ཇོ་ལུགས་སྒྲོལ་དཀར་མཎྜལ་གཅིག་པ།
ཇོ་ལུགས་སྒྲོལ་དཀར་མཎྜལ་གཅིག་པ་བཞུགས། །
ན་མ་ཨཱརྱ་ཏཱ་རེ། འདིར་ཇོ་བོ་ལས་བརྒྱུད་པའི་སྒྲོལ་དཀར་ཡིད་བཞིན་འཁོར་ལོའི་བསྙེན་པ་བྱ་བར་འདོད་པས། གནས་དབེན་ཞིང་ཉམས་དགའ་ལ། གཞི་བདག་དང་འབྱུང་པོ་གདུག་པ་ཅན་གྱིས་དབང་དུ་མ་བྱས་པར་བྱི་དོར་ལེགས་པར་བྱ། དཀོན་མཆོག་གི་རྟེན་དགྲམ། ཚེ་སྒྲུབ་སྤྲོས་བཅས་དང་འབྲེལ་ན་སྟེགས་བུ་ཁེབས་ལྡན་པདྨ་འདབ་བརྒྱད་རེ་ཁཱ་ཅན་གྱི་དབུས། སྐུ་རྟེན་ཚེ་བུམ། གསུང་རྟེན་བདུད་རྩི། ཐུགས་རྟེན་ཚེ་རིལ་ཡང་བཤམ། རྒྱུན་བསྙེན་དང་སྒྲུབ་པ་ཇི་ལྟར་ཡང་དཀར་གསུམ་མངར་གསུམ་ཤིང་འབྲས་སོགས་ཀྱིས་བརྒྱན་པའི་དཀར་གཏོར་ཟླུམ་པོ་པད་འདབ་བཞི་པ་དང༌། མཐའ་ཉེར་སྤྱོད་ཀྱིས་བསྐོར། གྲུབ་ན་གཏོར་མ་ཆ་གསུམ་དང༌། མ་བདེ་
ན་གཞི་བདག་ལ་དཀར་གཏོར། འབྱུང་པོ་ལ་ཆངས་བུ། རིལ་བུ། མཐེབ་ཀྱུ་སོགས་བཤམས་ལ་ཆུ་ཆང་གིས་བྲན། ཨ་ཀཱ་རོ་ལན་གསུམ་གྱིས་བརླབ། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་བསྔོས་ལ་ཕྱི་རོལ་ཏུ་གཏོང༌། རྡོ་རྗེའི་རྭ་གུར་གྱིས་སྲུང་འཁོར་སྒོམ། དེ་ནས་བྱང་ཆུབ་སེམས་ཀྱི་བསྔགས་པ་བརྗོད་པ་ནི། ངན་འགྲོའི་ལམ་ནི་ལྡོག་བགྱིད་ཅིང༌། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། །ཞེས་བརྗོད་ཅིང༌། ཚད་མེད་བཞིས་རྒྱུད་ལེགས་པར་སྦྱང༌། སྐྱབས་འགྲོ་ནི། སྐྱོབ་པ་མཆོག་དང་བདེན་གཉིས་དམ་པའི་ཆོས། །རིག་གྲོལ་གཉིས་ལྡན་བྱང་ཆུབ་སེམས་དཔའི་ཚོགས། །འཕགས་
མའི་སྐུ་གསུང་ཐུགས་ལས་གཞན་མིན་པས། །སྐྱེས་བུ་ཆེན་པོའི་སེམས་ཀྱིས་སྐྱབས་སུ་མཆི། །གསུམ། སེམས་བསྐྱེད་ནི། ཧོ། བདག་དང་མར་གྱུར་སེམས་ཅན་ཐམས་ཅད་ཀུན། །གནས་སྐབས་བདུད་བཞིའི་འཇིགས་པ་ལས་གྲོལ་ཞིང༌། །མཐར་ཐུག་བྱང་གྲོལ་མཆོག་ལ་འདོད་པའི་ཕྱིར། །སྨོན་དང་འཇུག་པའི་བྱང་ཆུབ་མཆོག་སེམས་བསྐྱེད། །གསུམ། ཡན་ལག་བདུན་པ་ནི། ཨཱཿཡན་ལག་ལྔས་བཏུད་ལུས་དང་ལོངས་སྤྱོད་འབུལ། །ཉེས་ལྟུང་མི་འཆབ་དགེ་ལ་རྗེས་ཡི་རང༌། །ཆོས་འཁོར་བསྐོར་ཞིང་མྱ་ངན་མི་འདའ་གསོལ། །དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ། །མཆོད་རྫས་བྱིན་བརླབ་ནི། ཧཱུྃ། མཆོད་པའི་དམ་རྫས་བརྟན་གཡོའི་དངོས་པོ་ཀུན། །ཀུན་ཏུ་བཟང་པོའི་རྣམ་པར་འཕྲུལ་བ་ཡིས། །ནམ་མཁའ་མཛོད་ཀྱི་འཁོར་ལོར་བྱིན་གྱིས་རློབས། །མཆོད་པའི་ཕྱག་རྒྱ་ཆེན་པོར་ལྷུན་རྫོགས་ཤོག །རཱུ་བ། ཤབྟ། གྷནྡྷེ། རཱ་ས། པརྴེ། དྷརྨ་དྷརྟུ་སརྦ་པཱུ་ཛ་ཨཱཿཧཱུྃ། གསུམ་དང༌། ནམ་མཁའ་མཛོད་ཀྱི་སྔགས་རྒྱས་རློབ། དེ་ནས་མངོན་རྟོགས་བསྒོམ་པ་ནི། ཨཱཿ ཆོས་རྣམས་ཐམས་ཅད་སྟོང་ཞིང་བདག་མེད་ཀྱང༌། །འདི་ལྟར་མ་རྟོགས་སེམས་ཅན་སྙིང་རེ་རྗེ། །སྐྱེ་མེད་ངང་ལས་སྐྱེ་བའི་ཆོ་འཕྲུལ་ནི། །གཡུ་ལོ་བཀོད་པའི་ཞིང་ཁམས་ཉམས་དགའ་བ། །མནན་ན་ནེམ་ཞིང་བཏེག་ན་སྤར་བའི་གཞིར། །རིན་ཆེན་བཻ་ཌཱུརྱ་
ཡི་བྲག་རི་ལ། །དྲང་སྲོང་རིག་འཛིན་གྲུབ་པ་མཆོག་རྣམས་གནས། །འབྱུང་བ་ཡོངས་རྫོགས་དྭངས་པའི་མཚོ་རྫིང་ནི། །པུཎྜ་རི་ཀ་ནེའུ་གསིང་དྲ་བས་མཛེས། །རིན་ཆེན་སྣ་ཚོགས་ལྗོན་ཤིང་བལྟ་ན་སྡུག །ཡལ་འདབ་རྣམས་ལ་གསེར་གཡུ་བྱི་རུ་དང༌། །པད་རག་ཨིནྡྲ་ནི་ལ་ལ་སོགས་པ། །དབང་གཞུ་ལྟ་བུར་བཀྲ་བའི་བྱ་ཚོགས་དང༌། །འཕུར་ལྡིང་ཤིན་ཏུ་གཡོ་བའི་བྷྲཱ་མ་ར། །སེམས་དང་ཡིད་དང་རྣམ་པར་ཤེས་པ་དང༌། །ཀུན་འབྱུང་སྡུག་བསྔལ་སྤངས་པའི་ཆོས་ཀྱི་སྒྲ། །ཐེག་པ་གསུམ་དང་རྒྱུད་སྡེའི་དབྱིངས་སུ་སྒྲོག། གཟུགས་སྣང་ཐམས་ཅད་དག་པའི་སྣོད་དང་བཅུད། །ཚོར་བ་ཐམས་ཅད་བདེ་སྟོང་ཕྱག་རྒྱ་ཆེ། །འདུ་ཤེས་ཐམས་ཅད་ཕ་རོལ་ཕྱིན་པ་དྲུག །འདུ་བྱེད་ཐམས་ཅད་ས་བཅུའི་སྤངས་རྟོགས་ཏེ། །རྣམ་ཤེས་ལས་འདས་ཡེ་ཤེས་རོལ་པའི་གདངས། །དག་པ་རབ་འབྱམས་ཞིང་ཁམས་བཀོད་པའི་ཀློང༌། །རང་བཞིན་ལྷུན་གྲུབ་སྤྲུལ་པའི་གཞལ་མེད་ཁང༌། །རྒྱ་ཁྱོན་བཀོད་པ་བློ་ལས་འདས་པའི་དབུས། །པད་ཟླའི་གདན་ལ་ཏཱཾ་ཡིག་ཡོངས་གྱུར་ལས། །རྗེ་བཙུན་སྒྲོལ་དཀར་ཡིད་བཞིན་འཁོར་ལོ་ནི། །ཟླ་བར་རྒྱབ་བརྟེན་རྡོ་རྗེའི་སྐྱིལ་མོ་ཀྲུང༌། །ཕྱག་གཡས་མཆོག་སྤྱིན་མི་མཐུན་ཕྱོགས་ལས་སྒྲོལ། །གཡོན་པ་སྐྱབས་སྦྱིན་མཐེབ་མཛུབ་ལ་གནས་པའི། །ཨུཏྤལ་ཟེའུ་འབྲུས་དུས་གསུམ་སངས་རྒྱས་མཚོན། །རིགས་
ཀྱི་བདག་པོ་སྣང་བ་མཐའ་ཡས་བརྒྱན། །ཚེ་དང་ཡེ་ཤེས་མཆོག་གི་དངོས་གྲུབ་སྟེར། །འགྲོ་ལ་ཐུགས་རྗེས་གཟིགས་པ་མི་ཡོལ་བས། །ཕྱག་ཞབས་མཐིལ་སོགས་ཡེ་ཤེས་སྤྱན་བདུན་སྤྲས། །མཉེན་ལྕུག་འཁྲིལ་ལྡེམ་གཞོན་ནུའི་ངང་ཚུལ་ཅན། །གསལ་འཚེར་ལྷུན་སྟུག་གཟི་བྱིན་ལྡན་པ་སྟེ། །ཞི་ཚུལ་དགུ་དང་རྒྱན་ཆ་བཅུ་གསུམ་མཛེས། །མཐའ་སྐོར་སངས་རྒྱས་བྱང་སེམས་རིག་འཛིན་དང༌། །གནས་ཡུལ་ཉེར་བཞིའི་དཔའ་བོ་མཁའ་འགྲོས་བསྐོར། །ཀུན་ཀྱང་གདན་གསུམ་རྡོ་རྗེའི་བདག་ཉིད་ཅན། །ཡོངས་སྒྲུབ་དབང་བསྐུར་རྫོགས་པའི་པྲོག་ཞུས་བརྒྱན། །གནས་གསུམ་ཕྱག་མཚན་གསུམ་དང་ཡིག་འབྲུ་ལས། །འོད་འཕྲོས་རང་བཞིན་སྤྲོས་བྲལ་གདོད་མའི་དབྱིངས། །སྐུ་གསུམ་ཡན་ལག་བདུན་ལྡན་ལོངས་སྤྱོད་རྫོགས། །གཡུ་ལོ་བཀོད་སོགས་སྤྲུལ་བའི་ཞིང་ཁམས་ནས། །ཡེ་ཤེས་ལྷ་ཚོགས་བཛྲ་ས་མཱ་ཛཿ སྤྱན་འདྲེན་ནི། ཧཱུྃ། མཁྱེན་པས་བྱང་ཆུབ་ཆོས་ཁམས་ཡོངས་གཟིགས་ཀྱང༌། །བརྩེ་བས་ཞི་ལ་མི་གཞོལ་འཁོར་བ་སྒྲོལ། །ནུས་པས་བདུད་སྡེ་ཕྱེར་འཐག་བཅོམ་ལྡན་མ། །ཚེ་དབང་བདེ་སྦྱིན་ལྷ་མོ་གཤེགས་སུ་གསོལ། །ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ བཞུགས་གསོལ་བསྟོད་ཕྱག་ནི། ཨཱཿབདེ་གཤེགས་སྙིང་པོའི་རང་བཞིན་ཡེ་ཤེས་སེམས། །གདོད་ནས་དམ་ཚིག་འཁོར་ལོར་རོ་གཅིག་ཀྱང༌། །གློ་བུར་སྒྲིབ་
གཉིས་སྤངས་པའི་སྟན་བཞུགས་ལ། །མངོན་སུམ་ལྟ་བ་མཇལ་བའི་ཕྱག་གིས་བཏུད། །ན་མོ་ན་མ་ཧཱུྃ། མཆོད་པ་ནི། ཧཱུྃ། ཡུལ་དང་དབང་པོ་འབྲེལ་བའི་སྲེད་ལེན་གྱི། །ཉེར་སྤྱོད་ལས་འདས་མཆོད་པའི་ཕྱག་རྒྱ་ཆེ། །ཀུན་ཏུ་བཟང་པོའི་རྣམ་འཕྲུལ་བླ་ན་མེད། །ནམ་མཁའ་མཛོད་ཀྱི་འཁོར་ལོས་མཉེས་གྱུར་ཅིག །བཛྲ་རཱུ་པ། ཤབྟ། གནྡྷ། རཱ་ས། པརྴེ། དྷརྨ་དྷརྟུ་མ་ཧཱ་སརྦ་པཱུ་ཙ་ཨཱཿཧཱུྃ་བསྟོད་པ་ནི། ཨོཾ། ཆུ་སྐྱེས་ཞལ་གྱི་གེ་སར་ལས། །འགྲོ་བ་སྒྲོལ་ཕྱིར་རྣམ་པར་འཕྲུལ། །ཕྲིན་ལས་མྱུར་ཞིང་བདུད་ལ་དཔའ། །བཞད་པ་རབ་བཞད་ཁྱོད་ལ་བསྟོད། །སྦྱིན་པའི་མཆོག་ལྡན་མི་འཇིགས་སྟེར། །སེམས་ཅན་དོན་བྱེད་ཚུལ་ཁྲིམས་དང༌། །བཟོད་པའི་དཀའ་ཐུབ་ཉམས་མི་མངའ། །ཤིན་ཏུ་སྦྱངས་པ་ཁྱོད་ལ་བསྟོད། །སུ་ཡིས་ཁྱེད་ལ་གསོལ་བཏབ་དོན། །ཡལ་བར་མི་འདོར་བརྩོན་འགྲུས་དང༌། །དེ་བཞིན་གཤེགས་དགའི་བསམ་གཏན་དང༌། །བྱང་གྲོལ་ཤེས་རབ་ལྷ་མོར་བསྟོད། །བདག་གིས་ཚེ་རབས་ཐམས་ཅད་དུ། །ཁ་ན་མ་ཐོའི་ལས་བསགས་པ། །ལྷ་མོ་ཁྱོད་ལ་མཐོལ་ཟིན་གྱིས། །བདུད་བཞིའི་གཡུལ་ལས་རྒྱལ་བར་མཛོད། །བཟླས་དམིགས་ནི། ཐུགས་ཀར་ཟླ་གདན་ལ་གནས་པའི། །འོད་ཀྱི་རྣམ་པའི་འཁོར་ལོ་ནི། །རྩིབས་བརྒྱད་འབྲུ་བརྒྱད་དབུས་ན་ཏཱཾ། །རེག་ལ་མ་འབྱར་གཡོན་
དུ་འཁོར། །འོད་ཟེར་འཕྲོས་པས་རྒྱལ་བ་མཆོད། །སེམས་ཅན་དོན་བྱས་འཁོར་འདས་ཀྱི། །དྭངས་བཅུད་བདག་ལ་ཐིམ་པ་ཡིས། །དུས་མིན་འཆི་བའི་འཇིགས་པ་བསལ། །མཆོག་ཐུན་དངོས་གྲུབ་ཐོབ་པར་གྱུར། །ཨོཾ་ཏཱ་རེ་ཏཏྟཱ་རེ་ཏུ་རེ་མ་མ་ཨཱ་ཡུརྤུཎྱ་ཛྙཱ་ན་པུཥྟིཾ་ཀུ་རུ་སྭཱ་ཧཱ། ཞེས་སྣང་བ་སྐུ་དང་ཞིང་ཁམས། གྲག་པ་སྔགས་ཀྱི་རང་སྒྲ། དྲན་རྟོག་ཆོས་ཉིད་ཀྱི་དོན་ལས་མི་འདའ་བའི་ངང་ནས་བཟླས་དམིགས་བྱ་ཞིང༌། ཐུན་བསྡུ་བ་ནི། ཚོགས་བསགས་པའི་ཕྱིར་མཆོད་པ་བརྗེ། མཎྜལ་རྒྱས་བསྡུས་ཅི་རིགས་པ་དང༌། བསྟོད་བསྔགས་ནི། སངས་རྒྱས་ཐམས་ཅད་ཁྱོད་ལས་སྐྱེས། །དེ་ཕྱིར་རྒྱལ་བ་ཀུན་གྱི་ཡུམ། །ས་དང་ཕ་རོལ་ཕྱིན་བཅུའི་བདག །སྤྲོས་བྲལ་དབུ་མ་ཆེན་པོར་བསྟོད། །གཟུགས་སོགས་ཕུང་པོའི་ཉེར་ལེན་བདུད། །རང་བཞིན་རྣམ་དག་སྟོང་ཉིད་དབྱིངས། །ལྟོས་གྲུབ་མེད་པར་སྦྱོར་མཛད་པའི། །རྣམ་ཀུན་མཆོག་ལྡན་མ་ལ་བསྟོད། །ཀུན་བརྟག་ལས་རླུང་བཞོན་པ་དང༌། །ལྷན་ཅིག་སྐྱེས་པའི་ཉོན་མོངས་བདུད། ། མཐོང་སྤངས་བྱང་ཆུབ་ཡན་ལག་གི །ཡེ་ཤེས་མེ་ལྕེས་བསྲེག་ལ་བསྟོད། །མ་རིག་ལས་ནི་རྣམ་ཤེས་སོགས། །རྟེན་འབྲེལ་ལུགས་འབྱུང་འཆི་བདག་བདུད། །སྒོམ་སྤངས་འཕགས་པའི་ལམ་བརྒྱད་ཀྱིས། །འཆི་མེད་ཞི་བར་སྦྱོར་ལ་བསྟོད། །ཡུལ་དང་ཡུལ་ཅན་འབྲེལ་བ་ལས། །བསླུ་བྲིད་འདུ་བྱེད་ལྟ་
བུའི་བདུད། །སློབ་པ་མིན་པའི་ཟུང་འཇུག་ཀློང༌། །སྒྲོལ་མཛད་ཡིད་བཞིན་འཁོར་ལོར་བསྟོད། །ནོངས་བཤགས་ནི། མ་འབྱོར་པ་དང་ཉམས་པ་དང༌། སོགས་ཀྱི་མཐར་ཡིག་བརྒྱས་ནོངས་པ་བཤགས། རྗེ་བཙུན་བཅོམ་ལྡན་འདས་མ་སོགས་ཀྱིས་འདོད་གསོལ་གདབ། དགེ་བ་འདི་ཡིས་སྐྱེ་བོ་ཀུན། །སོགས་ཀྱིས་བསྔོ་སྨོན་བྱ། ཐུན་མཚམས་ཐམས་ཅད་དུ་བྱང་ཆུབ་སེམས་ཀྱིས་ཟིན་ པའི་བསྐྱེད་རྫོགས་བཟླས་གསུམ་གྱི་ལམ་ཁྱེར་དང་མ་བྲལ་ན། བར་དོར་སྒྲོལ་མའི་ཞལ་མཐོང་བ་ཡིན་ནོ། །ཆོས་མཛད་སཱ་རའི་ངོར་རྒྱལ་བའི་མྱུ་གུ་མཁྱེན་བརྩེའི་ལྷས་སོ།། །།
འཇམ་དཔལ་དཀར་པོ་མ་ཏི་ལུགས་ཀྱི་རྒྱུན་ཁྱེར་ནི།
འཇམ་དཔལ་དཀར་པོ་མ་ཏི་ལུགས་ཀྱི་རྒྱུན་ཁྱེར་ནི། སངས་རྒྱས་ཆོས་ཚོགས་དང༌། སྟོང་བའི་ངང་ལས་བཾ་ཡིག་ནི། །འོ་མའི་རྒྱ་མཚོར་གྱུར་པའི་མཐའ། །ནེའུ་གསིང་མེ་ཏོག་དུ་མས་མཛེས། །ལྷ་དང་དྲང་སྲོང་རིག་འཛིན་དང༌། །གླང་ཆེན་ཐལ་ཀར་ཆུ་བྱས་གང༌། །ཡིད་འོང་རྫིང་བུར་པཾ་ཡིག་ལས། །པདྨའི་སྡོང་པོ་རྒྱས་པའི་རྩེར། །འདབ་སྟོང་གེ་སར་དམར་སེར་དབུས། །ཨ་ལས་ཟླ་བའི་དཀྱིལ་འཁོར་སྟེང༌། །རང་སེམས་ཨ་ཡིག་དཀར་པོ་ལས། །འོད་འཕྲོས་མི་ཤེས་རྨོངས་མུན་བསལ། །འགྲོ་ཀུན་ཤེས་རབ་སྣང་བར་བཀོད། །ཚུར་འདུས་ཡོངས་གྱུར་བདག་ཉིད་ནི། །རྒྱལ་ཀུན་ཡབ་གཅིག་འཇམ་དཔལ་དབྱངས། །དཀར་གསལ་ཞལ་གཅིག་ཕྱག་གཉིས་པ། །
གཡས་པས་མཆོག་སྦྱིན་གཡོན་པ་ཡི། །མཐེབ་སྲིན་གྱིས་བཟུང་ཨུཏྤ་ལའི། །སྡོང་པོའི་རྩ་བ་ཐུགས་ཀར་འཛིན། །རྩེ་མོ་སྙན་ཐད་བྱེ་བའི་སྟེང༌། །སྟོང་ཕྲག་བརྒྱ་པའི་གླེགས་བམ་ཅན། །ཞབས་གཉིས་རྡོ་རྗེའི་སྐྱིལ་མོ་ཀྲུང༌། །རལ་པའི་ཟུར་ཕུད་ལྔ་དང་ལྡན། །བཅུ་དྲུག་ལོན་པའི་ན་ཚོད་ཅན། །དར་དང་རིན་ཆེན་རྒྱན་གྱིས་མཛེས། །མཚན་དཔེ་བལྟ་བས་ཆོག་མི་ཤེས། །ཐུགས་མཆོག་པད་འདབ་ཁ་བྱེའི་དབུས། །འཁོར་ལོ་དཀར་པོ་རྩིབས་དྲུག་པའི། །ལྟེ་བར་ཟླ་དཀྱིལ་ཨ་ཡིག་མཚན། །རྩིབས་དྲུག་མདུན་ནས་གཡས་སྐོར་ལ། །འབྲུ་དྲུག་འཁོར་ལ་མ་རེག་གསལ། །འཁོར་ལོ་གཡས་དང་ཡིག་འབྲུ་ནི། །དེ་ལས་ལྡོག་པར་འཁོར་བ་ཡིས། །སྡིག་སྒྲིབ་དག་ནས་རིག་པ་མཆོག །སྤོབས་པའི་གཏེར་མཛོད་གྲོལ་བར་གྱུར། །ཨོཾ་ཝཱ་ཀྱཻ་དཾ་ནཱ་མ། ཞེས་ཅི་མང་བཟླས་མཐར་ཡིད་ཀྱིས་མཎྜལ་ཕུལ། དགེ་བ་འདི་ཡིས་སོགས་བརྗོད། སློབ་དཔོན་སྒེག་པའི་རྡོ་རྗེའི་ཐུགས་དམ་ཟླ་བ་གཅིག་གིས་བློ་གྲོས་ཀྱི་མཐུ་ཆེན་པོར་བྱེད་པའི་མན་ངག་གི་རྒྱུན་འཁྱེར་འདི་ཡང་རྭ་སྟོན་སྤྲུལ་པའི་སྐུ་འཇིགས་མེད་མཐུ་སྟོབས་རྡོ་རྗེའི་སྐྱེས་ཐོབ་ཀྱི་ལང་ཚོ་སྒེག་པའི་ཆ་རྐྱེན་དུ་མཁྱེན་བརྩེའི་འོད་ཟེར་གྱིས་གཞུང་ལས་ཉེ་བར་བསྡུས་ཏེ་སྦྱར་བའོ།། །།
དྲང་སྲོང་ཞི་བའི་རྒྱུན་ཁྱེར་ནི།
དྲང་སྲོང་ཞི་བའི་རྒྱུན་ཁྱེར་ནི། སྐྱབས་སེམས་དང་ཡན་ལག་བདུན་པ་བྱས་ནས། རང་གི་སྙིང་ནང་ཨ་དཀར་པོ། །འོད་ཟེར་ཤིན་ཏུ་འབར་བ་ཡིས། །
རྣམ་སྨིན་ལུས་དང་བག་ཆགས་བསྲེགས། །སྟོང་པའི་ངང་ལས་དྲན་རྫོགས་སུ། །རང་ཉིད་དྲང་སྲོང་དྲི་མེད་ནི། །སྐུ་མདོག་སྔོ་སྐྱ་སྐྱིལ་ཀྲུང་བཞུགས། །སྨིན་མ་སྟུག་ཅིང་ཨག་ཚོམ་རིང༌། །རས་དཀར་ཤམ་ཐབས་བླ་གོས་གསོལ། །གཡས་གཡོན་ཕྱག་ན་སྤྱི་བླུགས་དང༌། །ལུང་ཐང་ཕྲེང་འཛིན་རིག་སྔགས་གསུང༌། །འཁོར་དུ་དྲང་སྲོང་འབུམ་གྱིས་བསྐོར། །དེ་ལྟར་གསལ་བའི་སྙིང་ག་རུ། །ཉི་མའི་གདན་ལ་ཧཱུྃ་གི་མཐར། །སྔགས་ཕྲེང་འཁོར་བའི་འོད་ཟེར་གྱིས། །ནད་གདོན་སྡིག་སྒྲིབ་ཀུན་ཞི་ཞིང༌། །ཕས་རྒོལ་རིག་སྔགས་བཟློག་པར་གྱུར། །ཏྲཾ་དུ་ཏྲི་ན་ཏྲཾ་དུ་ཛཿཛཿ ཞེས་ཅི་ནུས་བཟླས་མཐར། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང༌། །རྒྱུ་འབྲས་བསླུ་བ་མེད་པ་དང༌། །ཆོས་ཉིད་ཟབ་མོའི་བདེན་པ་དང༌། །གསང་སྔགས་རིག་སྔགས་ནུས་མཐུ་དང༌། །དྲང་སྲོང་ཞི་ཁྲོའི་བདེན་པ་ཡིས། །ཕས་རྒོལ་རིག་སྔགས་བྱད་མ་དང༌། །ཁྱབ་པ་འདུ་བྱེད་རྟེན་འབྲེལ་ལས། །ཚེ་དང་སྲོག་ལ་རྒོལ་བ་ཡི། །བྱད་ཕུར་རྦོད་གཏོང་འཚེ་བ་ཀུན། །སླར་ལ་ཁོ་རང་གཤེད་དུ་བཟློག །སངས་རྒྱས་ཀྱིས་ནི་བདུད་རྣམས་ཕམ། །ཆོས་མ་ཡིན་པ་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་གྱུར། །ལྷ་མིན་རྣམས་ཀྱིས་ཟླ་བ་ཕམ། །ནམ་མཁའ་ལྡིང་གིས་རྒྱ་མཚོ་ཡི། །ཀླུ་རྣམས་
རབ་ཏུ་ཕམ་པར་གྱུར། །མེ་ཡིས་བུད་ཤིང་བསྲེགས་པ་དང༌། །རླུང་གིས་སྤྲིན་རྣམས་གཏོར་བ་དང༌། །རྡོ་རྗེས་རིན་ཆེན་ཕུག་པ་ལྟར། །དྲང་སྲོང་བདེན་པས་རབ་ཏུ་གནས། །བདེན་པ་འདི་དག་ཐམས་ཅད་ཀྱིས། །དེང་འདིར་བྱད་ཕུར་བཟློག་གྱུར་ཅིག །ཅེས་ཐལ་མོ་བརྡབ། དྲང་སྲོང་ལོག་ཏྲི་འདི་ནི་སྡེ་བརྒྱད་གནད་ལ་དབབ་པའི་དྲག་སྔགས་ཤིན་ཏུ་གཉན་པ་ཡིན་ཡང༌། བྱད་ཁ་བཟློག་པའི་ཟབ་གྲགས་ནོར་སྐྱོང་གི་ཀུ་ཅོས་རབ་ཏུ་འགྲོགས་ནས་གང་དྲན་གྱི་དམོད་སྔགས་དྲག་པོའི་ཉམས་ལེན་ལ་ཞུགས་པས་སྡེ་བརྒྱད་ཀྱི་འཁུ་ལྡོག་བལྟར་མངོན་པ་དང་མི་མངོན་པ་རྣམས་ཚོགས་ཤིང་དུས་ལ་བབས་པའི་འབྲས་བུའི་ཚོར་བ་དང་ལྷན་ཅིག་ཉམས་སུ་མྱོང་བར་མཐོང་བ་དག་ལ་ཕན་པའི་བློས་རིགས་གཏད་ཐོབ་ལ་བསྙེན་པ་མ་སོང་བ་དག་གི་རྒྱུན་ཁྱེར་དུ་ཕན་སེམས་བསྐྱེད་ནས་མཁྱེན་བརྩེའི་ལྷས་སྦྱར་བའོ།། །།
རྟ་མགྲིན་གསང་སྒྲུབ་ཀྱི་རྒྱུན་ཁྱེར།
རྟ་མགྲིན་གསང་སྒྲུབ་ཀྱི་རྒྱུན་ཁྱེར་བཞུགས། །པདྨ་ཧེ་རུ་ཀ་ལ་ན་མོ། འདིར་རྟ་མགྲིན་གསང་སྒྲུབ་ཀྱི་རྒྱུན་ཁྱེར་ནི། མཆོད་གཏོར་སོགས་མཐོང་རྒྱུད་བཞིན་བཤམས་ལ། དང་པོ་སྐྱབས་སེམས་སྤྱི་ལྟར་བྱས། མཆོད་རྫས་རཾ་ཡཾ་ཁཾ་གིས་བསང་སྦྱངས། ཨོཾ་ཨཱཿཧཱུྃ་གིས་བྱིན་གྱིས་བརླབ། གཉིས་པ་མངོན་རྟོགས་ནི། ཨོཾ་རང་སེམས་མ་བཅོས་གཉུག་མའི་ངང༌། །ཆུ་ལས་ཆུ་བུར་རྡོལ་བ་བཞིན། །རྟ་
མགྲིན་ཞལ་གསུམ་ཕྱག་དྲུག་པ། །སྐུ་མདོག་དུས་མཐའི་མེ་ལྟར་འབར། །གཡས་ལྗང་གཡོན་དཀར་རྩ་ཞལ་དམར། །ཀུན་ཀྱང་རྟ་མགོ་ལྗང་ཞུར་གྱི། །རྔོག་མའི་གསེབ་ནས་མེ་སྟག་འཕྲོ། །གཡས་གསུམ་རྡོ་རྗེ་ཁ་ཊྭཱཾ་གྲི། །གཡོན་གསུམ་མེ་དཔུང་མདུང་རྒྱུ་ཞགས། །ཞབས་བཞིས་ཀླུ་བརྒྱད་སྤྲུལ་དུ་བརྫིས། །དུར་ཁྲོད་རོལ་པའི་ཆས་ཀུན་རྫོགས། །བ་སྤུའི་བུ་ག་ཁྲོ་བོས་གཏམས། །ཀུན་ཀྱང་དྲག་སྔགས་གནམ་ཐོག་འབེབས། །ཡེ་ཤེས་མེ་དཔུང་ཀློང་ན་བརྗིད། །ལྷ་སྲིན་སྡེ་བརྒྱད་རྒྱལ་འགོང་རྣམས། །རང་དབང་མེད་པར་འདུད་ཅིང་འདར། །དེ་ལྟར་གསལ་བའི་གནས་གསུམ་དུ། །ཡི་གེ་གསུམ་ལས་འོད་འཕྲོས་པས། །རང་བཞིན་རྣམ་དག་ཆོས་ཀྱི་དབྱིངས། །བདེན་བྲལ་ལངྐའི་ཕོ་བྲང་ནས། །ཡེ་ཤེས་སྤྱན་དྲང་དབྱེར་མེད་བསྟིམ། །གསུམ་པ་སྤྱན་འདྲེན་ནི། ཧཱུྃ། ཐུགས་རྗེའི་ལྕགས་ཀྱུས་སྤྱན་འདྲེན་ནོ། །བྱམས་པའི་ཞགས་པས་རྟེན་དང་བསྲེ། །དགའ་པའི་སྒྲོག་གིས་ཕྱག་འཚལ་ལོ། །བཏང་སྙོམས་དྲིལ་བུས་དགྱེས་པ་བསྐྱེད། །ཛཿཧཱུྃ་བྃ་ཧོཿ ན་མ་ན་མ་ཧོ། བཞི་པ་མཆོད་པ་ནི། ཧཱུྃ། བླ་མེད་མཆོག་གི་དམ་རྫས་ནི། །ཡེ་ཤེས་ལྔ་ཡི་རང་བཞིན་ཏེ། །འདོད་ཡོན་ལོངས་སྤྱོད་ཀུན་བཟང་སྤྲིན། །བླང་དོར་མེད་པའི་ངང་དུ་རོལ། །རཱུ་པ། ཤཔྟ། གྷནྡྷེ། རཱ་ས། པརྴེ། པྲ་ཏཱིཙྪ་ཧོཿ། །
མ་ཧཱ་པཉྩ་རཀྟ་བ་ལིང་པཱུ་ཛ་ཧོ། ལྔ་པ་བསྟོད་པ་ནི། ཧྲིཿ གཏི་མུག་རྡོ་རྗེ་རྟོག་བྲལ་ཆོས་ཀྱི་དབྱིངས། །འདོད་ཆགས་རྡོ་རྗེ་བདེ་ཆེན་ལོངས་སྤྱོད་རྫོགས། །ཞེ་སྡང་རྡོ་རྗེ་གར་དགུས་དཔའ་བའི་ཉམས། །དཔལ་ཆེན་རྟ་མཆོག་རོལ་པའི་སྐུ་ལ་བསྟོད། །དྲུག་པ་བཟླས་དམིགས་ནི། ཨཱཿ ཐུགས་ཀར་སྤྱན་རས་གཟིགས་དབང་ནི། །སེམས་ཉིད་ངལ་བསོའི་ཐུགས་ཀ་རུ། །ཟླ་གདན་ལ་གནས་ཧྲཱིཿཡིག་མཐར། །ཡི་གེ་དྲུག་པས་བསྐོར་བ་ལས། །འོད་འཕྲོས་འགྲོ་དྲུག་སེམས་ཅན་དང༌། །ཁྱད་པར་གནོད་བྱེད་ལས་ཉོན་སྦྱངས། །བྱང་ཆུབ་སེམས་དང་ལྡན་པར་བསམ། །ཨོཾ་མ་ཎི་པདྨེ་ཧཱུྃ། བརྒྱ་སྟོང་བཟླས་རྗེས་ཁྲོ་བོའི་བཟླས་པ་ནི། ཟླ་གདན་ཉི་མ་དང་ཡིག་དྲུག་ཁྲོ་བོའི་སྔགས་སུ་བསྐྱུར་ལ། བསྐྱེད་རྫོགས་བཟླས་གསུམ་གྱི་གདེང་དང་ལྡན་པས། ཨོཾ་ཧྲཱིཿཔདྨ་ཏ་ཀྲིཏ་བཛྲ་ཀྲོ་དྷ་ཧྱ་གྷཱི་ཝ་ཧུ་ལུ་ཧུ་ལུ་ཧཱུྃ་ཕཊ། ཅེས་བཟླས་ཤིང་འོད་ཟེར་སྤྲོ་བསྡུ་སྤྱི་དང་འདྲའོ། །ཐུན་མཐར་རྫོགས་རིམ་ནི། ཆུ་ལས་ཆུ་བུར་རྡོལ་བ་བཞིན། །རང་ལས་སྤྲུལ་པའི་དཀྱིལ་འཁོར་ལྷ། །ཡེ་ཤེས་དབྱིངས་སུ་བཛྲ་མུཿ། །རྗེས་ཐོབ་སྒྱུ་མའི་ལྷ་སྐུར་ལྡང༌། །བདུན་པ་དགེ་བ་བསྔོ་བ་དང༌། བརྒྱད་པ་ཤིས་བརྗོད་གང་རུང་བྱའོ། །ཐལ་བ་ན་ཚོད་བུས་པ་བློ་གྲོས་ཕྱིར། །བསྐྱེད་རིམ་རང་རྒྱུད་ཅན་གྱི་དྲག་སྔགས་དེས། །གདོན་གྱི་སྤྱན་འདྲེན་བྱེད་པ་མང་མཐོང་ནས། །རང་བྱུང་རྡོ་རྗེས་དགེ་བའི་སེམས་ཀྱིས་སྦྱར།། །།
སྨན་བླའི་སྒོམ་བཟླས་འཚོ་བྱེད་བདེ་ལམ།
སྨན་བླའི་སྒོམ་བཟླས་འཚོ་བྱེད་བདེ་ལམ་བཞུགས། །སྐྱབས་སེམས་སྔོན་དུ་འགྲོ་བས། སྣང་སྲིད་ཐམས་ཅད་བཻ་ཌཱུརྱའི་རང་བཞིན། འདོ་སྣང་ལས་གྲུབ་ཞིང་ཁམས་བཀོད་པའི་དབུས། །པད་ཟླའི་གདན་ལ་ཨ་ཡིག་ཡོངས་གྱུར་ལས། །འགྲོ་བའི་དོན་མཛད་སངས་རྒྱས་སྨན་གྱི་བླ། །ས་གནོན་མཉམ་གཞག་བཻ་ཌཱུརྱ་ཡི་མདངས། །རོ་དྲུག་ནུས་པ་བརྒྱད་ལྡན་རྣམ་རྒྱལ་འཛིན། །མ་རིག་རྒྱུ་ལས་རྣམ་པར་གྱུར་པའི་ནད། །བཞི་བརྒྱ་རྩ་བཞིའི་སྡུག་བསྔལ་སེལ་མཛད་ཅིང༌། །རྣམ་པར་མ་གྱུར་བདེ་ལ་སྦྱོར་མཛད་པ། །ཁྱོད་ལ་སྐྱབས་མཆི་ཕྱག་འཚལ་མཆོད་པ་འབུལ། །ཉེས་པ་མི་འཆབ་དགེ་ལ་རྗེས་ཡི་རང༌། །མ་རིག་ནད་ལས་དབུགས་འབྱིན་ཆོས་འཁོར་བསྐོར། །བསྐལ་པར་འཚོ་གཞེས་དགེ་བ་རྫོགས་བྱང་བསྔོ། །མགོན་པོ་ཁྱོད་ཀྱི་ཐུགས་དང་རོ་གཅིག་ཤོག། ཅེས་བརྗོད་ཅིང་སྙིང་གར་ཟླ་གདན་ཨ་ཡིག་གི་མཐར་བྷཻ་ཥ་ཛྱེས་བསྐོར་བ་ལ་སེམས་གཏད་ནས་འོད་ཟེར་སྤྲོ་བསྡུས་འགྲོ་བའི་དུག་གསུམ་གྱི་ནད་ལས་གྲོལ་བར་བསམས་ལ་བཟླས་པ་ཅི་ནུས་མཐར། འཁོར་གསུམ་མི་དམིགས་པའི་ངང་དུ་མཉམ་པར་འཇོག་ཅིང་དགེ་བ་བསྔོའོ། །ཞེས་པའང་མདོ་ཁམས་ཡིད་ལྷུང་པ་འཇིགས་མེད་རི་རྒྱལ་གྱི་ངོར་རྒྱལ་བའི་མྱུ་གུ་རང་བྱུང་རྡོ་རྗེས་སོ།། །།
བྲམ་ཟེ་ཕུར་བུའི་ལུགས་ཀྱི་དབྱངས་ཅན་མ་སྒྲུབ་ཐབས་ཀུན་མཁྱེན་ལམ་སྲོལ།
བྲམ་ཟེ་ཕུར་བུའི་ལུགས་ཀྱི་དབྱངས་ཅན་མ་སྒྲུབ་ཐབས་ཀུན་མཁྱེན་ལམ་སྲོལ་བཞུགས། །ན་མཿསྭ་ར་སྭསྟི། འདིར་ལྷ་མོ་དབྱངས་ཅན་མའི་རྒྱུན་བསྙེན་བྱ་བར་འདོད་པས། སྔ་ཐུན་གྱི་ཆར་ཤ་ཆང༌། སྒོག་ཙོང་སོགས་དྲི་ང་བའི་ཟས་སྤངས་ལ། སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྦྱངས། སྣོད་བཅུད་རྣམ་དག་བདེ་ཆེན་ཞིང༌། །འོད་སྣང་ལས་གྲུབ་རི་དབང་དང༌། །ནགས་ཚལ་སྨན་ལྗོངས་ཉམས་དགའ་བ༌། །ལྷ་དང་དྲང་སྲོང་གྲུབ་པས་བརྟེན། །དབུས་ན་འོ་མའི་རྒྱ་མཚོའི་ནང༌། །པཾ་ལས་པད་དཀར་འདབ་སྟོང་སྟེང༌། །ཨ་ལས་ཟླ་གདན་ཧྲིཾ་མཚན་པའི། །ས་བོན་ཡོངས་གྱུར་དབྱངས་ཅན་མ། །བཅུ་དྲུག་ལང་ཚོ་སྟོན་ཟླའི་མདོག །ཞི་འཛུམ་བལྟ་ན་སྡུག་པའི་ཞལ། །དབུ་སྐྲ་ལི་བ་ལྟག་པར་བཅིངས། །ལྷག་མ་ཐུར་གྲོལ་རིན་ཆེན་བརྒྱན། །པད་དཀར་ཕྲེང་བས་ཐོད་བཅིངས་པའི། །དབུ་གཙུག་ཟླ་བ་ཕྱེད་པས་མཚན། །དར་དཀར་སྟོད་གཡོགས་སྨད་དཀྲིས་ནི། །དབང་པོའི་མཚོན་ཆ་ལྟ་བུར་བཀྲ། །ནོར་བུའི་རྒྱན་ཕྲེང་གཡེར་ཁས་མཚན། །ཙོག་པུ་མནོལ་བའི་འདུག་སྟངས་པར། །བཻ་ཌཱུརྱ་ཡི་ཏམྦུ་ར། །འཛིན་ལས་ཆོས་ཀྱི་སྒྲ་དབྱངས་སྒྲོག །ཟླ་བའི་རྒྱབ་ཡོལ་ལ་བརྟེན་པའི། །ཙིཏྟ་ཨུཏྤལ་གྱེན་བསྟན་ལྟའི། །དབུས་ན་ཟླ་སྟེང་ཨོཾ་དཀར་པོ། །དེ་ཡི་ནཱ་དའི་བཞོན་པ་དང༌། །ལྷན་ཅིག་འོད་ཟེར་
དཀར་པོའི་ཕྲེང༌། །སྣ་བུག་གཡས་ནས་ཐོན་གྱུར་ཏེ། །རྒྱ་གར་ལྷོ་ཕྱོགས་རྒྱ་མཚོའི་འགྲམ། །རིག་པ་འཛིན་པའི་དགའ་ཚལ་ན། །སྒྲ་དབྱངས་ལྷ་མོ་བཞུགས་པ་ཡི། །ཤངས་བུག་གཡོན་ཞུགས་ཐུགས་ཀ་ནས། །ཡེ་ཤེས་སེམས་དཔའི་རང་བཞིན་ནི། །འཁོར་ལོའི་རྣམ་པ་ཤངས་གཡས་ཐོན། །སྤྱན་དྲངས་མདུན་གྱི་མཁར་བཞུགས་བསམ། །ཨོཾ་པྲི་ཏི་དེ་ཝཱི་དཱི་བྱ་པུཥྤེ་ཧཱུྃ། དེ་བཞིན་དུ་སྦྱར་བས། དྷཱུ་པེ། གནྷེ། ནཻ་ཝི་ཏེ། ཨཱ་ལོ་ཀེ །བི་ལེ་བ་ཧི་ཧཱུྃ། ཞེས་པས་མཆོད། ཨོཾ་པྲི་ཏི་དེ་ཝཱི་མེ་ཧྲཱིཿཥྟི་ཏིཥྛ་ཧྲཱིཿ། ཞེས་ཤུབ་པུར་བརྗོད་ཅིང་སྣ་བུག་གཡོན་ནས་དབུགས་རྔུབ་བ་དང་ཆབ་ཅིག་ཏུ་འཁོར་ལོ་འོད་ཀྱི་རང་བཞིན་དུ་གྱུར་བའི་སྙིང་ཁའི་ཨོཾ་དང་འདྲེས། ཨོཾ་ཡོངས་སུ་གྱུར་པ་སླར་ཡང་ཡེ་ཤེས་སེམས་དཔའི་ངོ་བོ་འཁོར་ལོ་པད་འདབ་བརྒྱད་པ་དཀར་ལ་འཚེར་བར་གྱུར་པའི་ལྟེ་བར་ཟླ་གདན་ལ་ཏིང་འཛིན་སེམས་དཔའ་ཧྲི་དང༌། འདབ་མ་བརྒྱད་ལ་མདུན་ནས་གཡས་བསྐོར་དུ་དབྱངས་ཡིག་གཉིས་གཉིས་གནས་པ་སྣང་གསལ་ལྟར་འབར་བའི་འོད་ཀྱིས་སྐུའི་དབྱིངས་ཐམས་ཅད་ཁྱབ། རྨོངས་པའི་མུན་པ་ཅིག་ཅར་དུ་བཅོམ། ཆགས་ཐོགས་མེད་པའི་བློ་གྲོས་ཀྱི་སྣང་བ་རྒྱས་པར་གྱུར། ཅེས་བརྗོད་ལ་བཟླས་དམིགས་ནི། ཏིང་འཛིན་སེམས་དཔའི་ཧྲིཾ་ལས་མར་མེ་གཅིག་ལས་གཉིས་མཆེད་ལྟར་
ཧྲི་ཡིག་ལུ་གུ་རྒྱུད་དུ་འབྲེལ་བ་ཞལ་ནས་ཐོན། དེའི་འོད་ཟེར་གྱི་སྣང་བས་རྒྱལ་བ་སྲས་དང་བཅས་པའི་སྤངས་རྟོགས་ཀྱི་ཡོན་ཏན་དང་མཁྱེན་བརྩེ་ནུས་གསུམ། ལྷ་དང་དྲང་སྲོང་རིག་འཛིན་གྲུབ་པ་མཆོག་རྣམས་ཀྱི་ཚེ་དང་བསོད་ནམས་མངའ་དབང་ལོངས་སྤྱོད་ཐམས་ཅད༌། ཉི་ཟླ་ལ་སོགས་པའི་བརྟན་གཡོའི་དྭངས་བཅུད་ཐམས་ཅད་བསྡུས་ཏེ་ཐུགས་སྲོག་ལ་ཐིམ། སྔགས་ཕྲེང་རྣམས་ཀྱང་ལྟེ་བ་ནས་ཞུགས་འཁོར་ལོའི་དབུས་ཀྱི་ལྟེ་བའི་ཧྲཱིཾཿལ་ཐིམ་པས་བློ་གྲོས་ཀྱི་སྣང་བ་དང་སྲིད་ཞིའི་ཡོན་ཏན་ཐམས་ཅད་རྒྱས་པར་བསམས། སྔགས་ཕྲེང་དལ་བུས་འཁོར་བ་ལ་རིག་པ་གཏད་དེ། ཡི་གེ་འབྲུ་གཅིག་པ་འབུམ་ཕྲག་གཅིག་དང་ཉི་ཁྲི་ལྔ་སྟོང་བཟླ་བ་གྲངས་ཀྱི་བསྙེན་ཚད་དང༌། དེ་བཞི་འགྱུར་བཟླ་བ་ནི་དུས་བསྙེན་ནོ། །རྒྱུན་བསྙེན་ལ་བཟླས་པ་ཅི་ནུས་བྱ། ཐུན་མཚམས་སུ་མཆོད་བསྟོད་གཏོར་འབུལ་ནི། མཆོད་པ་རྣམས་འབྲུ་གསུམ་ལན་བདུན་གྱིས་བྱིན་གྱིས་བརླབས་ལ། ཨོཾ་སྭ་ར་སྭསྟི་ས་པ་རི་ཝཱ་ར་རཱུ་པ། ཤཔྟ། གནྡྷེ། རཱ་ས། པརྴེ། དྷརྨ་དྷརྟུ་པྲ་ཏཱིཙྪ་ཨཱཿཧཱུྃ། བསྟོད་པ་ནི། མཆོག་དགའི་རང་བཞིན་ལྷ་མོ་ནི། །ཡོན་ཏན་རྒྱ་མཚོའི་གླིང་ན་བཞུགས། །རྒྱལ་བ་སྲས་བཅས་ཀུན་གྱི་ཡུམ། །དབྱངས་ཅན་མ་ལ་ཕྱག་འཚལ་བསྟོད། །ཁྱོད་ཞལ་མཛེས་པ་ཟླ་བས་མི་མཚུངས་སྤྱན་གྱི་གེ་སར་འཛུམ་པའི་ཕྱིར། །
མཆུ་སྒྲོས་དམར་བའི་བིམ་པས་ཅི་ཞིག་ཚེམས་ཀྱི་ག་བུར་བལྟ་ན་སྡུག །ངེས་པ་དྲུག་ལྡན་ཧྲིཾ་གྱི་ང་རོ་ཏམྦུ་ར་དང་གཉིས་མེད་གསུང༌། །ཟབ་ཞི་སྤྲོས་བྲལ་རྣམ་པ་ཀུན་གྱི་མཆོག་ལྡན་ཐུགས་ལ་རྟག་ཏུ་འདུད། །གཏོར་མ་འབྲུ་གསུམ་ལན་བདུན་གྱིས་བརླབས་ལ། །བདུད་རྩིའི་རང་བཞིན་དུ་གྱུར་པ་ཚོགས་ཞིང་གི་ལྗགས་རྡོ་རྗེའི་སྦུ་གུ་ཅན་གྱིས་བཞེས་པར་བསམས་ལ། ཨོཾ་སྭ་ར་སྭ་སྟི་ས་པ་རི་ཝཱ་རེ་བྷྱཿ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱི་མཐར། མཆོད་སྦྱིན་གཏོར་མ་འདི་བཞེས་ལ་སོགས་བྱ། དེ་ནས་ནོར་འགྲིབ་པ་སྤང་བའི་ཕྱིར། ནོར་རྒྱུན་མ་ལ་གཏོར་མ་གཅིག་བཤམས་ཏེ། གོང་ལྟར་བརླབས། ཨོཾ་བཱ་སུ་དྷ་ར་ས་མ་ཡ་ཛཿ། ཞེས་སྤྱན་དྲངས། ཨོཾ་བཱ་སུ་བྷ་ར་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་ཕུལ་ལ། བདག་ནི་མཚོ་བྱུང་བསྒྲུབ་པ་ལ། །ནོར་སྟེར་ལྷ་མོ་མཆོག་ཁྱོད་ཀྱིས། །ཕྲག་པ་ཡངས་པར་མཛད་ནས་ཀྱང༌། །ཟས་ནོར་འཕེལ་བའི་དངོས་གྲུབ་སྩོལ། །ཞེས་དང༌། ཤེས་རབ་ཀྱི་གྲོགས་མཛད་པའི་ཕྱིར་འཇམ་དབྱངས་ལའང༌། ཨོཾ་ཝཱའ་ཀྱཻ་དཾ་ན་མ་ས་མ་ཡ་ཛཿས་སྤྱན་དྲངས། ཨོཾ་ཝཱ་ཀྱཻ་དཾ་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་དེ་བཞིན་དུ་གེགས་བསྲུང་བ་དང་བློ་མཐུ་བསྐྱེད་པའི་ཕྱིར་མི་གཡོ་བ་ལ་དམིགས་ཏེ། ཨ་ཀཱ་རོ་མུ་ཁཾ་ལན་གསུམ་གྱིས་གཏོར་
མ་འབུལ་ལ། རྣོ་ལ་མྱུར་བའི་ཤེས་རབ་ཀྱང༌། །སོ་སོ་ཡང་དག་རིག་པ་བཞིར། །སྤོབས་པའི་གཏེར་གྲོལ་ཐབས་ཀྱི་ལྷས། །ཡིད་ལ་འཁྱུད་པའི་དངོས་གྲུབ་སྩོལ། །འབྱུང་པོ་སྤྱི་ལ་དམིགས་ནས་ཨ་ཀཱ་རོ་ལན་གསུམ་གྱི་མཐར། རྣམ་དག་ཆོས་དབྱིངས་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་བྱུང༌། །ཐབས་ཆེན་ཟླ་གསང་ཐིག་ལེ་ལས། ཡ་གམ་ཅན་རྣམས་འདུ་བར་མཛོད། །འདུ་རྫས་རྣམ་དག་འདི་བཞེས་ལ། བཅོལ་བའི་ཕྲིན་ལས་འགྲུབ་པར་མཛོད། །མགྲོན་རྣམས་བཛྲ་མུས་གཤེགས། །དེ་ནས་ཐུན་བསྡུ་བ་ནི། སྣང་ཆ་རྟེན་དང་བརྟེན་པར་བཅས། །འོད་ཞུ་ཐུགས་ཀའི་འཁོར་ལོར་བསྟིམ། །འཁོར་ལོ་དབྱངས་ཅན་ཐུགས་ཀར་གཤེགས། །ཐུགས་སྲོག་བདེ་གཤེགས་སྙིང་པོ་དང༌། །རོ་གཅིག་ཆོས་ཀྱི་དབྱིངས་སུ་ཨཿ། །ལས་སྦྱོར་དམིགས་བསལ་རྣམས་ནི་ཀུན་མཁྱེན་བསམ་ཡས་པའི་ཡིག་ཆ་ལས་ཤེས་པར་བྱའོ། །ཞེས་པའང་འབྲོང་རྩེ་སྲས་ཀྱི་ཞལ་འདོན་དུ་རིག་འཛིན་འཇིགས་མེད་གླིང་པས་གཟིམ་ཆུང་ལྷ་རྒྱལ་རྩེར་བཀོད་པའོ།། །།དགེའོ། །དགེའོ། །དགེའོ། །