ཀུན་བཟང་སྨོན་ལམ་གྱི་འདྲེན་བྱེད་ཊཱི་ཀའི་ཐུར་མས་བསལ་བ།
ཀུན་བཟང་སྨོན་ལམ་གྱི་འདྲེན་བྱེད་ཊཱི་ཀའི་ཐུར་མས་བསལ་བ་བཞུགས། །
ཀུན་ནས་ཀུན་ཏུ་བདེ་གཤེགས་སྙིང་པོའི་ཁམས། །ཀུན་ནས་ཀུན་ཏུ་རྣམ་ཐར་སྒོ་གསུམ་ཀློང་། །ཀུན་ནས་ཀུན་ཏུ་བྲལ་ཐོབ་སྤངས་གྱུར་ནས། །ཀུན་ནས་ཀུན་ཏུ་བཟང་པོའི་རང་བཞིན་ནོ། །དེ་ལ་སྣང་སྲིད་འཁོར་འདས་ཐམས་ཅད་ཀུན༔ གཞི་གཅིག་ཅེས་པ་ནས་སངས་རྒྱས་ཤོག །ཅེས་པའི་རྐང་པ་དང་པོ་ནི་གོ་སླ་ཡང་། གཞི་གཅིག་ལམ་གཉིས་ལ་སོགས་པའི་དོན། གཞི་གཅིག་ནི་ཤིན་ཏུ་རགས་པའི་རྣམ་བཞག་སྟེ། རྫོགས་པ་ཆེན་པོའི་རྒྱུད་ལས་གཞི་བདུན་དུ་བསྟན་ནས་ཀ་དག་གི་ཡེ་གཞི་སྐྱོན་མེད་དུ་འདོད་པ་ཉིད་ཀྱང་། འདིར་ཀུན་གཞི་ལུང་མ་བསྟན་ལ་གཞིར་འདོད་པའི་ཕྱོགས་སུ་བྱས་ཏེ། ལུང་མ་བསྟན་གྱི་ཤེས་པ་དེ་ཉིད་ལ་ལྷག་མཐོང་གི་རྩལ་ཤར་ཏེ། རང་ངོ་རིག་ན་སངས་རྒྱས་ཀྱི་
ལམ་དང་། མ་རིག་ན་འཁོར་བའི་ལམ་སྟེ། དེ་གཉིས་ལ་འབྲས་བུའང་སངས་རྒྱས་དང་། སེམས་ཅན་གཉིས་འབྱུང་བའོ། །དེའི་འགྲོས་ཀྱིས་གཞན་རྣམས་གོ་སླའོ། །ཡང་ཀུན་གྱི་གཞི་ནི་འདུས་མ་བྱས༔ ཞེས་པ་ལ་སོགས་པའི་དོན་ནི། རང་བྱུང་ཀློང་ཡངས་ཀྱི་སྒྲས། ཀ་དག་གི་ཡེ་གེ་གཞི་སྐྱོན་མེད་དུ་ཁས་བླངས་པའི་དབང་དུ་བྱས་ཏེ་བསམ་བརྗོད་བློ་བྲལ་གྱི་ཤེས་པ་དེ་ཉིད་ཀྱི་རང་ངོར་རང་གི་རིག་ན་སངས་རྒྱས་དང་། མ་རིག་ན་སེམས་ཅན་དེ་འཁོར་བའི་རང་བཞིན་ཡིན་པས་ན། སེམས་ཅན་གྱི་དོན་རིག་པར་སྨོན་པའོ། །ཀུན་ཏུ་བཟང་པོ་ང་ཡིས་ཀྱང༔ རྒྱུ་རྐྱེན་མེད་པ་ཞེས་པ་ལ་སོགས་པའི་དོན། ངོ་བོའི་གནས་ལུགས་རྒྱུ་འདི་ལས་བྱུང་བ་དང་། རྐྱེན་འདི་ལས་སྐྱེས་མེད་པའི་གཞི་དོན་རང་བྱུང་དུ་རིག་
པའི་ཚེ། ཕྱི་དོན་དུ་ཡོད་ཅེས་སྒྲོ་མ་བཏགས། ནང་དོན་དུ་མེད་ཅེས་སྐུར་བ་མ་བཏབ། དྲན་མེད་མུན་སྲོས་པ་ལྟ་བུའི་སྐྱོན་དང་དྲིས་མ་གོས་པ། རིག་པ། སོམ། བརྗོད་བྲལ་ཆེད་འཛིན་མེད་པའི་ངང་དུ་གནས་ན། སྲིད་པ་གསུམ་པོ་འདི་གཟུང་འཛིན་གྱི་བློས་བཏགས་བའི་ཕྱིར་དེ་ཉིད་མེ་ཆུ་རླུང་གསུམ་གྱི་སྐལ་བས་ཞིག་ཀྱང་སྔངས་པ་དང་སྐྲག་པ་མེད་ཅིང་མིག་ལ་སོགས་པའི་དབང་ཤེས་དག་པས་འདོད་ཡོན་ལ་ཆགས་པའང་མེད་དོ། །ཅིའི་ཕྱིར་ན་འཇིགས་སྐྲག་དང་ཆགས་སྡང་ལ་སོགས་པ་ནི་གཟུང་ཡུལ་ལ་འཛིན་སེམས་འདྲེས་པ་ལས་སྐྱེས་བའི་ཕྱིར་ན། རྟོག་མེད་ཤེས་པ་རང་བྱུང་ལ༔ རྡོས་པའི་གཟུགས་དང་ཁ་དོག་མེད༔ ཅེས་པས་རྟོག་མེད་ཀྱི་ཤེས་པ་ནི་རང་གསལ་བློ་འདས་ཆེན་པོ་ཡིན་པས།དེ་ལ་ཕུང་པོ་ལྔ་དང་ཚོགས་བརྒྱད་ཀྱི་ཉེར་ལེན་མེད་པའི་ཕྱིར་རོ། །དེ་ལྟ་ནའང་རིག་པ་དེ་སྟོང་པ་ཕྱང་ཆད་མ་ཡིན་པར་སྟོང་བཞིན་དུ་གསལ་ཆ་མ་འགགས་པ་དེ་རྣམ་བྱང་སྐྱེ་བའི་རྒྱུ་ཡིན་པས་ན། རིག་བའི་གསལ་ཆ་མ་འགགས་པ༔ སོགས་ཀྱིས་བརྟེན་པ་ཡེ་ཤེས་ལྔ་དང་རྟེན་གདན་གསུམ་ཚང་བའི་ངོ་བོ་དམ་པ་རིགས་བརྒྱར་སྨིན་པའི་ཕྱིར། དེ་ཕྱིར་གཞི་རིག་འཁྲུལ་མ་མྱོང་༔ ཞེས་སོ། །དེ་ལྟར་འཁྲུལ་མ་མྱོང་བའི་ཐོག་མའི་སངས་རྒྱས་སམ། མི་འགྱུར་རྡོ་རྗེའི་སྐུ་ཞེས་བྱ་སྟེ་དེས་བཏབ་པའི་སྨོན་ལམ་རྐང་བ་བཅུ་གཅིག་གོ་སླའོ། །དང་པོ་སེམས་ཅན་འཁྲུལ་བའི་རྒྱུཿ གཞི་ལ་སོགས་པའི་
དོན་ནི་སྤྱིར་གཞི་ཞེས་བྱ་བ་དོན་ལྔ་ལ་འཇུག་ཀྱང་། འདིར་སྲིད་པ་ཀུན་ཏུ་སྦྱོར་བ་གཉིད་འཐུག་པའམ་སེམས་དྲན་མེད་ལུང་མ་བསྟན་དེ་ལ་རིག་པའི་མདངས་སམ། གསལ་ཆ་མ་ཤར་བས་ཅི་ཡང་མི་སེམས་པ་སྒོ་ལྔའི་རྣམ་ཤེས་ལྟ་བུ་དྲན་པ་མེད་ཅིང་ཐོམ་ཡོར་རེ་བ་བརྒྱལ་བ་ལྟ་བུ་དེ་མ་རིག་པའི་རྩ་བ་ཡིན་པས་དེའི་ངང་ནས་ཡིད་ཤེས་ལངས་ཏེ་རྟེན་འབྲེལ་བཅུ་གཉིས་ཀྱི་རྒྱུན་ལ་འཁོར་པའི་ཚུལ་དེ་གོ་བདེ་བར་བརྗོད་ན། ང་དང་ང་ཡིས་འཛིན་པའི་ཤེས་པས་བདག་དང་གཞན་དུ་གཟུང་ཡུལ་འཇིགས་པ་ལ་སྔངས་སྐྲག་དང་། བཏང་སྙོམས་ལ་ཟ་ཟི་ཅིར་ཡང་ཤར་བས་དགྲ་གཉེན་དང་ཆགས་སྡང་དང་ཕྱོགས་རིས་ཀྱི་བག་ཆགས་བལྟས་པས་འཁོར་བ་ལུགས་སུ་འཇུག་པ་འབྱུང་བ་སྟེ། འདོད་ཡོན་དང་གཉེན་ལ་ཆགས་པའི་འདོད་ཆགས། དགྲ་ལ་སྡང་བའི་ཞེ་སྡང་། གཉིད་དང་རྨོངས་པའི་གཏི་མུག་ངའོ་སྙམས་པའི་ང་རྒྱལ། གཞན་འབྱོར་ལ་སྡང་བ་ཕྲག་དོག་སྟེ། ཉོན་མོངས་དུག་ལྔ་རྒྱས་ཤིང་རྒྱུན་ཆད་མེད་པའི་རྒྱུ་དང་། དྲན་པ་ཉམས་པ་དང་། རང་ངོ་རང་གིས་མ་རིག་པའི་རྒྱུ་རྐྱེན་ལས་བྱུང་བས་ན་རང་ངོ་ཤེས་པ་དེ་ཀུན་ཏུ་བཟང་པོ་རང་བཞིན་ཡིན་པས། སྨོན་ལམ་གྱི་སྒྲས་སྟོན་པའོ། །ལྷན་ཅིག་སྐྱེས་པའི་མ་རིག་པཿ ཤེས་པ་དྲན་མེད་ཡེངས་པ་ཡིནཿ ཞེས་པ་ལ་སོགས་པའི་དོན། ད་ལྟ་དྲན་པ་ཡོད་འཕྲོ་ལ་བརྗེད་འབྱམས་ཀྱིས་ཤེས་བཞིན་
མ་ཡིན་པར་འགྲོ་བ་ནི་ལྷན་སྐྱེས་ཀྱི་མ་རིག་པ་དང་། རྣམ་རྟོག་གི་རྗེས་སུ་བརྟག་དཔྱད་བསམ་གཞིག་བྱེད་པ་ནི་ཀུན་བརྟགས་ཀྱི་མ་རིག་པ་ཞེས་བྱ་སྟེ་འཁྲུལ་གཞི་འདི་གཉིས་ངོ་ཤེས་ན་དྲན་མེད་ཀྱི་མུན་པ་སངས། གཉིས་འཛིན་གྱི་སྣང་བ་ལོག །རིག་པ་རང་ངོ་ཤེས་པས་ཆུ་བརྒྱ་ཟམ་འོག་ཏུ་འདུ་བ་ལྟར་འཁྲུལ་གྲོལ་གྱི་གནད་རྩ་བ་ཆོད་པ་ཡིན་པས་དེའི་ངང་དུ་རིག་པ་རང་ཚོ་གཟུང་དགོས། གལ་ཏེ་མ་གཟུང་ན་ང་ལས་ཕ་གིའམ་ཕ་གི་ལས་ངའོ་སྙམ་པའི་གཉིས་འཛིན་གྱི་བློས་ཞེན་པའི་ཡུལ་ལ་མཚམས་སྦྱོར་བའི་ཚུལ། གཉིས་འཛིན་བློ་ནི་ཐེ་ཚོམ་སྟེཿ ཞེས་པ་ལ་སོགས་པས་བསྟན་པ་ལྟར་རིགས་དྲུག་ཏུ་འཁོར་བའི་རྒྱུ་གཟུང་འཛིན་གྱི་རྣམ་རྟོག །ཁེངས་སེམས་དང་། འགྲན་སེམས་དང་། ང་རྒྱལ་དང་། འདོད་ཆགས་དང་། གཏི་མུག་དང་། དེས་བསྐྱེད་པའི་སེམས་དང་། སེམས་བྱུང་ལྔ་བཅུ་གང་ཤར་ཡང་། འཁོར་བའི་རྒྱུ་ཡིན་པས་ན། དེའི་རྗེས་སུ་མི་འབྲང་། བརྟགས་དཔྱད་མི་བྱ།གཉེན་པོས་མི་འགེག དགག་སྒྲུབ་མི་བྱ་བར། ཤར་ས་དེ་གར་ཅོག་གེ་བཞག་ནས་སེམས་ལ་བཟོ་བཅོས་མི་བྱ་བ་དེ་ལ་ཐ་མལ་གྱི་ཤེས་པ་ཞེས་བྱ་སྟེ། སོ་མ། ངང་བཞག།།རང་བབས། བརྗོད་བྲལ་གྱི་ངང་དུ་དྲན་པའི་སོ་པས་བསྐྱངས་ན། འགྲོ་བ་རིགས་དྲུག་ཏུ་འཁོར་བའི་རྒྱུ་ཟད། འབྲས་བུ་སྟོངས། ཀུན་གཞི་སངས་རྒྱས་དང་མཉམ་པའི་ཐ་སྙད་བཞག་ལ། སེམས་ཅན་རྣམས་
ནི་དྲན་པ་ཉམས་པས་འཁྲུལ། གཟུང་བའི་ཡུལ་ལ་འཛིན་པའི་སེམས་ཆགས་པས། རྨི་ལམ་བཞིན་ཏུ་རིགས་དྲུག་བརྒྱུད་མར་འཁོར་བས་ན་འཁོར་འདས་ཀྱི་སོ་མཚམས་རང་ངོ་ཤེས་མ་ཤེས་ལས་མེད་པར་རིག་པར་བྱའོ། །ཞེས་ཉེ་བར་བསྡུས་སོ། །གཞི་ལམ་འབྲས་བུའི་ཐ་སྙད་ཆོས་ཀུན་ལ། །གྲགས་ཀྱང་རྫོགས་ཆེན་གཞི་ཡི་གནས་ལུགས་ནི། །འཁོར་འདས་གྱེས་མདོ་གཏན་ལ་དབབ་པའི་ཕྱིར། །ཟློས་དང་མ་ཚང་གཞུང་གིས་མི་འཚལ་བས། །བཅུ་བདུན་རྒྱུད་དང་དེ་ཡི་དགོངས་པ་ནི། །ཇི་བཞིན་རྟོགས་ནས་གཞན་ལ་འདོམས་མཁས་པ། །དྲི་མེད་འོད་ཟེར་སྟོང་གིས་ཕྱེ་བའི་གཞུང་། །ཐེག་མཆོག་རིན་ཆེན་མཛོད་ལས་གཞན་གྱིས་མིན། །འདི་ནི་རྡོར་བྲག་སྤྲུལ་སྐུའི་དགོངས་བཞེད་བཞིན། །བློ་དམན་རྣམས་ལ་ཕན་ཕྱིར་གཞུངས་དེ་གའི། །ཚིག་དོན་རང་སར་འབྱེད་པའི་དབང་བྱས་ཏེ། །ཀློང་ཆེན་ནམ་མཁའི་རྣལ་འབྱོར་དེ་ཡིས་སོ།། །།