བསུན་བཟློག།
༈ གྲངས་གསོག་ཚེ་བསུན་བཟློག་རྒྱས་པའི་མཚམས་སུ་གླུད་གཏོར་རིལ་བུ་དང་བཅས་པ་ནམ་མཁའ་མཛོད་ཀྱི་སྔགས་རྒྱས་བརླབས་ནས་ཕུལ་ཏེཿཧཱུྃ་རིགས་ལྔའི་རྒྱལ་བ་གང་ཆེན་མཚོའིཿསྐུ་ལ་ཞིང་ཁམས་ཡོངས་རྫོགས་པའི། །དེ་སྙེད་སངས་རྒྱས་བྱང་སེམས་དང༌། །དཔའ་བོ་ཌཱཀྐི་རྣལ་འབྱོར་མ། །སྟོང་གསུམ་བྱེ་བ་ཕྲག་བརྒྱའི་ཞིང༌། །ཧེ་རུ་ཀ་ཡི་གནས་བཅུ་དང༌། །ནང་ལྟར་རྡོ་རྗེ་ལུས་ཀྱི་གྲོང༌། །ཨོ་རྒྱན་དྷུ་མ་ཐ་ལ་སོགས། །གནས་དང་ཡུལ་གྱི་དཔའ་བོ་དང༌། །འབུམ་ཕྲག་ཡངས་པའི་མཁར་འགྲོའི་ཚོགས། །འདིར་བྱོན་དམ་ཚིག་གདན་ལ་བཞུགས། །ཉེར་སྤྱོད་འདོད་ཡོན་གླུད་གཏོར་དང༌། །ཚོགས་ཀྱི་འཁོར་ལོས་ཐུགས་དམ་བསྐང༌། །སྡོམ་གསུམ་དམ་ཚིག་ཉམས་པ་བཤགས། རྩ་རླུང་ཐིག་ལེའི་གནད་འཕྱུགས་ན། །དཔའ་བོ་མཁའ་འགྲོའི་བསུན་ཁ་ལྡང༌། །རང་མལ་བཞུགས་ཤིང་བར་ཆད་ཟློག །རིགས་ལྔ་ཡེ་ཤེས་ཌཱཀྐི་ཡིས། །སྤྱན་འདྲེན་དར་ཐག་དབྱིངས་སུ་སྡུས། །དཔའ་བོ་རྡོ་རྗེ་སློབ་དཔོན་འདི། །བསྟན་པ་རྒྱ་མཚོའི་སྒྲོན་མེ་ཡིན། །སེམས་ཅན་ཡོངས་ཀྱི་དཔུང་གཉེན་ཕྱིར། །སྤྱན་འདྲེན་དར་ལམ་བརྐྱང་སྲིད་ན། །ཁྱེད་རྣམས་དམ་ཚིག་ཉམས་པར་འགྱུར། །དམ་ཚིག་འདི་ནི་མཁའ་འགྲོའི་སྲོག །སྲོག་ལ་མི་གཅེས་གང་ཡང་མེད། །ཚོགས་གཏོར་གླུད་བཟང་འདི་བཞེས་ལ། །དབྱིངས་ཀྱི་རྗེ་མོས་སྲོག་མཁར་ཚུགས། །འཁོར་གྱི་མཁའ་འགྲོས་བླ་རྐུན་ཆོམས། །ཤུགས་འགྲོ་གནས་ཉུལ་རང་གནས་དེངས། །སྐྱེས་བུ་ཆེན་པོ་ལོ་བརྒྱའི་བར། །ཞབས་པད་བརྟན་པའི་ཕྲིན་ལས་མཛོད།། །།