ཆབ་ཤོག་གི་རིམ་པ་རྣམས་ཕྱོགས་གཅིག་ཏུ་བསྒྲིགས་པ་མིའམ་ཅིའི་ཟློས་གར།
ཆབ་ཤོག་གི་རིམ་པ་རྣམས་ཕྱོགས་གཅིག་ཏུ་བསྒྲིགས་པ་མིའམ་ཅིའི་ཟློས་གར་བཞུགས། །
དངོས་ཅག་ལ་ཞབས་དྲུང་ལྷ་བས་རང་གི་ཁབ་ཏུ་བསྐྱོད་དགོས་གསུངས་པ་ཐོག་མར་བྱུང་བའི་ལན་ཕུལ་བ། འདི་ན་སྣོད་བཅུད་དགེ་མཚན་མ་ལུས་ཕྱུར་བུར་སྤུངས་པའི་ས་འཛིན་ངོགས། །རྩ་མཆོག་མྱུ་གུའི་མངོན་པར་རྟོགས་པས་མིང་གི་ཅོད་པན་འགོད་པ་དང༌། །ཆབ་གཅིག་འཆི་མེད་རིགས་ཀྱི་ཐིག་ལེའི་རྟེན་དང་བརྟེན་པའི་རང་བཞིན་ཅན། །དབང་བཅུའི་དཔལ་གྱི་རྗེས་སུ་ཉེར་འགྲོ་མི་དབང་མཁས་པའི་དབང་པོ་རྒྱལ། །ཞབས་པད་རིན་པོ་ཆེར། གང་གི་ཚེ་སངས་རྒྱས་མང་པོ་ལ་བསྙེན་བཀུར་བ་དང༌། ཐབས་དང་སྤྱོད་པའི་ཚོགས་རྒྱ་མཚོ་འབྱམས་ཀླས་པས་ཆོ་འབྲང་བཙན་པོའི་ཁབ་ཏུ་ཞབས་བརྟན་ལེགས་པར་
བཀོད་པ་ནའང༌། དེ་ཙམ་གྱིས་ཁེངས་དང་བརྟུན་ངས་པའི་ཀུན་འབྱུང་གི་རྣམ་པར་རྟོག་པ་ནི་ཡོངས་སུ་སྤངས། མཚན་དཔེའི་ཟླ་ཞལ་གསར་བའི་ངོགས་སུ་ཐར་བའི་ལམ་དང་རྗེས་སུ་འབྲེལ་བའི་ཡོན་ཏན་རྒྱ་མཚོས་མངོན་པར་ཕྱུག་པར་གཏན་ཆགས་པ་ནས་ཆབ་ཤོག་རིན་པོ་ཆེ་གནང་རྟེན་གྱི་རེ་ཁཱ་ཅན་དང༌། དབང་ཆོག །དཀྱིལ་ཐང༌། ཙཀླི་བཅས་ཉམས་མེད་སོན་པ་བཀའ་དྲིན་དམ་པར་ཆེ་ལགས། འདི་ན་རྒྱལ་དབང་པདྨའི་ཐུགས་རྗེས་འཚོ་བ་གྱི་ན་པའང་དགེ་སྦྱོར་ལ་འབད་ཁུལ་ན་ལགས། མཚམས་ཞུས། དངོས་ཅག་ལ་རྒྱ་ཆེ་བ་དང་ཟབ་པའི་ཡོན་ཏན་གྱིས་ཉེ་བར་གོས་པ་ཞིག་མ་ལགས་མོད་ཀྱིས། དམ་པའི་ཀུན་ཏུ་
སྤྱོད་པ་རྒྱ་མཚོས་བསྲུངས་པའི་མི་དབང་ཉིད་ཀྱིས་དཀར་པོ་རྣམ་པར་འཕེལ་བའི་ས་བོན་གྱིས་གཟིགས་པས་བསྐྱེད་བསྲིངས་པར་ངེས་ན་རྟེན་ཅིང་འབྲེལ་བར་འབྱུང་བའི་གོམ་སྟབས་ཕྱོགས་མི་འཆོལ་བར་བསྒྱུར་བའི་འདུན་པ་ཡིད་ལ་དམ་བཅའི་ཆོ་གང་བཀོད་མོད། དེ་ལྟ་ནའང་དངོས་ཅན་གྲོ་བཞིན་གྱི་ཁྱིམ་ཟླ་ཚེས་མ་ཐག་པར་ཟུང་ཕུ་ལྷ་སྡིངས་སུ་རྗེ་ཐེག་གླིང་པ་ཞི་བར་གཤེགས་པའི་གདུང་རྟེན་རབ་གནས་ལ་བགྲོད་དུ་ཉེ་བ་དང་ཞར་ལ་གནས་ཆེན་དམ་པ་བསྒྲགས་ཀྱི་ཡང་དབེན་དུ་ཏིང་ངེ་འཛིན་གྱིས་འཚོ་བ་དོན་དུ་གཉེར་བ་དང་བཅས་ཞག་གི་ཕུང་པོ་འགའ་ཞིག་འཐོགས་པའི་སྟ་གོན་གྲུབ་པ་ལགས། ཀུན་རྫོབ་རྟེན་འབྲེལ་གྱི་རྗེས་སུ་སོན་པས་ལོ་གསར་མ་ཐག་པའམ། དེའང་རང་བཞིན་མེད་པའི་ཆོས་ཉིད་ལ་རྩིས་གདབ་མེད་པས་ཚུར་འཁོར་ཟླ་བཅུ་པའི་ནང་ཕྱིན་དག་མཆོག་གི་དགོངས་པ་དང་བསྟུན་པའི་སྔ་འགྲོས་སུ་དུས་གསལ་ངེས་བཅར་གྱི་ཕོ་ཉ་དང་བཅས་བཞེད་པ་བསྐང་ཆོག་པ་དང༌། དུས་སླད་མའི་ཆར་ཡང་བསོད་ནམས་རྒྱ་མཚོའི་སྣང་བརྙན་གྱི་མྱུ་གུ་མཆོག་ཏུ་བརྟན་ཞིང་ཀུན་ནས་དགེ་བའི་ལུགས་ཟུང་གི་ཕྲིན་ལས་བསྙེལ་བ་མེད་པ་ནས་ཐུགས་བརྩེའི་འཆིང་རྒྱས་གཏང་མི་བྲ་བའི་བཀའི་ཕེབས་ཚོགས་ཀྱང་ཆུ་བོ་ཆེན་པོ་པཀྵུའི་ཀླུང་བཞིན་ཞུ་
བ་ཡིན། ཞུ་ཆུང་སྤྱན་སྔར་སོན་པའི་རྟེན་འབྱུང་ལྷ་རྫས་བཅས་ཕུལ།། །།ཞབས་དྲུང་ལྷ་པའི་མཆིད་ལན་གཉིས་པ། འཆི་མེད་དཔལ་གྱི་གྲོང་ཁྱེར་སྐབས་གསུམ་པ། །རི་དབང་རྩེ་ནས་ལྷུང་ལྟ་ག་ལ་ཞིག །གཟུགས་བརྙན་གཉིས་པར་འཆར་བཟོད་ལེགས་བྱས་ཀྱི། །དཔུང་པས་ཐོབ་པའི་ལྷ་དབང་ཁྱོད་གཅིག་རྒྱལ། །ལྷ་གཟིགས་སུ་གསོལ། འདི་ལྟར་བརྟན་གཡོའི་ཆོས་ནི་སྒྱུ་མ་མཁན་གྱི་བྱེད་ལས་དང་མཚུངས་པའི་སྐྱེད་མོའི་ཚལ་ནའང༌། འཆི་བ་སྤངས་པའི་ཆུ་སྐྱེས་གཞོན་ནུ་དཔྱིད་ཀྱི་ཕོ་ཉའི་ལང་ཚོ་དང་འགྲོགས་པའི་ཕྲིན་ལས་ཀྱི་བྱེད་པ་ཆབ་མི་འཚལ་བ་ནས། འཆིད་ཀྱི་བཞིན་བཟང་རི་མོ་མཁན་གྱི་གཟུགས་བརྙན་དུ་འཕོས་པའི་གཏམ་གྱི་བརྗོད་པས་ཡིད་ལ་སིམ་པའི་ངོ་མཚར་ཅི་ཡང་བྱིན་པ་ལགས། འདིར་གནས་ཡུ་བུ་ཅག་ཀྱང་འཚོ་བའི་འདུ་བྱེད་ཉམས་བརྟས་ཤིང༌། འཆི་མེད་གྲུབ་པའི་རི་ངོགས་ནས་དམ་པ་ཆོས་ཀྱི་རྔ་ཆེན་བརྡུང་བའི་སླད་དུ་བགྲོད་པའི་གོམ་སྟོབས་ལྷོད་པོར་བསྒྱུར་བའི་མཆིད་གསལ་གཞོན་ནུའི་ལྕགས་ཀྱུས་བཏབ་པ་གང༌། རི་ཁ་བ་ཅན་ན་ཐེག་པའི་རྒྱལ་པོའི་ཆོས་ཀྱི་སྒྲ་དབྱངས་གནྡྷརྦྷའི་རྒྱུད་མངས་ཀྱི་དབྱངས་སུ་འཆོར་བ་ལ། དུས་གསུམ་གྱི་བློ་མཆོག་རྣམས་ཀྱིས་ཀྱང་ཕྲག་པར་ལྕི་བའི་གླེགས་བམ་དང༌།
རལ་གྲིའི་འཁྲི་ཤིང་འདར་བ་ནུས་པ་རྒྱལ་བ་གཉིས་པ་ཀུན་མཁྱེན་ངག་གི་དབང་པོའི་གསུང་རབ་ལས། རྣམ་གསུམ་ཤིང་རྟ་ཆ་ལག །མཛོད་བདུན་དགོངས་འགྲེལ་དང་བཅས་པའི་ཆོས་ཀྱི་འཁོར་ལོས་གཉུག་མའི་ཁང་བུར་བསྟི་བ་ལ་རེ་ཞིག་བཤོལ་བཏབ་བོ། །རྒྱུ་གང་ལས་མིའི་དབང་པོའི་མཆིད་ཀྱི་ཞུ་ལེན་སྐབས་དེ་དང་དེ་དག་ཏུ་དབུལ་བ་རྔོ་ཐོགས་པར་མ་གྱུར་མོད། འདི་ལྟར་རྒྱལ་རིགས་དྲ་མ་ཆེན་པོ་དག་ནི་རིགས་པ་དང་མ་ཡིན་པའི་གནས་ལ་ལེགས་པར་རྟོག་ཅིང༌། བློ་གྲོས་ཀྱི་དཀྱིལ་ཁོ་ལག་ཡངས་པས་གཤུང་བའི་གནས་སྐབས་ལྟ་ག་ལ་ཞིག །ལྷ་ད་དུང་དགོངས་ཤིག །འདི་ན་བཤུལ་རིང་གི་མགྲོན་པོ་རྩྭ་ཅན་གྱད་ཀྱི་ཡུལ་དང་ཉེ་བ་ལྷོ་འབྲུག་གི་ཕྱོགས་ནས་ལྷགས་པ་དང༌། དངོས་ཅག་གི་གམ་དུ་རང་བཞིན་རྫོགས་པ་ཆེན་པོའི་ཟབ་པ་དང་རྒྱ་ཆེ་བའི་འབྲས་བུ་དོན་དུ་གཉེར་བ་དག་མཆིས་བའི་རེ་བའི་ཤིང་རྟ་ངལ་བསོའི་འབབ་སྟེགས་ལ་བཀོད་ནས་སླར། གནམ་ལོའི་གདོང་པ་ཆུ་ཤེལ་གྱི་དཀྱིལ་འཁོར་ལྟར་གསར་དུ་རྔོམ་པ་ཆོ་འཕྲུལ་ཆེན་པོའི་དགའ་བ་གཉིས་པའི་ཉིན། ལྷ་གཅིག་མཁས་པའི་དབང་པོའི་རྒྱལ་ཁབ་དམ་པར་དྲན་པའི་འདུ་བྱེད་མངོན་དུ་ཕྱོགས་ནས་འདེགས་པའི་དམ་བཅའ་ཡིད་ཀྱི་ཆོ་གར་བཀོད་པ་ལགས་ན། དེ་ཉིད་ཀྱི་སྔ་མར་
ཤུགས་ལྡན་གྱི་བཞོན་པ་ལྔ་དང་བཅས་པའི་མངག་གཞུག་པ་ཁོ་བོའི་གམ་དུ་འཁོད་པའི་སྐབས་དབྱེ་བར་མཛོད་ཅིག་དང༌། ལྷ་སྲས་དམ་པའི་ཞལ་སྐྱིན་ཟླ་བ་འབུམ་གྱི་དཔལ་ཡོན་དང་འགྲོགས་པའི་ངང་ཚུལ་དབང་པོའི་མངོན་སུམ་པར་བལྟ་བ་ལ་གཅིག་ཏུ་འདུན་པ་ལགས། ཞུ་ཆུང་འདེགས་མཚོན་དང་བཅས་ཚེས་བཟང་པོ་ལ་ཕུལ་བ་མཆོག་ཏུ་བཀྲ་ཤིས་པར་གྱུར་ཅིག།། ༈ ལྕགས་ཟམ་སྤྲུལ་སྐུ་རིན་པོ་ཆེ་ལ་ཕུལ་བ། སྐྱེས་བུ་ཆེན་པོ་དེང་གཟིགས་སུ་གསོལ། གང་དུ་གདོང་ཕྱོགས་ཤིང་གུས་པའི་མཆོད་སྤྲིན་ཆེན་པོ་སྤྲོ་བ་ནི་ལྗོན་ཤིང་གི་ལོ་འབྲས་མཆོག་ཏུ་དུད་པ་བཞིན་ནོ། །གསོལ་བར་འོས་པ་ནི། རྨད་དུ་བྱུང་བའི་ཐུགས་བསྐྱེད་ཀྱི་ཤིང་རྟས་དྲངས་པའི་མཚན་དཔེའི་འཁྲི་ཤིང་ནི་རྒུད་པ་མེད་པའི་དཔལ་གྱིས་ཉེ་བར་མཛེས་པ་ཉིད་དང༌། ཕུལ་དུ་བྱུང་བའི་འཕྲིན་ལས་ལང་ཚོ་བླ་ན་གསལ་བཞིན་པ་ནས་བཀའ་ཐ་མ་རིན་ཆེན་མཚམས་ཀྱི་སྤྲིན་པའི་སྤུན་ཟླར་མཛེས་པ། བདེ་བླག་ཏུ་སོན་པས་གུས་པ་དང་སྤྲོ་བའི་རྣམ་འགྱུར་ནི་མདོངས་དང་ལྡན་པའི་ཐོས་འཛིན་དུ་འཁྱོག་པོར་འགྲོ་བའི་རྔ་གསང་གྲགས་པ་ཇི་ལྟ་བའོ། །འདིར་གནས་པའང་རྩ་གསུམ་རྒྱ་མཚོའི་ཐུགས་རྗེའི་གདུགས་ཀྱི་གྲིབ་བསིལ་ལ་ངལ་བཏེག་འཆའ་བའི་རྣམ་པར་གང་
ཡིན་པ་དེའོ། །རེ་ཞིག་འདས་པ་ན་རྒྱུད་ལུང་མན་ངག་ཀུན་གྱི་ཡང་བཅུད་བདེ་གཤེགས་འདུས་པའི་པུསྟ་ཀ་དང་ཆབ་གཅིག་པར་རྣམ་འདྲེན་དམ་པའི་གསུང་གི་གསང་བ་བསམ་གྱིས་མི་ཁྱབ་པ་བྲི་གཞིའི་ངོས་ལ་གཟུགས་བརྙན་གྱི་དམ་བཅར་བཀོད་པ་དེ་འདྲེན་བྱེད་ཀྱི་པད་མཚོར་ལྷུངས་པས་སྲེད་ལྡན་མའི་ཆོམ་རྐུན་སྐྱེས་བུའི་ཡིད་ཀྱི་གྲོང་ཁྱེར་དམ་པར་ཞུགས་པ་ཉིད་དུ་འགྲན་པར་འོས་སོ། །འདིར་དགོངས་ཤིག །ཇི་ལྟར་སྩལ་བའི་བཀའི་མཆིད་ཕྲེང་མནྡཱ་ར་བའི་དོ་ཤལ་མགུལ་བར་མཚོན་ཏེ་སྙིང་ལ་ཡང་དག་བཅང་པ་ལས་འདས་པའི་རང་བཞིན་གང་ཡིན་པ། མྱུར་འགྲོའི་མགྲིན་པ་ལས་ལུ་གུ་རྒྱུད་དུ་གསོལ་བ་དེ་ལགས། ནོངས་པ་གང་ཡིན་པ་མི་འཆལ་པ་ལགས་པས་ཚངས་པར་སྩོལ་བ་ལ་ཅི་གནང༌། དངོས་ཅག་སྲིད་པའི་འཁོར་ལོར་ཡུན་དུ་འཚོ་བའི་རྟེན་འབྱུང་གི་དངོས་པོ་ལྷའི་ཝསྟྲ་དང༌། ནཻ་པ་ལའི་དོང་རྩེའི་ཁུར་གྱིས་ལྕི་བའི་རྟེན་འབྲེལ་གྱི་མཚན་མ་ཡང་གདུང་བས་ཉེན་པ་ཁུ་འཕངས་ཀྱི་གྲིབ་ཏུ་བསིལ་བ་དེ་ཅི་འདྲ་བའོ། །སྙིང་གི་དབུས་སུ་ནི་གསང་ཆེན་སྙིང་པོའི་བསྟན་པ་ཁོ་ན་ཡང་ཡང་ལྷགས་ནས་རྒྱུད་འབུམ་རིན་པོ་ཆེའི་བསྟན་པའི་སྣང་བ་གསར་དུ་སྣང་བར་བྱེད་པ་ལ་ཤིན་ཏུ་ཉེ་བར་ཕྱོགས་པ་ན། བྱམས་པ་ཆེན་པོའི་ཕྱག་རྒྱ་སྙིང་
ལ་ཡང་དག་འཁྱུད་པའི་དངོས་པོ་ངེས་བསྟན་འདི་ཞེས་མཚོན་པའི་གནང་སྦྱིན་གྱི་རིམ་པ་ལྗོན་པའི་བམ་པོ་མཚམས་ཀྱི་སྤྲིན་པའི་བཞིན་རས་ཅན་དང༌། འབྲུ་དཀར་གྱི་ཕུང་པོ་ཡུལ་མ་ག་དྷཱའི་བྲེ་བོ་ཆེའི་ཁལ་དུ་ལངས་པ་སོན་པའི་བཀའ་དྲིན་གྱི་འཁོར་ལོ་ནམ་ཡང་མཐའ་མི་གཏུགས་པ་རྩིབས་ཀྱི་མུ་ཁྱུད་དེ་ཇི་འདྲ་བའོ། །སྨྲ་བའི་དབང་ཕྱུག་ཆེན་པོ་སྒྲོལ་བའི་མགོན་པོའི་ཆོས་འབྱུང་མི་ཤེས་མུན་པའི་འཇོམས་པ་ལ་འཇམ་པའི་གཞོན་ནུའི་རལ་གྲིའི་མཆེད་ཟླར་གྱུར་པ་གང་ཡིན་པའང་དེང་འབུལ་བས་དགྱེས་པར་རྩེན་དུ་གསོལ། གང་ན་ལུས་ཅན་རྣམས་ཀྱི་བསོད་ནམས་མ་ཡིན་པའི་ལས་ཀྱི་འདུ་བྱས་པའི་འབྲུམ་བུའི་ནད་རིམས་ཉེ་ཞོ་མེད་པའི་གནས་སུ་ཕྱིན་པ་མ་གྱུར་པ་དེ་སྲིད་དུ་ཕྱོགས་སུ་རིང་པར་ཅང་ཤེས་ཀྱི་འཐུར་མདའ་གཡོ་བ་ནི་ཡུལ་གཉན་པོའི་བླང་བྱ་མ་ཡིན་ནོ། །འདི་ལ་ནི་ཤེས་བྱར་ལྡན་པ་ཐམས་ཅད་སྐྱེས་བུ་དམ་པ་དེ་དེ་བཞིན་ནོ། །དེ་དེ་བཞིན་ཞེས་སྒྲོག་པར་གདོན་མི་ཟ་བ་ཉིད་དོ། །ཕྱིན་ཆད་ནའང་འཁོར་ལོའི་མཚན་མས་འཁྱུད་པའི་ཞབས་རྡུལ་རྡོ་རྗེའི་ཁྲི་ལ་མོས་པ་མ་བྱོན་གྱི་བར་འཚོ་ཞིང་གཞེས་པའི་རིང་ནས། བསྟན་འགྲོའི་དོན་རླབས་པོ་ཆེ་སྔར་འཁྱུད་བཞིན་གཏང་དུ་མེད་པའི་ཕྲིན་ལས་ཆེན་པོ་དུས་ལས་གཡོ་བ་མི་མངའ་བ་ནས། བཀའི་མཆིད་
ཕྲེང་ཡང་གཞོན་ནུའི་དོ་ཤལ་བཞིན་ཆད་པ་མེད་པར་ཡན་ལག་མཆོག་གི་རྒྱན་དུ་སྩོལ་བར་གསོལ་བ་འདེབས་པ་ཡིན། ཞུ་ཆུང་འདེགས་མཚོན་བཅས་པདྨ་འོད་གླིང་ནས་ཕུལ་པའོ།། །། ༈ ལྕགས་ཟམ་ཕྱག་མཛོད་བློ་གྲོས་དབང་པོས་སྒྲ་རིག་པ་ཁོང་དུ་ཆུད་པའི་གནས་ཚུལ་དང་ཆབ་གཅིག་རྫོགས་པ་ཆེན་པོའི་ཁྲིད་ཉན་དུ། ཁོ་བོའི་མདུན་སར་ལྷགས་རྒྱུའི་ཞུ་འཕྲིན་བྱུང་དུས་གསོལ་བ་སློབ་དཔོན་མཆོག་སྲེད་དབང་པོའི་གཏམ། བློ་གྲོས་མ་ལ་ཡ་ཡི་འཁྲི་ཤིང་རྩེར། །ཤེས་བྱ་འཇའ་ཚོན་རི་མོ་རྣམ་བཀྲ་ཡང༌། །གནས་ལུགས་འོད་མཚན་སྟོང་དུ་འབར་བའི་ཁྲིར། །གཅིག་ཏུ་རིངས་པའི་མདངས་ལྡན་ཀུ་མཱ་རར། །ཐོག་མཐའ་མེད་པའི་ཀུན་འབྱུང་གྲོང་ཁྱེར་ཆེར། །ཤིན་ཏུ་སྨད་པར་འོས་པ་སྡིག་པའི་མངལ། །དཀར་པོ་རྣམ་པར་འཕེལ་བའི་མཐུས་བཤིག་ལ། །ཁྱོད་དང་འཇིག་རྟེན་མེས་པོ་མཚུངས་ན་ཡང༌། །བསྔོ་བ་དམ་པའི་ཞགས་པས་བཅིངས་པའི་ཁྱད། །ལྟར་སྣང་འཇིག་རྟེན་འབྱོར་བས་མ་ཁེངས་པར། །རྣམ་པ་ཐམས་ཅད་མཁྱེན་པའི་གོ་འཕང་ལ། །འཇུག་པར་འདོད་ཁྱོད་དེད་དཔོན་བཞིན་བཟང་དངོས། །ཀུན་མཁྱེན་གོ་འཕང་བགྲོད་པའི་ལམ་སྟེགས་གྲུར། །ཤེས་བྱའི་བ་དན་འཛུགས་པ་རྒྱལ་སྲས་ཀྱི། །འཇུག་ངོགས་དམ་པར་
མ་ཟད་རྨོངས་ཆེན་གྱི། །དྲ་བ་འཇོམས་ལ་ཕུར་བུའི་གྲུབ་མཐར་གྲངས། །དེ་ཕྱིར་གང་ཟག་ཙམ་ལ་མི་རྟོན་པར། །ཆོས་ལ་རྟོན་པའི་རྣམ་ཐར་ལྷུར་བཞེས་ནས། །སྒྲ་དོན་གཙུག་ལག་རྒྱ་མཚོའི་དོ་ཤལ་གྱིས། །སྨིན་དྲུག་བསྙེངས་པའི་གནས་ལ་སྦྱར་དེ་སྤྲོ། །དེ་ལྟ་ན་ཡང་སྒྲ་རིག་ཟླ་བའི་མར། །ཀུ་ཤའི་ཆུན་པོས་རེག་པའི་དཔེས་མཚོན་ཏེ། །ཐུག་པ་མེད་པ་མུ་ཁྱུད་ལ་བསྐོར་བའི། །བརྟུལ་ཞུགས་ཡང་དག་འཇོག་ལ་དབུགས་དབྱུང་འཚལ། །མ་སྦྱངས་རིག་པ་ཨེ་རན་ཌ་ཡི་ཤིང༌། །སྙིང་པོས་སྟོངས་པའི་ཅ་ཅོ་སྒྲོག་པ་ལ། །མཆོག་ཏུ་སྤྲོ་བ་མིན་ཡང་ཐུགས་རྗེའི་སྤྱན། །བདག་ལ་རིངས་པར་གཟིགས་དེར་དངས་བའི་སྐྱེས། །སེམས་ཉིད་ནམ་མཁའི་བུ་མོ་ཡི། །ཟླ་ཞུན་ཁུར་ཚོས་ལ་བསྐུས་ནས། །བརྗོད་པ་སྙན་པར་སྒྲོག་བཞིན་དུ། །ནམ་མཁའ་མཛོད་ཀྱི་གམ་དེར་སོང༌།། །།རྒྱ་རི་ཞབས་དྲུང་ལ་ཕུལ་བའི་མཆིད་ལན། རྣམ་དཔྱོད་ལུས་སྟོབས་བརྟས་པའི་གཉིས་འཐུང་གང༌། །ས་སྲུངས་དབང་པོ་ཐ་ཤལ་ནགས་ཁྲོད་ལ། །འདུན་སར་མི་བྱེད་དགའ་བ་བརྒྱ་ལྡན་གྱི། །ལྷ་ཡི་འདུན་སར་བག་ཕེབས་གཏམ་དེ་སྙན། །འཇིག་རྟེན་མོས་པོའི་བློ་གྲོས་གནམ་རུའི་རྒྱུད། །ཤེས་བྱའི་མཐེབ་ཀྱིས་བཀུག་པའི་ཉག་ཕྲན་མདའ། །ཆོས་དང་སྲིད་ཀྱི་དཔལ་འབྱོར་སྐྱེད་མོས་ཚལ། །
རྒྱ་ཁྱོན་བཀོད་པ་གཞལ་བའི་བྱེད་པོར་བསྐོས། །འཁོར་བ་སྒྱུ་མའི་གཟུགས་ཀྱི་འཁྲི་ཤིང་ལ། །རྨི་ལམ་ཤེས་པ་བཞིན་དུ་ཉམས་མྱོང་བ། །དབང་རྣོན་ཆོས་རྗེས་འབྲང་བའི་ཁྱད་ནོར་ཕྱིར། །རྣམ་པར་དཀར་བའི་ཟོང་དེ་འབད་པས་སྒྲུབས། །འདི་ན་རིན་ཆེན་གསུམ་གྱི་གྲིབ་བསིལ་ནི། །བསྟི་ལ་མངོན་པར་ཆས་པའི་རྣལ་འབྱོར་ཅན། །རང་བཞིན་རྫོགས་པ་ཆེན་པོའི་གནས་ལུགས་དང༌། །ཆོས་ཉིད་མཉམ་པར་སྦྱོར་ལ་རྟག་ཏུ་འདུན། །དེ་བས་ཡང་ཡང་འགྲོ་དང་ལྡོག་པའི་ལས། །རྣམ་པར་ཤེས་པའི་ཁུར་དུ་ལྕི་བ་དེས། །གཉུག་མའི་གྲོང་ཁྱེར་ཉིད་དུ་བརྟན་པའི་གཏམ། །གང་ལས་ཅིག་ཤོས་སྣང་ཆར་གསལ་བ་མེད། །འདྲིས་པར་མིན་བཞིན་བཤེས་པར་གྱུར་པ་ཁྱེད། །ལང་ཚོའི་པདྨོ་སྙིང་ལ་སྤྲོ་བཞིན་པས། །བདེ་གཤེགས་བྱེ་བའི་མཚན་གཟུངས་ཚེ་ཡི་མདོ། །བརྒྱ་ཕྲག་རིམ་གྲོར་བསྐྱེད་ཅིག་ཤིས་པར་འགྱུར།། །།མཚོ་སྣ་དགོན་རྩེ་སྤྲུལ་སྐུའི་ཆབ་ཤོག་ལན་ཕུལ་བ། འཇིག་རྟེན་རྣམ་པར་འདྲེན་པ་སྤྲུལ་བའི་སྐུ་རིན་པོ་ཆེ་སྡེ་སྣོད་གསུམ་པའི་ཞབས་སྟེགས་སུ། མཚན་དཔེའི་ཉིན་བྱེད་བླ་ན་མངོན་པར་གསལ། གཙུག་ལག་རྒྱ་མཚོའི་ཁང་མཛེས་དམ་པར་འཇུག་པའི་བློ་མཆོག་ནོར་བུའི་ཁོ་ལག་ཡོངས་སུ་རྫོགས་བཞིན་པར་གཏན་ཆགས་པ་སྤྱི་སྒོས་ལ་བཀའ་དྲིན་
དམ་པར་གྱུར། གུས་པ་རྡོ་རྗེའི་ལམ་ལ་རྣལ་དུ་འབྱོར་པར་རྗེས་སུ་སློབ་པའང་གཟུགས་ཁམས་འཚོ་བ་སྙོམས་ཤིང་གཞན་ཕན་དུ་རློམ་པའི་འདུན་པ་ཙམ་དུ་ལགས། མཚམས་སུ་གཏམ་བྱ་བའི་གླིང་བུར། རིང་མོ་ཉིད་ནས་སྐྱེས་བུ་ཆེན་པོའི་བློ་མཆོག་ལ་གོམས་པར་རྣམ་པར་དཔྱོད་པའི་འདྲེན་བྱེད་རབ་རིབ་ཀྱིས་ལྡོངས་བ་མ་ཡིན་པའི་མཉན་དུ་འོས་པ་གང༌། ཟབ་པ་དང་རྒྱ་ཆེ་བའི་ཆོས་ཚུལ་རྒྱ་མཚོར་ཕྱོགས་ལྷུང་བྲལ་བའི་གྲུ་གཟིངས་ཀྱི་འཁྲི་ཤིང་བརྟེན་པར་མཁས་པའི་རྣམ་ཐར་བཟང་པོ་གཞར་དུ་མེད་པའི་དཔའ་རླབས་གཡོ་བའི་འཛུམ་དཀར་གྱིས་དངོས་ཅག་ལའང་སྤྱན་རས་ཀྱིས་བཙའ་བ་གཡོ་བས་དནྚིའི་གཏམ་གྱི་དགེ་མཚན་བརྒྱ་ཕྲག་ལྷབ་ལྷུབ་ཏུ་གཡོ་བའི་བ་དན་གྱི་མཆིད་སྒྲ་སྙན་པའི་རི་མོའི་སྣང་བརྙན་རིན་པོ་ཆེའི་རྣ་ཆ་ཅན་སྩལ་བ་ཡིད་མཚོར་རབ་ཏུ་ཞུགས། འབྱུང་དུ་འགྱུར་བའི་གནས་སྐབས་ལའང་བསྟན་པ་རྒྱ་མཚོའི་རྩ་ལག་ཚུལ་ཁྲིམས་རིན་པོ་ཆེའི་ཁང་མཛེས་དམ་པར་འཛམ་བུའི་གླིང་མཛེས་པར་བྱེད་པའི་རྒྱན་དྲུག་དང༌། རྨད་བྱུང་གཉིས་སོགས་རྒྱ་བོད་མཁས་པའི་གཞུང་འགྲེལ་རྒྱ་མཚོའི་ཟབ་པ་དང་རྒྱ་ཆེ་བའི་བརྟུལ་ཞུགས་ཐལ་འགྱུར་དུ་སྒྲོག་པའི་གནས་ལ་བསྙེལ་བ་སྤངས་བའི་ཕྲིན་ལས་ལྷུར་བཞེས་པའི་རྣོ་དབལ་གང༌།
རིགས་པ་མ་ཡིན་པའི་ཅེ་སྤྱང་གི་སྙིང་ལ་ཟུག་རྔུའི་ཚེར་མ་འཛུགས་པའི་དཔྱད་མཁན་གྱི་ཆོ་གར་གྲུབ་ཅིང༌། དམ་པའི་ཆོས་འདུལ་བ་ལ་སྟོན་པས་ལེགས་པར་གསུངས་པའི་གནང་བཀག་དང་རྒྱུད་སྡེའི་གནས་ལ་མཐའ་དྲུག་ཚུལ་བཞིའི་ས་ལམ་གྱི་དབྱིངས་འཇལ་བར་མཁས་པས་མཐའ་བྲལ་ཆོས་སྐུའི་གོ་འཕང་མཆོག་ལ་བདེ་བླག་ཉིད་དུ་སོན་པར་མཛད་པའི་མཆོག་གི་ཕྲིན་ལས་བསྐྱུད་པ་མེད་པ་རང་གིར་བཞེས་པ་ནས་ཐུགས་བརྩེའི་བཀའ་འཆིད་གནྡྷརྦ་རབ་དགའི་གོ་འཕང་གཏམ་གྱི་ཡ་མཚན་གསར་པ་འདྲེན་བྱེད་ཀྱི་ངོར་ཡངས་པར་འཇུག་པའི་རིམ་པའང་རྒྱུན་མི་འཆད་དུ་སྩོལ་བ་ཅི་གནང༌། ཞེས་ཤུལ་དུ་ཞུགས་པའི་ལམ་གྱི་ཁྱོགས་ལ་རྟེན་བཞིན་པ་ནས་སྤྱན་རས་བཙའ་བའི་ལྷའི་རེག་བྱ་དང་བཅས་ཕུལ།། །།གཞུང་སར་ཞབས་བརྟན་གྱི་དཔེར་བརྗོད། ཤྲཱི་མངྒ་ལཾ། གང་ལ་བཤེས་པ་མ་ཡིན་འདུ་བྱེད་གདོན། །རྡོ་རྗེའི་ཁམས་ལ་བཞུ་བཏུལ་གྱིས་ཕམ་པའི། །ངལ་བ་སྟེར་ལ་འོད་མཚན་སྟོང་ཕྲག་བརྒྱར། །འབར་བ་སྐུ་ཡི་དབྱིག་ཏུ་དེང་གྱུར་ཅིག །ཆུ་སྐྱེས་གཞོན་ནུའི་ལྕུག་ཕྲན་གྱི་སོར་མོའི་བྲེ་ཁ་འཛུམ་པར་བྱས་པའི་རང་རྟགས་དང་ནམ་ཡང་བྲལ་ཐོབ་སྤངས་པས་བྱང་ཆུབ་སེམས་དཔའ་ལག་ན་མྱུ་གུའི་མིང་གི་ཅོད་པན་དཔྱངས་ཤིང༌། དམ་པའི་
ཆོས་པདྨ་དཀར་པོ་ལས་རྗེས་བསྔགས་ཀྱི་རྒྱུད་མངས་སྙན་པའི་རོལ་མོར་དཀྲོལ་བ་བཞིན། གངས་རིའི་ཁྲོད་ན་ངུར་སྨྲིག་གི་རྒྱལ་མཚན་སའི་བླ་དོག་པོར་བགྱིད་པ་ཉིད་དུ་བསྟན་ཏེ། རྒྱལ་བའི་བསྟན་པ་རིན་པོ་ཆེ་ཕྲིན་ལས་སྣ་ཚོགས་པའི་བདག་ཉིད་ཅན་ཉེ་འཁོན་མེད་པའི་གནས་ལ་དཀར་འཇམ་དུ་བརྡལ་ནས། ལུས་ཅན་རྣམས་ཀྱི་སྐྱབས་དང་མགོན་དང་དཔུང་གཉེན་གཅིག་པུ་བར་གྱུར་ཏོ་ཞེས་པས་ངེས་པ་བརྟན་པོ་ལ་དྲན་པ་ཉེ་བར་བཞག་པ་གུས་པ་འཕྱོང་རྒྱས་དཔལ་རི་གྲྭ་ཚང་པས་ཞབས་བརྟན་གསོལ་འདེབས་དང་འབྲེལ་བའི་དངོས་འབུལ་མཚོན་བྱེད་ཙམ་དུ། སྐུ་རྟེན་སོགས། བདག་ཅག་གི་དངོས་འབུལ་གྱི་རྔོ་ཐོགས་པ་མ་ལགས་མོད་ཀྱི། ལྷ་རྫས་དང་མེ་ཏོག་གི་མཆོད་པའི་སྤྲིན་དུ་སྤྱན་རས་ཀྱིས་བཙའ་བ་ནས། ཇི་སྲིད་དབུས་འགྱུར་འཚང་རྒྱལ་བ་མ་རྒྱལ་བ་ལས་རྒྱལ་བའི་ཆོས་འཁོར་ཀྱི་ཕྲུ་མས་མ་བཏབ་པ་དེ་སྲིད་རྡོ་རྗེའི་ཆོས་བདུན་གྱི་ཁམས་ལ་རང་གིར་མཛད་ནས་འཚོ་ཞིང་གཞེས་པར་གསོལ་བ་འདེབས་པ་ལགས།། །།ལྕགས་ཟམ་རིན་པོ་ཆེ་ལོ་གསུམ་གནང་རྒྱུའི་མཆིད་ཕེབས་ལེན། རྣམ་འདྲེན་ཡོངས་འདུའི་ལྗོན་པ་མཆོག་གི་ཞབས་པད་རིན་པོ་ཆེར། གུས་པས་ཞུ་བ། དེང་གཟུགས་སྐུའི་ཆོས་སྡོང་
མངོན་པར་གསལ་ཞིང༌། རྡོ་རྗེ་གཟུགས་ཀྱི་བཀོད་པའི་ཕུང་ཁམས་སྐྱེ་མཆེད་གདན་གསུམ་རྫོགས་པའི་འཁོར་ལོ་བདག་གིར་བཞེས་པའི་ཕྲིན་ལས་བླ་ན་མེད་པ་ནས་ཐུགས་དམ་རིན་པོ་ཆེའི་ངེས་གསལ་དང༌། ལྗོན་ཕུར་བམ་པོ་བཅས་མཚམས་ཀྱི་སྤྲིན་པའི་རེ་ཁཱ་རྔོམ་བཞིན་ཕེབས་པ་དངོས་ཞལ་མཇལ་བ་མི་གཉིས་པར་གྱུར། མཚམས་གསོལ། སྔོན་དུ་དེ་ཕྱོགས་ཀྱི་འགྲུལ་འགྲིམ་ལ་མཚམས་ཞུ་འབུལ་འདོད་གདུང་བ་ཆེ་ཡང༌། གློ་བུར་གྱི་བྲེལ་གཡེང་ཁོ་ནའི་སྟེས་དབང་གི་འབུལ་མ་ཐུབ་ཅིང༌། དཔེ་ཆའི་རིགས་བཀའ་གནང་གིས་འཐུས་པ་འདུག་ལགས། ཚོགས་ཀྱི་བདག་པོའི་སྤྱི་བོར་བསྟན་པའི་དཔལ་མགོན་ཞལ་དྲུག་གི་རྗེས་གནང་སོགས་ཀློག་པའི་འཁོར་ལོ་ཤངས་ཆོས་ཀྱི་བླ་བརྒྱུད་གསར་བསྐྲུན་སོགས་བསྟན་འགྲོའི་ཕྲལ་ཡུན་གྱི་རྩ་ལག་ཆེན་པོའི་བྱ་བ་ལས་ཀྱི་འཁོར་ལོ་དང༌། བྱེ་བྲག་ཏུ་ཐོས་བསམ་རྒྱ་མཚོའི་སྙིང་པོ་སྒྲུབ་པ་ནན་ཏན་གྱི་འཁོར་ཆེན་པོར་གཅིག་ཏུ་ཐུགས་གཞོལ་བའི་ཕྲིན་ལས་རླབས་པོ་ཆེའི་གཏམ་གྱི་དགེ་མཚན་རྣ་བའི་དཔྱིད་དུ་འབར་བས་གུས་པ་དང༌། རྗེས་སུ་ཡི་རང་བའི་ཡན་ལག་གི་ལྗོན་པ་ནི་ཤིན་ཏུ་རྨྱང༌། འདི་ཕྱོགས་སུའང་རྒྱལ་ཟླའི་ནང་ར་སྟོན་སྤྲུལ་པའི་སྐུ་དང༌། འབྲུག་བླ་གསར་པ་གཅིག་སོགས་འདུས་པ་སུམ་ཅུ་སྐོར་ལ་སྔོན་དུ་མདོ་དབང་སྨིན་རྒྱས་དང༌།
ད་ལྟ་སྙིང་ཐིག་ཡ་འགའི་ཆོས་འཁོར་སོགས་གཞན་ཕན་དུ་རློམ་པ་འགའ་འགའ་གྲུབ་རྗེས། འདུས་བྱས་ཀྱི་རང་བཞིན་གཡོ་བ། མི་བརྟན་པ་གཞན་དབང་ཅན་གྱི་ཆོས་ཉིད་ལ་ངེས་པར་འབྱུང་བའི་དམ་བཅའ་བརྟན་པོ་ཡིད་ཀྱི་ཆོ་གར་བྱེད་ཅིང༌། ཐར་པ་དང་ཐམས་ཅད་མཁྱེན་པའི་ལམ་གྱི་འགལ་ཟླར་གྱུར་པ་མ་བསྡམས་པ་ དང༌། ལྷོད་པོར་གྱུར་པའི་གཉེན་པོར། ཀླུ་སྒྲུབ་ཞབས་ཀྱིས། དབང་ཕྱུག་ལུས་རྟོག་དྲན་པ་བདེ་གཤེགས་ཀྱི། །བགྲོད་པ་གཅིག་པའི་ལམ་འདི་ཉེ་བར་བསྟན། །དེ་ལ་གོམས་ནས་མངོན་པར་བསྲུང་བགྱི་སྟེ། །དྲན་པ་ཉམས་པ་ཆོས་ཀུན་འཇིགས་པར་འགྱུར། །ཅེས་པ་འདི་ཡིད་ལ་རི་མོར་བྲི་བ་ལ་འདུན་པ་རང་བཞིན་སྙན་འབུལ་དང༌། འབྱུང་དུ་འགྱུར་བའི་གནས་སྐབས་ན། ཁམས་དྲུག་ལྡན་པ་སྤྲུལ་བའི་སྣང་བསྙན་ཟོ་མདོག་བཟང་པོར་འགྱུར་བའི་རྟེན་ཅིང་འབྲེལ་འབྱུང་བདག་གིར་གཞེས་པའི་རིང་ནས། ཟབ་པ་དང་རྒྱ་ཆེ་བ་རྡོ་རྗེའི་ལམ་གྱི་ཐེག་སྐས་ལས་ལམ་ལྔ་དང༌། རིགས་འཛིན་བཞིའི་གོ་འཕང་ཆེན་པོར་བདེ་བླག་ཉིད་དུ་སོན་པའི་ཕྲིན་ལས་རླབས་པོ་ཆེ་དུས་ལས་ཡོལ་བ་མེད་པ་ནས་བཀའི་ཕེབས་ཚོགས་ཀྱང་ནར་མར་སྨིན་པ་མཁྱེན་མཁྱེན་གསོལ་བ་འདེབས་པ་ལགས། ཞུ་ཡིག་སྤྱན་རས་ཀྱིས་བཙའ་བའི་རྟེན་བཅས་
གུས་པས་ཕུལ།། །།ལྷོ་རྒྱུད་བུམ་ཐང་ཕྱོགས་ལ་གནས་པའི་སློབ་བུ་དམ་པ་གང་ལ་ཟློ་བ། འདིར་ངོས་ཅག་ཀྱང་འཚོ་བ་སྙོམས་ལྡན་ནས་སྟོན་པས་ལེགས་པར་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་རྫོགས་པ་ཆེན་པོའི་ཀློང་དུ་དྲན་པ་ཡང་དག་འཇོག་ཅིང་རྣམ་པར་སྨིན་པ་ལ་རེ་བ་མེད་པའི་སྤྱོད་ཕྱོགས་ནས་བསྟན་པ་དང་སེམས་ཅན་གྱི་ཞབས་ཏོག་བསྒྲུབ་པར་འདུན་པས་དད་གཤིན་གྱི་རྫས་ལ་རྟེན་བཞེངས་ཀྱི་རིམ་པ་རྒྱ་ཆེ་བར་སྒྲུབ་སྐབས་ན་མཆིས། ད་ནི་རང་ཅག་ཀྱང་ན་ཚོད་ལས་ཡོལ། འཁོར་བ་རྣམ་གྲངས་མང༌། མིང་གིས་དུ་མར་བཏགས། བྱས་པ་ཟིན་པ་མེད། གཞན་དོན་གྱིས་རང་དོན་ཤོར། རྣམ་དཀར་དང་སྙིང་སྟོབས་རྒྱ་ཆེན་པོའང་སྟོང་ཉིད་ཟབ་མོའི་ཕོ་ཚུགས་ཤོར་བའི་རྒྱུར་མཆིས་ན། གཤིན་རྗེའི་ཕོ་ཉ་ལ་ཡང་ནས་ཡང་དུ་བལྟ། ཁྱེད་ཅག་ཀྱང༌། སྣང་བ་རྟེན་ཅིང་འབྲེལ་འབྱུང་ཅན། གཡོ་ཞིང་མི་བརྟན་པ། རག་མ་ལུས་པ། གང་ལའང་སྙིང་པོ་མ་མཆིས་པའི་མཚན་ཉིད་ཅན་དུ་ཉམས་འོག་ཚུད་ཀྱང༌། ཕུང་པོ་ལྔ་དང༌། དབང་པོ་རྣམས་ཀྱི་ཉེ་བར་ལེན་པའི་རྐྱེན་གྱིས་སྲིད་ལམ་དུ་དུབ་པའི་རྒྱུ་འབྲས་ལ་ནི་སྤྱོད། རང་བཞིན་ཤེས་པའི་དྲན་པ་ལས་གཞན་དུ་བྱས་ཏེ་རྟོག་ཚོགས་པའི་ས་བོན་གྱི་འཁོར་པའི་འཁོར་ལོ་བརྒྱུད་མར་འདུ་
བྱེད་པ་དེ་ལ། གྲུབ་ཆེན་གོང་མའི་རྣམ་ཐར་ལ་ཡང་ཡང་བསམས་ནས་དབེན་གནས་འབའ་ཞིག་ཏུ་ཆོས་ཉིད་ཟད་སར་འཁྱོལ་བའི་སྙིང་སྟོབས་མ་སྨད་པ་ནས་བསྙད་པར་འོས་པའི་ཆོས་ཀྱི་གཏམ་ཡང་གྱིས་ཤིག་གུ། །།གང་དུ་མཆིས་ན་གཡོར་སྟོད་ཀྱི། །ཆུ་བོ་རི་ཞེས་བྱ་བ་ན། །ལོ་ཧི་ཏ་ཡི་ཆུ་ཀླུང་ཡང༌། །ལྕགས་ཞུན་སྐ་རགས་འཆིང་བ་ཡོད། །དེ་ལ་བརྟུལ་ཞུགས་གྲུབ་པ་ཡི། །ཕྲིན་ལས་ཤིང་རྟའི་སྒྱུ་ཐབས་ལ། །རང་གིར་བགྱིད་པའི་དམ་པ་མཆོག །རྡོ་རྗེའི་གནས་ལ་དགོངས་ཤིག་མཆི། །དེ་དེ་ཡིད་ཀྱི་ཆོ་ག་ལ། །ཡང་ཡང་བཀོད་པའི་རི་མོ་ནི། །ཡི་གེའི་གཟུགས་སུ་འཕོས་པ་ལྟས། །བསྙུན་འདྲི་བགྱིད་ལ་ལྷག་པར་ཆས། །ཚོགས་གཉིས་རིན་ཐང་བྲལ་བ་ཡིས། །མངལ་གྱི་འདམ་རྫབ་ལ་ཉོས་པའི། །རྡུལ་བྲལ་པདྨོའི་སྐྱེ་མཆེད་ནི། །མཐོ་རིས་ཡོན་ཏན་བདུན་གྱི་དངོས། །གང་ལ་ཆགས་པའི་རྐང་དྲུག་ནི། །སྡེ་སྣོད་གསུམ་དང་ཕྱི་ནང་གི། །སྔགས་རྒྱུད་རིག་པའི་ཆོ་ག་ཡི། །དབྱངས་ཀྱི་ངེས་པར་བདུན་དུ་སྒྲོག ། འཇིག་རྟེན་སྡིག་པས་བཀབ་པ་ཡི། །ངེས་འབྱུང་བསམ་པ་བརྟན་པོའི་ཟོལ། །དམོད་པ་བོར་བའི་གྲོང་ཁྱེར་གྱི། །སྐྱེད་མོས་ཚལ་ལ་རྣམ་པར་ཞུགས། །ཕྱིན་དྲུག་མ་ཚང་མེད་པ་ཡི། །ཡན་ལག་རྫོགས་པའི་ཐ་གྲུ་ཀུན། །རིམ་པ་གཉིས་
ཀྱི་ཁྲི་གདུགས་ཀྱི། །འགབ་པའི་ཆོ་ག་ཁྱེད་ལ་རྫོགས། །དེ་ལ་ལྷ་དང་དྲང་སྲོང་དང༌། །འཇིག་རྟེན་སྐྱོང་བ་ཀུན་དགའ་ན། །གཞན་འཕྲུལ་དབང་བྱེད་སྡེ་དང་བཅས། །འཁུ་བཞིན་འབྲོས་པའི་གོ་སྐབས་བཙལ། །འདི་ན་གློག་ལྟར་གཡོ་བའི་ཚེར། །ཡིད་བརྟན་མེད་པའི་ཕོ་ཉ་ཡིས། །རྣམ་གཡེང་རབ་ཏུ་རྨོངས་བྱས་པས། །སྤོང་བའི་བརྟུལ་ཞུགས་ལ་དགའ་བ། །གསོག་དང་སྲུང་དང་སྤེལ་བ་ཡི། །ཡིད་ནི་རྣམ་པར་མ་དཀྲུགས་ཀྱང༌། །བྱིས་པ་དག་དང་ལྷན་ཅིག་པས། །ཞི་བདེ་གཞན་དབང་ཅན་དུ་བྱས། །དེ་ལྟ་མོད་ཀྱི་ཆོ་འཕྲུལ་གྱི། །འདུན་ཁང་བརྩིགས་པའི་གནས་སྐབས་ནས། །གྲང་རེག་གིས་ནི་སྨ་བབ་པའི། །འཕྱི་བ་བཞིན་དུ་བཅད་མཚམས་ཐོབ། །འཇིག་རྟེན་གཡོ་ཞིང་འཆིང་བ་དང༌། །ཀུན་འབྱུང་རག་མ་ལུས་པ་སོགས། །སྡུག་བསྔལ་བདེན་པའི་ཆོས་ཉིད་ལ། །སྐྱོ་བཞིན་འཕགས་པའི་ལམ་ལ་དད། །དྲན་པ་དང་ནི་ཤེས་བཞིན་གྱི། །རྣམ་རྟོག་མ་རིག་རྨོངས་བྱས་པས། །ཆོ་ག་མེད་པའི་དགེ་ཆོས་ལ། །དལ་བ་ཆེན་པོའི་གནས་སྐབས་ཐོབ། །སྨིན་དྲུག་གི་ནི་ཟླ་བ་དེར། །དམ་པའི་ཕྱག་ནས་སོན་པ་ཡི། །གསང་རྫོགས་རྒ་ཤི་འཇོམས་པའི་སྨན། །གཤེགས་གསོལ་བགྱིད་པ་དེར་བརྟོལ་ལམ། །དེང་འདིར་ཐོས་དང་བསམ་པའི་མཐའ། །
བསྒོམས་པས་ཉམས་འོག་ཆུད་པའི་གཏམ། །དགོངས་ཤིག་དཔྱད་ནས་འདུས་དུས་ཀྱི། །སྐྱེས་པ་རབ་དང་ལྷན་ཅིག་སྩོལ། །སྐྱེས་བུ་ཆེན་པོ་སེམས་ཅན་དོན། །འཚོ་གཞེས་ཆོ་ག་མཁན་གྱིས་ནི། །ཇི་ལྟར་གསོལ་བའི་གཏན་ཚིགས་བཞིན། །བཞུགས་ན་འགྲོ་འདི་དབུགས་དབྱུང་འཚལ། །དེ་སྐད་དུ་ནི་གསོལ་བའི་ངག །ཡེ་གེའི་འཁྲི་ཤིང་གཞོན་ནུ་མའི། །ཁུར་དུ་ལྕིད་པའི་ལྷ་རྫས་དང༌། །ཆབ་གཅིག་པདྨ་འོད་ནས་ཕུལ།། །།བྱ་བྲལ་བ་སོས་དལ་དུ་མི་འཇོག་པར་གཞོན་ནུ་ལ་ཡོན་ཏན་བསླབ་པར་བསྐུལ་བའི་ཕྲིན་ལས། ས་འཛིན་འབྲས་ཀྱི་ལྗང་པ་ལྟའི། །དཔལ་དང་དགེ་བཅུ་ཚང་བའི་ཡུལ། །གཡུ་བ་ལས་གཞན་གསེར་པ་ནས། །ཆབ་ཤོག་སྙན་པའི་གཏམ་དུ་འཕྲོད། །གང་ནས་བསླུ་བ་སྤངས་པའི་སྐྱབས། །རིན་ཆེན་གསུམ་གྱི་གྲིབ་ བསིལ་ལ། །ཁྱོད་ཅིག་སྤྲོ་བར་ཆས་པའི་གཏམ། །ཐོས་པ་འཛིན་པའི་དཔྱིད་དུ་སྨིན། །གཞོན་ནུའི་ཤེས་བརྩོན་གྱིས་ཐོབ་པའི། །ཡོན་ཏན་མགུལ་པར་དཔྱངས་མོད་ཀྱི། །སྐར་ནག་རྩིས་དང་ཐ་སྙད་གཞུང༌། །སྤངས་ནས་ལོ་ཚོགས་དཔག་མེད་ཐལ། །སྙན་དངགས་དང་ནི་མངོན་བརྗོད་གཞུང༌། །བློ་གྲོས་དམན་ལ་མི་འདོམས་པས། །ངལ་བ་འབྲས་མེད་དེ་ལྟས་ནི། །བདག་ཅག་བསམ་
གཏན་ཉམ་ཉེས་འགྱུར། །ཡི་གེའང་འདུ་བྱེད་ལ་བསྟན་ཡང༌། །རྣམ་འགྱུར་སེམས་ཀྱི་རི་མོ་ཡིན། །དེ་ཕྱིར་སེམས་ཀྱི་ཆོ་ག་ལ། །མ་བསྟེན་ཤེས་བྱ་ག་ལ་སྲིད། །ད་ནི་བཅུ་ཕྲག་ལྔ་པ་ལས། །ལྷག་པར་ཐལ་བའི་རབ་རིབ་ཀྱིས། །ལྡོངས་པས་ཡི་གེའི་གཙང་ཤ་དང༌། །བཅད་ནི་སྤངས་པ་བཞིན་དུ་གྱུར། །དེ་ལྟ་མོད་ཀྱི་གཞོན་ནུ་ཡི། །རྩ་ཁམས་དར་བའི་ལང་ཚོ་དང༌། །རྣམ་རིག་གསལ་བའི་འདུ་ཤེས་ཀྱིས། །བསྒྲིམས་ནས་མཁས་པའི་གནས་ཐོབ་སྲིད། །བདག་ཅག་དབེན་པ་ལ་དགའ་ཞིང༌། །འཆི་བ་ཁོ་ནས་འཇིག་པ་ཡི། །མཐུན་འཇུག་གནས་ལ་སྤྲོ་བ་ཞན། །དེ་ལ་བཟོད་པར་རིག་ཅེས་ཕུལ།། །།གང་ཞིག་མིག་མི་འཛུམས་པ་ན། །ལ་ཐོད་གདེངས་ཀར་མངོན་ཆགས་པ། །ཕོ་བྲང་སྤྲུལ་བའི་སྒྱུ་མ་ཡི། །ཞགས་པས་བཅིངས་པ་དམར་པོ་རི། །སྲིད་པ་འདི་ནི་སྲིད་པ་ལ། །མངོན་བརྗོད་འགོད་པའི་ཕུན་ཚོགས་ཀྱི། །མགོ་བོས་ཡང་དག་གཏུགས་བྱས་པར། །ཁང་བརྩེགས་མིག་སྟོང་ལྡན་པ་མཆིས། །དྲང་སྲོང་ཐུབ་པ་ཉིན་བྱེད་ཀྱི། །ལྡན་གྲོལ་ཅན་ལ་དེ་གནང་བས། །ཐོས་སྒྲོག་བླ་གོས་གསར་བའི་ཚོགས། །སྐྱེད་མོས་ཚལ་བཞིན་དེ་ལ་བསྙེན། །གང་ན་བློ་གསལ་ཁྱོད་གཅིག་ནི། །གཙུག་ལག་གཞན་ལ་བལྟ་བའི་མིག །རི་དྭགས་བཞིན་དུ་སྒྲོས་བྱེད་པས། །རི་བོང་ལྟ་བུ་བདག་ཀྱང་
མཐོང༌། །སྲིད་པ་འདི་ན་རང་དང་གཞན། །བདེའམ་ཅིག་ཤོས་ལས་ཀྱིས་སྤྲུལ། །སྐབས་འཚོས་དཎྜིའི་རྒྱུད་མངས་ནི། །ཅོད་པན་གེ་སར་ལ་དཔྱངས་འོངས། །རྗེ་འོས་ཀློང་ཆེན་རོལ་པའམ། །མདངས་ལྡན་དབྱར་རྔས་དཀྲོགས་པ་བཞིན། །མཉམ་པར་གཞག་པའི་རང་བཞིན་ཡང༌། །འཕྲིན་ཡིག་བརྗོད་པ་སྙན་ལ་ལྡང༌། །སྐར་མདའ་བཞིན་དུ་མི་བརྟན་པའི། །འཚོ་བའི་ཟུངས་འདི་ཡ་མ་བརླར། །མངོན་མཐོང་ངེས་པ་འབྱུང་བའི་དབྱངས། །བདེན་བཞིའི་དཔྱངས་ཐག་ལ་དྲངས་ན། །ཁྱོད་ཀྱི་སོ་སོ་ཐར་པ་ཡི། །བསླབ་ལ་དོན་ལྡན་གནས་ལ་རེག །དལ་བའི་རྟེན་གྱིས་བཟུང་བ་དང༌། །བསྟན་བའི་ལམ་སྲོལ་ལ་ཞུགས་པའི། །འབྱོར་བའི་ཁྱད་པར་དཔྱད་བཟོད་ན། །དབང་པོའི་མངའ་རིས་ཉམ་ཆུང་བྱེད། །འཁོར་བ་ཅེ་སྤྱང་གདུག་པའི་ཁ། །རིང་ན་མཆིས་པ་མ་ལགས་པས། །དམ་ཆོས་དྲན་པ་ཉེར་གཞག་ནི། །བླང་དོར་གནས་སུ་ཡང་དག་ཟུང༌། །དགེ་བ་བཅུ་ཡི་ལས་ལམ་ལས། །ཕྱིར་ཕྱོགས་དེ་ནི་སྙིང་འདར་བའི། །གནས་སུ་མཐོང་ན་བབ་ཅོལ་ལ། །གོམས་པ་མིན་པའི་གནས་ཐོབ་འགྱུར། །གཞི་གསུམ་རྩ་བ་བརྟན་པོ་ཡི། །ཆོ་ག་རྒྱལ་པོའི་ཁབ་དང་ནི། །ནམ་ཡང་མཛའ་གཅུགས་མ་ལགས་པས། །གསོ་སྦྱོང་སེམས་ཀྱི་བསླབ་བ་ཡིན། །ལེགས་པར་བྱས་པའི་ཏམྦུ་ར། །བརྡུང་ན་
གཏོང་ལ་ཁུར་བཟོད་པས། །ཐུབ་པའི་ཞལ་སྐྱིན་ཇོ་ཤཱཀ་ལས། །བསོད་ནམས་དམ་པའི་ཚོང་ཟོང་ཉོས། །རྒྱལ་བའི་ཆོས་ཀྱི་ངེས་བརྗོད་ནི། །བདེན་པ་གཉིས་ལ་རབ་རྫོགས་པའི། །རྣམ་ཐར་བསམ་གྱིས་མི་ཁྱབ་ཀྱང༌། །དཀོན་མཆོག་འདུ་འབྲལ་མེད་པར་ཟུང༌། །ཁྱོད་བློ་རིག་པ་གསར་པ་ཡི། །སྦྲང་རྩི་དོག་པས་གཏམས་པ་ལ། །རྒྱན་དང་མངོན་བརྗོད་རྣམ་འགྱུར་གྱི། །གདུང་བ་ལྡོག་གནས་མང་མཆིས་ཀྱང། །མཐར་བྱེད་སོག་ལེ་རྣོན་པོ་ལ། །འགོམ་པར་མི་ནུས་ངེས་འབྱུང་གིས། །ཕྲོགས་པའི་རྣམ་ཤེས་གཞན་དབང་ཅན། །ཚིག་གི་ཚོགས་པས་སྐྲག་པ་བཞིན། །ཤེས་པར་གྱུར་ཅིག་དེ་རིང་འདིར། །རྒྱལ་བ་སྲས་དང་བཅས་པ་ཡི། །སློབ་པའི་ཡོན་ཏན་ཀུན་རྫོགས་པའི། །དགེ་མཚན་ཆོ་གས་ཁྱོད་ལ་སྲུངས།། །།འཕྱོང་རྒྱས་རྫོང་གི་དེབ་གསར་བཟོའི་འགོ་བརྗོད་བསྐུལ་མ་བྱུང་བ། ཟག་མེད་ཡེ་ཤེས་དམ་པའི་སྣོད་གྱུར་མཚན་དཔེའི་སྐུ་མཆོག་བལྟར་མི་མངོན། །ཡན་ལག་དྲུག་ཅུའི་གདངས་སུ་གདོན་ཀྱང་ཆོས་ཕུང་བརྒྱད་ཁྲིའི་མངོན་རྟོགས་ཅན། །རྟག་ཆད་གདོན་དང་བཤེས་པ་མ་ཡིན་ཟབ་ཞི་སྤྲོས་བྲལ་དབུ་མའི་ཐུགས། །མི་ཟད་རྒྱན་གྱི་འཁོར་ལོའི་བརྗོད་པས་བསྔགས་འོས་དེ་ནི་ས་འཚོའི་བདག །འགོག་དང་ལམ་བདེན་འཁོར་ལོ་གསུམ་དུ་མངོན་བརྗོད་ཀྱང༌། །སྒྲ་དང་བྲག་ཆར་ཡོང་ཡེ་བཟུང་དུ་མི་
སློབས་པ། །མཆོག་དམན་འགྲོ་བའི་རྣམ་པར་རིག་དང་འཚམ་པའི་གསུང༌། །རྒྱལ་བ་རྣམས་ཀྱི་གསུང་གི་མངོན་བརྗོད་ཉིད་དུ་སྒྲོག །ཉེས་སྤྱོད་སྡོམ་པའི་ཁྲིམས་ཀྱི་བླ་གོས་མཚམས་སྤྲིན་གསར་བས་བཙོས་པ་ཡང༌། །དགེ་བའི་ཆོས་སྡུད་དག་བྱེད་གཏེར་དང་འདུ་འབྲལ་སྤངས་པའི་ཚངས་སྤྱོད་ཅན། །གཞན་དོན་འབའ་ཞིག་ཡིད་ལ་གདུང་བ་བྱང་ཆུབ་སེམས་དཔའི་དགེ་འདུན་ནི། །རིག་གྲོལ་སྤོབས་པའི་འཁྲི་ཤིང་ཀྱང་ངོ་རིན་ཆེན་གསུམ་གྱིས་བདེ་ལེགས་མཛོད། །རྒྱལ་བས་སྤངས་པའི་གངས་ཅན་འདི་ནི་མིག་མི་འཛུམས་པས་ཡོངས་གཟིགས་ནས། །འཇམ་དཔལ་ཞིང་གི་བཀོད་པའི་བསྐལ་བར་གསར་དུ་བསྐྲུན་པའི་ཐུགས་བསྐྱེད་ལ། །རྒྱ་མཚོའི་གོས་ཅན་སྣོད་དུ་ཆུང་སྙམ་དོགས་པའི་རྒྱལ་མཚན་གསར་བ་ཡིས། །སྐྲག་པའི་གནས་འཐོབ་ངུར་སྨིག་གར་གྱིས་རྣམ་པར་རྩེན་ལ་སྤྱི་བོས་འདུད། །ས་ལ་སྤྱོད་པའི་དབང་པོ་དགེ་མཚན་ནི། །བང་མཛོད་དབྱིག་གི་གང་བ་ལས་འབྱུང་ན། །ས་བརྒྱད་ནོན་པའི་གནོད་མཛེས་ཆེན་པོ་བརྒྱད། །གཙུག་ཏོར་ནོར་བུའི་རྣ་ཆ་གཡོ་བཞིན་སྤྱོན། །ཞེས་སྒྲ་དབྱངས་ལྷ་མོའི་ཏམ་བུ་རའི་སྙན་འགྱུར་ལ་ཅུང་ཟད་རེག་སྟེ་དམ་པའི་ཡུལ་ལ་བསྟི་སྟང་གིས་གསོལ་ནས་བསྙད་པར་འོས་པ་ནི། བྱང་ཆུབ་སེམས་དཔའ་
སྒྲིབ་པ་རྣམ་སེལ་གྱི་རྣམ་པར་འཕྲུལ་པ་ལྷ་ཐོ་ཐོ་རི་གཉན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས་ཤིང་ས་མཁར་གྱི་སྲོལ་བཏོད། དབོན་སྲས་སྤྲུལ་པའི་རྒྱལ་པོ་སྲོང་བཙན་གྱི་རིང་ལ་ཁྲ་འབྲུག་བྱམས་པ་མི་འགྱུར་གྱི་གཙུག་ལག་ཁང་གསར་དུ་འདུ་བྱས་ཤིང་དགེ་བཅུའི་ཡོན་ཏན་གྱི་མ་ཚང་བ་མེད་པས་ཡོངས་སུ་བཏུད་པའི་ཡུལ་ཡར་མོ་ནུབ་ཀྱི་སའི་ཆར། བརྒྱ་བྱིན་གྱི་གླང་པོ་ཆེ་ས་སྲུངས་བྲེས་ན་ཉལ་བ་ལྟ་བུའི་ས་འཛིན་གྱི་གདེངས་ཀས་གཟེངས་བསྟོད་པའི་བཙན་རྫོང་འཕྱོང་རྒྱས་འཕྱིང་བར་སྟག་རྩེ་ཞེས་བྱ་བ་ས་ཧོ་རའི་རྒྱལ་བརྒྱུད་རིམ་བྱོན་གྱི་བདེ་བའི་ལྷས་མལ་ལམ་ཕོ་བྲང་དུ་རུང་བར་བྱས་པ་གང་ཞིག་ཏུ་པདྨའི་ངང་ཚུལ་ཆོས་ཀྱི་རྒྱལ་པོ་ཚངས་པའི་མེ་ཏོག་སླར་ཡང་ཟ་འོག་གི་འཇོལ་བེར་རུང་སྨྲིག་ཏུ་གནས་བསྒྱུར་བ་གངས་རིའི་མགོན་པོ་ངག་དབང་བློ་བཟང་རྒྱ་མཚོས་སྐུ་བལྟམས་པའི་ཕོ་བྲང་ཆེན་པོའི་མངའ་རིས་སུ་ཆུད་པའི་གཞིས་ཁག་རྣམས་ཀྱིས་བཞེས་འབྲུའི་འབབ་སོགས།། །།དཔེར་བརྗོད་ཏུ། བསྟན་འགྲོའི་རྩ་ལག་སྤྲུལ་སྐུ་རིན་པོ་ཆེའི་ཞབས་དྲུང་དུ། གུས་ཕྱག་གིས་བཏུད་དེ་ཞུ་བ། ཐུགས་བསྐྱེད་སྐལ་ལྡན་ཤིང་རྟས་དྲངས་བའི་མཚན་དཀྱིལ་རིན་ཆེན་གྲུ་གཟིངས་བསྟན་འགྲོའི་སྨིན་པའི་མཛད་པ་ཕྲིན་ལས་ཀྱི་བ་དན་གཡོ་བཞིན་འཚོ་གཞེས་བཀའ་དྲིན་དམ་པར་
གྱུར། འདིར་ཡང་བདེ་མུས་ནས་དགེ་བློ་མ་བོར་ཙམ་ལགས། དོན་འདྲི། སླད་དུའང་ཞབས་པད་བརྟན་ཅིང་བསྟན་འགྲོའི་དོན་ལ་ཐུགས་བསྐྱེད་དུས་ལས་ཡོལ་བ་མེད་པ་ནས་སྐྱབས་འོག་ཏུ་ཆུད་པའི་ ཕེབས་ཚོགས་ཀྱང་མཁྱེན་མཁྱེན་གསོལ་བ་འདེབས་པ་ལགས། གསོལ་བ་འདེབས་རྟེན་བཅས་ཕུལ།། །།སྐྱབས་གནས་དམ་པ་མཁན་རིན་པོ་ཆེའི་སྐུ་ཞབས་སུ། གཞི་གསུམ་རྩ་བ་བརྟན་པའི་ལྗོན་པ་གང་ཞིག་ཐུགས་བསྐྱེད་ཀྱི་ལོ་འབྲས་དཔག་མེད་དུ་དུད་ཅིང༌། གདུལ་བྱ་རྣམས་བསླབ་པ་གསུམ་གྱི་ཡོན་ཏན་ལ་སྦྱོར་བཞིན་པར་བཞུགས་འཇགས་བཀའ་དྲིན་དམ་པར་གྱུར། ཕྲན་བུའང་འདུ་བ་སྙོམས་མུ་ནས་སྐྱབས་འགྲོ་ལ་བརྩོན་པར་ལགས། མཚམས་ཞུ། དོན་འདྲི། ཕྱིན་ཆད་ནའང་གཟུགས་སྐུ་ཡུན་དུ་འཚོ་གཞེས་དང༌། བསྟན་འགྲོའི་སྙིགས་མ་འབྲས་བུའི་དུས་ལ་གོ་འཕོ་བའི་ཐུགས་བསྐྱེད་དུས་ལས་མི་ཡོལ་ངོས། ཐུགས་རྗེས་གཏང་མི་བྲ་བའི་ཕེབས་ཚོགས་ཀྱང་ཞུ་ཞུ་ལགས།། །།བསྟན་པའི་གསལ་བྱེད་དགེ་བའི་བཤེས་གཉེན་ཆེན་པོའི་སྐུ་ཞབས་སུ། དེང་སྐུ་འཚོ་བརྟན་པ་ནས་ཀློག་པ་ཐོས་བསམ་ལ་སོགས་ཏེ་འཁོར་ལོ་གསུམ་གྱི་གནས་ལ་མགྲིན་པའི་རྒྱུད་མངས་འཁྲོལ་
ཞིང༌། བློ་གསལ་དད་པའི་སྡེ་དཔོན་གཅིག་ཏུ་བཞུགས་པར་བདག་ཅག་ཀྱང་གུས་པ་ཤིན་ཏུ་ཐོབ། གུས་ཕྲན་ཡང་གཟུགས་འཚོ་ཁྱོར་རེ་ནས་དཀོན་མཆོག་ལ་གུས་པ་མི་ལྷོད་ཁུལ་དུ་ལགས། མཚམས་ཞུ་དོན། ཕྱིན་ཆད་ནའང་བརྒལ་བརྟག་རྩོད་པའི་འཁོར་ལོས་རྒྱལ་བའི་བསྟན་པ་རིན་པོ་ཆེ་ལ་བསྟི་སྟང་དང་འབྲེལ་བར་སྦྱངས་ཡོན་བཅུ་གཉིས་ལ་རང་དབང་དུ་མཛད་པ་དུས་ལས་མི་ཡོལ་ངོས་རྨོངས་པ་བདག་ཅག་ཀྱང་ཆོས་ལྡན་དུ་འགྱུར་བའི་ཐུགས་སྨོན་ཡང་འཚལ།། །།སྤོང་པ་བསམ་གཏན་པའི་ཁྱུ་མཆོག་དམ་པ་རིན་པོ་ཆེར། དེང་སྐུ་འཚོ་བརྟན་པ་ནས་འདུས་བྱས་ཀྱི་རང་བཞིན་ལ་ངེས་པར་འབྱུང་བའི་བསམ་པ་བརྟན་པོས་སོ་སོ་ཐར་པ་གྲགས་པ་དོན་མཐུན་ལ་སྦྱོར་ཞིང༌། རྒྱ་ཆེན་སྤྱོད་པ་དང༌། ཟབ་མོ་ལྟ་བ་དེ་གཉིས་ཀའི་ཕྱོགས་ན་བསམ་སྒོམ་གྱི་ཤེས་རབ་གནད་དུ་འཕྲོད་པས་ཐར་པ་དོན་ཡོད་པར་མཛད་པ་དེ་ལ་རྗེས་སུ་ཡི་རང་བ་ཆེན་པོ་ཐོབ། ཕྲན་ཡང་ཀུན་སྤྱོད་མཐུན་པའི་ཁུལ་ནས་ཡིད་ལ་ཡིད་སྨོན་ཅན་དུ་ལགས། ཆེད་ཞུ། དོན་འདྲི། སླད་དུའང་འདུ་འཛི་ལས་བྲོས་པ་གཅིག་པོའི་ཡོན་ཏན་བསམ་གྱིས་མི་ཁྱབ་ན། དབང་ཤེས་ཀྱི་ཡུལ་བགྲོད་པའི་ཉེས་དམིགས་ལས་ལྡོག་པ་ནི་སྨོས་ཅི་འཚལ་བས་ཐུགས་དམ་ཉམས་གཞེས་གོང་འཕེལ་ནས་
བདག་ཀྱང་ཐུགས་བརྩེས་མི་འདོར་བ་ཞུ།། །།མཁྱེན་དབང་དམ་པ་རིན་པོ་ཆེར། སྐུ་འཚོ་བདེ་བ་ནས་བསླབ་པ་ལ་གུས་པས་ཞལ་འདོན་ཆོས་སྤྱོད་སྨར་བ་ཐོས་པས་སྤྲོ། འདིར་ཕྲན་ཡང་སྙེམས་ཆུང་སྡོད་བཟོ་རང་དོན་མ་ཤོར་ཙམ་ལགས། ཆེད་འབུལ། སླད་དུའང་བསླབ་གཉེར་ལ་བརྩོན་ཞིང༌། ཆོས་དང་མཐུན་པའི་སྤྱན་ལྟོས་ལ་སྔར་བཞིན་བརྩོན་པ་ནས་ཕེབས་འོས་ཀྱང་ཞུ།། །།མཁྱེན་དཔྱོད་ཡངས་པ་སྡེ་པ་རིན་པོ་ཆེའི་དྲུང་དུ། བསོད་ནམས་ཀྱི་བསགས་པས་ཐོབ་པའི་སྐུ་འཚོ་དགེ་ཞིང་གནང་འཁོས་ཐམས་ཅད་འཇིག་རྟེན་མེས་པོའི་རྗེས་སུ་འཇུག་པ་ཐུགས་རྗེ་ཆེ། ཕྲན་བུའང་ཆོས་གཟུགས་ལས་ཉམས་པ་མེད་པར་ལགས། མཚམས་ཞུ། དོན་འདྲི། སླད་དུའང་འབངས་ལ་བྱམས་པས་སྐྱོང་ཞིང་མཆོད་སྦྱིན་ལ་བརྩོན་པ་སོགས་ཁྱིམ་ན་གནས་པའི་བྱང་ཆུབ་སེམས་དཔའི་མཛད་པས་དལ་རྟེན་དོན་ཡོད་པར་བསྒྲུབ་པའི་རིང་ནས། ལུགས་ཀྱི་བསྟན་བཅོས་ལ་བསྙེལ་བ་མེད་པས་མངོན་མཐོའི་རྒྱུ་འབྲས་ལ་རང་དབང་དུ་མཛད་པ་ནས། ཐུགས་ཉེའི་མཆིད་འོས་ཀྱང་ཞུ། འདེགས་བཅས་ཕུལ།། །།མདོ་སྨད་བསྟན་པའི་སྲོག་ཤིང་རྫོགས་ཆེན་སྤྲུལ་པའི་སྐུ་མཆོག་དམ་པའི་ཞབས་སྟེགས་སུ། གུས་པས་གསོལ་བའི་
དོན། ཡང་སྲིད་མང་པོར་བསྟན་འགྲོའི་དོན་ལ་ཐུགས་བསྐྱེད་ཀྱི་རང་འབྲས་དུས་ལས་ཡོལ་བ་མེད་པའི་གཟུགས་སྐུའི་འཁྲི་ཤིང་བརྟན་པ་ནས་ཐུགས་བསྐྱེད་ཀྱི་འཇུག་པ་སེམས་ཅན་གྱི་ཁམས་དང་འཚམ་པར་སྨིན་པའི་ཕྲིན་ལས་ཀྱི་སྣང་བ་མི་འགོག་པར་འཚོ་ཞིང་གཞེས་པ་དེ་དཀའ་དྲིན་ཆེ། འདིར་གནས་པའང་སྒྱུ་ལུས་ལོ་ཟླའི་རྒ་བས་ནོན་པ་ལས་བསླད་པ་གསར་བྱུང་མེད་པས་བདེ་བར་འཚོ་ཞིང་གཞན་ཕན་གྱི་ལྷག་བསམ་དང་བཅས་པའི་ཁུལ་དུ་འཆིས། ཆེད་དུ་གསོལ་བ། བླ་མ་གསོལ་ནམས་བསྟན་འཛིན་འདི་གར་ཆེད་དུ་སྩལ་བའི་དོན་ལ། དབང་ཆོས་ལུང་ཁྲིད་ཀྱི་རིམ་པ་དམ་པའི་དགོངས་བཞེད་ཇི་ལྟར་འགྲུབ་འགྲུབ་དང༌། ལྷག་པར་སྔ་འགྱུར་རྒྱུད་འབུམ་རིན་པོ་ཆེ་པོད་ཆེན་ཉི་ཤུ་རྩ་ལྔའི་ལུང་རང་ཉིད་ཀྱིས་གང་ལྕོགས་བཀའ་གཏད་རྗེས་གནང་དང་བཅས་ཚང་མ་ཐོབ་པའི་ཐབས་དང་རྟེན་འབྲེལ་འབད་པ་ཆེན་པོས་བསྒྲིགས་པས་མཚོན། ཁོང་པ་བཞུགས་རིང་མདོ་སྒྱུ་ཕུར་པ་རྒྱུད་ལུགས་ལ་སོགས་པའི་ཆོ་ག་ཕྱག་ལེན་སྒྲུབ་པ་དང་བཅས་པ་དུས་མི་དྲོན་པར་འབད་པ་ལགས་ན། སྤྱིར་དེང་སང་ལྟ་བ་དང་ཉོན་མོངས་པའི་སྙིགས་མར་གྱུར་པས་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་ནས་གཟུགས་བརྙན་ཙམ་དུ་ཉེ་བས་སྐྱོ་བའི་གནས་དང༌། ལྷག་
པར་སྔ་འགྱུར་རྡོ་རྗེ་ཐེག་པ་ནི་མདོས་དང་གཏོ་ཆོག་ཙམ་གྱིས་ཆོག་པར་འཛིན་པར་གཟུགས་བརྙན་དུའང་མི་མངོན་པར་ཉེ་བའི་དུས་འདིར། རྫོགས་ཆེན་སྐུ་གོང་མས་མཛོད་བདུན་པར་ལ་འཁོད་པའི་བདག་རྐྱེན་མཛད་པས་དཔེ་རྒྱུན་འཕེལ་བ་ཙམ་གྱིས་ཀྱང་རྙིང་མ་ཆོས་མིན་དུ་འདུ་ཤེས་པའི་སྐྱེ་བོ་མང་པོ་ངན་འགྲོའི་གཡང་ས་ལས་ཕྱིར་ཕྱོགས་པའི་རྟེན་འབྲེལ་མངོན་དུ་གྱུར་ན། བདག་ཅག་གིས་ཀྱང་ཚེ་འདིར་དགེ་བའི་བཤེས་གཉེན་དང་མཇལ་བའི་ཐོས་བསམ་རྒྱ་ཆེའི་རྟེན་འབྲེལ་ཚོགས་པ་མ་ཡིན་བཞིན། དཔལ་ཨོ་རྒྱན་ཆོས་ཀྱི་རྒྱལ་པོའི་ཐུགས་རྗེ་དང༌། རྒྱལ་བ་གཉིས་པ་ངག་གི་དབང་པོའི་བཀའ་དྲིན་གྱིས་སྒོམ་བྱུང་གི་ཤེས་རབ་ལས་སྤོབས་པ་ཅུང་ཟད་ཐོབ་པའི་ཡོན་ཏན་རིན་པོ་ཆེའི་མཛོད་རྩ་འགྲེལ་ཤོག་གྲངས་སྟོང་དུ་ལྡང་བ་བསྟན་པ་ཁོ་ན་སྙིང་ལ་བཞག་ནས་བརྩམས་པ་དང༌། བློ་གྲོས་གསར་བུའི་དུས་བྱས་པའི་ལུང་གི་གཏེར་མཛོད། དགོངས་འདུས་ཆོ་གའི་རྣམ་ངེས་སོགས་དང་པོའི་ལས་ཅན་ལ་ཕན་པའི་རིགས། ཁྱད་པར་སྔ་འགྱུར་གྱི་ཆོས་འབྱུང་གཙོ་བོར་སྨོས་ཤིང་ལོག་རྟོག་ཅན་གྱི་དགག་པ་ཚར་གཅོད་པའི་རྒྱུད་འབུམ་དཀར་ཆགས་བཅས་དང་འདི་པ་རྣམས་ཀྱི་གདོང་པོ་ཏི་ལྔའི་དམ་པ་ཆོས་ཀྱི་སྐྱེས་གང་མཆོད་སྤྲིན་སྤྲོས་པ་ལ་སྤྱན་རས་མཆོག་ཏུ་བཙའ་བ་དང༌། དམ་པའི་སྐྱེས་
བུ་ཁྱོད་ནི་བསྟན་པ་ལ་ཕྱག་བཞེས་ལྷག་པར་ཆེ་བ་ཉིད་ན་རྒྱུད་སྡེ་ཆེན་པོའི་རིང་ལུགས་དར་དུ་འཇུག་པ་དང༌། ད་དུང་སྔ་འགྱུར་རྒྱུད་འབུམ་ཙམ་པར་དུ་བསྐྲུན་པའི་ཐུགས་སྟོབས་བསྐྱེད་ན་བཀའ་འགྱུར་ཁྲོད་ནས་དབྱུང་བས་ཕྲིན་ལས་ཀྱི་གེགས་སུ་གྱུར་པའི་ཉམས་གསོ་ཆེ་ཞིང༌། བཙན་པོ་ཁྲི་སྲོང་ལྡེའུ་བཙན་ཡོན་མཆོད་ལོ་པཎ་དང་བཅས་པའི་ཐུགས་བསྐྱེད་དུས་ལས་མི་ཡོལ་བའི་བདག་རྐྱེན་དང༌། མཛད་པ་ཕྲིན་ལས་རི་དབང་ལས་འཕང་མཐོ་བས་བསྟན་པའི་རྩ་ལག་གཅིག་ཏུ་འགྱུར་བར་ཅི་གནང༌། གསོལ་བར་འོས་པའི་ཡན་ལག་རྣམས་ཕྱི་ནས་བླ་མ་བསོད་ནམས་བསྟན་འཛིན་གྱི་ངག་ལས་ཞར་ཞོར་གསོལ་ཡོང་བ་དང༌། རྡོ་རྗེ་ཕུར་པ་རྒྱུད་ལུགས་འདི་མྱུར་པོར་ཚུགས་ན་ཉིད་ཀྱི་སྐུ་ཚེ་དང་དགོན་པ་མེས་གནོད་པ་ཡང་སྐྱོབ་པས་དེའི་ཡན་ལག་ཏུ་ཕྱོགས་སྐྱོངས་བཅུའི་དར་ཆེན་སློང་ཞིང༌། རྡོ་རྗེ་སྡེར་མོ་དང༌། སྟོབས་པོ་ཆེ་སྟོང་རྩ་རེ་སྒྲོགས། བཀྲ་ཤིས་བརྩེགས་པ་བརྒྱ་རྩ་གདོན་པར་ཞུ། སླད་དུའང་ཞབས་པད་ཡུན་དུ་བརྟན་ཅིང༌། བསྐྱེད་རྫོགས་ཟབ་མོའི་ཉམས་གཞེས་དང་འབྲེལ་བའི་རིང་ནས་བསྟན་འགྲོའི་དོན་མཛད་པའི་ཐུགས་བསྐྱེད་གཏང་མི་བྲབ་ནས་ཕེབས་ཚོགས་ཀྱང་རྒྱུན་ཆགས་སུ་ཡོད་པ་འཚལ། གཟིགས་རྟེན་ཆོས་གོས་དང་བཅས་པདྨ་འོད་གླིང་ནས་ཕུལ།
དགོན་རྩེ་སྤྲུལ་པའི་སྐུར་ཕུལ་བ། གཙུག་ལག་རྒྱ་མཚོར་སྤྱན་ལྡན་སྤྲུལ་པའི་སྐུ་རིན་པོ་ཆེའི་ཞབས་པད་ལ། དང་པའི་ཡིད་ཀྱིས་གསོལ་བ། འཕེན་རྫོགས་གཉིས་ཀ་ཚོགས་གཉིས་རྣམ་པར་འཕེལ་བའི་ཤིང་རྟས་ཉེ་བར་དྲངས་པའི་གཟུགས་སྐུའི་ཉིན་བྱེད་གསལ་ཞིང་གསང་གསུམ་རྒྱལ་བའི་མཛོད་ཁང་ཆེན་པོར་སྦྱོར་བའི་སློབ་པ་ལམ་གྱི་གནས་སྐབས་ལ་རང་གིར་མཛད་པའི་རིང་ནས་གསུང་ཤོག་རིན་པོ་ཆེ་གནང་རྟེན་འབུ་དམར་དང་བཅས་འབྱོར་པས་ངོས་མཇལ་ལྟ་བུའི་སིམ་པ་ཐོབ། འདིར་ཡང་ཚུར་མཐོང་གི་གདུལ་བྱའི་སྐལ་པ་དང་མཚམས་པའི་དམ་པ་ཆོས་ཀྱི་ཕྲིན་ལས་ཅུང་ཟད་སྐྱོང་ཁུལ་ཙམ་གྱིས་བསམ་པ་དཀར་བར་མཆིས། མཚམས་ཞུ། ད་ནི་ཉོན་མོངས་པ་དང་ལྟ་བའི་སྙིགས་མར་གྱུར་པའི་དུས་འདིར་ཆོས་དང་ཆོས་ཀྱི་རང་བཞིན་ལ་ལྡོངས་པ་ལས་ཀྱང་ལྡོངས་པའི་ཀུན་སློང་ངན་པས་དབྱེན་བཅོས་ཏེ་བདག་དང་གཞན་དུ་ཞེན་པའི་ཕྱོགས་འཛིན་ཙམ་ལས། རྒྱལ་བ་ཐུགས་རྗེའི་བདག་ཉིད་ཅན་དེས་དྲང་ངེས་ལྡེམ་དགོངས་ཀྱི་ཚུལ་དུ་བཤད་པའི་དོན། རྒྱ་བོད་ཀྱི་པཎ་གྲུབ་སྐྱེས་ཆེན་དམ་པ་དེ་དག་གིས་གནས་དུས་གདུལ་བྱའི་ཁམས་དབང་དང་འཚམས་པར་བཀྲལ་ཞིང་གདུལ་བའི་དབང་གིས་བསྟན་པའི་ཆུ་འགོ་ཐ་དད་དུ་བགྱིས་པའི་དགོངས་པ་ཆོས་ཉིད་གཅིག་ཏུ་མི་ཤེས་པའི་
དུས་འདིར། དམ་པ་གང་གི་ཡོངས་འཛིན་བླ་མ་ཆེན་པོ་གཙང་པ་དགེ་བཤེས་རིན་པོ་ཆེ་དེ་ཉིད་ཀྱི་རྗེས་སུ་ཞུགས་པའི་བདག་རྐྱེན་དང་སྔོན་གྱི་ལས་སྨོན་ཐབས་ཤེས་སུ་འབྲེལ་བ་ལས་རྒྱལ་བ་གཉིས་པ་ཀུན་མཁྱེན་ངག་གི་དབང་པོའི་གསུང་རབ་ལ་མི་འཕྲོགས་པའི་ངེས་ཤེས་འཁྲུངས་པ་དེ་ནི་ཚིགས་སུ་བཅད་པ་བརྒྱ་པ་ལས། ཡོན་ཏན་ལྡན་པ་ཡོན་ཏན་ལ་དགའ་ཞིང༌། །ཡོན་ཏན་མེད་པ་ཡོན་ཏན་ལ་མི་དགའ། །ནགས་ཀྱི་བུང་བ་མཚོ་ཡི་པདྨར་དགའ། །སྦལ་བ་ལྷན་ཅིག་གནས་ཀྱང་དེ་ལྟ་མིན། །ཞེས་དང༌། ངེས་པའི་དོན་ལ་རྟོན་མི་རྟོན་གྱི་ཆོས་ཀྱི་རྣམ་དབྱེ་ཕྱེད་པའང་དེ་ཉིད་ལས། སྐར་མ་ཆེན་པོ་མང་དུ་ཤར་གྱུར་ཅིང༌། །ས་ཡི་རྒྱན་གྱུར་ཟླ་བ་ཤར་ན་ཡང༌། །གང་ཚེ་ཉི་མ་ནུབ་ན་མཚན་མོར་འགྱུར། །ཉི་མས་མ་གཏོགས་ཤར་ནུབ་ཕྱོགས་མི་ཕྱེད། །ཅེས་པའི་དོན་ལ་གནས་པ་དེ་ངོ་མཚར་ཆེ་ན། མཛོད་བདུན་དང་ངལ་བསོ་སྐོར་གསུམ་པོ་འདི་རྩ་འགྲེལ་སྡེ་ཚན་ཉི་ཤུ་རྩ་གྲངས་སུ་ལྡང་བ་དང༌། སྤྱིར་ཤོག་གྲངས་ཉིས་སྟོང་བརྒྱད་བརྒྱར་ཉེ་བ་ཡོད་ཚོད་ལ། ཡིག་མཁན་སོགས་ཀྱི་སྟ་གོན་ཉེར་བསྡོགས་གྲུབ་བསྟུན་ལ་ཕྱི་ནས་རིམ་བཞེས་གནང་ན་དེང་སང་ངོས་ནས་འདི་སྐོར་འགྲོ་དོན་འབྱུང་བའི་རྒྱུན་འཕེལ་གྱི་ལམ་མི་འགེགས་ཤིང༌། དེ་གའི་ཀྱང་བཞེད་དོན་འགྲུབ་པ་ཞིག་ཡོང་བ་ལས། བསྡེབས་
བཞེས་གནང་ཀྱང་སྟབས་གཅིག་ཏུ་བཤུ་མི་ཐུབ་ཅིང་འདིར་ཡང་ལག་འཐོགས་བཅས་སྔ་འཕྲོས་འདི་གདོང་གྲུབ་མཐའ་རིན་པོ་ཆེའི་མཛོད་དང༌། རང་རེའི་བསྟན་བཅོས་ཡོན་ཏན་རིན་པོ་ཆེའི་མཛོད་གཉིས་ཕུལ་ཞིང༌། གསར་རྩོམ་ལ་མདོ་སྔགས་སོ་སོར་འགྲེལ་པ་ཤོག་གྲངས་་ལྔ་བརྒྱ་རེ་ཡོད་པ་རྗེས་ནས་རིམ་གཟིགས་ཡོང་ལགས་ཤིང༌། ཕྱིན་ཆད་ནའང་ཞབས་པད་བརྟན་ཅིང་བསྟན་པ་ཆོས་བཞིན་དུ་སྐྱོང་བའི་ཕྲིན་ལས་ཀྱི་འཇུག་པ་དུས་ལས་ཡོལ་མེད་ནས་ཕེབས་ཚོགས་ནང་མར་སྨིན་པ་མཁྱེན་མཁྱེན། གཟིགས་རྟེན་བཅས་པ་པདྨ་འོད་གླིང་ནས་ཕུལ།། །།ས་སྤྲེའུ་ཚེ་ཆོག་དང་འབྲེལ་བར་ཇོ་བོ་བྱང་ཆུབ་ཆེན་པོར་ཞབས་བརྟན་ཐུགས་དམ་རྒྱུད་བསྐུལ། གང་གི་ཚེ་བསྐལ་བཟང་རྣམ་འདྲེན་ཡོངས་ཀྱི་སྟོང་ཉིད་སྙིང་རྗེའི་ནོར་བུའི་ཏོག་རི་ཁ་བ་ཅན་གྱི་གཙུག་ཏོར་དུ་མངོན་པར་གསལ་བའི་བྱང་ཆུབ་ཆེན་པར་ཁྱོད་ནི། ཐོག་མ་མེད་པའི་དུས་ནས་མངོན་པར་བྱང་ཆུབ་བཞིན་དུ་སྤྲུལ་བའི་སྐུ་སྒྱུ་མ་ལྟ་བུས་སེམས་ཅན་གྱི་ཁམས་རྒྱ་མཚོ་ལམ་བདེན་འདུས་བྱས་པ་ལ་བཀྲིས་ནས་འབྲས་བུའི་ངོ་བོ་ཉིད་དུ་མཛད་པའི་ཕྱིར་སློབ་པ་ལམ་གྱི་མངོན་པར་རྟོགས་པ་ལ་ཆེ་ཐང་དུ་མཛད་ནས་བསྡུས་པའི་དངོས་པོ་བཞི་དང༌། ཕྱིན་དྲུག་གི་ལང་ཚོ་དུས་ལས་ཡོལ་བ་མེད་པའི་ཚུལ་སྟོན་ཅིང༌། འདོད་པའི་
བསོད་ནམས་དང༌། སོ་སོ་སྐྱེ་བོའི་ཉོན་མོངས་པའི་མཐའ་གཉིས་ལས་བརྒལ་ནས་མངོན་པར་ཤེས་པ་དང༌། ཡེ་ཤེས་དང༌། རིག་པའི་བདག་ཉིད་དུ་མྱ་ངན་ལས་འདའ་བའི་མིག་དང་ཡེ་ཤེས་མངོན་དུ་བསྐྱེད་ནས་འཇིག་ཚོགས་ལ་བལྟ་བའི་རིའི་རྩེ་མོ་ནི་བཤིག །ཆོས་ཀྱི་མིག་རྡུལ་བྲལ། འཕགས་པའི་ལམ་ཡན་ལག་བརྒྱད་ལ་བསྟེན་གོམས་རྟག་ཏུ་མཛད་ན། ཕུང་པོ་ལྔའི་ཉེར་ལེན་དང༌། སྡུག་བསྔལ་བདེན་པའི་ཆོས་ཉིད་ཀྱིས་བརྫི་བ་མ་ཡིན་ཀྱང༌། གཟུགས་ཀྱི་སྐུ་རྣམ་པ་ཐམས་ཅད་པའི་ཉིད་ཅན་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་གིས་གཞན་རྒྱུད་ལ་བསོད་ནམས་ཀྱི་ཚོགས་རྒྱ་ཆེན་པོ་འདུ་བར་མཛད་པའི་ཐབས་ལ་མཁས་པའི་ཕྲིན་ལས་དང་དུ་གཞེས་པ་ནི་རྒྱལ་དང་རྒྱལ་སྲས་དམ་པའི་ཆོས་ཉིད་ཡིན་ན། ཞིང་གི་མཆོག་དཀོན་མཆོག་ཐམས་ཅད་པའི་ངོ་བོ་ཉིད་ལུས་ཅན་ཀུན་གྱི་མཐུན་སྣང་དུ་གྲུབ་པའི་སྐུ་མཆོག་མཐོང་ན་མི་མཐུན་པ་མེད་པ་གང་ཞིག་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་དང་། བྲམ་ཟེ་དང་བཅས་པའི་སྐྱེ་དགུའི་མཆོད་སྡོང་གཅིག་ཏུ་ལྷམ་མེ། ལྷན་ནེ། ལྷང་ངེར་འཚོ་ཞིང་གཞེས་པའི་རྟེན་ཅིང་འབྲེལ་འབྱུང་གསར་བའི་སྒོར་དེང་ཕན་ཆད་ལ་མཆོད་པ་སྣ་ལྔ་ཁྲི་ཚར་གཅིག་
དང་ཚོགས་འཁོར་སྟོང་ཕྲག་བཅས་པའི་མཆོད་སྤྲིན་གྱིས་སྣ་དྲངས། ལྷག་པའི་བསམ་པ་ཁ་ན་མ་ཐོ་བ་དང་མཛའ་བ་ཡིན་པས་ཐབས་ཀྱི་རྣམ་པར་ཆེ་བ་རིག་པ་འཛིན་པའི་སྡེ་སྣོད་ལ་དྲན་པ་ཉེ་བར་གཞག་ནས་ཡེ་ཤེས་སེམས་དཔའ་དགུག་གཞུག་བཅིངས་པ་བཅས་པའི་ཏིང་ངེ་འཛིན་གྱི་རྣམ་པར་འཕྲུལ་པའི་མཆོད་པ་བསམ་གྱིས་མི་ཁྱབ་པ་དང་སྣང་གྲག་རིག་པ་རྒྱལ་བ་འོད་མཚན་སྟོང་དུ་འབར་བའི་སྐུའི་དེ་ཁོ་ན་ཉིད་དང༌། དབྱངས་ཀྱི་དེ་ཁོ་ན་ཉིད་དང༌། ཡེ་ཤེས་ཀྱི་དེ་ཁོ་ན་ཉིད་ལ་གཅིག་ཏུ་བསམ་བཏན་པས་ཉེ་བར་བསྙེན་ཅིང་བསྒྲུབ་པའི་གཏོར་བླུགས་ཀྱི་ཆུ་རྒྱུན་དང༌། བྱང་ཆུབ་སེམས་ཀྱི་བདུད་རྩི། རྡོ་རྗེ་བཟའ་བའི་རིལ་ལུ་དང་བཅས་པའི་སྤྲིན་ཆེན་པོའི་ཁྱད་པར་ཡང༌། དད་པ་དང༌། འདུན་པ་དང༌། སྨོན་ལམ་དང༌། རྟེན་ཅིང་འབྲེལ་འབྱུང་གི་དངོས་པོའི་དེ་ཁོ་ན་ཉིད་དུ་འབུལ་ན། རྟོག་པ་མེད་པ་བཞིན་ཐུགས་རྗེ་ཆེན་པོའི་སྤྱན་རས་འགོག་པ་མེད་པས་རང་གིར་མཛད་ནས་མོས་པ་མ་བྱོན་གྱི་བར་དུ་འབྱུང་བ་བཞིའི་བྱེད་པ་ཕྱིར་བསྲིངས་ནས་མི་འཇིགས་སེངྒེའི་ཁྲི་ལ་ཞབས་པད་བརྟན་ནས་གངས་ཅན་པ་རྣམས་ལ་རྫོགས་ལྡན་གྱི་བསྐལ་པ་ཟད་མི་ཤེས་པ་སྩལ་དུ་གསོལ།། །།ལྷོ་བྲག་གསུང་སྤྲུལ་གྱི་མཆིད་ལན། སེམས་དང་སེམས་བྱུང་སྤྲོས་པ་
ཉེར་ཞི་ཡང༌། །རྒྱལ་གསུང་ལམ་བདེན་འབྱེད་པའི་སེང་གེའི་སྒྲས། །བསྒྲིབས་དང་མ་བསྒྲིབས་ལུང་དུ་མ་བསྟན་པའི། །ཅེ་སྤྱང་ཟ་བ་ངག་གི་དབང་པོ་རྒྱལ། །གང་གི་ཚེ་ཡུལ་ཉི་ཤུ་རྩ་བཞིའི་ཡ་གྱལ་དེ་ཝཱི་ཀོ་ཊ་ཡིན་ནོ་ཞེས་གླེང་བ་ལྷ་མོ་མཁར་དང་ཉེ་བ་ལྷ་ལུང་ལྷ་ཡི་དགའ་ཚལ་ན་དཔལ་ལྡན་འདྲེན་བྱེད་སྟོང་པའི་ངང་ཉམས་ཀྱིས་རང་ལུགས་བདེ་བརསྐྱོང་བའི་སྤྲུལ་པའི་སྐུ་རིན་པོ་ཆེ་ཡབ་སྲས་འཚོ་ཞིང་གཞེས་པའི་རིང་ནས། དངོས་ཅག་ལ་ཕྲིན་ཡིག་རྟེན་ལྡན་པུསྟ་ཀ་དང་བཅས་སྤྲིང་པ་དངོས་མཇལ་ལྟ་བུའི་གཟིགས་མོར་ཆེ། རྣམ་སྨིན་གྱི་རྟེན་སྐལ་མཉམ་དང་ཀུན་འགྲོའི་རྒྱུ་འབྲས་ལ་སྤྱི་མཐུན་དུ་སྤྱོད་པའང་ལུས་ཉམས་བརྟས་ཤིང་དཀོན་མཆོག་གསུམ་དང་བྱང་ཆུབ་ཀྱི་སེམས་རིན་པོ་ཆེ་ལ་གུས་པ་ཆེ་ཐང་དུ་བགྱིད་པའི་ཁུལ་དུ་ལགས། ད་དུང་དགོངས་ཤིག །དེ་ལ་བདག་ཅག་ནི་རིགས་དང༌། གཟུགས་དང༌། དབང་ཕྱུག་གིས་རྒྱགས་པ་ཅན་ཡང་མ་ཡིན་ལ། དྲན་པའི་དབང་པོ་ཅན་ལ་བསྙེན་ནས་ཐམས་ཅད་མཁྱེན་པའི་ཡོན་ཏན་གྱི་ཉེ་རྒྱུ་ཤེས་བྱའི་གཙུག་ལག་ལ་ཐོས་བསམ་བགྱིས་པའང་མ་ལགས་པས། ལང་ཚོ་བདོ་བ་ཙམ་ནས་དབེན་པ་ལ་དད་ཅིང་རི་སུལ་དུ་ཉི་མ་ལྡེ་བཞིན་རྒ་བའི་ཚོར་བས་གཏུགས་པ་ཞིག་པས། རིག་པའི་གཙུག་ལག་ལ་སོགས་པའི་ཡོན་ཏན་གྱི་ལྡན་ཆོས་ལ་
བསྙེམས་པ་དང༌། ལྡན་མིན་གྱི་བསྙེངས་པའི་ཕྱོགས་གཉིས་ཀར་མི་བསྟེན་ན་རྫིང་བུ་ནམ་མཆེས་པ་ཡུར་བ་ལ་ཅི་ཞིག་དྲང༌། དེ་ལྟ་ནའང་སྒོམ་བྱུང་གི་ཤེས་རབ་ལས་ནང་རིག་པའི་དེ་ཁོ་ན་ཉིད་ལ་བག་ཆགས་དགེ་བ་ཅན་དུ་གཟིགས་སྟངས་དགེ་བའི་ཚོགས་ཐམས་ཅད་ལ་གང་ལས་རྟེན་ཅིང་འབྲེལ་འབྱུང་ཆུད་མི་གསན་པའི་ལྷག་བསམ་དག་ཀྱང༌། སྤྱིར་ན་ཚོད་ཡོལ། འཇིག་རྟེན་མཐུན་འཇུག་ལ་སྤྲོ་བ་ཞན། བསམ་གཏན་གྱི་ངང་དུ་ཡིད་སྡུད་པས། ཕ་རོལ་གྱི་བསམ་པ་དང་མཐུན་པའི་ཉེར་ལེན་ལ་མི་མཁས་ཤིང༌། རང་ཉམས་དོ་ཧར་སྤྱོད་པའི་གནས་ལ་འཛིན་སྟངས་མི་འགལ་ན། བསྟན་པའི་ལམ་སྲོལ་སྙན་དུ་ལྡུགས་པར་རྔོ་ཐོགས་ཚོད་ནི་ཁྱེད་ཅག་ཡབ་སྲས་དང་དངོས་ཅག་སྨོན་ལམ་གྱིས་འབྲེལ་བ་ཅན་དུའང་ཆ་མི་འཚལ་བ་ལ་དགོངས་ཤིང་དཔྱད་ནས། སངས་རྒྱས་གཉིས་པ་ཀུན་མཁྱེན་ངག་གི་དབང་པོའི་བསྟན་པ་ལ་ཐུགས་ཡིད་ཕྱོགས་པའི་རྒྱུད་ལས་རྙིང་བསྟན་རི་མོ་མཁན་གྱི་སྣང་བྱེད་ལས་སྒྲོལ་མའི་བྱེད་ལས་ཅན་དུ་བགྱིད་པར་གསོལ་ན་ཅི་གནང༌། ཞེས་གཟིགས་རྟེན་མཚོན་པ་བཅས་ཕུལ།། །།བསླུ་བ་མེད་པའི་བདག་ཉིད་དཀོན་མཆོག་རིན་པོ་ཆེ་རྣམ་པ་གསུམ་དང༌། དེ་དག་གི་ངོ་བོ་ཉིད་རྣམ་པ་ཐམས་ཅད་མཁྱེན་པའི་ཡེ་
ཤེས་ལ་རང་བཞིན་ཤེས་པའི་ངང་དུ་སྐྱབས་སུ་མཆིའོ། །ཡང་དག་པའི་ལྟ་བ་ལ་དད་ཅིང༌། དགེ་བ་བཅུའི་ས་ལམ་འཛིན་པའི་སྐྱེ་དགུ་མཆོག་དམན་མཐའ་དག་དང༌། སྣང་སྲིད་ལྷ་འདྲེའི་ཚོགས་ལ་བསྒོ་བ། རི་ཁ་བ་ཅན་གྱི་རྒྱལ་ཁམས་ན་སངས་རྒྱས་གཉིས་པར་བསྙོན་དུ་མེད་པ་སློབ་དཔོན་ཆེན་པོ་པདྨ་འབྱུང་གནས་ཀྱིས་ཚེ་རབས་ཀུན་ཏུ་རྗེས་སུ་བཟུང་ནས་གཞན་ཕན་བསྒྲུབ་པར་དབང་བསྐུར་བ་རིག་འཛིན་འཇིགས་མེད་གླིང་པའམ། རང་བཞིན་དུ་གྲགས་པའི་མིང་ཀློང་ཆེན་སྤྲུལ་སྐུར་རང་བྱུང་རྡོ་རྗེར་འབོད་པས་རིང་མོའི་དུས་ན་སངས་རྒྱས་འོད་སྲུང་ལ་སེམས་བསྐྱེད་པ་ནས་བཟུང་རྣམ་པར་རྒྱལ་བ་ཅན་དུ་མངོན་པར་སངས་མ་རྒྱས་པར་འཇུག་པའི་སེམས་བསྐྱེད་བླ་ན་མེད་པས་བསྟན་པའི་ཞབས་ཏོག་དང༌། སེམས་ཅན་གྱི་ཁམས་ཡོད་དོ་ཅོག་ལ་དངོས་རྒྱུད་དུ་མའི་སྒོ་ནས་ཕན་པའི་བསམ་སྤྱོར་ལྷུར་བྱེད་ན། ད་ལྟའི་དུས་འགྲོ་བ་རྣམས་སྙིགས་མ་ལྔའི་དུས་ཀྱིས་རྒུད་པས་ཆེས་ཆེར་ནོན། ཁྱད་པར་མཐའ་འཁོབ་ཏུ་སྐྱེས་པ་རྣམས་མི་གཞི་དྲང་ཡང་ལས་འབྲས་ལ་རྨོངས་ཆེས་བས་སེམས་ཅན་གྱི་སྲོག་འཕྲོག་པ་དང༌། དམག་ཇག་གི་ལས་ལ་ཉེས་དམིགས་ཆེན་པོར་མི་བལྟ་བས་ངན་སོང་དུ་རྡོ་འཕངས་པ་བཞིན་འགྲོ་བ་ལ་སྙིང་རྗེས་མ་བཟོད། དེ་དག་གི་མཚན་ཉིད་མཚན་ཤེས་པའང་རྒྱལ་བའི་བསྟན་པ་རིན་པོ་ཆེ་དར་བ་ལ་རག་ལུས་ན།
དེ་ཡང་ཕྱོགས་རིས་དང་ལྟ་བའི་སྙིགས་མར་གྱུར་པས་དཀྲུགས་ཤིང༌། ཁྱད་པར་ལྷ་བཙན་པོ་ཁྲི་སྲོང་ལྡེའུ་བཙན་གྱི་སྐུ་རིང་ལ་མཁན་སློབ་ལོ་པཎ་རྣམས་ཀྱིས་ཆེ་ཐང་དུ་མཛད་པའི་རྒྱུད་སྡེ་སྔ་འགྱུར་གྱི་རིང་ལུགས་གཟུགས་བརྙན་ཙམ་དུ་སོང་བ་སེམས་ཀྱིས་མ་བཟོད་ནས། ཡོན་ཏན་རིན་པོ་ཆེའི་མཛོད་རྩ་འགྲེལ་གྱིས་མདོ་སྔགས་ཀྱི་གྲུབ་མཐའ་གསར་དུ་བསླངས་ཤིང༌། རྒྱལ་དབང་པདྨས་རྗེས་སུ་གདམས་པའི་ཐུགས་གཏེར་ཟབ་མོས་བསྐྱེད་རྫོགས་ཀྱི་གནད་མ་འཁྲུལ་པའི་ལམ་མངོན་སུམ་བསྟན་པ་རྣམས་མདོ་སྨད་ཀྱི་སའི་ཆར་སྤེལ་ནས་སེམས་ཅན་མང་པོ་བྱང་གྲོལ་ལ་འགོད་པའི་ཕོ་ཉར་སྨོན་ལམ་གཏད་རྒྱས་དབང་བསྐུར་བ་འཇིགས་མེད་ཕྲིན་ལས་འོད་ཟེར་པ་འདི་ཉིད་གཟུ་བོར་གནས་ཤིང༌། ལྷག་པའི་བསམ་པ་དགེ་བ་ཅན་ཡིན་པས་དམ་པ་རྣམས་ཀྱི་དྲུང་དུ་རྟེན་འབྲེལ་གྱི་མཚམས་སྦྱོར། གནས་སྐོར་ལམ་ཞུགས། ཐོས་བསམ་སྒོམ་གསུམ། དགོན་གནས་འཛིན་སྐྱོང་གང་གི་ཐད་དུའང་གྲོགས་དན་ཟླ་བ་ཡར་ངོ་བཞིན་དུ་མཛད་པ་དང༌། ཁྱད་པར་སྔ་འགྱུར་བ་རྣམས་བསྟན་པའི་ཕར་རྒྱ་ལ་རྩིས་ཆུང༌། གདམས་ཕྲན་ལ་ཁ་འཛིན་ཆེ། བློ་སྟོབས་དང་ཆོས་ཉམས་ཆུང་བས་རྙིང་བསྟན་གྱི་རྩ་བརྒྱུད་འབུམ་རིན་པོ་ཆེ་དང༌། མདོ་སྒྱུ་སེམས་གསུམ༌། ཡང་ཕུར་མཉམ་སྦྱོར། སྙིང་ཏིག་ཡ་བཞི། སྒྲུབ་
ཆེན་བཀའ་བརྒྱད་རྣམས་ལ་ཆེ་ཐང་དུ་མི་བྱེད། སོ་ཟུར་གནུབས་གསུམ་དང༌། རོང་ཟོམ་ཆེན་པོ། ཁྱད་པར་བསྟན་པ་རྒྱ་མཚོའི་རྩ་ལག་ཀུན་མཁྱེན་བསམ་ཡས་པའི་གྲུབ་མཐའ་ལ་རྨོངས་པས་ཆོས་ལུགས་གཞན་པས་བསྙས་ཤིང༌། གཤུང་བའི་ཚུལ་དབུས་གཙང་ཁམས་གསུམ་དུ་མཐོང་ཞིང་ཐོས་པས་གནས་ཚུལ་འདི་ལ་གཟུ་བོའི་བློས་གཞིག་འབྲེལ་ལེགས་པར་མཛད་ནས་རང་བསྟན་དར་བ་ལ་འགལ་རྐྱེན་དང་ཕྲག་དོག་སྤོངས་ཤིག །བསྟན་པ་ལ་ཕྱག་བཞེས་ཆེ་བ་དང་དཀར་ཕྱོགས་སྐྱོང་བ་ཐམས་ཅད་ནས་མཐུན་རྐྱེན་ཆོས་བཞིན་དུ་སྒྲུབ་ཤིག །གལ་ཏེ་དམ་ཚིག་མི་ཤེས་པ་དང༌། དཀར་ཕྱོགས་ལ་མི་དད་པ་དང༌། རྒྱལ་འདྲེ་འགོང་པོ་དང༌། གསར་བྱུང་ལས་ངན་གྱི་རྒྱུ་འབྲས་ལ་སྤྱོད་པ་ཡིན་དུ་ཟིན་ཀྱང༌། ངའི་བྱང་ཆུབ་སེམས་ཀྱི་གདུལ་བྱར་མ་གྱུར་པ་མེད་པས་ཤེས་རྒྱུད་དགེ་ལ་འགྱུར་བར་གྱུར་ཅིག །དེ་ལྟར་གྱུར་ནས་ནད་ཡམས་འཁྲུགས་རྩོད། མེ་ཆུ་གཅན་གཟན། རི་རུད་ཤྭ་ལོག །སྐྱིན་ཐང་ཐོག་རྒོད། འཁྱུག་དང་ས་གཡོས། ཁ་ཆར་རླུང་ལོག་སོགས་འཇིག་རྟེན་མི་བདེ་བའི་སྣ་འདྲེན་སྤོངས་ལ་ཞི་བ་བྱང་ཆུབ་ཀྱི་སེམས་དང་ལྡན་པར་བྱོས་ཤིག །ཁྱེད་རྣམས་ཀྱི་ལས་ངན་གྱི་འཕེན་པ་རྫོགས། ཕྱི་ནས་དགེ་བ་འབའ་ཞིག་ཏུ་འགྱུར་བའི་སྨོན་ལམ་ངེད་ཀྱིས་འདེབས་སོ། །
གལ་ཏེ་ལྷག་བསམ་དག་པའི་བདེན་ཚིག་ལ་མི་ཉན་ན། མི་དང་མི་མ་ཡིན་གང་སུ་ཡང་རུང་སྟེ། དེ་དག་ལ་དཀོན་མཆོག་དང་མཁའ་འགྲོ་ཆོས་སྐྱོང་ཡེ་ཤེས་ཀྱི་སྤྱན་དང་ལྡན་པས་བཀའ་ཆད་དྲག་པོ་ཕོབ་ཅིག །ལེགས་ཉེས་ཀྱི་སྟངས་ཟུང་ཞིག །ས་མ་ཡ་རཀྵནྟུ། ཞེས་གོ་བར་བྱ་བའི་གཏམ་པདྨ་འོད་གླིང་ཆོས་ཀྱི་གན་མཛོད་ནས་བྲིས་པ་སརྦ་མངྒ་ལཾ།། །།རིག་བྱེད་འཛིན་པ་ལ་སྤྲིངས་པ། རྨོངས་ཆེན་གླང་པོས་རིང་སྤངས་པའི། །རིག་བྱེད་རྒྱ་མཚོའི་དེ་ཉིད་ལ། །ཀློག་ཏུ་མ་གྱུར་དེད་དཔོན་ཁྱེད། །དྲང་སྲོང་རྒན་པོའི་མཆིད་འདིར་གསོན། །ཕུང་པོ་ལྔ་དང་ཚོགས་བརྒྱད་ཀྱི། །ཉེར་ལེན་སྲིད་པའི་ཆོས་ཡིན་ཡང༌། །དེ་ཡི་འགལ་ཟླས་མ་བཅོས་པ། །མཐོ་རིས་དམ་པའི་ཡོན་ཏན་བདུན། །གང་ལ་འཚོ་གཞེས་བརྟན་པ་ནས། །རིང་དུ་འདྲིས་ཤིང་གཅུགས་པའི་གཏམ། །མིང་ཚིག་ཡི་གེའི་ཞལ་སྒོ་ལས། །དར་དིར་གླེང་མོ་བྱེད་པ་བཞིན། །རྒ་བས་ལང་ཚོའི་དཔལ་བཅོམ་ཞིང༌། །སྲོག་གི་ལྷག་མ་ཙམ་འདི་ལ། །ཡིད་བརྟན་མེད་པའི་ངེས་འབྱུང་དང༌། །གཞན་ཕན་ལྷག་བསམ་འགྲན་པར་མཆིས། །འཇིག་རྟེན་རྒུད་པའི་ཆོས་ལ་སྐྱོ་ཞིང་དེ་ཡི་དབུགས་ཆེན་འབྱིན་པ་ནི། །རྒྱལ་དང་དེ་སྲས་ལས་གཞན་མིན་པས་དངུལ་དཀར་བྲེ་ཆེན་
བཅུ་ཕྲག་ལས། །འཕགས་པ་མིག་མི་འཛུམས་པའི་ཞལ་དང་ས་སྙིང་ཐུར་སྲང་ལག་མིག་གིས། །བཀྲ་ཤིས་རྟགས་དང་ལྷག་གནས་འབུལ་སླད་ཆོས་འཁོར་ཆེན་པོར་དེང་ལ་ཉེ། །འགྱུར་དང་སྡུག་བསྔལ་འདུ་བྱེད་ཀྱི། །དམ་ལ་གཅུར་བའི་འཁོར་བ་འདིར། །སྐྱོ་བས་མངོན་མཐོའི་རིམ་གྲོ་ཡང༌། །ངེས་ལེགས་གྲུབ་ཕྱིར་འབད་འཚལ་ལོ། །མྱོང་གྲོལ་དམ་མདུད་དང་ལྷ་རྫས་བཅས།། །།སྲིད་སྐྱོང་རྟ་ཚག་རིན་པོ་ཆེར་རྟེན་བཞེངས་ཀྱི་ལེགས་འབུལ་ཆབ་ཤོག །ཆོས་ཀྱི་འབྱུང་གནས་སྨོན་པའི་རྔ་བོ་ཆེས། །གནས་ངན་ལེན་གྱི་དྲི་མ་བཀྲུས་པའི་ཞིང༌། །ཀུན་ནས་དག་པ་རབ་འབྱམས་སྐྱེད་མོས་ ཚལ། །བདེ་ལྡན་མགོན་པོས་འཚོ་གཞེས་ཆོ་ག་སྦྱིན། ༡ །རང་བཞིན་མེད་པའི་བདེ་གཤེགས་སྙིང་པོའི་ཁམས། །ཚོགས་བརྒྱད་ཞགས་པས་བཅིངས་པའི་ཡིད་ཅན་འདིའི། །བརླང་སྤྱོད་ལྕགས་ཀྱུས་བོས་པའི་དཀར་མིན་གྱི། །ཆོམ་པོར་གྱུར་པ་བསོད་ནམས་ཡེ་ཤེས་ཚོགས། ༢ །བྱེ་བྲག་རྩོད་ལྡན་གདུང་བ་ཞི་བའི་སྨན། །མི་བདག་དུང་གི་གཞོན་ནུ་མ་ཕམ་པ། །རྫོགས་ལྡན་གསར་པའི་དགའ་སྟོན་ཤིང་རྟའི་རྩེར། །འདྲེན་པའི་རྟེན་ཅིང་འབྲེལ་འབྱུང་ཆོ་ག་ལ། ༣ །ཐུགས་བསྐྱེད་ཚད་མེད་བཞི་པའི་ས་མཁན་གྱིས། །བྱ་བ་ལས་ཀྱི་འཁོར་ལོས་བདག་ཅག་ལ། །དབུགས་འབྱིན་ཆེན་
པོ་སྩོལ་ལ་རངས་པའི་ཡིད། །ཡན་ལག་བདུན་གྱི་མཆོད་སྤྲིན་ཐོག་མར་འབུལ། ༤ །བྱས་པ་ཤེས་ལ་དྲིན་དུ་གཟོ་བ་ཡི། །མི་ལ་དཔལ་མགོན་ཉེ་བར་གནས་སོ་ཞེས། །བདག་ཅག་ཁོ་ནའི་སྟོན་པ་དེས་གསུངས་ཕྱིར། །དངོས་སྟོབས་ཆུང་ཡང་དང་པའི་རྟེན་ཙམ་དུ། ༥ །སྐུ་གསུང་ཐུགས་རྟེན་མཆོག་གིས་སྣ་དྲངས་བའི། །ཟང་ཟིང་རྫས་ཀྱི་བདོ་པ་ཉུང་ཟད་འདི། །ཉུང་ངུའང་མང་པོར་བགྱིད་པའི་མཐུ་ལྡན་པ། །ཀུན་ཏུ་བཟང་པོའི་སྤྲིན་དུ་འཆར་གྱུར་ཅིག ༦ །སེམས་ཅན་དང་ནི་ཆོས་ལ་དམིགས་པ་དང༌། །དམིགས་པ་མེད་པའི་བྱང་ཆུབ་སེམས་གསུམ་ལས། །དང་པོའི་དོན་ཉིད་གཙོ་བོར་གྱུར་པ་ཡིས། །མཐུན་འགྱུར་མཛད་ལ་དེང་འདིར་དགོངས་ཤིག་ཀྱེ།། ༧ །།རྡོ་རྗེ་བྲག་སྤྲུལ་སྐུ་རིན་པོ་ཆེར། དུས་གསུམ་རྒྱལ་པའི་ཞལ་སྐྱིན་མཆོག །སངས་རྒྱས་གཉིས་པ་པདྨ་དང༌། །ཀུན་མཁྱེན་ངག་གི་དབང་པོ་ཡིས། །སྐྱེས་བུ་ཁྱོད་ལ་བྱིན་གྱིས་རློབས། །ཚངས་པ་ལྷ་ཡི་མེ་ཏོག་དེ། །གངས་རིའི་ལྗོངས་འདིར་ཡང་ནས་ཡང༌། །གེ་སར་རྒྱས་པའི་ཟེའུ་འབྲུ་ལ། །ཉང་རལ་དྷརྨ་ཤྭ་ར་དང༌། །ཡེ་ཤེས་རོལ་པའི་རྡོ་རྗེ་བྲག །གང་གི་བྲག་ཆེན་རྡོ་རྗེ་དེར། །དགུང་གཅིག་རྣལ་བའི་རྟེན་འབྱུང་ལས། །མངྒ་ལའང་དབང་པོའི་སྡེའི། །ཆོས་གཞི་ཨེ་ཝམ་ལྕོག་སྒར་
གྲུབ། །ཡབ་སྲས་གཉིས་མེད་ཐུགས་བསྐྱེད་ལས། །རྣམ་པར་འཕྲུལ་པ་ཁྱོད་ཅིག་དང༌། །དངོས་ཅག་སྐྱེས་པ་རབ་ཀྱི་ཕྲེང༌། །སྨོན་པས་འབྲེལ་བའི་ལས་འཕྲོ་སད། །གང་ཕྱིར་བདག་ལ་མ་འདྲིས་པའི། །མཛའ་བཤེས་ཐུགས་སུ་བྱོན་པ་ཡི། །མངོན་རྟོགས་རྔོན་པའི་བཀའ་མཆིད་ལ། །སྤྲོ་དང་རྗེས་སུ་ཡི་རང་འགྲན། །རྨོངས་པས་དཀྲུགས་པའི་གཞན་དབང་གི། །གཡང་སར་ལྷུང་བ་མེད་ཁྱོད་ལ། །བདག་གིས་སྤངས་དང་རྟོགས་པའི་ཆོས། །མངོན་སུམ་འཕོ་བར་ཅིས་མི་སྨོན། །རྒ་བའི་ཆད་པས་ནོན་གྱུར་ཅིང༌། །དབང་ཤེས་ལྡོངས་པར་གྱུར་ན་ཡང༌། །དམ་པའི་ཞིང་སར་དམ་པའི་ཀླུང༌། །འདྲེན་ལ་སྐྱོ་བའི་སྐབས་མི་དབྱེ། །རྒྱལ་བསྟན་སྤྱི་དང་བྱེ་བྲག་ཏུ། །སྔ་འགྱུར་ནུབ་རིར་སོན་པའི་ཚེ། །བསྟན་པའི་རྩ་ལག་ཆེན་པོར་རེ། །ཐོས་བསམ་སྒོམ་ལ་ཐུགས་སྟོབས་བསྐྱེད། །དམ་པ་རྣམས་ཀྱིས་དམ་བཅའ་ནི། །བསྟན་དང་འགྲོ་ལ་སྨན་པ་ཡི། །བྱང་ཆུབ་སེམས་མཆོག་ཁོ་ནའི་ཕྱིར། །སྐྱེས་བུ་ཆེན་པོའི་རྣམ་ཐར་སྐྱོངས། །རོང་པ་ཆོས་ཀྱི་ཟབ་པོ་དང༌། །རྒྱལ་བ་ཀློང་ཆེན་རབ་འབྱམས་དང༌། །ཞང་ཞུང་པཎྜི་ཏ་སོགས་ཀྱི། །གཞུང་ལ་རྟག་ཏུ་བསྟེན་གོམས་འཚལ། །དེ་ཡི་རྒྱུས་ལ་རྒྱུད་འབུམ་གྱི། །ཆོས་འབྱུང་འཛམ་གླིང་ཐ་གྲུའི་རྒྱན། །སྤྱན་
ལམ་བསྟར་བར་སྤྲོ་མོད་ཀྱང༌། །དེང་ཚེ་འབྲི་གུང་ཕྱོགས་སུ་དེངས། །འོན་ཀྱང་སྟོན་ཟླའི་གང་བ་ལ། །བསམ་ཡས་ཆོས་འཁོར་ཆེན་པོ་དེར། །ལྷག་གནས་བགྱིད་ལ་ཕྱོགས་པའི་ཚེ། །ཕོ་ཉའི་འགྲོས་ཀྱིས་སྐབས་དབྱེར་གསོལ། །དེང་གི་རིས་ལ་བཀའ་ཕེབས་བཞིན། །རྟོགས་པ་བརྗོད་དང་གཏམ་གྱི་ཚོགས། །ཤོག་གྲངས་ཟུར་གསལ་ལྟར་འབུལ་གྱི། །ཡ་རབས་རྣམས་ལ་སྐྱེས་ཀྱི་མཆོག །རྟག་ཏུ་ཞབས་པད་བརྟན་པ་ཡི། །རྟེན་ཅིང་འབྲེལ་འབྱུང་རྒྱ་མཚོ་དང༌། །སྐྱེས་བུ་གསུམ་གྱི་གཞུང་ལམ་ནས། །སེམས་ཅན་བདེ་ལ་འགོད་པར་འཚལ། །སྤྱན་རས་གཡོ་བའི་ལྷ་རྫས་དང༌། །ཡར་ཀླུང་ཤེལ་གྱི་བྲག་ཕུག་ཏུ། །ཆེ་མཆོག་བདུད་རྩིའི་སྒྲུབ་རྫས་བཅས། །མོས་དང་དད་པའི་སེམས་ཀྱིས་ཕུལ།། །།ལྷོ་བྲག་ལྷ་ལུང་ཐུགས་སྲས་སྤྲུལ་སྐུར་མཆིད་ལན། རི་མོ་གཡས་སུ་དཀྲིས་བའི་དགེ་མཚན་གྱི། །དབྱངས་ཡིག་ཡན་ལག་དྲུག་ཅུར་རྫོགས་པའི་གདངས། །དབྱངས་ཅན་འཕང་འགྲོའི་རྒྱུད་མིན་བདེ་གཤེགས་ཀྱི། །སྒྲ་ཚིག་བརྗོད་པ་བྲལ་དེས་ཁྱོད་བྱིན་རློབས། ༡ །རིང་ནས་བཤེས་པའི་དམ་བཅའ་མི་འགོག་པས། །སྙན་ཚིག་ཀ་ལ་པིངྐའི་རྒྱུན་ཆགས་གླུ། །འཚོ་གཞེས་ཆོ་ག་བརྟན་པའི་སྐབས་དབྱེ་བཞིན། །དངོས་དཀྱིལ་མཐོང་བའི་དགའ་
སྟོན་མཛད་ལ་རིངས། ༢ །འདི་ན་བདེ་གཤེགས་སྙིང་པོའི་ཆོས་ཉིད་ལ། །བྲི་གང་འཕོ་འགྱུར་མིན་བཞིན་དབང་ཤེས་རྣམས། །རྒ་བའི་ཆད་པས་ནོན་ཀྱང་ལྷག་བསམ་གྱི། །ཤིང་རྟའི་ཕྱི་བཞིན་བདུན་གྱི་བདུན་པ་འགྲོ། ༣ །འཁོར་བའི་རང་བཞིན་སྡུག་བསྔལ་བདེན་པ་ཡིས། །དམ་ལ་མ་གཞག་མེད་ཀྱང་རྩོད་ལྡན་གྱི། །འགྲོ་འདིའི་ལུས་སེམས་བརླང་སྤྱོད་རྩུབ་མོ་དེས། །ལྷག་བར་གཟིར་བའི་རྒྱུ་འབྲས་འགོག་པའི་སླད། ༤།སཽརྞ་རཱུ་པཾ་ཐུར་སྲང་བརྒྱ་ཕྲག་དྲུག ། རྒྱུ་འགྲོར་ཚོགས་པའི་མ་ཕམ་མགོན་གྱི་སྐུ། །བཟོ་གནས་རིག་པ་ལས་བྱོན་དེའི་ལྷག་གནས། །བགྱིད་པ་བསམ་ཡས་ཆོས་འཁོར་དེང་དུ་ཉེ། ༥ །སྲིད་པའི་མཚོ་འདིར་བདེ་སྐྱིད་སྤྱོད་བྱེད་སྨན། །རྒྱལ་བསྟན་རིན་ཆེན་བཻ་ཌཱུརྱ་ཡི་ཁམས། །དེ་འཛིན་སྐྱེས་བུ་མཆོག་གི་བདག་པོའི་རྒྱན། །ཉིད་ཕྱིར་ཤེས་རབ་གསུམ་ལ་ཐུགས་བརྩོན་བསྐྱེད། ༦ །དེ་ཡང་དོན་ལ་རྟོན་པའི་གནས་མང་དག །ཚིག་ལ་རྟོན་པའི་རྟོག་གེའི་མུན་སྤྲུལ་གྱིས། །བསྟན་པ་དཀྲུག་པའི་གཉེན་པོར་ཀུན་མཁྱེན་ཆེའི། །མཛོད་བདུན་ཤིང་རྟ་རྣམ་གསུམ་ལས་གཞན་མིན། ༧ །དེ་ཕྱིར་རྒྱལ་བ་གཉིས་པའི་གཞུང་ལུགས་ལ། །རྟག་ཏུ་བསྟེན་གོམས་མཛད་པར་བསྐུལ་པ་ཡི། །མཆོད་པའི་སྤྲིན་འདི་སྟོང་གསུམ་རིན་ཆེན་ཀྱིས། །བཀང་བས་ཆེས་ལྷག་བདག་གིར་གཞེས་ཤིག་གུ། ༨ །རིང་མིན་
ཞལ་སྐྱིན་བལྟ་དང་ཆབ་གཅིག་པར། །ཡ་རབས་དམ་པ་རྣམ་ལ་སྐྱེས་ཀྱི་མཆོག །སྟོན་པའི་དམ་ཆོས་རྣམ་གཉིས་བདུད་རྩིའི་སྤྲིན། །ཐུགས་ཀྱི་དཔལ་བེར་འབབ་པའི་བཀྲ་ཤིས་ཤོག།། ༩ །།མངའ་རིས་སྤྲུལ་སྐུའི་ཆབ་ཤོག་ལན། ལེགས་སྤྱད་ལེགས་སྨོན་རྒྱ་མཚོའི་ཤིང་རྟ་མཆོག །ཚོགས་གཉིས་དཔྱིད་ཀྱི་ཐིག་ལེའི་མུ་ཁྱུད་ཀྱི། །སྡེ་སྣོད་རྒྱ་མཚོའི་གོས་ཅན་ལ་དྲང་བ། །གང་གི་བཞེད་དོན་ལྷུན་གྱིས་གྲུབ་གྱུར་ཅིག །ཞི་བ་ཕྱོགས་གཅིག་མྱ་ངན་འདའ་བ་ཡི། །དགྲ་བཅོམ་བརྟུལ་ཞུགས་བསླབ་པའི་མཛོད་ཁང་ནས། །བྱང་ཆུབ་འཇུག་པའི་སྤྱོད་པ་རླབས་པོ་ཆེས། །བདག་ལའང་རྗེས་སུ་ཡི་རང་དགེ་ཚོགས་བྱིན། །རིགས་གསུམ་སེམས་དཔའི་ཐུགས་བསྐྱེད་གཞལ་མེད་ཁང༌། །རྡུལ་སྙེད་འབྱུང་བའི་ཆོམ་པོས་བཀབ་པ་ལ། །དལ་འགྲོའི་དཔུང་ཚོགས་ཡན་ལག་བཞི་བཤམས་པའི། །རྣམ་སྨིན་ག་པར་རྡུལ་དུ་འཛག་དེ་རྨད། །བྱང་ཆུབ་ཕྱོགས་ཀྱི་ཆོས་རྣམས་མཐའ་དག་གི། །བརྡ་དོན་ཁུར་དུ་བཟོད་པའི་མཆོད་སྡོང་གིས། །བརྟེན་པ་རིང་བསྲེལ་བཞི་པའི་ཡན་ལག་དང༌། །བཅས་པ་དང་བའི་ངང་ནས་བཞེས་སུ་གསོལ།། །།བཀའ་བློན་ལྷ་སྡིངས་བར། ཕུན་ཚོགས་ནོར་བུའི་གན་མཛོད་འབུམ་འཇོ་བ། །འོད་སྣང་མཐའ་ཡས་ཉེ་འཁོན་མེད་པའི་སྤྱན། །རིགས་ཅན་དྲ་མ་ཁྱོད་ལ་གཡོས་པའི་
མོད། །སྲོག་གི་སྐྱབས་སྦྱིན་ཕྱག་རྒྱས་རིང་དུ་སྐྱོངས། །གཡོ་བའི་རང་བཞིན་སྲིད་པའི་ཆོས་ཉིད་ཆེ། །གང་གིས་མ་དཀྲིགས་འཁོར་བ་ཡོད་མིན་ཡང༌། །དལ་བའི་རྟེན་ལ་རང་འབྱོར་བཞིས་ཕྱུག་ཅིང༌། །གསུམ་ལ་རིམ་གྲོར་བགྱིད་པ་ཁྱོད་ཅིག་གྲང༌། །གངས་རིའི་ལྗོངས་འདིར་འཕགས་པའི་གདུལ་ཞིང་ཕྱིར། །རྒྱལ་བསྟན་ལྷག་ཞབས་གནས་པའང་འདི་ཁོ་ནར། །ངེས་ཕྱིར་རིམ་གྲོ་བསྐྱེད་དང་སེམས་ཅན་གྱི། །བདེ་སྐྱིད་རྒྱལ་བློན་དག་ལ་རག་ལུས་སོ། །སྔོན་གྱི་ཆོས་རྒྱལ་མེས་དབོན་རྣམ་གསུམ་དང༌། །བསྟན་པ་རི་མོར་བགྱིད་པའི་རྗེས་ཞུགས་ཏེ། །མི་ཆོས་གཙང་མ་བཅུ་དྲུག་དམ་བཅའ་དང༌། །ཁྱིམ་གནས་བྱང་ཆུབ་སེམས་དཔའི་རྣམ་ཐར་སྐྱོངས། །ཆོས་ཀྱི་རིང་ལུགས་ཤེས་པའི་ཉེར་བསྡོགས་སུ། །ལུགས་ཀྱི་བསྟན་བཅོས་རྣམས་ལ་བསྙེན་བྱས་ཏེ། །རིགས་དང་དེ་ཡི་འགལ་ཟླ་རྣམ་གཉིས་ལས། །དང་པོའི་ཕྱོགས་ལ་བརྟུན་པའི་གོ་ཆ་བཀོན། །ཁྱད་པར་བྱང་ཆུབ་སེམས་དཔའི་སྡེ་སྣོད་ལ། །རྒྱལ་བློན་སོ་སོར་གདམས་པའི་ལྟུང་བྱེད་བཅུས། །བྱོལ་ཏེ་གཟུགས་ཅན་སྙིང་པོའི་རྣམ་ཐར་སྐྱོངས། །དེ་ཡིས་སྦྱིན་ཚུལ་བཟོད་པའི་བ་དན་སློང༌། །འཁོར་བ་སྙིང་པོ་མེད་པའི་རང་གཟུགས་ལ། །ཆུ་ཟླ་རྨི་ལམ་ལྟ་བུར་ཉམས་མྱོང་ནས། །མངོན་མཐོའི་རྒྱུ་ཚོགས་ཡན་ལག་བརྒྱད་པ་དང༌། །བདེན་པ་གཉིས་ཀྱི་ཆོས་ལ་གུས་པར་
མཛོད། །དངོས་ལའང་མ་འདྲིས་བཤེས་པའི་གསུང་མཆིད་དང༌། །སྔ་ཕྱིར་གཏོང་སེམས་གོམས་པའི་ཟང་ཟིང་སྐྱེས། །སྩལ་ལ་བཟང་པོ་བཞི་ལྡན་ཡོངས་བསྔོ་དང༌། །སྨོན་ལམ་རྣམ་པར་བརྒྱན་པའི་མཚམས་སྦྱོར་ཞུ། །གང་ཐུགས་དང་བའི་མེ་ཏོག་མནྡཱ་རའི། །སྐྱེད་ཚལ་དགའ་བའི་སྦྲང་རྩིས་བསྐྱེད་བསྲིངས་པའི། །གཟིགས་རྟེན་བྷྲ་མ་ར་ཡི་གཤོག་རླབས་ཀྱིས། །བཏེགས་པའི་བྱིན་མདུད་དང་བཅས་ཕྱོགས་དེར་དེངས། །གསུང་སྤྲུལ་རིན་པོ་ཆེའི་སྐུ་ཞབས་སུ་ཞུ་བ། དེང་གི་ཆར་སྐུ་རིན་པོ་ཆེའི་ཉིན་བྱེད་གསལ། བསྟན་པ་ཕྱག་བཞེས་ཆེ་བའི་རིང་ནས་ཆབ་ཤོག་རིན་པོ་ཆེ་གནང་རྟེན་བཅས་ཕེབས་པ་དངོས་མཇལ་ལྟར་གུས། འདིར་གྱི་ན་བའང་འཚོ་བ་སྙོམས་པ་ནས་དགེ་བློར་འདུན་པར་མཆིས། མཚམས་ཞུས། གཏེར་གསར་གྱི་ཆོས་རིགས་ལུང་བསྟན་དང་བཅས་བསྐུར་ཕེབས་པ་རང་རེ་ལ་གཟིགས་པ་དགེ་བའི་གསུང་དུ་སྣང་ཡང་ད་ལྟ་ལག་ཐོག་ཏུ་མེད་པས་ཅུང་ཟད་ནོངས། ཞུ་བའི་སྙིང་པོར། ངེད་ཆོས་ལ་གོ་བ་ཅུང་ཟད་སྐྱེས་པའི་དུས། སྡོམ་གསུམ་རབ་དབྱེར། དེས་ན་འདུལ་བའི་བསྟན་པ་ནི། །གཟུགས་བརྙན་ཙམ་ཞིག་དེང་སང་སྣང༌། །འབྲས་བུ་གསང་སྔགས་བསྟན་པ་ནི། །གཟུགས་བརྙན་ཙམ་ཡང་མི་སྣང་ངོ༌། །ཞེས་པ་འདི་ལ་གོ་བ་ཆེན་
པོ་ཞིག་སྐྱེས། སྔགས་ལམ་ལ་བསྐྱེད་རྫོགས་སོ་སོའི་སྦྱང་གཞི་སྦྱོང་བྱེད་རྒྱུད་སྡེའི་རིང་ལུགས་དང་མ་འབྲེལ་ན། བསྐྱེད་རིམ་ཚིག་ཀྱང་དང༌། རྫོགས་རིམ་ལྟར་སྣང་བས་གཞི་ལམ་འབྲས་བུའི་དོན་ངོས་མི་ཟིན་པས། སྔ་འགྱུར་བཀའ་མ་དང༌། སྙིང་ཐིག་ཡ་བཞི་ལ་སོགས་པའི་ཆོས་ཚུལ་ཡོངས་གྲགས་དེ་ཚོའི་དོན་མ་རིག་ན་རྙིང་མའི་བསྟན་པ་མེད་པར་ཤེས། རྒྱལ་བ་ཀློང་ཆེན་པས། དམན་པའི་ནོར་དག་ཉོ་ཚོང་བྱེད་ན་ཡང༌། །རང་གིས་མི་ཤེས་གཞན་ལ་འདྲི་བྱེད་ན། །དེང་སང་གང་བྱུང་ཆོས་ཀྱི་ལམ་དེར་འཇུག །བློ་གྲོས་བླུན་པོ་བདུད་སྡེས་མངོན་སུམ་བཅོམ། །ཞེས་པས་བསྐལ་ངན་གྱི་གནས་སུ་ལྷུང་དོགས་ནས། གོང་གསལ་རྣམས་ལ་ཆེ་ཐང་དུ་བགྱིད་པའི་དུས་ཤིག་ན། ཀུན་མཁྱེན་ཆེན་པོ་དངོས་དང་ཞལ་མཇལ་ནས། སྔ་འགྱུར་གྱི་བསྟན་པ་དངོས་བསྟན་ནུབ་ཏུ་ཉེ་བས། ཁྱོད་ཀྱིས་གདམས་ཕྲན་གྱི་ཁ་འཛིན་མ་བྱེད་པར། ཤིང་རྟ་ཆེན་མོའི་གྲུབ་མཐའ་སློང་ཞིག་གསུངས་ཤིང་རྒྱུད་བྱིན་གྱིས་བརླབས་པ་ནས་བཟུང༌། དེའི་ལུགས་ཀྱི་གསང་སྔགས་ཟབ་མོའི་ལྟ་སྒོམ་སྤྱོད་འབྲས་ཀྱི་རྩ་བ་མདོ་སྒྱུ་སེམས་གསུམ་ལ་སོགས་པར་རིག་ནས་དེ་དག་འབའ་ཞིག་ལ་བཤད་སྒྲུབ་ཀྱི་བྱ་བ་བྱེད་པས། གཏེར་གསར་གྱི་རིགས་ལ་དག་སྣང་མེད་
པ་མ་ཡིན་ཀྱང༌། དཔེ་ཆ་སྒྲུབ་རྩོལ་སོགས་མ་འགྲུབ་པས་དཔེ་རྒྱུན་དཀོན་པོ་ལས་མེད་ཅིང༌། འོན་ཀྱང་ཡོད་ཁུངས་ཞུ་རྒྱུ་ཟུར་གསལ་ལྟར་དང༌། དམ་པ་ཁྱེད་ཅག་ཡབ་སྲས་ཀྱང་ཀུན་མཁྱེན་ཆེན་པོའི་དེ་མ་ཐག་པའི་ཕྲིན་ལས་སྒྲུབ་པའི་རྣམ་སྤྲུལ་པདྨ་གླིང་པའི་ཆོས་ཀྱི་གདན་ཁྲི་ལ་བཞུགས་པ་ཡིན་ན། རང་བསྟན་རྩ་བ་ཆེན་པོ་འདི་ནུབ་ཏུ་ཆ་བ་ལ་ལུང་ཙམ་ཐོས་པས་ཆོས་ཀྱི་གོ་མི་འགོགས་པར་ད་ལྟ་སྐུ་ན་གསར་བུར་གྱུར་པ་ལ་ཐོས་བསམ་སྒོམ་གསུམ་གྱི་སྒྲོ་འདོགས་ཕྱོགས་འདིའི་བསྟན་པ་ལ་གཅོད་པའི་ཕྲིན་ལས་བདག་གིར་བཞེས་པར་གསོལ་བ་འདེབས་ན། རྒན་པོའང་ཞྭ་དཀར་གྱི་ཕྱོགས་རིས་ཅན་དུ་དགོངས་པའི་གཟིགས་པ་མི་ལྷོད་པས་དྲང་པོར་གསོལ་བ་ལ་བསྙེལ་བ་མེད་པ་དང༌། སྐུ་ཚེ་བརྟན་ཅིང་བསྟན་པ་རྒྱས་པའི་ཐུགས་བསྐྱེད་ནས་ཕེབས་ཚོགས་ཀྱང་ནར་མར་སྩོལ་བར་ཅི་གནང༌། ཞུ་འདེགས་བཅས་ཕུལ།། །།