཐོབ་པའང་དུ་མ་བྱུང་། བོད་སྲིན་མོ་གན་རྐྱལ་གྱི་རྣམ་པར་ཡོད་པའི་ས་དགྲའི་གཉེན་པོར་མཐའ་འདུལ། ཡང་འདུལ། རུ་གནོན་གྱི་གཙུག་ལག་ཁང་རྣམས་བཏབ། ཐབས་དང་རྫུ་འཕྲུལ་གྱི་བཀོད་པ་འབྱམ་ཀླས་པས་ཇོ་ཤཱཀ་རྣམ་གཉིས་དང་། ལོ་ཀེ་ཤྭ་ར་སྤྱན་དྲངས། ལྷ་ལྡན་སྤྲུལ་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། མི་ཆོས་གཙང་མ་བཅུ་དྲུག་གི་ཆོས་ལུགས་ལེགས་པར་བཅས། རྒྱ་གར་བལ་པོ་རྒྱ་ནག་གསུམ་ནས་སློབ་དཔོན་སྤྱན་དྲངས། ཐོན་མིས་ལོ་ཙཱ་བྱས་ནས་དམ་པའི་ཆོས་ཀྱང་འགའ་ཞིག་བསྒྱུར་བས་བོད་མུན་པའི་གླིང་དཀར་པོར་བྱས་པ་ཡིན། དེ་ནས་རྒྱལ་རབས་ལྡན་རྗེ་བཙུན་བརྟན་པའི་འཁོར་ལོ་མིའི་སྒྱུ་འཕྲུལ་རྣམ་པར་རོལ་བ་ལྷ་བཙན་པོ་ཁྲི་སྲོང་ལྡེའུ་བཙན་བྱོན། སྐུ་གཞོན་ནུའི་ཚེ་མ་ཞང་ཞེས་བྱ་བའི་བློན་པོ་ཆོས་ལ་མི་དགའ་བས་ལྷ་སའི་ཇོ་བོ་སྐྱི་རོང་དུ་བསྐྱལ། གཙུག་ལག་ཁང་དུ་བཤས། །ར་བྱས། རྒྱལ་པོ་ཆོས་ལ་ཤིན་ཏུ་དད་པ་ལ་རེ་ཞིག་གཞན་དབང་གི་ཚེར་མ་མི་བསྲུན་པས་བཏབ་པ་གང་འདི་ལྟར་གླང་པོ་ཆེ་ཆུ་ཀླུང་ཆེན་པོར་འཇུག་པར་རྩོམ་པ་ན་ལང་ཚོའི་བག་མཆུའི་ཕང་པ་ན་ནུབ་པ་ལྟར་སྣང་ཡང་། རང་སྟོབས་ཀྱི་དཔུང་པ་བཙན་པོས་གདོན་མི་ཟ་བར་བདེ་བའི་གནས་སུ་ཕྱིན་པ་བཞིན་དུ། ཐུགས་བསྐྱེད་དང་སྨོན་ལམ་གྱི། དམ་བཅའི་རི་མོ་བསུབ་ཏུ་མེད་པའི་མཐུ་མངོན་དུ་བདེ་བར་གྱུར་ཏེ། ཆོས་བློན་ཚན་པོ་འགོས་ཀྱི་བློ་གྲོས་སྡིག་ཅན་བསླུ་བའི་གཡུ་སྒྱུའི་ཆོམ་རྐུན་དུ་ཤར་ཏེ་མ་ཞང་སྟོད་ལུངས་སུ་གསོན་དུར་དུ་བཅུག། སློབ་དཔོན་ཧྭ་ཤང་གི་ལུང་བསྟན་པ་ལྟར། དབའ་
གསལ་སྣང་མཁན་པོ་ཞིབ་འཚོ་སྤྱན་འདྲེན་དུ་བཏང་། བདེ་བར་སོན་ནས་བསམ་ཡས་འོམ་བུའི་ཚལ་དུ་མཇལ། མཁན་པོས་འོ་སྐོལ་གྱིས་འོད་སྲུངས་ཀྱི་བསྟན་པ་ལ་བལ་པོའི་མཆོད་རྟེན་བྱ་རུང་ཁ་ཤོར་དུ། བོད་དུ་དམ་པའི་ཆོས་དར་བར་སྨོན་ལམ་བཏབ་པ་དེ་བསྙེལ་ཏམ་གསུངས་པས། བཙན་པོས་སྒོམ་ཡུན་ཐུང་བསམ་འཚལ་ཞུས། དེར་མཁན་པོས་བྱིན་གྱིས་བརླབས་ཏེ། སྔོན་གནས་རྗེས་སུ་དྲན། བཙན་པོ་ལ་དགེ་བ་བཅུ་དང་ཁམས་བཅོ་བརྒྱད་ལ་སོགས་པའི་ཆོས་བཤད་པས་བོད་ཀྱི་ལྷ་སྲིན་རྣམས་ཁྲོས། དམར་པོ་རིལ་ཐོག་བརྒྱབ། འཕངཐང་གི་ཕོ་བྲང་ཆུས་ཁྱེར། ལོ་ཉེས་དང་རྩུབ་འགྱུར་ཆེན་པོ་བྱུང་བས། སྡིག་བློན་རྣམས་ཀྱིས་འདི་ཆོས་བྱས་བསལ་ན། ཨ་ཙར་རང་ཡུལ་དུ་གཏང་དགོས་ཟེར། བཙན་པོས་མཁན་པོ་ལ་གསེར་མང་པོ་ཕུལ་ནས་ལོ་རྒྱུས་བསྙད་པས། བོད་ཀྱི་མི་མ་ཡིན་རྣམས་མ་དགའ་བ་ཡིན། ཁོ་བོ་བལ་པོར་འགྲོ་ཨོ་རྒྱན་གྱི་སློབ་དཔོན་པདྨ་སམ་བྷ་ཝ་ཞེས་བྱ་བ་འཛམ་བུའི་གླིང་ན་ཆ་བ་ཞིག་ཡོད། དེ་ངས་ཀྱང་སྤྱན་འདྲེན་དུ་གཏང་། བཙན་པོ་རང་ཡང་དེ་བཞིན་འཚལ་གསུངས་པས་ཕོ་ཉ་སྔ་རྟིང་དུ་བརྫངས། སླར་སྣ་ནམ་རྡོ་རྗེ་བདུད་འཇོམས་ལ་སོགས་པ་ལམ་དུ་སྟབས་མྱུར་བོས་མངགས་པ་སློབ་དཔོན་གྱིས་མཁྱེན་ནས། མང་ཡུལ་གུང་ཐང་དུ་ཡུད་ཙམ་ལ་ཕེབས་ནས་མཇལ། ཕྱག་རྟན་གྱི་གསེར་རྣམས་ངའི་སྣང་བ་གསེར་དུ་ཡོད་གསུངས་ནས་མངའ་རིས་ཕྱོགས་སུ་གཏོར། སླར་བོད་དུ་གསེར་གྱི་འདོད་དགུ་འབྱུང་བའི་རྟེན་འབྲེལ་མཛད། མང་ཡུལ་གྱི་རི་བོ་དཔལ་འབར་ཕན་ཚུན་བརྗེས། ཉི་ཟླ་ཐང་ལ་ཕབ། ཆུ་བོ་གྱེན་ལ་བཟློག་པ་སོགས་རྫུ་འཕྲུལ་གྱི་བཀོད་པ་མཐའ་ཀླས་པ་བསྟན། ལམ་དུ་བརྟན་མ་བཅུ་གཉིས་དང་། གཉན་ཆེན་ཐང་ལྷ་ལ་སོགས་པས་ཐོ་འཚམས་པར་ནུས་མཐུའི་ཟིལ་འོག་ཏུ་སྤ་བཀོང་། སྟོད་ལུང་གཞོང་པ་ནས་ཕྱག་འཁར་གྱིས་སྒྲུབ་ཆུ་བཏོན། མངའ་བདག་རྒྱལ་པོའི་བསུ་
བར་དྲེགས་རློམ་གྱིས་ཀུན་ཏུ་རྟོགས་བག་ལ་ཉལ་བརྟན་པ་གཏིང་ནས་དགྲོག་པར་མཛད་པའི་རྗེས་ཤུལ་ཀྱང་མངོན་སུམ་ཚད་མའོ། །དེ་ནས་རང་གི་ཡབ་མེས་ཨ་ག་ཚོམས་ཀྱིས་བརྩིགས་པའི་ཕོ་བྲང་བྲག་དམར་མགྲིན་བཟང་དུ་སྤྱན་དྲངས་ནས་བཞུགས། རྒྱལ་པོ་ཡིད་ཆེས་སུ་བྱ་ཕྱིར་བྱིས་པ་ལ་རྒྱལ་ཆེན་རིགས་བཞི་པའི་ལྷ་ཞིག་ཕབ་པས། དེས་དམར་པོའི་ལ་ཐང་ལྷས་ཐོག་བརྒྱབ། ཤམ་པོས་འཕང་ཐང་ཆུ་ལ་བསྐུར། ཞེས་སོགས་ལྷ་འདྲེ་འདིས་འདི་བྱས་ཐམས་ཅད་བཤད་པས། དཔལ་སངས་རྒྱས་གཉིས་རྫུ་འཕྲུལ་གྱི་རྐང་པ་བཞི་ལ་མཆོག་ཐོབ་པའི་རོལ་པ་རྣམ་པར་བཀོད་པའི་གཡུལ་ངོ་ནི་གཤོམས། རྣམ་པར་ཐར་བའི་སྒོ་སྟོང་པ་ཉིད་ལ་སོགས་པའི་ཏིང་ངེ་འཛིན་གྱི་ཆོ་འཕྲུལ་ཟད་མི་ཤེས་པའི་ནུས་མཐུས། གཞན་འཕྲུལ་དབང་བྱེད་ཀྱི་བདག་པོའི་བྱེད་ལས་སུ་གྱུར་བའི་ལྷ་སྲིན་གདུག་པ་ཅན་ཐམས་ཅད་ཀྱི་གདུག་རྩུབ་ཀྱི་འཐོར་རླུང་ནི་མནན། ང་རྒྱལ་གྱི་བྲག་རི་ནི་བཤིག །ཕྲག་དོག་གི་མེ་ལྕེ་ནི་མནལ། སྲོག་གི་སྙིང་པོ་བླངས་ཏེ་བརྟན་པ་དང་དྲལ་པར་བྱས་པས། གངས་རིའི་ཁྲོད་ནག་ཕྱོགས་ཀྱི་ལྷ་སྲིན་གདུག་པའི་ཚང་ཚིང་འཁྲིགས་པའི་གནས་སུའང་། རྒྱལ་བའི་བསྟན་པ་དཀར་འཇམ་དུ་བརྡལ་བ་འདི་ཉིད་གཅིག་པུའི་མཐུར་ཤེས་པར་བྱའོ། །དེ་ནས་ཇོ་བོ་མང་ཡུལ་ནས་སྤྱན་དྲངས། མཁན་པོ་ཡང་སླར་སྤྱོན་པར་བྱས། སློབ་དཔོན་ཆེན་པོས་དཔལ་གྱི་མགུར་ལས་དྲེགས་པ་ཟིལ་གནོན་གྱི་ཐ་ཚིག་དང་། ནམ་མཁའ་ལ་རྡོ་རྗེའི་གར་འགྲོས་ཀྱིས་ས་གཞི་བྱིན་གྱིས་བརླབས། མཁན་པོའི་གསུང་བཞིན་ཨོ་ཏནྟྭ་པུ་རིའི་གཙུག་ལག་ཁང་ལ་དཔེ་བྱས། སློབ་དཔོན་ཆེན་པོས་དྲེགས་པ་ཅན་ཐམས་ཅད་ཀྱང་ལས་ལ་བཀོལ་བས་ཉིན་མི་ཡིས་བརྩིགས་པ་བས་མཚན་མི་མ་ཡིན་པས་བརྩིགས་པ་མཐོ་བར་བྱུང་སྟེ་ཆོས་འཁོར་དཔལ་གྱི་བསམ་ཡས་རྒྱ་ཁྱོན་འདི་ཙམ་ལོ་ལྔ་ལ་གྲུབ། མཁན་སློབ་གཉིས་ཀྱིས་རབ་ཏུ་གནས་པས་དབུ་རྩེའི་ལྷ་རྣམས་ཕྱི་རོལ་དུ་བྱོན། སློབ་དཔོན་གྱིས་བཙན་པོ་ལ་རྟ་མགྲིན་
གནང་བ་ཡང་གྲུབ་སྟེ་འཛམ་བུའི་གླིང་དུ་གྲགས་པའི་རྟ་སྐད་ཐོན། སྦ་བཞེད་དུ་འདི་དག་གསལ་བར་མ་བྲིས་པས་དེ་ལ་ཁུངས་སུ་འཚོལ་བ་དག་ཀྱང་དེ་ལྟ་མོད། བསམ་ཡས་ཞིག་གསོ་ལྔ་ཕྱི་ཐ་དད་དུ་ཀྱང་གསེབ་ལས་མི་མ་ཡིན་གྱི་རྗེས་ཁྲུ་གང་བ་ལ་སོགས་ཆེ་ཆུང་མ་ངེས་པ་མང་པོ་ཀུན་གྱི་མཐུན་གྲུབ་ཏུ་ཐོན་པས་ཐང་ཡིག་ལ་སོགས་པ་ལོ་རྒྱུས་བྱེ་བྲག་པ་ལ་ངེས་པ་ལྷག་པར་དུ་རྙེད་པའི་སྐབས་བྱུང་བ་ཡིན། དེ་ནས་ཐམས་ཅད་ཡོད་སྨྲའི་སྡེའི་ལུགས་སུ་སད་མི་བདུན་རབ་ཏུ་བྱུང་སྟེ་དམ་པའི་ཆོས་འདུལབའི་གཞི་བཏིང་། རྒྱ་གར་གྱི་པཎྜི་ཏ་ཆེན་པོ་བི་མ་ལ་མི་ཏྲ་དག །སངས་རྒྱས་གསང་བ་དང་། རྣམ་དག་སེངྒེ་ལ་སོགས་པ་དང་། བོད་ཀྱི་ལོ་ཙཱ་བ་བ་གོར་བཻ་རོ་དང་། རྨ་རིན་ཆེན་མཆོག་དང་། གཉགས་ཛྙ་ན་ཀུ་མཱ་ར་དང་། སྐ་ཅོག་ཞང་གསུམ་ལ་སོགས་པའི་ལོ་ཙཱ་བ་བརྒྱ་ཕྲག་བཅུར་ལོངས་པ་ཙམ་གྱིས་སྡེ་སྣོད་གསུམ་དང་། རྒྱུད་སྡེ་དྲུག་གམ་བཞིའི་ངེས་པ་ཅན། དེ་དག་གི་དགོངས་འགྲེལ་དང་བཅས་པའི་ཆོས་མང་པོ་བསྒྱུར་ཞིང་། ཤེས་རབ་རྣམ་པ་གསུམ་གྱིས་གཏན་ལ་ཕབ། སློབ་དཔོན་ཆེན་པོས་བསམ་ཡས་མཆིམས་ཕུར་སྒྲུབ་སྡེ་ཆེན་པོ་བརྒྱད་ལ་སོགས་ཏེ་རྡོ་རྗེ་ཐེག་པའི་རྒྱུད་དང་སྒྲུབ་ཐབས་མང་དུ་བསྒྱུར་ཞིང་བསྟན་ནས་རྗེ་འབངས་ཉེར་ལྔར་གྲགས་པས་མཚོན་ལས་ཅན་གྱི་སྐྱེས་བུ་རྣམས་རྗེས་སུ་བཟུང་། ཡེར་བ་དང་མཆིམས་ཕུར་སྒོམ་གྲྭ་བཙུགས་པས་ནམ་མཁའི་ལམ་ལ་གྱ་གྱུར་འགྲོ་བ་མང་པོ་བྱུང་། དེ་དུས་ཀྱི་བསྟན་པ་དར་བལྟ་བུ་རྒྱ་གར་དུའང་མ་བྱུང་ཞེས་ཇེ་བོ་དཱི་པཾ་ཀ་རས་གསུངས། ཁྲི་སྲོང་གི་སྲས་སང་ན་ལེགས་མཇིད་ཡོན་ཏེ་མུ་ཏིག་བཙན་པོས་ཡབ་མེས་ཀྱི་གཙུག་ལག་ཁང་དང་། ལོ་པཎ་ཐམས་ཅད་ལ་བསྟི་སྟང་ཕུལ་དུ་ཕྱིན་པ་མཛད། རྒྱལ་སྡེ་སྐར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། སྔར་མ་འགྱུར་བའི་གསུང་རབ་ཀྱང་ཐོགས་ཤིག་བསྒྱུར། བོད་འབངས་ཀུན་བདེ་སྐྱིད་ཀྱི་གྲིབ་བསིལ་ལ་ངལ་བསོ་བའི་དབུགས་འབྱིན་ཆེན་པོ་མཛད། ཨུ་རྒྱན་སངས་རྒྱས་གཉིས་བ་ལ་མི་ཕྱེད་པའི་དད་པ་དང་།
ལྡན་པས་ཟབ་རྒྱས་ཀྱི་གདམས་པ་མང་པོས་རྗེས་སུ་བཟུང་ཞིང་གུང་ཐང་ལ་ཁར་གཤེགས་སྐྱལ་མཛད་པ་ལ་སོགས་པའི་ཞལ་ཆེམས་ཡིག་ཚད་ཀྱང་སྣང་། རི་སྲས། གཙང་མ། ལྷ་་རྗེ། ལྷུན་གྲུབ། དར་སྔ། །རལ་པ་ཅན་དང་ལྔ་ལས། འཕགས་ཆེན་ལག་ན་རྡོ་རྗེའི་སྒྱུ་འཕྲུལ་རྣམ་པར་རོལ་པ་ཁྲི་རལ་བ་ཅན་གྱིས་རྒྱལ་སྲིད་བཟུང་། རྒྱ་བལ་གྱི་པཎྜི་ཏ་མང་པོའང་སྤྱན་དྲངས། ཉི་འོག་གི་མཁན་པོ་འཛིན་མི་ཏྲ་ལ་སོགས་པ་དང་། ལོ་ཙཱ་བ་སྐ་ཅོག་སོགས་གདན་འཛོམ་པར་བྱས། སྔར་ཡབ་མེས་ཀྱི་དུས་བསྒྱུར་བའི་ཆོས། ཨོ་རྒྱན། བལ་ཡུལ། རྒྱ་ནག་སོགས་སྐད་དུ་མ་ལ་བརྟེན་ནས་བསྒྱུར་བས་བོད་སྐད་ལ་འཇུག་དཀའ་བར་རང་སོར་བཞག་པ་རྣམས་ཡུལ་དབུས་འགྱུར་འཆང་གི་རྒྱ་དཔེ་དང་བསྟུན་ནས་སྐད་གསར་བཅད་ཀྱིས་གཏན་ལ་ཕབ། ཡབ་མེས་ཀྱི་གཙུག་ལག་ཁང་ལ་བསྙེན་བཀུར་དང་། བཤད་གྲུབ་ཀྱི་སྲོལ་ཤིན་ཏུ་དར། འོ་ན་ཅང་རྡོའི་ལྷ་ཁང་། རྨིང་ཐོག་གསུམ་རྡོ་བ། བར་ཐོག་གསུམ་སོ་ཕག། སྟེང་ཐོག་གསུམ་ཤིང་ལས་གྲུབ་པ། ཐོག་རེ་རེ་བཞིན་བྱ་འདབ་དང་སྒོ་དང་། ཕ་གུལ་སོགས་ཀྱིས་རྣམ་པར་མཛེས་ཤིང་། སྟེང་གི་རྒྱའི་བས་རླུང་གི་འཕྲུལ་འཁོར་ལས་གདུགས་ལྟར་བསྐྱོད་པ་ལ་སོགས་པའི་ངོ་མཚར་གྱི་བཀོད་པ་མིག་འཕྲུལ་གྱི་སྤུན་ཟླར་འོས་པ་བཞེངས། བསྟན་པ་ལ་ཤིན་ཏུ་གུས་པས་དགེ་འདུན་རེ་ལ་འབངས་མི་ཁྱིམ་བདུན་བདུན་ཕུལ་བ་སོགས་མདོར་ན་བསྟན་པའི་རྩ་་ལག་ཆེན་པོ། ཆོས་རྒྱལ་མེས་དཔོན་རྣམ་གསུམ་ཞེས་གྲགས་པའི་བ་དན་དཀར་པོས་སྲིད་རྩེའི་བསམ་གཏན་པ་དག་ཀྱང་ཚོར་བ་ལ་སོགས་པའི་ཉེ་བར་ལེན་པ་དྲིའི་བཞོན་པ་ཅན་དང་འགྲོགས་སུ་བཅུག་ནས་དད་པ་དང་རྗེས་སུ་ཡི་རང་བའི་རྣམ་རྟོག་གིས་འདུ་འགོད་རྒྱ་ཆེན་པོ་ལ་འགོད་པར་ནུས་པའི་ཕྲིན་ལས་ཅན། ཐུགས་བསྐྱེད་ཀྱི་རྩ་བ་བརླིང་པ། སྙིང་རྗེའི་བགམ་བརྗིད་པ། དད་པའི་གཏེར་མཛོད་ཕྱུག་པ། སྙིང་སྟོབས་ཀྱི་གྲ་ཟུར་རྣོ་བ། གཞན་ཕན་གྱི་ཁྱོད་ནོར་འཇོམ་
པ། སྨོན་ལམ་གྱི་སྲོག་ཤིང་བརྟན་པ། ཕྲིན་ལས་ཀྱི་ལ་འདབ་རྒྱས་པ། ཕན་བདེའི་གྲིབ་བསིལ་མང་བ། ་ཉོན་མོངས་ཀྱི་ཚ་གདུང་ལས་སྐྱོབ་པ། ཐར་བ་དང་ཐམས་ཅད་མཁྱེན་པའི་འབབ་སྟེགས་ལ་བདག་ཅག་གངས་ཅན་པ་རྣམས་གཞོལ་བར་བྱེད། འབབ་པར་བྱེད་པའི་བདག་ཉིད་ཆེན་པོ་འདི་དག་གི་བཀའ་དྲིན་ལ་རྣམ་པ་ཐམས་ཅད་ནས་བསམས་ཤིང་། དེ་དག་གིས་བསྟན་པའི་སྲོག་ཤིང་གཅིག་ཏུ་བཀུར་བའི་ཆོས་དང་གང་ཟག་གི་གནས་ཆུད་གཟོན་པའི་ཀུན་སློང་གི་གདོན་ཆེན་པོ་དང་མ་འགྲོགས་པའི་སྐྱེས་བུ་དམ་པ་རྣམས་ལའང་ཕྱག་བྱ་བར་འོས་སོ། །དེ་ལྟར་སྐྱེ་དགུ་ཀུན་གྱི་ཕན་བདེའི་སྐྱེད་མོའི་ཚལ། ལོག་པའི་སྨོན་ལམ་གྱིས་རྣམ་པར་བརྫི་བའི་སྤྲིན་ཕྱི་དུམ་བུ་གླང་དར་མ་བུ་དུམ་བཙན་རྗེ་བློན་གྱི་སྙིང་ལ་ཡིད་ཀྱི་སྲུང་ཤིང་དྲག་པོས་རབ་ཏུ་བསྲུབས་ནས། མངའ་བདག་རལ་བ་ཅན་བཀོངས། ལོ་པཎ་འདུ་བའི་པད་ཚལ་བཤིག །རབ་བྱུང་རྣམས་རྟགས་དང་ཕྲལ། ལ་ལ་རྔོན་པར་བཙུད། གསུང་རབ་ཕལ་ཆེར་ལྷ་སའི་བྲག་ལ་སྦས། འགའ་ཞིག་མེ་དང་ཆུར་སྦྱངས། ཇོ་ཤཱཀ་རྣམ་གཉིས་ཀྱང་ཆུ་ལ་བསྐྱུར་བའི་གཏམ་ཆོས་བློན་རྣམས་ཀྱི་རྣ་བར་གཟོན་པར་གྱུར་ཏེ། སྐུ་གཟུགས་ཀྱི་ལྕིད་ལ་བསྙད་ནས་བྱེ་སྟོངས་སུ་སྦས། ལྷ་ས། བསམ་ཡས། ར་མོ་ཆེ་རྣམས་ཀྱི་གཙུག་ལག་ཁང་གི་སྒོར་ཞལ་བ་བྱས་པས་རྒྱལ་པོ་མགུ་བའི་སླད་དུ་བཙུན་པ་ཆང་འཐུང་བའི་ཆ་བྱད་བྲིས། རྒྱལ་བའི་བསྟན་པ་རིན་པོ་ཆེ་ལོ་ཏོག་ལ་སེར་བས་བྱ་བ་བཞིན་དུ་བསྣུབས་སོ། །དེ་ལྟ་ནའང་རྒྱལ་བའི་ཐུགས་རྗེའི་རོལ་པ་ནི་ཟད་མི་ཤེས་པས་དཔལ་ཨོ་རྒྱན་སངས་རྒྱས་གཉིས་པའི་དངོས་སློབ། རི་བྲག་ལ་ཐོགས་རེག་སྤངས་པའི་རྣལ་འབྱོར་གྱི་དབང་ཕྱུག་ཆེན་པོ། གསང་བའི་བདག་པོ་ལག་ན་རྡོ་རྗེའི་ཡེ་ཤེས་སྒྱུ་མའི་རོ་ལས་ལྷ་ལུང་དཔལ་གྱི་རྡོ་རྗེས་ཆུ་སྲིན་རྒྱལ་མཚན་གྱི་དཔུང་པ་བླ་ན་མཐོ་བའི་རྒྱལ་པོ་སྡིག་ཅན་གྱི་
སྙིང་ལྕགས་མདས་རྣམ་པར་བགས་པས། མདའ་ལ་འཇུ་ཞིང་། ཡང་ན་ལོ་གསུམ་གྱིས་སྡས། ཡང་ན་ལོ་གསུམ་གྱིས་ཕྱིས་ཞེས་པའི་ཀུ་ཙ་དྲག་པོ་འདོན་བཞིན་དུ་དམྱལ་བ་མནར་མེད་པའི་གྲོང་ཁྱེར་ཆེན་པོར་ཆས་སོ། །སྐབས་འདིར་འགོས་ལོ་ཆེན་པོའི་དེབ་ཐེར་དུ། བསྟན་པ་བསྣུབས་རྗེས་བོད་ཀྱི་ཁྱིམ་པ་རྣམས་ཀྱིས་ཀྱང་དཀོན་མཆོག་གསུམ་ལ་གུས་པར་བྱས་པས། ལྷ་ས་དང་བསམ་ཡས་ལ་སོགས་པའི་གཙུག་ལག་ཁང་རྣམས་མ་ཞིག །ཁྱིམ་དང་རི་སུལ་ན་གནས་པའི་སྔགས་པ་རྟེན་སྐྱེ་བོར་གྱུར་བ་དེ་དག་གིས་ཀྱང་རང་ཉིད་ཀྱི་སྒྲུབ་པ་ཚུལ་བཞིན་དུ་ཉམས་སུ་བླངས། བསྟན་པ་སྤྱི་ལ་ཡང་གུས་པར་བྱས་པས་མངའ་བདག་རལ་བ་ཅན་ཡན་ཆོད་དུ་འགྱུར་བའི་བཀའ་དང་བསྟན་བཅོས་ཀྱི་བུ་ཏི་རྣམས་ལེགས་པར་བསྲུངས་པས། སྔོན་འགྱུར་བ་ཕལ་ཆེར་ད་ལྟ་ལོངས་སྤྱོད་དུ་ཡོད་པ་འདི་ཡིན་ལ་ཞེས་གསུངས། རིང་མིན་སྲས་འོད་སྲུངས་དང་། ཡུམ་བརྟན་ཆེར་སོན་ནས་ཇོ་བོ་རྣམ་གཉིས་ཁྲི་ལ་བཞུགས་སུ་བཅུག། གཙུག་ལག་ཁང་ལ་ཡང་སྲི་ཞུ་མཛད་མོད་དེ། གླང་དར་གྱིས་བསོད་ནམས་མ་ཡིན་པ་བྱེད་པས་མངའ་རིས་བགོ་བཤར་སེང་། ཐུག་རྗེའི་གདུང་གིས་བོད་ཁམས་ལ་དབང་བསྒྱུར་བའི་རྟེན་འབྲེལ་གཞན་དུ་གྱུར་ཏོ། །ཇེ་ཞིག་ན་པཎྜི་ཏ་ས་ཏི་དང་། ཕྲ་ལ་རིང་བ་བོད་དུ་བྱོན། སྤྱན་འདྲེན་པ་པོའི་ལོ་ཙཱ་བསླེ་རུ་རྩེ་བྱ་བ་འདས་པས་པཎྜི་ཏ་གཉིས་ཡུན་རིང་པོར་འཁྱམས། སྨྲཾ་ཏིས་རྟ་ནག་ཏུ་རྫི་བ་མཛད། མཐར་གཉིས་ཀས་ཁམས་ལ་བྱོན་ཏེ་སྨྲི་ཏིས་སྨྲ་བའི་སྒོ་མ་ཚོན་ཆར་གྲགས་པའི་བསྟན་བཅོས་ཀྱང་མཛད་དོ། །དེ་ནས་བསྟན་པ་ཕྱི་དར་བྱུང་སྟེ། དར་མས་བསྟན་པ་བསྣུབས་དུས་དཔལ་ཆུ་བོ་རིའི་སྒོམ་གྲྭ་ན་སྨར་ཤཱཀྱ་དང་། གཡོ་དགེ་འབྱུང་དང་། གཙང་རབ་གསལ་གསུམ་གྱིས་བཙུན་པ་རི་དྭགས་འདེད་པ་གཟིགས་པས། བསྟན་པ་བསྣུབས་པའི་ཚུལ་མཁྱེན་ནས་ཉིན་བར་ཡིབས་ཤིང་། མཚན་
མོ་བཤུལ་དུ་ཞུགས་ནས་མངའ་རིས་སུ་གྲོས། དེར་ཡང་བཞུགས་པར་མ་ནུས་ནས་བྱང་ལམ་བརྒྱུད། མདོ་སྨད་སྲོ་གུ་ལུང་དུ་བརྟོལ། སྨོན་ལམ་གྱི་མཐུ་ཚད་མེད་པའི་བླ་ཆེན་དགེ་བ་རབ་གསལ་རབ་ཏུ་བྱུང་བའི་མཁན་སློབ་གསུམ་པོས་མཛད་པ་ལས་བརྟན་པའི་མི་རོ་མདོ་སྨད་ནས་བསླངས། དེ་བཞིན་དུ་བསྙོད་ནས་པཱ་ལའི་མཐའ་ཅན་རྣམ་པ་གསུམ་ལས་རིམ་པར་གསོས། དེའི་ཕྱིན་འཕགས་པའི་ཡུལ་བི་ཀ་མ་ལ་ཤི་ལའི་གཙུག་ལག་ཁང་གི་པཎྜི་ཏ་རྒྱ་མཚོའི་གཙུག་རྒྱན་ངོ་བོ་དཱི་པཾ་ཀར་དང་། མ་བྱོན་སངས་རྒྱས་གསུམ་པར་གྲགས་པ་ཁ་ཆེའི་པཎྜི་ཏ་ཤཱཀྱ་ཤྲཱི་ལ་སོགས་པ་ལྗོངས་འདིར་བྱོན་ནས་དམ་པའི་ཆོས་འདུལ་བའི་སྡེ་སྣོད་གཙོ་བོར་གྱུར་བའི་བསྟན་པ་རིན་པོ་ཆེའི་ལྗོན་ཤིང་ཡལ་ག་མང་པོར་བརྐྱང་ངོ། །དེ་བཞིན་དུ་རྡོ་རྗེ་ཐེག་པའི་གནས་ལའང་མཁས་པ་དང་གྲུབ་པ་བརྙེས་པའི་སྐྱེས་བུ་དམ་པ་མང་དུ་བྱོན་པ་ཀུན་ཀྱང་དེ་བཞིན་གཤེགས་པའི་ཕྲིན་ལས་ཀྱི་རོལ་བཟད་མི་ཤེས་པའི་མཐུ་ལས་བྱུང་བ། བསྟན་པའི་ལམ་སྲོལ་ལ་ཡངདག་པར་ཞུགས་པ། དངོས་དང་བརྒྱུད་ནས་སེམས་ཅན་ལ་ཕན་པ་རྒྱ་ཆེན་པོ་དང་། ཐར་བ་དང་ཐམས་ཅད་མཁྱེན་པའི་ལམ་ལ་བདེ་བླག་ཏུ་བཀྲི་བའི་ས་མཁན་འབའ་ཞིག་ཏུ་གྱུར་བའོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། གངས་རིའི་ཁྲོད་དུ་རྒྱལ་བསྟན་ཇི་ལྟར་བྱོན་པའི་རྣམ་གཞག་མདོ་ཙམ་བརྗོད་པའི་རབ་ཏུ་བྱེད་པ་སྟེ་གསུམ་པའོ།། །།
གངས་རིའི་ཁྲོད་ན་བསྟན་པ་ཇི་ལྟར་བྱོན་པ་ལས་བརྩམས་ཏེ་བཙན་པོ་ཁྲི་སྲོང་ལྡེའུ་བཙན་གྱི་དུས་ན་གསང་སྔགས་ནང་གི་རྒྱུད་རྣམས་བྱུང་བའི་གཏམ་གསལ་བར་སྲསཔའི་རབ་ཏུ་བྱེད་པ་སྟེ་བཞི་པ།
སྤྱི་དོན་བཞི་པ་ད་ནི་དེ་ལས་ལྷ་བཙན་པོ་ཁྲི་སྲོང་ལྡེའུ་བཙན་གྱི་དུས་ན་སྤྲུལ་པའི་ལོ་པཎ་ཆེན་པོ་རྣམས་ཀྱིས་བསྒྱུར་ཞིང་དར་བའི་གསང་སྔགས་སྔ་འགྱུར་གྱི་མཚན་ཉིད་གང་ཡིན་བཤད་ནས། དེའི་བསྟན་པ་ལ་བྱ་བ་བྱས་ཤིང་རྡོ་རྗེའི་ལམ་ལས་དངོས་གྲུབ་བརྙེས་
པའི་སྐྱེས་བུ་དམ་པ་རྣམས་ཀྱི་རྟོགས་པ་བརྗོད་པར་བྱ་སྟེ། དེ་ལ་སྟོན་པ་མྱ་ངན་ལས་འདའ་ཁར། ང་ཡོངས་སུ་མྱ་ངན་ལས་འདས་ནས་འདུལ་བ་ལ་སྣང་། མདོ་སྡེ་ལ་འཇུག། ཆོས་ཉིད་དང་མི་འགལ་ན་བཀའ་ཡིན་པར་བཟུང་ཞེས་གསུངས་པ་ལྟར། བསྐྱེད་པ་མ་ཧཱ་ཡོ་ག་ཏནྟྲ་སྡེ་བཅོ་བརྒྱད་ལ་སོགས་པའི་བསྐྱེད་རྫོགས་ཟབ་མོས་རང་རྒྱུད་ཀྱི་ཉོན་མོངས་པ་མ་སྤངས་གནས་དག་ཏུ་འདུལ་བས་རྡོ་རྗེ་ཐེག་པའི་འདུལ་བ་ལ་སྣང་། ལུང་ཨ་ནུ་ཡོ་ག་གསང་ཆེན་དགོངས་པ་འདུས་པ་ལ་སོགས་པས་སེམས་ཀྱི་བསབ་པའི་མཚན་ཉིད་ཟབ་མོ་ཕུང་ཁམས་སྐྱེ་མཆེད་དབྱིངས་ནས་སངས་རྒྱས་པར་སྟོན་པས་གསང་བ་སྔགས་ཀྱི་མདོ་སྡེ་ལ་འཇུག །མན་ངག་རྫོགས་པ་ཆེན་པོ་ངོ་བོ་ལ་སྐྱེ་འགག་མེད། རང་བཞིན་ལ་རྟག་ཆད་བྲལ། མཚན་ཉིད་རྣམ་པ་ཐམས་ཅད་མཁྱེན་པའི་ཆོས་ཉིད་དང་མི་འགལ་ཞིང་ཡེ་ཤེས་ཐུག་ཕྲད་དུ་སྟོན་པ་མདོ་སྒྱུ་སེམས་གསུམ་གྱི་ངོ་བོར་གནས་པ་སྟེ། གང་གི་ཚེ་བདག་ཅག་གི་སྟོན་པ་འདི་དང་པོའི་སངས་རྒྱས་ཀུན་ཏུ་བཟང་པོའི་མཚན་གྱིས་སྙན་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཤིང་། ཆོས་ཉིད་འོད་གསལ་གྱི་ཞིང་ཁམས་གང་དུ་སྒྲིབ་པ་མཐའ་དག་སྤངས་པའི་ཡོན་ཏན་གྱི་བཀོད་པ་ཟད་མི་ཤེས་པའི་འོག་མིན་ཡེ་ཤེས་རོལ་བའི་རྒྱན་ཉིད་དུ་བཞུགས་ནས། རྡོ་རྗེ་འཆང་རྒྱ་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རོལ་བ་བསམ་གྱིས་མི་ཁྱབ་པའི་མངའ་ཐང་ཆེན་པོས་ཆོས་ཀྱི་སྒྲོན་མ་རྣམ་པར་བཀོད་དེ། དུས་བཞི་མཉམ་པ་ཉིད་དེ་སྲིད་དུ་སོ་སོའི་སྐལ་པ་ཇི་ལྟ་བ་བཞིན་དུ་བྱང་ཆུབ་གསུམ་གྱི་ལམ་དང་འབྲས་བུར་འགོད་པའི་ཕྲིན་ལས་ལྷུན་གྱིས་གྲུབ་ནི་འདི་ལྟ་སྟེ། སྐུ་གསུམ་རང་རང་ལ་མཚན་ཉིད་གསུམ་གྱིས། ཆོས་སྐུའི་སྟོན་པ་དཔལ་ཀུན་ཏུ་བཟང་པོ། ཆོས་རང་བཞིན་རྫོགས་པ་ཆེན་པོ། འཁོར་ཡེ་ཤེས་རྒྱ་མཚོ། དུས་བསམ་གྱིས་མི་ཁྱབ་པ། གནས་ཆོས་ཉིད་དོན་གྱི་འོག་མིན་ནོ། །ལོངས་སྤྱོད་རྫོགས་
པ་སྐུའི་སྟོན་པ་རིགས་ལྔའི་སངས་རྒྱས། ཆོས་གསང་སྔགས་ཕྱི་ནང་། འཁོར་གསང་བའི་བདག་པོ་དང་འཇམ་དཔལ་རྣོན་པོ་ལ་སོགས་དབང་པོ་ཡུལ་སྣང་དག་པ་འབྲས་བུའི་སེམས་དཔའ། དུས་འཕོ་་འགྱུར་མེད་པ། གནས་རང་སྣང་སྟུག་པོ་བཀོད་པའི་ཞིང་ཁམས་སོ། །སྤྲུལ་པ་སྐུའི་སྟོན་པ་རྡོ་རྗེ་འཆང་དང་ཐུབ་པ་དྲུག། ཆོས་ཐེག་པ་ཆེ་ཆུང་། འཁོར་སར་གནས་དང་། སོ་སོའི་སྐྱེ་བོ་དང་། མཁའ་འགྲོ་དང་། རིག་པ་འཛིན་པ་ལ་སོགས་ཐ་དད་པའི་ཚོགས། དུས་འདས་དང་མ་འོངས་ད་ལྟར་མ་ངེས་པའོ། །གནས་ལྷ་གནས་ཀྱི་འོག་མིན་དང་། དུར་ཁྲོད་ཆེན་པོ་དང་། རྡོ་རྗེ་བཙུན་མོའི་བྷ་ག་ལ་སོགས་ཏེ་གསང་བ་ཆེན་པོའི་འོག་མིན། འགྲོ་དྲུག་སོ་སོའི་གནས་རིགས་ཐ་དད་པའོ། །དེ་དག་ཀྱང་ཐེག་པའི་རྣམ་གྲངས་སུ་བསྡུ་བའི་སྒ་ནས། ཀུན་འབྱུང་འདྲེན་པའི་ཐེག་པ་དང་། དཀའ་ཐུབ་རིག་བྱེད་ཐེག་པ་དང་། །དབང་བསྒྱུར་ཐབས་ཀྱི་ཐེག་པའོ། །ཞེས་སྡེ་སྣོད་གསུམ། ཕྱི་རྒྱུད་སྡེ་གསུམ། ནང་རྒྱུད་ཡོག་གསུམ་སྟེ་རིམ་པ་དགུར་རྫོགས་པ་ཉིད་དུ་བསྟན་པའང་། དཔུང་བཟང་གིས་ཞེས་པར། བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུངས། །ཞེས་པས་སྤྱིར་བཏང་དམན་པ་གསུམ་གྱི་ཐེག་པའི་སྤྱི་གཞིར་གྱུར་བས་སྡེ་སྣོད་བཞི་བའམ། དམིགས་བསལ་རིག་འཛིན་གྱི་སྡེ་སྣོད་ཉག་གཅིག་ཏུ་བསྟན་པ་ཡིན་ནོ། །མདོར་བསྡུ་ན། བསྐལ་པ་དཔག་ཏུ་མེད་པ་ནས་ད་ལྟའི་བར་དུ་ཀུན་ཏུ་བཟང་པོ། རྡོ་རྗེ་འཆང་། རྡོ་རྗེ་སེམས་དཔའ་ཞེས་བྱ་བ་གདོད་མའི་མགོན་པོས་གསུངས་པ་ཐམས་ཅད། དུས་གང་དུ་འཁོར་གྱི་མཁའ་འགྲོ་དང་། གྲུབ་པ་མཆོག་དང་། རྡོ་རྗེ་ཆོས་ལ་སོགས་པས་ལེགས་པར་བསྡུས་ཤིང་། ཚེ་ལ་དབང་བའི་མཁའ་འགྲོ་མ་གྲུབ་པ་ཅན་དག་གིས། ལྷ་དང་། ཀླུ་དང་། གནོད་སྦྱིན་དང་། དྲི་ཟའི་ཡུལ་ལ་སོགས་པ་ནས།
འཛམ་བུའི་གླིང་གིའང་ཨོ་རྒྱན་དང་། ཟ་ཧོར་གྱི་གནས། ཤམྦྷ་ལ་དང་། སིངྒ་ལ། ལངྐའི་ཡུལ་གྱི་མ་ལ་ཡ་གནམ་ལྕགས་འབར་བའི་རྩེ། འོག་མིན་དང་། དགའ་ལྡན་དང་། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པ་ལ་སོགས་པར་མཁའ་འགྲོམས་བཟུང་ནས་བཞུགས་པ་དག། སློབ་དཔོན་ཆེན་པོ་པདྨ་དང་། ཀླུ་སྒྲུབ་དང་། དགའ་རབ་དང་། བི་མ་ལ་སོགས་པས་ཡེ་ཤེས་དང་། རྫུ་འཕྲུལ་གྱི་སྤྱོད་ཡུལ་ཁོ་ནས་སྤྱན་དྲངས་ཏེ་འཕགས་པའི་ཡུལ་དང་། བོད་ཡུལ་དུ་དར་ཞིང་དེ་ལས་གྲུབ་པ་ཐོབ་པ་མང་པོ་བྱུང་བ་ཡིན་ནོ། །བློ་གྲོས་མཐུ་ཆུང་བ་དག། ཤཱཀྱ་ཐུབ་པ་ཉིད་ནང་ལྟར་རྡོ་རྗེ་འཆང་དུ་བཞེངས་ནས་ཚེ་ལོ་བརྒྱ་པའི་གནས་སྐབས་ན་གསུངས་པ་འགའ་ཞིག་ཡུལ་དུས་དེའི་རིག་པ་འཛིན་པ་དག་ལ་གྲགས་ཆེ་བ་ཙམ་གཏན་ཚིགས་སུ་བཟུང་ནས། དེ་ལས་གཞན་པའི་རྒྱུད་མི་སྲིད་དོ་སྙམ་པ་ནི། འཕགས་པའི་བློ་གྲོས་ཀྱིས་ཕྱོགས་ཙམ་མཉེ་བའི་འདོད་པ་བྱིན་ཡིན་ཏེ། རྫོགས་ལྡན་དང་པོ་བྱ་བའི་རྒྱུད། །ཅེས་དང་། འཇམ་དཔལ་སྒྱུ་འཕྲུལ་ལས། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ཞེས་དང་། ཡེ་ཤེས་རོལ་བའི་རྒྱུད་ལས་ཐོག་མའི་རྡོ་རྗེ་འཆང་པངས། བསྐལ་པ་ཀུན་གྱི་སྔོན་རོལ་ནས། །ཕྱི་མའི་མུ་མཐར་ཐུག་གྱུར་བ། །དེ་སྲིད་བླ་མེད་གསང་བའི་ཆོས། །རྨད་བྱུང་རྒྱལ་པོ་འགྲོ་བ་ལ། །གསུངས་སོ་གསུང་ངོ་གསུང་བར་འགྱུར། །ཅེས་པའི་རང་བཞིན་ལ་རྨོངས་པའོ། །དེ་ལས་སྔགས་གསར་མའི་བརྡ་ཆད་ནི། །བཅོམ་ལྡན་འདས་ཀྱིས་རི་རབ་ཀྱི་ཟོམ། ཨོ་རྒྱན་གྱི་གནས། དཔལ་ལྡན་འབྲས་སྤུངས། རི་བོ་བྱ་རྐང་ཅན། འོག་མིན་ལ་སོགས་པར་ཆགས་བྲལ་དང་། ལོངས་སྤྱོད་རྫོགས་པའི་རྣམ་པ་ཅི་རིགས་པས་གསུངས་པ་དག་སྟེ། རྒྱུད་སྡེ་བཞིའམ། ལྔར་
ཡང་གྲགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་དང་། མཁའ་འགྲོ་མ་དང་། གྲུབ་པ་ཆེན་པོ་དང་། རིགས་གསུམ་སེམས་དཔའ་ལ་སོགས་པས་བསྡུས་པ་སྟེ། མཚན་ཉིད་ཇི་ལྟར་ཡིན་པ་མདོར་བསྡུ་ན། ཆོས་ཀྱི་དབྱིངས་རང་བཞིན་གྱི་རྣམ་པར་དག་པ་དང་། དེ་བཞིན་གཤེགས་པ་ཐམས་ཅད་ཀྱི་གསང་བ་བསམ་གྱིས་མི་ཁྱབ་པའི་ཐུགས་རྡོ་རྗེའི་ཡེ་ཤེས་ཏེ། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ནོ། །ཞེས་སོ། །འདི་གཉིས་འགྱུར་གྱི་སྔ་ཕྱིའི་དབྱེ་བ་ལ། ཉོན་མོངས་པ་དང་། ལྟ་བའི་སྙིགས་མར་གྱུར་བ་དག་གིས་སྡེ་ཚན་དང་ཕྱོགས་རིས་སུ་དབྱེན་འཆོས་ཀྱང་། གཟུ་བར་གྱུར་བ་དག་དྲི་མ་མེད་པའི་བློ་གྲོས་ཆེན་པོས་སྡེ་བ་བཅོ་བརྒྱད་བཀར་བསྡུ་ཤེས་པས་མཚོན་པར་བྱས་ཏེ་རགས་པའི་མཚན་ཉིད་ཆ་ཕྱེད་པའི་སླད་ཙམ་དུ་བལྟ་སྟེ། པཎྜི་ཏ་སྒྲའི་ཚེར་མ་ཡན་ཆོད་དང་། ལོ་ཙཱ་བ་རིན་ཆེན་བཟང་པོ་མན་ཆོད་ཀྱི་འགྱུར་ལས་བཏགས་པའི་ཕྱིར་རོ། །དོན་དུན་ད་ལྟ་གསར་མང་གྲགས་པའི་རྒྱུད་སྡེའི་ཁྲོད་ན་བསྟན་པ་སྔ་དར་གྱི་ཚེ་འགྱུར་བའི་རྒྱུད་ཀྱང་ཡོད་ལ། ད་ནི་སྔ་བརྒྱའི་ཐ་མར་གྱུར་བས་འཕགས་པའི་ཡུལ་གྲུའང་སྡིག་ཏོ་དང་ཀླ་ཀློས་ཁེངས་ན། རང་རང་གི་འདོད་པས་བླང་བར་འོས་པའི་རྒྱུད་གསར་ལྟ་འབྱོན་དུ་གལ་སྲིད། གལ་ཏེ་ན་རེ་ཞིག་གི་བློ་ལ་ཐེ་ཚོམ་ཟ་བའི་ཆོས་སྐད་རྣམ་པ་ཐམས་ཅད་པ་ཅན་ཞིག་ཀྱང་གསར་མའི་སྡེ་ཚན་དུ་འཇོག་དགོས་པས་འགྲོ་ལྡིང་དང་། ཨོ་རྒྱན་གྱི་གླིང་དུ་དེངས་ཤིག། དེ་སྐད་དུ། སློབ་དཔོན་གསང་ཕུ་བས། བསམ་ཡས་ཀྱི་དཔེ་ཁང་ན། རྒྱ་གར་ནས་སྤྱན་དྲངས་ནས་བོད་དུ་མ་འགྱུར་བའི་ཆོས་མང་པོ་ཡོད། ང་ལ་རྫུ་འཕྲུལ་ཞིག་ཡོད་ན། ཟབ་ཤོས་ཤིག་བསྒྱུར་ན། བོད་ཀྱི་སྟོན་པ་འདི་ཀུན་ང་ལ་ཇི་སྐད་ཟེར་ན། འདི་འདྲེའི་ཆོས་ཤིག་གང་ནས་བྱུང་། ཚིག་ལེགས་ཏེ་ཁུངས་ལ་ཐེ་ཚོམ་ཟ་
ཟེར་ནས། སྒྲོ་སྐུར་བྱེད་ཅིང་ལོག་ལྟ་འཕེལ་བ་ལས་མི་འོང་། འོ་སྐོལ་བོད་ཀྱི་སྟོན་པ་འདི་ཚོ། མི་ཚེ་བཤད་སྐམ་རེ་ལ་བསྐྱལ་ནས། མངོན་ཤེས་ཀྱི་སྣ་རྩེ་བག་རེ་མི་སྒྲུབ་བར། ཕོ་ཚོད་འོད་ཏོ་དཔགས་ཀྱིས་ཕྱོགས་གཅིག་ཏུ་ཁ་ཆོད་ཅད་དེ་བཅད་ནས་ཆོས་ཟབ་མོ་ལ་སྒྲོ་སྐུར་བཏབ་ནས། ངན་འགྲོའི་གཡང་ལ་འགྲོ་སྟེ། རང་རེའི་ཐོས་པ་ཕྱོགས་རེ་བ་རེས་ང་རྒྱལ་བས་བརླག་པ་ཡིན། ཞེས་པ་དང་། དེའི་ཐིག་ལེ་བཅུ་དྲུག་དང་། གཏེར་གྱི་ཆོས་སྐད་འདིས་ཇོ་བོ་བཀའ་གདམས་པའི་གྲུབ་མཐའི་སྙིང་པོའང་གང་དུ་དེངས་པར་འགྱུར། དེའི་ཕྱིར་སངས་རྒྱས་རྣམས་ཀྱི་ཕྲིན་ལས་དང་། ཐབས་ལ་མཁས་པའི་གདུལ་ཚུལ་དང་། བྱིན་རླབས་ཀྱི་ཆོ་འཕྲུལ་ཆེན་པོ་བསམ་གྱིས་མི་ཁྱབ་པའི་རང་བཞིན་ཁོང་དུ་ཆུད་པ་ནི། བློ་གྲོས་ཆེན་པོ་སྟེ། གང་དང་གང་དུ་སྐུ་གསུམ་གྱི་སྟོན་པའི་རོལ་བ་ཆེན་པོ་དང་། ཞིང་ཁམས་དང་། ཆོས་འཁོར་གྱི་མཚན་ཉིད་གང་ཡང་མི་འགལ་ཞིང་། བསམ་གྱིས་མི་ཁྱབ་པའི་དོན་དྲན་པར་བྱའོ། །དེ་ལ་བཟང་པོའི་བསྐལ་པ་འདིར་ཐུན་མོང་མ་ཡིན་པའི་གསང་སྔགས་འབྱུང་བའི་གླེང་གཞིར་བསྟན་པའི་བཙས་གསུམ་གྱི་བྱིན་རླབས་ལས། གྲགས་ཆེན་གྱི་སྟོན་པ་བཅུ་གཉིས་སུ་བསྟན་ནས་མདོ་སྔགས་ཀྱི་ཆོས་ཚུལ་མ་ལུས་ཤིང་། ལུས་པ་མེད་པ་རྐྱལ་བ་དགོངས་པའི་བརྒྱུད་པ་གཅིག་ཏུ་ཐ་མི་དད་པའི་རྣམ་གཞག་བློ་གྲོས་ཆེན་པོའི་སྤྱོད་ཡུལ་དུ་བྱང་ཆུབ་པའི་རང་བཞིན་ཁོ་བོའི་བླ་མ་ཀུན་མཁྱེན་ངག་གི་དབང་པོས་ཐེག་མཆོག་རིན་པོ་ཆེའི་མཛོད་ལས་རྒྱ་ཆེར་བསྟན་པ་ལས་ཤེས་པར་བྱོས་ཤིག། འདིར་རེ་ཞིག་འཛམ་བུའི་གླིང་འདིའི་དབང་དུ་བྱས་ནས་ཐེག་མཆོག་སྙིང་པོའི་བསྟན་པ་མི་ཡུལ་དུ་ཇི་ལྟར་བབས་ནས་བོད་དུ་བྱོན་པའི་རྣམ་གཞག་བཤད་པར་བྱའོ། །དེ་ལ་ཐེག་པའི་རྩེ་མོ་མན་ངག་རྫོགས་པ་ཆེན་པོ་ནི། ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ན་རྒྱལ་པོ་ཨུ་པ་རཱ་ཛའམ། དྷརྨ་ཨ་
ཤྭ་དང་། བཙུན་མོ་སྣང་གསལ་འོད་ལྡན་མ་གཉིས་ལ་སྲས་མོ་མི་ལས་འདས་པའི་དགེ་སློང་མ་ཞིག་ཡོད་ཅེས་གྲགས་སོ། །དེ་གསེར་གྱི་བྱེ་མ་བརྡལ་བའི་རྒྱ་མཚོའི་འགྲམ་ན་བསམ་གཏན་བྱེད་པའི་ཚེ། ཤེལ་གྱི་སྐྱེས་བུ་འོད་དང་ལྡན་པ་གཅིག་གིས་ཤེལ་བུམ་དཔའ་བོ་འབྲུ་ལྔས་མཚན་པས་དབང་བསྐུར་བ་རྨིས། གཡོག་མོ་མཁའ་འགྲོའི་མཚན་དང་ལྡན་པ་ལ་བཤད་པ་སྤྲུལ་པའི་སྐུ་འབྱུང་བའི་རྟགས་ཡིན་ཟེར། མི་རིང་བར་རྡོ་རྗེ་སེམས་དཔའི་སྤྲུལ་པ་ལྷའི་བུ་སེམས་ལྷག་ཅན་ཞེས་རྫོགས་པ་ཆེན་པོ་ལྷ་ཡུལ་དུ་དར་བར་བྱེད་པ་དེ་དགེ་སློང་མའི་རུམ་ནས་བཙས། ཕ་མེད་ཀྱི་བུར་གྱུར་བས་གནོང་སྟེ་ཐལ་ཁུང་དུ་བོར་བས་སྒྲ་དང་འོད་དང་མེ་ཏོག་གི་ཆར་བྱུང་། ཞག་གསུམ་གྱི་ནངས་པར་བལྟས་པས་མ་ཉམས་པར་འདུག་ནས་ཁྲུས་གསོལ་བ་ན། ནམ་མཁའ་ནས་ལྷ་དང་མཁའ་འགྲོས་ཀྱང་མཆོད་པ་བྱས། ལོ་བདུན་ལོན་པའི་ཚེ་ཡུམ་ལ་པཎྜི་ཏ་དང་ཆོས་གཏམ་བྱ་བར་གསོལ་བས། བུ་སོམ་བརྗེས་པས་ཆོས་གཏམ་མི་འོད་ཟེར་ནས་གནང་བ་མ་བྱིན། ནན་གྱིས་གསོལ་ནས་རྒྱལ་པོ་ཨུ་པ་རཱ་ཛའི་མཆོད་གནས་པཎྜི་ཏ་ལྔ་བརྒྱ་དང་རྩོད་པ་བྱས་པས་སུས་ཀྱང་མཐུབ་སྟེ་སྤྲུལ་པའི་སྐུར་བཟུང་ནས་ཞབས་སྤྱི་བོར་བླངས། རྒྱལ་པོ་རབ་ཏུ་དགའ་བས་དགའ་རབ་རྡོ་རྗེར་མཚན་བཏགས། བྱང་ཕྱོགས་ཉི་མ་སྣང་བྱེད་ཅེས་ཡི་དྭགས་དྲག་པོ་གནས་པའི་རི་ལོ་སུམ་ཅུ་རྩ་གཉིས་ཏིང་ངེ་འཛིན་མཛད་པས་ས་གཡོ་བ་དང་མུ་སྟེགས་ཕམ་པར་བྱས་སོ་ཞེས་པའི་སྒྲ་ཡང་བྱུང་། དེ་ཕྱུགས་རྫིས་བསྙད་པ་ལས་མུ་སྟེགས་ཀྱི་རྒྱལ་པོས་གཤེད་མ་བཏང་ཡང་། སྐུ་ཉི་ཞུར་ལྟ་བུར་གྱུར་བས་གནོད་མ་ནུས། སླར་ནམ་མཁའི་ལམ་ལ་གྱ་གྱུར་གཤེགས་པས་དད་དེ་སངས་རྒྱས་པའི་རྗེས་སུ་ཞུགས། དེར་སྡེ་སྣོད་ཀྱི་ཆོས་རྒྱ་མཚོ་ལྟ་བུ་དང་། རྫོགས་པ་ཆེན་པོ་ཤློ་ཀ་འབུམ་ཕྲག་དྲུག་ཅུ་རྩ་བཞི་གདོད་ནས་
ཐུགས་ལ་མཆིས་པར་རྡོ་རྗེ་སེམས་དཔས་ཞལ་མངོན་སུམ་དུ་བསྟན་ནས་འོད་ཟེར་ཆེན་པོའི་དབང་གིས་མི་སློབ་པའི་ཡེ་ཤེས་མངོན་དུ་གསལ་བའི་ཚུལ་བསྟན། ཚིག་གི་རྒྱུད་ཡི་གེར་འགོད་པའི་གནང་བ་བྱིན་ནས་རྡོ་རྗེ་དབྱིངས་དང་ཡོན་ཏན་མཐའ་ཡས་པའི་མཁའ་འགྲོ་མ་ལ་སོགས་པས་གླེགས་བམ་དུ་བཀོད། མཁའ་འགྲོ་སེམས་ལྡན་མས་བཟུང་སྟེ་མཆོད་པར་བྱེད་ཅིང་། སློབ་དཔོན་ཉིད་ཁྱབ་འཇུག་གི་བུ་མོ་གཅེར་བུ་ལ་ཆིབས་ཏེ་དུར་ཁྲོད་བསིལ་བའི་ཚལ་དུ་བྱོན་ནས་མཁའ་འགྲོ་རྣམས་ལ་ཆོས་སྟོན་ཏོ། །དེའི་ཚེ་མ་ག་དྷཱ་རྡོ་རྗེའི་གདན་གྱི་ནུབ་ཕྱོགས་རིམ་པ་གཉིས་པའི་གྲོང་ཁྱེར་དུ་བྲམ་ཟེ་སྙིང་པོ་གྲུབ་པའི། འཇམ་དཔལ་བཤེས་གཉེན་ཞེས་བྱ་བ་རིག་པའི་གནས་ལྔ་ལ་མཁས་པ་ཅིག་བྱོན། རྣམ་ཐར་བཻ་རོའི་འདྲ་འབག་ལ་གསལ་ཞིང་རྒྱལ་རིགས་ལྟར་བཤད་པ་འོག་ཏུའང་བྲི་བར་བྱའོ། །དེ་ལ་འཇམ་དཔལ་རྣོན་པོས་ལུང་བསྟན་ནས་དགའ་རབ་རྡོ་རྗེའི་དྲུང་དུ་བརྟོལ། ལོ་དོན་ལྔར་ཆོས་ཉན། མཐར་དགའ་རབ་རྡོ་རྗེ་ཆུ་བོ་དན་ཏིའི་མགོར་འོད་ཕུང་དུ་ཡལ་བའི་ཚེ། འདས་རྗེས་ཀྱི་གླེགས་བམ་བབས། གཟིགས་པ་ཙམ་གྱིས་སློབ་དཔོན་དང་རྟོགས་པ་མཉམ་པར་གྱུར་ནས། རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་གནས་པ་སེམས་ཀྱི་སྡེ། གྱ་བྲལ་ཀློང་གི་སྡེ། གནད་དོན་མན་ངག་གི་སྡེ་དང་གསུམ་དུ་ཕྱེ། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣར་རྒྱུད་གཉིས་སུ་བྱེ། རྣར་རྒྱུད་མཆན་བུར་བཏབ། བཤད་རྒྱུད་སྤེལ་བའི་ཡུལ་མ་རྙེད་ནས་རྡོ་རྗེ་གདན་དུ་གཏེར་ལ་སྦས། ནུབ་ཕྱོགས་ཀྱི་དུར་ཁྲོད་ཆེན་པོ་སོས་གླིང་དུ་ལོ་བརྒྱ་དང་རྩ་དགུར་བཞུགས་སོ། །དེའི་ཚེ་རྒྱ་ནག་ཏུ་ཁྱིམ་བདག་གི་རིགས་ལས་ཤྲཱི་སིངྷ་ཞེས་བྱ་བ་རིག་པའི་གནས་ལྔ་ལ་མཁས་པ་ཅིག་བྱུང་། སྤྱན་རས་གཟིགས་ཀྱིས་ལུང་བསྟན་ནས་འཇམ་དཔལ་བཤེས་གཉེན་གྱི་མན་ངག་མྱུར་
དུ་རྟོགས་པའི་སླད་དུ། རབ་ཏུ་བྱུང་ཞིང་གསང་སྔགས་མཐའ་དག་སྦྱངས་པས་ཚེའི་རིག་འཛིན་དང་རྫུ་འཕྲུལ་ཡང་གྲུབ། དེར་སླར་ཡང་ཐུགས་རྗེ་ཆེན་པོས་བསྐུལ་ཏེ་འཇམ་དཔལ་བཤེས་གཉེན་ལོ་ཉེར་ལྔ་བསྟེན། སློབ་དཔོན་འོད་ཕུང་དུ་ཡལ་བའི་དུས་འདས་རྗེས་ཤྲཱི་སིངྷའི་ཕྱག་ཏུ་བབས་པས་རྟོགས་པ་མཉམ་པར་སོང་། དེ་ནས་ལོ་བརྒྱ་ཉེར་ལྡན་འཇམ་དཔལ་བཤེས་གཉེན་ཕྱི་མ་ནུབ་ཕྱོགས་ཀྱི་པདྨ་ལས་བརྫུས་ཏེ་སྐྱེས་པ་སློབ་དཔོན་ཆེན་པོ་པདྨའི་གསང་སྔགས་མང་པོའི་འབྱུངཁུངས་ཀྱང་ཡིན། འདིས་ཨཱརྱ་དེ་ཝ་ལ་སྙིང་ཐིག་བསྟན་པས་འོད་དུ་ཡལ་ཞིང་། སངས་རྒྱས་ཡེ་ཤེས་ཞབས་ལ། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། ཞེས་པས་མཚོན་རྫོགས་ཆེན་དང་ཐ་མི་དད་པའི་འཇམ་དཔལ་ཞལ་ལུང་གི་དོན་བསྟན་པའང་བསྟན་བཅེས་རྒྱུད་ཀྱི་དངོས་པོ་ཅན་རྫོགས་པ་ཆེན་པོའི་གྲུབ་མཐའི་ངོ་བོར་གནས། འདིས་མཚོན་ནས་རྒྱ་གར་གྱི་པཎ་གྲུབ་ཕལ་མོ་ཆེ་ཞིག་རྫོགས་པ་ཆེན་པོའི་ལྟ་བ་ལས་དངོས་གྲུབ་བརྙེས་པ་མང་མོད་ཀྱི། མན་ངག་གི་རྒྱུད་འདི་གཞུང་གིས་གསང་ཞིང་ལུ་གུ་རྒྱུད་ལ་སོགས་པའི་མིང་ཙམ་བརྗོད་ཀྱང་དམ་ཚིག་མ་ཡིན་པར་བཤད་པས་རྒྱ་གར་ནའང་ཅིག་བརྒྱུད་འབའ་ཞིག་ཏུ་བཀའི་རྒྱ་དམ། འགྲོ་དོན་ཀྱང་མཁའ་འགྲོ་མ་དང་། མི་མ་ཡིན་གྱི་གནས་ཁོ་ན་ལ་ཆེ་བར་གསུངས་པས་ཐ་མལ་གྱི་གདུལ་བྱ་ལ་ཁྲོམ་བསྒྲགས་སུ་སྣང་བའང་མེད། བྱེ་བྲག་ཏུ་རྒྱ་གར་གྱི་སློབ་དཔོན་རྣམས་གསང་བ་བསྲུང་བ་ལ་ཐུགས་སྒམ། ལྷ་དང་སྔགས་ཀྱི་དེ་ཉིད་ཁྱབ་གདལ་དུ་མི་སྟོན་པའི་དམ་ཚིག་ལ་ཤིན་ཏུ་གནས་པས། ནམ་དངོས་གྲུབ་ཆེན་པོ་ཐོབ་པའི་མཚན་མ་ཀུན་གྱིས་སྤྱོད་ཡུལ་དུ་མངོན་པའི་ཚེ། ཀྱེ་མ་དེ་ནི་སྔགས་ལ་སྤྱོད་པའི་རིགས་ཅན་ནོ། །ཞེས་གླེང་ཞིང་ཤེས་པ་ལས། བསྟན་པ་སྙིགས་ཤིང་གསང་སྔགས་
འཆལ་བའི་གནས་སྐབས་ལྟར། གསང་བ་ཁྲོམ་དུ་གྱེར་ཞིང་། རྒྱུད་དང་མན་ངག་རླུང་གིས་དེད་པའི་ཤིང་ལོ་བཞིན་དཔེ་ལ་ཁྱམས་སུ་བྱེད་པ་མེད། དཔེར་ན་མར་པས་མིང་ཙམ་མ་ཐོས་པའི་ནཱ་རོ་མཁའ་སྤྱོད་བལ་པོ་ཕམ་མཐིང་བ་ལ་གྲགས་ཟེར་བ་བཞིན་ནོ། །འདི་ལྟར་བྲེང་ཆགས་ཀྱི་བརྒྱུད་པས་མ་བཞུགས་ཀྱང་མངོན་གྱུར་བ། པཎ་ཆེན་ཤཱཀྱ་ཤྲཱིས་སློབ་དཔོན་ཆེན་པོ་ལ་རྡོ་རྗེ་ཕུར་བ་དངོས་སུ་ཐོབ་པ་དང་། ཕ་དམ་པས་སངས་རྒྱས་གསང་བ་ལས་ཡོ་གའི་གདམས་པ་ནོས་ཤིང་། རྫོགས་པ་ཆེན་པོའི་ལྟ་བའི་གྲུབ་མཐའ་འཛིན་པ་དང་། ཞང་གཡུ་བྲག་པའི་མཆིམས་ཕུ་བཀའ་རྒྱ་མར། སློབ་དཔོན་ཆེན་པོ་དང་། བྷོ་རྷི་ས་ཏྭ། བི་མ་མི་ཏྲ་རྣམས་ལས་དངོས་སུ་གསན་པའི་རྫོགས་ཆེན་ཡོད། རྗེ་བཙུན་མི་ལས་རྫོགས་ཆེན་ཉན་ཏེ་ལྟ་བའི་ག་ཐོག་ཏུ་མཉམ་པར་མ་གཞག་པས་རེ་ཞིག་རྟེན་འབྲེལ་འཕྱུགས་མོད་ཀྱི། མཐར་ཐུག་མར་བའི་ཐབས་ལམ་གྱིས་རྒྱུ་བྱས་ནས་འབྲས་བུ་རྫོགས་པ་ཆེན་པོའི་ཀ་དག་ཆོས་ཟད་ཀྱི་ཀློང་དུ་དངོས་གྲུབ་བརྙེས་པ་ཡིན་ཏེ་ལྟ་བའི་ཞེ་ཕུགས་ལ་ལྟོས། རྣལ་འབྱོར་གྱི་དབང་ཕྱུག་ཀརྨ་པཀྴི། དགའ་རབ་རྡོ་རྗེའི་སློབ་མ་ཏོག་རྩེ་བར་གྱུར་ནས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་ཁོང་དུ་ཆུད་པའི་སྔོན་གནས་རྗེས་དྲན་ལས་དངོས་གྲུབ་བརྙེས། ཀུན་མཁྱེན་རང་བྱུང་རྡོ་རྗེས་རང་གི་མཛོད་སྤུར་བི་མ་ལ་ཐིམ་པའི་རྐྱེན་གྱིས་སྙིང་ཐིག་ཁོང་དུ་ཆུད་དེ་དགོངས་གཏེར་བྱོན། མདོ་སྔགས་གཉིས་ཀ་ལ་བྱང་བའི་གྲུབ་ཆེན་ཨོ་རྒྱན་པ་དང་། ཡང་དགོན་པ་སོགས་འཁོར་འདས་རོ་གཅིག་ཏུ་ཤར་བ་དེ་རྣམས་ཀྱང་རྫོགས་པ་ཆེན་པོ་ལས་དངོས་གྲུབ་བརྙེས་པ་ཤ་སྟག་ཡིན་ཏེ། བསྟན་པའི་བབས་ཚུལ་གྱི་རྟེན་འབྲེལ་ལས་དེ་དག་ལས་རྒྱ་ཆེར་བརྒྱུད་པ་དང་། བརྒྱུད་པར་བཞུགས་པ་ནི་རྒྱལ་བ་རང་བྱུང་རྡོ་རྗེ་ཙམ་ལས་མ་བྱུང་བ་ལྟ་བུར་ཤེས་སོ། །འཇམ་དཔལ་བཤེས་གཉེན་མི་སྣང་
བའི་རྗེས་ཤྲཱི་སིངྷས་མན་ངག་གི་དཔེ་ཕྱུང་། ཐིག་ལེའི་སྐོར་ལ་ཕྱི་ནང་གསང་བ་ཡང་གསང་བླ་ན་མེད་པ་སྟེ་སྐོར་བཞིར་ཕྱེ་ནས་དང་པོ་གསུམ་གཏེར་དུ་སྦས། ཕྱི་མ་ཐུགས་ལ་གབ་པ་མཁའ་འགྲོའི་ལུང་གིས་སྐབས་དབྱེ་ཞིང་དེ་ཉིད་དུ་སྦས། སློབ་དཔོན་ཉིད་བསིལ་སྦྱིན་དུ་ཡོད་ན་དཔའ་བོ་དང་མཁའ་འགྲོའི་ཚོགས་རྗེར་མཛེས་པ་ཉིད་དོ། །དེ་ལ་བི་མ་ལ་མི་ཏྲ་དང་། ཛྙཱ་ན་སཱུ་ཏྲས་ཞུས་ཏེ། དང་པོ་ནི་ཁྱིམ་བདག་གི་བུ། ཕྱི་མ་ནི་གདོལ་བའི་རིགས་ལས་རབ་ཏུ་བྱུང་། གཉིས་ཀའང་མཁས་པའི་བྱ་བ་མཐར་ཕྱིན་པས་རྡོ་རྗེ་གདན་ན་པཎྜི་ཏ་ལྔ་བརྒྱའི་གཙོ་བོར་གྱུར། ཚེ་སྔོན་སྤུན་ཟླར་གྱུར་བའི་རྟེན་འབྲེལ་ལས་ཐུགས་ཤིན་ཏུ་གཅུགས། རེ་ཞིག་ན་སྐྱོ་སངས་ལ་བྱོན་པས་ནམ་མཁར་རྡོ་རྗེ་སེམས་དཔའི་ཞལ་གཟིགས། ཁྱེད་གཉིས་སྐྱེ་བ་ལྔ་བརྒྱར་པཎྜི་ཏར་གྱུར་མོད་ཀྱི་འབྲས་བུ་ཅི་ཡང་མ་ཐོབ། ད་ཚེ་གཅིག་གིས་སངས་རྒྱ་བར་འདོད་ན་རྒྱ་ནག་བྱང་ཆུབ་ཤིང་དྲུང་དུ་སོང་ཞིག་བར་བསྐུལ། བི་མ་ལ་བརྩོན་འགྲུས་ཆེ་བས་སྔོན་ལ་བརྟོལ། རྣར་རྒྱུད་དང་མན་ངག་ཕྱི་ནང་གསང་གསུམ་གྱིས་ཚིམས་ནས་ལོག །རྗེས་ལ་ཛྙཱ་ན་སཱུ་ཏྲས་བྱེན་བླ་མའི་བྱིན་རླབས་ཀྱིས་ཟླ་བ་དགུའི་ལམ་ཉིན་ལམ་ལ་བཅད། མཛེས་མཆུའི་བུམ་པ་ཁྱེར་བས་བཀྲ་ཤིས་ཁྲི་་སྒོ་ལུང་བསྟན། དེར་བརྟོལ་བ་ན་སློབ་དཔོན་བསིལ་སྦྱིན་དུར་ཁྲོད་ན་བཞུགས་སོ་ཞེས་མཁའ་འགྲོ་མས་ལུང་བསྟན་པ་བཞིན་བགྲངས། ཤྲཱི་སིངྷ་ཐོད་པའི་ཁང་བུ་བརྩེགས་པ་ན་ཁྱབ་འཇུག་གི་སྟན་ལ་རོལ་བའི་ལྟ་སྟངས་སུ་འདུག་པའི་དྲུང་དུ་སླེབ། ཕྱག་སོར་གསུམ་གྱེན་ལ་བསྟན་བྱུང་བས་གདམས་པ་ལོ་གསུམ་ན་ཐོབ་པར་གོ། དེའི་བར་བླ་མའི་ཞབས་ཏོག་བྱས། དེ་ནས་ལོ་དགུར་རྣར་རྒྱུད་དང་ཕྱི་ནང་གསང་གསུམ་པོ་གསན། འདི་ལ་དཔེ་ཞིག་འོད་ཐང་སྙམ་པ་སློབ་དཔོན་གྱིས་དགོངས་ཏེ་དཔེ་རྣམས་ཕྱུང་ནས་གནང་། ལྡོག་པར་ཆས་པ་ན་ཚིམ་མམ་གསུངས་
ཚིམས་ལགས་ཞུས་པས། གཏད་པ་མེད་གསུངས་པས་གདམས་པ་མ་རྫོགས་པར་གོ། སླར་གསོལ་བ་བཏབ་པས། སྒྲོས་བཅས་བུམ་པའི་དབང་རྫོགས་པར་བསྐུར། གསང་བ་བླ་མེད་ཀྱི་མན་ངག་ལོ་གསུམ་དུ་གནང་། གླེགས་བམ་ནི་མ་བསྟན་ཏེ་དུས་ལ་བབ་པའི་ཚེ་ཁྱོད་ལ་སྣང་བར་འགྱུར་རོ། །ཞེས་ལུང་བསྟན། ང་ནི་གདམས་ངག་ཀྱང་རྫོགས་པར་ཐོབ། ཉམས་སུ་བླངས་བཞིན་པས་བླ་མའི་ཞབས་ཏོག་བྱའོ་སྙམ་པ་ན། སྣོད་ཁྱད་པར་ཅན་དུ་གཟིགས་ནས་སྤྲོས་མེད་ཀྱི་དབང་རྫོགས་པར་གནང་། ལོ་གཅིག་ཏུ་འཁོར་འདས་རུ་ཤན་འབྱེད་པའི་སྤྱོད་པ་ཚང་དུ་ཕྱིན་པར་བྱས། གདམས་པ་དུས་གཅིག་ཏུ་མི་སྟོན་པ་ཐེག་པའི་རྒྱལ་པོ་འདིའི་རིང་ལུགས་ཡིན་པས། སླར་ཤིན་ཏུ་སྤྲོས་མེད་ཀྱི་དབང་བསྐུར་བས་གནས་ལུགས་ཡིད་དཔྱོད་ལ་མི་རེ་བའི་ངེས་ཤེས་ཁྱད་པར་ཅན་དུ་སྐྱེས། མཐར་རབ་ཏུ་སྤྲོས་མེད་ཀྱི་དབང་རྫོགས་པ་ན་རིག་པ་ཚད་ལ་ཕེབས། ལོ་བཅུ་དྲུག་གི་བར་དུ་བླ་མའི་མཛད་སྤྱོད་ལྟ་ཞིང་ཉམས་སུ་བླངས། དེའི་ཚེ་སློབ་དཔོན་ནི་བརྟུལ་ཞུགས་ཀྱིས་ཀུན་ཏུ་སྤྱོད་པ་རྒྱ་མཚོའི་གནས་ལ་ཞུགས་ཏེ་འཇིགས་སུ་རུང་བའི་དུར་ཁྲོད་རྣམས་མྱུལ། འབྱུང་བཞི་ཟད་པར་གྱི་སྤྲུལ་བསྒྱུར་དང་། ཕྱོགས་ལས་རྣམ་རྒྱལ་གྱི་སྤྱོད་པས་མཁའ་འགྲོ་དང་། འབྱུང་པོ་དང་། ཤ་ཟའི་དབུས་ན་བག་ཚ་བ་མེད་པར་བཞུགས་ཞེས་གྲགས་སོ། །དེར་རྒྱལ་པོ་དཔལ་བྱིན་ཞེས་བྱ་བ་དད་དེ་སྤྱན་དྲངས་པ་ན། སེངྒེ་དཀར་མོ་ཡན་ལག་དྲུག་པ་ལ་བཅིབས་ཏེ་གཤེགས། རེ་ཞིག་ན་ས་གཡོ་བ་དང་། སྒྲ་དང་འོད་ཆེན་པོ་བྱུང་བས་སྐུ་ཡལ་བར་ཤེས་ཏེ་ཛྙཱ་ན་སཱུ་ཏྲས་གསོལ་བ་བཏབ་པས། ཞལ་ཆེམས་གཟེར་བུ་བདུན་པ་ཕྱག་ཏུ་བབས། གསང་བའི་མན་ངག་རྣམས་བཀྲ་ཤིས་ཁྲི་སྒོའི་ཀ་བའི་ཁོར་ནས་ལོངས་ལ་དུར་ཁྲོད་བསིང་གི་ནགས་སུ་སོང་ཞིག་པར་ལུང་བསྟན་ཐོབ། དེར་སྔོན་གྱི་ལུང་བསྟན་བཞིན་གླེགས་བམ་རྣམས་ཕྱུང་། རྡོ་རྗེ་གདན་
གྱི་ཤར་ཕྱོགས་ནས་རིང་པོར་ཐལ་བ་ན་དུར་ཁྲོད་དེ་ཡོང་སར་བྱོན་ནས་མཁའ་འགྲོ་མ་རྣམས་ལ་ཆོས་སྟོན་ཅིང་བཞུགས་སོ། །འདིའི་ཚེ་པཎྜི་ཏ་གྲུང་བའི་རྣལ་འབྱོར་ཆེན་པོའི་ས་ལ་དུར་ཁྲོད་དུ་སྤྱོད་པ་ལ་རྒྱུ་བའི་ཚེ། མཁའ་འགྲོ་མ་དཔལ་གྱི་བློ་གྲོས་ཞེས་བྱ་བས་སྔ་མ་ནི་ཐུན་མོང་གི་མན་ངག་ཡིན་གྱི། ཡང་གསང་བླ་ན་མེད་པ་ཐུགས་ལ་གབ་པ་ཡོད་པས་བསིང་གི་དུར་ཁྲོད་དུ་སོང་ཞིག་པར་བསྐུལ། འདི་ལྟར་སྐྱེས་བུ་དམ་པ་རྣམས་ནི་གདམས་པ་དང་ཡེ་ཤེས་ཐོབ་པའི་གནས་ལ་ཤིན་ཏུ་གུས་པར་སྟོན་པས། རྫུ་འཕྲུལ་གྱི་ཀུན་ཏུ་སྤྱོད་པས་སྐད་ཅིག་ལ་གཤེགས་ཏེ། མཉམ་འགྲོགས་དང་ཡིད་གཉིས་སྤངས་ནས་རྗེས་སུ་འཛིན་པར་ཞུས་པ་ན། མཛོད་སྤུ་ནས་འོད་ཟེར་བགྱི། སྤྱན་གྱེན་དུ་ལྡོག་པ་ཙམ་གྱིས་ལོངས་སྐུའི་ཞིང་ཁམས་བསྟན་པས་དད་པ་ཤིན་ཏུ་ཐོབ། སྤྲོས་བཅས་ཀྱི་དབང་བསྐུར་བའི་མོད་ལ་སློབ་དཔོན་བི་མ་ལའི་མཛོད་སྤུའི་སྒོ་ཕྱེ། སྤྲོས་མེད་ཀྱི་དབང་བསྐུར་བས་བ་འི་སྒོ་ནས་འོད་ཟེར་བྱུང་། ཟླ་བ་བཅུ་འཁོར་འདས་རུ་ཤན་ཕྱེ་ནས་ཤིན་ཏུ་སྤྲོས་མེད་ཀྱི་དབང་བསྐུར་བས་ཡོན་ཏན་ཁྱད་པར་ཅན་སྐྱེས། ཤངས་ཀྱི་རྩེར་ཡི་གེ་ཨ་དཀར་པོ་འཐེགས་ལ་ཁད་པ་བྱུང་། རབ་ཏུ་སྤྲོས་མེད་ཀྱི་དབང་བསྐུར་བས་རིག་པ་གཞི་ཐོག་ལས་རྣམ་པར་གྲོལ། འདི་ཙམ་ན་སློབ་དཔོན་གཉིས་ཀ་དགུང་ལོ་བརྒྱ་དང་གསུམ་ཡིན་ཞེས་གྲགས། བརྒྱ་དང་བཅུ་གསུམ་ཁོ་ན་ཚེ་ཛྙཱན་སཱུ་ཊ་འཇའ་ལུས་འཕོ་བ་ཆེན་པོའི་སྐུར་གཤེགས་ནས་འདས་རྗེས་བི་མ་ལའི་ཕྱག་ཏུ་བབས་པས་སློབ་དཔོན་དང་དགོངས་པ་མཉམ། དེ་ནས་བི་མ་ལས་རྒྱལ་པོ་དྷརྨ་པཱ་ལ་དང་། ཡུལ་ཀ་མདུའི་རྒྱལ་པོ་གཉིས་ཀྱི་མཆོད་གནས་ལོ་ཉི་ཤུ་རེ་མཛད། སླར་རབ་ཏུ་སྣང་བྱེད་ཅེས་བྱ་བར་སྤྱོད་པ་ལ་གཤེགས་ནས་མཁའ་འགྲོ་མའི་ཚོགས་དཔག་ཏུ་མེད་པ་དབང་དུ་བསྡུ་བཞིན་པར་གསང་བ་མན་ངག་གི་དཔེ་ཚར་གསུམ་བྲིས། གཅིག་ཨོ་རྒྱན་གྱི་ཡུལ་གསེར་གྱི་བྱེ་མ་བརྡལ་བའི་གླིང་དུ་སྦས། གཅིག་ཁ་ཆེ་
མ་ཟད་འཁོབ་རིགས་ངན་གྱི་གྲོང་ཁྱེར་དང་ཉེ་བའི་བྲག་སྐྱིབས་སུ་སྦས། གཅིག་དུར་ཁྲོད་དེ་ཉིད་དུ་རྒྱལས་བཏབ་པ། སྤྱིར་འཛམ་བུའི་གླིང་ན་དུར་ཁྲོད་ཆེན་པོ་བརྒྱད་ཀྱིས་དབུས་མཁའ་འགྲོ་ངེས་པར་འདུ་བའི་དུར་ཁྲོད་བརྒྱ་དང་བཅུ་གསུམ་ཡོད། ཀུན་ཀྱང་མི་མ་ཡིན་གདུག་པ་ཅན་དང་། མཁའ་འགྲོ་མས་དབང་བྱས་པས་གདུག་རྩུབ་ཆེ། སྲོག་ལ་བར་གཅོད་ཤིན་ཏུ་རྩུབ་ཅིང་སྐྱི་གཡའ་བ་ཅན། ཨོ་རྒྱན་དང་། ཟ་ཧོར་དང་། ཤམྦྷ་ལ་སོགས་འཛམ་བུ་གླིང་གི་ཟུབ་པའི་གནས་ཐམས་ཅད་དུ་སློབ་དཔོན་བི་མ་ལས་སྤྱོད་པ་མཛད་པས། ཉེ་བའི་འཐུང་སྤྱོད་ཙཱ་རི་ཏྲ་ན་འང་མུ་སྟེགས་ཀྱི་རྣལ་འབྱོར་པ་བཏུལ་བའི་ཞབས་རྗེས་ཡོད་པར་གྲགས། སློབ་དཔོན་བི་མ་ལས་དགུང་ལོ་ཉིས་བརྒྱར་ཉེ་བའི་ཚེ་བཙན་པོ་ཁྲི་སྲོང་ལྡེའུ་བཙན་གྱིས་བོད་ན་བསྟན་པ་བཙུགས་པའི་སྐབས་སུ་གྱུར། བཙན་པོ་ཉིད་སྐྱེ་བ་སྔ་མ་ལ་རྒྱ་གར་ན་དགེ་སློང་ཨ་བ་དྷུ་ཏི་བར་གྱུར་བའི་བག་ཆགས་ལས་རྒྱུ་འབྲས་བྱ་རྩོལ་ལས་འདས་པའི་ཐེག་པ་རྒྱ་གར་ན་བལྟར་མི་མངོན་པར་ཡོད་པའང་མཁྱེན། ཁྱད་པར་ཉང་ཏིང་འཛིན་བཟང་པོ་ཞེས་བྱ་བ། མངའ་བདག་གཞོན་ནུར་བརྩལ་བའི་བུར་རྫིིར་གྱུར་ལ། ཕྱིས་རབ་ཏུ་བྱུང་ནས་ལོ་བདུན་དུ་མཉམ་པར་གཞག་པས་ཏིང་ངེ་འཛིན་གྱིས་འཚོ་ཞིང་། ཤའི་སྤྱན་གྱིས་གླིང་བཞི་ཅིག་ཅར་དུ་གཟིགས་པས་ཉང་བ་ན་ཤའི་སྤྱན་ཅན་ཞེས་གྲགས་པ་དེས་ལུང་བསྟན་ཞིང་བསྐུལ་ནས། རྒྱལ་པོས་བི་མ་ལ་རྒྱ་གར་མ་ཧཱ་རཱ་ཛའི་མཆོད་གནས་སུ་བཞུགས་པ་ལ་གསེར་གྱི་སྐྱེས་བཟང་པོ་དང་བཀའ་རྟགས་མཛད་ནས། ལོ་ཙཱ་བ་སྐ་ཅོག་གཉིས་སྤྱན་འདྲེན་དུ་མངགས། བོད་གདུལ་བྱར་གཟིགས་ནས་ཨ་ཙར་ས་སྙིང་གཡོག་ཏུ་ཁྲིད་ནས་བྱོན། རྒྱ་གར་བ་རྣམས་ཀྱི་རྨི་ལམ་དད་ཆུ་ཚོད་ཀྱི་རྩིས་འཁྲུགས། རྩི་ཤིང་མེ་ཏོག་རྣམས་ཀྱང་བོད་དུ་ཁ་བསྟན། མཁའ་འགྲོ་མ་རྣམས་ཀྱང་ཕྲག་པ་དོག་པས་མཁས་པ་པཎྜི་ཏས་འབྲས་བུའི་ཆོས་ཁྱེར་ནས་བོད་དུ་སོང་བས་ལན་ཟེར། དེར་
བོད་ཐེ་ཚོམ་བསྐྱེད་པོའི་རྐང་མགྱོགས་པ་བཏང་ནས་ཕྲ་མེན་གྱི་ངན་སྔགས་མཁན་པོ་སོང་ངོ་ཞེས་བི་མ་ལའི་སྔོན་དུ་བརྟོལ་ནས་དབྱེན་ཆེན་པོ་བཅོས་པས། པཎྜི་ཏ་བསམ་ཡས་སུ་ཕེབས་ཀྱང་བོད་རྣམས་ཐེ་ཚོམ་སྐྱེས་པས་བཙན་པོ་དང་མ་མཇལ། སྤྱིར་སློབ་དཔོན་འདི་དགའ་རབ་རྡོ་རྗེ་དང་ལན་བདུན་མཇལ། རྫོགས་པ་ཆེན་པོ་ལ་གྲུབ་པ་ཤིན་ཏུ་བརྙེས་པས། འཁོར་འདས་བློས་བཅོས་ཤིང་རྒྱུ་འབྲས་ལས་འདས་པར་སྟོན་ཕྱིར་དབུ་ཚལ་དུ་རྣམ་སྣང་གི་ལྡེར་ཚོལ་ཕྱག་མཛད་པས་ཐལ་ཕུང་དུ་སོང་། སླར་ལ་ཐེ་ཚོམ་ཆེར་སོང་བས་དབུ་ཞྭ་བསྐོན་ཞིང་ཕྱག་རེག་པ་ཙམ་གྱིས་སྔར་ལས་གཟི་བྱིན་ཆེ་བར་བྱུང་། རྟགས་རྣལ་འབྱོར་པར་ཡོད་པས་ཕྱི་རོལ་བར་དོགས་པའི་ཉེས་པ་སེལ་ཕྱིར་ཡིན་ཡང་ཟེར་ཏེ་ཇི་ལྟར་ཡང་། རྒྱལ་བློན་ཡིད་ཆེས་མ་གྱུར་བས། སྐྱབས་འགྲོ་ཡན་ལག་དྲུག་པ་བྱས། གསུངས་པ་ན་མེད། རྒྱལ་པོ་སླར་ལ་དད་དེ་རྒྱུ་འབྲས་ཀྱི་ཆོས་་དང་། བྱེ་བྲག་ཏུ་གཉགས་ཛྙཱ་ནས་ལོ་ཙཱ་མཛད་དེ་སྒྱུ་འཕྲུལ། གཡུ་སྒྲ་དང་བཅས་ཏེ་སེམས་སྡེ་ཕྱི་འགྱུར་བཅུ་གསུམ་བསྒྱུར། མན་ངག་སྙིང་ཏིག་རྗེ་བློན་གཉིས་སོགས་སྐལ་བ་དང་ལྡན་པ་འགའ་ཙམ་ལའང་ལྐོག་ཆོས་སུ་གདམས་པ་འདི་འཐད་པ་ཀུན་མཁྱེན་ཆེན་པོ་བཞེད། ཆོས་འདི་བློ་ལ་ཆུད་པ་དང་། ལྟ་སྤྱོད་ཟུད་འབྲེལ་དུ་ཉམས་སུ་བླངས་ནུས་པ་ཤིན་ཏུ་དཀོན་པར་གཟིགས་ནས་གསང་བ་སྙིང་ཐིག་བོད་ཡིག་ཏུ་བྱས་ནས་མཆིམས་པུའི་དགེ་གོང་དུ་སྦས། རྒྱ་དཔེ་རྣམས་ཕྱི་མའི་དུས་མན་ངག་བསླད་པ་ཅན་འོང་བར་གཟིགས་ནས་ཞུ་དག་གི་ཆེད་དུ་སྦས་པ། ཞུས་དག་པར་བྱེད་ཅིང་རྒྱ་ཆེར་འགྲེལ་བ་པོ་ཀུན་མཁྱེན་ངག་གི་དབང་པོ་བསྟན་པ་མི་ནུབ་པའི་རྒྱལ་མཚན་དུ་བྱོན་ཏོ། །བི་མ་ལ་སྔ་ཕྱི་གཉིས་སུ་བྱོན་པར་འདོད་པ་ནི། སློབ་དཔོན་འདི་མདོ་སྔགས་ཀྱི་ཆོས་རྒྱ་མཚོ་ལྟ་བུ་ལ་མཁས་པས་སོ་སོ་
ཐར་བའི་རྒྱ་ཆེར་འགྲེལ་ལ་སོགས་པའི་བསྟན་བཅོས་དགག་པར་མི་ནུས་པ་དག་མཆིས་པ། རྫོགས་པ་ཆེན་པོ་ཕྱོགས་གཞན་དུ་འདུལ་བར་འདོད་པ་དག་གིས་ཀུན་སློང་མིན་ན་རུང་སྟེ། དོན་ལ་ཤེས་རབ་སྙིང་པོའི་རྒྱ་ཆེར་འགྲེལ་དང་། རིམ་གྱིས་དང་། ཅིག་ཅར་འཇུག་པའི་སྒོ་མ་དོན་གཉིས་ཀྱང་སློབ་དཔོན་འདིས་མཛད་ཅིང་། ཡེར་བའི་དཀར་ཆགས་ལས་རང་བྱུང་གི་མཁན་པོ་མཛད་པའི་ལོ་རྒྱུས་བསྙད་པ་སོགས་རྟགས་ཀྱང་གང་ཡིན་བསྒྲུབ་དཀའ་ལ། སྤྱིར་འཕགས་པའི་གནས་བརྟན་བཅུ་དྲུག་དང་། ཇོ་བོ་ཨ་ཏི་ཤ་ཡང་བཤུལ་ལམ་ལ་ན་བཟའ་དཀར་པོ་ཡིན་ལ། བོད་དེ་ལ་ཁྱིམ་པར་འཛིན་པ་གསན་པས། ན་བཟའ་བརྗེས་ནས་ཕེབས་པ་སོགས་རྟགས་འབའ་ཞིག་ལ་ངེས་པ་ཁོ་ནའང་ཡོད་དཀའོ། །དེ་ལྟར་ལོ་བཅུ་གསུམ་བོད་ཡུལ་དུ་བཞུགས་ནས་སླར་རྒྱ་ནག་རི་བོ་རྩེ་ལྔར་གཤེགས། སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་ལ་གནས་དེར་འཕོ་བ་ཆེན་པོའི་སྐུར་བཞུགས། ལོ་བརྒྱ་བརྒྱ་ན་བོད་དུ་སྐུའི་བཀོད་པའི་བསྟན་ནས་རྫོགས་པ་ཆེན་པོའི་ལྟ་སྐོམ་ནོར་བ་བསལ་བར་བྱེད། མ་འོངས་པ་ན་བསྟན་པའི་བཙས་གསུམ་འཇིག་རྟེན་གཞན་དུ་འཕོ་བའི་ཆོ་རྡོ་རྗེ་གདན་དུ་འོད་སྐུར་དེངས་པར་འགྱུར་རོ། །ཨ་ཙ་ར་ས་སྙིང་མཆིམས་ཕུར་གྲོངས་པ་ལའང་ལྟས་ཁྱད་པར་ཅན་བྱུང་ནས་བི་མ་ལ་གྲོངས་པར་ནོར་བར་བྱུང་ངོ། །དེ་ལྟར་བི་མ་ལ་གཤེགས་ནས་ལོ་ལྔ་བཅུ་རྩ་ལྡན། དེས་མན་ངག་རྗེས་སུ་གདམས་པ་ཉང་ཏིང་འཛིན་བཟང་པོ་རྒྱུད་རྣམ་ཡང་དག་སྟེ་ཕུང་པོ་ཟག་མེད་དུ་གྱུར། རྡོ་རྗེ་ལེགས་པས་ཁམས་སུ་སེར་བ་ཕབ་པའི་ནས་རྔ་མོའི་ཁལ་རྒྱབ་བརྒྱ་བཀལ་བྱུང་བ་ལ་རྡོ་རྗེ་འཕངས་པས། དམ་ཚིག་དྲན་ཏེ་ནས་རྣམས་ལས་ཕྲལ་ཕུལ། དེ་ལ་རྒྱུ་བྱས་ནས་དབུ་རུ་ཞྭི་ལྷ་ཁང་བཞེངས་སོ། །གདམས་པ་རྣམས་ཀེ་ཚད་རིམ་གསུམ་གྱི་སྒོའི་ཀ་བའི་ཁོང་སེང་དུ་སྒོས་
སྙན་བརྒྱུད་སྲོལ་མ་ཉམས་པའི་ཆེད་དུ་འབྲ་རིན་ཆེན་འབར་བ་ལ་བཤད། ཉང་བན་ཆེན་པོ་ལྷ་ས་བྲག་ལྷའི་ཕུག་ཏུ་འཇའ་ལུས་འཕོ་བ་ཆེན་པོའི་སྐུར་ཡལ་ལོ། །མན་ངག་སྙིང་གི་ཐིག་ལེ་སྐབས་ཀྱི་གཏམ་མོ། ། སྡོགས་པ་ཆེན་པོ་སེམས་ཕྱོགས་སུ་གྲགས་པ་ནི། དུས་དེར་བསྟན་བཅོས་བྱེ་བྲག་བཤད་མཛོད་ཆེན་མོ་བསྒྱུར་བའི་རྣམ་དཔྱོད་བསམ་གྱིས་མི་ཁྱབ་པ་གཅིག་པོའི་གནས་ལའང་ཕྱིས་རྡོག་ལོ་ཆེན་པོ་བློ་ལྡན་ཤེས་རབ་ཀྱིས། བཻ་རོ་ཙ་ན་ནམ་མཁའི་མཐའ་དང་མཉམ། སྐ་ཅོག་རྣམ་གཉིས་ཉི་ཟླ་ཟུང་གཅིག་འདྲ། །རིན་ཆེན་བཟང་པོ་ཐོ་རངས་སྐར་ཆེན་ཙམ། །ཞེས་བསྔགས་པའི་བ་དན་དཀར་པོར་གཟེངས་སུ་མཐོ་བར་མཛད་ཅིང་། སངས་རྒྱས་ཐམས་ཅད་ཀྱི་གསུང་གི་གསང་བ་བསམ་གྱིས་མི་ཁྱབ་པའི་ཡེ་ཤེས་རྡོ་རྗེ། མཁྱེན་པ་དང་རྫུ་འཕྲུལ་དཔག་ཏུ་མེད་པའི་སྤྲུལ་པའི་ལོ་ཙཱ་བཻ་རོ་ཙ་ན་དང་། གཙང་ལེགས་གྲུབ་གཉིས་བཙན་པོའི་ཐུགས་བསྐྱེད་ཀྱི་ཤིང་རྟ་ལས་མན་ངག་ཡིད་བཞིན་གྱི་ནོར་བུ་འདྲེན་པའི་དེད་དཔོན་དམ་པར་རྒྱ་གར་འཕགས་པའི་ཡུལ་ལ་ཆས་སོ། །དེར་བཻ་རོ་ལ་ལམ་དུ། མེ་དང་། ཆུ་དང་། དུག་དང་། མཚོན་དང་། ཁང་བརྡིབ་པ་དང་། གཅན་ཕྲང་བས་སྲོག་ལ་རྒོལ་བ་ལ་སོགས་འཆི་ལ་ཐུག་པའི་ཡེ་འབྲོག་ཆེན་པོ་ལྔ་བཅུ་རྩ་བདུན་བྱུང་ཡང་། ལ་ལ་ནི་དཀའ་སྤྱད་ཁུར་དུ་བཟོད་པའི་སྙིང་སྟོབས་ཀྱིས་བཟློག། ལ་ལ་ནི་སྙིང་རྗེ་ཆེན་པོའི་གཞན་དབང་གིས་བསལ། ལ་ལ་ནི་རྫུ་འཕྲུལ་གྱི་བཀོད་པ་ཟད་མི་ཤེས་པས་སྤྲུལ་ཞིང་བསྒྱུར་བ་སོགས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལས་ཉམས་པ་མེད་དོ། །དེར་སློབ་དཔོན་ཆེན་པོ་ཤྲཱི་སིདྷིའི་རྫུ་འཕྲུལ་གྱི་བཀོད་པས་མངོན་པར་འདུ་བྱས་པ། དྷ་ན་ཀོ་ཤའི་ཙན་དན་བསིལ་བྱེད་ཀྱི་ནགས་རིན་པོ་ཆེ་ཟ་མ་ཏོག་སྤུངས་པའི་ཁབ་ཅེས་བྱ་བ། དཔེར་ན་སྒྱུ་མ་མཁན་བཟང་པོས་
བདེ་གཅག་གི་སྟོན་པ་སྒྱུ་མའི་མིག་འཕྲུལ་གྱིས་བསླུབ་རབ་རྩམས་པའི་ཚེ། བཟང་པོའི་འདུན་ཁང་ཡང་སྐུ་ལུས་ཀྱི་བཀོད་པས་མཛེས་པར་བྱས། མ་སྐྱེས་དགྲའི་ཁྱིམ་ན་ཆོས་སྟོན་གསོལ། ཀུན་ཏུ་རྒྱུའི་སྲང་ན་བསོད་སྙོམས་བྱེད། འཚོ་བྱེད་ཀྱི་ཚལ་ན་འཁོར་རྣམ་པ་བཞི་ལ་ཆོས་སྟོན། སུམ་ཅུ་རྩ་གསུམ་ན་ལྷ་རྣམས་ལ་ཆོས་སྟོན་མས་མཚོན་པར་ཀེ་ཚད་ཆེན་པོ་རིམས་དགུའི་ཡང་སྟེང་ན་དགའ་རབ་རྡོ་རྗེ་ལ་སོགས་པ་བཞུགས་པའི་གནས་སུ་བརྟོལ་ཏོ། །འདི་ཚོང་དཔོན་རིན་ཆེན་གཙུག་ཕུད་ཀྱི་ཁང་བརྩེགས་བཅུ་པའི་ཡང་ཐོག་ན་སངས་རྒྱས་རྣམས་ཆོས་འགྲོ་བ་དང་། བརྩེགས་དགུ་ས་ན་ས་བཅུ་པ་རྣམས་གནས་པ་དང་ཆོས་མཚུངས་པའི་གནས་ཕལ་པ་མིན་པར་དཔའ་བོ་གཙུག་ཕྲེང་འཆད་པ་ནི་རྣམ་དཔྱོད་ཆེ། དེར་བཻ་རོས་གསེར་རྣམས་ས་འོག་ཏུ་བསྐུངས། མན་ངག་གི་ཆོས་ལ་སུ་མཁས་དྲིས་པས། མཁས་པ་ཉེར་ལྔའི་སྲས། པཎྜིི་ཏ་སྟོང་གི་སློབ་དཔོན་ཤྲཱི་སིངྷ་ཉིད་ཡིན་ཟེར། ཆུ་ལེན་གྱི་རྣལ་འབྱོར་མ་ཞིག་བྱུང་བར་འཕྲིན་དུ་མར་བརྫངས་ཀྱང་ལན་མ་བྱུང་། ལན་ཅིག་བཻ་རོས་ལྟ་སྟངས་བྱས་པས་དེའི་ཆུ་བན་ས་ལ་འབྱར། དེ་ན་རེ་ཁྱོད་ཀྱང་རྫུ་འཕྲུལ་ཅན་ཞིག་སྟེ་བདག་ལའང་འདི་ལྟ་བུ་ཟེར་ནས་རང་གི་ཟ་འཕྱེ་ནས་རྡོ་རྗེ་དབྱིངས་ཀྱི་ལྷ་སོ་བདུན་བཀྲལ་མ་མེ་བསྟན། སླར་བརྡ་ཐབས་ཀྱིས་ནང་དུ་བརྟོལ་བར་གྱིས། བརྡ་འདི་ལ་ལན་འདི་སྟོན་གྱི་གསང་ཚིག་བསླབས། དེར་སྐབས་འཚལ་ནས་ནང་དུ་ཚམ་ཚོམ་མེད་པར་བྱོན། ཀེ་ཚང་འོག་མའི་མཁས་པ་རྣམས་ཕྱག་དང་བརྡ་ལན་གྱིས་མཉེས་པར་བྱས། ནངས་པར་ཤྲཱི་སིངྷ་དང་མཇལ། གསེར་གྱི་ཕྱག་རྟེན་དཔག་ཏུ་མེད་པ་ཕུལ། རྩོལ་མེད་ཀྱི་ཐེག་པ་གསུང་བར་གསོལ་བ་བཏབ་པས། ཆོས་ཀྱི་བཀའ་གཙིགས་གསལ་བའི་ཕྱིར་དོ་ནུབ་བརྟག་གིས་གསུང་། ནངས་པར་དུས་གསུམ་གྱི་ལུང་བསྟན་དང་གཙིགས་རྒྱ་
བཏབ་ནས་ད་ནི་ཁྱོད་ལ་བསྟན་པར་བྱ་སྟེ། གསང་བ་མ་བསྲུངས་ན་མན་ངག་འདི་གང་དགར་སྤྱད་དུ་མེད། རྒྱལ་པོའི་ཆད་པས་འུ་ཅག་གསུམ་ཀའི་སྲོག་ལ་ཡོང་མཆི། དེས་ན་པཎྜི་ཏ་བརྒྱ་ལ་གསེར་གྱི་ཕྱག་རྟེན་ཕུལ་ལ་རྒྱུ་འབྲས་ཀྱི་ཆོས་ཉོན། དེ་ཁོ་ན་གཉེར་བྱའི་གཙོ་བོ་ཡིན་པ་ལྟར་གྱིས། མཚན་མོ་མན་ངག་གི་ཆོས་བསྟན་གྱིས་གསུངས། དེར་པྲ་སན་ཤིན་ཏུ་བཙན་པར་ཡོད་པས་དཔྱད་མི་བཟོད་པའི་རྟེན་འབྲེལ་བྱས། སློབ་དཔོན་གྱིས་མཚན་མོ་གསང་བ་གདམས་པའི་མན་ངག་སེམས་སྡེ་བཅོ་བརྒྱད་རྣམས་དར་དཀར་ལར་དཀར་མོའི་བོ་མས་བྲིས། དུད་པས་བདུགས་ན་ཡི་གེ་གསལ་བའི་ཐབས་བྱས། བམ་པོ་མང་པོ་ཡུད་ཡུད་ལ་ཚར་བར་མཛད། གཙང་རིས་ཀྱི་མགོན་པོ་མ་ཚང་བ་མེད་པ་དང་། གསང་སྔགས་ཕྱི་ནང་གི་སྲུང་མ་ཐམས་ཅད་ལགས་ཏེ་བསྟན་པ་འདི་བསྲུང་བའི་ཆད་ཐོ་བླངས་ཤིང་། ཤིན་ཏུ་གསང་བའི་རྒྱས་བཏབ་བོ། །དེའི་ཚེ་གཙང་བ་ན་ལེགས་གྲུབ་མན་ངག་དེ་ཙམ་གྱིས་ཚིམས། རྒྱལ་པོ་ལ་ངོ་སོ་འདོང་ནས་སྔོན་ལ་དེངས་པ་ལམ་དུ་གཅན་ཕྲང་བས་བསད། བཻ་རོ་ཙ་ན་སྙིང་སྟོབས་འགྲན་ཟླ་མེད་པས་ད་དུང་མཚིམས་པར་བཞུགས་པས། སློབ་དཔོན་གྱིས་ནའམ་གསུང་བི་རོས་མཐོང་སྟེ་མ་ཕྲད་རང་སེམས་ན། མྱངས་ཏེ་མཚིམས་རང་སེམས་ན་བྱ་བ་ལ་སོགས་པ་དང་། ལྟ་བ་ཕྱོགས་རིས་མེད་པ་དེ། །ལས་དང་རྟོག་པའི་འཕྲང་ལ་རྡུགས། །སྤྱོད་པ་བླང་དོར་མེད་པ་དེ། །འདོད་རྩོལ་གཉིས་ཀྱི་འཕྲང་ལ་རྡུགས། །ལམ་ལ་བགྲོད་དུ་མེད་པ་དེ། །ལུང་དང་རིག་པའི་འཕྲང་ལ་རྡུགས། །རང་བྱུང་ཡེ་ཤེས་ཆེན་པོ་དེ། །བག་ཆགས་སྟུག་པོའི་འཕྲང་ལ་རྡུགས། །དུས་གསུམ་སངས་རྒྱས་དགོངས་པ་དེ།
བྱིང་རྒོད་གཉིས་ཀྱི་འཕྲང་ལ་རྡུགས། །འབྲས་བུ་སྐུ་གསུམ་ལྷུན་གྲུབ་དེ། །བརྡ་དོན་ཕྲད་པའི་འཕྲང་ལ་རྡུགས། །རྫོགས་ཆེན་བྱ་བྲལ་ལྷུན་གྲུབ་དེ། །བརྡ་དོན་དཔྲལ་བའི་འཕྲང་ལ་རྡུགས། །སངས་རྒྱས་སྤྱོད་ཡུལ་རང་དབང་དེ། །སྤྱི་བླུགས་ཚངས་པའི་དབང་ལ་རྡུགས། །ཆ་ལ་སེམས་སྡེ་བཅོ་བརྒྱད་པོས། །འབྲང་བརྒྱད་བསྐྱེལ་མ་མ་གཤོགས་པས། །བདག་ཉིད་བཻ་རོ་ཙ་ན་བ། །ཡུལ་དུ་འགྲོ་བའི་འཕྲད་ལ་རྡུགས། །ཞེས་གསུངས། འདི་ནི་ཚིག་ཚོན་པོ་བླ་ན་མེད་པར་སྣང་སྟེ་སྤྱིར་སྔགས་ཀྱི་རྡོ་རྗེའི་གནས་ཆེན་པོ་རྣམས་དང་། ཁྱད་པར་ཐེག་པའི་རྒྱལ་པོ་འདིའི་དགོངས་པ་ལ་མཁས་སུ་རློམ་པའི་རྟོག་དཔྱོད་ཅན་རྣམས་ཀྱིས་ཀུན་འབྱུང་གི་བློས་གཞལ་ན་རྒྱུ་འབྲས་རྣམ་པ་འགལ་བ་ལྟར་འཆར་བའི་མ་ཚང་དང་། གོལ་ས་མ་ལུས་པ་འདིས་བསྟན་ཏོ། །དེར་སློབ་དཔོན་ཤྲཱི་སིངྷས་རྒྱུད་སྡེ་དྲུག་ཅུའི་དབང་དང་མན་ངག་བྱིན། འབྲས་བུ་རང་ཆས་སུ་སྟོན་པ་རྒྱ་མཚོའི་ཀློང་ལ་སོགས་པ་བསྟན་པས་རྟོགས་པའི་མཐར་ཕྱིན། ད་དུང་མ་ཚིམས་པ་ལྟར་མཛད་ནས་ཆད་ལ་བོར་བས། ཆོས་ཀྱི་དབྱིངས་ལ་ཟད་མེད་ཀྱང་། །དེ་བཞིན་ཉིད་ན་གཅིག་ཤེས་ན། །མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་སིདྡྷི་ཀན། །ཞེས་གསུངས་ནས་གདམས་པ་མིག་འབྲས་ལྟར་བཙའ་བ། ཁོང་སྙིང་ཁྲག་ལྟར་བཙའ་བ། སྲོག་ལྟར་བཙའ་བ་སྟེ་བཙའ་ལུགས་གསུམ། དེ་བཞིན་དུ་བྱིན་པའི་གནས་བཞི། མི་སྦྱིན་པའི་གནས་བཞི་ལེགས་པར་གདམས། དགའ་རབ་རྡོ་རྗེ་དང་མཇལ་བའི་ཕུང་བསྟན་ཐོབ་པས་དེ་ཉིད་དུ་བཙལ་ཡང་མ་རྙེད། མཁའ་འགྲོའི་ལུང་གིས་ཨོ་རྒྱན་དུ་སོང་ཞིག་པར་སྐབས་དབྱེ་བས། དྷཱུ་མ་ཐཱ་ལའི་དུར་ཁྲོད་ཆེན་པོར། སློབ་དཔོན་དགའ་རབ་རྡོ་རྗེ་དང་མཇལ་ནས་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞིའི་དངོས་གྲུབ་
ཐོབ་ཅིང་སློབ་དཔོན་འོད་ཕུང་དུ་ཡལ་ལོ། །བོད་འདིར་བསམ་གྱིས་མི་ཁྱབ་པའི་ཆོས་ཉིད་བློར་མི་གནས་པས་ཐ་མལ་གྱི་རྟོག་དཔྱོད་ཁོ་ནས་ཆོས་ཀྱི་ཚིག་དོན་འཇལ་བ་བྱུང་མོད། འདིར་དགའ་རབ་རྡོ་རྗེ་གེ་ཚང་དང་བོན་བཞུགས་པས་སོ་སྙམ་ན། མཆོག་གཟིགས་ཀྱི་གྲུབ་པའི་དབང་ཕྱུག་རྣམས་ལ་ཨོ་རྒྱན་ལས་འོག་མིན་ཡང་ལོ་ཟླས་བཅད་པའི་ཡུལ་ན་མེད་དེ། འདིར་སློབ་དཔོན་བཻ་རོ་ཙན་ས་གནས་དེ་ཉིད་དུ་རྟོགས་གྲོལ་དུས་མཉམ་གྱི་དངོས་གྲུབ་ཆེན་པོ་བརྙེས་པས་ཨོ་རྒྱན་གྱི་ཡུལ་ལ་དྲན་པ་ཉེ་བར་གཞག་ནས་གོམ་པ་གཅིག་ཙམ་ཡང་འཕགས་པའི་གཏན་ཚིགས་བསྒྲུབ་པར་མི་བྱའོ། །དཔེར་ན་ཏེ་ལོ་པས་ནཱ་རོ་པ་རིམ་པ་མང་པོའི་ཡང་ཐོག་ནས་བསྐྱུར་ཟེར་བ། དོན་ལ་རྡེའུ་གཅིག་གི་སྟེང་ནས་ཀྱང་ལྷུང་བ་མེད་པའི་ཆོས་ཉིད་རྣལ་འབྱོར་དབང་པོ་ཨ་ནནྟས་རང་གི་རྣམ་ཐར་ན་བཀོད་པ་བཞིན་ནོ། །དེ་བཞིན་དུ་གཏན་ཚིགས་ལ་མངོན་པར་ཞེན་པའི་བཱ་ཆུང་གིས་ཤྲཱི་སིངྷ་དང་བཻ་རོ་སྔ་ཕྱི་འགལ་བའང་མཐོང་སྲིད་ཀྱི་དེ་དག་ཡེ་ཤེས་སྐུ་ཅན་ཡིན་པས་སྐུ་ལ་འདས་གྲོངས་མི་མདའ། ལས་དག་པས་ད་ལྟའང་མཇལ་དུ་ཡོད་ལ། མ་ཏཾ་གི་པ་ཀླུ་སྒྲུབ་ཀྱི་སློབ་མར་གྲགས་པ་བཞིན། དེ་གཉིས་སྔ་ཕྱི་རིང་པོར་འཛོལ་བའི་དཔེས་ཤེས་པར་བྱའོ། །མཚན་ཉིད་འདི་ལ་བློ་གྲོས་ཚད་མ་ཧཱར་ནཱ་ཐས། སྔོན་བོད་དུ་བྱུང་བའི་ལོ་རྒྱུས་རྣམས་ན། དབང་བསྐུར་ཞིང་གདམས་པ་དང་རྗེས་སུ་གདམས་པ་མཐའ་དག་སྩལ་ཞེས་པ་ནི། སོ་སོ་སྐྱེ་བོའི་སློབ་དཔོན་གྱིས་སློབ་མ་ཕལ་པ་ཅིག་ལ་བྱེད་པ་བཞིན་དུ། རྡུལ་ཚོན་བཞེངས། དབང་རྫས་བསགས། ཆོག་འདོན་བཏང་། ཉིན་མོ་བསྒྲུབས། མཚན་མོ་བསྐུར། དཔེ་ཆ་སྒྲོགས་པ་དང་། གཞུང་གི་འབྲུ་བཤད་མཛུག་བྲིད་བྱེད་པ་དང་། འཛིན་ཆོས་གཏད་པ་མ་ཡིན་ཏེ། །སློབ་དཔོན་ནག་པོ་སྐལ་ལྡན་གྱི་གང་ཟག་དེ་ལ། སྤྲུལ་པའི་སྐུ་ཡེ་ཤེས་ཀྱི་མཁའ་འགྲོ་མ་དེས། དགོངས་པ་གཏད་དེ་ཐུགས་རྒྱུད་བྱིན་གྱིས་བརླབས་
པ་ཙམ་གྱིས། སྐད་ཅིག་དེ་ལ་ཡེ་ཤེས་ཁྱད་པར་ཅན་བརྙེས། རྒྱུད་དོན་མ་ལུས་པ་ཐུགས་སུ་ཆུད། བཀའི་གནང་བ་སྩལ་བ་ཙམ་གྱིས་སེམས་ཅན་གྱི་དོན་རྒྱ་ཆེན་སྤྱོད་པའི་ནུས་པ་ཐོབ་པ་དེ་ཀ་དབང་བསྐུར་བ་དང་། གདམས་ངག་རྗེས་གདམས་བླ་ན་མེད་པ་ཡིན་ནོ། །འདིས་མཚོན་པའི་སྔོན་གྱི་གྲུབ་ཐོབ་ཆེན་པོ་རྣམས་ཀྱི་རྣམ་ཐར་ན། གཅིག་གིས་གཅིག་ལ་གདམས་ཚུལ་ཡོད་པ་རྣམས། ཕལ་ཆེར་དེ་བཞིན་ཡིན་ལ། རང་ཅག་བོད་འདི་་ན་གོ་བ་འདི་ཙམ་ལ་ཡང་མཐའ་གཉིས་གང་རུང་གཅིག་ཏུ་ལྷུང་བར་སྣང་སྟེ། བླུན་པོ་རྣམས་དང་། བླུན་པོའི་རྗེས་འབྲངས་མཁས་འདོད་ཡོད་པ་ཕལ་ཆེར་ཞིག་ནི། གྲུབ་ཐོབ་རྣམས་ལ་དེ་ལྟར་ཡིན་པའི་གོ་བ་རབ་རིབ་ཅིག་ཤར་བ་རྒྱུ་མཚན་དུ་བྱས་ནས། ད་ལྟའི་བླ་མ་དང་། སློབ་མ་ཕལ་བ་ལམ་སྣ་ཙམ་ཡང་མ་ཟིན་པ་རྒན་རྒོན་རྣམས་ལ་ཡང་གྲུབ་ཐོབ་ཀྱི་རིགས་འགྲེ་འགྲན་འདོད་བྱས་ཏེ། དབང་བསྐུར། རྒྱུད་བཤད། མན་ངག་ཐམས་ཅད་རྩ་བས་བཅད། པོ་ཏི་མགོ་ལ་འཇོག་པ་དང་། དགོངས་པ་གཏད་པས་ཆོག་པ་སོགས། མི་ཤེས་པ་དང་། མ་ལྕོགས་པ་ལ་བཟང་མོ་དང་དབའ་དཔའ་མོ་བྱེད་དོ། །དེ་རིགས་བླ་མས་མ་བཤད། སློབ་མས་མ་གོ། དཔོན་སློབ་གཉིས་ཀར་བྱིས་ཅི་ཡང་མི་ཤེས་པ་ལ་ཤེས་མ་དག་བྱེད་པ་ལས་མི་ཡོད་པར་འདུག་པ་འདི་ཆད་པའི་མཐའ་ཡིན་ཡང་། སྔགས་གཞུང་དང་ཆོ་ག་ལ་གཙིགས་སུ་བྱེད་པ་རྣམས་ཀྱང་། ད་ལྟ་ལས་དང་པོ་པ་གང་བྱེད་པའི་རྒྱས་བཀབ་སྟེ། འཕགས་པ་དང་། གྲུབ་ཐོབ་དང་། སྒྲུབ་པ་པོམཆོག་རྣམས་ལའང་བྱེད་པ་ནི། བསྒྲིགས་བཀོད་དམ་དམ་མོ་དང་། མཁས་འདོད་བྱས་པས་གཏི་ཐུག་ཏུ་སོང་སྟེ། འདི་ག་ལ་ལྟོས་པའི་རྟག་པའི་མཐའ་ཡིན་ནོ། །དེས་ན་ལས་དང་པོ་བ་ལ་བརྒྱུད་པ་ཁུངས་ལ་ཐུག་པའི་ཆོས་བཀའ་མ་ཆད་པ་ཅིག་དགོས། ཆོ་ག་ལག་ལེན་བྱད་ལ་མ་ནོར་བ་ཞིག་དགོས། བསྙེན་སྒྲུབ་ལ་སོགས་པ་ཚད་དུ་ཕྱིན་པ་ཅིག་དགོས། རང་རང་གི་
གཞུང་བཤད་ཐེ་ཚོམ་ཆེད་ངེས། བློ་རྩེ་གཏང་མཚམས་ཡོད་ངེས་ཤིག་དགོས། མན་ངག་རྣམས་ལག་ལེན་དུ་བཏབ་ན་ཐེབ་པ་ངེས་པ་ཅིག་དགོས་སོ། །གྲུབ་པ་ཐོབ་པ་རྣམས་ཀྱིས་སྤྱོད་ཡུལ་ནི་གཞན་མ་ཡིན་པས། དེ་འདྲའི་ངེས་ཁྲིགས་མེད་ཀྱང་། དེ་ལ་ལོག་ལྟ་དང་ཐེ་ཚོམ་མི་བྱ། གུས་པས་གསོལ་བ་ཐོབ་ཅིག་ཅེས་སོ། །དེར་རྒྱ་གར་བ་ཆོས་ལ་ཕྲག་དོག་པས་རྗེས་བསྙགས་བྱུང་གིས་དོགས་པས། བཻ་རོས་རྐང་མགྱོགས་ཀྱི་གདམས་པ་ཉམས་འོག་ཏུ་བཙུད། རྐང་མགྱོགས་ཀྱི་གཙོ་བོ་ལ་བརྔན་པ་བྱིན་པས་རྗེས་མ་ཟིན་པ་ལྟར་བྱས། བོད་དུ་མྱུར་བར་ཕེབས། བཙན་པོ་ལ་ཉིན་མོ་རྒྱུ་འབྲས་ཐུན་མོང་བའི་ཆོས་དང་། མཚན་མོ་རྫོགས་པ་ཆེན་པོ་ལྐོག་ཆོས་སུ་གསུངས། དེའི་ཚེ་རྒྱ་གར་བའི་རྨི་ལྟས་ལོག །རྡོ་རྗེ་གདན་གྱི་ཆོས་མཛོད་ཆེན་པོའི་རྒྱ་རུ་སྤྲོད་ཞིག་པས་ཆོས་མ་ཚང་བར་ཤེས། བོད་ཐེ་ཚོམ་བསྐྱེད་པའི་ཕྲ་མ་མཁན་བཅུག། བཙུན་མོ་ཚེ་སྤོང་བཟས་བཻ་རོ་བསླུ་བར་མ་ཚུགས་པས་སྡིག་བློན་རྣམས་བསླད། རྒྱ་གར་བའི་ཕྲ་མ་ལ་བསྙད་ནས་བཻ་རོ་ཁྲིམས་ལ་སྦྱར་བར་གསོལ། རྒྱལ་པོས་སྒྱུགས་པར་ཞལ་གྱིས་བཞེས་ནས་ཀུན་རྫོབ་ཏུ་སྦྲང་པོ་ཆུ་ལ་སྦྱངས། སློབ་དཔོན་དབུ་རྩེའི་གདུགས་ཁང་དུ་བལྟར་མི་མངོན་པར་བྱས་པའང་དམང་རྒྱན་གྱིས་ཤེས་ནས་བཻ་རོ་ཚ་བའི་རོང་དུ་སྤྱུགས་དགོས་པ་བྱུང་། འདི་དག་གི་གཏམ་འདྲ་འབག་ལ་སོགས་པ་ལས་རྒྱས་པར་བྱུང་བ་འདིར་དེ་ཙམ་མོ། །དམ་པའི་ཆོས་བསྒྱུར་བའི་རྣམ་གྲངས་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་སོགས་པ་སེམས་སྡེ་ཉེར་གཅིག །ལུང་བམ་པོ་བཅོ་བརྒྱད། ཀློང་སྡེའི་རྒྱུད་ནམ་མཁའ་ཀློང་ཡངས་ལ་སོགས་པ་ཚིག་བམ་པོ་ཉི་ཁྲི། དེ་དག་ཀྱང་གྲུབ་པའི་སྐྱེས་བུ་རྣམས་ཀྱི་ཕྱག་ན་བཞུགས་པའི་དབང་དུ་བྱས་ཏེ་ཚང་བར་མ་འགྱུར་རོ། །སླར་བཻ་རོས་རྒྱལ་མོ་ཚ་
བའི་རོང་དུ་གཡུ་སྒྲ་སྙིང་པོ་རྗེས་སུ་བཟུང་། ཡུལ་དེ་སྨིན་པར་མཛད། ཁམས་སུའང་འགྲོ་དོན་མཛད། རྒྱ་ནག་ཏུ་གཤེགས་ནས་གྲུབ་པ་མཆོག་དང་མཁའ་འགྲོ་མ་རྣམས་དང་ཆོས་སྐད་འདྲེས། ཡར་ལམ་ཡེ་ཤེས་གསང་བ་ལ་སོགས་པའི་རྒྱུད་ལ་བརྟེན་པ་རྡོ་རྗེ་ཐམ་པའི་མན་ངག་གིས་སྤང་མི་ཕམ་མགོན་པོ་རྗེས་སུ་བཟུང་། དེ་ནི་ལོ་བརྒྱད་ཅུ་རྩ་ལྔ་ལོན་པ་གཞོན་ནུའི་དུས་ཆོས་མ་གྲུབ། རྒས་ནས་ཏེ་འཁོར་དང་སྤུན་ཡ་བསྡང་བར་གྱུར་བ་ཞིག་སྟེ། རྒས་ཆེས་པས་ལུས་ཟུངས་ངན་པ་ལ་སྒོམ་ཐག་དང་སྒོམ་བརྟེན་བཅས། གདམས་པ་ཡིད་ལ་ཟིན་པའི་ཕྱིར་ཚུལ་ཤིང་གཏད། སློབ་དཔོན་གྱི་ལུང་བཞིན་ཉམས་སུ་བླངས་པས་ཆོས་ཉིད་ཅེར་མཐོང་དུ་ངོ་ཕྲོད། རྟོགས་པ་ཐོད་རྒལ་དུ་སྐྱེས་པས་རྒད་པོ་དགའ་ཆེ་སྟེ་སློབ་དཔོན་གྱི་མགུལ་བར་འཁྱུད་ནས་ཞག་གཅིག་ཏུ་མ་བཏང་། དངོས་གྲུབ་བརྙེས་པས་ལོ་བརྒྱ་ལྷག་བཅས་སུ་ཐུབ། དེས་ངན་ལམ་བྱང་ཆུབ་རྒྱལ་མཚན་ལ་བཤད་ནས་རིམ་པར་འཇའ་ལུས་གྲུབ་པ་ཤ་སྟག་བྱུང་སྟེ་འོག་ཏུ་རྡོ་རྗེ་ཟམ་པའི་རྒྱུད་རིམ་ལ་འཆད་ཏོ། །དེ་ལྟར་བཻ་རོས་རིམ་པ་ལྔར་བཤད་པའི་ཕྱི་མ་ལི་བཟའ་ཤེས་རབ་སྒྲོན་ཏེ། འདིས་བཻ་རོ་ལི་ཡུལ་དུ་སྤྱན་དྲངས། མཐར་བལ་བོ་བ་སེང་གི་ནགས་སུ་འོད་ཀྱི་སྐུར་དེངས་ཞེས་གྲགས་སོ།། །།གངས་ཅན་པ་རྣམས་ཀྱི་སྐྱབས་དང་། མགོན་དང་། རྟེན་དང་། དཔུང་གཉེན་གཅིག་པུ་པ་ཨོ་རྒྱན་སངས་རྒྱས་གཉིས་པ་ལས་ཇི་ལྟར་བརྒྱུད་པ་ནི། སྤྱིར་སློབ་དཔོན་ཉིད་སྐུ་གསུམ་གྱི་སྟོན་པ་རྒྱ་མཚོའི་ངོ་བོ་ཉིད་ཡིན་པས་བརྒྱུད་པ་བྲེང་ཆགས་ཀྱི་མཚན་ཉིད་ལའང་ལྟོས་པ་མེད་དེ། སྐུ་གསུམ་གྱི་ཞིང་ཁམས་རྟེན་བརྟེན་པར་བཅས་པ་རང་གི་མཚན་ཉིད་དང་གཉིས་སུ་མེད་པས་སོ། །དེ་ལས་གཞན་སྣང་འཁྲིད་ཚུལ་གྱི་སྒོ་ནས་ཤྲཱི་སིངྷ་དང་། འཇམ་དཔལ་བཤེས་གཉེན་སོགས་ལས་གདམས་པའི་དཀའ་བབས་རྙེད་པའི་ཚུལ་བསྟན། བོད་དུ་བི་མ་ལས་མན་ངག་སྙིང་ཏིག་དང་། བཻ་རོས་སེམས་ཕྱོགས་དར་བར་མཛད་
པས༑ དེ་དག་ཕྱི་མཐར་འཆལ་ཞིང་། གདམས་པའི་སྙིང་པོ་དང་བྲལ་བའི་ཚེ་འགྲོ་དོན་ཆེ་བར་དགོངས་ནས་རང་གི་སྙིང་ཏིག་གཞོ་སྟོད་ཏི་སྒྲོར་མཁའ་འགྲོ་ཡེ་ཤེས་མཚོ་རྒྱལ་ལ་ལྐོག་ཆོས་སུ་གདམས། མངའ་བདག་གི་བཙུན་མོ་འབྲོམ་གཟའ་བྱང་ཆུབ་སྨན་ལས་འཁྲུངས་པ་ལྷ་ལྕམ་པདྨ་གསལ་ལོ་བརྒྱད་ལོན་པ་ཞིག་ཚེའི་དུས་བྱས་པར་ཡབ་རྒྱལ་པོ་མྱ་ངན་གྱིས་དུབ་པ་བསལ་བའི་ཕྱིར། མཆིམས་ཕུར་ལྷ་ལྕམ་གྱི་ཕུང་པོའི་སྙིང་གར་མཚལ་གྱི་ཡི་གེ་ནྲྀ་གཅིག་་བྲིས། ཏིང་ངེ་འཛིན་གྱི་ལྕགས་ཀྱུ་རྣོན་པོས་རྣམ་ཤེས་བཀུག་པས། མིག་ལྟ་ཞིང་སྨྲ་ཤེས་པར་གྱུར་བའི་ཚེ། མན་ངག་མཁའ་འགྲོའི་སྙིང་ཏིག་བྱིན་རླབས་འཕོ་བའི་སྟོབས་ཀྱིས་གདམས་ནས་སྐྱེ་བ་ཕྱི་མའི་ཆོས་སྐལ་དུ་དབང་བསྐུར། ཟབ་མོའི་གཏེར་དུ་བཙས་པ་ཕྱིན་ཆད་པདྨ་ལས་འབྲེལ་རྩལ་གྱིས་བཏོན་པས་མཁའ་འགྲོའི་སྙིང་ཏིག་ཏུ་གྲགས་པ་སོགས་གཏེར་ལས་བྱོན་པའི་སྙིང་ཏིག་གནད་མ་འཁྲུལ་ཞིང་དོན་ཚང་བ་དག་ཡིན་ནོ།། །།ལུང་ཨ་ནུ་ཡོ་ག་ནི། མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག། བཅོམ་ལྡན་ངེས་པར་གསུངས་ལགས་ན། །ཞེས་པའི་ལུང་འདྲེན་གྱི་ཁུངས་བཤད་པའི་རྒྱུད་དགོངས་པ་འདུས་པ་འདི་ན། འདྲེན་པའི་ཐེག་པ་རྣམ་གསུམ་ལ། །གང་དག་ངེས་པར་བཀོད་ལགས་ན། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དཔག་གིས་མི་ལང་བའི། །ངེས་པའི་ཐེག་པ་ཡོངས་མ་གསུངས། །ཞེས་ཡོད་པ་དེ་ཡིན་པར་སྣང་ཞེས་འགོས་ལོ་གཞོན་ནུ་དཔལ་ཡང་བཞེད། སྤྱིར་འདྲེན་པའི་ཐེག་པ་ཞེས་པའི་ཆོས་སྐད་ལོ་ནས་ཀྱང་མདོ་སྡེ་གདམས་ངག་འབོགས་པ་དེ་ཀུན་འབྱུང་འདྲེན་པ་ལ་སོགས་ཏེ་རིམ་པ་དགུའི་ངེས་འབྱེད་ཀྱི་རྣམ་གྲངས་སུ་འདུ་བའི་ཕྱིར། །གྲུབ་པའི་མཐའ་འདི་ལ་ཡིད་གཉིས་བྱེད་པ་རྣམས་རྟེན་དང་རྟེན་བཤད་འགལ་བ་ཡིན་ནོ། །དེ་ལ་སྟོན་པ་མྱ་ངན་ལས་འདས་
ནས་རེ་ཞིག་དགྲ་བཅོམ་པ་ཡང་ཉུང་ངུར་གྱུར་ཅིང་། བསྟན་པ་ཉམས་དམས་པས་མུ་སྟེགས་པ་རྣམས་ཀྱི་གཽ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་ནོ་ཞེས་ཁ་ཟེར་བར་བྱེད་པའི་ཚེ། འདི་ལྟར་སྤྲུལ་སྐུ་ཆུ་ཟླ་ལྟ་བུ་གཅིག་འདས་ཀྱང་འོག་མིན་གྱི་ལོངས་སྐུ་ཟླ་བ་དངོས་ལྟ་བུ་རྟག་པ་རྒྱུན་གྱི་འཁོར་ལོར་བཞུགས་པས། སེམས་ཅན་གྱི་མོས་པས་དང་སྐལ་བའི་ཆུ་སྣོད་དང་འཚམས་པའི་སྤྲུལ་པ་དང་། ཐེག་པ་གང་གིས་འདུལ་བའི་ཆོས་འབྱུང་བ་ཡིན་པས། མདོ་དགོངས་འདུས་ལེའུ་བཞི་བར། དྲག་ཤུལ་ཅན་ཞེས་བྱ་བའི་རི། །དགོན་པ་ཆེན་པོའི་གནས་དེ་ནི། །ཡེ་ཤེས་སྙིང་པོ་ཅན་རྣམས་ཀྱི། །ཐེག་ཆེན་གསང་སྔགས་འབྱུང་བའི་གནས། །ཞེས་གསུངས་པ་ལ་བདེ་མཆོག་རྡོ་རྗེའི་མདོ་འགྲེལ་གྱིས། ཟ་ཧོར་གྱི་ཡུལ་དང་ཉེ་བར་བསྟན་ཅིང་ལངྐྐའི་གནམ་ལྕགས་ཡོད་པའི་རྩེར། རགས་ཅན་དྲ་མ་ལྔ་རང་རང་གི་མངོན་ཤེས་དང་རྫུ་འཕྲུལ་གྱིས་འདུས། གདུང་ཚིག་ཉི་ཤུ་རྩ་གསུམ་བཏོན་པས། སངས་རྒྱས་རྣམས་ཀྱི་བྱིན་རླབས་ཀྱིས་བསྐུལ་ནས་གསང་བདག་དངོས་སུ་བྱོན། སྔོན་འོག་མིན། དགའ་ལྡན། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པའི་ཐེག་པ་བླ་ན་མེད་པ། རྩ་བའི་རྒྱུད་ཀུན་འདུས་རིག་པ་དང་། བཤད་པའི་རྒྱུད་དགོངས་པ་འདུས་པ་གཉིས་བཤད་དེ་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བུ་ལ་བི་རཱུརླ་ཞུན་མས་བྲིས། དགོངས་པའི་རྩལ་བདུན་གྱིས་ནམ་མཁའ་ལ་སྦས་པའང་རྒྱལ་པོ་ཛ་ལས་བརྒྱུད་དེ་དར་རོ།། །།བསྐྱེད་པ་མ་ཧཱ་ཡོ་ག་ལ་རྒྱུད་སྡེ་དང་། སྒྲུབ་སྡེ་གཉིས་ལས་དང་པོ་ནི། རྒྱལ་ཚབ་རྡོ་རྗེ་སེམས་དཔས་རིགས་གསུམ་སེམས་དཔའ་ལ་བཤད། དེ་ལས་འཇམ་དཔལ་གྱིས་ལྷ་གྲགས་ལྡན་མཆོག་སྐོང་། སྤྱན་རས་གཟིགས་ཀྱིས་ཀླུ་རྒྱལ་གྲྀཧྣ་ནག་པོ། །ལག་རྣ་རྡོ་རྗེས་གནོད་སྦྱིན་སྐར་མདའ་གདོང་། །ལངྐ་མགྲིན་
བཅུས་མི་མ་ཡིན། ལི་ཙ་བཱི་དྲི་མེད་གྲགས་པས་མི་རྣམས་ལ་རིག་འཛིན་རིག་པས་བརྒྱུད་དེར་རང་གི་འཁོར་ཚོམ་བུ་འབུམ་སྡེ་དང་བཅས་པ་སངས་རྒྱས། དེ་ནས་མི་ཡུལ་དུ་མངོན་དུ་དད་པནི། གསང་བའི་བདག་པོས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ལས། ལྷོ་ཕྱོགས་ཟ་ཧོར་གྱི་ཡུལ་དུ་རྒྱལ་པོ་ཛ་ཞེས་བྱ་བ་ལ་སྔོན་དུ་ལྟས་ཁྱད་པར་ཅན་གྱི་རྨི་ལམ་བདུན་ཤར། ཕྱག་ན་རྡོ་རྗེ་ཟླ་བ་བདུན་བསྒྲུབས་པས་ཕོ་བྲང་གི་ཡང་ཐོག་ཏུ་གླེགས་བམ་གྱི་ཆར་བབས། དོན་མཁྱེན་ཀྱང་གང་པར་བྱས་ཏེ་ཨུ་པ་རཱ་ཛ་སོགས་ལ་དྲིས་པས་བརྡམ་ཁྲོལ། དགེ་སློང་ཀུ་ཀུ་རཱ་ཛས་སྒྱུ་འཕྲུལ་དྲྭ་བའི་ལེའུ་སྟོང་ཕྲག་བརྒྱ་བའི་ལེའུ་གསུམ་པ་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས། རང་གིས་ཟླ་བ་བདུན་བསྒྲུབས་པས་གྲུབ་སྟེ་ལུང་བསྟན་པ་བཞིན། རྒྱལ་པོས་ཕྱག་ན་རྡོ་རྗེ་ཟླ་བ་བདུན་བསྒྲུབས་པས་དངོས་སུ་བྱོན་ནས་དབང་བསྐུར་བྱིན་གྱིས་བརླབས། ཚིག་རྣམས་ལི་ཙ་བཱི་དྲི་མེད་གྲགས་པ་ཞུས་ཤིག་པའི་ལུང་བསྟན་ཐོབ་པ་ལྟར་མཉན་པས་ཏནྟྲ་སྡེ་བཅོ་བརྒྱད་བྱུང་། དེ་ལ་སྡེ་ཚན་གྱིས་དབྱེ་བས། སྐུའི་རྒྱུད་གསུམ་ནི། སངས་རྒྱས་མཉམ་སྦྱོར། གླང་པོ་རབ་འབོག། གླང་པོ་མཚོ་ཞུགས། ་གསུང་གི་རྒྱུད་གསུམ་ནི། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་ལས་འཕྲོས་པ། ཐུགས་ཀྱི་གསུམ་ནི། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པ། ཡོན་ཏན་ཕྱི་གསུམ་ནི། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུའི་རྒྱུད་དོ། །ཕྲིན་ལས་ཀྱི་གསུམ་ནི། ཀརྨ་མཱ་ལེ། སྒྲོན་མེ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་སོ། །སྤྱིའི་རྒྱུད་གསུམ་ནི། སྒྱུ་འཕྲུལ་དྲ་བ། དམ་ཚིག་བཀོད་པ། ཐབས་ཀྱི་ཞགས་པ་སྟེ་བཅོ་བརྒྱད་དོ། །རྒྱལ་པོ་ཛ། སྲས་ཨིནྡྲ་དྷཱ་ཏི། སིངྷ་
རཱ་ཛ། ཨུ་པ་རཱ་ཛ། སྲས་མོ་གོ་མ་དེ་ཝི་སོགས་ཀྱི་ཚོགས་ཀྱི་དཀྱིལ་འཁོར་བསྒྲུབས་པ་ཚོས་བུ་འབུམ་ལ་སོག་པ་རིག་འཛིན་གྱི་ས་ལ་གཤེགས་པའང་བསམ་གྱིས་མི་ཁྱབ། བྲེང་ཆགས་ཀྱི་བརྒྱུད་པའང་། ཀུ་ཀུ་རཱ་ཛ་ཕྱི་མ། རོ་ལངས་བདེ་བའི་དངོས་གྲུབ། རྡོ་རྗེ་བཞད་པ། ཟ་ཧོར་། གྱི་མཁན་པོ་པྲ་བྷ་ཧསྟི། སངས་རྒྱས་གསང་བ། བི་མ་ལ། དེས་རྒྱ་གར་གྱི་པཎྜིཏ་་ལྔ་བརྒྱ་ལ་བཤད་ཅིང་། བོད་དུ་གཏགས་ཛྙཱ་ནས་ལོ་ཙཱ་བྱས་ཏེ་མདོ་དང་སེམས་ཕྱོགས་བསྒྱུར། རྨ་རིན་ཆེན་མཆོག་གིས་མཚན་ཉིད་དང་སྒྱུ་འཕྲུལ་བསྒྱུར། སྒྱུ་འཕྲུལ་ད་ལའང་ནང་གསེས་སུ་དབྱེན། རྩ་རྒྱུད་གསང་བ་སྙིང་པོ། རོལ་བ་མངོན་པར་བརྗོད་པ་ལྷ་མོ་སྒྱུ་འཕྲུལ། དཀྱིལ་འཁོར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་སྟོན་པ་སྒྱུ་འཕྲུལ་བཞི་བཅུ་པ། དབང་གཙོ་བོར་སྟོན་པ་སྒྱུ་འཕྲུལ་བླ་མ། ཡོན་ཏན་མཐར་ཕྱིན་པ་སྟོན་པ་སྒྱུ་འཕྲུལ་བརྒྱད་ཅུ་བ། སྡེ་སྣོད་ཡོངས་ལ་ཁྱབ་པར་སྟོན་པ་སྒྱུ་འཕྲུལ་དྲྭ་བ་ཆེན་པོ། དམ་ཚིག་གཙོ་བོར་སྟོན་པ་སྒྱུ་འཕྲུལ་ལེ་ལག་སྟེ་སྡེ་བརྒྱད། ས་ལམ་སྟོན་པ་ཡེ་ཤེས་སྙིང་པོ། །ཅིག་ཅར་སྟོན་པ་རྡོ་རྗེ་མེ་ལོང་། ཐབས་ལམ་རིམ་གྱིས་སྟོན་པ་རྡོ་རྗེ་ཐལ་བ། ཅིག་ཅར་སྟོན་པ་རྡོ་རྗེ་རྒྱ་མཚོ་སྟེ་བཤད་རྒྱུད་སྡེ་བཞི་ཞེས་བྱའོ། །དེ་ལས་སྡེ་བརྒྱད་བི་མ་ལས་རྨ་རིན་ཆེན། དེས་གཙུག་རུ་རིན་ཆེན་གཞོན་ནུ་དང་། གྱེར་མཆོག་གཉིས། དེ་གཉིས་ལས་དར་རྗེ་དཔལ་གྲགས་དང་། ཞང་རྒྱལ་བའི་ཡོན་ཏན་གཉིས། དེས་དར་རྗེ་ལ་བཀའི་ཡོངས་གྲགས་དང་། ཞང་ལ་བཀའ་མཆིམས་ཕུ་མར་གྲགས་ཏེ། སྒྱུ་དྲྭ་མ་གཏོགས་པ་གནུབས་ཆེན་གྱིས་གསན་ཏོ།། །།འདུས་པ་མདོ་ནི། རྒྱལ་པོ་ཛས། སྲས་ཨིནྡྲ་བྷཱུ་ཏི་དང་། ནཱ་གབྷོདྷི། གུ་ཧྱ་བྷོ་དྷི་ལ། ནཱ་ག་བོ་དྷི་ནི་ཀླུ་བ་སུ་རིགས་དྲུག་གིས་ལོ་དགུར་བཤོད་དུ་མ་སྟེར། ཨིནྡས་ཁྱིའི་རྒྱལ་པོ་ཀུ་ཀུ་རཱ་ཛ། དེས་རོ་ལངས་བདེ་བ།
དེས་རྡོ་རྗེ་བཞད་པ། པྲ་བྷ་ཧསྟི། ཤཱཀྱ་སེངྐེ་། ཤཱཀྱ་པྲ་བྷ། ཤཱཀྱ་མུ་ཏྲ་གསུམ་ལ་བཤད། ཤཱཀྱ་སེངྒེས་དྷ་ན་རཀྴི་ཏ། དེས་སྠི་ར་མ་མ་ཏི་ལ། དེས་བདེ་བ་གསལ་མཛོད། དེས་དྷརྨ་བྷོ་དྷི་དང་། བ་སུ་དྷ་ར་ལ་རྒྱུད་པའམ། ཡང་དྷ་ན་རཀྵི་ཏ་བྱ་ཤའི་རུ་ཆེ་བཙན་སྐྱེས་ཀྱིས་གདན་དྲངས་ནས། བྲུ་ཤའི་ཡུལ་གྱི་ཁྲོམ་དུ་བསྒྱུར་བར་བྱས་པས། མོས་པ་ཆུང་བསམ་འགྱུར་བར་བལ་ཡུལ་དུ་བྱོན། དྷརྨ་བྷོ་དྷི་དང་བ་སུ་དྷ་ར་ལ་བཤད། དེ་ནས་ཕྱིས་བྲུ་ཤའི་ཡུལ་དུ་ཁྲོམ་བསྒྱུར་བྱས། རུ་དྷརྨ་བོ་དྷི་དང་། བ་སུ་དྷ་ར་དང་ཟུའི་མཁན་པོས་གནུབས་ཆེན་ལ་བཤད་ནས་བོད་ལ་བྱོན་ཏོ། །དེ་ལ་བོ་ཏིའི་ཆར་འབབ་པ་ནི་གསང་སྔགས་རང་ཉིད་ལེན་པའི་ཕྱོགས་ཡིན་ཟེར་བ་བྱུང་མོད། རྒྱུད་རང་གི་ངོ་བོ་ནས་རྩོད་པ་མེད་པའི་མངོན་སུམ་ཚད་མ་ནི་ཤེར་ཕྱིན་བརྒྱ་ལྔ་བཅུ་པའི་འགྲེལ་བ་ནས་གསུང་རབ་འདིའི་ལོ་རྒྱུས་ཤིན་ཏུ་ཞིབ་པ་བྱུང་བས་བོ་དོང་པ་ཆེན་པོས་རྒྱུད་སྡེ་སྤྱི་རྣམས་སུའང་བཀོད་ཅིང་། མཉམ་སྦྱོར་གྱི་འགྲེལ་བར་ཡང་དེ་དང་ཚུལ་འདྲ་བ་ཞིག་བཤད་པས་དགག་པར་མི་བྱའོ། །ཞེས་གསུངས་ལ། གཟུ་བོར་གནས་པ་དག་གིས་ཀྱང་དེ་ལ་བསྐྱར་ཟློས་མཛད་སྣང་། སྤྱིར་ཕྱག་ན་རྡོ་རྗེའི་བྱིན་རླབས་ཀྱིས་བླ་མའི་གོ་ཆོད་མོད། གསང་སྔགས་རང་ཉིད་ལེན་པའི་ཉེས་པ་དེ་རང་རྒྱུད་པ་ལ་ཡིན་ནམ། སྤྲུལ་པའི་སྐུ་ལ་ཡིན། དང་པོ་ལ་ཡིན་ན་རྒྱལ་པོ་ཛའི་ཁང་སྟེངས་སུ་གླེགས་བམ་འབབ་པར་བྱེད་པའི་ཐུགས་རྗེ་དང་རྫུ་འཕྲུལ་གྱི་མངའ་དབང་ཅན་དེ་དག་གིས་ཀྱང་རྒྱལ་པོའི་རྒྱུད་ཆུང་གཟོན་པ་མ་མཁྱེན་པའོ། །ཕྱི་མ་ལ་ཡིན་ན། ཤཱཀྱ་ཐུབ་པས། ང་ལ་མཁན་པོ་མེད་པས་ན། ང་ནི་རང་བྱུང་དགེ་སློང་ཡིན། །ཞེས་གསུངས་ཤིང་དོན་ལ་གནས་པས་ཤཱཀྱ་ཐུབ་པའང་རང་གི་བསྟན་པའི་ཆོམ་རྐུན་པ་ཉིད་དུ་ཁྱེད་ཀྱིས་སྨྲ་བར་ཤེས་སོ། །པོ་ཏིའི་ཆར་དེ་ཡང་རིག་པས་བཏགས་པ་ཡིན་སྙམ་ན།
དཔལ་ན་ལེནྡྲའི་ཀྱང་རིས་ལ་མངོན་སུམ་དུ་བྲིས་པ་ལོ་ཙཱ་བ་ཟུ་དགའ་རྡོར་གྱིས་ཀྱང་མཐོང་བའི་ཕྱིར་རོ། །དེ་ལྟར་རྒྱུད་སྡེ་དེ་དག་ལ་སློབ་དཔོན་ཀུ་ཀུ་རཱ་ཛ་དང་། ཨིནྡྲ་བོ་དྷི་དང་། གོ་མི་དེ་ཝ་དང་། པྲ་བྷ་ཧསྟི། རྡོ་རྗེ་བཞད་པ་ལ་སོགས་རིམ་པར་དགོངས་འགྲེལ་ཀྱང་དཔག་ཏུ་མེད་པ་བྱུང་སྟེ་གཞན་ལས་ཤེས་སོ། །དེ་དག་ནི་རྣམ་པ་མང་པོ་སྡེ་ཚན་གྱི་བསྡུས་པ་ལས་མདོ་སྒྱུ་སེམས་གསུམ་མམ། ཡོ་ག་གསུམ་གྱི་སྒྲས་སྤྱིར་བསྙང་པ་ཡིན་ནོ།། །།གཉིས་པ་སྒྲུབ་སྡེ་ལ་བཀའ་གཏེར་གྱི་ཕྱོགས་གཉིས་ལས། དང་པོ་ནི། སྐུའི་རྒྱུད་གཤེད་སྐོར་རྣམས་ནི་སློབ་དཔོན་འཇམ་དཔལ་བཤེས་གཉེན་ལས་བྱུང་བ་གཙོ་བོར་གྱུར་ལ། དེ་ནི་སིངྒེ་ལའི་རྒྱལ་པོ་གཞོན་ནུ་དཔལ་གྱི་སྲས་ཁྱིའུ་དཔལ་བཟང་ཞེས་བྱ་སྟེ། རྒྱལ་སྲིད་ལ་སྐྱོ་ནས་ལྷོ་ཕྱོགས་བེ་ཏའི་ཡུལ་དུ་བྲོས། སྤྲུལ་པའི་སྐུ་དཀའ་རབ་རྡོ་རྗེ་ལས་རབ་ཏུ་བྱུང་ཞིང་། རྒྱུད་ལུང་མན་ངག་ཐམས་ཅད་ཐུགས་ལ་ཆུད། དེས་འཇམ་དཔལ་ལ་ཡི་དམ་བྱས་ནས་བསྒྲུབས་པས། བུམ་པ་ཁོལ། བྲིས་སྐུ་བཞང་། མེ་ཏོག་འཁྲུངས་པ་བྱུང་བས། དེའི་ནུབ་མོ་འཇམ་དཔལ་ཞལ་གཟིགས། ཚེ་ལ་དབང་བའི་དངོས་གྲུབ་བརྙེས། ཕྱི་ནུབ་ཡི་གེ་འཁོར་ལོ་ཚོགས་ཆེན་གྱིས་ནོན། འཇམ་དཔལ་ཡ་མཱནྟ་ཀའི་ཞལ་མཐོང་ཞིང་དབང་རྒྱུད་མན་ངག་ལུང་དང་བཅས་པ་བཤད་པ་རྨིས། མནལ་སད་ཙན་སྤྲུལ་པའི་གཤིན་རྗེ་མང་པོ་སྐོར་བ་བྱེད་ཅིང་འདུག། དེ་ཐམས་ཅད་ཀྱིས་སྲོག་སྙིང་ཕུལ། དེའི་ཚེ་ནམ་མཁའ་ལ་སྒྲ་ཆེན་པོ་གྲགས་པས་པཎྜི་ཏ་རྣམས་ཐེ་ཚོམ་སྐྱེས། དགའ་རབ་རྡོ་རྗེའི་ཞལ་ནས། འདི་ནི་དགེ་སློང་དཔལ་བཟང་གིས་འཇམ་དཔལ་གྲུབ་པའི་རྟགས་ཡིན་གསུངས། མཚན་ཡང་འཇམ་དཔལ་བཤེས་གཉེན་དུ་བཏགས། ནམ་མཁའ་ལས་རིང་གནམ་ལྕགས་འབར་བར་སོང་། །དེ་ན་རྒྱུད་སྡེ་མ་ལུས་པ་ཡོད་པ་ལོངས་སྤྱོད་ལ་འགྲོ་
འགྲོ་བའི་དོན་གྱིས་ཞེས་བྱུང་། དེར་གཤིན་རྗེ་གཤེད་ཀྱི་བརྟུལ་ཞུགས་རོལ་བའི་སྤྱོད་པ་བསྐྱངས་པས་སྨྱོན་པ་བརྟུལ་ཞུགས་ཅན་དུ་གྲགས། སློབ་དཔོན་ཤྲཱི་སིངྷའི་སྤུན་ན་བཙུན་པ་ཤམ་ཐབས་ཐོད་དུ་བཅིངས། ཐོང་གཤོལ་ཕྲག་པ་ལ་བཟུང་བའི་རྨོས་མཁན་དུ་བསྟན། ཤྲཱི་སིངྷ་ཡིད་མ་ཆེས་པས་འདི་ནི་འཇམ་དཔལ་བཤེས་གཉེན་གལ་ཞིག་སྟེ་དེ་ནི་ཡང་ན་པཎྜི་ཏའམ། ཡང་ན་རྣལ་འབྱོར་བའི་ཆ་བྱད་དུ་འོང་ཐང་སྙམ་ནས་བཟའ་ཞིག་བསླངས་པས། ངའི་ཆུད་མ་ལ་སློངས་ཟེར། དེ་ནས་གྲོང་ཁྱེར་དུ་ཕྱིན་ནས་བསླངས་པས། ཇོ་མོས་ཚོང་འདུས་ནས་བྱིའུ་མཆིལ་པ་བདུན་ཉོས། དེ་འབྲས་ཆན་དང་བསྲེས་ནས་དྲངས་བྱུང་། ང་དགེ་སློང་ཡིན་པས་མི་རུང་བྱས་པས་རྗེས་སུ་ཡི་རང་ཟེར་ལག་མཐིལ་དུ་བཞག། ཕུས་བཏབ་པས་ཅོ་རིར་གྱིས་ནམ་མཁའ་ལ་དེངས། དེར་ཁྱིམ་བཙུན་བྱོན་ནས། འདི་ལ་བཟའ་བྱིན་ནམ་གསུངས་པས། ཇོ་མོ་ན་རེ་བཟའ་བྱིན་གྱིས་བོད་མི་འདོད་པར་གདའ་གསུངས་པས། གང་ཟག་འཆིང་བ་ཅན་གསུངས། ཤྲཱི་སིངྷས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞལ་འདོན་མཛད་པས། སློབ་དཔོན་གྱི་དང་པོར་མལ་ལས་གཟིམས་བཞིན་དུ་གསན། དེ་ནས་བཞེངས་ཏེ་གསན། རྫོགས་པ་དང་དོན་ལ་ལྟ་ཅི་ཚིག་ལའང་རྨོངས་གསུངས་པས་འཇམ་དཔལ་གཤེས་གཉེན་ཡིན་ནམ་དགོངས། དེ་བཞིན་དུ་གྲོང་ཁྱེར་དུ་གྲུབ་པའི་སྤྱོདབསམ་ཐུང་མང་དུ་བསྟན་པས་རྒྱལ་པོའང་ངོ་མཚར་སྐྱེས་ཏེ་རྣལ་འབྱོར་གྱི་དབང་ཕྱུག་ཆེན་པོར་གྲགས། རིམ་ལ་ཡ་ཞེས་སྣང་བ་རང་ཚན་པས་བགྲོད་པར་མི་ནུས་པའི་གནས་དེར་བྱོན་པས་གནོད་སྦྱིན་གྱི་བུ་མོ་ཟངས་ཀྱི་འོད་འཕྲོ་མ་སོགས་ཀྱིས་འབྱོན་དུ་མ་སྟེར། དེར་བདེན་པའི་ཚིག་གིས་བཀྲོལ་བས་ལྕགས་ཀྱི་སྡིག་པ་འཇིགས་སུ་རུང་བ་ཞིག་བྱུང་། དེ་ནི་སྤྲུལ་པར་ཤེས་ནས་བསྟི་སྟང་བྱས་པས་བསེའི་སྒྲོ་མ་བུར་སོང་། དེ་ནས་ལས་བཞི་ཚང་བའི་གསེར་གྱི་གླེགས་བམ་བཻ་ཌཱུ་རྻ་ས་བྲིས་པ་བྱུང་། གཟིགས་པ་ཙམ་གྱིས་ཐུགས་
སུ་ཆུད་ནས་མུ་སྟེགས་འདུལ་བའི་སྔགས་རྒོད་རྣམས་བསྒྲུབས་ཏེ་ལས་ལ་སྦྱར་ནས་མུ་སྟེགས་ཀྱི་རྒྱལ་ཁམས་བརླག་པར་མཛད། གླེགས་བམ་དངོས་རྡོ་རྗེ་གདན་གྱི་བྱང་དུ་མི་སྣང་བར་རྒྱས་བཏབ་བོ། །དེ་ཉིད་ལ་སློབ་མ་བསམ་གྱིས་མི་ཁྱབ་མོད་ཀྱི། གཙོ་བོར་གྱུར་བ་ཧཱུྃ་ཀཱ་རའི་ལུགས། པདྨ་འབྱུང་གནས་ལ་བརྒྱུད། དྷ་ན་ཏ་ལ་མན་ངག་གསུངས་ནས་དར། འཇམ་དཔལ་བཤེས་གཉེན་འདིར་ལོ་རྒྱུས་རྙིང་བ་ཐམས་ཅད་ལ་རྒྱལ་རིགས་གཅིག། བྲམ་ཟེའི་རིགས་གཅིག །རྫུས་ཏེ་སྐྱེས་པ་གཅིག་སྟེ་གསུམ་སྣང་བ་རང་ས་རང་སར་གསུམ་ཀ་འབད་ལ། དོན་ལ་སྤྲུལ་པ་སྒྱུ་མ་ལྟ་བུས་འདུལ་བའི་སྟོན་པ་ཡིན་ཏེ་གསང་སྔགས་འབྱུང་བའི་གླེང་གཞི། རྡོ་རྗེ་བཙུན་མོའི་བྷ་ག་དང་ཨོ་རྒྱན་གྱི་གནས་བཞིན་ནོ། །གཤེད་སྐོར་རྣམས་བོད་དུ་གཙོ་བོར་སློབ་དཔོན་ཤཱནྟིང་ག་རྦྷ་བྱོན་ནས་དར་ཞིང་། འདིས་བསམ་ཡས་ཀྱི་རབ་ཏུ་གནས་པའང་བྱས་སོ་ཞེས་གྲགས་པ་སྣང་ངོ།། །།གསུང་གི་རྒྱུད་རྟ་མགྲིན་ལ་སོགས་པ་པདྨའི་རིགས་མཆོག་དག་ནི་དཔལ་མགོན་ཀླུ་སྒྲུབ་ལས་རིམ་གྱིས་པདྨས་མ་བྷ་ཝལ་བརྒྱུད་པ་སྟེ། སློབ་དཔོན་ཆེན་པོ་འདིའི་རྣམ་པར་ཐར་བ་ཐུན་མོང་དུ་གྲགས་པ་དག་ལས་འདི་ལྟར་མ་གསལ་སྙམ་ན། སྔགས་ཀྱི་རྒྱུད་སྡེ་ཕལ་མོ་ཆེ་ལས་མཛད་པ་བཅུ་གཉིས་ཀྱི་ཁོང་ནམ་གསལ་བས་དེ་དག་ཀྱང་གཞན་དུ་འཕེན་པར་འགྱུར་རོ། །སྤྱིར་གྱི་སློབ་དཔོན་འདིའི་དུས་རྒྱ་གར་ན་གསང་སྔགས་ཁྱབ་གདལ་དུ་དར་བལྟ་ཅི་སྨོས། ཐེག་པ་ཆེན་པོ་དར་བའི་མགོ་རྩོམ་པ་ལའང་ཉན་ཐོས་རྣམས་ཀྱིས་ཀླུ་སྒྲུབ་ཀྱི་ཐེག་པ་ཆེན་པོར་གྲགས་པའི་ཆོས་ལོག་བསྟན་ནོ་ཞེས་སྐུར་བ་བཏབ་པའི་ཕྱིར་གསང་སྔགས་ནི་གྲུབ་པ་མཆོག་རྣམས་ཀྱི་ཡུལ་དུ་སྤྱོད་པ་ལས་མིང་ཙམ་ཡང་མི་མངོན་པའི་སྐབས་སོ། །ཐུགས་ཀྱི་རྒྱུད་ཡང་དག་གམ། དཔལ་ཧེ་རུ་ཀ་ནི། དོན་གྱི་སངས་རྒྱས་མཉམ་སྦྱོར་་ཉིད་དུ་གནས་པ་སློབ་དཔོན་ཧཱུྃ་ཀཱ་ར་ལས་བརྒྱུད་པའི་ཆོས་ཏེ། འདི་བལ་པོའི་ཡུལ་དུ་
འཁྲུངས། གོ་ལེ་བཅེས་བྱ་བའི་དབུལ་པོར་གྱུར་བས་རྒྱ་གར་དུ་བྱོན་ནས་རྒྱལ་པོའི་ཕྱུགས་རྫི་བྱས། ནགས་གསེབ་ཏུ་ཕྱུག་འཚོར་སོང་བ་ན། སློབ་དཔོན་ཀུ་ཀུ་རཱ་ཛ་སྒོམ་ལ་ཞུགས་པ་དང་མཇལ། ཤིན་ཏུ་དད་དེ་ཕྱག་དང་བསྐོར་བ་བྱས། མ་ཧེའི་ལོ་མ་བཞོས་ཏེ་དྲངས་པས། བྱིས་པ་ཁྱོད་ཀྱིས་ཆོས་ནུས་སམ་གསུངས། ཆོས་ནུས་ཏེ་བརྒྱག་མེད་ཞུས་པས། བརྩོན་པས་ནུས་ན་གྲུབ་པ་ཡིན་གསུངས་ནས་རྡོ་རྗེ་སེམས་དཔའ་རྒྱ་ནག་གཅིག་པའི་སྒོམ་བཟླས་གནང་། དེར་ཕྱུག་འཚོ་བཞིན་བསྒོམས་པས་རྡོ་རྗེ་སེམས་དཔའ་གྲུབ་སྟེ། ལན་ཅིག་བྲག་ལ་སྒོམ་པའི་་ཚེ་རྒྱལ་པོས་དེའི་ཐད་ཀ་ན་རྡོ་རྗེ་སེམས་དཔའ་འོད་ཁྱིལ་ལེ་བཞུགས་པ་མཐོང་། དགོང་ཁར་སོང་བ་དང་ཕྱུགས་ཐམས་ཅད་ཀྱང་དེར་འདུས། རྡོ་རྗེ་སེམས་དཔས་ཕྱུགས་དེད་ནས་འོང་བ་མཐོང་། ཕོ་བྲང་ལ་ཉེ་བར་སོང་དུས་ལྷ་མི་གསལ་དུ་སོང་། སྒོ་རྩར་སླེབས་དུས་ཕྱུགས་རྫི་རང་དུ་སྣང་བས་རྒྱལ་པོ་ཐེ་ཚོམ་སྐྱེས། ནངས་པར་གོས་བརྗེས་ནས་ཕྱུགས་རྫིའི་ཕྱི་བཞིན་བལྟར་ཕྱིན་པས། ཡང་བྱིས་པ་དེ་རྡོ་རྗེ་སེམས་དཔར་ཀྲོང་ངེར་སོང་། སླར་ཕྱུགས་རྫི་གཙང་ཁང་དུ་བོས། སྔོན་ཆད་མ་ཤེས་པ་བཟོད་པར་མཛོད་ལ་ངའི་མཆོད་གནས་མཛོད་ཅེས་བསྒས་པས། བདག་ལ་ཆེ་བའི་ཡོན་ཏན་ཅི་ཡང་མེད་པས་མི་རུང་ཟེར། རྒྱལ་པོས་སྔར་གྱི་ལོ་རྒྱུས་བརྗོད་པས། ངས་སྐྱེ་བ་འདི་ལ་རྒྱལ་པོ་གདུལ་བར་བྱར་མེད། ཕྱི་མ་མངོན་པར་དགའ་བའི་ཞིང་དུ་མཇལ་ལོ་ཟེར། དེར་རྒྱལ་པོས་ངས་ཡོ་བྱད་སྦྱར་གྱིས་སྒྲུབ་པ་ལ་ཞུགས་སྨྲས་པ་ན། བྱིས་པ་སློབ་དཔོན་ཀུ་ཀུ་རཱ་ཛའི་དྲུང་དུ་སོང་ནས་སྒྲུབ་ཐབས་དངོས་གཞི་ཞུས་པས། སྔར་ལས་འཕྲོ་ཡོད་པས་ལྷ་ངོ་བསྟན་པ་ཡིན། ངས་ཁྱོད་འདུལ་བའི་དུས་ལ་མ་བབས་པས་ཨུ་ཏ་ཡའི་གྲོང་ཁྱེར་ན་སློབ་དཔོན་དུར་ཁྲོད་བདེ་བ་ཡོད་པས་དེར་སོང་ཞེས་ལུང་བསྟན། བྱིས་པས་གྲོང་ཁྱེར་དེར་བཙལ་བས། སློབ་དཔོན་
གྲོངས་ནས་ཕུང་དུར་ཁྲོད་དུ་བསྐྱལ་ཟེར། སླར་ལོག་ནས་ཀུ་ཀུ་རཱ་ཛ་ལ་ཞུས་པས། རོ་ལངས་སྒྲུབ་པའི་མན་ངག་གནང་སྟེ་ཞག་ཉེར་གཅིག་ལ་འགྲུབ། སློབ་དཔོན་ལངས་ཏེ་རོ་ལངས་བདེ་བའི་དངོས་གྲུབ་ཅེས་གྲགས་སོ། །དེས་ཡན་ལག་དྲུག་ཅུ་རྩ་བརྒྱད་ཀྱི་དཀྱིལ་འཁོར་བཞེངས་ནས་སྨིན་པར་བྱས། དཀྱིལ་འཁོར་གྱི་མེ་ཏོག་ཧཱུྃ་ཀཱ་ར་ལ་བབས་པས་གསང་མཆེན་བཛྲ་ཧཱུྃ་ཀཱ་ར་ཞེས་གྲགས། དེར་གདམས་པ་མ་ལུས་པ་རྫོགས་པའི་ཚེ་སློབ་དཔོན་གྱིས། དངོས་གྲུབ་ཀྱི་རྟེན་དུ་ཕྱག་རྒྱ་མཚན་དང་ལྡན་པ་ཞིག་བཟུང་ལ། བསེ་བྲག་བྱ་ཁྱུང་གི་ཚལ་དུ་བསྒྲུབ་པར་སོང་ཞེས་བསྐུལ། དེར་ཧཱུྃ་ཀཱངས་རིགས་ངན་གྱི་གྲོང་ཁྱེར་དུ་བྱོན་ནས་བཙལ་བས། རྒན་རྒོན་རང་ཐག་མཁན་གཉིས་ལ་བུ་མོ་མཚན་དང་ལྡན་པ་ཞིག་འདུག། འདི་ནི་ངའི་སྒྲུབ་བདེ་མོར་སྦྱིན་དགོས་བྱས་པས། བུ་མོ་ཁྱོད་ལ་མི་བསྐུར་ཟེར་སྟེར་དུ་མ་འདོད། རིན་འཇལ་བར་བྱས་ནས་ཡུལ་གྱི་རྒྱལ་པོ་ལ་དབང་པོ་བཅོལ་བས། གསེར་མོ་དང་མཉམ་པ་དགོས་ཟེར། སླར་ལོག་ནས་སློབ་དཔོན་རོ་ལངས་ལ་ལོ་རྒྱུས་བརྗོད་པས། མི་རོ་ལས་གསེར་དུ་བསྒྲུབ་པའི་མན་ངག་གནང་། དུར་ཁྲོད་ནས་རོ་བཙལ་ཏེ་བསྒྲུབས་པས་ལོ་གཅིག་གིས་འགྲུབ། དེར་གསེར་དང་བུ་མོ་བརྗེས་ཏེ་གཉིས་ཀས་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན་ནས་གདམས་པ་ལ་མཐའ་གཅོད་བྱས། ཡོ་གའི་ཤིང་རྟ་ཆེན་པོ་སངས་རྒྱས་གསང་བ་ལའང་གཏུགས་ཏེ་སྒྲོ་འདོགས་བཅད། དེ་བཞིན་དུ་སློབ་དཔོན་སོ་ཀྱ་དེ་ཝ་ལ་ཡང་དག་གི་སྒྲུབ་ལུང་མན་ངག་ཞུས། བསེ་བྲག་བྱ་ཁྱུང་ཚལ་དུ་བསྒྲུབས་པས། དཔལ་ཆེན་པོའི་ཞལ་མངོན་སུམ་དུ་མཐོང་། ཚེ་ལ་དབང་བའི་རིག་འཛིན་ཐོབ། ཡུམ་གྱིས་མཱ་མ་ཀཱིའི་དངོས་གྲུབ་བརྙེས། གཞན་དོན་དུ་ཡང་དག་རྩ་བའི་སྒྲུབ་པ་མཛད། འདིས་རྒྱ་གར་དུ་སློབ་དཔོན་ཆེན་པོ་པདྨ་ལ་གསུངས་ཤིང་། བོད་དུའང་བྱོན་ནས་དར་བ་ཡིན་ནོ།། །།རིན་པོ་ཆེའི་རིགས་བདུད་རྩི་ཡོན་ཏན་ནི། རྒྱལ་རིག་གང་ཟག་གསུམ་
ལས་རིམ་པར་བརྒྱུད་དེ་བདུད་རྩིའི་དངོས་གྲུབ་ཐོབ་པས་བསྐལ་བར་མི་ཤིགས་པའི་ཚེ་ལ་མངའ་དཔལ་འབྱོར་བ་སློབ་དཔོན་བི་མ་ལ་མི་ཏྲ་ལས་འབྱུང་བ་ཡིན་ཏེ། སློབ་དཔོན་དེ་ནི་རྒྱ་གར་ནུབ་ཕྱོགས་ཀྱི་གྲོང་ཁྱེར་གླང་པོ་སྒང་ཞེས་བྱ་བ་མི་ཕྱི་མ་འབུམ་ཚེ་ཉི་ཤུ་རྩ་དགུ་ཡོད་པ་ན། ཁྱིམ་བདག་བདེ་ལྡན་ཞེས་བྱ་བ་དང་། ཡུམ་བདག་ཉིད་གསལ་རིག་ཅེས་བྱ་བའི་སྲས་སུ་འཁྲུངས། ལོ་བདུན་སློབ་མའི་གྲྭར་ཞུགས་པས་སུས་ཀྱང་ངོ་མེད་པ་ཞིག་བྱུང་བས་རིག་པ་ཆེ་བར་གྲགས། བསྟན་པ་ལ་ཞུགས་ནས་བཤེས་གཉེན་མང་དུ་བསྟེན། རིག་པའི་གནས་ཆེ་བ་རེ་ལ་སློབ་དཔོན་གསུམ་གསུམ་བསྟན་ཏེ་བཅོ་ལྔ་ལ་ཕྲུགས་གཅིག་ཏུ་བསླབས་པས་ལོ་ཉེར་གཅིག་པ་ལ་པཎྜི་ཏའི་གྲལ་དུ་ཐོན། པཎྜི་ཏ་རྒྱ་མཚོའི་དབུས་ན་སྒྲ་སྐད་མི་འདྲ་བ་སུམ་བརྒྱ་དྲུག་ཅུ་ཤེས། འབྱུང་བ་བཞིའི་སྒྲ་དང་། དུད་འགྲོའི་སྐད་ལས་ཀྱང་དོན་འཆར་ཞིང་འཆད་པར་ནུས། ཤེས་རབ་ཀྱི་ཕ་རོལ་ཏུ་ཕྱིན་པའི་བཀའ་ཐམས་ཅད་ལ་ཞལ་འདོན་མཛད་ཅིང་། ནང་དུ་དེའི་དོན་མཉམ་གནས་རྫོགས་པ་ཆེན་པོ་ལ་དྲན་པ་ཉེ་བར་གཞག་པ་དེ་ལ། གཤད་ལུང་དང་སྒོམ་ལུང་ནོད་པའི་སློབ་དཔོན་བརྒྱ་དང་དགུ་ཅུ་ཡོད་པའི་ནང་ནས་སློབ་དཔོན་སངས་རྒྱས་གསང་བས་འཁོར་འདས་ཀྱི་ཆོས་ཐམས་ཅད་ཡེ་ཤེས་ཀྱི་བདུད་རྩི་བཅིང་གྲོལ་མེད་པའི་ངོ་བོར་སངས་རྒྱས་པའི་རྒྱུད་སྡེ་རྣམས་བསྟན་ཅིང་། ཁོང་དུ་ཆུད་ནས་མན་ངག་གི་ཡི་གེ་ཡང་མང་དུ་མཛད་དེ་དར་རོ། །དོན་གྲུབ་ཀྱི་རིགས་ལས་ཕྲིན་ལས་ཕུར་བ་ནི། སློབ་དཔོན་ཆེན་པོ་པདྨ་ལས་བྱུང་བའི་མན་ངག་སྟེ། བདག་ཉིད་ཆེན་པོ་འདིའི་རྣམ་པར་ཐར་བ་ནི་བསམ་པར་མི་ནུས་མོད་ཀྱི། རེ་ཞིག་གདུལ་བྱའི་ངོར་སྣང་གི་ཚུལ་འཇིག་རྟེན་ན་ཤིན་ཏུ་གྲགས་པ་གསལ་བ་ཡིན་པས་འདིར་འགོད་པའང་ངལ་བའི་ལས་འདུ་བྱེད་པ་ཙམ་མོ། །དེ་ལྟར་འང་མཁས་པས་ལུང་རིག་གཏན་ཚིགས་མི་འགལ་བར་བསྒྲིགས་པའང་ངོ་མཚར་ཆེ་ཞིང་། ལས་ཅན་གྱི་སྣང་ངོར་རྗེས་སུ་གནང་བ་གཏེར་མའི་ཕྱོགས་ལས་བྱོན་པ་ལའང་
འཐད་པ་དང་། དགོས་པ་དང་། བྱིན་རླབས་བསམ་གྱིས་མི་ཁྱབ་པ་འདུག་པས། དཀོན་མཆོག་བརྩེགས་པར། འོད་སྲུངས་དེའམ་ང་དང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གི། གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ། །ཞེས་གསུངས་པ་ལེགས་པར་བསམས་ཏེ། རྟོག་གེའི་རིག་པ་ཁོ་ནས་མཐའ་གཅིག་ཏུ་སེམས་པ་དང་། ཕྲག་དོག་དང་། ཀུན་སློང་ངན་པས་བསླད་པ་དག་གི་རྗེས་སུ་བློ་གྲོས་ཆེན་པོ་སུའང་མི་འཇུག་པ་ཉིད་དོ། །འདི་ལྟར་ཕུར་བའི་ལོ་རྒྱུས་ཉིད་ལས་ཀྱང་རང་ལུགས་ཀྱི་རྣམ་པར་ཐར་བ་ཡོད་མོད་ཀྱི། སྐབས་ཀྱི་བརྗོད་དོན་ལ། སློབ་དཔོན་ཉིད་ཕྱག་རྒྱ་ཆེན་པོའི་རིགས་འཛིན་བསྒྲུབ་པར་དགོངས་ནས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་བལ་མོ་ཤཱཀྱ་དེ་ཝསསྒྲུབ་བདེ་མོ་བྱས་ཏེ། དཔལ་ཡང་དག་ཟླ་གམ་དགུ་པའི་དཀྱིལ་འཁོར་ཞལ་ཕྱེ་སྟེ་བསྒྲུབས་པས། ཀླུ་གྱོང་པོ་གནོད་སྦྱིན་རྒོད་མ་ཁ། བྱི་དུར་བར་སྣང་ཁམས་ཀྱི་གློག་མ་སྤྲིན་དང་གསུམ་གྱིས་བར་གཅོད་བྱས༑ ནམ་མཁའི་ཆར་བཅད། རྩིྭ་ཤིང་དང་ལོ་ཏོག་ཐམས་ཅད་བསྐམས་པར་བྱས་པས། བལ་པོ་ཤཱི་ལ་མཉྫུ་དང་། བལ་པོ་ཀུན་ཞི་གཉིས་རྒྱ་གར་གྱི་པཎྜི་ཏ་ལས་བར་ཆད་འདུལ་བའི་ཆོས་ལེན་དུ་བཏང་། པཎྜི་ཏ་རྣམས་ཀྱིས་ན་ལེནྡྲའི་གཙུག་ལག་ཁང་ནས། བེ་ཏོ་ཏམ་ལ་འབུམ་སྡེ་དང་ཕུར་བ་མི་ཁུར་གཉིས་བརྫངས། ཡང་ལེ་ཤོད་དུ་ཕེབས་པ་ཙམ་གྱིས་བར་ཆད་ཞི། བསྒྲུབས་པས་ཟླ་བ་གཅིག་ན་རྡོ་རྗེ་གཞོན་ནུས་ཞལ་གཟིགས། སླར་ཡང་ཕུར་སྦྲགས་མའི་སྒྲུབ་པ་མཛད། དམ་ཅན་མ་མོ་བཅུ་གཉིས་ཀྱི་སྲོག་སྙིང་ཕུལ་ཏེ་དམ་ལ་བཏགས། དེའི་ཚེ་བི་ཏོ་ཏ་མ་ལའི་རྒྱུད་སྡེ་ཚན་བཞི་བཅུ་ཞི་བརྒྱད་དམ། སུམ་ཅུ་སོ་དྲུག་ཏུ་ཕྱེ་ཞེས་གྲགས། དེར་རྒྱུད་སྡེ་ལེ་ལག་དང་བཅས་པ་བང་ཆེན་པའི་ཕྲག་པ་ན་བཟུང་། སློབ་དཔོན་ཉིད་ཀྱང་གཤེགས་པས། ཡུལ་ཚ་བ་ཚ་ཤོད་དུ་ནུབ་ཅིག་གཟིམས་པའི་ནམ་ཕྱེད་ན་ཆོ་འཕྲུལ་ཆེན་པོ་བྱུང་། གཟིགས་པས་མདུན་ན་ནེ་གུ་དྲུང་
དྲུང་བ་གཅིག་འདུག། དེར་ཕྱག་རྒྱས་བསྡམས། ལྷུང་བཟེད་དུ་བཅུག། སང་ཆུ་མིག་བྱང་ཆུབ་རིས་སུ་དྲོ་བཏབ་པའི་ཚེ་ཁ་ཕྱེ་བས་བུད་མེད་བཞིན་བཟང་མ་བཞི་འདུག། སུ་ཡིན་དྲིས་པས། ཡུལ་ཚ་བ་ཚ་ཤོད་ལ་དབང་བྱེད་པའི་ས་བདག་མོ་བཞི་ཡིན། ངེད་ཅག་སེམས་ཅན་རྣམས་ཀྱི་ཚེ་སྲོག་ལ་དབང་བའི་བདག་པོར་སློབ་དཔོན་གྱིས་དབང་བྱིན་ཅིག་ཟེར། སློབ་དཔོན་གྱིས་དེ་ལྟར་མི་རུང་གསང་སྔགས་རྡོ་རྗེ་ཕུར་པ་སྒྲུབ་པ་ལ་བར་དུ་གཅོད་པའི་དགྲ་བགེགས་རྣམས་ཀྱི་ཚེ་སྲོག་ལ་དབང་བྱེད་པར་བསྐུར་རོ་གསུངས་ནས་དེ་ལྟར་མཛད། གསང་བའི་མཚན་རྡོ་རྗེ་ཡ་བྱིན་ལ་སོགས་པར་བཏགས། དེ་ནས་ན་ལེནྡྲར་བརྟོལ། པཎྜི་ཏ་རྣམས་ལ་དཔེ་སྔ་མ་གཏད་ཅིང་། རང་གི་མན་ངག་ཏུ་ཕྱེ་བ་རྣམས་གཟིགས་བཅུག་པས། འདི་དག་ནི་ལུང་དང་མི་འགལ་ལ་བསྒྲུབ་པའི་ཆ་རྐྱེན་དུ་འཕགས་སོ་གསུངས་ནས་རྒྱལ་མཚན་གྱི་རྩེལ་ཕྱར། དེང་དུར་ཁྲོད་སོས་གླིང་དུ་མཁའ་འགྲོ་མ་བདེ་བའི་འཁོར་ལོ་ལས་རྡོ་རྗེ་ཕུར་བའི་དཀྱིལ་འཁོར་དུ་དབང་ཐོབ་པ་སློབ་དཔོན་བྲ་བྷ་ཧསྟི་ལས། ཕུར་བའི་ཆོས་ཚར་བཅོ་བརྒྱད་གསན། ཚེ་དང་། ལས་དང་། ས་འོག་གི་རིག་འཛིན་གསུམ་གྲུབ། བོད་ཀྱི་སྤྱན་འདྲེན་པའང་ལྷགས་པ་མཁྱེན་ནས་སླར་ཡང་ལེ་ཤོད་དུ་བྱོན། སློབ་དཔོན་གསུམ་གང་ན་འཇོམ་པ་ན། བི་མ་ལས་ཕུར་བ་གདེངས་པས་ཆུ་བོ་གྱེན་ལ་ལྡོག། བལ་པོ་ཤཱི་ལ་མཉྫུས་བྲག་ལ་ཕུར་བ་བཏབ། སློབ་དཔོན་ཆེན་པོས་ནགས་ཚལ་ལ་མེ་ཤོར་བའི་སར་བསྡིགས་པས་ཙནྡན་གྱི་ནགས་སུ་སོང་། དེ་ནས་བསམ་ཡས་སུ་རྒྱལ་པོ་ལ་ཕུར་བའི་ཆོས་གསུངས། མཁར་ཆེན་བཟའ་མཚོ་རྒྱལ། ཅོག་རོ་བཟའ་མཆོད་གནས་མ། ཨ་ཙར་ས་ལེ་གསུམ་ལ་མདུན་གྱི་ནམ་མཁར་དཀྱིལ་འཁོར་སྤྲུལ་ཏེ། དབང་ལྷ་ལ་ཞུའམ་བླ་མར་ཞུ་གསུངས་པས། མཁར་ཆེན་བཟས་བླ་མ། ཅོག་རོས་ལྷ་ལ་འདམས། ས་ལེས་བླ་མའི་དགོངས་པ་དང་སྦྱར་བ་ཞུས་པས། རྟེན་འབྲེལ་
གྱི་དབང་ལས་ཡང་ཕུར་བདུད་རྩི་གསུམ་ལྕམ་ལུགས་མི་ཐབ་པར་གྲགས། མཁར་ཆེན་བཟའ་ལ་རྒྱུད་དང་མན་ངག་སྙིང་པོར་དྲིལ་ནས་གནང་སྟེ་ས་ལེ་ལའང་ཤོང་གསུངས་པས་ཕུར་པ་ཇོ་མོ་ལུགས་ཟབ་པ་ཡིན་ནོ། །སྤྱིར་བོད་ཡུལ་འདིར་ཕུར་བ་ཤིན་ཏུ་དར་ཞིང་དེ་ལས་དངོས་གྲུབ་བརྙེས་པའང་བསམ་གྱིས་མི་ཁྱབ་ལ། གསར་མ་རྣམས་མ་དར་གྱི་བར་ལ་བོད་དུ་ཡི་དམ་དང་སྔགས་ཀྱི་བསྟན་པའི་སྲོག་ཀྱང་ཡང་ཕུར་གྱིས་བཟུང་། བརྒྱུད་པ་བྱིན་གྱིས་རློབ་པར་ནུས་པའི་རིག་སྔགས་འཆང་བའི་གདུང་དང་། དེ་ལས་མཁས་ཤིང་གྲུབ་པ་བརྙེས་ནས་བསྟན་པའི་ཆུ་མགོ་ཐ་དད་པར་ཤར་བའི་སྐྱེས་བུ་དམ་པ་རྣམས་ཀྱང་བྱུང་མོད་། དེ་ལྟ་ནའང་། ཕལ་ཆེར་ཡོངས་སུ་འདྲིས་ལ་སྡང་། །རྟག་ཏུ་གསར་པ་གསར་པ་འཚོལ། །ཞེས་པ་ལྟར། དཔལ་ཡེ་བཟང་རྩེ་བས། བོད་འདིར་རྡོ་རྗེ་ཕུར་པའི་སྒྲུབ་པ་ཤིན་ཏུ་དར་ལ། དེ་ལའང་ཁ་ཟེར་བ་དག་ཡོད་མོད་ཀྱི། དུས་ཕྱིས་ཆོས་རྗེས་སྐྱབས་ཤངས་སྲེག་ཤིང་ནས་སློབ་དཔོན་པདྨ་དངོས་ཀྱི་ཕྱག་དཔེའི་རྒྱ་དཔེ་རྙེད་ནས་འགྱུར་མཛད་པས་ཕལ་ཆེར་ཁ་རོགས་ཏེ་འདུག་གོ །ཞེས་གསུངས་པ་ལྟར་ས་པཎ་གྱིས་ཕུར་བའི་རྒྱ་དཔེ་རྙེད་པས་དགྱེས་ཆེས། སྣམ་སྦྱར་མན་བས་ནས་རྒྱ་དཔེ་ཕྱག་ཏུ་བཟུང་། བསུ་བ་དང་རོལ་མོའི་བྱེ་བྲག་གིས་སྤྱན་དྲངས་པས་བོད་དུ་བྱུང་བའི་ཆོས་སུ་སྒྲོ་འདོགས་པའི་གཟུ་བོ་མི་གནས་པ་དག་གི་བཞིན་རས་ལ་མུན་པའི་བྱུག་པ་བྱེད་པའི་སྐབས་བྱུང་བ་ཡིན་ནོ།། །།གཉིས་པ། བདེ་འདུས་གཏེར་མའི་ལོ་རྒྱུས་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན་སྟོན་པ་བཅོམ་ལྡན་འདས་ཆོས་སྐུ་ཀུན་ཏུ་བཟང་པོ་ཉིད་དགོངས་པ་མཉམ་ཉིད་བསལ་གཞག་མེད་པའི་ངང་དུ་བཞུགས་པ་ལ། ཡུམ་ཀུན་ཏུ་བཟང་མོས་རྡོ་རྗེའི་དམ་ཚིག་ཆེན་པོའི་གླུས་བསྐུལ་ནས་ལོངས་སྤྱོད་རྫོགས་པའི་སྐུར་བཞེངས་ཏེ། ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་རྣམ་པར་འཕྲུལ་ཏོ། །ཞི་བའི་གདུལ་བྱར་མ་གྱུར་བ་རྣམས་ལ་ཁྲོ་བོ་ཆེ་མཆོག་ཧེ་རུ་ཀའི་སྐུར་
བཞེངས་ནས་ཁྲོ་བོའི་དཀྱིལ་འཁོར་བསྟན་ཏེ་དགོངས་པས་བརྒྱུད་པ་དག །རིག་འཛིན་རྣམས་ལ་བརྡ་ལས་བརྒྱུད་དེ་གཙོ་བོར་གྱུར་བ་སྟོན་པ་ཉིད་བྱང་ཆུབ་སེམས་དཔའི་ངང་ཚུལ་ཅན་རིག་འཛིན་རྡོ་རྗེ་ཆོས་ཀྱིས་ཕྱོགས་སུ་བསྡེབས་ཏེ་གླེགས་བམ་དུ་སྣང་བར་མཛད་དོ། །དེར་རེ་ཞིག་མིའི་ནང་དུ་སྐལ་བར་གྱུར་བ་མ་རྙེད་ནས་མཁའ་འགྲོའི་གཙོ་མོ་ལས་ཀྱི་དབང་མོ་ཆེ་ལ་གཏད་རྒྱས་བརྒྱུད། མཁའ་འགྲོ་མས་བདེ་གཤེགས་འདུས་པའི་སྤྱི་རྒྱུད་ལྔ་དང་། བྱེ་བྲག་གི་རྒྱུད་བཅུ་རྣམས་རིན་པོ་ཆེ་སྣ་བརྒྱད་ལས་བྱས་པའི་སྒྲོམ་བུར་སྩལ། སྒོས་རྒྱུད་རྣམས་སྒྲོམ་བུ་ཐ་དད་པར་བཅུག་ནས་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་རྒྱས་བཏབ་བོ། །དེར་དུས་ལ་བབ་པའི་ཚེ་ཉིན་པར་ཐོག་སེར་འབབ་ཅིང་། མཚན་མོ་གློག་འགྱུ་བ་ལ་སོགས་པའི་ཆོ་འཕྲུལ་ཟད་མི་ཤེས་པ་སློབ་དཔོན་བརྒྱད་ཀྱིས་དགོངས་ཏེ་ཐམས་ཅད་ནམ་མཁར་བྱོན་ནས། དགོངས་པ་གཅིག་ཏུ་བསྡུས། མཆོད་རྟེན་ཆེན་པོའི་མདུན་དུ་ལྷགས་ནས་མཐུན་པའི་རྫས་དང་བདེན་པའི་ཚིག་གིས་བཀྲོལ། གཞན་དོན་དུ་དགོངས་པའི་བརྟུལ་ཞུགས་བསྐྱེད་དེ་དབང་དུ་བསྡུས་པས། གདུགས་བདུན་གྱི་ནུབ་མོ་མཁའ་འགྲོ་མ་ལས་ཀྱི་དབང་མོ་ཆེ་མངོན་སུམ་དུ་བྱོན་ནས་མཆོད་རྟེན་ནས་སྒྲོམ་བུ་ཕྱུང་སྟེ། ཆེ་མཆོག་གི་བསེ་སྒྲོམ་བི་མ་ལ། ཡང་དག་གི་དངུལ་སྒྲོམ་ཧཱུྃ་ཀཱ་ར། གཤིན་རྗེའི་ལྕགས་སྒྲོམ་འཇམ་དཔལ་བཤེས་གཉེན། རྟ་མགྲིན་གྱི་ཟངས་སྒྲོམ་ཀླུ་སྒྲུབ། ཕུར་བའི་གཡུ་སྒྲོམ་སློབ་དཔོན་པདྨ། མ་མོའི་ང་སེ་སྒྲོམ་དྷ་ན་སཾ་སྐྲྀ། མཆོད་བསྟོད་ཀྱི་མཆོད་སྒྲོམ་རོམ་བུ་གུ་ཧྱ། དྲགསྔགས་ཀྱི་གཟི་སྒྲོམ་ཤཱནྟི་ང་གརྦྷ་སྟེ་སོ་སོར་བཀའ་བབས་ཀྱི་ངེས་པ་གཏད་པས་རང་རང་གི་དོན་ལ་མཁས་ཤིང་གྲུབ་པ་ཐོབ་པར་གྱུར། རིན་པོ་ཆེ་སྣ་བརྒྱད་ཀྱི་སྒྲོམ་དུས་དེར་རྒྱ་མ་བཀྲོལ་བ། ཕྱིས་སློབ་དཔོན་པདྨར་གཏད་པ་ནས་བདེ་གཤེགས་ཡོངས་རྫོགས་ཚོམ་བུ་གཅིག་ཏུ་སྒྲུབ་པའི་རྒྱུད་དང་མན་ངག་བྱུང་། སླར་བོད་དུ་བཙན་
པོ་ཁྲི་གྲོང་ལྡེའུ་བཙན་གྱིས་གསོལ་བ་བཏབ་པ་ལས། བསམ་ཡས་མཆིམས་ཕུའི་བྱེ་གུ་དགེའུར་ལས་ཅན་གྱི་རྗེ་འབངས་བརྒྱད་ལ་ཕྱི་ནང་གསང་བའི་དབང་དང་མན་ངག་རྫོགས་པར་བྱིན། དེའི་ཚེ་གསེར་སྲང་བཅུ་རེ་ལས་བྱས་པའི་མེ་ཏོག་སོ་སོར་དོར་བས། མངའ་བདག་ཉིད་དབུས་ཀྱི་ཆེ་མཆོག། ནམ་མཁའི་སྙིང་པོ་ཡང་དག། སངས་རྒྱས་ཡེ་ཤེས་གཤིན་རྗེ།། །།ངན་ལམ་མཆོག་དབྱངས་རྟ་མགྲིན། མཁར་ཆེན་བཟའ་ཕུར་བ། དཔལ་གྱི་ཡེ་ཤེས་བླ་མེད་ཧེ་རུ་ཀ། རླངས་དཔལ་སེང་དྲེགས་པ་ཀུན་འདུལ། བཻ་རོ་ཙ་ན་སྟོབས་ལྡན་ནག་པོ་ལ་བབས་པས་ལྷ་སོ་སོས་ཞལ་གཟིགས། མཁར་ཆེན་བཟས་བླ་མ་སངས་རྒྱས་ཐམས་ཅད་འདུས་པའི་ངོ་བོར་མཐོང་། དེ་དག་མཆོག་གི་གདུལ་བྱ་ཡིན་པས་དབང་དུས་སུ་རྟོགས་པ་བརྙེས། བཀའ་བབས་སོ་སོར་བསྒྲུབས་པས་བཙན་པོས་ཏིང་འཛིན་ཁྱད་པར་ཅན་གྲུབ། རྩ་མདུད་གྲོལ་བས་ཤེས་རབ་ཕྱོགས་མེད་དུ་རྒྱས་ནས་བཀའ་ཡང་དག་པའི་ཚད་མ་ཞེས་པའི་བསྟན་བཅོས་ཀྱང་མཛད། སྐུ་ཚེ་ཕྱིར་བསྲིངས། ནམ་མཁའི་སྙིང་པོས་ཉི་ཟེར་ལ་ཆིབས་ཤིང་བྲག་ལ་འདམ་རྫབ་ལྟར་མཛད། སངས་རྒྱས་ཡེ་ཤེས་ནམ་མཁའ་ལ་བྱ་ལྟར་གཤེགས་ཤིང་ཚེའི་རིག་འཛིན་བརྙེས། རྒྱལ་བ་མཆོག་དབྱངས་བསྐྱེད་རིམ་གྱད་དུ་གྱུར་བས་དབུ་གཙུག་ན་རྟ་མགོ་འབྱིན་ཅིང་རྟ་སྐད་ཧི་ཧིར་བསྒྲགས། མཁར་ཆེན་བཟས་འཕགས་ཡུལ་གྱི་གྲུབ་ཐོབ་དག་གིས་ཀྱང་སྤྱོད་ཡུལ་དུ་དོགས་པའི་བསད་པ་གསོ་ནུས། འབྲོག་མི་དཔལ་ཡེས་མ་མོ་ལས་ལ་དངོས་སུ་འཁོལ། རླངས་དཔལ་སེང་གིས་སྡེ་བརྒྱད་བྲན་དུ་འཁོལ། བཻ་རོ་ཙ་ན་ཡེ་ཤེས་ཀྱི་སྤྱན་དང་ལྡན་ཞིང་རྫུ་འཕྲུལ་གྱི་བཀོད་པ་ལ་མངའ་བརྙེས་པ་སོགས་བྱུང་བས་འདི་དག་ལ་གྲུབ་ཆེན་བརྒྱད་ཅེས་གྲགས། འདིའི་སྟེང་དུ་སློབ་དཔོན་ཆེན་པོས་མན་ངག་རྗེས་སུ་གདམས་པ་ལས་དངོས་གྲུབ་ཆེན་པོ་བརྙེས་པ། གཉགས་ཛྙཱ་ན་ཀུ་མཱ་ར་དང་། ལྷ་ལུང་དཔལ་གྱི་རྡོ་རྗེ་ལ་སོགས་
པ་ནམ་མཁའ་ལ་འདབ་ཆགས་བཞིན་བྱ་བ་དང་། ཆུ་བོ་ལ་གར་མཁན་བཞིན་བྱ་བ་དང་། མཁའ་སྤྱོད་དུ་འོད་པུང་གིས་འགྲོ་བ་དང་། གཅན་གཟན་གྱི་གཉའ་བ་ནས་འཛིན་པ་དང་། ཆུ་བོ་གྱེན་ལ་ལྡོག་པ་དང་། རོ་ལངས་གསེར་དུ་བསྒྱུར་བ་དང་། ལྟ་སྟངས་ཀྱིས་གཡག་རྒོད་འགུགས་པ་དང་། རི་བྲག་ལ་ཐོགས་རེག་སྤངས་པ་དང་། ཐོག་མདས་བྲག་རི་བསྙིལ་བ་དང་། ཕ་ཝང་ཟན་ལྟར་གཅོད་པ་དང་། ནམ་མཁའ་ལ་སྐྱིལ་མོ་ཀྲུང་བཅའ་བ་དང་། བར་སྣང་ནས་འདབ་ཆགས་འཛིན་པ་དང་། ཕུར་བ་གདེངས་ཚད་སྲོག་གི་རྒྱུ་བ་འགག་པ་ལ་སོགས། བལྟར་མངོན་པའི་རྫུ་འཕྲུལ་ཡ་མ་ཟུང་དང་། ནང་ཏིང་ངེ་འཛིན་གྱི་དགོངས་པ་ཚད་དུ་ཕྱིན་པས། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། གཡུང་དྲུང་ལྟ་བུའི་ལུས་ལ་སོགས་ཏེ་དངོས་གྲུབ་རྣམ་པ་གཉིས་ཀྱི་གོ་འཕང་ལ་རྐང་སྟེགས་འཇོག་པ་བཅུ་བདུན་བསྣན་པས་རྗེ་འབངས་ཉི་ཤུ་རྩ་ལྔར་གྲགས་པ་ཡིན་ནོ། །དཔལ་འཛིན་གྱིས། འཇིག་རྟེན་མཆོད་བསྟོད་དཀྱིལ་འཁོར་དུ། །བོད་ཀྱི་ལྷ་འདྲེ་འཛུད་ལུགས་ཀྱིས། །གཞན་དུ་འབྱུང་པོ་ཟད་དམ་ཅི། །ཞེས་ཁ་ཟེར་བ་བྱས་མོད། དེ་དག་ཡེ་ཤེས་ཀྱི་དཀྱིལ་འཁོར་ཡིན་པས་དྲེགས་པ་ཅན་འཁོར་དུ་མི་རུང་ཟེར་ན། དཔལ་ལྡན་འབྲས་སྤུངས་རྒྱུ་སྐར་གྱི་དཀྱིལ་འཁོར་ལ་ཡང་ཉེས་པ་དེ་ཡོད་པས་སོ། །ཡང་བོད་ཀྱི་ལྷ་འདྲེའི་མིང་སྣང་ལུགས་ཀྱིས་བོད་དུ་བྱས་སོ་ཟེར་ན་ནི། གཟུངས་གྲྭ་ལྔར་ཡུལ་སོ་སོའི་གནོད་སྦྱིན་མང་དུ་བཀོད་པ་དེ་ཡང་ནོད་པར་འགྱུར་ལ། སྤྱིར་རྟོག་གེའི་རིག་པས་གཞལ་ནའང་འཇིག་རྟེན་གྱི་ཁམས་ན་མིང་འདྲ་དང་རུས་འདྲ་ཇི་སྙིད་་ཡོད། ཕྱིན་ཅི་ལོག་འདིས། ཕུང་པོ་གསུམ་པའི་སངས་རྒྱས་གྲྭར། །སྲེད་མེད་བུ་སོགས་འཛུད་ལུགས་ཀྱིས། །གཞན་དུ་འདྲེན་པ་ཟད་དམ་ཅི། །ཞེས་ཚངས་པ་དང་ཆུ་ལྷ་དང་། སྲེད་མེད་བུ་ལ་སོགས་པ་དངོས་བསྟན་དུ་སྨྲ་བར་འགྱུར་བ་ཤིན་ཏུ་ཐ་ཆད་པའི་
ཚིག་གོ །ཁྱད་པར་རྒྱུད་ཀྱི་གླེང་གཞི་མ་མཐོང་ཞིང་། སངས་རྒྱས་ཀྱི་ཕྲིན་ལས་རླབས་པོ་ཆེའི་ཚུལ་ཁོང་དུ་མ་ཆུད། ཆོས་ཉིད་བསམ་གྱིས་མི་ཁྱབ་པའི་གནས་ལ་ལྟ་བའི་སྐལ་བ་ནི་ཆད། བེམ་པོའི་རུམ་ནས་སྣང་བ་ཀོ་ལེར་ཤར་བའི་གཏན་ཚིགས་ཀྱིས་རང་གི་ཚི་ཆད་པར་བྱ་བ་རྒྱ་གར་ནས་བྱུང་བའི་རྒྱུད་ལ་བོད་ཀྱི་ལྷ་འདྲེ་མི་རུང་བར་བསྟན་པའི་ཤུགས་ཀྱིས་རྒྱ་གར་ཉིད་ཀྱིས་ལྷ་འདྲེ་བྱུང་སྲིད་ན་འགལ་བ་མེད་པར་དོན་གྱིས་སོང་བས། གང་དུ་སྟོན་པས་གསང་སྔགས་གསུངས་པའི་གནས་དང་མཚན་ཉིད་སོགས་ཀྱི་གོ་བ་རབ་རིབ་ཙམ་ཡང་མ་ཆགས་པ་ཉིད་དོ། །འདིར་འཇིག་རྟེན་མཆོད་བསྟོད་ཀྱི་རྒྱུད་ལས། བཅོམ་ལྡན་འདས་འབར་བ་ཆེན་པོའི་སྐུར་བཞེངས་ཚུལ་བསྟན་པའི་རྗེས། འཇིག་རྟེན་གྱི་ཁམས་ཀྱི་དྲེགས་པ་ཅན་ལྷའི་ཚོགས་དང་། བདུད་དང་། གཤིན་རྗེ་དང་། སྲིན་པོ་དང་། གནོད་སྦྱིན་དང་། གཟའ་དང་། ཀླུ་དང་། རྒྱལ་པོ་དང་། གིང་དང་། མ་མོ་ཆེན་མོ་རྣམས་དང་། ཌཱཀྐིའི་ཚོགས་དང་། རཱུ་ཏྲ་དང་། མུ་སྟེགས་དང་། སྲོག་གི་བདག་པོ་དང་། ནོར་གྱི་བདག་པོ་དང་། ཚེའི་བདག་པོ་དང་། སྲིད་པའི་བདག་པོ་དང་། གཞན་ཡང་འཇིག་རྟེན་གྱི་ཁམས་ཐམས་ཅད་དང་། དུར་ཁྲོད་ཆེན་པོ་དང་། འཛམ་བུའི་གླིང་མཐའ་འཁོབ་ཀྱི་ས་དང་། རིའི་རྒྱལ་པོ་དང་། རི་ཕྲ་མོ་དང་། རྒྱ་མཚོ་དང་། ཆུ་ཕྲན་དང་། ཡོངས་སུ་འདུ་བའི་ཤིང་དང་། ནགས་ཚལ་ཆེན་པོ་དང་། གནས་ཕྲ་མོ་བསམ་གྱིས་མི་ཁྱབ་པ་དག་ན་གནས་པའི་འཇིག་རྟེན་གྱི་དྲེགས་པ་ཅན་ཕོ་དང་མོའི་རྣམ་པར་འདུག་པ་དང་། གཙོ་བོ་དང་འཁོར་གྱིས་ཁྱད་པར་དུ་གྱུར་བ་དང་། བྲན་དང་གཡོག་གི་ཚོགས་དང་བཅས་པ་དག་རང་རང་གི་གནས་ནས་མྱུར་དུ་སྡངས་ཤིང་སྐྲག་ལ་འཇིགས་པ་དང་། ཡ་ང་བའི་སེམས་དང་། དུལ་བའི་སེམས་ཀྱིས་ཐོན་ཏེ། བཅོམ་ལྡན་འདས་དེའི་སྤྱན་སྔར་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་ཤིང་བལ་གྱི་འདབ་
མ་བཞིན་དུ་རང་དབང་མེད་པར་ལྷགས་པར་གྱུར་ཏེ། ཞེས་སྟོན་པ་བཅོམ་ལྡན་འདས་གསང་བའི་བདག་པོ་དཔལ་ཧེ་རུ་ཀས་གང་དུ་རང་སྣང་གི་འོག་མིན་སྤྲུལ་པའི་གནས་དེར་འཇིག་རྟེན་ཁམས་ཀྱི་དྲེགས་བཙན་ཐམས་ཅད་དབང་དུ་བསྡུས། སྲོག་སྙིང་བླངས། འཁོར་གྱི་རོལ་བར་མཛད་པའི་ཕྱིར། འཇིག་རྟེན་གྱི་ཁམས་ཞེས་པས་སྤྱིར་བསྡུས་ལ། འཛམ་བུའི་གླིང་ཞེས་པས་བྱེ་བྲག་གིས་བསྡུས་པའི་ཁམས་སུ་བོད་ཅེས་བྱ་བའི་ཡུལ་ཕྲན་ཀོ་ལེབ་འདི་ཡོད་པ་བ་ལང་རྫི་བོ་ཡན་ཆད་ཀྱིས་ཀྱང་ཤེས་པར་འགྱུར་རོ། །རྒྱུད་སྡེའི་གནས་ཆེན་པོ་འདི་དག་གཟིགས་ནས་གཡུང་སྟོན་རྡོ་རྗེ་དཔལ་བས། མདོ་སྔགས་ཀྱི་སངས་རྒྱས་ལ་ཁྱད་པར་ཕྱེ་ཞིང་། སྔགས་ཀྱི་སྟོན་པས་གདུལ་བྱ་ནག་ཕྱོགས་པ་འདུལ་ནུས་པར་བཤད་པའང་དོན་འདི་ལྟ་བུ་ལ་དགོངས། དེ་བཞིན་དུ་བློ་གྲོས་བསམ་གྱིས་མི་ཁྱབ་པ་འགོས་ལོ་གཞོན་ནུས། ལྷ་ཆེན་པོ་འདི་རྣམས་ཀྱང་སངས་རྒྱས་མཐོང་བ། རང་རང་གི་གསང་སྔགས་ཀྱི་གསང་ཚིག་དང་བཅས་ཤིང་། དེས་འཇིག་རྟེན་ལ་ཕན་འདོགས་པ་ཤ་སྟག་ཡིན། ཞེས་གསུངས་པའང་དོན་འདིར་གནས་ལ། གཞན་དུ་བོད་ཀྱི་ལྷ་འདྲེས་སངས་རྒྱས་མཐོང་བའི་ཚུལ་སྟོན་པ་མེད། ཤམྦྷོ་ལ་སོགས་པ་ནག་ཕྱོགས་སུ་བྲིས་པའང་ཡོད་དེ་གནས་སྐབས་ཀྱི་གཏམ་ཙམ་མོ། །དེ་བཞིན་དུ་དཔལ་འཛིན་གྱིས་གསར་མའི་རྒྱུད་འགྲེལ་འདི་ཙམ་ཞིག་འགྱུར་བ་ལ། ཐ་ན་རྫོགས་པ་ཆེན་པོ་ཞེས་པའི་མིང་ཙམ་ཡང་མེད་ཅེས་རང་མཚང་རང་གིས་སྟོན་པ་ཉིད་དེ། འཇམ་དཔལ་ཞལ་ལུང་ལས། རྫོགས་པ་ཆེན་པོ་ཡེ་ཤེས་སྤྱི་གཟུགས་ཅན། །ཞེས་དང་། ཡེ་ཤེས་ཞབས་ཀྱིས་སྒྲུབ་ཐབས་ཀུན་ཏུ་བཟང་མོར་ཡང་རྫོགས་པ་ཆེན་པོ་ཞེས་བཤད་པས་རྒོད་འགྱོད་ལ་སོགས་པའི་སྒྲིབ་པ་ལྔ་ཅང་ཉམས་སུ་མྱོང་བར་བྱས་སོ། །ལར་རྟོག་དཔྱོད་འདི་ནི་བློ་གྲོས་ཕུར་ཁུང་ཐུག་པ་ཡིན་ཏེ། གཅིག་ལ་གཅིག་ལྟོས་ཀྱི་ལུང་བསྟན་པ་མེད་པས་ཆོས་མ་ཡིན་
པར་འགྲོ་ན། མདོ་སྡེ་རྣམས་ནས་གསང་སྔགས་སྤྱིའི་མཚན་ཉིད་དང་མིང་ཙམ་ཡང་མ་བསྟན་པས་དེ་ཐམས་ཅད་ཀྱང་རྫུན་པར་འགྱུར་རོ། །དེ་བཞིན་དུ་གཟུ་བོར་མི་གནས་པའི་རྫུན་གཏམ་དང་། དྲང་དོན་གྱི་ཕྱོགས་ལ་འཆེལ་བ་དང་། རི་བོང་གི་ཆ་ལ་བྲག་ཆ་ལྟ་བུར་ཟློ་བ་ལ་སོགས་པའི་ཕྱོགས་ཀྱང་བསལ་བར་བྱ་སྟེ། དེ་ལ་བཙན་པོ་ཁྲི་སྲིང་ལྡེའུ་བཙན་གྱི་ཐུགས་བསྐྱེད་བླ་ན་མེད་པས་གངས་ཅན་པ་རྣམས་ཀྱི་བསོད་ནམས་དམ་པའི་བགོ་སྐལ་དུ། བསྐལ་པ་དང་པོ་ཆགས་པ་ནས་ད་ལྟའི་བར་དུ་བཅོམ་ལྡན་འདས་དཔལ་ཀུན་ཏུ་བཟང་པོའི་བྱིན་རླབས་ལས། འོག་མིན་གྱི་གནས་སུ་དྲུག་པ་རྡོ་རྗེ་འཆང་དུ་རྣམ་པར་འཕྲུལ་ཏེ། གསང་བ་འཛིན་པ་རྣམས་ལ་གསང་སྔགས་རྡོ་རྗེ་ཐེག་པའི་ཆོས་ཀྱི་འཁོར་ལོ་རྒྱ་མཚོའི་རྡུལ་གྱིས་ཀྱང་མཐའ་མི་དཔོགས་པར་གསུངས་པ་ཉིད། རིགས་གསུམ་སེམས་དཔའ་ལ་སོགས་པས་ལྷ་དང་། ཀླུ་དང་། གནོད་སྦྱིན་ལ་སོགས་པའི་ཡུལ་དུ་སྣང་བར་མཛད་ཅིང་། མཁའ་འགྲོ་དང་། གྲུབ་ཐོབ་རིག་པ་འཛིན་པ་དུ་མས་བཟུང་སྟེ་གནས་པ་དག་ཀྱང་བོད་འདིར་བྱོན་མོད་ཀྱི། དེ་དག་ལ་འཇམ་དཔལ་གང་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་པ་ནི་ཆོས་སྤོང་བའོ། །ཞེས་གསུངས་པ་ལྟར་སྔོན་གྱི་སྤྲུལ་པའི་ལོ་ཕན་ཆེན་པོ་རྣམས་ལ་ཕྱག་བྱ་བ་དང་། རྗེས་སུ་ཡི་རང་བ་ལྟ་ཅི་སྨོས། རྒྱ་གར་ན་མེད་པ་དང་། བོད་དུ་བཅོས་པ་སོགས་ཀྱི་བསྟིང་ཚིག་མང་དུ་སྨྲས་ནས། ཐོས་པ་ཉུང་ཞིང་རྨོངས་པའི་ཕྱོགས་ལ་མངོན་པར་ཞེན་པ་རྣམས་ཀྱང་ངན་འགྲོའི་ལམ་ལ་འཁྲིད་པར་རྩོམ་པ་ཉེས་སྤྱོད་ཆེན་པོ་འདི་བཟོད་པར་དཀའ་བས་བཏང་སྙོམས་ལས་བསླང་བར་བྱའོ། །དེ་ལ་རྒྱ་གར་ན་མེད་པ་ཁོ་ནས་རྒྱུད་ཡང་དག་པ་མ་ཡིན་པའི་གཏན་ཚིགས་མི་འགྲུབ་སྟེ། རྒྱ་གར་གྱི་རྒྱུད་རྣམས་ཀྱང་། ལྷ་དང་། ཀླུ་དང་། གནོད་སྦྱིན་དང་། མཁའ་འགྲོ་མའི་གནས་དང་། ཁྱད་པར་དུ་འཛམ་བུའི་གླིང་གི་
ཟ་ཧོར་དང་། ཤམྦྷ་ལ་དང་། སིངྒ་ལ་དང་། མ་ལ་ཡ་དང་། ཨོ་རྒྱན་ལ་སོགས་པ་མཁའ་འགྲོའི་གནས་ཆེན་པོ་དག་ནས་སློབ་དཔོན་ཆེན་པོ་དགའ་རབ་རྡོ་རྗེ་དང་། ཀླུ་སྒྲུབ་སྙིང་པོ་དང་། པདྨ་འབྱུང་གནས་དང་། ས་ར་ཧ་པ་དང་། བི་མ་ལ་མི་ཏྲ་ལ་སོགས་པས་སྤྱན་དྲངས་ཏེ་བྱོན་པ་ཡིན་ནོ། །གལ་ཏེ་བཞུགས་པ་དག་ཀྱང་ཡོད་སྲིད་དེ་ཁྱོད་ཀྱིས་ལན་རེ་ཙམ་ཕྱིན་པས་མཐོང་མི་ནུས་ཏེ། ཉམ་ཆུང་བོད་ཀྱི་རྒྱལ་ཁམས་ཙམ་ན་ཡོད་པའི་གླེགས་བམ་གྱི་རྣམ་གྲངས་ཀྱང་། ཤུལ་རིང་གི་མགྲོན་པོས་ཁ་ཚོན་མི་ཆོད་ན། སྔོན་གྱི་སྤྲུལ་པའི་ལོ་པཎ་ཆེན་པོ་རྣམས་ལྟར་རྫུ་འཕྲུལ་གྱི་བཀོད་པས་ཡུལ་ཉེར་བཞི་ལ་སོགས་པ་མཁའ་འགྲོའི་གསང་མཛོད་ལ་བགྲོད་ནུས་པ་ནི་ཕྱིས་ཀྱི་ལོ་ཙཱ་བས་མ་བྱུང་། རྒྱུ་མཚན་དེས་ཇོ་བོ་ཨ་ཏི་ཤས་ཀྱང་རྒྱ་གར་གྱི་སློབ་དཔོན་ནག་པོ་བདེ་ཚེ་འཕོས་པ་འདི་ཁོ་ན་ཡིན་ཏེ། ཁོ་བོས་འདི་དང་ཆོས་གཉམ་གན་ནུས་གསུངས་པའི་རོང་ཟོམ་ཆོས་ཀྱི་བཟང་པོའི་ཞལ་ནས། སྔོན་པ་གོར་བཻ་རོ་ཙ་ན་དང་། རྨ་རིན་ཆེན་མཆོགགཉགས་ཛྙཱ་ན་ཀུ་མཱ་ར། སྐ་ཅོག་རྣམ་གཉིས་ལ་སོགས་སྤྲུལ་པའི་ལོ་ཙཱས་བསྒྱུར་བས་ཆོས་ཡིན་ལ། ད་ལྟའི་ལོ་ཙཱ་བ་དགུན་བལ་ཡུལ་དུ་བསྡད། དབྱར་ཚད་པས་འཇིགས་ནས་མང་ཡུལ་དུ་དོན། སྔོན་གྱི་མཁས་པའི་འགྱུར་ལ་རང་བཟོ་བཅོས་མ་སྣ་ཚོགས་བྱས་པ་དང་མི་འདྲ། མཁས་པ་པཎྜི་ཏའི་ཁྱད་ཀྱང་། པདྨ་འབྱུང་གནས་དང་བི་མ་ལ་མི་ཏྲ། བོ་དྷི་ས་ཏྭ། སངས་རྒྱས་གསང་བ་ལ་སོགས་པ་རིག་འཛིན་གྱི་ས་ལ་བཞུགས་པའི་བྱང་ཆུབ་སེམས་དཔའ་གདན་དྲངས་པའི་ཆོས་ཡིན་ལ། ད་ལྟའི་པཎྜིི་ཏ་་ལྟོ་མ་ཕྱིད་བོད་དུ་གསེར་འཚོལ་དུ་འོངས་པའི་བཟང་སྤྲང་ཁ་ཅིག་དང་མི་འདྲའོ། །ཞེས་གསུངས་པ་ལྟར་བོད་ལ་བསྟན་པ་ཕྱི་དར་གྱི་སྐབས་ཤིག་ཙན་རྒྱ་གར་ལ་བློ་གྲོས་ཅུང་ཟད་རྣོ་ལ་གསེར་ཟོང་རྙེད་པའི་རྐང་པ་ཡང་བ་ཐམས་ཅད་ཀྱིས་དེང་སང་ཁམས་པ་གནས་བསྐོར་ལ་ཁ་ལུད་པ་བཞིན་ལྷགས་འགྲོ་བ་ཞིག་ཀྱང་བྱུང་། བསམ་པ་
སྦྱོར་བ་ཐམས་ཅད་ན་སངས་རྒྱས་ཀྱི་བསྟན་པ་སྙིང་ལ་གཅགས་པ་ཡིན་ན་དེ་ཡང་རྗེས་སུ་ཡི་རང་སྟེ་འདི་ལྟར་ངན་སྨྲས་བྱེད་པ་ཕལ་མོ་ཆེ་བོད་དུ་རང་གི་བླ་མ་དང་། བཤེས་གཉེན་ལ་སོགས་པ་དང་ཉོན་མོངས་པའི་དབང་གིས་འགྲས་ནས་ལྷགས་པ་མང་། རྒྱུ་མཚན་དེས་མདོ་སྔགས་ཀྱི་ཚེས་རང་སའི་གནས་གཅིག་ལ་ཕན་ཐོགས་པ་ལྟར་སྣང་ཡང་། དོར་རྒྱལ་བའི་ཕྲིན་ལས་བསམ་གྱིས་མི་ཁྱབ་པ་ལ་སྐུར་བ་བཏབ་པས་ཆོས་ཆོས་སུམ་སོང་བདུད་ཀྱི་ལས་སུ་གྱུར་བ་ཡིན། ལམ་ཆོས་ནི་ཚིག་ལ་མི་རྟོན་དོན་ལ་རྟོན་པ་ཡིན་པས་འགྱུར་གྱི་རྣམ་ཆ་རིག་པས་དཔྱད་དུ་བཟོད་པ་འགའ་ཙམ་བྱུང་སྲིད་ནའང་མུ་སྟེགས་པ་ཚིག་ལ་གྲིམས་པ་དང་། ཞིང་བསོ་ནམ་ལ་བྲིམས་པ་ལྟ་བུ་ལས་དགོས་པ་ལྷག་པོ་མེད་དེ། དུས་འཁོར་འགྲེལ་ཆེན་ལས། ཡུལ་གྱི་སྐད་དང་ཟུར་ཆག་སྒྲ་ལས་ཀྱང་། །རྣལ་འབྱོར་ལྡན་པས་དོན་ནི་འཛིན་བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །དང་པས་རབ་ཏུ་བྱུང་ནས་འཐུང་བར་བྱེད། །དོན་དམ་དེ་ཉིད་ཡུལ་ལ་རྟག་ཏུ་ནི། །ཆེན་པོ་རྣམས་ལ་ཚིག་ལ་རྟོན་པ་མིན། །ཡུལ་གྱི་མིང་རྣམས་ཀྱིས་ནི་དོན་ཤེས་ན། །བསྟན་བཅོས་སྨྲ་རྣམས་ཀྱིས་ནི་ཅི་ཞིག་བྱ། །ཞེས་བཤད་པས་སོ། །སྔར་བོད་ན་བསྟན་པའི་གཟུགས་བརྙན་ཙམ་ཡང་མེད་པས་ཆོས་སྐད་ཙམ་སློབ་པ་ལའང་བློ་མཐུ་ཆུང་ངུར་གྱུར་བའི་དུས་བྱོན་པའི་སྤྲུལ་པའི་ལོ་པཎ་གྱིས་བསྒྱུར། འཐོར་བ་བསྡུས། གཅུས་པ་བསྲངས། གཞི་གཏན་ལ་ཕབ། ལམ་ཉམས་འོག་ཏུ་བཙུད་ཚར་བས་རང་གི་བློ་གྲོས་དེའི་སྣོན་མར་སོང་བ་འདི་མཚོར། དེའི་ཕྱིར་ཀུན་མཁྱེན་རོང་པས། སངས་རྒྱས་ཀྱི་བསྟན་པ་གྭམ་ཉམས་པའི་དུས་སུ། སྤྲུལ་པའི་ལོ་ཙཱ་བས་བཀའ་འགྱུར་བ་མེད་པར་གཏན་ལ་ཕབ་ནས། ཤེས་བྱ་དངོས་པོའི་འདུག་ཚུལ་འབེབས་ཤིང་། དེ་རྟོགས་པར་བྱེད་པའི་ཐབས་དུ་མས་བརྒྱན་པའི་ཆོས་དང་། དུས་ད་ལྟའི་ལོ་ཙཱ་རྫུན་པོ་ཆེ་སྔོན་གྱི་འགྱུར་ལ་བཅོས་མ་སྣ་ཚོགས་བྱས་ནས། འགྱུར་ང་བཟང་།
ཁུངས་ང་བཙུན་ཟེར་ནས། སངས་རྒྱས་ཀྱི་བཀའ་དང་བླ་མའི་གསུང་ལ་རས་ཆོད་བྱས་ནས། མི་རེས་ཆོས་རེ་བཅོས། གཅིག་སྐྱོན་གཅིག་ལ་འགེལ། ཕའི་ཆོས་ལ་བུའི་དཔེ་མི་བཏུབ་པའི་ཆོས་དང་མི་འདྲ་ཞེས་གསུངས་པ་འདི་ཤིན་ཏུའང་མེད། ལར་བོད་མ་ཡིན། བརྫུས་མ་ཡིན་བྱས་པ་ཐམས་ཅད་ལ་རིམ་ཐར་བསྟན་པ་སྔ་དར་གྱི་རྒྱ་དཔེ་རྙེད་ནས་རྫུན་ཕུགས་རྡིབ་བ་ཤ་སྟག་ཡིན་ཏེ། དེ་ལ་དང་པོ་ཁྱེད་ཅག་གིས་རྒྱ་གར་དུ་ཕྱིན་ནས་མ་མཐོང་མ་ཐོས་པ་དེ། ངོས་ཅག་གིས་སྟན་ཐོག་གཅིག་ཏུ་མཐོང་ཞིང་ཐོས་པ་འདི་བསོད་ནམས་ཆེ་སྟེ། འགོས་ལོ་ཐམས་ཅད་གཟིགས་པའི་ཕྱག་ཏུ་བྱུང་བའི་གསར་རྙིང་རྒྱ་དཔེའི་རས་མའང་མཐོང་། བསོད་ནམས་ཀྱིས་མངོན་པར་མ་ཐོབ་རྒྱལ་པོས་ཆེན་གན་ལྟ་བུའི་དྲེགས་རློམ་ཀྱང་བརྟུལ་ཞུགས་ཀྱི་ཟིལ་གྱིས་ནོན་པ་མཁས་གྲུབ་ཆེན་པོ་ཨོ་རྒྱན་པ་རང་བྱུང་དཔལ་གྱིས། བོད་ཀྱི་ལོ་ཙཱ་བ་ཁ་ཅིག་རྒྱ་གར་ན་རྙིང་མ་བསྐྱུར་རྒྱུ་མི་འདུག་ཟེར། ད་ལ་ཆག་ལོ་ཙཱ་བ་དག་རང་གིས་དབང་ཞུས་ཀྱི་བླ་མ་ཡིན། རྒྱ་གར་ན་རྙིང་མ་བསྒྱུར་རྒྱུ་མི་འདུག་ཟེར། དེ་འདྲ་ཁོང་རང་བློ་ཆུང་གི་གཏམ་ཡིན། ལོ་ཙཱ་བ་རྒྱ་གར་ཤར་ཕྱོགས་སུ་ཡུག་རེ་ལས་མ་ཕྱིན་པར་རྒྱ་གར་ན་གང་ཡོད་ཀྱི་ཆ་ཅི་ཆོད། དེ་ལས་བོད་ན་གང་ཡོད་ཀྱི་ཆ་ཡང་མི་ཆོད། སྤྱིར་ཡང་རྒྱ་གར་ཚད་ཁུངས་ཆེ་བས། རྒྱ་གར་གྱི་དཔེ་རྣམས་རུལ་བ་མང་། སངས་རྒྱས་ཀྱི་བཀའ་ལ་ཚད་གཟུང་མེད་པ་ལ། བོད་ཀྱི་ལོ་ཙཱ་བ་རྣམས་ཀྱིས་དེའི་ཁུངས་ཅི་ཆོད། ངས་ནུབ་ཕྱོགས་ཨོ་རྒྱན་གྱི་ཡུལ་ལ་ཕྱིན་པ་ཡང་། མུ་མཐའ་མ་ཆོད། དེ་ཡང་དང་པོའི་རྒྱ་དཔེ་རྣམས། དུས་ཕྱིས་བལ་པོ་ན་མང་ཡིན། དེ་ནས་བལ་པོ་བྷེ་ཧ། །རའི་གཙུག་ལག་ཁང་ཞིག་ན། རྙིང་མའི་རྒྱུད་རྣམས་ཀྱི་རྣམ་གྲངས་རང་ཡང་བསམ་གྱིས་མི་ཁྱབ་བར་བཞུགས་འདུག །ངས་བོད་ཀྱི་རྙིང་མ་རྣམས་ལ་ངས་རྙིང་མའི་རྒྱ་དཔེ་དང་པཎྜིི་ཏ་ཆུང་དགུགཁྱེད་རང་རྣམས་མང་ཡུལ་གྲོང་དུ་འདེངས། ངས་
ལོ་ཙཱ་བ་བྱས་བསྒྱུར་ཟེར་བ་བྱས་ཏེ་མ་གྲུབ། དང་འགྱུར་རྙིང་མའི་འགྱུར་ད་རུང་བྱ་རུ་ཡོད་པ་ལ། ཡང་བོད་ཀྱི་ཤེས་པར་འདོད་པ་འགའ་ཞིག་ན་རེ། རྙིང་མའི་དགོངས་པ་འདུས་པ་བོད་ཀྱི་སྔགས་རྒན་ཚོས་བཅོས་པ་ཡིན་མི་དག་ཟེར། དེ་འདྲ་ཡང་འོས་སུ་མི་འགྲོ་བའི་གཏམ་ཡིན། ཤེས་ན་དེ་འདྲ་བའི་ཆོས་རང་རེ་ཚོ་ས་ཀྱང་འཚོོས་དང་། དེ་ལས་ལེགས་རྒྱུ་ནི་སངས་རྒྱས་ཀྱི་བཀའ་ལའང་མེད། ཅེས་སོ། །དེ་བཞིན་དུ་ནུབ་པ་ཡང་ཤིན་ཏུ་མང་སྟེ། འདི་ལྟར་བཙན་པོ་ཁྲི་སྲོང་ལྡེའུ་བཙན་དང་དུས་མཉམ་པ་ཙམ་དུ་གྲགས་ང་རྒྱལ་པོ་དྷརྨ་པ་ལའི་ཚེའི་སྨད་ཙམ་ན། རྡོ་རྗེ་གདན་གྱི་ལྷ་ཁང་ཞིག་ན་ཧེ་རུ་ཀའི་སྐུ་དངུལ་ལས་བྱས་པ་སྐུ་ཚད་མཐོན་པོ་ཞིག་དང་། གསང་སྔགས་ཀྱི་གླེགས་བམ་མང་རབ་ཅིག་ཡོད་པ་སིངྒ་གླིང་པ་སོགས་ཉན་ཐོས་སནྡྷེ་པ་འགའ་ཞིག་གིས་འདི་དག་ནི་བདུད་ཀྱིས་བྱས་པའོ་ཞེས། སྐུ་གཟུགས་དུམ་བུར་བགོས་ནས་རང་རང་གི་རྙེད་པ་བྱས། གླེགས་བམ་རྣམས་མེ་ལ་བསྲེགས། དེ་བཞིན་དུ་བྷཾ་ག་ལའི་ཡུལ་ནས་བི་ཀྲ་མ་ཤི་ལར་མཆོད་པའི་ཕྱིར་དུ་འགྲོ་བ་མང་པོའང་བློ་བསྒྱུར་ནས། དེ་དག་ནི་ཐེག་ཆེན་ཞེས་བྱ་བ་ལྟ་བ་ལོག་པར་སྤྱོད་པ་ཡིན་པས། ཡང་དག་པའི་ཆོས་སྤྱོད་པ་ངེད་རྣམས་ལ་བྱིན་ཅིག་ཅེས་སྨྲས་ནས་རྙེད་པ་འཚོལ་བ་སོགས་བྱས་པ་རྒྱལ་པོས་ཐོས་ནས་ཆད་པ་བྱུང་ངོ་ཞེས་རྒྱ་གཏམ་ཚད་མར་གྱུར་བ་དག་ལ་གྲགས། དེ་བཞིན་དུ་སྒྲོལ་བའི་མགོན་པོས། འགྲོ་ལྡིང་གི་གླིང་ན་སྔོན་བསྟན་པ་རྣལ་མ་མེད་པ་ལས། སློབ་དཔོན་པདྨ་འབྱུང་གནས་ཀྱིས་དང་པོར་བཙུགས། མར་མེ་མཛད་བཟང་པོས་ཀྱང་བྱོན། དེ་ནས་བརྩམས་ཏེ་ལོ་བརྒྱ་ཙམ་གྱི་བར་དུ་མ་ག་དྷཱ་དང་། ཨོ་རྒྱན་དང་། ཁ་ཆེ་ལ་སོགས་པའི་རྡོ་རྗེ་འཛིན་པ་མང་པོ་བྱོན་ཏེ། སྔགས་ཀྱི་ཐེག་པ་ལྷག་པར་རྒྱས་པར་མཛད། སྔོན་རྒྱལ་པོ་དྷརྨ་པཱ་ལའི་སྐབས་སུ་སྦས་ཏེ། རྒྱ་གར་དུ་ནུབ་པའི་རྒྱུད་ཀྱི་རིགས་དང་། ཨོ་ཏི་ཡན་ནས་སྤྱན་དྲངས་པའི་རིགས་ཀྱི་རྒྱུད་རྒྱ་གར་ན་
མེད་པ་མང་དུ་ཡོད། ཅེས་བསྟན། འདི་དག་ནི་ཤེས་རབ་ཕྱོགས་རེ་བའི་བློ་མིག་རྣམ་པར་དག་ཅིང་། འཕགས་པའི་ཡུལ་གྱི་དངོས་གནས་དང་། གཏམ་རྒྱུད་ལ་འདྲིས་ནས་རང་བཞིན་སྲོང་པོར་བརྗོད་པ་ལ་བསྙེལ་བ་སྤངས་པའི་སྨྲ་བའི་སེངྒེ་ཆེན་པོ་ཡིན་ནོ། །དེ་བཞིན་དུ་ཇོ་བོའི་རྣམ་ཐར་ན། ཡང་ཇོ་བོའི་ཐུགས་དགོངས་ལ། མི་ཡུལ་དུ་བཞུགས་པའི་གསང་སྔགས་ལ་ང་ལས་མཁས་པ་མེད་སྙམ་པའི་ཐུགས་རྒྱལ་མངའ་བ་ལ། ཕྱིས་བོད་དུ་བྱོན་ནས་པེ་དཀར་གླིང་གི་དཀོར་མཛོད་ཅིག་སྒོ་ཕྱེ་ནས་རྒྱ་དཔེ་གཟིགས་པས། ཇོ་བོས་དེ་གོང་དུ་མ་གསན་མ་གཟིགས་པ་མང་པོ་བཞུགས་འདུག་ནས། ཐེག་པ་ཆེན་པོ་གསང་སྔགས་འདི་ལ་མི་ཤེས་པ་མེད་སྙམ། ཌཱཀྐི་མས་ཀྱང་ནམ་མཁའ་ནས་གཞལ་ཡས་ཁང་དཔག་ཏུ་མེད་པ་བསྟན། རྒྱུད་སྡེ་མང་པོ་བསྟན་པ་ཡིན་པ་ལ། འདི་རྣམས་མི་གདའ། ཐེག་པ་ཆེན་པོའི་གསང་སྔགས་འདི་ལ་མཐའ་ཡོད་ཡོད་མི་འདྲ་གསུང་ཐུགས་རྒྱལ་ཆག། བོད་ཀྱི་རྒྱལ་པོ་ལ་རྗེས་སུ་ཡི་རང་བ་མང་པོ་ཕུལ། བོད་དུ་བསྟན་པ་དར་བ་འདྲ་བ་རྒྱ་གར་དུ་ཡང་མ་བྱུང་བ་འདྲ་གསུངས་ཞེས་དང་། སློབ་དཔོན་པདྨ་རྡོ་རྗེ་འཆང་གཉིས་པ་དེའི་དྲིན་ལ་རྒྱ་གར་ན་ཡོངས་སུ་མ་གྲགས་པའི་མཁའ་འགྲོའི་གསང་མཛོད་མང་པོ་འགྱུར་ནས་བསམ་ཡས་པེ་དཀར་གྱི་དཀོར་མཛོད་ན་བཞུགས་སོ། །ཞེས་པ་འདི་ལ་ཅིས་བསྙོན། དེ་ལྟར་མི་འདུག་དང་། མ་དག་ཟེར་བའི་རྫུན་གཏམ་གཅིག་གིས་བློ་འདྲོགས། མཁས་སུ་རེ་བའི་རྟོག་དཔྱོད་ཅན་རྣམས་ཀྱང་ཕྲ་མ་སྔ་བཙན་ལ་ཡི་དམ་དུ་མ་བཟུང་ན་རང་ཉིད་ཀྱང་སྡེ་ཚན་དེ་ལས་གྱར་གྱི་དོགས་ནས་ཡང་དག་པའི་མདོ་དང་། རྒྱུད་ལུང་མང་པོ་ལ་སྐུར་བ་འདེབས། སྔོན་དུ་བསྒྱུར་བའི་གཞུང་ལུགས་ཆེན་པོ་གཅིག་ལ་རང་གིས་རིག་པས་བཏགས་པའི་སྐྱོན་འགེལ་ནུས་ན་དེ་ལ་རྗེས་འབྲངས་དང་བཅས་པས་ངོ་མཚར་དུ་བྱེད་ཅིང་། མཁས་པའི་གྲལ་དུ་རྗེས་སུ་ཡི་རང་སྒོམ་
པ་འདི་དུས་རིང་མོ་ཞིག་ནས་སྣང་སྟེ། དགེ་བཤེས་ལོ་ཙཱ་བ་བོད་ན་བཞུགས་པའི་ཚེ་ཆོས་སྤྱོད་ཐམས་ཅད་ཀྱི་རྒྱུད་བྱ་བ་དེ་དགེ་ཚུལ་ཁྱུང་གྲགས་བྱ་བས་བྱས་པ་ཡིན་ཟེར་ནས་རྫུན་མར་བྱེད་པ། རྒྱ་གར་དུ་ཇོ་བོ་གདན་འདྲེན་ལ་ལྷགས་པའི་ཚེ། བི་ཀ་མ་ལའི་དགེ་འདུན་རྣམས་ཉན་བཤད་བྱེད་ཅིང་སྣང་། དེ་ལ་གདམས་པ་བདུད་རྩིའི་སྙིང་པོ་བྱ་བ་ཡང་འདུག་པ་སླར་ལོ་ཙཱ་བས་བོད་དུ་བསྒྱུར་བས་ཆོས་སུ་སོང་། དེ་བཞིན་དུ་བགྲང་གིས་མི་ལང་བ་ཡོད། སྔོན་གྱི་དུས་སུ་བྱུང་བ་དག་བཅོས་མ་ཡིན་ན། རྩོམ་གཞི་གང་ལ་བྱས། དེ་ལྟར་ན་ཕྱིས་བྱུང་བ་རྣམས་དེ་བས་ཀྱང་བཅོས་མ་ཡིན། རྩོམ་གཞི་སྔོན་མ་ལ་བྱས་ཤིང་། དོན་སྟོན་པས་བཟང་དུ་མ་སོང་། ཚིག་མི་འདྲ་བ་དང་མང་ཉུང་ལས་མེད་པ་གསང་བ་འདུས་པའི་རྒྱུད་ལྟ་བུས་མཚོན་ནོ། །འགོས་ལྷས་བཙས་ཆོས་རྗེ་ཟུར་བའི་སྐུ་དྲུང་ནས་གཞན་དུ་གྱུར་བས་དང་པོར་གསང་བའི་སྙིང་པོ། ཕྱི་ནས་སྔ་འགྱུར་གྱི་ཆོས་རྒྱ་མཚོ་ལྟ་བུ་ལ་མ་ཡིན་མ་འགྱུར་ཅེས་ཁ་ཟེར་བ་བྱས་མོད་ཀྱི། སྐྱོན་བཞིའི་འགལ་སྤོང་ལ་སོགས་པ་ཟུར་བའི་རྗེས་འབྲངས་རྣམས་ཀྱིས་རྒྱུས་ཀྱི་བཤད་པ་རྒྱ་མཚོ་ལྟ་བུའི་ཞར་ཆོས་སུའང་རྒོལ་ངན་རྩོད་པས་ཐལ་བར་རློག་པའི་བརྟུལ་ཞུགས་བཟུང་ནས་སྤོབས་པ་ལན་མེད་དུ་བཏང་བས་འདིར་མ་བཀོད་ལ། གསང་སྙིང་བོད་མར་དབྱེན་བཅོས་པའི་རྫུན་ཕུགས་བཅོམ་ལྡན་རིག་རལ། པཎ་ཆེན་ཤཱཀ་ཤྲཱི། ཐར་ལོ་ཆེན་པོ། འགོས་ལོ་གཞོན་ནུ་དཔལ་ལ་སོགས་པའི་སྤྱན་སྔར་རྒྱ་དཔེའི་དངོས་པོ་ཁོ་ནས་རྟིབ་ཅིང་། ཆོས་ཀྱི་རང་ངོ་ནས་ནི་མུ་སྟེགས་བྱེད་སཾ་ག་ཨ་ཙརྱས། དཔལ་ལྡན་ཆོས་ཀྱི་གྲགས་པ་ལ་རྒོལ་བ་བཞིན་དུ་རང་ཉིད་ཀྱིས་སྐྱེ་བ་ནས་སྐྱེ་བར་བརྒྱུད་ཀྱང་། དགེ་སློང་ལྷ་ཆེན་པོའི་བརྟུལ་ཞུགས་ཀྱིས་བསྟན་པའི་དབྱེན་ཙམ་དུ་འགྱུར་སྲིད་ཀྱི། དེ་ལས་བསམ་པ་མཐར་ཐུག་པའི་ལམ་དུ་མ་སོང་ངོ། །མཁས་པ་ཆེན་པོ་བུ་ནི་གཞོན་ནུའི་ཚེ་རྙིང་མའི་ཆོས་དང་ཡང་དམ་ཚིག་གིས་འབྲེལ་ཏེ། ཐ་སྙད་
ལ་བློ་གྲོས་བསམ་གྱིས་མི་ཁྱབ་པས། རང་གི་བླ་མ་མཁས་པའི་དབང་ཕྱུག་ཆེན་པོ་ཉི་མ་རྒྱལ་མཚན་ལྟ་བུའི་རྣམ་དཔྱོད་ལའང་ཚད་མར་མི་བྱེད་པས་རྙིང་མར་བཏང་སྙོམས། གསར་མའི་ཕྱོགས་མང་པོ་ཡང་བརྫུས་མར་གཟིགས་མོད་ཀྱི། སློབ་དཔོན་སངས་རྒྱས་གསང་བས༑ ཧ་ཅང་ཐོས་པ་མང་པོ་ཡང་བདུད་ཀྱི་ལས་སོ་གསུངས་པ་དེ་མིན་ན་བསྟན་པའི་ཕྱི་དོར་ཆེན་པོ་ཉིད་དོ། །འོན་ཀྱང་སི་ཏུ་ཐམས་ཅད་མཁྱེན་པ་དགེ་བའི་བློ་གྲོས་ཞེས་སྤོབས་པ་བསམ་གྱིས་མི་ཁྱབ་པ་དེས་ཚལ་བ་བཀའ་འགྱུར་གྱི་ཞུ་དག་ལ་བུ་སྟོན་སྤྱོན་པར་བྱས་མོད། དེའི་བཀའ་འགྱུར་ཁྲོད་ན་ནི་མདོ་སྒྱུ་སེམས་གསུམ་གྱི་རྒྱུད་སྡེ་ཚན་ཚང་མ་རེ་དང་། བསྟན་སྲུང་གི་སྐོར་ཀྱང་མཆིས་གདའ་བ་ལ་སྦྱིན་པའི་བདག་པོའང་བློ་གྲོས་བསམ་གྱིས་མི་ཁྱབ་པས་གཤུང་པར་དཀའ་བའམ། གདོད་ནས་ཚད་མ་མ་ཡིན་པའི་གཏན་ཚིགས་ལ་ངེས་པ་འདྲོངས་ན་ནི་བྱི་དོར་མཁན་པོར་དམིགས་ཀྱིས་བསལ་བས་དེ་དག་ཀྱང་འཇོག་མེ་ཐང་སྟེ་སྣང་ངོ། །སྤྱིར་ཡོངས་གྲངས་སུ་དེ་ལྟ་མོད་ཀྱི། སྒྲ་ཚད་པས་མཛད་པའི་རྣམ་ཐར་ལ་དཔྱད་ན། སྔ་འགྱུར་ལ་རུས་ཞེན་དང་། ལྟ་བའི་ཆོས་སྐད་ཀྱང་དེ་རྗེས་ཟློ་ཞིང་། མེས་པོའི་ཡི་དམ་ལ་ཉམས་བཞེས་མཛད་པས་གུ་རུ་མཚན་བརྒྱད་ཞལ་གཟིགས་ནས་ལུང་བསྟན་ཐོབ་ཚུལ་སོགས་དངོས་བསྟན་ཡིན་ན་རྒྱུད་འབུམ་ལ་དཔྱད་ཞུས་སོགས་གཞན་སྣང་དང་བསྟུན་པའི་དྲང་དོན་དུ་ངེས་སོ། །ཡང་གསེར་མདོག་ཅན་པས། གསེར་བྱི་ཐུར་མར་དཔལ་འཛིན་གྱི་རྫུན་གཏམ་འཕྲོས་དོན་དུ་བྱས་པས། དེས་གང་ཟག་བློ་གྲོས་གསར་བུ། །རྣམས་ལ་ཐེ་ཚོམ་དུ་མ་བསྐྱེད་ཅིག། བླུན་པོ་དང་ཕྱོགས་ལྷུང་ཅན་རྣམས་ཀྱི་རྒྱབ་བརྟེན་དུ་འཁྱེར་བ་བྱུང་མོད་ཀྱི། དེ་ལ་ནི་དཔྱད་པར་བྱ་བ་ཞིག་སྟེ། ཆོས་རྗེ་བསྐལ་བཟང་རྒྱ་མཚོས་གསེར་ཐུར་ལས་བརྩམས་པའི་དོགས་གཅོད་ཀྱི་ལན་ངེས་དོན་རབ་གསལ་ཞེས་བཏགས་པར། གསེར་མདོག་ཅན་པས་ཁོ་བོ་ཅག་གི་འབེལ་གཏམ་རྣམ་པར་ངེས་པའི་ཡི་གེ་དཀྱུས་མིན་ནི།
གསང་རྙིང་ལ་ཆོས་ཡིན་མིན་གྱི་རྣམ་དབྱེ་བྱས་པ་ལྟ་ཅི་སྨྲོས། རྙིང་མ་ཞེས་པའི་ཚིག་ཙམ་ཡང་བྱུང་བ་མེད་ཀྱི་སྟེང་དུ། དྲི་བ་དང་ལན་གཉིས་ཀའི་ནང་ན། འགོས་ལོ་ཙཱ་བ་སོགས་ཀྱིས་ཆོས་ལོག་དྲི་མ་ཅན་བགྲངས་པའི་རྣམ་གྲངས་མང་པོ་དེ་དག་དེ་ལྟར་དུ་འཐད་ན་ཧ་ཅང་ཐལ་བར་འགྱུར་བའི་ཀླན་ཀ་དག་བཀོད་ནས་ཞེས་དང་། གྲུབ་མཐའ་ལ་མ་ཞུགས་པའི་སྐྱེ་བོ་དག་གིས། དཔལ་འཛིན་གྱིས་སྨྲས་པའི་ཚིག་དེ་དག་ཁ་ཏོན་དུ་བྱས་པ་ན། གྲུབ་མཐའ་སྨྲ་བར་ཁས་འཆེ་བའི་སྨྲ་བ་དག་ཀྱང་། ལ་ལ་དག་རྟོག་དཔྱོད་པ་བཏང་བར་གང་ཐོས་སུ་དབྱངས་སུ་གྱེར་བའམ། སྨྲ་བ་པོ་ཁ་ཅིག་ནི་འགའ་དང་འགའ་ལ་ཕྲ་མ་དགྱིདཔའི་བསམ་པ་ཁོ་ན་སྔོན་དུ་བཏང་ནས། གཞུང་རྩ་བ་ན་ཅི་ཡོད་མི་རྟོག་པར་འབེལ་གཏམ་གྱི་ཚིག་ཁོ་ན་ལ་སྐྱོར་འབྱིན་བྱེད་པ་དག་ཡོད་པར་སྣང་ངོ། །ཞེས་འགོས་དང་དཔལ་འཛིན་གྱིས་བྱས་པའི་ངག་བགྲོས་རླབས་པོ་ཆེ་ཧ་ཅང་ཐལ་བར་བཤད་ཅིང་། རང་གི་འདོད་པའི་སྙིང་པོའི་མཐར་ཐུག་པ་ལ་དཔྱད་པ་མ་ཞུགས་བཞིན་དུ་འབེལ་གཏམ་ན་ཡམས་སུ་བྱས་པ་བཤད་བྱའི་རྩ་བར་འཁྲུལ་བ་རྣམས་ཀྱིས་ནོངས་པ་ཡིན་ནོ་ཞེས་པས་གསེར་ཐུར་གྱིས་རྙིང་མ་ལ་སྐུར་བ་བཏབ་བོ་ཟེར་བའི་འདོད་པ་བཀག་ནས་། འདི་སྐད་དུ། སྤྱིར་རྙིང་མ་ཆོས་མ་ཡིན་པ་བབས་ལེན་ནུས་པ་དག་ཡོད་ན། དེའི་ཚེ་དེ་ལྟར་འདོད་པ་དེས་སྐ་ཅོག་ཞང་གསུམ་གྱིས་བསྒྱུར་བའི་སྡེ་སྣོད་གསུམ་གྱི་ཆོས་རྣམས་དང་། བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད། ལོ་ཆེན་རིན་ཆེན་བཟང་པོ་མ་བྱོན་གོང་དུ་འགྱུར་བ་ཐམས་ཅད་ཆོས་མ་ཡིན་པ་ཉིད་དུ་ཁས་ལེན་དགོས་པར་འགྱུར་རོ། །བྱེ་བྲག་ཏུ་གསང་སྔགས་བླ་མེད་ཀྱི་རྒྱུད་རྙིང་མ་ཆོས་མ་ཡིན་པར་ཁས་ལེན་ནུས་པ་དག་ཡོད་ན། དཔལ་གསང་བ་འདུས་པ་དང་། ཟླ་གསང་ཐིག་ལེ་དང་། སངས་རྒྱས་མཉམ་སྦྱོར་རྣམས་ཆོས་མ་ཡིན་པ་ཉིད་དུ་ཁས་ལེན་དགོས་པར་འགྱུར་ཏེ། དེ་གསུམ་རྙིང་མའི་ལུགས་ཀྱི་ཏནྟྲ་བཅོ་བརྒྱད་དུ་གྲགས་པ་དེའི་གཙོ་བོར་གྱུར་བ་དང་།
རྩ་བ་དེ་གསུམ་ལ་བརྟེན་ནས་བོད་དུ་རྙིང་མར་གྲགས་པའི་ཆོས་མང་དག་ཅིག་བྱུང་བར་སྔོན་གྱི་ཆེན་པོ་དག་གིས་འཆད་པའི་ཕྱིར། བྱེ་བྲག་ཏུ་ཡང་ཕུར་ཆོས་མ་ཡིན་པར་ཁས་ལེན་པ་དག་ཡོད་ན། དེའི་རྒྱུད་ཀྱི་རྒྱ་དཔེ་དང་། ལོ་ཙཱ་བ་ཚད་ལྡན་གྱིས་བསྒྱུར་བ་སོགས་ཀྱི་གཏན་ཚིགས་ལས་རྣམ་དག་ཏུ་གྲུབ་ཟིན་པ་དང་། ཁྱད་པར་རྙིང་མའི་རྒྱུད་དུ་གྲགས་པ་གཞན་དང་གཞན་རྣམས་རྒྱུད་འབུམ་གྱི་དཀར་ཆག་ཏུ་འདེབས་པར་མི་མཛད་པའི་ཆེན་པོར་དག་གིས་ཀྱང་ཡང་དག་དང་ཕུར་བ་རྩོད་མེད་དུ་གྲུབ་ཟིན་པའི་ཕྱིར། དཔེར་ན་རལ་གྲི་དང་། བུ་སྟོན་རིན་པོ་ཆེའི་ཆོས་འབྱུང་ལས་བཤད་པ་བཞིན་ནོ། །ཞེས་གཞན་གྱི་འདོད་པའང་ཞར་བྱུང་ན་ཡམས་སུ་བཀོད་དོ། །ལར་ཆོས་ཀྱང་བདག་གིར་བྱེད་པ་པོའི་གཟི་བྱིན་ལ་ལྟོས་ནས་ཡང་དག་དང་ཅིག་ཤོས་སུ་བསྒྲུབ་ཤེས་པའི་དཔྱོད་ལྡན་དེ་འདྲ་ལ་ལྔ་པ་ཆེན་པོས། སྒྲུབ་སྡེ་བརྒྱད་པོ་ལྷ་སྔགས་རྒྱུད་མན་ངག་སྨིན་གྲོལ་གྱི་གནད་མཐའ་དག་ཕྱོགས་མཚུངས་པ་ཁོ་ནར་ཡོད་པས་ཆེ་མཆོག་གཤིན་རྗེ་སོགས་གཞན་རྣམས་མ་དག་ན་ཡང་ཕུར་གཉིས་སྒེར་དུད་ག་དོན་མེད་པས། གྲུབ་མཐའི་ཕྱོགས་ཁྱེར་གྱི་ཞེ་སྡང་བ་ཁོ་ནས་དགག་ཅིང་། ཡང་ཕུར་གཉིས་ས་སྐྱ་བའི་ཡབ་ཆོས་སུ་སོང་ཞིང་དུས་དེར་བོད་ཆོལ་ཁ་གསུམ་གྱི་བདག་པོས་སྐྱ་བ་ཡིན་པའི་ངོ་འཛིན་ཁོ་ན་ཡིན་པར་གསལ་བས་རྩེད་ཡིག་གི་ནང་ཐོང་གནག་རྫི་རྒན་པོ་ཡན་ཆོད་ཀྱི་མཐོང་བར་གསལ་པོར་བསྟན་པ་གོར་མ་ཆགས། དབུ་རུ་དཔལ་བརྗིན་སྔགས་རྒྱུད་རྙིང་མ་ཡིན་པར་རང་གི་སློབ་དཔོན་དང་འགྲས་པའི་ལེ་ལན་དུ་དགག་པ་ཚིགས་བཅད་ལྷུག་སྤེལ་མ་བརྩམས་པ་ཞེ་སྡང་གི་ངན་སྨྲས་ལས། ལུང་རིག་རྣམ་དག་ཆེར་མི་འདུད། །ཅེས་གསུངས་པ་ནི་ཤིན་ཏུ་འཇམ་དེ། གསེར་མདོག་ཅན་པ་རང་གིས་བཞེད་པ་ནི་འདི་སྐད་དུ། བསྟན་པ་འདིའི་བདག་པོ་སྟོན་པ་ཐུབ་པའི་དབང་པོས། ཆགས་བྲལ་གྱི་གཟུགས་ཀྱིས་སམ། འཁོར་ལོས་སྒྱུར་བའི་གཟུགས་ཀྱིས་གསུངས་ཀྱང་རུང་སྟེ། སྟོན་པ་གཅིག་པུ་དེ་ཉིད་ཀྱི་ལྷ་དང་སྔགས་ཀྱི་རིམ་པ་ཁོ་ན་ཉམས་སུ་
བླངས་པ་ལས་གྲུབ་པ་བརྙེས་པའི་སློབ་དཔོན་པདྨ་འབྱུང་གནས་དང་། དེའི་སློབ་མ་རིམ་པ་གཉིས་ལ་བརྟན་པ་ཐོབ་ནས་གྲུབ་ས་བརྙེས་པ་དེ་དག་གིས་བོད་དུ་དམ་པའི་ཆོས་དར་བ་ལ་གེགས་སུ་གྱུར་བའི་ལྷ་འདྲེ་གདུག་པ་ཅན་འདུལ་བ་དང་། རྡོ་རྗེ་ཐེག་པའི་སྣོད་དུ་གྱུར་བ་རྣམས་རིག་འཛིན་གྱི་ས་ལ་འགོད་པའི་ཕྱིར་དུ། གང་དང་འཚམས་པའི་ལྷ་དང་། སྔགས་དང་། ལྟ་བའི་རིམ་པ་རྣམས་གསུངས་པ་དང་། དེའི་དོན་སློབ་མས་ཚུལ་བཞིན་ཉམས་སུ་བླངས་པ་དང་། དེ་ལས་གྲུབ་པའི་ས་བརྙེས་པའི་རིག་པ་འཛིན་པ་མང་དུ་བྱོན་པ་དང་། དེ་དང་མཐུན་པའི་སྙན་བརྒྱུད་དང་། དགོངས་པ་ཡི་གེར་བཀོད་པ་ལ་བརྟེན་ནས་རྙིང་མར་གྲགས་པའི་ཆོས་རྣམ་པར་དག་པ་འདི་ཉིད་བྱུང་བ་ཡིན་ལ། འདི་དག་ལའང་ཡང་དག་པར་ན་བསྟན་བཅོས་ཀྱི་མཚན་ཉིད་ཚང་བ་ཡིན་ཏེ། ཇི་སྐད་དུ། གང་ཞིག་རྒྱལ་བའི་བསྟན་པ་གང་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཅེས་སོགས་ཀྱི་མཚན་ཉིད་དེ་ཚང་བའི་ཕྱིར་སློབ་དཔོན་པདྨས་གསུངས་པའི་བསྟན་བཅོས་ནི་སངས་རྒྱས་ཀྱི་བཀའ་དང་ཁྱད་པར་ཡོད་པ་མ་ཡིན་ཏེ། ཐར་བ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྐྱི་བོར་བླང་། །ཞེས་གསུངས་པའི་ཕྱིར་རོ། །ཞེས་སྣང་བས་འདི་དག་ནི་གཟུ་བོར་གྱུར་བའི་ཤེས་བྱ་རིག་པས་གཞལ་བའི་གཏན་ཚིགས་སུ་ཤེས། ཡང་ཁ་ཅིག་གིས། ད་ལྟའི་ཕྱག་རྒྱ་ཆེན་པོ་དང་། །རྒྱ་ནག་ལུགས་ཀྱི་རྫོགས་ཆེན་གཉིས། །ཞེས་གཤིས་ལ་བྱ་བ་དང་བྲལ་བའི་གྲུབ་མཐའ་བློར་མ་ཆུད་ནས་ཀུན་རྫོབ་ཙམ་དུའང་ཐབས་ཀྱི་ཆ་ཡལ་བར་དོར་རོ་སྙམ་པས་རྫོགས་ཆེན་རྒྱ་ལུགས་མའི་ཆོས་པ་ནི་གཟུགས་བརྙན་སྤངས་པའི་གྲིབ་མའོ། །རང་གཞུང་སེམས་སྡེའི་རྒྱུད་ཆེན་པོ་རྔོ་ལ་གསེར་ཞུན་དུ། བདེ་གཤེགས་མ་ལུས་ཡུམ་དུ་གྱུར་བས་རྒྱལ་བ་ཀུན་གྱི་ལམ་གཅིག་པུ། །ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་རྒྱ་མཚོའི་གཞིར་གྱུར་བ། ཞེས་གྲུབ་མཐའི་འཆའ་ལུགས་ཆེན་པོ་འདི་ཡོད་པས་ཀུན་རྫོབ་
བདེན་པ་ཇི་ལྟར་འགོག། དེ་ལྟ་ནའང་ལོག་མར་དགོངས་ཏེ་གསུངས་པ་འདིར་བདེན་གཉིས་དབྱེར་མེད་ཆེན་པོར་རྣམ་པར་དག་པའི་ཚུལ། སེམས་སྡེ་ཕྱི་འགྱུར་ལས། སོ་སོ་ཐར་བའི་སྡོམ་པ་དང་། །བྱང་སེམས་ཚུལ་ཁྲིམས་རྒྱ་ཆེན་པོས། མ་ལུས་ཀུན་སྦྱོར་ཡུལ་དུ་གནས། །དེ་དག་ཐེག་པའི་ཁྱད་པར་མཆོག། སངས་རྒྱས་ཀུན་གྱིས་དགོངས་མཛད་དེ། །སྤྱོད་པ་ཐབས་བཅས་གསང་བའི་ཚུལ། །དེ་ལྟར་ཕ་རོལ་ཕྱིན་སྒོམ་པ། །སྔགས་ཀྱི་ཐེག་པ་གྲངས་མེད་རྣམས། །བསྟན་པ་སོ་སོར་སྣང་བའི་ཚུལ། །མ་ལུས་ཀུན་འདུས་རྣམ་པར་དག། ཅེས་དང་། རང་བཞིན་མེད་པའི་ངང་དུ་ཕྱིན་དྲུག་རྫོགས་པའི་ཚུལ་ཡང་། སེམས་ཕྱོགས་རིན་པོ་ཆེ་རྒྱས་པའི་རྒྱུད་ལས། དབྱེར་མེད་མཉམ་པར་གནས་པས་སྦྱིན་པའོ། །རང་བཞིན་མེད་པར་ཤེས་པས་ཕ་རོལ་ཕྱིན་པ་ཡིན། །ཆོས་སྐུ་རང་བཞིན་གོས་པ་མེད་པ་ལས། །ངོ་བོ་རང་བཞིན་དག་པ་ཚུལ་ཁྲིམས་ཏེ། །གང་གིས་ནོས་པ་ཚུལ་ཁྲིམས་ཕ་རོལ་ཕྱིན། །ཆོས་ཉིད་རང་བཞིན་གདོད་ནས་ཞི་བ་ལས། །རང་བཞིན་ཁོང་ཁྲོ་མེད་པ་བཟོད་པ་སྟེ། །དབྱེར་མེད་གཉིས་སུ་མེད་པས་ཕ་རོལ་ཕྱིན་པའོ། །སྐྱེ་མེད་གདོད་ནས་རང་བཞིན་ཀུན་ལ་ཁྱབ། །དོན་ཐོབ་ལེ་ལོ་མེད་པ་བརྩོན་པ་སྟེ། །ཀུན་ཁྱབ་དབྱེར་མེད་གནས་པས་ཕ་རོལ་ཕྱིན། །ཆོས་ཉིད་གདོད་ནས་རང་བཞིན་རྣམ་དག་པས། །རྟོག་མེད་མཉམ་ཉིད་གནས་པས་བསམ་གཏན་ཏེ། །རང་བཞིན་ཡེངས་པ་མེད་པས་ཕ་རོལ་ཕྱིན། །ཆོས་ཀྱི་སྐུ་ཡི་རང་བཞིན་དེ་ཉིད་ལ། །ཐམས་ཅད་དེ་བཞིན་ཉིད་ལ་གནས་པར་ཤེས་རབ་སྟེ། །རང་བཞིན་དེ་ལྟར་རྟོགས་པས་ཕ་རོལ་ཕྱིན། །ཆོས་ཀྱི་སྐུ་ཡི་རང་བཞིན་དོན་རྟོགས་ན། །ཕ་རོལ་ཕྱིན་པ་ཐམས་ཅད་ཡོངས་སུ་རྫོགས་པ་སྟེ། །རྫོགས་པ་ཆེན་པོ་འོད་ལ་གང་གནས་པ། །འདི་བསྒོམས་ཐམས་ཅད་ཡོངས་སུ་བསྒོམས་པའོ། །ཞེས་སོ། །རྒྱུ་མཚན་དེ་ལ་དམིགས་ནས་འཕགས་པ་ལྷས། །ཚུལ་ཁྲིམས་ལས་ནི་ཉམས་སླ་ཡིས།།
ལྟ་ལས་དེ་ལྟར་མ་ཡིན་ནོ། །ཞེས་པ་འདིས་དོན་དམ་པར་ཐབས་སྤྱོད་པའི་ཕྱོགས་ལས་ཤེས་རབ་ལྟ་བའི་ཆ་ཁོ་ན་གཙོ་ཆེ་བར་སྟོན་པ་འདི་ཕྱག་རྫོགས་ཙམ་མ་ཟད་མདོ་ལུགས་ཤིང་རྟ་ཆེན་པོ་བའི་དགོངས་པ་ལའང་ཡོད་པར་གསལ། སེམས་ཕྱོགས་དག་ནས་ཀྱང་གཤིས་ལ་བྱ་བ་དང་བྲལ་བར་གཙོ་བོར་སྟོན་པས་ལྟ་བ་རིག་ཐོག་ཏུ་མཉམ་པར་འཇོག་པའི་ཚེ། ཆོས་ཉིད་ཁས་ལེན་དང་བྲལ་བ། །རང་བཞིན་ཡིད་བྱེད་དང་བྲལ་བ། །ཐོབ་བྱ་རེ་དོགས་ལས་འདས་པ། །སྤྱོད་པ་བླང་དོར་མེད་པ་ནི་གྲུབ་པའི་མཐའ་ཆེན་པོ་འདིའི་ངོ་བོའི་བརྗོད་བྱ་མཐར་ཐུག་པས་ཚིག་གི་ལམ་དུ་དེ་ལས་ཅི་ཞིག་བསྒྲགས། གཞན་དུ་ཆོས་ཉིད་ནི་བསམ་གྱིས་མི་ཁྱབ་པ་ཡིན་ལ། ཚིག་ནི་རྟོག་དཔྱོད་ཀྱི་ངོ་བོར་གནས་པའི་ཕྱིར་དེ་ཉིད་གཅིག་ཏུ་མཛའ་བ་མ་ཡིན་པས། སྐྱེས་བུའི་བློ་སྟོབས་ཀྱིས་རང་རང་གི་འདོད་པ་བསྒྲུབ་པའི་ཕྱོགས་ཇི་སྙེད་པ་འདི་བྱུང་ལ། ཇི་ལྟ་བ་ནི་སངས་རྒྱས་རྣམས་དང་། བྱང་ཆུབ་སེམས་དཔའ་མཆོག་གཟིགས་རྣམས་ཀྱི་རྒྱུད་ལ་རང་བཞིན་གྱིས་ཡོད་པའོ། །དེ་ལྟར་ཡོད་པས། རྔོག་ལོ་ཆེན་པོ་ནས་ཇོ་ཞལ་ཡན་ཆོད་ཀྱི་ཀློག་པ་ཐོས་བསམ་པ་མཁས་པ་དག་དང་། གངས་རིའི་ཁྲོད་ཀྱི་བསམ་གཏན་པ་འཁྲུལ་མེད་ཀུན་གྱི་ཡི་གེ་ན་དོན་འདི་ཡོད་པས་སོ། །དེའི་ཕྱིར་སངས་རྒྱས་ནི་གཉིས་སུ་མི་གསུང་བ་ཡིན་པས་ཤིང་རྟ་ཆེན་པོ་གཉིས་ཀྱི་དགོངས་པའི་མཐར་ཐུག་པའང་འདིར་གནས་ངེས་པ་ཡིན་ནོ། །དེ་ལྟ་ནའང་རེ་ཞིག་དབུ་མའི་གཞུང་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་སྲིད། །ཅེས་པས་རྟོག་དཔྱོད་ཀྱི་མཐའ་ལ་བཀར། དགག་བསྒྲུབ་ཀྱི་རྫོང་ལ་བསྐོར་བ་བྱས་པས། རང་གི་ཡེ་ཤེས་རང་ལ་ལྐོག་ཏུ་གྱུར་ནས་བསླུ་བའི་རིང་། རང་བཞིན་རྫོགས་པ་ཆེན་པོ་འདུག་སྟངས་གསུམ་གྱིས་རྡོ་རྗེའི་ལུས་ལ་གནད་དུ་བསྣུན་པ་དང་། རིག་པ་ཐོད་རྒལ་གྱི་ངང་དུ་ཡེ་ཤེས་དབབ་པ་དང་། རིག་པའི་རྩལ་དབང་གིས་ཆོས་ཉིད་མངོན་དུ་བསྟན་པའི་གནད་ཀྱིས་ལམ་ཁྱད་གནམ་ས་ལྟ་བུར་ཡོད་པ་ཡིན་
ནོ། །ཡང་བླང་དོར་མེད་པ་ལྟ་བ་ཡིན་གྱི་སྤྱོད་པར་ཅི་འགྲོ་ཟེར་མོད། ཁོ་བོ་ཅག་ནི་ཆོས་ཀྱང་རྫོགས་པ་ཆེན་པོ། གང་ཟག་ཀྱང་རྫོགས་པ་ཆེན་པོ། ལྟ་སྤྱོད་མཉམ་པ་རིས་མེད་དུ་ཁས་བླང་བའི་དབང་དུ་བགྱིད་ན། རྣམ་ཤེས་ཀྱི་ངོ་ན་བླང་དོར་ཀྱང་ཡོད་པས་ཐབས་ལ་སྐུར་བ་མ་བཏབ། ཡེ་ཤེས་ཀྱི་དོན་གཟུང་འཛིན་མེད་པས་ཐབས་ལ་རེ་བ་མི་འཚོལ། དེའི་ཕྱིར་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ནི་རྒྱུ་འབྲས་གཉིས་སུ་མེད་པའི་ངོ་བོ་བསྒྲུབ་བྱ་སྟེ། གངས་རིའི་ཁྲོད་ན་འདི་ལ་སྐྲག་པར་གྱུར་ནས། གཞི་དུས་སུ་ཀུན་རྫོབ་ཚད་མས་མ་གྲུབ་ན་རྒྱུ་འབྲས་ལ་སྐུར་བ་བཏབ། ལམ་གྱི་དུས་ན་ཅི་ཡང་ཡིད་ལ་མི་བྱེད་པ་ཧྭ་ཤང་གི་ལྟ་བ་ཡིན། འབྲས་བུའི་དུས་སངས་རྒྱས་ཀྱི་ཡེ་ཤེས་ལ་ཀུན་རྫོབ་མི་སྣང་ན་ཐམས་ཅད་མཁྱེན་པ་ནས་བུད་ཟེར་ཏོ། ཁོ་བོ་ཅག་ནི་ཀུན་རྫོབ་འཁྲུལ་སྣང་ཡིན་པས་ཚད་མའི་གཏན་ཚིགས་འགལ། ཡིད་བྱེད་རྣམ་རྟོག་ཡིན་པས་མཉམ་གཞག་ཏུ་ཅི་ཡང་མི་བསྒོམ། སངས་རྒྱས་ནས་མ་རིག་པ་ཤེས་བྱ་ལ་མི་སྲིད་ན་ཀུན་རྫོབ་གང་ལ་སྣང་། དེ་ཀ་འཁོར་ལོ་ཐ་མ་དང་། དབུ་མ་ལ་འཇུག་པ་རྩ་འགྲེལ་གྱི་དགོངས་པ་མཐར་ཐུག་པ་ཡིན་ན་གཤིས་ཀྱི་བཞུགས་ཚུལ་གཙོ་བོར་འདོན་པའི་གྲུབ་པའི་མཐའ་རྫོགས་པ་ཆེན་པོ་ཕྱོགས་གཞན་དུ་འཕྲུལ་བའི་དོན་པོ་གང་། རྫོགས་ཆེན་པས་མི་དགེ་བཅུ་དང་། མཚམས་མེད་ལྔ་ལ་རྣམ་པའི་ཆ་ནས་ཀྱང་བསྒྲུབ་བྱར་བྱེད་པ་མེད། དེ་བཞིན་གཤེགས་པས་ལེགས་པར་གསུངས་པའི་གནས་གཞན་ཡལ་བར་འདོར་བའང་མེད། གང་དང་གང་དུ་གདུལ་བྱ་ལས་ངན་པ་ལྟ་བ་གཞན་དབང་ཅན། བདེ་གཤེགས་བཀའ་འདས་ཀྱི་རྩ་ལྟུང་ལ་ཉམ་མི་ང་བའི་སྤྱོད་པ་རླབས་པོ་ཆེ་ཆོས་ལྟར་འཆོས་པ་དག་མཐོང་ནས་སྔགས་ལོག་སུན་འབྱིན་དུ་སྨྲས་པ་ཡིན་ཟེར་ན། དེ་ལྟ་བུ་གསར་རྙིང་གང་གི་ཁྲོད་དུའང་མཆི་བས་གང་ཟག་སུན་འབྱིན་དུ་སྨྲ་བར་འོས་ཀྱིས། སྔགས་ལོག་སུན་འབྱིན་དུ་སྨ་བརྟེན་དང་བརྟེན་བརྫས་འགལ་བའི་ཕྱིར་རོ། །ཡང་རྒྱུད་ལས་སྦྱོར་སྒྲོལ་ལ་སོགས་པའི་ཚིག་ཟིན་དངོས་བསྟན་བྱུང་
བས་སྔགས་ལོག་ཡིན་ཟེར་ན། དེས་སྤྱིར་གསང་སྔགས་ཀྱི་ཆོས་ལ་འཚལ་ཏོ་ཅོག་ཆུད་གསན་ཞིང་། ཁྱད་པར་རང་ཉིད་ཁ་ཏོན་དུ་བགྱིད་པའི་གསང་འདུས་རྩ་རྒྱུད་ལེའུ་བཅུ་དྲུག་པར། ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པ་ཡང་ཁྱོད་ཀྱིས་ལོངས། །བུད་མེད་དག་ཀྱང་བསྟེན་པར་བྱ། །རྡོ་རྗེའི་ལམ་ནི་འདི་དག་གིས། །སེམས་ཅན་ཐམས་ཅད་བསྐུལ་བར་བྱ། །ཞེས་པ་འདི་ལ་དགོངས་པ་ལུང་སྟོན་ལྟར་མ་ཡིན་པས་མངོན་གྱུར་ཉིད་དུ་སྤྱད་དེ། དྲག་ཤུལ་གྱི་སྦྱོར་བ་བརྩམ་པ་དང་། རྫུན་གྱི་ངག་སྨྲ་བ་དང་། ཚོང་ལ་སོགས་པའི་ཐབས་ཀྱིས་གཞན་ནོར་བརྐུ་བ་དང་། འཁོར་བ་མ་སྟོངས་ཀྱི་བར་དུ་ཆོ་འབྲང་གི་ཕྲེང་བ་བསྟར་ལ་རྒྱུ་བའི་འདུན་པ་ཅན་གསར་མའི་ཁྲོད་ནའང་ཇི་ཙམ་ཡོད། འདི་ལྟར་ཁྱིམ་པ་འདོད་ཡོན་གྱི་རོ་ལ་བརྐམ་ཆགས་ཅན་དག་ལ་ལྟོས་ནས། སྔ་མ་བྲམ་ཟེ་ལ་སོགས་ཏེ་གཙང་སྦྲའི་བརྟུལ་ཞུགས་ལ་མངོན་ཞེན་བརྟས་པའི་བྱེད་པ་རྒྱུ་མཐུན་ལས། ཚེ་འདིར་འབག་བཙོག་ལ་སོགས་པ་ཡ་ང་བར་བལྟ་ཞིང་། དབང་པོ་ལས་སུམ་གྱུར་བའམ། རང་བཞིན་གྱིས་འཁྲིག་པའི་ཆོས་བསྟེན་པ་ལ་སྤྲོ་བ་ཞན་པ་དག་གི་ཐོས་པ་དང་། བསམ་པ་དང་། སྒོམ་པའི་ཤེས་རབ་འགོག་ཅིང་། རྡོར་དཀར་དང་། བཀྲུ་ཤལ་དང་། ཆུད་མ་མེད་པ་ཙམ་ཚུལ་ཁྲིམས་ཀྱི་ཕུང་པོར་བལྟས་ནས། གཡུལ་གྱི་བྱ་བ་དང་། རྒྱལ་པོའི་ཞལ་ལྕེ་བ་དང་། དཔྱ་སྡང་བ་དང་། སོ་ནམ་གྱི་འདུ་འགོད་དང་། ཤོ་གམ་གྱི་ལས་དང་། འགྲན་ཟླར་གྱུར་བའི་ཕུན་སུམ་ཚོགས་པ་གཞོམ་པ་དང་། འབངས་སུ་གྱུར་བ་དག་ལ་སྲོག་དང་། ནོར་གྱི་ཆད་པ་སྦྱིན་པ་སོགས་ལ་ཚམ་ཚོམ་མེད་པར་འཇུག་པ་དག་ཡོད་པ། དེ་དག་ལ་ལྔ་བརྒྱའི་ཐ་མར་གྱུར་བས་བསྟན་པ་གཤིས་ཀྱིས་སྙིགས་པའི་སྐྱོ་བ་མི་སྒོམ་པར། འདུལ་ལོག་སུན་འབྱིན་དུ་སུ་ཞིག་གིས་སྨྲ་བར་ནུས། བརྗོ་པ་དེ་ལ་ཚེར་མ་ཆགས་པར་གྱུར་སྲིད་ན་ཆོས་ཀྱི་དབྱིངས་ཅི་ཡང་མ་ཡིན་པའི་ཀློང་ནི་དགག་བསྒྲུབ་མེད་པ་ཉིད་དེ་མི་འཆབ་
བོ། །ཡང་ཐེག་པའི་གདགས་གཞི་པ་ཁ་ཟེར་ན། དཔུང་བཟང་གིས་ཞུས་པར། གསང་སྔགས་མདོ་སྡེའི་ཚུལ་དུ་བཤད་ཀྱི་ཉོན། །ཅེས་དང་། རྣམ་འཇོམས་སུ། མདོ་སྡེ་འདི་ཡི་གཟི་བརྗིད་ཀྱིས། ཞེས་ལན་གཉིས་སྨོས་པའང་རྒྱུད་ལས་གཞན་དུ་འཕེན་ཏོ། །མདོ་སྔགས་ཐམས་ཅད་རིག་འཛིན་གྱི་སྡེ་སྣོད་དུ་བསྡུས་ནས་གསུངས་པའི་མ་བ་དགུའི་རྣམ་གཞག་ལ་ཀླན་ཀ་བྱས་མོད། དོན་གྱི་སངས་རྒྱས་པའི་གྲུབ་མཐའ་རྫོགས་མཚན་ཉིད། དེ་ལ་མི་གནས་པའི་དགག་བྱ་ཅི་ཞིག་ཡོད། ཐམས་ཅད་ཐེག་པར་མི་རུང་ཟེར་ན་ལང་ཀར་གཤེགས་པ་ལས། ཇི་སྲིད་སེམས་ཀྱི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་པའི་གོ་དོན་གང་གིས་ལེན། །ཡང་ལྟ་བ་ལ་ཁྱད་པར་བྱས་པས་སོ་ཟེར་མོད། དེ་ལ་ལྟ་བའི་ཐེམ་སྐས་བཙུགས་པ་གང་དུ་བཤད། སྒོམ་པའི་རིམ་པ་ལ་ལྟ་བའི་བརྡ་ཆད་ཙམ་བཞག་པ་བྱུང་ནའང་། ལྟ་བ་ཡིན་ན་སྒོམ་པ་ཡིན་པས་མ་ཁྱབ་ལ། སྒོམ་པའི་ཀློང་ན་ལྟ་བ་ཡོད་པས་ཁྱབ་པའི་ཕྱིར་མཆོག་གཟིགས་རྣམས་ལ་ལྟ་སྒོམ་དུ་མ་རོ་གཅིག་གོ། ཡང་མདོ་སྔགས་གཉིས་ལྟ་བའི་སྒོ་ནས་ཁྱད་པར་མེད་པ་ལ་ཟེར་མོད། བཞུགས་ཚུལ་ལ་དེ་བཞིན་ཉིད་དེ་སྒོམ་ཚུལ་ལ་ཁྱད་པར་ཤིན་ཏུ་ཡོད་དོ། །དབྱིངས་དག་མཉམ་རང་བཞིན་གྱི་རྣམ་པར་དག་པའི་འོད་གསལ་རང་གནས་ཆེན་པོ་བཅོས་བསྒྱུར་མེད་པའི་ཡེ་ཤེས་དང་། བློས་བཀོད་ནས་རྟག་ཆད་ཀྱི་མཐའ་བསལ་ཞི་སེམས་དང་སེམས་བྱུང་བླང་དོར་གྱི་གོ་ན་གནས་པ་གཉིས། གདོད་ནས་རང་བཞིན་གྱིས་གྲུབ་པའི་སྤྲོས་བྲལ་དང་། རྩོལ་བས་བྱས་པའི་ཁྱད་པར་ཆེས་ཆེ་བ་ཡོད་པས་ཤིན་ཏུ་རྣལ་འབྱོར་དུ་བཞག་པ་ཡིན་ནོ། །དེ་སྐད་དུ་ཨིནྡྲ་བྷཱུ་ཏིས། བླ་མའི་ཁྱད་པར་དང་། སྣོད་དང་། ཆོ་ག་དང་། ལས་དང་། དམ་ཚིག་དང་། སྒོམ་པའི་ལྟ་བ་དང་། སྤྱོད་པའི་ཁྱད་པར་གྱིས་འཕགས་སོ་ཞེས་པས་གསལ་ལོ། །ཇོ་བོའི་ཆ་ནས་བསྒྲུབས་ཀྱང་། པདྨ་རྩེ་མོ་ལས། དྲི་
མེད་དབྱིངས་ཀྱི་རང་བཞིན་ནི། །སྐུ་གསུམ་ཡེ་ཤེས་གཞི་དང་བཅས། །གང་ཚེ་དག་པ་དེ་ཉིད་དུ། །རང་གསལ་མངོན་དུ་འཆར་བ་དག། འདྲ་བ་ལམ་དུ་བྱེད་པ་ལ། །འབྲས་བུའི་ཐེག་པར་ཡང་དག་བརྗོད། །ཅེས་དབྱིངས་ངོ་བོ་ཉིད་ཀྱི་འབྲས་བུ་དམ་པར་ཡེ་ནས་བཞུགས་པའི་མཚན་ཉིད་ཤེས་ནས། དེ་ཁོ་ན་ཉིད་ལ་བསླབ་པའམ། བསྐྱེད་རྫོགས་ལ་ལྟོས་ནས་གློ་བུར་གྱི་དྲི་མ་དང་མཛའ་བར་མི་བྱེད་པའི་གནད་ཁྱད་པར་ཅན་ཡོད་དོ། །དེའི་ཕྱིར་ཡེ་ཤེས་ལ་ཐེག་པའི་ངེས་བརྗོད་བྱུང་བ་མི་འགལ་གྱི་སྟེང་དུ་གཞུང་ལུགས་སྤྱིའི་དགོངས་པར་གནས་པ་ཡིན་ཏེ། ཤེར་ཕྱིན་རབ་རྩལ་རྣམ་གནོན་གྱིས་ཞུས་པ་ལས། སངས་རྒྱས་ཀྱི་ཡེ་ཤེས་ནི་ཐེག་པ་ཆེན་པོའོ། །ཞེས་པ་ལ་ཅེས་བསྙོན། རྒྱུ་མཚན་དེས་སྤྲོས་བྲལ་གྱི་ལྟ་བའང་ཡེ་ཤེས་ཉིད་ལ་ས་ལམ་གྱི་རྣམ་གཞག་ཐམས་ཅད་རྫོགས་དགོས་པ་དང་། མི་སློབ་པའི་ལམ་འབྲས་བུ་ཡིན་པའང་ལམ་གྱི་རྩེ་མོར་བཞག་པའི་ཕྱིར་རོ། །དེ་ལ་འདི་སྐད་ཅེས་བྱ་སྟེ། བདག་ཅག་གི་བླ་མ་དམ་པ་རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོས། ཐེག་པ་རྣམས་ཀྱི་གྲངས་ནི་མཐའ་གཅིག་ཏུ་མ་ངེས་ཏེ། དབྱེ་བསྡུ་དཔག་ཏུ་མེད་པ་བྱར་ཡོད་ཅིང་། སྔོན་གྱི་རྡོ་རྗེ་འཆང་དང་། གྲུབ་པ་ཆེན་པོ་བརྙེས་པའི་སློབ་དཔོན་མཁས་པ་དག་གིས་མཛད་པའི་ཕྱིར་རོ། །བློ་ཆུང་ཞིང་ཤེས་རབ་ཀྱི་མིག་རྒྱང་ཐུང་བ་དག་གཅིག་ཏུ་ཞེན་ནས། ཐེག་པའི་གྲངས་དང་། གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་རྣམ་གཞག་ལ་དངངས་ཤིང་མི་བདེན་ཏོ་ཞེས་སྨྲ་བ་ནི། བ་གླང་ལ་སོགས་པ་མ་ཧེ་དག་བདག་ཅག་དུད་འགྲོ་རྣམས་ནི་རྭ་དང་བཅས་པའི་ཕྱིར། མི་དང་ལྷ་རྣམས་ཀྱང་རྭ་ཅན་ཁོ་ནའོ་ཞེས་འཛིན་པ་བཞིན་ནོ། །དེ་བས་ན་ཐེག་པའི་ཚུལ་རྣམས་ནི། མིང་ཚིག་དང་དོན་གྱི་རྣམ་གྲངས་མཐའ་ཡས་ཤིང་། ལམ་བགྲོད་ཚུལ་དང་། ས་དང་། ཏིང་ངེ་འཛིན་གྱི་འཇོག་ཚུལ་དཔག་ཏུ་མེད་དེ། ཐམས་ཅད་མཁྱེན་པ་ནི་གང་ཡང་མཁྱེན་
ཅིང་གསུངས་པའི་ཕྱིར། ལམ་བགྲོད་དུ་ཡོད་པ་དང་། མེད་པ་དང་། རྩོལ་བ་དང་བཅས་པ་དང་། རྩོལ་བ་མེད་པ་དང་། ཚེ་གཅིག་གིས་གྲོལ་བ་དང་། བསྐལ་བས་གྲོལ་བ་ལ་སོགས་པ་ནས། གྲུབ་པའི་རྣམ་གཞག་གང་ལ་དགའ་ཞིང་མོས་པའི་བསམ་པ་དང་མཐུན་པའི་ཆོས་གསུངས་ཏེ། ཆོས་ཚུལ་རྒྱ་མཚོ་རྣམས་ལ་དངངས་ཤིང་སྐྲག་པས་ལོག་པར་ལྟ་བ་རྣམས་དོར་ནས། དོན་དུ་གཉེར་བས་འཇུག་པར་བྱ་བ་ནི་གདམས་ངག་དམ་པའོ། །ཞེས་སོ། །དེ་ཙམ་གྱིས་ཕྱིན་ཅི་ལོག་གི་ཀླན་ཀ་ཉམས་བརྟས་པར་མི་འགྱུར་ཏེ། གཞན་དུ་འགོས་ཀྱིས་ནི་གསང་བ་སྙིང་པོ་ལ་སྐྱོན་གཞིར་བཀོད་ཅིང་། ཁྱད་པར་རྒྱ་གར་ནམ་གྲགས་ཟེར་བ་ཁོ་ན་ཤེས་བྱེད་དུ་བྱས་པ་དང་། དཔལ་འཛིན་གྱིས་ཚིག་དོན་ལ་ནོར་བའི་གཏན་ཚིགས་བཀོད་པ་དག་ནི་ཕལ་ཆེར་སྡོམ་གསུམ་རབ་དབྱེ་ལ་རྟོག་དཔྱོད་བྱས་པའི་རྒན་གྱི་ལད་མོ་བྱིས་པས་བྱེད་པ་ལྟར་བས། རབ་དབྱེའི་དོན་ནི་སྙིང་མ་ལ་བརྟག་དཔྱད་མཛད་པ་ཆ་ཤས་ལས་མེད་པས་དེའི་ལན་ནི་གོང་དུ་བརྗོད་མ་ཐག་པ་ཉིད་དེ། ཚིག་དོན་གྱི་ནོར་བ་ཕལ་ཆེར་ནི་གསར་མ་སྨྲ་བ་ཁོ་ན་ལ་ཡིན། དེའང་དོན་གྱི་དེ་ལྟར་འཐད་ན་གངས་ཅན་པ་རྣམས་སངས་རྒྱས་ཀྱི་བསྟན་པའི་ནང་ནས་བཞེངས་ཤིག །ཡང་ཆག་དང་། ཕོ་བྲང་ཞི་བ་འོད་དང་། ལྷ་བླ་མས་མཛད་ཏོ་བར་གྲགས་པ་དང་། རྡོག་གི་གཟེ་མར་མགོར་བཏགས་པ་རྣམས་ལ་ནི། གང་ཟག་འདི་ཞེས་བྱ་བས་བྱས་པ་འདི་ནི་ཆོས་ལོག་དྲི་མ་ཅན་ཡིན་ཞེས། ཚེས་ཀྱི་ཚིག་དོན་ལ་ནོར་བ་འདི་ཡོད་ཀྱི་གཏན་ཚིགས་མེད་པར་དབང་ཡོད་དང་སྨྱོན་ཧམ་ཁོ་ནས་ལུང་བསྒྲགས་པ་འབའ་ཞིག་གོ །དེ་ལྟར་ཁྱི་ཕྱོགས་བྲའི་རྗེས་སུ་འབྲངས་ནས་འདི་ལ་ནོར་བ་དང་འཁྲུལ་བ་ཡོད་ཅེས་སྒྲོ་འདོགས་ནུས་ན་རང་ཉིད་ཀྱང་མཁས་པའི་གྲལ་དུ་སོན་པར་གྱུར་སྙམ་ནས་ཁ་ཟེར་བ་དག་གཞན་ཡང་བྱུང་མོད་དེ། དེ་དག་ལ་འདི་སྐད་ཅེས་སྨྲའོ། །འདི་ལྟར་སྟོན་པ་བདེ་བར་གཤེགས་པས་གསུང་རབ་
དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་ངག་ནི་བྱང་ཆུབ་སེམས་དཔའ་ས་བཅུ་པས་ཀྱང་བསྡུ་བར་མི་ནུས་ན། གཞན་མཁས་པ་དང་། གྲུབ་པ་དང་། བཙུན་པ་དག་གིས་སྤྱོད་ཡུལ་དུ་ག་ལ་ཞིག་གོ། རྒྱུ་མཚན་དེས་གསང་བ་འདུས་པའི་འགྲེལ་བར་སློབ་དཔོན་མཚོ་སྐྱེས་ཀྱིས། སློབ་དཔོན་ཕལ་ཆེར་འདི་སྐད་བརྗོད། །དཔལ་ལྡན་འདུས་པ་མདངས་ཆེན་གྱིས། །རྒྱུད་ཀྱི་སྡུད་པར་བྱེད་པ་པོ། །དཔའ་བོ་འཇིག་རྟེན་དབང་ཕྱུག་ཟེར། །བླ་མའི་ཞབས་ཀྱི་བཀའ་དྲིན་གྱིས། །དཔལ་ལྡན་འདུས་པའི་སྡུད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པོ་ནི་ཐུགས་རྡོ་རྗེ། །ཞེས་གསུང་བ་པོ་སངས་རྒྱས་ཉིད་ཀྱིས་སྡུད་པར་བཞེས་པའི་ཕྱིར། སངས་རྒྱས་ཀྱིས་འོག་མིན་དུ་གསུངས་པའི་རྒྱུད། བོད་རང་དུ་ནི་འབྱུང་མི་སྲིད་པར་ཁས་ལེན་ཞིང་གལ་ཏེ་བྱུང་སྲིད་ནའང་བསྟན་བཅོས་རྒྱུད་ཀྱི་དངོས་པོ་ཅན་དུ་བྱེད་པ་མཁས་པར་གྲགས་པ་རྣམས་ཀྱིས་དཔྱད་མོད། ཁོ་བོ་ཅག་ལ་དེ་ལས་གཞན་དུ་གྱུར་བའི་གོ་བ་བསམ་གྱིས་མི་ཁྱབ་པ་ཅིག་ཡོད་དེ་གསང་སྒྲོག་གི་ཉེས་པ་ཆེན་པོ་འབྱུང་སྲིད་པས་འདིར་དབུ་མའི་ལམ་དུ་བཞག་ནས། སྔ་འགྱུར་གྱི་རྒྱུད་འདི་རྣམས་ལ་ལོ་པཎ་ཆེན་པོ་རྣམས་ཞལ་འཛོམ། རྒྱ་གར་དུ་དཀའ་བ་སྤྱད། གྲུབ་པའི་གནས་དང་མཁའ་འགྲོའི་གསང་མཛོད་རྣམས་ནས་བླངས་པའི་གཏན་ཚིགས་དཔྱད་པ་གསུམ་གྱི་སྲང་ལ་གཞལ་ནས་བཀོད་པ་དེ་ལྟར་ཡིན་མོད། གལ་ཏེ་ཁྱོད་ཅག་གི་འདོད་པ་སོར་བཞག་ཏེ་འོད་དུ་བྱས་པར་བྱེད་ན། དེའང་བདག་ཅག་སྤྲོ་བ་ལྷག་པར་བསྐྱེད་པར་བྱ་སྟེ། བཅོམ་ལྡན་འདས་ཀུན་ཏུ་བཟང་པོའི་ཁྱད་དུ་འཕགས་པའི་གསང་བ་ཆེན་པོ་མཆོག་དང་ཐུན་མོང་གི་དངོས་གྲུབ་ལ་ངེས་པར་མི་བསླུ་ཞིང་། ཤིན་ཏུ་ལྐོག་གྱུར་གྱི་གནས་མངོན་དུ་གསལ་བས་བཅུའི་དབང་ཕྱུག་དག་གིས་ཀྱང་སྤྱོད་ཡུལ་དུ་མ་ཡིན་པའི་རྒྱུད་ཆེན་པོ་དེ་དག་
སློབ་དཔོན་ཆེན་པོ་བི་མ་ལ་དང་། བཻ་རོ་ཙ་ན་དང་། རྨ་རིན་མཆོག་དང་། གཉགས་ཛྙཱ་ན་ཀུ་མཱ་ར་རྣམས་ཀྱིས་མཛད་པའི་ཕྱིར་དེ་དག་རིག་པ་འཛིན་པའམ། ས་མཐོན་པོ་ལ་གནས་པ་ཙམ་གྱི་ཡོན་ཏན་ལས་ཀྱང་འཕགས་པ་སྟོན་པ་ཀུན་ཏུ་བཟང་པོའམ། རྡོ་རྗེ་འཆང་ངམ། རྒྱལ་ཚབ་རིགས་ལྔ་ལ་སོགས་པར་མངོན་སུམ་དུ་སོང་ཞིང་། མཁན་སློབ་ཆོས་རྒྱལ་གསུམ་གྱི་ཐུགས་རྗེའི་ཟླ་ཟེར་གྱིས་བསྐྲུན་པའི་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་འདི་ཡང་ངེས་པ་དོན་གྱི་འོག་མིན་ཆེན་པོར་གྲུབ་བོ། །ཅིའི་ཕྱིར་ན་རྗེ་བཙུན་བྱམས་པའི་ཆོས་ལྔ་དང་། དུས་ཀྱི་འཁོར་ལོའི་བསྡུས་པའི་རྒྱུད་དང་། དེའི་འགྲེལ་བ་དྲི་མེད་འོད་ལ་སོགས་པ་བཞིན་ནོ། །དེ་བཞིན་དུ་བདག་པོའི་རྐྱེན་ལས་དབྱེ་ན། བཅོམ་ལྡན་འདས་ཀྱི་ཞལ་ནས་གསུངས་པ་དང་། བྱིན་གྱིས་བརླབས་པ་དང་། རྗེས་སུ་གནང་བའི་བཀའ་གསུམ་དུ་ཡོད་པ་ལས། དང་པོ་ནི། འོག་མིན་ལ་སོགས་པར་གསུངས་པ་རྣམས་ཏེ། གཉིས་པ་ནི་སྐུས་བྱིན་གྱིས་བརླབས་པའི་བཀའ་རྡོ་རྗེ་སྙིང་པོའི་སྤྱི་བོར་ཕྱག་བཞག་ནས་བྱིན་གྱིས་བརླབས་པས། མདོ་སྡེས་བཅུ་པ་འཆད་པའི་སྤོབས་པ་སྐྱེས། རྣམ་པར་གྲོལ་བའི་ཟླ་བས་དྲིས་པ་ལྟ་བུའོ། །གསུང་གས་བྱིན་གྱིས་བརླབས་པའི་བཀའ་ནི་འཇམ་དཔལ་ལ་མ་སྐྱེས་དགྲའི་འགྱོད་པ་སོལ་ཅིག་ཅེས་བཀའ་སྩལ་པས། འཇམ་དཔལ་གྱིས་མ་སྐྱེས་དགྲའི་འགྱོད་པ་བསལ་བའི་མདོ་བྱུང་བ་ལྟ་བུའོ། །ཐུགས་ཀྱིས་བྱིན་གྱིས་བརླབས་པའི་བཀའ་ནི་བཅོམ་ལྡན་འདས་ཟབ་མོ་སྣང་བའི་ཏིང་ངེ་འཛིན་ལ་བཞུགས་ནས། ཤཱ་རིའི་བུ་དང་། སྤྱན་རས་གཟིགས་ལ་བྱིན་གྱིས་བརླབས་པས། ཤེས་རབ་སྙིང་པོ་གསུངས་པ་ལྟ་བུའོ། །ཡོན་ཏན་དང་ཕྲིན་ལས་ཀྱིས་བྱིན་གྱིས་བརླབས་པ་ནི། བཤད་སྦྱར་ལས། སྟོན་པ་འདི་ཡི་བྱིན་རླབས་ཀྱིས། །བྱའམ་ཤིང་བུ་རྡེའུ་དང་། པདྨོ་་ངག་དང་དཔག་བསམ་ཤིང་། །རྔ་བོ་ཆེ་ལས་བྱུང་བ་ཡང་། །རྒྱལ་
བས་བྱིན་གྱིས་བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །ཅེས་གསུངས་པའི་ཕྱིར་རོ། །གསུམ་པ་ནི། པདྨ་དཀར་པོ་ལས། ཀུན་དགའ་བོ་ང་ཡོངས་སུ་མྱ་ངན་ལས་འདས་པའི་་འོག་ཏུ་བསྡུ་བ་བྱེད་པའི་ཚེ། འདི་སྐད་བདག་གིས་ཐོས་པའི་དུས་གཅིག་ན་ཞེས་པས་གླེང་བསླང་ལ། བར་དུ་མཚམས་སྦྱར་བའི་ཚིག །མཐར་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་བྱ་བའི་བར་གྱིས་བསྡུས་ཤིང་གསུངས་པས་མཚོན་ནོ། །མཆོག་དང་ཐུན་མོང་གི་དངོས་གྲུབ་ལ་མི་བསླུ་བ་ཅིས་ཤེས་ན། རྒྱུད་སྡེ་འདི་དག་ཉམས་སུ་བླངས་པ་ལས་བོད་འདིར་འཇའ་ལུས་འཕོ་བ་ཆེན་པོའི་སྐུ་བརྙེས་པ་ཇི་སྙེད་བྱུང་བ་དང་། ཟུར་ཆེ་ཆུང་ལ་སོགས་གསད་གསོ་ནུས་པའི་གྲུབ་ཐོབ་ཇི་སྙེད་བྱུང་བ་དང་། རོང་ཟོམ་ཆོས་ཀྱི་བཟང་པོ་དང་། རྒྱལ་བ་ཀློང་ཆེན་པ་སོགས་རྒྱན་དྲུག་མཆོག་གཉིས་ལྟ་བུའི་འཕགས་པའི་བློ་གྲོས་དང་ལྡན་པ་ཇི་ལྟར་བྱུང་གིས་ཤེས་ལ། དེ་བཞིན་དུ་ཐུན་མོང་ལ་བཻ་རོ་ཙ་ནས་བསྒྱུར་བའི་སྨན་དཔྱད་ཀྱི་རྒྱུད་སྡེ་བཞི་རོས་ཤིན་ཏུ་ལྐོག་གྱུར་གྱི་དོན་ལ་མི་བསླུ་བས་འགྲོ་བ་ནད་པའི་ཚོགས་ལ་དབུགས་འབྱིན་ཆེན་པོ་སྟེར་བ་དང་། སྔ་འགྱུར་གྱི་དྲག་སྔགས་རྒྱ་མཚོས་བསྟན་པ་ལ་འཚེ་བའི་མི་དང་། མི་མ་ཡིན་སྡེ་དང་བཅས་པ་བརླག་པར་བྱས་པ་དང་། ནད་དང་། མཚོན་དང་། མུ་གེ་དང་། འཇིགས་པ་ཆེན་པོའི་ཚོགས་ལས་སྐྱོབ་ཅིང་། དེ་བཞིན་དུ་ཆར་དབའ་བདང་། གནོད་མཛེས་དབང་པོའི་བཅའ་ག་ལ་བརྟེན་ནས་འཇིག་རྟེན་གྱི་འབྱོར་བ་རྒྱས་པ་ལ་སོགས་མདོར་ན་དབང་དུ་བྱ་བ་དང་། ཞི་བ་དང་། རྒྱས་པ་དང་། དྲག་ཤུལ་གྱི་ལས་གང་དང་གང་ལའང་ནུས་པའི་གཟུགས་བརྙན་ལྐོག་ཏུ་མ་གྱུར་བ་མངོན་སུམ་ཚད་མ་ཡིན་ན། སངས་རྒྱས་ནི་འཇིག་རྟེན་ལ་ཕན་པ་འབའ་ཞིག་པས་དེའི་བཀའ་མངོན་མཐོ་དང་ངེས་ལེགས་ཀྱི་གནས་ལ་གཞན་དབང་དུ་གྱུར་བའི་ཕྱོགས་གང་དུ་འཕུལ། འདི་ལྟར་སྤྲུལ་པའི་སྐུ་དང་ཆོས་ཚུལ་རྒྱ་མཚོ་ནི་སྔོན་ཚེ་ལོ་བརྒྱ་བ་ལ་སོགས་པའི་གནས་སྐབས་ན་བྱུང་སྟེ། དེ་ལས་གཞན་
དུ་མ་ཡིན་ནོ་བསམ་པར་མི་བྱ་སྟེ། སངས་རྒྱས་ནི་རྟག་པར་བཞུགས་ཤིང་གདུལ་བྱའི་དོན་མཛད་པས། དེ་ས་སྔོན་མདོ་དང་རྒྱུད་ལ་མ་གྲགས་པ་གསལ་བར་བྱེད་པའང་སྲིད་པས། ཐེག་པ་དང་གྲུབ་མཐའི་རྣམ་གཞག་བསམ་གྱིས་མི་ཁྱབ་པ་དག་གསང་བ་ཟབ་མོ་ལ་རྨོངས་པའི་རྟོག་དཔྱོད་ཀྱིས་གཞལ་བྱ་དང་མ་མཐུན་ཀྱང་། སངས་རྒྱས་ནི་ཐམས་ཅད་མཁྱེན་ཅིང་གང་ཡང་གསུང་བ་ཡིན་པས་གང་ཞིག་ཐར་བའི་ལམ་དུ་འཇུག་ཅིང་འཁོར་བ་སྤོང་བ་ཐམས་ཅད་སྟོན་པ་སངས་རྒྱས་ཀྱི་གྲུབ་པའི་མཐའ་ཡིན་པར་ངེས་སོ། །འདི་ལྟར་ཚིག་དོན་ལ་ནོར་འཁྲུལ་ཡོད་མེད་སངས་རྒྱས་ཀྱི་བཀའ་དང་ཆ་མི་བྱེད་པ་ཙམ་དུ་འཁྲུལ་ནས་དཔྱད་མི་བཟོད་པ་དེ་སྲིད་ཀྱི་གྲུབ་པའི་མཐའ་བཟང་པོ། མཆོག་དང་ཐུན་མོང་གི་དངོས་གྲུབ་ལ་མི་བསླུ་བའི་མངོན་སུམ་ཚད་མ་དག་ཀྱང་བཅོས་མ་དང་རྫུན་མར་ཡིད་གཉིས་བྱེད་ན། རང་གི་རྣམ་པར་ཤེས་པའང་རང་ལས་ཤིན་ཏུ་ལྐོག་ཏུ་གྱུར་བ་ཚད་མ་ཉིད་ཀྱི་ཕྱིར། སོ་སོ་རིག་བཞིག་དགུ་པ། མ་ཐོབ་དེ་སྲིད་ཆོས་ཀུན་གྱི། །ངེས་ཚིག་ཤེས་མིན་དེ་ཡི་ཕྱིར། །ཞེས་པ་ལ་དཔྱད་ནས་རང་གི་དབང་པོ་དང་། སྐལ་བའི་སྣང་ངོར་བཀའ་མ་ཡིན་པ་ལྟར་མཐོང་སྲིད་ནའང་། སྤུད་པ་ལས། རྒྱལ་བའི་ཉན་ཐོས་གང་དག་ཇི་སྙེད་ཆོས་སྟོན་དང་། །འཆང་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཅི་ཕྱིར་ཞེན་རྒྱལ་བའི་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་བས་སྔོན་བསླབས་ཤིང་། །མངོན་སུམ་བྱས་ནས་བསླབ་པ་ཇི་བཞིན་སྟོན་བྱེད་པ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་དང་། རྒྱུད་བླ་མར། ཁམས་གསུམ་དག་ན་ཉོན་མོངས་སྤོང་བྱེད་གསུངས། །ཞི་བའི་ཡོན་ཏན་བརྗོད་པར་མཛད་པ་གང་། །དེ་ནི་དྲང་སྲོང་གསུང་ཡིན་ལྡོག་པ་གཞན། །ཞེས་པ་ལ་དྲན་པ། །བར་འཇོག་དགོས་ཏེ། དེ་ལྟར་མ་བཞག་ན་ཆོས་དང་གང་ཟག་ལ་སྐུར་བ་
བཏབ་པའི་སྒྲིབ་པ་ནི་ཤིན་ཏུ་ཚད་མེད་པའི་ཕྱིར་རོ། །དེ་སྐད་དུ་རྒྱུད་བླ་མ་ལས། འཕགས་པ་སྐུར་དང་དེས་གསུངས་ཆོས་ལ་བརྙས་པ་གང་། །དེ་ཀུན་རྨོངས་པའི་མངོན་ཞེན་བརྟས་བྱས་ཉོན་མོངས་ཡིན། །དེས་ན་ཞིན་ལྟའི་དྲི་ཅན་དེ་ལ་བློ་མི་སྦྱར། །ཞེས་སོ། །མཚན་ཉིད་དེས་རྒྱུད་བླ་མའི་འགྲེལ་བར། སྤྲིན་མཐོངས་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །ཞེས་སངས་རྒྱས་པའི་ཆོས་ཁམས་རྒྱ་མཚོ་ནི་དེ་བཞིན་གཤེགས་པ་ཉིད་ལས་གཞན་བློ་མིག་དག་པའི་འཕགས་པ་རྣམས་ཀྱིས་ཀྱང་སྤྱོད་ཡུལ་མ་བཞིན། གངས་རིའི་ཁྲོད་ཙམ་ན་མཐོང་བ་རྒྱ་ཆེ་བའམ། མཁས་པར་གྲགས་པ་དག་གིས་ཆོས་ཚུལ་རྒྱ་མཚོ་ལྟ་བུ་ལ་བླང་དོར་བྱ་བ་ནུས་པ་མ་ཡིན་པས། ལེགས་པར་མཐོང་བའི་བློ་མི་གཟུམ་པ་དང་། །དྲང་དོན་གྱི་ཆོ་ངེ་འདོན་པ་དང་། ཕྱོགས་ཞེན་གྱི་སྣ་ཞགས་བརྐྱང་བ་དང་། ཕྲག་དོག་གི་མཆེ་བ་བརྡར་བ་དང་། རྙེད་པའི་ལུས་སྟོབས་རྔོམ་བདག་གིས་སྐུར་བ་བཏབ་པའི་དག་ལ་ཡིད་ཆེས་སུ་བཟུང་ནས་ལོག་པར་ལྟ་བ་ནི་སྒྲིབ་པ་ཚད་མེད་པས། མཁས་ཤིང་གཟུ་བོར་གྱུར་བ་དག་གི་སྲོག་གི་སླད་དུའང་སྡིག་པ་དེ་ལྟ་བུ་ལ་འཇུག་པར་མི་བརྩོན་ཏེ། དཔལ་འཛིན་བཞིན་དུ་མཐོང་བའི་ཆོས་ལ་མནར་མེད་པའི་དམྱལ་བར་འགྲོ་བའི་ཕྱིར་རོ། །འདི་ལྟར་གྲུབ་མཐའ་ལ་མ་ཞུགས་པ་དག་གིས་མཚམས་མེད་པ་ལྔ་བྱས་པའང་ཟབ་མོའི་དོན་ལ་བསམས་པས་ནམ་ཞིག་ཐར་བའི་སྐབས་ཡོད་ན། ཆོས་སྤངས་པས་དེ་ལྟ་མ་ཡིན་ཏེ། རྒྱུད་བླ་མ་ལས། བློ་དམན་ཕྱིར་དང་དཀར་པོའི་ཆོས་བྲལ་ལོག་པའི་ང་རྒྱལ་ལ་བརྟེན་ཕྱིར། དམ་ཆོས་སྤོང་བའི་སྒྲིབ་པ་དག་ཕྱིར་དྲང་དོན་དེ་ཉིད་འཛིན་པའི་ཕྱིར། རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟེན་པའི་ཕྱིར། ཆོས་འཛིན་བསྲིང་ཕྱིར་མོས་པ་དམན་ཕྱིར་དགྲ་བཅོམ་རྣམས་ཀྱིས་ཆོས་སྤོང་བྱེད། ཇི་ལྟར་ཟག་མོའི་ཆོས་ཉམས་དེ་བཞིན་མཁས་པ་
རྣམས་ཀྱང་མེད་པ་ནི། །མི་བཟང་སྤྲུལ་དུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། །མེ་སྤྲུལ་དགྲ་དང་རྡོ་རྗེའི་མེས་ནི་སྲོག་དང་བྲལ་བ་ཙམ་བྱེད་དེ། །དེ་ལས་མནར་མེད་རྣམས་ཀྱིས་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། །གང་ཞིག་གང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་གང་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་པས་མྱུར་དུ་དེ་ལས་ཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་བ་ག་ན་ཡོད། །ཅེས་སོ། །དེ་བཞིན་དུ་སེམས་ཅན་གྱི་མོས་པ་དང་། བསམ་པ་ཐ་དད་པས། འགྲོ་བའི་སྐད་ནི་བསམ་ཡས་པ། །བདེ་གཤེགས་གསུང་གིས་དེ་སྙེད་སྟོན། །ཐུགས་ལས་ངེས་མེད་གཟུགས་བྱུང་བ། །ཞེས་གང་ཟག་དང་། ཆོས་ཀྱང་སྣ་ཚོགས་སུ་སྣང་བས་དོན་བྱེད་པའི་ཕྱིར་འདི་ནི་ལོག་པའོ། །འདི་ནི་བཅོས་མར། ཞེས་སྒྲོ་སྐུར་གྱིས་སྟངས་གཅོད་པ་ནི་བརྣག་པར་དཀའ་བའི་ལས་ཡིན་ནོ། །འདིར་ཀློག་པ་བདག །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་ལ་རྒྱབ་བརྟེན་མོད། དེ་ནི་རང་རང་གི་གློ་བར་ཞེན་པ་ཅིག་ཡི་དམ་དུ་བཟུང་ནས་ཆོས་ཀྱི་རྣམ་གྲངས་རླབས་པོ་ཆེ་ལ་ཡིན་མིན་གྱི་རིག་པ་འཕེན་པའི་དོན་མ་ཡིན་གྱི། གང་ཞིག་དོན་དུ་གཉེར་བྱའི་ཆོས་དེ་སློབ་དུས་ཚིག་དོན་གྱི་རིམ་པ་ལ་བསམ་བྱུང་གི་ཤེས་རབ་རྣམ་པར་དག་པས་གདར་བྱ་བའི་དགོངས་པ་ཡིན་གྱི། དཀོན་མཆོག་བརྩེགས་པར། འོད་སྲུངས་ངའམ་ངདང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གིས། གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ་ཞེས་པའི་དོན་ལ་བསམ་མོ། །རྒྱུ་མཚན་དེ་ལྟ་བུས་བློ་གྲོས་གྱི་འདུན་ཁང་མཛེས་པར་བྱས་པ་འགོས་ལོ་གཞོན་ནུ་དཔལ་གྱིས་འཕགས་པའི་ཡུལ་དུ་སྡེ་བ་བཅོ་བརྒྱད་བཀར་བསྡུ་ཤེས་པ་ལྟ་བུས་གངས་རིའི་
ཁྲོད་ཀྱི་བསྟན་པ་ཇི་སྙེད་པ་རང་རང་གི་འཐད་པ་བཞིན་ཕྱོགས་ལྷུང་མེད་པའི་གནས་སུ་བསྡུས་ནས་ཆོས་སྤོང་གིས་ས་ལས་ལྡོག་པར་མཛད་པ་ནི་རྣམ་པར་ཐར་བ་བསམ་གྱིས་མི་ཁྱབ་མོད། དེ་བཞིན་དུ་ཐུབ་པའི་དབང་པོས། རྒན་པའམ་ནི་གཞོན་པའང་རུང་། །གང་ལས་ཆོས་ནི་རྣམ་ཤེས་པ། །དེ་ལ་གུས་པས་ཕྱག་བྱ་སྟེ། །བྲམ་ཟེ་གཙང་མས་མེ་ལ་བཞིན། །ཞེས་དང་། བྱས་པ་ཤེས་ཤིང་བྱས་པ་དྲན། །བྱས་པ་དྲིན་དུ་གཟོ་བ་ཡི། །མི་ལ་དཔལ་མགོན་ཉེ་བར་གནས། །ཞེས་པ་ལྟར། གོང་མ་ལྔ་པས་རང་གི་ཐུགས་བསྐྱེད་ཀྱི་ངོ་ནས་གངས་རིའི་ཁྲོད་ཀྱི་བསྟན་པ་མཐའ་དག་ལ་རི་མོར་མཛད་ཅིང་། ཆོས་རྒྱལ་མེས་དཔོན་རྣམ་གསུམ་གྱིས་བཙུགས་པའི་བསྟན་པ་ལ་སྲི་ཞུ་དང་། བསྟི་སྟང་བླ་ལྷག་ཏུ་མཛད་པས་སྔ་འགྱུར་རྡོ་རྗེ་ཐེག་པའི་ཕྱོགས་ལའང་རྒྱུ་མཚན་ཤེས་ནས་རྗེས་སུ་ཞུགས་པའི་གཏན་ཚིགས་དང་། ལོག་པར་སྨྲ་བདག་ལ་དགག་སྒྲུབ་ཀྱི་བགྱི་བ་ལྷུར་བླངས་ནས་རྒྱུད་འབུམ་རིན་པོ་ཆེ་གཟེངས་སུ་བསྟོད་པའི་ཚུལ་གང་གི་གསན་ཡིག་གླེགས་བམ། ང་པའི་ཤོག་གྲངས་བརྒྱ་གོ་ལྔ་ནས་ཉིས་བརྒྱ་ཐམ་པའི་བར་གྱིས་ལེགས་པར་རྟོགས་པར་འགྱུར་ལ། མདོར་བསྡུ་ན་གསེར་མདོག་ཅན་པས། རྙིང་མའི་ཆོས་ཀུན་འཕགས་ཡུལ་ནས། །བསྐྱུར་བར་འབད་པས་བསྒྲུབ་མི་དགོས། །སློབ་དཔོན་སྤྲུལ་པའི་སྐུ་ཉིད་ཀྱིས། །གསུངས་པ་ཉིད་དུ་གྲུབ་པས་ཆོག །འཕགས་པའི་ཡུལ་ནས་ཕྱིས་འགྱུར་བས། །སྔགས་དང་བརྡ་སྐད་མ་མཐུན་ཀྱང་། །མཆོག་དང་ཐུན་མོང་གྲུབ་པ་ལ། །མི་བསླུར་གྲུབ་ཕྱིར་དེ་ཚད་མ། །དཔེར་ན་ཡུལ་ཆེན་སོ་སོ་ནས། །གྲུབ་པ་མཆོག་རྣམས་ཀྱིས་བླངས་པའི། །ཆོས་ཀྱང་གླེགས་བམ་སོ་སོ་ལས། །འཕགས་པའི་ཡུལ་དུ་བསྒྱུར་བ་མིན། །རྡོ་རྗེ་སེམས་དཔས་གནང་ཐོབ་པའི། །བཀའ་ཡི་བསྡུ་བ་པོ་ཉིད་ཀྱིས། །ཡུལ་ཁམས་སོ་སོའི་སྐད་ཉིད་དུ། །བཤད་པས་ཆོག་པར་གསུངས་པ་ཡིན། །རྙིང་མའི་
ཆོས་ལུགས་འཕགས་ཡུལ་ནས། །འགྱུར་བར་ངེས་རྣམས་བསྒྲུབ་མི་དགོས། །མ་ངེས་པ་རྣམས་བསྟན་བཅོས་སུ། །བསྒྲུབས་ལས་གྲུབ་པར་གྱུར་འདི་ཡང་། །གང་འདིའི་རྣམ་རྟོག་རང་བཟོའི་ལམ། །རྙེད་ནས་འཕྱན་པ་འགྱུར་མིན་གྱི། །བོད་ཀྱི་ཡུལ་དུ་སྔོན་བྱོན་པའི། །ཆེན་པོ་རྣམས་ཀྱིས་དེར་བཤད་པའོ། །ཞེས་དང་། འགོས་ལོ་ཆེན་པོའི་དེབ་ཐེར་དུ། སྤྱིར་ན་དར་མས་བསྟན་པ་བསྣུབས་ནས་ལོ་བདུན་ཅུ་ལྷག་ཅིག་གི་བར་དུ་དབུས་གཙང་ན་རབ་ཏུ་བྱུང་བ་ནི་གཅིག་ཀྱང་མེད། རྙིང་མ་བའི་སྔགས་འཆང་མང་དུ་ཡོད་པ་རྣམས་ཀྱིས། ཡུལ་སོ་སོར་སྒྲུབ་པ་ཁྱད་པར་ཅན་གྱིས་བཀྲ་ཤིས་པར་མཛད་ཅིང་། ཁྱིམ་པ་རྣམས་ཀྱིས་ཀྱང་དེ་དག་ལ་དད་ཅིང་ཟས་གོས་སོགས་ཀྱིས་མཉེས་པར་བྱས། བུམ་དབང་ཙམ་རེ་བླངས་ཤིང་། བརྒྱུད་རིམ་གྱིས་སྨིན་པ་ལ་བརྟེན་ནས། ཀླུ་མེས་ལ་སོགས་པའི་དབུས་གཙང་མི་དྲུག་གམ་བརྒྱད་དུ་གྲགས་པ་རྣམས་བྱོན་པའི་ཚེ། ཡུལ་དང་ཡུལ་རྣམས་སུ་གཙུག་ལག་ཁང་དང་དགེ་འདུན་གྱི་སྡེ་གྲངས་མེད་པ་འཕེལ། སྔོན་རྒྱལ་བློན་གྱི་དུས་སུ་འགྱུར་བའི་བཀའ་བསྟན་བཅོས་རྣམས་ལ་མ་ཉམས་པར་ལོངས་སྤྱོད་པས་ཆོག་པ་བྱུང་། མཁས་པ་དང་གྲུབ་པའི་སྐྱེས་བུ་མང་དུ་བྱུང་བ་ཕལ་ཆེར་ཡང་། རྙིང་མ་པའི་གྲུབ་ཐོབ་བརྒྱུད་པ་ལས་བྱུང་ཡིན། ཞེས་འདོམས་པར་མཛད་པ་བཞིན་ནོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། གངས་རིའི་ཁྲོད་ན་བསྟན་པ་ཇི་ལྟར་བྱོན་པ་ལས་བརྩམས་ཏེ་བཙན་པོ་ཁྲི་སྲོང་ལྡེའུ་བཙན་གྱི་དུས་ན་གསང་སྔགས་ནང་གི་རྒྱུད་རྣམས་བྱུང་བའི་གཏམ་གསལ་བར་སྲསཔའི་རབ་ཏུ་བྱེད་པ་སྟེ་བཞི་པའོ། །
མདོ་སྒྱུ་སེམས་གསུམ་གྱི་བསྟན་པ་ལ་བཤད་སྒྲུབ་ཀྱི་སྒོ་ནས་བྱ་བ་མཛད་པ་གྲགས་ཆེ་བ་དག་གཙོ་བོར་སྨོས་པའི་སྐབས་ཏེ་རབ་ཏུ་བྱེད་པ་ལྔ་པ།
ད་ནི་སྔ་འགྱུར་རྡོ་རྗེ་ཐེག་པ་ལས། དངོས་གྲུབ་བརྙེས་ཤིང་གང་ལ་བཤད་སྒྲུབ་ཀྱི་བྱ་བ་བྱེད་པའི་སྐྱེས་བུ་དམ་པ་ཇི་ལྟར་བྱོན་གྱི་རྣམ་གཞག་བརྗོད་པར་བྱའོ། །དེ་ལ་སེམས་ཕྱོགས་ཀྱི་ཤིང་རྟ་ཆེན་པོ་སློབ་དཔོན་བཻ་རོ་ཙ་ན་ལས་ཇི་ལྟར་བརྒྱུད་པ་ནི། སློབ་དཔོན་དེ་ནི་ཡུལ་ཉང་ཆབ་དང་གཙང་ཆབ་འཛོམ་པའི་འགྲམ་སྙེ་མོ་བྱེ་མཁར་རམ། ཡང་ན་བྱིས་པའི་དུས་ཀྱི་ཞབས་རྗེས་ཡོད་པས་གཙང་ཟངས་དཀར་ཅེས་པའི་གྲོང་དང་ཉེ་བར་འཁྲུངས་སོ་ཟེར་ཏེ་ཕྱོགས་གཉིས་ཡོད། དགུང་ལོ་བརྒྱད་པའི་སྐབས་སུ་ནག་མོ་རི་དང་། བྲག་པོ་ཆེ་གཉིས་སུ་ཉི་ཟེར་ལ་ཞོན་ནས་ཕན་ཚུན་དུ་འགྲོ་ཞིང་བརྡ་སྐད་དང་ཆོས་ཀྱི་རིམ་པ་རྩོལ་མེད་དུ་མཁྱེན་པར་བྱུང་བས་སྤྲུལ་པའི་སྐུར་ཡོངས་སུ་གྲགས། དེ་ཉིད་བཙན་པོས་བསམ་ཡས་སུ་སྤྱོན་པར་བྱས་ནས་འཕགས་པའི་ཡུལ་དུ་དཀའ་བ་བཅུ་དྲུག་སྤྱད་དེ་མན་ངག་གི་ཆོས་བླངས། དང་པོར་རྒྱལ་པོ་ལ་གསུངས། དེ་ནས་ཚ་བ་རོང་དུ་སྤྱུགས་པས། རྒྱལ་རོང་བྲག་ལྷ་མགོན་པོའི་དགོན་པར་གཡུ་སྒྲ་སྙིང་པོ་ལ་གསུངས། དེ་ནས་ཚ་རོང་སྟག་རྩེ་མཁར་དུ་གསང་སྟོན་ཡེ་ཤེས་བླ་མ་ལ་གསུངས། དེ་ནས་སྟོང་ཁུང་རོང་གི་བྲག་དམར་དགོན་རྫོང་དུ་སྤང་སངས་རྒྱས་མགོན་པོ་ལ་གསུངས། དེ་ནས་དབུས་སུ་གཉགས་དང་། ལི་བཟའ་ཤེས་རབ་སྒྲོན་མར་གསུངས་ཏེ་རིམ་པ་ལྔར་གྲགས། དེ་ལས་གཉགས་ཀྱིས་སོག་པོ་དཔལ་གྱི་ཡེ་ཤེས། གྲྭ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ་སོགས་ལས་རིམ་པར་བརྒྱུད་པའི་ལུགས་གཅིག། ཡང་སོག་པོས་སངས་རྒྱས་ཡེ་ཤེས་ལ་སོགས་ཏེ་རིམ་པར་བརྒྱུད་པའི་ལུགས་གཅིག །ཡང་གཙང་ཤཱཀ་རྡོར་གྱིས་སྤང་རཀྵི་ཏ་ལ། དེས་ཡར་ཟིད་རམ་ཤེས་རབ། དེས་ཟེར་མོ་དགེ་སློང་མ། དེས་མར་པ་ཤེས་རབ་འོད། དེས་ལྷ་རྗེ་ལ་བཀའ་དྲིན་ནོད་དུ་འོངས་པ་དང་། ནད་དྲག་པོ་ཞིག་བྱུང་བ། ཤངས་ཀྱི་ལང་ཟ་སྟོན་པ་དར་མ་བསོད་ནམས་ཀྱིས་བཅོས་པས། དེའི་དྲིན་ལན་དུ་རྡོ་རྗེ་མེ་ལོང་དང་། ལམ་རྣམ་བཀོད་དང་། ཟབ་མོའི་དབང་གི་མན་ངག་དང་། མདོའི་འགྲེལ་བ་ལུང་བསྟན་རྡོ་རྗེ་སོགས་བི་མ་ལ་ལས་བརྒྱུད་
པའི་གདམས་པ་དང་། སེམས་ཕྱོགས་མ་ལུས་པ་གནང་ངོ། །དེ་ལས་གསང་བདག་སྒྲོ་ཕུག་པར་བརྒྱུད་པ་དེ་བྱུང་བ་ཡིན་ནོ། །སློབ་དཔོན་བཻ་རོ་ཙ་ནས་སྤང་སངས་རྒྱས་མགོན་པོ་ལ་བརྒྱུད་དེ་འཇའ་ལུས་ཤ་སྟག་བྱུང་བའི་ལོ་རྒྱུས་ནི། སྤང་རྒན་པོའི་སློབ་མ་ངན་ལམ་བྱང་ཆུབ་རྒྱལ་མཚན་ཡིན། དེ་ནི་ཡུལ་དབུ་རུང་ན་ལམ་རལ་གསུམ་པ་དགེ་སློང་ལོ་དྲུག་ཅུ་རྩ་བདུན་ལོན་པ་ཞིག་གིས་རྒྱལ་མོ་སྟག་རྩེ་མཁར་དུ་བྱོན། སྤང་མི་ཕ་མ་མགོན་པོ་ལ་གདམས་པ་ཞུས་པས་གནང་སྟེ། ང་ཡུལ་དུ་མ་འགྲོ། ཝ་སེངྒེ་བྲག་ལ་བསྒོམ་གསུངས། སློབ་དཔོན་གྱི་བཀའ་བཞིན་ཉན་ཏེ་དེར་བྱོན་ནས་བསྒོམས་པས་ལོ་བརྒྱ་དང་བདུན་ཅུ་རྩ་གཉིས་ལོན་པའི་ཚེ་ཕུང་པོ་ལྷག་མེད་དུ་གཤེགས།། །།དེ་ལ་སློབ་མ་ཟད་མ་རིན་ཆེན་དཔྱིག་བྱ་བ་མདོ་ཁམས་སྟོད་པ་ཞིག་བྱུང་། དེས་ངན་ལམ་ལ་གདམས་པ་ཞུས། བྲག་དེ་ཉིད་དུ་བླ་མ་དང་འབྲལ་བ་མེད་པར་སྒོམ་བཞིན་བཞུགས་པས། ལོ་བརྒྱ་དང་བཞི་བཅུ་ཞེ་བཞི་ལོན་པའི་ཚེ་ཕུང་པོ་ལྷག་མེད་དུ་གཤེགས། །དེ་ལ་ཡར་ཀླུངས་འཕྱོས་ནས་ཁུ་འགྱུར་གསལ་བའི་མཆོག་ཅེས་བྱ་བའི་སློབ་མ་རྟེན་དགེ་སློང་ཡིན་པ། ལོ་ལྔ་བཅུ་རྩ་བདུན་ལོན་པ་ཅིག་བྱུང་། ཟ་དམ་རིན་ཆེན་གྱིས་གདམས་ངག་གནང་བས་ཡུལ་དུ་ལོག་པའི་བསམ་པ་སྤངས། ཝ་སེངྒེ་བྲག་ཉིད་དུ་བཞུགས་ནས་བསྒོམས་པས་ཁུ་འགྱུར་གསལ་ལོ་བརྒྱ་དང་བཅུ་བདུན་ལོན་ཚེ། ཕུང་པོ་ལྷག་མེད་དུ་གཤེགས། དེ་ལྟར་སློབ་དཔོན་གསུམ་ཀ་ལ་སེངྒེ་བྲག་ཅེས་བྱ་བ་སྤྲུལ་གྱི་ལོ་གཅིག་རྟིང་ལ་གཅིག་སྙུན་བུན་ནས་འཇའ་ཚོན་ཡལ་བ་བཞིན་དུ་གཤེགས་སོ།། །།དེ་ལ་སློབ་མ་བྱང་ཆུབ་གྲགས་ཞེས་བྱ་བ། ཡུལ་ཉང་གཡུ་འབྲུག་སྟོད་པ་རྟེན་དགེ་སློང་ལོ་བཞི་བཅུ་རྩ་གཉིས་ལོན་པ་ཞིག་བྱུང་། ཁུ་འགྱུར་གསལ་བ་ལས་གདམས་པ་ཞུས་ནས་ཡར་ལོག། བསམ་ཡས་མཆིམས་ཕུར་སྒོམ་གྱིན་བཞུགས་ཙ་ན། དབུ་རུ་ཞྭའི་ཉང་ཤེས་རབ་འབྱུང་གནས་ཞེས་བྱ་བ་དགེ་སློང་བགྲེས་པོ་
གཅིག་བཞུགས་འདུག་པ་དང་མཇལ། ཁོང་ན་རེ་བསྙེན་པར་རྫོགས་ནས་ལོང་རྒན་ཡང་གདམས་པ་ཁྱེད་ཆེ་བར་འདུག། རྗེས་སུ་གཟུང་འཚལ་ཞུས་པས། ཉང་བྱང་ཆུབ་གྲགས་ཀྱིས་ཁོང་ལ་གདམས་པ་རྣམས་བྱིན། ཕུག་པོ་ཆེ་དང་། ཡང་རྫོང་དུ་བཞུགས། རང་གི་སློབ་མ་དང་། ཡང་སློབ་དག་ལ་འབྱུང་བཞི་ཟད་པར་གྱི་སྤྲུལ་བསྒྱུར་བསྟན། མཐར་རང་ཉིད་གཙང་རྒྱ་མཉེ་དུ་ཁའི་ཕུང་པོ་རི་བོ་ཆེ་ལ་ད་ལྟ་རང་འདུག་པའི་འཕྲོལ་རི་ཟུར་ན་ཡར་སྐུ་ལུས་སྤྲིན་ཆད་པ་བཞིན་དུ་ཕུང་པོ་ལྷག་མེད་དུ་གཤེགས་སོ། །དེར་ཉང་ཤེས་རབ་འབྱུང་གནས་ཀྱིས་མཆིམས་ཕུ་དཔལ་གྱི་ནགས་ཁྲོད། སྒྲགས་ཀྱི་ཡང་རྫོང་། ཕུག་པོ་ཆེ་རྣམས་སུ་བཞུགས། དེར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་ཤར་ནས། ཕུག་པོ་ཆེ་ལྷ་རིའི་རྩེ་མོ་ལ་ཡོད་པའི་ཤུག་པ་རྐང་གཅིག་པར་ན་བཟའ་དང་། ཕྲེང་བ་དང་། ཀ་པཱ་ལ་རྣམས་གཟེད་ནས། སྐུ་ནམ་མཁའ་ལ་འཇའ་ཚོན་དེངས་པ་བཞིན་སོང་ངོ།། །།དེ་ལ་སློབ་མ་ཡུལ་ལོ་མོ་བ། རུས་སྦ་ཡིན་པ་ཅིག་བྱུང་བས་སློབ་དཔོན་སྦ་སྒོམ་དུ་གྲགས། དེ་རང་གི་ཡུལ་ན་ཡོད་པའི་ཚེ་འཁྲུག་པ་ཡོད་པས། ཡུམ་ན་རེ། བུ་འདི་སྲིང་མོ་དྲུག་གི་མིང་པོ་གཅིག་པོ་ཡིན། སློབ་དཔོན་ཤེས་རབ་འབྱུང་གནས་ལ་འཆོལ། མ་ཤི་བ་རང་གིས་ཆོ་ག་ཟེར་ལོ་བཅུ་དྲུག་པ་ཞག་ཉང་ལ་བཅོལ་ནས་ཡོད་ཙ་ན། སྔར་གྱི་ཉང་བྱང་ཆུབ་གྲགས་པ་དེ་ཕུག་པོ་ཆེ་དང་། ཡང་རྫོང་དང་། མཆིམས་ཕུ་རྣམས་སུ་ཤ་བ་གཅིག་འཁྲིད་ནས་འབྱོན་པས། ཉང་ཤ་བ་ཅན་ཞེས་ཀྱང་གྲགས། ཕུག་པོ་ཆེར་ཕྱི་བའི་རེས་བྱོན་ཙ་ན། ངས་ཁྱོད་གཉིས་ལ་ལྟད་མོ་ཞིག་བསྟན་གྱིས་ལྟོས་ཤིག་གསུངས། དེར་སློབ་དཔོན་ཤེས་འབྱུང་དང་། སྦ་སྒོམ་གཉིས་ཀྱིས་གཡས་གཡོན་ནས་བལྟས་ཙ་ན། སློབ་དཔོན་དབུས་ན་ཡོད་པ་དེ་མི་སྣང་བར་སོང་། དེར་ངོ་མཚར་སྐྱེས་ནས་ཡོད་ཙ་ན། རླུང་
འཚུབ་ཁྲུ་གང་པ་ཞིག་ཏུ་གྱུར་ནས་ཕར་བསྐྱིལ་ཚུར་བསྐྱིལ་བྱས། དེ་མེར་སོང་། དེའང་ཆུ་གཏོར་གཏོང་བའི་འཁར་གཞོང་གཅིག་ཏུ་འཕོས་ནས་ཆུར་ལྟེམ་གྱིས་སོང་། དེ་ས་འཆུ་གཅིག་གི་ངང་ལ་སློབ་དཔོན་རང་དུ་ཀྲོང་གིས་སོང་། དེ་ལྟར་འབྱུང་བཞི་ཟད་པར་གྱི་སྐྱེ་མཆེད་ལ་དབང་བསྒྱུར་ནས་འདི་སྐད་དུ། འབྱུང་བའི་སྙིགས་མདངས་ནས་དངས་མ་མ་ཡལ་བའི་བར་དུ་དེ་ལྟར་འོང་བ་ཡིན། ཤེས་རབ་ཀྱི་སྒོམ་རྒྱུ་མེད་པའི་དོན་མཐོང་ཡང་། བརྡལ་ཡེངས་པ་མེད་པར་བསྐྱངས་ན་དེ་ལྟར་དུ་རང་དབང་ཐོབ་པ་ལ་ཚེགས་མེད། མ་ཡེངས་པར་སྐྱོང་བ་གལ་ཆེ་བ་ཡིན་གསུངས། དེ་ནས་རེ་ཞིག་ན་སྦ་སྒོམ་གྱིས་བལ་བུའི་ནགས་ལ་ཤིང་འཐུ་བར་ཕྱིན་པས། ཁོང་རང་གི་འཇག་སྤྱིལ་མེ་དམར་བུན་བུན་འདུག་པ་མཐོང་། སློབ་དཔོན་ནི་མེ་མི་འབུད། མེ་ཤོར་བ་ཡིན་ནམ་སྙམ་བལྟར་ཕྱིན་པས། འཇག་སྤྱིལ་སྔར་བཞིན་ལས་མེ་མི་སྣང་། སློབ་དཔོན་ལ་དེ་ཅི་ཙུག་ཡིན་དྲིས་པས། ངས་མེའི་ཏིང་ངེ་འཛིན་ལ་མཉམ་པར་བཞག་པ་ཡིན། ངའི་བླ་མ་ཉང་བྱང་ཆུབ་གྲགས་པའི་དེ་མི་དྲན་ནམ་གསུངས། ཡང་སྐབས་ཤིག་སློབ་དཔོན་གྱི་བཞུགས་སར་ཆུ་ལྟེམ་མེ་འདུག་པ་མཐོང་། མཐར་སློབ་དཔོན་གྱིས། ང་མི་འདུག་ན་ལྷ་རིའི་རྩེ་མོ་ལ་ལྟོས་ཤིག་གསུངས། རེ་ཞིག་ན་སློབ་དཔོན་མ་བྱུང་ནས་རི་ལ་སྐྱོ་སེང་ལ་བཞུད་པ་ཡིན་གྱི། སང་དགོངས་འབྱོན་དུ་འོང་སྙམ་ཙ་ན་ཡང་མ་བྱོན། བལྟར་ཕྱིན་ཙ་ན། ན་བཟའ་དང་། དབུ་ཞྭ་དང་། བྷོ་དྷི་ཙིའི་ཕྲེང་བ་ལ་སོགས་པ་ཤུག་པ་ལ་གཟེད། སློབ་དཔོན་ཕུང་པོ་ལྷག་མེད་དུ་གཤེགས་སོ། །འདི་ནི་རང་བཞིན་རྫོགས་པ་ཆེན་པོ་ལ་ནམ་མཁའ་དང་མཁའ་འགྲོའི་འཆི་ལུགས། མེ་དཔུང་དང་རིག་འཛིན་གྱི་འཆི་ལུགས་ཞེས་པའི་ཡ་གྱལ་གཅིག་ཡིན་ནོ། །སྦ་སྒོམ་ལོ་ཉི་ཤུ་རྩ་བཞི་ལོན་ཙ་ན་ཉང་ཤེས་འབྱུང་གིས་གདམས་ལ་བཏབ་པ་ཡིན། སྦ་སྒོམ་འདི་རྟེན་དགེ་བསྙེན་དུ་བཞུགས།
མཚན་ཡེ་ཤེས་བྱང་ཆུབ་ཏུ་གྲགས། རྟོགས་པ་ཁྱད་པར་ཅན་མངའ། རྡོ་ལ་འདམ་རྫབ་ལྟར་མཛད། བྲག་ལ་སྐུའི་པར་འདེབས། དགུང་ལོ་དགུ་བཅུ་རྩ་བརྒྱད་ལོན་པའི་ཚེ་སྐུ་སྙུན་པ་མེད་པར་གཤེགས། ངོ་མོ་གང་མོས་ཕྱི་རོལ་གྱི་མི་རྣམས་ལ་བུར་མཇལ་མ་གཏང་བར་མཆོད་ཁང་དུ་པུར་མེ་ལ་སྤྱངས་པས། འོད་རྫ་མ་ཙམ་ཞིག་ནམ་མཁའ་ལ་འགྲོ་བ་ཕྱི་རོལ་གྱི་མི་ཀུན་གྱིས་མཐོང་། ཤུལ་དུ་གདུང་རུས་གཅིག་ཀྱང་མ་བྱུང་ངོ། །དེའི་སློབ་མ་ནི་འཛེང་སྟེ། ཡུམ་མཚར་དགུ་སྐྱིད་དེ་ཞེས་བྱ་བ་ཡར་ཀླུངས་ཐང་ཆུང་བའི་མཛེོ་ཡིན། ཐང་ཆུང་བཙད་པོའི་བུ་ཆེ་བས་ཕབ་ནས་འཛེང་འཁྲུང་། ལོ་བཅུ་དྲུག་ལོན་པའི་དུས། འགྲུལ་ཟླ་ཁ་ཤས་དང་བཅས་དོལ་གྱི་གདོང་སྣར་ཚོང་ལ་ཕྱིན་ཙ་ན། དོལ་གྱི་འཚེར་ཆུང་ན་མི་མང་པོ་སྤུངས་འདུག། བལྟར་ཕྱིན་པས་དམ་པ་རྒྱ་གར་དང་མཇལ། ཟླ་བ་བཅུ་བཞི་དམ་པའི་ཕྱག་ཕྱིར་འབྲེངས། གཙང་གི་གནས་གཞི་བཟངས་ཅན་དུ་སླེབ་ཙ་ན། དམ་པས་སྣམ་བུ་གཅིག་གནང་ནས། ཁོང་དང་ཐུང་འདུག་པས་ཁྱོད་རང་ཡུལ་དུ་ལོག། དྭགས་པོ་ནས་ཁམ་བུ་ཁྱེར་ལ་ཤོག །དོལ་དུ་འགྲོ་བའི་ཟླ་བོ་འདུག་གོ་གསུངས། དེར་འཛེང་གིས་ལམ་དུ་ཞུགས་པ་ན། དམ་པ་་ཚུར་བྲེང་གིས་བྱོན། འཛོང་གི་མདན་པ་གཉིས་ནས་འཇུས་ཏེ། ཅི་ཡང་མ་ཡིན་གནས་གྱུར་བ། །གནས་གྱུར་བ་ལ་གཉིས་འཛིན་མེད། །ཅེས་གསུངས་ནས་མགོ་ཐུག་ལན་གཉིས་བརྒྱབ་པས། སེམས་ཧད་དེ་བ་ལས། ཤེས་པ་བཀྲ་གསལ་བ་ཞིག་བྱུང་། ཁ་ནང་ན་ཆུ་ཁྱིལ་ལེ་སྣང་། དེ་ནི་དམ་པས་བྱིན་གྱིས་བརླབས། རྡོ་རྗེ་ཟམ་པ་དང་མཇལ་བའི་ལུང་བསྟན་པར་འདུག་སྟེ། དུས་ཕྱིས་ལས་མ་གོ་གསུངས། དམ་པས་རྟེན་འབྲེལ་འགའ་ཙམ་དང་། སྔགས་ཀྱི་གནད་མང་དུ་གནང་། རྒྱང་རོ་ཚལ་མར་ཡི་གེ་དྲུག་པའི་གདམས་ངག་གནང་ནས་བསྒྲུབས་པས་བྱིན་རླབས་ཆེན་པོ་བྱུང་། ཡང་ཆུ་བོ་ཆེན་པོ་འདིའི་ཤར་ཕྱོགས་ན་ཙནྡན་གྱི་ནགས་ཡོད། དེ་ན་ཁྱོད་ཀྱི་བླ་མ་
ཡོད་གསུངས་ནས་ལུང་བསྟན། དེ་ནས་དབུས་སུ་བྱོན། ཨ་ཁུ་དཔལ་འབར་ལས་ཁྲག་འཐུང་དང་། དཔེ་དཀར། གནུབས་ཤར་པོ་ཆེ་ལས་ཀྲཱི་ལ་དང་། ཁ་འབར་མའི་གཏོར་ཆེན་ཞུས། ཁོང་གིས་གཙང་དུ་བ་རི་བ་ལ་འབུལ་བ་བསྐྱེལ་དུ་བཏང་བས། བ་རི་ལའང་འཇམ་དཔལ་དང་ཁྱུང་སྒྲུབ་ཞུས། དགེ་བཤེས་སྦོ་ལ་སྔ་འགྱུར་རིགས་ཞུས། དེ་ནས་སུམ་ཅུ་རྩ་ལྔ་ལོན་པའི་ཚོ་དམ་ཤོད་རྒྱུད་ལྕང་ཚིགས་སུ་བྱོན། ཕུག་པོ་ཆེའི་ལ་ཁ་ན་དགེ་བཤེས་བཙན་ཁ་བོ་ཆེ་རྒྱ་གར་ནས་བྱོན་མ་ཐག་པ་ཞིག་ཇོ་མོ་བས་སྤྱན་དྲངས་ནས་ཆོས་དང་བཟའ་དང་ལྟད་མོ་ཡོད་ཟེར། ནངས་བར་སྔ་བར་བྱོན་ཙ་ན། བུད་མེད་གཅིག་ན་རེ། ཁྲབ་ནས་ལམ་ཟུར་འདི་ནས་ཡར་ཕྱིན་ན། སློབ་དཔོན་སྦ་སྒོམ་བྱ་བ་ལྟོ་སྟེར་བ་ལ་ཡངས་པ་ཞིག་ཡོད་ཟེར། ཕྱིན་པས་རྣལ་འབྱོར་པ་ཚོ་གཅིག་གིས་ཀྱང་སླེབ་ནས་ཚོ་བ་དྲངས། ཕྱེ་ཟངས་ཀྱི་ཁྱིམ་བུ་རེ་ཡང་གཏོང་གི་འདུག། དེ་ཚོར་བྱིན་ཟིན་ནས། དེ་ན་གསར་དུ་གཅིག་བྱང་འདུག་གསུངས་ནས་ཆུ་བུམ་པ་གང་ལེན་དུ་བཅུག། ཆུ་གཏོར་མཛད་ནས་ཕུག་ཆུང་ཟུ་རར་ཁྲིད། ཚོད་མ་ཀེ་རུ་ཕོར་བ་གང་བྱིན། དེ་ནུབ་ཀྱང་བཟའ་བྱིན་ནས་བྲག་རྩ་ཞིག་ཏུ་ཉལ། ནངས་པར་འགྲོ་དོགས་སེམས་ཙ་ན། ཡང་ལྟོ་བྱིན་ནས་ངའི་ཉེ་གནས་བཙུན་ཆུང་གཅིག་ཡོད་པ་བྲོ་ནད་་དུ་གསར་ལེན་དུ་སོང་བ་ཚར་ཚེས་བསམ་བྱུང་། ཤིང་ཞིག་འཐུས་གསུངས། དེར་ནགས་ཁྲོད་ནས་ཤིང་ཁུར་ཆེ་བ་གཅིག་བསྐྱལ་བས། སྦ་སྒོམ་མཉེས་ནས་ཕྱག་རྒྱ་ཆེན་པོ་བརྡའི་མན་ངག་དང་། རྫོགས་པ་ཆེན་པོ་སྐོར་བདུན་རང་ཆས་བྱ་བ་བཤད། དེར་ཉེ་གནས་ཀྱང་བྱུང་། དེད་མ་སླེབ་པས་སློབ་དཔོན་འོ་བརྒྱལ་སེམས་ཙ་ན་ཁྱེད་ཀྱིས་གོ་བཅད་འདུག་པ་ད་དུང་ཞག་འགའ་ཙམ་བཞུགས་ཟེར། ཡང་ཡར་ཀླུངས་ལན་ཅིག་བསྐོར་ནས་བྱུང་། དེར་སྦ་སྒོམ་གང་ཟག་ཁྱད་པར་ཅན་དུ་ཤེས་ནས་ཡུལ་དུ་མ་ཕྱིན་པར་འོན་དང་ཟངས་རི་ཡན་ཆད་དུ་བསོད་སྙོམ་བྱས། སྐྱེ་གཅིག་ཉོས།
ནས་སྒྱེ་གང་དང་བཅས་པ་སློབ་དཔོན་སྦ་སྒོམ་ལ་ཕུལ་བས། ཁྱོད་ཀྱིས་པའི་གཡོག་བྱས་པ་ཡིན་པས་དེས་རུང་། འདི་ལ་ཁྱོད་རང་གི་བརྒྱགས་ཀྱིས། ང་ལ་མན་ངག་རྡོ་རྗེ་ཟམ་པ་ཞེས་བྱ་བ་སྐད་ཅིག་མས་དོན་རྟོགས་ནས་ཚེ་གཅིག་ལུས་གཅིག་ལ་ཕུང་པོ་ལྷག་མེད་དུ་སངས་རྒྱ་བའང་བརྒྱུད་པ་བྲེང་མ་ཆད་པ་ཞིག་ཡོད། དེ་གོང་ཕན་ཆད་སུ་ལའང་མ་སྨྲས་པ་ཡིན། ང་ཁྱོད་ལ་སྦྱིན་ནོ་གསུངས། ནས་ནན་གྱིས་ཕུལ་ནས་འདི་སློབ་དཔོན་རང་ལ་བསྔགས་པ་ཡིན། གདམས་ངག་ཐུགས་ལ་གདགས་པར་ཞུ། བརྒྱགས་རྙེད་དེ་འོང་བྱས་པས། ཕྱག་གཡོན་པས་སྤྱི་བོ་ནས་བཟུང་། གཡས་པས་ལྟག་ཁུང་ནས་རྟ་བརྟབ་བྱེད་ཅིང་། འོར་ཆེད་མ་ཆིག་ཅན་དུ་འདུག། གདམས་ངག་གིས་ཕན་ཐོགས་པར་གདའ་གསུངས། དེར་ལོ་ཆུང་གི་སྔགས་པ་གཅིག་ལ་གཤིན་རྗེ་དམར་པོའི་སྒྲུབ་ཐབས་ཤིག་བྱིན་པས། སྲན་ནས་ཁལ་བརྒྱད་བྱུང་། ལོ་མོ་དང་འཕྲུན་དུ་སྲུང་སྐྱོབ་ཞར་རེ་ཙམ་བྱས་པས་ཆོས་བརྒྱགས་ལྡང་བ་རྙེད། དེར་རྡོ་རྗེ་ཟམ་པའི་བྱིན་རླབས་ཞུ་བ་ལ་ཚོགས་ཀྱི་ཡོ་བྱད་མ་ཚོགས་པའི་ངང་། སློབ་དཔོན་གྱིས་བྱིན་རླབས་ད་ལྟ་བྱ། ཕྱི་ནས་བར་ཆད་འོད་གསུངས། མཁས་པར་དུ་གྲོགས་པོ་གཅིག་ལས་རི་མོ་གཅིག་བཅོལ་བའི་རིན་སློང་དུ་ཕྱིན་པས། མཇོའི་ཤམ་ཐབས་གཅིག་ཐོབ། དེའི་རྣམ་པ་ཚོ་ཕྲལ་ནས་བཅོངས། ཆང་ཕུད་དང་། གཏོར་མ་དང་། ནས་བྲེ་ལྔ་རྣམས་ལ་བརྟེན་ནས། མར་མེའི་དོད་ཉིན་བར་བྱའོ་གསུངས་ནས་གྲོལ་ལམ་དབང་བཞི་རྫོགས་པར་བསྐུར། གདམས་ངག་མ་ལུས་པ་གནང་། ཕྱི་ནས་ཀྱང་བྱིན་རླབས་ལན་བཞི་ཙམ་ཞུས། ནས་དང་གསེར་ལ་སོགས་པའི་འབུལ་བ་ལན་ལྔ་བསྐུལ། རེ་ཞིག་ན། སྣང་བ་འདི་ཀུན་རྫུན་པའི་ཆོས་ཅན་ཡིན་གསུངས་ནས། ཆུ་རྡོ་གཅིག་ལ་ཕྱག་ཆར་གྱིས་བརྒྱབ་པས་གྲུ་མོ་ཡན་ཆད་ཐིམ་གྱིས་སོང་། ཡང་སྐུ་ལུས་ཕྱིར་བཤིགས་ཀྱི་མཛད་པས་བྲག་ལ་འདལ་གྱིས་ཐལ་ནས་རྗེས་ཝལ་ལེ་བྱུང་། ཕུག་ཆུང་རོང་ནས་ལྟ་སྟངས།
ཀྱིས་ཤུག་པའི་གདུང་མང་པོ་བཀུག། ཇོ་མོའི་མཆོད་ཁང་ཕུབ་པའི་ཤིང་ཡིན་གསུངས། དེ་ལྟ་བུའི་སློབ་དཔོན་ལས་རྡོ་རྗེ་ཟམ་པའི་སྐོར་མ་ལུས་པ་ཐོབ་ཅིང་། གཞན་ཡང་ཇོ་བོ་རྗེའི་ཕ་རོལ་ཏུ་ཕྱིན་པའི་ལམ་རྐྱང་ཁུག་སོགས་ཀྱང་ཐོབ། དེ་བཞིན་དུ་ཡུ་མོ་ལས་སྦྱོར་དྲུགཁམས་པ་ལུང་པ་ལས་ཐུན་བརྒྱད་མ། སྨེའུ་ཟུར་བའི་སློབ་མ་ལས་དམིགས་བསྐོར་གསུམ། ཤོད་བུ་ལོ་ཙཱ་བ་ལས་འགྲེལ་ཆུང་། དགེ་བཤེས་དགྲོལ་སྒོམ་ལས་ནཱ་རོའི་ཐབས་ལ་མ་ཞུས་ཤིང་། རྡོ་རྗེ་ཟམ་པ་ཕར་ལ་བཤད། སྙུན་གདངས་ལས་སྨོན་སྤྲུལ་དང་རྒྱབ་ཤ། རྫ་བོར་བ་ལས་བདུད་རྩི་ཐིགས་གསུམ། རི་ཁྲོད་དུ་རླུང་ཆུང་ལས་རྣན་རྒྱུད་ཚིགས་གསུམ། རླུང་དམ་ཆེན་པོ་ལས་དོ་ཧའི་མན་ངག། ལབ་སྒྲོན་ལས་གཅོད་ཡུལ། རྒྱལ་བ་སྦོ་སྟོན་ལས་སྡེ་སྐོར་བདུན་པ། གནུབས་ཤངས་ཆེན་ལས་བ་རི་བའི་ཀྲཱི་ཡའི་ཆོས་བཅོ་ལྔ། དིང་རི་ཀུན་དགའ་ལས་གདམས་པ་སྣ་ཚོགས་སོགས་ཐོབ་པ་ཤིན་ཏུ་མང་། དྭགས་པོ་ལྷ་རྗེ་ལས་ཆོས་དྲུག་དང་། སྐྱེས་སྦྱོར་ཞུས། རྟོགས་པ་ཉམས་བསྡུར་བས་ཤིན་ཏུ་མཉེས། སྤྱན་སྔ་རྣལ་འབྱོར་གྱི་གྲྭ་ས་རུ་སྤྱོད་པ་བྱས་པས་བརྟུལ་ཞུགས་ཅན་དུ་གྲགས། གྲོགས་མཆེད་ཀྱང་ཨ་ཙར་སྟག་ཤམ་ཅན་དང་། བླ་མ་དབུ་འདྲེན་པ་དང་། བླ་མ་ཐུད་ཁ་འབར། བླ་མ་དྲེད་འབྱོར ཞང་འགྲོ་སྨྱོན་ལ་སོགས་དེ་ཙ་ནའི་རྣལ་འབྱོར་གྱི་དབང་པོ་ཤ་སྟག་དང་འགྲོགས། གཙང་དུ་གཅེར་པ་ལོ་ལྔ་བྱས། གཞན་ཡང་སྣང་བ་ལ་ཐོག་བརྫིས་ཤིན་ཏུ་ཆེ་བས་དགུན་འཁྱགས་པའི་རུམ། དབྱར་ཆུ་བོའི་གཞུང་། མ་ངེས་པའི་གཡང་རོང་ཟབ་མོར་མཆོངས་པ་དང་། མགོ་རྡེབ་པ་དང་། མཚོན་བརྡེག་པ་ལ་སོགས་ཏེ་སྤྱོད་པ་ཚན་པོ་ཆེ་མ་བྱས་བྱ་བ་མེད་པས་དཔའ་བོ་འཛེད་ཆུང་དུ་གྲགས། སོ་མང་བཙན་ལ་ཕྱག་རྒྱ་ཆེན་པོ་བརྟབ་པས་འཁྲུལ་སྣང་ཡེ་ཤེས་སུ་གནས་འགྱུར། རི་ཁྲོད་ཀླུང་ཆུང་བ་དང་། དངུལ་མོ་རྒྱ་ལེ་ལྕམ་ལ་ཡི་གེ་བཞི་པ་དང་རྫོགས་ཆེན་བཏབ་པས་འཁྲུལ་
ཞིག་ཆེན་པོར་གྱུར་ཏེ་མཐར་ཕུང་པོ་ལྷག་མེད་དུ་དེངས། དེ་བཞིན་དུ་མ་ཇོ་དང་པ་ཅན་དང་། ཁམས་པ་སྙིང་རུས་ཅན་ཞིག་ལ་རྡོ་རྗེ་ཟམ་པ་བསྟན་པས། མ་ཇོ་མོན་ཁ་ཟེར་མོའི་མཚོ་དང་། ཁམས་པ་ཀོང་པོ་མཚོ་རྫོང་དུ། ནམ་མཁའ་དང་མཁའ་འགྲོའི་འཆི་ལུགས་ཀྱིས་ཕུང་པོ་ལྷག་མེད་དུ་སོང་། རས་པ་སྒོམས་སྟག། ཤོ་རས། རྒྱ་རས། རླུང་རས་སོགས་ལ་གདམས་པ་བཏབ་པ་ཙམ་གྱིས་བདེ་དྲོད་འབར། དེ་བཞིན་དུ་ཆོས་ཉིད་བསྟན་པ་ཙམ་གྱིས་རྟོགས་གྲོལ་དུ་སོང་བ་ཤིན་ཏུ་མང་། འཛེང་དྷརྨ་བྷོ་དྷི་ཉིད་ཀྱི་གསུང་ནས་ཀྱང་། ངའི་གམ་དུ་ལོ་ཙཱ་བ་ཡང་བཞི་ཙམ་བྱུང་། རབ་བྱུང་དང་། སྟོན་ཆེན་དང་། སྒོམ་པ། སྒོམ་མ་ལུས་པོ་ཆེ་རང་མཐོང་ཅན་མང་ཞིག་བྱུང་། ཚུལ་བཞིན་ཉམས་སུ་ལེན་པ་ཨ་ཅང་ཆེ་སྟེ། དྭགས་པོར་ཉམས་ལེན་ཨེ་ན་རེ་བྱེད་པའི་ཉམ་བཅུ་གཅིག་ཙམ། དང་པོར་འཆི་དུས་ཐེབས་པ། འཆི་ཁར་གནད་གཅོད་མེད་པ། རོ་ལ་འཇའ་ཟུག་པར་བྱུང་བ་ཡིན། ངའི་གདམས་པ་འདི་ལ་བལ་མ་བལ་ལས་བྱེད་པ་དང་། ཕ་མ་སྲིའུ་གསོ་བ་འདྲ་བའི་ཉམས་ལེན་ལོ་ལྔ་དྲུག་གཅིག་བྱས་ན། ཕུང་པོ་ལྷག་མེད་དུ་སོང་ནས་ཤུལ་དུ་མིའི་ལུས་པོ་མི་ཡོང་ངེས་གསུང་། རྫུ་འཕྲུལ་གྱི་བཀོད་པ་རྒྱ་མཚོ་ལྟ་བུ་ལ་དབང་འབྱོར་བས། རེས་སྐུ་ལུས་འཇའ་རུ་འཁྱིལ། རེས་ཞབས་ས་ལ་མི་རེག་པར་གཤེགས། སྣང་སེམས་རོ་གཅིག་ཏུ་འདྲེས་པས། ཐག་རིང་པོའི་ས་ཡང་ཡུད་ཙམ་ལ་འཁོར། གཞན་སེམས་ཤེས་པ་ལ་སོགས་པའི་མངོན་པར་ཤེས་པ་ཐོགས་མེད་མངའ་བས། མ་འོངས་པ་ཐམས་ཅད་ལུང་སྟོན། ལྷའི་མིག་དག་པས། ཇོ་སྲས་མ་རྡོ་རྗེ་སྐྱིད་ཀྱི་བུ་ནམ་ཕྱེད་ན་གཉིད་ལོག་པ་རྒྱ་མཐོངས་ནས་མར་སྤབ་ཏུ་འཆོར་ལ་ཁད་པ་གཟིགས། སྣང་བ་ལ་ཉིན་མཚན་མེད་པས། ནུབ་མོ་སྦུར་མའི་ཁྲོད་དུ་རྒྱ་ཁེབ་ལྷུང་བ་བདེ་བླག་ཏུ་མཐོང་བ་སོགས་ཡོད། ཕྱི་རེས་གཙང་དུ་ལོ་བདུན་བཞུགས་ནས་སླར་ཕུག་པོ་ཆེར་བྱོན་པས། སློབ་དཔོན་སྦ་སྒོམ་གྱིས། ནམ་མཁའ་འདི་ཁོང་དུ་ཆུད་པར་གྱིས། དེ་རྟེན་མེད་དུ་རྟོགས་ན་སྒོམ་མེད་ཀྱི་གཟེར་ཆེན་ཐེབས་པ་ཡིན་གསུངས་པས་ངེས་
ཤེས་གཏིང་ནས་འདྲོབས། དེ་ནས་དྭགས་པོ་ཞུ་རུ་བླ་མ་ཞལ་གདམས་ལས་གུ་རུ་ཞིབ་སྡེ་སྐོར་བདུན་པའི་གདམས་པ་ཞུས། དེའི་ལྷ་ཟུར་དགོན་པར་བརྡ་བཞི་ལོ་གསུམ་བསྐྱངས་པས་ཆོས་ཐམས་ཅད་ལ་བྱན་ཚུད། སྤྲོས་བྲལ་གི་དགོངས་པ་ནམ་མཁའ་ལྟ་བུར་སོང་། ལར་དཀའ་ཐུབ་ལ་ཤིན་ཏུ་བཟོད་པས། ཕུག་པོ་ཆེར་རྡོ་རྗེ་ཟམ་པ་ཞུས་ནས་བདུད་རྩིའི་དཀའ་ཐུབ་མཛད་པས་རིམས་ཀྱིས་བརྫི་བར་མ་ནུས། གནུབས་ཤངས་པོ་ཆེའི་དྲུང་དུ་བླ་མའི་བྲན་གྱིས་དཀའ་ཐུབ་བྱས་པས་གར་ཕྱིན་དུ་བླ་མས་ཐུགས་ལ་འདོགས། དམ་པ་རྒྱ་གར་གྱི་དྲུང་དུ་རྟོག་དཔྱོད་ཀྱི་དཀའ་ཐུབ་བྱས་པས་ཆོས་ཐམས་ཅད་ལ་རང་བྱན་ཆུད། སྐྱིད་ཁུང་དུ་ཕུར་བའི་བཟླས་པ་ལ་དཀའ་ཐུབ་བྱས་པས་འཇིག་རྟེན་གྱི་ལྷ་འདྲེས་ཅི་སྨྲས་ཉས། ཇོ་བོ་དཀའ་གདམས་པའི་ས་རུ་ཞི་དུལ་གྱི་དཀའ་ཐུབ་བྱས་པས་གར་ཕྱིན་དུ་གཞན་གྱིས་བྱམས། ཡི་གེ་བཞི་ལ་མི་སྡོད་པ་གསུམ་གྱི་དཀའ་ཐུབ་བྱས་པས་བདེ་དྲོད་འབར་ནས་གཅེར་བུ་ལོ་ལྔ་བྱས། དེ་ལ་ངེས་ཤེས་སྐྱེས་ནས་ཕག་མོ་མངོན་བྱུང་ལ་སྒྲུབ་པའི་དཀའ་ཐུབ་བྱས་པས་འགུར་མོའི་ནུབ་ཕྱོགས་སུ་རྗེ་བཙུན་མའི་ཞལ་གཟིགས། བརྡ་མང་པོ་གནང་། གནུབས་ཡུལ་རོང་དུ་རྨི་ལམ་སྦྱངས་པས་སྣང་བ་ཐམས་ཅད་རྨི་ལམ་དུ་ཤེས། གཞུ་སྟོད་ཏི་སྒྲོའི་ཤེལ་ཕུག་ཏུ་ཁྲོ་བོ་བདུད་རྩི་འཁྱིལ་བའི་ཞལ་མཐོང་། མི་མ་ཡིན་ཞིག་གིས་བསྙེན་བཀུར་ཆེར་བྱས། བཙུན་གཟུགས་གཅིག་ནམ་མཁའ་ལ་འཕུར་ནས་ཕར་འགྲོ་ཚུལ་འགྲོ་བྱེད་པ་མཐོང་། བཙལ་བསམ་རྙེད། མི་ཡིན་མིན་མ་ཤེས་གསུངས། དྭགས་པོ་ཞུ་རུར་ཨ་རྫི་བསྒྲུབས་པས་ཉི་མ་དྲོ་ཁར་ཞལ་གཟིགས། དམ་བསྲི་བྱེད་སྙམ་ཙ་ན་ཇོ་མོ་ཕྱལ་ལེ་བྱོན་ནས། བུད་མེད་ཅན་ཟེར་ནས་འོད་གཅིག་ཏུ་ཡལ། ལྷ་ཟུར་དུ་བཅུད་ལེན་གྱི་སྒྲུབ་པ་བྱས་པས་ཚེ་དཔག་མེད་ཞལ་མཐོང་། ཆོས་མང་པོའི་རྣམ་གཞག་རྒྱུད་ལ་ཤར། ཨོ་དཀར་བྲག་ཏུ་སྒྲུབ་པ་མཛད་པས་བདེ་མཆོག་ཡབ་ཡུམ་ཞལ་གཟིགས། ལན་ཅིག་འགྲོ་སྙིང་འདོད་པ་ཞིག་བྱུང་ནས།
མོན་འགར་གྲོང་མོ་ཆེའི་མདུན་དུ་བྱོན། ཆུའི་རྫིང་མོ་ཞིག་ལ་ཐུབ་ཆོད་བྱས་མཆོངས་པས། འཁྱགས་པ་ཆག་ནས་ཆུར་ཕྱིང་། སྐྱེངས་པའི་རྣམ་རྟོག་ཅིག་ཤར་ཙན། ཆུ་ལ་རླངས་པ་ནམ་མཁའ་མི་མཐོང་བ་ཙམ་བྱུང་། མི་རྣམས་ངོ་མཚར་སྐྱེས་ནས་དགུན་གྲང་བདོ་བ་ལ་ཆུ་ལ་དེ་ཙམ་ཚུགས་པ། ལྕགས་བསྲེགས་ཆུ་ལ་བཙུད་པ་འདྲ་བ་བྱུང་ཟེར། རང་ལ་འཁྱགས་པའི་སྣང་བ་ནི་བྱུང་གསུང་། ཡང་ལན་ཅིག་ཇོ་མོ་དང་གཉིས་ཀྱིས་ཤིང་འཐུར་ཕྱིན་པས་ཤིང་ཁུར་ཆེ་བ་གཅིག་རྙེད། དེ་ཁུར་ནས་མཐའ་ཆེན་པོ་ཞིག་གི་ཁར་སླེབ་པ་དང་། འདི་ནི་རྨི་ལམ་དུ་འདུག་སྙམ་ནས་མ་ཆོངས་པས་བྱ་བབས་པ་བཞིན་དུ་སོང་། ཇོ་མོ་ན་རེ་བླ་མ་ཁྱེད་མིའམ་ཞིག་མི་འདུག། དམ་པ་རྒྱ་གར་དྲན་ཟེར། དེ་ཡན་དུ་གདམས་པ་མང་དུ་མ་འཕེལ། གྲོང་ཆོག་མཛད་ཅིང་གསང་སྤྱོད་བསྐྱངས། དེ་ནས་ཐག་རིང་ནས་སློབ་མ་མང་དུ་བྱུང་ནས་འཕེལ། རེ་ཞིག་ན་བལ་བུ་དོར་ལས་སྤྱན་དྲངས། གདམས་ངག་གསུངས་པས། ཉི་མ་སྔ་དྲོ་དང་པོ་ལ་འཇའི་གདུགས་དང་རེ་མིག་མང་པོ་བྱུང་། ཆོས་ཐོན་ནས་རི་ལོ་གསལ་སྐྱོ་སངས་ལ་བྱོན། འཇའ་དེ་བླ་མ་གྲོངས་པའི་རྟགས་མི་དགའ་བ་མིན་ནམ་ཞུས་པར། ངའི་བླ་མ་སྦ་སྒོམ་གྱིས། འབར་སྟོན་ཤེས་རབ་གྲགས་སྤུན་གཉིས་ལ་གདམས་པ་འདི་གནང་བའི་དུས་ཀྱང་ངོ་མ་ཤོད་ལུང་པ་དང་། ཕུག་པོ་ཆེའི་རི་ལོགས་ཁེངས་པ་ཙམ་བྱུང་བ་ཡིན། གདམས་པ་འདི་ལ་རྟགས་འདི་འོང་གསུང་། ཡང་བླ་མ་འདི་འཛིན་ན་བཞུགས་པའི་དུས་སུ། སློབ་མ་ཇོ་སྲས་འཛེང་གི་དྲུང་དུ་བྱོན་པས། མཆོད་རྟེན་རྩའི་གད་རྩ་ཞིག་ན་བཞུགས་འདུག། དེ་ནས་དབེན་ཁང་དུ་ཕྱིན་ཙ་ན་བླ་མ་འཛེང་ནི་མ་མཐོང་། འོད་ཕུབ་ཙམ་ཞིག་འདུག། རྩར་ཉེ་ཙན་འོད་དེ་མི་འདུག་ནས་དེ་ཙུག་ལགས་ཞུས་པས། མཉམ་པར་གཞག་པའི་རྟགས་ཡིན་མི་ལ་མ་སྨྲ་གསུངས། ཡང་ཨ་ཇོ་དངོས་གྲུབ་ལ་མ་ཇོ་བྱུང་བས། ངས་བཟླས་གྲོགས་བྱས་པས་མཛེ་ནི་མ་གསོས། ངས་ཕྱག་ན་རྡོ་རྗེའི་ཞལ་མཐོང་། དགོད་བྲོ་གསུང་། དེ་ལྟར་ཆོས་ཚུལ་གཞན་ལ་
གྲགས་པའི་རོ་སྙོམས་དང་། ཆོས་དྲུག་དང་། གཅོད་ཡུལ་དང་། རིམ་པ་ལྔ་ལ་སོགས་པའི་གདམས་པའི་དོན་གྱི་ཐོབ་བྱ་གང་ཡིན་པ་ཉམས་འོག་ཏུ་ཚུད་པའི་འཛེད་སྒོམ་དྷརྨ་བྷོ་དྷི་འདི་དགུང་ལོ་བརྒྱ་དང་གཉིས་ལོན་པའི་དུས་ཤིག་སྙུན་པ་ལྟར་བསྟན་བྲས། འཁོར་རྣམས་ཀྱིས་བླ་མ་གྲོངས་ཀྱིས་དོགས་ཙ་ན། ཞལ་ནས་མ་དང་རྨི་ལམ་བཟང་། ང་མ་འཆི། རྒྱལ་པོ་རིའི་སྟེང་ན་འདུག་པ་ལ་ཉི་ཟླ་གཉིས་ཤར་བྱུང་། རུས་པའི་སྤྱིལ་པོ་མང་པོའི་སྟེང་ན་བུད་མེད་མང་པོ་འདུག་པས། བླ་མ་འཛེང་ཁྱོད་ལོ་བཞིན་ཤོག་ཟེར་བ་ཞིག་རྨིས་གསུང་། ཡ་རིང་ཞིག་ན། ངས་ལོ་མང་པོ་ལོན་ཏེ་ང་རང་ལའང་ཏིག་པོ་བཤད་རྒྱུ་མེད་གསུངས། དེ་ནི་རྟོག་དཔྱོད་ལ་འཛིན་པ་དག་པས་ནང་དུ་དགོངས་པ་ཟད་སར་འཁྱོལ་བའི་རྟགས་ཡིན་ནོ། །དེར་འཁོར་རྣམས་ཀྱིས་དགེ་རྩ་ཞིག་མཛད་པར་ཞུས་པས། འདུས་བྱས་ཀྱི་དགེ་རྩ་ལ་ཐུགས་མི་གཏོད། བཅུད་ལེན་ཞིག་མཛད་པར་ཞུས་པས་ཀྱང་། བཅུད་ལེན་བྱས་ན་ལོ་བཅུ་ཙམ་ཚེ་བསྲིང་ནུས་ཏེ། དུས་ངན་གྱི་ཚེ་རིང་བ་ལ་དགོས་པ་མེད་གསུངས། གཞན་ལ་སྐྱོ་བ་ཡང་དག་བསྐུལ་ནས་སྐུ་གཤེགས། ཕུར་སྦྱངས་པས་ནམ་མཁའ་འཇས་གང་། མཆོད་རྟེན་དང་རིང་བསྲེལ་ཡང་མང་དུ་བྱོན་ནོ། །འདི་ནི་ཚོགས་པ་བསྐྱངས་པས་སྙིགས་མ་འཇའ་ལུས་སུ་མ་དེངས་ཀྱང་། དོན་གྱི་ཀ་དག་ཆོས་ཟད་ཀྱི་ས་ལ་མྱ་ངན་ལས་འདས་པའི་རྟགས་མཐའ་དག་ཚང་ཞིང་སྙན་བརྒྱུད་རྡོ་རྗེ་ཟམ་པའི་དར་རྒྱས་ཀྱང་འདིའི་རིང་ནས་ཆེ་བར་བྱུང་སྟེ་དངོས་ཀྱི་སློབ་མ་ཡང་། སློབ་དཔོན་ཀུན་བཟང་དང་། འཛེང་ཇོ་སྲས་དང་། བཙན་ཐང་བ་ཉང་དྷརྨ་སིདྡྷ་དང་། སློབ་དཔོན་གསེར་ལུང་པ་དང་། བླ་མ་དུ་རྡོ་རྗེ་རྒྱལ་མཚན་དང་། གཟིགས་ཡེ་ཤེས་དབང་པོ་དང་། གཡག་སྟོན་ཟླ་བ་འོད་ཟེར་ལ་སོགས་མང་དུ་བྱོན་ནོ། །དགུང་ལོ་ཡང་བརྒྱ་དང་བཅུ་བདུན་ལོན་ཚེ་གཤེགས་པ་ཡིན། འདི་ཇོ་འབྲོམ་དང་། ཕྱ་པ་ཆོས་ཀྱི་སེངྒེ་དང་། རྗེ་བཙུན་མི་ལ་དཔོན་སློབ་དང་སྔ་ཕྱིར་ཐོག་མཉམ་པ་ཙམ་ཡིན་
ནོ། །དེ་ལ་འཛེང་ཇོ་སྲས་ནི། སྔགས་པའི་རིགས་ལས་བཙས་པས་ཆུང་ངུ་ནས་ཡིག་རྩིས་ལ་སྦྱངས། འོལ་ཁའི་ལྷ་བྲིས་ས་སྒྱུ་འཕྲུལ་ལ་སོགས་རྙིང་མ་དང་། དགྱེས་རྡོར་དང་མཚན་བརྗོད་ཞུས། དེར་སློབ་དཔོན་ལྷ་བྲིས་པས་འདའ་ཀར། ངས་གཞུང་ཆེན་པོ་འདི་ཙམ་ཤེས་ཀྱང་འཆི་ཁར་ཕན་ང་ཨ་རོ་ཐུན་བདུན་ལས་མ་བྱུང་། ཁྱོད་ཀྱང་གཞུང་མ་བསླབས་པར་གདམས་ངག་ཁོ་ན་ལ་ནན་ཏན་གྱིས། དྭགས་པོ་ན་ཁོ་རང་གི་བླ་མ་འཛེང་བྱ་བ་ཞིག་ཡོད་འདུག་པ་དེར་སོང་ཞེས་ལུང་བསྟན། གངས་བར་དུ་རྫོགས་ཆེན་ལྷུན་གྲུབ་མཁན་སློབ་དཔོན་ཟེམ་གྱི་སར་དབྱར་དགུན་ཐོག་དྲུག་བསྡད་ཀྱང་ཐུགས་ལ་མ་བཏགས། གདམས་ངག་གི་སྒྲོས་པ་མཆོད་ནས་སློབ་དཔོན་འཛེང་ལ་དཔལ་ལུང་དུ་རྡོ་རྗེ་ཟམ་པ་ཚར་གསུམ་ཞུས། བྱིན་རླབས་མཛད་ནས། ཁྱེད་རང་རེ་ཞིག་གཙང་ལ་སོང་ལ་གཞུང་སློབ། གཙང་ནས་འཁོར་ཙ་ན་ཨ་མིས་དགོན་པ་གཅིག་ཀྱང་བསྡོགས་ཀྱི་གསུངས། དེར་གདམས་པ་མི་གནང་བར་དགོངས་ནས། གཞན་སུས་ཤེས་དྲིས་པས། གྲྭ་ཕྱིའི་ཇོ་སྲས་ཞང་ལ་སྐྱབས་བྱ་བས་ཤེས་གསུངས། དེ་ལ་ཞུ་བར་སེམས་ཙ་ན་ཁོང་གྲོངས། ཡང་དྭགས་པོ་རང་དུ་ལོག་ནས་འཛེང་ལ་ཞུས་པས་ཀྱང་མ་གནང་། སློབ་མ་ཞིག་ལ་ཞུ་བསམས་ནས། ཤོ་སྐྱམ་དུ་སློབ་དཔོན་དུའི་སྤྱན་སྔར་ཕྱིན་ཙ་ན། རེ་བ་ཙམ་བཅོས་ནས་འདིས་མི་འོང་ད་དུང་དྭགས་པོར་སོང་ལ་ཞུས་གསུངས། ཡང་དྭགས་པོར་བྱོན་ནས་ཞུས་པས། ཅིས་ཀྱང་འདོད་ན་གདམས་པ་ལ་ནན་ཏན་བྱེད་དགོས་པ་ཡིན་གསུངས་ནས་རྫོགས་པར་གནང་། དབྱར་དགུན་ཐོག་འགའ་སློབ་དཔོན་གྱི་དྲུང་དུ་བསྡད། ལོ་དྲུག་ཙམ་ལོན་ནས་ཕྲན་ཚེགས་རྣམས་ཀྱང་རྫོགས། གཞན་ལ་བྱིན་རླབས་མཛད་པའི་ལས་སློབ་ཀྱང་བྱས། ཐོད་པའི་སློབ་མ་རོག་པོ་དགའ་དང་། མ་ཇོ་ཟློ་བ་ལ་སོགས་པ་ལྔ་བཅུ་ཙམ་གྱིས་རྡོ་རྗེ་ཟམ་པ་ཞུས་པས་ཇོ་སྲས་ཀྱིས་ཤོད། ཁྱེད་ཆོས་ཉོན་གསུངས་ནས་སློབ་དཔོན་གྱི་ཁྲི་ཁ་ནས་གསུངས། དཔོན་སློབ་གཉིས་ལོ་ངོ་བཅོ་བརྒྱད་ཙམ་དུ་འགྲོགས། གདམས་ངག་གི་བཀའ་ཕོག་
ནས་བརྒྱུད་འཛིན་དུ་བསྐོས་སོ།། །།དེ་ལྟར་འཛེད་དྷརྨ་བྷོ་དྷི་དང་། ཇོ་སྲས་འཛེད་ཆུང་སྨྱོན་པ་གཉིས་ཀའི་སློབ་མ་སློབ་དཔོན་ཀུན་བཟང་ཡིན་ཏེ། དེ་ནི་ཁུ་བོ་ཕ་ཇོ་དབུས་འཕག་མོ་གྲུ་བའི་སློབ་མ་སྒོམ་ཆེན་བཟང་པོ་ཞིག་ཡིན། མཇོ་བཟའ་དེས་ཆོག་བྱ་བ། མཇོ་སྨྱོན་མ་བསམ་འགྲུབ་བྱ་བ་ལས་ཆོས་ཐོས་པ་གཉིས་ཀ་ལ་རྨི་ལམ་གྱི་ལྟས་བཟང་པོ་དང་བཅས་ཏེ་འཁྲུངས། ལོ་བརྒྱད་དགུ་ལ་སློབ་དཔོན་ཀོར་སྟོན་རཱ་ཛ་ལ་སློབ་གཉེར་ཅུང་ཟད་རེ་བྱས། བཅོ་ལྔ་ལོན་པའི་ཆོ་ཁོང་གྲོངས་ནས་སློབ་དཔོན་དུའི་གམ་དུ་ལོ་ལྔ་ཙམ་ཞི་བྱོད་ཞུ་ཞིང་བསྡད་ནས་ཞབས་ཏོག་འགྲུབ་ཚང་བྱས། གསེར་ལུང་དགོན་པར་སློབ་དཔོན་དུའི་སར་ཇོ་སྲས་འཛེང་དང་མཇལ་ནས། འཛེང་གི་གསང་སྒྲུབ་དང་། ཕག་མོ་མངོན་འབྱུང་ཞུས། རྡོ་རྗེ་ཟམ་པ་ལྷག་མ་ལུས་བར་དབུ་སྙུང་བཞེས་པའི་ནུབ་ཀྱི་རེས་ལ་དཔོན་སློབ་གཉིས་ཀ་ལ་རྨི་ལམ་བཟང་པོ་རྨིས། དེར་འཛེང་ཆུང་བས་ཁྲིད་ནས་འཛེད་དྷརྨ་བྷོ་དྷི་དང་མཇལ་བའི་ཚེ། བཅོ་ལྔའི་ཟླ་བའི་རུམ་ན་སྐར་མ་གཉིས་ཐིམ་པ་རྨིས། འཛེང་ཆེན་པོ་ལ་རྡོ་རྗེ་ཟམ་པ་ཚར་གཅིག་ཞུས། དེ་ནས་འཛེང་ཇོ་སྲས་སྤུང་རིང་དུ་སྤྱན་དྲངས་ནས་རྡོ་རྗེ་ཟམ་པ་ཚར་བདུན་ཞུས། དྭགས་པོར་དགུན་ཐོག་བཞི་ཕྱིན། རྡོ་རྗེ་ཟམ་པ་ཚར་ཕྱེད་པ་གཅིག་དང་བཅུ་བཞི་ཐོབ། ཇོ་སྲས་དང་ལོ་བརྒྱད་འཕྲོགས་ནས་རྡོ་རྗེ་ཟམ་པ་ཚར་བདུན་ཞུས། ཕྱི་ནས་ཤོ་རུ་ཚར་གཉིས། གསེར་ལུང་དུ་ཚར་གཅིག་གཞན་ལ་གསུང་འཕྲོར་མཇལ་བ་དང་དྲིལ་བས་འཛེང་མེས་དཔོན་གཉིས་ལ་རྡོ་རྗེ་ཟམ་པ་ཚར་སུམ་ཅུ་རྩ་ལྔ་ཐོབ། གཉིས་ཀའི་གདམས་པ་བཀའ་བབས་ནས་གཞུང་བཤད་ཆེ་ཆུང་གཉིས་ཀྱང་མཛད་དོ། །འདི་ལ་སྲས་སྤྲུལ་སྐུ་འོད་འབར་སེངྒེ་བྱ་བ་བྱུང་། དེ་ནི་བློ་རྣོ་བ། ཤེས་རབ་ཕུན་སུམ་ཚོགས་བཞིག་སྟེ། ལོ་བཅུ་བཞི་པ་ལ་རྡོ་རྗེ་ཟམ་པ་གསུངས། དེས་བརྒྱུད་འཛིན་ཇོ་མགོན་ལ་གནང་། དེས་བྱ་མེད་ཚུལ་རིན་ལ་གནང་ངོ། །ཡང་འཛེང་གིས་ཡར་ཀླུངས་བཙན་ཐང་བ་ཉང་དྷརྨ་སིངྷ་ལ་རྡོ་རྗེ་ཟམ་པ་བཤད་པས་བྱིན་བརླབས་ཞུགས། རྟོགས་པ་ཐོད་རྒལ་དུ་སྐྱེས། དུར་ཁྲོད་དགོན་པར་
བཞུགས་ཏེ་འགྲོ་དོན་རྒྱ་ཆེན་པོ་མཛད། མཐར་དགུང་ལོ་དོན་བདུན་པ་ལ་གཤེགས། འདི་ནས་བརྒྱུད་པའི་གཞུང་བཤད་ཀྱང་ཡོད་དོ། །དེའི་སློབ་མ་བཛྲ་བཱ་ནི། དེའི་སློབ་མ་བླ་མ་ལྷའོ། །ཡང་འཛེང་གིས་སེར་ལུང་བ་ལ་བཤད། དེས་སློབ་དཔོན་རང་གྲོལ། དེས་སྲས་པོ་ཆོས་རིན་ལ་བཤད་དོ། །ཡང་འཛེང་གིས་དུ་རྡོ་རྗེ་རྒྱན་ལ་བཤད། དེས་དུ་སྟོན་དད་པ་བརྩོན་འགྲུས། དེའི་སློབ་མ་ཞིག་གིས་བྱས་པའི་གཞུང་བཤད་ཀྱང་ཡོད། ཡང་འཛེང་གིས་གཟིགས་ཡེ་ཤེས་དབང་པོ། དེས་མཁན་པོ་ལ་ཁབ། དེས་སློབ་དཔོན་མགོན་སྐྱབ། དེས་སློབ་དཔོན་གོ་རིབ། དེས་སོ་སྟོན་ལ་བཤད་དེ་སོ་སྟོན་གྱི་གཞུང་བཤད་ཀྱང་སྣང་ངོ། །ཡང་འཛེང་གིས་སྤུང་རིང་པ་གཡག་སྟོན་ཟླ་བ་འོད་ཟེར། དེས་ཀློག་སྟོན་དགེ་འདུན་སྐྱབས། འདི་ནས་བརྒྱུད་པའི་གཞུང་བཤད་ཀྱང་ཡོད། ཡང་སྤུང་རིང་གཡག་སྟོན་གྱིས་ལོ་བརྒྱ་ལ་ཉེ་བ་ཐུབ། དེས་འོན་ནག་སྟོད་པ་གླ་རུ་བན་དེ་ལ་བཤད་ནས་ཀྱང་དར། ཡང་འཛེང་གིས་སྐྱེ་ཚེ་ཡེ་ཤེས་དབང་ཕྱུག་ལ་བཤད། དེས་གཟིགས་ཡེ་ཤེས་དབང་པོ། །དེས་མཁན་ཆེན་དུར་བ། དེས་དུ་སྙོན་བཛྲེ་ཤྭ་ར། དེས་མཁན་ཆེན་བསོད་ནམས་རྒྱལ་མཚན། དེས་མཁན་ཆེན་ཤེས་རབ་རྒྱལ་མཚན། དེས་མཁན་ཆེན་གཞོན་ནུ་ཤེས་རབ་འོད་དང་སློབ་དཔོན་གཞོན་ནུ་གྲགས་པ། དེས་མཁན་ཆེན་སངས་རྒྱས་བཟང་པོ། དེས་བླ་མ་བརྩོན་འགྲུས་དབང་ཕྱུག། དེས་མཐའ་བཞི་གྲགས་པ་རིན་ཆེན། དེས་སློབ་དཔོན་ཤཱཀྱ་རྒྱལ་པོ། འདི་སྐུ་གཞོན་ནུའི་ཚེ་ཁྲབ་ལ་ཁར་རབ་ཏུ་བྱུང་། ལོ་དུས་ལ་བསྙེན་པར་རྫོགས། མཛོད་དང་འདུལ་བ་ལ་བྱང་བས་སྐྱོར་ལུང་དུ་གྲ་སྐོར་མཛད། ཐུགས་དམ་འཕེལ་བར་བཞུགས་པ་ལ། སྐུན་ཧ་ཅང་མཐོ་བས་སྤྱན་མི་གསལ་ཡང་གཞན་གྱིས་སྤྱན་ཚབ་བྱས་ཏེ་རྗེས་སུ་བརྗོད་ནས་གསུང་བ་སོགས་ཐུགས་བསྐྱེད་ཤིན་ཏུ་ཆེ། དགུང་ལོ་བརྒྱར་ཉེ་བར་བཞུགས་ནས་གཤེགས་པའི་རྗེས་ཐུགས་ལས་རིང་བསྲེལ་ཟད་པ་མེད་པར་བྱོན་པ་བྱུང་། འདིས་འགོས་ལོ་གཞོན་ནུ་དཔལ་ལ་གསུངས་པ་
ཡིན་ནོ། །རྡོ་རྗེ་ཟམ་པའི་ལོ་རྒྱུས་བཤད་ཟིན་ཏོ།། །།ད་ནི་མན་ངག་སྡེའི་ཤིང་རྟ་ཆེན་པོ་སློབ་དཔོན་བི་མ་ལ་ལས་བརྒྱུད་པའི་སྙིང་ཏིག་གི་ལོ་རྒྱུས་བཤད་པར་བྱ་སྟེ། དེ་ལ་གདགས་གཞིའི་མིང་ལ་བརྟེན་ནས་ཡང་ཏི་དང་། སྤྱི་ཏི་ལ་སོགས་པ་འགོག་མོད། གནད་ལས་གནད་དུ་བསྡུས་པ་མིང་དུ་མི་འགྲུབ་ན། འདུལ་བའི་འདུལ་བ་དང་། འདུལ་བའི་མངོན་པ་དང་། འདུལ་བའི་མདོ་སྡེ་ལ་སོགས་པ་དང་། དེ་བཞིན་དུ་ཆོས་སྐད་གཞན་སྟོང་པ་དང་། སྟོང་པ་ཆེན་པོ་དང་། ཤིན་ཏུ་སྟོང་པ་དང་། རབ་ཏུ་སྟོང་པ་ལ་སོགས་པའང་ཉམ་ཉེས་པར་བྱས་སོ། །འདི་ནི་རྣམ་པའི་ཚིག་ཁོ་ན་ལ་རྟོག་ཅིང་དོན་ལ་རྟོན་པ་མི་བསམ་པ་སྟེ། སྟོང་པ་སྟོང་དུ་འགྲོར་མེད་པས། སྟོང་པ་ཉིད་སྟོང་པ་ཉིད་ཅེས་བྱ་བ་མི་འཐད་དོ་ཟེར་བ་ལྟ་བུའོ། །དེ་བཞིན་དུ་གདུང་ཆེན་ལྔར་དང་པོའི་སངས་རྒྱས་ཀྱི་རྣམ་པར་གཞག་ཅིང་། དངོས་སུའང་འགྲུབ་ན། ཤ་རི་རམ་གཅིག་པོའི་སྐད་དོད་ལ་ཕུ་གཏུགས་པ་མ་ཡིན་ཏེ། སཾ་སྐྲྀ་ཏའི་སྐད་ཁོ་ནས་བཤད་པ་ནི། དྲང་དོན་དང་། དུས་ཀྱི་འཁོར་ལོ་ལྟར་སྐད་ཆེན་པོ་བཅོ་བརྒྱད་ཀྱིས་བཤད་པ་ལ་ངེས་དོན་ཡིན་པ་མཁས་པ་རྣམས་ལ་གྲགས་པའི་ཕྱིར་རོ། །དེ་བས་ན་སྔ་འགྱུར་གྱི་རྒྱུད་རྣམས་ལ་ནི། མཁའ་འགྲོ་དང་མི་མ་ཡིན་གྱི་བརྡ་སྐད་ལ་སོགས་པའི་རྣམ་གྲངས་བསམ་གྱིས་མི་ཁྱབ་བོ། །འདིར་ཐིག་ལ་ཏིག་ཏུ་བྱས་པ་འདི་་ཇི་སྐད་དུ། ཏིག་ནི་ཤེས་རབ་མིང་དུ་སྨྲ། ཞེས་བརྡ་རྙིང་དུ་མི་འགལ་ལ། ལར་དབང་པོ་རབ་ཀྱིས་རྒྱུད་ལ་སོགས་པའི་མཚན་སྨོས་པ་ཁོ་ནས་དོན་ཤེས་པའི་དགོས་པ་འཇོག་པའི་ཕྱིར་འདི་དག་ལ་འཐད་པ་མ་གྲུབ་ན། ལི་ཤིའི་གུར་ཁང་ནང་དུ་འགལ་འགྲེལ་གྱི་མིག་མངས་རིས་ལ་བརྩེ་བར་བྱའོ། །དེ་ལ་ཉང་ཏིང་འཛིན་བཟང་པོ་དེ་ཕུང་པོ་ལྷག་མེད་དུ་དེངས་ནས་ལོ་བརྒྱད་ལོན་ཞིང་ཉང་མི་དར་མ་དང་དུས་མཚུངས་པ། དབུ་རུ་གཞོའི་ལྡང་མ་དགེ་མཆོག་གི་བུ་གནས་བརྟན་ལྡང་མ་པ་ལྷུན་གྲུབ་རྒྱལ་མཚན་ཞེས་བྱ་བ། ངོ་བོའི་མ་ལའི་སྤྲུལ་པར་གྲགས་ཀྱང་རྣམ་པར་ཤེས་པ་ལྐོག་ཏུ་གྱུར་བ་རྣམས་ལ་
གནས་བརྟན་དཀྱུས་མའི་ངང་ཚུལ་དུ་སྣང་བ་ཞིག་ལ་རྡོ་རྗེ་ལེགས་པས་ལུང་བསྟན་ནས་སྔར་སྦས་པའི་གཏེར་རྣམས་ཕྱུང་། སྦས་བློ་གྲོས་ལས་ཚིག་བརྒྱུད་ཀྱང་མཉན་ནས་ཆོས་ཉིད་ཡིད་སྤྱོད་དུ་མ་ལུས་པར་ཉམས་སུ་བླངས། མན་ངག་རྙེད་ནས་བཅོ་ལྔ་པ་ལ་བཤད་བརྒྱུད་གཞག་པའི་སྣོད་འཆོལ་དུ་བྱོན་པ་ན། ཉང་སྟོད་ནས་ལྕེ་བཙུན་སེང་གེ་དབང་ཕྱུག་ཅེས་བྱ་བ་རྙེད། དེ་ལ་གདམས་པ་རིམ་པ་བདུན་དུ་བཏབ། དེ་དང་ཉེ་བར་ཁ་རག་སྒོམ་ཆུང་ལའང་བཏབ་པས་ཁོང་ཡང་དེས་གྲོལ། ལྕེ་བཙུན་ལ་དཔེ་རྣམས་དག་པར་བྲིས་ལ་ཁྲའི་ཟླ་བ་ལ་སྐྱོལ་ཅིག་གསུངས། ཕྱི་ཞིག་ལྕེ་བཙུན་གྱིས་འབུལ་བ་ཤིན་ཏུ་མང་པོ་དང་བཅས་བྱོན་པས་སྙེ་ཐང་དུ་མལ་གྲོའི་ཉང་བཀའ་གདམས་པ་བྱ་བ་དང་ཕྲད། དེས་ལྡང་མ་གཤེགས་པའི་གཏམ་བཤད་པས། འབུལ་བ་རྣམས་གནས་གཞི་ཞིག་འདུག་པའི་དགེ་འདུན་རྣམས་ལ་ཕུལ། ཉང་བཀའ་གདམས་པ་ན་རེ། ལྡང་མ་དེ་གནས་བརྟན་ཡིན་པ་ཙམ་ལས་གང་ཟག་བཟང་པོར་སྔར་སུས་ཀྱང་མ་རིག། སྐུ་གཤེགས་པའི་དུས་ནམ་མཁའ་འཇས་ཁེངས། སྐུ་གདུང་དང་རིང་བསྲེལ་དཔག་ཏུ་མེད་པ་བྱོན་པས་ཐམས་ཅད་ངོ་མཚར་ཞིང་འགྱོད་པ་སྐྱེས་གདའ། ཁྱེད་ཀྱང་འབུལ་བ་འདི་ཙམ་ཁྱེར་ལུགས་ཀྱིས་གདམས་ངག་ཁྱད་པར་ཅན་ཡོད་མཆི་བས་བདག་ལ་སྩོལ་ཅིག་ཞུས་པས་གདམས་པ་བྱིན། དེས་གཞོའི་ཏི་སྒྲོ་བྲག་ལ་ལོ་གཉིས་བསྒོམས་ནས་ཕུང་པོ་ལྷག་མེད་དུ་སོང་བ་ཡིན་ནོ།། །།དེ་ལ་ལྕེ་བཙུན་ཆེན་པོ་ནི། ཡུལ་ཉང་རོ་གཉན་ཚོའི་ལྕེ་ཐུབ་པའི་དབང་པོ་ཞེས་བྱ་བའི་བུ་གཞོན་ནུ་ནས་ཆོས་མང་པོ་ལ་ཐོས་པའི་ཕ་རོལ་ཏུ་སོན་པ་ཞིག་ཡིན། གནས་བརྟན་ལྡང་མ་བ་དང་རི་གཟར་རྒོད་པོ་ལུང་དུ་མཇལ། ཁ་རག་ཏུ་གདམས་པ་གསུང་བའི་དུས་བཏབ་སྟེ་རྫོགས་པར་ཐོབ། སློབ་དཔོན་གཤེགས་ནས་གཏེར་དཔེ་རྙིང་པ་རྣམས་ལང་གྲོ་འཆད་པ་སྟག་འདྲའི་ཆུ་མིག་གི་རྩ་དང་། འུ་ཡུག་དང་། ཇལ་གྱི་ཕུ་སྟེ་གཏེར་ཁ་གསུམ་དུ་སྦས། འུ་ཡུག་ནས་ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་སྒོམ་པའི་ཚེ། རྨི་ལམ་ན་ཨ་ཙ་ར་ཅིག་བྱུང་
ནས། །བདག་ནི་བི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་འདོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདེབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལའུ་ཡུག་ཕྱི་གོང་དུ། སུས་ཀྱང་མཐོང་བ་མེད་པར་ལ་བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་གསུང་པ་ཐོས་ནས་མཆིམས་ཕུར་བྱོན། བུད་མེད་དུང་སོ་འཁོར་མ་གཡུའི་སྨིན་མ་ཅན་ཞིག་གིས་དཔེ་རྣམས་བྱིན། སླར་འུ་ཡུག་ཕྱི་གོང་རྫའི་ར་བར་བཞུགས་པས་བི་མ་ལ་དངོས་སུ་བྱོན། ཟླ་བ་ཕྱེད་དུ་དབང་ཁྲིད་གདམས་པ་རྫོགས་པར་གནང་ནས་སློབ་དཔོན་བི་མ་ལ་རྒྱ་ནག་ཏུ་གཤེགས། དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་ཞང་སྟོན་པ་གདམས་ངག་རྫོགས་པར་བྱིན་ནས། ལོ་བརྒྱ་དང་ཉི་ཤུ་རྩ་ལྔ་ན་ནམ་མཁའ་ལ་འཇའ་འོད་ཀྱི་ཕུང་པོ་གཅིག་ཏུ་གཤེགས་སོ། །གཏེར་སྦས་པའི་ལོ་སུམ་ཅུ་ན་རོང་སྣར་མདའི་ལྕེ་སྒོམ་ནག་པོས་ཁ་ཤས་བཏོན་ནས་རང་ཉམས་ལོངས་ཤིང་། གཞན་ནང་པོ་ལའང་བཤད། དེ་བཞིན་དུ་ལང་གྲོ་འཆད་པ་སྟག་ནས་ཤངས་པ་རས་པ་ཞེས་བྱ་བས་ཀྱང་བཏོན་ནས་དར་རྒྱས་བྱུང་ཞེས་གྲགས།། །།དེ་ལ་ཞང་སྟོན་ནི། ཡུལ་ཡར་འབྲོག་དོ་ནང་དུ་འཁྲུངས། མཚན་བཀྲ་ཤིས་རྡོ་རྗེ་ཞེས་བྱ་སྟེ། ལོ་བཅུ་གཅིག་པར་བླ་མ་ལ་སྒོམ་ལ་གདམས་པ་མང་དུ་ཞུས། དེ་ནས་ཉི་ཤུ་རྩ་གཅིག་གི་བར་མཁས་གྲུབ་ཀྱི་བླ་མ་མང་དུ་བསྟེན་ནས། སྡེ་སྣོད་གསུམ་དང་རྒྱུད་སྡེ་གསར་རྙིང་གི་ཕྱོགས་ཐམས་ཅད་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོང་ཁུ་ཡུལ་ན་ཡོད་པའི་ཚེ། ནམ་མཁའ་ལས་བླ་མ་དང་། ཐུགས་རྗེ་ཆེན་པོ། སྒྲོལ་མ་ལ་སོགས་པའི་ཞལ་མཐོང་ཞིང་ལུང་བསྟན་ཐོབ། རྡོ་རྗེ་ལེགས་པ་མི་དཀར་ཞྭ་དཀར་ཅན་དུ་བྱས་པས་དངོས་གྲུབ་བྱིན་གྱིས་འདོད་ཟེར་ནས་ཁྲིད། ཉང་སྨད་པ་ཚབ་ཏུ་ལྷ་གསོལ་བ་མང་པོས་བཟའ་བཏུང་བྱིན་པས་དངོས་གྲུབ་དེ་ལ་
ཟེར་རམ་སྙམ་ཙན། མི་དཀར་དེས་དངོས་གྲུབ་གཞན་དུ་ཡོད་ཀྱིས་འདེང་ཟེར་འོད་ཀྱིས་ལམ་སྣ་བྱས་ནས་བྱོན། ཁང་སྟོང་ཞིག་ཏུ་ཉས་པས་འདིར་མི་རུང་ཟེར། བྲག་ཕུག་ཅིག་ཏུ་བྱོན་ཙ་ན་ཁང་སྟོང་འགྱེལ། ཁོའི་སྦྲུལ་བས་བཟའ་བཏུང་ཡང་བྱིན། འོ་ཡུག་མདའ་ན་འཁྲུག་པ་ཆེན་པོ་ཡོད་པ་ཡང་རྡོ་རྗེ་ལེགས་པས་བསྒྲིབས་ནས་དམག་གིས་མ་མཐོང་། དེར་བྲག་སེང་གེ་འདྲ་བའི་རྩེར་སླེབ་ཙ་ན་ཁོ་སྟོར། ཕྱིར་ལོག་གོ་སྙམ་ནའང་མཐར། ཆ་མ་ཕྱེད་པའི་ངང་ལ་བལྟས་ཙ་ན་བྲག་ཕུག་ཁ་བྱང་བསྟན་གྱི་སྒོ་རྩས་འགགས་པ་མཐོང་། དེ་བྲུས་པས་དང་པོར་སྦྲུལ་དང་སྦལ་བ་ཤིག་ཤིག་སྣང་། དེ་ནས་ཁ་བྱང་རྙེད་དུས་མི་དཀར་དེས་སྒྲོན་མེ་བརྟེག་བྱུང་བས། དར་ཅིག་ན་གདོད་དང་སྐད་ཤིན་ཏུ་མི་བསྲུན་པ་ཞིག་བྱུང་། ཁོས་བརྡ་སྦྱར་བས། ངས་ཨ་ལྕེ་བོས་ཀྱི་ཟེར་བའི་མོད། ཨེ་ཀ་ཙ་ཊཱི་སྤྱན་གཅིག་ཁྲག་ཏུ་ཁོལ་བས། མཆེ་བ་གཙིགས་ཤིང་བལྟར་མི་བཟོད་པ་ཙམ་དུ་བྱུང་། ཁོས་འདི་ནི་ལུང་བསྟན་པ་དེ་འོ་བྱས་པས། ཚོགས་འཁོར་བརྒྱ་རྩ་བརྒྱད་ཐོང་། ལོ་གསུམ་དུ་སུ་ལའང་མ་བཤད་ཟེར། བྲག་ཕུག་གི་སྒོ་རྩ་ནས་གཡུ་གཉིས་རྙེད་པ་ལས་རྒྱུ་བྱས། ཚོགས་འཁོར་བརྒྱ་རྩ་བརྒྱད་བཏང་། ལོ་ཉི་ཤུ་རྩ་ལྔ་ལ་དབུས་སུ་བྱོན། མཆེམས་ཕུ་ནས་བི་མ་ལའི་ཆོས་གཏེར་ཡང་ཐོན། དངོས་དང་ཞལ་མཇལ་ནས་རྗེས་གནང་ཐོབ། སླར་ཤངས་རྟ་ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ། གསང་བ་སྙིང་ཏིག་གི་གདམས་པ་རྫོགས་པར་ཐོབ། སྐུ་ན་མཐོན་པོར་སོང་ནས་བརྒྱུད་འཛིན་གྱི་སླད་དུ་སྲས་ཉི་འབུམ་བསྐྲུན། ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་དབང་ཐོབ་པས་རེས་འགའ་རྒྱལ་བ་རིགས་ལྔར་གསལ། སྐུ་ལུས་ལ་གྲིབ་མ་གཏན་མི་མདའ། རྫོགས་པ་ཆེན་པོའི་ཆོས་གསུང་དུས་འཇའ་གུར་འཁྱིལ་བ་སོགས་ངོ་མཚར་གྱི་ལྟས་མང་པོ་ཡོང་། དགུང་ལོ་བདུན་ཅུ་དོན་གཅིག་པ་མེ་མོ་
ཕག་གི་ལོ་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་ནམ་མཁའ་ལས་སྒྲ་ཆེན་པོ་ལན་བདུན་བསྒྲགས་ཤིང་ས་ཆེན་པོ་འདི་ལན་གསུམ་གཡོས། འཇའ་དང་། འོད་དང་། སིལ་སྙན་གྱི་སྒྲ་དང་། དྲི་ཞིམ་གྱི་ངད་ལ་སོགས་པ་གདོད་མའི་ས་ལ་མངོན་པར་བྱང་ཆུབ་པའི་རྟགས་མ་ལུས་པ་བསྟན་ཏེ་གཤེགས་སོ། །དེའི་ཕྱི་ནུབ་བུར་སྦྱངས་པས་གདུང་ཆེན་ལྔ་དང་། རིང་བསྲེལ་ཁ་དོག་ལྔ་པ་སྐུ་ལྔའི་རྒྱལ་ཚབ་ཏུ་བཞག། མེ་ཏོག་གི་ཆར་དང་འཇའི་གུར་ལ་སོགས་པས་འགྲོ་བ་མང་པོ་དད་པའི་གནས་ལ་སྦྱར་ཞིང་རང་བཞིན་གྱི་བསམ་གཏན་ལ་གནས་པ་བྱུང་ངོ།། །།དེའི་སློབ་མ་སྲས་ཉི་འབུམ་སྟེ། ཡུམ་རྒྱལ་མོ་གཡང་དེའི་ལྷུམས་སུ་ཞུགས་པའི་དུས་ཉི་མ་མང་པོ་དུས་གཅིག་ལ་ཤར་བ་བྱུང་བས། ཡབ་ཀྱིས་སེམས་ཅན་གྱི་མ་རིག་པའི་མུན་པ་བསལ་བར་ལུང་བསྟན་ནས་ཉི་མ་འབུམ་དུ་བཏགས། ལོ་ལྔ་ནས་རིམ་པར་ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་ཉམས་འོག་ཏུ་ཆུད་པར་མཛད། དགུང་ལོ་བཅུ་པ་ལ་ཆེ་སར་བཏོན་དུས་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེ་བ་བྱུང་། ལོ་ཉི་ཤུའི་བར་དུ་སྒྲུབ་པ་ཁོ་ན་ལ་ནན་ཏན་མཛད། དེ་ནས་རྗེས་ཐོབ་སྒྱུ་མ་ལྟ་བུའི་ཏིང་འཛིན་དང་འགྲོགས་ནས་རྡོག། །རྒྱལ་རྩེའི་སར་གསར་མའི་རྒྱུད་མན་ངག་དང་བཅས་པ་ལ་གསན་པ་མཛད། ཉི་ཤུ་རྩ་གཉིས་པ་ལ་ཇོ་མོ་རྒྱ་གར་དངོས་གྲུབ་ཀྱི་རྟེན་དུ་བཟུང་། ཉི་ཤུ་རྩ་བདུན་ལ་འཁོན་གྲགས་པ་རྒྱལ་མཚན་དང་། བླ་མ་སྟག་སོ་བ་བསྟེན་ནས་རྒྱུད་གསུམ་གདམས་ངག་དང་བཅས་པ་དང་། བདེ་མཆོག་མལ་གྱོ་ལུགས་མཁྱེན་པར་མཛད། ཁ་རག་གི་འབྲུག་སྟོན་གྲགས་པ་ལས་བདེ་མཆོག་དང་། རྗེ་བཙུན་མ་ར་ལུགས། ཡེ་ཤེས་མགོན་པོ་སོགས་ཞུས། ཞང་གཡུ་བྲག་པ་དང་གཞུང་གི་རྡོག་རྡོ་རྗེ་སེང་གེ་ལ་སོགས་
ཏེ་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་རྒྱུད་དུ་མ་ལ་ཐོས་བསམ་ཕྱོགས་མེད་མཛད། ཚིག་དོན་ཆེན་མོ་ཞེས་བྱ་བའི་བསྟན་བཅོས་ཀྱང་མཛད་དེ་དགུང་ལོ་ལྔ་བཅུ་རྩ་དྲུག་ལ་གཤེགས། ཕུར་སྦྱངས་པས་གདུང་རིགས་ལྔ་བྱོན། འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཁུག་ཆོས་མེ་ཏོག་སྐྱེས་པ་སོགས་བྱུང་ངོ། །འདི་སྒྲ་ཐལ་འགྱུར་ནས་ཕྱག་རྡོར་གྱི་སྤྲུལ་པ་བཛྲ་པ་ལར་ལུང་བསྟན་པ་ལ་ངོས་འཛིན་པར་གྲགས་སོ།། །།དེའི་སློབ་མ་གུ་རུ་ཇོ་འབེར་ནི་གཅུང་པོ་ཟླ་བ་འབུམ་གྱི་སྲས་ཡིན། ལོ་བདུན་མན་ཆད་ལྐུགས་པ་འདྲ་བར་ཡོད་པ་ལ། བརྒྱད་ནས་ཤེས་རབ་མེ་ལྟར་འབར། བཅོ་བརྒྱད་ཀྱི་བར་དུ་ཁུ་བོ་ཉི་འབུམ་དང་འགྲོགས། གསང་བ་བླ་མེད་ཀྱི་དབང་ཁྲིད་གདམས་པ་དང་བཅས་རྫོགས་པར་མཛད་ཅིང་རྒྱུད་ཀྱི་བཤད་པ་ལ་ཐོས་པས་སྒྲོ་འདོགས་གཅོད་པ་དང་། མན་ངག་གི་དོན་ལ་སྒོམ་པས་ཉམས་སུ་བླང་པ་ལ་བརྩོན། བཅུ་དགུ་ནས་ཉི་ཤུའི་བར་ས་སྐྱ་ལོ་ཙཱ་བ་ལས་རྒྱུད་གསུམ་མན་ངག་དང་བཅས་པ་དང་། བདེ་མཆོག་མལ་གྱོ་ལུགས་ཉན། དབུ་ཚད་ལ་སོགས་པའི་རིག་པའང་ཁོང་དུ་ཆུད་པར་བྱས། དེ་བཞིན་དུ་ཁྲོ་ཕུ་ལོ་ཙཱ་བ་ལས་མི་ཏྲ་ཛོ་ཀིའི་གདམས་པ་དང་། ཆུ་མིག་ང་ལས་ཚད་མ་བསྡུས་པ། བལ་པོ་གྲགས་འབུམ་ལས་་དོ་ཧ་དང་ཕྱག་ཆེན་ཁ་འཐོར་སོགས་མཁས་གྲུབ་དུ་མ་ལས་སྡེ་སྣོད་དང་རྒྱུད་ལུང་མང་པོ་ལོ་སུམ་ཅུ་རྩ་དྲུག་ཚུན་མཉན་པས་རིག་པ་རྣོ་ཞིང་ཐོས་པ་ཤིན་ཏུ་མང་བར་གྲགས། སྒྲུབ་པ་མཛད་རེས་ཡི་དམ་གྱི་ལྷ་ཞལ་མཐོང་བ་ཡིན་ཏེ་ཐུགས་སྒམ་པས་མི་གསུང་། ལྷ་སར་ཇོ་བོ་ལ་མཆོད་པ་ཕུལ་དུས་འོད་ཀྱི་ཐིག་ལེའི་ཁོང་ནས་འཕགས་པ་ལག་ན་པདྨ་དང་། རྡོ་རྗེ་འཛིན་པ་ཞལ་གཟིགས། ཐོ་རེངས་ཤིག་ཚེ་དཔག་མེད་ཀྱི་ཞལ་མཐོང་བས། ངེད་ཅག་ལ་ཚེ་རིང་བརྒྱུད་མེད་ཀྱང་ཁོ་བོ་ལེགས་པར་བྱུང་བ་དེའི་བྱིན་རླབས་ཡིན་གསུངས། དེ་ལྟར་ཚད་མེད་པའི་མཁྱེན་རབ་དང་ཐུགས་རྗེའི་མངའ་བདག་གིས་
འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་ཅུ་པ་ལ་གཤེགས། ཞག་བདུན་དུ་འཛའི་དྲ་བས་འབྲེལ། སྐུ་གདུང་ལ་ཨོཾ་ཨཱཧཱུྃ་དང་རིང་བསྲེལ་མང་པོ་བྱོན་ཏོ།། །།དེའི་སློབ་མ་འཁྲུལ་ཞིག་སེང་གེ་རྒྱབ་པ་ཡིན་ཏེ། གཡོ་རུ་གྲའི་བུ་སོང་གད་ཕྲེང་གི་གྲོང་དུ་ཉི་མ་རྩེ་ཤར་ལ་འཇའི་གུར་པུ་བ་ཅིང་འཁྲུངས། ལོ་དགུ་ནས་རིགས་སད་དེ་དག་སྣང་དང་མོས་གུས་དཔག་མེད་ཤར། བཅུ་པའི་ཚེ་སྣང་བ་འདི་རྨི་ལམ་ལྟ་བུ་སྒྱུ་མ་ལྟ་བུ་ལ་སྲ་ཞིང་འཐས་འཐས་འདྲ་བ་མི་བདེན་སྙམ་པ་དང་། བཅུ་གཉིས་པ་འཁོར་བ་ལ་སྐྱོ་བ་ཚད་མེད་པ་སྐྱེས་ནས་ཆོས་འབའ་ཞིག་ལས་གཞན་གང་གིས་ཀྱང་མི་ཕན་པར་ངེས་ཤེས་རྙེད། བཅུ་གསུམ་གྱི་ཐོ་རངས་ཉི་ཟླ་དུས་གཅིག་ལ་ཤར་བའི་རྨི་ལམ་སད་དུས། འཕགས་པ་ཐུགས་རྗེ་ཆེན་པོའི་ཞལ་མཐོང་། ཚེ་གཅིག་གིས་གྲོལ་བ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་རྗེ་ཕྱོགས་མེད་དུ་རྒྱས། འགྲོ་བ་ཀུན་ལ་བུ་གཅིག་པའི་འདུ་ཤེས་ཤར། རྐྱེན་རིལ་བརྟེན་ནས་གཞན་ལ་མཐོ་འགྲོགས་དང་ཁྱད་གསོད་མི་བྱེད་པའི་དམ་བཅའ་བྱས། ལུས་ཀྱི་སྲིན་བུ་དག་སྙིང་རྗེ་ཆེན་པོས་མི་འདོར་ཞིང་། ལོང་སྤྲང་དང་དམན་པ་ཁོ་ན་ལ་བྱམས་པ་སོགས་ཐེག་པ་ཆེན་པོའི་རིགས་སད་པའི་རྟགས་ཁྱད་པར་ཅན་མངའ། བཅོ་བརྒྱད་ལ་སྣང་བ་བདེན་མེད་དུ་རྟོགས་པ་ལ་སྨྱོན་པ་ཁྲོག་ལངས་པ་ལྟ་བུར་སོང་སྟེ། ཕ་མས་ལྷ་གསོལ་བའི་ཡོ་བྱད་གསར་བ་གཏོར་ཞིང་། པོ་གདོན་རྒྱལ་པོ་མཆོད། མོ་གདོན་བསེན་མོ་མཆོད། ཅེས་བྱས་པས། ཁྱོད་འདྲ་བའི་བུ་སྐྱེ་བ་ཟེར་འཐབས། ཉི་ཤུ་ལ་མཁན་པོ་ལྡེའུ་སྒང་པ་དང་། སློབ་དཔོན་བཀྲས་སྒང་པ་ལས་རབ་ཏུ་བྱུང་། ཉི་ཤུ་རྩ་ལྔ་ལོན་ཚེ་སྲི་ཞལ་གྱི་སེང་གེ་རྒྱབ་ཏུ་བྱོན། སེང་གེ་རྒྱབ་པ་བ་ལས་ཚལ་བའི་ཆོས་སྐོར། བུ་མ་ཙཱ་རིབ་ལས་སེང་གེ་མཛིང་
བསྣོལ། རས་པ་དྲི་མེད་འོད། ལྷ་རི་དཔལ། གཞོན་ནུ་འབུམ། སྟོན་ཆར། བྱང་ཡོན། ཇོ་སྲས་སུ་གྲགས་པ་རྣམས་ལས། གསང་སྔགས་གསར་རྙིང་། ཞི་བྱེད། གཅོད་ཡུལ། ཕྱག་ཆེན་མང་དུ་ཉན། ཁྱད་པར་ཐུགས་རྗེ་ཆེན་པོའི་ལུང་བསྟན་བཞིན་གུ་རུ་ཇོ་འབེར་ལས་རྫོགས་པ་ཆེན་པོ་ཐོས་པས་རྟོགས་པ་ཐོད་རྒལ་དུ་སྐྱེས། ཁྲོ་བོ་མ་ལ་སོགས་པའི་རི་ཁྲོད་དང་ལུང་སྟོངས་རྣམས་སུ་མང་པོའི་བར་དུ་སྒྲུབ་པ་ཁོ་ན་ལ་གཞོལ་བས་དགོངས་པ་ཀ་དག་གི་སར་གཤེགས། སྐལ་ལྡན་མང་པོ་སྨིན་གྲོལ་ལ་བཀོད་ནས། དྲུག་ཅུ་རྩ་བཞི་བ་ལ་ཐེག་པ་མཆོག་གི་འབྲས་བུ་ཐོབ་པའི་རྟགས་ཁྱད་པར་བ་རྣམས་མངོན་དུ་བསྟན་ནས་གཤེགས་སོ།། །།དེའི་སློབ་མ་གྲུབ་ཆེན་མེ་ལོང་རྡོ་རྗེ་ནི། སྒྲགས་ཀྱི་ཕུར་རྣལ་འབྱོར་བ་བསམ་ཡེས་ཀྱི་སྲས་སུ་བཙས། ལོ་དགུ་ན་གྲུབ་ཐོབ་ཟ་ལུང་བ་དང་། མཁན་པོ་སེ་ཕུང་བ་ལས་རབ་ཏུ་བྱུང་། དེ་དུས་གཤིན་པོའི་དགེ་རྩར་ཡུམ་རྒྱས་འབྲིང་བསྡུས་གསུམ་ཁོ་ན་སྒྲོགས་པས་ལོ་བཅུ་དྲུག་པའི་དུས་སྒྲགས་ཀྱི་ཕུའི་ཞོགས་སྟེང་བྱ་བར་བརྒྱད་སྟོང་པ་རྒྱ་རྩ་མཛད་པས་གནས་ལུགས་ཀྱི་དོན་རྟོགས། ཟངས་ཚོར་བསྒོམས་པས་ཉམས་འབར་ཞིང་མངོན་ཤེས་ཕྲ་མོའང་ཤར། དེ་ནས་ཕྱོགས་མེད་དུ་འགྲིམས་ཏེ། མཚུར་ཕུའི་དོ་པོ་རས་བ་སོགས་བླ་མ་མང་པོ་བསྟེན། ཤ་འུག་སྟག་སྒོ་དང་། མཁར་ཆུ་ལ་སོགས་པའི་གནས་ཆེན་མང་པོར་བྱོན། ནས་བྲེ་གང་གིས་ཟླ་བ་གཅིག་དང་ཞག་ཉི་ཤུའི་འཚོ་བ་བྱས་པ་སོགས་དཀའ་ཐུབ་ལ་ཤིན་ཏུ་བཟོད་པ་ཞིག་ཡིན། དཀའ་བ་སྤྱད་པའང་བསམ་གྱིས་མི་ཁྱབ། ལོ་བཅོ་བརྒྱད་པའི་ཚེ་སེང་གེ་རྒྱ་བ་སངས་རྒྱས་དཔོན་པོ་མཇལ་ནས་མན་ངག་སྙིང་ཏིག་ཐོབ། ད་མན་ངག་གིས་འཚེངས་བསམ་པའི་སྤོབས་པ་སྐྱེས་ཏེ་བསྒོམས་པས་སྔོན་འགྲོའི་དུས་རང་ནས་ཞག་དྲུག་ཏུ་རྡོ་རྗེ་སེམས་དཔའི་ཞལ་ཉིན་མཚན་མེད་པར་མཐོང་། དངོས་གཞིའི་དུས་བརྒྱུད་པའི་བླ་མ་
རྣམས་རྨི་ལམ་དུ་མཇལ་ནས་བྱིན་གྱིས་བརླབས། ཉི་ཤུ་རྩ་གསུམ་པར་སངས་རྒྱས་རས་པ་ལས་རྡོ་རྗེ་ཕག་མོ་ལ་སོགས་པའི་གཏེར་ཆོས་དུ་མ་གསན་ནས་བསྒྲུབས་པས། རྡོ་རྗེ་ཕག་མོ་མངོན་སུམ་དུ་མཇལ། བྲག་ལ་གསང་རྡོར་བསྣུན་པས་ཐིམ་གྱིས་སོང་། ། རྟ་མགྲིན། སྒྲོལ་མ། སྤྱན་རས་གཟིགས། སློབ་དཔོན་ཆེན་པོ། ཀུན་ཏུ་བཟང་པོ། རྡོ་རྗེ་སེམས་དཔའ། བི་མ་ལ། ཟ་ལུང་པ། སངས་རྒྱས་རས་པ། འགྲོ་མགོན་ཕག་གྲུ་རྣམས་ཞལ་གཟིགས། དུང་ལུང་དུ་མཁའ་འགྲོའི་སྒྲ་ཤིན་ཏུ་སྙན་པས་སྐྱེ་རྒྱུན་ཆོད་པའི་ལུང་བསྟན། ཀ་བ་ཅན་དུ་ཕག་མོ་དམར་མོ་དང་། གྲུབ་ཐོབ་ཟ་ལུང་པ་ནམ་མཁའི་ཀློང་དུ་མཇལ། ངར་ཆུང་ན་བཞུགས་པའི་ཚེ་རྨི་ལམ་ན་ཕག་མོ་གཙོ་འཁོར་ལྔ་མཐོང་དེར་མནལ་སད་ཙ་ན། འོད་ཀྱི་ཕག་མོ་དངོས་སུ་གཟིགས། སྐྱབས་གནས་རྫོང་དུ་རྡོ་རྗེ་སེམས་དཔས་རྨི་ལམ་དུ་རྫོགས་པ་ཆེན་པོའི་དབང་བསྐུར། སྤྱིར་བླ་མ་མང་པོ་བསྟེན་ཅིང་ཁྱད་འཕགས་ཀྱི་བླ་མ་བཅུ་གསུམ་བཞུགས། བཀའ་དྲིན་འགྲན་ཟླ་བྲལ་བ་གྲུབ་ཐོབ་ཟ་ལུང་པ། མཚུར་ཕུའི་དོ་བོ་རས་པ། འཁྲུལ་ཞིག་སེང་གེ་རྒྱབ་པ་ལས་སྙིང་པོའི་དོན་རྙེད་པ་ཡིན། འདི་བཏུལ་ཞུགས་ཤིན་ཏུ་ཆེ་བས་ཞིག་པོའི་སྤྱོད་པ་བླང་དོར་མེད་པས་གསང་བ་སྔགས་ཀྱི་དམ་ཚིག་ལ་སྒྲ་ཇི་བཞིན་པར་སྤྱོད་ནུས། རྒོད་དྲུག་ནམ་མཁའ་ལ་ལྡིང་བ་མཐོང་བས་རིག་པ་བརྟུལ་ཞུགས་ཀྱི་ངར་ཐོགས་ནས་ནམ་མཁའི་ལམ་ལ་འགྲོ་བ་དང་། བྲག་ལ་འདམ་ལྟར་བྱེད་པ་བྱུང་། མཁན་པ་ལྗོངས་དང་། མཁན་པ་གླིང་དང་། སེང་གེ་རྫོང་དང་། མཁར་ཆུ་རྣམས་སུ་སྒྲུབ་པའི་རྒྱལ་མཚན་བཙུགས་ཤིང་འགྲོ་དོན་མཛད། ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགའ་ཞེས་པའི་སྐལ་ལྡན་ཞིག་གིས་གསོལ་བ་ཐེབས་པས། དགུང་ལོ་དྲུག་ཅུ་རྩ་གཅིག་པ་ལ་ཞུ་བཟོད་ལ་ཁར་
གཤེགས་པའི་ཚེ་འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་བ་ཀུན་གྱིས་མཐོང་། པུར་གྱི་རྣམ་པ་སྤྱོད་དུས། ནམ་མཁའི་ལམ་ནས་པུར་ཁང་ལ་འོད་ལྔའི་སྣམ་བུ་བརྐྱངས་པ་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཞིང་། སྐུ་ལྔ་ཐོབ་པའི་རྟགས་ཀྱི་གདུང་ཡང་རྒྱུད་ལས་ཇི་སྐད་བཤད་པ་བཞིན་བྱོན་ཏོ། །འདི་གྲུབ་ཐོབ་ཨུ་རྒྱན་པ་དང་དུས་མཚུངས། ཨུ་རྒྱན་པ་བཅུ་ཕྲག་ལྷག་བཅས་ཀྱིས་བགྲེས་ལ་སྐུ་ཚེ་ཡང་རིང་ངོ།། །།མེ་ལོང་པའི་སློབ་མ་ནི་རིག་འཛིན་ཀུ་མ་རཱ་ཛ་སྟེ། གཡོ་རུ་འོན་པར་གསར་རྫིང་ཁ་ཞེས་བྱ་བའི་གྲོང་རྡལ་དུ་འཁྲུངས། ཐར་པ་རྒྱན་དུ་བཏགས། ཆུང་ངུ་ནས་དད་པ་དང་སྙིང་རྗེ་དང་ཤེས་རབ་ལ་སོགས་ཏེ་འཕགས་པའི་ནོར་གྱི་ཁྱད་ཆོས་མང་པོ་མངའ་བས་ཀློག་ཡིག་མ་བསླབས་པར་མཁྱེན། ལོ་བདུན་པ་ལ་ཀོང་པོ་འོར་ཤོད་མཐོ་སྟེངས་དགོན་པའི་བླ་མ་དགྱེས་རྡོར་པ་ལས། ཀྱེ་རྡོ་རྗེ་དང་། བདེ་མཆོག་གི་དབང་ཞུས། ལོ་དགུ་པའི་ཚེ་མཁན་པོ་གཙང་བ་ལས་ཡོངས་རྫོགས་ཀྱི་དགེ་བསྙེན་བླངས། སྤྱན་རས་གཟིགས་འཁོར་བ་དོང་སྤྲུགས་ཀྱི་ཆོས་སྐོར་ལ་སྦྱངས། བཅུ་གཉིས་པ་ལ་ཕག་མོ་གྲུའི་མཁན་པོ་ཡེར་བ་པ་དང་སློབ་དཔོན་མངའ་རིས་པ་ལས་རབ་ཏུ་བྱུང་། མཚན་གཞོན་ནུ་རྒྱལ་པོར་བཏགས། འདུལ་བ་བསླབས། རིན་པོ་ཆེ་གྲགས་ཡེ་བ་ལས་ལོ་ལྔའི་བར་དུ་ནཱ་རོ་ཆོས་དྲུག་ལ་སོགས་པ་དང་། མཚར་སྟེངས་པ་ལས་བརྟག་གཉིས་ཉན། དཔོན་སངས་ཤེ་ལས་བཟོ་རིག་པ་བསླབས། ཡི་གེ་དྲུག་པ་བཟླས་པས་ཤེལ་གྱི་ཁང་བུ་ཞིག་ན་ཐུགས་རྗེ་ཆེན་པོ་ཞལ་འཛུམ་པ་མཐོང་། ཁྱུང་ནག་ཤག་དར་ལས་རྙིང་མའི་རྒྱུད་ལུང་མན་ངག་མང་དུ་ཞུས། དང་ཕུག་ཏུ་མེ་ལོང་རྡོ་རྗེ་དང་མཇལ། ཕྱག་རྒྱ་ཆེན་པོའི་ཁྲིད་ཞུས་པས་སེམས་ཅེར་མཐོང་དུ་ངོ་འཕྲོད། དེ་ནས་གྲུབ་ཆེན་པ་མོན་གྱི་མཁའ་འགྲོ་གླིང་ལ་གཤེགས་པའི་ཕྱགས་ཕྱི་ལ་བྱོན། རྡོ་རྗེ་ཕག་མོའི་ཆོས་སྐོར་སོགས་
ཞུས་ནས་བསྙེན་པ་མཛད་པས། ཚེས་བཅུའི་ནུབ་ཅིག་ཨོ་རྒྱན་པདྨ་དང་མཇལ། ཨེ་མ་རིགས་ཀྱི་བུ། རྟག་ཏུ་ཆོས་ཀྱིས་ཤིག་གསུངས། དེ་ནས་མཚུར་ཕུར་བྱོན་ནས་གཉན་རས་དང་དར་མ་མགོན་པོ་ལས་ཀརྨ་པའི་ཆོས་སྐོར་རྣམས་ཞུས། དེ་ནས་ལ་སྟོད་དིང་རི་དང་། སྤུད་ཏྲར་བྱོན་པས། གྲུབ་ཆེན་ཨོ་རྒྱན་དང་། རྗེ་ཀརྨ་པ་རང་བྱུང་རྡོ་རྗེ་དགུང་ལོ་བདུན་པ་རབ་ཏུ་བྱུང་མ་ཐག་པ་དང་མཇལ། ཨོ་རྒྱན་པ་ལས་གདམས་པ་མང་དུ་ནོད། དེ་ནས་ལོ་འགའ་ན་ཨོ་རྒྱན་པས་གཉན་རས་ལས་སྙིང་ཏིག་ཞུས་པའི་ཟླ་བ་ཚང་བར་ཐོབ། རྒྱ་སྨན་པ་ནམ་མཁའ་རྡོ་རྗེ་ལས་གསང་སྐོར་གནད་ཀྱི་ངོ་སྤྲོད་དང་། སྐལ་ལྡན་པ་ཆོས་ཀྱི་སེང་གེ་ལས་གསང་བ་གནད་ཀྱི་མེ་ལོང་སོགས་རྫོགས་ཆེན་གསང་བའི་སྐོར་ཞུས། སླར་མཁར་ཆུར་གྲུབ་ཆེན་མེ་ལོང་རྡོ་རྗེར་གསང་བ་སྙིང་ཏིག་དབང་ཁྲིད་གདམས་པ་དང་བཅས་པ་ལེགས་པར་ཐོབ། འབུལ་རྒྱུ་གཞན་མེད་པས་ལུས་ངག་གི་ཞབས་ཏོག་དང་། དབྱར་རིལ་པོ་གཉིས་སུ་རི་མོ་མཛད། ནས་ཁལ་བཞི་བཞི་གནང་བའི་གཉིས་གཉིས་ཀྱིས་ཤོག་བུ་ཉོས། མཚན་མོ་དཔེ་རྣམས་བྲིས། ཕྱེད་པོས་མར་མེ་དང་གསོལ་མཛད་པས། དཀའ་ཐུབ་ཀྱི་མཐུས་ཤིག་ནད་དྲག་པོ་ཅིག་བྱུང་། བྱིན་རླབས་དད་པའི་རྗེས་སུ་འདྲང་བས་ཐུགས་དམ་ཡང་ཁྱད་པར་ཅན་འཁྲུངས། བླ་མ་མཉེས་ནས་འགྲོ་དོན་གྱིས་ཤིག་པའི་རྗེས་སུ་གནང་བ་ཐོབ། དབང་གྲལ་དུ་བླ་མའི་དབུའི་བར་སྣང་ལ་མགོན་པོ་ཕྱག་བཞི་པ་དང་། སྒོའི་ཐད་ན་ཨེ་ཀ་ཛ་ཊཱི་མཐིང་མོ་ཞིང་དབྱུག་དང་སྦྱང་མོ་བསྣམས་པ་བོངས་གཉིས་ཐོག་ཙམ་པ། ཕྱི་ངོས་ན་ལས་ཀྱི་མ་མོ་ཁྲག་རལ་ཅན་ལག་པས་ཁྲག་བཅུས་ནས་འཐུང་བ་རྣམས་མཐོང་། ལོ་བརྒྱད་དུ་བླ་མ་འདུ་འབྲལ་མེད་པར་བསྟེན། ཨོ་རྒྱན་གྱི་སྒྲུབ་གནས་སྨྱུག་ཚལ་སྦུག་ཏུ་དགུན་ཐོག་ཅིག་བཞུགས་པས་རྡོ་རྗེ་ཕག་མོས་ཞལ་གཟིགས། དེ་ནས་ཤེས་
རབ་ཕྱོགས་མེད་དུ་རྒྱས། རེ་ཞིག་ཡར་ཀླུངས་མཚར་སྟེངས་ཀྱི་རི་ཁྲོད་བཏབ་ནས་བཞུགས། དེ་ནས་བླ་མ་འདའ་བར་མཁྱེན་ནས་མཁར་ཆུར་བྱོན་ཙ་ན། བླ་མའི་སྲས་གཉིས་ས་སྐྱགས་སུ་འཛོམ། སླར་ལོག་ཉི་ཤུ་ལྔའི་དུས་མཆོད་བཙུགས། ཙ་རིལ་བྱོན་པས་ཀྲིག་མོ་ལྷའི་ནེའུ་གསིང་གི་རྡོ་སྐུ་ལ་འཇའ་ཚོན་སྣ་ལྔ་ཟུག་པ་སོགས་བྱུང་། དེ་ནས་མཚུར་ཕུར་ཆོས་རྗེ་རང་བྱུང་རྡོ་རྗེས་གདན་དྲངས་ཏེ་སྙིང་ཏིག་གི་གདམས་པ་རྣམས་ཕུལ། ཤངས་སུ་བྱོན་ནས་ལྕེ་སྒོམ་ནག་པོའི་བརྒྱུད་པ་སློབ་དཔོན་སྒོམ་པ་ལ་གསང་སྐོར་སྙན་བརྒྱུད་རྣམས་དང་བསམ་གཏན་མིག་གི་སྒྲོན་མེ་ཞུས། དིང་རི་སྣ་དམར་དུ་དབོན་པོ་བྱང་སྒྲུབ་ལ་ཡང་དགོན་པའི་རི་ཆོས་རྣམས་ཉན། ཨོ་རྒྱན་པ་རང་བྱུང་དཔལ་དང་ཡང་མཇལ། མར་ལམ་བླ་མ་བཀྲ་ལུང་བ་ལས་གཤེད་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་མགོན་ལ་སོགས་པ་བཤེས་གཉེན་མང་དག་ལས་གསང་སྐོར་དང་། རྒོད་ཚང་པའི་ཁྲིད་ཀྱི་སྐོར། ཨ་རོའི་ཁྲིད་མོ་ཆེ་དོན་སྐོར་ལ་སོགས་པ་བོད་ན་གྲགས་པ་ཆེ་བའི་རྫོགས་རིམ་ཕལ་མོ་ཆེ་ཁོང་དུ་ཆུད། ཆོས་ཕྱིར་དཀའ་སྤྱད་བཟོད་པས་ཙཱ་རི་གསར་མ་བགྲོད་ནས་རྙིང་མའི་གཡུ་མཚོའི་འགྲམ་དུ་གཅིག་པུར་ཟླ་བ་བརྒྱད་བཞུགས། ཆོ་འཕྲུལ་ཆེན་པོ་བྱུང་བ་གཤིས་ཐོག་ཏུ་རོ་སྙོམས་པས་གཞི་བདག་དབང་དུ་འདུས་ནས་ཁོང་པར་གདན་དྲངས་བསྙེན་བཀུར་བྱས། ཛམྦྷ་ལས་ནོར་བུ་བྱིན། མཚོ་ནང་དུ་འོད་ལྔའི་སྤུ་བསེལ་པོ་ཙམ་ཞིག་ཐིམ་འགྲོ་བ་གཟིགས། ཐུགས་ངེས་འབྱུང་དང་སྐྱོ་ཤས་ཀྱིས་རྒྱུད་བརླན་པས་རྟག་ཏུ་ཤམ་པོ་ལ་སོགས་གངས་ཁྲོད་དང་ལུང་སྟོང་འབའ་ཞིག་ཏུ་ལྷགས་སྐྱོབ་ཙམ་ལ་བརྟེན་ནས་བཞུགས་པས་སློབ་མའི་ཚོགས་མང་པོ་འཁོར་བ་མཐའ་ཅན་དུ་མཛད། སྤྲུལ་པའི་སྐུར་གདོན་མི་ཟབ་ཀརྨ་པ་རང་བྱུང་རྡོ་རྗེ་དང་། རྒྱལ་བ་ཀློང་ཆེན་པ་གཉིས་རྫོགས་པ་
ཆེན་པོའི་སློབ་མའི་གཙོ་བོར་གྱུར་བས་བསྟན་པ་འདི་སྤེལ་བའི་ཕྲིན་ལས་ལ་མུ་དང་མཐར་མ་སོན། དེ་སྐད་དུ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ཀྱིས། ཆོས་འདིའི་བསྟན་པའི་བདག་པོ་ཀུན་མཁྱེན་ཀློང་ཆེན་པ་ཡིན། རྒྱལ་བ་རང་བྱུང་རྡོ་རྗེའི་དུས་ཕྲིན་ལས་རྒྱ་ཆེ་ཞེས་གསུངས་པས་མཚོན་ནོ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གོམས་པས་སྙིང་རྗེ་ཆེན་པོའི་དབང་གིས་གྲོང་དང་ཡུལ་འཁོར་མང་པོ་དག་ལའང་ཐབས་ལ་མཁས་པས་ཐར་བའི་ས་བོན་འདེབས་པ་ཁོ་ན་ལྷུར་མཛད་ཅིང་། ཀོང་པོ་ནས་ཨེ་ལ་ཐུག་གི་བར་འཇིགས་པས་ཉེན་པའི་ལམ་འཕྲད་ལ་འགྲོ་བ་དག་གི་དབུགས་འབྱིན་པ་དང་། རི་དྭགས་དང་ཉ་ལ་སོགས་པའི་སེམས་ཅན་ཉམ་ཆུང་བ་དེ་དག་ལ་ཐུགས་ཤིན་ཏུ་བརྩེ་བས་བདོག་པ་ལ་ཕངས་སེམས་མེད་པས་རི་རྒྱ་དང་། ལམ་རྒྱ་དང་། ཆུ་རྒྱ་ལ་སོགས་པ་མཛད་ནས་བདེ་འཇམ་ལ་བཀོད། གང་དུ་བཞུགས་པའི་ལུང་པ་དང་། ཡུལ་གྲོང་ཐམས་ཅད་ཀྱི་སད་སེར་ཡམས་ནད་ལ་སོགས་པ་ཞི་བར་མཛད་ཅིང་ཕན་པ་འབའ་ཞིག་ལྷུར་ལེན། སྙིང་ཏིག་གི་གདམས་པ་རྫོགས་རིམ་གཞན་དང་མ་འདྲེས་པར་རང་སྐད་ཀྱི་གྲུབ་མཐའ་བསླངས་ཏེ་འཆད་ནུས་པ་དང་། ཤངས་ལ་སྨེ་བ་ཨའི་རི་མོ་ཅན་མངའ་བ་དང་། སྔགས་བདག་གཟའ་དང་དམ་ཅན་རྣམས་ཀྱིས་བཀའ་ལ་ཉན་ཅིང་མི་དང་མི་ལ་བབ་བཞིན་དུ་ཡོད་པ་དང་། མངོན་པར་ཤེས་པས་གདུལ་བྱའི་བསམ་པ་མཁྱེན་ནས་འདུལ་ལུགས་མཁས་པ་དང་། གཞན་རྒྱུད་བྱིན་གྱིས་རློབ་ནུས་པ་དང་། རྗེས་སུ་བཟུང་བའི་སྐལ་ལྡན་ཀུན་ལ་འདས་དུས་རྟགས་ཁྱད་པར་ཅན་འབྱུང་བ་སོགས་སློབ་དཔོན་བི་མ་ལའི་སྐུའི་བཀོད་པར་གྲགས་ཤིང་ཐལ་འགྱུར་ལས་དགེ་སློང་དཔལ་ལྡན་ཞེས་ལུང་བསྟན་ཏོ། །དེ་ལྟར་དོན་གྱི་འགྲོ་དོན་བསམ་གྱིས་མི་ཁྱབ་པའི་ངང་ནས་བདུན་ཅུ་རྩ་བརྒྱད་པ་ཆུ་བོ་ལུག་གི་ལོའི་སྟོན་ཟླ་འབྲིང་
པོའི་ཉི་ཤུ་ལྔ་ལ་སྒྲ་དང་། འོད་དང་། གུར་ཁྱིམ་ལ་སོགས་པའི་རྟགས་ངོ་མཚར་བ་དང་བཅས་སྐུ་གཤེགས་པས། ཉེ་གནས་སྒོམ་དར་ལ་སོགས་པ་དྲུང་ན་ཡོད་པ་རྣམས་ཀྱིས་མོས་གུས་ཆེན་པོ་གདུང་བ་བསྐྱེད་པས་སླར་བཞེངས་ཏེ་སྐྱིལ་མོ་ཀྲུང་བཅས། ཞལ་འཛུམ་པའི་ངང་ནས་ཁྱེད་རྣམས་མྱ་ངན་མ་བྱེད། ང་ཤི་བ་མིན་གསུངས་ནས་གདམས་ངག་དང་ཞལ་ཏ་ཅི་རིགས་པ་བྱོན། ཞག་བཅུ་གསུམ་སྐུ་ཚེ་སླར་ལ་བསྲིངས། དེར་ཚེས་བདུན་གྱི་ཉིན་གཤེགས་པའི་ཕྱིན་ཇི་ལྟར་བགྱི། བླ་མ་ཀུན་མཁྱེན་པ་གདན་འདྲེན་ནམ་ཞུས་པས། ཁོང་འོ་བརྒྱལ་དུ་མ་འཇུག། ད་གཟོད་ཆོས་ཀྱི་ཞུན་མཐར་མཆོད་པ་ཡོད་ན་དེར་སོང་། ཁ་ཏ་མང་པོ་སྔར་ནས་བྱས་ཟིན་ཅལ་ཅོལ་མ་སྨྲ་གསུངས། དྲང་སྲོང་ཙོག་པུའི་བདུག་སྟངས་དང་། ཆོས་སྐུའི་གཟིགས་སྟངས་ཀྱི་ངང་ལས་ཞལ་འཛུམ་པར་མཛད་དེ། ཚེས་བརྒྱད་ཀྱི་ཐོ་རེངས་ཁ་ན་གདོད་མའི་གྲོང་ཁྱེར་ག་ལ་བདེར་གཤེགས་སོ། །ཉི་ཤུ་ལྔ་ལ་པུར་བཞུབས་དབུ་ཐོད་རིལ་པོར་བྱོན་པའི་ནང་ན་རིགས་ལྔའི་ཚོམ་དཀྱིལ་དང་། སྙན་གོང་གཡས་ན་རྗེ་བཙུན་མ་མཐིང་ག་ཚོན་གང་པ། གདུང་རིགས་ལྔ་དང་། རིང་བསྲེལ་ལ་སོགས་པ་བྱོན་ཞིང་འཇའི་གུར་གྱིས་ཁོར་ཁོར་ཡུག་ཏུ་དཀྲིགས་སོ།། །།དེ་ལ་རྒྱལ་བའི་དབང་པོ་ཀརྨ་པ་རང་བྱུང་རྡོ་རྗེ་ནི། འཕགས་པ་སྤྱན་རས་གཟིགས་འཇིག་རྟེན་དུ་དངོས་སུ་བྱོན་པ་སྟེ། ཆོས་ཀྱི་དབྱིངས་ནས་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་རྡོ་རྗེའི་གླུས་བསྐུལ་ནས་སེམས་ཅན་རྣམས་ལ་ཚད་མེད་པའི་སྙིང་རྗེས་གཟིགས་ཏེ་སྟོད་ལུང་དུ་རྒན་རྒོན་གཉིས་ཀྱི་བུ་ཤི་བའི་རོ་ལ་གྲོང་འཇུག་གི་རྣམ་པས་གཤེགས་ཙ་ན། ཤི་མིག་གསོན་ལ་བལྟ་བལྟས་ངན་ཡིན་ཟེར་ནས་མིག་ཁབ་ཀྱིས་གཙགས། དལ་འབྱོར་གྱི་ཆོས་བརྒྱད་ཚང་བའི་ལུས་ལས་གཞན་དུ་གྱུར་བས་སླར་འཕོས་ཏེ། རྣལ་འབྱོར་ཕོ་མོ་གཉིས་ཀྱི་བུར་སྲིད་པ་བཟུང་།
སྔོན་གནས་རྗེས་སུ་དྲན་པ་ལ་སྒྲིབ་བྱེད་སྐྲའི་རྩེ་མོ་ཙམ་ཡང་མེད་པས་མངལ་གྱི་དྲི་མས་གཏན་ནས་མ་གོས་པ་རྒྱ་གར་ན་ཤཱཀྱ་ཐུབ་པ་དང་། བོད་དུ་སྐྱེས་བུ་ཆེན་པོའི་དེ་ལས་མེད་པར་གྲགས། རྒྱ་བོད་གཉིས་གར་སངས་རྒྱས་ཀྱི་བསྟན་པའི་སྲོང་ཤིང་གཅིག་པུར་བཞུགས། བསམ་ཡས་མཆིམས་ཕུ་དང་གཡའ་མ་ལུང་སོགས་ནས་ཚེ་ཆུའི་གཏེར་བཞེས་ནས་གོང་མ་རྒྱལ་པོའི་ཚེ་བསྲིངས། བི་མ་ལ་མི་ཏྲ་རང་གི་མཛོད་སྤུར་ཐིམ་པ་གཟིགས་པའི་མོད་ལ་སྙིང་ཐིག་གི་དགོངས་པ་ཇི་ལྟ་བ་བཞིན་མངོན་དུ་གྱུར། འོན་ཀྱང་གསང་སྔགས་བླ་མ་ལ་བསྟེན་པའི་མིག་ལྟོས་ཚམ་སྟོན་པའི་སླད་དུ་གཅོམ་བསྐྱུངས་ནས་རིག་འཛིན་ཀུ་མ་རཱ་ཛ་ལས་གསང་བ་སྙིང་ཏིག་གི་མན་ངག་ཡོངས་སུ་རྫོགས་པ་གསན། འདི་ནི་སློབ་དཔོན་ཆེན་པོ་པདྨ་ལས་བརྒྱུད་པ་ཞིག་འོང་ཐང་དགོངས་པའི་ཚེ་སློབ་དཔོན་སངས་རྒྱས་གཉིས་པ་ཞལ་གཟིགས། མན་ངག་སྙིང་ཏིག་དངོས་སུ་ཐོབ་ཀྱང་ཚིག་བརྒྱུད་ལ་ནན་ཏན་དུ་བྱ་བའི་ཕྱིར་ཤོའི་རྒྱལ་སྲས་ལེགས་ལྡན་པ་སྤྱན་དྲངས་ནས་ཙཱ་རི་དགོན་གསར་དུ་རྫོགས་པར་གསན། སླར་སློབ་མ་རྣམས་ལ་རྩལ་དུ་བཏོན་ནས་གསུངས། བཀའ་ལས་ཆོས་འདི་ལྟ་བུ་ནུབ་ཏུ་ཕངས་པས་གཡུང་སྟོན་རྡོ་རྗེ་དཔལ་གྱིས་གཙང་། ཡེ་རྒྱལ་བས་ཁམས་ཀོང་། ཡེ་ཤེས་རྒྱལ་མཚན་པས་ཧོར་དང་རྒྱ་ནག། སྤྲུལ་སྐུ་བས་དབུས་སུ་དར་བར་གྱིས་ཞེས་སྨན་ལུང་པ་ཤཱཀྱ་གཞོན་ནུ་སོགས་ལ་རྗེས་སུ་གདམས། ས་ལ་གནས་པའི་བྱང་སེམས་ཀྱིས། །རྒྱ་མཚོའི་བར་དུ་སྤེལ་བར་བྱེད། །ཅེས་པ་དེ་ཡིན་པར་གྲགས། ཀུན་ཏུ་བཟང་པོ་ཐུགས་ཀྱི་ཀློང་ན་རང་གསལ་ཏེ་དགོངས་པའི་གཏེར་མཛོད་ཆེན་པོ་ལ་དབང་བསྒྱུར་ནས་ཀརྨ་སྙིང་ཏིག་ཅེས་གྲགས་པའི་གདམས་པ་ཡང་བྱུང་། འདི་དག་ཀྱང་བསྟན་པའི་ཆུ་མགོ་གཅིག་ཡིན་ནོ།། །།རྒྱལ་བ་གཉིས་བདབ་ལ་བསམ་
ཡས་པ་ཀུན་མཁྱེན་ངག་གི་དབང་པོའམ། ཀློང་ཆེན་རབ་འབྱམས་ནི། གཡོ་རུ་གྲའི་ཆ་སྟོད་གྲོང་དུ་ངན་ལམ་བཙན་པོ་འོད་ཀྱི་དཀྱིལ་འཁོར་ཅན་ཞེས་བྱ་བ་མ་སྨད་པའི་རིགས་ཀྱི་ཡོན་ཏན་ཅན་ནོ། །རུས་ནི་རོག་སྟེ་སད་མི་བདུན་གྱི་ནང་ཚན་ཛྙཱ་ན་ཨིནྡྲ་རཀྵི་ཏའམ། བོད་སྐད་དུ་ཡེ་ཤེས་དབང་པོ་བསྲུངས་པ་སློབ་དཔོན་ཆེན་པོའི་དངོས་སློབ་དགེ་སློང་རྒྱལ་བ་མཆོག་དབྱངས་དང་གདུང་གཅིག་པའི་རབས་ཉེར་ལྔ་པ། མེས་པོ་ལྷ་སྲུང་ཞེས་བདུད་རྩིའི་བཅུད་ལེན་གྲུབ་པས་ལོ་བརྒྱ་དང་སྔར་འཚོ་བ་དེའི་སྲས་སློབ་དཔོན་བསྟན་པ་སྲུང་རྟེས་རིག་གནས་དང་། སྔགས་ཀྱི་རྣལ་འབྱོར་ལ་རང་བྱན་ཆུད་པ་ཞིག། འབྲོམ་སྟོན་རིན་པོ་ཆེ་རྒྱལ་བའི་འབྱུང་གནས་ཀྱི་གདུང་ལས་བྱོན་པ་འབྲོམ་བཟའ་མ་བསོད་ནམས་རྒྱན་ཅེས་བྱ་བ་དང་འདུས་པ་ལས་སྐྱེ་བའི་མྱུ་གུ་བཟུང་ངོ། །དེའི་ཚེ་ཡུམ་ལ་སེང་གེ་ཆེན་པོ་གཅིག་གི་དཔྲལ་བ་ན་ཉི་མའི་འོད་ཟེར་འབར་བས་སྲིད་པ་གསུམ་ལྷག་གེར་གསལ་བ་ཞིག་རང་ཉིད་ལ་ཐིམ་པར་རྨིས་སོ། །དེ་ནས་རབ་བྱུང་ལྔ་པའི་ཕུར་བུས་སྤྲེའུ་དབོ་ཟླ་བའི་ཚེས་བཅུའི་ཉིན་མངལ་གྱི་ཆུ་འཛིན་ལས་རྣམ་པར་གྲོལ། གཞོན་ནུ་དོན་གྲུབ་ལ་ལྷའི་དབང་པོས་བྱ་བ་བཞིན་དུ་ནམ་གྲུ་རེ་མ་ཏིས་ངས་བསྲུངས་པ་ཡིན་ཞེས་ལག་ཏུ་བླངས། སླར་ཡུམ་ལ་གཏད་ནས་མི་སྣང་བར་སོང་། འདི་ལྟར་བྱང་ཆུབ་སེམས་དཔའ་ནི་འཕགས་པའི་ནོར་གྱིས་གདོད་ནས་ཕྱུག་པས་དད་པ་དང་། སྙིང་རྗེ་ལ་སོགས་པའི་ཡོན་ཏན་བསྒྲིབ་མེད་དུ་གསལ། ལོ་ལྔ་ནས་དྲི་ཀློག་ལེགས་པར་མཁྱེན། ཡབ་ལས་བཀའ་བརྒྱད་བདེ་འདུས། ཕུར་པ། རྟ་མགྲིན། བླ་མའི་ལས་གཞུང་སོགས་སྒྲུབ་ཕྲིན་མང་དུ་གསན། སྨན་རྩིས་ལ་སོགས་པའི་རིག་པའང་ཁོང་དུ་ཆུད། དགུ་པའི་སྟེང་དུ་ཉི་ཁྲི་དང་བརྒྱད་སྟོང་བརྒྱ་ཚར་བཏོན་པས་ལྷག་མེད་དུ་ཐུགས་ལ་འཛུལ། བཅུ་གཉིས་པའི་ཚེ་བསམ་ཡས་པ་མཁན་པོ་བསམ་གྲུབ་རིན་ཆེན་དང་། སློབ་དཔོན་ཀུན་
དགའ་འོད་ཟེར་ལས་རབ་བྱུང་གི་དངོས་པོ་བརྙེས། མཚན་ཚུལ་ཁྲིམས་བློ་གྲོས་སུ་གྲགས། དམ་པའི་ཆོས་འདུལ་བ་ལ་ལེགས་པར་སྦྱངས་པས་ལོ་བཅུ་བཞི་བར་བཤད་པའི་བ་དན་བཟུང་ཆོག་པ་བྱུང་། བཅུ་དྲུག་པར་སློབ་དཔོན་བཀྲ་ཤིས་རིན་ཆེན་ལས་ལམ་འབྲས་དང་། ཆོས་དྲུག་གཉིས། ཕག་མོ་ཆོས་དྲུག། བདེ་མཆོག་དྲིལ་བུ་པ། ཕྱག་རྡོར་འཁོར་ཆེན་ལ་སོགས་པའི་དབང་ཁྲིད་གདམས་པ་མང་དུ་ཉན། སློབ་དཔོན་དབང་ཡེས། སྟོན་ཚུལ། ཁྲོ་ཕུ་བ་ལ་སོགས་པར། བྱ་སྤྱོད། རྣལ་འབྱོར། རྡོ་རྗེ་གུར། མཁའ་འགྲོ་རྒྱ་མཚོ། སངས་རྒྱས་ཐོད་པ། རྡོ་རྗེ་ཕྲེང་བ། དུས་ཀྱི་འཁོར་ལོ་ལ་སོགས་པའི་སྔགས་རྒྱུད་མང་པོ་དང་། རིན་པོ་ཆེ་ཟ་ལུང་པ་སོགས་ལས་ཞང་ཚལ་པའི་གདམས་སྐོར། རྒོད་ཚང་བའི་ལམ་ཁྲིད། གཅོད་ཡུལ། ཞི་བྱེད་སྔ་ཕྱི་བར་གསུམ་ལ་སོགས་པ་མང་དུ་ཉན། བཅུ་དགུ་པར་གངས་རིའི་ཁྲོད་ན་ཚད་མ་སྨྲ་བའི་རིག་གང་ཆེན་ཕོ་རྡོག་ལགས་པའི་ཤེས་རབ་ཀྱིས་ལེགས་པར་བསྐྲུན་པའི་གནས་གསང་ཕུ་ནེའུ་ཐོག་གི་མལ་ཡའི་ནགས་ཀླུང་ཆེན་པོར་ཞུགས་ནས་གླིང་སྟོད་གདན་རབས་བཅོ་ལྔ་པ་སློབ་དཔོན་བཙན་དགོན་པ་དང་། གདན་རབས་བཅུ་དྲུག་པ་བླ་བླང་བ་ཆོས་དཔལ་རྒྱལ་མཚན་གཉིས་ལས། བྱམས་པའི་ཆོས་ལྔ། ཚད་མ་སྡེ་བདུན། པར་ཕྱིན་དབུ་མ་ལ་སོགས་མཚན་ཉིད་ཐེག་པའི་ལུང་རིག་གི་པདྨའི་རྩ་བ་མངར་པོར་གྱུར་བ་དག་ལོ་དྲུག་གི་བར་དུ་ལྷག་མ་མ་ལུས་པར་ཐོས་པས་བློ་གྲོས་ཆེན་པོའི་ལུས་ཀྱི་སྟོབས་ལྷག་པར་རྒྱས། དབང་ལོ་བློ་གྲོས་བརྟན་པ་ལས་མདོ་ཏིང་ངེ་འཛིན་རྒྱལ་པོ་ལ་སོགས་པའི་ཟབ་ཆོས་མདོ་ལྔ། ཤེས་རབ་སྙིང་པོ་རྒྱ་ཆེར་འགྲེལ་བས་མཚོན་པའི་ལུང་ཕྲན་མང་པོ་སོགས་ནང་པའི་གཞུང་། སྒྲ་དང་སྙན་དངགས་དང་སྡེ་བ་སྦྱོར་དང་། ཟློས་གར་ལ་སོགས་པ་ཕྱི་རོལ་པ་དང་ཐུན་མོང་དུ་གྱུར་བའི་གནས་ཐམས་ཅད་ལ་ཐོས་བསམ་མཐར་ཕྱིན་པའི་སྣ་ཞགས་
རིང་པོར་བརྐྱངས། ཤེས་རབ་ཀྱི་ལྷ་འཇམ་པའི་དབྱངས། མཚོ་ལྡན་མ། མི་གཡོ་བ། ཕག་དཀར་རྣམས་ལ་སྒྲུབ་པ་མཛད་པས་ཀུན་ཀྱང་ཞལ་གཟིགས། ཁྱད་པར་སྒྲ་དབྱངས་ལྷ་མོས་ཕྱག་མཐིལ་དུ་བཞག་ནས་གླིང་བཞི་རི་རབ་དང་བཅས་པ་ཞག་བདུན་དུ་བསྟན་ཅིང་ལུང་བསྟན་ཐོབ། ལྷག་པའི་ལྷ་དེ་དག་གིས་ཀྱང་ཐོགས་པ་མེད་པའི་བློ་གྲོས་ཀྱི་དངོས་གྲུབ་ཆེན་པོའི་གནས་གང་ཡིན་པའི་དྲྭ་བ་དང་དྭ་བ་ཕྱེད་པའི་འཕྱང་འཕྲུལ་དང་། རིན་པོ་ཆེའི་ཏོག་གི་རྣམ་པར་དཔྱངས་པས། བརྒལ་བ་དང་། བརྟག་པ་དང་། རིགས་པའི་ཐལ་འགྱུར་གྱི་སྒྲ་ཆེན་པོས་ས་འདི་གཡོ་བ་ཙམ་དུ་གྱུར་ནས། རྒོལ་བ་ངན་པའི་ཁྱུ་མཆོག་རྭ་གཅིག་པའི་བརྟུལ་ཞུགས་འཛིན་པ་རྣམས་བསྒྲུབ་པ་དང་། སུན་འབྱིན་པའི་རྐང་པ་མཆོག་གིས་རྣམ་པར་བརྫི་བ་དང་། རྣམ་པར་འཐག་པ་དང་། རྣམ་པར་ཉམ་ཉེས་པར་བྱས་ནས་ཅང་མི་སྨྲ་བའི་གནས་ལ་བཀོད་པས་བསམ་ཡས་ལུང་མང་བའམ། ཀློང་ཆེན་རབ་འབྱམས་ཞེས་པའི་མཚན་གྱི་རྔ་བོ་ཆེ་མཁའ་ལ་འགྲོ་བ་དང་མི་མ་ཡིན་གྱི་གནས་སུའང་གྲགས་པ་གསལ་བ་ཉིད་དོ། །དེ་ལྟར་ལུང་དང་རིག་པའི་གནས་རྒྱ་ཆེན་པོ་ལ་མི་འཇིགས་པའི་ཉམས་བརྟས་པར་གྱུར་ནའང་། འདི་ལྟར་སྐྱེས་བུ་ཆེན་པོ་རྣམས་ནི་རྣམ་པར་གྲོལ་བའི་ལམ་ལ་གང་ཉེ་བའི་ཕྱོགས་ལ་འཇུག་པ་རྩོམ་སྟེ། ཕྱོགས་དང་ཕྱོགས་བྲལ་གྱི་གནས་སུ་ལྷགས་ནས་བྱང་ཆུབ་སེམས་དཔའ་རྟག་ཏུ་དུའི་རྣམ་པར་ཐར་བ་ལ་ཡིད་གཞུངས་པས། བླ་མ་དང་དགེ་བའི་བཤེས་གཉེན་དུ་མ་ལས་མདོ་དང་། རྒྱུད་དང་། མན་ངག་མང་དུ་ཞུས་ནས་ཐོས་པ་དང་བསམ་པའི་བློ་གྲོས་ཆེར་བསྐྱེད། གངས་རིའི་ཁྲོད་ན་གཞུང་ལུགས་དང་མན་ངག་མང་དུ་གནས་པ་ལ་ཕྱོགས་དང་རིས་སུ་བཅད་པ་སྦབས་ཏེ། བུང་བ་གཞོན་ནུས་སྦྲང་རྩིའི་སྙིང་པོ་ལ་བྱ་བ་བཞིན་དུ། དན་བག་པ། སློབ་དཔོན་གཞོན་ནུ་དོན་གྲུབ། མྱོས་མཐིང་མ་
བ། སངས་རྒྱས་གྲགས་སོགས་བླ་མ་བཞི་ལ་མདོ་སྒྱུ་སེམས་གསུམ་རྙིང་མ་རྒྱུད་འབུམ་གྱིས་གཙོས་མ་དག་གསན་པས་སྔ་འགྱུར་རྡོ་རྗེ་ཐེག་པའི་གྲུབ་པའི་མཐའ་ཆེན་པོ་གཅིག་ཏུ་འཇུག་པའི་རྟེན་འབྲེལ་ཤད། ཕྱིས་གསང་བའི་སྙིང་པོ་ལ་སྙིང་ཏིག་དང་མཐུན་པའི་ཊཱི་ཀ་ཕྱོགས་བཅུ་མུན་སེལ་ཉི་ཟླའི་སྤྲིན་གྱི་སྣང་བ་ཞེས་བྱ་བ་དང་། སྤྱིའི་ཁོག་འབུབས་གཉིས་མཛད། གསང་རྙིང་འགྲེལ་བ་སྤར་ཁབ་གྱི་ལུགས་ལྟར་འཆད་པ་མི་ལེགས་ཀྱི། རོང་ཟོམ་གྱི་ལུགས་ལྟར་ལེགས་པ་ཡིན་ཞེས་གསུངས། ལར་གཡུང་འགྲེལ་དང་བཅས་འདི་གསུམ་རོང་བཤད་སྒྲོམ་ཆེ་བར་སྣང་། སློབ་དཔོན་གཞོན་རྒྱལ་ལ་སོགས་པར་དབུ་མ་ཚིག་འཇུག་ལ་སོགས་འཕགས་སྐོར་རྣམས་ཚང་བ་དང་། གཞོན་རྡོར་ལས་སྤྱོད་འཇུག་དང་བསླབ་བཏུས་ལ་སོགས་པ། ཇོ་བོའི་ཡི་དམ་སྐོར། སྦྱོར་དྲུག་ཆོས་དྲུག། མཁན་པོ་ལས་ཁྲོ་ལུ་པའི་སྐོར། ཁ་རག་ཆོས་སྐོར། སྒྲུབ་ཐབས་རྒྱ་མཚོ། ཆོས་ཆུང་བརྒྱ་རྩ། འདུལ་བ་ལུང་ལ་སོགས་ཤིན་ཏུ་མང་བ། རྗེ་རང་བྱུང་རྡོ་རྗེ་ལས། སྦྱོར་དྲུག་གེགས་སེལ་དང་བཅས་པ། ནཱ་རོ་ཆོས་དྲུག། སྐུ་གསུམ་ངོ་སྤྲོད། རྒྱལ་བ་རྒྱ་མཚོ། སྤྱན་རས་གཟིགས་རྒྱལ་པོ་ལུགས། གསང་འདུས། སམྦུ་ཊི། མ་ཧཱ་མ་ཡ། གཤིན་རྗེ་གཤེད་དམར་ནག་སོགས་ཆོས་བཀའ་རྒྱ་ཆེན་པོ། སློབ་དཔོན་དབང་ཚུལ་ལས་སྦྱོར་དྲུག་དང་། བསྙེན་སྒྲུབ། རླུང་སྐོར་ལ་སོགས་པ་མང་པོ། ས་སྐྱ་པ་བླ་མ་དམ་པ་ལས། སེམས་བསྐྱེད་ཆེན་མོ་དང་། ལམ་འབྲས་སོགས་ས་སྐྱ་བའི་ཆོས་ཟབ་དགུགས་ན་ཞིང་། འདི་ལ་གཞི་ལམ་འབྲས་བུ་གསུམ་གྱི་རྣམ་པར་གཞག་པའི་ཞི་ཡིག་རིན་པོ་ཆེ་གསེར་གྱི་མཆོད་སྡོང་ཞེས་བྱ་བའང་ཕུལ་བ་སྣང་། ཞི་བྱེད་རྒྱུད་པ་རྨ་སོ་ཀཾ་གསུམ་དུ་གྲགས་པའི་སློབ་བརྒྱུད་ཤུག་གསེབ་རི་བ་གཞོན་རྡོར་ལས། དོ་ཧ་སྐོར་གསུམ། རི་ཆོས་སྐོར་
གསུམ། རྟེན་འབྲེལ་བརྒྱ་རྩ་ལ་སོགས་མདོར་ན་གངས་རིའི་ཁྲོད་ན་གྲགས་པའི་གྲུབ་པའི་མཐའ་ཕལ་མོ་ཆེ་ཐུགས་སུ་ཆུད་ཅིང་། འཆད་རྩོད་རྩོམ་གསུམ་ལ་ཐོགས་པ་མེད་པའི་ཐུགས་རང་སྐྱེས། ཐ་སྙད་ཀྱི་རིག་པ། མདོ་སྔགས་ཀྱི་གཞུང་ལུགས། མན་ངག་གི་སྐོར་སོགས་གང་ལའང་རང་བྱང་ཆུབ་བར་མཛད་དོ། །འདི་ལྟར་སྐྱེས་བུ་ཆེན་པོ་རྣམས་ནི། ཐོས་བསམ་གྱི་མཐའ་སྒྲུབ་པས་ཉམས་འོག་ཏུ་བཙུད་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་འདབ་སྟེགས་ཉིད་དུ་མཛད་དེ། དེ་ལ་རྣམ་པ་ཀུན་ཏུ་འཁོར་བའི་རང་བཞིན་ལ་ཐུགས་སྐྱོ་ཤས་དང་ངེས་འབྱུང་ཚད་མེད་པས་སྔོན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྔགས་པའི་གནས་ནགས་ཁྲོད་དང་། བས་མཐའ་འབའ་ཞིག་དོན་དུ་གཉེར་བའི་དགོངས་པ་གཏོད་པའི་ཚེ། བཅོམ་ལྡན་འདས་ཀྱིས་ངེས་པར་འབྱུང་བའི་རྐྱེན་བཞི་གཟིགས་པ་བཞིན་དུ། གྲྭས་དེར་ཁམས་པའི་གྲྭ་པ་དག་གིས་གཟུ་བོར་མི་གནས་པའི་སྤྱོད་པ་ངན་པས་ཐུགས་ངེས་པར་འབྱུང་སྟེ་བྱ་བྲལ་གྱི་ཀུན་ཏུ་སྤྱོད་པས་གཤེགས་པར་ཉེ་བའི་ཚེ། མཁན་སློབ་རྣམས་སྐྱེས་བུ་དམ་པ་འདིའི་རྣམ་དཔྱོད་ལ་དཀོན་པའི་འདུ་ཤེས་བཟོད་པར་དཀའ་བས་ནན་གྱིས་བཤོལ་བཏབ་ནའང་། སེམས་ཅན་གྱི་བསོད་ནམས་ལས་གཞན་དོན་རླབས་པོ་ཆེའི་ཕྲིན་ལས་ཀྱི་འཇུག་པ་དུས་ལས་མ་ཡོལ་བས་བཤོལ་མ་ཐེབས་པར་ཆས་ཙ་ན། རྔོག་ལོ་ཆེན་པོའི་གདུང་རྟེན་རྩར་དགེ་འདུན་དཔྱོད་ལྡན་པ་ཞིག་དང་ཕྲད། ཁོང་གིས་ཀྱང་བཤོལ་བཏབ་ཅིང་སྐྱོ་བའི་རྣམ་པ་སྟོན་པ་ལ་གནས་ཚུལ་རྣམས་བཤད་པས། ཁོང་ཡང་ཁམས་པའི་ཚོགས་ལ་འཁུན་པར་བྱེད་ཅིང་། ད་ཅིས་ཀྱང་གཤེགས་ན་རང་རེ་ལ་རྩོམ་པ་ནི་ཐོགས་རྡུག་མེད། ཁམས་པ་རྣམས་ལ་ངན་སྨྲས་ཤིག་འཇོག་པར་འཚལ་ཞེས་བསྐུལ་བས། ཀུ་རེའི་ཚུལ་དུ་ཤོག་བུ་བྲེ་ཁ་གཅིག་ལ་ཤོང་ཐད་བྲིིས་པ་ཁོང་གིས་ཁྱེར་ནས་ཆོས་རའི་ཁྲི་ལ་སྦྱར་བ་ཁམས་པ་རྣམས་ཀྱིས་
རིག་སྟེ་མཐོང་དུ་མ་སྟེར། ཀ་ལིང་ཡུལ་དུ་སྲེན་པོ་རྒྱུ་བཞིན། ཞེས་པ་ལ་སོགས་པའི་ཀ་ཐོ་སུམ་ཅུ་པ་འདི་རྒྱལ་ཁམས་ཀུན་ཏུ་དར་རོ། །དེ་ནས་ངེས་པ་མེད་པའི་གནས་སུ་འཁྱམས་ཤིང་སྒྲུབ་པ་འབའ་ཞིག་ལྷུར་མཛད་པ་ལས་རྒྱ་མའི་ཅོག་ལ་བྲག་ཕུག་ཏུ་ཟླ་བ་ལྔ་མུན་པའི་རྣལ་འབྱོར་ལ་བཞུགས་པའི་ཚེ། སིལ་སྙན་གྱི་སྒྲ་གླུ་དབྱངས་དང་བཅས་པ་ཞིག་གསན་པས། དེ་ལ་བལྟ་བའི་སྣང་བ་ཤར་ཙ་ན་བུད་མེད་ལོ་བཅུ་དྲུག་པ་ཟ་འོག་གི་འཛལ་བེར་དང་གསེར་གཡུའི་རྒྱན་གྱིས་སྤྲས་ཤིང་། བསེ་ཁྲབ་དྲིལ་བུས་བརྒྱན་པའི་རྟ་ལ་བཅིབས་པ་གདོང་གསེར་གྱི་དྲྭ་བས་གཡོགས་པ་ཞིག་དང་མཇལ། དེའི་ཐུབ་ནས་འཇུས་ཏེ་འཕགས་མ་རྗེས་སུ་འཛིན་པར་ཞུ་ཞེས་བཏུད་པས། རིན་པོ་ཆེའི་དབུ་རྒྱན་ཅིག་འདུག་པ་ཕུད་ནས་ཀུན་མཁྱེའི་པའི་དབུལ་བསྐོར། དེང་ནས་དུས་རྟག་ཏུ་བྱིན་གྱིས་རློབ་ཅིང་དངོས་གྲུབ་སྦྱིན་ནོ་གསུང་། བདེ་གསལ་མི་རྟོག་པའི་ཏིང་འཛིན་ལ་ཡུན་རིང་པོར་འབྱམས། མན་ངག་རྫོགས་པ་ཆེན་པོའི་ཆོས་དང་མཇལ་བའི་རྟེན་འབྲེལ་བསྒྲིགས། དེ་ནས་ཉི་ཤུ་རྩ་དགུ་པར་བསམ་ཡས་སུ་ཕེབས་པའི་དཔྱིད་སོས་བླ་མ་དམ་པ་ཀུ་མ་རཱ་ཛ་ཡར་སྟད་སྐྱིམ་གྱི་ཕུན་བཞུགས་པ་ལ་གཏད་དེ་བྱོན་པས། ལམ་དུ་གཡག་སྡེ་པཎ་ཆེན་དང་མཇལ་ནས་རྗེ་དྲུང་ཀརྨཱ་པའི་དྲུང་ན་དེངས་ཞེས་བསྐུལ་ནའང་མ་ཉན་པར་ལྷགས། ཡར་སྟོད་སྐྱིམ་གྱི་ཕུན་རིག་འཛིན་པ་སློབ་མའི་ཚོགས་ཆ་ཐེར་ལྷགས་སྐྱོབ་བདུན་ཅུ་ཙམ་དང་བཅས་པ་བཞུགས་པ་དང་མཇལ། མ་དང་ལྷའི་བྱ་ཡིན་ཟེར་བའི་བྱ་ཡ་མཚན་ཅན་ཞིག་ལ་བྱ་བྲན་མང་པོའི་ཚོགས་དང་བཅས་བྱུང་ནས་ངའི་དཔེ་ཆ་རྣམས་ཕྱོགས་མཚམས་ཐམས་ཅད་དུ་ཁྱེར་སོང་བར་རྨིས་པས་བརྒྱུད་པ་འཛིན་པ་ཅིག་འོང་གསུངས་ནས་ཤིན་ཏུ་མཉེས། དེར་ཆོས་ཁྲལ་འདེགས་རྒྱུ་མེད་པས་ཐུགས་ལ་སྐྱོ་བ་དཔག་ཏུ་མེད་པ་འཁྲུངས། ཆོས་ཁྲལ་ལ་འཐོགས་ནས་བླ་མའི་དྲུང་ནས་འགྲོ་དགོས་པར་ལས་མེད་པས་ཉིན་བར་འགྲོ་བ་
ངོ་ཚ། སང་ནམ་ལྡང་ཙ་ན་ལུང་པ་འདིའི་མདའ་ལ་སླེབས་པར་འགྲོ་དགོས་དགོངས་ཙ་ན་བླ་མའི་མངོན་མཁྱེན་གྱིས་དགོངས་ནས་འདིའི་ཆོས་ཁྲལ་ནང་ནས་འདབས་པ་ཡིན་པས་མ་གཙེར་ཞེས་གྲྭ་པ་གཉིས་ཀྱིས་བསྐྱར་བྱུང་བས་དགའ་ཆེས། རིག་འཛིན་པ་དེ་སློབ་མའི་ཚོགས་ལ་སྐྱོབ་བསྐུལ་ཕྱིར་གཞི་མི་འཛིན་པས་ལོ་དེའི་དཔྱིད་སོས་ལུང་སྟོངས་གཅིག་ནས་གཅིག་ཏུ་འཕོ་སྐྱས་ལན་དགུ་མཛད་པས། གཞིར་ཟིན་དུས་འཕོ་དགོས་པ་འདྲ་དེས་རང་ལ་ན་བཟའ་དང་བཟའ་བཏུང་གཉིས་ཀ་མེད། ནམ་ཟླ་དང་གངས་རྩ་ཡུལ་ཤིན་ཏུ་གྲང་བས་ལུས་སེམས་ལ་ངལ་དུབ་དཔག་ཏུ་མེད་པ་བྱུང་། ཕྱེ་བྲེ་གསུམ་དང་དངུལ་ཆུ་རིལ་བུ་རིལ་མ་ཚམ་ཉི་ཤུ་རྩ་གཅིག་ལས་མེད་པ་དེས་ཟླ་བ་གཉིས་ཀྱི་འཚོ་བ་བྱས། ཁབ་བབས་དུས་འབོག་གི་དོད་སྒྱེ་གཅིག་ཡོད་པ་དེའི་ནང་དུ་ཞུགས་ནས་གོས་སྟན་གཉིས་ཀའི་གོ་བཅད་པ་སོགས་ཆོས་ཕྱིར་དཀའ་བ་སྤྱད་པ་བསམ་གྱིས་མི་ཁྱབ། ལོ་དེར་རྫོགས་པ་ཆེན་པོ་གསང་བ་སྙིང་ཏིག་གི་དབང་ཁྲིད་གདམས་པ་དང་བཅས་པ་ཐོབ་ཅིང་བསྒོམས། ཕྱི་ལོ་དེ་དབང་གོང་མ་དང་། རྫོགས་ཆེན་སྡེ་གསུམ་གྱི་རྒྱུད་ལུང་མན་ངག་བསྟན་སྲུང་དང་བཅས་པ་བུམ་པ་གང་བྱོར་གནད་ནས་བསྟན་པའི་རྒྱལ་ཚབ་ཏུ་དབུགས་འབྱིན་མཛད། ལོ་དྲུག་གི་བར་དུ་བསྒྲུབ་པའི་དམ་བཅའ་ཕུལ། སུམ་ཅུ་རྩ་གཅིག་པ་ལ་སྙི་ཕུའི་ཤུག་གསེབ་ཏུ་སྙིང་ཐིག་གི་སྒོ་ནས་སྐལ་ལྡན་དུ་མ་ལ་སྨིན་གྲོལ་མཛད། རྣལ་འབྱོར་པ་འོད་ཟེར་གོ་ཆས་དཀའ་སྤྱད་ཆེན་པོས་མཁའ་འགྲོ་སྙིང་ཐིག་གི་དཔེ་བཙལ་བ་གཟིགས་ཕུལ་བ་དང་མཚུངས་པར། གཟིམས་ལམ་དུ་ཤན་པ་སྲོག་སྒྲུབ་མས་གླེགས་བམ་གཏད། སང་ཕོད་སུམ་ཅུ་རྩ་གཉིས་བར་མཆིམས་ཕུའི་རི་མོ་ཅན་དུ་སྒྲུབ་པ་ལ་བཞུགས་དུས། སྐལ་ལྡན་གྱི་རྣལ་འབྱོར་ཕོ་མོ་བརྒྱད་ལ་སྙིང་ཐིག་གི་གདམས་པ་བཏབ། སྤོས་བཅས་ཀྱི་དབང་གི་དུས་ཕྱིན་ཕབ་པས། རྣལ་འབྱོར་མ་གཅིག་ལ་སྔགས་སྲུང་མ་མངོན་སུམ་དུ་བབས་ཏེ་འཁྲབ་བྱུང་བས། སློབ་མ་རྣམས་ཀྱིས་
ཟིལ་མ་བཟོད་པར། བླ་མའི་ཞལ་ནས་འདིར་མཁའ་འགྲོ་བབས་པ་ཡིན་པས་ཨའུ་རྩི། ད་སྣང་སེམས་རོ་གཅིག་ཏུ་རྟོགས་པའི་རྣལ་འབྱོར་བ་ཡིན་པར་ཆད་མི་འོང་གསུངས། དེར་རྣལ་འབྱོར་མས་བླ་མ་ལ་ཕྱག་བྱས། དཀྱིལ་འཁོར་ལ་བལྟས་ནས། རྨ་བྱ་མ་འཛོམ་པ་ག་རེ་ཟེར། ཡིད་ཀྱིས་བསམ་པ་ཡིན་གསུངས་པས། བརྡའི་ཆོས་ལ་ཡིད་ཀྱིས་ག་ན་འོང་ཟེར། ཡང་བུམ་པའི་སྟེགས་ཀྱི་མཉྫི་དོར་ཏེ་བུམ་པ་གསུམ་སྒྲེལ་ནས་བཞག །ཆོ་གའི་རྣམ་གཞག་ཞིབ་མོ་མཛད་དུས། ཐལ་མོ་སྦྱར་ཏེ་ལེགས་སོ་བརྗོད། རིགས་ཀྱི་ཡི་གེའི་ས་མཐའ་ཆད་ནས་རིག་ཏུ་བོས་པ་ལས། མིན་མིན་རིགས་ཟེར་བ་ཡིན་ཞེས་དང་། སྔགས་བཟླས་དུས་ངའི་ལད་མོ་གྱིས་ཟེར་ནས་མཁའ་འགྲོའི་སྐད་དུ་འབྲེལ་ལ་མ་འབྲེལ་བའི་གདངས་སྙན་པོ་བྱས། དངོས་གཞིའི་སྐབས་སུ། བློ་སྒོམ་དང་བྲལ་ན་དགའ་བ་ལ། བློ་སྒོམ་དང་བྲེལ་ན་ཨ་རེ་སྐྱིད། ཅེས་དོན་གྱི་ལྟ་སྒོམ་ཡིད་དཔྱོད་དང་བྲལ་བའི་གླུ་བླངས། མཆོད་པ་ངན་པ་ལ་འདིས་མི་ལྟོ་ཟེར། མཆོད་དབྱངས་སྙན་པོ་བྱས། ཚོགས་ཀྱི་དུས་བླ་མ་ལ་བདུད་རྩི་དྲངས་དུས། འདི་མཁའ་འགྲོའི་དམ་རྫས་ཡིན་པས་ཅིས་ཀྱང་བསྟེན་དགོས་ཟེར་ལྷག་མེད་དུ་དྲངས། དེའི་ཚེ་སློབ་མའི་ཚོགས་ཀྱང་ཉམས་ལའུར་ནས་གླུ་ལེན། བྲོ་བརྡུང་། ཐ་མལ་གྱི་གཉིད་ལས་འདས་པའི་འོད་གསལ་རྩེ་གཅིག་ཏུ་ཤར། དཔའ་བོ་དང་། མཁའ་འགྲོ་དང་། ཆོས་སྐྱོང་། སྣ་ཚོགས་པའི་གཟུགས་བརྙན་མངོན་སུམ་དུ་མཐོང་ནས། བུད་མེད་ནག་མོ་གཅིག་གིས་ཕྱེ་ཕུད་ཉམས་ཟེར་བ་དང་། དམ་ཅན་པ་མི་དཀར་པོར་བསྙན་ནས་ངའི་གཏོར་མ་ལ་དམར་རྒྱན་ཆད་ཟེར་བ་དང་། ཇོ་བོ་མདངས་ལྷ་མི་དཀར་ཅན་དུ་འོངས་ནས་གཏོར་མ་འདོད་པ་ལ་དམར་གཏོར་སྦྱིན་པས་མ་འདོད་པ་དང་། མཁའ་འགྲོའི་ཚོགས་ཀྱིས་བླ་མ་ལ་
གདུགས་འབུབས་པ་དང་། སྐོར་བ་བྱེད་པ་དང་ཧཱུྃ་དང་ཕཊ་ལ་སོགས་པའི་སྒྲ་དྲག་པོ་དང་། ཐུག་ཆོམ་ཆེན་པོ་སོགས་ཆོ་འཕྲུལ་བསམ་གྱིས་མི་ཁྱབ་པ་བྱུང་བས། རྣལ་འབྱོར་བ་གཅིག་གིས་དོ་ནུབ་གནམས་ངོ་ལོག་པ་འདུག། ཤ་དུམ་ཁྲག་དུ་མ་བྱེད་ལས་ཆེ་ཟེར་ནས་སྐྲག་པ་སོགས་བྱུང་། དེ་བཞིན་དུ་འོ་དེ་གུང་རྒྱལ་དང་། གཉན་ཆེན་ཐང་ལྷ་དང་། སྨན་མོ་མཆེད་བདུན་ལ་སོགས་གཏོར་མ་ལེན་དུ་འོངས། རྡོ་རྗེ་ཕག་མོ་སྐུ་མདོག་མཐིང་ཀ་རིན་པོ་ཆེ་དང་རུས་པས་བརྒྱན་པ་མངོན་སུམ་དུ་བྱོན་ནས་དྲིས་པས། དོ་ནུབ་དུས་གཉན་པས་ལས་ཅན་གྱི་སློབ་མ་ཉུལ་དུ་འོངས། བླ་མ་དམ་པ་སྐུ་ཁམས་བཟང་ཟེར། ད་ལོ་སྐུ་ཆག་བདོ་བས་ཇི་ལྟར་མཆི་དྲིས་པས། མཁའ་འགྲོ་མས། སངས་རྒྱས་ཀྱི་རྣམ་འཕྲུལ་ལ་བར་ཆད་ག་ན་འོང་། གདུལ་བྱ་ལ་དགོངས་པ་ཡིན། བི་མ་ལ་བོད་ཡུལ་དུ་བྱོན་པ་མི་ཤེས་སམ་ཟེར། ད་ཅི་ཙམ་བཞུགས་དྲིས་པས། ལུག་ལོ་ཕྱི་མའི་བར་བཞུགས། དེ་ནས་གདུལ་བྱ་དང་བསྟུན་པའི་ངེས་པ་མེད་ཟེར། འོ་ན་ང་བླ་མ་ཀུ་མ་རཱ་ཛས་གཞན་དོན་ལ་བསྐུལ་བ་འདི་བླ་མ་ལ་ཁྱེད་ཀྱིས་བསྐུལ་ལམ་དྲིས། འོ་འོ་དེ་ཀ་དེ་ཀ་ཟེར་དུས། ངས་གཅིག་པོར་བསྒྲུབས་ནས་འོད་ལུས་སྒྲུབ་བམ། གཞན་དོན་བྱས་ན་སེམས་ཅན་ལ་ཕན་ཐོགས་འོང་ངམ། ལོ་ཅི་ཙམ་ཐུབ་དྲིས་པས། འོད་ལུས་འགྲུབ་ཀྱང་སེམས་ཅན་ལ་ཕན་འདོགས་དགོས། གཞན་དོན་འུར་འུར། ད་ལོ་ནས་སུམ་ཅུ་ཐུབ་ཟེར། ང་ལ་བཀའ་སྲུང་ཇི་ལྟར་ཡོད་དྲིས་པས། མང་མང་བླ་མའི་ཐམས་ཅད་ཁྱེད་ལ་ཡོད། ཁྱད་པར་རྡོ་རྗེ་གཡུ་སྒྲོན་མ་ཟེར། དེ་བཞིན་དུ་འགྲོ་དོན་ལྷོ་ནུབ་ཕྱོགས་ན་ཡོད། ཚེ་ཕྱི་མ་འདི་བས་ཀྱང་འགྲོ་དོན་ཆེ་ཟེར། འོ་ན་མཁའ་འགྲོ་སྙིང་ཏིག་ནས་བཤད་པ་དེ་ཡིན་ནམ། དབང་ཁྲིད་གདབ་ཏུ་རུང་ངམ་དྲིས་པས། འོ་དེ་ཀ་དེ་ཀ་མ་ནོར་མ་ནོར། ཆོས་ཀྱི་བདག་པོ་ཁྱེད་
རང་ཡིན་པ་ལ་ལོས་ལོས་ཟེར། ཡང་མི་རྣམས་ཀྱིས་ཟོག་པོར་འཛིན་དུ་མི་འོང་ངམ་དྲིས་པས། མིའི་ཁ་ལ་གཏད་པ་ཅི་ཡོད། སྐལ་ལྡན་རྣམས་ཁོ་མོས་སྡུད། སྐལ་མེད་སངས་རྒྱས་ལའང་སྐུར་བ་འདེབས་ཟེར། སྙིང་ཏིག་གི་ཆོས་བཀའ་རྡོ་རྗེ་གཡུ་སྒྲོན་མའི་གནས་སུ་འབྱེད་དམ་དྲིས་པས། འདི་ན་མཁའ་འགྲོ་རང་བཞིན་གྱིས་འདུ་བས་འདིར་འབྱེད་དགོས་ཟེར། བུམ་ཐང་གི་གཏེར་ཁའི་ལུང་ཡང་གསལ་་བར་བཤད། སློབ་དཔོན་ཆེན་པོ་དང་མཇལ་ལམ་དྲིས་པས། ལུང་གསུམ་གྱི་ཕུ། རི་གསུམ་གྱི་མདའ། བྲག་ཆུང་ངེ་བ་ཁ་ནུབ་ཏུ་བལྟ་བའི་གཡས་ཟུར་དུ་མཇལ་ཟེར། བི་མ་ལ་དང་ནམ་མཇལ་དྲིས་པས། མཇལ་ཟིན་འདུག་པ་ལ་ཟེར་རོ། །ངས་རྟོགས་པའི་ལྟ་བ་འདི་སྙིང་ཏིག་གི་དགོངས་པའི་མཐར་ཐུག་གམ་དྲིས་པས། མཐར་ཐུག་པ་ལ་ནོར་འཁྲུལ་མེད་ཟེར། སློབ་དཔོན་རིན་རྡོར་གྱིས་སྤང་སྒང་པ་རིན་ཆེན་རྡོ་རྗེ་གན་བཞུགས་དྲིས་པས། བླ་མ་ལ་མཛུབ་མོ་བཙུགས་ནས་འདི་ན་བཞུགས་འདུག་ས་ཟེར། དེར་བླ་མས། ཁོང་སྐྱེ་བ་དེའི་འོག་ཏུ་བུམ་ཐང་དུ་སྐྱེ་བ་ལ་ངག་ན་ཡིན་གསུངས་པས། དེ་ཀ་ལྟར་སྐྱེ་བ་མིན། བར་དུ་ལོངས་སྐུའི་ཞིང་ཉུལ་དགོས་པ་དེ་སློབ་དཔོན་རིན་ཆེན་རྡོ་རྗེས་གཏེར་ཐོན་རྗེས་ལོ་འགའ་ཡར་གསོད་ནས་སྒྲུབ་པ་མཛད་ན་རང་དོན་དུ་འོད་གསལ་ལོངས་སྐུའི་རྩལ་སྦྱངས་དང་། གཞན་ལ་ཕན་པ་རྒྱ་ཆེན་པོ་འོང་བ་ལ། མ་གསོད་པས་སྐུ་ཚེ་མཐར་མ་ཕྱིན། ད་ལྟ་ཁྱེད་དུ་སྐྱེས་དུས་འོད་གསལ་གྱི་སྣང་བ་ལམ་དུ་འཁྱེར་བ་འདི་ནི་ལོངས་སྐུའི་ཞིང་ཁམས་དར་ཅིག་ཉུལ་བ་དེ་ཡིན་ཟེར། ངས་ཕུང་པོ་ལྷག་མེད་ཨེ་འགྲུབ་དྲིས་པས། གཅིག་པུར་བསྒོམ་ན་ད་ལྟ་འགྲུབ། གཞན་དོན་མཛད་པས་བར་དོར་གྲོལ། སྤྲུལ་པས་བུམ་ཐང་དུ་སྐྱེ་བ་བླངས་གཞན་དོན་བྱས། དེའང་ནུབ་ཕྱོགས་ཨོ་རྒྱན་གྱི་ཡུལ་དུ་གཤེགས་
ནས་སངས་རྒྱ་བའི་ཚུལ་སྟོན་གསུངས། ཡང་ངས་སྙིང་ཐིག་གིས་ཕན་ཐོགས་བི་མ་ལ་དང་། མཁའ་འགྲོའི་གཉིས་གང་ཆེ་དྲིས་པས། གཉིས་ཀས་ཕན་ཐོགས། བི་མ་ལ་རྒྱ་ཆེ་ལོ་བརྒྱ། མཁའ་འགྲོའི་སྙིང་ཏིག་ལོ་ལྔ་བརྒྱར་གནས། དེ་ནས་མགོ་རྩོམ་པ་ཡིན་ཟེར། དེར་བླ་མ་ཡང་ཐུགས་ཉམས་འུར་ནས་སྐུ་བཞེངས་ཏེ་རྡོ་རྗེའི་གླུ། ཚེ་འདི་ཡང་བདེ་སྟེ་ཕྱི་མ་སྐྱིད། བར་དོ་རང་ངོ་ཤེས་པས་བདེ། །ད་ནི་བདེ་ནས་བདེ་བར་འགྲོ། །གླུ་མཆོད་པར་འབུལ་ལོ་དཀོན་མཆོག་གསུམ། །ཐུགས་དགྱེས་པར་མཛོད་ཅིག་མཁའི་འགྲོའི་ཚོགས། །ཞེས་པའི་མཐའ་ཅན་དེ་གནང་། ད་དུང་མཁའ་འགྲོའི་སྣང་བ་བསམ་གྱིས་མི་ཁྱབ་པ་མཐོང་ཞིང་དེ་ཐམས་ཅད་མཐར་བླ་མ་ལ་ཐིམ། བླ་མ་ཡང་རེས་ལོངས་སྐུར་གནས་འགྱུར་བ་སོགས་མཐོང་། དེར་ཉེ་བརྒྱད་ཀྱི་ཉིན་ཞིག །ལྷོ་ནུབ་མཚམས་ནས་སློབ་དཔོན་ཆེན་པོ་སྐུ་མདོག་དཀར་གསལ་ཟ་འོག་གི་དར་དང་། ཤ་བའི་མཉེན་ཞུ་ཅན་འཁོར་དཔག་ཏུ་མེད་པས་བསྐོར་བ་བྱོན་ཏེ་བླ་མར་ཐིམ་པ་མཐོང་། དེའི་ནུབ་མཁའ་འགྲོ་མ་རུས་པའི་རྒྱན་ཅན་ནམ་མཁའ་ལ་བུན་བུན་འགྲོ་བས་བླ་མར་མཆོད་པ་བྱེད་ཅིང་། བུད་མེད་སྨུག་ནག་གསུམ་བྲོ་འཁྲབ་པ་དང་། ངེད་ཡོང་ཡོང་བདེ་ཆེན་གྱི་གནས་ནས་ཡོང་། ལས་ཅན་གྱི་སློབ་མ་ཉུལ་དུ་འོངས། དམ་ཚིག་གི་གཙང་སྦྲ་བལྟ་རུ་འོངས། འགྲོ་དོན་མཛོད་ཅིག་རིགས་ཀྱི་བུ། ཟེར་བ་དང་། ཡང་ནང་མཆོད་མཛད་པའི་དུས་སློབ་དཔོན་ཆེན་པོའི་གཡས་ན་བི་མ་ལ། གཡོན་ན་རྡོ་རྗེ་ཕག་མོ། མདུན་ན་མཁའ་འགྲོ་མ་མང་པོ་མི་རྐང་འབུད། རྒྱབ་ན་སྔགས་པ་མང་པོ་འཆམས། མཁའ་འགྲོ་མ་གསེར་གྱི་གོ་ཞུ་བ་ཅན་མང་པོས་གླུ་གར་བྱེད་ཅིང་བསྐོར་བའི་དབུས་ན་བླ་མ་བཞེངས་ནས། དགའ་བོ་སྐྱིད་དོ་རྣལ་འབྱོར་ཀུན། །དུས་དོ་ནུབ་འོག་མིན་དག་པའི་ཞིང་། རང་ལུས་ཞི་ཁྲོའི་ཕོ་བྲང་ན། །སྟོང་གསལ་རྒྱལ་བའི་དཀྱིལ་འཁོར་རྒྱས།
སངས་རྒྱས་ཕྱིན་མེད་དེ་ནང་ན་ཡོད། །ཅེས་དང་། སེམས་གཅིག་པུར་གནས་པའི་བསམ་གཏན་པ། །ཡིད་གཅིག་ལ་མི་འཛིན་གང་བདེར་ཐོང་། །སེམས་འཕྲོ་ཡང་སྟོང་ལ་གནས་ཀྱང་སྟོང་། །གང་ཤར་ཡེ་ཤེས་ཀྱི་རོལ་པ་ཡིན། །ཞེས་པ་ལ་སོགས་རྡོ་རྗེའི་གླུ་བཞེངས། དེ་དུས་རྡོ་རྗེ་གཡུ་སྒྲོན་མ་དཀར་མོ་མཆེད་བདུན་དང་བཅས་པ་བྱོན་ནས་དེའི་གནས་སུ་གཤེགས་པ་ཞུ་ཟེར། བླ་མས་ང་ཁྱེད་ཀྱི་གནས་སུ་རྒྱུན་དུ་སྡོད་དགོས་གསུངས་པས། རྒྱུན་དུ་བཞུགས་ན་དགའ་སྟེ་དགུན་སྟོད་ལས་མི་བཞུགས་པ་འདྲ་ཟེར། ཁྱོད་ང་ལ་ཅུའི་ཕྱིར་འགོ་དྲིས་པས། གུ་རུའི་དམ་འོག་ཏུ་ཆུད་པས་གཏེར་གྱི་ཕྱི་ལ་འབྲང་ཟེར། དེར་ཆོས་ནི་ཕ་གིར་ཡོད། འདོན་མཁན་ནི་ཤི། འདིར་ཅི་བྱེད་བྱས་པས། ཆོས་ཕ་གི་ན་ཡོད་ཀྱང་དོན་འདི་ན་ཡོད། ཁྱེད་ཚེ་འཕོས་ཀྱང་སྐལ་ལྡན་ཚེ་མ་འཕོས་པས་ཡོང་བ་ཡིན་ཟེར། བཀའ་སྲུང་རྣམས་ལུང་བསྟན་ཅིང་། འདི་ཤིན་ཏུ་གཉན་པས་སྐུ་ཚེ་ལ་བར་ཆད་འོང་ཉེན་ཡོད། ཁྲིད་ཐེབས་ཉུང་ན་དགའ་ཟེར། ངའི་གཏེར་ཤོག་རྣམས་ཨེ་ཡོད་དྲིས་པས། སིབ་སིབ་དེད་རྣམས་ཀྱིས་ཡིད་བསྐུལ་བ་ཡིན་མོད་ཟེར། ཡང་ངས་ཁྱེད་ལ་དབུ་རུར་དངོས་གྲུབ་བྱིན་པ་མི་དྲན་ནམ་ཟེར། སྔར་ཅོག་ལའི་བྲག་ཕུག་གི་དེ་དྲན་ནས་རྡོ་རྗེ་གཡུ་སྒྲོན་མ་ཨེ་ཡིན་བྱས་པས། མིན་མིན་རྡོ་རྗེ་ཕག་མོ་ཡིན་ངོ་མ་ཤེས་སམ་ཟེར། འདི་ནི་འཇིག་རྟེན་པའི་གཟུགས་ཀྱིས་ཕྲིན་ལས་བྱས་པ་དང་། འདས་པའི་གཟུགས་ཀྱིས་མཆོག་གི་དངོས་གྲུབ་སྟེར་བའི་རྣམ་པ་ཆ་ཕྱེད་དགོས་པའོ། །འདི་ནས་ཐིག་ལེ་གཙོ་བོར་བཤད་ནས་དབང་གསུམ་པ་རྟེན་ཅན་དུ་བསྐུར་བ་ཇི་ལྟར་ལགས་དྲིས་པས། དེ་ཆགས་ཅན་ལམ་དུ་འཇུག་པ་ལ་དགོས་པ་ཡིན། ཆགས་བྲལ་ལ་ཡིད་རིག་ཙམ་གྱིས་ཆོག་གསུངས། ངོ་སྤྲོད་ཀྱི་སྐབས་སུ། རྟོག་པ་སྐྱེ་མེད་དུ་འཇོག་པ་དང་། བློ་རྩིས་མེད་དུ་འཇོག་པ་གང་ཡིན་དྲིས་པས།
རྟོག་པ་ལ་བརྟན་པོས་ཅི་བྱེད། ཡེ་གྲོལ་ཀློང་ཡངས་ཆེན་པོར་ངོ་སྤྲོད་ཅིག་ཟེར། འོ་ན་སྙིང་ཏིག་འདི་བཤད་མི་མང་པོ་ནི་སྣང་ན་ངས་བཤད་ཅི་དགོས། ལུང་བྱེད་པ་ཀརྨ་པ་དང་། རིན་ཆེན་གླིང་པ་སོགས་པའང་འདུག་པས་སོ་བྱས་པས། བཤད་ཚུལ་དེ་དག་ལ་ངེད་མི་མགུ། ལུང་དང་རྫ་ལའང་ཡོང་སྟེ། དེས་གར་ཆོག། བདག་པོ་རེ་ཡོད་པ་དེ་དགོས་པ་ཡིན་མོད་ཟེར་རོ། །རིན་ཆེན་གླིང་པའི་གཏེར་ཁ་དྲིས་པས་ཡིན་པ་ལ་ཡིན། དག་རྒྱུ་མེད་ཟེར། ངས་ཁྱེད་མ་བསྒོམས་པར་གྲུབ་པའི་རྒྱུ་དྲིས་པས། ང་ལ་སྒོམ་པའི་ལྷ་འདུག་གམ། བཟླས་པའི་སྔགས་འདུག་གམ། མཆོད་པའི་ཡུལ་འདུག་གམ། རྣལ་འབྱོར་པ་དམ་ཚིག་དང་རྟོགས་པར་ལྡན་པ་ཀུན་ལ་ང་རྒྱུན་དུ་ཡོད་པ་མི་ཤེས་སམ། ཁྱོད་དང་ཚེ་རབས་ཐམས་ཅད་དུ་འདུ་འབྲལ་མེད་ཟེར། མཆིམས་ཕུར་ལྷ་ལྕམ་གྱི་ནོར་ཡོད་པ་དེ་ཅི་འདྲ་ཞིག་འདུག་དྲིས་པས། བྲག་ལྷ་བཤོས་འདྲ་བ་རྩེ་མོ་མེད་པ་གཅིག་ན་འདུག། ད་དུང་དུས་ལ་མ་བབ་ཟེར། བི་མ་ལའི་གཏེར་ཇི་ཙམ་ན་འདོན་དྲིས་པས། ད་ནས་ལོ་བཅོ་ལྔ་ན་སྔགས་པ་དཀར་པོ་གཅིག་གིས་བཏོན་ནས་དར་བར་བྱེད། ཟབ་པ་བོད་བཞི་ཁྱེད་རང་གི་ལག་ན་འོང་བར་འདུག་ཟེར། དེར་ཟླ་བ་ཚེས་པའི་ཚེས་བཅུ་གཅིག་ལ་རྣལ་འབྱོར་བ་འོད་ཟེར་གོ་ཆ་དཔེ་ལེན་དུ་བཏང་ནས་ལམ་དུ་འོང་དུས། འཇའ་ཚོན་གྱིས་དཔེ་ལ་ཟུག་ཅིང་འཁོར་བ་དང་། ཁྱད་པར་ཟུང་མཁར་མདའི་མཆོད་རྟེན་གྱི་ཉེ་ལོགས་ཕྱུག་པོ་བྲག་ཅེས་བྱ་བར་སླེབས་པའི་མཚན་མོ་རི་མོ་ཅན་ནས་འདིའི་བར་འཇའ་ཚོན་ཁ་དོག་སྣ་ལྔས་འབྲེལ་བ་རྣལ་འབྱོར་བ་ཕོ་མོ་ཀུན་གྱིས་མཐོང་ངོ། །དེར་ཚོགས་འཁོར་སྐོང་ལ་སོགས་པ་མཛད་ནས་མན་ངག་མཁའ་འགྲོའི་སྙིང་ཏིག་གི་ཆོས་སྒོ་ཕྱེད། མཚན་མོའི་འོད་གསལ་གྱི་སྣང་བ་ལས་ཆོས་སྐུའི་དགོངས་པ་ཀ་དག་གི་དབྱིངས་སུ་འཁྱིལ་ཚུལ། དེའི་རྩལ་སྣང་ལོངས་སྐུར་འཆར་ལུགས། ཕྱིར་གསལ་ལས་
སྤྲུལ་པའི་སྐུ་འགྱེད་ཅིང་། རིགས་དྲུག་གི་འཆར་ཚུལ་སོགས་འོད་གསལ་གྱི་ཆོས་སྐད་སྒྲ་བོ་ཆེ་དང་། རྩིས་པོ་ཆེ་དག་གིས་ཀྱང་ཕྱོགས་མི་མཚོན་པའི་ངོ་བོའི་བཞུགས་ཚུལ་ཆེན་པོ་གང་ཡིན་པ་བླ་མ་ཡི་དམ་མཁའ་འགྲོའི་ཚོགས་ཀྱི་ཐུགས་རྒྱུད་ལ་མངོན་དུ་གསལ་བར་བྱིན་གྱིས་བརླབས་ཤིང་། མཁའ་འགྲོ་མས་ངོ་སྤྲོད་ཅེར་མཐོང་དུ་མཛད། དེའི་ཚེ་མན་ངག་མཁའ་འགྲོའི་ཡང་ཏིག་གི་ཡིག་ཆ་མཛད་དུས་སློབ་དཔོན་རིན་པོ་ཆེ་ཐུགས་སྒྲུབ་ཀྱི་ཆ་ལུགས་སུ་བྱོན། གཡས་ན་མཚོ་རྒྱལ་དང་། གཡོན་ན་གཡུ་སྒྲོན་མས་ཚིག་དཔོན་པ་རྣལ་འབྱོར་མ་མཁའ་འགྲོའི་མཚན་རྟགས་ཚང་བ་གཅིག་གིས་ཀྱང་མཐོང་། ཁྱད་པར་དུ་ཡེ་ཤེས་མཚོ་རྒྱལ་ཉིན་ཞག་དྲུག་གི་བར་དུ་དངོས་སུ་བྱོན་ནས་མཁའ་འགྲོའི་སྙིང་ཏིག་བརྡ་དོན་དཔེ་གསུམ་གྱི་ངོ་སྤྲོད་གཏད་རྒྱ་དང་བཅས་མཛད་པས་དམིགས་པ་དང་། ངོ་སྤྲོད་ལུགས་དང་། བརྗོད་པའི་ཚུལ་ངོ་མཚར་ཅན་སྔ་ནམ་གྲགས་ཤིང་། ཡི་གེ་ན་མི་གསལ་བ་མང་པོ་ཐུགས་ལ་རང་རྡོལ་དུ་བྱོན་པས་གངས་རིའི་ཁྲོད་ན་གཞན་སྙིང་ཐིག་གི་ཡི་གེ་ཟབ་མོར་གྲགས་པ་ཇི་སྙེད་ལའང་། ཀུན་ཏུ་བཟང་པོ་གཉིས་པས་ཆོས་ཀྱི་འཁོར་ལོ་བསྐོར་བའི་དགོངས་གཏེར་རྒྱ་མཚོའི་རྡོ་རྗེའི་གནས་འདི་ན་གསལ་བའི་ཟབ་གནད་ཀྱི་ཆ་ཤས་ཀྱིས་ཀྱང་མ་གོས་པ་ཉིད་དུ་མཐོང་བས། ཡིག་ཆ་འདི་ལ་མ་བརྟེན་པ་གང་ཞིག་རི་མོའི་མར་མེ་དང་མཚུངས་པ་ཉིད་དུ་རིག་པར་བྱས་ནས་བསྟན་པ་འདི་ལ་གཅེས་སྤྲས་སུ་བྱ་བར་འོས། འདི་་ལྟར་གདམས་པའི་ས་བོན་ཕལ་ཆེར་གནས་འདིར་བྱུང་ཡང་། གཏན་ལ་འབེབས་པ་གངས་རི་ཐོད་དཀར་དུ་མཛད་པས་སྦྱར་བྱང་ལ་དེ་ལྟར་ཐེབས་པ་ཡིན་ནོ། །ལར་ཆོས་འདི་མཁའ་་འགྲོའི་སྙིང་ཁྲག་ལྟ་བུར་གྱུར་ལ་གནས་འདིའང་བྱིན་རླབས་ཆེ་བས་རྩ་བ་གསུམ་དང་མཁའ་འགྲོའི་འདུ་བ་ཟད་མི་ཤེས་པ་དང་། རྨ་བྱའི་གདུགས་རིན་པོ་ཆེའི་ཏོག་གིས་མཚན་པ་བླ་མའི་དབུ་སྟེང་ན་བཟུང་བ་མཐོང་བ་དང་། དཀྱིལ་འཁོར་གྱི་ཐིག་མཛད་།
དུས་ཐིག་སྣ་བུད་མེད་དམར་མོས་འཛིན་པ་དང་། རེ་ཁཱ་དགྲམ་པའི་ཚེ་བུད་མེད་གསེར་གཡུའི་ལན་ཚར་ཅན་གྱིས་འདྲི་རོགས་བྱེད་པ་དང་། དབང་གོང་མའི་དུས་སློབ་མ་བདུན་ཙམ་ཚོགས་པ་ལ། ཤངས་ཁྲག་གློ་བུར་དུ་བྱུང་ནས། བླ་མའི་གསུང་གིས་དབང་འདི་ལ་གསུམ་ལས་མི་ཚུད་པ་ལ་གྲངས་ཐལ་བས་ལན། ཁྱེད་བཞི་ཕྱིར་དེངས་གསུངས་པས་དབང་ཁང་ལ་འཇའ་ཚོན་ཟུག་པ་དང་། ནམ་གྲུ་རེ་མ་ཏིས་མངོན་སུམ་དུ་འོངས་ནས་ང་ལ་གཏོར་མ་མི་སྟེར་བ་ཨེ་ཡིན། ངས་དཀའ་ལས་ཡུན་རིང་རབ་བྱས་ཟེར་ནས་རང་ཉིད་གཙོ་འཁོར་རྣམས་ཀྱི་མངོན་རྟོགས་གསལ་བར་བཤད་ཅིང་། གཏེར་གྱི་ལུང་བསྟན་དང་ཆོ་འཕྲུལ་ཆེན་པོ་བསྟན་ནས། ང་ནང་འོད་གསལ་གྱི་གཏེར་ཁ་ཕྱེད་པ་ལ། །བྲག་སེར་ཀའི་གཏེར་གྱིས་དགོས་པ་མེད། །གཏེར་ཡོད་ཀྱང་ཆོག་ལ་མེད་ཀྱང་ཆོག། སྐལ་ལྡན་ཡིན་ཀྱང་ཆོག་ལ་མིན་ཀྱང་ཆོག། ཆོས་ཟད་བློ་ཟད་ཀྱི་རྣལ་འབྱོར་ལ། ཁྱེད་གཏེར་སྲུང་གིས་ཡུས་ཆེ་འཚོང་མི་དགོས། ཞེས་གསུངས། རྒྱབ་ཆོས་དང་རིན་པོ་ཆེ་གསང་བའི་ངོ་སྤྲོད་མཛད་པའི་ཚེ། ཡེ་ཤེས་མཚོ་རྒྱལ་གྱིས་བུམ་པ་བསྣམས་ནས་དབང་བསྐུར་བ་མཐོང་བས་ཐམས་ཅད་འུར་ལངས་ཕྱག་འཚོལ་ཟེར་བ་བྱུང་། བར་དོ་དང་འོད་གསལ་སྦུབས་འཇུག་གི་ངོ་སྤྲོད་མཛད་དུས་མཁའ་འགྲོ་མ་རྣམས་མཉེས། ངའི་ཆོས་འདི་ལ་མི་ལས་མི་མ་ཡིན་གཙིགས་ཆེ་ཞིང་དོན་གཉེར་དང་འདུན་པ་ཆེ་བར་འདུག་ཁྱེད་རང་ཚོ་སེམས་ལ་ཞོག་གསུང་། འོད་གསལ་ཡེ་ཤེས་ཀྱི་ངོ་སྤྲོད་མཛད་པའི་ཚེ་བར་སྣང་ཐམས་ཅད་མཁའ་འགྲོས་གང་ནས་ཐལ་མོ་སྦྱར། ནུབ་མོ་སྔགས་སྲུང་མ་བབས་ནས་གར་བྱེད་པ་ལ། བླ་མས་ཁོ་བོ་སྙིང་ཏིག་དེ་ལྟར་དུ་སྟོན་པ་ཡིན། ཁྱེད་བཀའ་སྲུང་དང་མཁའ་འགྲོ་རྣམས་ཨེ་དགའ་གསུངས་པས། གུ་རུ་དང་ཡེ་ཤེས་མཚོ་རྒྱལ་དེ་བཞིན་གསུང་། གཞན་དེ་ལྟར་ཤེས་པ་ག་ན་ཡོད་དོ་མཚར་ཆེ། སྤྱིར་མཁའ་འགྲོ་ཐམས་ཅད་དགའ།
ལྷག་པར་ཨོ་རྒྱན་རྫོང་ན་གསོལ་བ་འདེབས་པ་ཅིག་མཉེས་ནས་གདའ་ཟེར། དེ་ནས་སྐྱེས་བུ་ཆེན་པོ་བྱུང་ནས་ཨོ་རྒྱན་རྫོང་དུ་འབྱོན་པར་བསྐུལ། ཁྱེད་ལ་སློབ་མ་འགྲོ་དོན་ནུས་པ་སུམ་ཅུ་འོང་། དེའི་ནང་ནས་བྱང་སེམས་ཅན་ལ་ཕན་པ་ཆེ་བ་བཅུ་གཅིག་འོང་། ཁྱད་པར་ཅན་དགུ་ཡོང་། ཁྱེད་ཚོ་བླ་མ་འདི་དང་ཕྲད་པས་འཚེངས་པ་ཡིན་ཟེར། ཆོས་སྐྱོང་གི་གཏད་རྒྱ་བྱེད་དུས། ཤན་པ་སྲོག་སྒྲུབ་མས་ངའི་སྒྲུབ་ཐབས་མི་ཀློག་པ་ཞུ་ཟེར་བའང་བྱུང་། དེ་ལྟར་མཁའ་འགྲོ་སྙིང་ཏིག་གི་དབང་ཁྲིད་ཐམས་ཅད་རྫོགས་པའི་ནུབ། ཁ་སིང་ནས་མཁའ་འགྲོ་མ་རྣམས་ཀྱིས་དངོས་གྲུབ་བྱིན་པ་ཡིན། དོ་ནུབ་བེས་ཀྱང་ཨེ་ཡོང་ལྟ་ཡི་ཆང་ལ་ཆུ་རྐྱོབ་ཅིག་གསུངས། ཡོད་ཚད་བཙགས་པས་རྫ་ཆུང་གང་བྱུང་། དེས་ཆོག་ལས་ཆེ་ཞུས་པས། དེས་མི་ལྡང་ད་དུང་ཆུ་རྒྱོབ་ལ་ཚོགས་གསུངས། དེ་བཞིན་བྱས་པས་བཙགས་ཚད་ཆད་དུ་བྱུང་ནས་དེར་ཚོགས་པ་ཐམས་ཅད་བཟིབ་ཙམ་སོང་བས། དངོས་པོ་སྤྲུལ་བསྒྱུར་བྱ་བ་དེ་ལྟར་ཡིན་གསུངས། དེ་ནས་གཡུ་སྒྲོན་མས་ཀྱང་ངའི་གནས་སུ་གཤེགས་པ་ཞུ་ཞེས་བསྐུལ་ནས་ཞལ་གྱིས་བཞེས་ཙ་ན། ཤིན་ཏུ་དགའ་བའི་ཚུལ་གྱིས་ཁོ་མོ་སྔོན་ལ་འགྲོ་ཟེར། དེས་ནམ་གྲུ་བབས་ནས་བླ་མ་མི་གཤེགས་པར་ཞུ་ཟེར། ཁྱེད་མི་མ་ཡིན་རྣམས་ལངས་ཆོས་དེ་འདྲ་བཤད་ཀྱང་མཁོ། དགའ་མི་དགའ་བློའི་ཆོ་འཕྲུལ་ཡིན། ང་གང་ཡོད་སར་འོངས་པས་ཆོ་ག་གསུངས་ནས་ཏིང་ངེ་འཛིན་གྱི་དབང་བསྐུར་ཞིག་མཛད་པས་ཐུགས་ལ་བཏགས་ཟེར། ཁ་སང་གར་དེངས་དྲིས་ལས། འབྲོག་ཏུ་རུ་སྡུད་ཅིག་ལ་ཕྱིན་ཟེར། དེ་དུས་ཕྱུགས་ནད་མང་པོ་བྱུང་བར་གྲགས། དེ་ནས་རྣལ་འབྱོར་ཕོ་མོ་རྣམས་ཀྱིས་ཀྱང་རང་རང་གི་གོས་དང་རིན་པོ་ཆེའི་མཎྜལ་ཕུལ། སྒྲུབ་པའི་དམ་བཅའ་བྱས་པས། ངའི་ཆོས་འདི་ལ་གཏོང་ཕོད་དང་སྒྲུབ་པའི་དམ་བཅལ་བརྩོན་པ་མང་པོ་ཡོད་གསུངས། ཡང་འོད་
གསལ་སྦུབས་འཇུག་གི་གདམས་པ་གསུངས་ནས། ངའི་མན་ངག་འདི་དག་འཛམ་བུའི་གླིང་ན་དཀོན་པ་ཡིན། སྣོད་ཀྱིས་འཆུན་ན་འོད་ལུས་མྱུར་དུ་འགྲུབ་བོ་གསུངས། བསམ་ཡས་མཆིམས་ཕུ་ནས་ཕྱགས་ཕེབས། ཕྱུག་པོ་བྲག་ཏུ་ཚོགས་འཁོར་མཛད། གཡུ་སྒྲོན་མས་བསུ་བའི་རྣམ་པ་ཡང་བྱས། དེ་ནས་ཤུག་གསེབ་ཏུ་གདན་དྲངས་དུས་རྣལ་འབྱོར་མ་ཞིག་ལ་མཁའ་འགྲོ་བབས་ནས་བླ་མ་ཨོ་རྒྱན་རྫོང་དུ་གཤེགས་པར་ཞུ་ཟེར། དེ་ནས་གངས་རི་ཐོད་དཀར་ཨོ་རྒྱན་རྫོང་འོད་ཟེར་སྤྲིན་གྱི་སྐྱེད་མོས་ཚལ་དུ་ཕེབས། རྣལ་འབྱོར་བ་འོད་ཟེར་གོ་ཆས་གསོལ་བ་བཏབ་ནས་མཁའ་འགྲོ་ཡང་ཏིག་གཏན་ལ་ཕབ། དེའི་ཚེ་ནམ་མཁའ་འཇས་ཁེངས། མཁའ་འགྲོའི་སྣང་བ་དང་ཆོ་འཕྲུལ་ཟད་མ་ཤེས་པ་ཀུན་གྱི་མཐུན་གྲུབ་ཏུ་བྱུང་། དེ་དག་གི་བར་སྐབས་ཅི་རིགས་པར་བླ་མའི་དྲུང་དུའང་གདམས་ངག་གཞུན་ཐར་བཅད། གང་དུ་བཞུགས་སར་སྒྲུབ་པའི་རྒྱལ་མཚན་བཙུགས་ནས་བླ་མ་མཉེས་པར་བྱས། འདི་སྣང་ལ་ཆགས་ཞེན་མེད་ཅིང་འཁོར་འདས་ལ་རེ་དོགས་སུ་འཛིན་པ་དག་པས་དགོན་གནས་དང་གཞི་འཛིན་པའི་འདུ་འགོད་མ་མཛད། བླ་མའི་དྲུང་དུ་འཁོར་གསུམ་ཡོངས་སུ་དག་པའི་འབུལ་བ་ལན་ལྔ། འབུལ་མོ་ཆེ་གཉིས་དང་། བདུན་རྣམ་དག་གིས་མཆོད། ཟླ་བ་བྱུང་ངོ་ཅོག་གི་ཚེས་བཅུ་རྣམ་གཉིས་དང་། བརྒྱད་མཆོད་བཟུང་ནས་དཔའ་བོ་དང་མཁའ་འགྲོ་རྣམས་ཚོགས་གཏོར་རྒྱ་ཆེན་པོས་མཉེས་པར་མཛད། གནས་འདིར་འོད་གསལ་ཐོད་རྒལ་གྱི་གསེང་ལམ་ལས་རིག་པ་ཚད་ཕེབས་ཀྱི་གྲོང་ཁྱེར་ག་ལ་བ་དེར་བྱོན་ཏེ་རྒྱུན་གྱི་རྣལ་འབྱོར་ལྷུམས་སུ་ཞུགས། ཡི་དམ་གྱི་ལྷ་དཔག་ཏུ་མེད་པ་ཞལ་མཇལ། ཁྱད་པར་སློབ་དཔོན་བི་མ་ལའི་ཞལ་གཟིགས་ནས། ངའི་སྙིང་ཏིག་འདི་དོན་བསྡུས་གོ་སླའི་ཉིང་ཁུ་ཞིག་བསྡེབས། ཀུ་མ་རཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་ལ་སྟོན། དེ་
ནས་ཀྱང་སྣ་ལ་ཨ་ཡིག་གིས་མཚན་པའི་གཞོན་ནུའི་མིང་ཅན་བདུན་འབྱུང་བས་ཆོས་འདི་འཛིན་སྤེལ་བྱེད་པར་ལུང་བསྟན་པས་ཡང་ཏིག་ཡིད་བཞིན་ནོར་བུ་ཆོས་སྡེ་སུམ་ཅུ་རྩ་ལྔ་པར་གདམས། ས་མོ་ཡོས་ཀྱི་ལོར་ཁོ་བོ་ཅག་ལའང་མཆིམས་ཕུ་ནགས་ཀྱི་དུར་ཁྲོད་ཆེན་པོར་མངོན་སུམ་པའི་ཞལ་ལན་གསུམ་དུ་བསྟན་ཅིང་གསོལ་བ་དྲག་པོ་བཏབ་པ་ལས། མི་དང་མི་ཟློ་བ་ལྟ་བུའི་གསུང་གིས་དབུགས་འབྱིན་ཆེན་པོ་ཐོབ། ཤིང་རྟ་ཆེན་མོ་ལ་སོགས་པའི་མན་ངག་གབ་པ་ཐམས་ཅད་འདིས་གསལ་བ་ཡིན་གསུངས་ནས་གླེགས་བམ་ཞིག་ལག་ཏུ་སྤྲད། མན་ངག་དང་བྱིན་རླབས་ཀྱི་རྗེས་སུ་གདམས་པ་ཐམས་ཅད་སྩལ་བས་ཆོས་ཉིད་ཀྱི་དྲན་པ་མཁའ་ལྟར་དག། ཆོས་ཚུལ་རྒྱ་མཚོ་དང་ཁྱད་པར་ཀུན་མཁྱེན་བླ་མ་ཉིད་ཀྱི་གཞུང་ལུགས་དང་མན་ངག་ཐམས་ཅད་ལ་གོ་བ་ཅུང་ཟད་རྙེད་པ་འདི་བྱུང་། རྟེན་འབྲེལ་དེ་ལས་གསུང་རབ་འདི་དག་གཅིག་ཏུ་ཚོགས་པའང་དཀོན་པའི་གནས་སྐབས་སུ་རིང་མོ་ཉིད་ནས་གྱུར་བ་ལ། སྡེ་དགེ་བཙད་པོའི་ཁབ་ཏུ་པར་གྱི་སྒོ་འཕར་ཕྱེ་མ་ཐག་པའང་གནས་དེར་སོན་པས་ལུང་རྒྱུན་གསོ་བའི་རྟེན་འབྲེལ་ཆེན་པོ་དང་། རིང་མིན་མཆིམས་བུ། ཀོང་པོ། གཡོ་རུ་རྣམས་ནས་ཀྱང་ཀུན་མཁྱེན་ཆེན་པོའི་ཕྱག་དཔེ་ཡིན་ཞེས་ཡང་ཏིག་ཡིད་བཞིན་ནོར་བུ་ཚར་གསུམ་བསྐུར་ནས་འཕྲོད་པ་རྒྱལ་བ་གཉིས་པ་དེའི་ཕྲིན་ལས་ཀྱི་བྱེད་པ་ཡིན་པར་བལྟའོ། །དེ་བཞིན་དུ་བི་མ་ལས་དབུ་རུ་ཞྭའི་ཕྱོགས་སུ་སྡིགས་མཛུབ་གཏད་ནས་ཞིག་གསོས་དགོས་པར་ལུང་བསྟན་པ་ལྟར། དེ་ཉིད་དུ་བྱོན་ནས་ཞིག་གསོས་མཛད་པའི་ཚེ། མནན་པའི་ཐོད་པ་མང་པོ་ནམ་མཁའ་ལ་འཕར་བ་ཏིང་ངེ་འཛིན་གྱི་ངང་ལས་སྡིགས་མཛུབ་གཏད་པ་ཙམ་གྱིས་བཀུག །དབུ་རྩེའི་རྒྱབ་ནས་ལྷ་ཁང་གསོ་བའི་ཐེབས། གསེར་འགུ་ཙེ་གང་བཅུས། དམ་ཅན་པ་བྱིས་པ་གཡུ་རྣ་ཅན་དུ་སྤྲུལ་ནས་ཉིན་བཞིན་བཟོ་བོའི་གྲོགས་བྱས། རྡོ་རིང་ཆེན་པོ་གཉིས་འགྱེལ་བ་ཐབས་དང་དཔུང་གང་གིས་ཀྱང་བསླང་མ་ནུས་པར།
ཆོས་སྐྱོང་ལ་གཏོར་མ་བྱིན། བདེན་ཚིག་བརྗོད། ཐུགས་འུར་བའི་ཚུལ་གྱིས་སྐུ་ཆོས་བརྡབས་པས་མོད་ལ་སློང་ནུས་པ་བྱུང་། ཐོད་པ་སྣ་ཚོགས་ན་དམ་སྲི་མནན་ཡོད་པའི་བཅའ་གཞིག་པ་རྣམས་སོར་བཙུད་དེ་སླར་ཡང་དེ་ཉིད་དུ་རྒྱས་འདེབས་པར་བརྩམས་པ་ན། འཐོར་རླུང་དྲག་པོ་གཡོས། ས་རྡོའི་ཆར་བབས་པས་མི་རྣམས་ཀྱང་བྲོས། ཐོད་པ་རྣམས་འཕར་ནས་ཕན་ཚུན་བརྡབས། ཆེ་ཤས་ཤིག་དམ་སྲིའི་འཕྲུལ་གྱིས་ནམ་མཁའ་ལ་ཡར་བ་དྲག་ཤུལ་རབ་ཏུ་འབར་བའི་ཏིང་ངེ་འཛིན་དང་ལྟ་སྟངས་ཀྱིས་བཀུག་ནས་ཞབས་ཀྱི་འོག་ཏུ་བཙུད་པས། གསལ་བགྱད་དུ་གྱུར་བའི་རྟགས་གུ་རུ་དྲག་པོའི་སྐུར་གཞན་གྱིས་དངོས་སུ་མཐོང་། སླར་ཐོད་པ་རྣམས་ཕྲ་མན་མཆོད་རྟེན་གྱི་ཞབས་སུ་མནན། རབ་གནས་དུས་སྐུའི་བཀོད་པ་དུ་མ་ངོ་མཚར་བར་བསྟན། ཐུབ་པ། བྱམས་པ། གནས་བརྟན་བཅུ་དྲུག་རྣམས་ཞལ་འཇུམ་ལྷག་ལྷག་སྟོན་པ་དང་། བྱམས་པས་ཕྱག་མཛུབ་དེངས་ནས། ཁྱོད་ཀྱི་སྐྱེ་བའི་མཐར་པདྨ་བརྩེགས་པའི་ཞིང་དུ་དེ་བཞིན་གཤེགས་པ་རི་རབ་མར་མེའི་རྒྱལ་མཚན་དུ་འཚང་རྒྱའོ་ཞེས་པའི་ལུང་བསྟན་ཐོབ། དབུར་སྟོད་སྐྱེ་ཆུའི་འགྲམ།།།ན་གཉིས་ཀར་ཆོས་ཉན་མང་དུ་ཚོགས་པ་ལ་གསང་བ་བླ་ན་མེད་པའི་ཁྲིད་བཏབ། ཚོགས་པ་རྣམས་ལ་ཚོགས་ཀྱི་འཁོར་ལོ་རྒྱ་ཆེན་པོ་ཡང་ཡང་གནང་། གསང་ཕུའི་ཆོས་གྲྭ་ལའང་སྔ་ཕྱིར་གནང་སྦྱིན་བཟང་པོ་མཛད། གོང་པོ་རིའི་ཐད་ནས་གདོང་འཇིགས་སུ་རུང་བ་ཞིག་གཟིགས། འཇིག་རྟེན་ལ་མི་དགེ་བ་དང་། ས་ཕག་གི་རྩོད་པ་འོང་བ་མཁྱེན་ནས་མོན་བུམ་ཐང་དུ་ཕེབས། བསྟན་པའི་སྣང་བ་ཉུང་བས་ཤིན་ཏུ་གདུལ་དཀའ་བའི་གནས་དེར་ཡང་གདུལ་ཞིང་རྒྱ་ཆེ། ཚོགས་པ་མང་པོ་འདུ་བའི་དགེ་འདུན་གྱི་སྡེ་བཙུགས་ཏེ་ཐར་བ་གླིང་དུ་བཏགས། སློབ་དཔོན་སངས་རྒྱས་ཀུན་དགའ་བསྐོ་འཇའ་གནས། སྔ་འགྱུར་སྤྱི་དང་རྫོགས་ཆེན་གྱི་ཕྲིན་ལས་སྤེལ། གསང་སྔགས་རང་གར་སྤྱོད་པ་དག་ལ་མི་ལྟོས་བསྟན་པའི་ཆེད་བྱར་
ནས་གཏེར་སྟོན་གྱི་དངོས་སློབ་ཤོའི་རྒྱལ་སྲས་ལེགས་པ་ལས་མཁའ་འགྲོའི་སྙིང་ཏིག་གི་ཚིག་བརྒྱུད་གསན། ལྷ་སར་བྱོན་ནས་ཇོ་བོ་མཇལ་དུས་མཛོད་སྤུ་ནས་འོད་ཟེར་བྱུང་སྟེ་ཉིད་ཀྱི་སྨིན་མཚམས་སུ་ཐིམ་པས་བྱ་རྒོད་ཕུང་པོ་དང་། ལི་ཡུལ་རྣམས་སུ་པཎྜི་ཏར་སྐྱེ་བ་བླངས་པ་དྲན། གནས་འདིར་དགེ་འདུན་མང་པོས་བསུ་བ་སེར་ཕྲེང་གིས་བསུས། ལྷས་དང་ར་མོ་ཆེའི་བར་དུ་ཆོས་ཁྲི་བརྩེགས་པའི་སྟེང་ནས་སེམས་བསྐྱེད་ཆེན་མོ་སོགས་ཆོས་འཁོར་རྒྱ་ཆེན་པོ་བསྐོར། ཁེངས་པའི་བློ་ཅན་མང་པོས་དངོས་དང་རྒྱུད་ནས་ཉམས་སད་བྱེད་པ་མཐའ་དག་ལུང་དང་རིག་པའི་ཆོམ་པོས་རྣམ་པར་བརྟགས་ནས་ངེས་ཤེས་སྐྱེ་བའི་དད་པ་ལ་བཀོད་པས་ཀུན་མཁྱེན་ཆོས་རྗེ་ཞེས་པའི་མཚན་གྱི་རྣ་ལུང་དཔྱངས། ཡང་ལན་ཅིག་ཇོ་བོ་མཇལ་དུས་སྐུ་ལས་གསེར་བཙོམ་ལྟ་བུ་འོད་འཕྲོ་བ་དང་། དབུའི་སྟེང་ནས་སངས་རྒྱས་རབས་བདུན། སྨན་བླ། བདེ་དགྱེས། སྤྱན་རས་གཟིགས་ནམ་མཁའི་རྒྱལ་པོ། རྒྱལ་བ་རྒྱ་མཚོ་དང་། བསྟན་སྲུང་གི་ཚོགས་དུ་མ་གཟིགས། འདིས་མཚོན་པའི་དུས་དང་དུས་མ་ཡིན་པར། སློབ་དཔོན་ཆེན་པོ། གུ་རུ་དྲག་པོ། དམ་པ་རིགས་བརྒྱ། སྒྲུབ་ཆེན་བཀའ་བརྒྱད་ལ་སོགས་པ་སངས་རྒྱས་བྱང་སེམས་ཏིལ་གྱི་གོང་བུ་ལྟར་ཞལ་གཟིགས་ནས་བསྟན་བཅོས་བརྩམ་པར་བསྐུལ་ཞིང་བཀའི་གནང་བ་ཐོབ་པས། དགོངས་པ་ཀུན་ཏུ་བཟང་པོའི་ཀློང་ན་རྣམ་པ་ཐམས་ཅད་མཁྱེན་པའི་ཆོས་ཉིད་ལས་གཡོ་བ་མེད་པའི་ངང་ནས་རྗེས་ལ་ཐོབ་པའི་ཡེ་ཤེས་སངས་རྒྱས་རྣམས་ཀྱི་ཐུགས་རྗེ་དང་འགྲོགས་ནས་རྒྱལ་བ་བདེན་པར་སྨྲ་བའི་བཀའ་དང་ཐ་དད་དུ་མེད་པས་བྱིན་གྱིས་བརླབས་པའི་བཀའ་འམ། ལ་ཆོས་སྐྱོང་གཉིས་ཀྱི་ཡོན་ཏན་རྒྱ་མཚོས་བསྲུངས་པའི་བསྟན་བཅོས་གང་ཞིག་སེམས་ཀྱི་གླང་པོ་སེམས་བྱུང་དང་རྟོག་ཚོགས་མཐའ་ཡས་པའི་ཁུར་གྱིས་དུ་བ་ནས་འཁོར་བ་རྒྱ་མཚོའི་རུམ་ན་འཇུག་པར་རྩོམ་པ་དག །བདེ་བ་ཆེན་པོའི་ཙན་དན་ལྗོན་པའི་གྲིབ་བསིལ་ལ་ངལ་གསོའི་དབུགས་འབྱིན་ཆེན་པོ་
སྟེར་བའི་ཆོས་ཚུལ།། །།ངལ་བསོ་སྐོར་གསུམ། བསྡུས་དོན་བྲེང་བ་རྣམ་གསུམ། རྒྱས་འགྲེལ་ཤིང་རྟ་རྣམ་གསུམ། དོན་ཁྲིད་རྣམ་གསུམ། སྤྱི་དོན་ལེགས་བཤད་རྒྱ་མཚོ། དཀར་ཆག་པདྨ་སྟོང་ལྡན་ཏེ་ཆོས་སྡེ་བཅུ་བཞི། ལོག་པར་སྨྲ་བའི་ཕྱི་རོལ་བ་དག། རང་གི་གཏན་ཚིགས་ལ་མཆོག་ཏུ་ཞེན་པའི་འཇིག་ཚོགས་ལ་ལྟ་བ་སུམ་བརྒྱ་དྲུག་ཅུའི་རི་དྭགས་མི་བསྲུན་པ་རྣམས་ཀྱི་མཚང་གཏིང་ནས་བྲུས་ཏེ། གྲུབ་མཐའ་ངན་པའི་སྤྱི་བོར་བརྒལ་བ་དང་། བརྟག་པ་དང་། སུན་འབྱིན་པའི་སྡེར་མོ་རྣོན་པོ་བསྣུན་ནས་ཅང་མི་སྨྲ་བ་དང་ཡུལ་ཡུལ་པོའི་གནས་ལ་འགོད་པ་སྔོན་དུ་འགྲོ་བས། སྟོན་པ་འཇིག་རྟེན་གསུམ་གྱི་མིག་གཅིག་པུའི་གྲུབ་པའི་མཐའ་ཐེག་པ་གསུམ་གྱི་ཁང་བཟང་ཆེན་པོར། བླ་ན་མེད་པའི་ཐེག་པའི་ཁྱད་པར་གྱི་ཡིད་བཞིན་ནོར་བུ་ཏོག་གི་བློ་གྲོས་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་མཛོད་ཁང་དམ་པར་ཟད་མི་ཤེས་པའི་སྐོར་ལ། ཡིད་བཞིན་མཛོད་རྩ་བ་ལེའུ་ཉེར་གཉིས་པ། འགྲེལ་ཆེན་པདྨ་དཀར་པོ། ཁྲིད་ཡིག་རྡོ་རྗེ་སྙིང་པོ་སྟེ་མ་བུ་གསུམ། གནད་ལས་སྙིང་པོར་བྱུང་བ་མན་ངག་རིན་པོ་ཆེའི་མཛོད། ཀློང་སྡེ་ཤས་ཆེར་སྟོན་པ་ཆོས་དབྱིངས་རིན་པོ་ཆེའི་མཛོད་རྩ་བ་ལེའུ་བཅུ་གསུམ་པ། འགྲེལ་བ་ཆོས་དབྱིངས་གསལ་བ་སྟེ་སྡེ་ཚན་གཉིས། ཐེག་པ་མཐའ་དག་གི་དོན་གསལ་བ་གྲུབ་མཐའ་རིན་པོ་ཆེའི་མཛོད་ལེའུ་བརྒྱད་པ། ཀུ་མ་རཱ་ཛའི་དགོངས་རྫོགས་སུ་བརྩམས་པར་གྲགས་པ་རྒྱུད་བཅུ་བདུན་དང་། མན་ངག་བརྒྱ་བཅུ་དགུའི་དོན་འགྲེལ་བརྗོད་བྱ་ཤིན་ཏུ་རྒྱ་ཆེ་བ་ཐེག་མཆོག་མཛོད་རིམ་ཁང་ཉི་ཤུ་རྩ་ལྔ་པའི་བདག་ཉིད་ཅན། དེའི་གནད་དོན་བསྡུས་པ་ཚིག་དོན་རིན་པོ་ཆེའི་མཛོད་རྡོ་རྗེའི་གནས་བཅུ་གཅིག་པ། སེམས་ཀློང་མན་ངག་གསུམ་ཀའི་སྙིང་པོའི་མཐར་ཐུག་གནས་ལུགས་རིན་པོ་ཆེའི་མཛོད་རྩ་བ་ལེའུ་ལྔ་པ། ནཱི་ཀ་དང་བཅས་པ་སྟེ་མཛོད་བདུན་གྱི་བདག་ཉིད་ཅན་ཕལ་མོ་ཆེ་གནས་འདི་ཉིད་དུ་བྱུང་། སྤྱིར་སྔགས་བདག་
གཟའ་དང་། དམ་ཅན་གསུམ་ལས་ལ་བྲན་བཞིན་དུ་འཁོལ་ཞིང་བཀའ་ཉན་པས། མཛོད་འདི་དག་རྩོམ་པའི་ཚེ་གངས་རིར་ཁྱབ་འཇུག་ཆེན་པོར་སྣག་ཚ་མཉེར་བཅུག་པ་ཉེ་གནས་པས་མངོན་སུམ་དུ་མཐོང་། དེ་ལྟར་བཤད་པ་དང་དོན་གྱི་སྙིང་པོའི་སྒྲུབ་པ་ཁོ་ན་ལ་དབེན་པ་འབའ་ཞིག་ཏུ་བཞུགས་པའི་སྒྲུབ་གནས་ཀྱང་། བསམ་ཡས་མཆིམས་ཕུ། ཨོ་རྒྱན་རྫོང་། ལྷ་རིང་བྲག། གྲཱ་ཕུ། ཤུག་གསེབ། གངས་རི་ཐོད་དཀར། གཞུ་སྟོད་ཏི་སྒྲོ། ཡེར་བ། ཡར་ལྷ་ཤམ་པོ། བུམ་ཐང་། སྐྱིམ་བུ་དཔལ་གྱི་དགེ་སྡིངས། གོང་པོ་རིའི་གླ་བ་ལུང་། ཀོང་པོ་རྩེ་ལར་གི་ཕུ་རྣམས་ལས་ཕལ་ཆེར་གངས་རི་ཉིད་དུ་གཏན་ཆགས། ལྷོ་འབྲོག། དབུ་གཡོར། ལྷོ་མོན་གྱི་ཡུལ་མཐའ་དག་ཏུ་ཁྲིད་ཉན་སྟོང་ཕྲག་ཚོགས་པ་ལན་མང་དུ་བྱུང་ཞིང་། དེ་དག་ལའང་ཐུགས་བསྐྱེད་ཤིན་ཏུ་ཆེ་བས། ཆོས་ཁྲལ་མི་ལེན། དད་རྫས་ཆུང་མི་གསོན། སློབ་མའི་བྱ་བ་འབའ་ཞིག་དོན་དུ་གཉེར་བ་ལ་ལོག་སྒུྲབ་དང་སྐྱོངལ་བཟོད། ཚོགས་ཀྱི་འཁོར་ལོ་རྒྱ་ཆེན་པོས་བསྟི་སྟང་དུ་བྱ་བ་དང་། གཞན་རྒྱུད་ཀྱི་བསམ་པ་མཁྱེན་ནས་ཐབས་ལ་མཁས་པའི་གདུལ་ཚུལ་དཔག་ཏུ་མེད་པ་ལ་སོགས་མདོར་ན་རང་དོན་སྤངས་རྟོགས་ཕུན་སུམ་ཚོགས་པའི་གོ་འཕང་བརྙེས། འདོད་པ་གཏན་ནས་ཟད་པ་ལ་སོགས་པའི་ཕྲིན་ལས་བསམ་གྱིས་མི་ཁྱབ་པས་གདུལ་བྱ་སྨིན་གྲོལ་ལ་འགོད་པའི་རྣམ་པར་ཐར་བ་གང་ཡིན་པ་ནི་སྐྱེས་བུ་ཆེན་པོ་འདིས་ལག་ལེན་ལ་བཏབ་པ་སྟེ། འབྲི་གུང་སྒོམ་པ་ཀུན་རིན་རང་སྲིད་ཀྱིས་དྲེགས་པས་མྱོས་ཏེ་དམག་འཁྲུག་གཡོ་བར་བརྩམས་པ་ལ། །སློབ་དཔོན་ཆེན་པོའི་ལུང་བསྟན་དུ། །འབྲི་ཞེས་བྱ་བའི་ས་ཕྱོགས་སུ༔ ཀུན་དགའི་མིང་ཅན་བདུད་ཀྱི་བུ༔ ལུས་ལ་མཚོན་ཆའི་རི་མོ་ཡོད༔ ཤི་ནས་དམྱལ་བར་སྐྱེ་བར་འགྱུར༔ ལྷོ་ཡི་ཕྱོགས་ནས་འཇམ་དབྱངས་ཀྱི༔ སྤྲུལ་པ་ཅིག་གིས་འདུལ་བར་བྱེད༔། ཅེས་པའི་ལུང་བསྟན་དེ་
སྒོམ་པ་ཀུན་རིན་གྱིས་དཀར་པོ་རྣམ་པར་འཕེལ་བའི་ས་བོན་གྱིས་མཐོང་ནས་རང་གི་ལུས་ལ་བལྟས་པར་རྒྱབ་ངོས་སུ་ཤ་མཚན་རལ་གྲི་འདྲ་བ་ཞིག་བྱུང་། དེ་རང་ཉིད་དུ་གདོན་མི་ཟ་བར་ཤེས་ནས་དབུས་གཙང་འདིར་འཁྲུག་པ་ཆེན་པོ་ཞིག་བྱེད་བསམས་ཀྱང་། དམྱལ་བར་འགྲོན་བྱེད་དོན་ཆུང་བསམས་ནས་བརྣག་པར་དཀའ་བའི་ལས་ལ་བཤོལ་བཏབ། ཕྱོགས་ཀུན་ཏུ་དྲིལ་བསྒྲགས་ནས་འཇམ་དཔལ་གྱི་སྤྲུལ་བ་བཙལ་བས། མཁས་པ་ཀུན་ཞལ་འཆམ་པ་རང་ལྟ་བོད་རུ་བཞིན་བསམ་ཡས་པ་ལས་མཁྱེན་རབ་ཆེ་བ་མི་བཞུགས་ཞེས་བསྒྲགས་པས། འཇམ་དཔལ་གྱི་སྤྲུལ་པར་ངེས་ཤེས་རྙེད་དེ་སྤྱན་དྲངས་ནས་གཙུག་གི་ནོར་བུར་བྱས་པས་འགྲོ་བ་གང་དང་གང་དག་གི་གནས་སྐབས་དང་མཐའ་ཐུག་གི་ལས་མི་བསྲུན་པའི་རྒྱུ་རྐྱེན་འབྲས་བུ་དང་བཅས་པ་དྲུངས་ནས་འབྱིན་པར་མཛད། དུས་དེ་ཙམ་ན་དབུས་གཙང་འདིར་དྲེགས་རློམ་གྱི་སྐྲའི་ཅོད་པན་གཞན་ལ་སྟོན་པར་དཀའ་བ་ཏའི་སི་ཏུ་བྱང་ཆུབ་རྒྱལ་མཚན་གྱིས་འབྲི་གུང་པའི་བླ་མ་ཡིན་ཞེས་མི་མཐུན་པར་བལྟ་བ་ལ། ཚད་མེད་པའི་ཐུགས་རྗེ་ཆེན་པོའི་ཕྲིན་ལས་དང་། མཁས་པ་དང་གྲུབ་པའི་རྣམ་ཐར་བཟང་པོ་བུདྡྷ་ཤྲཱིའི་རྣ་ལུང་དུ་དཔྱངས་པས་མཚམས་སྦྱར་ཏེ་བོད་ཤིང་སྒོ་ཅན་བའི་རྒྱལ་པོ་སེང་གེ་རྐང་པ་བརྒྱད་པའི་སྤྱི་བོར་ཡང་ཞབས་སེན་ལེགས་པར་བཀོད། དེ་བཞིན་དུ་དབུར་སྟོད་ཁྲིད་པོ་ན་སི་ཏུ་ཤཱཀྱ་བཟང་པོ། ཡར་འབྲོག་ཁྲི་བོན་རྡོ་རྗེ་རྒྱལ་མཚན་ལ་སོགས་པའི་མི་ཆེན་དུ་མས་ཀྱང་སྲི་ཞུ་བྱས། དེ་དག་ལ་སོགས་ཏེ་དད་པ་ཅན་གྱིས་བྱིན་པའི་རྫས་ཀྱང་སློབ་དཔོན་ནཱ་གཱ་རྫུ་ནའི་རྣམ་ཐར་བཟུང་ནས་གནས་མིན་དུ་ཅུང་ཟད་ཙམ་ཡང་ཆུད་མི་གཟོན་བར་དཀོན་མཆོག་གསུམ་ལ་བསྟི་སྟང་བླ་ལྷག་ཏུ་མཛད། ཡོ་བྱད་ཆོས་ཕྱོགས་སུ་བསྔོས་ཟིན་པ་རྣམས་རང་གི་རྫས་སུ་འདུ་མི་ཤེས་པས་ཕྱོགས་གཞན་གང་དུའང་འབྱམ་མི་སྲིད། བསྙེན་བཀུར་དཀོན་མཆོག་ལ་དགོས་པ་ཡིན་གྱི་སྡིག་ཅན་ལ་མི་རུང་གསུངས་ནས་མི་ཆེན་ལ་སྟན་དང་བཀུར་སྟི་མི་མཛད། ཚོགས་གསོག་ཡོན་བདག་གིས་བྱ་བ་ཡིན་གྱི་མཆོད་ཡོན་གོ་ལོག་བམ་བཟང་གསུངས།
ནས། འབུལ་བ་ཆེན་པོ་གང་ཕུལ་ཡང་དེ་བསྔོ་བས་རྒྱས་འདེབས་པ་ལས་གདབ་ལན་མི་ཡོང་། འགྲོ་བ་ཉམ་ཆུང་བ་ལ་ཐུགས་ལྷག་པར་བརྩེ་བས་སྙོམས་ཆུང་དང་སྤྲང་པོས་ཅི་དྲངས་ཀྱང་ཞིམ་ཞིམ་ལྟར་གསོལ་ནས། མདོ་འདོན་པ་དང་བསྔོ་བ་ནན་གྱིས་གསུང་། དེ་ལྟ་བུའི་མཛད་པ་དཔག་པར་དཀའ་བས་མཐོང་བའི་ཆེས་ལ་རྗེས་སུ་བཟུང་བ་དག་ལྟ་ཅི་སྨོས། རང་བཞིན་གྱིས་མཐོང་བ་དང་། ཐོས་པ་དང་། རིག་པ་དང་། གནོད་པ་བྱེད་པའང་བདེ་བའི་གནས་སུ་འབྲེལ་ཞིང་། བྱང་གྲོལ་གྱི་ས་བོན་ཐེབས་པར་མཛད་ནས་ལྔ་བཅུ་རྩ་དྲུག་བཞེས་པ་ཆུ་མོ་ཡོས་ཀྱི་ལོར། སྐལ་ལྡན་མང་པོ་ལ་སྨིན་གྲོལ་གྱི་གོ་འཕང་སྟེར་བའི་སྐབས་ཤིག་རྒྱལ་སྲས་བཟོད་པ་ལ་སྣག་ཤོག་བསྡོགས་ཤིག་གསུངས་ནས་ཞལ་ཆེམས་དྲི་མ་མེད་པའི་འོད་དུ། འཁོར་བའི་རང་བཞིན་སྔ་ནས་ཤེས་ཟིན་ཏེ། །འཇིག་རྟེན་ཆོས་ལ་སྙིང་པོ་མེད་པའི་ཕྱིར། །ད་ནི་མི་རྟག་སྒྱུ་མའི་དུས་འདོར་བས། །གཅིག་ཏུ་ཕན་པའི་གདམས་ངག་བཤད་ཀྱི་ཉོན། །ཞེས་པ་ལ་སོགས་པས་སྣ་དྲངས་ནས། ཐུགས་རྗེ་མངའ་བའི་མགོན་པོ་པདྨའི་ཞལ། །དབུགས་འབྱིན་མཛད་པ་དེ་ཡི་དེང་བཟུང་བས། །འགྲོ་བའི་དུས་བབ་འགྲོན་པོ་ལམ་ཞུགས་བཞིན། །འཆི་བས་དགའ་བའི་རྙེད་པ་ལེགས་གྲུབ་པ། །རྒྱ་མཚོར་དོན་ཡོངས་གྲུབ་པའི་ཚོང་པ་དང་། །གཡུལ་ལས་རྣམ་པར་རྒྱལ་བའི་ལྷ་དབང་དང་། །བསམ་གཏན་གྲུབ་པའི་བདེ་བས་ཆེས་ལྷག་གོ། ད་ནི་མི་སྡོད་པདྨ་ལས་འབྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །ཞེས་པ་ལ་སོགས་ཀྱི་ཞལ་ཆེམས་བསྟན་པས་རྒྱལ་སྲས་བཟོད་པ་ན་རེ། དེ་ལྟར་མི་གསུང་བཞུ་ཞེས་མཆི་མ་བླགས་པས། འདུས་བྱས་འཇིག་པ་ལས་བརྩམས་པའི་ཆོས་མང་པོ་གསུངས། སླར་བསམ་ཡས་སུ་གདན་འདྲེན་བྱང་བས་ཆོས་ཀྱི་འཁོར་ལོ་བསྐོར་བཞིན་དུ་རྒྱ་མ་དང་བསམ་ཡས་བརྒྱུད་མཆིམས་ཕུ་དཔལ་གྱི་ནགས་ཁྲོད་དུ་ཕེབས། དེའི་ཆོས་ཀུན་སྒྱུ་མ་ལྟ་བུ་དང་། སྐྱེ་བ་སྐྱེད་མོའི་ཚལ་
འགྲོ་ལྟར་རྟོགས་ནས། ཞེས་པ་དེ་སྐྱེས་བུ་ཆེན་པོ་འདིས་ཉམས་འོག་ཏུ་བཙུད་པས། གནས་འདི་ནི་རྒྱ་གར་གྱི་དུར་ཁྲོད་བསིལ་བའི་ཚལ་དང་མཚུངས་པ་ཡིན། གཞན་དུ་སྐྱེ་བ་ལས་འདིར་འཆི་བ་དགའ། ངའི་སྒྱུ་ལུས་གོག་པོ་འདི་འདིར་འཇོག་པ་ཡིན་གསུངས་ནས་བསྙུང་བའི་ཚུལ་བསྟན་ཀྱང་ད་དུང་ཆོས་མཚམས་རྒྱུན་མ་ཆད། དེར་འོ་བརྒྱལ་དུ་བསམས་ཏེ་རེ་ཞིག་ཆོས་མཚམས་འཇོག་པར་ཞུས་པས་ཆོས་འདི་རྫོགས་པ་ཞིག་བྱེད་བསམ་པ་ཡིན་ཏེ་གསུངས། དེ་ནས་རྒྱལ་ཟླའི་ཚེས་བཅུ་དྲུག་གི་ཉིན་དཔའ་བོ་དང་མཁའ་འགྲོ་རྣམས་མཆོད་གཏོར་རྒྱ་ཆེན་པོས་མཉེས་པར་མཛད་ཅིང་། སློབ་མའི་ཚོགས་ལ་སྤྱིར་ཡང་འདུས་བྱས་ལ་སྙིང་པོ་མེད་པས་ཆོས་འབའ་ཞིག་དོན་དུ་གཉེར། ལྷག་པར་ཁྲེགས་ཆོད་དང་ཐོད་རྒལ་གྱི་ཉམས་ལེན་གནད་དུ་བསྣུན། མ་གོ་བའི་སྐབས་བྱུང་ན་ཡང་ཏིག་ཡིད་བཞིན་ནོར་བུ་འདི་བསམ་འཕེལ་ནོར་བུ་དང་འདྲ་བས་ལྟ་རྟོག་ཞིབ་མོར་གྱིས་ལ་བསྒོམ་དང་། ཆོས་ཉིད་ཟད་པའི་ས་ལ་མྱ་ངན་ལས་འདའ་བར་འགྱུར་རོ་ཞེས་གདམས། དེ་ནས་ཚེས་བཅོ་བརྒྱད་ཀྱི་ཉིན་མཆོད་པ་ཅིག་ཤོམ་ལ་ཁྱོད་རང་རྣམས་དགེ་སྦྱོར་ལ་དེངས་གསུངས། སྐུ་དྲུང་ན་འདུག་པར་ཞུས་པས། འོ་ན་ངའི་སྒྱུ་ལུས་གོག་པོ་འདི་འདོར་བ་ཡིན་པས་ཅ་ཅོམ་ཁྱེད་པར་མཉམ་གཞག་གི་ངང་ལ་སྡོད་གསུངས། སྐུ་གདུང་རིན་པོ་ཆེ་ཆོས་སྐུའི་བཞུགས་སྟངས་ཀྱིས་བཞག་ནས། དགོངས་པ་གདོད་མའི་དབྱིངས་སུ་མནལ་བ་ན། ས་ཆེན་པོ་འདི་ཡང་ཡིད་ཁོང་དུ་ཆུད་པར་གྱུར་ནས། ལྡེག་རང་ཏུ་ལྡེག་པ་ལ་སོགས་པའི་ཟོལ་གྱིས་ལུས་བཏེག་ཅིང་གཡོ་བར་གྱུར་ལ། འུར་རབ་ཏུ་འུར་བ་ལ་སོགས་པའི་ཟོལ་གྱིས་ཆོང་འདོན་པ་ལ་ཞུགས་སོ། །གདུང་ཞག་ཉེར་ལྔར་བཞག་པས་བསྟན་ལ་དགའ་བའི་ལྷ་རྣམས་ཀྱིས་འཇའ་འོད་ཀྱི་གུར་ཕུབ། མེ་ཏོག་གི་ཆར་ཕབ། དགོངས་པ་ཆོས་ཉིད་དུ་གྲོལ་བས་འབྱུང་བ་ཆེན་པོ་བཞིའང་དུས་བཞིའི་གཏན་ཚིགས་འཛིན་པའི་བརྟན་པ་བྲལ་ནས། རྒྱལ་དང་ཆོ་འཕྲུལ་གྱི་ཟླ་བ་གཉིས་ཀར་ས་དྲོས་
འཁྱགས་བཞུ། སེ་བའི་ལོ་མ་རྒྱས་པ་བྱུང་། གདུང་མཆོད་པའི་ཞིང་དུ་བྱིན་ཟའི་ཁང་པར་སྤྱན་དྲངས་པའི་ཚེའང་ས་གཡོས། སྒྲ་ཆེན་པོ་ལན་བདུན་གྲགས། ཞུགས་ལ་བཞེན་པ་ན་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་བྱང་ཆུབ་པའི་རྟགས་ཐུགས་ལྗགས་སྤྱན་གསུམ་ཀ་སྐལ་ལྡན་གྱི་སློབ་མའི་ཁང་པར་བྱོན། སྐུ་ལྔ་དང་ཡེ་ཤེས་ལྔའི་ཐོབ་བྱ་མ་ལུས་པ་མངོན་དུ་མཛད་པས་གདུང་ཆེན་ལྔ་དང་། རིང་བསྲེལ་ཕྲ་མོ་བགྲང་ལས་འདས་པ་བྱུང་། རིང་བསྲེལ་གོང་བུ་ཆེ་བ་དག་ནས་བརྒྱ་སྟོང་གྲངས་མེད་དུ་འཕེལ་བ་རྩོད་པ་དང་གྲལ་ཞིང་། སྐུ་གདུང་མ་ཉམས་པ་ཕྲན་བུ་བཟུང་བ་དག་ལའང་ད་ལྟའི་བར་དུ་སྟེང་གདོན་གྱི་གནོད་པས་བརྫི་བར་མི་ནུས་པ་སོགས་མངོན་སུམ་ཚད་མའོ། །སྐྱེས་བུ་ཆེན་པོ་འདིའི་གསུང་རབ་ནི་རྒྱལ་བའི་བཀའ་དང་ཁྱད་པར་མེད་པ་ཡིན་པས་ངེས་བརྗོད་རྟོགས་སླ་བའི་ཕྱིར་རྣམ་གྲངས་བཀོད་ན། ཐུན་མོང་ཕྱིའི་བསྟན་བཅོས། ཁྱད་པར་ནང་གི་བསྟན་བཅོས། ངེས་དོན་གསང་བའི་བསྟན་བཅོས་ཏེ་སྐོར་ཚོ་གསུམ། དེ་དག་ལའང་ནང་གསེས་ཀྱི་དང་པོ་ལ་རིག་གནས་ཀྱི་སྐོར། གཏམ་གྱི་ཚོགས། བསྟོད་པའི་ཚོགས་དང་གསུམ། གཉིས་པ་རྒྱུ་དང་འབྲས་བུའི་ཐེག་པ་གཉིས། གསུམ་པ་ལ་བྲང་གསང་རྒྱུད་སྡེའི་དགོངས་འགྲེལ་དང་། ཁྱད་པར་བླ་ན་མེད་པ་འོད་གསལ་རྡོ་རྗེ་སྙིང་པོའི་གདམས་སྐོར་རོ། །དང་པོ་རིག་གནས་ཀྱི་སྐོར་ལ་ཡིག་སྡེབ་ཀྱི་སྦྱོར་བ་དཔག་བསམ་སྙེ་མ་ཆེ་ཆུང་གཉིས། དོན་བསྡུས། སྒྲའི་མཚམས་སྦྱོར་རབ་གསལ་ཟླ་བ། སྡེབ་སྦྱོར་ཉི་མའི་ཤིང་རྟ། ལྕི་་ཡང་གི་གནས་རིན་པོ་ཆེའི་ལྡེ་མིག། མངོན་བརྗོད་མེ་ཏོག་འཁྲི་ཤིང་། སྙན་དངགས་ཀྱི་བསྟན་བཅོས་མེ་ཏོག་ཀུན་དུ་རྒྱས་པའི་སྐྱེད་མོའི་ཚལ། དཔེར་བརྗོད་ཀླུ་ཤིང་གི་མེ་ཏོག། གཉིས་ཀ་སྤེལ་བ་ཚངས་པའི་གསུང་དབྱངས་ཏེ་སྡེ་ཚན་བཅུ། གཉིས་པ་གཏམ་གྱི་ཚོགས་ལ། མིའམ་ཅི་ཀུན་ཏུ་དགའ་བའི་ཟློས་གར། ཕོཊ་ལ་ཀུན་ཏུ་དགའ་བའི་གཏམ། གཞོན་ནུ་ཞི་བའི་རྟོགས་
(""བརྗོད་མེ་ཏོག་གི་ཆུན་པོ། བློ་གསལ་རི་བོང་གི་རྟོགས་བརྗོད། ནགས་ཚལ་ཀུན་ཏུ་དགའ་བའི་གཏམ། ནགས་ཀྱི་གཏམ་པདྨ་དཀར་པོ། གངས་རིའི་རྒྱན་ཀུན་ཏུ་བཟང་པོ། ཀུ་མུ་ཏའི་འཁྲི་ཤིང་སྟེ་ནགས་ཀྱི་གཏམ་ལྔ། སློབ་དཔོན། རབ་བྱུང་། སྤྱི་བོ། མཁས་བླུན། བཤེས་གཉེན། ཆོས་དང་ཆོས་མིག་བརྟག་པའི་རབ་བྱེད་དྲུག་སོགས་ཆོས་སྡེ་བཞི་བཅུ་རྩ་ལྔ། གསུམ་པ་བསྟོད་ཚོགས་པ། རྒྱལ་བ་སྲས་བཅས་ཀྱི་ཚོགས་དང་། འཇིག་རྟེན་པའི་ལྷ་ཆེན་པོ་རྣམས་དང་། རི་དང་། རྒྱ་མཚོ། སྒྲུབ་གནས། བསམ་ཡས། གསང་བུའི་ཆོས་གྲྭ་སོགས་གཙུག་ལག་ཁང་དང་ཆོས་སྡེ་རྣམས་ལ་བསྟོད་པའི་ཚོགས་བཞི་བཅུ་རྩ་གསུམ་མོ། །གཉིས་པ་ཁྱད་པར་ནང་གི་བསྟན་བཅོས་ཀྱི་སྐོར་ལས། དང་པོ་རྒྱུ་མཚན་ཉིད་ཀྱི་ཐེག་པའི་སྐོར་ལ། བྱམས་ཆོས་ལྔའི་སྤྱི་དོན་གྱི་འགྲེལ་བ། ས་ལམ་གྱི་རྣམ་གཞག་རིན་པོ་ཆེའི་ཐེམ་སྐས་རྩ་འགྲེལ་དང་བཅས་པ། མངོན་རྟོགས་རྒྱན་གྱི་ལུས་རྣམ་གཞག་གི་གསལ་བྱེད་རྒྱན་གྱི་སྣང་བ། འདུལ་བ་ཀཱ་རི་ཀླའི་གསལ་བྱེད་འོད་ཀྱི་སྙོམ། དབུ་མ་ཐལ་འགྱུར་གྱི་གནས་གསལ་བ་རབ་ཏུ་མི་གནས་པའི་དོན་བསྡུས། བསླབ་བྱ་རྒྱལ་སྲས་ལམ་བཟང་སོགས་ལེགས་བཤད་རྒྱ་ཆེ་བའི་ཆོས་སྡེ་ཉི་ཤུ་རྩ་གསུམ། གཉིས་པ་འབྲས་བུ་སྔགས་ཀྱི་སྐོར་ལ། ཆོས་སྤྱོད་ཐམས་ཅད་ཀྱི་མངོན་པར་རྟོགས་པ་རྒྱུད་ཀྱི་བཤད་འགྲེལ་བྱང་ཆུབ་ལྗོན་ཤིང་། རྒྱུད་སྡེ་སྤྱིའི་དོན་བཤད་རྡོ་རྗེ་འབྱུང་བ། དམ་ཚིག་གསུམ་བཀོད་ཀྱི་རྣམ་བཤད་ཉི་མའི་འོད་ཟེར། སྒྲུབ་ཕྲིན་སྐོར་ལའང་གནས་བརྟེན་བཅུ་དྲུག་གི་ཆོག་གཞན་ཕན་ནོར་བུ། སྒྲོལ་མ་མཎྜལ་བཞི་པའི་ཆོག་བདེ་ལེགས་ཀུན་འབྱུང་། སྨན་བླའི་ཆོག་ཡོན་ཏན་ཕྲེང་རྫོགས། སྤྱོད་རྒྱུད་སྒྲུབ་ཐབས་ཟླ་བའི་ནོར་བུ། རྣམ་སྣང་སྒྲུབ་ཐབས་ངན་སོང་ཀུན་སྤྱོད། ཀུན་རིག་རྩ་བའི་དཀྱིལ་འཁོར་དུ་སློབ་མ་འཇུག་ཅིང་དབང་བསྐུར་བའི་ཆོག །མི་འཁྲུགས་པའི་སྒྲུབ་བབས་སྡུག་བསྔལ་ཀུན་སྦྱོར། ཤཱཀ་ཐུབ་སྒྲུབ་ཐབས་འོད་ཟེར་ཀུན་འབྱུང་། བྱམས་
པའི་སྒྲུབ་ཐབས་པདྨ་བརྩེགས་པ། གཞན་ཡང་འཇམ་དཔལ། དབྱངས་ཅན་མ། ཕག་མོ། མི་གཡོ་བ། ཛམྦྷ་ལ། དེ་དག་རྣམས་ལས་དཀར་སེར་དམར་སྔོ་ནག་སོགས་སོ་སོའི་སྒྲུབ་ཐབས། དཀར་པོ་སྐོར་གསུམ། འོད་ཟེར་ཅན། ནོར་རྒྱུན་མ། ཨཾ་གུ་ལི། དུག་སེལ་ཅན་རྣམ་རྒྱལ་སོགས་དང་། དབང་ཕྱུག་ཁྱབ་འཇུག་སོགས་འཇིག་རྟེན་པའི་སྡེ། གཞན་བྱ་སྤྱོད་རྣལ་འབྱོར་བླ་མེད་གསར་རྙིང་ཐམས་ཅད་ཀྱི་རྩ་གསུམ་ཆོས་སྲུང་ནོར་ལྷ་བཅས། རྒྱལ་བ་སྲས་བཅས་ཀྱི་སྒྲུབ་ཐབས་སྐོར་ཆོས་སྡེ་བརྒྱད་ཅུ་རྩ་ལྔ། གསུམ་པ་ངེས་དོན་གསང་བའི་བསྟན་བཅོས་ལ། དང་པོ་ཟབ་གསང་རྒྱུད་སྡེའི་དགོངས་བཅུད་རྫོགས་རིམ་སྐོར་ལ། བདེ་མཆོག་རིམ་ལྔའི་ཟབ་དོན་སྙིང་པོའི་ཡང་ཞུན། གསང་འདུས་རིམ་ལྔའི་ཟབ་དོན་འོད་གསལ་འཁོར་ལོ། སྦྱོར་དྲུག་བསྡུས་དོན་དེ་ཉིད་འདུས་པ། ལམ་འབྲས་བསྡུས་དོན་རིམ་གཉིས་འཁོར་ལོ། ཆོས་དྲུག་སྙིང་པོ་འོད་གསལ་རྣམ་སྦྱོང་སོགས་ཆོས་སྡེ་ཉི་ཤུ་ལྷག་ཙམ། གཉིས་པ་འོད་གསལ་རྡོ་རྗེ་སྙིང་པོའི་སྐོར་ལ། ངལ་བསོ་སྐོར་གསུམ་དང་། མཛོད་ཆེན་བདུན་བཅས་པའི་སྡེ་ཚན་སྔར་བཤད་ཟིན་ལ། བི་མ་ལའི་སྙིང་ཏིག་ཟབ་པ་བོད་བཞི་དང་མན་ངག་བརྒྱ་བཅུ་དགུ་བརྗོད་བྱ་རྒྱ་ཆེ་བས་འཐོར་བ་བསྡུས་པ་ལྟ་བུ་བླ་མ་ཡང་ཏིག་གམ། ཡང་ཟབ་ཡིད་བཞིན་ནོར་བུ། སྐྱེ་བ་སྔ་མ་ལ་མཁའ་འགྲོའི་སྙིང་ཏིག་རྗོད་བྱེད་ཚིག་གི་གཏེར་ལ་དབང་བ། ད་རེས་མཆི། །འཕུར་བརྗོད་བྱའི་དོན་ལ་དབང་བསྒྱུར་ནས་རྒྱས་པར་བཀྲལ་བའི་ཟབ་ཅིང་རྒྱ་ཆེ་བ་ཤོག་སྐྱ། ཡང་ཟབ་རྣམས་ཤོག་འདྲ། ཤིན་ཏུ་ཡང་ཟབ་རྣམས་ཤོག་སེར་ཏེ་སྐོར་གསུམ་དུ་བབ་པའི་མཁའ་འགྲོ་ཡང་ཏིག། གཉིས་ཀའི་དོན་རྒྱས་པར་བཀྲལ་བ་ཟབ་མོ་ཡང་ཏིག། སྙན་བརྒྱུད་ཐིག་ལེ་གསང་སྐོར་དང་། སྙིང་ཏིག་རྣམ་གསུམ་གསུམ་དུ་བསྡུས་པའི་ཆོས་ཀྱི་རྣམ་གྲངས་བཅུ་ཕྲག་བཞི་ལྷག་བཅས་ཏེ། ཀུན་དྲིལ་བས་སྡེ་ཚན་བརྒྱ་ཕྲག་གཉིས་དང་དྲུག
ཅུ་རྩ་གསུམ་ཙམ་མོ། །དེ་དག་ཀྱང་མདོ་ཙམ་སྨོས་པ་སྟེ། གཞན་དུ་ཆོས་འབྱུང་རིན་པོ་ཆེའི་གཏེར་མཛོད་ཅེས་བྱ་བ་དང་། ཆོས་སྤྱོད་ལམ་གྱི་རིམ་པ་དང་། ཤི་གསོན་གྱི་བསྔོ་བ་རིན་ཆེན་ཕྲེང་བ་དང་། རྒྱུ་ལ་ཁམས་འདུས་པ་མེ་ཏོག་ཕྲེང་ལྡན་དང་། རྐྱེན་ལ་ཁམས་འདུས་པ་ཀ་ཐ་སུམ་ཅུ། རྒྱུ་རྐྱེན་གཉིས་ཀ་ལ་ཁམས་འདུས་པ་དུས་ལ་མངོན་པར་སྐྱོ་བའི་རབས་ལ་སོགས་པ་དངོས་ཀྱི་ལག་ཏུའང་དོང་བར་གྱུར་ལ། དུས་དེ་དག་ཏུ་བསྡུ་བའི་བརྩོན་འགྲུས་ཉུང་བའམ། མཁས་རྨོངས་ཀྱི་བསྟན་བཅོས་ལ་བྱེ་ཐག་མི་ཕྱེད་པའི་ཤུགས་ཀྱིས་ནུབ་པའང་ཤིན་ཏུ་མང་བ་ཡོད་མཆི་སྟེ། གསུང་རབ་ཀྱི་དཀར་ཆག་རིན་པོ་ཆེའི་མཛོད་ཁང་ཞེས་བྱ་བ་ལས་ཤེས་པར་བྱ་བ་ནི་ཕྱི་མཐའ་འདིའི་གཏན་ཚིགས་ཙམ་མོ། །བབས་ལུགས་ཆེན་མོར་སྒྲ་མཁས་དཔལ་འཛིན་དུ་ལུང་བསྟན་པ་ལ་སྔོན་གྱི་བླ་མ་རྣམས་ཀྱིས་ངོས་འཛིན་པར་འདུག་སྟེ། གོ་རིམ་གྱི་ངེས་པ་ལྟར་ན་བློ་གྲོས་མཆོག་ཏུ་ངོས་བཟུང་ན་འཐད་ལ། ཀུ་མ་རཱ་ཛ་དང་གཉིས་ཀྱི་བར་ལ་ལོ་བརྒྱ་བརྒྱའི་གཏན་ཚིགས་མི་འགྲུབ་སྙམ་དུའང་དོགས་པར་མི་བྱ་སྟེ། ལོ་བརྒྱ་ནི་སྤྱིར་བསྟན་པ་འདི་ཡིད་དཔྱོད་དང་འདྲེས་པའི་ཚེ་དེའི་གསལ་བྱེད་རེ་འབྱོན་པ་ལ་དགོངས་ཀྱི། གཞན་དུ་ནི་གནས་སྐབས་དེ་དང་དེའི་གདུལ་བྱའི་རྟེན་འབྲེལ་ཁོ་ན་ལ་ལྟོས་ནས་སྤྲུལ་པ་སྒྱུ་མ་ལྟ་བུས་དོན་མཛད་པའི་ཕྱིར་རོ། །དོན་ལ་ཀུན་ཏུ་བཟང་པོ་འཇིག་རྟེན་དུ་བྱོན་ནས་ཆོས་ཀྱི་འཁོར་ལོ་བསྐོར་བ་ཡིན་པས་འདིའི་གསུང་རབ་ཚིག་བཞི་པ་ཡན་ཆད་ལའང་གཅེས་སྤྲས་སུ་བྱ་བ་ཡིན་ནོ། །དེ་སྐད་དུ་ཐུབ་པའི་དབང་པོས། །གང་ལས་ཆོས་ནི་རྣམ་ཤེས་པ། །དེ་ལ་གུས་པས་ཕྱག་བྱ་སྟེ། །ཞེས་པས། འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྫོགས་པ་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །ཞེས་བདག་ཅག་ནི་རྣམ་པ་ཀུན་ཏུ་གསོལ་བ་འདེབས་པ་ལགས་སོ། །
དེས་གསུང་གི་བདུད་རྩི་མྱོང་བ་ལས་བྱུང་བའི་སློབ་མའི་གཙོ་བོ་དག་སྨོས་པ་ནི། ཞོགས་ཐར་གླིང་བ་མཁས་གྲུབ་བདེ་ལེགས་རྒྱ་མཚོ། མཁས་གྲུབ་ཆོས་ཀྱི་གྲགས་པ། མཁས་གྲུབ་ཁྱབ་གདལ་ལྷུན་གྲུབ་སྟེ་གྲགས་པ་ཐོབ་པའི་མཁས་གྲུབ་གསུམ། མདོ་ཁམས་བ་འདན་སྒོམ་གྱི་་གྲགས་པ། རྒྱལ་སྲས་བཟོད་པ། བླ་མ་དཔལ་མགོན་པ། གུ་རུ་ཡེ་ཤེས་རབ་འབྱམས། གཞོན་ནུ་སངས་རྒྱས་ཏེ་ཐུགས་ཀྱི་སྲས་ལྔ། སྤྲུལ་སྐུ་དཔལ་འབྱོར་རྒྱ་མཚོ། སློབ་དཔོན་སངས་རྒྱས་ཀུན་དགའ། སློབ་དཔོན་བློ་གྲོས་བཟང་པོ། སྟག་མགོ་བྱད་ལ་ཆོས་རྗེ་སྟེ། བསྟན་བ་སྤེལ་བའི་བཤེས་གཉེན་བཞི། ཕ་རྒོད་རྟོགས་ལྡན་རྒྱལ་པོ། རྣལ་འབྱོར་བ་འོད་ཟེར་གོ་ཆ། རིག་འཛིན་འོད་གསལ་རང་གྲོལ། བྱ་བཏང་བསོད་ནམས་འོད་ཟེར་ཏེ་གྲུབ་པ་ཐོབ་པའི་རྣལ་འབྱོར་བ་བཞི། གཞན་ཡང་སྣེ་གདོང་གོང་མ་དང་མཚམས་སྦྱོར་བའི་སངས་རྒྱས་དཔལ་རིན་དང་། གྲགས་པ་དཔལ། གླུ་མཁན་བསོད་ནམས་སེང་གེ་ལ་སོགས་བསྟན་འཛིན་གྱི་བཤེས་གཉེན་དུ་མ་བྱུང་། ཕྱིས་ཆོས་རྒྱལ་འབྲི་གུང་པ་རིན་ཆེན་ཕུན་ཚོགས་ལ་ཞལ་བསྟན་ཅིང་། རང་གི་སྲས་སྤྲུལ་སྐུ་ཟླ་བ་གེས་དབུ་གཙུག་རྟ་མགོས་མཚན་བར་སྟོན་པ་དེའི་སྐྱེ་བ་ཡིན་པར་ལུང་བསྟན། དབུ་ཞྭ་བསྐོན་ཏེ་བྱིན་གྱིས་བརླབས་པ་ལས་དངོས་ཀྱི་སློབ་མར་གྱུར་ཏེ་གསུང་རབ་རྣམས་ལ་འཛིན་སྐྱོང་སྤེལ་བའི་གཅེས་སྒྲས་དཔག་ཏུ་མེད་པ་མཛད། དེ་ལས་བདག་ཅག་གི་གདོད་ནས་གྲུབ་པའི་རིགས་ཀྱི་ཅོད་པན་པདྨའི་རྒྱལ་ཚབ་ཤཱནྟ་པུ་རི་བའམ། གཏེར་ཆེན་ཤེས་རབ་འོད་ཟེར་ལ་བརྒྱུད། དཔལ་རི་ཐེག་པ་མཆོག་གི་གླིང་འདི་བསྐུན་ནས་བསྟན་པའི་སྒྱེན་བདག་ཞབས་དྲུང་འཕྱོང་རྒྱས་པ་ལས་སེམས་ཉིད་ངལ་བསོ་རྩ་འགྲེལ་བར་དུ་བསྒྲུབ་པར་བསྐུལ། བསྟན་པ་འདི་ལ་བཤད་སྒྲུབ་བྱེད་དགོས་པར་གདམས་པས་དོན་གྱི་བརྒྱུད་འཛིན་ཡིན་པར་ཡང་ཁས་པ་ཆེའོ། །ཡང་རིང་བརྒྱུད་ནི། མཁས་གྲུབ་བདེ་ལེགས་ནས།
སྟག་མགོ་བྱ་བྲལ་སོགས་རིམ་པར་ལས་འགྲོ་གླིང་བར་བརྒྱུད། ཆོས་རྒྱལ་རིན་ཆེན་ཕུན་ཚོགས་ལ་བཀའ་བབས་པའོ། །ཤིན་ཏུ་ཉེ་བརྒྱུད་ནི། མ་ཏང་གི་ཀླུ་སྒྲུབ་ཀྱི་སློབ་མར་གྱུར་བ་བཞིན་བདག་ཅག་གིས་ཞལ་མངོན་སུམ་དུ་མཐོང་བས་བརྒྱུད་པ་གཞན་ལ་རེ་བ་མི་འཆའོ། །མན་ངག་སྙིང་གི་ཐིག་ལེའི་སྐབས་ཀྱི་གཏམ་བཤད་ཟིན་ཏོ།། །།ད་ནི་མོད་སྒྱུ་སེམས་གསུམ་གྱི་བསྟན་པ་སྤྱིའི་བབས་ཚུལ་ལས། གངས་རིའི་ཁྲོད་འདིར་སྔ་འགྱུར་རྡོ་རྗེ་ཐེག་པའི་བསྟན་པ་དང་པོར་གཉགས་ལ་བབས། བར་དུ་གནུབས་ལ་བབས། ཐ་མར་ཟུར་ལ་བབས་ཞེས་བརྒྱུད་པའི་དང་པོ་སློབ་དཔོན་གཉགས་ཛྙཱ་ན་ཀུ་མཱ་ར་ནི། ཡུལ་ཡར་ཀླུངས་ཤེལ་བའམ་འཕྱོས། རུས་ལས་མིང་དུ་ཆགས་པ་གཉགས་རྟག་སྒྲ་ལྷ་སྣང་དང་། སྲུ་བཟའ་སྒྲོན་སྐྱིད་གཉིས་ཀྱི་སྲས་སུ་བྱུང་། མགྲིན་པ་ན་སྨེ་བའི་རྡོ་རྗེ་རྒྱ་གྲམ་ཡོད། མཚན་རྒྱལ་བའི་བློ་གྲོས་སུ་བཏགས། མཁན་བོ་བྷོ་དྷི་ས་ཏྭ་ལས་རབ་ཏུ་བྱུང་ཞིང་བསྙེན་པར་རྫོགས། མདོ་སྔགས་ཀྱི་ཆོས་མང་པོའི་འགྱུར་བྱེད་སྤོབས་པ་བསམ་གྱིས་མི་ཁྱབ་པ་ཡིན། སློབ་དཔོན་ཆེན་པོ་དང་། བི་མ་ལ་དང་། བཻ་རོ་དང་། གཡུ་སྒྲ་སྙིང་པོ་ཀུན་ལ་བསྟེན་པས་བཀའི་ཆུ་བོ་བཞི་འདུས་པ་ཡིན། དཀྱུས་བཤད་གཞུང་གི་ཆུ་བོ་འགྲེལ་ཊཱི་ཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནས་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པའོ། །དེ་ལ་སློབ་དཔོན་ཆེན་པོས་བདུད་རྩི་ཡོན་ཏན་གྱི་དཀྱིལ་འཁོར་དུ་སྨིན་པར་མཛད་པས་ཡར་ཀླུངས་ཤེལ་གྱི་བྲག་ཕུག་རྡོ་བསྐམ་པོའི་ཁོང་ནས་གྲུབ་ཆུ་བཏོན། འདི་ལས་བརྒྱུད་པའི་སྒྱུ་འཕྲུལ་ཀྱང་ཡོང་དགོས་ཏེ། གཙོ་བོར་ཕུར་བ་ལས་མངོན་རྟགས་བརྙེས་པ་ཡིན། བཙན་པོ་ཁྲི་སྲོང་གཤེགས་པའི་ཕྱི་ཞིག་ན། བཙུན་མོ་
ཚེ་སྤོང་བཟའ་བསམ་སྦྱོར་མི་བསྲུན་པས་ལོ་པཎ་ཕལ་ཆེར་དབུ་འཕང་སྨད། གཉགས་ཛྙཱ་ན་ཀུ་མཱ་རས་ཡར་འབྲོག་ཏུ་བཞུགས་པ་ལ། རང་གིས་སྤུན་གཉགས་དགེ་སྟོན་དགྲར་ལངས་ཏེ་འདི་མུ་སྟེགས་ཀྱི་སྔགས་མཁན་ཡིན་ནོ་ཟེར་གཡོ་ཅན་གྱི་ཁ་སྨྲས་བྱས། བསེ་ཞོས་ཀྱུགས་པའི་བྷནྡྷ་ནང་དམར་བ་ཡོད་པ་དེ། བརྐུས་ནས་སྐྱེ་བོ་བླུན་པོར་གྱུར་པ་དག་ལ་སྟོན་ཅིང་། བྷནྡྷའི་ནང་གྲི་རྩེས་དུད་ནས་འདི་ནི་ཐག་ཐོག་གི་ལས་སོ་ཞེས་དབྱེན་བཅོས། སྐྱེ་བོ་རྣམས་ཐེ་ཚོམ་སེལ་བའི་ཆེད་དུ། གང་དུ་བཞུགས་སར་རིན་པོ་ཆེའི་རྙེད་པ་སྤྲུལ་པས་མི་རྣམས་ཀྱིས་རྫུ་འཕྲུལ་དུ་ཤེས་ནས་ཁོ་རིག་ལ་ཡིད་མི་གཏོད་ཀྱང་། ད་དུང་བྱ་བ་མང་པོ་བསགས་ནས་སྐུ་ལ་བསྔོ་བའི་ཐབས་སྣ་ཚོགས་བྱེད་པ་མཁྱེན་ནས་གཤེགས། ཀོང་པོ་མཆི་མས་ཡུལ་གྱི་ཕུན་ཕེབས་ཙ་ན། ལུང་སྟོངས་ཤིག་ནར་མ་བདུན་འགྲོ་ཞིང་འདུག། གཡོག་པོ་དཱ་ལ་མིག་འོག་བཙན་བྱ་བར་འདི་དེད་ཅིག་གསུངས་པས། ཁོ་ན་རེ། ར་ལ་བདག་པོ་ཡོད་མཆི་འདིས་ཅི་འཚལ་ཞུས་པས། ལུང་སྟོངས་ཀྱི་རལ་བདག་པོ་ག་ན་འོང་དེད་ཅིག་གསུངས། དེར་བདག་པོ་མཆིམས་བྱ་རོག་གིས་ཤེས་ཏེ་རྐུན་ཁག་བབ། ར་ལ་བདུན་འཇལ་དགོས་ཟེར། བདུན་འཇལ་སྒྲད་ཙ་ན། ད་དུང་མཚིམ་པར་དབེན་པ་བཤིག ལྕགས་ཀྱི་ཐོབ་བཟུང་ནས་འདེད་དུ་བྱུང་། གཉགས་ཀྱི་བྲོས་ནས་གཙུག་ལག་ཁང་གི་ནང་དུ་ཆུད། སྒོ་བཅད་པས་ཐེམ་པ་ལ་ཐོ་བ་བརྡེག་ཅིང་བཙུན་ཆུང་གི་མགོ་ལ་དེ་བུ་ཐེབས་ཟེར། དེར་ཡང་བཞུགས་སུ་མ་སྟེར་བས། དབུས་སུ་གཏད་དེ་བྱོན་ཙ་ན། འགྲོ་སྲས་ཆུང་བྱ་བ་ཤ་བ་གཅིག་དེད་ནས་བྱུང་བ་དང་ཕྲད། ཁོའི་རྟ་འདྲོགས་ཤ་བ་ཤོར་བས། ཁོང་ཡང་ཁྲོས་ཏེ་གསོད་དུ་བྱུང་བ་ལ་འབྲོས་པའི་བདུན་པ་ཞིག་གཏད་པས་ཁོས་མ་མཐོང་ནས་ཐར། དུས་དེ་ཙ་ན་ལྷ་སྲས་མུ་ནེ་བཙན་པོ་ཡུམ་དམར་རྒྱན་གྱིས་དུག་གིས་བཀྲོངས་པའི་སྡད་ཀྱི་ཚོགས་དབུར་སློབ་དཔོན་བི་མ་ལ་རྒྱ་ནག་ནས་
རྫུ་འཕྲུལ་གྱིས་གཤེགས་པ་དང་མཇལ། གསེར་ཕྱེ་ལོང་མོ་གང་ཕུལ་བས། ལོ་ཙཱ་བ་དཔོན་གཡོག་སྐྱིད་དམ་གསུངས། ཡར་འབྲོག་སྒང་དུ་སྐྱིད་བགྱི་རུ། དགེ་ལ་སྟོན་གྱིས་མ་སྟེར་རོ། །མཆིམས་ཡུལ་གཏིང་དུ་སྐྱིད་བགྱི་རུ། །བྱ་རོག་དམྱལ་བས་མ་སྟེར་རོ། །བོད་ཡུལ་དགུས་སུ་སྐྱིད་བགྱི་རུ། །འགྲོ་སྲས་ཆུང་གིས་མ་སྟེར་རོ། །ཞེས་ཞུས་པས། ལོ་ཙཱ་བར་བརྙས་ན་བསྟན་པ་ལ་ཤིན་ཏུ་གནོད་པར་དགོངས་ནས། ཕུར་བ་ཕུན་སུམ་ཚོགས་པ་དང་། ཤམ་སྔོན་གཉིས་ཐུགས་ནས་བྱུང་སྟེ་བཤད། ལྟོ་བྲག་གཡར་ཆུ་སྣའི་བྲག་ཕུག་ཏུ་ལོ་པཎ་ལྷན་ཅིག་བས་སེང་ཕུར་ཉི་ཤུ་རྩ་གཅིག་ལ་བརྟེན་ནས་བསྒྲུབས་པས་ཕུར་དུ་ཕན་ཚུན་འཁྲོལ་བ་ཙམ་དུ་གྲུབ། དེར་གཉགས་ཀྱིས་ཏིང་ངེ་འཛིན་གྱི་ངང་ནས་ཕུར་བུ་གདེངས་ཏེ་བྱ་རོག་ལའོ་བྱས་པས། སྟོང་ཁམས་ཀྱི་བྱ་རོག་ཐམས་ཅད་ཚོགས་བྱུང་། སླར་མཆིམས་བྱ་རོག་ལའོ་ཞེས་བསྒྲིལ་བས། མཆིམས་ནས་བྱ་རོག་སྲུང་ཞིག་བྱུང་། གཉགས་ཁྲོས་ནས་བྱ་རོག་གཅིག་ལ་དེངས་པས་མོད་ལ་ཤིའོ། །དེར་བི་མ་ལས་མངོན་སྤྱོད་ཀྱི་མཐུས་བསད་པ་གྲུབ་ཀྱིས། ད་ཆོས་ཉིད་ཀྱི་མཐུས་གསོབ་ཨེ་འགྲུབ། གསོས་ཤིག་གསུངས་པས། སློབ་དཔོན་ཛ་ལན་དྷ་རི་བ་དང་སློབ་མ་ནག་པོ་སྤྱོད་པ་བཞིན་གཉགས་ཀྱིས་སླེང་མ་ནུས། བི་མ་ལས་བྱེ་མ་གཅིག་བཏབ་པའི་མོད་ལ་བྱ་རོག་གསོས་ཏེ་དེངས་པར་གྱུར་ཏོ། །རྟོགས་པས་བདག་མ་བསྒྲལ་བར། དྲག་ཤུལ་གྱི་ལས་བརྩམས་པ་གྲུབ་ཀྱང་ཉེས་པ་ཆེ་ལོ་གསུངས་ནས་གནས་ལུང་གི་ཆོ་ག་མཛད། དེར་མཆིམས་ལྷ་གཡག་དཀར་དུ་བརྫུས་ནས་བྱུང་བ་སྤུན་ལ་བསྒྲལ། དེ་ནས་མཆི་མས་བྱ་རོག་བླ་སྤང་རབ་འབྲིང་ཐ་གསུམ། བྲན་དང་། ཁོལ་པོ། འོག་རྟ། སྒོ་ཁྱི། སྣག་གི་གཉེན་མཚམས་དང་བཅས་པ་ཕུར་བ་གདེངས་ཆོག་གི་མཐུས་བསྒྲལ་ནས་རབས་བཅད། དེ་ནས་པ་སྤུ་ན་གཉགས་དགེ་སྟོན་ལ་བཏབ་པས་འདི་ལྟར་དྲག་པོ་མཐུའི་
ལས་ནི་རྣམ་པ་ཞེ་སྡང་རྡོ་རྗེའི་རྟེན་འབྲེལ་ལ་ལྷག་པར་ལྟོས་དགོས་པ་ཞིག་ལ། སློབ་དཔོན་བི་མ་ལའི་ཐུགས་རྗེས་གཉགས་ལ་སྙིང་རྗེ་ཆེན་པོའང་སྐྱེས། དགོངས་པ་ཆོས་ཉིད་དུ་གྱུར་བས་ཡེ་མཐེ་བས། དེར་སློབ་དཔོན་བི་མ་ལས་འདིར་གྲོགས་མངོན་སྤྱོད་ཀྱི་མཚན་དང་ལྡན་པ་ཞིག་རྙེད་ན་ཐེབས་གསུངས་པས་འཚོལ་དུ་བྱོན། དུས་དེ་ཙ་ན་མགར་བྱེད་པ་ལ་སོག་བོར་འབོད་པས། སོག་པོ་བེ་གཙོ་ཞེས་བྱ་བ་ཁྲོ་བོའི་དབྱིབས་སུ་ཡོད་པ་ཞིག་རྙེད། དེའི་གཟུགས་མགོ་བོ་རྒྱ་མདུད་དུ་འགྲིལ་ཞིང་ངོ་སྨད་ཟུར་གསུམ་པའི་རྣམ་པར་ཤར་བ་ལ་སོགས་པའི་མཚན་རྟགས་ཐམས་ཅད་ཚང་བར་གཟིགས། གཉགས་ཀྱིས་ཁོའི་ཕྱིན་མར་བྱོན། ཁོ་མགར་བྱེད་པའི་སྤུད་ཕ་འབུད་གྲོགས་མཛད་ཀྱིན་རྒྱུ་མཚན་ཉིད་ཀྱི་ཆོས་བཤད་པས་ཁོའི་རྣ་ལམ་དུ་མ་བྱུང་། ཀྲི་ཡོག་སྡེ་གསུམ་བཤད་པས་རེས་འགའ་ཙམ་ཉན་ཅིང་གཞན་ཐོབ་ཆེམ་ཆེམ་བརྡུང་སྐད། ནང་རྒྱུད་སྡེ་གསུམ་བཤད་ཀྱིན་ལྕགས་ཀྱི་ལྕུག་མ་སྙོད་པ་རྣམས་ཁྱུར་མིད་བྱས་པས། ཁོ་ཡ་མཚན་སྐྱེས་ཏེ་འདི་ལྟ་བུའི་རྫུ་འཕྲུལ་ཅི་ལས་བྱུང་ཟེར། ད་ལྟ་བཤད་པའི་ཆོས་དེ་ཉམས་སུ་བླངས་པ་ལས་བྱུང་སྨྲས་པས། ཁོ་ཤིན་ཏུ་དད་དེ་ལག་ཆ་ཐམས་ཅད་ཕུལ་ནས་སློབ་མར་བྱས། ལྷ་དཔལ་གྱི་ཡེ་ཤེས་སུ་མིང་སྤོས། དེ་བཞིན་དུ་འོ་ཕྲན་དཔལ་གྱི་གཞོན་ནུ་ཡང་། ཕུར་པ་བསྒྲུབ་པའི་མཚན་ལྡན་དུ་ཤེས་ནས་དཔོན་སློབ་གསུམ་ཀས་བསྒྲུབས་པས། དེ་དགེ་སྟོན་གྱིས་ཚོར་ཏེ་གསོད་དུ་འགྲོ་བའི་སྟ་གོན་རྩོམ་པ་ན། གཞན་དག་གིས་བནྡེར་བརྙས་པ་མི་རུང་ཟེར་ནས་བཤོལ་བཏབ་ཀྱང་མཉན། ནངས་པར་འགྲོ་རྒྱུའི་ནུབ་བུད་མེད་མང་པོས་མཐའ་བསྐོར་ནས་མགོ་བཅད་པར་རྨིས། དེ་ཆུང་མ་ལ་བཤད་པས་ནན་གྱིས་བཤོལ་བཏབ་ཀྱང་མཉན་པར་རྟ་ལ་ཞོན་ནས་སོང་བ་ན། བྱ་ཆེན་པོ་ཞིག་འཕུར་བྱུང་ནས་རྟ་འདྲོགས་ཤ་ཁམ་ཁྲག་ཐིགས་སུ་གྱུར་ཏེ་སྲུང་མས་དངོས་སུ་བསྒྲལ་བར་གྲགས། དེར་སོག་པོ་དཔལ་ཡེས་སྙིང་བཏོན་ནས་སློབ་
དཔོན་ལ་ཕུལ་བས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །སེམས་ཅན་ཐམས་ཅད་བདེ་གྱུར་ཅིག་གསུངས། མདོར་ན་སྐྱོབ་པའི་ལྷ་བྱ་ཁྲར་སྤྲུལ་པ་དང་། བླ་སྤྱང་་། བྲན་ཁོལ། འོག་རྟ། སྒོ་ཁྱི། གཉེན་མཚམས་ཚུན་ཆད་བསྒྲལ་ཞིང་རབས་བཅད། དེ་བཞིན་དུ་འགྲོ་སྲས་ཆུང་ནེའུ་ཐང་ལ་རྟ་ཁྱུ་འཚོ་བའི་རྣམ་པར་ཤེས་པའང་བཀུག་སྟེ་གདབ་ལས་ཀྱིས་ཚར་བཅད། འགྲོ་ལྷ་སྤྱང་ཀི་སྔོན་པོར་བྱས་པ་དང་། བླ་སྤྱད་བྲན་ཁོལ་ཐམས་ཅད་སྔར་བཞིན་ཁ་དག་པར་བྱས། དེའང་གཉགས་ལོ་ཆེན་པོ་འདི་སངས་རྒྱས་དངོས་དང་མཚུངས་པའི་པཎ་གྲུབ་རྣམས་ལ་བསྟེན་པས། སྒྲ་ཚད་མཚན་ཉིད། སྔགས་ཕྱི་ནང་ཀུན་ལ་མཁྱེན་པ་ཤིན་ཏུ་ཆེ་བར་གྲགས། ལོ་ཙཱ་བ་ཆེན་པོར་བསྟེན་ནས་དམ་པའི་ཆོས་མང་པོ་བསྒྱུར། མདོ་སྒྱུ་སེམས་གསུམ་ཀའི་བསྟན་པའི་མདའ་བདག་ཏུ་གྱུར་ཅིང་ཉན་བཤད་ཀྱི་སྒོ་ནས་སློབ་མ་ཁྱད་པར་ཅན་བསྐྲུན་པས་བཀའ་དྲིན་བསམ་གྱིས་མི་ཁྱབ། མཐར་སྙན་བརྒྱུད་རྡོ་རྗེ་ཟམ་པ་དང་། མན་ངག་སྡེ་ལས་དངོས་གྲུབ་ཆེན་པོ་བརྙེས་ཏེ་སྟོང་གསལ་འོད་ཀྱི་ཕུང་པོར་གཤེགས་སོ། །དེ་ལ་སློབ་མའི་གཙོ་བོ་ནི། ཕུར་བ་མཁན་པོ་དག་དཔལ་བརྒྱུད་དུ་འདྲེན་པ་ཡོད་དེ། འདིར་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ། སྙན་དཔལ་དབྱངས། མཚུར་ནག་ཡེ་ཤེས་དཔལ། ཨུ་པ་དེ་གསལ། ཐང་བཟང་དཔལ་གྱི་རྡོ་རྗེ། དགྱེ་འཕགས་པ་ཤེས་རབ། བྷུ་སུ་ཀུ་མཆོག་རྣམས་ཏེ། དབོན་བརྒྱུད་རྣམས་ལས་ཀྱང་ཕྲིན་ལས་རྒྱ་ཆེར་བྱུང་ངོ། །སོག་པོ་དཔལ་གྱི་ཡེ་ཤེས་ནི་ཡུལ་ཡར་འབྲོག་པ་ཡིན། སློབ་དཔོན་ཆེན་པོའི་དུས་ནས་དངོས་གྲུབ་བརྙེས་ཚར་བ་གཅིག་ཐུན་མོང་བའི་སྣང་ངོར་མགར་གྱི་ཚལ་དུ་བཞུགས། གཉགས་ལོ་ཆེན་པོ་དེ་མཁྱེན་པ་ཤིན་ཏུ་ཆེ་བས།
སློབ་དཔོན་རྣམས་ལས་ཀྱང་རང་ཉིད་མཁས་སྙམ་པ་ལན་གསུམ་སྐྱེས་པས་སྲོག་ལ་བབས་པའི་དོ་གལ་ཚར་གསུམ་བྱུང་བར་གྲགས། དེ་ལ་རྒྱུ་འབྲས་མི་བསླུ་བའི་བདེན་པ་ལས་བདག་གིར་མཛད་པའི་ཚུལ་སྟོན་པ་ལ་བབ་པའི་སྐབས་ཤིག་ན། གཉགས་ལ་སྐུ་དགྲ་ལན་གསུམ་དུ་ལངས་པའི་རེས་གཅིག་ཡུལ་ཉེ་འཁོར་གྱི་གཉགས་དམར་ཕ་སྤུན་གྱི་མི་ཤ་ལ་བོན་དུ་བྱས་ནས་སློབ་དཔོན་བཙོན་དུ་བཟུང་། སོག་པོ་དཔལ་ཡེ་དེ་དོན་ལ་གྲུབ་པའི་སྤྱོད་པ་འབའ་ཞིག་ཡིན་གྱི་རྣམ་པར་གཅན་གཟན་གྱི་གཉའ་ནས་འཛིན་པ་སོགས་བརྟུལ་བོད་པར་སྟོན་པས། སྐབས་འདིར་བླ་མའི་ཕྱིར་དུ་ལུས་སྲོག་འདོར་བའི་རྡོ་རྗེའི་དམ་ཚིག་གཉན་པོ་ལ་འཚལ་བས་བཙོན་སྲུང་བ་གཉིས་བཀུམ། སློབ་དཔོན་བཙོན་དོང་ནས་སྤྱན་དྲངས་པ་སོགས་སྐུ་དགྲ་ལན་གསུམ་བརྟུལ་ཞིང་། ཐུགས་ལན་གསུམ་བཟུང་བས་རྡོ་རྗེ་ཕུར་བའི་དཀྱིལ་འཁོར་མངོན་སུམ་པར་སྤྲུལ་ནས་རྗེས་སུ་བཟུང་བ་འདི་ཙམ་དོན་ལ་གནས་སོ། །དེས་གནུབས་ཆེན་ལ་རྗེས་སུ་གདམས་པའོ།། །།དེ་ལ་སྔ་འགྱུར་གྱི་བསྟན་པ་བར་དུ་གནུབས་ལ་བབས་ཏེ། གནུབས་ཆེན་སངས་རྒྱས་ཡེ་ཤེས་རིན་པོ་ཆེ་འདི། བཙན་པོ་ཁྲི་སྲོང་ལྡེའུ་བཙན་ནས། ཁྲི་བཀྲ་ཤིས་བརྩེགས་པ་དཔལ་གྱི་བར་ཅི་རིགས་པར་བྱུང་བར་འདོད་པ་དང་། ཡང་རལ་བ་ཅན་གྱི་དུས་སུ་བྱུང་ནས། ཁྲི་བཀྲ་ཤིས་བརྩེགས་པའི་བར་བཞུགས་པར་འདོད་པ་དང་། ཡང་སྔམ་བཙན་པོ་ཁྲི་སྲོང་ལྡེའུ་བཙན་དང་། ཕྱི་མངལ་བ་ཅན་གྱི་དུས་ན་བྱུང་ངོ་ཞེས་གཏན་ཚིགས་སྣ་ཚོགས་ཡོད་དེ། རྒྱ་བོ་ཆེར། རྒྱ་གར་མཁས་པ་བི་མ་མི་ཏྲ་དང་། ཨོ་རྒྱན་མཁན་པོ་པདྨ་འབྱུང་གནས་དང་། བལ་པོའི་མཁས་པ་བསུ་དྷར་དང་། བོད་ཀྱི་མཁས་པ་ཛྙཱ་ན་ཀུ་མཱ་རས། བདག་ལ་གནང་བའི་མན་ངག་འདི་རྣམས་ཡིན། །ཞེས་པས་བཙན་པོ་ཁྲི་སྲོང་གི་དུས་ན་བྱུང་བར་རྩོད་པ་མེད་ལ། སྐུ་ཚེའི་ཚང་བརྒྱ་དང་བཅུ་
གསུམ་ལ་གཏན་ཚིགས་བསྒྲིགས་ནས་བྱོན་པའི་དུས་ཕྱིར་བསྲིང་བ་དང་། རུས་གནུབས་དང་། ཡུལ་སྒྲགས་ལ་གཟུགས་བརྙན་གཉིས་པར་བཅོས་པས་སྔ་ཕྱི་གཉིས་པར་བྱུང་སྟེ་སྙིང་པོ་མེད་དོ། །འདིར་ནི་གནུབས་ཀྱི་བན་ཆུང་སངས་རྒྱས་ངས། ལོ་ནི་བརྒྱ་དང་སུམ་ཅུར་ལོན། །ཞེས་ཕྱི་མཐའི་ཐ་ཚིག་མིན་པར་སྐབས་ཀྱི་འཕྲོས་དེ་ན་ལའང་བྱུང་བས་ཚེའི་རིག་པ་འཛིན་པ་བརྙེས་ནས་མངའ་བདག་དང་ལ་འཁོར་བཙན་གྱི་བར་དུ་བཞུགས་པར་སྣང་བ། དེ་ལ་ཡབ་གནུབས་རིགས་གསལ་བའི་དབང་ཕྱུག་དང་། ཡུམ་མཆིམས་མོ་བཀྲ་ཤིས་འཚོ་ཞེས་བྱ་བའི་པུར་བཙས། མཚན་རྡོ་རྗེ་ཁྲི་གཙུག་ཏུ་གྲགས། ལོ་བདུན་བར་འོ་བྲན་དཔལ་གྱི་གཞོན་ནུ་ལས་བྲི་ཀློག་སྦྱངས། མཁན་པོ་བྷོ་དྷི་ས་ཏྭ་ལས་རབ་ཏུ་བྱུང་། སློབ་དཔོན་བ་སུདྷ་ར་བསམ་ཡས་སུ་བྱོན་པ་དང་མཇལ་ནས་གསེར་སྲང་གསུམ་གྱི་འབུལ་བ་བྱས་ཏེ་མན་ངག་འགའ་ཞིག་ཐོས། སློབ་དཔོན་འབྱོན་ཁར་སླར་བལ་ཡུལ་དུ་ཤོག་ཅེས་པའི་རྗེས་སུ་གནང་བ་ཐོབ་པས་རྒྱ་བལ་ལ་འགྲོ་བའི་བློ་ཆུང་ངུ་ནས་སྐྱེས། སྤྱིར་རྒྱ་གར་ལ་ལན་བདུན་བྱོན་པའི་སྔ་རེས་དང་པོ་ལོ་བཅུ་གསུམ་པ་ཡིན་ཞེས་ཟེར། སློབ་དཔོན་ཆེན་པོ་པདྨའི་ཞབས་ལས་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་བ་ཐོབ་ཅིང་དངོས་གྲུབ་བརྙེས། རེ་ཞིག་ན་ཡུལ་གཞིས་བཙོངས་པའི་རིན། གསེར་ཞོ་ལྔ་བཅུ་བྱུང་བ་བསྣམས་ཏེ་རྒྱ་བལ་ལ་གཏད་དེ་བྱོན། སློབ་དཔོན་བ་སུ་དྷ་ར་ལས་རྒྱུད་དང་མན་ངག་མང་དུ་ཐོས། དེས་མདོ་ལུང་གི་མཁན་པོ་ཆོས་རྒྱལ་སྐྱོང་དང་། དྲག་སྔགས་ཀྱི་མངའ་བདག་རོ་མ་བུ་གུ་ཧྱའང་ལུང་བསྟན། རྒྱ་གར་དང་། བལ་པོ་དང་། བྲུ་ཤའི་ཡུལ་ན་གནས་པའི་མཁས་པ་མང་ཞིག་བསྟེན། རྒྱ་གར་དུ་མཁན་པོ་ཆོས་རྒྱལ་སྐྱོང་ལས་མདོ་ལུང་འགའ་ཞིག་དང་། ཁྱད་པར་བྲུ་ཤའི་མཁན་པོ་ཆེ་བཙན་སྐྱེས་ལས་མདོ་དགོངས་པ་འདུས་པ་ཡོངས་སུ་རྫོགས་པ་མཁྱེན་པར་མཛད། བསམ་ཡས་སུ་ལོ་ཙཱ་བ་ཆེན་པོའི་གྭར།
བཞུགས་ཤིང་དམ་པའི་ཆོས་ཀྱང་བསྒྱུར། དབེན་པ་འབའ་ཞིག་བསྟེན་དགོངས་པ་ལ་སྤྱིར་དུས་འདི་ཙམ་ན་རྒྱལ་ཁྲིམས་ཞིག་ཅིང་། ཕྱོགས་རིས་ཀྱི་འཁྲུག་པ་དར་བའི་སྐབས་སུ་གྱུར་བ་གནུབས་ཆེན་ཡབ་སྲས་ལ་འོ་བརྒྱལ་ཆེན་པོ་བྱུང་། ཁྱད་པར་སྐུ་ཚེ་སྔ་མ་ལ་རྒྱ་གར་དུ་ཤན་པ་མ་རུ་ཙེ་བྱ་བར་འཁྲུངས་ནས་སེམས་ཅན་གྱི་དོན་མཛད་པས་དྲག་པོའི་གདུལ་ཞིང་ལྷག་མ་མ་ལུས་པར་རྫོགས་པར་མཛད་པ་དང་། བོད་འདིར་དཔོན་སྲས་ཀྱི་བསྟན་པ་ཉམས་པར་བྱེད་པས་མཚོན། སྔ་ཕྱིར་བསྟན་པ་ལ་གནོད་བྱེད་མང་དུ་བྱུང་བ་དེ་དག་དྲག་སྔགས་ཀྱིས་ཚར་བཅད་ནས་བསྟན་པ་བསྲུང་བའི་ཕྱིར། རྒྱས་པའི་ཕྲིན་ལས་ཀྱིས་བསྐུལ་བ། རྣམ་པའི་རྐྱེན་ཡུལ་པའི་ཁེངས་ལོག་སྔ་ཕྱི་བར་གསུམ་དུ་བྱུང་ནས་རིགས་ཀྱི་སྲས་གཉིས་བཀྲོངས་པས། ཇི་སྐད་དུ། ཉོན་མོངས་བོད་ཡུལ་དབུས་སུ་ལངས། །འཚོ་བའི་ཟས་རྣམས་འབངས་ཀྱིས་ཕྲལ། །ཅེས་དང་། བདག་འདྲ་གནུབས་ཀྱི་བན་ཆུང་ཡང་། །སྙིང་ནས་ཆོས་བཞིན་བྱ་སེམས་སྐྱེས། །ཞེ་སྡང་དགྲ་བོས་བྱེད་མ་སྟེར། །སངས་རྒྱས་བསྟན་པ་བསྲུང་བའི་ཕྱིར། །ཞེ་སྡང་དེ་མ་ཐག་ཏུ་བསྐྱེད། །དཀར་པོའི་ཆེ་བ་འདོན་བསམས་ནས། །ངན་སྔགས་ཡིག་སྣ་སྣ་ཚོགས་བསླབས། །ཞེས་པ་ལྟར་རྒྱ་བལ་གྱི་ཡུལ་ནས་གཤེད་སྐོར་རྒྱ་མཚོའི་དྲག་སྔགས་རྣམས་སྤྱན་དྲངས་པ་ཡིན་ཏེ། བླ་མ་བཅུ་གཅིག་ཞབས་ནས་བཏེག །འོན་ཀྱང་མཁས་པ་བཞི་ལ་གཏུགས། །སློབ་དཔོན་དཔལ་གྱི་སེང་གེ་དང་། །རྒྱ་གར་ཁྲག་འཐུང་ནག་པོ་དང་། །ཕུང་བྱེད་ཤཱནྟིང་གརྦྷ་དང་། །བལ་པོ་བ་སུ་དྷ་ར་བཞི། ། མཁས་པ་བཞི་ཡི་ཐུགས་བརྟོལ་ནས། །དྲབ་པའི་མན་ངག་ཐུགས་ལ་བཏགས། །ཞེས་དང་། དེ་དག་ཀྱང་གནད་དུ་བསྡུས་པ་བལ་པོའི་སློབ་དཔོན་ཉིད་ལས་བྱུང་སྟེ། འདི་སྐད་དུ། སློབ་དཔོན་བལ་པོའི་རྒྱལ་པོ་ཡི། །ཡང་ལེ་ཤོད་ཀྱི་བྲག་ཕུག་ཏུ། །གནུབས་ཀྱི་བན་ཆུང་འདིར་ཤོག་གསུངས། །བམ་ཆེན་རོ་ཡིས་དབང་བསྐུར་
ནས། །ལྷ་རུ་འཇམ་དཔལ་ཚེ་བདག་གཏད། །ཅེས་པས་མཚོན་ནོ། །དེ་ལྟར་སློབ་དཔོན་འདི་རྒྱ་གར་དུ་འབྱོན་པའི་རེས་ཤིག་རྡོ་རྗེ་གདན་ལ་ཚོགས་གསོག་མཛད་པས། ནམ་མཁའི་ཀློང་ནས་གསེར་གྱི་རྡོ་རྗེ་རྩེ་དགུ་བཞིག་རང་གི་ཐད་ཁྲུ་གང་གི་སར་བྱུང་སྟེ་ལན་གཉིས་སུ་མ་ཟིན། གསུམ་པའི་ཚེ་ཕྱག་གཡས་པའི་མཐེབ་སྲིན་གྱི་བར་དུ་ཆགས་པའི་མོད་ལ་ཕྱག་ན་རྡོ་རྗེ་དངོས་ཀྱི་སྐུར་གྱུར། དབང་བསྐུར་བྱིན་གྱིས་བརླབས། སངས་རྒྱས་ཡེ་ཤེས་སུ་མིང་གི་ཅོད་པན་དབྱངས། དབང་རྟགས་སུ་རྡོ་རྗེ་རྩེ་དགུ་པ་འབྲལ་མེད་དུ་འཆང་བ་ད་ལྟ་རོང་བྱམས་ཆེན་གྱི་ཐུགས་ཀ་ན་ཡོད་པར་གྲགས། རྒྱ་བལ་གྱི་རུ་མཚམས་རྡོ་རྗེ་རྩེ་ལྔའི་བྲག་ཕུག་ཏུ་སློབ་དཔོན་པདྨ་ལས་ཀྱང་གདམས་པ་ནོད་པ་སོགས་རྒྱུད་དང་མན་ངག་མང་པོ་ཐུགས་སུ་ཆུད། དུར་ཁྲོད་དང་། མཚོ་གླིང་དང་། མི་མ་ཡིན་དྲག་པོ་རྒྱུ་བའི་གནས་སུ་སྒྲུབ་བར་མཛད་པས། འཇམ་དཔལ་ཡ་མཱནྟ་ཀ་ལ་སོགས་ཏེ་ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། ཀླུ་དང་། གནོད་སྦྱིན་དང་། དྲི་ཟ་དང་། ཡི་དྭགས་དྲག་པོ་དག་དང་ཡང་གཏམ་འགྲེ་ཞིང་མཆོད་པར་བྱེད། ནུས་པ་ཤིན་ཏུ་ཆེ་བས་ལྷ་སྲིན་ཀུན་གྱིས་སྟངས་ཕུལ། དུར་ཁྲོད་ཕུ་ལུང་ནག་པོར་ཨེ་ཀ་ཙ་ཊཱིས་ཞལ་བསྟན། བྲམ་ཟེ་མོའི་ཐོད་པ་དངོས་གྲུབ་ཀྱི་རྫས་སུ་བྱིན། པདྨ་གར་གྱི་དབང་ཕྱུག་གིས་མོན་ནག་ཁ་ཁྲའི་ཐོད་པའང་དམ་ཚིག་གི་རྫས་སུ་སྤྲད། མངོན་ཤེས་དང་རྫུ་འཕྲུལ་ཐོགས་པ་མེད་པར་གྲུབ། བོད་ཡུལ་དབུས་ཀྱི་གནས་སྒྲགས་ཀྱི་ཡང་རྫོང་དུ་སྒྲུབ་གནས་ཀྱི་མཐིལ་མཛད། དེ་བཞིན་དུ་ཉུག་གི་རྡོ་རྗེ་སྒྲོམ་བུར་ཟླ་བ་དགུས་སེམས་ཉིད་བཙན་ས་ཟིན། གཙང་གི་ཕུང་པོ་རི་བོ་ཆེ་དང་། གཡུང་གི་རྫ་ལྷུད་མོ་སོགས་ཞབས་ཀྱིས་བཅགས། དྲུག་ཅུ་རེ་གཅིག་པར་སྒྲགས་སུ་ཁེངས་ལོག་བྱུང་བས་གཤིན་རྗེ་གཤེད་ཀྱི་དྲག་སྔགས་རྣོན་པོས་གྲོང་ཁྱེར་མང་པོ་བརླག་པར་མཛད། དེ་སྐད་དུ། བདག་འདྲ་སངས་རྒྱས་ཡེ་ཤེས་ཀྱིས། །སྒྲུབ་ཁང་ཡ་མའི་མཁར་
ལ་བྱས། །སྒྲགས་ལ་ནག་པོའི་རྩེ་མོ་རུ། །ཉེ་འབྱེད་རླུང་གི་འཁོར་ལོ་བསྐོར། །སྒྲགས་ཀྱི་གྲོང་ཁྱེར་སུམ་ཅུ་རྩ་བདུན་བརླང་། །ཅེས་བྱུང་ངོ། །སླར་གནུབས་ཡུལ་གྲོང་དུ་བྲོས། དེར་ཡང་བཞུགས་སུམ་སྟེར་བས་སྙེམ་བྱེ་མཁར་བཟུང་། གནས་རྟེན་ཡང་དམག་གི་ཆོམ་པོས་བསྐོར་ཞིང་སྐུ་སྲོག་ལ་བསྔོ་བར་ཉེན་པ་ན། མཁར་གྱི་རྩེ་ནས་ལྷ་འདྲེ་གཉན་པོ་དཔང་དུ་གསོལ། ཚིགས་སུ་བཅད་པའི་བདེན་པ་བདར། ཆོས་གོས་བརྡབས་པས་དམ་ཅན་ཆོས་སྐྱོང་རྣམས་མངོན་སུམ་བར་བྱུང་སྟེ། བདག་ཅག་གི་མཐུ་རྩལ་གྱིས་རེབས་ཐལ་བར་རློག་ཉི་ཟླ་ཆ་ལང་རྡེབ། གནམ་ས་བླ་འོག་བསྒྱུར་ནུས་ཀྱང་ཚེ་རབས་སྔ་མའི་ལན་ཆགས་འཇོལ་བས་སྔོན་ཆད་གྲོགས་བྱེད་དུ་མ་སྟེར། ད་ནི་བཀའ་བཞིན་འཚལ་ལོ་ཟེར་བས། ཆོས་གོས་ཀྱི་ཆ་གནས་སེང་ལྡེང་གི་ཕུར་བུ་བཏོན། དམ་ཅན་རྣམས་ཀྱི་སྲོག་སྙིང་དྲངས། དམག་མི་ཡོད་པའི་རི་ལོགས་ལ་འདྲིལ་ཞིང་བསྡིགས་པས། རི་ལས་མེ་དཔུང་ཆེན་པོ་བྱུང་སྟེ་དམག་རྣམས་ཐམས་ཅད་བསྲེགས་ཤིང་བརླག་པར་བྱས། སླར་རབ་ཏུ་འགྱོད་ནས་བསམ་གཏན་མིག་གི་སྒྲོན་མ་སྡིག་སྦྱོང་དུ་མཛད་པར་གྲགས། སྐུ་དགྲ་ཐུལ་རྗེས་ལོ་གསུམ་གྱི་བར་ལ་དབུལ་ཞིང་ཕོངས། སོག་པོ་དཔལ་གྱི་ཡེ་ཤེས་ལས་སེམས་ཕྱོགས་དང་སྒྱུ་འཕྲུལ་ལ་སོགས་པ་གསན། སྒྲགས་ཡང་རྫོང་དུ་དེ་ཁོ་ན་ཉིད་གྱི་ཏིང་ངེ་འཛིན་ལ་གཞོལ། མངའ་བདག་རལ་བ་ཅན་གྱི་བར་ལན་ཆོད་དུ་རྒྱ་གར་དང་བོད་ཀྱི་བར་དུ་འབྱོན་བཞུད་ཀྱི་ངང་དུ་ཡོད་པ་ལ། དར་མས་བསྟན་པ་བསྣུབས་པ་ཐུགས་ཀྱིས་མ་བཟོད་ནས་སླར་ཡང་དྲག་སྔགས་སྤུ་གྲི་རེག་ཆོད་མང་པོ་ཚགས་སུ་བཙུད་ནས་མངོན་སྤྱོད་ཀྱི་ཐུགས་རྗེས་མཚམས་སྦྱར་བར་དགོངས་པ་ལ། སྡིག་སྤྱོད་རྒྱལ་པོ་ལྷ་ལུང་དཔལ་གྱི་རྡོ་རྗེས་བསྒྲལ་ཟིན་པས་དྲག་སྔགས་འཆོལ་གྱིས་དོགས་ནས་གཏེར་དུ་སྦས། མདོ་སྒྱུ་སེམས་གསུམ་གྱི་བསྟན་པའི་རྒྱུན་སློབ་མའི་ཚོགས་ལ་མི་ནུབ་བར་སྤེལ་ནས་མཐར་
རང་བཞིན་རྫོགས་པ་ཆེན་པོའི་ལམ་ནས་ལྷུན་གྲུབ་འོད་ཀྱི་ཕུང་པོར་མྱ་ངན་ལས་འདས་སོ། །འདི་ལ་བརྒྱུད་འཛིན་གྱི་སློབ་བུ་སྲས་ཀྱི་དམ་པ་གཅིག། ཐུགས་ཟིན་གྱི་སྲས་བཞི་དང་ལྔར་བྱུང་བ་ལས། །སྲས་ཀྱི་དམ་པ་ཡོན་ཏན་རྒྱ་མཚོ་ནི་སྐྱེ་བ་སྔ་མ་ཡབ་སྲས་སུ་འགྲེལ། འདིར་གནུབས་ཁུ་ལུང་དུ་བཙས། སྐྱེ་བ་སྔ་མའི་ཕུ་པོ་རྒྱ་གར་བྷན་དྷ་ལས་གནོད་སྦྱིན་མོའི་རྐང་མགྱོགས་བསྒྲུབས་ནས་གྲུབ་ཀྱང་གཤོག་པ་བཅག་པས་མ་ནུས། སླར་རྐང་མགྱོགས་ཅིག་ཤོས་བསྒྲུབས་པས་ཁོས་ཐུ་བའི་ནང་དུ་དྷ་ན་དྷ་ལ་ཁུར་ནས་མཚན་གུང་གཅིག་ལ་ཁུ་ལུང་ཡོན་ཏན་རྒྱ་མཚོའི་རྩར་བསྐྱལ། དེར་ཡོན་ཏན་རྒྱ་མཚོའི་སྐྱེ་བ་སྔ་མ་རང་གི་གཅུང་པོར་གྱུར་བ་ལ་རྗེས་སུ་བརྩེ་བས་དབང་བསྐུར། ཡོན་བདག་ལ་ཐུན་མོང་གི་དངོས་གྲུབ་བྱིན་པས་མིང་བས་བདུན་ཚུན་ཆད་དར་བར་གྲགས། ཡོན་ཏན་རྒྱ་མཚོ་ལ་སྒྲུབ་གནས་གྲོང་དུ་མི་རུང་གསུངས་ནས་མཁར་གདོང་ཡོན་མོའི་གཙུག་རུམ་ལྟ་བུའི་ས་གནད་བསྟན་ཏེ་བསྟན་སྲུང་གཤིན་རྗེ་དམར་ནག་དང་། མ་གཤིན་གྱི་སྐོར་སོགས་བྱིན་ནས་རྒྱ་གར་དུ་གཤེགས། དེར་ཡོན་ཏན་རྒྱ་མཚོ་ལོ་སུམ་ཅུ་ལོན་པའི་ཚེ་ཁྱིར་ལ་འཁྱམས་པ་སློབ་དཔོན་སངས་རྒྱས་ཡེ་ཤེས་སྣང་གྱི་ཤུག་ལ་དག་པོར་བཞུགས་པ་དང་མཇལ་བས། རུས་གཅིག་པ་དང་། སྐལ་བ་ཅན་དུ་དགོངས་ནས་ཆོས་སྐོར་བཅུག་སྟེ་རྗེས་སུ་བཟུང་། ལྟ་བསྒང་དྲིལ། གབ་བ་མངོན་དུ་ཕྱུང་། གསང་བ་ཁེང་ལྟོ་ལྟར་ཕྱུང་། སྟར་ཁ་གེགས་སེལ་གྱི་ཚུལ་ཏེ་བཞིག་བཤད་པས་གདམས་ངག་ཐམས་ཅད་རྫོགས་པར་གྲགས། འདི་ལའང་ཁེངས་ལོག་བྱུང་སྟེ་གཞེད་མ་བརྒྱས་བསྐོར་བའི་ཚེ་ཕང་། འབར་བ་ལྟ་སྟངས་ཀྱི་རྫུ་འཕྲུལ་མངོན་སུམ་དུ་གྲུབ་པས། སྤྱན་གཡས་པ་ནས་མེ་འབར། གཡོན་པ་ནས་ཆུ་འབྲུབ་པར་སྤྲུལ་པས་གླགས་ལྟ་བའི་སྐབས་མ་རྙེད་པར་རང་རང་གི་ལག་ཆ་འཚོར་བའི་ངང་དུ་འབྲོས་དགོས་པ་བྱུང་། སྤྱིར་ཡི་དམ་མང་པོའི་ཞལ་གཟིགས། དམ་ཅན་བྲན་དུ་འཁོལ། ཆོས་ཉིད་ཀྱི་བདེན་པ་མངོན་དུ་གྱུར་བས་དངོས་
གྲུབ་ཆེན་པོ་གཉིས་ཀ་བརྙེས་པ་ཞིག་ཡིན་ཏེ་རྣམ་ཐར་རྒྱས་པ་ཡི་གེའི་བམ་དུ་འདྲེན་པར་མ་ནུས་པས་སོ་ལུགས་ཀྱི་ཡིག་ཆ་སོགས་ལས་ཤེས་སོ།། །།ཐུགས་ཟིན་གྱི་སྲས་བཞི་ནི། སོ་ཡེ་ཤེས་དབང་ཕྱུག་ལ་ལྟ་བསྒང་དྲིལ་ཏེ་བཤད། པ་གོར་བློན་ཆེན་འཕགས་ལ་གཞུང་འགྲེལ་ཊཱི་ཀ་དང་སྦྱར་ནས་བཤད། དེ་ན་ཡོན་ཏན་མཆོག་ལ་སྟར་ཁ་གེགས་སེལ་གྱི་ཚུལ་དུ་བཤད། སྲུ་ལེགས་པའི་སྒྲོན་མ་ལ་ཚིག་སྡེབ་སྦྱོར་ལེགས་པར་བཤད། བཞི་ཀ་ཚང་བ་ནི་ཡོན་ཏན་རྒྱ་མཚོ་ཡིན་ནོ། །འདི་ལ་སྲས་ཡེ་ཤེས་རྒྱ་མཚོ་དང་། པདྨ་དབང་རྒྱལ་གཉིས་བྱུང་། ཡེ་ཤེས་རྒྱ་མཚོའི་སྲས་ལྷ་རྗེ་ཧཱུྃ་ཆུང་། འདིས་རྗེ་བཙུན་མི་ལ་ལ་དྲག་སྔགས་བསྟན་པས་མཐུ་ཆེན་གྱི་གྲགས་པ་ཐོན་པ་དེ་བྱུང་། ཡོན་ཏན་རྒྱ་མཚོ་ཡབ་སྲས་ཀྱི་སློབ་མ་ཉང་ཤེས་རབ་མཆོག །འདི་བསྐྱེད་རྫོགས་གསུམ་ཀ་ལ་མཁས་པར་གྲགས་ཤིང་དོག་ལ་གཤོངས་ཀྱི་གཙུག་ལག་ཁང་ཡང་བཞེངས། ཧའོ་སྒོལ་གྱི་བྲག་ལ་སྒྲུབ་པ་མཛད་པའི་ཚེ། རྡོ་རྗེ་ཕུར་བའི་དཀྱིལ་འཁོར་ཞལ་གཟིགས། བྲག་ལ་རྡོ་རྗེ་བརྒྱབ་པས་འཇིབ་པ་ལ་བྱས་པ་བཞིན་ཐིམ་གྱིས་སོང་བ་སོགས་གྲུབ་པ་བརྙེས་པའི་ལོ་རྒྱུས་མང་དུ་ཡོད། དེའི་སློབ་མ་ཆོས་ལུང་ཉང་ཤེས་རབ་འབྱུང་གནས་ཡིན། བླ་མའི་ཐུགས་ཟིན་ཞིང་། བསྐྱེད་རྫོགས་གསུམ་ཀ་ལ་མཁས་པའི་གྲགས་པ་ཐོབ། དེ་དག་ལས་བརྒྱུད་པ་ཕལ་མོ་ཆེར་རོང་ལུགས་སམ། རུས་ལས་བཏགས་ཏེ་ཉང་ལུགས་ཀྱང་ཟེར་རོ། །ཡང་སོ་ཡེ་ཤེས་དབང་ཕྱུག་གི་སློབ་མ་ངན་ཐུང་བྱང་ཆུབ་རྒྱལ་མཚན། ཀོང་བཙུན་ཤེས་རབ་ཡེ་ཤེས། ར་ཐུང་ཤེས་རབ་ཚུལ་ཁྲིམས་ཏེ་གསུམ་ཀ་ཡིན་གྱི་བྲེང་ཆགས་སུ་མི་འདྲེན་ཞེས་འགོས་གཞོན་ནུ་བཞེད། ཡོན་ཏན་རྒྱ་མཚོ་ཡབ་སྲས་དང་། སོ་ཡེ་དབང་གཉིས་ཀའི་སློབ་མ་ཉང་ཤེས་རབ་མཆོག། དེའི་སློབ་མ་ཡེ་ཤེས་འབྱུང་གནས། དེའི་སློབ་མ་ལྷ་རྗེ་ཟུར་བོ་ཆེ་སྟེ། ཟུར་མཆེ་ནི་སྟོད་ཚབ་འཕགས་པ་རིན་པོ་ཆེ་ལའང་ཐུག་པས། གནུབས་ཆེན་དང་། ཟུར་པོ་ཆེའི་བར་
ན་བླ་མ་གཅིག་ཡོད་པ་ཡིན་ནོ།། །།ད་ནི་ཐ་མ་ཟུར་ལ་བབས་པའི་རྣམ་གཞག་བཤད་པར་བྱ་སྟེ། དེ་ལ་ཟུར་པོ་ཆེ་ཤཱཀྱ་འབྱུང་གནས་ཀྱིས་བསྟན་པ་ཕྱི་དར་ལ་སྔ་འགྱུར་གྱི་བསྟན་པའི་རྩ་བ་བཙུགས། ཟུར་ཆུང་བ་ཤེས་རབ་གྲགས་ཀྱིས་ཡལ་གར་བརྐྱང་། ཟུར་ཤཱཀྱ་སེང་གེས་ལོ་འབྲས་རྒྱས་པར་མཛད་པས་ཟུར་མེས་དཔོན་རྣམ་གསུམ་ཞེས་གགས་ལ། སྤྱིར་ཟུར་ཞེས་བྱ་བའི་གདུང་འདི་དང་པོར་རྒྱ་གར་ནས་ལྷགས་བཞིག་སྟེ། འཕགས་པའི་ཡུལ་དུ་འོད་གསལ་ལྷ་དབང་གཞོན་ནུ་གཙུག་ཏོར་ཅན། དེའི་སྲས་མནྟྲ་ཅང་ཞུ་ཅན། དེའི་སྲས་མདོ་ཁམས་སུ་བྱུང་བཟུར་རྒྱལ་བ་གསུམ་གྲགས། དེའི་སྲས་ཟུར་བཤེས་གཉེན་སྟག་སྒྲ་ཅན། དེའི་སྲས་ཟུར་རིན་ཆེན་རྒྱ་མཚོ། དེའི་སྲས་མཚོ་བཟང་མིག་པོ་ཆེ། དེ་བ་སྔོན་དུ་ལྷ་རྗེ་ཟུར་བོ་ཆེ་འདིའི་སྲས་སུ་འཆད་ཅིང་། གཞན་དུ་ཨ་ཙ་རའི་སྲས་སུ་འདོད་ཀྱང་། འདིར་ཟུར་བའི་ར་བས་ཉི་ཤུ་རྩ་བདུན་གྱི་ཡི་གེ་ཞིག་མཐོང་བ་དེ་ཉིད་བཙན་པར་བགྱིས་ཏེ་མིག་བོ་ཆེ་ལ། ཟུར་ཨ་ཙ་ར། ཟུར་ཁ་ཅན་ལག་ཅན། ཟུར་བཟང་ཤེས་རབ་འབྱུང་གནས་ཏེ་སྲས་གསུམ་བྱུང་བས། ཐ་ཆུང་ཤེས་འབྱུང་གི་སྲས་ལྷ་རྗེ་ཟུར་པོ་ཆེ། ཟུར་སྟོན་བླ་མ། ཟུར་སྒོམ་རྡོ་རྗེ་འབྱུང་གནས། ཟུར་སྒོམ་ཆུང་དང་བཞིར་བྱུང་ལ། ཆེ་བ་ཨ་ཙ་རས་རྒྱ་གར་ལ་བྱོན་པའི་སྲས་ཉི་མའི་སྙིང་པོ། སླར་བོད་དུ་བྱོན་ནས་ཐག་ལུང་བར་བཞུགས་པའི་སྲས་ཟུར་ཐག་པ་སྒོམ་ཆེན། དེའི་སྲས་ཟུར་ཆུང་ཤེས་རབ་གྲགས་པ་ཡིན་ཞེས་སྨྲའོ། །དེ་ལ་ལྷ་རྗེ་ཟུར་པོ་ཆེ་ནི་དཔལ་ཆེན་པོ་འཇིག་རྟེན་ན་མངོན་སུམ་དུ་བྱོན་པ་ཡིན་ཏེ། ཡུལ་མདོ་ཁམས་ཀྱི་སའི་ཆ་ཡར་རྫོང་ངམ་གཡར་མོ་ཞེས་བྱ་བར། ཡུམ་ཡོན་བདག་མོ་བདེ་བ་ལྕམ་ཞེས་བྱ་བའི་སྲས་སུ་འཁྲུངས། ལྷུས་ས་སུ་ཞུགས་པའི་ཚེ་ཡབ་ཀྱི་མན་ལ་ལམ་དུ་གསེར་གྱི་འཁོར་ལོ་རྩིབས་སྟོང་བ་ཕྱག་ཏུ་བྱུང་བ་དང་། འཕགས་པ་སྤྱན་རས་གཟིགས་ཡུམ་ལ་ཐིམ་པ་སོགས་བྱུང་བས་སྤྲུལ་པའི་སྐུར་ཤེས་ནས་མཚན་ཤཱཀྱ་འབྱུང་གནས་སུ་བཏགས། ཡབ་ལས་བྲི་ཀློག་མཁྱེན་པར་མཛད། སྒྱུ་འཕྲུལ་གྱི་
སྐོར་དང་མན་ངག་ཕྲན་ཚེགས་ཞུས། བླ་ཆེན་དགོངས་པ་རབ་གསལ་བས་ཚིགས་གསུམ་རིམ་ནོད་ཀྱི་ལོ་དུས་ལ་བསྙེན་པར་རྫོགས། འདི་སྤྲུལ་པའི་སྐུར་འདུག་པས་མཚན་སྤོ་མི་དགོས་གསུངས། མེས་པོ་རིན་ཆེན་རྒྱ་མཚོའི་དྲུང་ནས་མཚན་ཉིད་སྡེ་གསུམ། ཀྲཱིི་ལ་རྣམ་འཇོམས། རྣམ་སྣང་སྒྱུ་དྲྭ། དཔལ་མཆོག་དང་པོ་རྣམས་དང་། གསང་སྔགས་ནང་གི་མན་ངག་ཐབས་ལམ་ལ་སོགས་པའང་མཁས་པར་མཁྱེན། དེ་ཡང་གསུང་ལས། རྩ་རླུང་རྟ་རུ་ཞོན། གཏུམ་མོ་གོས་སུ་བྱོན། གདམས་ངག་སྐྱོ་གྲོགས་སུ་ཁྲིད། དད་པས་སྣ་དྲངས་ཏེ་མདོ་ཁམས་ཀྱིས་ཆ་བརྒལ་ནས་འདམ་གྱི་ཕྱོགས་སུ་ཉེ་བར་སླེབ་ཅེས་གསུངས་པ་ལྟར། ཁམས་ནས་འདམ་དུ་སླེབ་པའི་ཚེ། ལམ་ཆ་མ་འཚལ་བ་ལ་སྤྲིན་གསེབ་ནས་ལྷའི་བུ་གཉིས་ཀྱིས་བསྟན་ཏེ་དབུས་ཕྱོགས་སུ་བརྟོལ། ཡར་ཀླུངས་ན་མོ་ལུང་དུ་ཀཱི་ལ་ལ་སྒྲུབ་པ་མཛད་པའི་ཚེ། ཐེག་པ་ཆེན་པོ་གསང་བ་བླ་ན་མེད་པའི་རིགས་སད་དེ། སྤོང་ལེན་རྩོལ་བྱས་ཀྱི་ལམ་འདི་ནི་འཆིང་བའི་རྒྱུར་འདུག། ཚེགས་ཆུང་ལ་བྱ་སླ་བ་གསང་སྔགས་བླ་མེད་ཀྱི་ལམ་ཞིག་དང་མཇལ་བར་ཤོག་དགོངས་པའི་ནུབ། ནགས་ཚལ་ཅན་གྱི་རི་ལ་སྒོམས་ཟེར་བ་ཞིག་བྱུང་། དེར་གཙང་པོ་ལ་ལམ་རྒྱུས་བཅོལ་ནས་གཙང་ལ་བཏད་དེ་བྱོན། གསང་སྔགས་ཀྱི་ཆོས་ལ་མཁས་གྲུབ་བརྙེས་པ་སུ་ཡོད་དྲིས་པས། ནགས་ཚལ་གསུམ་སྒྲིལ་བྱ་བ་ན་ཡོད་ཟེར། དེར་སྔར་གྱི་རྨི་ལམ་དྲན་ནས་བྱོན། དགེ་གོང་གི་ལྕེ་ཤཱཀ་མཆོག་ལ་བདུད་རྩི་སྨན་སྒྲུབ་ལ་སོགས་པ་ཞུས། སྤྱིར་ཟུར་ཆེན་ལ་བླ་མ་མང་དུ་བཞུགས་ཏེ། ཁྱད་པར་དུ་ཆོས་ལུང་གི་ཉང་ཡེ་ཤེས་འབྱུང་གནས་ལས་ཟུར་བའི་མེ་ཏོག་ཕོག་པའི་ཆོས་སྒྱུ་འཕྲུལ་དང་སེམས་ཕྱོགས་རྙེད་པ་ཡིན། ཐོ་གར་ནམ་མཁའ་ལྡེ་ལས་མདོ་དང་སྦར་ཁབ། རྫོགས་ཆེན་མན་ངག་དང་བཅས་པ། ཡུལ་གསར་གྱི་གཉན་ནག་དབང་དྲག་དང་། ལྕེ་ཤཱཀྱ་རྒྱལ་མཚན་ལས་གསད་དབང་དང་ཐབས་ལམ། ཉང་སྟོད་ཀྱི་འགྲེ་ཁྲོ་ཆུད་ལས་ཀ་དག་དང་ལྷུན་གྲུབ། སྒྱུ་
འཕྲུལ་ལམ་རིམ། མཆིམས་རུའི་རོག་ཤཱཀྱ་་འབྱུང་དང་ལྡན་མ་ཤེས་ཚུལ་ལས་ཡང་དག། གཞུ་སྟོན་བསོད་ནམས་ཤཱཀྱ་ལས་མདོ་ཡོངས་རྫོགས། སྟོང་ཚ་བ་བྱང་ཆུབ། རྒྱ་སྟོན་བློ་གྲོས། བཀའ་སྡོད་ཡེ་ཤེས་སྙིང་པོ་རྣམས་པའང་མདོ་ལུང་། དབང་སྒྲུབ། རྒྱུད་འགྲེལ་ཕྲིན་ལས་དང་བཅས་པ་གསན་ཞིང་། བླ་མ་ད་དག་ཀྱང་རྟ་ལ་སོགས་པའི་བདོག་དགུའི་འབུལ་བ་དང་། འཁོར་གསུམ་ཡོངས་དག་གི་མཆོད་པས་མཉེས་པར་བྱས་པ་འབའ་ཞིག་གོ། ཚུལ་དེ་ལྟ་བུས་མཁས་པ་མང་པོའི་མན་ངག་བླངས། དགོངས་པ་ཉམས་འོག་ཏུ་ཆུད། སྡེ་སྣོད་དང་། རྒྱུད་སྡེའི་གྲུབ་མཐའ་ལ་མཁས་ཤིང་བྱང་ཆུབ་བར་བྱས་ནས། རྩ་རྒྱུད་དང་བཤད་རྒྱུད་བསྡེབས། རྩ་བ་དང་འགྲེལ་བ་བསྡེབས། རྒྱུད་དང་སྒྲུབ་ཐབས་སུ་བསྡེབས། སྒྲུབ་ཐབས་ཆོག་ཡིག་ལ་སོགས་པར་བསྡེབས་ནས་ལག་ལེན་དུ་ཐེབས་པར་བྱས། ནགས་ཚལ་ཅན་གྱི་རིལ་དཔལ་ཡང་དག་གི་སྒྲུབ་པ་ཁོ་ན་ལ་གཅིག་ཏུ་གཞོལ་བས་བསྐྱེད་རྫོགས་བཟླས་གསུམ་གྱི་གདེང་ཆེན་པོ་སྟོབས་སུ་གྱུར། མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་ནས་ཤེས་རབ་ཕྱོགས་མེད་དུ་རྒྱས། སློབ་མ་མང་དུ་འདུས་པ་ལ་མདོ་དང་སྒྱུ་འཕྲུལ་གྱི་འཆད་ཉན་ཀྱང་མཛད། རྒྱུན་དུ་གཡེང་བའི་ལས་ཐམས་ཅད་རྣམ་པར་སྤངས། ཆེ་ཐབས་དང་འདུ་འཛི་བཤིག། །བྱང་ཆུབ་ཕྱི་དུས་ལ་མི་རེ་བ་ད་ལྟ་ཉིད་ཁོ་ནར་མངོན་དུ་མཛད་པའི་བརྩོན་འགྲུས་དྲག་པོ་རྒྱུད་ལ་བསྟེན་ནས་བསྒྲུབས་པས། རེ་ཞིག་ན་གཏོར་ལེན་དུ། རྣལ་འབྱོར་བའི་རྣམ་པ་ཅན་ཞིག་བྱུང་། དེ་ལ་ཅུང་ཟད་བྱིན་པས་ཁོས་རིལ་པོར་ཐོབ། རྩིག་པའི་དྲུང་ན་ཕར་འགྲོ་བ་དང་། ཟུར་བོ་ཆེ་འདི་སྙན་པ་དང་། ཡོན་ཏན་མངའ་བ་ཞིག་འདུག་སྟེ། རོག་ཤཱཀ་འབྱུང་གི་རྒྱུན་གཏོར་ཙམ་ཡང་མི་འདུག་ཟེར། དེ་ཉེ་གནས་ཀྱིས་ཐོས་ནས་བླ་མ་ལ་ཞུས་པས་བོས་ཤོག་གསུངས། འབོད་དུ་བྱིན་པས་ཕུག་ཅིག་ན་ཀ་པཱ་ལ་ནས་ཟན་འབྲུལ་ཟ་ཞིང་སྣང་། འདེང་ངོ་བྱས་ཀྱང་ཡོང་མཉན་པར་རོག་ཤཱཀ་འབྱུང་
མཆིམས་ཕུན་ཚེ་ལ་དབང་ཐོབ་ནས་ཡོད་པ་ཡིན། ཟུར་པོ་ཆེ་ལ་ཆོས་ལེན་མི་ཐོང་གྱིས་ཤིག་ཟེར། རྐང་པ་ས་ལ་མ་རེག་པར་སོང་། དེར་བཟང་སྒོམ་ཤེས་རབ་རྒྱལ་པོ་དྲིའུའི་ཁལ་དང་བཅས་ཆོས་ལེན་དུ་བཏང་བས། བསམ་ཡས་སུ་སླེབས་ཏེ་དྲིས་ཙན་སུ་ལའང་བཤད་རྒྱུ་མི་གདའ། སླར་རྒན་མོ་ཞིག་གིས། དེ་དང་པོ་ཙ་ན་མཆིམས་པུའི་རི་འདི་ལ་ཡོད་པ་ཡིན་ཟེར། རྫིའུ་གཅིག་གིས། རི་འདི་ལ་ཡོད་ཡོད་འདྲ། སྐབས་རེ་ཙ་ན་རྔ་དང་། རུ་ལུའི་སྒྲངས་ཀྱང་ཐོས་ཟེར། དེར་བཟང་སྒོམ་གྱི་རྩྭ་བར་ཕུང་ཡོད་པ་ཞིག་ཏུ་ཁལ་ཕོག །དད་གུས་ཀྱིས་གསོལ་བ་བཏབ་པས། སྒྲ་ཆེན་པོ་དང་བཅས་བྲག་ཕུག་གི་སྒོ་དང་དེ་མཐོང་། དེར་མོས་གུས་ཆེན་པོ་དང་བཅས་ཕུག་པར་ཐལ་གྱིས་སོང་བས། གསང་བའི་སྒྲོལ་གིང་བཅོ་བརྒྱད་ཀྱི་འདུ་བར་འོང་བ་འདི་སྒྲོལ་ཞིག་ཟེར། དེར་གྲམ་རོག་གིས་འདི་ལས་ཅན་ཡིན་པས་མི་རུང་གསུངས། ལོ་རྒྱུས་ཞུས་པས། ང་རོག་ཤཱཀ་འབྱུང་། སློབ་མ་ཟུར་ཤཱཀ་འབྱུང་། མཚམས་སྦྱོར་ཤེས་རབ་རྒྱལ་པོ། རྟེན་འབྲེལ་བཟང་གསུངས། དེར་བཟང་སྒོམ་ལ་སངས་རྒྱས་མཉམ་སྦྱོར། ཡང་དག་གི་བདག་གཞན་དཀྱིལ་འཁོར་བཅུ་གཉིས། ཡང་ཕུར་སྦྲགས་མ་ལ་སོགས་པའི་དཀྱིལ་འཁོར་དྲུག་ཅུ་རྩ་གཉིས་ཀྱི་དབང་བསྐུར། དཔེ་དང་བཀའ་ལུང་རྗེས་སུ་གདམས་པ་ཐམས་ཅད་ཐོབ་སྟེ་བསམ་ཡས་རྒལ་བར་སླེབ་པའི་དུས། ཁལ་གྱི་སྟེང་ན་ཁྱེའུ་དར་གྱི་བེར་ཐོད་ཅན་ཞིག་མཐོང་བས་སླར་ལོག་སྟེ་དྲིས་པས། ཚངས་པ་དུང་ཐོད་ཅན་འགོ་བ་ཡིན་གསུངས་ནས་གསོལ་ཀའང་གནང་། སླར་གདམས་པ་བླ་མ་ཟུར་ཆེན་ལ་གསང་བའི་ངང་ནས་ཕུལ། དཔོན་སློབ་ཀུན་གྱིས་སྒོམ་སྒྲུབ་ལོ་དུ་མར་མཛད་ཅིང་འཆད་ཉན་བསྐྱངས་པས་འགྲོ་ཕན་ཆེ་བར་བྱུང་ནའང་། ཟུར་ཆེན་པོ་དབེན་པ་འབའ་ཞིག་ལ་ཐུགས་གཏོད་པས་འདི་ཡང་དགེ་འབྱོར་གྱི་གཡེང་བར་འདུག་པས་པོ་དོང་མངའ་བདག་བྲག་ལ་འགྲོ་གསུངས་ཏེ་དེར་གཅིག་པུར་སྒོམ་སྒྲུབ་ལ་ཞུགས་ཙ་ན། བུ་སློབ་རྣམས་ཀྱང་རྗེས་སུ་འབྲེངས་བྱུང་བས། ཁྱོད་རྣམས་ངའི་རྩར་ཡོང་དོན་བྱང་ཆུབ་ཐོབ་པ་ལ་རེ་བ་
ཡིན་ན་སྒོམ་སྒྲུབ་མིན་པ་གཞན་གང་གིས་ཀྱང་ཕན་མི་ཐོགས། འཇིག་རྟེན་གྱི་གཡེང་བ་རྒྱབ་ཏུ་གཞོག་ལ་སྒྲུབ་པ་ལ་འབྱུང་ས། ང་ཡང་སྒྲུབ་པ་ཁོ་ན་བྱེད་གསུངས་ཏེ་དཔོན་སློབ་ཀུན་སོ་སོར་སྒྲུབ་པ་མཛད། དེ་ནས་རེ་ཞིག་ན་མཁའ་འགྲོའི་ལུང་གིས་ས་སྨད་ལ་ཕེབས་ན་འགྲོ་དོན་ཆེ་བར་བསྐུལ་བས། རྟ་ནག་གི་ལུང་བར་བྱོན། འུག་པའི་ཚང་ཡོད་པའི་བྲག་ཕུག་ཁ་ཤར་བསྟན་ཅིག་ཏུ་ཡང་དག་ལྷ་དགུའི་སྒྲུབ་པ་མཛད་པས། དཔལ་ཆེན་པོ་ཡང་དག་ལྷ་དགུའི་ཞལ་མངོན་སུམ་དུ་མཐོང་། དེ་ལྟར་བཞུགས་གནས་ཀྱི་མིང་ལས་བླ་མ་འུག་པ་ལུང་པ་ཞེས་ཀུན་ཏུ་གྲགས། དེར་སྒྲུབ་བརྒྱགས་ཀྱང་དཀོན་ཞིང་། འབྱོན་པའི་ལུང་བསྟན་ཀྱང་འགྱུར་ནས་སྨད་ཕྱོགས་སུ་ལྗོངས་རྒྱུ་བར་ཆས་པས། གཞི་བདག་ཟེ་རེ་ཟ་བཙན་བྱ་བས་གཟུགས་བསྟན་ཏེ་བཞུགས་པར་ཞུས་པ་ན། ང་ལ་གནས་གཞན་དུ་འགྲོ་བའི་ལུང་བསྟན་ཡང་བྱུང་། བརྒྱགས་ཀྱང་མེད་པས་འགྲོ་གསུངས་པས། དཔོན་སློབ་རྣམས་ཀྱི་འཚོ་བ་བདག་གིས་འབུལ། ཅིས་ཀྱང་བཞུགས་པར་ཞུ་ཞུས་པས། རེ་ཞིག་བཞུགས་པར་ཞལ་བཞེས། རྟ་ནག་གི་ཕྱུག་པོ་ཞིག་ལ་ནད་དྲག་པོ་བྱུང་ནས། མོ་ལུང་ལ་ཚོགས་གཏོར་ཐོང་། བླ་མ་འུག་པ་ལུང་པ་ལ་བྱིན་རླབས་ཞུས་ཟེར་བས། ནད་པས་བླ་མའི་དྲུང་དུ་ཕྱིན་པས་ཞལ་མཐོང་བ་ཙམ་གྱིས་བདེར་སོང་། བྱིན་རླབས་ཞུས། ཚོགས་འཁོར་བྱས་མ་ཐག་ཏུ་ནད་ལས་གྲོལ། དེ་བཞིན་དུ་ནད་གདོན་གྱིས་མནར་ཚད་ལ་བྱིན་རླབས་དཔག་ཏུ་མེད་པ་བྱུང་བས་སྐྱེ་བོ་རྣམས་དང་དེ་སྐུ་བསོད་ཆེན་པོ་སྐྱེས། བླ་མའི་དགོངས་པ་ལ། ཐུན་མོང་གི་བསོད་ནམས་འདི་མཆོག་བསྒྲུབ་པའི་བར་ཆད་ཆེན་པོ་ཡིན། རི་བོ་དགུ་འདུས་ལ་སྒོམ་དུ་འགྲོ་དགོངས་ནས་གཤེགས་ཙ་ན། གཞི་བདག་དེས་སྒྲུབ་བརྒྱགས་ནི་ཕུལ་ཡོད། ཅིས་ཀྱང་བཞུགས་པར་ཞུ་ཟེར་བས་ཁྱོད་ཀྱི་འཚོ་བ་འདི་གཞི་དག་པོ་ཞིག་ཀྱང་དཀའ། འདུ་འགོད་ཀྱིས་གཡེང་བར་འགྱུར་བས་ངལ་ན་འགྲོ་གསུངས་པས། ཁོ་གདོང་མཆིམས་གང་ནས་ཅིས་ཀྱང་མི་བཞུགས་ན་
བདག་ལའང་། ཐུགས་རྗེས་དགོངས་འཚལ་ཞུས་ནས་སྲོག་སྙིང་ཕུལ། བླ་མས་དགེ་བསྙེན་གྱི་སྡོམ་པ་ཕོག་ནས་བསྟན་པ་བསྲུང་བར་བསྒོས། མར་ལམ་ཇོ་མོ་སྣ་དམར་ཀྱང་དམ་ལ་བཞག །དེ་ནས་གཡས་རུ་ཐག་ཏུ་བྱོན། ཟུར་ཆུང་བ་ལ་ང་ལ་རི་བོ་དགུ་འདུས་སུ་བསྒོམ་ཟེར་བའི་ལུང་བསྟན་བྱུང་བ་དེ་བྲག་རྒྱའོ་འདི་ཡིན་པར་འདུག་གསུངས་ནས་དཔོན་སློབ་ཐམས་ཅད་སྒྲུབ་པ་ལ་བཞུགས་སོ། །དེའི་ཚེ་ལྷ་རྗེ་ཟུར་པོ་ཆེ་ལ་སློབ་མ་རྩེ་མོ་བཞི། རྩེ་ལྐོག་དང་ལྔ། སྒོམ་ཆེན་བརྒྱ་རྩ་བརྒྱད་ཡོད་པའི་རྩེ་མོ་བཞི་ནི། ལྟ་དགོངས་ཀྱི་རྩེ་མོར་གྱུར་པ་ཟུར་ཆུང་ཤེས་རབ་གྲགས། སྒྱུ་འཕྲུལ་གྱི་བཤད་པའི་རྩེ་མོར་གྱུར་བ་མི་ཉག་ཁྱུང་གྲགས། མཁྱེན་རྒྱའི་རྩེ་མོར་གྱུར་བ་ཞང་འགྲོས་ཆུང་། སྒོམ་སྒྲུབ་ཀྱི་རྩེ་མོར་གྱུར་བ་བཟང་སྒོམ་ཤེས་རབ་རྒྱལ་པོ། རྩེ་ལྐོག་ནི་ཆོས་ཀྱི་སྟེང་དུ་ཕོ་ཟའི་རྩེ་མོར་གྱུར་བརྩགས་བླ་མའོ། །ཡང་མེ་ལྐོག་བརྒྱད་དུ་འདྲེན་པའང་ཡོད་དོ། །དེ་བཞིན་དུ་གྲུ་སྒོམ་སྦ་འགྱིང་། ཡུལ་སྒོམ་ནག་མོ། ལྕེ་སྒོམ་ཤཱཀ་རྒྱལ། ཟུར་སྒོམ་རྡོར་འབྱུང་། གཡུ་སྒོམ་ངོ་འབར། སྦ་སྒོམ་བསོད་ནམས་སྙིང་པོ་ལ་སོགས་ཏེ་སྒོམ་ཆེན་བརྒྱ་རྩ་བརྒྱད་དོ། །དེ་ཐམས་ཅད་ཀྱང་ནམ་མཁའ་ལ་འགྲོ་བ་སོགས་རྫུ་འཕྲུལ་ཐོབ་པ་འབའ་ཞིག་ཏུ་གྲགས། དེ་ནས་རེ་ཞིག་ན་བླ་མའི་དྲུང་དུ་བུད་མེད་གསུམ་བྱུང་ནས། གཡས་རུ་ཤངས་ཀྱི་མདའ། ཤངས་ཆུའི་ཤར་ན་ལུང་པ་དབྱིབས་ཟླ་གམ། ཕུན་གྲག་སྙིང་འདྲ་བ། མདའ་ན་ཐང་མ་ཏི་བསྒྲལ་བའི་བགས་པ་ལྟ་བུ། རི་དབྱིབས་གླང་པོ་ཆེའི་སྣ་འདྲ་བ་ལ་བྲག་སེང་གེའི་ཡ་ཐོད་ལྟ་བུ། རྫ་གསུམ་ནས་ཆུ་གསུམ་འབབ་པ་སྐུ་གསུམ་གྱི་དོན་རྙེད་པ་ཞིག་ཡོད་ཀྱི། དེར་བསྒོམ་ན་སྐྱེ་བ་འདི་ཉིད་ལ་འཚང་རྒྱ་ཞིང་། འགྲོ་དོན་ཡུན་རིང་བར་འགྱུར་རོ་ཞེས་ལུང་བྱིན་པས། ཟུར་ཆུང་བ་ལ་བྲག་རྒྱ་བོ་སྒྲུབ་གནས་ཀྱི་ཕ་ཕོགས་སུ་མཛད། བླ་མ་འཁོར་དང་
བཅས་པ་མར་བྱོན། ས་དམིགས་མཁྱེན་ནས་ཞང་མོ་ཡོན་ཏན་རྒྱན་གྱིས་སྦྱིན་བདག་བྱས། དེས་ཕུལ་བའི་ཕུག་པར་བླ་མས་བཞུགས། ཟུར་ཆུང་བ་སོགས་སྒོམ་ཆེན་བརྒྱ་ལྷག་ཙམ་ཡོད་པ་ལུང་པའི་ཕུ་མདའ་ཐམས་ཅད་དུ་སྤྱིལ་པོ་དང་། བྲག་སྐྱིབས་དང་། ལྷགས་སྐྱོབས་ལ་བརྟེན་ནས་སྒྲུབ་པ་མཛད། ཡུལ་མི་ཚོ་བདུན་གྱིས་ཞབས་ཏོག་བྱས་ཤིང་ཡོན་བདག་གི་རྩ་བསྲམ་པ་བོན་གོང་བས་བྱས། བླ་མ་སངས་རྒྱས་དངོས་སུ་འཛིན་ཏོ། །དེར་ལོ་མང་པོར་སྒྲུབ་པ་མཛད། ཞི་བ་ཞེ་གཉིས་དང་ཁྲག་འཐུང་ལྔ་བཅུའི་ཞལ་མཐོང་། ཁྱད་པར་དུ་ཡང་དག་གི་ལྷ་ཚོགས་མི་དང་མི་ཕྲད་པ་བཞིན་གཟིགས་ནས་གསུང་གླེང་མཛད། ཀཽ་རཱི་བརྒྱད་ལ་སོགས་པ་བྲན་དུ་འཁོལ། མི་མ་ཡིན་རྣམས་ཀྱིས་ལས་གང་བཅོལ་ཉན་པ་བྱུང་། དེར་བླ་མའི་ཞལ་ནས། ངས་འུག་པ་ལུང་གིས་རྡོ་རི་བྲག་ཐམས་ཅད་ཞི་ཁྲོའི་ལྷ་ཚོགས་སུ་མཐོང་། ཁྱད་པར་ཡང་དབེན་སེར་མོའི་ལྷོ་རི་འདི་རྒྱལ་བ་རིགས་ལྔར་རྒྱུན་དུ་མཐོང་བས་ཞི་བའི་ལྷ་ཁང་བཞེང་གསུངས་ཏེ་སྟ་གོན་མཛད། སའི་དཔྱད་གཟིགས་ནས་ས་དགྲ་ངན་པ་དག་བཅོས། ལྷོ་རི་སྡིག་ནག་ཐུར་དུ་རྒྱུག་པ་འདྲ་བའི་རྭ་དབྲག་ཏུ་ཟུར་བོ་ཆེ་དཔལ་ཆེན་པོའི་སྐུར་བཞེངས་ནས་ཞབས་གཡས་པ་བཞག་སར་ཞབས་རྗེས་ཀྱང་བྱུང་། དེར་ཧེ་རུ་ཀའི་སྐུ་འབུམ་ཕྲག་ཡོད་པའི་མཆོད་རྟེན་དང་། ཕྱོགས་བཞི་དབུས་དང་ལྔར། རྩེ་མོ་བཞི་དང་། རྩེ་ལྐོག་ལྔས་མཆོད་རྟེན་རེ་ཡང་བཞེངས། ཀླུ་དུང་སྐྱོང་གནས་པའི་ཆུ་མིག་ལ་ཟངས་བཀབ་ནས་ཁ་བཅད། དེའི་སྟེང་དུ་གཙུག་ལག་ཁང་གི་རྨད་བཏིང་། ཆེ་ཆུང་ཉང་སྟོད་རྩིས་ཀྱི་ལྷ་ཁང་དང་མཉམ་པ་བྱེད་རྒྱུ་ལ། རྡོ་བཟོ་བས་ཅུང་ཟད་བསྐུམ་ཟེར། དེ་བཞིན་དུ་བོ་ཟ་བོ་ཕལ་ཆེར་བསོད་ནམས་མ་ཡིན་པ་འདུ་བྱེད་པ་ལ་སྤྲོ་བས། ཤིང་ཐམས་ཅད་ཕོད་མི་སྙོམས་ཤིང་། རིང་ཐུང་དུ་གནས་པ་ལ་སོགས་ཕྱག་རྫས་བྲོན་པའི་ཐབས་འབའ་ཞིག་བྱས་ཀྱང་། འདི་ལྟར་བྱང་ཆུབ་སེམས་དཔའ་གཏོང་བ་ལ་གོམས་པའི་སྙིང་སྟོབས་ལ་སེར་སྣ་དང་འཇུར་བུའི་
རྣམ་རྟོག་གིས་བརྫི་བར་ནུས་པ་མ་ཡིན་པས་ནོར་རྫས་ལ་རྨི་ལམ་དང་སྒྱུ་མ་ལྟ་བུར་གཟིགས། ཀ་ཆེན་ཡ་གཅིག་དྲེགས་ཐར་ཏེ་མ་སྙེགས་པ། ཞབས་ཀྱིས་སྒྲིལ་བས་རིང་དུ་སྙོམས་པའི་གྲུབ་རྟགས་བསྟན། དེ་ལ་རྡོ་རྗེའི་རྟགས་སྦྱར་ནས་ཡོད། དེ་བཞིན་དུ་ཀ་བ་སྐྱོག་པོར་གྱུར་བ་རྣམས་ཞབས་ཀྱིས་སྒྲིལ་བས་མདའ་ལྟར་འཁྲོངས་པ་དང་། ལོག་སྒྲུབ་བཟོད་པ་སོགས་ཚད་མེད་པའི་ཐུགས་རྗེ་དང་ནུས་པ་མཐོང་བས། བཟོ་བ་རྣམས་སླར་འགྱོད་པ་ཆེན་པོ་སྐྱེས། ལྷའང་ཚར་བའི་ཤིང་ལྷག་རྣམས་ལ་རྩིག་པ་མེད་པར་ཀ་བ་བཞིས་བཏེགས་པའི་སྒོ་ཁང་ཁྱད་འཕགས་ཞིག་བྱས་པར་འགྱོད་ཚངས་རྒྱ་ཕུགས་ཞེས་གྲགས་ལ་དེ་སླར་མགོན་ཁང་དུ་མཛད་དེ། དེ་ལྟར་གཙུག་ལག་ཁང་དུ་བརྩེག་པ་བཞི་བ་རྣམ་སྣང་ཀུན་ཏུ་ཞལ་གྱིས་གཙོ་བྱས་པའི་ཞི་བའི་ལྷ་ཚོགས། ཁྱམས་སྟོད་ཀ་བ་བརྒྱད་ཀྱི་སར་སྒོ་སྲུང་རྟ་བདུད་གཉིས། གློ་འབུར་ལྷོ་བྱང་གཉིས་ན་ཡུམ་ཆེན་མོ་དང་། མར་མེ་མཛད་ལ་མཆོད་ལྷ་བཞི་བཞིས་བསྐོར་བ། མགོན་ཁང་ན་ལེགས་ལྡན། དཔལ་ལྡན་ལྷ་མོ། ཚངས་པ་དང་། བརྒྱ་བྱིན་རྣམས་འབུར་སྐུ་བྱས། ཁྱམས་སྟོད་ཀ་བ་བརྒྱད་ཀྱི་སར་བླ་མ་བརྒྱུད་པའི་གྱང་རིས། སྐོར་ཁང་པ་པདྨ་བརྒྱ་ལྡན་ལ་སོགས་པའི་དཀྱིལ་འཁོར་ཉི་ཤུ་རྩ་གསུམ། ཁྱམས་སྨད་ཀ་བ་ཉི་ཤུའི་སར་སངས་རྒྱས་སྟོང་རྩ། ཕྱོགས་བཅུའི་སངས་རྒྱས། ཚེ་དཔག་མེད་ལ་ཉེ་སྲས་ཀྱིས་བསྐོར་བ། སངས་རྒྱས་རབས་བདུན། མཛད་པ་བཅུ་གཉིས། བྱང་ཆུབ་སེམས་དཔའ་ཆོས་འཕགས། སྒྲོལ་མ་འཇིགས་པ་བརྒྱད་སྐྱོབ། རིགས་གསུམ་མགོན་པོ། མ་ལ་ཡའི་ཞིང་བཀོད། སྲིད་པའི་ཙཀྲ་ལ་སོགས་པ་གྱང་རིས་སུ་མཛད། དེ་ལྟར་སྐྱ་བཟོ་གྲུབ་ནས། ད་ནི་ངའི་ལྷ་ཁང་ཐང་ཀ་ཡན་ཆོད་གསེར་གྱིས་བྱུག་པ་ཡིན། གསེར་འགྲོང་ནི་ཚུགས་པོ་ལས་འདོན་གསུངས་ནས་དགོངས་པ་མཛད་པས། ནམ་ཕྱེད་ན་གཞིས་བདག་བཙན་དེ་རྟ་བ་ནག་པོ་གཅིག་ཏུ་བྱས་ནས་བྱུང་། ཟུར་བོ་ཆེ་ལ་ཕྱག་
དང་བསྐོར་བ་བྱས་ནས་ལྷ་ཁང་གི་ཐང་ཀ་ལན་ཆོད་གསེར་དུ་བྱུག་ན། ངེད་ཀྱི་གསེར་འཛད་པས། ལྷའི་སྐུ་རྣམས་ཁྱབ་ངེས་ཤིག་འབུལ་ཐེར་བས་དེ་བཞིན་དུ་མཛད། རབ་ཏུ་གནས་པའི་ཚེ་རྒྱལ་བ་ཟུར་ཆེ་ཆུང་གིས་ཀུན་རིག་རྣམ་སྣང་གི་དབུ་གཙུག་ནས་ཞུགས་ཐུགས་ཀར་ཐོན། ཐུགས་ཀ་ནས་ཞུགས་དབུ་གཙུག་ཏུ་ཐོན་པ་ལ་སོགས་རྫུ་འཕྲུལ་གྱི་བཀོད་པ་ཟད་མི་ཤེས་པ་བསྟན་པས་བཟོ་བོ་རྣམས་སྙིང་ཐག་པ་ནས་དད་པར་གྱུར་ཏེ། བླ་མའི་ལྷ་ཁང་རིར་བཅོམ་ལ། མཆོད་རྟེན་གྱི་འདེགས་བྱེད་ཟེར། བསམ་ཡས་མཆོད་རྟེན་སྔོན་པོ་ལ་དཔེ་བྱས་བཀྲ་ཤིས་སྒོ་མངས་ལྷ་ཁང་གི་བྱང་ཕྱོགས་སུ་དད་བཞེངས་ཀྱིས་ཕུལ། བླ་མའི་མཚན་གདན་ས་ལ་ཆགས་པས་དཔལ་འུག་བྱ་ལུང་ཞེས་ཡོངས་སུ་གྲགས། ལྷ་རྗེ་ཟུར་པོ་ཆེའི་རིང་ལ་དབུ་བརྙེས། ཟུར་ཆུང་བས་སྲོལ་བཏོད། ཟུར་ཤཱཀྱ་སེང་གེས་དར་རྒྱས་སུ་མཛད་ཟེར་བ་དེ་གདན་རབས་འདིས་སྔ་འགྱུར་རྡོ་རྗེ་ཐེག་པའི་བསྟན་པ་ལ་བྱ་བ་རླབས་པོ་ཆེ་མཛད་པའི་རྣམ་གཞག་ཡིན་ནོ། །དེ་ནས་འཆད་ཉན་ལ་སོགས་པའི་འགྲོ་དོན་རྒྱ་ཆེན་པོ་མཛད། རེ་ཞིག་ན་དཔོན་སློབ་ཀུན་གྱིས་ཡང་དབེན་སེར་མོར་ཡང་དག་གི་ལོ་སྒྲུབ་མཛད་པས་མར་ཟད་དེ་མཆོད་མར་མ་བྱུང་བས། ཆུ་མིག་ཞག་བདུན་དུ་མར་ཁུར་བྱིན་གྱིས་བརླབས་ནས་མར་ཁུ་འཛད་མེད་བླངས་ཆོག་པ་བྱུང་། དེར་ཐོག་མར་འཆང་ཉན་པ་རྣམས་བཤད་པ་ལ་གཙོ་བོར་འདོན་པས་དང་པོ་ཙ་ན་ཕྲིན་ལས་ཤེས་པ་ཉུང་སྟེ། ཁོང་རྣམས་ཆོས་རར་བགྲོ་གླེང་བྱེད་པའི་ཚེ་ཕྲིན་ལས་ཤེས་ཤིང་བགྲོ་གླེང་མེད་པ་དག་མི་ཤེས་པའི་ཕྱོགས་སུ་ཕུལ་བས། རྒྱུན་གཏོར་ལྷན་ཅིག་ཏུ་གཏོང་བའི་ཚེ་ཕྲིན་ལས་ཤེས་པ་ཆོས་གྱེར་དུ་མཉན། དེར་བླ་མའི་ཞལ་ནས། གང་ལ་མཐར་ཕྱིན་པ་གཅིག་གིས་གྲོལ་བ་ཡིན། གཅིག་གིས་གཅིག་ལ་ཁྱད་གསོད་མི་རུང་། ཐེག་པ་དགུའི་གྲུབ་མཐའ་རངསན་ཡོད་ཀྱི། ཐེག་པའི་ཁ་འཛིན་པ་མ་ཡིན། གསུངས་པས་ཐམས་ཅད་ལ་དོན་གྱི་གོ་བ་ཁྱད་པར་ཅན་སྐྱེས་ནས་ཞི་དུལ་དུ་གནས་པ་བྱུང་། དེའི་དུས་སུ་བླ་མའི་ཞལ་ནས།
སློབ་མ་རྩེ་མོ་བཞི་ལ། ལམ་ཉམས་སུ་ལེན་པ་ལ་གང་གལ་ཆེ། ཁྱེད་བཞི་པོ་གོ་བ་རེ་བཞོག་གསུང་བ་ལ། ཟུར་ཆུང་བས། སྔར་ཞེན་གྱི་བག་ཆགས་ཚན་པོ་ཆེ་འདི། མ་བསྒོམས་ན་མི་འཛད་པ་ཞིག་འདུག་པས། ཉམས་ལེན་ལ་བློ་ཐག་ཆོད་པ་གལ་ཆེ། འཕྲལ་གྱི་སྒྲིབ་པ་དྲི་མ་འདྲ་བ་འདི། ད་ལྟ་ནས་དག་དགོས་པ་འདུག་པས། ནངས་དང་ནུབ་ཏུ་དགེ་སྦྱོར་བྱེད་པ་གལ་ཆེ། ཇི་སྲིད་གནས་ལུགས་མངོན་དུ་མ་གྱུར་གྱི་བར་དུ་བསོད་ནམས་ཀྱི་ཚོགས་བསག་དགོས་པ་འདུག་པས། དགེ་བ་ཕྲ་ཞིང་ཕྲ་བ་ལ་བརྩོན་པ་གལ་ཆེ་ཞུས། དེ་བཞིན་དུ་གཞན་གསུམ་པོས་ཀྱང་རང་སའི་གོ་བ་རེ་ཞུས་པས། བླ་མ་མཉེས་ནས། དམ་པའི་ལྷ་ཆོས་བྱེད་པ་ལ། ལམ་ལྟ་སྒོམ་སྤྱོད་པ་གསུམ་དུ་གདའ། །ལྟ་བ་ཞེས་མིང་དུ་བཏགས་པ་དེ། ལྟ་རྒྱུ་བྱུང་ན་ལྟ་བ་མིན། །ལྟ་རྒྱུ་མེད་པའི་དོན་ལ་བལྟ། །ཆོས་ཉིད་བརྗོད་མེད་ལམ་དུ་ཁྱེར། །ཞེས་པ་ལ་སོགས་པ་ལྟ་སྒོམ་སྤྱོད་པའི་ལམ་ཁྱེར་གྱི་མགུང་གསུངས་པས་སློབ་མ་ཀུན་མོས་པ་མཆོག་ཏུ་འཕེལ། དེ་ནས་བླ་མ་ཟུར་པོ་ཆེས་འུག་པ་ལུང་དུ་ཚོགས་པ་བསྐྱངས་ཤིང་རྒྱུད་ཀྱི་བཤད་གླ་དང་སྒོམ་གྲྭ་ཆེན་པོ་མཛད། ཟུར་ཆུང་བས་ཡང་དབེན་སྔོན་མོར་ཡང་དག་གི་སྒྲུབ་པ་མཛད་ཅིང་བཞུགས་ཙ་ན། ཤངས་ཀྱི་སྒྲུབ་ཁང་གདོང་ལ་རྒྱུའི་ཧེ་རུ་ཀ་ཞལ་གཅིག་ཕྱག་གཉིས་པ་ཀྲོང་དེར་འདུག་པ་གཟིགས། སྒྲུབ་པ་ཐོན་ནས་བླ་མར་ལོ་རྒྱུས་ཞུས་པས། བླ་མའི་ཞལ་ནས་ཟུར་ཆུང་བ་དཔལ་ཆེན་པོ་ལ་གྲུབ་པ་ཐོབ་པ་ཡིན། ང་ལ་རིག་འཛིན་ནམ་མཁའི་སྙིང་པོས་ཀྱང་ཧེ་རུ་ཀའི་སྐུ་བཞེངས་ན་བོད་འབངས་ལ་གནོན་པའི་གདོན་མཐུ་བོ་ཆེ་ཐུལ་ཞིང་འགྲོ་དོན་འབྱུང་བའི་ལུང་བསྟན་ཀྱང་ཡོད་པ། དེའི་སླད་དུ་འགྲོ་ཞེས་གསུངས། ཉེ་གནས་ལ། འོ་ཅག་ལྷ་ཁང་བཞེངས་པའི་ཡོ་བྱད་བསྡོགས་ཤིག། ངེད་ཚོས་ས་འདུལ་བྱ་ཡི་གསུངས། བྲག་སེང་གེའི་ཡ་ཐོད་ཀྱི་ཁར་བཞུགས། གཏོར་མ་བཤམས། བླ་མ་དཔལ་ཆེན་པོའི་ཏིང་ངེ་འཛིན་ལ་བཞུགས་ནས་
སྟངས་སྟབས་མཛད་པའི་ཚེ། སངས་རྒྱས་མཐོང་བའི་སྐལ་བ་དང་ལྡན་པ་རྣམས་ཀྱིས་མངོན་སུམ་པའི་སྐུར་མཐོང་བ་བྱུང་། དེ་ནས་འགྲམ་རྡོ་སློང་བའི་དུས་ཟུར་ཆུང་བ་སྐུ་ལུས་སྦེག་ཅིང་ཞལ་རོ་དང་ན་བ་ལ་བརྙས་ནས། གཞན་ཀུན་གྱིས་འགྲམ་རྡོ་ཆེན་པོར་བཞག་གིན། ད་ཟུར་ཆུང་བས་གྱང་རྡོ་གཅིག་འཇོག་ཐང་ཞེས་ཟུར་ཟ་བར་བྱས་པས། ཟུར་ཆུང་བ་ན་རེ། དཔོན་སློབ་རྣམས་ཚ་བ་ལ་གཤེགས་ཤིང་། །ངེད་ཀྱང་ད་ལྟ་འདེང་ངོ་ཟེར་ཏེ་མ་བྱོན། ཁོང་རྣམས་ཀྱིས་ཚ་བ་ཟིན་ནས་ཐོན་པ་དང་། གྱད་ཀྱི་རྡོ་ཐེག་པ་ལྟ་ཅི་སྨོས། བསྒུལ་བའང་མི་ནུས་པའི་ཕ་ཝང་ཆེན་པོ་བརྒྱད་རྨང་གི་ཕྱོགས་བཞི་མཚམས་བརྒྱད་དུ་བཞག་ནས། དེ་ལ་རྡོ་དཀར་གྱིས་ཟུར་ཆུང་བའི་གྱད་རྡོ་ལགས་བྱ་བ་བྲིས་པ་མཐོང་བས། གྲྭ་བ་རྣམས་སྤོབས་པ་སྨད་ཅིང་གཟུ་བོར་གྱུར་བ་དག་མོས་པར་གྱུར་ཏོ། །དེར་ནག་ཕྱོགས་ཀྱི་ལྷ་འདྲེ་བྱེད་པ་མི་བསྲུན་པས་ལྷ་ཁང་བརྩིགས་པའི་འགལ་རྐྱེན་དང་ཐོ་འཚམས་པའང་ཟུར་ཆུང་བས་གྱང་རྡོ་བཞག་པ་ཕྱིན་ཆད་ནས་ཞི་བར་གྲགས། ཤིང་བསྒྲིག་རན་པའི་ཆོ་ཀ་བ་བཞི་སྐྱོག་པོར་བྱུང་བ་བླ་མའི་ཞལ་ནས་འདིར་ཟུར་ཆུང་བས་སྲོངས་ཤིག་གསུངས་པས། རླུང་ཁུག་པ་གཅིག་གི་ངང་ལ་དགྱེ་བ་དང་སྒུག་པའི་རྟེན་འབྲེལ་ཅིག་མཛད་ནས་མདའ་བཞིན་དུ་བསྲངས། ཐོག་ཕུབ་ཟིན་པ་ཙམ་ལ། ངས་ལྷ་བཟོ་བ་བཀུག་པས་ཁུག་ཡོང་གི་འདུག་གསུང་། ཞག་གཉིས་པ་ལ་ལྷ་བཟོ་ཤེས་པ་འགའ་ཞིག་ཆོས་ཞུ་རུ་བྱུང་། མ་མཁྱེན་པ་ལྟར་མཛད་ནས། ཁྱེད་རྣམས་ཡོན་ཏན་མཁན་གྱི་རིགས་སམ་གསུངས། བདག་ཅག་རྣམས་ནི་ལྷ་བཟོ་མཁན་ཏེ་སྐུ་དྲུང་དུ་ཆོས་ཞུར་བཅར་བ་ལགས་ཞུས་པས། རྟེན་འབྲེལ་བཟང་། ཅི་འདོད་པའི་ཆོས་ཀྱང་འོང་། དུས་ཀྱི་སྙིགས་མ་ལ་འགྲོ་དོན་ཆེན་པོ་འོང་བས་དཔལ་ཆེན་པོའི་སྐུ་བཞེང་བ་ཡིན། ཁྱོད་རྣམས་ཀྱིས་དེ་བཞིན་དུ་འཚལ་ཞེས་གསུངས་པས། ཁོང་རྣམས་ཀྱང་དང་བ་ཤིན་ཏུ་སྟོན་པར་གྱུར་ནས་དཔལ་ཡང་དག་གི་བུམ་དབང་སྔོན་ལ་བསྐུར། དེ་ནས་དེ་བཞིན་གཤེགས་པའི་གདུང་
རིང་བསྲེལ་དང་། བྲམ་ཟེ་སྐྱེ་བ་བདུན་པའི་ཤ། དུར་ཁྲོད་བརྒྱད་ཀྱིས་རྡོ་ཆུ་ཤིང་། རིན་པོ་ཆེའི་རིགས། རྒྱ་བོད་རིག་འཛིན་གྱིས་བསྒྲུབས་པའི་ཆོས་སྨན་རྣམས་བསྲེས་པའི་སྡེ་གུ་སྟ་གོན་བྱས། སྐུའི་ཚད་ཇི་ཙམ་བགྱིས་ཞུས་པས། ཐོག་དཔངས་དང་བསྟུན་པར་གནང་། དེར་འབྲས་བུའི་ཧེ་རུ་ཀ་ཞལ་གསུམ་ཕྱག་དྲུག་པ་མཚར་བ་དང་། རྔོམ་པ་དང་། བཞད་པ་ཅི་ལྟ་བུ་ཞིག་བྱུང་ཡང་། བླ་མས་ཞལ་མཐོང་བ་ལྟར་མ་བྱུང་བས་སྐྱོར་ཅིག་གསུངས། ལན་མང་པོ་བསྐྱར་དགོས་པ་བྱུང་། རེས་ཤིག་ན། དང་འདྲ་བ་ཞིག་ཤེས་སམ་གསུངས། ཤེས་མཆི་ཞུས་པས། དོ་ནུབ་གསོལ་བ་ཐོབ་ལ། སང་ངལ་བ་ལྟ་རུ་ཤོག་གསུངས། སང་ཟུར་ཆུང་བ་དང་བཅས་ལྷ་བཟོ་རྣམས་ཀྱིས་དྲུང་དུ་ཕྱིན་པས། ཉེ་གནས་དོན་ཡོད་རྡོ་རྗེ་ལ་གཏོར་ཚོགས་ཤོམས་གསུངས། ཡང་དག་གི་ལས་གཞུང་བསྲངས། ཚོགས་འཁོར་མཛད་ནས་ད་སོྟོས་ཤིག་གསུངས་ཏེ་ལྟ་སྟངས་མཛད་པའི་མོད་ལ་ཧེ་རུ་ཀ་དངོས་སུ་གྱུར་ནས། དབུ་སྤྲིན་དང་ན་བུན་གྱི་མཚམས་ན་ལྷག་གེ་བ། ཞབས་གཡས་འུག་པ་ལུང་གི་ཧེ་རུ་ཀའི་བྲག་གདོང་དང་། གཡོན་བཙད་པོ་པུར་ཁང་གི་རི་རྩེར་བཞག་པ། ཞལ་གཅིགས་ཕྱག་གཉིས། མཆེ་བ་གཙིགས་ཤིང་ལྗགས་འདྲིལ་བ། རྡོ་རྗེའི་གཤོག་བས་བར་སྣང་གང་བ། འཇིགས་ཤིང་རྔམ་པ་ཅིག་མཐོང་བ་དང་། ལྷ་བཟོ་བ་རྣམས་ཟིལ་མ་བཟོད་པར་དྲན་མེད་དུ་བརྒྱལ། བརྒྱལ་སངས་ཙ་ན་དགོངས་པ་གློང་ནས་བླ་མ་ཞལ་འཛུམ་ལྷག་གེ་འདུག །ད་ཤེས་སམ་གསུངས། ཞལ་གཅིག་ཕྱག་གཉིས་པའི་སྐུ་གཅིག་གསལ་བར་མཐོང་། དེ་ནས་གང་ཡང་དྲན་པ་མེད་པར་སོང་བས། ད་བཞེང་རྒྱུ་ཞལ་གསུམ་ཕྱག་དྲུག་པ་ཞིག་བསྟན་པར་ཞུས་པས། དེ་ཡང་ཟང་སྟེ། གདུལ་བྱའི་དབང་གིས་ཞལ་གཅིག་ཕྱག་གཉིས་འབྱོན། ཞེས་གསུངས་ནས་དེ་ལྟར་བཞེངས་པའི་ཚེ། ལྟེ་བ་མན་ཆད་སྔ་མ་མཐོང་
བས་མཚོན་པར་ནུས་ལ། ལན་ཆ་དང་དུབ་སྐྱོར་ཅིག་གསུངས་ནས་ལན་གྲངས་མང་པོར་བསྐྱར་དགོས་པ་བྱུང་བས། ཞལ་ནས་ཁྱེད་ཚོ་སྒྲིབ་པ་མ་དག་པ་ཡིན། འཇིམ་པ་ལེགས་པར་སྦྱོར་ལ་འདིར་ཞོག །ཆུ་མིག་ཕ་གི་ངའི་བདུད་རྩི་ཀ་པཱ་ལ་གང་གཏོར་བ་ལས་བྱུང་བའི་སྒྲུབ་ཆུ་ཡིན་པས་ཁྲུས་ཀྱིས། ལྷ་ཁང་གི་ཕྱི་ལ་བསྐོར་བ་ལན་བདུན་བསྐོར་ལ་ཤོག། དེ་བར་དུ་ནང་འདིར་སུ་ཡང་མ་འོང་། ངས་དཔལ་ཆེན་པོ་ལ་གསོལ་བ་འདེབས་པ་ཡིན་གསུངས། ཁོར་རྣམས་དེ་ལྟར་བྱེད་པའི་རིང་ལ་ནང་ན་འཕྲོས་དིར་དིར་འདུགཁྲུས་དང་བསྐོར་བ་ཚར་ནས་ནང་དུ་ཕྱིན་ཅན། སྐུ་དྲུང་ན་སུ་ཡང་མེད། བླ་མ་དགོངས་པ་ལ་བཞུགས། འཇིམ་པ་རྣམས་ཟད། དཔལ་ཆེན་པོ་ལྟེ་བ་ཡན་ཆོད་རང་བྱོན་དུ་ཤར་འདུག་པས། བུ་སློབ་དང་ལྷ་བཟོ་བ་ཀུན་ངོ་མཚར་དཔག་ཏུ་མེད་པ་སྐྱེས། ཕྱག་འཚལ་བཞིན་དུ་བླ་མ་རང་གིས་འདི་ལྟར་མཁྱེན་པ་ལ། ཁ་སང་ནས་མི་མཛད་པ། བདག་ཚོར་བགམ་པ་ལགས་མོད་ཞུས་པས། ང་ཉིད་ལྟ་བུའི་གང་ཟག་ལས། །ང་ཉིད་ལྟ་བུའི་རྟེན་ཅིག་འབྱུང་། །སྙིགས་མའི་དུས་སུ་འགྲོ་བ་འདྲེན། །ནད་དང་གདོན་གྱི་གཉེན་པོར་འགྱུར། །སྔར་ཡང་ཧེ་རུ་ཀ་ཉིད་ལ་བརྟེན་ནས་ཧེ་རུ་ཀ་ཉིད་བྱུང་བ་ཡིན་ལ། ད་ཡང་ཧེ་རུ་ཀ་ཉིད་ལ་ཧེ་རུ་ཀ་ཉིད་ཐིམ་པར་འགྱུར་རོ། །ཞེས་མ་འོངས་པའང་བསྟན་ནོ། །སྔོན་དུས་ན་བྱོན་པའི་གྲུབ་པའི་སློབ་དཔོན་ཆེན་པོ་འདི་དག་ནི་གསང་བ་སྲུང་བ་ལ་ཐུགས་ཤིན་ཏུ་སྒམ་པས། འདི་ལྟར་མིའི་འདུ་འཚོགས་མང་པོ་འོང་སར་གསང་སྒྲུབ་ལྟར་བཞེང་བ་ཤིན་ཏུ་གཉན་པས་མི་བཏུབ་གསུངས། ཁྲོ་མོ་བརྒྱད་པོ་རྒྱུད་ལུགས་ལྟར་བཞེངས་ཤིག་གསུངས་ནས་བཞེངས། གཡས་ཕྱོགས་ཀྱི་གྱང་རིས་ལ་སྒྱུ་འཕྲུལ་ཞི་བ། གཡོན་ཕྱོགས་ལ་འབར་བ་ཁྲོ་བོའི་ལྷ་ཚོགས། མདུན་དུ་མདོ་ཡོངས་རྫོགས། སྟེང་དུ་དཀྱིལ་འཁོར་གསུམ་དང་། སྒོ་ཁང་ངོས་ལ་དཔལ་མགོན་མ་ཧཱ་ཀཱ་ལ་དྲག་པོ་གཤིན་རྗེ་ལྟར་སྒྲུབ་པ། སྟག་ཞོན་མོན་པ་སྡེ་བརྒྱད་དང་བཅས་པ་བྲིས། དེ་ནས་རབ་ཏུ་གནས་པའི་དུས་ལ་བབ་སྟེ། ཆད་མ་
སུ་ལ་འཆོལ། ཤ་གང་ནས་འཚོ་ལ་སོགས་རབ་སྟོན་གྱི་ཉེར་བསྡོགས་བྱ་བ་ན། ཉེ་གནས་ན་རེ། བཟོ་བ་དང་། ལས་བྱེད། མགྲོན་པོའི་སྐྱོང་དར་མངས་པས་དངོས་པོ་ཕལ་ཆེར་ཟད་པ། ད་འབུལ་བ་སྒུག་པ་དང་ཡོན་བདག་གི་སར་གཡར་སྐྱིའང་བྱེད་དགོས་པས་རབ་གནས་དལ་གྱིས་གནང་བར་གསོལ་བས། ཟུར་ཆུང་བ་ན་རེ། རབ་གནས་དུས་ལ་བྱེད། ཆང་གི་ནས་བཙལ་བས་མི་ཡང་། རྫ་མས་ཀྱང་མི་ཁོམ། དེ་བས་ཆང་བ་ཀླུ་ལ་འཆོལ། ཤ་རྙེད་པའང་དཀའ། རྙེད་ཀྱང་རིན་མི་འཁྱོངས། སྲམ་པ་བོན་གྲོང་བའི་གླང་ལ་ཤ་རྒྱུ་བྱེད། རྩམ་པ་མི་མ་ཡིན་ལ་འདེགས་བསྐུལ་བས་ཆོག། དེ་ལྟར་བྱས་ན་མི་ལྡང་བ་གང་ཡང་མེད་གསུངས། དེར་བླ་མ་ཟུར་པོ་ཆེས། ནས་ཁལ་སྟོང་གི་ཆང་ལས་མི་འགྲོ། ཁྱོད་རང་ནས་བྲེ་དྲུག་ཚོས། མིའི་མདུན་ན་རབ་གནས་ཀྱི་ཆང་ཚོང་མང་པོ་ཡོད་པ་ལྟར་གྱིས། ཟུར་ཆུང་བས་ཀླུ་མོ་ཁུ་གཅིག་གསུངས། དེ་ནས་ཡ་ཟད་བྲག་གདོང་གི་བྲག་ལ་གནས་པའི་ཀླུ་བདུད་ཀྱི་སྲིང་མོ་དེར་ཟུར་ཆུང་བས་དགོངས་པ་མཛད་དེ་བཀུག་པས་སྦྲུལ་ལ་ཕྲ་མོ་གཅིག་བྱུང་། ལྟ་སྟངས་མཛད་པས། བུད་མེད་དཀར་མོ་གཅིག་ཏུ་སོང་། དེར་ཟུར་བོ་ཆེས། ངའི་ལྷ་ཀླུ་ལ་གནས་ཀྱི་ཆང་མ་བྱེད་དགོས་གསུངས་པས། ངེད་གཙང་མ་ཀླུའི་རིགས་གྲིབ་ལ་སྔར། སྐྱུར་ལ་འཛེམ། བླ་མའི་གཟི་བྱིན་ཡང་མི་བཟོད་པས་ཆང་འགོ་མི་ཐོན། ངའི་མིང་པོ་ལ་འཆོལ་བ་ཞུ། རྐྱེན་གང་དགོས་འབུལ་ཟེར། དེར་བླ་མས་འོ་ན་ཟུར་ཆུང་བ་མིང་པོ་འགུགས་སམ། བྱིན་གྱིས་བརླབ་གསུངས་པས། བདག་གིས་འགུགས་པར་འཚལ་ཟེར་ནས་ལྟ་སྟངས་མཛད་པས། སྡིག་བར་ཙ་རྩིད་བུ་ཙམ་ཞིག་བྱུང་། ཏིང་ངེ་འཛིན་གྱིས་གཟིར་བས་གཟུགས་མངོན་སུམ་དུ་བསྟན་བྱུང་། དེར་ཆང་མ་བྱེད་པར་བསྒོས་པས། བདག་ལྷ་འདྲེའི་རིགས་སུ་གཏོགས་པས་བྱ་དཀའ་དང་སེམས་འཛིན་དུ་མ་དགོས། ཆང་མ་བྱེད་དུ་མི་ཁོམ་ཡང་། བླ་མའི་བཀའ་གཅོག་
པར་མི་ནུས་ཟེར། དེར་ཁོང་གཉིས་ཀྱི་སྲོག་སྙིང་བླངས། དམ་ལ་བཞག། གནངས་ཉིན་ཡོང་བས་གྲངས། །མཛོད། ངེད་ཀླུའི་རིགས་གྲིབ་ལ་སྔ་རབས་གཙང་ཞིང་སྡོངས་བཙན་པའི་ཐབས་ཞུ་ཟེར། དེར་བླ་མ་ཟུར་བོ་ཆེས། ངས་བྱིན་གྱིས་བརླབས་ཀྱིས་གསུངས། རྫ་མ་ཐེམ་བུ་གསུམ་པ་སྦོས་ཆུས་བཀྲུས། བདུད་དང་ཀླུ་བསྟེན་པའི་མཐུན་རྫས་ཀྱང་འདུ་བྱས། ནས་བྲེ་དྲུག་གི་གླུམ་རྣམས་བླུགས། ཁ་ནས་དཀར་གཙང་མས་བཀང་། དེར་ཀླུ་བདུད་མིང་སྲིང་གཉིས་བཅུགཁ་བླ་མའི་ན་བཟའ་ཕོད་ཀས་བཅད། ཕུ་དུང་ནས་ཆུ་བླུག་ཏུ་རུང་བར་བྱས། རྡོ་རྗེའི་མདུད་རྒྱ་བྱས་པས་ཀླུས་ཕྱོགས་ཕྱོགས་ཀྱི་ཆང་རྣམས་ཀྱི་བཅུད་བསྡུས་ཏེ་ཆང་ལ་འཛད་པ་མ་བྱུང་། དེར་ཉེ་གནས་ཀྱིས་ཆང་གི་ལྡང་མཆི། རྩམ་པ་ཇི་ལྟར་བྱེད་ཞུས་པས། ཕང་སྣོད་མང་པོ་གཡོར་ཞིག་གསུངས། དེར་བླ་མས་གཏོར་མ་གཅིག་མཛད། ཕད་བུའི་སྣོད་རྣམས་སུ་རྩམ་པ་ཁྱོར་བ་རེ་ཐོབ་ལ་ཞོག་གསུངས། དེ་ལྟར་བྱས་པས་སང་ཉིན་སྣོད་ཐམས་ཅད་རྩམ་པས་ཁེངས། ཡང་བླ་མའི་ཞལ་ནས་གྲྭ་བ་གཅིག་སྲམ་པ་བོན་གྲོང་བའི་སར་དེངས་ལ། ངེད་རབ་གནས་བྱེད་པའི་ཆང་གི་སྦང་མ་མང་པོ་ཤིང་ནགས་ལ་ཕོ་བཏང་བ་འདི་ཕངས། གླང་རྣམས་སྦང་མ་ཟ་བར་ཐོང་གིས་གསུངས། དེ་བཞིན་བྱས་པར་གླང་མང་པོ་བསྐུར་བྱུང་། བླ་མའི་གསུང་གིས་ཟུར་ཆུང་བས་སྒྲོལ་ལམ། གསོ་གསུངས་པས། བདག་བླ་མའི་བཀའ་བཞིན་བསྒྲུབ་པར་ཞུ་ཞུས་པས། ཟུར་པོ་ཆེས་དགོངས་པ་མཛད་དེ་ཐུན་རེ་འཕངས་པས་གླང་ཐམས་ཅད་ཉལ་གྱིས་ཤི། ལྤགས་པ་བཤུས། རུས་པ་མ་བཅག། ལྷུ་ཚིགས་མ་བྲལ་བར་གྱིས། ནང་གི་དོན་སྣོད་རྣམས་ཀྱང་རང་སོར་ཞོག། ཕྱི་ཤ་རྣམས་བྲེགས་ཤིག་གསུངས་པས། ཉེ་གནས་སྐྲག་སྟེ། འདི་བ་དཔོན་སློབ་སྡིག་རྒྱལ་དུ་འདུག །གླང་ལ་སྦང་མ་སྟེར་གསུངས་ནས་ཐམས་ཅད་བསད། ད་གླང་འདོན་མི་བྱུང་ན་ཇི་ལྟར་བྱེད་སྙམ་ནས་བློ་ཤིན་ཏུ་འཚུབས་པའི་ངང་ནས་རབ་
གནས་ཀྱི་ཤ་སྟོན་བྱས། སྟོན་མོ་གྲུབ་ནས་གླང་འདོན་མི་བྱུང་། ཉེ་གནས་རྟབ་རྟབ་པོར་གྱུར་བ་དང་། བླ་མའི་གསུང་གིས་ཁོང་ཚོ་ལའང་བཟའ་བ་བྱིན། ཟུར་ཆུང་བས་གླང་བདག་པོ་ལ་སྤྲོད་ཅིག་གསུངས། དེར་ཟུར་ཆུད་་པས་པགས་པའི་ཁུང་དུ་རུས་པ་རྣམས་གྲལ། ནང་རོལ་རྣམས་ཀྱང་བཙུད་ན་བཟའ་བཀབ། སོ་གོལ་གཅིག་གཏོགས་པའི་མོད་ལ་གླང་རྣམས་འདར་ཕྲི་ལི་ལི་ལངས་གྱུར། རྒན་མོ་གཅིག་གིས་ཤ་འདྲལ་བའི་ཚེ་རུས་རྩི་དྲད་པ་བྱུང་བས། ཕྱིས་གླང་དེ་ལ་རྩི་བགྱོལ་བྱུང་སྐད། གསད་གསོའི་རྫུ་འཕྲུལ་དེ་ལྟ་བུ་མཛད་པས་དེར་ཚོགས་ཚད་ཐམས་ཅད་ཤིན་ཏུ་དད་པར་གྱུར། བླ་མ་ཟུར་ཆེན་ཡང་མཉེས་པའི་དང་ནས་དཔལ་ཆེན་པོ་ལ་གཟིགས་ཏེ། འགྲོ་བའི་དོན་ཆེན་པོ་མཛད་འཚལ་གསུངས་པས། སྐུ་གར་དགུའི་རྣམ་པར་རོལ་ཞིང་། ཧེ་ཧེ། སྨོས་ཅི་འཚལ། གསུངས་པས་དང་པོ་རྔམ་ཞལ་དུ་ཡོད་པ་ལ། དེ་ནས་བཞད་ཞལ་དུ་གྱུར་བ་ཡིན་ནོ། །དེ་ངེད་རང་རྣམས་ཡང་དག་གི་ལོ་སྒྲུབ་བྱེད་པ་ཡིན་གསུངས། ཉེ་གནས་ན་རེ་ཆ་རྐྱེན་གྱིས་མི་ལྡང་ཟེར། ཟུར་ཆུང་བས། ཆང་མི་ལྡང་ན་ཀླུ་བདུད་སྒོར་བས་ཆོག། ཤ་དང་རྩམ་པ་ཡང་བག་ཙམ་མཆིས། རྣལ་འབྱོར་དམ་ཚིག་མ་ཉམས་ན། །འཚོ་བ་སྣང་སྲིད་ལྷ་འདྲེས་སྦྱོར། །གཞི་བདག་གིས་འབུལ་བའང་འོང་བས་ལོ་སྒྲུབ་མཛད་པ་དགའ་ཟེར། དེར་རྣལ་འབྱོར་ཕོ་མོ་བརྒྱ་ཙམ་ཚོགས། སྒྲུབ་པ་པོ་རྣམས་ལ་ཆང་ཀ་བཱ་ལ་རེ་དང་། བྲན་བྱ་དང་མོའི་སྒོ་ང་ཙམ་རེ། ཤ་དམ་ཚིག་གི་བཟའ་བ་ཙམ་དྲོངས་ཤིག་གསུངས་ཏེ་ལོ་སྒྲུབ་མཛད། དེར་བླ་མའི་ཞལ་ནས་ཁྱེད་རྩེ་མོ་བཞི་དགོངས་པ་འདྲེན་པ་ཡིན་གསུངས་པས། ཐམས་ཅད་ཀྱིས་མཉམ་པར་གཞག་པ་ན། གསུམ་པོ་ལ་གཡོ་འགུལ་མེད་པའི་དགོངས་པ་རི་བོ་ལྟ་བུ་རྐྱེན་གྱིས་དབྲོག་མི་ནུས་འབྱུང་། ཟུར་ཆུད་པ་རིས་མེད་མཉམ་པ་ཆེན་པོའི་གནས་ལ་བྱོན་པས་ལྟ་བ་མ་ཐོབ་མཚོན་ཕྱིར་ཤིང་ཏཱ་ལ་གང་ཙལ་འཕགས་ནས་གདའ་སྐད། ཡང་བླ་མའི་ཞལ་ནས། ད་ཟུར་ཆུང་བའི་རུ་ལུའི་བཟླས་པ་ལ་ཕྱི་ནས་ཉོན་ཅིག་གསུངས། རྣལ་འབྱོར་མ་གཅིག་གིས་ཕྱི་ནས་ཉན་པས། སྔ་རབས་ཆུང་ངུ་
མ་སོང་། རི་ཟུར་གཅིག་འདས་ནས་ཉན་པས་ཀྱང་ཆུང་དུ་མ་སོང་བས། དེར་བླ་མའི་གསུང་གིས། ཁྱེད་རྣམས་མཆེད་གྲོགས་མཉམ་པོར་ཡིན་ཡང་། ཟུར་ཆུང་བའི་གྲིབ་མ་ལའང་འགོམ་དུ་མི་རུང་གསུངས་ནས་གཟེངས་བསྟོད་དོ། །དེ་ནས་སྒྲུབ་པ་ཐོན་པ་དང་། དཔོན་སློབ་རྣམས་གྲོགས་པོའི་སུམ་མདོར་བྱོན། བླ་མ་ཐུགས་ཉམས་འུར་ནས་བྲག་རྡོ་རྗེའི་གཏན་པ་བྱ་བའི་སྟེང་དུ་རུ་ལུའི་བྲོ་བརྡུངས་མཛད་པས། ཞབས་ཀྱི་ལོང་བུ་མན་ཆོད་འདམ་ལ་བརྒྱབ་པ་བཞིན་སོང་། ཟུར་ཆུད་པས་ངའི་བླ་མ་སངས་རྒྱས་་དངོས་སུ་འདུག་པས་ཞབས་སྤྱི་བོར་ལེན་པ་ཡིན་ཟེར་ཞབས་རྗེས་ལ་དབུ་གཏུགས་པས་རལ་བའི་ཐོག་ཚུགས་སྙན་ཆ་དང་བཅས་པའི་རྗེས་ལྷམ་མེར་བྱུང་། དེར་བཟང་སྒོམ་ཤེར་རྒྱལ་ན་རེ། བླ་མ་ཁུ་དབོན་གཉིས་ཀྱི་གྲུབ་རྟགས་ཁྱད་དུ་འཕགས། འདི་ལ་མི་ཕྱུགས་ཀྱི་རྡོག་པ་བཞག་ན་བསོད་ནམས་མ་ཡིན་པར་འགྱུར་ཉེ་ཟེར་ནས། ལག་སོར་ལྔ་གྱད་སྟོབས་པོ་ཆེ་ལྔར་སྤྲུལ་ནས་བྲག་རྡོ་རྗེའི་གཏན་པ་གྱེན་དུ་སློང་ནས་བཞག། ཡང་ཞང་འགོས་ཆུང་བ་དང་། མི་ཉག་ཁྱུང་གྲགས་གཉིས་ཀྱིས། འདི་བརྟེན་པ་ངེད་ལ་བབས་ཟེར་ནས། གྱད་སྟོབས་པོ་ཆེ་མང་པོས་བསྒུལ་བར་ཡང་མི་ནུས་པའི་ཕ་ཝང་རེ་བླངས་ནས་གཡས་གཡོན་ནས་བརྟེན་ཏེ་རྩ་བ་བརྟན་པར་བྱས་པ་ད་ལྟ་མངོན་སུམ་ན་ཡོད་དོ། །དེ་ནས་འུག་པ་ལུང་དུ་འབྲས་བུའི་དཔལ་ཆེན་པོ་བཞེང་བར་བཞེད་ནས་སློབ་མ་ཐམས་ཅད་ཀྱང་ཕར་དེངས་ཤིག་གསུངས་པས། ཟུར་ཆུང་བ་བླ་མའི་ཕྱགས་ཕྱི་སྙོགས་པར་འོང་གིས་ཟེར་ནམ་མཁའ་ལ་ཕུར་ནས་བྲག་རྒྱ་བོར་གཤེགས། གྲྭ་པ་རྣམས་ཀོ་བ་བརྒྱུད་ནས་སོང་། ཀླུ་བདུད་མིང་སྲིང་གཉིས་ན་རེ་བདག་ཅག་ཀོ་བ་ལ་མི་གྲིབ་ཅན་དང་འགྲོགས་པར་མི་རུང་བས། རབས་ལ་འཁྲིད་པར་འཚལ་ཞེས་ཞུས་པས། བླ་མས་དེ་བཞིན་རུང་གསུངས། དེར་ཉེ་གནས་ལ་རྫ་མ་བསྐུར་བས་ལྗིད་བྱ་སྒྲོ་ལས་ཡང་བ་བྱུང་། ཆུ་ཁར་ཕེབས་པ་དང་ཉེ་གནས་ལ་ཁྱོད་རང་ང་ལ་འཇུས། ཐེ་ཚོམ་མེད་པར་ཤོག་གསུངས་པས། ཁོའི་སེམས་ལས་སུམ་རུང་ནས་ཆུ་ལ་བསྐྱུར་བ་མིན་ནམ་སེམས། དེ་མཁྱེན་ནས་
ད་ཁྱོད་ངའི་ཕྱིར་མི་ཐར་བ་འདུག། ཀོ་བ་བསྐོར་ལ་ཤོག། ངས་སྔོན་ལ་འགྲོ་ཡི་གསུངས་བླ་མ་ཞབས་ཆུ་ལ་མི་རེག་པར་གཤེགས་སོང་། ཉེ་གནས་ཀྱིས་ཀོ་སར་ཕྱིན་པས་ཀོ་བ་ཕར་རི་ཐལ། དེར་སྒུག་ཡུན་རིང་བ་དང་ཁ་སྐོམ་ནས་ཆང་བཙགས། ཡོ་ག་ཚད་འཐུངས་པས་རྣམ་རྟོག་ལ། ཆང་བཙོས་ནས་ལོ་གཅིག་དང་ཟླ་བ་བཞི་སོང་། འདི་ཙམ་ཡོང་བ་བླ་མས་རྫ་མའི་ནང་དུ་ཅི་བཅུག་པ་ཡིན་སྙམ་ནས་རྫ་མའི་རྒྱ་བཤིག་པས། སྤྲུལ་དཀར་ནག་གཉའ་ཤིང་ཙམ་པ་གཉིས་མ་དུད་པ་ཤིགས་སེ་གྲོལ་ནས་ནམ་མཁའ་ལ་དེངས། ཤུལ་དུ་སྡིག་སྦལ་ལྕོད་མོ་ལ་སོགས་པ་འདུག་པ་དག་ཀྱང་ཚག་སྒྲའུ་བསྒྲ་དང་བཅས་ནམ་མཁའ་ལ་སོང་མ་ཐག་སྦང་མ་སྔོ་ཧྲུལ་ལེ་སིང་པོ་སྒྱུར་སིང་ངེ་སོང། དེར་སྦང་མ་རྣམས་པོ་རྫ་མཁུར་ཕྱིན་པས་ཆུ་ཐོན་པ་དང་རྫ་མའང་ཆག། དེར་བླ་མའི་བཀའ་ལས་རྟེན་འབྲེལ་འཕྱུགས་འོག་གདོང་གི་ཀླུ་བདུད་མིང་སྲིང་གཉིས་ཕྱིར་མ་ཐོན་ན། འུགར་ལུང་དུ་དགོན་ར་ཁོད་ཙམ་ན་ཆེ་བ་ཆགས། སྲམ་པ་སྒྲུབ་ཁང་ཡང་དར་རྒྱས་ཆེ་ལས་མི་གཉན་པ་ཞིག་དོང་སྟེ། ད་རྫ་མཆུ་ལྷོར་ཐོན་པས་གནས་བཞི་དང་སྡེ་དགོན་འགའ་ཞིག་ཆགས་པར་འགྱུར་ཞེས་གསུངས། ཀླུ་བདུད་མིང་སྲིང་སྲམ་པ་སྒྲུབ་ཁང་གི་བཀའ་སྲུང་ལ་བསྐོས། རྟེན་འབྲེལ་དེས་འབྲས་བུའི་དཔལ་ཆེན་པོ་ཡང་མ་གྲུབ་བོ། །དེ་ནས་བཤད་གྲྭ་དང་སྒོམ་གྲྭ་རྒྱ་ཆེན་པོ་བྱུང་། དེའི་ཚེ་ཉ་རི་ནམ་མ་གཡུང་དྲུང་བཀྲ་ཤིས་བཟའ་མི་གཉིས་བུ་ཚ་མེད་ལ་ནོར་གྱི་འབྱོར་བ་ཡོད་པ། ཆོས་འཁོར་བྱ་བར་འདོད་ནས་ཡུལ་མི་དང་ཉེ་དུ་ཀུན་བསགས་ཏེ་སློབ་དཔོན་གང་བཟང་དྲིས་པས། ལ་ལ་སྔགས་པ། ལ་ལ་བཙུན་པ། ལ་ལ་བོན་པོ་ཟེར་ཁམ་འཆམ་པས་ཁྱེད་རང་གང་མོས་ལ་གྱིས་ཤིག་པའི་གྲོས་བཏབ། མོ་ན་རེ། ངའི་ཡོ་བྱད་ཀྱིས་འདེངས་པས་གསུམ་ཀ་ལ་བྱེད་ཟེར། དེར་སྔགས་པ་འུག་པ་ལུང་པ། བོན་པོ་ལ་ཀེ་ཙེ་བ། བཙུན་པ་ཆུ་མིག་རིང་མོ་བ་རྣམས་གདན་དྲངས་སོ། །མཆོད་གནས་གསུམ་པོ་འདུས་ནས་ལྷ་ཁང་སྟབས་སུ་བརྩིག་པའི་གྲོས་བྱས་པས་ལྷའི་གཙོ་བོ་ལམ་མཐུན།
སྔགས་པས་རྡོ་རྗེ་སེམས་དཔའ་ལ་བྱེད་ཟེར། བཙུན་པས་ཤཱཀྱ་ཐུབ་པ་ལ་བྱེད་ཟེར། བོན་པོས་གཤེན་རབ་མི་པོ་ལ་བྱེད་ཟེར་བས། ལྷ་ཁང་སོ་སོར་བརྩིག་ཏུ་ཆད། ལྷ་རྗེ་འུག་པ་ལུ་དངས་སྒྲོ་ཕུག་པས་དམར་བ་གཅིག་ཏུ་བོན་པོ་དང་བསྡེབས་ནས་བརྩིགས་པས། བོན་པོ་ན་རེ། གདོང་ལྷ་བཞེངས་པའི་ཚེ་ཡང་། ཁྱོད་ཀྱི་ལྷས་གཙོ་བོ་བྱས་ན་ངའི་ལྷ་ས་འཁོར། ངའི་ལྷས་གཙོ་བོ་བྱས་ན་ཁྱོད་ཀྱི་ལྷས་འཁོར་དུ་བྱེད་དགོས་ཟེར་བས་དེ་གཉིས་གང་ཡང་ལེགས་པ་ཞིག་མི་འོང་བར་འདུག་དགོངས་ནས་ལྷ་ཁང་དེ་བོན་པོ་ལ་བྱིན། སྒྲོ་སྟོན་པས་སྒྲོ་ཕུག་ཅེས་བྱ་བའི་གནས་ཕུལ་ཏེ་དེར་ལྷ་ཁང་བརྩིགས་སོ། །དེའ་ཚེ་ཡོན་བདག་གཉན་སྡེ་གསུམ་ན་རེ། ལྷ་ཁང་ལ་རྒྱ་ཕིབས་ས་ཁལ་བ་ལ་མེ་ཏོག་སྡུད་ཟེར་བ་ལ། སྔགས་པ་དང་པོ་ན་བོས་ཕེལ། བཙུན་པས་མཁེལ་ལོ། །དེར་སྔགས་བོན་གཉིས་ལོ་རེ་མོས་སུ་སྡུད་པས། བཙུན་པ་ན་རེ་བདག་ཅག་ལའང་སློབ་དེ་ཞུ་ཟེར། ལོ་གཅིག་སྦྱིན་པས། དེ་ཕྱིན་ཆད་གསུམ་ཀ་ལོ་རེས་སྡུད་དུ་སོང་། སྒྲོ་ཕུག་གི་གཙུག་ལག་ཁང་དེར་དུས་གསུམ་སངས་རྒྱས་ཀྱིས་གཙོ་བྱས་པའི་ལྷ་ཁང་ཆེ་ཆུང་བརྒྱད། ཁྱམས་སྟོད་ཀ་བ་ཉི་ཤུ་དང་། ཁྱམས་སྨད་ཀ་བ་དྲུག་ཅུའི་སར་ཡོད། གནས་འདིར་ཆོས་གྲྭ་ཆེན་པོ་ཚུགས། དེ་ཡང་ཐག་གི་རྒྱ་བོར་ཡང་དག་གི་སྒྲུབ་པའི་སྐབས་ཡིན་པར་ཡང་གྲགས་ཤིང་རྒྱལ་བཟུར་པོ་ཆེ་ལ་སྐུ་བསོད་ཤིན་ཏུ་རྒྱས་པའི་སྐབས་ཤིག་ན། འབྲོག་མི་ལོ་ཙཱ་བ་པཎྜི་ཏ་རྫོངས་པའི་གསེར་མ་ལྡང་ནས་ཁྱེད་ཀྱིས་གསེར་མང་པོ་ཁྱེར་ཤོག། ངས་གདམས་པ་ཟབ་མ་སྦྱིན་ནོ་ཟེར། འདི་ལྟར་སྐྱེས་བུ་ཆེན་པོ་རྣམས་ནི་གཞན་ལ་ཡན་འདོགས་པའི་དམ་བཅུའི་རྩ་བ་བརྟན་ཅིང་། སྡོང་པོ་བཀོད་པ་ལས། རིགས་ཀྱི་བུ་ཁྱེད་ཀྱིས་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག། ཆོས་ཀྱི་སྒོ་གཅིག་དང་། སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་འཛིན་ཅིག། དེ་ཅིའི་ཕྱིར་ན། རིགས་ཀྱི་བུ་བྱང་ཆུབ་སེམས་དཔའ་ནི་ད་ཤེ་བའི་རྩ་བ་ཆད་མེད་པ་ཡོངས་སུ་
བསྡུ་བར་བྱ་དགོས་སོ། །ཞེས་པས་བྱང་ཆུབ་སེམས་དཔའི་བསྡུ་བའི་དངོས་པོ་བཞིའི་སྤྱོད་པ་མ་ཚང་བ་མེད་པ་རང་གིར་བྱ་བའི་སླད་དུ། ཀརྨ་པཀྴིས་མཚུར་ཕུའི་གཙུག་ལག་ཁང་གི་རྒྱ་ཕེབས་འདམ་ཅོག་རྩེལ་ནས་མཐོང་བ་ཙམ་གྱིས་སྲིད་དུ་བགམ་པར་མཛད་པ་བཞིན། རྒྱལ་བཟུར་པོ་ཆེས་དགོངས་པ་ཅན་གྱི་སླད་དུ། སྒྲོ་ཕུག་གི་ལྷའི་གདོང་དང་། ཐག་གི་ཡང་གདོང་གཉིས་སྤུབས་སུ་བཅུག་པའི་གསེར་འབུམ་རེ་བྱེད། དེ་གཉིས་ཀྱི་བར་ལྕགས་ཐག་གིས་སྦྲེལ་ལོ་གསུངས་པ་དང་། གྲྭ་པ་རྣམས་ན་རེ། འོན་བདག་ཅག་གིས་ཀྱང་འཐུད་དུ་ཟངས་སྡེར་རེ་དང་། དྲིལ་བུ་རེ། ལྕགས་ནག་རེ་འབུལ་ལོ་ཞེས་དམ་བཅས། དེའི་གཡེར་ཆེན་པོ་བྱུང་ནས་གཞིས་བདག་གཉིས་ཀྱང་བློ་འདྲོགས་པར་གྱུར་ཏེ། གསེར་རའི་མཆིན་པ་ཙམ་ཞིག་ཞུ་རྟེན་དུ་ཕུལ་ནས་གསེར་འབུམ་མི་མཛད་པའི་ཞུ་བ་བྱས། གསེར་གྱི་གཏེར་ཁ་ཕུལ་ནས་སྲོག་ཆགས་ཀྱི་གཟུགས་མ་བྱུང་བར་ལོང་ཞེས་ཟེར། ཁུང་བུ་གཅིག་ནས་གསེར་ཤིན་ཏུ་མང་བར་བྱུང་བའི་མཐར་གསེར་སྦལ་བ་འདྲ་བ་ཞིག་བྱུང་བ་དང་འཕྲོ་བཅད། མྱུ་གུ་ལུང་དུ་ལོ་ཙཱ་བ་ལ་གསེར་སྲང་བརྒྱའི་འཐུད་བྱས། སྟོན་གྱི་དུས་སུ་བེར་ཐོག་ཏུ་ཚར་མ་འཁུར་བ་སོགས་གུས་པའི་སྤྱོད་ལམ་ཡང་མཛད། རྒྱུད་གསུམ་ཆ་ལག་དང་། གུར་ལ་ཤིན་ཏུ་མཁས་པར་བྱང་ཆུབ་མོད་ཀྱི། བླ་མ་ཆེན་པོའི་བཀའ་དྲིན་གྱིས། །ཨ་བོའི་སེམས་ཕྱོགས་ནོར་བུ་ཐལ། །ཞེས་གསེར་འགྱུར་གྱི་ཆོས་ལ་རོ་མྱངས་པས། །སླར་ཡང་རང་གི་སེམས་ཕྱོགས་ཡིད་བཞིན་རིན་པོ་ཆེ་ལྟ་བུའི་ནོར་དུ་ཐལ་ཞེས་ངེས་ཤེས་ལྷག་པར་སྐྱེས་པའི་གསུང་བྱོན་ཏོ། །ལར་ཕག་མོ་གྲུ་བས་ལམ་འབྲས་གསན་པའི་ཕྱིན་དྭགས་པོ་རྙི་བ་རིན་པོ་ཆེ་ལ་ཐུག་པ་ནད་བུར་བྱེད་པ་དང་། གངས་རིའི་ཁྲོད་ཙམ་ན་དཀོན་པའི་དགེ་སློང་རྡོ་རྗེ་འཛིན་པ་གྲུབ་ཐོབ་རྣལ་འབྱོར་གྱི་དབང་པོ་ལྷ་རྗེ་ཟུར་བོ་ཆེ་རང་སྲིད་ཀྱི་ཕྱོགས་ལ་མ་ཐོབ་སྙམ་པའི་ཀུན་སློང་གི་གདོན་ཆེན་པོས། བདེ་གཤེགས་རྒྱ་བོ་པ། འབྲོམ་སྟོན་རྒྱལ་བའི་འབྱུང་གནས།
བླ་མ་ཞང་རིན་པོ་ཆེ་སྟོན་པ་བྱང་འབར་རྣམས་སྡེ་སྣོད་གསུམ་གྱི་དགྲར་བལྟ་བའི་ཚེ་དེ་འདོན་པ་ནི་རང་ཉིད་ཀྱི་མགོན་ཆབ་འཚལ་བའི་སྤྱི་བརྟོལ་ཆེན་པོའོ། །དེ་ལྟར་སྒྲོ་ཕུག་གི་གཙང་ཁང་འབྱོངས་ཙམ་པ་དྲུག་ཅུ་རེ་གཅིག་པའི་ཚེལ་མ་ལྔའི་ཡོན་ཏན་མཐར་ཕྱིན་ནས་ལྷུན་གྲུབ་རིག་འཛིན་གྱི་ས་ལ་གནས་པའི་སྐྱེས་བུ་ཆེན་པོ་སྤྲུལ་པའི་སྐུར་རྩོད་པ་མེད་པ་དེ་ནི་རགས་ལུས་དྭངས་མར་གནས་འགྱུར་བའི་དགོངས་པ་གཏད་དེ། བྲག་རྒྱ་བོ་ནས་ཟུར་ཆུང་བ་བོས་ཤིག་གསུངས། བྱོན་པ་དང་ངའི་གདན་ས་འདི་ཟུར་ཆུང་བ་ལ་གཏོད་པ་ཡིན། སློབ་མའི་ཚོགས་ལ་ཆོས་ཀྱིས་ཕན་འདོགས་དགོས་པས་བློ་དང་འཚམ་པར་སྦྱོར། ངས་སྐྱོང་བ་བཞིན་སྐྱོངས། སློབ་མ་རྣམས་ཀྱིས་ཟུར་ཆུང་བ་འདི་དཔལ་ཆེན་པོའི་སྐུ་གསུང་ཐུགས་ཀྱི་དངོས་གྲུབ་ཐོབ་པ་ཡིན་པས་ང་བས་འདི་ལྷག །ཅི་མཛད་ལེགས་པར་ལྟོས། གསུང་མ་གཅག་སྐུའི་གྲིབ་མ་དང་ཞབས་རྗེས་ན་བཟའ་ཙམ་ལའང་མ་འགོང་། ངས་བསྐྱངས་པ་བཞིན་སྐྱོང་བ་ཡོད་པས་མོས་གུས་ཕུན་སུམ་ཚོགས་པ་གྱིས་ཤིག་གསུངས། དེ་ནས་སྲམ་བསྒྲུབ་ཁང་དུ་གཤེགས། ལན་ཅིག་ཉེ་གནས་ལ་ད་ནངས་ཚ་བ་སྔ་སེ་གྱིས་གསུངས། དེར་ཉི་མ་ཤར་བ་དང་སྐུ་མདུན་དུ་ཕྱིན་པས། བླ་མ་གཟིམ་མལ་ན་སྐུ་ཚགས་མཛད་ཅིང་འདུག། ད་ལྟ་ནས་སྐུ་ཚགས་མཛད་པ་གར་གཤེགས་པ་ཡིན་ཞུས་པས། ང་ནི་བདེ་ཆེན་ཞིང་དུ་འགྲོ། དཔལ་ཆེན་ང་དང་དབྱེར་མེད་པས། །ཡི་དམ་ལྷ་ལ་གསོལ་བ་ཐོབ། །ཅེས་གསུངས་ནས་རྡོ་རྗེ་དྲིལ་བུ་ཁྲོལ་ལེའི་ངང་ལ་སྐུ་འོད་ཀྱི་རང་བཞིན་དུ་གྱུར་ཏེ། དཔལ་ཆེན་པོའི་ཐུགས་ཀར་ཐིམ་མོ། །དེའི་དུས་སུ་ཁམས་པའི་འབུལ་སྐྱེ་ལ་ཡོངས་པ་དང་འགྲིག་པས། ལམ་དུ་བླ་མ་དང་མཇལ། ཕམས་པའི་སད་པ་བྱིན་གྱིས་བརླབས་ནས་སྤྲུལ་པའི་གཞལ་ཡས་ཁང་དུ་འབུལ་བའང་བཞེས། བསྔོ་བ་མཛད། སླར་ཁམས་པ་གཉིད་ལོག་པ་ལས་སད་པ་བཞིན་དུ་ཅི་ཡང་མི་གདའ་བས། ཐེ་ཚོམ་གྱི་ངང་ནས་ཕྱིན་ཙ་ན་ལམ་དུ་བླ་མ་དཔལ་ཆེན་པོའི་ཐུགས་ཀར་ཐིམ་མོ་
ཞེས་ཐོས་སོ། དེ་ལྟ་བུའི་དཔལ་ཆེན་པོ་འདི་བྱིན་རླབས་ཤིན་ཏུ་ཆེ་བས་སླན་ཆད་ཀྱང་སྐུ་གཉེར་ལ། རྒྱ་སྟོན་ཤཱཀ་ཡེ་ལ་བསྲུ་བགྱིས་ཞེས་གསུང་བྱོན། བསུ་བ་བྱས་ཙ་ན། རྒྱ་སྟོན་དེ་བ་དཀར་མོ་ཞིག་ལ་བཅིབས། སྤྱང་ཞྭ་ཞིག་གསོལ་ནས་བྱུང་སྟེ། དཔལ་ཆེན་པོའི་སྐུ་མདུན་དུ་འོད་དཀར་པོ་གཅིག་ཏུ་གྱུར་ཏེ་གཡོན་སྐོར་ལན་གསུམ་བྱས་ནས་སྐུ་ལ་དངོས་སུ་ཐིམ་པ་དཀོན་གཉེར་མཛོ་དོན་ལྡན་ཞེས་བྱ་བས་མངོན་སུམ་པར་མཐོང་། དེ་བཞིན་དུ་མཚན་ལྡན་ཟུར་མེ་འོད་འབུམ་བྱ་བའང་སྐུ་ལ་ཐིམ་པར་གྲགས་སོ།། །།རྩེ་མོ་བཞིའི་ནང་ནས་ཀྱང་གླང་པོའི་ནང་ན་ཁྱུ་མཆོག་ལྟ་བུ་བདེ་གཤེགས་རྒྱ་པོ་བའམ། ཟུར་ཆུང་ཤེས་རབ་གྲགས་པ་ནི། སྔགས་འཆང་འུག་པ་ལུང་པའི་གདུང་གི་ཕྱི་མོ་ཡིན་ཏེ། དེ་ལ་ཡབ་ཐག་པ་སྒོམ་ཆེན་རེས་འགའ་ལྡོམ་བུའི་ཚུལ་དུའང་ཡོད་པའི་བུར་གཡས་རུ་གཙང་གི་སའི་ཆར་མཇོ་ཤེས་རབ་སྐྱིད་ལ་ངོ་མཚར་བའི་ལྟས་ཁྱད་པར་བ་དང་བཅས་བཙས། ལོ་བདུན་བར་བྲི་ཀློག་དང་། དགུ་ལ་ཞི་ཁྲོའི་ཕྲིན་ལས་གྱེར་ཤེས་པ་བྱུང་། བཅུ་གསུམ་ལོན་པའི་སྐབས་ཤིག་ན་གཟིམ་མལ་ན་ཕྱག་དཔེ་གཟིགས་ཤིང་ཡོད་ཙ་ན། ཇོ་མོ་ཞིག་ཡོད་པ་རྒྱུག་བྱུང་སྟེ་ཞིང་ལ་ཤྭ་ལོག་ཤོར་འདུག་གོ། ཁྱོད་ཉལ་བས་ཆོག་གམ་ཟེར་བ་ལ། སྨད་གོས་གསར་པ་ཞིག་ཡོད་པ་གྱོན་རོང་ཆུ་བརྒལ་ནས། ཁྱེམ་གྱི་ཆུ་བཀག་གིན་ཡོད་ཙན། མོན་རེངས་དཀའ་ལས་བྱས་པའི་གོས་བརྗེས་བཅངས་ཀྱང་མི་བྱེད་པར་ཆུད་འཛའ་ཞེས་རྒོལ་དུ་བྱུང་། ཁོ་བོ་མི་འདས་པར་གོས་འདས་ན་དོན་ཡོད་དོ་ཞེས་བསྐྱུར་བས་མོ་ཁྲོས་ཏེ་ང་ལ་བརྙས་པ་ཡིན་ཟེར་ནས་རང་ཡུལ་དུ་བྲོས། ཟུར་ཆུང་བ་འཁོར་བ་ལ་སྐྱོ་བ་སྐྱེ་དྲག་ནས་གདུང་ཁུང་ན་མོའི་ཞུད་ལུས་བདེ་ཁྱེར། རྗེས་ལ་སྐད་བཏང་པས། མོ་ཡར་ཤོག་ཅེས་འབོད་དུ་རེ་ནས་ཚོམ་མེར་བསྡད་པ་ལ་ཞུད་གཏད་དེ། ཕོ་ནོར་ཕོ་མོ་ནོར་མོ་བྱ་བ་ཡིན་པས་ཞུད་ཁྱེར་ཅིག་སྨྲས་པས། མོ་ཡིད་ཆད་ནས་ཡུལ་དུ་སོང་། དེར་་ཟུར་ཆུང་བས་ཕལ་གྲོས་མ་དྲིས། མ་ལ་བརྒྱགས་མ་བླངས།
གྲོགས་ཀྱི་ངོ་མ་བལྟས་པར་སྤྱང་སློག་ཅིག་ཡོད་པ་ཁྱེར་ནས་ཟུར་བོ་ཆེ་ལ་གཏད་དེ་བྱོན་པས། ལམ་དུ་རྟ་ནག་གི་འབྲོག་པ་གཡུ་དང་ཟངས་ཁྱེར་བ་གཉིས་དང་། ཤངས་པ་ཁྲབ་ཁྱེར་བ་རྣམས་བསྡེབས་སུ་བྱུང་སྟེ་བྱོན། དེར་ཟུར་ཆུང་བར་སྦྱར་སློག་ལས་འབུལ་རྒྱུ་མེད། གཞན་གསུམ་པོའི་ཕྱག་རྟེན་ཕུལ་བས། བླ་མའི་ཞལ་ནས། ཁོང་རྣམས་འཁོར་བ་འཁོལ་ལྡོག་མ་ལྡོག་ལྟ་བས་སྤང་ཟན་དང་། ལོ་ཐུག་རེ་དྲོངས་གསུངས་པས། འབྲོག་པ་གཉིས་པོ་ཟེར་མི་འདོད། ཤངས་བས་ཅུང་ཟད་ཟོས། ཟུར་ཆུང་བས་ལྷག་མེད་ཟོས་པས། བླ་མའི་ཞལ་ནས་སྤྱང་སློག་དང་ཁྲབ་གཉིས་ཞོག། གཡུ་དང་ཟངས་བདག་པོ་ལ་གཏོད་གསུངས་པས། འགྲོག་པ་མ་དགའ་སྟེ་ཕྱག་རྟེན་སློག་པ་འུ་ཅག་ལ་ཆོས་མི་སློབ་པའི་རྟགས་ཡིན་ཟེར་ནས་སོང་། རྟེན་འབྲེལ་དེ་ལས་ཟུར་བའི་ཆོས་ལ་གཤེ་བ་དེ་བྱུང་། དེར་ཟུར་ཆུང་བ་ལ་ཁྱོད་ཀྱི་རུས་པ་ཅི་ཡིན་གསུངས་པས། བླ་མ་དང་རུས་གཅིག་པར་བརྗོད་ན་འགྲན་པར་སོང་དོགས་ནས། ཟུར་ཆུང་ཆུང་ཞིག་ལགས་བྱས་པས་བླ་དྲགས་སུ་དེ་ལྟར་ཐོགས། དེ་ལས་ཅན་དུ་མཁྱེན་ནས་སློབ་གཉེར་བྱེད་དུ་བཅུག་པས་བློ་གྲོས་ཀྱི་སྤོབས་པ་མཆོག་ཏུ་གྱུར་བ་ཞིག་བྱུང་། དང་པོ་ཤིན་ཏུ་དབུལ་བས་བླ་མས་གཏོར་མ་བཏང་བ་དག་བླངས་ནས་ཟན་ཆང་བྱ་བཞིན་གསོལ་བ་ན། གྲྭ་བ་གཞན་ཆོས། ཁོ་ཆང་གིས་ཁ་སྐྱུར་དྲི་ཆིལ་ལེ་སྡོད། ཆང་བླ་མ་ལའང་མི་འདྲེན། མཆེད་གྲོགས་ལའང་མི་སྟེར་ཞུས་པས། བླ་མས་དེ་རིང་ཟུར་ཆུང་བ་ཤིང་ཐུས་ཤོག་གསུངས། ཤུལ་དུ་ཟུར་ཆུང་བའི་སྤྱིལ་བུ་གཡེང་དུ་བཅུག་པས། བེམ་པོ་ཞིག་གི་འོག་ན་ཟན་ཆང་ཀ་པཱ་ལ་གང་ལས་གཞན་ཅི་ཡང་མེད། དེར་བླ་མས་ཟུར་ཆུང་བ་འཚོ་བ་ཆད་པ་ན་རང་རེའི་ཐབ་ལ་ཤོག་གསུངས་པས། ང་བླ་མའི་དཀོར་ལ་འབག་རེ་ཟེར་དཀའ་སྤྱད་འབའ་ཞིག་ཁུར་བཟོད་པར་མཛད། ཉིན་ཅིག་བླ་མས་བསེ་ཕོར་ཕུལ་དགུ་ཤོང་བ་ཞིག་བསྣམས་ནས་ཁྱོད་ལ་སྐོམ་སྟེར་རྒྱུ་ཨེ་ཡོད་གསུངས། ཟན་ཆང་ཞུས་པས་སྣོད་དོ་གསོལ། ད་དུང་ཁྱེར་ཤོག་གསུངས་ནས་
གསོལ། ད་ཨེ་འདུག་གསུངས་པས་བྲེ་གང་ཙམ་གདའ་ཞུས་པས། ད་མི་ཡོག་པར་འདུག །ཡོག་ན་ཁྱོད་ལ་བསོད་ནམས་བོད་ཙམ་ན་ཆེ་བ་འོང་སྟེ། འོན་ཀྱང་བསྙེན་བཀུར་གྱི་བརྟེན་འབྲེལ་ལས་བསོད་ནམས་ཆེན་པོ་འོད་གསུངས། དེར་ནས་ཁལ་གསུམ་གནང་ནས་འདི་ཟད་པ་དང་ཡོ་བྱད་མི་འཐོགས་པ་ཡོང་གསུངས། དེར་ཟུང་ཆུང་བས་ཐོས་པ་དང་། བསམ་པ་དང་། སྒོམ་པའི་གནས་གང་ཡིན་པ་ལ་ཕྲུགས་གཅིག་ཏུ་ཉིན་དང་མཚན་མེད་པར་བརྩོན་པ་བསྐྱེད་པས། སྤྲུལ་པའི་སྐུ་ཡིན་པས་མཁྱེན་རབ་ཀྱི་ཀློང་རྡོལ། ཉམས་རྟོགས་བསམ་གྱིས་མི་ཁྱབ་པ་འཁྲུངས་ཀྱང་དཔེ་ཆ་ཙམ་འདྲི་བའི་ཡོ་བྱད་ཀྱང་རྔོམ་ཐོགས་པར་ཡོད་ཙ་ན། ལྷ་རྗེ་ཟུར་པོ་ཆེ་ལ་པཎ་གྱི་ཁང་སྔོན་བྱ་བ་ན་ཇོ་མོ་གཡུ་མོ་བྱ་བའི་སྒོམ་མ་ཕྱུག་མོ་མ་སྨད་གཉིས་ཡོད་པས། ཁྱོད་རང་འདིའི་སྟེང་དུ་སྡོད་གསུངས། ང་ཁྱིམ་ཐབ་མི་བྱེད་ཞུས་པས། འདུ་ཤེས་མ་ཆུང་། སྟོན་པས་གནང་བ་དང་བཀག་པའི་མཚམས་ངས་ཤེས། ཁོང་གཉིས་ཀྱི་ཡོ་བྱད་ལ་སྤྱད་ནས་དབང་ཞུས། དཔེ་བྲིས། ཆོས་ཐམས་ཅད་ལྷག་མ་ལུས་པར་ཉན་པས་ཆོག་པ་ཡིན། དེས་ཁོང་གཉིས་ཀྱང་ཚོགས་རྫོགས། ཁྱོད་རང་གི་དོན་ཡང་གྲུབ་པ་དེ་དགའ་མོད་གསུངས། དེར་གསུངས་བཞིན་ཉན་པས་འདོད་པ་ཐམས་ཅད་རྫོགས་པ་དང་། ཡང་གསུང་གིས། ད་ཁྱོད་དེར་མ་སྡོད་དཔེ་ཆ་ལ་སོགས་པ་མཆོད་པའི་ཡོ་བྱད་རིམ་གྱིས་སྐྱོལ་ལ་ངའི་འདིར་ཤོག་གསུངས། དེ་ལྟར་བྱས་པས་ཅང་མཆིའམ། ཁོང་གཉིས་ཀྱང་དྲིན་ཆེ་ཞུས་པས། བློ་མ་ཆུང་། ཁྱོད་ཀྱིས་འགྲོ་བའི་དོན་ནུས་པ་ཞིག་འོང་བར་འདུག །སྙིགས་མའི་དུས་འདིར་སངས་རྒྱས་ཀྱི་བསྟན་པ་དར་བར་བྱས་ནས་འགྲོ་བ་མང་པོའི་དོན་བྱེད་དགོས་པ་ཡིན། ཁོང་གཉིས་ཀྱི་དྲིན་ལན་དུའང་དེ་ཆེ། འདི་ལ་གབ་པས་རང་དོན་གཞན་དོན་གང་ཡང་མི་འགྲུབ་གསུངས། དེར་ཇི་སྐད་གསུངས་པ་བཞིན་ཉན་པས་བླ་མའི་དགོངས་པ་ཇི་བཞིན་དུ་ལོངས། སྐབས་ཤིག་ན་ལྷ་རྗེ་བཞུགས་པའི་སྒོ་
རྩན་མཆོད་རྟེན་གཅིག་ཡོད་པ་ལ་ཟུར་ཆུང་བསྐོར་བ་བྱེད་ཅིང་འདུག་པ་གཟིགས། ཞབས་ས་ལ་མི་རེག་པར་ཁྲུ་གང་ཙམ་ནས་སྒོར་ར་གདའ། བླ་མའི་ཐུགས་ལ་འདི་སྤྲུལ་པའི་སྐུ་ཞིག་ཡིན་ཉེན་འདུག་པས་ངོ་མཚར་ཆེ་སྙམ་དུ་དགོངས་ཤིང་དགྱེས་སོ། །དེ་བཞིན་དུ་ཟུར་ཆུད་པ་ཕྱོགས་གཤེད་ན་འབྱོན་བཞུད་ཀྱི་ལུང་སྟོངས་བྱེ་མའི་གསེབ་ཏུ་ཚད་པས་ཤིན་ཏུ་གདུངས་པ་ལ་ཞལ་སྐྱེམས་འདྲེན་པ་བྱུང་བ་དང་། རི་སྟོང་གི་རྩེ་མོ་ལ་སྒོམ་དུ་གཤེགས་པས་སྐུ་བཀྲེས་པ་ལ་ཞལ་ཟས་འདྲེན་པ་སོགས་གང་འདོད་པའི་ཐུགས་དགོངས་འབད་མེད་གྲུབ་པ་བྱུང་བས། ད་ནི་ངས་འགྲོ་བའི་དོན་བྱས་ཀྱང་འགྲུབ་དགོངས་པའི་ཚེ། བླ་མའི་ཞལ་ནས་ཀྱང་། ང་ཁྱོད་ཀྱིས་བཤད་པ་གྱིས་གསུངས། དེར་མདོ་དགོངས་འདུས་གསུངས་པས་དུས་ཤིག་ལ་དཔེ་འགྲེམས་སུམ་བརྒྱ་བྱུང་། དེའི་ཚེ་ཟུར་ཆུང་བ་ལ་བླ་མས་བསྔགས་པ་ཆེན་པོ་མཛད་པས། བླ་མས་དཔོན་པོའི་དབུ་འཕང་བསྟོད་ཅེས་ཅུང་ཟད་མི་གུས་པའི་རྣམ་འབྱེད་པ་བྱུང་། བླ་མ་བསྐུར་བ་བྱས་ན་བསོད་ནམས་མ་ཡིན་པ་ཆེན་པོར་མཁྱེན་ནས། ནམ་ཞིག་ཨེ་དམར་རྡོ་རྗེ་སྦོ་ཞེས་བྱ་བར་དཔོན་སློབ་ཐམས་ཅད་ཆོས་འཁོར་ལ་བྱོན་ཙ་ན། སྲང་ཁ་ཅིག་ན་ཁྱི་མོ་མ་སྨད་རོ་སྨད་ལ་འབུ་ཞུགས་པ་ཞིག་འདུག །བླ་མ་ཟུར་ཆེན་གྱིས་རེག་པ་ཙམ་མཛད། ཟུར་ཆུད་པས་ཁྱི་མོ་མ་སྨད་བསད། འབུ་ཞལ་དུ་གསོལ་བས་གཞན་རྣམས་ན་རེ། ཟུར་ཆུད་པ་ཟེར་བའི་སྨྱོ་སྤྱོད་མཁན་འདི་འདྲ་འཆད་ཉན་སུ་བསྐོས། འོ་སྐོལ་ལ་སྦྱིན་བདག་རྣམས་ཀྱང་མོས་པ་ལྡོག་གདའ་ཟེར། བླ་མའི་ཞལ་ནས་ཁྱི་རྣམས་ངན་སོང་དུ་འགྲོ་བ་ངས་ཀྱང་ཤེས་ཏེ་སྒྲོལ་མ་ནུས་པ་ཡིན། ཁོང་གིས་བསྒྲལ་བ་ངོ་མཚར་ཆེ་གསུངས། དེར་ཟུར་ཆུང་བས་ལྟ་སྟངས་ཤིག་མཛད་པས། ཁྱི་རོ་རྣམས་མཆོད་པའི་ལྷ་མོར་གྱུར། འབུ་རྣམས་སྐྱུགས་པས་ནམ་མཁའ་ལ་ཅོ་དིར་དིར་སོང་། དེར་ཟུར་ཆེན་པོས། ད་ཁྱེད་རྣམས་ངོ་མཚར་སྐྱེས་སམ་གསུངས་པས། མིའི་འཁྲུལ་དུ་གདའ་ཟེར། དེར་ཤངས་ཆུ་རྒྱས་པ་དང་ཐུག་པས་ཟུར་ཆེན་གྱིས་ཆུང་རིར་ཀ་པཱ་ལ་རྫུ་འཕྲུལ་གྱིས་
བསྐྱུར་ནས། འདི་སུས་ལོངས་པ་ལ་ངའི་བཤད་གྲ་འབོགས་པ་ཡིན་གསུངས་པས། རྩེ་མོ་གཞན་གསུམ་པོས་ཀྱང་ལེན་མ་ནུས། ཟུར་ཆུང་བས་ཞབས་ཆུ་ལམ་རེག་པར་བྱོན་ནས་བླངས་སོ། །ཡང་རླུང་གི་ནུས་པ་འགྲན་པར་བསྐུལ་བས། རྩེ་མོ་བཞི་ལ་སོགས་པའི་སྟོན་སྒོམ་གཞན་རྣམས་ཀྱིས་ཀྱང་ཞབས་ལམ་རེག་པར་འགྲོ་ནུས་པར་བྱུང་ཡང་། ཟུར་ཆུང་བས་ཏཱ་ལ་གང་ཙམ་གྱི་ནམ་མཁའ་ལ་འཕགས་ཏེ་སྲམ་བསྒྲུབ་ཁང་དུ་སྔོན་ལ་བརྟོལ་བས་རྩེ་མོ་གཞན་གསུམ་ཡང་ངེས་ཤེས་རྟེན། བླ་མ་ཅི་གསུང་གི་བཀའ་བསྒྲུབས་པས་ཞབས་ཏོག་ཀྱང་མཐར་ཕྱིན་ཏོ། །རེ་ཞིག་ན་ནུར་ཆུང་བ་ལ་གནས་ཀྱི་ལུང་བསྟན་རིམ་པ་གསུམ་དུ་བྱུང་སྟེ་སྟོང་ཉིད་རྟོགས་པའི་རྣལ་འབྱོར་བ་དེ་ལ་ཆེད་དུ་འཛིན་པ་མ་ཡིན་པས་འཁྲུལ་སྣང་གི་སྡེ་ཚན་དུ་དོར་མོད། མཐར་རུས་པའི་རྒྱན་གྱིས་སྤྲས་པའི་བུ་མོ་ལོ་བཅུ་དྲུག་པ་རཱ་མ་རུ་དང་གར་སྟབས་བསྒྱུར་བ་ལྔ་བྱུང་ནས་མིང་པོ་ཁྱོད་རི་བོ་དགུ་འདུས་ལ་བསྒོམས་ན་དོན་གཉིས་གྲུབ་བོ་ཟེར་ཞིང་བྲག་རྒྱ་བོ་ལ་མཛུབ་མོ་གཏད་པས། རི་བོ་དགུ་འདུས། ཆུ་མིག་དགུ་འདུས། ནེའུ་གསེང་དགུ་འདུས་པས་ཐེག་པ་རིམ་པ་དགུ་རྫོགས་པའི་རྟགས་སུ་མཁྱེན། བྲག་རྒྱ་བོ་དེ་བཅོམ་ལྡན་འདས་དཔལ་ཆེན་པོ་ལ་གོ་རཱིམ་བརྒྱད་ཀྱིས་བསྐོར་བ་འདྲ་བ་ཡིན་པས་འདི་ལ་སྒྲུབ་པ་བྱས་ན་སྒྲུབ་ཐག་ཉེལ་བྱིན་རླབས་ཆེ། ལར་འཁོར་བ་སྡུག་བསྔལ་གྱི་རང་བཞིན་ཡིན་པས་འཇིག་རྟེན་གྱི་འཁྲིབ་ཆོད་དགོས། ཕྱི་མའི་དོན་བསྒྲུབ་པ་ལ་འདུ་འཛི་དང་ཁེ་གྲགས་ཀྱིས་མི་ཕན། མིའི་ངོ་བསྲུང་བ་འདི་འཕྲལ་དུ་བྱ་དཀའ་ལ་ཕུགས་སྙིང་པོ་མེད་པ་ཡིན་པས་ང་གཅིག་པུར་སྒོམ་པ་ཡིན་གསུངས་ནས་གྲྭ་བ་རྣམས་གོ་མཆོད་མི་གསུམ་ལ་གཏད་ནས། ཆོས་འཆད་ཉན་གྱི་བསྟན་པ་ཁྱེད་རྣམས་ཀྱིས་སྐྱོངས་ཤིག་ཅེས་བྲག་རྒྱ་བོ་ལ་གཤེགས་སོ། །དེར་བྱོན་ནས་སྒྲུབ་པ་ཁོ་ན་ལ་བཞུགས་པས་གཞི་བདག་གི་ལྷོངས་ཆོ་འཕྲུལ་ཤིན་ཏུ་ཆེ་བར་བྱུང་སྟེ། འདི་ལྟར་གྲུབ་པའི་ཁྱུ་མཆོག་ཆེན་པོ་དག་ནི་རྨི་ལམ་དང་མངོན་སུམ་རྫུན་པའི་དང་དུ་རོ་གཅིག་པས་ནུབ་ཅིག་མནལ་ལམ་དུ།
བྲག་རྒྱ་བོའི་རྩེར་མི་ནག་པོ་ཞིག་བྱུང་ནས་ཞབས་གཉིས་བསྡུས་ཏེ་ཀླད་ལ་བསྐོར་ཏེ་བསྐྱུར་བྱུང་བས། ཐག་གི་མདོའི་ཐང་ཆེན་པོ་གཅིག་ཏུ་བརྡབས་པ་རྨིས། སད་ཙན་ཐང་དཀྱིལ་ན་དངོས་སུ་འདུག་པས་ཡར་འཛེག་དགོས་པ་བྱུང་སྟེ་ཆོ་འཕྲུལ་ཆེན་པོ་ལ་མ་འཛེམ་པར་བཞུགས། ཡང་སྡིག་པ་རྩི་དབུ་ཙམ་གྱིས་སྒྲུབ་ཁང་ཁེངས་པས་རྒྱུ་འབྲས་ལ་ཟློ་བའི་རྟོགས་པ་མངོན་དུ་གྱུར་ནས། སྡིག་པའི་རྭ་གཉིས་སྣས་འཇུས་ཏེ་ཕྱེད་མར་གཤེགས་པ་དང་ཆབ་གཅིག །སྡིག་པ་མི་དགེ་སོ་སོར་བཤགས། ཞེས་དོན་ལ་མི་རྟོན་ཚིག་ལ་རྟོན་པའི་ཀུར་མཛད་དེ་བསྒྱུར་བས་ཐམས་ཅད་རྣམ་པར་སྣང་མཛད་དུ་གྱུར་ནས་ནམ་མཁའ་ལ་དེངས། ཡང་ལན་ཅིག་གྲོག་མོའི་དམག་དྲངས་བྱུང་བས། ཉེ་གནས་ལ་ཙོང་གེ་ཁྱེར་ཤོག་གསུངས་ཙོང་གེས་བརྡུངས་པས། ཉེ་གནས་ན་རེ་སྡིག་པ་ལ་དགོངས་མཛོད་ཅེས་ཁྲེལ་བརྡས་པས། ཁྱོད་དེ་ལ་མི་དད་ན་འདི་ལྟར་བྱ་ཡི་གསུངས་ནས་གྲོག་མོ་ཞལ་དུ་སྟོབ་ཀྱིན་ཕུ་མཛད་པས། ཐམས་ཅད་རྡོ་རྗེ་སེམས་དཔར་ཀྲོང་ཀྲོང་གྱུར་ཏེ་ནམ་མཁའ་ལ་སོང་བས་ཉེ་གནས་ཤིན་ཏུ་དད། གསད་གསོའི་རྫུ་འཕྲུལ་བསམ་གྱིས་མི་ཁྱབ་པས་གཞི་བདག་མིང་སྲིད་གསུམ་དམ་ལ་བཏགས་ཏེ་དངོས་སུ་གཟུགས་བསྟན་ནས་ཞབས་སྤྱི་བོར་བླངས། བྲག་ལ་ཕུར་བ་བཏབ་པའི་གྲུབ་ཆུད་ལྟའང་ཡོད། དེར་གསང་བ་སྒྱུ་འཕྲུལ་ལས་བྱུང་བའི་ཕྱག་རྒྱ་བསམ་གཏན་གྱི་སྒྲུབ་པ་མཛད་པས། རྡོ་རྗེ་སེམས་དཔས་ཞལ་གཟིགས། ཐག་གི་ལུང་པ་རྡོ་རྗེ་སེམས་དཔས་ཁེངས་པ་བྱུང་། སྣང་བ་ཟད་པར་གྱིས་སྐྱེ་མཆེད་བརྙེས་པས་སྐུ་མེ་དང་། ཆུ་དང་། རླུང་དང་། ས་འཚུབ་ཏུ་འགྲོ་བ་དང་། ཅིར་སྣང་ཐམས་ཅད་རྡོ་རྗེ་སེམས་དཔའི་རང་བཞིན་དུ་བཀྲ་ལམ་ལམ་གསལ་བ་བྱུང་ཏེ་བཟང་རྟོག་གི་མཐུ་བརྟས་པ་ཡིན། ཡང་དག་པར་གཏད་པ་མེད་སྙམ་དུ་དགོངས། དེར་སྣང་སེམས་ཆོས་ཉིད་གསུམ་རོ་གཅིག་ཏུ་འདྲེས་ནས་དགོངས་པ་ཟད་པའི་ས་ལ་སྐྱོལ་ཏེས་རྡོ་རི་བྲག
ཐམས་ཅད་ལ་ཐོགས་པ་མེད་པ་དང་། ནམ་མཁའ་ལ་བྱ་ལྟ་བུར་འགྲོ་བ་སོགས་འབྱུང་བ་ལྔ་ལ་རང་དབང་ཐོབ་པ་བྱུང་། ད་ཟླ་བ་གཅིག་ན་སློབ་མ་སྣོད་ལྡན་ཞིག་འོང་གསུང་རེ་ཞིག་ན་མཚན་ཉིད་པའི་དགེ་བཤེས་སྤ་དགེ་མཐོང་བྱ་བ་ཐག་ཏུ་ཆོས་འཁོར་ལ་བྱུང་། ཁོང་གི་གྲྭ་བ་བློ་རྣོ་བ་གཅིག་ཟུར་ཆུང་ལ་རྩོད་པ་བྱེད་དུ་བཏང་བས། ཁོས་ཀ་བ་ལ་མཛུབ་མོ་གཏད་ནས་ཀ་བ་ཆོས་ཅན་བྱས་པས། ཀ་བ་ཆོས་ཅན། ཀ་བ་ཆོས་ཅན་ཁྱོད་འཇིག་རྟེན་རང་རྒྱུད་པའི་འཁྲུལ་དོར་ཀ་བ་རང་རྒྱུད་དུ་སྣང་ཡང་། ང་རྫོགས་པ་ཆེན་པོ་རང་སྣང་རིས་མེད་ཀྱི་དོན་ལ་ཀ་བ་གྲུབ་པ་མི་གདའ་གསུང་ནས། ཕྱག་ཡུག་ཡུག་མཛད་པས་ཀ་བ་ལ་ཆགས་ཐོགས་མེད་པར་སོང་། ཁོ་ངོ་མཚར་སྐྱེས་ནས་སྨྲ་མ་ནུས། དད་པ་ལྷག་པར་ཐོབ་ནས་སློབ་མར་བྱས་པ་མ་ཐོག་བྱང་འབར་རོ། །འདི་རྡོའི་ཀ་བ་ཡིན་ཆ་གདུམ་ད་ལྟའང་ཡོད་ཟེར་བ་དངོས་པོར་ཞེན་པ་དག་གི་འདོད་པ་མིན་ན་རུང་ངོ། །དེ་ལ་སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུག དྲལ་མ་སུམ་ཅུ་རྩ་གཉིས། སྒོམ་ཆེན་མི་གཉིས། ཡུས་པོ་ཆེ་མི་གཅིག །དཀྱུས་མ་གཉིས། སྟ་གུར་མི་གཉིས། གོ་མཆོད་གསུམ་ལ་སོགས་པ་མང་དུ་བྱོན་ཏེ། ཀ་བ་བཞི་པོ་ནི། དང་པོ་དགེ་བཤེས་ཁྱུང་པོ་གྲགས་སེའི་གྲྭ་བ་མཚན་ཉིད་པ་ཆེན་པོ་བློ་གྲོས་ཤིན་ཏུ་རྣོ་བ་ཡིན། བདེ་གཤེགས་རྒྱ་བོ་བ་དང་དགེ་བཤེས་ཁྱུང་པོ་གཉིས་ཉང་རོར་ཡོན་བདག་གིས་གདན་དྲངས་ཏེ་འཛོམ་པའི་དུས། ཁྱུང་པོས་ཁོང་བཞི་པོ་བཏང་ནས། ཟུར་ཆུང་བ་བྱ་བའི་ཆོས་ལོག་མཁན་འདི་སུན་ཕྱུང་ལ་ཤོག། ཅེས་བསྒོས་པས་བཞི་པོས་ལྷ་རྗེའི་སྤྱན་སྔར་ཕྱིན་ཙ་ན། ཟུར་ཆུང་པ་ཐུལ་བ་ཕྱི་ནང་ལྡོག་ནས་བཞེས་ཏེ་འདུག །དེར་གཅིག་གིས། པགས་པ་ཕྱི་ནང་སློག་པའི་གོས་འདི་གང་གི་ཆོས་ལུགས་ཡིན་ཟེར། པགས་པ་དང་པོ་ནས་འདི་ལྟར་ཡོད་པས་ཕྱི་ནང་མ་ལྡོག །ཕྱི་ནང་འཛོལ་བ་ཁྱེད་རང་གི་ཆོས་ཡིན་མོད་གསུངས། གཅིག་གིས་འོ་ན་ཆོས་གཏམ་བྱའོ་སྨྲས་པས། ཆོས་ཀྱི་ངོ་བོ་བརྗོད་མེད་
མཐའ་བྲལ་ལ་ཆོས་གཏམ་ག་ན་ཡོད་གསུངས། དེར་སྐྱོ་སྟོན་གྱིས་དྲིས་པ། འོ་ན་ཁྱེད་རྫོགས་པ་ཆེན་པོ་བའི་ལུགས་ཀྱི་སྒོམ་ལ་གཙོ་བོར་བྱེད་པ་ལགས་སམ་བྱས་པས། ང་དམིགས་པ་གང་ལ་གཏད་འདུག་གསུངས། འོ་ན་མི་སྒོམ་པ་ལགས་སམ་བྱས་པས། ང་གང་ལ་ཡེངས་འདུག་གསུངས་པས་སྦེབསཔ་ལན་མེད་དུ་སོང་། ཡང་གླན་སྟོན་ཤཱཀ་བཟང་གིས་དྲིས་པས། ཁྱེད་གསང་བསྒྱུ་འཕྲུལ་བའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོར་འདོད་པ་ལགས་སམ་བྱས་པས། ཡུལ་བེམ་པོ་རང་རྒྱུད་དུ་སྣང་བའི་མངོན་སུམ་གྱི་ཚད་མ་སུས་འགེགས་གསུངས། འོ་ན་མི་འདོད་པ་ཨེ་ཡིན་བྱས་པས། སེམས་ཅན་གྱི་མ་དག་པའི་འཁྲུལ་སྣང་རང་རྒྱུད་པ་སྦྱོང་ཕྱིར། མདོ་རྒྱུད་ཀྱི་དགོངས་པ་དང་འགལ་བར་སུས་ནུས་གསུངས་པས། ཁོང་བཞིའི་བརྒལ་བརྟག་གི་རིག་པ་རྣོན་པོའི་ཚིག་གི་ཚོགས། དོན་གྱི་མཐུ་ཆེ་བའི་ལན་སྒྲ་གཅན་གྱི་ལག་པ་ལྟ་བུས་རྣམ་པར་བཀབ་ཅིང་། སྙིང་རྗེ་ཆེན་པོའི་གཞན་དབང་གི་སྡེར་མོས་བརྫིས་པས། འདི་ལྟར་ལས་འཕྲོ་སད་པའི་གང་ཟག་ནི་སློབ་དཔོན་དབའ་བོ་འཕགས་པ་ལྷའི་གདུལ་ཞིང་དུ་གྱུར་བ་ལྟ་བུ་སྟེ། འདི་སྐད་དུ། ཀྱ་མ་ཐེག་པ་ཆེན་པོའི་དོན་ཕྱིན་ཅི་མ་ལོག་བར་རྟོགས་པ། རིག་པ་རང་གྲོལ་བའི་སྤོབས་པ་དང་ལྡན་པ་འདི་ལྟ་བུའི་བཤེས་གཉེན་ནི་རྙེད་པར་དཀའོ། །འོན་ཀྱང་ད་ལྟ་དངོས་སུ་ཕྱིན་ན་སློབ་དཔོན་མི་དགྱེས་སུ་འོང་བས། སད་ཕོད་ཐབས་ཀྱིས་རྟོག་གེ་ངན་པའི་སློབ་དཔོན་དང་བྲལ་བར་བྱས་ལ། རྣལ་འབྱོར་གྱི་དབང་ཕྱུག་སྲིད་པའི་དྲ་བ་གཅོད་པའི་མཚོན་ཆ་རྣོན་པོའི་དཔའ་དང་འགྲོགས་པར་བགྱི་བ་ལ་གདོན་་མི་ཟ་བའི་དམ་བཅའ་ལྷུར་ལེན་ཏོ་ཞེས་མནའ་ཐོས་བཅད་ནས་དེངས་སོ། །དེ་ལྟར་དེངས་པའང་མེ་ཏོག་ཟས་ཅན་པདྨའི་ཚལ་ལ་བྱ་བ་བཞིན་དུ་སང་ཕོད་ལས་འཕྲོ་དང་སྨོན་ལམ་བཟང་པོའི་གཤོག་པ་སྨྱང་སྟེ་བདེ་གཤེགས་རྒྱ་བོ་པའི་ཆོས་གྲྭ་མ་ལ་ཡའི་ནགས་ཀླུང་ཆེན་པོར་ལྷགས་པ་ལས་ཀ་བ་བཞི་བྱུང་བ་ཡིན་ནོ། །དེར་ཁོང་བཞི་ངོས་ཁྱུང་པོའི་དྲུང་དུ་ཕྱིན་ཙ་ན། ཁྱེད་ཚོས་ཟུར་ཆུང་བ་སུན་ཕྱུང་ངམ་ཟེར། སུན་འབྱིན་བྱིན་པ་མི་གདའ་བྱས་པས།
ཕྲག་དོག་གི་འཐོར་རླུང་དྲག་པོས་ཡིད་རྣལ་དུ་མི་ཕེབས་པ་ཙམ་དུ་གྱུར་ནས་ཟུར་ཆུད་པ་འདྲ་བའི་ལྟ་བ་ངན་པ་ཅན། སྐྱེ་བོ་ཐམས་ཅད་ལོག་པའི་ལམ་དུ་འཁྲིད་པ་འདི་བསད་ན་སངས་རྒྱས་ངེས་ཟེར་རོ། །དེ་ཟུར་བའི་གྲྭ་བ་དག་གིས་ཐོས་ནས་སྙན་དུ་གསོལ་བས། རྒྱུད་རང་བཞིན་གྱིས་གྲོལ་བའི་བྱང་ཆུབ་སེམས་དཔའ་ལ་ཁོང་ཁྲོ་བའི་རྣམ་པར་རྟོག་པ་མེད་པས་ཅང་མི་གསུང་བས་ལན་བཏབ། ནངས་པར་ཆོས་ཁྲིའི་ཁ་ན་བཞད་ཀྱིན་འདུག །བླ་མ་ཅི་ལ་དགྱེས་ཞུས་པས། ཆོས་བྱ་བ་དེའི་ཐེག་པ་ཆེན་པོ་གསང་སྔགས་འདི་ཡིན་པ་འདུག །སྒྲོལ་བ་ལ་བརྟེན་ནས་སངས་རྒྱས་པར་འདོད་པ་འདི་གསང་སྔགས་ཀྱི་ལུགས་ཡིན། མཚན་ཉིད་པ་ལ་མེད་སྙམ་ཙ་ན། ཟུར་ཆུང་བ་ལྟ་བུ་བསད་ན་སངས་རྒྱས་གསུངས་ནས་ཁྱུང་པོ་གྲགས་སེ་ལྟ་བུའི་མཚན་ཉིད་པ་ཆེན་པོ་ཡང་བློ་ཕུགས་ངའི་ཆོས་ལ་གཏོད་པ་འདུག་པས། ང་དགའ་བ་ཞིག་བྱུང་གསུང་སྐད། དེ་ལ་སེམས་ཕྱོགས་ཀྱི་ཀ་བ་གུང་བུའི་སྐྱོ་སྟོན་ཤཱཀ་ཡེས་མདོའི་ཀ་བ་ཅང་ལུང་གི་ཡང་ཁེང་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀྱ་བཟང་པོ། ཕྲིན་སྒྲུབ་ཀྱི་ཀ་བ་ནག་མོ་རིའི་འདའ་ཏིག་ཇོ་ཤཱཀ་གོ །ཡང་མཐོག་བྱང་འབར་དང་བརྒྱུད་པ་ལྔ་ཞེས་ཀྱང་གྲགས། གདུང་བརྒྱད་ནི་མ་ཐོག་པ། སྐྱོ་སྟོན་ཆོས་སེང་། གླན་ཤཱཀྱ་བྱང་ཆུབ། རྩགས་ཤཱཀ་རངས། གནུབས་སྟོན་དག་མ། དབུས་པས་ཐོར། ཤུ་སྟོན་ཟླ་གྲགས། རྩེ་ཕྲོན་བྱང་དཔལ་དང་བརྒྱད་དོ། །ཡང་འ་ལ་གཟི་ཆེན། ནལ་རྣ་སྙིང་པོ། རམ་སྟོན་རྒྱལ་བ་གསུམ་དྲངས་པའང་ཡོད། སྒོམ་ཆེན་མི་གཉིས་ནི། འབའ་སྒོམ་དག་མ་དང་། བོན་སྒོམ་དོ་བའོ། །ཡུས་པོ་ཆེ་ནི་ལས་སྟོད་ཀྱི་ཟི་སྟོན་བསོད་རྒྱལ་ལོ། །སྟ་གུར་མི་གཉིས་ནི། ཞང་སྟོན་སྔགས་སེ་དང་། ཁྱུང་པོ་གྲགས་བྲེའོ། །ཕྱམ་དྲལ་ལ་སོགས་ཏེ་དགྱུས་མའི་མིང་སྨོས་མ་འཚལ་ལོ། །གོ་མཆོད་མི་གསུམ་ནི། མགོ་བྱ་ཚ། མིག་ཆུང་དབང་སེང་། འགོས་ཆུང་དབང་དེ་གསུམ་མོ།།
དེ་ལ་བླ་མ་ཟུར་ཆུང་བ་བྲག་རྒྱ་བོར་ལོ་ཉི་ཤུ་རྩ་བཞི་སྒྲུབ་པ་ཐུན་གཅིག་ལ་བཞུགས་ནས་འཇལ་ལུས་སུ་གཤེགས་པའི་དགོངས་གཏད་ཡོད་པ་ལ་སྐུ་མཚམས་ཐོན་དགོས་པའི་རྐྱེན་གཉིས་བྱུང་བས། ལོ་རིལ་པོ་བཅུ་གསུམ་དང་ངོ་གཅིག་སྟེ་བཅུ་བཞི་བཞུགས། འདིའི་སྐབས་ཤིག་ན་ཉེ་གནས་ཀྱིས་ཀྱང་སྐུ་ལ་བཅར་དུ་མེད་པར་རྒྱུན་རིང་བར་བཞུགས། རེ་ཞིག་ན་དུད་པ་དང་ལྡབ་ལྡིབ་ཙམ་ཡང་མ་བྱུང་། སྐུ་ལ་སྙུན་པ་མི་མངའ་འམ་སྙམ་ནས་ཉེ་གནས་ཀྱིས་བལྟར་ཕྱིན་ཙན། ཞལ་དང་ཤངས་ལ་སྡོམ་ཐག་ཐེང་ངེ་འདུག བླ་མ་གྲོངས་སྙམ་ནས་དུ་ཤོར་བས་དགོངས་པ་གྲོལ། བླ་མའི་ཞལ་ནས་ང་དེ་གའི་ངང་ལ་བཞག་ན་མགོ་ལ་ཐོད་པ་མི་འགེལ་བ་ཞིག་ཡོད་པ་ཡིན་ཏེ། ད་སྐྱེ་བ་གཅིག་ལེན་པར་འདུག་གསུངས། དེ་ས་སྐྱ་ལོ་ཆེན་ཡིན་ཟེར། འདི་ནི་ཆོས་ཉིད་ཅིག་ཅར་དུ་ཟད་པ་ནས་ཕུང་པོ་རྡུལ་ཕྲན་དུམ་དེངས་ཙམ་པའི་ལམ་རྟགས་སུ་སྣང་། ཡང་ནངས་གཅིག །ཚ་བའི་སྟ་གོན་གྱིས་ཤིགད་ངེས་ལོ་མའི་ཚོད་མ་བྱའོ་གསུངས། ཉེ་གནས་ཀྱིས་ཆུ་མཁོལ་བ་ལ་བླ་མས་ཚོད་མ་བསྣམས་བྱུང་། ངས་འུག་པ་ལུང་འཁོར་ནས་ཁྱོད་ཆུ་མི་ཁོལ་བ་ཅི་ཡིན་གསུངས། ཀུ་རེ་ཡིན་ནམ་ཞུས་པས། ཟུར་པོ་ཆེ་བ་གནང་བའི་གསོལ་རས་ཤིག་ཡོད་པ་ཉེ་གནས་ལ་གནང་བས། ཁོ་ཡིད་ལྷག་པར་ཆེས། ངའི་བླ་མ་རླུང་སེམས་ལ་རང་དབང་ཐོབ་ངེས་ཡིན་སྙམ་པའི་མོས་གུས་སྐྱེས་སོ། །དེ་ལ་དགོན་པ་ནས་འབྱོན་པའི་རྐྱེན་གཅིག་ནི། གོ་མ་ཆོད་མི་གསུམ་གྱིས་བསྟན་པ་མ་འཁྱོངས་ཏེ། མགོ་བྱ་ཚས་ཐབས་ལམ་གྱི་རྒྱབ་ཏུ་མ་རྒྱུད་དགོས་ཟེར་འགོས་ཁུང་པའི་རྩར་སོང་། མིག་ཆུང་དབང་སེང་ན་རེ། དཀྱིལ་འཁོར་ཕྱིར་འདོན་པ་ལ་རྒྱབ་ཏུ་ཡོ་ག་དགོས་ཟེར་ནས་སུམ་པ་ཡེ་འབར་གྱི་རྩར་སོང་། འགོས་ཆུང་དབང་དེས་གཞི་ལམ་གྱི་གྲུབ་མཐའི་རྒྱབ་ཏུ་ཚད་མ་དགོས་ཟེར་སྤང་ཀ་དར་ཆུང་བའི་རྩར་སོང་ངོ། །དེ་དག་ནི་གསང་བ་སྙིང་པོ་ལ་ལམ་ཐབས་གྲོལ་གཉིས་ཀ་ཡོད་དེ་མ་རྒྱུད་ཀྱི་མཚན་ཉིད་མ་ཕྱེད། དཀྱིལ་འཁོར་རང་ས་ནས་ཐོན་པ་ལ་མིག་ལྟག་ཁུང་དུ་འཆུས།
ཚད་མ་ཚིག་གི་གྲུབ་མཐའ་ཡིན་ཏེ་གཞི་ལམ་ཐོག་ཏུ་མི་ཕེབས་པ་མགོ། རྒྱུ་དེས་གོ་མཆོད་མི་གསུམ་གྱིས་བཤད་གྲ་མ་འཁྱོངས་པས་སྐུ་མཚམས་ལས་ཐོན་དགོས་པ་བྱུང་། ཉེན་ཅིག་ནི། སྒྲོ་བུག་ལྷ་ཁང་གི་མཇུག་སྐྱོང་དང་། རབ་གནས་མ་གྲུབ་ཙམ་ལ་རྒྱལ་བ་ཟུར་བོ་ཆེ་སྐྱེ་བ་མ་སྤངས་པར་ཟུང་འཇུག་གི་གྲུབ་མཐའ་སྙོགས་པར་བཞེད་ནས་ངའི་ལག་རྗེས་འདི་ཁྱོད་ཀྱིས་སྐྱོངས་ཤིག་ཅེས་བླ་མའི་བཀའ་བྱུང་ནས་བྱོན་པ་ཡིན་ནོ། །དེ་ལྟར་བདེ་གཤེགས་ཟུར་ཆུང་བ་ཕྲིན་ལས་རྒྱས་པའི་དུས་ན། བོད་ཀྱི་སྔགས་པ་ཚོགས་ཚད་ཀྱིས་ཕྱག་མི་བྱེད་པ་དང་། གྲལ་གོང་དུ་འགྲོ་བ་མེད་པས། འགོས་ལོ་ཙཱ་བས་གཞན་རྣམས་ལ་ཕྱག་མི་འཚལ་བ་དང་། གྲལ་ཞབས་སུ་མི་བསྒྲིག་པའི་ཁྲིམས་བཅས་མོད། ནམ་ཞིག་ཤངས་སུ་སྟོན་མོ་ཆེན་པོ་ཞིག་ལ་ཐམས་ཅད་འཚོགས་པ་ན། ཟུར་ཆུང་པ་གྲལ་འགོན་བཞུགས་པའི་སྤྱན་སྔར་འགོས་ཀྱིས་སླེབས། དེའི་ཚེ་འདི་ལྟར་ཚིག་ལ་མཁས་ཤིང་ཉོན་མོངས་ལ་གྲིམས་པའི་བཤེས་གཉེན་ཆེན་པོ་དག་གིས་དགོངས་པ་སངས་རྒྱས་དང་མཉམ་པའི་རྣལ་འབྱོར་གྱི་དབང་པོ་དག་གི་ཟིལ་བཟོད་པ་མ་ཡིན་པས། ལྔ་སྡེ་བཟང་པོའི་ནང་ཁྲིམས་བཞིན་རང་དབང་བརྟན་པ་བྲལ་བའི་འདུ་བྱེད་རྟབ་རྟབ་པོར་གྱུར་ནས་ཕྱག་མི་བྱེད་པའི་དམ་བཅའི་རི་མོ་རྗེས་ཤུལ་ཙམ་ཡང་མེད་པར་ཟུབས། ཡན་ལག་ལྔའི་འཁྲི་ཤིངས་ལ་འབྱར་བ་བཞིན་དུ་གྱུར་བས་ཀུན་ཀྱང་ཕྱག་བྱེད་པ་ལ་མངོན་དུ་ཕྱོགས་སོ། །དེར་སྟོན་མོ་གྱེས་ཙ་ན་གཞན་དག་ན་རེ། ཟུར་ཆུང་བ་ལ་ཕྱག་མི་བྱེད་པའི་དམ་བཅའ་རང་རེས་མཛད་པ་ལ་སྔོན་ལ་ཉིད་ཀྱིས་མཛད་པ་ཅི་ཡིན་དྲིས་པས། ཁོའི་དྲུང་དུ་ཕྱིན་ཙ་ན་བཅོམ་ལྡན་འདས་དཔལ་ཆེན་པོའམ་དེ་འདི་ཀ་ཡིན་པར་འདུག་སྙམ་པ་ལས། མི་ཡིན་པའི་འདུ་ཤེས་མ་སྐྱེས་གསུང་སྐད། ལར་རྫུ་འཕྲུལ་ཤིན་ཏུ་ཆེ་བས་ཉི་ཟེར་ལ་བྱོན་བཞུད་མཛད་པར་གྲགས་ཏེ། འུག་པ་ལུང་དུ་སྔ་ཆོས། སྒྲོ་ཕུག་ཏུ་གུང་ཆོས། བྲག་རྒྱ་བོར་དགོངས་ཆོས་ཏེ་འགྱང་
ཁ་ཤིན་ཏུ་ཆེ་སར་ཉི་མ་རེ་ལ་ཆོས་ཐུན་གསུམ་རེ་འཆད། དེ་བཞིན་དུ་ལྷ་ཟེར་མོར་མཁའ་འགྲོ་མ་རྣམས་པྲོ་བརྡུངས་མཛད་པ་གཟིགས་པས་རྐྱེན་བྱས་མཁའ་འགྲོ་ལས་ལ་བཀོལ་ནས་མཆོད་ཁང་ཀ་བ་བདུན་དང་། ཁྱད་འཕགས་གཉིས་ཏེ་དགུས་པ་ཏེག་པ་ཞིག་བཞེངས་པས་མཁའ་འགྲོ་ལྷ་ཁང་དུ་གྲགས། སངས་རྒྱས་བཞི་བཅུ་རྩ་གཉིས་དང་། བཀའ་སྲུང་ལེགས་ལྡན་ལྡེད་གུར་བཞེངས། དཀྱིལ་འཁོར་རྒྱས་པ་སྤུས་གཉིས་ལོགས་ལ་བྲིས། རབ་ཏུ་གནས་པའི་ཚེ་ལེགས་ལྡན་གྱི་སྐུལ་བུ་དུང་གི་ལྕག་བྲབ་ཅིང་སངས་རྒྱས་ཀྱི་བསྟན་པ་ཨེ་བསྲུང་གསུངས་པས་དབུ་གུག་གུག་པ་བྱུང་། དཀོན་མཆོག་གི་དབུ་འཕང་ཨེ་བསྟོད་གསུངས་པས་མཆུ་ལྷེབ་ལྷེབ་པ་བྱུང་། དེ་བཞིན་དུ་དཔལ་ཆེན་པོ་ཞལ་གཟིགས་པའི་ཞབས་གཡོན་བཞག་སར་ཡང་དག་གི་ལྷ་ཁང་བཞེངས། མ་ཐོག་བྱང་འབར་གྱི་ལྷ་ཁང་ལ་ཤིང་གཉན་ཁྲག་ཏུ་འཛད་པ་གཅོད་དུ་སྩལ་ནས་ལྷ་ཁང་འབྱོངས། ཤིང་ཕུང་བླ་མ་ལ་ཕུལ་བའི་ཚེ་གཞི་བདག་ཕྲེང་བས་སྤེན་མའི་ཀ་བ་གཅིག་ལུས་ནས་གཙང་བོར་དྲངས་པ་རྔ་མོ་ཕྲ་བདུ་ཞག་ལྔ་ཆུ་ལ་བྱིངས་ནས་མཐོན། དེར་སློབ་མ་གཉིས་བཏང་ནས་བྲག་ལ་དཀར་གཏོར་འདི་སྤུངས། མཚོ་ལ་དམར་གཏོར་འདི་རྒྱོབ་ལ་བླ་མ་ཟུར་ཆུང་བའི་ཤིང་ད་ལྟ་བསྐྱལ་ན་སྐྱོལ་ཅིག །ཅེས་བསྡིགས་སུ་བཅུག་པས། ཆུ་བདག་སྐྲག་ནས་འཕྲལ་དུ་ཐོན་པ་སོགས་ལྷ་འདྲེས་བཀའ་ལ་ཉན། དེ་ལྟ་བུའི་ཆེ་བའི་ཡོན་ཏན་གྱིས་བརྒྱན་པའི་ལྷ་རྗེ་ཟུར་ཆུང་བ་དེ་སྐུ་མྱ་ངན་ལས་འདའ་བར་ཉེ་བའི་ཚེ། བུ་སློབ་རྣམས་ཀྱིས་རིགས་སྲས་བསྐྲུན་པར་གསོལ་བ་བཏབ་པས་གསང་བདག་ལག་ན་རྡོ་རྗེ་ཡུལ་གྱི་ལྷུམས་སུ་མངོན་བྱང་ལྔའི་ཏིང་ངེ་འཛིན་གྱིས་སྤྱན་དྲངས་པ་ཟུར་ཤཱཀྱ་སེང་གེ་མཚན་དཔེའི་ངོ་མཚར་གསལ་བར་བྱས། ཞལ་གྱི་གདམས་པ་བརྒྱད་ཅུ་པར་གྲགས་པ། རིའི་བུ་གྱིས། ཧྲུལ་པོའི་གོས་གྱོན། མི་ཞིམ་པའི་ཟས་ཟོ། དགྲ་གཉའ་རེངས་བུ་ཐོང་། ཞིང་ཐ་རེངས་སུ་ཞོག །བློ་ཐག་ཆོས་ལ་ཆོད། ཅེས་པ་ལ་
སོགས་པ་གསུངས་ནས་དྲུག་ཅུ་རྩ་གཅིག་བཞེས་པའི་ཤིང་ཕོ་སྟག་ལ་བྲག་རྒྱ་བོར་འོད་དང་སྒྲ་དང་ས་གཡོ་བ་དང་བཅས་འོག་མིན་རྡོ་རྗེ་བཀོད་པའི་གྲོང་ཁྱེར་དུ་གཤེགས་སོ།། །།དེ་ལ་བོད་འདིར་དཔལ་གསང་བའི་སྙིང་པོའི་བཤད་པའི་ཆུ་བགོ་ལྟ་བུར་གྱུར་བ་གསང་བདག་སྒྲོ་ཕུག་པ་ཆེན་པོའམ། ཟུར་ཤཱཀྱ་སེང་གེ་ནི། ཇོ་སྲས་མོ་མདའ་མོ་གཙུག་ཏོར་ལྕམ་ཞེས་བྱ་བ་སློབ་མར་གྱུར་བ་ཞིག་ཡོད་པ་དེས་མངལ་དུ་སྤྲུལ་པའི་སྐུ་འཛིན་ནུས་པར་དགོངས་ནས། དེ་ཉིད་ཀྱི་མིང་པོ་ཀ་བ་བཞིའི་གྲས་མདའ་ཏིག་ཆོས་ཤཱཀ་ལ། ཁྱོད་ཀྱི་སྲིད་མོ་འདི་བདག་གིར་རིང་ངམ་ཞེས་གསུངས་པས། མདའ་ཏིག་ན་རེ། བཀའ་བཞིན་འཚལ་ཞེས་དེའི་ལག་པ་ན་རྡོ་རྗེ་དྲིལ་བུ་བཞག་སྟེ་འདི་གཞན་ལམ་བརྒྱུད་པར་བླ་མའི་ཕྱག་ཏུ་ཕུལ་ཞིག་པར་བསྒོས་པས་རྟེན་འབྲེལ་ཆེན་པོ་འགྲིབ། དེ་ཁབ་ཏུ་བཞེས་པས་གྲྭ་བའི་ཚོགས་ཀྱང་སྡང་ཞིང་འདོན་པར་བརྩམས་པ་ན། སྐྱོ་སྟོན་ཤཱཀ་ཡེ་ན་རེ། འདིའི་སྲིན་འགལ་བསྟན་པའི་གཙོ་བོ་གཅིག་འདུག་པར་རྨིས་པས། རིགས་སྦས་འདྲ་མཐོང་ན་བསྟན་པར་ཕན་སྲིད་ཀྱིས་ཞོག་གསུངས། དེ་བཞིན་དུ་ཀ་བ་གཞན་རྣམས་ལའང་སངས་རྒྱས་ཀྱི་སྐུ་དང་། གསེར་གྱི་རྡོ་རྗེ་སོགས་ཇོ་མོ་ལ་ཐིམ་པར་རྨིས་པས་བཞག་གོ། དེ་ལ་རྔོག་ལོ་ཆེན་པོའི་བཅུ་དྲུག་པ་ཤིང་ཕོ་སྟག་ལ་སྒྲོ་ཕུག་པ་སྐུ་བལྟམས། དེར་བླ་མའི་ཞལ་ནས་ངའི་བུ་འདི་ལྷུམས་སུ་འཇུག་པའི་ཚེ་ཕྱག་ན་རྡོ་རྗེ་ཐིམ་པའི་མཚན་མ་ཡོད་པ་ཡིན་པས་འགྲོ་བ་ལ་ཕན་པ་ཞིག་འོང་གསུངས་ནས། མཚན་ཤཱཀྱ་སེང་གེར་བཏགས། ཡབ་ཀྱིས་སྡོང་དག་བྱས་ནས་ཅི་ཡང་མེད་པ་དང་ཐུག་པས། ཡུམ་ན་རེ། ཁ་ནིང་ནས་བུ་སྐྱེ་བ་ནི་ཐུགས་ལ་མངའ། རྐན་མར་ཙམ་ཡང་མི་འཇོག་པ་ཟེར་བ་ལ། ཁོང་ལ་བསོད་ནམས་ཡོད་ན་ངས་མ་བཞག་ཀྱང་འོང་། དེ་མེད་ན་བཞག་ཀྱང་མི་ཕན་གསུང་ཁང་ཐོག་ན་བཞུགས་ཙ་ན། བཙུན་མ་ཕྱུག་མོ་ཞིག་གིས་ནས་རྒྱབ་མང་པོ་དང་། མར་ཕོན་ཆེར་ཕུལ། མདོ་ཁམས་ནས་འབུལ་སྐྱེལ་ལྷགས་པས། འདི་ལ་
བསོད་ནམས་ཀྱང་འོང་། འགྲོ་བ་ལའང་ཕན་གསུངས། ཟླ་བ་བརྒྱད་ན་ཡབ་གཤེགས་པས། ཡུམ་དང་ཞང་པོས་བསྐྱངས་ནས་མདའ་ཕུར་ལོ་བཅོ་ལྔ་བཞུགས། དེ་ནས་ཆུ་བར་དུ་ཟུར་ཤཱཀྱ་བཟང་པོའི་དྲུང་དུ་བྱོན་ནས་གསང་བ་སྒྱུ་འཕྲུལ་དང་། སྐེད་ལུང་དུ་ཡང་ཁྱེད་ཀྱི་སར་ཡང་བྱོན་ནས་ཆོས་གསན། དགུང་ལོ་བཅུ་དགུ་པ་ལ་ཆེ་འདོན་མཛད་པས་ཕྲིན་ལས་ཤིན་ཏུ་རྒྱས་ཏེ་བསླབ་གཉེར་གཡེལ་བ་བྱུང་། དེར་སྐབས་བཙལ་ནས་གོང་ཕུར་སྐྱོའི་རྩར་ལོ་གཅིག་བྱོན། དེ་ནས་སླར་ཕྲིན་ལས་ཆེར་རྒྱས་ཏེ་གཞན་དུ་བཞུད་པའི་སྐབས་མ་བྱུང་། བླ་མ་མཁས་གྲུབ་ཀྱི་ཚོགས་ཆུང་སྤྱན་དྲངས་ནས་སློབ་གཉེར་རྫོགས་པར་མཛད། ཁྱད་པར་ཀ་བ་བཞི་ལས་ཡབ་ཆོས་མདོ་སྒྱུ་སེམས་གསུམ་རྒྱུད་མན་ངག་ཕྲིན་སྒྲུབ་ཕྱག་བཞེས་དབང་དང་བཅས་པ་ཡོངས་སུ་རྫོགས་པར་གསན་ཅིང་ཁྱད་པར་དུ་ཞད་པོ་མདའ་ཏིག་ལས་མདོའི་སྐོར་ཞིབ་པར་བརྙེས། གླན་ཤཱཀྱ་བྱང་ཆུབ་ལས་རྫོགས་ཆེན་སྐོར་ལུགས། ལྷ་རྗེ་ཤངས་ནག་ལས་རྫོགས་ཆེན་བརྒྱུད་པ་ཐ་མ་སོགས་མདོར་ན་བླ་མ་མང་པོ་ལས་ཐོས་བསམ་གྱི་སྒྲོ་འདོགས་ཆོད་པར་མཛད། རང་གི་གྲུབ་མཐའ་གསན་པའི་བླ་མ་དེ་དག་ལའང་ཡུམ་རྒྱས་འབྲིང་བསྡུས་གསུམ་གྱིས་སྣ་དྲངས་པའི་འབུལ་བརྒྱ་ཆེན་པོས་ཐུགས་ཟིན་པར་མཛད། ཉ་རི་སྒྲོ་ཕུག་ཏུ་སྒྲུབ་པ་ཡུན་རིང་དུ་མཛད་པས་བསྐྱེད་སོགས་ཀྱི་གནས་ལ་མན་ངག་གི་རྒྱུད་ནས་གསུངས་པའི་གཟེར་བཞི་ཐེབས། ཡི་དམ་ལྷའི་སྐུ་གསུང་ཐུགས་དང་ཐ་དད་མེད་པར་འདྲེས་པས་སྐུ་གཞོན་ནུ་ནས་གཟི་བྱིན་ཤིན་ཏུ་ཆེ་སྟེ་ཐམས་ཅད་ཟིལ་གྱིས་གནོན་ནུས། རེ་ཞིག་ན་དམ་པ་སངས་རྒྱས་དིང་རིན་བཞུགས་པ་དཔོན་སློབ་ལྔས་མཇལ་དུ་བྱོན། ཕེབས་རྒྱུའི་ཉིན་དམ་པའི་ཞལ་ནས་དེ་རིང་ཕྱག་ན་རྡོ་རྗེའི་སྤྲུལ་པ་འབྱོན་པ་ཡོད་ཀྱི་བསུ་བགྱིས་གསུངས། དར་གདུགས་ལ་སོགས་བཤམས་པས། ཉི་མ་རྒས་སུ་ཆ་ཙན་སྔགས་པ་དཔོན་སློབ་ལྔ་བྱུང་། གཞན་སུ་ཡང་མི་གདའ་ཞུས་པས། དེ་ཀ་ལ་བསུ་བགྱིས་གསུངས། དེར་ལྷ་
རྗེ་སྒྲོ་ཕུག་པས་དམ་པ་ལ་མངོན་མཁྱེན་ཨེ་འདུག་ལྟ་ཡི་གསུངས་ནས་སློབ་མ་ཞིག་ཉིད་དུ་རྫུར་བཅུག་ནས་སྔོན་ལ་བཏང་། ཁོང་རང་ཕྱིན་ཞབས་འབྲིང་བལྟར་བྱས་པས། དམ་པས་སྒྲོ་ཕུག་པའི་མགུལ་ན་ཝ་བ་ཡོད་པའི་གཟིགས་ནས། ཕྱག་སྣ་ལྦ་བ་ཅན་གྱིས་དྲངས། དཔོན་སློབ་གོམ་ལོག་པ་འབྲང་གསུངས་པས་མོས་གུས་ཆེན་པོ་ཐོབ། ཆོས་ཀྱི་བདུད་རྩིའང་ནོད། དམ་པའི་ཞལ་ནས་སྒྲོ་ཕུག་པ་ལ་འདི་བསྟན་པའི་བྱེ་དཔལ་ཆེན་པོར་འགྱུར་ཅེས་དབུགས་འབྱིན་མཛད། ཡང་རེ་ཞིག་ན་ཕྱག་རྡོར་གྱི་བྲིས་སྐུ་བྱེད་པའི་བྲོ་བཀོད་ཀྱི་ཚེ། ལྷ་བྲིས་པའི་ཁྱེད་རང་འདི་འདྲ་བ་ཞིག་བྲིས་ཞེས་ཕྱག་ན་རྡོ་རྗེ་སྐུ་དངོས་སུ་བསྟན་པ་སོགས་རྒྱུ་མཚན་དུ་མའི་སྒོ་ནས་དཔལ་གསང་བའི་བདག་པོ་བྱང་ཕྱོགས་ཀྱི་རྒྱུད་འདིར་གསང་སྔགས་ཀྱི་བསྟན་པ་རྒྱས་པར་མཛད་པ་ལ་བྱོན་ནོ་ཞེས་གྲགས། སྤྱིར་གདུལ་བྱའི་ཚོགས་དཔག་ཏུ་མེད་ལ། ཁྱད་པར་སློབ་མ་དགེ་བའི་བཤེས་གཉེན་ཆེན་པོ་གྲས་འཛིན་ཅིང་བསྟན་པ་སྐྱོང་བ་གདུགས་ཐོགས་བསྟོང་ཐོན་པས་རིང་མོའི་མཐར་ཡང་ཕྲིན་ལས་བསམ་གྱིས་མི་ཁྱབ། སྒྲོ་ཕུག་ཏུ་ཆོས་གསུང་བའི་དུས་ཤིག་ཆོས་ཁྲི་རྒྱབ་ཡོལ་མེད་པ་ཅིག་ལ་བཞུགས་ཏེ་མཐའ་སྐོར་ཐམས་ཅད་གྲྭ་བས་བསྐོར་ནས་ཡོད་པ་ལ། ཕྱོགས་ཐམས་ཅད་ཞལ་དུ་ཐལ་ལེ་བར་བྱུང་བས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་དཀྱིལ་འཁོར་གྱི་བདག་པོའི་ཞལ་སྐྱིན་མངོན་སུམ་པར་ཡིད་ཆེས་ཤིང་སྤྲུལ་པའི་སྐུར་རྩེད་པ་མེད་པར་གྲགས། དབྱར་ཆོས་དགུན་ཆོས་ཀྱི་དུས་ཕྱོགས་རེ་ན་མར་དཔེ་འགྲེམས་ལྔ་བརྒྱ་ཙམ་རེ་དང་། སྟོན་ཆོས་དང་དཔྱིད་ཆོས་ཀྱི་དུས་སུམ་བརྒྱ་ཙམ་ཡོད་ཅིང་། སྤྱིར་ཁྲི་ཕྲག་ཏུ་ཐལ་བ་བྱུང་བས། ཆོས་རྭའི་གོས་བདེ་དོག་ལའང་གསེར་ཞོ་རེའི་མཇལ་ལེན་བྱེད་པའི་དར་རྒྱས་བྱུང་། མཁྱེན་བརྩེ་ནུས་པ་གསུམ་གྱི་ཡོན་ཏན་ཕུན་སུམ་ཚོགས་ཤིང་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་དོན་ལ་རང་བྱན་ཆུད་པ་ཙམ་གྱི་ཆོས་སྤྱན་ཐོབ་པས་གསང་བདག་སྒྲོ་ཕུག
པའི་བཤད་སྲོལ་ཞེས་དུས་ད་ལྟའི་བར་དུ་ལྡབ་ལྡིབ་བྱེད་པ་འདི་བྱུང་ཞིང་ཉི་ཟླ་ལྟར་གྲགས་པ་ཡིན་ནོ། །དེ་ལ་ཐུགས་ཟིན་གྱི་སློབ་མ་བཅུ་གཉིས་བྱུང་སྟེ། ནག་པོ་བཞི། སྟོན་པ་བཞི། མེས་བཞི་ལས། ནག་པོ་བཞི་ནི། ལྕེ་སྟོན་རྒྱ་ནག །ཟུར་ནག་འཁོར་ལོ། །ཉང་ནག་མོད་པོ། མངའ་ནག་གཙུག་ཏོར་དབང་ཕྱུག་གོ །སྟོན་བཞི་ནི། ཉེ་སྟོན་ཆོས་སེང་། གྱ་བསྟོན་རྡོ་རྗེ་མགོན་པོ། ཞང་སྟོན། རྒྱ་སྟོན་བཞིའོ། །མེས་བཞི་ནི། རྩངས་པ་བྱི་སྟོན། གཡུ་སྟོན་ཧོར་བོ། སྤང་སྟོན་ལྕགས་ཀྱུ། དབུས་པ་ཆོས་སེང་ངོ་། འདྲེན་ཚུལ་འདི་ཟུར་སྟོད་ལུགས་སུ་གྲགས་ལ། སྨད་ལུགས་སུ་དེ་ལས་ཐ་དད་པའང་ཡོད། དེ་ལྟར་སྤྲུལ་པའི་སྐུ་གསང་བདག་སྒྲོ་ཕུག་པ་ཆེན་པོ་དེ་ཉིད་ཐ་མའི་མཛད་པ་སྟོན་པར་བབས་པའི་ཚེ། སྟོན་པ་བཞི་ལ་བྱེད་ཚོས་ཚོགས་འཁོར་གྱི་ཆ་རྐྱེན་འདྲ་ཁྱེར་ལ་ཤོག །ངས་ཀྱང་བསྡོགས་ཀྱི་གསུངས། སྟོན་པ་བཞིས་གསུངས་བཞིན་དུ་བསྒྲུབས་པ་དང་། སྒྲོ་ཕུག་གི་ལྟག་ལྟ་རི་གདོང་གི་རྩེ་ར་བྱོན་ནས་ཚོགས་འཁོར་རྒྱ་ཆེན་པོ་མཛད། གསུང་གི་གསང་བ་མང་པོ་རྗེས་སུ་བསྟན་ནས། ཁྱེད་རྣམས་ང་མེད་པ་ལ་མྱ་ངན་མ་བྱེད་ཅིག །ངས་ད་རེས་ལུས་མ་སྤངས་པར་ཁྱེར་ནས་རིག་འཛིན་གྱིས་ལ་འགྲོ་བ་ཡིན། དེས་ཁྱེད་རྣམས་ལ་ཤུལ་དུའང་བཀྲ་ཤིས། མི་རྒྱུད་དང་བསྟན་པ་འཕེལ་བ་ཞིག་འོང་ངོ་གསུངས་ནས། དཔལ་གྱི་མགུར་ལས་རྡོ་རྗེའི་གླུ་ཞིག་བཞེངས། ནམ་མཁའ་ལ་ཇེ་མཐོ་ཇེ་མཐོར་འཕགས་ཀྱིན་མགུར་རེ་བཞེངས་ནས་མཐར་མི་མངོན་པའི་སར་གཤེགས་པ་དང་། སྟོན་པ་བཞི་སྙིང་ཕྱུང་བ་ལྟ་བུའི་སྡུག་བསྔལ་གྱིས་མནར་ནས། ཆོ་ངེས་བཏབ། འགྲེ་ལྡོག་བྱས། མཚན་ནས་བོས་པས་བྱ་བབས་པ་བཞིན་དུ་བྱོན། ཁྱེད་རྣམས་དེ་ལྟར་མི་བྱེད་པ་ཡིན་ཏེ། ངས་གོང་དུ་ཁ་ཏ་ནི་ལེགས་པར་བཅུག། དེ་ལ་མི་ཉན་པར། ད་ངའི་མི་རྒྱུད་ལ་བཀྲ་ཤིས་པ་བག་མི་འོང་གསུངས།
དེ་ནས་བྱི་ལོ་དྲུག་ཅུ་རྩ་གཅིག་པ་ཤིང་པོ་སྟག་ལ་འོག་མིན་ཚོགས་ཆེན་འདུས་པའི་གྲོང་ཁྱེར་དུ་གཤེགས་སོ། །པུར་སྦྱོང་བའི་ཚེ་སྔགས་པ་གཞོན་མཛེས་གཅིག་གིས་རྟ་དང་བཟང་གཅིག་ལ་དུང་གི་སྒ་རང་གུག་ངོ་མཚར་ཅན་བསྟད་པ་ཞིག་ཕུལ། དེ་འདི་ནས་བྱུང་དང་འདིར་སོང་སུས་ཀྱང་ངོ་ཤེས་པ་མ་བྱུང་བས་ལྷས་འདེགས་བསྐྱལ་བར་གྲགས། དེ་བཞིན་དུ་བཙན་དང་། མ་མོ་དང་། ཀླུ་རྣམས་ཀྱིས་ཀྱང་འདེགས་བསྐྱལ་ཏེ། མི་ལ་མེད་པའི་ནོར་སྣ་བཞི་བྱུང་བ་ཡིན་ནོ། །འདིས་སྐྱ་བ་ཀུན་དགའ་སྙིང་པོ་ལས་ལོ་བཅོ་བརྒྱད་ཀྱིས་བགྲེས་པས་དྭགས་པོ་རྗེ་དང་། ཕག་མོ་གྲུ་པ། བླ་མ་ཞང་། ཇོ་སྲས་འཛེོང་སོགས་དང་ཐོག་ངགས་པ་ཙམ་མཉམ་མོ།། །།ཡང་བི་མ་ལའི་སློབ་མ་རོང་ཆུ་ཚན་གྱི་དགེ་སློང་མ་སྒྲེ་མོ། དེའི་སློབ་མ་ལྷོ་བྲག་བྱ་ཟེའི་མར་པ་ཤེས་རབ་འོད། དེའི་སློབ་མ་ཤངས་ལྟ་བུའི་ཡང་སྟོན་དར་མ་བསོད་ནམས། དེའི་སློབ་མ་ལྷ་རྗེ་ཧོར་པོ་སྟེ་སྒྲོ་ཕུག་པ་ཡིན་པས་བི་མ་ལ་དང་གཉིས་ཀྱི་བར་ལ་གསུམ་ལས་མེད་དོ། །དེ་ལ་སྒྲོ་ཕུག་པའི་སློབ་མ་ལྕེ་སྟོན་རྒྱ་ནག་ནི་འཁྲུངས་ས་ཉང་སྟོད་པ་ཡིན། མཚན་ཉིད་ཀྱི་གྲྭས་ན་ཕུ་བོ་གཉིས་སློབ་གཉེར་ལ་ཡོད་པའི་སར་བརྒྱགས་བསྐྱལ་དུ་བྱོན། ཞར་ཉན་བྱས་པས་ཁོང་གཉིས་ཀྱིས་ཆེད་དུ་སྦྱངས་པ་ལས་ལྷག་པ་བྱུང་། དེར་རྒྱ་ནག་ན་རེ། ཁྱེད་གཉིས་ཀྱིས་ལོ་གསུམ་ཉན་ཀྱང་གོ་བ་ཅི་མང་མི་འདུག །ངས་ཉན་ན་གོ་བ་འདུག་བྱས་པས། ཁུ་བོ་གཉིས་ན་རེ། ངེད་གཉིས་ལ་དེ་ལས་མ་བྱུང་། ཆོས་སུས་ཤེས་ཀྱང་འདྲ་ཡི་ཁྱོད་ཀྱིས་གོ་ན་ཁྱོད་རང་ཉོན། ངེད་ཀྱིས་བརྒྱགས་སྐྱེ་ལ་བྱེད་ཟེར་བས། དེར་ལྷ །རྗེ་རྒྱ་ནག་གིས་བཞུགས་ནས་ཁྱུང་པོ་གྲགས་སེམས་པར་ཕྱིན། འབེན་ལས་མངོན་པ། སྟག་པ་ཁ་ཆེ་ལས་དབུ་ཚད། འགར་བསོད་ཡེས་ལའང་གཏུགས་ཏེ་ལོ་དགུར་ཉན་པས་མཁས་པའི་ཕ་རོལ་ཏུ་སོན། སུམ་ཅུ་པའི་ཚེ་གསང་བདག་སྒྲོ་ཕུག་པ་ལ་སྔགས་གསན་དུ་བྱོན་ནས་ལོ་བཅུ་གཅིག་བཞུགས་
ཏེ། ལོ་གསུམ་གྱི་བར་ཇོ་སྲས་ཉང་སྟོད་པ་གསུང་བ་ཙམ་ལས། སྤྱན་སྔར་གསུང་གླེང་ཞིབ་པ་ཙམ་མ་བྱུང་། སྐབས་ཤིག་ན་རྒྱ་བརྩོན་སེང་དཔོན་གཡོག་དང་ལྷ་རྗེ་ཆོས་འཁོར་སྟབས་གཅིག་ཏུ་འཛོམ་པའི་ཆོ། །རྒྱ་བརྩོན་དཔོན་གཡོག་གིས་རྩོད་པ་བཙུགས་པས། ལྷ་རྗེ་རྒྱ་ནག་གིས་ཁོང་རྣམས་སུན་ཕྱུང་། ང་རྒྱལ་བཅགས་པས་མཉེས་ཏེ་ཐུགས་ལ་འདོགས་པར་བྱུང་བའི་ཁར། སྲས་ཇོ་བཙུན་རྡོ་རྗེ་གྲགས་བློ་ཁ་ཕྱེ་བས་རབ་ཏུ་དགྱེས་ནས། བསྐྱེད་རྫོགས་གསུམ་གྱི་གཞུང་གདམས་ངག་དང་། ཁྱད་པར་གྱི་མན་ངག་ཡིག་ཆུང་དང་བཅས་པ་གནང་བས་ལྷ་རྗེ་ལྷ་ཁང་བཟུར་ཚོ་གཞན་ལས་ཆོས་ཁ་ཚང་ཞིང་མན་ངག་ཟབ་པ་ཡིན། བཞི་བཅུ་ཐམ་པ་ལ་གཤེགས་བཙུན་མཛད། དེའི་ཕྱི་ལོ་སྒྲོ་ཕུག་པ་གཤེགས། ཉང་སྟོད་ཀྱི་རྒྱ་རྩ་བསྐོར་ལས་བདུད་རྩི། ཉང་སྨད་སྒྲོ་དར་སེང་ལས་རྣམ་འཇོམས་དང་ཕུར་པ་རྩ་བསོར་བཞག་ལུགས། གཞན་ཡང་སྐྱི་ལུགས་ལ་སོགས་ཕུར་བ་ལུགས་ཐ་དད་པ་དང་། དམ་པ་སྤོར་མང་ལས་རྫོགས་ཆེན་སྤོར་ལུགས། ཇོ་མོ་ཉང་མོ་ལས་རྫོགས་ཆེན་ཁམས་ལུགས་ཨ་རོའི་ཐུགས་བཅུད། དེ་བཞིན་དུ་རྫོགས་ཆེན་བྲམ་ཟེའི་སྐོར་དང་ཀེ་ཚངས་སོགས་ཐོས་པ་ཤིན་ཏུ་མང་བས་སྔགས་དང་། མཚན་ཉིད། རྒྱུད་དང་སྒྲུབ་ཐབས་ཐམས་ཅད་ཀྱི་བདག་པོར་གྱུར། སྨན་སྒྲུབ་མཛད་པའི་ཚེ་སྨན་གྱི་ཕོ་བྲང་ལས་ལྷ་མོ་མངོན་སུམ་དུ་ཐོན་ནས་དཀྱིལ་འཁོར་ལ་བསྐོར་བ་ལན་གསུམ་བྱས་ཏེ་ཐིམ་པར་ཀུན་གྱིས་མཐོང་། གཞན་དོན་རྒྱ་ཆེན་པོ་མཛད་ནས་ལྔ་བཅུ་རྩ་དྲུག་པ་ལ་གཤེགས་སོ།། །།འདིའི་དཔོན་པོ་བླ་མ་ཆེན་པོ་ཡོན་ཏན་གཟུངས་ནི། མེ་ཕོ་རྟ་ལ་འཁྲུངས། བཅུ་གཅིག་ནས་སློབ་གཉེར་མཛད། ལོ་བཅུ་གསུམ་ཁུ་བོ་དང་འགྲོགས་ནས་བསྐྱེད་རྫོགས་གསུམ་གྱི་རྒྱུད་ལུང་མན་ངག་ཀུན་ལ་སློབ་གཉེར་རྫོགས། ཉི་ཤུ་རྩ་བཞི་བཞེས་པའི་ཚེ་ཁུ་བོ་རྒྱ་ནག་པ་སྐུ་གཤེགས་ནས་གདན་ས་མཛད། དབུས་བསྟོད་ཤཱཀ་དང་། དབུས་པ་ཞིག་པོ་སོགས་ལས་ཐེ་ཚོམ་གྱི་དྲས་
ཐག་བཅད་ནས་རང་གཞན་གྱི་དོན་མཛད་པ་ཡིན་ནོ།། །།དབུས་པ་སྟོན་ཤཱཀ་གམ་དམ་པ་སེ་སྤྲག་པ་ནི། གཟད་ཀྱི་གཅེར་བ་ཝང་ཐུང་རྒྱུད་ཡིན། སྒྲ་ཕུག་པའི་གྲ་སར་ཡི་གེ་འདྲིར་བྱོན་པ་ལ་དད་པ་ཐོབ་ནས་སློབ་གཉེར་བྱས། ལྷ་རྗེ་རྒྱ་ནག་གཤེགས་བཙུན་མཛད་པའི་ཕྱིར་འབྲེང་དུ་གཤེགས་ནས་རྒྱུད་དང་གདམས་ངག་ཐམས་ཅད་རྫོགས། སྒོམ་སྒྲུབ་འབའ་ཞིག་བྱ་བར་བསམས་ཏེ་བྱང་རི་ལ་དགོན་པ་འཚོལ་དུ་བྱོན་པས། ཡོལ་བ་བྲག་ལ་དམ་པ་ཡོལ་ཆུང་བ་བྲག་བརྐོ་བ་དང་མཇལ། འདིར་དགོན་པ་མཛད་པ་ལགས་མ་བྱས་པས་ཡིན་ཟེར། འདི་མིན་པ་བྱས་མི་གདའ་འམ་བྱས་པས། ཕར་ངོས་ན་མེ་བ་ཁ་སྤྲག་ཅན་ཞིག་ན་འདུག་སྟེ། དེ་བས་འདི་བཙན་པས་འདིར་འདིར་བྱེད་ཟེར། དེར་དམ་བསྟོན་ཤཱཀ་གིས་བྲག་སེ་བ་ཁ་སྦྲག་སྐྱེས་པ་དེར་བྱོན་ཙན། ཆུ་མིག་འགྲམ་ནས་ཟན་རྡོག་འགའ་ཞིག་རྙེད་པས་བཟང་ལྟས་སུ་བཟུང་། དེ་རང་ཞུགས་ཏེ་སྒོམ་སྒྲུབ་མཛད་པས་རྟོགས་པ་ཁྱད་པར་ཅན་སྐྱེས། ལྷ་འདྲེས་བཀའ་ལ་ཉན། གདུལ་བྱ་མང་པོའི་དོན་ནུས་པ་བྱུང་སྟེ་དམ་པ་སེ་སྤྲག་པ་ཞེས་གྲགས་སོ།། །།དབུས་པ་ཞིག་པོ་ནི། ཡར་ཀླུངས་བྱས་པ་ཡིན། རྗེ་སྒྲོ་ཕུག་པའི་གདན་སར་ཡིག་མཁན་ཆོས་ལ་ཚུད་པ་ཞིག་སྟེ། ལྷ་རྗེ་རྒྱ་ནག་གི་ཕྱི་ལ་འབྲེངས། བསྐྱེད་རྫོགས་གསུམ་ཀ་ལ་འབྱོངས་པ་བྱས། ཡུལ་ལ་ཆེ་འདོན་ལ་འགྲོ་སྙམ་ཙན། དེའི་ཆ་རྐྱེན་གདུགས་དང་། དུང་དང་། མཆོད་ཆ་སོགས་དགོས་པར་སེམས་ནས་དེ་དག་འདོན་པའི་ཕྱིར་བལ་ཡུལ་དུ་བྱོན། ལམ་དུ་བསམས་པ་ལངས་ཆོས་དེ་ཙམ་ཤེས་ཀྱང་ཉམས་སུ་བླང་རྒྱུ་ཞིག་མི་འདུག། ད་ལྟ་ཤི་ཅིས་ཀྱང་མི་ཕན་གདགས་ངག་ཁོ་ན་ལ་བློ་གཏོད་དགོས་པར་འདུག་སྙམ་ནས་སླར་ལོག་བླ་མའི་སྤྱན་སྔར་ཕྱིན་ནས་ཞུས་པས། སྙན་བརྒྱུད་རིན་པོ་ཆེའི་གདམས་ངག་གནང་། དེ་ལ་ཉམས་ལེན་མཛད་ཀྱིན་བྱོན་པས། མང་ཡུལ་གུང་ཐང་དུ་རྟོལ་ཙ་ན་རྫོགས་པ་ཆེན་པོའི་ཡེ་ཤེས་
བརྗོད་དུ་མེད་པ་ཞག་བདུན་དུ་ཤར། དེར་བལ་པོ་ནས་མཆོད་ཆ་བླངས། མང་ཡུལ་གུང་ཐང་དུ་ལྟོགས་ཙ་ན། ཚད་པ་ཕྱིན་འབྲེངས་ནས་བསྙུན། དམི་དགའ་ཨེ་ཡིན་སྙམ་ནས་བློ་ཐག་བཅད། ཀ་ཅ་རྣམས་གྲོང་དུ་བཞག། རི་ལ་བྱོན་ནས་ཉམས་སུ་བླངས་པས་ས་རྡོ་རི་བྲག་ཐམས་ཅད་ལ་ཐོགས་པ་མེད་པ་བྱུང་། སྔར་གྱི་བསམ་པ་དེ་དག་དགོས་མེད་འབའ་ཞིག་ཏུ་ཤེས་ནས་ཆེ་འདོན་གྱི་ཀ་ཅ་ཐམས་ཅད་གང་དགར་བསྐྱུར། མཉྫི་དང་ཏིང་བདུན་ཆ་གཅིག་ཡོད་པ་དེ་མཐོང་བ་དང་བླ་མའི་དྲིན་དྲན་ཏེ་ང་ལ་དགོངས་པ་འདི་འདྲ་འཆར་བ་ཡང་བླ་མའི་ཐུགས་རྗེ་ཡིན་པས་འདི་ཙམ་ཞིག་བླ་མ་ལ་འབུལ་དགོས་སྙམ་ཁྱེར་ཕྱིན་པས། འདོད་པ་ཟད་པས་དེ་ཡང་ལམ་དུ་བསྐྱུར་འདོད་པ་བྱུང་སྟེ། ཡང་བླ་མའི་དྲིན་བསམས་ཏེ་བྱོན། ལྷ་ཁང་དུ་སླེབ་ཙན་བླ་མའི་དྲུང་དུ་བསྐྱུར་ནས། ཏིང་ཁྱོད་ཀྱིས་ང་ཇི་ཙམ་ཞིག་བཅིངས་གསུང་སྐད། དེར་རི་འབའ་ཞིག་ལ་བཞུགས་ནས་ཉམས་ལེན་མཛད་པས། ཆོས་ཐམས་ཅད་བློ་ལ་འཆར་བ་དང་། སྣང་བ་བདེན་མེད་དུ་བུན་ལོང་སོང་བས་རྦབ་ཀྱིས་མ་ཚུགས། གཡས་རུའི་བ་གོར་ཕུར་བཞུགས་པའི་ཚེ་གཟིམས་མལ་གྱི་སྟེང་དུ་ཐོག་བྱུང་ཡང་མ་གནོད། གཞན་གྱིས་ཐོག་བྱུང་ངམ་ཞུས་པས། ཐོག་གམ་དེ་བྱུང་གསུང་། མ་གནོད་དམ་ཞུས་པས། སྒྲ་གྲག་སྟོང་དབྱེར་མེད་ཡིན། ཐོག་ལ་རང་བཞིན་ག་ལ་ཡོད་གསུངས་ཏེ་རྣལ་འབྱོར་གྱི་དབང་ཕྱུག་ཆེན་པོར་བཞུགས། སྒོམ་སྒྲུབ་འབའ་ཞིག་གི་དང་ནས་མཚམས་འོག་ཏུ་གྲས་ལོ་བཅོ་བརྒྱད་བསྐྱངས། དགུང་ལོ་བདུན་ཅུ་བ་ལ་གཤེགས་སོ། །དམ་པའི་སྐྱེས་བུ་འདི་ལ་སློབ་མ། ཞིག་བོ་བདུད་རྩི། སྟོན་པ་བླ་སྐྱབས། དབུས་པ་ཇོ་བསོད། སྙིང་སྟོན་ཉི་མ་རྡོ་རྗེ་ལ་སོགས་པ་གཞུང་ལུགས་ལ་མཁས་པ་མང་དུ་བྱུང་། གཞན་ཡང་ལ་སྟོང་གྱི་མེས་སྟོན་མགོན་པོ་དང་། དཔྱལ་ཀུན་དགའ་རྡོ་རྗེ་ལ་སོགས་པས་ཀྱང་ཞབས་ལ་གཏུགས་སོ།། །།ཐུགས་ཀྱི་སྲས་ཞིག་པོ་བདུད་རྩི་ནི། ཡབ་མེས་ཀྱི་རིང་ནས་མཁས་
པ་དང་། གྲུབ་པའི་དཔའ་བོ་རྒྱུད་མར་བྱུང་བ་ལས་འདིའི་ཡབ་སངས་རྒྱས་དྭགས་ཆུང་སྟེ། དྭགས་པོ་རྒྱ་རས་ཀྱི་ཕྱིན་འབྲེངས་པས་དྭགས་ཆུང་བར་གྲགས། དེས་ལྷོ་བྲག་ཏུ་བྱོན་ནས། ལྷོ་སྟོད་ཕུར་མོང་སྒང་བྱ་བའི་དགོན་པར་འགྲོ་དོན་མཛད་ཅིང་བཞུགས་པ་ལ། གཟད་པའི་ཡོན་བདག་རྣམས་ཀྱིས་གདན་དྲངས། གཟད་ཀྱི་ལྷ་གདོང་དགོན་པ་དང་། འུག་སྐད་དགོན་པ་ལ་སོགས་པ་ཕུལ་ནས་བཞུགས། བུ་སློབ་མང་དུ་འཕེལ། དེ་ལ་ཇོ་མོ་ཝང་མོ་བྱ་བ་ཞིག་ཡོད་པ་དང་གཉིས་ཀྱི་བུར་གཟད་ཀྱི་ལྷ་གདོང་དགོན་པར་བཙས། ཞིབ་མའི་ནང་དུ་བསྙལ་བ་ལ་འཇའ་ཚོན་ཟུག། དགུང་ལོ་གཉིས་ཙམ་ལོན་པའི་ཚེ་ཡབ་ལ་རྨི་ལམ་ངོ་མཚར་བ་བྱུང་ནས། དང་འཆི་བ་འདུག །ཤི་ནས་ཀྱང་རིག་འཛིན་གྱི་ས་ལ་འགྲོ་བར་འདུག བུ་འདིས་ཀྱང་གཞན་ལ་ཕན་ཐོགས་པར་འདུག་གསུངས་ཏེ་གཤེགས། ཞིག་པོ་རིན་པོ་ཆེ་འདི་ཆེར་སྐྱེས་པ་དང་སྙིང་རྗེ་ཤིན་ཏུ་ཆེ་བས་གོས་བཅོས་པ་ཐམས་ཅད་མས་འབར་ཀྱང་མ་ཉན་པར་ལམ་ཟན་པ་ཉམ་ཐག་ཅིག་ཡོད་པ་ལ་བྱིན། དེར་མོ་མ་རྣོན་པོ་ཅིག་ན་རེ། ཁྱོད་ཀྱི་བུ་འདི་ཅི་འདྲ་ཞིག་འོང་། འདི་ལ་འཇིག་རྟེན་གྱི་ལྷ་འདྲེ་ཐམས་ཅད་ཚོགས་ནས་བསྐོར་བ་བྱེད་ཅིང་མཆོད་པར་འདུག་ཟེར། སྟོན་གཞིག་འོངས་འདོན་ཙ་ན། མན་རེ་མི་ཐམས་ཅད་འོངས་འདོན་པ་ལ་གཏོར་མ་གཏོང་གི་འདུག། གླེན་པ་ཁྱོད་ཀྱང་ཆུ་གཏོར་འདྲ་ཐོང་། རང་རེ་ཡང་འོངས་འདོན་པ་ཡིན་བྱས་པས། འོངས་འདོན་སར་བྱིས་པ་དེས་སོང་ནས། གཟད་ལུང་པའི་ལྷ་འདྲེ་ཚོ། ཉང་ནག་འོལ་པོའི་ལྷ་འདྲེ་ཚོ། སྤྲང་པོ་འུ་ལུའི་རྒྱལ་ནག །ད་ནངས་སུའི་སར་ཡང་མ་འགྲོ་བར། རྒན་མོ་ཝང་མོའི་འོངས་འདོན་གྱིན་ཡོད་པས་འདིའི་འོངས་ལས་ཁྱེར་ཟེར་ནས་ཐོར་ཐོར་བྱས་པས། ཨམ་ཁྲོས་ནས་ཕྱར་ཕྱིན་འདུག དེར་ཞིང་རེ་བཞི་བྱ་བ་ཡོན་ན་ལྟར་ལེགས་ནའང་བཞི་བཅུ་ལས་མི་ཐོན་པ་ཞིག་ལ། དེའི་ལོ་སྙེ་མ་ཧ་ཅང་མེད་པ་ལ་ཁལ་ལྔ་བཅུ་ཐལ་བ་བྱུང་བས་
འདི་སྤྲུལ་པ་ཞིག་ཡིན་ཉེན་འདུག་ཟེར་ནས། ཞང་པོ་དམ་པ་སེ་སྦྲག་པའི་རྩར་སློབ་གཉེར་ལ་བཏང་། ལོ་གསུམ་གྱི་རིང་ལ་རྫོགས་ཆེན་རོང་ཕུགས་སྒང་དྲིལ། གབ་ཕྱུང་སོགས་ལེགས་པར་ཐོས། བླ་མ་གཤེགས་ཁར་མིག་མཆིམས་འགགས་ནས་དྲན་པ་ཙམ་མ་བྱུང་གསུངས། བཅུ་དྲུག་པ་ལ་སྐྱིལ་ཁར་ལྷ་ཁང་པ་ཡོན་ཏན་གཟུངས་ཀྱི་ཞབས་ལ་གཏུགས། ལོ་མང་དུ་བཞུགས་ནས་བསྐྱེད་རྫོགས་གསུམ་ཀ་ལ་བློ་གྲོས་བྱང་བར་མཛད། ཉམས་ལེན་གྱི་གཙོ་བོ་དང་འཆད་ཉན་ཐམས་ཅད་སེམས་ཕྱོགས་ལ་མཛད་དེ་ཞལ་གྱིས་ཀྱང་སེམས་ཕྱོགས་ཁོ་ན་སྒྲུབ་པ་ཡིན་གསུངས། ཀུན་བྱེད་རྒྱལ་པོ་དང་མདོ་བཅུ་ལ་སོགས་པ་སེམས་ཕྱོགས་ཀྱི་རྒྱུད་སྡེ་ཆེན་པོ་ཉི་ཤུ་རྩ་བཞི་གསན། རྩ་བ་སེམས་སྡེའི་སྐོར་ལ། སྐོར་ལུགས། རོང་ལུགས། ཁམས་ལུགས་ལ་སོགས་པ་བཤད་སྲོལ་མི་གཅིག་པ་བཅུ་བཞི་གསན། རོང་ལུགས་ཀྱི་སྒོམ་ཡིག་ཆེན་པོ་རྣམས་ལས། རྣལ་འབྱོར་རིག་པའི་ཉི་མ། བསམ་གཏན་མིག་གི་སྒྲོན་མ། བསམ་གཏན་སྙིང་གི་ཉི་མ། གདར་ཤ་དང་གཟེར་བུ། ཞུལ་ན་ཁུང་གདབ། རྡོ་རྗེ་སེམས་དཔའི་ཞུ་ལན་སོགས་སྒོམ་ཡིག་ཕལ་མོ་ཆེ་ཐོས། སྙན་བརྒྱུད་ཕྱི་སྐོར་ལ། སྐོར་རོང་ཁམས་གསུམ་ཀའི་གདམས་པ་དང་། བྲམ་ཟེའི་སྐོར་གྱི་སྙན་བརྒྱུད། ཀེ་ཚང་དང་རྫོང་ཕྲང་སྙན་བརྒྱུད་ཀློང་ལ་སོགས་པ་བསམ་གྱིས་མི་ཁྱབ་པ་ཞིག་གསན་ཏེ། རྫོགས་ཆེན་གྱི་སྐོར་ལ་ཐོས་བསམ་གྱིས་སྒྲོ་འདོགས་ལྷག་པར་ཆོད་པ་ཡིན། དགུང་ལོ་བཅུ་དྲུག་ལ་བཤད་པ་མཛད་དེ་སྐོར་ལུགས་ཀྱི་སྟོང་ཐུན་གསུངས་པས་མཁས་པའི་ཐོག་ཆོད། དེར་ལྷ་རྗེ་གནུབས་སྨན་བྱ་བ་ན་རེ། དབུས་པའི་ཇོ་སྲས་ཁྱེད་ངའི་རྟ་ཁྱུང་ཕྲུག་ཁ་ཆེ་དང་འདྲ་བ་འདུག་ཟེར། ནས་ཁལ་བཅུ་གཅིག་གི་ཕོགས་བྱས་སྐད། བླ་མ་ལྷ་ཁང་བའི་དྲུང་དུ་ལོ་བཅུ་བཞི་བཞུགས། བར་སྐབས་ཀུན་ཏུ་ཞང་པོའི་གདན་ས་སེ་སྦྲག་ཏུའང་བཞུགས་ཏེ་སྒོམ་སྒྲུབ་དང་བཤད་པ་བག་རེ་མཛད། སློབ་གཉེར་ཚར་བ་དང་ཡབ་
ཀྱི་སློབ་མ་བླ་འདོས་བྱ་བ་ཞིག་གིས་གདན་དངས་ཏེ་གཟད་དུ་བྱོན་ནས་འུག་སྐད་དགོན་པ་བཟུང་། གཙང་དུ་སེ་སྤྲག་དང་། དམ་པ་སེ་སྤྲག་པའི་སྒོམ་མ་རྣལ་འབྱོར་མ་ཤཱཀ་གཉེན་པ་སོགས་པ་བཞིས་ངེད་ཀྱི་སེ་སྤྲག་ལ་མི་ཐར་བར་འདུག་པར་རི་སྒབ་འདིར་ངལ་བསོས་ཞིག་བྱེད་ཟེར་ནས་བརྩིགས་པའི་ཆོས་སྡིངས་ཀྱང་བཟུང་། ཞང་ཚལ་བའི་སློབ་མ་གཙང་སྒོམ་ཧྲུལ་ལེབ་བྱ་བས་ཞིག་པོའི་སྤྱན་སྔར་བླ་མ་ཞང་གི་ལོ་རྒྱུས་བཤད་པས་དད་པར་གྱུར་ནས་གདན་དྲངས། ཆོས་འཁོར་བཙུགས། ཆོས་འབྲེལ་མ་ཞུས་ཀྱང་རྒྱུད་བྱིན་གྱིས་རློབ་པའི་བླ་མ་ཡིན་གསུངས་ནས། མོས་གུས་དང་ཞབས་ཏོག་ཆེ་བར་མཛད། བླ་མ་ཞང་གིས་ཁྱོད་ཀྱི་དགོན་པ་འདི་ཆུ་ཤིང་འཛོམ་པ་མི་འདུག་སྟེ། འདུ་བ་ཆེ་ཞིང་འགྲོ་བ་ལ་ཕན་པ་ཞིག་འོང་བས་ཆོས་སྡིངས་སུ་ཐོགས་གསུངས། དེར་མི་རྣམས་ན་རེ། ཆོས་ལྷ་ཁང་པ་ལས་ཉན། ཞབས་ཏོག་ཚལ་བ་ལ་བྱེད་ཟེར་བ་ལ། བླ་མ་ལྷ་ཁང་བ་དེ་ཕྲག་དོག་རྩ་བ་ནས་ཞིབས་ནས་ཁལ་ཉི་ཤུ་ཙམ་དང་ཤ་མར་ཁ་ཡར་བསྐུར་ཏེ། ཁྱོད་བླ་མ་བཟང་པོ་གདན་དྲངས་ནས་ཆོས་འཁོར་འཛུགས་པ་ལངས་ཀྱང་འཐུད་བྱེད་དགོས་པ་ཡིན་ཏེ། དེ་ལས་མ་འབྱོར་གསུང་པས། རྨོངས་པ་དག་གི་ཁ་སྨྲས་འཕྲོ་ཆད། ང་རང་ཡང་བླ་མ་རྙིང་པ་ལ་མོས་གུས་གསར་པ་སྐྱེས་གསུངས། ཕྲིན་ལས་དུས་ལ་བབ་པས་གདུལ་བྱ་དཔག་ཏུ་མེད་པ་འདུས། འགྲོ་བའི་དོན་རྒྱ་ཆེན་པོ་མཛད། བླ་མ་ལ་ཤིན་ཏུ་གུས་པས་མཉེས་པ་གསུམ་གྱིས་གཞུང་སྲོང་ཞིང་སྐུ་མདུན་ནས་འབྱོན་ཚད་ལ་ཞབས་སྤྱི་བོར་མ་བླང་བར་འགྲོ་མ་མྱོང་གསུངས། གསེར་གྱི་རྒྱས་འབྲིང་བསྡུས་གསུམ་ལ་སོགས་ཏེ་མདོ་རྒྱས་ཚར་བཅུ་བདུན་གྱིས་སྣ་དྲངས་པའི་ཆོས་དང་ཟང་ཟིང་གི་ཞབས་ཏོག་བསམ་གྱིས་མི་ཁྱབ་པ་མཛད། བྱིན་རླབས་ཞུགས་པས་དགོངས་པ་ཇི་ལྟ་བ་བཞིན་དུ་ལོངས། རྟོགས་གྲོལ་དུས་མཉམ་དུ་སོང་ནས་ས་རྡོ་རི་བྲག་ཐམས་ཅད་ལ་ཐོགས་མེད་དུ་འགྲོ་ནུས་པ་དང་། མི་མ་ཡིན་གྱིས་
བསྐོར་བ་བྱེད་པ་བྱུང་། མངོན་པར་ཤེས་པ་མངའ་བའི་ལོ་རྒྱུས་མང་དུ་ཡོད། གཟང་ཕུའི་ད་ལུང་དགོན་པར་བཞུགས་པའི་ཚེ་སྐུ་ཕ་ཝང་ལ་ཐིམ་པ་དང་། སྲིན་པོ་རིར་གྱང་ལ་ཐོགས་མེད་དུ་གཤེགས་པ་སོགས་རྫུ་འཕྲུལ་དུ་མ་མངའ། གངས་རིའི་ཁྲོད་འདིའི་ཡུལ་དང་ཡུལ་ཕྱོགས་ཐམས་ཅད་དུ་བྱོན་ནས་འགྲོ་བ་མང་པོ་ཐར་བའི་ལམ་ལ་བཀོད། བསྟན་པའི་བྱ་བ་ལ་སྐུ་གསུང་ཐུགས་ཀྱི་རྟེན་བཞེངས་པ་དང་། ཞིག་པ་གསོ་བ་དང་། གཞན་གྱིས་བཞེངས་པ་ལ་ཡོ་བྱད་གཏོང་བ་སོགས་ཕ་རོལ་ཏུ་ཕྱིན་པ་དྲུག་ཀའི་དོན་ཉམས་སུ་ལེན་ཤེས། རྒྱ་གར་ནས་བྱོན་པའི་ལོ་པཎ་མཁས་པ་ཐམས་ཅད་ལ་ཞབས་ཏོག་མཛད། སྡེ་སྣོད་འཛིན་པའི་བཤེས་གཉེན་ཆེན་པོ་རྣམས་ཀྱིས་ཞབས་ནས་འདེགས། རྟག་པར་འཇིག་རྟེན་གྱི་བྱ་བ་ལ་བློ་མི་འཇུག་པར་སྒོམ་སྒྲུབ་ཁོ་ན་མཛད། སེམས་ཅན་དབུལ་ཞིང་ཕོངས་པ་ཀུན་གྱི་སྦྱིན་བདག་མཛད་པས་ཐེག་པ་ཆེན་པོའི་རིགས་ལྷག་པར་སད་པ་ཡིན། རྒྱུ་དེས་རྒྱ་གར་ནག་དང་བལ་པོ་ལ་སོགས་པའི་སྐྱེ་བོ་སྐད་རིགས་མི་གཅིག་པ་ཀུན་ཀྱང་འདུ། མ་གདྷཱ་རྡོ་རྗེའི་གདན་ལ་ཞབས་ཏོག་ལན་གསུམ། འཛམ་བུའི་གླིང་གི་རྒྱན་གཅིག་པུ་ཇོ་ཤཱཀ་རྣམ་གཉིས་ལ་སྲི་ཞུ་ལན་བཞི། ཇོ་རགས་ལན་བཞི་མཛད། རྗེས་སུ་ཕྲིན་ལས་སྐྱོང་བའི་དགེ་བའི་བཤེས་གཉེན་ཀྱང་བགྲང་གིས་མི་ལང་བ་བྱུང་སྟེ་གངས་ཁྲོད་འདིར་རྩོད་མེད་དུ་གྲགས་པའི་སྐྱེས་བུ་ཆེན་པོ་ཞིག་ཡིན་ནོ། །དེ་ལྟ་བུའི་མཛད་པ་ཕུན་སུམ་ཚོགས་པས་དངོས་དང་བརྒྱུད་ནས་གཞན་ལ་སྨན་པ་ཤ་སྟག་མཛད་དེ། ལྷ་སའི་རྡོ་རགས་ཕྱི་མ་མཛད་པའི་གཤེགས་སྐྱེམས་ཀྱི་དུས་ལས་འཕྲོ་ངན་པའི་འཁོར་ཁ་ཅིག་གིས་ཆང་འཐབས་བྱས་པས་ཐུགས་སྐྱོ་བའི་གསུང་བྱོན་ཏེ་ལྔ་བཅུ་རྩ་དྲུག་བཞེས་པས་མོ་ལུག་གི་ལོར་གསང་ཕུའི་རྒྱར་གད་ལོགས་ཀྱི་དགོན་པར་སྐུ་གཤེགས། པུར་ཆབ་ལ་བཀལ་ནས་གཟད་འུག་སྐད་དགོན་པར་ཟླ་བ་བཞི་བཞུགས། དེ་ནས་བཙན་པོ་དང་། དཔོན་སྐྱ་སློབ་མའི་ཚོགས་ཀྱིས་གདན་སར་བསམས་
ནས་བཞེངས་པའི་གཟད་ཐང་སྐྱའི་གཙུག་ལག་ཁང་དུ་གདན་དྲངས་པའི་ཆོས་རབ་ཏུ་གཡོས་ཤིང་། ཡོན་ཆབ་ལས་པདྨའི་སྡོང་བུ་སྐྱེ་བ་སོགས་ལྟས་ངོ་མཚར་བ་བྱུང་། ནངས་བར་པུར་སྦྱངས་པས་སྒྲ་དང་། འོད་དང་། འཇའ་ཚོན་དང་། མཆོད་རྟེན་ཡིག་འབྲུ་ལ་སོགས་པ་དཔག་ཏུ་མེད་པར་བྱོན་ཏོ། །གཙུག་ལག་ཁང་དེ་ནི་ད་ལྟ་རྗེས་ཙམ་དུ་སྣང་ངོ། །ཞིག་པོ་ལ་སློབ་མ་མང་ཡང་ཐུགས་སྲས་སུ་གྱུར་བ་ནི། རྟ་ལྷོན་ཇོ་ཡེས། མ་ཧཱ་ལྷུན་པོ། ཁས་པ་ཇོ་ནམ། དབུས་འཇོ་བསོད། བཟང་སྟོན་ཧོར་གྲགས། གཉིར་སྟོན་བླ་མ་ངང་དྲུག་ལས། །གཙོ་བོར་གྱུར་བ་རྟ་སྟོན་ཇོ་ཡེས་ནི། ཡབ་རྟ་སྟོན་ཇོ་འབུམ་ཞེས་བྱ་བ་གཡོ་རུ་སྟོད་ཀྱི་བདག་པོ་འཁོར་འབངས་དང་ཡུལ་གཞིས་འཛོམ་པ་ཞིག་ཡོད། དེ་འཁོར་བ་ལ་སྐྱོ་བ་སྐྱེས་ནས་གཡོག་བཞི་ཁྲིད་དེ་བྲོས། ལྷ་རྗེ་གླན་ཉ་ཚ་བའི་ཐུགས་སྲས་གཉིས་ཆུ་བོ་རི་བའི་སྤྱན་སྔར་བྱོན་དཔོན་གཡོག་ལྔ་ཀས་སྟབས་གཅིག་ཏུ་ཆོས་སྒོར་ཞུགས། སྔགས་རྙིང་མ་སྤྱི་དང་། ཁྱད་པར་རྫོགས་ཆེན་སྐོར་ལུགས་གཞུང་གདམས་ངག་དང་བཅས་པ་ལ་ཤིན་ཏུ་བྱང་ཆུབ། ཕག་མོ་གྲུ་བའི་སྤྱན་སྔར་ལམ་འབྲས་དང་ཕྱག་ཆེན། དབུར་སྟོད་བླ་མ་མཚར་སྟོན་ལས་ཕྱག་ཆེན་སྒང་ལུགས་ཀྱི་དོ་ཧ། ཟངས་རི་འགྲོ་རས་ལས་རས་ཆུང་བའི་ཆོས་སྐོར། ནང་སྟོན་མགོན་པོ་ལ་རྣམ་འཇོམས་དང་། ཕུར་བ་སོགས་མདོར་ན་བླ་མ་མང་པོ་ལས་ཆོས་རིས་མེད་གསན་པ་ཡིན་ཏེ། གཉོས་ཆུ་བོ་རི་པ་དང་། ཕག་མོ་གྲུབ་རྩ་བའི་བླ་མར་འཛིན། ཆུ་བོ་རིལ་སྒྲུབ་པ་མཛད་པས་གདུལ་བྱ་མང་དུ་འདུས། དེ་ལ་སྲས་རྟ་སྟོན་ཇོ་ཡེར་འདི་ཆུ་མོ་ལུག་ལ་བལྟམས། དེ་ནས་ལོ་བཞི་བ་ལ་གཅུང་བོ་ཇོ་བསོད་བཙས། འདིས་ཆུང་ངུ་ནས་ཞིག་པོའི་དྲུང་དུ་བྱོན། ཐུགས་ལ་བཏགས། ཇོ་ཡས་ཀྱིས་ལོ་བཅུ་གཉིས་བར་དམར་སྟོན་ལས་བདེ་མཆོག་དང་། ཕྱག་རྡོར་བདུད་རྩི་ཐིགས་པའི་སྐོར་ཞུས།
གཟུངས་རིང་ལ་བསྙེན་པ་ལོ་གཉིས་མཛད། ཡབ་དང་ལྷན་དུ་བདེ་མཆོག་གི་དབང་བརྒྱ་རྩ་བརྒྱད་ཞུས། ཁ་རག་སྟོན་སྙིང་གི་སར་སྒྱུ་འཕྲུལ་ལོ་གཉིས་ཉན། བླ་མ་རྩགས་དང་། སེ་དུར་ལུང་པ་གཉིས་ལས་རྫོགས་ཆེན་སྐོར་ལུགས་གཞུང་གདམས་པ་དང་བཅས་པ་ཞུས། དགུང་ལོ་བཅུ་དྲུག་པར་རྡོ་རྗེ་སེམས་དཔའ་ནམ་མཁའ་ཆེ་ལ་བཤད་པ་མཛད། བཅུ་དྲུག་གི་གཤམ་ན་ངམ་ཤོད་སྨད་དུ་བྱོན། ཡབ་ཀྱི་སློབ་མ་རྗེ་བཙུན་ཞབས་ལས་ཕྱག་རྒྱ་ཆེན་པོ་སྒང་ལུགས་གསན། ཟངས་རི་རྒྱ་རས་ལས་ལོ་རོངས་ཆུང་བའི་ཆོས་སྐོར། དགྱེས་རྡོར་མེས་ལུགས། འཇམ་དཔལ་གསང་ལྡན། བདེ་མཆོག་ལཱུ་ཡི་བ་དང་། མཚོ་སྐྱེས་རྡོ་རྗེའི་སྒྲུབ་ཐབས། ལམ་འབྲས་ཞམ་ལུགས། ཞི་བྱེད་ལུགས་གསུམ་ཀ་སོགས་མདོར་ན་གསར་རྙིང་རིས་མེད་ལ་ཐོས་པ་ཤིན་ཏུ་ཆེ་བ་ཡིན། རི་ཞིག་ན་ནང་སྟོན་ཇོ་འཁྱམས་ལས་ཕུར་བ་གསན་ནས་ཆུ་བོ་རིར་སྒྲུབ་པ་མཛད། ལོ་ཉེར་ལྔ་པའི་ཚེ་ཞིག་པོའི་དྲུང་ན་བྱོན་པ་ཡིན། དང་པོ་ཆོས་ཞུ་བའི་རྟོག་པ་མེད་དེ། ཆོས་ཀྱང་ང་རང་མཁས། གདམས་ངག་ཀྱང་ང་རར་ཆེ། ཁོང་སྙན་པ་དང་། གྲགས་པ་ཆེ་བར་འདུག་པ་དང་། གཏུང་པོའི་བླ་མ་ཡིན་པས་མཇལ་ཕྲད་ཀྱི་རྣམ་པ་ཞིག་བྱ་སྙམ་ནས་བྱོན་པས། ཞིག་པོ་བདུད་རྩི་འུག་སྐད་དགོན་པ་ན་བཞུགས་པ་དང་མཇལ། ཞལ་མཐོང་བ་ཙམ་གྱིས་གུས་པ་དཔང་མེད་དུ་སྐྱེས། ནངས་པར་ལོག་འགྲོ་ཙ་ན་སྐུ་དྲུང་དུ་འོང་བས་ཐུགས་ཀྱིས་གཟུང་བར་ཞུ་ཞུས་པས། ཁྱེད་མོས་སམ་གསུངས། ཤིན་ཏུ་མོས་པ་ཐོབ་ཞུས་པས། འོ་ན་ལས་འཕྲོ་ཡོད་པ་ཡིན་ད་ལྟ་ནས་སྡོང་། འཁོར་བའི་མཚན་ཉིད་ལ་རྟག་པ་མེད་ན་ཕྱིས་ཇི་ལྟར་འོང་ཆ་མེད་གསུངས། ད་རེས་ཆ་རྐྱེན་མེད་བྱས་པས། འདིར་འོང་བ་ལ་བརྒྱགས་ཕྱེ་ཁུར་བ་སུ་ཡང་མེད། ཁྱོད་གཅིག་པུ་ལ་ཆ་རྐྱེན་ཅི་འཚལ་གསུངས། དེར་ལོ་བདུན་གྱི་བར་དུ་ཞག་གཅིག་ཀྱང་མ་བྲལ་བར་བསྟེན། མཉེས་པ་གསུམ་གྱིས་སྲི་ཞུ་བྱས།
ཀུན་བྱེད་རྒྱལ་པོ་མ་བུ་གསུམ་སྐོར། བཤད་རྒྱུད་མདོ་བཅུ། འཁོར་བ་རྩད་གཅོད་ཀྱི་རྒྱུད་ལ་བཤད་རྒྱུད་སྡེ་བཞི། རྩ་འགྲེལ་རྒྱབ་ཆོས་མན་ངག་དང་བཅས་པ། རྩ་བ་བཅོ་བརྒྱད་ཀྱི་བཤད་སྲོལ་ལ་བབ་པ་གཞུང་དང་། གབ་པ་མངོན་བྱུང་མན་ངག་སྒོམ་སྡེབས་སུ་བཤད་པ། དེའི་སྒོམ་འགྲེལ་སྙིང་གི་ཉི་མ་དྲུག། ཡང་སྙིང་རིག་པའི་ཉི་མ་དྲུག། སྙན་བརྒྱུད་སྒྲོབ་ནག་པོའི་སྐོར། སྒོམ་ཡིག་ཆེན་མོ། རིག་ཉི། མིག་སྒྲོན། གདར་ཤ་གཟེར་བུ་རྣམས་དང་། གདམས་པ་སྙན་བརྒྱུད་སྐོར་ལ། སྐོར་ལུགས། རོང་ལུགས། ཁམས་ལུགས་ཀྱི་གདམས་ངག་ལག་ཁྲིད་དང་བཅས་པ་ལ་ནན་ཏན་ཆེར་མཛད། གསུང་གི་ཆུ་རྒྱུན་ལེགས་པར་འཐུངས་པས། བྱིན་རླབས་ཅིག་བར་དུ་ཞུགས། རྟོགས་པ་ཐོད་རྒལ་དུ་སྐྱེས་པས་འཇིག་རྟེན་གྱི་སྒྲོ་སྐུར་ལ་ཉམ་མིང་། ཚུལ་འཆོས་མེད་པའི་སྤྱོད་པ་སྐྱོང་། བླ་མ་ལ་ཤིན་ཏུ་གུས། ཅི་གསུང་དར་དུ་འདེགས་པས་དགོངས་པ་གཅིག་ཏུ་འདྲེས་ཏེ། བླ་མ་ཅི་མཉེས་བྱེད་པ་ཅི་བསམ་འགྲུབ་པར་གྱུར་ཅིག་གསུངས་པ་ལན་གསུམ་ཐོབ། སྤྱིར་བླ་མ་ཐམས་ཅད་ལ་ཞབས་ཏོག་མ་གྲུབ་པ་མེད། ཁྱད་པར་ཞིག་པོ་ལ་ཡུལ་གཞིས་ཐམས་ཅད་བཙོངས་ནས་སྤོང་དག་བྱས་པའི་ཆོས་འཁོར་ལན་བཞི་གཙུགས། སྔ་ཕྱི་བསྡོམས་པས་རྟ་བཟང་པོ་ཁོ་ནའང་བདུན་ཅུ་རྩ་བཞི་ཕུལ་ཞེས་གྲགས། གདམས་པའི་གསུང་སྒྲོས་ཐམས་ཅད་ཡི་གེར་བཀོད་པས་རྗེས་འབྲང་ལ་དྲིན་ཆེ། ཆེས་ཞུ་བའི་སྒྲོས་པ་ཆོད་ནས་ནགས་ཁྲོད་དམ། རི་སུལ་གཉན་པོ་མི་སྐད་བྱ་སྐད་མི་གྲག་པ་ཞིག་ཏུ་འདིར་སོང་དང་། འདིར་ཡོད་མེད་པ་ཞིག་བྱ་དགོས་སྙམ་པའི་སྙིང་སྟོབས་བསམ་གྱིས་མི་ཁྱབ་པས་དཔེ་ཆ་རྣམས་ཀྱང་ཡིག་ཆུང་ཟིན་བྲིས་འབའ་ཞིག་ཏུ་བྱས་ཏེ། བླ་མ་སློབ་དཔོན་གྱི་གདན་སའི་བྱ་བ་བཀལ་བས་གསུང་གཅོག་མ་ཕོད། འོན་ཀྱང་བླ་མའི་ཞབས་ཏོག་འབའ་ཞིག་བྱས་པས་སྒྲིབ་པ་ཆེན་པོ་ཆེ་དག། ཏིང་ངེ་འཛིན་ཀྱང་གོང་འཕེལ་
དུ་སོང་བས་རི་ཁྲོད་འགྲིམ་པ་ལས་ཆོད་ཆེ་བ་བྱུང་གསུང་། དེའི་རྒྱུ་མཚན་ཡང་། ཐང་སྐྱའི་ཐུགས་རྗེ་ཆེན་པོ་བཞེངས་པའི་ཚེ་ཟུར་མཁར་དུ་ཟངས་བཞུས་ཀྱི་ལས་ཟླ་བ་བཅོ་བརྒྱད་བྱས་པས་རྟོགས་པ་ཁྱད་པར་ཅན་སྐྱེས། སློབ་དཔོན་སྤྲུལ་སྐུའི་ཆིབས་པ་ཕོ་བ་ཕོ་དྲག་བཙང་པོས་ཁྱེར་བའི་ཚེ། རྡོར་ཐེབས་ཕུའི་སྣང་གསལ་བྲག་ལ་ཆོས་སྐྱོང་སྒྲུབ་པས་མགོན་པོས་ཞལ་གཟིགས། སྟོད་ལུང་དུ་བསོད་སྙོམས་ལ་བྱོན་པའི་ཚེ་རྨི་ལམ་དུ་ཕ་མ་དང་མཇལ་བས་སྡུག་བསྔལ་རང་སངས་ལ་སོང་། དེ་ནས་བཟུང་སྡུག་བསྔལ་རང་རྒྱུད་པ་སྐྱེ་མ་མྱོང་གསུངས། གདན་སའི་བྱ་བ་དང་། ཞིག་པོའི་ཕྲིན་ལས་བསྒྲུབ་པའི་ཕྱིར། རྒྱལ་ཁམས་ཀུན་ཏུ་འགྲོ་དོན་རྒྱ་ཆེན་པོ་དང་། ལྷ་སའི་ཇོ་ཤཱཀ་རྣམ་གཉིས་ལ་ཞབས་ཏོག་ལོ་དྲུག་མཛད་དེ། དྲུག་ཅུ་རྩ་བརྒྱད་པ་ལྕགས་ཕོ་སྟག་གི་ལོ་ཨོ་རྒྱན་པའི་འཁྲུངས་ལོ་ལ་གཤེགས་ཤིང་། སྐུ་གདུང་དང་རིང་བསྲེལ་མང་པོ་བྱོན་ཏོ། །འདིའི་གཅུང་པོ་ཇོ་བསོད་ནི། སྐུ་ན་ཆུང་དུ་ནས་ཞིག་པོའི་དྲུང་དུ་བྱོན། ཐུགས་ལ་བཏགས་ནས་སྨེས་ཕྱོགས་རྫོགས་པར་གནང་། ཁྱོད་ཆོས་ལན་ན་ཏན་བྱེད་པ་ཞིག་འདུག་པས་ངའི་བླ་མའི་རྩར་སོང་ཞིག་གསུངས་ནས། ལྷ་ཁང་པ་ཆེན་པོ་ལ་གཏང་། མདོ་སྒྱུ་སྨེས་གསུམ་རྫོགས་པར་ཐོག་མཁས་པའི་ཕུལ་དུ་ཕྱིན་པ་ཞིག་བྱུང་སྟེ་སུམ་ཅུ་རྩ་གཅིག་པ་ལ་མྱ་ངན་ལས་འདས་པས་ཕྲིན་ལས་ཧ་ཅང་མ་སྨིན་ཏོ། །རྟ་སྟོན་གཟི་བརྗིད་ནི། སངས་རྒྱས་དཔོན་སྟོན་གྱི་སློབ་མ་ཡིན། མཁས་པ་ཆེན་པོར་གྱུར་བས་གསང་བའི་སྙིང་པོ་ལ་ཊཱི་ཀ་རྒྱས་པར་མཛད། བརྒྱུད་པ་འདིའི་ལོ་རྒྱུས་ཕལ་མོ་ཆེ་ཡང་འདིས་མཛད་སྣང་། འོན་ཀྱང་གཡུང་སྟོན་པའི་ཁོག་དབུབ་དང་ཅུང་མི་གཅིག་པར་ཡོད། འདི་ཡན་ཆོད་དུ་སྒྱུ་འཕྲུལ་དང་། སེམས་ཕྱོགས་མཐའ་དག་ལ་མཁས་པར་གྲགས།། །།ཡང་གཡུང་འགྲེལ་དུ་འཕྲོས་དོན་མང་དུ་སྨོས་པའི་གཙང་བ་བྱི་སྟོན་དང་། སྒང་དྲི་ངས་པ་ཉེ་སྟོན་ཆོས་ཀྱི་སེང་གེ་གཉིས་ཀྱང་གསང་
བདག་སྒྲོ་ཕུག་པའི་སློབ་མ་ཡིན། དེ་གཉིས་ཀས་གཙང་ནག་འོད་འབར་ལ་གསུངས། དེས་མེས་སྟོན་མགོན་པོ། དེས་བླ་མ་སྲོང་། དེས་པཀྴི་ཤཱཀ་འོད་དེ། འདི་ཟུར་བའི་གདུང་ཡིན། སྐྱེ་བ་སྔ་ཕྱི་ཐལ་ལེར་དྲན་པའི་ཟུར་དབང་ཆེན་འོད་པོ་ཞེས་གྲུབ་པའི་དབང་པོ་དེ་ལ་སྲས་མོ་ལྔ་ཡོད་དེ། སྲས་མེད་ནས་གདུང་བ་ཡོད་པའི་ཚེ། པཎ་ཆེན་ཤཱཀྱ་ཤྲཱི་ཤིང་ཕོ་བྱི་བའི་ལོ་ལ་ཁྲོ་ཕུར་གདན་དྲངས་པའི་ཕྱིན་དབང་ཆེན་འོད་པོས་འུག་པ་ལུང་དུའང་སྤྱན་དྲངས། དེང་པཎ་ཆེན་གྱིས་འུག་པ་ལུང་འདི་གསང་སྔགས་ཀྱི་གནས་ཡོན་ཏན་དུ་མས་བརྒྱན་པར་འདུག །བྱང་ངོས་རི་རྒྱལ་བ་རིགས་ལྔའི་རང་བཞིན་དུ་སྣང་། བྱ་རི་དྭགས་ལ་སོགས་པ་འདི་དག་ཀྱང་འཕགས་པའི་སྤྲུལ་པར་འདུག །རབས་རེ་ལ་གསང་སྔགས་ཀྱི་ཆོས་སྒྲ་སྒྲོག་པ་རེ་འབྱུང་བས་རིང་པོ་མ་ཡིན་པར་ཁྱེད་ལ་སྲས་གཉིས་འབྱུང་བས་དེ་ལ་ངའི་མིང་ལས་གྲགས་པ་ཐོགས་ཤིག །བསྟན་པ་དང་འགྲོ་བ་ལ་ཕན་པར་འོང་གསུངས། དེ་ནས་དེ་བཞིན་དུ་བྱུང་བས། སྲས་ཆེ་བ་ལ་ཤཱཀྱ་མགོན་དང་། ཆུང་བ་ལ་ཤཱཀྱ་འོད་ཅེས་བཏགས། གཅེན་འདི་ཡང་ངོ་མཚར་ཅན་བྱུང་། གཅུང་ཤཱཀྱ་འོད་ནི་ཆུང་ངུ་ནས་མངོན་ཤེས་རྡོ་ལ་ཐབས་སུ་སྨྲ་ཞིང་ཆོས་ཐམས་ཅད་བརྡའི་སྒོ་ནས་སྟོན་ཤེས་པའི་བརྟུལ་ཞུགས་ཅན་ཞིག་བྱུང་། རྒྱལ་ཁབ་གོང་པ་བླ་མར་བསྟེན་ནས་ལབ་ཆོས་མཐའ་དག་གསན། བར་དོ་མངོན་སུམ་དུ་གཟིགས་པས་གཞན་གྱི་གནས་ལུང་བྱེད་སར་བྱོན་ནས་ཁྱོད་ཀྱི་གཤིན་པོ་གཤེད་དང་མ་ཕྲོལ། བྱང་ཆུབ་སེམས་ཀྱིས་མ་ཟིན་པའི་ཆོ་ག་ལ་དོན་མེད་དོ་གསུངས་ནས་གནས་ལུང་བསྐྱར་དགོས་པ་བྱུང་། ཉིན་ཅིག་ང་ལ་འགྱོད་པ་བྱུང་གསུངས་ཅི་ལགས་ཞུས་པས། ང་རིག་འཛིན་གྱི་ཚོགས་གྲལ་དུ་རྟག་པར་ཚུད་པ་ལ། ཕོ་བོ་ཤཱཀྱ་མགོན་ལ་ཚིག་རྩུབ་ཤོར་བས་དེའི་ནུབ་མོ་ནས་དམ་ཉམས་ཡིན་ཟེར་རིག་འཛིན་གྱི་གྲལ་དུ་མ་ཚུད་གསུངས་ནས་བཤགས་པ་མཛད། མི་ཉག་བྷ་རས་ལ་ཉེ་བ་དགྲ་རུ་ལངས་ནས་བོད་ན་མཐུ་སུ་ཆེ་དྲིས་པས། ཤཱཀྱ་འོད་བོ་ཆེ་
ཟེར་བ་ཐོས་ནས་ཆ་རྐྱེན་མང་པོ་བསྐུར་ཏེ། ཟླ་བ་བརྒྱད་ཀྱིས་ཆ་ནས་ཀྱང་མཐུ་ཞུ་བར་བཏང་བྱུང་བ་ལ། ང་ལ་མཐུ་མེད། ངའི་འཁར་བ་འདི་དགོས་ན་ཁྱེར་གསུངས་ནས་ཡིག་ལན་ཀྱང་མ་མཛད། བང་ཆེན་གྱིས་ལོ་རྒྱུས་བརྗོད་པས། ལྷ་རས་ཁྲོས་རེ་ངའི་དངོས་པོ་བཟུང་ནས་གདམས་ངག་མི་སྟེར་བ་ཟེར། ཕྱག་འཁར་བརྡབས་པས། དེའི་ཁོང་ནས་རྡོ་རྗེ་ལེགས་པ་ལྷ་བཞིའི་སྐོར་ཐོན། ཁོ་དགའ་སྟེ་བསྒྲུབས་པས། ཕ་ཚན་མང་པོ་རྩབས་ཆད། དེའི་སྡིག་སྦྱོང་དང་དགེ་རྩ་ལ་ལྷ་ཁང་དང་། མཆོད་རྟེན་བཞེངས། དྲིན་ལན་དུ་འབུལ་བ་མང་པོ་ཁྱེར་ནས་མི་ཉག་གྷར་ཉིད་ཀྱང་བྱོན་ཟུར་ཤཱཀྱ་འོད་དང་མཇལ། གསང་སྙིང་ལ་སོགས་པའི་ཆོས་མང་པོ་ཉམས་སུ་ལེན་ཞིང་། གཉིས་ཀ་བསྡེབས་ནས། ལྷོ་བྲག་མཁར་ཆུར་བྱོན། ཁོ་མཐིང་ལྷ་ཁང་དང་། སྤ་གྲོལ་སོགས་པའི་གནས་སུ་སྒོམ་ཞིང་བཞུགས་ཙ་ན། མངའ་བདག་ཉང་ཡབ་སྲས་དང་མཇལ། བཀའ་བརྒྱད་བདེ་འདུས་ལ་སོགས་ཏེ་ཉང་ལུགས་ཕལ་ཆེར་ཞུས། རང་གནས་སུ་ཕེབས། སླར་གྷ་རས་ན་རེ། བླ་མ་བཀའ་དྲིན་ཆེ། ངེད་ཧོར་ཡུལ་དུ་འགྲོ་བས་མི་གཅིག་གཏང་བ་ཞུ། དྲིན་ལན་ཞབས་ཏོག་བྱེད་ཟེར་ནས་གཤེགས། དེའི་ཚེ་ཧོར་ཡུལ་ན་ནུ་བོ་ཨ་རི་བྷོགས་རྒྱལ་ས་བཟུང་ནས་རྒྱལ་པོ་སེ་ཆེན་གན་རྒྱལ་སྲིད་མ་ཐོབ་སྟེ་དམག་འཁྲུག་གཡོ་བའི་སྐབས་སུ་ཡོད། མི་ཉག་གྷ་རས་ལ་སེ་ཆེན་གན་གྱིས། བོད་ལ་མཐུ་བྱ་བ་ཡོད་ཟེར་ནས་ཁྱོད་ཀྱིས་ཤེས་སམ་དྲིས། གྷ་རས་ན་རེ་ཤེས། གསད་པ་དང་། བསྐྲད་པ་དང་། འགུགས་པ་གསུམ་ཀྱང་བྱ་གསུངས། དེར་སེ་ཆེན་གྱིས་ལས་ཀྱིས་ཤི་བ་དང་འགྲིག་ན་གསད་པ་ཐེ་ཚོམ་ཆེ། འགྲོ་འདོད་པ་དང་ཐུག་ན་བསྐྲད་པ་ཡིད་གཉིས་ཟ། ངའི་སྒར་འདིར་དགྲ་བོ་ཁུག་ན་ཡོང་འདོད་པ་ཁོ་ལ་མེད་ངེས་ཡིན་པས་ཁུ་གཅིག་ཟེར། དེར་བླ་མ་འཕགས་པ་རིན་པོ་ཆེ་དཔང་པོར་བཞག་ནས། གྷ་རས་ཀྱིས་རླུང་འཁོར་གྱི་སྦྱོར་བ་བརྩམས་པས།
ནུ་བོ་ཨ་རི་བྷོ་ག་བརྟན་པ་བྲལ་ནས་བྱུང་། ད་དུང་ཡིད་མ་ཆེས་ནས་མཚོ་འདི་དང་། ཐང་འདིའི་དཀྱིལ་དུ་ཐོག་ཕོབ་ཅིག་ཟེར། གྷ་རས་ཀྱིས་དེ་དང་དེར་ཐོག་ཕབ་པས་ཡིད་ཆེས། སྔགས་པ་རྣམས་ལ་སྐྲག་པར་འགྱུར་ནས་བྱ་དགའ་ཆེན་པོ་བྱས། འདིས་ཚལ་གྱི་སློབ་མ་གཤིན་རྗེ་ལ་ནུས་པ་ཐོབ་པ་ཞིག་ཡིན་ཟེར་ཏེ། དེའང་ཡིན་མོད། དྲག་སྔགས་ཀྱི་སྦྱོར་བ་མཐར་ཐུག་པ་ཐུར་བ་ལས་རྙེད་པ་ཡིན། དེར་པཀྴི་ཤཱཀ་འོད་ཀྱི་སྟོན་པ་རཱ་ཧུ་བྱ་བ་གཅིག་བསྔགས་པས། གྷ་རས་དང་མཇལ། གནང་སྦྱིན་བཟང་པོ་བྱིན། མངའ་བདག་ཉང་གི་གཏེར་ཡིག་ཁ་བྱང་ན། གཙང་གི་སའི་ཆ་བྲག་རྡོ་རྗེ་ཆེ་བརྟན་ན་ཚེ་ཆུའི་གཏེར་ཡོད་པར་བཤད་པ་དེ། སྟོན་པ་རཱ་ཧུ་ལ་བསྐུར་ནས་བླ་མ་ཤཱཀ་འོད་ལ་འབུལ་དུ་བཅུག། དེ་དང་སྟགས་གཅིག་པར་སེ་ཆེན་གན་གྱི་ལུང་། ཤཱཀྱ་འོད་པ་དང་། ཤཱཀྱ་མགོན་པོ་ལ་བཟློག །རིམ་གྲོ་གང་དགོས་གྱིས་ལ་ཚེ་ཆུ་ཐོན་ལ་དེད་ལ་བསྐུར། དེའི་ཡོན་ཏན་འབྱུང་མོད། ཁྱེད་རྣམས་ཀྱི་སྐྱིད་སྡུག་ངས་ཤེས་པ་ཡིན། གཏོར་ཕྱེའི་བསྲེས་ལ་དངུལ་ཁྲེ་གཅིག་ཡོད། བྱ་བའི་གསེར་ཡིག་བྱུང་། དེར་རིམ་གྲོ་ཆེན་པོ་བྱས། གོང་མ་ནན་ཆེས། གསེར་ཡིག་པ་དང་ཐུང་བས་རྔོ་བརྒྱལ་བ་ཙམ་བྱུང་སྟེ། སྒྱུ་འཕྲུལ་གྱི་བརྒྱུད་པ་ལ་སྒྲ་འོད་ཟེར་གསུམ་མའི་གསོལ་འདེབས་མཛད་པའི་ནུབ་མོ་གཏེར་སྒོའི་ལུང་བསྟན་གསལ་པོ་ཐོབ། དེ་ནས་ཟུར་ཤཱཀྱ་འོད། གུ་རུ་ཁྱུང་གྲགས། དཔོན་ཆེན་ཤཱཀ་བཟང་། གསེར་ཡིག་པ་ཨ་ག་ཡ་ན་རྣམས་འཛོམ། ཁྲོམ་གཏེར་དུ་བྱས་པ་ལ། གཏེར་སྒོ་ལ་སྤུ་གྲི་རེག་ཆོད་ཀྱི་འཁོར་ལོ་འཁོར་ནས་འཛུལ་མ་ནུས། དེར་ཟུར་ཤཱཀྱ་འོད་ཀྱིས་གཟུད་པར་གསོལ། གཏེར་བདག་མ་ཆོད་པས་སྤུ་གྲི་རང་མལ་དུ་བསྡད་ནས་ཐམས་ཅད་ངོ་མཚར། གཏེར་ཁུང་ནས་གསོལ་བ་གཡེངས་པའི་དཀྱིལ་ན་སྦལ་བ་ཁ་མིག་དེང་དེང་། ལག་པ་གདེངས་པ་མཐོང་བའི་མོད་ལ་རླུང་གི་འཁྲུལ་འཁོར་བྱུང་ནས་ཐམས་ཅད་ཧ་ལས། དེར་བླ་མས་རཀྴའི་ཕྲེང་
བས་མནན་ནས། བདེན་པ་བདར་པས་རླུང་གི་འཁྲུལ་འཁོར་ཀྱང་ཞི། ཆུ་དར་གྱི་ཁེབས་བསལ་བས་ཟངས་ཀྱི་གའུ་གསུམ་སྤྲགས་ཀྱི་ནང་དུ་ཕོ་ཐོད་མོ་ཐོང་ཁ་སྦྱར་བའི་ནང་ན་ཐོག་སྔས་པས་རེག་མ་ཐག་རྡུལ་དུ་བུན་ལོང་འགྲོ་བའི་དར་ཟབ་མང་པོས་གྲིལ་བའི་རྟ་ཕག་ཞལ་སྦྱོར། རྡོར་སེམས་ཡབ་ཡུམ་སྒྲུབ་ཐབས་ཀྱི་ཤོག་དྲིལ་བཅུ་གསུམ་གྱི་དབུས་ན་ཚེ་ཆུའི་སྣོད་མུ་མེན་གྱི་བུམ་པ་སྣག་བུམ་ཆེ་ཤོས་ཙམ་པ་བྱུང་བས་ཐམས་ཅད་ངོ་མཚར་སྐྱེས། ཕུང་བླ་མས་བཞེས་ན་དགུང་ལོ་བརྒྱ་ཐུབ་རྒྱུ་ལ། ལྗགས་ཐོག་ནས་ཐུར་མས་ཕྲི་བས་རྟེན་འབྲེལ་འཕྱུགས། དེ་ཚས་མང་པོར་གྲིལ་ནས་གཉིད་མི་ལོག་པའི་བརྩོན་པས་རྒྱ་ནག་དུ་ཁྱེར་རྒྱལ་པོ་སེ་ཆེན་གན་གྱིས་གསོལ་བས་ལོ་བརྒྱ་འཚོ་བར་གྲགས། དེའི་བྱ་དགར་དབུས་གཙང་ན་ཡོད་པའི་སྔགས་པ་ཐམས་ཅད་ཁྲལ་དམག་ལས་ཐར་དུ་བཅུག་པའི་འཇའ་ས་ལོངས། གོང་མའི་བླ་མ་རྣམས་དང་བྱས་པ་མཉམ་པའི་ཕྱིར་པཀྴིར་བཏགས། ཚེ་ཆུའི་ཡོན་དུས་ན་ཧོར་དུད་ཞེ་ལྔའི་ས་ཕུལ། མེས་འགྲིལ་གྱི་རི་ལ་དགོན་པ་ཆེན་པོ་འདེབས་པར་བཞེད་པ་ལ། ཀླུའི་གྲོང་ཁྱེར་ཆེན་པོ་ཡོད་པས་ཀླུས་ཞུ་བ་ཕུལ། རྒྱ་རྒན་གྱི་ཐད་མ་ཚོར་ཡོད་པས་ཚབ་ཏུ་ཕུལ་བ་ཀླུའི་ཆོ་འཕྲུལ་གྱིས་བསྐམས་སུ་བཅུག་ནས་དེར་སྔགས་སྡེ་ཆེན་པོ་བཏབ། མཁར་རྡོ་རྗེ་བྲག་གི་ལྟེ་བ་ལ་སྒྲུབ་པ་རྩེ་གཅིག་ཏུ་མཛད་ནས་དྲུག་ཅུ་རྩ་གསུམ་པར་གཤེགས། པུར་ལ་རེག་པས་མཛེ་ནད་གསོས་པ་བྱུང་ངོ། །འདིའི་སློབ་མ་རྟ་ནག་བདུད་འདུལ། དེས་མདའ་ཤཱཀྱ་འཕེལ། དེ་ལས་བྲུར་བྱམས་པ་སེང་གེས་གསན་དེ། འདིའི་ཡབ་ལ་ཟུར་ཉི་མ་སེང་གེ་ཞེས་བྱ་སྟེ་མེས་པོ་པཀྴིའི་སྲས་ཡིན། ཁྲོ་ཕུར་རབ་ཏུ་བྱུང་། ཁྲོ་ལོ་བྱམས་པ་དཔལ་གྱིས་མཚན་གསོལ། ཡོན་ཏན་དུ་མ་དང་ལྡན། ཁྱད་པར་བྱང་ཆུབ་སེམས་ཀྱི་རྩ་བ་བརྟན་པས་ཧོར་དམག་གི་དུས་མི་ཆེན་ས་མ་བྷ་རས་གསེར་མང་པོ་ཕུལ་བ་ལ། བདག་གསེར་མི་འདོད། མི་འཇིགས་པའི་སྦྱིན་པ་འཚལ་བར་ཞུ་བྱས་ནས་འགྲོ་བ་མང་པོ་སྲོག་སྐྱོབས། ཁྲོ་ཕུའི་འབུམ་ཆེན་རྩིག་དུས་ཆུ་ཤིན་ཏུ་དཀོན་པ་ལ་
མཐུ་རྩལ་གྱིས་ཆར་རྒྱུན་ཆེན་པོ་ཕག། སྟོང་ཧོར་གྱིས་ས་སྐྱ་མིང་མེད་དུ་གཏོང་བར་བརྩམས་དུས། གོང་མ་མཆོད་ཡོན་གྱི་ལུང་དང་། དཔོན་ཆེན་ཀུན་གཞོན་གྱི་བཅའ་ཧུ་བྱུང་བ་ལྟར། དྲག་པོ་མངོན་སྤྱོད་ཀྱི་ནུས་པས་དམག་ཁྲི་ཚོ་གསུམ་གངས་དབྲག་ཏུ་སྲོག་གི་རྒྱུ་བ་འགགས་པས་སུ་བསྟན་ལའང་བྱས་པ་ལྷག་པར་ཆེ། བར་དགའ་ལྷ་ཁང་སོགས་སྐུ་གསུང་ཐུགས་ཀྱི་རྟེན་དང་བརྟེན་པ་བསྐྲུན་པས་མཚོན་བསྟན་འགྲོའི་དོན་ལ་ཕྲིན་ལས་རླབས་ཆེ་བ་དེའི་སྲས་ཡིན།། །།དེ་ལ་ཟུར་བྱམས་པ་སེང་གེའི་དེ། ཐེག་པ་ཆེན་པོའི་རིགས་སད་པས་བྱིས་པའི་དུས་ནས་སྙིང་རྗེ་ཆེ་བ་ཞིག་ཡོད། གཞན་གྱིས་སེམས་ཅན་ལ་འཚོ་བ་བྱེད་པ་གཟིགས་ན་ཐུགས་ལ་ཁུར་ཆེན་པོ་འབྱུང་། ཁྲོ་ཕུར་རབ་ཏུ་བྱུང་ནས་མཚན་ཡང་དེ་ལྟར་ཐོགས། མཚན་ཉིད་ཀྱི་རིག་པ་དང་། ཁྲོ་ཕུ་བའི་ཆོས་ལུགས་མཁས་པར་མཁྱེན་ནས་དགུང་ལོ་བཅུ་བཞི་ལ་བཤད་པ་མཛད་པས་མཁས་པའི་གྲགས་པ་ཐོབ་ངེས་པ་ཡིན། གཡུང་སྟོན་རྡོ་རྗེ་དཔལ་བས་ཀྱང་། ཁོ་བོའི་བླ་མ་ཟུར་ཐམས་ཅད་མཁྱེན་པ་ཞེས་གསུངས། ཁྲོ་ཕུའི་ཆོས་ཁྲི་ལ་བཞུགས་ནས་གྲྭ་པ་རྣམས་ལ་མངོན་པ་གསུངས་པས་ཐོག་ཆོད། དགུང་ལོ་བཅོ་ལྔ་ལ་འུག་བྱ་ལུང་དུ་མདའ་ཤཱཀྱ་འཕེལ་ལས་གསང་སྙིང་གསན་སྦྱངས་མཛད་པས་མཁས་པའི་དབང་པོར་གྱུར། བཅུ་བདུན་ལ་རྒྱུད་ཀྱི་རྣམས་གཞག་མཛད་ནས་ཆོས་གཞི་བཟུང་། བཅུ་དགུ་ལ་ལྕེ་སྟོན་སྒྲུབ་པ་འབུམ་ལས་སྒྱུ་འཕྲུལ་ལམ་རིམ་དང་། རྫོགས་ཆེན་གསན་པས་རྟོགས་པ་ཐོད་རྒལ་དུ་སྐྱེས། ཉི་ཤུ་ལ་ལ་སྟོད་ནས་བྷ་སྟོན་གཟི་བརྗིད་སྤྱན་དྲངས་ནས། སྒྱུ་འཕྲུལ་ཟུར་ལུགས་ཀྱི་ཕན་ནུས་ཟབ་གསུམ་གྱི་དབང་དང་། དགོངས་འདུས་རྩ་རླུང་སྐོར་ཞུས། ཟུ་ལུང་པ་གྲུབ་ཐོབ་བཤེས་གཉེན་ལས་མདོ་དབང་དང་། སེ་ལུགས་ཀྱི་ཞི་ཁོ་རྒྱས་འབྲིང་བསྡུས་གསུམ་གསན། ཐར་ལོ་ཉི་མ་རྒྱལ་མཚན་ལས་སྒྲ་ཚད། ཁྲོ་བུའི་སློབ་དཔོན་དཔལ་མཆོག་
ལས་རྡོ་རྗེ་ཕྲེང་བས་མཚོན་པའི་གསར་མ་རྒྱ་ཆེན་པོ། །བསམ་སྡིངས་གྲུབ་པ་དཔལ་ལས་ལམ་འབྲས། བླ་མ་ཡོན་ཏན་མགོན་ལས་ཕྱག་རྡོར་དང་། རྣམ་འཇོམས། དབོན་དཔལ་ཆེན་མགོན་ལས་བསྟན་སྲུང་དང་། སྨན་རྩིས་གཡུལ་རྒྱལ། ཤངས་པ་ཤཱཀ་འབུམ་ལས་གཤིན་རྗེ་དམར་ནག་དང་། ཀླང་སྡེའི་སྐོར་ལ་སོགས་ཏེ་མདོར་ན་བླ་མ་མང་པོ་ལས་རིག་གནས་ཕྱི་ནང་། སྡེ་སྣོད། རྒྱུད་སྡེ་མཐའ་ཡས་པ་ཞིག་གསན་ཞིང་། རྩ་བ་ཆོད་པར་སྦྱངས་ནས་གཙོ་བོར་ཐུགས་དམ་འབའ་ཞིག་ལ་བཞུགས། ཡི་དམ་མང་པོའི་ཞལ་གཟིགས། སྐུ་མདུན་ན་སུས་སླེབས་པ་ཡིན་ཡང་སྣར་བ་རང་སར་འགྱུར་ནས། ངེས་འབྱུང་དང་དད་པ། སྙིང་རྗེ་རང་དབང་མེད་པར་སྐྱེ་བ་ཞིག་ཡོད་པར་གྲགས། ལར་སྐྱེས་བུ་དམ་པ་འདི་་ལ་བོན་པོ་ཞིག་གིས་ཟས་ངན་སྦྱར་བས་དགུང་ལོ་ཉི་ཤུ་རྩ་བདུན་ལས་མ་བཞུགས་ཏེ་མཁྱེན་བརྩེ་ནུས་གསུམ་གྱི་ཡོན་ཏན་དཔག་པར་བཀག་པས་སྤྲུལ་པའི་སྐུར་ཡིད་ཆེས་སོ། །དེ་ལ་སློབ་མའི་ཚོགས་བསམ་གྱིས་མི་ཁྱབ་ཅིང་། སྒྱུ་འཕྲུལ་ལམ་རེམ། གསང་བའི་སྙིང་པོ། འགྲེལ་བ་སྤར་ཁབ། མདོ་དང་བཅས་པ་ཚད་དུ་རྫོགས་པའི་བཤེས་གཉེན་གཞན་ཕན་རྒྱ་ཆེན་སྤྱོད་ཅིང་གྲགས་པ་ཐོབ་པ་རང་ཡང་བཅུ་དྲུག་ཙམ་ཡོད་པ་ལས། གཙོ་བོར་གྱུར་བ་ནི་སྔ་ཚར་གྱི་ཐུ་བོ་གཡུར་སྟོན་རྡོ་རྗེ་དཔལ། ཕྱི་ཚར་གྱི་ཐུ་བོ་རྟ་ནག་སྒྲོལ་མ་བ་བསམ་འགྲུབ་རྡོ་རྗེའོ། །དེ་ལ་གཡུང་སྟོན་པ་ནི། གདུང་རུས་གླ་ན། ཤིང་ཕོ་སྤྲེའུའི་ལོར་སྐྱེ་བའི་མྱུ་གུ་ཚོང་འདུས་སུ་བཟུང་། སྐུ་གཞོན་ནུ་ནས་མཁྱེན་པ་ཕུན་སུམ་ཚོགས། སྤྱིར་མཚན་ཉིད་ཐམས་ཅད་མཁྱེན་ཅིང་ཁྱད་པར་མངོན་པ་ཀུན་ལས་བཏུས་ལ་མཁས། སྔགས་གསར་རྙིང་ཐམས་ཅད་ལ་བློ་མཐུ་ཤིན་ཏུ་ཆེ། ཁྱད་པར་ཀརྨ་པ་རང་བྱུང་རྡོ་རྗེའི་སྲས་ཀྱི་དམ་པར་གྱུར་ཅིང་། ཟུར་བྱམས་པ་སེང་གེ་ལས་མདོ་སྒྱུ་སེམས་གསུམ་གྱི་མན་ངག་རྫོགས་པས་ཕྱོགས་འདི་ལའང་སྨྲ་བའི་དབང་ཕྱུག་ཆེན་པོར་གྱུར། གསང་བའི་སྙིང་པོ་ལི་ཊིྭ་ཀ་གསལ་
བྱེད་མེ་ལོང་མཛད་དེ་བཤད་རླབས་གཞན་ལས་ཆེ། ཟུར་བྱམས་པ་སེང་གེས་ཤངས་པ་ཤཱཀ་འབུམ་ལས་གཤེད་སྐོར་གསན་པའི་ཕྱགས་ཕྱིར་འབྲེངས་ནས་སློབ། འཁྲུལ་འཁོར་ལས་སྦྱོར་སོགས་ལ་ཤིན་ཏུ་མཁས་ཤིང་མཐུ་ཆེ་བས། སླར་ཟུར་བྱམས་པ་སེང་གེའི་སྐུ་ཚེ་ལ་བར་དུ་གཅོད་པའི་ལྷ་ཁུད་བོན་པོ་ལ་གཤིན་རྗེའི་འཁོར་ལོ་བསྐོར་ནས་མི་ནོར་ཞིང་ཁང་དང་བཅས་པ་གཙང་པོ་ལ་སྦྱངས་ཏེ་རྨིང་མེད་དུ་བཏང་དུས། བླ་མའི་སྐུ་དགྲ་ཐུལ་པ་ཁོ་བོ་ཙམ། ཞེས་པའི་ཚིགས་བཅད་ཀྱང་མཛད། སྐུ་གཞོན་དུས་གོང་མའི་ལུང་གིས་རྒྱ་ནག་ཏུ་བྱོན། སྔར་འཇིག་རྟེན་གྱི་ཁམས་ནམ་གྲགས་པ་ཙམ་གྱི་མདོས་གཏོར་ཞིག་མཛད། ཡུལ་གྲུ་འགའ་ཞིག་ལ་ཐན་པ་ཆེན་པོ་བྱུང་བས། གོང་མའི་ལུང་གིས་བསྔགས་ཏེ་ཆར་འབེབས་མཛད་པས་ཅུས་པ་མངོན་སུམ་དུ་ཐོན། གོང་མ་དགྱེས་ཏེ་བྱ་དགའ་ཆེན་པོ་བྱིན་པའི་ནོམ་པ་དང་བཅས་བོད་དུ་ཕེབས། དངོས་པོ་རྣམས་དོ་ཤེས་དང་གྲོགས་མཆེད་སུ་ལ་འདམ་བྱིན་པར་ཡུམ་གྱི་དོན་དུ་བླ་མ་དང་དགེ་འདུན་ལ་ཕུལ། བུ་སྟོན་རིན་པོ་ཆེའི་ཡང་སློབ་མར་གྱུར་ནས་དུས་ཀྱི་འཁོར་ལོ་ལ་ཤིན་ཏུ་མཁས། རྒོད་སྒྲོས་ཆུའི་གྲོད་པ་དུམ་བུར་བཅད་ཀྱང་ཆུ་མི་འབོ་བ་དང་། ལྕགས་བསྲེགས་ལ་ཤ་རྗེན་གྱིས་རེག་ཀྱང་མི་ཚིག་པ། རྩིག་པ་ལ་རྡོ་དྲུག་སྦྱོར་གྱི་ཞལ་བ་བྱས་པས་རྩིག་པ་བྲག་ཆེན་ལ་འགྱུར་བ་ལ་སོགས་པའི་རྟེན་འབྲེལ་མང་པོ་མཁྱེན། གཙོ་བོར་ཀརྨ་པ་རང་བྱུང་རྡོ་རྗེའི་དབུགས་འབྱིན་ཆེན་པོས་མན་ངག་སྤྱི་དང་ཁྱད་པར་རྫོགས་པ་ཆེན་པོ་ལ་ཉམས་བཞེས་མཛད། རྒྱ་ཆེར་རོལ་བ་ལས་བཤད་པའི་གཏེར་ཆེན་པོ་བརྒྱད་ཐོབ་པས། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པ་སྤོངས་པའི་གཏེར་ཆེན་པོ་ཡོངས་སུ་གྲོལ་ནས། མདོ་སྔགས་ཀྱིས་སངས་རྒྱས་ལ་ཁྱད་པར་ཕྱེ་བའི་བསྟན་པཅེས་མཛད་པ་གཡག་སྡེ་པཎ་ཆེན་གྱིས་གཟིགས། ཤིན་ཏུ་དང་ནས་དཔོན་སློབ་བཅོ་ལྔས་བྱོན་ཏེ་ཞབས་ལ་གཏུགས། སྐུ་ཚེའི་སྨད་ལ་ཚོགས་པ་ཆོས་ལུང་བ་ལས་བསྙེན་པར་རྫོགས་
མཚན་རྡོ་རྗེ་འབུམ་ཞེས་པ་རྡོ་རྗེ་དཔལ་དུ་བསྒྱུར། མོན་པ་གྲོ་དང་། ཕུང་པོ་རི་བོ་ཆེ། ར་དུམ་བྲག་ལ་སོགས་པར་བཞུགས་ཤིང་བཤད་པས་ཀྱང་གཞན་ལ་ཕན་པ་རྒྱ་ཆེན་པོ་མཛད། བརྒྱད་ཅུ་རྩ་གཉིས་པ་ཤིང་མོ་སྤྲུལ་ཕྱི་ལོར་ཞི་བར་གཤེགས་སོ།། །།རྟ་ནག་སྒྲོལ་མ་བ་བསམ་འགྲུབ་རྡོ་རྗེ་ནི། སྔགས་རྙིང་མ་ལས་དངོས་གྲུབ་བརྙེས་པ་རིམ་ཅན་གྱི་སྲས་སུ་རྟ་ནག་གནས་གསར་དུ་འཁྲུངས། ཟུར་བྱམས་པ་སེང་གེ་ལས་གསན་པ་རྒྱ་ཆེན་པོ་མཛད་ཅིང་ཁྱད་པར་སྒྱུ་འཕྲུལ་ལ་མཆོག་ཏུ་མཁས། གླ་ན་ཉ་ཚལ་བ་བསོད་ནམས་མགོན་ལས་སྒྱུ་འཕྲུལ་གྱི་དབང་ནོད། མཁྱེན་པ་དང་ཕྲིན་ལས་དཔག་པར་དཀའ་བ་ཡིན་ཏེ་དབེན་པ་འབའ་ཞིག་ལ་ཐུགས་གཏོད། །བྱེ་མ་སེང་གེར་རྫོགས་པ་ཆེན་པོ་སྙིང་ཐིག་ལ་ཐུགས་དམ་རྩ་གཅིག་ཏུ་མཛད་པས། རིག་པ་ཚད་ལ་ཕེབས་ཏེ་སངས་རྒྱས་ཀྱི་ཞིང་ཁམས་རྒྱ་མཚོ་དང་མཉམ་པ་ཉིད་དུ་སྤྱོད། ཡང་དབེན་པའི་ཟུར་ཤཱཀྱ་འབྱུང་གནས་དང་། འུག་པ་ལུང་པའི་བླ་མ་སེང་གེ་པ་གཉིས་ཆུང་ཆུང་ནས་སྐུ་དྲུང་དུ་བཞག་ནས་ལེགས་པར་བསྐྱངས་པས་བླ་མ་འདི་མ་ཚིག་ལ་གཅིག་ཏུ་གུས་ཤིང་། ཟུར་བརྒྱུད་ལ་བཀའ་དྲིན་ཆེ། ཤངས་པ་ཀུན་མཁྱེན་ཞེས་གྲགས་པ་བླ་ན་གསལ་བ་དེའང་བྱིས་པའི་དུས་ན་བླ་མ་འདིས་དབང་མང་པོ་བསྐུར་ཞིང་བྱིན་གྱིས་བརླབས་པས་མཁས་པ་ཆེན་པོར་གྱུར་བ་སོགས་བྱིན་རླབས་བསམ་གྱིས་མི་ཁྱབ། དགུང་ལོ་བརྒྱད་ཅུ་རྩ་གཉིས་པ་མེ་པོ་འཐུག་གི་ལོ་གཤེགས་ཁར་སྲས་ལ། ང་བདེ་བ་ཅན་དུ་འགྲོ། ཁྱོད་ཀྱིས་ཀྱང་ངའི་ལོ་དང་མཉམ་པ་ཐུབ། དེ་ནས་བདེ་བ་ཅན་དུ་ཤོག་ཅེས་གསུངས་ནས་གཤེགས། དེ་ལ་ཟུར་བརྒྱུད་དང་། སྲས་བརྒྱུད་གཉིས་ལས་ཟུར་བརྒྱུད་ནི། ཟུར་ཏམ་ཤཱཀྱ་འབྱུང་གནས་ཏེ། འདིའི་ཡང་ཟུར་བཟང་པོ་དཔལ་ཞེས་བྱ་བའི་རིང་ལ་གོང་མ་བུ་ཡན་ཐུ་གན་གྱི་ལུང་དང་གནང་སྦྱིན་བླངས། སླར་གོང་མའི་ལུང་གིས་རྒྱ་ནག་ཏུ་འབྱོན་དགོས་པ་བྱུང་། དང་པོ་གོང་མ་རྒྱལ་པོའི་རིམ་གྲོ་བར་གྱུར་ལ་མཐུ་རྩལ་དང་ནུས་པ་ཤིན་ཏུ་ཆེ་བས་ལོ་ཉེས་
ལས་སྐྱོབ་པ་དང་། མདོས་ཟོར་ཐོག་སེར་ལ་སོགས་པས་ངོ་ལོག་ཆོམས་པར་ནུས། ཁྱད་པར་རྒྱལ་པོའི་ཕོ་བྲང་ཏའི་ཏུའི་སྟེང་གི་ནམ་མཁར་མི་མཐུན་པའི་མཚན་མ་སྤྲིན་ནག་པོ་སྡིག་པའི་གཟུགས་ཅན་བྱུང་བ་སུས་ཀྱང་བཤིག་མ་ནུས་པའི་ཚེ། རྒྱལ་པོའི་ལུང་གིས་སྐབས་དབྱེ་ནས་མ་མོ་འཁང་ཕབ་ཀྱི་མདོས་དར་ཁང་བཅོ་བརྒྱད་ཀྱིས་བཅིངས་པ་བཏང་། གཏོར་འཆམས་མཛད་པས་སྤྲིན་ནག་འཐོར་བ་སོགས་མཐའ་ཁོབ་ཀྱི་ཡུལ་དུ་དམ་པའི་ཆོས་ཀྱི་ཆེ་བ་ལན་མང་དུ་སྟོན་པས་གོང་མ་དད་དེ། ཡང་དག་ལྷ་དགུའི་དབང་དང་ཚེ་དབང་ཞུས། དངུལ་གྱི་ཐ་མག་དང་། དངུལ་བྲེ་བཅུ་གསུམ། ཕོད་ཁ་ཕྱེད་ཉིས་བརྒྱ་འདེངས་པའི་གོས་དར་གྱི་འབུལ་བ་ཕུལ། ཕོ་བྲང་ཏའི་ཏུར་སྔགས་སྡེ་བཙུགས། དེའི་དུས་ཀྱི་ལས་བཞིའི་ཕུར་བ་ཕོ་བྲང་ན་ཡོད་པར་གྲགས། དེ་ལྟར་ཟང་ཟིང་གི་རྫས་འབྱོར་བ་ལས་རྩ་རྒྱུད་གསང་སྙིང་། འགྲེལ་བ་སྤར་ཁབ། གསང་སྔགས་ལམ་རིམ། མན་ངག་དགུ་པ་ལ་སོགས་པའི་སྔ་འགྱུར་གྱི་ཆོས་སྡེ་ཉི་ཤུ་རྩ་བརྒྱད་དུ་བསྒྲུབས། སོ་སོ་ནས་སྟོང་ཕྲག་རེ་བཏབ་སྟེ་གྲྭ་པ་ལ་བཀྱེ། རྒྱུད་འབུམ་བཞེངས་པའི་ཆ་རྐྱེན་མང་པོ་བསྐུར་བ་སོགས་བསྟན་པ་ལ་ཕན་པ་རྒྱ་ཆེ། སླར་རྒྱལ་པོ་བུ་ཡན་ཐུ་རླུང་གི་ནད་ལ་ཚད་པའི་བཅོས་བྱས་ནས་གཤེགས། འདི་དུས་ས་སྐྱ་དང་ཟུར་ཚོ་རྣམས་གྲུབ་མཐའི་སྙིང་པོ་གཅིག་པས་འདྲིས་ཤིན་ཏུ་ཟབ་པ་ཡིན། རྒྱུ་དེས་ཟུར་བྱམས་པ་སེང་གེ་གཤེགས་པའི་ལོ་རྒྱུས་ས་སྐྱར་བསྐྱལ་བས། དེ་མ་ལེགས། ད་ཟུར་བཟང་པོ་དཔལ་རྒྱ་ནག་ནས་བོས་ཤིག་གསུངས། གཞན་རྣམས་ཀྱང་བགྲོས་ནས་ཉེ་གནས་འཇམ་དབྱངས་གདན་འདྲེན་དུ་བཏང་། དེས་རྒྱ་ནག་ཏུ་བརྟོལ་བའི་ཚེ་ཚད་པའི་ནད་ཀྱིས་བསྙུན་ནས་འགྲོངས་ལ་ཁད་ཡོད་དེ། མཁའ་འགྲོ་ཆོས་སྐྱོང་གི་བྱིན་གྱིས་བརླབས་ནས་ཅུང་དྲག་པའི་མགོ་བསྟན། དེའི་ཚེ་ཉིད་ཀྱི་གཟིགས་སྣང་ལ་རྒྱལ་པོ་བུ་ཡན་ཐུ་དང་མཇལ་ནས། ཁྱོད་བོད་དུ་འབྱོན་ན་གནད་སྦྱིན་ཇི་ལྟར་སྦྱིན་ཞེས་
གསུང་བ་ལ་ལན་ཞིབ་ཏུ་ཞུས་པས། ཅི་ཡང་མ་བྱིན་པར་འདུག་གསུངས་ནས་ཡལ། དེའི་ལོ་རྒྱུས་དཔོན་མོ་ཐའུ་ལས་ཐོས་ཏེ་ཁྱོད་མཐོང་བས་གོང་མ་དྲན་ཟེར་ནས་མཆི་མ་བྱུང་། སླར་དངུལ་བྲེ་བཅུ་བྱིན། རྡོ་རྗེ་སེམས་དཔའི་སྐུ་རྒྱ་ནག་ལི་མ་དང་། ཆོས་སྐྱོང་ལྕམ་དྲལ་གྱི་འཆམས་སྐུ་བཞེངས་པ་གདན་དྲངས་ནས་བོད་ལ་བྱོན་པའི་ཚེ། མགོན་པོས་བོད་ལ་ཞལ་གཟིགས་ནས་གོམ་པ་བདུན་འཕགས་པས། བསེ་འབག་གོམ་བདུན་མར་གྲགས། བོད་དུ་བྱོན་ནས་བསྟན་པའི་བྱ་བ་ལ་རྒྱུད་འབུམ་བཞེངས། ཆོས་སྐྱོང་བྲན་དུ་འཁོར། མ་འོངས་པ་མངོན་སུམ་དུ་ལུང་སྟོན། སླར་ཡང་གོང་མའི་ལུང་གིས་རྒྱ་ནག་ཏུ་གཤེགས་དགོས་པ་བྱུང་བའི་ཚེ། འབྱོན་པར་མི་སྤྲོ་བས། རྒྱལ་པོའི་ཕོ་ཉ་ཐེ་མུར་དར་དང་། གྷ་ར་ལ་དངུལ་བྲེ་ལ་སོགས་པ་བྱིན་ཏེ་སློག་ཀྱང་རྒྱལ་པོའི་ཆད་པ་འོད་ཟེར་འགྲོ་མ་འདོད། དེར་རང་དབང་ཐམས་ཅད་བདེ་བ་ཡིན། གཞན་དབང་ཐམས་ཅད་སྡུག་བསྔལ་ཡིན། ཞེས་པ་ལ་སོགས་པའི་ཞལ་གདམས་མཛད་ནས་རྒྱ་ནག་ཏུ་གཤེགས། སྤྱིར་དགུང་ལོ་སུམ་ཅུ་སོ་བརྒྱད་ལས་མ་བཞུགས་པ་དེའི་སྲས་ཡིན། དེ་ལ་ཟུར་ཧམ་ཤཱཀ་འབྱུང་འདིས་ཆུང་ངུ་ནས་ཡབ་མེས་ཀྱི་ཆོས་ལ་སྦྱངས་ཤིང་ལས་སད་པས། རང་ལོ་ལྔ་པར་ཡབ་རྒྱ་ཡུལ་དུ་གཤེགས་པའི་བསུ་བ་མི་ཆེན་དང་བཅས་པའི་དབུས་སུ་རྩ་རྒྱུད་ལ་བཤད་པ་ཐོར་ལོང་མཛད་པས་ཐམས་ཅད་ཧ་ལས། དགུང་ལོ་བདུན་པ་ནས་བཤད་གྲྭ་བསྐྱངས། བླ་མ་ཀུན་སྤངས་པར་དགེ་ཚུལ་དང་། ཆོས་རྗེ་བསོད་ནམས་གྲྭགས་པ་ལས་བསྙེན་པར་རྫོགས་པའི་མཚན་ཤཱཀྱ་འབྱུང་གནས་སུ་གྲགས། ཟུར་པཀིྴའི་སྲས་ཟུར་ཤཱཀྱ་སེང་གེ་ཞེས་བྱ་བ་གོ་ལུག་རྒྱལ་པོའི་ལུང་དང་། གནང་སྦྱིན་གསེར་བྲེ་ཆེན་སྲང་བག་ཅུ་མ་བཞི། དངུལ་དཀར་བྲེ་ཆེན་ཉི་ཤུ། གོས་ཕྱི་ནང་ཉིས་བརྒྱ་རྣམས་ཐོབ་ཅིང་། དབོན་མོ་ཐའུ་སོགས་པས་ཀྱང་བདོག་པ་རྒྱ་ཆེར་བྱིན་པས་ཟུར་བའི་བསྟན་སྲིད་ལ་ཕན་པ་རྒྱ་ཆེར་བཏགས་ལ། ཁྱད་པར་རྒྱལ་པ་ཟུར་པོ་ཆེའི་སྐུ་
ཆོས་ཀྱི་དུམ་བུ་བཞུགས་པའི་འཇམ་དབྱངས་ཀྱི་གསེར་སྐུ་ཤིན་ཏུ་མཚར་བ་བཞེངས་ནས་དཔལ་འུག་བྱ་ལུང་གི་རྟེན་གཙོར་མངའ་གསོལ། བཤད་གྲྭ་དང་སྒོམ་གྲཱའི་ཚུགས་ཁ་ཆེན་པོ་ཟིན་པར་བྱས། བདོག་པ་ལ་ཕོངས་པ་མེད་པས་བསྟན་པའི་རིམ་གྲོ་ལྷུར་ལེན། མཐོང་ན་མི་མཐུན་པ་མེད་པའི་གཟི་བྱིན་གྱིས། ཧོར་གྱི་མི་ཆེན་ཐེ་མུར་དར་ཀྱང་དད་པར་གྱུར་ནས་ཚེ་དབང་ཞུ་བ་ལ་སོགས་པའི་དང་བ་སྟོན་ནུས་པའི་སེམས་དཔའ་ཆེན་པོའི་ངང་ཚུལ་ལ་གནས་པ་དེ་དང་། ས་བཟང་ལོ་ཆེན། རྒྱལ་བ་གཡུང་། འཇམ་དབྱངས་བསམ་འགྲུབ་རྡོ་རྗེ། ས་སྐྱ་བའི་གདུང་བརྒྱུད། ཟུར་བའི་དབུ་ཆེ་གྲགས་པ་ཆེ་བ་རྣམས་ཀྱིས་མཚོན། བོད་དབུས་གཙང་གི་མཁས་བཙུན་བཟང་གསུམ་ཐམས་ཅད་ལ་གཏུགས་ནས་མཚན་ཉིད་སྡེ་གསུམ། གསང་སྔགས་གསང་རྙིང་ཐམས་ཅད་ཀྱི་གཞུང་དང་མན་ངག་ལ་ལེགས་པར་སྦྱངས། ཁྱད་པར་དུ་མངོན་རྟོགས་རྒྱན། སྤྱོད་འཇུག། དུས་ཀྱི་འཁོར་ལོ། །ཀུན་བྱེད་རྒྱལ་པོ། །སྒྱུ་འཕྲུལ་ལམ་རིམ། གསང་བ་སྙིང་པོ། འགྲེལ་བ་སྤར་ཁབ་རྣམས་ལ་ནན་ཏན་དུ་སྦྱངས་པས་མཁས་གྲུབ་ཆེན་པོར་གྲགས། དུས་ཕྱིས་མདོ་དབང་ཟུར་ལུགས་ཀྱི་བསྟན་པའི་བདག་པོ་འདི་ཁོ་ན་ཡིན། སྒྲོལ་ཆེན་བསམ་རྡོར་ལས་མདོ་དབང་གསན་པའི་ཚེ། རྒྱ་བོད་ཀྱི་ན་བཟའ། ཐབ་ཆས། ནས་ཁལ་ལྔ་བཅུ་སོགས་ཀྱིས་སྣ་དྲངས་པའི་འབུལ་བ་བྱས་ཏེ་ལུང་ལ་གཡེན་ཕྱག་བཞེས་མཐའ་ཆོད་པར་མཛད། གཏད་རྒྱ་ཁོ་ནའི་དོན་དུའང་གོས་ཡུག་ཆེན་དང་གསེར་གྱི་འབུལ་བས་མཉེས་པར་མཛད། ཤཱཀྱ་ཐུབ་པ་དང་། ཧེ་རུ་ཀ་རིགས་ལྔ་གཟིགས་སྣང་དུ་ཤིན་ཏུ་གསལ་བ་གཟིགས། འདུས་པ་མདོའི་ལྷ་ཐེམ། གཏད་རྒྱའི་འགྲེལ་བ་སོགས་མང་དུ་མཛད། མདོ་སྒྱུ་སེམས་གསུམ་གྱི་བསྟན་པ་ལ་བྱ་བ་རྒྱ་ཆེན་པོ་མཛད་ཅིང་། སྒྲོལ་མ་བའི་སྲས་སངས་རྒྱས་རིན་ཆེན་དང་། གཉལ་བ་བདེ་ལེེགས་པ་ལ་སོགས་ཏེ་བསྟན་པའི་གསལ་བྱེད་དུ་གྱུར་བའི་
སློབ་མ་མང་དག་བསྐྲུན་ནས་དགུང་ལོ་སུམ་ཅུ་སོ་བརྒྱད་པ་ལ་གཤེགས། གཉལ་བ་བདེ་ལེགས་ཀྱི་ཆོག་ཁྲིགས་ཀྱང་ཡོད་དོ།། །།ཡང་སྒྲོལ་ཆེན་པོའི་སྲས་བརྒྱུད་ལྟར་བྱས་ན། སྲས་སངས་རྒྱས་རིན་ཆེན་རྒྱལ་མཚན་དཔལ་བཟང་པོ་ཞེས་གྲགས་པ་དེ་ཉིད་ཡབ་ཀྱི་ལྔ་བཅུ་རྩ་དྲུག་པ་ལྕགས་ཕོ་སྟག་ལ་གནས་གསར་དུ་འཁྲུངས། མི་རྣམས་ཀྱིས་ཁྱེད་ཀྱི་སྲས་འདིས་ཕན་ནི་མི་ཐོགས། དེ་ཙམ་གྱི་གཅིགས་ཀྱིས་ཅི་བྱ་ཟེར་བས། འགྲོ་བ་ལ་ཕན་ཐོགས་པ་གཅིག་འོང་གསུངས། དགུང་ལོ་དྲུག་པ་ལ་གསང་བ་སྙིང་པོའི་རྒྱུད་ཐུགས་སུ་ཆུད། ཟུར་ཤཱཀ་འབྱུང་བའི་སྤྱན་སྔར་བྱོན། ངའི་བླ་མའི་སྲས་ཞེས་གཅེས་པར་བསྐྱངས་པས་རྒྱུད་བཟུང་བ་དེ་བསྙེལ། ཡང་ལོ་བརྒྱད་ལོན་པན་བསྐྱར་ཏེ་བཟུང་། ཆོ་ག་ཕྲིན་རྣམས་ཡབ་ཀྱིས་བསླབས་པས་ལོ་བཅུ་བཞི་བར་གཞན་ལ་དབང་བསྐུར་བའི་སློབ་དཔོན་ཕེར་བ་བྱུང་། ཡབ་ལས་སྒྱུ་འཕྲུལ་གྱི་ཆོས་སྐོར་རྣམས་ཐུགས་སུ་ཆུད་པར་མཛད། དང་རབ་ཏུ་བྱུང་ནས་མཚན་ཉིད་ཀྱང་སྐྱོང་། གསར་མིའི་རྒྱུད་སྡེའང་སློབ་པ་ཡིན་ཞུས་པས། རེ་ཞིག་མི་རུང་། གཟོད་རབ་ཏུ་བྱུང་བས་ཆོ་ག་གསུངས། དེར་མ་གཅིག་ཞིག་བདག་གིར་བཟུང་བས་སྲས་ཁ་ཤས་འཁྲུངས། དགེ་བསྙེན་གྱི་རྟེན་ལ་བསླབས་སྦྱངས་རྫོགས་པར་མཛད་ནས་སླར་ཆོས་འཁོར་སྒང་དུ་ཆིག་རྫོགས་མཛད། སྐུ་ཤིན་ཏུ་བཙུན་པར་བཞུགས། སྒྱུ་འཕྲུལ་ལ་མཁས་པར་གྱུར་བས་དགུང་ལོ་བཞི་བཅུ་སྐོར་ལ་གསང་བ་སྙིང་པོ་ལ་ཊཱི་ཀ་ཆེ་བ་ཞིག་དང་། ལམ་རྣམ་བཀོད་ལའང་རྣམ་བཤད་ཆེན་པོ་ཞིག་མཛད། དེ་བཞིན་དུ་ཕྲིན་ལས་བཤར་བ་བརྒྱད་ལས། ཁྲོ་བོ་ལ་མངོན་པར་རྟོགས་པ་རྒྱས་པ་དང་། གནས་ལུང་ལའང་ཆོ་ག་རྒྱས་པ་ཞིག་མཛད། ཡབ་དང་ཐུགས་སྲས་མཐུན་པ་རྡོ་རྗེ་སོགས་ལས་མན་ངག་མང་དུ་མཉན་ཞིང་ཉམས་སུ་བསྟར། དགུང་ལོ་བདུན་ཅུ་པ་ལ་འགོས་ལོ་ཡེ་བཟང་རྩེ་བ་རྗེས་སུ་བཟུང་སྟེ། འདི་ལྟར་སྒྱུ་འཕྲུལ་ཞི་ཁྲོའི་དབང་དང་། སྒྱུ་འཕྲུལ་གྱི་ཚེ་དབང་། དོང་སྤྲུགས་ཀྱི་དབང་། ཚེ་བདག་དང་། ཡང་དག་མེ་གཅིག་གི་དབང་།
རྣ་བོ་བའི་ལུགས་ཀྱི་རྟ་མགྲིན་དང་། ཟླ་རྒྱལ་མའི་ལུགས་ཀྱི་རྗེས་གནང་། ཕུར་པས་ལུགས་ཀྱི་དབང་དྲག་པོའི་རྗེས་གནང་དང་བཅས་པ། སེམས་སྡེ་བཅོ་བརྒྱད་ཀྱི་རིག་པའི་རྩལ་དབང་། གསང་སྙིང་རྒྱུད་འགྲེལ་བ་དང་བཅས་པའི་བཤད་པ། ལམ་རྣམ་པར་བཀོད་པའི་ཊཱི་ཀ་ཉིད་ཀྱིས་མཛད་པའི་ཐོག་ནས་བཤད་པ་རྒྱས་པ། གཞན་སྒྱུ་འཕྲུལ་གྱི་ཁོག་གཞུང་བཞི་བཅུ་ལ་སོགས་པའི་གཞུང་ཆུང་བཞི་བཅུ་ཙམ། མདོ་དགོངས་པ་འདུས་པ་དང་། དེའི་རྩེ་བའི་རྒྱུད་ཀུན་འདུས་དང་། གནུབས་ཆེན་གྱི་མདོ་འབྲེལ་མུན་པའི་གོ་ཆ། སྒྱུ་འཕྲུལ་བརྒྱད་ཅུ་པ་དང་བླ་མ་གཉིས། ཡང་དག་རྩ་བའི་ལུང་རྣམས་ཀྱང་གནང་། སྙིང་ཐིག་སྤྲོས་བཅས་ལ་སོགས་པའི་དབང་བཞི་དང་། མེ་ལོང་པས་མཛད་པའི་ཡི་གེའི་སྟེང་ནས་ཁྲིད་ཡིག །རྫོགས་ཆེན་ཨ་རོའི་མན་ངག་ཀྱང་ཁྲིད་དུ་མཛད། དེ་བཞིན་དུ་བྱང་སེམས་ཡེ་རྒྱལ་བ་ནས་བརྒྱུད་པའི་ཐུགས་རྗེ་ཆེན་པོའི་སླར་ཁྲིད་ཀྱང་གནང་སྟེ། རྒྱུ་མཚན་དེ་ལ་བརྟེན་ནས་འགོས་ལོ་ཡེ་བཟང་རྩེ་བས། གསང་སྔགས་རྙིང་མ་ཞེས་གྲགས་པའི་ཕྱོགས་ལ་ལྷག་པར་མོས་པ་ཐོབ་ཅིང་། ཆོས་སྤོང་བའི་སྒྲིབ་པས་མ་སྦགས་ཙམ་མོ། །ཞེས་ཐོས་པའི་ཕ་རོལ་ཏུ་སོན་པའི་མཐར་ཐུག་དོན་དང་ལྡན་པར་སོང་བ་ཡིན་ཞེས་ངེས་པ་བརྟན་པའི་ཐ་ཚིག་གོ། དེ་ལྟར་ཆོས་རྗེ་སངས་རྒྱས་རིན་ཆེན་པས་བདུན་ཅུ་རྩ་གཉིས་པ་ལྕགས་མོ་གླང་གི་ལོ་ལ་དབུས་སུ་ཕེབས། གོང་བོ་རིའི་བསམ་གཏན་གླིང་དུ་དབང་གྲགས་པ་རྒྱལ་མཚན་གྱི་ཞབས་ནས་བཏེག། འདུས་པ་མདོ་ལ་སོགས་པའི་དབང་མང་པོ་དང་། གསང་སྙིང་ལ་སོགས་པའི་བཤད་པ་དང་ལུང་མང་པོ་བྱིན། བརྒྱད་ཅུ་རྩ་གཉིས་པ་ལྕགས་མོ་ཕག་གི་ལོ་ལ་གཙང་དུ་སྐུ་གཤེགས། ཟུར་ཆུང་བ་འཁྲུངས་ནས་དུས་འདི་ཡན་ཆད་ལ་ལོ་བཞི་བརྒྱ་དང་བཅུ་བདུན་སོང་། །ཡང་སྒྲོ་ཕུག་པ་ཆེན་པོའི་སློབ་བརྒྱུད་འཕྱོང་རྒྱས་རྒྱ་སྨན་པ་སངས་རྒྱས་གྲགས་ཞེས་བྱ་བ་ནི། རུས་གཉལ། ཡུལ་རྒྱ་སྨན་སྟག་རྩེ་སར་འཁྲུངས། གཞོན་
རུའི་དུས་ཛམ་བྷ་ལ་བསྒྲུབས་པས་ཞིང་ཆུང་ཞིག་ཡོད་པ་དེའང་ཆུས་ཁྱེར། བྱ་བྲལ་ལ་བྱོན་པས་སྡུ་གུ་དོར་ཕྱུག་པོ་མཛེས་ཁྱེར་བ་ཞིག་གི་རོ་ཁུར་མི་མ་བྱུང་བར་འདུག། སྙིང་རྗེ་དྲག་པོ་སྐྱེས་ཏེ་རྟོག་མེད་མཛད་ནས་རོ་ལས་བྱས་པས་མལ་འགྲམ་ནས་གསེར་མང་པོ་བྱུང་། དེ་ཛམ་བྷ་ལས་དངོས་གྲུབ་བྱིན་པར་འདུག། སླར་ལོག་སྟེ་གྲ་གྱི་ཁང་དམར་དུ་ཁྱུང་པོ་ཁྲོ་བོར་ཐུག། ཁོང་ཡང་དག་སྒྲུབ་པའི་ཕྱག་ཕྱིར་སྒྲུབ་པ་མཛད་པས། ཡང་དག་མར་མེ་དགུ་པའི་ཞལ་གཟིགས། དེ་ནས་གཅང་དུ་བྱོན། གསང་བདག་སྒོ་ཕུག་པའི་སློབ་མ་བྱ་ཆེན་པོའི་དཔོན་པོ་ཞིག་ལ་མོད་དང་སྒྱུ་འཕྲུལ་ལ་སོགས་པའི་གསན་པ་མཛད། དེར་ཕྱུག་པོ་ཞིག་གིས་ནས་ཁལ་བརྒྱ་ཐམ་པ་ཕུལ། ཆ་རྐྱེན་གྱིས་མི་འཐོགས་བར་བྱུང་བས་སྒྲོ་ཕུག་པའི་སློབ་མ་ཉང་ནག་མོད་བོ། །དེའི་སློབ་མ་ལྷ་རྗེ་མདའ་སེང་གེ་ལའང་སྒྱུ་འཕྲུལ་ཉན། མཁས་པ་ཆེན་པོར་གྱུར་ནས། རང་ཡུལ་དུ་རྡོ་ཐོག་ཐེལ་བཏབ། གཉལ་བ་ཞིག་པོའི་སློབ་མ་རྒྱ་འཆིང་དུབས་ཀྱང་རྡོ་ཐོག་པའི་ཞབས་ལ་གཏུགས་ཏེ་ཐོས་པ་མང་དུ་མཛད། ཁྱད་པར་དུ་འདི་ལ་སློབ་མ་མཁས་ཤིང་གྲུབ་པའི་དཔའ་བོ་སྐྱི་ཆོས་ཀྱི་སེང་གེ་བྱ་བ་ཞིག་བྱུང་། དེས་གོང་མ་སེ་ཆེན་གྱི་སྤྱན་སྔར་བྱོན་པས། རྒྱལ་པོས་ནུས་པ་བརྟག་པའི་ཕྱིར་ཐུབ་ཆོད་མཛད་དེ་མཆོད་རྟེན་གྱི་ནང་དུ་བཅུག་ནས་སྒོ་བརྩིགས་ཏེ་ལོ་གཅིག་བཞག། ལོ་དུས་ན་ཁ་ཕྱེ་སྟེ་བལྟས་པས། རྡོ་རྗེ་ལྟ་བུའི་སྐུར་གྱུར་འདུག་པས་ངོ་མཚར་ཆེན་པོ་སྐྱེས། རྡོ་ཐོག་པ་ལ་དར་རིངས་ཆེན་མོ་ལ་སོགས་པའི་དངོས་པོ་ཚན་ཆེར་གནང་། འཇའ་སས་བཅད་པའི་དགོན་གཞིས་ཀྱང་མང་དུ་ཡོད་དེ་དར་རྒྱས་ཤིན་ཏུ་ཆེ་བ་བྱས། ད་ལྟ་ནི་མིང་དུ་གྲགས་པའི་རྗེས་ཤུལ་ཙམ་སྟེ་བསྟན་པའི་འཕེལ་འགྲིབ་འདི་ཡང་སྐྱོ་བ་བསྐུལ་བའི་རང་བཞིན་ནོ།། །།སྐྱི་ཆོས་ཀྱི་སེང་གེའི་སློབ་མ་ནི། སྨན་ལུང་བ་ཤཱཀྱ་འོད་དེ། འདི་ནི་འབྱོར་བོ་ཁེ་རུའི་ཉང་སྟོན་ཆེན་པོར་སྲས་ལྔ་བྱུང་བ་ཡར་གྲུངས་སྤྲུལ་སྐུ་མཆེད་ལྔར་གྲགས་པའི་ཚེ་ཤོས་ཡིན། ཡུལ་ཡར་ཀླུངས་དགོན་པ་སྨན་ལུང་ཡིན་པས་དེ་སྐད་
དུ་གྲགས། ཚིགས་གཉིས་པ་ཆོས་ལྡན་པའི་གད་ནས་ད་ལྟ་ཆོས་ལྡན་ཞེས་པའི་དགོན་རོལ་འདི་ག་ཡིན། མཚན་དངོས་མགོན་པོ་རྡོ་རྗེ་ཞེས་བྱ་སྟེ་གྲུབ་པ་ཤིན་ཏུ་བརྙེས་པས་རྒྱད་ལ་སྐུ་རྒྱབ་གཏད་པའི་རྗེས་ཐིམ་གྱིས་སོང་བ་ད་ལྟའང་ཡོད། སྔར་འདིར་ཆོས་གྲྭ་ཆེན་པོ་ཆགས་པར་སྣང་སྟེ་རྒྱུད་འབུམ་གྱི་རས་མའང་ཤིན་ཏུ་མང་བར་མཐོང་། སྨན་སྒྲུབ་མཛད་པས་ཡུལ་འདི་སྡིག་པ་དང་གྲོག་སྦུར་ཀྱང་དཀོན་པ་ཡིན་ཞེས་ཐོས། སྲུང་མ་ཤིན་ཏུ་ནུས་པ་ཆེ་བས་ད་ལྟ་དགོན་ཤུལ་ཀྱང་སྲུང་བར་སྣང་སྟེ་ལྷ་འདྲེ་རྣམས་དམ་ཚིག་ལ་ཤིན་ཏུ་གནས་པ་ཞིག་གོ། ཚིགས་འོག་མ་གསུམ་ལ་སྐལ་ལྡན་པ། དུར་ཁྲོད་པ། དབང་རྒྱལ་བཞེས་གྲགས། དེ་ལས་འདིར་ཚིགས་དང་པོ་སྨན་ལུང་པ་ཤཱཀྱ་འོད་ཀྱིས་སྐྱི་ཆོས་ཀྱི་སེང་གེ་ལས་མོད་སྒྱུ་འཕྲུལ་རྣམས་ལེགས་པར་བསླབས། ཕྱིས་སླན་ཤཱཀྱ་འོད་པོའི་སྲས་གླན་མཁས་པ་བསོད་རྒྱས་ལའང་གསན་ནས། གསང་བ་སྙིང་པོའི་ཁོག་དབུབ་དང་། ཊཱི་ཀ་རྒྱུད་དོན་རྣམ་ངེས་ལ་སོགས་པ་ཡིག་ཆ་མང་དུ་མཛད། འདིའི་སློབ་མ་དྭགས་པོའི་སངས་རྒྱས་གོང་ལ་པ་ཡིན། དེ་ལ་དྭགས་པོ་ཉིད་དུ་སློབ་མ་གཉན་ལ་སོགས་པ་མང་དུ་ཐོན་ཞིང་། གཙོ་བོར་གོན་གྱོ་བདག་པོའི་བླ་མར་གྱུར་ནས་ཁམས་སུ་ཤིན་ཏུ་དར་བར་གྱུར་ཏོ། །ཡང་སྨན་ལུང་པ་ལས་དབོན་ཤཱཀྱ་འབུམ་པས་གསང་བ་སྙིང་པོའི་བཤད་པ་མཁས་པར་བསླབས། དེ་ལ་མཁས་གྲུབ་ཆོས་དཔལ་ཡབ་སྲས་གཉིས་ཀྱིས་ཀྱང་གསང་སྙིང་གི་བཤད་པ་ལེགས་པར་ནོད། སྨན་ལུང་པའི་བརྒྱུད་པ་དེ་དག་ནི་གཏེར་ཁ་གོང་འོག་ལའང་གནས་དུས་དེར་ཆོས་ཀྱི་བདག་པོར་གྱུར་བ་ཞིག་གོ།། །།སྐྱི་ཆོས་ཀྱི་སེང་གེའི་གདན་ས་བརྒྱ་ཡེ་ཤེས་མགོན་པོས་ཀྱང་། སྐྱེ་དང་གླམ་ཆོས་རྒྱལ་གཉིས་ཀ་ལ་གཏུགས་ནས་མདོ་དང་སྒྱུ་འཕྲུལ་མཁས་པར་མཁྱེན། དེའི་དཔོན་པོ་རྡོ་རྗེ་རྒྱལ་མཚན་ཞེས་བྱ་བ་གཞོན་ནུ་ལ་གསང་ཕུར་བྱོན་ནས་ཚད་མ་རྣམ་དེས་མཁས་པར་སྐྱངས། དེ་ནས་ཕུ་པོ་རྒྱ་ཡེ་ཤེས་མགོན་པོ་
ལས་མདོ་དང་སྒྱུ་འཕྲུལ་ལེགས་པར་བསླབས་ནས། འགྲེལ་བ་སྤར་ཁབ་གཞུང་དུ་བྱས་པའི་ཊཱི་ཀ། དབང་གི་ཆོག་ལ་སོགས་པར་མཛད། དེས་རང་གི་དཔོན་པོ་བླ་མཚུལ་རྒྱལ་བ་ལ་གསུངས། དེ་ལ་རི་གདོང་པ་ཤེས་རབ་རྒྱལ་མཚན་གྱིས་གསན། འདི་དྭགས་པོར་སྐུར་བ་པ་དཔོན་གཡོག་དང་སྔགས་པ་རྣམས་ལ་བཤད་པས་རེ་ཞིག་ན་དྭགས་པོའི་ཕྱོགས་ནའང་དར་བར་ཡོད་ཟེར། ཤེར་རྒྱལ་གྱི་སློབ་མ་ཞང་མཁར་བ་བསོད་ནམས་བཟང་པོ། དེའི་སློབ་མ་སློབ་དཔོན་བཀྲ་ཤིས་རྒྱ་མཚོ། འདི་ལ་རྡོ་རྗེ་རྒྱལ་མཚན་པའི་སྙིང་ཊཱིཀ་གི་ཐོག་ནས་བཤད་ལུང་དང་། ཕུར་བ་ལྷ་ནག་ལ་སོགས་པ་འགོས་གཞོན་ནུས་གསན་ཏོ། །ཡང་ཁམས་ལུགས་སུ་གྲགས་པ་ནི། སྤྱིར་གསང་བ་སྙིང་པོའི་རྒྱ་ཆེར་འགྲེལ་བ་སློབ་དཔོན་ཉི་འོད་སེང་གེས་མཛད་པ་ཡང་ཁམས་ནས་བྱུང་ཞིང་། བཻ་རོ་ཙ་ན་ལས་བརྒྱུད་པའི་བཤད་རྒྱུན་ཡིན་པར་ཤེས་ལ། ཁྱད་པར་སྒྲོ་ཕུག་པའི་སློབ་བརྒྱུད་ཀཐོག་པ་ནི། ཟུར་གསང་བདག་ཤཱཀྱ་སེང་གེའི་སློབ་མ་གཙང་སྟོན་འགྲོ་བའི་མགོན་པོ་ཞེས་བྱ་བ་མཁས་གྲུབ་ཆེན་པོ་ཞིག་བྱོན་ཏེ། དེའི་སློབ་མ་ཀ་དམ་པ་བདེ་གཤེགས་སམ། ཤེས་རབ་སེང་གེ་བྱ་བའི་རིང་ལ་བསྟན་པའི་ཆུ་མགོ་བརྙེས་པ་ཡིན། མཚན་གཞན་དུ་སྤོབས་པ་མཐའ་ཡས་ཀྱང་བྱ་སྟེ་འདི་ཕག་མོ་གྲུབ་དང་ཡུམ་སྤུན་དུ་གྱུར་ལ་འཁྲུངས་ཡུལ་ཡང་གཅིག་པ་ཁོ་ན་ཡིན། སྔོན་རབས་ལ་ཀྲྀ་ཀིའི་བུ་མོ་བདུན་གྱི་དང་པོ་དང་། གནས་བརྟན་བྷར་དྷྭ་ཛ། ཕལ་ཆེན་པའི་གནས་བརྟན་མུ་སྟེགས་ཀྱི་མཁས་པ་ཕྱིས་ནང་བར་གྱུར་བ། ཝཱ་རཱ་ཎ་སཱིར་ཆོས་རྒྱལ། ལོ་ཙཱ་བ་རྨ་རིན་ཆེན་མཆོག་ལ་སོགས་པའི་སྐྱེ་བ་དུ་མར་དྲན། བྱེ་བྲག་ཏུ་ཐལ་མ་ཐག་པའི་སྐྱེ་བར་བལ་པོ་བྷ་དནྟ་བྱ་བའི་རྣལ་འབྱོར་བ་ཞིག་མི་ཉག་རྒྱལ་པོའི་བླ་མར་གྱུར། དད་ཆེས་ནས་དེའི་དབུའི་བྱད་ཕྲེང་བའི་མདོ་འཛིན་ལ་བརྒྱུད་པར་མི་ཉག་གི་ཡུལ་ཐམས་ཅད་དུ་བཀར་བཏགས། རེ་ཞིག་ན་ཕྱིའི་རྒྱ་མཚོ་གཟིགས་སུ་བྱོན་
པས། རྒྱ་མཚོའི་འགྲམ་དུ་ཕྲུམ་བཏབ་སྟེ་བཞུགས་པའི་ཚེ་དུས་མིན་གྱི་རླབས་འཁྲུགས་ནས་མྱ་ངན་ལས་འདའ་བར་བསྐུལ། སླར་གདུང་རྒྱལ་པོས་སྤྱན་དྲངས་ཏེ་མཆོད་པར་བྱེད་པ་དང་། རྒྱ་གར་ནུབ་ཕྱོགས་ཀྱི་རི་བྲག་ཆེན་པོར་དྲང་སྲོང་ག་གཏི་བྱ་བའི་དྲུང་དུ་ནེ་ཙོར་གྱུར་ནས་རིག་སྔགས་བསླབས་ཏེ་ནུས་པ་ཅན་དུ་ཡོད་པའི་ཚེ། ཤར་ངོས་ནས་དཀར་པོའི་ཕྱོགས་ཀྱི་ཀླུ་གཅིག་དང་། ནུབ་བོས་ན་ནག་པོའི་རིགས་ཀྱི་ཀླུ་སྟོབས་ཅན་ཞིག་གནས་པ་ལས། ནག་པོའི་རིགས་ཀྱིས་དཀར་པོའི་ཕྱོགས་ལ་དམག་དྲངས་ནས་ནམ་མཁའ་ཐོག་སེར་དང་། སྤྲིན་ནག་གིས་ཁྱབ། ས་གཞི་སྒུལ་སྤྲུལ་ལ་སོགས་པའི་སྲོག་ཆགས་ཀྱིས་བཀང་ནས་བྱུང་བའི་ཚེ། ཀླུ་དཀར་པོས་ནེ་ཙོ་ལ་སྐྱབས་སུ་སོང་ངོ། །དེར་ནེ་ཙོའི་རིག་སྔགས་ཀྱིས་ནག་པོའི་སྟོབས་ཕམ་པར་བྱས་པས། དཀར་པོའི་སྟོབས་རྒྱས་ནས་རྒྱལ་ཁམས་ཀྱི་འབྲུ་བཅུང་འཕེལ་བར་བྱས་པ་དང་། རྒྱ་གར་དུ་མུ་སྟེགས་ཞི་བ་བརྩོད་པས་ཚར་བཅད་ཅིང་སློབ་དཔོན་ཞི་བའི་ལྷར་གྱུར་ནས་པཎྜི་ཏའི་དབུས་སུ་སྤྱོད་འཇུག་གསུངས་པ་སོགས་སྐྱེ་བ་མང་པོ་དྲན། སྔོན་རྒྱལ་པོར་གྱུར་བའི་ཚེ་བློན་པོ་གཅིག་གིས་དབྱེན་བྱས་པ་ལྕེ་གཅོད་དུ་བཅུག་པས་ད་ལྟར་ངག་མི་བདེ་བ་ཡིན་གསུང་ཞིང་ལས་འབྲས་ལ་གཅིག་ཤིན་ཏུ་ཆེ་བ་དེ་དང་། ཡང་འཁྲུངས་ཡུལ་ལས་མིང་ཆགས་པ་རིན་པོ་ཆེ་གཙང་སྟོན་པ་ཞེས་མི་བསྐྱོད་པའི་ཞིང་རྟག་པར་གཟིགས་ཤིང་ལུང་བསྟན་ཐོབ་པ། ལོ་ཙཱ་བ་ཡེ་ཤེས་མཆོག་དང་། རྒྱ་གར་ཕྱག་ན་ལ་སོགས་པའི་སྔོན་གནས་རྗེས་སུ་དྲན་ཞིང་། ཆོས་སྐྱོང་བྲན་ལྟར་འཁོལ་བ་ཞིག་དང་པོར་གྲོགས་མཆེད་ལ། ཕྱི་ནས་དཔོན་སློབ་ཏུ་གྱུར་བ་དེ་ལས་བརྒྱུད་ནས་མདོ་དང་སྒྱུ་འཕྲུལ་གྱི་བཤད་པ་ཀཐོག་ཏུ་འཕེལ་ཏོ། །དེ་ལ་འབྲི་ཆུའི་འགྲམ་སྤོམ་པོ་མ་པོར་དང་ཉེ་བར་མི་མ་ཡིན་གདུག་པ་ཅན། མངོན་སུམ་དུ་སྐྱེ་འགྲོ་ལ་འཚེ་བ་ཞིག་ཕ་ཝང་ལ་གནས་བཅས་ནས་ཡོད་དོ། དེ་འདུལ་བའི་དུས་ལ་བབས་ནས་ཕ་ཝང་
ཆོས་གོས་ཀྱིས་བཅིངས། གཙང་སྟོན་གྱིས་ཁྲིད། ཀ་དམ་པས་ཕྲེང་ལྕག་གིས་བདས་ཏེ་ཐག་རིང་པོར་བསྐྱལ་བས་ཕ་ཝང་ལ་ཕྱག་ཕྲེང་གི་རྗེས་ཤིན་ཏུ་གསལ་བ་ད་ལྟ་མངོན་སུམ་བར་ཡོད། དེ་ནས་ས་ཡུལ་ཡི་གེ་ཀ་འདྲ་བའི་ཐོག་ཏུ་དགོན་གནས་བཅས་པ་ཀཐོག་ཏུ་གྲགས། གཞི་འདུལ་བའི་ཚུལ་ཁྲིམས་ཀྱིས་བཟུང་བས་དགོན་པ་གཙང་ཞིང་དག། སྤྱོད་འཇུག་ལ་སོགས་སྤྱོད་ཕྱོགས་དར་བས་ཐེག་པ་ཆེན་པོའི་ལམ་སྲོལ་ཏུ་ཚུད། སྔགས་མཚན་ཉིད་གཉིས་ཀ་དར་ཞིང་ཁྱད་པར་མདོ་སྒྱུ་སེམས་གསུམ་གྱི་བསྟན་པའི་རྩ་བ་གནས་པ་ཡིན། ཕག་མོ་གྲུ་བས་ཀྱང་དག་སྣང་མཐའ་ཡས་པ་གཟིགས་ནས་ཆོས་མང་དུ་གསན། དེའི་སློབ་མ་སྤྱན་སྔ་བྱམས་པ་འབུམ་ནི་སློབ་དཔོན་ཛ་ལནྡྷ་རི་བའི་སློབ་མ་སྤྱོད་འཆང་དབང་པོ་ཡིན་ཏེ། འཕགས་པའི་ཡུལ་ནས་སོ་མ་ཛེ་ཀི་ཞེས་བྱ་བ་ཐུན་མོང་གི་དངོས་གྲུབ་ཐོབ་པ་ཞིག་བོད་དུ་འབྱོན་ཁར། མི་ཏྲ་ཛོ་ཀིའི་ཞལ་ནས། ཁྱོད་བོད་དུ་འགྲོ་ན་ཡུལ་ཀཐོག་བྱ་བར་སློབ་དཔོན་ཤཱནྟ་དེ་བ་དང་། བཛྲ་པ་ཎི་བོད་དུ་སྐྱེ་བ་བཟུང་བའི་གདན་ས་ན་ཀ་ཧྣ་པ་ཆེན་པོ་ཡོད་ཀྱིས་དེ་ལ་ཕྱག་བགྱིས། ཞེས་དཔོན་སློབ་གཉིས་ཀའི་ལུང་བསྟན་པས་ཞབས་ལ་གཏུགས། རྣལ་འབྱོར་གྱི་དབང་ཕྱུག་ཆེན་པོ་ཀརྨ་པཀྴིིས་ཀྱང་འདི་ལས་རབ་ཏུ་བྱུང་ཞིང་མན་ངག་རྫོགས་པ་ཆེན་པོའི་བཀའ་ཐམས་ཅད་གསན། དེ་བཞིན་དུ་པཀིྵ་དང་འཕགས་པ་གཉིས་ཀའི་བླ་མར་གྱུར་པ་ཙ་ཏི་སྤྱན་སྔར་མད་ཕུ་བ་བསོད་ནམས་འབུམ་ལ་སོགས་པ་མཁས་ཤིང་གྲུབ་པ་བརྙེས་པ་ཤ་སྟག་བྱུང་ཞིང་། དགོན་པ་འདིར་གྲྭ་བ་ཁྲི་ཚོ་བཅོ་བརྒྱད་འདུ་བའི་སྐབས་བྱུང་བས་དར་རྒྱས་ཤིན་ཏུ་ཆེ། གུ་རུ་ཆོས་དབང་གི་སློབ་མ་གྲུབ་ཐོབ་མ་ཎི་རིན་ཆེན་ཞེས་པའང་འདི་ཉིད་ཡིན་ཟེར་ཏེ་བརྟག། རྙིང་མ་རྒྱུད་འབུམ་གསེར་བྲིས་སུ་གནས་པ་སོགས་མདོ་ཁམས་ཀྱི་ཕྱོགས་ལ་སྔ་འགྱུར་བསྟན་པའི་རྩ་ལག་ཆེན་པོར་གྱུར་ཅིང་། ད་ལྟའང་བཀའ་གཏེར་གཉིས་ཀའི་སྲོལ་ཤིན་ཏུ་
དར་བ་ཡོད་དམ་སྙམ་མོ། །ཡང་རོག་ཤེས་རབ་འོད་ལས་ཀྱང་མདོ་སྒྱུའི་བཤད་བཀའ་ཤིན་ཏུ་དར་བར་བྱུང་སྟེ། ཤེས་རབ་འོད་འདིས་དང་པོར་རོག་སྟོན་བཙན་པོ་ལས་སོ་ལུགས་ཀྱི་མདོ་དང་སྒྱུ་འཕྲུལ་དང་སེམས་ཕྱོགས་གསན། ལྷ་བ་དྲེས་མ་གོང་པ་ལས་མདོ་དང་སྒྱུ་འཕྲུལ་སྐྱོ་ལུགས། ལྷབ་ཀྱི་ཟུར་ཆོས་པ་སློབ་དཔོན་ཡམ་ཤུད་དངོས་གྲུབ་ལས་མདོ་དང་། སྒྱུ་འཕྲུལ་ཟུར་ལུགས། ཡང་སྒྲོ་ཕུག་པའི་སློབ་མ་གནུབས་སྟོན། དེས་ཁ་རག་སྙིང་པོ། དེས་ཡམ་ཤུད། ཡང་ཁ་རག་སྙིང་པོས་སྲས་པདྨ་འབར། དེས་རོག་ཤེས་རབ། ཡང་སོ་དར་མ་སེང་གེ་ལས་སྒྱུ་འཕྲུ་མཆན་མངས་ཞེས་སྔར་མཆན་བུས་ཊཱི་ཀ་འཆད་པའི་སྲོལ་ཡོད་པ་དེ་གསན། ཡང་ཆུ་བར་གྱི་གླན་ཤཱཀྱ་བཟང་པོ་ལས་བརྒྱུད་པ་དང་། ལྷ་རྗེ་ཉ་རི་བའི་སློབ་མ་ཉང་ནག་མདོ་པོ་ལས་བརྒྱུད་པ་སྟེ། མདོར་ན་བླ་མ་འདིས་ལུགས་ཐ་དད་པ་མང་པོ་གསན་ཞིང་། སྒྱུ་འཕྲུལ་གཞི་ལམ་འབྲས་གསུམ་གྱི་སྟོང་ཐུན་དང་། ལམ་རྣམ་བཀོད་ཀྱི་ཊཱི་ཀ་བརྩམས། དེས་སྙེ་མདོ་ཐམས་ཅད་གཟིགས་པ་ཞེས་གྲགས་པར་བཤད་ཅིང་། དེས་ཀྱང་སྙིང་ཊཱི་ཀ་དང་། ལམ་རྣམ་བཀོད་ལ་མཆན་བུ་ཞིབ་པར་མཛད། །རོག་གི་གདུང་བརྒྱུད་རྣམས་ལའང་དབང་དང་རྒྱུད་ཀྱི་བཤད་པ་ཤིན་ཏུ་དར་བར་བྱུང་ངོ། །དེ་བཞིན་དུ་གཙང་སྟོད་མང་དཀར་དུ་ཡང་སྟོད་ཟུར་བ་ཞེས་གྲགས་པ་རིམ་པར་བྱུང་ནས་བཤད་སྒྲུབ་ལེགས་པར་མཛད། དེས་ལ་སྟོད་ལྷོ་བྱད་ཐམས་ཅད་དུའང་མེ་མཆེད་པ་བཞིན་གྱུར་བས། བྱང་དུ་མེས་སྟོན་འབྱུང་གནས་འོད་ཅེས་པ་དང་། སྣར་སྟོན་སེང་གེ་འོད་ཅེས་པ་དག་བྱང་ཏར་ལ་མོ་པ་ཡོན་ཏན་དབང་ཕྱུག་ཅེས་བྱ་བ་ལ་སོགས་པའི་བཤད་པ་ཡང་ཐོ་རེ་ལོང་ཡོད་པ། གཞན་ཡང་དན་བག་ཏུའང་སྒྱུ་འཕྲུལ་གྱི་བཤད་པ་རིམ་པར་བྱུང་བས་རྒྱལ་བ་ཀློང་ཆེན་པས་དེར་གསན་པ་མཛད་ཅིང་། མདོར་ན་ཟུར་མེས་དབོན་གསུམ་ལས་སློབ་མའི་
རྣམ་གྲངས་ཇི་ལྟར་མཆེད་པ་བཤར་གྱིས་བཏབ་པ་དང་། དེ་དག་ལས་མཆེད་པའང་གྲངས་མེད་པས་གང་གི་རིང་ལ་དར་རྒྱས་སུ་མཛད་པ་གསང་བདག་སྒྲོ་ཕུག་པ་ཆེན་པོ་དེ་གངས་རིའི་ཁྲོད་ན་གསང་བའི་བདག་པོ་སྔགས་ཀྱི་བསྟན་པ་སྤེལ་བའི་སླད་དུ་བྱོན་ཏོ་ཞེས་པ་དེའང་གྲགས་པ་དོན་དང་ལྡན་ནོ། །དུས་ཕྱིས་ནི་གདུལ་བྱུ་རྫོགས་པ་ལྟར་གྱུར་ནས་སྟོན་གྱི་ཆུ་བྲན་བཞིན་དུ་བལྟར་མི་མངོན་པ་ལ་ཕྱོགས་པའི་ཚེ། གནུབས་ཆེན་སངས་རྒྱས་ཡེ་ཤེས་ཀྱི་སྨོན་ལམ་ཕྲག་པར་བཟུང་བ་གཉོས་དར་རྒྱས་ཆོས་སྡིངས་པ་ཕྲིན་ལས་ལྷུན་གྲུབ་ཡབ་སྲས་ཀྱིས་སྔགས་རྙིང་མའི་དགེ་འདུན་འདུས་པའི་སྡེ་དབུས་རྒྱུད་ལ་ཆགས་པ་སྔ་བ་དཔལ་རི་ཐེག་པ་ཆེན་པོའི་གླིང་དུ་ཡུན་རིང་བོར་གཏན་ཆགས། ཐམས་ཅད་མཁྱེན་པ་པྲཛྙཱ་རསྨིའི་གདུང་། རྒྱལ་སྲས་རིན་པོ་ཆེའི་སློབ་མར་གྱུར་བ་གཤེས་གཉེན་རིན་ཆེན་དར་རྒྱས་ལའང་བཀའ་གཏེར་གྱི་ཕྱོགས་མང་དུ་གསན། ཁྱད་པར་དུ་གོང་རཱ་ལོ་ཙཱ་བ་གཞན་ཕན་རྡོ་རྗེ་ལ་སོགས་པའི་བླ་མ་མཁས་གྲུབ་དུ་མའི་ཞབས་ལའང་གཏུགས་ནས་སྙན་བརྒྱུད་དང་། གདམས་པའི་སྲོལ་ཁ་ཟིན། སྲས་ཀྱི་དམ་པ་འགྱུར་མེད་རྡོ་རྗེ་དང་། ལོ་ཙཱ་བ་ངག་དབང་ཆོས་དཔལ་གཉིས་ལས། གཏེར་སྟོན་སྨིན་གྲོལ་གླིང་པ་ཞེས་གྲགས་པའི་བ་དན་ཕྱོགས་ཀྱི་བུ་མོའི་རྣ་ལུང་དུ་དཔྱངས་པ་དེའི་ཐུགས་བསྐྱེད་དང་སྨོན་པའི་ལས་ཤུགས་གོང་མ་ལྔ་པ་ཆེན་པོའི་ཐུགས་རྗེའི་གྲིབ་བསིལ་ལ་དབུགས་འབྱིན་ཐོབ་པའི་བདག་པོའི་རྐྱེན་དང་འགྲོགས་ནས། དགེ་འདུན་འདུ་བའི་པད་ཚལ་བསྐྲུན། དམ་པའི་ཆོས་འདུལ་བ་ལ་ལེགས་པར་གནས་པས་གཞི་གསུམ་གྱི་ཆོ་ག་ལག་ལེན་དུ་འདེབས་པ་དང་ཆབས་ཅིག་མདོ་སྒྱུ་སེམས་གསུམ་གྱི་བསྟན་པའི་འབབ་སྟེགས་བཅས། སྔ་འགྱུར་བཀའ་མའི་རྒྱུད་སྡེའི་དཀྱིལ་འཁོར་ཆེན་པོ་ཕལ་ཆེར་གྱི་བཤད་སྒྲུབ་
ཀྱི་རྒྱུན་བཙུགས། །དེ་དག་གི་ཆོ་གི་འཁྲིགས་རིམ་མང་དུ་མཛད། ཁྱད་པར་དུ་ལོ་ཙཱ་བ་དྷརྨ་ཤྲཱིའི་མཁྱེན་རབ་ཀྱི་ཆུ་གེགས་ལས་གསང་བ་སྙིང་པོའི་རྒྱུད་ལ་ཟུར་བའི་བཤད་སྲོལ་གྱི་འགྲེལ་བ་ཞལ་ལུང་དང་དགོངས་རྒྱུན་གཉིས། འདུས་པ་མདོའི་དཔང་གི་ཆོ་གའི་ཁྲིགས་ལག་ལེན་ལ་འདེབས་བདེ་བ། མངའ་རིས་པཎ་ཆེན་པོ་ཆེའི་སྡོམ་པ་གསུམ་གྱི་རྣམ་པར་ངེས་པའི་བསྟན་བཅོས་ཀྱི་ཊཱི་ཀ་སོགས་མཛད་པས་བསྟན་པའི་བྱ་བ་ལ་གཅིག་ཏུ་ངོ་མཚར་ཆེའོ། །དེ་དག་ལས་བདག་ཅག་གིས་རིན་པོ་ཆེ་ཐང་འབྲོག་པ་པདྨ་རིག་འཛིན་དབང་པོ་ལས་གླན་ལུགས་ཀྱི་ཡིག་ཆའི་སྟེང་ནས་འདུས་པ་མདོ། །གྲུབ་དབང་ཤྲཱི་ནཱ་ཐ་ལས་སྒྱུ་འཕྲུལ་རྩ་རྒྱུད་ཀྱི་སྟེང་ནས་བཤད་ལུང་སྦྲག་མ། །སྤྲུལ་པའི་སྐུ་རིན་པོ་ཆེ་བསྟན་འཛིིན་ལྷུན་གྲུབ་ལས་སེམས་ཕྱོགས་ལ་སོགས་ཏེ་རྒྱུད་འབུམ་རིན་པོ་ཆེ་ཚང་མེད་པའི་ལུང་ནོད་ཅིང་། དེ་དག་གི་གོ་དོན་དང་རྟོགས་པའི་དངོས་གྲུབ་མ་ལུས་པ་རྒྱལ་བའི་དབང་པོ་ཀློང་ཆེན་རབ་འབྱམས་ཀྱི་བྱིན་རླབས་དང་། གསུང་རབ་ཁོ་ན་ལས་རྙེད་པ་ཡིན་ནོ།། །།ད་ནི་གངས་རིའི་ཁྲོད་ཙམ་ན་ཕུལ་དུ་བྱུང་བའི་པཎྜི་ཏ་ཆེན་པོར་གྲགས་པ་རོང་པ་ཆོས་ཀྱི་བཟང་པོའི་གཏམ་བརྗོད་པ་ལ་དྲན་པ་ཉེ་བར་གཞག་པ་བྱ་སྟེ། དེ་ལ་རོང་བན་དཔལ་གྱི་རིན་པོ་ཆེའི་སྲས། རོང་བན་རིན་ཆེན་ཚུལ་ཁྲིམས་ཞེས་བྱ་བ་དེས་རྒྱུའི་དུས་ཀྱི་མངོན་བྱང་ལྔའི་ཆོ་ག་བྱས་པ་ལས། ཕྱོགས་ཀྱི་གླང་པོའི་ཤེས་རབ། དབྱིག་གཉེན་ཞབས་ཀྱི་ཐོས་པ། ཙནྡྲ་གོ་མིའི་བརྗོད་པ། ཆོས་ཀྱི་གྲགས་པའི་བརྒལ་བརྟག། སློབ་དཔོན་དཔའ་བོའི་རྩོམ་པ་སྟེ་ཕུན་སུམ་ཚོགས་པ་ལྔའི་ངོ་བོར་བྱང་ཆུབ་བའི་སྐྱེ་བའི་མྱུ་གུ་གཙང་སྨད་རུ་ལག་གིས་སའི་ཆ་སྣར་ལུང་རོང་དུ་བཟུང་ངོ། །དེ་ནི་བསྟན་པ་སྔ་དར་གྱི་ཞབས་སུ་སློབ་དཔོན་སྨྲྀ་ཏི་ཛྙཱ་ན་ཀཱིརྟི་ཞེས་བྱ་བའི་པཎྜི་ཏ་ཅིག་བྱོན་ནས་མདོ་ཁམས་ཀྱི་སའི་ཆར་རྒྱུད་འགའ་ཞིག་གི་འགྱུར་ཡང་བཅོས། ཐག་ན་མཚན་བརྗོད་ཀྱི་འགྲེལ་བ་ལ་སོགས་པ་གསང་
སྔགས་ཀྱི་འགྲེལ་བ་དང་། འཇམ་དཔལ་གསང་ལྡན་ལ་སོགས་པའི་སྒྲུབ་ཐབས་མང་པོ་བསྒྱུར། སྒྲའི་བསྟན་བཅོས་འགའ་ཞིག་ཀྱང་མཛད་ནས་མྱ་ངན་ལས་འདས་པ་གང་གི་དེ་མ་ཐག་པའི་སྐུའི་སྐྱེ་བ་ཡིན་པར་གྲགས། བཀའ་འགྱུར་མདོ་མང་གི་ལུང་རྒྱུན་ལ་སྨྲྀ་ཏི་དང་བྲེང་ཆགས་སུ་འདྲེན་པ་དཔྱད། །གཞིར་སྣང་། ཡང་ཨ་ཙར་ཕྲལ་རིང་མོ་ཞེས་བྱ་བའི་པཎྜི་ཏ་ཅིག་ཁམས་སུ་བྱན། གསང་བ་འདུས་པའི་རྒྱ་ཆེར་འགྲེལ་བ་ལ་སོགས་བསྒྱུར་བཤད་མཛད་ནས་འདས་པ་དེ་ཉིད་ཀྱི་སྐྱེ་བ་ཡིན་པར་ཡང་གྲགས། སྐུ་གཞོན་ནུ་ནས་ལྷུན་གྱིས་གྲུབ་པའི་ཤེས་རབ་ཆེན་པོ་མངའ་བས་ཉང་སྨད་དུ་འགར་སྟོན་ཚུལ་ཁྲིམས་བཟང་པོ་ལས་གསན་པ་མཛད། ཡབ་ཀྱིས་བརྒྱགས་བསྐྱེལ་དུ་བྱོན་པས། མཆེད་གྲོགས་དག་ན་རེ། ཁྱོད་ཀྱི་བུ་འདི་བློ་དྲེད། ཐོ་ཅོ་ཆེ་བས་དེད་ཅག་ཀྱང་སྲུན་པར་བྱེད་ན་ད་རེས་འཁྲིད་པར་འཐད་ཅེས་ཟེར། ཡབ་ཀྱིས་སློབ་དཔོན་ལ་ཁོང་རྣམས་དེ་སྐད་མཆིད་ན་འཁྲིད་པར་བྱའམ་ཞུས་པས། འགར་སྟོན་ཆེན་པོས། དེ་སྐད་མ་ཟེར། ཆོས་ཐམས་ཅད་ཁོས་གོ་ནས་ཡོད་པ་ཡིན་གསུང་སྐད། ལོ་བཅུ་གཅིག་པ་ལ་མཚན་ཉིད་གསན། ཆོས་དབར་ལ་བྱིས་པའི་རྩེ་སར་ཡང་སློབ་དཔོན་གྱི་གསུང་ཚད་ཤར་རེ་འོང་བས། ཆོས་ཐམས་ཅད་ཚར་རེ་གསན་པ་ཁོ་ནས་ཚིག་གཅིག་ཀྱང་མི་ནོར་བར་ཐུགས་སུ་ཆུད་པས་འཇམ་དཔལ་གྱི་སྤྲུལ་པར་གྲགས། བཅུ་གསུམ་ལོན་པའི་ཚ་གསན་པ་རྫོགས་པ་དང་འདྲ་བར་བྱུང་ཞིང་། ཤེས་བྱ་ཐམས་ཅད་ལ་མ་རྨོངས་པ་བྱུང་། ཉིད་ཀྱི་ཞལ་ནས་ཀྱང་། བདག་ཐོས་པ་ཆུང་བ་ཡང་མ་ཡིན་ཏེ། ཆོས་ཐམས་ཅད་མ་ཐོས་པ་མེད་དོ། །ཐོས་པ་ཆེ་བ་ཡང་མ་ཡིན་ཏེ་ཆོས་ཐམས་ཅད་ཚར་རེ་ལས་མ་དགོས་སོ་གསུངས་སྐད། སྐྱེས་བུ་ཆེན་པོ་འདི་ནི་ཤེས་རབ་མྱུར་ལ་ཟབ་པ། རྒྱ་ཆེ་ལ་དྲི་མ་དང་བྲལ་བའི་སྤོབས་པ་མཆོག་ཏུ་དགེ་བས་མདོ་རྒྱུད་དམ་བསྟན་བཅོས་ལ་སོགས་
པའི་རྒྱ་གཞུང་བརླིང་པོ་སྔར་མ་གཟིགས་པ་མཐའ་དག་ཚར་རེ་རེའམ། གཉིས་ཚུན་ཆད་གཟིགས་པས་ཚིག་དང་དོན་གྱི་ཆ་མ་ལུས་པ་ཐམས་ཅད་ཐུགས་ལ་ཟིན་ཅིང་མི་བརྗེད་པའི་གཟུངས་ཐོབ་པར་གྲགས་པས། ཐོག་མ་ཉིད་ནས་ཧ་ཅང་མ་འབད་པར་སཾ་སྐྲྀ་ཏ་དང་། སྐད་རིགས་ཀྱི་བྱེ་བྲག་གཞན་མང་པོ་ལའང་མ་རྨོངས་ཤིང་། ཕྱི་ནང་གི་རིག་པའི་གནས་དང་། གཙུག་ལག་ཐམས་ཅད་ལ་ཐོགས་པ་མེད་པའི་བློ་གྲོས་ཀྱི་ཚེར་མ་རྣོ་བས། བོད་ཀྱི་སྐད་ཉིད་པའང་འདི་ནི་དོན་འདི་་ཙམ་ལ་འཇུག་གོ་ཞེས་སྟོན་པའི་ཁྱད་པར་ཕྲ་མོའང་གཞན་ལས་ཆེས་ལྷག། ཚད་མའི་བསྟན་བཅོས་དང་། རིག་བྱེད་ཀྱི་བསྟན་བཅོས་དང་། དོན་དུ་འགྱུར་བའི་ཚིགས་བཅད་དང་། སྙན་དང་གསལ་སོགས་པའང་དབྱུག་པ་ཅན་གྱི་གཞུང་ཁོ་ན་ལ་མ་ལྟོས་པར་རིག་པ་དེ་སྟོན་པའི་གཞུང་ལུགས་རྒྱ་ཆེན་པོ་མང་པོའི་དོན་མཁྱེན་པ་ཡིན། བྱིས་པའི་དུས་ཨ་ཙར་འདུག་ཚད་ལ་དགྱེས་ཤིང་དེ་དག་དང་བརྡ་འཕྲོད་པས་པི་བརྟའི་བུ་ཏི་ལ་བརྟགས་པ་ཙམ་གྱིས་མཁྱེན་པ་ལ་ཚེགས་མ་བྱུང་། ཐ་ན་དུད་འགྲོའི་བརྡ་དང་སྐད་ཀྱི་རིམ་པའང་མཁྱེན་པར་གྲགས། སྨྲ་སྒོལ་སོགས་པའི་འགྲེལ་བ་དང་བསྟན་བཅོས་ཀྱང་མང་དུ་མཛད། བློ་གྲོས་ཀྱི་མཐུ་བསམ་གྱིས་མི་ཁྱབ་པས་སྤྱིརཆོས་ལ་མོས་པའི་མི་རྣམས་དང་། ཆོས་ཀྱི་གང་ཟག་དང་། ཁྱད་པར་དུ་རྡོ་རྗེ་ཐེག་པ་ལ་ཞུགས་ཤིང་། གསང་སྔགས་ཀྱི་ལས་དང་དངོས་གྲུབ་བསྒྲུབ་པར་འདོད་པ་དག་ལ་ཕན་གདགས་པའི་དགོངས་པ་ཟབ་མོ་མངའ་བས། ཕྱིན་ཅི་མ་ལོག་པའི་གདམས་པས་ནན་ཏན་དུ་འདོམས་ཤིང་ཕན་ཐོགས་པར་མཛད། མངོན་པར་ཤེས་པའི་ཆ་དང་ལྡན་ཞིང་སེམས་ཅན་འདུལ་བའི་དུས་དང་གནས་སྐབས་མཁྱེན་པས། འགྲོ་བ་ཕལ་པ་བློ་བསྒྱུར་ཞིང་། ཆོས་ལ་གནས་པ་རྣམས་དེའི་འགལ་ཟླར་གྱུར་བ་ལས་ལྡོག་པའི་ཕྱིར། འབྱར་ཞིང་འགྲིག་པའི་བསྟན་བཅོས་ཞལ་སྒོའི་ཆུ་སྐྱེས་ལས་བྱུང་སྟེ་ཕན་འདོགས་པ་ལ་རྟག་ཏུ་
སྐྱོ་བ་མི་མངའ། ཆོས་ཀྱིས་བློ་མ་བསྒྱུར་བའི་སྐྱེ་བོ་ཐ་མལ་བ་དག་ལ་སེར་སྣ་སྤངས་ནས་བདོག་པ་གཏོང་བ་དང་། ལོག་སྒྲུབ་བཟོད་པས་སྙིང་རྗེའི་ཡུལ་དུ་མཛད་ནས་ཞི་བདེ་ལ་འགོད། སྡོམ་པའི་གནས་དང་ཐུགས་དམ་ལ་ནོར་བུ་རིན་པོ་ཆེ་དང་སྲོག་གི་དབང་པོ་ལྟར་གཅེས་སྤྲས་མཛད་ཅིང་གཞན་ཡང་དེ་ལ་འགོད། དམ་པའི་ཆོས་རྩོམ་པ་ན་གླེགས་བམ་བསྡུ་ཞིང་གཟིགས་པ་ལ་སོགས་པའི་རྟོག་དཔྱོད་ཀྱི་སྒྲོ་འདོགས་མི་དགོས་པར། ཆོས་ཀྱི་ཚིག་དོན་ལ་ཐོགས་རྡུགས་མེད་པར་འཇུག་པའི་སྤོབས་པའི་གཏེར་ཆེན་པོ་བརྒྱད་གྲོལ་ཞིང་བསྟན་བཅོས་རྣམས་ཀྱང་དོན་བཟང་པོ། །ཚིག་འབྲུ་བཟང་པོ། །བརྗོད་པ་མ་འདྲེས་པ་ཤ་སྟག་འབྱུང་བས། སྟོན་པ་དྲང་སྲོང་ཆེན་པོའི་གསུང་གི་གསང་བ་དང་རྗེས་སུ་མཐུན་པའི་ཕྱིར་གཞན་མཁས་པར་གྲགས་པ་གང་གིས་ཀྱང་རྩོད་མི་ནུས་ཤིང་། དེས་མཛད་པའི་གསང་སྔགས་ཀྱི་མན་ངག་རྣམས་ལ་སློབ་པའི་རྒྱུད་དུ་བྱུང་བའི་གང་ཟག། ལུང་མ་ཐོབ་ཀྱང་ཡི་གེ་ལས་བྱུང་བ་བཞིན་སྦྱར་བ་ལས་བྱིན་རླབས་མ་བྱུང་བ་མེད་ཅེས་གྲགས་པས་བདེ་བར་གཤེགས་པའི་སྤྲུལ་པའི་སྐུ་ཉིད་དུའང་གླེང་། གནས་ལྔ་རིག་པའི་པཎྜི་ཏ་མངོན་པར་ཤེས་པ་ལྔ་དང་ལྡན་པ་ཇོ་བོ་ཨ་ཏི་ཤ་དང་བདག་ཉིད་ཆེན་པོ་འདི་མཇལ་བའི་ཚེ། ཇོ་བོའི་ཞལ་ནས། རྒྱ་གར་གྱི་ཨ་ཙཱརྱ་ནག་པོ་སྤྱོད་པ་བ་དེ་ཉིད་ཆེ་འཕོས་པ་ཇོ་བོ་འདི་ཁོ་ན་ཡིན་ཏེ། ཁོ་བོས་འདི་དང་ཆོས་གཏམ་བྱ་བ་ག་ལ་ཐུབ་ཅེས་རྩོད་མེད་དུ་གྲགས་པར་གསུངས། སྤྱིར་གཏམ་དུའང་། འདུལ་བ་མཚུང་སྟོན་དབྱིག་གི་མཁས། །ཆོག་སྒྲིག་བཟངས་ཀྱི་ཡེ་གྲགས་མཁས། །སྒྲ་དང་ཚད་མ་རོང་བ་མཁས། །ཐམས་ཅད་འཛོམ་པ་ཨ་ཕོ་རང་། །ཆོས་གྲགས་རང་ཟེར་སྐད། སྤྱིར་བླ་མ་མང་པོ་ལས་མདོ་སྔགས་སོ་སོའི་བརྒྱུད་པའི་བྲེང་ཆགས་འཐུད་པ་ཙམ་ཡོད་མོད་ཀྱི། ཁྱད་པར་དུ་སྔ་འགྱུར་རྡོ་རྗེ་ཐེག་པའི་ཆོས་སྐོར་ལས། སློབ་དཔོན་ཆེན་པོ་པདྨའི་གདམས་པ་རྣམས་ནི་སྣ་ནམ་རྡོ་རྗེ་བདུད་
འཇོམས། མཁར་ཆེན་དཔལ་གྱི་དབང་ཕྱུག། ངོམ་ཨ་ཙར་དཔལ་མེ་ཏོག །སྒྲོ་རྡོ་རྗེ་གཞོན་ནུ། ཞང་ཞུང་ཡོན་ཏན་གྲགས། རོང་བན་ཡོན་ཏན་རིན་ཆེན། རོང་བན་ཚུལ་ཁྲིམས་རིན་ཆེན་ལས་ཉིད་ཀྱིས་གསན་ཏོ། །བཻ་རོ་ཙ་ནའི་མན་ངག་རྣམས། བཻ་རོས་གཡུ་སྒྲ། དེས་བླ་ཆེན་དགོངས་པ་གསལ། དེས་གྲུམ་ཤིང་གླག་ཅན། དེས་གནུབས་དཔའ་བརྟན། དེས་ཡ་ཟི་བོན་སྟོན། དེས་ཀུན་མཁྱེན་རོང་ཟོམ་ལ་བཤད་དེ་སེམས་སྡེའི་བརྒྱུད་པ་གཅིག་གོ། །ཡང་ཀློང་ཐང་སྒྲོན་མར་ཨ་རོ་ཡེ་ཤེས་འབྱུང་གནས་ཞེས་བྱ་བའི་གྲུབ་པའི་སྐྱེས་བུ་ཞིག་བྱུང་སྟེ། དེ་ལ་རྒྱ་གར་བདུན་བརྒྱུད་དང་། རྒྱའི་སློབ་དཔོན་བདུན་བརྒྱུད་ཀྱི་གདམས་པ་མངའ་ཞིང་། དེས་ཅོག་རོ་ཟངས་དཀར་མཛོད་ཁུར་དང་། ཡ་ཟི་བོན་སྟོན། དེས་ཉིད་ལའོ། །འདི་ལ་རྫོགས་ཆེན་ཁམས་ལུགས་ཞེས་ཟེར། ཡང་བི་མ་ལས་ཉང་ཏིང་འཛིན་བཟང་པོ་ལ་གསུངས་པ་དང་། བི་མ་ལས་རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱར་ལ་གསུངས་པའི་མན་ངག་ཀྱང་། གཉིས་ཀས་ཁུ་བྱང་ཆུབ་འོད་ཁྱུང་པོ་དབྱིག་འོད་ལ་བརྒྱུད་ནས་རིམ་གྱིས་རོང་ཟོམ་ལ་མངའ་བས་གསང་སྔགས་སྔ་འགྱུར་གྱི་བསྟན་པའི་བདག་པོ་འགྲན་ཟླ་སྤངས་བ་ཞིག་སྟེ་འདི་ཉིད་ལའང་བསྟན་པའི་ཆུ་མགོ་གཅིག་གནས་སོ། །གསང་སྙིང་འགྲེལ་བ་རོང་ལུགས་ཀྱི་འགོ་ན། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། ཞེས་ཡོད་པས་དཀོན་མཆོག་འགྲེལ་ཞེས་མིང་དུ་ཐོགས་ལ། ཀུན་མཁྱེན་ཆེན་པོའི་འགྲེལ་བ་ཕྱོགས་བཅུ་མུན་སེལ་ཐེག་རྒྱལ་གྱི་ལུགས་སུ་བཀྲལ་ཞིང་ཞལ་གསལ། །ཀུན་མཁྱེན་རོང་པའི་འགྲེལ་བ་འདི་བྱིངས་ཆེ་བར་བཀྲལ་བས་སྒྲོམ་ཆེ་ཞིང་ཁ་དམ་པར་སྣང་སྟེ། བོད་འགྲེལ་གྱི་གཙོ་བོ་འདི་གཉིས་ཡིན་པར་ཤེས་ན་བློ་གྲོས་ལ་ནུས་པ་ཆེན་པོ་སྟར་བ་ཡིན་ནོ། །དེའང་སྐུ་གཞོན་ནུའི་ཚེ། མདོ་སྟོན་སེང་གེ་བྱ་བ་ལས་
སྔ་འགྱུར་གསན་པའི་ཚེ། རེ་ཞིག་ན་མནལ་ལམ་དུ། གསང་བ་སྙིང་པོས་ཟན་བྱས། སངས་རྒྱས་མཉམ་སྦྱོར་གྱི་ཚོད་མ་བྱས་ནས་གསོལ་གྱིན་འདུག་པ་རྨིས། དེ་སློབ་དཔོན་ལ་བརྗོད་པས། ཤིན་ཏུ་ངོ་མཚར་ཆེ། ཆོས་དེ་ཁོང་དུ་ཆུད་པའི་རྟགས་ཡིན་ཁྱོད་ཀྱིས་འགྲེལ་བ་རེ་གྱིས་གསུང་སྐད། དེར་བླ་མའི་དགོངས་པ་རྫོགས་པར་བྱ་བའི་ཕྱིར། བསླབ་པ་རིན་པོ་ཆེ་གསུམ་ལ་བསྟན་པའི་མན་ངག་གསུམ་མཛད་དེ། ལྷག་པ་ཚུལ་ཁྲིམས་ཀྱི་བསླབ་པའི་དོན་གྱི་ངེས་བརྗོད་དམ་ཚིག་མདོ་རྒྱས། ལྷག་པ་ཏིང་ངེ་འཛིན་གྱི་བསླབ་པ་སྟོན་པ་འགྲེལ་བ་ཚུལ་བཞི་ཡན་ལག་བཅོ་ལྔ་པ། ལྷག་པ་ཤེས་རབ་ཀྱི་བསླབ་པ་སྟོན་པ་རྫོགས་པ་ཆེན་པོའི་ལྟ་སྒོམ་མན་ངག། མཉམ་སྦྱོར་གྱི་འགྲེལ་བ། དེ་བཞིན་དུ་ངན་སོང་སྤྱོང་རྒྱུད། འཇིགས་བྱེད་ལ་སོགས་པའི་འགྲེལ་བ་དང་མན་ངག་མང་པོ། །དེ་དག་གི་ནང་ནས་ཀྱང་ཐེག་པ་ཆེན་པོའི་ཚུལ་ལ་འཇུག་པའི་བསྟན་བཅོས་ལ་སོགས་པ་གཞུང་གཏིང་ཟབ་ལ་གོ་དོན་སློང་ཆེ་བ་བརྗོད་ཀྱིས་མི་ལང་བ་དང་། མདོར་ན་མདོ་སྡེ་དང་། རྒྱུད་སྡེ་དང་། བསྟན་བཅོས་ཀྱི་བྱེ་བྲག་ལ་ཐུགས་སུ་མི་ཆུད་པ་བྱ་ལ་སྲིད་པར་མ་གྱུར་བས་ཐམས་ཅད་མཁྱེན་པའི་གནས་ལ་རང་གིར་མཛད་དེ་ཐ་ན་འཇིག་རྟེན་པའི་ཞིང་ལས་དང་། ཕྱུགས་སྐྱོང་བ་དང་། དཀར་ཤེ་ཇི་ལྟར་བསྒྲུབ་པ་ཚུན་ཆད་ཀྱི་བསྟན་བཅོས་ཀྱང་མཛད་པས། དུས་དེའི་ཚེ་བོད་རུ་བཞིའི་མཁས་པ་ཐམས་ཅད་ཀྱི་དང་པོར་རྩོད་པའི་བྱ་བ་ལ་ལྷགས་པའང་། སླར་སློབ་དཔོན་ཆོས་ཀྱི་གྲགས་པའི་བརྟུལ་ཞུགས་ཀྱིས་གང་དང་གང་གི་སྤོབས་པའི་འཁྲི་ཤིང་ཉམ་ཉེས་པར་བྱས་ནས། ང་རྒྱལ་གྱི་གདེངས་ཀ་ལ་སྐྱང་ནུལ་བྱ་བའི་སྐབས་བྱུང་བ་ཡིན་ཏེ། འདི་ལྟར་ཤབ་ཀྱི་ཡང་ཁྱེད་བླ་མ། མར་པ་དོ་བ། འུ་ཡུག་པ་མདའ་སྟོན། མདོའི་ཁྱུང་པོ་ཧཱུྃ་སྙིང་། སེ་ཁྲོམ་རྒྱ་མཚོ་འབར། མཚམས་སྟོན་གོ་ཆ། པད་ཀ་དར་ཆུང་། འགོས་
ལྷས་བཙས། རྒྱ་རྒྱལ་ཚུལ་ལ་སོགས་པའི་མཁས་པ་ཐམས་ཅད་ཀྱིས་བོད་དུ་སྐྱེས་པའི་གང་ཟག་གིས་བསྟན་བཅོས་འདི་ཙམ་བརྩམས་བཞེས་དཔྱས་གདགས། སུན་འབྱིན་པའི་རིག་པ་བསམས་ཏེ། ཁྱུ་མཆོག་རྭ་བརྡར་བ་ལ་ཕྱོགས་པ་བཞིན་དུ་སྐྱེས་བུ་ཆེན་པོ་དེའི་གམ་དུ་སོང་སོང་བ་ན། ལུང་གིས་འཐད་པ་དང་། རིག་པས་དཔྱད་བཟོད་པ་དང་། །གཏན་ཚིགས་དང་བླ་མས་ཉེ་བར་བསྟན་པ་དང་མི་འགལ་ཞིང་། སྒྲ་སྐྱོན་དང་། དོན་སྐྱོན་ལ་སོགས་ཀྱི་འགལ་ཟླའི་ཕྱོགས་ཐམས་ཅད་རྣམ་པར་སྤངས་པའི་མཁྱེན་རབ་ཀྱི་སློབས་པས་ཚར་བཅད། བསྟན་བཅོས་རེ་མཐོང་ཞིང་། དེའི་དོན་ལ་རོ་མྱངས་པས་ཐམས་ཅད་ངོ་མཚར་སྐྱེས་ནས་བསྟི་སྟང་དུ་མཛད། རི་མོར་མཛད། བླ་མར་མཛད་པ་ཤ་སྟག་ཡིན་ཞེས་གྲགས། དེ་སྐད་དུ་གོ་རུབ་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཅེས་བྱ་བ་ཐོས་པ་མང་པོའི་གཟུངས་འཛིན་པ་དེ་ཉིད་ཀྱིས་ཀྱང་དང་པོར་དཔྱད་གདགས། བར་དུ་བླ་མ་རོང་པས་མཛད་པའི་ཐེག་པ་ཆེན་པོའི་ཚུལ་ལ་འཇུག་པའི་པོ་ཏི་གཟིགས་པས་གུས་པ་ཆེན་པོ་སྐྱེས། ཐ་མར་ཟང་ཟིང་མང་པོས་བསྙེན་བཀུར་ཏེ་མི་འཆབ་པར་བྱས་ནས། རྗེས་སུ་གཟུང་བར་གསོལ་བ་བཏབ། འཇམ་དཔལ་གསང་བའི་རྒྱུད་ལ་སོགས་པའི་ཆོས་མང་དུ་གསན། གསང་རྒྱུད་ཀྱི་སྐབས་ན་མ་ཧཱ་པཎྜི་ཏ་ཆེན་པོའི་ཞལ་ནས། འོ་སྐོལ་ཡད་ལྷ་རྒྱ་དཔེ་ཡོད་པར་གྱུར་ན་འདི་ལྟར་འགྲོ་བ་མིན་ཏེ། རྒྱ་དཔེ་མེད་པས་ད་ལྟ་བཅོས་སུ་མེད་གསུང་བ་ལ། གོ་རུབ་ལོ་ཙཱ་བས་དེ་བློ་ལ་བཟུང་སྟེ། ཕྱིས་ཇོ་བོ་ཀྲྀཥྞ་ཞེས་བྱ་བའི་པཎྜིི་ཏ་ལས་རྒྱ་དཔེ་བྱུང་ནས་དེ་ལས་མཉེན་པས། །རོང་པ་པཎྜི་ཏའི་གསུངས་བཞིན་བྱུང་ནས་ཤིན་ཏུ་མོས་པ་ཐོབ་པར་གྱུར་ཏེ། ཀྲྀཥྞ་པ་ལས་བྱུང་བའི་རྒྱ་དཔེ་གཅིག་རོང་པ་ཉིད་ལ་ཕུལ་ནས་སླར་ཡང་གསན་སྐད། དེ་བཞིན་དུ་མར་བ་ཆོས་ཀྱི་དབང་ཕྱུག་ལ་སོགས་པའི་ལོ་ཙཱ་བ་དང་། མཁས་པར་གྲགས་པའི་བློ་རྩལ་ཅན་མང་པོས་ཀྱང་ཞབས་ལ་བཏུད། རྒྱ་གར་གྱི་མཁན་པོ་མཉྫུ་ཤྲཱི་ཝརྨ་དང་། མཉྫུ་
ཤྲཱི་ཛྙཱ་ན་དང་། ཨུ་པཱ་ཡ་ཤྲཱི་མི་ཏྲ་དང་། བུདྡྷ་ཨ་ཀ་ར་བྷ་དྲ་དང་། དེ་བ་ཀ་ར་ཙནྡྲ་དང་། པར་མི་ཤྭར་དང་། ཨ་མོ་གྷ་བཛྲ་ལ་སོགས་པ་པཎྜིི་ཏ་མང་པོ་བསྟེན་ནས། དེ་དག་གིས་ལོ་ཙཱ་བ་མཛད་དེ། རྡོ་རྗེ་འཇིགས་བྱེད་དང་། གཤིན་རྗེ་དགྲ་རྒྱུད་དང་། འཇམ་དཔལ་སྔགས་དོན་དང་། བདེ་མཆོག་རྩ་རྒྱུད་ལ་སོགས་པ་མང་དུ་བསྒྱུར། འགྱུར་ཤིན་ཏུ་བཟང་བས་གསར་འགྱུར་གྱི་དཔེར་འོས། རྒྱ་གར་གྱི་པཎྜི་ཏ་ཀུན་ན་རེ། དྷརྨ་བྷ་དྲ་ཁྱོད་ཆོས་མང་པོ་བརྩམས་ལ་འགྲོ་བ་རྣམས་སྐྱོབས་ཤིག། ཁྱོད་ཀྱི་ཡོན་ཏན་གཞན་ལྟ་ཞོག། སྒྲ་ཚད་ཀྱི་ལུགས་འདིའི་སུམ་ཆ་ཙམ་ལས་མི་ཤེས་པས་ཀྱང་རྒྱ་གར་ན་ཆོས་རྩོམ་པ་ཡིན་ན། ཁྱེད་ཅིའི་ཕྱིར་མི་རྩོམ་ཞེས་གསུང་སྐད། དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ཡང་། གཅོམ་བསྐྱུངས་པ་དང་། ཁེངས་པ་སྙོལ་བ་ལྷུར་མཛད་པས། རྒྱལ་བ་ཀློང་ཆེན་པས་རྒྱ་འགྲེལ་ལས་མངོན་པར་འཕགས་པ་བརྗོད་པའི་རང་ཉིད་ཀྱི་འགྲེལ་བ་བཟང་པོ་དཀོན་མཆོག་འགྲེལ་ལྟ་བུའི་གཤམ་དུའང་། མཁས་དང་འཕགས་ཆེན་རྣམས་ཀྱིས་མཛད་པའི་གཞུང་ལ་ཡང་། སྒྲོ་སྐུར་དཔྱ་བར་བྱེད་ན་བདག་གཞུང་ཅིས་མི་སྨོད། ཅེས་འཕགས་ཆེན་ལག་ན་རྡོ་རྗེས་བསྡུས་པའི་རྒྱུད་ལའང་མུན་པས་སྤྲུལ་པའི་ཤེས་རབ་ཀྱི་གཞུར་བརྟག་བྱེད་པ་ཡོང་ན། བདག་གི་འགྲེལ་བ་སྨྲོས་ཅི་འཚལ་ཞེས་སློབ་དཔོན་ཞི་བ་ལྷའི་རྣམ་པར་ཐར་བ་བསྐྱངས་ནས་ངང་གིས་དགེ་བ་བྱང་ཆུབ་སེམས་དཔའི་སྤྱོད་པ་ཅན་དུ་སྟོན། གྲུབ་པའི་རྣམ་ཐར་ལ་གཞལ་ན། བྲག་ཆེན་གཟར་པོ་མེ་ལོང་ལྟ་བུའི་ངོས་ལའང་རྫུ་འཕྲུལ་གྱི་སྤྱོད་པས་གཤེགས་པ་དང་། བྲག་ལ་ཕུར་བ་འདེབས་པ་དང་། ནམ་མཁའ་ལ་འཕུར་བ་དང་། བོད་ཀྱི་ལྷ་འདྲེ་ཕལ་མོ་ཆེའི་གནས་དང་། སྤྱོད་པ་ཐུགས་སུ་ཆུད་པའི་མངོན་པར་མཁྱེན་པ་མངའ་བ་སོགས་མང་དུ་ཡོད་མོད་ཀྱི། འདི་ལྟ་བུའི་ལྟ་བ་མཆོག་ཏུ་གྱུར་ཅིང་སོ་སོ་ཡང་དག་རིག་བཞིའི་ས་ཐོབ་པ་དག་ལ་སྐྱེ་བོ་ཕལ་བ་ཡིད་བརྟན་
པར་བྱེད་པའི་མངོན་རྟགས་ཀྱི་ན་པ་ཡི་གེའི་ལམ་དུ་འདྲེན་པ་ངོ་མཚར་བ་མ་ཡིན་ནོ། །དེ་ལྟར་སྤྲུལ་པའི་སྐུར་རྩོད་པ་མེད་པའི་པཎྜི་ཏ་ཆེན་པོ་དེ་ལ་གནས་སྐབས་དེ་ཙམ་ན་བྱོན་པའི་མཁས་པ་ཐམས་ཅད་ཀྱིས་མངོན་པར་བསྟོན་ཅིང་སྤྱི་བོས་བཏུད་པར་གྱུར་ལ་དགུང་ལོ་བརྒྱ་དང་བཅུ་དགུ་བཞུགས་ཏེ་སྐུ་ལ་བསྙུན་པ་མེད་པའི་ངང་ནས་གཤེགས་པར་གྲགས། བོད་གངས་ཅན་གྱི་རྒྱུད་འདིར་འདི་དང་མཉམ་པའི་མཁས་པ་ནི་སུ་ཡང་མ་བྱུང་ཞེས་འགོས་ལོ་ཆེན་པོས་ཀྱང་བསྔགས་ཤིང་ཡོངས་སུ་གྲགས་པའོ། །རྗེས་སུ་སློབ་པ་ལ་སྲས་བརྒྱུད་དང་སློབ་བརྒྱུད་གཉིས་ལས། དང་པོ་ནི། སྲས་གཟི་བརྗིད་འབར་དང་། འབུམ་འབར་གཉིས་ལས་སྲས་བརྒྱུད་ཡུན་རིང་པོའི་བར་བྱུང་བ་ཀུན་ཀྱང་རྡོ་རྗེ་ཕུར་བ་ལས་དངོས་གྲུབ་བརྙེས་པ་ཤ་སྟག་ཡིན། སློབ་བརྒྱུད་ནི། གོ་རུང་ལོ་ཙཱ་བ་དང་། མར་པ་དོ་པ། འགོས་ལོ་ལ་སོགས་པའི་ལོ་ཙཱ་བ་ཆེན་པོ་བཅུ་བདུན། གཡག་རྡོ་རྗེ་འཛིན་པ་ལ་སོགས་ཏེ་གྲུབ་ཐོབ་ཆེན་པོ་སུམ་ཅུ་རྩ་ལྔ། མ་གཅིག་ཞ་མའི་མིང་པོ་རྗེ་འཁུན་བུ་པ་ལ་སོགས་པ་སྒོམ་ཆེན་རྣལ་འབྱོར་གྱི་དབང་པོ་བརྒྱ་བརྒྱད་ཅུ། ཡོལ་དགེ་བསྙེན་རྡོ་རྗེ་དབང་ཕྱུག་དང་། ཡང་ཁྱེར་བླ་མ་ལ་སོགས་པ་གདུགས་ཐོགས་པ་ལྔ་བརྒྱ་ལ་སོགས་པའོ།། །།དེ་ལྟར་སྔོན་རབས་པ་རྣམས་ཀྱིས་ཡི་དམ་གྱི་གཙོ་བོ་ཡང་ཕུར་ཁོ་ན་བཟུང་བ་ཡིན་པས་ཡང་དག་གི་སྐོར་དེས་ཤེས་ལ། རྡོ་རྗེ་ཕུར་བ་ཇི་ལྟར་དར་བའི་གཏམ་ཅུང་ཟད་བརྗོད་དེ། དེ་ལ་རིག་འཛིན་གྱི་སློབ་དཔོན་ཨུ་རྒྱན་གྱི་མཁན་པོ་པདྨ་ས་མ་བྷ་ཝའི་ཞབས་ལ་བརྒྱུད་དེ། ཕུར་བ་རྒྱལ་པོ་ལུགས་སུ་གྲགས་པ་དང་། ཇོ་མོ་ལུགས་དང་། ལྕམ་ལུགས་དང་ཡང་སྣ་ནམ་མམ་རོང་ལུགས་དང་། ལྷ་ནག་དང་། ལྷ་ཁྲ་སྟེ་སྐུ་མདོག་ལས་གྲགས་པ་སོགས་རྣམ་གྲངས་ཐ་དད་མོད། དེ་དག་ཀྱང་ངོ་བོ་གཅིག་ལ་མན་ངག་གི་ལྡོག་ཆ་དང་། བཀའ་བབས་ཀྱི་ཁྱད་པར་ལས་དེ་དང་དེར་གྲགས་པའོ། །དེ་ལ་དང་པོ་ནི་བསམ་ཡས་འབྱོངས་ནས། སློབ་དཔོན་ཆེན་པོས་
བཙན་པོ་ཁྲི་སྲོང་ལྡེའུ་བཙན་དང་། ཇོ་མོ་མཁར་ཚོན་བཟའ་སྤྱན་འདྲེན་པ་མི་གསུམ་ལ་གནང་བས་དེ་སྐད་དུ་གྲགས།། །།ཇོ་མོ་ལུགས་ནི། སློབ་དཔོན་གཤེགས་ཁར་ཉུང་ལ་འདུས་པ་ཕུར་བ་རྩ་བའི་དུམ་བུ་སྟོད་ལས་བྱང་ཆུབ་སྒྲུབ་པ་དང་། སྨད་ལས་དམོད་པ་ལམ་ཁྱེར་བཅུད་དུ་དྲིལ་བ་འདི་ཇོ་མོ་མཁར་ཆེན་བཟའ་ལ་གསུངས། དེས་ལྷོ་ཕྱོགས་མོན་ཁ་སྣ་རིང་སེང་གེ་རྫོང་གི་བྲག་ཕུག་ཏུ་མཚན་མ་རྫས་ཀྱི་དཀྱིལ་འཁོར་ཞལ་ཕྱེ་ནས་བསྒྲུབས་པས་ཞག་ཉེར་གཅིག་ན་ཕུར་བུ་ཐམས་ཅད་བཞད་ཅིང་། འོད་འཕྲོ་བ་དང་། འཕར་གཡོ་བྱེད་པར་བྱུང་། དེར་ཇོ་མོའི་དགོངས་པ་ལ། ཕུར་བ་གྲུབ་ན་གདབ་ལས་བྱ། ཟེར་བ་ཡིན་ཏེ་དངོས་ལ་གདབ་པའི་ཡུལ་དུ་གྱུར་བ་ནི་མེད། འོན་ཀྱང་ཕ་མེས་ཀྱི་ཟ་འདྲེ་ལ་གདབ་བོ་སྙམ་དུ་དགོངས་ནས་བསྙེན་ཕུར་དྲིལ་བས། ཕུར་བ་ནམ་མཁའ་ལ་དེང་ངེ་སོང་། ཕ་ཡུལ་གྱི་ཁང་ལྟག་ན་ཕ་མེས་ཀྱི་ཟ་འདྲེར་གྱུར་བ་ཞིག་གནས་པའི་རྟེན་སྐྱེར་བའི་ཕུང་པོའི་སྟེང་དུ་བབས་ནས་སྐྱེར་ཕུང་ཚིག། ཟ་འདྲེ་མཉམ་པ་ཉིད་ཀྱི་ཀློང་དུ་བསྒྲལ། སླར་ཕུར་བ་དེ་ཇོ་མོའི་དབོན་བརྒྱུད་རྣམས་ཀྱིས་བཅངས། །གདེངས་པ་ཙམ་གྱིས་ཆོག་པ་བྱུང་བས། མཁར་ཆེན་བཟའ་འདྲེ་འདུལ་གྱི་བརྒྱུད་པར་གྲགས། ཇོ་མོས་རང་གི་མིང་པོ་མཁར་ཆེན་དཔལ་གྱི་དབང་ཕྱུག་ལ་བཤད་ནས་རིམ་པར་དར་རོ། །ལྕམ་ལུགས་སུ་གྲགས་པ་ནི། ཅོག་རོ་བཟས་སློབ་དཔོན་དངོས་ལ་ཐུག་ཀྱང་། དབང་བླ་མ་ལ་མ་ཞུས་ཡི་དམ་ལ་ཞུས་པས་ཡི་དམ་སློོབ་དཔོན་གྱི་ཐུགས་ཀར་བསྡུས་ཏེ་དབང་སྐལ་ཆད། སླར་ཇོ་མོ་མཚོ་རྒྱལ་ལ་རྗེས་སུ་གནང་ནས་ཇོ་མོས་ཅོག་རོ་བཟའ་ལ་གདམས་པ་ལས་བརྒྱུད་པའོ། །ཡང་སྣ་ནམ་ལུགས་སུ་གྲགས་པ་ནི་རོང་ཟོམ་ཆེན་པོ་ལས་བརྒྱུད་པའི་ལུགས་ཁོ་ན་སྟེ་བརྒྱུད་པ་སྔར་བཤད་མ་ཐག་པས་ཤེས་ལ། འདིར་ཁ་ཅིག་ཏུ། རོང་ཟོམ་ཆེན་པོའི་མེས་པོ་རོང་བན་ཡོན་ཏན་རིན་ཆེན་ནམ། དཔལ་གྱི་རིན་ཆེན་དེས་སློབ་དཔོན་ཆེན་པོ་དངོས་ལ་ཐུག། དགུང་ལོ་སུམ་བརྒྱ་འཚོ་ཞེས་ཟེར།
དེའི་སྲས་རོང་པ་པཎྜི་ཏའི་ཡབ་རིན་ཆེན་ཚུལ་ཁྲིམས་ཀྱིས་ཀྱང་ལོ་ཕྱེད་ཉིས་བརྒྱར་བཞུགས་པ་ལས་བརྒྱུད་པས། རོང་ལུགས་ཞེས་བཤད་པ་ཡིན་པར་ཤེས་སོ།། །།ཕུར་བ་ལྷ་ནག་ཏུ་གྲགས་པ་ནི། ཨུ་རྒྱན་ཡབ་ཡུམ་ནས་འདྲེ་ཨ་ཙ་རས་ལེ། ལང་ལབ་བྱང་ཆུབ་རྡོ་རྗེ་ནས་རིམ་པར། ཡར་འབྲོག་པ་གུ་རུབ་ཡང་དག་ཅེས་བྱ་བས་ཕུར་བ་མྱ་ངན་ལས་འདས་པའི་རྒྱུད་ལ་བརྟེན་ནས་ལྷ་ཐམས་ཅད་ནག་པོར་མཛད་པས་དེ་ལྟར་གྲགས་ལ། འདི་ལ་འབྲེ་ཨ་ཙར་ས་ལེ་བྱས་ན་ལང་ལབ་ཀྱི་བར་དང་དེ་གཉིས་ཕྱི་ཐག་རིང་བས་བརྒྱུད་པ་ལྷག་མི་འཕྲོད། འབྲེ་ཨ་ཙར་ནུ་རུ་ཞེས་བྱ་བས་ཚེའི་གྲུབ་པ་ཐོབ་པ་ཡིན་ཞེས་ཟེར་བའང་འདུག་སྟེ། མིང་གི་ཁྱད་པར་དུ་བྱས་ཀྱང་འགལ་བ་ནི་ཆུང་མོད། འོན་ཀྱང་བླ་མ་འཕགས་པ་རིན་པོ་ཆེ་ལ་སྨད་ལས་སྒྲོལ་དབང་གི་རྒྱུན་མ་རྙེད་ནས། སྤྲང་པོ་ལ་འདུག་ཀྱང་ཞུའོ་ཞེས་བཙལ་བས། མཚོ་རྒྱལ་གྱི་དངོས་སློབ་ཨ་ཙར་ནུ་རུ་བྱ་བ་ཚོའི་རིག་འཛིན་ཐོབ་པ་ཞིག་བསིལ་བ་ཚལ་ལ་སོགས་པའི་གནས་ངེས་མེད་དུ་རྒྱུ་བ་ལ་ཡོད་ཟེར་བ་ཐོས། དེར་གློ་བོ་ལོ་ཙཱ་བ་ལ་གསེར་མང་པོ་བསྐུར་ནས་སྒྲོལ་དབང་གི་རྒྱུན་ཐོབ་པ་ཡིན་ཞེས་ཟེར་ཏོ། །ས་ཕུར་དུ་གྲགས་པ་ནི། སློབ་དཔོན་ཆེན་པོ་པདྨའི་ཞབས་ཀྱི་སློབ་མ་འཁོན་ཀླུའི་དབང་པོ་ལས་རིམ་པར་བརྒྱུད་དེ། ཆོས་དང་རིགས་བརྒྱུད་གཉིས་ཀ་ཟམ་མ་ཆད་པས་སྐྱ་བ་རྣམས་ལ་གྲགས་པས་དེ་སྐད་དུ་གྲགས་པའོ།། །།ཡང་ཕུར་བ་གསང་བའི་རྒྱུད་ལ་བརྟེན་པ་ཕུར་བ་ཕུན་སུམ་ཚོགས་པ་དང་། གསང་བའི་རྒྱུད་དྲུག་དང་། ཀཱི་ལ་ཡ་ཏནྟྲ་བཅུ་གཉིས་ནས་བསྡུས་པ་གཤམ་སྔོན་ཅན་གྱི་སྐོར་གཉགས་ལས་བརྒྱུད་ཚུལ་སྔར་བཤད་ཟིན་ཏོ། །དེ་ལྟ་བུའི་ཡི་དམ་ལས་མངོན་རྟགས་བརྙེས་པ་ནི་བསམ་གྱིས་མི་ཁྱབ་པ་ཞིག་བྱུང་བས་ཐམས་ཅད་བསྙད་པར་མི་ནུས་ལ། ཁྱད་པར་དུ་གྱུར་བ་ལང་ལབ་བྱང་ཆུབ་རྡོ་རྗེ་ཞེས་བྱ་བ་དེ་གཞོན་ནུ་ནས་ཕ་མ་དང་བྲལ། ཕ་ཚན་རྣམས་ཀྱིས་རྗེ་བཙུན་མི་ལ་ལ་ཇི་ལྟར་བྱ་བ་བཞིན་དུ་ཤིན་དུ་
ཉམ་ཐག་པར་བཅོས་པས། འབྲེ་ཨ་ཙ་རས་ཐུགས་ཀྱིས་མ་བཟོད་ནས་ཕུར་བའི་མན་ངག་ལས་གནད་དུ་ཟབ་པའི་སྐོར་བྱིན་ཏེ་སྒྲུབ་པ་བྱས་ནས་ཕ་སྤུན་རྣམས་བརྩབས་བཅད། དེ་ལ་གྲགས་པ་ཆེན་པོ་འཕེལ་ནའང་སྔོན་གྱི་སྦྱིན་འབྲས་དབུལ་བས་འཁོར་རེའི་ལུག་རྫི་བྱེད་ཅིང་ཡོད་ཙ་ན། དགེ་བཤེས་ར་ལོ་ཙཱ་བ་དེ་མངའ་ཐང་དང་འབྱོར་བ་ཤིན་ཏུ་རྒྱས། བོད་ཀྱི་བླ་དཔོན་ཆེ་དགུས་དབང་མེད་དུ་འདུད་དགོས་པ་ཡིན། དེ་ལྟར་མ་བགྱིས་ན་ཁོང་གིས་གཤིན་རྗེའི་དྲག་སྔགས་ཀྱིས་སྒྲོལ་བར་གྲགས། དེ་ལ་དུམ་པ་རྒྱ་ཞང་ཁྲོམ་གྱིས་གཤིན་རྗེའི་སྐོར་རྫའི་ཟོ་མ་གང་གཏེར་ནས་ཕྱུང་སྟེ། ཚེ་བདག་སྡིག་པ་སྙིང་འཛིངས་ལ་སོགས་པ་ཕྱེད་ཙམ་ལས་མ་བཤུས་པ་རྣམས། ར་ལོའི་སྔུན་དུ་སོན་པས། རང་ཉིད་ཀྱི་གཤེད་སྐོར་ལ་ལྷན་ཐབས་སུ་བྱས། དེ་ལ་རྒྱ་གར་གྱི་ཁུངས་དང་འགྱུར་བཅོས། དེ་བཞིན་དུ་བུམ་ཐང་གི་གཏེར་ཁ་མང་པོའི་ཁྲོད་ནས་ཀྱང་། མཐུ་གཏད་སེལ་གསུམ། རྣམ་སྲས་ཛམ་ལ། ཚོགས་བདག་ལ་སོགས་པ་མན་ངག་ཟབ་དགུ་བྱུང་བས་གསར་འགྱུར་གྱི་ཤིན་རྗེ་ལས་མཐའ་མང་བ་མྱུར་བར་སོང་། མར་པའི་སྲས་དར་མ་མདོ་སྡེ་ལ་སོགས་པ་བྱང་ཆུབ་སེམས་དཔའ་བཅུ་གསུམ་དང་། གཉན་ལོ་ཙཱར་སོགས་རང་མཉམ་གྱི་ལོ་ཙཱ་བ་བཅུ་གསུམ་བསྒྲལ་བའི་སྔགས་མཁན་དེ། འཁོར་རེའི་སར་ཆོས་འཁོར་ལ་བྱོན་པས་ལང་ལབ་ཀྱིས་ཕྱག་མ་བཙལ། མི་བླུན་པོ་ཞིག་ཡིན་དགོངས་པ་ལ། སླར་ལང་ལབ་ཀྱི་མཚན་ཉིད་ཐོས་ནས། འོ་ན་ཁོ་ལ་དོ་ནུབ་ཀྱི་ཚེ་ལས་མེད་ཀྱི་སླུག་ཟེར། དྲག་ཤུལ་གྱི་ལས་བརྩམས་པས། དགུག་འདྲེན་གྱི་བདེན་བརྡར་དང་པོའི་ཚེ་ཁོང་དཔོན་སློབ་ལ་རྩངས་ཕུར་གྱི་ཆར་བབས་ནས། ཐོ་ཕྱིའི་གྲྭ་པ་རྣམས་སྨྲས། བར་བལ་ཕྱོགས་བཅུ་ཁྲོ་བོའི་དཀྱིལ་འཁོར་ཟ་གསོད་དང་བཅས་པའི་ལྕགས་ཕུར་གྱི་ཆར་བབས། ཐ་མའི་ཚེ་མེ་དཔུང་དང་འུར་སྒྲས་གང་སྟེ་ནམ་མཁའ་ལ་བལྟས་པས། ལྕགས་བསྲེགས་ལྟ་བུའི་རྡོ་རྗེ་གཞོན་ནུ་རི་ངོ་ཆད་པ་ཙམ་པར་ལོའི་ཐོག་ཏུ་བརྡམས་བརྡམས་འཆའ་འཆའ་ལྟར་འདུག་པས་
སྐྲག་པར་གྱུར་ཏེ། བཟོད་གསོལ་བྱས། ཕྱག་དང་འབུལ་བས་བསྙེན་བཀུར། གཤིན་རྗེའི་མཁན་པོ་ཕུར་ལ་རྡུགས་ཟེར་བ་དེ་ནས་བྱུང་། ཕུར་བའི་སྟོད་ལས་ལ་དངོས་གྲུབ་བརྙེས་པ་མང་དུ་བྱུང་སྟེ། སྨད་ལས་ལ་རྩལ་ཤུགས་ཐོན་པ་འདི་ལས་མ་བྱུང་བར་གྲགས། དེ་ལ་སློབ་མའི་གཙོ་བོར་གྱུར་བ་སྣ་ནམ་ཤེས་རབ་ཚུལ་ཁྲིམས། མོང་དགུའི་གྱི་གྱང་བསྐྱེལ། རོང་གི་སྐྲང་ཕུར་བུ་མགོ འུ་ཡུག་རོལ་པོའི་ཉང་ནག་གོ དེ་ལ་ཀྱི་གྱང་བསྐྱེལ་ནི། ཀྱི་བན་བྱང་ཆུབ་རིན་ཆེན་བྱ་བའི་ཁང་ཞིང་དང་ནོར་རྣམས་ཕ་སྤུན་གྱིས་ཕྲོགས། སྐྱོ་བ་ཤིན་ཏུ་འཕེལ་ཏེ་ལང་ལབ་ལ་ཕུར་བ་ཞུག་པས་ཟླ་བ་དགུར་ལྷ་བསྙེན་གྱིས། དེ་ནས་བསེ་ལྕགས་ཤེལ་གསུམ་ལ་ཟླ་བ་གཉིས་སྒྲུབས་ཤིག། དོན་འགྲུབ་བོ་གསུངས། དེ་ལྟར་བྱས་པས་ནུས་པ་ཚད་དུ་ཕྱིན། གྱང་གི་དྲུང་ན་མི་མང་པོ་ཉི་མ་ལྡེ་ཞིང་འདུག་པ་ལ་བལྟས་པས། ཐམས་ཅད་དགྲ་རུ་མ་གྱུར་བ་མི་འདུག་ནས། ཕུར་བ་གྱང་ལ་བསྡིགས་པས་གྱང་འགྱེལ། ཐམས་ཅད་ཕྱི་མའི་ལམ་དུ་བཀོད་པས་ཀྱི་གྱང་བསྐྱེལ་དུ་གྲགས་པས་མཚོན་ནུས་པ་ཅན་ཤ་སྟག་བྱུང་སྟེ་ཡི་གེར་བྲིར་མ་ལང་། ལར་ཕུར་བ་འདི་ནུས་པ་མཆོག་ཏུ་ཆེ་བར་གྲགས་པས། སློབ་དཔོན་ཆེན་པོས་ཙན་དན་གྱི་ནགས་ལ་མེ་ཤོར་བ་ལ་གདེངས་པས་ནགས་སོར་ཆུད། བི་མ་ལས་གངྒཱ་གྱེན་དུ་འཕྱུར་བ་ལ་གདེངས་པས་གངྒཱ་ཡན་མན་དུ་ཆད། བལ་བོ་ཤཱི་ལ་མཉུས་བྲག་མཁར་གོང་ཅན་ལ་གདེངས་པས་བྲག་རི་དུམ་བུར་བསྙིལ། ཇོ་མོ་མཁར་ཆེན་བཟས་སྤྱང་ཀིའི་རྗེས་ས་ལ་བཏབ་པས་སྤྱང་ཀི་རྦབ་ལ་འདྲིལ། མི་ནུ་རྒྱལ་བའི་སྙིང་པོས་བྱ་རོག་གིས་ཕྲེང་བ་ཁྱེར་བ་ལ་བསྡིགས་པས་བྱ་རོག་ཐང་ལ་ལྷུང་། ལོ་དཔལ་གྱི་བློ་གྲོས་ཀྱིས་དམག་གི་སྦ་ཁྱིམ་ལ་ཐེབས་པས་མོན་དམག་ཆམ་ལ་ཕབ། དེ་ལ་སོགས་ཏེ་དགྲ་བགེགས་གཉིས་ལ་ཐེབས་པས་ཆོ་འཕྲུལ་སྟོབས་པོ་ཆེ་གང་གིས་ཀྱང་བརྫི་བར་མ་ནུས། ནང་དུ་ཉོན་མོངས་དུག་ལྔ་ལ་ཐེབས་པས་མཆོག་གི་དངོས་གྲུབ་ཐོབ་པ་དཔག
ཏུ་མེད་པ་བྱུང་ངོ།། །།ཡང་གཏེར་མའི་ཕྱོགས་རང་བཟོས་མ་བསླད་པའང་ཤིན་ཏུ་མང་མོད་དེ། མངོན་རྟགས་གསལ་བ་སློབ་དཔོན་ཆེན་པོས་བཙན་པོ་ལ་དབང་རྒྱུད་གདམས་པ་དང་བཅས་གནང་ནས། རྟ་མགྲིན་ཕང་གསང་གི་ཆོས་སྐོར་དང་ལྷན་ཅིག་ཡེར་བ་སེ་བ་ལུང་གི་བྲག་ལ་གཏེར་དུ་གཏམས་པ། གྲུབ་པའི་དབང་ཕྱུག་འདར་ཕྱ་རུ་བས་ཇོ་མོ་ནགས་རྒྱལ་གྱི་ཕུག་པ་གོང་མར་སྒྲུབ་པ་མཛད་པས་སློབ་དཔོན་ཆེན་པོ་དང་དངོས་སུ་མཇལ། ཡེར་བ་ཟླ་བ་ཕུག་ཏུ་སྒྲུབས་ཤིག་གསུངས་པས་དེ་བཞིན་དུ་མཛད། དེར་ནང་རེ་བཞིན་སློབ་དཔོན་ཆེན་པོ་ཉི་ཟེར་ལ་ཆིབས་ནས་ཕེབས་ཏེ་ཆོས་གསུངས། ནུབ་རེ་བཞིན་སྲིན་པོ་འདུལ་དུ་འགྲོ་ཞེས་ཉི་ཟེར་ལ་བཅིབས་ཏེ་བཞུད། དེའི་ཚེ་ཡེར་བའི་སེ་བ་ལུང་ནས་མཚན་མ་རྫས་ཀྱི་ཕུར་བ་གཏེར་ནས་ཕྱུང་། ལྷ་སའི་ཚོང་དུས་སུ་ཕེབས་པ་ན། རླུང་འཚུབས་ཆེན་པོས་ཁྲོམ་འཐོར་བ་བྱུང་། དེ་ནས་གཙང་དུ་བྱོན་ཙ་ན། ས་པཎ་སྐྱིད་གྲོང་དུ་བྱོན་པ་དང་གནས་ཁང་གཅིག་ཏུ་འཛོམ། འདར་ཕྱར་ཞལ་འཆོས་པས་ཨོཾ་བཛྲ་ཀྱི་ལི་ཀྱི་ལ་ཡ་ཞེས་བགྲངས་པས། ས་པཎ་གྱིས། དེ་མ་དག། བཛྲ་ཀཱི་ལི་ཀཱི་ལ་ཡ་ཟེར་བ་ཡིན་གསུངས། དེར་འདར་ཕྱར་ཐུགས་ཡུས་ནས། སྔགས་མ་དག་ཀྱང་འདི་བཞིན་བྱེད་པ་ཡིན་གསུངས་ནས་བྲག་ལ་ཕུར་བ་ཐམ་ཐམ་བརྒྱབ་པས་འཇིམ་པ་ལ་བྱས་པ་བཞིན་སོང་། སླར་ཕུར་བ་ཚུར་ལ་གཅུས་ཀྱིན་འཐེན་པས་དབལ་ནས་ཅུང་ཟད་གས། དེ་རས་པཎ་གྱིས་གྲུབ་ཐོབ་ཏུ་ཤེས་ནས། ང་མུ་སྟེགས་པ་དང་རྩོད་དུ་འགྲོ་བས་དེའི་རིམ་གྲོར་འབྱོན་དགོས་གསུངས། རུང་གསུངས་ནས་ལྷན་ཅིག་ཏུ་བྱོན། སྐྱིད་གྲོང་དུ་ཕེབས་པ་ན། རྒྱ་གར་གྱི་ལུགས་བཞིན་བསྟན་པ་གང་རྒྱལ་བའི་རུ་མཚོན་དུ་བཙུགས། ས་པཎ་དང་འཕྲོག་བྱེད་དགའ་བོ་གཉིས་ཉི་མ་བཅུ་གསུམ་གྱི་བར་རྩོད་པའི་གཡུལ་ངོ་ལ་ཞུགས་པས། མཐར་ས་པཎ་རྩོད་པ་ལས་རྒྱལ་ཡང་། གྲུབ་རྟགས་འགྲན་ཟེར་འཕྲོག་བྱེད་དགའ་བོ་ནང་པའི་
བསྟན་པ་ལ་འཇུག་ཏུ་མཉན། དེར་མུ་སྟེགས་དེས་རལ་བརྒྱབ་ཏུ་བསྐྱུར། ལག་པ་གཤོག་པ་ལྟར་བརྐྱངས་ཏེ་ནམ་མཁའ་ལ་འཕུར་བས། ས་པཎ་རྡུགས་པ་ལྟར་གྱུར་ཏེ་བཛྲ་ཀྱེ་ལི་ཀྱི་ལ་རྒྱུག་ཤོག་ཅེས་འདར་ཕྱར་བོས། དེར་རྣལ་འབྱོར་གྱི་དབང་ཕྱུག་ཆེན་པོས་མུ་སྟེགས་ཀྱི་གྲིབ་མའི་སྙིང་གར། ཨོཾ་བཛྲ་ཀྱི་ལི་ཀྱི་ལ་ཡ་ཧཱུྃ་ཕཊ། ཅེས་ཕུར་བ་བཏབ་པས། མུ་སྟེགས་པ་བྱལ་རྡོ་བཏགས་པ་བཞིན་དུས་ལ་ལྷུང་། དེ་ནས་ས་པཎ་གྱིས་རྩོད་པ་ལས་རྒྱལ་བའི་དཔའ་རྟགས་སུ་འཕྲོག་བྱེད་དགའ་བོ་རབ་ཏུ་མ་བྱུང་བར་ཁྲིད་བྱོན་པ་ན། སློབ་དཔོན་ཆེན་པོས་བོད་ལ་མུ་སྟེགས་བསྲུང་བར་བཀའ་བསྒོས་པས། བརྟན་མ་བཅུ་གཉིས་ཀྱིས་ཆད་པས་བཅད་དེ་སྐྱིད་གྲོང་དང་བོད་ཀྱི་སོ་མཚམས་སུ་མུ་སྟེགས་དེ་ཁ་ནས་ཁྲག་སྐྱུགས་ནས་ལྔ་པའི་ལམ་དུ་བཏང་། ལར་ཕྱི་རོལ་པའི་གྲུབ་མཐའ་འཛིན་པ་ཙམ་བོད་ལ་བལྟར་མི་མངོན་པར་ལྷགས་སྲིད་ཀྱི། སངས་རྒྱས་ཀྱི་བསྟན་པ་ལ་དངོས་ཀྱིས་རྒོལ་བ་བྱེད་ནུས་པའི་བློ་སྟོབས་ཅན་མི་འོང་བ་ཡིན། འདིས་མུས་སྲད་དུ་བྱོན་ནས་གཙུག་ལག་ཁང་གི་རྟེན་གཙོར་ཕུར་བ་འདི་བཞག། སླར་རིམ་གྱིས་གྱར་ནས་ད་ལྟ་སེར་ཕུར་མཇལ་ཞེས་ཟེར་བའི་རྒྱུན་བྱུང་ངོ།། །།ད་ནི་གཏེར་ཁ་གོང་འོག་གི་གཏམ་བཤད་པར་བྱ་སྟེ། རྒྱ་ཆེར་རོལ་པ་ལས། བརྗོད་པ་མེད་པ་དྲན་པའི་གཏེར་དང་། བློ་གྲོས་རབ་ཏུ་འབྱེད་པས་བློ་གྲོས་ཀྱི་གཏེར་དང་། མདོ་སྡེ་ཐམས་ཅད་ཀྱི་རྣམ་ངེས་ཁོང་དུ་ཆུད་པས་རྟོགས་པའི་གཏེར་དང་། ཐོས་པ་ཐམས་ཅད་ཀུན་ཏུ་འཛིན་པས་གཟུངས་ཀྱི་གཏེར་དང་། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པས་སྤོབས་པའི་གཏེར་དང་། དམ་པའི་ཆོས་ཡོངས་སུ་བསྲུང་བས་ཆོས་ཀྱི་གཏེར་དང་། དཀོན་མཆོག་གསུམ་གྱི་རིགས་རྒྱུན་མི་གཅོད་པས་བྱང་ཆུབ་ཀྱི་སེམས་དང་། མི་སྐྱེ་བའི་ཆོས་ལ་གྲུབ་པ་ཐོབ་པས་སྒྲུབ་པའི་གཏེར་ཏེ། གཏེར་ཆེན་པོ་བརྒྱད་ཐོབ་པར་འགྱུར་རོ། །ཞེས་བཤད་པའི་གནས་གང་ཡིན་པ་དེ་གདོད་ནས་
སྤྲུལ་པའི་སྐུར་བྱང་ཆུབ་པའི་ཡེ་ཤེས་དམ་པའི་སྤྱོད་ཡུལ་དུ་གྱུར་ལ། རྣམ་པ་ཙམ་དུ་ཡང་རང་དོན་དུ་མཆོག་གི་དངོས་གྲུབ་ཆེན་པོའི་གོ་འཕང་ལ་འཛེགས་ཏེ། གསད་གསོ་དང་། རྫུ་འཕྲུལ་གྱི་ཡན་ལག་རྒྱ་མཚོ་ལྟ་བུ་ལ་དབང་འབྱོར་བས་རྣལ་འབྱོར་གྱི་དབང་ཕྱུག་ཆེན་པོའི་ས་ལ་བཞུགས་ཤིང་། གཞན་དོན་དུ་བསྟན་པའི་བྱ་བ་བླ་ན་མ་མཆིས་པ་དང་། སེམས་ཅན་གྱི་ཁམས་རྒྱ་མཚོ་ལྟ་བུ་འདུལ་བའི་ཐབས་ལ་མཁས་པར་སྟན་པ་ནི། སྤྲུལ་པའི་སྐུ་ཆེན་པོ་འདི་དག་ཏུ་ཡིད་ཆེས་སོ། །དེ་ལ་ཁ་ཅིག་གིས་གཏེར་ཟེར་བའི་ཕྱོགས་ཐམས་ཅད་ལ་སྒྲོ་སྐུར་བྱེད་པ་ནི། ལྕེ་ལ་ཐོང་གཤོལ་ལྔ་བརྒྱས་རྨོ་བའི་ལས་ཡིན་ནོ། །གཏེར་དུ་བཏགས་པ་རྣམ་པ་ཐམས་ཅད་པའི་ཆ་ལ་ནི། ཁོ་བོ་ཅག་གིས་ཀྱང་དགག་བསྒྲུབ་གཉིས་ཀ་བྱ་བ་མ་ཡིན་ཏེ། རྒྱན་ལས། མི་རིག་པ་ཡིས་གཟུགས་ལའང་མི་རིག་ན། ཐེ་ཚོམ་ཟ་བའི་ཆོས་ལ་སྨོས་ཅི་འཚལ། ཞེས་དང་། རང་ས་ན། དགེ་བ་ཡིན་ན་བཟང་བ་སྟེ། སྡིག་པ་བྱེད་པའང་སྡིག་བལྟའོ། །ཞེས་དེ་དང་དེའི་འབྲས་བུ་མི་འཆོལ་བའི་ཕྱིར་རོ། །འོན་ཏེ་རྣམ་པ་ཐམས་ཅད་ནས་རྫས་འགལ་བ་མཐོང་བའི་ཆོས་སུ་གཏན་ལ་ཕེབས་པ་བྱུང་ཡང་། དེས་རྙིང་མའི་བསྟན་པ་ཐམས་ཅད་ཉམ་ཉེས་པར་མི་བལྟ་སྟེ། དཔེར་ན་དགེ་སློང་ལྷ་ཆེན་པོ་དང་། སྡེ་སྣོད་འཛིན་པ་གཞོན་ནུ་སྡེ་བདུད་ཀྱིས་ཁེབས་ནས་དེ་བཞིན་གཤེགས་པའི་གསུང་རབ་ཆུད་གསན་པ་ལྟ་བུའོ། །དེས་ན་ཆོས་མ་ཡིན་པ་ཆོས་སུ་བརྫུས་པའམ། གཏེར་མ་ཡིན་པ་གཏེར་མར་བརྫུས་པ་དེ་ཀ་སྡེ་ཚན་གཅིག་ཏུ་འཇོག་པར་འོས་ཀྱི། གསང་སྔགས་ཀྱི་རྒྱུད་སྡེ་ཆེན་པོའི་བརྗོད་བྱ་དང་། བརྗོད་དོན་མ་ནོར་ཞིང་། འབྲས་བུ་གྲུབ་པའི་བསླུབ་མེད་པ་འདི་དག་ལ། ས་ཆོས་དང་། །རྡོ་ཆོས་ཞེས་སྐུར་བ་བྱེད་པ་ནི་བདུད་ཀྱི་ལས་སུ་འགྱུར་ཏེ། བཅོམ་ལྡན་འདས་ཀྱིས། བདག་བསྟོད་གཞན་ལ་སྨོད་པའི་བྱང་ཆུབ་སེམས་དཔའ་ནི། བདུད་ཀྱིས་ཡོངས་སུ་བསླད་ཅིང་བློ་ཆུང་རིག་པར་བྱ།
ཞེས་གསུངས་པའི་ཕྱིར་རོ། །དེ་ལ་ལྷ་བཙན་པོ་ཁྲི་སྲོང་ལྡེའུ་བཙན་སླར་ཡང་རང་གི་མན་ངག་སྤེལ་བའི་སླད་དུ་བྱོན་པ་མངའ་བདག་ཉ་བ་ཉི་མ་འོད་ཟེར་ནི། ཡུལ་ལྷོ་བྲག་གཏམ་ཤུལ་ཞེས་བྱ་བང་། ཡབ་ཉང་སྟོན་ཆོས་འཁོར་དང་། ཡུམ་པདྨ་བདེ་རྩལ་གྱི་སྲས་སུ་ཤིང་ཕོ་འབྲུག་གི་ལོ་ལ་བལྟམས། སྐུ་གཞོན་ནུ་ནས་ངོ་མཚར་བསམ་གྱིས་མི་ཁྱབ་ཅིང་། མཁའ་འགྲོ་མ་རིགས་བཞི། རྗེ་བཙུན་སྒྲོལ་མ། ཐུགས་རྗེ་ཆེན་པོ། །སློབ་དཔོན་པདྨ་ལ་སོགས་པའི་ཞལ་གཟིགས་ཤིང་ཆོས་ལ་བསྐུལ། རང་གི་ལབ་ལས་གསན་པ་མང་པོ་མཛད། དགུང་ལོ་བཅུ་གསུམ་པ་ལ་ཐུགས་རྗེ་ཆེན་པོ་དང་ཕུར་བ་གྲུབ་སྟེ་བརྗོད་ཕུའི་བྲག་ལ་ཕྱག་ཞབས་ཀྱི་རྗེས་དང་། ཟངས་ཀྱི་ཕུར་བས་རྟ་སྐད་མངོན་སུམ་དུ་འཚོར་བ་བྱུང་། ཡེ་ཤེས་ཀྱི་མཁའ་འགྲོ་མས་བྲག་རྡོ་རྗེ་རྩེ་ལྔ་འདྲ་བར་སོང་ཞིག་ཅེས་སྨྲ་བོའི་རི་ལུང་བསྟན། འདུལ་འཛིན་རྒྱལ་སྲས། ཁམས་འབུ་ཡང་ལེ། གུ་རུ་ཁྲོ་བོ་སོགས་ལས་གསར་རྙིང་གི་ཆོས་མང་པོ། །ཁྱད་པར་གྲུབ་ཐོབ་དངོས་གྲུབ་ལས་སྤྱན་རས་གཟིགས་དང་། བཀའ་བརྒྱད་བཀའ་མའི་དབང་ལུང་ཡོངས་སུ་རྫོགས། སྨྲ་བོའི་རི་ལ་སྒྲུབ་པ་མཛད་ཀྱིན་ཡོད་ཙན་བུ་ལྟོས་ཤིག་བྱ་བའི་སྒྲ་ཞིག་བྱུང་། བལྟས་ཙན་རྣལ་འབྱོར་ལུས་པའི་རྒྱན་ཅན་ཞིག་འདུག། ནང་དུ་བོས་ནས་ཚ་བ་དྲངས་པས་དེ་ན་རེ། ང་ནི་ནམ་མཁའི་རྣལ་འབྱོར་བ། །དབང་ཕྱུག་རྡོ་རྗེ་བྱ་བ་ཡིན། །བུ་ཁྱོད་ལས་དང་སྐལ་བ་ལྡན། །པདྨས་དབང་དང་ལུང་གིས་སྐྱོབས། །གསང་སྔགས་ཟབ་མའི་ཆོས་རྣམས་ཀུན། །ད་ལྟ་མཁའ་འགྲོའི་ལ་གད་ཡོང་། །གསོལ་བ་ཐོབ་པ་མྱུར་དུ་ཡོད། །ཞེས་ཁ་བྱང་ཡང་བྱང་གནད་ཡིག་གསུམ་གཏད་དེ་འཇའ་ལྟར་ཡལ། གྲབ་མངོན་ཤེས་དང་ར་ཤག་གཏེར་སྟོན་གྱིས་ཀྱང་ཁ་བྱང་སྤྲད། ཁྱད་པར་མཁའ་འགྲོ་ཡེ་ཤེས་མཚོ་རྒྱལ་གྱི་སྤྲུལ་པས་སྟག་སྒྲོམ་ཆོས་གཏེར་གྱིས་གདབ་གཏད་པས་མཁའ་འགྲོའི་སྒྲུབ་སྐོར་སོགས་མན་ངག་མང་པོ་བྱུང་། ཁོ་མཐིང་གི་གནས་
ཡིག་ལྷའི་ཕྱག་མཛུབ་ཆད་པ་ཚོང་པས་ཁྱེར་ཏེ་ཕུལ་བ་ལས། སྒྲོམ་སྐྱ་སྒྲོམ་སྨུག་གཉིས་ནས་བདེ་གཤེགས་འདུས་པ་རྒྱལ་པོའི་བླ་དཔེ་དང་། རྟ་མགྲིན་བཀའ་སྲུང་གི་སྐོར་གྱིས་མཆོན་ཏེ་ཆོས་གཏེར་དང་བྱིན་རླབས་ཀྱི་རྟེན་དཔག་ཏུ་མེད་པ་བྱོན། བདེ་གཤེགས་འདུས་པའི་སྨན་སྒྲུབ་མཛད་པས་སྨན་གྱི་ལྷ། མོས་ཨ་རུ་ར་རློན་པ་ཕུལ། ཡེ་ཤེས་མཚོ་རྒྱལ་དང་དངོས་སུ་མཇལ་ནས་དངོས་གྲུབ་ཅི་འདོད་གསུངས་པ་ལ། ཆོས་འདོད་ཞུས་པས་མཁའ་འགྲོ་ལུང་བསྟན་བྱ་སྐོར་དང་ཞུ་ལན་བརྒྱ་རྩའི་དཔེ་གཏད། དུར་ཁྲོད་བསེལ་བའི་ཚལ་དུ་མངོན་སུམ་པ་མ་བྲེད་ནས་དེར་སློབ་དཔོན་ཆེན་པོ་དང་མཇལ། བུ་ཚངས་པ་ལྷའི་མེ་ཏོག་སླེབ་པ་མ་གསུངས་ནས་ཀེང་རུས་ཀྱི་ཁྲི་ལ་བཞག། སྒྲུབ་ཆེན་དགུས་བཀའ་བརྒྱད་སྤྱི་རང་བྱེ་བྲག་གི་དབང་ཐམས་ཅད་རྫོགས་དང་གནང་། ཡི་དམ་གྱི་ལྷ་དང་གཉིས་སུ་མེད་པར་གྱུར་ནས་ཆོས་སྐྱོང་བྲན་དུ་འཁོར། ཕྲིན་ལས་ནམ་མཁའི་མཐའ་དང་མཉམ་པར་སོང་བས་དུས་དེ་ཚན་གསང་སྔགས་འཆང་བའི་གཟུགས་སུ་གནས་པ་གཉིས་ལམ་དུ་འདྲིས་མང་བ་ལའང་ཁྱོད་ཅག་གཏེར་ཁ་གོང་དོག་གང་གི་ལུགས་ཡིན་ཞེས་འདྲི་བ་བྱུང་། བསྟན་པའི་བྱ་བ་དང་རྫུ་འཕྲུལ་གྱི་ནུས་པ་བསམ་གྱིས་མི་ཁྱབ་སྟེ་རྣམ་ཐར་གྲགས་པ་ཆེ་བས་འདི་ཙམ་གྱིས་མཚོན་པར་ནུས། སློབ་མ་ནི། གཉོས་གྲགས་རྐྱལ། ཞིག་པོ་བདུད་རྩི། སྲས་མི་བསྐྱོད་རྡོ་རྗེ། སྨན་འོན་པ། སེ་སྟོན་ཁྲི་མཆོག་སྟེ་བཀའ་བབས་ཀྱི་བུ་ལྔ། སྲས་ཆུང་བ་མངའ་བདག་འགྲོ་མགོན་ནམ་མཁའ་དཔལ་ནི་སྨིན་གྲོལ་ཡོངས་རྫོགས་ཀྱི་བཀའ་བབས་གཏད་པའི་བསྟན་པའི་བདག་པོ་ཡིན། དགུང་ལོ་རེ་དགུ་པ་ཤིང་ཕོ་བྱི་བའི་བོ་ལ་རྫུ་འཕྲུལ་གྱི་བཀོད་པ་རྒྱ་ཆེན་པོ་དང་། ཁྱད་པར་ཐུགས་ཀ་ནས་ཧྲཱིཡིག་དཀར་པོ་ཞིག་བདེ་བ་ཅན་དུ་གཤེགས་པར་བསྟན་ཏེ་སྐུའི་བཀོད་པ་བསྡུས། སླར་སྐུའི་སྤྲུལ་བ་རྒྱ་གར་ཤར་ཕྱོགས་སུ་བཀོད་པ་སྣ་ཚོགས་སྟོན་པའི་རྣལ་འབྱོར་བ་ཅིག། གསུང་གི་སྤྲུལ་པ་གུ་རུ་ཆོས་ཀྱི་དབང་ཕྱུག་ཐུགས་ཀྱི་སྤྲུལ་པ་ཡུལ་
ཉེར་བཞི་ལ་སྤྱོད་པའི་རྣལ་འབྱོར་བ་ཅིག་སྟེ་གསུམ་ཅིག་ཅར་དུ་འབྱུང་བར་ལུང་བསྟན། ལོ་ཙཱ་བ་ཆག་གིས་གདུང་བཞུ་བས་མེ་སྦར་བར་མ་ནུས། སླར་སྟོན་པ་མཆོག་གི་སྐུ་གདུང་བཞིན་མེ་རང་བྱུང་དུ་འབར། དེ་ལས་འཇའ་ཚོན་བྱུང་བ་ནུབ་ཕྱོགས་སུ་ཟུག། གདུག་བདེ་ན་ཁྱེའུ་གཞོན་ནུ་རུས་པ་དང་རིན་པོ་ཆེའི་རྒྱན་ཅན་ཧ་རི་ནི་ས་སྒྲོག་པ་མཁའ་འགྲོ་མ་མང་པོའི་འཁོར་དང་བཅས་པ་ཀུན་གྱིས་མཐོང་། ལྷ་སའི་བཅུ་གཅིག་ཞལ་གྱི་ཐུགས་ཀ་དང་གདུང་ཁང་གཉིས་འཇའ་དཀར་པོས་ཏ་ལ་མར་འབྲེལ་འབྱུང་། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་གྲུབ་པའི་རྟགས་སུ། ཐུགས་ལྗགས་དང་དབུ་སྐྲ་ལ་ཞུགས་ཀྱིས་ཟ་བར་མ་ནུས་ཤིང་། རྟེན་དང་རིང་བསྲེལ་མཐའ་ཡས་པ་བྱོན་ཏོ། །དེ་ནས་སྲས་འགྲོ་མགོན་ཡབ་ཀྱི་དགོངས་པ་རྫོགས་པའི་བྱ་བ་ལ་ཞུགས་ཏེ། སྐུའི་རྟེན་རིགས་གསུམ་སེམས་དཔའ་མི་ཚད་དང་མཉམ་པ་ནཻཔ་ལའི་ཡུལ་དུ་བསྐྲུན་ནས་སྤྱན་དྲངས། གསུང་གི་རྟེན་དུ་མདོ་མང་དང་རྒྱུད་འབུམ་གསེར་བྲིས་མ། ཐུགས་ཀྱི་རྟེན་དུ་སྐུ་འབུམ་མཐོང་གྲོལ་ཆེན་མོ་བཞེངས། རབ་ཏུ་གནས་པ་ལ་ཁ་ཆེའི་བསོད་སྙོམས་པ་ཆེན་པོ་པ་ཧཱ་མཎྜིི་ཏ་ཤཱཀྱ་ཤྲཱི་སྤྱན་དྲངས་ནས་ཆོས་འཁོར་ལང་བཙུགས། སྲས་འགྲོ་བའི་མགོན་པོ་ཉིད་ཀྱིས་གཙུག་ཕུད་ཕུལ། འོན་ཀྱང་ཕྲིན་ལས་འདི་ཀ་ཆེ་གསུངས་ནས་རབ་ཏུ་བྱུང་བར་མ་གནང་། གསེར་ཀ་ཊོ་རར་བླུགས་པའི་འབུལ་བ་དང་ཞབས་ཏོག་བྱ་ནོམ་པས་བསྟི་སྟང་དུ་བྱས། སླར་པཎྜིི་ཏ་གཤེགས་ནས་ཀྱང་ལྷོ་བྲག་དང་མོན་ཡུལ་གྱི་འདུ་བ་མང་པོས་གསེར་གྱི་འབུལ་བ་རྒྱ་ཆེན་པོ་བྱུང་བ་རྣམས་ཁྲོ་ཕུར་འབུལ་དུ་བྱོན་པས། ་པཎྜི་ཏ་ན་རེ། མཆོད་གནས་རང་གནས་སུ་ལྡོག་ནས་ཀྱང་འབུལ་བ་སླར་བསྐྱེལ་བ་ཇོ་སྲས་མི་བཟང་གསུངས་ནས་མཉེས་ཚོར་ཆེན་པོ་མཛད་སྐད། སྲས་འགྲོ་མགོན་ཉིད་སྤྱན་རས་གཟིགས་ཀྱི་སྤྲུལ་པར་ལུང་བསྟན། རྫུ་འཕྲུལ་ཤིན་ཏུ་ཆེ་བས་དགོས། ལྗོགས་སུ་དམིགས་ནས་ཤམ་པོའི་མདུན་གྱི་
རྡོ་རྣམས་ནམ་མཁའ་ལ་ལུག་ཁྱུ་བཞིན་དུ་དེད། །གཞན་གྱི་སྣང་ངོར་གང་ནས་བྱུང་ཆ་མེད་པར་སྐྱི་ཆུའི་འགྲམ་དུ་རྡོ་སྐྱ་ཆག་གེ་ཆགས་པ་ལ་ཇོ་བོའི་ཆུ་རགས་མཛད། སྔར་རྡོ་རྣམས་རིགས་མ་ནོར་བ་ཡོད་ཟེར། བལ་རིས་ཀྱི་ཐང་ཀ་ཐོག་ཚད་མ་བརྒྱ་དང་བརྒྱད་ཀྱང་བཞེང་པ། མཐུ་རྩལ་དང་ནུས་པ་ཤིན་ཏུ་ཆེ་ཞིང་ཆོས་སྐྱོང་བྲལ་དུ་འཁོལ་བས། ཐོག་སེར་ལ་སོགས་པས་སྐུ་དགྲར་གྱུར་པ་དག་ཟླ་དུས་ལ་མི་ལྟོས་པར་ཉི་མའི་སྔ་ཕྱི་ལ་བཙན་ཐབས་སུ་བརླག་པར་མཛད་པ་སོགས་ཀྱི་ལོ་རྒྱུས་དུ་མ་ཡོད། ཐུགས་རྗེ་བསམ་གྱིས་མི་ཁྱབ་པས་གུ་རུ་ཆོས་དབང་སོགས་སྤྲུལ་པའི་སྐུའི་སློབ་མ་ཡང་མང་དུ་བྱུང་། འདིའི་སྲས་མངའ་བདག་བློ་ལྡན་འཇམ་དཔལ་གྱི་སྤྲུལ་པ་དང་། དེའི་སྲས་མངའ་བདག་བདུད་འདུལ་ཕྱག་རྡོར་གྱི་སྤྲུལ་པ་སྟེ། ཉང་རིན་པོ་ཆེའི་གདུང་བརྒྱུད་ལ་རིགས་གསུམ་མགོན་པོའི་སྤྲུལ་པ་བྱུང་བར་ལུང་བསྟན་པ་ཡིན་ནོ། །ཆོས་ཀྱི་བརྒྱུད་པ་ལའང་སྲས་བརྒྱུད་དང་སློབ་བརྒྱུད་གཉིས་ཀའི་ལུགས་ཡོད་དོ། །གཏེར་ཁ་འོག་མར་གྲགས་པའི་བདག་ཉིད་ཆེན་པོ་གུ་རུ་ཆོས་ཀྱི་དབང་ཕྱུག་གི་གདུང་ནི། བསྟན་པ་སྔ་དར་གྱི་ཚེ་བོན་གཉའ་རེངས་བྱ་བས་བཙན་པོ་ཁྲི་སྲོང་ལ་ཐོག་ཕབ་སྟེ་བཀྲོངས་པར་ཁས་བླངས་པ་ན། སློབ་དཔོན་པདྨ་དང་། རིམ་ལ། བཻ་རོ་གསུམ་ཀའི་སློབ་མར་གྱུར་བ་སྤང་རྗེ་བཙན་ཁྲོམ་བྱ་བའི་སྔགས་པ་ནུས་པ་ཅན་ཞིག་གིས། བོན་པོས་ཐོག་ལྔ་དུས་གཅིག་ལ་ཕབ་པ་སྡིགས་མཛུབ་ཀྱིས་བླངས་ཏེ་བོན་པོའི་གྲོང་ལ་རང་གཤེད་དུ་བཏང་ནས་བརླག་པར་བྱས། བཙན་པོས་དེ་ལ་བྱ་དགའ་ཆེན་པོ་མཛད། དེ་ལ་སྲས་སྤང་རིག་འཛིན་སྙིང་པོ་ཞེས་བྱང་ཞིག་བྱུང་སྟེ། དས་ཡང་འདུལ་ཕྱི་ལྷ་ཁང་བཞིའི་མཆོད་གཉེར་མཛད། ལོ་སྐོར་རེ་ལ་མཆོད་པ་ལ་འབྱོན་པ་ལས་ཁོ་མཐིང་དུ་བྱོན་པའི་ཚེ་ལ་ཡག་རྫ་བར་གྱི་དཔོན་ཆེན་སྤྲད་པས་ནོར་གཞིས་མང་དུ་ཕུལ། ཚེ་སྔ་མའི་ཡུལ་ཡིན་གསུངས་ནས་བདག་གིར་མཛད། དེའི་སྲས་ཀུན་མཁྱེན་ཤེས་རབ་རྒྱལ་པོ་ནས་མཁྱེན་ལྡན་ནུས་པ་ཅན་བར་མ་ཆད་
དུ་བྱུང་བའི་སྤང་སྟོན་གྲུབ་པའི་སྙིང་པོ་ཞེས་བྱ་བ་དེས་བླ་མ་སངས་རྒྱས་ཀྱི་སྒོམ་ལ་བདག་ཚངས་པར་སྤྱོད་པར་ཞུས་པས། དགེ་སློང་གི་སྡེ་བརྒྱ་ལས་བྱང་ཆུབ་སེམས་དཔའ་གཅིག་འགྲོ་དོན་ཆེ་བས་བྱང་ཆུབ་སེམས་དཔའི་གདུང་མ་བཅད་གསུངས། དེར་ཁྱིམ་ན་བཞུགས་པའི་ཚེ་མཁའ་འགྲོ་གལ་གྱི་དབང་མོ་ལ་ཇོ་མོ་གྱིས་ཤིག་ཟེར་བའི་ལུང་བསྟན་བྱུང་། སླར་ནམ་མཁའ་ལ་གྱ་གྱུར་འགྲོ་བའི་གྲུབ་ཐོབ་ཀྱི་བརྒྱུད་པ་དཀར་བཟའ་མགོན་སྐྱིད་ཡིན་པར་ཤེས་ནས་བདག་གིར་བཟུང་བ་ལས། ལྷུམས་སུ་ཞུགས་པའི་ཚེ་ཉི་ཟླ་ཁ་སྦྱོར་སྤྱི་བོར་ཐིམ་པ་དང་། ལྷུམས་ནས་སྐྱེ་མེད་ཀྱི་ཡི་གེའི་སྒྲ་ཡང་ཡང་སྒྲོག་པ་དང་། མདའ་དར་གཏད་ངེ་ཚིགས་སུ་བཅད་པ་སོགས་སྟགས་ཁྱད་པར་ཅན་བྱུང་། སྤྲེའུ་ལོ་དཔྱིད་རའི་བཅོ་ལྔའི་ཉི་ཤར་ལ་བལྟམས། མཚན་བརྗོད་གསེར་མ་ཞིག་བི་ཞིང་ཡོད་པའི་ཚིག་མཚམས་ལ་རྟེན་འབྲེལ་བརྟགས་པས། ཆོས་ཀྱི་དབང་ཕྱུག་ཆོས་ཀྱི་རྒྱལ། བྱ་བ་དང་ཐུག་ནས་མཚན་དེར་བཏགས། མིག་མཐོང་མཁན་དག་གིས་ཀྱང་ལྷ་འདྲིས་མཆོད་པར་འདུག་ཅེས་ཟེར། ཡབ་ཀྱིས་འབྲི་གུང་འཇིག་རྟེན་མགོན་པོ་ལས་ཕུར་བ་རྩ་རྒྱུད་ཉན་པའི་ཚེ། ཁྱོད་ཀྱི་བུ་ཐ་ཆུང་ཅིག་ལ་ཆོས་སློབས་ཤིག། དེས་ཕྲིན་ལས་འབྱུང་ངོ་ཞེས་ཀྱང་གསུངས། དེ་བཞིན་དུ་མལ་ཀ་བ་ཅན་ན་རེ། དགེ་བ་ཤེས་ལྷོ་པ་ཁོ་དེ་མདའ་ལྔ་དང་གཞུག་ཅིག་ཚགས་ཀྱི་ས་དང་། དགྲ་བོའི་སྙིང་ལ་ཕོག་པའི་མདའ་གཅིག་འོད་ཞེས་གསུངས། ཞང་རིན་པོ་ཆེས་ཀྱང་དགེ་བཤེས་ལྷོ་ཆུང་བ་ཁྱོད་ཀྱི་བུ་ངས་བྱའམ། ཀུར་ཡིན་ཁྱོད་ལ་ང་འདྲ་བའི་བུ་གཅིག་འོང་གསུངས་པ་སོགས་ལུང་བསྟན་མང་པོ་ཐོབ། ལོ་བཞིན་ས་ཡབ་ལས་བྲི་ཀློག་བསླབས། སྒྲ་སྒོ་མཚོན་ཆ། རིག་ཀློག་སྡེ་ལྔ། བི་བལྟ་ཆེན་མོ་སོགས་སྒྲའི་བསྟན་བཅོས་བཅུ་གསུམ། སྐྱེ་བོ་གསོ་ཐིགས་སོགས་ཞུགས་ཀྱི་བསྟན་བཅོས་བཅུ། ནག་རྩིས་དང་། སྨན་དཔྱད་བཀའ་གཏེར། རྒྱལ་རབས་སྡེ་བདུན། ལྡེ་རྒྱུད་ཆེན་པོའི་སྒྲུང་འབུམ་
སོགས་གླུ་གར་གྱི་བསྟན་བཅོས་བརྒྱ་དང་བཞི། སྔོན་གྱི་གཞུང་ཆེན་བདུན་ཅུ་དོན་ལྔ། མདོས་གཞུང་ཆེན་ཁོ་བརྒྱ་ཕྲག། གསང་སྔགས་ཕྱི་ནང་གི་ཐིག་རྩ་མང་པོ། ཕུར་བའི་སྐོར་བོད་ཆེན་བཞི་ལ་སོགས་པ་ཐོས་པ་མང་པོ་མཛད། བཅུ་ལ་གསར་མའི་ཕྱག་རྡོར་ལུགས་དྲུག་གསན་ཏེ་བསྒྲུབས་པས་བུམ་ཆུ་ཁོལ། གཤིན་རྗེའི་གཤེད་དང་ཕུར་བ་ལ་བསྙེན་པ་ཚང་དུ་བསྐྱལ། བཅུ་གཅིག་པ་ལ་སྒྱུ་འཕྲུལ་གྱི་དབང་རྒྱུད་མན་ངག་ཐམས་ཅད་རྫོགས། བཅུ་གཉིས་ལ་ཀ་ཀ་ནི་གྲ་ལྔ། སྒྲུབ་ཐབས་བརྒྱ་རྩ་སོགས་མཁྱེན་པར་མཛད་ཅིང་ཡིག་བརྒྱའི་སྒྲུབ་པ་མཛད། བཅུ་གསུམ་ལ་ཡང་དག་དང་མ་གཤིན། ཐུགས་རྗེ་ཆེན་པོ་ལུགས་གཉིས་དང་། རྟ་མགྲིན་ལ་སོགས་གསར་རྙིང་མང་པོ་གསན་ཞིང་བསྒྲུབས། བཅུ་གསུམ་པའི་དུས་ཉམས་སྣང་ལ་ཇོ་མོ་སྒྲོལ་མས་ཤེལ་མཁར་ཞིག་གི་རྩེར་ཁྲིད་པས་རྡོ་རྗེ་སེམས་དཔའ་དང་མཇལ། དེ་ནས་མཁའ་འགྲོ་མ་གདོང་པ་བཞི་པ་ཞིག་འདུག་པའི་མདུན་ཞལ་དཀར་པོ་ནས། སངས་རྒྱས་བསྟན་པ་ཁྱོད་ཀྱིས་ཟུང་། གཡས་ཞལ་སེར་པོ་ནས། དམ་ཆོས་དར་བ་ཁྱོད་ཀྱིས་གྱིས། རྒྱབ་ཞལ་དམར་པོ་ནས། དགེ་འདུན་དབུ་འཕང་ཁྱོད་ཀྱིས་བསྟོད། གཡོན་ཞལ་སྔོན་པོ་ནས། དུས་ངན་གདུལ་དཀའ་ཁྱོད་ཀྱིས་ཐུལ། ཟེར་ནས་མདའ་དཀར་པོ་སྒྲོ་ལྔ་པ་ཅིག་གཏད། དགུང་ལོ་བཅུ་བཞི་བར་ཏི་སེ་གྲོ་གྱང་སར་པར། ཚད་མ་དང་། མངོན་པ་ཀུན་ལས་བཏུས། སྤྱོད་འཇུག། དགྱེས་རྡོར་ལ་སོགས་པའི་གཞུང་ཆེན་པོ་དང་། ཕྱག་རྫོགས་ཞི་བྱེད་ཆོས་དྲུག་ལ་སོགས་པའི་མན་ངག་ཉན། མཐའ་སྐོར་བ་ལས་དབུ་མ་བདེན་ཆུང་། མཚུར་སྟོན་ཡབ་སྲས་ལས་ཨ་ཏིའི་སྐོར་སོགས་མདོ་སྔགས་གསར་རྙིང་གི་བཤད་སྒྲུབ། ཡབ་ལས་ཞི་བྱེད་ཕྱག་རྫོགས་གཅོད་ཡུལ། གདམས་ངག་ངོ་སྤྲོད། བསྟན་སྲུང་དྲག་སྔགས་མཐའ་དག་ཉན་ཞིང་ཉམས་འོག་ཏུ་ཆུད་པར་མཛད། བཅུ་བདུན་པ་ལ་མངའ་བདག་འགྲོ་མགོན་དང་མཇལ་ཏེ་ཉང་རིན་
པོ་ཆེ་ཉི་མ་འོད་ཟེར་གྱི་གཏེར་ཆོས་མཐའ་ཡས་པའི་བདག་པོར་གྱུར། །བཅོ་བརྒྱད་པའི་ཚེ་ས་པཎ་ལ་གནས་གཞི་སྒང་པོར་སེམས་བསྐྱེད་དང་། གྱང་གསར་དུ་ཆོས་འབྲེལ། ལྷ་ལུང་གི་མཆོད་རྟེན་རྩར་རབ་གནས་ཐོབ། དེ་ནུབ་མནལ་ལམ་དུ་རྒྱ་ནག་རི་བོ་རྩེ་ལྔར་མེ་ཏོག་ཨུ་དུམ་ཝར་འཚོལ་དུ་ཕྱིན་པས། ཨུཏྤལ་སྔོན་པོའི་སྟེང་ནས་འཕགས་པ་འཇམ་དཔལ་གྱིས། ཛྙཱ་ན་ཀཱ་ཡ་དྷ་རྨཱ་ཏུ། ཆོས་ཀྱི་དབང་ཕྱུག་ང་ཡིན་ནོ། །ང་ནི་ཁྱོད་ཀྱི་སེམས་རྟོག་གོ། སེམས་རྟོག་ནི་ཆོས་ཀྱི་སྒོ་མོ་བསམ་གྱིས་མི་ཁྱབ་པའོ། །ཆོས་སྒོ་བསམ་གྱིས་མི་ཁྱབ་པའི་དོན་ནི་རང་བྱུང་གི་ཡེ་ཤེས་ཐིག་ལེ་ཉག་གཅིག་གོ། ཆོས་སྒོ་བརྒྱད་ཁྲི་བཞི་སྟོང་གི་དོན་ཁྱོད་ལ་བཤད་ཟིན་གྱི་དེའི་དོན་ལ་དཔྱོད་ཅིག། ཅེས་གསུངས་པའི་མོད་ལ་མནལ་སད་པས་ཆོས་ཐམས་ཅད་ཐོབ་པའི་ངེས་ཤེས་རྙེད། ཡུལ་གྲ། མངོན་པ་ལ་མཆོག་ཏུ་མཁས་པས་གྲ་བ་མངོན་ཤེས་སུ་གྲགས་པའི་སྡེ་སྣོད་འཛིན་པ་ཆེན་པོ་གཏེར་སྟོན་རྣལ་འབྱོར་གྱི་དབང་པོ་དེས་བསམ་ཡས་ནས་བཏོན་པའི་ཁ་བྱང་རིམ་པར་བརྒྱུད་པ་དགུང་ལོ་བཅུ་གསུམ་པའི་ཚེ་ཕྱག་ཏུ་བྱུང་། བར་དེར་ཁ་བྱང་དེ་ལ་བརྟེན་ནས་བླུན་པོ་གཟུ་ལུམས་ཅན་མང་པོས་འདོན་པར་བརྩམས་པ་ལ་ལ་ཤི། ལ་ལ་ཐོག་སེར་གྱིས་བྱེར་དགོས་པ་བྱུང་། ཁ་བྱང་དེ་ནང་དུ་བཞག་ན་ཆོ་འཕྲུལ་གྱིས་མི་ཚུགས། ལམ་འཕྲང་དང་། བཞི་མདོ་དང་། ཆུའི་དཀྱིལ་དང་། ས་འོག་ལ་སོགས་པར་བསྐྱུར་ཀྱང་། འབྱུང་བའི་གནོད་པས་མི་ཤིགས། བཟུང་དུའང་མ་བཏུབ་པས་བརླག་ཤོག་སེར་པོ་ཞེས་མིང་ཐོགས། ཡབ་ན་རེ། ཐམས་ཅད་བརླག་པའི་བརླག་ཤོག་སེར་པོ་དེ་ཅི་ཞིག་བྱ། ཁྱོད་འཆི་བ་ཉོ་བ་ཨེ་ཡིན་གསུངས་ནས་ཕྲོགས་ཏེ་ཕྱོགས་གཞན་དུ་སྦས། དེ་སླར་དགུང་ལོ་ཉེར་གཉིས་པ་འདིར་བརྐུས་ནས་རྟོགས་ལྡན་གཅོད་ཡུལ་པ་ཞིག་དང་འགྲོགས། དེ་ལ་བརྟེན་ནས་གནམ་སྐས་ཅན་ནས་ཡང་བྱང་བླང་། རིམ་པར་བླ་རྫོགས་ཐུགས་གསུམ་གྱིས་མཚོན་པའི་
གཏེར་ཁ་ཆེན་པོ་བཅོ་བརྒྱད་ལ་དབང་བསྒྱུར། དེ་དག་ཀྱང་སྐལ་ལྡན་གྱི་སྐྱེ་བོའི་སྔུན་ན་ངོ་མཚར་ཆེན་པོའི་སྣང་བ་དང་འགྲོགས་ནས་བླངས་པ་དང་། ཕལ་ཆེར་གཏེར་བདག་ལ་ཐ་ཚིག་བསྒྲགས། གཞན་ལས་དང་སྐལ་བར་ལྡན་པ་མངག་གཞུག་ཏུ་བྱས་ནས་རྩོད་པ་མེད་པར་ཕྱུང་བ་འབའ་ཞིག་གོ། དེ་ཡབ་ཀྱིས་ཚོར་ནས་ཁྱོད་ཀྱིས་གཏེར་ཐོན་ཟེར་བ། ཐོན་པ་རང་ཅི་ཞིག་ཐོནཤོག་གསུངས། ཟངས་སྒྲོམ་གཏད་པ་ནས་དཀར་ཆག་ཀློག་དང་གསུངས། བཀླགས་པས། སངས་རྒྱས་མཉམ་སྦྱོར་གྱི་རྒྱུད་གཅིག་ཤེས་ཀུན་གྲོལ་འམ་དེ་ཀློག་དང་གསུངས། རྒྱུད་ཀྱི་མགོ་ནས་བཀླགས་པས། དགོ་གོ་དེས་ཆོག་ཁྱོད་ལ་སྔར་གྲོས་སྣམ་ཐུང་བ་བཏབ་པ་ཡིན། ཕྱིས་གྱོད་ལ་བསྣན་ཀྱང་ཚིག་རོལ་ས་མི་ཡོང་། ད་གཏེར་དེས་འཕུང་འཚེངས་གང་ཡིན་ཡང་ཟིན། དུས་གསུམ་མཁྱེན་པ་ཨོ་རྒྱན་ཆེན་པོའི་བཀའ་རྩོད་མེད་དུ་འདུག། ཟབ་ཀྱང་ཁྱོད་ཀྱི་ཆོས་ལ་དང་རེ་མ་དགོས། ངའི་མདུན་མ་ལོ་བཞི་བཅུའི་བར་དུ་རུ་བཞིའི་བླ་མ་མཁས་གྲུབ་ཐམས་ཅད་ཀྱི་དགོངས་པ་བླངས། སྤྲོས་པ་ཆོད། འཁོར་འདས་ཀྱི་གཞི་རྩ་སེམས་ཉིད་གཅིག་པུ་འདིའི་སྟེང་དུ་ལ་ཟློས་ཟིན། ད་ཁྱོད་ངའི་ཁ་ལ་ཉན་པར་སོང་ན་བླ་རྫོགས་ཐུགས་གསུམ་འདིའི་མགོ་ཅི་ཐོན་གྱིས། དེ་མིན་པའི་མཐུ་ངན་སྔགས། སྒྱོགས་དང་། དཔག་ཆེན། ཐན་དང་ཆོ་འཕྲུལ། གཟོ་སྣ་ཀྱག་ཀྱོག་རྣམས་ཆོས་འདི་མགོ་མ་ཐོན་བར་ཁའི་ཟུར་ལའང་མ་འདོན། ཤེས་ཤེས་མང་ལ་མཐར་ཐོན་མེད་པ་འདི་མཐར་སྤྲང་པོར་འགྲོ་བ་ཡིན། སྤྱིར་གཏེར་ཆོས་ལང་གནག་བ་ག་ལ་ཡིན། སངས་རྒྱས་ཀྱི་མདོ་རྒྱུད་ཀུན་ནས་གཏེར་ལོང་གསུངས། རིག་འཛིན་གོང་མའི་ཕྱག་ལེན་ཡིན་ཏེ། སྔར་ཡང་གཏེར་སྟོན་བློ་ཆུང་རེས་ཆོས་ལ་དག་མ་ཐོན་པར། ཞོགས་ཁྱེར་དང་ངོ་སོ་བྱས་ནས་འགྲོ་དོན་རླབས་པ་ཆེ་མ་གྲུབ། རྒྱ་ཞང་ཁྲོམ་གྱིས་ངན་སྔགས་སྔོན་ལ་སྤེལ་བས་འགྲོ་དོན་གྱ་རྡུགས། ཀུ་ཚ་སྨན་པས་སྨན་དཔྱད་བྱས་པས་ཆོས་ཀྱི་འགྲོ་དོན་གཡེལ། ར་ཤག་
གཏེར་སྟོན་གྱིས་མདོས་ཆོག་བྱས་པས་ཕྱིས་མདོས་མཁན་དུ་སོང་། བོན་པོ་དྲག་རྩལ་གྱིས་སྔོན་ལ་པེ་ཧར་བསྒྲུབས་པས་མཐུ་མཁན་ལས་མ་བྱུང་། དེ་འདྲ་ལ་ཟད་པ་མེད། རྒྱལ་བ་གོང་མས་གཞན་དོན་ལ་དམིགས་ཀྱང་གཉེར་སྟོན་ཆོས་རྩ་བའི་ཆོས་ཀྱི་གཞུང་མ་བསྲངས་པར་ཕྲིན་ལས་ཁ་ཁྱེར་དུ་བཏང་བས་གོ་མ་ཆོད་དུ་སོང་། ཆོས་བྱས་ནས་ཆོས་སྐྱོང་ཞོར་ལ་ཡོང་། མཐུ་ཡང་མ་བསྒྲུབས་པར་འོང་བ་ཡིན། དེ་ཆོས་སྐྱོང་རང་གིས་དམ་བཅའ་ཡིན་པས་སོ། །བློ་རྩབ་རྩུབ་མ་མང་བར་བླ་རྫོགས་ཐུགས་གསུམ་གྱི་ཉམས་ལེན་ལ་འབུངས་ཤིག། མངའ་བདག་ཉང་ཡབ་སྲས་མིས་འཁུར་བ་འདི་ཁོས་ཐུགས་རྗེ་ཆེན་པོ་བསྒྲུབས་པས་བྱུང་བ་ཡིན། གཏེར་སྟོན་གྱམ་རྡུགས་ཙམ་དེ་ཁོ་ཡིན། ངས་ལོ་དྲུག་གི་གོང་ནས་འགྲོ་བྱས་པའི་དུས་ཆོད་དེ་ཟླ་བ་གཉིས་ཙམ་ནས་སླེབས་ཡོང་། མི་ཆོས་གཏེར་རྡུར་ཡིན་ཟེར་ཡོང་སྟེ་རྟོག་པ་དེ་མི་དགོས། ང་ཡན་ཆད་ཀྱི་སྤང་མི་རབས་བཅུ་གསུམ་སོང་སྟེ་ནང་གི་གྲུབ་རྟགས་མ་བྱུང་བ་མེད། ང་ཡང་ཞན་ཤོས་མིན་ཙམ་འོང་གསུང་སྐད། དེར་མངའ་བདག་འགྲོ་མགོན་གྱིས་གཏེར་གྱི་ཉམས་ང་ཆེ་གསུངས་ནས་གཟིགས་པས་མཆོག་ཏུ་མཉེས། ལུང་བསྟན་ལས་ཧོར་དམག་འབྱུང་ཚུལ་ཡོད་པ་སློབ་དཔོན་མཐའ་བསྐོར་བས་མཐོང་ནས། ཧོར་བལྟ་ཡུལ་ན་མེད་པ་ལ་ཟེར་སྐུར་བ་བཏབ་པས། ཐུགས་ཆད་ནས་གདམས་པ་སླར་སྦ་བར་སེམས་པ་ན། བུ་མོ་གཉིས་ཀྱིས་རྟ་དཀར་གཤོག་པ་ཅན་ལ་བསྐྱོན་ནས་རྔ་ཡབ་དཔལ་རིར་ཁྲིད། ཨོ་རྒྱན་ཆེན་པོས་གསང་བ་ཡོངས་རྫོགས་ཀྱི་དབང་རྫོགས་པར་བསྐུར་ནས། ལམ་གྱི་ལམ་མཆོག་གཞན་དོན་ཡིན། འདི་ལ་སྒྱིད་ལུགས་སུ་སྐྱེས་པ། དེ་ཡི་བྱང་ཆུབ་རྒྱང་ཐག་རིང་། །ཞེས་སོགས་ཞལ་གདམས་པ་སླབ་བྱས་དབུགས་ཕྱུང་། གནས་འདིར་མ་ཞེན་ཅིག་ཞེན་ན་སྐྱེ་བ་འཕོ་བའི་ཉེན་ཡོད་གསུངས་པའི་མོད་ལ་འོང་ཕུབ་ལྟ་བུས་བཏེག་སྟེ་སྐད་ཅིག་ལ་སླེབས། ཤིང་ཕོ་བྱི་བའི་ལོ་ཧོར་དོར་ཏོག་
གི་དམག་གིས་སླེབས་པས་མ་འོངས་པ་མངོན་སུམ་དུ་གཏན་ལ་ཕེབས། བཙན་པོ་ཁྲི་སྲོང་ལྡེའུ་བཙན་གྱི་ཕྱི་མ་ལྷའི་བུ་འོད་མཐའ་ཡས་སུ་སྐྱེས་གནས་རིམ་པར་མངའ་བདག་ཉང་གི་བར་སྐྱེ་བ་བཅུ་གསུམ་ཐལ་ལེར་དྲན་སློབ་མའི་དམ་པ་བལ་ཡུལ་ཡམ་བུ་བ་བྷ་རོ་གཙུག་འཛིན་ཞེས་བྱ་བ་ཞིག་ཡོད་དེ། དེ་ཉིད་བོད་དུ་གསར་འཚོལ་བའི་ཕྱིར་འོངས་པ་ལ་མཁའ་འགྲོས་ལུང་བསྟན་ཏེ་གུ་རུ་ཉིད་དང་མཇལ། ཞག་བདུན་གྱི་བར་དུ་བླ་མ་ཨོ་རྒྱན་དངོས་སུ་མཐོང་། གསུང་ཐོས་པ་ཙམ་གྱིས་རྟོགས་པ་ཤར། ནུབ་ཅིག་དབང་མཛད་པའི་ཚེ་ཁྱོད་ཀྱིས་ང་ཅིར་མཐོང་གསུངས། ཡི་དམ་དངོས་སུ་མཐོང་ཞུས་པས། འོ་ན་ཚོགས་གཏོར་གཞན་ན་འབུལ་ས་མེད་གསུངས་ནས་གནའ་བའི་ཤ་བུབས་བྱེད་ལ་སོགས་པའི་ཚོགས་རྫས་རྣམས་སྐད་ཅིག་གིས་བཞེས། ཡང་ང་ཅིར་མཐོང་གསུངས། སངས་རྒྱས་དངོས་སུ་གདའ་ལགས་ཞུས་པས། འོ་ན་དབང་བསྐུར་བྱའོ་གསུངས་ནས་མཆོད་རྫས་བསྡུས། དཀྱིལ་འཁོར་བཤིང་། ཤུལ་དུ་བྲོ་བརྡུངས། བླང་དོར་མེད་པའི་སྤྱོད་པ་དང་། རྡོ་རྗེའི་དམ་ཚིག་ཆེན་པོའི་གནས་ལ་སྐྲག་པར་མི་འབྱུང་བའི་ལས་ཅན་གྱི་སློབ་མའི་ཁམས་དང་བསམ་པ་མཁྱེན་ནས་རྡོ་རྗེ་ལུས་ཀྱི་དཀྱིལ་འཁོར་ཆེན་པོ་ནས་རྣམ་པར་སྣང་མཛད་དྲི་ཆེན་གྱི་ལྷ་བསྣམས་ཀྱི་སྒོ་ནས་ཕྱུང་སྟེ་དབང་བསྐུར་བས། བྷ་རོ་ལ་ལུས་སྤྲུལ་ཤུན་དོར་བལྟ་བུའི་ཉམས་ཤར། དེ་བཞིན་དུ་རྡོ་རྗེ་གསང་བའི་མྱུར་ལམ་ནས་དྲི་ཆུ་དོན་ཡོད་གྲུབ་པ་ལྕེ་ཐོག་ཏུ་བླུད་པས་ཟག་མེད་བདེ་བ་ཆེན་པོའི་ཡེ་ཤེས་ཐོད་རྒལ་དུ་འབར། སྙིང་གར་ཕྱག་མཛུབ་བཙུགས་ནས། ང་བྱ་བའི་དངོས་ཟུང་ཞིག་གསུངས་པས་ཡུལ་གྱི་འཛིན་པ་བུན་ལོང་ངེ་བ་ཞིག ང་མཐོང་དོན་ལ་མ་ཡེངས་ཤིག། དེ་ལ་སྒོམ་རྒྱུ་སྤུ་ཙམ་མེད། གསུངས་པས་རྫོགས་ཆེན་བྱ་བྲལ་རིས་མེད་ཀྱི་རྟོགས་པ་ལྷག་གེར་ཤར། ངེས་ཤེས་ཁྱད་པར་ཅན་སྐྱེས་ནས་ད་ནི་དུས་གསུམ་སངས་རྒྱས་བྱོན་ཀྱང་དབང་ཞུ་སྙམ་པ་མི་གདའ། རྒྱ་གར་དུ་འགྲོ་བའི་སྤྲོས་པ་ཡང་ཆོད་ཞུས་པས། འཁོར་བར་
མི་འཁྱམ་པའི་སངས་རྒྱས་བྱུང་ན་མུ་སྟེགས་པ་ཡིན། ཁྱོད་རྒྱ་གར་དུ་སོང་ལ་བླ་མ་རྙེད་ན་བླ་མ་ཚོལ། སློབ་མ་རྙེད་ན་སློབ་མ་ཚོལ་ཞེས་གསུངས། ཞལ་ཏ་འདི། དོན་ཤིན་ཏུ་བཟང་པོ་སྣང་། ལར་བལ་པོ་བྷ་རོ་འདི་ལས་མེད་པའི་གང་ཟག་དད་པ་ཤིན་ཏུ་ཆེ་བས་གུ་རུའི་སྟ་ཟུར་ལ་ཁྲོ་བོའི་སྤྱན་མངའ་བ་དང་། མཁའ་འགྲོ་དང་ཆོས་འགྲོ་བ་སོགས་སྣང་བ་དག་པ་འབའ་ཞིག་ཏུ་མཐོང་། ལན་ཅིག་མངོན་སྤྱོད་འདི་དག་ལ་རྟགས་ཐོན་པ་མཆིས་སམ་ཞུས་པས། ལག་ལེན་དོན་ཐོག་ཏུ་ཕེབས་ཏེ་མ་ཎི་འདྲེན་ནས་དེ་སྒྲུབ་མ་ཁོམ་གསུངས། དེར་བལ་པོར་སྒྲོལ་བའི་ནུས་པ་སྟོན་པར་ཞུས་པས། རི་བོང་ཞིག་ཉེར་བའི་སར་འགྲེ་བ་ལ། ས་ལ་རི་བོང་གི་གཟུགས་གཅིག་བྲིས། ཁ་བ་ལ་སྔགས་ལན་བདུན་བགྲངས་ཏེ་གཟུགས་བརྙན་ལ་བཏབ་པས་རི་བོང་ཐུར་ལ་རིལ་ལི་ལི་འདྲིལ། ད་སྒྲིབ་པ་སྦྱང་དགོས་ལོང་ཤོག་གསུངས་ནས་བཏགས་གྲོལ་བཏགས་ཏེ་ཚོགས་གཏོར་དང་བསྔོོབས་རྗེས་སུ་བཟུང་། དེ་འདྲ་བ་མི་ལ་བྱུང་ན་འཇིགས་ཞུས་པས། མི་དང་ཕྱི་པ་འདྲ་གསུངས་ནས་ཕྱི་བའི་གཟུགས་བརྙན་ལ་སྔར་བཞིན་མཛད་པས་ཕྱི་ཁུང་ནས་རོ་བྱུང་། བྱས་ན་འདི་འདྲ་བ་འོང་སྟེ་སེམས་ཅན་ལ་གནོད་པས་སུ་ལའང་མི་སྟེར། དགྲ་ལའང་འཚང་རྒྱ་བའི་མཐུ་ལས་གཞན་མི་བྱེད། འདི་བདུད་འགྲོར་སོང་བས་གནས་སྦར་བ་ཡིན། གཞན་མི་ལུས་ཐོབ་པ་ནི་ཤིན་ཏུ་དཀའ། སྲོག་བཅད་པའི་སྡིག་པ་ནི་མཐའ་ཡས། གཅིག་ཤི་བས་མི་ཆོ་ག་དེའི་ཉེ་འཁོར་ཐམས་ཅད་སྡུག་བསྔལ་བ་ཡིན། དགྲ་ལའང་མཐུ་མི་བྱེད་ཀྱི་སྟེང་དུ་སླར་ལ་སྙིང་རྗེ་བསྐྱེད་དགོས་པ་ཡིན་གསུངས་ནས་བྱང་ཆུབ་སེམས་དཔའི་སྤྱོད་ཕྱོགས་ལྷག་པར་དང་དུ་ལེན། རང་དོན་དུ་མཐུ་དང་མངོན་སྤྱོད་མི་མཛད་པའི་དམ་བཅའ་ཤིན་ཏུ་བརྟན་པ་ཡིན་ཏེ། ཐུགས་རྗེ་ཡུལ་ལ་འཇུག་པའི་ཆ་ནས་ངན་སོང་གསུམ་ཡང་ཐུགས་རྗེ་བསྒྲལ། ཞེས་པ་སྟེ་གུ་རུ་ཆེན་པོ་འདིས་མངོན་དུ་མཛད་དེ། ལས་ཀྱི་ལུས་དུག་ལྔའི་ཕུང་པོ་ཅན་དེ་བསད།
རྣམ་པར་ཤེས་པ་ཆོས་ཉིད་ཀྱི་ཀློང་དུ་གསོས་ནས་འཁོར་བ་མཐའ་ཅན་ཏུ་མཛད་པས་གསད་གསོའི་ནང་ནས་ཀྱང་ངོ་མཚར་ཆེ་བ་ཞིག་ཡིན། བལ་པོ་བྷ་རོ་ལྡོག་པར་ག་ཁར་གསེར་ཞོ་དྲུག་ཅུ་ཐམ་པ་ཕུལ་ནས་རྒྱ་བལ་དུ་ལྡོག་པ་ལ་བར་ཆད་མེད་པའང་ཞུ་བྱས་པས། གསེར་ཕྱེང་ཕྱེ་དང་བསྲེས་ནས་སྦྱིན་སྲེག་མཛད། སེར་སྣའི་མདུད་བ་རྩ་བ་ནས་གྲོལ། ལར་འདི་དཀོན་མཆོག་ཡོད་པར་ཡིད་ཆེས་པར་སྟོན་པའི་མཛད་པ་ངོ་མཚར་ཅན་ཡིན་ཏེ། གཏོང་བ་ལ་གོམས་པ་རྣམས་ཀྱིས་ཀྱང་དཀོན་མཆོག་ལ་དམིགས་ནས་རྫས་དངོས་མེད་དུ་གཏོང་བ་ལ་རྣམ་པའི་ཆ་ནས་ཡིད་གཉིས་ཡོད་པ་ལྟར་མི་སྟོན་ཡང་དོན་དངོས་པོར་སྣང་བའི་དགེ་བའི་ཕྱོགས་ལ་དགའ་བར་བྱེད་པ་འདི་ཀ་ཅུང་ཟད་བློ་ལ་འཕྲིག་ཆགས་པ་ཡིན། དེར་བྷ་རོ་ལ་སྦྱིན་སྲེག་གི་ཐལ་བ་ཕངས་སེམས་མ་བྱེད་པར་ཆུ་ལ་སྦྱོངས། ལམ་དུ་ཟས་སྟེར་བ་ཞིག་འོང་། དེ་བདག་གིར་གྱིས་ཤིག་གསུང་བ་ལྟར་བྱས་པས་བུ་མོ་གཅིག་གིས་ཉུང་མ་ཞིག་བྱིན། དེ་གུ་རུ་ལ་ཕུལ་བས་རས་ཁོབ་ལ་ཤོས་ཤིག་གསུངས། རེ་ཞིག་ན་དེ་ཤར་གྱུར་ནས་རོ་མངར་ལ་ཤུམ་པ་ཅིག་བྱུང་། ད་ཁྱོད་ཀྱི་དོན་དེས་གྲུབ། ངའི་ཡོན་ཏན་ཐུན་མོང་མ་ཡིན་པ་མཐོང་བ་དེ་གཞན་ལམ་བཤད་ཅིག་གསུངས། སླར་བྷ་རོ་རྒྱ་གར་དུ་འགྲོ་བ་ལ་སྐྱེལ་ཐུང་མཛད་པས་ཡང་གསེར་ཞོགས་སུམ་ཕུལ། དེར་གུ་རུའི་ཞལ་ནས། མེ་ལ་བསྲེགས་པས་མཁའ་འགྲོ་མཉེས་ན། ཆུ་ལ་གཏོར་ན་དེ་བས་ཀྱང་དགྱེས་མཆི་གསུངས་ནས་གསེར་དེ་ཆུ་ལ་གཏོར། སྲས་ཀྱི་དམ་པར་གྱུར་བ་པདྨ་དབང་ཆེན་དང་། གཉལ་དུ་འཁྲུངས་པའི་ཉི་མ་འོད་ཟེར་སོགས་སྲས་བརྒྱུད་དང་། སྣོད་ལྡན་གྱི་བུ་དགུ་ལ་སོགས་པ་སྨིན་གྲོལ་དུ་མཛད། ཆུ་ཞལ་མགུར་གསུམ་ལ་སོགས་པའི་བླ་ཆེན་དང་མི་ཆེན་མང་པོས་ཞབས་ལ་གཏུགས། གཙོ་བོར་མ་ཎི་འབའ་ཞིག་གིས་ཕྲིན་ལས་མཛད་དེ་བོད་ཡུལ་ཐམས་ཅད་ལ་ཐར་བའི་ས་བོན་རྒྱ་ཆེན་པོ་བཏབ། ཁྱད་པར་གྲུབ་ཐོབ་མ་ཎི་རིན་ཆེན་ཞེས་བྱ་བ་ལས་ཁམས་སུ་ཐུགས་རྗེ་ཆེན་པོའི་ཕྲིན་ལས་རྒྱ་ཆེར་འཕེལ། བརྒྱ་བྱིན་དང་
ཉི་ཟླའི་ལྷའི་བུས་ཀྱང་མཆོད་བསྟོད་བྱས། བོད་ཀྱི་ལྷ་འདྲེ་ཐམས་ཅད་ཀྱིས་བླ་མར་བཀུར་ཞིང་སྙན་གྲགས་ཀྱིས་འཇིག་རྟེན་གཡོས། འགྲོ་བའི་བསོད་ནམས་གསོག་པའི་ཞིང་དུ། ཚོང་དུས་འགུར་མོའི་ལྷ་ཁང་དང་། བསམ་འགྲུབ་བདེ་བ་ཆེན་པོའི་ལྷ་ཁང་གཉིས་ཀྱང་མཛད། ལ་ཡག་གུ་རུ་ལྷ་ཁང་དུ་གཙོ་བོར་གདན་ས་མཛད། ལྷ་སའི་ཇོ་ཤཱཀ་དང་མཚུངས་པ་ཙམ་གྱི་བྱིན་རླབས་ཅན་དུ་གྲགས་པའི་བསྟན་གཙོའི་སྣང་བརྙན་དང་པོར་འཕགས་པ་ཀླུ་སྒྲུབ་ཀྱིས་རི་བཏང་བཟུང་ནས་སྤྱན་དྲངས། བར་དུ་སློབ་དཔོན་ཆེན་པོས་སྣབ་སྟོད་ས་ཟམ་ཡང་དབེན་ནས་ཕྱུང་སྟེ། ཧ་བོའི་གངས་ལ་རྒྱས་བཏབ་པ་འདི་དགུང་ལོ་ང་བདུན་པ་ས་ཕོ་འབྲུག་གི་ལོར་སྤྱན་དྲངས་ཏེ་འགྲོ་བའི་དོན་དུ་བཞུགས་སུ་གསོལ། མ་འོངས་པ་ན་ཀླུ་ཡུལ་དུ་སྤྱན་འདྲེན་པ་བཤད། དེ་ལྟ་བུའི་ཐུགས་རྗེ་དང་ཕྲིན་ལས་བསམ་གྱིས་མི་ཁྱབ་པས་འགྲོ་བའི་དོན་མཛད་ནས་མཛད་པ་བསྒྲུབ་བར་ཉེ་བའི་ཚེ། ཁོ་བོ་ཆོས་ཀྱི་དབང་ཕྱུག་ལ། །སེམས་ཅན་རྣམ་རྟོག་ཐ་དད་ཀྱིས། །ལ་ལ་ཆོས་དབང་བདེ་ན་དགའ། །ལ་ལ་ཆོས་དབང་བདེ་ཡི་དོགས། །ཞེས་དང་། ཆོས་དབང་སེམས་ཉིད་རེ་དོགས་བྲལ། །ཆོས་དབང་སེམས་ལ་ཟུག་རྔུ་མེད། །བདེ་ན་དགའ་ཚོད་དགྱེས་པར་མཛོད། །ཆོས་དབང་ཟུག་རྔུ་སྤང་བ་མེད། སྡུག་ན་དགའ་ཚོ་དགྱེས་པར་མཛོད། །ཆོས་དབང་སེམས་ལ་སྐྱེ་ཤི་མེད། །ཤི་ཡི་དོགས་ཚོ་དགྱེས་པར་མཛོད། །ཆོས་དབང་སེམས་ཉིད་ཆོས་དབྱིངས་ཤི། །མ་ཤི་དོགས་ཚོ་དགྱེས་པར་མཛོད། །ཆོས་དབང་སེམས་ཉིད་འཕོ་འགྱུར་མེད། །རྟག་ཏུ་རེ་ཚོ་དགྱེས་པར་མཛོད། །ཆོས་དབང་སེམས་ལ་རང་བཞིན་མེད། །རྟག་གི་དོགས་ཚོ་དགྱེས་པར་མཛོད། །ཅེས་རེ་དོགས་རྩབ་ནས་ཟད་པའི་རྣལ་འབྱོར་གྱི་དབང་པོ་ཆེན་པོར་བཞུགས། རང་གིས་བཞེངས་པའི་ལྷ་ཁང་འབད་པ་དོན་ལྡན་དུ་འགྱུར་བའི་ཕྱིར་ཞབས་ཏོག་དགོས་པར་གདམས་ཤིང་། གཙུག་ལག་ཉམས་རྐྱེན་བུཡིས་བྱས་ཀྱང་ཐོན། །ལྷ་ཁང་ཞབས་ཏོག་སྤྲང་པོས་བྱས་ཀྱང་ཁུར། །ཞེས་དང་
ཀུན་བཟང་བདེ་ཆེན་ཆོས་དབྱིངས་གཞལ་ཡས་སུ། །སྒྱུ་མའི་སྐྱེས་བུ་ཆོས་དབང་ད་ནི་སྡུད། །ཅི་ཕྱིར་ལུས་འདིའི་གདུལ་བྱ་རྫོགས་རྫོགས་འདྲ། །ལས་ངན་ཟད་པའི་རྟགས་ཀྱང་ལུས་ལ་སྨིན། །རྨི་ལམ་མི་གཟུགས་ཆོས་དབང་ཡལ་ནས་འགྲོ། །དཔོན་སློབ་ཀུན་འདུས་ནོར་བུའི་ཚོད་ལེན་རྨིས། །ང་དང་འབྲེལ་ཚད་བདེ་ཆེན་ཐོབ་པའི་རྟགས། །ཞེས་དང་། བདག་གི་ཤ་རུས་སྲན་ཚད་ཡུངས་འབྲུ་རེ། །ལྟོར་སོང་ཐམས་ཅད་ལམ་འགྲོ་བདེ་ཆེན་བགྲོད། །ཅེས་པ་ལ་སོགས་པའི་ཞལ་གྱི་གདམས་པས་དབུགས་དབྱུང་ནས་དགུང་ལོ་ང་དགུ་པ་ལ་པདྨ་འོད་ཀྱི་ཕོ་བྲང་ཆེན་པོར་གཤེགས་སོ།། །།ད་ནི་བཀའ་གཏེར་གྱི་བསྟན་པ་ལ་དངོས་སམ་བརྒྱུད་ནས་བཀའ་དྲིན་བསམ་གྱིས་མི་ཁྱབ་ཅིང་སྤངས་པ་དང་རྟོགས་པའི་ཡོན་ཏན་ཟད་མི་ཤེས་པ་མངའ་རིས་པཎ་ཆེན་རིན་པོ་ཆེ་རྗེས་འབྲང་བཅས་པའི་གཏམ་བརྗོད་པར་བྱ་སྟེ། སྐྱེས་བུ་དམ་པ་འདི་ནི་ཡུལ་མངའ་རིས་གློ་བོ་མར་ཐང་གིས་སའི་ཆག ཡབ་མར་པ་ལོ་ཙཱའི་སྐྱེ་བ། ལྷ་རིགས་གྲུབ་པའི་དབང་པོ་འཇམ་དབྱངས་རིན་ཆེན་རྒྱལ་མཚན་ཞེས་གྲུབ་པའི་དབང་ཕྱུག་ཐང་སྟོང་རྒྱལ་པོ་ལ་སོགས་ཏེ་མཁས་གྲུབ་ཀྱི་བླ་མ་མང་པོའི་ཞབས་ལ་ཐུག་ཅིང་། བཀའ་གཏེར་གྱི་བསྟན་པ་རྒྱ་མཚོའི་མངའ་བདག་ཏུ་གྱུར་བ་དེ་དང་། ཡུམ་འཕྲོ་ལྕམ་ཁྲོམ་པ་རྒྱན་གྱི་སྲས་སུ་མེ་མོ་ལུག་གི་ལོ་ལ་སྐུ་བལྟམས། མཚན་པདྨ་དབང་རྒྱལ་དུ་བཏགས། དགུང་ལོ་བརྒྱད་པ་ལ་རྟེན་དགེ་བསྙེན་དུ་མཛད། ཡབ་ལ་བྱང་ཆུབ་ཏུ་སེམས་བསྐྱེད་པའི་སྡོམ་པས་རྒྱུད་སྦྱངས་ནས། འཇམ་དཔལ་མཚན་བརྗོད། སྒྱུ་འཕྲུལ་ཞི་ཁྲོ། ཡང་དག་མེ་དགུ། སེམས་ཕྱོགས་ལ་སོགས་གསན་པ་རྒྱ་ཆེན་པོ་མཛད། བཅུ་གཅིག་པར་རྩ་རྒྱུད་གསང་སྙིང་། སློབ་དཔོན་སྒེག་པའི་རྡོ་རྗེའི་འགྲེལ་བ། གཡུང་ཊཱི་ཀ་ཁ་དམར་ཅན། སུམ་སྟོན་གྱི་ཊཱི་ཀ་ལ་སོགས་པ་ཕལ་ཆེར་ཞིག་ཟླ་བ་བདུན་གྱིས་ཁོང་དུ་ཆུད། དགོངས་འདུས་ལ་སོགས་པའི་མདོའི་གནས་ཀྱང་བྱང་བར་བྱས། བཅུ་གཉིས་པའི་ཚེ་མཁས་པ་མང་པོའི་དབུས་སུ་གཞུང་བསྒྱུར་གྱི་བཤད་པ་
མཛད། བླ་མ་གསང་འདུས་དང་། སྒྱུ་འཕྲུལ་ཞི་ཁྲོ། རྟ་མགྲིན་ལ་སོགས་པར་བསྙེན་སྒྲུབ་མཐར་ཕྱིན། ལྷ་མོ་དུད་སོལ་མས་ཞལ་ཡང་ཡང་བསྟན། གྲུབ་མཚན་གྱི་ཐོག་མར་ཞིང་ལ་ཤྭ་ལོག་ཆེན་པོ་ཞིག་བྱུང་བ་ལ། ཕུར་བ་གདེངས་པ་ཙམ་གྱིས་ནམ་མཁའ་ལ་ཐེག་སོ་བདུན་ཙམ་འཁྱིལ་ཞིང་བཟློག །དེ་བཞིན་དུ་གཏོར་ཆེན་འཕངས་པའི་ཚེ་ས་སྟེང་ནས་ཁྲུ་གང་ཙམ་འཕགས་པ་ཡང་བྱུང་། སྨེ་བརྩེགས་ཀྱི་སྒོམ་བཟླས་མཛད་པས་ཨརྑི་ཛིརྑཾ་གྱི་སྒྲ་སྒྲོགས་བཞིན་པར་མཐོང་། དགུང་ལོ་བཅུ་བཞི་ནས་བཀའ་བརྒྱད་དང་མ་གཤིན་ལ་སོགས་པའི་སྒྲུབ་ཕྲིན་མང་དུ་བསླབས་ཤིང་བཟླས་སྒོམ་གྱིས་བཟློས། དེ་ནས་ལོ་བདུན་གྱི་བར་དུ་གཅོད་ཡུལ་དང་རོ་སྙོམས་མཛད། བྱེ་མ་དང་། ཆུ་རྡེལ་མེ་ཏོག་ལ་སོགས་པའི་བཅུད་ལེན་ཁོ་ནས་དཀའ་སྤྱད་ཀྱི་ཕྲང་ལ་བཤར། ཐེམ་སྤངས་ཀྱི་དམ་བཅའ་ལོ་གསུམ། ངག་བཅད་ཀྱི་དམ་བཅའ་ལོ་གསུམ། ཤ་ཁྲག་གི་ཟས་ལ་ཤིན་ཏུ་སྔར་ཞིང་སྨྱུང་གནས་དང་། གསོ་སྦྱོང་ལ་སོགས་མང་དུ་མཛད་པས་སྤྱན་རས་གཟིགས་ལན་བདུན་དུ་གཟིགས། ལོ་གཅིག་ཏུ་བླ་མ་གསང་འདུས་ཀྱི་གདམས་ངག་ལ་ནན་ཏན་མཛད། སྤྱིར་བླ་མ་མཁས་གྲུབ་མང་པོ་ལས་མདོ་སྔགས་ཆོས་ཀྱི་བདུད་རྩི་ངོམས་པ་མེད་པར་འཐུངས་ཤིང་། ཁྱད་པར་དུ་ཡབ་ལས་མདོ་དབང་དང་། ཕུར་པ། སྒྲུབ་ཆེན་བཀའ་བརྒྱད་ལ་ནན་ཆགས་ཆེན་པོ་མཛད། གྲུབ་པ་བརྙེས་པའི་རྣམ་ཐར་ཡང་། གསུང་ལས། བྲག་དམར་གྱི་མཚོ་ལ་རོ་སྙོམས་བྱས། སྨུན་ནགས་ཀྱི་ཆུ་ལ་རྡོག་པས་བརྫིས། ལྷ་ལུང་གི་བྲག་ལ་མཁའ་ལྟར་ལྡིང་། བ་གམ་ཅན་བྲག་ལ་བྱི་ལྟར་འཛུལ། མགོ་བོ་ཅན་བྲག་གི་ལོ་གསལ་རྒྱུགས། གྲོགས་ཤེས་སེང་དང་ཤེར་དཔལ་རྒྱལ་བཟང་གསུམ། །བྱང་རྒྱལ་དང་བླ་མ་རིན་སེང་བ། །སྐྱེས་ཕོ་མོ་འགས་གྲུབ་ཐོབ་གྲུབ་ཐོབ་ཟེར། །དེང་གྲུབ་ཐོབ་ཀྱི་གོ་བར་མི་ལེན། །ཆོས་ཉམས་བླངས་ཀྱི་ཉམས་སྣང་ཐོལ་ཙམ་ཡིན། དོན་འཕོ་འགྱུར་འབྲལ་བ་མ་རྟོགས་ན། ལུས་སྒྱུ་མའི་
ཆོ་འཕྲུལ་བྱ་བྱེས་སྟོན། །ཞེས་གྲུབ་རྟགས་ཀྱི་མཐར་ཐུག་རྟོགས་པ་ལ་ངོས་འཛིན། བཅུ་བདུན་གྱི་ལོ་ལ་དམ་བཅའ་བརྒྱད་མཛད་དེ། དགེ་འདུན་ལ་མཐོང་ཕྱག་བྱེད་པ་དང་། ཕ་ཡུལ་དུ་ཞག་བདུན་ལས་མི་བཞུགས་པ་དང་། དབེན་པ་འབའ་ཞིག་ལ་བློ་གཏོད་པ་དང་། རྒྱལ་པོའི་སྒོ་ཁང་ལན་གསུམ་ལས་མི་འགྲིམ་པ་དང་། ཚོང་ཁེ་དང་གྲལ་འགོ་མི་འཛིན་པ་དང་། རོ་ཆོག་དང་དབུ་གཙོ་མི་བྱེད་པ་དང་། འཚོ་བ་བསོད་སྙོམས་ལ་བསྟེན་པ་དང་། སྒྲུབ་པ་དང་ཐོས་བསམ་འབའ་ཞིག་བྱེད་པ་རྣམས་སོ། །སློབ་དཔོན་ནོར་བསྟན་བཟང་པོ་ལས་ཡང་ཡང་དུ་བསྙེན་ནས་འདུལ་བ་དང་། མདོ་སྡེའི་སྐོར་དང་། ཇོ་བོ་བཀའ་གདམས། ནཱ་རོ་མཁའ་སྤྱོད་མ། སྙན་བརྒྱུད་བསམ་མི་ཁྱབ་པ་དང་བཅས་པ་ཞུས། སྐྱིད་གྲོང་དུ་འཕགས་པ་ཝ་ཏི་མཇལ་བས་གསུང་བྱོན། སྐུ་ཚེ་སྔ་མའི་སྔོན་གནས་མང་པོ་རྗེས་སུ་དྲན། དགུང་ལོ་བཅུ་དགུ་པར་ཕ་ཡུལ་དུ་ཡིག་དྲུག་གིས་འགྲོ་དོན་མཛད། ཉི་ཤུ་ལ་བྱམས་ཆོས་ལྔ། ཕར་ཕྱིན་ཚད་མ། དབུ་མ་རྩ་ཤེ། བཞི་བརྒྱ་བ་དང་། བསླབ་བཏུས། སྤྱོད་འཇུག། དངོས་བརྒྱད་དོན་བདུན་ཅུ་སོགས་གཞུང་ལུགས་ཆེན་པོ་བརྒྱ་ཕྲག་གཅིག་ཁོང་དུ་ཆུད། ཉེར་གཅིག་པ་ལ་འཇམ་དབྱངས་ཆོས་སྐྱོང་དང་། སྡོམ་བརྩོན་ཚུལ་ཁྲིམས་དཔལ་ལ་སོགས་པར་གཤེད་དམར་ལ་སོགས་པའི་དབང་སྒྲུབ་གདམས་པ་གསན་ཞིང་བསྒྲུབས་པས་ཞག་བདུན་ན་གཤེད་དམར་དངོས་སུ་མཐོང་། ཉི་ཤུ་རྩ་གཉིས་པར་ཡབ་ཀྱི་དྲུང་དུ་སྔ་འགྱུར་བཀའ་གཏེར་ལ་ཞུན་ཐར་ལེགས་པར་སྤྱད། བཀའ་བརྒྱད་ཀྱིས་སྒྲུབ་པ་མཛད་པས་བདུད་རྩི་ཁོལ། མར་མེ་ཆུང་ངུ་ཞིག་གིས་ཞག་གསུམ་ཐུབ། དེའི་ཚེ་ཡབ་ཀྱི་གཟིགས་སྣང་ཉིད་ཀྱིས་ཚིགས་སུ་བཅད་པ། བུ་ཁྱོད་ཚེ་ལ་བར་ཆད་མ་བྱུང་ན། འཇིག་རྟེན་འདིར་ནི་ཆོས་ཀྱི་འཁོར་ལོས་སྒྱུར། །མདང་སུམ་དཀྱིལ་འཁོར་མཐའ་ལ་ཀུན་བསྐོར་ནས། བླ་མ་ཟུར་ཆེན་རྡོག་སྟོན་ཆེན་པོ་དང་། །རྗེ་བཙུན་གྲགས་པ་འཕགས་པ་རིན་པོ་ཆེ། །ནམ་མཁའི་སྙིང་པོ་བསོད་ནམས་བླ་མ་དང་། །འགྲོ་མགོན་ཉང་དང་རས་ཆུང་རྡོར་གྲགས་དང་། །
རྒྱལ་སྲས་དབང་ཆེན་གློ་བོ་ཡབ་སྲས་དང་། །ཆག་ལ་ཆོས་དཔལ་ཁྲེ་ཕུ་ལོ་ཙཱ་དང་། །ནག་ཚོ་ལོ་ཙཱ་ཀུན་མཁྱེན་མུས་སྲད་པ། །མཁས་གྲུབ་བསོད་བཟང་གྲུབ་ཆེན་དམར་ཞབས་དང་། །དམ་པ་སངས་རྒྱས་པེ་རོ་བི་མ་ལ། །ཨོ་རྒྱན་ཡབ་ཡུམ་རྒྱལ་པོ་ཁྲི་སྲོང་དང་། །མ་ཅིག་ལབ་སྒྲོན་ཞང་ལོ་རས་ཆེན་པ། ཁམས་པ་སྒ་ལོ་རྒྱ་གར་པཎ་ཆེན་རྣམས། །གཅིག་ལ་གཅིག་ལྟ་འཛུམ་ཞིང་བཞད་པ་ལ། །ཀུན་ཀྱང་ང་ནི་པདྨ་དབང་རྒྱལ་ཡིན། །སྨྲ་ཞིང་ཐམས་ཅད་ཁྱོད་ལ་ཐིམ་ནས་སོང་། །ཞེས་པ་ལྟར་ཡིན། ཉེར་གསུམ་པ་ལ་གློ་བོ་ལོ་ཙཱ་བར་ལམ་འབྲས་ཚོགས་བཤད་དང་། སློབ་བཤད་གཉིས། ཉེར་བཞི་བའི་ཚེ་ཡང་ཚར་གཅིག་བསྐྱར། ཉེར་ལྔ་པའི་ཚེ། བསམ་འགྲུབ་གླིང་དུ་གློ་བོ་མཁན་ཆེན་བསོད་ནམས་ལྷུན་གྲུབ་ཀྱིས་མཁན་པོ། ཆོས་རྗེ་དཀོན་མཆོག་སྐྱབས་ཀྱིས་སློབ་དཔོན། དེ་བཞིན་དུ་གསང་སྟོན་པ། གྲིབ་ཆོད་པ། གྲོགས་ངན་པ། དད་པའི་དགེ་སློང་ཉི་ཤུ་རྩ་ལྔ་དང་བཅས་པའི་དབུས་སུ། བུ་ལུགས་ཀྱི་ལས་ཆོག་གཞིར་བཞག་ལ། ནམ་བསོད་དང་། འཕགས་པ་རིན་པོ་ཆེའི་ལས་ཆོག་གི་བཤད་སྦྱར་དང་བཅས་ཚིག་གསུམ་གྱིས་བསྙེན་པར་རྫོགས་པའི་དངོས་པོར་བསྒྲུབས། མཁན་སློབ་དེ་རྣམས་ལས་ཆོས་ཀྱང་མང་དུ་ཉན། ཉེར་དྲུག་པ་ལ་ཤེལ་གྱི་རི་བོ་འབྲུག་སྒྲ་ལ་སོགས་པའི་དབེན་པར། ཆོས་གོས་གསུམ་དང་། གླེགས་བམ། འཁར་གསིལ། ལྷུང་བཟེད་ལས་གཞན་པའི་ཡོ་བྱད་ཐམས་ཅད་སྤངས་ཏེ་བྱ་བཏང་སྒོ་གཅིག་པའི་བརྟུལ་ཞུགས་བཟུང་། སྟོན་པས་བཅས་པའི་གནང་བཀག་དང་། སྦྱངས་པའི་ཡོན་ཏན་བཅུ་གཉིས་ལ་སྒྲ་ཇི་བཞིན་པར་གནས་པ་ནི་སྐྱེས་བུ་ཆེན་པོ་འདི་དང་། ཀོང་པོ་རྒོད་ཚང་བ་སྣ་ཚོགས་རང་གྲོལ་གྱི་རྣམ་པར་ཐར་བ་མཐོང་བའི་ཆོས་ལ་གནས་ངེས་པར་ཤེས། གཞན་དུ་མི་ལ་རས་པ་ལ་སོགས་ཏེ་རྟགས་དང་ཆོ་ག་མ་བྱས་པའང་ཇི་སྙེད་ཅིག་ཡོད་སྲིད་ཀྱི། དེ་དག་ལ་བསྟན་པ་ལ་དགའ་བའི་ལྷ་རྣམས་དང་ལྷན་ཅིག་རྗེས་སུ་ཡི་རང་བར་བྱས་སོ། །སླར་ལྗོངས་རྒྱུ་བའི་བརྟུལ་
ཞུགས་ཀྱིས་མངའ་རིས་ཀྱི་གནས་རྟེན་རྣམས་ཀྱང་མཇལ། ཐེག་པ་ཆེན་པོའི་བརླབ་པར་བྱ་བའི་གནས་ལས་འདའ་བ་མ་ཡིན་པས་ཆོས་ཀྱི་སྦྱིན་པའང་ཅི་རིགས་སུ་སྩལ། གློ་བོ་མཁན་ཆེན་ལས། དགྲ་གདོང་། འཇིགས་བྱེད། གཤེད་དམར། གསང་བ་འདུས་པ་ལ་སོགས་པའང་མང་དུ་གསན། མཁན་པོ་དེ་དང་། གུ་གེ་པཎ་ཆེན་རྣམ་རྒྱལ་དཔལ་བཟང་། འཇམ་དབྱངས་བློ་གྲོས་དཔལ་མགོན་རྣམས་ལས་སྒྲ་དང་། ཚད་མ། བརྟག་གཉིས་ཀྱི་བཤད་པ། གསང་སྔགས་ཀྱི་དབང་དང་མན་ངག་ཀྱང་མང་དུ་ཉན། པུ་རང་དང་། ཏེ་སེ། ཁོ་ཆར་ལ་སོགས་པའི་གནས་རྟེན་འཁོར་ནས་སླར་གློ་བོར་བྱོན། དྲང་སོ་གཏེར་སྟོན་ཤཱཀྱ་བཟང་པོ་ལས་བྱང་གཏེར་མང་དུ་གསན། མདོར་ན་བདེ་ཀྱེ་གསང་གསུམ། མ་གཤིན་ཕུར་བ། བཀའ་བརྒྱད་གསར་རྙིང་། ཡང་ཕུར་རྟ་གསུམ། རྡོ་རྗེ་གུར། གསང་འདུས་ཞབས་ལུགས། བདེ་མཆོག་ལྷན་སྐྱེས། ལཱུ་ནག་དྲིལ་གསུམ། བོང་ཞལ་ཅན། དཔལ་མགོན་ཞལ་བྲམ། དུས་འཁོར་འགྲེལ་ཆེན། ཕྱག་རྡོར་བརྒྱད་སྐོར། ཨུ་ཙ་ཡ། རས་ཆུང་སྙན་བརྒྱུད། ཕྱག་ཆེན་སྦྱོར་དྲུག། ཨོ་རྒྱན་བསྙེན་སྒྲུབ། ཡང་དགོན་པའི་རི་ཆོས། ཉང་གཏེར་ཡོངས་རྫོགས། རྡོ་རྗེ་ཕྲེང་བ་ལ་སོགས་ཏེ་གསར་རྙིང་བཀའ་གཏེར་བསྟན་བཅོས། མན་ངག་གི་ཡི་གེ་རྣམ་པ་ཐམས་ཅད་ལ་དཱ་རི་དྲའི་བརྟུལ་ཞུགས་ཁོ་ནས་ཆོས་སྒུགས་སོགས་ཀྱི་ངལ་བ་དང་དུ་བླངས་ཏེ། སྐྱེས་རབས་ལས་མེ་ཚོགས་སྤུ་གྲིའི་སོ་ཡང་བརྒལ་ནས་ནི། འཆི་མཐར་ཐུག་གི་བར་དུ་དམ་ཆོས་བཙལ། ཞེས་པ་ནི་སྐྱེས་བུ་དམ་པ་འདིས་ཕྱག་ལེན་ལ་བཏབ་པ་ཡིན། གསར་རྙིང་གི་རྒྱུད་སྡེ་ཆེན་པོ་དེ་དག་ལའང་བསྙེན་པ་མ་སོང་བ་མེད་པས་དེང་སང་སྔ་འགྱུར་བ་ཚོས་བཀའ་བརྒྱད་དང་། གསར་མ་པ་རྡོ་རྗེ་ཕྲེང་བ་ཙམ་གྱིས་བསྙེན་པ་རྫོགས་པའང་དཀོན་པའི་དངོས་པོར་གྱུར་ན། འདི་ལྟ་བུ་ཨ་ལ་ལ། དམ་པའི་ཆོས་འཚོལ་ཞིང་བྱ་བཏང་སྒོ་
གཅིག་པའི་བརྟུལ་ཞུགས་ཀྱིས་བལ་ཡུལ་ཤིང་ཀུན། བྱ་རུང་ཁ་ཤོར། བལ་པོ་ཕམ་མཐིང་། ཡམ་བུའི་ཚལ། ཡང་ལེ་ཤོད་ལ་སོགས་པ་ཐམས་ཅད་དུ་གཤེགས་ཤིང་། །བལ་བོད་ཀྱི་བླ་མ་མང་པོ་བསྙེན། གནས་འབྲལ་དང་ཐུགས་དམ་འབའ་ཞིག་མཛད། དག་པའི་སྣང་བ་མཐའ་ཀླས་པར་ཤར། ཡི་དམ་དང་ཆོས་སྐྱོང་མང་པོའི་ཞལ་གཟིགས། མཁའ་འགྲོ་མས་སློབ་དཔོན་ཨ་བྷྱ་ཀ་རའི་སྐྱེ་བར་ལུང་བསྟན། ལོ་ཆེན་དཀོན་མཆོག་སྐྱབས་ཀྱི་རྡོ་རྗེ་ཕྲེང་བའི་དབང་ལ་དོགས། །མཛད་པས། མཚན་ལམ་ན་འཁོར་ལོ་སྡོམ་པའི་དཀྱིལ་འཁོར་གྱི་གཙོ་བོ་པཎ་ཆེན་པདྨ་དབང་རྒྱལ་གྱིས་མཛད་ཅིང་འདུག་པའི་སྒོ་དྲུང་ནས་མཁའ་འགྲོ་མས་ཁོང་བཀག་ནས་མ་བཏང་བས་སླར་འགྱོད་དེ་གནང་། ཞང་ལ་ལམ་འབྲས་གསར་མའང་ཐོབ། སོ་བརྒྱད་པ་ནས་གསར་རྙིང་རིས་མེད་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར། དེ་ནས་དངུས་གཙང་ཕྱོགས་ལ་གསར་རྙིང་གི་ཆོས་རྒྱུད་ཉམས་པ་དག་གསོ་བའི་ཐུགས་བསྐྱེད་བླ་ན་མེད་པས། ཡབ་དང་གློ་བོའི་སྡེ་བདག་ཀུན་ལ་གནང་བ་ཞུས། རིམ་བཞིན་ཟང་ཟང་བྲག། བཀྲ་བཟང་། བྱང་དམ་རིན་རྣམས་བརྒྱུད་དེ་བྱོན། བདེ་གྲོལ་དུ་མེས་སྟོན་ནམ་མཁའ་རྒྱལ་མཚན་དང་། སྔགས་འཆད་ཤཱཀྱ་བཟང་པོ་གཉིས་མཇལ། དེ་ནས་གཅུང་ལེགས་ལྡན་ཀྱང་ལྷན་ཅིག་པས་དབུས་འབྱོན། ཆོས་ཚིགས་སྤྲུལ་པའི་རྡོ་རྗེ་གདན་ལྷ་སའི་གཙུག་ལག་ཁང་ཇོ་ཤཱཀ་རྣམ་གཉིས་ཀྱིས་གཙོས་པའི་རྟེན་བརྟེན་པ་རྣམས་མཇལ། རྔོག་ཆོས་དང་། ཞི་བྱེད་ལ་ཐུགས་འདུན་དྲག་པོ་ཡོད་པས་རྗེ་བཙུན་མ་དང་། དཔལ་ལྷའི་སྤྲུལ་པས་སྐོར་ལམ་དུ་འགྲོགས་ནས་ལུང་བསྟན། གུང་ཐང་དུ་ཕྱག་མཆོད་མཛད། གཞུང་སྦྲེ་ཤིང་དུ་རྔོག་བསོད་ནམས་བསྟན་འཛིན་ལ་རྔོག་དཀྱིལ་རྣམས་ལེགས་པར་ནོད། གྲྭ་ཐང་དུ་ཞ་ལུ་ལོ་ཆེན་ཆོས་སྐྱོང་བཟང་པོ་ལས་གཤེད་དམར་སྐོར་སོགས་གསན བསམ་ཡས་སུ་བྱོན་པས་སྔོན་བཙན་པོ་ཁྲི་སྲོང་ལྡེའུ་བཙན་དུ་གྱུར་བའི་བག་ཆགས་དུ་མ་སད། བར་ཁང་
དུ་བདེ་གཤེགས་འདུས་པའི་དཀྱིལ་འཁོར་བཞེངས་ནས་སྒྲུབ་མཆོད་དང་སྨོན་ལམ་མཛད། ལྷོ་བྲག་གུ་རུབ་སོགས་ལ་ཆོས་ཀྱི་བདུད་རྩི་མང་དུ་བགྱེ། ཀཐོག་པ་ཆོས་རྗེ་བསོད་ནམས་རྒྱལ་མཚན་སོགས་བཤེས་གཉེན་མང་དག་དང་ཆོས་སྐྱེས་འབུལ་རེས་མཛད། ཕྲེང་བ་ཨོ་རྒྱན་ཆོས་རྫོང་དུ་ཀོང་ཆེན་ནམ་མཁའ་དཔལ་ལྡན་ལས་བླ་མ་དགོངས་འདུས་གསན། ཡང་རྫོང་དང་། མཆིམས་གུར་ཐུགས་དམ་མཛད་པས་རྩ་བ་གསུམ་གྱི་ལྷ་ཚོགས་མང་པོའི་ཞལ་གཟིགས། ཆོས་དབང་གི་གདུང་རབས་བརྒྱད་པས་ལྷོ་བྲག་ཏུ་སྤྱན་དྲངས་ནས། མཁར་ཆུ་བསམ་འགྲུབ་བདེ་ཆེན། ལྷ་བྲོ་དང་། སྨྲ་བོ་ཅོག། གྲོ་བོ་ལུང་ལ་སོགས་པར་བྱོན། མངའ་བདག་ཉང་ལ་ཨོ་རྒྱན་ཆེན་པོས་ལུང་བསྟན་པ་བཞིན། པཎ་ཆེན་འདིས་ཆོས་བརྒྱུད་ཉམས་པ་གསོ་བར་གསུངས་པའི་བདེན་པའི་རྔ་བོ་ཆེ་སྒྲོག་པའི་དུས་ལ་བབས་ཏེ། ཉང་གི་གདུང་སྒར་ཟུར་སོགས་ལ་རང་ལུགས་ཀྱི་བཤད་ཉན་རྒྱ་ཆེན་པོ་མཛད། སྡིག་ཅན་འབའ་ཞིག་ལ་གནས་སྤོར་མཛད་པས་འཇའ་འོད་ཀྱིས་བར་སྣང་བཀང་། ཞ་སྟོད་དང་། བཙན་གྲོ་སོགས་སུ་སྒྲུབ་ཆེན་བདེ་གཤེགས་འདུས་པའི་སྨན་སྒྲུབ་དང་སྐྱེ་བདུན་གྱིས་འགྲོ་དོན་མཛད། སྤྱིར་སྐྱེས་བུ་ཆེན་པོ་འདི་ཆོས་ལ་གནས་འཇོག་ཤིན་ཏུ་ཆེ་ཞིང་ཁྱད་པར་སྔོན་གྱི་སྨོན་ལམ་ལས་བདེ་གཤེགས་འདུས་པ་ལ་དོན་གཉེར་ཆེན་པོ་དང་ལྡན་པས་རང་གི་ལ་བརྗེ་ལ་སོགས་པར་བཀའ་བརྒྱད་བདེ་འདུས་ཚར་ཉི་ཤུ་རྩ་ལྔ་གསན་པའི་ཕྱི་མ་ཁུངས་བཙུན་ཞིང་ཡིད་རྟོན་པར་ནུས་པ་དེ་ལྷོ་བྲག་དགོན་དཀར་ཞེས་པ་འདིར་རི་བྲག་ལ་ཐོགས་པ་མེད་པའི་རྗེ་རིགས་ནམ་མཁའི་རྣལ་འབྱོར་ལས་རྙེད་པས་གསན་ཡིག་ཏུའང་བསྔགས་པ་ཆེན་པོ་མཛད་ཅིང་། དགོངས་པ་མཐར་ཐུག་པ་རྫོགས་པའི་ཐ་ཚིག་ཀྱང་གསལ། སླར་ཞེ་དྲུག་པར་བསམ་ཡས་དུ་བྱོན་ནས་བཀའ་འདུས་ཕྱི་མ་རིག་འཛིན་ཡོངས་འདུས་ཀྱི་ཆོས་སྐོར་རྣམས་རྣམ་སྣང་གསང་སྒྲོམ་ནས་སྤྱན་དྲངས། སྙེ་མོར་དགོངས་འདུས་ཀྱི་སྒྲུབ་ཆེན་བཙུགས། ཕུང་པོ་རི་བོ་ཆེར་བདེ་འདུས་ལ་འཆད་ཉན་མཛད། ངོར་དང་གསེར་མདོག་ཅན་དུ་དགེ་ཚུལ་སློང་གི་ལས་ཆོ་ག་མང་དུ་མཛད། གཞན་
ཡང་ཆོས་འཆད་ཉན་ལ་སོགས་པའི་འགྲོ་ཕན་རྒྱ་ཆེན་པོ་མཛད་དེ་ཆུ་བོ་རི་བརྒྱུད། བྲག་ཆེན་རྡོ་རྗེ་ཞེས་པ་འདིར་ཞག་གཅིག་གཏན་ཆགས་པས་སྐུ་ཚེའི་རྟེན་འབྲེལ་འགྲིག། བྲག་ཆེན་ཕུར་བ་ཞེས་པའི་དཔྱད་ལས་བསྐྱེད་རྫོགས་ཀྱི་བསྟན་པ་ཟིན་པའི་བརྡ་དོན་དགོངས་པ་བཞིན། སྔོན་ཕྲེང་བོ་བདར་ཞིང་རྒྱས་པའི་དུས་བདག་ཅག་གི་བསྟན་པའི་ཆོ་མོག་ཆེན་པོ་ཀུན་གཟིགས་ཕྲེང་པོ་གཏེར་ཆེན་ཤེས་རབ་འོད་ཟེར་ཏི་ཤིར་བཀུར་ནས་གནས་འདིར་ཡུན་རིང་པོར་དགོན་པ་བཅས་ནས་གཏན་ཆགས། གསུང་རབ་མང་པོའི་སྦྱར་བྱང་དུའང་ཐུབ་བསྟན་རྡོ་རྗེ་བྲག་ཏུ་སྦྱར་བའོ། །ཞེས་མིང་གིས་མངའ་གསོལ། འདི་ཉིད་མཛད་པ་བརྟུལ་བར་ཉེ་བའི་ཚེ་པཎ་ཆེན་ཉིད་ཀྱི་དེ་མ་ཐག་པའི་སྐྱེ་བ་བྱང་བདག་བཀྲ་ཤིས་སྟོབས་རྒྱལ་དབུས་སུ་བྱོན་ནས་དགོན་གནས་འདིར་རྗེ་བཙུན་པྲཛྙཱའི་ཞབས་དང་མཇལ་བར་དགོངས་པ་ལ། པྲཛྙཱའི་ཞབས་འཕྱོང་རྒྱས་སྟག་རྩེར་བཞུགས་པ་དང་འགྲིག། བདག་པོ་ཐུགས་དུངས་པས་དང་པོར་གཟིམ་མལ་མཇལ་བས་ཡུན་དུ་བཞུགས་པའི་རྟེན་འབྲེལ་གཞན་དུ་སོང་། པཎ་ཆེན་རིན་པོ་ཆེའི་དུས་ནས་ཉེ་བར་གནས་པའི་ཅོག་སླར་ཆུང་ངུ་ཞིག་ཡོད་པབདག་ཆེན་གྱི་དུས་སྟོབས་སུ་གྱུར་ནས་ཨེ་ཝཾ་ཅོག་སྒར་དུ་གྲགས་པ་འདིར་ཆགས་པ་ལས་ཐུབ་བསྟན་རྡོ་རྗེ་བྲག་ཅེས་པའི་དགེ་འདུན་འདུས་པའི་སྡེ་འཕེལ། སྲས་རིག་འཛིན་ངག་གི་དབང་པོའི་སྤྲུལ་པའི་སྐུ་པདྨ་ཕྲིན་ལས་རིགས་ཀྱི་ཅོད་པན་དུ་མཛེས་པ་ལ། གོང་མ་ལྔ་པ་ཆེན་པོའི་བསྟི་སྟང་གིས་གཟེངས་བསྟོད་པས་བྱང་གཏེར་གཙོ་བོར་གྱུར་བའི་དར་རྒྱས་བླ་སྟག་ཏུ་འཕེལ། སྤྲུལ་པའི་སྐུ་རིན་པོ་ཆེ་འདི་ཉིད་ཀྱང་སྨན་ལུང་པ་བློ་མཆོག་རྡོ་རྗེ་ལས་བརྒྱུད་དེ་འདུས་པ་མདོ་ལ་གསན་བསམ་མཛད། སེམས་སྡེ་བཅོ་བརྒྱད་ཀྱི་ལྷག་པའི་མདོ་དབང་གི་ཡིག་ཆའང་མཛད་སྣང་ངོ། །དེ་ནས་པཎ་ཆེན་རིན་པོ་ཆེ་ཉིད་ཕལ་ཆེར་བསམ་ཡས་དབུ་ཚལ་དུ་གཏན་ཆགས། བྱམས་པ་གླིང་དུ་ཐུ་བཙུན་བསོད་ནམས་རྣམ་རྒྱལ་ལས་སངས་རྒྱས་མཉམ་སྦྱོར་གསན་ཞིང་། ཕར་ཟབ་ཆོས་མཁའ་འགྲོ་སྙིང་ཏིག་གི་དབང་ཁྲིད་མ་ལུས་པ་ཕུལ་ནས་ཐུགས་ཡིད་
གཅིག་ཏུ་འདྲེས། འོ་ན་སྨོན་ཐང་དུའང་སྐུ་མཆེད་ལྷན་ཅིག་པས་ཡུན་རིང་པར་བཞུགས། གཅུང་རིག་འཛིན་ལེགས་ལྡན་པ་དེ་ལུགས་གཉིས་ཀའི་ཕོ་སྒོ་ཡངས་པས་འབྲི་གུང་པ་རིན་ཆེན་ཕུན་ཚོགས་བསམ་ཡས་སུ་གདན་དྲངས་ནས་དཔོན་སློབ་གསུམ་ཀས་བསམ་ཡས་ཀྱི་རབ་གནས་བསྐྱར་ཏེ་བོད་ཁམས་ཡུན་དུ་བདེ་བའི་རྟེན་འབྲེལ་བསྒྲིགས། འདི་ནས་བཟུང་ཆོས་རྒྱལ་རིན་ཆེན་ཕུན་ཚོགས་ཀྱང་སྲས་ཀྱི་དམ་པར་གྱུར་བས་རྒྱལ་དབང་པདྨའི་རིང་ལུགས་ལ་རྟེན་འབྲེལ་ཆེན་པོར་གྱུར། སྤྱིར་སྐྱེས་བུ་འདི་ཉིད་ནི་གནས་ལྔ་རིག་པའི་པཎྜི་ཏ་ཆེན་པོ། །མདོ་སྔགས་གསར་རྙིང་རིས་མེད་པའི་བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཆེན་པོ། བཞོན་པ་དང་འཇོ་འཁྱེར་ལ་སོགས་པའི་ཆོས་བརྒྱད་ཡོངས་སུ་སྤངས་པས་ཤཱཀྱ་ཐུབ་པའི་རྗེས་ཞུགས་བསོད་སྙོམས་པ་ཆེན་པོ། ཞེན་ལོག་དང་དཀའ་སྤྱད་ཁུར་དུ་བཟོད་པས་བྱ་བཏང་རྣལ་འབྱོར་གྱི་དབང་པོ་ཆེན་པོ། རིག་པ་དང་གྲོལ་བའི་སྤོབས་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་དགེ་འདུན་ཆེན་པོ་དེས། དངོས་ཀྱི་ལམ་ནས་བསྟན་པ་དང་སེམས་ཅན་གྱི་དོན་བླ་ན་མེད་པ་མཛད་ཅིང་སྔ་འགྱུར་རྒྱུད་འབུམ་རིན་པོ་ཆེའི་སྐོར་ཚོ་འབྱེད་པ་ལའང་རྣམ་དཔྱོད་འདི་ཁོ་ན་ཆེ་ཞིང་། ལུང་གི་རྒྱུན་ལའང་བཀའ་དྲིན་བསམ་གྱིས་མི་ཁྱབ། ཚིག་ཉུང་ལ་དོན་ཤིན་ཏུ་མང་བསྡོམ་པ་གསུམ་གྱི་རྣམ་པར་ངེས་པའི་བསྟན་བཅོས་ལ་སོགས་ཏེ་རྣམ་གྲངས་མཐའ་ཡས་པ་དག་གིས་བརྒྱུད་ནས་བསྟན་འགྲོའི་དོན་བླ་ན་མཐོ་བའི་ཆོ་ག་མཛད་དེ་འོ་ན་སྨོན་ཐང་ནས་ཟངས་མདོག་དཔལ་གྱི་རི་བོར་གཤེགས་སོ། །དེ་ཉིད་ཀྱི་རྗེས་སུ་བསླབ་པ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ནི། དབུར་སྟོད་འབྲི་གུང་སྐུ་གཉེར་སྒང་ཞེས་བྱ་བར། རིགས་ཀྱིས་མངོན་པར་མཐོ་བ་སྐྱུ་རའི་གདུང་དུ་སྐུ་བལྟམས། དགུང་ལོ་བརྒྱད་ཀྱི་སྟེང་དུ་ཕག་མོ་གྲུར་སྤྱན་སྔར་རིན་པོ་ཆེ་ཆོས་ཀྱི་གྲགས་པ་ལས་རབ་ཏུ་བྱུང་། བཅུ་གསུམ་པར་རྩེས་དང་བསམ་གཏན་གླིང་དུ་བཞུགས་པའི་དུས་དཀར་པོ་ཀུན་གྲགས་པས་ཁྲ་འབྲུག་གི་ཞིག་གསོ་མཛད་པའི་རབ་གནས་ལ་སྤྱན་དྲངས་པས། མཐོང་ན་མི་མཐུན་པ་མེད་
པའི་སྐུའི་བྱིན་གྱིས་སྐྱེ་བོ་ཀུན་གྱི་སྙིང་ལ་ངོམས་པ་མེད་པའི་དད་པ་བྱིན། སྔོ་སངས་ཀྱི་ལམ་ནས་ལྷ་རྣམས་ཀྱིས་མེ་ཏོག་གི་ཆར་ཕབ། མདོ་སྔགས་དང་གཞུང་ལུགས་མཐའ་ཡས་པའི་གསན་པ་ཕུལ་དུ་ཕྱིན། ཡངས་པ་ཅན་དང་། ཀླུངས་ཤོད། དབུར་སྟོད་ཀྱི་གཞུ་སྟོད་ཏི་སྒྲོལ་སོགས་པའི་གནས་ངེས་མེད་ཀུན་ཏུ་སྒྲུབ་པ་མཛད། སྣང་སེམས་མཉམ་པ་ཉིད་དུ་འདྲེས་པས་རྡོབ་ལ་ཕྱག་མཛུབ་ཀྱི་རྗེས་ཤིན་ཏུ་གསལ་བ་བྱུང་། རེ་ཞིག་ན་ཏི་སྒྲོར་བཞུགས་པའི་ཚེ་རྒྱ་གར་གྱི་པཎྜིཏ་བཛྲ་ནཱ་ཐ་དཔོན་སློབ་བཅུ་གཅིག་བྱོན་ནས་བྷུ་རླུང་ཛ་བི་རའི་མན་ངག་ཕུལ། ནུབ་ཅིག་མནལ་ལམ་ན་ནམ་མཁའ་ལ་འཕུར་ཏེ་བྱོན་པས། རིན་པོ་ཆེ་སྣ་ཚོགས་གཅལ་དུ་བཀྲམ་པའི་དབུས་ན་རྗིང་བུ་མེ་ཏོག་གིས་བཀྲ་བར་སྔགས་བསྐྲའི་རྩེ་མོ་ལ་སྤྱན་རས་གཟིགས། སྐེད་པ་ཐམས་ཅད་རྟ་མགྲིན། རྩ་བ་རྡོ་རྗེ་ཕག་མོའི་རྣམ་པར་འདུག་པ་ཞིག་ཁྲུས་བྱེད་པར་གཟིགས་ནས་དེ་ལ་ངོ་མཚར་སྐྱེས་ཙ་ན། བུད་མེད་མཛེས་ཤིང་ཡིད་དུ་འོང་བ་ཞིག་གིས། འདིའི་སྐྲ་དང་ཁྱོད་ཀྱི་སྐྲ་མཆུངས་པ་་ཡིན། ཁྱོད་ཀྱིས་རྟག་པར་སྐྲ་བྲེགས་པས་ལྷ་ཚོགས་འདི་རྣམས་སྤངས་པའི་ཉེས་པ་བྱུང་ཞིང་འབྱུང་འཁྲུགས་ཀྱི་ནད་མང་། ད་ལུས་ཀྱང་དཀར་ཆས་སུ་བསྒྱུར་ན་རྟེན་འབྲེལ་ཐམས་ཅད་ང་རང་གིས་ཤེས་ཟེར། དེར་དེ་བཞིན་དུ་མཛད་པས་མར་མེའི་ཀོང་བུ་ཆུང་ངུ་ཞིག་གིས་ཞག་འགར་འཚོ་བ་སོགས་རྟེན་འབྲེལ་ཟབ་མོའི་སྒོ་འཕར་ཕྱེ། རེ་ཞིག་ན་ཡངས་པ་ཅན་དུ་བྱོན་པས་གཏེར་གྱི་ཁ་བྱང་བྱུང་ནས། གུ་རུ་རིན་པོ་ཆེའི་ཐུགས་ཀྱི་ཡང་བཅུད་དམ་ཆོས་དགོངས་པ་ཡང་ཟབ། དུང་ཤོག་དཀར་པོ་དང་། གསེར་ཤོག་སེར་པོ། མཆོང་ཤོག་སྨུག་པོ། གཡུ་ཤོག་ལྗང་སྐྱ། ལྕགས་ཤོག་ནག་པོའི་ཤོག་སེར་ངོ་མཚར་ཅན་གྱི་ཕྱི་མོར་གནས་པ། དཔོན་སློབ་བཞིས་རྣམ་གུང་སྟབས་སུ་གཤེགས་ནས་ཏི་སྒྲོའི་ཚོགས་ཁང་ཆེན་མོ་ནས་སྤྱན་དྲངས། གནས་དེ་ཉིད་དུ་བདུན་ཕྲག་གཅིག་ཏུ་སྐུ་མཚམས་ལ་བཞུགས་པ་ན། ཚེས་བཅུའི་ནུབ་བུད་མེད་ལྔ་བྱུང་ནས། དོ་ནུབ་གུ་རུ་རིན་པོ་ཆེ་ཚོགས་ཀྱི་འཁོར་ལོ་མཛད་ཀྱིན་ཡོད་པས་འདེངས་ཟེར་ཟངས་
མདོག་དཔལ་རིར་ཁྲིད། སློབ་དཔོན་ཆེན་པོ་གུ་རུ་རྟ་ཕག་ཡབ་ཡུམ་གྱི་རྣམ་པར་བཞེངས་ནས་བཞུགས་པ་ཞིག་མཇལ་བས། འདི་ནི་ཡི་དམ་དུ་འདུག། སྔོན་དུ་བླ་མ་ལ་ཕྱག་བྱ་དགོས་པས་གུ་རུ་རིན་པོ་ཆེ་གང་ན་བཞུགས་སྙམ་པའི་ཚེ། རྟ་པག་གི་ཞལ་ནས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་བྱེད་རྒྱལ་པོ་བླ་མའི་སྐུ། །བླ་མ་དཔལ་ལྡན་ཧེ་རུ་ཀ། །ཞེས་གསུངས་ཤིང་སྐུ་ལུས་གར་གྱི་རྣམ་འགྱུར་ཤིག་ཤིག་འདུག། དཔའ་བོ་དང་མཁའ་འགྲོའི་ཚོགས་ཀྱིས་ཀྱང་རྡོ་རྗེའི་གླུ་དང་གར་མཛད་པས་སྣང་བ་གཏད་མེད་དུ་ཧ་ཕྱད་དེ་ལུས། དེར་བུད་མེད་ལྔས་རིན་པོ་ཆེ་ཐ་དད་པ་ལས་གྲུབ་པའི་རིགས་ལྔའི་ཕྱག་རྒྱ་རེ་བྱིན། གུ་རུ་རིན་པོ་ཆེའི་ཞལ་ནས། །རིན་པོ་ཆེ་སྣ་ཚོགས་ཀྱི་ཕྱག་རྒྱ་དེ་མི་འབུལ་ལམ་གསུངས་པས། བུ་མོ་ལྔ་པོས་བདག་ཅག་ནི་ལས་དང་སྨོན་ལམ་གྱི་སྟབས་སུ་མཆིས་ལགས་ཏེ། ཁོང་ད་དུང་འཆིང་བ་དམ་པོས་དཀྲིས། རྟེན་འབྲེལ་མ་འགྲིག་པས་འབུལ་རྒྱུ་ཅང་གདའ་མ་ཞུས་སོ། །མ་ཧཱ་གུ་རུའི་ཞལ་ནས། ནམ་མཁའི་པདྨོ་ཞེས་ལན་གསུམ་གསུངས་པས། སྙིང་གྲང་སྟོང་པ་ཅིག་བྱུང་། དེར་གདན་ཁྲི་དཔག་ཏུ་མེད་པ་ལ་རིག་འཛིན་གྱི་ཚོགས་རྣམས་བཞུགས་པའི་དབུས་དེར། ཁྲི་རྐང་འབོལ་བརྩེགས་བཅས་པའི་སྟེང་ན་སྣམ་ཕྲུག་མོན་དར་སོགས་ལ་བྱས་པའི་གོས་དང་། རྒྱལ་པོའི་ལ་ཐོད་ཅིག་འདུག་པ་རང་གི་ཡིན་པར་དགོངས་ཏེ་མནབས། དེར་བཞུགས་པ་ན་ཐམས་ཅད་དགྱེས་པར་སྟོན་ཞིང་། ག་ན་ཙཀྲའི་འདུ་བ་རྒྱ་ཆེན་པོ་དང་བཅས་རྩ་བ་གསུམ་གྱི་གཞུང་བསྲངས་ནས་དབང་བསྐུར། མན་ངག་རྗེས་སུ་གདམས་པ་ཐམས་ཅད་སྩལ། དེར་རྒྱལ་པོའི་ཆ་བྱད་དུ་བྱས་པའི་སློབ་དཔོན་ཅིག་བྱོན་ཏེ། དགྱེས་དགྱེས་ལྟར་འདུག། ཁྱེད་སུ་ཡིན་དྲིས་པས། བདག་ནི་སྔོན་བོད་ཡུལ་དུ་ཁྱོད་ཀྱི་ཕ་ཡིན་མོད། ཁྲི་སྲོང་ལྡེའུ་བཙན་ནོ། །སྙིགས་དུས་གདུལ་བྱར་མངའ་རི་པཎ་ཆེན་དུ་བསྟན་ཀྱང་། ན་ནིང་སློབ་མ་དམ་ཉམས་ཀྱི་གྲིབ་ཕོག་ནས་སྤྲུལ་པ་བསྡུས་ཏེ་ད་ལྟ་མ་ཧཱ་གུ་རུའི་ཞབས་དྲུང་ན་ཡོད་པ་ཡིན་གསུངས་པས་ཕ་དང་བུ་ཕྲད་པའི་དགའ་བ་ཐོད་རྒལ་དུ་སྐྱེས་ནས་རབ་ཏུ་བཏུང་། ཞབས་
ལ་འཆང་། མཆི་མ་ཕྱུང་ཞིང་གསོལ་བ་བཏབ་པས། བསླབ་བྱ་དང་ཞལ་གདམས་ཤིན་ཏུ་མང་བར་གནང་། གུ་རུའི་དྲུང་དུ་ཁྲིད་ནས་བྱིན་རླབས་ཞུར་བཅུག་པས་ད་ཅིའི་རྟ་ཕག་མ་ཡིན་པར་སངས་རྒྱས་པདྨའི་སྐུ་དངོས་སུ་མཐོང་། ཞལ་ཏ་དང་མན་ངག་ཤིན་ཏུ་མང་བར་གསུང་བའི་མཐར། བཛྲ་རཏྣ་པདྨ་ཀརྨ་བུདྡྷ་ཌཱཀྐི་ཛཞེས་གསུངས་པས་སྔོན་གྱི་བུད་མེད་ལྔ་བྱུང་སྟེ་ཕྱག་ནས་ཁྲིད། དེར་འདི་གར་སྡོད་པ་ཞིག་ཡིན་ན་དགའ་བ་ལ་སྙམ། །སྐྱོ་བ་ལ་ཚད་མེད་པའི་ངང་ནས་ཏི་སྒྲོའི་ཚོགས་ཁང་ཆེན་མོར་ཕེབས། དུས་འདི་ཙམ་ན་གསར་རྙིང་བཀའ་གཏེར་རིས་མེད་པའི་བདག་པོར་གྱུར། ཁྱད་པར་གཏེར་ཁ་གོང་འོག་དང་། བཀའ་བརྒྱད་ལུགས་དགུ། སྙིང་ཏིག་ཡ་བཞི་ལ་རྩལ་དུ་བཏོན་པའི་ཕྲིན་ལས་རྒྱ་ཆེ། མཁའ་འགྲོ་སྙིང་ཏིག་ལ་ཁྲིད་ཡིག་ཀྱང་མཛད། གྲུབ་མཐའི་ཁོག་དབུབ་ཚུལ་ཀྱང་། ཁོ་བོའི་རྡོ་རྗེ་སློབ་དཔོན་མངའ་རིས་པཎ་ཆེན་རིན་པོ་ཆེའི་མཁྱེན་རབ་ལ་མཐའ་མེད། དེའི་བཀའ་ལས་རྙིང་མ་ལུགས་མཐུན་ཞིག་བྱེད་ན་བཀའ་མས་ཁོག་དབུབ། གཏེར་མའི་མན་ངག་གིས་བརྒྱན་པ་ཞིག་དགོས་ཞེས་གསུངས་པ་དེ་སྲས་ཀྱི་དམ་པ་རྗེ་བཙུན་ཤེས་རབ་འོད་ཟེར་ལ་རྗེས་སུ་གདམས། ལར་འབྲི་གུང་འཇིག་རྟེན་མགོན་པོས་ཕུར་བ་རྩ་རྒྱུད་འཆད་པ་སོགས་གསར་རྙིང་ལ་རིས་སུ་གཅོད་པ་བཀར་མ་བཏགས་ཏེ་སྔ་འགྱུར་གྱི་བཤད་སྲོལ་མེད་པས། དཔྱོད་ལྡན་དུ་གྲགས་པ་དགེ་སློང་སངས་རྒྱས་རྡོ་རྗེར་སྙན་འབུལ་དུ། ཁྱེད་ཨུ་རྒྱན་པདྨའི་རྒྱལ་ཚབ་ཆེན་པོ་ཡིན། ཕྱོགས་ཀྱི་ཆོས་ཞུ་བ་རྣམས་ཀྱང་རྙིང་མ་ཁོ་ན་ལ་གཏད་ནས་ལྷགས་པ་མང་། ཆོས་གསུང་བའི་ཚེ་ད་དུང་བཀའ་བརྒྱུད་པའི་ཆོས་སྐད་དང་འདྲེས་པ་གདའ་བས། སྔགས་རྙིང་མ་ལ་མདོ་སྒྱུ་སེམས་གསུམ་གྱི་བཤད་སྲོལ་ཐུན་མོང་མ་ཡིན་པར་ཡོད་ཅིང་། དེ་ལ་ཀུན་མཁྱེན་ཀློང་ཆེན་པའི་བཀའ་འབུམ་ཉི་མ་ཤར་བ་ལྟ་བུའི་འགྲེལ་བ་ཡོད་པ་དེ་ཁོ་ནའི་ལུགས་བཞིན་ཐུགས་རྗེ་ཆེ་དགོས་ཞེས་སྙན་འདེགས་ཕུལ་བ་ཐུགས་ལ་ཤིན་ཏུ་ཞུགས་པས་རྒྱལ་བ་
ཀློང་ཆེན་པའི་གཞུང་ལ་དགོངས་པ་ལྷག་པར་བདེ། སྤྱིར་སྐྱེས་བུ་དམ་པ་འདི་མཁས་གྲུབ་ཆེན་པོའི་གནས་ལ་བཞུགས་པས་སྤྱོད་འཇུག་ལ་སོགས་རྒྱ་གཞུང་ཆེན་པོ་དག་གི་དགོངས་པ་འཆད་པའི་ཚེའང་བཤད་ཚུལ་གཞན་ལས་ཁྱད་དུ་འཕགས་པས་བློ་གསལ་མང་དུ་ཐོས་པ་དག་གིས་ཀྱང་ཁེངས་པ་དེ་བླག་ཏུ་དཔྲོག་ནུས་པ་ཞིག་ཡིན་འབྲི་གུང་པ་སྲིད་སྡེ་ཆེ་ཞིང་། ཁྱད་པར་འདི་དུས་བོད་ཤིང་སྒོ་ཅན་པའི་རྒྱལ་པོའི་མཆོད་གནས་ཀྱི་དམ་པར་གྱུར་ཏེ་གདན་ས་ཐེལ་གྱི་ཁྲི་མཛད་པའི་སྐབས་ནས་སློབ་མའི་ཚོགས་ནི་དབུས་གཙང་རུ་བཞི། མངའ་རིས་ལ་དྭགས། མདོ་ཁམས། ཧོར་ཡུལ་ལ་སོགས་པར་ཀུན་ཏུ་ཁྱབ་པ་སྨོས་ཀྱིས་མི་ལྡང་ལ། ཚོགས་པ་རྒྱ་མཚོའི་དབུས་སུ་དགོངས་གཅིག་ལ་སོགས་པ་གསུངས་པའི་ཚེ། ངའི་རལ་བའི་ཁྲོད་ནང་དང་མཉམ་པའི་རྒྱལ་ཚབ་གཅིག་སྦས་ནས་ཡོད་ཅེས་གསུངས་པ་ནི་བདག་ཅག་གི་རིགས་ཀྱི་བདག་པོར་གདོད་ནས་གྲུབ་པ་རྗེ་བཙུན་པྲཛྙཱའི་ཞབས་ཡིན་ལ། རིགས་ཆོས་གཉིས་ཀའི་སྲས་སུ་གྱུར་བ་རྒྱལ་པོ་གཙུག་ལག་འཛིན་གྱི་སྐྱེ་བ་ཆོས་རྒྱལ་ཕུན་ཚོགས། དེའི་སྲས་སུ་རང་ཉིད་དེ་མ་ཐག་པའི་སྤྲུལ་པའི་སྐུར་བཟུང་བ་ཆོས་ཀྱི་གྲགས་པས་ཀྱང་གོང་མས་སྲོལ་བཏོད་པའི་གྲུབ་པའི་མཐའ་གང་ཡིན་པ་ལྷག་པར་རྒྱས་པར་མཛད་པས་བཀའ་བརྒྱུད་རིན་པོ་ཆེའི་ལྗོན་ཤིང་ལ། སྔ་འགྱུར་གྱི་འབྲས་བུ་ཆགས་ནས། །ཆོས་དགོངས་པ་ཡང་ཟབ་ལ་རྒྱུན་གྱི་རྣལ་འབྱོར་དུ་བྱེད་ཅིང་། བཀའ་བརྒྱད་ཀྱི་སྒྲུབ་དབང་ཆེན་མོའི་སྲོལ་ཁ་ལ་སོགས་པ་ཐམས་ཅད་ད་ལྟའང་མ་ཉམས་པར་དཔལ་དུ་འབར་རོ་ཞེས་ཐོས་སོ།། །།ད་ནི་སློབ་དཔོན་བཻ་རོ་ཙ་ན་སླར་ཡང་རིག་གྲོལ་གྱི་སྤྲུལ་པའི་སྒྱུ་འཕྲུལ་ལ་ཆགས་པ་ཀུན་མཁྱེན་ཤེས་རབ་འོད་ཟེར་གྱི་གཏམ་བཤད་པར་བྱ་སྟེ། བདག་ཉིད་ཆེན་པོ་འདི་ནི་བྱང་ངམ་ཆེན་གྱི་སའི་ཆར་ཁྲིབས་མ་གཉིས་ཀྱི་ཆོ་འབྲང་ལས་ས་ཕོ་སྟག་ལོ་ཆུ་སྟོད་ཟླ་བའི་ཚེས་བཅུར་མངལ་གྱི་པདྨོ་ལས་གྲོལ། ལྷུམས་སུ་ཞུགས་པའི་ཚེ་སྐྱེས་བུ་ཤེལ་གྱི་ཁ་དོག་ཅན་རིན་པོ་ཆེའི་དོ་ཤལ་དང་ལྡན་པ་ཞིག་གིས་ཤེལ་བུམ་བདུད་རྩིས་གང་བ་ཡུམ་གྱི་སྤྱི་བོ་ནས་བསྟིམ་པ་རྨིས། ཚེས་
བཅུ་བྱུང་ངེས་སྦྲ་ཁྱིམ་ལ་འཇའ་ཟུག་པ་དང་། དྲི་ཞིམ་པོའི་ངད་པ་རྒྱུན་དུ་བྱུང་། གཞོན་ནུ་རོལ་རྩེད་ཀྱི་ཚེ་ནའང་། བཅོས་མིན་གྱི་ངེས་འབྱུང་དང་། དད་པའི་སྣང་བ་རྒྱ་ཆེན་པོ། མྱུར་ལ་ཟབ་པའི་ཤེས་རབ་ལ་སོགས་ཏེ་བྱང་ཆུབ་སེམས་དཔའི་ངང་ཚུལ་གྱིས་ལྷག་པར་ཕྱུག་པ་ཞིག་སྟེ། འཇམ་པའི་དབྱངས་དང་། གཤེད་དམར་དང་། གཉན་མགོན་རྣམས་ཀྱིས་ཞལ་བསྟན་པ་བྱུང་བ་འབྲི་གུང་པས་གཡག་སྡེ་པཎ་ཆེན་གྱི་བག་ཆགས་སུ་ངོས་འཛིན་མཛད། ཁྱད་པར་དུ་རིན་ཆེན་ཕུན་ཚོགས་ཆོས་ཀྱི་རྒྱལ་པོ་ཇི་ལྟ་བ་ཞིག་གི་ཞལ་ནས། ཁྱོད་ཀྱི་སྙིང་ག་ན་ཨ་གཅིག་ཡོད་པ་ད་ལྟ་སྟོན་མ་རན་ཞེས་ཕྱག་མཛུབ་བཙུགས་པས་བརྗོད་མི་ཤེས་པའི་ཉམས་ཤར། །རྗེས་སུ་སྐུའི་བཀོད་པ་དེ་ཁོ་ནར་སྣང་ཞེས་གསུང་། རུ་སྐེར་དེ་ལ་ཧོར་གྱིས་རྒྱབ་དུས་བུ་ཆུང་འཕྲོག་པར་བརྩམས་ཏེ་ཞགས་པས་བཏབ་ཕན། ལྷག་པའི་ལྷས་བསྒྲིབས་པར་གཟིགས་ཏེ་བྲོས་པས་ཐར། དེ་ནས་གྲོག་གི་ཕུར་བཞུགས། བྱིས་པའི་དབུས་ན་ཆོས་གསུང་བ་དང་། མདོ་རྒྱུད་ཀྱི་ཚིག་ཚོན་པོ་ཅལ་ཅོལ་དུ་འདོན་པ་དང་། ལྷག་པར་གཞོན་ནུ་ཤེད་མ་བྱེ་བ་དེས་ཆུ་བ་ན་གང་གྱ་ཅན་ཁ་ཁྱེར་ནས་བཟུང་སྟེ་ཇ་ཁང་དུ་བསྐྱལ་བ་དང་། རྒན་བདག་གིས་སྒོ་བཅད་ནས་ཕྱིར་ཐོན་པ་ན། སྒོ་མ་ཕྱེ་བར་ཐལ་བྱུང་དུ་ཕྱིར་ཐོན་པ་སོགས་བྱུང་། ཁྱད་པར་ཐེག་པ་ཆེན་པོའི་རིགས་སད་པས་སེམས་ཅན་ཉམ་ཆུང་བ་དག་ལ་བཟོད་དུ་མེད་པའི་སྙིང་རྗེ་དང་། ཞང་པོས་འཐབས་པའི་གལ་ལ་ཅི་མི་སྙམ་པས་ག་ཅ་སྟེར་བ་སོགས་ཕལ་པའི་ཀུན་ཏུ་སྤྱོད་པ་ལས་རྒྱང་རིང་། དགུང་ལོ་བརྒྱད་པའི་ཚེ་ཨེ་ཝཾ་གླིང་སྨད་དང་ཉིན་སྡིངས་གཉིས་ཀའི་སློབ་དཔོན་བརྟེན་མཁས་ཀྱི་ཡོན་ཏན་རྫོགས་པ་ཚུལ་ཁྲིམས་འོད་ཟེར་བ་ལས་དགེ་བསྙེན་དུ་མཛད། མཆོད་གྲལ་གྱི་ལྷ་ཕལ་ཆེ་དངོས་འཛིན་མཛད་པས་འདི་ཤེས་རབ་ཐོད་རྒལ་བ་ཞིག་བྱུང་ཞེས་མཚན་ཤེས་རབ་འོད་ཟེར་དུ་བཏགས། གསེར་
མདོག་ཅན་པའི་སློབ་མའི་མཆོག་པཎ་ཆེན་རྡོར་རྒྱལ་བ་ལས་རབ་ཏུ་བྱུང་། དེ་ནས་ཀློག་པ་ཐོས་བསམ་གྱི་གྲར་ཞུགས་ནས། དགའ་ལྡན་ཁྲི་བཞལ་སྔ་ནས་བསྟན་དར་ལ་ཟབ་མོ་ལྟ་བ་དང་། རྒྱ་ཆེན་སྤྱོད་པའི་སེམས་བསྐྱེད་ལུགས་སྲོལ་གཉིས། སླབ་བཏུས། སྤྱོད་འཇུག མདོ་སྡེ་ཀུན་ལས་བཏུས། བྱང་ས། སྡོམ་པ་ཉི་ཤུ་པ། ཀླུ་སྒྲུབ་ལུགས་ཀྱི་དོན་དམ་སེམས་བསྐྱེད་སོགས་ཉན་ཞིང་ཀླུ་སྒྲུབ་ཀྱི་བཞུང་ལ་ནན་ཏན་དོས། མཚན་ཉིད་ཀྱི་གཞུང་ལ་ལོ་དྲུག་གི་བར་དུ་ཉིན་མཚན་མེད་པར་སྦྱངས། སློབ་དཔོན་གཉིས་པོ་ལས། བྱམས་ཆོས་ལྔ། ས་སྡེ་ལྔ། སྡོམ་རྣམ་གཉིས། དབུ་མ་རིག་ཚོགས། གཏམ་ཚོགས། བསྟོད་ཚོགས། བྱང་ཆུབ་སེམས་འགྲེལ། རིམ་ལྔ་རྣམས་དང་། དགེ་ལྡན་པའི་མདོའི་ལམ་རིམ་གཉིས། སྔགས་རིམ་ཆེན་མོ་ལ་སོགས་ཏེ་རྒྱ་བོད་ཀྱི་གཞུང་འགྲེལ་མང་དུ་ཉན། ལམ་གྱི་འགྲོ་ས་ལ་གོ་དོན་ཕུན་སུམ་ཚོགས་པ་སྐྱེས་ཀྱང་འཁོར་བའི་ས་བོན་དྲུངས་ནས་འབྱིན་པ་ལྟར་རྣམ་པར་དག་པ་ཁོ་ན་ཡིན། དེ་ལ་དགག་བཞག་གི་འདོད་པ་མངས་པས་ངོ་བོ་མ་འཕྲུལ་བ་གང་ཡིན་ཤེས་དཀའ། སངས་རྒྱས་ཀྱི་ལྟ་བ་ཟབ་མོ་སྟོན་པ་ཀླུ་སྒྲུབ་ལུང་བསྟན། དེའི་དགོངས་འགྲེལ་ཚད་མ་ཟླ་བ་གྲགས་པ་ཡིན། དེས་ཀྱང་སངས་རྒྱས་བསྐྱངས་ལ་བསྟེན་ནས་རྟོགས་པ་ཡིན་པས། འགྲེལ་བ་བུདྡྷ་པ་ལི་ཏི་ལ་བསླབ་གཉེར་གཏིང་ཐུག་པ་ཞིག་བྱས་པས། དེང་སང་ལྟ་བའི་གནས་ཚུལ་གླེང་བ་རྣམས་ལ་ཁོ་བོ་མགུ་བོ་རང་མི་འོང་ཞེས་གསུངས། ས་དགེ་གཉིས་ཅར་ལ་མཁས་པའི་སློབ་དཔོན་ཞིག་ཡོད་པ་ལ་ལུགས་གཉིས་པའི་སྦྱངས་པ་མཐར་སོན། ཁྱད་པར་གསང་བ་འདུས་པ་ལ་ཙོང་ཁ་པ་ཆེན་པོའི་ཡིག་ཆའི་སྟེང་ནས་དགོངས་པ་ཇི་བཞིན་དུ་ལོངས། རྡོར་རྒྱལ་བ་ལས་དགྱེས་རྡོར་ལྷ་དགུ། ལམ་འབྲས་ལུགས་ལྔ། རྣམ་འགྲེལ་བཅུ་གཅིག་དང་བཅས་ས། གུར་བརྟགས་ལ་གསུམ་ལུང་ཊཱི་ཀ་བཤད་པ་དང་བཅས་
པ། དུས་འཁོར་ཡོངས་རྫོགས། ལམ་རིམ་པ་གཉིས་ཀྱི་ཁྲིད། བླ་མ་དམ་པའི་ཊཱི་ཀའི་སྟེང་ནས་གཟབས་བཤད་རྣམས་དོགས་པའི་མཐའ་བཅད་ནས་ཉན་པས། སློབ་དཔོན་དེས། དགེ་བཤེས་ཤེས་རབ་འོད་ཟེར་འདིས་ཆོས་ཀྱི་གནད་ལ་བཀར་ནས་དྲི་ཤེས་པར་འདུག་ཅེས་འཆད་པ་ལ་བསྙེངས་པ་བྲལ་བ་དག་ཀྱང་བློ་གྲོས་ལ་གྲིམས་ཆ་སྟེར་དགོས་པ་བྱུང་། རིན་པོ་ཆེ་རྡོར་རྒྱལ་བ་དེ་ལས་སྤྱིར་མདོ་སྔགས་ཀྱི་གཞུང་འགྲེལ་ད་ལྟ་འཆད་ཉན་ཡོད་པ་མཐའ་དག། དེ་བཞིན་དུ་གསེར་མདོག་ཅན་པ་དང་། ས་སྐྱ་བཀའ་འབུམ་ཡོངས་རྫོགས་ཉན་ནས། ཟིན་ཐུན་བསྐྱར་བའང་མཛད། ལྷག་པར་གསེར་མདོག་ཅན་པའི་ཡིག་ཆ་ལ་མཆོག་ཏུ་འདྲིས་ཤིང་གྲུབ་མཐའང་འཛིན། སྐྱེས་བུ་དམ་པ་འདི་གཡག་སྡེ་པཎ་ཆེན་གྱི་དེ་མ་ཐག་པའི་སྐྱེ་བ་ཡིན་པས་སྐུ་གཞོན་ནུ་ནས་གསལ་སྣང་ཤིན་ཏུ་ཆེ་ཞིང་ཁྱད་པར་པཎ་ཆེན་དེ་ལ་སློབ་དཔོན་ཆེན་པོས་སེང་གདོང་མའི་གདམས་པ། བུ་ཏིར་ལོངས་པ་ཞིག་སྩལ་བ་རང་ཉམས་སུ་བསྟར། གཞན་བློར་མ་ཆུན་ངོགས་ནས་མྱ་ངན་ལས་འདའ་ཁར་ཨེ་ཝྃ་རྡོ་སྱིྤལ་དུ་རྒྱས་བཏབ་པ་དུས་འདིར་ཕྱག་ཏུ་སོན་མེད། འབྲུག་པ་རིན་པོ་ཆེ་པདྨ་དཀར་པོའང་གསལ་སྣང་ཞིག་ལ་ཐེ་ཚོམ་སྐྱེས་པས། ཕྱིན་ཆད། དེ་ནི་ཨ་ཁུ་མཚན་ཉིད་པའི་ཁྲོད་དུ་ཕྱིན་པས་ལན་པར་འདུག་ཅེས་གསུངས་པ་བཞིན་རྟེན་འབྲེལ་གཞན་དབང་དུ་སོང་། གྲྭས་དེ་དང་། ཐལ་འགྱུར་གྱི་མགྲིན་རྔ་ལྡིར་བའི་རིགས་གྲྭ་གང་དང་གང་དུ་རྩོད་པའི་གཡུལ་ངོ་ལ་ལྷགས་པས་བློ་གྲོས་བསམ་གྱིས་མི་ཁྱབ་པར་སོང་སྟེ། བོད་འགྲེལ་རྣམས་ཀྱང་རྒྱ་ཡན་དུ་བཞག། རྒྱན་དྲུག་མཆོག་གཉིས་ཀྱི་གཞུང་འགྲེལ་ཁོ་ན་ལ་བརྟེན་ནས། བརྒལ་བ་དང་། བརྟག་པ་དང་རིགས་པ་གསུམ་གྱི་ལྷའི་རྔ་ཆེན་པོ་ཀུན་ནས་ཀུན་དུ་ཡོངས་སུ་བརྡུངས་པས། གླིང་སྨད་སློབ་དཔོན་ན་རེ། ཁྱེད་སློབ་གསེར་བ་ལྟ་བུ་ཡིན་ཀྱང་འདི་ལྟ་བུའི་རྣམ་དཔྱོད་པ་མཆེ། ཀུན་མཁྱེན་རོང་པ་ལ་བོ་དོང་བའི་དགེ་བཤེས་ཤིག་གིས། ཅི་མཁྱེན་
ཞུས་པས། ཁོ་བོས་ཕར་ཕྱིན་ཤེས་གསུངས། འོ་ན་འདུལ་བ་ལ་ཨེ་གནང་ཞུས་པས། དེ་ལོས་ཤེས་ཕར་ཕྱིན་གྱི་སྤྱོད་པ་ཡིན་གསུངས། ཡང་དབུ་ཚད་ལ་དྲིས་པས། དེ་བཞིན་དུ་དབུ་མ་ལ་ལྟ་བ། ཚད་མ་ལ་རིགས་ལམ་ཡིན་གསུངས་པ་ལྟར། ཁྱེད་ཀྱི་བུ་ཕར་ལ་བརྟེན་ནས་བསྟན་པའི་སྒྲོམ་འཚོལ་ལུགས། དེ་ལ་རིགས་ལམ་གྱི་གྲུབ་མཐའ་འཆབ་ལུགས་ལ་དཔགས་ན། དགེ་བཤེས་ཟེར་ན་འདི་ལ་ཟེར་ཞེས་ཚོགས་པའི་ཁྲོད་རང་དུ་བསྔགས་པ་བརྗོད་པས་དེ་ཕྱིན་ནས་དགེ་བཤེས་ཤེས་རབ་འོད་ཟེར་ཞེས་གྲགས། རྟོག་གེའི་རིག་པ་ལ་ཚེར་མ་ལྟ་བུའི་བློ་གྲོས་མངའ་ཡང་འདི་ལྟར་སྐྱེས་བུ་མཆོག་ཏུ་གྱུར་བ་རྣམས་ནི་དེ་ཙམ་ལ་བརྟེན་ནས་གྲགས་པ་དང་རྙེད་པ་བསྒྲུབ་པའི་སྟ་གོན་རྩོམ་པ་མ་ཡིན་པས། སྐྱོ་ཤས་དང་ངེས་འབྱུང་དྲག་པོས་རྒྱུད་བརླན་ནས་སྒྲུབ་པ་ནན་ཏན་གྱི་འཁོར་ལོ་ཡིད་ལ་སེམས་ཤིང་། དེའི་ངང་ཚུལ་སློབ་དཔོན་ཞི་བ་ལྷ་དང་ཇོ་བོ་རྗེའི་རྣམ་ཐར་ལ་སྙིང་ཐག་པ་ནས་སྨོན་ཞིང་དད་པའི་སྐབས་ཤིག་ན། འབྲི་གུང་པ་རིན་ཆེན་ཕུན་ཚོགས་ལྷོ་རྒྱུད་ལ་ཐེགས་པའི་ཨེ་ཝྃ་དང་ཧ་ཅང་མི་རིང་བའི་ས་ཐང་སྐྱར་སྒར་ཕབ་པ་གཟིགས་སུ་བྱོན་པས། སྒར་གྲྭ་ཚང་སུམ་བརྒྱ་ཙམ་ལ་སྤྱི་ཆོས་སུ་སྤྱོད་འཇུག་གསུང་བ་དང་ཐུག། ཤེར་ལེའི་དོན་དམ་བློ་ཡི་སྤྱོད་ཡུལ་མིན། །ཞེས་པ་ནས་ཤློ་ཀ་གསུམ་ལ་ཇོ་འགྲེལ་གཙོ་བོར་བཏོན། འགྲེལ་བ་གྲགས་ཆེ་བ་ཁ་ཡར་ན་ཡམས་སུ་བྱས། རིགས་ལམ་གྱི་སྦྱོར་བས་ཀྱང་བརྒྱན། བཀའ་བརྒྱུད་པའི་ཉམས་ལེན་དང་ཡང་བསྟུན་ཀྱིན་བཤད་པ་ཡམས་པ་ཅིག་གསུང་བ་མཐོང་བས། རྗེ་བཙུན་དམ་པ་འདིའི་ཐུགས་རྗེའི་ཆོམ་ཀུན་གྱིས་སྙིང་ལ་བཏབ། ཟང་ཟིང་གི་ཉེ་བར་དཔྱད་པ་སླེ་མོའི་ཁུད་ན་ཤོང་བ་ཙམ་ཞིག་ཡོད་པ་ཁང་ཐོག་ནས་བསྐྱུར། ཆས་པར་བརྩམས་པ་ན། གྲོགས་མཆེད་སྨད་དཔྱད་ཤེས་པ་ཞིག་ཡོད་པས་རེ་ཞིག་བཀག། འདི་དུས་དགུང་ལོ་བཅོ་བརྒྱད་པ་ཡིན། ལར་སྐྱེས་བུ་དམ་པའི་སྙིང་སྟོབས་དང་སྨོན་ལམ་གྱི་མཐུ་ནི་གཞན་དབང་གིས་བརྫི་བར་ནུས་པ་མ་ཡིན་པས་སྲབ་མེད་པའི་སེང་གེ་ནམ་མཁའ་ལ་འཕྱོ་བ་
བཞིན་དུ། གྲྭས་བསྐྱུར། གྲོགས་མཆེད་སྤངས། དཀོར་ལ་བརྐམ་ཆགས་བྱེད་པ་བཏང་ནས། ངེས་དོན་སྟོན་པའི་བླ་མ་དང་། དབེན་པ་འབའ་ཞིག་ཡིད་ལ་བསམས་ནས་རི་དྭགས་རྒྱ་ནང་ནས་ཤོར་བ་བཞིན་དུ་ཟོས། འབན་ཡུལ་དུ་བེབས་པ་དང་འགྲི་གུང་ཡང་རི་བའི་རྟོགས་ལན་ག་ལ་བ་སོགས་དགེ་འདུན་བཞི་བཅུ་ཙམ་བསོད་སྙོམས་ལ་བྱོན་པ་དང་འགྲོགས། དུས་དེ་ཙན་འབྲི་གུང་པ་ལུགས་གཉིས་ཀ་ནས་རྣམ་དཔྱོད་ཆེ་ཞིང་། ཐེལ་གྱི་ཁྲི་ཐོག་ཏུ་བཞུགས་ནས་སྤྱན་སྔ་ཆོས་ཀྱི་གྲགས་པའི་སྤྱན་ལྟོས་སྒྲིག་སྲོལ་ལེགས་པ་དང་། བླ་དཔོན་གྱི་འཁོར་རྒྱ་མཚོའི་དབུས་ན་ལྷ་སྲབ་འབྲི་གུང་པ་རིན་ཆེན་ཕུན་ཚོགས་མཐོང་ན་མི་མཐུན་པ་མེད་པའི་ཞལ་སྐྱིན་ཅན་དེའི་ཕྱག་འབུལ་ལ་ལྟགས་པས། མཚན་ཉིད་པའི་ཧམ་ཐུལ་ཡུལ་བུད། མི་ཕྱེད་པའི་དད་པ་གཏིང་ནས་གཡོས། སྤྱན་ཆབ་ལྷུག་པར་ཤོར། མཚན་ཉིད་པའི་རིགས་ལམ་དགག་སྒྲུབ་ཁོ་ནར་ཨ་འཐས་སྤྲུལ་ཀྱི་ཤུན་པ་བཞིན་དུ་དོར། ཚེ་འདི་ཕྱི་ཀུན་གྱི་བློ་གཏད་ཞུ་སྙམ་པ་བྱུང་གསུང་། རེ་ཞིག་ན་ཐོས་བསམ་གྱིས་སྨེད་ཞིབ་ཏུ་གནང་། ལར་བཀའ་བརྒྱུད་པ་འདི་ལ་འཇིག་རྟེན་གྱི་དཔལ་འབྱོར་ཡོད་ཀྱང་ཆོས་ཀྱི་འཇུག་སྒོ་འགག་དམ་ཞིང་མིག་ལྟོས་ལེགས་པས། སློབ་གསར་བ་རྣམས་ཅོག་གླའི་སྒྲིག་སྲོལ་དམ་པོར་འཇུག་པ་ལ། རྗེའི་ཞལ་ནས་ཆོས་ཁྲིམས་པར། ཨེ་ཝཾ་པའི་དགེ་བཤེས་འདི་ཡོན་ཏན་ཅན་ཞིག་འདུག། སྒྲིག་ལམ་འཇུར་ཕེབས་ཀྱང་། རང་གི་བསག་སྦྱོང་ཡིན་དགོངས་ནས་ཟླ་བ་གསུམ་གྱི་བར་དུ་ནན་ཏན་མཛད། འཁོར་ལོ་སྡོམ་པ་དྲིལ་བུ་ལྷ་ལྔའི་དབང་། ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད། བཀའ་བརྒྱུད་གསེར་ཕྲེང་དགོངས་གཅིག། ལྔ་ལྡན་གྱི་ཁྲིད་རྣམས་གསན། དེ་མ་ཅིག་གི་གཅོད་ཡུལ་ལ་འདྲིས་པར་བྱས་ཚེ་བློས་བཏང་གིས་བྱ་བཏང་ཕྱགས་བྲལ་བ་ཞིག་བྱེད་དགོངས་ནས་སྙན་དུ་གསོལ་བ་ན། ཁྱེད་གང་དུའང་མ་འབྱོན་པར་འདི་གར་བཞུགས། གཅོད་ལའང་ངེད་འདྲིས་ཆེ་བ་ཡིན་གསུངས་
ནས་ཐུགས་ཀྱི་རེ་བ་བསྐངས། དཔོན་སློབ་གཉིས་ལན་མང་པེར་མདོ་སྔགས་དང་། ཁྱད་པར་གསང་སྔགས་གསར་རྙིང་གི་ལུགས་སོ་སོའི་དགོངས་པ་ལ་འགྲེལ་ཚུལ་དོན་ལ་རྟོན་མི་རྟོན་གྱི་འཕེལ་གཏམ་དྲི་སྨེད་མང་པོ་མཛད་པས། གཅིག་ལ་གཅིག་ཐུགས་ཆེས། དགེ་བཤེས་ཀྱི་མིང་མ་ནོར་ཞེས་རྣམ་པ་ཀུན་ཏུ་བསྔགས་ཤིང་། བཀུར་མཐོང་ཆེན་པོས་གཟེངས་བསྟོད་ཀྱང་སྙོམས་ཆུང་ཁོ་ན་ལྷུར་ལེན། དེར་འབྲི་གུང་པའི་དགོངས་པར། འདི་འདྲ་བའི་གང་ཟག་མཁྱེན་པ་རླབས་ཆེ་ཞིང་། བྱ་བ་བཏང་བ། ཕྲལ་ཚུགས་ཁ་བཟང་བ་སོགས་གང་ལ་དཔག་ཀྱང་ངོ་མཚར་ཆེ་སྙམ་དུ་དགོངས་པའི་ཚེ། སློབ་དཔོན་ཆེན་པོའི་ལུང་བསྟན་བྱུང་། ལན་ཅིག་ཁྱེད་མདོ་སྔགས་གང་ས་ལ་བརྡ་བསྟན་པ་ཙམ་གྱིས་ཁོང་དུ་ཆུད་པ་དང་བཅས། ཁོ་བོས་འཁྲུལ་སྣང་ལ་ལོ་ཆེན་བཻ་རོ་ཙ་ནས་བྱིན་གྱིས་བརླབས་པའི་གང་ཟག་གསང་སྔགས་སྔ་འགྱུར་ལ་ཆོས་ཀྱི་བག་ཆགས་ཆེ་བ་ཞིག་ཏུ་སེམས་པས། ཁྱེད་སློབ་དཔོན་པདྨ་ལ་ཨེ་དད་གསུངས། སློབ་དཔོན་པདྨ་ལ་སངས་རྒྱས་དངོས་ཀྱི་འདུ་ཤེས་བྱིས་པའི་དུས་ནས་ཡོད། གང་ཟག་ཕལ་ལ་རྟོག་པ་ཆུང་ཞིང་དེའི་སྟོབས་ཀྱིས་ཆོས་གང་ལའང་འདྲིས་ཆུང་ཞུས་པས། འོ་ན་གསོལ་བ་ཐོབ་མཛོད། སྐུའི་སྣང་བ་དང་ལུང་སྟོན་པ་ཐག་ཆོད་གསུངས། ཡང་རི་སྒར་བའི་ཆོས་ཁྲིམས་མཛད་དུས་བསྟན་པ་ལ་ཕྱག་བཞེས་ཤིན་ཏུ་ཆེ་བས། ལེགས་པར་གསུངས་པའི་དམ་པའི་ཆོས་འདུལ་བའི་བཅའ་ཁྲིམས་ལ་སུས་ཀྱང་འདའ་བར་མི་ནུས། ལན་ཅིག་རྗེ་འབྲི་གུང་པའི་གསུང་གིས། དགེ་བཤེས་ཀྱིས་སང་ཚོགས་ཁྲོད་དུ་དགོངས་གཅིག་ལ་བཤད་པ་བྱེད་དགོས་གསུངས། སྔར་དེ་འདྲ་བའི་བཤད་སྲོལ་མི་འདུག་ཀྱང་། དགོས་པའི་སླད་ཡིན། བླ་མའི་བཀའ་ལྡོག་ཏུ་མི་རུང་སྙམ་ནས་སང་ཚོགས་དབུས་སུ་ཞབས་དྲུང་ཚོགས་དབུལ་བྱོན། ཐེལ་གྱི་མཁན་སློབ་ཆོས་སྒོ་བ་དང་། རྡོར་འཛིན་སློབ་ཆུང་། ཡང་རི་སྒར་པ་དང་བཅས་པའི་ཚོགས་པ་རྒྱ་མཚོའི་དབུས་སུ། ལྔ་ལྡན་ལ་རྩ་བར་བྱས། རྡོ་རྗེའི་གསུང་བརྒྱ་ལྔ་བཅུ་པ་ཆོས་ཚོམས་སུ་བཅད། དགོངས་གཅིག་ལུགས་གསུམ་གྱི་གྲུབ་མཐའི་རྐང་བཟུང་མདོ་སྔགས་ཀྱི་ཆོས་འཁོར་བསྟན་པ་ཡོངས་
རྫོགས་ཀྱི་ཚུལ་དུ་བཤད། སྐབས་དོན་ཚོར། ས་པཎ་གྱིས་བཀག་པ་རྣམས་རང་སྟོབས་ཀྱིས་སྒྲུབ་རྗེས་རྣམ་པར་དག་པ་དང་བཅས་བཤད་པས་ཐམས་ཅད་སྔ་ན་མེད་པའི་ངོ་མཚར་སྐྱེས། །སང་སྐུ་དྲུང་ན་བཅར་བས། དབུ་ལ་ཕྱག་གསི་བྱེལ་ཞིང་། ངས་སྤྱན་སྔ་ཆོས་ཀྱི་གྲགས་པ་དང་། མངའ་རིས་པཎ་ཆེན་གྱི་ལེགས་བཤད་སློབ་མ་ཀུན་ལ་བཤད་པ་ཡིན་ཡང་། ཕལ་ཆེར་བས་དགོངས་གཅིག་འབྲི་གུང་པ་ཁོ་ནའི་ཆོས་སྐད་རང་ཚན་བར་གླེང་བ་སྐད་བྱེད། དེའང་བྱས་ན་དོན་གྱི་སྟོན་པའི་བཀའ་དང་མི་མཐུན་པར་འགྲོ། ཁྱེད་ཀྱི་བཤད་པ་དེས་ལྔ་ལྡན་མདོ་སྔགས་གཉིས་ཀའི་ཉམས་ལེན་གྱི་རྩ་བར་སོང་། དགོངས་གཅིག་དེའི་རྒྱབ་ཆོས་ཡིན་པ་ལ། ས་ལུགས་པའི་ཕྱོགས་སྔ་སྤངས་པའི་དགག་བསྒྲུབ་གནད་ཐོག་ཏུ་འགྲོ་བ་བྱུང་བས་སྙིང་ཚིམས། དེ་བཞིན་རེ་ནས་ཀྱང་བྱས་པ་ཡིན། རེ་བ་ལས་ལྷག་གསུང་། །དེ་ལ་ཡིག་ཆ་ཞིག་ཀྱང་མཛད་སྣང་སྟེ་ཁམས་པའི་གྲྭ་བ་ཞིག་གིས་ཟིན་བྲིས་ཁྱེར་བས་རྒྱུན་ཆད། དེར་བཀའ་བརྒྱད་ལུགས་སྲོལ་ཆེན་པོ་དགུ། བདུད་རྩི་སྨན་སྒྲུབ་ཀྱི་ཕྱག་བཞེས། རྙིང་མ་བཀའ་གཏེར་གྱི་གཤིན་རྗེ་རིགས་ལྔ། དགོངས་པ་ཡང་ཟབ། མཁའ་འགྲོ་སྙིང་ཏིག་བརྒྱུད་པ་གཞན་ལས་ཆེས་འཕགས་པ། བྱང་གཏེར་མཛོད་ལྔ། བང་གླིང་ཆོས་སྐོར་རྣམས་དང་། འབྲི་གུང་ཕྱོགས་ཀྱི་བཀའ་བརྒྱུད་བཀའ་འབུམ། ཀརྨ་བཀའ་བརྒྱུད་ཀྱི་བཀའ་འབུམ་ལ་སོགས་པའི་དབང་ཁྲིད་ལུང་གི་བཤད་སྦྱར་མང་པོ་གསན། ཁྱད་པར་སྔ་འགྱུར་གྱི་གྲུབ་མཐའི་གཞུང་བསྲངས་ཚུལ། ཁོ་བོའི་རྡོ་རྗེའི་སློབ་དཔོན་མངའ་རིས་པཎ་ཆེན་རིན་པོ་ཆེ་དེའི་མཁྱེན་རབ་ལ་མཐའ་མེད། དེའི་བཀའ་ལས་རྙིང་མ་ལུགས་མཐུན་ཞིག་བྱེད་ན་གསང་སྔགས་སྔ་འགྱུར་རང་གི་བསྟན་པའི་བབས་ལ། བཀའ་གཏེར་ཟུང་གཅིག་ཡིན་པས། བཀའ་མ་ནི། མདོ་སྒྱུ་སེམས་གསུམ་ལ་སྔ་འགྱུར་བཀའ་བབས་ཀྱི་ཆུ་བོ་བཞིའི་སྒོ་ནས་བཤད་རྒྱུན་རྣམ་པར་དག་པ་བཞིན་བཤད་པ་ལག་ལེན་དང་བཅས་པ་བཀའ་མ་ལྟར་བྱེད་དགོས། ཆོས་ཀྱི་ཟབ་གནད་རྣམས་བརྒྱུད་པ་དང་ཆོས་ལ་སེལ་མེད་ཅིང་མཁའ་འགྲོའི་ཁ་རླངས་
ཆིལ་ལེ་བདེ་གཏེར་མ་ཡིན་པས་གཏེར་ཆོས་ཚད་ལྡན་ལྟར་བྱེད་དགོས། དེ་ལྟར་བྱས་ན་རྙིང་མ་ལུགས་དང་མཐུན་པ་ཞིག་ཡོད་ཕེབས་བྱུང་བས། ཁྱེད་རང་ཡང་ཉན་འདོད་ན་ཁོ་བོས་དེ་རྣམས་ཐོས་པས་བཤད་ཆོག། བརྗོད་གསོ་ཙམ་དུའང་འགྲོ་གསུངས་ནས། བསྐྱེད་པ་མ་ཧཱ་ཡོ་ག་ཏནྟྲ་སྡེ་བཅོ་བརྒྱད་ཀྱི་རྩ་བ་སྒྱུ་འཕྲུལ་གསང་བ་སྙིང་པོ་ལ་འགྲེལ་བ་ཕྱོགས་བཅུ་མུན་སེལ་གྱི་ལུགས་གཙོ་བོར་བཏོན། ལུང་ཨ་ནུ་ཡོ་ག་མདོ་དགོངས་པ་འདུས་པ་མདོ་འགྲེལ་ཆེན་མོའི་དགོངས་པ་དང་། རྫོགས་པ་ཆེན་པོ་ཨ་ཏི་ཡོ་ག་ཀུན་བྱེད་རྒྱལ་པོ་ལ་སོགས་པའི་མན་ངག་དངོས་སྟོབས་ཀྱི་འགྲེལ་བས་བཀྲལ་ནས་བཤད། དེ་བཞིན་དུ་གེ་སར་སྙིང་གཉིས་ཀའི་རྒྱུད་འབུམ། རྒྱལ་བ་ཀློང་ཆེན་པའི་ངལ་བསོ་སྐོར་གསུམ། མཛོད་བདུན། སྙིང་ཏིག་ཡ་བཞི། ཟབ་མོ་ཡང་ཏིག། རྒྱུད་བཅུ་བདུན། བི་མ་ལའི་ཊཱི་ཀ་དང་བཅས་པ། མན་ངག་བརྒྱ་བཅུ་དགུ་རྣམས་གསན། ཁྱད་པར་དཔེ་ཁང་དུ་ཆེད་ཀྱི་བཞུགས་ནས་སོ་སོའི་ཡིག་ཆ་ལ་བསམ་བྱུང་གི་ཤེས་རབ་རྣམ་པར་དག་པས་དཔྱད་པ་ན། ཆོས་ཀྱི་བྲབ་གནད་རྣམས་རྙིང་མ་ཁོ་ན་ལ་སྣང་ཞིང་། ཁྱད་པར་སྙིང་ཏིག་ལ་ཡོད་པར་ངེས་ཤེས་གཏིང་ནས་འདྲོངས། དཔོན་སློབ་གཉིས་ཀ་བསྟན་པ་ཡོངས་རྫོགས་ཀྱི་བཤེས་གཉེར་ཆེན་པོར་གྱུར་བས་མདོ་ཕྱོགས་དང་གསར་མའི་མཁས་པ་རྣམས་ཀྱི་ཡིག་ཆ་གང་ལེགས་ཀྱི་དཔྱད་པ་ལ་བཞུགས་པ་ན། སངས་རྒྱས་ཀྱི་བསྟན་པའི་སྙིང་པོ་རྡོ་རྗེའི་ཐེག་པ་དང་མཐུན་པའི་ཆོས་འཁོར་ནི་འཁོར་ལོ་གསུམ་པ་ཡིན། དེར་རྒྱུའི་རྒྱུད་བདེ་བར་གཤེགས་པའི་སྙིང་པོར་གྲགས་པ་དེ་གསལ་པོར་བསྟན། དགོངས་པ་དེ་འགྲེལ་བ་ལ། རྗེ་རང་བྱུང་རྡོ་རྗེ། ཀརྨ་པ་ཆོས་གྲགས་རྒྱ་མཚོ། སྤྱན་སྔ་ཆོས་ཀྱི་གྲགས་པ། ཀུན་མཁྱེན་ཀློང་ཆེན་པ་རྣམས་ཤིན་ཏུ་མཁས་ཤིང་མཐུན་པས་དེ་ཁོ་ནའི་གྲུབ་མཐའ་ལ་ཡིད་བརྟན་པར་གྱིས་ཤིག་གསུངས། ཀུན་མཁྱེན་བླ་མ་འདི་ཉིད་པཎ་ཆེན་གསེར་མདོག་ཅན་པའི་གྲུབ་མཐའ་ལ་མཆོག་ཏུ་འདྲིས་ཤིང་ངེས་པའི་ཤེས་པ་བརྟན་པས་སྐབས་འདིར་དཔྱད་བཞུགས་པ་ན། ཀུན་མཁྱེན་དག་གི་དབང་པོ་དང་ཤླཀ་མཆོག་པ་གཉིས་གྲུབ་མཐའི་ངོས་འཛིན་སྙིང་པོ་གཅིག་ཏུ་
མཐུན་པ་ལ་ངེས་པ་གཏིང་ནས་འདྲོངས་པ་ཡིན་ཞེས་གསུངས། དོན་གྱའང་དེ་ལྟར་ཡིན་པའི་འཐད་པ་ནི། ཀུན་མཁྱེན་ཆེན་པོས་རྫོགས་པ་ཆེན་པོའི་ལྟ་བའི་མཐར་ཐུག་དབུ་མ་ཐལ་འགྱུར་བ་དང་མཚུངས་པར་ཞལ་གྱིས་འཆེས་པ་ཡིན། སེམས་ཕྱོགས་ཀྱི་ལྟ་བ་ཁས་ལེན་དང་བྲལ་བ་ལ་སོགས་པའི་ཆོས་བཞི་པོ་འདི་གསེར་མདོག་ཅན་པས་ཇི་བཞིན་བར་ཁས་ལེན་ཏེ། ཇི་སྐད་དུ། དེང་སང་གངས་ཅན་ན་ལུགས་དེ་ཐོས་ན་སྙིང་འགས་ནས་སྲོག་འདོར་བར་བྱེད་པ་དག་མང་ན། དེ་དག་དང་དགག་བསྒྲུབ་ཀྱི་བགྱི་བ་གཟེངས་བསྟོད་ནས་ལྷུར་ལེན་པ་མཛོད་ཅིག། ཁོ་བོ་ཅག་ནི་ཆོས་བཞི་པོ་དེ་ལྟ་འདུ་ཁས་ལེན་པ་ལ་སྔོན་ཉིད་ནས་སྤོབས་པར་གྱུར་ཏེ། །དེ་ཡང་ལྟ་སྒོམ་སྤྱོད་འབྲས་གསུམ་པོ་དེ་ནི་ཀླུ་སྒྲུབ་དང་ཐོགས་མེད་གཉིས་ཀའི་ཤིང་རྟའི་སྲོལ་མཐར་ཐུག་ཏུ་མཐུན། ཞེས་དང་། དེ་བཞིན་དུ་ཚིག་གིས་བརྗོད་པ་ཙམ་དུ་རང་རང་གི་གྲུབ་པའི་མཐའ་ལ་ལྟ་བ་མཆོག་འཛིན་གྱི་མངོན་རློམ་སྒོམ་པ་ཙམ་ལས། དོན་དེ་དག་གང་ཡང་མིན་པའི་འདོད་ཁའི་ལྟ་བ་ཡ་མ་ཟུང་གསར་བྱུང་བ་གཡངས་སུ་སྨྲ་བ་དག་གིས་འདོད་པའི་གཏིང་དཔྱིས་ཕྱིན་པ་དགོངས་ནས་འདི་སྐད་དུ། དེང་སང་གངས་ཅན་གྱི་རློག་པ་བདག་ནི། གསང་མ་ལས་ཀྱང་ཆེས་གསར་མར་གྱུར་བའི་གྲུབ་པའི་མཐའ་དག་གློ་བ་ལ་ཞེན་ཞིང་བྱང་བར་བྱས་ནས། ཚིག་གི་བརྗོད་པ་ལ་ཁོ་བོ་ཅག་ནི་རྫོགས་པ་ཆེན་པོའམ། ཕྱག་རྒྱ་བའམ། བཀའ་གདམས་པའམ། ས་སྐྱ་བ་ཡིན་ནོ་ཞེས་སྨྲ་བདག་མང་བའི་ཕྱིར་རོ། །ཞེས་གསུངས་པས་སོ། །དེ་ནས་སྐྱེས་བུ་དམ་པ་འདི་ཁ་ཆེའི་པཎྜི་ཏ་ཤཱཀྱ་ཤྲཱིས། བོད་བཙུན་རྣམས་ཀྱིས་འདུལ་བ་ནས་བཤད་པའི་རབ་ཏུ་བྱུང་བ་དེ་མི་འོང་བ་འདུག། རྗེ་བཙུན་མི་ལ་དེས་རྟགས་དང་ཆོ་ག་བྱས་ན་རབ་ཏུ་བྱུང་བ་མཚན་ཉིད་པ་ཞིག་འོང་བ་འདུག་གསུངས་པ་དེས་ཐུགས་དྲངས། གྲུབ་པའི་མཚན་མ་ཞིག་མ་རྙེད་བར་ལ། འཇིག་རྟེན་ཆོས་བརྒྱད་ལ་དོར། གང་དབེན་གྱི་གཉན་ཁྲོད་དུ་སྦྱངས་པའི་ཡོན་ཏན་བཅུ་གཉིས་ལ་གནས་བཞིན་པས་མཆོག་གི་དངོས་གྲུབ་བསྒྲུབ་བར་དགོངས། ཆོས་གོས་གསུམ་དང་། ལྷུང་བཟེད། ཞལ་
སྤྱོགས་ཙམ་ལས་ཡོ་བྱད་ཅི་ཡང་མ་བཟུང་། འཚོ་བ་བསོད་སྙོམས་ཀྱང་གཡེང་བའི་རྒྱུར་དགོངས་ནས། སྲན་མ་ཁལ་བཞི་ལ་བཟའ་བ་དང་། དེ་བཙོས་པའི་ཁུ་བ་ལ་བཏུང་བར་བྱས་ནས་གྲོག་རི་རིན་ཆེན་སྡུངས་པའི་མགུལ་སློབ་དཔོན་ཆེན་པོའི་སྒྲུབ་ཕུག་ཏུ་རི་མི་འབབ་པའི་དམ་བཅའ་སྔོན་དུ་འགྲོ་བས་མན་ངག་མཁའ་འགྲོ་སྙིང་ཐིག་གི་བསྐྱེད་རྫོགས། རྩ་རླུང་གི་ལམ་འབྲས་བུ་དང་བཅས་པ་ལག་ཁྲིད་དུ་འདེབས་པའི་གདམས་པ་འབྲི་གུང་བས་བླ་མ་ལྔ་ཙམ་ལ་གསན་པས་མན་ངག་ཡོངས་སུ་རྫོགས་པའི་ཚིག་བརྒྱུད་དམ་པ་འདི་ལ་གདམས་པ་གང་གི་མནོག་ཆོས་སུ་མཛད་ནས་ལོ་གསུམ་འདིའི་རིང་སྟན་ཐོག་གཅིག་ཏུ་བསྒྲུབས་པས། མངོན་རྟགས་བསམ་གྱིས་མི་ཁྱབ་བ་ཤར། ཏིང་ངེ་འཛིན་གྱི་སྒོ་མཐའ་ཡས་པ་བརྙེས། དེ་ནས་དགོན་གནས་ཀྱི་བཀའ་བཀོད་བི་ལྟ་བུ་ཕེབས་ཀྱང་། རྣམ་གཡེང་གི་དབང་དུ་གྱུར་དོགས་ནས་རངས་རང་སར་དགོངས་པ་སེང་ནས་གནས་གང་དབེན་དང་། དབེན་པ་འབའ་ཞིག་ཏུ་ལོ་བརྒྱད་བཞུགས། དེའི་ཚེ་འདི་ལྟ་བུའི་གང་ཟག་ས་མཐོན་པོ་ལ་བཞུགས་པ་དག་ནི་ཆོས་ཀྱི་གཏེར་ལ་ལོངས་སྤྱོད་པ་མདོ་སྡེ་ཟབ་མོའི་དགོངས་པ་ཡིན་པས་དགུང་ལོ་སུམ་ཅུ་པའི་ཚེ། མཁའ་འགྲོ་མ་མོན་མོའི་ཆ་ལུགས་ཅན་ཞིག་གིས། ཁྱོད་ཀྱི་བསླབས་པས་བཅིངས་པའི་བྱ་བཏང་འདི་ཉམས་རེ་དགའ། འདི་འཐུང་དང་ཟེར་ནས་ཆད་བསེ་ཕོར་གང་བྱིན། རྟེན་འབྲེལ་དེ་ལས་མེ་མོ་ལུག་གི་ལོའི་ཆུ་སྟོད་ཟླ་བའི་ཚེས་བཅུའི་ཉིན་འོད་དཀར་པོ་ཞིག་གིས་རྐྱེན་ལས་ཐིག་ལེ་ཆེན་པོའི་དབུས་སུ་སློབ་དཔོན་ཆེན་པོ་པདྨ་རྒྱལ་པོའི་ཆ་ལུགས་སུ་ཞལ་གཟིགས། རྗེས་སུ་གདམས་པའི་གསུང་གི་དབུགས་དབྱུང་བས་གྲོག་རི་རིན་ཆེན་སྤུངས་པ་ནས་པདྨའི་ཞལ་གདམས་གྲོལ་ཏིག་དགོངས་པ་རང་གྲོལ་གྱི་གཏེར་ཤོག་འཛམ་བུའི་ཆུ་བོའི་ཤིང་ཤུན་ཁ་དོག་ལྗང་སྐྱ་མཚོན་གྱིས་མི་ཤིགས་པ་ཁ་ཤས་དང་། སྐུ་གསུང་ཐུགས་རྟེན་གྱིས་མཚོན་པའི་ཟབ་གཏེར་རྒྱ་མཚོ་ལ་མངའ་དབང་བསྒྱུར། ཁྱད་པར་ལྷ་སའི་གཏེར་འབྱིན་པ་ལ་དགོངས་པ་ཞུས་པས། འབྲི་གུང་བའི་སློབ་མ་བླ་མ་གཙང་གནས་དང་བཅས་གྲོགས་སུ་རྫོངས་ད་གནང་། ལྷ་སའི་
སྐུ་གཉེར་གྱིས་རྙིང་མ་བས་གཏེར་བཏོན་ཡོང་ཞེས་ཐོན་བག་བྱས་ཀྱང་ཐུག་དམ་གསོལ་འདེབས་ཚུགས་པའི་མོད་ལ་སྐུ་གཉེར་རྣམས་ར་རོ་ཐ་མའི་གནས་སུ་སོང་། ནོར་བུ་སྟག་ཤ་དྷེ་བ། བསམ་ཡས་ཀྱི་མེའི་གནོད་པ་སྲུང་བའི་དུག་ཤོག་གསུམ། དེ་བཞིན་གཤེགས་པའི་རིང་བསྲེལ། མཚོ་རྒྱལ་གྱི་ཚེམས། ལོ་རྒྱུས་ཤོག་སེར། མྱོང་གྲོལ་ཨ་རྒྱ་ཅན། སྣོད་པདྨ་རཱ་གའི་དཔྱད་པ་རྣམས་དང་། ཁྱད་པར་བདུད་རྩི་འཁྱིལ་བའི་ཁུག་ནས་ཆོས་རྒྱལ་གྱི་སྐུ་འདོན་པར་བརྩམས་པ་ན་གཏེར་བདག་མིང་པོ་ཀླུ་རྗེ་ཆུ་སྲིན་གྱི་མགོ་ཅན་ས་འོག་ནས་མངོན་སུམ་དུ་ཐོན། གཉེན་པོའི་རྡོ་རྗེ་ཡོད་པ་མགོ་ཐོག་ཏུ་བཞག་ནས། སློབ་དཔོན་གྱི་དམ་ཚིག་རྗེས་སུ་དྲན་པར་གྱིས་ཤིག་གསུངས་པས་རང་སར་ཐིམ། དེའི་འཇིག་ས་ཟིལ་གྱིས་གཉིད་དུ་གཡུར་བ་རྣམས་སྐད་ཤོར། བླ་མ་གཙང་གནས་ཀྱིས་དངོས་སུ་མཐོང་། བསྟན་སྐྱོང་མ་ཤིན་ཏུ་འགོ་བས་ལམ་དུ་དྲེའུའི་སྐད་དང་ཐུག་ཆོམ་ཡང་ཡང་བྱུང་། དེར་འབྲི་གུང་རིན་པོ་ཆེ་ཡང་དབུ་སྐྲ་བསིལ་ཏེ་སྤྱན་འདྲེན་ལ་ཕེབས། ན་བཟའ་ཕྱག་བྲིས་མ་འདོད་གསོལ་ཅན་དེ་ཕུལ། ཤོག་སེར་རྣམས་དཔོན་སློབ་ལྷན་ཅིག་པས་ཕབ་པ་སོགས། འདི་ལྟ་བུའི་གཏེར་གྱི་རྣམ་གྲངས་དང་། ངེས་ཤེས་འདྲོངས་པ་གཞན་དུ་མ་གྱུར་བ་ལྟ་བུ་ཡིན་ཏེ་གཏེར་བྱུང་ལོ་རྒྱུས་ཀྱིས་ཤེས་སོ། །དེ་ནས་ཟིང་པ་སྟག་མགོར་གཏེར་སྒྲུབ་ལ་བཞུགས་པའི་ཚེ། ནུབ་ཅིག་སྣང་བ་ཐམས་ཅད་སྐྱ་ཏལ་ལེ་བའི་དང་། བུད་མེད་ཅིག་ན་རེ། དོ་ནུབ་སློབ་དཔོན་ཆེན་པོ་ཚེས་བཅུ་གནང་གི་ཡོད། ཁྱེད་རང་ཆང་འདི་འཐུང་། ཤ་འདི་རིལ་ཕྱི་རི་དུར་ཁྲོད་ན་བྲམ་ཟེ་སྐྱེ་བ་བདུན་པའི་ཤ་འདུག་པས། ཚོགས་ཤར་བླངས་པ་ཡིན་གསོལ་དང་ནུས་པ་ཚད་མེད། ནམ་མཁའ་ལ་འཕུར་ཡང་ཐུབ་ཟེར། ཆང་དེ་འཐུངས། ཤ་དེ་དམར་ཙར་རེ་འདུག་པས་ཡིད་འཕྲིགས་སེབ་ཞིག་གི་ངང་ནས་ཟོས་པས། དེ་ན་རེ། ཁྱེད་རྣལ་
འབྱོར་བ་འདྲ་བོར་ནི། ད་སྟེ་སློབ་དཔོན་མཇལ་དུ་འདོད་ཟེར་བའི་མོད་ལ་ཤའི་ནུས་པས་ནམ་མཁའི་ལམ་ལ་གྱ་གྱུར་ཁྲིད་ནས་ཟངས་མདོག་དཔལ་རིའི་བཀོད་པ་སྲིན་པོའི་ཡུལ་གླིང་དང་བཅས་པ་ངོ་མཚར་ཅན་གཟིགས། སློབ་དཔོན་ཡབ་ཡུམ་གུ་རུ་བདེ་བ་ཆེན་པོའི་རྣམ་པས་དབང་བསྐུར། རྗེས་སུ་གདམས། ཞལ་གདམས་དང་བསླབ་བྱ་མཛད། ཟླ་བ་གཅིག་གི་ཡུན་དུ་བཞུགས་པའི་སྣང་བ་བྱུང་། ད་སྟེ་སྔོན་གྱི་སྨོན་ལམ་གྱིས་དབང་ལས་བོད་ཡུལ་གྱི་གདུལ་བྱ་རྣམས་དྲན་བར་གྱིས་ཞེས་མཁའ་འགྲོ་མ་རྣམས་ཀྱིས་བསྐུལ་བས། རྨི་ལམ་སད་པ་བཞིན་སོང་། སྔར་ཐོས་བསམ་གྱི་དཔྱད་གཞི་བྱས་པའི་གོ་མྱོང་རྟོགས་པའི་ཐོག་ཏུ་འབྱོར་བས་བསྟོད་པ་སྙན་པའི་སྒྲ་དབྱངས་ལྷའི་རོལ་མོར་གྲགས་པ་འདི་མཛད། དེ་ནས་བྱ་བ་ལས་ཀྱི་འཁོར་ལོ་ལ་ཞུགས་ཏེ། རྗེ་འདི་བ། །སྙིང་པོའི་སྒྲུབ་པ་འབའ་ཞིག་ཐུགས་ལ་གཏད་ནའང་། ཀུན་མཁྱེན་ཆེན་པོའི་རིང་ལུགས་པ་ཟིང་བ་སྙག་མགོའི་བླ་མར་དམ་ཚིག་ལ་བཀར་ནས་བསྐོ་བཞག་གནང་བས། དེར་ཆོས་ཀྱི་ཆར་ཕབ། རེ་ཞིག་ན་སྒར་མངས་བསམ་ཡས་སུ་ཕྱགས་ཕེབས་པ་ལས་ཕྲེང་པོར་དགོངས་འདུས་ཀྱི་ཆོས་བདག་ཉི་མ་རྒྱལ་མཚན་ལས་དཔོན་སློབ་གཉིས་ཀས་དགོངས་འདུས་དང་། གཏེར་ཕྲན་པོ་ད་བཅུ་གཉིས་ཙམ་གསན། ཕྲེང་པོ་བས་ནན་གྱིས་ཞུས་པའི་ངོར་བསམ་ཡས་དང་ཕྲེང་པོ་གཉིས་ཀར་རྒྱལ་ཚབ་ཏུ་མངའ་གསོལ། བར་སྐབས་ནས་ཁྲ་འབྲུག་གི་ཇོ་མོ་སྒྲོལ་མ་ལ་བུད་མེད་ཀྱི་རྒྱན་གསོལ་བས་རབ་གནས་ཉམས། སླར་བསྐྱར་བར་པྲཛྙཱའི་ཞབས་ཆེད་དུ་སྩལ་ཡང་སྡེ་སྲིད་ཀྱིས་བཀག། དེས་རྟེན་འབྲེལ་ལོག་སྟེ་དཔོན་བློན་ནང་གཤེགས་པའི་ཆིངས་ལ་འབྲི་གུང་བས་གཤེགས་དུས་འཕྱོང་རྒྱས་ཞབས་དྲུང་ཧོར་བསོད་པའང་དད་པ་ཤིན་ཏུ་ཐོབ། རྗེ་འབྲི་གུང་བས་དམ་པ་འདིའི་བསྔགས་པ་བརྗོད་དེ་མཆོད་ཡོན་གྱི་ལུང་བསྟན། དཔག་པར་དཀའ་བའི་ཡོན་ཏན་གྱིས་བློ་ཕྲོགས་ནས་དཀར་པོ་བ་བསྟན་འཛིན་ནོར་བུའང་སློབ་མར་གྱུར། དེ་ཉིད་
རིང་པོར་མ་ལོན་པ་གཤེགས་སྐབས། བསམ་ཡས་གཙུག་ལག་ཁང་སྡེ་དང་བཅས་པ་རྗེ་བཙུན་འདི་ལ་གཉེར་དུ་གཏད་པས། ལོ་གསུམ་གྱི་བར་གཙུག་ལག་ཁང་གི་ཞབས་ཏོག། བར་སྐོར་ཞིག་གསོས། འབྲས་པའི་གྲུ་ཤན་གསོ་བ་དང་། དཀར་མེའི་འདུ་འགོད་ལ་སོགས་པའང་བདག་གིར་བཞེས། ཆོས་རྗེ་མངའ་བདག་པ་སྐུ་མཆེད་སོགས་འདུས་འཕྱེད་ཉིས་བརྒྱ་ཙམ་ལ་ལྷན་ཅིག་སྐྱེས་སྦྱོར་གྱི་ཁྲིད་དང་། རྒྱབ་ཆོས་སུ་མདོ་མཛངས་བླུན། དགོངས་པ་དེས་འགྲལ་སོགས་སྟལ། མཆོག་ལྡན་མགོན་པོའི་སྲས་རྒྱལ་སྲས་བསྟ་པའི་འབྱུང་གནས། མེ་ལོང་རྡོ་རྗེའི་གདུང་བརྒྱུད། མདོ་སྔགས་གླིང་པ། ཁྱད་པར་དུ་གསང་ཕུའི་ཆོས་རྗེ་སྟོན་ཚག་བ་ཞེས་དུས་དེ་ཙན་དགེ་བའི་བཤེས་གཉེན་རིག་པ་ཆེ་བར་གྲགས་པ་དེ་རྣམས་ལ་གྲོལ་ཐིག་གི་ཆོས་འཁོར་བསྐོར་བས། དམ་པ་འདིས་སྔོན་འགྲོའི་སྐབས་སུ་མདོའི་བཤད་པ། དངོས་གཞིའི་སྐབས་སུ་རྒྱུད་སྡེའི་བཤད་པ། ཁྱད་པར་གཏེར་ཆོས་འདི་གའི་རང་སྐད་རྒྱུད་སྡེ་ཆེན་པོའི་གྲུབ་པའི་མཐའ་ལ་གནས་པ་དེའི་གོ་དོན་བསླངས་ནས་བཤད་པས། སྟོན་ཆེག་པ་ཆེན་པོ་ན་རེ། ད་ལྟ་མདོ་སྔགས་ལ་ཁོ་བོ་ལས་སྦྱངས་སྟོབས་ཆེ་བ་མེད་སྙམ་པ་ཡིན་ཏེ། སྐྱེ་བ་བརྒྱད་ནས་སྦྱངས་པ་དང་མི་འདྲ་བ་འདུག། རྗེ་བཙུན་དམ་པ་པྲཛྙཱ་རསྨེ་ཁམ་རང་ཆེ་གསུངས། དེ་ཕྱིན་ནས་ཏིང་ངེ་འཛིན་ཁོ་ན་ལ་དྲེལ། དེའི་སྙན་པས་ས་སྐྱ་བདག་པོ་ཆེན་པོས་ཀྱང་འཆི་མེད་སྐུ་གསུམ་འདུས་པའི་སྐོར་གསན་ཞིང་ཐུགས་ཡིད་འདྲེས། དེ་བཞིན་དུ་བྱ་རྒོད་གཤོངས་སུ་སྡེ་འཁྲུགས་ཆེན་པོ་སུས་ཀྱང་མི་འདུམས་པ་བྱུང་བའང་བླང་དོར་སྟོན་པའི་ལུང་བསྟན་གྱིས་ཞི་བས། པཎ་ཆེན་འབུམ་ཕྲག་གསུམ་པའི་སྤྲུལ་པའི་སྐུར་ཡིད་ཆེས། རྩེ་གདོང་པ་སྐུ་མཆེད་རྣམས་ཀྱིས་ཀྱང་དབང་ཆོས་མང་དུ་གསན། དེ་ནས་རྗེ་འབྲི་གུང་པ་ཟས་ངན་གྱི་སྦྱོར་བས་བསྙུན་པ་ན། དམ་པ་འདི་ལ་ཐུགས་ཤིན་ཏུ་བརྩེ་བས་ཞལ་གདམས་མང་དུ་གནང་དེ་སྐུ་
ལ་སྙི་ཐབས་ཀྱི་ངང་ནས་ཞིང་ཁམས་འཕོས། ཕྱིས་འབྲི་གུང་ཕྱོགས་ཀྱི་གདུང་བརྒྱུད་རིན་པོ་ཆེས་གཙོས་བུ་ཆེན་ཐམས་ཅད་འདིར་འདུས། དགོངས་པ་ཡང་ཟབ་མིང་ཙམ་དུ་འགྲོ་ཉེའི་སྲོག་འཐུད། ཐུབ་བསྟན་རྡོ་རྗེ་བྲག་ཏུ་ལོ་གསུམ་གྱི་བཅད་རྒྱར་བཞུགས་དུས། སློབ་དཔོན་ཆེན་པོ་པདྨ་རྒྱལ་པོའི་ཆ་ལུགས་སེང་གེ་ལ་བཅིབས་པ་ཞིག་ཞལ་གཟིགས། དེར་སང་འདི་ན་ལྟ་བ་མ་འཁྲུལ་བའི་ཁྱད་པར་འབྱེད་ཤེས་པ་ཁྱེད་ལས་མེད་པས་དེའི་གནས་གསལ་བར་སྟོན་ཅིག་གསུངས་པས་བདེན་གཉིས་གསལ་སྒྲོན་ཞེས་ཚིག་ཉུང་ལ་དོན་ཆེ་བ་དེ་མཛད། འབྲི་གུང་བའི་དགོངས་རྫོགས་སུ་མདོ་སྔགས་ཀྱི་སྨོན་ལམ་ཞེས་བསྟན་པ་ཐམས་ཅད་མ་འདྲེས་ཡོངས་སུ་རྫོགས་པའི་གསུང་རབ་ཚིག་དོན་བཟང་པོ་དེའང་མཛད། སླར་ཞབས་དྲུང་ཧོར་བསོད་ནམས་དར་རྒྱས་ཀྱིས་འཕྱོང་རྒྱས་སུ་སྤྱན་དྲངས། ཕ་དང་བུ་འཕྲད་པ་ལྟ་བུའི་དགྱེས་པ་ཆེན་པོས་ཏི་ཤིར་བཀུར། གྲོལ་ཏིག་ལ་སོགས་ཏེ་ཟབ་མོའི་གདམས་པས་རྗེས་སུ་བཟུང་། མི་འགྱུར་ཀུན་དགའ་དཔལ་བཟང་དང་། སྤྲུལ་སྐུ་ཟླ་བ། ཞིག་པོ་གར་གྱི་དབང་ཕྱུག་སོགས་དང་ཡང་ཐུགས་ཡིད་གཅིག་ཏུ་འདྲེས་ཤིང་ཆོས་ཀྱི་སྐྱེས་རྒྱ་ཆེན་པོས་ཕན་ཚུན་ངོམས་རེས་མཛད། བྱང་བདག་པོ་བཀྲ་ཤིས་སྟོབས་རྒྱལ་དང་ཡང་མཇལ་བས་ཐུགས་ཤིན་ཏུ་ཆེས། རེ་ཞིག་ན་ཕྲེང་པོར་སྐུ་བསྙུན་པ་ཞིག་བྱུང་བས་རྐྱེན་བྱས། ཤཱནྟ་པུ་རིའི་ཞིང་ཁམས་ཕྱི་མཆོད་རྟེན་ལ་ནང་གཞལ་མེད་ཁང་། མཁའ་འགྲོའི་གྲོང་ཁྱེར་འབུམ་ཚོ་གསུམ་གྱིས་བསྐོར། གཞལ་ཡས་ཁང་གི་ཁྲི་འཕང་མཐོན་པོ་ལ་དཔའ་བོ་ཆེན་པོ་ཐོད་པའི་དུམ་བུ་རྩལ་ན་ཚོད་བཅོ་ལྔ་པ། སྐུ་མདོག་སྔོ་སངས་ཤངས་ཞུང་དཀར་པོ། དར་དང་རིན་པོ་ཆེས་བརྒྱན་པ། དཔའ་བོ་དང་། མཁའ་འགྲོ་དང་། རབ་བྱུང་དང་། བྱང་ཆུབ་སེམས་དཔའི་ཚོགས་དཔག་ཏུ་མེད་པའི་འཁོར་ལ་ཐེག་པ་སྣ་ཚོགས་
ཀྱི་ཆོས་འཁོར་བསྐོར་བ་ཞིག་གཟིགས་ཤིང་། མ་འོངས་པ་ན་དམ་པ་ཉིད་དེའི་ཐུགས་ཀར་སྤྲུལ་པ་བསྡུ་བ་ལུང་བསྟན་ཐོབ། དེས་སྐྱེ་བའི་མཐའ་ཡང་ཆོད། སྐྱེ་བ་སྔ་ཕྱིའི་གདུལ་བྱའི་གོ་འཐུད་ཆོག་པ་བྱུང་གསུངས། ཀརྨ་པ་དབང་ཕྱུག་རྡོ་རྗེ་ཕྲེར། །བོང་ཕེབས་པ་དང་མཇལ། དག་སྣང་མཐའ་ཡས་པ་གཟིགས། འབེལ་གཏམ་མཛད་པས་ཐུགས་ལྷག་པར་ཆེས། དགེ་བཤེས་རིན་པོ་ཆེ་དེ་མཁྱེན་རབ་བསམ་གྱིས་མི་ཁྱབ་ཟེར་བ་དེ་བདེན་པར་འདུག་ཅེས་འཕྲོས་དོན་ལའང་བསྔགས་པ་མཛད། སྤྲུལ་པའི་སྐུ་དཀོན་མཆོག་ཡན་ལག་དང་མཇལ་དུས། དྲུང་རམས་རྗ་མོན་པས་གསར་རྙིང་གི་རྒྱུད་ལ་དོགས་སློང་མང་པོ་མཛད་པ་ལ། ལན་གབ་ལ་དཔྱིངས་ཆེ་བ་འབའ་ཞིག་གིས་རྒྱས་བཏབ་པས། ཇ་གྲལ་གྲོལ་ནས་ཞབས་དྲུང་སྤྲུལ་པའི་སྐུའི་གསུང་ནས་དྲུང་རམས་པར། གང་ཟག་ཁྱད་པར་ཅན་དེ་ལ་སོ་སོ་སྐྱེ་བོས་རྒོལ་བ་བྱས་ན་ལྡོན་མི་ནུས་བདེ་འདྲ་འོང་ཞེས་གསུང་སྐད། འབྲུག་པ་རིན་པོ་ཆེ་ཆོས་ཀྱི་སྤྱན་ལྡན་པདྨ་དཀར་པོ་དང་སྔ་ཕྱིར་མཇལ། ས་པཎ་གྱི་དགོངས་གཏད་དབུ་མ་རང་རྒྱུད་པར་འདུག་པ་དང་། དགེ་ལྡན་པའི་སྒྱུ་ལུས་ཕྱི་ལྡང་ནང་ལྡང་སོགས་ཀྱི་འབེལ་གཏམ་ཞིབ་རྒྱས་སུ་གནང་། ཐུགས་ཡིད་གཅིག་ཏུ་འདྲེས། ལན་ཅིག་སྤྲུལ་པའི་སྐུ་ཁྱེད་ལྟ་བུ་རྟོག་གེའི་ཆོས་ལ་དགྱེས་པ་མི་འགབ། ད་སྟེ་སྙིང་པོའི་ཆོས་ཀྱི་འཕེལ་རྒྱས་ཁོ་ན་ལ་དགོངས་པ་གཏོད་དགོས་ཚུལ་ཞུས་པས་ཐུགས་ལ་ཤིན་ཏུ་ཞུགས། གྲོལ་ཐིག་གི་ཆོས་ཀྱི་བདག་པོར་གྱུར་ཅིང་ཆོས་སྐོར་ཕལ་ཆེར་གསན་པ་ཡིན། འབྲུག་པ་རིན་པོ་ཆེ་ཉིད་ཀྱི་རྣམ་ཐར་དུའང་། ཕྲེང་བོ་ནས་གཏེར་སྟོན་དགེ་བཤེས་རིན་པོ་ཆེ་དང་མཇལ། ཐུགས་ཀ་ཤིན་ཏུ་ཉེ་བར་བྱུང་ཞེས་སྣང་། ཕྱི་རེས་ཤིག་གང་གི་སློབ་མ་རིན་པོ་ཆེ་ལྷ་རྩེ་བ་ལ་ལྔ་ལྡན་གྱི་ཁྲིད་སྩལ། ཚེ་རིང་ཕོ་བྲང་དང་སྡིག་སྟེངས་རྣམས་སུ། འཕྱོང་རྒྱས་ཞབས་དྲུང་། བདེ་ཆེན་གླིང་པ། སྤྲུལ་སྐུ་མདོ་སྔགས། རྒྱལ་སྲས་རིན་པོ་ཆེ་རྣམས་ལ་གྲོལ་ཐིག་དང་། མཁའ་འགྲོ་སྙིང་ཏིག
དགོངས་པ་ཡང་ཟབ་རྣམས་ཀྱི་བཤད་སྒྲུབ་མཛད། གྲོལ་དབང་ལ་མི་སྟོང་ཕྲག་བདུན་བདུན་ཚོགས་པ་ཤ་སྟག་དང་། མེ་ཏོག་གི་ཆར་འཇའ་འོད་ལ་སོགས་པའང་བྱུང་། མདོ་མཁར་དུ་སྡེ་བ་སྐྱ་རྒྱལ་བས་འདེད་ཀྱི་གྲལ་དབུར་གདན་དྲངས། རཏྣའི་གདུང་བརྒྱུད་ཆོས་རྗེ་ནོར་བུ། །བཞལ་ངོ། ལས་འཕྲོ་གླིང་ང་པའི་སྐུ་སྐྱེ། ལྷོ་མོན་གྱི་མི་ཁྲི་ཚོ་གསུམ་ཙམ་ལ་ཆོས་དང་དམ་རྫས་ཀྱི་འབྲེལ་བ་དང་སངས་རྒྱས་ཀྱི་མཚན་སྒྲོག་པ་སོགས་ཀྱིས་འགྲོ་དོན་མཛད། གནས་དེར་དགོན་པ་འདེབས་པར་ཞུས་པ་ཞང་གྱིས་མ་བཞེས། འབྱོང་རྒྱལ་སུ་དབུས་དྭགས་ཀྱི་དམག་ཆེན་པོ་ཆེས་རྒོལ་བར་ལྷགས་པ། གཤིན་རྗེ་ནག་པོ་སུ་མ་སྒྲིལ་གྱི་དམག་བཟློག་དང་བསམ་ཡས་དཔོན་བློན་བྲན་དུ་བཀོལ་ནས་བཟློག་པར་མཛད། སྡེབ་ཡར་རྒྱབ་ནས་སྐུ་འབྲིང་བ་ཉིད་ལོ་ཆེན་བཻ་རོའི་དུས་ཀྱི་ཚེ་རིང་རྒྱལ་མོའི་སྐྱེ་བ་ཡིན་པས་མཆོད་ཡོན་དུ་འབྲེལ་ཞིང་། དབང་ཁྲིད་གདམས་པས་རྗེས་སུ་བཟུང་། མི་ཆེན་གྱི་སྦྱིན་བདག་ཅིག་ལ་ཐུགས་ནང་གཙང་། སྤང་ཆུང་དགོན་གསར་མ་ལག་དང་བཅས་པའང་ཕུལ། འདི་དུས་སྒོམ་གྲུབ་ཀྱིས་ཕྱོགས་ཕུལ་ནས་དར་རྒྱས་ཆོས་སྡིངས་པ་ལ་བཀའ་བཀྱོན་ཕོག། དགོན་གནས་དམ་པ་འདི་ལ་ཐ་ཚིག་ཏུ་བཀར་ནས་བུ་ལ་ནའང་གཞན་ལ་གནོད་པ་རྨི་ལམ་ཙམ་དུའང་ཐུགས་ལ་མི་དགོངས་ཤིང་། རང་དབང་དཔལ་གྱིས་ཆོག་ཤེས་ལ་མཉེས་པས། སྤྲུལ་སྐུ་གསུང་སྤྲུལ་རང་ལ་འཇགས་པ་དགོས་ཞེས་ནན་ཞུ་མཛད་པས་དེ་དག་ཀྱང་དྲིན་དུ་གཟོ་ཞིང་དད་པས་ཡར་བྱོན་ལྷ་ཁང་དུ་འབུལ་བ་དང་བཅས་མཇལ་དུ་བྱོན། བཀའ་དྲིན་ཟླ་མེད་པར་བརྩི། སྣེའུ་གདོང་གོང་མ། མཁར་ཐོག། གྲུབ་རྒྱལ་གླིང་། ཁྲོ་བོ་མཁར། བཀྲ་ཤིས་རྩེ། དཔལ་གྲོང་སོགས་སུའང་གདན་དྲོངས་ཤིང་བསྙེན་བཀུར། ཆོས་རྗེ་སྣང་གསལ་སྒང་པ་དང་། མདོ་ཁམས། གོ་འཇོ། ཀཐོག། ཉག་ར། ཅོང་ཞི། རྒྱལ་མོ་རོང་སོགས་ནས་བྱོན་པའི་བླ་མ་རྣམས་སོ་སོར་
། སྨོན་གྲོལ་གྱི་གདམས་པས་ཚེམས་པར་མཛད། ལར་སྐྱེས་བུ་ཆེན་པོ་འདི་དབེན་པ་འབའ་ཞིག་པ་མཉེས་པས་གང་དུ་ཡུན་རིང་བ་ཙམ་གཏན་ཆགས་པ་དེ་དང་དེར་ཡང་སྐུ་མཚམས་གཙོ་བོར་འདོན། རྣམ་པ་ཀུན་ཏུ་སྔ་དགོངས་ཀྱི་ཐུགས་དམ་ལ་ཆེ་གཉན་དང་ཐུགས་བྲེལ་ཅི་ལྟ་བུས་ཀྱང་གཡེང་མི་ནུས། ཉིན་གུང་གི་ཆ་ལའང་བསྟན་འགྲོར་སྨན་པའི་བྱ་བ་ལས་ཀྱི་འཁོར་ལོ་དེ་དང་དེ་སྟབས་གཅིག་ཏུ་མཛད་པ་ཐུགས་དམ་ཁོ་ནའི་ངང་དུ་བཞུགས་པ་ལས་གདུལ་བྱའི་སྣང་བ་དག་པ་རྒྱུ་མཚན་དུ་མཛད་པའི་བག་ཡངས་སུ་ལར་མི་བཞུགས། སློབ་མའི་བྱ་བ་ལ་ཐུགས་བསྐྱེད་ཤིན་ཏུ་ཆེ་བས་འོ་བརྒྱལ་ཇི་ལྟ་བུ་བྱུང་ཡང་དེ་དང་དེའི་རེ་བ་འཕྲལ་འཕྲལ་དུ་བསྐང་བ་ལས། ཞུ་སྣམ་འཕྲོད་པ་དང་ཆོས་སྒུགས་ཀྱི་ངང་ལ་གྲྭ་ཚོགས་གསོག་པ་རྒྱལ་སའི་རྣམ་ཐར་མི་སྐྱོང་། ཆེ་གཉན་སུ་འདྲའི་ཐད་དུའང་རྟེན་འབྲེལ་སྒྲིག་ཕྱོགས་དང་ལུང་བསྟན་སོགས་ལ་བསྙད་པའི་ངོ་དགའ་དང་ཕྱེ་འཐོར་མཛད་པ་མི་སྲིད། མཁས་པ་དང་གྲུབ་པའི་ངོ་ནས་དཔྱོད་ལྡན་ཐམས་ཅད་ཀྱིས་རྗེས་སུ་ཡི་རང་བར་མངོན་པར་བསྟོད་ཅིང་། བླ་དཔོན་ཆེ་གཉན་མང་པོའི་ཏི་ཤིར་གྱུར་ཀྱང་ཁེངས་པ་དང་དྲེགས་པའི་གཟི་བྱིན་རྔོམ་པར་མི་མཛད། འཕྲལ་སྐུ་ལ་བཅར་ཏེ་ཡུན་རིང་དུ་བསྡད་ཀྱང་ཐུགས་ཀྱི་གཏིང་མི་ལོན་ཞིང་གནང་སྤྱོད་ལོག་པའི་ཐེ་ཚོམ་ཙམ་ཡང་མི་མངའ། རྣམ་ཐར་གསོལ་བ་འདེབས་ལས། གྲོལ་བྱེད་རླུང་སེམས་རྩ་དང་ཐིག་ལེའི་གནད། །ཞུགས་གནས་ཐིམ་གསུམ་དབུ་མའི་ལམ་དག་པས། །རོ་རྐྱང་མདུད་གྲོལ་ས་བཅུ་རིམ་གྱིས་བགྲོད། །ཐ་མས་གཙུག་ཏོར་མཆོག་གྲུབ་གསོལ་བ་འདེབས། །ཞེས་རྡོ་རྗེའི་གནས་ཆེན་པོའི་ཉེ་རྒྱུའི་ལམ་གནད་དུ་སོང་བས་སྐུན་མཐོན་པོར་སོང་ནས་ཀྱང་། སྐུ་ལ་གཉེར་བ་གདང་སྐྲ་དཀར་མེད་ཅིང་གཞོན་ཤ་ཆགས། ནང་གི་རྩ་མདུད་གྲོལ་བས་ཆོས་ཀྱི་ཚིག་དོན་ཟབ་ཅིང་གཏིང་དཔག་དཀའ་བའི་གནས་འགྲེལ་བ་ལ་བསྙེངས་པ་མེད། གཞན་རྒྱུད་ཀྱི་བསམ་པ་མཁྱེན་པས་མ་འོངས་པ་མངོན་སུམ་དུ་ལུང་སྟོན་པ་དང་།
འགའ་དང་འགས་ཉམས་སད་པའི་སླད་དུ་བརྟགས་པ་ཞུས་པའང་མངོན་སུམ་དུ་གཏན་ལ་ཕེབས་པ་དང་། ཚོགས་པ་འཛོམ་ཆེ་སར། ཁྱེད་རང་རྣམས་ཀྱི་སྐུ་ཚེའི་སྨད་ལ་གློ་བུར་གྱི་རྒྱལ་པོ་སྟོབས་ཅན་ཞིག་གིས་དབུས་གཙང་ཐམས་ཅད་ལ་དབང་བསྒྱུར་བ་འོང་། དེ་ནས་རིམ་པས་སེམས་ཅན་གྱི་བདེ་སྐྱིད་དམན་པ་ཡིན། ཞེས་སྡེ་སྲིད་གཙང་བའི་ལས་དོན་རྒྱུག་པ་དང་། དེ་བཞིན་དུ་སྡེབ་འཕྱོང་རྒྱས་པ་ཉིད་ཀྱི་སྲིད་ལ་ཐལ་བ་འབྱུག་པ་དང་། སོག་པོ་གུ་ཤྲིའི་དམག་གིས་དབུས་གཙང་ཁམས་གསུམ་བཅུ་པ་ལ་སོགས་མི་རབས་མང་པོའི་རྗེས་ཀྱི་གཏེར་ལུང་ཐིག་ཁེགས་པ་ལྔ་པ་ཆེན་པོས་ཀྱང་རྣམ་ཐར་ལ་འདྲེན་པར་མཛད། དེ་བཞིན་དུ་དྲག་པོ་མངོན་སྤྱོད་ཀྱི་ལས་གདེང་དུ་གྱུར་བས་འཕྱོང་རྒྱས་པའི་གདུང་ལ་དམ་སྲི་རྒྱལ་བུར་བརྫུས་པ་གདོང་ཕྱེད་ལ་ཤ་ལྤགས་བྲལ་བ་ཞིག་བྱུང་བ་རང་གཏེར་གཤིན་རྗེའི་སྒྲུབ་པ་མཛད་པས་བདུན་ཕྲག་གཉིས་ལ་རྣམ་ཤེས་དེངས་སུ་བཅུག་པ་སོགས་བརྗོད་ཀྱིས་ག་ན་ལྡང་། ལར་འཕྱོར་རྒྱས་ཞབས་དྲུང་ཧོར་བསོད་པ་དེ་ལྷ་སྲས་དཔལ་གྱི་འབྱུང་གནས་ཀྱི་སྐྱེ་བར་ལུང་གིས་ཟིན་ཅིང་དད་སྟོབས་བསམ་གྱིས་མི་ཁྱབ་པས་གསང་སྔགས་རྙིང་མའི་དགེ་འདུན་གྱི་སྡེ་ཞིག་འཛུགས་པར་ནན་གྱིས་བསྐུལ་ཡང་། ལྔ་བརྒྱའི་ཐ་མར་གྱུར་པས་གྲྭ་ས་གྲྭ་ཚང་གི་གནས་དག་ཀྱང་སྦྱོར་བ་ལྷོད་པོར་གྱུར་བའི་ཉེས་དམིགས་གཟིགས་ནས་ཞལ་གྱིས་མ་བཞེས་པའི་ཐོག་ཏུ་གཤེགས། དེའི་སྲས་ཧོར་བསོད་ནམས་སྟོབས་རྒྱས་ཀྱིས་ཡབ་ཀྱི་དགོངས་པ་རྫོགས་སླད་དང་། རང་གི་བཞེད་པ་སྟབས་གཅིག་པས་ནན་ལྟར་གསོལ་བ་བཏབ་པ་ལ་བརྟེན་ནས་འབྱོང་རྒྱས་དཔལ་རི་ཐེག་པ་ཆེན་པོའི་གླིང་འདི་གསར་དུ་བཏབ། སྤྱི་རྫས་དང་མཆོད་གཞིས་གཙུག་ལག་ཁང་གི་འདུ་འགོད་ཐམས་ཅད་ཞབས་དྲུང་འཕྱོང་རྒྱས་པ་རང་གི་བླ་ནས་སྦྱར། སྡིག་སྟེངས་རིན་པོ་ཆེ་ངག་དབང་འོད་ཟེར་མཁན་པོར་བསྐོས་ནས་དམ་པའི་ཆོས་འདུལ་བ་ལ་ལེགས་པར་གནས་པའི་དཔྱ་ཁྲིམས་དང་། གཞི་གསུམ་གྱི་ཆོ་གའི་ཕྱག་ལེན་ལ་གནས་པས་ཕྱི་རུ་འདུལ་བའི་ཀུན་ཏུ་སྤྱོད་པ་
ཉམས་སུ་བསྟར་ཞིང་། ནང་དུ་གསང་སྔགས་རྡོ་རྗེ་ཐེག་པའི་སྨིན་གྲོལ་རབ་འབྱམས་ལས། གྲུབ་མཐའི་གཞུང་རྒྱལ་བ་ཀློང་ཆེན་པའི་ཤིང་རྟ་ཆེན་མོ་རྩ་འགྲེལ་གྱིས་སློང་ཞིང་། ཉམས་ལེན་གཏེར་ཁ་གོང་འོག་དང་། ཡབ་སྲས་གཉིས་ཀྱི་གཏེར་ཆོས། སྙིང་ཐིག་ཡ་བཞི་བླ་མ་དགོངས་འདུས་ལ་སོགས་པས་གཞུང་བསྲང་བར་བསྟན་ནས་རིམ་གྱིས་སྔ་འགྱུར་བཀའ་མའི་རྒྱུད་སྡེའི་ལམ་སྲོལ་ཆེན་པོ་སྟོན་པར་བཞེད་ཀྱང་། སྡེ་དཔོན་ཕན་ཚུན་མི་མཛའ་བའི་ཀུན་སློང་གིས་གསོལ་བའི་སྙུན་གཞིས་ལོ་གཅིག་གི་ཁེངས་སུ་ཞི་བར་མནལ་བས་བསྟན་པ་མཐའ་རྒྱས་ཀྱི་རྟེན་འབྲེལ་ལ་ཅུང་ཟད་གཞར། དེ་ལྟ་ནའང་དོན་གྱི་ཐེག་རིམ་དགུའི་གྲུབ་མཐའི་རྣམ་གཞག་དཔྱིས་ཕྱིན་པ་རྒྱལ་བ་ཀློང་ཆེན་པའི་གཞུང་གིས་སློང་ཞིང་། །རྣལ་འབྱོར་དུ་བྱ་བའི་གནས་ལ་ཡོ་ག་གསུམ་ཀའི་ཟབ་ཅིང་རྒྱ་ཆེ་བའི་ངོ་བོ་མ་འཁྲུལ་ཞིང་མི་བསླུབ་གཏེར་ཁ་གོང་འོག་བླ་མ་དགོངས་འདུས་གྲོལ་བའི་ཐིག་ལེ་ལ་སོགས་པ་དང་། རིག་པའང་ཤར་གྱི་རྒྱུད་དོན་ལ་བྱེ་བྲག་ཏུ་འཇུག་པ་དགོངས་པ་ཡང་ཟབ་རྣམས་མདོ་སྒྱུ་སེམས་གསུམ་ཀའི་རྒྱུད་སྡེ་ལ་དོན་གྱིས་རྟོན་པ་སངས་རྒྱས་པདྨའི་རིང་ལུགས་མ་ནོར་བ་ཞེས་བྱའོ། །ཞབས་དྲུང་འཕྱོང་རྒྱས་པས་སེམས་ཉིད་ངལ་བསོ་རྩ་འགྲེལ་བར་གྱི་སྒོ་འཕར་ཕྱེ་བའི་གཏམ་ལའང་། འགྲོ་བ་ལྷ་དང་བཅས་པའི་སྟོན་པ་དཔལ་ཀུན་ཏུ་བཟང་པོ་དེ་ཉིད་ཀྱིས་རང་གིས་བདུད་རྩི་བརྙེས་པའི་གོ་འཕང་ལ་གདུལ་བྱ་རྣམས་དངོས་སམ་བརྒྱུད་ནས་བཀྲི་བར་བཞེད་པས། རྒྱུ་དང་འབྲས་བུའི་ཐེག་པ་ཇི་སྙེད་ཅིག་གསུངས་པ་དེ་ཐམས་ཅད་ཀྱི་དོན་སྙིང་པོར་དྲིལ་བ་ནི་མདོ་སྔགས་ཐམས་ཅད་གང་ཟག་གཅིག་འཚང་རྒྱ་བའི་ལམ་གྱི་ལུས་ཡོངས་སུ་རྫོགས་པར་སྟོན་པའི་བསྟན་བཅོས་འདི་ཉིད་ཀུན་མཁྱེན་ངག་གི་དབང་པོས་ཆེད་དུ་སྤེལ་བར་མཛད་པས། སྤྱིར་རྒྱལ་བའི་བསྟན་པ་ལ་ཞུགས་སོ་ཅོག་དང་། ཁྱད་པར་སྔ་འགྱུར་བར་ཁས་འཆེ་བ་རྣམས་ཀྱིས་བསྐྱེད་རིམ་ཚིག་རྐྱང་ཙམ་དང་། རྫོགས་རིམ་སྣ་རེའི་ཉམས་མྱོང་ཅུང་ཟད་
ཀྱིས་ཡིད་ཚིམ་པར་བྱས་ན། དེ་དག་ལམ་ལྟར་སྣང་དང་ཡང་དག་པ་ཡིན་མིན་ཀྱང་མི་ཤེས་ཤིང་། རྒྱ་ལ་རང་གི་རྒྱུད་ལ་མྱོང་བ་རྣལ་མ་ཞིག་སྐྱེས་ནའང་ལྐུགས་པའི་རྨི་ལམ་ལྟར་གཞན་ལ་འདོམས་པའི་མཐུ་མེད་པ་དག་གིས་གསར་རྙིང་གི་བསྟན་པ་མཐའ་དག་ཉམས་དམས་པ་ལ། མཁས་ཤིང་གྲུབ་པ་རྣམས་ཀྱིས་འཁུ་ཞིང་གཤུང་བ་དང་། གལ་ཏེ་མདོ་སྔགས་ཀྱི་གཞུང་ལུགས་རྒྱ་ཆེན་པོ་ལ་སློབ་པ་ནི་སྙིགས་མ་ལྔ་བདོ་བའི་དུས་འདིར་གཤིས་ཀྱིས་དཀའ་བ་ལ་དགོངས་ནས་འདི་ནི་མདོ་རྒྱུད་དང་རྒྱ་གཞུང་རྩོད་པ་དང་བྲལ་བ་རྣམས་ཀྱི་ལུང་ཇི་ལྟར་བཀྲལ་བས། བློ་གྲོས་དང་ལྡན་པ་དག་གིས་རྐང་ཚུགས་པའི་རྟོག་དཔྱོད་ཀྱི་མིག་ཞི་བ་མོས་གོ་བའི་གཏིང་ཕྱིན་པར་བལྟས་ཚེ། དཔྱད་པ་ཡོངས་སུ་རྫོགས་པས་ན་ལམ་གྱི་རིམ་པ་འདི་ཉིད་ལ་ངེས་པ་གཏིང་ནས་འདྲོངས་ཤིང་། དེའི་ཚུལ་ལ་གནད་དུ་བསྣུན་ནས་ཉམས་སུ་བླངས་ན་རྒྱལ་བ་སྲས་དང་བཅས་པ་དགྱེས་པའི་འཕྱུགས་མེད་ཀྱི་མྱུར་ལམ་ངོ་མཚར་རྨད་དུ་བྱུང་བ་ཡིན་ཞེས། རྗེ་བཙུན་རྣམ་པ་པྲཛྙཱ་ར་སྨིའི་གསུང་གི་གསང་བས་ལན་ཅིག་མ་ཡིན་པར་བསྙད་པ་ལ་བརྟེན་ནས། ཆོས་བཞིན་དུས་སྐྱོང་བ་མིའི་དབང་པོ་བསོད་ནམས་སྟོབས་ཀྱི་རྒྱལ་པོས། ཉིད་ཀྱི་ཡབ་རྗེའི་དགོངས་པ་བསྐང་བ་དང་། སྔ་འགྱུར་གྱི་བསྟན་པ་རིན་པོ་ཆེ་འཕེལ་རྒྱས་ཀྱི་ཕྱིར། འཁོར་ལོ་གསུམ་ལ་ལྷུར་བྱེད་པའི་དགེ་འདུན་གྱི་སྡེ་བཙུགས་ཤིང་། དེ་དག་གི་འཚོ་བ་བླ་ནས་སྦྱོར་བ་དང་། སྨིན་གྲོལ་ལམ་གྱི་ཆ་ལག་ཚེས་བཅུ་ཆེན་མོའི་ཕྱག་བཞེས་ཀྱི་སྲོལ། དེ་དག་གི་ཆས་སོགས་གཞན་གྱི་བློས་དཔག་པར་དཀའ་བའི་རྒྱུན་དང་། བསྟན་བཅོས་འདི་ཉིད་ཀྱི་གླེགས་བམ་གྲངས་མེད་དུ་འཆར་བའི་ཕྱིར་བར་དུ་བཞེངས་ཏེ་བསྟན་པའི་བཙས་སུ་བཞག་པ་ཡིན་ལ་ཞེས་སོ། །རྒྱུ་ངེས་སེམས་ཉིད་ངལ་བསོ་རྩ་འགྲེལ་དང་། གསང་བའི་སྙིང་པོ། འགྲེལ་བ་ཕྱོགས་བཅུ་མུན་སེལ་སྲོགས་བློ་ལ་འདོམས་པར་བྱེད་པའི་རྒྱུན་ད་ལྟའི་བར་དུའང་གནས་པ་ཙམ་མོ། །དེ་ལྟར་དགོན་གནས་བསྐྲུན་ནས་ཡུན་རིང་མ་སོང་བ་ལ།
དེ་བཞིན་གཤེགས་པ་ལ་བདུད་སྡིག་ཏོ་ཅན་གྱིས་བསྐུལ་བ་བཞིན་དུ་སྐུ་མྱ་ངན་ལས་འདའ་བར་བཞེད་ནས་རྗེས་འཇུག་རྣམས་ལ་ཞལ་ཆེམས་སུ། དེད་ཀྱི་ཕུང་པོ་འདི་ས་འབུམ་ཞིག་ཏུ་བཞག་ན་མཐར་ནོར་བུ་དབྱིག་ཏུ་འགྱུར་ཅིང་། བོད་འབངས་བདེ་བ་དང་། མཐའ་དམག་བཟློག་པའི་རྟེན་འབྲེལ་ཡོད་དེ་དུས་དབང་གིས་ཅིར་འགྱུར་ཆ་མེད། དེ་བས་དུམ་བུར་བྱས་ཏེ་ཡར་རྒྱབ་གཙང་པོའི་ཆུ་ལ་སྦྱངས་ན་ཀོང་པོ་རྒྱལ་ཡན་ཆོད་ཀྱི་སེམས་ཅན་ལ་ཕན་ཏེ་མི་ནུས། དུས་ཀྱི་དབང་ལས་བསྟན་པ་འཕེལ་རྒྱས་ཡོང་བ་གཤིས་ཀྱིས་དཀའ། དགེ་འདུན་རྣམས་རང་རང་གི་བསྟན་པ་སྒོ་དྲུང་ནས་མ་ནུབ་པར་གྱི་ས་ལ་སྒྱེ་བེ་མ་རེ་གྱོན། གཙོ་བོར་ཐོས་བསམ་སྒོམ་པ་ལ་འབད་འབུངས་ཐོན། འཕྲལ་བྱ་བ་གང་ཐངས་རང་གྱིས། དཀའ་ཐུབ་འདིས་དལ་རྟེན་ཆུད་འཛའ་བས་འཆི་བགྱིན་ཙམ་རེ་བསྟེན། སྡོམ་པ་གསུམ་ལ་ཉེས་ལྟུང་གི་དྲི་མས་མ་གོས་པར་བརྩོན་འགྲུས་དྲག་པ་འབད་གཉེན་པོས་རྐྱེན་ཐུབ་པ་དང་། དད་པས་ཁམས་གསོས་པ་དང་། འགྲོ་རྣམས་ཕ་མར་ཤེས་པའི་ཉམས་ལེན་ལ་འབུངས། ང་དང་ཕྲད་པར་འདོད་པ་རྣམས་གྲོལ་ཏིག་དགོངས་པར་བགྲོལ་དང་། བེ་བུམ་གྱི་མན་ངག་རྣམས་ལ་ཉམས་ལེན་མཛོད། ཅེས་གདམས། དག་པའི་གསལ་སྣང་དཔག་ཏུ་མེད་པ་གཟིགས། ཁྱད་པར་ཉིན་གཅིག་དུས་ཀྱི་འཁོར་ལོའི་མངོན་དཀྱིལ་རྫོགས་པར་གནང་ནས་དབང་མཛད་པས། དགེ་སློང་འབྲི་གུང་པ་ན་རེ། ལོ་དུས་ན་གནང་བ་ཨེ་ཡིན་ཞུས་པས། དེ་འདྲ་བྱེད་པ་མེད། ཆོག་བཟུང་ཡང་མ་མྱོང་། ད་རིང་བྱང་ཤམྦྷ་ལའི་སྣང་བ་མུ་མཐའ་མེད་པར་ཤར་ནས་སྐྱེ་བོའི་ཚོགས་མང་པོས་གསོལ་བ་འདེབས་པ་ལ་དེ་ལྟར་བྱས་པ་ཡིན། ལར་ཞིང་ཁམས་མང་པོར་དབང་དང་བྱིན་རླབས་བགྲང་ལས་འདས་པ་བྱས་པའི་སྣང་བ་དང་། གསལ་སྣང་འབའ་ཞིག་ལས་སྣང་བ་རང་ཚན་པར་འཆར་གྱི་མི་འདུག །ད་རེས་ཀྱི་ནད་འདིས་
སྡིག་སྒྲིབ་དག་པ་འདྲ་གསུངས། ཡང་ཀུན་གྱིས་མཐོང་སར་བྱིས་པ་ཅིག་བྱུང་། ཅི་ལགས་ཞུས་པས། ཆུ་བར་ནས་ང་ཕྲད་པ་ལ་བྱོན་པ་ཡིན། འབྲི་གུང་ཨ་བྱི་དང་། བསྟན་སྐྱོང་མ་སོགས་བོད་ཀྱི་ལྷ་འདྲེ་ཆེ་དགུ་ངོས་ཕྲད་པ་ལ་བྱོན་གྱི་འདུག། ལྷ་འདྲེ་རྣམས་ཕྱི་ཐག་རིང་བས་སྡུག་བསྔལ་ཆེན་པོ་འདུག་གསུངས། དེ་ནས་ཆུ་སྤྲེའུ་ཧོར་ཟླ་དྲུག་པའི་ཚེས་བཅུའི་ཉིན་དགོངས་པ་འཕོ་བར་བཞེད་པ་ལ། གཉགས་ཛྙཱ་ན་ཀུ་མཱ་རའི་སྤྲུལ་པར་ལུང་གིས་ཟིན་པ་རྒྱལ་སྲས་ཀརྨ་ཀུན་བཟང་ཡུམ་སྲས་སོགས་ཀྱིས་མྱ་ངན་ལས་མི་འདའ་བར་གསོལ་བ་བཏབ་པས། སངས་རྒྱས་ཀྱི་སྐུ་ཚེའི་འདུ་བྱེད་ནི་བཏང་། འཚོ་བའི་འདུ་བྱེད་ནི་སྲིངས་པ་བཞིན་དུ་འོ་ན་ཞག་གསུམ་སྡོད་དོ་གསུངས་ནས་ཚེ་ས་བཅུ་གསུམ་གྱི་སྔ་ཞོགས་ཀུན་གྱིས་མཐོང་བར་ནམ་མཁའི་དབྱིངས་ནས་མཇའ་ཚོན་ཆེན་པོ་སྣ་ལྔའི་དྲྭ་བས་སྤྲེལ། ས་ཆེན་པོ་འདི་ཡང་མྱ་ངན་གྱིས་གདུངས་པའི་ཚེ་དེའི་སྒྲ་འུར་གྱིས་འདོན། སྐྱེས་བུ་ཆེན་པོ་འཇིག་རྟེན་དུ་མི་བཞུགས་པ་ལ་ཡིད་རབ་ཏུ་སྐྱོ་ནས། འདར་ཞིང་གཡོ་བའི་སྒྲ་ཆེན་པོ་དང་བཅས། དཔལ་རི་པདྨ་འོད་ཀྱི་ནུབ་ཕྱོགས། བདེ་བ་ཆེན་པོ་ཤཱནྟ་པུ་རིའི་གྲོང་ཁྱེར་གལ་བདེར་དཔའ་བོ་ཆེན་པོ་ཐོད་པའི་དུམ་བུ་རྩལ་གྱི་ཐུགས་ཀར་ཐིམ་པར་གྱུར་ཏོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། རྡོ་རྗེ་ཐེག་པ་སྔ་འགྱུར་གྱི་ཕྱོགས་ལ་མཁས་པ་དང་། གྲུབ་པ་བསྙེས་པའི་སྐྱེས་བུ་བསམ་གྱིས་མི་ཁྱབ་པ་ཞིག་བྱོན་པ་ལས། མདོ་སྒྱུ་སེམས་གསུམ་གྱི་བསྟན་པ་ལ་བཤད་སྒྲུབ་ཀྱི་སྒོ་ནས་བྱ་བ་མཛད་པ་གྲགས་ཆེ་བ་དག་གཙོ་བོར་སྨོས་པའི་སྐབས་ཏེ། རབ་ཏུ་བྱེད་པ་ལྔ་པའོ། །
མཚན་ཉིད་ངེས་པའི་སླད་དུ་བསྟན་བྱ་དམ་པའི་ཆོས་ཀྱི་རྣམ་པ་སྤྱི་དང་བྱེ་བྲག་པ་མདོ་ཙམ་སྨོས་པའི་རབ་ཏུ་བྱེད་པ་སྟེ་སྐབས་དྲུག་པ།
སྤྱི་དོན་དྲུག་པ་ཆེད་དུ་བྱ་བ་དམ་པའི་ཆོས་ཀྱི་རྣམ་པར་གཞག་པ་ལ། ཆོས་ཀྱི་སྒྲ་འཇུག་པའི་ཡུལ་སྦྱར་བཤད་པ་དང་། དེ་ལས་དམ་པའི་ཆོས་བྱེ་བྲག་ཏུ་བཤད་པའོ། །དང་པོ་ལའང་གཉིས་ལས་སྒྲའི་དོན་བཤད་པ་ནི། ལེགས་པར་སྦྱར་བའི་སྐད་དུ་དྷརྨ་ཞེས་བྱུང་སྟེ། དེ་ནི་ཊུ་དྷྲྀ྅་འཛིན་པ་ལའོ་ཞེས་བྱ་བའི་བྱིངས་ལས་སྐྱེས་པའི་ཕྱིར་འཛིན་བྱེད་ཀྱི་དོན་ལ་འཇུག་གོ །གང་འཛིན་ན། ཤེས་བྱ་ཐམས་ཅད་པའི་རང་དང་སྤྱིའི་མཚན་ཉིད་རྣམས་འཛིན་པས་གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་རང་རང་གི་མཚན་ཉིད་གང་ཡིན་པ་དེ་དང་དེར་འཛིན་པར་བྱེད་པ་སྟེ། འདི་ལྟར་གཟུགས་ཀྱི་མཚན་ཉིད་གཟུགས་སུ་རུང་བར་འཛིན་པར་བྱེད་པ་ནས་རྣམ་པ་ཐམས་ཅད་མཁྱེན་པའི་མཚན་ཉིད་ཆོས་ཐམས་ཅད་མངོན་སུམ་དུ་བྱེད་དོ། །ཞེས་བྱ་བ་ལྟ་བུའི་བར་གྱི་མཚན་ཉིད་ཐམས་ཅད་འཛིན་པར་བྱེད་དོ། །དེ་བཞིན་དུ་འདུས་བྱས་ཀྱི་མཚན་ཉིད་མི་རྟག་པར་འཛིན་པ་ནས། ཟག་པ་དང་བཅས་པ་ཐམས་ཅད་ནི་སྡུག་བསྔལ་བ། ཆོས་ཐམས་ཅད་ནི་བདག་མེད་པ། མྱ་ངན་ཁས་འདས་པ་ནི་ཞི་བའོ་ཞེས་བྱ་བ་ལྟ་བུའི་མཚན་ཉིད་ཐམས་ཅད་འཛིན་པར་བྱེད་པས་ན། ཆོས་ཞེས་བྱ་བའི་ངེས་ཚིག་ནི་འཛིན་པར་བྱེད་པའི་དོན་དུ་གཟུང་ངོ། །གཉིས་པ་དབྱེ་བ་ནི། རྣམ་བཤད་རིགས་པ་ལས། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དེ་ལྟ་བུའི་སྒྲ་འཇུག་པའི་ཡུལ་རྣམ་པ་བཅུར་བསྟན་པའོ། །ཇི་ལྟར་འཇུག་ན་ཤེས་བྱ་ལ་འཇུག་པ་ནི། དཔེར་ན་ཆོས་གང་ལ་འདུས་བྱས་སམ་འདུས་མ་བྱས་ཞེས་བྱ་བ་ལྟ་བུ་སྟེ་ཤེས་བྱའི་ཆོས་སུ་གཏོགས་པ་རྣམ་པ་ཐམས་ཅད་པ་ལ་མཁས་པར་བྱ་བ་ནས། ཆོས་ལུགས་ལ་འཇུག་པ་ལུགས་ཀྱི་ཆོས་ཡུལ་ཆོས་དང་རིགས་ཆོས་ཞེས་བྱ་བ་ལྟ་བུ་གང་ཡིན་པ་དེ་དང་དེའི་རྗེས་སུ་མཐུན་པར་བྱ་བ་ཉིད་ཀྱི་བར་སྔོན་གྱི་མཁས་པ་རྣམས་ཀྱིས་བཀྲལ་བ་བཞིན་ནོ། །གཉིས་པ་དམ་པའི་ཆོས་ཀྱི་རང་བཞིན་བྱེ་བྲག་ཏུ་བཤད་པ་ལ། མཚན་ཉིད་དང་། སྒྲ་དོན་དང་། རབ་ཏུ་དབྱེ་བ་གསུམ་མོ། །དང་པོ་
མཚན་ཉིད་ནི། རྣམ་བཤད་རིགས་པའི་བཅུ་པོ་དེ་ལས། བསོད་ནམས་དང་། ལམ་དང་། མྱ་ངན་ལས་འདས་པ་གསུམ་བརྗོད་བྱའི་དོན་ཉིད་དུ་བཟུང་ནས། གསུང་རབ་ནི་རྗོད་བྱེད་ཀྱི་ཚིག་ཏུ་བྱས་པ་དམ་པའི་ཆོས། གང་ལ་དམིགས་ནས་སྲིད་པའི་སྡུག་བསྔལ་རྒྱུ་དང་བཅས་པ་མཐར་འབྱིན་པར་བྱེད་པ་ཐགས་སུ་གྱུར་བ་གང་ཡིན་པའོ། །དེ་ལའང་བརྗོད་བྱ་དང་རྗོད་བྱེད་ཀྱི་མཚན་ཉིད་ལ་ལྟོས་ནས་ལུང་དང་རྟོགས་པའི་དམ་ཆོས་གཉིས་སུ་གནས་པ་སྟེ། །མཛོད་ལས། སྟོན་པའི་དམ་ཆོས་རྣམ་གཉིས་ནི། །ལུང་དང་རྟོགས་པའི་བདག་ཉིད་དོ། །ཞེས་སོ། །དེ་ལ་ལུང་གི་ཆོས་ནི་རྟོགས་པའི་དོན་ལ་འཇུག་པར་བྱེད་པ་བརྗོད་བྱ་ཕུན་སུམ་ཚོགས་པའི་དམ་ཆོས་ཏེ། དེ་ལའང་འཇིག་རྟེན་པའི་མངོན་བརྗོད་དང་། འཇིག་རྟེན་ལས་འདས་པའི་མངོན་བརྗོད་མིང་གི་རྣམ་པ་ཐ་དད་དུ་དབྱེ་བའང་བྱུང་སྟེ། སྔ་མ་ནི་བརྟག་པ་བརྒྱད་ལ་སོགས་པའི་གཏམ་སྣ་ཚོགས་པ་སྟེ་འཁོར་བ་དང་ཆོས་མཐུན་པས་དེ་སྐད་ཅེས་བྱ་སྟེ། ཤེས་རབ་བརྒྱ་བ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་བ་གམ་ན་ཡོད། །ཅེས་པ་ལྟར་དངོས་སུ་མངོན་པར་མཐོ་བའི་རྒྱུའི་གཙོ་བོ་ལས་མ་སྨོས་ཀྱང་། བརྒྱུད་ནས་རྟོགས་པའི་ཆོས་ལ་འཇུག་པའི་དབང་གིས་སོ། །ཕྱི་མ་ནི་གསུང་རབ་ཡན་ལག་བཅུ་གཉིས་ཏེ། ཆོས་ཉིད་རྟོགས་པར་བྱེད་པའི་རྒྱུ་མཐུན་ནམ། ཆོས་དབྱིངས་རྟོགས་པར་བྱེད་པའི་རྒྱུ་མཐུན་ལས་བྱུང་བས་དེ་སྐད་ཅེས་བྱ་སྟེ། མྱ་ངན་ལས་འདས་པའི་མདོ་ལས། ཆུ་བོ་ཆེན་པོ་རྒྱ་མཚོར་བབ། འབབ། གཞོལ་བ་དེ་བཞིན་དུ། ཆོས་ཐམས་ཅད་མྱ་ངན་ལས་འདས་པར་བབ་། འབབ། གཞོལ་ཞེས་གསུངས་སོ། །དེའི་འབྲས་བུ་རྟོགས་པའི་དམ་པའི་ཆོས་དེ་ལའང་། གང་འདོད་ཆགས་དང་བྲལ་བར་གྱུར་བ་དང་། གང་གིས་འདོད་ཆགས་དང་བྲལ་བར་བྱེད་པའི་མཚན་ཉིད་ཀྱི་དབྱེ་བ་རྣམ་པ་གཉིས་སུ་གནས་ཏེ། མགོན་པོ་བྱམས་པས། གང་ཞིག་གང་གིས་
ཆགས་བྲལ་བ། །བདེན་གཉིས་མཚན་ཉིད་ཅན་དེ་དངོས། །ཆགས་བྲལ་ཉིད་ཀྱི་འགོག་པ་དང་། །ལམ་གྱི་བདེན་པ་དག་གིས་བསྡུས། །ཞེས་འགོག་པའི་བདེན་པའི་དམ་པའི་ཆོས་དང་། ལམ་གྱི་བདེན་པའི་ཚེས་རྣམ་པ་གཉིས་ཕན་ཚུན་འབྲས་བུ་དང་། བྱ་བའི་རང་བཞིན་དུ་གནས་པའོ། །གཉིས་པ་སྒྲ་དོན་སྤྱིར་བཤད་པ་ནི། ལེགས་པར་སྦྱར་བའི་སྐད་དུ་སདྡྷརྨ་ཞེས་འབྱུང་བ་གངས་ཅན་པའི་སྐད་ལ་དམ་པའི་ཆོས་ཞེས་བྱ་སྟེ། དེ་ལ་དམ་པ་ནི། སྟོང་པ་བདེན་པར་གསུང་བ་ཡིན་ལ། ཆོས་ནི་དེས་གསུངས་པ་ཡིན་པའི་ཕྱིར་དམ་པའི་ཆོས་ཞེས་པའོ། །གཞི་མཐུན་པར་སྨྲ་ན་དམ་པ་ནི་མཆོག་ཏུ་གྱུར་བ་ཡིན་ལ་ཆོས་ཀྱང་དེའི་རང་བཞིན་ཡིན་པས་སོ། །བྱེ་བྲག་ཏུ་བཤད་ན། སུ་བྷཱ་ཥི་ཏ་ཞེས་པ་ལེགས་པར་གསུངས་པ་སྟེ། ཇི་ལྟ་བུས་ལེགས་པར་གསུངས་ན། ཚིག་དང་དོན་ཕྱིན་ཅི་མ་ལོག་པར་ཡང་དག་པར་གསུངས་པའི་ཕྱིར་མདོ་ལས་བཅོམ་ལྡན་འདས་ཀྱིས་ཆོས་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་རང་གི་རིག་པར་བྱའོ། །ཞེས་མྱ་ངན་ལས་འདས་པའི་གོ་འཕང་དམ་པར་སྦྱོར་བས་ཡང་དག་པར་གསུངས་པ། དེའི་དོན་ཇི་བཞིན་པར་མཐོང་བས་ཡང་དག་པར་མཐོང་བ། ཉོན་མོངས་པ་བག་ལ་ཉལ་གྱི་གཉེན་པོར་གྱུར་བས་ནད་མེད་པ། དུས་ཐམས་ཅད་དུ་བྱ་སླ་བའམ། ཡོངས་སུ་ཉམས་པ་མེད་པའི་ཕྱིར་དུས་ཆད་པ་མེད་པ། སྡུག་བསྔལ་རྒྱ་མཚོ་ལས་ངེས་པར་འབྱུང་བ་ཉེ་བར་གཏེད་པའི་ཕྱིར་ཉེ་བར་གཏོད་པ། དྲང་སྲོང་ཆེན་པོ་རྒྱས་པ་དང་གྲོག་མཁར་བ་ལ་སོགས་པས་བྱས་པའི་གཞུང་མཐར་ཐུག་སྙིང་པོ་མེད་པ་དེ་དག་དང་ཐུན་མོང་མ་ཡིན་པས་འདི་མཐོང་བ་ལ་དོན་ཡོད་པ། རྟོག་གེས་བརྟག་པར་མི་ནུས་པའི་ཕྱིར་མཁས་པ་རྣམས་ཀྱིས་རང་གི་རིག་པར་བྱའོ། །དེ་དག་གི་དོན་ཡང་བདག་ཅག་གི་སྟོན་པའི་ལུགས་ཀྱི་སེམས་ཅན་གྱི་ཁམས་འདོད་ཆགས་བདོ་
བ་དང་། ཞེ་སྡང་བདོ་བ་དང་། གཏི་མུག་བདོ་བ་དང་། ང་རྒྱལ་བདོ་བ་དང་། ཕྲག་དོག་བདོ་བ་དང་། ཐམས་ཅད་བདོ་བ་རྣམས་འདུལ་བའི་ཐབས་དང་ཡོན་ཏན་ཡང་དག་པར་བསྟན་པ་ཁོ་ན་ཡིན་ཏེ། ཕྱི་རོལ་བ་དག་གི་འདུལ་བ་ནི་ཉེས་པར་བསྟན་པ་ཉིད་ཀྱིས་ལེགས་པར་གསུངས་པ་མ་ཡིན་པ་དང་། རྫོགས་པའི་བྱང་ཆུབ་ཏུ་འགྲོ་བར་མི་འགྱུར་བ་ཉིད་ཀྱིས་ངེས་པར་འབྱུང་བ་མ་ཡིན་པ་དང་། འདུས་པ་དང་མི་ལྡན་པ་ཉིད་ཀྱིས་མཐུན་པ་མ་ཡིན་པ་དང་། སྟོན་པ་དེ་བཞིན་གཤེགས་པ་ལ་སོགས་པ་མ་ཡིན་པ་ཉིད་ཀྱིས་བསྟན་པ་མེད་པའོ། །དེའི་ཕྱིར། བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་འདུལ་བ་ནི་ལེགས་པར་བསྟན་པ། ངེས་པར་འབྱུང་བ། རྫོགས་པའི་བྱང་ཆུབ་ཏུ་འགྲོ་བར་བྱེད་པ། མི་མཐུན་པ་མེད་ཅིང་འདུས་པ་དང་ལྡན་པ། བསྟན་པ་ཡོད་པ་ཞེས་ཁྱད་པར་གྱི་ཆོས་བགྲངས་པ་ཡིན་ནོ། །དེ་ལས་གཞན་དུ་གྱུར་བ་དག་གི་ནི་སློབ་དཔོན་དབྱིག་གཉེན་གྱིས། ཚིག་འབྲུ་བཟང་མིན་དོན་བཟང་མིན། །གྲོལ་དང་རིག་པའི་ཐབས་མ་ཡིན། །སྔ་མ་ཕྱི་མ་འགལ་བ་ཡིན། །དེ་བཞིན་བསྡུ་བ་བཞི་དང་ནི། །བསྟན་པ་བཞི་དག་སྤངས་པ་དང་། །སྟོན་པའང་སྟོན་པའི་མཚན་ཉིད་མེད། །དེ་ལྟར་གཞན་གྱི་བསྟན་བཅོས་དང་། །སློབ་མ་བསྟན་པ་སྐྱོན་ཅན་ཡིན། །ཞེས་པས་གང་གི་སྟོན་པའི་སྟོན་པ་དང་། དེས་བསྟན་པའི་ཆོས་ཀྱི་ཡོན་ཏན་གཞན་ལས་ཁྱད་པར་ཕྱེ་བའོ། །གསུམ་པ་རབ་ཏུ་དབྱེ་བ་ལ་ལྔ་སྟེ། བརྗོད་བྱ་དང་། རྗོད་བྱེད་དང་། གཉེན་པོ་དང་། གདུལ་བྱ་དང་། བདག་རྐྱེན་གྱི་སྒོ་སོ་སོ་ནས་དབྱེ་བའོ། །དང་པོ་བརྗོད་བྱའི་སྒོ་ནས་དབྱེ་ན། བདེན་པ་གཉིས་ཏེ། རྩ་ཤེ་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བསྟེན། །ཞེས་སོ། །དེ་ཉིད་ཀྱང་མདོར་བསྡུས་ན། དྲང་ངེས་ཀྱི་ངོ་བོར་གནས་པ་ཡིན་ཏེ། འཕགས་པ་བློ་གྲོས་མི་ཟད་པས་བསྟན་པར། ཀུན་རྫོབ་སྒྲུབ་པ་སྟོན་པ་ནི་དྲང་བའི་དོན་ཏོ། །དོན་དམ་སྒྲུབ་པ་སྟོན་པ་ནི་ངེས་པའི་དོན་ཏོ། །ཞེས་སོ།
གཉིས་བརྗོད་བྱེད་ཀྱི་སྒོ་ནས་དབྱེན་གསུང་རབ་ཡན་ལག་བཅུ་གཉིས་ཏེ། བརྒྱད་སྟོང་འགྲེལ་བ་སྙིང་པོ་མཆོག་ལས། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། །ཞེས་པས་མདོའི་སྡེ་ནི་ཚིག་བཅད་ལྷུག་གི་མདོ་མདོར་སྨོས་ནས། རྣམ་པར་གཞག་སླ་བ་དང་། བཤད་སླ་བ་དང་། གཟུང་སླ་བ་དང་། ཆོས་ལ་གུས་པས་ཚོགས་རྫོགས་པར་བྱེད་པ་དང་། ཆོས་ཉིད་རྒྱུད་དུ་རྟོགས་པར་འགྱུར་བ་དང་། སངས་རྒྱས་ལ་ཤེས་ནས་དད་པ་ཐོབ་པ་དང་། ཆོས་དང་དགེ་འདུན་ལ་ཤེས་ནས་དད་པ་ཐོབ་པ་དང་། མཐོང་བའི་ཆོས་ལ་བདེ་བར་གནས་པའི་མཆོག་ལ་རེག་པ་དང་། འབེལ་གཏམ་གྱིས་གཏན་ལ་འབེབས་པས་དམ་པ་རྣམས་ཀྱི་སེམས་མགུ་བར་བྱེད་པ་དང་། མཁས་པ་མཁས་པ་ཞེས་བྱ་བའི་གྲངས་སུ་འགྲོ་བའི་ཕན་ཡོན་བཅུ་གཟིགས་ནས་མདོར་གསུངས་པའོ། །དབྱངས་ཀྱིས་བསྙད་པའི་སྡེ་ནི། བཤད་བྱ་དེ་ཉིད་ཀྱི་བར་དང་མཐའ་མ་ངག་ཏུ་ཚིགས་སུ་བཅད་པའི་དབྱངས་ཀྱིས་བསྙད་པའམ། བརྟག་པར་བྱ་བའི་གནས་གཞན་ད་དུང་ཡོད་པས་དྲང་བའི་དོན་དུ་གསུང་བའི་མདོ་སྡེ་གང་ཡིན་པའོ། །ལུང་དུ་བསྟན་པའི་སྡེ་ནི། འདས་པ་དང་མ་འོངས་པ་ལ་སོགས་པ་བྱུང་དང་འབྱུང་འགྱུར་རྣམས་ལུང་དུ་སྟོན་པ་གཙོ་བོར་སྨོས་པའམ། དགོངས་པ་རྣམ་པར་ཕྱེ་ནས་ལུང་སྟོན་པར་བྱེད་པ་ངེས་པའི་དོན་དུ་གསུང་བ་གང་ཡིན་པ་རྣམས་སོ། །ཚིགས་སུ་བཅད་པའི་སྡེ་ནི། །གང་ཞིག་རྐང་པ་གཉིས་པའམ་གསུམ་པ་ལ་སོགས་ཏེ་རྐང་པ་དྲུག་པའི་བར་དུ་ཚིགས་སུ་བཅད་པར་བསྡེབས་ནས་གསུངས་པ་གང་ཡིན་པ་རྣམས་སོ། །ཆེད་དུ་བརྗོད་པའི་སྡེ་ནི། གཞན་གྱིས་ཞུ་བ་ལ་མ་ལྟོས་པར་བསྟན་པ་གནས་པ་འབའ་ཞིག་གི་ཕྱིར། བཅོམ་ལྡན་འདས་ནང་དུ་ཡང་དག་འཇོག་ལས་བཞེངས་ཏེ་དགེ་སློང་གི་དགེ་འདུན་རྣམས་ལ་
ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་པ་ལྟ་བུའོ། །གླེང་གཞིའི་སྡེ་ནི། འགའ་དང་འགའ་ལ་ཆེད་དུ་གསུངས་པའམ། གཞི་འདི་དང་། སྐབས་འདི་དང་། བྱུང་བ་འདིའི་ཚེ་བསླབ་པ་འདི་ལྟར་བཅས་པ་ལྟ་བུ་ལ་བྱ་སྟེ། སྒྲ་སྦྱོར་བ་མ་པོ་གཉིས་པ་ལས། མདོ་སྡེ་དང་འདུལ་བ་ལ་སོགས་པ་ཐོག་མ་ཅི་ལས་བྱུང་གླེངས་ཏེ་བཤད་པ་དང་། ཞེས་པ་ལ་སོགས་པས་མཚོན་ཏོ། །རྟོགས་པ་བརྗོད་པའི་སྡེ་ནི། ཉན་པ་པོས་དོན་དཔྱིས་ཕྱིན་པར་གོ་ཞིང་མཚན་ཉིད་རྟོགས་པར་བྱ་བའི་ཕྱིར་སྔོན་རབས་ཀྱི་གཏམ་རྒྱུད་གཞན་ལས་བརྩམས་པའི་དཔེས་ཆོས་ཀྱི་དོན་གསལ་བར་སྟོན་པ་རྣམས་སོ། །སྐྱེས་པ་རབས་ཀྱི་སྡེ་ནི། བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལ་ཞུགས་པའི་ཚེ། །གང་དང་གང་དུ་སྐྱེ་བའི་མྱུ་གུ་བཟུང་བ་དང་། དཀའ་ཐུབ་ཀྱི་སྤྱོད་པ་ཅི་དང་ཅི་མཛད་པ་སྟོན་པ་རྣམས་སོ། །ཤིན་ཏུ་རྒྱས་པའི་སྡེ་ནི། སྐྱེས་བུ་ཆེན་པོའི་ལམ་བྱང་ཆུབ་སེམས་དཔའི་སྡེ་སྣོད་ཀྱི་ས་དང་ཕ་རོལ་ཏུ་ཕྱིན་པ་ལ་སོགས་པ་ཤིན་ཏུ་རྒྱ་ཆེ་བ་དང་། ཟབ་པའི་རྣམ་པར་སྟོན་པ་རྣམས་སོ། །རྨད་དུ་བྱུང་བའི་སྡེ་ནི། གང་ལས་ཉན་ཐོས་དང་། བྱང་ཆུབ་སེམས་དཔའ་དང་། རྫོགས་པའི་སངས་རྒྱས་རྣམས་ཀྱི་མཁྱེན་པ་དང་རྫུ་འཕྲུལ་དང་། བྱིན་རླབས་ལ་སོགས་པ་ངོ་མཚར་རྨད་དུ་བྱུང་བར་སྟོན་པའི་ཆོས་རྣམས་སོ། །གཏན་ལ་དབབ་པའི་སྡེ་ནི། ཆོས་ཐམས་ཅད་རང་དང་སྤྱིའི་མཚན་ཉིད་ཀྱིས་གཏན་ལ་འབེབས་པའི་སྒོ་ནས་མདོ་སྡེ་ལ་སོགས་པའི་དོན་ཡང་དག་པར་བསྟན་པ་རྣམས་སོ། །གསུམ་པ་གཉེན་པོའི་སྒོ་ནས་དབྱེ་ན་སྡེ་སྣོད་གསུམ་སྟེ། །སྤྱིའི་ངེས་ཚིག་དང་། སོ་སོའི་རང་བཞིན་དང་། སྡེ་སྣོད་གསུམ་དུ་འཇོག་པའི་རྒྱུ་མཚན་ནོ། །དང་པོ་ནི། ལེགས་སྦྱར་གྱི་སྐད་དུ་པི་ཊ་ཀ་ཞེས་འབྱུང་ངོ། །དེ་ཉིད་བསྒྱུར་ན་གོང་བུའམ། བསྡུས་པའི་དོན་ལ་འཇུག་སྟེ། ཤེས་པར་བྱ་བའི་ཆོས་སམ། བསླབ་པར་བྱ་བའི་ཆོས་ཐམས་ཅད་བརྗོད་བྱ་འདི་ཉིད་དུ་བསྡུས་པའི་ཕྱིར་
སྡེ་སྣོད་དང་། དཔེར་ན་གྲོང་ཁྱེར་མ་ག་དྷཱའི་བོ་ཆེ་རི་ནང་དུ། བྲེའུ་ཆུང་མང་པོ་འདུས་པའམ། ཆུད་པའི་དོན་གྱིས་སྣོད་དུ་མིང་ཞེས་འགྲུབ་པ་ལྟར། སྡེ་སྣོད་གསུམ་པོ་འདིར་གསུང་རབ་ཡན་ལག་བཅུ་གཉིས་ཀྱི་དོན་དང་ཚིག་གི་ཚོགས་མ་འདུས་པ་མེད་པས་སྡེ་སྣོད་ཅེས་བྱའོ། །དེ་སྐད་དུ་རྟེན་དང་བརྟེན་པ་ལ་སྦྱར་ན། སློབ་དཔོན་ཐོགས་མེད་ཀྱིས། ཡང་ན་ཕུང་པོ་དང་། ཁམས་དང་སྐྱེ་མཆེད་ཀྱི་ཆོས་ནས་སྐུ་དང་ཡེ་ཤེས་ལ་སོགས་པའི་བར་གྱི་ཤེས་པར་བྱ་བའི་དོན་ཐམས་ཅད་འདུས་པས་དེའི་ཕྱིར་སྡེ་སྣོད་ཅེས་བྱའོ། །ཞེས་གསུངས་སོ། །ཇི་ལྟར་བསྡུ་ན། དང་པོ་ལྔ་ཉན་ཐོས་ཀྱི་མདོ་སྡེའི་སྡེ་སྣོད་དང་། བར་པ་གསུམ་ཉན་ཐོས་ཀྱི་འདུལ་བ་སྟེ། དེའི་ཡང་གླེང་གཞིའི་སྡེ་ནི་ལྟུང་བ་བསླབ་བྱ་དང་བཅས་པ་སྟོན་པའི་ཕྱིར་ན་གཙོ་བོའི་ཚུལ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་ནི་དེའི་གྲོགས་སུ་གྱུར་བ་ཡིན་པས་འཁོར་གྱི་ཚུལ་དུ་འདོད་པའོ། །ཐ་མ་བཞི་ལས། སྐྱེས་པོ་རབས་ཀྱི་སྡེས་བྱང་ཆུབ་སེམས་དཔའི་འདུལ་བའི་སྡེ་སྣོད་ཀྱི་འཁོར་དང་། ཤིན་ཏུ་རྒྱས་པ་དང་རྨད་དུ་བྱུང་བ་གཉིས་ཀྱིས་བྱང་ཆུབ་སེམས་དཔའི་མདོ་སྡེའི་སྡེ་སྣོད་དང་། གཏན་ལ་དབབ་པའི་སྡེ་ནི་ཉན་ཐོས་དང་བྱང་ཆུབ་སེམས་དཔའ་གཉིས་ཀའི་ཐུན་མོང་དུ་གྱུར་བ་ཆོས་མངོན་པའི་སྡེ་སྣོད་དུ་བཞག་པ་ཡིན་ལ། རང་སངས་རྒྱས་ལ་ནི་སྡེ་སྣོད་ལོགས་སུ་གྱུར་བ་མེད་དེ་ཉན་ཐོས་ཀྱི་སྡེ་སྣོད་ལ་དམིགས་པ་ཡིན་ནོ། །གཉིས་པ་སོ་སོའི་རང་བཞིན་ལ། མཚན་ཉིད་དང་། མཚན་གཞི་དང་། ངེས་པའི་ཚིག་གསུམ་ལས། དང་པོ་མདོ་སྡེའི་སྡེ་སྣོད་ཀྱི་མཚན་ཉིད་ནི། ལྷག་པ་སེམས་ཀྱི་བསླབ་པ་བརྗོད་བྱའི་གཙོ་བོར་གྱུར་བའི་གསུང་རབ་ཀྱི་རིགས་སུ་གཏོགས་པའོ། །གཉིས་པ་མཚན་གཞི་ནི། ཤེས་ཕྱིན་སྟོང་ཕྲག་བརྒྱ་བ་ལ་སོགས་པ་རྣམས་སོ། །གསུམ་པ་ངེས་ཚིག་ནི། ལེགས་པར་སྦྱར་བའི་སྐད་དུ་སུ་ཏྲ་ཞེས་བོད་སྐད་དུ་མདོར་སྨོས་པ་སྟེ། མདོ་སྡེ་རྒྱན་ལས། གནས་
རྣམས་དང་ནི་མཚན་ཉིད་དང་། །ཆོས་དོན་སྨོས་ཕྱིར་མདོ་ཡིན་ནོ། །ཞེས་པ་ལྟར། གཡུལ་གང་དུ་བཤད་པ་དང་། གང་གིས་བཤེད་པ་དང་། གང་གི་ཕྱིར་གསུངས་པ་རྣམས་སྨོས་པའི་ཕྱིར་གནས་དང་། བདེན་པ་གཉིས་ཀྱི་མཚན་ཉིད་སྨོས་པའི་ཕྱིར་མཚན་ཉིད་དང་། ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་བར་འབྱུང་བ་ལ་སོགས་པ་སྨོས་པའི་ཕྱིར་ཆོས་དང་། དེ་རྣམས་ཀྱི་དགོངས་པའི་དོན་སྨོས་པའི་ཕྱིར་དོན་ཏེ་ཐམས་ཅད་ཚོགས་པའི་ཚུལ་དུ་གསུངས་པའི་ཕྱིར་མདོ་ཞེས་བྱ་ལ། དེ་དག་སྟོན་པར་བྱེད་པའི་གསུང་རབ་ཀྱི་ཚོགས་སུ་གྱུར་བའི་ཕྱིར་སྡེ་ཞེས་བྱ་བ་ཡིན་ནོ། །གཉིས་པ་མངོན་པའི་སྡེ་སྣོད་ལའང་གསུམ། དང་པོ་མཚན་ཉིད་ནི། ལྷག་པ་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་སྨོས་པའི་རིགས་སུ་གཏོགས་པའོ། །གཉིས་པ་མཚན་གཞི་ནི། མངོན་བསྡེ་བདུན་ལ་སོགས་པ་རྣམས་སོ། །གསུམ་པ་ངེས་ཚིག་ནི། ལེགས་པར་སྦྱར་བའི་སྐད་དུ་ཨ་བྷི་ཞེས་འབྱུང་སྟེ། ཨ་བྷི་མུ་ཁྱ་ཞེས་མངོན་དུ་ཕྱོགས་པ་དང་། ཨ་བྷི་ཀྵཎ་ཞེས་པ་ཡང་ཡང་དང་། ཨ་བྷི་བྷུ་ཞེས་པ་ཟིལ་གནོན་དང་། ཨ་བྷི་ས་མ་ཡ་ཞེས་པ་རྟོགས་པ་སྟེ། རྒྱན་ལས། མངོན་དུ་ཕྱིར་དང་ལང་ཡང་དང་། །ཟིལ་གནོན་རྟོགས་ཕྱིར་མངོན་པའི་ཆོས། །ཞེས་པས་ཞི་བ་དམ་པ་མྱང་འདས་ལ་མངོན་དུ་ཕྱོགས་པའི་ཆོས་བྱང་ཕྱོགས་དང་མཐུན་པ་དང་། རྣམ་པར་ཐར་བའི་སྒོ་ལ་སོགས་པ་སྟོན་པས་མངོན་དུ་བ་དང་། ཕུང་པོ་ཁམས་དང་སྐྱེ་མཆེད་ལ་སོགས་པའི་ཆོས་རེ་རེ་ལའང་བསྟན་དུ་ཡོད་པ་དང་། བསྟན་དུ་མེད་པ་ལ་སོགས་པའི་བྱེ་བྲག་མང་པོ་ཡང་དང་ཡང་དུ་སྟོན་པའི་ཕྱིར་ཡང་ཡང་དང་། བརྩད་པ་དང་བརྩད་བྱའི་གཞི་ལ་སོགས་པ་སྨྲ་བ་ལ་རྣམ་པར་ངེས་པས་ཕས་རྒོལ་ཟིལ་གྱིས་གནོན་པའི་ཕྱིར་ཟིལ་གནོན་དང་། ཇི་སྙེད་པའི་མདོ་སྡེའི་ཤེས་བྱའི་དོན་ནོར་བ་མེད་པར་རྟོགས་པའི་རྒྱུར་འགྱུར་བའི་ཕྱིར་རྟོགས་པ་སྡེ་རྣམ་པ་བཞི་པོ་དེ་དག་གི་དོན་ལ་འཇུག་པས་མངོན་པའི་སྡེ་སྣོད་ཡིན་ནོ། །གསུམ་པ་འདུལ་བའི་སྡེ་སྣོད་ལའང་དང་པོ་མཚན་ཉིད་ནི། ལྷག་པ་
ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་གྱུར་བའི་གསུང་རབ་ཀྱི་རིགས་སུ་གཏོགས་པའོ། །གཉིས་པ་མཚན་གཞི་ནི་ལུང་སྡེ་བཞི་ཡ་སོགས་པའོ། །གསུམ་པ་ངེས་ཚིག་ནི་འདུལ་བ་ལ་ལེགས་པར་སྦྱར་བའི་སྐད་དུ་བིན་ཡ་ཞེས་པ་འབྱུང་གིས། བི་བརྟི་རྣམ་པར་ལྟུང་བ་དང་། པི་ནིཤྩ་ཡ་རྣམ་པར་ངེས་པ་སྟེ། །རྒྱན་ལས། ལྟུང་དང་འབྱུང་དང་ལྡང་བ་དང་། །ངེས་པར་འབྱུང་བ་གང་ཟག་དང་། །བཅས་པ་དང་ནི་རབ་བྱེད་དང་། །རྣམ་པར་ངེས་ཕྱིར་འདུལ་བ་ཉིད། །ཅེས་ལྟུང་བ་པས་ཕམ་པ་དང་། དགེ་འདུན་ལྷག་མ་དང་། ཉེས་པ་སྦོམ་པོ་དང་། ལྟུང་བྱེད་དང་། སོ་སོར་བཤགས་པ་སྟེ་ལྟུང་བ་རིགས་ལྔའོ། །དེ་དག་གང་ལས་འབྱུང་བའི་རྒྱུ་ནི། ཐོགས་མེད་ཀྱིས། ལྟུང་བ་འབྱུང་བའི་སྒོ་ནི་མི་ཤེས་པ་ལ་སོགས་པ་བཞིར་བཤད་དོ། །ལྟུང་བ་ལས་ལྡང་བའི་ཐབས་ནི། ཕྱིན་ཆད་མི་བྱ་བའི་སྡོམ་སེམས་ཀྱིས་ལྡང་བའོ། །ལྟུང་བ་ལས་ངེས་པར་འབྱུང་བའི་ཐབས་ནི། སོ་སོ་བཤགས་པ་ལ་སོགས་དེའི་གཉེན་པོ་བདུན་སྟོན་པས་ངེས་པར་འབྱུང་བ་སྟེ། ཆོས་རྣམ་པ་བཞི་སྟོན་པས་འདུལ་བ་ཡིན་ལ། གཞན་ཡང་གང་ལ་བརྟེན་ནས་བསླབ་པའི་ཚིགས་བཅའ་བའི་གང་ཟག་དང་། གང་ཟག་གི་ཉེས་པ་གསོལ་ནས་སྟོན་པས་དགེ་འདུན་བསླབ་པ་བཅས་པ་དང་། དེ་མདོར་བསྟན་པ་ལས་རབ་ཏུ་དབྱེ་བ་དང་། ལྟུང་བ་དང་ལྟུང་བ་མ་ཡིན་པ་རྣམ་པར་ངེས་པ་སྟེ་རྣམ་གྲངས་བཞིར་འབྱུང་བའི་ཕྱིར་ཡང་འདུལ་བ་ཡིན་ནོ། །གསུམ་པ་སྡེ་སྣོད་གསུམ་དུ་འཇོག་པའི་རྒྱུ་མཚན་ནི། རྒྱུ་རྣམ་པ་དགུ་སྟེ། འདི་ལྟར་སྤང་བྱ་གསུམ་ཡིན་པ་དང་། བསླབ་བྱ་གསུམ་ཡིན་པ་དང་། ཤེས་བྱ་གསུམ་ཡིན་པའོ། །དང་པོ་སྤང་བྱ་ཉོན་མོངས་པ་གསུམ་གྱི་གཉེན་པོར་སྡེ་སྣོད་གསུམ་དུ་གཞག་པ་ནི། འདི་ལྟར་ཉེ་བའི་ཉོན་མོངས་པ་ཐེ་ཚོམ་གྱི་སྙིང་པོར་མདོ་སྡེ་སྣོད་རྣམ་པར་བཞག་སྟེ། མདོ་སྡེ་གང་ལས་ཕུང་ཁམས་སྐྱེ་མཆེད་དང་། རྟེན་ཅིང་འབྲེལ་འབྱུང་དང་། ས་དང་ཕ་རོལ་རྒྱུ་ཕྱིན་པའི་དོན་གང་ལ་ཡིད་གཉིས་སུ་གྱུར་བ་དེ་ལ་གདོན་མི་
ཟ་བར་བྱ་བའི་ཆེད་དུ་བཤད་དོ། །འདོད་པ་བསོད་སྙོམས་ཀྱི་མཐའ་དང་། ངལ་ཞིང་དུབ་པའི་མཐའ་གཉིས་ལ་སྦྱོར་བའི་གཉེན་པོར་འདུལ་བའི་སྡེ་སྣོད་རྣམ་པར་བཞག་སྟེ། ཚོགས་དང་རྩོལ་བས་བྱས་ཤིང་། སྲེད་པས་ཀུན་ནས་བསླངས་པའི་གསོག་འཇོག་ཁ་ན་མ་ཐོ་བ་བཀག་པ་འདོད་པའི་བསོད་སྙོམས་ཀྱི་མཐའ་སྤོང་བ་དང་། ངེས་པར་འབྱུང་བའི་ཚུལ་ཁྲིམས་ཡང་དག་པ་དང་ལྡན་པའི་དགེ་སློང་གིས་ཁ་ན་མ་ཐོ་བ་མ་ཡིན་པའི་ཡོངས་སུ་སྤྱད་པ་ལྷག་པར་རྙེད་ན་ཁ་ཟས་རོ་བརྒྱ་བ་དང་། ཁང་བརྩེགས་མིག་ལྔ་བརྒྱ་པའང་ཞེན་མེད་དུ་སྤྱོད་པར་གནང་བ་ངལ་ཞིང་དུབ་པའི་མཐའ་སྤོང་བར་སྟོན་པ་སྟེ། བཅོམ་ལྡན་འདས་ཀྱིས་དགེ་སློང་ཚུལ་ཁྲིམས་དང་ལྡན་པ་དང་། ཡོན་ཏན་དང་ལྡན་པ་ལ་ནི་ངས་ཁ་ཟས་རོ་བརྒྱ་དང་ལྡན་པ་དང་། གོས་འབུམ་རི་བའང་གནང་ངོ་ཞེས་པས་སོ། །རང་གི་ལྟ་བ་ལ་མཆོག་ཏུ་འཛིན་པའི་གཉེན་པོར་མངོན་པའི་སྡེ་སྣོད་རྣམ་པར་བཞག་སྟེ། ཆོས་ཐམས་ཅད་ཀྱི་མ་མོ་གང་གིས་ཤེས་བྱ་མ་ལུས་པའི་རང་དང་སྤྱིའི་མཚན་ཉིད་ཕྱིན་ཅི་མ་ལོག་པར་གཏན་ལ་ཕབ་ནས་རྒྱ་ཆེར་སྟོན་པའི་ཕྱིར་རོ། །གཉིས་པ་བསླབ་པར་བྱ་བ་རྣམ་པར་བྱང་བའི་ལམ་གསུམ་གྱི་དབང་གིས་སྡེ་སྣོད་གསུམ་དུ་རྣམ་པར་བཞག་སྟེ། འདི་ལྟར་རྗོད་བྱེད་གསུམ་པོ་དེ་དག་གིས་བརྗོད་བྱ་བསླབ་པ་གསུམ་ཅི་རིགས་པར་བསྟན་པ་ནི། མདོ་སྡེའི་སྡེ་སྣོད་ཀྱིས་ནི་ཐེག་པ་ཆེ་ཆུང་གཉིས་ཀའི་བསླབ་པ་གསུམ་གྱི་གནས་རྒྱས་པར་དབྱེ་བའི་སྒོ་ནས་གདུལ་བྱ་རྣམས་དོན་དེ་ལ་ཡང་དག་པར་སྦྱོར་རོ། །འདུལ་བའི་སྡེ་སྣོད་ཀྱིས་ནི་སོ་སོར་ཐར་བའི་སྡོམ་པའི་བསླབ་བྱ་ལ་སློབ་པའི་ཚུལ་རྒྱ་ཆེར་བསྟན་པའི་སྒོ་ནས་གདུལ་བྱ་རྣམས་ཀྱི་རྒྱུད་ལ་ཚུལ་ཁྲིམས་ཀྱི་ཕུང་པོས་ཡོངས་སུ་འདོམས་པར་བྱེད་པ་དང་། །དེ་ལས་འདའ་བ་མ་ཡིན་པས་འགྱོད་པ་དང་བྲལ་བ་ལ་སོགས་པ་རིམ་གྱིས་སེམས་རྩེ་གཅིག་པ་ཐོབ་པའི་ཕྱིར་ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་ཀྱི་བསླབ་པ་ལ་ཡང་དག་པར་སྤྱོད་པར་བྱེད་དོ། །ཆོས་མངོན་པའི་སྡེ་སྣོད་ཀྱིས་ནི་གང་བརྗོད་པར་བྱ་བའི་མཚན་ཉིད་མ་འཁྲུལ་བར་རྒྱ་ཆེར་བསྟན་པའི་སྒོ་ནས་ཆོས་རབ་ཏུ་འབྱེད་པར་བྱེད་པའི་བློ་གྲོས་དྲི་མ་སྤངས་པ་སྒྲུབ་པའི་ཕྱིར་
ལྷག་པའི་ཤེས་རབ་ཀྱི་བསླབ་པ་ལ་ཡང་དག་པར་སྦྱོར་བར་བྱེད་དོ། །མདོར་བསྡུ་ན། དབྱིག་གཉེན་གྱིས། མདོ་སྡེས་ནི་བསླབ་པ་གསུམ་བཤད་དོ། །འདུལ་བས་ནི་ལྷག་པ་ཚུལ་ཁྲིམས་དང་ལྷག་པའི་སེམས་བསྒྲུབ་པ་ཡིན་ཏེ། ཚུལ་ཁྲིམས་དང་ལྡན་པ་ནི་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་འཐོབ་པའི་ཕྱིར་རོ། །ཆོས་མངོན་པས་ལྷག་པའི་ཤེས་རབ་བསྒྲུབ་པ་ཡིན་ཏེ། དོན་ཕྱིན་ཅི་མ་ལོག་པར་སྟོན་པའི་ཕྱིར་རོ། །ཞེས་བཤད་དོ། །གསུམ་པ་ཤེས་པར་བྱ་བ་གསུམ་ནི་ཆོས་དོན་བཤད་པ་དང་། ཆོས་དོན་སྒྲུབ་པ་དང་། ཆོས་དོན་འབེལ་གཏམ་གྱིས་གཏན་ལ་འབེབས་པའི་དབང་གིས་སྡེ་སྣོད་གསུམ་དུ་རྣམ་པར་གཞག་པ་སྟེ། འདི་ལྟར་མདོ་སྡེའི་སྡེ་སྣོད་ཀྱིས་ནི་རྗོད་བྱེད་མིང་ཚིག་ཡི་གེའི་མཚན་ཉིད་ཀྱི་ཆོས་དང་། བརྗོད་བྱ་ཕུང་པོ་དང་ཁམས་ལ་སོགས་པའི་མཚན་ཉིད་ཀྱི་དོན་ནམ། མཐོ་རིས་འགྲུབ་བྱེད་ཀྱི་རྒྱུ་དགེ་བ་བཅུའི་ལས་ལ་སོགས་པའི་ཆོས་དང་། མྱ་ངན་ལས་འདས་པ་འགྲུབ་པར་བྱེད་པའི་རྒྱུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་དོན་བརྗོད་པའི་སྒོ་ནས་ཚིག་དོན་ལ་བློ་བྱང་བར་བྱེད་དོ། །འདུལ་བའི་སྡེ་སྣོད་ཀྱིས་ནི་འདོད་ཆགས་ལ་སོགས་པའི་ཉོན་མོངས་པ་རྣམས་ལ་མི་སྡུག་པའི་འདུ་ཤེས་དགུ་སྒོམ་པ་ལ་སོགས་པའི་སྒོ་ནས་ཉོན་མོངས་པ་འདུལ་བ་ལ་མཆོག་ཏུ་སྤྲོ་བས་ན། གང་དུ་ཚོགས་པའི་ཆོས་ཀྱི་རྗོད་བྱེད་དང་། དེ་དག་གི་བརྗོད་དོན་མངོན་སུམ་དུ་བྱེད་པའོ། །མངོན་པའི་སྡེ་སྣོད་ཀྱིས་ནི་ཆོས་རྣམས་ཀྱི་མཚན་ཉིད་ཤིན་ཏུ་དཔྱད་བཟོད་པར་བསྒྲུབས་ནས་ཆོས་དང་དོན་རྣམས་གཞན་དུ་མི་འཁྲུལ་བ་ཉིད་དུ་ལེགས་པར་འདོམས་པར་བྱེད་དོ། །དེ་སྐད་དུའང་ཐོས་པ་མང་པོ་དབྱིག་གཉེན་གྱིས། མདོ་སྡེས་ནི་ཆོས་དང་དོན་བཤད་དོ། །འདུལ་བས་ནི་ཆོས་དང་དོན་བསྒྲུབ་པ་སྟེ། ཉོན་མོངས་པ་འདུལ་བ་ལ་རབ་ཏུ་བརྩོན་པས་དེ་གཉིས་རྟོགས་པའི་ཕྱིར་རོ། །ཆོས་མངོན་པས་ནི། འབེལ་བའི་གཏམ་རྣམ་པར་གཏན་ལ་དབབ་པ་ལ་མཁས་པ་ཞེས་བཤད་དོ། །དེ་ལྟ་བུའི་སྡེ་སྣོད་གསུམ་གྱི་ཆོས་དེ་དག་ལས་བྱུང་བའི་ཤེས་རབ་ཀྱིས་
རྣམ་པར་གྲོལ་བར་བྱེད་དོ། །ཇི་ལྟར་གྲོལ་ན། ཐོས་པའི་ཤེས་རབ་ཀྱིས་ཆོས་ཀྱི་དབྱིངས་དག་གཏམ་ཆེན་པོ་ལ་རྒྱུ་མཐུན་གྱི་བག་ཚགས་འཇོག། བསམ་པའི་ཤེས་རབ་ཀྱིས་དེ་དང་དེའི་དོན་སྤྱོད་ཚུལ་དུ་རྟོགས་པར་བྱེད། སྒོམ་པའི་ཤེས་རབ་ཀྱིས་ཐོས་བསམ་གྱི་དོན་རྩེ་གཅིག་ཏུ་ཡིད་ལ་སྦྱོར་བས་ལྷག་མཐོང་གི་རྒྱུ་ཞི་གནས་ཀྱི་ཏིང་ངེ་འཛིན་རྒྱུད་ལ་སྐྱེད་པར་བྱེད། དེས་སེམས་ཀྱི་ཉོན་མོངས་བ་ཞི་བར་བྱེད་ཅིང་། ལྷག་མཐོང་གི་ཆོས་ཉིད་དོན་དམ་པའི་བདེན་པ་ཡང་དག་པ་ཇི་ལྟ་བ་བཞིན་དུ་རྟོགས་ནས་རྣམ་པར་གྲོལ་བར་བྱེད་དེ། མདོ་སྡེ་རྒྱན་ལས། མདོ་དང་ཆོས་མངོན་འདུ་ལ་བདག། མདོར་ན་དོན་ནི་རྣམ་བཞིར་འདོད། །བློ་དང་ལྡན་པས་དེ་ཤེས་ན། །རྣམ་པ་ཐམས་ཅད་མཁྱེན་པ་ཐོབ། །ཅེས་སོ། །བཞི་བ་གདུལ་བྱའི་སྒོ་ནས་དབྱེ་བ་ནི། སྡེ་སྣོད་བཞིར་སྤྲོ་བ་དང་། གཉིས་སུ་བསྡུ་བའང་ཡོད་པས་མཐའ་གཅིག་ཏུ་མི་གནས་ཏེ། དང་པོའི་དབང་གིས་སྡེ་སྣོད་བཞི་བར་བྱེད་ན། མཚན་གཞི་ནི་རིག་པ་འཛིན་པ་སྔགས་ཀྱི་སྡེ་སྣོད་ཅེས་བྱའོ། །དེ་ལ་སློབ་དཔོན་ཨ་བྷ་ཡ་ཀ་རས་ནི་བསླབ་པ་གསུམ་ལ་སྟོན་པས་སྡེ་སྣོད་གསུམ་ཀའོ་ཞེས་དང་། སློབ་དཔོན་ཤཱནྟི་པས། ཟབ་མོའི་དོན་བསྡུས་ནས་སྟོན་པས་མདོ་སྡེའི་སྡེ་སྣོད་ཡིན་ནོ་ཞེས་གསུངས་ལ། རྡོ་རྗེ་རྣམ་པར་འཇོམས་པ་དང་། མདོ་དགོངས་པ་འདུས་པའི་མཚན་གཞིའི་དབང་དུ་བྱས་ཀྱང་དངོས་བསྟན་ཉིད་དུ་གྲུབ་མོད། འདིར་སློབ་དཔོན་ཨཱརྱ་དེ་བས་རིག་པ་འཛིན་པའི་སྡེ་སྣོད་དོ་ཞེས་ལོགས་སུ་བྱ་བ་སྡེ་སྣོད་བཞི་པར་ཕྱེ་བའི་རྗེས་སུ་འབྲངས་པ་ཡིན་ཏེ། དག་པའི་གདུལ་བྱ་ལ་གསུངས་པའི་དོན་གྱི་དང་། ཐབས་མང་བ་དང་། དཀའ་བ་ཉུང་བ་དང་། དབང་པོ་རྣོན་པོའི་སླད་དུ་གསུངས་པའི་ཕྱིར་རོ། །དེ་སྐད་དུ་ལུང་གང་གིས་སྟོན་ན། མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག། བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་དང་། །རྒྱུ་ལ་མོས་པ་རྒྱུ་ཆོས་ཀྱི། །འཁོར་
ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག། མ་འོངས་དུས་ན་འབྱུང་བར་འགྱུར། །ཅེས་བསྟན་པའི་ཕྱིར་རོ། །ཡང་གཉིས་སུ་བསྡུ་བའི་དབང་དུ་བྱས་ན། རྒྱན་ལས། གཉིས་ཀྱང་རུང་ཞེས་པས་གདུལ་བྱའི་གང་ཟག་ལ་སྟོས་ནས་སྡེ་སྣོད་གཉིས་སུ་བཞག་པ་སྟེ། ཉན་ཐོས་ཀྱི་སྡེ་སྡོང་དང་། བྱང་ཆུབ་སེམས་དཔའི་སྡེ་སྣོད་དོ། །དེ་ལ་ཉན་ཐོས་ཀྱི་སྡེ་སྣོད་ནི། །གདུལ་བྱ་བློ་དམན་པ། ལམ་རྒྱ་ཆུང་ངུ་ལ་མོས་པའི་དོན་དུའོ། །བྱང་ཆུབ་སེམས་དཔའི་སྡེ་སྣོད་ནི། །གང་ཟག་བློ་མཆོག་ཏུ་གྱུར་བ་ལམ་རྒྱ་ཆེན་པོ་ལ་མོས་པའི་དོན་དུའོ། །དེ་གཉིས་ཀྱི་ཁྱད་པར་ཡང་། སྡེ་སྣོད་ཀྱི་དབང་དུ་བྱས་ན། ཐེག་པ་དམན་པའི་ལུགས་ཀྱིས་གསུང་རབ་ཡན་ལག་བཅུ་གཉིས་དང་། བསྟན་བཅོས་མངོན་པ་སྡེ་བདུན་ལ་སོགས་པ་ཉན་ཐོས་ཀྱི་སྡེ་སྣོད་ཡིན་ལ། དེ་དག་ལམ་གྲགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཕལ་པོ་ཆེ་ལ་སོགས་པ་རྒྱས་པའི་སྡེ་སྣོད་རྣམས་ནི་བྱང་ཆུབ་སེམས་དཔའི་སྡེ་སྣོད་དེ། ཕྱི་མའི་ཁྱད་པར་གྱི་ཆོས་ནི་ལང་ཀར་གཤེགས་པ་ལས། ཆོས་ལྔ་དག་དང་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་དངོས་པོར་ནི། །ཐེག་པ་ཆེན་པོ་མཐའ་དག་འདུས། །ཞེས་སོ། །ཡང་ལམ་དང་འབྲས་བུའི་དབང་དུ་བྱས་ན། མགོན་པོ་བྱམས་པས། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་ངག་དང་། །ཡེ་ཤེས་བརྩོན་འགྲུས་རྩོམ་པ་དང་། །ཐབས་ལ་མཁས་པར་གྱུར་བ་དང་། །ཡང་དག་གྲུབ་པ་ཆེན་པོ་དང་། །སངས་རྒྱས་ཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་སོ། །དེ་ལྟ་བུའི་ཁྱད་པར་གྱིས་འཕགས་པའི་ཐེག་པ་ཆེན་པོ་དེ་ལ་དབྱེ་ན། གདུལ་བྱ་དབང་པོ་རྟུལ་པོ་རྒྱུ་ལམ་དུ་བྱེད་པ་ལ་མོས་པའི་ངོར་རྒྱུ་ཕ་རོལ་ཏུ་ཕྱིན་པ་དང་། དབང་པོ་རྣོན་པོ་འབྲས་བུ་ལམ་དུ་བྱེད་པ་ལ་མོས་པའི་ངོར་གསང་སྔགས་རྡོ་རྗེའི་ཐེག་པ་གཉིས་སུ་གསུངས་པ་སྟེ། མདོ་དགོངས་པ་འདུས་པ་ལས། འདྲེན་པའི་
ཐེག་པ་རྣམ་གསུམ་ལ། །གང་དག་རིམ་པར་བཀོད་ལགས་ན། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དཔག་གིས་མི་་ལང་བ། །ངེས་པའི་ཐེག་པ་ཡོང་མ་གསུངས། །ཞེས་སོ། །དེ་དག་ལས་འདིར་གསང་སྔགས་རྡོ་རྗེའི་ཐེག་པ་བྱེ་བྲག་ཏུ་བཤད་པ་ལ་དོན་གཉིས་ཏེ། །རྒྱུའི་ཐེག་པ་ལས་གང་གི་འཕགས་པ་དང་། ཁྱད་པར་ཅན་གྱི་གསང་སྔགས་ཉིད་བསྟན་པའོ། །དང་པོ་ལ་གཉིས་ཏེ། །གྲུབ་མཐའ་སྨྲ་བ་སྤྱིའི་འདོད་པས་མདོར་བསྟན་པ་དང་། །རྒྱལ་བ་གཉིས་པ་ཀུན་མཁྱེན་ངག་གི་དབང་པོའི་བཞེད་པས་རྒྱས་པར་བཤད་པའོ། །དང་པོ་ནི་ཐེག་པ་དམན་པ་ལས་མཆོག་ཏུ་གྱུར་བའི་ཐེག་པ་ཆེན་པོའི་ནང་ནས་གཞི་མི་སྤོང་བར་ལམ་དུ་བྱེད་པའི་ཐབས་ཀྱིས་ཁྱད་པར་འཕགས་པ། །དཀའ་བ་མེད་པར་གཞན་དོན་དུ་བླ་ན་མེད་པའི་བྱང་ཆུབ་མྱུར་དུ་འགྲུབ་པའི་ཐབས་སུ་གྱུར་བ་གང་ཡིན་པ་སྟེ། །ཚུལ་གསུམ་པའི་སྒྲོན་མེའི་ལུང་ཡོངས་སུ་གྲགས་པས་མ་སྨོས་སོ། །གཉིས་པ་ནི། མཚན་ཉིད་དུ་ལྟ་བ་སྟོང་ཉིད་སྤྲོས་བྲལ་བརྗོད་པའི་ལམ་དུ་ཚིག་གིས་མཚོན་པ་ཙམ་སྟེ། གདོད་མ་ནས་བདེན་གཉིས་དབྱེར་མེད་ལྷ་དང་སྔགས་ཀྱི་རང་བཞིན་དུ་མ་རྟོགས་ལ། སྔགས་སུ་ཀུན་རྫོབ་ཀྱང་མེད་ལ་སྣང་བ་སྤྲུལ་པ་ཙམ་དུ་ལྷར་དག་པ་སྤྱོད་ཞིང་། དོན་དམ་དབྱིངས་དར་ཡེ་ཤེས་གདོད་ནས་ལྷུན་གྲུབ་ངོ་བོ་ཉིད་མེད་པའི་རང་དུ་རྟོགས་པ་སྟེ། སྒྱུ་འཕྲུལ་ལམ་རིམ་ལས། དོན་དམ་ཀུན་རྫོབ་དབྱེར་མེད་པར། །མཉམ་པའི་དཀྱིལ་འཁོར་ཆེན་པོ་རུ། །ཞེས་སོ། །སྤྱོད་པའམ་མཚན་ཉིད་ནི་བླང་དོར་དང་བཅས་པྲ་སྟེ། སྔགས་སུ་སྣང་སྟོང་སྒྱུ་མའི་རང་བཞིན་ལྟ་དང་གཞལ་ཡས་ཁང་གི་ངང་ལས། ཚོགས་ཀྱི་འདུ་བས་ལྷ་མཆོད་པ་དང་། ཆོས་ཉིད་མཐུན་པ་དང་། ཉོན་མོངས་པ་དག་པ་ལ་སོགས་པས་འཕགས་སོ། །ཏིང་ངེ་འཛིན་ལའང་མཚན་ཉིད་དུ་ཞིག་ནས་ལ་འཇོག་པ་དང་། ལྷག་མཐོང་ལ་དཔྱད་པ་སོགས་སེམས་འཛིན་གྱི་དཀའ་བས་འབད་དགོས་པ་ཉིད་སྔགས་སུ་མཚན་བཅས་བསྐྱེད་པའི་རིམ་པས་བསོད་ནམས་ཀྱི་ཚོགས་རྫོགས་
ཤིང་སྤྲོས་པ་ཞི་ནས། མཚན་མེད་རྫོགས་པའི་རིམ་པས་ཡེ་ཤེས་ཀྱི་ཚོགས་ལ་སྤྱོད་ཅིང་རྩ་རླུང་གི་གནད་གནུན་པ་ཙམ་གྱིས་ཆོས་ཉིད་མ་འཁྲུལ་བ་མྱུར་དུ་སྟོན་པས་འཕགས་སོ། །རྒྱུའང་མཚན་ཉིད་དུ་བསྐྱེད་བྱ་སྐྱེད་བྱེད་ཀྱི་ཀུན་རྫོབ་ལ་ལྟོས་ཏེ། སྔགས་སུ་དག་བྱ་རང་གནས་ཀྱི་ཡེ་ཤེས་བླང་དོར་མེད་པར་བཙན་ཐབས་སུ་ངོ་སྤྲད་ནས་བསྒོམས་པས་དོན་དམ་རྟོགས་པའི་གནད་ཀྱིས་འཕགས་སོ། །ལམ་ཡང་མཚན་ཉིད་དུ། ཚོགས་གཉིས་ལ་མཉམ་རྗེས་རེས་འཇོག་ཏུ་གྱུར་བས་བསྐལ་པའི་གྲངས་ཀྱིས་བགྲོད་བྱ་ཉིད། སྔགས་སུ་རང་བཞིན་དབྱེར་མེད་ཡེ་ཤེས་མ་འཁྲུལ་བའི་ལམ་ལ་ཞུགས་ནས་མྱུར་དུ་བགྲོད་པས་འཕགས་སོ། །འབྲས་བུའང་མཚན་ཉིད་དུ་ཕྱི་དུས་སུ་གདེང་འཆའ། སྔགས་ལ་ད་ལྟ་ལྷུན་གྲུབ་རང་གནས་སུ་འདོད་པས་འཕགས་སོ། །དེ་བཞིན་དུ་མཚན་ཉིད་ནི་སྤང་གཉེན་རིམ་པ་ཅན་གྱིས་བཅུ་གཅིག། སྔགས་སུ་འབྲས་བུ་རྣམ་དག་ཆེན་པོ་གསུམ། དུས་ལ་དགོངས་པ་ལུང་སྟོན་ལས། ཤིན་ཏུ་གྲངས་མེད་བསྐལ་པ་རུ། །སངས་རྒྱས་རྣམས་ཀྱིས་གང་མཁྱེན་པ། །སྔགས་པ་རྣམས་ཀྱིས་དུས་གཅིག་ཏུ། །ཚིག་ཅིག་རྫོགས་པའི་བྱང་ཆུབ་ཐོབ། །ཅེས་སོ། །ལོངས་སྤྱོད་ལ་མཚན་ཉིད་དུ་དཀའ་ཐུབ་སྤྱོད་ལ། །སྔགས་ནི་རྡོ་རྗེ་བཀོད་པར། ལོངས་སྤྱོད་འདོད་ཡོན་རྣམ་པ་ལྔ། །ཐབས་ལྡན་སྔགས་ལ་གྲོགས་ཀྱི་མཆོག། ཅེས་སོ། །རྣལ་འབྱོར་ལའང་། མཚན་ཉིད་དུ། མཉམ་གཞག་ནམ་མཁའ་དང་། རྗེས་ཐོབ་སྒྱུ་མར་ལམ་བྱེད་དམིགས་པ་དང་བཅས་ཏེ། སྔགས་ལ་བསམ་འདས་ལྷུན་གྲུབ་ཆེན་པོར་ལམ་དུ་བྱེད་པ་དང་། རང་གཞན་གྱི་དོན་བྱ་བ་ལའང་། མཚན་ཉིད་དུ་ཐབས་བསམ་གྱིས་མི་ཁྱབ་པའི་སྤོ་ཉུར་ལ། སྔགས་ལས་ཆར་དབབ་པས་མུ་གེ་གཅོད་པ་དང་། རྣལ་འབྱོར་གྲུབ་པས་ཟས་སྐོམ་ནོར་བུ་ལ་སོགས་པའི་ཆར་འབེབས་པ་དང་། དབང་དུ་བྱེད་པ་དང་། ནད་འཁྲུག་ཞི་བ་ལ་སོགས་པས་ཡུལ་འཁོར་དང་གྲོང་ཁྱེར་ཙམ་བཀྲ་ཤིས་པར་བྱེད་པའོ། །དགོས་པའང་།
མཚན་ཉིད་དུ་རྒྱུ་ལས་འབྲས་བུ་བསྐྱེད་པ་ཙམ་ལས་མེད་ལ། སྔགས་སུ་ཐུགས་ཀྱི་གསང་བ་ལམ་དུ་བྱེད་པ་དང་། དེ་བཞིན་དུ་གསུང་དང་སྐུ་ཡང་ལམ་དུ་བྱེད་པས་དང་། བྱ་དཀའ་བ་མེད་པ་སྟེ། སྔ་འགྱུར་རྟ་མཆོག་དྲེགས་པ་དཔའ་འདུས་ཀྱི་རྒྱུད་ལས། འབྲས་བུའི་ཐེག་ཆེན་གསང་སྔགས་འདི། །ཁྱད་པར་གྱུར་ཕྱིར་ཁྱད་པར་ཆེ། ཐབས་མང་དཀའ་བ་མེད་པ་དང་། །དབང་པོ་རྣོན་པོའི་མཆོག་གྱུར་དང་། །དོན་གཅིག་ཕྱིར་མའང་མ་རྨོངས་པས། །སྔགས་ཀྱི་ཐེག་པ་ཁྱད་པར་འཕགས། །འབྲས་བུ་ཉིད་དུ་ལམ་ཤེས་པས། །ཚེ་ལུས་གཅིག་ལ་རྫོགས་སངས་རྒྱས། །ཞེས་སོ། །ཚོགས་གསོག་གི་ཁྱད་པར་ལའང་། མཚན་ཉིད་དུ་ཕར་ཕྱིན་དྲུག་ལ་སོགས་སྤྱོད་པ་དག་པ་ཙམ་སྟེ། སྔགས་སུ་སྣང་སྲིད་སངས་རྒྱས་ཀྱི་ཞིང་དུ་དག་པ་དང་། ཉོན་མོངས་པ་དང་། འདོད་ཡོན་གྱི་ཚོགས་མཆོད་པའི་ཕྱག་རྒྱར་ཤེས་པ་ལ་སོགས་ཏེ་ཁྱད་པར་རྣམ་པ་བཅོ་ལྔས་འཕགས་པའི་ཚུལ་མགོན་པོ་རྡོ་རྗེ་འཆང་གིས། ཉན་ཐོས་ལ་སོགས་ཐེག་ཆུང་ལ། མན་ངག་ཡོད་པ་མ་ཡིན་ཏེ། །ལྟ་བ་སྤྱོད་པ་སེམས་བཟུང་དང་། །རྒྱུ་དང་ལམ་དང་འབྲས་བུ་ས། །དུས་དང་ལོངས་སྤྱོད་རྣལ་འབྱོར་དང་། །བདག་གཞན་དོན་དང་དགོས་པ་དང་། །ངལ་དུབ་མཐའ་སྤངས་ཚེགས་ཆུང་དང་། །ཚོགས་བསགས་པ་ཡི་ཁྱད་པར་དང་། །ཁྱད་པར་རྣམ་པ་བཅོ་ལྔ་ཡིས། །རིག་འཛིན་ཐེག་པ་ཁྱད་པར་འཕགས། །ཞེས་དང་། ཡེ་ཤེས་གྲུབ་པ་ལས། རྒྱུ་ཡི་ཐེག་པ་ཆེན་པོ་ལས། །སྐུ་གསུང་ཐུགས་ཀྱི་ལམ་རྣམས་ཀྱི། །གསང་བ་ཆེ་ལས་གསང་སྔགས་མཆོག། རབ་ཏུ་འཕགས་པར་རིག་པར་བྱ། །ཞེས་པ་ནི་སྐུ་གསུང་ཐུགས་གསང་བ་བསམ་གྱིས་མི་ཁྱབ་པའི་གནས་བླ་ན་མེད་པས་འཕགས་པ་ཉིད་ཀྱི་ཆིངས་ཆེན་པོ་བསྟན་པ་ཡིན་ནོ། །གཉིས་པ་གསང་སྔགས་ཀྱི་རྣམས་པ་གཞག་པ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་གསང་སྔགས་ཀྱི་སྤྱིའི་རང་བཞིན་ལ་བཞི། མཚན་གཞི། མཚན་ཉིད། སྒ་དོན། མིང་གི་རྣམ་གྲངས་སོ། །
དང་པོ་ནི། གདོད་ནས་རང་བཞིན་གྱི་འོད་དུ་གསལ་བའི་བདག་ཉིད་སྐུ་དང་ཡེ་ཤེས་འདུ་འབྲལ་མེད་པའི་ཆོས་ཉིད་པ། ལམ་གྱི་བྱ་བས་སྤྱང་གཞི། སྦྱང་བྱ། སྤྱོང་བྱེད། སྦྱངས་འབྲས་བཞིར་གནས་ཏེ། དབྱིངས་བདེ་གཤེགས་སྙིང་པོ་འོད་དུ་གསལ་བའི་ཆོས་ཉིད་ནི་སྤྱང་གཞི་ཡིན་ལ། གློ་བུར་གྱི་སྒྲིབ་པ་ལས་དང་ཉོན་མོངས་པ་འཁོར་བའི་ཆོས་ཀུན་གཞི་ཚོགས་བརྒྱད་དང་བཅས་པ་ནི་སྤྱང་བྱ་སྟེ། དེའང་བག་ཆགས་སྣ་ཚོགས་པའི་ཀུན་གཞི་ནི་འཁོར་བའི་རྩ་བ་ཡིན་པས་ལྡོག་ལ། བཞུགས་ཚུལ་གཤིས་ཀྱི་ཀུན་གཞི་ནི་ངོ་བོ་མི་ལྡོག་ཀྱང་། ཐ་སྙད་དུ་གཏགས་པའི་ཀུན་གཞིའི་མིང་གིས་ཆ་དེ་ལོག་ནས་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བར་གནས་འགྱུར་བའོ། །དེ་བཞིན་དུ་རྣམ་ཤེས་གཞན་རྣམས་ལྡོག་པའི་ཆ་ལས་མེ་ལོང་ཡེ་ཤེས་ལ་སོགས་པའི་ལྷག་མ་བཞི་འཆར་བ་ཡིན་ནོ། །སྨིན་གྲོལ་གྱི་ལམ་རྒྱ་མཚོ་ལྟ་བུས་ཡེ་ཤེས་ཀྱི་ཡོན་ཏན་གསར་དུ་འཐོབ་པ་ནི་སྦྱོང་བྱེད་ཀྱི་ཆོས་སོ། །དེ་ལྟར་སྦྱངས་པས། དབྱིངས་ལ་སྒྲིབ་བྱེད་ཀྱི་རྣམ་པ་ཐམས་ཅད་དག་ནས་ཁམས་བྱང་ཆུབ་ཏུ་གྱུར་ཏེ་སྐུ་དང་ཡེ་ཤེས་ཀྱི་བདག་ཉིད་ཅན་མངོན་དུ་གསལ་ནས་དོན་གཉིས་མཐར་ཕྱིན་པ་ནི་སྦྱངས་པའི་འབྲས་བུ་ཡིན་ནོ། །དེ་སྐད་དུ་གསང་བ་གྲུབ་པ་ལས། དབྱིངས་ལ་བྲལ་བ་དག་ཐོབ་འབྲས། །གསང་སྔགས་རྣམ་པ་བཞིར་བཤད་དོ། །ཞེས་སོ། །གཉིས་པ་ནི། དབྱིངས་རང་བཞིན་གྱིས་དག་ཅིང་མ་འགགས་བརྗོད་བྱེད་ཐུགས་རྡོ་རྗེའི་གསང་བ་ཆེན་པོ་སྟེ། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་སོ། །གསུམ་པས་གཉིས། སྒྲ་དོན་སྤྱིར་བཤད་པ་དང་། རྒྱུད་ཀྱི་ངེས་ཅོག་བྱེ་བྲག་ཏུ་བཤད་པའོ། །དང་པོ་ནི། ལེགས་སྦྱར་གྱི་སྐད་དུ་མནྟྲྭ་ཞེས་འབྱུང་བས་གསང་སྔགས་སམ་སྔགས་ཞེས་བྱ་སྟེ། དེའང་ཡི་གེ་བསྣན་དགོད་ཀྱི་སྒྲ་ལས་དྲངས་ན་མན་ཡིད་དང་། ཏྲ་ཡ་སྐྱོབ་པའོ། །ཡིད་དང་ཉོན་མོངས་པའི་
ཕྱོ་ནས་ཡེ་ཤེས་སུ་བསྒྱུར་བས་བདག་ཏུ་ལྟ་བ་ལ་སོགས་ཏེ་མི་མཐུན་པའི་ཕྱོགས་ལས་སྐྱོབ་ཅིང་རྒྱལ་བར་བྱེད་པའི་དོན་ཏེ། གསང་བ་འདུས་པའི་རྒྱུད་ཕྱི་མ་ལས། ཡིད་དེ་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བ། །ཞེས་སོ། །གཉིས་པ་ནི། སྐད་བྱེ་བྲག་ཏུ་རྟོགས་པར་བྱེད་པ་འབྲིང་པོ་ལས། རྟནྟྲ་པྲ་ནནྡྷར་ཞེས་པས་རྒྱུན་ཆགས་པའི་མིང་དུ་བཤད་དེ། རྡོ་རྗེ་རྩེ་མོ་ལས་ཀྱང་། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བརྒྱུད་དུ་འདོད་པ་སྟེ། །མྱ་ངན་འདས་པ་རྒྱུད་ཁྱིམ། །ཞེས་པས་བརྗོད་བྱ་དོན་གྱི་དབང་དུ་རྒྱུད་དང་། ཐབས་དང་། འབྲས་བུའི་གནས་སྐབས་ཐམས་ཅད་དུ་འབྲེལ་ཞིང་རྒྱུན་ཆགས་པ་གཉིས་སུ་མེད་པའི་ཡེ་ཤེས་སོ། །བཞི་པ་ནི། རིག་པ་འཛིན་པའི་སྡེ་སྣོད་དམ། གསང་སྔགས་ཀྱི་ཐེག་པ། རྡོ་རྗེའི་ཐེག་པ། འབྲས་བུའི་ཐེག་པ་ཞེས་པའི་མཚན་གྱི་རྣམ་གྲངས་སུ་ངེས་པ་སྟེ། ཉོན་མོངས་པ་ལ་སོགས་སྤང་བྱ་གནས་སུ་དག་པ་དང་། བསྒྲུབ་བྱ་ཐོབ་པའི་ཐབས་ལ་ཆེད་དུ་བསྔགས་པ་སྟེ། རིག་པ་མཆོག་པས། དག་ཐོབ་ཡང་དག་སྦྱོར་བ་ལ། །མཆོག་ཏུ་བསྔགས་པས་སྔགས་ཞེས་བརྗོད། །ཅེས་སོ། །གཉིས་པ་བྱེ་བྲག་ཏུ་བཤད་པ་ལ་གཉིས། ཕྱི་འགྱུར་གསར་མའི་རྣམ་གཞག་དང་། སྔ་འགྱུར་རྙིང་མའི་རྣམ་གཞག་གོ། །དང་པོ་ནི། གཞན་དུ་རྒྱ་ཆེར་བཀྲལ་བས་འདིར་དངོས་ཀྱིས་མ་བཤད་ལ། འོན་ཀྱང་ཕྱི་མའི་ཤུགས་ལས་རྟོགས་པར་འགྱུར་རོ། །གཉིས་པ་གསང་སྔགས་རྙིང་མའི་རྣམ་པར་གཞག་པ་ལ། རྣམ་དབྱེ་སྤྱིར་བསྟན་པ་དང་། གསང་སྔགས་བྱེ་བྲག་ཏུ་བཤད་པ་གཉིས་ལས། དང་པོ་ནི། ཐེག་པའི་རིམ་པ་དང་སྦྱར་ན་དགུ་སྟོ། །སྒྱུ་འཕྲུལ་རྩ་རྒྱུད་ལས། །འདུལ་བ་མདོ་སྡེ་ཆོས་མངོན་དང་། །དམ་ཚིག་བསྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཅེས་རྒྱུའི་ཐེག་པ་གསུམ་དང་། འབྲས་བུའི་ཐེག་པ་དྲུག་ཏུ་སྟོན་པས་ཆོས་ཀྱི་འཁོར་ལོ་བསྐོར་ཏེ་ཅོག་
ཐམས་ཅད་བསྡུས་ཏེ་བསྟན་པ་ཡིན་ནོ། །དེ་ཡང་ཞི་བ་བརྩེགས་ཀྱི་དབང་དུ་ན་སྒྲ་ཐལ་འགྱུར་ལས། གསུངས་ཚུལ་དགོངས་པ་གསུམ་དང་བཅས། །གཉེན་པོ་བསྡུད་དབང་པོའི་དོན། །ཚིག་རྣམས་བསྡུས་ཏེ་སྣང་བར་བྱས། །དེ་མ་ཡིན་པ་བརྗོད་པའི་ཚིག། །དུས་གསུམ་རྒྱལ་བས་གསུང་བ་མེད། །ཅེས་པས་གཉེན་པོ་ལ་དགོངས་ཏེ་གསུངས་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི། བསྡུ་བ་ལ་དགོངས་ཏེ་གསུངས་བ་ཟབ་ཅིང་རྒྱ་ཆེ་བ་རྡོ་རྗེ་ཐེག་པ། དབང་པོ་ལ་དགོངས་ཏེ་གསུངས་པ་འཇིག་རྟེན་པའི་ཐེག་པ་གཉིས་དང་། །འདས་པའི་གསུམ་སྟེ་དེ་དག་གི་མདོ་དོན་འཁོར་འདས་མ་ལུས་པ་ཐེག་བ་ཉིད་ཀྱི་རིམ་པའི་ཁང་པ་ལ་བཀྲི་བའི་རྣམ་པར་གཞག་པ་མཐའ་ཡས་པ་ཡོད་དེ་རེ་ཞིག་ཡི་གི་ཉུང་ངུའི་ཕྲག་པ་ལ་འདྲེན་བར་མ་བཟོད་དོ།། །།གཉིས་པ་གསང་སྔགས་ཀྱི་རང་བཞིན་བྱེ་བྲག་ཏུ་བཤད་པ་ལ་གཉིས། ཕྱི་ཐུབ་པ་རྒྱུད་ཀྱི་ཐེག་པ་དང་། ནང་ཐབས་ཀྱི་རྒྱུད་ཀྱི་ཐེག་བའོ། །དང་པོ་ནི། གཙང་སྦྲ་ལ་གནས་ཤིང་སྒོ་གསུམ་གྱི་བྱ་བ་དང་བྱེད་པ་གཙོ་བོར་འདོན་པས་སྤྲུལ་སྐུའི་ཐེག་པ་ཆུང་ངུ་གསུམ་དང་ཆོས་མཐུན་བའི་ཕྱིར། ཕྱི་ཐུབ་བ་ཞེས་བསྟན་ལ། གསང་སྔགས་ཀྱི་ཁོངས་སུ་གཏོགས་པའི་ཆོས་ཆེན་པོར་གྱུར་པ་གཞི་དང་། ལམ་དང་། འབྲས་བུའི་རྣམ་གཞག་ཟམ་མཆད་པས་རྒྱུད་དུ་བཞག་པ་ཡིན་ནོ། །དབྱེ་ན་གསུམ། ཀྲཱི་ཡ། ཨུ་པ། ཡོ་གའོ། །དང་པོ་ལའང་སྒྲ་དོན། གྲུབ་མཐའ། ལམ། འབྲས་བུ་དང་བཅས་པ་བཞིས་སྟོན་པ་ལས། དང་པོ་སྒྲ་དོན་ནི། ཀྲཱྀ་ཡ་སྟེ་ལུས་ངག་གི་བྱ་བ་གཙོ་བོ་བྱེད་པའི་དོན་ལ་ཏནྟྲ་སྟེ་རྒྱུད་སྡེ་འབྲེལ་བ་ཅན་དུ་བྱུང་བའི་དོན་ཏོ། །གཉིས་པ་གྲུབ་མཐའ་ནི། ཀུན་རྫོབ་འཁྲུལ་བར་སྣང་བ་འདི་དག་ནི་སྦྱང་བྱའི་དྲི་མ། དོན་དམ་མ་འཁྲུལ་བའི་དབྱིངས་ཀྱི་རང་བཞིན་སྦྱང་གཞི་བདེན་པར་བྱེད་མེད་ལ་འཇུག་པའི་ངོ་བོ་རྟོགས་བྱའི་གཞིར་བྱས་ནས་དབྱིངས་རང་བཞིན་གྱིས་དག་པའི་ལྷ་ཁས་ལེན་ཏོ། །གསུམ་པ་ལམ་ལ། སྣང་ཆ་ཀུན་རྫོབ་པ་
ཐམས་ཅད་ལྷ་དྲུག་གི་རང་བཞིན་དུ་ཤེས་པས། ཡི་དམ་གྱི་ལྷ་ཡེ་ཤེས་སེམས་དཔའ་རྗེ་དང་། བདག་དམ་ཚིག་སེམས་དཔའ་ཁོལ་གྱི་ཚུལ་དུ་བསྒྲུབ་ཅིང་། དོན་དམ་པར་མ་སྐྱེས་པའི་ཆོས་ཉིད་འོད་གསལ་བ་ལ་འཇུག་གོ། །ལྷ་དྲུག་ནི་སྣང་ཙམ་ལྷའི་སྐུ་སྒྱུ་མར་གསལ་བས་གཅིག་དང་དུ་མའི་མཐའ་ལ་མི་གནས། གསུང་ཡིག་འབྲུ་ལྷའི་སྒྲར་གསལ་བས་གྲག་སྟོང་བཟླས་པའི་འཁོར་ལོ། །ཐུགས་ཕྱག་མཚན་ལ་དམིགས་པས་དྲན་བསམ་ཏིང་འཛིན་གྱི་ལྷར་གསལ། འཕྲོ་འདུ་སྐུ་མདོག་ཏུ་གསལ་བས་འོད་ཀྱི་ལྷར་གྲོལ། གསལ་བ་བཞུགས་ཚུལ་གྱི་ལྷ་གདན་ཁྲི་ཆ་ལུགས་སུ་གསལ་བས་གཞལ་ཡས་ཁང་དུ་གྲོལ། གྲོལ་བ་ཡེ་ཤེས་ཀྱི་ལྷ་སྣང་སྲིད་ཆོས་སྐུར་གསལ་བས་སྤང་བྱ་ཡེ་ཤེས་སུ་གྲོལ། མདོར་ན་ཡུལ་དྲུག་ལ་མངོན་པར་ཞེན་པ་དྲུག་སྦྱང་ཞིང་། སྣང་བ་གཟུགས་ཀྱི་ལྷ་ལ་སོགས་པ་དྲུག་ཏུ་ཤེས་པས་ཉོན་མོངས་པ་སྦྱོང་བར་བྱེད་དོ། །བཞི་པ་འབྲས་བུ་ནི། གནས་སྐབས་སུ་ལྟ་བ་དང་ཏིང་ངེ་འཛིན་གྱི་ཡོན་ཏན་གོང་ནས་གོང་དུ་འགྲོལ། མཐར་ཐུག་མི་ཚེ་བཅུ་དྲུག་ན་ལྷ་དང་གཉིས་སུ་མེད་པར་སངས་རྒྱས་པར་འདོད་དེ། རྡོ་རྗེ་ལྷུན་པོ་ལས། གང་དག་སྔགས་པ་སྐལ་བཟང་ཆེ། །གཙང་སྦྲ་དག་པས་དག་བརྩོན་པ། །དེ་ཚེ་བཅུ་དྲུག་སྐྱེ་བ་ན། །རྣམ་གྲོལ་ཡེ་ཤེས་མཆོག་ལ་རེག། ཅེས་སོ། །དེའང་ལུས་ཀྱི་བྱ་བ་ཁྲུས་ཆེན་པོ་གསུམ། ཕྲ་མོའི་་ཁྲུས་དང་བཅས་པ་དང་། གོས་གསུམ་བརྗེ་བ་དང་། ཟས་གསུམ་ཟ་བ་དང་། སྨྱུང་བར་གནས་པ་དང་། གཙང་སྦྲ་དང་། དཀའ་ཐུབ་དང་། འདུག་སྟངས་ཀྱི་ཁྱད་པར་དང་། ཕྱག་རྒྱ་འཆིང་བ་ལ་སོགས་པའི་སྒོ་ནས། ངག་གི་བྱ་བ་བཟླས་བརྗོད་གཙོ་བོར་བྱ་བ་དང་། སེམས་ཀྱི་གནད་བདག་དྲན་དང་། ལྷ་རྗེ་དཔོན་དུ་བལྟ་བའི་སྒོ་ནས་བསྒྲུབ་པའོ། །དེ་དག་གི་རྒྱུད་སྡེའི་རྣམ་གྲངས་ཀྱང་། བསྟན་པ་སྔ་དར་གྱི་ཚེ་པཎྜི་ཏ་མཁན་པོ་ཞིབ་འཚོ་དང་། སློབ་དཔོན་པདྨ་འབྱུང་གནས་དང་། བི་མ་ལ་མི་ཏྲ་ལ་སོགས་པ་དང་། ལོ་ཙཱ་བ་བཻ་རོ་ཙ་ན་དང་། གཉགས་ཛྙཱ་ན་ཀུ་མཱར་དང་།
རྨ་རིན་ཆེན་མཆོག་དང་། ཨཱ་ཙཱརྱ་ཡེ་ཤེས་དབྱངས་ལ་སོགས་པས་ཕྱི་ནང་གི་རྒྱུད་སྡེ་མང་དུ་བསྒྱུར་བ་ལ། དང་པོ་བྱ་རྒྱུད་ཀྲཱི་རྒྱུད་དྲུག་ལ། རིག་སྔགས་ཐམས་ཅད་ཀྱི་ཁོག་འབུབས་པ་དཔུང་པ་བཟང་པོའི་རྒྱུད། རིག་སྔགས་ཐམས་ཅད་ཀྱི་དབང་བསྐུར་བ་ལག་ན་རྡོ་རྗེ་དབང་བསྐུར་བའི་རྒྱུད། རིག་སྔགས་ཐམས་ཅད་ཀྱི་གསང་བ་བསྟན་པ་རིག་པ་མཆོག་གི་རྒྱུད། རིག་སྔགས་ཐམས་ཅད་ཀྱི་འདུལ་བ་བསྟན་པ་སུ་སི་ཏི་ཀར་ལེགས་པར་གྲུབ་པའི་རྒྱུད། རིག་སྔགས་ཐམས་ཅད་ཀྱི་ཕྲིན་ལས་སྟོན་པ་ཁམས་གསུམ་རྣམ་པར་རྒྱལ་བའི་རྒྱུད། རིག་སྔགས་ཐམས་ཅད་ཀྱི་དགོངས་པ་སྟོན་པ་བསམ་གཏན་ཕྱི་མའི་རྒྱུད་དོ། །བྱེ་བྲག་གི་རྒྱུད་ལ་རིགས་གསུམ་གྱི་སྤྱན་རས་གཟིགས་ཀྱི་སྐོར་ལ། པདྨ་རྩེ་མོ་སྔགས་ཀྱི་རྒྱུད། པདྨ་ཅོད་པན་གྱི་རྒྱུད། ཆོ་ག་སྔགས་ཀྱི་རྒྱུད། ཡིད་བཞིན་ནོར་བུའི་རྒྱུད། ཨ་མོ་གྷ་བཱ་ཤའི་རྒྱུད། གནོད་སྦྱིན་གར་མཁན་གྱི་རྒྱུད། ཁ་འབར་མ་དབུགས་དབྱུང་བའི་རྒྱུད། ནམ་མཁའ་མཛོད་ཀྱི་རྒྱུད་ལ་སོགས་པའོ། །འཇམ་དཔལ་གྱི་སྐོར་ལ། འཇམ་དཔལ་ཡེ་ཤེས་སེམས་དཔའ་དྲི་མ་མེད་པའི་རྒྱུད། འཇམ་དཔལ་རྣོན་པོ་སྒྲིབ་པ་མེད་པའི་རྒྱུད། འཇམ་དཔལ་དྲཱ་བ་སྤྱོད་པའི་རྒྱུད། བསྟོད་པ་གླུར་བླངས་པའི་རྒྱུད་ལ་སོགས་པའོ། །ཕྱག་ན་རྡོ་རྡོ་སྐོར་ལ། ཕྱག་ན་རྡོ་རྗེ་དབང་བསྐུར་བའི་རྒྱུད། རྡོ་རྗེས་འོག་གོ་རྒྱུད། དྲག་པོ་གསུམ་འདུལ་གྱི་རྒྱུད། རྡོ་རྗེ་བེ་ཅོན་གྱི་རྒྱུད། རྡོ་རྗེ་རྣོན་པོའི་རྒྱུད་ལ་སོགས་པའོ། །ལས་ཕྲན་ཚེགས་ཀྱི་རྒྱུད་ལ། གཟུངས་གྲྭ་ལྔ་དང་། འོད་ཟེར་ཅན་དང་། རྣམ་པར་རྒྱལ་མ་དང་། མཛོད་སྤུ་ནོར་བུ་ལ་སོགས་པའི་གཟུངས་ཕྲན་དཔག་ཏུ་མེད་པའོ། །གཉིས་སྦྱང་བའི་རྒྱུད་ནི་ཨུ་པ་ཡ་ཏནྟྲ་ཞེས་སྒྲ་དོན་གྲུབ་སྟེ། སྤྱོད་པ་ཀྲཱི་ཡ་ལྟར་གཙང་སྒྲ་དག་པར་སྤྱོད་ཅིང་། རྣལ་དུ་འབྱོར་བ་ཡོ་གའི་ལུགས་སུ་སྤྱོད་བསམ་ནི་ང་གི་ཐེག་པ་ཞེས་ཀྱང་བྱ་སྟེ། གཞི་ཁམ་འབྲས་བུའི་གྲུབ་པའི་
མཐའ་རྣལ་འབྱོར་རྒྱུད་དུ་རིགས་གཅིག་པར་སྟོན་ཏོ། །སྒོམ་པ་ལྷའི་རྣལ་འབྱོར་ནི། རང་དམ་ཚིག་པའི་མདུན་དུ་ལྷ་ཡེ་ཤེས་སེམས་དཔའ་སྤུན་ནམ་གྲོགས་ལྟར་བསྒོམས་པས་སྐྱེ་བ་བདུན་ཚུན་ཆད་དུ་དངོས་གྲུབ་ཐོབ་པའོ། །རྒྱུད་སྡེའི་ངེས་འབྱེད་ལ། རྣམ་སྣང་མངོན་བྱང་། མེ་ཀློང་འབར་བ། དབང་བསྐུར་བའི་རྒྱུད། རྣམ་པར་མི་རྟོག་པའི་རྒྱུད་ལ་སོགས་པའོ། །གསུམ་པ་རྣལ་འབྱོར་གྱི་རྒྱུད་ནི། ཡོ་ག་ཏནྟྲ་ཞེས་སྒྲ་དོན་གྲུབ་སྟེ། སྤྱིར་ལུས་ངག་གི་བྱ་བ་གཙོ་བོར་མི་སྟོན་ལ། སེམས་ཀྱི་བྱ་བ་གཙོ་བོར་སྟོན་པ་སྟེ། དེའང་ཀུན་རྫོབ་ཏུ་ལྷའི་དཀྱིལ་འཁོར་ཡོངས་སུ་རྫོགས་པའམ། དཔལ་མཆོག་གཅིག་པུ་ཉིད་ལ། རང་ཉིད་དམ་ཚིག་སེམས་དཔའ་ལ་ལྷ་ཡེ་ཤེས་་སེམས་དཔའ་འོག་མིན་ནམ་རང་བཞིན་ཀྱ་གནས་ནས་སྤྱན་དྲངས་པ་བསྟིམ་སྟེ། འཕྲོ་འདུ་འོད་ཀྱི་དྲ་བ་ལ་སེམས་བཟུང་ནས། རྗེས་ལ་ཡེ་ཤེས་པ་གཤེགས་པར་བྱེད་དོ། །བརྟུལ་ཞུགས་དེས་མི་ཚེ་གསུམ་ན་གྲོལ་བའོ། །དབྱེ་ན་མངོན་བྱང་ལྔ་ལ་བརྟེན་ནས་ཏིང་ངེ་འཛིན་གཙོ་བོར་བྱེད་པ་དང་། ཆོ་ག་ཞིབ་མོ་དང་ཐོར་བུའི་ལས་གཙོ་བོར་བྱེད་པའི་ལུགས་གཉིས་སོ། །རྒྱུད་སྡེའི་ངེས་འབྱེད་ལ། རྡོ་རྗེ་དབྱིངས་རྩ་བའི་རྒྱུད་སྟོང་ཕྲག་ལྔ་པ་ལེ་ལག་དང་བཅས་པ། པ་ཤ་ཀཱར་རྡོ་རྗེ་རྩེ་མོའི་རྒྱུད། པདྨ་ཀཱ་ར་དཔལ་མཆོག་དང་པོའི་རྒྱུད། ས་མུ་ཙ་ལ་རྟོགས་པ་བསྡུས་པའི་རྒྱུད་དེ་གཞུང་ཆེན་པོ་བཞི། ཡུལ་ཏནྟྲ་ངན་སོང་སྦྱོར་བ། དཔལ་མཆོག་བསྡུས་པ་ལ་སོགས་པའོ། །ཕྱི་རྒྱུད་སྡེ་གསུམ་ནི་དབང་པོ་འབྲིང་པོ་ཚེ་རབས་ཀྱི་གྲོལ་བ་བསྒྲུབ་བའོ། །གཉིས་པ་ནང་པ་ཐབས་ཀྱི་རྒྱུད་གསུམ་ནི། གསང་བ་འདུས་པ་ལས། དཀའ་ཐུབ་སྡོམ་པ་མི་ཟད་པ། །བསྒྲུབས་ཀྱང་གྲུབ་བར་མི་འགྱུར་ཏེ། །འདོད་པའི་ཡོན་ཏན་ཐམས་ཅད་ལ། །བརྟེན་ནས་དངོས་གྲུབ་ཐོབ་བར་འགྱུར། །ཅེས་པ་ལྟར། དབང་ཕྱུག་བརྒྱད་ལྡན་གྱི་བདེ་བ་ཆེན་པོའི་ཡེ་ཤེས་ཏེ། ཕྱི་བས་སྤང་བྱར་བྱས་པ་ཐམས་ཅད་ནང་པས་བླང་དོར་མེད་པར་སྤྱོད་ནུས་པའི་ཕྱིར་ཐབས་ཀྱི་ཐེག་པ་ཞེས་བྱ་སྟེ། འཁོར་ལོ་སྡོམ་པ་
ལས། ཕྲ་ཞིང་ཕྲ་ལ་ཕྲ་བར་ནུས་པ་དང་། །སྤྱོད་པ་ནུས་དང་བདག་ཉིད་ཆེན་པོ་དང་། །དགའ་མགུར་བྱེད་དང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་དོན་བརྒྱད་དོ། །ཞེས་པས་སྤྱིར་བསྟན་ལ། བྱེ་བྲག་གི་ངོས་འབྱེད་རང་རང་གི་ཐད་ཀར་ཡོད་དོ། །དེའང་ཞེ་སྡང་ཤས་ཆེ་ཞིང་རྟོག་པ་མང་བ་ལ་སྣང་བ་ཐབས་ཀྱི་རང་བཞིན་ཕའི་རྒྱུད་མ་ཧཱ་ཡོ་ག་བསྟན་ལ། འདོད་ཆགས་ཤས་ཆེ་ཞིང་རྟོག་པ་ཉུང་བ་ལ་སྟོང་པ་དེ་ཁོ་ན་ཉིད་ཀྱི་རྫོགས་རིམ་ཤེས་རབ་མའི་རྒྱུད་ཨ་ནུ་ཡོ་ག་བཤད་ཅིང་། གཏི་མུག་ཤས་ཆེ་ཞིང་བྱ་རྩོལ་ཅན་ལ་གཉིས་སུ་མེད་པའི་རང་བཞིན་ཨ་ཏི་ཡོ་ག་གསུངས་པའོ། །ནང་རྒྱུད་དེ་གསུམ་ནི་སྤྱི་ཚན་དུ་ཆོས་རྣམས་མ་ལུས་པའི་གཞི་དང་། ལམ་དང་། འབྲས་བུའི་བདག་ཉིད་དུ་གནས་པ་སྟེ། སེང་གེ་རྩལ་རྫོགས་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །ལུང་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་པ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་སོ། །དེ་ལ་དང་པོ་མ་ཧཱ་ཡོ་ག་ལ་གསུམ། ངོ་བོ། དབྱེ་བ། རྒྱུད་ཀྱི་ངེས་འབྱེད་དོ། །དང་པོ་ནི། མ་ཧཱ་ཡོ་ག་ཏནྟྲ་སྟེ་རྣལ་འབྱོར་ཆེན་པོ་ཐབས་ཀྱི་རྒྱུད་དུ་གྲགས་སོ། །ཇི་ལྟར་ན་སྣང་ཞིང་སྲིད་པས་བསྡུས་སོ་ཅོག་ཐམས་ཅད་ལྷའི་རྟེན་དང་བརྟེན་པར་གསལ་ཞིང་། ཕུང་ཁམས་སྐྱེ་མཆེད་ལྷའི་རང་བཞིན་དུ་དག་པས། རླུང་ལྔའི་ཁམས་བདེ་གསལ་མི་རྟོག་པའི་ཡེ་ཤེས་གཉིས་མེད་ལམ་དུ་བྱས་པས་ཚེ་འདིར་གྲོལ་བར་འདོད་པའོ། །དབྱེ་ན་གསུམ། གཞི་ལམ་འབྲས་བུ་གཙོ་བོར་འདོད་པ་དང་། ཐབས་ལམ་སྒྲུབ་པ་གཙོ་བོར་འདོད་པ་དང་། སྣ་ཚོགས་ལམ་གྱུར་གཙོ་བོར་འདོད་པའོ། །དང་པོ་ནི། རང་བཞིན་གཞིའི་རྒྱུད་སེམས་ཉིད་འོད་གསལ་བ་དེ་མཚོན་བྱེད་མིང་ཚིག་ཡི་གེར་སྣང་བས་རྟོགས་པར་བྱས་ནས། སྨིན་གྲོལ་ལམ་གྱི་བསྐྱེད་རྫོགས་ལས་གཅིག་ཏུ་མི་གཡོ་བའི་དྲོད་ཀྱིས་ཡོན་ཏན་གོང་
ནས་གོང་མར་སྦྱར་ཏེ་འབྲས་བུ་རང་བྱུང་གི་ཡེ་ཤེས་བསྒྲུབ་བའོ། །གཉིས་པ་ནི། དཀྱིལ་འཁོར་ལྔ་གང་རུང་གི་སྒྲུབ་པ་ལ་བརྟེན་ནས་རྟོགས་པ་དང་ཏིང་ངེ་འཛིན་རྗེས་ལ་སྐྱེ་བའི་ཕྱིར་བསྒྲུབས་པ་ལས་དངོས་སྒྲུབ་འདོད་དེ། སྒྱུ་འཕྲུལ་དྲྭ་བ་སྐུའི་དཀྱིལ་འཁོར་ལམ་དུ་བྱེད་པ་དང་། པདྨ་སྒྱུ་འཕྲུལ་དྲྭ་བ་གསུང་། ཐུགས་ཁྲག་འཐུང་། ཡོན་ཏན་རིན་པོ་ཆེ། ཕྲིན་ལས་ཀྱི་དཀྱིལ་འཁོར་སྒྱུ་འཕྲུལ་དྲྭ་བ་བསྒྲུབ་པ་ལམ་དུ་བྱེད་པ་སྟེ། ལམ་བསྒྲུབས་པས་འབྲས་བུ་ཞོར་ལ་འདོད་པའོ། །གསུམ་པ་ནི། རྒྱུད་དང་། སྒྲུབ་པ་གཉིས་ལས། རྒྱུད་ལ་བསྐྱེད་རྫོགས་རིམ་ཅན་དང་། ཅིག་ཅར་དུ་འདོད་པ་གཉིས་ཀྱི་འབྲས་བུ་བསྒྲུབས་ནས་གཞི་ལམ་ཞོར་ལ་འདོད་པའོ། །སྒྲུབ་པ་ལ་གཉིས་ལས། སོ་ཏ་ནོ་པི་ཀ་སེམས་ཀྱི་རོལ་པར་ཐམས་ཅད་ཤེས་ནས་བསྒྲུབ་པ་དང་། མཎྜལ་ནོ་པི་ཀ་དཀྱིལ་འཁོར་དུ་འཇུག་པ་ཚོགས་གཙོ་བོར་བྱས་ཏེ་བསྒྲུབ་བའོ། །གསུམ་པ་རྒྱུད་ཀྱི་ངེས་འབྱེད་ནི། རྩ་བའི་རྒྱུད་དཔལ་གསང་བ་འདུས་པ་ནམ་མཁའ་དང་མཉམ་པའི་རྒྱུད། རི་རབ་ཟོམ་རྒྱ་མཚོ་དང་མཉམ་པའི་རྒྱུད། ཡེ་ཤེས་རྒྱས་པས་གཞི་དང་མཉམ་པའི་རྒྱུད་དོ། །མན་ངག་གི་རྒྱུད་ལ། བར་ཆད་སྲུང་བ་གཟི་ལྡན་འབར་བ་མཚམས་ཀྱི་རྒྱུད། རྔོམ་བྱེད་མེ་ལྟར་འབར་བའི་རྒྱུད། ཟ་བྱེད་རོལ་བ་སྦྱིན་སྲེག་གི་རྒྱུད། སྟོབས་པོ་ཆེ་ཡོངས་སུ་སྒྲོལ་བའི་རྒྱུད། ཟླ་གསང་ནག་པོའི་རྒྱུད། ཞིབ་ལྟ་རྒྱུད་ལ་སོགས་པའོ། །གཉིས་པ་ལུང་ཨ་ནུ་ཡོ་ག་ལ་གསུམ། ངོ་བོ། །དབྱེ་བ། ངེས་འབྱེད་ད། །དང་པོ་ནི་ཨ་ནུ་ཡོ་ག་ཏནྟྲ་སྟེ་དབྱིངས་བདེ་ཆེན་རྣལ་འབྱོར་གྱི་རྒྱུད་ཆེན་པོར་གྲགས་སོ། །དེ་ལ་སྣོད་བཅུད་ལྷའི་རང་བཞིན་དུ་དབྱིངས་ནས་སངས་རྒྱས་པར་སྟོན་པས་བསྐྱེད་པ་ཐབས་ཀྱི་ཆ་ཤས་ཆུང་ཞིང་། རྫོགས་པ་རྩ་ཐིག་རླུང་གི་ལས་ལ་རྣལ་དུ་འབྱོར་བས་བདེ་གསལ་མི་རྟོག་པའི་ཡེ་ཤེས་ལམ་དུ་བྱེད་པས་ཚེ་འདིར་གྲོལ་བར་འདོད་དོ། །གཉིས་པ་ནི། ལུང་དང་མདོ་གཉིས་ལས། ལུང་ལ་བསྟན་པའི་
ལུང་དབྱིངས་རང་བཞིན་གྱི་རྣམ་པར་དག་པ་དང་། ཡེ་ཤེས་འོད་དུ་གསལ་བའི་བདག་ཉིད་དོ། །བརྗོད་པའི་ལུང་ཚིག་གི་ཚོགས་དང་ཐ་སྙེད་ལས་ངེས་པར་བྱེད་པའོ། །མདོ་ལ་གཞི་ལམ་གྱི་གྲུབ་མཐའ་དབྱིངས་སུ་སྨྲ་བ་དང་། དེ་ལས་བདེ་སྟོང་དབྱིངས་དང་ཡེ་ཤེས་ཀྱི་རིམ་པ་ཅིག་ཅར་དུ་འདོད་པ་དང་། རིམ་གྱིས་འདོད་པ་དང་། ཐོད་རྒལ་དུ་འདོད་པ་དང་། མཐར་ཆགས་སུ་འདོད་པ་ལ་སོགས་པས་མཚན་ཉིད་དོན་གྱིས་ངེས་པ་ཐམས་ཅད་གཅིག་ཏུ་ཚོགས་པར་སྟོན་པའི་ཕྱིར་མདོ་ཡིན་ནོ། །གསུམ་པ་རིས་འབྱེད་ནི། སྒྱུ་འཕྲུལ་གཞི་ལམ་གྱི་ངོ་བོ་ཡེ་ཤེས་རྔམ་ཀློག། ཕུར་བུ་ཐལ་འབྱིན་གྱིས་དོན་གྱི་ངེས་པ་མཚོན་པ། དུར་ཁྲོད་ཁུ་བྱུག་རོལ་བས་ཡེ་ཤེས་ཐོད་རྒལ་དུ་སྨྲ་བ། ཕྱག་རྒྱ་དབྱེར་མེད་དུ་སྨྲ་བ་ཀུན་འདུས་རིག་པ། མངོན་རྟོགས་རང་གསལ་དུ་སྨྲ་བ་དབྱིངས་དང་ཡེ་ཤེས་ལྷུན་མཉམ་དུ་འདོད་པ་སངས་རྒྱས་ཐམས་ཅད་ཀྱི་དགོངས་པ་འདུས་པ། སེམས་དང་ཡེ་ཤེས་འབྱེད་པ་ཡི་གེ་རྣམ་དག་ལྟེ་ཕྱུགས་ཀྱི་མདོ་དྲུག་དང་། རྩ་བའི་རྒྱུད་ལ་ཐིག་ལེ་འདུས་པའི་རྒྱུད། སྒྱུ་མ་ཆེན་པོའི་རྒྱུད། ཟླ་གསང་ཐིག་ལེའི་རྒྱུད། རྡོ་རྗེ་གདན་བཞིའི་རྒྱུད་དོ། །གདམས་པ་མན་ངག་གི་རྒྱུད་ལ། སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུཎྜ་རི་ཀ། །ཡོན་ཏན་གྱི་རྒྱུད་ལྟ་མོ་གསང་བ། ཕྲིན་ལས་ཀྱི་རྒྱུད་རིག་འཛིན་འདུས་པ། རིག་སྔགས་སྤྱིའི་རྒྱུད་སྒྲུབ་པ་ཧེ་རུ་ཀའི་ཏནྟྲ། བྱེ་བྲག་གི་སྒྲུབ་པ་ལ། འཇམ་དཔལ་སྐུའི་རྒྱུད་ཟླ་གསང་ནག་པོ། པདྨ་གསུང་གི་རྒྱུད་རྟ་མཆོག་རོལ་བ། ཡང་དག་ཐུགས་ཀྱི་རྒྱུད་ཧེ་རུ་ཀ་གལ་པོ་ཆེ། ཕུར་བ་ཕྲིན་ལས་ཀྱི་རྒྱུད་ཀྱི་བྱི་ཏོ་མ་ལ་འབུམ་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་རོལ་བ་ཆེ་ཆུང་། མ་མོ་རྦོད་གཏོང་གི་རྒྱུད་མ་མོ་ཀུན་འདུས་སོ། །སྒྲུབ་པ་སྡེ་དྲུག་ལས་ཁ་ཚར་གྱི་རྒྱུད་ལ། ཕྲིན་ལས་ཁ་སྐོང་བ་ཆོས་ཉིད་གཏོར་མའི་རྒྱུད། ལས་རྒྱ་མཚོའི་ལྟར་བྱ་བ་
ཀརྨ་མཱ་ལེ་ཕྲིན་ལས་ཀྱི་རྒྱུད། བསོད་ནམས་དང་ཡེ་ཤེས་ཀྱི་ཚོགས་བསག་པ་ཚོགས་ཀྱི་རྒྱུད་ཆེ་ཆུང་། མཆོད་པ་མི་ཟད་པའི་གཏེར་དུ་བྱིན་གྱིས་བརླབས་པ་ནམ་མཁའ་མཛོད་ཀྱི་རྒྱུད། སྒྲོལ་བ་གནས་སུ་དག་པ་སྟོབས་པོ་ཆེ་ཡོངས་སུ་སྒྲོལ་བའི་རྒྱུད། སྦྱོར་བ་གནས་སུ་དག་པ་ཐིག་ལེ་གློང་གི་རྒྱུད། བརྟུལ་ཞུགས་དྲག་པོས་ཀུན་ཏུ་སྤྱོད་པ་གླང་པོ་ཆེ་རབ་འབོག་གི་རྒྱུད། ལས་བཞི་མཐར་ཕྱིན་པ་ཟ་བྱེད་རོལ་བ་སྦྱིན་སྲེག་གི་རྒྱུད། ལས་ཐམས་ཅད་ཀྱི་སྔོན་དུ་འགྲོ་བ་གཏོར་རྒྱུད་ཆེ་ཆུང་། བཀའི་འཁོར་ལྷག་མས་བསྐངས་ནས་ལས་ལ་བསྐུལ་བ་དཔལ་འབར་ཁྲོ་མོའི་རྒྱུད། གདུག་པ་ཅན་གཟིར་མནན་གྱིས་ཚར་བཅད་བཞིང་བཅུར་རོལ་བའི་རྒྱུད་ལ་སོགས་པའོ། །འདི་དག་གཙོ་ཆེ་ཆུང་གི་སྐེམས་སྐབས་འདིར་བཞག་པ་ལས། རང་བཞིན་དུ་བསྐྱེད་རྫོགས་གཉིས་ཀར་རྫོགས་པའི་མན་ངག་གི་རྒྱུད་དུ་བདག་ཅག་གི་བླ་མ་དམ་པ་པདྨ་ལས་གྲོལ་བཞེད་དོ། །གསུམ་པ་རྫོགས་པ་ཆེན་པོ་ཨ་ཏི་ཡོ་ག་ལ་གཉིས། འོག་མ་ལས་བྱང་བར་འཕགས་ཚུལ་དང་། །གྲུབ་པའི་མཐའ་བྱེ་བྲག་ཏུ་བསྟན་པའོ། །དང་པོ་ནི། ལྷུན་པོའི་རྩེ་ནས་རི་ཕྲན་མཐོང་བ་བཞིན་དུ་འོག་མ་ཐམས་ཅད་ཟིལ་གྱིས་གནོན་པའི་ཐེག་པ་ཡིན་ཏེ། །གདོད་ནས་རང་བཞིན་གྱིས་རྣམ་པར་དག་པའི་ཡེ་ཤེས་ཆེན་པོའི་ངོ་བོའི་བཞུགས་ཚུལ་ལ་བཅོས་བསྒྱུར་གྱི་གྲུབ་མཐས་མ་བསླད་པས་རྟེན་དང་བརྟེན་བཤད་མི་འགལ་བ་དང་། འོག་མ་རྣམས་སུ་རྣལ་མའི་དོན་ལ་བཅོས་མའི་རྩོལ་སྒྲུབ་ཀྱིས་བླང་དོར་བྱས་པས་རང་བཞིན་གྱིས་འོད་གསལ་བའམ། །རང་བཞིན་གྱིས་རྣམ་པར་དག་པ་ཞེས་སངས་རྒྱས་ཀྱི་གསུང་རབ་རྒྱ་མཚོར་བཞག་པ་དེ་རང་བཞིན་གྱིས་ངོ་བོ་ལས་གནས་འགྱུར་ཏེ། རྒྱ་མཚོ་ཆེན་པོ་རང་ས་ན་ཞི་ཞིམ་ལ་མལ་དུ་གྲོལ་ནས་ཡོད་པ། གནས་སྐབས་ལས་བྱུང་བའི་དུས་ཀྱི་ཆད་པས་འཁྱགས་རུམ་དུ་བསྡམས་པ་ལྟ་བུ་སྟེ། རྟོག་དཔྱོད་ཀྱི་རྐྱེན་གྱིས་དྲི་མ་མི་འགྱུར་ལ་ཡེ་ཤེས་འགྱུར་བའི་ཆུའི་བྱེད་ལས་སུ་མི་བཏུབ་པ་ལྟ་བུས་འོག་མ་རྣམས་ཀྱི་གྲུབ་མཐའ་ལ་
གནོད་བྱེད་འཇུག་སྟེ། རྡོ་རྗེའི་གནས་ཆེན་པོ་འདི་ནི་གཤིས་ཀྱི་བཞུགས་ཚུལ་ལམ་དུ་བྱེད་པའི་ཕྱིར་རོ། །འདིར་ཁ་མིག་དེ་ལྟ་ན་ཁམས་ཀྱི་དྲི་མ་བླང་དོག་གྱིས་སྦྱངས་ནས་སངས་རྒྱས་མི་འདོད་པས་ཐ་མལ་དང་ཁྱད་པར་ཅི་ཡོད། དེས་ནི་ཐབས་དང་སོ་སོར་རྟོག་པའི་ཤེས་རབ་གཉིས་ཀའང་སྡངས་པ་ཞིག་གོ་སྙམ་ན། ཐབས་ལ་སྐུར་བ་བཏབ་པ་མེད་དེ། རྡོ་ལ་གསེར་ཞུན་དུ། ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པོ་རྒྱ་མཚོའི་གཞིར་གྱུར་བ། ཞེས་དང་། རྟོག་དཔྱོད་ཀྱི་ཡེ་ཤེས་ལ་རེ་བའང་མ་ཡིན་པས། འདི་ལྟར་རང་བྱུང་གི་ཡེ་ཤེས་རྫོགས་པ་ཆེན་པོ་ལ་སངས་རྒྱས་ཀྱི་ཆེ་བའི་ཡོན་ཏན་ལྷུན་གྲུབ་ཏུ་ཡོད་པས་སྐུ་གསུམ་རང་ཆས་སུ་གནས་པ་ལོགས་ན་བཙལ་མི་དགོས་ཏེ། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས། །ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་སུ་མེད། །དེས་ན་སངས་རྒྱས་སེམས་ལས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལས་ལོངས་སྤྱོད་སྐུ། །སེམས་ལས་བྱུང་བའི་གཟུགས་རྣམས་ལ། །ལོངས་སྤྱོད་རྫོགས་ལ་སྐུ་གཞན་མེད། །སྤྲུལ་པའི་སྐུ་ནི་བྱང་ཆུབ་སེམས། །བྱང་ཆུབ་སེམས་ཀྱི་སྤྲུལ་པ་ལས། །འགྲོ་དོན་མཛད་པ་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དེ། །ཞེས་པས་བླང་དོར་གྱི་གནས་བཅོས་མའི་ཆོས་སུ་བསྟན་ལ། །མ་བཅོས་པ་ཉིད་ངོ་བོའི་དོན་མཐར་ཐུག་ལམ་ནོར་བ་ཡིན་པའི་ཚུལ། །དེ་ཉིད་ལས། སེམས་ནི་ཇི་བཞིན་པ་ཡི་དངོས་པོ་སྟེ། །ཆོས་རྣམས་ཐམས་ཅད་དེ་བཞིན་ཉིད་དུ་འགྲུབ། །ཇི་བཞིན་པ་ལ་འཆོས་པར་མ་བྱེད་ཅིག། ངོ་བོ་ཉིད་ལས་གཞན་དུ་མ་སྒྲུབས་ཤིག། བཙལ་ན་རྒྱལ་བས་དབྱིངས་ལ་རྙེད་མི་འགྱུར། །ཅེས་སོ། །དེའི་ཕྱིར་རྟོག་དཔྱོད་ཀྱི་ཏིང་འཛིན་ལ་ཤེས་རབ་ཀྱིས་དཔྱད་བཟོད་པའི་འཐད་པ་བཟང་བཟང་མོ་བྱུང་སྲིད་ནའང་
དེ་ཉིད་བརྗོད་བྱའི་ངོ་བོར་མི་གནས་ཏེ། དོན་དམ་པའི་བདེན་པ་ནི་རྗོད་བྱེད་ཀྱི་ཕྱོགས་ཙམ་ལས་མི་མཚོན་པའི་ཕྱིར་རོ། །དེ་སྐད་དུ་ཀུན་ཏུ་བཟང་པོ་ཆེ་བ་ལ་རང་གནས་པའི་རྒྱུད་ལས། རྟོག་པ་མེད་པའི་སྔོན་རོལ་ན། །སངས་རྒྱས་བྱ་བའི་མིང་ཡང་མེད། །རྟོགས་པ་ཡེ་ནས་ཆེ་བ་ཡིན། །དོན་ཉིད་བསྟན་པས་འདི་ཡིན་ནོ། །མཁས་པ་མི་གཙོ་རྟོགས་པ་གཙོ། །མཁས་པའི་ཚིག་ནི་ཐན་པ་ཡིན། །རྟོགས་པ་ཆོས་ཉིད་ཀློང་ན་འཕྱོ། །བཤད་པ་མི་གཙོ་སྒོམ་པ་གཙོ། །བཤད་པའི་ཚིག་ནི་བཤད་ར་མཁན། །སྒོམ་པ་ལྷ་དང་གཉིས་སུ་མེད། །སྒྲུབ་པས་ཀྱང་རྟོགས་པ་རིང་། །རྟོགས་པ་གདེང་དུ་མ་ཆུད་ན། །སྒྲུབ་པས་རྟོགས་པའི་རྒྱུན་ལ་བསྒྲུབ། །ཅེས་བཤད་དོ། །གཉིས་པ་གྲུབ་པའི་མཐའ་ལ་དབྱེ་ན་གསུམ་སྟེ། བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ། ཞེས་པས་འདིར་སྤང་བྱའི་མཐའ་ལས་གྲལ་བས་སྟོང་པ་ཉིད་སྟོང་པ་ཉིད་དུ་སྟོན་པ་སེམས་ཀྱི་སྡེ། གཉེན་པོའི་མཐའ་ལས་གྲོལ་བས་འདུས་མ་བྱེས་སྟོང་པ་ཉིས་དུ་སྟོན་པ་ཀློང་གི་སྡེ། གཉིས་ཀའི་མཐའ་ལས་གྲོལ་བས་རང་གི་མཚན་ཉིད་སྟོང་པ་ཉིད་དུ་སྟོན་པ་མན་ངག་གི་སྡེ་སྟེ་འགག་རྣམ་པ་གསུམ་དུ་དྲིལ་ཤེས་ལ་དེ་ལྟ་ནའང་གཙོ་ཆེ་ཆུང་གིས་སྨོས་པ་ལས་ངོ་བོའི་ཆ་ལ་སེམས་སྡེས་གསལ་བ་མ་སྤངས། ཀློང་སྡེས་སྟོང་པ་མ་སྤངས། མན་ངག་སྡེ་ལྷུན་གྲུབ་རང་གསལ་ཆེན་པོ་སྟེ། གྲུབ་མཐའི་འཆའ་ལུགས་འདི་ངོས་འཛིན་སེམས་སྡེས་འཁོར་འདས་རྒྱས་འདེབས་པ་དང་། ཀློང་སྡེས་འཁོར་འདས་ངང་ལ་རྫོགས་པ་དང་། མན་ངག་སྡེས་ཡིན་ཚུལ་གནང་ཐོག་ཏུ་སྤྱོད་པ་གསུམ་གྱིས་དོན་གཏན་ལ་ཕེབས་པ་ཡིན་ཏེ། བརྗོད་བྱའི་སྒོ་ནས་སེམས་ཀྱི་སྡེ་ལ་རྗོད་བྱེད་ཀྱི་རྒྱུད་ཤློ་ཀ་འབུམ་ཕྲག་ཉི་ཤུ་རྩ་གཉིས་གསུངས་པ་རྣམས། ཆོས་ཉིད་ལ་བརྗོད་དུ་མེད་པའི་ཀློང་། ལྟ་བ་ལ་ཡིན་པ་མེད་པའི་ཀློང་། སྤྱོད་པ་ལ་མིན་པ་མེད་པའི་ཀློང་
སྟེ། རྣམ་པ་གསུམ་དུ་བསྡུལ། དེའང་བམ་པོ་སྟོང་ཕྲག་དྲུག་དང་སུམ་བརྒྱར་གནས་པ་ཉིད། གནས་པ་གཞི་ཐོག་ཏུ་ཐེབས་པའི་འཕྱོང་དང་། སྣང་བ་རང་སར་གྲོལ་བའི་འཕྱོང་དང་། རོ་མཉམ་ཐ་དད་མེད་པའི་འཕྱོང་དང་གསུམ་དུ་བསྡུ་སྟེ། ཆོས་ཉིད་ལ་འཕྱུགས་པ་མེད་པའི་གཟེར་བུ་ལྔ་བཅུ། ཡུལ་སེམས་ལ་ལྟ་བའི་གནས་ལྔ་བརྒྱ་དང་བཅུ་གཅིག། སྣང་སེམས་ཅིག་ཅར་དུ་ཤན་འབྱེད་པའི་གནད་ཁྲི་ཕྲག་གཉིས། ལྟ་བ་ཐོད་རྒལ་དུ་ལ་བཟླ་བ་ཁྲི་ཕྲག་ལྔ། སྒོམ་ཡོད་རྟོག་པ་གཅོད་པའི་གནད་སྟོང་ཕྲག་གཅིག་ཏུ་དབྱེ་བ་རྣམས་མིང་ཐོགས་ཀྱི་རྒྱུད་སྟོང་ཕྲག་གཅིག་དང་གསུམ་གྱི་གྲངས་སུ་བཞུགས་པ་ལ། སེམས་ཀྱི་ཕྱོགས་འཛིན་པ། སེམས་ཀྱི་གནད་འཛིན་པ། སེམས་ཀྱི་གདེང་འཛིན་པ་གསུམ་དུ་འདུ་བ་ཡིན་ནོ། །དེ་བཞིན་དུ་ཀློང་གི་སྡེ་རྣམས་བསྡུ་ན་དགུར་འདུ་སྟེ། ལྟ་བ་ལ་འཕོ་འགྱུར་མེད་པའི་ཀློང་། །སྒོམ་པ་ལ་ཡིན་མིན་མེད་པའི་ཀློང་། འབྲས་བུ་ལ་རེ་དོགས་མེད་པའི་ཀློང་། ངོ་བོ་ལ་གྲུབ་བསལ་མེད་པའི་ཀློང་། རང་བཞིན་ལ་འགག་པ་མེད་པའི་ཀློང་། མཚན་ཉིད་ལ་སྣང་སེམས་གྲོལ་བའི་ཀློང་། དབྱིངས་ལ་འཕོ་འགྱུར་མེད་པའི་ཀློང་། རོལ་པ་ལ་རང་ཤར་ཆེན་པོའི་ཀློང་། ལྷུན་མཉམ་ལ་ཡེ་གྲོལ་ཅོག་གཞག་གི་ཀློང་ངོ། །དེ་དག་ཀྱང་བསྡུ་ན་གསུམ་དུ་འདུ་སྟེ། ལྷུན་གྲུབ་ཡངས་པ་ཆེན་པོའི་ཀློང་། རང་གསལ་བྱ་རྩོལ་མེད་པའི་ཀློང་། མ་བྱས་ཡེ་ནས་གྲུབ་པའི་ཀློང་སྟེ། དེ་དག་གི་ཚུལ་རྒྱས་པར་སྟོན་པའི་རྒྱུད་སྟོང་ཕྲག་གསུམ་གྱི་མིང་གིས་བསྡུས་པ་རྣམས་ལ་ལེའུ་ཁྲི་ཕྲག་གཅིག་དང་ཆིག་སྟོང་། ཤློ་ཀ་འབུམ་ཕྲག་དྲུག་ཅུ་རྩ་བཞི་ཡོད་པ་རྣམས། ཁ་ཟླ་བ་ཁྲི་ཕྲག་བརྒྱད་དུ་འདུས་ལ། དེའང་ཤན་བྱེད་ཁྲི་ཕྲག་གཉིས་སུ་འདུས། དེའང་གགས་དགུ་བརྒྱར་འདུས་ཏེ་གནང་སྟོང་ཕྲག་གཉིས། གཟེར་བུ་ལྔ་བཅུ་དང་བཅས་པ་ཐམས་ཅད་བྱས་གྲོལ། བཞག་གྲོལ། ཆེར་གྲོལ་གྱི་ཕྱོགས་གསུམ་དུ་འདུས་པའོ། །སྙིང་པོའི་མཐར་ཐུག་རྫོགས་
པ་ཆེན་པོ་མན་ངག་གི་སྡེ་སྐོར་ནི། ཕྱི་ནང་གསང་བ་བླ་མེད་བཞིའི་ངོ་བོར་གནས་པ་ལ། རྗོད་བྱེད་ཀྱི་རྒྱུད་མཚན་སོ་སོར་ཁྲི་ཕྲག་གཉིས་དང་བཅུ་གཉིས། ལེའུ་སྟོང་ཕྲག་སུམ་ཅུ་རྩ་ལྔ། ཤློ་ཀ་འབུམ་ཕྲག་དྲུག་ཅུ་རྩ་བཞི། གནང་སྟོང་ཕྲག་ལྔ། འཕྱོང་ཆེན་པོ་བརྒྱད། གཟེར་བུ་བརྒྱ་དང་བརྒྱད་ཅུ། གྲགས་སྟོང་ཕྲག་དགུ་བརྒྱ། ཤན་འབྱེད་ཁྲི་ཕྲག་བདུན། ལོ་བཟླ་བ་འབུམ་ཕྲག་ཕྱེད་དང་གཉིས་ཏེ་བརྗོད་བྱ་ནམ་མཁའི་མཐའ་དང་མཉམ་པར་བཀའ་སྩལ་བ་ནི་མཐར་ཕྱིན་མན་ངག་ག་སྡེའོ། །དེ་ལྟར་མན་ངག་གི་སྡེ་གསུམ་པོའང་ཀློང་གསུམ་དུ་འདུས་ཏེ། རོལ་བ་འགག་པ་མེད་པའི་ཀློང་། བློ་ལམ་རྗེས་པ་མེད་པའི་ཀློང་། ངོ་བོ་ལ་བཟང་ངན་མེད་པའི་ཀློང་ངོ། །དེ་དག་ཀྱང་མན་ནག་གི་སྙིང་པོ་གནད་བཀྲོལ་བ་དང་། འགག་བསྡམས་པ་དང་། ངོ་སྤྲད་པ་དང་། མངོན་སུམ་རང་གནད་ལ་དམ། །པ་དང་བཞིར་འདུས་པ་ཡིན་ནོ། །ད་ནི་དེ་དག་ལས་བོད་དུ་འགྱུར་བའི་གྲགས་ཆེ་བ་ཆེ་ལོང་ཙམ་ཞིག་སྡེ་ཙན་གྱི་རྣམ་པས་སྨོས་ཏེ། དང་པོ་སེམས་སྡེའི་རྒྱུད་ལ་སེམས་མེད་བཅོ་བརྒྱད་དུ་གྲགས་པའི་སྔ་འགྱུར་ལྔ་ནི། རིག་པའི་ཁུ་བྱུག། རྩལ་ཆེན་སྤྲུགས་པ། ཁྱུང་ཆེན་ལྡིང་བ། རྡོ་ལ་གསེར་ཞུན། མི་ནུབ་པའི་རྒྱལ་མཚན་ལྔ་པོ་བཻ་རོ་ཙ་ནས་བསྒྱུར་བའོ། །ཕྱི་འགྱུར་བཅུ་གསུམ་ནི། རྩེ་མོ་བྱུང་རྒྱལ། ནམ་མཁའ་རྒྱལ་པོ། བདེ་བ་འཕྲུལ་བཀོད། རྫོགས་པ་སྤྱི་ཚངས། བྱང་ཆུབ་སེམས་ཏིག། བདེ་བ་རབ་འབྱམས། སྲོག་གི་འཁོར་ལོ། །ཐིག་ལེ་དྲུག་པ། རྫོགས་པ་སྤྱི་སྤྱོད། ཡིད་བཞིན་ནོར་བུ། ཀུན་འདུས་རིག་པ། རྗེ་བཙུན་དམ་པ། སྒོམ་པ་དོན་གྲུབ་སྟེ་བཅུ་གསུམ་པོ་བི་མ་ལ་དང་། ཀུ་མཱར། གཡུ་སྒྲ་གསུམ་གྱིས་བསྒྱུར་བ་སེམས་མེད་བཅོ་བརྒྱད་དུ་གྲགས། དེ་དག་གི་སྟེང་དུ་བཻ་རོས་སྔར་བསྒྱུར་བའི་ཀུན་བྱེད་རྒྱལ་པོ། རྨད་བྱུང་། མདོ་བཅུ་གསུམ་པ་རྣམས་བསྡོམས་པ་སེམས་སྡེ་ཉེར་གཅིག་གོ།
ལུང་པ་མ་ལོ་བཅོ་བརྒྱད་རྣམས་མིང་གི་རྣམ་གྲངས་ལ་འདྲ་ཡང་། ལ་ལ་སྔ་ཕྱི་དང་སྒྱུར་བྱེད་མི་འདྲའོ། །ཀློང་སྡེའི་རྒྱུད་ལ། འཁོར་བ་དོང་སྤྲུགས། རིན་ཆེན་གསང་བའི་རྒྱུད། བྱ་རྩོལ་མེད་པའི་རྒྱུད། ནམ་མཁའ་ཀློང་ཡངས་ཀྱི་རྒྱུད་ལ་སོགས་པ་འབུམ་ཕྲག་གཅིག་གོ། མན་ངག་གི་རྒྱུད་ནི། པདྨ་ཀློང་གསལ། པདྨ་དབང་རྒྱལ། ཡིད་བཞིན་ཏོག་གི་རྒྱུད་ལ་སོགས་པ་ཁྲི་ཕྲག་ལྔ་དང་སྟོང་ཕྲག་གཅིགཁྱད་པར་དུ། སངས་རྒྱས་མཉམ་སྦྱོར། ཐིག་ལེ་སྐོར་གྱི་སྙིང་པོའི་རྒྱུད་ལྔ་སྟོང་སུམ་བརྒྱ། སྒྲ་ཐལ་འགྱུར་ལ་སོགས་ཏེ་གསང་ཆེན་ངེས་པའི་རྒྱུད་བཅུ་བདུན། ཁྲོས་མ་དང་བཅོ་བརྒྱད། གསང་བ་སྤྱོད་པ་ས་བོན་གྱི་རྒྱུད་ལས་འཕྲོས་ཏེ་བྱོན་པ་རྣམས་སོ། །གསུམ་ཀའི་ཐུན་མོང་དུ་གྱུར་བ་རྫོགས་པ་ཆེན་པོ་སྤྱིའི་རྒྱུད་ནི། སེམས་ཉིད་བྱ་རྩོལ་ལས་འདས་པ་ནམ་མཁའ་ཆེའི་རྒྱུད་དང་། དེ་ཉིད་ཉམས་སུ་བླང་བ་ནམ་མཁའ་ཆེ་ཕྱི་མའི་རྒྱུད། དེ་ཉིད་ཡོངས་སུ་རྫོགས་པའི་འབྲས་བུ་ནམ་མཁའ་ཆེ་ཕྱི་མའི་རྒྱུད་ཡོངས་སུ་འགྲོ་བ། སེམས་ཉིད་འཕོ་འགྱུར་མེད་པ་ཆོས་ཉིད་རྒྱལ་པོའི་རྒྱུད། སེམས་ཉིད་ཐིག་ལེ་ཉག་གཅིག་ཏུ་སྟོན་པ་བྱང་ཆུབ་ཀྱི་སེམས་ཐིག་ལེའི་རྒྱུད། སེམས་ཉིད་རང་བྱུང་གི་ཡེ་ཤེས་སུ་བསྟན་པ་ཡེ་ཤེས་ཐིག་ལེའི་རྒྱུད། སེམས་ཉིད་ཐམས་ཅད་ཀྱི་རྩ་བར་བསྟན་པ་མན་ངག་ཕྲེང་བའི་རྒྱུད། སེམས་ཉིད་ཀུན་ཁྱབ་ཆེན་པོར་བསྟན་པ་གསང་བ་རྒྱལ་པོའི་རྒྱུད། སེམས་ཉིད་རང་རིག་ཏུ་བསྟན་པ་ཡེ་ཤེས་དམ་པའི་རྒྱུད། སེམས་ཉིད་ཀུན་ཏུ་བཟང་པོའི་རོལ་པར་སྟོན་པ་ནམ་མཁའ་དབྱིངས་རྣམ་དག་གི་རྒྱུད། སེམས་ཉིད་ཀུན་གྱི་སྙིང་པོ་སྟོན་པ་མན་ངག་སྙིང་པོའི་རྒྱུད། སེམས་ཉིད་རང་རིག་ཏུ་ཡིད་ཆེས་པ་སྙིང་པོ་གསང་བའི་རྒྱུད། སེམས་ཉིད་ཀུན་གྱི་རྩ་བ་ནམ་མཁའ་ཆེ་རྩ་བ་ཅན་གྱི་རྒྱུད། སེམས་ཉིད་གཅིག་ཏུ་འདུས་པ་ཉག་གཅིག་དགོངས་པའི་རྒྱུད། སེམས་ཉིད་ཇི་བཞིན་པར་གཞག་
པ་བསམ་གཏན་ཆེན་པོའི་རྒྱུད། སེམས་ཉིད་རྒྱུན་ཆགས་སུ་གོམས་པ་བསམ་གཏན་རྒྱུན་ཆགས་ཀྱི་རྒྱུད། སེམས་ཉིད་ཐམས་ཅད་དུ་གསུངས་པ་སྒོ་མང་མདོའི་རྒྱུད། སེམས་ཉིད་དབང་དང་སྒྱུར་བ་ནམ་མཁའ་ཆེ་དབང་གི་རྒྱུད། སེམས་ཉིད་སྒྲ་ཚིག་ལས་འདས་པ་ནམ་མཁའ་ཚེ་ཡི་གེ་མེད་པའི་རྒྱུད། སེམས་ཉིད་གདོད་མའི་གནས་སུ་བསྟན་པ་ནམ་མཁའ་ཆེ་གཞིའི་རྒྱུད། སེམས་ཉིད་འོད་གསལ་དུ་བསྟན་པ་རིན་ཆེན་འབར་བའི་རྒྱུད། སེམས་ཉིད་ཡོན་ཏན་ལྷུན་གྲུབ་ཏུ་བསྟན་པ་རིན་ཆེན་ཕྲེང་བའི་རྒྱུད། སེམས་ཉིད་ཁམས་གསུམ་གསལ་བའི་ཁམས་གསུམ་སྒྲོད་མེའུ་་རྒྱུད། སེམས་ཉིད་སྤང་བླང་ལས་འདས་པར་སྟོན་པ་ངེས་པ་སྙིང་པོའི་རྒྱུད། སེམས་ཉིད་འཕོ་འགྱུར་མེད་པར་སྟོན་པ་རྡོ་རྗེ་གསང་བའི་རྒྱུད། སེམས་ཉིད་ཡེ་ནས་སངས་རྒྱས་པར་སྟོན་པ་ཡེ་སངས་རྒྱས་པའི་རྒྱུད་སྡེ་ཉི་ཤུ་རྩ་ལྔ་དང་། ལུང་བམ་པོ་བཅོ་བརྒྱད། ཐམས་ཅད་བྱང་ཆུབ་ཀྱི་སེམས་ལས་བྱུང་བ་རིག་པའི་ཁུ་བྱུག། རྩོལ་སྒྲུབ་ཟིལ་གྱིས་གནོན་པ་རྩལ་ཆེན་སྤྲུགས་པ། སེམས་ཉིད་དབྱིངས་སུ་རྫོགས་པ་ཁྱུང་ཆེན་རྫོགས་པ། ཆོས་ཉིད་ཡེ་གནས་ཀྱི་སྒོམ་པ་རྡོ་ལ་གསེར་ཞུན། སེམས་ཉིད་ལྷུན་གྲུབ་ཀྱི་ལྟ་བ་མི་ནུབ་རྒྱལ་མཚན། སེམས་ཉིད་ཡེ་ནས་སྟོང་པ་རྨད་བྱུང་རྒྱལ་པོ། སེམས་ཉིད་ཆོས་སྐུར་བསྟན་པ་ཡེ་ཤེས་དམ་པ། སེམས་ཉིད་ཐིག་ལེར་བསྟན་པ་ཡང་ཏིག་རྒྱལ་པོ། སེམས་ཉིད་སྐྱེ་ཤི་མེད་པར་སྟོན་པ་སྲོག་གི་འཁོར་ལོ། །སེམས་ཉིད་འདོད་དགུ་འབྱུང་བར་སྟོན་པ་ཡིད་བཞིན་ནོར་བུ། སེམས་ཉིད་མཉམ་རྫོགས་ཆེན་པོར་སྟོན་པ་ཐིག་ལེ་ཀུན་འདུས། སེམས་ཉིད་ཐེག་པ་ཀུན་རྫོགས་སུ་སྟན་པ་ནམ་མཁའ་ཆེ་རྒྱལ་པོ། སེམས་ཉིད་ཀུན་གྱི་ཡང་རྩེར་སྟོན་པ་རྩེ་མོ་བྱུང་རྒྱལ། སེམས་ཉིད་ཡེ་བདེ་སྤྲོས་བྲལ་དུ་སྟོན་པ་བདེ་བ་རབ་འབྱམས། སེམས་ཉིད་ཉོན་མོངས་མེད་ཅིང་ཟག་མེད་དུ་སྟོན་པ་བདེ་བ་ཕྲ་བཀོད། སེམས་ཉིད་འཁོར་འདས་ཀྱི་གཞི་འདུས་པར་བསྟན་པ་གཏེར་ཆེན་ཡོངས་
རྫོགས། སེམས་ཉིད་ཐེག་པ་ཀུན་གྱི་སྤྱི་ཆིངས་སུ་བསྟན་པ་ལྷུན་རྫོགས་སྤྱི་ཆིངས། སེམས་ཉིད་རྒྱ་ཆད་དང་ཕྱོགས་ལྷུང་མེད་པར་སྟོན་པ་ནམ་མཁའ་མཐའ་དབུས་ཀྱི་རྒྱུད་རྣམས་སོ། །དེ་ཙམ་ནི་རྒྱུད་ཀྱི་སྡེ་ཚན་ངོས་ཟིན་པའི་སླད་དུ་སྟེ། རང་བཞིན་དུ་ན་དེ་བཞིན་གཤེགས་པའི་གསུང་ནི་རྣམ་པ་ཐམས་ཅད་པ་ཟབ་ཅིང་གཏིང་དཔག་དཀའ་བ་ཡིན་པས་ཐོགས་པ་མེད་པའི་བློ་གྲོས་དང་། སྐལ་བ་མཆོག་ཏུ་གྱུར་བ་རྣམས་ཀྱིས་ཚིག་དང་དོན་གྱི་འབྲེལ་བཀོད་ནས་སྡེ་ཚན་དེ་དང་དེར་སྣང་བའོ། །ཡན་མན་གཉིས་ཀར་རྟོགས་པའམ། དཔལ་བསམ་ཡས་པས། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྙིང་ཐིག་གི་ལུགས་སུ་བཀྲལ་བ་བཞིན་གཞུང་དོན་རྒྱ་ཆེན་པོ་ཡང་མན་ངག་འབའ་ཞིག་ཏུ་འཆར་ཞིང་། མན་ངག་ཟབ་མོའང་གཞུང་ལུགས་ཀྱི་ས་བོན་དུ་འཆར་བའང་ཡོད་དེ། །སྐྱེས་བུའི་བློ་སྟོབས་ཀྱི་ཁྱད་པར་དང་། སངས་རྒྱས་རྣམས་ཀྱི་གསུང་གི་གསང་བ་བླ་ན་མེད་པའི་ཡོན་ཏན་ཡིན་པར་བལྟའོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། མཚན་ཉིད་ངེས་པའི་སླད་དུ་བསྟན་བྱ་དམ་པའི་ཆོས་ཀྱི་རྣམ་པ་སྤྱི་དང་བྱེ་བྲག་པ་མདོ་ཙམ་སྨོས་པའི་རབ་ཏུ་བྱེད་པ་སྟེ་སྐབས་དྲུག་པའོ།། །།
ཆེད་དུ་བརྗོད་པ་བྱ་བ་ལས་ཀྱི་འཁོར་ལོ་ཇི་ལྟར་བརྩམས་པའི་གཏམ་བརྗོད་པ་སྟེ་སྐབས་བདུན་པ།
སྤྱི་དོན་བདུན་པ་བསྟན་པ་གནས་པའི་ཆེད་དུ་རྒྱུད་ཀྱི་རྡོ་རྗེའི་གནས་ཆེན་པོ་ཡི་གེའི་སྲོག་ཏུ་ཇི་ལྟར་བཙའ་བར་བྱས་པའི་གཏམ་བརྗོད་པ་ལ་གཉིས། གང་ལས་འབྱུང་བ་རིག་པའི་ཡོན་ཏན་ལ་ལྟོས་པའི་རྣམ་པར་གཞག་པ་དང་། བདག་པོར་གྱུར་བའི་རྐྱེན་གང་ལས་བྱ་བ་ལས་ཀྱི་འཁོར་ལོ་ཇི་ལྟར་འདུ་བྱས་པའོ། །དང་པོ་ནི། མདོ་སྡེ་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། འཕགས་པའི་དམ་པ་ཐམས་ཅད་མཁྱེན་པ་ག་ལ་ཐོབ། །ཅེས་པ་ལྟར། རྣམ་
པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་ལ་སྦྱོར་བ་ལྷག་པར་འཇུག་པའི་བྱང་ཆུབ་སེམས་དཔའ་རྣམས་ཀྱིས་བསླབ་བར་བྱ་བའི་གནས་དམ་པར་གྱུར་བ་ནི། རིག་པའི་གནས་ཆེན་པོ་རྣམ་པ་ལྔའམ། བཅུར་གྲགས་པ་ཡིན་ཏེ། འདི་ལྟར་ནང་རིག་པ་དང་། རྒྱུ་རིག་པ་དང་། སྒྲ་རིག་པ་དང་། །གསོ་བ་རིག་པ་དང་། བཟོའི་ལས་ཀྱི་གནས་རིག་པའོ། །དེའི་ངོས་འཛིན་ནི་རྒྱན་གྱི་འགྲེལ་བར། དེ་ལ་དེ་བཞིན་གཤེགས་པའི་གསུང་རབ་ཡན་ལག་བཅུ་གཉིས་ལ་མཁས་པ་ནི་ནང་རིག་པ་ཞེས་བྱའོ། །མངོན་སུམ་དང་རྗེས་སུ་དཔག་པའི་ཚད་མས་ཟིན་པའི་ཏེ་རྐའི་གཞུང་ལ་མཁས་པ་ནི་རྒྱུ་རིག་པ་ཞེས་བྱའོ། །སྒྲའི་གཙུག་ལག་བྱཱ་ཀར་ལ་མཁས་པ་ནི་སྒྲ་རིག་པ་ཞེས་བྱའོ། །རླུང་དང་བད་ཀན་ལ་སོགས་པ་ནད་གསོ་བའི་གཙུག་ལག་ལ་མཁས་པ་ནི་གསོ་བ་རིག་པ་ཞེས་བྱའོ། །གླུ་དང་གར་དང་སྤོས་ལ་སོགས་པའི་གཙུག་ལག་ལ་མཁས་པ་ནི་བཟོའི་ལས་ཀྱི་གནས་རིག་པ་ཞེས་བྱའོ། །ཞེས་བཤད་པའི་ཁོང་དུ་རིག་པའི་གནས་ཆུང་བ་ལྔ་དང་། མདོ་ལས་རིག་པའི་གནས་བཅོ་བརྒྱད་དུ་གསུངས་པའང་འདུ་བ་ཡིན་ནོ། །དེ་ལ་ནང་རིག་པས་ནི། བདག་ཉིད་འཕགས་པའི་ལམ་གྱི་དེ་ཁོ་ན་ཉིད་ཀྱི་མཚན་ཉིད་གང་ཡིན་པ་ཕྱིན་ཅི་མ་ལོག་པར་ཤེས་པར་བྱེད་དོ། །རྒྱུ་རིག་པ་དང་། སྒྲ་རིག་པས་ནི་གཙུག་ལག་དེ་གཉིས་ཤེས་པར་རློམ་པའི་མུ་སྟེགས་བྱེད་དག་ཚར་གཅོད་པར་བྱེད་དོ། །གསོ་བ་རིག་པས་ནི་ནད་ཀྱིས་བཏབ་བའི་འགྲོ་བ་གང་ཞིག་བདེ་བར་གནས་པའི་ས་ལ་དབུགས་འབྱིན་སྟེར་བར་བྱེད་དོ། །གཟོའི་ལས་ཀྱི་གནས་རིག་པས་ནི་ལོངས་སྤྱོད་འདོད་པ་རྣམས་རྗེས་སུ་བཟུང་ཞིང་ཕན་གདགས་པར་བྱེད་དོ། །རང་བཞིན་བྱེ་བྲག་ཏུ་བཤད་ན། སྔ་མའི་འཕྲོར། དེ་བས་གཞན་རྣམས་ཚར་བཅད་རྗེས་སུ་བཟུང་ཕྱིར་དང་། རང་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་ཕས་ཀྱི་རྒོལ་བ་ངན་པ་ཚར་གཅོད་པའི་གཙུག་ལག་གཉིས། གཞན་རྗེས་སུ་བཟུང་བའི་གཙུག་ལག་གཉིས། རང་ཉིད་ཀྱིས་ཀུན་ཏུ་ཤེས་པར་བྱ་བའི་གཙུག་
ལག་གཅིག་སྟེ། ལྔ་ལས། འདིར་བར་པ་གཉིས་ཀྱི་སྡེ་ཚན་བཟོ་རིག་པའི་བྱེ་བྲག་གིས་ཡོན་ཏན་སྟབས་བཙའ་ནས་བཤད་པར་འོས་ཏེ། འདི་ལྟར་གནས་སྐབས་སུ་བསྟན་པ་དང་སེམས་ཅན་གྱི་ཕན་བདེའི་རྩ་ལག་ཆེན་པོར་འགྱུར་ཅིང་། བརྒྱུད་ནས་རྣམ་པ་ཐམས་ཅད་མཁྱེན་པའི་ཐུགས་ཀྱི་སྐུ་མཚན་དང་དཔེ་བྱད་ཀྱི་བདག་ཉིད་དམ་པའི་གོ་འཕང་གི་རྒྱུར་འགྲོ་ལ། སྐབས་དེ་དང་དེར་ཡང་རིག་པ་དེའི་སྒྱུ་རྩལ་ལ་བྱང་ཆུབ་པས་མཁས་པའི་གོས་ལ་དབང་བ་དང་། ཤ་ཐང་བ་མེད་པའི་ལོངས་སྤྱོད་ཀྱིས་འབྱོར་བ་དང་། འཇིག་རྟེན་ན་མདུན་འཇོག་གྱ་ནོམ་པའི་ཡུལ་དུ་བསྔགས་པ་དང་། ལོངས་སྤྱོད་ཀྱི་སྒོ་ནས་གཞན་ལ་ཕན་གདགས་པར་བྱ་བ་དང་། དེ་ཉིད་མངོན་དུ་གྱུར་ནས་དེ་བཞིན་གཤེགས་པའི་གཟུགས་དང་གཟུགས་བརྙན་ནས་སྤྲུལ་པ་ཐ་མ་པའི་བར་གྱི་རྣམ་པས་འགྲོ་བ་རྒྱ་མཚོའི་ཉེར་འཚོར་འགྱུར་བའི་དགོས་པ་དང་བཅས་པས་ཡིད་དྲངས་ཏེ་ཚུལ་འདི་ལ་འཇུག་པར་བྱ་སྟེ། འདི་སྐད་དུ་རྒྱན་གྱི་འགྲེལ་བ་ལས། བཟོའི་གནས་ཀྱི་རིག་པ་བྱང་ཆུབ་སེམས་དཔའ་འཚོལ་བར་བྱེད་དོ། །ཅིའི་ཕྱིར་ཞེ་ན། ཚོགས་ཆུང་ངུས་ཤ་ཐང་བ་མེད་པར་ལོངས་སྤྱོད་བསྒྲུབ་པར་བྱ་བ་དང་། ལོངས་སྤྱོད་དང་ལྡན་ཞིང་བཟོའི་གནས་ལ་མཁས་པས་འཇིག་རྟེན་པ་རྣམས་ཀྱིས་བཀུར་བར་བྱ་བ་དང་། ལོངས་སྤྱོད་ཀྱི་སྒོ་ནས་འཇིག་རྟེན་པ་རྣམས་ལ་ཕན་པར་བྱ་བའི་ཕྱིར་འཚོལ་བར་བྱེད་དོ་ཞེས་དང་། བསོད་ནམས་སྟོབས་ཀྱི་རྟོགས་པ་བརྗོད་པ་ལས། དེ་བས་ན་བཟོ་འབའ་ཞིག་མི་རྣམས་ཀྱིས་ཉམས་སུ་སྨན་པ་ཡིན་ཏེ། བཟོ་བོ་ནི་རིགས་དམན་པར་སྐྱེས་སུ་ཟིན་ཡང་རྒྱལ་པོ་རྣམས་དང་། བློན་པོ་རྣམས་དང་། བྲམ་ཟེ་དང་། ཁྱིམ་བདག་རྣམས་ཀྱིས་གདོན་མི་ཟ་བར་བཀུར་ཏོ། །སྣ་ཚོགས་ལས་ཅན་ལྷ་རྣམས་དང་། །མི་རྣམས་ཀྱིས་ཀྱང་ལེགས་པར་བཀུར། །དེ་བཞིན་མ་རབས་བཟོ་ཡི་ཕྱིར། །མི་དང་ལྷ་རྣམས་ཀྱིས་ཀྱང་བཀུར། །ཞེས་ལྷའི་བཟོ་བོ་ནི་བི་ཤྭ་ཀརྨ་
ལྷའི་དབང་པོ་ལ་སོགས་པ་འཇིག་རྟེན་ན་ཆེ་བར་རློམ་པ་དག་གིས་ཀྱང་བཀུར་ཞིང་། བཙན་པོ་ཁྲི་སྲོང་ལྡེའུ་བཙན་གྱིས་ཨཱརྱ་པོ་ལོའི་གླིང་དུ་སྤྲུལ་པའི་བཟོ་བོ་ལ་བྱ་དགའི་ལྟ་གོན་རྒྱ་ཆེན་པོ་བཤམས་པ་ལྟ་བུ་སྟེ། རིག་པ་དེས་འཇིག་རྟེན་ན་ཕན་པ་རྒྱ་ཆེན་པོ་གྲུབ་པའི་ཕྱིར་རྒྱལ་སྲས་རྣམས་ཀྱིས་བསླབ་པར་བྱ་བའི་གནས་སུའང་བསྟན་པ་ཡིན་ནོ། །འདི་ལ་དབྱེ་ན་གཙོ་བོ་དང་། ཕལ་པ་གཉིས་ལས། དང་པོ་ནི། དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་གསུམ་མོ། །དང་པོ་སྐུ་གཟུགས་ལའང་དེ་བཞིན་གཤེགས་པ་དང་། ཉན་ཐོས་དང་། རང་སངས་རྒྱས་ལ་སོགས་པའི་ཆད་བཤད་པ་དང་། དེའི་རྣམ་པར་བཤད་པའོ། །དང་པོ་ཚད་ནི་དུས་ཀྱི་འཁོར་ལོ་དང་། སྡོམ་འབྱུང་དང་། བསླབ་བཏུས་ལ་སོགས་པ་མདོ་རྒྱུད་བསྟན་བཅོས་དུ་མ་ལས། རྒྱལ་བའི་སྐུ་གཟུགས་ཐལ་མོ་བཅུ་པ་དང་། རྒྱལ་སྲས་རྣམས་ཀྱི་མཐོ་བཅུ་ཞན་པ་དང་། རྒྱལ་ཡུམ་སོགས་ཀྱི་ཞལ་ཚད་དགུ་པ་དང་། བདེ་གཤེགས་ཁྲོས་པ་རྣམས་གདོང་བརྒྱད་པ་དང་། མིའུ་ཐུང་གི་ལུས་ཚད་མཐོ་དྲུག་པ་སོགས་པའོ། །དེ་དག་ཀྱང་ཆུ་ཞེ་དག་བ། །པའི་སླད་དུ་བཟོ་བོའི་བློ་གྲོས་ལ་ཚད་ཀྱི་མཐུ་བྱིན་པ་ཡིན་ཏེ། དེ་ལས་གཞན་དུ་སྤྲུལ་པའི་བཟོ་བོས་བྱས་པ་སོགས་ལ་ངེས་པ་དེ་ལྟར་ཁོ་ན་གནས་པའི་ཤེས་བྱེད་མེད་དེ། ཆ་ཚད་ནི་བཟོ་ཉེས་འགོག་པའི་སླད་དུ་གསུངས་པའི་ཕྱིར་རོ། གཉིས་པ་རྣམ་པ་ནི། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པ་དང་། ཁྲོ་བོར་གྱུར་བ་རྣམས་ལ། ཧེ་རུ་ཀ་གལ་པོར། སྒེག་པ་དཔའ་བ་འཇིགས་སུ་རུང་། །ཞེས་སྐུའི་རྣམ་འགྱུར་གསུམ་བཤད་པ་ལ་སོགས་པས་མཚོན་ནོ། །གཉིས་པ་གསུང་གི་རྟེན་ནི་ལུང་གི་ཆོས་ཀྱི་ཕུང་པོ་སྟེ། དེ་ལའང་ཆོས་ཀྱི་ཕུང་པོའི་ཚད་དང་། དེ་ཉིད་གང་ལས་
གྲུབ་པའི་རྒྱུ་བསྟན་པའོ། །དང་པོ་ནི། གསུང་སྒྲ་ཚིག་རང་ཚན་པ་ལས་འདས་པ་གདུལ་བྱའི་བློ་ལ་བྱིན་རླབས་ཀྱི་ཚིག་ཏུ་སྣང་བ་ལ་མུ་དང་མཐའ་ཡོད་པ་མི་འཚལ་ཏེ། གདུལ་བྱ་སོ་སོའི་དབང་པོའི་རིམ་པ་དང་འཚམ་པར་བཟུང་བའི་འདོད་པ་ཐ་དད་པར་ཡོད་དེ། འདི་ལྟར་ཁ་ཆེ་ཡེ་ཤེས་རྡོ་རྗེའི་སོགས་པས་ཤློ་ཀ་སྟོང་ཕྲག་གཅིག་ལ་ཆོས་ཀྱི་ཕུང་པོར་བྱེད་དེ། ས་སྡེ་ལས། གནས་བརྟན་ཀུན་དགའ་བོས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གང་བའི་གང་བཟུང་བ་རྣམས་ནི། སྡེ་སྣོད་གསུམ་པོ་འདི་དག་ཡིན་ཏེ། ཆོས་ཀྱི་ཕུང་པོ་གཅིག་གི་ཚང་ཇི་ཙམ་ཡིན་ཞེ་ན། གྲངས་བརྒྱ་ཕྲག་བཅུ་ནི་ཆོས་ཀྱི་ཕུང་པོ་གཅིག་སྟེ་ཞེས་འདོད་ལ། མངོན་པ་སྡེ་བདུན་གྱི་ཡ་གྱལ་ཆོས་ཀྱི་ཕུང་པོ་ཞེས་བྱ་བ་ཤཱ་རིའི་བུས་བསྡུས་པར་འདོད་པའི་གཞུང་གང་ལ་ཤློ་ཀ་སྟོང་ཕྲག་དྲུག་ཏུ་ལོངས་པ་དེ་ཉིད་ཆོས་ཀྱི་ཕུང་པོའི་ཚད་དུ་བྱས་པ་དང་། དབུ་མ་བ་ཆོས་ཀྱི་བཤེས་གཉེན་གྱིས། དེ་ལ་ཆོས་ཕུང་གཅིག་གི་ཆང་ཇི་ཙམ་ཞེ་ན། དེ་གཅིག་ལ་ཚིག་ལེའུར་བྱས་པ་སྟོང་ཉིད་དོ། །ཚིགས་སུ་བཅད་པ་རེ་རེ་ལའང་ཡིག་འབྲུ་སུམ་ཅུ་རྩ་གཉིས་ཉིད་དོ། །ཞེས་འདོད་པ་དང་། ནཱ་ག་བྷོ་དྷི་ལ་སོགས་པ་ནི། ཆོས་གང་ཞིག་གི་མིང་ཚིག་ལྷའི་གོས་ལྟར་སྲང་བའི་གྲོ་གའམ་ཏ་ལ་ལར། སྐྲའི་རྩེ་མོའི་ཆ་ཤས་ཀྱི་མཐའ་རྒྱགས་མེད་པར་བྲིས་པ་གླང་པོ་ཆེ་དར་མའི་ཁུར་དུ་བཟོད་པའམ། ཐེག་པ་ཆེན་པོ་ཁ་ཅིག་གི་འདོད་པས་གླང་པོ་ཆེ་རབ་བརྟན་ཞེས་བྱ་བ་མཐའ་སྐོར་ལ་དཔག་ཚད་བདུན་ཡོད་པའི་ལུས་ཚད་ཀྱི་ཁུར་དུ་བཀལ་བར་འོས་པའི་བར་སྣག་ཚས་བྲིས་པ་དེ་ཙམ་ལ་ཆོས་ཀྱི་ཕུང་པོར་འདོད་པ་སོགས་ཡོད་དེ། མཛོད་ལས། ཁ་ཅིག་བསྟན་བཅོས་ཚད་ཅེས་ཟེར། །ཕུང་པོ་ལ་སོགས་གཏམ་རེའང་ཡིན། །ཞེས་པས། དེ་དག་ཀྱང་ཉོན་མོངས་པར་རེའི་གཉེན་པོར་རེ་རེ་སྟོན་པ་ལ་མང་དུ་ཉུང་གི་དབང་གིས་བཞག་པའི་ཚད་ཡིན་གྱིས། གྲངས་དེར་འཆད་པའི་ཚད་མ་ཡིན་པས། གཉེན་པོར་རྫོགས་
ངའི་དབང་གིས་བཞག་པ་ཉིད་ལེགས་པར་བཟུང་གིས། སྔ་མའི་འཕྲོར། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་པས་སོ། །རྒྱུད་སྡེའི་ཚད་ནི། རྟོགས་པའི་རྒྱུད་དང་། བྱ་བའི་རྒྱུད་དང་། སྤྱོད་པའི་རྒྱུད་དང་། གཉིས་ཀའི་རྒྱུད་དང་། རྣལ་འབྱོར་གྱི་རྒྱུད་རྣམས་ཀྱི་མིང་ལ་རིམ་པ་བཞིན་དུ་སྟོང་ཕྲག་བཞི་དང་། བཞི་དང་། བརྒྱད་དང་། དྲུག་དང་། སྟོང་ཕྲག་བཅུ་གཉིས་རྣམས་ཏེ་སུམ་ཁྲི་བཞི་སྟོང་དུ་ཡེ་ཤེས་རྡོ་རྗེ་ཀུན་ལས་བཏུས་པ་ལས་བཤད་ཅིང་། རྣལ་འབྱོར་མའི་རྒྱུད་ཀྱི་གྲངས་ནི་དེར་མ་གསུངས་སོ། །ཡང་སྡོམ་འབྱུང་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲངས། །དེ་བཞིན་ཕ་རོལ་ཕྱིན་པའི་གྲངས། །ས་ཡ་དང་ནི་དུང་ཕྱུར་ལྔ། །ཐེག་ཆེན་ལས་གཞན་མདོ་སྡེ་རྣམས་དུང་ཕྱུར་ཕྲག་བརྒྱད་གསུངས་པ་ཡིན། ཞེས་ཚིགས་སུ་བཅད་པའི་ངེས་བརྗོད་ཙམ་མ་ཡིན་པར་མདོ་རྒྱུད་ཐ་དད་པའི་མིང་གི་རྣམ་གྲངས་ཁོ་ན་ཡིན་པས་བསམ་གྱིས་མི་ཁྱབ་བོ། །དེ་ལྟ་བུའི་ལུང་གི་ཆོས་དེ་དག་མིང་དང་ཚིག་ཏུ་ཚོགས་ནས་གླེགས་བམ་དུ་བྱས་པ་ལ་ལེགས་པར་སྦྱར་བའི་སྐད་དུ་པུསྟ་ཀ། ཞེས་བྱ་ལ། རྒྱུད་ཀྱི་དབང་དུ་བྱས་ན་འོག་མིན་དུ་བྱང་ཆུབ་སེམས་དཔའ་རྣམས་ཀྱིས་ཆོས་ཀྱི་ལོངས་སྤྱོད་རྗོད་བྱེད་སྒྲའི་རྒྱུད་མཚན་ཉིད་པ་གང་། འདིར་བློ་ལ་གནས་པའི་འབྲས་བུའམ། དེ་ཉིད་རྒྱུད་ལ་བསྐྱེད་པའི་གྲོགས་སུ་དེ་བཞིན་གཤེགས་པས་ལེགས་པར་གསུངས་པ་ནས་བརྩམས་ཏེ་གླེགས་བམ་དུ་བྲིས་པའི་བར་ནི་མཚན་རྟགས་ཀྱི་སྒྲ་རྒྱུད་ཉིད་དུ་བཟུང་སྟེ། གཞན་དུ་མཛོད་ལས། །ཆོས་ཀྱི་ཕུང་པོ་བརྒྱད་ཁྲི་དག། གང་རྣམས་ཐུབ་པས་གསུངས་དེ་དག། ཚིག་གམ་མིང་ཡིན་དེ་དག་ནི། །གཟུགས་སམ་འདུ་བྱེད་དག་ཏུ་འདུས། །ཞེས་བཤད་དོ། །གཉིས་པ་དེ་ཉིད་གང་
ལ་བརྟེན་ནས་གྲུབ་པའི་རྒྱུ་ནི་ཡི་གེ་སྟེ། དེ་ལ་ཡི་གེའི་ངོ་བོ་དང་། ངེས་ཚིག་དང་། དབྱིབས་སམ་རྣམ་པ་གསུམ་ལས། དང་པོ་ནི་སློབ་དཔོན་ཙནྡྲ་གོ་མིས་ཡི་གེའི་མདོར། གནས་དང་བྱེད་པ་དང་། རྩོལ་བ་རྣམས་ལས་ཡི་གེ་རྣམས་སྐྱེའོ། །ཞེས་པ་ལྟར། ཡིད་ལས་བརྗོད་པར་འདོད་པའི་རླུང་གཡོས་པས་དེའི་སྐྱེ་བའི་གནས་དང་བྱེད་པ་ལྷན་ཅིག་ཏུ་འཕྲད་པ་ལས་ཡི་གེའི་གདངས་འགའ་ཞིག་འབྱུང་སྟེ། རྣམ་འགྲེལ་ལས། ཡི་གེ་ཀུན་སློང་ཤེས་པ་ལས། །སྐྱེ་ལ་ཤེས་པ་སྒྲ་སྐྱེའོ། །ཞེས་སོ། །གཉིས་པ་ནི། ལེགས་པར་སྦྱར་བའི་སྐད་དུ་ཨ་ཀྵར་ཞེས་འབྱུང་བ་ནི་མི་འགྱུར་བའི་དོན་ཏེ། ཡུལ་གྱི་བྱེ་བྲག་ཐ་དད་པར་གྱུར་ཀྱང་དབྱངས་དང་གསལ་བྱེད་རྣམས་ནི་དེ་ལས་གཞན་དུ་མི་འགྱུར་རོ། །ཡང་བྱ་ཉྫ་ན་ཞེས་པ་ནི་གསལ་བྱེད་དེ། ཡི་གེ་འདུས་ནས་བརྗོད་བྱའི་དོན་གང་ཡིན་པ་དེ་གསལ་བར་བྱེད་པས་སོ། །གསུམ་པ་ནི། རྒྱ་ཆེར་རོལ་པ་ལས། ཚངས་པའི་ཡི་གེ་དང་། ཨ་རོཥྟའི་ཡི་གེ་དང་། པདྨ་སྙིང་པོའི་ཡི་གེ་དང་། མངྒ་་ག་དྷཱའི་ཡི་གེ་དང་། བཀྲ་ཤིས་པའི་ཡི་གེ་དང་། སོར་མོ་བའི་ཡི་གེ་དང་། ཤ་ཀ་ནའི་ཡི་གེ་དང་། ཡབ་ནའི་ཡི་གེ་དང་། བ་ག་ལེ་བའི་ཡི་གེ་དང་། ས་རུ་ཤའི་ཡི་གེ་དང་། འགྲོ་ལྡིང་བའི་ཡི་གེ་དང་། ཏའི་ཡི་གེ་དང་། ལྷོ་ཕྱོགས་པའི་ཡི་གེ་དང་། དྲག་ཤུལ་ཅན་གྱི་ཡི་གེ་དང་། གྲངས་ཀྱི་ཡི་གེ་དང་། སྤྱིའུ་ཚུགས་པའི་ཡི་གེ་དང་། རྗེས་སུ་མཐུན་པའི་ཡི་གེ་དང་། བྲུ་ཤའི་ཡི་གེ་དང་། ཀ་ཤའི་ཡི་གེ་དང་། རྒྱའི་ཡི་གེ་དང་། ཕུ་ནའི་ཡི་གེ་དང་། ཧུ་ནའི་ཡི་གེ་དང་། ཡི་གེ་འབྲིང་དང་། རྒྱལ་བར་བྲི་བའི་ཡི་གེ་དང་། རྒྱལ་གྱི་ཡི་གེ་དང་། ལྷའི་ཡི་གེ་དང་། ཀླུའི་ཡི་གེ་དང་། གནོད་སྦྱིན་གྱི་ཡི་གེ་དང་། དྲི་ཟའི་
ཡི་གེ་དང་། མིའམ་ཅིའི་ཡི་གེ་དང་། ལྟོ་འཕྱེ་ཆེན་པོའི་ཡི་གེ་དང་། ལྷ་མ་ཡིན་གྱི་ཡི་གེ་དང་། ནམ་མཁའ་ལྡིང་གི་ཡི་གེ་དང་། རི་དྭགས་ཀྱི་འཁོན་ལོ་པའི་ཡི་གེ་དང་། ཁ་སྐད་ཤེས་པའི་ཡི་གེ་དང་། ས་བླའི་ལྷའི་ཡི་གེ་དང་། བར་སྣང་གི་ལྷའི་ཡི་གེ་དང་། ནུབ་ཀྱི་བ་ལང་སྤྱོད་ཀྱི་ཡི་གེ་དང་། བྱང་གི་སྒྲ་མི་སྙན་གྱི་ཡི་གེ་དང་། ཤར་གྱི་ལུས་འཕགས་པོའི་ཡི་གེ་དང་། གདེག་པའི་ཡི་གེ་དང་། གཞག་པའི་ཡི་གེ་དང་། བསྣན་པའི་ཡི་གེ་དང་། རྒྱ་མཚོའི་ཡི་གེ་དང་། རྡོ་རྗེའི་ཡི་གེ་དང་། སྤྲིང་ཡིག་དང་། ལན་གྱི་ཡི་གེ་དང་། རྣམ་འཐོར་གྱི་ཡི་གེ་དང་། རིངས་མེད་ཀྱི་ཡི་གེ་དང་། བསྟན་བཅོས་བསྐོར་བའི་ཡི་གེ་དང་། རྩིས་བསྐོར་བའི་ཡི་གེ་དང་། གདེག་པ་བསྐོར་བའི་ཡི་གེ་དང་། གཞག་པ་བསྐོར་བའི་ཡི་གེ་དང་། རྐང་པས་བྲིས་པའི་ཡི་གེ་དང་། ཚིག་ལན་གཉིས་སུ་གདབ་པའི་ཚིག་གི་མཚམས་ཀྱི་ཡི་གེ་དང་། ཚིག་གི་མཚམས་བཅུར་བརྒྱུད་པའི་ཡི་གེ་དང་། བླ་ཐབས་སུ་བསྣན་པའི་ཡི་གེ་དང་། སྒྲ་ཐམས་ཅད་ཀུན་ཏུ་སྡུད་པའི་ཡི་གེ་དང་། རིག་པ་དང་མཐུན་པའི་ཡི་གེ་དང་། རྣམ་པར་འདྲེས་པའི་ཡི་གེ་དང་། དྲང་སྲོང་གི་དཀའ་ཐུབ་སྤྱད་པའི་ཡི་གེ་དང་། ལྷའི་ངེས་པའི་ཡི་གེ་དང་། ས་བལྟ་བའི་ཡི་གེ་དང་། ནམ་མཁའ་བལྟ་བའི་ཡི་གེ་དང་། སྨན་ཐམས་ཅད་ཀྱི་རྒྱུ་མཐུན་པའི་ཡི་གེ་དང་། སྙིང་པོ་ཐམས་ཅད་ཀུན་ཏུ་སྡུད་པའི་ཡི་གེ་དང་། འབྱུང་བ་ཐམས་ཅད་ཀྱི་སྦྲ་སྡུད་པའི་ཡི་གེ་སྟེ། ཞེས་ཡི་གེའི་རིགས་ཀྱི་བྱེ་བྲག་དྲུག་ཅུ་རྩ་བཞིའོ། །བརྗོད་པ་ནི་འགྲེལ་ཆེན་དྲི་མ་མེད་པའི་འོད་མདོར་བསྡུས་བཞི་བ་ལས། སྡུད་པར་བྱེད་པ་པོ་དག་གིས་ཐེག་པ་གསུམ་གླེགས་བམ་ལ་བྲིས་ཏེ་དེ་བཞིན་གཤེགས་པའི་ངེས་པས་སྡེ་སྣོད་གསུམ་མ་ག་དྷཱའི་སྐད་ཀྱིས་བྲིས་སོ། །མདོ་སྡེ་ནི་སིན་དྷུའི་སྐད་ཀྱིས་སོ། །ཕ་རོལ་ཏུ་ཕྱིན་པའི་ཚུལ་དང་།
སྔགས་ཀྱི་ཚུལ་ནི་ལེགས་པར་སྦྱང་བའི་སྐད་ཀྱིས་སོ། །རྒྱུད་དང་རྒྱུད་གཞན་དག་ནི་ལེགས་པར་སྦྱར་བའི་སྐད་དང་། ཐ་མལ་བའི་སྐད་དང་། ཟུར་ཆག་གི་སྐད་དང་། ལེགས་པར་སྦྱར་བ་མ་ཡིན་པར་རི་ཁྲོད་ལ་སོགས་པ་ཀླ་ཀློའི་སྐད་ཀྱིས་ཏེ། དེ་ལྟ་བུ་ལ་སོགས་པ་ཐམས་ཅད་མཁྱེན་པས་བསྟན་པའི་ཆོས་རྣམས་སྡུད་པར་བྱེད་པ་པོ་དག་གིས་བྲིས་སོ། །དེ་བཞིན་དུ་བོད་ཀྱི་ཡུལ་དུ་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ། རྒྱ་ནག་ཏུ་རྒྱ་ནག་གི་སྐད་ཀྱིས་སོ། །རྒྱ་ནག་ཆེན་པོར་རྒྱ་ནག་ཆེན་པོའི་སྐད་ཀྱིས་སོ། །པར་སི་ཀའི་ཡུལ་དུ་པར་སི་ཀའི་སྐད་ཀྱིས་སོ། །ཆུ་བོ་ས་ཏིའི་བྱང་དུ་ཙམ་བཀའི་ཡུལ་གྱི་སྐད་དང་། སྤྲེའུའི་ཡུལ་གྱི་སྐད་དང་། གསེར་ཞེས་བྱ་བའི་ཡུལ་གྱི་སྐད་ཀྱིས་སོ། །ཞེས་བཤད་དོ། །དོན་འདིས་གསང་བསྔགས་ཀྱི་གཞུང་ལེགས་སྦྱར་གྱི་སྐད་ཁོ་ནས་གཏན་ཚིགས་དང་། ངེས་པ་འཚོ་བའི་རྣམ་ཤེས་ཕྱོགས་གཅིག་པ་བ་རྣམས་ཀྱི་འདོད་པའང་གཞན་དུ་བྱས་སོ། །ཡང་གཞུང་འདིས་རྟོག་དཔྱོད་ཅན་དག་ལ་ཡིད་གཉིས་མང་པོ་བྱིན་ནས་བོད་ཀྱི་ཡུལ་དུ་བསྟན་པ་མེད་ཀྱི་གོང་ནས་བསྡུ་བ་བྱས་པའི་གཏན་ཚིགས་རྗེས་སུ་དཔག་སྟེ། སྒང་དུ་བསྡུ་བ་བྱེད་པའི་དུས་ཙམ་ནས་བོད་ལ་ཡི་གེ་ཡོད་པར་དོགས་པ་དང་། ཡང་སྡུད་པོ་རྣམས་ཀྱིས་ཐེག་པ་གསུམ་བོད་སྐད་ཀྱིས་བྲི་བར་ལུང་བསྟན་པ་ཡིན་ཞེས་རྗོད་བྱེད་ད་ལྟ་བ་ཕྱི་མའི་ལུང་སྟོན་དུ་སྒྲུབ་དགོས་པའང་བྱུང་ན། སྔ་འགྱུར་གྱི་རྒྱུད་ལ་སྤྲུལ་པའི་ལོ་པཎ་ཆེན་པོ་དག་གིས་དོན་འགྱུར་གཙོ་བོར་སྨོས་ནས་ཡུལ་དུས་ཀྱི་སྐད་དང་ལུགས་ཀྱི་རྗེས་སུ་མཐུན་པར་བཀྲལ་བ་ལ་ཀླན་ཀ་བྱ་བའི་སྐབས་ཀྱང་བྱེ་མའི་ཆངས་པ་བཞིན་དུ་ཞིག་པར་གྱུར་ཏེ། དཔེར་ན་བོད་ཀྱི་སྔོན་ནས་རྒྱ་ནག་ཏུ་བསྟན་པ་བྱུང་ཞིང་། རྒྱའི་པཎྜི་ཏ་ཧྭ་ཤང་མ་ཧཱ་ལཱན་ལ་སོགས་པས་སྐབས་དེར་བོད་དུ་ཚེས་སྔོན་ལ་བསྒྱུར་བ་དང་རྗེས་སུ་མཐུན་པར། སྐད་གཉིས་ཤན་སྦྱར་གྱི་དུས་ཧ་ཤང་འབར་བའི་སྐད་དུ། ཞེས་བལྟ་བུའང་སྐད་ཉམས་འགྱུར་གྱི་བྱེ་བྲག་ཏུ་མཛད་པར་ཤས་དགོས་ལ། དེ་བཞིན་དུ་འགྱུར་
བ་མེད་པའི་དོན་ལ་རྡོ་རྗེའམ། གཡུ་དྲུང་གཉིས་ཀ་མི་འགལ་བ་ཉིད་དུ་བལྟས་ནས། སྐབས་དུས་དེར་རིང་ལུགས་སྔོན་ནས་དར་བ་གང་ལ་ཞེན་པའི་བརྡ་སྐད་དེས་སྦྱང་སླ་བ་དང་། གདུལ་སླ་བའི་སླད་དུ་ཆོས་སྐད་དེ་དང་མཐུན་པར་བྱས་པ་དག་ཀྱང་ཡོད་ན། བོན་གྱི་གཞུང་དུ་གཡུང་དྲུང་སེམས་དཔའ་སེམས་དཔའ་ཆེན་པོ་ཞེས་འབྱུང་བ་དེ། སྡང་ཞེན་གྱི་ཡུལ་དུ་གློ་བ་ལ་ཞེན་ནས་གཡུ་དྲུང་གི་མིང་ཙམ་སྨོས་པར་དེ་དང་དེའི་ལུགས་སུ་ཡིད་གཉིས་བྱེད་པ་སོགས་ནི། གསུང་རབ་ཀྱི་དགོངས་པ་དོན་ལ་རྟོན་མི་རྟོན་གྱི་ཁྱད་པར་མ་བསམས་པས་ནོངས་པ་ཡིན་ནོ། །འདི་ལྟར་བློ་མཆོག་རྣམས་ཀྱིས་དཔྱད་བཟོད་ན། སངས་རྒྱས་ཀྱི་བྱིན་རླབས་ལས་འགྲོ་བ་སོ་སོའི་སྐད་དུ་གསུང་དབྱངས་ཡན་ལག་དྲུག་ཅུ་ལྟར་སྣང་བས་དོན་མཛད་ཀྱང་། དོན་ལ་སྒྲ་ཚིག་རང་ཚན་པ་མ་ཡིན་ཏེ། གདུལ་བྱའི་མོས་པ་དང་། སངས་རྒྱས་ཀྱི་བྱིན་རླབས་དང་། དུས་སུ་ཚོགས་པའི་རྐྱེན་གསུམ་འཛོམ་པ་ལས། དུས་སྔ་ཕྱི་མེད་པ་ཉིད་དུ་གདུལ་བྱའི་རིགས་ཁམས་དང་མཐུན་པར་ཆོས་ཀྱང་ཐ་དད་པར་སྟོན་པ་ཡིན་ཏེ། མདོ་ཏིང་ངེ་འཛིན་རྒྱལ་པོ་ལས། །འཇིག་རྟེན་ཕན་པ་ཁྱོད་ཀྱི་གསུང་གཅིག་ལས། །མོས་པ་ཐ་དད་བཞིན་དུ་སྒྲིབ་འབྱུང་སྟེ། །རྒྱལ་བས་བདག་ལ་སྟོན་ཉམས་སོ་སོར་སེམས། །གང་གི་སླད་དུ་ཁྱོད་ཀྱིས་འཛུམ་མཛད་སྟོན། །ཞེས་པའི་གནས་བསམ་གྱིས་མི་ཁྱབ་པ་འདི་ཁོང་དུ་ཆུད་པ་ནི་དོན་ལ་མཁས་པ་ཞེས་བྱའོ། །དེའི་ཕྱིར་བཀའ་ལུང་འགྲེལ་བར་བྱེད་པའི་བྱང་ཆུབ་སེམས་དཔའ་དེ་དག་ཀྱང་བློ་གྲོས་ཀྱི་མཐུ་བསམ་གྱིས་མི་ཁྱབ་ཅིང་། སྒྱུར་བྱེད་ཀྱི་ལོ་པཎ་སྤྲུལ་པའི་སྐུ་རྣམས་ཀྱང་སངས་རྒྱས་ཀྱི་བྱིན་རླབས་ཀྱིས་སྤོབས་པའི་གཏེར་མཛོད་གྲོལ་བ་འབའ་ཞིག་ཡིན་པས། འཇིག་རྟེན་ན་རྒྱལ་པོའི་ངག་བགྲོས་བློན་པོས་བསྐྱར་བ་ལ་མཁས་པ་ཙམ་མམ། ཡི་གེའི་ལས་འདུ་བྱེད་པ་དག་གིས་བཤུས་ནས་བཀབ་པ་ལྟ་བུའི་རྣམ་པར་རྟོག་པའི་ཆོས་ཀྱི་ཚིག་དོན་ཡོད་དོ་ཅོག་གི་ཆ་ལ་རིག་པ་བསྐྲེ་བ་གཅིག་པུའི་མཐར་ཡང་མ་ལྷུང་བར་བྱའོ། །དེ་ལྟར་
བརྗོད་བྱ་དེ་རྣམས་ཀྱི་སྲོག་གཟུགས་སམ་ངོ་བོས་བསྟན་པ་ནི། བཟོ་རིག་པའི་ཡན་ལག་ཡི་གེའི་འདུ་བྱེད་འདི་ཡིན་ཏེ། འདི་ལྟར་འཕགས་པའི་ཡུལ་གྱི་ཡི་གེའི་རྒྱུན་མང་པོ་དག་བོད་དུ་མཆེད་པ་ཙམ་ཡོད་མོད་ཀྱིས། མཐའ་ཁོབ་ཀྱི་སྐད་ལ་སྒྲ་ཇི་བཞིན་དུ་བྲི་བར་ནུས་པ་མ་ཡིན་པས་མཁན་པོ་ཐོན་མི་ས་མ་བྷོ་ཊའི་བློ་གྲོས་ཀྱིས་རྒྱ་ཡིག་ལྔ་བཅུ་ཐམ་པ། བོད་ཡིག་སུམ་ཅུའི་སྡེར་གཏན་ལ་ཕབ་ཅིང་། དེ་དང་མཐུན་པའི་གཟུགས་བརྙན་གྱི་ཡི་གེའང་གསལ་བར་མཛད་པས། བོད་དང་བོད་ཆེན་པོར་གཏོགས་པའི་ཡུལ་དང་། ལྗོངས་དང་། གྲོང་ཁྱེར་དང་། གྲོང་དལ་དང་། གཙུག་ལག་ཁང་དང་། རྒྱལ་པོའི་ཁབ་ཀྱི་གྲོང་ཁྱེར་ལ་སོགས་པར་དར་རྒྱས་སུ་གྱུར་བའི་ཡི་གེ་རྫབ་ཆེན་དང་། རྫ་བ་ཆུང་དང་། འབྲུ་ཆེན་དང་། འབྲུ་ཆུང་དང་། གཤར་མ་དང་། དཀྱུས་ཡིག་ལ་སོགས་པ་ཡོངས་སུ་གྲགས་པ་དག་དང་། འཕགས་པའི་ཡུལ་གྱི་ཡི་གེ་ལ་དཔེ་བྱས་པའམ། མིན་ཡང་རུང་སྟེ་བོད་འདིར་རང་རང་གི་བློ་གྲོས་ཀྱིས་གཟུགས་བརྙན་དུ་བཅོས་པ་དག་ཀྱང་མཐའ་མི་འཚལ་བ་ཞིག་བྱུང་ཡང་། གསུང་རབ་དགོངས་འགྲེལ་དང་བཅས་པའི་སྲོག་བསྟེན་པར་ནུས་ཤིང་། གཟུགས་ཀྱི་རྣམ་པ་ཁོ་ན་ལའང་བྱིན་རླབས་ཀྱི་ཁྱད་པར་རང་བཞིན་གྱིས་ཞུགས་པ་ནི་རྫབ་ཆེན་འདི་ཁོ་ན་སྟེ། དེ་ལའང་ལི་ལུགས་དང་། ལྡན་ལུགས་སོགས་སྲོལ་ཐ་དད་པ་ལས། བཟོའི་གནས་ཀྱི་རིག་པ་འདི་ལ་ཉེ་བར་མཁོ་བའི་མཚན་ཉིད་བཟང་མགོ་ལ་འདོན་པ་ལ་སོགས་གདོན་པ་བཅུ། སྣ་བ། ལམ་ཟླུམ་ལ་སྒྲོས་ཆགས་པ་ལ་སོགས་ཏེ་གཅེས་སོ་བརྒྱད་དེ་བཅོ་བརྒྱད། དེ་བཞིན་དུ་ཐག་ཟླུམ་གྲིས་བཅད་འདྲ་བའི་མགོ་དང་། ཐུགས་ཀར་རྡོར་འཛིན་གྱི་དཔུང་བ་དང་། གསེགས་སྦྱོར་ཐུང་རྣོ་བྲགས་མཆུ་དང་། རྒྱ་ཁབ་བསླངས་འདྲའི་་ཡར་འཐེན་དང་། སྒོ་ལྕགས་རྐང་འདྲའི་མར་
འཐེན་དང་། ཉ་མིག་འདྲ་བའི་མིག་བུ་སྟེ། དེ་བཞིན་དུ་རེ་རེ་ལ། རབ་དང་། འབྲིང་དང་། ཐ་མ་སྟེ་གསུམ་གསུམ་དུ་ཕྱེ་བའི་ཆོས་ཉི་ཤུ་རྩ་གཅིག་དང་། མཐོ་དམན་མེད་པ་ལ་སོགས་པ་རྣ་རུའི་ཆོས་གསུམ། སྟོད་སྨད་ཕྱེད་པ་ལ་སོགས་ཏེ་འགྲེང་བུའི་ཆོས་གཉིས། ཟླུམ་འགྲིལ་འཁྱུག་པ་སྙེ་གི་གུའི་ཆོས་གསུམ། གསུམ་འགྲེལ་ལྡན་པ་སྟེ་ཞབས་ཀྱུའི་ཆོས་གསུམ། རྟ་སྦྲེལ་བ་སོགས་ར་བཏགས་ཀྱི་ཆོས་གཉིས། འཁྱུག་སྙོམས་སོགས་ཡ་བཏགས་ཀྱི་ཆོས་གསུམ་སྟེ་བུ་ཆོས་བཅུ་དྲུག་དང་། གཟུགས་དཀྱུས་སུ་མ་གོལ་བ། དཀྱས་ཆར་ནས་མ་ཡར་བ། དེ་གཉིས་ཤན་ཕྱེད་པ་སྟེ། སྤྱིའི་ཆོས་གསུམ་སྤོ་དང་བཅས་པ་སྟེ་རགས་པར་ཆོས་བཞི་བཅུའི་མཚན་ཉིད་དང་། ཞིབ་པར་སོ་སོའི་ཐིག་གི་ས་ཆ་དབྱེ་བ་དང་བཅས་པ་སྟེ། དེ་དག་གི་སྲོལ་འབྱེད་ཆེན་པོ་ཐོན་མིས་མ་བྷོ་ཊའི་ཡི་གེའི་རྒྱུན་འཛིན་པ་རྣམས་ཀྱི་མཆོག་ཏུ་གྱུར་བ་སྐ་བ་དཔལ་བརྩེགས་ཀྱི་ལུགས། ཁྱུང་པོ་གཡུ་ཁྲིས་ཐིག་རིས་སུ་བཏབ་པ་ལ། མཁས་པ་རོང་པོས་ལྷན་ཐབས་ཀྱིས་དག་པ་སྦྱར་བའང་ཡོད་དེ། དེ་དག་ལ་བཟོ་གནས་འཛིན་པ་ཕལ་ཆེར་རྣམས་དབྱེ་འབྱེད་པའི་བློ་གྲོས་གསལ་བ་ཉུང་ནའང་། རགས་པ་ཙམ་དུ་ཕྱིའི་ཤ་དང་ནང་གི་དཀར་ཞེས་གཟུགས་ཀྱི་མཚན་ཉིད་འོལ་སྤྱི་ཙམ་འཛིན་པ་ལ་གཅིག་ཏུ་རྟོག་པ་གསལ་བས་ཡི་གེའི་གཟུགས་བརྙན་དང་། བྲིས་སྐུ་གཉིས་པོ་གནའ་བོའི་དུས་ལས་ཀྱང་བར་སྐབས་ཙམ་དུ་ཉམས་འགྱུར་གསལ་ཞིང་། ལྷག་པར་ཡི་གེའི་བཟོ་གནས་ནི་ཐོད་རྒལ་བ་རེ་རེ་ཙམ་ད་ལྟའང་འབྱུང་བཞིན་པ་བོད་འདིར་བསྟན་པ་གནས་པ་ཁོ་ནའི་བྱིན་རླབས་སུ་ངེས་སོ། །གསུམ་པ་ཐུགས་ཀྱི་རྟེན་ནི། སྤྱིར་འཕགས་པའི་བདེན་པ་གཟིགས་པ་རྣམས་ཀྱི་དོན་ཁམས་གསུམ་པོ་འདི་དག་ཀྱང་དེ་བཞིན་གཤེགས་པའི་རྣམ་པ་ཐམས་ཅད་པའི་མཆོད་རྟེན་དུ་བཞག་པ་ཡོད་ད། རྡོ་རྗེ་བཀོད་པ་ལས། འདོད་ཁམས་དབང་གི་རི་བོ་ལ། །གཟུགས་ཁམས་བང་རིམ་ཁྲི་འཕང་ཅན། །གཟུགས་
མེད་བུམ་རྟེན་བུམ་པར་བཅས། །སྐུ་གདུང་ཆེན་པོ་རྒྱུན་དུ་གནས། །ཞེས་དང་། འདིར་ཚད་དང་རྣམ་པ་ལྟར་གཞག་པ་ལ་ཉན་ཐོས་དང་། རང་སངས་རྒྱས་དང་། ཐེག་པ་ཆེན་པོའི་མཆོད་རྟེན་གསུམ་དུ་གྲགས་པ་སྟེ། དེའང་ཉན་ཐོས་ཀྱི་མཆོད་རྟེན་ཆོས་གོས་བཞི་བལྟབ་ཀྱི་སྟེང་དུ་ལྷུང་བཟེད་ཁ་སྦུབ་བ་ལ་འཁར་གསིབ་བཙུགས་པ་ལྟ་བུའོ། །རང་སངས་རྒྱས་ཀྱི་མཆོད་རྟེན་ནི་རྨད་གྲུ་བཞིའི་སྟེང་དུ་དངོས་གྲུབ་ཞི་ཟླུམ་པོ་བང་རིམ་བཅུ་གཉིས་པ་འཁོར་ལོ་རྩིབས་བརྒྱད་པའི་རྣམ་པ་ཅན་ན། །ཐེག་པ་ཆེན་པོའི་མཆོད་རྟེན་ནི་ལྷུང་བཟེད་ཁ་སྦུབ་པ་ལྟ་བུའི་བིམྦའི་ཟླུམ་པོ་དང་ཁང་བུ་ལྟ་བུ་དག་རྒྱལ་མཚན་ལྟ་བུའི་མཆོད་རྟེན་བརྒྱད་ལ་སོགས་པར་ཀླུ་སྒྲུབ་ཞབས་ཀྱིས་བཤད་ཅིང་། དེ་ལྟར་སྟོན་པའི་ཁུངས་འདུལ་བ་ལུང་ལས། ཤཱ་རིའི་བུའི་གདུང་གི་གླེང་གཞི་བྱས་ནས་ཉན་རང་སངས་རྒྱས་གསུམ་གྱི་མཆོད་རྟེན་ལ་འབྲས་བུའི་གྲངས་ཀྱི་གདུགས་ཐ་དད་པར་བཞག་པ་དང་། དེ་བཞིན་དུ་དུས་ཀྱི་འཁོར་ལོ་ནས་མགུལ་བ་ཐུང་བ་དང་། འགྲེལ་བ་དྲི་མེད་ནས་མགྲིན་རིང་སྟེ་རྣམ་པ་གཞན་དུ་བཤད་པ་དང་། བདུད་རྩི་མཆོག་ནས་སྔགས་རྒྱུད་ཀྱི་གླེང་གཞི་དང་མཐུན་པར་བཞུགས་པའི་གནས་ཀྱི་བྱེ་བྲག་དང་། །སྤྱིར་བསོད་ནམས་དམ་པའི་ཉེར་འཚོར། །པདྨ་སྤུངས་པ་ནས་རིམ་པར་དེ་བཞིན་གཤེགས་པའི་མཆོད་རྟེན་བརྒྱད་ཀྱི་མཚན་ཉིད་བསྟན་པ་གྲགས་ཆེ་ཞིང་། ངེས་པའི་དོན་དུ་བདེ་བར་གཤེགས་པའི་རྣམ་པ་ཐམས་ཅད་པའི་མཆོད་རྟེན་ལ་བྱང་ཆུབ་ཕྱོགས་ཀྱི་ཆོས་རྣམས་མ་ལུས་པའི་དག་པ་སྦྱོར་བས་ན་ཐུགས་ཀྱི་རྟེན་དུ་འཇོག་པ་ཡིན་ནོ། །གཉིས་པ་བཟོ་གནས་ཕལ་བ་ནི། བོད་ཆོ་རིག་མི་བཙུན་པས་སྐྱེ་བོ་ཕལ་ཆེར་གྱིས་ཉམས་སུ་བསྟར་བ་སྟེ། ངོ་མཚར་མ་ཡིན་ཡང་མདོ་སྡེ་ལས་བཟོ་གནས་བཅོ་བརྒྱད་དུ་ཕྱེ་བས། འདི་ལྟར་ཚོང་པ་དང་། རྫ་མཁན་དང་། ཕྲེང་བ་མཁན་དང་། ཆང་ཚོང་དང་། ཕྱུགས་བཙོང་བ་དང་། འདྲེག་མཁན་དང་། འབྲུ་མར་
འཚིར་བ་དང་། མགར་བ་དང་། ཤིང་མཁན་དང་། ཕྱྭ་མཁན་དང་། ཐག་པ་དང་། ཀོ་པགས་མཁན་དང་། རྒྱལ་ཆེན་པ་དང་། བཙོ་བླག་མཁན་དང་། སྨྱིག་མ་མཁན་དང་། སྲོག་ལས་པ་དང་། གདོལ་བ་མཁན་དང་། ཤིང་རྟ་མཁན་ཏེ་རྣམ་གྲངས་བཅོ་བརྒྱད། གཞན་ཡང་རིན་པོ་ཆེ་བརྟག་པ། ས་གཞི་བརྟག་པ། གོས་བརྟག་པ། ལྗོན་ཤིང་བརྟག་པ། རྟ་བརྟག་པ། གླང་པོ་ཆེ་བརྟག་པ། སྐྱེས་པ་བརྟག་པ། བུད་མེད་བརྟག་པ་སྟེ་བརྟག་པ་བརྒྱད། དེ་བཞིན་དུ་སྒྱུ་རྩལ་གྱི་གནས་དྲུག་ཅུ་རྩ་བཞི་ནི། ཇི་སྐད་དུ། རོལ་མོའི་མཚན་ཉིད་སྒྱུ་མ་དང་། །འགྱེད་སྟོབས་དང་ནི་མེ་རྟོག་ལས། །དམག་རྣམས་ཀྱིས་ནི་བདག་ཉིད་ཤེས། །གཡོས་སུ་བྱ་བ་རྣམ་པར་ངེས། །ཚོང་དང་ནོར་ནི་བསྒྱུར་བ་དང་། །རྒྱན་དང་ལག་རྩིས་བཅུད་ཀྱི་ལེན། །འཁྲུལ་འཁོར་སྦྱོར་དང་དྲི་བ་དག། འཕོང་དཔྱད་དང་ནི་ཚོམ་སྦྱོར་སྒྲ། །ཡི་གེ་དང་ནི་ཁྲ་སྐད་དང་། །རང་རང་བཟོ་དང་མཚོན་རྣམས་བརྟག། །གཅོད་ཐབས་དང་ནི་སོག་ལེ་དང་། །ཕུབ་རྣམས་བསྐོར་བར་བྱེད་པ་དང་། །སོང་་དང་འོང་བ་ཤེས་པ་དང་། །གཞི་ཡི་མཚན་ཉིད་ཤེས་པ་དང་། །མདུང་དང་རྡོ་རྗེ་བརྟག་པ་དང་། །ཐབས་ཀྱི་ཚོར་བའི་མཚན་ཉིད་དང་། །ཟུག་རྔུ་འབྱིན་དང་མིག་འཕྲུལ་དང་། །བྷ་ར་ཏ་ཡི་བསྟན་བཅོས་ཤེས། །བཅིང་དང་ཁང་པ་བརྩེགས་མ་དང་། །དེ་བཞིན་གོས་ཀྱི་འཕར་བ་དང་། །ཡན་ལག་མཉེ་དང་མོ་འདེབས་དང་། །དེ་བཞིན་ཆུ་ཡི་ཀུན་འཛིན་དང་། །དུང་གི་སྒྲ་དང་སྡེབ་སྦྱོར་དང་། །གྲོང་རྡལ་དང་ནི་གློག་འདྲ་དང་། །མཚན་མོ་ཆོམ་རྐུན་ཤེས་པ་དང་། །སྐྲ་དང་ས་རྟོག་བྱེད་པ་དང་། །སྐྱེས་པ་བུད་མེད་རྟ་དང་ནི། །གླང་པོའི་མཚན་ཉིད་གར་སློབ་དང་། །འབྱུང་པོ་དག་ནི་གསོ་བ་དང་། །ཟངས་མ་འཁར་བ་གསེར་དག་དང་། །ཤིང་དང་དུང་དང་ཤེས་པ་དང་། །རི་མོ་མཚན་དང་གོས་ངག་གི། ལས་རྣམས་དེ་དག་གོ་རིམ་བཞིན། །སྐར་མའི་གཏན་ཚིགས་
ཤེས་པ་དང་། །མཚན་མོ་ཤེས་པ་ཉིད་དང་ལང་། །ངེས་པའི་ཚིག་གི་གཞུང་རྣམས་ཀྱིས། །སྒྱུ་རྩལ་དྲུག་ཅུ་རྩ་བཞིར་དྲན། །ཞེས་དང་། དེའི་ཁྱད་པར་གཞན་པ་སྙན་དངགས་མེ་ལོང་ལས་བཟོར་གཏོགས་པ་སུམ་ཅུ། རོལ་མོའི་བྱེ་བྲག་བཅོ་བརྒྱད། གླུ་དབྱངས་ཀྱི་ངེས་པ་བདུན། གར་གྱི་ཉམས་དགུ་སྟེ་དྲུག་ཅུ་རྩ་བཞིར་བྱེད་པ་ལས། བཟོར་གཏོགས་པ་སུམ་ཅུ་ནི། སྒྱུ་རྩལ། ཡི་གེ། ལག་རྩིས། གྲངས་ཅན། རྩིས། འཛིན་སྟངས། ཐོར་ཚུགས། གོམ་སྟབས། ལྕགས་ཀྱུས་བསྒྱུར་ཐབས། རལ་གྲིའི་ཐབས། ཞགས་པ་གདབ་པ། མངའ་བོ་ཆེ་འཕེན་ཐབས། འཕང་གི་སློབ་དཔོན། མདུན་དུ་བསྣུར་བ། ཕྱིར་བསྣུར་བ། བཅད་པ། དྲལ་བ། དབུག་པ། རྒྱང་ནས་འཕོག་པ། སྒྲ་གྲག་པར་འཕོག་པ། གནད་དུ་འཕོག་པ། མི་འཆོར་བར་འཕོག་པ། ཚབས་ཆེ་བ་སྟེ་གནས་ལྔ་དང་། མཆོངས་པ། གྱད་ཀྱི་འཛིན་སྟངས། བང་། རྐྱལ། རྒལ་བ། གླང་པོ་ཆེའི་གཉར་ཞོན་པ། རྟ་འཞོན་པ། ཤིང་རྟའི་ཐབས། མདའ་གཞུ་འགྱེད་སྟབས་སོ། །རོལ་མོའི་བྱེ་བྲག་བཅོ་བརྒྱད་ནི། གར་མཁན་ནམ་བྲོ་མཁན། གར་རམ་བྲོ། །རྔ་བོ་ཆེ། རྫ་རྔ་རྔ། རྫ་རྔ་ཆེན་པོ། འཁར་རྔ། པི་ཝང་རྒྱུད་གཅིག་པ། རྫ་རྔ་ཁ་གཅིག་པ། ལྕགས་ཀྱི་སིལ་ཁྲོལ། ཁར་དཀྲལ། པི་ཝང་། རྒྱུད་གསུམ་པ། རྔ་མུ་ཀུན། སིལ་སྙན། གླུ་དབྱངས། ཕེག་རྡོབ་པ། རོལ་མོའི་སྒྲ། པི་ཝང་། གླིང་བུའོ། །གླུ་དབྱངས་ཀྱི་ངེས་པ་བདུན་ནི། ཇི་སྐད་དུ། འཁོར་ཉན་ཁྱུ་མཆོག་དྲི་འཛིན་དང་། །དྲུག་སྐྱེས་བར་མ་བློ་གསལ་ཏེ། །ལྔ་བཞེས་བྱ་དབྱངས་བདུན་ནོ། །ཞེས་དང་པོ་ནས་རིམ་བཞིན། །གླང་པོའི་སྒྲ་ལྟ་བུ་དང་། ཁྱུ་མཆོག་བ་གླང་ལྟ་བུ་དང་། ར་སྐད་ལྟ་བུ་དང་། ཟླ་བ་སྒྲ་གཅན་ལྟ་བུ་དང་། ཁྲུང་ཁྲུང་སྒྲོག་ག་པ་ལྟ་བུ་དང་།
རྟ་སྐད་ལྟ་བུ་དང་། མེ་ཏོག་དུས་ཀྱི་རྨ་བྱ་སྒྲོག་པ་བཞིན་ནོ། །གར་སྟབས་ང་། །སུ་ནི། སྒེག་པ་དང་། དཔའ་བ་དང་། མི་སྡུག་པ་དང་། དྲག་ཤུལ་ཅན་དང་། བཞད་གད་དང་། འཇིགས་སུ་རུང་བ་དང་། སྙིང་རྗེ་བ་དང་། རྔམ་པ་དང་། ཞི་བ་སྟེ་དགུ་རྣམས་སོ། །དེ་བཞིན་དུ་དུས་ཀྱི་འཁོར་ལོའི་བསྡུས་རྒྱུད་ལས། གཡུལ་དུ་ཕམ་པའི་དགྲ་བོ་དག་ནི་གལ་ཏེ་འཕྲལ་རྫོང་གི་ནང་དུ་ཞུགས་པར་གྱུར་བ་ན། །ཕྱི་རོལ་དུ་ནི་འཁྲུལ་འཁོར་བྱ་སྟེ་རྒྱུན་ཆད་མེད་པར་རྡོ་དང་མེ་མདའ་རབ་ཏུ་འབེབས་པ་དང་། །རལ་གྲི་ལ་སོགས་གཅོད་པའི་འཁྲུལ་འཁོར་དག་དང་ས་གཞིའི་གནས་ལ་གུར་དང་གོ་ནི་དབྱེ་བ་ཡིས། །དེ་ཡིས་རྫོང་ནི་ཕྱེ་མར་བྱས་ཏེ་ཉིན་ཞག་ཅུང་ཟད་དག་གིས་གདུག་པ་དེ་ནི་བསྒྲུབ་བར་བྱ། །ཞེས་འཁྲུལ་འཁོར་གྱི་བཟོ་གནས། ཐང་རྫོང་གཞིག་པ་རྡོའི་འཁྲུལ་འཁོར། ཆུ་རྫོང་འཇོམས་པ་གྲུའི་འཁྲུལ་འཁོར། རི་རྫོང་འཇོམས་པ་མེའི་འཁྲུལ་འཁོར། རལ་གྲི་འཁོར་བ་གྲི་གུག་གི་འཁྲུལ་འཁོར། རྩེ་མོ་འབྱེད་པ་རླུང་གི་འཁྲུལ་འཁོར། རྩིག་པ་འཇིག་པ་གུར་གྱི་འཁྲུལ་འཁོར། གོ་ཆ་འཇིགས་པ་ལྕགས་མདའི་འཁྲུལ་འཁོར་རྣམས་དང་། རང་ཕྱོགས་བསྲུང་བ་རལ་གྲིའི་འཁྲུལ་འཁོར། རྒྱལ་རིགས་འཐབ་པ་ཤིང་རྟའི་ཚད། ལྟད་མོ་ལ་འགྲོ་བའི་དོན་དུ་ཁང་བཟང་གི་མཚན་ཉིད། དགའ་སྟོན་གྱི་དོན་དུ་ཕྱོགས་ཀྱི་མཚན་ཉིད། ལྡུམ་ར་གསོ་བའི་དོན་དུ་ཆུ་འདྲེན་པའི་འཁྲུལ་འཁོར་ལ་སོགས་པས་ཕས་རྒོལ་ཆམ་ལ་འབེབས་པའི་གནད་དེ། མདོར་ན་ལུས་ཀྱི་བཟོ་དང་། ངག་གི་བཟོ་དང་། ཡིད་ཀྱི་བཟོ་སྟེ་རྣམ་པ་གསུམ་གྱི་ཁོང་དུ་མི་འདུ་བ་ནི་གང་ཡང་མེད་དོ། །གཉིས་པ་གཅིག་ཏུ་རྣམ་པར་དཀར་བའི་བྱ་བ་ལས་ཀྱི་འཁོར་ལོ་ཇི་ལྟར་བརྩམས་པ་ནི། མདོ་སྡེ་ས་བཅུ་པ་ལས། ས་དང་པོ་ལ་གནས་པའི་བྱང་ཆུབ་སེམས་དཔའ་རྣམས་ནི་ཕལ་ཆེར་འཛམ་བུའི་གླིང་གི་དབང་པོར་གྱུར་ཅིང་། དབང་ཕྱུག་ཆེན་པོ་ལ་དབང་རབ་ཏུ་ཐོབ་པ་དང་། ཆོས་རྗེས་སུ་སྲུང་བ་དང་། གཏོང་བ་ཆེན་པོས་སེམས་ཅན་རྣམས་སྡུད་པའི་གཙོ་བོར་གྱུར་ཅིང་། སེམས་ཅན་རྣམས་ཀྱི་སེར་སྣའི་དྲི་མ་
བཟློག་པ་ལ་མཁས་པ་ཡིན། གཏོང་བ་ཆེན་པོ་རྩོམ་པ་ལ་ཡོངས་སུ་དུབ་པར་མི་འགྱུར་བ་ཡིན་ནོ། །སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པས་ལས་གང་ཅི་རྩོམ་ཡང་རུང་སྟེ། དེ་ཐམས་ཅད་སངས་རྒྱས་ཡིད་ལ་བྱ་བ་དང་། ཆེས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་པ་ཡིད་ལ་བྱ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཕུལ་དུ་འགྱུར་རོ་ཞེས་པ་ལྟར། སྔོན་གྱི་ཚེ་འཕགས་པའི་ཡུལ་དུ་རྒྱལ་པོ་མྱ་ངན་མེད་ཀྱི་རྒྱལ་སྲིད་དགེ་འདུན་ལ་བྱིན་པ་ལ་སོགས་ཏེ་བསྟན་པའི་སླད་དུ་སྲི་ཞུ་ཇི་ལྟར་བྱས་པ་དང་། གངས་རིའི་ཁྲོད་འདིར་རྒྱལ་སྲས་རིགས་གསུམ་མགོན་པོའི་ཡེ་ཤེས་ཀྱི་རྣམ་པར་འཕྲུལ་པ་ཆོས་རྒྱལ་མེས་དཔོན་རྣམ་གསུམ་ལ་སོགས་བསླད་པ་མེད་པའི་རིགས་དང་། ཡན་ལག་མཆོག་གི་གཟུགས་དང་། ལང་ཚོ་གསལ་བའི་དཔལ་དང་། དཔའ་བ་དང་། དེས། །པ་དང་། བརྟུལ་ཕོད་པ་དང་། བརྫི་བ་མེད་པའི་སྟོབས་དང་། གཞོམ་དུ་མེད་པའི་དཔུང་བ་དང་། དྲི་བ་མེད་པའི་མངའ་ཐང་དང་། ནོར་གྱི་རྣམ་པ་མཐའ་ཡས་པ་དང་། བཞོན་པ་དང་། རྐང་བྲན་དང་། སྐྱེ་དགུ་མང་པོའི་སྤྱི་བོ་ན་རྐང་བཏེགས་འཆའ་བ་དང་། ཡུལ་དང་། ལྗོངས་དང་། གྲོང་རྡལ་དང་། གྲོང་ཁྱེར་ཆེན་པོའི་ཁོར་ཁོར་ཡུག་དང་། རྫོང་ཆེན་པོ་དང་། ཁང་བུ་བརྩེགས་པའི་ཕོ་བྲང་མིག་སྟོང་བ་ལ་དབང་བྱེད་པའི་བདག་པོར་གྱུར་ཀྱང་། འདི་སྐད་དུ། ཀླུ་སྒྲུབ་ཞབས་ཀྱིས། གཞོན་ཡང་རྒན་པའི་ཉེ་བར་ཞི་ལ་དགའ། །མཁས་པར་གྱུར་ཀྱང་ཤེས་པའི་ང་རྒྱལ་མེད། །གཟི་བརྗིད་ཆེ་ཡང་བཟོད་ཅིང་ངེས་པའི་ངང་། །ཇི་མཐོར་ཕྱིན་ཡང་ང་རྒྱལ་དྲེགས་པ་མེད། །ཅེས་དང་། བཤེས་སྤྲིང་དུ། སེར་སྣ་གཡོ་སྒྱུ་ཆགས་དང་སྙོམ་ལས་དང་། །མངོན་པའི་ང་རྒྱལ་འདོད་ཆགས་ཞེ་སྡང་དང་། །རིགས་
དང་གཟུགས་དང་ཐོས་པ་ལང་ཚོ་དང་། །དབང་ཐང་ཆེ་བས་རྒྱགས་པ་དགྲ་བཞིན་གཟིགས། །ཞེས་པ་ལྟར། ཁྱིམ་ན་གནས་པའི་བལྟར་སྣང་གི་བདེ་བ་ནི་བཟང་པོ་མ་ཡིན་པ། ཐར་བ་མེད་པ། སྐྱེ་འཆིའི་བར་ལག་ཅན། འབྱོར་རྒུད་རེ་མོས་པ། འཁོར་བ་དང་ངན་སེང་གི་རྒྱུ་ལ་བརྟེན་ཅིང་འབྲས་བུ་ལ་ལོངས་སྤྱོད་པའི་རང་བཞིན་དུ་བཅོམ་ལྡན་འདས་ཀྱིས་ཡང་ནས་ཡང་དུ་གསུངས་པའི་ཉེས་དམིགས་མང་པོ་བརྟེན་པ་རྗེས་སུ་དྲན་པའི་ངེས་འབྱུང་གི་ཐུར་མ་རྣོན་པོས། བསོད་ནམས་མ་ཡིན་པ་ལ་ཞེན་ཅིང་རྒྱུ་འབྲས་ཀྱི་མཚན་ཉིད་ལ་ལྡོངས་པར་གྱུར་བའི་འཆིང་བར་མཁོ་ཡོངས་སུ་འབྲལ་བར་བྱེད་པའི་སྤྲོ་བ་ལ་ཞུགས་པ་ཤ་སྟག་གོ། །ཇི་ལྟར་བཞུགས་ན། མཛའ་བཤེས་ལ་སྤྲིངས་པར། དགེ་བའི་བཤེས་གཉེན་བསྟེན་པ་ཚངས་པར་སྤྱོད། ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། །སྐྱེས་བུ་དམ་པ་བརྟེན་བགྱི་དམ་པ་ལ། །བརྟེན་ནས་རབ་ཏུ་མང་པོས་ཞི་བ་ཐོབ། །ཅེས་གསུངས་པ་ལྟར་ཐར་བ་དང་རྣམ་མཁྱེན་གྱི་རྒྱུ་འབྲས་དེ་ཡང་སྐྱེས་བུ་དམ་པ་དགེ་བའི་བཤེས་གཉེན་འབའ་ཞིག་གིས་བདག་པོའི་རྐྱེན་ལ་ལྟོས་ཤིང་རག་ལས་པར་མཁྱེན་ནས། རྒྱ་གར་ཆོས་ཀྱི་འབྱུང་གནས་ཆེན་པོ་ནས་པཎྜི་ཏ་སྤྲུལ་པའི་སྐུ་མཆོག་ཐོས་པ་མང་པོའི་ཕ་རོལ་ཏུ་སོན་ཞིང་། མདོ་སྔགས་རིག་པའི་གནས་གང་ལའང་མ་རྨོངས་པ་བསམ་གྱིས་མི་ཁྱབ་པ་ཞིག་སྤྱན་དྲངས། སྲོག་དང་། ནོར་གྱི་དངོས་པོ་ཅི་ཡང་མི་སེམས་པའི་གནས་སུ་ཉེ་བར་བསྡོགས་ནས་དཀའ་བས་བཙལ་ཞིང་། དགོན་པས་བསྒྲུབས་པའི་རྒྱལ་བསྟན་ཡིད་བཞིན་ནོར་བུ་རིན་པོ་ཆེའི་རྩ་ལག་གཅིག་ཏུ་འགྱུར་བའི་མདོ་དང་སྔགས་ཀྱི་དམ་པའི་ཆོས་དཔག་ཏུ་མེད་པར་བསྒྱུར་བའང་། ཇི་སྐད་དུ་སྒྲ་སྦྱོར་བམ་པོ་གཉིས་པར་གསང་སྔགས་ཀྱི་རྒྱུད་རྣམས་གཞུང་གིས་གསང་བར་བྱ་བ་ཡིན་ཏེ། སྣོད་དུ་མ་གྱུར་བ་རྣམས་ལ་བཤད་ཅིང་བསྟན་དུའང་མི་རུང་ལ། བར་དུ་བསྒྱུར་ཞིང་སྤྱོད་པར་གནང་གིས་ཀྱང་། །ལྡེམ་པོའི་ངག་ཏུ་བཤད་པ་མ་ཁྲོལ་ནས། སྒྲ་ཇི་བཞིན་དུ་འཛིན་ཅིང་ལོག་པར་སྤྱོད་པ་དག་ཀྱང་འབྱུང་། སྔགས་
ཀྱི་རྒྱུད་ཀྱི་ནང་ནས་ཐུ་ཞིང་བོད་སྐད་དུ་བསྒྱུར་བ་དག་ཀྱང་འབྱུང་ཞེས་བདས་ཀྱི། ཕྱིན་ཆད་གཟུངས་སྔགས་དང་། བླ་ནས་བཀའ་སྩལ་ཏེ་བསྒྱུར་དུ་བཅུག་པ་མ་གཏོགས་པ། སྔགས་ཀྱི་རྒྱུད་དང་། སྔགས་ཀྱི་ཚིག་ཐུ་ཞིང་བསྒྱུར་དུ་མི་སྣང་ངོ། །ཞེས་ཐེག་པ་ཆེན་པོ་གསང་སྔགས་ནི་གདུལ་བྱ་ཐུན་མོང་བའི་སྤྱོད་ཡུལ་དུ་མ་ཡིན་པས། བཙན་པོ་ཁྲི་སྲོང་ཉིད་ཀྱི་དུས་ནས་གསང་བ་ཆེན་པོའིསྦུབས་སུ་བསྐྱིལ་བ་ཉིད། སླར་ཡང་རྟའི་ལོ་ལ་ལྷ་སྲས་ཁྲི་ལྡེ་སྲོང་བཙན་འོན་ཅང་དོན་བཞུགས་ཏེ་སྡེ་སྣོད་གསུམ་ལ་སོགས་པའི་གསུང་རབ་སྔོན་འགྱུར་རྣམས་སྐད་གསར་བཅད་ཀྱིས་གཏན་ལ་ཕབ་པའི་ཚེའང་སྔགས་རྒྱུད་རྣམས་གསང་བ་བསྲུང་བའི་དམ་ཚིག་ཏུ་བཀས་བཅད་པས་གླེགས་བམ་དུ་མར་མ་འཕེལ་ལ། སྔར་ཡབ་མེས་ཀྱི་དུས་ཆོས་ཀྱི་སྐད་བོད་ལ་མ་གྲགས་པ་ལས་མིང་དུ་བཏགས་པ་དག། བྱཱ་ཀ་ར་ཎའི་ལུགས་དང་མི་མཐུན་པ་དང་། འཇལ་དཀའ་བ་རྣམས་ཚིག་གིས་སོ་སོར་མ་ཕྲལ་བདག་སྒྲའི་ལུགས་བཙན་པར་བགྱིས་པ་དང་། དོན་གྱི་ལུགས་བཙན་པར་བགྱིས་པའི་དག་ཐེར་གྱིས་ཀྱང་མ་ཕོག་པས་ལེགས་སྦྱར་ཁོ་ནའི་སྐད་ཀྱིས་དབང་དུ་འཇུག་པ་དང་། མི་འཇུག་པའང་ཅི་རིགས་སུ་ཡོད་ཅིང་། བཀའ་དང་དགོངས་འགྲེལ་ཕྱོགས་སུ་བསྒྲིགས་པ་ལ་སྔ་བ་དཀར་ཆག་འཕང་ཐང་མ་དང་། ལྡན་དཀར་མ་གཉིས་སུ་གསང་སྔགས་ནང་གི་རྒྱུད་རྣམས་ཆེས་ཆེར་གཉན་པས་རེ་ཞིག་འདིར་འགོད་པར་མ་ནུས་ཞེས་ཡོ་ག་གསུམ་གྱི་རྒྱུད་རྣམས་གཞུང་གིས་གསང་བར་བྱས་སོ། །རྒྱུ་དེ་རྣམས་ཀྱིས་ཆོས་ལ་ཞུད་པ་དང་གཡེལ་བའི་སྐབས་སུ་མ་བྱུང་བས་བྱིན་རླབས་མ་ཉམས་ཤིང་། གང་དང་གང་གིས་ཚུལ་བཞིན་ཉམས་སུ་བླངས་པ་ཐམས་ཅད་གྲུབ་ཐོབ་ཀྱི་དངོས་པོ་འབའ་ཞིག་ཏུ་བསྒྲུབ་ནུས་པ་བྱུང་བ་ནི་སྔར་གྱི་གཏན་ཚིགས་རྣམས་ཀྱིས་ཤེས་པར་འགྱུར་ལ། ཕྱི་མཐའི་དུས་ན་ཆོས་ལ་མི་རྟོན་བདག་པོ་ལ་རྟོན་པ་དག་གིས་སྔ་འགྱུར་རྩོད་པ་ཅན་དུ་བྱེད་བཞིན་དུ། ཡང་ཕུར་ངོ་མཚར་ཅན་དུ་སྒོམ་པའི་
རྣམ་པར་རྟག་པ་མཉམ་པ་ཉིད་ཀྱི་ངང་དུ་བཞག་ནས། རྙིང་རྒྱུད་ཚང་མ་འདྲིལ་བར་མ་ནུས་པའི་ཕྱོགས་རེའི་ཁུར་གྱི་དུཁ་ལྷོད་པོར་བཀྲོལ་བ་ཚལ་བ་བཀའ་འགྱུར་ལས་ཡོ་ག་གསུམ་ཀའི་རྒྱུད་གཙོ་བསྡུས་ཏེ་ངེས་པ་འདྲེན་པའི་སླད་དུ་བཀོང་མོད། དེ་ལས་གཞན་དུ་སྡེ་ཚན་ལོགས་སུ་བཞུགས་བཞིན་པའང་དུས་ཀྱི་རྒུད་པ་དང་། ཀླ་ཀློ་ཏུ་རུཥྐའི་སྤུན་ཟླར་གྱུར་བ་དག་གིས་རྒྱལ་བའི་བསྟན་པ་ཕྱོགས་བྲལ་ཆེན་པོ་རིས་སུ་གཅོད་པའི་དོ་ཟླར་ལྷགས་ནས་ཉམ་ཉེས་པར་བྱས་པས་གླེགས་བམ་གྱི་རྒྱུན་ཉུང་ངུར་གྱུར་བ་དེས། སྟོན་པ་བཅོམ་ལྡན་འདས་དེ་བཞིན་གཤེགས་པའི་གདུལ་བ་ཚད་མེད་པའི་ཕྲིན་ལས་ཆུད་གསན་ཅིང་། སྔོན་གྱི་རྒྱལ་བློན་བྱང་ཆུབ་སེམས་དཔའ་དང་། ལོ་པཎ་སྤྲུལ་པའི་སྐུ་མཆོག་རྣམས་ཀྱི་བསམ་གྱིས་མི་ཁྱབ་པའི་ཐུགས་བསྐྱེད་དང་། ཕྱག་རྗེས་ཀྱི་རིམ་པ་ལ་ཟུག་རྔུའི་རྨ་ཕྱུང་བདེ་བློ་ལ་གདུང་བར་ལྕི་ནས་བགྱི་བ་འདི་བརྩམས་པ་ཡིན་ནོ། །དེ་ལ་བདག་ཅག་ནི་རིགས་དང་། གཟུགས་དང་། ཐོས་པ་དང་། ལང་ཚོས་དྲེགས་པ་མ་ཡིན་པ། འབྱོར་བ་ཉུང་བ། མཐུ་ཆུང་བ། བགྱི་བ་མང་པོ་ལྷུར་མི་ལེན་པ། །ནགས་ཁྲོད་དབེན་པ་ན་གནས་པ། །ཚོང་དང་། སོ་ནམ་དང་། གཞན་ངོ་སྲུང་བ་ལ་སོགས་པའི་འདུ་འགོད་རྒྱ་ཆེན་པོ་རྨི་ལམ་དུའང་མི་སེམས་པར། ནམ་སྒྱུ་མའི་ལུས་རྟེན་ཕུང་པོའི་འདུ་བྱེད་དང་བཅས་པ་འཇིག་རྟེན་ཕ་རོལ་པའི་གནས་སུ་འཁྲིད་པར་འགྱུར་བའི་ངེས་པར་འབྱུང་བ་ཁོ་ན་ཡིད་ལ་རྒྱུན་ཆགས་པས་དཀོན་མཆོག་གསུམ་ལ་སྐྱབས་སུ་འགྲོ་ཞིང་། ཡིད་མཉམ་པ་ཉིད་ཀྱི་ཀློང་ན་རེ་བ་དང་དོགས་པའི་གནས་ལ་ཆབ་མི་འཚལ་བར་གནས་པ་ཞིག་ལ། ལ་ལ་ཞིག་གིས་བདོག་པའི་རྣམ་པ་དབྱིག་གི་དངོས་པོའམ། འབྲུའི་ཆ་ཤས་སམ། བཟའ་བ་དང་བཅའ་བའམ། བགོ་བ་དང་། རྒྱན་གྱི་བྱེ་བྲག་གམ། ཐ་ན་ཁབ་དང་སྲད་བུའི་རྣམ་པ་ཙམ་འབྱོར་བར་གྱུར་ནའང་། དེ་ལ་རང་གི་
ཕྱོགས་སྲུང་བ་དང་། དཔལ་དང་འབྱོར་བའི་འདུ་འགོད་རྩོམ་པ་དང་། འགའ་དང་འགལ་ལ་དོ་ཟླའི་གནས་སུ་ལྟ་བ་ལ་སོགས་པའི་རྣམ་པར་རྟོག་པ་ཡིད་ཀྱི་ཡུལ་དུའང་འཇུག་པ་མ་ཡིན་པས། རྔ་བོ་ཆེའི་མདོར། ནོར་ནི་དགྲ་དང་ཆོམ་རྐུན་སོགས་མང་དང་། །རྒྱལ་པོ་མེ་དང་ཆུ་དང་མཛའ་བཤེས་དང་། །ཉེ་དུ་མི་མཛའ་བགོ་སྐལ་སྤྱོད་མང་གིས། །སྡིག་པར་སྤྱོད་པ་ཡིས་ནི་འཛད་པར་འགྱུར། །ཅེས་གསུངས་པའི་ཚུལ་དེ་ལ་སེམས་ཤིང་། ཇི་ལྟར་ནུས་པའི་སྒོ་ནས། འདི་ནི་དཀོན་མཆོག་གི་ཕྱོགས་སུ་མཆོད་པར་ཕུལ་བའམ། དཀྲེན་པ་དང་། ཕོངས་པ་དང་། ཉམ་ཐག་པ་དང་། མགོན་མེད་པ་དང་། ནད་པ་དང་། སྲོག་གི་འཇིགས་པས་སྐྲག་པ་ལ་སོགས་པའི་སྙིང་རྗེའི་ཡུལ་དུ་གྱུར་བ་དག་གི་ཉེར་འཚོར་བྱས་ན་རུང་གི། རི་ཞིག་བྱ་བ་དེ་དང་དེའི་རྒྱུ་རྐྱེན་ཚོགས་པར་མ་གྱུར་བ་དེ་སྲིད་དུ་བདག་ནི་འདིའི་གཉེར་དུ་བསྐོས་པ་ཙམ་ཡིན་གྱིས། དངོས་པོ་འདིའི་བདག་པོར་གྱུར་བ་ནི་ཁོ་བོ་ཅག་ནམ་དུའང་མ་ཡིན་ནོ་སྙམ་དུ་ཡིད་ལ་ལྷན་སྐྱེས་སུ་འཆར་བས་དཀོར་གྱི་ནུས་པ་སླར་ལ་འཕེལ་བའི་བརྟུལ་ཞུགས་ཀྱང་ཉམས་དམས་པར་འགྱུར་རོ་སྙམ་དུ་སེམས་ལ། བདུན་པ་དེའི་རྒྱུ་དང་། འབྱོར་བ་ཉུང་ངུར་གྱུར་བའི་བདག་པོའི་རྐྱེན་ལས་ཀྱང་། བོད་ཀྱི་རྡོ་རྗེའི་གདན་ཆེན་པོར་གྱུར་བའི་གཙུག་ལག་ཁང་དག་ལ། སྟོང་མཆོད་ཀྱི་རིམ་པ་ལན་བཅུ་ཕྲག་ཙམ་དང་། གསེར་སིལ་མའི་མེ་ཏོག་གཏོན་པ་དང་། ཞལ་གསེར་གྱི་བྱུག་པས་བསླུ་བ་དང་། རྒྱལ་བའི་བཀའ་འགྱུར་རོ་ཅོག་གི་གསུང་སྒྲོགས་དང་སྐུ་གསུང་ཐུགས་ཀྱི་རྟེན་བཞེངས་ཀྱི་རིམ་པ་ཅུང་ཟད་དང་། འགྲོ་བ་མང་པོའི་སྲོག་བསླུ་བའི་དམ་བཅའ་རྒྱུན་མི་བཅད་པར་བཟུང་བ་དང་། སྒྲུབ་གནས་རྣམས་སུ་མེ་མཚད་དང་ཚོགས་སྐོང་ལ་སོགས་པ་ཡང་ནས་ཡང་དུ་བགྱིད་པ་ལ་སོགས་པ་ཐར་བ་ཆ་མཐུན་གྱི་དགེ་བར་འགྱུར་བའང་རྗེས་ལ་ཐོབ་པའི་ཡེ་ཤེས་དང་འབྲེལ་བར་སྤྱད་ལ། ཁྱད་པར་ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་རྣམས་ཀྱི་གཏོང་བ་ནི་རྣམ་པ་གསུམ་
སྟེ། གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བའོ། །དེ་ལ་གཏོང་བ་གང་ཞེན། བཟའ་བ་དང་། བཏུང་བ་དང་། བཞོན་པ་དང་། གོས་དང་། མར་མེ་དང་། སྤོས་དང་། རྒྱན་ལ་སོགས་པ་གང་སེམས་ཅན་ལ་ཕན་པར་འགྱུར་བ་མ་གཏོགས་པ་མི་སྦྱིན་པ་གང་ཡིན་པ་དེ་ནི་གཏོང་བའོ། །གཏོང་བ་ཆེན་པོ་ནི། འདི་ལྟ་སྟེ། ཆུང་མ་དང་། བུ་དང་། བུ་མོ་དང་། ཡིད་དུ་འོང་བའི་བྲན་དང་། ཁྱིམ་དང་། རྒྱལ་སྲིད་རྣམས་ཡོངས་སུ་གཏོང་བ་ནི་གཏོང་བ་ཆེན་པོའོ། །ཤིན་ཏུ་གཏོང་བ་གང་ཞོན། ལག་པ་དང་། རྐང་པ་དང་། རྣ་བ་དང་། སྣ་དང་། ཤ་དང་། རུས་པ་དང་། པགས་པ་དང་། མིག་དང་། ལྕེ་དང་། མགོ་རུས་དང་། རྐང་ལ་སོགས་པ་གཏོང་བ་སྟེ། འདི་ནི་བྱང་ཆུབ་སེམས་དཔའི་ཤིན་ཏུ་གཏོང་བ་ཞེས་བྱའོ། །ཞེས་གསུངས་པ་ལས། འདིར་ཕྱི་མ་གཉིས་སྨོན་པའི་ཡུལ་དུ་བྱས་ཏེ། དང་པོའི་གནས་ལ་སྦྱིན་པའི་མདོ་ལས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མཁས་པ་རྣམས་ཀྱིས་རྣམ་པ་སུམ་ཅུ་རྩ་བདུན་སྦྱིན་པར་བྱིན་ནོ། །སུམ་ཅུ་རྩ་བདུན་གང་ཞེ་ན། སེར་སྣ་རྣམ་པར་སླང་བའི་ཕྱིར་དད་པས་སྦྱིན་པ་བྱིན་ནོ། །དུས་སུ་སྦྱིན་པ་བྱིན་ནོ། །དེ་བཞིན་གཤེགས་པས་གནང་བའི་རུང་བར་དངོས་པོ་གསུམ་ཡོངས་སུ་དག་པས་སྦྱིན་པ་བྱིན་ནོ། །སེམས་ཀྱི་འཁྲུག་པའི་སྐྱེ་ན་ཐམས་ཅད་སྤང་བའི་ཕྱིར་བསྟི་སྟང་དུ་བྱས་ནས་སྦྱིན་པ་བྱིན་ནོ། །སྙིང་པོ་མེད་པའི་ལུས་ལས་སྙིང་པོ་བླང་བའི་ཕྱིར་རང་གི་ལག་ནས་སྦྱིན་པ་བྱིན་ནོ། །ཞེས་པ་ལ་སོགས་པས་རྒྱ་ཆེར་བསྟན་པ་བཞིན། འཕྲལ་གྱི་བཟའ་བ་དང་། བཏུང་བའི་ཉེ་བར་སྤྱད་པ་ཚུན་ཆད་གཅིག་ཏུ་རྣམ་པར་དཀར་བའི་བགྱི་བ་འདིའི་ཕྱོགས་སུ་ཉེ་བར་བསྔགས་པའི་དམ་བཅའ་བཟང་པོ་ཡིད་ཀྱི་ཆོ་གར་ཡང་དག་པ་ཉིད་དུ་བཅས་སོ། །དེ་ལས་ཇི་ལྟར་བསྒྲུབས་པའི་ཡུལ་ནི། ལྟ་གཅིག་དཱི་པཾ་ཀཱ་རའི་དོན་གྱི་རྟོགས་པ་བརྗོད་པའི་གླེགས་བམ་ལས་མཁའ་འགྲོ་མ་རྣམས་ཀྱི་རྡོ་རྗེའི་མགུར།
ཤར་རྡོ་རྗེ་གདན་གྱི་བྱང་ཕྱོགས་ན། །གནས་སུ་རྒྱལ་བོད་ཅེས་བྱ་བ་ཡོད། །རིམ་ཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མཎྜལ་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །ཚོན་བཀྲ་བ་གསེར་གྱི་མེ་ཏོག་ཡོད། །དབྱར་བཀྲ་བ་གཡུ་ཡི་མེ་ཏོག་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་བསྔགས་པ་བཞིན། རི་ཁ་བ་ཅན་ན་སྟོད་ལ་མངའ་རིས་སྐོར་གསུམ། བར་ན་དབུས་གཙང་རུ་བཞི། སྨད་ན་མདོ་ཁམས་སྒང་དྲུག་ཡོད་པའི་ནང་ཚན་ལས། གངས་རིའི་ཁྲོད་ཀྱི་རྡོ་རྗེའི་གདན་ཆེན་པོ་ལྷ་ལྡན་སྤྲུལ་པའི་གཙུག་ལག་ཁང་ཆེན་པོ་ནས་མཐར་བྱེད་ཀྱི་ཕྱོགས་སུ་གདུགས་གསུམ་གྱིས་བདེ་བ་ཕྱིན་པའི་ས། དགེ་བཅུའི་དཔལ་གྱིས་མངོན་པར་ཕྱུག་པའི་ཡུལ་ཡར་མོ་གྲུང་གི་ཆུ་ལྷའི་ཕྱོགས་ཀྱི་ཡན་ལག། གཡོ་རུའི་ཁྲ་འབྲུག་གི་གཙུག་ལག་ཁང་དང་ཧ་ཅང་རིང་བ་མ་ཡིན་པ་བཀྲ་ཤིས་སྲོང་བཙན་བང་སོའི་དབང་པོའི་ཕྱོགས། སྐྱེ་བོ་རྣམས་ཆོས་ཀྱི་སྣང་བ་ཤས་ཉུང་ཞིང་། ཞོ་ཤས་འཚོ་བ། འབྱོར་བ་མ་ཡིན་པ། ཕྱོགས་དང་ཕྱོགས་མཚམས་གྲོང་ཁྱེར་སྟོངས་པས་གང་ཞིང་། དགེ་བ་བསྒྲུབ་པ་ལ་ཕན་པ་དང་གནོད་པའི་ཕྱོགས་གཉིས་ཀ་སྤངས་པའི་མཐའ་ཁོ་འཁོལ་བུ་པར་ཡང་དབེན་པ་འབའ་ཞིག་གི་ཡོན་ཏན་བསམས་ཏེ་འཕྲ་བཟུང་ནས་བྱང་ཆུབ་ཤིང་གི་ནགས་ཁྲོད་ཚེ་རིང་ལྗོངས་ཞེས་བྱ་བའི་བས་མཐའ་ཆེན་པོ། ཁོ་བོ་ཅག་ཡོན་མཆོད་ཀྱིས་རེ་ཞིག་ཅིག་ལ་རྟེན་དང་བརྟེན་པའི་གནས་མིག་འཕྲུལ་ལྟ་བུར་རྣམ་པར་འདུ་བྱས་པའི་དྲི་གཙང་ཁང་མཐོང་ན་མི་མཐུན་པ་མེད་པའི་རྟེན་གྱི་གཟི་བྱིན་དང་འགྲོགས་པ་པདྨ་འོད་གླིང་ཐར་བ་ཆེན་པོའི་གྲོང་ཁྱེར་ཞེས་བྱ་བ་རྣ་ལུང་དུ་དབྱངས་ནས་ཕྱོགས་དང་ཕྱོགས་བྲལ་ནས་འབྲེལ་བ་ཅན་དག་ཆོས་ཀྱི་འདུ་བ་ལ་ལྟགས་ཤིང་། རྡོ་རྗེ་ཐེག་པའི་བཤད་སྒྲུབ་ཀྱི་སྒྲ་ཡང་ཅུང་ཟད་སྒྲོགས་པ། དེ་ལས་གཞན་དུ་སྐྱེ་བོ་ཕལ་པ་རྣམས་
ཀྱིས་བལྟར་མི་མངོན་ཞིང་། སྙིང་ཐག་པ་ནས་འཁོར་བ་ལ་ངེས་པར་འབྱུང་བའི་ཡིད་ཀྱིས་ཤིང་རྟས་བསམ་གཏན་གྱི་ཁང་བུའི་ནང་དུ་ལང་ཚོའི་འདུ་བྱེད་རྣམ་པར་དྲངས་ནས། འགྱུ་བའི་ལམ་གྱི་སྒོ་ཡང་རྩིག་པའི་རབ་དང་འཇིམ་པའི་ཞལ་ཞལ་གྱིས་འཐས་པར་བྱས་པའི་དྲང་སྲོང་དུ་མས་བསྟེན་པའི་གནས་ཤིག་ཡོད་དེ། དེ་ནི་སྲིད་པ་འདིར་སྐྱེ་བའི་མྱུ་གུ་བཟུང་མ་ཐག་པ་ནས་སངས་རྒྱས་ཀྱི་བསྟན་པའི་ལམ་སྲོལ་ལ་ཡང་དག་པར་ཞུགས་ཤིང་། ཐོས་པ་མང་པོ་དང་། བློ་གྲོས་རྒྱ་ཆེན་པོའི་གནས་སུ་འཇུག་པ་བརྩམ་པ་མ་ཡིན་ཡང་། དད་པ་དང་། བརྩོན་འགྲུས་དང་། སྙིང་རྗེ་བ་དང་། སྐྱོ་ཤེས་དང་། ངེས་པར་འབྱུང་བས་ཡིད་དྲངས་ཏེ་སྒྲུབ་པ་འབའ་ཞིག་ལྷུར་བྱེད་པའི་གནས་ལ་རང་བཞིན་གྱིས་བག་ཆགས་གསལ་བའི་རིག་པ་འཛིན་པ་མཁྱེན་བརྩེའི་འོད་ཟེར་རམ། ཨོ་རྒྱན་གྱི་སློབ་དཔོན་ཆེན་པོས། རང་བྱུང་རྡོ་རྗེ་འཇིགས་མེད་གླིང་པར་མིང་གི་ཅོད་པན་དབྱངས་ཤིང་། གཞན་དུ་ཀློང་ཆེན་ནམ་མཁའི་རྣལ་འབྱོར་ཞེས་ཀྱང་བོད་པ་དེ་ཉིད་ཀྱི་རྣམ་པར་རྟོག་པ་ལ་སྔོན་གྱི་ཚེ་རང་ཉིད་ཀྱི་ཡབ་ཏུ་གྱུར་བ་རྒྱལ་པོ་ཀྲྀ་ཀྲིའི་རྨི་ལྟས་ཀྱི་མཚན་ཉིད་བཅུ་ཐམ་པའི་དོན་ལ་རྟོག་ཕ་ཤར་ཏེ། འདི་སྐད་དུ་སངས་རྒྱས་འོད་སྲུངས་ཆེན་པོས། རྒྱལ་པོ་ཆེན་པོ་མ་འཇིགས་ཤིག། རྒྱུ་འདི་ལས་ཁྱོད་རྒྱལ་སྲིད་ལས་ཉམས་པ་དང་། སྲོག་གི་བར་ཆད་དུ་མི་འགྱུར་གྱི་མ་འཇིགས་ཤིག། དེ་ཅིའི་ཕྱིར་ན། །རྒྱལ་པོ་ཆེན་པོ་གང་ཁྱོད་ཀྱིས་གླང་པོ་ཆེ་སྐར་ཁུང་ནས་བྱུང་བ་ལས་མཇུག་མ་ཐོགས་པ་མཐོང་བ་དེ་ཅིའི་སྔ་ལྟས་ཤེ་ན། མ་འོངས་པ་ན་སྐྱེ་དགུའི་ཚེ་ལོ་བརྒྱ་ཐུབ་པའི་དུས་ན། ཤཱཀྱ་ཐུབ་པ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྱུང་བར་འགྱུར་ཏེ་དེའི་ཉན་ཐོས་དག་རང་གི་སྐྱེ་བོ་གཉེན་བཤེས་རྒྱ་ཆེན་པོ་སྤངས་ནས་རབ་ཏུ་བྱུང་སྟེ། དེ་ལྟར་རབ་ཏུ་བྱུང་ནས་གཙུག་ལག་ཁང་ལ་ཁྱིམ་གྱི་འདུ་ཤེས་སྐྱེ་བར་འགྱུར་ཅིང་། དེ་ནས་སེར་སྣ་ཀུན་ཏུ་བརྟེན་ཅིང་ལན་མང་དུ་བྱས་པས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་རྣམས་སུ་ལྟུང་ཞིང་སྐྱེ་བར་འགྱུར་
བ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྒོམ་པ་མ་ཡིན་པ་རྣམས་ཀྱི་ཕྱི་བཞིན་དུ་ཁྲོན་པ་གདའ་བ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེ་ན། དེའི་ཉན་ཐོས་དག་བྲམ་ཟེ་དང་ཁྱིམ་བདག་རྣམས་ལ་ཆོས་སྟོན་པ་དེ་དག་ཉན་པར་མི་འདོད་ཅིང་གནས་པར་འགྱུར་བ་དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་བྱེ་བྲེྲགང་དང་མུ་ཏིག་བྲེ་གང་བརྗེ་བ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེན། དེའི་ཉན་ཐོས་བྱེ་ཆོལ་བའི་ཕྱིར་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་ལ་སོགས་པའི་རིན་པོ་ཡང་དག་པར་གསལ་བར་བྱེད་དེ། །དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་ཙན་དན་ཤིང་ཐ་མལ་པར་འཚོང་བ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེན། དེའི་ཉན་ཐོས་དག་ལུས་མ་བསྒོམས་པ་འབྱུང་བར་འགྱུར་ཞིང་། ཚུལ་ཁྲིམས་མ་བསྒོམས་པ་དང་། སེམས་མ་བསྒོམས་པ་དང་། ཤེས་རབ་མ་བསྒོམས་བདག་འབྱུང་བར་འགྱུར་ལ། ལུས་མ་བསྒོམས་པ་དང་། ཚུལ་ཁྲིམས་མ་བསྒོམས་པ་དང་། སེམས་མ་བསྒོམས་པ་དང་། ཤེས་རབ་མ་བསྒོམས་པས་མུ་སྟེགས་ཀྱི་བསྟན་པ་འཛིན་ཅིང་། སངས་རྒྱས་ཀྱི་གསུང་རབ་དང་མཉམ་པར་བྱེད་པར་འགྱུར་ཏེ། དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་ཀུན་དགའ་རབ་མེ་ཏོག་དང་འབྲས་བུ་ཕུན་སུམ་ཚོགས་པ་དག་མ་བྱིན་པར་ལེན་པས་ཕྲོགས་པ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེན། དེའི་ཉན་ཐོས་ཁྱིམ་ལ་བརྟེན་ཏེ་དགེ་འདུན་གྱི་མེ་ཏོག་དང་འབྲས་བུ་བཙོངས་ཤིང་བཙོངས་ཏེ་བཟུང་ནས་འཚོ་བའི་ཕྱིར་སྒོམས་པ་དག་འབྱུང་བར་འགྱུར་ཏེ། དེ་ནི་དེའི་སྔ་ལྟས་སོ། །རྒྱལ་པོ་ཆེན་པོ་གད་ཁྱོད་ཀྱིས་གླང་པོ་ཆུང་ངུས་སྤོས་ཀྱི་ཀླང་པོ་ཆེན་པོ་སྐྲག་པར་བྱེད་པ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེན། དེའི་ཉན་ཐོས་ཚུལ་ཁྲིམས་འཆལ་བ་སྡིག་པའི་ཆོས་ཅན་དག་འབྱུང་བར་འགྱུར་ཏེ། དེས་གང་དག་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། དེས་ཤིང་དགེ་བ་དེ་དག་བསྐྲད་ནས་གནས་གཞན་ན་གནས་པར་འགྱུར་ཏེ། དེ་ནི་དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་མི་གཙང་བས་འབགས་པ་གཞན་ལ་བསྐུས་པ་རྨིས་པ་དེ་
ཅིའི་སྔ་ལྟས་ཤེ་ན། དེའི་ཉན་ཐོས་སྡིག་པའི་ཆོས་ཅན་ཚུལ་ཁྲིམས་འཆལ་བ་དེ་དག་གིས་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། དེས་ཤིང་དགེ་བའི་ཆོས་ཅན་དག་ལ་མི་བདེན་པའི་སྐྱོན་འགེལ་བར་འགྱུར་ཏེ། དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་རྒྱལ་པོར་དབང་བསྐུར་བ་རྨིས་པ་དེ་ཅིའི་སྔ་ལྟས་ཤེན། དེའི་དུས་ན་མ་ནིང་ཡང་རྒྱལ་པོ་བྱེད་པར་འགྱུར་ཏེ། དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་སྣམ་བུ་གཅིག་མི་བཅོ་བརྒྱད་ཀྱིས་བགོས་ལ་སྣམ་བུ་ཡང་དེ་བཞིན་དུ་གནས་པ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེ་ན། དེའི་བསྟན་པ་ཁ་བཅོ་བརྒྱད་དུ་གྱེས་པར་གྱུར་ན་རྣམ་པར་གྲོལ་བའི་སྣམ་བུ་ནི་རལ་བར་མི་འགྱུར་ཏེ། དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་གང་སྐྱེ་བོ་ཕལ་པོ་ཆེའི་ཚོགས་འདུས་ཤིང་ཚིག་ངན་བརྗོད་དེ་ཆད་པ་དང་། གནོད་པ་བྱེད་པ་རྨི་ལམ་དུ་མཐོང་བ་དེ་ཅིའི་སྔ་ལྟས་ཤེ་ན། དེའི་བསྟན་པ་ལོ་སྟོང་དུ་གནས་ཤིང་ངན་པར་སྨྲ་བ་དང་། ཆད་པ་བྱེད་པས་ནུབ་པར་འགྱུར་ཏེ་ཞེས་པ་དེས་ཡིད་ལ་གདུང་པ་ལྷག་པར་སྐྱེས་ནས་དེ་བཞིན་གཤེགས་པའི་བསྟན་པ་ལ་དཀོན་པའི་འདུ་ཤེས་བླ་ལྷག་ཏུ་བསྐྱེད་ཅིང་། གང་ན་ཆོས་ཀྱི་སྣང་བ་ཉུང་བ་དང་། གང་ཞིག་ཆོས་ཀྱི་རྣམ་གྲངས་དཀོན་པ་དེ་དག་ལ་འདི་ལྟ་བུ་ནི་བསྟན་པའི་ཁུར་དང་། མངའ་རིས་དང་ལོངས་སྤྱོད་ཆེན་པོའི་གནས་ལ་རང་དབང་དུ་བྱེད་པ་དག་གིས་ཀྱང་ཅི་མི་སྙམ་ན། བདག་ཅག་ནི་མཐུ་ཆུང་ངུར་གྱུར་བས་སེམས་ལ་བརྣག་པའི་ཁུར་དུ་བསྐུར་བར་འོས་པ་མ་ཡིན་ནོ་སྙམ་པའི་ཞུམ་པ་ལྷག་པར་སྡང་སྟེ། བློ་གྲོས་དང་བ་རྟུན་བ་ཆུང་ངུར་གྱུར་བ་དག་གིས་བརྗི་བར་མི་ནུས་པའི་དམ་བཅའི་རི་མོ་བསུབ་ཏུ་མེད་པ་བྲིས་ནས་བགྱི་བ་འདི་བརྩམས་པ་ཡིན་ནོ། །དེ་ལ་དུས་ཀྱི་ངེས་པ་ནི། བདག་ཅག་གི་སྟོན་པ་ཤིང་མོ་གླང་ལ་སྐུ་བལྟམས་པའི་གཏན་ཚིགས་ཇོ་བོ་དཱི་པཾ་ཀཱ་རའི་ལུགས་སུ་བྱེད་པ་ན། འགོས་ལོག་ཞོན་ནུས་སྟོད་ལུང་པ་ཇོ་བོ་ཚུལ་ཁྲིམས་ཀྱི་འདོད་པར་འཇོག་པ་དང་། ཀསྨི་རའི་པཎྜི་ཏ་ཤཱཀྱ་ཤྲཱི་ལ་སོགས་པ་རྒྱ་བ་ལ་ཁ་ཆེ་བ་མང་པོ་དག་མེ་མོ་སྦྲུལ་་གྱི་ལོ་ལ་སྐུ་བལྟམས་པར་བྱེད་པ་ནི། ཉན་ཐོས་སེནྡྷ་པ་རྣམས་ཀྱི་སྟོན་པའི་འདས་ལོ་ནུབ་རེ་བཞིན་བརྩི་བའི་རྒྱུན་མ་ག་དྷཱའི་བྱང་ཆུབ་ཆེན་པོའི་སྐུ་གཟུགས་ཙན་དན་གྱི་ལྡེ་
གུ་ལ་སར་འབྱུང་དུ་འཁྲུངས་པའི་དུས་ལ་འཁྲུལ་བར་འཇོག་པ་དང་། འདོད་པ་གཞན་དུས་འབྲུག་གི་ལོ་ལ་སྐུ་བལྟམས་པར་བྱེད་པ་སོགས་རྣམ་པ་ཤིན་ཏུ་མང་པོར་གྱུར་བ་དག་ལས། འདིར་དུས་ཀྱི་འཁོར་ལོ་ཕྱི་ནང་གཞན་གསུམ་གྱི་གནས་ལ་བློ་མཐུ་ཆེ་ཞིང་། དུས་ཚིགས་རྟག་པའི་འཕྲོས་ཅན་དང་། གསུང་རབ་ཀྱི་ལུང་དོན་རྒྱ་མཚོར་འགལ་བ་མ་ཡིན་པར་སྤྱོད་པ་པད་དཀར་ཞལ་ལུང་གི་རྗེས་འབྲང་ལེགས་པར་བཤད་པ་བཻ་ཌཱུར་དཀར་པོའི་བསྟན་བཅོས་ཀྱི་གཞུང་ལམ་ལ་གཞོན་ནུའི་དུས་ན་གོམ་པ་ལེགས་པར་དོར་བའི་རྗེས་སུ་དཔགས་ཏེ། བདག་ཅག་གི་སྟོན་པ་དྲག་པོ་ལྕགས་སྤྲེའུས་ག་ཟླ་བའི་བཟང་པོ་གཉིས་པར་གྱུར་པ་ཆོས་བདུན་གྱི་ཟླ་སྐར་རྒྱལ་ལ་བབས་པའི་ཉིན་སྐུ་བལྟམས་ནས་ཝརྵ་སྟེ་རང་སྐྱོབ་བམ་ལོ་གྲངས་ཉིས་སྟོང་བདུན་བརྒྱ་སུམ་ཅུ་སོ་གཅིག། ཤིང་པ་སྤྲེའུར་འོད་མཚན་སྟོང་འབར་ཆུ་སྐྱེས་གཞོན་ནུའི་མ་མས་བརྟེན་པ་སངས་རྒྱས་གཉིས་པ་མཚོ་སྐྱེས་རྡོ་རྗེའི་གྲགས་པར་གསལ་ནས་ཉིས་སྟོང་དྲུག་བརྒྱ་བཞི་བཅུ་ཞེ་བདུན། ཕུར་བུས་སྒྲོལ་གསང་བའི་བདག་པོས་རིམ་ལ་ཡ་གནམ་ལྕགས་འབར་བའི་རྩེར་རིགས་ཅན་ལྔ་ལ་གསང་བ་མཆོག་གི་ཆོས་འཁོར་བསྐོར་ཞིང་ཟ་ཧོར་རྒྱལ་པོ་ལུང་བསྟན་རྡོ་རྗེའི་ཕོ་བྲང་རྩེན་ཏནྟ་བཅོ་བརྒྱད་ཆར་དུ་བབས་ནས་ཉིས་སྟོང་དྲུག་བརྒྱ་ཉི་ཤུ་རྩ་གསུམ། ཁྲོ་བོ་ཤིང་གླང་རྡོ་རྗེ་སེམས་དཔའ་གཞོན་ནུའི་ངང་ཚུལ་འཛམ་བུའི་གླིང་ན་དགྱེས་བཞིན་རྩེན་པ་དགའ་རབ་རྡོ་རྗེ་འཁྲུངས་ནས་ཉིས་སྟོང་སུམ་བརྒྱ་དང་བདུན། རྣམ་གནོན་ལྕགས་འབྲུག་རྡོ་རྗེའི་སྐུ་བརྙེས་འཇམ་པའི་གཞོན་ནུའི་སྤུན་ཟླར་གྱུར་བ་པཎྜི་ཏ་ཆེན་པོ་དྲི་མེད་བཤེས་གཉེན་འཁྲུངས་ནས་ཆིག་སྟོང་བདུན་བརྒྱ་ལྔ་བཅུ་རྩ་གཅིག ལྕགས་ཕོ་སྟག་ལ་བསམ་ཡས་བཞེངས་ནས་ཆིག་སྟོང་ཉི་ཤུ་རྩ་གཅིག་རྣམས་སྔོན་དུ་འདས་ཤིང་། རང་ཉིད་ཀྱི་སོ་བཞིབ་ཆུ་ཕོ་རྟའི་ལོ་ལ་པདྨ་འོད་གླིང་བྱང་ཆུབ་ཤིང་གི་ནགས་ཁྲོད་བསྟེན་ནས་འདོར་བྱེད་བཅུ་པའི་ལོ། །དེ་བཞིན་གཤེགས་པའི་བསྟན་པའི་གནས་ཚད་ལས། འདོད་པ་གཞན་ས་ཕོ་འབྲུག་ལ་སྐུ་བལྟམས། མེ་མོ་ཕག་ལ་མྱ་ངན་ལས་འདས་པའི་དབང་གིས་ན། འབྲས་བུའི་
དུས་གསུམ་དང་། སྒྲུབ་པའི་དུས་གསུམ་སྟེ་སྟོང་དང་། ལུང་གི་དུས་གསུམ་ལས་མངོན་པའི་དུས་ཀྱི་ལྔ་བརྒྱ་ཕྲག་གཅིག་ནི་འདས། མདོ་སྡེའི་དུས་ཀྱི་ལྔ་བརྒྱ་ཕྲག་གཅིག་ལས་ཀྱང་བཞི་བརྒྱ་དང་བཞི་སྟེ། བསྡོམས་པས་སུམ་སྟོང་དགུ་བརྒྱ་བཞིར་འདས་ལ། དེའི་ལྷག་མར་གྱུར་བ་བརྒྱ་ཕྲག་གཅིག་དང་དྲུག། འདུལ་བའི་དུས་ཀྱི་ལྔ་བརྒྱ་ཕྲག་གཅིག་དང་། རྟགས་ཙམ་འཛིན་པའི་དུས་ཀྱི་ལྔ་བརྒྱ་ཕྲག་གཅིག་སྟེ། ཕྱི་མ་ནི་བསྟན་པར་མི་ཐེབས། ཕྱིན་ཆད་བསྟན་པ་རྣལ་མའི་ལྷག་མ་ལྔ་བརྒྱ་དང་དགུ་བཅུ་གོ་དྲུག་ཡོད་པ་རབ་བྱུང་བཅུ་གསུམ་པའི་ནང་ཚན་ལྕགས་མོ་ཡོས་ཀྱི་བོད་སྟ་གོན་མ་ཚང་བ་མེད་པ་དང་། ཤོག་ལས་ཀྱི་རིམ་པ་ཉམས་སུ་བསྟར། དེའི་ཆོ་ག་ཙང་ཉང་སྟོང་སའི་ཐིག་ལེ་རྒྱལ་མཁར་རྩེའི་ཉེ་འདབས་ནས་མཐུ་སྟོབས་ཀྱི་དབང་པོ་རྭ་ལོའི་གདུང་དུ་གྱུར་བ་ལ་རབས་དྲ་མའི་ངང་ཚུལ་དང་ལྡན་ཞིང་། རང་བཞིན་གནང་བ། བློ་གྲོས་གྱ་ནོམ་པ། བདག་ཅག་པའང་རིང་མོ་ཉིད་ནས། གུས་པ་དང་། དང་བ་འབའ་ཞིག་ལྷུར་བྱེད་ཅིང་ཟབ་མོའི་ཆོས་ཀྱི་ལམ་ནས་ཡང་དག་པར་འབྲེལ་བ་ཞབས་དྲུང་ཡང་སྟེངས་པ་དྲང་སྲོང་རྒན་པོའི་ངང་ཚུལ་ཅན་དང་། རང་གི་ཞབས་འབྲིང་དུ་གྱུར་བ་དངོས་ལའང་ཆོས་ཀྱི་བདུད་རྩི་མང་དུ་འཐུངས་ཤིང་ནོས་པའི་ཤིང་རྟ་དགེ་བའི་དྲུང་ཡིག་བློ་གསལ་དབང་པོ་དེ་བསྒོ་བ་གང་ཡང་མེད་པར་འཇོག་གི་རྐང་བའི་ཁྱོགས་ལ་བརྟེན་ནས་ཕྱོགས་འདིར་ལྷགས་སུ་བཅུག་པས། དཀོན་མཆོག་གསུམ་གྱི་ཐུགས་རྗེའི་གནས་ལ་བསྒྲིབ་པ་མེད་ཅིང་། རྡོ་རྗེའི་ཆོས་སྐྱོང་རྣམས་ཀྱིས་གཡེལ་བ་མེད་པའི་ཕྲིན་ལས་ལ་ཆགས་ཐོགས་སྤངས་པ་ཉིད་དུ་ངེས་ཤེས་ལྷག་པར་རྙེད་ཅིང་གཟབ་བྲིས་རྣམས་འདྲི་བའི་དབུ་བརྩམས་སོ།། །།དེ་ལ་འདི་ལྟ་སྟེ། བྱ་དཀའ་བ་དང་། རྒྱུ་འགྲོ་མོད་པ་དང་། དུས་བུལ་བ་ལ་བློ་འཚོབ་པ་ནི་བྱ་བའི་ལས་དེ་ཕུན་སུམ་ཚོགས་པ་མ་ཡིན་པར་འཆོས་པའི་གདོན་ཆེན་པོ་བལྟར་མི་མངོན་པ་ཞིག་སྟེ། དེའི་ཕྱིར་བྱ་བ་དང་བྱ་བ་མ་ཡིན་པའི་གནས་ལ་བློ་གྲོས་ཀྱི་མཐུ་སད་པར་བྱེད་པའི་གྲོགས་སུ་གྱུར་བ་ནི་འཇིག་རྟེན་ནའང་ཤིན་ཏུ་དཀོན་པ་
ཉིད་ན་དངོས་ཅག་ཁོན་ལ་ལྟ་ཅི་སྨོས་ཏེ། བསྟན་པའི་གླད་དུ་རང་གི་སྒོ་གསུམ་རྡུལ་ཕྲན་དུ་བརླག་པ་ལའང་ཅང་མི་སེམས་པའི་སྐྱོང་ལ་ཁུར་དུ་བཟོད་པར་བྱས་ཏེ། ལས་ཀྱི་འདུ་འགོད་དང་། ཞུ་དག་གི་དབང་པོ་དང་། བཟོ་གནས་ཀྱི་ཁ་ཏ་ལ་སོགས་ཏེ་ཐམས་ཅད་རང་ཉིད་ཁོ་ནའི་ཕང་བ་ན་བཟུང་དགོས་པ་ཉིད་ལས། དང་པོར་གཟང་བྲིས་རྣམས་དབུ་ཤོག་གཅིག་པ་ནས་ལྔ་པ་ལ་སོགས་པའི་བར་དུ། གསེར་དང་། དངུལ་དང་། ཟངས་དང་། གཡུ་སྦྱངས་བསྲེས་པའི་མཐིང་དང་། མཚལ་ཏེ་རིན་པོ་ཆེ་སྣ་ལྔའི་བྲི་གཞི་ཨིནྡྲ་ནཱི་ལ་ལྟར་སྔོ་བ་དང་། བུང་བ་བཞིན་དུ་གནག་པ་དང་། པདྨ་རཱ་ག་ལྟར་དམར་བ་དང་། མ་རྒད་ལྟར་ལྗང་བ་དང་། གསེར་བཅོ་མའི་ཁ་དོག་དུ་རྔོམ་པའི་ཤོག་བུ་རྣམས་ལ་བྱ་བ་ཐ་དད་པ་མང་པོ་བ་སོགས་ཤིང་། དེ་དག་རྒྱུ་རྐྱེན་མ་ཚོགས་པའམ། ཐལ་བར་གྱུར་བ་ལས་ཡང་ནས་ཡང་དུ་ཆུད་གསོན་པར་གྱུར་བ་ལ་སྤྲོ་བ་ཞེན་པ་མེད་པའི་ནན་ཏན་གྱིས་མཐར་སོན་པར་བྱས་ཏེ་གཟབ་བྲིས་རྣམས་ལ་འདི་ཁོ་ན་ལ་ཚགས་སུ་ཚུད་པར་བྱས་སོ། །རེ་ཞིག་ན་སྟོན་གྱི་རྒྱལ་མོ་ཡང་བལྟར་མི་མངོན་པར་ཕྱོགས་པའི་ཆོ་དཔལ་གྱི་རི་བོ་དམ་པ་ནས་དགེ་འདུན་འདུས་པའི་ཚོགས་རྗེ་སྤྲུལ་པའི་སྐུ་རིན་པོ་ཆེ་གཙོ་བོར་གྱུར་བའི་དགེ་འདུན་ཉི་ཤུ་རྩ་ལྔ་སྐོར་དང་། །དེ་གའི་གྲྭ་རིགས་སློབ་མར་གྱུར་བ་གཙོ་ཆེ་བདག་འདུས་པ་ལ་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དབང་མོ་ཆེ་བསྐུར་བའི་རྗེས་ཐོག་ཏུ། སྔ་དྲོའི་ཆར་ཚོམ་བུ་ཡོངས་རྫོགས་འདུས་པའི་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང་། བདག་འཇུག་བླང་བ་དང་། ཚོགས་ཀྱི་འཁོར་ལོས་དགྱེས་པ་བསྐྱེད་ནས་ལྷག་པའི་ལྷ་དང་མཁའ་འགྲོའི་ཚོགས་ལ་རྒྱུད་ཆེན་ཟབ་མོ་ཤིན་ཏུ་བཀའ་གཉན་པ་དག་བྲི་བ་ལ་སྐབས་དབྱེ་བའི་གནང་བ་ཡང་དག་པར་ཞུས། ཕྱི་དྲོའི་ཆ་ལ་བབ་པ་ན་རྡོ་རྗེའི་ཆོས་སྐྱོང་རྣམས་ལ་མཆོད་པའི་སྤྲིན་རྒྱ་ཆེན་པོ་བཤམས་ཏེ། ཉིན་ཞག་བདུན་གྱི་བར་དུ་དཔོན་སློབ་ཚང་མས་གྱེར་དང་། འགྱུར། ཁུག། སྒོམ། ཕྲ།
འདེགས། འཇོག། སྟེ་ཡོན་ཏན་དུག་ཚང་བའི་དབྱངས་དང་། དྲག་དལ་སྐབས་ཕྱེད་པའི་རྔའི་ཆིངས་དང་། སྙན་འགྱུར་རྫོགས་པའི་རོལ་མོའི་བྱེ་བྲག་དང་། མཁའ་འགྲོ་འབོད་པའི་རྐང་གླིང་དང་། དུང་དང་། དུང་ན་ན་མོ་དང་། རྒྱ་གླིང་དང་། གླིང་བུ་དང་། རྒྱུད་མངས་ལ་སོགས་པའི་སྤྲོས་པ་ལ་བརྟེན་ནས་སྐོང་གསོའི་ཆོ་ག་ཤིན་ཏུ་རྒྱས་པར་བསྟར་ནས། ཐུགས་དམ་བསྐངས་ཤིང་། སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བ་མང་། །ཞེས་པ་ལྟར། རང་གི་སེམས་དགེ་བའི་རྒྱུད་ལ་ངང་གིས་གནས་པས་འདོད་པའི་དོན་བསྒྲུབ་པ་ལ་དགྲ་ཟླར་ཆས་པའི་སླུ་བྱེད་ཀྱི་མདའ་རྣོན་པོ་མེ་ཏོག་གི་མདེའུ་ཅན། རྣམ་པ་ཤིན་ཏུ་རྩུབ་མོ་མ་ཡིན་ཡང་ནུས་པ་ཤིན་ཏུ་རྩུབ་མོར་གྱུར་བ་དེས། ཐབས་དུ་མའི་སྒོ་ནས་གླགས་ལྟ་བའི་འཇུག་པ་རྩོམ་པ་དེ་བསླུ་བྲིད་ཀྱི་གོམ་པ་གྱ་གྱུར་འདོར་བཞིན་དུ་འོང་བའི་སྐབས་གཅོད་པར་གཉེར་དུ་གཏད་ཅིང་། བཀའ་བསྒོས་པས་དེ་དེ་བཞིན་དུ་བསྒྲུབ་པའི་དགེ་མཚན་གྱི་རུ་མཚོན་རྣོན་པོ་ཕྱོགས་དང་ཕྱོགས་བྲལ་དུ་འཕྱར་བའི་ལྟད་མོའང་འདྲེན་བྱེད་ཀྱི་ལམ་དུ་ཕྱིན་པར་གྱུར་ཏོ། །དེ་ནས་གཅིག་ཏུ་རྣམ་པར་དཀར་བའི་ལས་ཀྱི་དངོས་གཞི་རྩོམ་པ་ལ་གཞོན་ནུར་གྱུར་བའི་གསར་བུའི་ལོ་ཡང་ཆས་པར་གྱུར་ཏེ། འདི་ལྟར་འཕགས་པའི་ཡུལ་དུ་སྐད་རིགས་རྣམ་པ་བཞི་ལས་སཾ་སྐྲྀ་ཏའི་སྐད་དུ་ན་སྟ། སྟོད་འགྲེལ་ལས་བོད་སྐད་དུ་དགའ་བའི་སྒྲ་བཟང་པོ་དང་ལྡན། ཤར་ཕྱོགས་ཀྱི་གྲོང་ཁྱེར་ཆེན་པོ་མ་ཧཱ་ཙི་ནའི་ཁབ་ཏུ་ཐིང་ཤིན། འབྱུང་བ་དང་ཁམས་ཀྱི་བྱེ་བྲག་ལས་བྱུང་བའི་ངེས་བརྗོད་མ་སྨོས། ལྗོང་འདིར་དབང་ཐང་དང་བསྟུན་པས་ཆུ་ཕོ་འབྲུག་གི་ལོར་འབོད་པའི་རེས་ལ་འཁར་བའི་དྲང་སྲོང་ཆེན་པོ་དང་། ཆུ་ཚོད་ལ་སྤྱོད་པའི་རྒྱུ་སྐར་གྱི་ལྷ་མོ་སྟེ། དེ་གཉིས་ཕྲད་པའི་འཕྲོད་དང་སྦྱོར་བ་བྱེད་པ་སྟེ། ཡན་ལག་ལྔས་བསྡུས་པ་ལ། ལེགས་ལྡན་གཟའ་ལྔའི་གདོང་ཚུགས་དང་། དུ་བ་དང་། སོལ་བ་དང་། འཁྱུད་པའི་དཔྱད་མ་ཡིན་པ་ལ་སོགས་པ། ཆོག་ཞིང་ཡོས་ཀུན་རྫོབ་ཙམ་དུ་བརྟགས་ནས། དགེ་
བ་དང་ལགས་པའི་ཕྱོགས་འབའ་ཞིག་ལ་དཔལ་དུ་སྟེར་བའི་མཐུ་དང་འགྲོགས་པ། སྔོན་བདག་ཅག་གི་སྟོན་པས་དཔལ་ལྡན་འབྲས་སྤུངས་སུ་གཉིས་མེད་རྒྱུད་ཀྱི་རྒྱལ་པོ་གསུངས་པའི་དུས་ཀྱི་རྒྱལ་པོས་བསུ་བར་ཉེ་ཞིང་། མཛད་སུ་རྒྱ་གཞུང་མའི་འདོད་པས་སྐུ་བལྟིམས་པའི་དུས་ཚོད་ཀྱི་བསྐྱེལ་མར་བྱས་པ་ནག་པ་ཟླ་བའི་དགའ་བ་དང་པོའི་ཉིན། བཟོའི་གནས་ཀྱི་རིག་པ་ལ་གོམས་པའི་སྐྱེས་བུ་བཅུ་ཕྲག་གཉིས་སུ་ལྡང་བདག་མདུན་དུ་བདར་ནས། རྒྱུད་ཀྱི་རྡོ་རྗེའི་གནས་ཆེན་པོ་དག་ནི་སོ་སོ་སྐྱེ་བོ་ཐ་མལ་པའི་རྣམ་ཤེས་ཅན་ལ་ཡེ་གསང་ཆེན་པོའི་བདག་ཉིད་དུ་བཞུགས་ནའང་། གསང་སྒྲོག་གིས་ཉེས་པ་རྣམ་པ་ཙམ་དུ་འགོག་པའི་སླད་དུ་སངས་རྒྱས་ཐམས་ཅད་ཀྱི་གསུང་གིས་གསང་བ་འཛིན་པ་ཆེན་པོ་བྱང་ཆུབ་སེམས་དཔའ་ལག་ན་རྡོ་རྗེའི་རིག་པ་གཏད་པས་སྔོན་བསུས། བཟོ་བོ་དང་ལག་ཆར་གྱུར་བ་ཐམས་ཅད་བསྐྱེད་རྫོགས་ཀྱི་རྣམ་པ་དང་འབྲེལ་བའི་རིག་སྔགས་ཟབ་མོས་བྱིན་གྱིས་བརླབས། གཙང་འུག་བྱ་ལུང་ནས་ཀུན་སྤངས་གྲགས་རྒྱལ་གྱིས་བཞེངས་པའི་རྒྱུད་འབུམ་རགས་རིམ། གོང་ལོ་གཞན་ཕན་རྡོ་རྗེས་བཞེངས་པ་གཙང་སོག་གི་དུས་ཀོང་པོར་བཤུགས་ཏེ་ཐང་འབྲོག་ན་བཞུགས་པ། སྔ་འགྱུར་རྒྱུད་འབུམ་རིན་པོ་ཆེའི་དཔེ་ལུང་གཉིས་ཀའི་རྒྱུན་ལ་གཅིག་ཏུ་བཀའ་དྲིན་ལྡན་པ་རཏྣ་གླིང་བ་ཡབ་སྲས་ཀྱིས་བཞེངས་པའི་ལྷུན་གྲུབ་ཕོ་བྲང་གི་རྒྱུད་འབུམ་རྣམས་དཔེ་ལུང་གཉིས་ཀའི་རྩ་བར་གྱུར་ལ། སྤྱིར་ལྷུན་གྲུབ་ཕོ་བྲང་བ་ལ་སོགས་ཏེ་བླ་མ་གོང་མ་དག་གི་གསན་ཡིག་སོགས་ལས་གཏེར་རྒྱུད་མང་པོས་ཁ་བསྐངས་པས་བོད་ཆུང་བཞི་བཅུར་ཐལ་བ་སོགས་ཀྱི་ཀ་ཐ་སྣང་ཡང་། བཀའ་དགོངས་ལ་སོགས་པའི་རྒྱུད་མང་པོ་ནི་ཆོས་སྡེ་དེ་བའི་སྡེ་ཚན་དུ་དཔེ་ལུང་གཉིས་ཀའི་རྒྱུན་ཟམ་མ་ཆད་པར་འབྱུང་བས་ཕྱོགས་འདིར་འདྲི་བའི་དགོས་པ་ལྷག་པོའང་མི་སྣང་། །འདིར་ནི་ལྡང་མ་ལྷུན་རྒྱལ་དང་། གཏེར་ཁ་གོང་འོག་གི་ཆོས་སྡེ་ནས་སྤྱི་ཏི་ལ་སོགས་པའི་ཆོས་ཀྱི་བཞུགས་ཚུལ་ལ་ངེས་པར་གཅེས་ཤིང་། གཞུང་དོན་རྨད་དུ་བྱུང་བ་འགའ་
ཞིག་མ་གཏོགས། གཙོ་བོར་དཀའ་ནས་བཀར་བརྒྱུད་པ་རྣམས་ཕྱོགས་གཅིག་ཏུ་བཞུགས་པའི་སྡེ་ཚན་གཙོ་བོར་འདུ་བྱེད་པ་ལ་རྒྱལ་དབང་ལྔ་བའི་གསན་ཡིག་དང་། སྨིན་གླིང་གི་རྒྱུད་འབུམ་ཕྱོགས་མཐུན་པ་བྱུང་བས་ཆོས་ཀྱི་བཞུགས་ཚུལ་དེ་བཞིན་དུ་བྱས། རྒྱུད་སོ་སོའི་ཕྱོགས་གཏོགས་ཀྱི་ངོས་འཛིན་ལ་ཡོག་གསུམ་ཀའི་སྐབས་བཞེད་ཚུལ་མི་འདྲ་བ་མང་དུ་བྱུང་བ་ནི། གཞུང་གི་ངོ་བོས་གསལ་བར་སྟོན་པ་དག་གང་ཟག་གི་བློ་མཐུས་ཉམ་ཉེས་པ་མ་ཡིན་པའི་ཕྱིར་ན། རྒྱལ་བ་གཉིས་པ་ཀུན་མཁྱེན་ངག་གི་དབང་པོའི་གྲུབ་མཐའ་མཛོད་ཀྱི་དགོངས་པ་མ་འཁྲུལ་ཞིང་མ་འཛིངས་པ་སྔོན་དུ་བཤད་ནས་འཕྲོས་དོན་ལ་སངས་རྒྱས་ཀྱི་གསུང་རྣམ་པ་ཐམས་ཅད་པ་ཡིན་པའི་རྒྱུ་མཚན་གོང་དུ་བཀོད་པ་བཞིན་ཡན་མན་གཉིས་ཀར་རྟོགས་པའི་རྒྱུད་ཀྱང་ཡོད་པས་དོན་ལ་མི་འགལ་མོད། ཆོས་འབྱུང་རྙིང་པ་ཁ་ཅིག་དང་། མངའ་རིས་པཎ་ཆེན་ལ་སོགས་པའི་གསན་ཡིག་ལ་དཔྱད་ན་དཔེ་ལུང་གཉིས་ཀའི་རྒྱུན་མུད་པའང་འགའ་ཤས་མཆིས་པ་ལས། འདིར་སྨིན་གླིང་གི་རྒྱུད་འབུམ་པོད་ཆེན་ཉི་ཤུ་རྩ་གསུམ་པ་ཕྱི་མོར་བཟུང་། དེར་ཡང་རྒྱུད་བཅུ་བདུན་གྱི་སྡེ་ཚན་འགའ་ཞིག་ལ་རྟོབ་དཔྱོད་མེད་པར་གྲངས་ཡིག་བཏབ་པའི་རྒྱུན་འབྱམས་ནས་ལེ་གྲངས་ཡན་མན་ནོར་བ་སོགས་ཀྱི་གོལ་འཕྱུགས་སླར་ཡིག་དཀྱུས་སུ་ཤོར་བ་རེ་མང་འདུག་བཞུས་དག་གི་དུས་ཚོར་བསམ་ཕྱི་ལ་མཆན་བུས་བཏབ་ཅིང་འདི་ལ་བསྐྱར་བྲིས་བྱས། སྡེ་ཚན་རྣམས་ལའང་དང་པོར་ཕྱོགས་བསྒྲིགས་ཤིག་ཡོད་ཚོད་ལ། ཕྱི་མོ་འདིར་བོད་ལ་སྙོམས་ཕྱིར་འདིར་བྲིས་ཞེས་གྱ་ཚོམས་སུ་བརྒལ་བའང་མང་དུ་འདུག་པ་སླར་ཕྱོགས་བསྡེབས་སུ་གང་འགྲིག་བགྱིས་ཏེ་གཏན་ལ་ཕབ། ལ་ལ་འགྲོལ་བ་ལས་དབྱུང་། ཡི་གེ་པའི་ལྷང་སྐྱོན་དང་། ཞུ་དག་མཁན་གྱིས་དཔྱོད་ཚུལ་ནོར་བ་དང་། བྲི་ནོར་བྱུང་བས་ཤིན་ཏུ་བརྟག་དཀའ་བ་མང་དུ་མཆིས་པ་རྣམས་ལས་པོ་ཏི་གཉིས་གསུམ་ཙམ་མ་གཏོགས་ཕལ་ཆེར་རང་ཉིད་ཀྱི་མིག་ལམ་དུ་དོང་བས་འབྱིན་འཇུག་གང་ཤེས་བྱས། སྔགས་རྣམས་ནི་སྔགས་བཏུལ་སོགས་པ་དང་ཚད་མས་འགལ་བར་ཤེས་པ་རྣམས་
བཅོས་ཤིང་། ཅིས་ཀྱང་ཐེ་ཚོམ་དང་བྲལ་བར་མ་ནུས་པ་དག བིག་ཙི་དང་། ཨ་ཝ་བྷྲཾ་ཤ་དང་། པྲ་ཀྲི་ཏའི་སྐད་དང་། བརྡ་སྐད་ཤིན་ཏུ་གསང་བ་དང་། །ཀླ་ཀློང་སྐད་ལ་སོགས་པ་ཡོད་པར་ཤེས་ནས་བཅོས་སུ་མི་བཏུ་སྦ་རྣམས་ཕྱི་མོ་དང་མཐུན་པ་ཙམ་རྒྱུ་མཚན་དུ་བྱས་ནས་སོར་བཞག་པ་ཉིད་ཉེས་དམིགས་ཆུང་བའི་གནས་སུ་བྱས་ཏེ། སོ་སོ་རིག་བཞི་ས་དགུ་པ། །མ་ཐོབ་དེ་སྲིད་ཆོས་ཀུན་གྱི། །ངེས་ཚིག་ཤེས་མིན་དེ་ཡི་ཕྱིར། །མཐའ་དག་སྡེབ་སྦྱོར་སུ་ཡིས་ཤེས། །ཞེས་པ་འདི་ཤིན་ཏུ་གཟུ་བོར་གྱུར་བ་ཡིན། དེ་ལས་གཞན་དུ་ཞུ་བྱེད་ཀྱི་དབང་པོ་གྲོགས་སུ་གྱུར་བ་ཡང་སྤྱིར་བློ་གྲོས་གསལ་ལ་ཁྱད་པར་དངོས་ཀྱི་བསམ་པ་དང་མཐུན་པའི་དོན་གཉེར་ཡོད་པ་ཞིག་དགོས་པར་སྣང་སྟེ། སེམས་ཅན་མོས་པ་ཐ་དད་པས། །དེ་ཡིས་འགྲོ་འདི་སྣ་ཚོགས་བྱས། །ཞེས་པ་ལྟར་རང་དབང་དུ་འགྱུར་བའང་དཀའ་བར་སྣང་བས་སོ། །ཆོས་ཀྱི་བཞུགས་ཚུལ་ལ་ཐེག་པ་རིམ་འཇོགས་དང་། ལས་དབབ་གཉིས་ལས། མཆོག་དམན་གྱི་ཁྱད་པར་སོགས་གང་ནས་ཀྱང་ཡས་འབབ་འདི་དཔྱད་བཟོད་པ་ཡིན་ཞིང་ལྷག་པར་འཛམ་བུའི་གླིང་འདིར་ཐེག་རྩེ་ཤིན་ཏུ་རྣལ་འབྱོར་གྱིས་བརྒྱུད་པའི་ཆུ་མགོ་རྒྱལ་བ་མ་རྒྱལ་བ་ལས་རྒྱལ་བའི་རྣམ་པར་འཕྲུལ་བར་གདོན་མི་ཟ་བ་སྤྲུལ་པའི་སྐུ་དགའ་རབ་རྡོ་རྗེ་ཉིད། ཡུམ་གྱི་པདྨོའི་གེ་སར་ལས་རྡོ་རྗེ་སེམས་དཔའ་ནམ་མཁའ་ཆེ་ཞལ་འདོན་དུ་མཛད་ཅིང་བྱོན་པའི་རྟེན་འབྲེལ་ལས་རིགས་ཀྱི་སྒོ་ནས་དབྱེ་བའི་འདོད་པ་གཞན་བཞག་སྟེ་རྡོ་རྗེ་སེམས་དཔའ་ནམ་མཁའ་ཆེ་བྲམ་ཟེ་རྒྱས་པའི་རྒྱུད་དང་པོར་བཞག་ནས་བྲི་བའི་དབུ་བརྩམས་སོ། །དེ་ལ་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། གཞན་ལ་གཞན་བསྐུལ་འདེབས་མཁས་ཤིང་། །མ་བཅོལ་ཕན་པར་བྱེད་པའི་ངག གུས་པས་སྤྱི་བོར་བླངས་བགྱི་སྟེ། །རྟག་ཏུ་ཀུན་གྱི་སྒྲོན་མེར་འགྱུར། །ཅེས་པ་ལྟར། ཡི་གེའི་ལས་འདུ་བྱེད་པ་རྣམས་ལ་བསྒོ་བའི་ངག་འདི་སྐད་དུ། སྤྱིར་དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་ནི་བསོད་ནམས་དམ་པའི་འཇུག་
ངོགས། དཀར་པོ་རྣམ་པར་འཕེལ་བ། ནག་པོའི་ཕྱོགས་དང་མཛའ་བ་མ་ཡིན་པ། ཐར་བ་དང་ཐམས་ཅད་མཁྱེན་པའི་ཉེ་རྒྱུ་ཡང་དག་པ། སུ་ཞིག་གི་བྱ་བའི་ལས་དེ་ལ་སྒོ་གསུམ་གྱི་ཕན་པའི་སྦྱོར་བ་དང་། ཟང་ཟིང་གིས་འབྲེལ་བ། ཐ་ན་རྗེས་སུ་ཡི་རང་བའི་རྣམ་པར་རྟོག་པ་ཅིག་ལའང་བསོད་ནམས་དཔག་པར་དཀའ་བ་ཡིན་ན། འདི་ལྟར་དེ་ཉིད་སྐྱེད་བྱེད་ཀྱི་རྒྱུའི་གཙོ་བོར་བཟོ་རིག་པའི་གནས་ལ་གོམས་པ་ཁྱེད་ཅག་ནི་སྐྱེས་བུ་གང་ཞིག་དཔའ་བ་དང་། མཛངས་པ་དང་། བརྟུལ་ཕོད་པའི་ཡོན་ཏན་ཡོད་དམ་མེད་ཀྱང་རུང་སྟེ། ལྕུག་ཕྲན་གཞོན་ནུའི་སྤུན་ཟླར་གྱུར་བའི་སོར་མོའི་འདུ་འགོད་གཅིག་ཅིག་ཁོ་ནས་སྨྱིག་གུའི་འཁྲི་ཤིང་ཧ་ཅང་དམ་པ་དང་ལྷོད་པའི་ཕྱོགས་གཉིས་ཀ་སྤངས་པའི་ཟློས་གར་གྱི་བྱེད་པ་པོས། སངས་རྒྱས་རྣམས་ཀྱི་གསུང་གི་གསང་བ་བསམ་གྱིས་མི་ཁྱབ་པ་ཕྱི་མོའི་ངོས་ནས་བར་གྱིས་བཏབ་བ་མེད་པར་ཏ་ལ་ལ་བྱོན་ཏེ་གཅིག་ལས་དུ་མ། དུ་མ་ལས་མཐའ་ཡས་པར་འཕེལ་བའི་ངོ་མཚར་འདི་ནི་རྒྱལ་བསྟན་ཡིད་བཞིན་གྱི་ནོར་བུ་སྲིད་མཐའི་བར་དུ་མི་ཉམས་པའི་སྲོག་ཤིང་ཆེན་པོ་ཡིན་པས། གང་ཁྱེད་ཅག་ལ་བརྗེད་པར་འོས། རི་མོར་འོས། བསྟི་སྟང་དུ་འོས་པར་བདག་ཉིད་ཀྱིས་བལྟ་བར་བྱ་ཡིས། འདི་ལྟར་རྣམ་པར་ཤེས་པ་ལས་སུ་མི་རུང་བ་ནི་སེམས་ཅན་གྱི་ཁམས་ཚད་མེད་པའི་ཆོས་ཉིད་ཡིན་པས། ལྡབ་ལྡིབ་ཀྱི་ངག་དང་། དེའི་རྗེས་སུ་སེམས་གཞན་ནས་གཞན་དུ་གྱི་ནར་འབྱན་པས་ན་ཡི་གེའི་ལམ་དུ་བརྗོད་པ་མ་ཡིན་པ་འདྲེན་པར་འགྱུར་བས་དབང་པོ་ལས་སུ་རུང་བར་མཛོད་ཅིག །འདི་སྐད་དུ་བཤེས་སྤྲིང་ལས། རྒོད་དང་འགྱོད་དང་གནོད་སེམས་རྨུགས་པ་དང་། །གཉིད་དང་འདོད་ལ་འདུན་པ་ཐེ་ཚོམ་སྟེ། །སྒྲིབ་པ་ལྔ་པོ་འདི་དག་དགེ་བའི་ནོར། །འཕྲོག་པའི་ཆོམ་རྐུན་ལགས་པར་མཁྱེན་པར་མཛོད། །ཅེས་པས་སོ། །དེ་བཞིན་དུ་བྲི་བ་ཧ་ཅང་མྱུར་ཕོའང་ཡི་གེའི་ལུས་ཀྱི་འཁྲི་ཤིང་དཔེ་བྱད་མི་རྫོགས་པར་བྱེད་ཅིང་། །འགྱེལ་བ་དང་། བུབ་པ་དང་། མིག་འཛུམ་པ་དང་། སྲིན་བུའི་རྗེས་སུ་གྱུར་ནས་གདོན་པ་བཅུ་དང་། གཅེས་སོ་བརྒྱད་དང་། ཆོས་ཉི་ཤུའི་མཚན་ཉིད་
ལས་ཉམས་པར་བྱེད་པས་དུས་ཀྱི་ཆད་པ་ལྷགས་པ་མེད་ཀྱིས། བརྩམས་པ་གང་ཞིག་སྒྲོས་གཙང་བའི་སླད་དུ་བག་ཕེབས་པར་མཛོད་ཅིག། ཅེས་བརྗོད་པའི་དྲི་བསུང་བླ་ན་མང་རབས་དེ་དག་གི་རྣ་ལུང་མཛེས་པར་བྱས་པ་ནི། མགོན་པོ་ཀླུ་སྒྲུབ་ཀྱིས། རྒྱལ་བས་སྙིང་ལ་འབབ་དང་བདེན་པ་དང་། །ལོག་པར་སྨྲ་ལྡན་སྐྱེས་བུ་རྣམས་ལ་ནི། །སྦྲང་རྩི་མེ་ཏོག་མི་གཙང་ལྟ་བུའི་ཚིག། རྣམ་གསུམ་བཀའ་སྩལ་དེ་ལས་ཐ་མ་སྤང་། །ཞེས་པས་སོ། །དེ་ཡང་གླེགས་བམ་གྱི་དབུ་ཁང་གཡས་གཡོན་གསེར་གྱི་གྲག་ཤིན་ཏུ་མཛེས་པའི་ནང་དུ། བཅོམ་ལྡན་འདས་དཔལ་གདོད་པའི་སངས་རྒྱས་ཡེ་ཤེས་མཆོག་གི་རྒྱལ་པོ་སྟོང་དཔྱལ་དང་། རིགས་རྣམས་ཀུན་གྱི་སྤྱི་མེས་དཀྱིལ་འཁོར་རྒྱ་མཚོའི་བདག་ཉིད་དྲུག་པ་རྡོ་རྗེ་འཆང་ཆེན་པོ། རྒྱལ་ཚབ་རིགས་ལྔའི་སངས་རྒྱས། རིགས་གསུམ་སེམས་དཔའ། དགའ་རབ་རྡོ་རྗེ་ལ་སོགས་ཏེ་ཐེག་པ་མཆོག་གི་ཤིང་རྟ། རྒྱལ་པོ་ཛལ་སོགས་ཏེ་ཏནྟྲ་བཅོ་བརྒྱད་ཀྱི་མངའ་བདག། དཔལ་མགོན་ཀླུ་སྒྲུབ་ལ་སོགས་ཏེ་སྒྲུབ་སྡེ་བརྒྱད་ཀྱི་རིག་འཛིན་ཏེ། རྣམ་གསུམ་ཡོ་གའི་བསྟན་པ་ལ་དངོས་དང་བརྒྱུད་ནས་བཀའ་དྲིན་ཆེན་པོར་གྱུར་བའི་དགོངས་བརྡ་སྙན་བརྒྱུད་ཀྱི་བླ་མའི་ཚོགས་གཅེས་བསྡུས་དང་། མ་མགོན་གཉིས་བཅས་སྣང་བརྙན་ལྔ་བཅུ་ཐམ་པ་འཇམ་གཉེན་བིར་གྱི་རྩེ་ནས་སྨན་མཁྱེན་མཁས་པའི་རུས་ཚུགས་དང་། ཆོས་དབྱིངས་པའི་ཉམས་འགྱུར་གྱི་དངོས་པོ་འདུས་བྱས་པ་རི་མོའི་ལམ་དུ་འདྲེན་པ་ལ་ཆགས་ཐོགས་སྤངས་པའི་མིག་འཕྲུལ་མཁན། ཁོ་བོ་ཅག་གི་གྲུབ་པའི་མཐའ་ལ་ཐོས་པ་མང་ཞིང་། རྣམ་པ་ཀུན་ཏུ་རིམ་པ་གཉིས་ཀྱི་རྣལ་འབྱོར་ལ་ལམ་དུ་བྱེད་པ་ཝ་གིནྡྲ་དྷརྨ་ཀི་ཏིས་བསྟན་པའི་ཞབས་ཏོག་ཏུ་བགྱི་ངར་བོས་པ་འདི་དང་། དཔལ་ཨོ་རྒྱན་ཆོས་ཀྱི་རྒྱལ་པོའི་རྣམ་ཐར་ཤེར་བྲག་མའི་ཐང་ཆེན་དགུ། བཟོ་རྩད་ཤིན་ཏུ་གཟབས་པ་དང་བཅས་པ་དུས་འདི་ཙམ་ལ་གྲུབ་པར་བགྱིས་ནས། ཕྱིན་ཆད་ཀུན་ཏུ་བཟང་པོའི་གོ་འཕང་དང་། བཟོ་གནས་ཀྱི་
རིག་པ་བརྗེ་བ་ལ་ནམ་ཡང་མི་བརྩོན་པའི་དམ་བཅའི་སྲོག་ཤིང་བརྟན་པར་ཡང་བྱས་སོ། །དེ་ལྟར་གཟབ་བྲིས་ཀྱི་ཡི་གེ་དང་། །དབུ་ལྷའི་བྱེད་ལས་པ་གཉིས་ཀ་རང་གི་སློབ་མའི་ཆ་ནས་ཐོན་ཏེ་གཞན་དབང་ལ་མ་ལྟོས་པའི་རྒྱུས་ཕུན་སུམ་ཚོགས་པར་གྲུབ་བོ། །དེ་ལ་དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ་ཞེས་བརྗོད་བྱ་དོན་གྱི་ཆ་ལ་ཁྱད་པར་བཟང་པོ་དེ་ལྟ་བུ་ཡོད་ན། ཆོས་ཀྱི་སླད་དུ་ཇི་ལྟར་བྱ་བའི་འདུས་བྱས་ཀྱི་དགེ་བའི་ཚོགས་ལའང་དོན་དེ་ཐུན་མོང་དུ་གྱུར་བ་ཡིན་པས། སངས་རྒྱས་པའི་ཆོས་ནི་ཡང་དག་པར་ན་ཀླུ་སྒྲུབ་ཞབས་ཀྱིས། འཇིག་རྟེན་མཁྱེན་པ་རྙེད་དང་མི་རྙེད་དང་། །བདེ་དང་མི་བདེ་སྙན་དང་མི་སྙན་དང་། །བསྟོད་སྨད་ཅེས་བགྱི་འཇིག་རྟེན་ཆོས་བརྒྱད་པོ། །བདག་གི་ཡིད་ཡུལ་མིན་པར་མགོ་སྙོམས་མཛོད། །ཅེས་པ་ལྟར། ལོ་ཀའི་ཆོས་རྣམ་པ་བརྒྱད་ཀྱིས་བསྒྲུབས་པའི་དགེ་བ་ནི་བཟང་པོ་མ་ཡིན་གྱི། སྤྱིར་འཇིག་རྟེན་ན་རྒྱལ་པོ་དང་། མི་དབོན་ལ་སོགས་ཏེ་རང་རང་གི་མངའ་རིས་ལ་སྤྱོད་པ་ཕལ་མོ་ཆེའི་དགེ་བའི་རྩ་བ་ནི། རྒྱུད་ནས་གཞན་ལ་ཁྲལ་བཞག་པ་དང་། འུ་ལག་ཉག་གཅིག་བདས་ནས་བྱ་བ་མ་ཡིན་པ་གཅིག་ཏུ་རྣམ་པར་དཀར་བའི་བགྱི་བར་སེམས་པ་ལ། སློབ་དཔོན་དཔའ་བོས། སྦྱིན་བདག་སྟོབས་ལྡན་ཁྱབ་འཇུག་སློང་བ་པོ། །རྟ་ཡི་མཆོད་སྦྱིན་དུས་ན་ས་ཆེན་བྱིན། །འབྲས་བུ་བཅིངས་པ་ཉིད་ནི་ཐོབ་པར་འགྱུར། །རྒྱུ་འབྲས་འཆོལ་བ་འདི་ལ་སུ་ཞིག་སྨོན། །ཞེས་པ་ལྟར། ཕྱོགས་གཤེད་དུ་རང་ལ་གྲགས་པ་བསྐྱེད་པའི་དགེ་བའི་ལས་ཕུལ་དུ་ཕྱིན་པ་ལྟར་སྣང་ཡང་། དེའི་རྒྱུ་གཞན་གྱི་ལོངས་སྤྱོད་ལས་ཕྲི་བ་དང་། བརྡེག་པ་དང་། འཚོག་པ་དང་། འཆིང་བ་ལ་སོགས་པའི་སྒོ་ནས་མནར་གཅོད་ཀྱི་དུཁ་ཐོག་ཏུ་འབེབས་པ་དང་། བཟོ་བོ་དག་ཀྱང་འཁུན་ཞིང་གཤུང་བའི་ངང་ནས་བྱ་བའི་ལས་འདུ་བྱེད་པ་དག་ལ་རྒྱལ་བ་དགྱེས་པའི་རྒྱུ་འབྲས་སུ་མི་འགྲུབ་པ་ཉིད་དོ། །དེའི་ཕྱིར་ཆ་ཚད་ཀྱི་རབ་ཏུ་བྱེད་པ་ལས། །ཀུན་ནས་ལྷག་བསམ་རབ་དཀར་ལུས། ཁྲེལ་ཡོད་ངོ་ཚའི་གོས་རྒྱན་ལྡན། །དད་
དང་བཏོང་ཕོད་མཆོད་ཚོགས་ཀྱིས། །ལྷ་དང་བཟོ་བོ་དབྱེར་མེད་མཆོད། །ཅེས་པ་ལྟར། བཟོ་གནས་ཀྱི་རིག་པ་འཆང་བ་རྣམས་བཀུར་བའི་ཡུལ་དུ་བྱས་ནས་བཟའ་བཏུང་གིས་སྐྱོ་བ་དང་འཁུན་པ་མེད་པའི་གནས་སུ་མཆོད་ཅིང་། ཁྱད་པར་ཐོག་མཐའ་བར་གསུམ་ལ་སྟོན་མོ་ཆེན་པོ་རེ་དང་། སྟོན་རྒྱབ་ཀྱི་འགྱེད། དེར་མ་ལྟོས་པའི་ཡུལ་དུས་ཀྱི་ལྟས་མོ་ལ་ལྟགས་པ་དང་། ཉེ་རེག་བྱ་བ་ལ་སོགས་པ་རྣམ་པ་གཞན་དུ་མས་སྐྱོ་བ་སེང་བའི་སྐབས་ཕྱེ་ནས། འདི་ལྟར་སྐྱེ་བོ་མ་བསྡམས་པ་དང་། འདོད་པའི་ཡོན་ཏན་ལ་བད་མ་ཆགས་ཅན་དག་ནི། བཟའ་བ་དང་། བཅའ་བ་དང་། ཁྱད་པར་མྱོས་པར་བྱེད་པའི་བཏུང་བ་འབའ་ཞིག་ཡིད་ཀྱི་ཆོ་གར་བྱེད་ཅིང་། རྩེད་འཇོ་དང་། བཞད་གད་དང་། གླུ་ཤོན་གྱི་གནས་ལ་འཆི་མེད་བདག་པོའི་གོ་འཕང་བརྙེས་པ་ལྟ་བུའི་དགའ་བ་སྒོམ་པ་དང་ཆབས་ཅིག། བསམ་གཏན་བཞི་པའི་ལྷ་རྒན་གྱི་སྤུན་ཟླར་ད་ལྟ་ཉིད་དུ་ཕྱིན་པར་འགྱུར་བས་ན། སྐྱེ་བོ་གཡེང་པོར་བྱུར་བ་དག་གིས་སྤྱོད་པར་བྱ་བའི་གནས་ལོ་རྩལ་སྣ་དགུ་ཞེས་མཐེབ་ཀྱིས་ཤ་ནོན་པ་དང་། རྒྱལ་གྱིས་ཆུ་ཆེན་བརྒལ་བ་དང་། ཡང་རྩལ་བྱ་བ་དགྲན་པ་སྟེ་ལུས་ཀྱི་རྩལ་གསུམ། ལོ་རྒྱུས་ཀྱིས་དགེ་ཐོན་པ་དང་། གཏམ་གྱིས་བཞད་གད་ཐོན་པ་དང་། གཤགས་ཀྱི་ཕ་རོལ་གནོན་པ་སྟེ་ངག་གི་རྩལ་གསུམ། མཛངས་ལ་བློ་བ་རྒྱུ་བ་དང་། དཔའ་ལ་སྲན་ཚུགས་པ་དང་། ཁ་གསལ་ཞིང་གཏིང་མི་རྟོགས་པ་སྟེ་ཡིད་ཀྱི་རྩལ་གསུམ། དེ་བཞིན་དུ་ཕོ། །རྩེད་སྣ་དགུ་ཞེས། གཏམ་ཡིག་རྩིས་གསུམ། མདའ་རྡོ་མཆོངས་གསུམ། བང་རྐྱལ་ཤེད་གསུམ་གྱིས་གནས་གང་ལ་བྱང་བའི་ཕྱོགས་ལ་སྤོབས་པའི་འཁྲི་ཤིང་བསྐྱེད་དུ་བཅུ་གནས་ཤན་ཕྱེད་པའི་དགའ་སྟོན་དུ་ཏོང་འཁུན་དགའ་མའི་སོ་བརྩེས་བྱས་པའི་དར་དང་། རེ་བླའི་རྣམ་བ་ཅིར་ཡང་བྱས་པའང་བྱིན་ཏོ། །ཚུལ་དེ་ལྟ་བུས་དོན་དུ་གཉེར་བྱ་ལྷུར་བླངས་ནས་བྱ་བའི་ལས་མཐར་ཕྱིན་པ་དེ་སྲིད་དུ་རྡོ་རྗེའི་ཆོས་སྐྱོང་རྣམས་སྐོང་གསོ་དང་མཆོད་པའི་སྤྲིན་གྱིས་མཉེས་པར་བྱས་པའི་ཕྲིན་ལས་དང་། བླ་ན་མངོན་པར་མཐོ་བའི་མཆོག་གསུམ་
རྒྱལ་བ་རྒྱ་མཚོའི་ཚོགས་ཀྱི་དབྱིངས་ནས་ཐུགས་རྗེའི་སྤྱན་རས་ཀྱིས་རྩེན་པའི་རྒྱུས། གཞན་འཕྲུལ་དབང་བྱེད་ཀྱི་བདག་པོ་མཐུ་དང་རྫུ་འཕྲུལ་བསམ་གྱིས་མི་ཁྱབ་འདི་ནི་རང་བཞིན་གྱིས་མི་དཔོར། །དུ་ཆུང་བ་དང་། རང་གི་བསྟན་པ་ལ་སྤྲོ་བར་མི་འབྱུང་བ་དང་། རྟག་ཏུ་སྦྱང་བར་བྱ་བར་འདོད་ཡོན་ནལ་སྤྲོ་བ་ཞན་པ་དང་། རང་གི་གནས་སུ་ཡིད་དུ་མི་འོང་བའི་སྒྲ་ཆེན་པོ་བྱུང་བར་གྱུར་ནས། འདི་སྙམ་དུ། ཀྱེ་མ་བདག་ལ་སླད་མའི་དུས་འདི་ན་སྔན་ཆད་མ་ཡིན་པའི་ཡིད་ལ་རྩུབ་འགྱུར་གྱི་ཚེར་མ་རྣོན་པོའི་ཟུག་རྔུ་མི་བཟད་པ་སྟེང་བ་འདི་ནི་སུ་ཤིག་གི་མཐུ་ཡིན། འདོད་པའི་ཁམས་འདི་ན་བདག་ལ་རོ་བླར་འོས་པ་ནི་འགའ་ཡང་ཡོད་པ་མ་ཡིན་ནོ། །དེང་བདག་ལ་འཁོན་པའི་རྒྱུ་མེད་པར་བྱུང་ཞིང་། ནམ་ཞིག་ཁོ་བོ་ཅག་གི་གནས་ཀྱང་སྟོངས་པར་བགྱིད་པ་ལ་སྤྲོ་བ་ཆེན་པོའི་ཤིང་རྟ་ལ་ཞོན་པའི་དགེ་བ་ཅན་སུ་ཞིག་སའི་སྟེང་ན་མཆིས་པར་གྱུར་སྙམ་ནས་ཡིད་རྟབ་རྟབ་པོར་གྱུར་ཏེ་ཕྱོགས་དང་ཕྱོགས་མཚམས་སུ་བལྟས་སོ། །དེང་རྣལ་འབྱོར་གྱི་དབང་པོ་འཇིགས་མེད་གླིང་པའི་ལྷག་པའི་བསམ་པ་གཅིག་ཏུ་དཀར་བའི་མཐུ་ལས་བྱུང་བར་ཤེས་ནས། །ཡལ་མཐོ་འཚམས་པའི་བྱ་བ་བརྩམ་པ་ལ་གཅིག་ཏུ་སྤྲོ་བ་བརྟས་པར་གྱུར་ནའང་། དཀོན་མཆོག་རིན་པོ་ཆེ་རྣམ་པ་གསུམ་ལྷ་དང་བཅས་པའི་བྱིན་རླབས་དང་། སྨོན་ལམ་གྱི་སྟོབས་ཆེན་བོད་བྲོག་པར་ནུས་པའི་མཐུ་དམན་པར་གྱུར་ནས། སླར་ཡང་འདི་སྙམ་དུ། འོན་ཏེ་ང་ནི་བདག་གི་སླུ་བར་བྱེད་པའི་མེ་ཏོག་གི་མངའ་རྣོན་པོ་བྱེད་ལས་རྣམ་པ་ལྔའི་བར་དུ་ཟད་མི་ཤེས་པའི་ལག་ཆ་དེ་ཉེ་བར་བསྡོགས་ལ། དངོས་སམ། དེའི་གྲོགས་ངན་དུ་བྱུང་བའི་དགེ་བའི་སེམས་ཀྱི་རྒྱུན་ལམ་དེ་ནི་འབེམ་དུ་བཅས་པའི་གནས་སུ་བལྟས་ནས་གནད་ལས་འཆོར་བ་མེད་པར་བོག་པའི་བརྟུན་པ་བསྐྱེད་པར་བྱ་ན། ཇི་ཙམ་ནས་དེའི་སེམས་དགེ་བའི་རྗེས་སུ་ཞུགས་པ་དེ་ཡིད་གཉིས་བྲལ་བའི་ཤིང་རྟ་ལས་གཞོལ་ཏེ་འཕྱང་མོ་ཉུག་གི་ལྕུག་བྲན་ལ་གཞོན་པའམ་མ་ནི་ནའང་རུང་སྟེ་གཏོང་བའི་ཕྱོགས་ལ་སྤྲོ་བ་ལྷག་པར་ཞེན་པ་ཞིག་ཏུ་གྱུར་ནས་བྱ་བ་དེ་གནས་མ་ཡིན་པ་ཉིད་དུ་འཕན་པར་བྱེད་པའི་ནུས་པ་སྟེར་བ་ལ་གདོན་མི་ཟའོ་སྙམ་ནས་ཕྲག་དོག་པར་གྱ་གྱུའི་
གོམ་པ་འདོར་བཞིན་དུ་ལྷགས་པ་ན། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་དབྱིངས་ནས་གཟིགས་པ་ཚད་མེད་པའི་ཐུགས་རྗེའི་ཕྱག་གིས་ཁོར་ཁོར་ཡུག་ལས་མི་འདའ་བར་ཡོངས་སུ་བསྲུངས། ཞི་བ་དང་བདེ་ལེགས་ཆེན་པོར་མཛད་དོ། །དེ་བཞིན་དུ་རྟག་ཏུ་བརྟེན་ཅིང་སྒྲུབ་པའི་ལྷ་སྲུང་རྣམས་དང་། དཀར་པོའི་ཕྱོགས་ལ་རང་བཞིན་གྱིས་དགའ་བའི་ལྷ་ཐམས་ཅད་ཀྱིས་བདུད་དང་། བདུད་ཀྱི་རིགས་སུ་གྱུར་བ་རྣམས་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། རོ་ལངས་དང་། ཡི་དྭགས་དང་། ཤ་ཟ་དང་། སྨྱོ་བྱེད་དང་། རྗེད་བྱེད་དང་། མ་མོ་དང་། སྲུལ་ཕོ་དང་། ལུས་སྲུལ་པོ་དང་། ལྷ་མ་ཡིན་དང་། གྲིབ་གདོན་དང་། ཤ་ཟ་ལ་སོགས་ཏེ་ལེགས་པའི་ཕྱོགས་ལ་སྡང་བ་དང་། སྡང་བའི་སེམས་དང་ལྡན་པ། གདུག་པའི་སེམས་དང་ལྡན་པ། དྲག་ཤུལ་གྱི་སེམས་དང་ལྡན་པ་ཐམས་ཅད་ཕྲག་དོག་དང་། བསླུ་བྲིད་ཀྱི་ཞགས་པ་འདེབས་ཤིང་རྒྱུ་བའི་སྐབས་བཅད་པས་དུས་མ་ཡིན་པར་འཆི་བ་དང་། འཐབ་མོ་དང་། རྩོད་པ་འགྱེད་པ་དང་། ནད་ཀྱི་རིགས་ཆེན་པོ་བཞི་དང་། དེའི་འཁོར་ན་གནས་པ་དང་། ཉེ་བར་འཚེ་བ་དང་། གདོན་ཐམས་ཅད་དཀོན་མཆོག་གསུམ་གྱི་བདེན་པའི་མཐུ་ཆེན་པོ་དང་། སྲུང་མའི་དབང་པོ་དག་གིས་རྫུ་འཕྲུལ་ཆེན་པོ་དང་། གཟི་བརྗིད་ཆེན་པོའི་སྲུང་བ་དག་གིས་ཡོངས་སུ་བསྲུངས་ནས། སྐྱོབ་པ་དང་། སྦ་བ་དང་། གང་ལ་འོས་པའི་ཕྲིན་ལས་ཀྱི་རོལ་པ་དེ་དང་དེར་ཆགས་ཐོགས་མེད་པས་ཞི་བ་དང་བདེ་ལེགས་ཆེན་པོར་འགྱུར་བའི་སྟོང་གྲོགས་དང་དཔུང་གཉེན་ནི་ཅི་ཡང་བྱས་སོ། །རྒྱུ་དེས་དངོས་གཞིའི་ལས་རྒྱུན་ཟླ་བ་གསུམ་དང་ཕྱོགས་སུ་གྱུར་བ་གཅིག་སྟེ་ཞག་བཅོ་ལྔའི་ཁོངས་སུ་བདེ་བར་གྲུབ་བོ། །དེ་ལྟར་གྲུབ་ནས་བྱས་པ་ཤེས་ཤིང་དྲིན་དུ་གཟོ་བའི་ཕྱིར་ཡོན་གྱི་རིམ་པ་ཇི་ལྟར་བསྟབས་པ་ནི། རབ་ཏུ་གནས་པའི་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནས་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་
དག་ཀྱང་ནི་མཆོད་པར་བྱ། །ཞེས་བཟོ་གནས་དམ་པ་ལ་གོམས་པ་རྣམས་ནི་མདུན་འཇོག་གྱ་ནོམ་པར་བསྟི་སྟང་དུ་བྱ་བའི་ཡུལ་དུ་གསུངས་པ་ལྟར། བཟའ་བཏུང་སྡེར་མ་ལ་སོགས་པ་སྟོན་མོའི་རྣམ་གྲངས་རྒྱ་ཆེན་པོས་མདུན་བསུས་ནས། ཡོན་ཐོབ་ཀྱི་འཆར་གཞི་གྲགས་པ་སྐམ་པོའི་བཟའ་བ་ནི་པོད་རེར་དངུལ་སྲང་བརྒྱད་དུ་གྲགས་པ་ཕལ་ཆེར་རིན་ཐང་གི་མིང་དུ་གྱུར་ནས་ལག་ཐོག་ཏུ་འབབ་པ་ཉུང་ཟད་དུ་འགྱུར་བ་གཞུང་ལུགས་ཀྱི་རྩིས་གཞི་བཞག དངུལ་ངོ་ཐོག་དང་དེ་འཕྲོས་དངོས་པོ་སྤུས་གཙང་ཡུལ་ཐང་གིས་བཅང་ནས་ངོ་ད་རེར་སྲང་ལྔ་རེའི་ཅིས་དམའ་མཐར་བྱས་པ་སྨར་ཐོག་ཏུ་འབབ་ངེས་གཏན་ཚིགས་སུ་བཟུང་། དེ་ལས་གཞན་དུ་རང་རང་གི་བྱས་བྱུང་རྣམ་དབྱེ་ལ་དཔགས་པའི་བྱ་དགའ་སྒོས་སུ་བྱིན་པའི་དངོས་པོའི་རྣམ་གྲངས། གསེར་དང་། དངུལ་དང་། མུ་ཏིག་ཕོན་པ་དང་། གཡུ་དང་། བྱུ་རུ་དང་། སྤོས་ཤེལ་དང་། མུ་ཏིག་གི་སོག་སྐེ་ལ་སོགས་པའི་ཕོ་རྒྱན་གྱི་བྱེ་བྲག། ཨ་སྒོར་དང་། གཙུག་གཡུ། ཕྲེང་བ་དང་། དུང་སྐོར་དང་། ཚིགས་རྒྱན་ལ་སོགས་པ་མོ་རྒྱན་གྱི་རྣམ་གྲངས། གོས་ཕྱི་དང་། ཇ། དར་ཟབ་ཀྱི་བྱེ་བྲག། རས་ཟུང་དང་། རས་ཡ་བ་དང་། སྣམ་ཕྲུག་གི་རིགས་བྱེད་ཚོས་མ་དང་། དཀར་པོར་གྱུར་བ་དང་། བགོ་བ་དང་། གྱོན་པའི་བྱེ་བྲག་མཐའ་མི་འཚལ་བ། ལ་སྒོའི་ཤོག་བུ་དུམ་པར་བྱས་པ་དང་། འབྲུ་དཀར་ལ་སོགས་མདོར་ན་རྒྱུད་ནས་སྡིག་པར་འགྱུར་བ་སྲོག་ཆགས་ཀྱི་ཡོན་ལ་སོགས་པ་ཆེད་དུ་སྤངས་ནས་རང་རང་གི་མོས་པར་འཚམས་པའི་དབྱིག་གི་རྣམ་པ་གྱ་ནོམ་པས་མགུ་བར་བྱས་ཤིང་། ཚིག་ཙམ་དུའང་དྲིན་དུ་གཟོ་བས་བརྗོད་པས་ཡིད་རབ་ཏུ་དང་བར་བྱས་ཏེ་དར་དང་སྲུང་བའི་མདུད་པ་དམ་རྫས་ཀྱི་འབྲེལ་བ་དང་བཅས་བཏང་ངོ། །ཞར་ལ་ཞལ་འདེབས་ཀྱི་རྣམ་པ་ཇི་ལྟར་བྱུང་བ་བཤད་པར་བྱ་སྟེ། དཔལ་ཆུ་བོ་རི་ནས་ལྕགས་ཟམ་སྤྲུལ་པའི་སྐུ་རིན་པོ་ཆེས་བཟང་ཇ་སྦག འབྲུ་ཁལ་ཉི་ཤུ་ཐམ་པ། དཔལ་རི་སྤྲུལ་པའི་སྐུ་རིན་པོ་ཆེས་འབྲུ་རུའི་ཁལ་བཅུ་གསུམ། །གྲྭ་ཚང་སྤྱི་སོ་ནས་འབྲུ་ཁལ་བཅུ་གསུམ། གཉེར་ཚང་ནས་ཇ་སྦྱོར་གཉིས། ཆང་བུམ་པ་གཉིས། བྱིངས་ལ་གསོལ་
གྲོའི་སྡེར་མ། ངོས་ཅག་བཟོ་བ་དང་བཅས་པར་ལེགས་དར། རྣལ་འབྱོར་སྤྱོད་པ་རྡོ་རྗེ་ཀློང་ཡངས་ཀྱིས་བཟང་གོས་ཚོས་གཉིས་མ་ཁ་ཕྱེད་དང་བརྒྱད། མགོ་སྣམ་ཚལ་ཁ་ཁ་གང་། ས་ག་ལྷཱམ་འཇའ་ཆེན་མ། སྨྱུག་ཁྲོག་ར་མ་ལུག་གི་ཚགས་ལྡན། གོས་སེར་པོར་ཤུབས། རྒྱ་གྲི་ཤུབས་བཅས། སོག་ཞྭ་ཇར་མེད། ཐེར་དཀར་དམར་བུབས་གསུམ། སྣམ་དཀར་བུབས་ལྔ། ཆུང་ཇུ་སྐག་གཅིག རག་ལྟིར་གཅིག ཕོར་བ་གཅིག ཇུས་དམར་ཁ་གང་། གོས་སེར་ཁ་གང་། དངུལ་སྲང་ཉི་ཤུ་ཐམ་པ། མར་དོ་གཅིག་ལ་འདེགས་ཁལ་བརྒྱད། ཁ་བཏགས་ཆེ་བ་གཉིས་རྣམས། ཕ་ལྷ་རྗེ་དྲུང་རྡོ་རྗེ་སྙིང་པོས། ཤོག་བུ་དུམ་པ་ཉི་ཤུ་རྩ་གསུམ། སྟག་སྤང་ལྔ་བཅུ་སྐོར། མཚལ་ཕོན་ཆེ་བ། གསེར་ཤོག་སྟོང་པམ། ཞལ་ཁེབས་ཁ་ཤས། གཅུང་རྗེ་བཙུན་མ་ཆོས་སྒྲོན་དབང་མོའི་དགེ་རྫོངས་སུ་སྤོས་ཤེལ། རྒྱལ་བ་ཆོས་མཛད་འཇིགས་མེད་རྡོ་རྗེས། ཆོས་ཀྱི་ན་བཟར་འོས་པའི་རས་སེར་ཁྲ་ཡུག་བཅུ་དྲུག གླེགས་ཐག་ལྟས་མ་བཅུ་དྲུག སྣག་ཚ་ཟོམ་ཆུང་བརྒྱད། ཨ་ཐིག་ཅིག རགས་རྩིབས་ནས་ཆོས་དྲུང་གིས་བྱུ་རུ་ལེགས་པ་གཅིག འབྲུག་པ་བླ་མས་གླེགས་ཐག་ལྷས་མ་ཉི་ཤུ་རྩ་ལྔ། རྒྱང་རྩེ་ཞབས་དྲུང་ཡང་སྟེངས་པས་རབ་བརྟན་ལ་ཤོག་དུམ་པ་གཅིག །གཞིས་ཀ་གཡུང་དྲུང་འཁྱིལ་ཚལ་ནས། ཤོག་ལས་ཀྱི་གྲོ་ཞིབ་ཚང་མ། ས་ོྡཤོག་བཟོ་བའི་རམས། སྨན་པར་ཁ་བཞི། ཐོག་མཐའ་བར་གསུམ་གྱི་སྟོན་མོ་གཟབས་རྒྱས། ཆང་རྒྱུགས་དང་། བཟོ་བའི་རྒྱ་རིན་རིམ། ལྕམ་ཉི་ཟླ་དཔལ་འཛོམ་ནས་གསེར་བཏུལ་བོད་ཁ་ལྔ། ཟམ་ཟོ་ཁ་བརྒྱད། གྱོ་ནང་ཆ་ཚང་། ཞོལ་ཁང་ནས་ཀྱིས་ལས་ཤོག་བོད་ལྔ་ལྡེངས་པ། སྣག་ཚ་ཟོམ་ཆུང་གང་། ཞོལ་ཁང་ཆོས་དྲུང་དབོན་གཡོག་ནས་གསེར་ཞོ་རེ་རེ་དང་། ཇ་སྦྱོར། གསོལ་གྲོ། ལྷ་ལྡན་རྒྱལ་བྱེད་གླིང་པས་ཕག་ཤོག་དུམ་པ་བཅུ། དཔྱོད་ལྡན་དབང་པོ་ཝ་གིནྡྲས་སྣམ་དཀར་སྤྲུ་ཕྲུག་བུབས་གཉིས། ཨ་ཐི་ཐ་མར། ཆུང
དྲུ་སྦག གཟན་དམར་ཁེ་གསར། འབྲོག་བྲག་མདའ་སྒོམ་ཆེན་པ་ཀུན་བཟང་དབང་ཕྱུག་གིས་དངུལ་སྲང་གསུམ། སྣམ་དཀར་སྤུ་ཕྲུག་ལེགས་པ། མར་ཁལ་གཅིག། ཤ་ཁོག་གཅིག། གྲོ་མ་བྲེ་གསུམ། ལོ་རོ་ཞའི་ལྕམ་ཡིད་བཞིན་དབང་མོས་ཊཾ་ཁ་བཅུ། རྟག་རུ་ནངས་བསྟན་འཛིན་དབང་ཕྱུག་གིས་ཊཾ་ཁ་བཅུ་དང་ཁ་བཏགས། ཀ་ཆུ་བ་སྒོམ་མ་པདྨ་ཆོས་འཛོམ་གྱིས་ཊཾ་ཁ་བརྒྱད། གཙང་བ་ངག་དབང་འགྱུར་མེད་ཀྱིས་ཊཾ་ཁ་ལྔ། གཙང་གངས་རུ་གྲུབ་ཆེན་ངག་དབང་དཔལ་འབར་གྱིས་འབྲས་དོ་གཉིས། སྒོམ་མ་ཆོས་སྒྲོན་གྱིས་ཊཾ་ཁ་བཞི་དང་ཁ་བཏགས། །བསམ་ཡས་པ་ཆོས་དཔལ་གྱིས་ཊཾ་ཁ་དང་འཇམ་དམར། ཞོལ་ནང་རྫང་བས་ཇ་སྦྱོར་གཉིས། གསོལ་གྲོ། རྡོར་ཀ། ཡོལ་གོ་འགྲིམ་པ། ཚང་མར་ལེགས་དང་། ཁོ་བོ་ཅག་གི་ཕ་མའི་ཁྱིམ་ནས་བཟོ་སྟོན་ཉེན་འཁྱོངས། བཟོ་བོ་ལས་བྱེད་ཡོངས་རྫོགས་ལ་དཀར་སྤྲོ་རྒྱས་པ། ཆང་བུམ་གསུམ། ཀུན་པ་མགྲིན་དར། བློ་བཟང་བསོད་ནམས་ཀྱིས་བཟང་གོས་སྤུས་ལེགས་ཀྱི་ཞལ་ཁེབས་བཞི། མགོན་སྔ་བས་ཞབས་ཏོག་ཉིན་འཁྱོངས། གསོལ་གྲོ། ངས་དང་དབུ་བྱིངས་ལ་མགྲིན་དར། ཡོག་གོ་འགྲིམ་པ། བཟང་གོས་ཞལ་ཁེབས་གཉིས། མཐོང་ཤག་བས་ཇ་སྦྱོར། ཡོལ་གོ་འགྲིམ་པ། གཅུང་ཀུན་བཟང་ཕུན་ཚོགས་ཀྱིས་བཟོ་སྟོན་ཉིན་འཁྱོངས། སྟོན་རྒྱབ་ཐ་སྦབ། བཟང་གོས་ཁ་གང་། དཀར་སྤྲོ་གཟབས་རྒྱས་རྣམས་ཏེ། དེ་ལྟར་ཞལ་འདེབས་རྣམས་ནི་རྗེས་སུ་ཡི་རང་བའི་དགེ་བ་འཕེལ་བའི་ཕྱིར་ཕྲ་ཞིབ་ཏུ་བཀོད་ལ། རྟེན་བཞེངས་འདིའི་ཕྱོགས་སུ་རྒྱུ་སོང་གི་དངོས་པོ་བསྡོམས་ན་དངུལ་སྲང་བཞི་བརྒྱ་ལྔ་བཅུར་ཐལ་ཙམ་སོང་བར་སྣང་སྟེ། སྤྱིར་རྣམ་པར་དཀར་བའི་ལས་ལ་གཏོང་བ་དང་། སྐྱོ་ངལ་ཁུར་དུ་བཟོད་པ་བྱ་བའི་གཙོ་བོ་ཡིན་ན། དེ་ལ་བྱས་ཡུས་འཚོང་བ་ལྟ་བུ་རྒྱུ་འབྲས་ལ་ངེས་པ་མ་རྙེད་པའི་གཏམ་དུ་འགྱུར་ཅིང་། ཁྱད་པར་ཨོ་རྒྱན་ཆོས་ཀྱི་རྒྱལ་པོས། གཞན་ལ་བསྒྲགས་དང་འདོད་པ་སྐྱེས། །ཞེས་དགེ་བ་འཛད་པའི་རྒྱུ་བཞིར་གསུངས་པས། །ཕྲ་ཞིབ་ཀྱི་གཏམ་དུ་གླེང་བའི་སྐབས་
བཅད་ནས། དེ་མ་ཐག་པའི་བྱ་བ་ལ་རབ་གནས་ཇི་ལྟར་བྱས་པ་བརྗོད་པར་འོས་ཀྱི། དེ་ལ་རབ་གནས་ཀྱི་མཚན་ཉིད་ནི། རྟེན་དམ་ཚིག་པ་ལ། ཏིང་ངེ་འཛིན་གྱི་ཆོ་ག་ཟབ་མོས་རང་བཞིན་གྱི་གནས་ནས་སངས་རྒྱས་རྣམས་ཀྱི་ཡེ་ཤེས་སེམས་དཔའ་སྤྱན་དྲངས་ཏེ་བཞུགས་སུ་བཅུག་པས་དཔེ་ཞིང་བཀྲ་ཤིས་པའི་ལས་ཐམས་ཅད་འབྱུང་བའི་གཞིར་སྒྲུབ་པ་ཉིད་ཡིན་ནོ། །སྒྲ་དོན་ནི་ལེགས་སྦྱར་སྐད་དུ་སུ་པྲ་ཏིཥྛ་སྟེ། ལེགས་པར་རབ་ཏུ་གནས་པའམ། ཉེ་བསྒྱུར་གྱི་དབང་དུ་པྲ་ཏིའི་སྒྲས། ལེགས་པར་སོ་སོར་གནས་པ་ཞེས་པ་ཉིད་དུའང་འགྲུབ་སྟེ། གང་བསྟིམ་བྱའི་རྟེན་དང་། གང་ཞིག་སྟིམ་བྱེད་ཀྱི་ཡེ་ཤེས་སེམས་དཔའ་གཉིས་དབྱེར་མེད་དུ་ལེགས་པར་རབ་ཏུ་གནས་པ་ལ་སོགས་ཏེ་སྒྲ་དོན་གྱི་རྣམ་པ་ཐ་དད་པ་ཉིད་དུ་འཆར་རོ། །དགོས་པ་ནི། སངས་རྒྱས་རྣམས་ཆོས་སྐུ་སྤྲོས་པ་དང་བྲལ་བའི་ངང་དུ་བཞུགས་བཞིན་པ་དེ་ལས་གཞན་དུ་གཡོ་བར་འགྱུར་བའི་ཡེ་ཤེས་རང་ཚན་པ་སྤྱན་དྲངས་ནས་རབ་ཏུ་གནས་པ་བགྱིར་མེད་ནའང་། ཐ་སྙད་ཙམ་དུ་སྐྱེ་བོ་དད་པ་ཅན་རྣམས་མཆོད་པའི་འོས་སུ་འགྱུར་བ་དང་། དེ་ལ་བརྟེན་ནས་བསོད་ནམས་རྒྱ་ཆེན་པོ་འཕེལ་ཞིང་འཇིག་རྟེན་གྱི་ཁམས་སུ་དགེ་ལེགས་ཕུན་སུམ་ཚོགས་པ་འབྱུང་བར་བྱ་བའི་ཕྱིར་རབ་ཏུ་གནས་པའི་ཕྱིར་ཡོད་པར་བསྟན་ཏེ་རབ་གནས་ཀྱི་རྒྱུད་མདོར་བསྡུས་ལས། སངས་རྒྱས་ཀུན་ནི་རབ་ཏུ་བཞུགས། །རབ་ཏུ་གནས་པ་གང་ནའང་མེད། །ཀུན་ཏུ་མཁའ་ལྟར་གནས་པ་ལ། །ཅིག་ཤོས་ཀྱིས་ནི་རབ་ཏུ་བརྟག། འཇིག་རྟེན་ཀུན་རྫོབ་ལ་བརྟེན་ནས། །རབ་ཏུ་གནས་པ་རབ་ཏུ་བརྟགས། །ཞེས་སོ། །དོན་དེས་རབ་ཏུ་གནས་བྱ་གནས་བྱེད་ཀྱི་དབྱིངས་ལ་དོན་གྱིས་གཞལ་ནས། འདིར་འཇིག་རྟེན་ནི་ཀུན་རྫོབ་ལ་བརྟེན་པའི་ཕྱིར་དེ་དང་རྗེས་སུ་མཐུན་པར་རབ་ཏུ་གནས་པའང་ངེས་པར་གཅེས་པའི་ཚུལ་རབ་ཏུ་གནས་པའི་རྒྱུད་ལས། །གང་དུ་སྐུ་གཟུགས་རྫོགས་པ་ལ། །བྱིན་མ་བརླབས་པས་རིང་གནས་ན། །དེ་ལ་བཀྲ་ཤིས་མི་འབྱུང་ཞིང་། །ཇི་སྲིད་མཆོད་པ་དེར་མི་འོས། །ཞེས་དང་། རབ་གནས་མ་བྱས་གཟུགས་
བརྙན་ལ། །གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །ཞེས་དང་། དེ་ཡང་ཆོག་ཡང་དག་པ་ལ་བརྟེན་ནས་བརྩམ་དགོས་པའི་ཚུལ། དེ་ཉིད་ལས། ཆོ་ག་བདག་ཉིད་ནུས་པ་ཡིས། །བརྟག་པ་ལས་གསུངས་ཚུལ་ལེགས་པ། །དེས་བྱས་བསོད་ནམས་ཆེ་བ་ཡིན། །ཞེས་སོགས་རྒྱ་ཆེར་གསུངས་སོ། །དེ་ལ་མདོའི་ཕྱོགས་ནས་རབ་གནས་ཀྱི་ཆོ་ག་མཚན་ཉིད་པ་མ་བསྟན་ཀྱང་། འདུལ་བ་ལས་པཎྜིའི་རབ་གནས་བཤད་པ་དང་། སྣམ་སྦྱར་བྱིན་གྱིས་རློབ་པ་སོགས་དོན་ལ་རབ་གནས་ཀྱི་ངོ་བོར་འགྲུབ་པས་སྐུ་གསུང་ཐུགས་ཀྱི་རྟེན་གསར་བུ་དང་། །བཀུར་སྟི་དང་བཅས་ཁྲི་ཐོག་ཏུ་སྤྱན་དྲངས་ནས། མཆོད་པ་འབུལ་བ་དང་། གསོ་སྦྱོང་བླངས་ཏེ་སོ་ཐར་གྱི་མདོ་ཀློག་པ་དང་། འདུལ་བ་ལུང་གི་བཀྲ་ཤིས་ཚིགས་སུ་བཅད་པ་བརྗོད་ནས་མེ་ཏོག་འཐོར་བ་སོགས་ལ་ཐ་སྙད་དུ་གདགས་སུ་རུང་བའོ། །འདིར་ལག་ལེན་ལ་རྒྱུད་སྡེ་སོ་སོའི་རབ་གནས་ཀྱི་རིམ་པ་གྲུབ་པའི་སློབ་དཔོན་རྣམས་ཀྱིས་མཛད་པའི་ཆོ་ག་ཇི་སྙེད་ཅིག་ཡོད་པ་ལས། རང་ལུགས་སངས་རྒྱས་གཉིས་པ་པདྨ་འབྱུང་གནས་ཀྱིས་རྒྱུད་སྡེ་ཟབ་མོའི་མན་ངག་གནད་དུ་བསྡུས་པ་གཏེར་ཁ་ཆེན་པོའི་རིང་ལུགས་ལས་བྱུང་བ་ཉམས་སུ་བསྟར་བ་ཡིན་ཏེ། དེ་ལ་རབ་ཏུ་གནས་བྱའི་སློབ་དཔོན་ཡང་། རྒྱུད་སྡེ་ཕལ་ཆེར་ལས་དེ་ཉིད་བཅུ་ཤེས་པའི་སློབ་དཔོན་གཙོ་བོར་བཤད་ཅིང་། དུས་ཀྱི་འཁོར་ལོ་ལས། །དེ་ཉིད་བཅུ་ནི་ཡོངས་ཤེས་པ། །གསུམ་ལས་དགེ་སློང་མཆོག་ཡིན་ཏེ། །འབྲིང་ནི་དགེ་ཚུལ་ཉིད་དུ་བརྗོད། །ཁྱིམ་ན་གནས་པ་ཐ་མ་ཡིན། །ཞེས་དེ་ཉིད་བཅུ་ཤེས་པའི་སྟེང་དུ་བསྟན་པ་ལ་གུས་པ་བསྐྱེད་པའི་ཕྱིར་རྟགས་ཅན་གྱི་མཚན་ཉིད་ཀྱང་ངེས་པར་བཤད་མོད་ཀྱི། དོན་དུ་ནི་དེ་ཉིད་ལས། ས་ཐོབ་མ་གཏོགས་ཁྱིམ་པ་ནི། །རྒྱལ་པོའི་བླ་མར་མི་བྱ་སྟེ། །ཞེས་པས་ས་ཐོབ་ནི་ཡེ་ཤེས་ཀྱི་རྒན་པ་ཡིན་པས་རྟགས་ཁོ་ན་ལ་ལྟོས་པ་མེད་པར་བསྟན་པ་བཞིན། རང་ལུགས་ལའང་། བསྙེན་གྲོགས་རྟགས་ལྡན་རྣལ་འབྱོར་བས། །གཟིགས་པ་ཙམ་གྱིས་རབ་གནས་ཆགས། །ཞེས་དོན་
དམ་པར། རབ་ཏུ་གནས་པའི་ཡེ་ཤེས་གང་ཡིན་པ་དེ་ཉིད་རབ་ཏུ་གནས་པ་པོའི་གང་ཟག་གི་ཤེས་རྒྱུད་དང་རྫས་འགལ་བ་མ་ཡིན་པ་ཞིག་དགོས་ཏེ། དེ་མེད་ན་རྒྱུས་མེད་ས་མཁན་ལ་ཞུགས་པ་བཞིན་དུ། གཞུག་པ་པོས་གང་གཞུག་བྱའི་ཡེ་ཤེས་དེའི་ཆོས་ཉིད་ཆ་མི་ཆོད་བཞིན་དུ། དགེ་སློང་རྡོ་རྗེ་འཛིན་པའི་ཆོས་གོས་གསུམ་གྱི་ཏིང་ངེ་འཛིན་ལ་བསྙེམས་པའམ། ཆོ་ག་དང་གྱེར་དབྱངས་ཁོ་ནའི་འདུ་བ་རྒྱ་ཆེན་པོས་རྟེན་ལ་གཞུག་བྱའི་ཡེ་ཤེས་དེ་སྣང་བ་རང་ཚན་པའི་ཕྱོགས་གཤེད་ནས་སྤྱན་འདྲེན་པར་འདོད་པ་ནི། རྟགས་ཇི་ལྟ་བུ་ཡིན་ཡང་བེམ་པོའི་རྣམ་པ་སྦྱོང་བའི་རབ་གནས་ཅོམ་མོ། །རྒྱུ་དེས་ཡེ་ཤེས་ཀྱི་དེ་ཁོ་ན་ཉིད་རྟོགས་པ་གཙོ་བོར་གལ་ཆེ་བར་བཞག་པ་ཡིན་ནོ། །དེ་བཞིན་དུ་ལ་གནས་ཤིས་པར་བྱེད་པའི་གཟའ་དང་། སྐར་མ་དང་། བྱེད་པ་དང་། སྦྱོར་བ་ལ་སོགས་ཏེ་སྤྱི་དང་བྱེ་བྲག་པའི་དུས་བཟང་པོ་ལ་ངེས་པར་གཅེས་པ་ཡང་རྒྱུད་ལས་བསྟན་པ་བཞིན་ཚོགས་པར་བྱས། དེ་ཡང་ཉི་མ་བྱང་དུ་བལྟས་པ་ཡི། །དཀར་པོའི་ཕྱོགས་ནི་བཟང་པོ་ལ། །ཞེས་པས་རྣམ་པ་གཅིག་ཏུ་ལྷོ་ཕྱོགས་ནི་གཤིན་རྗེའི་སྐྱེས་བུ་མི་བཟད་པས་བསྲུངས་པས་རྒྱས་པའི་ལས་ལ་བསྔགས་པ་མ་ཡིན་ཞིང་། བྱང་ཕྱོགས་ནི་གནོད་སྦྱིན་གྱི་བདག་པོ་རྣམ་ཐོས་ཀྱི་བུ་ལ་སོགས་པས་རང་དབང་དུ་བྱས་པའི་གནས་ཡིན་པས། རབ་གནས་ལ་སོགས་ཏེ་རྒྱས་པའི་ལས་ལ་མཆོག་ཏུ་བསྔགས་པར་བཤད་ནའང་། ཀྲཱི་ཡས་མུཙྪ་ལས། མཆུ་དང་དབོ་ཡི་ཟླ་བ་དེ་བཞིན་ངེས་པར་སག་སྣྲོན་དང་ཆུ་སྟོད་ཟླ་བ་དང་། མགོ་སྟེ་དེ་སྲིད་འདི་རྣམས་དགེ་བ་གཅིག་པུས་འབྲས་བུ་སྟེར་བའི་ཟླ་བ་དྲུག་ཏུ་གསུངས། ཞེས་པ་ལ་སོགས་ཏེ་གཞན་དང་གཞན་དག་ལས་ཀྱང་བགྲོད་པ་གཅིག་པོའི་ཕྱོགས་ལ་ལྟོས་དགོས་པ་ལ་མ་བཤད་པས། འདིར་ལས་བསྲིད་ན་མཐར་སོན་པར་གྱུར་བ་ཆུ་སྟོད་ཟླ་བའི་གཟའ་ཚེས་ཕུན་སུམ་ཚོགས་པའི་ཉིན། དཀྱིལ་འཁོར་དང་འབྲེལ་བའི་ཡོ་བྱད་དང་། སྦྱིན་སྲེག་དང་འབྲེལ་བའི་ཡོ་བྱད་དང་། རབ་ཏུ་གནས་པ་ཁོ་ན་ལ་འགྲེལ་བའི་ཁྲུས་དང་། མངའ་དབུལ་གྱི་རྫས་སྤྱི་དང་བྱེ་བྲག་པ་རྣམས་ཉེར་བསྡོགས་སྔོན་དུ་བཏང་ནས་རང་ཉིད་ཀྱི་དད་པའི་རྟེན་དུ་
དངུལ་སྲང་ཉིས་བརྒྱའི་རྩ་བསམ་སྨད་པར་བསྒྲུབས་པའི་དཔལ་ཨོ་རྒྱན་ཆོས་ཀྱི་རྒྱལ་པོའི་རྣམ་ཐར་ཤེར་བྲག་མའི་ཐང་ཆེན་རྣམས་དང་། རྒྱུད་འབུམ་རིན་པོ་ཆེ་སྟབས་གཅིག་ཏུ། རབ་ཏུ་གནས་བྱར་བྱས་པ་ཕུན་སུམ་ཚོགས་པའི་དུས་ཚོད་གང་། ཞག་དང་པོ་ལ་བདག་ཅག་དཔོན་སློབ་བཅོ་ལྔ་སྐོར་གྱིས་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་གྱི་ཆོ་ག་དང་འབྲེལ་བར། འཛམ་བུའི་གླིང་དུ་ཉི་མ་ཤར་དྲོད་ཀྱི་དུས་ག་ལ་བར། སྤྱན་དབྱེ་བྱ་བ་ཡན་ལག་ཡང་དག་པར་གྲུབ་པར་བགྱིས་ཤིང་། ནངས་པར་གྱི་སྔ་དྲོ་དང་པོ་ལ་དམ་ཚིག་ནི་འཁོར་ལོ་ཆེན་པོའི་གྲོང་ཁྱེར་དུ་སྤྱོན་པར་གསོལ་བའི་མོས་གུས་ཀྱིས་སྙན་ཁུང་སྲབ་མོར་བགྱིས་ནས། རྟེན་གྱི་ཡེ་ཤེས་པ་རྣམས་ནམ་མཁའི་དབྱིངས་ཕ་མཐའ་མི་འཚལ་བའི་ཀློང་དུ། སེམས་མ་རྡོ་རྗེ་མའི་རྒྱས་བཏེག་སྟེ་བཞུགས་སུ་གསོལ། དམ་ཚིག་གི་རྟེན་རྣམས་གཙུག་ཏོར་འཁོར་ལོས་སྒྱུར་བའི་དབྱིངས་སུ་སྲུང་བར་བྱེད་པའི་མཚོན་བྱད་དབྱིངས་སྔགས་པར་བྱ་བ་ཡན་ཆད་གྲུབ་པར་བགྱིས་སོ། །དེ་ལྟ་བུའི་སྟ་གོན་གྱི་ཉིན་ཉི་མ་དྲོ་འཇམ་ལ་བབ་པའི་ཚེ་པདྨ་འོད་གླིང་ཐར་བ་ཆེན་པོའི་གྲོང་ཁྱེར་གང་གི་ནམ་མཁའི་དབྱིངས་ལ་དབང་པོའི་གཞུ་ཚོན་སྣ་མ་ཚང་བ་མེད་པ་བྱེད་པ་པོས་ཀྱང་མ་བྱས། སྒྱུ་མས་སྤྲུལ་པའང་མ་ཡིན། རྣམ་པར་མཛེས་པ་དང་། རྣམ་པར་བཀྲག་པ་དང་། རྣམ་པར་འཚེར་བ་ལ་སོགས་པའི་ངོ་མཚར་གསར་བའི་དཔལ་ཡོན་གྱིས་སོ་སོའི་སྐྱེ་བོ་དག་ལ་འདོད་སྲེད་ཀྱི་ཆོམ་རྐུན་དུ་ཤར་ནས། ལག་པའི་འདུ་བྱེད་རྟབ་རྟབ་བོར་འདེགས་པས་རྩོམ་པ་ཙམ་གྱིས་རྭ་བའམ་མུ་ཁྱུད་གསར་པ་རིམ་པ་གཉིས་ཀྱི་གུར་ཁྱིམ་དུ་གསལ་བ་ཉིད་སྒྲོ་བཏགས་ཀྱི་གཏམ་བརྗོད་པའི་ལམ་དུ་དྲངས་པ་ཙམ་མ་ཡིན་པ་ཀུན་གྱིས་མཐོང་བའི་ཆོས་ལ་གནས་པ་དང་། དེ་བཞིན་དུ་དག་ལ་དཔལ་ལྡན་དཎྜིའི་ཚིག་གི་རྒྱུད་ཆགས་པས་རབ་ཏུ་བཏགས་པ་དང་། ཕུལ་དུ་བྱུང་བའི་ལེགས་བྲིས་ཀྱི་ལམ་ཐ་གྲུ་ཀུན་ནས་ཡངས་པར་དཀར་ཕྱོགས་ལ་མངོན་པར་འདུན་པའི་ལྷ་རྣམས་ནི་ཤིན་ཏུ་རངས་པར་གྱུར་བའི་བསམ་པ་དང་། གསང་བསྔགས་ཀྱི་རྒྱུད་སྡེ་ཟབ་མོའི་ཆོ་གའི་ཡན་ལག་མཐོང་ཞིང་རྗེས་སུ་དྲན་
ནས་འདི་སྙམ་དུ། བཅོམ་ལྡན་འདས་ཆོས་དབྱིངས་གཞོན་ནུ་བུམ་པའི་སྐུའི་ཀློང་ནས་ཅིར་ཡང་སྤྲུལ་པའི་སྐུ་དང་། ལོངས་སྤྱོད་རྫོགས་པའི་སྐུ་དང་། དམིགས་མེད་ཆོས་ཀྱི་སྐུད་པ། མི་འགྱུར་རྡོ་རྗེའི་སྐུ་དང་། མངོན་པར་བྱང་ཆུབ་པའི་སྐུ་དང་ཡེ་ཤེས་ཀྱི་བདག་ཉིད་ཆེན་པོའི་རང་བཞིན་གང་ཡིན་པ་རྣམས། ཞིང་ཁམས་གཞན་དུ་སྤྱན་རས་ཀྱི་གཟིགས་པ་དུས་ལས་ཡོལ་བར་གྱུར་ཏེ་དེང་གི་དམ་ཚིག་སེམས་དཔའ་ལ་འཇུག་པའི་སླད་དུ། སྐྱེ་བ་མེད་པའི་ཀློང་ན་གསལ། །འགག་པ་མེད་པའི་ཀློང་ན་འཕྱོ། །རྟག་པ་མེད་པའི་ངང་ལ་བྱ། །ཆད་པ་མེད་པའི་གཤིས་ལ་མཉམ། །འོང་བ་མེད་པའི་ཀློང་ན་བརྗིད། །འགྲོ་བ་མེད་པའི་ངང་ལ་བཞུགས་བཞིན་པའང་། །ནམ་མཁའི་དབྱིངས་སུ་རྡོ་རྗེ་དམ་ཚིག་ཆེན་པོའི་ཕྱག་རྒྱས་བཅིངས་པ་འདི་ནི་དེ་རིང་གི་ཉིན་ཞག་ཙམ་ལས་གཞན་རྣམ་པ་གང་དུའང་སྐབས་མ་ཡིན་ནོ་སྙམ་དུ་སེམས་ཤིང་དད་པའི་སྣང་བ་ཆབ་མི་འཚལ་བས་མངོན་པར་སྤྲུལ་པ་སྡོས་ངས་སྤྲིན་གྱི་ཕྲེང་བ་དུམ་བུར་ལྡང་བ་དག་ཀྱང་། དཔེར་ན་སྒྱུ་མ་མཁན་མཁས་པའི་ཆོ་འཕྲུལ་བཞིན་དུ། ནམ་མཁའ་ལྡིང་གི་རྣམ་པ་དང་། ཅང་ཤེས་གཞོན་ནུའི་རྣམ་པ་དང་། ཤིང་རྟའི་རྣམ་པ་དང་། གླང་པོ་ཆེའི་རྣམ་པ་དང་། གྲོང་ཁྱེར་ཆེན་པོའི་རྣམ་པ་དང་། གཞོན་ནུ་ལང་ཚོ་མའི་རྣམ་པ་དག །ཁང་བུ་བརྩེགས་དུས་བྱེ་བྲག་གི་རྣམ་པ་དང་། སྐྱེད་མོས་ཚལ་དང་། གདུགས་དང་། བླ་བྲེ་དང་། དྲ་བ་དང་། དྲྭ་བ་བྱེད་པ་དང་། ལྡ་ལྡི་དང་། བ་དན་དང་། རྒྱལ་མཚན་དང་། ཀུན་དགའ་རྭ་བའི་རྣམ་པ་ལ་སོགས་པར་སྤྲུལ་ནས། ཕ་རོལ་དུ་འགྲོ་བ་དང་། ཚུ་རོལ་དུ་འོང་བ་དང་། རང་ས་ན་ལྡིང་བ་དང་། དགའ་བ་དང་། བརྩེ་བ་དང་། དགའ་མགུར་སྤྱོད་པ་དང་། ཇི་ཙམ་ན་དེ་དག་གི་རུམ་ལས། ལྷའི་མེ་ཏོག་མནྡཱ་ར་བ་དང་། པུནྡ་རིཀ་དང་། ནཱི་ལོརྤ་ལའི་འདབ་མ་ལྟ་བུའི་སྦྲང་ཆར་ཟིམ་བུ་དག་ཀྱང་དུས་མ་ཡིན་པར་འབེབས་པ་དང་། དུས་མ་ཡིན་པར་དངོས་སུ་འཛུག་པའི་ངོ་མཚར་ཅིང་ལར་འཆར་བས། སྐྱེ་བ་རྣམས་ཀྱི་ཡིད་ལ་ཚིམ་པ་ཆེན་པོའི་དགའ་སྟོན་དང་། །རྣམ་པར་ཤེས་པ་
གཞན་དབང་དུ་འགྱུར་བའི་ཞགས་པ་དམ་པོས་འཆིང་བ་ཙམ་དུ་གྱུར་ཅིང་། ངེས་འགའ་ནི་སྤྲིན་ནག་པོ་དང་། འཐོར་རླུང་དྲག་པོ་མ་ཡིན་པར་འབྱུང་བ་རང་བཞིན་གྱིས་བག་ཕེབས་པར་བྱེད་པའི་ལྷོ་སྤྲིན་ནགས་ཚལ་སྟུག་པོའི་སྤུན་ཟླར་གྱུར་བ་དག་གི་རུམ་ནས་ཧ་ཅང་མྱུར་བ་དང་། ཧ་ཅང་རྩུབ་མོ་མ་ཡིན་པའི་དབྱར་གྱི་རྔ་གསང་སྐབས་ཕྱོང་བ་ཉིད་སྒྲ་ལྷང་ལྷང་བའི་དབྱངས་སུ་དལ་བུར་ལྡིར་བས། སྟོན་གྱི་འབྲས་བུས་གཅིག་ཏུ་གདུངས་པའི་རྨ་བྱ་གཞོན་ནུའི་ཚོགས་ལ་དགའ་བའི་དངོས་པོ་བརྒྱ་ཕྲག་མང་པོས་ཀྱང་ཕྱོགས་མི་མཚོན་པར་བྱེད་པ་དག། ལྷའི་བུ་ཉི་མའང་བ་ལང་སྤྱོད་ཀྱི་མུན་པ་དང་། སྒྲ་མི་སྙན་གྱི་ལོངས་སྤྱོད་ལ་ཅི་ཡང་མི་སེམས་པར་ལྷོ་འཛམ་བུའི་གླིང་ཁོ་ན་ཡིད་ལ་སེམས་ཤིང་། དུས་སྦྱོར་བཅུ་གཉིས་ཀྱི་ཏཏྐལ་འཕྱུགས་པ་ལ་སྤྲོ་བར་གྱུར་ནས་རྟ་བདུན་གྱི་ཤིང་རྟ་ལའང་འཁུན་པར་བྱེད་པས། གོ་ལའི་རླུང་གི་འཁྲུལ་འཁོར་བཤིག་པར་རྩོམ་པ་དག དེ་བཞིན་དུསའི་ལྷ་མོ་བརྟན་མིན་རྫོགས་པའི་སངས་རྒྱས་དང་དེའི་བསྟན་པ་ལ་ཤིན་ཏུ་དད་པས་རང་གི་ལུས་ཐམས་ཅད་གསེར་དང་། དངུལ་དང་། གཡུ་དང་། བྱུ་རུ་དང་། མུ་ཏིག་དང་། བཻ་ཌཱུརྻ་དང་། ནོར་བུ་མཐོན་ག་དང་། ཀེ་ཀེ་རུ་ལ་སོགས་པ་ལྷ་དང་མིའི་རིན་པོ་ཆེ་སྣ་ཚོགས་པའི་འབྱུང་གནས་སུ་བྱིན་གྱིས་རློབ་ཅིང་། རི་དང་། ཀླུང་དང་། ཐང་དང་། ནགས་ཚལ་དང་། སྐྱེད་མོའི་ཚལ་དང་། ཞིང་ས་གཤིན་པོ་ལ་སོགས་པར་དེ་དང་དེའི་ཡོན་ཏན་སྐྱེད་པར་བྱེད་པ་ལ་འདུན་ཅིང་། འགྲོ་བ་རྣམས་ཀྱི་སྲོག་གི་དབང་པོ་དང་ལུས་ཀྱི་ཟུངས་རིང་མོའི་མཐར་ཡང་བསྐྱེད་བསྲིང་བར་བྱེད་པའི་འཚོ་བའི་བཅུད་ལེན་དམ་པར་བྱེད་པ་སོགས་སྣོད་བཅུད་ལ་དགེ་མཚན་རྒྱ་ཆེན་པོ་སྟེར་བའི་བྱ་བ་ལ་གཅིག་ཏུ་བྲེལ་བས་བཀྲ་ཤིས་པའི་ཆོ་ག་དབྱངས་སུ་ལེན་པ་འདི་ནི་རྒྱལ་བའི་བསྟན་པ་ལ་གུས་པ་བསྐྱེད་པ་ཁོ་ནའི་མཐུ་གཅིག་པོར་རིག་པར་བྱའོ། །དེ་ལྟ་བུའི་དགེ་མཚན་གྱི་སྣང་བ་བརྒྱ་ཕྲག་ལ་དོམས་པ་མེད་པར་སྦྱོང་བཞིན་པར་སང་གི་ཉིན་པར་དངོས་གཞིའི་བྱ་བ། དཀྱིལ་འཁོར་སྒྲུབ་པ་དང་། བདག་ཉིད་འཇུག་པ་དང་། རྟེན་སྦྱོང་བ་དང་། བཀྲུ་ཞིང་ཕྱི་བ་དང་། རིང་བསྲེལ་གཞུག་ཅིང་གསོལ་
བ་གདབ་པ་དང་། རྟེན་བསྐྱེད་པ་དང་། སྤྱན་དྲངས་པ་དང་། དགུག་ཅིང་རྒྱས་གདབ་པ་དང་། དེ་ལ་གདན་གསུམ་ཚང་བའི་ལྷས་དབང་བསྐུར་བ་དང་། དབང་གི་སྲེག་བླུག་དང་། མཆོད་ཅིང་བསྟོད་པ་དང་། སྤྱན་དབྱེ་བ་དང་། གསོལ་བ་བཏབ་པ་དང་། མངའ་དབུལ་བྱ་བ་དང་། གནས་བྱའི་ལྷ་རྣམས་ཐབ་ཏུ་སྤྱན་དྲངས་ནས་རྒྱས་པའི་སྦྱིན་སྲེག་བྱ་བ་སྟེ་དངོས་གཞིའི་རིམ་པ། གཏོར་མ་སྦྱིན་པ་དང་། ཆོས་སྐྱོང་བསྒོ་བ་དང་། དཀྱིལ་འཁོར་མཆོད་པ་དང་། དངོས་གྲུབ་བླང་བ་དང་། ནོངས་པ་བཤགས་པ་དང་། ཞི་བའི་སྦྱིན་སྲེག་དང་། གཤེགས་སུ་གསོལ་བ་དང་། ཡོན་བདག་བསྒ་བ་དང་། ཤིས་པ་བརྗོད་པ་དང་། བསྔོ་བ་བྱ་བ་དང་། སྨོན་ལམ་གདབ་པ་དག་དགའ་སྟོན་བྱ་བ་དང་། སླར་ཡང་ཤིས་བརྗོད་པ་དང་། མཇུག་དོན་བྱ་བ་ལ་སོགས་པ་སྦྱོར་དངོས་རྗེས་གསུམ་གྱི་ཆོ་ག་ཚང་ཞིང་མ་འཁྲུལ་བ་དང་། དོན་དམ་པའི་རབ་གནས་གང་ལ་རབ་ཏུ་གནས་བྱ། གང་གིས་རབ་ཏུ་གནས་བྱེད། གཉིས་ཀ་རྣམ་པར་མི་རྟོག་པ་སྟེ་ཆོས་ཉིད་བསམ་གྱིས་མི་ཁྱབ་པའི་དགོངས་སྤྱོད་དང་མཉམ་པ་ཉིད་དུ་བསྲེས་ནས་རྟེན་གྱི་ཡེ་ཤེས་པ་རྣམས་རྡོ་རྗེའི་ཆོས་བདུན་གྱི་རང་བཞིན་དུ་བསྐལ་བའི་བར་གང་ལ་གཉིས་སུ་མེད་པའི་ཕྱག་རྒྱ་དངོས་པོ་མེད་པའི་ངོ་བོ་ཉིད་ཀྱིས་རྒྱས་བཏབ་ཅིང་རྡོ་རྗེའི་གླུ་དང་གང་ཡང་བྱས་སོ། །དེ་ལྟ་བུའི་ཆོ་ག་ཟབ་མོ་ལ་བརྟེན་ནས་རབ་ཏུ་གནས་ཤིང་། ལེགས་པར་གསུངས་པའི་བཅའ་ག་རྫོགས་པའི་སྐུ་གསུང་ཐུགས་ཀྱི་རྟེན་ནི་གང་དུ་བཞུགས་པའི་ས་ཕྱོགས་སམ། ཡུལ་ཁམས་དེ་དང་དེར། དེ་བཞིན་གཤེགས་པ་སྲས་དང་བཅས་པའི་བྱིན་རླབས་ཀྱིས་རྟག་ཏུ་བསྲུང་ཞིང་། བྱུར་དང་སྐལ་བ་ངན་པའི་ཕྱོགས་མི་མཐུན་པ་ཐམས་ཅད་རང་བཞིན་གྱིས་དངོས་པར་འགྱུར་ལ། འཇིག་རྟེན་དང་འཇིག་རྟེན་ལས་འདས་པའི་བདེ་ལེགས་དང་དཔལ་གྱིས་མངོན་པར་མཐོ་བ་ནི་ཆོས་ཉིད་ཡིན་ནོ། །དེ་ལས་ཁྱད་པར་དུ་འདིར་གླེགས་བམ་གྱི་དེ་ཁོ་ན་ཉིད་ཅུང་ཟད་བརྗོད་ན། རྡོ་རྗེ་ཕུར་བ་གསང་བའི་རྒྱུད་ལས། །གླགས་ཤིང་ཐབས་དང་ཤེས་རབ་ལ། །ཤོག་བུ་ཐེག་པའི་ས་གཞི་སྟེ། །ཞི་གནས་
ལྷག་མཐོང་ཞིང་གི་རྒྱགས། །དབྱིངས་དང་ཡེ་ཤེས་དོན་རྒྱགས་གཉིས། །སྨྱུག་གུ་རིག་པའི་ཡེ་ཤེས་ཏེ། །བྱང་ཆུབ་སེམས་རྟག་སྣག་ཚ་ཡིན། །ཡི་གེ་གསུམ་གྱི་ཕྱག་རྒྱ་བྲི། །བྱེད་པ་པོ་ནི་དམ་ཚིག་ཅན། །ལེགས་ཤིང་ཚད་དང་ལྡན་བྱས་ནས། །སྔགས་མཁན་དམ་ཚིག་བློ་ཅན་གྱིས། །དུས་གསུམ་བཞུགས་པ་ཐམས་ཅད་ཀྱི། །གསུང་གི་དེ་ཉིད་བྱིན་བསྡུས་ནས། །གླེགས་བམ་ཉིད་ལ་བསྟིམ་པར་བྱས། །དེ་ཉིད་འཇིག་རྟེན་མ་སྟོངས་པར། །གནས་པར་བྱས་ཏེ་ཞལ་བསྲོས་ལ། །དེ་དོན་བསྒྲགས་པའི་ཆར་ཕབ་པས། །ཉེས་གྲོལ་བདེ་གཤེགས་གསུང་བརྙེས་ཏེ། །གླེགས་བམ་དེ་ཉིད་དུས་གསུམ་གྱི། །མཆོད་པའི་རྟེན་དུ་བཞུགས་སུ་གསོལ། །ཞེས་པ་དང་། ཕན་ཡོན་གྱི་སྒོ་ནས་གཞལ་ན་ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལས། རིན་ཆེན་སྣ་བདུན་ལ་སོགས་ལ། །རྒྱལ་བ་ཀུན་གྱི་རང་བཞིན་གྱིས། །མ་ལུས་བསྡུས་པའི་ངོ་བོ་ཉིད། །སྐུ་གསུང་ཐུགས་ཉིད་བྲིས་པ་ཡིན། །དེ་བས་རྒྱལ་བ་ཀུན་བྲིས་པའི། །ཆེ་བའི་ཡོན་ཏན་བསམ་མི་ཁྱབ། །ཅེས་སངས་རྒྱས་ཐམས་ཅད་ཀྱི་དོན་དམ་པའི་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ་ནི་རྒྱུད་འདི་དག་གི་བརྗོད་བྱར་གནས་པའི་ཕྱིར། །རྣ་རྒྱུད་བཟུང་བས་དེའི་ཡོན་ཏན་མ་ལུས་པ་བཟུང་བར་འགྱུར་ལ། རྒྱུད་ལས་གསུང་གི་རྟེན་ཁོ་ན་མཆོག་ཏུ་བཤད་པ་དང་། དེ་བཞིན་དུ་བྲིས་ཤིང་བཟུང་བའི་ཕན་ཡོན་ཡང་། དེ་ཉིད་ལས། གྲོག་ཤིང་ཤུན་ལ་སོགས་པ། །གསང་བའི་རྒྱུད་འདིར་རབ་བྲིས་ནས། །རིན་ཆེན་ཁྲི་ལ་ལེགས་བཞག་སྟེ། །གུས་པས་མཆོད་ཅིང་རབ་བཟུང་ནས། །ཇི་སྲིད་གནས་པར་བསམ་པ་ཡི། །དགའ་བའི་བསམ་པས་འཛིན་བྱེད་ན། །སངས་རྒྱས་ཐམས་ཅད་བཟུང་བ་ཡིན། །ཞེས་སོ། །མདོར་ན་དེ་བཞིན་གཤེགས་པའི་ཆོས་ཀྱིས་རྣམ་གྲངས་རེ་རེ་ཙམ་གླེགས་བམ་དུ་བྲིས་ཤིང་བཟུང་བའི་ཕན་ཡོན་ལའང་། །བྱང་ཆུབ་སེམས་དཔའ་བྱམས་པས་འདི་ལྟར་དུ་དམ་བཅས་སོ། །བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་བ་ཐ་མལ་དམ་
པའི་ཆོས་འཇིག་པའི་དུས་ལ་བབ་ཅིང་། སངས་རྒྱས་ཀྱི་བྱང་ཆུབ་འཇིག་པར་འགྱུར་བ་འཇིག་པ་ཆེན་པོས་འཇིག་པའི་དུས་ལ་བབ་པ་ན་བདག་གིས་ཆོས་ཀྱི་རྣམ་གྲངས་འདི་སྐྱེས་བུ་དམ་པ་དེ་དག་ལ་རབ་ཏུ་བསྟན་པར་བགྱིའོ། །དེ་དག་ལ་གཟི་བྱིན་སྩལ་བར་བགྱིའོ། །ཡུལ་གང་ན་མདོ་སྡེ་འདི་འཛིན་པ་དེ་ལྟ་བུ་ངག་གནས་པའི་ཡུལ་དེར་བདག་གིས་དུས་མ་ལགས་པའི་སེར་བ་དང་། དགུར་ཆང་དང་། མུ་གེ་དང་། བྲོ་ནད་ཡང་བ་དང་། མིངས་དང་། ཡམས་ཀྱི་ནད་དང་། འགོ་བའི་ནད་དང་། གནོད་པ་དང་། འཁྲུག་པ་ཐམས་ཅད་རབ་ཏུ་ཞི་བར་བགྱིའོ། །ཡུལ་གང་ན་ཚོས་ཀྱི་རྣམ་གྲངས་འདི་འཆང་བ་དང་། གླེགས་བམ་དུ་བགྱིས་པའམ། རྒྱལ་མཚན་གྱི་རྩེ་མོར་བཏགས་པ་ལ་མཆོད་པ་བགྱིད་པའི་ཡུལ་དེར་བདག་གིས་བྱིན་གྱིས་བརླབས་ཀྱིས་ཕ་རོལ་གྱི་དམག་ཚོགས་ཐམས་ཅད་དང་། ཆོམ་རྐུན་དང་། སྲིན་པོ་དང་། མཁའ་འགྲོ་མའི་ཡང་བ་ཐམས་ཅད་རབ་ཏུ་ཞི་བར་འགྱུར་རོ། །གང་དག་ན་ཆོས་སྨྲ་བ་འདི་ལྟ་བུ་དག་དང་། མདོ་སྡེ་འདི་འཆང་བའི་ཡུལ་དེར་བདག་གིས་ལོ་ཏོག་དང་། ནོར་དང་། འབྲུ་དང་། ལོ་ཏོག་དང་། ལོས་དང་། འབྲས་བུ་ཐམས་ཅད་ཕུན་སུམ་ཚོགས་པ་དང་། བདེ་བ་ཐམས་ཅད་འབྱུང་བར་བྱིན་གྱིས་བརླབ་བར་བགྱིའོ་ཞེས་དང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། བཙུན་པ་བཅོམ་ལྡན་འདས་ནམ་མིའི་རྒྱལ་པོས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་ཏེ་ཐོས་ནས། མདོ་སྡེའི་དབང་པོ་འདི་འཛིན་པའི་དགེ་སློང་དེ་དག་ཕྱིར་རྒོལ་བ་ཐམས་ཅད་ལས་ཀུན་ཏུ་བསྲུང་བར་བགྱིད། ཡོངས་སུ་སྐྱོབ་པ་དང་། ཡོངས་སུ་འཛིན་པ་དང་། ཡོངས་སུ་སྐྱོང་བར་བགྱིད་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས། མིའི་རྒྱལ་པོ་དེའི་ཡུལ་ཐམས་ཅད་ན་གནས་པའི་སེམས་ཅན་རྣམས་ཀུན་ཏུ་བསྲུང་བར་བགྱི། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །ཞེས་གསུངས་པས་མཚོན་ལ། ལྷག་པར་སངས་རྒྱས་འཇིག་རྟེན་ན་མངོན་
སུམ་པར་བཞུགས་པའི་དུས་དེ་ལ་མཆོད་པར་བྱས་ཤིང་། དེའི་བསྟན་པ་ལ་རྗེས་སུ་ཡི་རང་བའི་སྲི་ཞུ་བྱས་པ་དང་། དེང་སང་སྙིགས་མ་ལྔ་བདོ་བ། འགྲོ་བའི་རྒྱུད་ལ་རང་བཞིན་གྱིས་གཞན་འཕྲུལ་དབང་བྱེད་ཀྱི་བདག་པོའི་བསླུ་བྲིད་ཀྱི་གནས་མལ་ཆེན་པོ་བསྟར་མི་མངོན་པར་བཅས་ཤིང་། འདོད་ཆགས་བདོ་བ། ཞེ་སྡང་བདོ་བ། གཏི་མུག་བདོ་བ། ང་རྒྱལ་བདོ་བ། ཕྲག་དོག་བདོ་བ། ཀུན་ཀྱང་ཆ་མཉམ་པར་འདོ་བས་གྲྭ་ཟུར་རྣོལ། བསོད་ནམས་མ་ཡིན་པ་ཁོ་ན་ལ་གཅིག་ཏུ་སྤྲོ་ཞིང་འཇུག་པ་མང་བའི་དུས་འདིར་དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་ལ་བསྟི་སྟང་དུ་བྱ་བ་དང་། བླ་མར་བྱ་བ་དང་། །རི་མོར་བྱ་བ་དང་། བརྗེད་པར་བྱ་བ་ལ་སོགས་པས་སྲི་ཞུ་བསྐྱེད་པ་གཉིས། བསོད་ནམས་ཆ་མཉམ་པར་ཐོབ་པའི་ཚུལ་མེ་ཏོག་བརྩེགས་པའི་གཟུངས་ལས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ལོ་གཅིག་གམ་ལོ་བརྒྱའམ་ལོ་སྟོང་ཡང་རུང་སྟེ། བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་རྟེན་ནམས་ལ་མེ་ཏོག་འགའ་འཕུལ་ལམ་ཆུ་སྙིམ་ད་གང་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་ཉག་ཉིལ་འཕྱག་གམ། བྱུག་པ་འབུལ་ལམ། སྦོས་འབུལ་ལམ། བདུག་སྦོས་འབུལ་ལམ། མར་མེ་འབུལ་ལམ་ཕུལ་ནས་དགའ་བའི་སེམས་ཀྱིས་གོམ་པའི་སྟབས་འགའ་བོར་ཏེ། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ་ཞེས་སྨྲ་བ་དེ་དག་ནི། སེང་གེ་རྣམ་པར་བརྩེ་བ་བསྐལ་བ་བརྒྱའམ། བསྐལ་བ་སྟོང་དུའམ། བསྐལ་པ་བརྒྱ་ཕྲག་སྟོང་དུའང་ངན་འགྲོ་ལོག་པར་ལྟུང་བའི་གནས་སུ་འགྲོ་བར་འགྱུར་བ་དེ་ནི་གནས་མེད་དོ། །ཞེས་པས་དཀར་པོ་རྣམ་པར་འཕེལ་བའི་བསོད་ནམས་ཀྱི་ཤིང་རྟ་ལ་འཛགས་པར་སྤྲོ་བ་རྣམས། དེང་དེ་བཞིན་གཤེགས་པ་དངོས་ཀྱི་སྣང་བ་མེད་པས་ཚོགས་ཀྱི་ཞིང་རྒྱ་ཆུང་ངུར་གྱུར་ཏོ་སྙམ་པ་སྤངས་ནས། སྐུ་གསུང་ཐུགས་ཀྱི་རྟེན་འདི་དག་ལ་རིམ་གྲོ་ཆེན་པོ་བསྐྱེད་ཅིང་། བྱེ་བྲག་ཏུ་གསུང་གི་རྟེན་ནི་སློབ་དཔོན་སེང་གེ་བཟང་པོའི་ཡུམ་གྱི་འགྲེལ་བ་ལས། གཙོ་བོར་
ཆོས་ཀྱི་སྐུའི་དེ་བཞིན་གཤེགས་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཡིན་ནོ། །དེ་བས་ན་དེ་སྟོན་པར་བྱེད་པའི་རྒྱལ་བའི་ཡུམ་ལ་མཆོད་ན་ཐམས་ཅད་མཁྱེན་པའི་ཡེ་ཤེས་ཀྱི་ཆོས་ཀྱི་སྐུ་ལ་མཆོད་པའི་ཕྱིར་བསོད་ནམས་མང་དུ་སྐྱེ་བ་ཡིན་ནོ། །ཞེས་དྲི་མ་མེད་པའི་གསུང་རབ་རྣམས་ལས་ཡང་ནས་རང་དུ་གསུངས་པའི་དོན་ལ་ཡིད་རྟོན་པར་བྱས་ཏེ། །མཆོད་པ་དང་། འདྲི་བ་དང་། ཀློག་པ་དང་། འཆང་བ་དང་། ཁ་ཏོན་བྱེད་པ་དང་། འཆང་ཞིང་ཕུ་དུད་བྱ་བ་སོགས་ལ་བསོད་ནམས་ཚད་མེད་པ་ཉིད་དུ་འཕེལ་ཏེ། འདི་ལྟར་ཆོས་སྤྱོད་བཅུའི་ཡན་ལག་ཕལ་མོ་ཆེའང་གསུང་རབ་འདྲི་བ་ལ་སོགས་པའི་ཕྱོགས་འདིར་ལྟོས་ཤིང་གནས་པ་ཡིན་ཏེ། རྡོ་རྗེ་ཕུར་བ་འཇིག་རྟེན་སྣང་བྱེད་ཀྱི་རྒྱུད་ལས། ཡི་གེ་འདྲི་མཆོད་སྦྱིན་པ་དང་། །ཉན་དང་འཛིན་དང་ཀློག་པ་དང་། །འཆང་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་དག དེ་བཞིན་གཤེགས་པའི་ངོ་བོ་ཉིད། །བླ་མེད་བྱང་ཆུབ་ཐོབ་པར་འགྱུར། །གང་ཞིག་འདི་ལ་མོས་གྱུར་བ། །རྒྱལ་བ་རྣམས་ཀྱིས་བསྔགས་པ་ཡི། །ཡོན་ཏན་ཐམས་ཅད་འབྱུང་བར་འགྱུར། །ཅེས་གསུངས་པའི་ཕྱིར་རོ། །ད་ནི་གསང་རྒྱུད་རྒྱ་མཚོ་གཉུག་མར་གནས་པའི་གཙུག་ལག་ཁང་དུ་སྤྱོན་པར་བྱས་པའི་གཏམ་ནི། དུས་ཚོད་དེ་ནས་ཞག་གི་ཕུང་པོ་དྲུག་ཏུ་འདས་པ། སྔོན་གྱི་ཚེ་གྲོང་ཁྱེར་ཆེན་པོ་མཉན་ཡོད་དུ་བདག་ཅག་གི་སྟོན་པ་སྤངས་རྟོགས་བསམ་གྱིས་མི་ཁྱབ་པ། གནས་དང་གནས་མ་ཡིན་པ་མཁྱེན་པ་ལ་སོགས་ཏེ་སྟོབས་བཅུ། ཆོས་ཐམས་ཅད་མངོན་པར་རྫོགས་པར་བྱང་ཆུབ་བ་ལ་སོགས་ཏེ་མི་འཇིགས་པ་བཞི། དེ་བཞིན་གཤེགས་པ་ལ་འཁྲུལ་བ་དང་ཅ་ཅོ་མེད་པ་ལ་སོགས་ཏེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད། ཆོས་ཐམས་ཅད་བདག་མེད་པ་ཡིན་ན་སེམས་ཅན་རྣམས་བདག་མེད་པར་མ་མོས་པ་དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་སྐྱེ་བ་ལ་སོགས་པའི་ཐུགས་རྗེའི་མཚན་སུམ་ཅུ་རྩ་གཉིས། གུས་པར་ཉན་པ་རྣམས་ལ་སེམས་སྙོམས་པ་ལ་སོགས་ཏེ་དྲན་པ་ཉེ་བར་གཞག་བཞི། དེ་བཞིན་གཤེགས་པའི་
སྐུའི་ཕྲིན་ལས་ཀྱི་སྤྱོད་པ་ཡོངས་སུ་དག་པ་ལ་སོགས་ཏེ་བསྲུང་བ་མེད་པ་བཞི། ཆོས་སོ་སོར་ཡང་དག་པར་རིག་པ་ལ་སོགས་ཏེ་རྣམ་པ་ཐ་དད་པ་བཞི། ལྷའི་མིག་ལ་སོགས་ཀྱི་མངོན་པར་ཤེས་པ་དྲུག། དེའི་གནས་སྐབས་ལས་བྱུང་བའི་རྫུ་འཕྲུལ་གྱི་ཡན་ལག་ཆོ་འཕྲུལ་ཆེན་པོ་གསུམ། དབུ་གཙུག་ཏོར་དང་ལྡན་པ་ལ་སོགས་ཏེ་མཚན་བཟང་པོ་སུམ་ཅུ་རྩ་གཉིས། སེན་མོ་ཟངས་ཀྱི་ཁ་དོག་ཏུ་གྱུར་བ་སོགས་དཔེ་བྱད་བརྒྱད་ཅུའི་ཡོན་ཏན་རྣམས་ཀྱི་མངའ་བདག་ཆེན་པོ། ལྷ་དང་བཅས་པའི་འཇིག་རྟེན་ཀུན་གྱི་མཆོད་པའི་གནས་ཆེན་པོ་དེ་ལྟ་བུ་ཡ་ལོག་སྲེད་ཀྱི་རྣམ་པར་རྟོགས་པས་སྲིན་བུའི་འོད་ཀྱིས་ཉི་ཟླའི་སྣང་བ་འགོག་པར་སེམས་པའི་གཏུམ་པོ་གཟུ་ལུམས་ཅན་མུ་སྟེགས་བྱེད་ཀྱི་སྟོན་པ་དྲུག་འཁོར་དང་བཅས་པས་འགྲན་ཟླར་བྱས་པ་ནི། བདག་ཅག་གི་སྟོན་པ་འདི་ནི་ཐུགས་རྗེ་བསམ་གྱིས་མི་ཁྱབ་ཅིང་། སེམས་ཅན་འདུལ་བའི་ཐབས་ལ་མཁས་པ་ཡིན་པའི་ཕྱིར། རྒྱུ་འདི་ལས་གནས་སྐབས་དེ་དང་ད་ལྟ་ཕྱི་མའི་མུར་ཐུག་གི་བར་འགྲོ་བ་རྣམས་ཀྱི་བསོད་ནམས་རྒྱ་མཚོའི་འཇུག་ངོགས་དམ་པར་དུས་བྱིན་གྱིས་བརླབས་ཏེ། དགེ་བའི་རྩ་བ་ཉུང་ངུ་ཡང་མང་པོར་བྱེད་པའི་དགོས་པ་རྒྱ་ཆེན་པོ་གཟིགས་ནས་ཆོ་འཕྲུལ་འགྲན་པར་ཞལ་གྱིས་བཞེས་སོ། །དེ་ལྟར་བཞེས་ནས་ཆོ་འཕྲུལ་གྱི་འདུན་ཁང་མངོན་པར་སྤྲུལ་ཏེ། འབྱུང་རྩིས་པ་རྣམས་ཀྱི་དཔྱིད་ཟླ་ཐ་ཆུང་། གསོ་དཔྱད་ཀྱི་རྒྱུད་ལས་ཀྱང་། དཔྱིད་ཟླ་གསུམ་ནི་ཤིང་རྩི་ཁ་འབུས་དུས། །རྟ་པ་དབོ་དང་ནག་པས་ནག་ཚོད་འཛིན། །ཞེས་པ་ལྟར། དཔྱིད་ཟླ་ར་བར་གྲགས་པ་རྒྱུ་སྐར་གྱི་ལྷ་མོ་རྟ་བས་ཉ་བར་བྱེད་པ་ཆོ་འཕྲུལ་ཆེན་པོའི་ཚེས་གཅིག་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་མཆོད་ཅིང་། ཚེམས་ཤིང་འོད་སྲུངས་བྱིན་གྱི་བུ་མོའི་ཕང་བར་བཙུགས་པ་ལས། སྐད་ཅིག་ཉིད་ལ་རྒྱ་ཁྱོན་དང་ཡལ་གའི་ཁོ་ལག་རྫོགས་པའི་དཔལ་དུ་འབར་ཞིང་། ཆོས་ཀྱི་སྒྲ་སྒྲོགས་པའི་དུས་ཀྱི་ཉིན་ནས་བརྩམས། ཕྱོགས་གཅིག་གི་དུས་ཚོད་ལ་ཡོལ་བ་མ་བྱིན་གྱི་བར། སྟོན་པ་དྲུག་འཁོར་བརྒྱད་ཁྲི་དང་བཅས་བདག་གིས་ཟག་པར་བཅས་པའི་རྫུ་འཕྲུལ་གྱི་ཉེ་བར་ལེན་པའི་འཁྲི་ཤིང་ས་ཆེན་པོ་འདིའི་འོག་ཏུ་
ཡིབས་པ་ལ་གདོན་མི་ཟ་བའི་གནས་སྐབས་ནི་བྱིན། ཅང་མི་སྨྲ་བ་དང་། ཡུལ་ཡུལ་པོའི་བརྟུལ་ཞུགས་གསར་བུལ་ནི་བཀོད། རྔོ་ཐོགས་པ་མེད་པའི་བཞིན་རས་ལ་སོར་མོའི་བར་གྱིས་འདེབས་པ་ཙམ་གྱི་སྒྲིར་བྱེད་དམ་པོས་འགེབས་སུ་བཅུག་པ་དེ་བཞིན་གཤེགས་པའི་ཆོ་འཕྲུལ་ཆེན་པོའི་སྡོམ་པ་ཟད་མི་ཤེས་པ་ལས་ཕྱི་རོལ་དུ་ཡུལ་ཉི་ཤུ་རྩ་བཞིར་མཁའ་འགྲོ་མ་རྣམས་འདུ་བའི་ཆོ་ག་རྒྱ་ཆེན་པོས་བྲེལ་ཞིང་། ནང་རྡོ་རྗེའི་ལུས་ལ་རྒྱུད་སྡེ་ཟབ་མོ་ནས་བཤད་པའི་རྩ་རླུང་སེམས་གསུམ་གྱི་འདུ་བརྟེན་དང་བརྟེན་པར་འཛོམ་པའི་ངོ་མཚར་རྒྱ་མཚོ་ལའང་སྤྱོད། སངས་རྒྱས་གཉིས་པ་སློབ་དཔོན་ཆེན་པོའི་ཡང་དུས་ཀྱི་མཆོད་པའི་ངེས་པ་ཆེན་པོ། ཁྱད་པར་སྟོན་མཆོག་རྫོགས་པའི་སངས་རྒྱས་འཇིག་རྟེན་སྐྱོང་བ་བཞིས་མཆོད་ཅིང་མཚན་དཔེའི་ངོ་མཚར་རྒྱལ་ཆེན་རིས་བཞིའི་གནས་ནས་འོག་མིན་ལ་ཐུག་གི་བར་གྱི་བླའི་མཆོད་སྡོད་ཆེན་པོར་བཞེངས་ནས། གཉེན་འཇམ་ཡིད་དུ་འོང་བ་ལ་སོགས་ཏེ་དབྱངས་ཀྱི་ཡན་ལག་དྲུག་ཅུའི་རྒྱན་གྱིས་མཛེས་པའི་ཆོས་ཀྱི་རྔ་བོ་ཆེ་བརྡུང་བའི་དུས། དཀར་པོའི་ཕྱོགས་ཀྱི་རྫོགས་པ་གཉིས་པའམ། གྲལ་ཚེས་བཅུ་པའི་ངོ་མཚར་མཆོག་གི་སྣང་བ་འབུམ་ཕྲག་དུ་མར་འཛག་པའི་ཉིན། རང་ཅག་གི་གྲྭ་ས་ནས་སྟོན་པ་མཆོག་གི་རྗེས་སུ་ཞུགས་པའི་རབ་ཏུ་བྱུང་བ་གཞོན་ནུའི་ངང་ཚུལ་བ། འཇིག་རྟེན་གསུམ་ན་ཐོབ་པར་དཀའ་བའི་ངུར་སྨྲིག་རྒྱལ་མཚན་ཅན་བཅུ་ཕྲག་གཉིས་ཀྱི་ཕྲག་པ་ན་རྒྱུད་འབུམ་རིན་པོ་ཆེ་མཚང་བ་མེད་པ་ཡོངས་སུ་བཟུང་ཞིང་། འཆི་བ་མེད་པའི་གོས་བཟང་ཁ་དོག་སྣ་ཚོགས་པ་གཅལ་དུ་བཀྲམ་པའི་རྟེན་ཁེབས་ཀྱིས་ནི་ལྷབ་ལྷུབ་ཏུ་བྱས། སྤོས་ཀྱི་བདུག་པ་དང་། ཕྱེ་མ་ཕུར་མ་དང་། གདུགས་དང་། རྒྱལ་མཚན་དང་། བ་དན་ལ་སོགས་པའི་བསྟི་སྟང་གིས་མདུན་བསུས། བསོད་ནམས་དམ་པའི་ཡུལ་ལ་སྲི་ཞུ་འདི་ནི་རང་ཅག་གིའང་ཁུར་དུ་བཀལ་བར་འོས་པ་ཉིད་དེ། རྐང་པའི་འདུ་འགོད་ཉམ་ཉེས་ཤིང་ལང་ཚོའི་སྟོབས་ལས་ཡོལ་བའི་ཕྱིར་དང་། འཇིག་རྟེན་དང་ཡང་མཐུན་པར་འཇུག་པས་བདག་ཅག་རྣམས་ཀྱང་ཅང་ཤེས་བཟང་པོ་རྒྱན་གྱིས་སྤྲས་པའི་སྟེང་ན་འཛེགས་ཏེ།
ལོ་ཀའི་ཆོས་རྣམ་པ་ཐ་དད་པ་བརྒྱད་པོའང་ནང་དུ་འདོད་པ་ཟད་པའི་ཆོས་ཉིད་ཅན་ལ་གདོད་ནས་རྨི་ལམ་དང་སྒྱུ་མའི་རང་བཞིན་དུ་མཆིས་པ་དེ་ཉམས་འོག་ཏུ་བཙུད་ནས། འདི་ལྟར་དཀོན་མཆོག་གསུམ་གྱི་ཕྱོགས་ལ་དད་པམ། རྗེས་སུ་ཡི་རང་བས་ཐན་གོམ་པ་བདུན་གྱི་བར་དུ་བསུ་བསྐྱེལ་བྱས་པ་ལའང་བསོད་ནམས་དཔག་ཏུ་མེད་པ་ཐོབ་པའི་ཕྱིར་ཞབས་འབྲིང་གི་ཚུལ་དུ་བསྟི་སྟང་བྱས་སོ། །ཚུལ་དེ་ལྟ་བུས་དཔལ་ཨོ་རྒྱན་ཆོས་ཀྱི་རྒྱལ་པོ། གང་གི་གཏམ་ལྷའི་ཞུ་ལན་དུ་གྲགས་པ་གུ་རུ་ཆོས་ཀྱི་དབང་ཕྱུག་གིས་དུས་གསུམ་བསྒྲིབས་པར་གསལ་བར་སྟོན་པའི་ལུང་བསྟན་ལས། བང་སོ་དམར་པོའི་ཤར་རམ་ལྷོ་ཡི་ཕྱོགས། །ལྷ་བབས་མཆོད་རྟེན་དགོན་སྡེ་འཆའ་ཡང་སྲིད། །ཅེས། རྡོ་རྗེའི་ལུང་གིས་གསལ་བར་བསྟན་པ་བཞིན། སྔ་འགྱུར་རྡོ་རྗེ་ཐེག་པའི་རིང་ལུགས་འཛིན་པ་སྐར་ཚོགས་ལྟ་བུའི་དབུས་ན་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུའི་ཕ་རོལ་ཏུ་སོན་པ་ཀུན་མཁྱེན་ངག་གི་དབང་པོ། རོང་པ་ཆོས་ཀྱི་བཟང་པོ། མངའ་རིས་མ་ཧཱ་པཎྜི་ཏ། ཀུན་མཁྱེན་ཤེས་རབ་འོད་ཟེར་ཏེ། རྣམ་པ་བཞི་པོ་འདི་ལ་དོ་ཟླར་འོས་པ་སྔོན་མ་བྱུང་བའི་མ་གྱལ། དོན་དམ་པར་རྒྱལ་བའི་དབང་པོ་མཚོ་སྐྱེས་རྡོ་རྗེའི་རྒྱལ་ཚབ་ཆེན་པོ། རྣམ་པར་སྣང་མཛད་བཻ་རོ་ཙ་ན། མཁས་གྲུབ་ཁྱུང་པོ་རྣལ་འབྱོར། རྔོག་ལོ་བློ་ལྡན་ཤེས་རབ། གཡུ་བྲག་པ་འགྲོ་བའི་མགོན་པོ། དཔལ་ཆེན་ཆོས་ཀྱི་ཡེ་ཤེས། བྱ་འདུལ་བ་འཛིན་པ། གཡག་སྡེ་མ་ཧཱ་པཎྜི་ཏ། པཎ་ཆེན་འབུམ་ཕྲག་གསུམ་པ་ལ་སོགས་ཏེ་ཐུགས་རྗེ་ལས་སྤྲུལ་གྱི་སྐྱེས་རབས་ཨུ་དུམ་ཝཱ་རའི་འཁྲི་ཤིང་ལ་བརྟེན་ནས་མཁྱེན་རབ་བྱང་ཆུབ་བར་དུ་འཕེལ་བར་བྱས་པའི་མངོན་སུམ་ཚང་མ། ཀུན་མཁྱེན་བླ་མ་ཤཱནྟ་པུ་རི་བས་མངོན་པར་བསུན་པའི་གདན་ས་ཆེན་པོ། །ལྟར་སྣང་སྲིད་པའི་ཕུན་ཚོགས་རྒྱ་ཆེན་ངོས་བྲེལ་བའི་བསྙེངས་པ་ལ་གཅིག་ཏུ་འཇུག་པ་མི་བརྩོན་ཡང་། ནང་རྡོ་རྗེའི་ལམ་ལ་རྣལ་དུ་འབྱོར་བའི་གང་ཟག་རྣམ་པ་མང་པོ་བརྒྱུད་མར་བྱོན་ཏོ་ཞེས་ཡོངས་སུ་གྲགས་པ་ཤཱི་པརྦ་ཏ་མ་ཧཱ་གཱན་སྟེ། དཔལ་རི་ཐེག་པ་ཆེན་པོའི་གླིང་གི་ཉེ་འདབས་སུ་སྤྱོན་པ་ན། སིནྡྷུ་ཝ་རའི་རྒྱ་མཚོ་ཆེན་པོ་དཔའ་རླབས་ཀྱི་ལྕེ་ཞགས་ནམ་མཁའི་མཐོངས་སུ་
འཕྱོ་བ་སྙམ་བྱེད་པའི་དགེ་སློང་གི་དགེ་འདུན་ངང་པའི་རྒྱལ་པོ་ཤིན་ཏུ་དུལ་བ་བཞིན་དུ་གོམ་པ་དལ་གྱིས་འདོར་བ་དག་མུ་ཏིག་སྟར་ལ་བརྒྱུས་པ་ལྟ་བུའི་ཕྲེང་བར་བཀོད་པའི་ཕང་བར། ཆོས་དུང་དཀར་པོ་གཡས་སུ་འཁྱིལ་བ་དང་། གདུགས་དང་། རྒྱལ་མཚན་དང་། བ་དན་དང་། ཕྱེ་མ་ཕུར་མ་དང་། འཕན་རྩེ་གསུམ་པ་དང་། རིན་པོ་ཆེའི་རྔ་ཡབ་དང་། བསིལ་ཡབ་གདུང་བསེལ་བ་དང་། རྔ་བོ་ཆེ་དང་། རྫ་རྔ་དང་། རྔ་བྲན་དང་། རྔ་ཆེན་དང་། པི་ཝང་རྒྱུད་གཅིག་པ་དང་། རྫ་རྔ་ཕ་གཅིག་པ་དང་། ལྕགས་ཀྱི་སིལ་ཕྲོལ་དང་། འཁར་བའི་སིལ་ཁྲོལ་དང་། པི་ཝང་རྒྱུད་གསུམ་པ་དང་། རྔ་ཀུ་མུནྤ་དང་། སིལ་སྙན་གླུ་དབྱངས་དང་བསྟུན་པ་དང་། ཕེག་རྡོབ་དང་། དུང་ཆེན་དང་། རྒྱ་གླིང་ལ་སོགས་པ་ཕལ་མོ་ཆེ་ནི་མངོན་སུམ་པའི་ཆོས་ལ་གནས། ལ་ལ་ནི་ཏིང་ངེ་འཛིན་གྱི་ཆོ་གར་བྱས་པའི་མདུན་བསུའི་བཀོད་པ་རྒྱ་ཆེན་པོ་དང་བཅས་ཏེ་ཕེབས་པ་ན། གང་དང་ཉེ་བའི་ཕྱོགས་ག་ལ་བར་གྲོང་དང་གྲོང་ཁྱེར་སྦྲང་རྩིའི་བཟའ་བ་གསོག་པའི་བང་མཛོད་ལ་འགྲན་པ་དག་ཡོད་པའི་སྐྱེ་བོའི་ཚོགས་ཁྲོམ་དུ་འཁྱིལ་བ་དག་ཀྱང་། དད་པ་དང་རྗེས་སུ་ཡི་རང་བའི་ཆོ་ག་ཡིད་ལ་སེམས་བཞིན་དུ་ལྷགས་ཏེ་བརྟེན་དང་ཁོ་བོ་ཅག་ལ་མིག་མི་འཛུམས་པར་བལྟ་ཞིང་མགོ་བོས་གཏུག་པར་བྱེད་དོ། །དེར་གཙུག་ལག་ཁང་གི་ཐ་གྲུ་རྣམ་པར་ཡངས་པའི་འཛུམ། རྒྱལ་བའི་བཀའ་འགྱུར་རོ་འཆེལ་དང་། དགོངས་འགྲེལ་བསྟན་འགྱུར་རིན་པོ་ཆེའི་དབུས་ན་ལྷམ་མེར་གསལ་བའི་མདུན་དུ། འདི་ལྟར་ཤིན་ཏུ་མཛའ་བར་གྱུར་བའི་ཕོ་ནུའམ། སྐྱེད་པར་བྱེད་པ་དང་། སྐྱེ་བའི་ལམ་སྟེར་དང་། སྐྱེ་བའི་མྱུ་གུ་གསུམ་ཕན་ཚུན་ཕྱོགས་ཕྱོགས་སུ་དཔྲལ་བར་གྱུར་བ་སླར་གཅིག་ཏུཚོགས་པ་བཞིན། གངས་རིའི་ཁྲོད་ན་རྒྱལ་གསུང་བདེན་པར་སྨྲ་བ་ཡིད་ལ་གཉིས་སུ་འཛིན་པའི་དབྱེན་གྱིས་ཐ་དད་དུ་ཕྱོགས་ནས་ཡུན་དེ་སྲིད་ཅིག་མཛའ་བར་མ་གྱུར་བ། དེང་ལྗོན་པའི་ལང་ཚོ་མིག་མངས་རིས་སུ་བྲིས་པའི་ཀུན་དགའ་ར་བ་གཅིག་གི་ནང་དུ་མཉམ་པ་ཉིད་དུ་འདྲེས་པར་གྱུར་བས། ལྷ་དང་བཅས་པའི་འཇིག་རྟེན་ཐམས་ཅད་ཁོ་བོ་ཅག་གི་བསོད་ནམས་
དམ་པའི་དོར་ཡངས་པར། ཁྱོད་གཅིག་ཁོ་ནའི་སྨོན་ལམ་གསར་བའི་རྒྱང་གླུའི་ངོ་ལ་མོ་སྙན་པ་འཁྲོལ་བས་རིང་མོའི་དུས་ནས་ཕྱོགས་འདིར་བོས་པའི་མགྲོན་གྱི་དམ་པ་འདི་ནི་ཨེ་མ་མ་ལ་ཞེས་ད་དིར་དབྱངས་སུ་སྒྲོག་པའི་དགའ་བ་བརྒྱ་ཕྲག་གི་སྣང་བས་རྩེན་པར་བྱེད་པ་མཐོང་ངོ། །དེ་མ་ཐག་ཏུ་བདག་ཉིད་དགེ་འདུན་འདུས་པའི་གྲལ་དབུ་ན་རྡོ་རྗེའི་སློབ་དཔོན་གྱི་བརྟུལ་ཞུགས་ཉིད་དུ་གནས་པས་ཕྱིར་འབྲང་གི་བགེགས་རྣམས་རྒྱ་མཚོ་ཆེན་པོའི་ཕ་མཐའ་ལ་དེངས་སུ་བཅུ་བ། ཁྲུས་ཀྱི་བྱ་བ་དང་། །སྤྱན་འདྲེན་པ་དང་། །མཆོད་པ་འབུལ་བ་དང་། །ལྷག་པར་གནས་པའི་མེ་ཏོག་སིལ་མས་ཕྱོགས་ཀུན་གཏོར་བའི་རྗེས་ལ། ཁོ་བོ་ཅག་གིས་དཀོན་མཆོག་གསུམ་གྱི་ཡོན་ཏན་ལ་རྗེས་སུ་བསྔགས་པ་དང་། ཆོ་འཕྲུལ་ཆེན་མོའི་དུས་ལ་ཁྱད་པར་བརྗོད་པའི་ངེས་པ་ཅུང་ཟད་ཀྱིས་སྣ་དྲངས། བཀྲ་ཤིས་པའི་རྫས་བརྒྱད་ཀྱི་བཤད་པའི་སྟོང་ཐུན་རེའི་མཚམས་སུ་དགེ་འདུན་འདུས་པའི་ཚོགས་ཀྱིས་མཐུན་པར་གྱུར་བའི་ཚིག་ཀ་ལ་པིངྐའི་ངས་སུ་བསྒྱུར་ཞིང་། ཤིས་པ་བརྗོད་པའི་ཡན་ལག་མ་ཚང་བ་མེད་པའི་དེ་རིང་གི་ཉིན་ལ་མཐའ་རྒྱས་སུ་བྱས། སང་གི་ནངས་པར་ནས་གདུགས་གཉིས་ཀྱི་བར་ལ་དཀོན་མཆོག་གསུམ་ལ་མཆོད་པའི་སྤྲིན་གྱི་རོལ་བ་རྣམ་པར་བཀོད་ཅིང་། དགེ་འདུན་རྣམས་ལ་སྲི་ཞུ་ཆེན་པོས་བསྙེན་བཀུར་ནས། །རྒྱུད་འབུམ་རིན་པོ་ཆེའི་ཡི་གེའི་དངོས་པོ་སྒྲ་ཆོག་རང་ཚན་པར་སྣང་བའི་གསུང་སྒྲོགས་དང་། རྗེས་འབྲེལ་དུ་རྩ་བ་གསུམ་གྱི་ལྷ་ཚོགས་ལ་ཚོགས་ཀྱི་འཁོར་ལོ་རྒྱ་ཆེན་པོ་དང་། རྡོ་རྗེའི་ཆོས་སྐྱོང་རྣམས་ལ་གཏང་རག་གི་མཆོད་པས་མཉེས་པར་བྱས་ཤིང་། དགེ་འདུན་རྣམས་ལ་ཉིན་སྔ་མར་བསོད་ནམས་ཁ་བཏགས་རེ་དང་། ཕྱི་མར་ཊཾ་ཁ་རེའི་ཕྱག་འགྱེད། མཐར་བསྔོ་བ་སྨོན་ལམ་གྱིས་རྒྱས་འདེངས་པ་ཡན་ཆད་ཀྱིས་སྦྱོར་དངོས་རྗེས་གསུམ་མཐར་ཕྱིན་པ་ཡིན་ནོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། ཆེད་དུ་བརྗོད་པ་བྱ་བ་ལས་ཀྱི་འཁོར་ལོ་ཇི་ལྟར་བརྩམས་པའི་གཏམ་བརྗོད་པ་སྟེ། སྐབས་བདུན་པའོ། །
ཆོས་ཀྱི་བཞུགས་བྱང་སྨོས་པའི་རབ་ཏུ་བྱེད་པ་སྟེ་སྐབས་བརྒྱད་པ།
ད་ནི་ཡིད་བཞིན་གྱི་ནོར་བུ་ལྟ་བུའི་ནང་རྒྱུད་རིན་པོ་ཆེར་ཡོ་ག་གསུམ་རྗེས་འབྲངས་བརྟན་སྲུང་དང་བཅས་པའི་ཆོས་ཀྱི་བཞུགས་བྱང་དང་། ལོ་པཎ་སོ་སོའི་འགྱུར་བྱང་། ལོ་གྲངས་སོགས་ཀྱི་རྣམ་གཞག་ཞིབ་མོར་བཤད་པར་བྱ་སྟེ། །ཀ་བ་ལ། རྡོ་རྗེ་སེམས་དཔའ་ནམ་མཁའ་ཆེ་བྲམ་ཟེ་རྒྱས་པའི་བརྒྱུད་ལེའུ་བཅུ་དྲུག་པ། བྱང་ཆུབ་ཀྱི་སེམས་རྨད་དུ་བྱུང་བ་ལེའུ་ཞེ་གཉིས་པ། ཤྲཱི་སིངྷ་དང་། བཻ་རོ་ཙ་ནའི་འགྱུར། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པའི་རྒྱུད་སྐབས་བཅུ་པ། འགྱུར་གོང་འདྲ། ཆོས་ཐམས་ཅད་སེམས་ཉིད་ཡེ་ཤེས་ཀྱི་རྒྱུད་དངོས་གྲུབ་རང་བྱུང་དུ་སྤྱོད་པ་དབང་བསྐུར་བ། རྣ་རྒྱུད་ཟམ་པ་ལེ་གྲངས་མེད་པ་སྐལ་ལྡན་གྱི་བཅུད་ཆོས་རྫོགས་སོ་ཞེས་པའི་མཐའ་ཅན། རྫོགས་པ་ཆེན་པོ་ཆོས་ཉིད་བྱང་ཆུབ་ཀྱི་སེམས་ཐིག་ལེ་རྒྱ་མཚོ་གནས་ལ་འཇུག་པ་ཞེས་བྱ་བའི་རྒྱུད་ལེའུ་བཅུ་པ། བི་མ་ལ་དང་གཡུ་སྒྲའི་འགྱུར། བྱང་ཆུབ་སེམས་ཀྱི་མན་ངག་རིན་ཆེན་ཕྲེང་བའམ་བང་མཛོད་འཕྲུལ་གྱི་ལྡེ་མིག་ལེའུ་གཅིག་པ། མན་ངག་ཐམས་ཅད་ཀྱི་སྡོམ་མམ། མན་ངག་སྤྱིའི་རྒྱ་མདུད་ཅེས་བྱ་བ་ལོ་གྲངས་མེད་པ། ཡང་འབྱེད་འཕྲུལ་གྱི་ལྡེ་མིག་ལེའུ་བཅུ་བཞི་པ། བང་མཛོད་འཕྲུལ་གྱི་མེ་ལོང་ལེའུ་བཅུ་བ་གནུབས་ཆེན་གྱི་མན་ངག་གཏེར་རྒྱུད། ཐག་རིང་དུ་འགྲོ་བ་ནམ་མཁའ་དང་མཉམ་པའི་རྒྱུད་ལེའུ་ཉེར་ལྔ་པ། ལེའུའི་མིང་སྟོན་པ་འཁོར་ལོ་རྡོ་རྗེ་ཞེས་བྱ་བ་ལེའུ་གྲངས་བཞི་པ། ཛྙཱ་ན་གརྦྷ་དང་། བཻ་རོ་ཙ་ནའི་འགྱུར། བྱང་སེམས་རིན་ཆེན་འཁོར་ལོ་ཞེས་བྱ་བའི་རྒྱུད་ལེའུ་བཅུ་པ། རྡོ་རྗེ་སེམས་དཔའ་ནམ་མཁའ་ཆེ་རྒྱས་པ་ཞེས་བྱ་བ་བརྒྱུད་ལེའུ་བཅུ་གཅིག་པ། ཡང་ནམ་མཁའ་ཆེ་རྒྱས་པ་ཞེས་བྱ་བ་རྣལ་འབྱོར་མ་རྒྱུད་ལེའུ་བཅུ་གསུམ་པ། བི་མ་ལ་དང་། དཔལ་བརྩེགས་ཀྱི་འགྱུར། བྱང་ཆུབ་ཀྱི་སེམས་ཉ་མོ་བག་ལ་ཉལ་ལེའུ་དྲུག་པ། བྱང་ཆུབ་ཀྱི་སེམས་རྨད་དུ་བྱུང་བའམ། ཆོས་ཆེན་པོ་རྨད་དུ་གྱུར་བ་ལེའུ་ཉི་
ཤུ་པ། རྫོགས་པ་ཆེན་པོ་ཆོས་ཉིད་བྱང་ཆུབ་ཀྱི་སེམས་རིན་པོ་ཆེ་བཀོད་པ་རྣམ་པར་དབྱེ་བའི་རྒྱུད་ལེའུ་ལྔ་པ། ཤི་ལེནྡྲ་མི་ཏྲ་དང་། འཇིང་གསལ་འབར་གྱི་འགྱུར། བྱང་ཆུབ་ཀྱི་སེམས་རྨད་དུ་བྱུང་བ་ལེའུ་བཅུ་གཅིག་པ་ཕྱི་མ་ཏ་མ་ཉིད་དང་གསུམ་བཞུགས་པ་ཟབ་མོ་པོ་རིའི་ལྷ་ཁང་དུ་བུ་གཉིས་ལུས་སོ་ཞེས་པ། རྡོ་རྗེ་སེམས་དཔའ་ནམ་མཁའ་ཆེ་གསང་བ་སྙིང་པོ་རྣལ་མ་དོན་གྱི་རྒྱུད་ལེའུ་བཅུ་གཉིས་པ། གསང་སྔགས་ལམ་མཆོག་འདུས་པའི་རྒྱུད་ལེའུ་ལྔ་པ། ཤྲཱི་སིངྷ་དང་། རྡོ་རྗེ་ཡང་དབང་གཏར་གྱི་འགྱུར། ཐུགས་ཀྱི་རྒྱུད་རིན་པོ་ཆེ་སྤུངས་པའི་རྒྱན་ལེའུ་ལྔ་པ། གསང་བ་སྤྱི་རྒྱུད་ལེའུ་ཉེར་ལྔ་པ། དྲི་མེད་བཤེས་གཉེན་དང་། གཉགས་ཛྙཱ་ནའི་འགྱུར། རིན་ཆེན་རྒྱས་པ་ཆེན་པོའི་རྒྱུད་ལེའུ་རེ་གཅིག་པ་རྣམས་སོ། །ཁ་པ་ལ། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལྟ་བ་ནམ་མཁའ་ལྟར་མཐའ་དངུས་མེད་པའི་རྒྱུད་ལེའུ་བརྒྱད་ཅུ་རྩ་བཞི་པ། ཤྲཱི་སིངྷཀ་ལ་དང་། བཻ་རོ་ཙ་ནའི་འགྱུར། ཆོས་ཐམས་ཅད་རྫོགས་པ་ཆེན་པོོ་འཁོར་བ་རྩད་ནས་གཅོད་པ་ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལེའུ་བཅུ་གསུམ་པ་མཐའ་ཅན། ཤྲཱི་སིངྷ་དང་། བཻ་རོའི་འགྱུར། རྫོགས་པ་ཆེན་པོ་འཁོར་བ་རྩད་ནས་གཅོད་པ་རྒྱ་མཚོ་དང་མཉམ་པ་རྙོག་པ་མེད་པའི་རྒྱུད་ལེའུ་དངོས་བསྟན་བདུན་རྫོགས་སོའི་མཐའ་ཅན་འགྱུར་གོང་འདྲ། རྫོགས་པ་ཆེན་པོ་འཁོར་བ་རྩད་ནས་གཅོད་པ་ཉི་ཟླ་དང་མཉམ་པ་དྲི་མ་མེད་པའི་རྒྱུད་ལེའུ་དངོས་བསྟན་བཅུ་གཅིག་རྫོགས་སོའི་མཐའ་ཅན། འགྱུར་གོང་འདྲ། རིན་པོ་ཆེ་དང་མཉམ་པ་སྐྱེ་བ་མེད་པའི་རྒྱུད་ལེའུ་དངོས་བསྟན་བཅུ་བཞི་རྫོགས་སོའི་མཐའ་ཅན། འགྱུར་གོང་འདྲ། སེམས་སྒོམ་དོན་དྲུག། མན་ངག་རྩལ་ཆེན། བྱང་སེམས་ཁྱུང་ཆེན་རྣམས་དུམ་བུ་རེ། རྡོ་རྗེ་སེམས་
དཔའ་ནམ་མཁའ་ཆེ་ལེ་ཡོད་གྲངས་མེད་རྫོགས་སོའི་མཐའ་ཅན། འགྱུར་གོང་འདྲ། འདིར་གསན་ཡིག་སྔ་ཕྱི་དང་གོ་བསྟུན་གྱི་ཡིག་ཆུང་ཞིག་ཡོད། བྱང་ཆུབ་ཀྱི་སེམས་རྨད་དུ་བྱུང་བ་སོགས་རྒྱུད་ཐུན་གྱི་འགྱུར་བཅུ་གསུམ། བྱང་ཆུབ་ཀྱི་སེམས་རྩལ་སྤྲུག་ལེའུ་དགུ་པ། ཤྲཱི་སིངྷ་དང་། བཻ་རོའི་འགྱུར། བྱང་སེམས་ཁྱུང་ཆེན་མགོར་དེ་ནས་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རྣམས་ཞེས་ཡོད་པ་ལེའུ་བཅུ་པ། འགྱུར་གོང་འདྲ། ནམ་མཁའ་ཆེ་རྒྱས་པ་ཡི་གེ་མེད་པའི་རྒྱུད་ལེའུ་བརྒྱད་པ། བྱང་ཆུབ་སེམས་སྒོམ་རྡོ་ལ་གསེར་ཞུན་ལེ་མེད། ཡང་བྱང་ཆུབ་སེམས་སྒོམ་འཇམ་དཔལ་བཤེས་གཉེན་གྱི་མའི་མན་ངག །རྫོགས་པ་ཆེན་པོ་ཡེ་ཤེས་བདུན་བྱུང་གི་རྒྱུད་ལེའུ་བརྒྱད་པ་མགོར་བཀྲ་ཤིས་དཔལ་ཞེས་ཡོད་པ། རིག་པའི་ཁུ་བྱུག་ལེའུ་བདུན་པ། ཤྲཱི་སིངྷ་དང་། བཻ་རོའི་འགྱུར། བྱང་སེམས་བཀྲ་ཤིས་མི་འགྱུར་བ་གསལ་བར་གནས་པའི་རྒྱུད་ལེའུ་བཅུ་པ། བི་མ་ལ་དང་། གཡུ་སྒྲའི་འགྱུར། རྒྱུད་ཀྱི་རྒྱལ་པོ་གསེར་གྱི་རུས་སྦལ་རྩ་བའི་རྒྱུད་ཅེས་བྱ་བ་ལེའུ་སུམ་ཅུ་ཐམ་བ་པ། བཻ་རོའི་འགྱུར། རིན་པོ་ཆེ་སྣང་བྱེད་ཀྱི་རྒྱུད་ལེའུ་དགུ་པ། བྱང་སེམས་རྨ་བྱ་འཇིང་བསྣོལ་ལེའུ་དྲུག་པ། ཡང་རྨ་བྱ་འཇིང་བསྣོལ་མཐའི་མུན་སེལ་ཆེན་མོ་ཞེས་བྱ་བ་ལེའུ་ལྡབ། རྫོགས་པ་ཆེན་པོ་ལྟ་བ་ཡེ་ཤེས་གཏིང་རྩོགས་ལེའུ་ཉི་ཤུ་རྩ་བདུན་པ། ཨ་ཙར་དྲན་པའི་ཡེ་ཤེས་ཀྱིས་བོད་ཡུལ་དུ་བསྣམས་པ། བྱང་ཆུབ་ཀྱི་སེམས་སྒོམ་པའི་རྒྱུད་གཤམ་ན་ཐེག་པའི་སྙིང་པོ་རྫོགས་སོའི་མཐའ་ཅན་ལེའུ་བཅུ་གཅིག་རྣམས་སོ།། །།ག་པ་ལ། ཀློང་ཆེན་རབ་འབྱམས་རྒྱལ་པོའི་རྒྱུད་ལེའུ་བཞི་བཅུ་རྩ་བདུན་པ། ཀུན་ཏུ་བཟང་པོ་ནམ་མཁའ་ཆེ་རྩ་བ་བསྡུས་པའི་རྒྱུད་ལེའུ་བཅུ་བདུན། ཤྲཱི་སིངྷྷ་དང་། བཻ་རོའི་འགྱུར། བྱང་ཆུབ་ཀྱི་སེམས་ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལེའུ་བཅུ་བཞི་པ། རྡོ་རྗེ་སེམས་དཔའ་ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལེའུ་ཉི་ཤུ་རྩ་བདུན་པ། ཤྲཱི་སིངྷ་དང་། བཻ་རོའི་འགྱུར། རྡོ་རྗེ་སེམས་
དཔའ་ནམ་མཁའ་ཆེ་ཀུན་ཏུ་བཟང་པོ་གསང་བའི་སྙིང་པོའི་རྒྱུད་ཀྱི་མདོ་ལེའུ་ཉི་ཤུ་རྩ་དྲུག་པ། འགྱུར་གོང་འདྲ། ཡེ་ཤེས་གསང་བ་ཞེས་བྱ་བའི་རྒྱུད་ལེའུ་བཅུ་གཉིས་པ། བྱང་ཆུབ་ཀྱི་སེམས་ཡེ་ཤེས་རྫོགས་པའི་རྒྱུད་ལེའུ་བཅུ་པ། འགྱུར་གོང་འདྲ། རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་ལ་འཇུག་པ་རྣམ་དག་སྟོན་པའི་རྒྱུད་ལེའུ་ལྔ་པ། བི་མ་ལ་དང་། གཡུ་སྒྲའི་འགྱུར། བྱང་ཆུབ་ཀྱི་སེམས་རྡོ་རྗེ་འོད་འཕྲོ་བའི་རྒྱུད་དམ། བྱང་སེམས་རྗེ་བཙུན་དམ་པའང་ཟེར་བ་ལེའུ་བཅུ་གཉིས། ཤྲཱི་སིངྷ་དང་། བཻ་རོའི་འགྱུར། རིན་པོ་ཆེ་འཕགས་ལམ་བཀོད་པའི་རྒྱུད་ལེའུ་བཅུ་པ། འགྱུར་གོང་འདྲ། རྡོ་རྗེ་སེམས་དཔའ་ནམ་མཁའི་མཐའ་དང་མཉམ་པའི་རྒྱུད་ལེའུ་ཉི་ཤུ་རྩ་བདུན་པ། འགྱུར་གོང་འདྲ། འདིའི་ལེའུ་ཡར་འགྲོ་མར་འགྲོ་བྱས་པ་བརྟག་དཔྱད་ཀྱིས་མཆན་བུ་བཀོད་ཡོད་ད་དུང་བརྟག། གོང་གི་ལེའུ་གྲངས་ཉི་ཤུ་རྩ་བདུན་པའི་མུ་ནས་འཐུད་པ་ལེའུ་དྲུག་ཅུ་རྩ་བཞི་པ། གཞུང་ཚད་བམ་པོ་བཅུ་གཅིག་གིས་ངེས་པ་ཅན་འགྱུར་གོང་འདྲ། རིན་པོ་ཆེ་གདམས་ངག་སྣ་ཚོགས་འཁོར་ལོའི་རྒྱུད་ལེའུ་བཞི་པ། དེའི་རྒྱུད་ཕྱི་མ་ལེའུ་བཅུ་དྲུག་པ། རིན་པོ་ཆེ་འཁོར་ལོ་ཞེས་བྱ་བའི་རྒྱུད་ལེའུ་བརྒྱད་པ། ཡེ་ཤེས་གསང་བ་སྒྲོན་མའི་རིན་པོ་ཆེ་མན་ངག་གི་རྒྱུད་ལེའུ་བཅུ་དྲུག་པ། ཤྲཱི་སིངྷ་དང་། བཻ་རོའི་འགྱུར་རོ། །ང་པ་ལ། རིན་པོ་ཆེ་སྲིད་པ་བར་དོ་སྐང་བའི་རྒྱུད་ལེའུ་བཅུ་དྲུག་པ། འཇམ་དཔལ་གྱི་བཤད་རྒྱུད་རིན་པོ་ཆེའི་ཕྲེང་བ་ལེའུ་དགུ་པ། བི་མ་ལ་དང་། གཉགས་ཀྱི་འགྱུར། འཇམ་དཔལ་དགོངས་པ་འདུས་པ་ལེའུ་དྲུག་པ་མཐའ་ཅན། སྐུ་གསུམ་གྱི་སྣང་བ་གསལ་བར་ངོ་སྤྲོད་པའི་རྒྱུད་ལེའུ་བདུན་པ། དུར་ཁྲོད་ཕུང་པོ་འབར་བ་ལེའུ་བཅུ་གཅིག་པ། རྡོ་རྗེ་ཡང་རྩེའི་རྒྱུད་ལེའུ་ཉེར་གཅིག་པ། རྡོ་རྗེ་ཡང་ཏོག་སྙིང་པོའི་རྒྱུད་ལེའུ་བཅོ་ལྔ་པ། སྙིང་པོ་རྡོ་རྗེ་རིན་པོ་ཆེ་ཐམས་ཅད་གཅིག་པའི་རྒྱུད་ལེའུ་ཉེར་གསུམ་པ། དམ་ཚིག་བཀོད་པས་གཞིའི་རྒྱུད་ལེའུ་གྲངས་གསུམ་པ། འབྱུང་པོ་ཀུན་འདུས་རྒྱུད་ལེའུ་སོ་གཉིས་པ། རྡོ་རྗེ་གསང་བ་རིན་པོ་ཆེ་དབྱིག་གི་སྒྲོལ་མ་ཤེས་རབ་ཆེན་པོའི་མདོ་ཞེས་བྱ་བ་རྒྱུད་སྐད་འགྱུར་བཞི་པ། ལྷ་མ་ཡིན་གཡུལ་ངོ་བཟློག་པའི་
རྒྱུད་ལེའུ་སུམ་ཅུ་ཐམ་པ། རོ་སྲེག་ཐལ་བ་ནག་པོའི་རྒྱུད་ལེའུ་དྲུག་པ། ཡང་འཇིག་རྟེན་གྱི་ཕྲིན་ལས་སྤྲོད་པ་བསོད་ནམས་ཆེན་པོ་རྫོགས་པ་ཤེས་རབ་ཆེན་པོའི་རྒྱུད་དམ། ཐལ་བ་ནག་པོའི་རྒྱུད་ལེའུ་བཅུ་དྲུག་པ། ལྷ་རྒྱུད་རིན་ཆེན་སྤུངས་པ་ལེའུ་སོ་གསུམ་པ། ལྷ་རྒྱུད་རིན་ཆེན་དབང་གི་འཁོར་ལོ་ཞེས་བྱ་བ་ལེའུ་བཅུ་གསུམ་པ། ཐིག་ལེ་ཀུན་གསལ་ཆེན་པོ་ལེའུ་དགུ་བཅུ་རྩ་བདུན་པ། དཔལ་ལྡན་སེང་གེའི་འོད་ཅན་དང་། བཻ་རོ་ཙ་ནའི་འགྱུར། ཡེ་ཤེས་མར་མེའི་རྒྱུད་ལེའུ་གསུམ་པ། རྡོ་རྗེ་སེམས་དཔའ་དགོངས་པ་ཚིག་གསུམ་གྱི་རྒྱུད་ལེའུ་གསུམ་པ། མན་ངག་སྙིང་དགོངས་ལེའུ་བཅུ་བཞི་པ། ཐིག་ལེ་ཀུན་འདུས་ཆེན་པོའི་རྒྱུད་ལེའུ་བཅུ་གཉིས་པ། །སྐྱའི་རྒྱུད་པདྨ་འཁྱིལ་བ་ལེའུ་ཉི་ཤུ་རྩ་གཅིག་པ། རྡོ་རྗེ་རྩེ་མོ་འདུས་པའི་རྒྱུད་ལེའུ་བཅུ་ཐམ་པ། བི་མ་ལ་དང་། སྐ་ཅོག་གསུམ་ཀའི་འགྱུར། ཡེ་ཤེས་བླ་མ་ཆེན་པོའི་རྒྱུད་ལེའུ་བདུན་པ་མཐའ་ཅན། །བྱང་སེམས་རྒྱལ་མཚན་རྩེ་མོའི་རྒྱུད་ལེའུ་ལྔ་པ། རྡོ་རྗེ་སྲིན་པོ་རྣོ་བ་རྡོ་རྗེ་མཆུ་ཅན་གྱི་རྒྱུད་དམ། འཁོར་བ་དོང་སྤྲུགས་ཆེན་པོའི་རྒྱུད་ལེའུ་བདུན་པ། རྫོགས་ཆེན་ཐིག་ལེ་གསར་བའི་ངེས་རྒྱུད་ལེ་མེད། ཐིག་ལེ་གསུང་བའི་བརྡ་རྒྱུད་ལེའུ་བཅུ་དགུ་པ་རྣམས་སོ། །ཅ་པ་ལ། རྫོགས་པ་རང་བྱུང་ལེའུ་ཉི་ཤུ་རྩ་བཞི་པ། རིག་པ་རང་ཤར་ཆེན་པོའི་རྒྱུད་ལེའུ་བརྒྱད་ཅུ་གྱ་དྲུག་པ། སྒྲ་ཐལ་འགྱུར་ལེའུ་ལྔ་པ་རྗེས་འབྲེང་བཅས། །རིག་པ་རང་གྲོལ་ཆེན་པོའི་རྒྱུད་ལེའུ་བཅུ་ཐམ་པ། བཀྲ་ཤིས་མཛེས་ལྡན་རྒྱུད་ལེའུ་ལྔ་པ་རྣམས་སོ།། །།ཆ་པ་ལ། སེང་གེ་རྩལ་རྫོགས་རྒྱུད་ལེའུ་བཅུ་གསུམ་པ། བི་མ་ལའི་རང་འགྱུར། ནོར་བུ་འཕྲ་བཀོད་པའི་རྒྱུད་ལེའུ་ཉི་ཤུ་རྩ་བཞི་པ། །མུ་ཏིག་ཕྲེང་བ་ལེའུ་བརྒྱད་པ། ཡི་གེ་མེད་པ་གསང་བའི་རྒྱུད་ལེའུ་དག་པ། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལེའུ་བརྒྱད་པ། ཀུན་ཏུ་བཟང་པོ་ཐུགས་ཀྱི་མེ་ལོང་ལེའུ་བཞི་པ། ཉི་ཟླ་ལ་སྦྱོར་རྒྱུད་ལེའུ་བཞི་པ། ངོ་སྤྲོ་སྤྲས་པའི་རྒྱུད་ལེའུ་གསུམ་པ་ནི། བི་མ་ལ་དང་། སྐ་བ་དཔལ་བརྩེགས་ཀྱི་འགྱུར། སྐུ་གདུང་འབར་བ་ལེའུ་
གསུམ་པ། འགྱུར་གོང་འདྲ། རིན་པོ་ཆེ་སྤུངས་པ་ལེའུ་ལྔ་པ། འགྱུར་གོང་འདྲ། སྒྲོན་མ་འབར་བ་ལེའུ་བཞི་པ། ཀློང་དྲུག་པ་ལེའུ་དྲུག། ཀློང་གསལ་འབར་མ་ཉི་མའི་རྒྱུད་ལེའུ་བརྒྱ་དང་བཅུ་གསུམ། མཁའ་འགྲོ་ཀུན་གྱི་སྙིང་ཐིག་ཀློང་གསལ་ལེའུ་ཞེས་བྱ་བ་ཕྱི་མའི་རྒྱུད་འཐུད་པའི་ལེའུ་གྲངས་བརྒྱ་དང་བཞི་བཅུ་ཞེ་གཉིས་རྣམས་སོ། །ཇ་བ་ལ། སྣང་སྲིད་ཁ་སྦྱོར་བདུད་རྩིའི་ཐིགས་པ་འཁོར་བ་ཐོག་མཐའ་གཅོད་པའི་རྒྱུད་ལེའུ་བརྒྱ་དང་བཅུ་ཐམ་པ། སློབ་དཔོན་ཆེན་པོ་དང་། སྐ་བ་དཔལ་བརྩེགས་འགྱུར། རིན་པོ་ཆེ་བཅུད་ཀྱི་ཡང་སྙིང་ཐོག་མཐའ་དྲས་ཐག་གཅོད་པའི་རྒྱུད་ལེའུ་བཅུ་ཐམ་པ་མཐའ་ཅན། ཡང་སྤྲོས་པ་གཅོད་པ་སྡེ་ལྔའི་རྒྱུད་ལེའུ་བཅུ་བཞི་པ། པདྨ་ས་མ་བྷ་ཝ་དང་། སྐ་བ་དཔལ་བརྩེགས་ཀྱི་འགྱུར། རིན་པོ་ཆེ་བདུད་རྩི་བདུད་ཐིགས་རྒྱུད་ལེའུ་བ་ཅོ་ལྔ་པ། འགྱུར་གོང་འདྲ། རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་ཐམས་ཅད་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལེའུ་སུམ་ཅུ་སོ་ལྔ། འགྱུར་གོང་འདྲ། རིན་པོ་ཆེ་སྤྱི་གནད་སྐྱོན་སེལ་ཐིག་ལེ་ཀུན་གསལ་རྒྱུད་ལེའུ་དགུ་པ། གཏེར་སྙིང་རིན་ཆེན་སྤུངས་པའི་རྒྱུད་ལེའུ་དགུ་པ། ཐིག་ལེ་ཡེ་ཤེས་བཅུད་སྤུངས་སྒྲོན་མ་འོད་འབར་གྱི་རྒྱུད་ལེའུ་བཅུ་བདུན། འགྱུར་གོང་འདྲ། བདུད་རྩི་བཅུད་ཐིགས་སྒྲོན་མ་བརྩེགས་པའི་རྒྱུད་ལེའུ་ཉི་ཤུ་རྩ་གཉིས། འགྱུར་གོང་འདྲ། སྙིང་པོའི་ཅུད་སྤུངས་ནམ་མཁའ་ཀློང་ཡངས་ལེའུ་ཉི་མ་ཐམ་པ། འགྱུར་གོང་འདྲ། ཐུགས་ཀྱི་ཡང་སྙིང་དགོངས་བཅུད་འདུས་པ་ཉི་ཟླ་འབར་བའི་རྒྱུད་ལེའུ་བཅུ་གསུམ། འགྱུར་གོང་འདྲ། སངས་རྒྱས་ཀུན་གྱི་དགོངས་པའི་བཅུད་བསྡུས་རི་བོ་བརྩེགས་པའི་རྒྱུད་ལེའུ་ཉི་ཤུ་རྩ་གཅིག། དྲི་མེད་ཀ་དག་གི་རྒྱུད་རིན་ཆེན་གསལ་བ་ཆེན་པོ་ཞེས་བྱ་བ་ལེའུ་བཅུ་ཐམ་པ། རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩི་རྒྱ་མཚོར་འཁྱིལ་བའི་རྒྱུད་ལེའུ་བརྒྱད་ཅུ་གྱ་གཅིག། འགྱུར་གོང་འདྲ། སྐྱེ་མེད་ཀ་དག་ཟང་ཀ་ལེའུ་བཅུ་ཐམ་པ། སྤྲོས་བྲལ་དོན་གསལ་ཆེན་པོའི་རྒྱུད་ལེའུ་བརྒྱ་དང་ཉི་ཤུ་རྩ་གསུམ། རྒྱུད་ཐམས་
ཅད་ཀྱི་རྩེ་རྒྱལ་ནམ་མཁའ་འབར་བའི་རྒྱུད་ལེའུ་སུམ་ཅུ་སོ་དགུ་པ་ཤྲཱི་རཏྣུ་བཛྲ་དང་། ཧེ་རུ་ཀའི་འགྱུར། རྒྱུད་ཐམས་ཅད་ཀྱི་སྤྱིར་ལུད་ཉི་ཟླ་བཀོད་པའི་རྒྱུད་ལེའུ་བཅོ་ལྔ་པ། སློབ་དཔོན་པདྨ་དང་། དཔལ་བརྩེགས་ཀྱི་འགྱུར། །ནམ་མཁའ་འབྲུག་སྒྲོགས་ཐོག་བབ་ཀློང་འདུས་སྤྱི་རྒྱལ་རྒྱ་མདུག་ཀྱི་རྒྱུད་ལེའུ་བཅུ་ཐམ་པ། ལྟ་བ་ལ་ཤན་ཆེན་པོ་རིན་པོ་ཆེ་སྒྲོན་མའི་རྩ་བའི་རྒྱུད་ལེའུ་བཅུ་བཞི། གཉིས་ཀ་འགྱུར་གོང་འདྲ། རྩ་རླུང་ཐིག་ལེའུ་རྒྱུད་ལེའུ་བདུན་པ། །ལྟ་བ་ལ་ཐལ་ཆེན་པོའི་རྒྱུད། སྣང་བྱེད་སྤུ་གྲིའི་རྒྱུད། འབྲས་བུ་ཡེ་གྲོལ་ཆེན་པའི་རྒྱུད། །སྲོག་གི་འཁོར་ལོའི་རྒྱུད་བཅས་སོ་སོར་རྫོགས་མཐའ་ཡོད་པ། རྒྱུད་ཀྱི་རྩེ་རྒྱལ་ཉིས་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལེའུ་ཉི་ཤུ་རྩ་བཞིའི་མཐའ་ཅན། འགྱུར་གོང་འདྲ། ཉ་པ་ལ། རྫོགས་པ་ཆེན་པོ་ངེས་དོན་འདུས་པ་ལེའུ་བརྒྱད་ཅུ་གྱ་གཅིག། བི་མ་ལ་དང་། ཨཱ་ཙཱརྱ་དྲན་པ་ཡེ་ཤེས་ཀྱི་འགྱུར། རྫོགས་ཆེན་རིན་པོ་ཆེ་འཁོར་བརྩད་གཅོད་ཀྱི་རྒྱུད་ལེའུ་ཉི་ཤུ་རྩ་བཞི། རྫོགས་པ་ཆེན་པོ་ལྟ་བའི་རང་སྙིང་ནམ་མཁའ་ཀློང་ཡངས་ཀྱི་རྒྱུད་ལེའུ་ལྔ་བཅུ་ང་གསུམ། འགྱུར་གོང་འདྲ་རྫོགས་པ་ཆེན་པོ་དགོངས་པ་བཀའ་བགྲོས་ཀྱི་རྒྱུད་ལེའུ་དྲུག་ཅུ་རེ་ལྔ། འགྱུར་གོང་འདྲ་བོ་ཏེ་སེ་རུ་མཐིང་ཤོག་ཅན་མེར། རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བ་རང་བྱུང་བདེ་བ་འཁོར་ལོའི་རྒྱུད་ལེའུ་དྲུག་པ་རེ་དྲུག་ཅུ་མཐའ་ཅན་གསེར་གྱི་སྒྲིལ་ཤིང་ཅན་ཟེར། །འགྱུར་གོང་འདྲ། རྫོགས་པ་ཆེན་པོ་ངེས་དོན་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལེའུ་སུམ་དུ་སོ་བདུན། འགྱུར་གོང་འདྲ། རྫོགས་པ་ཆེན་པོ་རྨད་བྱུང་དོན་གྱི་སྙིང་པོ་རང་བྱུང་བདེ་བའི་འཁོར་ལོའི་རྒྱུད་ལེའུ་ཉི་ཤུ་རྩ་བདུན། བི་མ་ལ་དང་། གཉགས་ཀྱི་འགྱུར། རྫོགས་པ་ཆེན་པོ་ངེས་དོན་རིག་པའི་གསུང་རང་བྱུང་བདེ་བ་འཁོར་ལོའི་རྒྱུད་ལེའུ་སུམ་ཅུ་སོ་གསུམ། རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོའི་རྒྱུད་
ལེའུ་ཉེར་བརྒྱད། འགྱུར་གོང་འདྲ་བུ་ཚལ་དུ་བསྒྱུར་བ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལེའུ་བཅུ་གཉིས་པ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མ་ལེའུ་བཞི་པ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མ་ལེའུ་བཞི་པ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ་ཕྱི་མ་གསང་བའི་རྒྱུད་ལེའུ་བཞི་པ། ཤྲཱི་སིངྷ་དང་། རྡོ་རྗེ་ཡང་དབང་གཏེར་གྱི་འགྱུར། ཡེ་ཤེས་འཁོར་ལོའི་རྒྱུད་ལེའུ་བདུན། རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལེའུ་བཅུ་དགུ། འཇམ་དཔལ་འདུས་པའི་རྒྱུད་ལེའུ་བཅུ་དྲུག། སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ལེའུ་བཅུ་གསུམ། རྫོགས་པ་ཆེན་པོ་མ་རིག་མུན་པ་སེལ་བར་བྱེད་པ་ལྟ་བ་ཡེ་ཤེས་གཉིད་རྫོགས་རྒྱུད་ལེའུ་བཞི་བཅུ་ཞེ་གཅིག། བི་མ་ལ་དང་། ཨཱ་ཙཱ་རྱ་དྲན་པ་ཡེ་ཤེས་ཀྱི་འགྱུར་དངུལ་གྱི་སྒྲིལ་ཤིང་ཅན་རྣམས་སོ།། །།ཏ་པ་ལ། ཆོས་ཐམས་ཅད་ཀྱི་དོན་བསྟན་པ་རྫོགས་ཆེན་ཐིག་ལེ་ཉག་གཅིག་ཡེ་ནས་བྱ་རྩོལ་བྲལ་བའམ། ཀློང་ཆེན་རབ་འབྱམས་ཀྱི་རྒྱུད་ལེའུ་ལྔ་བཅུར་གསུམ། རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལེའུ་ཉིས་བརྒྱ་དང་བཅུ་གཉིས། བྱང་ཆུབ་ཀྱི་སེམས་ལུང་རྣལ་འབྱོར་ཆེན་པོའི་རྒྱུད་དམ། སེམས་ལུང་ཆེན་པོའི་མདོ་ལེའུ་བཞི་བཅུ་ཐམ་པ། །ཐ་པ་ལ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་རྡོ་རྗེ་བཀོད་པའི་རྒྱུད་རྣལ་འབྱོར་གྲུབ་པའི་ལུང་ཀུན་འདུས་རིག་པའི་མདོའམ། སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ་ལེའུ་བདུན་ཅུ་དོན་ལྔ། རྒྱ་གར་གྱི་མཁན་པོ་དྷརྨ་བྷོ་དྷི་དང་། རིང་ལུགས་པ་ཆེན་པོ། དཱ་ན་རཀྵི་ཏ་དང་། ཞུ་ཆེན་གྱི་ལོ་ཙཱ་བ་ཆེ་བ་ཙན་སྐྱེས་ཀྱིས་ཐ་ཤའི་ཡུལ་དུ་ཁྲོམ་བསྒྱུར་མཛད་པ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་ལེའུ་སུམ་
ཅུ་སོ་དྲུག། པདྨ་ས་མ་བྷ་ཝ་དང་། བཻ་རོའི་འགྱུར། དུར་ཁྲོད་བུ་བྱུག་རོལ་པ་ལེའུ་བཅུ་བཞི་རྣམས་སོ། །དཔལ། ཀུན་ཏུ་བཟང་པོ་ཆེ་བ་ལ་རང་གནས་པའི་རྒྱུད་ལེའུ་སུམ་ཅུ་སོ་གཅིག། དབང་བསྐུར་རྒྱལ་པོའི་རྒྱུད་ལེའུ་བཅུ་ཐམ་པ་རྒྱུད་ཀྱི་རྒྱལ་པོ་ཏིང་འཛིན་མཆོག་གི་རྒྱུད་ལེའུ་བཅུ་གཅིག། ཕྲིན་ལས་ཀྱི་རྒྱལ་པོ་སྐབས་སྦྱོར་བདུན་པའི་རྒྱུད་ལེའུ་བདུན་མཐའ་ཅན། སྤྱོད་པ་ཐམས་ཅད་ཀྱི་རྒྱལ་པོ་བརྩོན་པ་དོན་ལྡན་གྱི་རྒྱུད་ལེའུ་དྲུག། དམ་ཚིག་གོད་པའི་རྒྱུད་ལེའུ་སུམ་ཅུ་སོ་བཞི། ཞི་བ་ལྷ་རྒྱུད་ཆེན་པོ་ལེའུ་དགུ་པ། རྒྱ་གར་གྱི་མཁན་པོ་བྲས་ཏྭ་དང་། ལོ་ཙཱ་པདྨ་རུ་རྩེའི་འགྱུར། ཆོས་ཉིད་ཞི་བའི་ལྷ་རྒྱུད་ལེ་མེད། བི་མ་ལ་དང་། གཉགས་ཀྱི་འགྱུར། ཁྲོ་བོ་ལྷ་རྒྱུད་ལེའུ་བདུན་པ་པྲ་ས་ཏྭ་དང་། པདྨ་རུ་རྩེའི་འགྱུར། ཁྲོ་བོ་ལྷ་རྒྱུད་ཀྱི་རྟོག་པ་ཆེན་པོ་ལེ་མེད། ཐུགས་རྗེ་ཆེན་པོའི་གཏོར་མའམ་གཏོར་རྒྱུད་ཆེན་མོ་ལེའུ་བཞི་བཅུ་ཞེ་བཞི། པདྨ་ས་མ་བྷ་དང་། བི་མ་ལ། ནམ་སྙིང་གསུམ་གྱི་འགྱུར། ཕྱིས་བ་སུ་དྷ་ར་དང་། གནུབས་ཆེན་གྱིས་ཀྱང་ཞུ་གཏུགས་བྱས་པ། རྣལ་འབྱོར་ནམ་མཁའི་ཚོགས་རྒྱུད་ཆེན་མོ་ལེའུ་བརྒྱད་པ་དང་། ཕྱི་མའི་རྒྱུད་མུ་འབྲེལ་གྱི་ལེའུ་བཅོ་ལྔ། གནུབས་ཀྱིས་སྐད་གསར་བཅད་ཀྱིས་བཅོས་ཟེར་བ་ཡོད། དཔལ་འབར་ཁྲོ་མོའི་རྒྱུད་ལེའུ་མེད་པ། རཀྟ་དམར་གྱི་རྒྱུད་ལེའུ་བཅོ་ལྔ། གྲོ་ལོད་རྩལ་གྱི་འགྱུར། རྡོ་རྗེ་དུར་མོི་ཏནྟྲ་ཞེས་བྱ་བ་ལེའུ་ལྔ་པ། སྦྱིན་སྲེག་གི་ལེའུ་དང་པོ་དང་ཐ་མ། ཁྲོ་བོའི་སྦྱིན་སྲེག་གི་ལེའུ་དང་པོ་དང་ཐ་མ། མཆོད་འབུལ་གྱི་ལེའུ་དང་པོ། བསྟོད་པའི་ལེའུ་གཉིས་པ། འགྲུགས་འདྲེན་གྱི་ལེའུ་དང་པོ། ཕུར་བུའི་ལེའུ་གཉིས་པ། གཏོར་མའི་ལེའུ་གསུམ་པ། བཤིག་བྲལ་གཏོར་མའི་ལེའུ་བཞི་པ། གཏུབ་པའི་ལེའུ་ལྔ་པ་ནས་ལེའུ་དགུ། ཡང་ཧོམ་རྒྱུད་ལེའུ་གཉིས་པའི་མཐར་རྡོ་རྗེ་སེམས་དཔའི་ཞལ་གདངས་ཀྱི་མ་རྒྱུད་རྫོགས་སོའི་མཐའ་ཅན། སྐུ་གདུང་འབར་བ་ཚ་ཚ་དང་མཆོད་རྟེན་གྱི་རྒྱུད་ལེའུ་དགུ་པ། ཧཱུྃ་མཛད་ཆེན་པོའི་རྒྱུད་ལེའུ་བཅུ་གཅིག། རྡོ་རྗེ་གྲོ་ལོད་དང་། ལོ་ཙཱ་ཞང་དྲུང་གི་འགྱུར། ཟླ་གསང་ཆེན་པོའི་རྒྱུད་ལེའུ་ཉི་
ཤུ་རྩ་ལྔ། རིན་ཆེན་མེ་ལྷ་ཞི་བར་གྱུར་བ་འབར་བའི་རྒྱུད་ལེའུ་ཉི་ཤུ་རྩ་དྲུག་རྣམས་སོ།། །།ན་པ་ལ། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལེའུ་ཉི་ཤུ་རྩ་གཉིས། བི་མ་ལ་དང་། གཉགས་ཛྙཱ་ན་ཀུ་མཱ་ར། རྨ་རིན་ཆེན་མཆོག་གསུམ་གྱིས་བསྒྱུར་ཅིང་ཞུས། འདི་ལ་སངས་རྒྱས་གསང་བ་དང་། །བཻ་རོའི་སྔ་འགྱུར། པདྨ་དང་། གཉགས་ཀྱི་བར་འགྱུར། བི་མ་ལ་དང་། རྨ་གཉགས་གཉིས་ཀྱི་ཕྱི་འགྱུར་གསུམ་ལས་འདི་ཕྱི་མ་ཡིན། དེ་གསུམ་ཀ་ལོ་པཎ་བསྡེབས་པའི་གཞི་འགྱུར། ཕྱིས་ཐར་ལོ་ཉི་མ་རྒྱལ་མཚན་གྱི་འགྱུར་དང་། འགོས་ལོའི་འགྱུར་གཉིས་ནི་པཎྜིི་ཏ་མེད་པས་རྩལ་འགྱུར། དེའི་སྟེང་དུ་ལེའུ་ཉེར་གསུམ་དང་། ཉེར་བཞི་ཉིས་བརྒྱ་དཔེ་རྙེད་བལྟར་ཐར་ལོས་འགྱུར་མཛད། སླར་རྒྱ་དཔེ་དང་མཐུན་པ་འགོས་ལོས་ཚོང་དུས་སུ་འགྱུར་བཅོས་མཛད་དོ། །དཔལ་གསང་བའི་སྙིང་པོའི་རྒྱུད་ཕྱི་མཐའ་ལེའུ་ལྔ་པ། ཛྙཱ་ན་གརྦྷ་དང་། བཻ་རོའི་འགྱུར། སྒྱུ་འཕྲུལ་བརྒྱད་ཅུ་ཐམ་པ་རྫོགས་མཐའ་ཅན། །མགོར་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་ལེའུའི་སྟོད་ཆ་རྣམས་མེ་དང་སུམ་ཅུ་སོ་གསུམ་ནས་བགྲངས་པ་ལེའུ་དངོས་སུམ་ཅུ་སོ་དྲུག་སྟོང་ཕྲག་བརྒྱ་པ་རྫོགས་སོ་མཐའ་ཅན་ཕྱི་མའི་ཕྱི་མ་བམ་པོ་ཕྱེད་པ་ཞེས་ཡོད་པ། དྲི་མེད་བཤེས་གཉེན་དང་། མཁན་པོ་ཡེ་ཤེས་གཞོན་ནུའི་འགྱུར། གསང་བའི་སྙིང་པོ་དེ་ཁོ་ན་ཉིད་ངེས་པ་ལེའུ་བཞི་བཅུ་ཞེ་དྲུག། །མགོར་དེ་བཞིན་གཤེགས་པ་དགྱེས་པ་ཆེན་པོས་ཞེས་ཡོད་པ་ལེའུ་སུམ་ཅུ་སོ་གསུམ། ལེ་ལག་ཅེས་བྱ་བ་དམ་ཚིག་ཏུ་སྟོན་པའི་རྒྱུད་རྫོགས་སོའི་མཐའ་ཅན། གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་བྱ་བའི་སྒྱུ་འཕྲུལ་བརྒྱད་པ་ལེའུ་བརྒྱད། སྒྱུ་འཕྲུལ་བླ་མ་ལེའུ་འདིའི་ལེའུ་འཁྲུགས་པར་སྣང་བས་སླར་བརྟག། བཅུ་གསུམ། ལྷ་མོ་སྒྱུ་འཕྲུལ་དྲ་བ་ལེའུ་བཅུ་གཉིས་མཐའ་ཅན། འཇམ་དཔལ་སྒྱུ་འཕྲུལ་དྲྭ་བ་མཚན་བརྗོད་སྔ་འགྱུར་ལེའུ་བཅུ་བཞི་རྣམས་སོ།། །།པ་བ་ལ། སྒྱུ་འཕྲུལ་དྲྭ་བ་མེ་ལོང་རྩ་བའི་རྒྱུད་ཅེས་བྱ་བ་བཤད་པ་རྟོག་པའི་རྒྱལ་པོ་རྫོགས་སོའི་མཐའ་ཅན་ལེ་མེད་ཀྱིས་མགོ་དྲངས། སྒྱུ་འཕྲུལ་མེ་ལོང་ལེའུ་
བཅུ་གསུམ། བི་མ་ལ་དང་། ཛྙཱ་ན་གུ་མཱ་རའི་འགྱུར། སྒྱུ་འཕྲུལ་དྲྭ་བ་ཡེ་ཤེས་སྙིང་པོའི་རྒྱུད་ལེའུ་བཅུ་གསུམ། སྒྱུ་འཕྲུལ་ཐལ་བའི་རྒྱུད་ལེའུ་ཉི་ཤུ་རྩ་དྲུག། །འགྱུར་གོང་འདྲ། སྒྱུ་འཕྲུལ་རྒྱ་མཚོ་ལེའུ་ཉི་ཤུ་རྩ་གཉིས། །འགྱུར་གོང་འདྲ། རྡོ་རྗེ་གསང་སྙིང་པོ་རྩ་བའི་རྒྱུད་དེ་ཁོ་ན་ཉིད་ངེས་པའམ་ལེའུའི་ངེས་བརྗོད་ལ་རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བ་ཞེས་བྱ་བ་ལེའུ་སུམ་ཅུ་སོ་གསུམ། སྒྱུ་འཕྲུལ་རོལ་པ་ཆེན་པོ་ལེའུ་བཅུ་གསུམ། བི་མ་ལ་དང་། གཉགས་ཀྱི་འགྱུར། རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ཐེག་པ་ཆེན་པོའི་ཡང་ཆེན་པོའི་ཚུལ་ཞེས་བྱ་བ་ལེའུ་བཅུ་ཐམ་པ། གསང་བའི་སྙིང་པོ་དེ་ཁོ་ན་ཉིད་ངེས་པ་ཁྲོ་བོ་ཆེན་པོའི་སྟོབས་དུམ་གཅིག། ཡང་ཁྲོ་བོ་ཆེན་པོའི་སྟོབས་ཀྱི་རྣལ་འབྱོར་དབང་ཕྱུག་སྒྲུབ་པ་ཞེས་རྫོགས་སོའི་མཐའ་ཅན། བི་མ་ལ་དང་། བཻ་རོའི་འགྱུར། སྒྱུ་འཕྲུལ་དྲྭ་བ་སྙིང་པོ་འགོད་པའི་ལེའུ་བརྒྱད་རྣམས་སོ། །ཕ་པ་ལ། སངས་རྒྱས་མཉམ་སྦྱོར་རམ་སྒྱུ་མ་བདེ་མ་ཏོག་ལེའུ་བཅུ་ཐམ་པ། རྒྱ་གར་གྱི་མཁན་པོ་བཛྲ་ཏ་སྱ་དང་། ལོ་ཙཱ་བ་རྨ་རིན་ཆེན་མཆོག་གི་འགྱུར། སངས་རྒྱས་མཉམ་སྦྱོར་ལ་རྟོག་པ་ཉི་ཤུ་རྩ་གཉིས་ཀྱི་འགྱུར་ཡོད་ཅེས་པ་ཕྱོགས་གཅིག་ཏུ་བསྡུས་པ་རྟོག་པ་བཅུ་བའི་རྒྱུད་འདི་ཡིན། རྒྱུད་ཕྱི་མ་རྟོག་པ་བདུན་པ་ཡོད། ཕྱི་མའི་ཕྱི་མ་ཏོག་པ་བསྡུས་པའི་རྒྱུད་ཡོད་པ་དང་། ཆ་མཐུན་གྱི་རྒྱུད་རྡོ་རྗེ་གདན་བཞིའི་རྒྱུད་ཡིན་ནོ། །ཡང་རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་སྡུད་པའི་རྒྱུད་དམ་པ། ལེའུ་བཅུ་ཐམ་པ། གུ་ཧྱ་གསང་བ་དང་། ལོ་ཙཱ་བ་འབྲོག་མི་དཔལ་ཡེའི་འགྱུར། ཡང་སངས་རྒྱས་མཉམ་སྦྱོར་མཁའ་འགྲོ་མ་སྒྱུ་མ་བདེ་མཆོག་གི་རྒྱུད་ཕྱི་མའི་ཡང་ཕྱི་མ་ལེའུ་ཉེར་གཉིས་པར་རྫོགས་མཐའ་དང་། དངོས་བསྟན་ལེའུ་ཉི་ཤུ་རྩ་གསུམ་ཡོད། རྒྱུད་འདིར་སྟོད་ཆའི་ལེའུ་བཅུ་བདུན་ཡན་མེད་པ་བཅོ་བརྒྱད་པ་ནས་བགྲངས་པ་ཞིག་བྱུང་བ་ཕྱི་མོའི་སྐྱོན་ནམ། རྒྱ་དཔེ་མཚར་ཕྱོགས་གཞན་ལ་དཔྱད་པར་བྱའོ། །མགོར་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་ཡོད་པའི་དངོས་བསྟན་ཟླ་གསང་ཐིག་ལེ་ཡེ་ཤེས་ཀྱི་དབང་
བསྐུར་བ་ལེའུ་མེད་ཀྱང་། བར་དུ་ཡེ་ཤེས་ཀྱི་དཀྱིལ་འཁོར་དང་པོ་རྫོགས་སོ་ཞེས་ཡོད་ཅིང་། དེ་ཁའི་འཕྲོ་ནས་ལེ་མེད་ཟླ་གསང་ཐིག་ལེ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ་མཆོག་ཏུ་གསང་བ་ཡོངས་སུ་རྫོགས་སོ་མཐའ་ཅན། པདྨ་ས་མ་བྷ་ཝ་དང་། བནྡེ་དཔལ་བརྩེགས་ཀྱི་འགྱུར་ལ། ཕྱིས་ཁ་ཆེའི་པཎྜི་ཏ་ཏེ་ཛ་དེ་བ་དང་། ལོ་ཙཱ་བ་འཕགས་པ་ཤེས་རབ་ཀྱིས་སྐད་གསར་བཅད་ཀྱིས་བཅོས་པ། དཔལ་གསང་བ་འདུས་པ་ལེའུ་བཅུ་བདུན། བི་མ་ལ་དང་དཔལ་བརྩེགས་ཀྱི་འགྱུར། སླར་ཡང་ཤྲདྡྷ་ཀར་ཝ་རྨ་རིན་ཆེན་བཟང་པོས་བསྒྱུར་ཅིང་གཏན་ལ་བབ་པ། ཡང་རྒྱུད་ཕྱི་མ་ལེའུ་བཅོ་བརྒྱད། དད་བྱེད་གོ་ཆ་དང་རིན་བཟང་གི་འགྱུར། ཕྱིས་འགོས་ལོ་གཞོན་ནུ་དཔལ་གྱིས་རྒྱ་དཔལ་གཟིགས་ནས་དག་བཅོས་མཛད་པ། རྒྱུད་ཀྱི་རྒྱལ་པོ་ཆེན་པོ་ལས་ཀྱི་ཕྲེང་བའམ། ཀརྨ་མཱ་ལེ་ལེའུ་དགུ དྷརྨ་ཤྲཱི་པྲ་གྷ་ཛ་དང་། ཨཱརྱ་བི་མ་ལ་སོགས་པའི་པཎྜི་ཏ་དང་། རཏྣ་ཨ་གྲས་བསྒྱུར་ཅིང་གཏན་ལ་ཕབ་པ། ཡེ་ཤེས་རྔམ་པ་གློག་གི་འཁོར་ལོ་ལེའུ་བཅུ་བདུན། དྲི་མེད་བཤེས་གཉེན་དང་། བོད་ཀྱི་ལོ་ཙཱ་བ་ཅོག་རོ་ཀླུའི་རྒྱལ་མཚན་གྱི་འགྱུར། བི་ཤྭ་མི་ཏྲ་དང་། བཻ་རོའི་འགྱུར་བྱང་འཁོད་པ་ཡང་སྣང་ངོ། །བ་པ་ལ། རྟ་མཆོག་རོལ་བ་ལེའུ་སུམ་ཅུ་སོ་གཉིས། དཔལ་སྙིང་རྗེ་རོལ་བའི་རྒྱུད་དམ་ཧེ་རུ་ཀ་རྩ་རོལ་པ་་ལེའུ་བཅུ་ཐམ་པ། བི་དྱ་ཀ་ར་སིངྷ་དང་། བི་ཤྭ་མི་ཏྲ་དང་། ལོ་ཙཱ་ལུ་བྱིན་བཙུན་པའི་འགྱུར། སླར་བལ་པོ་ཤྲི་བྷི་ཏིས་མང་ཡུལ་བྱམས་སྤྲིན་དུ་སྐད་གསར་བས་བཅོས། འདི་ལ་ད་དུང་འགྱུར་བྱང་མང་པོ་ཡོད། བདུད་རྩི་རོལ་བ་རིམ་པར་བྱེ་བ་རྒྱས་པ། བི་མ་ལ་དང་གཉགས་འགྱུར། ཕུར་བ་བཅུ་གཉིས་ཀྱི་རྒྱུད་ཅེས་བྱ་བའི་མོད་ལེའུ་ཉི་ཤུ་རྩ་བཞི། གླང་པོ་རབ་འབོག་གི་རྒྱུད་ལེའུ་ཉེར་བརྒྱད། བི་ཤྭ་མི་ཏྲ་དང་། འཇིང་གསལ་འབར་འགྱུར། འདི་ལ་རྒྱུད་གསུམ་ཡོད་པས་འདི་བཤད་རྒྱུད་ཡིན། འཕགས་པ་ཐབས་ཀྱི་ཞགས་པ་པདྨོ་ཕྲེང་བའི་དོན་བསྡུས་པ་ཞེས་པའི་རྒྱུད་ལེའུ་ཞི་གཉིས། དྲི་མེད་བཤགས་རྒྱུད་ལེའུ་བཅུ་དྲུག། །བི་མ་ལ་དང་། གཉགས་ཀྱི་འགྱུར།
གཟི་ལྡན་འབར་བ་མཚམས་ཀྱི་རྒྱུད་ལེ་མེད་ཁྲོ་བོ་བཅུའི་སྨོན་ལམ་གྱི་མཐའ་ཅན་རྣམས་སོ།། །།མ་པ་ལ། དཔལ་ཟླ་གསང་ནག་པོའི་རྒྱུད་ལེའུ་བདུན་ཅུ་དོན་ལྔ་པ་རྩ་བའི་རྒྱུད་ཆེན་པོ་རྫོགས་སོ་མཐའ་ཅན། ལོ་ཙཱ་བ་ཆེན་པོ་གསུམ་གྱིས་ལན་གྲངས་གསུམ་དུ་བཅོས་ཤིང་ལན་གྲངས་གསུམ་དུ་གཏན་ལ་ཕབ་པ། ཡང་ཟླ་གསང་ནག་པོའི་རྩ་རྒྱུད་ལེའུ་བདུན་ཅུ་དོན་བཞི། ངན་སྔགས་ཀྱི་རྒྱུད་ཅེས་བྱ་བ་རྫོགས་སོའི་མཐའ་ཅན། འཇམ་དཔལ་བཤེས་གཉེན་གྱིས་ཚངས་པ་ཀླུ་གནོད་བསེའི་ཀ་པ་ལ་སྲས་པ། ཛྙཱ་ན་གྷནས་རྙེད་ནམ་མཁའ་སྙིང་པོ་ལ་བརྒྱུད་དོ། །ཡང་ཟླ་གསང་ནག་པོའི་རྒྱུད་ལེའུ་ལྔ་བཅུ་ང་བརྒྱད། སློབ་དཔོན་བ་སུ་དྷ་རེ་དང་། གནུབས་ཆེན་སངས་རྒྱས་ཡེ་ཤེས་ཀྱིས་བསྒྱུར་བ། ཡང་ཟླ་གསང་དྲག་སྔགས་ནག་པོ་བཤན་པ་སྤུ་གྲིའི་རྒྱུད་ལེའུ་དགུ་བཅུ་གོ་བདུན། བལ་པོ་བ་སུ་དྷ་ར་དང་གནུབས་ཆེན་གྱིས་བསྒྱུར་བ། ཡང་དྲག་སྔགས་ཟླ་གསར་ནག་པོའི་རྒྱུད་ལེའུ་ཉི་ཤུ་རྩ་ལྔ། བབ་ལུགས་རིམ་བཞིན་ཡོད་པ་གནུབས་ཆེན་གྱི་མན་ངག། འཇམ་དཔལ་དམར་པོའི་སྔགས་རྒྱུད་ཀྱི་རྒྱལ་པོ་ལེའུ་བཅུ་པ། ཤཱནྟི༚ི༚་གརྦྷ་དང་། གནུབས་ཆེན་གྱི་འགྱུར། གནོད་སྦྱིན་མ་རུ་རྩེ་རོ་ལངས་གསང་བའི་རྒྱུད་ལེའུ་བརྒྱད་མཐའ་ཅན་གནུབས་ཀྱི་མན་ངག་དྲག་པོའི་སྔགས་རྒོད་པདྨ་དབང་རྒྱལ་གྱི་བཀའ་ཞེས་པ། འཇམ་དཔལ་མ་རུ་རྩེའི་སྔགས་རྒྱུད་བསྟན་པ་ལེའུ་བཅུ་བདུན། ཡང་དྲེགས་པ་ཕོ་མོ་འདུས་པའི་ལས་རྒྱུད་ལེའུ་བཅུ་བདུན། རྡོ་རྗེ་གཏེར་གཞན་རྩལ་ལ་གཏད་པ། །ཙ་པ་ལ། འཕགས་པ་འཇམ་དཔལ་གྱི་དྲི་མ་མེད་པའི་གསང་རྒྱུད་ལེའུ་ཉེར་དྲུག། འཇམ་དཔལ་གཤིན་རྗེའི་གཤེད་ནག་པོ་ཆེན་པོ་གསང་བའི་རྒྱུད་ལེའུ་སུམ་ཅུ་སོ་གསུམ། སློབ་དཔོན་མ་ཧཱ་ན་བི་ཀུ་ཏ་པ་ཏའི་འགྱུར། །ཁྲོ་བོ་རྣམ་པར་རྒྱལ་བའི་རྒྱུད་ཕྱི་མའི་ཡང་ཕྱི་མ་ཞེས་བྱ་བ་ལེའུ་ཉེར་གཉིས། དཔལ་ཚེ་བདག་ནག་པོའི་ཕྲིན་ལས་ཀྱི་དགོངས་པ་ཐམས་ཅད་རྫོགས་པའི་རྒྱུད་ཆེན་པོ་ལེའུ་སུམ་བཅུ་ཐམ་པ། ལྷ་ཡུལ་དུ་གྲགས་པ་ཞེས་ཟེར། འཇམ་དཔལ་གཤིན་རྗེ་སྡིག་པ་
སྙིང་འཛིངས་ལེའུ་བཅུ་བཞི། བལ་པོ་བ་སུ་དྷ་ར་དང་གནུབས་ཆེན་གྱི་འགྱུར། གཤིན་རྗེ་གཤེད་ཀྱི་གསང་རྒྱུད་ལེའུ་བརྒྱད། གནུབས་པདྨ་དབང་རྒྱལ་གྱི་ཐུགས་དམ། འཇམ་དཔལ་གཤིན་རྗེའི་རྒྱལ་པོ་སྡིག་པ་སྟོབས་ཆེན་གྱི་རྒྱུད་ལེའུ་ཉེར་གཅིག། བལ་པོ་བ་སུ་དྷ་ར་དང་། རྡོ་རྗེ་ཁྲི་གཙུག་གི་འགྱུར། །འཕགས་པ་འཇམ་དཔལ་ལས་བཞི་འཁོར་ལོ་གསང་བའི་རྒྱུད་ལེའུ་བཅུ་གསུམ། བསྐྱར་ལེ་གཅིག་བཅས་བཅུ་བཞི་ཡོད། གཤིན་རྗེ་ནག་པོ་གསང་བ་དེ་ཁོ་ན་ཉིད་ཀྱི་རྒྱུད་ཁ་ཐུན་ལེའུ་བརྒྱད། རྒྱལ་པོ་ཛ་ལ་བབས་པ་ལས་རིམ་པར་བརྒྱུད་གནུབས་ཆེན་གྱི་མན་ངག། གཤིན་རྗེ་ནག་པོ་ཁ་ཐུན་གསང་བའི་དེ་ཁོ་ན་ཉིད་ཕྱི་མའི་རྒྱུད་ཅེས་བྱ་བ་ལེའུ་ལྔ་པ། བ་སུ་དྷ་ར་དང་། གནུབས་ཆེན་གྱི་མན་ངག། ཚེ་བདག་ནག་པོ་དྲག་སྔགས་མངོན་དུ་ཕྱུང་བའི་རྒྱུད་ཀྱི་རྒྱལ་པོ་ལེའུ་ཉེར་གཅིག། འཇམ་དཔལ་ཁྲོ་བོ་སྙིང་གཟེར་གསང་བའི་རྒྱུད་སྐབས་ལྔ་པ། གནུབས་ཆེན་གྱི་འགྱུར། དྲག་པོ་བུང་བྱེད་ཀྱི་རྒྱུད་ལེའུ་ཉེར་གཅིག། སྔགས་ཀྱི་དེ་ཁོ་ན་ཉིད་བཤད་པའི་ལེའུ་བརྒྱད། ངན་སྔགས་གཙུག་གི་རྒྱུད་ཕྱི་མའི་ཕྱི་མ་རྫོགས་སོའི་མཐའ་ཅན། འཇིག་རྟེན་གསུམ་གྱི་བཤད་པ་དྲེགས་རྒྱུད་ལེའུ་བརྒྱད། དེ་བཞིན་གཤེགས་པ་ཐམས་ཅད་ཀྱི་དགོངས་པ་ཁྲོ་བོ་འདུས་པའི་རྒྱུད་ལེའུ་དགུ། བལ་པོ་བ་སུ་དྷ་ར་དང་། རྡོ་རྗེ་ཡང་དབང་གཏེར་གྱི་འགྱུར། གཤིན་རྗེ་ནག་པོ་ཆུ་ཐིགས་སྔོན་མོའི་རྒྱུད་ལེའུ་བཅོ་བརྒྱད། གཤིན་རྗེ་ནག་པོ་ངན་སྔགས་ཕྱིར་བཟློག་པའི་རྒྱུད་ལེའུ་བདུན་པ་ཆུ་ཐིགས་སྔོན་མོའི་རྒྱུད་ཕྱི་མ་ཡིན། གནུབས་ཆེན་གྱི་འགྱུར། འཕགས་པ་འཇམ་དཔལ་མཆེད་བཞིའི་སྔགས་རྒྱུད་ལེའུ་དགུ་པ་རྩ་བའི་རྒྱུད། འཇམ་དཔལ་མ་རུ་རྩེ་བའི་རྒྱུད་ཕྱི་མ་ལེའུ་བདུན་རྫོགས་མཐའ་ཅན། དཔལ་གཤིན་རྗེ་ནག་པོའི་མེ་རླུང་སྦྱིན་ཐང་འཁྲུགས་པའི་རྒྱུད་ལེའུ་ལྔ་བཅུ་ང་གསུམ་རྣམས་སོ།། །།ཚ་བ་ལ། རྟ་མཆོག་རོལ་པའི་རྒྱུད་ལེའུ་ཉིས་བརྒྱ་དང་བརྒྱད་རཀྴི་སིདྡྷི་དང་། ལྕེ་ཀུ་ཀུ་རཱ་ཛཱི་འགྱུར། དབང་རྒྱས་རྟ་མཆོག་རོལ་པ་ལེའུ་དྲུག་ཅུ་ཐམ་པ། པདྨ་དབང་ཆེན་དྲེགས་པ་སྲུང་བཟློག་ཡོན་ཏན་གྱི་རྒྱུད་
ལེའུ་དགུ་པ། པདྨ་སམ་བྷ་ལ་དང་། ཁ་ཆེ་ཨ་ནནྟའི་འགྱུར། པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལེའུ་བཅུ་གསུམ། འགྱུར་གོང་འདྲ། པདྨ་དབང་ཆེན་འདུས་པའི་རྒྱུད་ཆེན་པོ་ལེའུ་སུམ་ཅུ་སོ་ལྔ། རྒྱ་གར་བ་རཀྴི་སིདྡྷི་དང་། བོད་ཀུ་ཀུ་རཱ་ཛའི་འགྱུར། ཕྱིས་གནུབས་ཆེན་གྱིས་ཀྱང་ཞུས་པ། དབང་ཆེན་འདུས་པའི་ཏནྟྲ་ལས། མགོན་ན་རྩིས་མགོས་ལེའུ་བཅུ་གཅིག་ལ་བྲོའི་ལེའུ་ནང་གསེས་སུ་ཕྱེ་བ་དྲུག་གཅིག་ཏུ་བྱས་པ་བསྣན་པས་ལེའུ་བཅུ་གཉིས་པར་སོང་བ། ངང་ལེའུ་བརྒྱད་གཅིག་ཏུ་བྱས་པ་བསྣན་པས་ལེའུ་བཅུ་གསུམ་དུ་སོང་། དེ་ནས་མུ་མཐུད་ལེའུ་དྲུག་ཅུ་རེ་གཉིས་རྫོགས་མཐའ་ཅན། པདྨ་དབང་ཆེན་དྲེགས་པ་གཟན་ལ་འབེབས་པའི་རྒྱུད་ལེའུ་བཅུ་གཉིས་པ། པདྨ་འབྱུང་གནས་དང་། ཁ་ཆེ་ཨ་ནནྟའི་འགྱུར། པདྨ་དབང་ཆེན་དྲེགས་པ་གནང་འབེབས་ཀྱི་རྒྱུད་ལེའུ་བཅུ་གཅིག། འགྱུར་གོང་འདྲ་རྣམས་སོ།། །།ཛ་པ་ལ། དེ་བཞིན་གཤེགས་པ་ཐམས་ཅད་ཀྱི་དགོངས་པ་ལུང་བསྟན་པ་དབང་ཆེན་འདུས་པའི་རྒྱུད་ལེའུ་ཉི་ཤུ་རྩ་བཞི། པཎྜི་ཏ་པདྨ་འབྱུང་གནས་དང་། ལོ་ཙཱ་སྦ་སང་ཤི་ང་། ངན་ལམ་རྒྱལ་བ་མཆོག་དབྱངས། ཅོག་རོ་རྣམས་ཀྱི་འགྱུར། རྔོག་མ་ལེབ་རྒྱན་གྱི་རྒྱུད་ལེའུ་བཅུ་བདུན། སློབ་དཔོན་ཆེན་པོ་པདྨའི་ཞབས། ཁ་ཆེ་ཨ་ནནྟ་དང་། བཻ་རོའི་འགྱུར། རྟ་མགྲིན་ལས་རྒྱུད་ལེའུ་བཅུ་གཅིག། སློབ་དཔོན་པདྨ་དང་། རྒྱལ་བ་མཆོག་དབྱངས་ཀྱི་འགྱུར། རྟ་མགྲིན་གསང་རྒྱུད་ལེའུ་ཉི་ཤུ་རྩ་ལྔ། པདྨ་དབང་ཆེན་དྲེགས་པ་ཚར་གཅོད་ཀྱི་རྒྱུད་ལེའུ་ཉེར་དགུ། སློབ་དཔོན་ཆེན་པོའི་རང་འགྱུར། པདྨ་དབང་ཆེན་ཡང་གསང་བྲོས་པའི་རྒྱུད་ལེའུ་བཅུ་གསུམ། བཻ་རོ་ཙཱ་ནས་མངའ་བདག་རྒྱལ་པོ་ལ་སྤྲད་པ། དཔལ་རྟ་མགྲིན་གསང་བ་ཕྲིན་ལས་ཀྱི་རྒྱུད་ཅེས་བྱ་བ་ལེའུ་ཉེར་གཉིས། ཨོ་རྒྱན་སངས་རྒྱས་གཉིས་པས། ཁྲི་སྲོང་ལྡེའུ་བཙན་དང་། རྒྱལ་བ་མཆོག་དབྱངས་ལ་གདམས་པ། ཕྱིར་མི་བཟློག་པ་སྡོམ་ཅན་རྟ་མགྲིན་གྱི་རྒྱུད་ལེའུ་དྲུག། པདྨ་དབང་ཆེན་གྱི་རྒྱུད་རྫོགས་སོའི་མཐའ་ཅན། ཀླུ་འདུལ་བའི་རྒྱུད་ལེའུ་སུམ་ཅུ་སོ་བདུན། རྡོ་རྗེ་སེམས་དཔའི་
ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལེའུ་ཉེར་བརྒྱད། ཨོ་རྒྱན་ཆེན་པོ་དང་། ནམ་མཁའི་སྙིང་པོའི་འགྱུར། རྡོ་རྗེ་སེམས་དཔའ་ཡི་གེ་བརྒྱ་པའི་རྒྱུད་ལེའུ་ཉི་ཤུ་རྩ་བདུན། བཛྲ་བཱ་ཎིས་བསྡུས་ཏེ་སྤྲུལ་སྐུ་པདྨ་འབྱུང་གནས་ལ་གཏད་པ། པདྨའི་ཞབས་དང་། ནམ་སྙིང་འགྱུར། རྡོ་རྗེ་སེམས་དཔའ་ཡི་གེ་བརྒྱ་པ་དབང་བསྐུར་རྒྱལ་པོའི་རྒྱུད་ལེའུ་ཉེར་གཅིག། ཧེ་རུ་ཀ་གལ་པོ་ལེའུ་འམ་བརྟག་པ་ཉེར་གསུམ། པདྨ་སམ་བྷ་ལས་བལ་པོ་བ་སུ་དྷ་ར་ལ་གནང་། དེས་གནུབས་ཆེན་ལའོ། །ཧེ་རུ་ཀའི་ཐུགས་ཀྱི་རྒྱུད་གལ་པོ་ལེའུ་དགུ། པདྨ་སམ་བྷ་ཝ་དང་། ནམ་སྙིང་འགྱུར། དཔལ་ཧེ་རུ་ཀ་གལ་པོ་ལེའུ་བཅུ་དྲུག། ཁྲོ་བོ་པུཎྜ་རི་ཀའི་རྒྱུད་ལེའུ་ཉེར་གཉིས། རྡོ་རྗེ་སེམས་དཔས་བསྡུས། སློབ་དཔོན་པདྨས་གཞུང་བསྲངས་པ་རྣམས་སོ། །ཝ་པ་ལ། དཔལ་ཁྲག་འཐུང་ཧེ་རུ་ཀ་འདུས་པའི་རྒྱུད་ཆེན་པོ་ལེའུ་སུམ་ཅུ་སོ་གཉིས་འདི་ལ་ཧེ་རུ་ཀ་གལ་པོ་དུར་ཁྲོད་མངོན་པར་འབྱུང་བའི་རྒྱུད་ཀྱང་ཟེར། པདྨ་སམ་བྷ་ཝ་དང་། བཻ་རོའི་འགྱུར། འཇིག་རྟེན་ལས་འདས་པའི་མདོ་ཞེས་བྱ་བའི་རྒྱུད་ལེའུ་བཅུ་གཅིག། པདྨ་སམ་བྷ་ཝ་དང་། ནམ་སྙིང་འགྱུར། དེ་བཞིན་རིགས་ཀྱི་སྒྲུབ་ཐབས་གསང་བ་མེ་དཔུང་ཐུགས་ཀྱི་རྒྱུད་ལེའུ་ཉེར་གཉིས། བདུད་རྩི་རིན་པོ་ཆེ་ཡེ་ཤེས་གསང་བའི་འཁོར་ལོའི་རྒྱུད་ལེའུ་ཉེར་གཉིས་མཐའ་ཅན། བི་མ་ལ་དང་། ཞང་ཛྙཱ་ནས་གཏན་ལ་ཕབ། ཕྱིས་སྐ་བ་དཔལ་བརྩེགས་ཀྱིས་བཅོས། བདུད་རྩི་རིན་པོ་ཆེ་འཁྲུངས་པའི་རྒྱན་ལེའུ་ཉེར་བདུན། འོག་མིན་དུ་གྲགས་པ། བི་མ་དང་གཉགས་ཀྱི་འགྱུར། བདུད་རྩི་བམ་བརྒྱད་བམ་པོ་ཆེན་པོ་བརྒྱད་པ་རྫོགས་མཐའ་ཅན། ཐམས་ཅད་བདུད་རྩིའི་རང་བཞིན་བདུད་རྩི་བུམ་པ་དུམ་བུ་གསུམ་པའི་རྒྱུད་བུ་ཆུང་། བདུད་རྩི་འཁོར་ལོ་འབར་བའི་རྒྱུད་ལེའུ་བདུན། བི་མ་ལ་དང་། གཉགས་ཀྱི་འགྱུར། བདུད་རྩི་རིན་པོ་ཆེ་ཕྲེང་བའི་རྒྱུད་ལེའུ་བདུན། འགྱུར་གོང་འདྲ། བདུད་རྩི་བདེ་བ་ཆེན་པོའི་རྒྱུད་ལེའུ་བཅུ་ཐམ་པ། འགྱུར་གོང་འདྲ། དངོས་གྲུབ་ཆེན་པོ་ཉེ་བའི་སྙིང་པོའི་རྒྱུད་ལེའུ་བཅོ་ལྔ་པའི་མལ་ནས་བརྒྱུད་པ། བདུད་རྩི་ལས་རྒྱ་མཚོའི་རྒྱུད་ལེའུ་ཉི་ཤུ་
ཐམ་པ། བི་མ་ལ་དང་། གཉགས་འགྱུར། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལེའུ་དྲུག། འགྱུར་གོང་འདྲ། བདུད་རྩི་འཁྱིལ་བ་འཆི་མེད་ཚེའི་རྒྱུད་ལེའུ་བཅུ་བཞི། བི་མལ་དང་། ལོ་ཙཱ་འཇིང་མཆིམས་གསལ་འབར་གྱི་འགྱུར། བདུད་རྩི་ཡེ་ཤེས་འོད་ལྡན་གྱི་རྒྱུད་ལེའུ་ལྔ་བཅུར་དགུ། མངའ་བདག་ཉང་རལ་གྱི་གཏེར་མ་རྣམས་སོ། །ཞ་པ་ལ། ཕུར་བ་རྩ་རྒྱུད་རྡོ་རྗེ་ཁྲོས་པ་ལེའུ་བཅུ་བདུན། སློབ་དཔོན་ཆེན་པོ་དང་། དམ་འབྲས་ལེས་མཆིམས་ཕུ་དགེ་གོང་དུ་བསྒྱུར་བ། ཕུར་པ་རྩ་དུམ་པདྨ་སམ་བྷ་ཝདང་། ལྕེ་ཀུ་ཀུ་རཱ་ཙ། བྲང་ཏི་ཛ་ཡ་རཀྵི་ཏ་གསུམ་གྱི་འགྱུར། སླར་ཡང་དཔལ་བསམ་ཡས་གཙུག་ལག་ཁང་དུ་རྒྱལ་པོའི་བླ་དཔེ་དང་། མུ་ཏིག་པ་མ་གོང་ནས་བྱོན་པའི་གཏེར་དཔེ་གཉིས་བླ་མ་ཁྱུང་པོ་ཁྲོ་འབར་གྱིས་བསྟུན་པས་འགྱུར་གཅིག་ཏུ་མཐུན་པ། རྡོ་རྗེ་ཁྲོས་པ་ཕུར་བ་རྩ་བའི་རྒྱུད་ཀྱི་བཤད་པ་ལེའུ་བཅུ་གསུམ། རྒྱ་གར་ཁ་ཆེའི་ཡུལ་དུར་ཁྲོད་བྷིས་ཀའི་མཆོད་རྟེན་རྩར། རྗེ་བཙུན་རྡོ་རྗེ་སེམས་མ་དང་། ལོ་ཙཱ་འགར་ཤེས་རབ་འབྱུང་གནས་ཀྱི་འགྱུར། སྨད་དུ་རྗེ་བཙུན་མ་དེ་ཉིད་དང་། ལོ་ཙཱ་འབྲོམ་སྟོན་རྒྱལ་བས་བཅོས་ཏེ་གཏན་ལ་ཕབ། རྡོ་རྗེ་ཕུར་པ་གསང་བའི་རྩ་བ་རྣལ་འབྱོར་ཆེན་པོ་ཡང་དག་གི་རྒྱུད་ལེའུ་ཉི་ཤུ་ཐམ་པ། པདྨ་སམ་བྷ་ཝ་དང་། ལོ་ཙཱ་བ་བྲང་ཏི་ཛ་ཡ་རཀྵི་ཏའི་འགྱུར། དེ་བཞིན་གཤེགས་པ་ཆེན་པོ་རྡོ་རྗེ་ཕུར་པའི་རྒྱུད་དམ་བཤད་པའི་རྒྱུད་ལེའུ་བཞི་བཅུ་ཞེ་བཞི། ཕྲིན་ལས་ཕུན་སུམ་ཚོགས་པའི་རྒྱུད་དམ། ཀརྨ་ཀུ་རུའི་རྒྱུད་ལེའུ་བཅོ་ལྔ། བི་མ་ལ་དང་། གཉགས་ཀྱི་འགྱུར། རྨ་རིན་ཆེན་མཆོག་གིས་སྐད་གསར་བཅད་ཀྱིས་གཏུགས་པ། ཕུར་པ་ལས་ཀྱི་རྒྱུད་དམ་ཕྲིན་ལས་ཀྱི་རྒྱུད་ལེའུ་བཅུ་བཞི། ཨོ་རྒྱན་མཁའ་འགྲོའི་གླིང་ནས་སློབ་དཔོན་པདྨས་བསྣམས་པ་རོང་ཟོམ་གཞོན་བློའི་འགྱུར། རྡོ་རྗེ་ཕུར་བ་ཆེན་པོ་གཏོར་མའི་རྒྱུད་ལེའུ་བརྒྱད། ཕུར་བུ་ཟ་བྱེད་ཡཀྴ་འབར་བའི་རྒྱུད་ལེའུ་བཅུ་གཅིག། རྡོ་རྗེ་ཕུར་བུ་ཆོས་ཐམས་ཅད་མྱ་ངན་ལས་འདས་པའི་རྒྱུད་ལེའུ་ཉེར་བརྒྱད། སློབ་དཔོན་བྷ་ཤི་ཏའི་འགྱུར། སྐུ་དང་ཡེ་
ཤེས་ཐམས་ཅད་འདུས་པ་སངས་རྒྱས་མདུད་པའི་རྒྱུད་ལེའུ་བཅོ་ལྔ། ཛྙཱ་ན་གརྦྷ་དང་། བཻ་རོའི་འགྱུར། རྒྱུད་ཀྱི་རྒྱལ་པོ་ཁྲོ་བོ་ཧཱུྃ་ཀཱ་རའི་རྒྱུད་ལེའུ་ལྔ། ཁྲོ་བོ་རྣམ་རྒྱལ་རྒྱུད་ལེའུ་བདུན། དབྱུག་སྔོན་རྒྱུད་ལེའུ་ལྔ། གཤིན་རྗེ་གཤེད་རྒྱུད་ལེའུ་བཞི། མི་གཡོ་བའི་རྒྱུད་ལེའུ་ལྔ། ཁྲོ་བོ་རྟ་མགྲིན་རྒྱུད་ལེའུ་དྲུག། ཁྲོ་བོ་གཞན་གྱིས་མི་ཐུབ་རྒྱུད་ལེའུ་ལྔ། བདུད་རྩི་འཁྱིལ་བའི་རྒྱུད་ལེའུ་དྲུག། ཁམས་གསུམ་རྣམ་རྒྱལ་གྱི་རྒྱུད་ལེའུ་བདུན། སྟོབས་པོ་ཆེའི་རྒྱུད་ལེའུ་ལྔ་རྣམས། དཔལ་རྡོ་རྗེ་ཕུར་བ་མེ་ལོང་གསལ་བའི་སྤུ་གྲི་རེག་གཅོད་འཁོར་ལོའི་རྒྱུད་ལེའུ་བདུན། རྒྱུད་ཀྱི་རྒྱལ་པོ་དཔལ་འཇིག་རྟེན་སྣང་བྱེད་ཅེས་བྱ་བ་ལེའུ་ཉེར་བདུན། ཛྙཱ་ན་གརྦྷ་དང་། བཻ་རོའི་འགྱུར། སླར་སྐ་ཅོག་ཞང་གསུམ་གྱིས་ཀྱང་ཞུས། རྒྱུད་ཀྱི་རྒྱལ་པོ་རྡོ་རྗེ་ཕྲེང་བ་ཞེས་བྱ་བ་ལེའུ་བཅུ་དྲུག། ཛྙཱ་ན་གརྦྷ་དང་། བཻ་རོའི་འགྱུར། ཕྱིས་སྐད་གསར་བཅད་ཀྱིས་བཅོས་པ་རྣམས་སོ། །ཟ་པ་ལ། ཕུར་བ་རྡོ་རྗེ་བཀོད་པ་རྣལ་འབྱོར་ཆེན་པོའི་རྒྱུད་ལེའུ་བཅོ་ལྔ། རྒྱ་གར་གྱི་མཁན་པོ་ཤྲཱི་ཛྙཱ་ནས་བསྒྱུར་བ་ལས། ཡང་པདྨ་ཐོད་ཕྲེང་ལ་དང་། ལོ་ཙཱ་བ་དཔལ་གྱི་ཡེ་ཤེས་ཀྱིས་ཀྱང་བསྒྱུར་བ། སངས་རྒྱས་ཐམས་ཅད་ཀྱི་ཡེ་ཤེས་རྩེ་མོའི་རྒྱུད་ཀྱི་རྒྱལ་པོ་ཆེན་པོ་ལེའུ་ལྔ་བཅུ་ང་གཉིས། རྡོ་རྗེ་ཕུར་པ་ཆོས་ཐམས་ཅད་ཀྱི་གསང་བའི་དོན་གྱི་རྒྱུད་ལེའུ་ལྔ། སྦས་པ་ཟབ་མོ་བདུད་རྩིའི་རྒྱུད་ལེའུ་དགུ །ཛྙཱ་ན་གརྦྷ་དང་། བཻ་རོའི་འགྱུར། བསེ་སྒྲོམ་དམར་པོའི་རྒྱུད་ལེའུ་བཞི། ལྷ་སྲས་ལྕམ་སྲིང་ལ་སློབ་དཔོན་ཆེན་པོས་གནང་བ། ཤྭ་ན་དཀར་ནག་གི་རྒྱུད་ལེའུ་བཞི། རྡོ་རྗེ་ཕུར་པ་ཕྲིན་ལས་ཀྱི་འཁོར་ལོ་གབ་པ་གསང་བའི་རྒྱུད་ལེའུ་བཅུ་གཉིས། གུ་རུ་པདྨ་དང་། གཉགས་ཀྱི་འགྱུར། རྡོ་རྗེ་འབར་བ་གསང་བའི་རྒྱུད་ཆུང་། ཛྙཱ་ན་གརྦྷ་དང་། བཻ་རོའི་འགྱུར། ཡང་རྡོ་རྗེ་འབར་བའི་རྒྱུད་ལེའུ་བཅུ་བདུན། བམ་པོ་བཞི་པ་འགྱུར་གོང་འདྲ་ལ་ཕྱིས་སྐད་གསར་བཅད་ཀྱིས་བཅོས། ཕུར་པ་གསང་བའི་དགོངས་རྒྱུད་ཆེན་པོ་ལེའུ་བརྒྱད་ཅུ་གྱ་གཉིས། །སློབ་དཔོན་ཆེན་པོ་པདྨ་ཐོད་ཕྲེང་དང་། ལོ་ཙཱ་བ་མང་ཡུལ་གྱི་ལྕེ་ཀུ་ཀུ་རཱ་ཇོ་
དང་། བྲང་ཏི་ཛ་ཡ་རཀྵི་ཏའི་འགྱུར། རྡོ་རྗེ་ཕུར་པ་ཞེ་སྡང་ཡོངས་སུ་དག་པའི་རྒྱུད་ལེའུ་ཉེར་གཉིས། ཕུར་བུ་འབུམ་སྡེའི་ནང་ནས་ཕྱུང་བརྒྱ་གར་གྱི་སློབ་དཔོན་ཀཱ་མ་རུ་པར་འཁྲུ་རས་པའི་ནག་པོའི་ཞབས་དང་། ལོ་ཙཱ་བ་ཤྲཱི་བྷ་ལ་ཀུན་ཏྲ་དྷ་ན་དེ་བས་ལུས་དབུས་འགྱུར་འོད་མའི་ཚལ་ཆུ་སླད་ཀྱིས་བསྒྱུར་ཅིང་གཏན་ལ་ཕབ་པ། རྡོ་རྗེ་ཕུར་པ་གསང་བ་གདམས་ངག་ཅན་གྱི་རྒྱུད་ལེའུ་བཅོ་བརྒྱད། ཕུར་པ་བཅུ་གཉིས་འབྱུང་བའི་རྒྱུད་ཆུང་ངུ་བསྟན་པ་ལེའུ་བཅུ་གཉིས། སློབ་དཔོན་བི་མ་ལ་དང་། གཉགས་ཛྙཱ་ན་ཀུ་མཱ་རའི་འགྱུར། རྡོ་རྗེ་ཕུར་པ་བཅུ་གཉིས་ཀྱི་རྒྱུད་ལེའུ་བཅུ་གཉིས། རྡོ་རྗེ་ཕུར་པ་གསང་བའི་རྒྱུད་ལེའུ་བཞི་བཅུ་ཞེ་བཞི། ལྕེ་ཀུ་ཀུ་རཱ་ཛ་དང་། བྲང་ཏི་ཛ་ཡ་རཀྵི་ཏའི་འགྱུར། རྡོ་རྗེ་ཕུར་པ་གསང་བའི་སྔགས་རྒྱུད་འབྱུང་པོ་ཀུན་འདུལ་ལེའུ་བཅུ་དྲུག། སློབ་དཔོན་ཆེན་པོས་བི་ཏོ་ཏ་མ་ལ་འབུམ་སྡེའི་ཏན་ཏྲ་ལས་ཕྱུང་བ་བདུད་འདུལ་སྔགས་པ་གླིང་དུ་ལྕེ་ཛྙཱ་ན་ཀུ་ཀུ་རཱ་དང་། བྲང་ཏི་ཛ་ཡ་རཀྵིཏས་བསྒྱུར་ཏེ་མཁར་ཆེན་བཟའ་ལ་གཏད་པ། རྡོ་རྗེ་ཕུར་པ་ན་དུང་རྩེ་དམར་པོའི་རྒྱུད་ལེའུ་བཅུ་དགུ་རྣམས་སོ། །འ་པ་ལ། ཡུམ་གཟུངས་མའི་དངོས་གྲུབ་ཆེན་མོའི་རྒྱུད་ལེའུ་ལྔ་བཅུ་ང་གསུམ། མ་མོ་སྲིད་པའི་རྒྱུད་ལུང་གི་རྒྱུད་ཕྱི་མ་རྫོགས་སོའི་མཐའ་ཅན། མ་མོ་སྲིད་པ་ཟླ་གསང་ཐིག་ལེའི་རྒྱུད་ལེའུ་བཅུ་གཉིས། པཎྜི་ཏ་གུ་ཧྱ་གསང་བ་དང་། འབྲོག་མི་དཔལ་ཡེའི་འགྱུར། མ་མོ་ལ་མ་རྒྱུད་ལུང་ལས་ལེའུ་བཅུ་བཞི། འགྱུར་གོང་འདྲ། མ་མོ་ཐམས་ཅད་ཀྱི་ལས་རྒྱུད་ལུང་ཞེས་བྱ་བ་ལེའུ་བཅུ་དྲུག། སྲིད་པ་མཚོ་བཞིའི་རྒྱུད་ལེའུ་ཉེར་གཉིས། མགོར་བཅོམ་ལྡན་འདས་དཔལ་ཀུན་ཏུ་བཟང་མོ་ལ་ཕྱག་འཚལ་ལོ། །ཞེས་པ་ལེའུ་བརྒྱད། མ་མོ་འདུས་པའི་ཏནྟྲ་རྫོགས་སོའི་མཐའ་ཅན། མགོར་དཔལ་ཁྲག་འཐུང་གི་རྒྱལ་པོ་དང་། ཡུལ་རིག་པའི་རྒྱལ་མོ་ལ་ཕྱག་འཚལ་ལོ། །ཞེས་པ་ལེའུ་དགུ་པའི་མཐར་སྲིད་པ་རྒྱུད་ལུང་གི་རྒྱུད་ཕྱི་མཁའ་བར་ནག་པོ་ལས་རྒྱ་མཚོའི་རྒྱུད་ཅེས་བྱ་བ་རྫོགས་མཐའ་ཅན། ལས་ཀྱི་མཁའ་འགྲོ་མ་དེ་ཁོ་ན་ཉིས་གསུམ་དུ་
འདུས་པ་ཞེས་བྱའི་རྒྱུད་གླེང་གཞིའི་ལེའུ་དང་། ལས་ཀྱི་མཁའ་འགྲོ་མའི་རྒྱུད་ཆེན་རྫོགས་སོའི་མཐའ་ཅན་རྒྱ་གར་བ་ཤཱནྟི༚ི༚་གརྦྷ་དང་། ལོ་ཙཱ་བ་ལྕེ་བཀྲ་ཤིས་ཀྱིས་བསྒྱུར་བ། མ་མོ་འབུམ་ཏིག་གི་རྒྱུད་ལེའུ་བཞི་བཅུ་ཞེ་བརྒྱད། རྩ་བའི་རྒྱུད་རྫོགས་སོའི་མཐའ་ཅན། དེ་ནས་མུ་མཐུད་མ་མོ་བྱང་ཆུབ་ཀྱི་སེམས་གསང་བའི་རྒྱུད་ལེའུ་བརྒྱ་དང་ཞེ་གཉིས། མགོར་བཅོམ་ལྡན་འདས་རྡོ་རྗེ་ཧེ་རུ་ཀའི་རྒྱལ་བ་ལ་ཕྱག་འཚལ་ལོ། །སྔོན་འདས་པའི་དུས་མ་བྱུང་བའི་སྔོན་རོལ་ན་ཞེས་ཡོད་པ་ལེའུ་སུམ་ཅུ་སོ་གཉིས། གནུབས་ནམ་མཁའི་སྙིང་པོའི་འགྱུར། མགོར་བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་ཡོད་པ་ལེའུ་བཅུ་གཉིས། བྱང་སྐོར་གྱི་རྒྱུད་ཕྱི་མ་རྫོགས་སོའི་མཐའ་ཅན། ལྷ་མོ་ནག་མོའི་སྔགས་རྒྱུད་ལེའུ་བཅུ་གཅིག། དེའི་རྒྱུད་ཕྱི་མ་མགོར། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་དང་ཞེས་ཡོད་པ་ལེའུ་བཅུ་གཉིས། དབྱིངས་གསང་བའི་འཁོར་ལོའི་རྒྱུད་ལེའུ་དགུ། ཕྲ་མེན་སྤྱང་ཀི་ལས་ཀྱི་རྒྱལ་མོའི་རྒྱུད་ལེའུ་ཉི་ཤུ་རྩ་བཞི། ཕྲ་མེན་སྤྱང་རྒྱལ་གྱི་རྒྱུད་རྫོགས་མཐའ་ཅན། སྙིང་ཐིག་བསྐོར་བའི་རྒྱུད་འུག་པའི་གདོང་ཅན་ཞེས་བྱ་བ་ལེའུ་ཉི་ཤུ་ཐམ་པ། མཁའ་འགྲོ་མེ་ལྕེ་འབར་མའི་རྒྱུད་ལེའུ་ཉེར་གཉིས་པ་སྔ་འགྱུར་ལ་མཁའ་འགྲོ་མ་ཆེན་མོ་སྡོམ་པའི་ཀ་མ་ལའི་ཞལ་སྔ་ནས་དང་། ཅོག་རོ་ཀླུའི་རྒྱལ་མཚན་གྱིས་འགྱུར་བ་རྣམས་སོ། །ལ་པ་ལ། དཔལ་སྔགས་ཀྱི་སྲུང་མ་ཨེ་ཀ་ཛ་ཊཱིའི་རྒྱུད་ལེའུ་དགུ་བཅུ་གོ་དྲུག དྷ་ན་སཾ་སྐྲྀ་ཏ་དང་། འབྲོག་མི་དཔལ་ཡེའི་འགྱུར། ཨེ་ཀ་ཛ་ཊཱི་སྦས་པ་ནག་མོའི་རྒྱུད་ལེའུ་ལྔ། ཨེ་ཀ་ཛ་ཊཱི་ཟ་བྱེད་སྤྱང་རྒྱལ་ནག་མོའི་རྒྱུད་ལེའུ་སུམ་ཅུ་སོ་གཉིས། དེ་ཝ་ཙནྡྲ་ལ་བཻ་རོས་ཞུས། འཕགས་པ་ཏེ་སྡུད་འབར་མའི་རྒྱུད་ལེའུ་བཅུ་གཅིག། དཔལ་ལྷ་མོ་ནག་མོའི་ཐུགས་ཀྱི་སྲོག་སྒྲུབ་གསང་བའི་རྒྱུད་ལེའུ་བཅོ་བརྒྱད། བདུད་བྱ་རོག་མགོ་བརྩེགས་གསང་བ་སྒྲོལ་བྱེད་ཀྱི་རྒྱལ་པོ་ཀི་ཀང་རོག་ཏིའི་རྒྱུད་ལེའུ་བཅོ་ལྔ། འཕགས་པ་ལྷ་མོ་རྡོ་རྗེ་ནག་མོ་དབང་ཕྱུག་ཅེས་བྱ་བ་སྔགས་ཀྱི་རྒྱུད་ཀྱི་རྒྱལ་པོ་ལེའུ་བཅོ་ལྔ། མགོར་དེ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་མངོན་རྫོགས་རྒྱལ་པོ་ལ་འདི་སྐད་ཅེས་ཡོད་པའི་རྡོ་རྗེ་ནག་མོ་དབང་ཕྱུག་མ་ཕྱི་མའི་རྒྱུད་ལེའུ་བཅུ་གཉིས། ནག་མོ་སྔགས་ཀྱི་རྒྱུད་ཕྱི་མའི་ཕྱི་མ་ལེའུ་བདུན་པ་རྡོ་རྗེ་གདན་ནས་བྱུང་ཟེར་བ་ལྷ་མོ་དཔོན་གཡོག་གཉིས་ཀའི་རྒྱུད་ཡིན། ལྷ་འདྲེ་སྟོང་གི་དྲྭ་བའི་རྒྱུད་ལེའུ་ལྔ་བཅུ་ང་གསུམ། སྲིད་པའི་བེམ་དངོས་བསྟན་ལེའུ་བཞི་བཅུ་ཐམ་པ་དང་། རྗེས་འབྲེལ་སྐབས་ཉི་ཤུ་རྩ་གྲངས་སྐོར་གྱིས་རྫོགས་པ་རྣམས་སོ། །ར་པ་ལ། དཔལ་མགོན་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལེའུ་སུམ་ཅུ་སོ་དྲུག བྲམ་ཞེ་གསལ་བའི་རྒྱན་དང་། བལ་པོའི་རྒྱལ་པོ་བ་སུ་དྷ་རས་བསྒྱུར་བ། དཔལ་མགོན་ནག་པོ་ཆེན་པོ་སྐུ་གསུང་ཐུགས་ཁྲོས་པའི་རྒྱུད་ལེའུ་བཅོ་བརྒྱད། དཔལ་མགོན་ནག་པོ་གསང་བ་སྙིང་གི་འཁོར་ལོ་རྟོག་པ་བཅོ་ལྔ། གནུབས་ཆེན་གྱིས་བསྒྱུར་བ། དཔལ་ནག་པོ་ཆེན་པོ་མེ་ལྕེ་ཕྲེང་བའི་རྒྱུད་ལེའུ་བཞི་བཅུ་ཞེ་ལྔ། རྒྱ་མཁན་དྷ་ན་སཾ་སྐྲྀ་དང་། པ་གོར་བཻ་རོའི་འགྱུར། དཔལ་ནག་པོ་ཆེན་པོའི་རྒྱུད་དུར་ཁྲོད་ནག་པོ་ཞེས་བྱ་བ་ལེའུ་བཅུ་གཉིས། མན་ངག་བརྩེགས་པ་གྲི་གུག་གི་རྒྱུད་དམ་མ་ཧཱ་ཀ་ལའི་རྒྱུད་ལེའུ་ཉེར་གཅིག། རྗེ་བཙུན་ཤཱནྟི་བྷ་དྲས་ཞུས་པ་ལ། དགེ་སློང་ཚུལ་ཁྲིམས་རྒྱལ་བས་འགྱུར་བ། དཔལ་ནག་པོ་ཆེན་པོ་དྲག་པོའི་བརྟག་པ་དུར་ཁྲོད་ཆེན་པོའི་རྒྱུད་ལེའུ་བཅུ་ཐམ་པ། སྣ་ནམ་བླ་མས་བསྒྱུར་ཞུས་གཏན་ལ་ཕབ། ནག་པོ་ཆེན་པོ་ལས་མགོན་བྱ་རོག་གདོང་གི་རྒྱུད་ལེའུ་བཅོ་ལྔ། ནག་པོ་ཆེན་པོ་གཟུགས་ཅན་གཅེར་བུའི་རྒྱུད་ལེའུ་བཅུ་གཉིས། རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད་ལེའུ་བཅུ་བཞི། རལ་གཅིག་མ་ཆོས་ཀྱི་བདག་མོ་སྤུ་གྲི་ཡ་མའི་རྒྱུད་ལེའུ་ཉི་ཤུ་རྩ་ལྔ། རྒྱ་གར་གྱི་སློབ་དཔོན་དཱ་ན་ཤཱི་ལ་དང་། བོད་ཀྱི་སློབ་དཔོན་དགེ་སློང་ཡང་དབང་གཏེར་གྱིས་ཞུས་ཏེ་གཏན་ལ་ཕབ་པ་སྟེ། སྤྱིར་རྒྱུད་ཀྱི་སྡེ་ཚན་ནམ། ཆོས་ཀྱི་རྣམ་གྲངས་བཞི་བརྒྱར་ལྡང་བའི་བཞུགས་ཚོགས་དང་བཅས་པའི་མཐར། རྒྱུད་འབུམ་རིན་
པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་གྱིས་རྣམ་པར་མཛེས་པའོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ། རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། ཆོས་ཀྱི་བཞུགས་བྱང་སྨོས་པའི་རབ་ཏུ་བྱེད་པ་སྟེ། སྐབས་བརྒྱད་པའོ།། །།
ཡོངས་སུ་བསྔོ་བ་དང་སྨོན་ལམ་དམ་པའི་ཁྱད་པར་ལས་འབད་པ་དོན་ལྡན་དུ་བགྱིས་པའི་རབ་ཏུ་བྱེད་པ་སྟེ་སྐབས་དགུ་པ།
སྤྱི་དོན་དགུ་པ་འབད་པ་དོན་ལྡན་དུ་བྱ་ཕྱིར་ཡོངས་སུ་བསྔོ་བ་ལ་གསུམ། རྣམ་གཞག་སྤྱིར་བཤད་པ་དང་། རང་བཞིན་བྱེ་བྲག་ཏུ་བཤད་པ། སྐབས་ལ་བབ་པའི་བསྔོ་བའོ། །དང་པོ་ལའང་གསུམ། མཚན་ཉིད་སྒྲ་དོན། དགོས་པའོ། །དང་པོ་ནི། ཟག་པར་བཅས་པའམ། དེ་ལས་ལྡོག་པ་སྟེ་བདེན་པ་གཉིས་ཀྱིས་བསྡུས་པའི་དགེ་བའི་རྩ་བ་མངོན་པར་འདུབ་གྱིས་པ་ཐམས་ཅད་བླ་ན་མེད་པའི་བྱང་ཆུབ་ཆེན་པོའི་ལམ་དུ་ཡོངས་སུ་བསྒྱུར་བའི་ཐབས་ཀྱི་མཐར་ཕྱིན་པ་གང་ཡིན་པ་སྟེ། དཔེར་ན་གསེར་གྱི་དངོས་པོ་རིན་པོ་ཆེའི་རང་བཞིན་དུ་གདོད་ནས་གནས་པ་ཉིད་དེ། དེ་ཉིད་བཟོ་བོའི་བྱེད་ལས་ཀྱི་སྒོ་ནས་སྐུ་གསུང་ཐུགས་ཀྱི་རྟེན་དུ་མ་བསྒྲུབས་ན་བསོད་ནམས་དམ་པའི་ཡུལ་དུ་མི་འགྱུར་བ་ལྟ་བུའོ། །དེ་སྐད་དུ་མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་སོ། །གཉིས་པ་ནི་ལེགས་སྦྱར་གྱི་སྐད་དུ། པ་རི་ཎ་ཏ་ཞེས་ཡོངས་སུ་བསྒྱུར་བའམ། སྤེལ་བ་ལ་འཇུག་སྟེ། དགེ་བའི་རྩ་བ་ཐམས་ཅད་ཐབས་ལ་མཁས་པས་བྱང་ཆུབ་ཆེན་པོའི་ལམ་དུ་བསྒྱུར་བའམ། དེའི་བར་མདོར་ཆུད་གསོན་པར་མི་འགྱུར་བའི་སྟོབས་དང་ལྡན་པ་ཉིད་དུ་སྤེལ་བར་བྱེད་པའི་ཐ་ཚིག་ཅན་ཏེ། ཐ་སྙད་གཞན་དང་མི་འདྲེས་པའི་ཆེད་ཡོངས་སུ་བསྔོ་བ་ཞེས་དོན་འགྱུར་དུ་བྱས་པའོ། །གསུམ་པ་ནི། དགེ་བའི་རྩ་བ་ཐམས་ཅད་ཡོངས་སུ་བསྔོ་བས་རྒྱས་འདེབས་པར་བྱེད་པ་འདི་ནང་པ་སངས་རྒྱས་པའི་ཁྱད་པར་གྱི་ཆོས་བླ་ན་མེད་པ། མུ་སྟེགས་བྱེད་ཀྱི་གཞུང་དང་། བསྟན་བཅོས་གཞན་ལ་མ་གྲགས་པ་ཞིག་ཡིན་ཏེ། ཁྱད་
འཕགས་བསྟོད་པ་ལས་ཀྱང་། བསོད་ནམས་བྱས་པའི་ཚོགས་འདི་ནི། །སེམས་ཅན་རྣམས་ལ་ཡོངས་བསྔོ་བ། །བཅོམ་ལྡན་ཁྱེད་ཀྱིས་གང་གསུངས་པ། །དེ་བཞིན་བསྟན་བཅོས་ལས་མ་བཤད། །ཅེས་སོ། །དེའི་ཕྱིར་དགོས་འབྲེལ་ལྡན་པ་སངས་རྒྱས་པའི་གྲུབ་མཐར་རྗེས་སུ་སློབ་ཅིང་། ཞི་བ་དམ་པའི་གྲོང་ཁྱེར་དུ་མྱ་ངན་ལས་འདས་པར་འདོད་པ་རྣམས་ཀྱིས། གང་ཞིག་བསགས་པའི་བསོད་ནམས་ཀྱི་ཕུང་པོ་ཐམས་ཅད་མྱ་ངན་ལས་འདས་པའི་གོ་འཕང་དམ་པར་བསྔོོབས་རྒྱས་ཐེབས་པ་ནི་ཤིན་ཏུ་གཅེས་པ་སྟེ། འདི་ལྟར་དགེ་བའི་རྩ་བ་ཉུང་ངུའང་དང་པོར་སེམས་བསྐྱེད་ཀྱིས་ཟིན་པ། བར་དུ་དམིགས་པ་མེད་པ། མཐར་བསྔོབས་རྒྱས་ཐེབས་པ་གསུམ་འཛོམ་ན། ནམ་ཞིག་བྱང་ཆུབ་ཀྱི་སྙིང་པོ་ལམ་ཐུག་གི་བར་དུ་བར་མདོར་ཆུད་མི་འཛའ་བ་དང་། བསམ་གྱིས་མི་ཁྱབ་པར་འཕེལ་བར་འགྱུར་བ་དང་། བྱང་ཆུབ་ཀྱི་རྒྱུར་སྨིན་པ་ལ་སོགས་པའི་དགོས་པ་དཔག་ཏུ་མེད་ཅིང་། ཐར་བ་དང་ཐམས་ཅད་མཁྱེན་པའི་ལམ་དང་ཡོངས་སུ་འབྲེལ་བའི་འབྲེལ་བ་ཅན་ཡིན་ཏེ། འདི་ལྟར་ཆུའི་ཐིགས་པ་གཅིག་རྒྱ་མཚོ་ཆེན་པོའི་ནང་དུ་དོར་བར་གྱུར་བ་དེའི་རྒྱུན་ནི་བསྐལ་པའི་བར་དུ་ཟད་མི་ཤེས་པས་མཚོན་ནོ། །དེ་སྐད་དུ་བློ་གྲོས་རྒྱ་མཚོས་ཞུས་པར། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་པ་དང་ཚུལ་མཐུན་པ་བློ་གྲོས་མི་ཟད་པའི་མདོར་ཡང་འབྱུང་བ་ཡིན་ན། །དེ་ལྟ་བུའི་བསྔོ་བ་དང་མ་ལྡན་ན་བར་མ་དོར་ཆུད་འཛའ་བར་འགྱུར་ཏེ། མོས་པས་སྤྱོད་པའི་དགེ་བ་ཕས་ཆེ་བ་དོན་མེད་དུ་འགྲོ་བ་མང་བ་ནི། དགེ་སེམས་ཙམ་གྱིས་འཕེན་པས་གནས་སྐབས་སུ་བདེ་འགྲོར་ཕྱིན་ཡང་། དེ་ཙམ་གྱིས་ཟད་པར་གྱུར་བའམ། ཡོངས་སུ་ཟད་པར་མ་གྱུར་ནའང་བསོད་ནམས་ཀྱི་སྟོབས་ཕྲ་མོར་གྱུར་ནས། ཕྱིས་འབྲས་བུ་འབྱིན་པའི་མཐུ་ཆུང་ངུར་འགྱུར་བ་དང་། ཡུལ་དམ་པར་
གྱུར་བ་ལ་ཁོང་ཁྲོ་བ་ལ་སོགས་སྡིག་པའི་ལས་མི་བཟད་པ་རེ་རེས་ཕུ་གཏུགས་པར་འགྱུར་ཏེ། དབུ་མ་འཇུག་པར། སྤྱད་དང་དངོས་དང་ཡོངས་སུ་ཟད་པ་ན། །ཕྱིན་ཆད་དེ་ལས་ལོངས་སྤྱོད་འབྱུང་མི་འགྱུར། །ཅེས་དང་། སྤྱོད་འཇུག་ལས་ཀྱང་། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་སོ། །དེའི་ཕྱིར་བསྡོ་ཚུལ་ཡང་རྣམ་པ་ཐམས་ཅད་མཁྱེན་པ་ཁོ་ནའི་ཕྱོགས་ཉིད་དུ་མི་བས་མན་གྱི་ནར་འཕྱན་པའི་ཚུལ། ལི་ཙ་བླིས་ཞུས་པའི་མདོ་ལས། མང་པོ་ཡང་ཉུང་ངུར་རིག་པར་བྱ་སྟེ། ཀུན་མཁྱེན་དུམ་བསྔོས་པའི་ཕྱིར་རོ། །ཞེས་སོ། །འདི་ལྟར་དམ་པ་གསུམ་གྱིས་ཟིན་པ་ནི་ཐར་བ་ཆ་མཐུན་གྱི་དགེ་བ་ཡིན་ལ། མ་ཟིན་ན་བསོད་ནམས་ཆ་མཐུན་ཞེས་བྱ་སྟེ་འབྲས་བུ་དམན་པར་འགྱུར་བ་ཡིན་ནོ། །གཉིས་པ་རང་བཞིན་བྱེ་བྲག་ཏུ་བཤད་པ་ལ་གསུམ། གང་ཞིག་བསྔོ་བྱ་བསོད་ནམས་ཀྱི་ཁྱད་པར། གང་དུ་བསྔོ་བའི་ཡུལ་གྱི་ཁྱད་པར། ཇི་ལྟར་བསྔོ་བ་ལམ་གྱི་ཁྱད་པར་རོ། །དང་པོ་ནི། དུག་གསུམ་མེད་པའི་སེམས་ཀྱིས་ཀུན་ནས་སླངས་པའི་སྒོ་གསུམ་གྱི་དགེ་བའི་རྩ་བ་གང་ཡིན་པ་སྟེ། རིན་ཆེན་ཕྲེང་བ་ལས། མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དག་པའོ། །ཞེས་པའོ། །དེ་ཉིད་ཀྱང་བསོད་ནམས་བྱ་བའི་དངོས་པོའི་སྒོ་ནས་དབྱེན། སྦྱིན་པ་ལས་བྱུང་བ་དང་། ཚུལ་ཁྲིམས་ལས་བྱུང་བ་དང་། སྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ་གསུམ་དུ་འགྱུར་བ་ལས། དེང་འདིར་སྐབས་སུ་བབ་པ་ནི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ། དེ་ལ་དབྱེན། ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་པ་ལས་དང་པོ་གཙོ་བོར་གྱུར་བ་སྟེ། ཇི་ལྟར་སྦྱིན་ན། འདི་སྐད་དུ། །དུས་སུ་སྦྱིན་དང་འགྱོད་པ་མེད་པ་དང་། །ཡིད་འོང་སྦྱིན་དང་རྣམ་སྨིན་མི་རེ་བ། །ཞེས་གསུངས་པའི་མཚན་ཉིད་བཞི་ཚང་བས་
སངས་རྒྱས་ཀྱི་རྒྱུར་བསྔོ་བར་མི་རུང་བ་མེད་ལ། སྤྱིར་ལེགས་བྱས་ཀྱི་ཕུང་པོ་འདིའི་ཁོང་དུ་སྦྱིན་པ་བཞི་ཀའི་རྣམ་གཞག་ཚང་བར་སྨོས་སུ་ཡོད་པའང་ཡིན་ནོ། །གཞན་ཡང་ཤིན་ཏུ་རྒྱས་པའི་སྡེ་སྣོད་དང་། སྡུད་པ་ཚིགས་སུ་བཅད་པ། ཕུང་པོ་གསུམ་པ་ལ་སོགས་པའི་དགོངས་པ་བཞིན་ཕྱོགས་བཅུའི་འཇིག་རྟེན་གྱི་ཁམས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྲངས་མེད་པ་ཡོད་དེ། དེ་དག་ཏུ་དུས་གསུམ་དུ་གཤེགས་ཤིང་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་དང་པོར་བྱང་ཆུབ་མཆོག་ཏུ་ཐུགས་བསྐྱེད་པ་ནས། མཐའ་མངོན་པར་རྫོགས་པར་སངས་རྒྱས་པ་དང་། ཕ་རོལ་ཏུ་ཕྱིན་པ་དྲུག་ལས་བརྩམས་པའི་དགེ་བའི་རྩ་བ་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་སློབ་པ་དང་། མི་སློབ་པ་དང་། སངས་རྒྱས་རྣམས་ཀྱི་རྗེས་སུ་བསྟན་པ་ཐོབ་པའི་ལྷ་མི་ལ་སོགས་པས་ཟག་བཅས་དང་ཟག་མེད་ཀྱི་དགེ་བའི་རྩ་བ་ཡང་དག་བསྐྲུན་པ་རྣམས་ཀྱང་བློ་གྲོས་ཆེན་པོས་ཡོངས་སུ་བསྔོ་བྱ་ཉིད་དེ། ཕལ་པོ་ཆེ་ལས་ཀྱང་། ཕྱོགས་བཅུའི་འཇིག་རྟེན་དག་ན་གང་ཡོད་པའི། །དགེ་བ་དེ་དག་ཡང་ཡང་སྒྲུབ་པས་ན། །འགྲོ་བ་ཀུན་ལ་ཕན་དང་བདེ་སེམས་ཀྱིས། །ཡེ་ཤེས་མཁས་པ་དེ་དག་ཡོངས་སུ་བསྔོ། །ཞེས་པས་བསྟན་ནོ། །གཉིས་པ་ནི། དགེ་བའི་རྩ་བ་དེ་དག་ཀྱང་སངས་རྒྱས་ཀྱིས་ཁོ་ནར་བསྔོ་བའི་ཡུལ་དུ་དམིགས་པ་ལས། གཞན་མི་མཛད་ཀྱི་བདག་པོ་ཚངས་པ་དང་། །བརྒྱ་བྱིན་དང་། སྟོང་འཁོར་ལོས་སྒྱུར་བའི་རྒྱལ་པོ་དང་། ཁམས་ཀྱི་རྒྱལ་ཕྲན་དང་། འཁོར་དང་ལོངས་སྤྱོད་ཕུན་སུམ་ཚོགས་པའི་བདེ་འབྲས་ཀྱི་སླད་དུ་བསྔོ་བར་བྱ་བ་ནི་བཟང་པོ་མ་ཡིན་ཏེ། དེ་དག་ནི་གནས་སྐབས་ཀྱི་བདེ་བ་ཅན་འཁོར་བའི་རྒྱུ་ལ་བརྟེན་པ། སྡུག་བསྔལ་གྱི་འབྲས་བུ་ལས་མ་བརྒལ་བ་ཡིན་ལ། དགེ་བ་ནི་གཏན་གྱི་འདུན་པ་ཁོ་ནའི་སླད་དུ་བསགས་པ་ཡིན་པས་སོ། །འདི་ལྟར་གཏན་གྱི་འདུན་མ་དེའང་རང་ཉིད་གཅིག་པུ་སྡུག་བསྔལ་དང་བྲལ་བ་ཙམ་དུ་སེམས་པ་
ཉན་ཐོས་ཀྱིས་འམ། རང་སངས་རྒྱས་ཀྱི་སར་ཡོངས་སུ་བསྔོ་བ་ཡང་མ་ཡིན་ཏེ། དེ་དག་ནི་རང་དོན་གྱི་ཞི་བདེ་འབའ་ཞིག་ལྷུར་བྱེད་པས། གཞན་དོན་དུ་རྫོགས་པའི་བྱང་ཆུབ་ཐོབ་པའི་གནས་ལ་གེགས་སུ་བྱེད་པའི་ཕྱིར་རོ། །དེའི་ཕྱིར་བསྔོ་བ་མཚན་ཉིད་པ་ནི། རྒྱལ་བའི་ཡུལ་ལས། དགེ་བའི་རྩ་བ་ཐམས་ཅད་རྣམ་པ་ཐམས་ཅད་མཁྱེན་པ་ཉིད་མ་གཏོགས་པ་ཉན་ཐོས་ཀྱིའམ། རང་སངས་རྒྱས་ཀྱི་སར་ཡོངས་སུ་བསྔོར་མི་འཇུག་པ་ཡིན་ནོ། །ཞེས་གསུངས་པས་སོ། །གསུམ་པ་ལ་གཉིས། །ཇི་ལྟར་བསྔོ་བའི་མི་མཐུན་ཕྱོགས་སྤོང་བ་དང་། མཐུན་ཕྱོགས་བསྒྲུབ་བའོ། །དང་པོ་ནི། གང་དུ་བསོད་ནམས་བྱས་པ་ལ་བསྔོ་བ་བྱེད་པའི་དམ་བཅའ་བརྟན་པོར་གྱུར་ཀྱང་འཁོར་གསུམ་དུ་མཚན་མར་འཛིན་པའི་འདུ་ཤེས་ཅན་ལ་དམིགས་པ་མེད་པའི་ཤེས་རབ་ཀྱིས་མ་ཟིན་པའི་དུག་བཅས་ཀྱི་བསྔོ་བ་ཁ་ན་མ་ཐོབ་འབྱུང་སྟེ། བརྒྱད་སྟོང་པ་ལས། དམིགས་པའི་འདུ་ཤེས་ཅན་ལ་ཡོངས་སུ་བསྔོ་བ་མེད་དོ། །དེ་ཅིའི་ཕྱིར་ཞེན། དམིགས་པ་ནི་དུག་དང་བཅས་པའོ། །ཞེས་སོ། །དེའི་ཕྱིར་དངོས་པོ་དང་། བསམ་པ་དང་། ཡུལ་གསུམ་ལ། བདེན་བདེན་པོར་ཞེན་ཅིང་ཆགས་པ་ནི་འཁོར་གསུམ་རྣམ་པར་རྟོག་པ་ཤེས་བྱའི་སྒྲིབ་པ་ཅན་ཡིན་ཏེ། མགོན་པོ་བྱམས་པས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་སོ། །གཉིས་པ་ནི། ཐབས་བྱང་ཆུབ་ཀྱི་སེམས་དང་། ཤེས་རབ་བདག་མེད་པའི་ལྟ་བས་ཟིན་པའི་ངང་ནས་ཡོངས་སུ་བསྔོ་བ་ནི་བཟང་པོ་བཞི་དང་ལྡན་པའི་བསྔོ་བ་ཡིན་ཏེ། དེ་སྐད་དུ། དམིགས་པ་བཟང་དང་སྟོན་པ་དང་། །ཐབས་བཟང་བ་དང་ངེས་འབྱུང་དང་། །སྤྱོད་པ་བཟང་པོ་བདག་ཉིད་ཀྱིས། །ཡང་དག་སྨོན་ལམ་ཡིན་པར་བཤད། །ཅེས་པ་ལྟར་རོ། །དེ་ལ་ཐབས་ནི་བྱང་ཆུབ་ཀྱི་སེམས་དམ་པས་ཟིན་པ་སྟེ། ཇི་ལྟར་བསྒྲུབ་པའི་དགེ་བ་ཐམས་ཅད་ཀྱང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང་ཐུན་མོང་དུ་བྱས་ནས་
རྣམ་མཁྱེན་དམ་པའི་གོ་འཕང་དོན་དུ་གཉེར་བའི་འདུན་པ་དང་མ་བྲལ་བ་སྟེ། ཞི་བ་ལྷས། དངོས་སམ་ཡང་ན་རྒྱུད་ཀྱང་རུང་། སེམས་ཅན་དོན་ལས་གཞན་མི་སྤྱང་། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་སོ། །དེ་ལྟ་བུའི་བྱང་ཆུབ་སེམས་ཀྱིས་ཡོངས་སུ་ཟིན་པའི་བསོད་ནམས་ཀྱི་འབྲས་བུ་ནི་ནམ་ཡང་ཟད་མི་ཤེས་ལ། རང་བཞིན་གྱིས་འཕེལ་བར་འགྱུར་བའི་ཕྱིར་དགེ་བ་གཞན་ཐམས་ཅད་ལས་མཆོག་ཏུ་གྱུར་བ་ཡིན་ཏེ། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་སྤྱད་པས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཅེས་དང་། སེམས་ཅན་གྱི་ཁམས་ཚད་མེད་པ་ལ་དམིགས་པས་བསོད་ནམས་ཀྱང་ཚད་མེད་པའི་ཚུལ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་སོ། །དེ་ཀུན་ཀྱང་ཤེས་རབ་བདག་མེད་པའི་ལྟ་བས་ཟིན་པས་མཉམ་གཞག་གི་དོན་འཁོར་གསུམ་རྣམ་པར་མི་རྟོག་ལ། རྗེས་ཐོབ་ཏུ་སྒྱུ་མ་དང་རྨི་ལམ་ལྟ་བུའི་ཆོས་ཉིད་ཤེས་པའི་བསྔོ་བ་ནི། བྱང་ཆུབ་ཀྱི་ལམ་མ་ནོར་བ་ཉིད་དུ་འགྱུར་བ་ཡིན་ཏེ། སྡུད་པ་ལས། གལ་ཏེ་འདི་ལྟར་ཆོས་འདི་འགགས་ཤིང་ཟད་པ་དང་། །གང་དུ་ཡོངས་སུ་བསྔོ་བ་དེ་ཡང་ཟད་པ་དང་། །ཆོས་ཀྱི་ཆོས་ལ་ནམ་ཡང་མི་བསྔོ་ཤེས་གྱུར་ན། །དེ་ལྟར་རབ་ཏུ་ཤེས་པས་ཡོངས་སུ་བསྔོས་པ་ཡིན། །ཞེས་གསུངས་ཤིང་། ཚུལ་དེ་ལྟ་བུས་བསྔོ་བའང་། སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དང་། །ཀུན་ཏུ་ཐོགས་མེད་གཟིགས་པ་ལྡན། །དེ་དག་ཀུན་གྱི་སྤྱན་སྔ་ན། །བདག་ནི་རྟག་པར་གནས་སོ་ཞེས། །ཞེས་པས་རྒྱུ་འབྲས་མི་འཆོལ་ཞིང་བསླུ་བ་མེད་པའི་བདེན་དབང་ཕྱོགས་གཤེད་ནས་སྤྱན་འདྲེན་པ་དང་བཅས་པའི་ངལ་བ་ལ་མ་ལྟོས་པ་ཉིད་ཀྱི་ཕྱིར། ཕྱོགས་བཅུ་དང་མུར་གཏུགས་པ་མེད་པའི་ཞིང་ཁམས་རབ་འབྱམས་རྒྱ་མཚོ་ན་འཚོ་ཞིང་
གཞེས་པའི་བཅོམ་ལྡན་འདས་སྲས་དང་སློབ་མར་བཅས་པ་རྣམས་དུས་གསུམ་སྒྲིབ་གཡོགས་དང་བྲལ་བར་བཞུགས་པའི་སྤྱན་སྔར། ཇི་ལྟར་བསྔོས་པའི་འབྲས་བུ་དེ་དེ་བཞིན་དུ་འགྲུབ་པའི་མཐུན་འགྱུར་ཞུ་བ་ཡིན་ནོ། །དེའང་འདི་ལྟར་ལས་བཞིའི་འཁོར་ལོའི་རྒྱུད་ཕྱི་མ་ལས། དུས་ངན་ཐ་མ་བྱུང་བའི་ཚེ། །ལྷ་མོའི་ནང་ན་འོད་ཟེར་ཅན། །འཕགས་པའི་ནང་ན་འཇམ་དཔལ་ཉིད། །འདི་གཉིས་མ་གཏོགས་དངོས་གྲུབ་གཞན། །རིག་འཛིན་ཀུན་ལ་མ་ཡིན་ནོ། །ཞེས་པ་ལྟར། ཐུགས་རྗེ་དང་ཕྲིན་ལས་ཆེན་པོའི་བ་གམ་བླ་ན་མཐོ་ཞིང་། ཐེག་པ་ཆེན་པོའི་ཆོས་ཚུལ་རྒྱ་མཚོའི་མཚན་ཉིད་གང་ཡིན་པ་མ་འདྲེས་གསལ་བའི་བློ་གྲོས་ལ་གདོན་མི་ཟ་བའི་མཁྱེན་རབ་ཀྱི་ཚེར་མ་རྣོན་པོ་དང་འགྲོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་བ་དང་། གཞོན་ནུ་ནོར་བཟང་གིས་ཁྱུ་མཆོག་ལྟ་བུའི་བཤེས་གཉེན་དམ་པ་མང་དུ་བསྟེན་པ་ཐམས་ཅད་ཀྱི་ནང་ན་ཚངས་པའི་གནས་པ་བཞིའི་མི་མཐུན་ཕྱོགས་ལས་རྣམ་པར་གྲོལ་བའི་བྱང་ཆུབ་སྤྱོད་པའི་དབང་པོ་འཕགས་པ་ཀུན་ཏུ་བཟང་པོའི་རྗེས་སུ་སློབ་ཅིང་། རྗེས་སུ་བསྒྲུབ་པའི་འདུན་པ་དང་བཅས་ཏེ། ད་ལྟར་གྱི་ལེགས་པར་བྱས་པའི་ཕུང་པོ་དང་འགྲོགས་ནས་འདས་པ་དང་མ་འོངས་པའི་ཆ་ལ་བྱེད་པར་འགྱུར་བ་ཡང་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཁོ་ན་ལ་གཅིག་ཏུ་འདུན་པས་ཡོངས་སུ་བསྔོ་བར་བྱ་སྟེ། འདི་ལ་འདོད་པ་ཁ་ཅིག་གིས། རྒྱུ་དགེ་བ་སྔོན་སོང་ནི་བསྔོ་བ། དེ་ལས་ལྡོག་པ་ནི་སྨོ་ལམ་ཞེས་རྣམ་དབྱེ་བྱེད་ཀྱང་ཕུང་པོ་གསུམ་པ་ལ་སོགས་ཏེ་ཡོངས་སུ་གྲགས་པ་དང་ཚད་མས་འགལ་བས། ད་ལྟ་ནས་རྒྱུ་དགེ་རྩ་སྔོན་དུ་སོང་བའམ་མིན་ཡང་རུང་སྟེ། འཁོར་གསུམ་མི་དམིགས་པའི་ཤེས་རབ་ཀྱིས་ཟིན་པ་བསྔོ་བ། དེར་མ་ལྟོས་པ་ལ་སྨོན་ལམ་ཞེས་ཐ་སྙད་དུ་བཏགས་ནས་བསྔོ་བར་བྱ་བའི་དུས་ལ་གཏན་ཚིགས་མེད་པར་བྱས་ན་ལེགས་པར་འགྱུར་གྱིས། དེ་ལྟར་དུ་བསྔོ་བའི་ཚིག་གི་བརྗོད་པ་ལའང་མདོ་སྡེ་དྲན་པ་ཉེར་གཞག་ལས། དམ་པའི་ཆོས་ཤིན་ཏུ་གསལ་
བར་བྱེད་པའི་སྙན་དངགས་བྱའོ། །དེ་ལས་མྱ་ངན་ལས་འདས་པའི་མཐར་ཐུག་པར་འགྱུར་རོ། །ངལ་བ་འབྲས་བུ་དང་བཅས་པར་འགྱུར་རོ། །གཞན་དག་གིས་དེ་རབ་ཏུ་བསྔགས་པར་འགྱུར་རོ། །ལུས་ཞི་གནས་ཤི་བའི་འོག་ཏུའང་ལྷ་རྣམས་སུ་སྐྱེ་བར་འགྱུར་རོ། །ཞེས་གསུངས་པ་ལྟར། སཾ་སྐྲྀ་ཏའི་སྐད་དུ་ཀ་བི་སྟེ། གངས་རིའི་ཁྲོད་ན་སྙན་དངགས་སུ་གྲགས་པ་སྔོན་གྱི་སློབ་དཔོན་རཱ་མ་ཤརྨ་ལ་སོགས་པའི་གཞུང་གི་དོན་འཕགས་པའི་ཡུལ་གྱི་གནས་ལྔ་རིག་པར་སྨྲ་བའི་པཎྜི་ཏ་དཎྜཱི་འམ། དབྱུག་པ་ཅན་ཞེས་བྱ་སྟེ་མིང་གི་མངོན་པར་བརྗོད་པས་གྲུབ་མཐའ་ཅིག་ཤོས་ལ་ཞུགས་པ་ཡིན་ཡང་རུང་སྟེ། རྒྱུད་ནས་རྣམ་པ་ཐམས་ཅད་མཁྱེན་པའི་ཁམས་ལ་ཉེ་བར་རྒྱུ་བའི་སྙིང་པོ་ཅན་གྱི་རིག་པའི་ཡན་ལག ཁྱད་པར་ཅན་ལ་མ་རྨོངས་པ་དེས་འདི་སྐད་དུ། བསྟན་བཅོས་སྔ་མ་རྣམས་བསྡུས་ཤིང་། །སྦྱོར་བ་རྣམས་ཀྱང་ཉེར་མཚོན་ཏེ། །ཇི་ལྟར་ནུས་བཞིན་བདག་གིས་ནི། །སྙན་དངགས་ནམས་ཀྱི་མཚན་ཉིད་བྱ། །ཞེས་ཀ་བྱཱ་དརྴ་ཞེས་པའི་གཞུང་རྒྱས་བསྡུས་འཚམས་པར་བསྡུས་ཤིང་། དཔེར་བརྗོད་ཀྱིས་མཚོན་པར་བྱས་པ་ཉིད་གངས་རིའི་ཁྲོད་འདིར་བསླབ་ཏུ་རུང་བའི་སྲོལ་ཤིན་ཏུ་དར་བ་འགྱུར་བའི་རྗེས་སུ་འདུན་པ་ཕྱོགས་པ་ཡིན་ཏེ། རྒྱུ་གང་གིས་ན། དེ་ཉིད་ཀྱིས། མཁས་པས་ཡང་དག་རབ་སྦྱར་བའི། །ངག་ནི་དག་གི་འདོད་འཇོར་བཤད། །ཅེས་དང་། དེ་སྐད་དུ། རྒྱལ་པོ་ལང་ཚོས་དྲེགས་གྱུར་ཀྱང་། །རྒྱན་མེད་པ་ན་སྐྱེ་བོས་གླེང་། །དེ་ཕྱིར་སྙན་དངགས་མི་ལྡན་པའི། །བསྟན་བཅོས་ཕལ་པ་བརྩི་བ་མེད། །ཅེས་པས་སོ། །དེའི་ཕྱིར་ཡུལ་ལྷོ་ཕྱོགས་པའི་པཎྜིི་ཏ་མའི་ཁལ་ལ་ལྷག་པའི་ལྷས་དངོས་གྲུབ་བྱིན་པ་བཞིན། འདིར་རང་བཞིན་རྫོགས་པ་ཆེན་པོ་ཤེས་རབ་རང་བྱུང་གི་སྒྲོན་མའི་གདངས་འགག་པ་མེད་པའི་རྩལ་སྣང་ནི་རྣམ་པར་ཐམས་ཅད་མཁྱེན་པའི་རྟེན་ཅིང་འབྲེལ་བར་འབྱུང་བའི་ཆོས་དང་ཕྱོགས་ཀུན་ནས་ཉེ་བར་གྱུར་བ་ཡིན་པས་བསྟོད་པའི་ཚིག་ཀྱང་སྐལ་བ་ངན་པའི་གྲོང་ཁྱེར་དུ་མི་འཇུག་
པ་ནི། འདི་ལྟ་སྟེ། །ཨོཾ་སྭ་སྟི་པྲཛྙཱ་བྷྱ། དཔལ་གྱི་ཡོན་ཏན་དམ་པའི་འབྱུང་གནས་ལྷུན་གྲུབ་ཞི་བ་གང་ཆེན་མཚོ། །མཐའ་དང་བྲལ་བའི་མུ་ཁྱུད་གསར་པ་ཀུན་གསལ་ལམ་གྱི་རྗེས་སོང་བ། །ཡང་སྲིད་མེད་པའི་ཆོས་རྣམས་མ་ལུས་གཞོལ་འགྲོའི་གདོང་གི་རི་མོ་བཞིན། །བརྟན་པ་བྲལ་བའི་ངང་ཚུལ་འདི་ནི་སངས་རྒྱས་རྣམས་ཀྱི་ཁྱད་པར་ཆོས། ༡།དེ་ཉིད་འཐོབ་བྱེད་མཐོང་དང་སྒོམ་ལམ་རྣོ་དབལ་མཚོན་གྱི་གདེངས་ཀ་ཅན། །གཉིས་སུ་བགྱི་དང་ཀུན་ཏུ་རྟོག་པའི་དྲྭ་བ་གཅོད་བྱེད་བདེན་པའི་གསུང་། །ཞི་གྱུར་ཆགས་བྲལ་དམ་པའི་ཆོས་ནི་སོ་སོ་ཡང་དག་རིག་བཞིའི་དངོས། །ཀུན་རྫོབ་མཚན་མའི་ཆོ་ག་མ་ལུས་འགོག་བྱེད་ཁྱོད་ལས་གཞན་ཡོད་མིན། ༢། རྟག་ཆང་སྨྲ་ལ་ཁྲོ་བ་སྤངས་པའི་སྡང་ཞེན་མི་བཟད་གཙུག་ཕུད་ལྡན། །རིག་དང་གྲོལ་བའི་བློ་གྲོས་གཏེར་གྱི་རལ་པའི་ལན་དུ་གཡོ་བ་ཡང་། །མཚམས་སྤྲིན་གསར་པས་བླ་རྣམས་བསྒྲིབས་ཏེ་དུལ་བའི་ངང་ཚུལ་ལྷུར་བྱེད་པ། །བསྟན་པ་རྒྱ་མཚོའི་རྩ་ལག་གཅིག་གྱུར་རིན་ཆེན་གསུམ་ལ་སྐྱབས་སུ་མཆི། ༣། འགྲོ་ཁམས་བྱང་གྲོལ་ས་བོན་བསྐྱེད་བསྲིང་སྙན་ཚིག་དཔྱིད་ཀྱི་རྒྱང་བླུའི་སྒྲས། །དགེ་ཚོགས་བྱང་ཆུབ་མྱུ་གུར་སྨིན་བྱེད་ཤིན་ཏུ་རྣམ་བཀྲའི་འོག་བག་ཅན། །ལེགས་བྱས་སྤུ་སྡུག་ཚོན་གྱིས་བསྡེབས་པའི་སྒྲོག་ཤོག་ཟླུམ་པོར་གཡོ་བའི་གར། །མུ་མཐའ་མེད་པའི་སྤྲུལ་བསྒྱུར་འདི་ནི་སྲིད་དང་ཞི་བའི་གྲོང་ན་མཛེས། ༤། རིགས་ཅན་གསུམ་གྱི་གདུལ་བྱའི་རྣམ་རྟོག་གངྒཱའི་ཀླུང་གི་བྱེ་མ་སྙེད། །ཐེག་པ་གསུམ་གྱི་ཆོས་ཀྱི་འཁོར་ལོའི་ཟ་མ་ཏོག་ཏུ་རྒྱས་བཏབ་ནས། །སྐྱེས་བུ་གསུམ་གྱི་ལམ་ལས་དབུགས་འབྱིན་ཐོབ་པའི་ས་མཁན་སུ་ཞིག་ན། །སྐུ་གསུམ་སྟོན་པ་མཆོག་གི་ངོ་བོ་རྡོ་རྗེ་གདན་པས་འཚོའི་བདག༥། ཕྱོགས་བཅུ་རབ་འབྱམས་མཐའ་མེད་རོལ་པ་ལྷ་ཡི་རྫིང་རིང་རབ་སོང་བ། །དེ་དེའི་རྡུལ་གཅིག་སྟེང་གི་རྡུལ་སྙེད་ཞིང་ཁམས་རྒྱ་མཚོར་བཀོད་པའི་ཁྱོན། །བྱོན་དང་འབྱོན་འགྱུར་འཚོ་ཞིང་གཞེས་པའི་མངོན་ཤེས་དྲུག་ལྡན་སངས་རྒྱས་དང་། །དབང་
བཅུ་ལྡན་པའི་སེམས་དཔའ་རྣམས་ཀྱིས་འདི་ནི་བརྗོད་པ་དོན་ལྡན་མཛོད། ༦། གང་ཞིག་སྟོན་གྱི་ཟླ་བའི་སྤུན་ཟླ་བསོད་ནམས་དམ་པའི་མུ་ཁྱུད་ནང་། །གནས་སྐབས་མཐར་ཐུག་བསྔོ་བྱའི་སྨོན་པ་རི་དྭགས་གཞོན་ནུའི་ལང་ཚོ་ཅན། །སྲས་བཅས་རྒྱལ་བའི་བདེན་དབང་སྤྲིན་ལམ་སྙན་དངགས་དམ་པའི་ཤིང་རྟར་བརྟེན། །དེ་ལ་དབྱངས་གཅིག་ཁོ་ནའི་ངེས་པས་མཐུན་འགྱུར་རོལ་མོ་དར་དིར་སྒྲོབ། ༧།འཁོར་བ་རྒྱ་མཚོར་སྐྱེ་བའི་འཁྲི་ཤིང་བཙུགས་པའི་རྣམ་གྲངས་དེ་སྙེད་ཀུན། །གཞན་དབང་ཉིད་དུ་ཡོང་ཡེམ་བཟུང་གྱ་གྱུའི་མཚོན་གྱིས་མ་བཞར་བའི། །གཅིག་ཏུ་རྣམ་པར་དཀར་བའི་ལས་ལམ་བྱུང་དང་འབྱུང་འགྱུར་ཐམས་ཅད་ཀྱང་། །ལེགས་པར་བྱས་པའི་རྣམ་དཀར་འདི་དང་གཉིས་སུ་མ་ཡིན་མཛའ་བར་བྱེད། ༨།འདི་ན་བསོད་ནམས་བདུན་གྱི་འདུན་པའི་སྔོན་ན་དལ་འགྲོ་ཁྱུང་སྔོན་སྐྱེས། །དགེ་བའི་ཆོས་རྣམས་མ་ལུས་སྡུད་བྱེད་ཡན་ལག་བདུན་གྱི་ཤིང་རྟ་ལ། །ཉེས་བྱས་མ་ལུས་བསྐམས་པར་བྱས་པའི་ཁུར་གྱིས་དུབ་གང་ངལ་བསོ་བར། །དབུགས་འབྱིན་ཐོབ་ཅེས་གཏམ་དུ་གླེང་བ་འདི་ཡང་བརྗོད་པ་དོན་དང་ལྡན། ༩། ཕྱག་འོས་རྣམས་ཀྱི་སྤྱན་སྔར་མཆིས་པའི་ལང་ཚོའི་འཁྲི་ཤིང་གཞོན་ནུ་མ། །ལྷ་ཆེན་འཕྲུལ་དགར་མངོན་དུ་བརྫུ་བའི་ཉམས་དང་འགྱུར་བ་ཟད་མི་ཤེས། །ཀུན་ཏུ་བཟང་པོའི་ཏིང་འཛིན་སྒྱུ་མ་རི་མོ་མཁན་གྱི་བློ་གྲོས་ལ། །མ་མཇེད་འདི་ཡང་སྣོད་དུ་ཆུང་ཞེས་གྱ་ནོམ་མཆོད་སྤྲིན་སྤྲོ་ལ་བྲེལ། ༡༠། ཞོ་འཐུང་རུས་པའི་མཚོན་གྱིས་འབིགས་པར་མ་ནུས་ཤིང་། །གངྒཱའི་ཀླུང་རྒྱུན་ཡོངས་ཀྱི་ཉེ་རེག་ངལ་བྱེད་པའི། །བཅས་དང་རང་བཞིན་ཁ་ན་མ་ཐོས་སྒྲིབ་བྱེད་འདིས། །ཐར་བ་ཉམས་བྱས་དེང་འདིར་སྟོབས་བཞིའི་ཆོ་གས་སྨད། ༡༡། ལྷག་པའི་བསམ་པ་ག་བུར་ཐིགས་པ་འཛག་པ་དེས། །སྲིད་ཞིའི་དགེ་ཚོགས་ཀུན་ལ་ཞེན་པའི་མཐུ་ཡོད་ན། །འདུན་པ་གཅིག་གིས་གཞན་གྱི་ལེགས་བྱས་དཔྲོག་ནུས་པ། །རྗེས་སུ་ཡི་རང་སྒོམ་པའི་ཕ་མཐའ་སུ་ཡིས་བགྲང་། ༡༢། སྤངས་རྟོགས་ཡོན་ཏན་བལྟར་མི་མངོན་
པ་དེ་སྲིད་དབེན་པར་རབ་བསྔགས་མོད། །རྒྱལ་རྣམས་ཐེག་དམན་མཆོག་ཏུ་འཛིན་མིན་ཞི་བར་གཞོལ་ལྟ་གལ་ཞིག །བདུན་ཕྲག་བདུན་དུ་སྤྲོ་བ་ཞེ་ནས་བསྐུལ་བའི་བསོད་ནམས་འཕེལ་ཕྱིར་ན། །འདིར་ཡང་ཚངས་དང་དབང་པོའི་རྗེས་སུ་ཆོས་འཁོར་བསྐུལ་ལ་སྐྱོ་བ་མེད། ༡༣། གང་ཞིག་སེམས་ཅན་ཡལ་བར་འདོར་བའི་བརྟུལ་ཞུགས་ཡོང་ཡེར་མ་བཟུང་བཞིན། །མྱ་ངན་འདའ་བ་ཆོས་སྐུའི་མཚན་ཉིད་སྟོན་ལ་རབ་ཏུ་དགོངས་པའི་ཕྱིར། །དེ་ལས་གཞན་དུ་རྣམ་པར་འཁྱམས་པའི་འགྲོ་བ་དག་ལ་སླར་གཟིགས་ནས། །བཞུགས་སུ་གསོལ་བ་འདེབས་པར་བྱེད་དང་བདག་ཉིད་གྲོས་སུ་མཐུན་པ་ཡིན། ༡༤། འདི་ན་ཞིང་བསམ་སྦྱོར་བ་དག་པའི་དབྱིག་འཛིན་ཁྱོན། །ལྷ་ཡི་འཁྲི་ཤིང་མནྡཱ་ར་བའི་ཡོངས་བསྔོ་ནི། །ཡོན་ཏན་མི་ཟད་དཔལ་གྱི་དུམ་བུའི་ལང་ཚོ་ཅན། །རྣམ་པ་ཀུན་ནས་ཐམས་ཅད་གཟིགས་པའི་འབྲས་བུར་སྨིན། ༡༥། རིང་མོ་ཉིད་ནས་སྔ་འགྱུར་བསྟན་པ་དགའ་བས་བརྒྱན། །འདོད་ཆགས་ཟས་པས་འགེགས་པར་རྩོམ་འདིར་དེ་བླག་ཅན། །གང་གི་ཡིད་ལ་ཟུག་རྔུའི་ཚེར་བ་སྟེན་བྱེད་པའི། །ལས་དང་དེ་ཡི་རྟོགས་པ་བརྗོད་འདི་དོན་ལྡན་ཡིན། ༡༦།གང་ཞིག་ལེགས་བྱས་ཡི་གེའི་འཛུམ་གྱིས་བསུས་པ་དེ་ཡི་བཞིན་རས་ལ། །གཅིག་ཏུ་དགའ་བའི་ཆོམ་རྐུན་ཆེན་པོས་གདོན་མི་ཟ་བར་བཏབ་པའི་ཡིད། །གཏོང་ལ་གོམས་དང་ལས་ཀྱིས་འབྲེལ་བ་དོན་ལྡན་ཉིད་དུ་གང་གིས་ན། །སྙན་དངགས་དམ་པའི་སྲད་བུ་འདི་ཡིས་ལན་བརྒྱར་བཙོམས་པའི་གྲོགས་སུ་བྱེད། ༡༧།གཡོ་སྒྱུའི་གཏམ་དང་བཀྱལ་བའི་ཚིག་ནི་ཇི་ཙམ་འབད་ཀྱང་གཞན་དབང་ཅན། །དེ་ཉིད་སྤངས་ལས་དྲང་སྲོང་ངག་གི་མཚོན་ཆ་རྣོན་པོར་བརྡར་བ་དང་། །རིག་སྔགས་གྲུབ་པའི་གཙུག་ཏོར་ཅན་གྱི་བདེན་པའི་ཉི་མ་འོད་པོ་ཆེས། །དེ་རིང་བདག་གིས་ཇི་ལྟར་སྨོན་པའི་སྙིང་པོ་ཁུར་དུ་ལྕི་བར་མཛོད། ༡༨། ཕྱོགས་བཅུའི་བདེ་གཤེགས་སྲས་དང་སློབ་མར་བཅས་པ་ཡིས། །ཐེག་པ་གང་ལས་བྱང་ཆུབ་སྙེ་མར་རབ་སོང་དང་། །སོ་སོ་སྐྱེ་བོའི་ཀུན་གཞིའི་ཁམས་ལ་བཅས་རང་གི། །རྣམ་པར་དཀར་
བའི་ས་བོན་ཇི་སྙེད་ཡོད་པ་ཀུན། ༡༩། དེང་འདིར་རྗེས་སུ་ཡི་རང་འཛུམ་རླབས་མུ་ཏིག་གསར་བའི་དོ་ཤལ་ནི། །ཆེད་དུ་བྱ་བ་ཡོངས་བསྔོའི་ཆོ་གར་རབ་ཏུ་མཁས་འདིའི་མགུལ་པ་རུ། །མཛིན་པར་ན་པར་མཛེས་བྱས་དེ་ཡི་བློ་གྲོས་ཀུན་ཏུ་བཟང་པོའི་འདུན་ཁང་ན། །ཡོན་ཏན་ཐམས་ཅད་རྣམ་པར་བྱང་བའི་ཆོས་ལས་གཞན་དུ་འཕེལ་མི་སྲིད། ༢༠། འདུས་བྱས་དགེ་ལ་མཆོག་ཏུ་རློམ་པའི་བདེན་ཞེན་དབང་པོའི་མཚོན་ཆ་ནི། །བསིལ་གྱུར་ཞི་བ་བྱང་ཆུབ་དམ་པར་རེག་བྱར་ནམ་ཡང་གཟུང་བ་མེད། །ཆོས་ཉིད་ཚན་པོ་སྤྲོས་པ་ཉེར་ཞི་རབ་ཏུ་མི་གནས་མྱ་ངན་ལས། །འདའ་བའི་གོ་འཕང་གདོད་པའི་འབྲས་བུ་སྟེར་ལ་ནེམ་ནུར་ཡོངས་སུ་སྤངས། ༢༡། འགྲོ་བ་ལམ་རབ་ཉམས་པའི་ཡིད་ནི་ཞི་བྱེད་པ། །ཐུབ་པའི་ལྷག་རྟོགས་བསྟན་པ་རིན་ཆེན་ས་མོས་ཕྲེང་། །སྐྱེས་བུ་གསུམ་མམ་རིམ་པ་དགུ་ཡི་གཞལ་མེད་ཁང་། །སྐྱེ་དགུའི་བསོད་ནམས་ཉེར་འཚོའི་བླ་ན་བརྟན་གྱུར་ཅིག༢༢། ཟབ་དང་རྒྱ་ཆེར་གཏིང་མཐས་མ་གཏུགས་བདེ་གཤེགས་བཀའ། །མ་རྟོགས་གཡང་དང་ལོག་རྟོག་སེམས་ཀྱི་རྣོ་དབལ་མཚོན། །འཕང་མོ་ཉུག་གི་ཁྱོགས་ལ་འདེགས་པའི་དམ་བཅའི་རིས། །འཆོས་སྐྱོབ་དམ་པའི་ཡོན་ཏན་ཆེན་པོས་བསྲུབས་དེ་རྨད། ༢༣། འདི་ན་གངས་ལྡན་རི་བོའི་དོ་ཤལ་གསར་བའི་འཛུམ། །རྒྱལ་བའི་རིང་ལུགས་ས་ཡི་གདུ་བུར་བཞད་བྱེད་པའི། །ཕྲིན་ལས་མི་ཟད་ཟླ་བཞིན་མ་ཡི་དཔེ་བྱད་གཟུགས། །ཆར་ལྡན་དུས་ཀྱི་མཛེས་པ་རྔོམ་ལ་གཅིག་ཏུ་སྨོན། ༢༤། རྩ་བ་སྦོམ་ན་ཀུན་ཏུ་དོན་ཡོད་སོ་སོ་ཐར་བའི་བསླབ་གཞི་སྟེ། །གྲིབ་མེད་པའི་དགེ་ཚོགས་ཡན་ལག་རྒྱལ་སྲས་སྤྱོད་པའི་འདབ་མ་བརྒྱ། །རོ་བཅུད་འབྲས་བུའི་ཡོན་ཏན་མ་སྨད་གསང་ཆེན་ཉིད་དུ་གཡུར་ཟ་བའི། །ཐར་བ་རྒྱ་མཚོའི་ས་མཁན་ལྗོན་པ་ཀུན་ཀྱང་རྩ་བ་བརྟན་ལ་དགའ། ༢༥། རིག་པའི་ཡོན་ཏན་འཆི་བ་མེད་པའི་སྐྱེད་མོའི་ཚལ། །རྒྱ་ཆེན་གཞུང་གི་དགོས་པ་བསྡུ་བའི་སྒྲ་དོན་གནས། །མཚམས་སུ་སྦྱོར་དང་བརྒལ་ཞིང་བརྟག་པའི་
འདྲེན་བྱེད་སྟོང་། །རབ་བགྲོད་རྨོངས་ཆེན་མུན་པ་བསལ་བས་དེང་མཛེས་ཤོག༢༦། རྒྱལ་བས་བདེན་གསུངས་ཕར་ཕྱིན་ལམ་གྱི་གཞལ་བྱའི་ཁྱོན། །འཇལ་བྱེད་ཚད་མའི་གོ་བ་གསུམ་གྱིས་རབ་གནོན་ལ། །ཆོས་ཀྱི་གྲགས་པའི་བློ་གྲོས་མཆོག་གི་ཐ་གུའི་ལྟོ། །ལོག་པར་སྨྲ་བའི་སྟོབས་ལྡན་གཉའ་ན་བརྗེད་གྱུར་ཅིག ༢༧།ཉམས་དང་འགྱུར་བ་སྟོང་དུ་རྫོགས་པའི་ནགས་ཁྲོད་ནས། །སྒྲ་དོན་རྒྱན་གྱི་ལེགས་བྲིས་སྒྲོ་ལྡན་གཙུག་ལག་གཞུང་། །བཅད་ལྷུག་སྤེལ་མའི་ལེགས་བཤད་དབྱངས་སུ་འཚོར་བ་ནི། །མང་ཐོས་སེམས་ལྡན་རླུང་གི་ཤིང་རྟ་མཛེས་གྱུར་ཅིག༢༨། གུར་གུམ་རྒྱས་པའི་ནག་འཚལ་བུང་བས་གང་བ་ཡང་། །འདི་ཡི་དཔེ་ཟླར་འོས་པ་མ་ཡིན་ཚུལ་ཁྲིམས་ཀྱི། །བསུང་ཞིམ་ཕྱོགས་ཀྱི་ཕ་མཐར་སོང་བའི་དགེ་འདུན་སྡེས། །བསླབ་པ་གསུམ་གྱི་གྲང་ཁང་དོག་པོར་བྱེད་ལ་སྨོན། ༢༩། ཤིན་ཏུ་མྱུར་བ་རྡོ་རྗེའི་ལམ་གྱི་ཐེམ་སྐས་ལ། །བསྐྱེད་དང་རྫོགས་པའི་གོམ་སྟབས་གཅིག་གིས་བགྲོད་པའི་མཐུ། །ཚད་མས་མ་ཡིན་ངོ་བོ་ཉིད་གསུམ་གྲུབ་པའི་མཐའ། །སྐུ་གསུམ་འབྲས་བུའི་སྙེ་མ་སྦོམ་པོར་གཡུར་ཟ་ཤོག༣༠། གྲོང་ཁྱེར་མ་ཡི་བདེ་བས་མཚོན་མིན་འཕུར་འགྲོའི་ཐེག་པ་མཆོག་གི་ཟིལ། །བཟོད་པར་མ་ནུས་བརྟན་གཡོའི་ཁམས་ཀྱང་རང་མཚན་འཛིན་པའི་མཐུ་སྨད་ནས། །སྣང་སྲིད་མ་ལུས་བདེ་ཆེན་ཞིང་དུ་འཇའ་དང་འོད་སྐུར་དེངས་པའི་གཏམ། །སྔོན་རབས་རྣམས་ལ་ཡོངས་སུ་གྲགས་པ་ད་དུང་མཐོང་བའི་ཆོས་ལ་གནས། ༣༡། ཐེག་པ་གསུམ་གྱི་བརྗོད་བྱའི་དངོས་པོ་བདེ་གཤེགས་སྙིང་པོའི་བ་དན་ཅན། །ལུང་དང་རྟོགས་པའི་ཀོ་ཏུ་བྷ་ཡི་ཏོག་གི་བློ་གྲོས་རྣམ་པར་མཛེས། །དེ་ཉིད་གང་དུ་རྩ་བ་བརྟན་ལས་འཇིག་རྟེན་ཀུན་ཏུ་བདེ་ལེགས་ཀྱི། །འཛུམ་ཞལ་མནྡཱ་ར་བའི་འདབ་བརྒྱ་གྲོལ་འདི་རྒྱུ་འབྲས་བསླུ་མེད་ཡིན། ༣༢། དེ་འདྲའི་མཐུ་ནི་བདེན་པ་གང་གིས་རྗེས་འགྲོ་ན། །འདི་དང་གཞན་གྱི་ལྗོངས་ཀྱི་ཐིག་ལེའི་དབྱིགས་འཛིན་ཁྱོན། །རྫོགས་ལྡན་གཞོན་ནུའི་དགའ་སྟོན་འབོད་ལ་
ཆས་པའི་འཛུམ། །ཐགས་བཟང་ཚེམས་ཀྱི་སོ་ཞོ་ངོམ་ལ་བྲེལ་བ་བཞིན། ༣༣།དུས་སུ་ཡིད་འོང་རླུང་གི་ཤིང་རྟའི་བླ་རེ་བྲེས། །ཨུཏྤལ་ཡི་སྤུན་ཟླར་གྱུར་བའི་ཆར་ཟིམ་ཉིད། །སྤྲིན་གྱི་ལྟུག་མ་གད་མོར་དགོད་ལས་ཁའི་ཐེགས་མ། །སད་ཞི་མ་རྒད་ཞུན་མས་འབྱུག་པའི་བྱེད་པོར་བསྐོས། ༣༤།ལོ་འདབ་རྒྱས་པའི་ནགས་ཚལ་སྟུག་པོའི་གུར་ཁྱིམ་ཀུན། །བཟའ་ལྡན་འབྲས་བུའི་ཏོག་གིས་རྣམ་མཛེས་འཕྱང་འཕྲུལ་ནི། །རླུང་གཡང་གསར་པའི་བ་དན་ཉིད་དུ་ལྷུན་གྲུབ་པ། །འདི་ནི་འཇིག་རྟེན་གདུང་བ་འགྲོག་སླད་སྤྱོན་པར་བསྐུལ། ༣༥།རྩ་ལྗང་མྱུ་གུའི་འདབ་མ་བརྒྱ་ཕྲག་བརྩེགས་པའི་ཟོལ། །དཔྱིད་ཀྱི་ཕོ་ཉར་མངོན་དུ་བརྫུ་བ་དེ་ཡི་ལུས། །མེ་ཏོག་གསར་པའི་དོ་ཤལ་རྒྱན་དུ་བྱེད་པ་དང་། །ལྷན་ཅིག་ཕུན་སུམ་ཚོགས་པའི་འབྲས་བུ་གཡུར་ཟ་ལྡེམ། ༣༦།གང་ལ་འགལ་བྱེད་དོ་ཟླར་ཆས་པས་འཕྱུང་པོའི་གདོན། །ཚ་གྲང་འབྱུང་བ་གཤེད་དུ་སྡེབ་པ་སྐྱིན་ཐང་གི་ཚེམ་པོས་རྣམ་པར་འཐག་ལ་དགའ་བར་བྱེད་པའི་སེམས། །སྐྱེ་དགུ་རྣམས་ལ་བྱམས་པར་བྱེད་དུ་གནས་འགྱུར་ཤོག ༣༧།གང་ཞིག་གདེངས་ཀ་རབ་ཏུ་གཡོ་བའི་ལྟོ་འགྲོ་རྣམས། །རངས་པ་མ་ཡིན་ཀུན་རྟོག་ཉིད་དང་མི་མཛའ་བས། །ཉལ་འགྲོའི་བུ་མོ་ཆབ་སྒྲ་སྙན་པའི་གླིང་བུ་བསྒྱུར། །རི་ཀླུངས་ནགས་ཚལ་ཕན་ཚུན་འཆོལ་བ་མེད་ལ་སྨོན། ༣༨། མཐོང་བའི་ཆོས་ལ་འཇིག་རྟེན་གང་དུ་བདེ་སྡུག་ལས། །མིག་འཕྲུལ་བཞིན་དུ་སྦྱིན་པར་ནུས་པའི་རྒྱལ་པོ་དག། སྲིད་པ་ལས་ཀྱིས་བསྐོས་པའི་དཔྱ་དང་མངའ་རིས་ལ། །ཆོག་ཤེས་ཐོབ་པའི་རྒྱལ་སྲིད་ཆོས་བཞིན་སྤྱོད་གྱུར་ཅིག ༣༩།འཁོར་ལོས་སྒྱུར་རྒྱལ་གཡུལ་གྱི་འཇིགས་དང་འགྲོགས་པ་མིན། །ཁམས་ཀྱི་རྒྱལ་ཕྲན་བརླང་སྤྱོད་སྨིན་མ་བཅུ་པའི་མཚོན། །རྣོན་པོར་བརྡར་ལས་བདེ་སྐྱིད་རི་བོའི་ངོས་གཟར་བའི། །འཁྲུག་རྩོད་མིང་གི་ལྷག་མར་ཞི་ལ་ནམ་ཡང་སྨོན། ༤༠། གང་དུ་མཐོ་
རིས་བདེ་བ་སྲིད་པའི་ལུས་ཅན་རྣམས། །འཇིག་རྟེན་ཡང་དག་ལྟ་ལ་རབ་གཞོལ་ཕན་ཚུན་མཛའ། །མནར་གྱིས་དགོས་པའི་རྒྱ་ལས་ལུས་སེམས་དབུགས་དབྱུང་དང་། །དགའ་བ་བརྒྱ་ཡིས་མགྲོན་དུ་བཀུག་པའི་གླུ་ལོན་ཤོག༤༡། དེ་ལས་སྙིགས་མའི་རང་སྟོབས་ངོ་ཚའི་གདོང་སྨད་ནས། །བརྐུ་དང་འཕྲོག་དང་གཡོ་སྒྱུའི་ཀུན་རྟོག་བརྟན་པ་བྲལ། །བདག་ཏུ་བཟུང་དང་ནགས་ཀྱི་རི་དྭགས་ལ་སོགས་པ། །མནར་སྤྱོད་འཚེ་བའི་བློ་ངན་རྩ་བ་རུལ་གྱུར་ཅིག༤༢། ཚ་གྲང་འདུ་བ་དགྲ་གཤེད་གྱུར་ལས་ཟུག་རྔུའི་མཚོན། །སྤུ་གྲི་ངར་མའི་དཔལ་ལན་ཆགས་ཉེར་འཚོའི་ལུས། །རིད་ཅིང་ལྡང་བའི་སྟོབས་ཉམས་ཕ་རོལ་འཇིག་རྟེན་དུ། །འགྲོ་ལ་འཇིགས་ཤིང་བླལ་བའི་ཆད་པ་ཕྱིར་དེངས་ཤིག༤༣། རཀྟའི་རླངས་པ་ན་བུན་འཕྱུར་བའི་བཏུང་བ་ལ། །གཅིག་ཏུ་དགའ་བས་མྱོས་པའི་སྡང་མིག་ཟུར་གསུམ་པས། །གཞན་གྱི་སྲོག་ལ་རྣམ་པར་བལྟ་བའི་སྲིན་པོ་དང་། །ཡི་དྭགས་འབྱུང་པོའི་རྒྱུད་ལའང་བྱང་ཆུབ་སེམས་གནས་ཤོག༤༤། གང་ཞིག་མགོ་ཉལ་སྤུ་གྲིས་དབྱུར་དང་བླ་ཡི་གོས། །གང་གི་དོན་དུ་ཡིན་པའི་ཆོ་ག་རབ་བསམས་ནས། །གཉིས་སུ་མེད་པར་གསུང་བའི་བསྟན་པ་རྟགས་ཙམ་གྱིས། །འཛིན་པའི་ཆོས་ལ་ནམ་ཡང་སྤྲོ་བ་ཞན་གྱུར་ཅིག ༤༥།མཁས་རྣམས་བློ་གྲོས་པདྨའི་རྫིང་བུ་གསར་པ་ནི། །ཡང་དག་ལྟ་བའི་ངང་མོས་རྣམ་རྩེན་ཆོས་ཚུལ་ཀུན། །རང་བཞིན་མ་འདྲེས་ཁོང་ན་རྔོམ་ལས་བསླབ་པའི་གནས། །གཅིག་དང་བདག་ལྟན་ཆོག་ཏུ་འཛིན་ལའང་རངས་མི་བྱེད། ༤༦།དེས་ཤིང་དུལ་བར་སྨྲ་བའི་ངང་ཚུལ་ཡང་མཐོང་བས། །འཇིག་རྟེན་ཀུན་ཀྱང་བསྟན་ལ་རབ་དད་ལྷ་དང་ནི། །ལྷ་མིན་གྲུལ་བུམ་མིའམ་ཅི་ལ་སོགས་པ་ཡང་། །དེ་ལ་དགའ་བས་བདེ་སྐྱིད་མགྲོན་པོར་འབོད་ལ་སྨོན། ༤༧།ཉེར་ལེན་ཕུང་པོའི་བདེ་བས་མཚོན་མིན་སྟོང་ཉིད་བདེ་གཤེགས་སྙིང་པོའི་ཁམས། །ལྐོག་གྱུར་
ཆོམ་པོའི་གཞན་དབང་ཉིད་དུ་ཡོད་ཡེར་བཟུང་འདི་མངོན་སུམ་དུ། །གཡོ་བའི་བ་དན་གང་ལས་ཉོང་སན་མིང་ཚིག་ཡི་གེར་འཛུམ་པའི་བཞིན། །ལང་ཚོ་མ་ཡི་དཔལ་སྟུག་དང་འགྲོགས་རྒྱུད་ཀྱི་རྒྱལ་པོའི་ཕྲིན་ལས་ཡིན། ༤༨།སྙན་པར་གྲགས་པ་རྒྱ་མཚོའི་སྐ་རགས་ཕྲ་རྒྱན་དུ། །སྨོན་ལམ་གསར་པའི་མུ་ཁྱུད་ལ་བརྟེན་འཁྲི་ཤིང་ནི། །གུས་པའི་ཡིད་ཀྱི་ཆོ་གར་བཀོད་ལས་ཉན་དང་འཛིན། །འདྲི་དང་ཀློག་དང་ཡིད་ལ་སེམས་པས་གང་གྱུར་ཅིག། ༤༩། མཁའ་སྤྱོད་མིག་ཡངས་གྲོང་ཁྱེར་མ་ལུས་རྒྱུད་ཀྱི་དངོས་པོ་འདིས་མཛེས་ནས། །ལྷས་རྩེན་གནས་དང་རྨི་ལམ་མེད་ཡུལ་དང་བའི་ཤིང་རྟ་མཆོད་སྦྱིན་དགྲ། །འཇུག་པ་བཅུ་པ་ཁྲུང་ཁྲུང་འཇོམས་དང་མཆེ་བ་གཅིག་པའི་གྲོང་ཁྱེར་ཡང་། །གསང་སྔགས་འདི་ཡིས་གདུལ་བར་ཕྲིན་ལས་གསར་པས་སྣང་བྱེད་ཤོག༥༠། ལྷུན་པོའི་དཔལ་དང་པདྨའི་རྩ་ལག་ག་པུར་འཛག། འཇིག་རྟེན་སྣོད་ཀྱི་ཇི་སྲིད་བཟུང་བ་དེ་སྲིད་ནི། །རྒྱུད་ཀྱི་རྒྱལ་པོའི་རིན་ཐང་ཉམས་ཀྱིས་དོགས་པའི་དཔལ། །ནུབ་པའི་ཆོས་ལ་ངོ་ཚ་བྱེད་བཞིན་གསུམ་གྱུར་ཅིག ༥༡།བདག་ཀྱང་བྱང་ཆུབ་སྙིང་པོ་སྲིད་དུ་ཐུབ་བསྟན་ལ། །རྒྱུ་མཚན་ཤེས་པའི་དད་པས་རབ་འཛུག་བསླབ་པའི་གནས། །སྲོག་གི་ཟུངས་སུ་དམ་བཅར་བརྟེན་ནས་ཤེས་བྱ་དང་། །གཞུང་ལུགས་མན་ངག་རིན་ཆེན་སྒྲོན་མར་རྣམ་འབྱེད་ཤོག༥༢། ཕྱིན་དྲུག་ལང་ཚོའི་བྱང་ཆུབ་སྙེམ་གཡུར་ཟ་བ། །བསྡུ་བའི་དངོས་པོ་བཞི་ཡི་བྱེད་པོས་སེམས་ཅན་ལ། །རྟག་ཏུ་འགྱེད་གང་མེ་ཏོག་གཞུ་ཡིས་མ་བཀུག་པའི། །ཕྲིན་ལས་སྲིད་སྒྲུབ་གཞོན་ནུའི་ཉག་ཕྲན་རྗེས་འགྲོར་སྨོན། ༥༣། རང་གཞན་འཚོ་བ་སྲོག་གི་རྒྱན་ནི་གཞན་དབང་ཅན། །གང་ལས་དེས་བྱུང་གསར་པའི་མྱུ་གུ་ནགས་ལ་དགའ། །རྫོགས་པ་ཆེན་པོའི་ཡོན་ཏན་མ་སྨད་སྤྲིན་གྱི་སྒེག །ཕུང་པོ་འཇའ་ལ་རྡུལ་ཕྲན་བཞིན་དུ་དེངས་གྱུར་ཅིག༥༤། གནས་སྐབས་
དོན་གཉིས་མཆོག་གི་ཁང་མཛེས་སྲོག་གི་ཟུངས། །འཚོ་བའི་སྟངས་འཛིན་རྡོ་རྗེའི་ཁམས་ཀྱི་རིན་ཐང་ལ། །ཉམས་པ་མེད་པས་མཐར་བྱེད་དགྲ་བོའི་འདྲེན་བྱེད་ཀྱང་། །ས་ལ་ལྷུང་ནས་རྒྱ་མཚོའི་འོག་ཏུ་ཐིབས་ལ་སྨོན། ༥༥།སུ་ཞིག་གང་ལ་སྐྱབས་སུ་འགྲོ་བའི་ཐལ་མོ་ནི། །སྤྱི་བོའི་ཏོག་ཏུ་མཛེས་པ་ཙམ་ནས་ཡེ་ཤེས་ཀྱིས། །གཟིགས་པའི་དཔག་བསམ་བརྩེ་བ་མཆོག་གི་འབྲས་བུ་ཅན། །རིན་ཆེན་གསུམ་གྱི་གྲིབ་བསིལ་བསྟི་ལ་ཆས་གྱུར་ཅིག༥༦། གྲོང་ཁྱེར་མ་ཡིས་འདོད་སྲེད་བཞིན་དུ་ཕྱོགས་རིས་བྲལ་འབྱམས་པའི་སེམས། །སྙིང་རྗེའི་སྒྱུ་རྩལ་བཅུ་ཕྲག་དྲུག་ལ་ལྷག་པའི་ཕྱག་རྒྱ་བཞི་ཡིས་བཅིངས། །དགའ་བ་ཁོ་ན་མགྲོན་པོར་འབོད་ཀྱང་འདི་དེ་དྲན་པའི་ལྟུང་བྱེད་མིན། །བཏང་སྙོམས་གྲོང་ན་ཀུན་དང་མི་མཛར་མེད་པའི་ཆོ་ག་ཡིད་བྱེད་ཤོག༥༧། དེ་ལས་བསམ་པ་ཐ་ཤལ་ཉིད་ཀྱི་མྱ་ངམ་ཐང་། །རྣམ་པར་འཁྱམས་པའི་འགྲོ་བ་མ་ལུས་གཉིད་སད་དེ། །གཞན་དོན་བསྒྲུབ་ལ་སྙེལ་བ་མེད་པའི་བྱང་ཆུབ་སེམས། །ཐེག་པ་ཆེན་པོ་རི་ཡི་རྣ་བའི་ཁུར་བཟོད་ཤོག༥༨། རྙོག་པའི་ཆ་ཤས་ཀུན་གྱིས་མ་བསླད་ཚུལ་ཁྲིམས་གསུམ། །རང་གི་རིན་ཐང་ཉམས་ཀྱིས་དོགས་ལ་སྐྲག་བྱེད་ཅིང་། །བྱང་ཆུབ་ལམ་ལས་སློང་བ་དབུགས་འབྱིན་སྙམ་པའི་གྲོང་། །དོག་པོར་བྱེད་པས་དབུལ་བ་མིང་གི་མཐར་བྱེད་སྨོན། ༥༩། གང་ཞིག་བརླང་པོར་སྤྱོད་ལ་འདུན་ངས་གཤེ་དང་བརྡེག། བཅིང་དང་མཚར་འདྲུའི་ཆོས་ལ་རབ་ཏུ་མི་མཇེད་པའི། །བཟོད་པ་དམ་པའི་ངང་ཚུལ་མ་སྨད་འཛུམ་པའི་རླབས། །རུས་པའི་གེ་སར་ཁོང་ནས་རྒོད་ལ་སྤྲོ་གྱུར་ཅིག༦༠། དཀར་པོའི་ལས་ལ་སྡིག་སེམས་རྩུབ་མོའི་མེ་ཏོག་མདས། །དབུག་པར་མི་ནུས་གཞན་དོན་སྦྱོང་བའི་གོ་ཆ་ལ། །ཉིན་དང་མཚན་མོར་དབྱེ་བའི་གནས་སྐབས་ཡོད་མིན་ཞེས། །བརྟུན་པ་བསྐྱེད་ལ་འགྲོ་འདིའི་དབུ་རྨོག་བཙན་པར་ཤོག ༦༡།
ཀུན་གཞིའི་མུན་ནག་དགོག་ཏུ་ཆས་པའི་དེ་བཞིན་ཉིད། །ཀུན་བསལ་བསམ་གཏན་ཤར་གྱི་ཐིག་ལེ་གསར་པའི་འཛུམ། །ཀུན་རྟོག་འོག་འགྱུའི་མིག་སྨིན་མདོག་དང་མི་མཛའ་བས། །ཀུན་ཏུ་བཟང་པོའི་གྱ་ནོམ་ཡེ་ཤེས་གཏེར་སྤྱོད་ཤོག ༦༢།བདེན་གཉིས་ཆོས་ལ་རྣམ་པར་དཔྱོད་པའི་ཤེས་རབ་མཚོན། །ཟུག་རྔུ་བསྐྱེད་པའི་བེམ་ཆོས་དཔལ་དང་མི་ལྡན་ཡང་། །རྣོ་བ་རབ་ཀྱི་རྩེ་མོར་ཕྱིན་ལས་སྒྲིབ་གཉིས་དངོས། །གཅོད་པའི་བརྟུལ་ཞུགས་འཇམ་དཔལ་གཞོན་ནུའི་རྗེས་འགྲོར་སྨོན། ༦༣།གང་དུ་བྱང་ཆུབ་སེམས་ཀྱི་མྱུ་གུའི་སྣ་ཚོགས་ཚལ། །ཕྱིན་དྲུག་ལང་ཚོམ་ནཱ་ར་བའི་འཁྲི་ཤིང་ལས། །ལམ་མཆོག་ལྔ་དང་ས་ཡི་ཁྱད་པར་བཅུ་གཅིག་གིས། །ཐུབ་དབང་ཡོན་ཏན་རྒྱ་མཚོའི་འགྲོད་པ་འགོག་ཏུ་མེད། ༦༤།དེ་ལས་དྲན་པ་ཉེ་བར་གཞག་སོགས་རྣམ་བྱང་ཆོས། །བཻ་ཌཱུར་དཀར་པོ་ཏོག་གི་བློ་གྲོས་གྲགས་པའི་འཛུམ། །འགྲོ་ཁམས་བདེ་གཤེགས་སྙིང་པོའི་རྒྱལ་མཚན་རྩེར་ཕྱིན་ནས། །འཁོར་བའི་རྒྱ་མཚོ་སྟོངས་པའི་གནས་སྐབས་མཐོང་གྱུར་ཅིག ༦༥།སྒོམ་པའི་ལམ་ནའང་རྣམ་པ་ཐམས་ཅད་མཁྱེན་པ་ཡིས། །དཔལ་གྱི་དུམ་བུ་ལྐོག་གྱུར་ཆེན་པོའི་གཞན་དབང་ཅན། །སོ་སོ་ཡང་དག་རིག་པའི་ཆོས་ཀྱི་མིག་གྲུང་བོས། །མཐོང་བའི་ངོ་མཚར་ལྟད་མོའི་དགའ་སྟོན་ལ་སྤྱོད་ཤོག ༦༦།དེ་ལས་སངས་རྒྱས་རྣམས་ཀྱི་འོད་ཟེར་ཆེན་པོའི་དབང་། །བསྐུར་ཐོབ་མེད་པའི་ཆོས་ཉིད་རྒྱུད་ལ་རབ་ཞུགས་ནས། །དག་པ་ཉིས་ལྡན་མཚན་དཔེའི་ལང་ཚོར་མ་སྨད་པས། །གཞན་དོན་རླབས་པོ་ཆེ་ཡི་ཤིང་རྟར་བཞོན་གྱུར་ཅིག༦༧། མི་སྡུག་ཉམས་ཀྱི་བཞིན་རས་འཛུམ་པོས་དེར་མ་བལྟས། །སྨིན་མ་ཡོན་པོའི་ལྟ་སྟངས་གཅིག་ཀྱང་མ་བསྒྱུར་བར། །བྱམས་
པའི་ཞལ་སྐྱིན་མཐོང་ན་མི་མཐུན་མེད་པ་དེ། །བརྩེ་དགའི་འཁྲི་ཤིང་གཡུལ་ལས་རྒྱལ་བའི་བ་དན་ཡིན། ༦༨།གང་དུ་སྒྲིབ་གཉིས་སེང་གེ་མོའི་བུ་ལས་གྲོལ་བས། །ཀུན་ཁྱབ་གྲོང་ཁྱེར་འོག་མིན་ཆེན་པོར་ཁྱད་པར་གྱི། །མཚན་དཔེའི་ངོ་མཚར་ལོངས་སྤྱོད་རྫོགས་སྐུར་རྟག་གསལ་ནས། །དག་པའི་གདུལ་བྱས་བཅུའི་དབང་ཕྱུག་དཔལ་དུ་ཤོག༦༩། ཆོས་ཀྱི་དབྱིངས་སོགས་ཡེ་ཤེས་ལྔ་ཡི་ངོ་བོའི་སྐུ། །གནས་དང་གནས་མིན་མཁྱེན་པ་ལ་སོགས་སྟོབས་བཅུ་དང་། །མི་འཇིགས་ཡོན་ཏན་མ་འདྲེས་སོ་སོར་འཆར་བའི་གཞི། །ནང་གསལ་ཆེན་པོ་ཆོས་སྐུའི་བཞུགས་ཚུལ་མཐོང་གྱུར་ཅིག ༧༠།སྐུ་གསུམ་གྲོང་ཁྱེར་གཞལ་དུ་མེད་པའི་ཁྱད་པར་ཆོས། །བསམ་གྱིས་མི་ཁྱབ་ཡོན་ཏན་ཡངས་པའི་དོར་དེར། །རྣམ་ཤེས་ཡེ་ཤེས་ཁམས་སུ་སྦྱངས་པའི་བཙོ་སྦྱངས་གསེར། །རྩིབས་སྟོང་ལྡན་པའི་ཆོས་ཀྱི་འཁོར་ལོར་ལྷུན་གྲུབ་ཤོག༧༡། དེང་ནས་འཁོར་བ་སྲིད་ཀྱི་རིང་ལ་ལས་ཀྱི་ལུས། །ནམ་ཡང་མ་ཡིན་རྣམ་འཕྲུལ་སྣ་ཚོགས་བཟློས་པའི་གར། །གཞན་ཕན་འབའ་ཞིག་སྣ་ཚོགས་ཤིང་རྟའི་སྤུན་ཟླ་ཅན། །འགྲོ་འདིའི་བསོད་ནམས་སྣོད་དང་འཚམ་པར་རྟག་འཆར་ཤོག༧༢། འདི་ལྟར་སྨོན་དང་ཡོངས་བསྔོ་གསར་བའི་བསོད་ནམས་སྟོབས། །ལྷུན་པོའི་དཔལ་ལྟར་ཆེ་བའི་གཏམ་ཙམ་གྲགས་མོད་ཀྱི། །ཞིང་བསམ་དངོས་དང་འཁོར་གསུམ་རྣམ་དག་དགེ་ཆེན་དུ། །གསུངས་པ་དེ་ཡི་ཕ་མཐའ་མཐོང་བ་སུ་ཡང་མེད། ༧༣།ང་ལས་ནུར་གྱུར་སྨོན་ལམ་གང་ལས་གྲུབ་པའི་རྟེན། །རྣམ་པར་གཟིགས་པས་སྲན་རྡོག་བདུན་ལ་དགོངས་པ་དང་། །སྙིམ་པ་གང་བའི་བྱེ་མ་གཏོར་ལས་མྱ་ངན་མེད། །བསོད་ནམས་སྟོབས་ཀྱིས་མངོན་པར་མཐོ་བ་དེ་ཡི་
ཕྱིར། ༧༤།རྒྱུ་དང་འབྲས་བུ་བསླུ་བ་མེད་པའི་འཕྲིན་ཡིག་གི། །བདེན་པ་འདི་ནི་བསོད་ནམས་ཆ་མཐུན་རྩ་ལག་ཏུ། །འགྱུར་བ་མེད་ན་ཞིང་བསམ་དངོས་པོ་དག་པའི་སྟོབས། །ཐར་བ་ཆ་མཐུན་ཉིད་དུ་ནམ་ཡང་བསླུར་མི་སྲིད། ༧༥།དག་གི་ནུས་པའི་ཆུ་ཀླུང་ཤིན་ཏུ་དར་དྲག་པ། །སྡང་ཞེན་ཕྱོགས་སུ་དབའ་རླབས་འཕྱུར་ཞིང་རྒྱུག་པའི་མཐུ། །དམོད་པ་གྲུབ་པའི་དྲང་སྲོང་ཕལ་ལ་ཡོད་གྱུར་ན། །བརྗོད་པ་ཀུན་ཏུ་བཟའི་རྗེས་འགྲོར་སླར་གྲིམས་ཤིག ༧༦།གང་ཞིག་ཚོ་དང་ལས་དང་ཡོ་བྱད་མོས་པ་དང་། །སྨོན་ལམ་རྫུ་འཕྲུལ་སྐྱེ་བའིསྟོབས་དང་ཆོས་དང་སེམས། །ཡེ་ཤེས་ཆེ་སྟེ་དབང་བཅུ་ཐོབ་པའི་སེམས་དཔའ་རྣམས། །དེ་རིང་སྨོན་པའི་མཐུན་འགྱུར་སླད་དུ་བཞེངས་ཤིག་ཀྱེ། ༧༧།སྤྲིན་ལམ་མཐའ་ལ་མུ་ཁྱུ་བྲིཨ་སྤཱི་རབ་དང་། །གྲིབ་མའི་བཞོན་པར་ནམ་མཁའི་ནོར་བུ་མདའ་བྱེད་ཅིང་། །འགྲོ་བ་སླུ་ལ་རིན་ཆེན་རྣམ་གསུམ་ཆས་པའི་རྫུན། །སྨྲ་ན་འཇིག་ཚོགས་ཆོས་ལ་ལྟ་དེའི་ཕྲག་དོག་ཡིན། ༧༨། དེ་ཕྱིར་སྲིད་པ་སླར་ལོག་གྱུར་ཀྱང་གཡུང་དྲུང་བཞིན། །འགྱུར་བ་མེད་པའི་ཡི་དམ་བརྟན་པོའི་ཆོ་ག་ནི། །གདོད་ནས་སྙིང་གི་དབུས་སུ་ཞུགས་པའི་ཏམ་བུར། །མཆོག་གསུམ་བདེན་པ་བསླུ་བ་མེད་པའི་དབྱངས་སུ་སྒྲོག ༧༩།རྒྱ་གྲོ་དྷ་་ལྟར་མཆུ་ཞིང་གབ་པའི་སྐྱེས་བུ་ཆེན་པོའི་སྐུ་མཆོག་མཐོང་ན་མི་མཐུན་མེད། །འཕྲོ་འདུ་འོད་ཀྱི་ཕོ་ཉས་རབ་དཀྲིགས་པ་ལྟར་མི་མངོན་པའི་གཙུག་ཏོར་ནོར་བུའི་འོད་ཆགས་འཛུམ། །མཚར་སྡུག་པདྨོ་བཞུ་བའི་ཛུལ་གྱི་ཕྱག་ཞབས་མཐིལ་དུ་ལན་བརྒྱར་བྱུག་པའི་རི་མོ་ནི། །འཁོར་ལོའི་མཚན་མར་དཔལ་དུ་འབར་བའི་གྲགས་པ་སྙན་པོའི་བཀྲ་ཤིས་གང་ཞིག་དེང་འདིར་
སྤྱོ ༨༠།ཡན་ལག་དྲུག་ཅུར་འཁྱིལ་བའི་དཔལ་གྱི་མགུར། །བརྒྱད་ཁྲི་བཞི་སྟོང་ཉོན་མོངས་ནད་གསོས་སྨན། །ཟབ་དང་རྒྱ་ཆེའི་སྐྱེ་བ་ལྔ་པའི་དུང་། །དགེ་བ་གསུམ་གྱི་བཀྲ་ཤིས་དབྱངས་སུ་ལེན། ༨༡།འགྲོ་འདིར་ཡེ་ཤེས་གཟིགས་པའི་སླད་དུ་དུས་གསུམ་མ་འདྲེས། །གཟུགས་བརྙན་འཛིན་ཡང་མཁའ་བཞིན་ཤིན་ཏུ་རྣམ་མི་རྟོག །ཟབ་ཞི་སྤྲོས་བྲལ་དཔལ་གྱི་བེའུར་ཆོས་དོན་རྒྱ་མཚོ་ཇི་ལྟ་ཇི་སྙེད་ལེགས་འདོམས་ངོ་བོ་ཉིད་ཀྱི་ཐུགས། །འཕགས་པའི་བློ་གྲོས་ལྡན་པ་དག་ཀྱང་དོན་འདི་དཔྱོད་ལ་བ་སྤུའི་འཁྲི་ཤིང་དུས་མ་ཡིན་པར་གཡོ་བྱེད་པའི། །མི་ཟད་རྒྱན་གྱི་འཁོར་ལོའི་རྩི་བས་འདིས་སྐྱེ་དགུ་ཐམས་ཅད་རྣམ་པ་ཀུན་ཏུ་བཀྲ་ཤིས་དཔལ་གྱིས་ཕྱུག་པར་ཤོག༨༢། གང་དག་ཕྱོགས་བཅུའི་རྣམ་པར་འདྲེན། །ཀུན་ཀྱང་བྱང་ཆུབ་སེམས་གཉིས་ཀྱི། །རྩ་བ་བརྟན་ལས་འབྲས་བུའི་མཆོག། སྨོན་ལམ་མཐུ་ཡིས་རང་གིར་མཛད། ༨༣།སྨོན་ལམ་ཕ་མཐར་སོན་པ་ཀུན། །འཁོར་བ་སྲིད་དུ་སེམས་ཅན་དོན། །དཔག་བསམ་ཤིང་དང་རིན་ཆེན་ལྟར། །འབྱུང་བའང་དེའི་མཐུ་ལས་གཞན་མིན། ༨༤།འདི་ན་བྱང་ཆུབ་སྙིང་པོའི་མངལ། །འཛིན་འདོད་གཉིས་གཉིས་སྤྱོད་པ་འགའ། །དགེ་བའི་ཆུ་གཏེར་ལ་དགའ་ནས། །སྨོན་ལམ་འདབ་གཤོག་རྨྱང་བ་ཡོད། ༨༥། དྲན་པའི་སྙེ་མ་གཞོན་ནུ་ཡང་། །མཐོང་ཆོས་ཚངས་དང་དབང་པོའི་བཞིན། །ཡིད་ལ་སྲེད་ཅིང་ཕྱི་མ་ཡི། །བདེ་འབྲས་སླད་དུ་ཅིས་མི་སྨོན། ༨༦།རྒྱ་ཆེའི་གཏོང་བ་སྲིད་པ་འདིའི། །འཚོ་བའི་སླད་དུ་དེང་མ་ལགས། །གྲགས་པའི་བྲག་ཅ་རང་དབང་དུ། །བགྱིད་པའི་འཁྲི་ཤིང་བཙུགས་པའང་མིན། ༨༧།མངོན་མཐོའི་འབྱོར་བ་དཔག་ལས་ཀྱིས། །ཁེངས་པའི་རེ་དབང་བང་རིམ་ཅན། །དེ་ན་བརྟེན་པའི་གནོད་སྦྱིན་དང་། །བདག་ཉིད་གྲོས་
སུའང་མ་མཐུན་ནོ། ༨༨།གནས་སྐབས་རྨི་ལམ་ཤིང་རྟ་ལ། །བཞོན་པར་བྱས་པ་ལྟ་བུ་ཡིས། །སྲོག་དབང་འཚོ་བའི་ཉེར་སྤྱད་ལ། །རྣམ་དཀར་འདི་ནི་འབེམ་དུ་བཅས། ༨༩།ལེགས་བྱས་གང་ལས་བརྩམས་པ་ཡི། །རྟོགས་བརྗོད་རལ་གྲི་རྣ་ལུང་དུ། །འཕོས་པའི་གདེངས་ཀ་འདི་འཛིན་ན། །དཔུང་གི་བྱུ་མཆོག་གཞོན་ནུ་བཞིན། ༩༠།མ་རྟོགས་ལོག་རྟོགས་ཕྱོགས་རྟོགས་ཀྱིས། །གོམ་པ་ཉམ་པའི་གཡངས་རུ། །གྱ་གྱུར་འདོར་བྱེད་མི་བསུན་ཡང་། །བགྲོད་པ་ཅིག་ཅར་ཉིད་དུ་འགོག ༩༡།བསྟན་དང་དམ་པའི་དྲིན་ཡིད་ཀྱི། །ཆོ་གར་བྱས་པའི་འདྲེན་བྱེད་ཟུང་། །ཆེད་དུ་གཉེར་བ་མེད་པར་ཡང་། །རྗི་དབུར་ཁྲུས་ལ་འཇུག་པ་བཞིན། །དེ་དེ་དྲིན་དུ་བཟོ་བ་དང་། །གསང་སྔགས་ཆོས་ཀྱི་བདུད་རྩི་མཆོག། ཡོད་བཞིན་སྤངས་པའི་འགྲོ་བ་ལ། །སྙིང་རྗེ་འཁྲུངས་པའི་ལྷག་བསམ་ཡིན། ༩༣།དེ་ཕྱིར་དབེན་བར་ཞི་བདེའི་གཉིད། །སད་པའི་ཆོ་གར་རབ་བརྩོན་པས། །རྗེས་ལ་ཐོབ་པའི་ཡེ་ཤེས་ཀྱང་། །སྨོན་པའི་ག་པུར་རྡུལ་དུ་འཛག༩༤། གང་ཞིག་འདི་ལའང་བསོད་ནམས་ཀྱི། །ས་བོན་རྒྱུན་ཆགས་དགེ་བ་དེའི། །མྱུ་གུ་བྱང་ཆུབ་སྙེ་མ་རུ། །འཁྲུངས་གྱུར་དེ་སྲིད་སྨོན་ལམ་གྱིས། ༩༥། མོས་པའི་ཕྲ་རབ་རྡུལ་བརྩེགས་ལས། །ནོར་གྱི་བློ་གྲོས་གཏེར་ལྡན་བཞིན། །བསིལ་གྱུར་བྱང་གྲོལ་ཆེན་པོའི་དངོས། །སྨོན་ལམ་མཐུ་ལས་དེར་སྣང་ངོ། ༩༦། གྲགས་པའི་སྤྲིད་ཡིག་མུ་ཁྱུད་ཞབས་ལྡན་མའི། །རྣ་ལུང་ཉིད་དུ་དཔྱང་བར་འོས་པའི་དག། ཐོས་པ་མ་བགྱིས་བདག་ལྟའི་སྤྱོད་ཡུལ་དུ། །འགལ་བ་ཉིད་དེ་ཆོས་ཉིད་མངོན་སུམ་མཐུ། །སྤྲིན་གྱིས་སོ་ཅན་གངས་རིའི་ལ་ཐོད་ཀྱི། །གདེངས་ཀས་མཛེས་པའི་ལྗོངས་འདིར་མཚོ་ལྡན་
མས། །མགྲིན་པར་འཁྱུད་ལས་འཁྱོག་ཚིག་སྨྲ་མཁས་དགུ། །སྨྲ་བར་མི་བརྩོན་ཉམས་སྣང་གོང་འཕེལ་དྲིན། ༩༨།སྡེ་གསུམ་གནས་ལུགས་བརྗོད་པ་བྲལ་བ་ཡང་། །ལོངས་སྤྱོད་འཁོར་ལོའི་རྩ་མདུད་ཏམ་བུ་རའི། །རྒྱུད་དང་གཉིས་མེད་ཞུགས་པས་སྣང་བའི་ཡུལ། །སྐུ་དང་ཡེ་ཤེས་རིག་པ་ཚད་ལ་ཕེབས། ༩༩།བརྗོད་པ་ཐམས་ཅད་སྤངས་པའི་ཕ་རོལ་ན། །ས་ལམ་འབྲས་བུའི་ཆོས་ཀྱི་གཏམ་འདིའང་རྫུན། །ཆོས་སོ་ཅོག་པ་བློ་ཡིས་བརྟགས་པའི་ཕྱིར། །ཟད་པའི་ཆོས་ལ་ངོ་མཚར་ཆེན་པོ་གནས། ༡༠༠། ལེགས་བྱས་གཏམ་གྱི་འགྱུར་བ་རྡམ་པའི་སླད། །ལེགས་མྱོས་མ་ཡི་ལང་ཚོ་ཡི་གེ་རུ། །ལེགས་པར་བརྫུས་ནས་བཀྲུས་པའི་འཁུར་ཚོས་འདིས། །ལེགས་བྲིས་བུ་མོའི་དཔལ་ལ་ཕྲག་དོག་བྱས། ༡༠༡།རབ་སྙན་ཆིག་གི་མནྡཱ་ར་བའི་བཞིན། །འདོད་པའི་སྨིན་མ་བཅུ་ལ་རྟག་དགའ་བ། །ཁོང་ནས་ལན་བརྒྱར་འཛུམ་པའི་མེ་ན་ཀཱ། །སྨོན་ལམ་རྒྱབ་གླུ་ལེན་ལ་ཆས་པ་བཞིན། ༡༠༢། བགྲང་དུ་མི་བཟོད་བསྐལ་པ་རྒྱ་མཚོའི་ཕྲ་རབ་རྡུལ་གྱི་གསེར་ལྡན་མའི། །བླ་མར་བྱ་བ་བྱང་ཆུབ་མཆོག་གི་སྤྱོད་པ་དམ་པའི་མྱུ་གུ་ནི། །རྣམ་པ་ཐམས་ཅད་མཁྱེན་པའི་དཔལ་དུ་ལེགས་པར་འབར་བའི་བསྟན་པ་མཆོག། འགྲོ་འདིའི་བསོད་ནམས་རིན་ཆེན་འབྱུང་གནས་ཉིད་དུ་བརྟན་པའི་བཀྲ་ཤིས་ཤོག ༡༠༣།དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་བ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་ལས། །ཡོངས་སུ་བསྔོ་བ་དང་། སྨོན་ལམ་དམ་པའི་ཁྱད་པར་ལས་འབད་པ་དོན་ལྡན་དུ་བགྱིས་པའི་རབ་ཏུ་བྱེད་པ་སྟེ། སྐབས་དགུ་པ་ཡཱ་ནའི་གྲངས་ཀྱི་བདག་ཉིད་ཅན་གྱིས་རྫོགས་སོ། །རྒྱ་གར་ནུབ་ཕྱོགས་པའི་པཎྜི་ཏ་ཆེན་པོ་ནང་རིག་པའི་དེ་ཉིད་ཁྱད་པར་དུ་སྨྲ་བ་དྲི་མེད་བཤེས་གཉེན་དང་། །དཔལ་ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་ཀུན་དངོས་
པདྨའི་ཞབས་ཀྱི་ཐུགས་རྗེའི་ཟླ་ཟེར་སྙིང་ལ་ཞུགས་པས་སྔོན་གྱི་བག་ཆགས་དུས་ལ་རང་དབང་དུ་བྱེད་ཅིང་། རང་བཞིན་ཐེག་མཆོག་སྙིང་པོའི་ལམ་ནས་རིག་པ་ཕྱོགས་ཡན་དུ་གྲོལ་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་རམ། ཀློང་ཆེན་ནམ་མཁའི་རྣལ་འབྱོར་འཇིགས་མེད་གླིང་པའི་སྡེས། ཐར་བ་ཆེན་པོའི་གྲོང་ཁྱེར་པདྨ་འོད་གླིང་དུ་རྒྱུད་འབུམ་རིན་པོ་ཆེ་གསར་དུ་བསྐྲུན་པའི་དེ་མ་ཐག་པ་ལས་དབུ་བརྩམས་ནས་བྲི་བར་འདུ་བྱེད་པ་ན། འབྲེལ་བར་ལྡན་པའི་དཔྱོད་ལྡན་དྲན་པའི་དབང་པོ་ཀུན་དང་། བྱེ་བྲག་ཏུ་ལྷ་རིགས་རྒྱལ་པོའི་ཁབ་ཏུ་མི་དབང་མཁས་པའི་དབང་པོ། ལྷ་འཇིགས་མེད་དཔའ་བོ་འཆི་མེད་བསྟན་པའི་རྡོ་རྗེའི་གསུང་གིས་ཀྱང་མྱུར་དུ་འགྲུབ་པར་བསྐུལ་ལོ། །གང་ལས་འཕགས་པའི་ཁྱད་ནོར་ཡིད་ཀྱི་ཆོ་གར་བྱེད་པའང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་འདུ་འགོད་ལ་དྲན་པ་ཉེ་བར་འཇོག་པའི་ཡོན་ཏན་སྟོབས་སུ་གྱུར་ནས། སྟོན་གསུམ་རྩི་ཐོག་དང་འབྲས་བུ་སྨིན་པའི་ཚེ་ལེགས་པར་སྦྱར་བའི་ཡི་གེ་བ་ནི། སྦས་ཡུལ་པདྨ་དཀར་པོའི་བོད་སྒོ་འཛིན་པར། འཕྲོག་བྱེད་གཏམ་དུ་གླེང་བའི་གངས་ལྡན་གྱི་རི་བོ་དང་། མ་ཧེའི་རྒྱལ་མཚན་གྱི་གནས་ལ་རང་དབང་དུ་བགྱིད་པའི་རྗེའུ་རིགས་ཀྱི་སློབ་མ་རྒྱལ་བ་ཆོས་མཛད་འཇིགས་མེད་རྡོ་རྗེས་མཛད་པའོ།