ཕུར་པ་རྒྱུད་ལུགས་ལས། སྤྲོ་མེད་རྒྱུན་གྱི་རྣལ་འབྱོར།
ཕུར་པ་རྒྱུད་ལུགས་ལས། སྤྲོ་མེད་རྒྱུན་གྱི་རྣལ་འབྱོར་བཞུགས། །གདན་གསུམ་ལུས་ཀྱི་ཕུར་བུ་ལ་ཕྱག་འཚལ་ལོ། །ལུང་ཨ་ནུ་ཡོ་ག་དང་མཐུན་པར་ལུས་དཀྱིལ་ལ་བརྟེན་ནས་ཕུར་པ་བསྒྲུབ་པ་ནི། སྐྱབས་སེམས་སྔོན་དུ་བྱས་ལ། ཧཱུཾ། སེམས་དང་ཡིད་དང་རྣམ་ཤེས་ཉིད། །དེ་ཉིད་ལས་ནི་འཁྲུལ་ནས་བཏབ། །རྣམ་རྟོག་བག་ཆགས་བསྲེག་པའི་ཕྱིར། །བདག་གི་ལུས་ནི་གཞལ་ཡས་ཁང༌། །ཧཱུཾ། རང་ལུས་འདོམ་གང་གྲུ་བཞི་ནི། །དུར་ཁྲོད་གཞལ་ཡས་ཁང་དུ་བསམ། །གྲུ་བཞི་པ་ལ་ཁ་དོག་ལྔ། །དྲི་མ་ནག་པོ་བཻ་ཌཱུར་སྔོ། །རྩ་ཆེན་ལྗང་གུ་མར་གད་མདོག །ཁྲག་གི་པདྨ་རཱ་ག་དམར། །ཚིལ་བུ་སེར་པོ་གསེར་ལྟར་སྣང༌། །རུས་པ་དཀར་པོ་ཤེལ་དངུལ་མདོག །ལྔ་ཡི་རྩིག་པ་རབ་ཏུ་མཛེས། །སྒལ་ཚིག་གདུང་གི་རང་བཞིན་ལ། །རྐང་བརྒྱད་ཀ་བ་བརྒྱད་ཡིན་ནོ། །ཐུར་མ་ལྕམ་ལ་རྩིབ་མ་དྲལ། །རྩ་ཡི་དྲྭ་བས་རབ་འབྲེལ་ཞིང༌། །མགོ་བོའི་ཚངས་སྒོ་ཤེལ་ལྟར་དཀར། །མིག་གཡས་ལྷོ་སྒོ་གསེར་ལྟར་སེར། །མིག་གཡོན་བྱང་སྒོ་མར་གད་ལྗང༌། །ནུབ་ཀྱི་ཆུ་སྒོ་པད་ལྟར་དམར། །འོག་གི་སྤུ་ནག་སྨིན་མ་དང༌། །སྐྲ་རྣམས་སྒོ་ཡི་རྒྱན་ཡིན་ནོ། །རྐང་ལག་སེན་མོའི་ཕྲེང་བ་རྣམས། །མུ་ཏིག་དྲྭ་བ་ཕྱེད་པས་
མཛེས། །ཚིགས་མདུད་རིན་ཆེན་ཕ་གུ་ལ། །པགས་པ་འདོད་ཡོན་ལྷ་མོས་མཛེས། །དུར་ཁྲོད་གཞལ་ཡས་མཛེས་པ་དེར། །ཀུན་གཞིའི་རྣམ་ཤེས་གནས་གྱུར་པ། །དཔལ་ཆེན་རྡོ་རྗེ་གཞོན་ནུ་ནི། །སྒེག་པ་དཔའ་བ་འཇིགས་སུ་རུང༌། །དགོད་དང་གཤེ་དང་འཇིགས་པ་དང༌། །སྙིང་རྗེ་རྔམ་དང་ཞི་བ་སྟེ། །ཞལ་དང་ཕྱག་མཚན་ཅིར་ཡང་སྟོན། །ཡིད་ཀྱི་རྣམ་ཤེས་གནས་གྱུར་པ། །འཁོར་ལོ་རྒྱས་འདེབས་ཡུམ་དང་འཁྲིལ། །སྒོ་ལྔའི་རྣམ་ཤེས་གནས་གྱུར་པ། །སྲས་མཆོག་རིགས་ལྔ་ཡུམ་དང་བཅས། །གཟུགས་ཀྱི་ཕུང་པོ་རྣམ་པར་རྒྱལ། །ཚོར་བ་གཤིན་རྗེ་གཤེད་པོ་ཉིད། །འདུ་ཤེས་ཧྱ་གྲཱི་ཝ་འོ། །འདུ་བྱེད་བདུད་རྩི་འཁྱིལ་བ་སྟེ། །རྣམ་ཤེས་ཁྲོ་རྒྱལ་ཧཱུཾ་ཀཱ་ར། །ས་ནི་དབྱུག་པ་སྔོན་པོ་སྟེ། །ཆུ་ནི་མི་གཡོ་མགོན་པོ་ལ། །མེ་ནི་གཞན་གྱི་མི་ཐུབ་པ། །རླུང་ནི་ཁམས་གསུམ་རྣམ་རྒྱལ་ཏེ། །ནམ་མཁའ་ཁྲོ་རྒྱལ་སྟོབས་པོ་ཆེ། །སྐྱེ་མཆེད་ཡུམ་བཅུའི་ངོ་བོ་སྟེ། །རྣམ་པར་རྟོག་པ་ཁྲ་ཕྱག་ལ། །ཉོན་མོངས་སྒོ་མ་བཞི་ཉིད་དོ། །ཧཱུཾ། རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེར་གྲུབ་མཛོད་ཅིག །སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་
མཛོད། །བསྐྱེད་དུ་མེད་དེ་ཡེ་ནས་ཡིན། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཕཊ། ཅེས་དང༌། ཚེ་སྒྲུབ་བྱེད་ན། ཨཱ་ཡུརྫྙཱ་ན་ཙིཏྟ་བྷྲཱུཾ། གདགས། གསོལ་བའི་ཟས་ནི་ཅི་ཡང་རུང༌། །དང་པོར་རཾ་ཡཾ་ཁཾ་གིས་སྦྱངས། །ཨ་དཀར་འོད་དང་བཅས་པ་ལས། །གཡས་ཕྱོགས་འཁྱིལ་ཞིང་འཁོར་བར་བསམ། །འོད་ཟེར་དོན་གཉིས་བྱང་ཆུབ་སེམས། །ཡེ་ཤེས་བདུད་རྩིར་གཉིས་མེད་བསྟིམ། །ཨ་མྲྀ་ཏ་ཡི་གསང་སྔགས་ཀྱིས། །འོད་ཞུ་བདུད་རྩི་ཆེན་པོར་གྱུར། །ཨོཾ་ས་མ་ཡ་ཨ་མྲྀ་ཏ་ཨོཾ་ཨཱཿཧཱུཾ་སྭཱ་ཧཱ། ལག་པ་ཡེ་ཤེས་ཧོམ་གཟར་གྱིས། །ཁ་ནི་ཧོམ་ཁུང་གཞལ་ཡས་སུ། །དབྱིངས་དང་ཡེ་ཤེས་མཆོད་པར་འབུལ། །མཉམ་པའི་སྒྲུབ་རྫས་ཡོངས་སུ་དག །བདག་དང་མཉམ་པའི་ཚོགས་ལ་འབུལ། །ལོངས་སྤྱོད་ལྔ་ལྡན་བདུད་རྩི་མཆོག །གཉིས་མེད་ཡོངས་སུ་དག་པར་བསྔོ། །གཉིས་སུ་མེད་པའི་མཆོད་པ་ཡིན། །སྐུ་གསུང་ཐུགས་སུ་རྣམ་པར་དག །དམན་པའི་ཟས་ལ་བཟའ་མི་བྱ། །བཏུང་བ་ཏྲཱཾ་ལས་མཱ་ཀིར་བསམ། །སྦོམ་པོ་དབང་མོ་ཐབས་ཤེས་ཀྱིས། །བླངས་ལ་ཨོཾ་ཨཱཿཧཱུཾ་གིས་མཆོད། །དེ་བཞིན་གོས་དང་རྒྱན་གནས་ཁང༌། །དབང་པོ་ལྔ་ཡི་ལོངས་སྤྱོད་ཀུན། །ཐ་མལ་སྣང་བས་མ་ཡིན་པར། །འདོད་ཡོན་སྒྱུ་མ་ལྟ་བུ་རུ། །དམིགས་ནས་ཡོངས་གྲུབ་དཀྱིལ་འཁོར་མཆོད། །བསོད་ནམས་ཡེ་ཤེས་ཚོགས་རྫོགས་འགྱུར། །འདི་ནི་རྒྱུན་གྱི་རྣལ་འབྱོར་ཡིན། །འདི་ཡང་རྒྱུད་ལས་བཏུས་པའོ།། །།