ཀློང་ཆེན་སྙིང་གི་ཐིག་ལེ་ལསཿ ཡུམ་ཀའི་བྱིན་རླབས་དབང་གི་ཆོ།
༂ ཀློང་ཆེན་སྙིང་གི་ཐིག་ལེ་ལསཿ ཡུམ་ཀའི་བྱིན་རླབས་དབང་གི་ཆོ་ག་བཞུགསཿ ༼བརྡ་ཡིག་ཡོད། ༽བྱིན་རླབས་དབང་གི་རིམ་པ་ནིཿ མཁའ་འགྲོ་འདུ་བའི་དུས་མཉན་ལཿ ཚོན་དཀྱིལ་གཉིས་སམ་ཚོམ་བུའི་སྟེངཿ བྷནྡྷ་མཚན་ལྡན་བདུད་རྩིས་བཀངཿ ཨ་མྲྀ་ཏ་དང་ཉེར་ལྔས་བྲནཿ སིན་དྷུ་རས་བཅགས་མེ་ལོང་ལཿ གཤེགས་མ་ལྔ་ཡི་ས་བོན་བྲིཿསྟེང་དུ་དྲིལ་བཅས་ལྡིང་གུར་ཕུབཿ ཉེར་སྤྱོད་ཚོགས་གཏོར་བཟང་དུ་བཤམཿ ལས་གཞུང་བསྲང་ལ་བཟླས་པ་བྱཿཚོགས་ཕུལ་རིག་པའི་མེ་ཏོག་དོརཿ སློབ་མ་བཀྲུ་ཞིང་བགེགས་དང་ཕྲལཿ ཀུན་མཁྱེན་ཡེ་ཤེས་ཕུང་པོ་ཅནཿ སྲིད་པའི་འཁོར་ལོ་རྣམ་སྦྱོང་བཿ དེ་རིང་བཤད་པའི་རིན་ཆེན་གཏེརཿ གཙོ་བོས་བདག་ལ་བཀའ་དྲིན་སྩོལཿ ལན་གསུམ་རྗེས་ཟློས་ལོ་རྒྱུས་བཤདཿ ཚད་མེད་བཞི་དང་སྐྱབས་སེམས་འབོགཿ དེ་ནས་དབང་གི་དོན་པོ་ནིཿ ཡེ་ཤེས་དབབ་ལ་ནན་ཏན་བྱཿསློབ་མའི་རྣམ་ཤེས་རཾ་ཡིག་ལསཿ མེ་འབར་རྣམ་སྨིན་ཕུང་པོ་བསྲེགསཿ འོད་ཀྱི་རྣམ་པའི་སྟོང་གཟུགས་ལསཿ མཁའ་འགྲོ་བདེ་ཆེན་རྒྱལ་མོ་ནིཿ ཞལ་གཅིག་ཕྱག་གཉིས་སྐུ་མདོག་དམརཿ གཅེར་མོ་མཉམ་པའི་དོར་སྟབས་ཅནཿ ཤིན་ཏུ་ཆགས་དང་བཞད་པའི་ཞལཿ ཕྱག་གཡས་ཐོད་པའི་ཅང་ཏེའུཿསྙན་གྱི་ཐད་ཀར་གཏོད་ཅིང་འཁྲོལཿ གཡོན་པའི་གྲི་གུག་ཡུ་བ་ནིཿ དཀུ་ལ་བརྟེན་ནས་མཆོག་ཏུ་འགྱིངཿ བྷ་ག་རྒྱས་ཤིང་ནུ་མ་འབུརཿ རིན་པོ་ཆེ་དང་གཞོན་ནུའི་རྒྱནཿ པུནྜ་རི་ཀའི་དོ་ཤལ་འཕྱངཿ རུས་པའི་
རྒྱན་དྲུག་སྐུ་ལ་མཛེསཿ གནག་སྣུམ་དབུ་སྐྲའི་ལན་ཚར་ཅནཿ རིན་པོ་ཆེ་ཡི་རྩེ་བྲན་བརྗིདཿ དབུ་མའི་སྤྱན་ནི་དབྱིངས་ལ་གཟིགསཿ ལོངས་སྐུའི་སྤྱན་གྱིས་འགྲོ་བ་འདུལཿ སྤྲུལ་སྐུའི་སྤྱན་གྱིས་ཁམས་གསུམ་འགུགསཿ སྐུ་ལ་རྒྱུད་སྡེའི་དཀྱིལ་འཁོར་རྫོགསཿ འབུམ་ཕྲག་ཡངས་པའི་མཁའ་འགྲོས་བསྐོརཿ ཐུགས་ཀར་ཨཱརྱ་ཏཱ་རེ་མཿ ལྗང་སྔོན་ཞལ་གཅིག་ཕྱག་གཉིས་ཚུལཿ དེ་ཡི་ཐུགས་ཀར་ཡེ་ཤེས་ཀྱིཿཕག་མོ་གནག་སྣུམ་གྲི་ཐོད་ཅནཿ སེམས་དཔའ་སུམ་བརྩེགས་གནས་ལྔ་རུཿཕྱག་མཚན་ལྔ་དང་ས་བོན་ལྔསཿ མཚན་པ་དེ་ལས་འོད་འཕྲོས་པསཿ འོག་མིན་གནས་དང་མཁའ་སྤྱོད་ཞིངཿ གཡུ་ལོ་བཀོད་དང་པདྨ་འོདཿ རང་བཞིན་གནས་ནས་ཡེ་ཤེས་པཿདྲངས་ཏེ་གཉིས་སུ་མེད་པར་བསྟིམཿ ཧཱུྃཿཡུལ་གྱི་མིང་ནི་རྒྱ་གར་ཡུལཿ གནས་ཀྱི་མཆོག་གྱུར་ཨོ་རྒྱན་གནསཿ དྷུ་མ་ཐ་ལ་མཁའ་འགྲོའི་གྲོངཿ གླིང་གི་གླིང་མཆོག་རྔ་ཡབ་གླིངཿ དོན་ལ་འོག་མིན་བདེ་ཆེན་ཞིངཿ རྣམ་པ་མཁའ་སྤྱོད་སྤྲུལ་པའི་གནསཿ དགྱེས་ཤིང་བཞུགས་པའི་ཡུལ་ཀུན་ནསཿ ཆོས་སྐུ་ཡུམ་ཆེན་འཚོ་རྒྱལ་མཿ འབུམ་ཕྲག་མཁའ་འགྲོའི་འཁོར་དང་བཅསཿ བྱིན་གྱིས་བརླབ་ཕྱིར་གཤེགས་སུ་གསོལཿ གནས་མཆོག་འདི་རུ་ཕྱིན་ཕོབ་
ལཿ སྒྲུབ་མཆོག་བདག་ལ་དབང་བཞི་བསྐུརཿ བགེགས་དང་ལོག་འདྲེན་བར་ཆད་སོལཿ མཆོག་དང་ཐུན་མོང་དངོས་གྲུབ་སྩོལཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཝཱ་རཱ་ཧཱི་ཕེཾེཾ་ཕེཾཿསྤོས་རོལ་དང་བཅས་བྱིན་ཆེན་དབབཿ ཏིཥྛ་བཛྲས་བརྟན་པར་བྱཿབདེ་སྐྱོང་བུམ་པ་སྤྱི་བོར་བཞགཿ ཧོཿགསང་སྔགས་དམ་ཚིག་བླ་ན་མེདཿ རང་བྱུང་ལྷུན་གྲུབ་བུམ་པའི་དབངཿ སངས་རྒྱས་ཀུན་ཀྱི་གསང་གསུམ་གྱིཿ དབང་བསྐུར་དམ་པ་ཁྱོད་ལ་སྤྱིནཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟ་རེ་ཏུ་རེ་ཛྙཱ་ན་ཝཱ་རཱ་ཧཱི་ཀ་ལ་ཤ་ཨ་བྷི་ཥིཉྩ་ཧཱུྃཿསྤྱི་བོར་གཏུགས་ཤིང་ཧུབ་གང་བྱིནཿ མགྲིན་པར་བཞག་ཅིང་ལྕེ་ལ་བླུདཿ ཧོཿ བྱང་ཆུབ་སེམས་ཀྱི་དམ་ཚིག་ནིཿ རྩ་ཁམས་ཡི་གེའི་འཁོར་ལོར་བསྟིམཿ བརྗོད་པ་མེད་ལས་ཐམས་ཅད་སྐྱེསཿ གྲགས་སྟོང་གསུང་གི་དབང་ཐོབ་ཤོགཿ རྩ་སྔགས་དངཿ བྷོ་དྷི་ཙིཏྟ་ཨ་བྷི་ཥིཉྩ་ཧཱུྃཿབགྲང་ཕྲེང་བཟུང་ལ་སྔགས་རྗེས་ཟློསཿ སིན་ངྷུ་ར་ཡི་དཀྱིལ་འཁོར་གཏད་ལཿ ཧོཿཡེ་ཤེས་རྣམ་པ་ཐམས་ཅད་པཿདགའ་བ་བཞི་ལ་ཡང་དག་བརྟེནཿ ཐབས་ཤེས་འབྲེལ་བའི་དམ་ཚིག་གིཿཕྱག་རྒྱ་ཆེན་པོ་ཁྱོད་ཀྱིས་ལོངསཿ ཛཿཧཱུྃ་བཾ་ཧོཿཨ་ཧོ་མ་ཧཱ་སུ་ཁཿསིནྡྷུ་
ར་ནི་སྙིང་གར་བྱུགཿ དྲིལ་བུ་དཀྲོལ་ཞིང་དེའི་སྒྲ་ལཿ དཔོན་སློབ་གཉིས་ཀས་རིག་པ་གཏདཿ ཧོཿསྒྲ་ནི་གྲགས་པ་ཉིད་ནས་སྟོངཿ དེ་བཞིན་སེམས་ལ་ངོ་བོ་མེདཿ ངོ་བོ་མེད་པའི་གནས་ལུགས་ལཿ བལྟ་བྱ་སྤངས་ནས་ཡང་དག་ལྟོསཿ ཨ་ཨ་ཞེས་བརྗོད་དོན་ངོ་སྤྲདཿ དབང་བཞི་རྫོགས་པའི་དམ་ཚིག་ཏུཿརྡོ་རྗེ་སློབ་དཔོན་མི་སྤང་ཞིངཿ མར་ངོའི་ཚེས་བཅུ་རྒྱུན་མི་གཅདཿ གཞོན་ནུ་མ་ལ་བསྙེན་བཀུར་བྱཿརྟག་ཏུ་བྱང་ཆུབ་སེམས་གཉིས་བསྒོམཿ གཙོ་བོས་ཇི་ལྟར་བཀའ་སྩལ་པཿསོགས་དང་དགེ་བ་རྫོགས་བྱང་བསྔོཿས་མ་ཡཿཆོ་ག་གཅིག་གིས་ ༼རྣལ་འབྱོར་མའི་༽བྱིན་རླབས་དངཿ ༼སྒྲོལ་མའི་༽རྗེས་གནང་༼ཕག་མོའི་༽དབང་བསྐུར་གསུམ་རྫོགས་པཿདམ་ཚིག་འཆལ་བར་མི་གཏོང་ཞིངཿ ཉམས་སུ་ལེན་པའི་གང་ཟག་ལསཿ གཞན་དུ་སྤེལ་ན་བཀའ་ཆད་འབྱུངཿ ས་མ་ཡཿ རྒྱ་རྒྱ་རྒྱཿབརྡ་རྒྱཿགཏེར་རྒྱཿསྦས་རྒྱཿཟབ་རྒྱཿ