ཐུགས་རྗེ་ཆེན་པོ་སྡུག་བསྔལ་རང་གྲོལ་ལསཿ པྲ་ཁྲིད་དམར་བྱང་གནད་ཡིག
འུྃཿ ཐུགས་རྗེ་ཆེན་པོ་སྡུག་བསྔལ་རང་གྲོལ་ལསཿ པྲ་ཁྲིད་དམར་བྱང་གནད་ཡིག་བཞུགསཿ
སྡུག་བསྔལ་རང་གྲོལ་ལྷ་ལ་འདུདཿ བོད་ཡུལ་ཐུགས་རྗེ་ཆེན་པོ་ཡིསཿ གདུལ་བྱར་གྱུར་པའི་རྟེན་འབྲེལ་ལསཿ སེམས་བསྐྱེད་ལྡན་པས་ཕྲིན་ལས་མཐའཿ གང་བརྩམས་ཐུགས་རྗེ་བྱིན་རླབས་མྱུརཿ དེ་ཕྱིར་པྲ་ཁྲིད་དམར་བྱང་གནདཿ ཆོས་རྒྱལ་ཁྱོད་ལ་བརྩེ་བས་གདམསཿ མང་དུ་སྤེལ་ན་དམ་ཚིག་ཉམསཿ ས་མ་ཡཿ འདི་ལ་སྤྱི་དོན་ལྔ་ཡིན་ཏེཿ སྒྲུབ་རྫས་བླ་རྡོ་སྲོག་འཁོར་དངཿ དཀྱིལ་ཆོག་དམིགས་གནད་ཁ་བསྒྱུར་རོཿ དང་པོ་བསྒྲུབ་རྫས་བསག་པ་ནིཿ ཡར་ངོའི་གཟའ་སྐར་བཟང་པོ་ལཿ མཆོག་སྒྲུབ་རྩ་བའི་མྱོང་གྲོལ་དངཿ ཐུན་མོང་ལས་བཞིའི་ཁ་ཚར་གདབཿ དང་པོ་རྩ་བའི་རྫས་མཆོག་
ནིཿ འབྲས་བུ་གསུམ་དང་གེ་སར་གསུམཿ ཅུ་གང་གི་ཝཾ་སིནྡྷུ་རཿ ཙན་དན་དཀར་པོ་དབང་པོ་ལགཿ བྲག་ཞུན་རུ་རྟ་བཟང་པོ་དྲུགཿ ཅོང་ཞི་སྤང་རྒྱན་དཀར་པོ་དངཿ རྒྱལ་བའི་སྤྱན་ལྡན་ཤུག་པའི་འབྲུཿ སྦྲང་རྩི་ཤིང་མངར་ག་བུར་སྟེངཿ སྐྱེ་བདུན་བྱང་སེམས་དཀར་དམར་དངཿ དམ་རྫས་ཤ་ལྔ་བདུད་རྩི་ལྔཿ བདེ་གཤེགས་རིང་བསྲེལ་ལ་སོགས་པཿ ཁྱད་པར་རྨད་བྱུང་དམ་རྫས་རིགསཿ དངོས་གྲུབ་འགུགས་པའི་ཐབས་ཀྱི་ཚུལཿ གྲོང་པའི་ཆོས་ཀྱིས་མ་གོས་པའིཿ ཟུང་འཇུག་ཁྱེའུ་གཙང་མ་ཡིསཿ རྩི་བཞིན་བཏགས་ལ་རིལ་བུར་དྲིལཿ རང་བྱུང་ལི་ཁྲིའི་ན་བཟའ་གསོལཿ དེ་ཡང་
ཐུན་མོང་རྣམ་པ་བཞིའིཿ ལས་ཚོགས་སྦྲགས་ནས་བྱ་འདོད་ནཿ ཀུན་ལ་སྔ་མའི་རྫས་ཀྱི་སྟེངཿ ཚེ་བསྲིང་ཞི་ལས་སྒྲུབ་པ་ལཿ དཱུརྦ་ཉེ་ཤིང་ར་མཉེ་གསེརཿ ཨུཏྤལ་ངང་པའི་ཀླད་པ་བསྣནཿ དེ་བཞིན་རྒྱས་པའི་ལས་ཚོགས་ལཿ གུ་གུལ་གླ་རྩི་རྨ་བྱའི་མདོངསཿ བྱ་རྒོད་ཀླད་པ་གླང་ཆེན་ཤཿ དཔའ་བོའི་རིགས་ཀྱི་བྱང་ཆུབ་སེམསཿ ཚེ་ཤུག་སེང་ལྡེང་ཁནྜ་སྦྱརཿ སྣང་བ་དབང་སྡུད་སིནྡྷུ་རཿ ཁུག་ཆོས་གླང་སྣ་ཧ་ལོ་མཚལཿ པདྨའི་ཟིལ་པ་ཁབ་ལེན་རྡོཿ ནོར་སྒྲུབ་རིན་ཆེན་སྣ་ལྔ་དངཿ ཤིང་ཏོག་འབྲུ་བཅུད་ལན་ཚྭ་བསྣནཿ ཀུན་ལ་རང་རང་ལས་མདོག་དངཿ མཐུན་པའི་ན་བཟའ་བཀྲག་ཅན་གསོལཿ རཏྣའི་བུམ་པའི་ནང་དུ་སྩལཿ གཉིས་པ་བླ་རྡོ་སྲོག་འཁོར་ནིཿ རྒྱ་ཤོག་གམ་ནི་དར་དམར་ལཿ འཁོར་ལོ་མུ་ཁྱུད་བཞི་བཞིར་བསྐོརཿ དང་པོར་ཚེ་སྤེལ་འཁོར་ལོ་ནིཿ ལྟེ་བར་བུམ་པའི་ཁོང་སེང་དུཿ ཟླ་བའི་གདན་ལ་སྲོག་ཡིག་ཏཱྃཿ མདུན་ནས་བརྩམས་པའི་གཡས་བསྐོར་དུཿ གཙོ་སྔགས་ཡི་གེ་བདུན་པའི་མཐརཿ རང་སྔགས་ཤམ་བུར་འདི་ཉིད་བྲིཿ བདག་འཆང་བ་པོ་ལ་ཚེ་ཉི་ཟླ་དང་མཉམ་པའི་དངོས་གྲུབ་སྩོལ་ཅིགཿསྭཱ་ཧཱཿ ཞེས་དང་དེའི་ཕྱི་པད་འདབ་
བཞིརཿ ཚེ་འཛིན་བརྟན་པའི་གཡུང་དྲུང་བཞིའིཿ གྲྭ་བཞིར་རྒྱས་གདབ་གསང་སྔགས་འདིཿ ཚན་པ་བཞི་རུ་བགོས་ནས་བྲིཿ མ་མ་ཨཱ་ཡུར་ཛྙཱ་ན་ཚེ་བྷཱུྃ་ཧཱུྃཿ ཞེས་དང་དེའི་ཕྱིར་དབྱངས་གསལ་ལཿ རྟེན་འབྲེལ་སྙིང་པོས་མཐའ་བརྟེན་བྱཿ ཕྱི་འཁོར་ནོར་འཛིན་པ་ཏྲའོཿ གཉིས་པ་རྒྱས་བྱེད་འཁོར་ལོ་ནིཿ ལྟེ་བར་ཉི་དཀྱིལ་མཱཾ་གྱི་མཐརཿ གཙོ་སྔགས་རྗེས་སུ་རང་སྲོག་སྔགསཿ ཤམ་བུར་བདག་འཆང་བ་པོའི་བསོད་ནམས་དང་རླུང་རྟའི་དཔལ་བསྐྱེད་དུ་གསོལ་སྭཱ་ཧཱཿ ཞེས་དང་དེའི་ཕྱིར་པད་འདབ་བཞིརཿ རྒྱས་བྱེས་ནོར་བུ་འབར་བའི་ནངཿ ཨཱ་ཡུ་ཛྙཱ་ན་པུཎྱཻ་པུཥྟིཾ་ཀུ་རུ་སྭཱ་ཧཱཿ ཞེས་དང་དེའི་ཕྱིར་སྔ་མར་མཚུངསཿ ཕྱི་འཁོར་བགེགས་འདུལ་མེ་རིས་བསྐོརཿ གསུམ་པ་ཁམས་གསུམ་དབང་བྱེད་ནིཿ ལྟེ་བར་ལྕགས་ཀྱུའི་དབུས་ན་བྃཿ མཐའ་བསྐོར་གཙོ་དང་རང་སྔགས་ཤམཿ ཁམས་གསུམ་སྲིད་པའི་དྭངས་བཅུད་བཀྲག་མདངས་དང་བཅས་པ་ཛཿཧཱུྃ་བཾ་ཧོཿ བརྟན་གཡོའི་དངོས་པོ་ཝཱ་ཤང་ཀུ་རུ་སྭཱ་ཧཱཿ ཞེས་དང་དེའི་ཕྱིར་པད་འདབ་བཞིརཿ པདྨའི་མདའ་གཞུ་བཀང་བའི་ནངཿ མ་མ་ཧྲིཾ་ཧྲིཾ་ཨ་ཏྲི་ནྲི་ཛཿ ཡིད་གཡོས་སེམས་སྒུལ་རང་དབང་མེད་པར་དུང་དུང་ཛཿ ཞེས་དང་ཁྱད་པར་
དམིགས་བྱ་ཡིཿ མིང་སྤེལ་གཞུག་པ་མན་ངག་གོཿ ཞལ་ཤེས་ཡོད། ཕྱི་ལ་དབྱངས་གསལ་རྟེན་སྙིང་འདྲིཿ ཁོར་ཡུག་འོད་ཟེར་ལྕགས་ཀྱུ་ལཿ ཛཿཡིག་མཚན་པའི་དྲྭ་བས་སྦྲེལཿ བཞི་པ་ནོར་སྒྲུབ་ཙཀྲ་ནིཿ ལྟེ་བར་རཏྣའི་ཟ་མ་ཏོགཿ བྷྲཱུྃ་ཡིག་གིས་མཚན་མཐའ་བསྐོར་དུཿ གཙོ་སྔགས་རང་སྔགས་སྦྲེལ་བའི་ཤམཿ བདག་འཆང་བ་པོ་ལ་འཇིག་རྟེན་སྲིད་པའི་ལོངས་སྤྱོད་འདོད་ཡོན་མི་ཟད་པའི་གཏེར་གྱི་དངོས་གྲུབ་སྩལ་དུ་གསོལཿ སྭཱ་ཧཱཿ ཞེས་དང་པད་འདབ་རྣམ་པ་བཞིརཿ རཏྣའི་གཏེར་བུམ་ལུད་པའི་ཚུལཿ དེ་ཡི་ལྟོ་བར་སྔགས་འདི་བྲིསཿ མ་ཎི་རཏྣའི་སརྦ་སིདྡྷི་ཧཱུྃ་ཧཱུྃ་སྭཱ་ཧཱཿ ཞེས་དང་དེའི་ཕྱི་སྤྱི་དང་འགྲེཿ ཁོར་ཡུག་ནོར་འཛིན་པ་ཏྲས་བསྐོརཿ ཀུན་ལ་རང་རང་གསང་བའི་རྫསཿ ཞལ་ཤེས་གནད་དང་ལྡན་པར་བྱུགཿ སོ་སོའི་དབུས་ཀྱི་བླ་རྡོ་ནིཿ ཚེ་འཁོར་གཡུ་བྱང་མིག་མེད་ལཿ འོད་ཟེར་ཅན་ལ་ས་སྙིང་སྦྲམཿ དབང་མོར་རྒྱལ་མོ་ལག་གཡས་སམཿ མ་གྲུབ་བྱུ་རུ་ནོར་མིག་ཅནཿ ནོར་རྒྱུན་མ་རྒད་བཻ་ཌཱུརྱཿ ཀུན་ལ་རང་བྱུང་ཤེལ་དཀར་པོཿ གས་གྲུམ་མེད་པའི་ཟུར་ལྡན་བཅསཿ དྲིལ་ཏེ་ཟ་འོག་ན་བཟའ་གསོལཿ དར་སྣ་ལྔ་ཡིས་རྒྱ་ཆིངས་གདབཿ རིན་པོ་ཆེ་ཡི་གའུའམཿ ཙན་དན་
སེང་ལྡེང་སྒྲོམ་བུར་བཅུགཿ མི་ལག་མི་གཏད་གྲིབ་ལ་གཟབཿ སྒྲུབ་དུས་རང་རང་བུམ་སྟེང་འགོདཿ རིགས་དང་མཐུན་པའི་དར་གྱིས་དགབཿ གཙོ་བུམ་མཐོང་གྲོལ་ཙཀྲས་གཡོགཿ དར་སྣ་ལྔ་ཡི་ན་བཟས་བཀླུབསཿ མྱོང་གྲོལ་རྐྱང་པར་བསྒྲུབ་པ་ལཿ རྫས་གཞན་དམིགས་ཀྱིས་མ་བསལ་ལསཿ རྒྱས་བསྡུས་བྱེ་བྲག་ཕྱེད་པར་བྱཿ སྒྲུབ་རྫས་བླ་རྡོ་སྲོག་འཁོར་གྱིཿ མན་ངག་གུད་དུ་སྦས་པའོཿ གསུམ་པ་དཀྱིལ་འཁོར་བཅའ་གཞི་ནིཿ ས་ཡི་ཆོ་ག་ནས་བཟུང་སྟེཿ སྒྲུབ་པ་ཆེན་པོའི་ཁོག་དབུབ་བམཿ སྤྲོས་པ་དམན་པས་ཕྱི་ནང་གིཿ མཚམས་གཅོད་ཙམ་དང་གཞི་བདག་ལཿ དཀར་གཏོར་སྦྱིན་ལ་བདེན་པ་བདརཿ ཆོས་ཉིད་བསམ་གྱིས་མི་ཁྱབ་པའིཿ ཏིང་འཛིན་བདེན་པས་དཀྱིལ་འཁོར་བཞེངསཿ སྟེགས་བུ་མདའ་གང་གྲུ་བཞི་པའིཿ ངོས་ལ་ཆང་དང་སིནྡྷུ་རཿ བ་བྱུང་ལྔ་ཡིས་ཆག་ཆག་གདབཿ ཕོ་བྲང་པདྨ་འདབ་བཞི་ལཿ སྒོ་ཁྱམས་རྟ་བབས་མུ་ཁྱུད་དངཿ པད་རྡོར་མེ་རི་ལ་སོགས་པཿ སྤྱི་མཐུན་བྲིས་པའི་སྟེང་ཉིད་དུཿ ལྡིང་ཁྲིའི་སྟེང་དུ་རང་རང་བུམཿ ལྷ་གནས་མ་འཆོལ་ཚུལ་བཞིན་བཤམསཿ སྟེང་ནས་དར་གྱི་ལྡིང་གུར་ཕུབཿ ཕྱི་ནང་གསང་བའི་མཆོད་པས་བསྐོརཿ གནས་
ཁང་རྒྱན་གྱིས་མཛེས་པར་བྱསཿ བགེགས་བསྐྲད་གུ་གུལ་དུད་པས་བདུགཿ བདེ་བའི་སྟན་ལ་བག་ཕོབ་ལཿ ལས་ཀྱི་གཞུང་བསྲང་དེ་ཡང་ནིཿ རྩ་བསྙེན་བྱེ་བ་མ་ཐོན་པརཿ བདག་དང་དཀྱིལ་འཁོར་སྒྲུབ་རྟེན་གསུམཿ དབྱེར་མེད་གཅིག་ཏུ་གསལ་བཏབ་སྟེཿ བསྒོམས་པས་སྒྲུབ་པའི་དྲོད་རྟགས་མྱུརཿ བཞི་པ་སྒྲུབ་པའི་དམིགས་གནད་ནིཿ བདག་མདུན་ཐ་དད་འཛབ་ཁང་དབྱེཿ བུམ་པ་ལྷ་ཡི་གཞལ་མེད་ལཿ རིལ་བུ་ལྷ་ཡི་ཕྱག་རྒྱར་གསལཿ འགྲོ་ཀུན་འཕགས་པའི་གོ་འཕང་ལཿ འགོད་འདོད་བཅོས་མིན་བྱང་ཆུབ་སེམསཿ དཔའ་བར་འགྲོ་བའི་ཏིང་འཛིན་གྱིསཿ བདག་བསྐྱེད་ཐུགས་ལས་འོད་ཟེར་དཀརཿ བ་ཐག་འཛིངས་པ་ལྟ་བུར་འཕྲོསཿ མདུན་བསྐྱེད་ལྷ་ཚོགས་ཐུགས་ཀར་ཕོགཿ བྱང་ཆུབ་སེམས་ཀྱི་ཐུགས་རྒྱུད་བསྐུལཿ ཀུན་ཀྱང་ཡི་གེ་དྲུག་མའི་སྒྲཿ བུང་བའི་ཚང་ལྟར་སྒྲོགས་པ་ལཿ འོད་ཟེར་དྲ་བས་སྟོང་གསུམ་ཁེངསཿ སྲིད་རྩེ་མནར་མེད་ཡན་ཆད་ཀྱིཿ རང་རང་ལས་དང་སྡུག་བསྔལ་ཀུནཿ ཉི་མས་བ་མོ་ཞུ་བཞིན་སྦྱངསཿ སྣོད་བཅུད་འབྱུང་ལྔའི་དུག་གཞིལ་ཏེཿ སྣོད་ཀྱི་འཇིག་རྟེན་གཞལ་མེད་ཁངཿ བཅུད་ཀྱི་སེམས་ཅན་སྲིན་བུ་ཡནཿ འཔགས་པའི་སྐུ་རུ་དཀྲོང་གིས་གྱུརཿ སྒྲར་གྲགས་ཡི་གེ་དྲུག་མའི་གདངསཿ དྲན་
རྟོགས་འོད་གསལ་བྱང་ཆུབ་སེམསཿ འཁོར་འདས་མཉམ་པ་ཉིད་ཀྱི་ཀློངཿ གསལ་འགྲིབ་མེད་པའི་ངང་ནས་བཟླཿ སྐྱོ་ན་དབྱངས་ཀྱི་རྟ་ལ་བསྐྱོནཿ བྱིང་རྒོད་གཉིད་དང་ལེ་ལོ་སོགསཿ ཏིང་འཛིན་གེགས་དང་མ་འདྲེས་པརཿ རིག་པ་གཟེངས་བསྟོད་ཐུན་བཞིར་འབདཿ དར་དྲག་ཡུན་ཐུང་སྒྲུབ་པའི་གནདཿ བདུན་ཕྲག་གཅིག་གིས་དངོས་གྲུབ་ཐོབཿ དེ་ཚེ་སྒོ་གསུམ་སྒྲིབ་དག་རྟགསཿ ཁྲུས་བྱས་གོས་གསར་དྲི་མེད་གྱོནཿ གྱེན་འཛེགས་གངས་ཀྱི་རི་བོ་མཐོངཿ ལུས་ལས་རྣག་ཁྲག་མི་གཙང་འབབསཿ ནམ་ལངས་ཉི་ཟླ་ཤར་བ་དངཿ ཁྱེའུ་དཀར་པོ་དར་གོས་ཅནཿ མཐོང་ཞིང་དུས་གསུམ་ལུང་སྟོན་དངཿ གྲེ་ལྕེ་བདེ་ཞིང་རིག་པ་དྭངསཿ སྒྲུབ་ཁང་འོད་ཀྱིས་ཁེངས་པ་དངཿ རིལ་བུ་རླངས་འཐུལ་དྲི་ཞིམ་སྣོམཿ བག་དྲོ་ཉམས་དགའ་ཏིང་འཛིན་གསལཿ དེ་སོགས་རྣམ་པ་ཅིར་བྱུང་ཡངཿ སྤྲོ་བ་མི་བསྐྱེད་བཟང་ངན་ཀུནཿ ཆོས་ཉིད་མཉམ་པ་ཉིད་དུ་བརྡལཿ རང་སྣང་འགྱུར་ཚེ་གཞན་སྣང་འགྱུརཿ ཀུན་ལ་བྱམས་དང་སྙིང་རྗེ་སྐྱེཿ འཇིག་རྟེན་འདི་ཡི་འཁྲི་བ་ཆོདཿ སྣང་བ་བན་བུན་ཆད་ཆོད་འགྲོཿ གཟའ་གཏད་མེད་པའི་རྟོགས་པ་འཆརཿ བྱང་ཆུབ་སེམས་ཀྱི་ནུས་སྨིན་པསཿ གཞན་ཕན་རྩོལ་བ་
མེད་པར་འབྱུངཿ དེ་ལྟར་རྟགས་ཀྱི་རིམ་པ་ནིཿ བསྙེན་སྒྲུབ་ལས་སྦྱོར་ཀུན་ལ་འབྱུངཿ རང་གི་ཉམས་དང་སྦྱར་ཏེ་དཔྱདཿ མཆོག་སྒྲུབ་རྩ་བའི་སྒྲུབ་པའོཿ ཁྱད་པར་ལས་ལ་སྦྱར་འདོད་ནཿ ཚེ་སྤེལ་ཞི་བའི་ལས་ཚོགས་ཏེཿ རྗེ་བཙུན་སྒྲོལ་མ་སྐུ་མདོག་དཀརཿ ཕྱག་གཡས་མཆོག་སྦྱིན་ཨུཏྤལ་འཛིནཿ གཡོན་པས་མཉམ་གཞག་ཚེ་བུམ་ཅནཿ ཞབས་གཉིས་སེམས་དཔའི་སྐྱིལ་ཀྲུང་བཞུགསཿ གསལ་བརྟན་འོད་ཟེར་འབར་བ་ཡིསཿ ཐུགས་དམ་རྒྱུད་བསྐུལ་འོད་ཟེར་འཕྲོསཿ བདེ་གཤེགས་ཀུན་གྱི་དྭངས་མའི་སྲོགཿ བརྟན་གཡོའི་ཚེ་བཅུད་འགུགས་པ་སོགསཿ རྩ་བའི་གཞུང་ལྟར་ཤེས་པར་བྱཿ རྒྱས་ཁྱེད་འོད་ཟེར་ཅན་མ་ནིཿ ཞལ་གཅིག་ཕྱག་གཉིས་སྐུ་མདོག་སེརཿ ཞབས་གཉིས་དོར་སྟབས་ གཡོན་བསྐུམས་གཡས་བཏུད་ཟུར་ཞལ་གྱེན་ལ་གཟིགས། ཞི་མ་ཁྲོཿ ཕྱག་གཡས་རཏྣའི་ནོར་བུ་དངཿགཡོན་པ་ཉི་ཟླའི་ཞགས་པ་གདེངསཿ དར་དང་རིན་ཆེན་རྒྱན་གྱིས་མཛེསཿ འཕྲོ་འདུའི་དམིགས་པ་གཞུང་ལྟར་ལཿ ཁྱད་པར་ཞགས་པ་གཡུགས་པ་ཡིསཿ ལོག་འདྲེན་དབང་བསྡུས་ཉི་ཟླ་གཉིསཿ ཆ་ལང་བརྡབས་པའི་བར་དུ་འཚིརཿ དེ་ཡི་བཀྲག་མདངས་ཚེའི་ལྷག་མཿ བརྟན་གཡོའི་གཟི་བྱིན་
སྟོབས་དཔལ་ཀུནཿ བདག་ཐིམ་གཟི་བྱིན་འབར་བར་དམིགསཿ དབང་མཛད་ཀུ་རུ་ཀུལླེ་ནིཿ ཞལ་གཅིག་ཕྱག་བཞི་བརྐྱང་བསྐུམས་ཞབསཿ རྩ་ཕྱག་པདྨའི་མདའ་གཞུ་བཀངཿ ལྷག་མ་རྣམ་གཉིས་ལྕགས་ཀྱུ་ཞགསཿ སྟག་ཤམ་རུས་རྒྱན་པད་ཕྲེང་ལྡནཿ འཕྲོ་འདུའི་དམིགས་པ་གཞུང་ལྟར་ལཿ ཁྱད་པར་མཁའ་འགྲོ་ཆོམ་རྐུན་མའིཿ གནད་ཀྱི་མན་ངག་འདི་ལྟ་སྟེཿ བདག་བདུན་གཙོ་ལས་འོད་འཕྲོས་པསཿ དབང་མོའི་ཐུགས་ཀར་ཕོག་པའི་མོདཿ ཟག་མེད་བདེ་བ་ཆེན་པོའི་ཉམསཿ དཔག་ཏུ་མེད་པ་འབར་ན་ལསཿ ཐུགས་དམ་རྒྱུད་བསྐུལ་དེའི་ཐུགས་ནསཿ མཁའ་འགྲོ་ཡིད་ཀྱི་ཆོམ་རྐུན་མཿ དམར་གསལ་བཀྲག་དང་ལྡན་པ་ལཿ ཧྲཱིཾཿསྒྲ་སྒྲོག་པ་ཏལ་གྱིས་འཐོནཿ པད་མདའ་འོད་ཀྱི་སྦུ་གུ་ཅནཿ དེ་ཡི་ནང་ཞུགས་ཤར་གྱིས་ཐོནཿ ཕོ་ཡི་སྤྱི་བོ་མོའི་གསང་གནསཿ ལམ་བརྒྱུད་སྙིང་གི་དབུས་སུ་ཞུགསཿབཀྲག་མདངས་བཅུད་ལ་འཇིབས་པ་ཡིསཿ འདོད་པ་གཡོས་ཤིང་བརྟན་པ་ཕྲོགཿ ཤོག་སྐྱ་རླུང་གིས་བཏེགས་པ་བཞིནཿ རང་དབང་བྲལ་ཏེ་འདུད་པར་བསམཿ མཁའ་འགྲོ་ཚུར་འདུས་འོད་དུ་ཞུཿ རང་ལ་བསྟིམ་སྟེ་སྟོང་ཉིད་
སྒོམཿ དེ་ལྟར་ཡང་ཡང་འབད་པ་ཡིསཿ འཁོར་ལོས་སྒྱུར་རྒྱལ་ཡིན་ཡང་འདུཿ ཕ་རོལ་བརྟན་པ་བྲལ་གྱུར་ནཿ ཞི་རྒྱས་གཉིས་ཀྱི་རིལ་བུས་གསོཿ རང་དབང་གྱུར་ནས་ཆོས་ལ་འགོདཿ རང་གར་སྤྱད་ན་རྣམ་སྨིན་ཆེཿ འབྲེལ་ཚད་དོན་དང་ལྡན་པར་བྱཿ ནོར་སྒྲུབ་མན་ངག་འདི་ལྟ་སྟེཿ འདོད་པ་འཇོ་བའི་གཏེར་བུམ་སྟེངཿ འཕགས་མ་ནོར་རྒྱུན་ལྷ་མོ་ནིཿ ཞལ་གཅིག་ཕྱག་གཉིས་མཉམ་སྟབས་བཞེངསཿ དར་དང་རིན་ཆེན་རྒྱན་ཕྲེང་མཛེསཿ ཕྱག་གཡས་ཡིད་བཞིན་ནོར་བུ་དངཿ གཡོན་པ་དགོས་འབྱུང་ནེའུ་ལེ་འཛིནཿ ལྗང་གསལ་སེམས་མའི་ཆ་བྱད་ཅནཿ འོད་ཟེར་སྤྲོ་བསྡུ་གཞུང་ལྟར་ལཿ ཟས་ནོར་ཆར་དུ་བབ་པར་སྒོམཿ དེ་རྣམས་ཀུན་གྱི་དམ་ཚིག་ཏུཿ དཀོན་མཆོག་མཆོད་དང་སྲོག་བསླུ་འདོནཿ མཆོད་རྟེན་གསོ་ཞིང་མཎྜལ་འབུལཿ ལན་ལ་མི་རེའི་སྦྱིན་གཏོང་སོགསཿ རྣམ་དཀར་དགེ་བའི་ལས་ལ་འབདཿ ཁྱད་པར་སྙིང་རྗེ་ཆེན་པོའི་བློསཿ གཞན་དོན་སྒྲུབ་པའི་བློ་མེད་ནཿ བསྒྲུབས་ཀྱང་ནུས་པ་མི་འབྱིན་ཏེཿ ཕྲ་མེན་དབང་ཕྱུག་རིག་སྔགས་ལྟརཿ རྫས་སྔགས་རྟེན་འབྲེལ་ཙམ་གྱི་མཐུསཿ གནས་སྐབས་དོན་འགྲུབ་འདི་མ་ཡིནཿ དགོས་འབྲེལ་ལྡན་པའི་བརྟུལ་ཞུགས་ཀྱིསཿ དོན་གཉིས་ལྷུན་གྲུབ་ལ་
སྤྱོད་པཿ སངས་རྒྱས་པ་ཡི་ཁྱད་ཆོས་ཕྱིརཿ བྱང་ཆུབ་སེམས་དང་འབྲལ་མི་བྱཿ ལྔ་པ་ལས་ཀྱི་མཐའ་སྒྱུར་ནིཿ གང་གི་ཚེ་ཡང་རྟགས་བྱུང་ནསཿ དངོས་གྲུབ་བླང་ཞིང་གཏང་རག་འབུལཿ ལྷ་རྣམས་ཡེ་ཤེས་སྙིང་གར་བསྡུཿ དམ་ཚིག་རིལ་བུ་དག་ལ་བསྟིམཿ ལས་གང་སྒྲུབ་པའི་མཐུ་ལྡན་བསམཿ རིལ་བུ་མི་ལག་མི་བརྒྱུད་ཅིངཿ དེ་ཡང་མཆོག་སྒྲུབ་མྱོང་གྲོལ་རྫསཿ འགྲོ་བ་ཀུན་ལ་སྙོམས་པར་སྦྱིནཿ ཡུལ་གྱི་ཆུ་མགོ་དག་ཏུའང་སྦཿ ཟོས་ཚད་འཕགས་པའི་ཐུགས་རྗེ་ཡིསཿ རྗེས་བཟུང་ལས་ངན་སྲབ་ནས་ཀྱངཿ ཞིང་མཆོག་པོ་ཏ་ལ་རུ་སྐྱེཿ ཁ་སྐོང་ཞི་བའི་སྦྱིན་སྲེག་བྱཿ སྨན་གཏོར་རཀྟ་རྫས་སུ་འབུལཿ ཁྱད་པར་དབང་གི་མཐའ་སྡུད་ལཿ རྟ་མགྲིན་འདུས་པའི་དཀྱིལ་འཁོར་དུཿ མན་ངག་གནད་དང་ལྡན་པ་ཡིཿ བསྲེག་རྫས་རིལ་བུ་གཙོར་གྱུར་གྱིཿ དབང་གི་སྦྱིན་སྲེག་མྱུར་བར་བྱཿ ཐལ་སོལ་རི་རྩེར་རླུང་ལ་བསྐུརཿ ལས་ཚོགས་རིལ་བུ་ཁུག་མར་བླུགསཿ ཀུན་ལ་མི་སྟོན་མ་ཉམས་བྱཿ དེ་ཡང་ཐོ་རེངས་ཚེའི་རིལ་བུཿ འབྲུ་གསུམ་སྔགས་ཀྱིས་བདུད་རྩིར་རློབཿ རང་ཉིད་ཚེ་ལྷའི་ཏིང་འཛིན་དངཿ གསུམ་མམ་ལྔ་སོགས་རྟག་པར་བསྟེནཿ དེ་བཞིན་རྒྱས་པ་ཉིན་གུང་དངཿ དབང་ལ་དམིགས་པའི་ཁ་སྒྱུར་ཅིངཿ སྔགས་ཀྱི་ངར་བཏགས་དགོངས་ཁའི་དུསཿ
རང་ཉིད་ཞལ་ཤེས་ཡོད། བཟའ་ཞིང་གཞན་ལ་བྱིནཿ དེ་ཉིད་ངེས་པར་དབང་དུ་འགྱུརཿ ནོར་སྒྲུབ་རཏྣའི་བུམ་པར་སྩལཿ མཛོད་ཕུགས་གཞུག་ཅིང་ས་བཅུད་གསོཿ བུམ་གཏེར་རྫས་ལ་ཁྱད་པར་འཕགསཿ ཡང་ན་རང་གིས་ཟོས་ཀྱང་རུངཿ བཅུད་ལེན་ཀུན་གྱི་མཆོག་ཏུ་འགྱུརཿ སྒྲུབ་པའི་རྗེས་ཀྱི་བྱ་བ་རྣམསཿ སྤྱི་དང་མཐུན་པ་ཉིད་དུ་སྤྱདཿ ས་མ་ཡཿ པྲ་ཁྲིད་སྙིང་གི་དུམ་བུ་འདིཿ མ་འོངས་གདུལ་དཀའི་འགྲོ་བ་རྣམསཿ ཐབས་མཁས་ཐུགས་རྗེའི་རྩལ་ཤུགས་ཀྱིསཿ འདུལ་ཕྱིར་སྣང་ཆའི་ཤོག་སེར་ལཿ ཡེ་ཤེས་མཁའ་འགྲོས་བརྡར་བཀོད་དེཿ འགྱུར་མེད་འོད་གསལ་སྒྲོམ་བུར་སྩལཿ ནམ་ཞིག་འགྲོ་དོན་དུས་བབས་ཚེཿ ཚེ་ཡི་ཐུགས་བསྐྱེད་སྨོན་ལམ་མཐུསཿ རྒྱལ་སྲས་ཚངས་པའི་མེ་ཏོག་ལཿ རང་བྱུང་ཌཱཀྐིས་བརྡ་བཀྲོལ་ཏེཿ འབྲེལ་ཚད་དོན་དང་ལྡན་པར་ཤོགཿ སྐུའི་རྒྱཿ གསུང་གི་རྒྱཿ ཐུགས་ཀྱི་རྒྱཿ སྦས་རྒྱཿ གསང་རྒྱཿ དྷ་ཐིམཿ