འཁོར་ལོས་མཚོན་པའི་གསུང་རྟེན་སྤྱི་ཁྱབ་ལ་རབ་གནས་བྱ་བའི་ཆོ་ག་ཕྱག་རྒྱ་བཞི་ལྡན།
འཁོར་ལོས་མཚོན་པའི་གསུང་རྟེན་སྤྱི་ཁྱབ་ལ་རབ་གནས་བྱ་བའི་ཆོ་ག་ཕྱག་རྒྱ་བཞི་ལྡན་ཞེས་བྱ་བ་བཞུགས། །
རབ་འབྱམས་ཞི་དང་ཁྲོ་བོ་ཡི། །དཀྱིལ་འཁོར་ཀུན་གྱི་འཁོར་ལོའི་མགོན། །སྣང་སྲིད་ཟིལ་གནོན་པདྨ་ལ། །བཏུད་ནས་གསུང་རྟེན་ལྷག་གནས་བྲི། །དེ་ཡང་རྩོད་པ་ཐམས་ཅད་དང་བྲལ་ཞིང་དཔྱད་པ་གསུམ་གྱི་འཕྲུལ་རྒྱས་ལེགས་པར་བསྲུབས་པའི་མཆོག་གཏེར་ཤིན་ཏུ་གསང་བ་ཤོག་སེར་གྱི་དྲི་མ་ཐུལ་ལེ་བ་ཞིག་གི་རྒྱུད་ལས། གསུང་རྟེན་གླེགས་བམ་རིགས་གྱུར་པ༔ ཀུན་ལ་རབ་གནས་འདི་ཉིད་གཅེས༔ གང་ལ་གང་དགོས་སྦྱར་ཤེས་བྱ༔ ཞེས་རྡོ་རྗེའི་ལུང་གིས་སྐབས་དབྱེ་བ་བཞིན་དོན་གཉེར་ཅན་གྱི་ཆེད་དུ་ལྷག་པའི་བསམ་པས་འཁོར་ལོ་དང་གླེགས་བམ་ལ་སོགས་ཏེ་གསུང་གི་རྟེན་ལ་གཏོགས་སོ་ཅོག་ལ་རབ་གནས་བགྱི་ཐབས་ཀྱི་ཕྲིན་ལས་སྤྱི་འདོམས་སུ་བཤད་
པར་བྱ་སྟེ། དེ་ལ་དང་པོར་རབ་ཏུ་གནས་བྱའི་རྟེན་གང་དང་གང་གིས་ལུགས་སུ་ཚུལ་ལྡན་དུ་བསྒྲུབ་པ་དེ་ལ་ཞི་དྲག་འཇམ་རྩུབ་སོགས་སོ་སོའི་སྒོས་གནད་ཀྱིས་ཕྱེ་བའི་རྫས་དང་དྲི་སྨན་རྫས་སོགས་ཚུལ་བཞིན་དུ་བྱུག་ཅིང་སྤྲོ་ན་འཁོར་ལོ་སོགས་ལ་འབྱུང་ཁྲུས་བྱེད་པ་ཡང་འཐད། དེ་ནས་ཡི་དམ་གང་ལ་བརྟེན་པ་དེའི་དཀྱིལ་འཁོར་སྤྲོས་པ་རྒྱས་བསྡུས་དང་བསྟུན་པར་བཤམས་པའི་དབུས་སུ་ཞལ་རང་ལ་ཕྱོགས་པར་བཞག །སྲུང་བ་ལྟ་བུ་ཡིན་ན་བཀྲམ་ནས་བཞག་པའི་སྲུང་ཆིངས་ཀྱང་ཉེ་ལོགས་སུ་དགོད་ཅིང༌། ཉེར་སྤྱོད་དང་སྨན་གཏོར་རཀྟ་སོགས་ཀྱང་བཤམ། དེ་ནས་འཁོར་ལོ་སོགས་ཀྱི་ཚེ་གང་ཡིན་དེ་གའི་ཡི་དམ་བདག་མདུན་ཟུང་འཇུག་ཨ་ཏིའི་རྣལ་འབྱོར་དུ་བསྐྱེད་པའི་མདུན་བསྐྱེད་
འཁོར་ལོ་དེ་ག་ལ་དམིགས། དྲག་པོའི་ང་རྒྱལ་ལ་གནས་པས་བགེགས་བསྐྲད་གུ་གུལ་བདུག །ལས་གཞུང་མཐར་ཆགས་སུ་བྱས་རྗེས། བཟླས་པའི་ཚེ་ལས་བཞི་གང་ཡིན་གྱི་འགྲོས་དང་བསྟུན་པའི་འོད་ཟེར་སྤྲོ་བསྡུ་བྱ་ཞིང་མདུན་བསྐྱེད་ལ་གཟི་བྱིན་བསྐྱེད། རྩ་སྔགས་གང་ཡིན་གྱི་ཤམ་བུར། ཨོཾ་ཛྙཱ་ན་ཨ་བེ་ཤ་ཡ་སུ་པྲ་ཏིཥྛ་བཛྲ་ཡེ་སྭཱ་ཧཱ། བཏགས་པ་ཅི་ནུས་བཟླས་སྤྲོ་ན་ཚོགས་མཆོད་བྱ། ལས་གང་ཡིན་འགྲུབ་པའི་ཕྲིན་ལས་འཆོལ། དེ་ནས་ཞལ་བསྒྱུར་བ་ནི། ལྷ་རྣམས་བདེ་སྟོང་ཆེན་པོའི་ངོ་བོར་འོད་དུ་ཞུ་ནས་ཡིག་འབྲུའི་རྣམ་པར་གྱུར་པ་གསུང་མཆོག་སྣང་བ་མཐའ་ཡས་ངོ་བོར་གྱུར། ཅེས་བརྗོད་ཅིང་བསམ། ཧཱུྃ་སྣང་བ་མཐའ་ཡས་བཅོམ་ལྡན་འདས༔ དུས་གསུམ་སངས་རྒྱས་གསུང་གིས་ལྷ༔ ཆོས་སྒོ་བརྒྱད་ཁྲི་བཞི་སྟོང་དབྱིངས༔ ལྷ་ཡི་ལྷ་ཁྱོད་བདག་ལ་དགོངས༔ བསྟན་པའི་གཙོ་ལ་ཕྱག་འཚལ་ལོ༔ ཨོཾ་ཨཱཿཧཱུྃ༔ ཨོཾ་མུ་ནེ་མུ་ནེ་མ་ཧཱ་མུ་ནེ་ཡེ་སྭཱ་ཧཱ༔ ཨོཾ་ཨཱཿཧཱུྃ་གསུམ་སྐུ་གསུང་ཐུགས༔ སྒྲ་གྲགས་རང་བྱུང་གསུང་གི་སྒྲ༔ ཆོས་ཉིད་སྐྱེ་མེད་ཀློང་ནས་བྱུང་༔ ཐུགས་རྗེའི་ཆོ་འཕྲུལ་བླ་ན་མེད། ཨ་ཨཱཿ ཨི་ཨཱི༔ ཨུ་ཨཱུ༔ རྀ་རཱྀ༔ ལྀ་ལཱྀ༔ ཨེ་ཨཱཻ༔ ཨོ་ཨཱཽ༔ ཨཾ་ཨཱ༔ ཀ་ཁ་ག་གྷ་ང་༔ ཙ་ཚ་ཛ་ཛྷ་ཉ༔ ཊ་ཋ་ཌ་ཌྷ་ཎ༔ ཏ་ཐ་ད་དྷ་ན༔ པ་ཕ་བ་བྷ་མ༔ ཡ་ར་ལ་ཝ༔ ཤ་ཥ་ས་ཧ་ཀྵ༔ ཨོཾ་ཨཱ༔ ཧཱུྃ་ཧྲཱི༔ དུས་གསུམ་
སངས་རྒྱས་བྱིན་རླབས་ལས༔ གླེགས་བམ་ཡེ་གེ་ཐམས་ཅད་ནི༔ ནམ་མཁའི་དབྱིངས་སུ་གསལ་བར་ཤར༔ ཡེ་ཤེས་ལྔ་ཡི་འོད་མདངས་འཚེར༔ ཨོཾ་ཧཱུྃ་ཏྲཱཾ་ཧྲཱི་ཨཱ༔ མཱུྃ་ལཱཾ་མཱཾ་པཱཾ་ཏཱཾ༔ ཧྲཱི༔ དུས་གསུམ་སངས་རྒྱས་སྐུ་ལྔའི་ཆོ་འཕྲུལ་ལས༔ འཁོར་ལོའི་ཞེས་བསྒྱུར་ཆོག །བཅོམ་ལྡན་ཤཱཀྱ་ཐུབ་པའི་ཐུགས་རྗེ་དང་༔ འཛམ་གླིང་སེམས་ཅན་རྣམས་ཀྱི་དཔལ་འབྱོར་དང་༔ ནམ་མཁའི་འོད་སྣང་འཁྲིགས་པའི་ཡེ་ཤེས་རྩལ༔ འབྱུང་བ་རྣམ་པ་ལྔ་ཡི་ཆོ་རོལ་ལས༔ རྒྱ་གར་ཡི་གེ་ཨཀྵ་ལྔ་བཅུ་སྲིད༔ དེ་ལས་གཅེས་བསྡུས་བོད་ཡིག་སུམ་ཅུ་སྟེ༔ བདེ་གཤེགས་སྐུ་སྤྲུལ་འཕྲུལ་གྱི་ཡི་གེ་རྣམས༔ རང་བཞིན་ཡི་གེའི་འཁོར་ལོ་ཆེན་པོ་ནས༔ གཟུགས་བརྙན་གསལ་བའི་ཡི་གེ་དམ་པ་འདིར༔ སྤྱན་འདྲེན་མཆོད་པའི་སླད་དུ་གཤེགས་སུ་གསོལ༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཀ་ཁ་ག་ང་བཞི་ནི་ནམ་མཁའི་ཁམས༔ ཆོས་ཀྱི་དབྱིངས་ཀྱི་ཡེ་ཤེས་ངོ་བོ་ཉིད༔ ཐུགས་རྗེ་མི་ཟད་སེམས་ཅན་ཀུན་ལ་ཁྱབ༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཅ་ཆ་ཇ་ཉ་བཞི་ནི་ནམ་མཁའི་ཁམས༔ སོར་རྟོག་ཀུན་རྟོག་ཡེ་ཤེས་ངོ་བོ་ཉིད༔ ཁམས་གསུམ་འདོད་ཆགས་གྲང་བའི་ནད་རྣམས་སེལ༔ འགྲོ་བའི་དོན་དུ་བརྟན་བར་བཞུགས་སུ་གསོལ༔ ཏ་ཐ་ད་ན་བཞི་ནི་ས་ཡི་ཁམས༔ མཉམ་པ་ཉིད་ཀྱི་ཡེ་ཤེས་ངོ་བོ་ཉིད༔ བརྟན་
བྱེད་སེམས་ཅན་ཀུན་གྱི་རྟེན་དུ་གྱུར༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ པ་ཕ་བ་མ་ཝ་ལྔ་ཆུ་ཡིག་སྟེ༔ མེ་ལོང་ལྟ་བུའི་ཡེ་ཤེས་ངོ་བོ་ཉིད༔ བརླན་བྱེད་བདུད་རྩི་ཀུན་ལ་ཆར་ལྟར་འབབ༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཙ་ཚ་ཛ་གསུམ་མེ་ཡི་ཁམས་ལས་ཤར༔ བྱ་བ་གྲུབ་པའི་ཡེ་ཤེས་ངོ་བོ་ཉིད༔ སྣང་གསལ་སྒྲོན་མེས་སེམས་ཅན་མ་རིག་སེལ༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཞ་ཟ་འ་ཡ་བདེ་གཤེགས་སྤྲུལ་པའི་སྲས༔ རང་བྱུང་ཀློང་གྱུར་ཡེ་ཤེས་ངོ་བོ་ཉིད༔ ཐུགས་རྗེ་སེམས་ཅན་ཀུན་ལ་ཁྱབ་པར་གཟིགས༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ར་ལ་ཤ་ས་ཧ་ལྔ་མེ་ཁམས་དང་༔ ས་ལས་སྤྲུལ་པའི་རང་བྱུང་ཡི་གེ་སྟེ༔ ཐབས་དང་ཤེས་རབ་ཡེ་ཤེས་མཆོག་གི་སྐུ༔ སྐྱེ་འགྲོ་སེམས་ཅན་ཀུན་གྱི་སྡོང་གྲོགས་བྱེད༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཨ་ནི་སངས་རྒྱས་ཀུན་གྱི་ཐུགས་ཀྱི་བཅུད༔ ཆོས་ཉིད་དོན་ལ་སྐྱེ་བ་མེད་པའི་སྐུ༔ རང་བྱུང་ཡེ་ཤེས་རང་ལས་སྣང་བར་བྱེད༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ ཨོཾ་ཨཱཿཧཱུྃ་གསུམ་སྐུ་གསུམ་འདུས་པའི་དོན༔ བྱིན་རླབས་ཀློང་ཡང་རང་བཞིན་འོད་དུ་གསལ༔ ཁམས་གསུམ་སེམས་ཅན་སྐུ་གསུམ་དོན་ལ་སྦྱོར༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ དེ་ལས་སྤྲུལ་པའི་གུག་འགྲེང་ན་རོ་
དང་༔ ཞབས་ཀྱུ་ཡ་བཏགས་ར་བཏགས་སྤྲུལ་པའི་སྐུ༔ གང་ལ་གང་འཚམས་སྟོན་པའི་ཐུགས་རྗེ་ཅན༔ འགྲོ་བའི་དོན་དུ་བརྟན་པར་བཞུགས་སུ་གསོལ༔ མཐུག་པོ་ལྔ་དང་ལོག་དྲུག་མཐར་ཟད་དང་༔ དབྱངས་ཀྱི་ཡི་གེ་རང་རིག་བཅུ་དྲུག་དང་༔ ཕོ་ཡིག་ཐབས་དང་མོ་ཡིག་ཤེས་རབ་དང་༔ མ་ནིང་ཡི་གེ་དབྱིངས་དང་རིག་པ་སྟེ༔ སྤྲུལ་པའི་ཡི་གེ་རྣམས་ལ་ཕྱག་འཚལ་བསྟོད༔ ཧྲཱི༔ ཡི་གེའི་དངོས་པོ་ཐམས་ཅད་ནི༔ སངས་རྒྱས་སྤྲུལ་པའི་གསུང་ཡང་ཡིན༔ ཡི་གེ་བཀླགས་པས་སྒྲ་རྣམས་འབྱུང་༔ སངས་རྒྱས་སྤྲུལ་བའི་གསུང་རྣམས་ཐོས༔ ཡི་གེའི་དོན་རྣམས་བསྒོམས་པ་ཡིས༔ སངས་རྒྱས་སྤྲུལ་པའི་ཐུགས་སུ་གྲོལ༔ སྐུ་གསུང་ཐུགས་ལྡན་ཡེ་ཤེས་དབྱིངས༔ སྤྲུལ་པའི་ཡི་གེ་རྣམས་ལ་བསྟོད༔ འགྲོ་བའི་དོན་དུ་བརྟན་པར་བཞུགས༔ ཧྲཱི༔ རང་བཞིན་ཡི་གེ་ཆེན་པོ་ནས༔ གཟུགས་བརྙན་ཡི་གེ་དམ་པ་འདིར་༔ མུ་ཁྱུད་འཁོར་ལོ་འཆི་ལ་བརྟེན༔ གླེགས་བམ་འདི་ལ་བཞུགས་སུ་གསོལ༔ བདག་གཞན་དོན་གཉིས་འགྲུབ་གྱུར་ཅིག༔ དབང་བསྐུར་བྱིན་གྱིས་བརླབ་ཏུ་གསོལ༔ ཧྲཱི༔ ང་ནི་རང་བྱུང་དཔལ་ཆེན་པོ༔ ཐུགས་རྗེས་འགྲོ་འདུལ་སྣང་མཐའ་ཡས༔ སྐུ་གསུང་ཐུགས་ལ་ཡི་གེ་གསུམ༔ ཡི་གེ་གསུམ་ལས་འོད་འཕྲོས་པས༔ ཡར་ལ་སངས་རྒྱས་ཐུགས་བརྒྱུད་བསྐུལ༔ མར་འཕྲོས་རིགས་
དྲུག་སྡིག་སྒྲིབ་སྦྱངས༔ ཚུར་འདུས་ཡི་གེ་རྣམས་ལ་ཐིམ༔ གཉིས་མེད་བརྟན་པར་བཞུགས་སུ་གསོལ༔ ཞེས་བརྗོད། དེ་ནས་ཡི་གེ་རྣམས་ལ་སྐུ་གསུམ་གྱི་རབ་གནས་བྱ་བ་ནི་རྟེན་ཤཱཀྱ་ཐུབ་པར་བསྒོམས་ལ་མེ་ཏོག་འཐོར་བ་དང་མཉམ་དུ། ཡེ་དྷར་གྱི་ཤམ་བུར༔ དྷརྨ་ཝྭཱཀྐ་རཏྣ་ཧཱུྃ་ཧཱུྃ་གྷི་ཏི་སྭཱ་ཧཱཿཞེས་བཏགས་པ་བརྒྱ་རྩའམ་ཉེར་གཅིག་གམ་བདུན་གྱིས་མཐའ་བརྟེན་བརྗོད། ཡང་ཡིག་འབྲུ་སྟོང་པ་ཉིད་དུ་བསྒོམས་ལ། ཡེ་དྷརྨ་གྱི་ཤམ་བུར། དྷརྨ་ཝྭཱཀྐ་རཏྣ་ཧཱུྃ་ཧཱུྃ་སྭ་བྷཱ་ཝ་ཏྲི་ཤུདྡྷེ་སརྦ་དྷརྨ་ཤུདྡྷོ་྅ཧཾ༔ ཞེས་བརྗོད་ཅིང་སྔ་མ་ལྟར་བྱ༔ ཧྲཱི༔ ནམ་མཁའི་གནས་ནས་ཆོས་ཀྱི་སྒྲ༔ དཔག་མེད་ཚ་གྲང་ཡེ་ཤེས་སྒྲ༔ བསམ་གྱིས་མི་ཁྱབ་གསུང་རྣམས་ནི༔ གཟུགས་བརྙན་ཡི་གེ་འདི་ལ་ཐིམ༔ གསུང་གི་དངོས་པོ་བཀྲ་གསལ་ལེ༔ གསུང་གི་རང་སྒྲ་དིར་གྱིས་བྱུང་༔ མཆོག་ཐུན་དངོས་གྲུབ་སྩལ་དུ་གསོལ༔ ཞེས་བརྗོད་ཅིང་ཡི་གེ་རྣམས་རང་སྒྲ་དིར་དིར་སྒྲོགས་པར་བསམས་ལ་རྟེན་སྙིང་ཤམ་བུར། དྷརྨ་ཝཱཀྐ་རཏྣ་ན་མ༔ སརྦ་ཏ་ཐ་ག་ཏ་བྷྱོ་བི་ཤྭ་མུ་ཁེ་བྷྱ༔ སརྦ་ཏདཾྑ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ༔ ཞེས་བཏགས་པ་མང་ཉུང་ཆ་མཚུངས་སུ་བཟླ་ཞིང་མེ་ཏོག་འཐོར། ཧྲཱི༔ གཟུགས་སྣང་ཐམས་ཅད་ཡི་གེའི་གཟུགས༔ སྒྲར་གྲགས་ཐམས་ཅད་ཆོས་ཉིད་སྒྲ༔ གཟུགས་སྒྲ་སེམས་ཅན་ཀུན་གྱིས་ཐོས༔ ཐོས་པས་སེམས་
ཅན་རང་རྒྱུད་གྲོལ༔ དྲན་རྟོག་ཐམས་ཅད་སྤྲོས་བྲལ་ངང་༔ མཉམ་ཉིད་བདེ་བ་ཆེན་པོར་གྲོལ༔ ཅེས་ཁྱད་པར་ཅན་གྱི་སྣང་གྲག་རིག་གསུམ་གྱི་རྣམ་རོལ་ཆེན་པོར་རྒྱས་བཏབ་ནས། རྟེན་སྙིང་ཤམ་བུར། དྷརྨ་ཝཱཀྐ་རཏྣ་རཀྵ་རཀྵ་ཧཱུྃ་ཧཱུྃཿབཏགས་པ་བརྒྱ་རྩ་བརྒྱད་ཀྱིས་རབ་གནས་བྱ། དེ་ནས། ཧྲཱི༔ སྲུང་བའི་འཁོར་ལོ་ཆེན་གསུང་རྟེན་གླེགས་བམ་ཞེས་བསྒྱུར། པོ་འདིའི༔ རང་བྱུང་རང་ཤར་ཡི་གེ་རྣམས༔ ནམ་མཁའི་དབྱིངས་ནས་རྟེན་ལ་བབས༔ གཟུགས་བརྙན་ཡི་གེ་ཐམས་ཅད་ཀུན༔ གྲགས་སྟོང་ཆོས་ཀྱི་ཕུང་པོར་གྱུར༔ སངས་རྒྱས་ཐམས་ཅད་ཡི་གེའི་གཟུགས༔ རང་བྱོན་རང་ཤར་བརྟན་པར་བཞུགས༔ ས་མ་ཡ་ཏིཥྛ་ལྷན༔ ཞེས་བརྗོད་ཅིང་ལས་གཞུང་རྗེས་ཆོག་རྣམས་མཐར་ཆགས་སུ་བྱ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་པ་ལ་སོགས་པས་བཀྲ་ཤིས་ཀྱི་ཚིགས་བཅད་རྒྱ་ཆེར་བརྗོད། སྲུང་བ་ལྟ་བུ་ཡིན་ན་ལྟེ་བ་ནས་ཆིངས་བརྒྱབ། བཟློག་འཁོར་ཡིན་ན་འདོད་གསོལ་དང་བཅས་གནོད་འཚེའི་ཕྱོགས་སུ་ཁ་སྟོན་ཞིང་འཇོག །དེ་ཡང་རིག་འཛིན་གདུགས་ཕུབ་དང་གླེགས་རལ་སོགས་ཁྱད་པར་བ་ཡིན་ན་སྨོན་ལམ་འདི་བཏབ་བོ། །ཨེ་མ་ཧོཿ ཀུན་ཏུ་བཟང་པོ་ཀུན་བདག་ཉིད༔ ཁྱེད་ཀྱི་ཐུགས་རྗེའི་ཡེ་ཤེས་ལ༔ གསལ་འགྲིབ་ཉེ་རིང་ཕྱོགས་རིས་བྲལ༔ འགྲོ་དྲུག་ཀུན་ལ་ཁྱབ་གྱུར་
ཀྱང་༔ ང་བདག་གིས་བསྒྲིབས་འཁོར་བར་འཁྱམས༔ སྲིད་པ་ལས་ཀྱི་དྲ་བར་འཐུམས༔ སྟོང་ཁམས་དྲེགས་པ་རཱུ་ཏྲར་གོལ༔ སངས་རྒྱས་ཐུགས་རྗེ་ཁྲོས་པ་ཡིས༔ དུག་གསུམ་རཱུ་ཏྲ་སྡེ་གསུམ་བཏུལ༔ གསང་སྔགས་ཐེག་ཆེན་སྒྲོན་མེ་སྦར༔ རྟེན་འབྲེལ་ཐུགས་རྗེའི་རོལ་པ་ལས༔ ཡེ་ཤེས་གཟུགས་ཀྱི་འཁོར་ལོ་ཤར༔ ཐབས་དང་ཤེས་རབ་གཉིས་མེད་ཀློང་༔ རབ་འབྱམས་མཐུ་སྟོབས་བསམ་ལས་འདས༔ གསང་སྔགས་བདེན་པའི་བྱིན་རླབས་ཀྱིས༔ ཁྱེད་དང་དབྱེར་མེད་གཅིག་པར་ཤོག༔ སྐད་ཅིག་མཐོང་ཐོས་རེག་པས་ཀྱང་༔ ཐོག་མེད་དུས་ནས་ད་བར་གྱི༔ ཉོན་མོངས་བསྒྲིབས་པར་གྱུར་པ་ཀུན༔ མཁའ་ལྟར་བྱང་ཞིང་དག་པ་དང་༔ སྲིད་པའི་མཚོ་ལས་སྒྲོལ་བར་ཤོག༔ སྦྱིན་སྟོབས་ཡོན་ཏན་འཕེལ་བ་དང་༔ ཚུལ་ཁྲིམས་ངེས་ལེགས་བཟོད་པར་ལྡན༔ བརྩོན་འགྲུས་བསམ་གཏན་ཏིང་འཛིན་གནས༔ ཤེས་རབ་ཕ་རོལ་ཕྱིན་རྟོགས་ཤོག༔ ཐབས་མཆོག་བདེ་བའི་རོ་མྱོང་ཞིང་༔ སྟོབས་བཟང་སྟོང་ཉིད་སྙིང་རྗེའི་རྩལ༔ སྨོན་ལམ་ཀུན་རིག་ཡོངས་རྫོགས་ནས༔ ཡེ་ཤེས་ཕ་རོལ་མཐར་ཕྱིན་ཤོག༔ གཞི་གནས་རང་བྱུང་ཡེ་ཤེས་དེ༔ བསྒྲིབ་མེད་མངོན་སུམ་མཐོང་རྩལ་རྫོགས༔ ཞི་རྒྱས་དབང་དྲག་ཕྲིན་ལས་སྟོབས༔ སངས་རྒྱས་ཐུགས་རྗེ་ཡོངས་རྫོགས་ཤོག༔ བློ་བྲལ་ཆོས་ཟད་ཆེན་པོའི་དབྱིངས༔ མཁའ་མཉམ་འགྲོ་བ་མ་ལུས་པ༔ རང་བྱུང་
ཡེ་ཤེས་མངོན་གྱུར་ནས༔ ཀུན་བཟང་ཀློང་དུ་ཐིམ་པར་ཤོག༔ ཅེས་བརྗོད་པར་བྱའོ། །སྨྲས་པ། གཟུགས་མེད་གཟུགས་སུ་ཤར་བ་ཡི་གེ་འཕྲུལ། །རྒྱལ་བསྟན་སྲོག་པ་རྩ་ཡི་རྟེན་མཆོག་ལ། །བྱིན་རླབས་ཡེ་ཤེས་དབབ་པའི་གནད་དོན་འགག །པདྨའི་ཞལ་ལུང་བཞིན་དུ་ཁྲིགས་སུ་བསྡེབས། །གསུང་རྟེན་པུསྟ་ཀཿཡི་དངོས་པོ་རྣམས། །གྲུབ་ཙམ་ཉིད་ནས་ཕྱག་མཆོད་འོས་ཡིན་ཞིང༌། །རབ་གནས་རྩིས་ལ་བཏབ་པའི་ཐ་ཚིག་ཆེ། །ཐེག་པ་འོག་མའི་གཞུང་ནས་མ་གསུངས་མོད། །གསང་སྔགས་ཐབས་ཀྱིས་ཆེ་བའི་གནད་དོན་ལ། །ཡེ་ཤེས་དགུག་གཞུག་ལྷག་གནས་གཙོ་ཆེ་ཡང༌། །ཙཀྲའི་གཟུགས་བརྙན་ཙམ་ལ་ཚོན་སྣ་ལྔའི། །སྲད་བུ་རིན་ཐང་ཅན་གྱིས་དཀྲིགས་པ་མང༌། །དེ་ཕྱིར་ཤེས་ལྡན་དག་ལ་ཕན་པའི་སླད། །གཞན་ལེགས་བསླད་དུ་དོགས་ནས་འདིར་མ་བཙུད། །འདིར་བཤད་མངས་ཀྱིས་དོགས་ནས་མ་ཕྲི་བར། །རྡོ་རྗེ་རྩ་ཚིག་བཞིན་དུ་གསལ་བར་བྱས། །ཞེས་པ་འདི་ཡང་གྲོལ་ཐིག་དགོངས་པ་རང་གྲོལ་གྱི་རབ་གནས་ཡེ་ཤེས་རྒྱ་མཚོའི་ཆ་ལག་ཏུ་འདུའོ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ། ཀ་ཁ་ག་གྷ་ང༌། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཨོཾ་ཡེ་དྷརྨཱ་ཧེ་ཏུ་པྲ་བྷཱ་ཝ་ཧེ་དུནྟེ་
ཥཱནྟ་ཐཱ་ག་ཏྭ་ཧྱ་ཝ་དཏ་ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ན་ཡེ་སྭཱ་ཧཱ།། །།སྔ་འགྱུར་བསྟན་པ་རྒྱ་མཚོའི་འཁོར་ལོས་བསྒྱུར། །འགྲོ་ལ་ཐེག་མཆོག་སྒྲ་སྒྲོག་རྫོགས་ཆེན་པ། །དོན་ཀུན་གྲུབ་པ་འཇིགས་མེད་གླིང་པ་ཡི། །བསྟན་པ་འཕེལ་རྒྱས་ཡུན་རིང་གནས་གྱུར་ཅིག །དགེའོ། །དགེའོ། །དགེའོ། །