ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ བྱད་འགྲོལ་གནམ་ལྕགས་འཁོར་ལོ།

[Full Size]

འུྃཿ ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ བྱད་འགྲོལ་གནམ་ལྕགས་འཁོར་ལོ་བཞུགསཿ

[Full Size]

བདུད་འདུལ་སེང་གེའི་ཞལ་ལ་འདུདཿ རིག་སྔགས་སྟོང་གི་ནུས་པ་དངཿ བྱད་མ་འབུམ་གྱིས་མཐུ་རྡུགས་པཿའདི་ལ་རྟེན་པའི་བྱད་འགྲོལ་བསྟནཿ དེ་ལ་དང་པོ་བཅའ་གཞི་ནིཿ སྟེགས་གཙང་མར་མཁའ་འགྲོའི་མཆོད་གཏོར་ཉེར་སྤྱོད་བཅས་བཤམས་པའི་མདུན་དུ་མཉྫིའི་ཁར་རིན་པོ་ཆེའི་བུམ་པ་འགུལ་ཆིངས་མཐིང་ཁ་གཙང་ཆུ་དང་ཤྭ་འོད་སེར་བའི་ཆུས་བཀང་བ་ལཿ རིན་ཆེན་སྣ་ལྔཿཐོག་ལྕགས་ཕྱེ་མཿ ཚྭ་བ་གསུམཿ ཁ་ཤའམ་ཤ་བའི་རྭཿཕག་གི་སྣའམ་གྲུམ་པའི་སོཿཁྱུང་ངམ་བྱ་གཱག་གི་སྡེར་མོའི་ཕྱེ་མ་བླུག་ལ་ཤིང་འབྲས་ཅན་ཀྱིས་ཁ་བརྒྱནཿ མཉྫིའི་འོག་ཏུ་རི་རུད་དང་ཕུང་ས་བསྲེས་པའི་འཇིམ་པ་ལ་ཧོམ་ཁུང་ཆུང་ངུ་བཟོས་པའི་ནང་དུ་ཆུ་མིག་ལྐུགས་པའི་ཆུ་བླུགསཿ དེའི་ཟུར་གསུམ་ལ་དབྱེ་སྒྲོ་གཉིས་དང་དཔལ་འབར་བཙུགསཿ བྱད་ལིངཿ ཚོན་སྐུད་སྔོ་དམརཿ ཐང་ཕྲོམཿ ཉུངས་དཀརཿ སྲིད་པའི་ཕྱེ་མཿ མདའ་བྱ་རྒོད་མ་དར་ཚོན་བཏགས་པཿ མེ་ལོངཿ ཕུར་པཿཚེར་ཤིང་གི་མེ་ཧོམཿ བསད་གྲིཿསྔོན་གཏོར་རྣམས་འདུ་བྱའོཿ གཉིས་པ་སྒྲུབ་པ་ལ་གཉིས་ལསཿ དང་པོ་བདག་བསྐྱེད་ནི་ལས་གཞུང་བཞིན་བྱས་ལ་ཡིག་འབྲུ་བཅུ་བཞི་པ་སྟོང་ཕྲག་ལས་མི་ཉུང་བར་བཟླའོཿ གཉིས་པ་ལས་བུམ་སྒྲུབ་པ་ནིཿ མཆོད་པ་གསོས་ལཿ ལས་བུམཿ སྭ་བྷཱ་ཝས་སྦྱངསཿ སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལསཿ སྣོད་ཀྱི་འཇིག་རྟེན་རིན་ཆེན་བུམ་པ་བཟངཿ ཞབས་ཞུམ་འདོད་ཁམས་ལྟོ་ལྡིར་གཟུགས་ཁམས་ལཿ མགྲིན་པ་རིང་ཞིང་ཁ་གཡེལ་གཟུགས་མེད་ཁམསཿ ནང་ནི་རྣམ་ཐར་

[Full Size]

སྒོ་གསུམ་གཞལ་མེད་ཁངཿ གཞི་ལམ་འབྲས་རྫོགས་ཆོས་འབྱུང་བསྣོལ་མའི་དབུསཿ ཡེ་ཤེས་མེད་དཔུང་རབ་ཏུ་འབར་བའི་ཀློངཿ ཆུ་སྐྱེས་གེ་སར་ཐབས་ཤེས་ཉི་ཟླའི་སྟེངཿ སྐྱེ་མེད་རྡོ་རྗེ་ཨ་ཡིག་ཡོངས་གྱུར་ལསཿ སྐྱེ་མཆེད་ཡོངས་རྫོགས་རྡོ་རྗེ་བདག་མེད་མཿ སོགས་ནས་བསྟོད་པའི་བར་སོང་རྗེསཿ མདུན་བསྐྱེད་བུམ་ལྷའི་ཐུགས་ཀ་རུཿཐུགས་སྲོག་ཧཱུྃ་ཡིག་སྔོན་པོ་ལཿ ཡིག་འབྲུ་བཅུ་བཞིའི་ཤམ་བུ་རུཿཨོཾ་ཧྲཱི་བཛྲ་ཛྭ་ལ་སརྦ་བཛྲ་ཙྪིནྡ་ཡ་ཧ་ཧེ་ཧཱུྃ་ཕཊཿཅེས་བཏགས་པས་བསྐོར་བ་མགལ་མེའི་འཁོར་ལོ་ལྟར་བསྐོར་བ་ལས་བྱུང་བའི་འོད་ཟེར་མེ་སྟག་འཕྲོ་བས་བྱད་ཕུར་རྦོད་གཏོང་ཐམས་ཅད་ལྷག་མེད་དུ་བསྲེགས་པར་བསམ་ལ་བཟླས་པ་སྟོང་ཕྲག་སོགས་ཅི་ནུས་བཟླས་མཐར་མཆོད་བསྟོད་བྱས་ལ་བུམ་ལྷ་འོད་ཞུ་བྱའོ། །གསུམ་པ་ལས་སྦྱོར་ནི། བསྒྲུབ་བྱ་མདུན་དུ་འཁོད་ལ་བྱད་ཐག་གིས་བཅིངསཿ ཧོམ་ཁུང་མདུན་དུ་བཞག་པའི་ནང་དུ་ཚུད་པར་བསམ་ལ། དེ་ཡང་བྱད་ཅེས་བྱ་བའི་ངོ་བོ་ནི་རྫས་སྔགས་ཏིང་ངེ་འཛིན་གསུམ་ཚོགས་པའི་རྟེན་འབྲེལ་ལ་བརྟེན་ནས་སྐྱེས་བུའི་སྒོ་གསུམ་འཆིང་ཞིང་རྨོངས་བར་བྱེད་ལ། དེ་འབྱུང་བའི་རྒྱུ་ནི་སྔོན་གྱི་ལས་ངན་དང༌། རྐྱེན་ནི་རང་གི་ལུས་ངག་གི་སྤྱོད་པ་མི་གཟོ་བ་དང༌། ཕ་རོལ་གྱི་བསམ་སྦྱོར་ངན་པ་ལས་འབྱུང་

[Full Size]

ལཿ དེ་ལས་གྲོལ་བའི་ཐབས་ནི་རྡོ་རྗེ་འཆང་གི་བྱིན་རླབས་ལས་རང་བཞིན་དུ་འབྱུང་བའི་སྔགས་རྒྱུད་ཀྱི་གདམས་པ་ཟབ་མོ་རྣམས་དང༌། སྟོན་པ་དྲང་སྲོང་ཆེན་པོ་ལ་སོགས་ལྷ་དང་མིའི་དྲང་སྲོང་བདེན་ཚིག་གྲུབ་པ་རྣམས་ཀྱིས་སྟོན་པའི་ཚུལ་རྒྱུད་ལས། ནམ་མཁའ་མེད་པར་གྱུར་ན་ཡངཿ སྔགས་ཀྱི་དངོས་གྲུབ་མེད་མི་སྲིདཿ ལྷ་དང་དྲང་སྲོང་གིས་བཤད་པའིཿརིག་སྔགས་བསླུ་བར་མི་སྲིད་ནཿ འདོད་ཆགས་བྲལ་བས་བཤད་པ་ཡིཿགསང་སྔགས་སྦྱོར་བས་བསླུས་པ་ནིཿ མ་བྱུང་འབྱུང་བར་མི་འགྱུར་རོཿཞེས་པས་གསལ་སྟེ། དེ་ལས་འདི་སྔོན་བྱུང་དང་ཕྱིས་བྱུང་གི་ལོ་རྒྱུས་གཉིས་ལས་དང་པོ་ནི་རྣམ་པར་རྒྱལ་བའི་ཁང་བའི་གནས་སུ་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་གསོལ་པ། ཀྱཻཿ བཙུན་པ་བཅོམ་ལྡན་འདས་ཁྱེད་ནི་ཐམས་ཅད་མཁྱེན་པའི་གཙོ་བོ་ལྷ་མ་ཡིན་གྱིས་བདག་གིས་ལུས་ངག་ཡིད་གསུམ་བཅིངས་པ་ལས་དགྲོལ་དུ་གསོལཿ བཅོམ་ལྡན་འདས་ཀྱིས་བཀའ་སྩལ་པ། བརྒྱ་བྱིན་ཁྱོད་ཀྱིས་ང་ལ་གང་དག་ཞུ་བ་ལེགས་སོ། །དེའི་ཕྱིར་ལེགས་པར་རབ་ཏུ་སྟོན་ལ་ཡིད་ལ་བཟུང་སྟེ། འདི་ཉིད་ལ་ནན་ཏན་དུ་གྱིས་ཤིག །གང་དག་ལུས་ངག་ཡིད་གསུམ་མནན་པ་དང་བཅིངས་པ་དེ་ལ་ནི་

[Full Size]

ནམ་ཡང་བདེ་བའི་སྐབས་མི་འབྱུང་བས། རིགས་སྔགས་ཀྱི་མཐུ་དང་ཏིང་ངེ་འཛིན་གྱི་ནུས་པ་དང་ལས་ཚོགས་གཉིས་ལས་བྱུང་བའི་འབྲས་བུ་ཐམས་ཅད་ཉམས་པར་བྱ་བའི་ཕྱིར་དང༌། འཇིག་རྟེན་ཕ་རོལ་གྱི་ཡོན་ཏན་དང༌། བསོད་ནམས་དང༌། བདེ་བའི་འབྲས་བུ་ནམ་ཡང་འབྱུང་བར་མི་འགྱུར་ཏེ། འདི་ལྟར་ཉི་མའི་འོད་ཟེར་ཕུན་སུམ་ཚོགས་པར་གྱུར་ཀྱང་སྤྲིན་གྱི་དབང་དུ་བྱས་པ་བཞིན་ནོ། །དེ་བས་ན་ལུས་ངག་ཡིད་གསུམ་བཅིངས་པ་ལས་གྲོལ་བར་བྱེད་པའི་ཐམས་ལ་བརྩོན་པར་བྱའོ། །དེ་ལྟར་བྱས་ན་བཅིངས་པའམ་མནན་པ་ལས་གྲོལ་བར་འགྱུར་ཏེ། སྒྲོན་མེའི་འོད་ཀྱིས་མུན་པ་སེལ་བའམ། མེ་ལྕེའི་ནུས་པས་ནགས་ཐམས་ཅད་བསྲེགས་པའམ། སེང་གེའི་སྐད་ཀྱིས་རི་དྭགས་ཐམས་ཅད་ཟིལ་གྱིས་གནོན་པ་བཞིན་དུ། རིགས་སྔགས་ཆེན་མོ་འདིའི་བྱིན་རླབས་ཀྱིས་བཅིངས་པ་ཐམས་ཅད་ལས་གྲོལ་བར་བྱེད་དོ། །ཞེས་གསུངས་ལ་ཕྱིས་བྱུང་གི་ལོ་རྒྱུས་ནི། རིག་པ་འཛིན་པ་ཐམས་ཅད་ཀྱི་རྒྱལ་པོ་སློབ་དཔོན་ཆེན་པོ་པདྨ་འབྱུང་གནས་རྒྱལ་པོ་ཛའི་ཁབ་དང་ཉེ་བའི་རི་མཱ་ལ་ཡ་གནམ་ལྕགས་འབར་བ་སེང་གེའི་ཟ་འགྲམ་ལྟ་བུར་མཁའ་འགྲོའི་ཚོགས་དཔོན་མཛད་ཅིང་བཞུགས་པའི་ཚེ། མུ་སྟེགས་ཀྱི་སྟོན་པ་གྷ་ན་པ་ཏི་ལ་སོགས་

[Full Size]

པ་ལྔ་བརྒྱས་སློབ་དཔོན་ལ་རྩོད་པ་བྱས་པས་མ་ཐུབ་སྟེ། སླར་ཁྲོས་ནས་རི་སུལ་ཞིག་ཏུ་མུ་སྟེགས་ཀྱི་ངན་སྔགས་བཅས་ཆོ་ག་ནག་པོ་ཞེས་བྱ་བ་བསྒྲུབས་པས་མཐུ་རྟགས་ཆེན་པོ་བྱུང་ནས་སློབ་དཔོན་ཉིད་ལག་ན་རྡོ་རྗེ་སེང་གེའི་ང་རོ་ཅན་ཞེས་བྱ་བའི་སྐུར་བཞེངས་ཏེ་རིགས་སྔགས་ཀྱི་སྦྱོར་བ་གཤིག་པའི་ཏིང་ངེ་འཛིན་ལ་སྙོམས་པར་ཞུགས་པའི་ཚེ། མཁའ་འགྲོ་བདུད་འདུལ་སེང་གེའི་གདོང་ཅན་གྱིས་ཞལ་བསྟན་ནས་རིགས་སྔགས་ཀྱི་དངོས་གྲུབ་བྱིན་པས་དེ་ཉིད་དུ་མུ་སྟེགས་ཀྱི་སྟོན་པ་ངན་སྔགས་མཁན་གནམ་ལྕགས་ཐོག་གིས་བསྒྲལ། ཕྱི་རབས་ཀྱི་འགྲོ་བའི་དོན་དུ་གདམས་པ་ཟབ་མོ་འདི་མཁའ་ལྡིང་འབར་བའི་བརྡ་རིས་ལ་བྲིས་ཏེ་ཀློང་ལྔ་འདུས་པའི་གཏེར་སྒྲོམ་དུ་རྒྱས་བཏབ་པས་དམག་འཁྲུགས་དང་བྱད་ཕུར་དར་བའི་ཚེ། རིག་འཛིན་འཇིགས་མེད་གླིང་པ་ལ་བཀའ་བབས་པས་བརྒྱུད་པ་ཁུངས་ལ་ཐུག་པའི་མན་ངག་ཟབ་མོའི་སྒོ་ནས་བྱང་འགྲོལ་བ་ལ་ངེས་ཤེས་དང་དད་པ་བསྐྱེད་ནས་སློབ་དཔོན་མཁའ་འགྲོ་མ་སེང་གེའི་གདོང་ཅན་དངོས་སུ་མོས་པའི་མདུན་དུ་རང་ཉིད་ཕ་རོལ་མི་དང་མི་མ་ཡིན་གྱི་བྱད་དུ་བཅུག་པ་ལས་དབུགས་དབྱུང་བའི་མོས་པ་མཛོད། བརྡ་སྦྱར་ལ། ཐོག་མར་ཕྱོགས་སྐྱོང་དང་གཞི་བདག་ལ་ཕུད་དང་གཏོར་མ་ཨ་ཀཱ་རོས་བསྔོས་ལ། མཆོད་

[Full Size]

སྦྱིན་གཏོར་མ་འདི་བཞེས་ལ། སོགས་ཀྱིས་དོར། དེ་ནས་ཡི་དམ་གྱི་ང་རྒྱལ་བརྟན་པས་བསད་གྲིའམ་གྲི་གུག་ཕྱར་ལ། ཧཱུྃཿབྱད་ཅེས་བྱ་བ་ཀུན་རྫོབ་སྟེཿ བསྒྲུབ་བྱའི་ལུས་ནི་བེམ་པོ་ལཿ སེམས་ནི་སྟོང་པ་ཉིད་ཡིན་ཀྱངཿ གློ་བུར་རྣམ་རྟོག་ལས་གྲུབ་པའིཿམིང་གཟུགས་འདུས་པའི་བླ་སྲོག་ལཿ ཕ་རོལ་མི་དང་མི་མིན་གྱིསཿ རྫས་སྔགས་ཏིང་འཛིན་མཐུས་བསྐྱེད་པའིཿའགུགས་འཆིང་སྡོམ་མྱོས་ཕྱག་རྒྱ་བཞིསཿ སྒོ་གསུམ་བྱད་དུ་བཅུག་པ་རྣམསཿ གྲི་གུག་འབར་བའི་ཕྱག་རྒྱས་བཅདཿ སྤུ་གྲི་རྣོན་པོའི་དབལ་ལ་བསྐྱོནཿ རིགས་སྔགས་འབར་བའི་མེ་ཡིས་བསྲེགཿ ཨཿཀཿསཿ མཿ རཿ ཙཿཤཿདཿ རཿ སཿ མཿ རཿ ཡཿཕཊཿལན་གསུམ་གྱི་རྗེས། བསྒྲུབ་བྱའི་ལུས་ངག་ཡིད་གསུམ་བྱད་དུ་བཅུག་པ་དང༌། བཅིངས་པ་དང༌། མནན་པ་དང༌། ནུས་པ་བཤིག་པ་ཐམས་ཅད་གྲོལ་བར་གྱུར་ཅིགཿ ཅེས་བྱད་ཐག་དུམ་བུར་གཏུབསཿ དེ་ནས་མདུན་དུ་སྟན་པའི་སྟེང་དབྱེ་སྒྲོ་གཉིས་བཞག་ལ་རལ་གྲི་བསྟུན་ཞིངཿ ཧཱུྃཿམི་ལ་འགོ་བ་ལྷ་ལྔ་སྟེཿལྷ་དང་མི་རུ་དབྱེན་སྦྱོར་བའིཿཕྲ་མེན་ཕྲ་མ་མཁན་གཉིས་ཀྱིསཿ ཉེས་བྱེད་སྦྱོར་བ་ཞིག་གྱུར་ཅིགཿ ཡིག་འབྲུ་བཅུ་བཞི་དངཿ ཨོཾ་མ་མ་སརྦ་བི་དྷ་བི་དྷཿཛ་ཡེ་ཛ་ཡེཿབི་ཛ་ཡེ་བི་ཛ་ཡེཿཨ་ཛི་ཏེ་ཨ་པ་ར་ཛི་ཏ་ཡེ་མ་མ་བྷེ་བྷྱ་པྲ་མར་དྷཿ ཧ་

[Full Size]

ཡེ་མ་མ་ཧཱུྃ་ཕཊཿ གཞན་གྱིས་མི་ཐུབ་པའི་རིགས་སྔགས་ཆེན་མོ་འདིས་གང་དག་སྡང་བ་དངཿ ལོག་པར་སེམས་པ་ཐམས་ཅད་ཞི་བར་གྱུར་ཅིགཿ ཅེས་དུམ་བུར་གཅདཿ དེ་ནས་བྱད་ལིང་གི་སྟེང་དུ་བྱད་ཐག་དང་སྒྲོ་དུམ་བཞག་ལཿ ན་མོཿ སངས་རྒྱས་ཀྱི་བདེན་པ་དངཿ ཆོས་ཀྱི་བདེན་པ་དངཿ དགེ་འདུན་གྱི་བདེན་པ་དངཿ ཁྱད་པར་དུ་རིག་སྔགས་ཀྱི་རྒྱལ་མོ་མཁའ་འགྲོ་སེང་གེའི་གདོང་ཅན་གྱི་བདེན་པ་དངཿ བྱིན་རླབས་ནུས་པའི་མཐུསཿ བསྒྲུབ་བྱ་འདི་ཉིད་ལ་ཕ་རོལ་བན་བོན་མི་དང་མི་མིན་གྱིས་བྱས་པའི་བྱད་ཁ་ཕུར་ཁ་ཟོར་ཁཿཧོམ་དང་པར་བུཿསྡེབས་གཤོརཿ རླུང་འཁོརཿ གྱིམ་ཤངཿ གཤེད་སྡེབསཿ བསད་བསྐྲདཿ དབྱེ་རྨོངས་ལ་སོགས་པ་དངཿ རང་གི་སྦྱོར་ངན་ལོག་པའི་ནུས་པ་ཐམས་ཅད་དམིགས་པའི་རྟེན་འདི་ལ་ཁུག་ཅིགཿ རང་གཤེད་རང་ལ་ཕོབ་ཅིགཿ ཅེས་ལན་གསུམ་གྱིས་བསྟིམ་ལཿ བྱད་མ་རང་གཤེད་དབབ་པ་འདི་བྱ་སྟེཿཕུར་པ་འདྲིལ་ལཿ ཧཱུྃཿཕུར་ནི་སྐྱེ་བ་མེད་པ་ལཿ པ་ནི་འགག་པ་མེད་པ་སྟེཿསྐྱེ་འགགས་བྲལ་བའི་ཕུར་པ་ནིཿ བྱད་མའི་རྣམ་ཤེས་ཚོགས་བརྒྱད་ལཿ བཏབ་ནས་དབང་དུ་བྱས་པ་ཡིཿབསྒྲུབ་བྱའི་རྣམ་པར་ཤེས་པའི་ཚོགསཿ བཅོམ་དང་ཉམས་པ་སོར་ཆུད་ནསཿ དབང་ཡུལ་སྐྱེ་མཆེད་གསལ་གྱུར་ཅིགཿ ཡིག་འབྲུ་བཅུ་བཞི་ལཿ ཀཱི་ལི་ཀཱི་ལ་ཡ་ཧཱུྃ་ཕཊཿ

[Full Size]

ཅེས་བཏགས་པ་ཚར་བརྒྱད་བརྗོད་ཅིང་བྱད་ལིང་གཏུབས། དེ་ནས་མཐའ་སྡུད་འབྱུང་བ་བཞིའི་སྦྱོར་བ་བཤིག་པ་ནིཿ དཔལ་འབར་སྦར་ལཿ ཧོམ་ཁུང་གི་ཆུ་ལ་གསད་ཅིངཿ ཧཱུྃཿའབྱུང་བཞི་འདུས་པའི་ལུས་རྟེན་ནིཿ གྲུབ་ཀྱང་འབྱུང་བ་བཞི་ལ་གྲུབཿ བཤིག་ཀྱང་འབྱུང་བའི་ནུས་པས་བཤིགཿ ཚ་ཞིང་བསྲེག་པ་མེའི་ཀློང་དུཿ ཧོམ་དང་སྦྱིན་སྲེག་ལས་གྱུར་བྱདཿ འབྱུང་བའི་དགྲ་གཤེད་ཆེན་པོ་སྟེཿམེ་དགྲ་ཆུ་ཡི་ནུས་པས་བསདཿ ཨོཾ་ཤཱིནྟཾ་ཀ་རི་ནི་ཡེ་མ་མ་བཛྲཿཛྙཱ་ན་པྲ་ཡཙྪ་ཡཾཿམ་མ་བྷི་དྷ་ར་ཡཿཧ་ཧ་ཧེ་ཧེ་ཧི་ཧི་ཧཱུྃ་ཧཱུྃཿཔྲ་ཀ་ར་ན་སརྦ་ས་ཙ་ཡ་ལ་སརྦ་བཛྲ་རཀྵཿརཀྵཿཕཊ་ཕཊཿསྭཱ་ཧཱཿཧོམ་ཁུང་གི་ཆུ་སྲིད་པའི་བྱེ་མས་མནན་ཅིངཿ ཧཱུྃཿརླན་ཞིང་གཤེར་བ་ཆུའི་ཀློང་དུཿ ཀླུ་ལ་གཏད་ཁྲམ་ལས་གྱུར་བྱདཿ འབྱུང་བའི་དགྲ་གཤེད་ཆེན་པོ་སྟེཿཆུ་དགྲ་ས་ཡིས་མནན་པར་བྱཿསྔགས་གོང་བཞིན་བརྗོདཿ ཧོམ་ཁུང་གིས་སྟེངས་མདའ་བྱ་རྒོད་མ་བཙུགས་ལ་ཧོམ་ཁུང་བུམ་ཆུས་བཤིག་ཅིངཿ ཧཱུྃཿསྲ་ཞིང་འཐས་པ་སའི་ཀློང་དུཿ གཤེར་དང་མནན་པ་ལས་གྱུར་བྱདཿ འབྱུང་བའི་དགྲ་གཤེད་ཆེན་པོ་སྟེཿས་དགྲ་ཤིང་གིས་བསད་པར་བྱཿསྔགས་གོང་བཞིནཿ དེ་ནས་བསྒྲུབ་བྱར་མེ་ལོང་ལ་ཧས་བཏབ་ཏུ་བཅུག་ལཿ ཧཱུྃཿཡང་ཞིང་གཡོ་བ་རླུང་གི་ཀློངཿ འཁོར་ལོ་བསྐོར་བ་ལས་གྱུར་བྱདཿ མེ་ལོང་སྟེང་དུ་སྐྱུགས་པ་ཡིསཿ རང་བཞིན་མེད་པའི་དབྱིངས་སུ་ཡལཿ སྔགས་གོང་བཞིན་བརྗོད་པ་དང་མཉམ་དུ་བསྒྲུབ་བྱ་བུམ་ཆུས་བཀྲུཿདེ་ནས་བྱད་ཐག་དང་དབྱེ་སྒྲོའི་དུམ་བུ་ཟངས་ཀྱི་གའུ་ལ་སོགས་པའི་པར་བུར་བཅུག་

[Full Size]

དུ་བ་མི་འཆོར་བ་བྱས་པ་ཧོམ་ནང་དུ་བཞག་ལ་མེ་སྤར་ཞིངཿ སྭཱ་བྷཱ་ཝས་སྦྱངས། སྟོང་པའི་ངང་ལས་བསྐལ་པ་དུས་མཐའི་མེ་དཔུང་འབར་བའི་དབུས་སུ་དུས་གསུམ་བདེ་གཤེགས་ཐམས་ཅད་ཀྱི་མཐུ་སྟོབས་གཅིག་ཏུ་བསྡུས་པ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་ཅན་བལྟར་མི་བཟོད་པའི་གཟི་བརྗིད་ཅན་ཞལ་གནམ་ས་ལྟ་བུར་བགྲད་པའི་ནང་དུ་ཕ་རོལ་མི་དང་མི་མ་ཡིན་པའི་བྱད་གཟུགས་འདོད་ཆགས་ཁྲག་གི་རྒྱ་མཚོ། ཞེ་སྡང་རུས་པའི་གྲམ་བུ། གཏི་མུག་ཤའི་རི་བོར་གྱུར་པ་ཨ་ལ་ལ་ཞེས་གད་མོའི་སྒྲ་དང་བཅས་བཞེས་པར་གྱུརཿ ཅེས་བརྗོད་ལ་བསྔགས་ཀྱི་མཚོན་ཆ་ཉུངས་ཀར། སྨྱོ་བྱེད་ཀྱི་རྫས་ཐང་ཕྲོམ་འབྱུང་བ་བཞི་ལ་བརྟེན་པའི་བྱད་རྫས་རྣམས་བདུད་རྩིའི་རང་བཞིན་དུ་དམིགས་པ་ཕུལ་ལཿ ཧཱུྃཿབྱད་མའི་བསམ་སྦྱོར་ངན་པ་རྣམསཿ བདུད་འདུལ་དྲག་མོའི་ཞལ་དུ་སྟོབཿ དགྱེས་པར་རོལ་ཅིག་ཁ་རཾ་ཁཱ་ཧིཿཛཿཧཱུྃ་བཾ་ཧོཿཧ་ཧ་ཕཊཿཞེས་བརྗོད་ཅིང་རོལ་མོ་སྒྲོགསཿ བཛྲཿམུཾཿཡེ་ཤེས་པ་གཤེགསཿ དམ་ཚིག་པ་མེ་ལྷའི་རྣམ་པར་གྱུར་པ་ལས་བསྒྲུབ་བྱས་ལན་བདུན་འགོངས་པས་མཐུ་བྱད་ཀྱི་ནུས་པ་ལྷག་མེད་དུ་འཚིག་པར་བསམཿ རྟེན་འབྲེལ་སྙིང་པོ་བརྗོད་སྟན་དཀར་གྱི་སྟེང་དུ་བཞག་ནས་ལག་ཏུ་མདའ་དར་གཏད་ཅིང༌། བྱང་ཆུབ་སྙིང་པོར་གཤེགས་པ་ན། སོགས་ཀྱིས་ཤིས་པ་བརྗོད། དགེ་བ་བསྔོ། ཧོམ་རོ་ཆུ་ཀླུང་ཆེན་པོའམ། རི་རྩེར་རླུང་ལ་འཕྱར་བར་བྱའོ། །བདེ་གཤེགས་བཀའ་དང་ཌཱཀྐཱིའི་བརྡཿགུ་རུའི་མན་ངག་གསུམ་རྫོགས་པའིཿབྱད་འགྲོལ་གནམ་ལྕགས་འཁོར་ལོ་འདིཿ སྙིང་གི་བུ་ལ་གཏད་དོ་རྒྱཿ ས་མ་ཡཿ རྒྱ་རྒྱ་རྒྱཿ