ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ དབང་ཆོག་བྱིན་རླབས་ཆུན་པོ།
༂ ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ དབང་ཆོག་བྱིན་རླབས་ཆུན་པོ་བཞུགསཿ བདུད་འདུལ་དྲག་མོའི་སྐུ་ལ་འདུདཿ གསང་སྒྲུབ་སེང་གེའི་གདོང་ཅན་གྱིཿ དབང་བསྐུར་གུད་དུ་ཕྱུང་བ་ནིཿ དཀྱིལ་འཁོར་གཞུང་བཞིན་མཉྫིའི་སྟེངཿ དབང་གཏོར་ཙཀླི་དར་གདུགས་ཅནཿ ཕྱག་མཚན་མཆོད་ཚོགས་འདུ་བྱས་ལཿ གཞུང་བཞིན་བདག་མདུན་རོ་གཅིག་སྒྲུབསཿ དབང་གི་སྔོན་རྗེས་བྱ་བ་རྣམསཿ ཡུམ་ཀའི་དབང་གིས་ཁོག་ཕུབ་ལཿ ལོ་རྒྱུས་མཚམས་སྦྱོར་ཅི་རིགས་པ་ལསཿ འདིར་རིག་འཛིན་འཇིགས་མེད་གླིང་པ་ལ་དུས་གསུམ་མཁྱེན་པ་ཨོ་རྒྱན་ཆེན་པོས་མངོན་སུམ་པར་དགོངས་པ་གཏད་ཅིང༌། བརྡ་བརྒྱུད་ཤོག་སེར་བྱ་ཁྲའི་གཟུགས་ཀྱི་ལྟོ་བ་ལ་སྙན་བརྒྱུད་མཁའ་འགྲོའི་བརྡ་ཡིག་ཏུ་ཤར་བ་ལས་བསྒྱུར་བའི་མཁའ་འགྲོ་མ་སེང་གེའི་གདོང་ཅན་གྱི་དབང་བསྐུར་བགྱི་བ་ལ་ཁྱེད་རང་གཞི་ལུས་སུ་གནས་པའི་མིག་གཉིས་ལ་ལཾ་ལཾཿརྣ་བ་གཉིས་ལ་གཾ་གཾཿསྣ་བུག་གཉིས་ལ་དཾ་དཾཿལྕེ་ལ་མཾཿལྟེ་བར་སཾཿསྙིང་གར་གཾཿཡིག་འབྲུ་དེ་རྣམས་ལས་འབར་བའི་འོད་ཟེར་གྱིས་རྣམ་སྨིན་གྱི་ལུས་རྟེན་དབང་ཡུལ་ཚོགས་བརྒྱད་རྣམས་བསྲེགས་ཤིང་སྦྱངསཿ སྟོང་པའི་ངང་ལས་པད་ཉི་བདུད་བཞིའི་གདན་ལ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་ཅན་སྐུ་མདོག་མཐིང་ནག་རྒྱན་དང་ཆ་ལུགས་རྫོགས་པར་
གསལ་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས་པས་རང་བཞིན་ཆོས་ཉིད་ཀྱི་གནས་ནས་ཡེ་ཤེས་སེམས་དཔའ་སྤྱན་དྲངས་ནས་སློབ་མ་དང་གཉིས་སུ་མེད་པར་གྱུརཿ ཅེས་བརྗོད་ལ་རྩ་སྔགས་དང་རོལ་མོས་བྱིན་དབབཿ ཏིཥྛ་བཛྲས་བརྟན་པར་བྱཿདེ་ནས་གཏོར་མ་སྤྱི་བོར་བཞག་ལ། གཏོར་མ་འདི་ཉིད་མཁའ་འགྲོ་མ་སེང་གེའི་གདོང་པ་ཅན་དངོས་སུ་གསལ་བ་ཁྱེད་རང་གི་སྤྱི་བོ་ནས་ཞུགས་པས་ཕུང་ཁམས་སྐྱེ་མཆེད་གདན་གསུམ་ཚང་བའི་ངོ་བོར་སྨིནཿ སེང་གེའི་གདོང་ཅན་དངོས་སུ་གྱུར་པའི་མོས་པ་མཛོདཿ ཧོཿསྐྱེ་བ་མེད་ལས་གཟུགས་སུ་སྐྱེསཿ སྣང་སྟོང་དབྱེར་མེད་ལྷ་ཡི་སྐུཿ བུམ་པའི་དབང་གི་ངོ་བོ་ཉིདཿ སྐུ་ལྔ་ཡེ་ཤེས་ལྔ་རྫོགས་ཤོགཿ རྩ་སྔགས་མཐརཿ ཀ་ལཱ་ཤ་ཨ་བྷི་ཥིཉྩ་ཧཱུྃཿབགྲང་ཕྲེང་མགྲིན་པར་བཞག་ལཿ ཨཱ་ལི་ཐབས་ཀྱི་ངོ་བོ་ཉིདཿ ཀཱ་ལི་ཤེས་རབ་རང་བཞིན་ལསཿ ཟུང་འཇུག་ཡིག་འབྲུ་བཅུ་གཉིས་བྱུངཿ རྟེན་འབྲེལ་དུས་སྦྱོར་ལས་སྐྱེས་པའིཿལས་རླུང་སྔགས་སུ་སྨིན་པར་ཤོགཿ བསྙེན་སྒྲུབ་སྔགས་ཀྱི་རྗེས་གནང་བྱིནཿ ཁ་ཊྭཾ་ཀ་སྙིང་གར་བཞག་ལ། ཧཱུྃཿཕྱག་མཚན་ཐབས་མཆོག་བདེ་བ་ཆེཿ གསུམ་པའི་དབང་གི་ངོ་བོ་ཉིདཿ དགའ་བཞིས་སྦྱངས་པའི་
དཔེའི་ཡེ་ཤེསཿ རྣམ་ཐར་གསུམ་ལྡན་ལ་གནས་ཤོགཿ རྩ་སྔགས་མཐརཿ ཛཿཧཱུྃ་བྃ་ཧོཿདྷརྨ་དྷཱརྟུ་ཨཿགྲི་ཐོད་གཏད་ལཿ ཧཱུྃཿགྲི་གུག་གཟུང་འཛིན་རྩ་བ་གཅོདཿ ཐོང་ཁྲག་ཞི་རྒྱས་ཆགས་པའི་ཉམསཿ ལས་བཞི་ལྷུན་གྲུབ་ཕྱག་མཚན་འདིསཿ ཕྲིན་ལས་རྣམ་བཞི་འགྲུབ་པར་ཤོགཿ རྩ་སྔགས་མཐརཿ ཤཱིནྟཾ་པུཥྟིཾ་པཱ་ཤང་མཱ་ར་ཡ་ཕཊཿརྗེས་ཆོག་ཡུམ་ཀའི་དབང་བཞིན་ནོཿས་མ་ཡཿརྒྱ་རྒྱ་རྒྱཿ