བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་ཞི་བའི་སྦྱིན་སྲེག་བདུད་རྩིའི་ཐིགས་པ།
བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་ཞི་བའི་སྦྱིན་སྲེག་བདུད་རྩིའི་ཐིགས་པ་ཞེས་བྱ་བ་བཞུགས། །
བཅོམ་ལྡན་འདས་བཛྲ་ཀུ་མཱ་ར་ལ་ན་མཿ འདིར་ཞི་བའི་སྦྱིན་བསྲེག་གི་རིམ་པ་ནི། རྒྱུད་ལས། ལས་ཀྱི་རིམ་པ་བྱ་བ་ཡང༌། །སྦྱིན་བསྲེག་དག་ནི་རབ་ཏུ་བྱ། །ཐམས་ཅད་མ་ལུས་ཞི་བའི་ཕྱིར། །ཤིན་ཏུ་ཁ་དོག་དཀར་ལ་འཚེར། །ཞི་བའི་ཐབ་ཁུང་དེ་བྱས་ཏེ། །ཁྲུ་གང་ཁྲུ་དོའི་ཚད་དུ་བྱ། །འབྲས་ཐུག་འོ་ཐུག་དཀར་གསུམ་དང༌། །མངར་གསུམ་དང་ནི་རབ་ལྡན་ཏེ། །ཞི་བའི་རྫས་ནི་མ་ལུས་བསག །མེ་ཏོག་དཀར་པོ་ཏིལ་དཀར་དང༌། །འབྲས་ཆེན་ཏིལ་སོགས་དངུལ་ཕྱེ་བསག །བསྲེག་ཤིང་ཁྲུ་གང་ཚད་བྱས་ཏེ། །ཡམ་ཤིང་མཐོ་གང་སོར་བཞི་བྱ། །ཤིན་དུ་དྲི་ཞིམ་དྲི་ཡིས་བྱུག །ཅེས་པས་གཟའ་སྐར་བཟང་པོ་ལ་དུལ་བ་མ་ཡིན་པའི་གནས་སུ་ནི་སའི་ཆོ་ག་ངེས་པར་བྱ་ལ། ས་སྟེགས་ཐབ་རྒྱ་དང་འཚམས་པ་འཐས་པར་བཅགས་ལ་ཐིག་ཆེན་
བརྒྱད་བཏབ་པའི་དབུས་སོར་མོ་ཉི་ཤུ་རྩ་གཅིག་གིས་ཟླུམ་སྐོར་གྱི་ནང་དུ་རྩིབས་བརྒྱད་ཀྱི་ལྟེ་བར་ཆོས་འབྱུང་མཐིང་ནག་རྡོ་རྗེས་མཚན་པ། དེའི་ཕྱིར་སོར་བཞི་རེ་ཡོད་པའི་མཆུ་དང་ཁ་ཁྱེར་གསུམ་གྱི་བར་མར་མེ་རི། ཕྱི་མར་རྡོ་རྗེའི་ཕྲེང་བ། ཟུར་བཞིར་བླ་རྡོར་བྲིས་པའི་སྟེང་བུད་ཤིང་བཟང་པོ་རྩེ་ཁྲུ་གང་བས་ཟླུམ་སྐོར་དུ་རྒྱ་ལས་ཕྱེད་ཆས་དམན་པའི་དཔངས་སུ་བརྩིག །སློབ་དཔོན་གྱི་གཡོན་ལོགས་སུ་འོ་མ་འབྲས་ཆེན་དངུལ་ཕྱེ་མེ་ཏོག་དཀར་པོ་རྣམས་ཀྱི་རྒྱུ་ལས། མཆོད་གཏོར་གཙང་མ་འཇིག་འདས་ཀྱི་རིམ་པ་གཉིས་སུ་བཤམ། གཡས་ངོས་སུ་བསྲེག་རྫས་ནི། འོ་མ་ཅན་གྱི་ཡམ་ཤིང༌། མར་ཁུ། ཏིལ་དཀར་ནག །དཀར་གསུམ་མངར་གསུམ་དང་འོ་ཐུག་བསྲེས་པའི་ཟས་མཆོག །འབྲས། སོ་བ། ནས། སྲན་མ། གྲོ། དཱུརྦ། ཀུ་ཤ །
ཤིང་ཏོག །ཁྱད་པར་གྱི་རྫས་མེ་ཏོག་དཀར་པོ་དང༌། ཏིལ་དཀར། ཉུང་ཀར། ཙནྡན་དཀར་དམར། རིན་པོ་ཆེ། སི་ཧླ་སོགས་ཀྱང་འཇིག་འདས་སོ་སོར་བཤམ་མོ། །གཉིས་པ་དངོས་གཞི་ལ་དྲུག་ལས། དང་པོ་བདག་བསྐྱེད་ནི་གཞུང་བཞིན་དང༌། ཞར་ལ་ལས་བུམ་ཀྱང་བསྒྲུབ་བོ། །གཉིས་པ་རྡོར་དྲིལ་བྱིན་བརླབ་ནི། ཐབས་ཤེས་ཀྱི་དེ་ཁོ་ན་ཉིད་དྲན་པས། ཨོཾ་མ་ཧཱ་བཛྲ་ཧཱུཾ། ཞེས་རྡོ་རྗེ་ལན་གསུམ་གསོར། ཨོཾ་བཛྲ་གཎྜེ་ཨ། ཞེས་པས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་འཁྱུད་རྒྱ་བྱས་ཏེ་དམ་ཚིག་གསུམ་དང་དུ་བླང་ངོ༌། །གསུམ་པ་མཆོད་རྫས་བརླབ་པ་ནི། ཧཱུཾ། རྣམ་དག་ཆོས་དབྱིངས་ངང་ཉིད་ལས། །རང་བྱུང་མཆོད་པའི་ཕུང་པོ་ནི། །ཀུན་བཟང་མཆོད་པའི་སྤྲིན་ལྟ་བུར། །དཔག་ཡས་ནམ་མཁའ་གང་བར་གྱུར། །ཨོཾ་བཛྲ་ཨརྒྷཾ་སོགས་དང༌། སྨན་རཀ་གཏོར་མའི་སྔགས་ལན་གསུམ་བརྗོད། བཞི་པ་བསྲེག་རྫས་བརླབ་པ་ནི། ལས་བུམ་གྱི་ཆུས་གཏོར་ཞིང༌། ཧཱུཾ་བིག་ནཾ་ཏ་ཀྲིཏ་ཀྱིས་བགེགས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་མ་དང་ཨ་ལས་བྱུང་བའི་ཉི་ཟླའི་གའུའི་སྣོད་དུ་བསྲེག་རྫས་རྣམས་སོ་སོའི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་བདུད་རྩིའི་དངོས་པོ་སོ་སོའི་བྱེད་ལས་འགྲུབ་པའི་ནུས་པ་ཅན་དུ་གྱུར།
ཨོཾ་ཨཱཿཧཱུཾ། ཨོཾ་ཧཱུཾ་སྭཱཾ་ཨཱཾ་ཧཱཾ། ཞེས་ལན་བདུན། ལྔ་པ་ཐབ་བསྐྱེད་ནས་མེ་ལྷ་ལྷར་ཤེས་པ་ལ་མཆོད་པ་ནི། སྭ་བྷཱ་ཝས་སྦྱངས། སྟོང་པའི་ངང་ལས་རང་མདུན་དུ། །བྷྲཱུྃ་ཡིག་ཡོངས་སུ་གྱུར་པ་ལས། །ཞི་བའི་ཐབ་ཁུང་དཀར་ལ་ཟླུམ། །མུ་རན་ཁ་ཁྱེར་ཟླ་ཚེས་ཅན། །སྣ་ཚོགས་པདྨའི་ལྟེ་བ་རུ། །རཾ་ལས་ཞི་བའི་མེ་ལྷ་ནི། །སྤུན་ལ་ཁ་དོག་དཀར་པོ་སྟེ། །འོད་ཟེར་དཀར་པོ་འཁྱིལ་ཚུལ་སྤྲོ། །ར་སྐྱེས་དཀར་པོའི་གདན་ལ་བཞུགས། །བགྲང་ཕྲེང་རིལ་བ་ཕྱག་ན་བསྣམས། །ཉོན་མོངས་ཐམས་ཅད་ཞི་མཛད་པས། །དྲང་སྲོང་ཚོགས་ཀྱིས་བསྐོར་བར་གྱུར། །དེ་ལྟར་དུ་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ་ལས་འོད་ཟེར་འཕྲོས། ཤར་ལྷོ་ནས་མེ་ལྷ་འཁོར་དང་བཅས་པ་སྤྱན་དྲངས་པར་གྱུར། སྤྱན་འདྲེན་པ་ནི། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་དྲང་སྲོང་བྲམ་ཟེའི་མཆོག །སུམ་ཅུ་རྩ་ལྔའི་ལྔ་ཚིགས་ནི། །ལྔ་པ་མེ་ལྷ་ཞེས་ཀྱང་བྱ། །རབ་ཏུ་སྤུན་ལ་སྐུ་མདོག་དཀར། །མགྲིན་པ་རིང་ལ་གསུང་ཡང་སྙན། །ཐུགས་རྗེའི་དབང་གིས་སྤྱན་འདྲེན་ན། །འབར་བའི་ནང་དུ་བཞུགས་ནས་ནི། །སྲེག་བླུགས་
ཞལ་ཟས་བཞེས་སུ་གསོལ། །ཁྱོད་ལ་ཕྲིན་ལས་བཅོལ་བ་ནི། །ཐབས་ཁུང་མ་ཉམས་དམ་པ་འདིར། །དྲོངས་ཤིག་དྲོངས་ཤིག་མེ་དྲོངས་ཤིག །སྤོར་ཅིག་སྤོར་ཅིག་མེ་སྤོར་ཅིག །ཟུར་ཕུད་ཅན་གྱི་མེ་གསོས་ལ། །ཁ་འབར་མ་ཡི་མེ་བུས་ཅིག །བྲམ་ཟེའི་བུ་མོ་ལྔ་བརྒྱ་ཡང༌། །ཁྱོད་ཀྱིས་གཡོག་དང་བྲན་དུ་ཁོལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཅེས་བརྗོད་ལ། བསང་ཆུ་གཏོར་ཞིང༌། ལས་སྔགས་ཀྱིས་ཕྱིར་འབྲངས་བགེགས་རྣམས་བསྐྲད། ཛཿཧཱུཾ་བཾ་ཧོཿས་བསྟིམ། ཨོཾ་བཛྲ་ཨགྣེ་རཾ་ཙི་ཏི་ཤག་རཾ། ཏི་པ་ར་ཤག་རཾ། ཡཾ་རཾ། ཞེས་རྗེའུ་རིགས་ཀྱི་ཁྱིམ་ལས་བྱུང་བའི་མེ་སྦར། དེ་ནས་མཆོད་པ་ནི། ཧཱུཾ། མེ་ལྷ་དྲང་སྲོང་ཉོན་མོངས་བསྲེག །འབར་བ་མེ་ལྷ་སྤྱན་འདྲེན་ན། །འབར་བའི་མེ་ཡི་དབྱིངས་ན་བཞུགས། །དྲང་སྲོང་ཆེན་པོ་མེ་ཡི་ལྷ། །མཆོད་པ་འབུལ་ལོ་འདི་བཞེས་ལ། །འཁོར་བའི་སྡུག་བསྔལ་འཚིག་པར་མཛོད། ། ཨཱོཾ་བཛྲ་ཨཉྫ་མ་ནཾ་ཨཱ་ཧཱུཾ་གིས་ཞལ་བསིལ་དང༌། བྱོན་སྐྱེམས་དགང་བླུགས་ཕུལ་ལ། ཨོཾ་ཨག་ན་ཡེ་ཧ་བྱ་ཀ་བྱ་ཧཾ་ཧ་ན་ཡེ་ཏི་བྱ་ཏི་པ་ཡི་སྭཱ་ཧཱ། ལན་བདུན་དང༌། ཨོཾ་བཛྲ་པུཥྤེ་ཨཱཿཧཱུཾ་སྭཱ་ཧཱ། ཨོཾ་བཛྲ་དྷཱུ་པེ་ཨཱཿཧཱུཾ་སྭཱ་ཧཱ། ཨོཾ་བཛྲ་དཱི་པཾ་ཨཱཿཧཱུཾ་སྭཱ་ཧཱ། ཨོཾ་བཛྲ་ནཻ་ཝི་དྱ་ཨཱཿཧཱུཾ་སྭཱ་ཧཱ། ཞེས་ཉེར་སྤྱོད་དབུལ། དེ་ནས་
བསྲེག་རྫས་རྣམས་ཡམ་ཤིང་ནས་རིམ་པར། ཨོཾ་ཨག་ན་ཡེ་ཧ་བྱ་ཀ་བྱ། ཧཾ་ཧ་ན་ཡེ། ཏི་བྱ་ཏི་པ་ཡེ་ཤཱནྟིཾ་ཀུ་རུ་སྭཱ་ཧཱ། ཞེས་པ་ཁོ་ནས་ཕུལ་ཞིང་འདོད་གསོལ་ནི། དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱད་སྟེམས་ཐམས་ཅད་མེད་པར་མཛོད། །ཅེས་རྐང་པ་བཞི་པོ་བརྗོད། རྫས་རྫོགས་པ་དང་དགང་བླུགས་གསུམ་ཕུལ་ལ་གཟི་བྱིན་བསྐྱེད། བསྟོད་པ་ནི། ཧཱུཾ། དྲི་ཟའི་དབང་ཕྱུག་མེ་ཡི་ལྷ། །འབྱུང་པོ་འདུལ་མཛད་ཕྱོགས་སྐྱོང་ཚུལ། །བསྲེག་རྫས་ཕུལ་ན་དོན་བསྒྲུབ་པ། །དྲང་སྲོང་ཆེན་པོ་ཁྱོད་ལ་བསྟོད། །དྲུག་པ་མེ་ལྷ་གཞལ་ཡས་ཁང་དུ་ཤེས་ནས་དཀྱིལ་འཁོར་གྱི་འཁོར་ལོ་མཆོད་པ་ནི། རྒྱུད་ལས། རྩ་བ་གཙོ་བོའི་དཀྱིལ་འཁོར་དང༌། །ཕུར་པ་ལྷ་ཡི་དཀྱིལ་འཁོར་དང༌། །ཕྱོགས་བཅུ་ཁྲོ་བོའི་དཀྱིལ་འཁོར་རྣམས། །མེ་ལྷའི་སྙིང་གར་རྫོགས་པར་བསྐྱེད། །ཏིང་འཛིན་བརྟན་པས་འགྲུབ་པར་འགྱུར། །ཅེས་པས། ལས་ཆུས་བསང༌། མེ་ལྷའི་ལྟོ་བ་ཡངས་ཤིང་རྒྱ་ཆེའི་དབུས། །རཀྟའི་རྒྱ་མཚོ་ཆེན་པོ་འཁྱིལ་བའི་ཀློང༌། །ཀེང་རུས་ཆེན་པོའི་རི་རབ་བརྩེགས་པའི་སྟེང༌། །རྡོ་རྗེའི་བྲག་ཆེན་གཏམས་པའི་ས་གཞི་ལ། །དུར་ཁྲོད་ཆེན་པོ་འབར་བའི་གཞལ་ཡས་ཁང༌། །སུས་ཀྱང་མ་བསྐྱེད་ཡེ་ནས་ཚད་ལས་འདས། །བསྐལ་པའི་མེ་ལྟར་འབར་བའི་དཀྱིལ་
འཁོར་ནང༌། །དྲེགས་པ་ལྷ་ཆེན་བསྣོལ་བའི་གདན་སྟེངས་སུ། །ཉི་ཟླའི་གདན་བཤམས་པདྨའི་གེ་སར་བཅས། །ཚད་དང་མཚན་ཉིད་མ་ལུས་ཡོངས་སུ་རྫོགས། །ཞེས་པས་མེ་ལྷའི་སྐྱེ་མཆེད་རྟེན་གཞལ་ཡས་ཁང་གི་རང་བཞིན་དུ་བསྐྱེད་ནས། བརྟེན་པའི་ལྷ་གསལ་གདབ་པ་ནི། གཙོ་བོའི་གནས་སུ་ཧཱུཾ་མཐིང་ནག་ཡོངས་སུ་གྱུར་པ་ལས་འཇིགས་བྱེད་ཀྱི་རྒྱལ་པོ་དཔལ་རྡོ་རྗེ་གཞོན་ནུ་དབུ་གསུམ་ཕྱག་དྲུག་པ། ཞབས་རྣམ་པ་བཞི་དང་ལྡན་པ། གཡས་ལྗང་ནག །གཡོན་དམར་ནག །དབུས་མཐིང་ནག་ཏུ་བཞུགས་པ། གཡས་ཀྱི་དང་པོ་ན་རྡོ་རྗེ་རྩེ་དགུ་པ་དང༌། གཡོན་དང་པོ་ན་མེ་དཔུང་འབར་བ་བསྣམས་པ། གཡས་བར་པ་ན་རྡོ་རྗེ་རྩེ་ལྔ་པ་དང༌། སྟྭ་རེ་དང༌། ཐོ་བའོ། །གཡོན་བར་པ་ན་ཁ་ཊྭཱཾ་དང༌། ཐོད་དབྱུག་དང༌། ལྕགས་ཀྱུའོ། །གཡས་ཐ་མ་ན་ཕུར་པ་དང༌། གཡོན་ཐ་མ་ན་རྦོད་གཏོང་ཕྲ་མེན་གྱི་ཚོགས་བསྣམས་ཏེ། བྱ་རྒོད་དང༌། ཁྱུང་དང༌། འུག་པ་དང༌། ཕོ་རོག་དང༌། ཁྲ་བསྣམས་པའོ། །ཞབས་བཞི་ལས་གཉིས་བརྐྱངས། གཉིས་བསྐུམས་ཏེ་དོར་སྟབས་སུ་བཞུགས་པའོ། །སྐུ་ལ་བསྐལ་པའི་མེ་རི་དང༌། གླང་པོ་ཆེའི་ཀོ་རློན་དང༌། སྟག་གི་ཤམ་ཐབས་དང༌། ཞིང་ཆེན་གྱི་པགས་པ་དང༌། ཐལ་བའི་ཚོམ་བུ་དང༌།
ཞག་གི་ཟོ་རིས་དང༌། ཁྲག་གི་ཐིག་ལེའོ། །སྦྲུལ་རིགས་ལྔས་བརྒྱན་ཏེ། རྒྱལ་རིགས་དང༌། རྗེའུ་རིགས་དང༌། བྲམ་ཟེའི་རིགས་དང༌། དམངས་རིགས་དང༌། གདོལ་པའི་རིགས་སོ། །ཐུགས་རྗེས་ཆགས་པས་ཁྲག་གི་རྒྱ་མཚོ་ལ་གསོལ་བའོ། །ཡུམ་འཁོར་ལོ་རྒྱས་འདེབས་མ་ཞལ་གཅིག་ཕྱག་གཉིས་མ། གཡས་ཡབ་ཀྱི་མགུལ་ནས་འཁྱུད་པ། གཡོན་བྷནྡྷ་རཀྟས་བཀང་ནས་ཡབ་ཀྱི་ཞལ་དུ་སྟོབ་པ། སྐུ་ལ་དུར་ཁྲོད་ཀྱི་རྒྱན་གྱིས་བརྒྱན་པ། དོ་ཤལ་དང༌། དཔུང་རྒྱན་དང༌། མགུར་ཆུ་དང༌། སྙན་ཆ་དང༌། སེ་མོ་དོས་བརྒྱན་ཏེ། ཐབས་དང་ཤེས་རབ་གཉིས་སུ་མེད་པར་བཞུགས་པའོ། །དེའི་ངང་ལས་རྡོ་རྗེ་ཆགས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཆགས་པའི་དོན་ལ་བསྐུལ་བར་མཛད། ཡབ་ཀྱིས་ས་མ་ཡ་ཧོཿ ཡུམ་གྱིས་ས་མ་ཡ་སྟྭཾ། རཱ་ཧོ་ཧཾ། རཱ་ག་ཡ་མི། ཡབ་ཡུམ་གཉིས་སུ་མེད་པར་གྱུར། པདྨ་ཡོ་གི་ནི་ས་མ་ཡ་པྲ་བེ་ཤ་ཡ་ཕཊ། ཡབ་ཀྱི་བྱང་ཆུབ་ཀྱི་སེམས་ཡུམ་མཁར་བབས་པས་ཡུམ་ཡང་བྱང་ཆུབ་སེམས་ཀྱི་རང་བཞིན་དུ་གྱུར། ཧཱུཾ་ཧཱུཾ་ཧཱུཾ། བི་ཤྭ་བཛྲ་ཀྲོ་ཏ་ཛྭ་ལ་མཎྜ་ལ་ཧ་ལ་ཧ་ལ་ཧཱུཾ་ཕཊ། ཅེས་
བརྗོད་པས་བྱང་ཆུབ་ཀྱི་སེམས་ལན་གཅིག་འཕྲོས་པས་ཁྲོ་བོ་འཆོལ་བའི་རང་བཞིན་དུ་གྱུར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷག་གིས་ཁེངས། ཉོན་མོངས་པ་དང་ལོག་པར་ལྟ་བའི་སེམས་ཅན་ཐམས་ཅད་བསྒྲལ། སླར་དེ་དག་ཐམས་ཅད་ཡུམ་གྱི་བྷ་ག་ལ་བསྡུས་ཏེ་འོད་ཟེར་ཕྱོགས་བཅུར་འཕྲོས་པས། ཕྱོགས་སྐྱོང་དྲེགས་པ་ཅན་ཐམས་ཅད་ཀྱང་བསྒྲལ་ཏེ་རྩིབས་བཅུར་གདན་དུ་བྱས་པའི་སྟེང་ཁྲོ་བོའི་དཀྱིལ་འཁོར་འཐོན་པ་ནི། ཧཱུཾ་ཧཱུཾ་ཛཿཛཿ ཤར་ཕྱོགས་སུ་ཁྲོ་བོ་རྣམ་པར་རྒྱལ་བ་དབུ་གསུམ་ཕྱག་དྲུག་ཞབས་རྣམ་པ་བཞི་དང་ལྡན་ཞིང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། ཡུམ་རྡོ་རྗེ་སྙེམས་མ་དང་འཁྲིལ་ནས་བརྒྱ་བྱིན་གྱི་གདན་ལ་བརྐྱངས་བསྐུམས་སུ་བཞུགས་པའི་གཡས་སུ་ཡབ་ཀྱི་སྤྲུལ་པ་སྟག་གི་མགོ་ཅན་དང༌། གཡོན་དུ་ཡུམ་གྱི་སྤྲུལ་པ་བྱ་རྒོད་ཀྱི་མགོ་ཅན་ནོ། །དེ་བཞིན་དུ་ཧཱུཾ་ཧཱུཾ་ཛཿཛཿ ལྷོར་ཁྲོ་བོ་གཤིན་རྗེའི་གཤེད་དང་ཡུམ་དུར་ཁྲོད་བདག་མོ། སྤྲུལ་པ་ཤ་བ་དང་འུག་པའི་མགོ་ཅན་ནོ། །ཧཱུཾ་ཧཱུཾ་ཛཿཛཿ ནུབ་ཏུ་ཁྲོ་བོ་རྟ་མཆོག་དཔལ་དང་ཡུམ་རྡོ་རྗེ་གཏུམ་མོ། སྤྲུལ་པ་བྱི་ལ་དང་པུ་ཤུད་མགོ་ཅན། ཧཱུཾ་ཧཱུཾ་ཛཿཛཿ བྱང་དུ་ཁྲོ་བོ་བདུད་རྩི་འཁྱིལ་བ་དང༌། ཡུམ་རྡོ་རྗེ་རླུང་འབྱིན་མ། སྤྲུལ་པ་
སེང་གེ་དང་ཕ་ཝང་མགོ་ཅན། ཧཱུཾ་ཧཱུཾ་ཛཿཛཿ ཤར་ལྷོར་ཁྲོ་བོ་དབྱུག་པ་སྔོན་པོ་དང་ཡུམ་རྡོ་རྗེ་སྡེར་མོ། སྤྲུལ་པ་གཡག་དང་བྱ་རོག་མགོ་ཅན། ཧཱུཾ་ཧཱུཾ་ཛཿཛཿ ལྷོ་ནུབ་ཏུ་ཁྲོ་བོ་མི་གཡོ་མགོན་པོ་དང་ཡུམ་རྡོ་རྗེ་གཏུན་ཁུང་མ། སྤྲུལ་པ་གཟིག་དང་ཁྭ་ཏའི་མགོ་ཅན། ཧཱུཾ་ཧཱུཾ་ཛཿཛཿ ནུབ་བྱང་དུ་ཁྲོ་བོ་གཞན་གྱིས་མི་ཐུབ་པ་དང་ཡུམ་རྡོ་རྗེ་མདའ་སྙེམས་མ། སྤྲུལ་པ་སྤྱང་ཀི་དང་ཁྲའི་མགོ་ཅན། ཧཱུཾ་ཧཱུཾ་ཛཿཛཿ བྱང་ཤར་དུ་ཁྲོ་བོ་ཁམས་གསུམ་རྣམ་རྒྱལ་དང་ཡུམ་རྡོ་རྗེ་གསོད་བྱེད་མ། སྤྲུལ་པ་དོམ་དང་སྲེ་མོའི་མགོ་ཅན། ཧཱུཾ་ཧཱུཾ་ཛཿཛཿ སྟེང་ཕྱོགས་སུ་ཁྲོ་བོ་ཧཱུཾ་ཀཱ་ར་དང་ཡུམ་རྡོ་རྗེ་སྒྲ་འབྱིན་མ། སྤྲུལ་པ་ཕག་དང་སྨིག་བུའི་མགོ་ཅན། ཧཱུཾ་ཧཱུཾ་ཛཿཛཿ འོག་ཕྱོགས་སུ་ཁྲོ་བོ་སྟོབས་པོ་ཆེ་དང་ཡུམ་རྡོ་རྗེ་སྐྱོད་བྱེད་མ། སྤྲུལ་པ་དྲེད་དང་བྱི་བའི་མགོ་ཅན་རྣམས་བཞུགས་པའོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཕཊ། ཅེས་བརྗོད་པས་སྲས་མཆོག་རྫས་ཀྱི་དཀྱིལ་འཁོར་དབུ་གསུམ་ཕྱག་དྲུག་པ། སྐུ་སྨད་ཕུར་བུའི་དབལ་དང་ལྡན་པ་ཟླ་གམ་གསུམ་ལ་བཀའ་ནོད་པའི་ཚུལ་དུ་བཞུགས་པའོ། །ཛཿཧཱུཾ་བཾ་ཧོཿ ལས་སྒོ་བཞིར་སྒོ་བ་བཞི་དང༌། མུ་རན་ལ་ཕུར་སྲུང་དམ་ཅན་གྱི་ཚོགས་རྣམས་མངོན་སུམ་ལྟ་བུར་
བཞུགས་པའོ། །རྡོ་རྗེའི་ཕྱག་རྒྱ་གནས་གསུམ་དུ་གཏུགས་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་བཞིན་དུ་ཝཱཀྐ་དང༌། ཙིཏྟ་སྦྱར་བས་བྱིན་གྱིས་རློབ། ཧཱུཾ། སྲིད་པ་ཕུར་བུར་བསྒྲུབ་པ་དང༌། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང༌། །རྟགས་དང་མཚན་མ་སྟོན་པ་དང༌། །རྡོ་རྗེ་ཕུར་པའི་དངོས་གྲུབ་སྩོལ། །ཨོཾ་ཧཱུཾ་སྭཱ་ཨཱཾ་ཧཱ། ཨ་བྷི་ཥིཉྩ་མཱཾ། ཞེས་དབང་བསྐུར། དེ་ནས་སྤྱན་འདྲེན་ནི། ཧཱུཾ། གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ཧེ་རུ་ཀ །བསྲེག་ཁང་མེ་ཡི་དཀྱིལ་འཁོར་དུ། །འགྲོ་བའི་དོན་ཕྱིར་སྤྱན་འདྲེན་ན། །བྱིན་གྱིས་རློབ་ཅིང་གཤེགས་སུ་གསོལ། །ཛཿཧཱུཾ་བཾ་ཧོཿ བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཕཊ། ཨ་གཙྪ་ཡ་ཨ་གཙྪ་ཡ། པྲ་བེ་ཤ་ཡ་པྲ་བེ་ཤ་ཡ། ཤོ་ཏ་ཡ་ཤོ་ཏ་ཡ། བཛྲ་ཊ་ཀི་ནི་ཧཱུཾ་ཕཊ། དེ་ནས་དམ་ཡེ་གཉིས་མེད་དུ་བྱ་བའི་ཕྱིར། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུཾ་བཛྲ་ས་མ་ཡ་ཧཱུཾ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཧཱུཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་
པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་དང༌། མཆོད་པ་ནི། ཧཱུཾ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་སོགས། ཨོཾ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ཨརྒྷཾ་སོགས་ཀྱིས་དབུལ། དེ་ནས་བསྲེག་རྫས་དབུལ་བ་ནི། དཀྱིལ་འཁོར་གྱི་ལྷ་ཚོགས་རྣམས་ཀྱི་ལྗགས་རྡོ་རྗེའི་སྦུ་གུ་ཅན་གྱིས་སྲེག་བླུགས་ཀྱི་རྒྱུན་དྲངས་ཏེ་གསོལ་བས་ཞི་བའི་ཕྲིན་ལས་མཛད་པར་གྱུར། ཞེས་བརྗོད་ཅིང་བསམ་ལ། རྩ་སྔགས་ལན་བདུན་གྱིས་དགང་བླུགས་བཀང་ལ། ཡེ་ཤེས་རྩེ་མོ་ལས། བཛྲ་ཨགྣེ་ཛྭ་ལ་སྥ་ར་ཎ་མ་ཧཱ་པཱུ་ཛ་ཁཱ་ཧི་ཧཱུཾ་ཕཊ། ལན་གསུམ་གྱིས་བསྐོར་བཞིན་འབུལ། དེ་ནས། ཧཱུཾ། གཏི་མུག་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་གྱིས་ནི་ཞི་མཛད་པས། །ཞི་མཛད་མཆོད་པ་བཞེས་སུ་གསོལ། །ཞེས་བརྗོད་ལ་རྫས་རྣམས། ཨོཾ་བཛྲ་ཀཱི་ལི་ཀཱི་ལ་ཡ། ཛཿཧཱུཾ་བཾ་ཧོཿ སརྦ་བིག་ནན་བཾ་ཧཱུཾ་ཧཱུཾ་ཕཊ། ཤཱནྟིཾ་ཀུ་རུ་སྭཱ་ཧཱ། ཞེས་པ་ཁོ་ནས་དབུལ་བ་ནི་རྡོ་རྗེ་ཁྲོས་པའི་བཤད་རྒྱུད་ཀྱི་དགོངས་པ་ཡིན་ལ། རྣམ་པ་གཅིག་ཏུ་སོ་སོའི་སྔགས་ཀྱིས་དབུལ་ན་ཕྲིན་ལས་ཀྱི་རྒྱུད་ལས། དེ་ནས་གཙོ་བོ་ཡབ་ཡུམ་དང༌། །ཕྱོགས་ཀྱི་ཁྲོ་བོ་ལྔ་རྣམས་ལ། །བརྒྱ་རྩ་བརྒྱད་ཀྱི་སྲེག་བླུགས་དབུལ། །ཁྲོ་བོ་ཡབ་ཡུམ་ཉི་ཤུ་
གཅིག །ཕྲ་མེན་སྒོ་མ་ལ་ནི་བདུན། །སོ་སོའི་སྔགས་ཀྱི་ཤམ་དག་ལ། །འདི་ཞེས་བྱ་བ་ཞི་གྱུར་ཅིག །ཤཱནྟིཾ་ཀུ་རུ་སྭཱ་ཧཱ། དེ་བྱས་གདུག་པའི་ཚོགས་རྣམས་ནི། །ཐམས་ཅད་མ་ལུས་ཞི་བར་འགྱུར། །ཞེས་བཤད་པ་ལྟར་བྱའོ། །ཇི་ལྟར་ཡང༌། བཟླས་བརྗོད་མེ་དང་འདྲ་བ་ཡི། །ཉོན་མོངས་རྩྭ་མཆོག་འདྲ་བ་བསྲེག །ཏིང་འཛིན་རྩལ་གྱི་ཁྱད་པར་ལས། །དྲོད་རྣམས་འབྱུང་བར་གདོན་མི་ཟ། །ཞེས་པས་བཟླས་བརྗོད་དང་ཏིང་ངེ་འཛིན་ནི་ལས་འགྲུབ་པའི་རྒྱུའི་གཙོ་བོ་ཡིན་པས་རྫས་མང་ལ་སྔགས་ཉུང་བ་ཡང་མི་ལེགས་སོ། །དེ་ཡང་བརྒྱ་རྩ་རེའི་མཚམས་སུ་ཐུགས་དམ་བསྐུལ་བའི་ཕྱིར། ཐབ་ཏུ་ཉུང་ཀར་འཐོར་ཞིང༌། བདག་དང་རྒྱུ་སྦྱོར་ཡོན་བདག་རྣམས། །སྒྲིབ་གཉིས་བྱང་ཞིང་ཚོགས་གཉིས་རྫོགས། །བྱད་ཕུར་གདོན་བགེགས་རིམས་ནད་དང༌། །རྨི་ལྟས་མཚན་ངན་དུས་མིན་འཆི། །འཇིགས་པ་བརྒྱད་དང་བཅུ་དྲུག་སོགས། །མྱུར་དུ་ཞི་ཞིང་མེད་པར་མཛོད། །ཅེས་འདོད་དོན་གསོལ་བས་ལྷ་ཚོགས་རྣམས་ཀྱི་སྐུ་ལས་ཟླ་བ་ཆུ་ཤེལ་ལྟ་བུའི་འོད་ཟེར་འཕྲོས་རང་དང་བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ལ་སོགས་ཞི་བར་བསམ་མོ། །རྫས་རྫོགས་པ་དང་དགང་བླུག་འབུལ་བ་ནི། རྩ་སྔགས་ཤམ་བཛྲ་ཨགྣེ་ཛྭ་ལ་སྥ་ར་ཎ་མ་ཧཱ་པཱུ་ཛ་ཁཱ་ཧི་ཧཱུཾ་ཕཊ། ཅེས་ལན་གསུམ་དང༌། དེ་ནས་དེ་ལ་སོགས་དང༌། བཛྲ་ཝསྟྲ་ཡེ་སྭཱ་ཧཱས་གོས་ཟུང་དང༌། བཛྲ་ཏམྦུ་ལ་ཡེ་སྭཱ་ཧཱས་སོ་རྩི་དབུལ། དེ་ནས་སྨན་གཏོར་རཀྟ་
འབུལ་བ་ནི། ཧཱུཾ། སངས་རྒྱས་ཀུན་དང་མཉམ་སྦྱོར་ཞིང༌། །རང་བྱུང་གདོད་ནས་རྣམ་པར་དག །རྩ་བརྒྱད་ཡན་ལག་སྟོང་སྦྱར་སྨན། །རིགས་ལྔ་དམ་ཚིག་ལྔ་ཡི་དངོས། །སྒྲོན་མ་ལྔ་དང་བདུད་རྩི་ལྔ། །རྒྱུད་ལྔ་དུག་ལྔ་འཇོམས་པའི་བདུད། །ཡེ་ཤེས་ལྔ་པོ་གྲུབ་པའི་རྩི། །འཆི་བ་མེད་པའི་དམ་རྫས་ཆེ། །དཀྱིལ་འཁོར་ལྷ་ཚོགས་རྣམས་ལ་འབུལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་དང༌། ཧཱུཾ། མཐུ་རྩལ་དབྱུང་བའི་དུས་ལ་བབ། །དམ་ཚིག་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །དུག་གསུམ་མཆོད་པར་རབ་ཕུལ་བས། །སངས་རྒྱས་སྐུ་གསུམ་ཐོབ་པར་འགྱུར། །མ་ཧཱ་བ་ལིནྟ་ཁཱ་ཧི། ཞེས་གཏོར་མ་འབུལ། དེ་ནས་རཀྟ་ཚར་གསུམ་ནི། ཧཱུཾ། དངོས་གྲུབ་བར་ཆད་བྱེད་པའི་གེགས། །གདུག་ཅིང་སྡང་སེམས་ལྡན་པ་རྣམས། །ཟུངས་ཤིག་རྒྱོབ་ཅིག་རྣམ་པར་ཆིངས། །གཏོགས་ཤིག་གྲོགས་དང་བྲལ་བར་གྱིས། །རེངས་པར་ཁུག་ལ་སྨྲར་ཆུག་ཅིག །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང༌། །བསྒོ་བའི་བཀའ་ལ་ཉན་པར་གྱིས། །མ་ཧཱ་རཀྟ་ཁཱ་ཧི། ཧཱུཾ། བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་
ཆད་ཇི་བཞིན་བཅས་པ་ཡི། །མངོན་སྤྱོད་ཕྲིན་ལས་མྱུར་དུ་མཛོད། །མ་ཧཱ་རཀྟ་ཁཱ་ཧི། ཧཱུཾ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང༌། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་མཛོད། །མ་ཧཱ་རཀྟ་ཁཱ་ཧི། དེ་ནས་སྦྱོར་སྒྲོལ་གྱི་མཆོད་པ་ནི། ཧཱུཾ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེག་ནས། །ལུས་ངག་རྡུལ་ཕྲན་བཞིན་དུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷ་ཡང་རུང་སྟེ་བསྒྲལ་བར་གྱིས། །ཁ་ཐཾ་ཁ་ཐཾ་ཁ་ཐཾ། ཁཱ་ཧི་ཁཱ་ཧི་ཁཱ་ཧི། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཧ་ཧ་ཧ། དེ་ནས་བསྟོད་པ་ནི། ཧཱུཾ། སྣང་སྲིད་ཐམས་ཅད་ཕུར་པའི་རང་བཞིན་ལས། །ཁམས་གསུམ་འཁོར་བ་མིང་ཡང་མི་གྲགས་ཀྱང༌། །རྒྱལ་བའི་རྫུ་འཕྲུལ་ཆེན་པོ་བསྟན་པའི་ཕྱིར། །རྡོ་རྗེ་མངོན་སྤྱོད་ཕྲིན་ལས་མཛད་ལ་བསྟོད། །ནོངས་བཤགས་ནི། མ་འབྱོར་བ་དང་སོགས། མཐར་ཡི་གེ་བརྒྱ་པས་བཤགས། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱིས་གཤེགས། གསུམ་པ་རྗེས་ཀྱི་རིམ་པ་ལ། ཨོཾ་ཨགྣེ་ཛྭ་ལ་ཧཱུཾ་
ཕཊ། ཅེས་བླུགས་གཟར་གྱིས་མེ་གསོས་པས་མེ་ལྷ་སྔར་བཞིན་བསམ། ཨོཾ་ཨགྣ་ཡེ་ཧ་བྱ་ཀ་བྱ་ཧཾ་ཧ་ན་ཡེ་ཏི་བྱ་ཏི་བ་ཡེ་ཤཱནྟིཾ་ཀུ་རུ་སྭཱ་ཧཱ། ཞེས་པས་རྫས་ལྷག་རྣམས་དང༌། བཛྲ་ཏམྦུ་ལས་སོ་རྩི། བཛྲ་ཝསྟྲས་གོས་དབུལ། ཨོཾ་ཨགྣེ་དེ་ཝ་རྀ་ཥི་ཨརྒྷཾ་སོགས་ཀྱིས་ཉེར་སྦྱོད་དབུལ། མེ་སྟེ་བསྲེག་བྱས་བསྟོད། ཨ་ཀཱ་རོས་གཏོར་མ་བསྔོས་ལ། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་ཕྲིན་ལས་བཅོལ། མ་རྙེད་ཡོངས་སུ་མ་ཚང་དང༌། །གཙོ་བོ་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱོད་ཀྱི་བཟོད་མཛད་རིགས། །ཞེས་ནོངས་པ་བཤགས། བདག་གི་དོན་དང་གཞན་གྱི་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་ལྟའི་དུས་སུ་ཚུར་བྱོན་ལ། །བདག་གི་དངོས་གྲུབ་ཐམས་ཅད་བསྒྲུབ། །བཛྲ་མུཿས་ཡེ་ཤེས་པ་གཤེགས། དམ་ཚིག་པ་འབར་བའི་རྣམ་པར་གྱུར། ཞེས་བརྗོད་ལ་དགེ་བ་བསྔོ་བ་དང༌། ཤིས་པ་བརྗོད་པས་མཐའ་རྒྱས་སུ་བྱ། མེ་རང་ཞིར་བཏང་བ་སོགས་རྗེས་ཀྱི་བྱ་བ་སྤྱི་དང་འདྲའོ། །ཕན་ཡོན་ནི། རྒྱུད་ལས། སྦྱིན་བསྲེག་གིས་ནི་ཐམས་ཅད་འགྲུབ། །དམ་ཚིག་ཉམས་པ་སྐོང་འགྱུར་ཞིང༌། །མཚམས་མེད་ལྔ་ཡི་སྡིག་བྱས་པ། །འདི་ཡིས་དག་པར་འགྱུར་བ་ཡིན། །ཞེས་སོ། །ཞི་བའི་སྦྱིན་བསྲེག་གི་རིམ་པ་རྡོ་རྗེ་ཕུར་པའི་རྒྱུད་སྡེ་རྒྱ་མཚོའི་རང་ལུགས་སོར་བཞག་ཅིང༌། མངོན་རྟོགས་རྒྱུད་ཚིག་ལྟར་བཀོད་
པ་འདི་ཡང་རིག་འཛིན་འཇིགས་མེད་གླིང་པས་སོ། །བདག་བསྐྱེད་ལ། རྡོ་རྗེ་སློབ་དཔོན་སངས་རྒྱས་དཔལ་སྔོན་དུ་བཏང་ནས། རཀྟའི་རྒྱ་མཚོ་ཆེན་པོ་འཁྱིལ་བའི་ཀློང༌། །སོགས་ནས། སྲིད་པ་ཕུར་བུར་བསྒྲུབ་པ་དང༌། །སོགས་མཐར། ཨ་བྷི་ཥིཉྩ་མཱཾ། ཞེས་དབང་བསྐུར་བ་ཡན་བརྗོད་ནས། ཀཱི་ལ་ཡ་བརྒྱ་རྩ་བཟླས་རྗེས། ལས་བུམ་ཨ་མྲྀ་ཏས་བསྒྲུབ་བོ། །དགེའོ།། །།