དཔལ་ཆེན་བཀའ་འདུས་རྒྱ་མཚོ་ལས། ལས་བཞི་མཆོག་དང་ལྔའི་སྦྱིན་སྲེག་དངོས་གྲུབ་རྒྱ་མཚོའི་ཟ་མ་ཏོག
དཔལ་ཆེན་བཀའ་འདུས་རྒྱ་མཚོ་ལས། ལས་བཞི་མཆོག་དང་ལྔའི་སྦྱིན་སྲེག་དངོས་གྲུབ་རྒྱ་མཚོའི་ཟ་མ་ཏོག་བཞུགས། །
རིགས་བཞིས་སྒོས་སྒྲུབ་བཀའ་འདུས་རྒྱ་མཚོ་ལ་བརྟེན་པའི་ལས་བཞི་མཆོག་དང་ལྔའི་སྦྱིན་སྲེག་དངོས་གྲུབ་རྒྱ་མཚོའི་ཟ་མ་ཏོག་ཅེས་བྱ་བ། ཁྲག་འཐུང་འདུས་པའི་ལྷ་ལ་ཕྱག་འཚལ་ལོ། །རྣམ་པ་ཐམས་ཅད་མཁྱེན་པའི་མཆོག་ལྡན་ནི། །སྐུ་གསུམ་ཡན་ལག་བདུན་གྱི་བདག་ཉིད་ཅན། །ལས་ཆོས་དམ་ཚིག་ཕྱག་རྒྱ་ཆེན་པོའི་གཟུགས། །གར་དགུའི་ཉམས་བརྒྱས་དཔའ་བ་དེ་ལ་འདུད། །གང་ཞིག་བསྲེག་བྱ་བཟའ་ལ་སྟོབ་པ་དང༌། །གདན་གསུམ་ལུས་དཀྱིལ་ཚིམ་པ་དྲུག་ཏུ་མཆོད། །རྩ་ཁམས་རྣལ་འབྱོར་ཞུ་བདེས་མཉེས་པ་ལ། །ཕྱི་ནང་གསང་བའི་སྦྱིན་སྲེག་ཞེས་སུ་གྲགས། །དེ་ལ་ཕྱི་དོན་གཙོ་བོར་འཛིན་པ་རྣམས། །ཕྲིན་ལས་རྣམ་བཞི་མཆོག་དང་བཅས་པ་ཡི། །གོ་འཕང་ལ་བསྙེན་དེ་ཡི་བྱ་བའི་མཆོག །དམ་ཚིག་རྫས་དང་ཡིད་བྱེད་རྣལ་འབྱོར་བཤད། །ཇི་སྐད་དུ། སྙིང་པོ་རྒྱུད་ལས། དབྱིབས་དང་
ཁ་དོག་མཚན་ལྡན་པར། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བ་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་པ་ལྟར། དེ་ལ་སྤྱི་དོན་རྣམ་པ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ནི། ལས་ལྔ་ཚར་གྱི་སྔོན་འགྲོར་སའི་ཆོ་ག་བྱ་བ་སྟེ། སོ་སོའི་དུས་སྐབས་ལ་བབས་པ་དང་གང་བྱ་བའི་གནས་ལ་རུང་ཞིང་ཤིས་པ་དེར་ལྷའི་རྣལ་འབྱོར་ལ་བསྙེམས་བཞིན་པས་གཞི་བདག་ལ་ཆ་གསུམ་པ་སོགས་པའི་གཏོར་མ་བཏང༌། སའི་ལྷ་མོ་ལ་དཀར་གཏོར་དང་ཉེར་སྤྱོད་བཤམས་ལ། ཨ་ཀཱ་རོས་བརླབས། རྒྱལ་བ་ཤཱཀྱ་སེང་གེ་ཡིས། །བདུད་སྡེ་མངོན་པར་བཅོམ་པའི་ཚེ། །དབང་གྱུར་ས་ཡི་ལྷ་མོ་ཁྱོད། །གཏོར་མ་བཞེས་ལ་ས་འདི་བླང༌། །རྣལ་འབྱོར་བདག་ཅག་འཁོར་
བཅས་ལ། །ནད་མེད་ཚེ་དང་དབང་འབྱོར་དང༌། །སོགས་ཀྱིས་ཕུལ་རྗེས། བཛྲ་མུཿས་གཤེགས། རྡོ་རྗེ་དང་བཅས་པའི་ཐལ་མོ་ས་ལ་བཀྲམ་སྟེ་ཡི་དམ་གྱི་ང་རྒྱལ་དང༌། རྩ་སྔགས་ཀྱི་སྦྱོང་བ་ལན་གསུམ་གྱིས་བཟུང་རྗེས། ས་གཞི་ཡང་རང་བཞིན་མེད་པར་ཤེས་པའི་ཆོས་ཉིད་ལ་དྲན་པ་མངོན་དུ་གཞག་ནས། ཤཱུནྱ་ཏའི་སྔགས་བརྗོད་པ་ནི་བདེན་པ་གཉིས་ཀྱིས་སྦྱོང་བའོ།། །།གཉིས་པ་དངོས་གཞི་ལ་ལས་བཞི་མཆོག་དང་ལྔ་སོ་སོའི་སྦྱོར་ཆོས་དང་ཕྲིན་ལས་ཐ་དད་དུ་བསྟན་པ་ལ་རིམ་པ་ལྔ་ལས། དང་པོ་ནི། རྡོ་རྗེ་ཕུར་པ་ལ་བརྟེན་ནས་ཞི་བའི་སྦྱིན་སྲེག་གི་རིམ་པ་ལ་སྦྱོར་དངོས་གཉིས་ལས། དང་པོ་ནི། ཞི་བ་ལ་བཀྲ་ཤིས་པའི་ས་ལ་སྟེགས་བུ་གྲུ་བཞིར་བྱས་པའི་སྟེང་ཐབ་ཁུང་ཟླུམ་པོ་རྒྱར་ཁྲི་གང༌། དཔངས་སུ་ཁྲི་ཕྱེད་ལོངས་པ་ནས་ཕྱིར་འཕྱང་མུ་རན་རྒྱ་དཔངས་སོར་བཞི་པ་རེའི་ཁ་ཁྱེར་ནང་དུ་བགས་ཀྱི་གཞོལ་བ་ལ་རྡོ་རྗེའི་ཕྲེང་བ་དང༌། མུ་རན་ལ་མེ་རིས་བསྐོར། ཐབ་ཀྱི་དབུས་རྩེ་མོ་ཤར་བསྟན་ཀྱི་རྡོ་རྗེ་དཀར་པོ་སོར་བརྒྱད་པ་དང༌། སྟེགས་བུའི་སྟེང་ཟུར་བཞིར་ཟླ་ཕྱེད་རྡོ་རྗེས་མཚན་པ་བྱ། བྲུས་ཐབ་བྱེད་ན་རྒྱ་དཔངས་དང་རྣམ་པ་དེས་མཚོན་ནས་རིག་པས་དཔག་པ་སླ། བྲིས་ཐབ་ནི། སྟེགས་བུའི་སྟེང་དྲི་བཟང་དང་འབྱུང་ལྔ་དང་བདུད་རྩི་ལྔ་རྣམས་ཆང་དང་སྦྱར་བའི་ཆག་ཆག་བཏབ། དེའི་སྟེང་དུ་ཚངས་ཟུར་གྱི་ཐིག་བཏབ། དབུས་ནས་མཐོ་གང་ཟླུམ་པོར་བསྐོར་བས་རྒྱ་ཁྲུ་གང་འོང་བའི་ཕྱི་རོལ་སོར་བཞི་རེ་སྐོར་བས་མཆུ་དང་ཁ་ཁྱེར་གཉིས་ཀྱི་ནང་མ་མེ་རི་དང་ཕྱི་མ་རྡོ་རྗེའི་ཕྲེང་བ་ཟུར་བཞིར་ཟླ་ཕྱེད་རྡོ་རྗེ། ལྟེ་བར་རྡོ་རྗེ་
དཀར་པོ་རྩེ་ལྔ་བྲི། འོ་མ་ཅན་གྱི་ཤིང་གི་རྩེ་མོའི་ཆའམ་དགོན་པའི་བ་གླང་གི་གཅི་བ་སྲོག་ཆགས་མེད་པས་ཐབ་ཀྱི་དཔངས་ཚད་ཙམ་དུ་ཟླུམ་པོར་བརྩིགས་པའི་ཤར་ལྷོར་མེ་ཚང་བཅའ། ཐབ་སྟེགས་ཀྱི་གྲྭ་བཞིར་མདའ་བཞིར་བཙུགས་པ་སྲད་བུ་དཀར་པོས་བསྣོལ་མར་སྦྲེལ་བ་ལ་དར་དཀར་པོས་དགབ། དེའི་ཤར་ལྷོའི་ཟུར་དུ་མདའ་དར་དམར་པོ་གཟུགས། ཐབ་ཀྱི་མདུན་དུ་རང་ཉིད་འདུག་པའི་སྟན་དཀར་ཞིང་འཇམ་པ་དང༌། དེའི་གཡས་གཡོན་དུ་སྟེགས་བུ་ཁེབས་དཀར་པོ་དང་ལྡན་པ་རེའི་གཡས་ཀྱི་སྟེང་ལོགས་སུ་བ་ལས་བྱུང་བའི་མར་ཁུ་དང༌འོ་མ་ཅན་ནམ་བལ་བུ་ལྕང་མ་ལ་སོགས་པའི་རུང་མཐུན་གྱི་ཤིང་གི་རྩེ་མོའི་ཆ་ལས་བྱུང་བའི་ཡམ་ཤིང་མཐོ་གང་བའི་རྩེ་མོ་མར་ཁུར་ཉུགས་པ་དང༌། ཏིལ་དཀར། ནས་འབྲས་དཀར་པོ་ལས་བྱུང་བའི་ཆན་སོགས་ཁ་ཟས་དཀར་པོ་དང༌། ཙན་དན་དཀར་པོ་སོགས་དྲི་དཀར་པོའི་རིགས་དང༌། ཙམ་པ་ཀ་སོགས་མེ་ཏོག་དཀར་པོའི་རིགས་རང་བཞིན་ནམ་བཅོས་པས་ཁ་དོག་དཀར་བ་རྣམས་འཇིག་རྟེན་པ་དང་ཡེ་ཤེས་པ་ཐ་དད་དུ་ཕྱི་ནང་ཉིས་རིམ་དུ་བཀོད། སྟེགས་བུ་ཅིག་ཤོས་ལ། བདག་བསྐྱེད་ཀྱི་མཆོད་གཏོར་སྤྱི་འགྲེ་དང་བྱེ་བྲག་སྦྱིན་སྲེག་ལ་འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་བསྲེས་པའི་མར་དཀར་གྱི་གཏོར་ཟླུམ་རིལ་བུ་གང་མང་གིས་བསྐོར་བ་དང༌། འཇིག་རྟེན་པར་ཡང་རྒྱུ་གོང་འདྲའི་གཏོར་མ་ཟླུམ་པོ་གཅིག་དང་གཞན་ཡང་ཞབས་བསིལ་ལ་སོགས་བའི་ཉེར་སྤྱོད་རྣམས་རང་བཞིན་ནམ་བཅོས་བུས་དཀར་པོ་དང༌། ཉེ་ལོགས་ཅི་བདེར་ལས་
བུམ། རྡོར་དྲིལ། ཐོད་རྔ། དགང་བླུགས་དང་ཐུགས་དམ་བསྐུལ་བའི་རྫས་ཡུངས་དཀར་རིན་པོ་ཆེ་དཀར་པོའི་སྣོད་དུ་བླུགས་པ་རྣམས་མ་ཚང་བ་མེད་པར་བཤམ་མོ། །གཉིས་པ་དངོས་གཞི་ལ་གཉིས། དང་པོ་བདག་བསྐྱེད་སྔོན་འགྲོ་ནས་བཟུང་བཟླས་པའི་བར་དུ་བྱ་བ་ལས་གཞུང་ལྟར་ཤེས། རབ་གནས་སམ་སྒྲུབ་མཆོད་དང་འབྲེལ་ཚེ་བདག་བསྐྱེད་ལོགས་སུ་བྱ་མི་དགོས་པ་འོག་མ་རྣམས་ལའང་འགྲེ། ཧཱུྃ་བིགྷྣཾ་ཏ་ཀྲིཏ་ཕཊ་ཀྱིས་ལས་བུམ་བསྒྲུབ། གཉིས་པ་སྦྱིན་སྲེག་གི་ལས་ལ་འཇུག་པ་ནི། རང་ཉིད་ཆོས་གོས་དཀར་པོ་དང་ལྡན་པ་ལྷའི་རྣལ་འབྱོར་ལ་གནས་བཞིན་པས་སྟན་ལ་རྡོ་རྗེའི་སྐྱིལ་ཀྲུང་གིས་འདུག་སྟེ་ཞི་ཞིང་དེས་པའི་སེམས་དང་ལྡན་པས་རྡོར་དྲིལ་བསང་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང༌། ཨ་ལས་བྱུང་བའི་དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་ནོ། །ཨོཾ་མ་ཧཱ་བཛྲ་ཧཱུྃ། ཞེས་ལག་གཡས་ཀྱིས་རྡོ་རྗེ་ཐུགས་ཀར་གསོར། ཨོཾ་བཛྲ་གྷནྜེ་ཨ། ཞེས་ལག་གཡོན་གྱིས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ཐབས་ཤེས་གཉིས་སུ་མེད་པའི་དོན་དྲན་པས་ཐུགས་ཀར་འཁྱུད་རྒྱ་བྱ། དེ་ནས་མཆོད་རྫས་བརླབ་པ་ནི། ཧཱུྃ། དབྱིངས་ནས་ཡེ་ཤེས་འབྲུ་གསུམ་ཆར་དུ་
བབསཿ མཆོད་རྫས་དངོས་འཛིན་མ་དག་བསྲེགས་གཏོར་བཀྲུསཿ བྷཱུྃ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུརཿ ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ་དང་སྨན་གཏོར་རཀྵའི་སྔགས་ཀྱིས་བརླབ། སྲེག་རྫས་རྣམས་ལ་བསང་ཆུ་འཐོར་ཞིང༌། ཧཱུྃ་བིགྷྣན་ཏ་ཀྲིཏ་ཕཊ་དང་སྭ་བྷཱ་ཝས་སྦྱངས། སྟོང་པའི་ངང་ལས་མ་དང་ཨ་ལས་ཉི་ཟླའི་གའུའི་སྣོད་དུ་སྲེག་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་བདུད་རྩིའི་དངོས་པོ་སོ་སོའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ་ཨོཾ་ཧཱུྃ་སྭཱ་ཨཱཾ་ཧཱཾ། ཞེས་ལན་བདུན་བཟླས་པས་བྱིན་གྱིས་བརླབས། ཐབ་བསངས་སྦྱངས། སྟོང་པའི་ངང་ལས་མདུན་དུ་བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་ལ་རྡོ་རྗེའི་ཕྲེང་བས་བསྐོར་བ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དཀར་པོ་འབར་བར་བསམས་ལ། ཨོཾ་ཨགྣ་ཡེ་ཛྭ་ལ་ཛྭ་ལ་ཧཱུྃ་ཕཊ། ཅེས་དགེ་འདུན་གྱི་ཚང་མང་ངམ་གཙུབ་ཤིང་ལས་བྱུང་བའི་མེ་དུ་བ་མེད་པས་སྤར་ལ། ཐབ་ཀྱི་མེའི་དབུས་སུ་མ་དང་དེ་ལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ཨོཾ་ཡིག་དཀར་
པོ་འཕྲོ་འདུས་ཡོངས་སུ་གྱུར་པ་ལས་ཨགྣི་ངྷེ་བ་རྀ་ཥི་ཧཱུྃ། ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆོས་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ། ཨགྣི་དེ་བ་ས་མ་ཡ་ཧཱུྃ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང༌། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དེ་ནི་གཤེགས་སུ་གསོལ། །ལྕགས་ཀྱུའི་ཕྱག་རྒྱ་དང་བཅས། ཨགྣི་དེ་བ་རྀ་ཥི་ཛཿཛཿས་སྤྱན་དྲངསཿ ཛཿཧཱུྃ་བཾ་ཧོཿ ས་བསྟིམ། ཨོཾ་བཛྲ་ཨརྒྷཾ་པུཥྤེ་སོགས་ཉེར་སྤྱོད་ཀྱིས་མཆོད། ཇི་ལྟར་བལྟམས་པ་སོགས་གྱི་མཐར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་བུམ་ཆུ་གཏོར། ཕྱོགས་བཅུའི་སངས་རྒྱས་རྣམས་ཀྱི་ཐུགས་ཀ་ནས་སྤྲོས་པའི་དབང་གི་ལྷ་མོ་བྱང་ཆུབ་སེམས་ཀྱིས་གང་བའི་བུམ་པ་ཐོགས་པ་སྤྲོས་ཏེ་དབང་བསྐུར། ཨོཾ་རཏྣ་ཨ་ལཾ་ཀ་ར་སྭཱ་ཧཱཿ ཞེས་བརྒྱན་བཏགས་པར་བསམ། མེ་ལྷ་ཞལ་ཅུང་ཟད་གདངས་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་གྱུར་པར་བསམས་ལ། ལག་གཉིས་དེ་བཞིན་གཤེགས་པའི་ཁུ་ཚུར་བྱས་པས་དགང་བླུགས་བཟུང་ནས། ཨོཾ་ཨགྣེ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་
གཡོན་པའི་དགང་གཟར་བཀང་རྗེས་གཟར་བུ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་སུ་བསྐོར་བཞིན་པར་ཨོཾ་ཨགྣི་དེ་བ་རྀ་ཥི་ཧ་བྱ་ག་བྱ་དེ་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱིནྟཾ་ཀུ་རུ་སྭཱ་ཧཱ། ཞེས་ལན་གསུམ་གྱི་དགང་བླུགས་ཕུལ་ནས་སྔགས་དེ་ཉིད་ཀྱིས། ཡམ་ཤིང༌། མར་ཁུ། སྲེག་རྫས་རྣམས་སོ་སོ་ནས་ལྔའམ་བདུན་སོགས་ཇི་ལྟར་རིགས་པ་ཕུལ་ལ། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་པ། །རིགས་སྔགས་གྲུབ་པའི་དྲང་སྲོང་ཚུལ། །ཉོན་མོངས་བསྲེགས་པས་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་བ་ཐེག་པ་ཆིབས། །བགྲང་ཕྲེང་འཛིན་ཞིང་རིག་སྔགས་གསུངས། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ་ཡུངས་ཀར་ཐབ་ཏུ་འཐོར་ཞིང༌། ན་མོ། རིག་
པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་རྣམས་ལྷའི་ཞལ་དུ་འབུལ་བ་དང༌། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། །ཞེས་འདོད་དོན་གསོལ་ལ། དེ་ནས་ཡེ་ཤེས་ཀྱི་དཀྱིལ་འཁོར་མཆོད་པ་ནི། སྭཱ་བྷཱ་ཝས་སྦྱངས་ནས། མེ་ལྷའི་ལྟོ་བ་ཡངས་ཤིང་རྒྱ་ཆེའི་དབུསཿ བྷྲཱུྃ་ཡིག་གནས་འགྱུར་སྤྲུལ་པའི་གཞལ་མེད་ཁངཿ ཕྱི་ནི་རིན་ཆེན་ནང་ནི་ཐོད་པའི་མཁརཿ གྲུ་བཞི་སྒོ་བཞི་ཚད་དང་མཚན་ཉིད་ལྡནཿ གུ་ཎ་ཏྭ་ར་རྟ་བབས་བང་རིམ་བརྒྱདཿ ཆོས་འཁོར་རི་དྭགས་གདུགས་དང་ནོར་བུའི་ཏོགཿ ཕྱི་རོལ་རིན་ཆེན་རྩིག་པའི་རྨིང་གི་གཞིཿ འདོད་སྣམ་དམར་པོར་ལྷ་མོ་བཅུ་དྲུག་འཁོདཿ ཕ་གུ་སེར་པོ་དྲྭ་བ་དྲྭ་ཕྱེད་མཛེསཿ ཤར་བུ་མདའ་ཡབ་ཁང་བརྩེགས་རྡོ་རྗེའི་ཏོགཿ ནང་ནི་དུར་ཁྲོད་རོལ་པའི་གཞལ་མེད་ཁངཿ ཕྱི་འཁོར་རི་གླིང་བརྒྱད་དང་རྡོ་རྗེའི་གུརཿ བསྐལ་མེ་འུར་འུར་ཆེམ་ཆེམ་འབར་བའི་ཀློངཿ འོག་མིན་གསང་ཆེན་རོལ་པའི་ཕོ་བྲང་ཆེཿ རབ་འཇིགས་གནམ་ལྕགས་ཙཀྲ་རྩིབས་བཅུའི་དབུསཿ བདེ་ཆེན་ཀུན་ཏུ་བཟང་མོའི་ཨེ་ཀློང་དབྱིངསཿ རྣམ་ཐར་གསུམ་ལྡན་རྡོ་རྗེ་བཙུན་མོའི་མཁརཿ མ་ཆགས་
པདྨ་ཐབས་ཤེས་ཉི་ཟླའི་སྟེངཿ རུ་ཏྲ་ཕོ་མོ་བདུད་བཞི་བྱི་ཆིངས་བསྣོལཿ པཾ་པདྨ་མཎྜལཿ མ་སཱུར་ཡ་མཎྜལཿ ཨ་ཙཎྜ་མཎྜལཿ ཛཿཧཱུྃ་བྃ་ཧོཿ ཏི་ར་བཾཿ ཨོཾ་བཛྲ་སཏྭ་ཧཱུྃཿ རྡོ་རྗེ་ཧཱུྃ་ཡིག་ཡོངས་གྱུར་ལསཿ རྡོ་རྗེ་སེམས་དཔའ་ཡབ་ཡུམ་ནིཿ ཞེས་པ་ནསཿ ས་མ་ཡ་ཏིཥྛ་ལྷནཿ ཞེས་པའི་བར་བྱཿ སྐབས་འདིར་སྒྲུབ་འཇུག་གི་ཁ་སྐོང་སྦྱིན་སྲེག་དང་རབ་གནས་ཞལ་བསྲོའི་རྒྱས་པའི་སྲེག་བླུགས་སོགས་ཀྱི་དུས་གཞལ་ཡས་ཁང་གདན་དང་བཅས་པ་བསྐྱེད་ནས་ལྷ་བསྐྱེད་པ་དོར་ཏེ་དཀྱིལ་འཁོར་གྱི་ལྷ་མཚོན་པ་མེ་ཏོག་གི་ཚོམ་བུའི་དབུ་རྒྱན་གྱི་རྣམ་པར་སྤྱན་དྲངས་པ་ལས་སློབ་དཔོན་གྱིས་མེ་ཏོག་ཐབ་ཏུ་དོར་བ་དང་ལྷན་ཅིག་ལྷ་ཚོགས་རྣམས་རང་རང་གི་གདན་ལ་བཞུགས་པར་བསམ་ཏེ་བསྐྱེད་སྔགས་ཙམ་གྱིས་གསལ་གདབ་པའམ་ཡང་ན་བསྐྱེད་སྔགས། ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་ཧ་ན་ཧ་ན་རུ་ལུ་རུ་ལུ་ཧཱུྃ་བྷྱོ་ཧཱུྃཿ དཔལ་ཆེན་རྡོ་རྗེ་གཞོན་ནུ་ནིཿ སྙིང་རྗེ་རྔམས་ཞིའི་ངང་ཉིད་ལསཿ ཞེས་པ་ནསཿ མ་མོ་དྲུག་ཅུ་ཕོ་ཉར་འགྱེདཿ ཅེས་པའི་བར་གྱིས་གཙོ་བོའི་མངོན་རྟོགས་དང༌། ཨོཾ་བུདྡྷ་བཛྲ་རཏྣ་པདྨ་ཀརྨ་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊཿ སྲས་མཆོག་ཀཱི་ལ་རིགས་ལྔ་ནིཿ སོགས་ནས། དུག་ལྔ་རྩད་ནས་གཅོད་པར་བྱེདཿ ཅེས་སྲས་མཆོག་ལྔ་དང༌། ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃཿ གརྫ་ཧཱུྃ་ཕཊཿ
གརྫ་ཧཱུྃ་ཕཊཿ སྟེང་ཕྱོགས་ཉི་ཟླའི་གདན་སྟེངས་སུཿ ཁྲོ་བོ་རྡོ་རྗེ་ཧཱུྃ་མཛད་ནི་སོགས་ནས། ཞེ་ལ་བརྣག་པའི་སྟོབས་ཀྱིས་སྒྲོལཿ ཞེས་སྒོ་མ་བཞི་བསྐྱེད་པའི་བར་གྱི་མངོན་རྟོགས་གསལ་གདབ་པ་སྟེ་འདིས་མཚོན་ནས་སླད་ཀྱི་སྦྱིན་སྲེག་གཞན་རྣམས་ལའང་འགྲེས་ཤེས་པར་བྱ་བ་ནི་དུས་སྐབས་ཁྱད་པར་བའི་ཆོ་གའི་ལག་ལེན་ཡིན་ཏེ་དེའི་ཚེ་བདག་བསྐྱེད་ཀྱང་སྒོས་སུ་མི་དགོས་མོད། སྦྱིན་སྲེག་དཀྱུས་མ་གློ་བུར་དུ་བྱེད་པ་ལ་དཀྱུས་བཞིན་ནོ། །དེ་ནས། བླ་མེད་མཆོག་གི་མཆོད་པ་དམ་པ་ནིཿ ཡེ་ཤེས་ལྔ་ཡི་འོད་ཟེར་རྣམ་པར་འཕྲོཿ འདོད་པའི་ཡོན་ཏན་ལྔ་ཡིས་རབ་བརྒྱན་ཏེཿ དམ་ཚིག་བཞིན་ལས་ཅི་བདེར་བཞེས་སུ་གསོལཿ ཞེས་པའི་མཐར། ཨོཾ་ཤྲཱི་བཛྲ་ཀུ་མཱ་ར་ས་པཱ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད་ནས། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེའི་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམས་ལ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་སརྦ་བིགྣན་བཾ་ཧཱུྃ་ཕཊཿ ཅེས་པ་བདུན་གྱིས་བཀང་བའི་དགང་བླུགས་ཁ་སྦྱར་བ་བཛྲ་ཨགྣི་ཛྭ་ལ་རཾ་སྥ་ར་ཎ་མ་ཧཱ་པཱུ་ཛ་ཁཱ་ཧིཿ ཞེས་པ་ལན་གསུམ་གྱིས་བསྐོར་བཞིན་ཕུལ་རྗེས། ཧཱུྃ། གཏི་མུག་རྡོ་རྗེ་འཁོར་བཅས་པསཿ འཇིག་རྟེན་ཁམས་ནི་རབ་འབྱམས་ཀུནཿ ཡུད་ཙམ་གྱིས་ནི་ཞི་མཛད་ནསཿ ཞི་མཛད་མཆོད་
པ་བཞེས་སུ་གསོལཿ ཞེས་བརྗོད་ནས་སྲེག་རྫས་རྣམས། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བྃ་ཧོཿ སརྦ་བིག་ནན་བྃ་ཧཱུྃ་ཧཱུྃ་ཕཊཿ ཤཱནྟིང་ཀུ་རུ་སྭཱ་ཧཱཿ ཞེས་པ་ཁོ་ནས་འབུལ་བ་ནི་རྒྱུད་སྡེའི་དགོངས་པར་འབྲེལ་བ་ཡིན། འོན་ཀྱང་བསྙེན་སྒྲུབ་ཁ་སྐོང་གི་སྦྱིན་སྲེག་ལ་བཟླ་བྱའི་རྩ་སྔགས་ཁོ་ན་དབུལ། སྔགས་བཅུ་ཚན་ནམ་བདུན་སོགས་དང་རྫས་རེ་རེའི་རྫོགས་མཚམས་སུ་འདོད་གསོལ་ནི། བདག་དང་རྒྱུ་སྦྱོར་ཡོན་བདག་རྣམས། །སྒྲིབ་གཉིས་བྱང་ཞིང་ཚོགས་གཉིས་རྫོགས། །བྱད་ཕུར་གདོན་བགེགས་རིམས་ནད་དང༌། །རྨིས་ལྟས་མཚན་ངན་དུས་མིན་འཆི། །འཇིགས་པ་བརྒྱད་དང་བཅུ་དྲུག་སོགས། །མྱུར་དུ་ཞི་ཞིང་མེད་པར་མཛོད། །ཅེས་འདོད་གསོལ་སྦྱར། རྫས་རྣམས་རྫོགས་པ་དང༌། དགང་བླུགས་གསུམ་ཕུལ་ནས། ཡེ་ཤེས་མེ་དང་གཉིས་མེད་འབར་བ་ཡིས། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་བླུགས་བདུད་རྩིའི་མཆོད་པའི་མྱོས་གྱུར་ནས། །ཞི་བའི་ཕྲིན་ལས་ལྷུན་གྱིས་གྲུབ་པར་མཛོད། །ཅེས་བསྐུལ་ནས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས་པས་བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ་མོ། །དེ་ནས་དེ་ལ་སོགས་བཛྲ་ཝསྟྲ་ཡེ་སྭཱ་ཧཱས་གོས་ཟུང་དང༌། བཛྲ་ཏམྦུ་ལ་ཡེ་སྭཱ་ཧཱས་སོ་རྩེ་དབུལ། སྨན་མཆོད་འབུལ་
བ་ནི། རྡོ་རྗེའི་དམ་ཚིག་རྨད་པོ་ཆེ། །རྩ་བརྒྱད་སྟོང་ལས་སྦྱར་བའི་བདུད། །རྒྱུད་དྲུག་སྡུག་བསྔལ་འཇོམས་པའི་རྩི། །རིགས་ལྔ་ཡེ་ཤེས་ལྔ་ཡི་དངོས། །ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁཱ་ཧིཿ གཏོར་མ་འབུལ་བ་ནི། ཧཱུྃཿ བྷ་ག་ཡངས་པའི་གཏོར་གཞོང་དུཿ ལིངྒ་འདོད་ཡོན་གཏོར་མར་འབརཿ རྡོ་རྗེ་བཟའ་བའི་དམ་ཚིག་རྫསཿ ཨ་ལ་ལ་སྟེ་དགྱེས་པར་རོལཿ མ་ཧཱ་བ་ལིངྟ་ཁཱ་ཧིཿ ཞེས་གཏོར་མ་ཐབ་ཏུ་དབུལ། རཀྟ་མཆོད་པ་ཚར་གསུམ་ནི། ཧཱུྃཿ དངོས་གྲུབ་བར་ཆད་བྱེད་པའི་བགེགསཿ གདུག་ཅིང་སྡང་སེམས་ལྡན་པ་རྣམསཿ ཟུངས་ཤིག་རྒྱོབ་ཅིག་རྣམ་པར་ཆིངསཿ གཏོགས་ཤིག་གྲོགས་དང་བྲལ་བར་གྱིསཿ རེངས་པར་ཁུག་ལ་སྨྲར་ཆུག་ཅིགཿ ཕོབ་ཅིག་རྣམ་པར་གཟིར་བར་གྱིསཿ ང་ཡི་དབང་དུ་གྱུར་ནས་ཀྱང༌། བསྒོ་བའི་བཀའ་ལ་ཉན་པར་གྱིསཿ མ་ཧཱ་རཀྟ་ཁཱ་ཧིཿ ཧཱུྃཿ བྲན་དང་བཀའ་ཉན་ཕོ་ཉའི་ཚོགསཿ ཁྱེད་ཀྱི་དམ་ཚིག་དུས་ལ་བབཿ སྔོན་ཆད་ཇི་ལྟར་དམ་བཅས་པའིཿ མངོན་སྤྱོད་ཕྲིན་ལས་མྱུར་དུ་མཛོདཿ མ་ཧཱ་རཀྟ་ཁཱ་ཧིཿ ཧཱུྃཿ དངོས་གྲུབ་བར་ཆད་བྱེད་པའི་བགེགསཿ གདུག་ཅིང་སྡང་སེམས་ལྡན་པ་རྣམསཿ ལྷའམ་འོན་ཏེ་བདུད་ཀྱང་རུངཿ ང་ལ་བར་ཆད་བྱེད་པ་རྣམསཿ མཐུ་དང་རྫུ་འཕྲུལ་
མེད་པར་མཛོདཿ མ་ཧཱ་རཀྟ་ཁཱ་ཧིཿ ཞེས་ཕུད་དང་རཀྟ་བསྲེས་ནས་དང་པོས་ཕོ་ཉ་ལ་བཀའ་བསྒོ་བ་དང༌། གཉིས་པས་དམ་ཅན་ལ་ཐ་ཚིག་བསྒྲགས་པ་དང༌། གསུམ་པས་གནོད་བྱེད་ཀྱི་རྫུ་འཕྲུལ་འཕྲོག་པའི་ཕྱིར་འབུལ་བ་ཕུར་པ་རང་གི་སྒོས་ཆོས་སོཿ ཧཱུྃ། སྒེག་པ་དཔའ་བ་འཇིགས་སུ་རུང་བ་དངཿ དགོད་དང་གཤེ་དང་འཇིགས་པར་སྟོན་པ་དངཿ སྙིང་རྗེ་རྔམས་ཞི་རྡོ་རྗེ་གཞོན་ནུའི་སྐུཿ ཞེ་སྡང་འཇོམས་པའི་ལྷ་ལ་ཕྱག་འཚལ་བསྟོདཿ ཡབ་ཀྱི་ཐུགས་དམ་དགྱེས་པ་སྐོང་བའི་ཡུམཿ འཁོར་ལོ་རྒྱས་འདེབས་འདོད་ཆགས་འཇོམས་མ་དངཿ ཨེ་ཀ་ཛ་ཊཱི་ཞེ་སྡང་འཇོམས་མཛད་མཿ འདོད་ཆགས་ཚུལ་གྱིས་འདོད་ཆགས་འཇོམས་ལ་བསྟོདཿ ཡེ་ཤེས་ལྔ་ལྡན་ཕུར་བུས་དུག་ལྔ་འཇོམསཿ ཕྲིན་ལས་ལྔ་ཡིས་དྲེགས་པ་སྒྲོལ་བ་ལཿ ཐོགས་པ་མེད་པའི་ལས་མཛད་འདུས་པ་ལྔཿ སྲས་མཆོག་རིགས་ལྔའི་སྐུ་ལ་ཕྱག་འཚལ་བསྟོདཿ ཡེ་ཤེས་རོལ་པའི་སྟོབས་བཅུས་མི་དགེ་འཇོམསཿ སྐུ་གསུང་ཐུགས་ཀྱིས་གདུག་པ་སྒྲོལ་བར་མཛདཿ ཡང་དག་དོན་གྱིས་ལོག་འདྲེན་འཇོམས་མཛད་པཿ ཁྲོ་བོ་ཡབ་ཡུམ་བཅུ་ལ་ཕྱག་འཚལ་བསྟོདཿ བྱང་ཆུབ་བདེ་ལ་རོལ་པའི་ཕོ་ཉ་མོཿ གདུལ་བྱའི་དོན་ལ་ཕྲ་ཐབས་གཟུགས་འཛིན་ཅིངཿ དྲེགས་པའི་ཚོགས་རྣམས་མ་ལུས་འདུལ་
མཛད་པཿ ཕྲ་མེན་ཕོ་ཉའི་ཚོགས་ལ་ཕྱག་འཚལ་བསྟོདཿ ཅེས་བསྟོདཿ སྦྱིན་སྲེག་གི་ཆོ་གའི་དུས་འདིར་སྦགས་དང་བསྟུན་ཏེ་རྫས་བསྲེག་ཅིང་མཆོད་པ་འབུལ་བ་བཟླས་པའི་ངོ་བོ་ཉིད་ཡིན་ཕྱིར་བཟླས་པ་སྒེར་དུ་མི་དགོས་མོད་ཀྱངཿ སྤྲོས་པ་ལ་དགའ་བ་རྣམས་བཟླས་པ་བྱ་བར་འདོད་ན་སྐབས་འདིར་ལྷ་ཚོགས་རྣམས་ཀྱི་ཐུགས་ཀར་པད་ཉིའི་གདན་ལ་སྔགས་ཕྲེང་ས་བོན་དང་བཅས་པའི་འོད་ཟེར་མཁའ་ཁྱབ་ཏུ་འཕྲོས། སངས་རྒྱས་ཐམས་ཅད་མཆོད་པས་དགྱེས་པ་བསྐྱེད། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཁྱད་པར་དུ་དམིགས་བྱའི་ནད་གདོན་སྡིག་སྒྲིབ་ཐམས་ཅད་འོད་ཟེར་དཀར་པོ་བདུད་རྩིའི་རང་བཞིན་ཅན་གྱིས་སྦྱངས་ཏེ་དག་ཅིང་ཞི་བར་གྱུར་པར་བསམས་ལ་རྩ་སྔགས་དང་དེའི་མཐར་ནད་གདོན་སྡིག་སྒྲིབ་ཤཱིནྟཾ་ཀུ་རུ་སྭཱ་ཧཱ། ཞེས་པ་ཅི་རིགས་བཟླའོ། །ཨརྒྷཾ་སོགས་ཀྱིས་མཆོད་ཅིང་བསྟོད་ནས། མ་རྙེད་ཡོངས་སུ་མ་ཚང་དང༌།། གཙོ་བོ་ནུས་པ་མ་མཆིས་པས། །འདིར་ནི་བྱ་མིན་གང་བགྱིས་པ། །དེ་ཀུན་ཁྱེད་ཀྱིས་བཟོད་མཛད་རིགས། །ཞེས་ཡིག་བརྒྱས་ནོངས་པ་བཟོད་པར་གསོལ། དེ་ནས་སྒྲུབ་དཀྱིལ་དང་འབྲེལ་ན་སྔར་བཞིན་སྤྱན་དྲངས་ཏེ་ཨོཾ་ཁྱེད་ཀྱིས་སེམས་ཅན་དོན་ཀུན་མཛད་སོགས་ཀྱིས་དཀྱིལ་འཁོར་གྱི་ལྷ་ཚོགས་རྣམས་སྒྲུབ་པའི་དཀྱིལ་འཁོར་ལ་རབ་གནས་དུས་རྟེན་གྱི་ཐུགས་ཀར་གཤེགས།
གཞལ་ཡས་ཁང་གདན་དང་བཅས་པ་རང་ཉིད་ལ་ཐིམ་པར་བསམ། གློ་བུར་བའི་ཚེ། བཛྲ་མུཾ་གྱིས་ཡེ་ཤེས་པ་ཆོས་ཀྱི་དབྱིངས་སུ་གཤེགས། དམ་ཚིག་པ་རང་ལ་བསྟིམ། སླར་ཡང་ཨོཾ་ཨགྣ་ཡེ་ཛྭ་ལ་ཛྭ་ལ་ཧཱུྃ་ཕཊ་ཅེས་བླུགས་གཟར་གྱི་མར་ཁུས་མེ་གསོས་ཏེ། འཇིག་རྟེན་པ་སྔར་ལྟར་གསལ་བ་ལ་ཨོཾ་ཨགྣེ་དེ་བ་རྀ་ཥི་ཧ་བྱ་ཀ་བྱ་དེ་བྱ་བདག་ཅག་དཔོན་སློབ་སོགས་ཀྱིས་སྲེག་རྫས་ལྷག་མ་དང༌། ཨོཾ་བཛྲ་ཝསྟྲས་གོས་ཟུང་དང༌། བཛྲ་ཏམྦུ་ལས་སོ་རྩི་འབུལ། ཨོཾ་ཨགྣེ་དེ་བ་རྀ་ཥི་མ་ཧཱ་བ་ལིངྟ་ཁཱ་ཧི། ཞེས་གཏོར་མ་དང༌། མ་ཧཱ་པཉྩ་ཨ་མྲི་ཏ་ཁཱ་ཧི། མ་ཧཱ་རཀྟ་ཁཱ་ཧི། ཞེས་ལས་སྨན་རཀ་ཕུལ། མེ་སྟེ་སྲེག་བྱ་ཟ་བའི་ལྷ། །ཞེས་ཤླཽ་ཀས་བསྟོད། ཡིག་བརྒྱས་ནོངས་པ་བཤགས། བཛྲ་མུས་མེ་ལྷ་ཡེ་ཤེས་པ་རང་གནས་སུ་གཤེགས་ལ། དམ་ཚིག་པ་འབར་བའི་རྣམ་པར་གྱུར་པར་བསམས་ལ་དགེ་བ་བསྔོ་ཞིང་ཤིས་བརྗོད་བྱའོ།། །། ༈ གཉིས་པ་དཔལ་ཆེན་ཕྱག་རྒྱ་རྒྱས་པ་ལ་བརྟེན་ནས་རྒྱས་པའི་སྦྱིན་སྲེག་གི་རིམ་པ་ལ་གཉིས་ལས། དང་པོ་སྦྱོར་བ་ནི། ཚོང་དུས་དང་རྒྱལ་པོའི་བང་མཛོད་ཀྱི་ས་ལ་ཐབས་སྟེགས་གྲུ་བཞི་རྒྱར་ཁྲུ་དོ་དཔངས་སུ་ཁྲུ་ཕྱེད་པའི་སྟེང༌། བ་བྱུང་དང་དྲི་སེར་པོས་ཆག་ཆག་བཏབ་ནས་ཐབ་ཁྲུང་གྲུ་བཞི་རྒྱར་ཁྲུ་གང་བ་དང་དཔངས་སུ་ཁྲུ་ཕྱེད་པ་སོར་བཞི་པའི་མཆུ་དང་མུ་རན་བང་རིམ་ཅན་ལ་མེ་རི་དང་ཁ་ཁྱེར་ལ་རིན་པོ་ཆེའི་ཕྲེང་བ་བྲི། ཐབ་ཀྱི་དབུས་སུ་རིན་པོ་ཆེ་ཧྲཱཾ་གིས་མཚན་པ་འབྲི། བརྐོས་ཐབས་དང་བྲིས་
ཐབ་ཀྱང་དེས་མཚོན་པར་བབ་ཀྱི་ནང་རྒྱ་ཁྲུ་གང་གི་ཕྱི་རོལ་སོར་བཞི་རེའི་ཚད་ཀྱི་མཆུ་དང་ཁ་ཁྱེར་ཕྱིར་འབྱེད་པ་ཡིན་ནོ། །འབྲས་བུ་ཅན་ནམ་མདོག་སེར་བ་དང་འོ་མ་ཅན་གྱི་བུད་ཤིང༌། རྒྱ་དཔངས་ཐབས་ལས་ཅུང་ཟད་དམན་པར་བརྩིག །སྟེགས་བུའི་གྲྭ་བཞིར་མདའ་གཞི་སྲད་བུ་སེར་པོས་སྤྲེལ་བ་དར་སེར་གྱིས་དགབ། ཤར་ལྷོའི་གྲར་མདའ་དར་དམར་པོ་གཟུགས། མདུན་དུ་སློབ་དཔོན་གྱི་སྟན་དང་མེ་ཡོལ། དེའི་གཡས་གཡོན་དུ་མཆོད་རྫས་དང་སྲེག་རྫས་ཀྱི་སྟེགས་བུ་ཁེབས་སེར་པོས་གཡོགས་པའི་སྟེང་མར་ཁུ་དང༌། རྒྱུ་བུད་ཤིང་དང་འདྲ་བའི་ཡམ་ཤིང་མཐོ་གང་བའི་རྩེ་མོར་མར་ཁུས་ཉུགས་པ། མངར་གསུམ་དང་ཞོ་འོ་མ་མར་ཁུ་སོགས་བསྲེས་པའི་ཞོ་ཟན། སྟར་ཁ་རྒུན་འབྲུམ་ལ་སོགས་པའི་ཤིང་འབྲས། ནས་འབྲས་ལ་སོགས་པའི་འབྲུ། གུར་གུམ་ལ་སོགས་པའི་མེ་ཏོག་སེར་པོའི་རིགས། དཱུར་ཝ་དང་རིན་པོ་ཆེ་རྣམས་ཁ་དོག་རང་བཞིན་གྱི་སེར་པོ་མི་གནས་པ་དག་བཅོས་བུས་སེར་པོར་བྱས་པ་དང༌། སྟེགས་བུ་ཅིག་ཤོས་ལ་བདག་བསྐྱེད་ཆོས་སྲུང་དང་བཅས་པའི་མཆོད་གཏོར་དང་བྱེ་བྲག་ཏུ་གསེར་ཕྱེ་དང་མེ་ཏོག་སེར་པོ་བསྲེས་པའི་ལྷ་བཤོས་གྲུ་བཞི་པད་འདབ་བཞི་པ་ཡེ་ཤེས་པ་དང་འཇིག་རྟེན་པ་སོ་སོར་བཤམས་པ་དང༌། སོ་རྩི་དང་མེ་དར་སེར་པོ། གཞན་ཡང་སྨན་རཀ་ཉེར་སྤྱོད་རྣམས་དང༌། སློབ་དཔོན་གྱི་མདུན་དུ་རྡོར་དྲིལ་ཐོད་རྔ། དགངས་བླུགས་སོགས་འོག་ཏུ་དགོས་པ་ཐམས་ཅད་མ་ཚང་བ་མེད་པར་བཤམ་མོ།། །།གཉིས་པ་དངོས་གཞིའི་རིམ་པ་ནི། བདག་བསྐྱེད་ཀྱི་རྣལ་འབྱོར་ལ་བསྙེམས་
བཞིན་པས། རང་ཉིད་ཆས་གོས་སེར་པོ་གྱོན་ཞིང་རིན་པོ་ཆེའི་རྒྱན་དང་ལྡན་པ་མཉམ་པའི་སྐྱིལ་ཀྲུང་གིས་སྟན་ལ་འཁོད་ནས། ཞི་ཞིང་དཔའ་བའི་བྱང་ཆུབ་ཀྱི་སེམས་དང་ལྡན་པས། རྡོར་དྲིལ་བསང་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང། ཨ་ལས་བྱུང་བའི་དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་ལ། ཨོཾ་མཧཱ་བཛྲ་ཧཱུྃ་གིས་རྡོ་རྗེ་གསོར། ཨོཾ་བཛྲ་གཎྜེ་ཨཿས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾཿ ཞེས་འཁྱུད་རྒྱ་བྱ། དེ་ནས་མཆོད་པ་བརླབ་པ་ནི། ཧཱུྃཿ དབྱིངས་ནས་ཡེ་ཤེས་འབྲུ་གསུམ་ཆར་དུ་བབསཿ མཆོད་རྫས་དངོས་འཛིན་མ་དག་བསྲེག་གཏོར་བཀྲུསཿ བྷཱུྃ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུརཿ ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ་དང༌། སྨན་གཏོར་རཀྟའི་སྔགས་ཀྱིས་བརླབ། སྲེག་རྫས་རྣམས་ལ་བསང་ཆུ་འཐོར་ཞིང༌། ཧཱུྃ་བིགྣན་ཏ་ཀྲིཏ་ཕཊཿ སྟོང་པའི་ངང་ལས་མ་དང་ཨ་ལས་ཉི་ཟླའི་གའུའི་སྣོད་དུ་སྲེག་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་བདུད་རྩིའི་དངོས་པོ་རྒྱས་པའི་ལས་སྒྲུབ་པ་
ལ་ཐོགས་པ་མེད་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ་ཨོཾ་ཧཱུྃ་སྭཱ་ཨཱཾ་ཧཱཾཿ ཞེས་བདུན་བཟླས་པས་བྱིན་གྱིས་བརླབས་ནས། ཐབ་བསང་སྦྱངས། སྟོང་པའི་ངང་ལས་བྷྲཱུྃ་ཞེས་བརྗོད་པས་མདུན་དུ་རྒྱས་པའི་ཐབ་ཁུང་སེར་པོ་གྲུ་བཞི་པ་མུ་རན་ཁ་ཁྱེར་དང་ལྡན་པ་འོད་ཟེར་སེར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་སེར་པོར་འབར་འབར་བསམས་ལ། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་རྗེའུའི་རིགས་ཀྱི་ཁྱིམ་ལས་བྱུང་བའམ་ནོར་བུ་ལས་བྱུང་བའི་མེ་སྦར་ལ། ཐབ་ཀྱི་མེའི་དབུས་སུ་ཉི་མ་དང་ར་སྐྱེས་ཀྱི་གདན་ལ་ཨགྣེ་དེ་བ་རྀ་ཥྀ་ཧཱུྃ་ཞེས་བརྗོད་པས་རྒྱས་པའི་མེ་ལྷ་སེར་པོ་སྒེག་ཅིང་གཟི་འབར་དྲང་སྲོང་གི་ཆ་ཅན་རིན་པོ་ཆེའི་སྒྲོམ་བུ་དང་བགྲང་ཕྲེང་འཛིན་པ་གསལ་བར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣེ་དེ་བ་ས་མ་ཡ་ཧཱུྃ་ཛཿ ཅེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང༌། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨགྣེ་དེ་ཝ་རྀ་ཥྀ་ཛཿཛཿས་སྤྱན་དྲངས།
ཛཿཧཱུྃ་བྃ་ཧོཿས་བསྟིམ། ཨོཾ་ཨགྣེ་དེ་ཝ་རྀ་ཥི་ཨརྒྷཾ་པུཥྤེ་སོགས་ཀྱིས་ཉེར་སྤྱོད་ཕུལ། ཧཱུྃ། རིན་ཆེན་རིགས་ལས་གྲུབ་པ་ཡི། །མེ་ལྷའི་རྒྱལ་པོ་དྲང་སྲོང་མཆོག །ཕྲིན་ལས་ཀུན་གྱི་དཔང་པོ་མཛད། །སྟངས་འཛིན་ལྷ་ལ་ཕྱག་འཚལ་བསྟོད། །ཅེས་པའི་བསྟོད། ཇི་ལྟར་བལྟམས་པ་སོགས་ཀྱི་མཐར་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་ཆུ་གཏོར་ཞིང༌། ཕྱོགས་བཅུའི་སངས་རྒྱས་རྣམས་ཀྱིས་དབང་གི་ལྷ་མོ་བྱང་ཆུབ་སེམས་ཀྱིས་གང་བའི་བུམ་པ་ཐོགས་པ་སྤྲོས་ཏེ་དབང་བསྐུར། ཨོཾ་རཏྣ་ཨཱ་ལངྐ་ར་སྭཱ་ཧཱ། ཞེས་རྒྱན་བཏགས་པར་བསམ། མེ་ལྷ་ཞལ་ཅུང་ཟད་གདངས་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་གྱུར་པར་བསམས་ལ། རཏྣའི་ཁུ་ཚུར་གྱིས་དགང་བླུགས་བཟུང་ནས། ཨོཾ་ཨགྣེ་ཡེ་སྭཱ་ཧཱ། ཞེས་མར་ཁུ་ལན་བདུན་གྱིས་དགང་གཟར་བཀང་སྟེ་དགང་བླུགས་ཁ་སྦྱར་བ་གཡས་སུ་བསྐོར་ཞིང༌། ཨོཾ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དེ་བྱ་མ་ཧཱ་ཡེ་བདག་ཅག་དཔོན་སློབ་འཁོར་དང་བཅས་པའི་ཚེ་དང་བསོད་ནམས་ཡེ་ཤེས་ཐམས་ཅད་པུཥྟིཾ་ཀུ་རུ་ཨོཾ། ཞེས་ལན་གསུམ་གྱིས་ཐབ་ཏུ་ཕུལ། དེ་རྗེས་སྔགས་དེ་ཉིད་ཀྱིས་ཡམ་ཤིང༌། མར་ཁུ། ཟས་མཆོག་ལ་སོགས་པའི་སྲེག་རྫས་རྣམས་རེ་རེ་ནས་ཇི་ལྟར་རིགས་པ་ཕུལ་རྗེས། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་
ལྷའི་རྒྱལ་པོ་དྲང་སྲོག་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་པ། །རིགས་སྔགས་གྲུབ་པ་དྲང་སྲོང་ཚུལ། །ཉོན་མོངས་བསྲེག་པས་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པ་ཐེག་པ་ཆིབས། །བགྲང་ཕྲེང་འཛིན་ཞིང་རིག་སྔགས་གསུངས། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ནས། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་རྣམས་ལྷའི་ཞལ་དུ་འབུལ་བ་དང་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་འཁོར་དང་བཅས་པའི་ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པའི་ཕྲིན་ལས་མཛད་དུ་གསོལ། །ཞེས་འདོད་དོན་གསོལ། དེ་ནས་འཇིག་རྟེན་ལས་འདས་པའི་ཡེ་ཤེས་ཀྱི་དཀྱིལ་འཁོར་མཆོད་པ་ནི། སྭ་བྷཱ་ཝས་སྦྱངས། མེ་ལྷའི་ལྟོ་བ་འབར་ཞིང་བསྲེགས་པའི་ཀློངཿ བྷྲཱུྃ་ཡིག་གནས་གྱུར་སྤྲུལ་པའི་གཞལ་མེད་ཁངཿ ཕྱི་ནི་རིན་ཆེན་ནང་ནི་ཐོད་པའི་མཁརཿ གྲུ་བཞི་སྒོ་བཞི་ཚད་
དང་མཚན་ཉིད་ལྡནཿ གུ་ཎ་ཏྭ་ར་རྟ་བབས་བང་རིམ་བརྒྱདཿ ཆོས་འཁོར་རི་དྭགས་གདུགས་དང་ནོར་བུའི་ཏོགཿ ཕྱི་རོལ་རིན་ཆེན་རྩིག་པའི་རྨིང་གི་གཞིརཿ འདོད་སྣམ་དམར་པོར་ལྷ་མོ་བཅུ་དྲུག་འཁོརཿ ཕ་གུ་སེར་པོ་དྲྭ་བ་དྲྭ་ཕྱེད་མཛེསཿ ཤར་བུ་མདའ་ཡབ་ཁང་བརྩེགས་རྡོ་རྗེའི་ཏོགཿ ནང་ནི་དུར་ཁྲོད་རོལ་པའི་གཞལ་མེད་ཁངཿ ཕྱི་འཁོར་རོ་གླིང་བརྒྱད་དང་རྡོ་རྗེའི་གུརཿ བསྐལ་མེ་འུར་འུར་ཆེམ་ཆེམ་འབར་བའི་ཀློངཿ འོག་མིན་གསང་ཆེན་རོལ་བའི་ཕོ་བྲང་ཆེཿ རབ་འཇིགས་གནམ་ལྕགས་ཙཀྲ་རྩིབས་བརྒྱད་དབུསཿ བདེ་ཆེན་ཀུན་ཏུ་བཟང་མོའི་ཨེ་ཀློང་དུཿ བྱོལ་སོང་གཙོ་རྣམས་དྲེགས་པ་ཆེ་དགུར་བརྫིསཿ མ་ཆགས་པདྨ་ཐབས་ཤེས་ཉི་ཟླ་འབརཿ རུ་ཏྲ་ཀྲོ་ཏི་ཏི་ར་བཾཿ པཾ་པདྨ་མཎྜལཿ མ་སཱུར་ཡ་མཎྜལཿ ཨ་ཙནྡྲ་མཎྜལཿ དེ་སྟེང་ཧཱུྃ་ཡིག་ཡོངས་གྱུར་ལསཿ ཆེ་མཆོག་བཛྲ་ཐོད་ཕྲེང་རྩལཿ མཐིང་ནག་དབུ་དགུ་ཕྱག་བཅོ་བརྒྱདཿ ཞེས་པ་ནས། ས་མ་ཡ་ཨ་བེ་ཤ་ཡ་ཏིཥྛ་ལྷནཿ ཞེས་པའི་བར་བྱ།། །།སྐབས་འདིར་སྒྲུབ་འཇུག་དང་འབྲེལ་བ་སོགས་ཡིན་ན་གདན་བསྐྱེད་པའི་རྗེས་དེ་མ་ཐག་པར་སྤྱན་འདྲེན་བྱ་དགོས་པས་མཎྜལ་མེ་ཏོག་གི་ཚོམ་ཅན་སོགས་ཀྱི་བརྡས་སྤྱན་དྲངས་པ་སློབ་དཔོན་ལ་གཡས་སུ་བསྐོར་ཏེ་སློབ་དཔོན་གྱིས་
མེ་ཏོག་ཐབ་ནང་ཏུ་དོར་བ་དང་ཆབས་ཅིག །ཨོཾ་གུ་རུ་ཤྲཱི་བཛྲ་ཡཀྴ་ཀྲོ་དྷ་ཙིཏྟ་ཧཱུྃཿ ཆེ་མཆོག་བཛྲ་ཐོད་ཕྲེང་རྩལཿ མཐིང་ནག་དབུ་དགུ་ཕྱག་བཅོ་བརྒྱདཿ ཅེས་སོགས་ནས། མ་འདྲེས་ཡོངས་རྫོགས་ཆེན་པོར་གསལཿ ཞེས་པའི་བར་གྱིས་གསལ་གདབ་ཉིད་ཁྱད་པར་རོ། །དེ་ནས། ཧཱུྃ། བླ་མེད་མཆོག་གི་མཆོད་པ་དམ་པ་ནིཿ ཡེ་ཤེས་ལྔ་ཡི་འོད་ཟེར་རྣམ་པར་འཕྲོཿ འདོད་པའི་ཡོན་ཏན་ལྔ་ཡིས་རབ་བརྒྱན་ཏེཿ དམ་ཚིག་བཞིན་ལས་ཅི་བདེར་བཞེས་སུ་གསོལཿ ཨོཾ་ཤྲཱི་བཛྲ་ཨརྒྷཾ་པྲ་ཏཱིཙྪ་ཧོཿ ནས་ཤཔྟའི་བར་གྱིས་མཆོད་ནས།དཀྱིལ་འཁོར་གྱི་ལྷ་རྣམས་ཀྱིས་ལྗགས་རྡོ་རྗེའི་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམས་ལ།ཨོཾ་གུ་རུ་ཤྲཱི་བཛྲ་ཡཀྴ་ཀྲོ་དྷ་ཙིཏྟ་ཧཱུྃཿ ཞེས་པ་བདུན་གྱིས་དགང་གཟར་བཀང་རྗེས། ཨོཾ་བཛྲ་ཙཎྜ་སརྦ་དུཥྚཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊཿ ཅེས་པ་ལན་གསུམ་གྱིས་བསྐོར་བཞིན་འབུལ་བ་དང༌། ཡེ་ཤེས་མེ་དང་གཉིས་མེད་འབར་བ་ཡི། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་བླུགས་བདུད་རྩིའི་མཆོད་པས་མཉེས་བྱས་ནས། །རྒྱས་པའི་ཕྲིན་ལས་ལྷུན་གྱིས་གྲུབ་པར་མཛོད། །ཅེས་བརྗོད་ནས་སྲེག་རྫས་རྣམས་ཡམ་ཤིང་མར་ཁུ་སོགས་རིམ་པར་གཙོ་སྔགས་འབའ་ཞིག་གི་མཐར་ཚེ་དཔལ་
ལོངས་སྤྱོད་པུཥྚིཾ་ཀུ་རུ་ཨོཾ་ཞེས་བཏགས་པས་འབུལ་བའམ་ཡང་ན་རིགས་བཞིའི་རྩ་སྔགས་དང་ཁྲོ་བོ་སྤྱི་སྔགས་ལ་གཤམ་བུ་བཏགས་པ་གཙོ་འཁོར་གྱི་འགྲོས་སྦྱར་བས་འབུལ་ཞིང༌། བཅུ་བཅུའམ་བརྒྱ་བརྒྱའི་མཚམས་སུ་སྤེལ་ཚིག་ཅི་རིགས་པའི་མཐར་པུཥྟིཾ་ཀུ་རུ་ཨོཾ་ཞེས་སྦྱར་བའམ། ཡང་ན། ཡེ་ཤེས་མེ་དང་ཞེས་པས་འདོད་དོན་གསོལ། རྫས་ཀྱི་གོ་རིམ་ཀྱང་མར་ཁུ་ཡམ་ཤིང་གི་རྗེས་ཞི་བར་ཏིལ་དང་རྒྱས་པར་ཟས་མཆོག་སྔོན་དུ་འགྲོ་བ་ཙམ་ཕྱག་བཞེས་སུ་སྣང་བ་ལས་གཞན་དུ་གོ་རིམ་གྱི་ངེས་པ་ཆེར་མི་འབྱུང་ངོ༌། །རྫས་རྫོགས་ནས་དགང་བླུགས་ལན་གསུམ་མམ་བདུན་ཅི་རིགས་པ་ཕུལ་ལ། ལྷ་ཚོགས་རྣམས་ཀྱི་སྐུ་ལས་འོད་ཟེར་གསེར་མདོག་ཉི་འོད་ལྟ་བུ་འཕྲོས་པས་བསྒྲུབ་བྱའི་ཚེ་དང་བསོད་ནམས་རྒྱས་པར་བསམ་མོ། །དེ་ནས་དེ་ལ་ཞེས་པས་གོས་ཟུང་དང༌། བཛྲ་ཏ་མཱུ་ལས་སོ་རྩི་ཕུལ། དེ་ནས་སྨན་མཆོད་ནིཿ ཧཱུྃཿ རྡོ་རྗེའི་དམ་ཚིག་རྨད་པོ་ཆེཿ རྩ་བརྒྱད་སྟོང་ལས་སྦྱར་བའི་བདུདཿ རྒྱུད་དྲུག་སྡུག་བསྔལ་འཇོམས་པའི་རྩིཿ རིགས་ལྔ་དམ་ཚིག་ལྔ་ཡི་དངོསཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁཱ་ཧིཿ གཏོར་མ་འབུལ་བ་ནི། ཧཱུྃཿ བྷ་ག་ཡངས་པའི་གཏོར་གཞོངས་དུཿ ལིངྒ་འདོད་ཡོན་གཏོར་མར་འབརཿ རྡོ་རྗེ་བཟའ་བའི་དམ་ཚིག་རྫསཿ ཨ་ལ་ལ་ཏེ་དགྱེས་པར་རོལཿ མ་ཧཱ་བ་ལིངྟ་ཁཱ་ཧིཿ ཞེས་གཏོར་མ་ཐབ་
ཏུ་འབུལ། ཧཱུྃཿ ལྕང་ལོར་བཅས་པའི་དུང་ཆེན་དུཿ ཆགས་སྡང་དབྱིངས་སུ་བསྒྲལ་བའི་ཁྲགཿ འཁོར་བ་གནས་སུ་དག་བྱའི་ཕྱིརཿ བླང་དོར་མེད་པར་བཞེས་སུ་གསོལཿ མ་ཧཱ་རཀྟ་ཁཱ་ཧིཿ ཞེས་རཀྟ་ཕུལ། སྤྲོ་ན་མཆོད་པ་རྣམས་ལས་གཞུང་གི་དཀྱུས་བཞིན་བྱ། ཧཱུྃཿ མི་སྡུག་སྲིན་པོའི་སྐུ་ནི་སྒེག་ཅིང་དཔའཿ དྲག་ཤུལ་རྡོ་རྗེའི་གད་མོ་གཤེ་བའི་སྒྲཿ མཆོག་ཏུ་ཞི་བའི་ཐུགས་ནི་སྙིང་རྗེ་རྔམསཿ གར་དགུས་ས་གསུམ་རྣམ་གནོན་ཁྱོད་ལ་བསྟོདཿ སྐུ་གསུམ་དབུ་ནི་སྟོབས་བཅུའི་དབྱིངས་ལ་རྫོགསཿ མ་འདྲེས་བཅོ་བརྒྱད་རྫོགས་པའི་ཕྱག་ཆ་ཡིསཿ ཡུལ་དང་ཡུལ་ཅན་ལྟར་སྣང་ཕྱག་རྒྱ་ཆེཿ བདེ་སྟོང་སྒྱུ་འཕྲུལ་དྲྭ་བར་སྦྱོར་ལ་བསྟོདཿ ཀུན་གཞི་ཡིད་ཆོས་ཕུང་ཁམས་སྐྱེ་མཆེད་ཚོགསཿ སྐུ་གསུམ་ཡན་ལག་བདུན་ལྡན་རྣམ་བྱང་གིཿ བཞིན་ལག་མཚན་དཔེར་ཤར་བའི་ཧེ་རུ་ཀཿ རྣམ་པ་ཀུན་གྱི་མཆོག་ལྡན་ཁྱོད་ལ་བསྟོདཿ ཆོས་ཉིད་གཅིག་ལ་ཡེ་ཤེས་ཀློང་དགུའི་རྩལཿ གདུལ་བྱའི་ཁམས་ལ་དགྱེས་ཆགས་ཁྲོ་བའི་ཉམསཿ རོལ་པའི་ཆོ་འཕྲུལ་མི་བཟད་འབར་བའི་སྐུཿ བདུན་བརྒྱ་ཉེར་ལྔའི་དཀྱིལ་འཁོར་ལྷ་ལ་བསྟོདཿ ཅེས་བསྟོད། སྐབས་འདིར་བཟླས་པ་བྱ་འདོད་ནཿ ལྷ་ཚོགས་རྣམས་ཀྱི་ཐུགས་ཀར་པད་ཉིའི་གདན་ལ་
རང་རང་གི་ས་བོན་སྔགས་ཕྲེང་དང་བཅས་པ་ལས་འོད་ཟེར་སེར་པོ་ཞིང་ཁམས་ཐམས་ཅད་དུ་ཁྱབ་པར་འཕྲོས་རྒྱལ་བ་ཐམས་ཅད་མཆོད་པས་མཉེས་བསྒྲུབ་བྱའི་ཚེ་དང་ཡེ་ཤེས་བསོད་ནམས་རྒྱས་པའི་དངོས་གྲུབ་སྩོལ་བར་བསམས་ལ་རྩ་སྔགས་དང་དེའི་མཐར་སརྦ་སིདྡྷི་པུཥྚིཾ་ཀུ་རུ་སྭཱ་ཧཱཿ བཏགས་པ་ཅུང་ཟད་བཟླ། མཐར་ཨརྒྷཾ་སོགས་ཀྱིས་མཆོད། བསྟོད་པ་ཉེར་བསྡུས་ཀྱང་བྱའོ། །དེ་ནས་མ་འབྱོར་པ་དང་སོགས་ཀྱིས་བཟོད་གསོལ་དང་ཡིག་བརྒྱ་བཟླ། ཨོཾ་ཁྱེད་ཀྱིས་སེམས་ཅན་དོན་ཀུན་མཛདཿ ཅེས་སོགས་ཀྱིས་སྒྲུབ་དཀྱིལ་དང་འབྲེལ་ན་སྔར་བཞིན་སྤྱན་དྲངས་ནས་ལྷ་ཚོགས་རྣམས་སྒྲུབ་པའི་དཀྱིལ་འཁོར་ལ་གཤེགས། གཞལ་ཡས་ཁང་གདན་དང་བཅས་པ་རང་ཉིད་ལ་ཐིམ་པར་བསམ་མོ། གློ་བུར་བའི་ཚེ། བཛྲ་མུཿས་ཆོས་དབྱིངས་སུ་གཤེགས། དེ་རྗེས། ཨོཾ་ཨགྣ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཞེས་བླུགས་གཟར་གྱིས་མེ་གསོས་ཏེ་འཇིག་རྟེན་པ་སྔར་བཞིན་གསལ་བ་ལ། ཨོཾ་ཨགྣེ་དེ་བ་རྀ་ཥི་ཧ་བྱ་ཀ་བྱ་དེ་བྱ་མ་ཧཱ་ན་ཡེ་བདག་ཅག་དཔོན་སློབ་འཁོར་དང་བཅས་པའི་ཚེ་དང་བསོད་ནམས་ཡེ་ཤེས་ཐམས་ཅད་པུཥྚིཾ་ཀུ་རུ་ཨོཾ། ཞེས་རྫས་ལྷག་མ་རྣམས་ཕུལ། བཛྲ་ཏམྦུ་ལས་སོ་རྩི་དང༌། བཛྲ་ཝསྟྲས་མེ་དར་དབུལ། ཨོཾ་ཨགྣི་དེ་ཝ་རྀ་ཥི་ཨརྒྷཾ་སོགས་ཀྱིས་ཉེར་སྤྱོད་དང༌། མེ་སྟེ་བསྲེགས་བྱས་
བསྟོད། ཨོཾ་ཨགྣི་དེ་ཝ་རྀ་ཥི་མ་ཧཱ་བ་ལིངྟ་ཁཱ་ཧིཿ ཞེས་པའི་གཏོར་མ་འབུལ་ཤིང༌། མཆོད་སྦྱིན་གཏོར་མ་འདི་བཞེས་ལ། སོགས་ཀྱིས་འདོད་དོན་གསོལ། མ་རྙེད་ཡོངས་སུ་མ་ཚང་དང༌། །སོགས་ཀྱིས་བཟོད་པར་གསོལ། བཛྲ་མུཿས་ཡེ་ཤེས་པ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམས་ལ་དགེ་བ་བསྔོ་ཞིང་ཤིས་པ་བརྗོད་པ་སོགས་མཐའ་རྒྱས་སུ་བྱའོ།། ༈ གསུམ་པ་རྟ་མགྲིན་ལ་བརྟེན་ནས་དབང་གི་སྦྱིན་སྲེག་བྱ་བའི་རིམ་པ་ལ་གཉིས་ལས། དང་པོ་སྦྱོར་བ་ནི། ཚོང་འདུས་དང་སྨད་འཚོང་མའི་གནས་ཀྱི་ས་ལས་ཐབ་སྟེགས་གྲུ་བཞི་རྒྱར་ཁྲུ་དོ་དཔངས་སུ་ཁྲུ་ཕྱེད་པའི་སྟེང༌། དྲི་དམར་པོ་དང་བ་བྱུང་གིས་ཆག་ཆག་བཏབ་པའི་ཁར་སྟེགས་བུའི་དཀྱིལ་ནས་རྒྱབ་ཏུ་མཐོ་གང་ཚད་པའི་བཞི་ཆ་མདུན་དུ་ཉེ་བ་ནས་ཟླུམ་པོར་བསྐོར་ཏེ་མདུན་ཐད་ཀར་བཅད་པའི་ཐབ་ཁུང་ཟླ་གམ་རྒྱར་ཁྲུ་གང་དཔངས་སུ་ཁྲུ་ཕྱེད་གྱེན་དུ་བསླང་བ་ལ་སོར་བཞི་པའི་ཚད་ཀྱི་མཆུ་དང་ཁ་ཁྱེར་ལྡན་པ་བྱ། བྲིས་ཐབས་བྱེད་ནའང་ཐབ་ཀྱི་ལྟེ་བ་ཟླ་གམ་ཁྲུ་གང་བའི་ཕྱི་རོལ་དུ་སོར་བཞི་རེ་བསྐོར་བའི་མཆུ་དང་ཁ་ཁྱེར་རིམ་པ་གཉིས་ལས། བྲི་རྩིག་གང་བྱེད་ཀྱང་ཐབ་ཀྱི་ལྟེ་བར་ལྷ་མཚན་པདྨ་དམར་པོའི་ལྟེ་བར་རྡོ་རྗེས་མཚན་པ་དང༌། མུ་རན་ནམ་མཆུ་ལ་པད་འདབ་དང་ཁ་ཁྱེར་ལ་རྡོ་རྗེ་དམར་པོའི་ཕྲེང་བ། ཟུར་བཞི་ལྕགས་ཀྱུ་བྲི། ཙན་དན་དམར་པོ་དང་མཛོ་མོ་ཤིང་སོགས་ཁ་དོག་དམར་ཞིང་རོ་སྐྱུར་བའི་ཤིང་གིས་གཅེར་ཞིང་ག་ཐབ་ཀྱི་ཚད་དང་
མཉམ་པར་བརྩིག །མདུན་དུ་སློབ་དཔོན་གྱི་སྟན་དང་དེའི་གཡས་སུ་སྟེགས་བུ་ཁེབས་དམར་པོས་གཡོགས་པ་ལ་རྒྱུ་བུད་ཤིང་དང་འདྲ་བའི་ཡམ་ཤིང་མཐོ་གང་བའི་རྩེ་མོ་ཏིལ་མར་རམ་མར་ཁུ་ལ་མངར་གསུམ་བཏབ་པས་བྱུག་པ་དང༌། འདིར་དབང་ལ་ཏིལ་ལས་བྱུང་བའི་མར་ཁུའི་དགང་བླུགས་འབུལ་བར་བཤད་ཀྱང་བོད་དུ་མི་འབྱུང་བས་པད་ཁའི་སྣུམ་དང་ཨུཏྤལ་གླང་སྣ་ལ་སོགས་མེ་ཏོག་དམར་པོའི་རིགས། ཙན་དན་དམར་པོ་སོགས་དྲི་བསུབ་ཅན་དང་རྒུན་འབྲུས་མཚོན། རོ་མངར་ཞིང་སྐྱུར་བ་ལ་སོགས་པའི་བཟའ་བཅའི་རིགས་རྣམས་ཁ་དོག་དམར་པོ་དང༌། དམིགས་བསལ་ལ་དོ་གལ་ཆེ་ན་ཙན་དན་དམར་པོའམ་ཟངས་ཀྱི་བྱང་བུར་གསེར་རམ་མཚལ་གྱིས་རྩ་སྔགས་གཤམ་ཨ་ཏྲཱི་ནྲྀ་དུང་དུང་ཛཿཛཿཆེ་གེ་ཝ་ཤཾ་ཀུ་རུ་ཧོཿ ཞེས་བྲིས་པ་གང་མང་བསགས། གཞན་ཡང་ནས་འབྲས་ལ་སོགས་འབྲུ་རྣམས་ཀྱང་ཚོན་རྩིས་ཁ་དོག་དམར་པོར་བསྒྱུར་བ་རྣམས་འཇིག་འདས་ཀྱི་དབྱེ་བས་ཕྲེང་ཚར་དུ་བཀོད་པ་དང༌། སོ་རྩི་དང༌། མེ་དར་དམར་པོ་སོགས་ཀྱང་བཤམ། གཡོན་ལོགས་སུ་སྟེགས་བུ་ཁེབས་དམར་པོ་དང་ལྡན་པ་ལ་བདག་བསྐྱེད་ཆོས་སྲུང་སོགས་ཀྱི་མཆོད་པ་དང༌། ཁྱད་པར་དུ་ཟངས་ཕྱེ། བུ་རམ། པད་རག །རམ་བུའི་ཕྱེ་རྣམས་བསྲེས་པའི་དབང་བཤོས་ཟླ་གམ་དམར་པོ་པད་འདབ་བཞིས་བརྒྱན་པ་ཡེ་ཤེས་པ་དང་འཇིག་རྟེན་ལས་གཏོར་གཉིས་སུ་བྱས་པ་དང༌། སྨན་རག་ཉེར་སྤྱོད་སོགས་དེ་ཐམས་ཅད་ཀྱང་ཁ་
དོག་དམར་པོར་རང་བཞིན་གྱི་མི་གནས་པ་རྣམས་རྒྱན་སོགས་ཚོས་ཀྱིས་བསྒྱུར། སློབ་དཔོན་གྱི་མདུན་དུ་རྡོར་དྲིལ་ཐོད་རྔ་དགང་བླུགས་སོགས་འོག་ཏུ་དགོས་པ་ཐམས་ཅད་མ་ཚང་བ་མེད་པར་འདུ་བྱའོ།། །།གཉིས་པ་དངོས་གཞིའི་རིམ་པ་དངོས་ལ་འཇུག་པ་ནི། རང་ཉིད་ཆས་གོས་དམར་པོ་དང་ལྡན་པ་པདྨའི་འདུག་སྟངས་ཀྱིས་སྟན་ལ་འཁོད་ནས་བྱང་ཆུབ་ཀྱི་སེམས་བསྡུ་བྱའི་ཡུལ་ལ་རྗེས་སུ་ཆགས་པ་དང་ལྡན་པས་རྡོར་དྲིལ་བསང་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང༌། ཨ་ལས་བྱུང་བའི་དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་ནོ། །ཨོཾ་མ་ཧཱ་བཛྲ་ཧཱུྃཿཞེས་རྡོ་རྗེ་ཐུགས་ཀར་གསོར། ཨོཾ་བཛྲ་གཎྜེ་ཨཿ ཞེས་དྲིལ་བུ་འཁོར་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་འཁྱུད་རྒྱ་བྱ། ཧཱུྃཿ དབྱིངས་ནས་ཡེ་ཤེས་འབྲུ་གསུམ་ཆར་དུ་བབསཿ མཆོད་རྫས་དངོས་འཛིན་མ་དག་བསྲེག་གཏོར་བཀྲུསཿ བྷྲུྃ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུརཿ ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ་དང་། སྨན་གཏོར་རཀྟའི་སྔགས་ཀྱི་བརླབ། སྲེག་རྫས་རྣམས་ལ་བསང་ཆུ་འཐོར་ཞིང༌། ཧཱུྃ་བིགྣནྟ་ཀྲིཏ་ཕཊཿ སྟོང་པའི་ངང་ལས་མ་དང་ཨ་
ལས་བྱུང་བའི་ཉི་ཟླའི་གའུའི་སྣོད་དུ་སྲེག་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་བདུད་རྩིའི་དངོས་པོ་དབང་གི་ལས་བསྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ་ཨོཾ་ཧཱུྃ་སྭཱ་ཨཱཾ་ཧཱཾཿ ཞེས་ལན་བདུན་བཟླས་པས་སྲེག་རྫས་བརླབ། མེ་ཐབ་བསང་སྦྱངས། སྟོང་པའི་ངང་ལས་བྷྲཱུྃ་ལས་དབང་གི་ཐབ་ཁུང་དམར་པོ་ཟླ་གམ་མུ་རན་ཁ་ཁྱེར་དང་བཅས་པ་འོད་ཟེར་དམར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དམར་པོ་འབར་བར་བསམས་ལ། ཨོཾ་ཨགྣ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་སྨད་འཚོང་མའི་ཁྱིམ་ལས་བྱུང་བའི་མེ་དུ་བ་མེད་པས་སྦར། ཐབས་ཀྱི་མེའི་དབུས་སུ་ཟངས་ཀྱི་ར་སྐྱེས་ལ་གནས་པའི་དབང་གི་མེ་ལྷ་དམར་པོ་ཞལ་བཞི་ཁྲོ་འཛུམ་ཆགས་པ་དྲང་སྲོང་གི་ཆ་བྱས་ཅན་ཕྱག་བཞིའི་གཡས་གཉིས་ལྕགས་ཀྱུ་དང་བགྲང་ཕྲེང་གཡོན་གཉིས་དབྱུག་པ་དང་གུནྡྷེ་བསྣམས་པའི་སྐུར་གྱུར། རང་གི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམས་ལ། ཧཱུྃ། ཡེ་ཤེས་སྤྱན་གྱི་སྤྱོད་ཡུལ་ནས། །མེ་ལྷ་དྲང་སྲོང་འཁོར་དང་བཅས། །དད་པ་
དང་ནི་དམ་ཚིག་གིས། །ཚུར་གཤེགས་ཚུར་གཤེགས་མེ་ལྷའི་གཙོ། །སེམས་ཅན་དོན་ལ་དམ་ཚིག་དགོངས། །འབར་བའི་གནས་འདིར་གཤེགས་སུ་གསོལ། །ཛཿཧཱུྃ་བྃ་ཧོཿ ཨགྣེ་ཛྙཱ་ན་སཏྭ་ཨེ་ཧྱེ་ཧི་བྷ་ག་ཝཱན་མ་ཧཱ་ཀུ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཞེས་པས་སྤྱན་དྲངས། ཨོཾ་ཨགྣ་ཡེ་ས་མ་ཡ་ཏིཥྛ་ལྷན་གྱིས་གཉིས་མེད་དུ་བསྟིམ། ཨོཾ་ཨགྣེ་ཡེ་ཨ་ལ་ལ་ཧོཿ ཨ་ཏི་པཱུ་ཧོཿ པྲ་ཏི་པཱུ་ཧོཿས་ཕྱག་བྱས་ལ། མེ་ལྷའི་རྒྱལ་པོ་དྲང་སྲོང་མཆོག །ར་སྐྱེས་བཅིབས་ཤིང་གློག་ལས་མགྱོགས། །སྲེག་རྫས་ཀུན་གྱི་ཕྱག་ཚང་མཛད། །ཚིམ་བྱེད་ཁྱོད་ལ་མཆོད་པ་འབུལ། །ཨོཾ་ཨགྣ་ཡེ་པུཥྤེ་ཨཱ་ལོ་ཀེ་གནྡྷེ་ནཻ་ཝི་དྱཱ་ཤཔྟ་པྲ་ཏིཙྪ་ཧོཿ ཞེས་ཉེར་སྤྱོད་ཕུལ་ནས། མེ་ལྷ་ཞལ་ཅུང་ཟད་གདངས་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམས་ལ། པདྨའི་ཁུ་ཚུར་ཀྱིས་དགང་བླུགས་བཟུང་ནས། ཨོཾ་ཨགྣ་ཡེ་སྭཱ་ཧཱ། ཞེས་ལན་བདུན་གྱིས་ཏིལ་མར་གྱིས་དགང་གཟར་བཀང་ནས། ཨོཾ་ན་མཿས་མནྟ་བུདྡྷ་ནཱཾ་བི་མ་ལ་ཨོཾ་ཨགྣ་ཡེ་སྭཱ་ཧཱ། ཁམས་གསུམ་སྐྱེ་དགུའི་དཔལ་འབྱོར་ཐམས་ཅད་ཝཱ་ཤཾ་ཀུ་རུ་ཧོཿ ཞེས་ལན་གསུམ་གྱིས་དགང་བླུགས་ཁ་སྦྱར་བ་བསྐོར་བཞིན་དབུལ། དེ་ནས་ཨོཾ་པྲ་ཏི་ཧ་ཏ་བཛྲ་ཡེ་སྭཱ་ཧཱས། ཡམ་ཤིང་དང་། ཨོཾ་ཨགྣ་ཡེ་སྭཱ་ཧཱས་མར་ནག །ཨོཾ་ན་མཿས་མནྟ་བུདྡྷ་ནཱཾ་བི་མ་ལ་ཨོཾ་ཨགྣེ་ཡེ་
སྭཱ་ཧཱ། ཞེས་པ་ཁོ་ནས་སྲེག་རྫས་གཞམ་རྣམས་གྲངས་ཇི་འོས་ཞུལ་ནས། ཧཱུྃ། མེ་ལྷའི་རྒྱལ་པོར་དྲང་སྲོང་མཆོག །བདུད་བཞི་འཇོམས་པའི་ཕྱག་བཞི་པ། །ཞལ་བཞིས་ལས་བཞི་གྲུབ་པར་བྱེད། །ལས་ཀུན་མཛད་ལ་ཕྱག་འཚལ་བསྟོད། །ཅེས་བསྟོད་དེ། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་རྣམས་ལྷའི་ཞལ་དུ་འབུལ་བ་དང༌། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་རང་བཞིན་གྱི་སྣང་བ་དབང་དུ་འདུས་པའི་ཕྲིན་ལས་མཛད་དུ་གསོལ། ཞེས་འདོད་དོན་གསོལ། དེ་ནས་འཇིག་རྟེན་ལས་འདས་པ་ཡེ་ཤེས་ཀྱི་དཀྱིལ་འཁོར་མཆོད་པ་ནི། ཨོཾ་སྭ་བྷཱ་ཝ་སོགས་ཀྱིས་སྦྱངས་ལ། མེ་ལྷའི་ལྟོ་བ་ཡངས་ཤིང་རྒྱ་ཆེའི་དབུས། །བྷྲཱུྃ་ཡིག་གནས་འགྱུར་སྤྲུལ་པའི་གཞལ་མེད་ཁངཿ ཕྱི་ནི་རིན་ཆེན་ནང་ནི་ཐོད་པའི་མཁརཿ གྲུ་བཞི་སྒོ་བཞི་ཚད་དང་མཚན་ཉིད་ལྡནཿ གུ་ཎ་ཏྭ་ར་རྟ་བབས་བང་རིམ་བརྒྱདཿ ཆོས་འཁོར་རི་དྭགས་གདུགས་དང་ནོར་བུའི་ཏོགཿ ཕྱི་རོལ་རིན་ཆེན་རྩིག་པའི་རྨིང་གི་གཞིརཿ འདོད་སྣམ་དམར་པོར་གཟུང་མ་བཅུ་དྲུག་འཁོདཿ ཕ་གུ་སེར་པོ་དྲྭ་བ་དྲྭ་ཕྱེད་མཛེསཿ ཤར་བུ་མདའ་ཡབ་ཁང་བརྩེགས་རྡོ་རྗེའི་ཏོགཿ ནང་ནི་དུར་ཁྲོད་རོལ་བའི་གཞལ་མེད་
ཁངཿ ཕྱི་འཁོར་རོ་གླིང་བརྒྱད་དང་རྡོ་རྗེའི་གུརཿ བསྐལ་མེ་འུར་འུར་ཆེམ་ཆེམ་འབར་བའི་ཀློངཿ འོག་མིན་གསང་ཆེན་རོལ་པའི་ཕོ་བྲང་ཆེཿ རྩིབས་འཁར་བཅུ་དྲུག་པད་འདབ་སོ་གཉིས་པའིཿ ལྟེ་བ་ཟླ་གམ་དམར་པོ་སྒོ་གཅིག་དབུསཿ པཾ་ལས་པདྨ་མཾ་ལས་ཉི་ཟླའི་གདནཿ རུ་དང་ནཱ་ལས་ཀླུ་སྲིན་བསྣོལ་བའི་སྟེངཿ ཧཱུྃཿ རང་བྱུང་རྒྱུ་ཡི་ཡི་གེ་ཧྲཱིཿ འཕྲོ་འདུས་ཡོངས་སུ་གྱུར་པ་ལསཿ དཔལ་ཆེན་རྟ་མཆོག་རོལ་པ་ནིཿ སྐུ་མདོག་དུས་མཐའི་མེ་ལྟར་འབརཿ ཞེས་པ་ནས། བཛྲ་ས་མ་ཡ་ཛཿཛཿཏིཥྛ་ལྷན་ཞེས་བྱ་བའི་བར་བྱ། སྒྲུབ་དཀྱིལ་སོགས་དང་འབྲེལ་ན་གདན་བསྐྱེད་པའི་རྗེས་དེ་མ་ཐག་པར་ཡེ་ཤེས་ཀྱི་ལྷ་ཚོགས་སྲེག་བླུགས་ཀྱི་ཐབ་ཏུ་སྤྱན་དྲངས་པ་ལ་སྦྱིན་སྲེག་གི་མཆོད་པ་འབུལ་བ་རྒྱུད་སྡེ་ལས་བཤད་པའི་ཕྱིར་ལྷ་བསྐྱེད་པ་དངོས་བསྟན་བཞག་ཀྱང་རུང་ལ། སྤྲོ་ན་སྔར་ཞི་རྒྱས་ཀྱི་སྐབས་སུ་བཤད་བཞིན་འབྱིན་འཇུག་གི་སྐབས་ཐོབ་ཤེས་པར་བྱའོ། །དེ་ནས་མཆོད་པ་ནི། ཧཱུྃ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འགྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་ཧྲཱིཿཔདྨ་ཏ་ཀྲིཏ་ས་པཱ་རི་ཝ་ར་ཨརྒྷཾ་ནས། ཤཔྟ་པྲ་ཏཱིཙྪ་ཡེ་སྭཱ་ཧྭས་མཆོད་ནས། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེའི་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་
དྲངས་ནས་གསོལ་བར་བསམས་ལ། ཨོཾ་ཧུ་ལུ་ཧུ་ལུ་ཕཊ་ཨེ་ཨ་ར་ལི་ཧཱུྃ་ཧྲཱིཿཛཿ ཞེས་པ་བདུན་གྱིས་དགང་གཟར་བཀང་བ་སྔགས་དེའི་མཐར་ཨ་ཏྲི་ནྲི་དུང་དུང་ཛཿཛཿ ཁམས་གསུམ་སྣོད་བཅུད་ཐམས་ཅད་ཝཱ་ཤཾ་ཀུ་རུ་ཧོཿ ཞེས་པ་ལན་གསུམ་གྱིས་བསྐོར་བཞིན་ཕུལ་ནས། ཡེ་ཤེས་མེ་དང་གཉིས་མེད་འབར་བ་ཡི། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་བླུགས་བདུད་རྩིའི་མཆོད་པས་མཉེས་གྱུར་ནས། །དབང་གི་ཕྲིན་ལས་ལྷུན་གྱིས་གྲུབ་པར་མཛོད། །ཅེས་བརྗོད་ནས་རྫས་རྣམས་ཡམ་ཤིང་ནས་རིམ་པར་རྩ་སྔགས་མཐར་ཨ་ཏྲི་ནྲྀ་དུང་དུང་ཛཿཛཿཝཱ་ཤཾ་ཀུ་རུ་ཧོཿ ཞེས་ཁོ་ནས་འབུལ་ཞིང༌། བཅུ་ཚན་ནམ་བརྒྱ་བརྒྱའི་མཚམས་སུ། ཡེ་ཤེས་མེ་དང་སོགས་ཀྱིས་འདོད་དོན་གསོལ། རྫས་རྫོགས་ནས་དགང་བླུགས་སྔར་བཞིན་ཕུལ་བ། ལྷ་ཚོགས་རྣམས་ཀྱི་སྐུ་ལས་འོད་ཟེར་དམར་པོ་ལྕགས་ཀྱུ་ལྟ་བུ་འཕྲོས་པས་བསྒྲུབ་བྱ་རྣམས་རང་དབང་མེད་པར་དབང་དུ་འདུས་པར་བསམས་མོ། །དེ་ནས་གོས་ཟུང༌། དེ་ནས་དེ་ལ་ཁ་དོག་ལེགས་བསྒྱུར་བའི། །སོགས་ཀྱིས་ཕུལ། ཨོཾ་བཛྲ་ཏམྦུ་ལ་ཡེ་སྭཱ་ཧཱ། ཞེས་སོ་རྩི་ཕུལ་ནས། ཧཱུྃ། རྡོ་རྗེའི་དམ་ཚིག་རྨད་པོ་ཆེཿ རྩ་བརྒྱད་སྟོང་ལས་སྦྱར་བའི་བདུདཿ རྒྱུད་དྲུག་སྡུག་བསྔལ་འཇོམས་པའི་རྩིཿ རིགས་ལྔ་ཡེ་ཤེས་ལྔ་ཡི་དངོསཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁཱ་ཧིཿ ཞེས་སྨན་མཆོད་དང༌། ཧཱུྃ། བྷ་ག་
ཡངས་པའི་གཏོར་གཞོང་དུཿ ལིང་ག་འདོད་ཡོན་གཏོར་མ་འབརཿ རྡོ་རྗེ་བཟའ་བའི་དམ་ཚིག་རྫསཿ ཨ་ལ་ལ་སྟེ་དགྱེས་པར་རོལཿ མ་ཧཱ་བ་ལིངྟ་ཁཱ་ཧིཿ ཞེས་གཏོར་མ་ཐབ་ཏུ་འབུལཿ ཧཱུྃཿ ལྕང་ལོར་བཅས་པའི་དུང་ཆེན་དུཿ ཆགས་སྡང་དབྱིངས་སུ་བསྒྲལ་བའི་ཁྲགཿ འཁོར་བ་གནས་སུ་དག་བྱའི་ཕྱིརཿ བླང་དོར་མེད་པར་བཞེས་སུ་གསོལཿ མ་ཧཱ་རཀྟ་ཁཱ་ཧིཿཞེས་རཀྟ་ཕུལ། སྤྲོ་ན་ལས་གཞུང་གི་དཀྱུས་ལྟར་བྱ། ཧཱུྃཿ མི་སྡུག་སྲིན་པོའི་སྐུ་ནི་སྒེག་ཅིང་དཔའཿ དྲག་ཤུལ་རྡོ་རྗེའི་གད་མོ་གཤེ་བའི་སྒྲཿ མཆོག་ཏུ་ཞི་བའི་ཐུགས་ནི་སྙིང་རྗེ་རྔམསཿ གར་དགུས་ས་གསུམ་རྣམ་གནོན་ཁྱོད་ལ་བསྟོདཿ བཻ་ཌཱུར་སྔོན་པོའི་རིན་ཆེན་རི་རབ་ལཿ ཉི་མ་སྟོང་གི་འོད་ཟེར་བརྡལ་བ་ལྟརཿ སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅནཿ དཔལ་དང་གཟི་བརྗིད་འབར་ལ་ཕྱག་འཚལ་བསྟོདཿ འོད་ཕུང་སྟུག་པོ་སྤྲིན་ལྟར་འཐིབས་པ་ཡིཿ འཇིགས་བྱེད་རྔམ་སྟབས་བརྐྱང་བསྐུམ་ཚུལ་དུ་བཞུགསཿ ཟ་བྱེད་བསྐལ་པའི་མེ་ལྟར་འབར་བ་ཡིསཿ གདུག་པ་ཞལ་དུ་འདྲེན་ལ་ཕྱག་འཚལ་བསྟོདཿ མི་བཟད་མཆེ་བས་བརྒྱན་པའི་ཞལ་གདངས་ཤིངཿ ཁམས་གསུམ་ཟ་བར་བྱེད་པའི་རྐན་སྒྲ་ཅནཿ ཉི་ཟླ་འབར་བའི་སྤྱན་གྱི་སྡང་མིག་གིསཿ བགེགས་དཔུང་
བསྲེགས་པར་མཛད་ལ་ཕྱག་འཚལ་བསྟོདཿ ཅེས་བསྟོད། བཟླས་པ་བྱ་བར་སྤྲོ་ན། ལྷ་ཚོགས་རྣམས་ཀྱི་ཐུགས་ཀར་པད་ཉིའི་སྟེང་རང་རང་གིས་ས་བོན་སྔགས་ཕྲེང་དང་བཅས་པའི་འོད་ཟེར་དམར་པོ་སྣོད་བཅུད་ཐམས་ཅད་ཁྱབ་པར་འཕྲོས། རྒྱལ་བ་ཐམས་ཅད་མཉེས། གཟི་བྱིན་རྣམས་ཚུར་བསྡུས་ཏེ་བདག་ལ་ཐིམ་པས་དབང་གི་དངོས་གྲུབ་ཐོབ། ཡང་འཕྲོས་དམིགས་ཡུལ་ཐམས་ཅད་བཀུག་འོད་དུ་ཞུ་ཞིང་བདག་ལ་ཐིམ་པས་དབང་དུ་གྱུར་པར་བསམ་ལ་རྩ་སྔགས་དང་དེའི་མཐར་སརྦ་པཱ་ཤཾ་ཀུ་རུ་སྭཱ་ཧཱ། བཏགས་པ་ཅུང་ཟད་བཟླ། མཐར་ཨརྒྷཾ་སོགས་ཀྱིས་མཆོད་ཅིང་བསྟོད་ནས། མ་འབྱོར་བ་དང་སོགས་ཀྱི་རྗེས་ཡི་གེ་བརྒྱ་པས་བཟོད་གསོལ་བྱས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད་སོགས་ཀྱིས་བསྒྲུབ་དཀྱིལ་དང་འབྲེལ་ན་མེ་ཏོག་གི་ཚོམས་བུས་སྔར་ལྟར་སྤྱན་དྲངས་ནས་དཀྱིལ་འཁོར་གྱི་ལྷ་ཚོགས་རྣམས་སྒྲུབ་པའི་དཀྱིལ་འཁོར་ལ་གཤེགས། གཞལ་ཡས་ཁང་གདན་དང་བཅས་པར་རང་ལ་ཐིམ་པར་བསམ། གློ་བུར་བའི་ཚེ་བཛྲ་མུཾ་གྱིས་ཆོས་དབྱིངས་སུ་གཤེགས། སླར་ཡང༌། ཨོཾ་ཨགྣ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་བླུགས་གཟར་གྱིས་མེ་གསོས་ལ། འཇིག་རྟེན་པ་སྔར་བཞིན་གསལ་བ་ལ། མར་ཁུ་ཡམ་ཤིང་སོགས་རྫས་ལྷག་མ་རྣམས་ཕུལ། བཛྲ་ཏམྦུ་ལས་སོ་རྩི་དང༌། བཛྲ་ཝསྟྲས་གོས་ཟུང་ཕུལ།
ཨོཾ་ཨགྣེ་དེ་ཝ་རྀ་ཥི་ཨརྒྷཾ་སོགས་ཀྱི་ཉེར་སྤྱོད་ཕུལ། མེ་སྟེ་སྲེག་བྱ་ཟ་བའི་ལྷ། །སོགས་ཀྱིས་བསྟོད། ནམཿས་མནྟ་བུདྡྷ་ནཱཾ་སརྦ་པཉྩ་ཨ་མྲྀ་ཏ་བ་ལིངྟ་ཨགྣ་ཡེ་སྭཱ་ཧཱས་ལས་གཏོར་ཕུལ་ཏེ་མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་གསོལ། མ་རྙེད་ཡོངས་སུ་མ་ཚང་དང༌། །གཙོ་བོ་ནུས་པ་མ་མཆིས་པས། །འདིར་ནི་བྱ་མིན་གང་བགྱིད་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་དང་ཡི་གེ་བརྒྱ་པས་ལྷག་ཆད་བསྐང༌། བཛྲ་མུཿས་ཡེ་ཤེས་པ་རང་གནས་སུ་གཤེགས། དམ་ཚིག་འབར་བའི་རྣམ་པར་གྱུར་པར་བསམས་ལ་དགེ་བ་བསྔོ། ༈ བཞི་པ་འཇམ་དཔལ་གཤིན་རྗེ་ལ་བརྟེན་ནས་དྲག་པོའི་སྦྱིན་སྲེག་གི་རིམ་པ་ལ་གཉིས་ལས། དང་པོ་སྦྱོར་བ་ནི། དུར་ཁྲོད་དང་ཕུང་ཤུལ་གྱི་ས་ལ་ཐབ་སྟེགས་རྒྱར་ཁྲུ་དོ་དཔངས་སུ་ཁྲུ་ཕྱེད་པའི་སྟེང་དུག་ཁྲག་གིས་ཆག་ཆག་བཏབ་ནས་ཟླུམ་པོར་བསྐོར་བའི་མུ་ཁྱུད་ནག་པོ་ལ་ཧཱུྃ་ཡིག་དང་ཐོད་སྐམ་སྤེལ་བའི་ནང་རྡོ་རྗེ་རྒྱ་གྲམ་སྔོན་པོ་རྭ་གདེངས་པ་ཟུར་བསྟན་གྱི་ལྟེ་བར་ལོགས་རེ་རེའི་ཞིང་དུ་ཁྲུ་གང་བའི་ཐབ་ཁུང་གྲུ་གསུམ་པ་དཔངས་སུ་ཁྲུ་ཕྱེད་བསླང་བའི་སྟེང་ནས་སོར་བཞི་རེའི་ཚད་ཀྱི་མཆུ་དང་ཁ་ཁྱེར་ལྡན་པའམ། བྲིས་ཐབ་བྱེད་ན་མཆུ་དང་ཁ་ཁྱེར་གཉིས་སོར་བཞི་རེའི་ཚད་ཀྱི་རེ་ཁ་ཕྱི་རོལ་དུ་འགྱེད་པ་སྟེ་བྲི་རྩིག་གང་བྱེད་ཀྱང་ཐབ་མཚན་རྡོ་རྗེ་རྭ་གདེངས་ཧཱུྃ་གིས་མཚན་པ། མཆུ་དང་ཁ་ཁྱེར་ལ་མེ་རི་དང་རྡོ་རྗེ་རྩེ་གསུམ་པའི་ཕྲེང་བ་བྲིས་པ་རོ་སོལ་གྱི་མདོག་
ནག་པོར་བྱས་པ་ལ་ནིམ་པ་སོགས་དུག་ཤིང་དང་ཚེར་མ་ཅན་གྱི་ཤིང་གིས་ཟུར་གསུམ་དུ་གཅེར་ཞིང་བརྩིག །སྟེགས་བུའི་གྲྭ་བཞིར་མདའ་བཞི་བཙུགས་པ་སྲད་བུ་ནག་པོས་སྦྲེལ་བ་ལ་དར་སྔོ་ནག་གང་རིགས་ཀྱིས་དགབ། ཤར་ལྷོར་མདའ་དར་དམར་པོ་གཟུག །མདུན་དུ་སློབ་དཔོན་གྱི་སྟན་ནག་པོ་དང༌། གཡས་སུ་སྟེགས་བུ་ཁེལ་ནག་པོས་གཡོགས་པ་ལ། སྐྱེ་ཚེའམ་ཡུངས་ནག་ལས་བྱུང་བའི་སྣུམ་དང༌། ཚིལ་ཞུན་བསྲེས་པ། བུད་ཤིང་གི་རྒྱུ་དང་འདྲ་བའི་ཡམ་ཤིང་རྩང་ཕུར་གྱི་རྣམ་པ་མཐོ་གང་བའི་རྩེ་མོ་དུག་ཁྲག་གིས་བྱུགས་པ་དང༌། དུག་སྣ། སྲན་ནག་གི་ཆན། ཁྲག་སྣ། བ་གླང་ལ་སོགས་པའི་ཤ་སྣ་ཚོགས་ཚད། སྐེ་ཚེ། ཤངས་ཚེ། ནིམ་པའི་ལོ་མ་སོགས་དུག་ཤིང་དང་ཚེར་མ་ཅན་གྱི་ཤིང་གི་འདབ་མའམ་འབྲས་བུ་ལ་སོགས། རོ་ཚ་ཞིང་རྩུབ་པའི་རིགས་རང་བཞིན་གྱི་ཁ་དོག་ནག་པོར་གནས་པའམ། ཡང་ན་བཅོས་བུས་བསྒྱུར་བ་རྣམས་འཇིག་འདས་ཀྱི་རིམ་པས་ཕྱི་ནང་ཉིས་རིམ་མམ་ཕྲེང་ཚར་དུ་བཀོད། ལྕགས་སམ་ཐོད་པའི་སྣོད་དུ་དུག་སྣ། ལྕགས་ཕྱེ། རྡོ་ཕྱེ། ར་ཁྱིའི་ཁྲག །ཤ་ཆེན། སྲན་ཆེན་རྣམས་རོ་སོལ་བསྒྱུར་བའི་མར་ནག་པོ་དང་བསྲེས་པའི་གཏོར་མ་གྲུ་གསུམ་མཐེབ་ཀྱུས་བསྐོར་བ་འདས་གཏོར་དང་འཇིག་རྟེན་ལས་གཏོར་སོ་སོར་བྱས་པ་དང༌། རྡོ་ཤོའི་སོ་རྩི། མེ་དར་ནག་པོ་སོགས་ཀྱང་བཤམ། ཁྱད་པར་དུ་སྒྲུབ་མཆོད་དང་འབྲེལ་ཚེ་ནུབ་རེ་བཞིན་ཚོགས་ཐ་མའི་དུས་ཀྱི་བསྒྲལ་བའི་ལིང་རོ་ཟུར་དུ་
བསགས་པ་དང༌། གཏོར་བཟློག་གི་མཐའ་སྡུད་ལྟ་བུར་བྱ་ནའང་བསྒྲལ་བའི་དུས་ཀྱི་ལིང་རོ་རྣམས་ལྕགས་སྣོད་དམ་འབྲུབ་ཁུང་དུ་བཤམ་སྲེག་ཀྱང་གློ་བུར་དུ་བྱ་ན་འབྲུབ་ཁུང་ནང་དུ་ཤ་ཆེན་ནམ་འབྲུ་ནག་གི་ཕྱེ་ལ་གནད་རྫས་ཁྱད་པར་བ་བསྲེས་པའི་རླུ་པ་དབང་པོ་དོད་པར་བཅོས་པའི་ལིང་ཁེབས་ཀྱིས་གཡོགས། ཉེ་ལོགས་ཅི་བདེར་ལས་བུམ་དང༌། སློབ་དཔོན་གྱི་མདུན་དུ་རྡོར་དྲིལ་སོགས་འོག་ཏུ་དགོས་པ་ཐམས་ཅད་མ་ཚང་བ་མེད་པར་བཤམ་མོ།། །།གཉིས་པ་དངོས་གཞིའི་རིམ་པ་ནི་གློ་བུར་དུ་བྱ་བའི་ཚེ་སྐབས་འདིར་བདག་བསྐྱེད་ཚོགས་མཆོད་ཀྱི་བར་བཏང༌། མངོན་སྤྱོད་དཀྱུས་མ་ཙམ་ལ་ཚོགས་ཐ་མལ་སྔར་འབྲུབ་ཁུང་བཤམས་པའི་ལིང་ག་བསྒྲལ་ལས་དམིགས་གནད་དང་ལྡན་པ་ཚར་ཇི་ཙམ་རིགས་པ་བྱས་ལ་ལིང་རོ་སྲེག་རྫས་སུ་འབུལ་རྒྱུར་བཞག །དོ་གལ་ཆེ་ན་རོལ་ཆེན་གཏོར་བཟློག་གི་གཟུ་དཔང་ནས་བསྒྲལ་ལས་གཏུན་དུ་བརྡུང་བའི་བར་བྱས་ལ་ལིང་རོ་སྲེག་རྫས་ཀྱི་གཙོ་བོར་གཞག་གོ །དེ་ནས་སྦྱིན་སྲེག་དངོས་ལ་འཇུག་པ་ནི་རང་ཉིད་ཆས་ནག་པོ་གྱོན་ཞིང་བྱང་ཆུབ་ཀྱི་སེམས་ཞེ་སྡང་དྲག་པོའི་ཀུན་སློང་དུ་ཤར་བས་སྟན་ལ་དོར་སྟབས་ཀྱིས་འཁོད་དེ་རྡོར་དྲིལ་བསང་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང༌། ཨ་ལས་བྱུང་བའི་དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་
ནོ། །མ་ཧཱ་བཛྲ་ཧཱུྃ། ཞེས་རྡོ་རྗེ་གསོར། བཛྲ་གྷནྜེ་ཨཿ ཞེས་དྲིལ་བུ་འཁྲོལ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾཿ ཞེས་འཁྱུད་རྒྱ་བྱ། ཧཱུྃ། དབྱིངས་ནས་ཡེ་ཤེས་འབྲུ་གསུམ་ཆར་དུ་བབསཿ མཆོད་རྫས་དངོས་འཛིན་མ་དག་བསྲེག་གཏོར་བཀྲུསཿ བྷྲཱུཾ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུརཿ ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ་དང༌། སྨན་གཏོར་རཀྟའི་སྔགས་ཀྱིས་བརླབ། སྲེག་རྫས་རྣམས་ལ་བསང་ཆུ་འཐོར་ཞིང༌། ཧཱུྃ་བིགྣནྟ་ཀྲིཏ་ཕཊཿ སྟོང་པའི་ངང་ལས་ཀཾ་ལས་བྷནྡྷའི་སྣོད་དུ་ཧཱུྃ་ཡིག་ལྔ་སྤྲོས་ཏེ་འཕྲོ་འདུས་ཡོངས་སུ་གྱུར་པ་ལས་སྲེག་རྫས་རྣམས་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་དགྲའམ་བགེགས་ཀྱི་ཤ་ཁྲག་རུས་ཕུང་གི་མཆོད་རྫས། དྲག་པོའི་ལས་བསྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་གྱུར་པར་བསམས་ལ། ཨོཾ་ཨཱཿཧཱུྃ་དང་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་བཟླས་པས་བྱིན་གྱིས་བརླབ། མེ་ཐབ་བསང་སྦྱངས། སྟོང་པའི་ངང་ལས་མདུན་དུ་བྷྲཱུྃ་ཡིག་འཕྲོ་དུས་ཡོངས་སུ་གྱུར་པ་ལས་རྡོ་རྗེ་རྒྱ་གྲམ་རྭ་གདེངས་པ་ཅན་གྱི་ལྟེ་བ་ལ་གནས་པའི་དྲག་པོའི་ཐབ་ཁུང་ནག་པོ་གྲུ་གསུམ་པ་ཁ་ཁྱེར་བང་རིམ་དང་ལྡན་པ་འོད་ཟེར་ནག་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་
ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་ནག་པོ་འབར་བར་བསམ་ཞིང༌། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་གདོལ་བཤན་ནམ་དུར་ཁྲོད་ལས་བྱུང་བའི་མེ་དུ་བ་ཅན་གྱིས་སྦར་ལ། ཐབ་ཀྱི་མེའི་དབུས་སུ་མ་དང་དིཿལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ཧཱུྃ་ཡིག་ནག་པོར་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་བ་རྀ་ཥི་ཧཱུྃ། དྲག་པོའི་མེ་ལྷ་མཐིང་ནག་ཁྲོ་ཞིང་གཏུམ་པ་དྲང་སྲོང་གི་ཆ་བྱད་ཅན་ཏྲི་ཤུ་ལ་དང་བགྲང་ཕྲེང་འཛིན་པའི་སྐུར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམས་ལ། ཨགྣེ་དེ་ཝ་ས་མ་ཡ་ཧཱུྃ་ཛཿ ཞེས་སེ་གོལ་བསྣོལ་མར་གདབ། མདའ་དར་ནག་པོ་གཡབ་ཅིང༌། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེའི་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་ཕྱག་རྒྱ་དང་བཅས་ཨགྣེ་དེ་བ་རྀ་ཥི་ཛཿཛཿས་སྤྱན་དྲངས། ཛཿཧཱུྃ་བྃ་ཧོཿས་བསྙིམ། ཨོཾ་ཨགྣེ་དེ་ཝ་རྀ་ཥི་ཨརྒྷཾ་པྲ་ཏཱིཙྪ་ཡེ་སྭཱ་ཧཱ། དེ་བཞིན་ཤཔྟའི་བར་གྱིས་མཆོད། ཇི་ལྟར་བལྟམས་པ་སོགས་ཀྱི་མཐར་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ། ཞེས་བུམ་ཆུ་འཐོར་ཞིང༌། ཕྱོགས་བཅུའི་སངས་རྒྱས་
རྣམས་ཀྱི་ཐུགས་ཀ་ནས་དབང་གི་ལྷ་མོ་བྱང་ཆུབ་སེམས་ཀྱིས་གང་བའི་བུམ་པ་ཐོགས་པ་སྤྲོས་ཏེ་དབང་བསྐུར་བར་གྱུར། ཨོཾ་རཏྣ་ཨ་ལངྐ་ར་སྭཱ་ཧཱ། ཞེས་རྒྱན་བཏགས་པར་བསམ། མེ་ལྷ་ཤིན་ཏུ་གདངས་པས་སྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམས་ལ། ཁྲོ་བོའི་ཁུ་ཚུར་གྱིས་དགང་བླུགས་བཟུང་ནས་ཨོཾ་ཨགྣེ་ཡེ་སྭཱ་ཧཱ། ཞེས་གཡོན་པའི་བླུགས་གཟར་བདུན་གྱིས་གཡས་པའི་དགང་གཟར་བཀང་བ་ཁ་སྦྱར་ཏེ་པུས་མོའི་ཕྱིར་གཡོན་དུ་བསྐོར་བཞིན། ཨོཾ་ཨགྣི་དེ་བ་རྀ་ཥི་ཧ་བྱ་ཀ་བྱ་དེ་བྱ་མ་ཧཱ་ན་ཡེ་བདག་ཅག་དཔོན་སློབ་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་གདུག་པ་ཅན་ཐམས་ཅད་མཱ་ར་ཡ་ཕཊཿ ཅེས་ལན་གསུམ་གྱིས་དགང་བླུགས་ཕུལ། དེ་རྗེས་སྔགས་དེ་ཉིད་ཀྱིས་ཡམ་ཤིང་མར་ནག་སོགས་སྲེག་རྫས་རྣམས་གྲངས་ཅི་རིགས་ཕུལ་ནས། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེས་དབང་གིས་སྐུ་སྤྲུལ་པ། །རིགས་སྔགས་གྲུབ་པ་དྲང་སྲོང་ཚུལ། །ཉོན་མོངས་བསྲེགས་པས་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པ་ཐེག་པ་ཆིབས། །
བགྲང་ཕྲེང་འཛིན་ཅིང་རིགས་སྔགས་གསུང༌། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཡུངས་ནག་ཐབ་ཏུ་འཐོར་བས། ན་མོ་རིག་པའི་རྒྱལ་པོ་ཁྱོད་ཀྱི་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང༌། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་གདུག་པ་ཅན་ཐམས་ཅད་ཐལ་བའི་རྡུལ་དུ་རློག་པའི་ཕྲིན་ལས་མཛད་དུ་གསོལ། ཞེས་འདོད་དོན་གསོལ་ནས་མེ་ལྷ་དེ་ཉིད་ཡེ་ཤེས་ལྷའི་ཕོ་བྲང་དུ་ཤེས་པར་བྱས་ནས། སྭ་བྷཱ་ཝས་སྦྱངས་ལ། ཧཱུྃ། མེ་ལྷ་འབར་ཞིང་བསྲེགས་པའི་ཀློངཿ ལྷུན་གྲུབ་ཡེ་ཤེས་གཞལ་མེད་ཁངཿ རིན་ཆེན་དུར་ཁྲོད་བརྟན་པར་གནསཿ ཞེས་པ་ནས། ཨ་ཏི་པཱུ་ཧོཿན་མ་ཡ་དྷིཿ ཞེས་པའི་བར་དང༌། མཆོད་པ་ནི། ཧཱུྃ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། དམ་ཚིག་བཞིན་ལས་ཅི་བདེར་བཞེས་སུ་གསོལཿ ཨོཾ་བཛྲ་ཨརྒྷཾ་པྲ་ཏིཙྪ་ཧོཿ དེ་བཞིན་དུ་ཤཔྟའི་བར་གྱིས་མཆོད་ནས།
དཀྱིལ་འཁོར་གྱི་ལྷ་རྣམས་ཁྲོས་པའི་ཞལ་རབ་ཏུ་གདངས་བའི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་གྱུར་པར་བསམས་ལ། ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ་ཧཱུྃ་ཕཊཿ ཅེས་བདུན་གྱིས་དགང་གཟར་བཀང་བ། ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ་ཧཱུྃ་ཕཊ་དགྲ་བགེགས་འབྱུང་པོ་མཱ་ར་ཡ་ཕཊཿ ཅེས་པ་ལན་གསུམ་གྱིས་ཕུལ་ལ། འདོད་གསོལ་ནི། ཡེ་ཤེས་མེ་དང་གཉིས་མེད་འབར་བ་ཡི། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་བླུགས་བདུད་རྩིའི་མཆོད་པས་མཉེས་གྱུར་ནས། །དྲག་པོའི་ཕྲིན་ལས་ལྷུན་གྱིས་གྲུབ་པར་མཛོད། །དེ་རྗེས་གོང་ལྟར་རྩ་སྔགས་ཤམ་བུ་ཅན་དེ་ཁོ་ནས་སྲེག་རྫས་རྣམས་ཕུལ། བཅུ་བཅུའམ། བརྒྱ་བརྒྱའི་མཚམས་སུ་ཡེ་ཤེས་མེ་དང་ཞེས་གོང་བཞིན་འདོད་དོན་གསོལ། རྫས་རྫོགས་པ་དང༌། དགང་བླུགས་གསུམ་ཕུལ་ནས། ལྷ་ཚོགས་རྣམས་ཀྱི་སྐུ་ལས་འོད་ཟེར་ནག་པོ་མེ་ལྕེ་ལྟ་བུར་འཕྲོ་བ་ལས་མཚོན་ཆའི་ཆར་བབས་པས་དགྲ་བགེགས་ཐམས་ཅད་བརླག་པར་བསམ་མོ། །དེ་ནས་དེ་ལ་སོགས་ཀྱིས་མེ་དར་ནག་པོ་དང༌། བཛྲ་ཏམ་བུ་ལས་སོ་རྩི་འབུལ། དེ་ནས་སྨན་མཆོད་ནི། ཧཱུྃ། རྡོ་རྗེའི་དམ་ཚིག་རྨད་པོ་ཆེཿ རྩ་བརྒྱད་སྟོང་ལས་སྦྱར་བའི་བདུདཿ རྒྱུད་དྲུག་སྡུག་བསྔལ་
འཇོམས་པའི་རྩིཿ རིགས་ལྔ་ཡེ་ཤེས་ལྔ་ཡི་དངོསཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁཱ་ཧིཿ གཏོར་མ་འབུལ་བ་ནི། ཧཱུྃ་བྷ་ག་ཡངས་པའི་གཏོར་གཞོང་དུཿ ལིངྒ་འདོད་ཡོན་གཏོར་མ་འབརཿ རྡོ་རྗེ་བཟའ་བའི་དམ་ཚིག་རྫསཿ ཨ་ལ་ལ་སྟེ་དགྱེས་པར་རོལཿ མ་ཧཱ་བ་ལིངྟ་ཁཱ་ཧིཿ ཞེས་གཏོར་མ་ཐབ་ཏུ་འབུལཿ རཀྟ་འབུལ་བ་ནི། ཧཱུྃ་ལྕང་ལོར་བཅས་པའི་དུང་ཆེན་དུཿ ཆགས་སྡང་དབྱིངས་སུ་བསྒྲལ་བའི་ཁྲགཿ འཁོར་བ་གནས་སུ་དག་བྱའི་ཕྱིརཿ བླང་དོར་མེད་པར་བཞེས་སུ་གསོལཿ མ་ཧཱ་རཀྟ་ཁཱ་ཧིཿ བསྟོད་པ་ནི། ཧཱུྃ། མི་གནས་མི་དམིགས་ཆོས་སྐུར་དག་པ་ལསཿ བདུད་འདུལ་ཁྲོ་བོ་མཆོག་ཏུ་སྐུར་སྤྲུལ་ཏེཿ ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལཿ ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་བསྟོདཿ གཏུམ་ཁྲོ་མི་བཟད་རྩུབ་པའི་སྒྲར་ལྡན་པསཿ ཁྱེད་ཀྱི་མཚན་ཐོས་ཙམ་གྱིས་བགེགས་རྣམས་ཕུངཿ འབར་བའི་སྐུ་མཐོང་གསུང་སྒྲ་ཐོས་པ་ཡིསཿ དགྲ་བགེགས་ཞི་བྱེད་ཁྱེད་ལ་ཕྱག་འཚལ་བསྟོདཿ ལུས་ངག་ཡིད་གསུམ་དང་བས་ཕྱག་འཚལ་ཞིངཿ དད་པ་རབ་ཀྱིས་འཕགས་མགོན་མི་གཏོང་བརཿ འགྲོ་ལ་ཕན་ཕྱིར་ཁྲོ་རྒྱལ་ཁྱོད་བསྒོམ་ནཿ མི་མཐུན་ཕྱོགས་རྣམས་རྡུལ་དུ་བརླག་ཏུ་གསོལཿ ཞེས་བསྟོད་ལ།
མ་འབྱོར་པ་དང་སོགས་ཀྱི་མཐར་ཡིག་བརྒྱ་བཟླས་པས་བཟོད་པར་གསོལ། ཨོཾ། ཁྱེད་ཀྱི་སེམས་ཅན་སོགས་ཀྱིས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་མེ་གསོས་ལ་མེ་ལྷ་སྔར་བཞིན་གསལ་བས། ཨོཾ་ཨགྣེ་དེ་བ་རྀ་ཥི་ཧ་བྱ་ཀ་བྱ་དེ་བྱ་མ་ཧཱ་ན་ཡེ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་འབྱུང་པོ་མཱ་ར་ཡ་ཕཊཿ ཅེས་རྫས་ལྷག་རྣམས་ཕུལ། བཛྲ་ཏམྦུ་ལས་སོ་རྩི་དང༌། བཛྲ་ཝསྟྲས་མེ་དར་འབུལ། ཨོཾ་ཨགྣི་དེ་ཝ་རྀ་ཥི་ཨརྒྷཾ་པུཥྤེ་སོགས་དང༌། ཨོཾ་ཨགྣེ་དེ་ཝ་རྀ་ཥི་མ་ཧཱ་བ་ལིང་ཏ་ཁཱ་ཧིཿ མ་ཧཱ་རཀྟ་ཁཱ་ཧིཿ མ་ཧཱ་པཉྩ་ཨ་མྲྀ་ཏ་ཁཱ་ཧིཿ ཞེས་གཏོར་མ་དང་རཀྟ་སྨན་རྣམས་ཕུལ། མེ་སྟེ་བསྲེག་བྱས་བསྟོད། མ་རྙེད་ཡོངས་སུ་མ་ཚང་དང་སོགས་ཀྱིས་ནོངས་པ་བཟོད་པར་གསོལ། བཛྲ་མུཿས་ཡེ་ཤེས་པ་གཤེགས། དམ་ཚིག་པ་འབར་བའི་རྣམ་པར་གྱུར། དུག་ཁྲག་གི་ཆུས་མེ་ཅིག་ཅར་དུ་གཞིལ། དགེ་བ་བསྔོ་ཞིང་ཤིས་བརྗོད་སོགས་མཐའ་རྒྱས་བྱ། ༈ ལྔ་པ་ཡང་དག་ལ་བརྟེན་ནས་མཆོག་གི་སྦྱིན་སྲེག་ནི། ལུང་ཁུངས་ཉུང་བས་ལག་ལེན་ལ་འདེབས་པ་དག་ཀྱང་ལས་བཞི་སྤྱི་དྲིལ་གྱི་གཟུགས་བརྙན་ལ་བྱེད་པ་དང༌། དེ་ལས་གཅིག་ཤོས་ཤིག་འདོད་རྒྱལ་དུ་བྱེད་པར་སྣང་ཡང༌། དང་པོ་ལྟར་མཆོག་གི་ཐ་སྙད་མི་རུང་ལ། ལས་བཞི་ནི་ཐུན་མོང་གི་དངོས་གྲུབ་ཡིན་པས་སོ། །
དེས་ན་མཆོག་ནི་བྱང་ཆུབ་ཞི་བ་དམ་པའི་གོ་འཕང་ལ་དམིགས་པའི་ཕྱིར་ཡི་དམ་ཀྱང་ཡང་དག་ལ་བརྟེན་པ་ལེགས་ཏེ་ལྷ་དང་སྔགས་ཀྱི་དེ་ཉིད་ཐམས་ཅད་ཆོས་སྐུ་ལ་སྦྱོར་བའི་ཕྱིར་རོ། །དེ་ལ་ཐབ་དང་མཆོད་པ་སྔར་ཞི་བར་བཤད་པ་ལྟར་དང༌། སྲེག་རྫས་ནི་ཞི་རྒྱས་གཉིས་ཀ་ལྟར་ཚོགས་པའི་སྟེང༌། ཁྱད་པར་གྱི་རྫས་མར་ཁུ་ལ་མངར་གསུམ་བཏབ་པ་དང༌། འབྲུ་མར། ཉམས་རྟོགས་བསྐྱེད་ཕྱིར་ཆང་རག་གི་ཉིང་ཁུ་ལ་ཆོས་སྨན་བཏབ་པ་དང༌། ཚོགས་འཁོར་ཀྱང་བཤམ། གཞན་ཡང་སྦྱོར་ཆོས་ཡོ་བྱད་ཐམས་ཅད་སྔར་ཞི་བའི་སྐབས་ལྟར་མ་ཚང་མེད་པར་འདུ་བྱའོ། །གཉིས་པ་དངོས་གཞིའི་རིམ་པ་ནི། རང་ཉིད་ཆས་གོས་དཀར་པོ་དང་ལྡན་པ་སྟན་ལ་རྫོགས་པའི་སྐྱིལ་མོ་ཀྲུང་གིས་འདུག་ནས། བྱང་ཆུབ་ཀྱི་སེམས་མཆོག་བསྒྲུབ་པའི་བློ་དང་ལྡན་པས། རྡོར་དྲིལ་བསང་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང༌། ཨཿལས་བྱུང་བའི་དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་ནོ། །ཨོཾ་མ་ཧཱ་བཛྲ་ཧཱུྃ། ཞེས་རྡོ་རྗེ་གསོར། ཨོཾ་བཛྲ་གྷཎྜེ་ཨཿ ཞེས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ཐུགས་ཀར་འཁྱུད་རྒྱ་བྱ། ཧཱུྃ། དབྱིངས་ནས་ཡེ་ཤེས་འབྲུ་
གསུམ་དུ་ཆར་དུ་བབསཿ མཆོད་རྫས་དངོས་འཛིན་མ་དག་བསྲེགས་གཏོར་བཀྲུསཿ བྷྲཱུྃ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུར། །ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ་དང་སྨན་གཏོར་རཀྟའི་སྔགས་ཀྱིས་བརླབས། སྲེག་རྫས་རྣམས་ལ་བསང་ཆུ་འཐོར་ཞིང༌། ཧཱུྃ་བིག་ནན་ཏ་ཀྲྀཏ་ཕཊཿ སྟོང་པའི་ངང་ལས་མ་དང་ཨ་ལས་ཉི་ཟླའི་གའུའི་སྣོད་དུ་སྲེག་རྫས་རྣམས་སོ་སོའི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་བདུད་རྩིའི་དངོས་པོ་མཆོག་གི་དངོས་གྲུབ་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ། ཨོཾ་ཧཱུྃ་སྭཱཾ་ཨཱཾཿཧཱཾ། ཞེས་ལན་བདུན་གྱིས་བྱིན་བརླབ། ཐབ་བསང་སྦྱངས། སྟོང་པའི་ངང་ལས་མདུན་དུ་བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དཀར་པོ་འབར་བར་བསམས་ལ། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་རྒྱུན་བཞག་གམ་གཙུབ་ཤིང་ལས་བྱུང་བའི་མེ་སྦར། ཐབ་ཀྱི་མེ་ཡི་དབུས་སུ་མ་དང་དིཿ ལས་བྱུང་བའི་ཉི་མ་
དང་ར་སྐྱེས་ཀྱི་གདན་ལ་ཨོཾ་ཡིག་དཀར་པོ་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་ཝ་རྀ་ཥི་ཧཱུྃ་ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆ་བྱད་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམས་ལ། ཨགྣེ་དེ་ཝ་ས་མ་ཡ་ཧཱུྃ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང༌། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ཨགྣེ་དེ་བ་རི་ཥི་ཛཿཛཿ ཞེས་ལྕགས་ཀྱུའི་རྒྱ་དང་བཅས་དྲངས། ཛཿཧཱུྃ་བཾ་ཧོཿས་བསྟིམ། ཨོཾ་ཨགྣི་དེ་བ་རྀ་ཥི་ཨརྒྷཾ་པྲ་ཏིཙྪ་ཧོཿ དེ་བཞིན་དུ་པུཥྤེ་སོགས་ཀྱིས་མཆོད་ནས། ཇི་ལྟར་བལྟམས་པ་ཙམ་གྱིས་ནི། །སོགས་མཐར་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་བུམ་ཆུ་གཏོར། ཕྱོགས་བཅུའི་སངས་རྒྱས་རྣམས་ཀྱི་ཐུགས་ཀ་ནས་དབང་གི་ལྷ་མོ་བྱང་ཆུབ་སེམས་ཀྱིས་གང་བའི་བུམ་པ་ཐོགས་པ་སྤྲོས་ཏེ་དབང་བསྐུར། ཨོཾ་རཏྣ་ཨ་ལངྐ་ར་སྭཱ་ཧཱ། ཞེས་རྒྱན་བཏགས་པར་བསམས་ལ། མེ་ལྷ་ཞལ་འཛུམ་པ་དང་བཅས་
པས་ཅུང་ཟད་གདངས་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་འོད་ཟེར་གྱི་ཕུང་པོར་འབར་བས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམས་ལ། ལག་གཉིས་བྱང་ཆུབ་མཆོག་གི་རྒྱས་དགང་བླུགས་བཟུང་ནས་ཨོཾ་ཨགྣེ་ཡེ་སྭཱ་ཧཱ། ཞེས་བདུན་གྱིས་དགང་གཟར་བཀང་ལ། ཨོཾ་ཨགྣེ་དེ་བ་རྀ་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་རྣམས་ཀྱི་བྱང་ཆུབ་བསྒྲུབ་པ་ལ་བར་དུ་གཅོད་པའི་འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་ཤཱིནྟཾ་ཀུ་རུ་སྭཱ་ཧཱ། ཞེས་ལན་གསུམ་གྱིས་དགང་བླུགས་འབུལ། སྔགས་དེ་ཉིད་ཀྱིས་ཡམ་ཤིང་སོགས་རྫས་གཞན་རྣམས་གྲངས་ཅི་རིགས་པ་ཕུལ་རྗེས། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་ཚུལ། །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པ་དྲང་སྲོང་ཚུལ། །ཉོན་མོངས་བསྲེགས་པས་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པ་ཐེག་པ་ཆིབས། །བགྲང་ཕྲེང་འཛིན་ཅིང་རིགས་སྔགས་གསུང། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་
བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ་ཞེས་བསྟོད་ནས། ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང༌། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པའི་བྱང་ཆུབ་བསྒྲུབ་པའི་ལམ་གྱི་བར་ཆད་ཐམས་ཅད་ཞི་བའི་ཕྲིན་ལས་མཛད་དུ་གསོལ། །ཞེས་འདོད་དོན་གསོལ། དེ་ནས་འཇིག་རྟེན་ལས་འདས་པའི་མེ་ལྷ་མཆོད་པ་ནི། སྭ་བྷཱ་ཝས་སྦྱངས་ལ། ཧཱུྃ། མེ་ལྷའི་ལྟོ་བ་འབར་ཞིང་བསྲེགས་པའི་ཀློངཿ བྷྲུྃ་ཡིག་གནས་འགྱུར་སྤྲུལ་པའི་གཞལ་མེད་ཁངཿ ཕྱི་ནི་རིན་ཆེན་ནང་ནི་ཐོད་པའི་མཁརཿ གྲུ་བཞི་སྒོ་བཞི་ཚད་དང་མཚན་ཉིད་ལྡནཿ གུ་ཎ་ཏྭ་ར་རྟ་བབས་བང་རིམ་བརྒྱདཿ ཆོས་འཁོར་རི་དྭགས་གདུགས་དང་ནོར་བུའི་ཏོགཿ ཕྱི་རོལ་རིན་ཆེན་རྩིག་པའི་རྨིང་གི་གཞིརཿ འདོད་སྣམ་དམར་པོར་ལྷ་མོ་བཅུ་དྲུག་འཁོདཿ ཕ་གུ་སེར་པོ་དྲ་བ་དྲྭ་ཕྱེད་མཛེསཿ ཤར་བུ་མདའ་ཡབ་ཁང་བརྩེགས་རྡོ་རྗེའི་ཏོགཿ ནང་ནི་དུར་ཁྲོད་རོལ་པའི་གཞལ་མེད་ཁངཿ ཕྱི་འཁོར་རོ་གླིང་བརྒྱད་དང་རྡོ་རྗེའི་གུརཿ བསྐལ་མེ་འུར་འུར་ཆེམ་ཆེམ་འབར་བའི་ཀློངཿ
འོག་མིན་གསང་ཆེན་རོལ་པའི་ཕོ་བྲང་ཆེཿ ལྟེ་བ་ཟླ་གམ་དམར་པོ་སྒོ་གཅིག་ནངཿ གསེར་འཁོར་རྩིབས་བརྒྱད་ཐབས་ཤེས་ཟླ་གམ་སྟེངཿ ཞེས་པ་ནས། ཨ་ཏི་པཱུ་ཧོཿན་མ་ཡ་དྷིཿ ཞེས་པའི་བར་དང་། མཆོད་པ་ནི། ཧཱུྃ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་ཤྲཱི་བཛྲ་ཨརྒྷཾ་པྲ་ཏཱིཙྪ་ཧོ། དེ་བཞིན་ཤཔྟའི་བར་གྱིས་མཆོད་ནས། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་གྱུར་པར་བསམས་ལ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃཿཞེས་རྩ་སྔགས་ལན་བདུན་གྱིས་དགང་བླུགས་བཀང་ལ། རྩ་སྔགས་དེའི་མཐར། སརྦ་ཏ་ཐཱ་ག་ཏ་མ་ཧཱ་མུ་དྲ་པཱུཙྪ་ཧོ། །ཞེས་ལན་གསུམ་གྱིས་བསྐོར་བཞིན་ཕུལ་ནས། བདག་དང་འགྲོ་བ་སེམས་ཅན་ཐམས་ཅད་ཀྱི། །སྒྲིབ་པ་གཉིས་བྱང་ཚོགས་གཉིས་མྱུར་དུ་རྫོགས། །ས་བཅུ་ལམ་ལྔའི་ཡོན་ཏན་མཐར་ཕྱིན་ནས། །ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ། །ཞེས་འདོད་གསོལ་སྦྱར་ལ། རྩ་སྔགས་འབའ་ཞིག་གིས་སྲེག་རྫས་འབུལ། སྐབས་ཅི་རིགས་པར་འདོད་དོན་གོང་བཞིན་གསོལ། རྫས་རྫོགས་ནས་ལྷ་ཚོགས་རྣམས་ཀྱི་སྐུ་
ལས་ཟླ་བ་ཆུ་ཤེལ་ལྟ་བུའི་འོད་ཟེར་བྱུང་བར་ང་ལ་ཕོག་པས་ཉོན་མོངས་པ་དང་ཤེས་བྱའི་སྒྲིབ་པ་སྦྱང༌། ས་དང་ལམ་གྱི་ཡོན་ཏན་མཐར་ཕྱིན་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བསམ་མོ། །དེ་ནས་དེ་ལ་ཞེས་གོས་ཟུང་དང་བཛྲ་ཏམ་བུ་ལས་སོ་རྩི་ཕུལ། དེ་རྗེས། ཨོཾ་ཤྲཱི་བཛྲ་ཧེ་རུ་ཀ་ཨརྒྷཾ་པྲ་ཏཱིཙྪ་ཡེ་སྭཱ་ཧཱ། དེ་བཞིན་དུ་པུཥྤེ་སོགས་ཀྱིས་མཆོད། ཨོཾ་ཤྲཱི་བཛྲ་ཧེ་རུ་ཀ་ས་པཱ་རི་ཝ་ར་མ་ཧཱ་བ་ལིངྟ་ཁཱ་ཧིས་གཏོར་མ་དང༌། མ་ཧཱ་པཉྩ་ཨ་མྲྀ་ཏ་ཁཱ་ཧིཿ ཞེས་སྨན་དང་མ་ཧཱ་རཀྟ་ཁཱ་ཧིཿ ཞེས་རཀྟ་འབུལ། ཧཱུྃ། མི་གནས་མི་དམིགས་ཆོས་སྐུར་དག་པ་ལསཿ བདུད་འདུལ།ཁྲོ་བོ་མཆོག་གི་སྐུར་སྤྲུལ་པཿ ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལཿ སངས་རྒྱས་ཀུན་དང་མཉམ་པར་སྦྱོར་ལ་བསྟོདཿ ཅེས་བསྟོད། སྤྲོ་ན་ལས་གཞུང་གི་དཀྱུས་ལྟར་མཆོད་བསྟོད་བྱ། དེ་རྗེས་ལས་གཞུང་ལྟ་ཚོགས་ཕུལ་རྗེས། དགང་བླུགས་གསུམ་ཕུལ་ནས། ཧཱུྃ། བྱིན་རླབས་ཀུན་གྱི་རྩ་བ་བླ་མ་ནིཿ དངོས་གྲུབ་སྩོལ་ཕྱིར་དཔལ་ཆེན་རོལ་པའི་ལྷཿ རྣམ་ཐར་སྒོ་གསུམ་ཐུགས་ཀྱི་དཀྱིལ་འཁོར་ནསཿ རང་བཞིན་ཡོངས་གྲུབ་བྱང་ཆུབ་སེམས་ཀྱི་དངོསཿ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལཿ ས་བཅུ་ལམ་ལྔའི་དབང་བཅུ་ཕྱི་ནང་གཉིསཿ རིག་འཛིན་བཞི་དང་སྐུ་ལྔ་ཡེ་ཤེས་ལྔཿ
གྲུབ་ཆེན་བརྒྱད་དང་ཕྲིན་ལས་རྣམ་པ་བཞིཿ འཁོར་བའི་རང་བཞིན་གློ་བུར་སྒྲིབ་པ་གཉིསཿ ཀུན་གཞིའི་ཁམས་ལ་བག་ལ་ཉལ་གྱི་ཚུལཿ ཤིན་ཏུ་རྣམ་དག་རྣམ་ཀུན་མཆོག་ལྡན་གྱིཿ དངོས་གྲུབ་དམ་པ་དེང་འདིར་སྩལ་དུ་གསོལཿ རྩ་སྔགས་མཐར། དྷརྨཱ་ཀཱ་ཡཿ སམྦྷོ་ཀཱ་ཡཿ ནིརྨ་ཀཱ་ཡཿ ཙིཏྟ་སིདྡྷི་ཕ་ལ་ཧཱུྃཿ ཞེས་དངོས་གྲུབ་བླང༌། བཟླས་པ་བྱེད་ན། ལྷ་ཚོགས་རྣམས་ཀྱི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་ཐིམ་པས་མཆོག་ཐུན་གྱི་དངོས་གྲུབ་བདེ་བླག་ཏུ་ཐོབ་པར་གྱུར་པར་བསམས་ལ། རྩ་སྔགས་མཐར། དྷརྨཱ་ཀཱ་ཡཿ སམྦྷོ་ཀཱ་ཡཿ ནིརྨ་ཀཱ་ཡཿ ཙིཏྟ་སིདྡྷི་ཕ་ལ་ཧཱུྃཿ ཅེས་ཅི་རིགས་བཟླ། སླར་ཡང་གཏང་རག་གི་མཆོད་བསྟོད་བགྱིས་ནསཿ མ་འབྱོར་པ་དང་སོགས་ཀྱི་མཐར་ཡི་གེ་བརྒྱ་པས་ནོངས་པ་བཟོད་པར་གསོལ། ཨོཾ། ཁྱེད་ཀྱིས་སེམས་ཅན་སོགས་ཀྱིས་གཤེགས་གསོལ་དང༌། དམ་ཚིག་པ་རང་ལ་བསྟིམ། སླར་ཡང་ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊཿ ཅེས་བླུགས་གཟར་གྱིས་མེ་གསོས་ནས། ཨོཾ་ཨགྣེ་དེ་བ་རྀ་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་རྣམས་ཀྱི་བྱང་ཆུབ་བསྒྲུབ་པ་ལ་བར་དུ་གཅོད་པའི་འགལ་རྐྱེན་མི་མཐུན་པའི་ཕྱོགས་ཐམས་ཅད་ཤིནྟཾ་ཀུ་རུ་སྭཱ་ཧཱས་རྫས་ལྷག་མ་རྣམས་ཕུལ། བཛྲ་ཏམྦུ་ལས་སོ་རྩི་དང༌།
བཛྲ་ཝསྟྲས་མེ་དར་ཕུལ། ཨོཾ་ཨགྣེ་དེ་བ་རྀ་ཥི་ཨརྒྷཾ་སོགས་ཀྱིས་ཉེར་སྤྱོད་དང༌། ཨོཾ་ཨགྣེ་དེ་བ་རྀ་ཥི་མ་ཧཱ་བ་ལིངྟ་ཁཱ་ཧིས་གཏོར་མ། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་དང༌། མ་ཧཱ་རཀྟས་རཀྟ་ཕུལ། མེ་སྟེ་སྲེག་བྱས་བསྟོད། མ་རྙེད་ཡོངས་སུ་མ་ཚང་དང༌། །སོགས་ཀྱིས་བཟོད་པར་གསོལ། བཛྲ་མུཿས་ཡེ་ཤེས་པ་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམ་མོ། །སྤྱི་དོན་གསུམ་པ་རྗེས་ཀྱི་རིམ་པ་མཇུག་བསྡུ་བ་ནི། ལས་བཞི་མཆོག་དང་ལྔ་གང་ཡིན་ཡང་རུང་སྟེ་སྦྱིན་སྲེག་གི་ཆོ་ག་ཟིན་ནས་སྒྲུབ་དཀྱིལ་སོགས་དང་འབྲེལ་ཚེ་སྦྱིན་སྲེག་དེ་གའི་ཐུན་མཇུག་གི་བསྔོ་སྨོན་ཤིས་བརྗོད་དང༌། གློ་བུར་དུ་བྱ་བའི་ཚེ་བདག་བསྐྱེད་ཀྱི་མཇུག་ཆོག་ཀྱང་བྱ། ཞི་རྒྱས་དབང་མཆོག་བཞིའི་མེ་རང་ཞིར་གཞག །དྲག་པོའི་སྦྱིན་སྲེག་ལ་དུག་ཁྲག་གི་ཆུས་ཅིག་ཆར་དུ་གཞིལ། ལས་གཞན་ལའང་ལོང་ཁྱབ་ཀྱིས་མ་ཁོམ་ན། ཞི་བ་དང་མཆོག་ལ་འོ་མ་དང་དྲི་དཀར་པོ། རྒྱས་པར་དྲི་སེར་པོ། དབང་ལ་ཆང་དང་བསྲེས་པའི་ཆུས་གཞིལ་ནས། ཐལ་བ་མཆོག་དང་ཞི་བ་དབང་གསུམ་འབབ་ཆུའམ་རི་མཐོན་པོའི་རྩེར་བསྐྱལ། རྒྱས་པར་མཛོད་དུ་སྦ། དྲག་པོའི་ཐལ་བ་བཞི་མདོར་མནན་ཏེ། ལས་ཀྱི་རྗེས་མི་མངོན་པར་བསྡུའོ། །རྒྱ་གར་ཀ་མ་རུ་པ་དང་ཉེ་བར་རྗེ་བཙུན་བླ་མ་མཆོག་གི་བསྟན་པ་སྤེལ་བའི་ཕྲིན་ལས་སློབ་དཔོན་འཇིགས་མེད་ཀུན་གྲོལ་གྱི་ཞུས་ངོར། རྗེས་སུ་གནང་བའི་ཞལ་ལུང་དང་མི་འགལ་བར་འོད་ཟེར་མིང་ཅན་གྱིས་བཀླག་མར་བཀྲལ་བའོ།། །།