གཤིན་རྗེ་ནག་པོ་སུམ་སྒྲིལ་གྱི་གནན་པའི་ཡིག་ཆུང་གཅིག་ཤེས་ཀུན་གྲོལ།
གཤིན་རྗེ་ནག་པོ་སུམ་སྒྲིལ་གྱི་གནན་པའི་ཡིག་ཆུང་གཅིག་ཤེས་ཀུན་གྲོལ་བཞུགས། །
ཁྱབ་བདག་བླ་མའི་ཞབས་དང་ལྷག་པའི་ལྷ། །དཔལ་ཆེན་གཤིན་རྗེ་གཤེད་པོར་གུས་བཏུད་ནས། །གནན་པའི་ལས་རིམ་རི་རབ་ནག་པོ་ཡི། །བཅས་ཤོམ་ལག་ལེན་འཆད་འདོད་གནང་བ་སྩོལ། །དེ་ཡང་མན་ངག་སྙིང་གཟེར་ནག་པོ་ལས། དམིགས་རྟེན་འབེམ་དུ་བཅའ་བ་ནི༔ དགྲ་བགེགས་ལིངྒ་འདྲི་བ་ཡིན༔ སྙིང་གར་རྣམ་ཤེས་ཡིག་འབྲུ་རེ༔ དཔྲལ་བར་མིང་བྲི་ཁ་ལ་རུས༔ སྟེང་འོག་གཉིས་ལ་གཅོད་གཟིར་གཉིས༔ མཐའ་ལ་འཕྲོག་བྱེད་ཡི་གེ་བཞི༔ ཡན་ལག་བཞི་ལ་གཅོད་བྱེད་བཞི༔ དཔུང་པ་གཉིས་ལ་མྱོས་བྱེད་བྲི༔ འདི་ལ་གཟུགས་ཅན་གཟུགས་མེད་དོ༔ ཞེས་གསུངས་པའི་དགོངས་དོན་གྱི་ཟབ་གནད་རྣམས་གཙོ་བོར་བྱས་ཏེ་རང་གཞུང་གི་མན་ངག་གིས་བརྒྱན་པའི་
དཔེའུ་རིས་ཟུར་གསལ་གྱིས་དགྲ་འདྲེའི་ལིདྒ་སོ་སོར་བྲི་བ་ཡིན་ཏེ། དེ་ཡང་དུས་ཚོད་ནི། གྱིམ་ཤང་ཞགས་པ་ནག་པོ་ལས། །ཤོག་བུ་གྲོ་ག་རོ་རས་ལ། །ཁྲག་ཆེན་བཙན་དུག་སྦྱར་ནས་ནི། །ཕུང་གསུམ་བྲ་ཉེའི་ཉིན་ཞག་ལ། །གཏུམ་པ་ཉི་མ་རྩེ་ཤར་ནས་སྲོད་ཚུན་ཆོད། སྟག་གི་དུས་ཚོད་དུས། །ཁམས་རུས་ཆེན་གང་ཡིན། དང་སྦྱར་བའི་ཕུང་དུས་དེར། །ལས་བྱེད་འབྲུག་གི་ཉི་མ་ལ། །དགྲ་བདུད་དུར་ཞུགས་ཀུན་ལ་འགྲེ། །ཞེས་དང༌། དྲང་སྲོང་ཤ་ལྡེ་རུ་རྩེ་བའི་མན་ངག་ལས། །ནམ་ལངས་ཡོས་ལ་ཉི་ཤར་འབྲུག །དུས་ཚོད་བཅུ་གཉིས་དེས་འགྲེའོ། །སྔ་དྲོ་མེ་ལ་ཉིན་གུང་ས། །ཕྱི་དྲོ་ལྕགས་ལ་དགོངས་ཀ་ཆུ། །ཉི་ཤར་ཤིང་ལ་ས་སྲོས་ཤིང༌། །སྲོག་འཁོར་མེ་ལ་ནམ་གུང་ས། །ཐོ་རངས་ལྕགས་
ལ་སྐྱ་རེངས་ཆུ། །འདི་རྣམས་ཞིབ་ཏུ་བརྩི་བ་གནད། །ཅེས་དང༌། སྟག་ལོའི་བདུད་སྐར་མཆུ་གྲེ་གཉིས། །ཡོས་བུའི་སྦོ་ལ་འབྲུག་ས་རི། །སྦྲུལ་གྱི་དབྱུག་གུ་ལག་སོར་ཏེ། །རྟ་སྣྲུབས་ལྷ་མཚམས་གཉིས་པོ་སྟེ། །ལུག་གི་ཆུ་སྨད་གྲོ་བཞིན་དང༌། །སྤྲེལ་གྱི་མོན་གྲེ་མོན་གྲུ་གཉིས། །བྱ་ཡི་ཁྲུམས་སྟོད་ཁྲུམས་སྨད་དང༌། །ཁྱི་ཡི་ནམ་གྲུ་དབྱུག་གུ་སྟེ། །ཕག་གི་སྨིན་དྲུག་སྣར་མ་དང༌། །བྱི་བའི་མགོ་ལག་གླང་ནབས་རྒྱལ། །དེ་ནི་སྐར་མའི་གྱིམ་ཤང་ངོ༌། །ཞེས་དང༌། གཞན་ཡང་ལོ་ཟླ་ཞག་དུས་ཟ་བདུན་མཐུན་བདུད་སོགས་ཞིབ་ཏུ་བརྩི་དགོས་ཀྱང་དེ་ཙམ་གྱིས་མཐའ་བསྡུས་ནས། མི་འདུས་རྐྱེན་བཞི་ཤོར་རྐྱེན་བཞི། །རྟེན་ལ་མི་ཁུག་གནད་བཞི་པོ། །སྤངས་ནས་ཚད་ལྡན་བྲི་བར་བྱ། །ཞེས་པའི་སྐྱོན་བྲལ་ཞིག་ངེས་པར་གཙོ་ཆེ། ཐོག་མར་རང་གི་ཁ་ལག་གདོང་གསུམ་དག་པར་བཀྲུས་ན་སྒོ་གསུམ་གྱིས་ནུས་པ་རྒྱས། དེ་རྗེས་ལག་པར་བསད་ཁྲག་དང་བསང་ཐལ་བྱུག །ཤ་ཆེན་ནམ། ཚ་བ་གསུམ་མུར་བཞིན་པར་པང་ཁེབས་ཁ་རས་དང་བཅས་གཤིན་རྗེའི་ང་རྒྱལ་ལ་གནས་པས་ཁ་བལྟ་ཕྱོགས། དམིགས་བྱའི་བདུད་གཅོད་དམ། ལྷོ་ནུབ། ལྷོ། སྒྲ་གཅན་སྡེ་བརྒྱད་སོགས་ཀྱི་ཐེབས་ཕྱོགས་དང༌། ཉི་མའི་འཆར་བཞུད་སོགས་རང་གྲིབ་མི་འགོ་བའི་ཐབས་སོགས་ཕྱོགས་མཐུན་རིག་པའི་མདའ་མོ་ཡང་འཕེན། སྣག་ཚའི་རྒྱུ་ཡུགས་སའི་ཁོག་དྲེག་གམ། རྒྱ་སྣག་གཙང་མ། རོ་སོལ་སོགས་ལ། མཆོད་རྟེན་རྙིང་
པའི་རྨངས་ཞབས། ཕུང་ཤུལ། རི་མཐོ་ཉི་འཆར་སྔ་བའི་རྨངས་སོགས་དང༌། ཕག་ནག །གྲི་མཛེ། ར་ཁྲག །བྱ་ཤ་ཟན། གཅན་གཟན་གདུག་པ་ཅན་གྱི་ཁྲག །བཙན་དུག །ཏིལ་ནག །ལྡོང་རོས། ལན་ཚྭ། སྐྱེ་ཚེ། ཟར་ཁུ། མི་རུས་སོགས་ཅི་འཛོམ་བསྲེས་ནས་ཐོད་ངན་ནམ། གྲི་ལྕགས་ཀྱི་ཀོང་བུར་སྦྱངས་པས་ལས་རང་བཞིན་གྱིས་འགྲུབ་པའི་དགོས་པ་ཡོད། སྤྲོ་ན་བདག་ཉིད་ཕྱག་རྒྱ་ཟིལ་གནོན་གྱི་ཏིང་འཛིན་སྔགས་རྒྱས་གཟས་པོ་དངོས་སུ་བཀུག་ལ་སྣག་ཚ་དང་དབྱེར་མེད་རོ་གཅིག་ཏུ་བསྟིམ་ལ་རུས་པའམ་ལྕགས་ཀྱི་ལྡེ་མིག་གིས་སྣ་ཚ་མཉེ་བ་དང་ཕྱེ་མར་འཐག་པའི་དམིགས་པ་བྱེད། བྲི་སྨྱུག་ནི་མི་བསད་མདའ་སྨྱུག་གམ། བྱ་ཤ་ཟན་གྱི་སྒྲོ་རྩ། སྲིད་གཏེར་ལས། ཁྱད་པར་ཕོ་རོག་ཤིས་པ་ཡིན༔ ཞེས་གསུངས། ཆེ་ཆུང་ཚད་ཉིད་པ་ལ་མདའ་གང་ངམ། །འབྲིང་མཐར་གཟས་པོའི་ཁྲུ་གང་མཐོ་གང་བྱ། །མི་འབྱམ་གནད་ལ་གྲོང་ཡུལ་ཕ་མ་དང༌། །བུ་ཚའི་མིང་སོགས་ཤར་ཡིག་བྲི་བར་གསུངས། །མ་བུབ་མ་ཞ་མ་ལོང་མ་འགྱེལ་གནད། །སྲི་ཅན་ལ་ལིངྒ་སྤྱི་ཁོག་འདྲ་བ་ལ། ཁྱད་པར་དགྲ་མིང་རྣམས་སུ་སྲི་མིང་དང་སྙིང་གར་ཏྲི། མགོ་བོ་བསྒྱུར་དགོས་པས། ཕོ་སྲི་ལ་གཡག་དཀར། སྤྱང་ཀིའང་གསུངས། མོ་སྲི་ལ་ཁྱི། རྒན་སྲི་ཝ། ཆུང་སྲི་སྲེ་མོང༌། དར་སྲི་སྤྱང་ཀི། དུར་སྲི་ཝ། དམ་སྲི་ཕག །སྤྱིའི་ཕུང་སྲི་རྔ་མོང༌། རྒྱལ་སྲི་སེངྒེ། བློན་སྲི་རི་བོང༌། དམངས་སྲི་དྲེའུ། དགྲ་སྲི་
སྤྱང་ཀི། མཚོན་སྲི་ཤ་བ། གོད་སྲི་ར། གཡའ་སྲི་འཕར་བ། ཉེ་སྲི་སྡིག་པ། བྱེས་སྲི་རྟའམ་རྐྱེན་གང་ཡིན། གདོན་སྲིའི་རིགས་ལ། བཙན་སྲི་དམར་པོ་འུག་མགོ། གཞན་ཡང་ཚོན་ཁྲལ་བསྡུས་ནས་དེ་ཚོན་སྐུད་སྣ་ལྔས་རྒྱ་གྲམ་དུ་བཅིང༌། གནན་དུས་སུ་རྩེ་མོ་ཐུར་ལ་བསྟན་ནས་གནན་ཆས་སྟེང་དུ་བཙུག །དེའི་སྟེང་དུ་མཆོད་རྟེན་བཞེངས་པ་ལ་སྔགས་འཆང་རྣལ་འབྱོར་པ་བྱིན་རླབས་ལྡན་པས་རབ་གནས་བྱས་ན། མཚོན་དང་འཁྲུག་པ་མཐའ་དམག་སོགས་ཞི་བར་གསུངས་པར། མཆོད་རྟེན་མ་འགྲུབ་ཀྱང་མཚོན་སྲིའི་རིགས་ལ་དེ་བཞིན་བསྟན་འགྲོར་དམིགས་ནས་བྱ་ཐུབ་ན་ལེགས། རྒྱལ་སྲི་དཀར་པོ་བྱ་ཕོ། ཀླུ་སྲི་སྔོན་པོ་སྦྲུལ། བདུད་སྲི་ནག་པོ་ཁྱུང༌། ལོ་སྲི་ལོ་བདུད། ཟླ་སྲི་ཟླ་བདུད་ཀྱི་མགོ་ཅན། དུས་སྲི་དུས་དེར་དམོད་པ་སོགས་སོ། །དཔྲལ་བར་ཨེ་ཏྲི་ག་ནན་སོགས་ཁོ་བོས་དཔེ་རིས་ཟུར་དུ་གསལ་བར་བཀོད་པ་ལྟར་རོ། །དགྲ་བོའི་སྙིང་གའི་ས་བོན་ལ་ཡིག་རིགས་མི་འདྲ་བ་མང་དུ་བྱུང༌། ལྔ་པ་ཆེན་པོའི་ཕྱག་བཞེས་ལ་རྣི་འདི་བཞིན་དང༌། དབུར་སྨྱོན་ཆོས་ཀྱི་གྲགས་པས་གཤིན་རྗེ་ལྕགས་སྡིག་གིས་ལུང་ཁུངས་སུ་ནྲི་འདི་བཞིན་འདྲེན། གཞན་དག་ནྲིཎྲྀ་འདི་བཞིན་བཞེད་ཅིང་དོན་དུ་འགྲོ་བ་མིའི་ས་བོན་ཉོན་མོངས་དུག་གསུམ་གྱི་ངོ་བོ། སྙིང་དབུས་ཁྲག་སྦལ་གྱི་ནང་དུ་ཡི་གེའི་རྣམ་པར་གནས་པ། རྟེན་འབྲེལ་ལུགས་འབྱུང་དུ་དུག་གསུམ་རང་རྒྱུད་ལ་ཤར་བའི་འདོད་ཆགས་བྱ། ཞེ་
སྡང་སྦྲུལ། གཏི་མུག་ཕག་སྟེ། གསུམ་པོའི་གཟུགས་ཀྱིས་མཚོན་བྱེད་དཔེའི་དབྱིབས་སུ་གྲུབ། སྤྲོ་ན་དགྲ་ལིང་གི་བརླ་གཡས་པར་ཤ་བའི་གཟུགས་བརྙན་ནམ། ཤ་བ་ཞེས་མིང་བྲིས་པའི་མཐར། དགྲ་བོའི་བླ་འཁྱམས་ཤ་བར་བརྫུ་བ་ཛཿཛ༔ ཞེས་བསྐོར་ཏེ་འདྲི། དེ་བཞིན་དུ་རྐྱང་ལཀྵ། རྟ་ལ་དྷ། གཡག་ལ་བྷུ། བོང་བུ་ལ་ཏྲི། གླང་ལ་གྷུ་ཏེ། བླ་རྟགས་ཆེ་བ་དྲུག་གི་སྲོག་དང༌། བྱི་བ་ལ་ཧཱུ། ཕག་པ་ལ་ས། གནའ་བར་ལ། ལུག་ལ་སེ། ར་ལ་ཛ། གླ་བ་ལ་བྷ་སྟེ་ཆུང་བ་དྲུག་གི་སྲོག་མཐར། དགྲ་བོའི་བླ་འཁྱམས་འདི་དང་འདི་རུ་བརྫུ་བ་ཛཿཛཿ ཞེས་སྔ་མ་ཇི་བཞིན་དུ་འདྲི། བརླ་གཡོན་པར་བླ་ལེན་འཕར་བ། སྤྱང་ཀི །དོམ། དྲེད། ཁྲ། གླག་སོགས་བླ་གཤེད་དྲུག་གི་ཁོག་པར་དགྲ་བོ་གླང་ལུག་ཁྱི་འབྲུག་བཞིའི་བླ་མེ་ཡིན་པས། ཤར་བྷ་སྟེ་མཱ་ར་ཡ་རྦད། ཅེས་རྟའི་གཤེད་སྔགས་དང༌། ས་ལ་སྲགྷེ་མ་ཏི་རྦད། ཅེས་སྦྲུལ་གྱི་གཤེད་སྔགས། དེས་འགྲེ་བར་སྟག་ཡོས་ལོ་བའི་བླ་དེའི་སྲོག་གི་མ་ཡིན་པས་བྱི་ཕག་གཉིས་ཀྱི་གཤེད་སྔགས། ས་དྷི་ཙ་ཡ་དུ་བྷི་ཏྲི་རྦད། ཅེས་བྱི་བ་དང༌། ཟོ་སོ་ལུ་ཤ་སུ་ཏ་རྦད། ཅེས་ཕག །རྟ་སྦྲུལ་ལོ་པའི་བླ་དེའི་སྲོག་གི་མ་ཡིན་པས་སྟག་ཡོས་གཉིས་ཀྱི་གཤེད་སྔགས། ཨ་བྷི་ཏ་ར་མེ་བྷི་རྦད། ཅེས་དང་ཡོས་ལ། ཤ་ས་ཀ་ར་ཧ་ར་རྦད། བྱ་སྤྲེལ་ལོ་པའི་བླ་གོང་ལྟར་ལ། གླང་ལུག་ཁྱི་
འབྲུག་བཞིའི་གཤེད་སྔགས། ཨ་དནྟ་གྷྲི་ཏ་རྦད་ཅེས་གླང་དང༌། སུར་ཤ་བྷུ་ཏིས་ཕག་རྦད། ཅེས་ལུག །ཤུ་ན་ས་སུ་ར་ཏྲ་རྦད། ཅེས་ཁྱི། ས་ཧ་ག་ཏེ་ལི་དུ་རྦད། ཅེས་འབྲུག །དེ་ཡང་དཔེར་ན་གླང་ལོ་པ་ཡིན་ན་རྟ་སྦྲུལ་གང་རུང་རེས་ཆོག་སྟེ་གཉིས་ཀ་འདྲི་མི་དགོས་པ་སོགས་གཞན་ལའང་ཤེས་པར་བྱའོ། །བླ་བདུད་གཟུགས་ལ་དབབ་པ་ནི། བྱད་མའི་བླ་དྭགས་བྲི་བ་ཡིན། །ཞེས་གསུངས་པའི་ཟབ་གནད་ཐུན་མོང་མ་ཡིན་པ་ཡིན། ཡང་ན་ཡི་གེ་ཚ་ལ། ཏྲོཾ། ཏྲི། ཤཾ། ཏྲི། ཛ། ཁཾ། ཤ། གྷ། ཛ། ཏྲི། ཐུཾ། ཛཿ སོགས་ཡིག་མགོ་ལྟ་ཕྱོགས་ཕོར་ཕྱི་མོར་ལྡོག་ནས་འཁོར་མར་བྲི། ཡང་ན་ཏྲི་ཏྲོཾ་ཤམ་གྷ་ཤ་ཛཿཐུཾ། ཡང་ན་བླ་ཆེན་དྲུག་གི་མིང་མཐར་བླ་ཁུག་ཛ༔ ཡང་ན་གནོད་བྱེད་དགྲ་བོའི་བླ་གང་དུ་བརྫུས་ཀྱང་ཁུག་ཛ༔ ཅེས་བརླའི་རྩ་བ་ནས་ཕྲེད་ལ་འབྲི། དེ་ལྟར་དཔེའུ་རིས་ནས་བཤད་པའི་མཚན་ཉིད་ཚང་བའི་ལིངྒ་དེ་ཉིད་ལྷག་ཆད་བྲེས་བསུབས་སྤངས་ཏེ་དག་པར་བྲི། གལ་ཏེ་བྲིས་བསུབས་བྱེད་དགོས་ན་སྟག་གི་སྡེར་མོས་བྲད། དམིགས་བྱ་ལེགས་པར་ཚར་བ་དང༌། ཕྱི་ནང་བྱེ་མ་གཤེར་ལྡན་གྱིས་ཕུར། ཟན་གཙང་མའི་དྲིལ་ཕྱིས་བྱ། ཚོན་གཏོང་ན། ཁ་དོག་འབྱུང་བ་གཤེད་དུ་བསྡེབ། ཅེས་པས་དམིགས་བྱའི་སྲོག་ཁམས་དང་བསྟུན། ཐུམས་འཁོར་རྩིབས་དེའི་གཤེད་དུ་སྡེབ་དགོས་པ་སོགས་ཕྲ་ཞིབ་ཀྱི་ལག་ལེན་མཐོང་རྒྱུན་བཞིན་བྱའོ། །སྐབས་འདིར་ལིང་ཁྲུས་
ཟུར་གསལ་བཞིན་གྲུབ་ནས། བྱུག་རྫས་ནི། ཁྲག་སྣ་གང་འཛོམ། ཁྱད་པར་གྲི་མཛེའི་ཁྲག། དུག་སྣ་ཅི་ཚོགས། ཐང་ཕྲོམ་དཀར་ནག །བཙན་དུག །ཕུང་ས་སོགས་གདུག་པའི་མི་སྣ་གང་འཛོམ། ལྷ་ཁང་རྙིང་པ། རི་ཉིལ། མཆོད་རྟེན་ཞིག་རལ་སོགས་ཀྱི་ས་དང༌། དམིགས་བྱར་དེའི་དྲི་མ་དྲུག་སོགས་ཟག་རྫས། བྱུག་རྫས་རྣམས་ཁུ་བ་འབྱིན་པའི་ཕྱིར་མེར་བསྲོས་ནས་རླངས་ཐོན་ཙམ་བྱེད། ཀེག་སྲི་སོགས་བགེགས་རིགས་ལ་འདྲེ་ཚུགས་ཀྱི་ས་དང༌། གང་གནོད་དེའི་ས་རྡོ་ཆུ་ཤིང་བསད་ཁྲག་དུག་སྣ་སོགས་བྱུག །བཟློག་གསད་ཀྱི་དཀྱིལ་འཁོར་ནི། གཞུང་ལས། ཕུང་གསུམ་ས་ལ་བ་བྱུང་ལྔའི༔ དཀྱིལ་འཁོར་སྟེགས་བུ་མདའ་གང་བ༔ བདུད་རྩི་ཁྲག་དང་ལྡན་པས་བྱུག༔ ཅེས་དང༌། རྡོ་རྗེ་འཁོར་ལོའི་བར་དག་ཏུ༔ མིང་རུས་ལྡན་པའི་ལིངྒ་བཅུ༔ དཔལ་གཏོར་འོག་ཏུ་གཅིག་ཀྱང་བཀོད༔ ཅེས་པའི་དཀྱིལ་འཁོར་དཔེ་རིས་བཞིན་གྱི་དབུས་སུ་ལྕགས་སྣོད་སོགས་ཀྱི་འབྲུབ་ཁུང་མཚན་ཉིད་ཚང་བའི་ནང་དུ་འཇུག །རྩིབས་དང་ལྕགས་མཁར་གྱི་བར་དུ་མིང་རུས་ལྡན་པའི་ཟན་གྱི་ཉ་པོ་བཅུ་དང་མཐར་རྩ་བར་ཟེར་རྫས་སོགས་འགོད། འཇུག་པ་བདེ་ཕྱིར་ཕུང་ས་སོགས་དྲག་པོའི་ས་སྣ་དང་བྱེ་མ་ལ་བྱས་པའི་མཎྜལ་མདའ་གང་གྲུ་བཞི་རོ་སོལ་དང་ཐལ་ཆེན་གྱིས་ནག་པོར་བྱས་པའི་དབུས་སུ་བྲུབ་ཁུང་ཕྱེད་ཆ་ཙམ་ནུབ་པར་འཇུག་པའམ། ཡང་ན་ལྕགས་སླང་བུག་རྡོལ་མེད་པ་བྱེ་མས་བཀང་
བའི་དབུས་སུ་འབྲུབ་ཁུང་ཇི་ལྟར་འཚམ་པ་བྲུས་ལ། གྲི་ཁྲག་དུག་ཆུ་དུར་ཐལ་སོགས་ཀྱིས་སྦགས་པའི་མཐར་སྐྱེར་རྩང་སྟོད་སྨད་ཁྲག་དང་དབུས་རོ་སོལ་གྱིས་ནག་པོ་བྱུག །རྩེ་མོར་ཤ་ཡིས་བརྒྱན་པ་ཉེར་གཅིག་སྲིན་མོ་འབྲོས་སམ་འཚུབ་མ་རིས་སུ་བཙུགས་ལ་འགུགས་བྱེད་ཀྱིས་ཕོ་ཉར་མངའ་གསོལ། དེ་ནས་ལིངྒ་རྣམས་མང་པོ་ཡོད་ན་བརྩེགས། འཁོར་ལིང་ཡོད་ཚེ་འོག་ཏུ་བཅུག་གཞུག་ཚུལ་ནི། ཇི་སྐད་དུ། ལིངྒ་གཤེད་བལྟབ་ནྲྀ་ཡིག་མཐོང༌། །ཞེས་པས་མཐའ་ནས་རིམ་པར་བསྡུས་པའི་མཚོན་ལྟེབ་བམ་རོ་སྒོང་དུ་གྲགས་པས་སྙིང་གའི་ས་བོན་མཐོང་བའམ། ཡང་ན་སྐེ་རྒྱབ་ཏུ་བཅག་པའི་གཡས་གཡོན་གཤམ་སོགས་ཟུར་ལྟེབ་ཟུར་གསུམ་བཟོས་ནས་ས་བོན་མཐོང་བ་ཤི་སྐྲ་དང༌། བྱད་ཐག་གིས་ཅུང་ཟད་དཀྲིས་ནས་གཞུག །དེའི་སྟེང་དུ་མཉྫིའམ་སྲིད་པ་ལུགས་འབྱུང་དྲག་པོའི་ཤིང་གིས་ཨེ་ཁྲམ་སྟེང་མཐོ་བར་གོང་གནོན་གྱི་གཏོར་མ་དཔེའུ་རིས་བཞིན་བཞུགས་སུ་གསོལ། ཨེ་ཁྲམ་རེ་ནག་གམ། དར་ནག་གིས་དཀྲིས་ལ་ཉི་ཟླའི་ཟེར། མར་མེའི་འོད། བདུད་རྩིའི་ཟེགས་མ་སོགས་མི་འཇུག་པ་བྱེད། འབྲི་གུང་ཆོས་ཀྱིས་གྲགས་པས་ལིངྒ་ལ་བདུད་རྩི་འཐོར་ན་དམེར་འགྲོ་གསུངས། གཤིན་རྗེ་ཡང་བཟློག་གི་ཁྲིགས་རིམ་དུ་དགུག་གཞུག་གི་གོང་དུ་སྨན་མི་བྲན་པ་གནད་ཟབ་ཅེས་བཤད། གང་ཟག་གཞན་དག་བདུད་རྩི་ནི་དམ་ལྡན་སྨན་དང་དམ་ཉམས་ལ་དུག་ཏུ་འགྱུར་བའི་ཕྱིར་སྐྱོན་མེད་པར་འཆད་ཀྱང༌།
སློབ་དཔོན་ཆེན་པོས་ལིངྒ་ལ་སྨན་རག་བདུད་རྩི་མ་འཐོར་བ་གལ་ཆེ༔ གསུངས། ཉེ་ལོགས་ཅི་བདེ་བར་གཡག་རྒོད་ཀྱི་རྭར་ཐུན་རྫས་ནི། སྐེ་ཤངས་ཡུངས་ཏེ་འབྲུ་གསུམ། ལྕགས་ཟངས་རྡོ་གསུམ་སྟེ་ཕྱེ་གསུམ། སྤང་བྲ་རམས་གསུམ་སྟེང་ན་གསུམ། ཕུང་ས་དགུ་སོགས་ས་སྣ་དང་བྱེ་མ། མཛེ་དམེ་རབས་ཆད་ཁྲ་སྤྱང་གྲི་ཁྲག་སོགས་ཁྲག་སྣ། བཙན་དུག་སོགས་དུག་སྣའི་རིགས་ཏེ་སྣ་གསུམ་རྣམས་ཀྱིས་བཀང་བའི་ཁ་དུག་ཤོག་ཁྲོལ་ཚགས་ཅན་གྱིས་བཀབ། མཐའ་བསྐོར་དུ་རང་གཞུང་ནས་གསུངས་པའི་གནན་སྣོད་ནི། རབ་མོན་ཐོད་གྲི་ཐོད་རབས་ཆད་ཐོད་པ། ཐ་མ་སྤྱང་དང་ཝ་ཁྱི་ཕག་པའི་ཐོད་པ་གཉིས། ཞེས་སྤྱིར་བཏང་དང༌། སྲི་ཅན་ལ། གནན་སྣོད་དང་ས་དམིགས་ངག་འདོན་གྱིས་ཤིན་ཏུ་གོ་སླ་བས་འདིར་ཚིག་ཚོགས་ཆེ་བས་མ་བྲིས། དེ་དག་གད་བརྡར་ལེགས་པར་བྱས་པའི་འགྲམ་པ་གཡས་ལ། སྐྱེས་པ་ཕོའི་ཕོ་སྲི་ལངས་པ་ནན་ཆིངས་བྲུབ། འགྲམ་པ་གཡོན་ལ། བུད་མེད་ཀྱི་མོ་སྲི་ལངས་པ། ཡ་རྐན་ལ། མི་ཁ་དང་བྲ་མཆུ་ནན་ཆིངས་བྲུབ། ཁ་ལ། བྱིས་པའི་ཆུང་སྲི་ལངས་པ། དཔྲལ་བར། རྒན་པའི་རྒན་སྲི་ལངས་པ། གདོང་ལ། གཞོན་པའི་གཞོན་སྲི་ལངས་པ། མཆེ་བ་ལ། དར་མའི་དར་སྲི་ལངས་པ། སྤྱི་བོར། སྤྱི་དགྲ་ལངས་པ་ཐམས་ཅད། རྣ་ལྟག་གཡས་གཡོན་དུ། ཕུང་སྲི་གོད་སྲི་ལངས་པ་ནན་ཆིངས་བྲུབ། །
ཅེས་བྲིས་ལ་རིང་ཆས་ཅུང་ཟད་དཀྲི། བྱེ་བྲག་གཞུང་གཞན་ལས། གནན་སྣོད་དང་ས་དམིགས་ནི། དགྲ་འདྲེ་སྤྱི་ཙམ་དུ། མོན་པ་རབས་ཆད་ཀྱི་ཐོད་པར་མཆོད་རྟེན་གྱི་ཞབས་སུ་གནན། དགྲ་བོ་སྤྱིར་སྤྱང་ཀིའམ་ཤ་ཁྱིའི་ཐོད་པ་ཡང་ན་ཁོ་རང་གི་ཕ་མེས་ཀྱི་ཐོད་པ། གླང་ངམ་གཡག་རྭ་མེ་ཆེས་མ་ཕོག་པ་སྐྱེས་པར་གཡས་དང༌། བུད་མེད་ལ་གཡོན་ལམ་རྒྱ་གྲམ་དང་ལ་བཙས། འབྱུང་པོ་སྤྱི་ལ་ཕག་ཐོད་མཆོད་རྟེན་ཞབས། དེ་ཡང་ཞིབ་ཏུ་དབྱེ་ན་དགྲ་འདྲེ་གཉིས་ལས། དང་པོ་ནི་བླ་མ་ལ་བྱ་རྒོད་ཀྱི་ཐོད་པའམ། སྟག་གམ་བྱི་ལ་ཁྲག་རིས་ཅན་གྱི་ཐོད་པ་མཆོད་རྟེན་ཞབས། དགེ་སློང་ལ་ངང་སེར་མཆོད་རྟེན། སྔགས་པ་ལ་བྱ་རོག་ལྷ་ཁང༌། ལྷ་སྔགས་དམ་ཚིག་གཅིག་པའི་མཆེད་དང་སློབ་མ་ལ། རུས་སྦལ་གྱི་ཁོག་པའམ། སྦལ་ནག་གི་ཐོད་པར་བྲག་གཅན་ཟན་འདྲ་བའི་འོག །བོན་པོ་དང་མུ་སྟེགས་ལ་གྲུམ་པ་དང་ཕག་ནག་གཅན་གཟན་གང་རུང་ལ་བཅས། རྒྱལ་པོ་ལ་སེངྒེའམ་ཁྱི་དཀར་རྒྱ་སྒོའི་ཐེམ་འོག །མི་དཔོན་གླང་ཐོད་སྦྲུལ་ནག་གམ་རུས་སྦལ་འདྲ་བའི་འོག །མི་སྐྱ་ཕག་ཐོད་དམ་གླང་རྭ་མེ་ཆུས་མ་འཕོག་པ་ཟམ་རྡུར། བུད་མེད་ཝ་ཐོད་རྒྱ་ལམ་མམ་དུར་ཁྲོད། བྱིས་པ་སྲེ་མོང་སྒོ་ཐེམ་འོག །མི་སྐྱ་ཁེར་འདོད་ཝ་ཐོད་ཤིང་གཅིག་གི་དྲུང་རྣམས་སུ་བཤད། གཉིས་པ་ནི། དམ་སྲི་འཕར་སྤྱང་ཁྱི་ཐོད་གྲོང་གི་དབུས། རྣལ་འབྱོར་པའི་དམ་སྲི་མི་ཁྱིར་ཕག་རབས་ཆད་ཀྱི་ཐོད་པ་མཆོད་རྟེན་འོག །
འགོང་སྲི་སྤྲེལ་ཐོད་ལྷ་ཁང་ཐེམ། རྒྱལ་པོའི་ཕུང་སྲི་མོན་བོད་ཧོར་གསུམ་གྱི་ཐོད་པ་ཆོས་འཁོར་གྱི་དབུས་སམ་ལྷ་ཁང༌། བློན་པོའི་ཕུང་སྲི་སྤྲེའུ་རི་བོང་ནེ་ཙོའི་ཐོད་པ་ཕོ་བྲང་གི་མདུན། ཡུལ་མིའི་ཕུང་སྲི་མཛོ་རྟོལ་དྲེའུའི་ཐོད་པ་སྦྲུལ་གྱི་སྲང་ངམ་ཡུལ་གྱི་དབུས། དགྲ་སྲི་རྟ་གཡག་གི་ཐོད་པ་དགྲ་བྱུང་དོགས་ཀྱི་གོང་གསུམ་མམ། ལམ་རྒྱ་གྲམ། ལུང་གསུམ་མདོ། ཕོ་སྲི་གཡག་རོག་གི་ཐོད་པར་གངས་སྟོངས་སམ་རི་རྩེའི་ལ་བཙས། མོ་སྲི་ཁྱི་མོ་ནག་མོའི་ཐོད་པ་རྒྱ་མཚོའི་གཏིང་ངམ་བྲག་གི་རྩིབ། དར་སྲི་ཝ་དམར་གྱི་ཐོད་པ་དུར་གྱི་འོག །ཆུང་སྲི་རེའུ་ལུ་གུ་ཁྱི་གུ་མིག་མ་བྱེ་བ་ཤོར་སྐྱེས་དང༌། ཕེ་གུ་སྲེ་མོང་ཐོད་པ་མའི་མལ་འོག་གམ། ལམ་རྒྱ་གྲམ། རྒན་སྲི་ཝ་ཐོད་ཆད་པའི་ཞབས། དུར་སྲི་ཝ་ཐོད་དུར་ཁྲོད་དབུས། དབུལ་སྲི་སྤྱང་ཀིའམ་རི་བོང་གི་ཐོད་པ་རྒྱ་ཐབ་ཀྱི་འོག །ཕུང་སྲི་རྔ་མོའི་ཐོད་པ་གྲོག་པོ་ཕུགས་རྡུགས་ཕུ། ལྕེབ་སྲི་རྦབ་སྲི་ཕག་ཐོད་རྒྱ་གྲམ་ལམ། ད་མེ་སྲི་སྐྱ་གའི་ཐོད་པ་ཁང་པའི་ཞབས། གྲི་སྲི་ཤ་བའི་ཐོད་པ་ལ་བཙས་འོག །རྟ་སྲི་རྟ་ཐོད་རི་ཆེན་ཞབས། གོད་སྲི་འཕར་སྤྱང་ར་ལུག་སྤྲེའུ། འབྲི་རོག་གམ། བེའུ། ཡང་ན་གོད་མགོ་ཕྱི་མ་ར་བའི་དབུས། གཡའ་མོའི་གོད་སྲི་འཕར་བ་རྔ་མོའི་གསའ་ཡི་ཐོད་པ་འབྲོག་ལྷས། སེར་སྲི་ཤ་བའི་ཐོད་པ་སེར་བ་འོང་པའི་སྒང་ཟུར་གྱི་རྨད། ཞིང་སྲི་གླང་རའམ་རྫའི་པར་བུ་འོད་ཁའི་དབུས་རྣམས་སུ་གནན་
པར་བྱའོ། །གཞན་ཡང་མངོན་སྤྱོད་ཀྱི་ཡི་གེ་ལས། དགྲ་ཡུལ་མི་མཐུན་ས་ཡིན་ན༔ དགྲ་བོའི་ཡུལ་གྲུ་གང་ཞིག་གི་ཐོད་པར་གནན༔ དགྲ་བོའི་དམག་དཔོན་དྲེད་མོང་གི་ཐོད་པ་དང་༔ དམག་མི་དོམ་གྱི་ཐོད་པར་གནན༔ ཡུལ་མཁར་དང་ནོར་རྫས་སྤྲེའུའི་ཐོད་པར་གནན༔ ཁྱད་པར་གང་རུང་གི་དགྲ་དང་སྲི་གནན་ཡིན་ན༔ དགྲ་བོ་ཆེ་རྒྱུད་དང་རྒན་སྲི་རྣམས་དོམ་མགོའི་ནང་དུ་གནན༔ དགྲ་བོ་ཆུང་རྒྱུད་དང་མོ་སྲི་རྣམས་ཕག་མགོའི་ནང་དུ་གནན༔ གཞོན་སྲི་དང་དབུལ་སྲི་རྣམས་སྤྱང་ཀིའི་མགོར་གནན༔ ཆུང་སྲི་དང་ཐེའུ་རང་རྣམས་སྲེ་མོང་མགོར༔ གོད་སྲི་དང་ནད་སྲི་ལངས་པ་བྱ་རོག་གི༔ མི་ཁ་དང་ཁ་མཆུ་ལངས་པ་རྣམས་ཝ་ཡི༔ ནད་ཡམས་དང་ཞིང་ཁའི་སྲི་རྣམས་བོང་བུའི༔ ཁྱིམ་དུ་འདྲེ་ཆགས་དང་འགོང་པོའི་སྲི་ཞུགས་ན་རི་བོང་གི༔ རྒྱལ་བསེན་དང་འབྱུང་པོས་རྒྱུན་དུ་ཟ་ཁ་ཟུག་ན་ཁྭ་ཏའི༔ སུན་ཁ་དང་གཤེད་ཁ་སྡང་ན་འུག་པའི༔ སྒྲུབ་ལ་ཕྱི་ནང་གི་བར་དུ་གཅོད་པ་བྱུང་ན་རའི༔ ཕ་རོལ་གྱིས་བྱད་ཟོར་དང་དམོད་པ་རྒྱུན་དུ་ཟུག་ན༔ སྐྱུང་ཀ་དང་བྱ་རོག་འུག་པ་དུར་བྱ་རྣམས་ཀྱི་མགོ་བོར་ལིངྒ་བཞག་ཅིང་མི་མགོའི་ནང་དུ་བཅུག་སྟེ་གནན༔ ཞེས་དང༌། དགྲ་བོ་དཔུང་ཚན་ཆེ་བ་ཡི༔ དམག་དཔོན་སོགས་ལ་སྦ་བ་ན༔ གངས་རི་སྤང་རི་རྫ་རི་ལ༔ རྩེ་མོ་ནག་པོར་འདུག་པ་ན༔ མགོ་ཆད་འདུན་ཕོག་རི་ཡིན་པས༔ དེ་ཡི་འོག་ཏུ་དགྲ་བོ་གནན༔ དགྲ་བོ་དཔུང་ཚན་ཆུང་བ་དང་༔ ཡུལ་མི་ལ་སོགས་དགྲ་ཡི་
རིགས༔ མི་ནག་མཚོན་ཆ་དྲུད་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཕུང་སྲི་ལངས་དང་ནང་འཁྲུགས་ལ༔ གནམ་ལྕགས་མཆོད་རྟེན་བརྩེགས་འདྲའི་རི༔ དེ་ཡི་འོག་ཏུ་དགྲ་བོ་གནན༔ གྲི་སྲི་གཞོན་སྲི་ལངས་པ་ན༔ ཆོས་འབྱུང་དགུ་བརྩེགས་བསྣོལ་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཆུང་སྲི་བུད་མེད་སྲི་ཡིན་ན༔ བཙུན་མོ་བྲང་རྒྱན་བཏགས་འདྲའི་རི༔ མདུན་གཤམ་འོག་ཏུ་དགྲ་བོ་གནན༔ སྒོ་ནོར་ཕྱུགས་ཀྱི་སྲི་ཡིན་ན༔ སྤྲེའུ་དཀར་བྱ་ར་བལྟ་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཡུལ་དང་ཞིང་གི་སྲི་ཡིན་ན༔ སེངྒེ་གནམ་དུ་མཆོངས་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཁ་མཆུ་མི་ཁའི་སྲི་ཡིན་ན༔ བྱ་ནག་ཤ་ལ་རྔམས་འདྲའི་རི༔ དེ་ཡི་འོག་ཏུ་དགྲ་བོ་གནན༔ དམ་པ་ཆོས་ཀྱི་སྲི་ཡིན་ན༔ གླེགས་བམ་བོ་ཏི་གཤིབས་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཆོས་སྒྲུབ་བར་གཅོད་སྲི་ཡིན་ན༔ བླ་མ་ཁྲི་ཁར་བཞུགས་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཕྱོགས་ཟས་མཐོ་གནོན་སྲི་ཡིན་ན༔ རྒྱལ་པོ་ལ་ཐོད་བསྡམས་འདྲའི་རི༔ དེ་ཡི་འོག་ཏུ་དགྲ་བོ་གནན༔ ཞེས་གསུངས། གཞན་ཡང་རྣལ་འབྱོར་བ་ལྟ་དགོངས་དང་ལྡན་ཕྱིན་རྭ་ཅོའི་རིགས་དང༌། ཀུ་བ་བྱ་སྒོང་སོགས་རང་བྱུང་གི་སྣོད། རྫའི་གའུ་ལ་ཅའི་སྒྲོམ་བུ། ལྕགས་ཟངས་ཞ་ཉེའི་པར་བུ། ཚ་ཚའི་ཞབས་སོགས་སུ་
རུང༌། མན་ངག་སྙིང་གཟེར་ནག་པོ་སྲིད་པའི་གཏེར་ཁྱིམ། མན་ངག་རྫོང་འཕྲང༌། རྡོ་རྗེ་གཙུག་ལག་སོགས་ཁོག་འབུབས། གྱིམ་ཤང་མཁའ་འགྲོའི་ཡིག་ཆུང་ལས། གཏོར་མ་ནི་དང་པོ་མངར་ལ་སྤྲད། དེ་ནས་ཤ་ཁྲག་གིས་མཆོད། གསུངས་པ་བཞིན་འགུགས་རིང་དཀར་མངར་གྱིས་སྤགས་པའི་གཏོར་ཟླུམ་མཐེབ་སྐྱུ་ཅན་དང༌། ལས་གྲུབ་ནས་ཤ་ཁྲག་གིས་བརྒྱན་པར་དམར་གཏོར་བཤམས་ནས་གཏང་རག་ཏུ་ཁས་བླངས་ཏེ་འཇོག་པ་སོགས་མཐོང་རྒྱུན་ལྟར་བྱ། མི་བསད་གྲི། འབྲོང་རྔ། ས་ཚ་ནག་པོ། དུར་གཡམ་སྟོང་རྒྱའི་རི་མོ་ཅན། བྲུབ་ཁུང་གི་གཡས་གཡོན་དུ་ལྷ་དབྱེའི་སྒྲོ་གཉིས་འཛུགས། གཞན་ཡང་གནན་གསད་སོགས་ཀྱི་དུས་ཚོད་ངེས་པ་ནི། ཁྱད་པར་དཔྱིད་གསུམ་བདུན་གསུམ་དབྱར་གསུམ་བརྒྱད་གསུམ། སྟོན་གསུམ་དགུ་གསུམ་དགུན་གསུམ་གྱི། །ཡར་ངོའི་བཅུ་དང་མར་ངོའི་ལྔ། །དགུ་སྟོང་རྣམས་ལ་མགོན་སྐྱབས་བྲལ། །གནད་འགག་ཡིན་མིན་གཞན་དུ་ལྟོས། །ལས་འབྲེལ་རྩལ་གྱི་གཤིན་རྗེའི་ལས་མཐའ་དགྲ་ཁ་ལ་རྒྱས་འདེབས་ལས། གླང་གི་ཟླ་བའི་ཐོ་རངས་མནན་ན༔ གནམ་རིམ་པ་བཅུ་གསུམ་གྱི་སྟེང་དུ་འགྲོ༔ སྟོང་གི་ཉི་མ་སྲོད་ལ་མནན་ན༔ ས་རིམ་པ་དགུའི་འོག་ཏུ་འགྲོ༔ མེ་ཐོག་ཏུ་ས་འགྲོ་བ་དེ་ལ་གནན་ནོ༔ ཞེས་གསུངས་པས། གཞན་ཡང༌། ཇི་སྐད་དུ། བླ་ཕུར་སྙིང་ཕུར་སྲོག་ཕུར་གསུམ༔ འདི་གསུམ་མེད་པར་
ལས་སྦྱོར་བ༔ བྱ་རྒོད་གཟན་མེད་གཤོག་མི་ཕེབས༔ ཞེས་དང༌། འཇའ་ཚོན་མ་ནིང་གི་དམར་ཁྲིད་ཡིག་ཆུང་ལས། བླ་ཕུར་སྲོག་ཕུར་སྙིང་ཕུར་གསུམ་གྱི་གནད་མ་ཤེས་ན། སྒྲུབ་པ་དོན་མེད་དུ་འགྲོ་ཉེན་ཡོད། ཅེས་གསུངས་པས། བྱ་རྒོད་ཀྱི་དང་རུར་བླ་ཕུར་བཅའ། དེ་ལ་གཞུང་གི་བླ་འགུགས་ཀྱི་སྔགས་དང༌། ཨུ་པ་ཏི་ཙིཏྟ་ནག་པོ་ཨུ་པ་ཏིས་སོད། མི་རུ་བརྫུ་ན་ཕོ་ཉ་སྲིན་པོའི་རྦད་སྔགས། ༡ ཁཾ་བླ་ཏྲི་ཏ་ཨུ་དནྟྲི་སོད། གཡག་ཤར་བརྫུ་ན་སྟག་གཟིག་རྦད་པའི་སྔགས། དགྲ་བོ་དུམ་བུ་གཙུག་ཉ་སྲི་སོད། གུག་ལིང་ཙིཏྟ་ནག་པོ་སོད། ཨ་ཏི་སུ་ཏི་ས་ལ་སོད། ཁ་ར་གཡག་སོད། ༢ ཨོཾ་ཨག་སོ་རྦད་སུ་སོད། གཉན་དང་བོང་བུའི་ཕོ་ཉ་དོམ་དྲེད་གཉིས། ༣ ཙ་རག་ཁ་ཙ་རག་ཁ། ར་དང་ལུག་ལྕགས་ཀྱི་སྤྱང་ཀིའོ། །ཁ་རག་རྦད་དགྲ་བོ་སོད། མ་གི་དགྲ་སྙིང་དུམ་གུ་སོད། བ་ཤ་ཁྲག་རྦད་སུ་ཆོད། ༤ ཅེས་པའི་མཐར། བླ་ཤ་རེ་མ་ཏི་གྷྲཾ་ཤ་རེ་མ་ཏི་ཐུམ་ཐུམ་གུག་ཐུམ་རིལ། ཞེས་སྦྲེལ་ནས་བཟླས་པ་དང༌། སེང་ཕུར་སོར་བརྒྱད་པར་སྙིང་ཕུར་དུ་བཅས་པར། རྦད་སྔགས་གོང་མའི་ཤམ་བུར། མྱོག་མྱོག་ཡེ་མུག །ཙ་ར་ལིང་རྦད། ཅེས་བཟླ། གྲི་ལྕགས་ཀྱི་ཕུར་པ་སྲོག་ཕུར་དུ་བཅས་པར་གནན་གཞུང་གི་གསད་སྔགས་ཤམ་བུར། ཐིབས་དར་ཡ་ཐིབས་སྲོག་ལ་རྦད། སྙིང་མགོ་ཆོད། ཁ་ལ་ཟ་མུ་ལོང་རྦད། ཅེས་པ་རྣམས་རབ་བརྒྱ། འབྲིང་གང་ལྕོགས། ཐ་མ་ཉེར་གཅིག་བཟླས་ནས་
ཕུར་པ་སོ་སོར་བཏབ་སྟེ་གདབ་པའི་དུས། ཨོཾ་བཛྲ་ཀཱི་ལི་ཀཱི་ལ་ཡ། ཤི་ཏྲི་ཀུ་ཀུ་ལ་ཡཾ་ཤྲི་མཱ་ར་ཡ་ཤྲི་ཧཱུྃ་ཕཊ༔ ཅེས་བླ་གནས་དང་བསྟུན་ནས་བླ་སྲོག་འཛོམ་སྐབས་གདབ་པས་གཟུགས་ལ་ཡིད་ཆགས། ཡིད་ལ་བླ་འཁོར། བླ་སྲོག་ཟུང་འབྲེལ་གྱི་རཱུ་པ་ལ་ཕུར་པ་བཏབ་པས་སྲོག་འགགས་ཏེ་དབུགས་ཆད། བླ་བསད་པས་རྣམ་ཤེས་ཀྱི་རྟེན་མེད་པར་གསུངས་སོ། །ལིངྒ་ལྟེབ་པའི་གནད་ནི། དགྲ་འདྲེ་གཉིས་ལས། དང་པོ་ནི། ཇི་སྐད་དུ། ལིངྒ་ལྟག་པ་བཅག་སྟེ་སྙིང་གའི་ནྲྀ་ལ་ཁ་སྦྱརཿ འཕོངས་ནས་ཡར་ལྟེབ་སྟེ་མཚན་མ་ལྟག་པ་ལ་ཁ་སྦྱརཿ དེ་ནས་གཡས་ལྟེབ་དང་གཡོན་ལྟེབ་ལེན་གསུམ་བྱས་ལ་འཁོར་ལོའི་དཀྱིལ་དུ་ལིངྒ་ཁ་སྦུབ་ལ་གཏུམསཿ འཁོར་ལོ་ལྟེབ་ཚུལ་ནི་ཟུར་གྱི་རྡོ་རྗེ་རྒྱ་གྲམ་ལྟེ་བར་ཡོད་པའི་ཟུར་ལྟེབ་ལན་གསུམ་བྱས་པའི་ཕྱི་ལ་རྡོ་རྗེ་རྒྱ་གྲམ་བྲིཿ ཞེས་དང༌། བླ་མ་དགོངས་འདུས་ཀྱི་སྲུང་བཟློག་གསད་པའི་གབ་ཡིག་བྱད་མ་སྟོབས་འཇོམས་ལས། ལྟེབ་ཚུལ་གོང་དང་འདྲ་བར་གསུངས་པའི་རྗེས་རིམ་གྱིས་ལྟེབ་ལ་གྲུ་གསུམ་དུ་འབྱུང་བ་དང་༔ རྩེ་མཐུར་དུ་ཕྱོགས་བར༔ ཡུགས་སའི་དོར་རྟས་གྲིལ༔ དེ་རོ་རས་ཀྱིས་གྲིལ་བ་སོགས་གསུངས། ཙཀྲའི་ཡིག་འབྲུ་རྣམས་ཡེ་ཤེས་ལྷའི་ངོ་བོར་གྱུར་པ་རང་བཞིན་གྱི་གནས་སུ་གཤེགས༔ དམོད་བཅོལ་སྔགས་སྒྲ་དང་བཅས་པས་ཟློག་བྱེད་ཀྱི་ལས་བྱེད་པར་བསམ༔ ཞེས་དང༌། ལྔ་པ་
ཆེན་པོས་ལིངྒའི་ཡི་གེར་བྱུག་རྫས་ལ་དབྱེ་འབྱེད་མཛད་པའི་དགོངས་པ་མཐུན། དེ་ནི་འཁོར་ལིང་དང་འབྲེལ་བའི་དབང་དུ་བགྱིས་བ་སྟེ་འཁོར་ལོ་མེད་ཀྱང་ལྟེབ་ལུགས་བཤད་མ་ཐག་པ་ཁོ་ནར་བྱས་པ་ལ་ཤི་ལྟེབ་ཏུ་འབོད། རོ་ལྟེབ་ཏུ་བྱེད་ན། ཁ་རྐུབ་སྤྲད། འདྲེ་ལྟེབ་ལ་སྙིང་གའི་ས་བོན་བཅག །བགེགས་རིགས་ལ་འདི་ཉིད་རང་ཤས་ཆེ་བར་གསུངས། དེ་རྗེས་ཕོ་ལ་དཔུང་པ་གཡས་དང༌། མོ་ལ་གཡོན་སྔོན་ལ་བཅོག །མགོ་ནས་མར་དྲིལ་བ་དང༌། མཇུག་ནས་ཡར་ལྟེབ་ཙམ་བྱེད་པའི་ལུགས་གཉིས་སྣང་བ་སྔ་མ་ལྟར་ན་ཕྱི་མ་འཐད་པར་སེམས་ཤིང་དཔྱད་པར་བྱའོ། །རུས་ལྟེབ་ནི་དཀྱིལ་གཞུང་བཅག་སྟེ་ཟུར་གཉིས་ལྟེབ་པས་ཁ་སྦྱར་ཟུར་གསུམ་དུ་ཡོང༌། ལྤགས་ལྟེབ་ནར་ནོ་དྲིལ། མཚོན་ལྟེབ་བམ་རོ་སྒོང་དུ་གྲགས་པ་གོང་དུ་བཤད། རང་གཞུང་དུ། གཡས་ཀྱིས་གཡོན་བཀབ༔ མགོ་ནས་མར་དྲིལ༔ གསུངས་པ་གང་ལྟར་བྱེད་ཀྱང་ཡུགས་ས་མ་སྐྱེས་པ་གཞན་དང་འཁྲིག་པ་མ་སྤྱད་ཅིང་ཡུན་རིང་མ་སོང་བའི་སྐྲ་ཤད་དང༌། བན་བོན་གྱི་ལག་ནས་བྱུང་བའི་ཚོན་སྐུད་སྔོ་དམར་རམ། སྣ་ལྔར་སྤྲོ་ན་སེར་པོ་ལ། བཛྲ་ཏི་བི་རི་རྦུད། དམར་པོ་ལ། ཁ་ལ་རཀྵ་རྦད། སྔོན་པོར། དན་ཏི་རྦད། དན་ཏི་རྦད་སུ་རྦད། དཀར་པོ་ལ། ལོ་ཤིག་ཁ་དུ་འབྱུང་བ་ཏྲིག་ནན་ན། ནག་པོ་ལ། ཟླ་སྲི། སྲི་ཤ་སོད་ཧཱུྃ། ཞེས་བརྒྱ་བརྒྱ་རེས་བཏབ་པ་སྡེ་བརྒྱད་ཀྱི་བྱད་
ཐག་ཏུ་བསམས་ལ་དཀྲིས། གནན་ཆས་གཞུང་བཞིན་བྱའོ། །དེ་ནས་གནན་པའི་དོང་ཚད་ནི། གཏེར་ཁྱིམ་ལས། ཁྲུ་གང་ཡན་ཆད་ས་རོ་ཡིན༔ ཕན་གནོད་མེད་དོ༔ དེ་ནས་སོར་དགུ་མ་མོའི་གནས་ཡིན་འགོང་ཆོག་གནན༔ དེ་ནས་སོར་བཅུ་བརྟན་མའི་གནས་ཡིན་བས་དགྲ་བགེགས་གནན༔ དེ་ནས་སོར་ཉི་ཤུ་རྩ་བཞི་ཀླུའི་གནས་ཡིན་པས་མནན་ན་དགྲ་བོ་ཕུང་ངོ་༔ ཞེས་དང༌། ཟུར་གསུམ་ཐོད་པ་ཤོང་པ་འདྲུ༔ དེ་བས་རིང་ན་རྩུབ་སྟེ་རང་ལ་ལྡོག༔ དེ་བས་ཐུང་ན་འཇམ་པས་དགྲ་མི་འཆིའོ༔ ཞེས་དང༌། རྡོ་རྗེ་གཙུག་ལག་ལས་གོང་དུ་བཤད་པ་དང་མཐུན་པའི་བརྟན་མའི་གནས་དེར་གནན་པ་ཐམས་ཅད་ཤིས་པར་གསུངས་པས་དེ་ཙམ་མདོ་རྒྱས་མཚམས། ལས་གྲུབ་ནས་ངག་ཏུ། ཨོཾ་ཡ་མཱནྟ་ཀ་ཡ་མ་ཀི་ཀི་དགྲ་བགེགས་སརྦ་ཏྲིག་ནན་རྦད་ནན། བྷི་ན་ཙིཏྟ་རྦད་ནན་ལམ་ནན་ནན། ཞེས་བརྒྱ་སྟོང་བཟླས་པས་ཕྱིས་མི་ལྡང༌། ཁྲོམ་དང་མི་མང་གི་གསེབ་ཏུ་འཁྱམས་པ་དང་ཅལ་ཅོལ་འབྲེལ་མེད་ལབ་པ་མིང་བསྒྱུར་བ་སོགས་ཀྱང་བྱས་པས་རང་ལ་མི་ལྡོག །གཞན་ཡང་ལྷ་ལྔ་གཤེད་འབེབས་ཀྱི་སྐོར་གནམ་སྐས་གཏེར་མ་སོགས་ལ་འདྲིས་པར་ཡང་བྱའོ། །ཞེས་མཁྱེན་བརྩེའི་འོད་ཟེར་གྱིས་གཞན་ངོ་བསྲུང་ཕྱིར་རང་ལོ་ཉི་ཤུ་པ་ལའོ།། །།
གཤིན་རྗེ་ནག་པོ་སུམ་སྒྲིལ་གྱི་སྒོ་ནས་ལོ་དགྲ་སེར་བའི་གནོད་པ་བསྲུང་ཐབས་སྤྲུལ་སྐུའི་འཁོར་ལོ་ཞེས་གྲགས་པ།
གཤིན་རྗེ་ནག་པོ་སུམ་སྒྲིལ་གྱི་སྒོ་ནས་ལོ་དགྲ་སེར་བའི་གནོད་པ་བསྲུང་ཐབས་སྤྲུལ་སྐུའི་འཁོར་ལོ་ཞེས་གྲགས་པ་བཞུགས། འཁོ༷ར་བ་ཐུགས་རྗེས་ཟིལ་གྱིས་གནོན། །མྱང་འད༷ས་རྟོགས་པས་ཟིལ་གྱིས་གནོ༷ན། །ཕྱག༷་རྒྱ༷ས་གཉིས་མེད་ཟིལ་གྱིས་གནོན། །ཆེ༷ན་པོ༷ས་ཁམས་གསུམ་ཟིལ་གྱིས་གནོན། །དེ་ལ་འདིར་འཇིགས་བྱེད་དུག་རི་ནག་པོ་སུམ་སྒྲིལ་གྱི་བསྙེན་སྒྲུབ་ཐེམ་པའི་སྔགས་པས། གཞན་དོན་སེམས་བསྐྱེད་ཀྱི་རྩིས་ཟིན་པའི་སྒོ་ནས་ལོ་ཏོག་ལ་སེར་བ་བསྲུང་བའི་རིམ་པ་ལ་གཉིས། གཏའ་བསྡམ་པ་དང༌། གདོང་ཟློག་བྱེད་པའི་གནད་བཤད་པའོ། །དང་པོ་ནི། འདི་ཉིད་ཀྱི་བཟློག་པ་སྤྱི་འབྱམས་སུ་བསྟན་པའི་འཁོར་ལོ་བྲི་ཚུལ། བླ་མ་དམ་པ་ཐུགས་མཆོག་རྡོ་རྗེས་ཟིན་ཐོ་ཙམ་མཛད་འདུག་པ་དེ་ཁ་ལ་གཞི་བཟུང་བའི་ཁྱད་པར་གྱི་ཁ་བསྒྱུར་ནི། ལྟེ་བ་ཡི་གེ་ཨྱཻ་རིང་གི་ཤམ་བུའི་གནོད་བྱེད་ཨ་མུ་ཀ་ཅེས་པ་ལ། སེར་བ་སེར་བདག་དང་བཅས་པ། མྱག་ཐུམ་རིལ། སོགས་སྤྱི་ལྟར་བྲི། དེའི་ཕྱིའི་མུ་ཁྱུད་ལ། ཨོཾ་ཨཱཿཨུཥྞི་ཥཿ བཛྲ་ཙཀྲ་ཝརྟི་སོགས་ནས་བི་ཙུརྞ་ཨོཾ་ཨཱཿཨུཥྟི་ཥ༔ ས་ཙ་བྷི་སྟོ་བཾ་ཤོ་དྷ་ཡ༔ མོ་ཧ་ཡ༔ སྟྭཾ་བྷ་ཡ་ཧཱུྃ་ཕཊ༔ ཅེས་བྲི། དེའི་ཕྱི་རྩིབས་བཅུ་ལ་ཁྲོ་བཅུའི་སྔགས་དེ་ཁ་ཇི་བཞིན་བྲི། རྩིབས་མཆན་གྱི་ནྲྀ་ཏྲི། ཞེས་པའི་དོད་དུ་སེར་བདག་ཨེ་ཧུར་ཐུམ་རྦད། སེར་བདག་ཅེས་བསྒྱུར། དེའི་ཕྱིའི་མུ་ཁྱུད་ལ། ཨོཾ་ཧྲིཥྚི་སོགས་ཀྱི་མཐའི། དགྲ་བགེགས་གནོད་བྱེད་ཅེས་པ་ལ་སེར་བ་སེར་བདག་དང་བཅས་པ་ཙིཏྟ་མཱ་ར་ཡ་ཕཊ༔
ཅེས་དང༌། གང་དག་བདག་ལ་ཅེས་པའི་འདོད་གསོལ་བཞག་ལ། སྐྱིན་ཐང་མཱ་ར་ཡ་བྱེར་བྱེར་གཏོར་གཏོར་བཟློག་བཟློག་ཆུཾ་ཆུཾ་དྲིལ་དྲིལ་ཙཀྲ་ཝརྟི་སྐྱིན་ཐང་ལ་རྦད་རྦད་སེར་བ་ཆོད། སྤྲིན་ཧྲོལ་ཧྲོལ། སཱུརྱ་ཙཀྲ་ཛ་ཡེ་བི་ཛ་ཡེ་སྭཱ་ཧཱ་ཕཊ། ཅེས་པ་བྲིས། དེ་ཐམས་ཅད་ལ་ཨྱཻ་རིང་ལ་སེར་བའི་བཟློག་ཤམ་བཏགས་པའི་སྔགས་འོག་ཏུ་འབྱུང་མ་ཐག་པས་ངར་བཏགས་པའི་དུག་ཁྲག་གིས་བྱུག །སྲ་རྩིས་གནན། འཁོར་ལོ་དེ་འདྲ་གཏའ་ཇི་ཙམ་ཡོད་པའི་གྲངས་ལྡན་དུ་བསག །སེང་ལྡེང་ངམ། དྲག་པོའི་ཤིང་གི་ཕུར་པ་སོར་བཅུ་གཉིས་སམ། བརྒྱད་ཅི་རིགས་བཅུ་ཐམ་པའི་དཔལ་ལ། ཨོཾ་བཛྲ་དུན་ཏེ་མི་ལི་མི་ལི་ཕྱེད་ཤག་སྭཱ་ཧཱ། ཞེས་བྲིས་པར་དུག་ཁྲག་གིས་བྱུག །དྲག་སྔགས་བཟླས་པའི་ཐལ་ཆེན་དང་ཡུངས་ཀར་གྱི་ཐུམ་བུ་མགུལ་དུ་གདགས། དར་ནག་གི་ཅོད་པན་གསོལ། དེ་ཐམས་ཅད་ལ་གུ་གུལ་ལེགས་པར་བདུག །སུམ་སྒྲིལ་གྱི་དཀྱིལ་འཁོར་ཇི་བཞིན་པའམ་འབྲུ་ཚོམ་གྱི་སྟེང་དུ་འཁོར་ལོ་རྣམས་རང་ལ་ས་བོན་ཁ་ཕྱོགས་པར་བྱས་ལ་ཐམས་ཅད་གཅིག་ཏུ་བརྩེགས་ཀྱང་འཐུས། ཕྱི་མཐའ་རྣམས་སུ་ཕུར་པ་བཅུ་ཕྱོགས་མཚམས་སུ་གཞག །དེ་ནས་གཏའ་སྒྲུབ་དངོས་ནི། ལས་བྱང་རིམ་གཉིས་གསལ་སྒྲོན་གྱིས་ཁོག་ཐུབ་ནས་བཅས་རྣམས་མདུན་བསྐྱེད་ཀྱི་ཚུལ་དུ་བསྒོམ། ཨྱཻ་རིང་ལ་ཤམ་བུ་པི་ཙུར་ཎ༔ ཨོཾ་ཨཱཿཨུཥྞི་ཥ་བཛྲ་ཙཀྲ་ཝརྟི་བྷྲཱུྃ༔ སརྦ་ལོ་ཀི་སྭཱ་ཧཱ། ཞེས་སྲུང་བཟློག་སྦྲགས་པ་ཐུན་
གྱི་སུམ་གཅིག་ཏུ་བཟླ། སྲུང་འཁོར་གྱི་དམིགས་གནད། སྣང་སྲིད་ཐམས་ཅད་འཇམ་དཔལ་ཁྲོ་བོའི་དཀྱིལ་འཁོར་དུ་འདུས་པའི་སྲུང་འཁོར་ཀྱི་ཕྱི་རྩིབས་བསྣོལ་སྟབས་སུ་འཁོར་བ་གྲངས་མེད་དེ་ཉིད་གྱིས་ལོ་ཏོག་གནོད་པའི་འབྱུང་བོ་རྗེས་མེད་དུ་བཏང་ནས་ནམ་མཁའི་བཻཌཱུརྱ་ཞུན་མ་ལྟ་བུར་བསྒོམས་པ་ན་འདིས་ནམ་མཁའ་རྒྱས་འདེབས་ཀྱི་གོ་ཡང་ཆོད། ཐན་པ་ཆེ་ན་དེ་ལྟར་མི་བྱེད་དོ། །དེ་ནས་ཐུན་གྱི་སུམ་གཉིས་ལ་ཨྱཻ་ནས། བཟློག་སྔགས་བོ་འདི། བི་ཙུརྞ༔ ཨོཾ་ཨཱཿཨུཥྞི་ཥ་ས་ཙ་བྷི་སྟོ་བཾ་ཤོ་དྷ་ཡ༔ མོ་ཧ་ཡ༔ སྟྭཾ་བྷ་ཡ་ཧཱུྃ་ཕཊ༔ ཅེས་བཟླ་ཞིང་འོད་ཟེར་སྤྲོ་བསྡུས་མདུན་བསྐྱེད་ལ་གཟི་བྱིན་བསྐྱེད། ཐལ་ཆེན་དང༌། ཡུངས་ཀར། དུག་སྣ་ཚོགས་བསྲེས་པའི་ཐུན་རྫས་ལ་ཧུས་གདབ། ཐུན་མཐར་དེ་ལ་རྟེན་སྙིང་སྤྲེལ་བས་རབ་གནས་བྱ། འདི་ནས་བཟུང་སྟེ་ཇི་སྲིད་ཉེན་ལས་མ་གྲོལ་གྱི་བར་དུ་ཐུན་མཚམས་རྣམས་སུ་རྡོར་ལེགས་དང༌། བསྟན་མ་གཙོ་བོར་གྱུར་པའི་སྲུང་མ་དང་གཞི་བདག་ལ་གསོལ་མཆོད་རེམ། ཕྲིན་ལས་གསོལ་བ་ཡང་གལ་ཆེ་སྟེ། དེ་སྐད་དུ། སེར་བ་གང་སྲུང་ཡུལ་དེ་ཡི། །ལྷ་སྲིན་ཡུལ་ལྷ་ཐམས་ཅད་ལ། །མཆོད་གཏོར་ཕུད་རྒྱས་གསོལ་ཀ་བྱ། །ཞེས་གསུངས་པས་སོ། །དེ་ནས་གཏའ་བསྡམ་པ་དངོས་ལ་བབ་ཚེ་དོ་གལ་ཆེ་ན། དུག་ཤོག་ལ་སེར་གཏོང་གི་དྲེགས་པའི་ལིངྒ་མཚན་ཉིད་ཚང་བ་བྲིས། སྙིང་ཁར་ཏྲི། ལྐོག་མའི་འོག་
ནས་མགོ་བརྩམས་པའི་ཡིག་མགོ་ཕྱིར་བསྟན་གྱིས། ཨོཾ་རུ་ལུ་པྲ་མ་ནི་སེར་བ་གཏོར་བའི་འབྱུང་པོ་ཐམས་ཅད་ཁ་ཐཾ་མཱ་ར་ཡ་རྦད་ནན། ཞེས་པས་བསྐོར། དུག་ཁྲག་གིས་བྱུག །ལྷའི་ང་རྒྱལ་ལ་གནས་པས་གསེར་སྐྱེམས་དང་བདེན་བརྗོད་དྲག་པོས་དགུག་བསྟིམ་བྱས་མཐར། ཡ་མ་རཱ་ཛའི་ཤམ་བུར་སེར་གཏོང་དང་བཅས་པའི་སྲོག་ལ་མྱག་རྦད༔ སེར་བ་གཟིར་ནན༔ ཨེ་ཧུར་ཐུམ་ཏྲིག་ནན་རྦད་ཛཿཅེས་ཐུན་རྫས་ཀྱིས་བྲབ། རང་གི་སྲུང་ཁོངས་ཀྱིས་མཚམས་སམ། སེར་ལས། ཅི་རིགས་སུ་གནན་པར་བྱ། དུར་གཡམ་ལ་སྟོང་རྒྱའི་རི་མོ་བྲིས་པས་ཁ་བཀབ། སས་གཡོགས། མེ་རྒྱ་འདེབས། ཚྭ་ཚྭ་ནག་པོས་སྟེང་ནས་གནན། བསྐྱེད་རྫོགས་དང་མི་ལྡན་ན་ཕོག་ཐུག་ཆེ། གཏའ་རྣམས་བུད་མེད་དང་། གྲིབ་ཅན་སོགས་ཀྱིས་མ་རེག་ཅིང་མ་ཉམས་པ་བྱེད། ཐོའི་ནང་དུ་བཅུག་ལ་མངའ་གསོལ་རབ་གནས་བྱ། བསང་མཆོད་དང་གསེར་སྐྱེམས་ཕྱོགས་བཅུར་གཏོང་ཞིང་བགེགས་ལ་བཀའ་བསྒོ། གཉིས་པ་གདོང་བཟློག་ཏུ་བསྲུང་བ་ནི། སེར་སྤྲིན་སོགས་ལ་བརྟག་པ་སྔོན་དུ་འགྲོ་བས། སྤྲིན་མ་རུངས་པ་འདུས་མ་ཐག་ཏུ་འཇིགས་བྱེད་ནག་པོ་སུམ་སྒྲིལ་གྱི་བསྐྱེད་རིམ་གསལ། སྤྲིན་གཏོར་ནམ་མཁའ་རྒྱས་འདེབས་ཀྱི་དམིགས་གནད་སྔར་བཤད་པ་དེ་ཁོ་ན་ལ་གཞུར། ཐོག་མར་བདེན་ཚིག་འདི་བརྗོད། སངས་རྒྱས་ཀྱིས་ནི་བདུད་རྣམས་
ཕམ༔ ཆོས་མ་ཡིན་པ་ཆོས་ཀྱིས་སོ༔ དགེ་འདུན་གྱིས་ནི་མུ་སྟེགས་ཕམ༔ དབང་པོས་ལྷ་མིན་ཕམ་པར་འགྱུར༔ ལྷ་མིན་རྣམས་ཀྱིས་ཟླ་བ་ཕམ༔ ནམ་མཁའི་ལྡིང་གིས་རྒྱ་མཚོ་ཡི༔ ཀླུ་རྣམས་རབ་ཏུ་ཕམ་པར་འགྱུར༔ མེ་ཡིས་བུད་ཤིང་བསྲེག་པ་དང་༔ རླུང་གིས་སྤྲིན་རྣམས་གཏོར་བ་དང་༔ རྡོ་རྗེས་རིན་ཆེན་ཕུག་པ་དང་༔ ལྷ་རྣམས་བདེན་པར་རབ་ཏུ་གནས༔ བདེན་པ་འདི་དག་ཐམས་ཅད་ཀྱིས༔ དེང་འདིར་བདེན་པ་འགྲུབ་གྱུར་ཅིག༔ སེར་བའི་གནོད་པ་ཞི་གྱུར་ཅིག༔ ཅེས་བརྗོད་ལ་སེམས་ཅན་ཐམས་ཅད་ལ་སྙིང་རྗེ་དུང་དུང་བ་བསྐྱེད། ལོ་ཏོག་སྐྱབས་འོག་ཏུ་འཛུད། དེ་ནས་བཤད་མ་ཐག་པའི་དམིགས་པ་རྩེ་གཅིག་པ་ལ་མ་ཡེངས་པས། ཨྱཻ་རིང་ལས་སྔགས་བཏགས་པ་ཁོ་ན་བཟླ། དེ་ནས་འཇམ་དཔལ་ཕྱག་རྒྱ་ཟིལ་གནོན་ནམ་མཁས་གར་ཁྱབ་སྐུས་ཁྱབ་ཅིང༌། ཡན་ལག་རགས་པ། ཕྱག་མཚན་རྣོ་བ། གོ་མཚམས་མེད་པའི་མེ་དཔུང་གི་དབུས་ན་བཞུགས་པའི་བ་སྤུའི་བུ་ག་ནས་ཀྱང་ཁྲོ་ཆུང་དང་མཚོན་ཆའི་ཆར་འབེབས་ཤིང་སེར་བདག་ཐམས་ཅད་རྩྭ་སྦུར་ལ་མེ་སྤར་བ་ལྟ་བུར་གཞོབ་ཐུལ་གྱིས་ཚིག་པར་བསམས་ལ་དྲག་སྔགས་དེ་ཉིད་བྲག་ཁ་ནས་ཆུ་འབབ་པ་བཞིན་དུ་ཐོ་རོ་རོ་བཟླ་ཞིང༌། སྡིགས་མཛུབ་དང་རལ་གྲི་སོགས་ཀྱིས་སེར་བ་འོང་ཕྱོགས་སུ་བསྡིགས་ལ་ཚམ་རྔམས་ཆེ་བར་བྱ་ཞིང་ཐུན་ཡང་གསོར།
ནན་ཆེར་བཅར་ན་ཐུན་ལ་ཧས་ངར་བཏགས་ལ་མཚོན་ཆ། མེ་དཔུང༌། དུག་རླངས། ཁྲོ་ཆུ་སོགས་བཟོད་པར་དཀའ་བའི་རང་བཞིན་དུ་བསྒོམས་ལ་སེར་ཕྱོགས་སུ་ཚམ་རྔམས་ཀྱིས་བརྡེག་ཅིང་སེར་བ་སེར་བདག་དང་བཅས་ལྕགས་བསྲེགས་དང་རྩྭ་སྦུར་ཐུག་པ་བཞིན་དུ་བརླག་ཅིང་ཚིག་པར་བསམ། གཞན་ཡང་ཐུན་ལ། སེར་རྡོག་བྲུལ་ལ་ཁད་པ་དང༌། རང་གི་འདོམས་འོག་གི་ས། ཡུགས་ས་མོའི་འཕོངས་ཤུལ་གྱི་ས་སོགས་བསྲེས་ནས་གཏོར་བ་ཡང་གནད། གཙོ་བོར་ནི་རྒྱུན་དུ་བསྐྱེད་རིམ་དང༌། བཟླས་པ་ཁོ་ན་ལ་འབད་པ་གལ་ཆེ། སྔགས་ཀྱི་ནུས་པ་འཕྲོག་པའི་རིགས་ལ་འཛེམ། གཞན་ཡང་གནམ་སའི་བརྟག་དཔྱད། རྒྱུ་དུས་དང༌། ཐེབས་བཟློག་རྟེན་འབྲེལ་གྱི་གནད་རྫ་བཟུར་ཐུ་བཟུར། རླུང་ཕྱོགས་སྤྲིན་ཕྱོགས། འགག་སོགས་ཅི་ལྟར་རིགས་པ་གཞན་ནས་བྱུང་བ་ཡང་བྱ། གནམ་ལྕགས་ཀྱི་འཇིགས་པ་ལ། མན་ངག་ཁྱད་པར་ཅན། སྐད་ཅིག་གིས་རང་གི་ཡུལ་ལྗོངས་དེ་གསེར་འཁོར་རྩིབས་སྟོང་དང་ལྡན་པའི་མདུན་ན་སའི་ལྷ་མོ་བརྟན་མ། རྩིབས་རྣམས་ལ་ས་བདག་ཀླུ་གཉན་དང་བཅས་པ་རང་ལ་གུས་འདུད་ཀྱིས་འཁོད་པར་བསམ། ལྟེ་བར་གསེར་རྡོར་རྩེ་ལྔ་གྱེན་དུ་སྒྲེང་བའི་ལྟོ་བའི་ནང་དུ་རང་དང་བསྲུང་བྱའི་ཚོགས་གསལ་བའི་སྤྱི་གཙུག་ཏུ་སངས་རྒྱས་ཀླུ་དབང་གི་རྒྱལ་པོ་གསལ་ལ། སངས་རྒྱས་ཀླུ་དབང་གི་རྒྱལ་བོ་ལ་ཕྱག་འཚལ་ལོ། །ཞེས་ལན་མང་དུ་བརྗོད་ཅིང་
མཉམ་པར་འཇོག །སྤྱིར་བསྐྱེད་རྫོགས་ཀྱི་དམ་ཚིག་གཙང་མར་མི་བསྲུང་བས་སྔགས་དྲག་ལ་མང་བ་མངོན་པའི་ང་རྒྱལ་གྱིས་བགྲངས་ཀྱང་ནུས་པ་བུལ་བར་འགྱུར་ན་མན་ངག་དང་ཡི་དམ་ལ་ཐེ་ཚོམ་ནི་མི་རིགས་སོ། །ལས་གྲུབ་ནས་ཀྱང་ཐོ་འགྲོལ་གཏང་རག །མནན་པ་འདོན་པ་སོགས་ཀྱང་ངེས་པར་བྱ་དགོས། འཁོར་ལོ་དང་ཕུར་པ་རྣམས་ཀྱང་འགོམ་ཡུག་མི་འགྲོ་སར་བཀུར་སྟི་དང་བཅས་འཇོག་དགོས་ཏེ་རབ་གནས་གྲུབ་པའི་ལྷ་དང་ཁྱད་མེད་པའི་ཕྱིར་རོ། །ལོ་ལེགས་པདྨ་གཞོན་ནུའི་ཚལ། །གནོད་བྱེད་སེར་བ་འཇོམས་པའི་ཐབས། །ཤུགས་སྒྲོལ་གཞད་པའི་ཧཱུྃ་གླུ་འདི། །མཁྱེན་བརྩེའི་གཞན་ཕན་མན་ངག་གོ། །ཅེས་པའང་འཇམ་དཔལ་ཁྲོ་བོའི་སྔགས་འཆང་ཝ་གིནྡྲས་འབད་པ་ཆེན་པོས་གཉེར་བ་ལས། སྙིང་པོར་དྲིལ་ཏེ་སྨྲས་པ་སྟེ་འདི་ཡང་སེམས་ཅན་ཕན་རྒྱ་ཆེར་ཐོགས་པར་གྱུར་ཅིག །ཚྭ་ཚྭ་ལ་ཨོཾ་ཤཱཀྱ་མུ་ནེ་རཱ་ཛ་ལ་ཡ། ཀྵིཾ་ཀྵིཾ་ཨ་སི་མུ་ས་ལ་ཡ། ཙནྡྷ་ཀ་རུ་སུ་རུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པ་བྲིས་ནས་མགོ་མཇུག་མ་ལོག་པར་དྲིལ་ལ་གཟུངས་སུ་འཇུག །རང་སྔགས་སྟོང་རྩའི་མཐའ་བརྟེན་གྱིས་རབ་གནས་བྱ། ཐུན་ཡང་བླུག །ཞབས་བསྡམས་ཐོ་དཀྱིལ་དུ་གཞུག་པ་ཡང་ཟབ་པའི་མན་ངག་གོ། །
འཇིག་བྱེད་ནག་པོ་སུམ་སྒྲིལ་གྱི་སྒོ་ནས་གནན་པའི་ལས་རིམ་རི་རབ་ནག་པོ།
འཇིག་བྱེད་ནག་པོ་སུམ་སྒྲིལ་གྱི་སྒོ་ནས་གནན་པའི་ལས་རིམ་རི་རབ་ནག་པོ་ཞེས་བྱ་བ་བཞུགས། །དུས་མཐའི་མེ་ལྟར་རབ་འབར་གཤིན་རྗེ་གཤེད། །
འཇིགས་བྱེད་ནག་པོ་སུམ་སྒྲིལ་དམོད་པའི་ཐོག །ལོག་འདྲེན་དགྲ་བགེགས་སྙིང་ལ་འབེབས་པའི་སླད། །གནན་པའི་ལས་རིམ་རི་རབ་ནག་པོ་སྤྲོ། །དེ་ལ་འདིར་ནག་པོ་སུམ་སྒྲིལ་གྱི་སྒོ་ནས་ལས་ཀྱི་མཐའ་སྡུད་གནན་པའི་ཕྲིན་ལས་བྱ་བ་ལ། སྔོན་འགྲོ་དངོས་གཞི་རྗེས་གསུམ་གྱིས་གཏན་ལ་འབེབས་ཏེ། དེ་ཡང་སྔོན་འགྲོ་བཅས་བཤམ་གྱི་རིམ་པ་ལོགས་སུ་འཆད་པ་ལས་ཤེས་པར་བྱས་ནས། དངོས་གཞི་ཆོ་གའི་གཞུང་ལ་འཇུག་པ་ནི། རང་གཞུང་དུ། དང་པོ་སྔགས་པ་བསྙེན་པར་རྫོགས་པ་ཡིས༔ ཞེས་དང༌། རྩ་བ་རྡོ་རྗེའི་མཁར་རྫོང་ལས། རྒྱུད་བཞི་དབང་ཐོབ་དམ་ཚིག་དང་ལྡན་པས༔ ཞེས་གསུངས་པས། དེ་ཡང་ཡི་དམ་འདིའི་བསྙེན་སྒྲུབ་ལས་གསུམ་ཚད་དུ་འཁྱོལ་བའམ། མིན་ན་ཡང་ཡི་དམ་གང་རུང་ལ་བསྙེན་པ་ཐེམ་ཞིང་འདིའི་དབང་ལུང་མན་ངག་གནོད་པའི་སྔགས་པས་དྲག་པོའི་ལས་ལ་ཤིས་པའི་གནས་སུ་དམར་ཕྱོགས་ཀྱི་གཟའ་ཚེས་དུས་སྦྱོར་ཤིན་ཏུ་རྩུབ་ཅིང༌། བདུད་ཉི་དང་ཉི་ནག་ལ་ཕུང་གསུམ་ལྕགས་ཁམས་ཀྱི་ལོ་ཟླ་ཉི་ཁྱིམ་སོགས་སྤྱི་བརྩམ་དང༌། བྱེ་བྲག་དམིགས་བྱའི་ལོ་ཟླ་ཞག་དུས་ཀྱི་ལོག་སྦྱོར་རྩུབ་མོས་དགྲ་བོར་གྱིམ་ཤང་གནད་དུ་ཕྲད་པའི་དུས་ཚོད་དེ། གང་གི་ཚེ་ནའང་སྙིང་རྗེ་ཁྲོས་པའི་ཞེ་སྡང་ལྡོག་ཏུ་མེད་པའི་གནས་སྐབས་སུ་བརྩམ་དགོས་པ་ནི། ཇི་སྐད་དུ། ཞེ་སྡང་མ་ཡལ་མཐུ་ཡི་མཆོག །ཅེས་པ་བཞིན་བཤད་མ་ཐག་པའི་སྟོང་ཉིད་སྙིང་རྗེ་
ཟུང་འཇུག་གི་ངང་ལས་ལྡང་བའི་གནད་མ་ཤེས་ན་མངོན་པའི་ང་རྒྱལ་ཆེ་བ་ཙམ་ལ་དགོས་པ་མེད་དེ། གཏེར་ཁྱིམ་དུ། ལྟ་བ་རྟོགས་ཤིང་སྙིང་རྗེ་བསྒྲལ་བ་གཅེས༔ ཞེ་སྡང་རང་མཐུ་སྲིན་པོའི་མཐུ༔ ཕྱི་མ་ངན་སོང་དུ་ལྟུང་ངོ་༔ ཞེས་གསུངས་པའི་དགོངས་དོན་ཡང་བློ་ལ་མ་ཆུད་ན། སྔགས་འཆང་མཐུ་སྐད་ཅན་ལའང་ལས་འབྲས་ཀྱི་རྣམ་སྨིན་དང༌། ཕྱི་མའི་ཕེབས་ལམ་སྤྱི་མཐུན་ཉག་གཅིག་ཏུ་གྱུར་པའང་བསམས་ནས། བདག་གི་རྣལ་འབྱོར་བཟླས་པའི་བར་སྔོན་དུ་གྲུབ་རྗེས། ཐུགས་དམ་བསྐུལ་བ་ནི། ཧཱུྃཿཆོས་ཀྱི་དབྱིངས་ནས་རང་བྱུང་གྲུབ་པའི་ལྷཿ གཤིན་རྗེ་རོལ་པའི་དུར་ཁྲོད་ཆེན་པོ་ནས༔ འཇམ་དཔལ་ཕྱག་རྒྱ་ཟིལ་གནོན་འཁོར་དང་བཅས༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཆོས་སྐུ་ཞི་བའི་ངང་ལས་མ་གཡོས་ཀྱང་༔ གཟུགས་སྐུ་འཇིགས་པའི་ཆ་ལུགས་རྫོགས་མཛད་པ༔ ཕྱོགས་བཅུ་དུས་གསུམ་བདེ་གཤེགས་ཞི་ཁྲོ་དང་༔ འཇམ་དཔལ་གཤིན་རྗེའི་ལྷ་ཚོགས་ཐུགས་དམ་ཅན༔ མི་མངོན་དབྱིངས་ནས་འདིར་གཤེགས་ཐུགས་དམ་བསྐུལ༔ དྲག་པོའི་ཕྲིན་ལས་མཛད་པའི་དུས་ལ་བབས༔ ཐུགས་དམ་ཐུགས་རྗེས་དགྲ་བགེགས་མྱུར་དུ་སྒྲོལ༔ ཞེས་བསྐུལ་ལོ། །དེ་ནས་གསེར་སྐྱེམས་བཤམས་ལ་དཀར་ནག་བདེན་རྫུན་གྱི་ཤན་འབྱེད་མཁྱེན་གསོལ་ནི། ཧཱུྃ་བྷྱོ༔ ཐོག་མའི་མགོན་པོ་ཀུན་བཟང་ནས་བཟུང་སྟེ༔
དཔལ་མགོན་རྩ་བའི་བླ་མ་ཡན་ཆོད་དུ༔ སངས་རྒྱས་དངོས་དང་སྙན་བརྒྱུད་མ་ཆད་པའི༔ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་༔ གང་ཟག་སྙན་བརྒྱུད་བླ་མ་སྙན་གསོན་ཅིགཿ གསང་སྔགས་བླ་མེད་དགོངས་པ་སྙིང་པོའི་དོན། །འཁོར་འདས་བྱང་ཆུབ་སེམས་སུ་རོ་གཅིག་པས། །འོད་གསལ་ཐིག་ལེ་ཆེན་པོའི་ངང་ཉིད་ལས། །རིགས་ཅན་རྣམས་ཀྱིས་སྨིན་གྲོལ་བྱེད་པ་ལ། །དམ་ཉམས་ཞིང་བཅུ་རྣམས་ཀྱིས་མ་སྟེར་རོ། །རིག་འཛིན་བླ་མས་གཟུ་དང་དཔང་མཛོད་ཅིག །དབྱིངས་དང་ཡེ་ཤེས་དཀྱིལ་འཁོར་ཀུན་གྱི་བདག །རིགས་ལྔ་རིགས་གསུམ་དུས་གསུམ་རྒྱལ་དང་སྲས། །ཡོན་ཏན་ཕྲིན་ལས་མ་ལུས་འདུས་པའི་སྐུ། །ཞི་ཁྲོ་རབ་འབྱམས་སྒྲུབ་པ་བཀའ་བརྒྱད་དང༌། །འཇམ་དཔལ་གཤིན་རྗེ་བསྙེན་ཅིང་བསྒྲུབས་ པའི་ལྷ། །ལས་དང་ཡེ་ཤེས་མཁའ་འགྲོ་སྙན་གསོན་ཅིག །བླ་མ་མཆོག་མཇལ་དབང་བསྐུར་མན་ངག་ཞུས། །རྒྱུད་སྡེའི་དགོངས་པ་བསྐྱེད་རྫོགས་ཟབ་མོ་བསྟེན། །བདེ་གཤེགས་བཀའ་བཞིན་བསྒྲུབ་སེམས་རྣལ་འབྱོར་བདག །བསྟན་པའི་དགྲ་བོ་འདི་ཡིས་སེམས་དཀྲུགས་སོ། །ཡི་དམ་ལྷ་ཚོགས་གཟུ་དང་དཔང་མཛོད་ཅིག །ཀུན་ཏུ་བཟང་མོ་སྤྱན་དྭང་མཱ་མ་ཀཱི། །གོས་དཀར་སྒྲོལ་མ་རིགས་ལྔའི་མཁའ་འགྲོ་མ། །གནས་དང་ཡུལ་གྱི་དཔའ་བོ་མཁའ་འགྲོ་དང༌། །སྤྲུལ་དང་ཡང་སྤྲུལ་མ་སྲིང་རྒྱ་མཚོ་དང༌། །དུར་ཁྲོད་བརྒྱད་ཀྱི་མཁའ་འགྲོ་
སྙན་གསོན་ཅིག །བས་མཐའ་ནགས་འདབས་གནས་དང་དུར་ཁྲོད་དུ། །ལྷག་པའི་སེམས་ལ་སྦྱོར་བའི་བརྟུལ་ཞུགས་ཀྱིས། །ཞི་གནས་ལྷག་མཐོང་ཉམས་རྟོགས་སྒོམ་པ་ལ། །ཕུང་བྱེད་དམ་ཉམས་འདི་ཡིས་མ་སྟེར་རོ། །སྔགས་སྲུང་དམ་ཅན་རྒྱ་མཚོ་དྲེགས་པའི་ཚོགས། །དཔའ་བོ་མཁའ་འགྲོས་གཟུ་དང་དཔང་མཛོད་ཅིག །ཆོས་ལོངས་སྤྲུལ་སྐུས་སྟོང་དང་རྟེན་ཅིང་འབྲེལ། །ཟུང་འཇུག་རྒྱུ་འབྲས་འདས་པའི་ཆོས་བསྟན་པ། །གདུལ་བྱའི་བསགས་པས་ཐེག་པ་གྲུབ་མཐའི་སྒོ། །མཐའ་ཡས་དུ་མར་གོ་ཡང་ངོ་བོ་གཅིག །ཀུན་ལ་རིས་མེད་དག་སྣང་རྩལ་སྦྱངས་ཤིང༌། །བདག་བསྟོད་གཞན་སྨོད་ཆགས་སྡང་ཚེར་མ་སྤང༌། །རང་གིས་ཚུལ་བཞིན་དམ་ཆོས་སྤྱོད་སེམས་ལ། །བན་སྔགས་བོན་དགྲ་ནག་པོའི་འཚེ་བ་དང༌། །རང་ཟས་སྨན་ལ་གཞན་ཟས་དུག་ལྟར་བལྟས། །དམན་པའི་ས་བཟུང་ཁ་ཉན་དཔུང་པ་སྨད། །མཐོ་ལ་མ་སྨད་དམའ་ལ་མ་བརྙས་ཤིང༌། །བར་དུ་ཕྲག་དོག་རུ་ངའི་སྦྱོར་སྤངས་ཀྱང༌། །བསྟན་པའི་རཱུ་ཏྲ་ནག་པོ་གླང་སྙིང་འདིས། །སྤྱིར་ནི་སངས་རྒྱས་བསྟན་པ་ཡོངས་ལ་འཚེ། །སྒོས་སུ་དཔལ་ལྡན་བླ་མའི་ཐུགས་རྒྱུད་དཀྲུགས། །ཡང་སྒོས་བདག་ཅག་ཆོས་སྲིད་བཅས་པ་ལ། །བདེན་པ་ཁྱད་གསོད་རང་གནོད་ཁོང་བསྲན་བཅས། །ངོར་རྩུབ་མ་བདེ་ཐབས་ཀྱིས་མཐའ་ནས་བསྐུལ། །རང་ནུས་
མ་ཐོན་ལོག་འདྲེན་གཞན་དག་རྦོད། །ཁ་དཀར་ཞེ་གནག་མགོ་སྨོང་སྒབ་ནས་རྩུབ། །མ་བྱས་བྱས་དང་མ་བྱུང་བྱུང་ཞེས་པའི། །ལེགས་བསུབས་ཉེས་སྒྲོགས་ཡ་ག་ངན་སྨས་སྦྱོར། །རྒྱབ་ནས་འདེད་ཅིང་མདུན་དུ་བསྒུག་པ་དང༌། །ཟུར་ནས་གསོད་གཅོད་བརྐུ་འཕྲོག་བརྡེག་བྱེད་ཅིང༌། །རང་གི་ཆོས་སྲིད་འབྱོར་པས་མི་ངོམས་པར། །གཞན་ལ་ཕྲག་དོག་བསྟན་ལ་བསྙེངས་པ་ཡི། །ཕྱི་དགྲ་ཞེ་སྡང་མེ་ལྟར་འབར་བ་དང༌། །ནང་དགྲ་བསམ་ངན་རླུང་ལྟར་འཚུབས་པ་ཡི། །སྔ་དགྲ་ཉེས་བྱེད་ཆུ་ལྟར་རྒྱུག་པ་དང༌། །ཕྱིས་དགྲ་བྱེད་སེམས་དུག་ལྟར་ཁོང་ནས་གཡོ། །ད་དགྲ་དྲག་པོ་ཚེར་ལྟར་རྩུབ་པ་ཡི། །བྱད་མ་དགྲ་བོ་ཕྱོགས་མཚམས་གང་གནས་ཀྱང༌། །འཇིག་རྟེན་འདས་དང་མ་འདས་ཚུལ་འཛིན་པའི། །བསྟན་སྲུང་དམ་ཅན་རྒྱ་མཚོ་དྲེགས་པའི་འཁོར། །བསྟན་དང་བསྟན་འཛིན་རྣལ་འབྱོར་ལ་གདུངས་པའི། །རྔམས་དྲག་འབར་བ་དཔལ་གྱི་ཕོ་ཉ་རྣམས། །རྒྱལ་བའི་བཀའ་དང་རྣལ་འབྱོར་དམ་བཞིན་འདུས། །ཉེས་བྱེད་དགྲ་བོའི་གཟུགས་ཕུང་རྣམ་ཤེས་བཅས། །ཕ་ཚན་ཡུལ་འཁོར་མི་ནོར་སྡེ་དཔུང་རྣམས། །རང་དབང་མེད་པར་དྲག་པོའི་རྟེན་ལ་ཕོབ། །ཅེས་གསེར་སྐྱེམས་གཤེགས་ཤིང་སྤྲོས་པ་ཆུང་སྐབས་བྱིན་རླབས་ཐུགས་རྗེ་མས་ཀྱང་རུང་ངོ༌། །བྲུབ་ཁུང་བསྐྱེད་པ་ནི། ཨེ༔ བདག་ཉིད་འཇམ་དཔལ་གཤིན་རྗེར་
གསལ་བ་ཡི༔ ཐུགས་ནས་མཐིང་ནག་ཨེ་ཡིག་ཆད་པ་ལས༔ ཡོངས་གྱུར་གནོད་བྱེད་དགྲ་བགེགས་བྲུབ་པའི་ཁུང་༔ གནམ་ལྕགས་ལས་གྲུབ་བཙོན་ཁང་ཟུར་གསུམ་པ༔ ཟིན་ནས་ཐར་པ་མེད་པ་མུན་པའི་གླིང་༔ སྟེང་ནས་འདབ་ཆགས་ཤ་ཟན་ཀླད་ལ་ལྡིང་༔ འོག་ཕྱོགས་འདོད་ཆགས་ཁྲག་མཚོ་དབའ་རླབས་འཁྲུགས༔ ནང་དམར་ཞེ་སྡང་རང་བཞིན་མེ་དཔུང་འབར༔ ཕྱི་ནག་གཏི་མུག་མུན་པ་སྤྲིན་ལྟར་གཏིབས༔ ཁོར་ཡུག་ལྕགས་བསྲེགས་ས་གཞིར་བཤན་པའི་གྲོང་༔ རྩང་དམར་ལས་བྱེད་གཤིན་རྗེའི་ཕོ་ཉའི་ཚོགས༔ ཉི་ཤུ་རྩ་གཅིག་འཁོར་བཅས་གསལ་བར་གྱུར༔ ཅེས་བྲུབ་ཁུང་ཕོ་ཉ་དང་བཅས་གསལ་བཏབ་ནས༔ དམིགས་བྱ་གསལ་འདེབས་པ་ནི། ནྲྀ་ཏྲི། དེ་ནང་བཀོད་པའི་ལིངྒ་བསྒྲལ་བའི་ཞིང་༔ བསྟན་པ་སྤྱི་དང་རྣལ་འབྱོར་སྒོས་ཀྱི་དགྲ༔ དམ་ཉམས་གནོད་བྱེད་དགྲ་བགེགས་ཨ་མུ་ཀ༔ གཟུགས་བརྙན་རི་མོར་བྲིས་ལ་མིང་བྱང་བཏབ༔ རྣམ་ཤེས་རྟེན་དང་བཅས་ལ་ཟག་རྫས་བྱུགས༔ ཉམ་ཐག་མྱ་ངན་འདུག་སྟངས་རྐང་ལག་བཅིངས༔ མངོན་སུམ་ལྟ་བུར་གསལ་བ་ཉིད་དུ་གྱུར༔ ཅེས་དངོས་སུ་བསམ༔ དེ་ནས་འགུགས་འདྲེན་བྱ་བ་ནི། ན་མོ༔ རྩ་བརྒྱུད་བླ་མ་རྒྱལ་བ་ཞི་ཁྲོའི་ལྷ༔ མཁའ་འགྲོ་དཔའ་བོ་དམ་ཅན་སྲུང་མར་བཅས༔ སྔགས་འཆང་བདག་གི་སྔགས་དང་
ཏིང་ངེ་འཛིན༔ དཀོན་མཆོག་གསུམ་སོགས་བཀའ་ཡི་བདེན་པ་དང་༔ ཁྱད་པར་འཇམ་དཔལ་ཚེ་འཆི་ཨུཥ་གསུམ་ཁྲོས༔ ལས་ཀྱི་མཐའ་སྡུད་འཆི་བདག་མ་ཧེའི་གདོང་༔ བླ་འགུགས་མོན་པ་ཕོ་མོ་སྤྲུལ་འཁོར་བཅས༔ བྱེ་བ་དགུ་ཁྲི་དགུ་སྟོང་བདེན་པའི་མཐུས༔ བླ་མའི་སྐུ་དགྲ་བསྟན་དང་བསྟན་འཛིན་དམོད༔ ཁྱད་པར་སྔགས་འཆང་བདག་དང་སྦྱིན་པའི་བདག༔ རྒྱུ་སྦྱོར་དགའ་ཆེ་གེ་མི་ནོར་འཁོར་བཅས་ལ་ཤེས་པ་ལྟ་བུའི་ཚིག་བསྒྱུར་དགོས། ལྡན་ཕོ་བྲང་བོད་ཁམས་སྤྱིར༔ སྔ་དགྲ་ལག་བརྡར་ཕྱི་དགྲ་ཡིད་ལ་སེམས༔ ད་ལྟ་གནོད་ཅིང་འཚེ་བའི་དགྲ་དང་བགེགས༔ སྲི་ཅན་ལ། དུར་སྲི་ཕུང་སྲི་གོད་སྲི་ཆུང་སྲི་དང་༔ ཕོ་སྲི་མོ་སྲི་མཚོན་སྲི་དགྲ་སྲི་སོགས༔ ཁ་འཇམ་གཏིང་རྩུབ་ཞེ་ནས་དམོད་པ་དང་༔ དོ་བསྡོ་ཕོད་འཛུགས་བསམ་ངན་སྦྱོར་རྩུབ་བྱེད༔ མི་ལ་ལྷ་མེད་ལྷ་ལ་མཐུ་མེད་ཅེས༔ མཐུ་དང་ནུས་པ་བུ་ལོན་བཞིན་དུ་གཤེར༔ འགྲོ་ལམ་རྩང་འཛུགས་ཟ་ལམ་དུག་སྦྱོར་བཤམས༔ དམིགས་ཡུལ་གཟུགས་ལིང་བཀོད་པ་འདི་རྣམས་ཀྱི༔ རྣམ་ཤེས་བླ་ཚེ་སྲོག་དང་བཅས་པ་རྣམས༔ གནམ་ས་གླིང་བཞི་གླིང་ཕྲན་རི་རབ་སེང་༔ ཉི་ཟླའི་གོ་དབང་ཆོས་བོན་སྲུང་མའི་བསྐྱབས༔ གང་ན་གནས་ཀྱང་ལིངྒ་འདི་ཉིད་ལ༔ ཁུག་ཅིག་བཛྲ་ཨངྐུ་ཤ་ཡ་ཛ༔ སྐེ་ནས་ཆིངས་ཤིག་བཛྲ་པཱ་ཤ་ཧོ༔ ཡན་ལག་སྡོམས་ཤིག་བཛྲ་སྥོ་ཊ་བཾ༔ མྱོས་པར་གྱིས་ཤིག་བཛྲ་གྷཎྜེ་
ཧོ༔ ལྷ་དང་ཕྱེས་ཤིག་པྲ་ཝེ་ཤ་ཡ་ཕཊ༔ དབྱེར་མེད་སྟིམས་ཤིག་ཨཱ་ཝེ་ཤ་ཡ་ཨ༔ ཞེས་འགུགས་འཆིང་སྡོམ་མྱོས་དབྱེ་སྡོམ་གྱི་ཕྱག་རྒྱ་དང་དམིགས་གནད་ལ་ནན་ཏན་བསྐྱེད་དེ་དགུག་གཞུག་རོལ་མོའི་ཚམ་རྔམས་བཤུགས་སྒྲ་དང་བཅས་བརྒྱའམ་ཉེར་གཅིག་གམ་བདུན་ལ་སོགས་དངོས་ཉམས་དང་སྦྱར་ཞིང་གུ་གུལ་ནག་པོས་བདུག །ཕོ་ཉ་བཀྱེ་བར་གསོལ་བ་ནི། ཧཱུྃཿ བསྐལ་པ་ཆེན་པོ་བརྒྱད་ཁྲི་ཡི༔ བཞི་སྟོངས་ཁོར་བའི་གཞལ་ཡས་ནས༔ ལྕགས་མཁར་སྒོ་མེད་བཅུ་དྲུག་གི༔ འབར་བའི་དབུས་ཕྱོགས་རྔམས་པ་ནས༔ འོབས་ཆེན་བཅུ་གཉིས་གཏིང་མཐའ་མེད༔ ཐོད་མཁར་འབར་བའི་ནང་ཞིག་ན༔ ཕོ་བྲང་ལྕགས་མཁར་སྤུ་གྲིས་གཏམས༔ ཀླུ་འབུམ་གཉན་ཁྲི་ས་བདག་སྟོང་༔ ལྟོ་འཕྱེ་ཕྱོགས་སྐྱོང་མ་ཧེའི་ཁྲི༔ ཐབས་ཤེས་ཉི་ཟླའི་གདན་སྟེང་ནས༔ སྲོག་བདུད་ཚེ་བདག་ནག་པོ་བཞེངས༔ རྔམས་པའི་ཚུལ་གྱིས་བླ་འགུགས་རྣམས༔ ད་ལྟ་ཁྱེད་ཀྱི་ལས་ལ་ཁྱེ༔ ཞེས་དང༌། བསྐུལ་བ་ནི། ཛཿ ཤར་གྱི་ཕྱོགས་ནས་བླ་འགུགས་པ༔ དུང་གི་མོན་པ་སེང་གེའི་མགོ༔ ལྷོ་ཡི་ཕྱོགས་ནས་བླ་འགུགས་པ༔ ལྕགས་ཀྱི་མོན་པ་སྟག་གི་མགོ༔ ནུབ་ཀྱི་ཕྱོགས་ནས་བླ་འགུགས་པཿ བསེ་ཡི་མོན་པ་དྲེད་ཀྱི་མགོཿ བྱང་གི་ཕྱོགས་ནས་བླ་འགུགས་པཿ གསེར་གྱི་མོན་པ་ཁྱུང་གི་མགོཿ བླ་རྐུན་མོན་པ་
ཁྱེད་བཞི་ཡངཿ དབུ་དགུ་སྤྱན་དགུ་ཞལ་དགུ་གདངསཿ ཕྱག་དགུ་ཞབས་དགུ་ཙིཏྟ་དགུཿ ཞབས་དགུས་སྟོང་གསུམ་བླ་ལ་རྒྱུག༔ སྤྱན་དགུས་དགྲ་བགེགས་བལྟས་ནས་འཛིན༔ སྙིང་དགུས་དགྲ་བགེགས་ཡིད་ལ་བྱེད༔ ཕྱག་དགུས་དགྲ་བགེགས་ཙིཏྟ་འབྱིནཿ ཞལ་དགུས་ཁ་མངར་མེད་པར་གསོལ༔ ལྗགས་དགུས་མྱོས་པའི་ཁྲག་མཚོ་འཐུང་༔ དགྲ་བགེགས་མྱུར་དུ་ཁྲིད་ལ་ཤོག༔ ཛཿ ཤར་ཕྱོགས་དྲི་ཟ་མེ་ལྷའི་གཙོཿ ཧེ་ལེ་ཁྱབ་པ་གཏུམ་ཆེན་འཐོམ༔ དགྲ་བགེགས་སྲོག་དབུགས་རྡུལ་དུ་རློགས༔ ཛཿ ལྷོ་ཕྱོགས་གཤིན་རྗེ་སྲིན་པོའི་གཙོ༔ ནག་པོ་འཛུམ་མེད་གཏུམ་ཆེན་འཐོམ༔ དགྲ་བགེགས་སྲོག་དབུགས་རྡུལ་དུ་རློགས༔ ཛཿ ནུབ་ཕྱོགས་ཆུ་དབང་རླུང་ལྷའི་གཙོ༔ ནག་པོ་བཀྲག་མེད་ཆགས་མེད་འཐོམ༔ དགྲ་བགེགས་སྲོག་དབུགས་རྡུལ་དུ་རློགས༔ ཛཿབྱང་ཕྱོགས་གནོད་སྦྱིན་འབྱུང་པོའི་གཙོ༔ སོ་འདར་འཁྲིག་པ་ཁྲག་ཆེན་པོས༔ དགྲ་བགེགས་སྲོག་དབུགས་རྡུལ་དུ་རློགས༔ བྷྱོ༔ དཔལ་གྱི་ཕྱག་བརྙན་རཀྟའི་དྲི་བསྣམས་མ༔ ཁྲག་མདོག་དམར་པོ་བསེ་ཡི་རལ་པ་ཅན༔ སྡེར་མོ་ལྕགས་ཀྱུའི་རྩེ་ལ་རཀྟའི་མེ་འབར་མ༔ ཉམས་པའི་སྙིང་ཕྱུང་མཆན་ཁུང་ཆུག་ལ་ཤོགཿ ཁྲོས་པའི་ཞལ་མདོག་ཁྲག་གི་མཆིན་པ་ཁཿ རྒྱུག་པའི་སྟོབས་ནི་སྤྱང་མོ་ངར་མ་འདྲ༔ དྲག་པོའི་སྐད་ནི་ནམ་མཁའི་འབྲུག་ལས་ཆེ༔
རྒྱུག་པའི་སྟོབས་ནི་བར་སྣང་གློག་ལས་མགྱོགས༔ ཟངས་ཀྱི་སྡེར་མོ་དམར་མོའི་ཆངས་པ་རུ༔ མགོན་མེད་བྱི་ཕྲུག་ཤ་རྗེན་བཅུག་པ་ལྟར༔ དམ་ཉམས་དགྲ་བོའི་དོན་སྙིང་ཕྱུང་ལ་ཤོག༔ རྣམ་སྨིན་ཕུང་པོ་དུམ་བུར་གཏུབས་ལ་ཤོག༔ གཟུགས་ཀྱི་ཕུང་པོ་དེ་རུ་ཞོག་ལ་ཤོག༔ རྣམ་པར་ཤེས་པ་འདི་རུ་ཁྱེར་ལ་ཤོག༔ དགྲ་བགེགས་གནོད་བྱེད་ཨཾ་ཀུ་ཤ་ཡ་ཛ་ཛ༔ ཞེས་རོལ་མོའི་ཚམ་རྔམས་ཀྱིས་དྲག་ཏུ་བསྐུལ་ལ་གཡབ་དར་གཡོབ་ཅིང་འོད་ཟེར་འཕྲོ་འདུ་དང་ཕོ་ཉས་བཀུག། །བླ་འགུགས་ཀྱི་སྔགས་ནི། ནྲྀ་ཤ་ཀུ་རུ༔ ནྲྀ་ཤ་ཀུ་རུ༔ ཁ་སོ་པ་ཏི༔ ཁ་སོ་པ་ཏི༔ ཡཾ་རུ་ཏི༔ ཡཾ་སེན་ཡཾ་སེན༔ མན་ཡཾ༔ སྙིང་ཚལ་པར་རྦད༔ བཾ་རི་ལི་རྦད༔ དམ་ཉམས་དགྲ་བགེགས་ཁྱོད་ཀྱི་བླ་རྟེན་ཚེ་རྟེན་སྲོག་རྟེན་ཅི་ཡོད་པ་ཐམས་ཅད་འདིར་ཁུག་མྱུར་དུ་ཤོག་ཅིག༔ ཅེས་བླ་ཁུག་པའི་རྟགས་མ་བྱུང་བར་དུ་བཟླའོ། །གལ་ཏེ་ཁུག་པའི་མཚན་མ་ཤིན་ཏུ་བུལ་ན། དམིགས་པ་དྲག་ཏུ་གཞུར་ཞིང་བླ་འགུགས་ཀྱི་ཕོ་ཉ་མོ་མོན་མོའི་ཚོགས་དང་ཁྱི་འགྱེད་སོགས་རྦད་པས་མོད་ལ་ཁུག་པ་ནི། གཞུང་ལས། ལས་ཀྱི་ཕོ་ཉ་འདི་དག་ནིཿ བསྐུལ་དང་རྦད་པས་སྲིད་གསུམ་འཇོམས༔ ལས་བསྒྲུབ་ཐེ་ཚོམ་མེད་པར་ངེས༔ ཞེས་གསུངས་ཀྱང་འདིར་རེ་ཞིག་དེ་ཙམ་མོ། །དེ་ཡང་འགུགས་པའི་དུས་གནད་ནི། དམིགས་བྱ་རང་རང་ལ་བླ་རྒྱུ་དུས་མི་འདྲ་བ་རེ་རེ་
སོགས་ཟབ་གནད་མང་དུ་གསུངས་ཀྱང་འདིར་རྒྱས་བཤད་དོར་བའི་རང་གཞུང་གི་དགོངས་པར། སྔ་དྲོ་སྟག་མོ་ལངས་པའི་དུས་དང་ནི༔ ཉིན་གུང་ཁྱིམ་བྱ་གདང་ལ་ཉལ་བ་དང་༔ སྲོད་ལ་སྲིན་མོ་ལྟོ་ལ་རྔུབ་པའི་དུས༔ ཁྱད་པར་ཉི་མ་གྲིབ་སོ་འཇུག་དུས་དང་༔ ཞེས་གསུངས་པའི་དགོངས་དོན་གཙོ་བོར་བཟུང་ནས། ཐོ་རངས་གུང་གཉིས། ཤར་ནུབ་གཉིས་ཀྱི་གྲིབ་སོ་བྱུང་སྐབས། སྲོད་གདོང་ནག་དུས་ཏེ་དྲུག་གོ། །རྒྱས་བསྡུས་ཀྱི་གོ་སྐབས་རིག་པའི་མདའ་མོ་འཕངས་པར་བྱའོ། །སྐབས་སུ་རིགས་མཐུན་གྱི་གཞུང་གཞན་ལས་བྱུང་བའི་ཟབ་གནད་འདི་ཡང་བྱ་སྟེ། ཧཱུྃ་བྷྱོ༔ ད་ནི་བསྒྲལ་བའི་ཐུགས་དམ་དུས་ལ་བབ༔ ད་ནི་ནམ་གྱི་སྲོད་ལ་བབ་དུས་འདིར༔ ཆོམ་རྐུན་ལས་ལ་འགྱེད་པའི་དུས་ཡིན་པས༔ དམ་ཉམས་དགྲ་བོའི་བླ་ཚེ་འཁྱམས་པའི་དུས༔ དམ་ཉམས་དགྲ་བོའི་བླ་འཁྱམས་ཁུག་ལ་ཤོགཿ བྷྱོཿ ད་ལྟ་ནམ་གྱི་གུང་ལ་བབ་དུས་འདིར༔ སེམས་མེད་འབྱུང་བ་ཆུ་ཡང་གཉིད་ལོག་གི༔ དགྲ་བོ་ལས་ངན་སྡིག་ཅན་གཉིད་ལོག་གི༔ བླ་ཚེ་འཁྱམས་པོ་ད་ལྟ་ཁྲིད་ལ་ཤོག༔ བྷྱོ༔ ད་ལྟ་ནམ་གྱི་ཐོ་རངས་བབ་དུས་འདིརཿ དགྲ་བོའི་བླ་ཚེ་འཕྱོ་ཞིང་འཕྲོ་བའི་དུས༔ དམ་ཉམས་དགྲ་བོའི་བླ་ཚེ་འཕྱོ་བའི་དུས༔ ལས་ངན་བླ་འཁྱམས་མྱུར་དུ་ཁྲིད་ལ་ཤོག༔ བྷྱོ༔ ད་ནི་ནམ་ལངས་ཉི་མ་ཤར་དུས་འདིར༔ མི་ཕྱུགས་ཐམས་ཅད་ལས་ལ་གྲམ་
པའི་དུས༔ དགྲ་བོའི་བླ་ཚེ་སྒོ་རུ་ཐོན་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོཿ ད་ལྟ་ཉི་མའི་གུང་ལ་བབ་དུས་འདིར༔ དགྲ་བོའི་རྣམ་ཤེས་བྱིངས་ཤིང་མྱོས་པའི་དུས༔ དགྲ་བོའི་བླ་ཚེ་འཐོམ་ཞིང་འཁྱམས་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ ད་ནི་ཉི་ནུབ་གྲིབ་སོ་འཕོག་པའི་དུས༔ སྙིང་མི་དགའ་ཞིང་ཤེས་པ་འཕྱོ་བའི་དུས༔ དགྲ་བོའི་བླ་ཚེ་རྣམ་ཤེས་འཕྱོ་བའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ ཅེས་དང་རང་རང་གི་དུས་དང་བསྟུན་པའི་བསྐུལ་པའམ་ཡང་ན་མཐར་ཆགས་སུ་བྱའོ། །དེ་ནས་རྒྱབ་བརྟེན་གྱི་ལྷ་དང་དཔྲལ་བ་ནི། གུ་གུལ་གྱིས་བདུག །བྱ་རོག་དང་འུག་པའི་དང་སྒྲོ་གཉིས་ཀྱིས་གཡབ་ཅིང༌། སྤྲོ་ན་དགྲ་བོའི་ལྷ་ལྔ་མིང་རུས་དང་བཅས་པའི་བར་དུ་མ་མོའི་སྔགས་བྱང་གཏེམ་ལ་སྒྲོ་ཡིས་གདོན་ཞིང་དབྱེ་རྫས་དམིགས་བསལ་གྱིས་བདུག་པ་དང་བསྐུལ་བྱང་སོགས་གུད་ལས་བྱུང་བ་ལྟར་འདིར་ཡང་སེམས་སོ། །ཧཱུྃ༔ སྡིག་ཅན་དགྲ་བོ་ལས་ངན་འདི༔ དགྲ་ལྷ་སྤྱི་བོའི་གཙུག་ནས་ཕྲོལ༔ སྲོག་ལྷ་སྙིང་གི་དཀྱིལ་ནས་ཕྲོལ༔ ཞང་ལྷ་ལྟེ་བའི་ཁུང་ནས་ཕྲོལ༔ མ་ལྷ་གསང་བའི་གནས་ནས་ཕྲོལ༔ ཕོ་ལྷ་ཕྲག་པ་གཡས་ནས་ཕྲོལ༔ མོ་ལྷ་ཕྲག་པ་གཡོན་ནས་ཕྲོལ༔ བང་ལྷ་མཛོད་ཁང་ནང་ནས་ཕྲོལ༔ བན་བོན་ལ་སོགས་འགོ་བའི་ལྷ༔ རིག་འཛིན་ལ་སོགས་སྲུང་
བའི་ལྷ༔ མ་ལུས་རྒྱབ་ནས་ཕྲོལ་ལ་ཤོག༔ ཧཱུྃ༔ ལས་ཀྱི་གཤིན་རྗེ་ཐམས་ཅད་དང་༔ བདག་གི་སྲུང་མ་དམ་ཅན་རྣམས༔ དགྲ་བོའི་ལྷ་ལྔ་དབང་དུ་སྡུས༔ དགྲ་བོའི་ཡུལ་ལྷ་མནོལ་དུ་ཆུག༔ དགྲ་བོའི་ཕོ་ལྷ་གྱེས་སུ་ཆུག༔ དགྲ་ལྷ་ཕམ་ཞིང་འཐོར་དུ་ཆུག༔ མ་ལྷ་མ་སྨན་ཡར་དུ་ཆུག༔ དགྲ་བོ་ལྷ་དང་ཕྲོལ་ལ་ཤོག༔ བདག་གི་གྲོགས་བྱེད་དམ་ཅན་རྣམས༔ ཉེས་བྱས་དམ་ཉམས་དགྲ་བོ་འདི༔ མགོན་བྱེད་ཡུལ་ལྷ་དབང་དུ་སྡུས༔ མཚོན་བྱེད་ཕོ་ལྷ་དབང་དུ་སྡུས༔ སྐྱོབ་བྱེད་དགྲ་ལྷ་དབང་དུ་སྡུས༔ གྲོགས་བྱེད་མ་ལྷ་དབང་དུ་སྡུས༔ སྲུང་བྱེད་སྲོག་ལྷ་དབང་དུ་སྡུས༔ ལེ་དགུའི་ལྷ་སྲུང་བྱད་དུ་ཕོབ༔ ཕན་བྱེད་ཞང་ལྷ་དབང་དུ་སྡུས༔ ཧཱུྃ༔ ཁ་ཁ་མུ་ཁ་མཐུ་མོ་ཆེ༔ མཐིང་ནག་ཆེན་མོ་བྱ་རོག་དབུ༔ རྟོག་མེད་ཟས་སུ་ཤ་ལ་ཟ༔ ཁྱོད་ཀྱི་ཐུགས་དམ་དུས་ལ་བབ༔ ཧུ་ལུ་མུ་ཁ་མཐུ་མོ་ཆེ༔ སེར་ནག་ཆེན་མོ་འུག་པའི་དབུ༔ ཁྱོད་ནི་ཉིན་མཚན་མེད་པར་རྒྱུག༔ ཁྱོད་ཀྱི་ཐུགས་དམ་དུས་ལ་བབ༔ དགྲ་དང་དགྲ་ལྷ་ཕྲོལ་ལ་ཤོག༔ ལུས་དང་སྲུང་མ་ཕྲོལ་ལ་ཤོག༔ ཁྱོ་དང་ཆུང་མ་ཕྲོལ་ལ་ཤོག༔ གཉེན་དང་ཉེ་དུ་ཕྲོལ་ལ་ཤོག༔ ཕུ་བོ་ནུ་བོ་ཕྲོལ་ལ་ཤོག༔ མངོན་སྤྱོད་དྲག་པོས་རྡུལ་དུ་རློགས༔ ཨ་ནྲྀ་ཏྲི་ཏྲག་རཀྴ་མཱ་ར་ཡ་ཕྱེ༔ མཱ་མ་ཏྲག་རཱུ་ཏྲ་མཱ་ར་ཡ་ཕྱེ༔ ཞེས་བག་ཙམ་རེ་བཟླས་པས་ལྷ་
དང་དབྱེའོ། །ཕ་རོལ་པོ་ལྷ་སྲུང་བཟང་ན་ལྷ་ལྔ་དཀྲོག་པའི་དྲག་སྔགས་ཟུར་དུ་གསལ་བ་ལྟར་བྱའོ། །དེ་ནས་དངོས་ཉམས་རྨི་ལམ་གྱི་སྒོ་ནས་བླ་རྟགས་མཐོང་བ་དང༌། དེ་ཉིད་གང་དུ་བརྫུ་བ་དེར་མངགས་པའི་ཕོ་ཉ་རྦད་དགོས་པའང༌། རེ་ཞིག་འདིར་མ་སྤྲོས་པས་བསྟན་དོན་གལ་ཆེའི་རིགས་ལ་ལོགས་སུ་ཤེས་པར་བྱའོ། །དེ་ལྟར་ཞག་གྲངས་ཇི་ལྟར་ཡང་ཁུག་པའི་རྟགས་མཐོང་ན་གསད་པའི་ལས་ལ་འཇུག་དགོས་ཏེ། སློབ་དཔོན་ཆེན་པོས། བླ་མ་ཁུག་པར་ལས་ལ་སྦྱོར་བ་ནི་དགྲ་བོ་མེད་པར་མཚོན་ཆ་བརྡེག་པ་དང་འདྲ༔ བླ་ཁུག་ནས་ལས་ལ་མ་སྦྱར་ན་བསྐུངས་ར་ནས་དགྲ་བོ་ཤོར་བ་དང་འདྲ༔ ཞེས་སོགས་སྐྱོན་ཡོན་གྱི་རྣམས་གྲངས་ཤིན་ཏུ་མང་བར་གསུངས་པས་གསད་པའི་ལས་ལ་སྦྱར་བ་ནི། ཐུན་སྣོད་གཡག་རྒོད་ཀྱི་རྭ་གཡས་མེ་ཆུས་མ་ཕོག་པའི་ནང་དུ་ཐུན་རྫས་རྣམས་ཚང་བ་ཤོག་བུའམ་གཡག་རྔས་བཀབ་པ་མདུན་དུ་བཤམས་ལ། ཨེ་ཛ་བྷྱོཿ ཐུན་སྣོད་ནད་མཚོན་དུག་རླངས་ཁོལ་བའི་ཀློང་༔ ཐུན་རྫས་ལས་བྱེད་ཕོ་ཉ་ཟ་གསོད་རྔམས༔ གཏུམ་དྲག་རྒྱོབ་སོད་འཇིགས་པའི་འབྲུག་སྟོང་ལྡིར༔ སྟོང་ཁམས་གང་བའི་མཚོན་ཆ་ཐོག་ལྟར་འབེབས༔ ལོག་འདྲེན་གནད་ལ་དབབ་པའི་མཐུ་ལྡན་གྱུར༔ ཅེས་གཟི་བྱིན་བསྐྱེད་ལ་དམིགས་གནད་ནི། གཞུང་ལས། དྲག་སྔགས་མཚོན་ཆའི་འོད་ཟེར་ལས༔ ཤུགས་
ལྡན་རི་ཆེན་ཉིལ་ལྟར་འཕྲོས༔ ཤ་ཟ་གསོད་བྱེད་ཕོ་ཉ་བསྐུལ༔ ཁོ་ཡི་བ་སྤུའི་བུ་གར་གདབ༔ སོགས། གནམ་ལྕགས་ཀྱི་འཁོར་ལོ་བསྣོལ་མ་ཤུགས་དྲག་ཏུ་བསྐོར་དམིགས་ཀྱིས་རང་གཤེད་རང་ལ་དབབ་པའི་དམིགས་གནད་ཟབ་མོ་ཞལ་ལས་ཤེས་པར་བྱས་ནས་བཟླ་བྱའི་སྔགས་ནི། ཨྱཻ་ཨྱཻ་ཨྱཻ། སོགས་ནས། བི་ཙུར་ཎ་བི་ཙུར་ཎ༔ ཨོཾ་ཨཱཿཨུཥྞི་ཥ་ཡ་རྦད༔ ཡནྟྲ་ཙཀྲ་རྦད༔ མན་ཏྲ་ཡ་ཙམ་རྦད༔ ཁཾ་ཤག་རོ་མྱག་མུག་ཏི་རྦད་ཡཱ༔ ཞེས་བཟླ་ཞིང་མཆིལ་རླངས་མི་ཤོར་བའི་གནད་དང་ལྡན་པས་ཐུན་ལ་ངར་བླུད་ནས་ལིངྒ་ལ་ཐུན་གྱིས་བྲབ་ཅིང་བསྐུལ་བ་ནི། ཧཱུྃ་ང་ནི་འཇམ་དཔལ་གཤིན་རྗེ་གཤེད༔ དགྲ་དང་བགེགས་ཀྱི་གཉེན་པོ་སྟེ༔ ཡུངས་ཀར་རྒྱལ་པོ་ཤ་རི་རཾ༔ དགྲ་བགེགས་སྟེང་དུ་བྲབ་པར་བྱ༔ ཁྲག་ཐུན་དུག་རླངས་ཆི་ལི་ལི༔ ཚེ་དཔལ་མདའ་འཕེན་ཟངས་སེ་ཟང་༔ གནམ་ལྕགས་གྲོག་ཆེན་ཧྲི་ལི་ལི༔ ཡུངས་ཀར་རྦབ་འདྲིལ་ཤ་ར་ར༔ ཕུང་པོའི་སྟེང་དུ་བྲབ་པར་བྱ༔ ཛ་མཱ་ར་ཡ་ཧཱུྃ་ཕཊ༔ དགྲ་བགེགས་ཀྱི་སྲོག་རྩ་ལ་ཏྲིག་ནན་ཨེ་ཧུར་ཐུཾ་ཛཿམཱ་ར་ཡ་རྦད་སོད༔ ཅེས་དང༌། སྤྲོ་ན་འོག་ནས་འབྱུང་བའི་ལོ་དང་ཟླ་བ་ལ་སོགས་ཀྱང་བརྗོད༔ དེ་ནས་བསད་རྟགས་ཀྱི་དྲོད་ཚད་ཤེས་པར་བྱ་དགོས་ཏེ། སྔ་མའི་འཕྲོ་ལས། གསོད་པའི་ནང་རྟགས་མེད་པར་གནན་སྲེག་འཕང་གསུམ་བྱས་ན་དགྲ་མི་འཆིའོ༔
ཞེས་དང༌། བསད་ལས་ཚད་ལས་ཐལ་ན་རང་ཉིད་གྲིར་འཆི༔ དྲོད་ཚད་ལ་མཁས་ན་མདའ་དང་འདྲའོ༔ ཞེས་གསུངས་པས་སོ། །དེ་ཕྱིར་སོད་རྟགས་མངོན་དུ་གྱུར་ནས། གནན་པའི་ལས་བསྒྲུབ་པ་ནི། འདིར་དམིགས་སུ་མ་བསལ་ཡང་གཞུང་གཞན་ལས། གནས་ལྔར་གནམ་ལྕགས་ཙཀྲ་ནི༔ རྩིབས་བཞི་སྲ་ཞིང་ལྕི་བ་རེསཿ བསྒུལ་བསྐྱོད་མི་ནུས་མནན་པར་བསྒོམཿ ཞེས་གསུངས་པས། དམིགས་པ་གསལ་འདེབས་ནི། དགྲ་བགེགས་འབྱུང་པོའི་སྤྱི་མགྲིན་སྙིང་ག་ལྟེ༔ གསང་གནས་གནམ་ལྕགས་ཙཀྲ་རྩིབས་བཞི་པ༔ གནམ་ལྕགས་རྡོ་རྗེས་མཚན་དང་ཚིགས་ཆེན་བཞིར༔ རྒྱ་གྲམ་ལྕི་ཞིང་འཐས་དང་རིག་སྔགས་ཀྱི༔ དམོད་པས་མནན་པས་སྒོ་གསུམ་རྨོངས་ཤིང་འཐིབས༔ བསྒུལ་བསྐྱོད་སྨྲ་བསམ་མེད་པ་ཉིད་དུ་གྱུར༔ ཅེས་དམིགས་པ་གསལ་པོ་ལ། ཨྱཻ་རིང་གི་ཤམ་བུར། བེ་ཙུར་ཎ་བི་ཙུར་ཎ༔ ཨོཾ་ཨཱཿཨུཥྞིཥ༔ དུ་ནས་དུ་ནཿ ཨེ་ཀ་དུ་ནཿ ཤེ་དུ་ནན༔ བཾ་ནི་ར་ཧཱུྃ་ལཾ་སྟམ་བྷ་ཡ་ནནཿ ཞེས་དམིགས་རྟགས་དང་མ་ལྡན་བར་དུ་བསྒྲུབ། དེ་ལྟར་འགུགས་གནན་གསད་གསུམ་གྱི་ཐུན་མཚམས་ཀུན་ཏུ་དམར་གཏོར་བཱ་ལ་དང་རཀྟས་བྲན་པར་དམིགས་ནས། ན་མོ་རྩ་བརྒྱུད་བླ་མ་སོགས་དགུག་གཞུག་གི་མཐར། སྨན་རཀ་བྲན་ལ། དམ་ཉམས་དགྲ་བགེགས་བསྒྲལ་
བ་ལས་བྱུང་བའི་གཏོར་མ་ངོ་བོ་རང་བཞིན་རྣམ་པར་དག་ཅིང་རྨད་དུ་བྱུང་བ་ལས་རྣམ་པ་དགྲ་བོའི་ཤ་ཁྲག་གི་རང་བཞིན་ཡི་དམ་ཞི་ཁྲོའི་ཚོགས་དང་སྲུང་མ་དམ་ཅན་རྒྱ་མཚོའི་དགྱེས་སྐོང་དམ་པར་གྱུར། ཨོཾ་ཨཿཧཱུྃ། ཨེ་ཨ་ར་ལི་ཧྲིཾ་ཧྲིཾ་ཛ་ཛཿ གསུམ་གྱིས་བརླབ། ཧཱུྃ༔ དགྲ་བགེགས་གདུག་པ་བདུད་ཀྱི་ཚོགས༔ སྡེ་དཔུང་འཁོར་དང་བཅས་པ་ཡི༔ ཤ་ཁྲག་བདུད་རྩིའི་རྒྱ་མཚོ་འདི༔ ཁྲོ་རྒྱལ་འབར་བའི་ཚོགས་ལ་འབུལ༔ ལས་དང་བག་ཆགས་དག་པ་དང་༔ རང་གཤེད་བསམ་སྦྱོར་ངན་པ་རྣམས༔ ཁོ་རང་ལ་ནི་བཟློག་པ་དང་༔ རང་མཚོན་རང་ལ་ཟུག་པ་དང་༔ རང་ཤ་རང་གིས་ཟ་བར་མཛོད༔ རང་སྡེ་རང་གིས་ཕྱེ་མར་ཐོང་༔ རྡུལ་ཆ་ཙམ་ཡང་མེད་པར་མཛོད༔ ཧཱུྃ༔ གཏུམ་ཆེན་འབར་བ་ཁྲོ་བོའི་རྗེ༔ ཚེ་བདག་འཆི་བདག་འཁོར་ལོས་སྒྱུར༔ ཁྲོ་བོ་བཅུ་དང་སྤྲུལ་པ་རྣམས༔ འཇིགས་ཚུལ་རྔམས་པའི་ང་རོ་ཡིས༔ དགྲ་བགེགས་གནད་ནས་འགུགས་པ་དང་༔ བདག་སྲུང་རྐྱེན་ངན་བར་ཆད་བཟློག༔ ཨོཾ་བཛྲ་ཀྲོ་ཏ་རཀྵ་རཀྵ་ཧཱུྃ་ཧཱུྃ་ཕཊ༔ ཅེས་གཏོར་མ་འབུལ། དེ་ལྟར་ཐུན་གྱི་དངོས་གཞི་དགུག་གསད་མནན་གསུམ་གྱི་རྟགས་རྣམས་རྫོགས་པ་དང་ལས་མཐའ་བསྡུ་བ་ནི། གཞུང་གི་ཚོགས་མཆོད་བཤགས་པའི་བར་གྲུབ་རྗེས། རང་ཉིད་ཚེ་འཆི་ཨུཥ་གསུམ་དང་འཁོར་ཚོགས་དམ་ཅན་རྒྱ་མཚོ་རྔོམ་སྟོབས་རིངས་ཤིང་
ཁྲོས་པས་རྨོངས་འཆིང་གི་ལས་མཛད་པར་མོས་པའི་ང་རྒྱལ་དང་དགུག་གསད་གནན་གསུམ་གྱི་སྔགས་སྦྲེལ་ནས་བཟླ་བཞིན་དུ་ལིངྒ་བྲུབ་ཁུང་ནས་ཕྱུང་སྟེ་མདུན་དུ་བཀོད་ནས། རང་གྲིབ་ཕར་མི་འཆོར་བ་དང་ལིང་གྲིབ་ཚུར་མི་འགོ་པའི་ཐབས་ཀྱང་གཞུང་གཞན་ལས་འབྱུང་བ་ལྟར་བྱས་ནས། སྤྲོ་ན་གཟུ་དཔང་དང༌། དགུག་གཞུག་དྲག་པོ་ལན་གསུམ་གྱི་མཐར། གུ་གུལ་གྱིས་བདུག །ཧཱུྃ་ཁ་ཁ་མུ་ཁ། སོགས་དང༌། བསྡུ་ན། ཛྙཱ་ན་ཨ་ཡུ་ཤེ་པྲ་བེ་ཤ་ཡ་ཕཊ༔ ཅེས་བརྗོད། སློབ་དཔོན་གྱིས་ཐུན་རྫས་ཐོགས་པ་བརྡེག་ཅིང་དམོད་མོ་བྱ་བ་ནི། ཧོཿ ཞིང་བཅུ་ཚང་བའི་དགྲ་བོ་འདིསཿ སྔགས་འཆང་བདག་ལ་རྒོལ་བ་དང་༔ ཡི་དམ་ལྷ་ལ་ཕོད་བཙུགས་པསཿ གཟུགས་ཕུང་ཤིག་ལ་ཚེ་སྲོག་ཕྲོག༔ ཡས་ནས་སྟེང་གི་འཇུ་ཐག་ཆོད༔ འོག་ནས་ས་ཡི་རྟེན་ཕུར་ཕྱུང་༔ བར་དུ་རླུང་རྟའི་མཁར་པོ་ཤིག༔ གཤིན་རྗེའི་ཚོགས་ཀྱིས་བཀའ་ཆད་ཕོབ༔ སྐྱེ་མཆེད་མ་ལུས་འགག་ཏུ་ཆུག༔ རྟེན་འབྲེལ་བཅུ་གཉིས་བདུད་དུ་ཕོབ༔ དུག་ལྔའི་རང་མཚང་ཁོང་ནས་ཤིག༔ མི་ནོར་མ་ལུས་ཕྱག་མས་ཐོབ༔ དུས་ལ་བབ་པོ་ས་མ་ཡ༔ ཞེས་དང༌། ཧཱུྃ༔ ང་ནི་འཇམ་དཔལ་གཤིན་རྗེ་གཤེད༔ དགྲ་དང་བགེགས་ཀྱི་གཉེན་པོ་སྟེ༔ ཡུངས་ཀར་རྒྱལ་པོ་ཤ་རི་རཾ༔ དགྲ་བགེགས་སྟེང་དུ་བྲབ་པར་བྱ༔ ཁྲག་ཐུན་དུག་རླངས་ཆི་ལི་ལི༔ ཚེ་དཔལ་མདའ་
འཕེན་ཟངས་སེ་ཟང་༔ གནམ་ལྕགས་ཐོག་ཆེན་ཧྲི་ལི་ལི༔ ཡུངས་ཀར་རྦབ་འདྲིལ་ཤ་ར་ར༔ ཕུང་པོའི་སྟེང་དུ་བྲབ་པར་བྱ༔ ཨྱཻ་ཨྱཻ་ཨྱཻ། སོགས་ཀྱི་མཐར། ཨོཾ་ཨཱཿཨུཥྞི་ཥ་ཡ་རྦད༔ ཡན་ཏྲ་ཙཀྲ་རྦད༔ མནྟྲ་ཡ་ཙ་མ་རྦད༔ ཅེས་ཕུར་པ་ཐོགས་ལ། ཧཱུྃ༔ ཧཱུྃ་ལས་བྱུང་བའི་ཡ་མ་ནི༔ ཐུང་ལ་སྦོམ་ཞིང་གསུས་པ་ཆེ༔ འོད་ཟེར་བསྐལ་པའི་མེ་དཔུང་བཞིན༔ དུག་གསུམ་སྲེག་བྱེད་ཀཱི་ལ་ཡ༔ ཧེ་རུ་ཀ་ཡི་སྤྱན་སྔ་རུ༔ ཇི་ལྟར་ཁས་བླངས་དམ་བཅས་པ༔ དཀོན་མཆོག་བླ་མ་བརྙས་བྱེད་པ༔ དུས་ལ་བབ་པོ་ཀཱི་ལ་ཡ༔ སྐུ་སྟོད་ཞལ་གཅིག་ཕྱག་གཉིས་པ༔ གཡས་པ་རལ་གྲི་ནམ་མཁར་འཕྱར༔ གཡོན་པ་ཐོད་པ་ཁྲག་བཀང་གསོལ༔ དམ་ཉམས་སྙིང་ལ་ཀཱི་ལ་ཡ༔ སྐུ་སྨད་ཕུར་བུ་ཟུར་གསུམ་དཔལ༔ བློ་ལྡན་རྡོ་རྗེའི་ཐོ་བ་ཡིས༔ གནས་བཅུ་རྣམས་སུ་གདབ་པར་བྱ༔ ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ༔ སརྦ་དུཥྚཾ་ཕཊ༔ ཀཱི་ལ་ཡ་ཀཱི་ལ་ཡ༔ སརྦ་པཱ་པཾ་ཧཱུྃ་ཕཊ༔ ཧཱུྃ་ཧཱུྃ་ཧཱུྃ༔ བཛྲ་ཀཱི་ལ་ཡ༔ བཛྲ་དྷ་རོད་ཨཛྙཱ་པ་ཡ་ཏི༔ སརྦ་བིགྷ་ནན༔ ཀཱ་ཡ་ཝཱཀྐ་ཙིཏྟ༔ བཛྲ་ཀཱི་ལ་ཡ་ཧཱུྃ་ཕཊ༔ ཞེས་ཚེ་ཁྲུས་ཀྱི་དགོངས་པས་ཟན་ལིང་བསྒྲལ་ཞིང་མཚོན་ཆས་གཏུབས་པ་ནི། བསད་གྲི་ཐོགས་ལ། ཧཱུྃ༔ སྒྲོལ་བྱེད་གིང་ཆེན་བཅོ་བརྒྱད་པོ༔ བཤན་པ་ཆེན་པོ་སྲོག་གི་གཤེད༔ རྔམས་ཆེན་འཐོམ་པའི་སྙིང་རྗེ་མེད༔ ཤ་ཁྲག་དྲོད་ལ་རྒྱུག་ཅིང་རྔམས༔ ལས་ཀྱི་སྤྲུལ་པ་ཕྱོགས་བཅུར་འགྱེད༔
ཁ་རླངས་ནད་ཀྱི་དཔལ་དུ་འཆར༔ ལག་ན་མཚོན་ཆ་སྣ་ཚོགས་བསྣམས༔ གང་ལ་དམིགས་པ་སྔོན་དུ་སྒྲོལ༔ ཙིཏྟ་དང་ནི་ནང་ཁྲོལ་གཏུབས༔ རྣམ་ཤེས་བཀྲགས་མདངས་ལུས་སྲོག་དཔྲལ༔ ཤ་ཁྲག་རོ་ལ་སྲེད་ཅིང་ཟ༔ ཁ་གདངས་ལྕེ་བསྒྲིལ་མཆེ་བ་གཙིགས༔ རྐང་པས་བརྒྱུགས་ཤིང་ལག་པས་རྩེ༔ སྐྱེ་འགྲོ་ཀུན་གྱི་སྲོག་དབུགས་ལེན༔ ཁ་ནས་ཁྲག་འཛག་མྱོས་ཤིང་བརྒྱལ༔ ཁྱོད་ཀྱི་དམ་ཚིག་དུས་ལ་བབ༔ སྡང་བའི་དགྲ་དང་གནོད་པའི་བགེགས༔ མ་ལུས་སྲོག་གཅོད་གཟིར་ཞིང་གནོན༔ སྡང་དགྲ་གནོད་བྱེད་རྡུལ་དུ་རློགས༔ བཅོལ་བའི་ལས་རྣམས་འགྲུབ་པར་མཛོད༔ རིངས་པར་ཁུག་ལ་མྱུར་དུ་སྒྲོལ༔ ཞེས་མཐར་གསད་སྔགས་བཟླ་བཞིན་དུ་ལིངྒ་གཏུབས་ལ་བསྟབ་པ་ནི། ཧཱུྃཿ གྲུ་གསུམ་མཐིང་ནག་འབར་བའི་ད་ལ་ནས༔ ཚེ་འཆི་ཨུཥ་གསུམ་ཞལ་གདངས་ཤིག༔ སྡང་བའི་དགྲ་དང་གནོད་པའི་བགེགས༔ ཞལ་དུ་བསྟབ་པོ་ཁ་རཾ་ཁཱ་ཧི༔ བཅོམ་ལྡན་སྐུ་ཡི་གཡོན་རོལ་ནས༔ རྡོ་རྗེ་ཁྲོས་མ་ཞལ་གདངས་ཤིག༔ སྡང་བའི་དགྲ་དང་གནོད་པའི་བགེགས༔ ཞལ་དུ་བསྟབ་པོ་ཁ་རཾ་ཁཱ་ཧིཿ རྩ་བའི་ལྷ་དྲུག་རྒྱན་གྱི་ལྷ་བརྒྱད་ཀུན༔ དགྲ་བགེགས་ཤ་ནི་བཟའ་བའི་མཆོག༔ ཞེ་སྡང་རུས་པའི་མཆོད་པ་བཞེས༔ དགྲ་བོའི་གློ་སྙིང་སྨན་གྱི་རྒྱུ༔ ང་རྒྱལ་གློ་སྙིང་མཆོད་པ་འབུལ༔ དགྲ་བོའི་མཁྲིས་པ་ཛ་གད་རྒྱུ༔ ཕྲག་དོག་མཁྲིས་པའི་མཆོད་པར་བཞེས༔ འདི་ནི་དུག་ལྔའི་མཆོད་པ་སྟེ༔
ཟིལ་གནོན་ལྷ་ཚོགས་བཞེས་སུ་གསོལཿ མ་ཧཱ་མཱཾ་ས་ལ་ཁཱ་ཧིཿ མ་ཧཱ་རཀྟ་ལ་ཧིཿ མ་ཧཱ་ཙིཏྟ་ལ་ཁཱ་ཧིཿ མ་ཧཱ་གོ་རོ་ཙ་ན་ལ་ཁཱ་ཧིཿ མ་ཧཱ་བ་སུ་ཏ་ལ་ཁཱ་ཧིཿ ཀིཾ་ནི་རི་ཏི་ཁཱ་ཧིཿ ཞེས་ལིང་རོ་གཏོར་མར་བྲན་ཞིང་སྨན་རཀ་སྒྲོན། དེ་རྗེས་ལྷག་མ་གྱེར། དེ་ནས་གནན་སྔགས་བཟླ་བཞིན་པར་ལིངྒ་ལ་གསད་སྔགས་ཀྱིས་ངར་བཏགས་པའི་དུག་ཁྲག་གིས་ཁྲམ་བཏབ་པ་ལ། དགྲ་འདྲེའི་ལྟེབ་ཚུལ་མང་ཡང༌། རང་གཞུང་དུ། གཡས་ཀྱིས་གཡོན་བཀབ། སོགས་སུ་གསུངས་པ་བཞིན་ལྟེ་བ་ནས་ཤི་སྐྲ་དང་ཚོན་སྐུད་ཀྱིས་རྒྱ་གྲམ་དུ་བཅིང༌། གཞུང་ལས་གསུངས་པའི་དམིགས་བསལ་གྱི་གནན་ཐོད་འབྱོར་ན་རབ། དེ་མིན་རང་རང་ལ་རུང་མཐུན་དང༌། རང་གཤེད་ཀྱི་གནད་དང་ལྡན་པའི་སྣོད་དུ་གཞུག །ཐུན་རྫས་དང་སྲི་ཅན་ལ། ཚྭ་དང་བ་ཚྭ་བུལ་ཏོག་ཀྱང་བསྣན་པས་བར་སེང་མེད་པར་བཀང་སྟེ་ཐལ་ཆེན་གྱི་འདམ་པའམ་ལ་ཆས་བཀག །བཛྲ་ཀརྨ་ཧ་ན་ཧ་ན་བཛྲ་བཛྲཿ ཞེས་རྡོ་རྗེའི་རྒྱ་རྒྱག །མན་ངག་ལས་གསུངས་པ་ལྟར་རྟེན་འབྲེལ་ནག་པོས་རབ་ཏུ་གནས། ཕུང་རེ་དང་བྱད་ཐག་གིས་བཅིངས་ལ་རྩང་རྒྱ་གྲམ་དུ་གཟེར་ཏེ་ལག་ཚགས་དམ་པར་བྱའོ། །དེ་ནས་སྐབས་འདིའམ་ལོང་ཁྱབ་དང་བསྟུན་པའི་གང་བྱ་བའི་ས་ཕྱོགས་རུང་མཐུན་དམིགས་བསལ་སོགས་ཀྱིས་དེར་བསྐྱོད་ལ། གསེར་སྐྱེམས་དང་དགོས་པའི་ཡོ་བྱད་འདུ་བྱས་ནས། ས་བདག་ལྟོ་འཕྱེའི་ཐིག་རྩ་རང་ལུགས་ཕྲ་ཞིབ་ཀྱི་ལག་ལེན་ལྟར་དཔེ་རིས་བལྟས་ཆོག་མ་ལས་ཤེས་སོ། །རམ། ཡང་ན་ལྟ་བ་རྒྱས་
ཐེབས་ངེས་པའི་རྣལ་འབྱོར་པས་ཆོས་ཐམས་ཅད་དེ་བཞིན་ཉིད་དུ་རོ་གཅིག་པར་ཐག་ཆོད་པའི་མོས་པ་བརྟན་པོས་སྟྭ་རེ་འཇོར་སོགས་རྐོ་བྱེད་ཀྱི་ལག་ཆར་ཁྲོ་བཅུའི་སྔགས་ཀྱིས་ངར་བཏབ་པས་ས་དམིག་དོང་ཚད་སོགས་གསང་སྔགས་ཀྱི་གཞུང་ཆེན་པོ་ནས་གསུངས་པའི་ངེས་པ་བཞིན་མཛད་པ་ལས། བརྐྱང་ཁྲུ་འདྲེ་སྐས་བཙུགས་པ་ལྟ་བུའི་ས་དམིགས་འཚོལ་བ་ལུང་རིག་གཉིས་ཀས་དབེན་ཏེ་གསང་ཆེན་གྱི་མིག་ལྟོས་ལ་གནོད་པས་དོར་ན་ལེགས་སོ། །དེ་ལྟར་ལེགས་པ་གྲུབ་ནས། ལས་གཞུང་གི་བསྐུལ་བ་དང་ཆད་ཐོ་སྒོ་དབྱེ་སོགས་སྤྱི་འགྲོ་ལྟར་བྱས་ནས། གོང་གནོན་གྱི་གཏོར་མ། གནན་ཆས། མི་ཁའི་རྫས་ཐལ་འདམ་སོགས་ཁྱེར་ནས་གནན་སར་སླེབས་པ་དང༌། ཡི་དམ་གྱི་ང་རྒྱལ་བརྟན་པོས་ཐེབས་ཕྱོགས་དང་མཐུན་པར་འདུག་སྟེ་གནས་ཡུལ་གཞི་བདག་ལོ་ཟླ་ཞལ་དུས་ལ་དབང་བའི་རིགས་ལ་གསེར་སྐྱེམས་བཤམས་ལ། ཧཱུྃ་བྷྱོཿ བྱིན་རླབས་ཐུགས་རྗེའི། སོགས་ཀྱིས་གསེར་སྐྱེམས་ཕུལ། བཀའ་བསྒོ། དེ་ནས་སྒྲུབ་རྟེན་གྱི་རལ་གྲིའམ་ཕུར་བུ་དོང་ཁར་བསྣུན་ལ། ཐོ་ཆེན་དགྲ་སྟྭ་བསྣུན་པས་ས་གཞི་གས༔ མཐའ་ཡི་རྒྱ་མཚོ་སྔོ་མེར་གསལ་བར་གྱུརཿ དེ་དབུས་གནམ་ལྕགས་ཁང་པ་སྒོ་མེད་ནང་༔ ལས་ཀྱི་གཤིན་རྗེ་ནག་པོ་མ་ཧེའི་གདོང་༔ གཏིང་ནས་ཁྲོས་པ་ཞལ་གདངས་མཆེ་བ་གཙིགསཿ ལག་གཡས་དབྱུག་ཐོ་གཡོན་པས་སྦྲུལ་ཞགས་ཐོགས༔ གཅེར་བུ་རྒྱན་མེད་མ་ཧེའི་སྟེང་ན་འགྱིང་༔
གཤིན་རྗེའི་འཁོར་ཚོགས་རྔམས་པའི་ཚུལ་གྱིས་བསྐོར༔ མངོན་སུམ་ལྟ་བུར་གསལ་བ་ཉིད་དུ་གྱུར༔ ཅེས་གསལ་བཏབཿ དེ་ནས་བསྐུལ་བ་ནི། ཧཱུྃཿ འཆི་བདག་ནག་པོའི་ལྷོ་ཕྱོགས་ཀྱི༔ རིམ་པ་བདུན་གྱི་ས་འོག་ན༔ སྲོག་ལ་རྔམས་པའི་གཤིན་རྗེ་ནིཿ ནག་པོ་མ་ཧེའི་གདན་སྟེངས་སུ༔ ཡ་ལས་བྱུང་བའི་དབྱུག་པ་ནི༔ མི་མགོས་མཚན་པ་ལས་བྱུང་བཿ གཏིང་ནས་ཁྲོས་པ་མ་ཧེའི་གདོང་༔ ཟ་བྱེད་ཞལ་གདངས་མཆེ་བ་གཙིགས༔ ཁྲོས་པའི་སྤྱན་གསུམ་དམར་པོ་འཁྲུགཿ སྐྲ་སེར་སྨ་ར་གྱེན་དུ་བརྫིསཿ ལག་གཡོན་ཞགས་པས་དགྲ་བགེགས་འཆིང་༔ ལག་གཡས་དབྱུག་ཏོས་རྡུལ་དུ་རློགསཿ ཆོས་ཀྱི་རྒྱལ་པོ་གཤིན་རྗེའི་ཚོགས༔ མ་མོ་ཆེན་མོ་ཙ་མུནྟྲི༔ བྲན་དང་བཅས་པའི་དུས་ལ་བབས༔ ཤ་ཆེན་ཁྲག་ཞག་རྒྱ་མཚོ་ཡི༔ མཆོད་སྦྱིན་གཏོར་མ་འདི་བཞེས་ལཿ རྒྱལ་བས་བསྒོས་པའི་བཀའ་བཞིན་དུ་༔ སྙིང་རྗེས་དགྲ་བགེགས་མྱུར་དུ་སྒྲོལ༔ སྡང་བའི་དགྲ་དང་གནོད་པའི་བགེགས༔ ཟུང་ཞིག་ཆིངས་ཤིག་རྣམ་པར་སྡོམས༔ ཁུག་ཅིག་དྲོངས་ཤིག་དབང་དུ་སྡུས༔ སོད་ཅིག་སྒྲོལ་ཅིག་རེངས་པར་གྱིས༔ ཕྱེས་ཤིག་གནོན་ཅིག་རྨུགས་པར་གྱིས༔ ཐུལ་ཅིག་ཆོམས་ཤིག་རྣམ་པར་ཤིག༔ རྡུལ་ཆ་ཙམ་ཡང་མེད་པར་གྱིས༔ བཅོལ་བའི་ཕྲིན་ལས་མྱུར་དུ་སྒྲུབས༔ དམར་གཏོར་ཤ་ཁྲག་གིས་བརྒྱན་པར། ན་མོ་སོགས་དགུག་གཞུག་གང་རུང་མཐར། ཨོཾ་ཨེ་ཨ་ར་ལི་
ཧྲིཾ་ཧྲིཾ་ཛཿ བརྗོད་ཅིང༌། དམ་རྫས་མཐུན་པའི་གཏོར་མ་འདི་བཞེས་ལ༔ བསྟན་པ་འཇིག་པའི་དམ་ཉམས་དགྲ་བོ་དངཿ བར་དུ་གཅོད་པའི་འབྱུང་པོ་ཕོ་མོ་རྣམས༔ ལུས་ངག་ཡིད་གསུམ་ལྡང་དུ་མེད་པར་ནོན༔ རིག་སྔགས་དྲག་པོས་གྲོལ་བ་མེད་པར་ཆིངས༔ བྱས་པའི་ལས་དང་ནུས་མཐུ་གཏན་ནས་སོདཿ རྟག་ཏུ་ཐར་བ་མེད་པའི་གནས་སུ་ཆུགཿ ཅེས་དམར་གཏོར་དོང་ནང་དུ་འབུལ༔ དེ་ནས་གནན་ཆས་ལ་དམིགས་ཏེ། ན་མོ་རྩ་བརྒྱུད་བླ་མ། སོགས་དགུག་གཞུག་དྲག་པོའི་མཐར། ཧཱུྃ་སེམས་ཅན་ལས་ངན་སྡིག་ཅན་ཁྱོད༔ གཏད་དོ་གཤིན་རྗེའི་ལག་ཏུ་གཏདཿ བཅིང་ངོ་རྒྱ་མཚོའི་གཏིང་དུ་བཅིངས༔ མནན་ནོ་རི་རབ་འོག་ཏུ་མནནཿ སྦྱོང་ངོ་འབྱུང་བ་བཞི་ལ་སྦྱངས༔ སྦའོ་ཀླུ་རྒྱལ་སྙིང་ལ་སྦ༔ འདི་ལས་འདའ་བར་མ་བྱེད་ཅིགཿ བསྡུ་ན་དེ་ཙམ་གྱིས་ཀྱང་ཆོག་པར་སེམས། ཧཱུྃ་དམ་ཉམས་དགྲ་བོ་ལས་ངན་ཁྱོད༔ ཁྱོད་མདང་སུམ་མདང་གི་རྨི་ལམ་ན༔ རྨི་ལམ་མི་བཟང་རྨི་ལམ་ངན༔ སྟེང་ནས་འབྲུག་སྒྲ་ལྡིར་བ་རྨིས༔ དུང་ཁང་ནང་དུ་ཉལ་བ་རྨིས༔ ལུས་ལ་འཇའ་ཚོན་གྱོན་པ་རྨིས༔ འོག་ཏུ་རྟ་སྔོན་ཞོན་པ་རྨིས༔ བར་ན་གློག་ལྟར་འཁྱུག་པ་རྨིས༔ སྟེང་ནས་དུང་ཆར་འབབ་པ་རྨིསཿ གོས་ནག་ལུས་ལ་གྱོན་པ་རྨིས༔ ཧཱུྃ་ད་ཉོན་ཅིག་སྡིག་ཅན་ལས་ངན་ཁྱོད༔ སྟེང་དུ་འབྲུག་སྒྲ་ལྡིར་བ་ནི༔ སྔགས་འཆང་ང་ཡི་སྔགས་སྒྲ་ཡིན༔ བར་
སྣང་གློག་ལྟར་འཁྱུག་པ་ནི༔ སྔགས་ལྕེ་གློག་ལྟར་འཁྱུག་པ་ཡིན༔ དུང་གི་ཆར་པ་འབབ་པ་ནི༔ ཡུངས་ཀར་ཐུན་གྱིས་བྲབ་པ་ཡིན༔ དུང་ཁང་ནང་དུ་ཉལ་བ་ནི༔ ཐོད་སྒང་སྐྱ་མོའི་ནང་དུ་ཚུད་པ་ཡིན༔ འཇའ་ཚོན་ལུས་ལ་གྱོན་པ་དེ༔ བལ་ཚོན་སྣ་ལྔས་བསྡམས་པ་ཡིན༔ འོག་རྟ་སྔོན་པོ་ཞོན་པ་དེ༔ འགལ་བའི་རྟ་ལ་ཞོན་པ་ཡིན༔ ལུས་ལ་གོས་ནག་གྱོན་པ་དང་༔ རོ་རས་ནག་པོས་གཏུམས་པ་ཡིན༔ སྙིང་ལ་འོད་ཟེར་ཕོག་པ་དེ༔ ལྷ་སྲུང་རྫུ་འཕྲུལ་ཕོག་པ་ཡིན༔ ལམ་རོགས་དམག་མིས་བྱེད་པ་དེ༔ ང་ཡི་བཤན་པ་བརྒྱུགས་པ་ཡིན༔ དམ་ཉམས་དགྲ་འདྲེ་བྱུར་གསུམ་ཁྱོད༔ ཁྱོད་མནན་རྟགས་འཆི་རྟགས་ཐམས་ཅད་ཤར༔ སྡིག་ཅན་བྱ་བའི་མནར་མེད་ཁྱོད༔ ལུས་ངག་ཡིད་གསུམ་སྟྭམ་བྷ་ཡ་ནན༔ ཞེས་དང༌། སྲི་ཅན་ལ་དཀྱུས་ལས། ཧཱུྃ་སྐྱེས་པ་ཕོ་སྲི་གང་ནས་ལངས༔ ཕོ་སྲི་གངས་དཀར་སྟོངས་ནས་ལངས་༔ རྫུ་བ་གཡག་ཕོ་དཀར་པོར་བརྫུ༔ གངས་དཀར་སྟོངས་སུ་ཕོ་སྲི་མནན༔ མནན་ནོ་གཟིར་རོ་མ་ལྡང་ཞིག༔ ཧཱུྃ་མོ་སྲི་ལངས་པ་གང་ནས་ལངས༔ མོ་སྲི་རྒྱ་མཚོའི་སྟེང་ནས་ལངས༔ རྫུ་བ་ཁྱི་མོ་ནག་མོར་བརྫུ༔ ཁྱི་མོ་ནག་མོའི་ཐོད་པར་རུ༔ རྒྱ་མཚོའི་གཏིང་དུ་མོ་སྲི་མནན༔ མནན་ནོ་གཟིར་རོ་མ་ལྡང་ཞིག༔ ཧཱུྃ་ཆུང་སྲི་ལངས་པ་གང་ནས་ལངས༔ ཆུང་སྲི་ཉལ་སའི་འོག་ནས་ལྡང་༔ རྫུ་བ་ཁྱི་གུ་ཕྲུག་གུར་བརྫུ༔ ཁྱི་གུ་ཕྲུག་
གུའི་ཐོད་པ་རུ༔ ཆུང་སྲི་ཉལ་སའི་འོག་ཏུ་མནན༔ མནན་ནོ་གཟིར་རོ་མ་ལྡང་ཞིགཿ ཧཱུྃ་དགྲ་སྲི་ལངས་པ་གང་ནས་ལངས༔ དགྲ་སྲི་ལ་རྫས་འོག་ནས་ལངས༔ རྫུ་བ་སྤྱང་ཀི་སྔོན་པོར་བརྫུ༔ སྤྱང་ཀི་སྔོན་པོའི་ཐོད་པ་རུ༔ དགྲ་སྲི་ལ་རྫས་འོག་ཏུ་མནན༔ མནན་ནོ་གཟིར་རོ་མ་ལྡང་ཞིག༔ ཧཱུྃ་ཕྱུགས་སྲི་གོད་སྲི་གང་ནས་ལངས༔ ཕྱུགས་སྲི་ར་བའི་དཀྱིལ་ནས་ལངས༔ རྫུ་བ་འབྲི་མོ་རོག་མོར་བརྫུ༔ སེམས་ཅན་གང་ཤིའི་ཐོད་པ་རུ༔ ཕྱུགས་སྲི་ར་བའི་དཀྱིལ་དུ་མནན༔ མནན་ནོ་གཟིར་རོ་མ་ལྡང་ཞིག༔ དགྲ་བོ་འཕྱོ་ཞིང་སྨྱོ་རུ་ཆུག༔ དམ་ཉམས་དགྲ་བགེགས་བྱུར་གསུམ་མནན༔ སྟམ་བྷ་ཡ་ནན༔ ཞེས་བརྗོད་ཅིང་ལིདྒ་མནན་དོང་དུ་ལ་ཕྱོགས་མ་འཆོལ་བར་བསྐྱུར། ཇི་བཞིན་བསྡད་ན་ལས་གྲུབ་བོ། །དམིགས་བྱ་ཁོང་ཆུད་གཤིན་རྗེའི་ཞལ་བསྡམས་ཏེ༔ མནན་པའི་ལས་སྦྱར་དམ་ཉམས་རཱུ་ཏྲ་འདི༔ བསྐལ་པ་མ་སྟོངས་བར་དུ་མི་ཐར་བསཿ མུན་ནག་རུམ་གྱི་ནང་ནས་རྒྱ་མཚོ་གཏིངཿ རིམ་བདུན་ས་འོག་གཤིན་རྗེའི་གྲོང་ཁྱེར་སོང་༔ ཞེས་མི་ཁའི་རྫས་རྣམས་བླུགས། དུར་གཡམ་ལ་སྟོང་ཁམས་དང་རྒྱ་གྲམ་བྲིས་པས་བཀབཿ ཐལ་འདམ་གྱིས་ལྕིབས་ལ་ཁྲོ་ཆུས་བསྡམས་པར་བསམས། ལོ་དང་ཟླ་བ་ལ་དགྲ་དར་བ་ཐམས་ཅད་ནན་ཆིངས་བྲུབ། ཞག་དང་ཟ་མ་ལ་དགྲ་དར་བ་ཐམས་ཅད་ནན་ཆིངས་བྲུབཿ
སྲོག་ལུས་དབང་ཐང་ལ་དགྲ་དར་བ་ཐམས་ཅད་ནན་ཆིངས་བྲུབ། རླུང་རྟ་དང་སྨེ་བ་ལ་དགྲ་དར་བ་ཐམས་ཅད་ནན་ཆིངས་བྲུབ། ཁྲམ་ལ་འདེབས་པ་ཐམས་ཅད་ནན་ཆིངས་བྲུབ། མགོ་ཐོག་ནས་རི་ལས་ལྗི་བའི་དགྲ་བོ་ཐམས་ཅད་ནན་ཆིངས་བྲུབ། རྐང་འོག་ནས་ཚེར་ལས་རྩུབ་པའི་དགྲ་བོ་ཐམས་ཅད་ནན་ཆིངས་བྲུབ། ཕྱི་དགྲ་མེ་ལྟར་འབར་བར་བྱེད་པའི་དགྲ་བོ་ཐམས་ཅད་ནན་ཆིངས་བྲུབ། ནང་དགྲ་རླུང་ལྟར་འཚུབ་པར་བྱེད་པའི་དགྲ་བོ་ཐམས་ཅད་ནན་ཆིངས་བྲུབ། རྒྱབ་ནས་འདེད་པའི་དགྲ་བོ་ཐམས་ཅད་ནན་ཆིངས་བྲུབ། མདུན་ནས་བསྒུག་པའི་དགྲ་པོ་ཐམས་ཅད་ནན་ཆིངས་བྲུབ། བཟང་དགྲ་གོང་ནས་བསྡིགས་པའི་དགྲ་བོ་ཐམས་ཅད་ནན་ཆིངས་བྲུབ། ངན་དགྲ་འོག་ནས་འཇབ་པའི་དགྲ་བོ་ཐམས་ཅད་ནན་ཆིངས་བྲུབ། ལུས་ལ་སྦྲུལ་ལྟར་འཁྱིལ་པའི་དགྲ་བོ་ཐམས་ཅད་ནན་ཆིངས་བྲུབ། ཀླད་ནས་རྦབ་ལྟར་འདྲིལ་བའི་དགྲ་བོ་ཐམས་ཅད་ནན་ཆིངས་བྲུབ། ཞབས་སུ་དོང་ལྟར་འདྲུ་བའི་དགྲ་བོ་ཐམས་ཅད་ནན་ཆིངས་བྲུབ། ལོང་པ་བརྒྱའི་མི་ཁ་ཟུག་པ་ཐམས་ཅད་ནན་ཆིངས་བྲུབ། ངན་པ་སྟོང་གི་བྲ་མཆུ་ཐམས་ཅད་ནན་ཆིངས་བྲུབ། སྔ་དགྲ་ལག་གིས་བརྡར་བའི་དགྲ་བོ་ཐམས་ཅད་ནན་ཆིངས་བྲུབ། ཕྱི་དགྲ་ཡིད་ལ་བརྣག་པའི་དགྲ་བོ་ཐམས་ཅད་ནན་ཆིངས་བྲུབ། ད་དགྲ་མདུན་ནས་བཤམས་པའི་
དགྲ་བོ་ཐམས་ཅད་ནན་ཆིངས་བྲུབ། མདུན་ནས་ཁྱི་ལྟར་ཟུག་པའི་དགྲ་བོ་ཐམས་ཅད་ནན་ཆིངས་བྲུབ། ལོགས་ནས་སྤྱང་ལྟར་འཇབ་པའི་དགྲ་བོ་ཐམས་ཅད་ནན་ཆིངས་བྲུབ། གཟུགས་ཅན་དགྲ་བོའི་དམག་དཔུང་ཐམས་ཅད་ནན་ཆིངས་བྲུབ། གཟུགས་མེད་ལྷ་འདྲེའི་ཟ་ཁ་བཏོད་པ་ཐམས་ཅད་ནན་ཆིངས་བྲུབ། འབྱུང་བཞིའི་དགྲ་དར་བ་ཐམས་ཅད་ནན་ཆིངས་བྲུབ། སྐྱེས་པ་ཕོ་བརྒྱའི་མདའ་གྲལ་དུ་གླེང་བའི་མི་ཁ་ཐམས་ཅད་ནན་ཆིངས་བྲུབ། ཟ་མ་མོ་བརྒྱའི་འཕོང་ར་ན་གླེང་བའི་མི་ཁ་ཐམས་ཅད་ནན་ཆིངས་བྲུབ། བྱིས་པ་ཆུང་གི་རྩེ་ར་ན་གླེང་བའི་མི་ཁ་ཐམས་ཅད་ནན་ཆིངས་བྲུབ། མགར་བའི་སོལ་ཁང་དུ་གླེང་བའི་མི་ཁ་ཐམས་ཅད་ནན་ཆིངས་བྲུབ། མཉེན་པའི་གྲུ་ཚུགས་སུ་གླེང་བའི་མི་ཁ་ཐམས་ཅད་ནན་ཆིངས་བྲུབ། མགྲོན་པོ་ཁ་དལ་གྱིས་གླེང་བའི་མི་ཁ་ཐམས་ཅད་ནན་ཆིངས་བྲུབ། དགྲ་ཆགས་པ་ཐམས་ཅད་ནན་ཆིངས་བྲུབ། བདུད་ལངས་པ་ཐམས་ཅད་ནན་ཆིངས་བྲུབ། སྔགས་པའི་སྒྲུབ་ཁང་དུ་གླིང་བའི་མི་ཁ་ཐམས་ཅད་ནན་ཆིངས་བྲུབ། བོན་པོའི་གཡང་གྲལ་དུ་གླེང་བའི་མི་ཁ་ཐམས་ཅད་ནན་ཆིངས་བྲུབ། བླ་མའི་ཆོས་ར་ན་གླེང་པའི་མི་ཁ་ཐམས་ཅད་ནན་ཆིངས་བྲུབ། བཙུན་པའི་ཚོགས་གྲལ་དུ་གླེང་བའི་མི་ཁ་ཐམས་ཅད་ནན་ཆིངས་བྲུབ། བུ་མོའི་བྲོ་ར་ན་གླེང་
བའི་མི་ཁ་ཐམས་ཅད་ནན་ཆིངས་བྲུབ། གཙོ་བོའི་གྲོས་ར་ན་གླེང་བའི་མི་ཁ་ཐམས་ཅད་ནན་ཆིངས་བྲུབ། བརྒྱ་ཁ་མང་གིས་གླེང་བའི་མི་ཁ་ཐམས་ཅད་ནན་ཆིངས་བྲུབ། སྟོང་མིག་མང་གིས་བལྟ་བའི་མི་ཁ་ཐམས་ཅད་ནན་ཆིངས་བྲུབ། ཟ་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། འཕྲོག་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། བཅོམ་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། བརྡུང་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། གསོད་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། བརྐུ་དགོས་ཟེར་བའི་དགྲ་བོ་ཐམས་ཅད་ནན་ཆིངས་བྲུབ། ཉེ་བས་དགྲ་ཤོམ་བྱེད་པའི་དགྲ་བོ་ཐམས་ཅད་ནན་ཆིངས་བྲུབ། ཁྱིམ་མཚེས་ཀྱིས་རྐུ་ཤོམ་བྱེད་པའི་དགྲ་བོ་ཐམས་ཅད་ནན་ཆིངས་བྲུབ། སྐྱེས་པ་ཕོའི་སྲི་ལངས་པ་ཐམས་ཅད་ནན་ཆིངས་བྲུབ། བུད་མེད་ཀྱི་མོ་སྲི་ལངས་པ་ཐམས་ཅད་ནན་ཆིངས་བྲུབ། བྱིས་པའི་ཆུང་སྲི་ལངས་པ་ཐམས་ཅད་ནན་ཆིངས་བྲུབ། རྒན་པོའི་རྒན་སྲི་ལངས་པ་ཐམས་ཅད་ནན་ཆིངས་བྲུབ། གཞོན་པའི་གཞོན་སྲི་ལངས་པ་ཐམས་ཅད་ནན་ཆིངས་བྲུབ། དར་མའི་དར་སྲི་ལངས་པ་ཐམས་ཅད་ནན་ཆིངས་བྲུབ། ཕུང་སྲི་གོད་སྲི་ལངས་པ་ཐམས་ཅད་ནན་ཆིངས་བྲུབ། བསྟན་དགྲའི་ལུས་ངག་ཡིད་གསུམ་སྟྭམ་བྷ་ཡ་ནན༔ ཞེས་ཐལ་བརྡེབ་བྱ་
ཞིང་རྔ་མས་བྲབ། མེ་ཆུ་གོ་ལྡོག་གི་རྒྱ་དང་སས་ཅུང་ཟད་གཡོགས། དེའི་སྟེང་དུ་ཚྭ་ཚྭ་ནག་པོ་གཅིག་བཞག་ལ་སངས་རྒྱས་དོན་ཡོད་གྲུབ་པའི་ཕོ་བྲང་བཏབ་པར་བསམས་ལ། ངག་ཏུ། ནམ་མཁའ་རླུང་མེ་ཆུ་ས་རི་རབ་འོག༔ མནན་པ་ཡིན་གྱིས་ལྡང་བར་མ་བྱེད་ཅིག༔ སངས་རྒྱས་དོན་ཡོད་གྲུབ་པས་རྒྱས་བཏབ་བོ༔ དམིགས་མེད་ཆོས་ཀྱི་དབྱིངས་སུ་ས་མ་དྷི༔ ཞེས་བརྗོད་ས་རིམ་པ་བདུན་གྱིས་གཡོགས། ཁོད་སྙོམས་པར་བྱས་ལ་རྟ་བྲོ་བརྡུང་བ་ནི། སྔགས་སྡེབ་ལས། མི་མཐུན་གླུ་སྣ་བླང་བ་ནི༔ ལས་མཇུག་བྲོ་ཡིས་བསྡུ་བ་ཡིན༔ ཞེས་གསུངས་པ་བཞིན་མཆེད་ལྕམ་རྣམས་མཐེའུ་ཆུང་སྦྲེལ། བྲོ་ར་གྲུ་གསུམ་དུ་བཅས་ལ་ཁྲོ་བོའི་སྟངས་སྟབས་དང་བཅས་ཏེ། གཅིག་ནི་བརྗོད་མེད་ཉག་གཅིག་རྒྱ༔ གཉིས་ནི་ཐབས་དང་ཤེས་རབ་རྒྱ༔ གསུམ་ནི་སྐུ་གསུང་ཐུགས་ཀྱི་རྒྱ༔ བཞི་ནི་ཕྱག་རྒྱ་བཞི་ཡི་རྒྱ༔ ལྔ་ནི་ཡེ་ཤེས་ལྔ་ཡི་རྒྱ༔ དྲུག་ནི་ཕ་རོལ་ཕྱིན་དྲུག་རྒྱ༔ བདུན་ནི་མ་མོ་བདུན་གྱི་རྒྱ༔ བརྒྱད་ནི་དུར་ཁྲོད་བརྒྱད་ཀྱི་རྒྱ༔ དགུ་ནི་ཧེ་རུ་ཀ་ཀློང་དགུའི་རྒྱ༔ བཅུ་ནི་ཁྲོ་རྒྱལ་བཅུ་ཡི་རྒྱ༔ ཁྱོད་ལ་བརྒྱ་བཅུ་བརྩེགས་ཏེ་གདབ༔ རི་རབ་བརྗིད་པས་སྟེང་ནས་མནན༔ དཔའ་བོའི་བྲོ་གར་བཅས་ཏེ་བརྡུང་༔ བསྐལ་པ་ཇི་སྙེད་མཐའ་རུ་མནན༔ ཨོཾ་ལཾ་ཧཱུྃ་ལཾ་སྟཾ་བྷ་ཡ་ནན༔ ཞེས་བྲོ་བརྡུང༌། དེ་རྗེས་གོང་གནོན་གཏོར་མ་གཞུང་
བཞིན་འཕངས། སྤྲོ་ན་གཏོར་གཞོང་མནན་སྟེང་དུ་ཁ་སྦུབ་ལ། ཧཱུྃ་སུམྦྷ་ནིའི་མཐར། སྟོང་གསུམ་བརྡལ་བ་དཔལ་གྱི་གཞལ་ཡས། སོགས་བརྗོད་མཐར་གནན་བྱ་གནོན་བྱེད་ཐམས་ཅད་གསལ་སྟོང་འཛིན་མེད་ངང་ལ་དར་ཅིག་མཉམ་པར་འཇོག་པ་ནི་དོན་དམ་པའི་མནན་པ་སྟེ་ཚེགས་ཆུང་ལ་དོན་ཆེ་བ་ཞིག་གོ། །རྒྱུད་གཞན་དང་མཁས་པའི་མན་ངག་ཏུ་རང་ལ་ཕྱིར་མི་ཟློག་པའི་གནད་འགག་གསུང་པའང་སྐབས་འདི་ཉིད་དུ་དྲན་པར་བྱ། སྤྱི་ཆིངས་ལས། དགྲ་བགེགས་ཞི་བའི་རྟགས་ལྡན་ན༔ བཤགས་ཤིང་གསོ་བའི་ཆོ་ག་དང་༔ ཚེ་ཆོག་དག་ལ་འབད་པར་བྱ༔ ཞེས་གསུངས་པ་བཞིན་ནང་དུ་ལོག་ནས་ནོངས་བཤགས། གཏང་རག་ཚེ་འགུགས་སོགས་བྱ་བ་ཡང་གནད་འགག་གོ། །འདིར་སྨྲས་པ། རབ་འབར་འཇིགས་བྱེད་འཇམ་དཔལ་ཧ་ལའི་མདོག །རབ་ཏུ་ཁྲོས་པ་ཚེ་འཆི་ཨུཥ་གསུམ་གྱི། །རབ་འབྱམས་ལས་བཞིའི་ཕྲིན་ལས་ན་ཀྲའི་གྲོང༌། །རབ་ཡངས་མཐའ་དབུས་གཏིང་མཐའ་མེད་པ་ནས། །མངོན་སྤྱོད་དམོད་པའི་མཐའ་སྡུད་རླུང་ལ་བསྐུར། །བུད་ཤིང་བྱ་དང་རྒྱ་མཚོར་སྦ་བ་ལས། །འདི་ནི་ཕྱི་མའི་བཞེད་གཞུང་གནན་པའི་ཁྲིགས། །གབ་དཀྲུགས་དགོངས་དོན་སྙིང་པོར་དྲིལ་ཏེ་བཀོད། །དེང་དུས་བསྐྱེད་རྫོགས་མན་ངག་གཞུང་དོན་ལས། །ཁམ་རེའི་ཟས་ལ་འདམ་པའི་གནས་སྐབས་སུ། །འདི་འདྲ་གདེངས་ཅན་
མདུན་སར་གླ་རྩི་བཞིན། །ཕྱོགས་ལྷུང་ཚིག་གི་ཟུག་རྔུས་གནོད་ལས་ཅི། །འོན་ཏེ་སྐལ་མཉམ་འགའ་ཡིས་བསྐུལ་འདེབས་དང༌། །གཏེར་ཆོས་འདི་ལ་བདག་གིར་བྱེད་པའི་སླད། །རྨ་མེད་ལྷག་བསམ་དག་པས་ཉེར་བསྒྲུབས་ལ། ནོངས་པ་མཆིས་ན་སྙིང་ནས་ལྷ་ལ་བཤགས། །གལ་ཏེ་ཚིག་ཤར་ཀློག་པ་ཙམ་ལ་ཡང༌། །རོ་འཛིན་མདུད་པའི་རྒྱར་ཆུད་སྐྱེ་བོ་ཡིས། །སྒྲོས་ངན་ཁ་ཏྭའི་ལོག་སྨྲས་མགྲིན་པ་འདེགས། །དེ་ནི་སྙིང་རྗེའི་གཞི་ལས་དོ་ཟླ་མིན། །ཞེས་འཇམ་དཔལ་གཤིན་རྗེ་དུག་རི་ནག་པོ་སུམ་སྒྲིལ་གྱི་གནན་པའི་ལས་ཁྲིགས་རི་རབ་ནག་པོ་ཞེས་བྱ་བ་ཝ་གིནྡྲ་དྷརྨ་ཀཱིརྟི་སོགས་དོན་གཉེར་འགའ་དང་རང་ལ་མཁོ་ཕྱིར་གཞུང་གི་དགོངས་དོན་གཙོ་བོར་བཟུང༌། ཁོག་འབུབས་ཀྱི་མན་ངག་འགའ་ཞིག་གིས་ཟུར་བརྒྱན། འགུགས་འདྲེན་སོགས་ཀྱི་འདོན་ཆ་བྱང་བདག་རིག་འཛིན་དབང་པོའི་སྡེའི་ལྗགས་བསྒྲིགས་ལ་སྐབས་བབ་ཀྱི་བསྒྱུར་ཁ་བག་ཙམ་རེ་བྱས་ཏེ། ཟབ་ཆོས་འདི་ཉིད་ཀྱི་བཀའ་བབས་གཏེར་ཆེན་བླ་མ་ངེས་པ་དོན་གྱི་ཐམས་ཅད་མཁྱེན་པ་ལོ་ཆེན་བཻ་རོ་གཉིས་པ་རྔ་ཡབ་གླིང་དུ་གཤེགས་ནས་བགྲང་བྱ་རིག་བྱེད་༡༨༤ཀླུ་གཟུགས་སླེབས་པ་འཛིན་བྱེད་ཅེས་མེ་ཕོ་བྱི་བའི་ལོ། དབོ་ཟླའི་དཀར་ཕྱོགས་ཀྱི་སྟོང་པ་གཉིས་པའི་ཚེས་ལ་དམག་དཔོན་ཆུ་ལྷར་འཁྱོག་འགྲོས་རྩོམ་པའི་དུས་ཚེས་རྩུབ་མོར་རིག་པ་འཛིན་པ་དབང་ཆེན་མཁྱེན་
བརྩེའི་འོད་ཟེར་གྱིས་སྤེལ་བ་བསྟན་དགྲ་གཞོམ་པའི་རྒྱུར་གྱུར་ཅིག། །།འཇིགས་བྱེད་ནག་པོ་སུམ་སྒྲིལ་གྱི་ལིང་ཁྲུས། དེ་ནས་ལིང་ཁྲུས་བྱ་བ་ནི། རང་གི་མདུན་དུ་ཡོ་བྱད་རྣམས་འདུ་བྱས་ལ། དང་པོ་རང་སྒྲིབ་སྦྱོང་བ་ནི། རང་གི་སྤྱི་མགྲིན་སྙིང་ག་པད་ཟླའི་སྟེང་༔ རྡོར་སེམས་དཀར་དམར་མཐིང་གསུམ་འོད་དུ་འབར། རྡོ་རྗེ་དྲིལ་འཛིན་རིན་ཆེན་རུས་པས་བརྒྱན། དར་ཟབ་ལོངས་སྤྱོད་རྫོགས་སྐུའི་ཆ་ལུགས་འཛིན༔ ཐུགས་ཀར་ཟླ་སྟེང་ཧཱུྃ་དཀར་ཡིག་བརྒྱས་བསྐོར༔ དེ་ལས་འོད་ཟེར་བདུད་རྩིའི་རྒྱུད་བབས་པས༔ སྒོ་གསུམ་ཉེས་ཚོགས་ཐམས་ཅད་སངས་ཀྱིས་དག༔ སླར་ཡང་འོད་འཕྲོས་འཕགས་པ་ཐམས་ཅད་མཆོད༔ ཚུར་འདུས་བདག་གི་དམ་ཚིག་ཉམས་ཆག་དང་༔ བྱད་ཕུར་ངག་མནན་གཏད་ཁྲམ་ཕྲ་མེན་གྱི༔ ནུས་མཐུ་ཉེས་ཚོགས་མ་ལུས་རབ་བྱང་ནས༔ རང་ལུས་དངས་ཤེལ་དྲི་མེད་ལྟ་བུར་གྱུར༔ ཡི་གེ་བརྒྱ་པ་བཟླས་རྗེས། མགོན་པོ་བདག་གི་སྡིག་སྒྲིབ་མ་ལུས་པ༔ དག་པར་ཐུགས་རྗེ་བསྐུལ་བའི་གདུང་ཤུགས་ཀྱིས༔ གནས་གསུམ་ལྷ་རྣམས་འོད་དུ་ཞུ་བ་ཡིས༔ དབྱེར་མེད་ངོ་བོ་གཅིག་ཏུ་ས་མ་དྷིཿ ཞེས་བརྗོད། ལིངྒ་སྲིད་པའི་བྱེ་མའམ་ཞིང་ས་གཙང་མ་འཐོར་ཞིང༌། ལཾ་ཧོ་ཤུདྡྷེ་ཤུདྡྷེ་སྭཱ་ཧཱ། ཞེས་དང༌། ཆུ་མིག་ལྐུགས་པའམ་ཕུ་རྡུགས་ཀྱི་ཆུ་རོ་སྐྲའི་ཆུན་པོས་
འཐོར་ཞིང༌། བཾ་ཧོ་ཤུདྡྷེ་ཤུདྡྷེ་སྭཱ་ཧཱ། དེ་བཞིན་དུ་ལྷ་དབྱེའི་སྒྲོ་གཉིས་ཀྱིས་གཡབ་ཅིང༌། ཡཾ་ཧོ་ཤུདྡྷེ་ཤུདྡྷེ་སྭཱ་ཧཱ། བྲ་ཤིང་གི་མེས་བསྐོར་ཞིང༌། རཾ་ཧོ་ཤུདྡྷེ་ཤུདྡྷེ་སྭཱ་ཧཱ། ཞེས་ས་ལ་དྲི་མ་ཐིམ། ཆུས་བཀྲུ། རླུང་གིས་གཏོར། མེས་བསྲེག་པའི་དམིགས་པ་བྱ་ཞིང་བར་སྣང་ལ་གཡབ་ཅིང༌། རྣལ་འབྱོར་པ་བདག་ཅག་ཡོན་མཆོད་ཀྱི་ལུས་ཀྱི་དྲི་མས་མ་གོས་སོ། །ངག་གི་དྲི་མས་མ་གོས་སོ། །ཡིད་ཀྱི་དྲི་མས་མ་གོས་སོ། །ལུས་ངག་ཡིད་གསུམ་གྱི་དྲི་མས་མ་གོས་སོ། །ཨེ་ཧེ་རཾ། ཨི་ན་རཾ། བི་ན་རཾ། ཤུདྡྷེ་ཤུདྡྷེ་ཨ་ཨ། ཞེས་ཨ་རྐྱང་ཉེར་གཅིག་དབུགས་ཐེངས་གཅིག་ལ་འདྲེན་ཞིང་གདོད་མའི་སྟོང་ཆེན་གྱི་ངང་དུ་ཀུན་རྫོབ་ཀྱི་དྲི་མ་ཐམས་ཅད་ཡེ་དག་ཡོངས་གྲོལ་དུ་སྦྱངས་ལ་དར་ཅིག་མཉམ་པར་གཞག་ལ། ཡང་ན་ལོང་སྐབས་ཀྱིས་གྲུབ་ན། ཟངས་གཞོང་ཆུ་གཙང་གིས་བཀང་ལ་མདུན་དུ་བཞག་ལ། བདག་ཉིད་འཇམ་དཔལ་གཤིན་རྗེར་གསལ་བ་ཡི། །མདུན་དུ་བདུད་རྩིའི་རང་བཞིན་ཉལ་འགྲོའི་དབུས། །པྃ་ལས་པདྨ་ཨ་ལས་ཟླ་བའི་སྟེང༌། བྃ་ལས་ཆུ་ཡི་ལྷ་མོ་སྐུ་མདོག་དཀར། །ཕྱག་གཡས་མཆོག་སྦྱིན་གཡོན་པ་པདྨ་དམར། །ཞབས་གཉིས་རྡོ་རྗེའི་སྐྱིལ་ཀྲུང་རིན་ཆེན་བརྒྱན། །ཐུགས་ལས་འོད་འཕྲོས་རང་འདྲའི་ཡེ་ཤེས་དྲངས། །ཛཿཧཱུྃ་བྃ་ཧོ༔ གཉིས་སུ་མེད་པར་གྱུར། །དེ་ནས་ལིདྒ་བཀྲུས་ལ།
དེའི་ཕྱག་གཡས་མཆོག་སྤྱིན་བཾ་ཡིག་ལས། །བདུད་རྩིའི་རྒྱུན་བབས་ལིངྒ་བཤལ་བ་ཡིས། །རྣལ་འབྱོར་བདག་ཅག་ཁ་རླངས་དྲ་དྲིལ་རྡུལ། །གཟས་པོའི་ཁ་རྗེ་བསོད་ནམས་ཚེ་དཔལ་འབྱོར། །མ་ལུས་ཆུ་ཡི་ནང་དུ་སིབ་ཀྱིས་ཐིམ། །སླར་ཡང་ཆུ་ཡི་ལྷ་མོ་འོད་དུ་ཞུ། །ཆུ་དང་དབྱེར་མེད་བདུད་རྩིའི་རང་བཞིན་གྱུར། །ཞེས་བརྗོད་ཅིང་བསམས་ལ། རང་གིས་ཧུབ་ཅིག་འཐུངས་པས་ཚེ་བསོད་བཀྲག་མདངས་རྒྱས་པར་བསམ་མོ། །ཆུ་ལྷག་གནས་ཁང་གི་ཕྱི་ནང་ཁྱབ་པར་གཏོར་བས་བཀྲ་ཤིས་བྱིན་ཆགས། འབག་བཙོག་ཐམས་ཅད་རང་བཞིན་གྱིས་དག་པར་འགྱུར། ཅེས་གསུངས་པ་ཡང་དམར་ཁྲིད་ཡིག་ཆུང་གི་དགོངས་དོན་མ་འཁྲུལ་བ་འདིའི་ཆ་ལག་ཏུ་ངག་བསྒྲིབས་བྱས་པ་ཡིན་ནོ། །