ཐུགས་སྒྲུབ་དཔལ་ཆེན་འདུས་པ་ལས་ཧེ་རུ་ཀ་རིགས་བཞིའི་སྒོས་སྒྲུབ་བསྙེན་པའི་དམར་བྱང་།

[Full Size]

ཐུགས་སྒྲུབ་དཔལ་ཆེན་འདུས་པ་ལས་ཧེ་རུ་ཀ་རིགས་བཞིའི་སྒོས་སྒྲུབ་བསྙེན་པའི་དམར་བྱང་བཞུགས། །བཅོམ་ལྡན་འདས་ཁྲག་འཐུང་གི་རྒྱལ་པོ་ལ་ན་མོ། རིགས་བཞིའི་ཁྲག་འཐུང་གི་བསྙེན་པ་བྱེད་ན། བསྙེན་རྐྱང་གི་དུས་ཚོམ་བུའི་ཁར་སོ་སོའི་སྒྲུབ་རྟེན་འབྱོར་ན་ཁྲིའུའི་ཁར་བཤམ། མ་འབྱོར་ན་གཏོར་མ་ཁོ་ནས་རུང༌། སྒྲུབ་ཆེན་ལ་ཚོན་དཀྱིལ་གཉིས་གང་རུང་གི་ས་ཆོག་སྟ་གོན་རྣམས་དབང་གི་སྤྱི་དོན་ལྟར་བྱ། གཏོར་ཚོགས་བཟང་དུ་བཤམ། དེ་ནས་དང་པོ་འཇམ་དཔལ་གཤིན་རྗེའི་སྐབས། སྣང་སྲིད་ཐམས་ཅད་འཇམ་དཔལ་གཤིན་རྗེའི་རྟེན་དང་བརྟེན་པར་བསྐྱེད་པ་ལས་བདག་མདུན་གྱི་གཉིས་རྟོག་མི་དགོས། ཛཔ་ལ་བབ་པ་ན། ཡ་མ་རཱ་ཛའི་ཐུགས་ཀར་ཉི་སྟེང་ཧཱུཾ་ཡིག་མཐིང་ཀས་མཚན་པ་ལ་མདུན་ནས་བརྩམས་ཏེ་སྔགས་ཕྲེང་སྤུས་བྲིས་པ་ལྟར་ཤིན་ཏུ་ཕྲ་བ་གཡོན་བསྐོར་དུ་བཀོད་ལ་ཀློག་ཐབས་སུ་སེམས་འཛིན། དེའི་འོད་ཟེར་གྱིས་མུན་ཁུང་དུ་སྒྲོན་མེ་བཏེག་པ་ལྟར། དང་པོར་གཙོ་བོ་ཡབ་ཡུམ། དེ་གསལ་ཐེབས་ནས་ཕྱག་རྡོར་དང་རུས་སྦལ་ཏེ་རྩ་བའི་ལྷ་ལྔ་ཆར་གྱི་གསལ་སྣང་ལ་སློབ། དེ་ནས་རིམ་བཞིན་རྒྱན་གྱི་ལྷ་རྣམས་དང་བཅས་རྟེན་དང་བརྟེན་པ་ཐམས་ཅད་ཁྲ་ལམ་གྱི་གསལ་ན་རབ། མིན་ཀྱང་དེ་ལ་འདུན་པ་བརྟས་པ་དང་འོད་ཟེར་སྤྲོ་བསྡུ་གཞུང་བཞིན་བྱ། ཆེར་གོམས་པ་དང་ཐུན་མཇུག་ཚོར། ཐུགས་ཀའི་སྔགས་ཕྲེང་ལས་རང་འདྲ་གཉིས་

[Full Size]

པ་ཆད་དེ་ལུ་གུ་རྒྱུད་དུ་འབྲེལ་བ་ཞལ་ལས་ཐོན། ཡུམ་ཞལ་དུ་ཞུགས། ཡེ་ཤེས་སེམས་དཔའ་ལ་བསྐོར་བ་རྒྱུན་མི་ཆད་པ་ལ་དོ་ལི་ཟེར། སྒྲུབ་ཆེན་ལ་ཕཊ་ཛས་འཛབ་ཁང་དབྱེ་ནས་བདག་མདུན་ཕྱེ་ཞིང་དམིགས་པ་འདི་གཙོ། སྲོག་སྡོམ་གཟེར་བཞིའི་དོན་སོགས་དཔལ་ཆེན་གྱི་བསྙེན་ཡིག་དང་བསྐྱེད་རིམ་རྣམ་བཤད་དུ་གསལ། སྒོས་ཆོས་རྣམས་མ་གཏོགས་དམིགས་པ་འདིས་འོག་མ་རྣམས་ཀྱང་ཁོག་དབུབ། ༈ རྟ་མཆོག་རོལ་པ་ནི། ཡེ་ཤེས་སེམས་དཔའ་ཡུམ་པདྨ་གཟི་ལྡན་མ་སྐྱིལ་ཀྲུང་ཕྱག་གཡས་སྟེང་དང་གཡོན་པ་འོག་ཏུ་བྱས་པའི་སྡིགས་མཛུབ་སྙིང་གར་ཁ་སྤྲད་པའི་ཐུགས་ཀའི་དབྱིངས་ལ་རིན་ཆེན་ཟུར་བརྒྱད་དམར་པོའི་སྟེང་ཉི་གདན་ལ་ཧྲཱིཿཡིག་མཐར་སྔགས་ཕྲེང་བསྐོར་ཚུལ་དང་སྤྲོ་བསྡུ་སོགས་གོང་དང་འདྲ་རུང་བ་ལས། དང་པོ་འཕྲོ་འདུ་ལྷ་རྣམས་བསྐུལ། །གཉིས་པ་མ་མོ་མཁའ་འགྲོ་བསྐུལ། །གསུམ་པ་ལས་ཀྱི་མཁའ་འགྲོ་བསྙེན། །བཞི་པ་གཉིས་མེད་ངང་དུ་བསྙེན། །འཕྲོ་འདུ་འཕྲོ་བ་མ་དད་བཏུལ། །དེ་ལས་ཕར་མཆོད་ཚུར་དངོས་གྲུབ། །ཚ་ཚའི་ཚུལ་དུ་འཕྲོ་འདུ་བྱ། །དེ་ནི་སྒྲུབ་པ་ཆེན་པོའོ། །ཞེས་རྟ་མཆོག་རོལ་པ་ལས་བཤད་པ་ལྟར་བྱའོ།། ༈ ཡང་དག་གི་ཁྱད་པར། གནས་སོ་སོར་རིན་པོ་ཆེ་ཟུར་བརྒྱད་པ་རེ་ལས། ཀླད་པ་དུང་ཁང་གི་ནང་དུ་ཟླ་གདན་ལ། ཨོཾ་དཀར་པོ་ལ་རུ་ལུ་གསེར་གྱི་ཕྲེང་བ་

[Full Size]

ལྟ་བུ་དང༌། མགྲིན་པར་པདྨ་འདབ་བརྒྱད་ཀྱི་སྟེང་ཨཿཡིག་དམར་པོ་ལ་རུ་ལུ་དམར་གསལ་མགལ་མེ་ཀླད་ལ་བསྐོར་བ་ལྟ་བུ་དང༌། སྙིང་གར་ཉི་གདན་ཧཱུཾ་སྔོན་པོའི་མཐར་རུ་ལུ་སྔོ་ནག་ལྕགས་ཞུན་འཐོར་བ་ལྟ་བུས་བསྐོར། དེ་བཞིན་དུ་གཽ་རཱི་མ་སོགས་ལྷ་མོ་བརྒྱད་ཀྱི་ཐུགས་ཀར་རིན་ཆེན་ཟུར་བརྒྱད་ལ་རུ་ལུའི་ཡི་གེ་མདུན་ནས་བརྩམས་འབྲུ་རེ་དང༌། དབུས་ན་སོ་སོའི་མིང་ཡིག་ཐིག་ལེས་མཚན་པའི་ཐུགས་སྲོག་གནས་པ་ལ་སེམས་འཛིན་ཅིག་ཆར་དུ་ཐོབ་ན་རབ། མིན་ན་གཙོ་བོའི་ཐུགས་ཀ་ནས་རིམ་པར་གྱེན་དུ་སྔགས་ཕྲེང་ལས་སེམས་གཏད་དེ་རུ་ལུའི་བཟླས་པ་བྱས་པས་ཡི་གེའི་སྤྲིན་ནམ་མཁའ་གང་བར་སྤྲོས། ཕྱོགས་བཅུའི་རྒྱལ་བ་སྲས་དང་བཅས་པ་ལ་བདེ་སྟོང་གི་མཆོད་པ་ཕུལ། ཐུགས་དམ་གྱི་རྒྱུད་བསྐུལ། ཡང་ཡི་གེའི་སྤྲིན་ལས་སྣོད་བཅུད་དུ་འཛིན་པའི་རྟོག་པ་སྦྱངས། དེ་རྣམས་ཚུར་འདུས་ཡི་གེ་སོ་སོ་ལ་ཐིམ། རྣམ་པར་ཤེས་པའི་ཚོགས་བརྒྱད་དང་ཡུལ་ལ་ཉེ་བར་ལེན་པའི་སེམས་ཤིན་ཏུ་རྣམ་པར་དག་ནས་ཚེ་འདི་ཉིད་ལ་ཕྱག་རྒྱ་ཆེན་པོ་མཐོང་ལམ་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་ནས་མཆོག་གི་དངོས་གྲུབ་བདེ་བླག་ཏུ་ཐོབ་པར་བསམ་པ་སྟེ། ཧེ་རུ་ཀ་གལ་པོ་ལས། རང་སེམས་བྱང་ཆུབ་འབྲུ་བརྒྱད་ཉིད། །རུ་ལུ་གསེར་ཕྲེང་རིན་པོ་ཆེ། །གཅིག་ལས་མང་སྤྲོས་དགུ་

[Full Size]

རུ་ལྡན། །བསམ་འཕེལ་འབྲུ་བརྒྱད་རིན་པོ་ཆེ། །རྒྱལ་བ་ཀུན་ཀྱི་ཐུགས་ཀྱི་དབྱིག །གདོད་ནས་ཡེ་ཤེས་སྙིང་པོ་བས། །བྱིན་རླབས་འབྲུ་བརྒྱད་ཕྱག་རྒྱར་གསལ། །དྲོད་ཚད་རྟགས་དང་ལྡན་པ་ཡིས། །དེ་བཞིན་ཉིད་དུ་ཤེས་པར་བྱ། །ཅེས་དང༌། ཀུན་གཞིའི་རྣམ་ཤེས་ཡུམ་སྐུར་གསལ། །ཡབ་ཡུམ་གཉིས་མེད་སྐུ་གསུང་ཐུགས། །ཐུགས་ཀྱི་ཡོན་ཏན་འབྱུང་བའི་གཏེར། །ཞེས་གསུང་པས་འདིས་ནི་རྟོགས་པ་ཁྱད་པར་ཅན་རྒྱུད་ལ་སྟེར་བ་ཡིན་ནོ། །༈ཕུར་པའི་ཁྱད་པར་ནི། ཐུགས་ཀར་རིན་པོ་ཆེའི་གཞལ་མེད་ཁང་སྒོ་གཅིག་པའི་ནང་དུ་ཡེ་ཤེས་སེམས་དཔའ་རྡོ་རྗེ་མི་བསྐྱོད་པ་དཀར་པོ་ཡུམ་དང་བཅས་པ་པད་ཟླའི་གདན་ལ་བཞུགས་པའི་ཐུགས་ཀར་རྡོ་རྗེ་མཐིང་ནག་རྩེ་ལྔ་པ། དེའི་ལྟེ་བར་ཉི་དཀྱིལ་ལ་ཏིང་འཛིན་སེམས་དཔའ་ཧཱུཾ་མཐིང་ནག་ལ་སྔགས་ཕྲེང་གིས་སྐོར་བ་ལ་སེམས་རྩེ་གཅིག་ཏུ་བཟུང་ནས་རེས་འགའ་རྣམ་པ་གསལ། རེས་འགའ་དག་དྲན་སྒོམ་ཅིས་ཀྱང་གསལ་དཀའ་ན་ང་རྒྱལ་ལ་དྲན་པ་བརྟེན་ནས་འོད་ཟེར་སྤྲོ་བསྡུས་དོན་གཉིས་བྱ་བ་ལ་གཙོ་བོར་བསླབ་ཅིང༌། སྒྲུབ་པའི་དུས་དོ་ལི་ལ་བསླབ་པ་སྔར་བཞིན་ནོ། །འདིའི་དོ་ལིའི་ཁྱད་པར་སྔགས་ཕྲེང་དབུས་ར་ནས་འཐོན། དམ་ཚིག་སེམས་དཔའི་ཤངས་བུག་གཡས་པ་བརྒྱུད། མདུན་བསྐྱེད་ཡོད་སྐབས་དེའི་ཤངས་

[Full Size]

བུག་གཡོན་པ་ནས་རིམ་པར་ཤངས་གཡས། དེ་ནས་རང་གི་སྣ་བུག་གཡོན་པ་ནས་འཇུག་པའི་ཁྱད་པར་རོ། །གལ་ཏེ་སྨད་ལས་ཀྱི་དམ་ཅན་ཉེ་བསྙེན་སོགས་འདོད་ན་རྒྱུད་ལུགས་ལོགས་སུ་བཀོད་པ་ལས་ཕུར་པའི་གྲུབ་མཐའ་དཔྱིས་ཕྱིན་པར་ཤེས་པར་བྱའོ། །ཅེས་མདོ་ཁམས་པ་འཇིགས་མེད་བློ་གསལ་ཅན་གཉིས་ཀྱི་ངོར་ཆོས་ཀྱི་བདག་པོས་དེ་མ་ཐག་བཀོད་པའོ། །