cover

རིག་འཛིན་འཇིགས་མེད་གླིང་པའི་གསུང་འབུམ།

ཨ་འཛོམ་པར་མ་གླེགས་བམ། ན༽

རིག་འཛིན་འཇིགས་མེད་གླིང་པ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ཐུག་རྗེ་ཆེ་ཞུ།

༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། གྲུབ་དབང་རྫོགས་ཆེན་པའི་བསྟན་པ་ལ་ལྷག་བློ་མཆོག་ཏུ་དཀར་བ་ཉག་རོང་བླ་མ་ཀུན་བཟང་རིག་འཛིན་མཆོག་གིས་རིག་འཛིན་འཇིགས་མེད་གླིང་པའི་གསུང་འབུམ་ཆ་ཚང་ཞུ་དག་ཟིན་པ་ཞིག་འདིར་གནང་འབྱོར་བྱུང་བ་ལགས་ན། སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་། ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། གཞན་ཡང་གཞི་རྒྱ་ཆེ་བའི་ལས་རིམ་འདིའི་ཐོག་ཏུ་དངོས་སུ་ཕྱག་རོགས་པ་ཚོང་དཔོན་པདྨ་དོན་ཡོད་ལགས་དང་། ཕྱི་གླིང་པ་ Gerry Wiener གྷེ་རེའི་ཝི་ནེར། Jeff Furlong རྗེཕུ༹་ལཱོང་རྣམ་པ་གསུམ་ནས་བརྩོན་པ་ཐང་ལྷོད་མེད་པ་གནང་བ་དང་། གཞན་ཡང་ལས་གཞི་འདིའི་ཐོག་དངོས་དང་བརྒྱུད་ནས་ཐུགས་ཁུར་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་དང་བཀའ་དྲིན་ཆེ་ཞུ།

ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།།

ཀློང་ཆེན་སྙིང་གི་ཐིག་ལེ་ལསཿ བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར།


JLAZ012_Page_0001
[མ་དཔེ་གཟིགས་ན་འདིར་གནོན།]

འུྃཿ ཀློང་ཆེན་སྙིང་གི་ཐིག་ལེ་ལསཿ བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར་བུ་བཞུགསཿ


JLAZ012_Page_0002
[མ་དཔེ་གཟིགས་ན་འདིར་གནོན།]

ཀུན་བཟང་གདོད་མའི་ཀློང་ལ་ཕྱག་འཚལ་ལོཿ མ་འོངས་དུས་ཀྱི་སེམས་ཅན་རྣམསཿ ཚེ་ཐུང་བསོད་ནམས་ལོངས་སྤྱོད་དབུལཿ སྒྲུབ་པའི་ལོང་མེད་སྙིང་རུས་ཆུངཿ དེ་ཚེ་སྐུ་གསུམ་བཞུགས་སྟངས་ལཿ བརྟེན་ནས་འོད་གསལ་རྫོགས་ཆེན་དོནཿ རྩོལ་མེད་ལྟ་བའི་ལོང་མེད་ནཿ གནད་ལ་བརྟེན་པའི་ཐབས་ཀྱི་ལམཿ རླུང་སེམས་དབྱེར་མེད་ངེས་པའི་གནདཿ བདུན་ཕྲག་གསུམ་གྱིས་འཁོར་བ་ལཿ མི་ལྡོག་ལམ་རྟགས་ཡོན་ཏན་ཀུནཿ མངོན་གྱུར་སྙན་བརྒྱུད་ཟབ་མོའི་ཆོསཿ རྡོ་རྗེ་སེམས་དཔའི་གསང་ལས་ཆེཿ འདི་ལས་གཞན་དུ་ངས་མ་བཤདཿ བདེན་རྫུན་ལག་ཏུ་ལོང་ལ་ལྟོསཿ གཅིག་ལས་གཉིས་སུ་


JLAZ012_Page_0003
[མ་དཔེ་གཟིགས་ན་འདིར་གནོན།]

སྤེལ་བས་ནཿ དམ་ཚིག་ཉམས་པས་དམྱལ་བར་ལྟུངཿ ཁྱད་པར་ཁ་མཁས་ཁོང་གནག་ཅིངཿ གཡོ་སྒྱུས་བླ་མའི་ངོ་སྲུང་བའིཿ དྲེད་པོ་ཆོས་ཀྱི་རྒྱུས་ཅན་ལཿ གདམས་པ་འདི་ནི་ཆུང་ཕྱོགས་ཙམཿ བསྟན་ཀྱང་སྲོག་གི་གཤེད་མར་བྱེདཿ དེ་ཕྱིར་སྙིང་ལས་གཅེས་པར་ཟུངཿ ས་མ་ཡཿ དང་པོ་མལ་ནས་ཧར་ལངས་ཏེཿ ལྟོ་ལྟོང་རླུང་རིག་དྭངས་པའི་ཚེཿ སྔོན་འགྲོ་སྤྱི་དང་ཁྱད་པར་དུཿ བླ་མའི་རྣལ་འབྱོར་གནད་དུ་བསྣུནཿ མོས་གུས་གདུང་ཞིང་དབང་བཞི་བླངཿ དངོས་གཞི་ལུས་གནད་དྲང་པོར་བསྲངཿ རང་ཉིད་རིག་འཛིན་རྡོ་རྗེ་ཆོསཿ སྔོ་སྐྱ་ཞལ་གཅིག་ཕྱག་གཉིས་པཿ བརྐྱང་བསྐུམ་འདོར་སྟབས་ཞི་མ་ཁྲོཿ རྣལ་


JLAZ012_Page_0004
[མ་དཔེ་གཟིགས་ན་འདིར་གནོན།]

འབྱོར་དམར་མོ་གྲི་ཐོད་ཅནཿ དང་འཁྲིལ་རྡོར་དྲིལ་བསྣོལ་ཐབས་སྦྱོརཿ ཡབ་ཡུམ་གཉིས་སུ་མེད་པ་ཡིཿ སྐུ་དབུས་དྲང་པོར་རྩ་དབུ་མཿ མཚན་ཉིད་བཞི་ལྡན་ཆོས་ཀྱི་སྐུཿ གཡས་གཡོན་རོ་རྐྱང་ལོངས་སྤྲུལ་གཉིསཿ ལྟེ་འོག་དབུ་མའི་མར་སྣ་ལཿ རོ་རྐྱང་རྣམ་གཉིས་ཆུད་པ་ཡིཿ ཡར་སྣ་ལྟག་པ་ནས་གུག་སྟེཿ སྣ་བུག་གཉིས་སུ་ཧ་རེ་ཟུགཿ དབུ་མའི་ཡར་སྣ་འཁྱིལཿ རོ་རྐྱང་གཉིས་ནས་ལས་ཀྱི་རླུངཿ གཡས་གཡོན་རེས་མོས་བདུན་བདུན་འབུདཿ ཉོན་མོངས་ལྔ་དང་འབྱུང་བ་ལྔརཿ བརྟེན་པའི་རླུང་དུག་སངས་ཀྱིས་ཐོནཿ རྩ་སྦུབས་སྐྱོན་དང་བྲལ་བར་བསམཿ དེ་ནས་ཧ་ཞེས་དབུགས་བཏང་ལཿ ངལ་བསོ་ཤེས་པ་རྣལ་དུ་ཕབཿ ༼བྲཾ༽ དེ་ནས་སྙིང་གུར་སྨུག་པོའི་དབུསཿ ཀུན་བཟང་མཐིང་ག་མཉམ་བཞག་ཅནཿ ཆེ་ཆུང་སྲན་མ་ཙམ་པ་ལཿ སྐྱེ་མཆེད་ཤིན་ཏུ་དྭངས་པར་གསལཿ དེ་ཡི་ཐུགས་ཀར་འོད་ལྔའི་ཐིགཿ ཟླུམ་པོར་འཁྱིལ་བའི་ནང་ཁོངས་སུཿ དྭངས་གསལ་སྐྱེ་མེད་སྲོག་གི་ ཨཾཿ གསལ་འཚེར་སྐུ་ཡིས་བྲིས་ལྟར་གསལཿ དེ་ནས་སྦྱོར་བ་བཞི་ལྡན་གྱིསཿ གནད་དང་ལྡན་པས་རླུང་རྔུབས་ལཿ རོ་རྐྱང་ལམ་བརྒྱུད་སྙིང་དབུས་བསྐྱལཿ རླ་ཁརཱུཌྷྱ་ཅུང་ཟདདྷཱི།ཾབྱས་ཏེཿ རླུང་ཡིག་རིག་པ་གཅིག་ཏུ་དྲིལཿ ཞལ་ཤེས་གནད་དང་ལྡན་པ་ཡིསཿ


JLAZ012_Page_0005
[མ་དཔེ་གཟིགས་ན་འདིར་གནོན།]

རླུང་ཁུག་རྒྱའམ་བདུན་ཅུ་ཐམཿ སུམ་ཅུ་ལ་སོགས་ཐུན་རེར་འབདཿ མན་ངག་གནད་དང་མི་ལྡན་ནཿ སྲོག་རྩར་ལས་ཀྱི་རླུང་ཞུགས་ནསཿ སྨྱོ་བའི་ཉེན་ཡོད་ཁེ་ཉེན་ཆེཿ གནད་དུ་སོང་ན་སྲོག་ཐུར་གྱིཿ རླུང་གཉིས་གཅིག་ཏུ་འདྲེས་གྱུར་ནསཿ དབུ་མར་ཞུགས་གནས་ཐིམ་གསུམ་གྱིཿ རང་རྩལ་རྫོགས་པའི་རྟེན་འབྲེལ་ལསཿ བུམ་ཅན་རིལ་པ་ཞབས་ཚགས་ཅནཿ མངོན་དུ་སྣང་ཞིང་འོག་རླུང་ལཿ བཤང་བའི་དྲི་མ་མི་འབྱུང་ཞིངཿ དྲི་ཆུ་ཆུ་གཙང་ལྟར་འབབ་སོགསཿ ཐུན་མོང་ཡོན་ཏན་བསམ་ལས་འདསཿ ཁྱད་པར་ལྟེ་བའི་རྩ་མདུད་གྲོལཿ དང་པོའི་ས་ཡི་རྟོགས་པ་འཆརཿ མངོན་སུམ་སྣང་བ་ལྷུག་པར་མཐོངཿ འདི་ལ་ཐེ་ཚོམ་འགའ་ཡང་མེདཿ ས་མ་ཡཿ འདི་ནི་རྫོགས་རིམ་ཀུན་ཀྱི་བཅུདཿ དབུ་མར་ཡེ་ཤེས་རླུང་ཟིན་པསཿ གཏུམ་མོའི་ནང་ནས་ཡང་རྩེ་ཡིནཿ སེམས་ཉིད་ཆོས་སྐུར་གནས་དག་པསཿ འོད་གསལ་ཀུན་གྱི་རྒྱལ་པོར་འགྱུརཿ སྣང་བའི་རྫུན་ཕུགས་རྡིབ་པ་ཡིསཿ སྒྱུ་མ་མ་བཅོས་རང་ལ་ཤརཿ གང་ཤར་རྣམ་རྟོག་མ་ཡན་པཿ རྨི་ལམ་ཀླུངས་ཚུད་སྤྲུལ་བསྒྱུར་ནུསཿ ཐ་མལ་རྣམ་རྟོག་ཡེ་ཤེས་སུཿ འཕོས་པས་འཕོ་བའི་ཡང་རྩེ་ལཿ སྒོ་གསུམ་རྡོ་རྗེ་གསུམ་ལྡན་གྱིཿ གྲོང་དུ་འཇུག་པས་གྲོང་འཇུག་མཆོགཿ གསང་སྔགས་


JLAZ012_Page_0006
[མ་དཔེ་གཟིགས་ན་འདིར་གནོན།]

ཀུན་ཀྱི་འབྲས་བུ་ཡིནཿ ས་མ་ཡཿ བདེ་སྟོང་རླུང་གི་རྫོགས་རིམ་ལསཿ འབར་འཛག་དྲོད་ཀྱི་རྣལ་འབྱོར་ནིཿ རྩ་གསུམ་སྔ་མ་ཇི་བཞིན་ལཿ དབུ་མའི་ཡར་སྣར་ཧེ་རུ་ཀཿ དཀར་ཆ་ཧཾ་ཡིག་རང་བཞིན་ལཿ མར་སྣར་དམར་ཆ་གནམ་ཞལ་ལཿ ཨ་ཤད་འོད་ཀྱི་རྣམ་པར་གསལཿ རོ་རྐྱང་གཉིས་ནས་རླུང་རྔུབས་ཏེཿ ལྟེ་བའི་གནམ་ཞལ་སྦར་བ་ལསཿ ཤེས་རབ་ཡེ་ཤེས་ལྷབ་ཀྱིས་འབརཿ དེ་ཡང་ངོ་བོ་བདེ་བ་ལཿ རང་བཞིན་གསལ་ཞིང་རྣམ་པ་ཚཿ རྩེ་མོ་རྣོ་ལ་འཁྱུག་པ་ཡིསཿ ལྟེ་བའི་རྩ་འཁོར་ཡོངས་གང་ཞིངཿ བདེ་དྲོད་གློ་བུར་སྐྱེས་པར་བསམཿ དེ་བཞིན་ཆོས་ཀྱི་འཁོར་ལོ་དངཿ ལོངས་སྤྱོད་བདེ་ཆེན་འཁོར་ལོ་སོགསཿ སོ་སོའི་གནས་སུ་རླུང་ཁུག་ནིཿ ཉེར་གཅིག་བདུན་སོགས་གོང་དང་མཚུངསཿ དེ་ནས་སྤྱི་བོའི་ཧཾ་ཡིག་ལཿ མེ་ལྕེས་རེག་པ་ཙམ་གྱིས་ནིཿ བདེ་བ་གཡོས་ཤིང་ཐིག་ལེ་ཞུཿ ཞུན་གྱི་མར་མེ་ཐིགས་པ་ལྟརཿ སྤྱི་བོའི་རྩ་འདབ་ཐམས་ཅད་ཁེངསཿ རྩ་ཁམས་དཔའ་བོ་ཌཱཀྐི་ནིཿ ཏིལ་གོང་ཕྱུང་བ་ལྟ་བུ་ལཿ བདེ་སྟོང་བདུད་རྩིའི་མཆོད་པ་ཕུལཿ ཚོགས་གཉིས་རྫོགས་ཤིང་སྒྲིབ་གཉིས་བྱངཿ བུམ་དབང་མངོན་དུ་ཐོབ་བྱས་ཏེཿ དགའ་བའི་ཡེ་ཤེས་སྐྱེས་པར་བསམཿ དེ་བཞིན་མགྲིན་པ་སྙིང་ག་དངཿ ལྟེ་


JLAZ012_Page_0007
[མ་དཔེ་གཟིགས་ན་འདིར་གནོན།]

བ་ལ་ཡང་གོང་བཞིན་དུཿ རིག་པ་སྒྲེ་ཞིང་གསང་དབང་དངཿ ཤེས་རབ་ཡེ་ཤེས་བཞི་པའི་དབངཿ རིམ་བཞིན་མངོན་དུ་ཐོབ་བྱས་ཤིངཿ མཆོག་དགའ་ཁྱད་པར་ལྷན་སྐྱེས་ཀྱིཿ ཡེ་ཤེས་ཉམས་སུ་མྱོང་བར་བསམཿ དེ་ནས་རྩ་གསུམ་འདུས་མདོ་རུཿ དྭངས་མ་ཨ་ཤད་ལ་ཕོག་ཚེཿ སྣུམ་ཁོལ་བདུད་རྩི་བླུགས་པ་བཞིནཿ མེ་དང་བདུད་རྩི་གཉིས་མེད་འབརཿ རིག་པ་རྩལ་གྱི་དབང་ཆེན་ཐོབཿ སྣང་སྲིད་ཐམས་ཅད་མེ་ཡིས་ཁེངསཿ སྣོད་དང་བཅུད་དུ་འཛིན་པ་ཡིཿ རྣམ་རྟོག་བག་ཆགས་ཐམས་ཅད་བསྲེགཿ མཐར་ནི་རང་ལུས་མེ་དང་བཅསཿ ཇེ་ཆུང་ཇེ་ཆུང་སྤྲོས་བྲལ་ངངཿ བསྡུས་ལ་གསལ་སྟོང་ངང་དུ་བཞགཿ གེགས་སེལ་ཧ་སྤྲུགས་བརྡབ་ཆུང་དངཿ ངལ་བསོ་ཤེས་རིག་རྣལ་དུ་དབབཿ འདི་ལྟར་གནད་དུ་ཕེབས་གྱུར་ནཿ བདེ་དྲོད་མེ་འབར་གོས་མི་དགོསཿ འབྱུང་བ་ལྔ་ལ་རང་དབང་སྒྱུརཿ མ་དག་ལས་ཀྱི་རླུང་དག་ལསཿ སྤྱན་དང་མངོན་ཤེས་ལ་སོགས་ཐོབཿ ཐུན་མོང་ཡོན་ཏན་བསམ་མི་ཁྱབཿ མངོན་ཞེན་སྐྱེས་ན་རུ་ཏྲར་གོལཿ ཅི་ཕྱིར་འབྲས་བུའི་ཡོན་ཏན་ནིཿ སྤངས་རྟོགས་མཐའ་རུ་ཕྱིན་པའི་དབྱིངསཿ ཆོས་ཟད་བློ་འདས་ཆེན་པོ་སྟེཿ དེ་ཕྱིར་དེ་དག་ལམ་རྟགས་ཀྱིཿ ཡོན་ཏན་ཙམ་ལས་ས་ཟིན་མེདཿ


JLAZ012_Page_0008
[མ་དཔེ་གཟིགས་ན་འདིར་གནོན།]

སྤངས་ཐོབ་བྲལ་བའི་རྫོགས་ཆེན་ནིཿ ཆོས་རྣམས་ཀུན་ཀྱི་གྲོལ་སའོཿ ས་མ་ཡཿ འདི་ལྟར་སྲོག་རྩོལ་རླུང་གི་གནདཿ བརྒྱ་ཕྲག་འདུས་པའི་ཡང་ཟབ་བཅུདཿ སྙིང་མཛོད་སྨུག་པོ་ཀློང་གི་སྒྲོམཿ སྐུ་གདུང་འབར་བའི་བརྡའ་རིས་ཅནཿ མཁའ་འགྲོའི་ཐུགས་གསང་ནམ་མཁའ་མཛོདཿ གཏེར་བཅུད་འདུས་པའི་ཕོ་བྲང་ནསཿ བརྡ་ཚིག་རྡོ་རྗེའི་དབྱངས་སུ་བསྒྱུརཿ སྐལ་ལྡན་འགའ་ཡི་སྤྱོད་ཡུལ་ལསཿ གཞན་དུ་མ་ཡིན་དམ་ཚིག་རྒྱཿ སྙིང་འདྲ་གཅིག་ལས་ཤོར་ར་རེཿ འདི་དང་རྫོགས་ཆེན་མ་བུ་གསུམཿ ཉམས་སུ་བླངས་ནས་མ་གྲོལ་ནཿ པདྨས་བསླུས་སོ་ཕྱི་རབས་རྣམསཿ ལས་འཕྲོ་ཅན་གྱི་དཔལ་དུ་ཤོགཿ སྐུའི་རྒྱཿ གསུང་གི་རྒྱཿ ཐུགས་ཀྱི་རྒྱཿ དཔལ་སྔགས་ཀྱི་སྲུང་མས་དམ་ཉམས་བཀའ་རྐུན་ལོག་སྲེད་ཅན་གྱི་ལག་ཏུ་མ་བཏང་ཞིགཿ ན་རཀྐནཿ

ཀློང་ཆེན་སྙིང་གི་ཐིག་ལེ་ལསཿ བདེ་སྟོང་རླུང་རྫོགས་ཞལ་ཤེས།


JLAZ012_Page_0009
[མ་དཔེ་གཟིགས་ན་འདིར་གནོན།]

འུྃཿ ཀློང་ཆེན་སྙིང་གི་ཐིག་ལེ་ལསཿ བདེ་སྟོང་རླུང་རྫོགས་ཞལ་ཤེས་བཞུགསཿ རྗེས་སུ་རྣལ་འབྱོར་དབྱིངས་ལ་འདུདཿ ལམ་བདེན་ཐམས་ཅད་དམིགས་པ་དངཿ འདུན་པའི་རྐྱེན་ལས་གྱུར་པའི་ཕྱིརཿ ཕུང་པོ་ལྔ་ནི་འཁོར་བའི་རྒྱུཿ སངས་རྒྱས་སྔར་ནི་མྱ་ངན་འདའཿ གཟུགས་ཕུང་སྣང་མཛད་ཡབ་ཡུམ་དུཿ གདོད་ནས་དག་པར་ངེས་ཤེས་བསྐྱེདཿ བདུད་རྩིས་མཆོད་ཅིང་བུམ་དབང་ཐོབཿ དགའ་བའི་ཡེ་ཤེས་མྱོང་བའི་


JLAZ012_Page_0010
[མ་དཔེ་གཟིགས་ན་འདིར་གནོན།]

མཐརཿ འོད་ཞུ་ཐིག་ལེ་དཀར་པོར་བསམཿ དེ་བཞིན་མགྲིན་པར་འདུ་ཤེས་ནིཿ སྣང་མཐའ་རྣམ་ཤེས་མི་བསྐྱོད་པཿ ཚོར་བ་རིན་འབྱུང་འདུ་བྱེད་གྲུབཿ རིམ་བཞིན་འོད་ཞུའི་ཐིག་ལེ་དམརཿ མཐིང་སེར་ལྗང་གུར་གནས་པ་དེཿ རྣམ་འབྱུང་ལྔ་ཡི་ངོ་བོར་བསམཿ དེ་ལས་འབྱུང་བཞི་ཟད་པར་གྱིཿ སྐྱེ་མཆེད་བསྒོམ་ན་སྤྱི་བོ་ཡིཿ ཐིག་ལེ་དཀར་ལས་འོད་ཟེར་འཕྲོསཿ སྣང་སྲིད་ཐམས་ཅད་ཆུའི་དྭངས་མཿ དཀར་པོར་འོད་ཞུ་ཐིག་ལེ་དངཿ རོ་གཅིག་འདྲེས་ལ་མཉམ་པར་བཞགཿ ཟད་པར་ཆུ་ཡི་སྐྱེ་མཆེད་འགྲུབཿ དེ་བཞིན་མགྲིན་པ་ལྟེ་བ་དངཿ གསང་གནས་རྣམས་ཀྱི་ཐིག་ལེ་ནིཿ དམར་པོ་མེ་དང་སེར་པོ་སཿ ལྗང་གུ་རླུང་དུ་ཤེས་བྱས་ནསཿ བསྒོམ་ཚུལ་གོང་ལྟར་ངེས་པ་ཡིནཿ ཀུན་ཀྱི་སྡུད་རིམ་ཙཎྜ་ལིསཿ ཕྱི་འབྱུང་ནང་འབྱུང་ཅིག་ཆར་དུཿ བསྲེག་པ་ཡི་གེའི་དཀྱུས་བཞིན་ནོཿ འདི་ནི་གནད་ཀྱི་མན་ངག་སྟེཿ ཐེམ་མེད་ཀུན་ལས་གསང་བའི་རྒྱཿ དྷ་ཐིམཿ

ཀློང་ཆེན་སྙིང་གི་ཐིག་ལེ་ལསཿ གཏུམ་མོའི་འབར་འཛག་ཡིག་ཆུང་།


JLAZ012_Page_0012
[མ་དཔེ་གཟིགས་ན་འདིར་གནོན།]

ཀློང་ཆེན་སྙིང་གི་ཐིག་ལེ་ལསཿ གཏུམ་མོའི་འབར་འཛག་ཡིག་ཆུང་བཞུགས།། འབར་འཛག་སྙན་བརྒྱུད་ཞལ་ཤེས་ལ། དང་པོ་རྩ་གནས་བྱིན་བརླབ་ནི། རྩ་དབུ་མ་སྟོང་གསལ་གྱི་ཡར་སྣེ་རྒྱ་སྐར་ཁ་ཕྱེ་བ་ལྟ་བུའི་ནང་ཀུན་བཟང་ཡབ་ཡུམ་མགྲིན་པ་ཡན་ཆད་ཐོན་པ་ནས་མས་རིམ་རྩ་བའི་བླ་མའི་བར་བརྒྱུད་པའི་གསོལ་འདེབས་ནང་བཞིན་ཐོ་བརྩེགས་སུ་གསལ། དག་པ་རབ་འབྱམས་དབུ་མའི་གྲོང་ཁྱེར་ན། ཅེས་པ་ལ་སོགས་པའི་གསོལ་འདེབས་མོས་གུས་དྲག་པོ་བྱས་རྗེས་བླ་མ་རྣམས་རིམ་གྱིས་འོད་དུ་ཞུ་ཐིག་ལེ་དམར་པོ་གཅིག་ཏུ་གྱུར་པའི་ནང་ཁོངས་ཨ་ཤད་ཀྱི་རྣམ་པ་གསལ་ཙམ་དང༌། སྤྱི་བོར་ཧཾ་ཡིག་མགོ་གྱེན་བསྟན་བསྒོམ། རོ་རྐྱང་གཉིས་ནས་རླུང་རྔུབས་ཕྲུ་མ་ཕུས་བརྒྱངས་པ་བཞིན་དུ་དབུ་མའི་མས་སྣར་ཞུགས། ཐིག་དམར་ཨ་ཟད་ཅན་ལ་ཕོག་པས་བྱིན་རླབས་ཡེ་ཤེས་ཀྱི་མེ་ལྷབ་ཀྱིས་འབར། མེའི་ངོ་བོ་བདེ་བ། རེག་བྱ་ཚ་བ། རྣམ་པ་གསལ་བ། རྩེ་མོ་ཤེས་རབ་ཀྱི་རང་བཞིན་རྣོ་ལ་འཁྱུག་པ་སྟེ་མཚན་ཉིད་བཞི་ལྡན་དུ་འབར་བས་གནས་ཚུལ་དང་མཐུན་པའི་རྩ་ནང་ཐམས་ཅད་དུ་མེ་ལྕེས་ཁྱབ། ཕོ་སྐོར་ཅུང་ཟད་བྱ། རིམ་བཞིན་ལྟེ་བ་སྤྲུལ་པའི་འཁོར་ལོ་ནས་སྤྱི་བོ་བདེ་ཆེན་གྱི་འཁོར་ལོའི་བར་གྱི་རྩ་གཙོ་བོ་གསུམ་དང༌། རྩ་འདབ་ཐམས་ཅད་དུ་ཞུགས་སྤྱི་བོའི་ཧཾ་ཡབ་ཧེ་རུ་ཀའི་ངོ་བོ་དང༌། མེ་ཉིད་ཡུམ་གྱི་ངོ་བོར་གྱུར་པ་གཉིས་རེག་པ་འཕྲོད་པས་ཞུ་བདེའི་ཉམས་རྒྱས། ཧཾ་ལས་འོད་ཟེར་མུ་མཐའ་མེད་པར་


JLAZ012_Page_0013
[མ་དཔེ་གཟིགས་ན་འདིར་གནོན།]

འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་མཆོད། ཐུགས་བདེ་སྟོང་གི་རོས་ཚིམ། མཁྱེན་བརྩེ་ནུས་གསུམ་གྱི་ཡོན་ཏན་དང་བྱིན་རླབས་དངོས་གྲུབ་ཐམས་ཅད་བསྡུས། ཡང་འཕྲོས་འབྱུང་བ་ལྔའི་དྭངས་བཅུད་དང་སྣོད་བཅུད་ཀྱི་བཀྲག་མདངས་གཟི་བྱིན་ཀྱང་ལྷན་ཅིག་བསྡུས་ཏེ་ཧཾ་ཡིག་ལ་ཐིམ་པའི་རྐྱེན་གྱིས་དེ་མགོ་མཇུག་ཧྲིལ་གྱིས་ལྡོག །ཞུ་བདེ་འབར་འཛག་གི་ཉམས་རྒྱས། སྤྱི་བོ་བདེ་ཆེན་གྱི་འཁོར་ལོ་ན་སངས་རྒྱས་རྣམ་པར་སྣང་མཛད་དང༌། ཡུམ་ནམ་མཁའ་དབྱིངས་ཕྱུག་མ་ལ་སོགས་ཏེ་བུདྡྷ་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་ཏིལ་གྱི་གོང་བུ་ཁ་ཕྱེ་བ་བཞུགས་པ་ལ་བདེ་སྟོང་བདུད་རྩིའི་མཆོད་པ་ཕུལ། ཚོགས་རྫོགས། སྒྲིབ་པ་དག །དམ་ཚིག་ཉམས་ཆག་བསྐངས། བུམ་དབང་ཐོབ། དགའ་བའི་ཡེ་ཤེས་རྒྱུད་ལ་སྐྱེས་པར་བསམ། ཡང་མགྲིན་པར་བབས། སངས་རྒྱས་སྣང་བ་མཐའ་ཡས་དང༌། ཡུམ་གོས་དཀར་མོ་ལ་སོགས་ཏེ་པདྨའི་རིགས་ཀྱི་དཔའ་བོ་དང་རྣལ་འབྱོར་མ་ལར་མཆོད་པ་འབུལ་ཚུལ་སྔར་དང་འདྲ། གསང་དབང་ཐོབ། མཆོག་དགའི་ཡེ་ཤེས་རྒྱུད་ལ་སྐྱེས་པར་བསམ། ཡང་སྙིང་གར་བབས། སངས་རྒྱས་མི་བསྐྱོད་པ་དང་ཡུམ་མཱ་མ་ཀཱི་ལ་སོགས་རྡོ་རྗེའི་རིགས་ཀྱི་དཔའ་བོ་རྣལ་འབྱོར་མ་སོགས། མཆོད་ཚུལ་སྔར་དང་འདྲ། ཤེས་རབ་ཡེ་ཤེས་ཀྱི་དབང་ཐོབ། ཁྱད་པར་གྱི་དགའ་བའི་ཡེ་ཤེས་རྒྱུད་ལ་སྐྱེས་པར་བསམ། ཡང་ལྟེ་བར་བབས། རིན་ཆེན་འབྱུང་ལྡན་དང༌།


JLAZ012_Page_0014
[མ་དཔེ་གཟིགས་ན་འདིར་གནོན།]

ཡུམ་སངས་རྒྱས་སྤྱན་མ་སོགས་ཏེ་རིན་ཆེན་རིགས་ཀྱི་དཔའ་བོ་དང་རྣལ་འབྱོར་མ་མཆོད་ཚུལ་གོང་དང་འདྲ་བར་དབང་བཞི་པ་ཐོབ། ལྷན་ཅིག་སྐྱེས་དཀའི་ཡེ་ཤེས་རྒྱུད་ལ་སྐྱེས་པར་བསམ། ཡང་གསང་གནས་སུ་བབས། སངས་རྒྱས་དོན་ཡོད་གྲུབ་པ་དང༌། ཡུམ་དམ་ཚིག་སྒྲོལ་མ་ལ་སོགས་ཏེ་ལས་ཀྱི་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་མཆོད། ཚོགས་རྫོགས། སྒྲིབ་པ་དག །དམ་ཚིག་ཉམས་ཆག་བསྐངས། རིག་པའི་རྩལ་དབང་ཐོབ། བསམ་གྱིས་མི་ཁྱབ་པའི་ཡེ་ཤེས་རྒྱུད་ལ་སྐྱེས་པར་བསམ། དམིགས་པའི་གནད་འདི་ཁོང་དུ་ཆུད་ན། ནང་དང་གསང་བའི་སྦྱིན་སྲེག་ཀྱང་ཡིན། ཚོགས་འཁོར་ཡང་ཡིན། བསོད་ནམས་བསག་ཐབས་ཀྱང་འདི་ལས་ཟབ་པ་མེད། དོན་དམ་པར་དཀྱིལ་འཁོར་དུ་འཇུག་པ་དང༌། དབང་ལེན་པ་ཡང་ཡིན། དེ་ལས་ཧཾ་ཡིག་དེ་ཉིད་བླ་མ་སངས་རྒྱས་ཐམས་ཅད་འདུས་པར་ཤེས་པའི་མོས་གུས་དང༌། གཏུམ་མོའི་མེ་དེ་ཉིད་ཀྱང་སངས་རྒྱས་ཐམས་ཅད་ཀྱི་བྱིན་རླབས་འདུས་པའི་ཕྲིན་ལས་སུ་ཤེས་དགོས་པ་ཡིན། གསང་སྔགས་ལམ་མྱུར་བ་དང་ཐབས་ཟབ་པའི་ངེས་ཤེས་རྒྱུད་ལ་བརྟན་ཅིང་ཐེ་ཚོམ་མེད་པ་རྣམས་ལ་དངོས་གྲུབ་མྱུར་བ་སྔགས་ཀྱི་ཁྱད་ཆོས་ཡིན་ནོ། །རྗེས་ལ་མེ་དང་དབུ་མ་ཆེ་བསྐྱེད་ཆུང་བསྐྱེད་


JLAZ012_Page_0015
[མ་དཔེ་གཟིགས་ན་འདིར་གནོན།]

རེ་མོས་ཡང་ཡང་བྱ་བའི་ཆེན་པོར་གྱུར་པའི་ཚེ་སྟོང་ཁམས་ཐམས་ཅད་མེས་གང་ལྟེ་བར་ཆད་གདོན་བགེགས་རྣམ་རྟོག་བག་ཆགས་ལས་ཉོན་དང་བཅས་པ་གཞོབ་ཐུལ་གྱིས་ཚིག་པར་བསམ། རེས་འགའ་དབུ་མ་མེ་དང་བཅས་པ་ཇེ་ཆུང་རྟ་རྔ་བརྒྱར་བཤགས་པའི་ཆ་ཙམ་ཇེ་ཕྲར་བསྒོམ་ལ་རིག་པའི་རྩལ་སྦྱང༌། མཐར་ཐམས་ཅད་རྫོགས་རིམ་དུ་བསྡུས་ཏེ་དགེ་བ་བསྔོ་བར་བྱའོ།། །།

སྙན་བརྒྱུད་ཤོག་དྲིལ་ཡིད་བཞིན་ནོར་བུའི་སྦས་དོན་ཐབས་ལམ་མ་བསྒོམས་སངས་རྒྱས།


JLAZ012_Page_0016
[མ་དཔེ་གཟིགས་ན་འདིར་གནོན།]

༂ སྙན་བརྒྱུད་ཤོག་དྲིལ་ཡིད་བཞིན་ནོར་བུའི་སྦས་དོན་ཐབས་ལམ་མ་བསྒོམས་སངས་རྒྱས་བཞུགསཿ


JLAZ012_Page_0017
[མ་དཔེ་གཟིགས་ན་འདིར་གནོན།]

དཔའ་བོ་དང་ནི་རྣལ་འབྱོར་མའིཿ གྲོང་ཁྱེར་མཆོག་ལ་ཕྱག་འཚལ་ལོཿ རང་ལུས་བདེ་ཆེན་ཙཎྜ་ལིཿ འབར་འཛག་དབང་དང་དགའ་བཞིའི་ལམཿ གབ་དོན་ནམ་མཁའི་ཙཎྜ་ལིཿ སྲོག་ཐུར་ཡེ་ཤེས་དབྱིངས་སུ་བསྲེཿ གཟུང་འཛིན་སྤངས་པའི་སྒྲ་གཅན་གྱིཿ དུས་མེ་ནོར་བུའི་ཁོང་སེང་རྩེརཿ རླུང་སེམས་འདྲེས་པའི་ཐིག་ལེ་ནིཿ གསལ་འཚེར་འོད་ཀྱི་རྣམ་པ་གཞགཿ ཐུར་སེལ་སྟེང་དུ་སྲོག་སྦུབ་པསཿ སྒྲ་གཅན་སྔགས་པའི་ཤུགས་རིངས་ཀྱིསཿ ཐིག་ལེ་སྦས་མའི་མཁའ་གསང་དུཿ སྐར་མདའ་འཕངས་པ་བཞིན་དུ་དཀྲོགསཿ ཧཱུྃ་དང་རླུང་གི་ལྕགས་ཀྱུ་ཡིསཿ གོ་ལྡོག་དྲངས་པ་གཙུག་ཏོར་ལམཿ བརྒྱུད་དེ་མཁའ་དབྱིངས་རྡོ་རྗེར་བཅིངཿ དེ་ལྟར་


JLAZ012_Page_0018
[མ་དཔེ་གཟིགས་ན་འདིར་གནོན།]

ཡང་ཡང་གོམས་པ་ཡིསཿ མེ་ཆུའི་ཁམས་གཉིས་གོ་ལྡོག་པསཿ འཆི་བ་མེད་པའི་བཅུད་ལེན་ཅིངཿ ནང་དུ་སྟེང་འོག་རླུང་འདྲེས་ནསཿ ཕྱི་རུ་སྣང་སེམས་རོ་གཅིག་འགྱུརཿ ས་མ་ཡཿ གཞན་ལུས་ཞུ་བདེའི་ཙཎྜ་ལིཿ རིག་མ་བརྟག་འགུགས་སྦྱང་བ་སོགསཿ སྤྱི་དང་མཐུན་པ་ཉིད་དུ་སྤྱདཿ བསླབ་པ་གསུམ་གྱིས་གཡའ་བླང་ཞིངཿ བདེ་བ་བསྐྱེད་པའི་ཐབས་ལ་འབདཿ འདུ་ཤེས་གསུམ་གྱིས་ཐ་མལ་ལསཿ ལྡོག་ནས་འབེབས་དང་སྐོར་དང་བསྐྱིལཿ ཤེས་པ་གསུམ་གྱི་གནད་ལ་བསླབཿ དབབ་ལ་མཁས་པ་རུས་སྦལ་བཞིནཿ བསྐྱོད་པ་དལ་བ་མན་ངག་ཡིནཿ བདེ་བ་རྫོགས་ནས་མ་ཡིན་ཏེཿ གཡོ་དུས་བསྲུབ་འཕྲོ་བཅད་ལ་བཟུངཿ ནོར་བུའི་རྩེ་ནས་


JLAZ012_Page_0019
[མ་དཔེ་གཟིགས་ན་འདིར་གནོན།]

ལྡོག་དཀའ་བསཿ རྩ་བར་རྨ་བྱའི་སྟངས་ཀྱིས་བཟུངཿ རིག་པ་སྤྱི་བོའི་ཧཾ་དང་འགྲོགསཿ རླུང་ནི་སྲིན་ཞལ་ནང་དུ་སྡིགསཿ ཨཱི་ཞེས་བྱ་བ་རྨ་བྱའི་སྟངསཿ བསྐྱིལ་ལ་མཁས་པ་ཐེམ་བུ་བཞིནཿ རླུང་རིག་འདྲེས་པའི་དབྱིངས་ལ་བཞགཿ འདྲེན་ལ་མཁས་པ་ཧུབ་ཀྱིས་སྒྲསཿ བར་རླུང་རྒྱངས་ཤིང་གསང་རླུང་ཐོནཿ ལྡོག་ལ་མཁས་པ་ཧིག་གི་སྒྲསཿ དུང་དཀར་དང་ནི་གར་མཁན་བཞིནཿ འགྲེམས་ལ་མཁས་པ་གཏུམ་མོ་དངཿ ཁྱད་པར་བརྗོད་བྲལ་ལྷན་ཅིག་སྐྱེསཿ འཛིན་འདྲེན་བགྲམ་པ་ཀུན་ཀྱི་གནདཿ ཁྱད་པར་བྱེད་པ་བྲབ་གཞིལ་ཏེཿ དེ་ལྟར་ལས་རྒྱའི་གནད་བདུན་གྱིསཿ ཐིག་ལེ་རྩ་ཡི་ནང་དུ་སྦཿ རྣམ་རྟོག་ཡེ་ཤེས་དབྱིངས་སུ་སྦཿ བདེ་བ་འོད་གསལ་ཀློང་དུ་སྦཿ འོད་གསལ་འཛིན་མེད་ངང་དུ་སྦཿ སྦ་བཞིའི་གནད་ལ་གོམས་པ་ཡིསཿ རླུང་སེམས་དབུ་མར་ཡང་དག་འཛུདཿ ཀུན་ལ་སྲོག་རྩོལ་ལོག་པའི་གེགསཿ བཅོས་ཤིང་རྩ་མདུད་གྲོལ་བའི་ཐབསཿ རྣམ་པ་ཉི་ཤུས་བྱང་ཆུབ་པའིཿ རྡོ་རྗེ་ལུས་ཀྱི་འཁྲུལ་འཁོར་གཅེསཿ ས་མ་ཡཿ རྒྱ་རྒྱ་རྒྱཿ དེ་ལ་རིག་འཛིན་འཁྲུལ་འཁོར་ནིཿ གསོལ་བ་བཏབ་ཅིང་བུམ་ཅན་བཟུངཿ དང་པོ་རྡོ་རྗེ་སྐྱིལ་མོ་ཀྲུངཿ ལག་གཉིས་ཆུན་བཙལ་མཆན་སྐོར་ཡན་ལག་གི་ནད་སེལ་


JLAZ012_Page_0020
[མ་དཔེ་གཟིགས་ན་འདིར་གནོན།]

བརྡེབཿ འཁྱུད་ཚུལ་བྱ་ཞིང་སེ་གོལ་གཏོགསཿ གཉིས་ཀ་ལག་གཉིས་ཨ་བ་མཉེཿ མིག་ནས་རིང་པར་ལུས་ཀུན་ཕུརཿ གསུམ་པ་སོར་བསྣོལ་བྲང་ལ་ཧ་སྒྲ་འདོད་ཅིང་བྲང་ལ་ཤུགས་ཀྱིས་གཏད་པས་སྲོག་རྩོལ་ལོག་པའི་གེགས་སེལཿ གཏདཿ ཐད་ཀར་རྒྱངས་ཞིང་ཕྱི་ལ་ཐེནཿ བཞི་པ་དཔུང་པ་གཡས་ རྩ་དཀར་སོགས་དཔུང་པའི་ནད་སེལཿ གཡོན་གཅུཿ ལག་གཉིས་ནང་དུ་སྐོར་ཞིང་སྤྲུགསཿ ལྔ་པ་བྱ་རྒོད་དཔུང་སྟངས་ནིཿ ཁུ་ཚུར་ཤ་ལྤགས་ཆུ་སེར་ཀྱི་ནད་སེལཿ སྙིང་ནས་ཕྱི་རུ་འཕངསཿ འབེབས་ཆུང་གསུམ་དང་འབའ་དཀྲུགས་གཅིགཿ དྲུག་པ་ལག་གཉིས་དཔུང་མགོར་བསྣོལཿ བསྡམས་ཏེ་ལུས་ཀུན་གཅུང་སྐེད་པའི་ནད་གཙོ་བོར་སེལཿ བའི་མཐར། །སྡིགས་མཛུབ་ཕྱིར་སྟོན་ཧཱུྃ་ཀར་རྒྱཿ ༼བགྲད༽ བདུན་པ་རྐང་པའི་བྲང་ས་ནསཿ ལག་གཉིས་ཁུ་ཚུར་དཔུང་མགོར་ཆུ་རྒྱུས་ཀྱི་ནད་སེལཿ ཐེནཿ གཡས་གཡོན་ལྟ་སྟངས་མཉྫུ་ཤྲཱིཿ ༼སྒུར༽ བརྒྱད་པ་གཞུ་འགེངས་མཁྲིག་མ་གཉིསཿ མཆན་སྐོར་གཞུ་རྒྱུད་རེ་མོས་སོ་གད་བྲག་དང་ཚིགས་པའི་ནད་སེལཿ ཐེནཿ རྟ་རྒྱ་སྤྱིར་བཞག་ལུས་སྤྲུགས་ཤིངཿ ཧི་སྒྲ་བསྟུད་པ་ནཱ་གཱརྫུཿ ༼ཆེན༽ དགུ་པ་རི་འཕུལ་ལག་ངར་གཉིསཿ ཆུན་བཙལ་མདུན་རི་འཕུལ་ཚུལ་རྗེསཿ ཆུ་སྲིན་རྣམ་རོལ་ཕྱག་རྒྱའི་ནངཿ ཧ་སྒྲ་གསུམ་བསྟུད་པྲ་བྷ་ཧཿ ༼བར༽ བཅུ་པ་


JLAZ012_Page_0021
[མ་དཔེ་གཟིགས་ན་འདིར་གནོན།]

དགྱེ་དགུ་ལུས་བསྲང་བཿ རྒྱབ་ཏུ་དགྱེ་མཁལ་མ་མཚེར་བའི་ནད་སེལཿ ཞིང་མདུན་དུ་དགུཿ ཆུན་བཙལ་ཐོད་རྔ་འཁྲོལ་ཆུལ་དངཿ རྐང་པའི་སྟབས་བསྟུན་དྷ་ན་སཾཿ ༼སྒུར༽ བཅུ་གཅིག་རྡོ་རྗེའི་འདུག་སྟངས་ལསཿ ལག་པའི་མཐེའུ་ཆུང་གཉིས་སྤྲེལཿ མཛུབ་རྩིབ་ལོགས་ནད་སེལཿ རྩེ་སྤྲད་པ་སྤྱི་གཙུག་བཞགཿ སྣ་རྩེར་ཤེས་པ་ཨ་ལ་གཏདཿ ལྔ་ཚར་བརྗོད་པ་བི་མ་ལཿ ༼གཅུས༽ བཅུ་གཉིས་མེ་རླུང་ཁ་སྦྱོར་འདྲེནཿ ལྟེ་བའི་རླུང་ནི་འོག་ཏུ་མནནཿ ལག་གཉིས་འདོད་རྒྱལ་དམ་རྒྱ་ནིཿ ས་ལ་བཏུགས་ནས་མ་ཞུ་བ་དང་ཕོ་བའི་ནད་སེལཿ དགྱེ་བ་དངཿ ལྷན་ཅིག་ལྟེ་བ་ནང་དུ་ཐེནཿ གུ་ཧྱ་ཙཎྜའི་འཁྲུལ་འཁོར་རྒྱཿ ༼བགྲད༽ བཅུ་གསུམ་ལག་གཉིས་བསྣོལ་བྱས་ཏེཿ སྤྱི་རོ་སྟོད་དང་སོག་པའི་ནད་སེལཿ བོར་འཇོག་དང་སྙིང་ག་རུཿ འཁོར་ལོའི་ཕྱག་རྒྱ་རེ་མོས་སྤེལཿ ཤཱནྟིང་གརྦྷའི་འཁྲུལ་འཁོར་རྒྱཿ ༼བགྲད༽ བཅུ་བཞི་གླང་ཆེན་ཧུ་འདྲེན་ནིཿ དཔྱང་མིག་གཉིས་ཀ་སྤྱི་བོ་ལ་གཏད། ཡིད་ཀྱི་རླུང་སྟོང་འདྲེན་དང་ལྟེ་བ་བསྐྱིལ་བྱེད། ཐག་སྟོང་འདྲེན་ཐེམ་བུ་ཡིནཿ རྐང་ལག་མཐིལ་བཞི་ས་ལ་བཙུགསཿ ཧུ་སྒྲ་འདོན་ཅིང་མགོ་ཅོག་ཡན་ལག་དང་ཉིང་ལག་གི་ནད་སེལཿ བྱཿ ༼སྒུར༽ བཅོ་ལྔ་སེང་གེ་རལ་རྔོམ་ནིཿ སྲོག་རྩོལ་གོ་ལྡོག་ཐེམ་བུ་མདུན་རླུང་ཅུང་ཟད་བཙལ་རྒྱབ་རླུང་ཡིད་ཀྱི་ཐེན་ཨ་ཧཾ་ཞེས་སྟོང་འདྲེན་བྱེདཿ ཡིནཿ མཐིལ་བཞི་བཙུགས་ལ་གཡས་


JLAZ012_Page_0022
[མ་དཔེ་གཟིགས་ན་འདིར་གནོན།]

གཡོན་རྩེའུ་ཆུང་གི་ནད་སེལ། བལྟཿ ༼སྒུར༽ བཅུ་དྲུག་གྱི་ལིང་ཁྲེ་ཆེན་འགྲེམསཿ ཨུར་མོ་ཁ་ཡན་ཐེམ་རླུང་ཕྱིར་བུས་འོག་སྒོ་གཉིས་མཉམ་པར་ཆུན་བཙལ་བར་རླུང་ཐད་ཀར་རྒྱངས་པ་དང་རིག་པ་ཚངས་བུག་ལ་གཏོད། བུ་ཡིནཿ གན་རྐྱལ་པུས་མོ་རོང་བྱས་ལཿ ཐལ་མོ་སྦྱོར་ཞིང་རྐང་པ་དང་ལག་པའི་ཚིགས་ནད་སེལ། འགྲེ་ལྡོག་བྱཿ ༼འབེབས་ཆེན༽ བཅུ་བདུན་རྨ་བྱ་བྱ་རྨྱང་ནིཿ འགྲམ་ཆེན་བུམ་པའི་རླུང་ནང་དུ་རྔུབས་ཏེ་འོག་ཏུ་མནན། ཐད་ཀར་རྒྱངས་པས་ལུས་ཀྱི་སྨད་ཐམས་ཅད་ཁྱབ་པར་བྱ། ཐེམ་བུ་ཡིནཿ ཁ་སྦུབ་གྲུ་མོ་བྲང་ལ་གཏདཿ ལག་མཐིལ་སར་བགྲད་རོ་སྟོད་དང་དོན་ལྔའི་ནད་སེལ། རྐང་པ་རྨྱངཿ ༼བགྲད་ཆུང་༽ བཅོ་བརྒྱད་ཤང་ཤང་གཤོག་འགྱུར་ནིཿ རྡོ་རྗེ་རྒྱ་གྲམ་རླུང་ནང་དུ་བཞག་ནས་ཕྱོགས་མཉམ་པར་ཆུན་བཙལ། ཐེམ་བུ་ཡིནཿ རྐང་གཉིས་ལག་པའི་གྲུ་མོའི་ཁུདཿ རེ་མོས་བླང་ཞིང་ལག་ཅིག་ཤོསཿ བརྐྱང་བསྐུམ་གཤོག་འགྱུར་བསྐོར་བའི་རྐང་པའི་ཉ་ཤ་དང་དཔུང་པའི་ནད་སེལཿ ཚུལཿ རིགས་ལྔའི་དམ་ཚིག་འཁྲུལ་འཁོར་རྒྱཿ ༼རྡོར༽ བཅུ་དགུ་དབུ་མ་འཛུགས་བསྐོར་འཐེནཿ འཁོར་ལོ་ཁ་སྦྱོར་ཐེམ་མཁའ་མ་ཁ་སྦྱར་ནས་རླུང་དབུ་མར་འཛུད། བུ་ཡིནཿ ༼སྒུར་འགྲད༽ ཉི་ཤུ་ཛ་ལན་དྷ་ར་ནིཿ རྐང་པ་པུས་སྟེང་རེ་མོས་བཞགཿ བརླ་དང་སྒྱིད་ཁུང་སྟེང་འོག་ནསཿ ལག་གཉིས་ཐལ་སྦྱར་མགོ་བོ་བསྐོརཿ ༼བགྲད༽ གེགས་སེལ་རྡོ་རྗེ་དབའ་རླབས་ནིཿ བྲབ་གཞིལ་ཞགས་འཕེན་གླིང་བཞི་སྡུདཿ ཀུན་ལ་ལུས་དང་ཡན་ལག་དངཿ ཉིང་ལག་སོ་སོའི་ཆ་ཆ་ནསཿ རོ་སྨད་ཐམས་ཅད་ཀྱི་ནད་སེལ།


JLAZ012_Page_0023
[མ་དཔེ་གཟིགས་ན་འདིར་གནོན།]

སྒྲིམ་དང་ཆུན་བཙལ་འཁྲུལ་འཁོར་གནད། རྗེས་ལ་བསྔོ་སྨོན་རྒྱ་ཡིས་གདབཿ ལུས་སྒྲིབ་དག་ཅིང་ཉམས་ཆག་བསྐངཿ མཁའ་འགྲོ་མཉེས་ཤིང་རྩ་མདུད་གྲོལཿ ཕོ་ཉའི་ལམ་མཆོག་བསམ་མི་ཁྱབཿ རྡོ་རྗེ་ལུས་ཀྱི་བྱེད་བཅིངས་ལཿ ཡས་བབས་དབང་ནི་རྣམ་པ་ལྔཿ དེ་ལ་ལུགས་འབྱུང་ལུགས་ལྡོག་གཉིསཿ མས་བརྟན་དགའ་བ་བཅུ་དྲུག་འགྲོསཿ འཁོར་ལོ་ལྔ་ཡི་ཞུ་བདེ་དངཿ མཉམ་སྦྱོར་དབུ་མའི་རྩ་མདུད་ནིཿ ཉི་ཤུ་རྩ་གཅིག་མ་ལུས་པཿ ཚོགས་དང་སྦྱོར་མཐོང་སྒོམ་པའི་ལམཿ མི་སློབ་ལམ་གྱི་འབྲས་བུ་རུཿ གྲོལ་འགྱུར་འདི་ལ་ཐེ་ཚོམ་མེདཿ ས་མ་ཡཿ རྒྱ་རྒྱ་རྒྱཿ གཏེར་རྒྱཿ སྦས་རྒྱཿ དམ་རྒྱཿ ཟབ་རྒྱཿ འདི་ནི་སྔོན་ཆད་བུ་དཔེར་ཕབ་པ་མེད་ཀྱང་མྱུར་ལམ་ཟབ་མོ་སྙན་བརྒྱུད་འཛིན་པར་མི་ནུས་པར་ཕངས་ནས་བཀོད་པ་ལ་མཁའ་འགྲོ་མ་རྣམས་བཟོད་པར་མཛད་དུ་གསོལ། བེམ་པོའི་རེག་བྱ་དོར་བས་བློ་ཚིམ་སྟེ། །མ་སྨིན་སེམས་ཅན་བདུན་ནས་རྩ་ལྟུང་རིན། །རྒྱབ་མདུན་ཐུར་མས་ཉོ་ཙམ་སྔགས་ལ་མིན། །ཟབ་མོའི་ལམ་གནད་ཇི་བཞིན་རྟོགས་འདོད་རྣམས། །ཡིད་བཞིན་རིན་ཆེན་མཛོད་ཀྱི་རིམ་པའི་ཁོད། །ཉི་ཤུ་པ་དང་དེ་ཡི་ཕྱི་མའི་གནས། །རྡོ་རྗེའི་ལམ་གྱི་ལྡེ་མིག་ཆེན་པོར་ཟུངས།། །།

ཀློང་ཆེན་སྙིང་གི་ཐིག་ལེ་ལསཿ རིག་འཛིན་འཁྲུལ་འཁོར་སྦས་དོན་གསལ་བ།


JLAZ012_Page_0024
[མ་དཔེ་གཟིགས་ན་འདིར་གནོན།]

ཀློང་ཆེན་སྙིང་གི་ཐིག་ལེ་ལསཿ རིག་འཛིན་འཁྲུལ་འཁོར་སྦས་དོན་གསལ་བ་བཞུགས།


JLAZ012_Page_0025
[མ་དཔེ་གཟིགས་ན་འདིར་གནོན།]

རྡོ་རྗེ་ཕུང་པོའི་གྲོང་ཁྱེར་དང་འབྲེལ་བའི་གདན་གསུམ་ལྷའི་འཁོར་ལོ་ལ་ཕྱག་འཚལ་ལོ། །མ་བསྒོམ་སངས་རྒྱས་གཅིག་ཤོས་ལས་རྒྱའི་ལམ་གྱི་མཆོག །རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར། །སྲོག་སྩོལ་གནད་དུ་ཚུད་པས་གནས་པའི་རྩ་ཁ་དབྱེ། །རླུང་དང་འཁྲུལ་འཁོར་འབྲེལ་བས་རྩ་མདུད་རང་སར་གྲོལ། །ཐེམ་བུའི་མན་ངག་ཤེས་ན་བཀོད་པ་བྱང་སེམས་རྒྱས། །རྡོ་རྗེ་དཔའ་རླབས་ལ་བརྟེན་འབྲས་བུའི་དེ་ཉིད་མཐོང༌། །གནད་ལས་གནད་དུ་གྱུར་པའི་ཐབས་ཀྱི་ལམ་མཆོག་ཡིན། །འདི་ལ་སྔོན་འགྲོ། དངོས་གཞི། རྗེས་གསུམ་ལས། དང་པོ་ནི། བྱང་ཆུབ་ཏུ་སེམས་བསྐྱེད་པ་སྔོན་དུ་འགྲོ་བས་བླ་མའི་རྣལ་


JLAZ012_Page_0026
[མ་དཔེ་གཟིགས་ན་འདིར་གནོན།]

འབྱོར་སྒོམ། གསོལ་བ་སྙིང་ནས་བཏབ་ལ་དབང་བཞི་བླངས་རྗེས་རླུང་བུམ་ཅན་ལ་གནད་དུ་བསྣུན་པའོ། །གཉིས་པ་ལ་རྣམ་པ་ཉི་ཤུས་བྱང་ཆུབ་པའི་དོན་གྱིས་རྩ་ཚིག་ཉི་ཤུའི་བདག་ཉིད་ཅན་ལ། རྟེན་ལུས་ཀྱི་གེགས་སེལ་དང༌། བརྟེན་པ་ཆོས་ཉིད་ཀྱི་གནད་ཁྱད་པར་ཅན་གཅིག་གིས་ལྷག་པའི་དོན་རྡོ་རྗེའི་ཚིག་གིས་བཅིངས་པ་ལྷུག་པར་དཀྲོལ་བ་ལ་དཔའ་བོ་མཁའ་འགྲོའི་ཚོགས་ཀྱིས་གནང་བ་སྩལ་དུ་གསོལ། དང་པོ་རྡོ་རྗེ་སྐྱིལ་ཀྲུང་ནི། རྣམ་པར་སྣང་མཛད་ཀྱི་ཆོས་བདུན་ཚང་བའི་ངང་ནས་རྡོ་རྗེ་ཁུ་ཚུར་གཉིས་པུས་མོའི་སྟེང་དུ་བཞག་པའི་འཆུན་བཙལ་ཐོག །ཁུ་ཚུར་བརླ་སྟེང་ནས་སྟ་ཟུར་སོ་སོའི་ཕྱོགས་བྲད་པ་མཆན་ལ་བསྐོར་ཏེ་གྲུ་མོ་བཏེག་པ་གསུམ་གྱི་


JLAZ012_Page_0027
[མ་དཔེ་གཟིགས་ན་འདིར་གནོན།]

མཐར། ཁུ་ཚུར་བསྐོར་རྒྱངས་དང་བཅས་གྲུ་མོ་བགྲད་སྡིགས་མཛུབ་ཕྱིར་བསྟན་བསྣོལ་བ་སྤྱི་བོར་འཇོག་པ་དང་སེ་གོལ་གཏོགས་པ་གསུམ། གཉིས་པ་བསྐུ་མཉེ་ནི་ཁུ་ཚུར་བསྐོར་རྒྱངས་དང་བཅས་ལྟག་པ་དགྱེ་བའི་གདོང་ཐད་ལས་མི་དམའ་བར་ཐལ་མོའི་རྟིང་པ་གཉིས་ཐག་སྒྲ་དང་བཅས་བསྣོལ། གྲུ་མོའི་ཚུན་བཙལ་ནས་ཨ་བ་དྲག་ཏུ་མཉེ་བ་ལས་བྱུང་བའི་དྲོད་མིག་ནས་རིམ་པར་མགོ་ལུས་ཀྱི་ཆ་ཤས་ཀུན་ལ་ཁྱབ་པར་འཕུར། གསུམ་པ་སོར་བསྣོལ་ནི། ཁུ་ཚུར་བསྐོར་རྒྱངས་ལས་ཐག་སྒྲ་དང་བ་ཅས་ཐལ་སྦྱར་སོར་མོ་རྣམས་བསྣོལ་བའི་རྟིང་པ་ཁ་ཕྱེ་ནས་གྲུ་མོ་གཉིས་རྒྱངས། ཨ་ཞེས་ཐལ་སྦྱར་བྲང་ལ་བརྡབ། ཀ་ཞེས་དེ་ཉིད་ཁ་ཕྱིར་བསྟན་ཐད་ཀར་རྒྱངས། ཙ་ཞེས་ནང་བསྟན་དུ་རྒྱངས། ཊ་ཞེས་བྲང་ལ་བརྡབ། ཏ་ཞེས་ཁ་ཕྱིར་བསྟན་དུ་རྒྱངས། པ་ཞེས་ནང་བསྟན་དུ་རྒྱངས། ཡ་ཞེས་བྲང་ལ་བརྡབ། ཤ་ཞེས་ཕྱིར་བསྟན་དུ་རྒྱངས། ཨ་ཧཾ་ཞེས་ནང་བསྟན་དུ་རྒྱངས། ཨ་ཀ་ཙ་ཊ་ཏ་པ་ཡ་ཤ་ཨ་ཧཾ། བཞི་པ་དཔུང་གཅུས་ནི། ཁ་ཚུར་བསྐོར་རྒྱངས་པུས་མོ་སོ་སོའི་སྟེང་དུ་སྒྲེང་ནས་དཔུང་པ་གཟེངས་བསྟོད་པ་པུས་མོ་གོ་ལྡོག་གི་སྟེང་རྨྱང་བ་ལན་གསུམ་རེའི་མཐར་ཁུ་ཚུར་བསྐོར་རྒྱངས་རྩ་འདིར་ཐོན་པ་གསུམ་དང༌། མགྲིན་པ་ཁྲུང་ཁྲུང་ལྟར་སྒྲེང་བ་སྒུར་སྟབས་རྩ་འདར་ཐོན་པ་གསུམ། ལྔ་


JLAZ012_Page_0028
[མ་དཔེ་གཟིགས་ན་འདིར་གནོན།]

པ་བྱ་དཔུང་ནི། ཁུ་ཚུར་སྐོར་རྒྱངས་ལས་སྙིང་ཁར་རྒྱབ་སྤྲོད་བྱས་པ་ཕྱི་རོལ་དུ་རྡོ་འཕེན་པ་ལྟར་ཤེད་བསྐྱེད་པས་ནམ་མཁའ་ལ་འཕུར་སྟངས་ལན་གསུམ་གྱིས་རྗེས་འཕོངས་མཐོ་གང་ཙམ་བཏེག་པའི་འབེབ་ཆུང་གསུམ་གྱི་རྗེས་མར་འབའ་ཧ་ཧ་ཞེས་དཀྲུགས། དྲུག་པ་དཔུང་བསྣོལ་ནི། ལངས་ཏེ་ལུས་བསྲང༌། ཁུ་ཚུར་བསྐོར་རྒྱངས་ལས་ཐལ་མོ་གཡོན་པས་དཔུང་པ་གཉིས་ལ་དགབ། གཡས་པས་གཡོན་ལ་དགབ། གྲུ་མོ་རྒྱངས། ལུས་བྱིང་པོ་གཡས་གཅུས་གཡོན་གཅུས་རྒྱབ་ལོགས་མཐོང་མཐོང་ཤེད་ཀྱིས་གཅུད་པ་ལན་གསུམ་རེའི་མཐར་ཧཱུྃ་ཀ་རའི་རྒྱ་གཡས་པའི་རྟིང་པ་ས་ལ་བཙུགས་ནས་པུས་མོ་བསྲང༌། གཡོན་པ་བསྐུམ་སྟངས་སུ་ས་ལ་བཞག་པའི་དོར་སྟབས་ཕྱོགས་ཀྱི་ཁུ་ཚུར་བསྐོར་རྒྱངས་ལས་སྡིགས་མཛུབ་དང་བཅས་པའི་ལྟ་སྟངས་ནམ་མཁའ་ལ་ཤེད་ཀྱིས་སྒྲེང༌། བསྐུམ་ཕྱོགས་ཀྱི་གྲུ་མོ་རྒྱངས་པའི་སྡིགས་མཛུབ་དཀུ་ལ་མ་རེག་ཙམ་པ་གཡས་གཡོན་དུ་གསུམ་རེའི་མཐར། ཁུ་ཚུར་གཟེངས་བསྟོད་པ་དང་བཅས་ཅུང་ཟད་འཕར་སྟངས་ལས་རྐང་པ་བགྲང་ཆུང་ཐོག་བགྲད་འབེབ་ལན་གསུམ། བདུན་པ་བྲང་འཐེན་ནི། ཁུ་ཚུར་གྱེན་བསྟན་ཐུར་ལ་ཤེད་ཀྱིས་སྦུབ་པ་དང་བཅས་སྒུར་ཏེ། རྐང་པ་གཤིབས་པའི་བྲང་ས་སོ་སོ་ནས་ཤེད་བསྐྱེད་པའི་འཐེན་སྟངས་


JLAZ012_Page_0029
[མ་དཔེ་གཟིགས་ན་འདིར་གནོན།]

མཆན་རྡེབ་དང་བཅས་ལུས་བསྲང༌། དཔུང་མགོ་སོ་སོའི་ཐད་ཀྱི་ནམ་མཁའ་ཁུ་ཚུར་གྱིས་བརྟོལ་བ་ལྟར་སྦྲེང་བ་གསུམ་གྱི་མཐར། འཇམ་དཔལ་བཤེས་གཉེན་གྱི་རྒྱ་ཁུ་ཚུར་བསྐོར་རྒྱངས་ལས་རྐང་པ་གཡས་བཏེག་པའི་སྟངས་སྟབས་དང་བསྟུན་སྡིགས་མཛུབ་དང་བཅས་པའི་ལྟ་ལྟངས་ནམ་མཁའ་ལ་སྒྲེང་ཞིང༌། བསྐུམ་ཕྱོགས་ཀྱི་གྲུ་མོ་རྒྱངས་པའི་སྡིགས་མཛུབ་སྤྱི་བོར་འཇོག །དེ་འདྲ་ཇི་ལྟ་བ་གཡོན་ཕྱོགས་དང་སྤེལ་བ་གསུམ་རེའི་མཐར། སྒུར་སྟངས་ཀྱི་རྐང་པའི་བྲང་ས་ནས་སྔ་མ་ལྟར་གྱེན་དུ་འཐེན་པའི་མོད་ལ་འབེབ་པའི་སྒུར་འབེབ་གསུམ། བརྒྱད་པ་གཞུ་འགེངས་ནི། ལངས་ཏེ་ཁུ་ཚུར་བསྐོར་རྒྱངས་སྔོན་འགྲོས་གཞུ་རྒྱུད་ཤིན་ཏུ་སྲ་བའི་འཐེན་སྟངས་མཐར་མཆན་རྡེབ་དང༌། མདའ་ཕྱོགས་ཡང་རྒྱངས་ཐོག་འཐེན་སྟངས་སྔ་མ་ལྟར་བྱ་བ་གསུམ་དང༌། གཡོན་ཕྱོགས་ལའང་དེ་བཞིན་ལན་གསུམ་སོང་ནས། ནཱ་ག་རྫུ་ནའི་རྒྱ་གྲུ་མོ་གཉིས་བགྲད་པའི་རྟ་རྒྱ་སྤྱི་བོར་བཞག་ནས་རོ་སྟོད་དཀྲུགས་པ་དང་སྤྲགས་འཚེར་སྐད་ཐོན་པའི་ཧི་སྒྲ་དབུགས་ཐེངས་གཅིག་ལ་བསྟུད་པ་གསུམ་གྱི་མཐར། ཁ་ཚུར་བསྐོར་རྒྱངས་དང་བཅས་སྔར་བཞིན་འབེབས་ཆེན་གསུམ། དགུ་པ་རི་འཕུལ་ནི། སྐྱིལ་ཀྲུང་ལས་ཁུ་ཚུར་གདོང་རྒྱངས་ཐོག་ལག་ངར་གཉིས་ཀྱིས་མདུན་རི་འཕུལ་བ་ལྟ་བུའི་ཤེད་བསྐྱེད་ལན་གསུམ་དང༌། པྲ་བྷ་ཧསྟིའི་རྒྱ། གྲུ་མོ་


JLAZ012_Page_0030
[མ་དཔེ་གཟིགས་ན་འདིར་གནོན།]

རྒྱངས་པའི་ཐལ་མོ་ཆུ་སྲིན་རྣམ་རོལ་གྱི་ཆོས་འབྱུང་ནང་ཧ་སྒྲ་གསུམ་བསྟུད། དབུགས་ཐེངས་གཅིག་ཏུ་དྲག་ལ་བཅད་ཐོན་པ་གསུམ་གྱི་མཐར་བར་འབེབས་ལན་གསུམ། བཅུ་པ་དགྱེ་དགུ་ནི། ལངས་ཏེ་ཁུ་ཚུར་སྦུབ་རྒྱངས་ཐོག་རྐང་པས་བྲང་ས་སོ་སོ་ནས་འཐེན་སྟངས་མཆན་རྡེབ་དང་བཅས་ཁུ་ཚུར་གཉིས་རྒྱབ་ཏུ་སྒྲེང་ཞིང༌། སྐེད་སྐབས་བཅག་པ་བཞིན་དུ་དགྱེ་བ་དང་དགུ་པ་སྤེལ་བ་གསུམ་གྱི་རྗེས། དྷ་ན་སཾ་སྐྲྀའི་རྒྱ། རྐང་པ་གཡས་གོམ་སྟབས་སུ་དོར་བའི་རྟིང་པ་ལ་བཙུགས་ནས་རོ་སྨད་གཅུད། ལག་གཡས་གཟེངས་བསྟོད་དེ་ཐོད་རྔ་ཁྲོལ་ཚུལ་གྱི་ཕྱོགས་ལ་རོ་སྟོད་ཀྱང་གཅུ་ཞིང༌། ལག་པ་ཅིག་ཤོས་ཀྱི་སྡིགས་མཛུབ་ཐུར་བསྟན་སྟ་ཟུར་དུ་ཤེད་ཀྱིས་བརྐྱང་པ་དང༌། དེ་བཞིན་དུ་གཡོན་གྱིས་བྱ་བའང་སྤེལ་བ་གསུམ་རེའི་མཐར། སྒུར་འབེབས་གསུམ། བཅུ་གཅིག་པ་རྡོ་རྗེའི་འདུག་སྟངས་ནི། ལངས་ཏེ་ཁུ་ཚུར་བསྐོར་རྒྱངས་ཐོག་ལུས་དྲང་པོར་བསྲང༌། རྐང་པའི་པུང་མོ་གཉིས་བགྲད་ཅིང་རྟིང་པ་གཉིས་མ་རིག་ཙམ་ནས་སྦོ་དང་སོར་མོ་ས་ལ་བཙུགས། ཐལ་མོ་ནང་བསྟན་ལས་ཁུ་ཚུར་གྱི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ། མཛུབ་མོ་གཉིས་རྩེ་སྤྲད་པ་ཐུར་དུ་བསྟན་ནས་སྤྱི་གཙུག་ལ་རེག །གྲུ་མོ་གཉིས་ཐད་ཀར་རྒྱངས། སྣ་རྩེར་སློབ་དཔོན་བི་མ་ལའི་ཆོས་ཀྱི་ཕྱག་རྒྱ་ཨ་དཀར་


JLAZ012_Page_0031
[མ་དཔེ་གཟིགས་ན་འདིར་གནོན།]

པོ་ཆུ་ཤེལ་ལྟར་འཚེར་བ་ལ་རིག་པ་གཏད་ནས། དབུགས་ཐེངས་གཅིག་ལ་ཨ་ལྔ་ཚར་བརྗོད་པ་དང་མཉམ་དུ་རྐེད་པ་ཉེག་ཉེག་ལན་གསུམ་གྱི་མཐར། ཁུ་ཚུར་གདོང་རྒྱངས་དང་རྐང་པ་བགྲད་ཆུང་ཐོག །རྐང་ལག་སོ་སོར་ཐད་ཀར་བསྣོལ་བའི་གཅུས་འབེབས་གསུམ། བཅུ་གཉིས་པ་ལག་བསྣོལ་ནི། ལངས་ཏེ་ཁུ་ཚུར་བསྐོར་རྒྱངས་ཐོག་སྡིགས་མཛུབ་ཕྱིར་བསྟན་གྱི་འཁྲིག་མ་བསྣོལ་བའི་སྤྱི་བོར་བཞག་ནས་གྲུ་མོ་རྒྱངས་པའི་དེ་མ་ཐག །ཤཱནྟིཾ་གརྦྷའི་རྒྱ། ཐལ་མོ་རྒྱབ་སྤྲོད་ཀྱི་སོར་མོ་རྣམས་ཤེད་ཀྱིས་ཕྲལ་ཏེ་སོ་སོར་རྩེ་སྤྲད་པའི་འཁོར་ལོའི་རྒྱ་སྤེལ་བ་ལན་གསུམ་གྱི་མཐར་བགྲད་འབེབས་གསུམ། བཅུ་གསུམ་པ་མེ་རླུང་ཁ་སྦྱོར་ནི། ལངས་ཏེ་ཁུ་ཚུར་བསྐོར་རྒྱངས་ལས་ཅུང་ཟད་སྒུར་ཏེ་ཧཱུྃ་ཞེས་ཐུར་སེལ་ལྟེ་འོག་ཏུ་མནན། གུ་ཧྱ་ཙནྡྲའི་རྒྱ། ལག་གཉིས་སྡིགས་མཛུབ་རྒྱབ་སྤྲོད་ལས་བརྐྱང་པ་བཞི་པོ་ལུག་རྒྱུད་དུ་སྦྲེལ་བ་ས་ལ་རེག་ནས། ལག་ངར་སྒྲེང་ཞིང་དགྱེ་བ་དང་མཉམ་དུ་སྟོང་འདྲེན་བྱེད་ཅིང་མིག་གྱེན་དུ་སྒྲིལ་ནས་ལུང་བསྲང༌། མི་ཐུབ་པ་དང་ཡང་ཧུ་ཞེས་སྔ་མ་ཇི་ལྟ་བའི་འདྲེན་དང་བཅས་དགྱེ་རྒུ་སྤེལ་བ་གསུམ་གྱི་རྗེས་བགྲད་འབེབས་གསུམ། ས་བཅད་གཉིས་པོ་གོ་ལྡོག་པ་འདི་ཞལ་ཤེས་ཡིན་ཀྱང་མོས་པས་སྤྱོད་པ་རྣམས་ལམ་ངེས་སོ། །བཅུ་བཞི་པ་གླང་ཆེན་ཧུ་འདྲེན་ནི། ལངས་ཏེ་ཁུ་ཚུར་བསྐོར་


JLAZ012_Page_0032
[མ་དཔེ་གཟིགས་ན་འདིར་གནོན།]

རྒྱངས་ཐོག་རླུང་གནད་ཡིག་ཆུང་བཞིན་ལ། ཁུ་ཚུར་གཉིས་སྟ་ཟུར་དུ་ཤད་དེ་བརྐྱང་ནས་མཐིལ་བཞི་ས་ལ་བཙུགས། ཧུ་ཞེས་རིང་པོ་དྲངས་པའི་ཡིད་ཀྱིས་སྟོང་འདྲེན་ཐོག་མགོ་ཅོག་ལན་གསུམ་གྱི་རྗེས་ལ་སྒུར་འབེབས་གསུམ། བཅོ་ལྔ་པ་སེངྒེ་རལ་ངོམས་ནི། བསྡད་བཞིན་པ་ལས་རྐང་པའི་རྟིང་པ་གཉིས་ས་ལ་བཙུགས། པུས་མོ་བགྲད་སྟབས་རོང་ངེར་བྱས་པའི་ནང་དུ་ཁུ་ཚུར་ལྷོད་ཆ་ཅན་གྱི་འཁྲིག་མ་གཉིས་ས་ལ་བཞག །རོ་སྟོད་གཟེངས་བསྟོད་པས་གདོང་ལྔའི་ཐ་སྙད་ཚང༌། ཨ་ཧཾ་ཞེས་རླུང་གནད་ངེས་པར་བྱས་ནས་མགོ་རྩལ་མཇིང་པ་ལ་བསྐུར་བ་དལ་བུས་སྐོར་རྗེས་རལ་པ་གསིག་པའི་ཚུལ་གྱིས་རྒྱབ་ལོགས་སུ་བལྟ་རེས་ལན་གསུམ་རེའི་རྗེས་སྒུར་འབེབས་གསུམ། བཅུ་དྲུག་པ་གྱི་ལིང་ཁྲེ་འགྲེམས་ནི། བསྡད་བཞིན་པ་ལས་གན་རྐྱལ་ལོག་པའི་གྲུ་མོ་བགྲད་པའི་ཐལ་མོ་སྙིང་གར་སྦྱར། པུས་མོ་རོང་ངེར་བྱས། འོག་སྒོ་གཉིས་ཁ་ཡན་དུ་བཞག་ནས་འགྲེ་ལྡོག་ལན་གསུམ་དང༌། དེ་མ་ཐག་མཐིལ་བཞི་པ་ལ་བཙུགས་ནས་སྒུར་བའི་ཧ་དཀྲུགས་དང་སྦྲགས་གཞི་དཀྲུགས་ལན་གསུམ་གྱི་རྗེས། ཧར་གྱིས་ལངས་ཁུ་ཚུར་བསྐོར་རྒྱངས་ཐོག་འབེབས་ཆེན་གསུམ། བཅུ་བདུན་པ་རྨ་བྱ་བྱ་རྨྱང་ནི། འབེབས་སྟན་ཁར་ཆུ་ལ་རྐྱལ་བ་ལྟར་ཁུ་ཚུར་ནང་བསྐོར་གྱི་གྲུ་མོ་


JLAZ012_Page_0033
[མ་དཔེ་གཟིགས་ན་འདིར་གནོན།]

གཉིས་བྲང་འོག་ཏུ་བཞག་པའི་ལག་མཐིལ་ས་ལ་སྦྱར། རྐང་པ་གཉིས་ཤད་དེ་རྨྱང༌། ཨོལ་ཀོ་བཏེག་སྟེ་མཇིང་པ་སྒྲོང་བ་ནས་བཟུང་ལུས་དང་ཡན་ལག་ཉིང་ལག་ཐམས་ཅད་ཀྱི་ཆ་ནས་འཆུན་བཙལ་ཏེ་རྨྱང་བ་གསུམ་དང༌། ཡང་ཁུ་ཚུར་སྐོར་བཞིན་དུ་རྒྱབ་ལོགས་ཀྱི་དཔྱི་མགོའི་ཤ་བོ་ཆེར་སྦྱར། མཇིང་བ་སྒྲེང་ནས་ལུས་ཐམས་ཅད་ལ་འཆུན་བཙལ་བ་གསུམ་གྱི་རྗེས། རྐང་པ་བགྲད་ཆུང་གི་འབེབས་གསུམ། བཅོ་བརྒྱད་པ་ཤང་ཤང་གཤོག་འགྱུར་ནི། ལངས་ཏེ་ཁུ་ཚུར་བསྐོར་རྒྱངས་ཐོག་རྐང་པ་གཡས་པའི་བྲང་ས་ནས་ལག་པ་གཡོན་པའི་འཁྲིག་མའི་རྒྱབ་ཀྱིས་བཏེག །སྐེད་པ་བསྲང་གང་ཐུབ་ཐོག་གཡས་པའི་ཁུ་ཚུར་གྱིས་གཡོན་པའི་གྲུ་མོའི་ཐད་ནས་དཔུང་པ་དང་ལག་ངར་སྒྲེང་བཞིན་པའི་འཆུན་གྱིས་རོ་སྟོད་རྒྱབ་ལ་གཅུས་འཆུས་ནེ་ཙོའི་གཤོག་འགྱུར་བཞིན་སྐོར་བ་གསུམ་དང་དེ་བཞིན་རྐང་ལག་གོ་ལྡོག་པ་གསུམ་གྱི་རྗེས་ཁུ་ཚུར་བསྐོར་རྒྱངས་ཐོག་རྐང་པ་གཡོན་ཕྱོགས་ཀྱི་སྐྱིལ་སྟངས་སྔོན་ལ་འགྲོ་བའི་རྡོར་འབེབས་གསུམ། བཅུ་དགུ་པ་དབུ་མ་འཛུགས་སྐོར་ནི། ལངས་འདུག་གི་ཕྱོགས་གཉིས་གང་བདེ་ལས། མཁལ་མ་གཉིས་ཁ་སྦྱར་དབུ་མ་ཇེ་ཕྲར་བསླབ་པ་གསུམ་གྱི་མཐར། གཡས་གཡོན་དུ་གཅུས་བསྐོར་དང་གྱེན་འཐེན་སྤེལ་བ་གསུམ་རེའི་


JLAZ012_Page_0034
[མ་དཔེ་གཟིགས་ན་འདིར་གནོན།]

རྗེས། སྒུར་འབེབས་གསུམ་དང་བགྲད་འབེབས་གསུམ། ཉི་ཤུ་པ་ཛ་ལནྡྷ་ར་ནི། ཁུ་ཚུར་བསྐོར་རྒྱངས་ཐོག །རྐང་མཐིལ་གཡས་པ་པུས་མོ་གཡོན་པའི་སྟེང་དུ་སྦྱར། ལག་པ་གཉིས་སྒྱིད་ཁུང་གི་སྟེང་འོག་ནས་འཁྱུད་དེ་ཐལ་མོ་ཐག་སྒྲ་དང་བཅས་སྦྱར། རོ་སྟོད་ཅུང་ཟད་བསྲང་སྟེ་མགོ་བོ་གཡོན་སྐོར་གསུམ་གྱི་ཚེ་དམིགས་པ་སྤྱི་བོའི་ཧཾ་ལ་གཏོད། དེ་བཞིན་དུ་རྐང་ལག་མགོ་གསུམ་མགོ་ལྡོག་ལན་གསུམ་གྱི་མཐར་བགྲད་འབེབས་གསུམ། ཉེར་གཅིག་པ་ལ་གེགས་སེལ་དང༌། རྡོ་རྗེ་དཔའ་རླབས་གཉིས་ལས། དང་པོ་ལ་དོན་བཞིའི་བྲབ་པ་ནི། བསྡད་བཞིན་པ་ལས་ཁུ་ཚུར་གདོང་རྒྱངས་དང་བཅས་གན་རྐྱལ་དུ་བྱས་ལ་རྐང་ལག་ཤད་དེ་བརྐྱང༌། བྲབ་པ་ནི། ཐལ་ལྕག་གིས་དཔུང་པ་གཡས་གཡོན་ནུ་མ་གཉིས། མཆན་ཁུང་གཉིས། མཁལ་ཁུང་གཉིས་སུ་བྲབས། གཞིལ་བ་ནི། མཆན་རྡེབ་དང་བཅས་ཁུ་ཚུར་གཉིས་སྟ་ཟུར་དུ་ཤད་པ་གསུམ། དེ་བཞིན་དུ་རྐང་མཐིལ་གཉིས་ཀྱིས་བརླ་སྟེང་དུ་བྲབ་ཅིང༌། པུས་སྟེང་ནས་ངར་བའི་གཞུང་ལ་བྱུག་པ་ལྟར་ཤད་ནས་གཞིལ། ཞགས་འཕེན་ནི། ཉལ་བཞིན་པ་ལས་རྐང་ལག་གཡས་པ་གཉིས་འཕེན་སྡུད་དྲག་པོ་ལན་གསུམ་དང༌། དེ་བཞིན་གཡོན་པ་གསུམ་བརྗེ་སྟེ། གང་གི་ཚེ་ཡང་ལག་པ་ཅིག་ཤོས་ཞགས་


JLAZ012_Page_0035
[མ་དཔེ་གཟིགས་ན་འདིར་གནོན།]

སྡོགས་ཀྱི་ཚུལ་དང༌། གླེང་གཞི་སྡུད་པ་ནི། རྐང་ལག་ཐམས་ཅད་ནམ་མཁའ་ལ་སྒྲེང་བའི་ཤུགས་ཀྱིས་འཕང་སྟངས་ལན་གསུམ་གྱི་རྗེས་སྐྱིལ་ཀྲུང་དང་བཅས་འབའ་དཀྲུགས་གསུམ་གྱིས་རྫོགས་པའོ། །རྣམ་འགྱུར་མང་ཡང་འཆུན་དང་མི་ལྡན་ན། འབོལ་སྟན་སྟེང་དུ་བྱ་མཁན་དྲངས་པ་དངོས། །དག་སྦྱོར་མེད་པའི་དུད་འགྲོའི་ལུགས་འགྱུར་ཡང༌། །ངན་འགྲོའི་ལམ་ལ་རྟེན་འབྲེལ་སྒྲིག་པ་བཞིན། །དེ་ཕྱིར་རྟེན་འབྱུང་བྱེད་ལས་འབྲས་གསུམ་ཀའི། །དོན་ལ་རྟོན་ཅིང་སྟོང་པ་གཞིའི་འོད་གསལ། །ཉམས་སུ་མྱོང་བ་རྡོ་རྗེ་ཐེག་པའི་ལམ། །ཡིན་པར་ངེས་ཤེས་སྐྱེས་པ་ཙམ་བྱུང་ཡང༌། །སྔགས་ཀྱི་གཟུགས་བརྙན་ཡོད་སྙམ་དགའ་བ་སྐྱེས། །དེ་ཡང་རྟེན་ཅིང་འབྲེལ་འབྱུང་གི་སྒོ་ནས་རྡོ་རྗེའི་སྐྱིལ་མོ་ཀྲུང་གིས་རྩ་ཕྲན་སྟོང་ཕྲག་བདུན་ཅུ་རྩ་གཉིས་པོ་སྟབས་གཅིག་ཏུ་འཆིང༌། བསྐུ་མཉེས་བདེ་དྲོད་འབར། སོར་བསྣོལ་གྱིས་རྩ་ཁམས་ཡི་གེར་སྦྱོང༌། དཔུང་པའི་སྟངས་གཉིས་ཀྱིས་རླུང་ལོག་རང་མལ་དུ་གསོད། རིག་འཛིན་གྱི་སྟངས་སྟབས་བརྒྱད་ཀྱིས་དངོས་ཞེན་ལྷ་སྐུར་གསལ། དམ་ཚིག་འཁྲུལ་འཁོར་ལྔས་རིགས་ལྔའི་དངོས་གྲུབ་ཐོབ། དབུ་མ་འཛུགས་བསྐོར་གྱིས་རྩ་ཕྲན་ཐམས་ཅད་ཀུན་དམར་སྡུད། ཛ་ལན་དྷ་རས་རླུང་ཐམས་ཅད་གཙུག་ཏོར་ཡེ་ཤེས་ཀྱི་འཁོར་ལོར་འཆིང༌། བྱེད་


JLAZ012_Page_0036
[མ་དཔེ་གཟིགས་ན་འདིར་གནོན།]

ལས་ཀྱི་སྒོ་ནས་རླུང་གིས་རྩ་ཁ་འབྱེད། འཁྲུལ་འཁོར་གྱིས་རྩ་མདུད་འགྲོལ། ཐེམ་བུས་ཐིག་ལེའི་གེགས་སེལ་བའི་ཕྱིར་རླུང་དང་འཁྲུལ་འཁོར་ཡ་མ་བྲལ་བ། དེ་ཡང་ལུས་བསྲང་བ་དང༌། གཅུད་པ་དང༌། དགྱེ་རྒུ་དང༌། ཡན་ལག་བརྐྱང་བསྐུམས་དང༌། སྡིགས་མཛུབ་ལ་སོགས་པ་གང་གི་ཐད་དུའང་དབྱིག་པས་སྲད་བུ་གཅུད་པ་ལྟར་སོར་ཚིགས་ཡན་ཆད་ལ་འཆུན་འཐོན་པར་ཆ་ཆ་ནས་སྒྲིམས་ཤིང༌། གཅུ་བ་དང་གཅུད་པ་མ་ནོར་བ། ལུས་སྤྲུགས་དང་རྩ་འདར་མ་ནོར་བ། ལྟ་སྟངས་དང་སྟངས་སྟབས་མ་ནོར་བ། ཁུ་ཚུར་དང་སྡིགས་མཛུབ་མ་ནོར་བ། བྲབ་པ་དང་གཞིལ་བ་མ་ནོར་བ་གནད་ཡིན་ལ། འབྲས་བུའི་སྒོ་ནས་བརྗོད་ན། རྩ་རླུང་ཐིག་ལེ་ལས་སུ་རུང་བས་དབུ་མར་ཞུགས་གནས་ཐིམ་གསུམ་གྱི་ཡོན་ཏན་ལས་རྩ་མདུད་ཉི་ཤུ་རྩ་གཅིག་པོ་གྲོལ་ཞིང༌། དུས་སྦྱོར་བཅུ་གཉིས་ཀྱི་རླུང་དག་པས་ས་ལམ་གྱི་ཡོན་ཏན་རྗེས་དཔག་ལ་མ་ལྟོས་པར་བཙན་ཐབས་སུ་བགྲོད་ནས་ཁ་སྦྱོར་ཡན་ལག་བདུན་ལྡན་གྱི་སྐུ་མངོན་དུ་བྱེད་པའི་ཕྱིར་ཐབས་ཀྱི་ལམ་ཞེས་བྱའོ། །གཉིས་པ་རྡོ་རྗེ་དཔའ་རླབས་ནི། ཆོས་ཉིད་ཀྱི་གནས་ལུགས་རླུང་སེམས་ཀྱིས་བསླད་པ་དང་བྲལ་བར་མངོན་སུམ་དུ་མཐོང་བའི་མན་ངག་ཡིན་ཏེ། ཐལ་འགྱུར་ལས། ལྟེམས་པས་འགགས་


JLAZ012_Page_0037
[མ་དཔེ་གཟིགས་ན་འདིར་གནོན།]

ལ་བཙིར་བས་འཆིང༌། །མནན་པས་གནད་ལ་གཅུད་པས་གསལ། །ཞེས་པའི་དོན་བར་རླུང་བུམ་པ་ཅན་དང་སྦྲགས་རིག་པ་ཆོས་ཉིད་ཀྱི་དོན་ལ་བཞག་ཅིང༌། དཔའ་རླབས་ཀྱི་མན་ངག་བཞི་པོ་བླ་མའི་ཞལ་ལས་ཤེས་པར་བྱས་ནས། རླུང་སེམས་འདུ་ཚུལ་བཞི་ལས། དུ་བ་དང་སྨིག་རྒྱུ་ལ་སོགས་པའི་རྟགས་སྣང་ཕྲ་མོ་དང་བཅས་རྣམ་ཤེས་སྣང་བ་ལ་ཐིམ་ནས་ཡུལ་ལྔའི་རྟོགས་པ་འགགས་པའི་མཚོན་དཔེ་ནི་སྟོན་ཀའི་ནམ་མཁའ་ལ་ཟླ་འོད་ཤར་བ་ལྟ་བུའོ། །དེའི་ཚེ་འཆིང་བའི་ཐབས་ཀྱིས་སྣང་བ་མཆེད་པར་ཐིམ་པས་ཡུལ་ཕྲ་བའི་རྟོག་པའང་འགགས་པའི་མཚོན་དཔེ་ནི་སྟོན་གནམ་རྙོག་བྲལ་ལ་ཉི་གཞོན་ཤར་བ་ལྟ་བུའོ། །དེ་ལ་གནས་པའི་ཐབས་ཀྱིས་མཆེད་པ་ཉེར་ཐོབ་ལ་ཐིམ་པས་རྟོག་པ་ཤིན་ཏུ་ཕྲ་བའང་འགགས་པའི་མཚོན་དཔེ་སྟོན་གྱི་ནམ་མཁའ་གཡའ་དག་པ་མཚམས་ཀྱི་སྨག་གིས་སློངས་པ་ལྟ་བུ་ནག་ལམ་པའི་སྣང་བ་དང་བཅས་ཏེ་དྲན་པ་ཉམས། དེ་ཉིད་གཅུད་པའི་ཐབས་ཀྱིས་ཉེར་ཐོབ་འོད་གསལ་ལ་ཐིམ་པས་ཆོས་དབྱིངས་སྤྲོས་པ་དང་བྲལ་བ་རང་གསལ་བའི་མཚོན་དཔེ་ནི་སྟོན་གནམ་སློང་བྱེད་ཀྱི་རྐྱེན་གསུམ་དང་བྲལ་བ་ཐོ་རངས་ཀྱི་ཐུན་དང་པོ་ལྟ་བུ་སྟེ། རིམ་བཞིན་སྟོང་པ་དང༌། ཤིན་ཏུ་སྟོང་པ་དང༌། སྟོང་པ་ཆེན་པོ་དང༌། ཐམས་ཅད་སྟོང་པའང་ཟེར། རབ་


JLAZ012_Page_0038
[མ་དཔེ་གཟིགས་ན་འདིར་གནོན།]

ཏུ་སྟོང་པ་ཞེས་བྱ་སྟེ་ཕྱི་མ་ནི་གཞི་གནས་ཀྱི་ཡེ་ཤེས་འཆི་བ་འོད་གསལ་གྱི་ངོ་བོ་ཉིད་ཡིན་པས་དེ་ཉིད་དཔའ་རླབས་ཀྱི་རྐྱེན་གྱིས་གསལ་བར་བྱས་པའམ། བདེ་སྟོང་གིས་དྲངས་པའི་ལྷན་སྐྱེས་གང་ཡིན་ཡང་འདྲ་སྟེ། གཏིང་གསལ་གཞོན་ནུ་བུམ་པའི་དཔེའི་ཡེ་ཤེས་ཀྱི་ངང་དུ་བཅོས་བསླད་མེད་པར་མཉམ་པར་འཇོག་པ་ལ་ཡུན་རིང་དུ་གོམས་པ་དེ་ཉིད་སད་དུས་ཀྱི་ཆོས་སྐུའི་བསྲེ་བ་དང་མཚམས་སྦྱར་བ་ནི་གནད་དམ་པའོ། །འདི་ནི་རྟོགས་པ་ལ་མྱོང་བ་ཅུང་ཟད་ཐོན་པའི་གང་ཟག་རྣམས་ཀྱིས་ཉམས་སུ་བླང་བྱ་ལས། ལས་དང་པོ་པའི་གང་ཟག་ལ་བསྟན་བྱ་མ་ཡིན་པས། གེགས་སེལ་གྱི་མཇུག་ཏུ་འཇམ་རླུང་ཡུན་རིང་དུ་བཟུང་ནས་རྣམ་པར་མི་རྟོག་པའི་གཏུམ་མོ་་ལ་འདྲིས་པར་བྱ་བ་ནི་ཀུན་ལ་གཅེས་སོ། །གསུམ་པ་རྗེས་ཀྱི་རིམ་པ་བསྔོ་བ་སྨོན་ལམ་སྤྱི་དང་ཁྱད་པར། ཉོན་མོངས་རླུང་སེམས་འཁོར་བའི་རང་བཞིན་ནི། །ཞེས་པའི་ཤླཽ་ཀ་གཅིག་པུ་གང་མང་འདོན་པར་བྱའོ། །ཞེས་པའང་ལྷོ་རྒྱུད་དུ་བསྟན་པའི་བ་དན་འཛིན་པའི་བུ་ཨ་བྷཱ་ཡའི་ངོར་མཁའ་འགྲོའི་གསང་མཛོད་ཀྱི་བདག་པོ་རང་བྱུང་རྡོ་རྗེས་སོ།། །།

ཀློང་ཆེན་སྙིང་གི་ཐིག་ལེ་ལསཿ གཏུམ་མོའི་གསོལ་འདེབས་རྡོ་རྗེའི་ཚིག་རྐང་།


JLAZ012_Page_0040
[མ་དཔེ་གཟིགས་ན་འདིར་གནོན།]

ཀློང་ཆེན་སྙིང་གི་ཐིག་ལེ་ལསཿ གཏུམ་མོའི་གསོལ་འདེབས་རྡོ་རྗེའི་ཚིག་རྐང་བཞུགས། །ཨེ་མ་ཧོ། དག་པ་རབ་འབྱམས་དབུ་མའི་གྲོང་ཁྱེར་ན། །སེམས་ཀྱི་རྡོ་རྗེ་ཆོས་སྐུའི་ངོ་བོ་ཉིད། །ཕུང་པོ་ཁམས་དང་སྐྱེ་མཆེད་གདན་གསུམ་ལྷའི། །རྣམ་རོལ་རྩ་བརྒྱུད་བླ་མར་གསོལ་བ་འདེབས། །རླུང་སེམས་དབྱེར་མེད་ཞུ་བདེའི་ཙནྜ་ལཱི། །འཁོར་ལོ་ལྔ་ཡི་དཔའ་བོ་མཁའ་འགྲོའི་གྲོང༌། །ཚོགས་ཀྱི་འཁོར་ལོའི་འདུ་བས་མཉེས་བྱས་ནས། །དབང་དང་དགའ་བཞིའི་ཡེ་ཤེས་རོལ་གང་ཤོག །ཁྱད་པར་མཆོག་གི་གཏུམ་མོས་འཁོར་ལོ་བཞིའི། །རླུང་སེམས་ལས་རུང་དྷཱུ་ཏིའི་རྩ་མདུད་རྣམས། །ཚོགས་དང་སྦྱོར་མཐོང་སྒོམ་པའི་ལམ་དུ་གྲོལ། །ས་བཅུའི་རྒྱུན་མཐའ་གཙུག་ཏོར་རྩེར་སྨིན་ཤོག །ཉོན་མོངས་རླུང་སེམས་འཁོར་བའི་རང་བཞིན་ནི། །རྣམ་གྲོལ་ཞི་བ་ཡེ་ཤེས་རླུང་མཆོག་གིས། །རང་དབང་གྱུར་ལས་རྩ་ཁམས་ཡི་གེའི་སྤྲིན། །འཁོར་ལོ་ཚོགས་ཆེན་ས་ལ་ལྷུན་རྫོགས་ཤོག །ས་མ་ཡ། རྫོགས་རིམ་ལམ་གྱི་མདོ་ཆིངས་ཀུན། །རྡོ་རྗེའི་ཚིག་རྐང་འདིས་གྲོལ་བྱེད། །རྒྱ་རྒྱ་རྒྱ།།

ཀློང་ཆེན་སྙིང་གི་ཐིག་ལེ་ལསཿ གཅོད་ཡུལ་མཁའ་འགྲོའི་གད་རྒྱངས།


JLAZ012_Page_0042
[མ་དཔེ་གཟིགས་ན་འདིར་གནོན།]

༂ ཀློང་ཆེན་སྙིང་གི་ཐིག་ལེ་ལསཿ གཅོད་ཡུལ་མཁའ་འགྲོའི་གད་རྒྱངས་བཞུགསཿ


JLAZ012_Page_0043
[མ་དཔེ་གཟིགས་ན་འདིར་གནོན།]

དབྱིངས་ཕྱུག་བདེ་ཆེན་མཚོ་རྒྱལ་མ་ལ་ཕྱག་འཚལ་ལོཿ རང་བཞིན་རྫོགས་པ་ཆེན་པོ་ནིཿ ཉག་གཅིག་རྩད་ནས་གཅོད་པའི་ཕྱིརཿ གཅོད་བྱ་གཅོད་བྱེད་ལས་འདས་ཀྱངཿ སྤྲོས་པ་ཅན་གྱི་གང་ཟག་དངཿ བརྟུལ་ཞུགས་སྤྱོད་པ་ལམ་སློང་ཕྱིརཿ ཕུང་པོ་གཟན་བསྐྱུར་མན་ངག་བསྟནཿ དེ་ལ་མཁོ་བའི་ཡོ་བྱད་ནིཿ དྲེགས་པ་ཟིལ་གྱིས་གནོན་པའི་ཕྱིརཿ སྡེར་གཞི་མ་ཉམས་གཅན་གཟན་ལྤགསཿ ལྟ་བ་ཡས་འབུབས་ཅོག་པུ་དངཿ སྤྱོད་པ་མས་འཛེགས་ཁ་ཊྭཱཾ་ཀཿ ལྷ་འདྲེ་དབང་སྡུད་མཆོག་ཆེན་རྐངཿ སྣང་བ་ཟིལ་གནོན་ཌཱ་མ་རུཿ མ་ཚོགས་དབང་སྐྱུར་དྲིལ་གཡེར་དངཿ སྟག་གཟིག་རས་མ་སྐྲའི་ཅོད་པནཿ མདོར་ན་བརྟུལ་ཞུགས་སྤྱོད་པ་ལཿ འོས་པའི་ཆས་རྣམས་སྟ་གོན་བྱཿ དེ་ནས་ས་གནད་གཉན་དམིགས་སུཿ ཕོ་ཚོད་ལྷ་འདྲེར་བརྙས་སེམས་དངཿ ཆོས་བརྒྱད་བསམ་པས་མ་ཡིན་པརཿ ཚད་མེད་བཞི་


JLAZ012_Page_0044
[མ་དཔེ་གཟིགས་ན་འདིར་གནོན།]

ཡིས་དཔའ་གདེངས་བསྐྱེདཿ སྣང་བ་གང་ཤར་ཐོག་བརྫིས་བྱཿ དེ་ཚེ་ཟིལ་གནོན་དམིགས་པ་ཡིསཿ མ་གཅུན་དགྲ་ལ་བྱ་ཤོར་མཚུངསཿ དེ་ཕྱིར་རིག་པ་བརྟུལ་ཞུགས་དངཿ ཕཊཿ ཅེས་རང་གི་སྙིང་ག་ནསཿ གནམ་ལྕགས་རྡོ་རྗེ་རྩེ་དགུ་པཿ སྲ་བརྟན་ལྕི་ཞིང་འཐས་པ་ལཿ འོད་ཟེར་མེ་དཔུང་འབར་བ་ཞིགཿ གང་དམིགས་གཉན་སར་ཐོག་ལྟར་ཕོབཿ དེ་གནས་ལྷ་འདྲེ་དཔུང་དང་བཅསཿ འབྲོས་ཤིང་འཁྱར་བའི་དབང་མེད་པརཿ དཔའ་ཟིལ་ཆག་སྟེ་གནས་པར་བསམཿ དེ་ནས་ཚུལ་འཆོས་ངོ་ཚ་སོགསཿ ཐ་མལ་འཁུ་འཕྲིགས་བློ་སྤངས་ལཿ བརྟུལ་ཞུགས་ངར་མའི་གདེང་ལྡན་པསཿ འགྲོ་ལུགས་རྣམ་པ་བཞི་དག་ལསཿ ལྟ་བའི་གདེང་འགྲོས་ཤུགས་ཀྱིས་འགྲོཿ དེ་ཡང་སྣང་སྲིད་ལྷ་འདྲེ་དངཿ གནས་གདོན་ལམ་འདྲེ་འཁྱམ་པོ་ཀུནཿ བཀུགས་ལ་ར་ལུག་བདས་པ་བཞིནཿ གཉན་སར་རང་དབང་མེད་པར་གཅུརཿ གནས་དེར་སླེབས་མ་ཐག་ཉིད་


JLAZ012_Page_0045
[མ་དཔེ་གཟིགས་ན་འདིར་གནོན།]

དུཿ དྲག་ཤུལ་འབར་བའི་སྟངས་སྟབས་ཀྱིསཿ ལྷ་འདྲེ་ཀུན་ཀྱི་རྐང་པ་ནསཿ བཟུང་སྟེ་ཀླད་ལ་ལན་གསུམ་བསྐོརཿ དབང་ཆེན་གཞི་ལ་བརྡབས་པར་བསམཿ ཙོག་པུ་སྟན་བཅས་ཤུགས་ཀྱིས་བསྒྱུརཿ ལྷ་འདྲེ་ཇི་ལྟར་དབྱིངས་ཆེ་ཡངཿ མི་ལྷོངས་མི་སྲིད་ཟི་ཁོལ་འགྲོཿ རྣལ་འབྱོར་བརྟུལ་ཞུགས་ཆུང་གྱུར་ནཿ རིམ་པས་བློ་དང་སྦྱར་ཏེ་བྱཿ དེ་ནས་རང་ཉིད་སྐད་ཅིག་གིསཿ གསང་བ་ཡེ་ཤེས་མཁའ་འགྲོ་མཿ ཆེ་ཆུང་སྲིད་པའི་གཏོས་དང་མཉམཿ རྣམ་འགྱུར་རྫོགས་པའི་སྐུར་བསྐྱེད་ལཿ མི་རྐང་གླིང་བུ་དྲག་ཏུ་འབུདཿ ལྟ་བའི་ངར་བསྐྱེད་བྲོ་བརྡུང་བྱཿ ཕཊཿ འཇིགས་མེད་བརྟུལ་ཞུགས་སྤྱོད་པའི་རྣལ་འབྱོར་ངཿ འཁོར་འདས་མཉམ་པར་བརྡལ་བའི་དགོངས་སྤྱོད་ཀྱིཿ བདག་འཛིན་ལྷ་འདྲེའི་སྟེང་དུ་བྲོ་ཞིག་རྡུངཿ གཉིས་འཛིན་འཁོར་བའི་རྣམ་རྟོག་རྡུལ་དུ་རློགཿ རྩ་བརྒྱུད་རིག་འཛིན་བླ་མ་བྲོ་ལ་བྱོནཿ ཡི་དམ་དཔའ་བོ་རྒྱ་མཚོ་བྲོ་ལ་བྱོནཿ མཁའ་འགྲོ་གནས་ཉུལ་མ་ཚོགས་བྲོ་ལ་བྱོནཿ བརྟུལ་ཞུགས་ལམ་དུ་ལོངས་པར་བྱིན་གྱིས་རློབསཿ ཕཊཿ ཤར་ཕྱོགས་ལུས་འཕགས་གླིང་དུ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟླུམ་ལ་འཁྱིལཿ ཞེ་སྡང་རྒྱལ་པོའི་མགོ་ལ་ཆེམས་སེ་ཆེམཿ མེ་ལོང་ཡེ་ཤེས་གླིང་བུ་ཀྱུ་རུ་རུཿ ཧཱུྃ་ཧཱུྃ་ཧཱུྃཿ ཕཊཿ ལྷོ་ཡི་འཛམ་བུའི་གླིང་ལ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟུར་གསུམ་དཔལཿ ང་རྒྱལ་གཤིན་རྗེའི་མགོ་ལ་ཆེམས་སེ་ཆེམསཿ མཉམ་ཉིད་ཡེ་


JLAZ012_Page_0046
[མ་དཔེ་གཟིགས་ན་འདིར་གནོན།]

ཤེས་ཐོད་རྔ་ཁྲོ་ལོ་ལོཿ ཧཱུྃ་ཧཱུྃ་ཧཱུྃཿ ཕཊཿ ནུབ་ཀྱི་བ་ལང་སྤྱོད་ལ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟླ་གམ་འཁྱིལཿ འདོད་ཆགས་སྲིན་མོའི་མགོ་ལ་ཆེམས་སེ་ཆེམསཿ སོར་རྟོགས་ཡེ་ཤེས་དྲིལ་གཡེར་ཁྲོ་ལོ་ལོཿ ཧཱུྃ་ཧཱུྃ་ཧཱུྃཿ ཕཊཿ བྱང་གི་སྒྲ་མི་སྙན་ལ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་གྲུ་བཞི་ལམཿ ཕྲག་དོག་དམ་སྲིའི་མགོ་ལ་ཆེམས་སེ་ཆེམསཿ བྱ་གྲུབ་ཡེ་ཤེས་ཅོད་པན་པུ་རུ་རུཿ ཧཱུྃ་ཧཱུྃ་ཧཱུྃཿ ཕཊཿ དབུས་ཕྱོགས་ལྷུན་པོའི་རྩེ་རུ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་བྱིན་རེ་ཆགསཿ གཏི་མུག་ཤི་འདྲེའི་མགོ་ལ་ཆེམས་སེ་ཆེམཿ ཆོས་དབྱིངས་ཡེ་ཤེས་ཧཱུྃ་གླུ་ཀྱུ་རུ་རུཿ ཧཱུྃ་ཧཱུྃ་ཧཱུྃཿ ཕཊཿ ཅེས་རྡུང་ཤེས་པ་གཏད་མེད་བཏངཿ དེ་ནས་ཅོག་པུ་འབུབས་པ་ནིཿ གཞི་དེའི་ལྷ་འདྲེ་གདུག་པ་ཅནཿ གན་རྐྱལ་བསྒྱེལ་བའི་ཡན་ལག་ལྔརཿ གནམ་ལྕགས་ཕུར་བུ་བཏབ་པར་བསམཿ ཕཊཿ ཤར་ཕྱོགས་རྡོ་རྗེ་མཁའ་འགྲོ་མསཿ བྱམས་པ་ཆེན་པོའི་ཕུར་པ་ཁྱེརཿ ལྷོ་ཕྱོགས་རིན་ཆེན་མཁའ་འགྲོ་མསཿ སྙིང་རྗེ་ཆེན་པོའི་ཕུར་པ་ཁྱེརཿ ནུབ་ཕྱོགས་པདྨ་མཁའ་འགྲོ་མསཿ དགའ་བ་ཆེན་པོའི་ཕུར་པ་ཁྱེརཿ བྱང་ཕྱོགས་ལས་ཀྱི་མཁའ་འགྲོ་མསཿ བཏང་སྙོམས་ཆེན་པོའི་ཕུར་པ་ཁྱེརཿ དབུས་ཕྱོགས་སངས་རྒྱས་མཁའ་འགྲོ་མསཿ བྱང་ཆུབ་སེམས་ཀྱི་ཕུར་པ་ཁྱེརཿ བདག་འཛིན་ལྷ་འདྲེའི་མགོ་


JLAZ012_Page_0047
[མ་དཔེ་གཟིགས་ན་འདིར་གནོན།]

བོ་དངཿ ལྷུ་ཚིགས་བཞི་ལ་བཏབ་པ་ཡིསཿ གཡོ་འགུལ་མེད་པར་གནས་པར་གྱུརཿ ཕཊཿ ཅེས་བརྗོད་བདག་གཞན་ལྷ་འདྲེ་བསམཿ གང་དུ་མི་དམིགས་མཉམ་པར་བཞགཿ དེ་ནས་ལྷ་འདྲེ་ངོས་ཟིན་ནསཿ ལུས་སྦྱིན་དངོས་ལ་འཇུག་པ་ནིཿ ཕཊཿ རང་སྣང་འོད་གསལ་བདེ་བ་ཆེན་པོའི་དབྱིངསཿ འབད་རྩོལ་སྤྲོས་པ་བྲལ་བའི་ནམ་མཁའ་ལཿ རྩ་བའི་བླ་མ་དྲུག་པ་རྡོ་རྗེ་འཆངཿ དགོངས་བརྡ་སྙན་བརྒྱུད་བླ་མ་ཡི་དམ་ལྷཿ མཁའ་འགྲོ་ཆོས་སྐྱོང་སྲུང་མ་སྤྲིན་ལྟར་གཏིབསཿ མ་འགགས་འཇའ་ཚོན་ཐིག་ལེའི་ཀློང་དུ་གསལཿ ཞེས་པས་ཚོགས་ཞིང་གསལ་བཏབ་ལཿ ལྷ་འདྲེས་གཙོ་བྱས་སེམས་ཅན་ཀུནཿ ཁྱེད་ཤེས་བློ་ཡིས་སྐྱབས་འགྲོར་དམིགསཿ ཕཊཿ རང་བྱུང་གི་རིག་པ་བཅོས་མེད་འདིཿ སྐྱབས་ཡུལ་གྱི་ངོ་བོ་མ་རིག་པསཿ སྡུག་བསྔལ་གྱི་རྒྱ་མཚོར་བྱིངས་པ་རྣམསཿ སྐུ་གསུམ་གྱི་དགོངས་པས་བསྐྱབ་ཏུ་གསོལཿ ལན་གསུམ། དེ་ནས་སེམས་བསྐྱེད་ནིཿ ཕཊཿ སྣང་བ་ལ་དངོས་པོར་འཛིན་པའི་སེམསཿ བརྟུལ་ཞུགས་ཀྱི་སྤྱོད་པས་ཚར་བཅད་ནསཿ ཡང་དག་གི་གནས་ལུགས་རྟོགས་བྱའི་ཕྱིརཿ རེ་དོགས་དང་བྲལ་བར་སེམས་བསྐྱེད་དོཿ དེ་ནས་མཎྜལ་ནིཿ ཁོག་པ་རི་རབཿ ཡན་ལག་གླིང་བཞིཿ ཉིང་ལག་གླིང་ཕྲནཿ མགོ་བོ་ལྷ་གནསཿ མིག་གཉིས་ཉི་ཟླཿ དོན་སྣོད་ལྷ་མིའི་དཔལ་འབྱོར་དུ་བསམས་ལཿ ཕཊཿ གཅེས་འཛིན་གྱི་ཕུང་པོ་རྒྱུ་མའི་ལསཿ མཎྜལ་གྱི་ཚོམ་


JLAZ012_Page_0048
[མ་དཔེ་གཟིགས་ན་འདིར་གནོན།]

བུར་རབ་བཀོད་ནསཿ ཚོགས་ཞིང་གི་ལྷ་ལ་ལྟོས་མེད་འབུལཿ བདག་འཛིན་གྱི་རྩ་བ་ཆོད་པར་ཤོགཿ ཕཊཿ དེ་ནས་བླ་མའི་རྣལ་འབྱོར་ནིཿ ཕཊཿ དབྱིངས་ཟག་མེད་ཆོས་སྐུའི་ནམ་མཁར་ལཿ མདངས་འཇའ་ཟེར་ཐིག་ལེར་འཁྲུགས་པའི་དབུསཿ ཕ་དུས་གསུམ་ཀུན་མཁྱེན་པདྨ་འབྱུངཿ ཚུལ་བརྟུལ་ཞུགས་སྤྱོད་པའི་ཧེ་རུ་ཀཿ མ་མཁའ་འགྲོ་རྒྱ་མཚོའི་ཚོགས་དང་བཅསཿ སྐུ་མཚན་དཔེའི་གཟི་བྱིན་ཏ་ལ་ལཿ གསུང་གང་འདུལ་ཆོས་སྒྲ་འུ་རུ་རུཿ ཐུགས་འོད་གསལ་རྡོ་རྗེའི་སྙིང་པོའི་ངངཿ བུ་མོས་གུས་དྲག་པོས་གསོལ་བ་འདེབསཿ ཕྱི་རྣམ་རྟོག་དགྲར་ལངས་ལྷ་འདྲེའི་གཟུགསཿ ནང་རེ་དང་དོགས་པའི་གཉིས་འཛིན་སེམསཿ བར་སྣང་བ་སྣ་ཚོགས་རྐྱེན་ངན་ཀུནཿ ཆོས་ཟབ་མོ་བདུད་ཀྱི་གཅོད་ཡུལ་གྱིསཿ དུས་ད་ལྟ་སྟན་ཐོག་འདི་རུ་ཆོདཿ དབྱིངས་ཆོས་སྐུའི་རྒྱལ་ས་ཟིན་པ་རུཿ ཕ་རྗེ་བཙུན་བླ་མས་བྱིན་གྱིས་རློབསཿ ཕཊཿ ཕཊཿ ཕཊཿ ཅེས་བརྗོད་ཚོགས་ཞིང་རང་ལ་བསྟིམཿ གཉིས་མེད་ངང་དུ་མཉམ་པར་གཞགཿ ཕཊཿ དེ་ནས་བག་ཆགས་སྙིགས་མའི་ལུསཿ ཚོ་ཞིང་སྣུམ་ལ་ལྟོས་ཆེ་བའིཿ དབུས་མའི་དྭངས་མའི་རིག་པ་ནིཿ ཁྲོས་མའི་རྣམ་པར་ཕཊཿཅེས་དབྱེཿ ཞལ་གཅིག་ཕྱག་གཉིས་གྲི་ཐོད་ཅནཿ དེ་ཡིས་རང་ལུས་ཐོད་པ་ཕྲལཿ


JLAZ012_Page_0049
[མ་དཔེ་གཟིགས་ན་འདིར་གནོན།]

སྟོང་ཁམས་ཁྱབ་པའི་མི་མགོ་ཡིཿ སྒྱེད་པུ་གསུམ་གྱི་ཁར་བཞག་ནངཿ འབྱུང་ལས་ཚོགས་སུ་བཤམས་པ་དེཿ འབྲུ་གསུམ་འོད་ཀྱིས་བདུད་རྩིར་སྦྱརཿ ཨོཾ་ཨཱཿཧཱུྃ་དང་ཧ་ཧོ་ཧྲཱིཿ ཅི་མང་བརྗོད་པས་སྦྱངས་སྤེལ་བསྒྱུརཿ ཁྲ་བོར་འགྱེད་ན་དེ་ཉིད་ལསཿ སྐྱེལ་ཚལ་ཟས་གོས་སྨན་ལ་སོགསཿ ཡིད་ལ་ཅི་འདོད་ངོ་བོར་སྦརཿ དམར་འགྱེད་རང་ཉིད་ཁྲོས་ནག་མསཿ སྙིགས་མས་ལུས་ཀྱི་པགས་པ་བཤུསཿ སྟོང་གསུམ་ཁྱབ་པར་བཀྲམ་པའི་སྟེངཿ གཟུགས་ཕུང་ཤ་ཁྲག་ཕུང་པོར་སྤུངསཿ ཤན་པའི་འདུན་ས་ལྟ་བུར་བསམཿ ནག་འགྱེད་བདག་གཞན་སེམས་ཅན་གྱིཿ ཐོག་མེད་ནས་བསགས་ནད་གདོན་དངཿ སྡིག་སྒྲུབ་ཐམས་ཅད་ནག་བུན་གྱིཿ བསྡུས་ཏེ་གཟུགས་ཕུང་ལ་བསྟིམ་པཿ ལྷ་འདྲེས་ཟོས་པ་ཁོ་ཡི་ལུསཿ སོལ་བ་ལྟ་བུར་གྱུར་པར་བསམཿ མཆོད་སྦྱིན་མགྲོན་རྣམས་འདི་ལྟར་འབོདཿ ཕཊཿ མཆོད་ཡུལ་རྩ་གསུམ་དམ་ཅན་ནསཿ སྡེ་བརྒྱད་འབྱུང་པོས་གཙོ་བྱས་པའིཿ སྦྱིན་ཡུལ་ལན་ཆགས་འདྲེ་གདོན་ཡནཿ བརྟུལ་ཞུགས་སྤྱོད་པའི་གནས་འདིར་བྱོནཿ དེ་རིང་འཇིགས་མེད་རྣལ་འབྱོར་ངསཿ འཁོར་འདས་ཤན་འབྱེད་རྒྱུ་མའི་ལསཿ སྟོང་གསུམ་ཁྱོན་ཡངས་ཀ་པཱ་ལརཿ བམ་ཆེན་ཚོགས་ཀྱི་འཁོར་ལོ་བཤམསཿ ཟག་མེད་ཡེ་ཤེས་བདུད་རྩིར་བསྒྱུརཿ འདོད་དགུར་འཆར་བའི་ཆོ་འཕྲུལ་ཅནཿ གཅེས་འཛིན་མེད་པར་འབུལ་ལགས་ཀྱིཿ སྟོན་ཆེན་མགྲོན་ལ་གཤེགས་སུ་གསོལཿ མཆོག་ཆེན་ཐོད་རྔ་སྐད་རེ་


JLAZ012_Page_0050
[མ་དཔེ་གཟིགས་ན་འདིར་གནོན།]

གསངསཿ ཞིང་ཆེན་གླིང་བུ་གདངས་རེ་སྙནཿ དྲིལ་གཡེར་ཅོད་པན་གདངས་རེ་སྤྲོཿ བྱ་རྒོད་ཤ་ལ་འཐིབས་པ་བཞིནཿ སྐད་ཅིག་ཉིད་ལ་གཤེགས་སུ་གསོལཿ ཕཊཿ དེ་ནས་འབུལ་ཞིང་བསྔོ་བ་ནིཿ ཕཊཿ གདོད་མའི་མགོན་པོ་མན་ཆད་ནསཿ རྩ་བའི་བླ་མ་ཡན་ཆད་ཀྱིཿ བརྒྱུད་གསུམ་རིག་འཛིན་བླ་མ་དངཿ ཡི་དམ་མཁའ་འགྲོ་ཆོས་སྐྱོངས་ལཿ བམ་ཆེན་བདུད་རྩིའི་མཆོད་པ་འབུལཿ ལྷ་འདྲེས་གཙོ་བྱས་བདག་གཞན་གྱིཿ ཚོགས་གཉིས་རྫོགས་ཤིང་སྒྲིབ་གཉིས་བྱངཿ བརྟུལ་ཞུགས་འགྲོ་དོན་མཐར་ཕྱིན་ནསཿ སྣང་བ་འོད་གསལ་སྒྱུ་མར་འབྱོངསཿ ཡ་ང་བག་ཚ་ཆོས་སྐུར་གྲོལཿ ཧེ་རུ་ཀ་ལྟར་བྱིན་གྱིས་རློབསཿ ཕཊཿ འཇིག་རྟེན་འདས་དང་མ་འདས་ཀྱིཿ སྡེ་བརྒྱད་འབྱུང་པོ་མི་མ་ཡིནཿ ལོག་འདྲེན་ཤ་ཟའི་གདོན་ཚོགས་ལཿ སྟོང་གསུམ་ཁྱབ་པའི་ཞིང་ལྤགས་སྟེངཿ ཤ་ཁྲག་རུས་པའི་ཕུང་པོར་འབུལཿ བདག་ཏུ་འཛིན་ན་ང་རེ་ཞནཿ སྤྱོད་དུ་མ་ནུས་ཁྱོད་རེ་ལོངསཿ རིང་ན་རྗེན་པར་ཁྱུར་མིད་ཐོངསཿ ལྷོད་ན་དུམ་བུར་ཚོས་ལ་ཟོཿ རྡུལ་ཕྲན་ཙམ་ཡང་མ་བཞག་ཅིགཿ ཕཊཿ འཁོར་ཚེ་ཐོག་མ་མེད་པ་ནསཿ ཤ་འཁོན་ཆགས་པའི་ལན་ཆགས་དངཿ གློ་བུར་ལྷགས་པའི་སྙིང་རྗེའི་མགྲོནཿ ཁས་ཉན་དབང་ཆུང་མ་ལུས་ལཿ སོ་སོར་གང་ལ་ཅི་འདོད་ཀྱིཿ འདོད་


JLAZ012_Page_0051
[མ་དཔེ་གཟིགས་ན་འདིར་གནོན།]

ཡོན་མི་ཟད་གཏེར་དུ་བསྔོཿ འབྲེལ་བ་ཐོག་ཚད་སངས་རྒྱས་ཤིངཿ བུ་ལོན་ལན་ཆགས་བྱང་བར་ཤོགཿ ཕཊཿ ཅེས་བརྗོད་ལྟོས་པ་མེད་པར་བྱིནཿ སྟོང་ཉིད་ངང་ལ་མཉམ་པར་བཞགཿ དེ་ཚེ་ལུས་ལ་གཅེས་འཛིན་དངཿ འཇིགས་སྣང་འཁུ་འཕྲིག་བློ་སྐྱེས་ནཿ ལུས་ནི་ལྷ་འདྲེར་བྱིན་ནས་མེདཿ སེམས་ནི་གཞི་མེད་རྩ་བ་བྲལཿ འདྲེ་བས་སངས་རྒྱས་ཉིད་ཀྱིས་ཀྱངཿ གཟིགས་པ་མེད་སྙམ་གདེངས་བསྐྱེད་ལཿ གང་ཤར་རང་ངོ་རྩ་བདར་བཅདཿ ཐོགས་བཅས་ཕྱི་རྐྱེན་འབྱུང་བ་དང་གཅན་གཟན་མི་རྒོད་སོགས་དང་ཆགས་སྡང་གི་རྣམས་རྟོགས་སོགས།བདུད་དང་ཐོག་མེད་ནང་རྐྱེན་དགའ་སྡུག་སེམས་ཚིག་པ་སོགས།བདུདཿ དགའ་འབྲོད་རང་མཐོང་བདེ་སྐྱིད་མངོན་རློམ་སོགས།བདུད་དང་བསྙེངས་བྱེད་ཐེ་ཚོམ་དང་ཁུ་འཕྲིག་ལ་སོགས།བདུདཿ ཕཊཿ ཅེས་དབྱིངས་སུ་གཅོད་པ་ཡིནཿ དེ་ཡང་དུས་ཚོད་ལ་མཚོན་ནཿ ཐོ་རངས་ཚོགས་གཉིས་རྫོགས་པའི་ཕྱིརཿ དཀར་འགྱེད་བདུད་རྩིའི་ངོ་བོ་སྦརཿ ཉིན་གུང་ལན་ཆགས་སྦྱང་བའི་ཕྱིརཿ ཁྲ་འགྱེད་གང་ལ་འཚམས་པར་བསྔོཿ ནུབ་མོ་བརྟུལ་ཞུགས་ལམ་སློང་ཕྱིརཿ བདག་འཛིན་ཚར་གཅོད་དམར་འགྱེད་གཏོངཿ སྲོག་ལ་སྡིག་སྦྱོང་ནག་འགྱེད་བྱཿ ཀུན་ཀྱང་བདུན་པ་བསྒྱུར་བ་སྟེཿ གཙོ་བོ་དམིགས་པས་ཉམས་སུ་བླངསཿ དེ་ཚེ་ཆོ་འཕྲུལ་ཅི་བྱུང་ཡངཿ ཉམས་དང་བྲལ་བའི་ལྟ་བས་གཅུནཿ གལ་ཏེ་རྣལ་འབྱོར་དབྱིངས་ཆུད་ནསཿ ལྷོངས་འཚུབས་འཆུན་པར་དཀའ་བའམཿ ལྷ་འདྲེ་དབྱིངས་ཆེས་མ་ལྷོངས་ནཿ ཀེང་རུས་དཀར་པོའི་དམིགས་པ་བྱཿ ཕཊཿ ཅེས་རང་ཉིད་སྐད་ཅིག་གིསཿ ཀེང་རུས་དཀར་པོ་མེ་འབར་བཿ


JLAZ012_Page_0052
[མ་དཔེ་གཟིགས་ན་འདིར་གནོན།]

ཤིན་ཏུ་ཆེ་བ་ལས་བྱུང་བའིཿ མེ་ཡིས་སྟོང་གི་འཇིག་རྟེན་དངཿ ཁྱད་པར་ལྷ་འདྲེའི་གནས་རྟེན་བསྲེགསཿ མཐར་ནི་ཀེང་རུས་མེ་དང་བཅསཿ འོད་ཡལ་སྟོང་པའི་ངང་ལ་གཞགཿ འགོ་ནད་སྲུང་བ་ལ་ཡང་ཟབཿ ཚར་ཚད་དུས་སུ་མ་བྱུང་དངཿ གནོད་འདྲེ་གདུག་པ་ཨར་གཏོད་ནཿ རིག་པ་ཁྲོས་མའི་སྐུར་གསལ་བསཿ སྙིགས་མའི་ལུས་ཀྱི་པགས་པ་བཤུསཿ སྟོང་གསུམ་ཁེངས་བའི་གཡང་གཞིའི་སྟེངཿ ཤ་རུས་གཅལ་དུ་བཀྲམ་པ་ལཿ འདྲེ་གདོན་ཟས་ལ་གདུང་བའི་མོདཿ ཁྲོས་མས་གཡང་གཞི་འུབ་ཀྱིས་དྲིལཿ སྦྲུལ་དང་རྒྱུ་མའི་ཞགས་པས་བསྡམསཿ ཀླད་ལ་བསྐོར་ཞིང་བརྡབས་པ་ཡིསཿ ཤ་མྱོག་རུས་མྱོག་དག་ཏུ་སོངཿ སྤྲུལ་པའི་གཅན་གཟན་དུ་མ་ཡིསཿ ལྷག་མ་མེད་པར་ཟོས་པར་བསམཿ དབྱིངས་རིག་བསྲེས་ཏེ་མཉམ་པར་བཞགཿ དེས་ནི་ཚར་ཚད་ངེས་འབྱུང་ཞིངཿ འདྲེ་གདོན་གདུག་པ་ཚར་ཆོད་འགྱུརཿ ཀུན་ལ་གཅེས་འཛིན་བློ་སྤངས་ཏེཿ ལྟ་བའི་གདེང་གིས་ཟིན་པ་གཅེསཿ དེ་ཚེ་ཚར་ཚད་འདྲ་བའི་ལྟོངསཿ ལྷོངས་ཚད་འདྲ་བའི་ཚར་ཚད་དངཿ གཉིས་ཀ་འདྲ་བའི་འདྲེས་མ་དངཿ འདྲེས་མ་འདྲ་བའི་བག་ཆགས་དངཿ ཚར་ལྷོངས་གཉིས་ཀ་མཐར་ཕྱིན་གྱིཿ རྟགས་རྣམས་ཉམས་དང་སྦྱར་ཏེ་སྤྱདཿ དོན་ལ་བདག་མེད་ཀུན་བཟང་མོཿ ཡུམ་ཆེན་ཤེས་རབ་ཕར་ཕྱིན་མའིཿ དགོངས་པ་ཀློང་དུ་གྱུར་ཙ་ནཿ གཅོད་ཡུལ་ལམ་དུ་ལོངས་པའོཿ ས་མ་ཡཿ རྗེས་ལ་བསྔོ་སྨོན་བྱ་བ་ནིཿ ཨཱཿ དགེ་དང་མི་དགེའི་རྟོག་ཚོགས་རང་གྲོལ་ལཿ རེ་དང་དོགས་པའི་མཚན་མ་མི་དམིགས་ཀྱངཿ སྣང་ཆའི་རྟེན་འབྲེལ་བསླུ་མེད་དགེ་ཚོགས་རྒྱུནཿ


JLAZ012_Page_0053
[མ་དཔེ་གཟིགས་ན་འདིར་གནོན།]

ཟག་མེད་ཆོས་ཀྱི་དབྱིངས་སུ་བསྔོ་བར་བྱཿ ཕཊཿ ཀུན་རྫོབ་ལུས་ཀྱི་སྦྱིན་པ་ལ་བརྟེན་ནསཿ བསྐལ་བར་བསགས་པའི་བུ་ལོན་ལན་ཆགས་བྱངཿ དོན་དམ་ཆོས་ཀྱི་བདེན་པས་རྒྱུད་འགྲོལ་ཚེཿ བདག་གི་འདས་པ་དང་པོར་སྐྱེ་བར་ཤོགཿ དེ་ཚེ་མ་བཅོས་རང་གཞག་གཉུག་མའི་དོནཿ མི་བསྐྲུན་ལྷ་འདྲེའི་རྒྱུད་ལ་སྐྱེས་ནས་ཀྱངཿ ངར་འཛིན་འཁྲུལ་བའི་རྗེས་སུ་མི་འབྲེང་བརཿ བྱམས་དང་སྙིང་རྗེས་ཤེས་རྒྱུད་བརླན་པར་ཤོགཿ བདག་ཀྱང་བརྟུལ་ཞུགས་སྤྱོད་པ་མཐར་ཕྱིན་ནསཿ སྐྱིད་སྡུག་རོ་སྙོམས་འཁོར་འདས་ཆོས་སྐུར་འབྱོངསཿ ཕྱོགས་ལས་རྣམ་རྒྱལ་འབྲེལ་ཚད་དོན་ལྡན་གྱིསཿ ཕྲིན་ལས་མཐར་ཕྱིན་འཇའ་ལུས་འགྲུབ་པར་ཤོགཿ ཕཊཿ ཅེས་བརྗོད་ལྟ་བའི་ངང་མདངས་བསྐྱངསཿ སྙིང་རྗེ་ཆེན་པོའི་རྩིས་ཟིན་པསཿ བདེ་སྡུག་གཏོང་བདག་གི་བདེ་བ་ལྷ་འདྲེར་བཏང༌། ལྷ་འདྲེའི་སྡུག་བསྔལ་རང་གིས་བླང༌།ལེན་དམིགས་པ་དངཿ ཆོས་ཀྱི་སྦྱིན་པ་རྣམ་དག་ཆོས་ཐམས་ཅད་རྒྱུ་ལས་བྱུང༌། སོགས་དང༌། སྡིག་པ་ཅི་ཡང་མི་བྱ་ཞིང༌། སོགས་དང༌། འབྱུང་པོ་གང་དག་སོགས་ཀྱི་ཤིས་བརྗོད་བྱའོ།།བྱཿ འབྲེལ་ཐོགས་བཟང་ངན་ཐར་ལམ་འགོདཿ ས་མ་ཡཿ མ་མ་ཀོ་ལིང་ས་མནྟཿ ཨོཾ་་་སྙན་ལ་རིང་བ་བུང་བའི་སྐད་ལྟ་བུ། ཧཱུྃ་་་རྔམ་ལ་འཚེར་བ་རྟ་སྐད་ལྟ་བུ། ཏྲཱཾ་་་དྲག་ལ་གཏུམ་པ་སྟག་མོའི་ངར་སྐད་ལྟ་བུ། ཧྲཱིཿ་་་འགྱུར་ལ་ལྡེམ་པ་དྲི་ཟའི་སྐད་ལྟ་བུ། ཨཱ་་་འགྱུར་ལྡེམ་གོང་འདྲ་འདྲ་ནས་གཤམ་འདེགས་ཙམ་བྱེད་པ་ལ་ཌཱཀྐིའི་སྤྱུག་གླུ་ཟེར།། །།

གཅོད་མཁན་རྣམས་ཀྱི་ཉེ་བར་སྤྱད་པའི་རྣམ་བཤད་ཕྱིན་དྲུག་ལང་ཚོ།


JLAZ012_Page_0054
[མ་དཔེ་གཟིགས་ན་འདིར་གནོན།]

གཅོད་མཁན་རྣམས་ཀྱི་ཉེ་བར་སྤྱད་པའི་རྣམ་བཤད་ཕྱིན་དྲུག་ལང་ཚོ་བཞུགས། ཁྲག་འཐུང་གཅོད་པའི་དབང་པོ་ལ་ཕྱག་འཚལ་ལོ། །གཅོད་ཅེས་བྱ་བའི་ངོ་བོ་ནི། །ཕ་རོལ་ཕྱིན་པ་དྲུག་གི་དབྱིངས། །ངེས་ཚིག་བདག་ཏུ་འཛིན་པ་གཅོད། །དབྱེ་ན་ཐུན་མོང་ཁྱད་པར་རོ། །དེ་ལ་གཅོད་པའི་རྣལ་འབྱོར་གྱི། །ཆས་ལ་འོས་པའི་ཡོ་བྱད་ནི། །སྦྱིན་པའི་དྲྭ་བ་ཚུལ་ཁྲིམས་སྟན། །བཟོད་པའི་ཅོག་པུ་བརྩོན་འགྲུས་དུང༌། །བསམ་གཏན་པུས་འཁྱུད་ཤེས་རབ་ནི། །ཌཱ་རུའི་རྣམ་པར་གཞག་པའོ།། ༼ཀ༽ དྲྭ་ཕད། སྦྱིན་པའི་ཚོགས་རྣམས་སྡུད་བྱེད་ཅིང༌། །ཆོག་ཤེས་དྲན་པའི་ཡོན་ཏན་སྣོད། །དྲྭ་བ་ཞེས་པ་མདོ་མདུད་འབྲེལ། །ཕད་བུའི་སྒྲ་ལས་ཡོལ་གོ་སྟེ། །རེག་འཇམ་གཡང་མོའི་འདབ་མ་ལ། །བྲམ་ཟེ་མ་ཡིས་སྲད་བུ་ལྟར། །ཐང་ལྷོད་འཚམས་པར་བསྒྲིབ་པ་བཞིན། །ལུ་གུ་རྒྱུད་དུ་ཡོངས་སུ་སྦྲེལ། །ཕྱི་ནང་མེད་པར་ཟང་ཐལ་ནི། །རྣལ་འབྱོར་འཛིན་པ་དག་པའི་རྟགས། །ནོར་ལ་བདག་ཏུ་ལྟ་བའི་སེམས། །མཉམ་པ་ཉིད་དུ་ལ་དོར་ནས། །འཕྲལ་གྱི་བཟའ་བཏུང་གྱི་ན་ཙམ། །ངོ་ལྐོག་མེད་པར་ཕྱིར་གསལ་བའི། །བརྟུལ་ཞུགས་འདི་ལ་སུ་གོམས་པ། །སྲིད་པའི་བཙོན་ར་དག་ལས་གྲོལ། །དགྲ་ཡིས་མཐོང་ཀྱང་སྙིང་རྗེ་སྐྱེ། །སེར་སྣའི་བགེགས་དང་མཛའ་བ་མིན། །ཆོམ་རྐུན་དང་ནི་རྩོད་པ་ཅན། །གཞན་འབྱོར་དཔལ་


JLAZ012_Page_0055
[མ་དཔེ་གཟིགས་ན་འདིར་གནོན།]

ལ་ཕྲག་དོག་པའི། །ལྟས་ངན་བརྒྱད་ཅུ་རྩ་གཅིག་དང༌། །གློ་བུར་ཡེ་འགྲོག་གདོན་ལས་གྲོལ། །ཕྱག་མཛོད་འདི་ནི་རྣལ་འབྱོར་གྱི། །དབང་ཕྱུག་མི་ལ་རས་པ་འོས། །གང་ལ་གསོག་སེམས་བྲལ་བ་དེ། །སྦྱིན་པའི་ཕ་རོལ་ཕྱིན་པའོ། །༼ཁ༽ ཀོ་སྟན། བརྟུལ་ཞུགས་ཀྱི་ལྟ་བའི་མཚོན་རྣོན་པོས། །མ་རིག་གི་གཅན་གཟན་སྲོག་བཅད་ནས། །མཉམ་ཉིད་ཀྱི་ངང་དུ་པགས་པ་བཤུས། །རིག་འཛིན་གྱི་སྡོམ་པའི་ཡན་ལག་ཅན། །བསྐྱེད་རྫོགས་ཟུང་འཇུག་གི་སྡེར་གཞི་མཛེས། །སྡོམ་པ་གསུམ་ལྡན་གྱི་སྟན་དུ་བཏིང༌། །གྱོ་མོ་དང་གསེག་མ་ཚེར་ཅན་སོགས། །ཏིང་འཛིན་ལ་འཛེར་བའི་རྣམ་རྟོག་སྤོང༌། །རྐང་མཐིལ་ལ་རླུང་ལྷ་ལྡང་བ་ཡི། །རྟེན་འབྲེལ་ཡང་སྲན་ཚུགས་ངང་དུ་རྫོགས། །ཚུལ་ཁྲིམས་ཀྱི་ཕ་རོལ་ཕྱིན་པའོ། །༼ག༽ ཅོག་པུ། ཅོག་ཅེས་བྱ་བ་པུ་རིའི་དངོས། །མཚོན་པ་རྟགས་ཀྱི་ཁང་བཟང་ཡིན། །བྱང་ཆུབ་སེམས་ཀྱི་རས་བལ་ལ། །སྙིང་རྗེ་ཆེན་པོའི་བཀལ་བཏགས་བྱས། །སྨོན་འཇུག་བྱང་སེམས་ཀྱི་བཟོ་གྲྭ་བཙུགས། །ཕར་ཕྱིན་དྲུག་གི་རྒྱན་སྤྲོས་མཛེས། །ལྟ་བ་ཡེངས་མེད་ཀྱི་སྲོག་མཁར་བཙུགས། །སྒོམ་པ་གཏད་མེད་ཀྱི་ཐ་གུས་སྦྲེལ། །སྤྱོད་པ་ཐུག་ཕྲད་ཀྱི་ཕུར་བུས་བརྒྱངས། །ཐེག་པ་ཡས་འབུབས་ཀྱི་ཚུལ་དུ་ཕུབ། །སྤྱོད་པ་མས་འཛེགས་ཀྱི་གནས་མལ་བཅས། །ཀ་བཞི་གདུང་བརྒྱད་ཀྱི་སྤྲོས་པ་ཆོད། །


JLAZ012_Page_0056
[མ་དཔེ་གཟིགས་ན་འདིར་གནོན།]

འདུ་འཛི་རྣམ་གཡེང་གི་འཁྲུལ་པ་དོར། །ཆོས་བརྒྱད་རང་གྲོལ་གྱི་ཁང་བཟང་ཡིན། །ཚ་གྲང་གི་གདུང་བ་ཀུན་བཟོད་པས། །བཟོད་པའི་ཕ་རོལ་ཕྱིན་པའོ། །༼ང༽ རྐང་གླིང༌། མཆོག་ཆེན་མི་རྐང་གླིང་བུ་ཡི། །བརྡ་དོན་རྟགས་གསུམ་བཤད་ཀྱིས་ཉོན། །རྟོགས་མེད་རོ་ཡི་ཡན་ལག་ལས། །ཆགས་སྡང་མེད་པའི་སེམས་ཀྱིས་བྲེགས། །ལྷ་བ་ཕྱུང་ཤིང་བྲད་བརྡར་བྱས། །ཕྱི་ནང་གཟུང་འཛིན་སྤོང་བའི་བརྡ། །རྐང་གླིང་ཁ་སྒོ་གཅིག་པ་ནི། །ཆོས་ཀུན་དུ་མ་རོ་གཅིག་བརྡ། །རྩ་བ་མཛོ་སྣ་ཟུང་འབྲེལ་ཅན། །ཆོས་སྐད་ཟུང་འཇུག་གཅིག་ཏུ་སྟོན། །གཤམ་ལ་འབྲེང་ལྕག་ཅོད་པན་ཅན། །གྲུབ་ཐོབ་རྗེས་སུ་འབྲེང་བའི་དོན། །དྲན་ཞིང་སྟོང་པ་གཞུང་མིག་ཅན། །མཐའ་ལ་མི་གནས་དབུ་མའི་དོན། །འབུད་པ་རླུང་གི་རྟེན་འབྲེལ་ལས། །རོ་རྐྱང་དབུ་མར་ཡང་དག་འཛུད། །ཐོས་པས་ལྷ་འདྲེའི་ཡིད་རྩ་འཁོལ། །ཉན་པས་རང་སྣང་གཞན་སྣང་འགྱུར། །འབུད་སྟངས་དང་པོར་བླ་མ་མཆོད། །གཉིས་པས་སྣང་བ་ཟིལ་གྱིས་གནོན། །གསུམ་པས་མགྲོན་རྣམས་སྤྱན་འདྲེན་བྱེད། །བཞི་པས་ཕམ་རྒྱལ་མེད་པར་བསྔོ། །ལྔ་པས་གཟུང་འཛིན་ཐད་ཀར་གཅོད། །ལེ་ལོའི་གཉིད་ལས་སད་པའི་ཕྱིར། །བརྩོན་འགྲུས་ཕ་རོལ་ཕྱིན་པའོ། ། ༼ཅ༽ སྒོམ་ཐག་གམ་པུས་འཁྱུད། པུས་མོའི་ལྷ་ངར་


JLAZ012_Page_0057
[མ་དཔེ་གཟིགས་ན་འདིར་གནོན།]

ལུས་བརྟེན་ཕྱིར། །དེ་ལ་འཁྱུད་པར་བྱེད་པའོ། །རྣལ་འབྱོར་རོ་སྟོད་མཛེས་པའི་རྒྱན། །ཡུམ་གཅིག་རྡོ་རྗེ་ཕག་མོ་དངོས། །ཐིག་ལེ་ཉག་གཅིག་མཚོན་པར་འཁོར། །དབུ་རྐྱང་རོ་གསུམ་བདག་ཉིད་ལ། །རྩ་གནས་འཁོར་ལོའི་དྲྭ་བ་ཅན། །ཕྱི་རུ་སྣང་བ་མཛེས་པའི་རྒྱན། །ནང་ནི་རང་བཞིན་སྟོང་པ་ཉིད། །བོད་དུ་ལོ་ཆེན་བཻ་རོས་བསྟན། །རྡོ་རྗེ་ཟམ་པའི་ཆ་ལག་སྟེ། །དགོས་འགྲེལ་ཤེས་པར་མ་བྱས་ན། །མཆོར་སྒེག་སེམས་ཀྱིས་འཆང་བ་ཙམ། །ཁྱི་རྒན་ཚངས་སྐུད་འཆིང་བ་འདྲ། །གནད་དོན་ཤེས་ན་རྣམ་སྣང་གི །ཆོས་རྣམས་མ་ལུས་སྡུད་པའི་ཕྱིར། །བསམ་གཏན་ཕ་རོལ་ཕྱིན་པའོ། །༼ཆ༽གཅོད་ཌཾ། ཌཱ་རུ་ལ་འཁོར་འདས་ལམ་གསུམ་ཚང༌། །འཁོར་བ་སྡུག་བསྔལ་གྱི་ནགས་ཁྲོད་ནས། །མྱང་འདས་ཀྱི་སྟྭ་རེ་རྣོན་པོ་ཡིས། །གཟུང་འཛིན་ལམ་གྱི་ལྗོན་ཤིང་བཅད། །མན་ངག་གདེང་ལྡན་གྱི་ཤིང་མཁན་དེས། །འཁོར་འདས་རྒྱབ་གྱེས་ཀྱི་ཌཱ་རུ་བཟོས། །གཉིས་སྣང་འུབ་ཆུབ་ཀྱི་པགས་པས་གཡོགས། །སྣང་སྟོང་ཟུང་འཇུག་གི་སྐེད་ཆིངས་བཏང༌། །ཐབས་དང་ཤེས་རབ་ཀྱི་དབྱུག་ཏོ་ཅན། །མཁའ་འགྲོ་བླ་ཆགས་ཀྱི་མགྲོན་ཚོམ་མཛེས། །ཡེ་ཤེས་ལྔ་ལྡན་གྱི་ལན་ཚར་གདགས། །གསོན་སྐྲས་མ་མོ་བྲན་དུ་བཀོལ། །ཤི་སྐྲས་མཁའ་འགྲོ་དབང་དུ་སྡུད། །སྣང་བ་ཟིལ་གནོན་


JLAZ012_Page_0058
[མ་དཔེ་གཟིགས་ན་འདིར་གནོན།]

སྟག་གཟིག་རས། །མ་ཚོགས་དབང་འགྱུར་དྲིལ་གཡེར་ཅན། །ཌཱཀྐ་ཌཱཀྐིའི་ཕྱག་མཚན་ཏེ། །མཐོང་བས་སྲིད་པའི་རྣམ་རྟོག་འགག །འཁྲོལ་བས་གཞན་སྣང་དབང་དུ་འདུ། །བཅངས་པས་མ་ཚོགས་མཁའ་འགྲོ་ཉེ། །སྣང་སྲིད་ལྷ་འདྲེའི་སྲོག་ནས་འདྲེན། །གྲགས་སྟོང་དབྱེར་མེད་རང་སྒྲ་ཡིས། །བརྟན་གཡོ་མ་ལུས་འདར་ཞིང་འཁྲུགས། །ཤེས་རབ་ཕ་རོལ་ཕྱིན་པའོ། །ཞེས་གཅོད་པའི་ཉེར་སྤྱད་རྣམས་ཀྱི་རྣམ་པར་ངེས་པ་མདོ་ཙམ་བརྗོད་པ་འདི་ནི། འབྲུག་པ་ངག་དབང་རྡོ་རྗེས་བསྐུལ་ངོར། ཀརྴ་པ་ཎིའི་སྣ་རྒྱན་འཛིན་པའི་བཀྱལ་ཀ་ལས་ཅུང་ཟད་གཞན་དུ་བྱས་ཏེ་བརྗོད་པ་པོ་ཀློང་ཆེན་ནམ་མཁའི་རྣལ་འབྱོར་རོ།། དགེའོ།།

ཀློང་ཆེན་སྙིང་གི་ཐིག་ལེ་ལསཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད།


JLAZ012_Page_0060
[མ་དཔེ་གཟིགས་ན་འདིར་གནོན།]

༂ ཀློང་ཆེན་སྙིང་གི་ཐིག་ལེ་ལསཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་བཞུགསཿ


JLAZ012_Page_0061
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མཧཱ་སནྡྷི་ས་མནྟ་བྷ་དྲ་ཛྙཱ་ན་དྷརྟུ་ཏནྟྲ་ནཱ་མཿ བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ཅེས་བྱ་བཿ བཅོམ་ལྡན་འདས་བདེ་གཤེགས་སྙིང་པོ་ལ་ཕྱག་འཚལ་ལོཿ ཆོས་ཉིད་མ་འཁྲུལ་བའི་དབྱིངས་རང་སྣང་དག་པའི་འོག་མིན་ཆེན་པོ་ནཿ གདོད་ནས་མངོན་སངས་རྒྱས་པའི་རིག་པ་ཀུན་ཏུ་བཟང་པོ་ཉིདཿ བཅོམ་ལྡན་འདས་གཟུགས་ཀྱི་རྒྱལ་པོ་དངཿ ཚོར་བའི་རྒྱལ་པོ་དངཿ འདུ་ཤེས་ཀྱི་རྒྱལ་པོ་དངཿ འདུ་བྱེད་ཀྱི་རྒྱལ་པོ་དངཿ རྣམ་པར་ཤེས་པའི་རྒྱལ་པོ་དངཿ ས་ཆུ་


JLAZ012_Page_0062
[མ་དཔེ་གཟིགས་ན་འདིར་གནོན།]

མེ་རླུང་ནམ་མཁའ་ལ་སོགས་པའི་འབྱུང་བ་ཆེན་པོ་ལྔ་དངཿ དབང་པོ་ཡུལ་དུས་དག་པའི་སེམས་དཔའ་སེམས་མའི་ཚོགས་དང་ཐབས་གཅིག་གོཿ དེའི་ཚེ་རྟོག་པའི་རྡོ་རྗེ་ཞེས་བྱ་བའི་སེམས་དཔའ་ཆེན་པོ་སྟན་ལས་ལངས་ཏེ་འདི་སྐད་ཅེས་གསོལ་ཏོཿ ཀུན་གཞི་དང་ཡེ་ཤེས་ཆེན་པོའི་ཁྱད་པར་ལས་འཁོར་བ་དང་མྱ་ངན་ལས་འདས་པའི་ཆོས་ཐ་དད་དུ་རྒྱབ་གྱེས་པར་སྟོན་པ་ཁྱོད་ཀྱིས་ཡང་ནས་ཡང་དུ་བཀའ་སྩལ་ནཿ དེ་དང་དེའི་མཚན་ཉིད་སོ་སོར་ཕྱེ་བ་ནི་གངཿ སེམས་དང་སེམས་ཉིད་ཅེས་པའི་གདགས་གཞི་དང་ངོ་བོ་ཇི་ལྟ་བུ་ལགསཿ བཀའ་སྩལ་པཿ ཀུན་གཞི་ནི་འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་སྤྱི་གཞི་ཆེན་པོ་དབང་པོ་ཡུལ་ལ་མ་སད་པ་གཉིད་


JLAZ012_Page_0063
[མ་དཔེ་གཟིགས་ན་འདིར་གནོན།]

དུ་སོང་བའི་སྐབས་ལྟ་བུ་སྟེཿ སེམས་མེད་པའི་གནས་སྐབས་ལྔའི་དུས་ནའང་སེམས་དང་སེམས་ཉིད་ཀྱི་རྟེན་དང་བརྟེན་པའི་རང་བཞིན་བག་ལ་ཉལ་དུ་གནས་སོཿ འོག་མ་རྣམས་སུ་འདི་ཉིད་བདེ་གཤེགས་སྙིང་པོའི་རང་བཞིན་དུ་བསྟན་པ་ནིཿ རེ་ཞིག་ཆོས་དབྱིངས་དྲི་མེད་ལ་ཐེ་ཚོམ་ཟ་བའི་བྱིས་པ་རྣམས་དྲང་བའི་སླད་དུའོཿ དེའི་ཕྱིར་འདིའི་གོ་ན་དག་པ་ཡེ་ཤེས་ཀྱི་སྒོ་མྱ་ངན་ལས་འདས་པའི་ལམ་དངཿ ཐིག་ལེ་ཆེན་པོའི་སྣང་བ་དངཿ འབྲས་བུའི་ཆོས་རྒྱ་མཚོ་ལྟ་བུ་དངཿ མ་དག་པ་འཁོར་བའི་སྒོ་ལས་དངཿ ཉོན་མོངས་པ་དངཿ རྣམ་པར་རྟོག་པའི་ཚོགས་བསམ་གྱིས་མི་ཁྱབ་པ་ལྟར་མི་མངོན་པ་བག་ལ་ཉལ་གྱི་ཚུལ་དུ་ཡོད་པས་ནཿ སེམས་ཅན་དངཿ སངས་རྒྱས་དངཿ ལམ་གྱི་ཡེ་ཤེས་དངཿ སེམས་ཉིད་གང་ཡང་མ་ཡིན་ཏེ་ཀུན་ཀྱི་སྣོད་དམ་འཆར་གཞིར་གྱུར་པས་ནཿ ཀུན་གཞི་ཞེས་བྱའོཿ དབྱེ་ན་རྣམ་པ་བཞི་ཡོད་དེཿ གདོད་མ་གཞིའི་ཀུན་གཞིཿ སྦྱོར་བ་དོན་གྱི་ཀུན་གཞིཿ བག་ཆགས་ལུས་ཀྱི་ཀུན་གཞིཿ བག་ཆགས་སྣ་ཚོགས་པའི་ཀུན་གཞིའོཿ དེ་དག་གི་ངོ་བོ་མདོར་བསྡུ་ནཿ ཀུན་གཞིའི་ཁམས་ནི་ཅི་ཡང་མི་སེམས་པ་སྒོ་ང་ལྟ་བུའོཿ རྩལ་སྣོད་དུ་མའི་འཆར་གཞིར་ལངས་པ་ནི་ཀུན་གཞིའི་རྣམ་པར་ཤེས་པ་ཉིད་དོཿ དེ་ལས་དགེ་མི་དགེ་


JLAZ012_Page_0064
[མ་དཔེ་གཟིགས་ན་འདིར་གནོན།]

ཆགས་སྡང་བར་མ་གསུམ་གྱིས་ཉེ་བར་ལེན་པའི་རླུང་གཡོས་པ་ནི་སེམས་ཀྱི་མཚན་ཉིད་དོཿ འདི་ལྟར་དབང་པོ་དྲུག་གི་ཡུལ་ལས་སད་པའི་ལས་གཟུང་འཛིན་གྱི་ཡིད་གཡོསཿ ཉོན་མོངས་པའི་ཡིད་ང་ཡིར་འཛིན་པ་དང་འགྲོགས་ནས་རྩ་བའི་ཉོན་མོངས་པ་ལྔཿ ཉེ་བའི་ཉོན་མོངས་ཉི་ཤུཿ སེམས་བྱུང་ལྔ་བཅུཿ རྟོགས་ཚོགས་བརྒྱད་ཁྲི་བཞི་སྟོང་ལྡང་འདུག་གི་ཚུལ་དུ་ཁྲིད་དེ་ཁམས་གསུམ་གྱི་རྟེན་ཅིང་འབྲེལ་བར་འབྱུང་བ་མ་ལུས་ཤིང་ལུས་པ་མེད་པ་ཐམས་ཅད་རྫོགས་པར་བྱའོཿ ཀྱཻ་རྟོགས་པའི་རྡོ་རྗེ་རིག་པའི་ཡེ་ཤེས་ནི་ཀུན་གཞིའི་ཁམས་ལས་རྒྱུན་ཆགས་ཀྱི་ཆ་ནས་རྫས་འགལ་བ་མ་ཡིན་ཀྱངཿ ངོ་བོ་གནས་འགྱུར་བ་ཞེས་བྱ་སྟེ་གཉིད་དུ་སོང་བ་དེ་ལས་སད་པ་ལྟ་བུའོཿ འདི་ལྟར་དབང་པོ་ཡུལ་ལ་སད་ཀྱང་ཡུལ་གྱི་སྣང་བས་ནི་མ་གོསཿ ལྷན་ཅིག་སྐྱེས་པ་དང་ཀུན་ཏུ་བཏགས་པའི་མ་རིག་པ་གཉིས་ཀྱི་སྦུབས་སུའང་མ་ཆུདཿ རྣམ་པར་མི་རྟོག་པ་ཙམ་གྱི་གཤིས་སུ་སེམས་དང་སེམས་ཉིད་གཉིས་མཚུངས་པ་ལྟར་སྣང་ནའངཿ སེམས་ནི་འཛིན་པ་དང་བཅས་ཤིང་ཡུལ་གྱི་བག་ཆགས་དང་བལྟར་མི་མངོན་པར་འགྲོགས་ལཿ སེམས་ཉིད་ནི་ངོ་བོ་སྤྲོས་པ་དང་བྲལཿ རང་བཞིན་ཟང་ཐལཿ རྣམ་པ་ཐམས་ཅད་པའི་ཤེས་རབ་ཡུལ་དང་བྱིང་རྒོད་ཀྱིས་བརྫི་བར་མི་


JLAZ012_Page_0065
[མ་དཔེ་གཟིགས་ན་འདིར་གནོན།]

ནུས་པས་མྱ་ངན་ལས་འདས་པའི་རྟེན་ཅིང་འབྲེལ་འབྱུང་ཐམས་ཅད་རྫོགས་པའོཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ཅེས་བྱ་བ་ལསཿ གཞི་དང་འཁོར་འདས་ཀྱི་སྒོ་བཤད་པའི་ལེའུ་སྟེ་དང་པོའོཿ ཡང་རྟོགས་པའི་རྡོ་རྗེས་གསོལ་བཿ འཁོར་བ་དང་མྱ་ངན་ལས་འདས་པའི་གྱེས་མཚམས་ལས་སྔ་ཕྱི་དང་དུས་ཚོད་ཀྱི་གཏན་ཚིགས་བཞག་ཏུ་རུང་ངམ་མི་རུངཿ སྟོན་པ་ཀུན་ཏུ་བཟང་པོ་ཡང་གཞན་སྣང་དགེ་བའི་ངོར་སྒྱུ་མ་ལྟ་བུའི་རྣམ་པར་འཕྲུལ་པ་ལགས་སམཿ རྒྱུད་གཞན་གྱིས་བསྡུས་པའི་དངོས་སྣང་བདེན་གྲུབ་ཇི་ལྟར་ལགས་སྟོན་པས་གསུང་དུ་གསོལཿ བཀའ་སྩལ་པཿ སྤྲུལ་པའི་སྐུའི་སྣང་ཆ་ལ་འདས་པ་དངཿ མ་འོངས་པ་དངཿ ད་ལྟ་བ་ཞེས་དུས་གསུམ་དུ་རྣམ་པར་བཞག་གིསཿ ང་ཀུན་ཏུ་བཟང་པོ་ནི་ཆོས་ཉིད་བརྗོད་པ་དང་བྲལ་བ་ཡིན་པས་བསམ་གྱིས་མི་ཁྱབ་པའི་ཀུན་ཏུ་བཟང་པོ་ལ་ཐོག་མར་བྱས་ནས་ཐོག་མའི་མགོན་པོ་ཞེས་ཚིག་བླ་དྭགས་སུ་བཏགས་པ་ཙམ་མོཿ རྒྱུ་དེས་གང་དུ་འཁོར་བ་དང་མྱ་ངན་ལས་འདས་པའི་རྟོག་དཔྱོད་ཀྱི་ཤེས་རབ་ཤར་བ་ཙམ་ནས་འཁོར་འདས་རྒྱབ་གྱེས་པ་ཞེས་བྱ་སྟེཿ གཞི་གཅིག་ལ་ལམ་གཉིས་སུ་ཤར་བའི་ཕྱིར་རོཿ ཀྱཻ་རྟོགས་པའི་རྡོ་རྗེཿ སངས་རྒྱས་ཐམས་ཅད་ཀྱི་སྙིང་པོ་ཅན་ཐོག་མའི་མགོན་པོ་བཅོམ་ལྡན་འདས་


JLAZ012_Page_0066
[མ་དཔེ་གཟིགས་ན་འདིར་གནོན།]

དཔལ་ཀུན་ཏུ་བཟང་པོ་ཞེས་བྱ་བ་ཉིད་སེམས་ཅན་གྱི་ཁམས་རྒྱ་མཚོ་ལྟ་བུ་ལས་རྒྱུད་གཞན་གྱིས་བསྡུས་པར་སེམས་ནཿ འཁོར་བ་དང་མྱང་འདས་འབྲེལ་ལམ་འབྲེལ་བར་གནས་པའི་ལྟེ་ཆད་དེཿ སེམས་ཅན་ལ་སངས་རྒྱས་ཀྱི་ས་བོན་དང་བྲལ་བས་ཚོགས་གཉིས་ཀྱི་ལམ་རྒྱ་མཚོ་ལྟ་བུ་བསྟན་པ་དེ་དག་ཀྱང་ཚི་ཆད་པར་འགྱུར་རོཿ རྒྱུ་དེས་ངའི་རང་བཞིན་རྫོགས་པ་ཆེན་པོ་ལ་གཞི་ཐོག་ནས་གྲོལ་བ་དངཿ འཁྲུལ་པའི་ལམ་གཉིས་ཀ་ཡོད་པས་གཞིའི་བཞུགས་ཚུལ་ལ་མཁས་པར་གྱིས་ཤིགཿ འདི་ལྟར་རང་ངོའི་དྲི་མ་མཐའ་དག་ལས་རྣམ་པར་གྲོལ་བ་དངཿ ལས་དང་ཉོན་མོངས་པས་ཀུན་ནས་དཀྲིས་པའི་ཆ་གཉིས་ལས་སངས་རྒྱས་དང་སེམས་ཅན་གྱི་ཁམས་སུ་རང་ཤར་བའི་ཆོས་ཤེས་པར་གྱིས་ལ་ང་ཀུན་ཏུ་བཟང་པོ་རྒྱུད་གཞན་གྱིས་བསྡུས་པའམཿ སྒྱུ་མ་ལྟར་སྣང་ཆ་ལ་འཕྲུལ་པ་བཅོས་མའི་སངས་རྒྱས་ལ་རེ་བ་མ་ཚོལ་ཅིགཿ ཅེས་གསུངས་སོཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལསཿ འཁོར་འདས་ཀྱི་གྱེས་མདོ་བསྟན་པའི་ལེའུ་སྟེ་གཉིས་པའོཿ ཡང་རྟོགས་པའི་རྡོ་རྗེས་གསོལ་པཿ རྣམ་པར་ཤེས་པའི་ཚོགས་དང་ཡིད་དང་ཉོན་མོངས་པ་ཅན་གྱི་ཡིད་ཀྱི་བྱེ་བྲག་ཇི་ལྟར་འབྱེད་པ་ལགསཿ བཀའ་སྩལ་པཿ ཀུན་གཞི་ལས་


JLAZ012_Page_0067
[མ་དཔེ་གཟིགས་ན་འདིར་གནོན།]

རང་གི་རྩལ་སྣང་གཡོས་ཏེ་ཤེས་པ་ཡུལ་ལ་འཇུག་པར་རྩོམ་པ་ན་ཀུན་གཞིའི་རྣམ་པར་ཤེས་པ་ལྡང་སྟེ། དཔེར་ན་ཀུན་གཞིའི་ཁམས་གཉིད་འཐུག་པོ་ལྟ་བུ་ལས་ནི་སདཿ ཡུལ་ལྔའི་གཟུང་ཡུལ་ལ་དངོས་སུ་ནི་མ་ཤརཿ འཛིན་བྱེད་ཀྱི་ཤེས་པ་ཤིན་ཏུ་ཕྲ་བ་ཞིག་ལངས་པ་དེས་ཀུན་ཏུ་རྟོག་པའི་གཟུགས་བརྙན་འཛིན་པའི་རྟེན་འབྲེལ་རང་ཆས་སུ་སློང་སྟེ་མེ་ལོང་བཞིན་ནོཿ དེ་སྒོ་ལྔ་སོ་སོའི་རྩ་རླུང་གི་བྱེད་པས་ཤེས་པ་ཡུལ་ལ་ཁྲིད་དེཿ མིག་གི་ཡུལ་དུ་གཟུགས་དངཿ རྣ་བའི་ཡུལ་དུ་སྒྲ་དངཿ སྣའི་ཡུལ་དུ་དྲི་དངཿ ལྕེའི་ཡུལ་དུ་རོ་དངཿ ལུས་ཀྱི་ཡུལ་དུ་རེག་བྱ་སྟེ་རྣམ་པར་ཤེས་པའི་ཁམས་ལྔ་ལྡང་ངོཿ དེ་ཉོན་མོངས་པ་ཅན་དང་ཡིད་ཀྱི་ངོ་བོས་ཆགས་སྡང་རྨོངས་གསུམ་ལ་སོགས་པར་བཟུང་ནས་འཁོར་བའི་རྒྱུ་མ་རིག་པ་དངཿ ལས་དངཿ བག་ཆགས་དངཿ འབྲས་བུ་ཐམས་ཅད་དུ་འདུ་བྱེད་པའོཿ མདོར་བསྡུ་ནཿ དེ་ཐམས་ཅད་ཀྱི་སྣོད་དམ་གཞི་ལྟ་བུར་གྱུར་པས་ན་ཀུན་གཞིཿ གོ་འབྱེད་པའི་ཆ་ནས་ཀུན་གཞིའི་རྣམ་པར་ཤེས་པཿ དེ་ཁ་ཕྱིར་བལྟས་ཏེ་ཡུལ་ལ་སད་པའི་ཆ་ནས་སྒོ་ལྔཿ རང་ས་ནས་ཉོན་མོངས་ཉེ་བར་ལེན་པའི་ཆ་ནས་ཉོན་ཡིདཿ སྣ་ཚོགས་སུ་འབྱེད་པའི་ཆ་ནས་ཡིད་ཤེས་ཏེ། རྣམ་པར་ཤེས་པའི་ཚོགས་


JLAZ012_Page_0068
[མ་དཔེ་གཟིགས་ན་འདིར་གནོན།]

བརྒྱད་ཅེས་བྱའོཿ ཡང་གསོལ་པཿ དེ་ལྟར་ན་སྣང་བའི་ཁམས་འདི་དག་འཁྲུལ་སྣང་ཡིན་བཞིན་དུ་སེམས་ཅན་ཐམས་ཅད་ལ་ཡུལ་ཁྱིམ་ལ་སོགས་པའི་དངོས་གཅིག་ཏུ་སྣང་བའི་རྒྱུ་ཇི་ལྟར་ལགསཿ བཀའ་སྩལ་པཿ རྟོགས་པ་རྣམས་ཀྱི་སྣང་ངོར་ནི་འཁྲུལ་པའི་སྣང་བ་ཡེ་ནས་ཡོད་མ་མྱོང་སྟེཿ མ་རྟོགས་པ་རྣམས་ལའང་སྤྱི་ཚན་དུ་རིགས་དྲུག་སོ་སོའི་སྣང་བསཿ ཆུ་གཅིག་པུ་ཉིད་ལའང་ལྷས་བདུད་རྩིཿ དམྱལ་བས་མེ་མདགཿ ཡི་དྭགས་ཀྱིས་རྣག་ཁྲག་ལ་སོགས་པའི་རིགས་དྲུག་གིས་སྣང་ཚུལ་ཐ་དད་དེཿ གནས་རིགས་དེ་དང་དེའི་ལས་སྣང་དང་རྩལ་གཟུགས་ཀྱིས་བསྡུས་པ་དག་ནི་ཁམས་དང་དབང་པོ་དང་བསམ་པའི་སྣང་ཚུལ་ཡང་རགས་པ་ཙམ་དུ་གཅིག་པའི་འཁྲུལ་སྣང་ལ་ལྷན་གཅིག་ཏུ་སྤྱོད་པའི་ཕྱིར་རོཿ རྟོགས་མ་རྟོགས་ཀྱི་ཆ་ནས་གཞལ་ན་དེ་ལྟར་སྣང་བ་ཡང་མི་རིགས་ཏེཿ དཔེར་ན་ཆོས་ཉིད་ལ་མཉམ་པར་གནས་པའི་རྣལ་འབྱོར་པ་ལ་རི་དངཿ ཁང་ཁྱིམ་ལ་སོགས་པ་སྣང་ངོ་ལ་མ་འགགས་ཀྱངཿ རིག་ངོ་ལ་དེ་དང་དེར་འཛིན་གྱི་འདུ་ཤེས་མེད་པས་སྣང་སེམས་དུ་མ་རོ་གཅིག་གི་ངང་ནསཿ ནམ་མཁའ་ལ་མཁའ་ལྡིང་བཞིན་བྱ་བ་དངཿ ཆུ་ལ་ངང་པ་ལྟ་བུ་དངཿ རི་བྲག་ལ་ཐལ་བྱུང་དུ་འགྲོ་བ་ལ་སོགས་ཀྱང་


JLAZ012_Page_0069
[མ་དཔེ་གཟིགས་ན་འདིར་གནོན།]

སྣང་བ་ལ་དེར་འཛིན་མེད་པ་ལས་བྱུང་བའོཿ དེའི་ཕྱིར་ཀུན་བྱེད་རྒྱལ་པོ་སེམས་ཀྱི་གནས་ལུགས་ཉིད་ཀུན་གཞིའི་ཀློང་ན་བལྟར་མི་མངོན་པར་གབ་ནས་འཁོར་འདས་ཐམས་ཅད་ཀྱི་གཞིར་གནས་པ་དངཿ གཞི་ཐོག་ནས་གཞི་སྣང་བ་ཆེན་པོའི་འོད་གསལ་མུ་མཐའ་མེད་པར་ཤར་ཀྱངཿ ཡུལ་དང་མ་འབྲེལཿ རང་སར་མ་རྨུགསཿ འཛིན་པས་མ་བསླདཿ བཟུང་བས་མ་བཅིངསཿ ཤེས་དང་ཤེས་བྱའི་སྒྲིབ་པ་མཐའ་དག་སྤངས་ཏེ་ཆོས་སྐུའི་དབྱིངས་ལ་བྱང་ཆུབ་པ་དངཿ གཞི་ལས་ཤེས་པ་གཡོས་ཏེ་ཡིད་ཀྱི་རྣམ་ཤེས་སུ་གནས་འགྱུརཿ གཟུང་འཛིན་གྱི་གདོན་ཆེན་པོ་དང་འགྲོགས་ནས་ལས་དང་བག་ཆགས་ཀྱི་རྟེན་བྱེད་པའི་མཚང་ཆེན་པོ་འདི་ཤེས་ནས་ང་ཀུན་ཏུ་བཟང་པོས་ཟག་བཅས་ཀྱི་དགེ་བ་རྡུལ་ཙམ་ཡང་མ་བྱས་པར་སངས་རྒྱས་ཐམས་ཅད་ཀྱི་མེས་པོར་སངས་རྒྱས་པའོཿ ཞེས་གསུངས་སོཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལསཿ རྣམ་པར་ཤེས་པ་ཚོགས་བརྒྱད་ཀྱི་རང་བཞིན་བཤད་པའི་ལེའུ་སྟེ་གསུམ་པའོཿ དེའི་ཚེ་སངས་རྒྱས་ཐམས་ཅད་དང་གཉིས་སུ་མེད་པའི་ཡེ་ཤེས་རྡོ་རྗེ་ཞེས་བྱ་བ་སྟན་ལས་ལངས་ཏེཿ རང་གི་སྟོན་པ་ལ་ཆོས་ཉན་ཅིང་རང་གི་ཉེ་འཁོར་ལ་འགྲོ་བ་མཛད་པའི་ངང་ནས་འདི་སྐད་ཅེས་གསོལ་ཏོཿ ཀྱཻ་བཅོམ་ལྡན་འདས་


JLAZ012_Page_0070
[མ་དཔེ་གཟིགས་ན་འདིར་གནོན།]

ཀ་དག་ཅེས་བྱ་བ་ནི་རིག་པའི་སྟོང་ཆ་སྤྲོས་མཚན་དང་བྲལ་བ་འདི་ཁོ་ན་ལགས་སམཿ དེ་ལས་འོད་གསལ་མ་བུའི་རྣམ་པར་དབྱེ་བ་ནི་གངཿ རང་བཞིན་རྫོགས་པ་ཆེན་པོ་ཡེ་ཇི་བཞིན་གནས་ལུགས་བཤད་དུ་གསོལཿ བཀའ་སྩལ་པཿ ངའི་སྙིང་ཏིག་གི་དགོངས་པ་གདོད་ནས་འཁྲུལ་མ་མྱོང་བའི་ཡེ་ཤེས་སངས་རྒྱས་བཟང་པོས་མ་བཅོསཿ སེམས་ཅན་ངན་པས་མ་བསླད་པའི་ངང་དུ་སྣང་སྲིད་ཡེ་སངས་རྒྱས་པ་ལ་ཀ་དག་ཞེས་ཚིག་བླ་དྭགས་སུ་བཏགས་པ་ཙམ་སྟེཿ ངོ་བོའི་ཆ་ནས་སྣང་བ་དང་སྟོང་པའི་ཕྱོགས་གང་དུའང་ལྟུང་བ་མེད་པས་རྒྱུ་འབྲས་དང་བཅས་པའི་བསྐྱེད་བྱ་སྐྱེད་བྱེད་ལ་སངས་རྒྱས་སུ་རེ་བ་མ་འཚོལ་ཅིགཿ ཅིའི་ཕྱིར་ཞེ་ནཿ ངས་བྱ་རྩོལ་ལས་འདས་པའི་ཐེག་པར་གཞི་དང་ལམ་གྱི་འོད་གསལ་དངོས་གཅིག་ཏུ་བཤད་པ་ལསཿ མ་དང་བུའི་བྱེ་བྲག་འབྱེད་པའི་རྟོག་ཆོས་གཙོ་བོར་བསྟན་པ་ནི་མེད་དོཿ འོན་ཏེ། གཉིས་སུ་མེད་པའི་དོན་ལ་གཉིས་སུ་བྱ་བའང་གདུལ་བྱ་ཁ་དྲང་བའི་སླད་དུ་ཡིན་ན་གདོད་མའི་གཞི་དབྱིངས་མཐར་ཐུག་གི་གྲོལ་ས་ཆེན་པོ་ནམ་མཁའི་དབྱིངས་ལྟ་བུ་ལ་འོད་གསལ་མའི་ཐ་སྙད་ཙམ་གདགས་སུ་རུང་ངོཿ ད་ལྟ་ལམ་གྱི་གནས་སྐབས་ན་རྣམ་པར་ཤེས་པའི་ཚོགས་དང་བཅས་ཤིངཿ ཕུང་པོ་ཁམས་དང་སྐྱེ་མཆེད་ཀྱི་དབུས་ན་བུམ་པ་ནང་གི་


JLAZ012_Page_0071
[མ་དཔེ་གཟིགས་ན་འདིར་གནོན།]

ནམ་མཁའ་གུད་དུ་བཅད་པ་བཞིན་བདེ་གཤེགས་སྙིང་པོ་རང་བཞིན་གྱི་འོད་དུ་གསལ་བའི་བདག་ཉིད་ཅན་ལ་གོམས་པར་བྱེད་པ་ལ་བུའི་ཐ་སྙད་ཙམ་དུ་མཚོན་ཏེཿ འདི་དག་ཀྱང་དོན་དམ་པར་ནི་མ་ཕྱིར་བཞགཿ བུ་ནང་དུ་བསྐྱིལ་བ་ལྟ་བུའི་གོ་མྱོང་ཡོད་ན་དེ་ཡང་བྱིས་པ་ཉེར་སྤྱོད་ཀྱི་བསམ་གཏན་ཞེས་ང་སྨྲའོཿ ཀྱེ་ཡེ་ཤེས་རྡོ་རྗེཿ ང་ཀུན་ཏུ་བཟང་པོའི་ཡེ་ཤེས་ཀྱི་ཀློང་ནིཿ ངོ་བོ་ལ་མཚན་ཉིད་མེད་པས་རྟག་པ་མ་ཡིན་ནོཿ རང་བཞིན་ལ་གསལ་འགྲིབ་སྤངས་པས་ཆད་པ་མ་ཡིནཿ ཐུགས་རྗེ་ལ་ཕྱོགས་རིས་མེད་པས་མུ་དང་མཐས་མ་གཏུགསཿ ནམ་མཁའི་ཁམས་སུ་གྱུར་ཡང་སྟོང་པས་དཔེར་མ་བཏུབཿ ཉི་ཟླའི་འོད་དང་འདྲ་སྟེ་རིག་པས་གོ་ཕྱེདཿ ངའི་སྣང་བ་ལ་བཟུང་བའི་ཡུལ་མེད་པས་ཕྱི་སྟོང་པ་ཉིད་དོཿ ངའི་སྟོང་པ་ལ་འཛིན་པའི་སེམས་མེད་པས་ནང་སྟོང་པ་ཉིད་དོཿ རིག་པའི་ཀློང་ན་ཡེ་ཤེས་རྒྱ་མ་རལ་བས་དོར་བ་མེད་པ་སྟོང་པ་ཉིད་དོཿ མདོར་ན་ཁས་ལེན་གྱི་ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་རྫོགས་པས་གཞི་ཀ་དག་ཆེན་པོཿ ལམ་ལྷུན་གྲུབ་ཆེན་པོཿ འབྲས་བུ་རང་གྲོལ་ཆེན་པོཿ བསྒོམས་པས་སངས་རྒྱས་མ་ཐོབཿ མ་བསྒོམ་པས་འཁོར་བར་མ་འཁྱམསཿ སོ་མ་རང་གྲོལ་རྒྱ་ཡན་ལྷུན་འབྱམས་ངང་གཞག་ཆེན་པོ་སྟེ་ཆོས་ལྔ་དང་ལྡན་པ་ཀ་ནས་དག་པའི་ཡེ་ཤེས་ཆེན་པོ་དུས་གསུམ་འཕོ་འགྱུར་མེད་པ་ཞེས་བྱའོཿ


JLAZ012_Page_0072
[མ་དཔེ་གཟིགས་ན་འདིར་གནོན།]

དེའི་ངང་ལས་གཞི་སྣང་བ་ཆེན་པོའི་འོད་གསལ་ལོངས་སྤྱོད་རྫོགས་པའི་སྐུ་ཐོད་རྒལ་གྱི་སྣང་བ་བཀོད་དེཿ ཤེས་རབ་རང་བྱུང་གི་སྒྲོན་མས་འཆར་བའི་གཞི་བྱས་སོཿ རྒྱང་ཞགས་ཆུའི་སྒྲོན་མས་འཆར་བྱེད་ཀྱི་སྒོ་བྱས་སོཿ དག་པ་དབྱིངས་ཀྱི་སྒྲོན་མས་ཤར་བའི་རྒྱན་བྱས་སོཿ ཐིག་ལེ་སྟོང་པའི་སྒྲོན་མས་ཤར་བའི་མཚན་ཉིད་བྱས་སོཿ དེ་ལྟར་སྒྲོན་མ་རྣམ་པ་བཞིའི་རྟེན་དེ་ཡང་བརྟེན་པ་རིག་པའི་གདངས་ཆེན་པོ་རྡོ་རྗེ་ལུ་གུ་རྒྱུད་ཆོས་ཉིད་མངོན་སུམ་པའི་སྣང་བ་དང་འགྲོགས་པ་ལསཿ ཉམས་གོང་འཕེལ་དངཿ རིག་པ་ཚད་ཕེབས་དངཿ ཆོས་ཉིད་ཟད་པ་སྟེ་སྣང་བ་ཆེན་པོ་བཞི་མཐར་ཐུག་པས་འབྲས་བུའི་ཆོས་ལམ་གྱི་སྣང་བ་ལ་རྫོགས་པ་ནི་ཀུན་ཏུ་བཟང་པོའི་གསང་བ་བསམ་གྱིས་མི་ཁྱབ་པའོཿ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལསཿ གཞི་སྣང་བ་ཆེན་པོའི་ལམ་བཤད་པའི་སྐབས་ཏེ་ལེའུ་བཞི་པའོཿ ཡང་སངས་རྒྱས་ཀུན་དང་གཉིས་སུ་མེད་པའི་ཡེ་ཤེས་རྡོ་རྗེས་གསོལ་པཿ ཀྱཻ་སྟོན་པ་དགོངས་ཤིགཿ ངོ་བོ་ཉིད་ཀྱི་སྐུ་འབྲས་བུའི་ལོངས་སྐུ་ཆེན་པོ་དངཿ ངོ་བོ་ཉིད་ཀྱི་སྣང་བ་ཆོས་ཉིད་ཀྱི་ལོངས་སྐུའི་ཁྱད་པར་གསུང་དུ་གསོལཿ བཀའ་སྩལ་པཿ ལོངས་སྤྱོད་རྫོགས་པའི་སྐུའི་འཆར་གཞི་ནི་ཆོས་ཀྱི་སྐུའི་རྩལ་སྣང་སྟེཿ དེའི་མཚན་ཉིད་ནི་རྣམ་པ་ཐམས་ཅད་པའི་མཆོག་དང་


JLAZ012_Page_0073
[མ་དཔེ་གཟིགས་ན་འདིར་གནོན།]

ལྡན་པའོཿ ངོ་བོ་ནི་ཆོས་སྐུའི་རང་བཞིན་ལས་གཡོ་བ་མེད་པའོཿ ངེས་ཚིག་ནི་སྐུ་གསུམ་དང་ཡན་ལག་བདུན་གྱི་རྒྱུ་དང་འབྲས་བུའི་ཆོས་མ་ལུས་ཤིང་ལུས་པ་མེད་པའི་སྣང་བ་ལ་རྟག་པ་རྒྱུན་གྱི་འཁོར་ལོར་ལོངས་སྤྱོད་པས་ན་བཅུ་གཅིག་ཀུན་ཏུ་འོད་ཀྱི་སའི་སྣང་བ་སྟེ་འབྲས་བུའི་ལོངས་སྐུ་ཞེས་བྱའོཿ དེ་ལས་གདུལ་བྱའི་སྣང་ཚུལ་སྐུའམཿ གཟུགས་བརྙན་ལོངས་སྐུའི་སྟོན་པ་ནི་ངེས་པ་ལྔ་ལྡན་འབྲས་བུའི་སྐུ་ལས་བྱད་དང་མེ་ལོང་གི་གཟུགས་བརྙན་བཞིན་སྟོན་པ་རྡོ་རྗེ་འཆང་གི་ཐུགས་རྗེ་ལས་རང་བཞིན་དུ་སྤྲུལ་པ་མངོན་པར་དགའ་བ་དངཿ དཔལ་ལྡན་བརྩེགས་པ་དངཿ པདྨ་བརྩེགས་པ་དངཿ ལས་རབ་གྲུབ་པ་དངཿ མེ་རི་འབར་བ་ལ་སོགས་ཏེ་ཕྱོགས་བཅུ་སྤྲུལ་པའི་ཞིང་དུ་རྣམ་པར་འཕྲུལ་ལོཿ འདི་ལྟར་གསང་བ་མཆོག་གི་ཐེག་པ་འདིའི་ལམ་གྱི་སྒོ་མཐོང་ཞིང་དམ་ཚིག་ཆེན་པོའི་གནས་ལ་བསླབ་པ་དག་ནི་གལ་ཏེ་སྐྱེ་བ་འདི་ལ་སྣང་བཞི་ཚད་དུ་མ་ཕྱིན་ཀྱངཿ ཁམས་བདེ་གཤེགས་སྙིང་པོའི་ཁྱབ་བྱེད་རང་གི་སྙིང་ག་ན་གཞི་སྣང་བ་ཆེན་པོའི་འོད་གསལ་ཆོས་ཀྱི་དབྱིངས་དངཿ མེ་ལོང་ལྟ་བུ་དངཿ མཉམ་པ་ཉིད་དངཿ སོ་སོར་རྟོགས་པ་དངཿ བྱ་བ་གྲུབ་པ་དང་ལྔའི་ཡེ་ཤེས་རང་བཞིན་ལྷུན་གྲུབ་ཆེན་པོའི་འཆར་གཞིར་བཞུགས་པས་ལམ་སྣང་དུ་རིག་པ་ཚད་ཕེབས་ཀྱི་མཚན་དཔེ་འགོད་ཅིངཿ


JLAZ012_Page_0074
[མ་དཔེ་གཟིགས་ན་འདིར་གནོན།]

ཆོས་ཉིད་ཀྱི་ལོངས་སྐུས་བར་དོའི་ལམ་དུའང་གདུལ་བྱའི་དོན་རྨི་ལམ་ལྟར་བྱེད་པའི་ཕྱིར་ཕྱེད་སྤྲུལ་ལོངས་སྐུ་ཞེས་བྱ་སྟེཿ རང་སྣང་ལ་འབྲས་བུའི་ལོངས་སྐུ་དང་ངོ་བོ་ཐ་དད་པ་མ་ཡིན་ཀྱངཿ ཞིང་ཁམས་དང་འཁོར་ལ་སོགས་པ་སྤྲུལ་པའི་སྣང་བས་བསྡུས་པའི་ཕྱིར་རོཿ དེའི་ཕྱིར་ཞིང་ཁམས་འདི་དག་ཏུ་དབུགས་ཕྱུང་བ་དང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཡིན་ལཿ དབྱིངས་ཀྱི་ལོངས་སྐུ་ཆེན་པོ་ནི་སངས་རྒྱས་ཉིད་ཀྱི་སྣང་ཆར་སྟོང་གཟུགས་རྟག་པ་རྒྱུན་གྱི་འཁོར་ལོའི་ཆོས་ཉིད་ལ་སྤྱོད་ཅིངཿ རྒྱུད་གཞན་དུ་ས་བཅུའི་དབང་ཕྱུག་གིས་ཀྱང་མི་མཐོང་བའི་ཁྱད་པར་རོཿ ཞེས་གསུངས་པསཿ འཁོར་གྱི་སངས་རྒྱས་དང་བྱང་ཆུབ་སེམས་དཔའི་ཚོགས་རང་སྣང་ཉིད་ལ་རང་སྣང་དུ་སྤྱོད་པའི་སྐལ་བ་ཆེན་པོ་ལ་རྗེས་སུ་ཡི་རང་བའི་ངང་ནས་གསོལ་བཿ ཀྱཻ་སྟོན་པ་ཀུན་ཏུ་བཟང་པོཿ ཉིད་ཀྱི་དགོངས་པ་ལ་གཅིག་དང་ཐ་དད་པའི་མཚན་མ་མི་དམིགས་ནཿ ངོ་བོ་ཉིད་ཀྱི་ཡེ་ཤེས་ངོ་བོ་ཉིད་ཀྱི་ཀློང་ན་འཁྱིལ་བ་ཆོས་དབྱིངས་གཞོན་ནུ་བུམ་པའི་སྐུའི་གནས་ལུགས་གསུང་དུ་གསོལཿ ཞེས་ཞུས་པསཿ བཅོམ་ལྡན་འདས་དཔལ་གདོད་མའི་མགོན་པོས་ཆོས་ཀྱིས་དབྱིངས་བསམ་གྱིས་མི་ཁྱབ་པའི་དོན་ལ་དགོངས་པ་ཙམ་ནས་ཅང་མི་གསུང་བའི་གནས་སྐབས་སུ་གྱུར་ཏེ་ཅང་མ་གསུང་བའི་དོན་གྱིས་ལན་བཏབ་ནས་ཞལ་ཕྱག་མཚན་དཔེར་སྟོན་


JLAZ012_Page_0075
[མ་དཔེ་གཟིགས་ན་འདིར་གནོན།]

པའི་སྤྲོས་པ་ཐམས་ཅད་ཀྱང་ཆོས་ཀྱི་དབྱིངས་འགྱུར་བ་མེད་པའི་རྡོ་རྗེཿ མངོན་པར་བྱང་ཆུབ་པའི་དབྱིངས་སུ་ཐིམ་པར་གྱུར་ཏོཿ དེའི་ཚེ་སངས་རྒྱས་ཀུན་དང་གཉིས་སུ་མེད་པའི་ཡེ་ཤེས་རྡོ་རྗེ་དེ་བཅོམ་ལྡན་འདས་དཔལ་ཀུན་ཏུ་བཟང་པོའི་གསང་བ་བསམ་གྱིས་མི་ཁྱབ་པའི་ཐུགས་རྗེས་བསྐུལ་ཏེ་ངོ་བོའི་བཞུགས་ཚུལ་ཚིག་གི་ལམ་དུ་སྟོན་པའི་སྤོབས་པའི་གཏེར་ཆེན་པོ་ཡོངས་སུ་གྲོལ་ནས་བཀའ་སྩལ་པཿ ཨེ་མ་ཧོཿ རྟག་པ་མ་ཡིན་ཡེ་ཤེས་སྐུཿ ཆད་པ་མ་ཡིན་གསལ་བའི་གདངསཿ གཉིས་ཀ་མ་ཡིན་ཟུང་འཇུག་སྦུབསཿ སོ་སོ་རང་རིག་ངོ་བོའི་སྐུཿ མཐའ་དང་དབུས་མེད་ནམ་མཁའི་ངངཿ ཆོས་ཉིད་གསལ་བའི་གཞལ་ཡས་ནཿ སྐུ་ལྔ་ཡེ་ཤེས་ལྔ་ཡི་བདགཿ ནང་གསལ་གཞོན་ནུ་བུམ་པའི་སྐུཿ བགྲེས་རྒུད་མེད་པའི་གཞོན་ནུ་ལཿ མཁྱེན་ཆ་ནང་གསལ་བུམ་པའི་སྐུཿ འགྱུར་བ་མེད་པའི་ཡེ་ཤེས་དངཿ འགག་མེད་ཐབས་ཀྱི་ཤེས་རབ་རྩལཿ ངང་དང་རང་བཞིན་ཆོས་ཉིད་ཀློངཿ ཐིམ་པ་ལ་རྨུགས་ཕྲ་བའི་སྐུཿ གནམ་སྟོང་དག་གི་ཟླ་བ་བཞིནཿ གཟུགས་སྐུ་གཉིས་ཀྱི་ཡོན་ཏན་ཀུནཿ སྣང་ཆར་མི་གསལ་དབྱིངས་སུ་འཁྱིལཿ གདུལ་བྱའི་དོན་ལ་སོ་སོར་སྣངཿ ཆོས་སྐུའི་ཀློང་ན་གཅིག་ཏུ་འདྲེསཿ ལོངས་སྐུའི་ངང་ནས་མཚན་དཔེར་རྫོགསཿ སྤྲུལ་བས་གདུལ་བྱ་དཔག་མེད་འདྲེནཿ


JLAZ012_Page_0076
[མ་དཔེ་གཟིགས་ན་འདིར་གནོན།]

མདོར་ན་དེ་བཞིན་གཤེགས་པ་ཡིཿ སྐུ་གསུང་ཐུགས་ཡོན་ཕྲིན་ལས་ཀྱིཿ གསང་བ་བསམ་གྱིས་མི་ཁྱབ་པའིཿ ཡེ་ཤེས་ཆེན་པོ་གང་ཡིན་པཿ ངོ་བོ་ཉིད་ཀྱི་ཀློང་ནའོཿ ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ཅེས་བྱ་བ་ལསཿ འབྲས་བུའི་གྲོལ་ས་ཆེན་པོ་བཤད་པའི་ལེའུ་སྟེ་ལྔ་པ་སྐུ་དང་ཡེ་ཤེས་ཀྱི་ངེས་བརྗོད་བསྟན་པ་རྫོགས་སོཿ རྒྱུད་འདི་སོར་མོ་དྲུག་པའི་ཚདཿ རིན་ཆེན་དང་པོའི་ཁུ་བས་བྲིསཿ འདི་ནི་ཆོས་སྐུའི་རིང་བསྲེལ་དངོསཿ གཞན་གསུམ་དག་ཀྱང་ལྡན་པར་བྱཿ སེལ་མེད་བདུད་རྩི་ཨ་མྲྀ་ཏཿ བདེ་བསྐྱེད་མ་ཡི་ལྕང་ལོར་བཅསཿ སྤྱི་ལ་གླེགས་བམ་ཚུལ་དུ་བྱསཿ མགུལ་དུ་དྲོད་དང་མ་བྲལ་བཅངཿ རྣལ་འབྱོར་ལྡན་ལ་ཙན་དན་གྱིཿ དྲིལ་ཤིང་བཅས་ཏེ་ཞགས་ནས་དྲིལཿ དར་སྣ་ལྔ་ཡིས་རྒྱ་ཆིང་གདབཿ མཁའ་འགྲོ་ཚོགས་ཀྱིས་མཉེས་བྱས་ལཿ ཐོད་རྒལ་རིག་པའི་རྩལ་དབང་དངཿ འབྲེལ་པར་བདེ་ཆེན་འཁོར་ལོར་བཟུངཿ ཆོས་ཕུང་བརྒྱད་ཁྲི་བཅངས་དང་མཉམཿ འཁོར་འདས་ལམ་གསུམ་ཀུན་ཀྱི་མཚངཿ རིག་འཛིན་དཔའ་བོ་མཁའ་འགྲོ་ཡིཿ བླ་རྡོ་ཡིན་པས་དད་གུས་བསྐྱེདཿ རྩ་གསུམ་ལྷ་ཚོགས་སྤྲིན་བཞིན་འདུཿ ཉམས་དང་རྟོགས་པ་ཤུགས་ལ་འབརཿ བགྲོད་པ་གཉིས་དང་ས་


JLAZ012_Page_0077
[མ་དཔེ་གཟིགས་ན་འདིར་གནོན།]

གཡོ་སོགསཿ རྣལ་འབྱོར་རང་ཉམས་འབར་བའི་ཚེཿ རྒྱུད་འདི་ཀློག་ཅིག་དོན་ལ་བསམཿ འདི་དོན་བདེ་བླག་སུས་རྟོགས་པཿ ཐོག་མའི་ཀུན་ཏུ་བཟང་པོ་དངཿ སྐལ་པ་མཉམ་པར་འགྱུར་བས་ནཿ ལྟ་སྒོམ་དམན་དང་ཐེག་དམན་ལཿ གཙུག་གིས་མི་འདུད་ལག་གི་བརྡཿ འདི་ནི་རྒྱུད་ཀུན་སྙིང་པོ་སྟེཿ དད་དང་ངེས་ཤེས་སུ་ལྡན་པཿ དེ་ལ་སྦྱོར་བའི་དངོས་གྲུབ་ཡོདཿ ཐེ་ཚོམ་ཅན་ལ་སྐལ་པ་ཆདཿ དེ་ཕྱིར་འབྲས་བུ་གསང་སྔགས་ཀྱིཿ ལམ་ལ་ཡིད་གཉིས་མེད་པ་དངཿ མོས་པ་བརྟན་པ་ཁག་ཆེ་བསཿ ཐབས་ཀྱི་ལམ་མཆོག་དམ་པའོཿ ས་མ་ཡཿ རྒྱ་རྒྱ་རྒྱཿ གཏེར་རྒྱཿ སྦས་རྒྱཿ དམ་རྒྱཿ ཟབ་རྒྱཿ རྒྱུད་ཀྱི་རྒྱལ་པོ་ཆེན་པོ་འདི་ནི་རྒྱ་གར་གྱི་པཎྜི་ཏ་ཆེན་པོ་བི་མ་ལ་མི་ཏྲའི་གསང་བ་གསུམ་གྱི་སྒྱུ་འཕྲུལ་རྡོ་རྗེའི་བཀོད་པསཿ ཐ་སྙད་དང་ཚིག་ལ་མ་བརྟེན་པར་ཀུན་ཏུ་བཟང་པོའི་དགོངས་པའི་ཀློང་ནས་འགག་པ་མེད་པར་བཤད་ཅིངཿ རིག་འཛིན་འཇིགས་མེད་གླིང་པས་སྐད་གཉིས་ཤན་སྦྱར་གྱི་རྟོག་ཆོས་ལ་མ་ལྟོས་པར་པུ་རི་


JLAZ012_Page_0078
[མ་དཔེ་གཟིགས་ན་འདིར་གནོན།]

དཀར་པོ་ཀློང་སྒྲོམ་འབར་བའི་མཁའ་འགྲོའི་ཡི་གེ་ལས་པར་གྱིས་བཏབ་པ་བཞིན་དུ་སྐད་ཅིག་ཉིད་ལ་གཏན་ལ་དབབ་པའོཿ ཤིན་ཏུ་ཟབ་ཅིང་བཀའ་གཉན་པས་དབྱིངས་ཀྱི་མཁའ་འགྲོ་རྣམས་མཁྲེན་པའི་རྒྱུསཿ ཉིན་ཞག་གཅིག་ཏུ་བཙན་ཐབས་ཀྱི་འདུ་འཁྲུགས་དྲག་པོའང་བྱུངཿ བུད་མེད་ཞིག་གིས་བྷོ་དྷི་ཙི་དངཿ རཀྴའི་ཕྲེང་བ་སྨུག་པོ་རྒྱན་ལྡན་ལུ་གུ་རྒྱུད་དུ་སྦྲེལ་བ་གཉིས་ལས་རཀྴ་དང་ཆུ་དར་སྔོན་པོའི་རྒྱ་མདུད་ལྷན་ཅིག་པར་སྤྲད་ནས་གསང་བར་གདམས་པ་ཡིན་པས་རེ་ཞིག་གསུམ་རྒྱུད་དུ་གུ་ཧྱཿ

ཀློང་ཆེན་སྙིང་གི་ཐེག་ལེ་ལསཿ མན་ངག་རྫོགས་པ་ཆེན་པོའི་རྒྱུད་ཕྱི་མ།


JLAZ012_Page_0080
[མ་དཔེ་གཟིགས་ན་འདིར་གནོན།]

༂ ཀློང་ཆེན་སྙིང་གི་ཐེག་ལེ་ལསཿ མན་ངག་རྫོགས་པ་ཆེན་པོའི་རྒྱུད་ཕྱི་མ་བཞུགསཿ


JLAZ012_Page_0081
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུཿ མ་ཧཱ་སནྡྷི་ཨུ་པ་དེ་ཤ་ཏནྟྲ་ནཱ་མཿ བོད་སྐད་དུཿ མན་ངག་རྫོགས་པ་ཆེན་པོའི་རྒྱུད་ཅེས་བྱ་བཿ མ་བཅོས་རིག་པའི་ཀློང་ལ་ཕྱག་འཚལ་ལོཿ ཐོག་མའི་མགོན་པོ་ཀུན་ཏུ་བཟངཿ སངས་རྒྱས་ཀུན་ཀྱི་མེས་པོ་ངསཿ ཅི་ཡང་མ་ཡིན་འོད་གསལ་ངངཿ ཉེ་བར་ལེན་པའི་མ་རིག་ཀུནཿ དབྱིངས་སུ་བཅོམ་ནས་སངས་རྒྱས་ཏེཿ འཁོར་བར་འཁྱམ་དུ་མ་མྱོང་བསཿ ང་ལ་ཐོག་མའི་མགོན་དུ་གྲགསཿ དེ་ཚེ་དབྱིངས་ལས་རིག་པའི་རྩལཿ ལྷུན་གྲུབ་ཐུགས་རྗེའི་སྤྲིན་བཀོད་ཚེཿ སྙིང་རྗེས་འཁོར་བའི་སེམས་ཅན་རྣམསཿ མ་བཟོ་ང་ཡི་གོ་འཕང་ལཿ འགོད་ཕྱིར་འགགས་མེད་རང་བྱུང་རྩལཿ གཞི་ལམ་འབྲས་བུའི་རྒྱུད་དུ་བཤདཿ


JLAZ012_Page_0082
[མ་དཔེ་གཟིགས་ན་འདིར་གནོན།]

གཞི་ནི་འཁོར་འདས་འདུས་མ་བྱསཿ ལམ་ནི་གསལ་དྭངས་ཕྱེད་པར་ཤརཿ འབྲས་བུ་མ་བཙལ་ལྷུན་གྲུབ་སྤུབསཿ བཅིངས་གྲོལ་མེད་པར་བུདྡྷའོཿ ས་མ་ཡཿ རྒྱུ་རྐྱེན་ལས་འདས་སྟོང་པ་ཉིདཿ འོད་དུ་གསལ་བའི་བདག་ཉིད་ཅནཿ སེམས་ཅན་ཀུན་ཀྱི་རང་རྒྱུད་ལཿ གནས་ཀྱང་རང་ངོ་རང་གིས་བསྒྲིབསཿ ལས་དང་བག་ཆགས་མུན་ཀློང་འཐུམསཿ སྣ་ཚོགས་སྡུག་བསྔལ་ལས་ལ་སྤྱོདཿ དེ་དག་སྙིང་རྗེས་དྲང་བའི་སླདཿ ང་ཡི་གནས་ལུགས་ཆེན་པོ་ལཿ བཞུགས་ཚུལ་ངོ་བོ་བརྟག་པའི་ཕྱིརཿ སྐྱེ་མེད་ཀློང་ནས་ཚིག་གི་རྒྱུདཿ འགགས་མེད་རྡོ་རྗེའི་རོལ་མོར་བསྒྱུརཿ ས་མ་ཡཿ སེམས་ཞེས་སྣ་ཚོགས་སྣང་བའི་སྒོཿ མི་དྲན་དགུ་དྲན་


JLAZ012_Page_0083
[མ་དཔེ་གཟིགས་ན་འདིར་གནོན།]

འཁོར་བ་དངཿ མྱ་ངན་འདས་པ་ཀུན་ཀྱི་གཞིཿ བྱུང་ནི་དང་པོ་གང་ནས་བྱུངཿ སྣང་བ་ས་རྡོ་རི་བྲག་དངཿ སྟོང་པ་ཅང་མེད་ནམ་མཁའི་དབྱིངསཿ དེ་ལ་སོགས་ཏེ་སྣང་བརྟགས་ཀྱིཿ ཤེས་བྱས་ཁྱབ་པའི་ཡུལ་ཀུན་ལཿ བརྟག་དཔྱད་གཞིག་འབྲེལ་ཅི་བྱས་ཀྱངཿ ངོ་བོས་སྟོང་པའི་ཆོས་ཉིད་ལཿ བྱུང་ས་སྟོར་བས་བྱུང་མཁན་མེདཿ རྒྱུ་ཡིས་དཔྱད་དུ་མེད་པའི་ཕྱིརཿ ངོ་བོ་སྟོང་པར་ང་ཡིས་བཤདཿ དེ་བཞིན་ལམ་གྱི་གནས་སྐབས་སུཿ བག་ཆགས་ལས་གྲུབ་སེམས་ཅན་གྱིཿ སྤྱི་བོའི་གཙུག་ནས་རྐང་མཐིལ་ཡནཿ གང་དུ་གནས་པའི་ཡུལ་བཙལ་བསཿ འཚོལ་བའི་མཁན་པོ་སྟོང་པར་ཤརཿ རྐྱེན་ལ་བལྟོས་པ་མེད་པའི་ཕྱིརཿ རང་བཞིན་གསལ་བར་ང་ཡིས་བསྟནཿ ཐ་མ་འཁོར་བ་སྟོངས་གྱུར་ནསཿ སྣོད་བཅུད་མིང་ཡང་མི་གྲགས་ཚེཿ ཡུལ་དང་ཡུལ་ཅན་ལ་སོགས་ཏེཿ རང་བཞིན་ཅི་ཡི་གནས་སུ་འགྲོཿ བརྟགས་ཀྱང་འགྲོ་མཁན་རྣམ་དག་པསཿ འགྲོ་སའི་ཁུངས་དང་བྲལ་བའི་ཕྱིརཿ ཐུགས་རྗེ་ཀུན་ཁྱབ་ཆེན་པོའོཿ ས་མ་ཡཿ དེ་ལྟར་བྱུང་གནས་འགྲོ་གསུམ་གྱིསཿ དཔྱད་དུ་མེད་པའི་སེམས་ཉིད་འདིཿ དངོས་པོ་ཅན་ནམ་དངོས་མེད་ཅནཿ གསལ་བ་ཅན་ནམ་སྟོང་པ་ཅནཿ འབྲས་བུ་ཅན་ནམ་འབྲས་མེད་ཅནཿ དོན་ལ་ཡོད་དམ་མེད་པ་སོགསཿ ཇི་ལྟར་


JLAZ012_Page_0084
[མ་དཔེ་གཟིགས་ན་འདིར་གནོན།]

གཞིགས་ཤིང་བློས་དཔག་ཀྱངཿ བྱ་ལོང་ནམ་མཁའི་མཐའ་འཚོལ་བཞིནཿ ཤེས་བྱས་ཐུག་པར་མི་ནུས་ཤིངཿ སྟོང་པའི་ངང་ལས་རིག་པར་ཤརཿ རིག་པའི་ངོ་བོ་སྟོང་པ་ཉིདཿ རིག་སྟོང་གཉིས་སུ་མི་ཕྱེད་ལཿ གཅིག་ཀྱང་མ་ཡིན་ཀུན་ཀྱི་སྲོགཿ སངས་རྒྱས་བཟང་པོས་མ་བཅོས་ཤིངཿ སེམས་ཅན་ངན་པས་མ་བསྒྱུར་བའིཿ ད་ལྟའི་རིག་པ་བཟོ་མེད་པཿ གཅེར་ཡན་དྲི་མེད་རང་གསལ་ནིཿ གདོད་མའི་མགོན་པོ་ང་ཉིད་དོཿ དེ་ཉིད་མ་རིག་སེམས་ཅན་རྣམསཿ དེ་ལ་གཟུགས་སུ་རྟོགས་པར་བྱེདཿ བསྐལ་པར་བསྒྲུབས་ཀྱང་ང་མི་མཐོངཿ ང་ལ་སྒྲ་རུ་རྟོགས་པར་བྱེདཿ རིག་པ་བགྲང་ཀྱང་ང་མི་འགྲུབཿ ང་ལ་ཐུགས་རྗེའི་ཡེ་ཤེས་རྟོགསཿ དེ་ཡང་གཉིས་འཛིན་རྣམ་རྟོག་སྟེཿ དགེ་སྡིག་ལས་དང་དེ་འབྲས་ཀྱིསཿ ཕན་གནོད་བཟང་ངན་མེད་པའི་དབྱིངསཿ སྤང་བླང་བྱ་རྩོལ་དག་པའི་ཀློངཿ གནས་ལུགས་དོན་གྱི་ཀུན་བཟང་ངཿ དུས་བཞི་མཉམ་པ་ཉིད་དུ་བཞུགསཿ མི་གསུང་རང་གནས་ཆེན་པོར་བཞུགསཿ མི་འགྱུར་གཡུང་དྲུང་ལྟ་བུར་བཞུགསཿ སྤྲོས་པའི་ཚིག་གིས་བཅོས་པ་ལཿ ང་ཡི་དགོངས་པར་ཉེ་མི་སྲིདཿ མངོན་སུམ་གནད་དུ་ཕེབས་པ་དེཿ ང་དང་གཉིས་སུ་མེད་པའོཿ ས་མ་ཡཿ རྒྱ་རྒྱ་རྒྱཿ དེ་ལྟར་དགོངས་པ་དོན་རྒྱུད་ལཿ


JLAZ012_Page_0085
[མ་དཔེ་གཟིགས་ན་འདིར་གནོན།]

ཚིག་རྒྱུད་རྣམ་པ་གསུམ་དུ་བྱུངཿ སེམས་ཀློང་མན་ངག་སྡེ་གསུམ་མོཿ དང་པོ་སེམས་སྡེའི་ངོ་བོ་ནིཿ མིག་གཉིས་ནམ་མཁའི་ཁམས་སུ་བལྟཿ འགྱུ་བའི་དབུགས་ཀྱང་རང་སོར་གློདཿ སྐྱིལ་ཀྲུང་མཉམ་བཞག་ལྷོད་ཆ་ཅནཿ ཡང་ན་ལག་གཉིས་པུས་མོར་བཀབཿ ཆོས་ཀུན་བྱང་ཆུབ་སེམས་ཀྱི་ངངཿ གསལ་དྭངས་ཕྱེད་པའི་རིག་པ་ལཿ འདུ་ཤེས་གྲུང་པོས་མི་ལྟ་བརཿ བལྟ་བྱ་ལྟ་བྱེད་གཉིས་མེད་པའིཿ གནས་ལུགས་ཡེ་གཞག་ཆེན་པོ་ལཿ སྒྲིམ་པོའི་བློ་ཡིས་མི་འཆོས་སོཿ དྲན་པའི་གཟེབ་ཀྱིས་མི་འཆིང་ངོཿ གཉེན་པོའི་ལྷད་ཀྱིས་མི་བསླད་དོཿ དེ་ཚེ་དྲན་བསམ་ཅི་ཤར་ཡངཿ སེམས་ལས་བྱུང་ཞིང་སེམས་ཀྱི་ངངཿ འཁོར་འདས་མ་ལུས་སེམས་སུ་རྫོགསཿ དེ་ལྟར་གནས་པའི་ཆོས་ཉིད་ལཿ ཐ་སྙད་ཚིག་གིས་སྨྲ་མ་ཤེསཿ བཅོས་མའི་མིག་གིས་མཐོང་མ་གྱུརཿ ཀ་དག་གཏིང་གསལ་ཆེན་པོའོཿ ས་མ་ཡཿ གཉིས་པ་ཀློང་སྡེའི་ངོ་བོ་ནིཿ ཕྱོགས་རིས་མེད་པ་ལྟ་བའི་ཀློངཿ དམིགས་གཏད་མེད་པ་སྒོམ་པའི་ཀློངཿ རེ་དོགས་མེད་པ་སྤྱོད་པའི་ཀློངཿ ཐེ་ཚོམ་མེད་པ་འབྲས་བུའི་ཀློངཿ བཟང་ངན་མེད་པ་ཆོས་སྐུའི་ཀློངཿ དྲན་འཛིན་མེད་པ་ལོངས་སྐུའི་ཀློངཿ རྟག་ཆད་མེད་པ་སྤྲུལ་སྐུའི་ཀློངཿ སྒོམ་དུ་མེད་པ་འོད་གསལ་ཀློངཿ གཉེན་པོ་མེད་


JLAZ012_Page_0086
[མ་དཔེ་གཟིགས་ན་འདིར་གནོན།]

པ་དྲན་པའི་ཀློངཿ བདེ་ཆེན་ཀུན་ཏུ་བཟང་མོ་ཡིཿ བྷ་ག་ཡངས་པའི་ཀློང་ཆེན་མོརཿ བཅོས་མའི་ཆོས་རྣམས་རྫོགས་སངས་རྒྱསཿ དེ་ཕྱིར་ང་ཡི་མཁའ་ཀློང་དུཿ རྒྱལ་བ་ཀུན་ཀྱི་ཐུགས་རྡོ་རྗེཿ འདུ་འབྲེལ་མེད་པ་ཨེ་མ་ཧོཿ ས་མ་ཡཿ གསུམ་པ་འོད་གསལ་མན་ངག་སྡེཿ གནད་ཀྱི་ཡང་ཟབ་ཐིག་ལེའི་སྐོརཿ དཔྲལ་བའི་མིག་ལས་གཅེས་པ་སྟེཿ སྙིང་གི་ཁྲག་ལས་ཕངས་པའི་དོནཿ ཅི་ཕྱིར་བློ་ཡིས་བྱས་པའི་ཆོསཿ ཐེག་བརྒྱད་ཚིག་གི་གྲུབ་མཐའ་དངཿ རྟོག་པས་བརྟགས་པའི་སྟོང་པ་ཉིདཿ རྩོལ་བས་གཅུན་པའི་ཤེས་ཉམས་ལཿ གནས་ལུགས་ཡིན་དུ་མི་རེ་བརཿ ཁྲེགས་ཆོད་གདེང་དུ་གྱུར་པ་ལསཿ ནང་དུ་སྟོང་པའི་ཉམས་ཤར་བསཿ ཕྱི་རུ་གསལ་བའི་ཡེ་ཤེས་ནིཿ སྙིང་ནས་མིག་ཏུ་འབྲེལ་བ་ཡིཿ རང་བྱུང་གསང་བ་ཆེན་པོའི་རྩཿ ཀ་ཏི་ཤེལ་གྱི་སྦུ་ཀུ་ཅནཿ དར་དཀར་སྣལ་མ་ལྟ་བུའི་ལམཿ བརྒྱུད་དེ་དབང་པོའི་མངོན་སུམ་པརཿ ལྷག་མཐོང་རྡོ་རྗེ་ལུ་གུ་རྒྱུདཿ མུ་ཏིག་བསྟར་ལ་བརྒྱུས་པ་ལྟརཿ གསལ་འཚེར་དྭངས་སྙིགས་ཕྱེད་པར་འཆརཿ འདི་ནི་སངས་རྒྱས་ཐམས་ཅད་ཀྱིཿ ཡེ་ཤེས་ཆེན་པོའི་ལམ་ཡིན་པསཿ མཐོང་ཞིང་གནད་ལ་སུས་ཕེབས་པཿ ཁམས་གསུམ་ལྡོག་པ་མ་ཡིན་ནོཿ དེ་ཕྱིར་ལྷག་མཐོང་རིག་པ་དེཿ སྐུ་གསུམ་བཞུགས་སྟངས་གཟིགས་སྟངས་དངཿ


JLAZ012_Page_0087
[མ་དཔེ་གཟིགས་ན་འདིར་གནོན།]

སྒོ་ཡུལ་རླུང་གི་གནད་བསྟུན་ཏེཿ སྒྲོན་མ་རྣམ་བཞིར་གཅུན་པ་ལསཿ ནང་དབྱིངས་རྣམ་དག་སྒྲོན་མའི་ཀློངཿ རིག་པ་བཅུད་དུ་སྨིན་པ་ལཿ ཕྱེད་སྐུར་འཆར་བ་ཉམས་གོང་འཕེལཿ རིགས་ལྔའི་ཚོམ་བུ་ཚད་ཕེབས་ཉམསཿ དེ་ཡང་སྣང་དང་མི་སྣང་གིཿ འཛིན་པའི་ཆོས་ཉིད་ལས་འདས་ཤིངཿ རགས་པའི་ལུས་དང་དབང་པོའི་ཡུལཿ ཐམས་ཅད་དབྱིངས་སུ་དག་པ་ལསཿ ཆོས་ཉིད་ཟད་ཅེས་ང་ཡིས་བཤདཿ ཡིད་དཔྱོད་ཐེག་པའི་སྐུ་གསུམ་གྱིཿ འབྲས་སྣང་འདི་ཡི་ལམ་སྣང་དུཿ སྐད་ཅིག་ཙམ་ལ་རྩལ་རྫོགས་པསཿ སྟོང་ཆེན་གཞོན་ནུ་བུམ་པའི་སྐུཿ ནང་གསལ་ཐིམ་ལ་མ་རྨུགས་པའིཿ དབྱིངས་སུ་མངོན་པར་སངས་རྒྱས་ཚེཿ སྤངས་རྟོགས་མཐའ་རུ་ཕྱིན་པའོཿ ང་དང་གཉིས་སུ་མེད་པའོཿ ཆོས་སྐུ་རང་གསལ་ཆེན་པོའོཿ དེ་ཕྱིར་ཤིན་ཏུ་གསང་ཆེན་གྱིཿ ལམ་མཆོག་བླ་ན་མེད་པ་འདིའིཿ ལམ་གྱི་ཁྲིད་ཚུལ་རྒྱ་ཆེན་རྒྱུདཿ འོད་ཀྱི་ཡང་ཞུན་བཅུ་བདུན་གྱིཿ གནས་རྣམས་འདས་རྗེས་གསུམ་དུ་བསྡུསཿ དེ་ཉིད་ལྟར་དུ་རིག་པར་བྱཿ ས་མ་ཡཿ རྒྱ་རྒྱ་རྒྱཿ དཔལ་ཀུན་ཏུ་བཟང་པོའི་དགོངས་པའི་ཀློང་ལས་རང་ཤར་བ་པཎ་ཆེན་དྲི་མེད་འོད་ཟེར་གྱིས་བརྡས་བརྒྱུད་དེཿ ཀློང་ཆེན་ནམ་མཁའི་རྣལ་འབྱོར་གྱིས་སྒྲ་རང་འགྱུརཿ དོན་དགོངས་བསྒྱུརཿ མན་ངག་གནད་བསྒྱུར་གྱི་ཚུལ་དུ་གཏན་ལ་ཕབ་པ་རྫོགས་སོཿ དཔལ་ལྡན་སྔགས་ཀྱི་སྲུང་མས་དམ་ཉམས་བཀའ་རྐུན་གྱི་ལག་ཏུ་མ་བཏང་ཞིགཿ

ཀློང་ཆེན་སྙིང་གི་ཐིག་ལེ་ལསཿ ཀུན་ཏུ་བཟང་པོའི་དགོངས་ཉམས།


JLAZ012_Page_0088
[མ་དཔེ་གཟིགས་ན་འདིར་གནོན།]

༂ ཀློང་ཆེན་སྙིང་གི་ཐིག་ལེ་ལསཿ ཀུན་ཏུ་བཟང་པོའི་དགོངས་ཉམས་བཞུགསཿ དྲན་པ་ཀུན་ཏུ་བཟང་པོ་ལ་ཕྱག་འཚལ་ལོཿ རྩ་བ་ཆོད་པའི་སེམས་ཉིད་ནམ་མཁའ་འདྲཿ ནམ་མཁའི་རང་བཞིན་ནམ་མཁའ་དམིགས་སུ་མེདཿ དེ་བཞིན་རིག་པ་དཔེ་ཡིས་མི་མཚོན་ཡངཿ ཐབས་ལ་བརྟེན་ནས་གནད་ཀྱི་མན་ངག་བཤདཿ ཇི་ལྟར་དབུལ་པོའི་ཁྱིམ་གྱི་གཏེར་བཟང་པོཿ རང་ལ་ཡོད་ཀྱང་དེ་ཉིད་མ་རིག་པསཿ དབུལ་པོའི་རང་བཞིན་འགྱུར་བ་མེད་པ་ལྟརཿ མ་རིག་རྟོག་པའི་དྲྭ་བར་འཐུམས་ཆེས་པའིཿ མ་རྟོགས་འཁོར་བའི་སེམས་ཅན་སྙིང་རེ་རྗེཿ ཇི་ལྟར་རྣལ་མའི་ལམ་ལ་རྒྱབ་ཕྱོགས་ནསཿ ལོག་པའི་འདུ་ཤེས་ཤིན་ཏུ་མི་བཟད་པསཿ རྟག་ཆད་ཁ་ན་མ་ཐོས་གྲུབ་པའི་མཐའཿ ཕྱོགས་གཅིག་ཁོ་ནར་འཛིན་པའི་དཀའ་ཐུབ་ཅནཿ ལོག་རྟོགས་མུ་སྟེགས་ཅན་དག་ཉོན་རེ་མོངསཿ གདོད་ནས་དག་པའི་སེམས་ཉིད་ནམ་མཁའི་ཁམསཿ ཤེས་བྱའི་ཆོས་ཀྱིས་ཇི་ལྟར་བཙལ་བྱས་ཀྱངཿ སྲིན་བུའི་ཁ་ཆུས་དེ་ཉིད་འཆིང་བ་ལྟརཿ དོན་ལ་རྒྱབ་ཀྱིས་ཕྱོགས་པའི་དོན་ཞེན་ཅནཿ ཉན་ཐོས་འགོག་པའི་བློ་ཅན་ཨ་ཐང་ཆདཿ འཁོར་འདས་ཀུན་ཀྱི་རྩ་བ་རང་གི་སེམསཿ བཅས་བཅོས་མེད་པའི་ངང་དུ་སངས་རྒྱས་པཿ མ་རིག་རྟེན་འབྲེལ་འཁོར་བའི་ཆོས་འཁོར་ལཿ འདུ་ཤེས་གཅིག་ཏུ་གཞུངས་པའི་ཕྱོགས་


JLAZ012_Page_0089
[མ་དཔེ་གཟིགས་ན་འདིར་གནོན།]

འཛིན་ཅནཿ རང་རྒྱལ་བཅོས་མའི་སངས་རྒྱས་ཉམས་རེ་དགའཿ གདོད་ནས་རང་རྩལ་རྫོགས་པའི་སེམས་ཉིད་དེཿ མ་བཅོས་གཉུག་མའི་ལྷུམས་སུ་ཞུགས་པ་ལཿ བདེན་གཉིས་ཚིག་ལ་འཆེལ་བའི་རྟོག་དཔྱོད་ཀྱིསཿ ཡིན་ཚུལ་བཅོས་མར་གཏོང་བའི་ཚུལ་འཆོས་ཅནཿ བྱང་ཆུབ་སེམས་དཔའི་གྲུབ་མཐའ་ཕྱི་ཐག་རིངཿ བཟང་ངན་བླང་དོར་མེད་པའི་སེམས་ཉིད་ལཿ གཙང་བཙོག་སྤོང་ལེན་སྒྲིན་པོའི་ལྷད་ཀྱིས་བསླདཿ གཉིས་མེད་དོན་ལ་གཉིས་འཛིན་གཟུགས་ཀྱིས་བཅོསཿ ཐོབ་བྱ་མེད་ལ་གོ་འཕང་དོན་གཉེར་བའིཿ བྱ་རྒྱུད་ཀྲི་ཡའི་གྲུབ་མཐའ་ཉམས་རེ་མཚརཿ བཟང་ངན་འཕེལ་འགྲིབ་མེད་པའི་གནས་ལུགས་ལཿ ལྟ་སྒོམ་སྤྱོད་པའི་ཐ་སྙད་འགགས་ན་ཡངཿ ཐབས་དང་ཤེས་རབ་སྤྱོད་པའི་དངོས་འཛིན་བློསཿ བྱར་མེད་བྱ་བར་གཡེལ་བའི་གྲུབ་མཐའ་ཅནཿ སྤྱོད་རྒྱུད་ཨུ་པའི་བརྟུལ་ཞུགས་ཐང་རེ་ཆདཿ ཕྱི་ནང་བར་མཚམས་མེད་པ་དྲན་པའི་གཤིསཿ བཅོས་མའི་བློ་དང་བྲལ་བའི་སེམས་ཉིད་ལཿ ཟབ་གསལ་ཕྱག་རྒྱར་བཅོས་པའི་རྣམ་རྟོག་ཅནཿ རྣལ་འབྱོར་ཡོ་གའི་གྲུབ་མཐའ་ཆོད་རེ་ཆུངཿ འབད་རྩོལ་རྒྱུ་ལ་མ་ལྟོས་སེམས་ཀྱི་ངངཿ འབྲས་བུ་ལམ་དུ་བྱེད་པའི་ཆོས་ཉིད་ལཿ རྩ་རླུང་སེམས་ཀྱི་ངལ་བསོས་དབུགས་འབྱིན་པའིཿ སྤྲོས་བཅས་


JLAZ012_Page_0090
[མ་དཔེ་གཟིགས་ན་འདིར་གནོན།]

ཨ་ནུའི་གྲུབ་མཐའ་ཐང་རེ་ཆདཿ ཞལ་ཕྱག་མཚན་མ་བྲལ་བའི་སེམས་ཉིད་ལཿ སྣང་སྲིད་ལྷ་སྐུར་ལྟ་བའི་གོལ་ས་དངཿ སྒྲར་གྲགས་སྔགས་སུ་གོལ་བའི་འཛིན་རྟོག་ཅནཿ མ་ཧཱ་ཡོ་གའི་ལམ་གྱིས་འདི་མི་མཐོངཿ ཀུན་ཏུ་བཟང་པོའི་དགོངས་ཉམས་ལསཿ ཐེག་བརྒྱད་བློ་ཡི་གྲུབ་མཐའ་གཞག་པའི་ལེའུ་སྟེ་དང་པོའོཿ ཀྱེ་ཧོཿ ང་ཡི་རང་བཞིན་རྫོགས་པ་ཆེན་པོ་ལཿ འཁོར་འདས་ཆོས་རྣམས་སྤངས་ཐོབ་བྲལ་བར་རྫོགསཿ མན་ངག་གནད་རྣམས་རང་གྲོལ་ཆེན་པོར་རྫོགསཿ ལྟ་བའི་གནད་རྣམས་རྟག་ཆད་མེད་པར་རྫོགསཿ སྒོམ་པའི་ལམ་རྣམས་འབད་རྩོལ་མེད་པར་རྫོགསཿ སྤྱོད་པའི་ཆོས་རྣམས་གནང་བཀག་མེད་པར་རྫོགསཿ འབྲས་བུའི་ངོ་བོ་ཡིད་སྨོན་བྲལ་བར་རྫོགསཿ རྫོགས་ཞེས་བྱ་བའང་བློས་བཏགས་ཙམ་དུ་ཟདཿ ཆོས་རྣམས་ཀུན་ཀྱི་ངོ་བོ་བྱང་ཆུབ་སེམསཿ སངས་རྒྱས་ཀུན་ཀྱི་ཐུགས་ཀྱང་བྱང་ཆུབ་སེམསཿ སེམས་ཅན་ཡོངས་ཀྱི་སྲོག་ཀྱང་བྱང་ཆུབ་སེམསཿ བྱང་ཆུབ་སེམས་ལ་ཀུན་རྫོབ་དོན་དམ་མེདཿ མེད་ཅེས་སྨྲ་ནས་སྟོང་པར་རྒྱས་མིག་གདབཿ ཡོད་ཅེས་བཟུང་ནས་རྟག་པར་བློས་མི་འཆོསཿ མ་བཟུང་མ་བཏང་རང་གར་བློ་འདས་དབྱིངསཿ བསམ་ཡུལ་སྤྲོས་པ་ཀུན་དང་བྲལ་བའི་ཀློངཿ དེ་ལ་


JLAZ012_Page_0091
[མ་དཔེ་གཟིགས་ན་འདིར་གནོན།]

བཅོས་མའི་རྣམ་རྟོག་མེད་པའི་ཕྱིརཿ དགེ་སྡིག་ལས་དང་འབྲས་བུ་གཏན་ནས་ཟདཿ ལྷ་སྔགས་ཏིང་ངེ་འཛིན་གྱིས་ཅི་ཞིག་བྱཿ བསྒྲུབས་པས་འགྲུབ་པའི་སངས་རྒྱས་ང་མ་ཡིནཿ ང་ཡི་རང་བཞིན་ཀུན་ཁྱབ་ཆེན་པོ་ལཿ ས་ལམ་བགྲོད་པས་མཐོང་བ་ག་ལ་སྲིདཿ དེ་ཕྱིར་རེ་དོགས་འཇུར་བུར་མི་འཆིང་བརཿ ལྟ་བ་བཟང་པོའི་ངར་དང་ཕྲོལ་ལ་ཞོགཿ སྒོམ་པ་ཟབ་མོའི་ཤུབས་ནས་ཐོན་ལ་ཞོགཿ སྤྱོད་པ་འཇུར་བའི་ཚུལ་འཆོས་ཤིག་ལ་ཞོགཿ འབྲས་བུ་ཆེན་པོའི་རེ་དོགས་བསྐྱུར་ལ་ཞོགཿ སྒོམ་དང་མི་སྒོམ་ལས་འདས་དྲན་པའི་ངངཿ བྱ་དང་མི་བྱའི་རྩིས་གདབ་དབྱིངས་སུ་ཡལཿ སྟོང་དང་མི་སྟོང་ལས་འདས་བྱང་ཆུབ་སེམསཿ ཡོད་དང་མེད་པའི་ཕྱོགས་ཞིག་གཉུག་མའི་ཀློངཿ སྨྲ་བསམ་བརྗོད་དུ་མེད་པའི་རིག་པ་ལཿ དེར་འཛིན་གཉེན་པོ་མེད་པའི་སྲོག་ཤིང་ཅནཿ གཅེར་བུ་ལྷིང་པ་རང་གྲོལ་སོ་མའི་གཤིསཿ འབད་རྩོལ་སྤྲོས་པ་ཀུན་དང་བྲལ་བའི་ཀློངཿ དུས་གསུམ་འཕེལ་འགྲིབ་མེད་པའི་ངང་ལ་གནསཿ ཀུན་ཏུ་བཟང་པོའི་དགོངས་ཉམས་ལསཿ རྫོགས་པ་ཆེན་པོ་ཡེ་གྲོལ་སོར་གཞག་ཏུ་བསྟན་པའི་ལེའུ་སྟེ་གཉིས་པའོ།། །།ཀྱེ་ཧོཿ དེ་ལྟར་སྤངས་ཐོབ་བྲལ་བའི་བྱང་ཆུབ་སེམསཿ བདེ་བར་གཤེགས་པ་རིག་པའི་སྙིང་པོ་ཅནཿ རྒྱུད་ལ་གནས་ཀྱང་བཅོས་མའི་གཟེབ་ཀྱིས་བཅིངསཿ ཇི་ལྟར་སྒོམས་བཞིན་


JLAZ012_Page_0092
[མ་དཔེ་གཟིགས་ན་འདིར་གནོན།]

སྙིང་པོའི་དོན་ལ་སྒྲིབཿ རྩ་བྲལ་ངོ་བོ་མེད་པའི་ཆོས་ཉིད་ལཿ ཤེས་བྱ་སྐྱེ་འགག་མེད་པར་སྒྲོ་བཏགས་པསཿ གཟུགས་མེད་གཟུགས་སུ་བཅོས་པ་ཇི་བཞིན་དུཿ རྣལ་མའི་དོན་ལས་གཡེལ་བ་ཉོན་རེ་མོངསཿ འགའ་ཞིག་དྲན་བསམ་འཕྲོ་འདུ་ཆད་པའི་རྗེསཿ ཆེད་འཛིན་གཉེན་པོས་བསླད་པའི་སྟོང་སྒོམ་གཟུགསཿ འབད་པས་གཅུར་གྱིས་སྒོམ་པས་ཨ་ཐང་ཆདཿ སྲོག་རྩར་ལས་རླུང་འཇུག་པའི་གེགས་སུ་ཆེཿ ལ་ལ་རྣལ་མའི་ངོ་བོ་མ་མཐོང་བཞིནཿ རྣལ་མའི་ཚིག་གིས་བསླུས་པའི་ལུང་མ་བསྟནཿ དྲན་བསམ་ལྐོག་ཏུ་གྱུར་པའི་གཏི་མུག་ལཿ སྒོམ་གྱི་ངོ་བོར་འཛིན་པ་ཤིན་ཏུ་འཁྲུལཿ ཁ་ཅིག་འགྱུ་དྲན་སེམས་སུ་ཤེས་པའི་བློསཿ དྲན་བསམ་འཕྲོ་འདུའི་ཕྱི་ལ་རྣམ་རྟོག་ཅིངཿ སྐྱེ་འགག་གྲངས་སུ་འདེབས་པའི་བསམ་གཏན་དེསཿ ལོ་བརྒྱར་བསྒོམས་ཀྱང་འཁྲུལ་བའི་འཁོར་ལོར་འཕྱནཿ ཕལ་ཆེར་རྩོལ་སྒྲུབ་ཁོ་ན་དགྲར་ལངས་ཏེཿ བསྒོམས་ན་མི་བདེ་སྣ་ཚོགས་ཟུག་རྔུ་ལྡངཿ མ་བསྒོམས་རང་ངོ་མ་ཤེས་འཁྲུལ་པར་འབྱམསཿ དེས་ཀྱང་མ་བཅོས་རྣལ་མའི་དོན་ལ་གཡེལཿ ཀྱེ་ཧོཿ དེ་ཀུན་སོ་སྐྱའི་ཉམས་ལས་མི་འདའ་བསཿ ད་ནི་སྒོམ་དང་མི་སྒོམ་གཉིས་ཀའི་བློཿ བཅོས་མའི་རྣམ་རྟོག་ཡིན་པར་ངེས་བྱས་ཏེཿ ད་ལྟའི་སེམས་ལ་


JLAZ012_Page_0093
[མ་དཔེ་གཟིགས་ན་འདིར་གནོན།]

བསྒྱུར་བཀོད་མེད་པར་ཞོགཿ དེ་ཡང་འདུ་བྱེད་བློ་ཡིས་འཚོལ་འཕྲོ་དངཿ བཏང་བཞག་ཆེད་འཛིན་མཐའ་དག་སྤངས་བྱས་ནསཿ ཐད་ཀའི་ཤེས་པ་རྩིས་མེད་རང་ཡན་འདིཿ བཅས་བཅོས་ཕྲི་བསྣན་སྤངས་ལ་རང་སོར་ཞོགཿ དེ་ཚེ་མཚན་མའི་རྣམ་རྟོག་ཅི་ཤར་ཡངཿ གང་ཤར་མི་ལྟ་ཤར་མཁན་ངོས་བཟུང་ལཿ སྤང་ལ་བེ་ཕུར་བཏབ་པ་ཇི་བཞིན་དུཿ ཤེས་རིག་རང་ཚོད་བཟུང་བ་གནད་དུ་ཟབཿ ཇི་ལྟར་གཤིས་ཀྱི་གནས་ཚུལ་རྗེན་པ་ལཿ འགྲོ་འོང་འཕེལ་འགྲིབ་མེད་པར་གནས་ན་ཡངཿ དེར་འཛིན་གཉེན་པོའི་གཟེབ་དང་མ་བྲལ་ནཿ ཡིད་དཔྱོད་ཐེག་པའི་གནས་ལུགས་དག་ཏུ་གོལཿ དེ་ཕྱིར་ལྟ་སྒོམ་སྤྱོད་པའི་ཐ་སྙད་ཀུནཿ རྣལ་མའི་དོན་ལ་བློ་ཡི་སྤུན་པ་སྟེཿ དྲན་འཛིན་རྩོལ་པའི་གཉེན་པོ་དབྱིངས་སུ་ནུབཿ ཡེངས་དང་མ་ཡེངས་མེད་པའི་བརྟུལ་ཞུགས་ཅནཿ སྤྲོ་བསྡུ་བསལ་བཞག་མེད་པའི་རང་ཡན་པཿ འབད་རྩོལ་སྤྲོས་པ་ཀུན་ལས་འདས་པའི་དབྱིངསཿ བསམ་དང་བསམ་བྱེད་མེད་པའི་གཏེར་ཆེན་པོཿ གདོད་ནས་སངས་རྒྱས་མེད་པར་ཤེས་པ་དེཿ འདོན་པ་ཡེ་ནས་ཟད་པའི་ཆོས་ཉིད་ཅནཿ འཁོར་བའི་རྩ་བ་རུལ་བའི་ཁྱད་ཆོས་ཀྱིཿ མྱ་ངན་དབྱིངས་སུ་སངས་པའི་གུ་ཡངས་པཿ བདེན་རྫུན་མཐའ་ལས་


JLAZ012_Page_0094
[མ་དཔེ་གཟིགས་ན་འདིར་གནོན།]

འདས་པའི་སྟོང་པ་ཉིདཿ ཤར་གྲོལ་རང་གྲོལ་ཅེར་གྲོལ་ཆེན་པོའི་དོནཿ རྟོགས་ན་སངས་རྒྱས་ཀུན་དང་གཉིས་སུ་མེདཿ ང་དང་ཐ་དད་མེད་པར་སངས་རྒྱའོཿ རྩོད་དུས་གསང་བ་ཆེན་པོའི་མན་ངག་གནདཿ ཡིད་དཔྱོད་ཐེག་པའི་གཞུང་དང་འདྲེས་པའི་ཚེཿ ང་དང་གཉིས་སུ་མེད་པའི་རིག་འཛིན་གྱིསཿ ང་ཡི་དགོངས་པ་གཏན་ལ་འདེབས་པར་བྱེདཿ རིགས་གསུམ་སེམས་དཔའི་རྣམ་སྤྲུལ་ཆོས་འདིའི་བདགཿ ལས་འཕྲོ་སྐལ་བ་ཅན་གྱིས་སྤྱོད་པར་ཤོགཿ ཀུན་ཏུ་བཟང་པོའི་དགོངས་ཉམས་ལསཿ གོལ་ས་བཅད་པའི་ལེའུ་སྟེ་གསུམ་པའི་བདག་ཉིད་ཅན་གྱིས་རྫོགས་སོཿ ས་མ་ཡཿ དྷ་ཐིམཿ

ཀློང་ཆེན་སྙིང་གི་ཐིག་ལེ་ལསཿ རྫོགས་པ་ཆེན་པོའི་གནད་གསུམ་ཤན་འབྱེད།


JLAZ012_Page_0096
[མ་དཔེ་གཟིགས་ན་འདིར་གནོན།]

༂ ཀློང་ཆེན་སྙིང་གི་ཐིག་ལེ་ལསཿ རྫོགས་པ་ཆེན་པོའི་གནད་གསུམ་ཤན་འབྱེད་བཞུགསཿ ཀུན་ཏུ་བཟང་པོའི་ཀློང་ལ་ཕྱག་འཚལ་ལོཿ སྙིགས་མའི་དུས་ན་རྫོགས་ཆེན་སྒོམ་པ་རྣམསཿ གཞི་ལམ་འབྲས་བུའི་གནད་ལ་རྨོངས་གྱུར་པསཿ འདོད་ཁའི་ལྟ་སྒོམ་མཐོན་པོར་ཕྱོགས་འཛིན་ལསཿ ཡིད་དཔྱོད་སྒྲོག་ལས་གྲོལ་བ་ཉིན་སྐར་ཙམཿ དེ་ཕྱིར་འདི་ན་གནད་གསུམ་ཤན་འབྱེད་མཿ སེམས་རིག་དབྱེ་བ་སེང་གེ་རྩལ་རྫོགས་བསྟནཿ ས་མ་ཡཿ ཀུན་གཞི་འཁོར་འདས་ཀུན་ཀྱི་གཞི་ཡིན་ཏེཿ རྙོག་མ་ཅན་གྱི་ཆུ་དང་ཁྱད་པར་མེདཿ བག་ལ་ཉལ་གྱི་གཏི་མུག་མགོ་རྨོངས་ནསཿ ཡེ་ཤེས་རིག་པའི་དྭངས་ཆ་ལྐོག་ཏུ་གྱུརཿ ཆོས་སྐུ་རྙོག་མ་དྭངས་པའི་ཆུ་དང་འདྲཿ གློ་བུར་དྲི་མ་སྤངས་པའི་བདག་ཉིད་ཅནཿ རྣམ་གྲོལ་ཡོན་ཏན་ཀུན་ཀྱི་ངོ་བོ་སྟེཿ ཕྱིན་ཆད་འཁྲུལ་མི་ཤེས་པའི་ཡེ་ཤེས་ཡིནཿ དེ་ཕྱིར་ཆུ་དང་རྙོག་མ་ཕྱེ་བ་བཞིནཿ ལུང་མ་བསྟན་གྱི་ཆ་ལས་ལྡོག་པ་ཡིནཿ རང་རིག་ཆོས་སྐུའི་ཀློང་དུ་བཙན་ས་ཟུངཿ ཡེ་ཤེས་དྲི་མེད་དབྱིངས་ལ་ལྟད་མོ་ལྟོསཿ ཀུན་གཞིའི་རྣམ་ཤེས་ཆུ་ནང་ཆབ་རོམ་འདྲཿ ངོ་བོའི་གཤིས་ལ་འཛིན་པའི་རྩལ་ཤར་ཏེཿ གཟུང་བའི་ཡུལ་ལ་ཆགས་པས་ཕལ་ཆེར་བསླུཿ དེ་ཕྱིར་གཟུགས་ཚོར་འདུ་ཤེས་ལ་སོགས་པའིཿ ཡུལ་སྣང་རང་སྟོང་འདི་ནི་ཁ་ཕྱིར་


JLAZ012_Page_0097
[མ་དཔེ་གཟིགས་ན་འདིར་གནོན།]

བལྟས་ཀྱི་གཟུགས་རང་སྟོང་དུ་འདོད་པ་མ་ཡིན་ཏེཿ བློ་ཡུལ་སྟོང་པས་གཟུགས་སྟོང་ཡུལ་གྱི་རྣམ་པ་བློ་ལ་ཤར་ཡང་གཟུགས་སྣང་རང་ཚན་པ་མེད་པས་གཟུགས་དེས་བློ་དང་མ་འདྲེས་པའི་ཕྱིརཿ གཟུགས་ལས་སྟོང་པཿ སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོཿ ཞེས་པའི་གོ་དོན་བླང་ངོཿ ཤེས་པའི་ཡེ་ཤེས་ཀྱིཿ རྣམ་རིག་ཆོས་སྐུར་འཕོ་བ་སྙིང་ཏིག་གནདཿ འདི་ལྟར་མ་རྟོགས་ཀུན་གཞི་ཆོས་སྐུར་འཁྲུལཿ ལོང་བ་བཤེས་མེད་ཐང་ལ་འཁྱམ་པ་བཞིནཿ གཞི་དང་འབྲས་བུའི་གནད་ལ་རྨོངས་གྱུར་པསཿ ཚེ་གཅིག་སངས་རྒྱས་འགྲུབ་པའི་ལམ་སྣ་འགགསཿ ས་མ་ཡཿ སེམས་དང་རིག་པ་རླུང་དང་ནམ་མཁའ་འདྲཿ སེམས་ནི་དམིགས་གཏད་གྱ་གྱུའི་རྣམ་པ་ཅནཿ ཝལ་ལེར་འཁྱིལ་བ་བླུད་བུ་དགང་བའམཿ ཡད་ཡུད་འཕྱོ་བ་འཐོར་རླུང་ལྟ་བུ་སྟེཿ བྱུང་ཚོར་སྣ་ཚོགས་རྐྱེན་གྱི་རྟེན་གཞི་ཅནཿ རིག་པ་རྟེན་དང་བྲལ་ཞིང་ཀུན་ལ་ཁྱབཿ སྟོང་ལ་གོ་འབྱེད་ནམ་མཁའི་དབྱིངས་ལྟ་བུཿ གསལ་ལ་རྟོག་མེད་དྭངས་ཤེལ་གཙང་མ་འདྲཿ དེ་ཕྱིར་སེམས་ལས་རྣམ་གྲོལ་རིག་པའི་ཀློངཿ གནས་ལུགས་བཙན་ས་འཛིན་པ་སྙིང་ཏིག་གནདཿ འདི་ལྟར་མ་རྟོགས་ཐམས་ཅད་སེམས་ཡིན་ཞེསཿ ཡུལ་གྱི་སྣང་བས་གོས་དང་མ་གོས་མཚམསཿ ཆུ་དང་དངུལ་ཆུ་ས་ལ་ལྷུང་བ་ལྟའིཿ རང་བཞིན་མི་ཤེས་མཚུངས་པར་ལྟ་བ་རྣམསཿ འབྲས་བུ་ལམ་བྱེད་རྡོ་རྗེ་ཐེག་


JLAZ012_Page_0098
[མ་དཔེ་གཟིགས་ན་འདིར་གནོན།]

པའི་རྩེསཿ ཅིག་ཆར་གྲོལ་བའི་གནས་ལ་རྨོངས་པའོཿ ས་མ་ཡཿ ཞི་གནས་དབང་པོ་མེད་པའི་མི་དང་འདྲཿ ལྷང་ངེ་ཐོམ་མེ་བུན་ནེ་ཡོར་རེ་བཿ ཤེས་པ་མདུང་ཚུགས་དྲན་པ་དམིགས་གཏད་ཅནཿ ལྷག་མཐོང་སྒོ་ལྔ་ཚང་བའི་སྐྱེས་བུ་འདྲཿ རང་བཞིན་ཤེས་ཤིང་ངོ་བོའི་ཆོས་ཉིད་མཐོངཿ ཧ་ཅང་དཔྱད་དྲགས་ཡུལ་སོགས་བློ་ཡིས་བསྒྲོདཿ དེ་ཕྱིར་གདོད་ནས་ཟུང་འཇུག་ཐ་མལ་གྱིཿ གནས་ལུགས་རྗེན་པ་བློ་ཡིས་མ་བཅོས་པཿ རྩ་བྲལ་ངོ་བོ་མེད་པའི་ཆོས་ཉིད་ལཿ དུས་གསུམ་མཉམ་པར་འཇོག་པ་སྙིང་ཏིག་གནདཿ འདི་ཉིད་མ་རྟོགས་ཡིད་དཔྱོད་ཐེག་པའི་ལུགསཿ ཡོད་མེད་སྟོང་པར་རྒྱས་བཏབ་བྱང་ཆུབ་པསཿ རླུང་གི་སྣང་འཁྱིམས་དྲན་བསམ་ཆད་པ་ལྟའིཿ གནས་ཆ་འཐུག་པོ་བག་ལ་འབེབས་པ་དངཿ ལུང་རིག་ཤེས་བྱས་དཔྱད་པའི་ལྷག་མཐོང་གཟུགསཿ དེར་འཛིན་གཉེན་པོ་དང་བཅས་ཡུལ་ཕྱིར་འབྲེངཿ ཡིད་སྨོན་སེམས་འཛིན་ལམ་དུ་བྱེད་པ་རྣམསཿ ཐེག་པ་འདི་ལ་མོས་པའི་གོ་ཙམ་ལསཿ ཇི་བཞིན་མཐོང་བའི་སྐལ་བ་མེད་པའོཿ ས་མ་ཡཿ མ་འོངས་སེམས་ཅན་བསོད་ནམས་དམན་པའི་ཕྱིརཿ དམ་པའི་བླ་མ་རྙེད་པ་ཤིན་ཏུ་དཀའཿ ཤེས་རབ་ཆུང་བས་རྒྱུད་ཀྱི་དོན་མི་རྟོགསཿ མོས་གུས་ཆུང་བས་དགོངས་རྒྱུད་


JLAZ012_Page_0099
[མ་དཔེ་གཟིགས་ན་འདིར་གནོན།]

ལོན་པ་དཀོནཿ བློ་མཐུ་ཞན་པས་མན་ངག་གནད་མི་ཤེསཿ ཉན་ལོ་ཐོས་ལོ་ཙམ་ལ་གདེང་བཅས་ནསཿ རི་ལ་མི་ཚེ་སྡུག་བསྐྱེལ་བྱེད་པའི་ཚེཿ སྔོན་སྤྱངས་ལས་འཕྲོ་སད་པའི་སྐལ་བ་ཅནཿ དགོངས་པའི་བཙན་ས་ཟིན་པའི་རིག་འཛིན་ལཿ མཁའ་འགྲོས་ཀློང་བྱང་བརྡའ་རིས་མངོན་དུ་སྤྲོདཿ ཚིག་ཉུང་དོན་འདུས་གནད་ཀྱི་ཡང་ཟབ་འདིསཿ ལས་འཕྲོ་སྐལ་བ་ཅན་རྣམས་འདུལ་བར་ཤོགཿ ས་མ་ཡཿ རྒྱ་རྒྱ་རྒྱཿ

ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས།


JLAZ012_Page_0100
[མ་དཔེ་གཟིགས་ན་འདིར་གནོན།]

ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་བ་བཞུགས།


JLAZ012_Page_0101
[མ་དཔེ་གཟིགས་ན་འདིར་གནོན།]

དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གང་གི་རང་བཞིན་ཤིན་ཏུ་རྣམ་དག་རྒྱ་ཆད་ཕྱོགས་སུ་མ་ལྷུང་ཞིང༌། །མ་སྐྱེས་མི་འགག་སྤྲོས་པ་ཀུན་བྲལ་ཡེ་བབས་གཉུག་མ་བྱང་ཆུབ་སེམས། །དུས་གསུམ་དུས་མེད་རྣམ་ཀུན་མཆོག་ལྡན་འཕོ་མེད་འདུས་མ་བྱས་ཀྱི་སྐུ། །འཁོར་འདས་བདག་མེད་ཁྱད་ཆོས་དྲུག་ལྡན་གདོད་མའི་མགོན་པོ་དེ་ལ་འདུད། །གང་གི་གཞི་སྣང་རོལ་པ་ཆུ་ཟླའི་གར། །སྲིད་མཚོར་བཅུད་དུ་སྨིན་པའི་དཔལ་ཡོན་ཅན། །འོད་ལུས་སྒྱུ་འཕྲུལ་དྲྭ་བའི་སྐུར་བཞེངས་པ། །སངས་རྒྱས་གཉིས་པ་པདྨ་འབྱུང་གནས་མཆོད། །རྐང་གཉིས་གཙོ་བོ་མི་ཡི་སེང་གེ་ཤཱཀྱའི་རྒྱལ་དང་དེ་ཡི་སྲས། །ཤིང་རྟ་གཉིས་སོགས་རྒྱན་དྲུག་མཆོག་


JLAZ012_Page_0102
[མ་དཔེ་གཟིགས་ན་འདིར་གནོན།]

གཉིས་འཇིག་རྟེན་མིག་གཅིག་ཞི་བ་འཚོ། །སད་མི་བདུན་དང་མར་མེ་མཛད་དཔལ་ཤཱཀ་ཤྲཱི་ཀུན་མཁྱེན་ལྔ་པ་སོགས། །བསྟན་པའི་གཞི་རྟེན་ཚུལ་ཁྲིམས་གསུམ་གྱི་བདག་པོ་རྣམས་ལ་ཅིས་མི་དད། །གསང་བདག་དཔའ་བོས་རྒྱལ་ཐབས་སྤྱི་བླུགས་དབང་བསྐུར་བྱིན་པའི་ཐེག་མཆོག་སྟོན་པ་དགའ་རབ་རྗེ། །དམ་པའི་རིགས་ཅན་དྲ་མ་ལྔ་དང་ཏནྟྲ་བཅོ་བརྒྱད་གླེགས་བམ་དབང་ཐོབ་རྒྱལ་པོ་ཛ། །རྣམ་གསུམ་ཡོ་གའི་དོན་བརྒྱུད་བདག་པོ་བི་མ་ལ་དང་བཻ་རོ་ལ་སོགས་ཉི་ཤུ་ལྔ། །ཀློང་ལྔའི་མཛོད་ནས་ཟབ་རྒྱའི་སྒོ་འབྱེད་བཅུ་ཕྲག་བཅུ་ཡི་ཕ་མཐར་བརྒལ་ལ་སྙིང་ནས་དད། །བརྗོད་བྱ་གསུང་རབ་ཡན་ལག་བཅུ་གཉིས་དང༌། །བརྗོད་དོན་རང་བཞིན་མེད་པའི་སྟོང་པ་ཉིད། །


JLAZ012_Page_0103
[མ་དཔེ་གཟིགས་ན་འདིར་གནོན།]

ཐུབ་པའི་ལུང་རྟོགས་བསྟན་པ་གངས་ཅན་འདིར། །གསལ་མཁས་ཀུན་མཁྱེན་ངག་གི་དབང་པོར་ངེས། །མདོ་སྔགས་ཆོས་རྣམས་བསྟན་པ་ཡོངས་རྫོགས་སུ། །སྟན་ཐོག་གཅིག་གི་གོ་ན་བསྟན་པའི་མཐར། །བྱ་རྩོལ་མེད་པ་ཆོས་སྐུའི་དགོངས་པ་ལ། །སྦྱོར་བ་རྫོགས་པ་ཆེན་པོའི་ཁྱད་ནོར་ཡིན། །དེ་ཕྱིར་དེ་ཡི་འཁྲིད་ཚུལ་རབ་འབྱམས་ཀྱི། །ཐུན་མོང་སྔོན་འགྲོ་སེམས་སྦྱོང་རྣམ་པ་བདུན། །རྒྱས་བསྡུས་གཉིས་ཀའི་ཕྱོགས་སུ་མ་ལྷུང་བར། །ཚད་མ་གསུམ་གྱིས་གཉེར་ཁས་བཤད་པར་བྱ། །དེ་ལ་འདིར་བརྒྱུད་པའི་ཁྱད་པར་དྲུག་དང་ལྡན་པའི་སྒོ་ནས་མདོ་སྔགས་ཀྱི་ཆོས་ཚུལ་རབ་འབྱམས་མཐའ་དག་སྟན་ཐོག་གཅིག་ཏུ་འཆད་ནུས་པའི་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོ་ལ་འཇུག་པའི་ལམ་སྟེགས་ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་འཁྲིད་ནི་ཇི་སྐད་དུ། བདག་གི་བླ་མ་རྒྱལ་དབང་པདྨའི་དོན་གྱི་རྒྱལ་ཚབ་ཀུན་མཁྱེན་ཤནྟ་པུ་རི་པས། མངོན་མཐོ་སྒྲུབ་བྱེད་རྒྱལ་བའི་གསུང་རབ་ཀུན། །དོན་རྣམས་སྐྱེས་བུ་ཆུང་ངུའི་ལམ་དང་ནི། །ཐར་པ་བསྒྲུབ་པའི་ཐབས་ལ་བརྩོན་པ་ཡི། །ཆོས་ཀྱི་རྣམ་གྲངས་ཀུན་གྱི་བརྗོད་བྱའི་དོན། །སྐྱེས་བུ་འབྲིང་གི་ལམ་གྱི་རིམ་པ་སྟེ། །ཞེས་གསུངས་པ་ལྟར་འདི་ཉིད་ས་བཅད་ཀྱི་དབང་གིས་སྐྱེས་བུ་འབྲིང་མན་ཆད་ཀྱི་ལམ་དུ་བཞག་ནའང༌།


JLAZ012_Page_0104
[མ་དཔེ་གཟིགས་ན་འདིར་གནོན།]

དངོས་གཞིར་སྟོན་བྱའི་ལམ་གྱི་ངོ་བོ་ཐེག་པའི་མཆོག་རབ་ཡིན་པར་ཡང་མ་ཟད་ཐེག་པ་ཆེན་པོའི་སེམས་བསྐྱེད་ཀྱི་འཕེལ་བ་ལན་རེ་རེའི་ནུས་སྟོབས་ཀྱང་བསམ་གྱིས་མི་ཁྱབ་པ་ཉིད་ལ་དཔགས་ནས་ལམ་གྱི་ཐོག་མ་ཉིད་ནས་སེམས་བསྐྱེད་ཁྱད་པར་བ་ཡོད་པའི་ཕྱིར་སྐྱེས་བུ་ཆེན་པོའི་ལམ་དུ་བཞག་ཀྱང་མི་འགལ་ལོ། །དེ་ལྟ་བུའི་སྐྱེས་བུ་གསུམ་གྱི་རྣམ་པར་བཞག་པ་ནི་ཚེ་དབང་རིག་འཛིན་སླར་ཡང་སྡེ་སྣོད་གསུམ་གྱི་སྤངས་རྟོགས་ཀྱི་བསྟན་པ་སྤེལ་བའི་སླད་དུ་ཚངས་པར་མཚུངས་སྤྱོད་ཀྱི་བརྫུ་ལ་ཞུགས་པ་ལྷ་གཅིག་དཱི་པམ་ཀཱ་རས་བྱང་ཆུབ་ལམ་གྱི་སྒྲོན་མར་བསྟན་པ་ལྟར་ལས། དོན་གྱི་ས་ཟིན་ཟུར་པ་མེད་ཅིང་ངོ་བོ་ལ་ཆོས་སྐད་ཀྱི་འཇུག་ལྡོག་ཙམ་ཡིན་པ་ལ་དགོངས་ནས་སྔ་འགྱུར་བའི་ཕྱོགས་ལ་གྲགས་ཆུང་བ་ཡིན་ནོ། །དེ་ལྟ་ནའང་རྣམ་པར་ཤེས་བྱ་འབྱེད་པའི་བློ་གྲོས་དཔྱད་བཟོད་པ་ཉིད་དང་སྔོན་གྱི་ལམ་སྟོན་ཆེན་པོ་རྣམས་ནས་སྲོལ་བཏོད་པའི་ཕྱིར་མདོ་སྔགས་ཀྱི་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་ཤེས་པས་བཀའ་ལུང་རང་དབང་དུ་བཀྲལ་བའི་ནུས་པ་འཇོག་ཕྱིར་དང༌། མདོ་ལས། འཇམ་དཔལ་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་ཕྲའོ། །འཇམ་དཔལ་གང་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་


JLAZ012_Page_0105
[མ་དཔེ་གཟིགས་ན་འདིར་གནོན།]

ཤེས་པ་ནི་ཆོས་སྤོང་པའོ། །ཞེས་གསུངས་པ་ལྟར་བསྟན་པའི་བར་སྐབས་སུ་ཕྱོགས་རེའི་མིག་ཅན་འགའ་ཞིག་གིས་བསྟན་པ་རྣམ་དག་ལ་རྟོག་བཏགས་འགལ་འདུའི་རྫུན་ཕྲེང་གིས་དྲི་བཅས་སུ་བསྒྲུབས་པས་རྐྱེན་བྱས་ཤིན་ཏུ་གསང་བ་ཆེན་པོའི་ཐེག་པ་ལ་ལམ་གྱི་གོ་རིམ་ཙམ་ཡང་མེད་པར་སྤྱོད་ཕྱོགས་ཁྱད་དུ་བསད་སྙམ་པའི་བཙན་ཐབས་ཉིད་དུ་ཆོས་ཐམས་ཅད་རང་བཞིན་མེད་པར་བསྟན་པར་གོ་ནས་ཡང་དག་པའི་ལམ་ལ་ཆོས་མ་ཡིན་པར་འདུ་ཤེས་ཏེ་གཤེ་ཞིང་སྡང་བའི་ཉེས་སྤྱོད་ཆེན་པོའི་གཡང་ས་ལས་སྐྱོབ་ཕྱིར་ཡང་ཡིན་ནོ། །དེ་ཡང་རྟེན་འབྲེལ་གྱི་སྒོ་དང་པོ་སྟོན་པ་དང་ཆོས་ལ་རིམ་གྲོ་དང་བཀུར་བསྟི་བྱ་བར་རྒྱལ་བའི་ཡུམ་དང་སའི་སྙིང་པོའི་མདོ་སོགས་ལས་རྒྱ་ཆེར་བཤད་ཅིང་དེ་སྐད་དུ་ཀུན་ཏུ་བཟང་པོའི་ཏནྟྲ་ལས། དང་པོར་སློབ་མས་བླ་མ་ལ། །སྡོམ་ཆོས་ཞུ་ཚེ་འདི་ལྟར་བྱ། །སྔ་བར་ལངས་ལ་ཁ་ལག་བཀྲུས། །ལུས་ཀྱི་ཆས་རྣམས་ལེགས་པར་གཟབས། །མཆེད་གྲོགས་དམ་ཚིག་ལྡན་མི་ལྡན། །སྟ་གོན་རྣམ་དབྱེ་ལེགས་པར་བྱ། །ཆོས་རར་ཆག་ཆག་བྱི་དོར་བྱ། །ཞེས་པ་ལྟར་ཁྲུས་བྱ་ཞིང་གོས་གཙང་མ་གྱོན། མཆེད་དམ་ཚིག་དང་མི་ལྡན་པ་དག་ཕྱིར་བསལ་ཏེ་ཐབས་ཀྱིས་སྤངས། ཆོས་རར་ཡུལ་དུས་དང་བསྟུན་པའི་བྱི་དོར་བྱ་བ་སོགས་བྱི་དོར་རྣམ་པ་


JLAZ012_Page_0106
[མ་དཔེ་གཟིགས་ན་འདིར་གནོན།]

གསུམ་དུ་ངེས་པར་བྱ་ཞིང༌། དེ་ནས་བཞུགས་ཁྲི་བླ་ཡོལ་ལྡ་ལྡི་དང༌། །ཕྱི་ནང་མཆོད་པ་རྒྱས་པར་བཤམ། །བཀོད་པས་ཁྱད་པར་འཕགས་པ་ནི། །ངག་གི་དང་འདྲེན་བློ་ཕེབས་བཅའ། །དེ་ནས་ཆོས་འཁོར་བསྐུལ་བའི་སྒྲ། །ཆོས་ཀྱི་དུང་ཆེན་ལན་དགུ་པོ། །བླ་མའི་ཕྱོགས་སུ་ཁ་བལྟས་འབུད། །ཀུན་གྱིས་གསོལ་འདེབས་དུང་བར་བྱ། །བླ་མ་སྤོས་དང་རོལ་མོས་བསུ། །བདེ་བའི་སྟན་ལ་བཞུགས་སུ་གསོལ། །ཞེས་པ་ལྟར་བརྙས་སྟབས་སུ་མ་སོང་བར་བླ་མ་དང་དཀོན་མཆོག་མཉེས་པའི་མཆོད་པ་དང་ཁྲི་སྟན་མཐོན་པོ་བཤམས་པ་སོགས་བྱ། ཆོས་ལ་བསྐུལ་བའི་དུང་འབུད་པའི་ཚེ་ཡང་བླ་མ་ལ་ཁ་བསྟན་ཏེ་བུས་པས་མཆོད་པའི་ཚུལ་དུ་འགྲོ། སྒྲ་དེ་ཐོས་པའི་སེམས་ཅན་མང་པོ་ཡང་ངན་སོང་ལས་ཐར་བར་བཤད་པས་སངས་རྒྱས་དང་བྱང་ཆུབ་སེམས་དཔའི་སྤྱོད་ཡུལ་དང་ཐབས་བསམ་གྱིས་མི་ཁྱབ་པར་ཤེས་པར་བྱས་ལ་ཐུན་ཐམས་ཅད་ཀྱི་བརྡར་དུང་འབུད་པ་ལ་ཡང་གནད་ཆེན་པོ་དེ་ལྟ་བུ་ཡོད་པ་ཡིན་ནོ། །དེའི་ཚེ་བླ་མས་ཀྱང་གདུལ་བྱ་དང་བ་འདྲེན་པའི་སྤྱོད་ལམ་ལ་བསླབ་དགོས་ཏེ་ཀློང་གསལ་ལས། སློབ་མའི་མོས་གུས་ཆེ་ཆུང་དེ། །བླ་མའི་མཛད་སྤྱོད་ལེགས་ཉེས་ཡིན། །འགྲོ་ཆག་ཉལ་དང་ཟ་བ་སོགས། །སྤྱོད་ལམ་ཐབས་ལ་ལེགས་པར་


JLAZ012_Page_0107
[མ་དཔེ་གཟིགས་ན་འདིར་གནོན།]

བསླབ། །ཅེས་གསུངས་ཤིང་རྒྱུད་སྡེ་རྒྱ་མཚོ་ནས་དམ་ཚིག་གི་རྣམ་བཤད་སྟོན་པའི་སྐབས་སུའང༌།དཔོན་གྱིས་ཉམས་ན་སྦྱང་ཐབས་མེད། །གཉིས་ཀ་ན་རག་ཆེན་པོར་འགྲོ། །ཞེས་གསུངས་པས་སྤྱིར་རྣམ་པ་ཐམས་ཅད་དུ་ཤིན་ཏུ་རིགས་པའི་སྤྱོད་ལམ་ལ་བསླབ་ཅིང་ཁྱད་པར་ཆོས་སྟོན་པ་ལ་སོགས་འདི་དག་གི་ཚེ་སྤོམ་ཡོར་ཡོམ་ཡུགས་སུ་མ་སོང་བ་ཞིག་དགོས་ཏེ། ཀློང་གསལ་ལས། དེ་ལྟར་སྣོད་ལྡན་སློབ་མ་ལ། །ཟབ་ཆོས་བསྟན་པའི་དུས་ཀྱི་ཚེ། །བླ་མའི་སྤྱོད་ལམ་འདི་ལྟར་བྱ། །བདེ་བའི་སྟན་ལ་སྐྱིལ་ཀྲུང་བཅས། །རང་ཉིད་ཐེག་པ་གང་སྟོན་པའི། །དཀྱིལ་འཁོར་གཙོ་བོར་གསལ་བཏབ་ལ། །འགྲོ་དྲུག་སེམས་ཅན་མ་ལུས་ཀུན། །མདུན་དུ་སྐད་ཅིག་འཁོད་པར་བསམ། །རང་རང་སྐད་དང་བློ་འཚམ་པའི། །ཐེག་ཆེན་ཆོས་སྟོན་སེམས་ཀྱང་བསྐྱེད། །ཆོས་སྐྱོང་དཀར་ཕྱོགས་ཐམས་ཅད་ལ། །ལེགས་སྤེལ་བར་ཆད་སྲུངས་ཤིག་ཅེས། །རང་རང་ལས་ཀྱི་ཕྲིན་ལས་བཅོལ། །ཆོས་གྲལ་དབུས་སུ་སྟོང་པར་གཞག །མི་དང་མི་མིན་དཀར་ཕྱོགས་ཀུན། །མོས་པས་དམ་ཆོས་ཉན་པར་བསམ། །མིག་གིས་སློབ་མ་ཀུན་ལ་བལྟ། །ལག་པ་ཆོས་འཆད་མཉམ་བཞག་བྱ། །ངག་གི་ཚིག་གསལ་གདངས་སྙན་པས། །དཔེ་དོན་རྟགས་གསུམ་འབྲེལ་བར་བཤད། །དབང་


JLAZ012_Page_0108
[མ་དཔེ་གཟིགས་ན་འདིར་གནོན།]

པོ་གང་ལ་འཚམ་པ་ཡི། །ཆོས་སྒོ་ཐེག་པ་རིམ་པར་བསྟན། །ཞེས་འདི་ལྟ་བུའི་ཆོས་འཆད་ལུགས་ནི་ཐེག་པ་གང་དང་གང་སྟོན་པ་ཐམས་ཅད་ཀྱི་ཁོག་འབུབས་ཀྱང་ཡིན་ལ། དེའི་ཕྱིར་ལུས་ཀྱི་སྤྱོད་ལམ་བག་མེད་པ་འགྱེལ་བུབ་གཞོགས་སྙེས་ལ་སོགས་པ་སྤང༌། གཡོན་མཉམ་གཞག་དང་གཡས་ཆོས་འཆད་ཀྱི་ཕྱག་རྒྱ་བཅའ་བ་སྔོན་དུ་འགྲོ་བས་སྔོན་དུ་འགྲོའི་ཚེ་ཤཱཀྱ་ཐུབ་པ་དང་དངོས་གཞིའི་ཚེ་རྒྱུད་ལུང་མན་ངག་ཇི་ལྟར་དུ་སྟོན་པའི་དཀྱིལ་འཁོར་གྱི་བདག་པོར་གསལ་བཏབ་ནས་སེམས་ཅན་ཐམས་ཅད་རྣམ་བྱང་ལ་འགོད་པའི་སེམས་བསྐྱེད་ཀྱིས་འཕེན་པས་གཞི་བཟུང༌། དེའི་ཚེ་རིགས་དྲུག་གི་སེམས་ཅན་ཐམས་ཅད་རང་གི་མདུན་དུ་ཆོས་ཉན་པའི་ཕྱིར་འཁོད་པར་བསམ་ཞིང༌། ཁྱད་པར་ཆོས་རའི་དབུས་སྟོང་པར་བཞག་པ་ལ་མི་མ་ཡིན་དཀར་ཕྱོགས་པ་ཀུན་ཀྱང་འདུས་ནས་མོས་པས་ཆོས་ཉན་པར་བསམ་ཞིང༌། བར་ཆད་ཞི་བ་དང་ལེགས་སྤེལ་གྱི་འཕྲིན་ལས་བཅོལ། འདོད་ལྷ་སྡེ་བཅས་ཀྱི་གཉེན་པོར་བློ་གྲོས་རྒྱ་མཚོར་ཞུས་པའི་མདོ་ལས་བདུད་ཚར་གཅོད་པའི་སྔགས་བཏོན་ན་དཔག་ཚད་བརྒྱ་ཚུན་ཆད་དུ་གླགས་ལྟ་བར་མི་ནུས་པར་བཤད་པས་དེ་ལྟར་འདོན། ངག་བུལ་མགྱོགས་ལྡབ་ལྡིབ་ལ་སོགས་པས་ཐོས་འཛིན་གྱི་ཚེར་མར་གྱུར་པ་སྤངས་ལ་གསལ་དག་སྙན་པའི་སྒྲས་དཔེ་དོན་


JLAZ012_Page_0109
[མ་དཔེ་གཟིགས་ན་འདིར་གནོན།]

རྟགས་གསུམ་འབྲེལ་བར་བཤད་ཅིང༌། དེ་ཡང་ངེས་དོན་གྱི་ཚིག་ཐོག་མ་ཉིད་ནས་འཆད་པ་དང་ཏན་གན་གྱི་སྤྱོད་པ་ཟུར་འཕྲིག་པ་ལ་སོགས་ཀྱིས་གདུལ་བྱ་བློ་ལས་སུ་མི་རུང་བར་འགྱུར་ཕྱིར་སྤང་པར་བྱ་ལ་དེ་སྐད་དུ། ཀློང་གསལ་ཉི་མ་ལས། བླ་མས་སློབ་མ་གསོ་བའི་ཚེ། །སློབ་མ་གསར་བུ་དད་ལྡན་དེ། །ཐོག་མར་ཐབས་ཀྱིས་འཁྲིད་པར་བྱ། །ངེས་དོན་སྙིང་པོ་མ་གོའི་བར། །རྒྱུ་འབྲས་གཉིས་ཀྱི་ཆོས་རྣམས་བཤད། །སྒྲུང་དང་དཔེ་དང་བསྟན་བཅོས་དང༌། །མགུར་གླུ་ལ་སོགས་འཁོར་བ་ལ། །ཡིད་དབྱུང་ངན་སོང་སྡུག་བསྔལ་དང༌། །སངས་རྒྱས་ཡོན་ཏན་ལ་སོགས་བཤད། །བླ་མ་ཉིད་ཀྱང་སྤྱོད་ལམ་གཟབས། །གལ་ཏེ་ཏན་གན་ཟུར་འཕྲིག་ན། །བློ་ཆུང་དད་ལོག་རྫ་མི་དོས། །དེ་ལ་བྱིན་རླབས་གཞན་མི་འགོ། །ཞེས་སོ། །དེའི་ཕྱིར་ཚུལ་འདི་ལྟ་བུའི་སེམས་སྦྱོང་ལུགས་ནི་ལས་དང་པོ་པ་བློ་སྦྱོང་བའི་ཐབས་ཁྱད་པར་ཅན་ཡིན་པར་ཡང་ཤེས་པར་བྱ་ལ། དངོས་གཞིའི་ཚེ་དེ་ཉིད་ལས། རྡོ་རྗེའི་ཚིག་རྐང་བཀྲོལ་ལ་བཤད། །རྒྱུད་དཀྲུགས་པ་རྣམས་བསྡེབས་ལ་བཤད། །ལུང་གཅུས་པ་རྣམས་བརྐྱངས་ལ་བཤད། །དྲང་པོར་དགོངས་དང་ལྡེམ་པོར་དགོངས། །མ་འོངས་འཇུག་དོན་དགོངས་པ་དང༌། །དྲང་དོན་ངེས་དོན་སྙིང་པོའི་དོན། །གཉིས་སུ་མེད་པའི་དོན་ཚིག་རྣམས། །


JLAZ012_Page_0110
[མ་དཔེ་གཟིགས་ན་འདིར་གནོན།]

རྒྱུད་ལུང་མན་ངག་ཕྱེ་ལ་བཤད། །མུན་ནག་མཛུབ་གཡུག་མ་སོང་བར། །སློབ་བུའི་རྒྱུད་ལ་ཐེབས་པར་གདབ། །དམུས་ལོང་མིག་ཕྱེ་ཇི་བཞིན་དུ། །ལག་ལེན་མྱོང་བས་ཡིད་ཆེས་འཇུག །ཅེས་པ་ལྟར་རྡོ་རྗེའི་ཚིག་རྐང་རྣམས་དོན་བརྒྱུད་ཀྱི་དགོངས་པས་བཀྲལ་ཞིང༌། དེ་ཡང་རྒྱུད་དཀྲུགས་པ་རྣམས་མུ་ཏིག་བསྟར་ལ་བརྒྱུས་པ་བཞིན་དུ་བསྡེབས། ལུང་གཅུས་པ་རྣམས་སྦྲུལ་གྱི་མདུད་པ་བརྐྱངས་པ་ལྟར་བསྲང༌། མན་ངག་གབ་པ་རྣམས་ཉི་མས་མུན་པ་བསལ་བ་བཞིན་མངོན་དུ་ཕྱུང་ནས་དྲང་ངེས་ལྡེམ་དགོངས་ཀྱི་ལུང་དོན་རིགས་པས་འབྱེད་པ་ལ་སྔ་འགྱུར་བཀའ་བབས་ཀྱི་ཆུ་བོ་བཞི་དང་མདོ་སྒྱུ་སེམས་གསུམ་གྱི་བཤད་པའི་རྒྱུན་མ་ཉམས་པ་ཀུན་མཁྱེན་ངག་གི་དབང་པོའི་མན་ངག་གི་བསྟན་བཅོས་རྒྱ་མཚོ་ལྟ་བུས་བཤད་དགོས་པ་ཉིད་དོ། །དེ་ལྟར་སྦྱོར་དངོས་རྗེས་གསུམ་གྱི་སྒོ་ནས་ལམ་གྱི་རིམ་པ་ཅི་ལྟ་བུ་འཆད་པ་ནའང༌། ཆོས་མཚམས་ལེའུའམ་ཐུན་གྱི་མཚམས་སོ་སོར། ཇི་ལྟར་བཤད་པའི་ཚིག་ཐམས་ཅད་དོན་ཐོག་ཏུ་ཧྲིལ་གྱིས་བསྡུས་ལ་བསྒོམ་བྱའི་དམིགས་པའི་ཐོག་དྲིལ་ནས་སློབ་བུའི་རྒྱུད་ལ་འདྲེས་ངེས་པར་བྱ། སྐབས་ཅི་རིགས་པར་གྲུབ་ཐོབ་གོང་མའི་རྣམ་པར་ཐར་པ་དང༌། དགོས་འབྲེལ་གཉིས་དང་ལྡན་པའི་སྒྲུང་རྒྱུད་ངོ་མཚར་བས་བྱིང་བ་བསང་ཞིང་སློབ་བུའི་སྐྱོན་


JLAZ012_Page_0111
[མ་དཔེ་གཟིགས་ན་འདིར་གནོན།]

མཚང་འདོན་པ་སོགས་ཐབས་ཀྱིས་འདུལ་བའི་མན་ངག་ལ་མཁས་པར་བྱས་པས་བརྐོས་ཕོར་ལས་སཙྪ་འབྱུང་བ་བཞིན་དུ་བླ་མའི་ཐུགས་རྗེ་དང་བྱིན་རླབས་ཐམས་ཅད་སློབ་མའི་རྒྱུད་ལ་བསྲེ་ནུས་པ་ཡིན་ནོ། །ཁྱད་པར་ཐུན་སོ་སོའི་འགོར་སེམས་བསྐྱེད་དང་མཇུག་ཏུ་དམིགས་པ་མེད་པའི་བསྔོ་སྨོན་གྱིས་མཚམས་སྦྱོར་བ་ཡང་ནང་པ་སངས་རྒྱས་པའི་ཁྱད་ཆོས་ཡིན་ལ་དེ་སྐད་དུ། ཀློང་གསལ་ལས། ཆོས་མཚམས་ལེའུའི་ཐུན་གྱི་དུས། །ཡས་དྲིལ་མས་དྲིལ་དོན་ཀུན་བསྡུ། །བསྒོམ་བྱའི་དམིགས་པ་བརྟན་དུ་གཞུག །བསམ་བྱའི་གོ་བ་ལེན་དུ་གཞུག །སྐབས་སུ་སྒྲུང་རྒྱུད་ལ་སོགས་པ། །ངོ་མཚར་གཏམ་གྱིས་བྱིང་བ་བསྲིང༌། །སློབ་བུའི་སྐྱོན་མཚང་འདོན་པའི་ཕྱིར། །སྔོན་གྱི་སྒྲུང་རྒྱུད་ལྡེའུ་ཆུང་བརྡེག །རྗེས་སུ་བསྔོ་བ་སྨོན་ལམ་གདབ། །ཀུན་ལ་བྱང་སེམས་བརྩེ་ལྡན་གཅེས། །དེ་ལྟར་ལག་ལེན་སྟོན་མཁས་ན། །བླ་མ་སངས་རྒྱས་བརྐོས་ཕོར་ལ། །དམ་པ་ཆོས་ཀྱི་རི་མོ་ཡོད། །སློབ་མ་སྣོད་ལྡན་བྷི་བྷི་བཅུག །བརྐོས་ཕོར་རི་མོ་དེ་ལ་ཐེབས། །སྐུ་གསུམ་ཚྭ་ཚྭར་དཀྲོང་གིས་འགྱུར། །དེ་ལྟར་སློབ་དཔོན་ལག་ལེན་གཅེས། །ཞེས་གསུངས་པའི་སྟ་གོན་དང་ཕྱག་ལེན་ཆེ་ཕྲ་མཐའ་དག་ལ་ཆོས་ལ་དབང་ཟ་བའི་རང་བཟོའི་དྲི་མས་མ་སྦགས་པ་ཉིད་སྔོན་དུ་སོང་ནས་མཎྜལ་འབུལ་དུ་གཞུག །༈


JLAZ012_Page_0112
[མ་དཔེ་གཟིགས་ན་འདིར་གནོན།]

ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་བའི་ཕྱིར་དུ། སྟོན་པ་བདེ་བར་གཤེགས་པའི་གསུང་གི་བདུད་རྩི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མཐའ་དག་གི་ཡང་ཞུན་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོའི་འབྲས་བུ་དོན་དུ་གཉེར་བའི་ལམ་ལ་འཇུག་གོ་སྙམ་པའི་མོས་པ་མི་ཕྱེད་པས་གཞི་བཟུང༌། དེ་ཡང་མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུང་ཞིག་ཅེས་པ་ལྟར་སྣོད་ཀྱི་སྐྱོན་གསུམ་སྤངས་ཏེ་རང་ལ་ནད་པ། ཆོས་ལ་སྨན། སྟོན་པ་ལ་སྨན་པ། ནན་ཏན་ཉམས་སུ་ལེན་པ་ལ་ནད་གསོ་བ། དེ་བཞིན་གཤེགས་པ་ལ་སྐྱེས་བུ་དམ་པ། ཆོས་ཀྱི་ཚུལ་ལ་རིངས་སུ་གནས་པ་སྟེ་འདུ་ཤེས་དྲུག་དང༌། ཀུན་ཏུ་བཟང་པོའི་རྒྱུད་ལས། བདེ་བའི་ས་ལ་སྐྱིལ་ཀྲུང་བཅའ། །ས་གཅིག་དག་ལས་གནས་མི་སྤོ། །ཞྭ་མོ་ཡོན་ན་མདུན་དུ་བཞག །སྐྲ་ལོ་ཡོད་ན་མདུན་དུ་ཕབ། །ལག་པ་ཐལ་སྦྱར་མཉམ་གཞག་བཅའ། །ལག་གིས་འདུ་བྱེད་ཐམས་ཅད་སྤང༌། །མིག་གིས་བླ་མའི་ཞལ་ལ་བལྟ། །རྣ་བས་བླ་མའི་གསུང་ལ་ཉན། །སེམས་ཀྱིས་ཚིག་དོན་གཏན་ལ་འབེབས། །ཐེ་ཚོམ་དུས་སུ་ལོག་ལ་ཞུ། །ངག་ཏུ་ཤུབ་བུའི་ཚིག་རྣམས་སྤང༌། །རྐང་བརྐྱང་གཞོགས་སྙེས་ཆེ་བཅོས་དང༌། །མ་


JLAZ012_Page_0113
[མ་དཔེ་གཟིགས་ན་འདིར་གནོན།]

གནང་ཁྲི་དང་སྟན་སྟེགས་སྤང༌། །མི་ན་བ་ལ་མགོ་གཡོགས་དང༌། །དགྲ་མེད་པ་ལ་མཚོན་ཐོགས་དང༌། །མ་རྒས་པ་ལ་དབྱུག་ཐོགས་དང༌། །ཚུལ་དང་མི་མཐུན་ཐམས་ཅད་སྤང༌། །ཚིག་དོན་རེ་རེ་གཞག་འབྲེལ་བྱ། །ཆོས་ཐུན་མཇུག་གི་དམིགས་པ་ལ། །ནན་ཆགས་ཆེན་པོས་གོང་འོག་མཐུད། །ཐ་མལ་སྤྱོད་པ་ཐམས་ཅད་སྤང༌། །ཆོས་ཁྲིམས་ལུང་བཞིན་བག་ཡོད་སྤྱད། །ཅེས་གསུངས་པས་ཀུན་སློང་དང་ཀུན་སྤྱོད་ཐམས་ཅད་གསལ་བཏབ་སྟེ་གསན་འཚལ། སྐབས་འདིར་སྙིང་ཐིག་ཡ་བཞི་ལ་སོགས་ཏེ་མན་ངག་གི་གཞུང་གཞན་གྱིས་འཆད་ན། ཆོས་ཀྱི་ཆེ་བ་དང་བརྒྱུད་རིམ་སློབ་མའི་དབང་པོ་དང་བསྟུན་ནས་དང་བ་འདྲེན་པར་བཤད་རྗེས། སེམས་སྦྱོང་དང་པོ་ནི། བུ་ཡིག་ལས། འདུས་བྱས་ཐམས་ཅད་མི་རྟག་པར་བསམ་པ་དང༌། ཞེས་པས། དང་པོ་ལུང་ལ་རྗེས་སུ་དཔགས་ནས་བསམ་པ་ནི། དེ་ཡང་རང་རེ་སྔོན་གྱི་བསགས་པ་ཕུལ་དུ་ཕྱིན་པའི་མཐུ་ཁོ་ན་ལ་བརྟེན་ནས་དཔེ་གྲངས་ངོ་བོའི་སྒོ་ནས་རྙེད་པར་དཀའ་བའི་དལ་འབྱོར་གྱི་མི་ལུས་རིན་པོ་ཆེ་ཐོབ་པ་སྐལ་བ་བཟང་སྟེ། བསམས་ན་གློ་བུར་གྱི་རྐྱེན་མི་ཟད་པས་དོ་ནུབ་ཤི་ནས་སང་ནངས་པར་མལ་དུ་རོ་ལ་སོང་ན་ཇི་ལྟར་བྱེད། བླུན་རྨོངས་ཕལ་ནི་འཆི་བ་འོང་མི་འོང་གི་རྟོག་དཔྱོད་ཙམ་ཡང་མི་བྱེད་པར་སྣང་བ་གདོང་འདེད་ཁོ་ནའི་ངང་ལ་


JLAZ012_Page_0114
[མ་དཔེ་གཟིགས་ན་འདིར་གནོན།]

ཐུག་སྟེ་འཆི། འགའ་ཞིག་འཆི་བ་འོངས་སྙམ་པ་ཡོད་ཀྱང་མ་རྒས་ཀྱི་བར་ལ་དགའ་རབ་ཡོད་རེའི་བསམ་པས་རིམ་གྲོ་དང་ཐབས་སྣ་ཚོགས་ཀྱི་སྒོ་ནས་ཕྱི་ཚིག་དང་རེ་དོགས་ཁོ་ན་ལྷུར་ལེན་ཅིང་ཚེ་འདིའི་འདུན་མ་འབའ་ཞིག་གི་དབང་དུ་འགྲོ། དེ་ལྟ་མི་ཀུན་ཟླ་བ་རྟིང་མའི་བྱ་བྱེད་ཀྱི་གཤོམ་ར་དང་རྒྱགས་ཕྱེ་ལ་སོགས་འོག་གྲབས་བྱེད་ཀྱང་དེའི་དུས་ན་རང་རེ་ལུས་རྟེན་འདི་འདྲ་མིན་པའི་མགོ་དང་ཁ་ལ་རྭ་ཅོ་ཡོད་པ་ཞིག་ཏུ་སྐྱེས་ནས་ལུས་རྟེན་འདིའི་རུས་པ་ཙམ་ཡང་ཤུལ་མེད་དུ་མི་བྱེད་པའི་གདེངས་ཨེ་འདུག །གདེང་མི་འདུག་ན་དེའི་ཚེ་ཐབས་ནི་གང་ཡང་མེད་དེ་རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ། དཔེར་ན་ཕྱོགས་བཞི་ནས་རི་སྲ་བ། བརྟན་པ། དཔང་མཐོ་བ་བཞི་འགྱེལ་ནས་རྩྭ་དང༌། ཤིང་གེལ་པ་དང༌། སྲོག་ཆགས་ཐམས་ཅད་ཕྱེ་མར་འཐག་ཅིང་རུབ་རུབ་བྱུང་ན། དེ་ལ་མགྱོགས་པར་འབྲོས་པ་དང༌། སྟོབས་ཀྱིས་བཟློག་པའམ། ནོར་གྱིས་བསླུ་བའམ། རྫས་དང་སྔགས་དང་སྨན་གྱིས་བཟློག་པ་སླ་བ་མ་ཡིན་ནོ། །དེ་བཞིན་དུ་སེམས་ཅན་ཐམས་ཅད་ལ། ན་བ་དང༌། རྒ་བ་དང༌། འཆི་བ་དང༌། རྒུད་པ་ཞེས་བྱ་བའི་འཇིགས་པ་ཆེན་པོ་བཞི་འབྱུང་སྟེ། དེ་ལ་མགྱོགས་པར་འབྲོས་པའམ། སྟོབས་ཀྱིས་བཟློག་པའམ།


JLAZ012_Page_0115
[མ་དཔེ་གཟིགས་ན་འདིར་གནོན།]

ནོར་གྱིས་བསླུ་བའམ། རྫས་དང༌། སྔགས་དང༌། སྨན་གྱིས་བཟློག་པར་སླ་བ་མ་ཡིན་ནོ། །ཞེས་གསུངས་ལ། དེའི་ཕྱིར་ན་རང་ཅག་རྣམས་ངེས་པར་འཆི་སྟེ། མྱ་ངན་བསལ་བའི་མདོ་ལས། ཅི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པའི། །རྡོ་རྗེ་སྐུ་ཡང་མི་རྟག་ན། །ཆུ་ཤིང་སྡོང་པོ་ལྟ་བུ་ཡི། །ལུས་ཅན་རྣམས་ལྟ་སྨོས་ཅི་དགོས། །ཞེེས་པས་སྐྱེ་འཆི་ལ་རང་དབང་ཐོབ་པའི་འོ་སྐོལ་གྱི་སྟོན་པ་ཤཱཀྱ་ཐུབ་པ་ཡང་གདུལ་བྱ་རྟག་འཛིན་ཅན་གདུལ་བའི་ཕྱིར་ཐ་མའི་གཟིམས་ཁྲི་ལ་མནལ་བས་ཡིད་སྐྱོ། དེ་བཞིན་དུ་རྒྱ་བོད་ཀྱི་པཎ་གྲུབ་རྒྱལ་བློན་བྱང་ཆུབ་སེམས་དཔའི་རྣམ་འཕྲུལ་དེ་དག་ཀྱང་བྱོན་ནས་བསྟན་པ་ལ་བྱ་བ་འདི་ལྟར་མཛད་ཅེས་པའི་གཏམ་རྒྱུད་ཆོས་འབྱུང༌། དེབ་ཐེར། རྣམ་ཐར་སོགས་ལ་བཤད་པའི་མཛུབ་མོ་རི་སྟོན་ལས་དེ་དག་གཅིག་ཀྱང་ཡང་མ་བཞུགས་པ་མངོན་སུམ་ཚད་མས་གྲུབ་པས་སྙིང་རླུང་ལྡང༌། རང་གི་གཉེན་བཤེས་བར་མའི་འགྲོ་བ་ལ་སོགས་ཏེ་ཇི་སྙེད་ཅིག་ན་ནིང་དང༌། ཁ་སང་ཟླ་བ་སྔོན་མ་ཕན་ཆད་ཡོད་པ་འཇིག་རྟེན་ཕ་རོལ་ཏུ་སོང་སྟེ་རོ་མེད་པར་ཟིན་པ་དང་མིང་ཙམ་ཤུལ་དུ་ལུས་པས་རང་རེ་ཡང་ངེས་པར་འཆི། ད་ནི་བསྐལ་བའི་སྙིགས་མ་ལ་ཐུག་ཅིང་ཚེ་ཚད་ཇི་བཞིན་ཐུབ་ནའང་དབུགས་ཉི་ཁྲི་ཆིག་སྟོང་རྒྱུ་རིང་ལ་ཞག་གཅིག་གི་མི་ཚེ་ཐུང་དུ་


JLAZ012_Page_0116
[མ་དཔེ་གཟིགས་ན་འདིར་གནོན།]

སོང་ངོ༌། །ཞག་སུམ་ཅུས་ཟླ་བ། ཟླ་བ་བཅུ་གཉིས་ཀྱིས་ལོ་འཛད་པས་ཚེ་འཛད་པ་ལ་ཚེགས་མེད་དེ། རྒྱ་ཆེ་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་སྐད་ཅིག་ཀྱང་སྡོད་དབང་མེད་པ་ལ་ལེགས་པར་བསམས་ནས་སྙིང་པོ་ལེན་པ་ལ་མགོ་ལ་མེ་ཤོར་གྱི་བརྩོན་འགྲུས་སྐྱེད་པར་བྱའོ། །གཉིས་པ་དེ་ཉིད་མན་ངག་གི་སྒོ་ནས་རྒྱུད་ལ་སྒོམ་པ་ནི། གང་ཟག་ཆོས་ཀྱི་གོ་རྟོགས་ཅན་ལ་ལུང་ལ་དཔགས་ནས་སྐྱོ་བ་བསྐུལ་བ་ཉིད་རྣམ་པ་གཙང་ཞིང་རྒྱུད་ལ་འཕྲོད། ལས་དང་པོ་པ་རྣམ་པར་ཤེས་པ་ཤིན་ཏུ་ལྐོག་ཏུ་གྱུར་པའི་རིགས་ཅན་འགའ་ཞིག་ལ་དཔེ་ཆོས་དང༌། སྒྲུང་རྒྱུད་དང༌། བློ་འདྲིད་པ་འདི་གནད་ཟབ་པ་ཡིན་པས་སློབ་མའི་ཁམས་དང་སྦྱར་རོ། །དེ་ཡང་བདག་ཉིད་ཡིད་ལ་མེད་པ་ཞིག་ལ་ངོ་མི་ཤེས་པའི་ལུང་པ་འཇིགས་སུ་རུང་བ་ཐང་ཤིན་ཏུ་རྒྱ་ཆེ་བ། མིའི་རྒྱུ་འགྲུལ་ཙམ་ཡང་མེད་པ། རླུང་སི་རི་རི་སྒྲོག་པ། འཇག་རྐྱང་པུ་རུ་རུ་ཟེར་བའི་ས་ཆ་ཞིག་ཏུ་སླེབས་ནས་ཅི་བྱ་བརྟོལ་མེད་ཅིང་ཡིད་སློང་སློང་པོར་ཡོད་ཙ་ན། གང་ནས་འོངས་ཆ་མེད་པའི་སྐྱེ་བོ་ཕོ་མོ་ཁ་དོག་དཀར་ནག་གཉིས་བྱུང་ནས་ཚོགས་དྲུག་སྒྱུ་མའི་གྲོང་ཁྱེར་བྱ་བ་ན་ཡིད་བཞིན་ནོར་བུ་


JLAZ012_Page_0117
[མ་དཔེ་གཟིགས་ན་འདིར་གནོན།]

འཆིང་བུ་བྱ་བ་ཡོད། དེ་ལེན་པ་ལ་ཆུ་བོ་ཆེན་པོ་ལ་གཟིངས་སུ་ཞུགས་ནས་འགྲོ་དགོས། རང་རེ་གསུམ་ལྷན་དུ་འགྲོགས་པར་འདོད་དམ་ཞེས་ཟེར། དེ་ལ་རང་ཉིད་བློ་ཡིད་ཕྱོགས་ཏེ་ཁོང་གཉིས་ཀྱི་རྗེས་སུ་འབྲངས་ནས་སོང་སོང་བ་ལས། ཅི་ཞིག་ན་རྒྱ་མཚོ་ཆེན་པོ་གནམ་ཐང་ལ་ཕབ་པ་འདྲ་བ། རྒྱ་ཁྱོན་བློས་མི་ཆོད་པ། དབའ་རླབས་བར་སྣང་ལ་འཕྱོ་བ། དེའི་ནང་ན་ཆུ་སྲིན་དང༌། ཉ་བོ་ཆེ་དང༌། ཆུ་མི་དང༌། ཆུ་རྟ་ལ་སོགས་པ་མདོར་ན་མིག་གིས་སྔར་མ་མཐོང་བ་སྐྱི་གཡའ་བའི་སྲོག་ཆགས་མགོ་ལུས་མི་མཚུངས་པ་མང་པོས་ཁེངས་ཤིང༌། རླབས་ཀྱི་གཉེར་མ་ལ་འཇུག་ལྡོག་བྱེད་པ་ཞིག་གི་རྩར་སླེབས་དེར་རང་ཉིད་ཤིན་ཏུ་འཇིགས་ཤིང་བྲོས་འཚལ་ནའང་ནོར་བུ་ལོན་དུ་རེ་བའི་འདོད་པས་གདུངས་ཏེ་ཁོང་གཉིས་ཀྱིས་བཏང་བའི་གཟིངས་སུ་ཞུགས་ཏེ་རྒྱ་མཚོ་ཆེན་པོ་ལ་བརྒལ་བ་ལས་མཚོ་ཆེན་པོ་དེའི་དཀྱིལ་ཙམ་དུ་སླེབས་པ་དང༌། རླུང་དམར་ཤིན་ཏུ་མི་བཟད་པ་ཞིག་ལངས། དེའི་འཇིགས་སྐྲག་གིས་མ་བཟོད་པར་སྐྱ་བ་ཤིན་ཏུ་དུབ་ཅིང་རྩོལ་བར་བརྒྱབ་པ་ལས་དེ་གཉིས་ཀྱི་ལག་པའི་སྐྱ་བ་ཟུང་ཀྱང་དུས་གཅིག་ལ་ཐུག་སྟེ་ཆག །ཆུའི་དབའ་རླབས་ནམ་མཁའ་ལ་འཕྱོ་བ་ལྟ་བུས་རེས་འགའ་གྲུ་གཟིངས་སྲིད་པའི་རྩེ་མོ་ལ་ལྡིང་བ་སྙམ་བྱེད། རེས་འགའ་ཆུ་བོ་བར་སྣང་ལ་འཕྱོ་ཞིང་གྲུ་གཟིངས་རྒྱ་མཚོའི་གཏིང་དུ་ཆུད་པ་སྙམ་བྱེད།


JLAZ012_Page_0118
[མ་དཔེ་གཟིགས་ན་འདིར་གནོན།]

དེའི་ཚེ་བྲོས་པས་ཐར་བ་དང༌། ར་མདའ་སྦྲན་པ་དང༌། ལག་པ་འཇུ་ས་ནི་མེད། འཆི་བ་འཆི་བ་ཟེར་བའི་འཇིགས་པ་ཅན་དེ། དབུགས་འབྱུང་འཇུག་ཙམ་གྱི་ཁོངས་སུ་བཙན་ཐབས་སུ་སླེབས། སྔོན་ཆད་འཆི་བ་ཡེ་མ་དྲན་པས་ཆོས་བྱས་པའི་གདེང་ནི་མེད། བུ་དང་ནོར་རྫས་གཉེན་འདུན་ཡུལ་མི་ཁྱིམ་མཚེས་དང༌། དེ་རིང་ནས་བྲལ་ཞིང་དེ་དག་གི་ཕན་པ་ནི་ཏིལ་ཙམ་མེད། ཨ་ཙི་འཇིགས་པ་ལ། ད་ཅི་དྲག །ཨ་ཙ་མ། ཀྱེ་ཧུད། ཀྱི་ཧུད་ཀྱི་ཧུད། ཅེས་སྨྲེ་སྔགས་དང་འོ་དོད་དྲག་པོ་འདོན་གྱིན་ཡོད་པའི་ཚེ། མདུན་གྱི་ནམ་མཁར་སྐུ་དྲིན་ཅན་གྱི་བླ་མ་དེ་ཉིད་ཨོ་རྒྱན་ཆེན་པོ་པདྨ་ཐོད་ཕྲེང་རྩལ་གྱི་རྣམ་འགྱུར་ཅན་དུ་གར་སྟབས་ལིང་ལིང་བྱོན་ནས། ཀྱེ་ཁྱོད་ཀྱིས་འཁོར་བ་སྡུག་བསྔལ་གྱི་རང་བཞིན་ལ་ཡིད་བཞིན་གྱི་ནོར་བུ་ལྟ་བུར་མཐོང་སྟེ་འཆི་ཆོས་ཡེ་ནས་མ་དྲན་བས་ལེན། ཁྱོད་རང་གི་ད་ལྟའི་སྣང་བ་ཨ་འཐས་མངོན་ཞེན་ཅན་འདི་ནི་རྒྱུ་བདག་ཉིད་གཅིག་པའི་མ་རིག་པ་ལས་བྱུང་ངོ༌། །བསླུ་བྲིད་མཁན་གྱི་སྐྱེ་བོ་ཕོ་མོ་གཉིས་ནི་ལྷན་སྐྱེས་དང་ཀུན་བརྟགས་ཀྱི་མ་རིག་པའོ། །རྒྱ་མཚོ་ཆེན་པོ་ནི་འཁོར་བའི་རྒྱ་མཚོ་མཐའ་མེད་པའོ། །གྲུ་གཟིངས་ནི་དབུ་བ་རྡོས་པ་ལྟ་བུའི་ཟག་བཅས་སྒྱུ་ལུས་ཀྱི་ཕུང་པོའོ། །སྐྱེ་བ་གཉིས་


JLAZ012_Page_0119
[མ་དཔེ་གཟིགས་ན་འདིར་གནོན།]

ཐུག་གི་ཆག་པ་ནི་ཉིན་མཚན་ལྟེབ་བསྣོལ་གྱི་མི་ཚེ་བཅར་གྱིས་ཟད་ནས་བསབས་ཐེབས་ཅིས་ཀྱང་མེད་པའོ། །ཀྱེ་རིགས་ཀྱི་བུ། ད་ནི་ཤི་བས་ཀྱང་མི་ཆོག་ཤི་ཚར་ནས་གཅེར་བུ་རྒྱང་འཕེན་པའི་འདོད་པ་བཞིན་ཁྲོན་པའི་ནང་དུ་རྡོ་འཕངས་བ་བཞིན་སོང་ན་དེ་ཀས་ཆོག་སྟེ། དཀར་ནག་གི་ལས་ཁྲེ་འུར་བསགས་པ་ཐམས་ཅད་གནམ་ཐིག་དྲང་པོར་བཏབ་པ་བཞིན་དུ་འཕྱུགས་པ་མེད་པར་འབབ་པས་ཇི་ལྟར་བགྱི། ཞེས་གསུངས་པས་སླར་འཇིགས་སྐྲག་དང་སྡུག་བསྔལ་ཤིན་ཏུ་ཆེར་སོང་བླ་མ་ལ་གསོལ་བ་རྩེ་གཅིག་ཏུ་འདེབས་ཤིང་ཅི་བྱ་བརྟོལ་མེད་པར་ཡོད་ཙ་ན། བླ་མའི་ཐུགས་ཀ་ནས་འོད་ཟེར་བ་ཐག་འཛིངས་པ་ལྟ་བུ་ཞིག་སྐྱ་ནར་གྱིས་བྱུང༌།རང་གི་སྙིང་གར་ཟུག་པ་དང་གྲུ་གཟིངས་མགོ་མཇུག་ལྡོག་པ་དུས་མཉམ་སྟེ་བེམ་རིག་བྲལ། སྐུ་གསུམ་པདྨ་འོད་ཀྱི་ཕོ་བྲང་དུ་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས། དེ་ལྟ་བུའི་རྒྱུ་མཐུན་གྱི་འཇིགས་པས་མནར་བའི་སེམས་ཅན་ཐམས་ཅད་བདག་གིས་འདྲེན་ནུས་པའི་སྐལ་བརྒྱུད་ལ་བཞག་པར་བསམས་རྗེས་དུས་གསུམ་གྱི་རྣམ་རྟོག་ཐམས་ཅད་རྟེན་མེད་ཁ་ཡན་དུ་གློད་ལ་འཕྲོ་གནས་སོ་སོའི་ཐོག་ཏུ་དྲན་པའི་བྱ་ར་བཞག་གོ ། སེམས་སྦྱོང་གཉིས་པ་ནི། བུ་ཡིག་ལས། བྱས་པ་ཐམས་ཅད་སྡུག་བསྔལ་གྱི་རྒྱུར་སྣང་བ་བསམ་པ་དང༌།


JLAZ012_Page_0120
[མ་དཔེ་གཟིགས་ན་འདིར་གནོན།]

ཞེས་པས། དང་པོ་ལུང་ལ་རྗེས་སུ་དཔག་ནས་བསམ་པ་ནི། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །ཞེས་གསུངས་པས་རང་རེ་རྣམས་ཀྱི་བདེ་སྡུག་བཟང་ངན་ལེགས་ཉེས་ཐམས་ཅད་ནི་ལས་ཁོ་ནའི་རྗེས་སུ་འབྲང་བར་གདོན་མི་ཟ་ན། དེའི་མི་མཐུན་ཕྱོགས་ཚེ་འདིའི་བྱ་བཞག་དགྲ་འདུལ་གཉེན་སྐྱོང་སོ་ནམ་ཚོང་ཁེ། ཁེ་དྲག་ལོ་འདོད་ཆགས་སྡང་ཁོང་ཁྲོ། གཞན་ལ་ཤ་ཚ་གྲོས་འདེབས། ཆེ་ཐབས་དང་སྙན་གྲགས་བསྒྲུབ་པ་ལ་སོགས་ཅི་དང་ཅི་བྱས་ཀྱང་ཡིད་བརྟན་དང་བློ་ལྟོས་རུང་བ་མི་འདུག །ཡོ་བྱད་ཐབས་སྣ་ཚོགས་ཀྱིས་བསགས་ཀྱང་དགྲ་རྐུན་གྱི་འདོད་པ་བསྒྲུབས་པ་ཡོད། ཞིམ་དུ་རེ་བའི་ཟས་སྐོམ་ཟོས་ཀྱང་ནད་རོ་སློང་ཞིང་འཆི་བའི་རྐྱེན་དུ་གྱུར་པ་དང༌། ཕན་དུ་རེ་ནས་གཉེན་བཤེས་མཛའ་གཅུགས་སུ་བཏགས་ཀྱང་དགྲའི་དྭངས་མར་གྱུར་པ་དང༌། གཞན་ལ་གནོད་པ་ལ་སོགས་མ་བྱས་ཀྱང་དོན་མེད་ལ་ངན་སྨྲས་དང༌། འཕྱ་ཚིག་དང༌། སྐུར་འདེབས་ཟུར་ཟས་ཤེས་རྒྱུད་བསྲེགས་པ་སོགས་སྣང་ཚུལ་


JLAZ012_Page_0121
[མ་དཔེ་གཟིགས་ན་འདིར་གནོན།]

ཐམས་ཅད་སྡུག་བསྔལ་གྱི་རང་བཞིན་དང༌། སྡུག་བསྔལ་བསྐྱེད་པའི་རྒྱུ་ཁོ་ནར་འདུག་པས་ད་ལྟ་ཕན་དེ་ལྟར་མ་གོ་བ་མཚང་རེ་ཆེ། ད་ལེགས་པར་བསམས་ན་ཁ་སང་ཕན་ཆད་ཀྱི་བྱ་བྱེད་ཐམས་ཅད་ཀྱང་ཡིད་ཡུལ་དུ་དྲན་པ་ཙམ་ལས་རྗེས་སུ་མི་འབྲང་བས་མདང་གི་རྨི་ལམ་དང་འདྲ། དེ་རིང་གི་སྣང་བ་ཡང་དོ་ནུབ་ཀྱི་རྨི་ལམ་དང་མཚུངས། སང་ཕན་ཆད་ཀྱི་བྱ་བྱེད་རྣམས་ཀྱང་སང་ནུབ་ཀྱི་རྨི་ལམ་དང་འདྲ་བ་ཞིག་ཡིན་པ་ལས་རྟག་ཐུབ་པ་ཞིག་མི་འདུག་ཀྱང༌། དོན་མེད་མངོན་ཞེན་གྱི་སྣང་བས་ཆགས་སྡང་འཐབ་རྩོད་སྙན་མི་སྙན། གསོག་འཇོག །བདེ་སྡུག །ཁ་འཛིན་གྱི་སྤྱོད་པས་དུས་འདའ་བ་འདི་རང་རེ་སྐྱོན་གྱི་གོང་བུར་འདུག །འཇིག་རྟེན་གྱི་སྣང་བ་འདི་ཀུན་བསླུ་བྲིད་སྒྱུ་མའི་རང་བཞིན་དུ་འདུག་པ་ལ་རྟག་བརྟན་ཐེར་ཟུག་ཏུ་བལྟ་བ་ང་རེ་འགྱོད། ད་ནི་སང་ཕན་ཆད་ཀྱི་བསམ་མནོ་གང་ཡང་མི་གཏོང་བར་བདག་ཏུ་འཛིན་པ་ལ་སྐྱོན་དུ་བལྟ་བར་བྱའོ་སྙམ་དུ་ཞེ་ཐག་པ་ནས་བསམ་མོ། །གཉིས་པ་བློ་བྲིད་དེ་ཐབས་ཀྱིས་སྒོམ་པ་ནི། ཡང་རང་ཉིད་གང་ནས་ཕྱིན་ཆ་མེད་པའི་ལུང་པ་ཐག་རིང་ངོ་མི་འཚལ་བ་ཞིག་དུ་སླེབས། གར་འགྲོའི་གཏད་སོ་མེད་པར་ཐོམ་ཐོམ་ཡོད་ཙ་ན། ངོ་མི་ཤེས་པའི་ཕོ་སྐྱེས་གཞོན་ནུ་བརྒྱད་འབྱུང་ནས་དེ་དག་ན་རེ། བདག་ཅག་ནི་ཀུན་གཞི་


JLAZ012_Page_0122
[མ་དཔེ་གཟིགས་ན་འདིར་གནོན།]

མུན་པའི་གླིང་བྱ་བ་ནས་འོངས། འདི་ནས་ཕར་ལ་ལོ་ཟླ་མང་པོ་བརྒལ་བའི་ས་ན་ཡུལ་རིན་པོ་ཆེའི་གླིང་བྱ་བ་ན་ནོར་བུའི་རིགས་བྱེད་བསམ་གྱིས་མི་ཁྱབ་པ་མཆིས། དེ་དག་ལེན་པ་ལ་ངལ་བ་ཁྱད་དུ་བསད་ནས་འགྲོ་བ་ཡིན། ཁྱོད་ཅག་ཀྱང་དེ་ལྟར་མི་བགྱིའམ་ཟེར་བས་བློ་འགྱུར་ཏེ་དེ་དག་དང་བསྡོངས་ནས་བསྐྱོད་དེ། རེས་ནི་རྫི་ངར་ཅན་གྱི་རླུང་ལ་འགམས། རེས་ནི་གཅན་གཟན་གདུག་པའི་འཕྲང་ལ་བཤར། རེས་ནི་ཆུ་བོ་ཆེན་པོའི་དཔའ་ལ་བཤམས། རྒྱུ་སྟོང་རྐེད་པར་དཀྲིས། མི་ཚེ་རིང་པོ་ལ་དུས་ཀྱི་ཚད་བཙུགས་ནས་ཉིན་མཚན་བར་མེད་དུ་ཤིན་ཏུ་ཐང་ཆད་པའི་ངང་ལ་ཕྱིན་ཕྱིན་པ་ལས། ཅི་ཞིག་ན་མི་ཚེ་ཡང་ཕལ་ཆེར་ཟད། སྐྲ་དང་ཁ་སྤུ་ཡང་དཀར་པོར་སོང་བའི་སྐབས་ཤིག་ན་འདོད་པའི་དོན་གྲུབ་སྟེ་རིན་པོ་ཆེའི་གླིང་ནས་ནོར་བུའི་བྱེ་བྲག་བསམ་གྱིས་མི་ཁྱབ་པ་ཐོབ། དགའ་སྤྲོ་ཡང་དཔག་ཏུ་མེད་པ་བཅས་རང་གི་ཡུལ་དུ་ལྡོག་ནས་ཡོང་ཙ་ན། ཞག་གསུམ་གྱིས་སླེབས་རྒྱུའི་སའི་ཆ་འདུ་བ་རྣམ་བཞིའི་ཐང་བྱ་བ་དེར་ཇག་པ་ཤིན་ཏུ་མི་བསྲུན་པ་སྤུན་བདུན་དང་ཕྲད་དེ། དགའ་བས་བཙལ་བའི་ནོར་བུ་རྣམས་ཕྲོགས། ལུས་ལ་འཇག་པའི་གོས་ནི་བཤུས། ཡན་ལག་ཐམས་ཅད་སྒྲོག་དམ་པོས་བཅིངས། མདའ་མདུང་རལ་གྲི་ལ་སོགས་


JLAZ012_Page_0123
[མ་དཔེ་གཟིགས་ན་འདིར་གནོན།]

པའི་མཚོན་ཆ་ཤིན་ཏུ་རྣོན་པོ་ཐོགས་ནས་བརླང་པོའི་ངག་གིས་ལས་ངན་ཁྱོད་ལ་བླ་མ་ཡོད་ན་གསོལ་བ་ཐོབ། ཡི་དམ་ཡོད་ན་ཐུགས་རྗེ་བསྐུལ། མཁའ་འགྲོ་དང་ཆོས་སྐྱོང་ཡོད་ན་ར་མདའ་སྦྲོན། དེ་དག་གང་ཡང་མེད་ན་འཆི་བ་ཟེར་བའི་སྒྲ་བོ་ཆེ་དེ་སྒོམ། ཚེ་འདི་ཕྱི་ཟེར་བའི་མཚམས་སུ་སླེབས་པ་ཡིན་ནོ། །ཟེར་ང་ཐོས་པས་སྙིང་རྩེ་ཤུམ་གྱིས་སོང༌། ཨ་ཙ་མ། བདག་གིས་མི་ཚེ་ཁོ་ན་ལ་ཚད་བཙུགས་ནས་དཀའ་བ་དེ་ཙམ་ཞིག་བྱས་པ་དོན་མེད་དུ་སོང་བས་མ་ཆོག་ད་ནི་རིན་ཆེན་སྲོག་དང་བྲལ་བ་ལ་ཐུག །བདག་མེད་ཀྱི་ལུང་པར་གཤེད་མ་འདི་ལྟ་བུ་དང་འཕྲད་དུས་སྐྱབས་མགོན་དང་དཔུང་གཉེན་རེ་ས་ནི་མེད། སྔར་དཀའ་བ་སྤྱད་པའི་ལས་ཐམས་ཅད་ཀྱིས་ཕན་པ་ནི་མ་བྱུང༌། ཚེ་ཟད་ལོང་མེད་པར་འཆི་བ་བཙན་ཐབས་སུ་སླེབས་ནས་གདའ། ཨ་ཙ་མ། འཇིགས་པ་ལ། ཀྱི་ཧུད་ཀྱི་ཧུད། ཅེས་སྨྲེ་སྔགས་དང་འོ་དོད་དྲག་པོ་འབོད་ཀྱིན་ཡོད་པའི་ཚེ། མདུན་གྱི་ནམ་མཁར་ཨོ་རྒྱན་ཆེན་པོ་ཕྱག་རྒྱ་བཞི་ལྡན་གྱི་རྣམ་པར་བྱོན་ནས་འོད་ཟེར་སྤྲོ་བསྡུས་མི་རྒོད་རྣམས་རྒྱང་རིང་པོར་བསྐྲད་རྗེས། ཀྱེ་ལས་ངན་གྱི་སེམས་ཅན་ཁྱོད་ཀྱིས་འཁོར་བའི་བྱ་བ་བཙན་དུག་ལྟ་བུ་ལ་རོ་བརྒྱ་དང་ལྡན་པའི་བདུད་རྩི་ལྟ་བུར་ཆགས་པས་ལེན། སྔར་ངོ་མ་ཤེས་པའི་ཕོ་སྐྱེས་བརྒྱད་ནི་རྣམ་ཤེས་


JLAZ012_Page_0124
[མ་དཔེ་གཟིགས་ན་འདིར་གནོན།]

ཚོགས་བརྒྱད་བཞོན་པས་རིག་པའི་ཡེ་ཤེས་བསླུས་པ་ཡིན། རིན་པོ་ཆེའི་གླིང་གི་ནོར་བུ་ནི་ཚེ་འདིའི་བདེ་སྐྱིད་རྨི་ལམ་ལྟ་བུ་བརྟག་མི་ཐུབ་པ་ཡིན། དཀའ་བ་སྣ་ཚོགས་སྤྱད་པ་ནི་སྡུག་བསྔལ་དང་དུ་བླངས་པས་བསླུ་བའི་གཞི་བསྒྲུབ་པ་ཡིན། སྐྲ་དང་ཁ་སྤུ་མདོག་འགྱུར་བ་ནི། སྡུག་བསྔལ་བདེ་བར་འཛིན་པ་ལ་འཁྲུལ་བཞིན་པའི་ངང་དུ་མི་ཚེ་འཛད་པ་ཡིན། འདུ་བ་རྣམ་བཞིའི་ཐང་དུ་ཇག་པས་སྲོག་ལ་རྒོལ་བ་ནི་བཞི་བརྒྱ་རྩ་བཞིའི་ནད་ཀྱིས་གཙེས་ཏེ་འཆི་བདག་གཤིན་རྗེས་དབང་མེད་དུ་སྲོག་གཏོར་བ་ཡིན། ཀྱེ་ཁྱོད་འདྲ་བའི་ལས་ངན། ཁྱོད་ཀྱིས་སྲིད་པ་ལ་ཞེན་པའི་བྱ་བ་ཇི་སྙེད་པ་ཅིག་བྱས་ཀྱང་འགག་ལ་ཐུག་ན་དེ་དང་འདྲ་བ་ཡིན་ཞེས་གསུངས་པ་ཐོས་པས་སྔར་བྱས་ལ་ལྷག་པར་འགྱོད། ཚེ་འདིའི་བྱ་བ་ཐམས་ཅད་སྡུག་བསྔལ་ཁོ་ནའི་རང་བཞིན་དུ་ཤེས་ནས། ཨོ་རྒྱན་ཆེན་པོ་ལ་གསོལ་བ་ཕུར་ཚུགས་སུ་འདེབས་པའི་སྣང་བ་ཤར་བ་ན་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་ཞིག་བྱུང་བ་རང་གི་སྙིང་གར་ཟུག་པ་དང་དུས་མཉམ་དུ་པདྨ་འོད་ཀྱི་ཞིང་དུ་སྐད་ཅིག་ལ་སྐྱེས་ནས་སེམས་ཅན་ཐམས་ཅད་འདྲེན་པའི་དེད་དཔོན་དམ་པར་གྱུར་པར་བསམ་ལ་ཤེས་པ་རང་བབས་སུ་ངལ་གསོ་བར་བྱའོ། །གསུམ་པ་ནི། བུ་ཡིག་ལས། རིགས་དྲུག་གི་སེམས་ཅན་ལ་སྙིང་རྗེ་སྐྱེ་ཞིང༌། ལས་སུ་དཀོན་


JLAZ012_Page_0125
[མ་དཔེ་གཟིགས་ན་འདིར་གནོན།]

མཆོག་མཆོད་ཅིང་དཀར་པོ་དགེ་བའི་ལས་བསྐྱེད་པ་དང༌། ཞེས་པས་དེ་ལྟར་འཆི་བ་མི་རྟག་པ་དང་བྱས་པ་ཐམས་ཅད་སྡུག་བསྔལ་གྱི་རང་བཞིན་དུ་གོ་བ་ཙམ་གྱི་བློ་ཡོད་ཀྱང་ཆོས་བྱེད་ལུགས་ཀྱི་གནད་འགག་མ་གོ་ན། ཆོས་ཀྱི་མཐུན་རྐྱེན་དུ་མིང་བཏགས་པའི་ཟས་གོས་ལོངས་སྤྱོད་སྲིད་པའི་ཕུན་ཚོགས་ལ་ཆོག་མི་ཤེས། གཅིག་ཟླར་གཅིག་དགོས། བློ་ངན་ལང་ཤོར་གྱི་ཡོ་བྱད་སྣ་ཚོགས་པ་ཐབས་དུ་མས་རྩོལ་སྒྲུབ་ལ་རེམ། ཆོས་བརྒྱད་ཁོ་ནས་མི་ཚེ་འཛད་པ་མང་བས་དེའི་ཕྱིར་འཁོར་བའི་སྡུག་བསྔལ་བསམ་ཞིང་རིགས་དྲུག་གི་སེམས་ཅན་ལ་སྙིང་རྗེ་བསྐྱེད་པར་བྱ། དེ་ཡང་མདོ་དྲན་པ་ཉེར་བཞག་ལས། འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་འཁོར་བ་ལ་སྡུག་བསྔལ་ཁོ་ན་ལས་བདེ་བ་ཡོད་པར་མ་གསུངས། དེའི་ནང་ནས་ཀྱང་ངན་འགྲོའི་སྡུག་བསྔལ་ནི་སློབ་དཔོན་ཞི་བ་ལྷས། དམྱལ་སོགས་སྡུག་བསྔལ་བསམ་བྱས་ན། །འདོད་པ་རྣམས་ལ་མཚོན་དང་ནི། །དུག་དང་མེ་དང་གཡང་ས་དང༌། །དགྲ་རྣམས་ཀྱིས་ཀྱང་དཔེར་མི་ཕོད། །ཅེས་སྡུག་བསྔལ་ཤིན་ཏུ་མི་བཟད་པར་གསུངས་པ་ལྟར་ལས་རང་ཉིད་ཀྱང་ཤི་བའི་འོག་ཏུ་མར་མེ་ཤི་བའམ་རྩྭ་ཕུང་མེས་བསྲེགས་པ་ལྟར་ཤུལ་མེད་དུ་སོང་ནས་དེ་ཀས་ཆོག་ཀྱང༌། སྐྱེ་བ་ཞིག་མི་འདོད་ཀྱང་ལེན་དགོས། སྐྱེ་བ་དེ་ཡང་བདེ་འགྲོར་ལེན་པའི་རྒྱུ་སྔོན་


JLAZ012_Page_0126
[མ་དཔེ་གཟིགས་ན་འདིར་གནོན།]

ཆད་རང་གིས་བློ་བདེ་སིང་ངེ་བ་བྱས་པའི་རིགས་ནི་ཆེར་མི་གདའ།ཚེ་རབས་སྔ་མ་རྣམས་སུའང་ཆེར་མ་བསགས་པའི་རྒྱུ་མཐུན་གྱི་འབྲས་བུས་ད་ལྟ་སླེབས་གདའ་མོད།མི་དགེ་བའི་ལས་ནི་རྩེད་མོའི་ཞོར་ཙམ་དུའང་བསམ་གྱིས་མི་ཁྱབ་པ་བསགས་ཚར། དེའི་འབྲས་བུས་ངན་འགྲོའི་སྡུག་བསྔལ་མྱོང་དགོས་པ་བྱུང་ན་ཚེ་འདི་ག་ལ་བྱུང་བ་དང༌། ལུས་རྟེན་ཕྱི་མ་ལ་བྱུང་བ་གཉིས་ཁྱད་པར་རྡུལ་ཙམ་མེད། འདི་ལྟར་དམྱལ་བའི་སྡུག་བསྔལ་ནི། བཤེས་སྤྲིངས་ལས། དམྱལ་བ་བྲིས་པ་མཐོང་དང་ཐོས་པ་དང༌། །དྲན་དང་བཀླགས་སམ་གཟུགས་སུ་བགྱིས་པས་ཀྱང༌། །སྡུག་བསྔལ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་གསུངས། དེ་ལྟ་བུའི་སྡུག་བསྔལ་རང་གི་རྒྱུད་ཐོག་ཏུ་མ་བསམས་ན་གཞན་གྱི་སྡུག་བསྔལ་ལ་ལྟད་མོ་བལྟ་བ་ལྟ་བུས་རང་རྒྱུད་ལ་མི་སྐྱེ། ལས་དང་པོ་པས་རུང་མཐུན་གྱི་སེམས་ཅན་ལ་སྙིང་རྗེ་ཡང་སྐྱེ་དཀའ་བས་སྡུག་བསྔལ་དེ་རང་ཐོག་ལ་བྱུང་བར་བསམས་པའི་བློ་ནང་དུ་བཀུག་ནས་སྒོམ་དགོས་ཏེ་རྫོགས་པ་ཆེན་པོའི་འདས་རྗེས་ལས་ཀྱང༌། རིགས་དྲུག་སྡུག་བསྔལ་བློ་ལ་བླངས། །ཞེས་གསུངས་པའི་ཕྱིར་རོ། །དེའི་དོན་བསམ་པར་བྱ་བ་ནི། གནས་དབེན་པར་སོང་སྟེ། གང་ན་ཕྱིན་ཆ་མེད་པར་གངས་རི་ཆེན་པོའི་སྟོངས།


JLAZ012_Page_0127
[མ་དཔེ་གཟིགས་ན་འདིར་གནོན།]

ཞབས་ཐམས་ཅད་འཁྱགས་སྦུག་གིས་གང་ལ། ཆར་རླུང་ཤིན་ཏུ་མི་བཟད་པས་མུན་པ་ནོག་ནོག་པོར་བྱེད་པ་ཞིག་ཏུ་སླེབས་པས་ཤིན་ཏུ་གྲང་བའི་སྣང་བ་ཤར་ཏེ་ཚ་བ་དོན་དུ་གཉེར་བའི་བསམ་པ་ཤར་བ་ན་སྐད་ཅིག་ལ་རྨི་ལམ་འཁྲུལ་པ་ལྟར་ཚད་དམྱལ་དུ་སྐྱེས་ཏེ་འོག་ཐམས་ཅད་ལྕགས་བསྲེགས་ཀྱི་ས་གཞི། འཁོར་ཡུག་ཐམས་ཅད་ཀྱང་ལྕགས་བསྲེགས་ཀྱི་རྭ་བ། སྟེང་འོག་གོ་མཚམས་མེད་པ་མེ་ལྕེ་དམར་ལྷབ་ལྷབ་པས་ཁེངས་ཤིང་འཁྲུགས་པའི་ཀློང་དུ་ཡང་སོས་ཚེ་ཚད་མི་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང༌། ཀྱི་སྡུག་བསྔལ་མྱོང་བའི་སེམས་ཅན་རང་དང་རང་འདྲ་དཔག་ཏུ་མེད་པ་དེ་དག་ཞེ་སྡང་གི་དབང་ལས་ཕན་ཚུན་གཅིག་གིས་གཅིག་ལ་མཚོན་ཆ་སྣ་ཚོགས་བརྡེག་རེས་བྱས་པས་ལུས་ཚལ་པ་བརྒྱ་སྟོང་དུ་སོང་བས་ན་ཚ་མ་བཟོད་པར་རེས་འགའ་དྲན་མེད་དུ་བརྒྱལ་ཞིང༌། ཤི་བ་སྙམ་བྱེད་པའི་ཚེ་ནམ་མཁའི་དཀྱིལ་ནས། ཡང་སོས་པར་གྱུར་ཅིག་ཅེས་པའི་སྒྲ་སྐད་ལྷང་ལྷང་བྱུང་བས་རྐྱེན་བྱས། ཡང་སྔར་ལྟར་སོས་ཏེ་སྡུག་བསྔལ་ཤིན་ཏུ་མི་བཟོད་པ་ཁོར་ཡུག་ཏུ་མྱོང་ངོ༌། །དམྱལ་བ་ཐིག་ནག་ནི་མི་ལོ་བྱེ་བ་ཕྲག་ས་ཡ་ཉིས་འབུམ་དགུ་ཁྲི་དྲུག་སྟོང་བཅུ་གཉིས། དམྱལ་སྲུང་འཇིགས་སུ་རུང་བས་རང་ལུས་ལ་ཐིག་བརྒྱད་བཏབ་སྟེ་སོག་ལེ་རྣོན་པོས་གཤགས། དེའི་ན་ཚ་ཤིན་ཏུ་མ་བཟོད་ནས་འོ་དོད་འབོད་ཅིང་འབྲོས་པའི་སྣང་བ་ཤར་རོ། །


JLAZ012_Page_0128
[མ་དཔེ་གཟིགས་ན་འདིར་གནོན།]

དེ་ནས་བསྡུས་འཇོམས་མི་ལོ་བྱེ་བ་ཕྲག་གསུམ་འབུམ་ཕྲག་དྲུག་ཁྲི་བརྒྱད་སྟོང་རྩ་གཅིག །སྒོམ་སྟེ། རི་བོ་གླང་སེང་ར་ལུག་ལྟ་བུའི་གདོང་དབྱིབས་ཅན་གྱི་བར་དུ་ཚུད། ལུས་དེ་དག་གི་བར་དུ་སྒང་ལྤགས་བཅར་བ་ལྟར་བཙིར་བས་བ་སྤུའི་བུ་ག་ཚུན་ཆད་ནས་ཁྲག་གི་རྒྱུན་ཆི་ལི་ལི་འབབ། ན་ཚ་དང་སྡུག་བསྔལ་མ་བཟོད་པར་དེ་ནས་འབྲོས་པའི་སྣང་བ་ཤར་རོ། །དམྱལ་བ་ངུ་འབོད་ནི་མི་ལོ་བྱེ་བ་ཕྲག་ས་ཡ་གཉིས་དང་བྱེ་བ་ཕྲག་དགུ་འབུམ་བཞི་ཁྲི་སྟོང་བྱེ་བ་བདུན། ལྕགས་ཀྱི་ཁང་པའི་ནང་དུ་སླེབས་པ་དང་སྒོ་དབྱེར་མེད་དུ་འགྲིག །ཕྱོགས་མཚམས་ཐམས་ཅད་ནས་མེ་འབར་བས་ལུས་རྡུལ་ཕྲན་ལྟ་བུར་བསྲེག་གོ། །ད་ནི་འབྲོས་ས་ཡང་མི་འདུག་སྙམ་ནས་ངུ་སྐད་ལྷང་ལྷང་འབོད་པའི་ཚེ། ངུ་འབོད་ཆེན་པོ་མི་ལོ་བྱེ་བ་ཕྲག་ས་ཡ་གསུམ་དང་བྱེ་བ་ཕྲག་ལྔ་འབུམ་ལྔ་ཁྲི་གཉིས་སྟོང་དྲུག་ཅུ་རྩ་དྲུག །ཞེས་ལྕགས་ཁང་དེ་ལ་སླར་ཡང་ལྕགས་ཁང་རིམ་པ་གཅིག་གིས་གཏུམས་པའི་ནང་དུ་ཚུད་པས་ད་ནི་ནང་མ་ནས་ཐོན་ཀྱང་ཕྱི་མ་ནས་མི་ཐོན་སྙམ་པའི་སྡུག་བསྔལ་སྔ་མ་ལས་ཉིས་འགྱུར་གྱིས་ཆེ་བ་མྱོང་ཞིང་ཤིན་ཏུ་ཉམ་ཐག་གོ། །ཚ་བ་ནི་མི་ལོ་བྱེ་བ་ཕྲག་ས་ཡ་བརྒྱད་དང་བཞི་འབུམ་བྱེ་བ་ཕྲག་ཁྲི་དྲུག་སྟོང་ལྔ་བརྒྱ་སུམ་ཅུའོ། །ལྕགས་ཀྱི་གསལ་ཤིང་མེ་འབར་བས་འཕོངས་ནས་སྤྱི་བོའི་བར་ཏལ་མར་ཕུག་སྟེ་དབང་པོའི་སྒོ་ཐམས་ཅད་ནས་མེ་ལྕེ་དམར་ལྷབ་ལྷབ་འབར་བ་དང༌། རེས་འགའ་ལུས་རིལ་པོ་ཁྲོ་ཆུ་ཁོལ་མའི་


JLAZ012_Page_0129
[མ་དཔེ་གཟིགས་ན་འདིར་གནོན།]

ནང་དུ་བཙོས་ནས་ཤ་རུས་སྐྱ་ཁྲོལ་གྱིས་འབྲལ་བའི་སྡུག་བསྔལ་མྱོང་ངོ༌། །ཡང་རབ་ཏུ་ཚ་བའི་དམྱལ་བ་ཚེ་ཚད་བར་གྱི་བསྐལ་པ་ཕྱེད་དེ་མིའི་ལོ་གྲངས་ཀྱི་གཞལ་བའི་ཡུལ་ལས་འདས། གསལ་ཤིང་རྩེ་གསུམ་གྱི་དབུས་མ་སྤྱི་བོ་དང་ལོགས་གཉིས་པོ་ཕྲག་པ་གཡས་གཡོན་དུ་ཏལ་མར་ཕུག་དང༌། ལྕགས་བསྲེགས་ལེབ་མོས་ལུས་ལ་སྣམ་བུ་ལྟར་དཀྲི་བ་དང༌། ཁྲོ་ཆུ་ཁོལ་མའི་ནང་དུ་ཤ་རྗེན་ལ་བཙོས་པས་ཤ་ལྤགས་རྣམས་འཐོར་ཀེང་རུས་ལྟར་སྐྱ་ཁྲོལ་གྱི་འགྲོ་བར་སྐྱེས་ནས་སྔ་མའི་སྡུག་བསྔལ་ལས་བརྒྱ་འགྱུར་གྱི་ཆེ་བས་ཟུག་རྔུ་མ་བཟོད་པར། ཨ་ར་དང༌། ཨུ་ཁྱུ་དང༌། ཀྱི་ཧུད་ཀྱི་སྒྲ་དྲག་པོས་འབོད་ཅིང་དེ་ནས་འབྲོས་པའི་སྣང་བ་ཤར་རོ། །མནར་མེད་འཇིག་རྟེན་ཆགས་འཇིག་གནས་སྟོངས་ཏེ་བསྐལ་ཆུང་བཞིར་བར་བསྐལ་གཅིག་སྟེ་དེའི་ཚེ་ཚད་ཡུན་ནོ། །པའི་དམྱལ་བ་ཕྱོགས་མཚམས་དང་མུ་མེད་པར་རབ་ཏུ་ཚ་བའི་མེ་འབར་བས་ལུས་དང་མེ་གཉིས་སུ་མེད་པར་བསྲེག་ཅིང་ངུ་བའི་སྐད་ལྷང་ལྷང་ཐོས་པ་ཙམ་ལས་ལུས་ཀྱི་དངོས་པོ་འདི་ཞེས་མི་མངོན་པའི་སྡུག་བསྔལ་བཟོད་བླག་མེད་པར་མྱོང་ཞིང༌། ཨ་ཙ་མ། ཨ་ར་ར། ཨུ་ཁྱུ། ཀྱི་ཧུད་ཀྱི་ཧུད་ཞེས་འོ་འདོད་དང་སྨྲེ་སྔགས་དྲག་པོ་འདོན་གྱིན་ཡོད་པར་སྒོམ། སླར་མདུན་གྱི་ནམ་མཁའ་ཨོ་རྒྱན་བདེ་ཆེན་རྒྱལ་པོ་སྐད་ཅིག་ལ་བྱོན་ནས། ཀྱེ་མ་ལས་ངན་གྱི་སེམས་ཅན། ཁྱོད་ཀྱིས་རྒྱུ་ཞེ་


JLAZ012_Page_0130
[མ་དཔེ་གཟིགས་ན་འདིར་གནོན།]

སྡང་གིས་ཀུན་ནས་བླངས་པའི་ལས་རྔམ་པོ་ཆེ་བསགས། ཡུལ་ཁྱད་པར་ཅན་ལ་ཁོང་ཁྲོ་དྲག་པོ་བྱས་པས་འབྲས་བུ་དམྱལ་བའི་སྡུག་བསྔལ་དེ་ལྟ་བུ་མྱོང་བ་ཡིན། ད་མི་དགེ་བའི་ལས་རྣམས་འགྱོད་པ་དྲག་པོས་བཤགས། རང་དང་རིགས་མཐུན་པའི་སེམས་ཅན་ཐམས་ཅད་ལ་སྙིང་རྗེ་དྲག་པོ་བསྒོམ། གཞན་གྱི་སྡུག་བསྔལ་ཡང་རང་གིས་ལེན་པའི་སྙིང་སྟོབས་བསྐྱེད་ན་འདི་ལས་ཐར་བ་སྲིད་དེ། སྔོན་ཤཱཀྱ་ཐུབ་པ་དམྱལ་བའི་གནས་སུ་གྱད་པཀྴི་ཏ་བྱ་བར་སྐྱེས་ནས་ཤིང་རྟ་འདྲེན་པ་ལ། གྲོགས་ཀ་མ་རུ་པས་ཤིང་རྟ་མ་འདྲོངས་ནས་དམྱལ་སྲུང་ཁྲོས་ཏེ་མགོ་ལ་ལྕགས་ཀྱི་ཐོ་ལུམ་བསྣུན་པས་གྲོགས་པོ་ལ་སྙིང་རྗེ་ཚད་མེད་པར་སྐྱེས། འདིའི་ཤིང་རྟའི་ཐག་པ་ཡང་བདག་གི་གཉའ་བར་ཐོགས་ཤིག་ཅེས་བདེ་སྡུག་བརྗེ་བར་ཐུགས་བསྐྱེད་པས། དམྱལ་སྲུང་ན་རེ་རང་རང་གི་ལས་ལ་སྤྱོད་པ་སུས་ཅི་བྱ་ཞེས་དབུ་ལ་ཐོ་བས་བསྡིགས་པ་སྐད་ཅིག་ལ་ཚེ་འཕོས་ནས་སུམ་ཅུ་རྩ་གསུམ་དུ་སྐྱེས་ཏེ་སྡུག་བསྔལ་ལས་གྲོལ་ལོ། །ཞེས་གཏམ་རྒྱུད་དང་བཅས་གསུངས་པ་ཐོས་པས། རང་འདྲའི་སེམས་ཅན་ཐམས་ཅད་སྡུག་བསྔལ་འདི་ལས་ཐར་ན་བདག་ད་དུང་འདི་ཁར་གནས་ནའང་བཟོད་པར་བྱའོ་སྙམ་པའི་སེམས་བསྐྱེད་མ་ཐག་ཨོ་རྒྱན་ཆེན་པོའི་ཐུགས་ཀ་ནས་འོད་ཟེར་དཀར་པོ་ལྕགས་ཀྱུ་ལྟ་བུ་ཞིག་སྐྱ་ཏལ་གྱིས་བྱུང༌།


JLAZ012_Page_0131
[མ་དཔེ་གཟིགས་ན་འདིར་གནོན།]

དེ་དང་གཉིས་སུ་མེད་པར་སངས་རྒྱས་དོན་གཉིས་ལྷུན་གྲུབ་གྱི་མཐུ་ཅན་དུ་གྱུར། རང་གི་ཐུགས་ཀ་ནས་སྔར་ལྟར་འོད་ཟེར་སྤྲོས་པས་སེམས་ཅན་དེ་དག་སྐད་ཅིག་ལ་འདྲོངས་ཏེ་དམྱལ་བའི་གནས་སྟོངས་པར་བསམ་མོ། །ཞར་ལ་དམྱལ་བ་དེ་དག་གི་ཚེ་ཚད་ནི། ཐུན་མོང་གི་མདོ་སྡེ་དྲན་པ་ཉེར་བཞག་དང༌། ལས་རྣམ་འབྱེད། མངོན་པ་མཛོད་ལ་སོགས་ལས་བགྲང་བྱར་གསུངས་ཀྱང༌། འདིར་གཉེན་པོས་ཟིན་པའི་དབང་དུ་བྱས་ཏེ་ངེས་པ་མེད་པར་བཤད་པ་སྟེ། ཀུན་མཁྱེན་ཆེན་པོས། གཉེན་པོ་དྲག་པོ་རྒྱུད་ལ་སྐྱེས་པ་ལ་སོགས་པས་གློ་བུར་དུའང་འཕོ་བ་དང༌། རྡོ་རྗེ་སློབ་དཔོན་ལ་བརྙས་པ་ལ་སོགས་པས་བསྐལ་ཆེན་དུ་མར་གནས་དགོས་པར་བཤད་པས་ལས་ཀྱི་སྒྲིབ་པས་ཕྱེ་བ་ཡིན་ནོ། །ཞེས་དང༌། གོང་དུ་བཤད་མ་ཐག་པའི་གྱད་པཀྴི་ཏ་དང༌། མཛའ་བོའི་བུ་མོའི་གཏམ་རྒྱུད་ལ་སོགས་པས་ཀྱང་ཤེས་སོ། །དེ་ནས་གྲང་དམྱལ་བསམ་པ་ནི། ཡང་རང་ཉིད་གང་ན་ཕྱིན་ཆ་མེད་པའི་ས་གཞི་ཐམས་ཅད་བྱེ་ཚན་གྱི་རང་བཞིན་ལ་བསིར་བུའི་རླུང་ཙམ་ཡང་མི་འགུལ་ཞིང༌། ཉི་མའི་ཚ་གདུང་གིས་ཤིན་ཏུ་དུབ་པའི་ལུང་པ་ཞིག་ཏུ་སླེབས།ཤེས་པ་ལུང་མ་བསྟན་དུ་ཐོམ་ཐོམ་འགྲོ་ཞིང་འདི་ལས་ཅུང་ཞིག་བསིལ་བ་ཞིག་ཡོད་ན་སྙམ་པས་རྐྱེན་བྱས། ཚ་གདུང་གི་སྣང་བ་འགགས་


JLAZ012_Page_0132
[མ་དཔེ་གཟིགས་ན་འདིར་གནོན།]

ནས་སྐད་ཅིག་ལ་གྲང་དམྱལ་བརྒྱད་དུ་སྐྱེ་བ་སྒོམ་སྟེ་ས་གཞི་ཐམས་ཅད་ཁ་བའི་རང་བཞིན། ཅོང་རོང་དང་ངམ་གྲོག་ཐམས་ཅད་འཁྱགས་རམ་གྱིས་གང་བ་མཐའ་ཐམས་ཅད་གངས་རི་ཆེན་པོས་བསྐོར་ཞིང༌། སྟེང་ནས་ཁ་བ་བུ་ཡུག་འཚུབས་པ་མུན་པ་ནག་ཐུམ་ཐུམ་བྱེད་ཅིང་རླུང་གི་ངར་སྒྲ་འུ་རུ་རུ་སྒྲོགས་པའི་ནང་དུ། ཆུ་བུར་ཅན་གྱི་དམྱལ་བ་ཁ་བའི་བུ་ཡུག་དང་རླུང་གི་རེག་བྱས་ལུས་ལ་བཏབ་པས་སྐད་ཅིག་སྐད་ཅིག་ལ་ལུས་ལ་ཆུ་བུར་མི་བཟོད་པ་འཆར་ཞིང་ཤ་ལྤགས་ཐམས་ཅད་འཁུམས་ནས་སྐྱི་བུང་བྱེད་པའི་སྡུག་བསྔལ་མི་བཟད་པ་དང༌། དེ་ལས་ཆུ་བུར་དེ་དག་བརྡོལ་ནས་རྣག་ཁྲག་ཆི་ལི་ལི་འཛག་པ་དང༌། དེ་བས་སྡུག་བསྔལ་ཆེར་སོང་སྟེ་ཨ་ཆུ་ཞེས་སྐད་ཀྱི་གདངས་དྲག་པོར་འདོན་པ་དང༌། ད་དུང་སྔར་བས་སྡུག་བསྔལ་ཇེ་ཆེར་སོང་བས་སྐད་ཀྱི་ཟུངས་ཀྱང་ཆག་སྟེ་ཀྱི་ཧུད་ཅེས་རྐན་གྱི་ཕུགས་ནས་འདོན་པ་དང༌། དེ་བས་ཀྱང་ཇེ་ཆེར་འཕེལ་བས་སྐད་ཀྱང་མ་ཐོན་པར་སོ་ཐམ་ཐམ་བྱེད་པ་དང༌། དེ་ལ་རླུང་ཆེན་པོའི་ངར་གྱིས་བཏབ་པས་ཁ་དོག་ཀྱང་སྔོ་ལྷང་གི་སོང་ཞིང་ཨུཏྤལ་ལྟར་སེར་ཁ་ཕྲ་མོ་དྲུག་ཏུ་གས་པ་དང༌། ད་དུང་གྲང་ཟུག་གིས་པགས་པ་རྣམས་ཀྱང་བཤུས་ཏེ་ཤའུ་དམར་ཧུ་རེ་པདྨ་ལྟར་ཚལ་པ་བཅུར་གས་པ་དང༌། སླར་སེར་ཁ་དེ་བས་ཀྱང་མང་དུ་སོང་སྟེ་པདྨ་ལྟར་ཆེར་


JLAZ012_Page_0133
[མ་དཔེ་གཟིགས་ན་འདིར་གནོན།]

གས་ནས་སྔ་མ་རྣམས་ཀྱི་སྡུག་བསྔལ་ལས་བརྒྱ་འགྱུར་གྱིས་ཆེ་བ་མྱོང་ཞིང་སྡུག་བསྔལ་དེ་ཡང་གྲོང་ཁྱེར་མ་ག་དྷའི་བྲེ་པོ་ཆེའི་ཁལ་བརྒྱད་ཅུ་ཤོང་བའི་ཏིལ་གྱི་བང་བ་ནས་ལོ་བརྒྱ་བརྒྱའི་མཚམས་སུ་ཏིལ་རྡོག་རེ་ཕྱུང་བས་དེ་ཟད་པའི་ཚེ་ཆུ་བུར་ཅན་གྱི་ཚེ་ཚད་དུ་བཤད་པ་སོགས་གོ་ནས་ཤིན་ཏུ་ཡི་མུག་ཅིང་སྒྱིད་ལུག་པར་སྒོམ། སླར་མདུན་གྱི་ནམ་མཁའ་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་ལུགས་སུ་བྱོན་ནས་བུ་རང་གི་སྡུག་བསྔལ་ལས་སུ་ཤེས་པར་གྱིས་ལ་ཟད་པའི་དགའ་བ་སྒོམ། གཞན་གྱི་སྡུག་བསྔལ་སྙིང་རྗེ་དྲག་པོའི་བསམ་པས་ད་དུང་བསྣོན་མར་ལོང་ལ་གཉེན་པོ་ཁྱད་པར་ཅན་བརྟེན་ཅིག །ཅེས་གསུང་ཐོས་པ་ཙམ་གྱིས། བདག་ལྟ་བུའི་སྡུག་བསྔལ་མྱོང་བའི་གྲང་དམྱལ་གྱི་སེམས་ཅན་ཐམས་ཅད་སྙིང་རེ་རྗེ། བདག་གིས་དེ་དག་གི་སྐལ་བ་མྱོང་ནས་འདི་བས་སྡུག་བསྔལ་འབུམ་འགྱུར་གྱིས་ཆེ་བ་བྱུང་ཡང་བཟོད་པར་བྱའོ། །སེམས་ཅན་དེ་དག་སྡུག་བསྔལ་ལས་ཐར་བར་ཤོག་ཅིག་ཅེས་པའི་སེམས་བསྐྱེད་མ་ཐག་ལས་ངན་སྐད་ཅིག་ལ་ཟད་དེ་ཨོ་རྒྱན་ཆེན་པོའི་ཐུགས་ཀར་ཡེར་གྱི་འཕོས་ནས་འགྲོ་བ་འདྲེན་པའི་དེད་དཔོན་དམ་པར་གྱུར་པར་བསམས་ལ། བདེ་སྡུག་གང་ཤར་གྱི་རང་ངོ་ལ་ལྟ་ཞིང་ཤེས་པ་རྣལ་དུ་དབབ་བོ། །དེ་ནས་ཡི་དྭགས་ཀྱི་སྡུག་བསྔལ་བསམ་པ་ནི། བཤེས་པའི་སྤྲིངས་ཡིག་ལས། ཡི་དྭགས་ནའང་


JLAZ012_Page_0134
[མ་དཔེ་གཟིགས་ན་འདིར་གནོན།]

འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་ལ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་ཟད་བསྟན་འཚལ་ལོ། །ཞེས་ཡི་དྭགས་ལ་རིགས་གསུམ་དུ་ཡོད་པར་བཤད་པའི་སྡུག་བསྔལ་རགས་པ་ཙམ་བློ་ལ་བླང་བ་ནི། ཡང་རང་ཉིད་ཟས་གོས་དང་དངོས་པོ་ལ་ཆགས་སྲེད་ཞེན་པའི་དབང་གིས་ཡུལ་ཁྱད་པར་ཅན་མཆོད་པ་དང་བཀུར་སྟི་ལྟ་བུ་ལ་སེར་སྣ་སྐྱེས་པའི་བསམ་པས་རྐྱེན་བྱས་སྐད་ཅིག་ལ་ཡི་དྭགས་ཕྱིའི་སྒྲིབ་པ་ཅན་དུ་སྐྱེ་བ་བསྒོམ་སྟེ། ལྗོན་ཤིང་གི་འབྲས་བུ་དང༌། ཆུ་ཀླུང་སོགས་ལ་ལོངས་སྤྱོད་པའི་བསམ་པས་ཐག་རིང་པོར་ཐང་ཆད་ཆད་ཕྱིན་པ་ན། སྐྱེ་བོ་མཚོན་ཆ་ཐོགས་པས་བསྲུངས་པ་དང༌། རྣག་ཁྲག་ལ་སོགས་ཡིད་དུ་མི་འོངས་བར་སོང་ནས་ཤིན་ཏུ་སྐྱེངས་ཤིང་བཀྲེས་སྐོམ་གྱི་སྡུག་བསྔལ་བཟོད་མི་ཕོད་པ་དང༌། ཡང་ནང་གི་སྒྲིབ་པ་ཅན་གྲོང་ཁྱེར་སེར་སྐྱ་ཆུ་དང་རྩི་ཤིང་སོགས་འདོད་པའི་དངོས་པོ་ཅི་ཡང་མེད་པའི་མྱ་ངན་གྱི་གནས་དེར་ཟས་སྐོམ་ལོ་ཟླའི་བར་དུ་མི་རྙེད་པས་སྡུག་བསྔལ། གལ་ཏེ་སྨན་ཙམ་རྙེད་ཀྱང་ཁ་ཁབ་མིག་ཙམ་གྱི་ནང་དུ་མི་ཤོང༌། ཅུང་ཟད་ཤོང་ཡང་མགྲིན་པ་རྟ་རྔ་ཙམ་གྱི་སྦུབས་ལ་མི་ཐར། ཐར་ཀྱང་ལྟོ་བ་རི་རབ་ཙམ་པ་མི་ཁེངས་ཤིང་ཡན་ལག་འཇག་མ་ཙམ་གྱིས་ལུས་མི་ཐེག་པ་སོགས་ཀྱི་


JLAZ012_Page_0135
[མ་དཔེ་གཟིགས་ན་འདིར་གནོན།]

སྡུག་བསྔལ་ཤིན་ཏུ་ཉམ་ཐག་པ་མྱོང༌། ཡང་ཟས་སྐོམ་གྱི་སྒྲིབ་པ་ཅན་ཟས་སྐོམ་ལྟོ་བའི་ནང་དུ་ཚུད་པ་དང་དེ་དག་ཀྱང་མེར་འབར་ནས་ལུས་ཚིག །རང་ཤ་རང་གིས་ཟ་བ་དང༌། བཤང་གཅི་ཟ་བས་ཉམ་ཐག །སོ་ཀ་དྲོད་དང་ལྡན་པའི་ཚེ་ཟླ་བའི་རེག་བྱ་གྲང་བ་དེ་ཡང་ཚ་བར་འགྱུར། དགུན་གྲང་བའི་ངར་དང་ལྡན་པའི་ཚེ་ཉི་མའི་འོད་ཟེར་ཡང་བསིལ་བར་གྱུར་ནས་ཚ་གྲང་ཁོད་མི་སྙོམས། ཆུ་ཀླུང་གི་རིགས་བལྟས་པ་ཙམ་གྱིས་སྐམས་ཏེ་ངམ་གྲོག་ཉམས་མི་དགའ་བར་འཆར་བ་སོགས་བཀྲེས་སྐོམ་གྱི་སྡུག་བསྔལ་དཔག་ཏུ་མེད་པ་མྱོང༌། དེ་ལྟ་བུའི་སྡུག་བསྔལ་ཡང་ཡུན་ཐུང་ངུས་མི་ཆོག་པར་མི་ལོ་ཆིག་ཁྲི་ལྔ་སྟོང་མྱོང་དགོས་པར་ཤེས་པས་ཡི་མུག་ཅིང་སྒྱིད་ལུག་པར་སྒོམ། སླར་མདུན་གྱི་ནམ་མཁར་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་བྱད་ཅན་དུ་བྱོན་ནས། ཀྱེ་ཁྱོད་ཀྱིས་སེར་སྣས་བསགས་པའི་སྡུག་བསྔལ་རང་ཐོག་ཏུ་འཕྱུགས་པ་མེད་པར་བབས་པ་ལ་དུས་གསུམ་སངས་རྒྱས་ཀྱིས་ཀྱང་སྐྱོབ་པར་དཀའ།རྒྱལ་བ་ཤཱཀྱ་ཐུབ་པས་རྒྱལ་པོ་གཟུགས་ཅན་སྙིང་པོ་ལ་གསུངས་པ་ལྟར་ལས་བདག་གིར་བྱོས་ལ་ལས་ངན་ཟད་པའི་དགའ་བ་སྒོམ། རང་འདྲའི་སེམས་ཅན་གྱི་སྡུག་བསྔལ་ལ་སྙིང་རྗེའི་བསམ་པས། རང་གི་སྡུག་བསྔལ་གྱི་ཁ་སྣོན་ལ་ལེན་པའི་སྙིང་སྟོབས་བསྐྱེད་ལ་གཉེན་པོ་བརྟེན་ཅིག །ཅེས་གསུང་ཐོས་


JLAZ012_Page_0136
[མ་དཔེ་གཟིགས་ན་འདིར་གནོན།]

པ་ཙམ་གྱིས་ཨ་ཙ་མ། བདག་འདྲ་བའི་སེམས་ཅན་གཅེས་འཛིན་ཁོ་ནས་ད་ལྟ་ཕན་འཁོར་བ་མཐའ་མེད་དུ་འཁྱམས་ཤིང་སྡུག་བསྔལ་འདི་ལྟ་བུ་མྱོང༌། བདག་དང་རིགས་མཐུན་པའི་ཡི་དྭགས་གངྒཱའི་ཀླུང་གི་བྱེ་མ་སྙེད་ཀྱི་རྡུལ་གྲངས་དང་ལྡན་པ་དག་ལའང་སྡུག་བསྔལ་འདི་ཁོ་ན་ཡོད་པས་ཤིན་ཏུ་སྙིང་རྗེ། ད་ནི་རང་གི་སྡུག་བསྔལ་བཟོད་པར་བྱས་ནས་སེམས་ཅན་གཞན་གྱི་སྡུག་བསྔལ་ཡང་དང་དུ་བླང་བར་བྱ། ཡི་དྭགས་ཀྱི་གྲོང་ཁྱེར་རྨང་ནས་སྟོངས་པར་ཤོག་ཅིག་བསམ་པའི་མོད་ལས་ངན་སྐད་ཅིག་ལ་ཟད་དེ་ཨོ་རྒྱན་ཆེན་པོའི་དགོངས་པ་དང་གཉིས་སུ་མེད་པར་སངས་རྒྱས། སེམས་ཅན་དེ་དག་ཀྱང་བདག་གི་ཐུགས་ཀའི་འོད་ཟེར་གྱིས་དྲངས་པར་བསམས་ལ་འཕྲོག་ནས་ཀྱི་མཁན་པོ་ལ་བརྟག་གོ །དེ་ཡང་གོང་གི་དམྱལ་བ་ལ་ཇི་སྐད་དུ། འདུལ་བ་ལུང་ལས། དེ་ནས་མོའུ་འགལ་གྱི་བུས་རྒྱ་མཚོའི་མཐར་ཕྱིན་པ་ལས། ཉི་ཚེ་བའི་སེམས་ཅན་དམྱལ་བ་གཏུན་ལྟ་བུ་དང༌། ཕྱགས་མ་ལྟ་བུ་དང༌། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱིས་གདུངས་བ་མཐོང་སྟེ། ཞེས་དང༌། ཉེ་འཁོར་བ་ནི་བརྒྱད་ཚན་གཉིས་ཀྱི་ཁོངས་ན་ཡོད་པ་སོ་སོའི་གནས་ནི་ཐེག་མཆོག་མཛོད་དུ། ཉི་ཚེ་བ་ནི་ས་ཆུ་མེ་རླུང་སྣ་ཚོགས་ན་ངེས་པ་མེད་པར་ཡོད་ལ། ཉེ་འཁོར་བ་ནི་བརྒྱད་


JLAZ012_Page_0137
[མ་དཔེ་གཟིགས་ན་འདིར་གནོན།]

ཚན་གཉིས་ཀྱི་འཁོར་ན་ཡོད་དོ། །ཞེས་རིགས་གཅིག་གིས་བསྡུས་པ་དང༌། བཤད་མ་ཐག་པའི་ཡི་དྭགས་ལའང་ཀུན་མཁྱེན་ཆེན་པོས། ཡི་དྭགས་དབྱིངས་མཁར་རྒྱུ་བའི་དབྱིངས་གནས་པ། །ཞེས་པའི་དབྱིངས་ན་གནས་པ་སྔ་མའི་གསུམ་པོ་ཡིན་ལ། མཁའ་ལ་རྒྱུ་བའམ་ཕྲན་ཚེགས་པ་ནི་ཤིང་རྟ་རྩ་བར། མཁའ་ལ་རྒྱུ་བའི་ཡི་དྭགས་འདྲེ་རྣམས་དང༌། །གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ཞེས་པ་ལ་སོགས་པས་བསྟན་པ་ལྟར་སློབ་མ་དབང་པོ་རྣོན་པོ་ལ་སྤྲོས་ནས་འཆད་དགེ་བ་གསུམ་གྱི་དོན་འཁྲིད་ནང༌། ཤེས་པར་བྱ་ཞིང་གཞན་དུ་ནི་དཀྱུས་སུ་བཤད་པས་དོན་འགྲུབ་བོ། །དེ་ནས་དུད་འགྲོའི་སྡུག་བསྔལ་བསམ་ཞིང་བློ་སྦྱང་བ་ནི། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང༌། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་དུད་འགྲོ་ལ་བྱིངས་དང་ཁ་འཐོར་བ་སྟེ་རྣམ་གྲངས་གཉིས་སུ་རིགས་བསྡུས་ཏེ་ས་སྡེ་ལས་བཤད་པའི་སྡུག་བསྔལ་བསམས་ཤིང་བློ་ལ་བླང་བ་ནི། ཡང་རང་ཉིད་གཏི་མུག་མུན་པ་ལྟ་བུའི་ཉོན་མོངས་པས་རྐྱེན་བྱས་ཏེ་སྐད་ཅིག་ཉིད་ལ་ཕྱིའི་རྒྱ་མཚོ་ཆེན་པོའི་ནང་དུ་བྱིངས་ན་གནས་པའི་དུད་འགྲོ་ཉ་དང༌། དུང་དང་ཆུ་སྲིན་ལ་སོགས་པས་གོ་


JLAZ012_Page_0138
[མ་དཔེ་གཟིགས་ན་འདིར་གནོན།]

མཚམས་མེད་པ་ཆང་འགག་གི་སྦང་མ་ལྟར་ལྕིག་ལྕིག་ཡོད་པའི་ནང་དུ་སྐྱེས་པར་སྒོམ། རེས་འགའ་རང་ཉིད་ཆེ་བར་གྱུར་པའི་ཚེ་ཆུང་བ་རྣམས་ཀྱིས་ལུས་ཏལ་མར་ཕུགས་ནས་སྙིང་ལ་མདའ་ཕོག་པ་ལྟ་བུའི་ན་ཚ། རེས་འགའ་ཆུང་བར་གྱུར་པའི་ཚེ་ཆེ་བ་རྣམས་ཀྱིས་གྱུར་མིད་དུ་ཟོས་ནས་ལུས་ལྕགས་ཀྱི་པར་བུར་བཅུག་པ་ལྟ་བུའི་སྡུག་བསྔལ། གླིང་འདི་དང་གླིང་གཞན་གྱི་ཕྱི་མཐའི་ལྕགས་རི་གཉིས་ཀྱི་གོ་དབར་ཉི་ཟླའི་སྣང་བ་མེད་པའི་མུན་ནག་གི་ཁྲོད་རང་གི་ལག་པ་བརྐྱང་བསྐུམ་ཙམ་མི་མཐོང་བའི་ཁྲོད་དུ་སྡུག་བསྔལ་དུ་བྲོ་བ་དང༌། ཁ་མཐོར་བའི་དུད་འགྲོ་བྱ་རི་དྭགས་འབུ་སྦྲང་གཅན་གཟན་ལ་སོགས་ཏེ་བདག་ཏུ་མ་བཟུང་བ་རྣམས་ལ་རང་བཞིན་གྱི་སྡུག་བསྔལ་ཚ་གྲང་བཀྲེས་སྐོམ་གཅིག་གིས་གཅིག་ཟ་བས་དོ་ནུབ་ད་ལྟ་སེ་གོལ་གཏོགས་ཡུན་ཙམ་གྱི་རིང་ལ་ཚེ་འདི་ཕྱིའི་མཚམས་སུ་ཡོད་ཅིང་མི་སོགས་མིག་གིས་མཐོང་ཚད་གཤེད་མ་ཁོང་ལག་ཅན་དུ་མཐོང་ནས་སྣང་བ་ཐམས་ཅད་དོགས་པར་འཆར་བས་ལྟོ་ཁམ་རེ་ཟ་བའི་རིང་ལ་མགོ་བོ་ཕྱོགས་མཚམས་བརྒྱད་དུ་བྱ་རར་གཡེང་བ་དང༌། ཁྱད་པར་དུ་རྔོན་པ་དང༌། ཉ་པ་དང༌། བྱ་གཤོར་བ་དག་གིས་བརྩེ་བ་མེད་པའི་འཇིགས་པ་དུ་མས་སྐད་ཅིག་ལ་གསོད་པ་དང༌། བདག་དུ་བཟུང་བའི་དུད་འགྲོ། རྟ་ནོར་


JLAZ012_Page_0139
[མ་དཔེ་གཟིགས་ན་འདིར་གནོན།]

དང༌། ར་ལུག །བ་གླང་ལ་སོགས་པ་ཐམས་ཅད་ཀྱང༌། ཁ་ལ་ལྕགས་ཀྱི་སྒྲོག་གཡོགས་ཏེ་ཞོན་ནས་རྒྱང་རིང་བོར་མནར་བ་དང༌། འགའ་ཞིག་ལུས་གནམ་ས་བསྒྱུར་ཏེ་བྲང་དྲོན་མོའི་ཁ་གྲི་རྣོན་པོས་གཤགས་ནས་ལྟོ་ལག་བཏང་སྟེ་སྲོག་དབུགས་ཀྱི་རྒྱུ་བ་གཅོད་པ་དང༌། གཞན་དག་སྣ་འབིགས་པ་དང༌། བྱ་གཅོད་པ་དང༌། བརྡེག་པ་དང༌། གསོན་ཁྲག་འབྱིན་པ་དང༌། ཁལ་ཐེག་ཚད་འགེལ་བ་དང༌། དེ་བཞིན་དུ་ཀླུ་རྣམས་ལ་ཡང་བྱེ་ཚན་དང༌། ནམ་མཁའ་ལྡིང་གི་འཇིགས་པ་དང༌། རིགས་སྔགས་དང༌། གཅིག་གིས་གཅིག་སྤང་སྟེ་ཁྱུར་མི་ཚུད་ཅིང་གྲོགས་མེད་པ་དང༌། སྤྱི་མཐུན་དུ་རྨོངས་པ་ལ་སོགས་པའི་སྡུག་བསྔལ་དང་ཚེ་ཚད་མ་ངེས་པར་མྱོང་བ་སོགས་དུད་འགྲོ་དེ་དག་ཐམས་ཅད་ཀྱང་བླང་དོར་མི་ཤེས་པའི་རང་བཞིན་ཅན་ཏེ་དེ་དག་གི་སྡུག་བསྔལ་རེ་རེ་ནས་བསམ་སྟེ་འཁོར་བ་ལ་སྐྱུགས་ལོག་གི་འགྲོ་བར་བྱ་དགོས་ཏེ། ཀུན་མཁྱེན་གྱིས། འདི་དག་བསམས་ནས་བྱོལ་སོང་འཇིག་རྟེན་ལས། །ཐར་འདོད་རྣམས་ཀྱི་ཕན་བདེ་བསྒྲུབ་པའི་ཕྱིར། །མངོན་མཐོ་ངེས་ལེགས་ལམ་བཟང་སྲོལ་གཏོད་ལ། །ཉིན་མཚན་བརྩོན་པས་དགེ་ལ་གཞོལ་བར་མཛོད། །ཅེས་གསུངས་སོ། །དེ་དག་ཀྱང་མཐར་ཆགས་སུ་སྡུག་བསྔལ་མྱོང་ཟིན་པའི་མཐར་རང་ཉིད་ཀླུར་སྐྱེས་པ། ནམ་མཁའ་


JLAZ012_Page_0140
[མ་དཔེ་གཟིགས་ན་འདིར་གནོན།]

ལྡིང་གིས་བར་སྣང་ལ་ཁྱེར་ནས་ད་ནི་དབུགས་ཕྱི་ནང་གང་གི་མཚམས་ཀྱང་ཚེ་འདི་ཕྱིའི་སོ་མཚམས་སུ་སླེབས་པ་ཨ་རེ་འཇིགས། སྟོབས་ལྡན་གྱི་འདབ་ཆགས་འཇིགས་པ་ཅན་འདི་ལྟ་བུས་བདག་ཉིད་གསོན་ཟས་བྱེད་པ་ཨ་ཙི། འཇིགས་པ་ལ། འཇིགས་པ་ལ། ཀྱི་ཧུད། ཀྱི་ཧུད་ཅེས་དྲན་པ་འཐོར་བ་ཙམ་གྱི་འཇིགས་སྐྲག་གི་རོ་མྱོང༌། སླར་སྟེང་གི་ནམ་མཁའ་ལ་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་ལུགས་སུ་བྱོན་ནས། ཀྱེ་ལས་ངན་གྱི་སེམས་ཅན་འདི་ལྟ་བུའི་སྡུག་བསྔལ་དང་འཇིགས་སྐྲག་མྱོང་དགོས་པའང་འཁོར་བ་མཐའ་མེད་དུ་བདག་གཅེས་འཛིན་ཁོ་ན་ལྷུར་བླངས་པས་ལེན། ད་ནི་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ཁྱད་པར་ཅན་སྒོམ་ན་འདི་ལས་གྲོལ་བའི་ཐབས་ཡིན་ཏེ། སྔོན་བསྟན་པའི་བདག་པོ་ཤཱཀྱ་སེང་གེས་བྱང་ཆུབ་ཀྱི་སྤྱོད་པ་ལ་བསླབས་པའི་ཚེ་མཛའ་བོའི་བུ་མོ་ཞེས་བྱ་བར་སྐྱེས་ནས་མས་བསྲུངས་ཀྱང་མ་ཉན་པར་མའི་མགོ་ལ་འགོངས་ནས་རྒྱ་མཚོར་ནོར་བུ་ལེན་དུ་ཕྱིན་པས་གྲུ་གཟིངས་ཞིག །ཤིང་ལེབ་གཅིག་ལ་འཇུས་པས། མཚོ་གླིང་ཞིག་ཏུ་འཐོན། དེ་ནས་རིམ་པར་ཕྱིན་པའི་ཅི་ཞིག་ན་ལྕགས་ཀྱི་ཁང་པ་ཞིག་ཏུ་མི་ཞིག་གི་མགོ་ལ་ལྕགས་ཀྱི་འཁོར་ལོ་བསྐོར་ནས་ཀླད་པའི་དཀྱིལ་དུ་འབུགས་ཀྱིན་འདུག །ཅི་བྱས་པ་ཡིན་དྲིས་


JLAZ012_Page_0141
[མ་དཔེ་གཟིགས་ན་འདིར་གནོན།]

པས་མའི་མགོ་ལ་འགོངས་པའི་རྣམ་སྨིན་ཡིན་ཟེར། འོ་ན་ང་ཡང་ལས་ཀྱིས་འདིར་ཁྲིད་པ་ཡིན་སྙམ་པ་དང༌། ནམ་མཁའ་ལས་སྒྲ་བྱུང་སྟེ་བཅིངས་པ་གང་ཡིན་པ་གྲོལ་བར་འགྱུར་རོ། །གྲོལ་བ་གང་ཡིན་པ་བཅིང་བར་འགྱུར་རོ་ཟེར་ནས་འཁོར་ལོ་རང་གི་མགོ་ཐོག་ཏུ་བྱུང་སྟེ་བསྐོར་བས་བཟོད་ཐབས་མེད་པའི་སྡུག་བསྔལ་བྱུང་ངོ༌། །དེའི་རྐྱེན་གྱིས་རང་འདྲའི་སེམས་ཅན་རྣམས་ལ་སྙིང་རྗེ་དྲག་པོ་སྐྱེས། འདི་ལྟ་བུའི་སྡུག་བསྔལ་མྱོང་བའི་སེམས་ཅན་མང་པོ་ཡོད་པས་སྙིང་རེ་རྗེ། དེ་དག་གི་སྡིག་པ་དང་སྡུག་བསྔལ་བདག་ལ་འབྱུང་བར་ཤོག་ཅིག་སྙམ་དུ་དགོངས་པ་དང་དེ་མ་ཐག་འཁོར་ལོ་ནམ་མཁའ་ལ་འཕུར་ཏེ་སྡུག་བསྔལ་ལས་གྲོལ་ལོ། །དེས་ན་བདག་བས་གཞན་གཅེས་ཀྱི་བསམ་པ་འདི་ནུས་པ་ཤིན་ཏུ་ཆེ་བ་ཡིན་པས་རང་འདྲའི་སེམས་ཅན་དཔག་ཏུ་མེད་པ་ཡོད་པ་དེ་དག་ལ་སྙིང་རྗེ་ཆེན་པོ་བསྐྱེད་དོ།།དེ་དག་གི་སྡུག་བསྔལ་ཁྱོད་རང་གི་འདིའི་བསྣོན་མར་ལོང་ལ་དགའ་བ་སྒོམས་ཤིག །ཅེས་གསུང་ཐོས་པ་ཙམ་གྱིས་རང་འདྲའི་སེམས་ཅན་ལ་སྙིང་རྗེ་དྲག་པོ་བསྐྱེད་ཅིང་བདེ་སྡུག་གཏོང་ལེན་གྱི་སྙིང་སྟོབས་བསྐྱེད་པ་ཙམ་གྱིས་ལས་ངན་སྐད་ཅིག་ལ་ཟད། འཇིགས་པ་ལ་རྨི་ལམ་གྱི་སྣང་བ་ལྟར་བདེན་མེད་དུ་ཡལ་ནས་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས། དུད་འགྲོའི་རིགས་ཀྱི་སེམས་ཅན་ཐམས་


JLAZ012_Page_0142
[མ་དཔེ་གཟིགས་ན་འདིར་གནོན།]

ཅད་ལ་འོད་ཟེར་སྤྲོས་པས་དེ་དག་གཅིག་ཀྱང་མ་ལུས་པ་བྱ་ཁྱུ་ལ་འུར་རྡོ་འཕངས་པ་ལྟར་རིག་འཛིན་རྣམ་པ་བཞིའི་གྲལ་དུ་དྲངས་པར་བསམ་ལ་རྟོགས་པའི་སྤུན་ཐག་བཅད་ནས་དྲན་ཤེས་ཁ་ཡན་དུ་གློད་པར་བྱའོ། ། ༈ དེ་ནས་བདེ་འགྲོ་ལའང་བདེ་བ་མེད་པར་བསམ་པ་ནི། འོ་ན་ངན་སོང་གསུམ་ལ་སྐྱེས་ན་དེ་ལྟར་ཡིན་ཀྱང་བདེ་འགྲོ་ཐོབ་ན་སྡུག་བསྔལ་མེད་པའི་བདེ་བ་འབའ་ཞིག་གོ་སྙམ་ན་མ་ཡིན་ཏེ་བཤེས་སྤྲིང་དུ། མཐོ་རིས་ན་ཡང་བདེ་ཆེན་དེ་དག་གི །འཆི་འཕོའི་སྡུག་བསྔལ་ཉིད་ནི་དེ་བས་ཆེ། །ཞེས་དང༌། ལྷ་ཡི་འཇིག་རྟེན་དག་ན་འཕོས་པ་ལ། །གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང༌། །དམྱལ་བར་གནས་པ་གང་ཡང་རུང་བར་འགྱུར། །ཞེས་དང༌། མདོ་དྲན་པ་ཉེར་གཞག་ལས། མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པ་ལྟར་མཐོ་རིས་མིའི་བདེ་འགྲོ་ཐོབ་ཀྱང༌། སྡུག་བསྔལ་གྱི་སྡུག་བསྔལ་བརྩེགས་མར་འབྱུང་བ་ཕ་ཤི་བའི་ཐོག་ཏུ་མ་ཡང་འདས་པ་ལྟ་བུ། འགྱུར་བའི་སྡུག་བསྔལ་ད་ལྟ་བདེ་བ་ལྟར་ཡོད་འཕྲོ་ཁོ་ན་ལ་གློ་བུར་གྱི་སྡུག་བསྔལ་


JLAZ012_Page_0143
[མ་དཔེ་གཟིགས་ན་འདིར་གནོན།]

དུག་དང་འདྲེས་པའི་ཁ་ཟས་ཟོས་པའམ། རྩེད་མོའི་ཆེད་དུ་ཆུ་བརྒལ་བས་བྱིང་སྟེ་སྐད་ཅིག་ལ་སྲོག་འདོར་བ་ལྟ་བུ། ཁྱབ་པ་འདུ་བྱེད་ཀྱི་སྡུག་བསྔལ་ནི་ཟས་གོས་དང་སྤྱོད་ལམ་ཉེས་པས་ཤིན་ཏུ་དོས་དྲག་པའི་ནད་མྱོང་བའམ། མི་བཙན་པོ་ལ་རྒོལ་བ་བྱས་པས་ཕྱིས་གནོད་པའི་ལན་འདུ་བྱེད་པ་ལྟ་བུ་སྟེ། རྩ་བའི་སྡུག་བསྔལ་ཆེན་པོ་གསུམ། དེ་སྐད་དུ་འདུལ་བ་ལུང་ལས། འཁོར་བ་སྡུག་བསྔལ་ཅན་ཕུང་པོ། །སྡུག་བསྔལ་སྡུག་བསྔལ་འདུ་བྱེད་དང༌། །འགྱུར་བ་ཉིད་གསུམ་བརྒྱད་རྣམས་ཀྱིས། །མི་རྣམས་ཤིན་ཏུ་སྡུག་བསྔལ་ལོ། །ཞེས་གསུངས་པ་ལྟར་རྩ་བའི་སྡུག་བསྔལ་གསུམ་གྱི་སྟེང་དུ་སྐྱེ་བ་དང༌། རྒས་པ་དང༌། ན་བ་དང༌། འཆི་བ་དང༌། དགྲ་མི་སྡུག་པ་དང་འཕྲད་པ་དང༌། གཉེན་བྱམས་པ་དང་བྲལ་བ་དང༌། འདོད་པ་ཐོག་ཏུ་མ་ཁེལ་བས་ཕོངས་པ་དང༌། ཉེར་ལེན་གྱི་ཕུང་པོ་ལྔས་སྡུག་བསྔལ་གཏན་དུ་འཛིན་པ་སྟེ་རྣམ་པ་བརྒྱད་ཀྱིས་མནར་བས་ཤིན་ཏུ་སྡུག་བསྔལ་ལོ། །དེའི་ཕྱིར་ཀུན་མཁྱེན་ཆེན་པོས། དེ་ལྟར་མི་ཡི་འཇིག་རྟེན་མཐའ་དག་ནའང༌། །སྡུག་བསྔལ་རྒྱུ་འབྲས་ཉིད་ཕྱིར་བདེ་བ་མེད། །དེ་ལས་ཐར་ཕྱིར་ལེགས་པའི་ཆོས་བསམ་སྟེ། །འཁོར་བའི་གནས་ལས་ཐར་བའི་ཐབས་འཚལ་ལོ། །ཞེས་གསུངས་སོ། །དེ་བཞིན་དུ་འདོད་ལྷའི་གནས་


JLAZ012_Page_0144
[མ་དཔེ་གཟིགས་ན་འདིར་གནོན།]

ནའང་སྡུག་བསྔལ་ཚད་མེད་དེ། འདི་ལྟར་རྒྱལ་ཆེན་རིགས་བཞི་དང༌།༤༠ ཨངྐི་རྣམས་ནི་མིའི་ལོ་གྲངས་ཏེ། ལྷ་གནས་སོ་སོའི་ཞག་རེ་ཡིན་ལ། དེའི་ལོ་ཟླའི་འགྱུར་གྱིས་རྩིས་ནས་རྒྱལ་ཆེན་རིགས་བཞིའི་ལོ་ལྔ་བརྒྱ་ལ་ཡང་སོས་ཀྱི་ཞག་གཅིག །སུམ་ཅུ་རྩ་གསུམ་པ་ནས་རིམ་པར་ལ་སྟོང་དང༌། ཉིས་སྟོང་དང༌། བཞི་སྟོང་དང༌། བརྒྱད་སྟོང་དང༌། ཁྲི་དྲུག་སྟོང་རྣམས་ཐིག་ནག་དང༌། བསྡུས་འཇོམས་དང༌། ངུ་འབོད་དང༌། ངུ་འབོད་ཆེན་པོ་དང༌། ཚ་བ་རྣམས་ཀྱི་ཞག་རེ་ཡིན་ལ། རབ་ཏུ་ཚ་བ་དང་མནར་མེད་པ་ནི་གཞལ་བྱ་དེས་མ་ཡིན་ཏེ་གོང་དུ་བཤད། སུམ་ཅུ་རྩ་གསུམ་ ༡༠༠ དང༌། མཚེ་མ་༢༠༠ དང༌། དགའ་ལྡན་༤༠༠ དང༌། འཕྲུལ་དགའ་༨༠༠ དང༌། གཞན་འཕྲུལ་༡༦༠༠ དབང་བྱེད་ཀྱི་བར་དེ་དག་བདེ་བ་ལྟར་སྣང་ཡང༌། འགྱུར་བ་དང༌། འདུ་བྱེད་ཀྱི་སྡུག་བསྔལ་ཁོ་ནས་མནར། འཆི་བའི་ཚེ་ལུས་ཀྱི་མདོག་མི་སྡུག་པ་དང༌། མེ་ཏོག་རྙིང་པ་དང༌། ཉམས་མི་དགའ་བ་དང༌། ལྷ་ཟླ་བོས་སྤོང་ཞིང་འདུ་ཤེས་འཁྲུགས་པ་དང༌། ཕྱི་མ་གང་དུ་སྐྱེས་པའི་གནས་ལྷ་ཡི་མིག་གིས་མཐོང་བས་རྐྱེན་བྱས་སྐྲས་སྟེ་བརྒྱལ་བ་ན་ལྷ་ཕ་མའམ། མཛའ་བཤེས་ལ་སོགས་པས་རྒྱང་རིང་པོ་ནས་བོས་ཏེ། འཛམ་བུའི་གླིང་དུ་མི་རྣམས་ཀྱི་ནང་དུ་སྐྱེ་བར་ཤོག་ཅིག །དེར་ཡང་དགེ་བཅུ་སྤྱད་ནས་ཕྱིས་ཀྱང་ལྷའི་གནས་འདིར་སྐྱེ་བར་ཤོག་ཅིག །ཅེས་ཡིད་སྨོན་ཁར་བཏོན། མེ་ཏོག་གཏོར་ནས་རྒྱང་རིང་བོར་འབྲོས་པ་དེ་ལྟ་བུའི་སྡུག་བསྔལ་ལྷའི་ཞག་


JLAZ012_Page_0145
[མ་དཔེ་གཟིགས་ན་འདིར་གནོན།]

བདུན་དུ་སྤྱོད་པས་ཉམ་ཐག །འོ་སྐོལ་མི་རྣམས་འཆི་བའི་ཚེ་གཉེན་བཤེས་ཀྱིས་མལ་མཐའ་བསྐོར་ནས་དེའི་འདོད་པ་ཐབས་དུ་མས་སྐོང་ནའང་ཤིན་ཏུ་སྡུག་བསྔལ་ཅིང་ཡི་མུག་ན་ལྷ་དག་འཆི་འཕོའི་སྡུག་བསྔལ་ལྟ་ཅི་སྨོས། གཞན་ཡང་ཚངས་རིས་ནས་འབྲས་བུ་ཆེན་པོའི་བར་ཏེ་གཟུགས་ཁམས་བསམ་གཏན་གྱི་ལྷ་གཟི་བྱིན་གྱི་དཔལ་དང་ལྡན་པ་དེ་དག་ཀྱང་འཆི་བའི་ཚེ། ད་ལྟའི་བདེ་བ་དེ་ཉིད་འགྱུར་ནས་སྲིད་པ་ཕྱི་མར་འཇུག་པའི་སྡུག་བསྔལ་དཔག་ཏུ་མེད་དེ་འཕགས་པ་ཀླུ་སྒྲུབ་ཀྱིས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐོངས་བས་ཀྱང༌། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་གསུངས་ལ། དེ་བཞིན་དུ་གཟུགས་མེད་སྐྱེ་མཆེད་མུ་བཞི་ནི་ཐམས་ཅད་མཁྱེན་པའི་ཉེ་རྒྱུ་མ་ཡིན་པའི་ལུང་མ་བསྟན་གྱི་བསམ་གཏན་ཉི་ཚེ་བར་འབྱམས། ཅི་ཞིག་ན་འཆི་འཕོས་ནས་སྲིད་པ་ཕྱི་མའི་སྡུག་བསྔལ་ནམ་མཁའ་ལ་འཕུར་བའི་འདབ་ཆགས་ངེས་པར་ས་ལ་བབས་པ་བཞིན་ངེས་མེད་དུ་མྱོང་ན་གནས་སྐབས་ཀྱི་བདེ་བ་ལ་ཡིད་བརྟན་པར་བྱེད་པ་ནི་མཚང་རེ་ཆེ་སྟེ། སློབ་སྤྲིང་ལས། སྡུག་བསྔལ་མེ་ཚོགས་ཕུང་པོས་འཇིགས་པའི་འཇིག་རྟེན་འདིར། །སྐྱེ་བོ་བདེ་སྙམས་


JLAZ012_Page_0146
[མ་དཔེ་གཟིགས་ན་འདིར་གནོན།]

མངོན་པའི་ང་རྒྱལ་བྱེད་པ་གང༌། །དེ་ནི་གཤིན་རྗེའི་ཁ་ཡང་འབྱེད་པ་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཞེས་གསུངས་སོ། །གཞན་ཡང་འདི་ལྟར་ལྷ་མིན་རྣམས་ལ་ནི་སྡུག་བསྔལ་དེ་བས་ཀྱང་དབལ་ཚ་སྟེ། བཤེས་སྤྲིང་ལས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་སུམ་ཅུ་རྩ་གསུམ་པའི་སྐྱིད་པ་དང་འབྱོར་བ་མཐོང་ནས། ཁོང་ཁྲོ་དང་ཕྲག་དོག་གི་མེས་གདུངས་ནས་ལྷ་དང་འཐབས་པའི་ཚེ་གཡུལ་ངོར། རྡོ་རྗེ་དང༌། མདའ་དང༌། འཁོར་ལོ་ལ་སོགས་པའི་མཚོན་ཆ་སྣ་ཚོགས་པས་མགོ་དང་ཡན་ལག་གཅོད་ཅིང༌། སྲོག་འགག །ལུས་ཤིན་ཏུ་སྣད་པ་དང༌། འཆི་བ་ལ་ཐུག་པའི་སྡུག་བསྔལ་ཤིན་ཏུ་མི་བཟད་པས་མནར་རོ། །གལ་ཏེ་བློ་དང་ལྡན་པ་དག་ཡོད་ཀྱང་སྒྲིབ་པའི་དབང་གིས་ཉན་ཐོས་རང་གི་མཐོང་ལམ་མི་ཐོབ་པས་བདེན་པ་མི་མཐོང་ཞེས་བཤད་ལ་ཐེག་པ་ཆེན་པོའི་ལུགས་སུ་ནི་དེ་ལྟར་མ་ཡིན་པར་དཀོན་ཅོག་བརྩེགས་པ་ལས་གསུངས་པ་ཀུན་མཁྱེན་ཆེན་པོས་ལུང་འདྲེན་མཛད་མོད། ཇི་ལྟར་ཡང་དེར་སྲིད་པ་སྤོང་བའི་ཐབས་ལ་


JLAZ012_Page_0147
[མ་དཔེ་གཟིགས་ན་འདིར་གནོན།]

འབད་དགོས་པ་ནི་ཀུན་མཁྱེན་གྱིས། ལྷ་མིན་པ་དག་ཤིན་ཏུ་སྡུག་བསྔལ་ན། །དེ་བས་དགེ་ལས་ཞི་བའི་འགྲོ་བ་དག །མྱུར་བ་ཉིད་དུ་དམ་པའི་ཆོས་མཛོད་ཅིག །ཅེས་གསུངས་པ་ལྟར་རོ། །དེ་ལྟར་འཁོར་བའི་སྡུག་བསྔལ་མཐའ་མེད་ཅིང་དོས་དྲག་པ་གཅིག་ནས་ཐར་ཀྱང་གཅིག་ཏུ་འཛུད་པ་ཟོ་ཆུའི་ཁྱུད་མོའམ། བུམ་ནང་གི་བུང་བ་བཞིན་སྡུག་བསྔལ་ཁོ་ནའི་རང་བཞིན་ཅན་ཏེ། སློབ་སྤྲིང་ལས། གང་ཞིག་འཁོར་བའི་འཁོར་ལོར་རྟག་ཏུ་འཁོར་འགྱུར་བའི། །ནང་དུ་ཞུགས་ནས་བསྟི་བ་ཙམ་ལ་བདེར་སེམས་པ། །དེ་ནི་ངེས་པར་དབང་མེད་རིམ་གྱིས་བརྒྱ་ཕྲག་ཏུ། །འགྲོ་བ་མཉམ་དང་མི་མཉམ་ཀུན་ཏུ་འཁྱམས་པར་འགྱུར། །ཞེས་གསུངས་སོ། །འོ་ན་ངན་འགྲོའི་གནས་དང་རིགས་དྲུག་ཐུན་མོང་གི་སྡུག་བསྔལ་ཐམས་ཅད་སངས་རྒྱས་ཀྱིས་སྐྱོབས་པས་ཨའུ་ཙི་མོད་སྙམ་ན། དེ་ལྟར་མ་ཡིན་ཏེ། འདུལ་བ་ལུང་ལས། ངས་ནི་ཁྱོད་ལ་ཐར་བའི་ལམ་བསྟན་གྱི། །ཐར་བ་རང་ལ་རག་ལས་བརྩོན་པར་གྱིས། །ཞེས་གསུངས་པས་རང་ཅག་རྣམས་བླང་དོར་ལ་རྨོངས་པའི་ཕྱིར་བདེ་བར་གཤེགས་པས་ཐབས་དུ་མའི་སྒོ་ནས་ཐར་པའི་ལམ་བསྟན་པ་ཙམ་ལས། འཁོར་བ་དང་ངན་སོང་ལས་ཐར་བ་ནི་རང་གི་བརྩོན་པ་ཁོ་ན་ཡིན་


JLAZ012_Page_0148
[མ་དཔེ་གཟིགས་ན་འདིར་གནོན།]

པས་དཔེར་ན་གཉིད་ཀྱིས་མྱོས་པའི་ཚེ་རྨི་ལམ་སུས་ཀྱང་དགག་ནི་མི་ནུས་པ་བཞིན་ནོ། །གལ་ཏེ་དེ་ལྟ་མིན་ན་སངས་རྒྱས་ཐུགས་རྗེ་ཅན་དེ་དག་གཅིག་གི་ཐུགས་རྗེའི་འོད་ཟེར་གྱིས་ཀྱང་སྲིད་པ་འདི་དཔག་ཏུ་མེད་པའི་སྔ་རོལ་ནས་སྟོངས་པར་མཛད་ཟིན་ངེས་སོ། །དེ་བས་ན་འོ་སྐོལ་འཁོར་བའི་དོང་དུ་ནི་ལྷུང༌། བཟུང་འཛིན་གྱི་སྒྲོག་དམ་པོས་ནི་བཅིངས། ཉོན་མོངས་པའི་མཚོན་གྱིས་ནི་བསྔུན། ད་ལྟའི་སྡུག་བསྔལ་ལ་སྤྱོད་ཅིང་ཕྱི་མའི་སྡུག་བསྔལ་འདྲེན་པ་ལས་འོས་མེད་པ་འདིར་ལེགས་པར་བསམས་ནས་རིགས་དྲུག་གི་སེམས་ཅན་ཐམས་ཅད་ལ་སྙིང་རྗེ་དཔག་ཏུ་མེད་པར་བསྐྱེད། སེམས་ཅན་དེ་དག་ཐམས་ཅད་ཐར་པའི་ལམ་ལ་བཀྲི་བའི་ཆེད་དུ་ཉི་མ་དེ་རིང་ནས་བཟུང་ཡོན་ཏན་ཐམས་ཅད་འབྱུང་གནས་དཀོན་མཆོག་གསུམ་ཐབས་དུ་མའི་སྒོ་ནས་མཆོད་པ་དང༌། མི་དགེ་བའི་བསམ་པ་སྐད་ཅིག་མ་ཡན་ཆད་ལ་གཉེན་པོ་དྲག་པོས་གཅུན་ནས་བཤགས་སྡོམ་བྱ་སྟེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང༌། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་དག་གིས་ཀྱང༌། །རྩྭ་ཕུང་རི་ཙམ་སྲེག་པར་བྱེད། །ཅེས་གསུངས་ལ། དགེ་བའི་བསམ་པ་ཆ་ཤས་ཕྲ་མོ་ཚུན་ཆོད་ནས་གསག་ཅིང་དཀར་པོ་དགེ་བའི་


JLAZ012_Page_0149
[མ་དཔེ་གཟིགས་ན་འདིར་གནོན།]

ལས་འབའ་ཞིག་གིས་དུས་འདའ་བར་བྱེད་དགོས། འགའ་ཞིག་བདག་ཤེས་རབ་ཆུང་བས་ཐོས་བསམ་མི་ནུས་སྐད་པ་དང༌། འགའ་ཞིག་བདག་ལོངས་སྤྱོད་དམན་པས་ཟག་བཅས་ཟང་ཟིང་གི་མཆོད་སྦྱིན་མི་འགྲུབ་སྐད་པ་དང༌། འགའ་ཞིག་བདག་ན་སོ་རྒས་པས་ཆོས་མི་ཡོང་སྐད་པ་སོགས་སྨྲ་ཞིང་སེམས་པའང་གཙོ་བོར་སེམས་ཁོ་ནས་མ་ནུས་པ་ཡིན་ཏེ་བརྩོན་འགྲུས་དང་སྤོབས་པ་བསྐྱེད་ན་དུད་འགྲོས་ཀྱང་ཐར་པ་བསྒྲུབ་ནུས་པར་གསུངས་ན་མི་ཡིས་ལྟ་ཅི་སྨོས་ཏེ། ཤཱནྟ་དེ་ཝས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པར་གསུངས་པས་བདེན་འདི་གསུངས། །སྦྲང་བུ་ཤ་སྦྲང་བུང་བ་དང༌། །དེ་བཞིན་སྲིན་བུར་གང་གྱུར་པ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའི་བླ་མེད་ཐོབ། །བདག་ལྟའི་རིགས་ཀྱི་མིར་སྐྱེས་ལ། །ཕན་དང་གནོད་པ་ངོ་ཤེས་ནས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་ཐོབ། །ཅེས་དང༌། མདོ་སྡེ་རྒྱན་ལས། གལ་ཏེ་སེམས་ཅན་མིར་གྱུར་པ། །ཚད་མེད་སྐད་ཅིག་རེ་རེ་ལ། །རྫོགས་པའི་བྱང་ཆུབ་ཐོབ་དེའི་ཕྱིར། །ཞུམ་པ་དང་དུ་བླང་མི་བྱ། །ཞེས་གསུངས་པའི་ཕྱིར་རོ། །གཞན་ཡང་


JLAZ012_Page_0150
[མ་དཔེ་གཟིགས་ན་འདིར་གནོན།]

དགེ་བའི་ལས་ཇི་སྙེད་པ་ལའང་ཆོག་ཚོད་དང༌། རྩིས་གྲངས་ཀྱིས་ཁྲིགས་སུ་བཅད་པར་མི་བྱ་སྟེ། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག །ཆོས་ཀྱི་སྒོ་གཅིག་དང༌། སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་འཛིན་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔས་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །ཞེས་གསུངས། ད་ལྟ་འོ་སྐོལ་གྱི་དགེ་བ་ཇི་ཙམ་ཞིག་འབད་ཀྱང་དེ་ཉིད་སྡིག་པ་མི་དགེ་བའི་ལས་དང་མ་འདྲེས་པའང་རྣམ་པར་དཔྱད་ན་འོང་མི་ཐར་བའི་ཕྱིར་དང༌། གལ་ཏེ་རེ་རེ་ཙམ་སྲིད་ནའང་ཡིད་ཅན་ཕལ་ཆེར་བློ་མིག་མ་དག་པས་སྦྱོར་དངོས་རྗེས་གསུམ་གྱིས་ཟིན་པའི་དམ་པ་གསུམ་དང་འབྲེལ་བའི་དགེ་བའི་རྩ་བ་གསོག་པ་ཤིན་ཏུ་དཀོན་ལ། དེའི་ཕྱིར་བསོད་ནམས་ཆ་མཐུན་གྱི་དགེ་འབྲས་ལན་གཅིག་སྨིན་ནས་ཟད་པར་གྱུར་བ་དག་ནི་དབུས་ཀྱི་རི་བོ་མཆོག་རབ་ཙམ་ཡོད་པར་རློམ་ཡང་སྟོན་ཀའི་སྤྲིན་དང་འདྲ་སྟེ་ཤིན་ཏུ་ཡ་མ་བརླ་བས་ལག་པ་བརྐྱང་བསྐུམ་ཙམ་གྱི་བསམ་པའང་དགེ་བའི་ལས་འབའ་ཞིག་ཏུ་འགྲོ་བར་བྱ་དགོས་སོ། །སེམས་སྦྱོང་བཞི་པ་ནི། བུ་ཡིག་ལས། བླ་མའི་གདམས་ངག་ཅིག་ཅི་ནས་


JLAZ012_Page_0151
[མ་དཔེ་གཟིགས་ན་འདིར་གནོན།]

ཀྱང་ཐོབ་པར་བྱ་ཞིང༌། ཐབས་གང་གི་སྒོ་ནས་ཀྱང་ཐོབ་པར་བྱ་དགོས་སྙམ་པ་དང༌། ཞེས་པས། དེ་ལྟར་སྔར་བཤད་མ་ཐག་པའི་རིགས་དྲུག་གང་དུ་འཁོར་ཀྱང་སྡུག་བསྔལ་འབའ་ཞིག་ལས་བདེ་བ་ཁབ་ཀྱི་རྩེ་ཙམ་མ་མཆིས་པར་ཤེས་པ་དང༌། གོ་བ་ཙམ་ཡོད་ཀྱང་དེ་ལ་ཡི་མུག་བྱས་པ་གཅིག་པུས་སྡུག་བསྔལ་དེ་ལས་ཐར་བ་མ་ཡིན་ཏེ། དེ་ལ་ཕན་པའི་ཐབས་ཁོ་ནར་ལྷུར་ལེན་དགོས། དེ་གང་ཡིན་ན། གསལ་རྒྱལ་ལ་གདམས་པའི་མདོ་ལས། རྒྱལ་པོ་ཆེན་པོ་དེའི་ཚེ། དེའི་དུས་ན་དམ་པའི་ཆོས་མ་གཏོགས་མགོན་དང་སྐྱབས་མེད་དོ། །དམ་པའི་ཆོས་ནི་དེའི་ཚེ་མགོན་དང་སྐྱབས་དང་རྟེན་དང་གླིང་དང་དཔུང་གཉེན་ཡིན་ནོ། །ཞེས་གསུངས་ཤིང་དེ་ཡང་ཡིག་ནག་ཀློག་པ་ཙམ་ནི་མ་ཡིན་ཏེ་དཔེར་ན་འོ་མ་ལས་མར་དང༌། མེ་ལས་དུ་བ་འབྱུང་བ་ལྟར་ལམ་གྱི་རྩ་བ་དགེ་བའི་བཤེས་གཉེན་ཁོ་ན་བསྟེན་ནས་སྙིང་པོ་ལེན་པར་བྱ་སྟེ། སྡུད་པ་ལས། བླ་མ་མཁས་པ་རྣམས་ནི་རྟག་ཏུ་བསྟེན་བྱ་སྟེ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །ཞེས་གསུངས་པ་དེ་ལ་བསྟེན་བྱ་བླ་མའི་མཚན་ཉིན་ནི། རིན་པོ་ཆེ་


JLAZ012_Page_0152
[མ་དཔེ་གཟིགས་ན་འདིར་གནོན།]

ཕུང་པོའི་མདོར། བྱམས་པས་གསོལ་བ། དགེ་བའི་བཤེས་གཉེན་ཇི་ལྟ་བུར་བསྟེན་པར་བགྱི། བཀའ་སྩལ་པ། དགེ་བའི་བཤེས་གཉེན་ནི་ཆོས་ཅི་དང་ཅི་སྟོན་པ་ཐམས་ཅད། ཆོས་ཀྱི་དབྱིངས་དོན་དམ་པའི་བདེན་པ་འབའ་ཞིག་སེམས་ཏེ་སྟོན་པར་བྱེད་གསལ་བར་བྱེད་པ་དེ་ནི་དགེ་བའི་བཤེས་གཉེན་ལམ་དྲང་པོ་ནས་འཁྲིད་པར་བྱ་བ་ཡིན་ནོ། །ཞེས་གསུངས་པ་དེ་གཞིར་བཞག་ནས་མདོ་སྡེ་རྒྱན་ལས་གསུངས་པ་ལྟར་ལྷག་པའི་བསླབ་པ་གསུམ་གྱིས་རྒྱུད་ལེགས་པར་དུལ་བ་ཕྱོགས་རེ་ཙམ་མ་ཡིན་པར་མང་དུ་ཐོས་པ་ལུང་གི་ཡོན་ཏན། དེ་ཁོ་ན་ཉིད་རྟོགས་པའི་ཤེས་རབ་ཀྱི་བསླབ་པ་སློབ་མ་རྣམས་ལས་ཆེས་ལྷག་པའི་ཁྱད་པར་གྱི་ཡོན་ཏན། ལུང་དོན་རིག་པས་འབྱེད་པ་ལ་རྣམ་དཔྱོད་ཀྱི་མཐུ་ཕུན་སུམ་ཚོགས་པས་གདུལ་བྱའི་རྣ་བར་འཇེབས་ཤིང་དོན་དམ་པའི་ལམ་ལ་བཀྲི་བར་མཁས་པས། རྙེད་པ་དང་བཀུར་སྟི་སོགས་ལ་མི་གཟིགས་པར་འགྲོ་བ་ཉམ་ཆུང་བ་ལ་བརྩེ་བའི་སྙིང་རྗེ་ཅན། གཞན་དོན་བསྒྲུབ་པ་ལ་སྐྱོ་དུབ་མེད་པའི་བརྩོན་འགྲུས། ཡང་ཡང་འཆད་པ་ལ་སྐྱོ་ངལ་མེད་ཅིང་ལོག་སྒྲུབ་བཟོད་པའི་སྙིང་སྟོབས་ཅན་གྱི་བླ་མ་དམ་པ་ཞིག་བསྟེན་དགོས། དེ་ལ་ནང་གསེས་སུ་དབྱེ་ན་སྤྱི་མདོ་དགོངས་པ་འདུས་པ་


JLAZ012_Page_0153
[མ་དཔེ་གཟིགས་ན་འདིར་གནོན།]

ལས། ཕྱི་སྒྲོ་འདོགས་གཅོད་པ་ལ་མཁས་པའི་བླ་མ། ནང་གསང་སྔགས་ཀྱི་གདམས་ངག་སྟོན་པ་དྲིན་ཅན་གྱི་བླ་མ། གསང་བ་སེམས་ཉིད་སྐྱེ་བ་མེད་པ་སྟོན་པ་རྩ་བའི་བླ་མ། རང་བཞིན་གཞིའི་བླ་མ། དག་པ་རང་སེམས་ཀྱི་བླ་མ། སྣང་བ་བརྡའི་བླ་མ་གང་ཟག་བརྒྱུད་པའི་བླ་མ་རྣམས་ལ་འདུས་པའོ། །ཞར་ལ་སློབ་མའི་མཚན་ཉིད་ཀྱང༌། རྒྱུད་ཀློང་གསལ་ལས། སྣོད་དང་མི་ལྡན་སློབ་མ་ནི། །ཤེས་ཆུང་ཁ་གསགས་གདོང་ལྟས་ཆེ། །ཁ་མཁས་ལག་དམ་གཡོ་སྒྱུ་ཆེ། །བླ་མའི་གསུང་བཅག་དྲིན་ལ་རྩོད། །ཡོན་ཏན་མི་མཐོང་སྐྱོན་ལ་རྟོག །རིགས་བརྒྱུད་དང་རྒྱུད་ངན་པ་དང༌། །བཀའ་དྲིན་ཁྱད་གསོད་རང་ལ་བསྟོད། །དོན་དམ་དམ་ཚིག་ཉམས་ལེན་འཆལ། །སློབ་མ་མ་བརྟག་སློབ་དཔོན་དགྲ། །ཞེས་གསུངས་པ་ལ་བརྟགས་པ་སྔོན་དུ་འགྲོ་བས་བསྟེན་བྱ་མཚན་ཉིད་དང་ལྡན་པ་ནི། འོད་གསལ་གྱི་རྒྱུད་རིག་པ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །ཞེས་གསུངས་པ་ཁོ་ན་ལས། གཞན་དུ་མ་ཡིན་ལ། དེ་ལྟ་བུའི་དཔོན་སློབ་ཟུང་དུ་འབྲེལ་ན་གཤོག་པ་གཉིས་ལྡན་གྱི་


JLAZ012_Page_0154
[མ་དཔེ་གཟིགས་ན་འདིར་གནོན།]

འདབ་ཆགས་མཁའ་ལ་འཕུར་བ་ལ་ཚེགས་མེད་པ་བཞིན་བྱང་ཆུབ་བསྒྲུབ་པ་ལ་དེ་ཙམ་གྱི་དཀའ་ལས་མེད་པས་སློབ་མས་ཀྱང་བླ་མ་མཚན་ཉིད་དང་ལྡན་པ་བསྟེན་ཞིང༌། རང་ཉིད་ལའང་ལུང་དང་འགལ་བའི་ཉེས་པའི་སྐྱོན་གང་ཆེ། ངོས་ཙེར་གྱིས་བཟུང་ནས་གཉེན་པོས་རྒྱུད་བསྡམས་རྗེས་བཤེས་གཉེན་བསྟེན་པ་དངོས་ལ་བསམ་པས་བསྟེན་པའི་ཚུལ་དང༌། སྦྱོར་བས་བསྟེན་པའི་ཚུལ་གཉིས་ཀྱི་སྔ་མ་ནི་དཀོན་མཆོག་ཏ་ལའི་གཟུངས་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །དད་པ་རྙོག་པ་མེད་ཅིང་སེམས་དྭངས་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་གསུངས་པ་ལྟར་དགེ་བའི་བཤེས་གཉེན་དེ་ལ་མཉམ་འགྲོགས་མ་ཡིན་པར་ཞེ་ཐག་པ་ནས་མི་ཕྱེད་པའི་དད་པ་ལྡན་པ་འཕགས་པ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་ཀྱི་ཡོན་ཏན་མཐོང་བ་ལྟ་བུ་ཞིག་ངེས་པར་དགོས། འོ་སྐོལ་ལས་མ་དག་པའི་དབང་གིས་བླ་མ་མཚན་ལྡན་ལའང་དེ་དག་གིས་དྲང་ངེས་ལྡེམ་


JLAZ012_Page_0155
[མ་དཔེ་གཟིགས་ན་འདིར་གནོན།]

དགོངས་རྣམ་པ་བཞིའི་མཛད་པ་སྣ་ཚོགས་བསྟན་པའི་གནད་མ་གོ་བར་སྐྱོན་ཡོན་འདྲེས་མར་སྣང་བ་སྲིད་པས་དེའི་ཚེ་སྐྱོན་རྟོག་ཤར་བའི་བློ་དེ་དགག་དགོས། དེ་དགག་ནུས་ན་ཅི་མཛད་ལེགས་མཐོང་ངམ་ངམ་ཤུགས་ཀྱིས་འོང་བ་ལས་འོས་མེད། དེའི་ཕྱིར་འདི་ལྟར་བླ་མ་དེའི་མཛད་པ་སྐྱོན་ལྟར་སྣང་བ་ཐམས་ཅད་ལ་ཆེད་དུ་གཉེར་ནས་གཉེན་པོའི་གསལ་འདེབས་བྱ་བ་ནི། བླ་མ་དེའི་མཛད་པ་ལེགས་ཉེས། གསུང་བགྲོས་གནང་ལུགས། ཐ་ན་ན་བཟའ་བཞེས་ལུགས་ལྟ་བུ་ཞིག་གི་མཚམས་སུ་ཡང་འདི་ལྟར་མ་ལེགས་སྙམ་པའི་བསམ་པ་ཞིག་ཧུར་གྱིས་ཤར་བྱུང་ན། དེ་མ་ཐག་རྣམ་རྟོག་དེ་ལ་བདག་འཛིན་རྗེས་གཅོད་མི་བྱ་བར་བདག་ལྟ་བུའི་ལས་ངན་གྱི་སེམས་ཅན། འདི་ལྟ་བུའི་བླ་མ་ཁྱད་པར་ཅན་ལ་དེ་འདྲའི་ཉེས་སྐྱོན་ཡོང་བ་མི་སྲིད། རང་ཉིད་ཐོག་མ་མེད་པ་ནས་གོམས་པའི་ལས་ཉོན་གྱི་མཐུས་སྐྱོན་དུ་ཤར་བར་འདུག །ཐང་ཕྲོམ་ཟོས་པའི་རྒན་མོའི་མིག་སྔར་ནམ་མཁའ་ནས་སྐྲ་ཤད་འཛག་པ་དང༌། མཁྲིས་ནད་ཀྱིས་གདུངས་བའི་མིག་ཤེས་ལ་དུང་གི་ཁ་དོག་ཀྱང་སེར་པོར་སྣང་བ་དང་ཁྱད་པར་ག་ལ་ཡོད། རང་རེ་འདོད་པའི་མདའ་ལྔས་སྙིང་ཕུགས་པའི་འགྲོ་བ་དག་གི་སྤྱོད་ཚུལ་དང་བསྟུན་ཀྱིན་དགོངས་པ་ཅན་གྱི་ཚུལ་དུ་མ་དག་པའི་མཛད་པ་དེ་དག་ཆེད་དུ་མ་བསྟན་པའི་ངེས་པ་ཅི་ཆ།


JLAZ012_Page_0156
[མ་དཔེ་གཟིགས་ན་འདིར་གནོན།]

སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་འདྲེན་པ་ཤཱཀྱ་ཐུབ་པ་ལའང་དགེ་སློང་ལེགས་སྐར་དང་ལྷས་བྱིན་མུ་སྟེགས་ཀྱི་སྟོན་པ་དྲུག་ལ་སོགས་པ་དག་གིས་སྐྱོན་གྱི་གོང་བུར་མཐོང་བ་དང༌། སྔོན་གྱི་པཎ་གྲུབ་མཁན་སློབ་རྒྱལ་བློན་བྱང་ཆུབ་སེམས་དཔའི་དེ་དག་ལའང༌། བོན་དང་སྡིག་བློན་མ་རུངས་པ་དེ་དག་གིས་ཉེས་པའི་གོང་བུར་མཐོང་བ་དང༌། འཕགས་པ་ཐོགས་མེད་ཀྱིས་མི་ཕམ་མགོན་པོ་ཁྱི་མོ་ཁོག་སྨད་འབུས་གཡེང་བར་གཟིགས་པ་དང་ཁྱད་པར་མེད། ཡབ་སྲས་མཇལ་བའི་མདོ་ལས་བདེ་བར་གཤེགས་པས་བདུད་དུ་སྤྲུལ་ནས་སེམས་ཅན་གྱི་དོན་མཛད་པར་ཡང་གསུངས་པའི་ཕྱིར་ན་སངས་རྒྱས་ལ་བདུད་དུ་མཐོང་བའང་རང་གི་སྣང་བ་མ་དག་པ་ཁོ་ན་ལས་ཡུལ་དེ་དག་ལ་སྐྱོན་ཡེ་ནས་མེད་པར་ངེས་ཤེས་བསྐྱེད་ཡང་ཡང་བསམས་ནས་སྐྱོན་དུ་ལྟ་མཁན་གྱི་ཀུན་རྟོག་དེ་ཟིལ་གྱིས་གནོན་དགོས་ཏེ། རྒྱུད་དོན་མདོར་བསྡུས་ལས། བླ་མའི་མཛད་པ་ཐམས་ཅད་ལ། །སངས་རྒྱས་མཛད་པ་ཉིད་དུ་བསམ། །གལ་ཏེ་གཟིམས་སམ་བཞེངས་པ་ནི། །འོད་གསལ་སྒྱུ་མར་སྣང་བར་བལྟ། །ཕྱག་དང་བསྐོར་བ་གང་མཛད་ཀྱང༌། །སངས་རྒྱས་རོལ་པ་ཉིད་དུ་སྟོན། །གར་དང་རྣམ་འགྱུར་བཞད་པ་ན། །སངས་རྒྱས་དགོངས་པའི་མཛད་པ་ཅན། །ཁྲོ་དང་ཆགས་པ་ཅིར་སྟོན་ཡང༌། །


JLAZ012_Page_0157
[མ་དཔེ་གཟིགས་ན་འདིར་གནོན།]

སངས་རྒྱས་བྱང་ཆུབ་ཉིད་དུ་བསམས། །མི་བརྒྱ་དུས་གཅིག་བསད་ན་ཡང༌། །སངས་རྒྱས་འགྲོ་ལ་ཕན་མཛད་ཉིད། །བཙུན་མོ་བརྒྱ་དང་རོལ་ན་ཡང༌། །བདེ་ཆེན་ཡེ་ཤེས་ཕྱག་རྒྱ་ཆེ། །འདོད་པ་འདུན་པ་ཅིར་སྣང་ཡང༌། །སངས་རྒྱས་འདོད་པ་བྲལ་བ་ཡིན། །ཐམས་ཅད་སངས་རྒྱས་མཛད་པ་སྟེ། །ཅི་མཛད་མཐོང་བ་ལེགས་པའི་ལམ། །ཅི་གསུང་ཐོས་པ་དམ་པའི་ཆོས། །ཅི་དགོངས་ཐམས་ཅད་མཁྱེན་པའི་དཔལ། །བླ་མ་འཁྲུལ་པ་སྲིད་མཐར་ཡང༌། །འབྱུང་བ་མེད་ཀྱི་གལ་ཏེ་ན། །མཐོང་སྣང་འཁྲུལ་པ་ལྟར་སྣང་སྟེ། །རང་སྣང་བསམ་པ་མ་དག་པས། །མིག་སྐྱོན་ཅན་གྱིས་གངས་ཉིད་ལ། །རྒྱུན་དུ་ནག་པོར་མི་སྲིད་ཀྱང༌། །ནག་པོར་དངོས་སུ་མཐོང་དང་མཚུངས། །མཁྲིས་ནད་ཅན་གྱིས་དུང་ཉིད་ལ། །རྒྱུན་དུ་དཀར་པོ་ཉིད་ཡིན་ཀྱང༌། །སེར་པོར་མཐོང་བ་ཉིད་དང་མཚུངས། །ལོག་སྲེད་ཅན་གྱིས་ཆུ་ཉིད་ལ། །ཁྲག་རྣག་མཚོན་ཆ་མེད་ན་ཡང༌། །རྣག་ཁྲག་མཚོན་ཆར་མཐོང་དང་མཚུངས། །དེ་ཕྱིར་བླ་མའི་རྣམ་ཐར་ལ། །ལོག་ལྟ་སྐྱེས་ན་ཐར་ལམ་འགག །འགྲོ་འདུལ་ཐབས་མཁས་སྤྱོད་པས་ཏེ། །བརྡ་དང་ཐབས་སུ་ཤེས་པར་བྱ། །ཞེས་གསུངས་སོ། །དེའི་ཕྱིར་ངེས་པའི་དོན་དུ་དམ་པ་དེ་ལ་སྐྱོན་ཡེ་ནས་མི་མངའ་བར་ངེས་ཤེས་


JLAZ012_Page_0158
[མ་དཔེ་གཟིགས་ན་འདིར་གནོན།]

གཏིང་ཚུགས་པ་ཞིག་སྐྱེས་ཕྱིན་ཆད་ལེགས་པའི་ཡོན་ཏན་ཐམས་ཅད་ངམ་ངམ་ཤུགས་ལ་འབྱུང་བ་ནི། སློབ་དཔོན་ནཱ་ག་རྫུ་ནས། རི་དབང་རྩེ་ལས་འགའ་ཞིག་ལྷུང་གྱུར་ན། །ལྷུང་བར་མི་འགྱུར་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ནས། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་གསུངས་སོ། །གུས་པ་ཆེན་པོ་བསྐྱེད་པར་བྱེད་པ་ལ་བཀའ་བཀྱོན་ཡང་ཆོས་བཤད་པ་དང༌། བརྡུང་བཙོག་མཛད་ཀྱང་བྱིན་གྱིས་བརླབས་པར་མཐོང་བ་ཞིག་དགོས་ཏེ། ལུང་གིས་དབྱེ་བར། མདོར་ན་བརྡུང་བཙོག་བཀའ་བཀྱོན་དང༌། །དྲག་སྔགས་གཡུལ་སྤྲོད་མཚོན་ཕུགས་བརྡེག །ཅི་ལྟར་མཛད་ཀྱང་རང་སྐྱོན་གྱི། །དྲི་མ་སེལ་བའི་ཐབས་ཡིན་གྱི། །དེ་ལ་མ་གུས་སྤང་བྱ་སྟེ། །སྐུ་གསུང་ཐུགས་ཀྱི་མཛད་པ་ནི། །ཅི་ལྟར་མཛད་ཀྱང་སངས་རྒྱས་ཀྱི། །གར་གྱི་ཆོ་འཕྲུལ་རོལ་པ་ལས། །གཞན་དུ་ཅི་ཡང་བསམ་མི་བྱ། །བྱས་ན་དངོས་གྲུབ་རྒྱབ་ཀྱིས་ཕྱོགས། །མོས་གུས་ལོག་པས་བདུད་ཀྱིས་འཛིན། །ནད་མང་ཚེ་ཐུང་ངན་འགྲོར་ལྷུང༌། །ཞེས་སོ། །དེའི་ཕྱིར་འདི་ལྟར་བདག་གི་བླ་མ་འདི་སྐྱོན་ཀུན་ཟད་ཡོན་ཏན་ཀུན་རྫོགས། སྤངས་རྟོགས་མཐར་ཕྱིན་པའི་སངས་རྒྱས་རྣམས་དང་ཁྱད་པར་མེད་ཀྱང༌། རང་རེ་བསོད་ནམས་


JLAZ012_Page_0159
[མ་དཔེ་གཟིགས་ན་འདིར་གནོན།]

དང་སྐལ་བ་དམན་པས་བླ་མ་འདིའི་སྐུ་གསུམ་གྱི་སྣང་ཆ་ཇི་བཞིན་པ་རང་ངོར་སྣང་དབང་མ་མཆིས་པས་ཐ་མལ་གྱི་ཚུལ་བསྟན་པ་སྟེ། རིག་འཛིན་འདུས་རྒྱུད་ལས། སངས་རྒྱས་རྣམས་དང་དེ་ཡི་སྲས། །གང་གིས་གདུལ་བྱ་དེ་ཉིད་ལ། །དེ་དང་མཐུན་པའི་གཟུགས་སྟོན་ཏེ། །ཞེས་སོ། །དེའང་འདི་ལྟར་སངས་རྒྱས་ཆོས་ཀྱི་སྐུ་ནང་གསལ་གཞོན་ནུ་བུམ་པའི་སྐུ་ཀུན་གཞིའི་སྟེང་ནས་ཁྱད་ཆོས་དྲུག་གིས་འཕགས་པའི་གདོད་མའི་མགོན་པོ་དེ་ནི། སྤངས་རྟོགས་ཕུལ་དུ་ཕྱིན་པའི་ཡེ་ཤེས་ཀྱི་མཐོང་བ་ལས་གཞན་གྱིས་སྤྱོད་ཡུལ་དུ་མ་གྱུར། ལོངས་སྤྱོད་རྫོགས་པའི་སྐུ་ངེས་པ་ལྔ་དང་ཁ་སྦྱོར་ཡན་ལག་བདུན་ལྡན་དེ་ནི་ཐུན་མོང་མ་ཡིན་པའི་གདུལ་བྱ་ས་བཅུའི་དབང་ཕྱུག་ཁོ་ན་ལས་གཞན་ལ་མི་སྣང༌། སངས་རྒྱས་སྤྲུལ་པའི་སྐུ་སྟོབས་བཅུ་མི་འཇིགས་རྣམ་བཞི་ལ་སོགས་པའི་རྩལ་མངའ་བ་དེ་ནི་ཉན་རང་གི་སྟོན་པར་གྱུར་ཀྱང་དེ་དག་ལས་བཀའ་དྲིན་ནོད་པའི་བསོད་ནམས་ཀྱིས་ཕོངས། དེའང་སྐུ་གསུམ་སྟོན་པ་དེ་དག་ལ་ཉེ་རིང་མངའ་ནས་རང་རེ་རྣམས་ཆེད་དུ་དོར་བ་མ་ཡིན་ཀྱང༌། བྲག་ཕུག་ཁ་བྱང་བསྟན་ལ་ཉི་མའི་སྣང་བ་མི་འཆར་བ་བཞིན་རང་ཉིད་ལས་དང་སྐལ་བ་དམན་པས་སངས་རྒྱས་དེ་དག་མཇལ་བ་དང་གསུང་ཐོས་པའི་སྣོད་དུ་མ་གྱུར་པས་ད་ལྟ་ཕན་མཐའ་མེད་ཀྱི་འཁོར་བ་བཙོན་དོང་ལྟ་བུར་ལྷུང་


JLAZ012_Page_0160
[མ་དཔེ་གཟིགས་ན་འདིར་གནོན།]

བ་འདི་ཙམ་དུ་ཟད། དེ་ལྟར་ནའང་ད་རེས་མི་ལུས་ཐོབ་པའི་དུས་འདིར་བཤེས་གཉེན་དམ་པ་འདི་ལྟ་བུ་དང་མཇལ་བ་བསོད་ནམས་ཤིན་ཏུ་ཆེ། རང་རེ་ལྔ་བརྒྱ་ཐ་མའི་སེམས་ཅན་རྣམས་ཀྱི་དོན་དུ་སངས་རྒྱས་དེ་དག་སོ་སོའི་སྐྱེ་བོའི་སློབ་དཔོན་གྱི་ཚུལ་དུ་སྤྲུལ་ནས་གདུལ་བྱ་འདུལ་བར་མདོ་རྒྱུད་མང་པོ་ནས་གསུངས་པས་བདག་གི་བླ་མ་དམ་པ་འདི་ཡང་ངེས་པའི་དོན་དུ་ཐ་མལ་མ་ཡིན་ལ། རང་ངོས་ནས་དངོས་ཀྱི་གདམས་པ་བསྟན་པས་སངས་རྒྱས་ལས་ཀྱང་ལྷག །མཚན་དཔེས་སྤྲས་པའི་སངས་རྒྱས་དངོས་སུ་མཇལ་ཡང་ཟབ་པ་དང་རྒྱ་ཆེ་བའི་དམ་ཆོས་བསྟན་ནས་ཐར་པ་དང་ཐམས་ཅད་མཁྱེན་པའི་གོ་འཕང་ལ་བཀྲི་བ་ཉིད་ལས་ལྷག་པ་ནི་མཛད་རྒྱུ་མེད། དེའི་ཕྱིར་དགེ་བའི་བཤེས་གཉེན་ལེགས་པར་བསྟེན་པའི་དོན་རང་གིས་ཉམས་སུ་ལེན་ནུས་ན་མངོན་མཐོ་དང་ངེས་ལེགས་ཀྱི་གོ་འཕང་ཐོབ་པར་ཐེ་མི་ཚོམ། ཚེ་འདིའི་ཟས་གོས་གྱི་ན་དང་དགྲ་གདོན་སོགས་ལས་སྐྱོབ་པ་དག་ལའང་བཀའ་དྲིན་ཆེ་བར་རྩི་ན། འཁོར་བ་མཐའ་མེད་ཀྱི་སྡུག་བསྔལ་སེལ་ཞིང་གཏན་གྱི་བདེ་བ་ལ་བཀོད་པར་མཛད་པའི་བཀའ་དྲིན་ནི་དབང་ཆེན་གསེར་གྱི་ས་གཞི་འཛམ་བུ་ཆུ་བོའི་གསེར་གྱིས་བཀང་ཡང་གཞལ་བར་ག་ལ་ནུས། དེའི་ཕྱིར་གདུལ་བྱ་རང་ངོས་


JLAZ012_Page_0161
[མ་དཔེ་གཟིགས་ན་འདིར་གནོན།]

ནས་སངས་རྒྱས་ཐམས་ཅད་ལས་བླ་མ་དམ་པ་བཀའ་དྲིན་ཆེ་ཞིང་ལྷག་གོ་སྙམ་པའི་དད་གུས་དང་མོས་པ་སྙིང་ཁུང་རུས་པའི་གཏིང་ནས་བསྐྱེད་དགོས་ཏེ། མ་རྒྱུད་ཀློང་གསལ་ལས། ནད་གདོན་ཞི་བྱེད་སྨན་པའི་མཆོག །དགོས་འདོད་འབྱུང་བའི་རིན་པོ་ཆེ། །ཐམས་ཅད་དབང་དུ་སྡུད་བྱེད་རྩི། །འགྲོ་བ་མ་ལུས་སྒྲོལ་བའི་གྲུ། །ཕྲིན་ལས་ཀུན་གྱི་མངའ་བདག་མཆོག །ཐོག་མར་བླ་མ་གལ་ཆེའོ། །གང་ཟག་འཁོར་བར་ཞེན་པ་རྣམས། །ཞེན་པ་ལྡོག་ཐབས་བླ་མ་གཙོ། །གང་ཟག་དམ་ཆོས་མ་དྲན་ཞིང༌། །དགེ་སྡིག་ངོ་མི་ཤེས་པ་རྣམས། །ཆོས་སྟོན་དགེ་སྡིག་ངོས་སྟོན་ཕྱིར། །བླ་མ་དམ་པ་ཤིན་ཏུ་གཅེས། །སྒོམ་སྐྱེས་གེགས་ཀྱིས་ཐུམས་པ་ལ། །གེགས་སེལ་འབྲས་བུ་འབྱུང་བ་ཡང༌། །བླ་མ་དག་གི་དྲིན་ལས་འབྱུང༌། །ཞེས་དང༌། རྒྱུ་དང་འབྲས་བུའི་ཆོས་རྣམས་ཀུན། །བླ་མའི་ཞལ་ལས་འབྱོན་པ་ཡིན། །དུས་གསུམ་སངས་རྒྱས་ཐམས་ཅད་ཀྱང༌། །བླ་མ་དམ་པ་བསྟེན་ལས་བྱུང༌། །ཞེས་གསུངས་ལ། དེའི་ཕྱིར་ཐོག་མ་ཉིད་ནས་བདུད་དང་བསླུ་བ་མཁན་མ་ཡིན་པའི་བླ་མ་དམ་པ་མཚན་ཉིད་དང་ལྡན་པ་ཞིག་དང་མཇལ་བའི་རྗེས་ཐོག་ཏུ་ཅི་མཛད་ལེགས་མཐོང་གི་མོས་གུས་སྐྱེ་བ་ནི་ཞེ་ནས་སྐྱེས་པའི་དད་པ་སྟེ་བྱིན་རླབས་ཞུགས་པའི་རྟགས་སུ་ངེས་ལ། བཅོས་མའི་མོས་གུས་ཀྱིས་ནི་


JLAZ012_Page_0162
[མ་དཔེ་གཟིགས་ན་འདིར་གནོན།]

དད་པ་ཚུགས་མི་ཐུབ་ཅིང་སྤྱོད་ལམ་མ་དག་པ་བག་ཙམ་མཐོང་བས་ལྡོག་པའི་ཕྱིར་ཡིད་བརྟན་རུང་བའི་དད་པ་མ་ཡིན་ནོ། །གཉིས་པ་སྦྱོར་བས་བསྟེན་ཚུལ་ནི། ལུས་ངག་ཡིད་གསུམ་གྱི་སྒོ་ནས་བཅུ་ཚན་གསུམ་གྱི་དམ་ཚིག་བསྲུང་མཚམས་དེའི་རྗེས་འབྲེལ་དང་བཅས་པ་ནི། རང་བྱུང་རང་ཤར་གྱི་རྒྱུད་ལས། དང་པོ་སྐུ་ཡི་དམ་ཚིག་ནི། །དང་པོ་ལུས་ཀྱི་བསྲུང་བྱ་བཅུ། །བླ་མའི་གདོང་ནས་འགྲོ་མི་བྱ། །ཅི་ཕྱིར་ཁྲེལ་ནས་རྒྱབ་ཕྱོགས་འདྲ། །ཆོས་མེད་དུད་འགྲོའི་གནས་སུ་སྐྱེ། །བླ་མའི་གཞུག་ནས་འགྲོ་མི་བྱ། །ཅི་ཕྱིར་ཞབས་རྗེས་གནོན་པའོ། །སྐྱབས་མེད་མགོན་དང་བྲལ་བར་སྐྱེ། །བླ་མའི་གཡས་ནས་འགྲོ་མི་བྱ། །ཅི་ཕྱིར་བརྡེག་པའི་སྟབས་སུའོ། །ཚེ་ཐུང་ནད་མང་དམྱལ་བར་ལྟུང༌། །དབུ་ཡི་གྲིབ་མ་མནན་མི་བྱ། །ཅི་ཕྱིར་ཁྱད་དུ་བསད་པ་ཡིན། །ངུ་འབོད་ཆེན་པོའི་དམྱལ་བར་ལྟུང༌། །དབུ་སྐྲ་རྡོག་པས་བརྫི་མི་བྱ། །ཅི་ཕྱིར་སངས་རྒྱས་གཤུང་པ་འདྲ། །ཐིག་ནག་འདྲི་བའི་དམྱལ་བར་སྐྱེ། །དབུ་སྔས་བཞུགས་གདན་བརྫི་མི་བྱ། །ཅི་ཕྱིར་སངས་རྒྱས་བླ་མེད་སྨད། །བཤལ་མ་རི་ལ་འཛེགས་པ་སྐྱེ། །སྐུ་ལ་མཐོ་ཡིས་གཞལ་མི་བྱ། །ཅི་ཕྱིར་ལག་གིས་བརྒྱབ་དང་མཚུངས། །མདུང་ཐུང་སུམ་བརྒྱས་འཇོམས་པར་འགྱུར། །


JLAZ012_Page_0163
[མ་དཔེ་གཟིགས་ན་འདིར་གནོན།]

བླ་མའི་བཞེངས་ཕྱག་ཚུར་མི་བླང༌། །མཐོ་རིས་ཐར་པའི་ལམ་སྣ་འགག །འདུ་ཤེས་མེད་པའི་དམྱལ་བར་སྐྱེ། །ཟབ་མོའི་མན་ངག་ཚིག་གསུམ་ཡང༌། །མཉན་ནས་དེ་ཡི་གོང་དུ་མིན། །ཤེས་རབ་འཆལ་བའི་འདམ་དུ་འཛུད། །བླ་མའི་ཞལ་དུ་མ་གསོལ་བར། །ལོངས་སྤྱོད་ཟས་ལ་ཕུད་བཅད་ན། །ཤ་ཁྲག་འབར་བའི་ལུས་སུ་སྐྱེ། །གཞན་ཡང་བཞེངས་ཚེ་བསྡད་པ་ནི། །མགོ་ལུས་བྲལ་བའི་དམྱལ་བར་སྐྱེ། །བཞུགས་ཚེ་སྟེགས་ལ་བསྡད་པ་ན། །དམྱལ་བ་མགོ་འཕྱང་ལུས་སུ་སྐྱེ། །དེ་རྣམས་སྐུ་ཡི་དམ་ཚིག་བཅུ། །ཉམས་ན་བསྐལ་པ་ཆེན་པོ་གཅིག །ཚ་གྲང་ལས་ཀྱི་དམྱལ་བར་སྐྱེ། །ཉམས་པ་སྐོང་ན་མཆོད་རྟེན་བཞེངས། །བུམ་པར་བླ་མའི་སྐུ་གཟུགས་བཞེངས། །མཆོད་ཅིང་བསྐོར་བ་རྒྱུན་མི་གཅད། །ཅེས་དང༌། ངག་གི་སྒོ་ནས་དམ་བཅུ་བསྲུང༌། །བླ་མ་སངས་རྒྱས་ཀུན་ལས་ལྷག །དེ་ལ་རྟོགས་བཅས་བྱ་མི་རུང༌། །རྒྱབ་ནས་འཕྱ་གཏམ་ཟེར་བ་དེ། །སངས་རྒྱས་རྒྱབ་ཀྱིས་ཕྱོགས་པ་ཡིན། །འབྲས་བུ་མེད་པར་ངན་སོང་ལྟུང༌། །ལུས་རུལ་མགུལ་འགག་ནད་ཀྱིས་འདེབས། །བླ་མ་བླུན་ཞེས་བརྗོད་མི་རུང༌། །བརྗོད་ན་བསྐལ་པ་ཕྲ་མོ་གཅིག །བྱང་ཆུབ་ལམ་དང་ཕྲད་མི་སྲིད། །བླ་མ་ཟོག་ཆེ་བྱ་མི་རུང༌། །རལ་གྲི་སོ་མས་ལྕེ་གཏུབས་ནས། །


JLAZ012_Page_0164
[མ་དཔེ་གཟིགས་ན་འདིར་གནོན།]

ལྐུགས་པའི་གནས་སུ་སྐྱེ་བར་འགྱུར། །བླ་མ་རྡོ་རྗེ་སློབ་དཔོན་ལ། །ཞེ་ལ་འབབ་པའི་ཚིག་མི་སྨྲ། །སྨྲས་ན་རི་འཐབ་བར་དུ་སྐྱེ། །ལེགས་པར་གསུངས་པའི་བཀའ་མི་བཅག །བཅག་ནས་མནར་མེད་གནས་སུ་སྐྱེ། །ངག་ཚིག་བརླང་པོས་ཞེ་འགེམས་ན། །འོ་དོད་འབོད་པའི་གནས་ངན་དུ། །བསྐལ་པ་སྟོང་ཕྲག་དྲུག་ཏུ་གནས། །སྨྲས་པའི་ཚིག་ལ་མི་གནས་པ། །སྡུག་བསྔལ་ལས་ལ་ཡུན་རིང་སྤྱོད། །སྒྲོ་སྐུར་མང་པོ་འདོགས་པ་དེ། །དགེ་སློང་འབུམ་ཕྲག་བསད་དང་མཉམ། །མནར་མེད་དམྱལ་བ་ཁོ་ནར་ལྟུང༌། །ཁྱོད་བས་ང་བཟང་ཟེར་བ་དེ། །དམྱལ་བར་བསྐལ་པ་ཡུན་རིང་གནས། །དམོད་པའི་གཡོ་སྒྱུ་སྣ་ཚོགས་སྨྲ། །རྟག་ཏུ་རྐེ་བཅད་དམྱལ་བར་ལྟུང༌། །དེ་ཡང་སྐུ་ཡི་དམ་ཚིག་ཡིན། །ཉམས་པ་སྐོང་ན་གཟུངས་སྔགས་འབུམ། །བྲིས་ལ་མཆོད་རྟེན་ནང་དུ་གཞུག །དྲིལ་བུ་ཟུང་འབྲེལ་མང་དུ་བཏག །ཅེས་དང༌། ཡིད་ཀྱི་སྒོ་ནས་དམ་བཅུ་བསྲུང༌། །བླ་མའི་དཀོར་ལ་བརྣབ་སེམས་བྱེད། །ཡི་དྭགས་གནས་སུ་བསྐལ་པ་གཉིས། །བཀྲེས་སྐོམ་མི་བཟོད་མྱོང་བར་འགྱུར། །བླ་མ་དག་ལ་འགྲན་སེམས་བྱེད། །འཁོར་བའི་གཅོང་རོང་ཐར་མེད་དུ། །ཆོས་སྤྱོད་བརྩོན་ཡང་སྐྱེ་བར་


JLAZ012_Page_0165
[མ་དཔེ་གཟིགས་ན་འདིར་གནོན།]

འགྱུར། །ཞེ་འགྲས་པ་ཡི་སེམས་བྱེད་ན། །རལ་གྲིས་གཅོད་པའི་དམྱལ་བར་སྐྱེ། །རྡོ་རྗེ་སློབ་དཔོན་འདོད་ཆགས་ཆེ། །སེམས་ན་ངན་སོང་ཀུན་ཏུ་འཁྱམས། །རྡོ་རྗེ་སློབ་དཔོན་ཞེ་སྡང་ཆེ། །སེམས་ན་དམྱལ་བ་དྲུག་ཅུར་འཚོད། །རྡོ་རྗེ་སློབ་དཔོན་འདུ་ཤེས་ཆུང༌། སེམས་ན་ངུ་འབོད་དམྱར་བར་སྐྱེ། །རྡོ་རྗེ་སློབ་དཔོན་གྲོད་པ་ཆེ། །སེམས་ན་མནར་མེད་དམྱལ་བར་སྐྱེ། །རྡོ་རྗེ་སློབ་དཔོན་ང་རྒྱལ་ཆེ། །སེམས་ན་ཁ་འཐབས་གནས་སུ་སྐྱེ། །རྡོ་རྗེ་སློབ་དཔོན་ཁ་ཞན་དུ། །སེམས་ན་བླ་མེད་ལམ་མི་རྙེད། །རྡོ་རྗེ་སློབ་དཔོན་སྐྱོན་བཞིར་ སྐྱོན་བཞི་ནི་བླ་མ་འདི་འཇིག་རྟེན་གྱི་བྱ་བ་ལ་མི་མཁས་སྙམ་པ་དང༌། རང་བས་ན་ཚོད་གཞོན་སྙམ་པ་དང༌། བཟའ་ཚོ་དང་ཉེ་འབྲེལ་ཡིན་སྙམ་པ་དང༌། རང་ལས་རིགས་དམན་པ་ཡིན་སྙམ་པའི་ལོག་པའི་འདུ་ཤེས་བཞིའོ། །སེམས། ། རྟག་ཏུ་བསམ་ངན་མཚང་འབྲུ་བ། །ལྷ་ཀླུ་གདུགས་པས་སྲོག་བཅད་ནས། །མྱུར་དུ་དམྱལ་བའི་གནས་སུ་ལྷུང༌། །འདི་ཡང་སྐུ་ཡི་དམ་ཚིག་ཡིན། །ཉམས་པ་གསོ་ན་མཚན་གྱི་མཐར། །གསོལ་འདེབས་བསྟོད་པ་བྲིས་པ་འབུམ། །བཤགས་པའི་ཚིག་བྲིས་འབུམ་ཐེར་གཞུག །ལོ་ཟླ་དུས་མཆོད་རྒྱུན་དུ་བཟུང༌། །ཞེས་སོ། །དེ་བཞིན་དུ་བླ་མའི་གནང་བ་མ་ཐོབ་ཀྱི་བར་ལ་ལུང་དང་རྟོགས་པའི་ཡོན་ཏན་གྱིས་


JLAZ012_Page_0166
[མ་དཔེ་གཟིགས་ན་འདིར་གནོན།]

གཞན་དོན་བྱེད་པའི་ནུས་པ་མངའ་བ་ཡིན་ནའང་སྨོན་པའི་ཡུལ་དུ་བྱ་བ་ལས་འཇུག་པས་དངོས་སུ་མི་བྱ་སྟེ། རྒྱུད་དེ་ཉིད་ལས། གཞན་ཡང་རྡོ་རྗེ་སློབ་དཔོན་གྱི། །བྱ་བའི་ལས་རྣམས་སློབ་མས་མིན། །བླ་མའི་སློབ་བུ་སློབ་མ་རུ། །བཅུག་ན་སྐྱབས་མེད་དམྱལ་བར་ལྟུང༌། །རྡོ་རྗེ་སློབ་དཔོན་ཆོས་ཀྱི་རྒྱལ། །རྒྱལ་པོའི་བྱ་བ་མངའ་ཐང་སྐྱོང༌། །དེ་བཞིན་ཆོས་ཀྱི་རྩ་བ་དྲུག །ཐེག་པ་འོག་མའི་རྩ་བ་གཉིས། །སེམས་བསྐྱེད་པ་དང་སྡོམ་པ་འབོགས། །ཐེག་པ་གོང་མའི་རྩ་བ་གཉིས། །དབང་བསྐུར་བ་དང་ངོ་སྤྲད་པ། །ཐེག་པ་ཐུན་མོང་རྩ་བ་གཉིས། །རབ་ཏུ་གནས་དང་གནས་སྤོར་བའོ། །རྡོ་རྗེ་སློབ་དཔོན་རྒྱལ་པོ་ཡི། །མངའ་ཐང་སྐྱོང་བའི་ཆོས་ཡིན་པས། །ཕྱོགས་བཞིར་དཔག་ཚད་བཅུ་གཉིས་ཏེ། །མ་འདས་བར་ལ་རྩ་བ་དྲུག །དེ་ཡི་སློབ་མས་བསྙེན་པ་ན། །བསྐལ་པ་དྲུག་ཅུ་རྩ་བརྒྱད་དུ། །རི་རབ་ཆེན་པོའི་འོག་ཏུ་སྐྱེ། །ཅི་ཕྱིར་ཞེ་ན་རྒྱལ་པོ་ཡི། །རྒྱལ་སྲིད་འབངས་ཀྱིས་ཕྲོགས་པ་ལྟར། །བླ་མའི་ཡོན་ཏན་སློབ་བུས་བསྣུབས། །དེ་ཡི་ཕྱི་མ་དམྱལ་བ་ལས། །འགྲོ་ས་མེད་པར་ང་ཡིས་བཤད། །དཔག་ཚད་བཅུ་གཉིས་ཕར་ཚད་དུ། །སློབ་དཔོན་དེ་ཡིས་མ་ཁྱབ་ན། །རྒྱལ་ཚབ་བསྐོས་ལ་གནང་བ་བྱིན། །དེ་ཡང་ལོ་ཡི་དུས་


JLAZ012_Page_0167
[མ་དཔེ་གཟིགས་ན་འདིར་གནོན།]

སུ་མཇལ། །མཉེས་པའི་ལོངས་སྤྱོད་དད་པས་འབུལ། །ཞེས་དང༌། རྒྱུད་དོན་མདོར་བསྡུས་ལས་ཀྱང༌། རང་ཉིད་ཡོན་ཏན་བསམ་ཡས་ཀྱང། །བླ་མས་རྗེས་སུ་མ་གནང་ན། །ཁ་རོག་འདུག་ལ་མཁས་པ་དང༌། །གྲུབ་པའི་སྤྱོད་པ་ཐམས་ཅད་སྤངས། །ལོངས་སྤྱོད་ལྡན་ཞིང་ཕུན་ཚོགས་ཀྱང༌། །ལྟོ་གོས་སྤོང་ཞིང་སྡུག་སྲན་གྱིས། །དམའ་ས་བཟུང་ལ་སྒེག་ཆོས་སྤོང༌། །གསུང་ཡང་དེ་ཉིད་དོན་བཞིན་བསྒྲུབ། །ཅེས་གསུངས་སོ། ། གལ་ཏེ་བླ་མས་བཀའ་གནང་ན། འཇིག་རྟེན་གྱི་སྣང་ངོར་མི་རིག་པ་ལྟར་སྣང་བའི་ངན་སྤྱོད་མི་རུང་བ་ཡང་བསྒྲུབ་དགོས་ཏེ། རང་བྱུང་གི་རྒྱུད་ལས། ཁྱོད་ཀྱིས་བརྐུས་ཕྲོགས་དམག་ཁྱེར་དང༌། །བརྡུང་བཙོག་གཞན་བརྙས་སྨྱོན་བཅོས་དང༌། །ཁྲེལ་མེད་ངོ་ཚ་མེད་པའི་ལས། །བྱ་རུ་མི་རུང་སྣ་ཚོགས་པ། །གྱིས་ཞེས་བཀའ་སྩལ་ལུང་བཞིན་བསྒྲུབ། །ལས་ཀ་ཚོང་ཁེ་བག་མ་ལེན། །ཕྲག་དོག་འཐབ་འཛིང་ཞིང་གཞིས་དང༌། །བེའུ་ལུག་སྤེལ་ཞེས་བཀའ་སྩལ་ཡང༌། །ཐེ་ཚོམ་མེད་པར་གསུང་བཞིན་བསྒྲུབ། །ཅེས་སོ། །གང་ཟག་ཐོས་པ་ཉུང་ཞིང་རྟོག་པ་ཅན་ཁ་གཅིག་དེ་ལྟར་སློབ་ན་བཤེས་གཉེན་ཚུལ་ལྡན་དུ་མི་འགྱུར་རམ་སྙམ་ན་མ་ཡིན་ཏེ། བླ་མའི་མཚན་ཉིད་ཀྱང་རྒྱུད་སྡེ་ནས་གསུངས་པ་ལྟར་བཙལ་བ་ལས་འདོད་ཁ་


JLAZ012_Page_0168
[མ་དཔེ་གཟིགས་ན་འདིར་གནོན།]

དང་ཉོན་མོངས་གང་ཆེ་སྙན་པ་ཙམ་གྱི་རྗེས་སུ་ཕྱོགས་ནས་འཚོལ་མ་ཉེས་པ་དགོས་ཏེ། བཀའ་བརྒྱད་ཡོངས་འདུས་ལས། ཕྱི་མར་གྱུར་པའི་དུས་ཀྱི་ཚེ། །བསོད་ནམས་དམན་པའི་སེམས་ཅན་གྱིས། །དམ་པ་རྙེད་པར་མི་འགྱུར་ཞིང༌། །ཚུལ་མིན་སློབ་དཔོན་ནག་པོའི་བདུད།།འབྱུང་བར་འགྱུར་གྱི་དེ་བས་ན། །ནོར་བ་སྤང་བ་ཉིད་དུ་བྱ། །ཞེས་གསུངས་ལ། དེ་ལྟར་མིན་ཕྱིན་ཆད་མཚན་ཉིད་ཚང་བའི་བླ་མེད་ཉིད་ཆ་ལུགས་དང་ལྟར་སྣང་ཇི་ལྟར་སྣང་ཡང་སྐྱེས་བུ་དམ་པ་ཡིན་པར་ངེས་ལ། དེས་ལོག་པའི་སྤྱོད་པ་མི་སློབ་ཅིང་གལ་ཏེ་སློབ་ན་རང་རྒྱུད་གདུལ་བའི་ཕྱིར་ངེས་པར་དགོངས་པ་ཅན་གྱིས་སློབ་པའི་ཕྱིར། པཎ་ཆེན་ནཱ་རོ་པས་ཏེ་ལོའི་ཞབས་པད་བརྟེན་པ་བཞིན་ཐེ་ཚོམ་མེད་པར་བྱ་དགོས་པ་ཉིད་དོ། །དེའི་ཕྱིར་རིག་པ་ལྟར་རྗེས་སུ་གནང་བ་ནི་ཤིན་ཏུའང་བསྒྲུབ་དགོས་ཏེ། རྒྱུད་དེ་ཉིད་ལས། བླ་མའི་ཞབས་ཏོག་ཆོས་བཤད་དང༌། །སྡོམ་པ་འབོག་ཅིང་སྡེ་དགོན་བཟུང༌། །འཁོར་དང་སློབ་མ་ཚོགས་སུ་བསྡུས། །འགྲོ་ཕན་སྐྱིད་སྡུག་རོ་མཉམ་གྱིས། །རི་ཁྲོད་བསྟན་པ་སྐྱོང་སྤེལ་གྱིས། །ནའམ་ཤི་ཡང་བྱ་བ་ལ། །ཐང་ལྷོད་མེད་པར་གྱིས་གསུངས་ཡང༌། །ཇི་ལྟར་བཀའ་སྩལ་དེ་བཞིན་བསྒྲུབ། །ཅེས་


JLAZ012_Page_0169
[མ་དཔེ་གཟིགས་ན་འདིར་གནོན།]

གསུངས་པའི་ཕྱིར་རོ། །དེ་བཞིན་གཤེགས་བཞུགས་གང་གི་ཐད་དུ་བསྙེན་བཀུར་བྱ་ཚུལ་ཡང་རྒྱུད་ལས། གཤེགས་ན་འདས་པའི་མཆོད་པ་འབུལ། །བཞུགས་ན་མཉེས་པའི་མཆོད་པ་བྱ། །གཤེགས་ནས་འདས་མཆོད་མི་འབུལ་ན། །རྩ་བའི་ཉམས་པ་ཆེན་པོ་སྟེ། །ངན་སོང་གནས་ནས་ཐར་མི་སྲིད། །དེ་དག་ཉམས་ན་བླ་མའི་སྐུ། །བརྒྱ་རྩ་བཞེངས་ལ་མཆོད་པ་གསུམ། །རྒྱུན་མི་ཆད་པ་ཟླ་དྲུག་འབུལ། །སྐུ་ཡི་མཆོད་པ་ཕྱག་འཚལ་འབུམ། །གསུང་གི་མཆོད་པ་བཤགས་པ་སྟོང༌། །ཐུགས་ཀྱི་མཆོད་པ་མར་མེ་བརྒྱ། །དང་པོར་ཟླ་བ་དྲུག་ཏུ་འབུལ། །ཕྱིན་ཆད་དུས་ཀྱི་མཆོད་པ་བཟུང༌། །ཞེས་དང༌། བླ་མའི་ཡུམ་དང་སྲས་པོ་དང༌། །མཆེད་ལྕམ་ལ་ཡང་རིམ་པ་ལྟར། །མཉམ་དང་འདྲ་དང་སུམ་ཆ་ཡིས། །བཀུར་སྟི་རིམ་གྲོ་བརྩོན་པར་གྱིས། །ཉམས་ན་བཤགས་པ་བརྒྱ་རྩ་འབུལ། །ཞེས་སོ། །དེ་ལྟར་གནང་བཀག་གི་རིམ་པ་ལ་བསོད་ནམས་ཀྱི་འཕེན་པས་བློ་ལས་སུ་རུང་བའི་བསམ་སྦྱོར་གཉིས་ཀྱིས་ཤིན་ཏུ་རིག་པར་དཔྱད་པས་ལམ་ལྔའི་ཡོན་ཏན་ལག་པའི་མཐིལ་དུ་ཟིན་ནས། གནས་སྐབས་སུ་མངོན་མཐོའི་དཔལ་ལ་སྤྱོད་ཅིང་མཐར་ཐུག་ངེས་ལེགས་ཀྱི་ས་ལ་ཐོགས་པ་མེད་པར་ཕྱིན་པར་འགྱུར་ཏེ། དེའང་


JLAZ012_Page_0170
[མ་དཔེ་གཟིགས་ན་འདིར་གནོན།]

འདི་ལྟར་བླ་མ་དམ་པ་ལ་བསོད་ནམས་ཀྱི་ཚོགས་ཆེན་པོས་བསྙེན་བཀུར་ཡོངས་སུ་རྫོགས་བཞིན་པས་དྲུང་ན་གནས་ཤིང་དེའི་ཚེ་ཐོས་བསམ་གྱི་ཚོགས་རྒྱ་ཆེན་སྤྱད་པས་ཚོགས་ལམ། ཇི་ལྟར་བསྟན་པའི་གསུང་གི་བདུད་རྩིའི་རོ་མྱོང་བས་རྣམ་པར་མི་རྟོག་པའི་ཡེ་ཤེས་ལ་བཙན་ཐབས་སུ་སྦྱོར་བས་སྦྱོར་ལམ། ཆོས་ཉིད་ཀྱི་རང་བཞིན་ཅི་ཡང་མ་ཡིན་པ་དཔེ་གང་གིས་ཀྱང་མཐོང་བར་དཀའ་བའི་ངེས་པའི་བདེན་པ་ཆེན་པོ་བརྡ་ཐབས་རྣམ་པ་བཞི་ལ་སོགས་པས་མངོན་སུམ་པར་སྟོན་པས་མཐོང་ལམ། དེའི་རང་བཞིན་སྒོམ་པ་དང་མི་སྒོམ་པ་ལ་སོགས་ཏེ་མཐའ་གཉིས་ཀྱི་ཕྱོགས་སུ་ལྷུང་བའི་གེགས་དང་གོལ་ས་ཚར་བཅད་དེ་འདུ་འབྲལ་མེད་པའི་སྒོམ་པ་ཁྱབ་གདལ་རང་བྱུང་དུ་ཤེས་པས་སྒོམ་ལམ། གདེང་ཆེན་བཞིས་དགོངས་པ་ཚད་དུ་སྐྱེལ་བས་བསླབ་བྱ་མཐར་ཐུག་སྟེ་སྒོམ་དུ་མེད་པའི་རང་ས་ཟིན་པ་མི་སློབ་པའི་ལམ་སྟེ་རྒྱུད་ལས། བླ་མ་བསྙེན་བཀུར་ཡོངས་རྫོགས་ནས། །དམ་པའི་དྲུང་ན་གནས་པ་ནི། །ཚོགས་ཀྱི་ལམ་ཞེས་དེ་ལ་བྱ། །བླ་མ་དམ་པས་དོན་བཤད་ཅིང༌། །གདམས་ངག་གཉིས་ཀྱང་རྒྱུད་ལ་སྦྱོར། །སྦྱོར་བའི་ལམ་དུ་ང་ཡིས་བསྟན། །ངོ་སྤྲོད་རྣམ་པ་བཞིའི་སྒོ་ནས། །ཚེ་འདིར་ངེས་པའི་བདེན་པ་མཐོང༌། །མཐོང་བའི་ལམ་དུང་ང་


JLAZ012_Page_0171
[མ་དཔེ་གཟིགས་ན་འདིར་གནོན།]

ཡིས་བཤད། །སྒོམ་དུ་མེད་པའི་སྒོམ་པ་དང༌། །སྒོམ་དུ་ཡོད་པ་མེད་པ་གཉིས། །འདུ་འབྲལ་མེད་པར་གནས་པ་ནི། །སྒོམ་པའི་ལམ་དུ་ང་ཡིས་བསྟན། །སངས་རྒྱས་དགོས་པ་གདེང་ཆེན་བཞི། །མི་གནས་ཚུལ་གྱིས་མཐར་ཕྱིན་པས། །མཐར་ཕྱིན་ལམ་དུ་ང་ཡིས་བཤད། །ཅེས་གསུངས་སོ། །དེའི་ཕྱིར་ན་རྣམ་པ་ཐམས་ཅད་མཁྱེན་པའི་གོ་འཕང་ཉིད་བླ་མ་དམ་པ་ཁོ་ན་ལས་བྱུང་བ་ཡིན་ཕྱིར། བྱང་ཆུབ་སེམས་དཔའ་རྟག་ཏུ་ངུས་འཕགས་པ་ཆོས་འཕགས་བསྟེན་པ་དང༌། སློབ་དཔོན་ཆེན་པོ་ཀླུ་སྒྲུབ་གྱིས་བྲམ་ཟེ་ཆེན་པོ་ས་ར་ཧ་ལ་མོས་གུས་ཆེན་པོ་བྱས་པས་ཐུན་གཅིག་གིས་གྲོལ་བ་དང༌། ཨ་ཏི་ཤས་བླ་མ་གསེར་གླིང་པ་ལ་བྱང་སེམས་ཞུ་བའི་ཕྱིར་རྒྱ་མཚོ་ཆེན་པོར་དཀའ་བ་དཔག་མེད་སྤྱད་པ་དང༌། ནཱ་རོས་ཏེ་ལོ། རྗེ་བཙུན་བཞད་པ་རྡོ་རྗེས་མར་པ་བསྟེན་པ་ལ། དཀའ་བ་ཇི་ལྟར་སྤྱད་པ་ལྟར་ཅི་གསུང་དང་དུ་བླང༌། ཅི་ཡོད་བླ་མར་འབུལ། གང་ཤར་མོས་གུས་སུ་འཁྱེར་ཤེས་པ་ཞིག་བློ་དང་ལྡན་པས་བླ་མ་འདི་གདམས་པའི་གནད་ལ་མཁས། ཉམས་མྱོང་དྲོད་ཐོབ། བྱིན་རླབས་དང་ནུས་པ་ཆེ། རྟོགས་པ་ཡང་མཆོག་ཏུ་མཐོ། ད་ལྟའི་དུས་སྐབས་ན་ཀུན་ཏུ་བཟང་པོ་འདི་ཁ་ཡིན་པས་རང་རེ་སྐལ་པ་


JLAZ012_Page_0172
[མ་དཔེ་གཟིགས་ན་འདིར་གནོན།]

བཟང༌། ད་ནི་གཡག་འདྲོགས་མི་བྱ་བར་གུས་པ་ཆེན་པོས་བསྟེན་ཏེ་གདམས་ངག་ཟབ་མོ་ཅི་ནས་ཐོབ་པར་བྱས་ནས་བླ་མ་དང་དགོངས་པ་མཉམ་པ་ཞིག་མི་བྱེད་རེ་སྙམ་དུ་ཡང་ཡང་བསམ་མོ། །དེ་ལྟར་རྒྱུད་ལ་སྐྱེས་ཙ་ན་བླ་མའི་བྱིན་རླབས་ཞུགས་ནས་དང་པོར་འཁོར་བ་ལ་བློ་ལྡོག །གཉིས་པ་ཡེ་ཤེས་ཀྱི་མཐོངས་ཕྱེད། གསུམ་པར་ལྷན་ཅིག་སྐྱེས་པའི་རྟོག་པ་ཤར་ནས། ཐ་སྙད་ཤེས་བྱའི་ཆོས་ཐམས་ཅད་སྒྲོག་རང་གྲོལ་ལ་སོང་སྟེ། དོན་དམ་ཡེ་ཤེས་ཀྱི་རིག་པའི་སྒྲོ་འདོགས་ནང་ནས་ཆོད་པ་ཞིག་ཡོད་པ་ཡིན་ལ། དེ་ལྟར་བཤད་མ་ཐག་པ་དེ་དག་གི་བསྟེན་ཚུལ་ནི་གཙོ་བོར་ལས་དང་པོ་པའི་སྤྱོད་པ་ཁོ་ན་ཡིན་ལ། དངོས་གཞིའི་དུས་སུ་མཉེས་པ་རྣམ་པ་གསུམ་ལས་སྒྲུབ་པའི་མཆོད་པ་ཁོ་ནས་མཉེས་པར་བྱ་དགོས་ཏེ་བཀའ་བརྒྱད་ཡོངས་འདུས་ལས། ད་ལྟར་བླ་མ་དེ་མཉེས་པའི། །ཐབས་ཀྱི་བྱེ་བྲག་ཁྱད་པར་ཅན། །བྱང་ཆུབ་སྒྲུབ་པ་ལྷུར་ལེན་པ། །ཇི་ལྟར་བཀའ་སྩལ་བསྒྲུབ་པའི་ཕྱིར། །ཟླ་གཅིག་དྲུག་དང་བཅུ་གཉིས་དང༌།།དེ་བཞིན་ལོ་གཅིག་དྲུག་དང་ནི། །བཅུ་གཉིས་བསྒྲུབ་པའི་ཞེ་དམ་འབུལ། །དེ་བཞིན་བླ་མའི་ཞབས་ཏོག་དང༌། །སེམས་ཅན་དོན་དུ་གང་འགྱུར་བའི། །ལུང་དང་མཐུན་པའི་འགྲོ་དོན་དང༌། །


JLAZ012_Page_0173
[མ་དཔེ་གཟིགས་ན་འདིར་གནོན།]

སངས་རྒྱས་བསྟན་པ་རྣམ་པ་གསུམ། །སྐྱོང་དང་བྱི་དོར་གྱིས་ཤིག་ཅེས། །བཀའ་སྩལ་དེ་ལ་བཀའ་བཞིན་དུ། །མི་སྒྲུབ་སྙམ་པའི་བློ་སྤངས་ལ། །འདོགས་པ་མེད་པར་བསྒྲུབ་བྱས་ན། །ཅི་བསམ་དོན་ལ་ཐོག་མེད་འགྲུབ། །ཅེས་གསུངས་པའི་ཕྱིར་རོ། །དེས་ན་ཇི་ལྟར་ཐོབ་པའི་ཆོས་རྣམས་ཀྱང་ཐོས་པས་ཁོག་དབུབ། བསམ་པས་དམར་ཐག་བཅད། སྒོམ་པས་རྒྱུད་ལ་བཀལ་ཏེ། ཤེས་རབ་རྣམ་པ་གསུམ་གྱིས་གཏན་ལ་ཕབ་ནས་གྲུབ་པའི་དབང་ཕྱུག་གི་སར་ཕྱིན་པར་བྱ་དགོས་ལ། དེ་ལྟར་ནའང་རེ་ཞིག་ལས་དང་པོ་པ་རྣམས་ཀྱིས་དངོས་སུ་བསྒྲུབ་མི་ནུས་པས་སྨོན་པའི་ཡུལ་དུ་བྱ་ཞིང༌། ཇི་ལྟར་སྒྲུབ་ནུས་པ་དག་ཡུལ་དུས་གནས་སྐབས་དང་བསྟུན་ནས་ལག་ཏུ་བླངས། ཚུལ་འདི་ནི་སྡོང་པོ་བཀོད་པའི་མདོ་དང༌། ལག་ན་རྡོ་རྗེ་མངོན་པར་དབང་བསྐུར་བའི་རྒྱུད། དམ་ཚིག་ས་མ་ཡ་འབུམ་སྡེ་བཀོད་པ་སོགས་སྔ་འགྱུར་གྱི་རྒྱུད་སྡེ་རྒྱ་མཚོ་ལྟ་བུ། གཞན་ཡང་ཁ་འཐོར་མན་ངག་ཇི་སྙིད་ལས་གསུངས་པ་ལྟར་བླང་བྱ་དོར་ན་ཉེས་དམིགས་ཐམས་ཅད་ཀྱི་རྩ་བ་དང༌། བསྒྲུབ་བྱ་བླངས་ན་ལེགས་ཚོགས་ཐམས་ཅད་ཀྱི་འབྱུང་གནས་ཡིན་པས་ལམ་གྱི་རྩ་བ་ཡིན་པར་བཟུང་ངོ༌། །སེམས་སྦྱོང་ལྔ་པ་ནི། བུ་ཡིག་ལས། གདམས་པ་རྙེད་ནས་མ་བསྒོམས་ན་སངས་མི་རྒྱ་བར་ངེས་ནས།


JLAZ012_Page_0174
[མ་དཔེ་གཟིགས་ན་འདིར་གནོན།]

རྩེ་གཅིག་ཏུ་ལེ་ལོ་སྤངས་ནས་བསྒོམ་པ་དང༌། ཞེས་པས། དེ་ལྟར་དགེ་བའི་བཤེས་གཉེན་མིག་བཞིན་དུ་བསྟེན་ནས་ཟབ་པ་དང་རྒྱ་ཆེ་བའི་གདམས་པ་ཇི་སྙེད་ཅིག་ཡོད་ནའང་དེ་ཉིད་རྣམ་གཡེང་སྤངས་ནས་རྩེ་གཅིག་ཏུ་མ་བསྒོམས་ན་ཞུས་བློ་དང་ཐོས་བློ་ཙམ་གྱིས་རྣམ་ཀུན་མཆོག་ལྡན་གྱི་དོན་ལ་རེག་པར་མི་འགྱུར་ཏེ། ཕལ་པོ་ཆེ་ལས། ཇི་ལྟར་མཉན་པ་མཁས་པ་ཞིག །སྐྱེ་བོ་མང་པོ་སྒྲོལ་བྱེད་ཀྱང༌། །རང་ཉིད་དེ་ན་འཆི་བ་ལྟར། །མ་བསྒོམས་ཆོས་ཀྱང་དེ་དང་འདྲ། །ཞེས་སོགས་དང༌། སློབ་དཔོན་འཕགས་པ་ལྷས། བསྐལ་པ་བྱེ་བ་དུ་མ་རུ། །ཐོས་པའི་ཕ་རོལ་སོན་གྱུར་པ། །བདག་བྱིན་རླབས་ལ་ཕྱིར་བལྟས་པས། །དེ་ཡིས་དེ་ཉིད་རྟོགས་མི་འགྱུར། །ཞེས་གསུངས་ལ། འདི་ལྟར་ཐུབ་པའི་ཞམ་རིང་ཀུན་དགའ་བོས་ཀྱང་ཤཱཀྱ་ཐུབ་པའི་ཞབས་པད་བསྙེན་ཅིང་ཐོས་པ་རྒྱ་མཚོ་ལྟ་བུའི་ཕ་རོལ་ཏུ་སོན་ཀྱང་བཀའ་བསྡུད་དང་པོ་ལ་ཐུག་གི་བར་རྒྱུན་ཞུགས་ཁོ་ན་ལས་དགྲ་བཅོམ་པའི་གོ་འཕང་མ་ཐོབ། འཕགས་པ་འདི་ཉིད་ངེས་པའི་དོན་དུ་རྡོ་རྗེ་འཛིན་པའི་སྤྲུལ་པར་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས་གསུངས་ན། རང་ཅག་བྱིས་པ་སོ་སོ་སྐྱེ་བོས་མ་བསྒོམས་པར་སངས་རྒྱ་བར་འདོད་པ་ཤིན་ཏུ་རྨོངས་པའི་རང་བཞིན་ཅན་ཏེ།


JLAZ012_Page_0175
[མ་དཔེ་གཟིགས་ན་འདིར་གནོན།]

དེའི་ཕྱིར་རང་རྒྱུད་ལ་གདོད་ནས་གནས་པའི་ཡེ་ཤེས་ཟབ་མོ་སད་པར་བྱ་བའི་ཕྱིར་མཚན་ཉིད་དང་ལྡན་པའི་དགེ་བའི་བཤེས་གཉེན་དམ་པས་བརྡ་དོན་རྟགས་གསུམ་གྱི་ལམ་ཟབ་མོ་ནས་འཁྲིད་པའི་རྗེས་སུ་གཡེལ་བ་མེད་པར་སློབ་ཅིང༌། ལེ་ལོ་དང་སྙོམས་ལས་ཀྱི་དབང་དུ་སྐད་ཅིག་ཀྱང་གཏོང་རེ། ཟླ་དགའ་དང་ཟས་འཚོལ་གྱི་དབང་དུ་ཕྱི་བཤོལ་དུ་འཇོག་རེ། ཕྱི་ཚིག་དང་རེ་དོགས་ཀྱི་དབང་དུ་བཏང་སྙོམས་སུ་ལུས་རེ། སྙམ་པས་རྒྱུད་ལེགས་པར་བསྡམས་ཤིང་མ་གཅིག་བུ་གཅིག་གི་མ་བུ་སྟོར་བ་འཚོལ་བའི་འདུ་ཤེས་ལྟར་ཚེ་འདིའི་རྗེས་སུ་སྐད་ཅིག་ཀྱང་མི་འབྲེང་བར་ལེ་ལོ་རྡོག་པས་བརྫིས། ཕྱི་བཤོལ་ཁྱུར་མིད་བཏང༌། སྙོམས་ལས་ཟིལ་གྱིས་གནོན་ནས་རི་དྭགས་རྨས་མ་དང༌། བསེ་རུ་ལྟ་བུར་དབེན་པ་བརྟེན་ནས་ཇི་ལྟར་ཐོས་པའི་གདམས་པ་འདི་ཉིད་རྩེ་གཅིག་ཏུ་ཉམས་སུ་མི་ལེན་རེ་སྙམ་དུ་ཞེ་ཐག་པ་ནས་བསམ་མོ། །སེམས་སྦྱོང་དྲུག་པ་ནི། བུ་ཡུག་ལས། འཇིག་རྟེན་གྱི་ལོངས་སྤྱོད་ནི། དུག་གིས་བསྐྱེད་པའི་སྦྲང་རྩི་དང་འདྲ་སྟེ། ཇི་ཙམ་ལོངས་སྤྱོད་པ་ཙམ་གྱིས་སྡུག་བསྔལ་བསྐྱེད་པར་བསམ་པ་དང༌། ཞེས་པས། སྤྱོད་འཇུག་ལས། སྡུག་བསྔལ་འདོར་འདོད་བློ་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །


JLAZ012_Page_0176
[མ་དཔེ་གཟིགས་ན་འདིར་གནོན།]

རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར། རང་རེ་རྣམས་བླང་དོར་ལ་ཤིན་ཏུ་རྨོངས་པས་འདོད་པ་བདེ་བ་འདོད་ཀྱང་སྒྲུབ་པ་སྡུག་བསྔལ་གྱི་རྒྱུ་འབའ་ཞིག་སྒྲུབ་པ་ནི། དཔེར་ན་བྱེ་མ་ལེབ་མར་མེའི་འོད་ལ་དགའ་ནས་དེར་ཕྱིན་ནས་གསོན་པོར་འཚིག་ནས་ཤི་བ་དང༌། བུང་བའི་སྦྲང་རྩིའི་བཅུད་ལ་ཆགས་ནས་མེ་ཏོག་འཇིབས་པས་དེར་འབྱར་བའམ། ཁ་ཟུམ་ནས་ཤི་བ་དང༌། རི་དྭགས་གླིང་བུའི་སྒྲ་ལ་ཉན་པས་བསད་པ་དང༌། ཉ་རྣམས་རྔོན་པའི་ལྕགས་ཀྱུའི་རྩེའི་ཟས་ཀྱི་རོ་ལ་ཞེས་པས་བྱེ་ཚན་ལ་འཆི་བ་དང༌། གླང་པོ་ཆེ་བསིལ་བའི་རེག་བྱ་འདོད་ནས་མཚོར་ཞུགས་ནས་ཤི་བ་ལྟ་བུ་སྟེ། དོ་ཧ་མཛོད་ལས། ཉ་དང་བྱེ་ལེབ་གླིང་ཆེན་བུང་བ་དང༌། །འདི་ནི་རི་དྭགས་བཞིན་དུ་ལྟ་བར་བྱོས། །ཞེས་གསུངས་པ་ལ། དེའི་ཕྱིར་ན་རང་ཅག་རྣམས་ཀྱི་སེམས་རྒྱུད་ལའང་ལྐོག་གྱུར་བག་ལ་ཉལ་གྱི་ཉོན་མོངས་པ་དཔེར་ན་ཆུ་ནང་དུ་ལན་ཚྭ་ཞུ་བ་བཞིན་མཆིས་པ་དེ་ཉིད། ནད་རོ་ཅན་གྱི་མི་ད་ལྟ་ཐར་པ་ལྟར་སྣང་ཡང་ནད་སློང་བྱེད་ཀྱི་ཟས་སྤྱོད་ཕྲན་བུ་དང་འཕྲད་ཚེ་ནད་དེ་མངོན་གྱུར་དུ་ལྡང་བ་བཞིན་འདོད་པའི་ཡུལ་ལྔ་ལ་ཆགས་ཤིང་ཞེས་པས་མཚམས་སྦྱོར་ཏེ། ངན་སོང་གསུམ་གྱི་རྒྱུ་མི་དགེ་བ་ཁོ་ན་འབད་པས་བསྒྲུབས་པས་དེའི་འབྲས་བུ་མི་འདོད་


JLAZ012_Page_0177
[མ་དཔེ་གཟིགས་ན་འདིར་གནོན།]

བཞིན་དུ་སྡུག་བསྔལ་ཁོ་ན་མྱོང་བ་ལས་འོས་མ་མཆིས། ད་སྡུག་བསྔལ་དེ་སྤོང་བ་ལ་དེའི་རྒྱུའམ། འབྱུང་བའི་ཁུངས་སྡིག་པ་དེ་ངེས་པར་སྤོང་དགོས། དེ་ཡང་དཔེར་ན་ན་ཚ་ཟུག་རྔུ་ཡིན་ཞེས་སྨན་བཏང་བ་གཅིག་པུས་མི་ཆོག །ནད་དེའི་རྒྱུ་རྐྱེན་ངོ་བོ་ཚ་གྲང་སོགས་བཅར་ཕོག་ཏུ་ངོས་ཟིན་པར་བྱས་ལ་དེའི་གཉེན་པོའི་སྨན་གཏོང་བ་བཞིན་སྡིག་པའི་ཕྱི་མོ་མི་དགེ་བ་ངོ་ཤེས་དགོས། དེ་ཡང་མཛོད་ལས། དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་པ་ལྟར་བསྡུ་ན་མི་དགེ་བཅུར་འདུ་བས། དེ་ལ་ལུས་ཀྱི་གསུམ། སྲོག་གཅོད། མ་བྱིན་ལེན། ལོག་གཡེམ། ངག་གི་རྣམ་པ་བཞི། རྫུན། ཕྲ་མ། ཚིག་རྩུབ། ངག་བཀྱལ། ཡིད་ཀྱི་གསུམ། བརྣབ་སེམས། གནོད་སེམས། ལོག་ལྟ་རྣམས་ལས། སྤྱིར་སེམས་ཅན་གྱི་རིགས་གང་སད་ཀྱང་སྲོག་གཅོད་ཀྱི་མི་དགེ་བ་ཡིན་པ་སྨོས་མ་དགོས། ནང་གསེས་ཀྱི་དབྱེ་ན། བསམ་པས་བསད་པ། སྦྱོར་བས་བསད་པ། མཐར་ཐུག་ཚང་བ་སྟེ། གསུམ་ཀ་རྫོགས་ན་སྲོག་གཅོད་ཀྱི་མི་དགེ་བ་མཐའ་དག་ཚང་བས་རྣམ་སྨིན་ཤིན་ཏུ་ལྕི་ལ། བསམ་པས་བསད་པ་ནི་གསོད་སེམས་སྐྱེས་ཚད་དོ། །སྦྱོར་བས་བསད་པ་ནི་འདུ་ཤེས་འཁྲུལ་པ་དང༌། གསོད་སེམས་མེད་པར་


JLAZ012_Page_0178
[མ་དཔེ་གཟིགས་ན་འདིར་གནོན།]

རྐང་འོག་ཏུ་ཤི་བ་སོགས་ཡིན་ཕྱིར། ད་ལྟར་རང་རེས་སེམས་ཅན་བསད་པའི་གྲངས་མི་ཆོད། དེ་དག་ལ་ཡང་མི་དགེ་བའི་འབྲས་བུ་གཅིག་མྱོང་བས་མི་ཆོག །རྣམ་སྨིན་གྱི་འབྲས་བུ་མཚམས་མེད་ལྔའི་ཆར་གཏོགས་པ་ཕ་མ་དང་སློབ་དཔོན་དགྲ་བཅོམ་པ་ལ་སོགས་གསོད་པས་མཚོན་ཏེ་ལྕི་ཡང་གིས་ཁྱད་པར་ཕྱེ་བས། དམྱལ་བ་ལ་སོགས་ངན་སོང་གསུམ། རྒྱུ་མཐུན་གྱི་འབྲས་བུར་རེ་ཞིག་བདེ་འགྲོ་ཐོབ་ཀྱང་ཚེ་ཐུང༌། བདག་པོའི་འབྲས་བུར་བཟའ་བཏུང་དང་སྨན་ཟོས་ཀྱང་ནུས་པ་མི་འབྱུང༌། མ་བྱིན་ལེན་ནི། གཞི་རང་ཉིད་མི་དབང་ཞིང་གཞན་གྱིས་བདག་ཏུ་བཟུང་བའི་དངོས་པོ་གསེར་ལ་སོགས་རིན་ཐང་ཅན། མཐུས་ལེན་པ་དབང་ཤེད་ཀྱིས་འཕྲོག་པའམ་ཆད་པས་ལེན་པ། གཡོ་སྒྱུས་ལེན་པ་ཚོང་དང་འབུན་བསྐྱེད་བྲེ་ལོག་སྲང་ལོག་བྱེད་པ། འཇབ་བུས་ལེན་པ་བརྐུ་བའམ། ངེད་ལ་དངོས་པོ་འདི་ལྟ་བུ་ཞིག་དགོས་གནད་ཆེ་ཡང་མ་བྱུང་ཟེར་བ་ལྟ་བུའི་གཡོ་ཐབས་སོགས་ཐབས་སྣ་ཚོགས་ཀྱིས་བླངས་ཤིང་མཐར་ཐུག་ཐོབ་བློ་སྐྱེས་པ་སྟེ། དེའི་རྣམ་སྨིན་གྱི་འབྲས་བུ་སྔ་མ་དང་མཚུངས། རྒྱུ་མཐུན་གྱི་འབྲས་བུར་ལོངས་སྤྱོད་དབུལ། བདག་པོའི་འབྲས་བུར་ལོ་འབྲས་ཉུང་ངུར་འགྱུར། ལོག་གཡེམ་ནི། སྡོམ་ལྡན་ནམ། གཞན་


JLAZ012_Page_0179
[མ་དཔེ་གཟིགས་ན་འདིར་གནོན།]

གྱིས་བདག་ཏུ་བཟུང་བའི་བུད་མེད་ལ་སྤྱོད་པ་དང༌། གཞན་ཡང་རང་གི་ཉེ་དུ་དང༌། དེ་ཡང་དེང་སང་གི་ཉེ་དུས་མཚམས་ཕྱེད་པ་དཀའ་བས་འདུལ་བ་ལས་ཕྱི་མོ་དང༌། མེས་པོ་དང༌། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །ཞེས་གསུངས་པས་མི་རབ་བདུན་བརྒྱུད་ཚུན་ཆད་དུ་སྤང་བྱ་ཡིན་ལ། གཞན་ཡང་རང་གི་ཆུང་མ་སོགས་བགྲོད་ཡུལ་ཡིན་ཡང་རྟེན་གྱི་དྲུང་དང༌། ཁ་དང་བཤང་ལམ་སོགས་བགྲོད་བྱ་མ་ཡིན་པ་དང༌། སྦྲུམ་མ་དང་བསྙེན་གནས་པ་ལྟ་བུའི་ཚེ་དེར་འདུ་ཤེས་ཏེ་ཉོན་མོངས་ཀྱི་སྒོ་ནས་མི་ཚང་པར་སྤྱོད་འདོད་ཀྱི་སྦྱོར་བ་དེའི་དོན་ལ་བརྩོན་པས། མཐར་ཐུག་དབང་པོ་གཉིས་སྦྱོར་ཚང་བ་སྟེ། དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུན་མཐུན་གྱི་འབྲས་བུར་རང་གི་ཆུང་མ་བསྲུང་དུ་མི་བཏུབ། བདག་པོའི་འབྲས་བུར་འདམ་རྫབ་དང་ཡང་བའི་གནས་སུ་སྐྱེ། རྫུན་དུ་སྨྲ་བ་ནི། ཡོན་ཏན་མེད་པར་ཡོད་ཚུལ། གྲུབ་པ་མ་ཐོབ་པར་ཐོབ་ཚུལ། ཆོས་མི་ཤེས་པར་ཤེས་ཚུལ་སོགས་ལྷག་མའི་རྫུན་དང་ཕམ་པའི་རྫུན། ལྷ་མ་མཐོང་བར་མཐོང༌། ས་མ་ཐོབ་པར་ཐོབ། མངོན་ཤེས་མེད་པ་ལ་ཡོད་ཅེས་སྨྲ་བ་མི་ཆོས་བླ་མའི་རྫུན་ལྟ་བུས་མཚོན་ཏེ་ཉོན་མོངས་པ་གང་རུང་གི་སྒོ་ནས་ཀུན་སློང་གི་གཏམ་སྨྲ་བར་འདོད་དེ་སྦྱོར་བ་


JLAZ012_Page_0180
[མ་དཔེ་གཟིགས་ན་འདིར་གནོན།]

ལུས་ངག་གང་ཡང་རུང་བས་རྣམ་འགྱུར་བསྟན་པས་མཐར་ཐུག་ཕ་རོལ་པོས་དོན་གོ་བ་སྟེ། དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་མི་ཁ་སྡང༌། བདག་པོའི་འབྲས་བུར་བསླུ་བྲིད་དང་འཇིགས་པ་ཆེ་བའི་ཡུལ་དུ་སྐྱེའོ། །ཕྲ་མ་ནི་མདོ་ལས། ཁྱུ་མཆོག་དང་མ་ཧེ་མཛའ་བཤེས་སུ་གྱུར་པ་ཝ་སྐྱེས་ཀྱིས་དབྱེན་བྱས་ཏེ་མི་མཛའ་བར་བྱས་པ་བཤད་པ་ལྟར་ཕན་ཚུན་སྙིང་ཉེ་ཞིང་ཡིད་གཅུགས་པའམ། མིན་ནའང་བཏང་སྙོམས་ལྟ་བུའི་འདུ་ཤེས་ལ་གནས་པ་དག་ཉོན་མོངས་གང་རུང་གི་ཀུན་སློང་དམ་པོས་དབྱེ་བར་འདོད་ནས། སྦྱོར་བ་འབྱེད་ནུས་ཀྱི་ཚིག་སྨྲས་པ་དང༌། གཞོགས་ཕྲའམ། ལྐོག་གྱུར་གྱི་ཕྲ་མའི་རིགས་རྫས་སྔགས་ལ་བརྟེན་པའི་ཉེ་འབྱེད་ལྟ་བུས་དབྱེ་སྟེ་མཐར་ཐུག་ཕ་རོལ་པོས་དེའི་དོན་གོ་བའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་མཛའ་བཤེས་ཉུང༌། བདག་པོའི་འབྲས་བུར་ཕྱོགས་མི་སྙོམས་ཤིང་བགྲོད་དཀའོ། །ཚིག་རྩུབ་ནི། དཔེར་ན་སྐྱེ་བོ་བྱད་མི་མཛེས་པའམ། མིའུ་ཐུང་ལྟ་བུ་དེར་འདུ་ཤེས་ཤིང་ཉོན་མོངས་གསུམ་གང་རུང་གི་སྒོ་ནས་དེའི་སྐྱོན་མངོན་གྱུར་དུ་སྒྲོག་པར་འདོད་པའི་ངག་རྩུབ་མོའི་སྦྱོར་བས། ཕ་རོལ་པོའི་སྙིང་ལ་མདའ་གཟིར་བ་ལྟ་བུའི་མི་སྙན་པ་བརྗོད་པས་མཐར་ཐུག་དེའི་དོན་གོ་བ་སྟེ།


JLAZ012_Page_0181
[མ་དཔེ་གཟིགས་ན་འདིར་གནོན།]

དེའི་རྣམ་སྨིན་གྱི་འབྲས་བུར་སྔ་མ་དང་མཚུངས། རྒྱུ་མཐུན་གྱི་འབྲས་བུར་མི་སྙན་པ་མང་དུ་ཐོས། བདག་པོའི་འབྲས་བུར་སྡོང་དུམ་དང་ཚེར་མ་སོགས་ཡིད་དུ་མི་འོང་བའི་གནས་སུ་ཆགས་དགོས་པའོ། །ངག་བཀྱལ་ནི། དེ་དག་གསུམ་གང་རུང་དུ་མི་གཏོགས་པའི་དོན་ཆུང་དང་ལྡན་པའི་དོན་ཙམ་ལ་དེར་འདུ་ཤེས་ཏེ་ཉོན་མོངས་གང་རུང་གི་སྒོ་ནས་ཀུན་སློང་མི་བཟད་པས་སྨྲ་བར་འདོད་དེ། སྦྱོར་བ་ཐ་མ་ཟེའི་ངན་སྔགས་འདོན་པའམ། གཅེར་བུ་པའི་བསྟན་བཅོས། དམག་དང་ཆོམ་རྐུན་ལ་སོགས་འདུ་འཛིའི་གཏམ་འབྲེལ་མེད་བྱུང་རྒྱལ་དུ་སྒྲོག་པ། ཆགས་སེམས་ཀྱིས་གླུ་ལེན་པ་དང༌། ཟློས་གར་གྱི་ཚིག་བརྗོད་ཅིང༌། དགེ་སྦྱོང་གང་ཞིག་རྙེད་པ་འཚོལ་བའི་ཕྱིར་གཞན་གྱི་དྲུང་དུ་ཁ་གསག་སྨྲ་བ་བརྩམས་ནས་མཐར་ཐུག་དོན་གོ་བར་བྱེད་པའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་ཚིག་མི་བཙུན། བདག་པོའི་འབྲས་བུ་ལྗོན་ཤིང་ལ་འབྲས་བུ་མི་ཆགས་པ་ཉིད་དུ་འགྱུར་རོ། །བརྣབ་སེམས་ནི། གཞན་གྱི་ནོར་ལ་དེར་འདུ་ཤེས་པས་ཆགས་སེམས་དང་འཁུ་སེམས་ཀྱི་རོ་མྱང་བ། རང་ནོར་ལ་གཅེས་འཛིན་དང་གསོག་སེམས། ཆོས་ལྔ་ལྡན་གྱི་ཉོན་མོངས་མི་བཟད་པས་ངོ་ཚ་དང་ཉེས་དམིགས་ཟིལ་གྱིས་གནོན་པའི་ཀུན་སློང་གིས་གཞན་ནོར་དེ་རང་ལ་བྱུང་ན་སྙམ་


JLAZ012_Page_0182
[མ་དཔེ་གཟིགས་ན་འདིར་གནོན།]

པའི་རྔམ་སེམས་ངམ་ངམ་གྱི་སྦྱོར་བ་ཡིད་ཀྱིས་རྩོལ་ནས་མཐར་ཐུག་དེར་སྨོན་པའོ། །དེའི་རྣམ་སྨིན་གྱི་འབྲས་བུ་སྔ་མ་དང་མཚུངས། རྒྱུ་མཐུན་གྱི་འབྲས་བུར་ཡིད་ཀྱི་རེ་བ་མི་འགྲུབ། བདག་པོའི་འབྲས་བུར་ཕུན་ཚོགས་ཐམས་ཅད་རིམ་གྱིས་འགྲིབ་པར་འགྱུར་རོ། །གནོད་སེམས་ནི། གཞི་ཡིད་དུ་མི་འཐད་པའི་འགྲོ་བ་ལ་དེར་འདུ་ཤེས་ཤིང་གནོད་སེམས་ཀྱི་ངོ་བོ་ལ་རྟག་ཆོས་ཐེར་ཟུག་ཏུ་འཛིན་པ་ཞེ་སྡང་གི་སེམས། ཚུལ་མ་ཡིན་པ་ཡིད་ལ་བྱེད་པ་ཡང་ཡང་དྲན་པ་འཁོན་འཛིན་གྱི་སེམས། གནོད་བྱེད་ལ་ཤིན་ཏུ་མི་བཟོད་པ་ང་རྒྱལ་གྱི་སེམས། འདི་དག་བསད་ན་དང་བརྡེག་ན་ཅི་མ་རུང་སྙམ་པ་འཁུ་བའི་སེམས། ངོ་ཚ་དང་ཉེས་དམིགས་ཟིལ་གྱིས་གནོན་པའི་སེམས་ལྔ་ལྡན་གྱི་ཉོན་མོངས་གང་རུང་གིས་ཀུན་ནས་བླངས་ཏེ། བཟུང་འཁྱིག་དང་གསོད་པ་ལ་སོགས་པའི་སྦྱོར་བ་བྱེད་པར་རྩོལ་ཞིང་མཐར་ཐུག་དངོས་སུ་ནུས་ན་བྱེད་པ་ཐག་ཆོད་པའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་འཇིགས་སྐྲག་ཆེ། བདག་པོའི་འབྲས་བུར་ནད་འཁྲུགས་དང༌། མི་དང་མི་མ་ཡིན་པའི་གནོད་འཚེ་མང་བ་ཡིན་ནོ། །ལོག་ལྟ་ནི། གཞི་ལས་རྒྱུ་འབྲས་ལྟ་བུའི་མི་བསླུ་བའི་ཆོས་ཅན་ལ་རྒྱང་འཕེན་པ་ལྟ་བུའི་འདོད་པས་དེ་མི་བདེན་པར་འདུ་ཤེས་ཤིང་ཉོན་མོངས་


JLAZ012_Page_0183
[མ་དཔེ་གཟིགས་ན་འདིར་གནོན།]

གང་རུང་གིས་ཀུན་ནས་བླངས་ཏེ་སྐུར་པ་འདེབས་པར་འདོད་པས་སྦྱོར་བ་ནི་ཇི་ལྟར་བསམ་པ་ལྟར་མེད་པ་ཉིད་དུ་གོ་ཞིང་མཐར་ཐུག་ཐག་བཅད་པའོ། །དེའི་རྣམ་སྨིན་ངན་སོང་ཅི་རིགས་པ་དང༌། རྒྱུ་མཐུན་གྱི་འབྲས་བུར་ཡང་དག་པའི་ལྟ་བ་ལ་རྨོངས། བདག་པོའི་འབྲས་བུར་བཟང་ངན་གོ་ལྡོག་པར་འགྱུར་བ་ཉིད་དོ། །དེ་ལྟར་མི་དགེ་བའི་ལས་བཅུ་པོ་དེ་དག་ཀྱང་ནང་གསེས་ཀྱི་སྒོ་ནས་སྡིག་པ་ལྕི་ཡང་དབྱེ་ན། བསམ་པ་ཉོན་མོངས་པ་དྲག་པོས་ཀུན་ནས་བླངས་པ། ལྷ་ཆོས་སུ་གཉན་པ་བླ་མ་དང༌། མི་ཆོས་སུ་གཉན་པ་ཕ་མ་སྟེ། ཡུལ་ཁྱད་པར་ཅན་དེ་ལྟ་བུ་བསད་པ་དང༌། དེ་དག་བསླུས་ཤིང་དཀོར་ཕྲོགས་པ་དང་དབྱེ་བ། ཚིག་རྩུབ་བརྣབ་སེམས་གནོད་སེམས་བྱེད་པ། གཞན་ཡང་སྡོམ་པའི་ཚུལ་ཁྲིམས་ལ་གནས་པ་སོགས་བགྲོད་བྱ་མིན་པ་ལ་འདོད་པ་སྤྱོད་པ། ལྷས་བྱིན་ལྟར་དགེ་འདུན་འབྱེད་པའི་རྫུན་དང་ཕྲ་མ་བྱེད་པ། དགྲ་བཅོམ་པ་འབྱུང་བ་མེད་པར་འདོད་པ། དུད་འགྲོ་ལྟ་བུ་ལ་ཤ་ཁྲག་གི་རློམ་སེམས་ཀྱི་ལུས་བོངས་ཆེ་བ་གསོད་པ། དངོས་པོ་མང་ཞིང་རིན་ཐང་ཆེ་བ་བརྐུ་བ། སྡིག་པ་ལ་བཤགས་སྡོམ་མེད་པར་དགའ་བཞིན་དུ་བྱེད་པ་སོགས་ཤིན་ཏུ་ལྕི་ལ། དེའི་ལྡོག་ཕྱོགས་རྣམས་ནི་ཡང་བ་སྟེ། ཇི་ལྟར་ཡང་རྒྱལ་སྲས་པདྨས། མི་དགེ་བཅུ་དང་


JLAZ012_Page_0184
[མ་དཔེ་གཟིགས་ན་འདིར་གནོན།]

མཚམས་མེད་རྣམ་པ་ལྔ། །ཉེ་བ་ལྔ་དང་ལྕི་བ་རྣམ་པ་བཞི། །ལོག་པའི་ལས་བརྒྱད་ཁ་ན་མ་ཐོའི་ལས། །སྲོག་ལ་བབ་ཀྱང་ཕྲ་མོའང་སྤང་བར་མཛོད། །དགེ་བ་བཅུ་དང་མཐུན་པར་འཇུག་པ་ཡི། །དགེ་བསྙེན་དགེ་ཚུལ་བསྙེན་གནས་དགེ་སློང་སོགས། །སོ་སོ་ཐར་དང་བྱང་སེམས་གསང་སྔགས་ཀྱི། །སྡོམ་པ་གང་བླངས་བླང་ཞིང་བསྲུང་བ་ལ། །ཐར་པ་འདོད་ཁྱོད་ནན་ཏན་སྲོག་ལྟར་སྲུངས། །ཞེས་གསུངས་པ་ལྟར་བཤད་མ་ཐག་པའི་ལས་འབྲས་ཀྱི་རྣམ་གཞག་དེ་དག་ངེས་པར་བྱས་ཏེ། རང་རྒྱུད་ལ་དེ་དག་གང་ཤས་ཆེ་བ་བརྟགས་ནས་ངོས་ཚིར་གྱིས་བཟུང༌། ག་རེ་སྔོན་ཆད་འདི་ལྟ་བུའི་སྡིག་པ་གྲངས་ཀྱིས་མི་ཆོད་པ་བསགས་ཡོད་འདུག་ཀྱང་ཤེས་བཞིན་གྱི་དྲན་པས་མ་ཟིན་པས་ལུང་མ་བསྟན་དུ་འཕྱན་ཏེ་ལས་བསགས་པ་ལ་བསགས་པར་ངོ་མ་འཕྲོད་པ་ཀླ་ཀློ་ལྟར་ནོངས་པ་ཤིན་ཏུ་ཆེ། ད་ནས་བཟུང་མི་དགེ་བཅུས་མཚོན་ཕྲ་རགས་ཀྱི་སྡིག་སེམས་ནམ་བྱུང་ཙ་ན་གཉེན་པོ་བསྟེན་ནས་གདོང་ཟློག་ཏུ་བྱོལ་ཐུབ་པ་ཞིག་དང༌། དེ་ཙམ་གྱིས་ཀྱང་མི་ཆོག་པར་དེའི་ལྡོག་ཕྱོགས་དགེ་བ་སྟོབས་ཆེན་གྱི་སྒོ་ནས་སྲོག་གཅོད་སྤོང་བ་སོགས་དགེ་བ་བཅུའི་ལམ་ལ་མགོའམ་གོས་ལ་མེ་ཤོར་བ་བཟློག་པའི་བརྩོན་པ་ལྟ་བུ་བསྐྱེད་པར་བྱའོ་སྙམ་དུ་མོས་པ་དང་སྤྲོ་བ་མ་བྱུང་བར་དུ་སྒོམ། དེ་ཡང་


JLAZ012_Page_0185
[མ་དཔེ་གཟིགས་ན་འདིར་གནོན།]

སློབ་དཔོན་དབྱིག་གཉེན་གྱིས། མཐོང་བའི་ཆོས་ལ་སོགས་པ་ལ། །མྱོང་གྱུར་ལ་སོགས་ངེས་རྣམ་གསུམ། །ཞེས་གསུངས་པ་ལྟར་དཔེར་ན་སྡིག་ཅན་ལྷས་བྱིན་དང༌། ཤ་ས་རཀྵི། དཔལ་འཛིན་ལ་སོགས་པ་རྣམས་ལུས་མ་སྤངས་པར་དམྱལ་བར་སོང་བའི་མཐོང་ཆོས་མྱོང་འགྱུར་གྱི་གཏམ་རྒྱུད་ལྟ་བུས་མཚོན་ཏེ་རང་ལ་ངན་སོང་གསུམ་དུ་སྐྱེ་ངེས་ཀྱི་ལས་ཤིག་ཡོད་པའི་སྡིག་ཅན་ཞིག་ཡིན་ན་མ་གཏོགས། གཞན་མ་འདི་སྙམ་དུ། ཀྱེ་མ་དེ་ལྟ་ན་ཐར་པ་ཐམས་ཅད་མཁྱེན་པ་ཐོབ་པར་བྱེད་པ་ལ་མི་དགེ་བ་དེ་དག་གི་རྩ་བ་སྟོངས་པ་ཞིག་དགོས་འདུག་ཀྱང༌། བསམ་ན་རང་གི་ཚེ་འདི་ཁ་ལ་མངོན་སུམ་དུ་གྲུབ་པའི་སྡིག་པ་དེ་ཙམ་ཞིག་བསག་མོད། དེས་ཆ་ཙམ་དུ་ཡང་མི་མཚོན་པའི་སྐྱེ་བ་སྔ་མ་རྣམས་སུ་རང་འཁོར་སློབ་འབངས་སྡེ་རིགས་སོགས་ཀྱི་ཆེད་དུ་བསམ་གྱིས་མི་ཁྱབ་པའི་སྡིག་པ་བསགས་པ་ཚད་མས་གྲུབ། དེ་དག་གི་འབྲས་བུ་ཡང་རང་ཉིད་ཁོ་ནས་མྱོང་བ་མ་གཏོགས་གང་གི་ཆེད་དུ་བྱས་པ་དེ་དག་ལ་བགོ་བཤའ་བྱ་རུ་མེད་པ་ནི། སློབ་དཔོན་ཀླུ་སྒྲུབ་ཀྱིས། ཁྱོད་ཀྱིས་བྲམ་ཟེ་དགེ་སློང་ལྷ་དང་ནི། །མགྲོན་དང་ཡབ་ཡུམ་དག་དང་བཙུན་མོ་དང༌། །འཁོར་གྱི་སླད་དུ་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་གསུངས་འདུག་པས་ཧ་བྷོ་ཧ་བྷོ། ང་ནི་མེད་དོ། །ང་ནི་མེད་དོ། །འདི་


JLAZ012_Page_0186
[མ་དཔེ་གཟིགས་ན་འདིར་གནོན།]

ནས་འཕོས་ཏེ་ངན་སོང་མྱོང་བ་ལས་འོས་མེད་པ་ཞིག་འདྲའོ་འདྲའོ་སྙམས་ནས་ཡིད་སློང་སློང་པོར་མི་འགྱུར་བའི་ཐབས་མེད། དེའི་ཚེ་ལས་འབྲས་ཀྱི་མཚང་རིག་པ་ཡིན། ད་ལྟ་མི་ཀུན་དགེ་སྡིག་གི་གླེང་མོ་ཙམ་བྱེད་པ་ལས་བླང་དོར་གྱི་རྩ་བ་བཅར་ཕོག་ཏུ་ངོ་ཤེས་པ་མེད་པས་ཀླ་ཀློ་ལས་དྲག་ཙམ་ལས་དོན་ལ་ལུང་མ་བསྟན་ཡིན། ད་རེས་རང་ཉིད་ཀྱི་བཤེས་གཉེན་དམ་པའི་བཀའ་དྲིན་ལ་ལས་དང་ལས་ཀྱི་འབྲས་བུ་ཆུད་མི་ཟ་བ་ཉིད་དུ་མཐོང་བ་དེ་བསོད་ནམས་ཆེ། དེ་ལྟར་མཐོང་བ་ལ་འཇིགས་སེམས་དང་ཡིད་ཁོང་དུ་ཆུད་པ་གཅིག་པོས་ཀྱང་མི་ཆོག་སྟོབས་བཞི་ཚང་བའི་སྒོ་ནས་བཤགས་སྡོམ་དྲག་པོ་དང་འགྱོད་སེམས་བརྟན་ཏེ་བྱང་ཆུབ་ཀྱི་སྤྱོད་པ་ལ་བསླབ་དགོས། དེའི་བླང་དོར་མ་ནོར་ན་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེ་བས་སྔར་བྱས་ཀྱི་སྡིག་པ་མཚམས་མེད་ལྟ་བུའི་ལས་རྔམ་ཆེན་བྱས་པ་ཡང་ཕྱི་ནས་བཤགས་སྡོམ་དྲག་པོས་འདག་པར་གསུངས་ཏེ། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱི་ནས་བག་དང་ལྡན་པར་གྱུར་དེ་ཡང༌། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གཅུང་དགའ་བོ་ཆུང་མ་པུནྚ་རི་ཀ་ལ་ལྷག་པར་ཡིད་ཆགས་པ་དེ་བཞིན་གཤེགས་པས་ལྷའི་གྲོང་ཁྱེར་དང༌། དམྱལ་


JLAZ012_Page_0187
[མ་དཔེ་གཟིགས་ན་འདིར་གནོན།]

བའི་གནས་རྣམས་སུ་ཁྲིད་དེ་ཐབས་ཀྱིས་བཏུལ་བས་མཐར་དགྲ་བཅོམ་ཐོབ། སོར་ཕྲེང་གིས་མི་དགུ་བརྒྱ་དང་གོ་དགུ་བསད། མ་སྐྱེས་དགྲས་ཡབ་གཟུགས་ཅན་སྙིང་པོ་བསད་དེ་མཚམས་མེད་ཀྱི་ལས་བྱས་པའང་བཤགས་སྡོམ་གྱིས་དག་ཅིང་སྔ་མས་དགྲ་བཅོམ། བདེ་བྱེད་ཀྱིས་རང་གི་མ་བསད་པ། ཕྱིན་ཆད་འགྱོད་སེམས་ཀྱི་སྒོ་ནས་བླང་དོར་ཚུལ་བཞིན་དུ་བྱས་པས་དམྱལ་བར་དར་གྱི་ཕོ་ལོང་བརྡབས་པ་ཙམ་ཞིག་སྐྱེས་ནས་མཐར་རྒྱུན་ཞུགས་ཐོབ་པར་བཤད་པས་སྡིག་པ་དེ་དག་དྲན་པའི་མོད་ལ་འགྱོད་པ་ཡང་ཆེ་ཞིང་བཤགས་པའི་ཐབས་ལ་འབད་པ་ནི། གནད་ཟབ་ཤོས་ཡིན་པས་ཕུང་པོ་གསུམ་པའི་མདོ་འདོན་པ་ལ་བསླབ་པར་བྱའོ། །དེ་ཡང་ཁྲིད་ཀྱི་སྐབས་འདིར་གོང་གི་མི་དགེ་བ་བཅུ་དང་དེའི་འབྲས་བུ་ངོས་མ་ཟིན་པར་བྱ་བ་ནི་སྤང་བྱ་ཡིན་ལ། དེ་ཉིད་བློ་ལ་ནམ་འཆར་འཆར་གྱི་དུས་སུ་སྟོབས་བཞིའི་གནད་དང་ལྡན་པས་ཕུང་པོ་གསུམ་པའི་མདོ་འདོན་པ་ནི། གཉེན་པོ་ཡིན་པས་འདི་གཉིས་རེས་འཇོག་ཏུ་ཡང་ཡང་སྒོམ། དུས་འདི་ནས་བཟུང་སྟེ་མི་དགེ་བའི་ཕྱོགས་ལ་ཤེས་བཞིན་གྱི་དྲན་པ་བརྟེན་ལ་དེ་དག་གི་བསམ་པ་ནམ་སྐྱེས་འབུར་འཇོམས་སུ་གཏོང༌། དངོས་གཞིའི་སྐབས་དུས་རྟག་པར་ཡང་ཇོ་བོ་དཱི་པམ་ཀཱ་རའི་རྣམ་ཐར་ལྟར། ནངས་པར་བསགས་པ་སྔ་དྲོ་བཤགས། ཕྱི་དྲོ་བསགས་པ་


JLAZ012_Page_0188
[མ་དཔེ་གཟིགས་ན་འདིར་གནོན།]

ཉལ་ཁ་བཤགས་ཏེ་སྡིག་ལྟུང་དང་ཞག་གཅིག་ཀྱང་མ་འགྲོགས་པར་བྱའོ། །ཁ་ཅིག་དེ་ལྟར་བཤགས་པ་ཁོ་ནས་ཆོག་པར་གོ་ནས་ཉེས་སྤྱོད་དང་མི་དགེ་བའི་ཕྱོགས་ལ་སྡོམ་སེམས་མེད་པར་འབྱོལ་ཉོག་ཏུ་སྤྱོད། ནངས་ནུབ་བཤགས་ཚིག་རེ་ཙམ་ཁ་ནས་བཏོན་པས་ཆོག་པར་བསམ་པ་ནི་ནོར་བ་རྔམ་པོ་ཆེ་ཡིན་ཏེ། བཤགས་པ་སྔ་མ་ལ་སྟོབས་བཞིས་བཤགས་པའི་འགྱོད་སེམས་ཟིལ་གྱིས་མནན་ཅིང༌། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་ལས་འཕྲལ་དུ་ཉམས་པའི་ཕྱིར་ལས་དང་དེ་འབྲས་ཀྱི་རྟེན་འབྲེལ་མི་བསླུ་བའི་ཆོས་ཐམས་ཅད་བསྣུབས་པའི་ལོག་པར་ལྟ་བ་ཡིན་ནོ། །དེ་ལྟར་འདི་ཡན་ཆོད་ཀྱི་ཚིག་དོན་ལ་ཞེ་ཐག་པ་ནས་ལེགས་པར་བསམ་སྟེ་འཇིག་རྟེན་གྱི་བྱ་བ་མཐའ་དག་ལ་མཁྲིས་ནད་ཅན་གྱིས་ཟས་མཐོང་བ་ལྟར་སྐྱུགས་ལོག་པ་ཞིག་མ་བྱུང་ན། ཐོས་པ་ལུང་ཡིན་ལ། ཀློག་པ་ཚིག་ཡིན་པས་བློ་ལ་འབྱོངས་པའི་སྐབས་མི་སྲིད་དེ། ཨོ་རྒྱན་ཆེན་པོས། སངས་རྒྱས་བཀའ་ལུང་དམ་ཆོས་གང་ཡོད་དུ། །ལེགས་པར་བཙལ་ཞིང་དམ་ཆོས་ཐོས་པའི་ཚེ། །ཡང་དག་བསམ་པས་ཚིག་དོན་མ་བཟུང་ན། །ཁ་སྦུབ་སྣོད་དུ་ཆུ་རྒྱུན་མི་འཇུག་ལྟར། །འཁོར་བའི་ཚ་གདུང་རྒྱས་ཚེ་ཕན་པ་མེད། །ཅེས་སོ། །དེའི་ཕྱིར་འཇིག་རྟེན་གྱི་ལོངས་སྤྱོད་ཇི་ལྟར་ཕུན་སུམ་ཚོགས་ཀྱང་


JLAZ012_Page_0189
[མ་དཔེ་གཟིགས་ན་འདིར་གནོན།]

རླུང་ནང་གི་མར་མེའམ། དབྱར་གྱི་ཆུ་བྲན་ནམ། ནམ་མཁའི་གློག་གམ། མདང་གི་རྨི་ལམ་ལྟ་བུ་ཤིན་ཏུ་མི་རྟག་ཅིང་བདེན་པ་མེད་པ་ཡིན་པས་རྟག་ཏུ་དབེན་པ་བརྟེན། སྐྱོ་བའི་འདུ་ཤེས་བསྐྱེད། གང་བྱུང་དེས་ཆོག་ལ་བློ་ཕུགས་གཏད། ན་དགའ་ཤི་སྐྱིད་ལ་སྐྱབས་བཅོལ། མི་ཤི་བའི་ཤུལ་ལྟར་སུ་གང་ལབ་ལབ་ཏུ་བཅུག །མཛེ་སྤྲང་ཡུལ་འཁྱར་བ་ལྟར་འཁོར་མཁན་བྱ་དང་བྱིའུ་གཅིག་ཀྱང་མེད་པ་ལ་ཡིད་སྨོན་ནས་བླ་མ་དམ་པའི་གདམས་ངག་སྒོམ་པ་ལ་བློ་འཇུག་པ་ཞིག་དགོས་ཏེ། ཨོ་རྒྱན་ཆེན་པོས། འདི་ནི་འཇིག་རྟེན་སྐྱོ་བའི་ཡུལ་ཡིན་པས། །སྐྱེ་བོའི་བདེ་སྐྱིད་ཕུན་སུམ་ཚོགས་འདྲ་བ། །དབྱར་གྱི་ཆུ་དང་རྨི་ལམ་ནོར་རྫས་ལྟར། །བདེན་པ་མེད་ཅིང་མྱུར་དུ་མི་རྟག་པས། །སྐྱོ་བའི་འདུ་ཤེས་རྟག་ཏུ་བསྐྱེད་འཚལ་ལོ། །འདི་ཉིད་ལས་ལོག་ཆགས་དང་འཁྱལ་བ་དང༌། །སྐྱེ་དགུའི་དཔལ་ལ་ངོ་མཚར་ཆེར་བྱེད་པ། །དེ་ནི་བསོད་ནམས་དམན་པའི་རིགས་ཅན་ཏེ། །ཁྱེད་ཀྱི་སྙིང་ནི་ཤིང་སྡོང་ཁོང་རུལ་ལྟར། །ཕྱི་ནས་ཐར་པའི་ལོ་འབྲས་མི་འབྱུང་ངོ༌། །ཀྱེ་མ་ཀྱི་ཧུད་ཚེ་འདིའི་དཔལ་འབྱོར་ལ། །རྟག་ཅིང་ཕུན་སུམ་ཚོགས་འདྲར་ཤེས་པའི་བློ། །བྱིས་པའི་ནང་ནས་ཐ་ཤལ་སྐྱེས་བུ་སྟེ། །འཇིག་རྟེན་འདི་ན་དེ་བས་བླུན་པ་སུ། །སྔར་ཡང་མ་བྱུང་ཕྱིས་ཀྱང་མི་འབྱུང་ངོ༌། །ཞེས་གསུངས་པ་


JLAZ012_Page_0190
[མ་དཔེ་གཟིགས་ན་འདིར་གནོན།]

ཡིན་ནོ། །སེམས་སྦྱོང་བདུན་པ་ནི། བུ་ཡིག་ལས། དེ་ལྟར་ཕྱི་ནང་གི་རྣམ་གཡེང་སྤངས་ནས་མི་རྟོག་པའི་བསམ་གཏན་ལ་བཞག་པས་ཉམས་མྱོང་འཕེལ་ནས་ཡུན་ཇེ་རིང་ལ་སོང་བས། དོན་འདི་ཉིད་དང་ནམ་ཡང་མི་འབྲལ་བར་བྱ་སྙམ་པའི་རྒྱུད་ལ་ངེས་ཤེས་བསྐྱེད་པ་དང༌། བདུན་གྱིས་སེམས་སྦྱང་བའོ། །ཞེས་མཇུག་བསྡུ་བ་ལས། རྣམ་པར་མི་རྟོག་པ་ལ་བརྟེན་ནས། སེམས་སྦྱོང་བ་ནི་ཏིང་ངེ་འཛིན་གྱི་ལམ་ལ་འཇུག་པའི་སྒོ་བླ་ན་མེད་པ་ཡིན་ཏེ། གྲོལ་བའི་ཐིག་ལེ་ལས། སྟེང་རླུང་རྔུབས་པས་སྣང་བ་དབང་དུ་འདུ། །འོག་རླུང་རྔུབས་པས་སྟོང་བ་དབང་དུ་འདུ། །བར་རླུང་བསྐྱིལ་ཞིང་དཀྲུགས་པས་ཟུང་དུ་ཆུད། །ཅེས་གསུངས་པ་ལྟར་སེམས་ཅན་རྣམས་སྣང་བ་ཕྱི་རུ་ལུས། རིག་པ་ནང་དུ་ལུས། བར་དུ་ལས་རླུང་གི་བཞོན་པས་སེམས་ཀྱི་རྟ་བྱས། གཟུང་བ་དང༌། འཛིན་པའི་ངང་དུ་འཕྱན་ཏེ་འཁོར་བ་ལུ་གུ་རྒྱུད་དུ་འཁྲུལ་པ་དག །རྡོ་རྗེ་ཐེག་པའི་མྱུར་ལམ་ཟབ་མོས་འགྲོ་འོང་ལས་ཀྱི་རླུང་གི་བྱེད་པ་བཅིངས་པ་ལ་བརྟེན་ཐེག་པ་འོག་མ་ལྟར་ཡུན་རིང་པོར་རྟོག་པའི་དྲ་བར་རིག་པས་རྗེས་སུ་དཔག་པའི་བསམ་གཏན་ལ་མ་ལྟོས་པར་བཙན་ཐབས་སུ་གཉུག་མའི་ཡེ་ཤེས་ངོས་ཟིན་པར་བྱ་བའི་མན་ངག་སྟེ། དེ་ལ་གསུམ། དང་པོ་ནི། རང་ལུས་བསམ་


JLAZ012_Page_0191
[མ་དཔེ་གཟིགས་ན་འདིར་གནོན།]

གཏན་གྱི་ཆོས་བདུན་དང་ལྡན་པའི་ངང་ནས། ཁོང་པའི་ནང་སྟོང་སངས་ཕྲུ་མ་ཕུས་བཏབ་པ་ལྟ་བུའི་དབུས་དྲང་པོར་རྩ་དབུ་མ་ཆུ་ཤིང་གི་ལྡེམ་བུ་ལྟར་དྲང་བ། པདྨའི་འདབ་མ་ལྟར་སྲབ་པ། ནམ་མཁའི་སྤྲིན་བྲལ་ལྟར་སྔོ་བ། ཏིལ་ཞུན་གྱི་མར་མེ་ལྟར་གསལ་བ་སྟེ། ཆོས་བཞི་ལྡན་དུ་སྒོམ་པའི་སྤྱི་གཙུག་གི་ཡར་སྣར་ཧཾ་ཡིག་དཀར་པོ། ལྟེ་འོག་གི་མར་སྣར་ཨ་ཡིག་དམར་པོ་གསལ་བ་ལ་སྦྱོར་བ་བཞི་ལྡན་གྱི་ངང་ནས་སྟེང་རླུང་མནན། འོག་རླུང་ཐེན་པས་ལྟེ་བའི་ཨ་ལས་མེ་འབར། རིམ་གྱིས་ཡར་སྣའི་ཧཾ་ཡིག་ཞུ་བ་ལས་བདུད་རྩིའི་རྒྱུན་བབས་འཁོར་ལོ་བཞི་དང་རྩ་ཕྲན་ཐམས་ཅད་ཁྱབ་པས་བདེ་སྟོང་གི་ཡེ་ཤེས་སྐྱེས་པར་བསམ་ཞིང་སྙིང་གར་ཡི་གེ་ཨ་དཀར་པོ་གཅིག་ལ་སེམས་བཟུང་སྟེ་རྩེ་གཅིག་ཏུ་འགྱུ་བ་སྤུན་ཐག་བཅད་ནས་བཞག་པས། བདེ་བས་ཐབས་བྱས་པའི་ཤེས་རབ་སྟོང་ཉིད་ཀྱི་ཡེ་ཤེས་སྐྱེ་བ་ཡིན། མ་གོམས་བར་དུ་ཡུན་ཐུང་གྲངས་མང་ལ་བསླབ་བོ། །གཉིས་པ་གསལ་སྟོང་མི་རྟོག་པ་ལ་སེམས་སྦྱོང་བ་ནི། རླུང་རོ་ལན་གསུམ་མམ་དགུ་ཕྲུགས་སུ་ཕུད་པས་འབྱུང་བའི་རླུང་དུག་ཐོན་པའི་དགོས་པ་ཡོད་དོ། །དེ་ནས་ནང་དུ་རྔུབ་པའི་ཚེ་ཕྱིའི་ཨ་འཐས་ཀྱི་སྣང་བ་ཐམས་ཅད་འོད་དུ་ཕྲི་ལི་ལི་ཞུ་སྟེ་ནམ་མཁའ་སྔོ་སངས་དང་འདྲེས། དེ་ཉིད་རང་གི་ལུས་ནང་དུ་བྱུང་བས་ལུས་ཐམས་ཅད་སྔོ་མེར་གྱིས་


JLAZ012_Page_0192
[མ་དཔེ་གཟིགས་ན་འདིར་གནོན།]

ཁེངས་པར་བསམ་སྟེ་རླུང་འོག་ཏུ་ཚིར་གྱིས་མནན། འོག་རླུང་ཅུང་ཟད་ཐེན་ལ་ཁ་སྦྱར་ཏེ་བསྒོམས་པས་གསལ་སྟོང་གི་ཉམས་སྐྱེའོ། །དེ་ཡང་གྲང་ཤས་ཆེ་ན་རླུང་དེ་ཚ་བ། ཚ་ཤེས་ཆེ་ན་བསིལ་བའི་རེག་བྱ་ཡོད་པར་བསྒོམ་པ་ནི་གནད་དོ། །ཞེས་དཔལ་བསམ་ཡས་པས་གསུངས་སོ། །སྤྲོས་པ་ལ་དགའ་བ་རྣམས་འབྱུང་བ་སོ་སོའི་རླུང་སྒོམ་པར་འདོན་ན། བུ་ཡིག་ཡེ་ཤེས་གསལ་སྒྲོན་ལྟར་ཉམས་སུ་བླང་བར་བྱ་ལ། འོན་ཀྱང་བླ་མ་ཡང་ཏིག་གི་སེམས་སྦྱོང་དོན་ཁྲིད་དུ། ནམ་མཁའི་རླུང་ནི་ཀུན་གྱི་དུས་ན་ཤིས་ལ་རེག་བྱའང་གཉིས་པོ་དེར་འདུས་པས། ཉམས་ལེན་ལ་འདིས་ཆོག་གོ །ཞེས་གསུངས་སོ། །འདི་ལྟ་བུའི་བུམ་པ་ཅན་ནི་ཡོན་ཏན་ཐམས་ཅད་ཀྱི་འབྱུང་ཁུངས་ཡིན་ཏེ། ཞལ་གདམས་ནོར་བུའི་ཕྲེང་བར། དེ་ཡང་དབུ་མ་མཆོག་ཡིན་པས་མཐོང་ཉམས་དེ་ག་མི་སྟོན། སླར་ཡང་རླུང་མི་གཏོང་བར་ནང་དུ་རྔུབ་ཅིང་བསྡམས་པས། རླུང་རོ་རྐྱང་གི་ལམ་བརྒྱུད་དེ། དབུ་མའི་མས་སྣ་ཡི་གེ་ཆའི་འཕོངས་ལྟ་བུ་ནས་ཞུགས། རྩ་དབུ་མའི་ལམ་ལ་འཇུག་པས། ས་དང་པོའི་རྟོགས་པ་ཕྱིན་ཅི་མ་ལོག་པ་སྐྱེའོ། །ཞུགས་གནས་ཐིམ་གསུམ་གྱི་རྟགས་རེ་རེ་འཆར་བ་ལས། རྩ་དབུ་མའི་མདུད་པ་དང་པོ་ཞིག་སྟེ། རླུང་འཇུག་པ་ལས་ས་དང་པོའི་ཡོན་ཏན་སྐྱེ། དེར་


JLAZ012_Page_0193
[མ་དཔེ་གཟིགས་ན་འདིར་གནོན།]

རླུང་སེམས་གནས་པས་ས་གཉིས་པའི་ཡོན་ཏན་སྐྱེ། དེར་རླུང་སེམས་ཐམས་ཅད་ཐིམས་པས་གཟུང་འཛིན་གྱི་རྟོགས་ཚོགས་མཁའ་ལྟར་དག །མཁྱེན་པའི་ཡོན་ཏན་མཐའ་དག་རྒྱས་པའོ། །གནས་སྐབས་སུའང་ཚེ་རིང༌། ནད་དཀོན། ལུས་བདེ་ཞིང་བྱ་ལྟར་མགྱོགས་པ་ལ་སོགས་པའི་ཡོན་ཏན་ནི། རླུང་བུམ་ཅན་གནད་དུ་བསྣུན་པའི་ཡོན་ཏན་ཡིན་ནོ། །དེས་ན་རླུང་གི་ཡོན་ཏན་ཐམས་ཅད་བུམ་ཅན་ལ་བརྟེན་ནས་སྐྱེ་དགོས་པས། འཚོ་རྒྱལ་རླུང་སྒོམ་པ་ཐམས་ཅད་བུམ་པ་ཅན་ལ་གནད་དུ་བསྣུན་ཅིག །ཅེས་གསུངས་པའི་ཕྱིར་རོ། །གསུམ་པ་ཆོས་ཉིད་རྣམ་པར་མི་རྟོག་པ་ལ་སེམས་སྦྱོང་བ་ནི། ལུས་སེམས་ཁོང་གློད། མིག་མི་འགུལ་བས་དྲན་བསམ་འཕྲོ་འདུའི་རྟོག་པ་ཐམས་ཅད་དང་བྲལ་བའི་ངང་ནས་རླུང་ཆེད་འཛིན་གྱི་འབད་རྩོལ་ལ་མ་ལྟོས་པར་བར་རླུང་ཐད་ཀར་རྒྱངས་པ་ཤིན་ཏུ་ཟབ་པའི་མན་ངག་ཡིན་ཏེ། ཞལ་གདམས་ནོར་བུའི་ཕྲེང་བ་ལས། འཚོ་རྒྱལ་ཉོན་ཅིག་ལུས་སྐྱིལ་དྲུང་དང་ལྡན་པའི་སྒོ་ནས། འོག་རླུང་གི་སྦྱོར་བ་ཅུང་ཟད་རྔུབ། སྟེང་རླུང་ཅུང་ཟད་མནན། བར་རླུང་ལྟེ་བའི་ཐད་ཀར་རྒྱངས་པའི་བསོད་ནམས་ནི། ཡེ་ཤེས་རང་སར་གནས་པའི་རླུང་སྦྱོར་ཡིན་ཏེ། ལུས་བསྐྱེད་རིམ་བསྒོམ་པ་དང༌། སེམས་འོད་གསལ་དུ་བསྒོམ་པ་ལ་


JLAZ012_Page_0194
[མ་དཔེ་གཟིགས་ན་འདིར་གནོན།]

སོགས་གང་གི་ཡང་གྲོགས་སུ་འགྲོ། ཐིག་ལེ་འཛིན་འདྲེན་དགྲམ་གསུམ་ཐམས་ཅད་ཀྱང་ངང་གིས་འགྲུབ་པའི་རླུང་སྦྱོར་ཡིན། གཟུང་འཛིན་གྱི་རྟོགས་ཚོགས་ཀྱང་ངང་གིས་དག །རིག་པ་བྱིང་རྨུགས་རྒོད་གསུམ་གྱི་སྐྱོན་དང་བྲལ། མིག་འགྲིབ་པ་ལ་སོགས་དབང་པོའི་སྐྱོན་མི་འབྱུང༌། བད་ཀན་དང་མཁྲིས་པའི་ནད་ཀྱིས་མི་ཚུགས། ཕོ་བ་སྦོས་འཁྲོག་ངང་གིས་སེལ། རིམས་ནད་ལ་སོགས་འགོ་བའི་ནད་བྱང༌། སྲོ་མ་མི་འབྱུང༌། ཚེ་ཉི་ཟླ་དང་མཉམ་པའི་རླུང་སྦྱོར་ཡིན་པས། རང་ལུས་ཡི་དམ་གྱི་ལྷར་གསལ། ལུས་ཀྱག་ཀྱོག་དང་ཡ་ཡོ་མེད་པོ་རླུང་ལྟེ་བའི་འོག་ཏུ་འཚིར་ཏེ་རྒྱངས། མིག་བར་སྣང་ལ་ལྟ་སྟངས་ཧར་རེ་བཞག །ཤེས་པ་ཀ་དག་གི་ངང་ལ་འཇོག་པ་ནི། ཡེ་ཤེས་ཆེན་པོའི་རླུང་སྦྱོར་ཞེས་ཀྱང་བྱ། སེམས་དང་རིག་པ་དབྱེ་བའི་རླུང་སྦྱོར་ཞེས་ཀྱང་བྱ། རླུང་སྦྱོར་འདིའི་དུས་སུ་སྐེད་པ་ཅུང་ཟད་ཉེག་བྱས། ལྟེ་བ་ཐད་ཀར་རྒྱངས། རྔུབ་དགང་རླུང་གི་ལས་ཐམས་ཅད་ཀྱི་དུས་སུ་ཡང་ཕྱིར་རྒྱངས་པའོ། །རྩེ་གཅིག་ཏུ་འདི་ལ་གནད་དུ་བསྣུན་པས། སྟེང་འོག་གི་རླུང་ཡང་ངང་གིས་འདྲེན། འདི་ཡང་དུས་ཐམས་ཅད་དུ་ལྟེ་བ་ཐད་ཀར་རྒྱངས་པས། དྲན་པའི་རྟེན་དུ་ཡང་ལྟེ་བ་རྒྱངས་པས་བྱེད། ཡི་དམ་


JLAZ012_Page_0195
[མ་དཔེ་གཟིགས་ན་འདིར་གནོན།]

གྱི་ལྷ་བསྒོམ་ན་ཡང་ལྟེ་བའི་ཐད་ཀར་རྒྱངས་ཏེ་སྒོམ། སྙིང་པོ་བཟླས་བརྗོད་བྱེད་ཀྱང་ལྟེ་བ་ཐད་ཀར་རྒྱངས་པའི་ངང་ནས་འདྲེན། ཆོས་ཉིད་རྣམ་པར་མི་རྟོག་པའི་ཡེ་ཤེས་བསྒོམ་ཀྱང་ལྟེ་བ་ཐད་ཀར་རྒྱངས། འགྲོ་འཆག་ཉལ་འདུག་ལ་སོགས་སྤྱོད་ལམ་རྣམ་པ་བཞི་གང་གི་དུས་སུ་ཡང༌། གསང་བ་ཡེ་ཤེས་ཆེན་པོ་འདི་དང་མ་བྲལ་བར་བྱའོ། །ཞེས་གསུངས་པས་འདི་ལྟ་བུའི་བར་རླུང་ནི་སེམས་སྦྱོང་གི་སྐབས་ཙམ་དུ་ཡང་མ་ཟད་བྱང་ཆུབ་བསྒྲུབ་པའི་ལམ་གྱི་སྟེགས་ཐམས་ཅད་ཀྱི་མཐུན་རྐྱེན་ཕུན་སུམ་ཚོགས་པའི་གནད་ཆེན་པོར་ཡང་རིག་པར་བྱའོ། །དེ་ལྟར་རྣམ་པར་མི་རྟོག་པ་གསུམ་གྱི་སྒོ་ནས་སེམས་སྦྱངས་པས། ཤེས་པ་གར་གཏད་དུ་ཟིན་ཅིང་རྟོག་མེད་ནམ་མཁའ་ལྟ་བུའི་ངང་དུ་ཡུན་ཇེ་རིང་ལ་གནས་པ་ནི་རང་རང་གིས་གོམས་པའི་ཚད་དོ། །འདི་ལྟ་བུའི་སེམས་སྦྱོང་བདུན་པོ་ནི། ཁ་ཙམ་ཚིག་ཙམ་དུ་མ་སོང་བར་འཁོར་བའི་རང་བཞིན་ཁྲི་མུན་དུ་ཆུད་པ་ལྟ་བུའི་སྡུག་བསྔལ་དང་སྐྱོ་ཤས་ཡིད་ལ་དྲན་པས་སྤྱིར་དུས་རྣམས་ཐམས་ཅད་དང༌། ཁྱད་པར་སྨིན་འཁྲིད་ལ་སོགས་པའི་ཚེ་ཞག་ཉི་ཤུ་རྩ་གཅིག་གམ། བཅུ་བཞིའམ་ཐ་ནའང་བདུན་ལ་སོགས་པར་ཉམས་སུ་བླངས་ཏེ་རྒྱུད་ལ་འདྲེས་པར་མ་བྱས་ན་ལུང་ཉན་པ་ལྟ་བུས་བློ་ལས་སུ་རུང་བར་མི་


JLAZ012_Page_0196
[མ་དཔེ་གཟིགས་ན་འདིར་གནོན།]

འགྱུར་ཏེ། ཨོ་རྒྱན་ཆེན་པོས། དེ་ལྟར་ཚིག་ཙམ་མ་ཡིན་པར་འཁོར་བའི་གནས་ཚུལ་འགྱུར་ཞིང་མི་རྟག་སྡུག་བསྔལ་བའི་རང་བཞིན་དང༌། སྐྱོ་ཤས་དང༌། ངེས་འབྱུང་ཉིད་དང་བསྲེས་ནས་ཉམས་སུ་མ་བླངས་ན། བཀྲེས་སྐོམ་གྱིས་ཉེ་བར་གདུངས་བ་དག་ལ། ཟས་སྐོམ་ལག་ན་ཡོད་པའམ། ལོངས་མ་སྤྱད་ན་དེ་ཉིད་ལ་ཕན་པར་ཤེས་པ་ཙམ་གྱིས་མི་ཡོང་ཞིང༌། ངེས་པར་བཟའ་བཏུང་བྱེད་དགོས་པ་བཞིན། གོ་དོན་ཉམས་སུ་བླངས་པས་འཁོར་བ་ཁྲི་མུན་ནང་དུ་ཆུད་པ་དང་འདྲ་བ་གོ་ནས། བློ་འཕྲལ་དང༌། ཡུན་གྱི་བདེ་བ་ཁོ་ན་ལ་གོ་འཕོ་བའོ། །ཞེས་གསུངས་ལ། རིམ་པ་དེ་ལྟ་བུས་སློབ་མའི་རྒྱུད་ཤིན་ཏུ་དུལ་ཞིང་ལས་སུ་རུང་བར་གྱུར་པའི་ཚེ། ཐུན་མོངས་མ་ཡིན་པའི་སྔོན་འགྲོ་སྐྱབས་འགྲོ་ལ་སོགས་པ་དྲུག་དང༌། ཁྱད་པར་ཅན་གྱི་སྔོན་འགྲོ་འཁོར་འདས་རུ་ཤན་དབྱེ་བ་ལ་སོགས་པར་གོ་ཕྱེ་སྟེ། དངོས་གཞིའི་ལམ་འགྲོ་བའི་ཁམས་ལ་རྡོ་རྗེ་བཞིའི་རིགས་གནས་པ་བརྡ་ཐབས་རྟེན་འབྲེལ་གྱི་ཆོ་གས་སད་པར་བྱས་ཏེ་སློབ་མའི་རྒྱུད་དག་པ་རབ་འབྱམས་སུ་སྨིན་པར་བྱེད་པའི་དབང་གཟུང་བ་དང་འཛིན་པའི་ཆོས་ཐམས་ཅད་དྲན་རིག་སྐྱེ་འགག་གནས་གསུམ་དང་བྲལ་བའི་རོལ་རྩལ་དུ་ངོ་སྤྲད་དེ་བྱ་རྩོལ་མེད་པ་ཆོས་སྐུའི་དགོངས་པ་ལ་སྦྱོར་བའི་


JLAZ012_Page_0197
[མ་དཔེ་གཟིགས་ན་འདིར་གནོན།]

གྲོལ་བྱེད་ཀྱི་ཁྲིད། སྣང་གྲགས་གློ་བུར་བའི་བག་ཆགས་རང་ཁ་མ་བརྡ་དོན་རྟགས་གསུམ་གྱི་སྒོ་ནས་དཀྱིལ་འཁོར་གསུམ་གྱི་རྣམ་རོལ་དུ་འཆར་བ་སྣང་སྟོང་ཟུང་དུ་འཇུག་པའི་བསྐྱེད་རིམ། རྒྱུད་ལུང་མན་ངག་གསུམ་གྱི་གནད་དོན་རྡོ་རྗེའི་ཚིག་གིས་བཅིངས་པ་མཐའ་དྲུག་ཚུལ་བཞིའི་སྒོ་ནས་གསལ་བར་སྟོན་པའི་བཤད་པ་སྟེ་རང་ལུགས་གསང་སྔགས་སྔ་འགྱུར་བའི་ཆུ་བོ་བཞིའི་བཤད་རྒྱུན་རྣམ་པར་དག་པས་སློབ་མའི་རྒྱུད་རྡོ་རྗེ་གསུམ་གྱི་རང་བཞིན་དུ་བསྒྲུབ་པའི་ཐབས་ལ་མཁས་པར་བྱ་ཞིང༌། དེའི་ཚེ་སློབ་མ་རབ་ཀྱིས་རང་རིག་མི་འགྱུར་བའི་གཟེར་ཐེབས་ནས་དགོངས་པ་ཚད་དུ་ཕྱིན་པ་ན་སྐྱོ་ངལ་དང་ལོག་སྒྲུབ་མཐའ་དག་བཟོད་པར་བྱས་ཏེ་གཞན་དོན་ཕྲིན་ལས་ཀྱི་འཇུག་པ་ལ་སྤྱོད་པའི་རྒྱལ་ཚབ་ཏུ་དབང་བསྐུར་ནས་རྡོ་རྗེ་རྒྱལ་པོའི་བཀའ་གཏད་འབོག །འབྲིང་སྣང་རིག་ཟུང་འཇུག་གི་རྩལ་མ་རྫོགས་ཤིང་སོ་ཀའི་ཆུ་ཕྲན་ལྟར་འཁྲུལ་གྲོལ་རེས་འཇོག་ཏུ་གྱུར་པ་རྣམས་བར་ཆད་དང་དངོས་གྲུབ་ནོར་བ་འདྲ་མིན་ལུང་བསྟན་གྱི་བདུད་ལ་སོགས་རྐྱེན་ཁར་ཤོར་ནས་རང་དོན་མ་འགྲུབ་པར་གཞན་དོན་ལ་རྔམས་ཤིང་ལོག་འཚོ་བྱུང་རྒྱལ་དུ་སྤྱོད་པས་འབྲེལ་ཚད་ངན་སོང་ལ་སྦྱོར་བ་དམྱལ་བའི་ལམ་མཁན་དུ་མི་འཕྱན་པར་བསྒྲུབ་པའི་རྒྱལ་མཚན་བཙུགས་ནས་དོན་གཉིས་མཉམ་སྒྲུབ་བྱེད་པའི་ལུང་ཕོག །


JLAZ012_Page_0198
[མ་དཔེ་གཟིགས་ན་འདིར་གནོན།]

ཐ་མའང་ཟླ་དགའ་དང་ཟས་འཚོལ་ལྟོ་ཕྱིར་གནམ་རྡིབ་ལ་སོགས་པའི་སྤྱོད་པ་མི་རིགས་པས་བསྟན་པ་སྤྱི་དང་བྱེ་བྲག་གི་མིག་ལྟོས་ལ་གནོད་པའི་བློ་ངན་ལང་ཤོར་ཆོས་དྲེད་ཉམས་ཆག་གི་གོང་བུར་མ་སོང་བར་ཞི་དུལ་ཆོས་མཐུན་གྱི་སྤྱོད་པས་གཞན་སྣང་དང་བ་འདྲེན་པའི་སྤྱོད་ལམ་དང་ཆོས་སྤྱོད་ལ་བསླབ་པའི་འགག་བསྡམས་པ་སོགས་མདོར་ན་སློབ་མ་རྗེས་སུ་འཛིན་པའི་ཐབས་དང་རྟེན་འབྲེལ་ལ་མཁས་ཤིང་སོ་སོ་ཐར་པ་ནས་བཟུང་རྡོ་རྗེ་ཐེག་པའི་བར་གྱི་དམ་ཚིག་དང་སྡོམ་པའི་གནས་ངེས་པའི་གནང་བཀག་གི་རིམ་པ་ཕྱེད་པས་རྒྱལ་བའི་གདུང་འཚོབ་པ་ལ་དཔའ་བ་པཎ་ཆེན་བི་མ་ལ་དང༌། ཨོ་རྒྱན་སངས་རྒྱས་གཉིས་པ། ཀུན་མཁྱེན་ཆོས་ཀྱི་རྒྱལ་པོ། མངའ་རིའི་མ་ཧཱ་པཎྜི་ཏ་ལ་སོགས་པ་ལྟ་བུ་ནི་རྡོ་རྗེ་འཛིན་པའི་སྤྱོད་པའི་དཔེར་འོས་སུ་གྱུར་པ་སྟེ་ཐབས་དེ་ལྟ་བུ་ལ་རྨོངས་པ་དག་ནི་བསྟན་པའི་སྲོག་ཤིང་ལ་སོགས་པའི་མིང་བཟང་པོར་ཁུངས་ཕྱུང་ཡང་ཉོན་མོངས་པ་དང་གཏི་མུག་དང་ལོག་པའི་ལམ་དུ་རང་ཉིད་འཇུག་ཅིང་བསོད་ནམས་དམན་པ་དག་ཀྱང་སྒྲོལ་བ་ཙམ་དུ་ཟད་དེ། དེའི་ཕྱིར་རྒྱུད་དོན་རྒྱ་མཚོའི་དགོངས་པ་ཕྱིན་ཅི་མ་ལོག་པར་བཀྲལ་བ་འདི་ལྟ་བུའི་རིགས་པས་གསང་སྔགས་སྔ་འགྱུར་གྱི་བསྟན་པའི་རྒྱལ་མཚན་ཕྲག་པར་འཛིན་པར་འཚལ་ཅེས་རྡོ་རྗེའི་རིག་འཛིན་དམ་པ་གྲགས་པ་དང༌། སྦས་


JLAZ012_Page_0199
[མ་དཔེ་གཟིགས་ན་འདིར་གནོན།]

པ་ཇི་སྙེད་མཆིས་པ་རྣམས་ལ་རློམ་སེམས་མེད་པའི་ཡིད་ཀྱིས་གསོལ་བ་བཏབ་པ་སྟེ། དེ་སྐད་དུ་རྫོགས་པ་ཆེན་པོའི་རྒྱུད་ལས། ཁྱད་པར་ཐེག་པ་འདི་ཉིད་ཀྱི། །ཆོས་སྤྱོད་ལག་ལེན་ཀུན་ལ་བསླབ། །འཁོར་བའི་བྱ་བ་འབྲེལ་འཁྲིས་ཀུན། །ཐབས་ཀྱིས་སྤང་ཞིང་དལ་དུ་གཞུག །སྤྲོས་བཅས་ལ་སོགས་དབང་བསྐུར་ནས། །དེ་ཡི་ལྷ་ལ་བསྙེན་སྒྲུབ་འཇུག །ཐེག་པ་རིམ་གྱིས་དབང་བསྐུར་ནས། །གཡའ་གངས་དུར་ཁྲོད་དབེན་པ་རུ། །ལུས་ངག་རུ་ཤན་དབྱེ་རུ་གཞུག །ཐོས་པའི་སྒྲོ་འདོགས་ཆོད་དུ་གཞུག །སྤྲོས་མེད་ལ་སོགས་དབང་བསྐུར་ནས། །དུས་དང་མཐུན་པའི་སྤྱོད་པ་བསླབ། །ལུང་དང་མཐུན་པའི་བསླབ་བྱ་བྱ། །དཔེར་ན་བུ་གཅིག་ཆུང་མ་དེ། །མ་ཡིས་ཇི་ལྟར་གསོ་བ་ལྟར། །བརྩེ་བའི་གདུང་ཤུགས་ཆེན་པོ་ཡིས། །དམ་ཚིག་བདུད་རྩིའི་ནུ་མ་བླུད། །ཆོས་རྣམས་མ་ལུས་ཐམས་ཅད་ཀུན། །རྩ་བ་ཐིག་ལེ་གཅིག་ལས་གྱེས། །གཅིག་པོ་ཐུགས་རྗེའི་རྩ་བ་ཡིན། །ཤེས་རབ་ཡེ་ཤེས་དབང་བསྐུར་ནས། །དབང་པོ་དང་འཚམ་རིག་པ་སྦྱིན། །དྲེད་མོ་ལྟ་བུའི་སྤྱོད་པ་བསླབ། །རང་ཡང་སློབ་བུའི་བློ་བསྐང་ཕྱིར། །དངོས་བསྟན་རྟགས་ཚད་དབྱུང་བར་བྱ། །ཚིག་དབང་རྩལ་གྱི་དབང་བསྐུར་ནས། །སྤྲོས་བཅས་བྱ་བ་ཀུན་བོར་ལས། །སྤྲོས་མེད་ངང་དེར་ལྷོད་ཀྱིས་


JLAZ012_Page_0200
[མ་དཔེ་གཟིགས་ན་འདིར་གནོན།]

གློད། །རི་དྭགས་ལྟ་བུའི་སྤྱོད་པ་བསླབ། །ངེས་དོན་སྙིང་པོའི་ངོ་སྤྲོད་གདབ། །རང་རིག་མི་འགྱུར་གཟེར་ཐེབས་ནས། །རྒྱལ་ཚབ་དག་ཏུ་དབང་བསྐུར་ལ། །འགྲོ་དོན་གྱིས་ཞེས་བཀའ་ལུང་སྦྱིན།།རང་ཉིད་ཏིང་ངེ་འཛིན་ལ་བཞུགས། །གཞན་དོན་བྱང་ཆུབ་སེམས་དཔའ་ཡི། །བསླབ་བྱ་ཐམས་ཅད་བསླབ་པར་བྱ། །དང་པོ་སློབ་མས་དམ་ཚིག་གི །རྣམ་དབྱེ་བསྲུང་མཚམས་མ་ཤེས་པར། །བླ་མས་དམ་ཚིག་སུམ་གཉིས་སྲུང༌། །རགས་པ་ཤེས་ན་སུམ་ཆ་སྟེ།། ཞིབ་པར་ཤེས་ན་གསུམ་གཉིས་སོ། །སློབ་མ་ཉིད་ཀྱིས་བསྲུང་བར་བྱ། །དུས་དང་གནས་སྐབས་ཡུལ་ཉིད་དུ། །གནང་བཀག་རིམ་པ་མ་ལུས་པ། །བླ་མས་སློབ་བུ་འཁྲུད་པར་བྱ། །དེ་ཡིས་ཡོན་ཏན་བསམ་མི་ཁྱབ། །སངས་རྒྱས་ཀུན་གྱི་གདུང་མི་ཆད། །དུས་གསུམ་སངས་རྒྱས་ཐམས་ཅད་ཀྱང༌། །དེ་ལྟར་བསླབ་པས་རིམ་གྱིས་བྱུང༌། །རྒྱལ་ཚབ་སློབ་བུ་གཅིག་ཚར་ནས། །འཁོར་བ་དོང་ནས་སྤྲུགས་པར་འགྱུར། །ཁམས་གསུམ་སེམས་ཅན་མ་ལུས་པ། །འདྲེན་པའི་ལྕགས་ཀྱུ་དེ་ལས་འབྱུང༌། །དེ་ཕྱིར་སློབ་མ་བླ་མ་གཉིས། །ཕན་ཚུན་རྟེན་འབྲེལ་མ་འཕྱུགས་ཤིག །ཅེས་གསུངས་པའི་ཕྱིར་རོ། །དེ་ལྟར་ཆོས་ཚུལ་ཐར་པའི་གྲུ་གཟིངས་བཤད་གྲོལ་མན་ངག་ལ་བརྟེན་ནས། །བདག་བློའི་རྣམ་དཔྱོད་དེད་དཔོན་གཞོན་ནུས་རྣམ་མཁྱེན་རིན་ཆེན་གླིང་མཆོག་ཏུ། །སྐྱོ་དུབ་ངལ་བ་མཐའ་དག་སྤངས་ཏེ་ལྷག་བསམ་ཁུར་གྱིས་བསྐྱོད་པ་ན། །རྒྱལ་དང་


JLAZ012_Page_0201
[མ་དཔེ་གཟིགས་ན་འདིར་གནོན།]

དེ་སྲས་དབྱིངས་ནས་དགྱེས་ཏེ་དོན་གཉིས་གྲུབ་པའི་ནོར་བུ་བྱིན། །ཀྱེ་ཧོ་དལ་འབྱོར་རིན་ཆེན་ཉིན་སྐར་ཙམ། །གལ་ཏེ་རྙེད་ཀྱང་རླུང་ནང་མར་མེ་ལྟར། །སྐད་ཅིག་ཉིད་ལ་མི་རྟག་འདི་བསམས་ན། །སྐྱེ་བོ་ཕལ་ཆེར་སྨྱོན་པའི་དེད་དཔོན་འདྲ། །ཆོས་ལ་འཇུག་པའི་རྩ་བ་ངེས་འབྱུང་སྟེ། །དེ་ཡི་ཐར་པར་རེངས་པའི་ཤེས་རྒྱུད་ལ། །སེམས་སྦྱོང་གནད་ཀྱི་ཕྲུ་སློག་མ་བྱས་ན། །འཆི་ཁར་བྲང་ལག་འཐབ་ཚེ་འགྱོད་ཀྱང་འཕྱིས། །ལས་རླུང་ཡེ་ཤེས་ཁམས་སུ་གནས་གྱུར་ཚེ། །འཁོར་འདས་གཉིས་སྣང་ཟད་དང་ཆབས་ཅིག་པར། །ཆོས་སྐུའི་རྒྱལ་ས་ཟིན་པའི་རིག་འཛིན་ལ། །སེམས་སྦྱོང་རྟོག་པའི་དྲ་བ་དགོས་མིན་ཡང༌། །དྲ་བའི་སྣོད་དང་གླིང་བུའི་སྟོང་ཆེན་སྒྲས། །ཕུར་བུའི་གྲུབ་མཐར་འཁྱོགས་པའི་རིགས་ཅན་དང༌། །འཁོར་བ་བདེ་བར་འཛིན་པའི་བྱིས་པ་རྣམས། །བརྩེ་བའི་སེམས་ཀྱིས་མ་བཟོད་ལས་གཞན་ཅི། །རྟོག་གེའི་རྩལ་བཤད་སྨིག་རྒྱུའི་ཆུ་ཀླུང་གིས། །རྨོངས་ཆེན་གླང་པོའི་ཡིད་དབང་འཕྲོག་པའི་ཚིག །མ་ཡིན་ལུང་དོན་རྒྱ་མཚོ་དོན་རྒྱུད་ཀྱི། །བྱིན་རླབས་གྲུ་གཟིགས་གསར་པས་བརྒལ་བའི་གཏམ། །སྔོན་བྱོན་མཁས་གྲུབ་ཟླ་བ་དབྱིངས་སུ་གཟིམས། །ལུང་རྟོགས་བཤད་སྒྲུབ་ཉི་མ་ཆུ་ལྟར་ཕྱོགས། །རྟ་ནོར་གཟི་བརྗིད་འགྲན་པའི་གཟའ་སྐར་ཤར། །རྒྱལ་བསྟན་མུན་པའི་སྨག་ལ་འོ་རེ་རྒྱལ། །ཐེག་རིམ་དགུ་ཡི་ས་མང་ནས་མྱོས་པའི། །མཛོད་ཆེན་བདུན་དང་ཤིང་རྟའི་རྒྱང་གླུ་ཡིས། །


JLAZ012_Page_0202
[མ་དཔེ་གཟིགས་ན་འདིར་གནོན།]

སྔ་འགྱུར་བསྟན་སྲོག་འཛིན་པའི་ཀུན་མཁྱེན་དེའི། །ལུང་རྟོགས་ཁྱད་ནོར་དེང་སང་ཁོ་བོས་འཛིན། །དེ་ཕྱིར་འདི་ཡི་ཉེ་བརྒྱུད་གང་ཞེ་ན། །ཁོ་བོའི་གཙུག་ན་དྲི་མེད་འོད་ཟེར་བཞུགས། །སྔ་འགྱུར་སྤྱི་དང་ཁྱད་པར་སྙིང་ཐིག་གི། །བསྟན་པའི་བདག་པོ་གང་ལས་དམིགས་སུ་མེད། །གདོད་མའི་མགོན་དེ་མི་ཡི་བརྫུར་ཞུགས་ནས། །ལྗོངས་འདིར་བསྟན་པའི་སྙིང་པོ་གསལ་ལོ་ཞེས། །མཚོ་སྐྱེས་རྡོ་རྗེས་ལུང་གིས་དབང་བསྐུར་ཞིང༌། །རིག་འཛིན་ཐམས་ཅད་དགོངས་པ་གཅིག་ཏུ་མཐུན། །དང་པོ་འཁོར་བའི་འཇིགས་པས་བས་མཐར་ཕྱོགས། །བར་དུ་ལས་འབྲས་བསླུ་མེད་འཕྲང་ལ་བཤར། །ཐ་མར་རྟོགས་པས་འཁོར་གསུམ་བདེན་མེད་དུ། །ཤེས་འདི་གྲུབ་ཐོབ་སྤྱི་ཡི་རྣམ་ཐར་ཡིན། །སྙིང་ཏིག་རིན་ཆེན་ཡི་གེ་རྣམ་ལྔ་ལས། །ཟངས་ཡིག་ཅན་གྱི་དགོངས་པ་སེམས་སྦྱོང་བདུན། །རྒྱ་ཆེར་བཀྲལ་བའི་བསོད་ནམས་གང་ཡིན་པ། །རྣམ་མཁྱེན་རིན་ཆེན་ཐོབ་པའི་རྒྱུ་རུ་བསྔོ། །བདག་བློའི་པད་ཚལ་དྲི་མེད་ཉི་མའི་འོད་ཟེར་གྱིས། །བསྐུལ་བས་ཐུན་མོང་ལམ་གྱི་འཇུག་སྒོའི་སྐྱེད་མོའི་ཚལ། །ཤིན་ཏུ་བཀོད་མཛེས་ཐ་གྲུ་ཡངས་པའི་བསྟི་གནས་འདི། །རིང་པོར་གནས་ནས་དོན་གཉེར་མགྲོན་པོ་དགའ་བར་ཤོག །ཅེས་རིན་ཆེན་ཟངས་ཀྱི་ཡི་གེ་ཅན་གྱི་དགོངས་པ། རྗོགས་པ་ཆེན་པོའི་ཁྲིད་ཡིག་སྤྱི་དང་ཁྱད་པར་ཐུན་མོང་གི་སྔོན་འགྲོར་འཇུག་པ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་


JLAZ012_Page_0203
[མ་དཔེ་གཟིགས་ན་འདིར་གནོན།]

བ་འདི་ནི་རང་བྱུང་པདྨའི་བསྒྲུབ་གནས་སུ་སྙིང་པོའི་སྒྲུབ་པ་ལ་གཞོལ་བའི་ཚེ་ཀུན་མཁྱེན་དྲི་མེད་འོད་ཟེར་གྱི་ཡེ་ཤེས་ཀྱི་སྐུ་དང་ལན་གསུམ་མཇལ་བའི་བར་པ་ལ། དཔེ་ཆ་བམ་པོ་ཞིག་གནང་ནས་འདིས་ཤིང་རྟ་ཆེན་མོ་ན་གབ་པའི་ཚུལ་དུ་ཡོད་པ་མཐའ་དག་གསལ་བ་ཡོད་སོགས་ཀློང་ལྔའི་གསང་མཛོད་བྱིན་གྱིས་བརླབས་པ་ལ་བརྟེན་ཟིན་བྲིས་སུ་བགྱིས་ཏེ་ལོ་ཤས་རྩིས་རྒྱར་བཞག་པའི་ཐོག་མངའ་བདག་ཉང་ཉི་མ་འོད་ཟེར་གྱི་རིགས་རུས་ཆོ་འབྲང་གིས་བསྲུངས་པའི་ཀོང་སྨྱོན་རིག་པའི་དཔའ་བོ་དང༌། དག་པའི་སྣང་བ་ཅན་ཝ་གིནྡྲའི་མིང་ཅན་གྱིས་དོན་གཉེར་ཆེན་པོས་བསྐུལ་བའི་རྟེན་འབྲེལ་གྱི་ཕོ་ཉས་མཚམས་སྦྱར་བ་ལས། སངས་རྒྱས་གཉིས་པ་སློབ་དཔོན་ཆེན་པོ། ཉི་སྒྲོལ་ཞེས་པ་ཤིང་ཕོ་སྤྲེའུའི་ལོར་སིནྡྷུའི་རྒྱ་མཚོར་ཆུ་སྐྱེས་གཞོན་ནུའི་སྦུབས་ལས་གྲོལ་ནས་ཉིས་སྟོང་དྲུག་བརྒྱ་སུམ་ཅུ་སོ་བདུན། ཕུར་བུ་ས་སྤྲེལ་ལོར་རིག་འཛིན་རྡོ་རྗེ་ཆོས་ཀྱི་རི་རྒྱལ་མ་ལ་ཡའི་རྩེ་མོར་ལྷ་ཀླུ་གནོད་སྦྱིན་མིའི་རིག་འཛིན་དེ་དམ་པའི་རིགས་ཅན་དྲ་མ་ལྔ་ལ་གསང་རྒྱུད་རྒྱ་མཚོའི་ཆོས་འཁོར་བསྐོར་ཞིང་ཟ་ཧོར་རྒྱལ་པོ་ཨིནྡྲ་བྷུ་ཏིའི་ཕོ་བྲང་གི་ཡང་སྟེང་ཏནྟྲའི་གླེགས་བམ་གྱི་ཆར་པ་ཕབ་ནས་ཉིས་སྟོང་དྲུག་བརྒྱ་དང་འདོད་པའི་གྲངས་ལྡན། ཁྲོ་བོ་ཤིང་གླང་ལོར་གསང་བདག་དཔའ་བོས་རྒྱལ་ཐབས་སྤྱི་བླུགས་ཀྱི་དབང་བསྐུར་བྱིན་པའི་རྒྱུད་ལུང་མན་ངག་ཀུན་


JLAZ012_Page_0204
[མ་དཔེ་གཟིགས་ན་འདིར་གནོན།]

གྱི་བསྟན་པའི་བདག་པོ་མི་ཕམ་མགོན་གྱི་སྤྲུལ་པའི་སྣང་བརྙན་དགའ་རབ་རྡོ་རྗེའི་ཟློས་གར་བསྒྱུར་ནས་ཉིས་སྟོང་ཉིས་བརྒྱ་དགུ་བཅུ་གོ་དྲུག །རྣམ་གནོན་ལྕགས་འབྲུག་པཎ་ཆེན་ལྔ་བརྒྱའི་གཙུག་གི་རྒྱན་གྱུར་འཇའ་ལུས་སྐུ་བརྙེས་བི་མ་ལ་མི་ཏྲ་འཁྲུངས་ནས་ཆིག་སྟོང་བདུན་བརྒྱ་བཞི་བཅུ་རྩ་གཅིག །ཕུར་བུ་ས་སྤྲེལ་ངེས་པ་དོན་གྱི་ཐམས་ཅད་མཁྱེན་པ་དཔལ་བསམ་ཡས་པ་ཀློང་གསལ་དྲི་མེད་དམ། ཀུན་མཁྱེན་ངག་གི་དབང་བོ་འཁྲུངས་ནས་བཞི་བརྒྱ་ལྔ་བཅུ་ང་གསུམ་འདས་ཤིང༌། རབ་བྱུང་བཅུ་གསུམ་པའི་ནང་ཚན་ལྕགས་མོ་སྦྲུལ་གྱི་ལོ། རྟ་བདུན་དབང་པོ་སྡིག་པའི་ཁྱིམ་ན་གནས་པའི་ཚེ། གསུང་གི་དབེན་གནས་བསམ་ཡས་མཆིམས་ཕུའི་བྲེ་གུ་དགེའུའི་རང་བྱུང་བྲག་གི་ཁང་མཛེས་ག་ལ་བ་དེར་བྱ་བྲལ་ཆོས་རྗེ་མཁྱེན་བརྩེའི་འོད་ཟེར་གྱིས་གྲུབ་པར་བགྱིས་པ་ཐོག་མཐའ་བར་གསུམ་དུ་དགེ་བར་གྱུར་ཅིག། །།

རྫོགས་པ་ཆེན་པོ་ཀློང་ཆེན་སྙིང་ཏིག་གི་ཐུན་མོང་གི་སྔོན་འགྲོ་ཁྲིད་ཀྱི་ལག་ལེན་ལ་འདེབས་ལུགས།


JLAZ012_Page_0206
[མ་དཔེ་གཟིགས་ན་འདིར་གནོན།]

རྫོགས་པ་ཆེན་པོ་ཀློང་ཆེན་སྙིང་ཏིག་གི་ཐུན་མོང་གི་སྔོན་འགྲོ་ཁྲིད་ཀྱི་ལག་ལེན་ལ་འདེབས་ལུགས་བཞུགས། །


JLAZ012_Page_0207
[མ་དཔེ་གཟིགས་ན་འདིར་གནོན།]

སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །འདིར་རྫོགས་པ་ཆེན་པོ་ཀློང་ཆེན་སྙིང་ཏིག་གི་ཐུན་མོང་གི་སྔོན་འགྲོ་ལག་ལེན་དུ་དྲིལ་ནས་ཁྲིད་ཀྱི་ལུགས་སུ་འདེབས་པའི་ཚུལ་ལ་དལ་འབྱོར་རྙེད་དཀའ་བ། ཚེ་མི་རྟག་པ། འཁོར་བའི་ཉེས་དམིགས། ལས་རྒྱུ་འབྲས། ཐར་པའི་ཕན་ཡོན། བཤེས་གཉེན་བསྟེན་པ་དང་དྲུག་ལས། དང་པོ་ལའང༌། ངོ་བོ་དལ་བ་བསམ་པ། ཁྱད་པར་འབྱོར་བ་བསམ་པ། རྙེད་དཀའི་དཔེ་ལ་བསམ་པ། གྲངས་ཀྱི་ཁྱད་པར་བསམ་པ་དང་བཞི་ལས། དང་པོ་ནི། མི་ཁོམ་པའི་གནས་བརྒྱད་དུ་སྐྱེས་ན་ཆོས་བྱེད་པའི་མཐུ་མེད་པས་དལ་བ་མ་ཡིན་པའི་ཚུལ། དམྱལ་བར་སྐྱེས་ན་ཚ་


JLAZ012_Page_0208
[མ་དཔེ་གཟིགས་ན་འདིར་གནོན།]

གྲང་གི་སྡུག་བསྔལ་ཁོར་མོར་སྤྱོད་པས་ཆོས་བྱེད་དུ་མི་ཁོམ། ཡི་དྭགས་ནི་བཀྲེས་སྐོམ་ཀྱི་སྡུག་བསྔལ་ལ་སྤྱོད་པས་ཆོས་བྱེད་དུ་མི་ཁོམ། དུད་འགྲོ་ནི་བཀོལ་སྤྱོད་དང་ཕན་ཚུན་འཚེ་བའི་སྡུག་བསྔལ་ལ་སྤྱོད་པས་ཆོས་བྱེད་དུ་མི་ཁོམ། ལྷ་ཚེ་རིང་པོ་ནི་འདུ་ཤེས་མེད་པའི་ངང་དུ་དུས་དྲོན་པས་ཆོས་བྱེད་དུ་མི་ཁོམ། ཡུལ་མཐའ་འཁོབ་ཏུ་སྐྱེས་ན་སངས་རྒྱས་ཀྱི་བསྟན་པ་མེད་པས་ཆོས་བྱེད་དུ་མི་ཁོམ། མུ་སྟེགས་བྱེད་དམ་དེ་དང་བསམ་པ་ཕྱོགས་མཐུན་པའི་སྐལ་བ་ངན་པར་སྐྱེས་ན་རང་རྒྱུད་ལོག་ལྟས་བསླད་པས་ཆོས་བྱེད་དུ་མི་ཁོམ། མུན་པའི་བསྐལ་པ་ལ་སྐྱེས་ན་དཀོན་མཆོག་གསུམ་གྱི་སྒྲ་མི་གྲག་ཅིང་དགེ་སྡིག་ངོ་མི་ཤེས་པས་ཆོས་བྱེད་དུ་མི་ཁོམ། ལྐུགས་


JLAZ012_Page_0209
[མ་དཔེ་གཟིགས་ན་འདིར་གནོན།]

པར་སྐྱེས་ན་རྣམ་པར་ཤེས་པ་ལས་སུ་མི་རུང་བས་ཆོས་བྱེད་དུ་མི་ཁོམ། དེ་ལྟར་བརྒྱད་དུ་མ་སྐྱེས་པ་ལ་ཁོམ་པ་ཞེས་བྱ་སྟེ་ཆོས་བྱེད་པའི་སྐབས་ཡོད་པས་དལ་བའི་སྒྲ་ཞུགས་པའོ། །དེའི་ཕྱིར་སྐྱབས་སུ་འགྲོ་བ་དང་སེམས་བསྐྱེད་ནས་ད་རེས་རང་རྒྱུད་རྟེན་གྱི་མི་ཁོམ་པའི་གནས་བརྒྱད་དུ་མ་སྐྱེས་པ་ལ་དགའ་བ་སྒོམ་ཞིང༌། སླད་ནས་འདི་འདྲ་བའི་དལ་བ་བརྒྱད་ཀྱི་ངོ་བོ་ནི་ཤིན་ཏུ་རྙེད་པར་དཀའ་བས་ད་རེས་ཆོས་ལ་མ་འབད་ན་བདག་གི་མི་ལུས་དོན་མེད་པའོ་སྙམ་དུ་ཡང་ནས་ཡང་དུ་བསམ་ཞིང༌། དགེ་བ་སེམས་ཅན་ཐམས་ཅད་ལ་བསྔོ་བ་ནི་འོག་མ་རྣམས་ལའང་འགྲེའོ། །ཞར་ལ་འཕྲལ་བྱུང་རྐྱེན་གྱི་མི་ཁོམ་པ་རྣམ་པ་བརྒྱད་དང༌། རིས་ཆད་བློའི་མི་ཁོམ་པ་བརྒྱད་ཀྱིས་རང་རྒྱུད་ཆུད་ཟོས་པ་ལའང་ཞིབ་ཏུ་བརྟགས་ནས་རང་མཚང་གདོན་པ་ནི་དོན་ཆེན་པོ་དང་ལྡན་པ་ཡིན་པས་ཡིད་བཞིན་རིན་པོ་ཆེར། དུག་ལྔ་འཁྲུགས་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་བརྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱི་མི་ཁོམ་རྣམ་པ་བརྒྱད། །ཅེས་པ་དང༌། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་བྲལ། །སྡོམ་དང་དམ་ཚིག་འཆལ་བ་ཞེས་བྱ་སྟེ། །རིས་ཆད་བློ་ཡི་མི་ཁོམ་རྣམ་པ་


JLAZ012_Page_0210
[མ་དཔེ་གཟིགས་ན་འདིར་གནོན།]

བརྒྱད། །ཅེས་དང༌། དེ་ལ་བརྒྱད་ཚན་གཉིས་པོ་ནི་ཤིན་ཏུའང་འབྱུང་ཉེ་བ་ཡིན་པས། དེ་དག་ལ་བླང་དོར་མ་བགྱིས་ན་དལ་བའི་ངོ་བོ་ཙམ་ཐོབ་ཀྱང་ཆོས་ཀྱི་བྱ་བ་ལ་མི་ཁོམ་པའི་གནས་སུ་ལྷུང་བར་འགྱུར་བས་མི་ཚེ་སོས་དལ་དུ་རྒ་བའི་དལ་བ་ཙམ་པོ་བ་ཉིད་དུ་རིག་པར་བྱའོ།། །།གཉིས་པ་རང་འབྱོར་ལྔ་དང་གཞན་འབྱོར་ལྔ་ལས། དང་པོ་རང་འབྱོར་ནི། མི་ལུས་མ་ཐོབ་ན་ཆོས་དང་མི་མཇལ་བ་ལས། ད་རེས་མིའི་ལུས་རྟེན་གྱིས་འབྱོར་པ་དང༌། དེའང་ཆོས་མེད་པའི་ཡུལ་མཐའ་འཁོབ་ལ་སོགས་པར་སྐྱེས་ན་ཆོས་དང་མི་མཇལ་བ་ལ། ད་རེས་ཆོས་ཚིགས་ཀྱི་ཡུལ་དབུས་སུ་སྐྱེས་པས་ཡུལ་གྱིས་འབྱོར་པ་དང༌། དབང་པོ་མ་ཚང་ན་ཆོས་ཀྱི་གེགས་སུ་འགྱུར་པ་ལས། ད་རེས་དེ་འདྲའི་སྐྱོན་དང་བྲལ་བས་དབང་པོའི་ཡོན་ཏན་གྱིས་འབྱོར་པ་དང༌། ལས་ཀྱི་མཐའ་ལོག་པ་སྟེ་རྟག་ཏུ་མི་དགེ་བ་ལ་སྤྱོད་ན་ཆོས་དང་རྒྱབ་ཀྱིས་ཕྱོགས་པ་ལས། ད་རེས་དགེ་བ་ལ་མོས་པས་བསམ་པའི་ཁྱད་པར་གྱིས་འབྱོར་པ་དང༌། དད་པའི་གནས་བསྟན་པ་ལ་མ་དད་ན་ཆོས་ལ་ཡིད་མི་ཕྱོགས་པ་ལས། ད་རེས་བློ་ཆོས་ལ་ཕྱོགས་ནུས་པས་དད་པའི་འབྱོར་པ་སྟེ། ལྔ་པོ་ནི་རང་ངོ་ལ་ལྟོས་ནས་ཚང་དགོས་པས་རང་འབྱོར་ལྔ་ཞེས་བྱའོ། །གཉིས་པ་གཞན་འབྱོར་ནི།


JLAZ012_Page_0211
[མ་དཔེ་གཟིགས་ན་འདིར་གནོན།]

སངས་རྒྱས་འཇིག་རྟེན་དུ་བྱོན་པའི་སྒྲོན་བསྐལ་ལ་མ་སྐྱེས་ན་ཆོས་ཀྱི་མིང་ཡང་མེད་པ་ལས། ད་རེས་སངས་རྒྱས་བྱོན་པའི་བསྐལ་པ་དང་ཐུག་པས་སྟོན་པ་ཁྱད་པར་ཅན་གྱིས་འབྱོར་པ་དང༌། བྱོན་ཀྱང་ཆོས་མ་བསྟན་ན་མི་ཕན་པ་ལས། ཆོས་འཁོར་རིམ་པ་གསུམ་བསྟན་པས་ཆོས་ཀྱིས་འབྱོར་པ་དང༌། ཆོས་བསྟན་ཀྱང་བསྟན་པ་ནུབ་ན་མི་ཕན་པ་ལས། ད་ལྟ་བསྟན་པའི་གནས་ཚད་མ་རྫོགས་པས་དུས་ཀྱིས་འབྱོར་པ་དང༌། བསྟན་པ་གནས་ཀྱང་དེ་ལ་མ་ཞུགས་ན་མི་ཕན་པ་ལས། བསྟན་པའི་སྒོར་ཞུགས་པས་རང་གི་སྐལ་པས་འབྱོར་པ་དང༌། ཞུགས་སུ་ཟིན་ཀྱང་མཐུན་པའི་རྐྱེན་དགེ་བའི་བཤེས་གཉེན་གྱིས་མ་ཟིན་ན་ཆོས་ཀྱི་དེ་ཉིད་མི་ཤེས་པ་ལ་དེས་ཟིན་པས་ལྷག་པའི་ཐུགས་རྗེས་འབྱོར་པ་སྟེ། ལྔ་པོ་ནི་གཞན་རྐྱེན་ལ་ལྟོས་ནས་ཚང་དགོས་པས་གཞན་འབྱོར་ལྔ་ཞེས་བྱའོ། །དེ་ལྟར་བཅོ་བརྒྱད་པོ་ཚང་ན་དམ་ཆོས་བསྒྲུབ་པའི་རྟེན་ཡིན་པས་མི་ལུས་རིན་པོ་ཆེ་ཞེས་བྱ་ལ། དེ་ལས་ཅིག་ཤོས་ཙམ་མ་ཚང་ཡང་ཐར་ལམ་རྣལ་མར་འགྲོ་མི་ནུས་པས་མི་ལུས་ཕལ་པ་ཞེས་བྱའོ། །དེའི་ཕྱིར་བདག་ཉིད་ལའང་མི་ལུས་རིན་པོ་ཆེར་འབོད་དུ་རུང་བ་དེ་རིང་གི་གནས་སྐབས་ནས་ཡིན་པ་ལ་དགའ་བ་སྒོམ་ཞིང་ད་དུང་ཡང་ལས་མཐའ་ལོག་པ་དང༌། དད་པ་འགྲིབ་པ་ལ་སོགས་པས་དལ་འབྱོར་གྱི་ཆོས་བཅོ་བརྒྱད་ལས་བྲི་བའི་གནས་སྐབས་ལ་གཟབས་པར་བྱ་བ་ནི་གནད་དུ་ཆེ་ལ། འདི་ལྟ་བུ་ནི་ཕྱིན་ཆད་


JLAZ012_Page_0212
[མ་དཔེ་གཟིགས་ན་འདིར་གནོན།]

རྙེད་པ་མ་ཡིན་པས་ད་རེས་ཐོབ་པའི་དལ་འབྱོར་དོན་ཡོད་པར་མ་བྱས་ན་སླད་དུ་ངན་འགྲོ་ལོག་པར་ལྟུང་དུས་དགེ་སྡིག་ངོ་མི་ཤེས། བདེ་འགྲོ་ཐོབ་ཀྱང་དགེ་བའི་བཤེས་གཉེན་དང་མཇལ་དཀའ་གང་བྱེད་སྡིག་པར་འགྱུར་བས་འཁོར་བའི་སྡུག་བསྔལ་ལས་ཐར་པའི་ཐབས་མེད་པ་དེའི་མཚང་མ་རིག་ན་ང་རེ་བླུན་སྙམ་དུ་སྙིང་ཐག་པ་ནས་བསམ་ཞིང༌། ཡུལ་གྲུ་དང་ཁྲོམ་ཚོགས་ཆེན་པོའི་དབུས་སུའང་བཅོ་བརྒྱད་པོ་མཐའ་དག་ཚང་པའི་མི་ལུས་རིན་པོ་ཆེ་མང་ཉུང་ལེགས་པར་བརྟགས་ནས་རང་གི་ངོ་བོའི་སྒོ་ནས་རྙེད་པར་དཀའ་བ་ཡང་ཡང་བསམ་མོ།། །།གསུམ་པ་རྙེད་དཀའི་དཔེ་ལ་བསམ་པ་ནི། རླབས་ཆེན་པོས་རྣམ་པར་དཀྲུགས་པའི་རྒྱ་མཚོའི་སྟེང་གི་གཉའ་ཤིང་བུ་ག་གཅིག་པ་ཡུད་ཙམ་ཡང་མི་གནས་པ། རྒྱ་མཚོའི་གཏིང་ན་རུས་སྦལ་ལོང་བ་ལོ་བརྒྱ་བརྒྱའི་མཚམས་ལ་སྟེང་དུ་འོང་བ་འཛོམ་ནས་གཉའ་ཤིང་གི་བུག་པར་རུས་སྦལ་གྱི་མགྲིན་པ་ཆུད་པ་ལས་ནི། མིའི་ལུས་རྟེན་རྙེད་པར་དཀའ་བའི་ཚུལ་དེ་བཞིན་གཤེགས་པས་གསུངས་སོ། །བཞི་པ་གྲངས་ཀྱི་ཁྱད་པར་བསམ་པ་ནི། སེམས་ཅན་གྱི་གྲངས་དང་རིམ་པ་ལ་ལྟོས་ནའང་མི་ལུས་ཐོབ་པ་སྲིད་པ་ཙམ་སྟེ། འདི་ལྟར་དམྱལ་བ་མཚན་མོའི་སྐར་མ་ཙམ་ལ་ཡི་དྭགས་ཉིན་མོའི་སྐར་མ་ཙམ། ཡི་དྭགས་མཚན་མོའི་སྐར་མ་


JLAZ012_Page_0213
[མ་དཔེ་གཟིགས་ན་འདིར་གནོན།]

ཙམ་ལ་དུད་འགྲོ་ཉིན་མོའི་སྐར་མ་ཙམ། དུད་འགྲོ་མཚན་མོའི་སྐར་མ་ཙམ་ལ་བདེ་འགྲོ་ཉིན་མོའི་སྐར་མ་ཙམ་ལས་མེད་པའི་ཚུལ་མཐོང་ཆོས་སུ་མིའི་ལུས་རྟེན་གཅིག་ལ་ཕྱི་ནང་གི་སྲིན་བུ་ཇི་ལྟར་གནས་བརྟགས་པས་ཤེས་ལ། མི་ཡང་ཆོས་ཀྱི་སྣང་བ་དང་བྲལ་བ། ཆོས་ལས་ཉམས་པ་རྣམས་ལ་དཔགས་ན་ཆོས་བཞིན་སྤྱོད་པ་ཤིན་ཏུ་ཉུང་བས་སྤྱིར་མིའི་ལུས་རྟེན་ཙམ་དང༌། ཁྱད་པར་ཆོས་ལྡན་གྱི་ལུས་ཐོབ་པར་དཀའ་བ་ལ་ལེགས་པར་བསམ་ནས་དལ་འབྱོར་རྙེད་དཀའ་བ་ལ་ངེས་ཤེས་བསྐྱེད་དོ། །གཉིས་པ་ཚེ་མི་རྟག་པ་བསམ་པ་ལ། དང་པོ་སྣོད་ཀྱི་འཇིག་རྟེན་ལ་བསམ་སྟེ་མི་རྟག་པ་སྒོམ་པ་ནི། འདི་ལྟར་གླིང་བཞི་རི་རབ་ལྷ་གནས་དང་བཅས་པའི་ར་བ་སྲ་ཞིང་བརྟན་པ། བསྐལ་པའི་བར་དུ་གནས་པ་འདི་དག་ཀྱང་ནམ་ཞིག་འཇིག་པའི་དུས་ལ་བབ་པ་ན་མེ་བདུན་དང་ཆུ་གཅིག་གིས་ཐལ་བ་ཙམ་ཡང་ལུས་པར་མི་འགྱུར་བ་ལ་བསམ་སྟེ་སྐྱོ་བ་བསྐྱེད་དོ། །གཉིས་པ་བཅུད་ཀྱི་འགྲོ་བ་མི་རྟག་པར་སྒོམ་པ་ནི། ཚེ་བསྐལ་པར་ཐུབ་ཅིང་གཟི་བརྗིད་ཕུན་སུམ་ཚོགས་པའི་ལྷ་དང་དྲང་སྲོང་རྣམས་ཀྱང་འཆི་བའི་གནས་སྐབས་ལས་མ་ཐར་ན། རང་རེ་འཛམ་བུའི་གླིང་པ་ཚེ་ལ་ངེས་པ་མེད་པའི་གནས་སུ་དུས་ཀྱི་ཐ་མར་སྐྱེས་པས་ད་ནི་མྱུར་དུ་འཆི། སྔོན་དར་ཞིང་རྒྱས་པའི་གྲོང་སྡེ་དང༌། དགོན་གནས་སྟོངས་པའི་


JLAZ012_Page_0214
[མ་དཔེ་གཟིགས་ན་འདིར་གནོན།]

ཤུལ་འདི་དག་ལའང་དང་པོར་སྐྱེས་བུའི་བདག་བཟང་པོ་རེ་ཡོད་པ་ཡིན་ཏེ་ད་ལྟའི་གནས་སྐབས་ན་བྱ་བྱེའུའི་ཚང་དུ་སོང༌། རང་གིས་དྲན་པ་ཙམ་ན་ཡོད་པའི་ཕ་མ་ཉེ་ལྟོས་ཡུལ་མི་ཁྱིམ་མཚེས་སྒོ་ཕྱུགས་སོགས་ཇི་སྙེད་མཆིས་པ་ལས་དེ་དག་ཕལ་ཆེར་མེད་ཅིང་ན་ནིང་ཡོད་པའང་ད་ལོ་མེད་པའི་དུས་ལ་ལྟོས། ཁྱད་པར་ད་ལྟའི་གནས་སྐབས་ན་རང་གི་ལུས་ཡན་ལག་དང་ཉིང་ལག་སོགས་པ་འདི་དག་ལ་ཟས་གོས་བཟང་པོ་སྦྱར། རྒྱན་དང་སྤྱོད་ལམ་གཟབས་ཀྱང་ཉིན་ཞག་རེས་མི་ཚེ་ཐུང་ངུར་སོང་བས་རིང་པོ་མི་ཐོགས་པར་འཆི་བས་སླེབས་ཏེ་དབུགས་ནི་ངར། བཀྲག་མདངས་ཉམས། ཡན་ལག་གཡོ་བ། འདུ་ཤེས་འཁྲུལ། རོ་ལ་ལིང་གིས་སོང་ནས་ཐ་གུས་བསྡམ། ཡོལ་བས་བསྒྲིབ། དུར་ཁྲོད་དུ་སྒྲེན་མོར་འདོར། ཡན་ལག་དང་ཉིང་ལག་འདྲལ། བྱ་རྒོད་དང་གཅན་གཟན་གྱིས་ཟ། སྐྲ་དང་རུས་དུམ་ཀྱང་ཕན་ཚུན་དུ་འཐོར་བའི་སྐབས་ན། ཉེ་དུ་དང་ལོངས་སྤྱོད་ནི་རྗེས་སུ་མི་འབྲང༌། བློས་ནི་མི་ཐོངས། ལས་འབའ་ཞིག་གི་རྗེས་སུ་འགྲོ་བའི་དུས་དེ་ནི་དེ་རིང་གི་ཉིན་ནུབ་ལའང་མི་འབྱུང་བའི་གདེང་མེད་པས་ཤིན་ཏུ་བཟོད་པར་དཀའ་སྙམ་དུ་འདུན་པ་དྲག་པོས་དྲན་པར་བྱས་ནས་འགྲོ་འདུག་ཉལ་གསུམ་ཐམས་ཅད་ལ་འཇིག་རྟེན་འདིའི་སྤྱོད་ལམ་གྱི་ཐ་མ་ཡིན་ནོ་


JLAZ012_Page_0215
[མ་དཔེ་གཟིགས་ན་འདིར་གནོན།]

ཞེས་ངག་ཏུའང་བརྗོད་ལ་ཡིད་ལ་དུང་ངེ་བསྒོམ་པར་བྱའོ། །དོན་གསུམ་པ་འཁོར་བའི་ཉེས་དམིགས་བསམ་པ་ལ། སྤྱི་དང་བྱེ་བྲག་གཉིས་ལས་དང་པོ་ནི། འདི་ལྟར་འཁོར་བ་ཞེས་བྱ་བ་ནི་རྣམ་པ་ཐམས་ཅད་དུ་འགྲོ་བའི་གནས་རིགས་དྲུག་ཏུ་རྒྱུད་མར་འཁོར་བའི་ལུས་རྟེན་འདི་མ་བཟུང་བྱ་བ་དང༌། ཕན་ཚུན་ཕ་མ་དང་དགྲ་གཉེན་བཏང་སྙོམས་མ་བྱས་པ་གཅིག་ཀྱང་མེད་ལ། དེ་ལྟར་མེད་པས་ཕ་མ་དང་གཉེན་གཤེས་ཀྱི་ཚེ་ཕན་བཏགས། དགྲའི་ཚེ་གནོད་པ་བྱས། འདོད་པའི་ཕྱིར་མགོ་དང་ཡན་ལག་དང་ཉིང་ལག་གཏུབ་པའང་གྲངས་ཀྱིས་མི་ཆོད། སྲོག་ཆགས་ཕྲ་མོར་སྐྱེས་པའི་ཡན་ལག་རྣམས་གཅིག་ཏུ་བསྡམས་ན་རི་རབ་ལས་ཀྱང་མཐོ། ངུས་པ་གཅིག་པོའི་མཆིལ་མ་བསགས་ཀྱང་རྒྱ་མཚོ་ཙམ་འོང་ངེས། ཚངས་པ་དང་ལྷའི་དབང་པོ་ལྟ་བུར་ཚེ་རིང་ཞིང་གཟུགས་དང་དཔལ་འབྱོར་ཕུན་སུམ་ཚོགས་པའང་ཤི་ནས་ངན་སོང་གི་སྡུག་བསྔལ་ཉམ་ཐག་པ་ལ་སྤྱོད་པ་ཡོད་ན་ལུས་རྟེན་འདིར་དབང་ཕྱུག་དང་ནད་མེད་པ་ལ་སོགས་པའི་བདེ་བ་ཅུང་ཟད་ཙམ་ལ་ནི་ལོ་ཤས་དང་ཟླ་བ་ཞག་འགའ་ཙམ་པས་མགོ་སྐོར་ཏེ་མཐོ་རིས་ཀྱི་བདེ་འབྲས་ཟད་ནས་ཤིན་ཏུ་དབུལ་ཞིང་ཉམ་ཐག་པའམ། ངན་སོང་གི་སྡུག་བསྔལ་བཟོད་དཀའ་བ་ལ་མི་འདོད་བཞིན་དུ་སྤྱོད་དགོས་པས་ད་ལྟའི་བདེ་


JLAZ012_Page_0216
[མ་དཔེ་གཟིགས་ན་འདིར་གནོན།]

སྐྱིད་རྨི་ལམ་བདོ་འཕྲོ་ལ་སད་པ་ལྟ་བུ་འདི་ལ་སྙིང་པོ་ཅི་ཞིག་ཡོད། དེ་བས་ད་རེས་ཀྱི་ཚེ་ལ་འཁོར་བ་སྡུག་བསྔལ་གྱི་རྒྱ་མཚོ་ལས་ཐར་བ་ཞིག་ཅི་ནས་ཀྱང་བྱེད་དགོས་སྙམ་དུ་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ༌། །གཉིས་པ་རིགས་དྲུག་སོ་སོའི་སྡུག་བསྔལ་བྱེ་བྲག་ཏུ་བསམ་པ་ལ་དྲུག་ལས། དང་པོ་དམྱལ་བ་ལ་སྡེ་ཚན་བཅོ་བརྒྱད་ཀྱི་ཚ་དམྱལ་བརྒྱད་ནི། གཞི་དང་འཁོར་ཡུག་ཐམས་ཅད་མགར་གྱི་ལྕགས་བསྲེགས་ལྟ་བུ་ལས་རྡོག་པ་བཞགས་ཙམ་གྱི་བདེ་བར་མངོན་པའང་མེ་ལྕེའི་ཀློང་ཤིན་ཏུ་དབལ་ཚ་བ་ནི་བརྒྱད་པོའི་གནས་སྤྱི་མཐུན་ཡིན་ལ། དེ་ལས་ཡང་སོས་ཞེས་བྱ་བ་ནི། མདག་མེའི་ཀློང་དུ་དམྱལ་བ་པ་དེ་དག་འདུས་ནས་ཕན་ཚུན་དགྲ་མི་ཤ་བོར་མཐོང་བའི་ཞེ་སྡང་གི་སེམས་ཀྱིས་མཚོན་ཆ་བརྡེག་རེས་འབའ་ཞིག་བྱེད་པས་ཤི་མ་ཐག་ནམ་མཁའ་ལས་ཡང་སོས་པར་གྱུར་ཅིག །ཅེས་པའི་སྒྲ་གྲགས་མ་ཐག་ཡང་སོས་ནས་ལས་མ་ཟད་ཀྱི་བར་སྡུག་བསྔལ་སྔར་ལྟར་མྱོང་བས་ཡང་སོས་ཞེས་མྱོང་བྱའི་ལས་ལ་མིང་བཏགས་པའོ། །དེའི་ཚུལ་རང་རྒྱུད་ལ་མངོན་སུམ་བྱུང་བ་བཞིན་ཉམས་སུ་བསྟར་ནས་བསྒོམས་པའི་རྗེས་ཤེས་ལ། ད་ལྟ་དམིགས་པས་སྒོམ་པ་ཙམ་ལའང་འདི་ལྟར་སྡུག་བསྔལ་ན། མངོན་སུམ་པའི་ལས་ལ་སྤྱོད་དུས་ཇི་ལྟར་བཟོད། དམྱལ་བར་སྐྱེ་བའི་


JLAZ012_Page_0217
[མ་དཔེ་གཟིགས་ན་འདིར་གནོན།]

རྒྱུའི་གཙོ་བོ་ནི་ཞེ་སྡང་གི་སེམས་ཡིན་ན་ལས་དེའི་རྒྱུ་ནི་མང་པོ་ཞིག་སྔོན་ནས་ད་ལྟའི་བར་འདུ་བྱས་པས། བདག་ཀྱང་མི་འདོད་བཞིན་དུ་ལས་དེའི་འབྲས་བུ་ལ་གདོན་མི་ཟ་བར་སྤྱོད་དགོས་པས་ཇི་ལྟར་བཟོད་སྙམ་དུ་འཇིགས་པ་དང༌། སྔོན་ཆད་ཀྱི་ལས་ལ་འགྱོད་སེམས་དྲག་པོ་བསྐྱེད་ཅིང་བཤགས་སྡོམ་དང༌། ཕྱིན་ཆད་བྱེད་རེ་ཤི་སྙམ་དུ་རང་རྒྱུད་གཉེན་པོས་སྡོམ་ཞིང༌། སྡུག་བསྔལ་དེའི་འབྲས་བུ་ལ་ད་ལྟ་མངོན་སུམ་པར་སྤྱོད་པའི་སེམས་ཅན་དམྱལ་བ་དང༌། ཕྱི་ནས་འདུ་བྱེད་ཀྱི་རྒྱུ་ལ་སྤྱོད་པ་རྣམས་ལའང་སྙིང་རྗེ་དྲག་པོ་སྒོམ་པ་ནི་རང་རྒྱུད་ཀྱི་སྡིག་པ་སྲབ་མོར་བྱེད་པའི་ཐབས་ཡང་དག་པ་ཡིན་པས་འོག་མ་ཐམས་ཅད་ལའང་དེ་ལྟར་ཤེས་པར་བྱའོ། །ཐིག་ནག་ནི། གཤིན་རྗེའི་ཕོ་ཉ་འཇིགས་སུ་རུང་བ་རྣམས་ཀྱིས་ལུས་འགལ་དུམ་བཞིན་དུ་བསྲངས་པའི་སྤྱི་བོ་ནས་རྐང་མཐིལ་གྱི་བར་ཐིག་བརྒྱད་དང༌། བཅུ་དྲུག་དང༌། དེ་བས་ཆེས་མང་བ་བཏབ་ནས་སོག་ལེ་རྣོན་པོས་སྤྱི་བོ་ནས་རྐང་མཐིལ་ལ་ཐུག་གི་བར་གཤོག་ཅིང༌། དེ་མ་ཐག་འབྱོར་ནས་ཡང་གཤོག་པའི་སྡུག་བསྔལ་དཔག་ཏུ་མེད་དོ། །བསྡུས་འཇོམས་ནི། ལྕགས་བསྲེགས་ཀྱི་ཡུལ་ལྗོངས་སུ་སོང་བ་ལས་རི་རྣམས་ཕན་ཚུན་རྟ་དང་རྔ་མོང་བ་ལང་ལ་སོགས་པའི་སྲོག་ཆགས་ཀྱི་མགོ་བརྙན་ལྟར་མཐོང་ནས་དེ་དག་ཕན་ཚུན་འཐབ་པའི་བར་ལྒང་ལྤགས་བཞིན་དུ་བཅར་བ་


JLAZ012_Page_0218
[མ་དཔེ་གཟིགས་ན་འདིར་གནོན།]

དང༌། རེས་འགའ་ལྕགས་གཏུན་དུ་ཐོ་ལུམ་མེ་འབར་བས་ཏིལ་བཞིན་དུ་བརྡུང་འཐག་བྱས་ཀྱང་མོད་ལ་གསོས་པས་སྔར་བཞིན་དུ་སྡུག་བསྔལ་ལོ། །ངུ་འབོད་ནི། ལྕགས་ཞུན་སྐོལ་བར་འཚོད་ཅིང་འོ་དོད་དྲག་པོ་འབོད་པའོ། །ངུ་འབོད་ཆེན་པོ་ནི། ལྕགས་ཁང་འབར་བ་ཉིས་རིམ་དུ་བཅུག་ནས་སྒོ་འགྲིགས་པས་སྡུག་བསྔལ་ཞིང་མེའི་ཐོ་བས་འཇོམས་པའོ། །ཚ་བ་ནི། ལྕགས་ཀྱི་ཡོལ་གོར་ཁྲོ་ཆུ་འབར་བར་འཚོད་ཅིང༌། སྟེང་དུ་འཐོན་པའི་རེས་མ་མགོ་ལ་ཐོ་ལུམ་བསྣུན་ནས་དྲན་པ་ཉམས་པའང་བདེ་བར་སྒོམ་པས་སྡུག་བསྔལ་ལོ། །རབ་ཏུ་ཚ་བ་ནི། ལྕགས་ཁྱིམ་འབར་བའི་ནང་དུ་གསལ་ཤིང་རྩེ་གསུམ་པས་ཕྲག་པ་གཉིས་དང་སྤྱི་བོ་ལ་ཏལ་མར་འབུགས་ཤིང༌། ལྕགས་བསྲེགས་ཀྱི་སྣམ་བུས་ལུས་ལ་དཀྲི་བས་ཤིན་ཏུ་སྡུག་བསྔལ་ལོ། །མནར་མེད་ནི། ལྕགས་ཁྱིམ་མེ་འབར་བ་ཉེ་འཁོར་ལྷག་པ་བཅུ་དྲུག་གིས་བསྐོར་བའི་ནང་དུ་མེ་དང་ལུས་གཉིས་སུ་མེད་པར་བསྲེགས་པས་སྡུག་བསྔལ་གྱི་ཚོར་བ་ཤིན་ཏུ་རགས་ཤིང་འོ་འདོད་འབོད་པའི་སྒྲ་ཙམ་ལས་ལུས་ཀྱི་དངོས་པོ་ལྟར་མི་མངོན་ལ། ཐར་བར་འདོད་པས་སེམས་རྒྱུན་ཆད་མེད་པ་ལ་སྒོའི་རྣམ་པ་མཐོང་བ་དེ་ཡང་རིང་དུ་བྱེར་ཞིང་བཅད་པར་གྱུར་པས་ཡི་མུག་པའི་སྡུག་བསྔལ་གསར་པ་མཐོང་བས་གནས་


JLAZ012_Page_0219
[མ་དཔེ་གཟིགས་ན་འདིར་གནོན།]

ཁང་གི་གནོད་པ་དང༌། དེ་བཞིན་དུ་མདའ་བོ་ཆེ་དང༌། དབྱུག་པ་དང༌། ལྕགས་ཞུན་ཁར་ལྡུག་པས་ཕྱི་ཡི་གནོད་པ་སོགས་མདོར་ན་དམྱལ་བ་སྔ་མ་བདུན་པོའི་སྡུག་བསྔལ་ཡང་རྟག་པར་འཆར་བས་ཚེ་ཚད་བར་བསྐལ་གཅིག་ཏུ་བདེ་བར་བསྟི་བའི་སྐབས་ཅུང་ཟད་ཙམ་ཡང་མེད་པས་མནར་མེད་བསྟིར་མེད་ཅེས་བཤད་པ་ཡིན་ནོ། །དེ་ལྟར་ཚ་དམྱལ་བརྒྱད་པོའང་རིམ་པས་ཚོར་བ་བདུན་འགྱུར་གྱིས་རགས་པས་སྡུག་བསྔལ་བདུན་འགྱུར་གྱིས་ཆེ་བའི་ཚུལ་བློ་ལ་བླང་ཞིང༌། སྔར་ཉམ་ཉེས་ཆེན་པོ་བྱུང་པའི་སར་ཕྱིན་ཆད་བགྲོད་པའི་བློ་སྣ་ལྡོག་པ་བཞིན་དུ། དེར་མི་སྐྱེ་བའི་ཐབས་ལ་འབད་པར་བྱའོ་སྙམ་དུ་བསྒོམ་པར་བྱའོ། །དེ་ལ་ཉེ་འཁོར་བ་ནི། མནར་མེད་ཀྱི་འཁོར་ལྷག་པ་བཅུ་དྲུག་ཡིན་ཏེ། ཕྱོགས་བཞི་སོ་སོ་ན། མེ་མ་མུར་གྱི་འོབས། རོ་མྱགས་ཀྱི་འདམ། མཚོན་ཆའི་ཐང༌། རལ་གྲི་ལོ་མའི་ནགས་ཚལ་བཞི་བཞི་ཡོད་པ་ལས། མེ་མུར་གྱི་འོབས་ནི། དམྱལ་བ་མནར་མེད་ཀྱི་ལས་བསྲབས་པ་དག་ཕྱིར་འཐོན་པ་ན་གྲིབ་མ་ནག་ངམ་པའི་འོབས་ལ་དགའ་ནས་སོང་བ་དང༌། ཐལ་ཚན་གྱི་མདག་མེ་འབར་བའི་ནང་དུ་ཚུད་ནས་ཤ་རུས་འཚིག་པའོ། །དེ་བཞིན་དུ་ཆུ་ཀླུང་མཐོང་བ་ལ་ཕྱིན་པས། རོ་མྱགས་ཀྱི་འདམ་རྫབ་དྲི་ང་བར་ཚུད་ནས་སྲིན་བུ་ལྕགས་ཀྱི་མཆུ་རྣོན་ཅན་གྱིས་འབིགས་


JLAZ012_Page_0220
[མ་དཔེ་གཟིགས་ན་འདིར་གནོན།]

པའོ།། མཚོན་ཆའི་ཐང་ནི། ཐང་ཉམས་དགའ་བ་མཐོང་ནས་ཕྱིན་པ་ན། དེ་ཐམས་ཅད་ལྕགས་ཀྱི་ཐུར་མ་རྣོན་པོར་གཟིངས་པས་རྐང་པ་གང་བཞག་ཐལ་མར་འབིགས་ཤིང་བཏེག་ན་སོས་པས་སྡུག་བསྔལ་ལོ། །ལོ་མའི་ཚལ་མཐོང་ནས་དགའ་སྟེ་ཕྱིན་པ་དང༌། ལོ་མ་ཐམས་ཅད་རལ་གྲིར་གྱུར་པ་རླུང་གིས་བསྐྱོད་པའི་ཆར་གྱིས་ལུས་དུམ་བུར་གཅོད་པའོ། །གཞན་ཡང་ལྕགས་ཀྱི་ཤལ་མ་ལི་ཞེས་བྱ་བ། རིའི་རྩེ་ནས་རང་ལ་དགའ་གདུང་ཡོད་པའི་སྐྱེ་བོས་འབོད་པར་མཐོང་ནས་ཕྱིན་པ་ན། ལམ་དུ་ལྕགས་ཐུར་རྣོན་པོས་རྐང་པ་འབིགས་ཤིང་སྟེང་དུ་སླེབ་དུས་ཁྭ་ཏ་དང་བྱ་རྒོད་ཀྱིས་ཀླད་པ་དང༌། མིག་ཚིལ་འབྲུ་ཞིང༌། ཐུར་ནས་འབོད་པར་མཐོང་ནས་ཕྱིན་པས་སྔར་བཞིན་འབིགས་ནས། དེའི་རྩར་སླེབས་དུས་ལྕགས་ཀྱི་སྐྱེས་པ་དང༌། བུད་མེད་མེ་འབར་བར་སོང་ནས་རང་ལ་འཁྱུད་པས་བསྲེག་ཅིང་ཟ་བར་བྱེད་དོ། ། དེ་ནས་གྲང་དམྱལ་བརྒྱད་བསམ་པ་ནི། སྤྱི་མཐུན་དུ། གངས་རི་དང་ཆབ་རོམ་གྱི་ཁྲོད། སའི་རྣམ་པ་རྡོག་པ་བཞག་ས་ཙམ་ཡང་མི་མངོན་པ་ལ་བུ་ཡུག་འབའ་ཞིག་གིས་ལུས་སྦྲེབས་པའི་གནས་སུ། གཅེར་བུར་གྲང་བའི་ཉེན་ཆེས་པས་ལུས་ལ་ཆུ་བུར་ཐོལ་གྱིས་འབྱུང་བས་ཆུ་བུར་ཅན་ནོ། །དེ་རྡོལ་ནས་རྨར་སོང་བས་ཆུ་བུར་རྡོལ་བའོ། །


JLAZ012_Page_0221
[མ་དཔེ་གཟིགས་ན་འདིར་གནོན།]

ཟུག་རྔུ་སྲན་མ་བཟོད་པའི་སོ་འཚིར་བས་སོ་ཐམ་ཐམ་པའོ། །སྨྲེ་སྔགས་རྒྱུན་མི་ཆད་པར་འདོན་པས་ཨ་ཆུ་ཆུའོ། །སྐད་ཀྱི་གདངས་ཆག་པས་ཤུགས་རིང་ཀྱི་ཧུད་དུ་འདོན་པའོ། །པགས་པ་བཞི་ཚལ་དུ་གས་པས་ཨུཏྤལ་ལྟར་གས་པའོ། །བརྒྱད་ཚལ་དུ་གས་པས་པདྨ་ལྟར་གས་པའོ། །བཅུ་དྲུག་དང་སུམ་ཅུ་གཉིས་ལ་སོགས་གྲངས་མེད་དུ་གས་པས་པདྨ་ལྟར་ཆེར་གས་པའོ། །དེ་ལྟར་གས་པའི་ནང་དུ་སྲོག་ཆགས་མཆུ་རྣོན་ཅན་ཞུགས་ནས་ཟ་ཞིང་གྲང་བའི་སྡུག་བསྔལ་མི་བཟོད་པའི་ཚུལ་བརྒྱད་ལ་མིང་བརྒྱད་དུ་ཆགས་པའི་སྡུག་བསྔལ་བློ་ལ་བླང་ཚུལ་སྔ་མ་བཞིན་ནོ། །དེ་ནས་ཉི་ཚེ་བ་ནི། བྲག་དབར་དུ་བཅར་བ་དང༌། རྡོའི་ནང་དུ་འཐུམས་པ་དང༌། ཆབ་རོམ་གྱི་ནང་དུ་རེངས་པ་དང༌། ཆུ་ཚན་གྱི་ནང་དུ་འཚོད་པ་དང༌། མེ་ནང་དུ་བསྲེག་པ་དང༌། ཤིང་སྡོང་ལ་བཅད་གཏུབས་བྱས་པའི་ཉེར་ལེན་བདག་ཉིད་ཀྱིས་ཚོར་བར་མངོན་ནས་ཡན་ལག་དང་ཉིང་ལག་བཅད་པའི་སྡུག་བསྔལ་དང༌། གཏུན་དང༌། ཕྱགས་མ་དང༌། ཕྲུ་བ་དང༌། སྒོ་དང༌། སབ་མོ་དང༌། ཀ་བ་དང༌། སྒྱེད་པུ་དང༌། ཐག་པ་ལ་སོགས་པ་རྟག་ཏུ་བཀོལ་ཞིང་སྤྱོད་པའི་གཟུགས་སུ་འདུ་ཤེས་པའི་སྡུག་བསྔལ་བཟོད་མི་ཕོད་པ་མྱོང་བ་དང༌། ལྕགས་ཀྱི་ཁང་པར་ཉིན་མོ་སྡུག་བསྔལ་ལ། མཚན་མོ་དེ་ལས་ལྡོག་པ་དང༌། ཕན་ཚུན་གསོད་རེས་བྱེད་པ་སོགས་


JLAZ012_Page_0222
[མ་དཔེ་གཟིགས་ན་འདིར་གནོན།]

སྡུག་བསྔལ་གྱི་རྣམ་པ་མྱོང་ཚུལ་ཐ་དད་པ་བློ་ལ་བླང་ཞིང་སྐྱོ་ཤས་བསྐྱེད་པར་བྱའོ། །དེ་ནས་ཡི་དྭགས་ཀྱི་སྡུག་བསྔལ་ལ། བྱིངས་ན་གནས་པ་དང་མཁའ་ལ་རྒྱུ་བ་གཉིས་ཀྱིས། བྱིངས་གནས་ལ་གསུམ་ལས་སྤྱི་མཐུན་དུ། པགས་རུས་གཉིས་ཀྱི་བར་ན་ཤ་མེད་པས་ཀེང་ཞིང་རིང་ལ། ལོ་ཟླ་མང་པོའི་བར་དུ་བཟའ་བཏུང་གི་སྒྲ་ཡང་མི་ཐོས་ན་མྱོང་བ་ལྟ་ཅི་སྨོས། ཕྱིའི་སྒྲིབ་པ་ཅན་ནི། ཚ་གྲང་གོ་ལྡོག་པ་ལ་སོགས་ཕྱིན་ཅི་ལོག་བཞི་དང༌། ཆུ་ཀླུང་དང༌། འབྲས་བུ་ལ་སོགས་པ་མཐོང་ནས་དེ་ལ་སྙེགས་པས་དེ་མ་ཐག་མེད་པར་གྱུར་པའི་ཤུལ་དུ་ངམ་གྲོག་ཉམས་མི་དགའ་བ་དང༌། མྱ་ངན་གྱི་ཐང་དུ་མངོན་ལ། ཡང་ན་སྐྱེ་བོ་མཚོན་ཆ་ཐོགས་པས་སྲུང་ཞིང་བརྡེག་བཙོག་འཕོག་པའི་སྡུག་བསྔལ་ལོ། །ནང་གི་སྒྲིབ་པ་ཅན་ནི། ཁ་ཁབ་མིག་ཙམ་པས་རྒྱ་མཚོའི་ཆུ་འཐུངས་ཀྱང་མགྲིན་པ་རྟ་རྔ་ཙམ་དུ་མ་ཆུད་པའི་བར་ལ་ཁའི་དུགས་ཀྱིས་མོད་ལ་སྐམ་པ་དང༌། ལྟོ་བ་ཡུལ་ལྗོངས་ཙམ་ཡན་ལག་འཇག་མ་ཙམ་གྱིས་མི་ཐེག །གལ་ཏེ་ཅུང་ཟད་རྙེད་ནའང་དེའི་ཁར་བྱེ་ཚན་འབར་བ་ཅན་དུ་འབབ་པས། མཚན་མོའི་ཆ་ཐམས་ཅད་ལ་གློ་སྙིང་ནས་མེ་འབར་ཞིང་སྣ་ནས་དུ་བ་འཐུལ་བས་ཟས་སྐོམ་གྱི་སྒྲིབ་པ་ཅན་ཞེས་བྱའོ། །སྒོས་ཁུར་གྱི་སྒྲིབ་པ་ཅན་ནི། ཡི་དྭགས་རེ་རེའི་ལུས་ལ་སྲོག་ཆགས་མང་པོའི་ཚང་


JLAZ012_Page_0223
[མ་དཔེ་གཟིགས་ན་འདིར་གནོན།]

བཅས་ནས་ལུས་ཀྱི་ནང་ནས་ཟ་བར་བྱེད་ཅིང༌། མདོར་ན་དེ་དག་རྣམས་ཕན་ཚུན་འཕྲད་ནའང་ཁྲོས་པའི་སེམས་ཀྱིས་བརྡེག་ཅིང་འཚོག་པ་དང༌། མགྲིན་པ་ལས་ལྦ་བ་བྱུང་བ་རྣག་ཏུ་སྨིན་པ་ཁ་ཟས་སུ་བྱེད་དགོས་པ་སོགས་ཤིན་ཏུ་ཉམ་ཐག་པའོ། ། གཉིས་པ་མཁའ་ལ་རྒྱུ་བའི་ཡི་དྭགས་ནི། སྨྱོ་བརྗེད་ལ་སོགས་པ་དང༌། བཙན་དང་རྒྱལ་པོ་ལ་སོགས་གནོད་སྦྱིན་གྱི་རིགས་གཞན་ལ་འཚེ་བ་རྣམས་ཏེ། རྫུ་འཕྲུལ་དང༌། ལོངས་སྤྱོད་ཅུང་ཟད་ཡོད་ཀྱང་འཚེ་བ་མང་བས་མི་བརྟན་ཞིང་དུས་ཚིགས་ལོག་པ་དང༌། སྔར་གྱི་གནད་འཆད་པའི་ཚོར་བ་དེས་རྟག་དུ་གདུངས་ཤིང༌། དེ་གཞན་ལ་སྤོ་བའི་བསམ་སྦྱོར་ངན་པ་དང༌། ཁྱི་དང་བྱ་ལ་སོགས་པའི་རྣམ་པ་དང་ཉི་ཚེ་བ་དང་མཐུན་པའི་སྡུག་བསྔལ་དང༌། ཕྱིན་ཅི་ལོག་བཞིའི་སྣང་བའང་ཐུན་མོང་དུ་འཆར་བས་ཉམ་ཐག་ལ། རྟག་ཏུ་གཞན་ལ་འཚེ་བའི་བསམ་སྦྱོར་ངན་པས་ཕྱི་མའི་སྡུག་བསྔལ་འདུ་བྱེད་པ་ལ་སོགས་ཏེ་ཉེས་པ་ཆེན་པོ་དང་ལྡན་པ་ཡིན་པས་གཤིན་རྗེའི་འཇིག་རྟེན་དུ་སོང་བ་ཞེས་བྱ་སྟེ་དེར་མི་སྐྱེ་བའི་ཐབས་ལ་འབད་དགོས་སྙམ་དུ་ཉམས་སུ་བླང་ངོ༌། །དེ་ནས་དུད་འགྲོའི་སྡུག་བསྔལ་ནི། ཁ་འཐོར་པ་དང་བྱིངས་གནས་གཉིས་ལས། ཁ་འཐོར་བ་ནི། བྱ་དང་རི་དྭགས་ལ་སོགས་བདག་མེད་རྣམས་གཅིག་ལ་གཅིག་ཟ་ཞིང༌། རྔོན་པ་


JLAZ012_Page_0224
[མ་དཔེ་གཟིགས་ན་འདིར་གནོན།]

དང༌། གདོལ་བ་ལ་སོགས་པས་ཐབས་དུ་མས་སྲོག་དང་དབྲལ་བ་དང༌། རྟ་གླང་མ་ཧེ་ར་ལུག་ལ་སོགས་པ་བདག་ཏུ་བཟུང་བ་རྣམས་ནི་གོ་རར་འཛུད་པ་དང༌། ལས་ཀྱིས་མནར་བ་དང༌། སྣ་འབིགས་པ་དང༌། བྱ་གཅོད་པ་དང༌། གསོན་ཁྲག་འབྱིན་པ་དང༌། གསོད་པ་དང༌། དེ་ལ་ཡང་མཐའ་འཁོབ་པའི་རིགས་ཀྱིས་དམྱལ་བ་པ་ལྟ་བུར་སྲོག་གཅོད་པ་ལ་སོགས་པ་མངོན་སུམ་དུ་མཐོང་ཞིང་ཐོས་པ་དང༌། བྱིངས་གནས་ནི། ཐར་པ་ཆ་མཐུན་གྱི་དགེ་བ་སྤངས་པ་རྣམས་ཀྱིས་མྱོང་བྱར་གསུངས་པས་གླིང་བར་མུན་ནག་གི་རྒྱ་མཚོ་དང༌། ཆུ་གཏེར་བཞིའི་ཁྱོན་ལ་གནས་ནས་གཅིག་ལ་གཅིག་ཟ་ཞིང༌། སྣང་བའི་ཆ་ཅུང་ཟད་ཀྱང་མེད་པར་ཚ་གྲང་བཀྲེས་སྐོམ་གླེན་རྨོངས་ཀྱིས་རྣམ་པ་ཀུན་ཏུ་མནར་བ་ཉིད་དེ། དེའི་རང་བཞིན་བློ་ཡུལ་དུ་མངོན་སུམ་བླང་ལ་སྐྱོ་ཤས་བསྐྱེད་པར་བྱའོ། །དེ་ནས་མིའི་སྡུག་བསྔལ་བསམ་པ་ལ། རྩ་བའི་སྡུག་བསྔལ་ཆེན་པོ་གསུམ་ལས། འགྱུར་བའི་སྡུག་བསྔལ་ནི། ད་ལྟ་བདེ་འགྲོའི་ལུས་རྟེན་རྙེད་ནས་བདེ་བ་ལྟར་ཡོད་ཀྱང༌། འདིས་རྟག་མི་ཐུབ་པར་ཉིན་ཞག་དེའི་སྔ་ཕྱིའམ། སང་རེས་ལ་སོགས་པར་ལུས་སེམས་ལ་སྡུག་བསྔལ་གསར་པ་གཅིག་བྱུང་ནས་གདུང་བ་ཆེན་པོ་འཕེལ་བ་མངོན་སུམ་པ་དང༌། སྡུག་བསྔལ་གྱི་སྡུག་བསྔལ་དེའི་ཡང་སྟེང་དུ་ད་དུང་གློ་བུར་བ་


JLAZ012_Page_0225
[མ་དཔེ་གཟིགས་ན་འདིར་གནོན།]

གཅིག་བརྩེགས་པ་དཔེར་ན་འགྱུར་བའི་སྡུག་བསྔལ་དེ་སྲིན་པོ་བར་ལངས་པ་ལྟ་བུ་ཡིན་ན། དེའི་སྟེང་དུ་རྒྱལ་པོས་ཆད་པ་བྱུང་བ་ལྟ་བུའོ། །ཁྱབ་པ་འདུ་བྱེད་ཀྱི་སྡུག་བསྔལ་ནི། ད་ལྟ་བདེ་བ་ལྟར་སྣང་བ་མང་སྟེ། འདི་ལྟར་འཇིག་རྟེན་གྱི་ཕུན་ཚོགས་ནི་སྲོག་གཅོད་པ་ལ་སོགས་པ་མི་དགེ་བའི་ལས་ལམ་གྱིས་བསྒྲུབས་པ་ཁོ་ནའི་ཕྱིར། སྐྱེད་མོས་ཚལ་གཅིག་ཏུ་རྩེད་སྣ་མང་པོས་ཉམས་དགའ་ཞིང༌། ཆོ་ལོ་དང། རྒྱན་པོ་འགྱེད་པ་ལ་སོགས་པའི་ཚེ་ཤ་དང་མྱོས་པར་བྱེད་པའི་བཟའ་བཏུང་གིས་ཚོར་བ་བདེ་བར་འཆར་བའི་གནས་སྐབས་དེ་ཙམ་ནས། དེ་ལྟར་སྤྱོད་པའི་རྒྱུ་ཐམས་ཅད་སྡིག་པ་འབའ་ཞིག་པའི་ཕྱིར་སླད་ནས་དེའི་འབྲས་བུ་སྡུག་བསྔལ་ཁོ་ན་འདུ་བྱེད་པ་དང༌། དེ་བཞིན་དུ་གཞན་ལ་གནོད་པ་བྱས་པས་ཕྱིས་རང་ལ་གནོད་ལེན་འདུ་བྱེད་པ་ཆོས་ཉིད་ཡིན་པས་འདི་ན་འཇིག་རྟེན་པའི་ཉེ་བར་སྤྱོད་པ་ཐམས་ཅད་ལ་ཁྱབ་པ་ཉིད་ཀྱང་འཕྲལ་དུ་སྡུག་བསྔལ་དུ་ལྟར་མི་མངོན་པས་ཁྱབ་པ་འདུ་བྱེད་ཀྱི་སྡུག་བསྔལ་ཞེས་བྱའོ། །དེ་ནས་སྐྱེ་རྒ་ན་འཆིའི་ཚུལ་ལ་བསམ་པ་ནི། དེ་ལ་མིའི་འགྲོ་བ་ནི་མངལ་ནས་སྐྱེ་བས་དྲི་ཟ་ཉེ་བར་འཁོར་བ་དང་ཕ་མའི་ཁུ་ཁྲག་འདྲེས་པ་ལས་མེར་མེར་པོ་ལ་སོགས་པའི་འགྱུར་བ་སྣ་ཚོགས་ཀྱིས་ལུས་ཆགས་ཤིང༌། དབང་པོ་ཡུལ་ལ་སད་ནས་མའི་ལྟོ་བ་ལ་སྐྱུགས་བྲོ་བ་དང༌། དྲི་ང་བ་དང༌། འཁུམས་པ་དང༌།


JLAZ012_Page_0226
[མ་དཔེ་གཟིགས་ན་འདིར་གནོན།]

དབུགས་འཐུམས་པ་དང༌། མས་ཟས་གོས་སྤྱོད་ལམ་ཉེས་པ་ན་མེའི་ནང་ན་འདུག་པ་ལྟར་ཚ་བ་དང༌། ཆུ་ནང་དུ་ཚུད་པ་ལྟར་གྲང་བ་དང༌། རིས་ནོན་པ་ལྟ་བུ་དང༌། གཡང་སར་ལྷུང་བ་ལྟ་བུ་དང༌། སྟན་ལ་ལྷུང་ཞིང་ལག་པས་རེག་དུས་རྨ་རྨེན་ལ་མཚོན་ཆ་བྲད་པ་ལྟ་བུ་དང༌།ཁྲུས་བྱས་པ་ན་པགས་པ་བཤུས་པ་ལྟར་དབལ་ཚ་བ་ལ་སོགས་ཏེ་སྐྱེ་བའི་སྡུག་བསྔལ་དཔག་ཏུ་མེད་དོ། །དེ་ལྟར་སྐྱེས་ནས་ནི། ལང་ཚོ་སྨིན་པའི་ཚེ་ན་རེ་ཞིག་འཕེལ་བ་ལྟར་སྣང་ཡང༌། ཚེ་ནི་འགྲིབ་པ་ལ་ཕྱོགས་ཤིང་རིང་པོར་མི་ཐོགས་པ་རྒས་པའི་སྡུག་བསྔལ་གྱིས་གཟིར་ནས་ལུས་ཀྱི་སྟོབས་ཉམས། ཞོ་ཤས་ཁུར་མི་བཟོད། ཟས་མི་འཇུ། མིག་འགྲིབ། རྣ་བ་འོན། ལྕེ་ལྡིབ། དྲན་པ་རྨོངས། སོ་ཕྲེང་ཟགས། འདོད་པའི་ལོངས་སྤྱོད་ལ་དགའ་ཡང་སྤྱོད་པའི་མཐུ་མེད། ཚ་གྲང་གང་ཡང་མི་བཟོད་ཅིང་བློ་སྲབ་པའི་ཁར། ཕ་རོལ་གྱིས་བརྙས་ཤིང་བསུན་འབྱིན་པས་ཚོར་བ་ཕལ་ཆེར་སྡུག་བསྔལ་དུ་འཆར་བ་མངོན་སུམ་དུ་མཐོང་བ་ལ་བསམ་མོ། །དེ་ལྟ་བུའི་ལུས་དེ་ཡང་འབྱུང་བཞི་འདུས་པའི་བདག་ཉིད་ཅན་ཡིན་པས་དེ་དག་ཕན་ཚུན་ཆ་མ་མཉམ་པ་ལས། རླུང་དང༌། མཁྲིས་པ་དང༌། བད་ཀན་དང༌། འདུས་པ་སྟེ། ནད་སྣ་ཚོགས་པས་རྟག་ཏུ་གཟིར་ཞིང༌། དེས་ཉེར་ལེན་གྱི་ཕུང་པོ་ལྔ་སྡུག་བསྔལ་འབའ་


JLAZ012_Page_0227
[མ་དཔེ་གཟིགས་ན་འདིར་གནོན།]

ཞིག་ལ་སྦྱོར་བས་དགའ་གདུང་གི་ཡུལ་དུ་གྱུར་པ་རྣམས་ཀྱང་དེ་ལས་ཕྱིན་ཅི་ལོག་ཏུ་འཆར་ཞིང༌། ན་བའི་རྐྱེན་གྱིས་ནི། ཤི་བའང་གློ་བུར་དུ་འོང་ངོ་སྙམ་པའི་འཇིགས་པ་དང་བཅས་པའི་ཚུལ་ལ་ལེགས་པར་བསམ་མོ། །དེ་ནས་འཆི་བ་ལ་བབ་པ་འབྱུང་སྟེ། མལ་དུ་ལྟུང་བ་ལས་ལྡོང་མི་ཤེས། ཟས་སྐོམ་མཐོང་ཡང་ཡི་གར་མི་འོང༌། འཆི་བའི་ཚོར་བས་གདུང་བས་སྙིང་མི་དགའ། ལོ་ཚོད་དང་སྙེམས་པའི་སྟོབས་ཤོར། འཁྲུལ་སྣང་གི་བསུན་མས་གཏུགས། སྐྱེས་ཆེན་པོ་འདེགས་པ་ལ་ཐུག །གཉེན་བཤེས་ཀྱིས་མཐའ་བསྐོར་ཡང་བཤོལ་ནི་མི་ཐེབས། གནད་གཅོད་ཀྱི་སྡུག་བསྔལ་རང་གཅིག་པོས་མྱོང༌། ལོངས་སྤྱོད་དཔག་ཏུ་མེད་པ་ཡོད་ཀྱང་ཁྱེར་དབང་ནི་མེད། བློས་ནི་མི་ཐོངས། རྗེས་སུ་ནི་མི་འབྲངས། ཡན་ལག་གཡོབ་ཅིང༌། མིག་བཟི་བའི་ངང་ལ་འབྱུང་བ་སྡུད། འདུ་ཤེས་འཁྲུལ། མཆི་མ་སྐྱ་ཙ་རེ་འཇིག་རྟེན་ཕ་རོལ་དུ་འགྲོ། བར་དོའི་སྣང་བ་ནི་ཤར། དེ་ན་མགོན་སྐྱབས་ནི་མེད། སྣང་བ་ཐམས་ཅད་ནི་འཇིགས་སྐྲག །ཚོར་བ་ཐམས་ཅད་ནི་སྡུག་བསྔལ་ལ་སྤྱོད་པའི་ཚེ། གཅེས་པར་བཟུང་བའི་ལུས་ནི་ཐ་གུས་བཅིངས། རྡོག་པས་བརྫིས། དུར་ཁྲོད་ཉམས་མི་དགའ་བར་འདོར། ལོངས་སྤྱོད་ཕུན་སུམ་ཚོགས་པ་ཡོད་ཀྱང་དྲི་ཟ་བའི་དུས་ལ་བབ་ཅིང༌། དེ་ནས་ཀྱང་ལས་ཀྱི་ཕྱི་


JLAZ012_Page_0228
[མ་དཔེ་གཟིགས་ན་འདིར་གནོན།]

བཞིན་དུ་རང་དབང་མེད་པར་འགྲོ་དགོས་ན། ད་ལྟ་ཕན་ཆད་འཆི་བ་མ་དྲན་པས་དགྲ་འདུལ་གཉེན་སྐྱོང༌། གནས་མལ་དང་ཟང་ཟིང་ལ་ཕྱི་ཚིས། ཉེ་དུ་འབྲེལ་ཅན་ལ་སོགས་པའི་དོན་དུ་ཆགས་སྡང་རྨོངས་གསུམ་གྱི་དུས་འདའ་བ་ནི་མཚང་རེ་ཆེ་སྙམ་དུ་བསམ་མོ། །དེ་ལྟར་བཞི་པོའི་སྟེང་དུ། དགྲ་ལ་སོགས་ཏེ་ཡུལ་གྱི་རྐྱེན་སྣང་མི་སྡུག་པ་དང་ཕྲད་ནས་མི་འདོད་བཞིན་དུ་སྡུག་བསྔལ་དང་ཡིད་མི་བདེ་བ་མྱོང་བ་དང༌། གཉེན་བཤེས་སམ། ཡིད་ལ་གཅེས་པའི་དངོས་པོ་དང་བྲལ་ནས་དེ་དག་གི་ཡོན་ཏན་དང་རྣམ་འགྱུར་དྲན་པས་སེམས་གདུང་བ་དང༌། འཇིག་རྟེན་ནི་རེ་དོགས་ཀྱི་རྣམ་པར་རྟོག་པའི་གཞན་དབང་ཅན་ཡིན་པས་དེ་དག་འདོད་པ་བཞིན་ཐོག་ཏུ་མ་ཁེལ་བའི་སྡུག་བསྔལ་དང༌། སྡུག་བསྔལ་བདེན་པའི་ཉེ་བར་ལེན་པ་པོ་ཟག་བཅས་ཀྱི་ཕུང་པོ་དང་ལྡན་ཕྱིན་ཆད་གཟུགས་ལ་རྟེན་བཅས། ཚོར་བས་དེའི་རང་བཞིན་ཤེས། འདུ་ཤེས་ཀྱི་འབྲེལ་རྒྱུན་ཆགས། འདུ་བྱེད་ཀྱིས་སླད་ཀྱིས་ས་བོན་བསྒྲུབ། རྣམ་པར་ཤེས་པས་དེ་ལ་བདག་གི་བར་ལྟ་བའི་ཕྱིར་སྡུག་བསྔལ་གྱི་གནས་དང༌། རྟེན་དང༌། འབྱུང་ཁུངས་ཅན་དང༌། རྟག་པར་འབྲེལ་བས་འཁོར་བ་སྡུག་བསྔལ་གྱི་ཕུང་པོ་ཅན་ཞེས་བྱ་སྟེ། མིའི་འགྲོ་བ་རྣམས་ནི་ལྷག་པར་དུའང་རྣམ་པ་བརྒྱད་པོ་དེས་རྟག་ཏུ་སྡུག་བསྔལ་བའི་ཚུལ་ལ་སོགས་པར་


JLAZ012_Page_0229
[མ་དཔེ་གཟིགས་ན་འདིར་གནོན།]

བསམ་ཞིང་ངོ་ཤེས་པར་བྱས་ནས་སྐྱེ་བའི་རང་བཞིན་ལ་སྐྱོ་བར་བྱའོ། །དེ་ནས་ལྷ་མ་ཡིན་གྱི་སྡུག་བསྔལ་བསམ་པ་ནི། འཕེན་བྱེད་མི་དགེ་བས་འཕངས་པའི་རྒྱུས། ལུས་རྟེན་དེ་བཟུང་བ་ཙམ་ནས་ཕྲག་དོག་གི་འདུ་ཤེས་རགས་པས་རང་རང་གི་གནས་རིས་རྩོད་ཅིང་འཚོ་བའི་ཆ་ལའང་ཕན་ཚུན་ཁ་སྨྲས་དང་འཐབ་རྩོད་འབའ་ཞིག་གིས་ལུས་སེམས་འཁྲུགས་པས་རྒྱུན་དུ་མནར་བའི་སྟེང༌། ལྷ་རྣམས་ཀྱི་དཔལ་འབྱོར་ལ་མི་བཟོད་པའི་ཕྲག་དོག་གིས་གཡུལ་གྱི་བྱ་བ་ཁོ་ནས་ཉོན་མོངས་ཤིང་གདུངས་པ་དང༌། དེ་ཡང་སྔོན་གྱི་བསོད་ནམས་ཀྱིས་ཁྱད་པར་ལས་ལྷ་རྣམས་ནི་མི་འགྲེང་བདུན་ཙམ་གྱིས་མཐོ་ཞིང་གནད་ཆེ་སར་མཚོན་ཆ་མ་ཕོག་ན་མི་འཆི་ལ། ལྷ་མ་ཡིན་རྣམས་དེ་སྙེད་ཀྱིས་དམའ་ཞིང་གནད་སར་འཕོག་ན་དེ་མ་ཐག་འཆི་བའི་སྡུག་བསྔལ་ཉམས་སུ་མྱོང་ཞིང༌། གལ་ཏེ་དེ་ན་བློ་དང་ལྡན་པ་རེ་ཙམ་ཡོད་སྲིད་ཀྱང་ལས་ཀྱིས་སྒྲིབས་པས་ཉན་རང་གི་བདེན་པ་མི་མཐོང་བའི་སྐལ་པ་ངན་པ་ཅན་རྟག་ཏུ་འཐབ་རྩོད་ཀྱིས་སྡུག་བསྔལ་ལ་སྤྱོད་པའི་རང་བཞིན་ལ་བསམས་ཏེ་དེའི་རྒྱུ་འབྲས་སྤངས་བའི་ཐབས་ལ་འབད་པར་བྱའོ། །དེ་ནས་ལྷའི་སྡུག་བསྔལ་ནི། རྒྱལ་ཆེན་རིགས་བཞི་པ་ནས་གཞན་འཕྲུལ་དབང་བྱེད་པའི་བར་གྱི་འདོད་ཁམས་པ་རྣམས་ནི་རེ་ཞིག་བདེ་བ་ལྟར་སྣང་ཡང༌། དེར་སྔ་མའི་


JLAZ012_Page_0230
[མ་དཔེ་གཟིགས་ན་འདིར་གནོན།]

ལས་དཀར་པོའི་ཆ་ཐམས་ཅད་ཟད་པར་བྱེད་ལ། གནས་སྐབས་ཀྱི་བདེ་བ་དེས་སྐྱོ་ཤས་དང་ངེས་འབྱུང་བྲལ་བས་ཕྱི་མའི་དོན་ལ་གཡེལ་ཞིང་སྔོན་གྱི་དགེ་བའི་ལས་ཟད་པ་དང་གནས་རིགས་དེ་ནས་འཆི་འཕོ་བའི་ལྟས་ལུས་ཀྱི་མདོག་ཉམས་པ་དང༌། སྟན་ལ་མི་དགའ་བ་དང༌། མེ་ཏོག་གི་ཕྲེང་བ་རྙིངས་པ་དང༌། གོས་ལ་དྲི་མ་ཆགས་པ་དང༌། ལུས་ལ་རྡུལ་འབྱུང་བ་ལྔ་མཐོང་བས་སྔངས་ཤིང་བརྒྱལ་བའི་སྡུག་བསྔལ་ལྷའི་ཞག་བདུན་དུ་མྱོང་བས་རིང་ཞིང་བཟོད་པར་དཀའ། གཟུགས་དང་གཟུགས་མེད་གཉིས་ནི་ཏིང་ངེ་འཛིན་གྱི་བདེ་བས་དར་ཅིག་འཚོ་ཡང༌། བསོད་ནམས་ཆ་མཐུན་གྱིས་འཕངས་པའི་འཇིག་རྟེན་པའི་བསམ་གཏན་ཡིན་པས་བདེན་པ་མཐོང་བའི་སྐལ་བ་མེད་པའི་ངང་ལ་ལས་དེ་ཟད་ནས་སྲིད་པ་འོག་མར་ལྟུང་བའི་སྡུག་བསྔལ་འདུ་བྱེད་ཅིང༌། ཕུང་པོ་ཉིང་མཚམས་སྦྱར་བས་འགྱུར་བའི་སྡུག་བསྔལ་ལ་སྤྱོད་པའི་ཕྱིར་ན་ཁམས་གསུམ་རིགས་དྲུག་གི་གནས་གང་དུ་སྐྱེས་ཀྱང་སྡུག་བསྔལ་འབའ་ཞིག་ལས་མེད་པའི་ཚུལ་ལེགས་པར་བསམ་ཞིང༌། ད་རེས་འཁོར་བ་ལས་ཐར་བའི་ཐབས་ལ་མ་འབད་ན་ང་རེ་བླུན་སྙམ་དུ་ཞེ་དམ་དྲག་པོ་བཅའ་ཞིང་དགེ་བ་བསྔོ་བར་བྱའོ།། །། བཞི་པ་ལས་རྒྱུ་འབྲས་བསམ་པ་ནི། འདི་ལྟར་འཁོར་བ་ནི་ལས་ལས་སྐྱེ་


JLAZ012_Page_0231
[མ་དཔེ་གཟིགས་ན་འདིར་གནོན།]

ཞིང༌། ལས་ཀྱི་འབྲས་བུས་བྱས་པ་ཡིན་པས་མཐོ་རིས་དང་ངན་སོང་གི་གནས་སུ་འགྲོ་བ་ལ་བྱེད་པ་པོ་གཞན་མེད་ཅིང༌། སྟེས་དབང་གིས་འགྲོ་བའང་མ་ཡིན་པས་རྣམ་པ་ཐམས་ཅད་དུ་དགེ་མི་དགེའི་རྒྱུ་འབྲས་ལ་དཔྱད་ནས་མི་དགེ་བའི་ཕྱོགས་སྤང་ཞིང༌། དགེ་བའི་ཕྱོགས་བསྒྲུབ་པ་ལ་འབད་དགོས་ཏེ། དེ་ལ་སྤང་བྱ་མི་དགེ་བ་བཅུའི་དང་པོ་ལུས་ཀྱི་ལས་གསུམ་ལས་སྲོག་གཅོད་པ་ནི། ཀུན་སློང་གི་སྒོ་ནས་ཞེ་སྡང་ལ་བརྟེན་པས་དམྱལ་བ། འདོད་ཆགས་ལ་བརྟེན་པས་ཡི་དྭགས། གཏི་མུག་ལ་བརྟེན་པས་དུད་འགྲོར་སྐྱེ་བ་ནི་རྣམ་སྨིན་གྱི་འབྲས་བུ་སྟེ་འོག་མ་ཐམས་ཅད་ལ་ཡང་མཚུངས་ལ། མྱོང་བ་རྒྱུ་མཐུན་གྱི་འབྲས་བུ་མཐོ་རིས་ཐོབ་ཀྱང་ཚེ་ཐུང་ལ་ནད་མང་བའོ། །དབང་གི་འབྲས་བུ་ནི་ཡུལ་ལ་སྨིན་པས། ས་ཕྱོགས་ཉམས་མི་དགའ་ཞིང་ངམ་གྲོག་དང་གཡང་ས་ཅན་ལ་སོགས་སྲོག་ལ་གནོད་པ་ཅན་དུ་སྐྱེ་བའོ། ། མ་བྱིན་བླངས་པའི་རྒྱུ་མཐུན་ནི་ལོངས་སྤྱོད་དབུལ་བ་དང༌། ཅུང་ཟད་རྙེད་ན་ཡང་གཞན་དང་ཐུན་མོང་དུ་བྱེད་དགོས་ལ། དབང་གི་འབྲས་བུར་ལོ་ཐོག་ལ་སད་སེར་སྡང༌། ལྗོན་ཤིང་ལ་འབྲས་བུ་མི་ཆགས། མུ་གེ་ཡོད་པའི་སར་སྐྱེའོ། །དེའང་དེང་སང་འཇིག་རྟེན་ན་འཇབ་བུས་ལེན་པ་བརྐུ་བར་གྲགས་ཤིང་དེའི་ཉེས་དམིགས་ཆེ་ཤོས་དཀོན་ཅོག་གི་དཀོར་


JLAZ012_Page_0232
[མ་དཔེ་གཟིགས་ན་འདིར་གནོན།]

འཕྲོག་པ་དང༌། གཞན་དབང་ཡོད་ཀྱིས་འཕྲོག་པ་དང༌། ཚོང་དང་བྲེ་སྲང་གི་གཡོ་སྒྱུས་ལེན་པ་རྣམས་ལ་ཅང་མི་སེམས་པ་མང་ཡང་མ་བྱིན་བླངས་པའི་སྒྲ་དོན་ལ་ཡང་དག་པར་ཞུགས་པས་བརྐུ་བའི་བྱེད་ལས་ཀྱི་ཁྱད་པར་ཙམ་དུ་ཤེས་པར་བྱའོ། །ལོག་པར་གཡེམ་པ་ནི། ཉེས་དམིགས་ཆེ་ཤོས་གཞན་གྱི་སྡོམ་པ་གཏོང་བའི་རྐྱེན་བྱས་པ་དང༌། རང་གི་ཁུ་བ་ཕྱུང་བ་དང༌། གཞན་གྱིས་བདག་པ་དང༌། གླ་བརྔན་སྤྲད་ཚར་བ་དང༌། རང་དབང་ཡིན་ཀྱང་ཉིན་མོ་དང༌། བསྙེན་གནས་སྲུང་བ་དང༌། ན་བ་དང༌། སྦྲུམ་པ་དང༌། མྱ་ངན་གྱིས་ནོན་པ་དང༌། ཟླ་མཚན་ཡོང་བ་དང༌། བང་མ་སངས་པ་དང༌། དཀོན་ཅོག་གི་རྟེན་ཡོད་སར་བགྲོད་པ་དང༌། ཕ་མ་དང་རིགས་ཀྱིས་སྲུང་བ་དང༌། མ་སྨིན་པའི་གཞོན་ནུ་མ་དང༌། ཁ་དང་གཤང་ལམ་ལ་སོགས་པར་བསྒྲོད་པ་སྟེ། ཡུལ་དུས་གནས་སྐབས་ཀྱི་སྒོ་ནས་ལོག་གཡེམ་གྱི་རྣམ་པ་ཐ་དད་པ་ཉམས་སུ་མྱོང་བའོ། །དེ་དག་གི་མྱོང་བ་རྒྱུ་མཐུན་ནི། ཁྱིམ་ཐབས་མི་མཛེས་ཤིང་ལྷོད་པ་ཅན་དང༌། དགྲ་ཟླ་ལྟ་བུ་འབྱུང་ངོ༌། །དབང་གི་འབྲས་བུར་གཤང་གཅི་དང༌། འདམ་རྫབ་ལ་སོགས་པ་དྲི་ང་བའི་གནས་ཡིད་དུ་མི་འོང་བར་གནས་དགོས་པའོ། །གཉིས་པ་ངག་གི་རྣམ་པ་


JLAZ012_Page_0233
[མ་དཔེ་གཟིགས་ན་འདིར་གནོན།]

བཞི་ལས། རྫུན་ནི། གཞན་བསླུ་བའི་བསམ་པས་བདེན་པ་མ་ཡིན་པར་སྨྲས་པ་ཐམས་ཅད། ཁྱད་པར་ས་མ་ཐོབ་པར་ཐོབ། མངོན་ཤེས་མེད་པར་ཡོད་ཟེར་བ་ལ་སོགས་དང༌། བྱེ་བྲག་ཏུ་སངས་རྒྱས་ལ་སྐུར་པ་འདེབས་པ་གང་ཡིན་པའོ། །དེའི་རྒྱུ་མཐུན་གྱི་འབྲས་བུར་རང་ཉིད་ལ་སྐུར་པ་མང་ཞིང༌། གཞན་གྱིས་བསླུ་བར་བྱེད། དབང་གི་འབྲས་བུར་འབྱོར་པ་མི་བརྟན་ཞིང་རྟག་ཏུ་ཤེས་པ་རྟབས་ཤིང་སྐྲག་པའི་ཡུལ་རྐྱེན་དང་ཕྲད་དོ། །ཕྲ་མ་ནི། འབྱེད་པའི་བསམ་པས་གཞན་མི་མཐུན་པར་བཅོས་པ་མཐའ་དག་དང༌། ཁྱད་པར་དགེ་འདུན་གྱི་དབྱེན་བྱེད་པའོ། །དེའི་རྒྱུ་མཐུན་གྱི་འབྲས་བུ་ནི། འཁོར་གཡོག་མི་མཐུན་པ་དང༌། བདག་ཉིད་ལ་རྒོལ་བ་ཅན་འབྱུང་ངོ༌། །དབང་གི་འབྲས་བུ་ནི། ཡུལ་ངམ་གྲོག་དང་ཅོང་རོང་ཅན་ལ་སོགས་བགྲོད་དཀའ་བར་གནས་དགོས་པའོ། །ཚིག་རྩུབ་ནི། སྐྱེ་བོ་བྱད་མི་མཛེས་པ་ལྟ་བུ་ལ་དེའི་སྐྱོན་མངོན་གྱུར་དུ་སྒྲོག་པ་ལྟ་བུས་མཚོན། མདོར་ན་ཕ་རོལ་པོའི་སྙིང་ལ་ཚེར་མ་ལྟ་བུར་འགྱུར་བ་མཐའ་དག་དང༌། ཁྱད་པར་འཕགས་པ་རྣམས་ལ་མི་སྙན་པར་བརྗོད་པའོ། །དེའི་རྒྱུ་མཐུན་གྱི་འབྲས་བུ་རྟག་ཏུ་མི་སྙན་པ་ཐོས་ཤིང་རང་གིས་སྨྲས་པའང་འཐབ་མོའི་ཚིག་ཏུ་འགྱུར་རོ། །དབང་གི་འབྲས་བུ་ནི། རྡོ་གསེག་དང་ཚེར་མ་ཅན་ལ་སོགས་པའི་ས་ཕྱོགས་ཡིད་མི་བདེ་བར་


JLAZ012_Page_0234
[མ་དཔེ་གཟིགས་ན་འདིར་གནོན།]

གནས་དགོས་པའོ། །ངག་འཁྱལ་ནི། བྲམ་ཟེའི་གསང་སྔགས་སོགས་ཆོས་མ་ཡིན་པ་ཆོས་སུ་སེམས་པ་དང༌། སྨད་འཚོང་མའི་གཏམ་དང་ཆགས་སེམས་ཀྱི་གླུས་ཆོས་རྣམ་པར་གཡེང་བ་དང༌། དམག་དང་ཆོམ་རྐུན་ལ་སོགས་ཆགས་སྡང་གི་ཚིག་དག་གོ །དེའི་རྒྱུ་མཐུན་གྱི་འབྲས་བུར། རང་གི་ཚིག་མི་བཙུན་ཞིང་སྤོབས་པ་ཆུང་བའོ། །དབང་གི་འབྲས་བུར་སོ་ནམ་བྱས་ཀྱང་འབྲས་བུ་མི་འབྱུང༌། དུས་ཚིགས་ལོག་ཅིང་མི་བརྟན་པའོ། །དེ་ལྟར་ལུས་ངག་གི་ལས་བདུན་པོ་ནི་བསྟན་ཡོད་ཐོགས་བཅས་ཀྱི་གཟུགས་ཅན་ཡིན་པས། གཞི་བསམ་སྦྱོར་བ་མཐར་ཐུག་བཞི་ཚང་བ་ལས་དེའི་ནུས་པ་རྫོགས་པའོ། །གསུམ་པ་ཡིད་ཀྱི་རྣམ་པ་གསུམ་ལས། བརྣབ་སེམས་ནི། གཞན་གྱི་དངོས་པོ་ལ་ཆགས་ནས་ཡིད་ཀྱི་རྩོལ་བས་རོ་མྱོང་ཞིང་འཁུ་སེམས་ཀྱིས་བདག་གིར་བྱེད་པའོ།།དེའི་རྒྱུ་མཐུན་གྱི་འབྲས་བུར། ཡིད་ལ་བསམ་པ་མི་འགྲུབ་ཅིང༌། མི་འདོད་པ་ཐོག་ཏུ་འབབ་པའོ། །དབང་འབྲས་ནི། ལོ་ཐོག་ཉེས་ཤིང་གནས་དུས་ངན་པའི་སྡུག་བསྔལ་མང་པོ་འབྱུང་ངོ༌། །གནོད་སེམས་ནི། གཞན་ལ་ཞེ་སྡང་དང་ཁོང་ཁྲོའི་སེམས་ཀྱིས་ཀུན་ནས་མནར་འདོད་པའོ། །དེའི་རྒྱུ་མཐུན་གྱི་འབྲས་བུར། རྟག་ཏུ་འཇིགས་པ་དང༌། འཚེ་བ་མང༌། དབང་འབྲས་ནི། སྡིག་སྤྱོད་རྒྱལ་པོ་


JLAZ012_Page_0235
[མ་དཔེ་གཟིགས་ན་འདིར་གནོན།]

དང༌། ཆོམ་རྐུན། སྦྲུལ་དང་གཅན་གཟན་ལ་སོགས་པའི་འཇིགས་པ་འབྱུང་ངོ༌། །ལོག་ལྟ་ནི། རྒྱུ་འབྲས་མི་བདེན་ནོ་སྙམ་པ་དང༌། རྟག་ཆད་དུ་བལྟ་བ་ལ་མཆོག་ཏུ་འཛིན་པའོ། །དེའི་རྒྱུ་མཐུན་གྱི་འབྲས་བུར་ལྟ་བ་ངན་པ་ལ་གནས་ཤིང༌། གཡོ་སྒྱུས་སེམས་འཁྲུགས་པའོ། །དབང་གི་འབྲས་བུར། འབྱོར་པ་ཉུང་ཞིང༌། སྐྱབས་དང་དཔུང་གཉེན་མེད་པར་སྐྱེའོ། །དེ་ལྟར་ཡིད་ཀྱི་གསུམ་པོ་ནི་བསྟན་མེད་ཐོགས་བཅས་ཀྱི་གཟུགས་སུ་འདུ་བས། ཡན་ལག་གཉིས་གཉིས་ཀྱིས་རྫོགས་པའོ། །དེ་ལྟའི་མི་དགེ་བ་བཅུ་ཆར་ལ་བྱེད་པ་རྒྱུ་མཐུན་གྱི་འབྲས་བུ་ནི་སླར་ཡང་དེ་དང་མཐུན་པའི་ལུས་རྟེན་ཐོབ་ནས་སྔ་མའི་སྤྱོད་པ་ངན་པ་ལ་འཇུག །ལས་དེ་མུ་མཐའ་མེད་པར་འཕེལ་ནས་སྡུག་བསྔལ་རྒྱ་ཆེན་པོ་མྱོང་བའོ། །དེའི་ཕྱིར་རྒྱུ་མི་དགེ་བ་བཅུ་དང༌། དེའི་འབྲས་བུར་སྡུག་བསྔལ་ཐ་དད་པར་མྱོང་ཚུལ་ཤེས་པར་བྱས་ནས་མི་དགེ་བ་བཅུ་ལ་སྤོང་སེམས་བརྟན་པ་དང༌། དགེ་བ་བཅུའི་འབྲས་བུ་ལ་བྲོད་པ་བསྐྱེད་ནས་དང་དུ་བླང་བའི་ཚུལ་སྲོག་གཅོད་སྤངས་པས་ཚེ་རིང་ཞིང་ནད་ཉུང༌། མ་བྱིན་ལེན་སྤངས་པས་ལོངས་སྤྱོད་དང་ལྡན། འདོད་ལོག་སྤངས་པས་ཁྱིམ་ཐབས་མཛེས་ཤིང་དགྲ་ཟླ་ཉུང༌། རྫུན་སྤངས་པས་ཀུན་གྱིས་བསྟོད་ཅིང་བྱམས། ཕྲ་མ་སྤངས་པས་འཁོར་གཡོག་གུས། ཚིག་རྩུབ་སྤངས་པས་སྙན་པར་ཐོས། ངག་འཁྱལ་


JLAZ012_Page_0236
[མ་དཔེ་གཟིགས་ན་འདིར་གནོན།]

སྤངས་པས་ཚིག་བཙན། བརྣབ་སེམས་སྤངས་པས་བསམ་དོན་འགྲུབ། གནོན་སེམས་སྤངས་པས་འཚེ་བ་དང་བྲལ། ལོག་ལྟ་སྤངས་པས་ལྟ་བ་བཟང་པོ་རྒྱུད་ལ་སྐྱེ། དེའི་ཕྱིར་ན་བདག་གི་བསོད་ནམས་ཆ་མཐུན་གྱིས་དཀར་པོའི་རྒྱུ་འབད་པས་བསྒྲུབ་པོ་སྙམ་དུ་བློ་སྟོབས་བསྐྱེད་པར་བྱའོ། །ལྔ་པ་ཐར་པའི་ཕན་ཡོན་བསམ་པ་ནི། ཉན་ཐོས། རང་རྒྱལ། རྫོགས་སངས་རྒྱས་གསུམ་གྱི་གོ་འཕང་གང་ཐོབ་ཀྱང༌། ཞི་བ་བསིལ་བ། འཁོར་བའི་སྡུག་བསྔལ་གྱི་འཕྲང་ལས་ཐར་བ་ཅན་ཡིན་པས་ང་རེ་དགའ། དེའི་ནང་ཚན་ལས་ཀྱང་ད་རེས་ཐེག་པ་ཆེན་པོ་དང་མཇལ་བས་དགེ་བ་བཅུ་དང་ཚད་མེད་བཞི་དང་ཕར་ཕྱིན་དྲུག་དང༌། བསམ་གཏན་བཞི་དང༌། གཟུགས་མེད་བཞི་དང༌། ཞི་ལྷག་གཉིས་ལ་སོགས་པ་ཐམས་ཅད་རྫོགས་པའི་བྱང་ཆུབ་ཁོ་ན་འདོད་པས་བསྒྲུབ་པར་བྱ་སྙམ་དུ་སྦྱོར་བ་སེམས་བསྐྱེད། དངོས་གཞི་དམིགས་པ་མེད་པ། རྗེས་བསྔོ་སྨོན་གྱིས་རྒྱས་ཐེབས་པའི་དམ་པ་གསུམ་གྱིས་ཟིན་པས་ཉམས་སུ་བླང་ངོ༌། །དྲུག་པ་དགེ་བའི་བཤེས་གཉེན་བསྟེན་པ་ནི། བླ་མ་མ་བསྟེན་པར་སངས་རྒྱས་འགྲུབ་པའི་ལོ་རྒྱུས་མདོ་རྒྱུད་བསྟན་བཅོས་ཐམས་ཅད་ནས་མ་གསུངས། མཐོང་ཆོས་སུའང་རང་བཟོ་དང༌། ལོ་ཚོད་ཀྱིས་ས་ལམ་གྱི་ཡོན་ཏན་སྐྱེས་པ་གཅིག་ཀྱང་མེད། འདི་ལྟར་


JLAZ012_Page_0237
[མ་དཔེ་གཟིགས་ན་འདིར་གནོན།]

རང་དང་བཅས་པའི་སེམས་ཅན་ཐམས་ཅད་ལོག་པའི་ལས་ལ་རྣམ་རིག་གཟོ་བ་ཉིད་དེ། ཐར་པ་དང་རྣམ་མཁྱེན་གྱི་ལམ་ལ་ལོང་བ་བཤེས་མེད་ཐང་སྟོངས་སུ་མགོ་འཁོར་བ་དང་མཚུངས། དཔེར་ན་དེད་དཔོན་ལ་མ་བརྟེན་པར་རིན་པོ་ཆེའི་གླིང་ནས་ནོར་བུ་བླངས་པའི་དཔེ་མེད། དེ་བས་དགེ་བའི་གཤེས་གཉེན་དང་དགེ་བའི་གྲོགས་པོ་ནི་ཐར་བ་དང་ཐམས་ཅད་མཁྱེན་པའི་ས་མཁན་མངོན་སུམ་པའི་ཕྱིར་གུས་པས་བསྟེན། སྤྱི་བོས་མཆོད། ཅི་གསུངས་བསྒྲུབ། མི་མཉེས་པ་སྐད་ཅིག་མ་ཙམ་ཡང་མེད་པར་བསྟེན་པའི་ཡོན་ཏན་ནི་བསམ་ལས་འདས་པ་ལ་སྤྲོ་བ་བསྐྱེད། སྡིག་གྲོགས་དང་རྨོངས་པའི་གཞན་དབང་དུ་མ་སོང་བར་བླ་མ་བསྟེན་པའི་ཚུལ་ལ་སྐྱོ་དུབ་མེད་པ་དང༌། ཚེ་རབས་གཞན་དུའང་བླ་མ་དམ་པ་དང་མཇལ་ནས་ཐུགས་རྗེས་འཛིན་པའི་སྨོན་ལམ་གདབ་པ་ལ་འབད་པར་བྱའོ།། །།ཞེས་པའང་རྫོགས་ཆེན་པ་རང་བྱུང་རྡོ་རྗེས་སོ།། །།

རྫོགས་པ་ཆེན་པོ་ཀློང་ཆེན་སྙིང་ཐིག་གི་ཐུན་མོང་མ་ཡིན་པའི་སྔོན་འགྲོའི་ཁྲིད་ཡིག་དྲན་པ་ཉེར་གཞག


JLAZ012_Page_0238
[མ་དཔེ་གཟིགས་ན་འདིར་གནོན།]

རྫོགས་པ་ཆེན་པོ་ཀློང་ཆེན་སྙིང་ཐིག་གི་ཐུན་མོང་མ་ཡིན་པའི་སྔོན་འགྲོའི་ཁྲིད་ཡིག་དྲན་པ་ཉེར་གཞག་བཞུགས།།


JLAZ012_Page_0239
[མ་དཔེ་གཟིགས་ན་འདིར་གནོན།]

རང་བྱུང་གདོད་མའི་དབྱིངས་ལ་ཕྱག་འཚལ་ལོ། །ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱིས་རྒྱུད་ལས་སུ་རུང་བར་བྱས་ནས། ཐུན་མོང་མ་ཡིན་པ་དང༌། ཁྱད་པར་གྱི་སྔོན་འགྲོས་གོ་ཕྱེ་ནས་རང་བཞིན་རྫོགས་པ་ཆེན་པོའི་སྙིང་ཐིག་འོད་གསལ་ཐེག་མཆོག་རྒྱལ་པོའི་གོ་འཕང་མཆོག་ལ་གཞག་པར་བྱ་བ་ནི། འཁྲིད་ཚུལ་གྱི་རིམ་པ་མང་དུ་བྱུང་བས་སྙིང་ཏིག་གི་བསྟན་པ་རི་མོའི་མར་མེ་ལྟ་བུར་གྱུར་པ་ལ་ཡིད་དབྱུང་ནས། ཐེག་མཆོག་འདིའི་བསྟན་པའི་བདག་པོ་རྒྱལ་བའི་དབང་པོ་ཀློང་ཆེན་རབ་འབྱམས་ཀྱི་དགོངས་པ་སོར་བཞག་སྟེ་བསྟན་པ་གཞི་བཞེངས་སུ་སློང་བར་དམ་བཅའོ། །དེ་ལ་དང་པོར་སྐྱབས་སུ་འགྲོ་བ་ལ་


JLAZ012_Page_0240
[མ་དཔེ་གཟིགས་ན་འདིར་གནོན།]

གསུམ། ཁྱད་པར་དབྱེ་བ། སྐྱབས་སུ་འགྲོ་ཚུལ། ཕན་ཡོན་བསམ་པ་ལས། དང་པོ་ནི། འདི་ལྟར་ངན་སོང་གསུམ་གྱི་སྡུག་བསྔལ་ལ་འཇིགས་ནས་བདེ་འགྲོ་མཐོ་རིས་ཀྱི་བདེ་བ་ཙམ་དོན་དུ་གཉེར་བའི་ཕྱིར། དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་ཆུང་ངུ་ཞེས་བྱ་སྟེ། འབྲས་བུ་གནས་སྐབས་ཀྱི་བདེ་བ་ཙམ་དོན་དུ་གཉེར་བ་ལས་གཞན་མེད་པའི་ཕྱིར་རོ། །འཁོར་བའི་སྡུག་བསྔལ་ལ་སྐྲག་ནས་རང་ཉིད་གཅིག་པུ་ཞི་བདེ་དོན་དུ་གཉེར་བའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་འབྲིང་པོ་ཞེས་བྱ་སྟེ་འཁོར་བ་ལས་རང་ཉིད་ཐར་ཙམ་པའི་འབྲས་བུ་ལ་དམིགས་པའི་ཕྱིར་རོ། །མཐའ་མེད་འཁོར་བའི་སེམས་ཅན་གཞན་རྣམས་ཀྱི་སྡུག་


JLAZ012_Page_0241
[མ་དཔེ་གཟིགས་ན་འདིར་གནོན།]

བསྔལ་མཐོང་ནས། དེ་རྣམས་འཁོར་བ་ལས་བསྒྲལ་བའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་ཆེན་པོ་ཞེས་བྱ་སྟེ། སེམས་ཅན་ཐམས་ཅད་ཀྱི་དོན་དུ་སངས་རྒྱས་འདོད་པ་ལ་དམིགས་པའི་ཕྱིར་རོ། །དེའི་ཕྱིར་སྐྱེས་བུ་ཆུང་ངུ་དང་འབྲིང་གི་ཆ་ལས་ལོག་སྟེ། སེམས་ཅན་ཐམས་ཅད་ཀྱི་དོན་དུ་སྐྱེས་བུ་ཆེན་པོའི་རྗེས་སུ་བསླབ་པར་བྱའོ་སྙམ་པས་ཀུན་སློང་འཆོས་པར་བྱའོ། །གཉིས་པ་སྐྱབས་སུ་འགྲོ་ཚུལ་ནི། དེ་ཡང་ཐུན་མོང་ཐེག་པའི་ལུགས་སངས་རྒྱས་ལ་སྟོན་པ། ཆོས་ལ་སྐྱབས། དགེ་འདུན་ལ་ལམ་བསྒྲུབ་པའི་གྲོགས་སུ་མོས་ཏེ་སྐྱབས་སུ་འགྲོ་བ་དང༌། ཐུན་མོང་མ་ཡིན་པ་གསང་སྔགས་སྤྱིའི་ཚུལ་གྱིས་སྒོ་གསུམ་བླ་མ་ལ་འབུལ་ཡི་དམ་ལ་བརྟེན་མཁའ་འགྲོ་ལ་གྲོགས་སུ་བྱས་ནས་སྐྱབས་སུ་འགྲོ་བ་དང༌། ཁྱད་པར་བ་ཐབས་མཆོག་རྡོ་རྗེ་སྙིང་པོའི་ལུགས་ཀྱི། རྩ་སྤྲུལ་སྐུར་བརྟེན། རླུང་ལོངས་སྐུར་སྦྱངས། ཐིག་ལེ་ཆོས་སྐུར་དག་པའི་མྱུར་ལམ་ལ་སྐྱབས་སུ་འགྲོ་བ་དང༌། མཐར་ཐུག་བསླུ་བ་མེད་པ་གནས་ལུགས་རྡོ་རྗེའི་སྐྱབས་འགྲོ་ནི། སྐྱབས་ཡུལ་དེ་དག་རྣམས་ཀྱི་ཐུགས་རྒྱུད་ལ་བཞུགས་པའི་ཡེ་ཤེས་ངོ་བོ་སྟོང་པ། རང་བཞིན་གསལ་བ། ཐུགས་རྗེ་ཀུན་ཁྱབ་རྣམ་གསུམ་དབྱེར་མེད་ཆེན་པོ་རང་རྒྱུད་ལ་བསྒྲུབ་བྱར་བྱེད་ཅིང་ལ་བཟླ་བ་སྟེ། ཚུལ་


JLAZ012_Page_0242
[མ་དཔེ་གཟིགས་ན་འདིར་གནོན།]

དེ་ལྟ་བུའི་གནས་ལ་འདྲིས་པར་བྱས་ནས། དངོས་གཞིའི་དམིགས་པ་ནི། རང་ཉིད་འདུག་པའི་ས་ཕྱོགས་འདི་ཉིད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བའི་དབུས་སུ་དཔག་བསམ་གྱི་སྡོང་པོ་ཡལ་ག་ལྔ་པ། ལོ་འདབ་དང་མེ་ཏོག་འབྲས་བུ་ཕུན་སུམ་ཚོགས་པ་ལ། རིན་པོ་ཆེའི་འཕྱང་འཕྲུལ་དྲིལ་གཡེར་ལ་སོགས་པས་རྣམ་པར་བརྒྱན་པས་ནམ་མཁའི་དབྱིངས་ཁྱབ་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་སྟེང་སྣ་ཚོགས་པདྨ་དང་ཉི་ཟླ་བརྩེགས་པའི་གདན་ལ་སངས་རྒྱས་ཀུན་འདུས་ཀྱི་ངོ་བོ་རྩ་བའི་བླ་མ་ཨོ་རྒྱན་རྡོ་རྗེ་འཆང་ཡུམ་དང་བཅས་པའི་རྣམ་པ་ཅན་ལ་རྫོགས་ཆེན་བརྒྱུད་པའི་བླ་མ་རྣམས་ཐོག་བརྩེགས་སུ་ཞུགས་ཤིང༌། ཡི་དམ་དཔའ་བོ་མཁའ་འགྲོས་མཐའ་ནས་བསྐོར་བ། མདུན་གྱི་ཡལ་ག་ལ་སངས་རྒྱས་ཤཱཀྱ་ཐུབ་པ་ལ་ཕྱོགས་བཅུ་དུས་གསུམ་གྱི་སངས་རྒྱས་རྣམས་དང༌། གཡས་ཀྱི་ཡལ་གར་བྱང་ཆུབ་སེམས་དཔའི་དགེ་འདུན་ཉེ་བའི་སྲས་བརྒྱད། གཡོན་གྱི་ཡལ་ག་ལ་མཆོག་ཟུང་ལ་སོགས་ཉན་ཐོས་ཀྱི་དགེ་འདུན་འཕགས་པའི་ཚོགས། རྒྱབ་ཀྱི་ཡལ་གར་ཆོས་དཀོན་མཆོག་གླེགས་བམ་བརྩེགས་པའི་རྣམ་པ་ཅན་ཨཱ་ལི་ཀཱ་ལིའི་རང་སྒྲ་སྒྲོགས་པ། དེ་དག་གི་བར་མཚམས་ཐམས་ཅད་ཡེ་ཤེས་དང་ལས་ལ་གྲུབ་པའི་ཆོས་སྲུང་དམ་ཅན་རྒྱ་མཚོའི་ཚོགས་ཀྱིས་བར་


JLAZ012_Page_0243
[མ་དཔེ་གཟིགས་ན་འདིར་གནོན།]

མེད་དུ་གང་བ། ཐམས་ཅད་ཀྱང་མཁྱེན་བརྩེ་ནུས་གསུམ་གྱི་ཡོན་ཏན་དཔག་ཏུ་མེད་པས་བདག་ཉིད་ལ་རྗེས་སུ་བརྩེ་ཞིང༌། འདྲེན་པའི་དེད་དཔོན་ཆེན་པོར་བཞུགས་པ་ལ་ཕ་མ་དང་གནོད་བྱེད་ཀྱིས་གཙོས་བྱས་བདག་གཞན་གྱི་སེམས་ཅན་ཐམས་ཅད་ས་གཞིའི་ངོས་ནས་ཐལ་མོ་སྦྱར་ཏེ། དུས་འདི་ནས་བཟུང་སྟེ་བྱང་ཆུབ་སྙིང་པོའི་བར་དུ་ཁྱེད་ལ་བརྟེན། ཁྱེད་ལ་འབུལ། ཁྱེད་ལས་གཞན་པའི་སྐྱབས་དང་རེ་ས་མེད་སྙམ་པའི་གདུང་བ་དྲག་པོས། ༈ དཀོན་མཆོག་གསུམ་དངོས་བདེ་གཤེགས་རྩ་བ་གསུམཿ རྩ་རླུང་ཐིག་ལེའི་རང་བཞིན་བྱང་ཆུབ་སེམསཿ ངོ་བོ་རང་བཞིན་ཐུགས་རྗེའི་དཀྱིལ་འཁོར་ལཿ བྱང་ཆུབ་སྙིང་པོའི་བར་དུ་སྐྱབས་སུ་མཆིཿ ཞེས་སྐྱབས་འགྲོ་ཅི་འགྲུབ་ཏུ་བྱས་ནས། བདག་དང་སེམས་ཅན་ཐམས་ཅད་དཀོན་མཆོག་གསུམ་སོགས་སྐྱབས་ཡུལ་རྣམས་ལ་ཐིམ། དེ་དག་ཀྱང་དབུས་ཀྱི་བླ་མ་སྐྱབས་གསུམ་ཀུན་འདུས་ལ་ཐིམ། དེ་ཡང་ཆོས་སྐུ་སྤྲོས་བྲལ་གདོད་མའི་ངང་ལ་བསྟིམ་ནས། གནས་ལུགས་དོན་གྱི་སྐྱབས་འགྲོ་ལ་ཅི་གནས་སུ་མཉམ་པར་འཇོག །གསུམ་པ་ཕན་ཡོན་བསམ་པ་ནི། འདི་ནི་ཆོས་ཐམས་ཅད་ཀྱི་གཞི་རྟེན་ཡིན་ཏེ། གང་གིས་སྐྱབས་སུ་སོང་བ་ཙམ་གྱིས་ཐར་པའི་ས་བོན་འདེབས་པ་དང༌། མི་དགེའི་ཚོགས་ལས་རིང་དུ་བྱེད་ཅིང༌། དགེ་བ་གོང་དུ་འཕེལ་བ་དང༌། སྡོམ་


JLAZ012_Page_0244
[མ་དཔེ་གཟིགས་ན་འདིར་གནོན།]

པ་ཀུན་གྱི་རྟེན་གཞིར་འགྱུར་ཞིང༌། ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་བ་དང༌། གནས་སྐབས་སུ་ཡང་དཀར་ཕྱོགས་ཀྱི་ལྷ་རྣམས་ཀྱིས་བསྲུང་ཞིང་སྨོན་པ་ཡིད་བཞིན་དུ་འགྲུབ་པ་དང༌། རྟག་ཏུ་དཀོན་མཆོག་གསུམ་གྱི་སྣང་བ་དང་མི་འབྲལ་ཞིང་ཚེ་རབས་དྲན་པ་དང༌། འདི་ཕྱིར་བདེ་ཞིང་མཐར་ཐུག་སངས་རྒྱས་ཀྱི་གོ་འཕང་ཐོབ་པ་ལ་སོགས་ཕན་ཡོན་དཔག་ཏུ་མེད་དོ། །ཞར་ལ་སྐྱབས་སུ་སོང་བའི་སྡོམ་པ་རྒྱུད་ལ་གནས་བྱའི་ཕྱིར། བསླབ་བྱའི་མཚན་ཉིད་མདོར་བསྡུ་ན། སངས་རྒྱས་ལ་སྐྱབས་སུ་སོང་ནས་རང་ཉིད་འཁོར་བ་ན་འཁོར་བ་འཇིག་རྟེན་པའི་ལྷ་དང་བརྟེན་པར་དཀའ་ཞིང་གནོད་པ་སྦྱིན་པའི་རང་བཞིན་རྒྱལ་པོ་ལ་སོགས་པར་མགོན་སྐྱབས་མི་འཚོལ། སྐུའི་རྟེན་ཆག་དུམ་ཡན་ཆད་ལ་ཅི་མི་མཉམ་པའི་སྲིད་ཞུ་མི་ལྷོད། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བའི་རྟོག་པ་རྨི་ལམ་དུའང་སྤོང་ཞིང༌། ཡི་གེའི་རས་མ་ཡན་ཆད་ལ་གུས་པ་བསྐྱེད། དགེ་འདུན་ལ་སྐྱབས་སུ་སོང་ནས་ལྟ་སྤྱོད་ལོག་པའི་གང་ཟག་མུ་སྟེགས་ཀྱི་དངོས་པོ་ཅན་དང་མི་འགྲོགས་ཤིང༌། ལྷན་པ་སེར་པོའང་རྡོག་པས་མི་བརྫི། མདོར་ན་གསང་བ་མཆོག་གི་ཐེག་པ་འདིར་སྐྱབས་ཡུལ་གྱི་གཙོ་བོ་བླ་མ་ཡིན་ལ། བླ་མའི་ཐུགས་སངས་རྒྱས། གསུང་དམ་


JLAZ012_Page_0245
[མ་དཔེ་གཟིགས་ན་འདིར་གནོན།]

ཆོས། སྐུ་དགེ་འདུན་ཡིན་པས་དེ་ཉིད་སུན་ཕྱུང་ན་སྐྱབས་ཡུལ་ཐམས་ཅད་སྤངས་པར་འགྲོ། ཆོས་ཐམས་ཅད་ཀྱི་གཞི་རྟེན་སྐྱབས་འགྲོའི་གནད་ལ་ནན་ཏན་དུ་བྱའོ། །གཉིས་པ་ཐེག་ཆེན་རྩ་བ་སེམས་བསྐྱེད་ཀྱི་ཁྲིད་ལ་གསུམ། ཚད་མེད་བཞིས་བློ་སྦྱོང་བ། བྱང་ཆུབ་ཏུ་སེམས་བསྐྱེད་པ། སྨོན་འཇུག་གི་བསླབ་བྱ་བཟུང་བ་དང་གསུམ་ལས། དང་པོའི་ནང་གསེས་བཏང་སྙོམས་བསྒོམ་པ་ནི། ག་རེ། ད་ལྟའི་གནས་སྐབས་ན་ཕ་མ་དང་གཉེན་འདུན་སོགས་རང་ཕྱོགས་ལ་ཤིན་ཏུ་ཆགས། དགྲ་དང་དེའི་ཕྱོགས་ལ་སྡང་ཞེན་མི་བཟད་པར་བྱེད་པ་འདི་ཡང་མ་བརྟགས་པའི་སྐྱོན་དུ་འདུག །འདི་ལྟར་ཚེ་རབས་སྔ་མར། དགྲས་ཀྱང་གཉེན་བྱས། གཉེན་གྱིས་ཀྱང་དགྲ་བྱས་པ་ལ་ཐེ་ཚོམ་མེད། ད་ལྟའང་དགྲ་ལ་དགྲར་བཟུང་ཀྱང་དེས་ངེས་པར་རང་ལ་གནོད་ཐུབ་པའི་གཏན་ཚིགས་མེད། རང་གིས་བསྟུན་ཤེས་ན་གཉེན་བཞིན་ཕན་ཐོགས་པའང་སྲིད་ལ། གཉེན་ཡིན་ཀྱང་བུ་ཚས་ཕ་མ་བསླུ་བ་བཞིན། འགལ་ཟླ་དང་བསྡོངས་ནས་དེའི་ཕྱོགས་བཟུང༌། ནོར་འཕྲོག་རྩོད་པ་འགྱེད་པ་སོགས་མཐོང་ཆོས་སུ་འགྱུར་བ་དང༌། གལ་ཏེ་གཅིག་ཏུ་མཛའ་བ་ལྟར་སྣང་ཡང་དེ་ལ་མི་འདོད་པ་བྱུང་བའི་ཚེ་རང་ལའང་སྡུག་བསྔལ་བསྐྱེད་ཅིང་གནས་སྐབས་ཀྱི་བདེ་བ་འཇོམས་པ་དང༌། མཐར་


JLAZ012_Page_0246
[མ་དཔེ་གཟིགས་ན་འདིར་གནོན།]

ཐུག་དགེ་བའི་གེགས་རླབས་པོ་ཆེ་བྱས་ཏེ་ངན་སོང་དུ་བསྐྱུར་བའང་ཡོད་ན་དེ་ལས་དགྲར་གྱུར་པ་ཅི་ཞིག་ཡོད། མ་འོངས་པའི་ཆ་ལ་དགྲ་གཉེན་དུ་འགྱུར་དང༌། གཉེན་དགྲ་རུ་འགྱུར་ངེས་པ་མེད་ངེས་ཡིན་པ་ལ་ཅིས་སྨྱོན་སྙམ་དུ་སེམས་ཅན་གཅིག་དང་གཉིས་ནས་རིམ་པར་ནམ་མཁས་གར་ཁྱབ་ཏུ་བརྟགས་ལ་ཉེ་རིང་ཆགས་སྡང་གཉིས་དང་བྲལ་བ་དམིགས་པ་མེད་པའི་བཏང་སྙོམས་ལ་རྩལ་སྦྱང་ངོ༌། ། དེ་ནས་བྱམས་པ་བསྒོམ་པ་ནི། སེམས་ཅན་ཐམས་ཅད་དམིགས་ཡུལ་དུ་བསམ་ལ། བུ་ཚ་ཆུང་ངུར་ཕ་མས་བརྩེ་ཞིང་ལོག་སྒྲུབ་བཟོད་པ་ལྟར། སེམས་ཅན་དེ་དག་བདེ་བ་དང་ལེགས་པའི་དཔལ་ལ་སྦྱོར་བའི་བློ་འདུན་དྲག་པོས། ཐབས་ཇི་ལྟ་བུས་ཕན་གདགས་པར་བྱ་སྙམས་པའི་བྱམས་པ་སྒོམ་ཞིང་རྩལ་སྦྱང་ངོ༌། །དེ་ནས་སྙིང་རྗེ་བསྒོམ་པ་ལ། གང་ཞིག་ནག་ཅན་བཙོན་དོང་དུ་བཅུག་པ་དེ་ཉིད་མཐར་གསོད་དུ་ཉེ་བའམ། ཤན་པའི་འདུན་སར་དུད་འགྲོ་འཆི་ག་མ་ལྟ་བུའི་སེམས་ཅན་སྡུག་བསྔལ་དྲག་པོས་གདུངས་པ་ཞིག་བློ་ཡུལ་དུ་བསམ་ལ། དེ་ལ་བརྩེ་བའི་ཡུལ་མ་དང་བུའི་འདུ་ཤེས་བསྐྱེད་དེ་སྡུག་བསྔལ་འདི་ལས་ད་ལྟ་ཉིད་དུ་མྱུར་བ་ཉིད་དུ་སྐད་ཅིག་ཉིད་དུ་ཐར་ན་ཅི་མ་རུང་སྙམ་པའི་སྙིང་རྗེ་ཤས་མི་བཟོད་པ་མཆི་མ་ཐོན་པར་སྒོམ་ཞིང༌། དེ་


JLAZ012_Page_0247
[མ་དཔེ་གཟིགས་ན་འདིར་གནོན།]

ནས་རིམ་པར་ངན་སོང་གཞན་དང༌། དེར་སྐྱེ་བའི་རྒྱུ་སྒྲུབ་པ་ཐམས་ཅད་ལ་སྒོམ་ཞིང་མཐར་མི་དམིགས་པའི་ངང་དུ་མཉམ་པར་འཇོག་གོ། །དེ་ནས་དགའ་བ་ནི། མཐོ་རིས་ཀྱི་ཡུལ་ན་སུ་ཞིག་བདེ་ཞིང་སྐྱིད་པ། ཚེ་རིང་བ། འཁོར་མང་བ། ལོངས་སྤྱོད་དང་ལྡན་པ་ཞིག་དམིགས་ཡུལ་དུ་བསམ་ནས། དེ་ལ་འགྲན་སེམས་དང་ཕྲག་དོག་མེད་པར། ད་རུང་འདི་བས་ཀྱང་མངོན་མཐོའི་དཔལ་གྱིས་འབྱོར་ཞིང༌། འཚེ་བ་མེད་པ། ཤེས་རབ་ཆེ་བ་ལ་སོགས་པའི་ཕུན་སུམ་ཚོགས་པ་དུ་མས་འབྱོར་བར་ཤོག་ཅིག །སེམས་ཅན་གཞན་རྣམས་ཀྱང་འདི་ལྟ་བུའི་གོ་འཕང་ལ་གནས་ན་ང་རེ་དགའ་སྙམ་པ་དང༌། ཁྱད་པར་དུ་རང་ལ་གནོད་བྱེད་ཀྱི་དགྲ་དང་སེམས་ལ་ཕྲག་དོག་གི་གནས་སུ་གྱུར་པ་ཐམས་ཅད་ལ་གཞན་འབྱོར་ཕུན་སུམ་ཚོགས་པ་ལ་མི་བཟོད་པའི་བློ་ངན་གྱི་རྩ་བ་དྲུང་ནས་ཕྱུང་སྟེ། བདེ་བ་དང་ལྡན་པའི་ཆ་ཐམས་ཅད་ལ་དགའ་བ་ཁྱད་པར་ཅན་སྒོམ་ཞིང་མཐར་དམིགས་པ་མེད་པའི་ངང་ལ་བཞག་གོ། ། གཉིས་པ་སེམས་བསྐྱེད་དངོས་ལ། བློའི་ཁྱད་པར་གྱིས། སྔོན་ལ་རང་ཉིད་ཐར་བར་བྱས་ནས་འགྲོ་བ་གཞན་ཡང་དེའི་གོ་འཕང་ལ་འགོད་པར་འདོད་པ་དེད་དཔོན་ལྟ་བུའི་སེམས་བསྐྱེད། རང་དང་སེམས་ཅན་གཞན་ལྷན་ཅིག་ཐར་བར་འདོད་པ་མཉེན་པ་ལྟ་བུའི་སེམས་


JLAZ012_Page_0248
[མ་དཔེ་གཟིགས་ན་འདིར་གནོན།]

བསྐྱེད། སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་རང་ཉིད་ཐར་པའི་འདོད་པ་མི་བྱེད་པ་རྫི་བོ་ལྟ་བུའི་སེམས་བསྐྱེད། ས་མཚམས་ཀྱིས་དབྱེ་ན། ཚོགས་སྦྱོར་གྱི་ལམ་ལ་མོས་པས་དཔྱོད་པའི་སེམས་བསྐྱེད། ས་དང་པོ་ནས་བདུན་པའི་བར་ལ་ལྷག་བསམ་རྣམ་དག་གི་སེམས་བསྐྱེད། དག་པའི་ས་གསུམ་ན་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་སར་སྒྲིབ་པ་སྤངས་པའི་སེམས་བསྐྱེད་ཀྱི་ཐ་སྙད་ཡོད་ཀྱང༌། ཀུན་རྫོབ་ཆོ་ག་དང་དོན་དམ་མཚན་ཉིད་སྒོམ་སྟོབས་ཀྱིས་ཐོབ་པ་ཡིན་ལ། འདིར་ལས་དང་པོ་པ། ཆོ་ག་ལ་ལྟོས་པ་ཅན་ཡིན་པས་སེམས་བསྐྱེད་འབོགས་ཆོག་གཞན་དུ་བལྟ། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའི་ཚོགས་སེམས་བསྐྱེད་ཀྱི་དཔང་པོར་དམིགས་ལ་བློ་གྲོས་ཆེན་པོའི་སེམས་བསྐྱེད་ནི། འདི་ལྟར་སེམས་ཅན་འདི་དག་ཐམས་ཅད་བདག་གི་ཕ་མར་མ་གྱུར་པ་ནི་གཅིག་ཀྱང་མེད། ཕ་མར་གྱུར་པའི་ཚེ་ད་ལྟའི་ཕ་མ་བཞིན་གཅེས་སྤྲས་ཀྱིས་བསྐྱངས། ཟས་སུ་ཕུད་བྱིན། གོས་ཀྱིས་བརྩེ་གཡོགས་ཤིན་ཏུ་བྱམས་པའི་བསམ་སྦྱོར་གྱིས་བསྐྱེད་བསྲིང་བར་ངེས་ན། ཕ་མ་འཁོར་བ་ན་གནས་བཞིན་བདག་ཐར་པ་ལ་དགོས་པ་ཅི་ཡོད། དེའི་ཕྱིར་བདག་གིས་སེམས་ཅན་ཐམས་ཅད་ཀྱི་དོན་དུ་


JLAZ012_Page_0249
[མ་དཔེ་གཟིགས་ན་འདིར་གནོན།]

བྱང་ཆུབ་མཆོག་ཏུ་སེམས་བསྐྱེད་ནས། སྤྱོད་པ་རླབས་པོ་ཆེ་ལ་བསླབ་ཅིང་འཁོར་བ་ན་སེམས་ཅན་གཅིག་ཀྱང་མི་གནས་པ་དེ་ཙམ་དུ་བརྩོན་འགྲུས་བརྩམ་མོ་སྙམ་པས། ཧོཿ སྣ་ཚོགས་སྣང་བ་ཆུ་ཟླའི་རྫུན་རིས་ཀྱིསཿ འཁོར་བ་ལུ་གུ་རྒྱུད་དུ་འཁྱམས་པའི་འགྲོཿ རང་རིག་འོད་གསལ་དབྱིངས་སུ་ངལ་གསོ་ཕྱིརཿ ཚད་མེད་བཞི་ཡི་ངང་ནས་སེམས་བསྐྱེད་དོཿ ཞེས་མང་དུ་བརྗོད་པའི་མཐར་ཚོགས་ཞིང་དུ་གྱུར་པ་རྣམས་རང་ཉིད་ལ་བསྟིམས་པས་དེ་དག་གི་ཐུགས་རྒྱུད་ལ་གནས་པའི་དོན་དམ་པའི་བྱང་ཆུབ་ཀྱི་སེམས་རང་གི་ཤེས་རྒྱུད་ལ་ལྷང་གིས་སྐྱེས་པར་བསམ་ལ་སྟོང་པ་ཉིད་ཀྱི་གཤིས་ལ་གཞག་པར་བྱའོ། །གསུམ་པ་བསླབ་བྱའི་བསམ་པ་ལ་སྨོན་འཇུག་གཉིས་ལས། དང་པོ་འགྲོ་བར་འདོད་པ་ལྟ་བུ་སྨོན་པའི་བསླབ་བྱ་ལ་བདག་གཞན་མཉམ་པ། བརྗེ་བ། གཞན་གཅེས་པར་བསྒོམ་པ་གསུམ་ལས། དང་པོ་མ་འབྱོངས་པར། འདི་ལྟར་སེམས་ཅན་ཐམས་ཅད་དང་བདག་ཉིད་བདེ་བ་འདོད་སྡུག་བསྔལ་མི་འདོད་པར་བློ་གཅིག་ཏུ་མཐུན་ཀྱང༌། སེམས་ཅན་རྣམས་ཀྱི་སྡུག་བསྔལ་གྱི་རྒྱུ་དགེ་སྡིག་བླང་དོར་གྱི་གནད་ལ་རྨོངས་པས་རྟག་ཏུ་སྡུག་བསྔལ་ལ་སྤྱོད་པ་འདི་སྙིང་རེ་རྗེ། བདག་དམ་པའི་ཆོས་ཀྱི་རྗེས་སུ་ཞུགས་པས་ཁེ་ཉེན་ཤེས་པའི་རང་བཞིན་ཅན་གྱི་ཕྱིར། ལོག་སྒྲུབ་དང་ཕྱོགས་རིས་བཟོད་པར་བྱས་ཏེ།


JLAZ012_Page_0250
[མ་དཔེ་གཟིགས་ན་འདིར་གནོན།]

བདག་གཞན་མཉམ་པ་ཉིད་དུ་བལྟ་བར་བྱའོ་སྙམ་དུ་ཡང་ཡང་སྒོམ། དེ་ནས་བདག་གཞན་བརྗེ་བ་བྱང་ཆུབ་ཀྱི་སེམས་ནི། མཐོང་ཆོས་སུ་གྱུར་པའམ། མིན་ན་སྡུག་བསྔལ་གྱིས་གདུངས་པའི་སེམས་ཅན་ཞིག་མདུན་དུ་བསམས་ནས། དབུགས་ཕར་རྒྱུ་བ་ན་བདག་གི་བདེ་བ་དང་ལེགས་པ་ལུས་ལོངས་སྤྱོད་དགེ་བའི་རྩ་བ་དང་བཅས་པ་གོས་ཕུད་དེ་གཡོགས་པ་ལྟར་ཁོང་ལ་བྱིན། ཁོང་གི་སྡུག་བསྔལ་ཅི་ཡོད་པ་དེ་དག་ཐམས་ཅད་རང་ཉིད་ཀྱིས་དང་དུ་བླངས་པར་བསམ་པ་དང་ལྷན་ཅིག་དབུགས་ནང་དུ་རྔུབས་པས་དེ་ཉིད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་བསམ་པའི་གཏོང་ལེན་སེམས་ཅན་གཅིག་ནས་ཐམས་ཅད་ཀྱི་བར་ལ་རིམ་པར་བསྒོམ་མོ། །འབྱོངས་ནས་བདག་པས་གཞན་གཅེས་པར་བསྒོམ་པ་ནི། གདག་འཁོར་བར་གནས་རུང༌། དམྱལ་བར་སྐྱེས་རུང༌། ན་རུང་ཚ་རུང་ཉམ་ཉེས་ཅི་བྱུང་ཡང་བཟོད་པར་བྱ་ཡིས། སེམས་ཅན་གཞན་གྱི་སྡུག་བསྔལ་བདག་ལ་སྨིན་པར་ཤོག་ཅིག །བདག་གི་བདེ་བ་དང་དགེ་བའི་འབྲས་བུ་ཁོང་ལ་རྫོགས་པར་ཤོག་ཅིག་སྙམ་དུ་ཞེ་ཐག་པ་ནས་བསམ་ཞིང་མཐར་དམིགས་པ་མེད་པའི་ངང་དུ་གཞག་གོ། ། གཉིས་པ་འགྲོ་བ་དངོས་ལྟ་བུ་འཇུག་པའི་བསླབ་བྱ་ནི་སེམས་ཅན་ཐམས་ཅད་ཀྱི་དོན་དུ་ནོར་རྫས་ལ་ཆགས་ཞེན་མེད་པར་དགེ་བའི་ཕྱོགས་ལ་


JLAZ012_Page_0251
[མ་དཔེ་གཟིགས་ན་འདིར་གནོན།]

གཏོང་བ་དང༌། ཡོངས་སུ་གཏོང་བ་དང༌། ཤིན་ཏུ་གཏོང་བ་གསུམ་གྱིས་སྦྱིན་པའི་ཕ་རོལ་ཏུ་ཕྱིན་པ། རང་རྒྱུད་ཀྱི་ཉེས་སྤྱོད་སྡོམ་ཞིང་གཞན་ལ་ཕན་གདགས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། དེའི་ཁྱད་པར་ལ་ཕལ་པོ་ཆེའི་སྤྱོད་ཡུལ་དག་པ་དང༌། སྐྱེས་བུ་ཆེན་པོའི་རྣམ་རྟོག་བརྒྱད་བསྒོམ་པ། ཆོས་ཕྱིར་དཀའ་བ་སྤྱོད་པ་དང་གཞན་གྱི་ལོག་སྒྲུབ་བཟོད་པ་ནི་བཟོད་པའི་ཕ་རོལ་ཏུ་ཕྱིན་པ། དལ་འབྱོར་ཆུད་གསན་པའི་བྱེད་པོ་ལེ་ལོ་ཟིལ་གྱིས་མནན་ནས་ཆོས་སྤྱོད་བཅུ་དང་ཕ་རོལ་ཏུ་ཕྱིན་པ་བཅུ་ལ་འབད་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ། འདུས་པ་ནི་འབྲལ་བའི་ཆོས་ཅན། འདོད་པ་ནི་ཉེས་པ་ཐམས་ཅད་ཀྱི་འབྱུང་ཁུངས། ཡོད་ཅིང་ཆོག་མི་ཤེས་སེར་སྣ་འཕེལ་ལ་རྐུན་པོ་ལ་སོགས་རྩོད་པ་ཅན་དང་ཐུན་མོང་བ་རྣམ་པར་གྲོལ་བའི་ཆོས་དང་འགལ་བས་འཕགས་པ་རྣམས་ཀྱིས་སྨད་པ། བྱིས་པའི་གྲོགས་ནི་རང་བཞིན་ངན་པ། བྱས་པ་མི་གཟོ་བ་མགུ་བར་དཀའ་བ། ཕྲག་དོག་པ་ལ་སོགས་འགྲོགས་པ་ཙམ་གྱིས་དགེ་བ་འགྲིབ་པ། འདུ་འཛི་ནི་རྟག་ཏུ་བྲེལ་ཞིང་དོན་ཆུང་བ། ཇི་ཙམ་བརྩོན་ཡང་སྙིང་པོ་མེད་པ། དགྲ་བཏུལ་ཀྱང་མཐའ་མེད་པ། གཉེན་བསྐྱངས་ཀྱང་མཐའ་མེད་པ་འདི་དག་ནི་ངེས་པར་སྤང་བར་བྱའོ། །དེ་ལྟར་སྤངས་ནས་ནགས་ཁྲོད་དབེན་པ་ཞེས་སྔོན་


JLAZ012_Page_0252
[མ་དཔེ་གཟིགས་ན་འདིར་གནོན།]

གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་ཞི་བ་བརྙེས་པའི་གནས། འདུ་འཛི་དང་རྣམ་གཡེང་མེད་པ་ཚོང་དང་སོ་ནམ་མེད་པ། བྱིས་པའི་གྲོགས་དང་བྲལ་བ། བྱ་དང་རི་དྭགས་འགྲོགས་ན་བདེ། ཆུ་དང་ལོ་མ་དཀའ་ཐུབ་ཀྱི་ཟས་དང་མཐུན་པ། རིག་པ་ངང་གིས་དྭངས། ཏིང་འཛིན་ཤུགས་ཀྱིས་འཕེལ་བའི་གནས། དགྲ་མེད་གཉེན་མེད་ཆགས་སྡང་གི་སྒྲོག་ལས་གྲོལ་བ་ཡོན་ཏན་དུ་མ་དང་ལྡན་པའི་གནས་སུ། ལུས་རྣམ་སྣང་གི་ཆོས་བདུན་དང་ལྡན་པས་ཡིད་གང་དུའང་མི་རྟོག་ཅིང་ཡང་མི་འཛིན་པའི་ངང་དུ་འཇོག་པ་ནི་བསམ་གཏན་གྱི་ཕ་རོལ་ཏུ་ཕྱིན་པ། འདི་ལྟར་ཕྱི་ཡུལ་ལྔའི་སྣང་བ་ཐམས་ཅད་ནི་མེད་བཞིན་འཁྲུལ་ངོ་ལ་སྣང་བ་རྨི་ལམ་ལྟ་བུ། རྒྱུ་རྐྱེན་རྟེན་འབྲེལ་ཚོགས་པ་ལས་གློ་བུར་དུ་སྣང་བ་སྒྱུ་མ་ལྟ་བུ། མེད་པ་ཡོད་པར་སྣང་བ་མིག་ཡོར་ལྟ་བུ། སྣང་བཞིན་དུ་བདེན་པར་མ་གྲུབ་པས་སྨིག་རྒྱུ་ལྟ་བུ། ཕྱི་ནང་གང་ལའང་སྣང་བས་བྲག་ཅ་ལྟ་བུ། རྟེན་དང་བརྟེན་པར་མེད་པས་དྲི་ཟའི་གྲོང་ཁྱེར་ལྟ་བུ། སྣང་ལ་རང་བཞིན་མེད་པས་གཟུགས་བརྙན་གྱི་སྣང་བ་ལྟ་བུ། མེད་སྣང་ཅིར་ཡང་ཤར་བས་སྤྲུལ་པའི་གྲོང་ཁྱེར་ལྟ་བུ་སྟེ། དངོས་པོ་མེད་པའི་སྟོང་གཟུགས་སྒྱུ་མའི་དཔེ་བརྒྱད་དུ་བལྟས་པས་ཡུལ་གྱི་སྣང་བ་རྫུན་པའི་


JLAZ012_Page_0253
[མ་དཔེ་གཟིགས་ན་འདིར་གནོན།]

རང་བཞིན་དུ་གོ་ལ། དེ་ལྟར་སྣང་བའི་མཁན་པོ་ཡུལ་ཅན་སེམས་ཀྱི་གཤིས་ལུགས་ལ་བརྟགས་པས། ཡུལ་སྣང་མ་འགགས་ལ། ཡུལ་གྱི་འཛིན་རྟོག་ཞི། ཆོས་ཉིད་སྟོང་གསལ་ནམ་མཁའ་ལྟ་བུར་རྟོགས་པའི་ངང་དུ་འཇོག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་འཁྲིད་ཚུལ་འདི་ལྟ་བུའི་ངེས་པ་ལས་ཕར་ཕྱིན་ཐེག་པའི་ཟབ་གནད་ཐམས་ཅད་ཀྱང་འདུ་ཞིང་ཐེག་པ་ཆེན་པོའི་ཆོས་ཀྱི་རྩ་བ་ཡིན་པས་འཁོར་བའི་སྡུག་བསྔལ་ལས་སྐྱོབ་པ་དང༌། ཉན་རིང་གི་ཐེག་པ་ལས་འཕགས་པ་དང༌། དགེ་རྩ་མི་ཟད་ཅིང་འཕེལ་བ་དང༌། བསོད་ནམས་རྒྱ་ཆེན་པོ་ཐོབ་པ་དང༌། སངས་རྒྱས་ཀྱི་གདུང་འཚོབ་པ་དང་གཞན་དོན་རླབས་པོ་ཆེ་འགྲུབ་པ་ལ་སོགས་པའི་དགོས་པ་དཔག་ཏུ་མེད་པས་ན་སྦྱོར་དངོས་རྗེས་གསུམ་ཚང་བས་ཉམས་སུ་བླང་ངོ༌། །གསུམ་པ་རྡོ་རྗེ་སེམས་དཔའི་སྒོམ་བཟླས་ནི། ཟབ་མོའི་ལམ་གྱི་ཉམས་རྟོགས་ཁྱད་པར་ཅན་སྐྱེ་བ་ལ་བར་དུ་གཅོད་པ་ནི་སྡིག་སྒྲིབ་ཡིན་ལ། དེ་ཉིད་སྦྱོང་བའི་མཆོག་ཏུ་གྱུར་པ་ནི་རྡོ་རྗེ་སེམས་དཔའི་རྣལ་འབྱོར་ཡིན་ཏེ། དེ་ལ་སྟོབས་བཞིའི་གནད་ནི། རྡོ་རྗེ་སེམས་དཔའ་ལ་སྐྱབས་སུ་བཟུང་ནས་སྨོན་འཇུག་གི་བྱང་སེམས་དང་ལྡན་པ་རྟེན་གྱི་སྟོབས། སྔར་བྱས་ཀྱི་སྡིག་པ་མི་དགེ་བའི་ལས་ཐམས་ཅད་ལ་


JLAZ012_Page_0254
[མ་དཔེ་གཟིགས་ན་འདིར་གནོན།]

འགྱོད་སེམས་དྲག་པོ་བསྐྱེད་པ་ཉེས་བྱས་སུན་འབྱིན་གྱི་སྟོབས། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པ་ཉེས་སྤྱོད་སྡོམ་པའི་སྟོབས། སྔར་བྱས་ཀྱི་གཉེན་པོར་རྡོ་རྗེ་སེམས་དཔའི་སྒོམ་བཟླས་བྱེད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། སྟོབས་བཞིའི་དག་པ་དྲན་པའི་ངང་ནས་འདོན་སྒོམ་ཟུང་མཇུག་ཏུ། ཨཿ བདག་ཉིད་ཐ་མལ་སྤྱི་བོ་རུཿ པད་དཀར་ཟླ་བའི་གདན་གྱི་དབུསཿ ཧཱུྃ་ལས་བླ་མ་རྡོ་རྗེ་སེམསཿ དཀར་གསལ་ལོངས་སྤྱོད་རྫོགས་པའི་སྐུཿ རྡོ་རྗེ་དྲིལ་འཛིན་སྙེམས་མ་འཁྲིལཿ ཁྱེད་ལ་སྐྱབས་གསོལ་སྡིག་པ་སྦྱངཿ འགྱོད་སེམས་དྲག་པོས་མཐོལ་ལོ་བཤགསཿ ཕྱིན་ཆད་སྲོག་ལ་བབ་ཀྱང་སྡོམཿ ཁྱོད་ཐུགས་ཟླ་བ་རྒྱས་པའི་སྟེངཿ ཧཱུྃ་ཡིག་མཐའ་མར་སྔགས་ཀྱིས་བསྐོརཿ བཟླས་པ་སྔགས་ཀྱི་རྒྱུད་བསྐུལ་བསཿ ཡབ་ཡུམ་བདེ་རོལ་སྦྱོར་མཚམས་ནསཿ བདུད་རྩི་བྱང་ཆུབ་སེམས་ཀྱི་སྤྲིནཿ ག་བུར་རྡུལ་ལྟར་འཛག་པ་ཡིསཿ བདག་དང་ཁམས་གསུམ་སེམས་ཅན་གྱིཿ ལས་དང་ཉོན་མོངས་སྡུག་བསྔལ་རྒྱུཿ ནད་གདོན་སྡིག་སྒྲིབ་ཉེས་ལྟུང་གྲིབཿ མ་ལུས་བྱང་བར་མཛད་དུ་གསོལཿ ཞེས་དམིགས་པ་དང་མོས་གུས་རྩེ་གཅིག་ལས་རྣམ་རྟོག་གཞན་དུ་མི་ཡེངས་པར་ཡི་གེ་བརྒྱ་པ་བཟླས་པས་ཐུགས་ཀའི་ཧཱུྃ་ཡིག་སྔགས་ཕྲེང་དང་བཅས་


JLAZ012_Page_0255
[མ་དཔེ་གཟིགས་ན་འདིར་གནོན།]

པ་ལས་བདེ་ཆེན་ཡེ་ཤེས་ཀྱི་བདུད་རྩི་ཟླ་བ་ཞུན་མ་ལྟ་བུ་བབས། སྐུའི་དབྱིབས་བརྒྱུད་སྦྱོར་མཚམས་ནས་བདག་ཉིད་ཀྱི་ཚངས་བུག་ནས་ཞུགས། ནད་ཐམས་ཅད་རྣག་ཁྲག །གདོན་ཐམས་ཅད་སྲོག་ཆགས། སྡིག་སྒྲིབ་ཐམས་ཅད་དུད་སོལ་ཁུ་རླངས་ཀྱི་རྣམ་པར་བ་སྤུའི་བུ་ག་དང་དབང་པོའི་སྒོ་གཉིས་ནས་ཐོན། ས་རིམ་པ་དགུའི་འོད་ཏུ་འཆི་བདག་ལས་ཀྱི་གཤིན་རྗེ་ཁ་གདངས་པའི་ལྟོ་བར་ཚུད་པས་དུས་མ་ཡིན་པའི་འཆི་བ་བསླུས་པར་བསམ་པ་སྔགས་ཅི་མང་བཟླས་མཐར། འཁོར་ལོ་བཞིའི་གནས་རྣམས་ཀྱང་བདུད་རྩིས་སྐྱ་མེར་གྱིས་ཁེངས་པའི་རྐྱེན་ལས་ལུས་སེམས་ཟག་མེད་ཀྱི་བདེ་བས་མྱོས། རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་ཞིང་འོད་དུ་ཞུ་ནས་རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་གི་གཟུགས་བརྙན་ལྟ་བུའི་སྐུར་གྱུར་པའི་ཐུགས་སྲོག་གི་ཐ་མར་ཡི་གེ་འབྲུ་བཞི་པོ་གསལ་བ་ལས་འོད་ཟེར་འཕྲོས་ཁམས་གསུམ་སྣོད་བཅུད་དང་བཅས་པ་རྡོར་སེམས་རིགས་ལྔའི་རྟེན་དང་བརྟེན་པའི་རང་བཞིན་དུ་སངས་རྒྱས་པར་བསམ་ལ། ཨོཾ་བཛྲ་ས་ཏྭ་ཧཱུྃཿ ཞེས་བཟླ་བ་ནི་ཁྱད་པར་ཅན་གྱི་མན་ངག་དང༌། ཐུན་བསྡུ་བ་ན་སྦྱང་གཞི་སྦྱོང་བྱེད་ཀྱི་རྟོག་ཚོགས་ཐམས་ཅད་འཁོར་གསུམ་


JLAZ012_Page_0256
[མ་དཔེ་གཟིགས་ན་འདིར་གནོན།]

མི་རྟོག་པའི་དྲན་ཤེས་ཁ་ཡན་གྱིས་རྒྱས་འདེབས་པ་ནི་དོན་དམ་པའི་སྒྲིབ་སྦྱོང་ངོ༌། །འདི་ནི་འབུམ་ཐེར་ཐ་མ་ཡིན་ཏེ་སྒྲིབ་པ་དག་པའི་རྟགས་མ་མཐོང་ཚུན་བྱའོ། །བཞི་པ་མཐུན་རྐྱེན་ཚོགས་བསགས་པ་ལ་མཎྜལ་གྱི་ཁྲིད་ནི། བསོད་ནམས་དང་ཡེ་ཤེས་ཀྱི་སྟོབས་སུ་གྱུར་པའི་འབྲས་བུ་ནི་དག་པ་གཉིས་ལྡན་གྱི་སངས་རྒྱས་ཡིན་ལ། དེའི་ཕྱིར་ལམ་གྱི་དུས་ན་ཚོགས་གཉིས་བསགས་པ་ནི་ཐབས་ཀྱི་ཕ་རོལ་ཏུ་ཕྱིན་པའང་ཡིན་ནོ། །དེ་ལ་འབྱོར་པ་དང་བསྟན་པའི་རབ་ཀྱིས་རིན་པོ་ཆེའི་མཎྜལ། འབྲིང་འཁར་བ་ལ་སོགས་པའི་རྒྱུ་དག་པ། ཐ་མའང་རྡོ་ཤིང་ལ་སོགས་པའི་སྟེགས་ཁོད་སྙོམས་ལ་ངོས་འཇམ་པའི་གཞི་མ་བྱི་དོར་ལེགས་པར་བྱས། དྲི་བཟང་དང་བ་བྱུང་གིས་བྱུགས། རབ་རིན་པོ་ཆེ། འབྲིང་སྨན་གྱི་འབྲས་བུ། ཐ་མ་འབྲུ་ལ་སོགས་པའི་ཚོམ་བུ་རྣམ་ངེས་ལྟར་བཀོད་པ་དམིགས་རྟེན་དུ་བྱས། མདུན་གྱི་ནམ་མཁར་སྐུ་གསུམ་གྱི་ངོ་བོ་རྒྱལ་བ་སྲས་དང་བཅས་པ་ཚོགས་ཞིང་དུ་དམིགས་ལ། བསམ་པར་བྱ་བ་ནི། ཐུན་མོང་སྤྲུལ་སྐུའི་མཎྜལ་གླིང་བཞི་རི་རབ་ལྷ་གནས་དང་བཅས་པའི་སྟོང་གསུམ་འཇིག་རྟེན་གྱི་ཞིང་ཁམས་བྱེ་བ་ཕྲག་བརྒྱ་དང་བྱེ་བྲག་རང་གི་ལུས་ལོངས་སྤྱོད་མངའ་རིས་ཕུན་ཚོགས་དང་བཅས་པ་མདོར་ན་འཛིན་སེམས་ཀྱིས་གཅེས་དགུར་


JLAZ012_Page_0257
[མ་དཔེ་གཟིགས་ན་འདིར་གནོན།]

བཟུང་བ་ཐམས་ཅད་སེར་སྣ་དང་འཇུར་གེགས་ཀྱིས་མ་བཅིངས་པར་ལྟོས་མེད་དུ་འབུལ་བ་ནི་བདག་ཏུ་ལྟ་བའི་གཉེན་པོར་ཡང་འགྱུར་རོ། །དེའི་སྟིང་གི་ནམ་མཁར་ཐུན་མིན་ལོངས་སྐུའི་མཎྜལ་རང་སྣང་འོག་མིན་སྟུག་པོ་བཀོད་པའི་ཞིང་ཁམས་ཡེ་ཤེས་རིན་པོ་ཆེའི་གཞལ་མེད་ཁང་སྐུ་དང་ཞིང་ཁམས་ཡེ་ནས་ལྷུན་གྲུབ་ཀྱི་རྣམ་པ་ལ་སྒེག་སོགས་འདོད་ཡོན་གྱི་ལྷ་མོས་སྤྲས་པ། དེའི་སྟེང་གི་དབྱིངས་ལ་ཁྱད་པར་ཆོས་སྐུའི་མཎྜལ་སྐྱེ་མེད་གདོད་མའི་གཞི་ལ་འགག་མེད་འོད་གསལ་གྱི་སྣང་ཆ་རིག་པ་ཚད་ཕེབས་ཀྱི་ཚོམ་བུར་བཀོད་པ་སྟེ་སྐུ་གསུམ་གྱི་དམིགས་པའི་བྱེ་བྲག་རྣམས་གསལ་བདེ་བའི་ཆེད་འདི་ལྟར་དུ་སྒོམ་ཞིང༌། དངོས་གནས་ལ་རྒྱ་ཆད་ཕྱོགས་ལྷུང་དང་བྲལ་བའི་རང་སྣང་གི་ཞིང་ཁམས་རྣམས་ལ་ཡན་མན་དང་སྟེང་འོག་གི་གཞལ་བྱར་མ་དམིགས་པ་རྡུལ་ཕྲན་གྱི་ཁོངས་སུ་རྡུལ་སྙེད་ཀྱི་ཞིང་ཁམས་ཡངས་དོག་མེད་པར་རང་ཤར་ལྷུན་གྱིས་གྲུབ་པའི་གནས་རྣམས་ཁོངས་སུ་ཆུད་པའི་ངང་ནས་མོས་གུས་ཀྱི་གདུང་བ་དང་བཅས། ཨོཾ་ཨཱཿཧཱུྃ་སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིངཿ རིན་ཆེན་སྣ་བདུན་ལྷ་མིའི་འབྱོར་པས་གཏམསཿ བདག་ལུས་ལོངས་སྤྱོད་བཅས་པ་ཡོངས་འབུལ་གྱིསཿ ཆོས་ཀྱི་འཁོར་ལོས་བསྒྱུར་བའི་སྲིད་ཐོབ་ཤོགཿ འོག་མིན་བདེ་ཆེན་སྟུག་པོ་བཀོད་པའི་ཞིངཿ ངེས་པ་ལྔ་ལྡན་རིགས་


JLAZ012_Page_0258
[མ་དཔེ་གཟིགས་ན་འདིར་གནོན།]

ལྔའི་ཚོམ་བུ་ཅནཿ འདོད་ཡོན་མཆོད་པའི་སྤྲིན་ཕུང་བསམ་ཡས་པཿ ཕུལ་བས་ལོངས་སྐུའི་ཞིང་ལ་སྤྱོད་པར་ཤོགཿ སྣང་སྲིད་རྣམ་དག་གཞོན་ནུ་བུམ་པའི་སྐུཿ ཐུགས་རྗེ་མ་འགགས་ཆོས་ཉིད་རོལ་པའི་རྒྱནཿ སྐུ་དང་ཐིག་ལེའི་འཛིན་པ་རྣམ་དག་ཞིངཿ ཕུལ་བས་ཆོས་སྐུའི་ཞིང་ལ་སྤྱོད་པར་ཤོགཿ ཅེས་འཁོར་གསུམ་ཡོངས་སུ་དག་པའི་ཤེས་རབ་ཀྱིས་དབུལ་ལོ། །ལྔ་པ་བདུད་བཞི་ཅིག་ཆར་དུ་བཅོམ་པ་ཀུ་སུ་ལུའི་ཚོགས་གསོག་ནི། མདུན་གྱི་ནམ་མཁར་རིན་པོ་ཆེའི་ཁྲི་རྐང་དར་ཟབ་འབོལ་བརྩེགས་དང་བཅས་པའི་སྟེང་དུ་དྲིན་ཅན་རྩ་བའི་བླ་མ་ལ་བརྒྱུད་པའི་བླ་མ་ཡི་དམ་དཀྱིལ་འཁོར་རྒྱ་མཚོ་མཁའ་འགྲོ་ཆོས་སྐྱོང་དང་བཅས་པས་བསྐོར་ཞིང༌། འོག་ཏུ་རིགས་དྲུག་གནོད་བྱེད་དང་བཅས་པ་སྐད་ཅིག་གིས་གསལ་བཏབ་ལ་དམིགས་འདོན་ཟུང་དུ་ཆུད་པས། ཕཊཿ ལུས་གཅེས་འཛིན་བོར་བས་ལྷ་བདུད་ཆོམཿ སེམས་ཚངས་པའི་སྒོ་ནས་དབྱིངས་ལ་ཐོནཿ འཆི་བདག་གི་བདུད་བཅོམ་ཁྲོས་མར་གྱུརཿ གཡས་ཉོན་མོངས་བདུད་བཅོམ་གྲི་གུག་གིསཿ གཟུགས་ཕུང་པོའི་བདུད་བཅོམ་ཐོད་པ་བྲེགསཿ གཡོན་ལས་བྱེད་ཚུལ་གྱིས་བྷནྡྷ་ཐོགསཿ སྐུ་གསུམ་གྱི་མི་མགོའི་སྒྱེད་བུར་བཞགཿ ནང་སྟོང་གསུམ་གང་བའི་བམ་རོ་


JLAZ012_Page_0259
[མ་དཔེ་གཟིགས་ན་འདིར་གནོན།]

དེཿ ཨ་ཐུང་དང་ཧཾ་ཡིག་གིས་བདུད་རྩིར་བཞུཿ འབྲུ་གསུམ་གྱི་ནུས་པས་སྦྱངས་སྤེལ་བསྒྱུརཿ ཨོཾ་ཨཱཿཧཱུྃ་གྲངས་མེད་བརྗོདཿ ཕཊཿ ཡར་མཆོད་ཡུལ་མགྲོན་གྱི་ཐུགས་དམ་བསྐངསཿ ཚོགས་རྫོགས་ནས་མཆོག་ཐུན་དངོས་གྲུབ་ཐོབཿ མར་འཁོར་བའི་མགྲོན་མཉེས་ལན་ཆགས་བྱངཿ ཁྱད་པར་དུ་གནོད་བྱེད་བགེགས་རིགས་ཚིམཿ ནད་གདོན་དང་བར་ཆད་དབྱིངས་སུ་ཞིཿ རྐྱེན་ངན་དང་བདག་འཛིན་རྡུལ་དུ་བརླགཿ མཐར་མཆོད་བྱ་དང་མཆོད་ཡུལ་མ་ལུས་ཀུནཿ གཤིས་རྫོགས་པ་ཆེན་པོར་མ་བཅོས་ཨཱཿ ཞེས་མཉམ་པར་བཞག །འདིས་ནི་ཚོགས་དཔག་ཏུ་མེད་པ་འདུམས། འཆི་བ་བསླུས་ཤིང་ནད་གཅོང་ཞི། བར་དོའི་འོད་གསལ་ཟིན་པ་ལ་སོགས་ཕན་ཡོན་དཔག་ཏུ་མེད་དོ། །དྲུག་པ་རྟོགས་པའི་ཡེ་ཤེས་རང་རྒྱུད་ལ་མངོན་དུ་བྱ་བའི་ཐབས་ཀྱི་མཐར་ཕྱིན་པ་བླ་མའི་རྣལ་འབྱོར་ལ་སྐྱབས་ཡུལ་གསལ་གདབ་པ། ཡན་ལག་བདུན་པ་འབུལ་བ། གསོལ་བ་གདབ་པ་དང་གསུམ་ལས། དང་པོ་ནི། ཞིང་ཁམས་སྦྱོང་བ་བསམ་སྟོབས་ཆེན་པོའི་སྤྱོད་ཡུལ་ཁྱད་པར་ཅན་ཡིན་པས། སྣང་བས་གར་ཁྱབ་པདྨ་འོད་ཀྱི་ཕོ་བྲང་བཀོད་པ་དང་མཚན་ཉིད་ཡོངས་སུ་རྫོགས་པར་གསལ་བའི་དབུས་སུ། དབང་གི་སྣོད་དུ་རུང་བ་དང༌། བདེ་སྟོང་གི་ཡེ་


JLAZ012_Page_0260
[མ་དཔེ་གཟིགས་ན་འདིར་གནོན།]

ཤེས་བསྐྱེད་པ་དང༌། རྗེས་སུ་འཛིན་པའི་རྟེན་འབྲེལ་གྱི་ཁྱད་པར་ལས། རང་ཉིད་ངོ་བོ་ཡེ་ཤེས་འཚོ་རྒྱལ་ལ་རྣམ་པ་རྡོ་རྗེ་རྣལ་འབྱོར་མ་མོས་གུས་ཀྱི་སྤྱན་བླ་མའི་ཐུགས་ཀར་རིངས་པའི་ཚུལ་གྱིས་གཟིགས་པའི་སྤྱི་བོར་པདྨ་ཉི་ཟླའི་སྟེང་དུ་རྩ་བའི་བླ་མ་དང་ཐ་མི་དད་པའི་ཨོ་རྒྱན་རྡོ་རྗེ་འཆང་སྐུའི་རྣམ་འགྱུར་ཡོངས་སུ་རྫོགས་ཤིང་ལོ་བརྒྱད་ལོན་པའི་ངང་ཚུལ་ཅན། ཕྱག་གཡས་རྡོ་རྗེ་ཐུགས་ཀར་འཛིན་ཅིང༌། གཡོན་མཉམ་གཞག་གི་སྟེང་ན་ཐོད་བུམ་བསྣམས་པ། རྒྱལ་པོ་རོལ་པའི་འདུག་སྟངས་ཅན། དེའི་མཐའ་སྐོར་དུ་འོད་ལྔའི་དྲ་བ་མིག་མང་རིས་སུ་ཤར་བའི་ནང་ཁོངས་འཇའ་འོད་ཟླུམ་འཁྱིལ་གྱི་དབུས་སུ་རྒྱ་གར་གྱི་རིག་འཛིན་བརྒྱད། བོད་ཀྱི་རྗེ་འབངས་ཉེར་ལྔ། རྩ་གསུམ་དམ་ཅན་རྒྱ་མཚོ་མ་ཚང་བ་མེད་པས་ཐ་མལ་གྱི་སྣང་བ་རང་འགགས་སུ་འགྲོ་བར་གསལ་ལ། ཨེ་མ་ཧོཿ རང་སྣང་ལྷུན་གྲུབ་དག་པ་རབ་འབྱམས་ཞིངཿ ཞེས་སོགས་པས་ཚིག་དོན་འབྲེལ་ཆགས་པར་གསལ་གདབ་བོ། །གཉིས་པ་ཡན་ལག་བདུན་པ་ནི། འདི་ལྟར་རྡོ་རྗེ་ཐེག་པའི་ལམ་ཐབས་མང་བ་དང༌། དཀའ་བ་མེད་པ་དང༌། དབང་པོ་རྣོན་པོའི་སྤྱོད་ཡུལ་ཡིན་པས། སེམས་སྟོབས་ཆེན་པོའི་ཚོགས་བསགས་པ་ལ་རྒྱུན་ཆགས་སུ་བསླབས་པས་ཕ་རོལ་


JLAZ012_Page_0261
[མ་དཔེ་གཟིགས་ན་འདིར་གནོན།]

ཏུ་ཕྱིན་པའི་བསྐལ་པ་ཆེན་པོའི་ཚོགས་འདིར་སྐད་ཅིག་མའི་བྱེ་བྲག་གིས་ཀྱང་འདུམས་ནས་ཚེ་གཅིག་ལ་སོགས་པས་གྲོལ་བ་ཡིན་ནོ། །དེའི་ཕྱིར་གསང་བ་བླ་ན་མེད་པའི་ཚོགས་ཞིང་གི་རབ་དང་ཕུལ་དུ་གྱུར་པ་ཡང་རྡོ་རྗེའི་སློབ་དཔོན་ཉག་གཅིག་ཏུ་ངེས་པས་བླ་མའི་རྣལ་འབྱོར་དང་རྗེས་སུ་འབྲེལ་བར་བྱུང་ལ། དེ་ལ་ཚོགས་གསོག་པའི་སྒོ་མཐའ་ཡས་པ་ཡན་ལག་བདུན་དུ་འདུ་བའི་དམིགས་པའི་བྱེ་བྲག་ནི། རང་ལུས་བརྒྱ་སྟོང་གྲངས་མེད་པར་སྤྲུལ་ཞིང་དེ་དང་ལྷན་ཅིག་ཁམས་གསུམ་སེམས་ཅན་ཐམས་ཅད་ཀྱང་ཐལ་མོ་སྤྱི་མགྲིན་སྙིང་ག་གསུམ་གང་རུང་དུ་སྦྱར་ལ། པུས་མོ་ས་ལ་ཕབ་སྟེ་ཡན་ལག་སྨད་ལྔ་བཏུད་པས་ཕྱག་འཚལ་བར་དམིགས་པ་ནི་ཕྱག་གི་ཡན་ལག །དངོས་སུ་ཅི་འབྱོར་པའི་མཆོད་པ་བཤམ་ཞིང༌། ཡིད་ཀྱི་ནམ་མཁའ་དང་ས་གཞི་ཐམས་ཅད་ལྷ་མིའི་མཆོད་རྫས་མེ་ཏོག་བདུག་སྤོས་མར་མེ་ལ་སོགས་པ་བཤམས། གཞལ་མེད་ཁང་དང་ཡུལ་མཁར་ཀུན་དགའ་ར་བ། རྒྱལ་སྲིད་སྣ་བདུན། བཀྲ་ཤིས་བརྒྱད། རྡོ་རྗེའི་ལྷ་མོ་བཅུ་དྲུག་ལ་སོགས་པའི་ཁྱད་པར་མང་པོ་གླུ་གར་དང་རོལ་མོའི་སྤྲིན་ཕུང་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་རྗེས་སུ་འགྲོ་བ་ནི་མཆོད་པའི་ཡན་ལག །ཚེ་ཐོག་མ་མེད་པ་ནས་དེ་རིང་ཡན་ཆད་དྲན་པ་དང་མི་དྲན་པའི་སྡིག་ལྟུང་ལུས་ངག་ཡིད་གསུམ་གྱི་སྒོ་ནས་མི་དགེ་བ་


JLAZ012_Page_0262
[མ་དཔེ་གཟིགས་ན་འདིར་གནོན།]

བཅུ། མཚམས་མེད་ལྔ། དེ་དང་ཉེ་བ་ལྔ། ལྕི་བ་བཞི། ལོག་པ་བརྒྱད། དཀོན་མཆོག་གི་དཀོར་ལ་འབགས་པ་སོགས་ཁ་ན་མ་ཐོ་བའི་ལས་ཅི་བསགས་པ་ཐམས་ཅད་གནོད་འགྱོད་དྲག་པོས་བཤགས་པས་ལྕེ་ཐོག་ཏུ་ནག་ཕུང་གིས་འདུས་པ་ལས། ཚོགས་ཞིང་གི་སྐུ་གསུང་ཐུགས་ལས་འོད་ཟེར་བྱུང་བ་ཕོག་པས་དྲི་མ་བཀྲུས་པ་བཞིན་དག་པར་བསམ་ལ། ཕྱིས་མི་བྱེད་པའི་གཉེན་པོས་སྡོམ་པ་ནི་བཤགས་པའི་ཡན་ལག །རྒྱལ་བ་རྣམས་ཀྱིས་འགྲོ་བའི་དོན་དུ་ཆོས་ཀྱི་འཁོར་ལོ་ཆེན་པོ། བྱང་ཆུབ་སེམས་དཔའ་རྣམས་ཀྱིས་སྤྱོད་པ་རླབས་པོ་ཆེ། སེམས་ཅན་རྣམས་ཀྱིས་བསོད་ནམས་དང་ཐར་པ་ཆ་མཐུན་གྱི་དགེ་བ། རང་གིས་སྔར་བྱས་པ། ད་ལྟ་བྱེད་བཞིན། ཕྱིས་བྱེད་པར་ངེས་པ་ཐམས་ཅད་ལ་སྙིང་ཐག་པ་ནས་རྗེས་སུ་ཡི་རང་བའི་ཡན་ལག །སངས་རྒྱས་དང་བྱང་ཆུབ་སེམས་དཔའ་དགེ་བའི་བཤེས་གཉེན་ལ་སོགས་གཞན་དོན་རླབས་པོ་ཆེའི་ཁུར་བཟོད་པ་རྣམས། འགྲོ་བའི་ལོག་སྒྲུབ་དང་སྐྱོ་ངལ་གྱིས་སུན་ནས་ཆོས་མི་གསུང་བར་ཞི་བདེར་གཞོལ་བ་དག་གི་དྲུང་དུ། སྔོན་ཚངས་པ་དང་བརྒྱ་བྱིན་གྱིས་ཞུ་བ་ཕུལ་བ་ལྟར། བདག་ཀྱང་ལུས་བྱེ་བ་བརྒྱ་སྟོང་གྲངས་མེད་པར་སྤྲུལ་ནས་འཁོར་ལོ་དང་ནོར་བུ་ལ་སོགས་པ་ཕུལ་ནས་ཆོས་ཀྱི་འཁོར་ལོ་


JLAZ012_Page_0263
[མ་དཔེ་གཟིགས་ན་འདིར་གནོན།]

བསྐོར་བར་གསོལ་བ་གདབ་པ་ནི་ཆོས་འཁོར་བསྐོར་བའི་ཡན་ལག །ཞིང་ཁམས་འདི་དང་གཞན་དག་ཏུ་བླ་མ་དང་སངས་རྒྱས་བྱང་ཆུབ་སེམས་དཔའ་གང་དག་སེམས་ཅན་གྱི་དོན་མཛད་ཟིན་ནས་མྱ་ངན་ལས་འདའ་བར་བཞེད་པ་དག་གི་མདུན་དུ། སྔོན་གྱི་དགེ་བསྙེན་ཙུནྡས་གསོལ་བ་བཏབ་པ་ལྟར་བདག་ལུས་མང་པོར་སྤྲུལ་ཏེ་གསོལ་བ་བཏབ་པས། འཁོར་བ་མ་སྟོངས་ཀྱི་བར་དུ་བཞུགས་ནས་སེམས་ཅན་གྱི་དོན་མཛད་པར་བསམ་པ་ནི་བཞུགས་པར་གསོལ་འདེབས་ཀྱི་ཡན་ལག །ད་ལྟར་གྱི་དགེ་བས་མཚོན་ནས་རང་གཞན་གྱིས་དུས་གསུམ་དང་འབྲེལ་བར་བསགས་པའི་དགེ་བ་ཐམས་ཅད་སེམས་ཅན་ཐམས་ཅད་ཀྱི་དོན་དུ་འཇམ་དཔལ་གཞོན་ནུའི་ཡོངས་བསྔོ་ལྟར་དམིགས་པ་མེད་པའི་ཤེས་རབ་ཀྱིས་རྒྱས་འདེབས་པ་ནི་བསྔོ་བའི་ཡན་ལག་སྟེ། ངག་ཏུ། ཧྲཱིཿ བདག་ལུས་ཞིང་གི་རྡུལ་སྙེད་དུཿ སོགས་བརྗོད་ཅིང་འདིའི་ཁོངས་སུ་ཕྱག་འབུམ་ཡང་འགྲོ་བར་བྱེད་པ་ལག་ལེན་ཡིན་ནོ། །གསུམ་པ་ཕུར་ཚུགས་སུ་གསོལ་བ་གདབ་ཅིང་རྒྱུ་རྡོ་རྗེ་བཞིའི་ངོ་བོར་བསྒྲུབ་པ་ནི། འདི་ལྟར་དཔལ་མགོན་བླ་མ་དམ་པ་ནི་དཀྱིལ་འཁོར་གང་དུ་ཧེ་རུ་ཀའི་ངོ་བོར་དབང་རྫོགས། མཐོང་བ་དང་ཐོས་པ་དང་དྲན་པ་དང་རེག་པ་ཙམ་གྱིས་ཐར་པའི་ས་བོན་འདེབས་ཤིང་སངས་རྒྱས་ཐམས་ཅད་དང་ཕྲིན་ལས་ཀྱི་བྱེད་པ་གཅིག་


JLAZ012_Page_0264
[མ་དཔེ་གཟིགས་ན་འདིར་གནོན།]

པས་དཀོན་མཆོག་བཞི་པར་བྱོན། རང་ངོར་ཚེ་གཅིག་ལུས་གཅིག་ལ་སྨིན་གྲོལ་ཟབ་མོའི་ལམ་དང་ཐུགས་རྗེའི་བྱིན་རླབས་ཁོ་ནས་རྡོ་རྗེ་འཆང་གིས་སར་བཙན་ཐབས་སུ་བཀོད་པས་སངས་རྒྱས་ལས་ཀྱང་བཀའ་དྲིན་མཆོག་ཏུ་ལྷག་ཅིང་ཡོན་ཏན་གྱི་སྒོ་ནས་གཞལ་ན་དགོངས་པ་ནམ་མཁའ་ལྟར་རྒྱ་ཆེ། མཁྱེན་བརྩེ་རྒྱ་མཚོ་ལྟར་ཚད་མེད། ཐུགས་རྗེ་ཆུ་ཀླུང་ལྟར་ཤུགས་དྲག །རང་བཞིན་རི་རྒྱལ་ལྟར་ཐུགས་བརྟན། འགྲོ་བར་ཕ་མ་ལྟར་ཐུགས་སྙོམས་ཤིང༌། ཡོན་ཏན་རེ་རེའི་ཆ་ཡང་དཔག་ཏུ་མི་ནུས་པ། གསོལ་བ་བཏབ་པ་ཙམ་གྱིས་ཅི་འདོད་ཀྱི་དངོས་གྲུབ་ཐམས་ཅད་འབད་མེད་དུ་འབྱུང་བ་ཡིད་བཞིན་གྱི་ནོར་བུ་རིན་པོ་ཆེ་ཁྱེད་ལ་བརྟེན། ཁྱེད་ལ་རེ། ཁྱེད་གཅིག་བསྒྲུབ་སྙམ་པའི་མོས་གུས་མཆི་མ་འཁྲུགས་པ་དང་བཅས། རྗེ་བཙུན་གུ་རུ་རིན་པོ་ཆེཿ སོགས་ནས། རྗེ་བཙུན་ཆེན་པོ་པད་འབྱུང་མཁྱེནཿ ཡན་ཆད་ཚར་ཅི་ནུས་གདབ་རྗེས། བདག་ལ་རེ་ས་གཞན་ན་མེདཿ ཅེས་པ་ནས། སྒྲིབ་གཉིས་སྦྱོངས་ཤིག་ནུས་མཐུ་ཅནཿ ཡན་ཆད་ཚར་འོས་མཚམས་ཀྱི་རྗེས་སུ། གསོལ་འདེབས་རྒྱུད་བསྐུལ་གྱི་རྣལ་འབྱོར་བཛྲ་གུ་རུ་ལ་ཆིག་སྒྲིལ་དུ་བྱ། དེའི་ཚེ་དབང་བཞི་ལེན་པའི་དམིགས་པ་ནི། བླ་མ་ལ་གདུང་བ་དྲག་པོའི་རྐྱེན་གྱི་བདག་ཉིད་ལ་བརྩེ་


JLAZ012_Page_0265
[མ་དཔེ་གཟིགས་ན་འདིར་གནོན།]

བས་རྗེས་སུ་དགོངས། གུ་རུའི་སྨིན་མཚམས་ནས་ཨོཾ་ཡིག་ཆུ་ཤེལ་ལྟ་བུར་འཚེར་བ་ལས་འོད་ཟེར་འཕྲོས། རང་གི་སྤྱི་བོ་ནས་ཞུགས། ལུས་ཀྱི་ལས་དང་རྩ་ཡི་སྒྲིབ་པ་དག །སྐུ་རྡོ་རྗེའི་བྱིན་རླབས་ཞུགས། བུམ་པའི་དབང་ཐོབ། བསྐྱེད་རིམ་གྱི་སྣོད་དུ་གྱུར། རྣམ་སྨིན་རིག་འཛིན་གྱི་ས་བོན་ཐེབས། སྤྲུལ་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག །མགྲིན་པ་ནས་ཨཱཿཡིག་པདྨ་ར་ག་ལྟར་འབར་བ་ལས་འོད་ཟེར་འཕྲོས། རང་གི་མགྲིན་པ་ནས་ཞུགས། ངག་གི་ལས་དང་རླུང་གི་སྒྲིབ་པ་དག །གསུང་རྡོ་རྗེའི་བྱིན་རླབས་ཞུགས། གསང་བའི་དབང་ཐོབ། བཟླས་བརྗོད་ཀྱི་སྣོད་དུ་གྱུར། ཚེ་དབང་རིག་འཛིན་གྱི་ས་བོན་ཐེབས། ལོངས་སྤྱོད་རྫོགས་པའི་གོ་འཕང་གི་སྐལ་བ་རྒྱུད་ལ་བཞག །ཐུགས་ཀའི་ཧཱུྃ་ཡིག་ནམ་མཁའི་མདོག་ཅན་ལས་འོད་ཟེར་འཕྲོས། རང་གི་སྙིང་ག་ནས་ཞུགས། ཡིད་ཀྱི་ལས་དང་ཐིག་ལེའི་སྒྲིབ་པ་དག །ཐུགས་རྡོ་རྗེའི་བྱིན་རླབས་ཞུགས། ཤེས་རབ་ཡེ་ཤེས་ཀྱི་དབང་ཐོབ། བདེ་སྟོང་ཙནྜ་ལིའི་སྣོད་དུ་གྱུར། ཕྱག་རྒྱའི་རིག་འཛིན་གྱི་ས་བོན་ཐེབས། ཆོས་སྐུའི་གོ་འཕང་གི་སྐལ་བ་རྒྱུད་ལ་བཞག །སླར་ཡང་ཐུགས་ཀའི་ཧཱུྃ་ལས་ཧཱུྃ་ཡིག་གཉིས་པ་ཞིག་སྐར་མདའ་འཕངས་པ་བཞིན་དུ་ཆད། རང་སེམས་དང་ཐ་དད་མེད་པར་འདྲེས། ཀུན་གཞིའི་


JLAZ012_Page_0266
[མ་དཔེ་གཟིགས་ན་འདིར་གནོན།]

ལས་དང་ཤེས་བྱའི་སྒྲིབ་པ་སྦྱངས། ཡེ་ཤེས་རྡོ་རྗེའི་བྱིན་རླབས་ཞུགས། ཚིག་གིས་མཚོན་པའི་དོན་དམ་གྱི་དབང་ཐོབ། ཀ་དག་རྫོགས་པ་ཆེན་པོའི་སྣོད་དུ་གྱུར། ལྷུན་གྲུབ་རིག་འཛིན་གྱི་ས་བོན་ཐེབས། མཐར་ཐུག་གི་འབྲས་བུ་ངོ་བོ་ཉིད་སྐུའི་སྐལ་བ་རྒྱུད་ལ་བཞག་གོ། །དེ་རྗེས་གུ་རུའི་སྐུ་གསུང་ཐུགས་དང་རང་གི་སྒོ་གསུམ་དུ་མ་རོ་གཅིག་ཏུ་བསྲེས་པའི་ངང་ལ་ལྟ་བའི་ངང་མདངས་བསྐྱང་ཞིང་གསོལ་འདེབས་བསྙེན་པ་ལ་འབད། འདི་ནི་བླ་མ་ཆོས་སྐུའི་ཞལ་ལྟ་བ་ཞེས་བྱའོ། །དེ་ལ་རང་རྒྱུད་ལ་རྡོ་རྗེ་བཞིའི་ས་བོན་གདོད་ནས་འབྲེལ་བ་གྲུབ་པར་གནས་པ་རྡོ་རྗེའི་སློབ་དཔོན་གྱིས་རིགས་སད་པར་བྱ་བའི་ཕྱིར་དཀྱིལ་འཁོར་དུ་བཅུག་ནས་སྨིན་པར་བྱས་པ་ནི་སྐབས་འདིར་གཞིའི་དབང་ཞེས་བྱ་ལ། བླ་མའི་རྣལ་འབྱོར་གྱི་ཚེ་གཞན་རྐྱེན་ལ་ལྟོས་པ་མེད་པར་ཀུན་ནས་ཀུན་ཏུ་ཉམས་སུ་བླང་བར་བྱར་ཡོད་པས་ལམ་གྱི་དབང་ཞེས་བྱ་སྟེ། ད་ལྟར་བླངས་པ་ལ་དག་རྫོགས་སྨིན་གསུམ་གྱི་ཡོན་ཏན་རྒྱ་མཚོའི་ས་བོན་ཐེབས་པའི་དགོས་པ་ཆེས་ཆེ་བ་དང་ལྡན་པའི་རྡོ་རྗེའི་ལམ་མཆོག་འདིས་སྨིན་པར་སློབ་པ་རྣམས་ཀྱིས་ལམ་དབང་འདི་རྟག་པར་བླང་ཞིང༌། གསོལ་འདེབས་ཀྱི་བསྙེན་པའི་ཚད་ཀྱང་འབུམ་ཕྲག་བརྒྱ་ཐམ་པ་ཁོ་ནའོ། །འབྲས་བུའི་དབང་


JLAZ012_Page_0267
[མ་དཔེ་གཟིགས་ན་འདིར་གནོན།]

ནི། སྒྲིབ་བྱེད་མཐའ་དག་ཟད་པའི་ཚེ་མདོ་ལུགས་ལའང་སངས་རྒྱས་རྣམས་ཀྱིས་འོད་ཟེར་ཆེན་པོའི་དབང་བསྐུར་གྱི་ཐ་སྙད་མཚོན་པ་བཞིན། བླ་ན་མེད་པའི་ཐེག་པ་འདིར། །ཆོས་སྐུ་ཀུན་ཏུ་བཟང་པོ་ལ། །བླ་མ་བྱ་བ་ཡོད་མིན་ཏེ། །དབང་ཆོས་བཤད་བྱེད་མཁན་པོ་མེད། །རང་སེམས་ཆོས་སྐུར་རྟོགས་ཙ་ན། དུས་གསུམ་རྒྱལ་བའི་དབང་ལུང་ཐོབ། །བརྒྱུད་པར་འཛིན་པ་རྟོག་པ་ཡིན། །ཞེས་སོ། །དེ་ལྟ་བུའི་བླ་སྒྲུབ་ཀྱི་གནས་སྐབས་ན་ཏིང་ངེ་འཛིན་ལ་སྐྱོ་བ་སེང་བ་དང༌། བོགས་དབྱུང་བའི་ཕྱིར་དམིགས་པའི་རིམ་པ་བསལ་གཞག་དང་སྤྲོ་བསྡུའི་རྣམ་པ་གོ་མ་འགགས་པ་ནི་བླ་སྒྲུབ་གཞུང་རྩ་བའི་ཡིག་ཆུང་གིས་ཤེས་པར་འགྱུར་ལ། ཐུན་ཐམས་ཅད་ཀྱི་མཐར་རྫོགས་རིམ་བསྡུ་བའི་དམིགས་པ་ཟབ་གནད་ཅན་འདི་ངེས་པར་གཅེས་ཏེ། ནམ་ཞིག་ཚེ་ཡི་དུས་བྱས་ཚེཿ སོགས་ཀྱི་ཚིག་བརྗོད་པ་དང་ཆབས་ཅིག །སློབ་དཔོན་ཆེན་པོ་ལ་གདུང་བ་དྲག་པོ་བསྐྱེད་པའི་རྐྱེན་གྱིས་བདག་ཉིད་ལ་ཐུགས་རྗེའི་འཇུག་པས་ཤིན་ཏུ་དགོངས་པར་གྱུར་ཏེ། ཞལ་མཛུམ་པ་དང་སྤྱན་དགྱེས་ཆགས་སུ་གཡོ་བའི་ངང་ལས་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་གྱི་འབར་བ་ཞིག་འཐོན། རང་རྡོ་རྗེ་རྣལ་འབྱོར་མར་གསལ་


JLAZ012_Page_0268
[མ་དཔེ་གཟིགས་ན་འདིར་གནོན།]

བའི་སྙིང་གར་རེག་པའི་མོད་ལ་འོད་ཀྱི་གོང་བུ་སྲན་མ་ཙམ་དུ་གྱུར། དེ་ཉིད་ཀྱང་མཐར་མེ་སྟག་ཡར་བ་བཞིན་དུ་གུ་རུ་རིན་པོ་ཆེའི་ཐུགས་ཀར་འདྲེས་པའི་ངང་ལ་མཉམ་པར་གཞག །རྗེས་ཐོབ་ལ་དགེ་བ་བསྔོ་ཞིང་ཟངས་མདོག་དཔལ་རིའི་སྨོན་ལམ་འདོན་པའང་གནད་དམ་པའོ། །མོས་གུས་དང་དམ་ཚིག་རྣམ་པར་དག་པ་གང་ཞིག་འདི་ཡན་ཆད་ཀྱི་ལམ་མཐར་ཕྱིན་པས་ཀྱང་དངོས་གཞི་ལ་མི་ལྟོས་པར་རྔ་ཡབ་དཔལ་གྱི་རི་བོར་དབུགས་དབྱུང༌། དག་པའི་ཞིང་ཁམས་དེར་རིག་འཛིན་རྣམ་པ་བཞིའི་ལམ་ཉི་ཟླའི་བགྲོད་པ་ལས་ཀྱང་མྱུར་བས་ཀུན་ཏུ་བཟང་པོའི་ས་ལ་ཕྱིན་པར་འགྱུར་རོ།། །།མངྒ་ལཾ། །

རྫོགས་པ་ཆེན་པོ་ཀློང་ཆེན་སྙིང་ཏིག་གི་གདོད་མའི་མགོན་པོའི་ལམ་གྱི་རིམ་པའི་ཁྲིད་ཡིག་ཡེ་ཤེས་བླ་མ།


JLAZ012_Page_0270
[མ་དཔེ་གཟིགས་ན་འདིར་གནོན།]

རྫོགས་པ་ཆེན་པོ་ཀློང་ཆེན་སྙིང་ཏིག་གི་གདོད་མའི་མགོན་པོའི་ལམ་གྱི་རིམ་པའི་ཁྲིད་ཡིག་ཡེ་ཤེས་བླ་མ་བྱ་བ་བཞུགས།


JLAZ012_Page_0271
[མ་དཔེ་གཟིགས་ན་འདིར་གནོན།]

རྫོགས་པ་ཆེན་པོའི་ཀློང་ཆེན་སྙིང་ཏིག་གི་གདོད་མའི་མགོན་པོའི་ལམ་གྱི་རིམ་པའི་ཁྲིད་ཡིག་ཡེ་ཤེས་བླ་མ་ཞེས་བྱ་བ། བཅོམ་ལྡན་འདས་སྟོན་པ་འོད་མི་འགྱུར་བ་ལ་ཕྱག་འཚལ་ལོ། །གང་གི་རང་བཞིན་ནམ་མཁའི་དབྱིངས་ལྟར་ཆོས་ཉིད་བསམ་གྱིས་མི་ཁྱབ་པས། །སྲིད་དང་ཞི་བར་ཡོང་ཡེ་མི་མངའ་རྣམ་པ་ཐམས་ཅད་མཆོག་ལྡན་ཉིད། །དབྱིངས་དང་ཡེ་ཤེས་གཉིས་སུ་མེད་གང་སྣང་ཆ་ཙམ་དུ་མཚོན་པའི་དཔལ། །གདོད་མའི་མགོན་པོ་བཙུན་མོར་བཅས་པ་བདག་བློའི་པད་མཚོར་རྒྱལ་གྱུར་ཅིག །གཟོད་ནས་ངོ་བོ་འགྱུར་བ་མེད་ལ་གློ་བུར་དྲི་མའི་དག་བྱ་ཅན། །


JLAZ012_Page_0272
[མ་དཔེ་གཟིགས་ན་འདིར་གནོན།]

སྐུ་གསུམ་སྟོན་པས་ཆོས་ཆར་ཕབ་ལས་ལེགས་པར་འཁྲུད་པའི་རང་བཞིན་ནི། །ཁམས་དང་དབང་པོ་བསམ་པའི་རིམ་པས་རིམ་དང་རིམ་མིན་ཅིག་ཆར་དུ། །གྲོལ་བའི་ཆོས་ཚུལ་ཤིན་ཏུ་རྨད་བྱུང་རྫོགས་པ་ཆེན་པོའི་ཤིང་རྟ་ཉིད། །འདི་ན་བསྐལ་པ་བྱེ་བར་ལེགས་བྱས་བསོད་ནམས་ཡོངས་བསྔོའི་སྲོག་ཤིང་ཅན། །དེ་ཡི་དཔལ་ལས་མི་མཇེད་འདིར་སྣང་སྔོན་བྱོན་སྤྲུལ་པའི་ལོ་པཎ་གྱིས། །གངས་ཀྱི་རི་བོར་མངོན་པར་དྲངས་ལ་རྣམ་བཤད་མི་ནུབ་རྒྱལ་མཚན་འཛིན། །ངག་གི་དབང་པོ་བསྟན་པའི་སྲོག་ཤིང་ཞབས་སེན་གཙུག་ན་བགྱིད་པའི་ཏོག །རྒྱུད་དོན་རྒྱ་མཚོ་ཤིན་ཏུ་ཟབ་ཅིང་མཆོག་ཏུ་རྒྱ་ཆེའི་རང་བཞིན་གང༌། །ཀུན་མཁྱེན་བློ་ཡི་སྤྱོད་ཡུལ་ཉིད་ལས་སྒྲོ་བཏགས་རྣམ་པ་ཅན་རྟོག་མིན། །དེ་ལྟར་ན་ཡང་


JLAZ012_Page_0273
[མ་དཔེ་གཟིགས་ན་འདིར་གནོན།]

དྲི་མེད་འོད་ཟེར་མིག་ཐུར་དབྱེ་བས་ཇི་སྙེད་དོན། །ཇི་བཞིན་འདིར་བསྡུས་སྐལ་བཟང་སློབ་མས་བསྐུལ་བའི་སྙིང་པོ་གསལ་བར་བྱ། །དེ་ལ་འདིར་ཡང་དག་རྫོགས་པའི་སངས་རྒྱས་ཀུན་ཏུ་བཟང་པོས་དགོངས་པ་ཆོས་ཀྱི་དབྱིངས་ལས་མ་གཡོས་བཞིན་དུ། ཉིད་ལས་མི་གཞན་པའི་འབྲས་བུའི་སངས་རྒྱས་ལྔ་ལ་དགོངས་པས་ལེགས་པར་བརྒྱུད་དེ། ཟབ་ཅིང་རྒྱ་ཆེ་བའི་ཆོས་ཕུན་སུམ་ཚོགས་པ་གསང་སྔགས་རྡོ་རྗེའི་ཐེག་པ་གསུངས་ཏེ་རྒྱུད་ལུང་མན་ངག་གསུམ་གྱི་སྣང་བས་གདུལ་བར་བྱ་བའི་སེམས་ཅན་གྱི་ཁམས་རང་བཞིན་གྱིས་གྲོལ་བར་མཛད་པ་ལས། འདིར་བསྐྱེད་པ་དང་རྫོགས་པ་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་སྟོན་པ་ཀ་དག་གི་གནས་ལུགས་དང༌། ཡེ་ཤེས་རང་སྣང་བའི་ངོ་བོར་སངས་རྒྱས་པའི་རང་བཞིན་དུ་སྟོན་པའི་ཐོད་རྒལ་གྱི་གྲུབ་མཐའ་ཚིག་དང་ཡིད་དཔྱོད་ལ་མི་ལྟོས་པར་མངོན་སུམ་རང་ཐོག་ཏུ་ངོ་སྤྲོད་པ། འདས་པའི་སངས་རྒྱས་རྣམས་ཀྱི་གཤེགས་ཤུལ། མ་འོངས་པའི་སངས་རྒྱས་ཐམས་ཅད་ཀྱིས་བསྒྲུབ་བྱ། ད་ལྟའི་སངས་རྒྱས་ཐམས་ཅད་ཀྱིས་བགྲོད་པ་གཅིག་པའི་ལམ་ཡང་དག་པ་ཐེག་པ་བརྒྱད་ཀྱི་བློའི་གྲུབ་མཐས་མ་རེག་པས་ཀུན་གྱི་རྩེ་མོར་ཕྱིན་ལ། དོན་དམ་པར་གདོད་མའི་སངས་རྒྱས་ཀུན་ཏུ་བཟང་པོའི་དགོངས་པའི་ཀློང་ཆེན་


JLAZ012_Page_0274
[མ་དཔེ་གཟིགས་ན་འདིར་གནོན།]

པོའི་རང་བཞིན་གང་ཡིན་པ་ལགས་པའི་མཐིལ་དུ་བཀྲམ་པ་ལྟར་གསལ་བར་བྱེད་པ་ལ་ཆོས་བདག་མཁའ་འགྲོ་རྣམས་ཀྱིས་གནང་བར་མཛད་དུ་གསོལ། དེ་ལ་གདམས་ངག་འཁྲིད་ཀྱི་ལུགས་སུ་གདབ་པ། ངོ་སྤྲོད་ཀྱི་ལུགས་སུ་གདབ་པ། མགྲོན་པོ་བརྒལ་བ་ཚང་སྤྲུགས་སུ་གདབ་པ་དང་གསུམ་དུ་ཡོད་པ་ལས། འདི་ནི་དང་པོའི་ཁོངས་སུ་ཕྱི་མ་གཉིས་ཞར་ལ་ཚང་བའི་མན་ངག་གི་ལུགས་ཏེ། དབང་པོ་རྣོན་པོ་རྒྱུའི་སྟོབས་ཅན་ཚེ་འདི་ཉིད་ལ་གདོད་མའི་གཞི་དབྱིངས་སུ་སྦྱོར་བ་དང༌།དབང་པོ་འབྲིང་བར་དོར་སངས་རྒྱ་བ། ཐ་མ་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་འབྱིན་པའི་རིམ་པ་གསུམ་གྱིས་སྟོན་པའོ། །སྤྱི་དོན་དང་པོ་ལའང་སྔོན་དུ་འགྲོ་བ་དང༌། དངོས་གཞི་གཉིས་ལས། སྔོན་འགྲོའི་ཆོས་ལ་སྐུ་གསུམ་གྱི་སྣ་འཁྲིད་པ་འབྱུང་བཞིའི་རྣལ་འབྱོར་ལ་བསླབ་ཚུལ། རིག་པའི་སྣ་འཁྲིད་པ་སྒོ་གསུམ་འཁོར་འདས་རུ་ཤན་དབྱེ་བ། སེམས་ཀྱི་སྣ་འཁྲིད་པ་ལུས་ངག་ཡིད་གསུམ་སྦྱོང་བའི་ཚུལ་དང་གསུམ་ལས། དང་པོ་ནི། རང་བཞིན་རྫོགས་པ་ཆེན་པོ་ཤླཽ་ཀ་འབུམ་ཕྲག་དྲུག་ཅུ་རྩ་བཞི་ལས་ཁྱད་པར་དུ་བྱུང་བ་སྒྲ་ཐལ་འགྱུར་རྩ་བའི་རྒྱུད་ལས། སྐུ་གསུམ་བསླབ་པའི་རིམ་པ་ཉིད། །འབྱུང་བའི་ཡོན་ཏན་


JLAZ012_Page_0275
[མ་དཔེ་གཟིགས་ན་འདིར་གནོན།]

གཙོར་བྱས་ཏེ། །མཆོག་ཏུ་ས་ཆུ་མེ་རླུང་གི། །སྒྲ་ལ་བསླབ་པས་ངེས་པར་འགྲུབ། །ཅེས་སྒྲ་བཞི་རྣལ་འབྱོར་དུ་བྱ་བར་གསུངས་ཀྱང༌། དེང་སང་ལག་ལེན་ལ་འདེབས་པ་ཉུང་བས་མ་བྱས་ཀྱང་རུང་ངོ༌། །གཉིས་པ་འཁོར་འདས་རུ་ཤན་འབྱེད་པ་ལ་ཕྱི་ནང་གཉིས་ལས། དང་པོར་ཕྱི་ལྟར་དབྱེ་བ་ནི་བསྟན་བུ་ལས། སྔོན་དུ་ལུས་ངག་ཡིད་རྣམས་ཀྱིས། །མངོན་པར་ཞེན་པ་ལྡོག་པའི་ཕྱིར། །སྔོན་དུ་སྤྱོད་པ་བརྩམ་པར་བྱ། །ཞེས་པས་བྱ་ལུགས་རྩ་རྒྱུད་ལས། །ལུས་ནི་འགྲོ་དང་འདུག་པ་དང༌། །གཅུད་ཅིང་འཁྲུལ་འཁོར་སྣ་ཚོགས་དང༌། །ཡན་ལག་འཕེན་ཅིང་སྡུད་པ་དང༌། །བྱ་བྱེད་རྣམ་པ་སྣ་ཚོགས་བསྟན། །དྲན་པའི་སེམས་གྱིས་མངོན་བླངས་ཏེ། །འགྲོ་དྲུག་གཟུགས་ཀྱི་སྤྱོད་པ་རྣམས། །སེམས་ཀྱིས་བླངས་ཏེ་ལུས་ཀྱིས་བྱ། །ཞེས་གསུངས་པས་ལས་དང་བག་ཆགས་ཀྱིས་བསྐྱེད་པའི་སྒོ་གསུམ་གྱི་བྱ་བ་རང་ལོག་ཅིང་ཕྱི་ནས་འགགས་པར་བྱ་བའི་ཕྱིར་དུ། གསང་བའི་སྤྱོད་པ་ལ་རྩ་ལྟུང་བདུན་པའི་ཉེས་པ་འགོག་ཕྱིར་ངེས་པར་མིའི་འགྲོ་འོང་དང་མཐོང་ཚོར་མེད་པའི་གནས་སུ་ཕྱིན་ཏེ། ཡུལ་དེའི་གཞི་བདག་ལ་གཏོར་མ་བྱིན་ནས་གྱ་ཚོམ་གྱི་སྤྱོད་པ་ཀོ་ལོང་མི་བྱེད་པར་ཕྲིན་ལས་གསོལ། ད་ནི་སེམས་ཅན་ཐམས་ཅད་ཀྱི་དོན་དུ་སྒོ་གསུམ་འཁོར་འདས་རུ་ཤན་ཕྱེ་ལ།


JLAZ012_Page_0276
[མ་དཔེ་གཟིགས་ན་འདིར་གནོན།]

ཕྱི་ནས་འཁོར་བར་མི་ལྡོག་པར་བྱ་སྙམ་དུ་སེམས་བསྐྱེད་ནས། ལུས་གཅེར་བུར་ཕྱུང༌། དམྱལ་བ་པའི་ཚ་གྲང༌། ཡི་དྭགས་ཀྱི་བཀྲེས་སྐོམ། དུད་འགྲོའི་བཀོལ་སྤྱོད། མིའི་སྐྱེ་རྒ་ན་འཆི། ལྷ་མིན་གྱི་འཐབ་རྩོད། ལྷའི་འཕོ་ལྟུང་སོགས་རང་རྒྱུད་ལ་བཀལ་ཞིང་དེ་དག་གི་རྣམ་འགྱུར་དང༌། གཞན་ཡང་རྒྱུག་པ་དང༌། མཆོང་བ་དང༌། གཅུད་པ་དང༌། ཡན་ལག་འཕེན་སྡུད་སོགས་མདོར་ན་དྲན་ཚད་ཀྱི་སྤྱོད་པས་སྣང་བ་གཏན་མེད་དུ་བཏང་ཞིང༌། དེ་བཞིན་དུ་ངག་རུ་ཤན་དབྱེ་བའི་ཕྱིར་ཐར་འགྱུར་ལས། ཅི་སྨྲས་ལྡོག་པ་མེད་པའི་ཕྱིར། །ལྷ་དང་ཀླུ་དང་གནོད་སྦྱིན་དང༌། །དྲི་ཟ་གྲུལ་བུམ་ཁྱབ་འཇུག་གི། །སྐད་ནི་བཟང་ངན་བྱེ་བྲག་བརྗོད། །མདོར་ན་འགྲོ་བ་དྲུག་གི་སྐད། །སེམས་ཀྱི་དྲན་བསམ་ངག་གིས་བརྗོད། །ཅེས་པ་ལྟར་ཅ་ཅོ་དང་སྒྲ་སྐད་སྣ་ཚོགས་པ་བླང་དོར་མེད་པར་སྒྲོགས་ལ། སེམས་ཀྱི་སྤྱོད་པའང༌། སངས་རྒྱས་སྲས་གཅིག་ལས། དགའ་དང་མི་དགའ་བདེ་དང་སྡུག །རྟག་དང་མི་རྟག་ལ་སོགས་པ། །ལྟ་སྒོམ་སྤྱོད་པའི་བསམ་པ་དང༌། །ཆོས་དང་ཆོས་མིན་ལ་སོགས་དང༌། །འདོད་ཆགས་ཞེ་སྡང་གཏི་མུག་དང༌། །དགེ་དང་མི་དགེ་ལ་སོགས་པའི། །བསམ་སྤྱོད་རྣམ་པ་སྣ་ཚོགས་བྱ། །ཞེས་གསུངས་པ་ལྟར་དུས་གསུམ་གྱི་དྲན་


JLAZ012_Page_0277
[མ་དཔེ་གཟིགས་ན་འདིར་གནོན།]

བསམ་དགེ་མི་དགེའི་འཕྲོ་འདུ་ཐམས་ཅད་བཙན་ཐབས་སུ་བསློངས་པར་བྱས་པས་སྒོ་གསུམ་ངལ་དུབ་ཀྱི་རྣམ་པར་ཤར་ཏེ་སྙེམས་ཐག་ཆོད་པའི་རྗེས་ཤེས་ཀྱི་ངོ་བོ་ལ་བལྟ་ཞིང་ངལ་བསོ། དེ་བཞིན་དུ་འདས་རྗེས་ལས། དཀོན་མཆོག་གསུམ་གྱི་སྤྱོད་པའང་སྤྱདཿ ཅེས་པས། ཡང་སྐྱིལ་ཀྲུང་དང་བཅས་པའི་ས་གནོན་མཉམ་གཞག །མཛོད་སྤུ་ནས་འོད་ཟེར་བཀྱེ་འདུན། བླ་གོས་ཟླུམ་པོར་བགོ་བ། མིག་གཉའ་ཤིང་གང་དུ་བལྟ་བ་ལ་སོགས་པའི་ཞི་དུལ་གྱི་སྤྱོད་ལམ། དེའི་ངག་གི་སྤྱོད་པ་ཤེས་རབ་སྙིང་པོ་ལ་སོགས་པའི་མདོ་འདོན་པ་དང༌། ཡིད་དཔྱོད་ཀྱི་ཚིག་དང་ཐལ་འགྱུར་གྱི་དགག་བཞག །དེ་བཞིན་དུ་ཁྲོ་བོའི་སྟངས་སྟབས། གར་དགུའི་རོལ་རྩེད། ངག་གི་སྤྱོད་པ་རུ་ལུའི་སྒྲ་དང་ཧཱུྃ་ཧཱུྃ་ཕཊ་ཕཊ་ལ་སོགས་པ་ལུས་ངག་གི་རྣམ་འགྱུར་སྣ་ཚོགས་པ་ལ་རྩལ་སྦྱོང་བ་ཡིན་ཏེ། རྒྱུད་ལས། སྔགས་དང་ཁ་ཏོན་ཆོས་ཀྱི་སྒྲ། །ཡོད་དང་མེད་དང་སྣང་བ་དང༌། །ཡིད་དཔྱོད་ཚིག་ནི་སྣ་ཚོགས་བརྗོད། །ཅེས་གསུངས་པའི་ཕྱིར་རོ། །དེ་ལྟར་ལུས་ངག་ཡིད་གསུམ་རུ་ཤན་ཐ་དད་དུ་དབྱེ་བ་དང༌། སྒོ་གསུམ་གྱི་སྔོན་འགྲོ་སྤེལ་ནས་བྱེད་པའི་ལུགས་སོགས་ཡོད་ཀྱང༌། འཁོར་འདས་ཀྱི་རྣམ་པ་ཅན་གང་ལའང་སྒོ་གསུམ་དང་སྐུ་གསུང་ཐུགས་ཀྱི་རོལ་པ་ཤུགས་འབྱུང་དུ་འཆར་


JLAZ012_Page_0278
[མ་དཔེ་གཟིགས་ན་འདིར་གནོན།]

བ་དེ་ལས་ཕྲུགས་གཅིག་ཏུ་བྱེད་པ་འདི་ལག་ལེན་ལ་འདེབས་སླ་ཞིང་འཆུན་ཆེ་བ་ཡིན་ནོ། །དེ་ལྟ་བུའི་རུ་ཤན་འབྱེད་པ་ལ་ཟླ་བ་ཕྱེད་དམ། ཞག་བཅུ་གཅིག་གམ། ཉི་མ་བདུན་ལ་སོགས་པར་འབད་པས་གནས་སྐབས་སུ་སྒོ་གསུམ་གྱི་ཞེན་པ་རང་ལོག་པ་དང་འཁོར་བའི་འབྲེལ་རྒྱུན་ཆོད། མཐར་ཐུག་ལུས་འོད་གསལ་དུ་སྨིན། ངག་ཡི་གེའི་འཁོར་ལོར་དག །སེམས་རིག་ཐོག་ཏུ་གྲོལ་བ་ལ་སོགས་ཕན་ཡོན་དཔག་ཏུ་མེད་པར་གསུངས་པ་ཡོད་དེ་མདོར་བསྡུ་ན་དབང་ཉེ་བར་རྟོགས་པ་ལས། རུ་ཤན་གང་གིས་ཕྱེ་བ་ཉིད། །ཁམས་གསུམ་ལྡོག་པ་མ་ཡིན་ནོ། །ཞེས་སོ། །གཉིས་པ་ནང་ལྟར་དབྱེ་བ་ནི་རྒྱུད་ཀློང་གསལ་གྱི་དགོངས་པ་ཡིན་ཏེ། དེ་ཉིད་ལས། སྤྱི་བོར་མགྲིན་པ་སྙིང་ག་དང༌། །ལྟེ་བ་གསང་གནས་རྐང་མཐིལ་དུ། །ཨ་སུ་ནྲྀ་ཏྲི་པྲེ་དུ་གནས། །ཞེས་བག་ཆགས་ཀྱི་ལུས་འདི་གྲུབ་པ་ཙམ་ནས་རིགས་དྲུག་ཏུ་འཕེན་བྱེད་ཀྱི་ས་བོན་རྒྱུན་ཆགས་སུ་གནས་པ་དེའི་སྟེང་དུ་ལས་སྔ་མའི་རྗེས་ཆགས་ཤིང༌། ཕྱི་མ་ཉེ་བར་ལེན་པའི་རྐྱེན་བྱེད་པས་འཆི་བའི་ཚེ་ནའང་ཡི་གེའི་རྩ་ཁམས་དེ་རྣམས་གང་དུ་རླུང་སེམས་འདུས་པ་ལས་དེ་དང་དེར་འཕེན་པར་བྱེད་པའི་ཕྱིར་ད་ལྟ་ལམ་གྱི་གནས་སྐབས་ན་སྦྱོང་ཚུལ་ཁྱད་དུ་འཕགས་པ་འདི་ནི་ཐབས་མང་དཀའ་བ་མེད་པ་བླ་ན་


JLAZ012_Page_0279
[མ་དཔེ་གཟིགས་ན་འདིར་གནོན།]

མེད་པའི་ཐེག་པ་འདིའི་འཕགས་ཆོས་ཡིན་ཏེ་ཇི་ལྟར་སྦྱོང་ན་འདས་རྗེས་ལས། ལུས་འདི་མ་རིག་རྒྱུས་བསྐྱེད་ཕྱིར། །རིགས་དྲུག་ས་བོན་ཉིད་དུ་གནས། །རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་གསུམ་དུ་ཤར། །ཡི་གེས་རྩལ་སྦྱངས་རུ་ཤན་དབྱེ། །ཞེས་པ་ལྟར་སྦྱང་གཞིའི་སྦྱི་བོར་ལྷའི་ས་བོན་ཨ་དཀར་པོ། མགྲིན་པར་ལྷ་མིན་གྱི་སུ་ལྗང་སེར། སྙིང་གར་མིའི་ནྲྀ་སྔོ་སྐྱ། ལྟེ་བར་དུད་འགྲོའི་ཏྲི་དམར་ནག །གསང་བར་ཡི་དྭགས་ཀྱི་པྲེ་ཐལ་སྐྱ། །རྐང་མཐིལ་དུ་དམྱལ་བའི་དུ་དུད་ཁ་རྣམས་ཀྱི་རྣམ་པར་གནས་པ། སྦྱོང་བྱེད་སངས་རྒྱས་ཐམས་ཅད་དང་གཉིས་སུ་མེད་པའི་རིག་པའི་ཡེ་ཤེས་རྡོ་རྗེ་གསུམ་གྱི་རང་བཞིན་ཡི་གེའི་རྣམ་པར་ཤར་བ་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་མཐིང་ག་རྣམས་བཀྲག་མདངས་དང་གཟི་བྱིན་འབར་བཞིན་པར་གསལ་ལ། འབྲུ་གསུམ་བཟླས་པའི་རྐྱེན་གྱིས་དེ་ལས་བྱུང་བའི་འོད་ཟེར་གྱིས་རིགས་དྲུག་གི་ས་བོན་བག་ཆགས་དང་བཅས་པ་དངོས་མེད་དུ་སྦྱངས་པར་བསམ་བཞིན་དུ། ཨོཾ་ཨཱཿཧཱུྃ་སྦྱང་གཞིའི་ས་བོན་རེ་ལ་འབུམ་རེ་དང་ཁ་སྐོང་བཅས་ཁྱོན་འབུམ་ཕྲག་བདུན་དུ་ལོངས་པར་བཟླའོ། །དེས་སྡིག་པ་དག་པའི་རྟགས་དང་ཐ་མལ་གྱི་ཞེན་འཛིན་ཤུགས་ལ་དག་པར་འགྱུར་ཏེ། ཀློང་གསལ་ལས། རུ་


JLAZ012_Page_0280
[མ་དཔེ་གཟིགས་ན་འདིར་གནོན།]

ཤན་ནང་ལྟར་སུ་ཕྱེ་བ། །འཁྲུལ་རྒྱུ་འཁོར་བའི་ས་བོན་སྟོངས། །ཞེས་སོ།། །།གསུམ་པ་སེམས་ཀྱི་སྣ་འཁྲིད་པ་སྒོ་གསུམ་སྦྱོང་བའི་སྔོན་འགྲོ་ལའང་གསུམ་ལས། དང་པོ་ལུས་སྦྱོང་བ་ནི། ཐལ་འགྱུར་ལས། ལུས་ཀྱི་སྔོན་དུ་འགྲོ་བ་ལས། །སོ་སོའི་བྱེད་པའི་རྒྱུད་འགགས་པ། །རྡོ་རྗེ་སྐྱིལ་ཀྲུང་དང་བཅས་ཏེ། །ལུས་སྦྱངས་སེམས་ལ་ཕན་པའོ། །ཞེས་པས་རྡོ་རྗེའི་འདུག་སྟངས་ལ་ལངས་འདུག་ཕྱོགས་གཉིས་སུ་བཞེད་པའི་སྔ་མ་ནི་རྟིང་པ་གཉིས་སྤྲད་ཅིང་པུས་མོ་བགྲད་སྐེད་པ་དྲང་པོར་བསྲང༌། ལག་པ་གཉིས་ཀྱི་གྲུ་མོ་རྒྱངས་བཞིན་དུ་ཐལ་མོ་སྤྱི་བོ་མ་རེག་པར་སྦྱར་མགྲིན་པར་ཨོལ་མདུད་ནོན་པར་བྱས་ཏེ་ལུས་རྡོ་རྗེ་སྔོན་པོ་རྩེ་གསུམ་པ་མེ་འབར་བ་ཞིག་ཏུ་སྒོམ། དེས་དུབ་ན་ཕྱི་མ་མི་འགྱུར་རྡོ་རྗེའི་འདུག་སྟངས། རྡོ་རྗེ་ལྟ་བུ་ལས་ལུས་སྤྱི་བསྲངས་པས་འགྱུ་བྱེད་ཀྱི་རླུང་འགག །རྐང་མཐིལ་ཁ་སྦྱར་བས་ཕོ་མོ་མ་ནིང་གི་རླུང་སྟོངས་ཏེ་འོད་གསལ་ཡེ་ཤེས་ཀྱི་ངང་དུ་རང་གནས། རྟིང་པ་གཉིས་གསང་བར་ཟུག་པར་གཏད་པས་འདོད་ཆགས་ཀྱི་གཞི་སྟོངས། ཐལ་མོ་སྤྱི་བོར་སྦྱར་བས་ལུས་ཀྱི་གནད་སྦྱོང་བར་བྱེད་དོ། །ཞེས་ཀུན་མཁྱེན་ཆེན་པོ་བཞེད་ལ། དག་པ་དྲན་པར་བྱ་བ་ནི། ཡར་རྩེ་གསུམ་ངོ་བོ་རང་བཞིན་ཐུགས་རྗེ་མཚོན་ལ། མར་རྩེ་གསུམ་སྐུ་


JLAZ012_Page_0281
[མ་དཔེ་གཟིགས་ན་འདིར་གནོན།]

གསུམ་མཚོན་པའི་སྐེད་པ་གཅིག་ཏུ་འདྲིལ་བ་ཀ་དག་དང་ལྷུན་གྲུབ་ངོ་བོ་གཅིག་ཏུ་ལམ་བྱེད་མཚོན་པའོ། །དེ་ལྟར་བགྱིས་པ་ལ་དགོས་པ་གསུམ་སྟེ། ཐུན་མོང་དུ་ངལ་དུབ་ཀྱིས་ལུས་སྒྲིབ་འདག །ཁྱད་པར་ལ་ལུས་རྡོ་རྗེ་མེ་འབར་བར་མཐོང་བས་གདོན་བགེགས་ཞི། མཐར་ཐུག་ལུས་ཞེན་ལྡོག་སྟེ་སྐུ་རྡོ་རྗེར་འགྲུབ་པར་འགྱུར་ལ། འདིའི་ཚེ་རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར་བའི་དོན་ངལ་དུབ་ལ་སོགས་པའི་རྐྱེན་གྱིས་འགྱུ་དྲན་བྱུང་ཚོར་གྱི་སྤུན་ཐག་ཆད། ཐད་ཀར་རིག་པ་རྟེན་མེད་དུ་ལུས་པས་ངོ་སྤྲོད་ཀྱིས་གཟེར་འདེབས་སླ་བ་ཡིན་ནོ།། །། གཉིས་པ་ངག་སྦྱོང་བ་ནི་ཐལ་འགྱུར་ལས། ངག་ནི་ཧཱུྃ་ཞེས་གནས་པ་ལས། །རྒྱས་གདབ་པ་དང་རྩལ་སྦྱང་དང༌། །མཉེན་བཙལ་ལམ་དུ་གཞུག་པ་ཡི། །དེ་ལྟར་ངག་སྦྱངས་སེམས་ལ་ཕན། །ཞེས་རྣམ་པ་བཞིར་བསྟན་པ་ལས། དང་པོ་རྒྱས་གདབ་པ་ལའང་གཉིས། ཕྱི་སྣང་བ་ལ་རྒྱས་གདབ་པ་ནི། དབེན་པར་སྐྱིལ་མོ་ཀྲུང་བཅས་ཏེ། ངག་ཏུ། ཧཱུྃ་ཧཱུྃ་ཧཱུྃ་ཧཱུྃ། ཞེས་གདངས་འགྱུར་རིང་པོས་བརྗོད་པས་ཕྱིའི་སྣང་བ་ཆེ་ཆུང་བརྟན་གཡོ་ཐམས་ཅད་ཧཱུྃ་དུ་ལམ་ལམ་སོང་བར་བསམ་ཞིང༌། སོ་དང་མཆུ་མ་རེག་ཙམ་གྱི་ངང་ནས་རླུང་དང་ཤེས་པ་སྣང་བ་གསུམ་གཅིག་ཏུ་བསྲེས་ལ་མ་ཡེངས་པར་བྱའོ། །


JLAZ012_Page_0282
[མ་དཔེ་གཟིགས་ན་འདིར་གནོན།]

སྣང་བ་ཐམས་ཅད་ཧཱུྃ་དུ་ལམ་ལམ་འཆར་ཞིང་བན་བུན་ཕྱད་ཕྱོད་དུ་སོང་ན་རྒྱས་ཐེབས་པའི་ཚད་དེ། དེས་ཡུལ་སྣང་རང་བཞིན་མེད་པར་གྲོལ་བའི་དགོས་པ་ཡོད་དོ། །གཉིས་པ་ནང་ཕུང་པོ་ལ་རྒྱས་གདབ་པ་ནི། ཡང་ཧཱུྃ་ཞེས་བརྗོད་པས་ཕྱི་རོལ་གྱི་ཧཱུྃ་རྣམས་གཅིག་བྱུང་གཉིས་བྱུང་ཐམས་ཅད་ལུས་ཀྱི་དབང་པོའི་སྒོ་ནས་ཞུགས་ཏེ་ཁོང་བའི་ནང་དུ་བྱུང་ནས་ནང་ཁྲོལ་ཤ་ཁྲག་དང་བཅས་པ་མི་དམིགས་པར་སྦྱངས་རྗེས། ལུས་ཀྱི་ནང་ཐམས་ཅད་ཧཱུྃ་གིས་རོང་ངེ་བ་སྙམ་བྱེད་ན་རླུང་བསྡམ་པ་གནད་དོ། །དེས་ནི་ལུས་ཀྱི་འབྱུང་བ་དག་སྟེ་གདོས་བཅས་ཟག་པ་མེད་པར་གྲོལ་བའི་དགོས་པ་ཡོད་དོ། །གཉིས་པ་རྩལ་སྦྱང་བ་ལ་གཉིས་ཀྱི། དང་པོ་ཕྱི་སྣང་བ་ལ་སྦྱོང་བ་ནི། ཧཱུྃ་ཧཱུྃ་ཞེས་དྲག་ལ་གཏུམ་པར་བརྗོད་པའི་རྐྱེན་གྱིས་མཁའ་ལ་གློག་འཁྱུག་པ་བཞིན་ཧཱུྃ་མཐིང་ནག་རྣོ་མྱུར་གྱི་ཤུགས་དང་ལྡན་ཞིང་གང་ལ་འབིགས་པའི་ཡུལ་དང་འཚམས་པ་གནམ་ལྕགས་བབས་པ་བཞིན་བྱུང་ནས་རི་དང་ཁང་ཁྱིམ་ཐོགས་རེག་གི་སྣང་བར་ཤར་བ་མཐའ་དག་ཁྲལ་ཁྲོལ་ཁལ་ཁོལ་མེད་པར་དབུག་པར་བསམ་མོ། །དེས་སྣང་བ་བདེན་མེད་དུ་ཤེས་པའི་དགོས་པ་ཡོད་དོ། །གཉིས་པ་ནང་ཕུང་པོ་ལ་རྩལ་སྦྱང་བ་ནི། ཧཱུྃ་མཐིང་ནག་མཐོ་གང་བས་རང་གི་ལུས་


JLAZ012_Page_0283
[མ་དཔེ་གཟིགས་ན་འདིར་གནོན།]

ཕྱིར་བྲལ་ནང་བྲལ་ཁོལ་རྩེ་མེད་པར་ཕུག་པས་རྡུལ་ཕྲན་དུ་དག་པར་བསམ་ཞིང་ཧཱུྃ་དྲག་པོར་བརྗོད། འབྱོངས་པའི་རྟགས་ལུས་ཀྱི་ཤ་ཁོལ་བུར་འཕར་བ་དང༌། མེ་ལོང་གི་བྱད་ལྟར་རང་བཞིན་མེད་པའི་ཉམས་འཆར་རོ། །དེས་ནང་ཕུང་པོའི་ནད་གདོན་ཞི་བ་དང༌། ལུས་འོད་གསལ་དུ་གྲོལ་བའི་དགོས་པ་ཡོད་དོ། །གསུམ་པ་མཉེན་བཙལ་བ་ནི། མདུན་དུ་ཤིང་བུ་ལ་སོགས་པའི་མཚན་མ་བཙུགས། ངག་ཏུ་ཧཱུྃ་ཧཱུྃ་ཞེས་བརྗོད་པས་ཧཱུྃ་གི་ཕྲེང་བ་ལུ་གུ་རྒྱུད་དུ་འབྲེལ་བ་དམིགས་རྟེན་གྱི་རྩ་བ་ནས་རིམ་པར་དཀྲིས་ཤིང་རྩེ་མོར་སླེབ་པ་དང་ཧཱུྃ་སྔ་མ་དེ་རྩེ་མོར་མདུང་ཚུགས་སུ་གནས་པ་ལ་ཤེས་པ་གཏད་དེ་ཧཱུྃ་གི་གླུ་དལ་བོས་ལེན། སྐྱོ་བ་ན་ཡང་གཅིག་ལ་གཅིག་ཐིམ་གྱི་འཇིག་པ་ལ་ཤེས་པ་གཅུར་ནས་མཐར་སྙིང་གར་བསྡུས་ཏེ་ངལ་བསོ། དེ་ལྟར་ཡང་ཡང་བགྱིས་པས་ཕྱི་ནང་གི་འགྲོ་ལྡོག་ལམ་དུ་ལོངས་ནས་སེམས་ལ་ཤིན་ཏུ་སྦྱངས་པའི་ཡོན་ཏན་ཐོབ་སྟེ་དམིགས་པ་གང་དུའང་བསྒྱུར་ཐུབ་པ་འོང་ངོ༌། ། བཞི་པ་ལམ་དུ་གཞུག་པ་ནི། རང་ཉིད་ཧཱུྃ་དུ་བྱས་པ་ཁ་དོག་མཐིང་ག་ཁྲུ་གང་བ་ཞིག་ཕར་འཁྱོག་ཚུར་འཁྱོག་སྲིན་བུའི་འགྲོས་ཀྱིས་རྣམ་པ་ཐམས་ཅད་པའི་ལམ་ལ་ཞུགས་ཤིང་མཐོང་ཡུལ་གྱི་རི་དང་ཡུལ་ལྗོངས་ནས། མི་མཐོང་ཞིང་རྒྱུས་ཡོད་པའི་ས་ཕྱོགས་ཐམས་


JLAZ012_Page_0284
[མ་དཔེ་གཟིགས་ན་འདིར་གནོན།]

ཅད་དུ་འགྲོན་པོ་དོན་གཉེར་ལམ་དུ་ཞུགས་པ་བཞིན་སོང་བར་བསམ་ཞིང་འགྲོ་ལུགས་དང་མཐུན་པའི་ཧཱུྃ་དལ་བུར་བརྗོད། དེས་ཡུལ་གྱི་བག་ཆགས་སྦྱོང་ཞིང་ལུས་ངག་གི་ལམ་སྲོལ་དུ་ཆུད་པའི་དགོས་འབྲེལ་ཡོད་ལ། སླར་ཡང་ཧཱུྃ་ཧཱུྃ་ཞེས་ཤར་ཕྱོགས་མངོན་དགའ་ལ་སོགས་པ་དག་པའི་ཞིང་རྣམས་སུ་ཡང་དཔག་ཆེན་གྱིས་མདའ་བཞིན་དུ་ཕྱིན་པར་བསམས་པས་ཞིང་ཁམས་འབྱོངས་པའི་རྟེན་འབྲེལ་སྒྲིག་གོ། །ཀུན་ལ་རླུང་སེམས་ཧཱུྃ་གསུམ་རྩེ་གཅིག་ཏུ་དྲིལ་ནས་འདུན་པ་གང་གཏད་དུ་བཟུང་བས་རྣམ་རྟོག་འགག་སྟོབས་གཞན་ལས་ཆེ་བ་ཡིན་ནོ། །དེས་ནི་ངག་གི་སྒྲིབ་པ་འདག་ཅིང་ངག་ལོངས་སྤྱོད་རྫོགས་པའི་སྐུར་གྲོལ་བར་བྱེད་དོ།། །། གསུམ་པ་སེམས་སྦྱོང་བ་ནི། ཐལ་འགྱུར་ལས། སེམས་ནི་ཐོག་མ་བྱུང་ས་དང༌། །བར་དུ་གནས་ས་ཐ་མ་འགྲོ། །དེ་ལྟར་གསུམ་ལ་བརྟག་དཔྱད་ན། །སེམས་སྦྱངས་སེམས་ཀྱིས་གནས་ལུགས་ཤེས། །ཞེས་པས་སེམས་སྦྱོང་བ་དངོས་དང༌། སྦྱངས་པ་རྣལ་དུ་དབབ་ཚུལ་ལོ། །དང་པོ་ལ་གསུམ་གྱི་ཐོག་མར་བྱུང་ས་དང་བྱུང་མཁན་ལ་བརྟག་པ་ནི། སེམས་འདི་ཡོད་ཙམ་ནས་སྣོད་བཅུད། ཕྱི་ནང་སྣང་བ་དང༌། སྟོང་པ་ལ་སོགས་ཡོད་མེད་ཀྱི་ཕྱོགས་གང་ནས་བྱུང༌། ཡོད་པ་དངོས་པོའི་ཕྱོགས་ནས་བྱུང་ཟེར་ན་གྲུབ་


JLAZ012_Page_0285
[མ་དཔེ་གཟིགས་ན་འདིར་གནོན།]

མཐའ་སྨྲ་བ་ཉན་ཐོས་པའི་ཕྱོགས་སུ་ལྷུང་བས། སྣང་བའི་བདེན་ཞེན་རྡུལ་ཕྲ་རབ་ཀྱི་ཆ་ཤས་ཙམ་དུའང་བཤིག་སྟེ་རྟོགས་ཤིག །དེ་ལྟར་བརྟགས་ཤིང་རྡུལ་ཕྲན་ཆ་མེད་ཀྱི་ཁོང་དུ་བཙལ་བས་སེམས་ཀྱི་བྱུང་ས་མ་རྙེད་པར། རྨི་ལམ་ལྟར་རང་བཞིན་མ་གྲུབ་པར་ཤེས་ཀྱང༌། བྱུང་མཁན་གྱི་ཤེས་པ་ཤ་ར་ར་འོལ་ལེ་བ་སེམས་དང་སེམས་བྱུང་ལྟར་ཤར་བའི་རྩ་བ་མ་ཆོད་ན་ནི་དབུ་མ་སེམས་ཙམ་པ་ལྟར་མེད་དགག་དང་མ་ཡིན་དགག་ལ་གནས་ལུགས་རེ་བའི་ཕྱོགས་ལ་འཕྱན་དུ་ཡོད་པས། འཚོལ་མཁན་གྱི་སེམས་ལ་ཚུར་ལྟོས་ཤིག །བལྟས་པས་ཀྱང་སེམས་དར་ཅིག་རང་གསལ་ཙམ་དུ་འདུག་པའམ། འགྱུ་དྲན་སྣ་ཚོགས་སུ་ཤར་བ་མཐར་ཐུག་ཏུ་འདོད་ན། སེམས་ཀློང་ཁ་འབྱམས་གཞི་བྲལ་ལ་གདེང་འཆའ་བ་དང་འདྲ་བས་ད་དུང་རིག་པ་མངོན་སུམ་དུ་མ་མཐོང༌། ཡང་སྟོང་པའི་ཕྱོགས་ནས་བྱུང་ཟེར་ན། མཁན་པོ་མཐོང་བས་དབྱིབས་དང༌། ཁ་དོག །རྟགས་མཚན། ཆེ་ཆུང་ཕྱོགས་ཆ་ལ་སོགས་པའང་ངེས་པར་ཡོད་དགོས་པས་དེའི་རང་བཞིན་བརྟག་དགོས་ཏེ། དེ་ལྟར་བརྟགས་པས་འཚོལ་ས་དང་འཚོལ་མཁན་དུ་སྣང་བའི་གཟུང་འཛིན་ཡུལ་མེད་རྟེན་བྲལ་སྨྲ་བསམ་བརྗོད་མེད་ཁས་ལེན་ཐམས་ཅད་བྲལ་བའི་ངང་དུ་ཧ་ཕྱད་དེ་ལུས་ན། གཞི་མེད་རྩ་བྲལ་


JLAZ012_Page_0286
[མ་དཔེ་གཟིགས་ན་འདིར་གནོན།]

ཆོས་སྐུ་སྐྱེ་བ་མེད་པའི་དོན་ཁོང་དུ་ཆུད་པ་ནི། དབུ་མ་ཐལ་འགྱུར་ལས། ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པའི་ཐོག་ཏུ་སླེབ་ཅིང་སླེབ་ཚུལ་ཡང་དིང་སང་གྲུབ་པའི་མཐའ་འདི་ཉིད་འཛིན་པར་རློམ་པ་རྣམས་ལྟར་ཡིད་དཔྱོད་ཀྱི་བློས་བཞག་པ་མ་ཡིན་པར་རང་བཞིན་རྫོགས་པ་ཆེན་པོའི་ཆོས་ཉིད་ཀྱི་དོན་མཐོང་བས་སླེབས་པ་ཡིན་ཞེས་བདག་ཉིད་སྨྲའོ། །གཉིས་པ་གནས་ས་གནས་མཁན་ལ་བརྟག་པ་ནི། སེམས་འདི་ད་ལྟ་ཕྱི་རུ་ཤར་ན་ཕྱིའི་ཡུལ། ནང་དུ་ཤར་ན་ནང་གི་ལུས། དེ་དག་གི་ཕྱི་ནང་སྟོད་སྨད་མགོ་མཇུག་ལ་སོགས་པར་གང་དུ་གནས་བརྟགས་པས་གནས་ས་མཐོང་ན་དེའི་དབྱིབས་དང་ཁ་དོག་བྱེད་ལས་ལ་སོགས་པའི་རྟོག་དཔྱོད་དང་དྲི་བརྩད་ཀྱི་རྫུན་ཕུགས་གཏིབ་ཅིང༌། ཕྱི་ནང་གང་དུའང་མ་མཐོང་ནས་གནས་མཁན་གྱི་ཐོག་ཏུ་དཔྱད་པའི་ཚེ་ཀུན་གཞིའི་རྣམ་ཤེས་རང་གསལ་ཙམ་བདེན་གྲུབ་ཏུ་ཤར་ནའང་སེམས་ཙམ་རྣམ་རྫུན་པར་ཉེ་ལ། འདིར་སེམས་ལ་རྒྱུ་མཚན་མེད་པས་ཆུ་ལ་ཡི་གེ་བྲིས་པའི་ཚེ་རང་ས་ན་རྗེས་མེད་དུ་ཞིག་པའང༌། གྲུ་རྡིབ་པའི་ཚེ་ཆུ་ལ་འཇུས་པ་ལྟར་གནས་ས་བཙལ་བའི་མོད་ལ་འཚོལ་མཁན་རང་ཞིག་པས་གནས་བྱེད་ཀྱི་མཁན་པོ་ངོས་བཟུང་དང་བྲལ་བར་གཏན་ལ་


JLAZ012_Page_0287
[མ་དཔེ་གཟིགས་ན་འདིར་གནོན།]

ཕེབས་པ་ནི་ལོངས་སྐུ་འགག་པ་མེད་པའི་དོན་ཁོང་དུ་ཆུད་པ་ཡིན་ནོ། །དེ་ལྟ་བའི་སྐབས་ན་ཚེར་མས་བཏབ་པ་ལ་སོགས་སྒོ་གསུམ་གྱི་སྟེང་དུ་ཚང་བའི་ཉེར་ལེན་ལས་མྱོང་རེག་གི་མཚན་མ་གང་དང་གང་དུ་ཤར་བ་དེ་དང་དེར་ཡོད་པ་ལྟར་སྣང་བ་ནི། འདུ་བྱེད་ཀྱི་ཕུང་པོས་རྒྱུ་བྱས། ཕྲལ་བྱུང་གི་རྣམ་པར་རྟོག་པས་རྐྱེན་བྱས། གཟུང་བའི་ཡུལ་ལ་འཛིན་པའི་སེམས་ཆགས་པས་བདག་པོའི་འབྲས་བུར་སྨིན་པ་སྟེ། གཟུང་འཛིན་ཡུལ་སྟོངས་ཏེ་ཆོས་ཉིད་ཟད་སར་འཁྱོལ་བའི་ཚེ་གཤེད་མ་བརྒྱས་བསྐོར་ཡང་ཉམ་ང་བ་དང་བག་ཚ་བ་མེད་པའི་གོ་དོན་ཡང་འདིས་ལྷོངས་པ་ཡིན་ནོ། །གསུམ་པ་འགྲོ་ས་འགྲོ་མཁན་ལ་བརྟག་པ་ནི། ཕྱི་ནང་སྣོད་བཅུད། སྣང་སྟོང་ཡོད་མེད་ལ་སོགས་གང་གི་ཕྱོགས་སུ་ཡང་འགྲོ་བའི་ཡུལ་བརྟགས་པས་འགྲོ་ས་མ་རྙེད་པས་འབྲས་བུ་ལ་རེ་དོགས་སུ་འཛིན་པའི་བློ་ལྡོག །གལ་ཏེ་རྙེད་ན་འགྲོ་མཁན་གྱི་བྱད་བཞིན་ལ་སོགས་པའི་མཚན་ཉིད་ཀྱང་ཤེས་དགོས་པས་བརྟགས་པའི་ཚེ་དེ་ལྟར་མི་འདུག་པས་བྱས་པའི་ཆོས་ཀྱིས་སངས་མི་རྒྱ་བར་ཡིད་ཆེས། དེ་ལྟར་འགྲོ་ས་མེད་པས་ཡུལ་སྣང་སེམས་ཀྱིས་བཟོས་པར་ཐག་ཆོད། འགྲོ་མཁན་མེད་པས་ཡུལ་ཅན་རང་བཞིན་མེད་པའི་གདེང་རྙེད། དེའི་ཚེ་རིག་སྟོང་འགྲོ་འོང་མེད་པ་


JLAZ012_Page_0288
[མ་དཔེ་གཟིགས་ན་འདིར་གནོན།]

སྤྲུལ་པའི་སྐུར་གཏན་ལ་ཕེབས་ཤིང༌། འདི་ལྟར་བྱུང་གནས་འགྲོ་གསུམ་ཐུན་མོང་མ་ཡིན་པའི་ཁོངས་སུ་སེམས་ཀྱི་ཁང་བུ་རྡིབ་པའི་མན་ངག་ཀྱང་ཚང་བས་ཁྱད་པར་འཕགས་པའི་མྱུར་ལམ་ཡིན་ནོ། །དེ་ལྟར་སེམས་ཀྱི་སྔོན་འགྲོའི་སྤྱོད་པ་བྱས་པས་ཐུན་མོང་དུ་སེམས་ཀྱི་སྡིག་སྒྲིབ་འདག་ཅིང་བར་ཆད་ཞི། མངོན་ཞེན་ལྡོག །ཁྱད་པར་དུ་འཁོར་འདས་རུ་ཤན་ཕྱེད་པས་སེམས་ཀྱི་མཚན་ཉིད་རིག་སྟོང་ཡེ་ཤེས་སུ་གྲོལ། མཐར་ཐུག་སངས་རྒྱས་ཀུན་དང་གཉིས་སུ་མེད་པའི་ཐུགས་རྡོ་རྗེ་གདོད་མའི་གཞི་ཐོག་ཏུ་ཕྱིན་པར་བྱེད་དོ།། །།གཉིས་པ་ལ་གཉིས། རྣལ་དུ་དབབ་པ་དང༌། སོར་གཞུག་པའོ། །དང་པོ་ནི། ཐལ་འགྱུར་ལས། འདི་དུས་ལུས་ངག་སེམས་ཀྱི་གནད། །རྣལ་འབྱོར་ལྡན་པས་རྣལ་དབབ་བྱ། །ཞེས་ཁྱད་པར་ཅན་གྱི་སྔོན་འགྲོའི་སྤྱོད་པ་དེ་རྣམས་ཀྱིས་ཁམས་དང་འབྱུང་བ་འཁྲུགས་པར་གྱུར་པ་རྣལ་མ་མ་བཅོས་པའི་གཤིས་སུ་གཏན་ལ་དབབ་པའི་ཕྱིར། ལུས་ཀྱི་གནད་བཟང་ངན་བླང་དོར་ལས་འདས་པ་དུར་ཁྲོད་ཀྱི་མི་རོ་བཞིན་དུ་ཅི་བདེར་གཞག །ངག་སྨྲ་བརྗོད་དང་བྲལ་བའི་གཤིས་ལ་དབུས་ཀྱི་འགྲོ་འོང་ཙམ་ཡང་དལ་བར་བསླབ། ཡིད་དྲན་རྟོག་རྣམ་གཡེང་ལས་གྲོལ་བ་སྤྲིན་དེངས་པའི་ནམ་མཁའ་ལྟར་འཇོག་པ་སྟེ། བྱ་


JLAZ012_Page_0289
[མ་དཔེ་གཟིགས་ན་འདིར་གནོན།]

བ་དང་བྱེད་པ་མེད་པའི་རྣལ་འབྱོར་དང་ལྡན་པས་རྣལ་དུ་དབབ་པ་ལ་ཞག་ཉི་ཤུ་རྩ་གཅིག་གམ། བདུན་ནམ་གསུམ་ལ་སོགས་པ་བྱ་སྟེ། དགོས་པ་ནི་ཀློང་གསལ་ལས། འདི་ལྟར་རྣལ་དུ་སུས་ཕབ་པ། །འབྱུང་འཁྲུགས་ནད་རྐྱེན་ཞི་བ་དང༌། །འཛིན་པ་རང་གྲོལ་ཉིད་དུ་འགྱུར། །ཞེས་སོ། །གཉིས་པ་སོར་གཞུག་པ་ནི། འདས་རྗེས་ལས། ཉན་ཐོས་བྱང་སེམས་ཁྲོ་བོ་ཡི། །ལྟ་སྟངས་ཉིད་ཀྱིས་སོར་ཡང་གཞུག །དེས་ནི་གསུམ་པོ་སོར་ཆུད་ནས། །ཉམས་ལེན་ཉིད་ལ་བརྩོན་པར་འགྱུར། །ཞེས་དང་པོ་ཉན་ཐོས་ཀྱི་ལྟ་སྟངས་རྣམ་སྣང་ཆོས་བདུན་དང་ལྡན་པས་བྱུང་ཚོར་གྱི་རྟོག་པ་ལ་བཟོ་མི་འཆོས་པ་ཉིད་དུ་གཞག་གོ། །གཉིས་པ་བྱང་ཆུབ་སེམས་དཔའི་ལྟ་སྟངས་མིག་གཉའ་ཤིང་གང་ཙམ་དུ་རྟེན་མེད་དུ་གཞག །གསུམ་པ་ཁྲོ་བོའི་ལྟ་སྟངས་རྐང་བ་གྱད་ཀྱི་དོར་སྟབས་སུ་བགྲད། མིག་སྡང་མིག་ཏུ་གཡོ་ཞིང་བར་སྣང་ལ་བལྟ། ངག་ཧ་ཧ་ཞེས་ཁྲོ་བོའི་གད་མོ་དང༌། ཧི་ཧི་ཞེས་ཁྲོ་མོའི་རྒྱངས་གླུ་བརྗོད་པའི་ངང་ནས་སྣང་བའི་རྫུན་ཕུགས་གཏིབ་པའི་བརྟུལ་ཞུགས་ལ་རྩལ་སྦྱང་ངོ༌། །དགོས་པ་ནི་ཀློང་གསལ་ལས། ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕེབས། །བོ་དྷི་ས་ཏྭའི་ལྟ་སྟངས་ཀྱིས།།རྣལ་ཕེབས་བདེ་བ་ཉིད་ཐོབ་འགྱུར། །ཁྲོ་བོ་ཉིད་ཀྱི་ལྟ་


JLAZ012_Page_0290
[མ་དཔེ་གཟིགས་ན་འདིར་གནོན།]

སྟངས་ཀྱིས། །རྣལ་ཕེབས་ཡོན་ཏན་གསུམ་ཡང་འགྲུབ། །ཅེས་སོ། །ཡི་གེ་རྙིང་པ་དག་ལ་རྣམ་སྣང་ཆོས་བདུན་ལས་ཐ་དད་པའི་མིག་སྣ་རྩེར་གཏོད་པ་དང༌། བྱང་སེམས་ལྟ་སྟངས་ཞི་བར་མི་གནས་པ་སོགས་སྣང་བ་ཧོལ་རྒྱུགས་སོ།། །།གཉིས་པ་དངོས་གཞིའི་ཁྲིད་ཚུལ་ལ་གཉིས་ལས། དང་པོ་སྐུ་བཞིའི་ས་བོན་འདེབས་ཤིང་མྱུར་ལམ་སྒོམ་པའི་སྣོད་དུ་བསྒྲུབ་ཕྱིར་དབང་གི་དཀྱིལ་འཁོར་ཆེན་པོར་འཇུག་ཅིང་སྨིན་པར་བྱེད་པའི་བྱ་བ་རྣམས་གནས་སྐབས་འདི་ཉིད་དུ་དོན་གྱིས་ཐོབ་པ་ཡིན་ལ། ཁྲིད་ཀྱི་བྱ་བ་མཐར་ཕྱིན་ནས་དབང་བསྐུར་བ་སོགས་དོན་ལ་མི་གནས་ཤིང༌། རྒྱུད་དོན་གཟིགས་པའི་སྤྱན་སྔར་ཡང་མི་མཛེས་པ་ཉིད་དོ། །གཉིས་པ་ལའང་ངེས་ཚིག་གི་གོ་ནས་རྡོ་རྗེ་སྙིང་པོ་བླ་ན་མེད་པའི་ཐེག་པ་འདི་འབྲས་བུ་ལམ་དུ་བྱེད་པ་སངས་རྒྱས་པའི་ལམ་ཐམས་ཅད་ཀྱི་དངོས་གཞི་ཡིན་པའི་རྒྱུ་མཚན་དང༌། འབྲས་བུའི་ངོ་བོ་རིག་ཐོག་ཏུ་ངོ་སྤྲད་པའོ། །དང་པོ་ནི། གཞི་ཡིན་ལ་དངོས་མ་ཡིན་པ་ལྷ་ཁང་མཐོང་ཡང་རྟེན་གསུམ་མ་མཐོང་བ་ལྟ་བུ་ཟབ་གསལ་དང༌། སྣང་སྟོང་ལ་སོགས་པ་གཅིག་ལ་གཅིག་འབྲེལ་གྱི་ཚིག་ཙམ་ལ་ལྟ་སྒོམ་ཡིན་པར་ཡིད་བརྟན་འཆའ་བའང་མ་ཡིན། དངོས་ཡིན་ལ་གཞི་མ་ཡིན་པ་རྟེན་གསུམ་མ་མཐོང་ཡང་མཚན་ཉིད་


JLAZ012_Page_0291
[མ་དཔེ་གཟིགས་ན་འདིར་གནོན།]

གཏན་ལ་ཕེབས་པ་མུ་བཞིའམ། མཐའ་བརྒྱད་སྤྲོས་བྲལ་རྟོག་དཔྱོད་ཀྱིས་གོ་ཡང་མྱོང་ཐོག་ཏུ་མ་ཆགས་པའི་པྲ་ཡས་པ་ཡང་མ་ཡིན། དངོས་དང་གཞི་གཉིས་ཀ་མ་ཡིན་པ་འཕྲུལ་སྣང་དང་ཤཱཀྱ་མུ་ནེ་གང་ཡང་མ་མཐོང་བ་ལྟ་བུ་ཆོས་ཐམས་ཅད་རང་བཞིན་མེད་དོ་ཞེས་ཡིད་དཔྱོད་ཙམ་གྱིས་ལམ་དུ་བྱེད་པ་ལས་རང་བཞིན་མེད་པའི་ངོ་བོ་བཅར་ཕོག་ཏུ་ངོ་མ་འཕྲོད་པས་འཆི་ཁར་ཐ་མལ་དུ་ལུས་པའི་གྲུབ་པའི་མཐའ་མ་ཡིན་པར། འདི་རང་བཞིན་རྫོགས་པ་ཆེན་པོ་སྙིང་ཐིག་གི་ལྟ་བ་དངོས་དང་གཞི་གཉིས་ཀ་ཡིན་པའི་ངོ་བོ་རྟེན་པའི་གནས་ཚུལ་ཇི་བཞིན་པ་གཏན་ལ་ཕེབས་པ་དང་འདྲ་བ་ལྟ་སྒོམ་ཡིན་སྙམ་ལ་རག་མ་ལུས་པར་རང་གྲོལ་མངོན་སུམ་པར་སྟོན་པའོ། །གཉིས་པ་ལ་གཉིས། དབང་པོ་རྣོན་པོ་སྒོམ་དུ་མེད་ཀྱང་ལ་བཟླ་བས་གྲོལ་བ་ཁྲེགས་ཆོད་ཀྱི་གདམས་པ་དང༌། བརྩོན་འགྲུས་ཆེན་པོས་ཐོད་རྒལ་དུ་སྒོམ་པ་སྐུ་གསུམ་ལམ་སྣང་ལ་གྲོལ་ཏེ་ཕུང་པོ་ལྷག་མེད་དུ་མྱ་ངན་འདའ་ཚུལ་ལོ།། དང་པོ་ལའང་དབང་པོའི་ཁྱད་པར་གྱི་ངོ་སྤྲོད་ལུགས་གཉིས་ལས། དང་པོ་ཐུན་མོང་བ་ནི། དད་པ་དང་ལྡན་པས་སྙིང་ཐིག་གི་གདུལ་བྱ་ཡིན་ཡང་རྣམ་པར་ཤེས་པ་ལྐོག་ཏུ་གྱུར་པའི་རིགས་ཅན་རྣམས་ལ་ནི་ངོ་སྤྲོད་སྤྲས་པ་ལས། ཨེ་མ་ཧོ། སྣང་བ་སེམས་སུ་ངོ་སྤྲད་པས་


JLAZ012_Page_0292
[མ་དཔེ་གཟིགས་ན་འདིར་གནོན།]

སེམས་ལ་བྱན་ཚུད། སེམས་ཉིད་སྟོང་པར་ངོ་སྤྲད་པས་སྟོང་པ་བདེ་བས་རྒྱས་གདབ། སྟོང་པ་རིག་པར་ངོ་སྤྲད་པས་རིག་པ་ཉིད་དབྱིངས་དང་གཉིས་སུ་མེད་པ་དེ་ཁོ་ན་ཆོས་སྐུའོ་ཞེས་པ་ལྟར། སྣང་བ་སེམས་ཀྱིས་བཟོས་པར་ངོ་སྤྲད་པས་བདེན་འཛིན་རང་རྒྱུད་པ་ལྡོག །དེ་ལྟར་བཟོ་བྱེད་ཀྱི་སེམས་སྟོང་པར་སྤྲད་པས་ཕྱི་ཡུལ་དོན་དུ་ཞེན་པ་སྤོང༌། སྟོང་པ་རིག་པར་ངོ་སྤྲད་པས་ཆོས་ཉིད་ཆད་ལྟར་མི་གོལ་བའི་གནད་ཙམ་ལ་ཁ་དྲངས་ཏེ་ཁྲིད་པའོ། །དེ་ནི་སྙིང་ཐིག་གི་དགོངས་པའི་ཕྱོགས་ལ་ཉེ་བ་མ་ཡིན་པར་ད་གདོད་གོ་སྟེ་རང་ཤར་ལས། སྣང་བ་སེམས་ཀྱི་རྣལ་འབྱོར་ནི། །ཐམས་ཅད་ང་ཡི་སེམས་ལས་བྱུང༌། །སེམས་ཉིད་རྟོགས་ན་ཅི་བྱར་ཡོད། །དེ་སྐད་ཀུན་ཏུ་བརྗོད་བྱེད་པ། །ང་ཡིས་གྲོལ་བར་མ་བཤད་དོ། །ཞེས་གསུངས་པ་སྟེ། གཞན་དུ་སེམས་དོན་དམ་དུ་མེད། ཀུན་རྫོབ་ཏུ་ཡོད་པར་བཏགས་ནས་ལྟ་སྒོམ་དམིགས་གཏད་ཅན་ལམ་དུ་བྱེད་ཅིང་དེ་བཞིན་དུ་ཟུང་འཇུག་གི་ཆོས་སྐད་ཀྱང་ཡོད་པ་གཉིས་གཅིག་ལ་གཅིག་འབྲེལ་གྱི་ཟུང་འཇུག་འཆོས་པ་དང༌།འདིར་རྫོགས་པ་ཆེན་པོ་གདོད་ནས་རིག་སྟོང་མཉམ་རྫོགས་ཆེན་པོར་སླར་ཟུང་དུ་འཇུག་རྒྱུ་མེད་པ་ཐ་དད་རིས་མེད་ཆེན་པོའི་ཁྱད་འདུག་པའི་ཕྱིར་རོ། །དེའི་ཕྱིར་ཀུན་


JLAZ012_Page_0293
[མ་དཔེ་གཟིགས་ན་འདིར་གནོན།]

མཁྱེན་གྱིས། སྣང་བ་སེམས་སུ་ངོ་སྤྲད་པ་དང༌། སེམས་ཉིད་སྟོང་པར་ངོ་སྤྲད་པ་མན་ངག་སྙིང་ཏིག་གི་དགོངས་པ་མ་ཡིན་པར་ཤེས་པར་བྱའོ། །མན་ངག་འགའ་ཞིག་ཏུ། དེ་ལྟར་བྱུང་སྲིད་ནའང་འོག་མ་དྲང་བ་ཙམ་ལས་ངེས་དོན་མ་ཡིན་པར་ཐག་བཅད་དོ། །ཞེས་གསུངས་ལ། དེ་ལྟར་སྣང་བ་སེམས་མ་ཡིན་པའི་མངོན་སུམ་ཚད་མ་ནི། གཉིད་དང༌། བརྒྱལ་བ་དང༌། སྙོམས་འཇུག་རྣམ་གཉིས་དང༌། རྟག་ཏུ་འདུ་ཤེས་མེད་པ་སྟེ་སེམས་མེད་པའི་གནས་སྐབས་ལྔར་དབུས་མཐའ་ལས་བཤད་པའི་དུས་ན་སྣང་བ་གང་དུའང་མ་སོང་ཞིང༌། མདང་གི་རྨི་ལམ་ན་ནོར་བུ་རྙེད་པའམ་དགའ་མགུར་སྤྱད་པ་ལ་དགའ་བ་དང་བདེན་པར་འཛིན་པ་དེ། སད་དུས་ཅི་ཡང་མེད་པས་དྲན་བསམ་དང་སྣང་བ་དཀར་དམར་གློ་བུར་བའི་རྐྱེན་ལས་བྱུང་བ་ངེས་པའི་ཕྱིར་རོ། །དེང་སང་རྫོགས་པ་ཆེན་པོའི་བསྟན་པ་ཉམས་དམས་བས་ངོ་སྤྲོད་འདི་ཁོ་ནར་ཡིད་བརྟན་འཆའ་བ་མང་བའི་ཕྱིར་འདིར་ལམ་ཐད་དྲང་དུ་བསྟན་པ་ལ་རང་ཤར་ལས། སེང་གེས་རང་སྐད་བཏོན་པས་གཅན་གཟན་ཐམས་ཅད་བརྒྱལ་ཞིང་སྐྲག །རྫོགས་ཆེན་རང་སྐད་སྨྲས་པས་ཐེག་དམན་ཐམས་ཅད་བརྒྱལ། ཞེས་པ་ལྟར་རྒྱུ་འབྲས་ངེས་དོན་དུ་སེམས་པའི་སྐལ་མེད་དང༌། ཡིད་དཔྱོད་ལ་རྫོགས་


JLAZ012_Page_0294
[མ་དཔེ་གཟིགས་ན་འདིར་གནོན།]

ཆེན་རེ་བའི་གང་ཟག་རྣམས་འཁུ་ཞིང་གཤུང་བར་སྲིད་ནའང་ཀུན་མཁྱེན་གྱིས་སྣང་བ་སེམས་སུ་འདོད་པ་འདི་ལོག་རྟོག་གི་མུན་པ་ཆེན་པོ་ཡིན་པས་བསལ་དགོས་སོ། །ཞེས་གདམས་པའི་ཕྱིར་སྤྲོས་ཏེ་བཤད་ནས་ལམ་ལ་བྱི་དོར་བྱས་པ་ཉིད་དོ།། །།གཉིས་པ་ཐུན་མོང་མ་ཡིན་པ་དམུས་ལོང་མིག་ཕྱེད་པ་ལྟར་མངོན་སུམ་བཅར་ཕོག་ཏུ་ངོ་སྤྲད་པ་ནི། སློབ་མ་མི་འགྱུར་རྡོ་རྗོའི་འདུག་སྟངས་བྱེད་དུ་བཅུག་ལ། ཌཱ་དྲིལ་དང་བཅས་བརྒྱུད་པའི་གསོལ་འདེབས་སྣང་བ་འགྱུར་བའི་དབྱངས་ཀྱིས་བརྗོད་པའི་མཐར། ཀྱེ་ཁྱེད་ཀྱི་ད་ལྟའི་རིག་པ་འདི་ལ་བཅས་བཅོས་དང་སྤྲོ་བསྡུ་མ་བྱེད་པ་ཐད་ཀར་ཞོག་དང༌། དེ་ལ་ཡོད་མེད་དང་ཕྱོགས་ཆ་མ་གྲུབ། སྣང་སྟོང་གི་སྤུ་རིས་མི་ཕྱེད། རྟག་ཆད་ཀྱི་མཚན་མ་མ་གྲུབ། མ་གྲུབ་པ་འདི་ཀའི་ངང་ལ་ལྟ་སྒོམ་གྱི་རྩོལ་བས་འབད་མི་དགོས་ཤིང༌། བསྡམས་པ་བཀྲོལ་བ་ལྟ་བུ་མ་ཡིན་པའི་ཡེ་གྲོལ་ཆེན་པོ། བློས་མ་བཅོས་པའི་རང་གསལ། རྣམ་རྟོག་གིས་མ་བཟོས་པའི་ཡེ་ཤེས། ལྟ་སྒོམ་གྱིས་མ་སླད་པའི་ཆོས་ཉིད། འཇོག་ཏུ་མེད་པའི་མཉམ་གཞག །རྩིས་གདབ་མེད་པའི་རྗེས་ཐོབ། གསལ་བ་ལ་ངོ་བོ་མེད་པ། ཡངས་པ་ལ་ཕྱལ་བར་མ་ཤོར། ཡེ་བབས་རང་གནས་ཀྱི་དགོངས་པ་འདི་ལྟ་བུ་སེམས་ཅན་ཐམས་ཅད་


JLAZ012_Page_0295
[མ་དཔེ་གཟིགས་ན་འདིར་གནོན།]

དང་སྐད་ཅིག་ཀྱང་འབྲལ་མ་མྱོང་བར་ཡོད་ཀྱང༌། དེ་ངོ་མ་ཤེས་པས་ཆུ་རང་གྲོལ་དུ་ཡོད་པ་འཁྱགས་པས་བསྡམས་པ་ལྟར་ནང་འཛིན་པའི་སེམས་ཀྱིས་རྒྱུ་བྱས། ཕྱི་གཟུང་བའི་ཡུལ་གྱི་རྐྱེན་བྱས། འཁོར་བ་མཐའ་མེད་དུ་འཁྱམས་པ་ཡིན་ཏེ། ད་ནི་བླ་མའི་གདམས་ངག་གིས་རིག་པ་སྐད་ཅིག་མའི་མཚང་རིག་པ་ཙམ་ནས་ཡིན་ལུགས་ཀྱི་ཐོག་ཏུ་བཟོ་མི་འཆོས་ཤིང༌། འདི་ལས་གང་དུའང་མ་ཡེངས། གང་དུའང་མི་སྒོམ་པར་འཇོག་པ་ནི་གདོད་མའི་སངས་རྒྱས་ཀུན་ཏུ་བཟང་པོའི་དགོངས་པའི་མཐིལ་ལྷག་གེར་བསྟན་པ་ཡིན་ཏེ། ཀློང་དྲུག་པ་ལས། རྟག་ཆད་མེད་པའི་སེམས་ཉིད་ལ། །བཟང་ངན་བྲལ་བའི་སྣང་བ་ནི། །སྤང་བླང་བྲལ་བའི་དགོངས་པ་ཞེས། །ཀུན་ཏུ་བཟང་པོ་ང་ཡིས་བསྟན། །བླང་དོར་མེད་པའི་སེམས་ཉིད་ལ། །ཕྱོགས་མེད་རང་གྲོལ་སྣང་བ་ནི། །ཁྱབ་གདལ་ཆེན་པོའི་དགོངས་པ་ཞེས། །ཀུན་ཏུ་བཟང་པོ་ང་ཡིས་བསྟན། །བྱིང་རྒོད་མེད་པའི་སེམས་ཉིད་ལ། །བཏང་སྙོམས་ཆེན་པོའི་དགོངས་པ་ནི། །ཚོགས་དྲུག་ལྷུག་པའི་དགོངས་པ་ཞེས། །ཀུན་ཏུ་བཟང་པོ་ང་ཡིས་བསྟན། །ཡ་ང་མེད་པའི་སེམས་ཉིད་ལ། །རེ་དོགས་བྲལ་བའི་སྣང་བ་ནི། །ཡེ་བཞག་གདེང་ལྡན་དགོངས་པ་ཞེས། །ཀུན་ཏུ་བཟང་པོ་ང་ཡིས་བསྟན། །ཅེས་དང༌། རིན་པོ་ཆེ་སྤུངས་པ་ལས། གཞི་རྩ་


JLAZ012_Page_0296
[མ་དཔེ་གཟིགས་ན་འདིར་གནོན།]

མེད་པའི་ཆོས་ཉིད་འདི། །མ་བཙལ་བཞག་པ་ངོ་མཚར་ཆེ། །འགྲོ་དང་འོང་བའི་རིག་པ་ལ། །ཐུག་པ་མེད་པ་ངོ་མཚར་ཆེ། །ཡེ་གནས་ཆེན་པོའི་ཡེ་ཤེས་ལ། །གཉེན་པོ་མེད་པ་ངོ་མཚར་ཆེ། །ཞེས་དང༌། ཀུན་བྱེད་ལས། སྔ་རབས་འདས་པའི་སངས་རྒྱས་རྣམས་ཀྱིས་ཀྱང༌། །རང་གི་སེམས་ལས་གཞན་དུ་ཆོས་བཙལ་མེད། །ཇི་བཞིན་པ་ལས་འཆོས་པར་བྱེད་མ་མྱོང༌། །ཏིང་འཛིན་རྣམ་པར་རྟོག་པ་སྒོམ་མ་མྱོང༌། །རང་སེམས་མི་རྟོག་པ་ཡིས་འགྲུབ་པ་ཡིན། །ད་ལྟར་བཞུགས་དང་སླད་ཀྱི་འབྱོན་པ་ཡང༌། །རྟོག་མེད་མཉམ་པ་ཉིད་ཀྱིས་འགྲུབ་པར་འགྱུར། །ཞེས་ཐེག་པ་འདིའི་ལུགས་ལ་སེམས་ཀྱི་ངོ་བོ་དང་པོ་ཉིད་ནས་རང་གྲོལ་ཆེན་པོར་ཡོད་པ་དེ་ཉིད་ངོ་ཤེས་པ་ལ་རིག་པར་གྲགས་པའི་རྒྱུན་བསྐྱངས་པས། བཙན་ཐབས་ཉིད་དུ་སངས་རྒྱས་པའི་ཕྱིར་ལམ་གཞན་ལས་མྱུར་བ་ཡིན་ནོ་ཞེས་སྤྲོ་བ་བསྐྱེད། ཞར་ལ་དོགས་པ་བསལ་ཞིང་གེགས་སྒྲོལ་བ་ནི། དེ་ལྟར་གནས་ལུགས་རང་གནས་ཆེན་པོའི་རྒྱུན་བསྐྱངས་པའི་ཚེ་རིག་པ་དེའི་ངོ་བོ་སྟོང་པར་འདུག་སྙམ་ན། སྟོང་པར་འདོགས་མཁན་བློ་ཡིན། བློ་ལ་གཏད་སོ་ཡོད། གཏད་སོ་དང་བཅས་པའི་བསམ་གཏན་གྱིས་སངས་མི་རྒྱ་བའི་ཚུལ། སེང་གེ་རྩལ་རྫོགས་ལས། བསམ་གཏན་བསྒོམས་པས་ཆོས་ཉིད་དོན་


JLAZ012_Page_0297
[མ་དཔེ་གཟིགས་ན་འདིར་གནོན།]

མི་མཐོང༌། །རང་སྣང་ཏིང་འཛིན་བསམ་པའི་ཕྱོགས་དང་བྲལ། །སྤྲོས་བྲལ་ཆོས་ཉིད་ནམ་མཁའི་མཐའ་དང་མཉམ། །དམིགས་པ་དག་གི་ཡུལ་ལ་འཛིན་རྟོག་མེད། །མཐའ་བཞི་བྲལ་བའི་སངས་རྒྱས་རང་རིག་ཡིན། །ཡོད་མེད་མཐའ་ལས་འདས་པ་ཆོས་ཀྱི་སྐུ། །ཞེས་སྟོང་ཉིད་ལ་དེར་འཛིན་གྱི་སྒྲིབ་བྱེད་མཐའ་གྲོལ་ཆེན་པོར་སྤང་ཐབས་བཤད་པ་ཡིན་ནོ། །ཡང་ཡོད་མེད་མཐའ་ལས་འདས་པའི་ངོ་བོའི་བཞུགས་ཚུལ་འདི་ལྟ་བུ་ཞིག་གོ་སྙམ་པའི་ངང་དུ་གདེང་འཆའ་ནའང་དེ་ཀ་ངེས་ཤེས་ཀྱིས་བཅིངས་པའི་རང་སའི་སྒྲིབ་པ་རྔམ་པོ་ཆེ་ཡིན་ཏེ། ཁྱུང་ཆེན་ལས། མུ་མཐའ་མེད་པར་རྩོལ་བ་གང་ཡིན་པ། །བྱ་ལོང་ནམ་མཁའི་མཐའ་འཚོལ་འདྲ་སྟེ་རྙེད་པ་མིན། །མི་རྙེད་དོན་འདི་ཉིད་ལ་སུས་ཀྱང་བཅོས་སུ་མེད། །ཤེས་བྱ་སྤྲོས་མེད་འདི་ལ་མཐའ་མ་མི་སྲིད་དོ། །ཞེས་བཤད་དོ། །དེ་བཞིན་དུ་རྟོག་པར་ཤར་ནས་དགེ་མི་དགེ་གཟུགས་སྣང་ལ་སོགས་པ་དབང་པོ་དྲུག་གི་ཡུལ་གང་དུ་ཤར་ཡང་དེ་ལ་ཆེད་དུ་འཛིན་པ་མ་ཡིན་མོད་ཀྱི། ཡིད་དཔྱོད་ཐེག་པ་ལྟར་སྟོང་ཉིད་མེད་དགག་དང་མ་ཡིན་དགག་ལ་སོགས་པའི་བློའི་ཆོས་ཀྱིས་ཡུལ་སྣང་ཆེད་དུ་བཀག་པ་ཙམ་གྱིས་འཚང་མི་རྒྱ་བའི་ཚུལ་ཀུན་བྱེད་ལས། ཀུན་བྱེད་རྒྱལ་པོས་བྱས་པ་མི་ཆ་བར། །དབང་པོ་དྲུག་ལ་ཡུལ་དྲུག་སྣང་བ་ལས། །


JLAZ012_Page_0298
[མ་དཔེ་གཟིགས་ན་འདིར་གནོན།]

སྡུག་བསྔལ་མཐོང་ནས་དབང་པོ་འགེགས་པར་བྱེད། །དེས་ནི་ཀུན་བྱེད་བྱས་པ་མི་ཆ་བས། །སྐྱེ་འགག་བྲལ་བའི་འབྲས་བུ་དེ་ལ་མེད། །ཅེས་སོ། །དེ་ལྟ་ན་སྣང་བ་དང་སྣང་ཡུལ་མ་ཕྱེད་པ་སེམས་ཙམ་རྣམ་བདེན་དྲི་བཅས་སུ་ཉེ་བ་མ་ཡིན་ནམ་ཞེ་ན། དཔེར་ན་རི་མཐོང་བའི་སྐད་ཅིག་མ་དང་པོར་རིའོ་སྙམ་པ་ནི་སོ་སྐྱེའི་ལམ་ལ་མི་སྐྱེ་བའི་དབང་མེད་ཀྱང༌། སྐད་ཅིག་མ་གཉིས་པར་རིའི་རང་བཞིན་ལ་དཔྱོད་པའི་སེམས་དང་སེམས་བྱུང་གི་རྩལ་རྫོགས་པས་རིའི་རྣམ་རྟོག་རང་ཡལ་རྗེས་མེད་དུ་སོང་ལ། དེའི་ཚེ་རིའི་སྣང་ཆ་མ་འགགས་ཀྱང་དེར་འཛིན་མེད་པའི་ཆོས་ཉིད་ལ་གནས་པ་ཉིད་གོམས་པར་གྱུར་པ་ལ་ཤར་གྲོལ་དུས་མཉམ་དུ་དག་ནས་སྣང་སེམས་འདྲེས་པ་རང་བཞིན་རྫོགས་པ་ཆེན་པོའི་ལམ་མ་ནོར་བ་སྟེ་རིག་འཛིན་དགའ་རབ་རྡོ་རྗེས། ཤར་བའི་དུས་ན་མཉམ་ཤར་བཟང་ངན་མེད། །གྲོལ་བའི་དུས་ན་མཉམ་གྲོལ་བཟང་ངན་མེད། །ཅེས་སོ། །དེའི་ཕྱིར་ཁམས་ཀྱི་དྲི་མ་བླང་དོར་གྱི་ངལ་དུབ་དང་བཅས་པས་སྦྱང་བར་མི་ལྟོས་ཤིང༌། བསྲུང་ཉམས་ཀྱི་འདུ་ཤེས་དམ་པོས་བཀྲིས་པ་ཟག་པ་དང་བཅས་པའི་ཚུལ་ཁྲིམས་ལས་ཆེས་འཕགས་པ། འདིར་རང་བཞིན་ཐེག་མཆོག་རྒྱལ་པོའི་དགོངས་པ་ཐིག་ལེ་ཉག་གཅིག་ལ་ཕ་རོལ་ཏུ་ཕྱིན་པའི་ལམ་གྱི་ཐབས་སྤྱོད་


JLAZ012_Page_0299
[མ་དཔེ་གཟིགས་ན་འདིར་གནོན།]

པའི་ཕྱོགས་དང༌། ཤེས་རབ་ཏིང་ངེ་འཛིན་གྱི་ཕྱོགས་ཐམས་ཅད་དྲན་མཆོག་རྒྱལ་པོ་རིག་པའི་ཆོས་ཉིད་ལ་ཚང་སྟེ་ཁྱད་པར་གྱིས་ཞུས་པའི་མདོ་ལས། མི་འཛིན་པ་ནི་སྦྱིན་པ། མི་གནས་པ་ནི་ཚུལ་ཁྲིམས། མི་བསྲུང་བ་བཟོད་པ། མི་བརྩོན་པ་བརྩོན་འགྲུས། མི་སེམས་པ་བསམ་གཏན། མི་དམིགས་པ་ཤེས་རབ་བོ། །ཞེས་པའི་ལུང་གིས་རྒྱབ་བསྐྱོར་ན་མཁས་པ་ལ་མཛེས་ཤིང་རྨོངས་པ་མིག་ཕྱེ་བར་འགྱུར་རོ། །དེ་ལྟ་བུའི་ཆོས་ཉིད་ཅོག་བཞག་རྣམ་པ་བཞིའི་ལྷུམས་སུ་འཇུག་ཚུལ་ཡང་སྒྲོན་མ་སྣང་བྱེད་ལས། རི་བོ་ཅོག་བཞག་ལྟ་བའི་ཚད། །རྒྱ་མཚོ་ཅོག་བཞག་སྒོམ་པའི་ཚད། །སྣང་བ་ཅོག་བཞག་སྤྱོད་པའི་ཚད། །རིག་པ་ཅོག་བཞག་འབྲས་བུའི་ཚད། །ཚད་བཞི་ལྡན་པའི་རྣལ་འབྱོར་དེ། །ངེས་པའི་དོན་ལ་འདྲེས་པའོ། །ཞེས་ལྟ་བ་རི་བོ་ཅོག་བཞག་གིས་ཡིན་ལུགས་བསམ་ངོ་བྲལ་བར་ངོ་སྤྲད་པས་རིག་པ་རང་གསལ་ཆེན་པོ་ལ་བློས་འཛིན་རྩོལ་དང་ཆེད་དུ་སྒོམ་པའི་གཉེན་པོ་མ་ཞུགས་པར་རྒྱ་ཡན་འཕོ་འགྱུར་མེད་པར་གཞག །སྒོམ་པ་རྒྱ་མཚོ་ཅོག་བཞག་གིས་ལུས་སྐྱིལ་མོ་ཀྲུང་དང་བཅས་པས་མིག་བར་སྣང་ལ་ཧ་རེ་གཏད་དེ་ཚོགས་དྲུག་གི་སྣང་བ་ལ་འཛིན་པའི་བཟོ་རྒྱ་མི་སྐྱེད་པར་རྒྱ་མཚོ་རླབས་ཀྱིས་མ་བསྐྱོད་པ་ལྟ་བུའི་ངང་ནས་ཤེས་པ་


JLAZ012_Page_0300
[མ་དཔེ་གཟིགས་ན་འདིར་གནོན།]

དྭངས་སངས་ཕྱེད་དུ་གཞུག །སྤྱོད་པ་མན་ངག་གཅོག་བཞག་གིས་སྒོ་གསུམ་ཐོག་བབས་སུ་ཀློད་ལ་ལྟ་སྒོམ་གྱི་ཤུབས་ནས་དོན་པའི་ཡེ་ཤེས་རང་གསལ་རྗེན་པར་བཅར་ཕོག་ཏུ་བསྐྱང༌། འབྲས་བུ་མ་བཅོས་ཅོག་བཞག་གིས་ཡུལ་ལྔ་རང་བབས་སུ་བཞག་པས་ནང་དུ་རང་གསལ་རྗེན་པ་ལྷག་གེར་ཤར་ཏེ་རླུང་ལྔ་དབྱིངས་སུ་འཆིངས་ནས། ཕྱི་རོལ་དུ་བ་དང༌། སྨིག་རྒྱུ་དང་འཇའ་ཚོན་ལ་སོགས་པ་རང་སྣང་དག་པའི་འོད་གསལ་ཀྱང་ཐུན་མོང་གི་གསང་བ་དང་མཐུན་པར་འཆར་རོ། །མདོར་ན་གཤིས་ལ་བྱ་བ་དང་གྲལ་བས་སྒོ་གསུམ་རང་བབས་ལྷུན་མཉམ་ཡངས་པ་ཆེན་པོའི་ཀློང་དུ་འགག་བསྡམ་པའི་ཚུལ་རང་བཞིན་རྫོགས་པ་ཆེན་པོ་གནད་ཀྱིས་ཆེ་བ་རྡོ་རྗེའི་གད་མོ་ཆེན་མོ་བཅུ་གཉིས་དང༌། རྣམ་ཤེས་ཚོགས་བརྒྱད་དག་པར་བྱེད་པའི་ཚིག་ཆེན་པོ་བརྒྱད་ཀྱིས་གཏན་ལ་དབབ་པའི་དོན་ཐད་ཀའི་ཤེས་པ་རྒྱུ་འབྲས་སྤང་བླང་ལས་འདས་པ་ཉིད་དུས་གསུམ་འཕོ་འགྱུར་མེད་པར་ལམ་དུ་འཁྱེར་རོ། །དེ་ལྟ་ནའང་ཁོ་བོའི་རིགས་བདག་ཆེན་པོ་ཀུན་མཁྱེན་ངག་གི་དབང་པོས། གཤིས་དེར་ཕེབས་པའི་རྣལ་འབྱོར་པ་ཆེན་པོ་རྣམས་ལ་རྒྱུ་འབྲས་དགེ་སྡིག་མེད་པ་ཐད་དྲང་དུ་བཤད་དེ་པདྨ་དང༌། བི་མ་ལ་དང༌། ཏེ་ལོ་བ་ལ་སོགས་པ་བཞིན་ནོ། །


JLAZ012_Page_0301
[མ་དཔེ་གཟིགས་ན་འདིར་གནོན།]

རང་ཅག་རྣམས་ལ་བློས་དེ་ལྟར་རྟོགས་ཀྱང་གོམས་པས་ཐོག་ཏུ་མ་ཕེབས་པས། གཤིས་ལ་མི་སྐྲག་ཅིང་ལས་འབྲས་ཆ་ཕྲ་བ་ལ་འཛེམ་པ་དང་སྦྱར་ནས་བཤད་དོ། །ཞེས་གསུངས་པའི་ཕྱིར་བློ་དམན་རྣམས་ལ་བདེན་པ་གཉིས་ཀྱིས་ཕྱེ་ནས་བཤད་པས་གདོད་རྟོགས་པར་འགྱུར་གྱི། དེའི་ཚུལ་ནི་དབང་པོ་རྟུལ་པོ་རྣམས་ཉོན་མོངས་གང་སྐྱེས་ངོས་བཟུང་སྟེ་རང་སར་བཞག་པས་ཉོན་མོངས་པའི་ངོ་བོ་ཡུལ་མེད་རྩ་བྲལ་དུ་སོང་བའི་འགྱུ་བ་གནས་དག་གི་དགོངས་པ་བསྐྱང་ཞིང་རྩལ་སྦྱང་ངོ༌། །བློ་ཆེ་བ་རྣམས་ནི་ཆོས་ཉིད་རང་ས་ནས་གྲོལ་བའི་གནད་ཀྱིས་ཉོན་མོངས་པ་དང་རྣམ་རྟོག་གང་སྐྱེས་ཀྱང་དེའི་རང་བཞིན་ཚུགས་མི་ཐུབ་པར་རྟ་རྔའི་མདུད་པ་རང་གིས་གྲོལ་བ་བཞིན་ཤར་གྲོལ་རིས་མེད་དུ་སངས་པ་ལ་སླར་གཉེན་པོས་གཅུན་མི་དགོས་ཤིང༌། སེམས་སྡེ་ལྟར་རྒྱས་མི་འདེབས་ཀློང་སྡེ་ལྟར་དབྱིངས་ལ་མི་གཏོད་པར་རང་བབས་དམིགས་བསམ་ལས་འདས་པ་མན་ངག་སྡེའི་མྱོང་ཐོག་ཏུ་ལ་བཟླ་བར་བྱའོ། །དེ་ཉིད་གོམས་པ་ན་ཀུན་བྱེད་ལས། མ་བསྒྱུར་མ་སྦྱངས་རིག་པ་ལྷུན་རྫོགས་པ། །ཞེས་པ་ལྟར་རིག་པ་སྦྱངས་བགྲོད་མེད་པའི་ས་ལ་བྱང་ཆུབ་སེམས་དཔའི་ས་བཅུ་དང༌། སྔགས་ཕྱི་ནང་གི་བསྐྱེད་རྫོགས་རྩོལ་སྒྲུབ་ཀྱིས་ས་ལམ་སྒོས་སུ་སྦྱོང་མི་དགོས་ཏེ་ཡེ་ཤེས་ཀྱི་ངོ་བོ་གཅིག་ཏུ་བཟླུམས་པའི་ཕྱིར་


JLAZ012_Page_0302
[མ་དཔེ་གཟིགས་ན་འདིར་གནོན།]

རོ། །གཉིས་པ་འོད་གསལ་ཆེན་པོ་ཐོད་རྒལ་གྱི་ལམ་བཤད་པ་ལ་གཉིས། ཁྲེགས་ཆོད་ལས་འཕགས་ཚུལ་དང༌། ཁྱད་པར་ཅན་གྱི་ལམ་དངོས་བཤད་པའོ། །དང་པོ་ནི། ཀུན་མཁྱེན་ཆེན་པོས་འཕགས་ཚུལ་བདུན་དུ་བཞེད་པ་འདིར་འདོམས་ན། ཁྲེགས་ཆོད་ཀྱིས་ས་རྡོ་རི་བྲག་ལ་སོགས་པ་འཁྲུལ་སྣང་གི་ཡུལ་དག་པར་མི་ནུས་པ་ཐོད་རྒལ་གྱིས་སྣང་བ་འོད་ལྔར་ཕྱེད་པའི་ཁྱད་པར། རིག་པ་ཡེ་ནས་འོད་གསལ་དུ་གསུངས་པ་དེ་ཁྲེགས་ཆོད་ཀྱིས་སྟོང་ལ་གསལ་བ་ཙམ་ལས་བལྟར་མེད་དུ་ཐག་གཅོད་པ། ཐོད་རྒལ་དུ་གནད་གཅུན་པས་ཡེ་ཤེས་ཀྱི་མཐོང་ཕྱེ་སྟེ་ཆོས་ཉིད་ཟེར་གདངས་ལ་མཐོང་བའི་ཁྱད་པར། ཁྲེགས་ཆོད་དུ་དབང་པོ་དྲུག་པ་འཁྲུལ་སྣང་ལ་ཞེན་པ་སྤོང་བའི་དྭངས་འཚོལ་བ་ལ། ཐོད་རྒལ་དུ་དག་པ་འོད་གསལ་གྱི་སྒོ་ཡེ་ཤེས་ཀྱི་རླུང་གིས་ཕྱེ་བས་ཕྱི་ནང་ཟང་ཐལ་གྱི་དབང་པོས་དབྱིངས་དང་ཡེ་ཤེས་འདུ་འབྲལ་མེད་པའི་སྒྲོན་མ་བཞིའི་སྣང་བ་ལ་ལོངས་སྤྱོད་པའི་ཁྱད་པར། ཁྲེགས་ཆོད་དུ་རགས་པའི་རྩ་རླུང་ལ་བརྟེན་པས་གེགས་དང་གོལ་ས་ཤིན་ཏུ་མང་ལ། དེ་ལྟར་བརྟེན་ཕྱིན་ཆད་འབྱུང་བའི་སྟོབས་ཆེ་ཆུང་གིས་ན་སོ་རྒན་གཞོན་ལའང་ལྟོས་ཤིང༌། འདི་ནི་རགས་པ་སྤང་བྱ་ཡིན་པས་གནད་མི་གཡོ་བ་གསུམ་གྱིས་བཅིང་བ་ཙམ་ལས་དོན་དམ་ཡེ་ཤེས་ཀྱི་རྩ་རླུང་འཛིན་


JLAZ012_Page_0303
[མ་དཔེ་གཟིགས་ན་འདིར་གནོན།]

རྩོལ་ལས་འདས་པ་ལམ་དུ་བྱས་པས་རགས་པ་ཐམས་ཅད་ཟད་ནས་ལུས་འོད་གསལ་དུ་གྲོལ་བའི་ཁྱད་པར། ཁྲེགས་ཆོད་ཀྱིས་གལ་ཏེ་སྣང་བ་ཚད་དུ་མ་ཕྱིན་པར་ཕུང་པོ་ལས་གྲོལ་བར་སྲིད་ནའང༌། ལུས་རྡུལ་ཕྲན་དུ་དེངས་པ་ཙམ་ལས་འོད་གསལ་དུ་འགྲོ་མི་སྲིད། འོད་གསལ་དུ་མ་སོང་ན་རེས་འགའ་བའི་སྒྱུ་ལུས་དང་ཟད་པར་གྱི་སྐྱེ་མཆེད་ལ་སོགས་པས་མཐར་ཐུག་གི་ས་མི་ཆོད་པ་དང༌། སྤྱན་དང་མངོན་ཤེས་རྫུ་འཕྲུལ་རླབས་པོ་ཆེའི་བདག་ཉིད་འཕོ་བ་ཆེན་པོ་རྡོ་རྗེའི་སྐུ་ཐོབ་པས་རྟེན་དེས་གཞན་དོན་རླབས་པོ་ཆེ་མི་འགྲུབ་པའི་ཚུལ་རྒྱལ་དབང་པདྨ་དང་རྒྱ་བོད་ཀྱི་གྲུབ་ཆེན་གཞན་གྱིས་ཁྱད་པར་ལ་ལྟོས། མདོར་བསྡུ་ན་ཨ་ཏི་ལའང་སེམས་ཀློང་མན་ངག་གི་སྡེ་གསུམ་ལས། སེམས་སྡེ་རང་གསལ་ཁ་འབྱམས་པ་དང༌། ཀློང་སྡེ་གཞི་བྲལ་ལ་གདེང་བྱེད་པ་གཉིས་ཀས་རིག་པ་མངོན་སུམ་དུ་མཐོང་ཞིང༌། མན་ངག་སྡེའི་སྐོར་གསུམ་ལ་ཡང་བར་དོར་ལྟོས་འཆའ་བ་ལས་མེད་པ། འདིར་འོད་ལུས་སུ་གྲོལ་བའི་གནད་ཡོད་པས་འཁྲུལ་སྣང་ལ་ལམ་བྱས་ནས་མ་འཁྲུལ་བའི་འབྲས་བུ་འཚོལ་བ་དག་དང༌། འདིའི་ཁྱད་པར་ཤེས་རབ་ཀྱི་མིག་ལྡན་རྣམས་ཀྱིས་རྟོགས་པར་བྱའོ།། །།གཉིས་པ་ལ་བཞི། ཐོད་རྒལ་སྤྱི་ལ་གཅེས་པའི་ཆིངས། གནད་མངོན་དུ་སྟོན་པའི་ལམ། རྟགས་སྣང་བ་བཞིའི་ས་མཚམས། མཐའ་རྟེན་གྱི་


JLAZ012_Page_0304
[མ་དཔེ་གཟིགས་ན་འདིར་གནོན།]

མན་ངག་དང་བཅས་པའོ། །དང་པོ་ནི། ཐེག་མཆོག་རྒྱལ་པོ་འདིའི་གནད་ལ་སེམས་དང་ཡེ་ཤེས་གཉིས་སུ་དབྱེ་བ་ལས་སེམས་ཀྱི་རང་བཞིན་ཆོས་ཉིད་ཀྱི་གདངས་སྐྱེས་བུ་འཕྱེའོ་འདྲ་བ་དེ་རླུང་རྟ་རྒོད་ལོང་བ་ལྟ་བུ་དང་འདྲེས་པས་རྣམ་པར་རྟོག་པ་དང་བཅས་པའོ། །དེ་ཡང་གློ་བ་ན་རྩ་གྲོ་སོག་གི་སྦུབས་ཙམ་ཞིག་རླུང་གིས་གང་བ་ལས་དབུགས་ཐམས་ཅད་མཆེད་པའི་རྟེན་བྱེད་ཅིང༌། དེ་ལས་རྩ་འདབ་སོ་སོར་གྱེས་པའི་རྩལ་སྒོ་ལྔའི་ཡུལ་ལ་ཤར་ནས་ལས་དང་ཉོན་མོངས་པའི་བྱེད་ལས་ཅན་ཏེ། དུར་ཁྲོད་ཕུང་པོ་རོལ་པར། སེམས་ཀྱི་ངོ་བོ་ཡེ་ཤེས་ཏེ། །དེ་ལ་གཟུང་འཛིན་རྩལ་དུ་ཤར། །དབུགས་ལ་རྟ་བྱས་རྐྱེན་དང་ཕྲད། །ཅེས་སོ། །ཡེ་ཤེས་ནི་ཙིཏྟ་ཤའི་སྒྲོན་མ་ནི་ངོ་བོ་རང་བཞིན་ཐུགས་རྗེ་གསུམ་གྱིས་མཚོན་པར་བཞུགས་ཏེ་གནས་ལུགས་གཞིའི་སྒྲོན་མ་ཞེས་བྱའོ། །དེ་སྐད་དུ་ཐལ་འགྱུར་ལས། ཙིཏྟ་རིན་ཆེན་གཞལ་ཡས་ན། །ངོ་བོ་ཀ་ནས་དག་པའི་ཆ། །སྟོང་གསལ་འདུས་པ་སྐུ་ཡི་གདངས། །ཞལ་ཕྱག་རྫོགས་པ་བུམ་སྐུའི་ཚུལ། །ལྷུན་གྲུབ་འོད་ཀྱི་གོང་བུར་གནས། །ཐུགས་རྗེ་ཁ་དོག་སོ་སོར་གསལ། །ཞེས་འོད་གསལ་གྱི་འཆར་གཞི་ཙམ་དུ་རང་བཞིན་མེད་པར་བཞུགས་པ་ཡིན་ནོ། །དེའི་ཕྱིར་འཇུག་པ་ལས་ཀྱང༌། སེམས་འགག་པ་དེ་སྐུ་ཡིས་


JLAZ012_Page_0305
[མ་དཔེ་གཟིགས་ན་འདིར་གནོན།]

མངོན་དུ་མཛད། །ཅེས་པ་ལྟར། རླུང་སེམས་དེ་དག་པར་བྱེད་པའི་ཐབས་སུ་གསང་སྐོར་མན་ཆད་ཀྱི་ཐེག་པ་གཞན་ལས་རྩོལ་བ་དང་བཅས་པའི་བསྐྱེད་རྫོགས་ཀྱི་ལམ་ལ་བརྟེན་ཀྱང་རྣམ་རྟོག་དང་དེའི་ཉེ་བར་ལེན་པ་བག་ལ་ཞར་བྱེད་པ་ཙམ་ལས་བྱར་མེད་ཀྱི་ངང་ནས་འབྱུང་བ་རང་མལ་དུ་དག་པའི་གནད་ཀྱང་མ་རྟོགས་ཤིང༌། སྒོའི་གནད་ལ་བརྟེན་ནས་འབྲས་བུ་ལམ་སྣང་དུ་བྱེད་པའི་ཐབས་ལ་རྨོངས་པ་ཡིན་ནོ། །རྒྱུ་མཚན་དེས་ལུས་ངག་ཡིད་གསུམ་གྱི་དགེ་མི་དགེའི་བྱ་བ་ཐམས་ཅད་དགུ་ཕྲུགས་སུ་བཏང་ནས་རླུང་རིག་དལ་བའི་ཐབས་ལ་བསླབ་པ་ནི་གནད་གལ་པོ་ཆེ་ཡིན་ཏེ། ཀློང་གསལ་ལས། ཕྱི་ནང་གསང་བའི་བྱ་བ་ནི། །ལུས་ངག་ཡིད་ཀྱི་དགུ་ཕྲུགས་བཏང༌། །ཞེས་སོ། །དེ་ལྟར་དུར་ཁྲོད་ཀྱི་མི་རོ་བཞིན་དུ་བསྒུལ་བསྐྱོད་མེད་པའི་ངང་དུ་སྒོ་གསུམ་གྱི་བྱ་བ་བཏང་བའི་རྗེས་ཐོགས་སུ་ཡེ་ཤེས་འཆར་བའི་ལམ་ངོས་ཇི་ལྟར་ཟིན་ན། སྙིང་ནས་མིག་ཏུ་འབྲེལ་བའི་རྩ་ཀ་ཏི་ཤེལ་གྱི་སྦུ་གུ་ཅན་ཏེ། གསེར་ཕྲེང་ལས། རིན་ཆེན་རྒྱ་མཚོ་འབྲེལ་བའི་རྩ། །དཀར་འཇམ་ཁོག་པ་སྟོང་པ་ནི། །ཐིག་ལེ་ཁྲག་གིས་མ་གོས་པ། །ཡེ་ཤེས་ཆེན་པོ་དེ་ནས་རྒྱུ། །ཞེས་པ་ལྟར་ལུས་དང་པོ་ཆགས་པའི་དུས་ན་ཆུའི་བྱེད་ལས་ཀྱིས་ཆགས་པའི་བསྐྱེད་བྱེད་ཀྱི་རྩའི་མདུད་པ་ན་སྒྲོན་མའི་སྤྱན་དང༌། འབྱུང་བའི་


JLAZ012_Page_0306
[མ་དཔེ་གཟིགས་ན་འདིར་གནོན།]

སྤྱན་གཉིས་སྔོན་དུ་ཆགས་ནས་འབྱུང་བའི་སྤྱན་ལས་ཕུང་པོར་གྲུབ་ཅིང༌། སྒྲོན་མའི་སྤྱན་ལས་ཡེ་ཤེས་ཀྱི་འོད་སྣང་གསལ་བྱེད་མིག་གི་ཨ་འབྲས་ཀྱི་དཀྱིལ་ན་རྩ་བ་མེན་གྱི་རྭ་འདྲ་བ་རྩ་བ་ཕྲ་ཞིང་རྩེ་མོ་ཡངས་པ་གཉིས་ཆགས་ཏེ། དེ་ལ་དཀར་ནག་ཕྱེད་མ་ཆུའི་རང་བཞིན་དྭངས་ལ་གསལ་བ་བྱུང་བས་རྒྱང་ཞགས་ཆུའི་སྒྲོན་མ་ཞེས་བྱའོ། །དེ་ཡང་ཞིབ་ཏུ་ཕྱེ་ན་ཀུན་མཁྱེན་གྱིས། འོད་རྩ་དག་པས་ཡེ་ཤེས་ཀྱི་སྣང་བ་འཛིན་ལ། དེའི་རྟེན་གྱི་འཁྲུལ་སྣང་གི་སྣང་བ་མཐོང་བས་རྟེན་དང་བརྟེན་པའི་ཆ་གཉིས་སུ་ཤེས་རབ་དང་ལྡན་པ་རྣམས་ཀྱིས་རྟོགས་པར་བྱའོ། །ཞེས་གསུངས་པ་ནི། སྙིང་ཏིག་འདི་ཉིད་ཀྱི་རྒྱུད་ལས་ཀྱང༌། སྙིང་ནས་མིག་ཏུ་འབྲེལ་བ་ཡིསཿ རང་བྱུང་གསང་བ་ཆེན་པོའི་རྩཿ ཀ་ཏི་ཤེལ་གྱི་སྦུ་གུ་ཅནཿ ཞེས་པའི་དགོངས་པར་ཤིན་ཏུ་འབྱོར་བ་ཡིན་ལ་རང་བྱུང་གི་སྒྲས་རྒྱུ་རྐྱེན་གྱིས་མ་བསྐྱེད་པའི་འོད་རྩ་ཞིག་ཡོད་པ་དེའི་རྟེན་འབྲེལ་ལས་ཐིག་ལེ་སྟོང་བའི་སྒྲོན་མ་རྨ་བྱའི་མདོངས་ལྟ་བུ་ལ་སོགས་པ་སྒྲོན་མ་རྣམ་པ་བཞིར་འཆར་བའི་ཚུལ་རང་ཤར་ལས། སྒྲོན་མ་རྣམ་བཞི་འདི་ལྟ་སྟེ། །ཐིག་ལེ་སྟོང་པའི་སྒྲོན་མ་དང༌། །རིག་པ་དབྱིངས་ཀྱི་སྒྲོན་མ་དང༌། །ཤེས་རབ་རང་བྱུང་སྒྲོན་མ་དང༌། །རྒྱང་ཞགས་ཆུ་ཡི་སྒྲོན་མ་རྣམས། །སེམས་ཅན་ཀུན་ལ་གནས་པའོ། །ཞེས་སོ། །རྒྱང་ཞགས་


JLAZ012_Page_0307
[མ་དཔེ་གཟིགས་ན་འདིར་གནོན།]

ཀྱི་རྟེན་ཆུང་ངུར་ཡང་རི་དང་ཁང་ཁྱིམ་ལ་སོགས་པ་ཆེན་པོ་རྣམས་སྣང་བ་ནི། རླུང་གི་ཆའི་ཕྲ་ཞིབ་ལས་བྱུང་ལ། དོན་དམ་པར་འབྱུང་བ་བཞི་ལས་རླུང་དང་བཅས་པ་དག་ནས་ཡེ་ཤེས་ཀྱི་རླུང་གི་ཆ་ལས་སྒྲོན་མ་བཞིར་སྨིན་ཅིང༌། དེ་ཉིད་ཀྱི་བརྟེན་པའི་རང་བཞིན་ཅན་སྣང་བ་བཞི་པོའི་རྩལ་རྫོགས་ནས་ཟད་པའི་ས་ལ་བསྐྱལ་ནས་འགག་བསྡམ་པའི་ཚུལ་ཚིག་དོན་རིན་པོ་ཆེར། ཐོད་རྒལ་གྱི་སྣང་བ་དང་པོར་འཆར་དགོས། སྒོམ་དུས་མ་ཞེན་དགོས། ཕྱིས་ཟད་དགོས་ཏེ་རིག་པ་རླུང་དང་སྦྲགས་ནས་རང་ས་ཟིན་དགོས་པའི་ཕྱིར་ཏེ། རླུང་གི་ཆ་དག་དགོས། རིག་གདངས་ཀྱི་ཆ་འཕེལ་བ་ལས་སླར་ནང་དབྱིངས་སུ་ཟད་དགོས། འདིའི་དགོང་པ་རྟོགས་པར་དཀའ་བའི་གནས་ཏེ་ཁོ་བོས་ཀྱང་རིང་མོ་ཞིག་ནས་བླ་མའི་དྲིན་གྱིས་རྟོགས་པ་ཡིན་ནོ། །ཞེས་སོ། །འདིར་རང་བཞིན་རྫོགས་པ་ཆེན་པོའི་འོད་གསལ་གྱི་སྣང་བ་ཁྱད་པར་ཅན་འདི་དག་འཇམ་དཔལ་སྒྱུ་འཕྲུལ་དྲྭ་བ་ལ་སོགས་པའི་རྒྱུད་སྡེ་ཆེན་པོ་མང་ཞིག་ནས་ཀྱང་གབ་པའི་ཚིག་གིས་བསྟན་པ་ལ་ཅེ་རེ་ལོང་དུ་སོང་བའི་མངོན་པའི་ང་རྒྱལ་ཅན་ཁ་ཅིག་རིག་པའི་གཤིས་ལ་མ་གྲུབ་པ་ཅིག་བློས་བཏགས་ནས་ཀུན་འབྱུང་གིས་བསྐྱེད་པའི་ཆོས་སོ་སྙམ་པ་ནི་མུན་སྤྲུལ་ཡིན་ཏེ། ཟླ་བའི་གཤིས་ལ་འཕེལ་འགྲིབ་ཀྱི་མཚན་ཉིད་ཡེ་ནས་གྲུབ་པ་ལྟར། རིག་པའི་གཤིས་ལའང་སྐུ་


JLAZ012_Page_0308
[མ་དཔེ་གཟིགས་ན་འདིར་གནོན།]

གསུམ་གྱི་མཚན་ཉིད་གདོད་ནས་གྲུབ་སྟེ། དེ་ལྟར་གྲུབ་ཕྱིན་ཆད་ལོངས་སྐུའི་ཡོན་ཏན་ལམ་གྱི་སྣང་བ་ལ་རྩལ་རྫོགས་པའི་དུས་འདིར་ཡང་མངོན་སུམ་ནས་ཚད་ཕེབས་ཀྱི་བར་ཟླ་བ་ཉ་བའི་དཔེས་མཚོན་ལ། སྟོང་གི་ཟླ་བ་དབྱིངས་སུ་ནུབ་པ་ནི་ཆོས་ཉིད་ཟད་པའི་མཐར་ཐུག་ནས་ཆོས་སྐུ་རང་མལ་ན་ཡོད་པའི་དཔེས་མཚོན་པ་ཡིན་ནོ།། །།གཉིས་པ་ལ་བཞི། སྒོ་གསུམ་གྱི་གནད་སྟོན་པ། གནད་གསུམ་གྱིས་འོད་གསལ་བལྟ་བ། རིག་པའི་རྩལ་དབང་བསྐུར་ནས་རིག་ཐོག་ཏུ་ངོ་སྤྲད་པ། མཐའ་བརྟེན་གྱི་མཇུག་བསྡུ་བའོ། །དང་པོ་ལའང་ནང་གསེས་གསུམ་གྱི་དང་པོ་རྟེན་ལུས་ཀྱི་གནད་མ་གཅུན་ན། རྩ་གནད་དུ་མི་ཆུན། རྩ་གནད་དུ་མ་ཆུན་ན། རླུང་རིག་གཉིས་གནད་དུ་མི་ཆུན། དེ་མ་ཆུན་ན་འོད་གསལ་མངོན་དུ་མི་གསལ་བའི་ཕྱིར་ལུས་ཀྱི་གནད་འདི་ཤིན་ཏུ་གཅེས་ཏེ་མུ་ཏིག་ཕྲེང་བར། ལུས་ཀྱི་གནད་ནི་རྣམ་གསུམ་སྟེ། །སེང་གེའི་ཚུལ་དང་གླང་ཆེན་དང༌། །དྲང་སྲོང་ལྟ་བུར་གནས་པར་བྱ།།ཞེས་རྣམ་པ་གསུམ་དུ་བསྟན་པའི་ཆོས་སྐུའི་བཞུགས་སྟངས་སེང་གེ་ལྟ་བུ་ནི། འགྱིང་ཚུགས་ཙོག་པུའི་རྐང་མཐིལ་གཉིས་མདུན་དུ་སྤྲད་པས་གཡོ་བྱེད་ཀྱི་རླུང་ནོན། ལུས་ཀྱི་ཆ་བསྲངས་པས་རླུང་བདེ་ལུགས་སུ་རྒྱུ། མགོ་རྩལ་མཇིང་པ་ལ་བསྐུར་པས་རྣམ་རྟོག་འགག་སྟོབས་ཆེ། ལག་སོར་གཉིས་ནང་དུ་བསྒོངས་ཏེ་


JLAZ012_Page_0309
[མ་དཔེ་གཟིགས་ན་འདིར་གནོན།]

རྐང་མཐིལ་གཉིས་སྤྲད་པའི་དབུས་སུ་བཙུགས་པས་འགྱུར་བ་ཆ་སྙོམས་པར་བྱེད་དེ། ཀུན་མཁྱེན་གྱིས་ཁ་ཅིག་རྐང་མཐིལ་ས་ལ་ཕབ་ནས་ཙོག་པུར་འདུག་པའི་གཡས་གཡོན་གཉིས་སུ་ལག་པའི་མཐིལ་ས་ལ་འཛུགས་པར་འདོད་དེ། དགོང་པ་ཅུང་ཟད་མ་ལོན་པར་སྣང་ངོ༌། །ཞེས་པ་ལ་དཔྱད་པ་འཇུག་དགོས་སོ། །ལོངས་སྐུའི་བཞུགས་སྟངས་གླང་པོ་ཆེ་ཉལ་བ་ལྟ་བུ་ནི། པུས་བྲང་སྦྱར་བས་བདེ་དྲོད་དང་ཁམས་རྒྱས། གྲུ་མོ་གཉིས་ས་ལ་བཙུགས་པས་ཕོ་མོའི་རླུང་མ་ནིང་དུ་ཆ་སྙོམས། ཐལ་མོས་ཨོལ་ཀོ་བརྟེན་པས་རགས་པའི་རླུང་འགག །རྐང་པའི་སོར་མོའི་ཕྱིར་འཕུལ་ཏེ་བསྐུམ་པ་ལས་བྱིང་རྒོད་ཆ་སྙོམ་པར་བྱེད་དོ། །སྤྲུལ་སྐུའི་བཞུགས་སྟངས་དྲང་སྲོང་ལྟ་བུའི་ནི། ལུས་ཙོག་པུར་འདུག་པས་རྩ་རླུང་ཆ་སྙོམས། རྐང་མཐིལ་ས་ལ་ཕབ་པས་ཆུའི་རྩལ་གནོན། སྒལ་ཚིགས་དྲང་པོར་བསྲངས་པས་རླུང་སེམས་ཆོས་ཉིད་དུ་རྒྱུ། པུས་བྲང་སྦྱར་བས་མེ་རླུང་ཡེ་ཤེས་སུ་འབར། རྒྱུ་ཞབས་ཡིད་ཙམ་འཐེན་ནས་སྒལ་པར་བཅར་བས་རྟོག་པ་རྒྱུན་གཅོད། ལག་པ་རེ་མིག་ལྟར་བསྣོལ་ནས་པུས་མོར་བཀབ་ན་ཚ་བའི་ནད་སེལ། དེ་ལས་མཆན་ཁུང་དུ་རེག་ན་གྲང་བའི་ནད་སེལ། གྲུ་མོ་གཉིས་པུས་མོའི་སྟེང་དུ་བཞག་ཏེ་ལག་སོར་བསྒོངས་པས་ལྐོག་མ་བཏེག་ན་ཚ་གྲང་ཆ་སྙོམས་པར་བྱེད་དོ། །དེ་ལྟར་འདུག་སྟངས་རྣམས་


JLAZ012_Page_0310
[མ་དཔེ་གཟིགས་ན་འདིར་གནོན།]

གང་ཡང་ཧ་ཅང་བསྡམས་ཤིང་གཅུམ་པ་མ་ཡིན་པར་ཆ་ཆ་ནས་ལྷོད་ཆགས་པས་གེགས་མི་འཇུག་པའི་གནད་གལ་པོ་ཆེ་ཡིན་ནོ། །འདི་ལས་གཞན་དུ་མངོན་པར་བྱང་ཆུབ་དང་མི་འགྱུར་རྡོ་རྗེས་མཚོན་པའི་འདུག་སྟངས་ཤིན་ཏུ་མང་བ་ཞིག་ཡོད་པ་རྒྱུད་ཀྱི་བུར་བགྲངས་པ་དག་གི་དགོངས་པ་ཡིན་པས་སྤྲོས་པ་མེད་པ་རྣམས་ལ་འདི་ཁོ་ནས་ཆོག་གོ། །དེ་ལྟ་བུའི་བཞུགས་སྟངས་ཀྱི་ཡོན་ཏན་ཁྱད་པར་བ་ནི་ཐལ་འགྱུར་ལས། ཆོས་སྐུའི་བཞུགས་སྟངས་སེང་གེ་ཡིས། །འཁྲུལ་པའི་འཇིགས་པ་ཀུན་བྲལ་ནས། །རྡོ་རྗེའི་མིག་གིས་མཐོང་བར་འགྱུར། །ལོངས་སྤྱོད་རྫོགས་སྐུའི་བཞུགས་སྟངས་ནི། །གླང་ཆེན་ཉལ་བ་ལ་བརྟེན་ནས། །ཆོས་ཉིད་དོན་ལ་ལོངས་སྤྱོད་དེ། །པདྨའི་སྤྱན་གྱིས་མཐོང་བར་འགྱུར། །སྤྲུལ་པ་སྐུ་ཡི་བཞུགས་སྟངས་ནི། །དྲང་སྲོང་ཙོག་པུ་ལ་བརྟེན་ནས། །ཆོས་ཉིད་སྣང་བར་རང་སྤྲུལ་ནས། །ཆོས་ཀྱི་མིག་གིས་མཐོང་བར་འགྱུར། །ཞེས་སོ། །གཉིས་པ་ངག་གི་གནད་ནི་རྩ་རྒྱུད་ལས། ངག་ནི་བསླབ་དང་གནས་པ་དང༌། །ལ་བཟླ་བ་ཉིད་བརྟེན་པར་བྱ། །ཞེས་པས། སྨྲ་བ་མ་བཅད་ན་དེ་ལ་བརྟེན་ནས་རྣམ་རྟོག་འཁྲུག་པ་དང༌། རྩོད་པ་དང་བཅས་པ་དང༌། བཀྱལ་པ་ལ་སོགས་ཏེ་རྣམ་པ་བཞིའི་སྒྲིབ་པར་འགྱུར་བས་ན་སྨྲ་བཅད་ལ་རིམ་པས་བསླབ་པར་བྱ་ཞིང༌། དེ་ཡང་ངག་


JLAZ012_Page_0311
[མ་དཔེ་གཟིགས་ན་འདིར་གནོན།]

གི་སྤྲོས་པ་ལ་ཤིན་ཏུ་འཐས་པའི་རིགས་ཅན་འགའ་ཞིག་དང་པོ་ལུང་སྟོངས་ལ་སོགས་པར་སོང་ནས་གང་ལ་ཞེན་པའི་བརྗོད་པ་དེ་ཉིད་ཀུན་སློང་སྣ་ཚོགས་ཀྱིས་སློང་བར་བྱས་ནས་བརྒྱ་སྟོང་བྱེ་བར་བརྗོད་ཅིང༌། ཁོ་ཐག་ཆོད་དེ་བརྗོད་སྙིང་མི་འདོད་པར་གྱུར་པ་ན་ཇེ་ཉུང་ལ་བཏང་ནས་མཐར་ཆོས་སྤྱོད་ལ་སོགས་པའི་བརྗོད་པ་ཙམ་ཡང་སྤངས་ཏེ་ལྐུགས་པ་བཞིན་དུ་གནས་པར་བྱས་པས་རླུང་དལ་ཞིང་སྟོངས་པར་འགྱུར་ཏེ། ཀློང་གསལ་ལས། དེ་ལྟར་ངག་གནད་སུས་གཟིར་བ། །ངག་གི་རྐྱེན་ཟད་མྱ་ངན་འདའ། །ཞེས་སོ། །གསུམ་པ་སེམས་ཀྱི་གནད་ནི། ཀློང་གསལ་ལས། སེམས་ཉིད་ཕྱི་ཡི་མཁའ་ལ་གཏད། །ནང་གི་སྒྲོན་མ་མངོན་དུ་སྣང༌། །ཞེས་རླུང་གིས་སྤུར་བའི་སེམས་རིག་པའི་སྙིང་པོ་ཅན་དེ་ཉིད་ཕྱིའི་ནམ་མཁའ་ལ་མདུང་ཚུགས་སུ་གཏད་པས་གཡོ་བྱེད་ཀྱི་རླུང་རབ་ཏུ་དལ་བར་གྱུར་ནས་ནང་གི་སྒྲོན་མའི་གདངས་སྟོང་གསལ་འདུས་མ་བྱས་པ་གསལ་དྭངས་ཕྱེད་པར་ཤར་ནས་དབྱིངས་རིག་ཟུང་དུ་ཆུད་པར་འགྱུར་རོ། །དེ་སྐད་དུ་ཀློང་གསལ་ལས། དེ་ལྟར་སེམས་ཀྱི་གནད་གཟིར་བས། །སྐུ་གསུམ་རིག་པ་སྟོང་པར་འཆར། །ཞེས་སོ། །གཉིས་པ་གནད་གསུམ་གྱི་འོད་གསལ་བལྟ་བ་ནི་ཐལ་འགྱུར་ལས། དེ་ཡང་སྒོ་དང་ཡུལ་ཉིད་དང༌། །རླུང་དང་རིག་པའི་གནད་ཉིད་བསྟུན། །


JLAZ012_Page_0312
[མ་དཔེ་གཟིགས་ན་འདིར་གནོན།]

ཞེས་པའི་དང་སྒྲས་བཅད་པ་དང༌། །གཞན་དུ་ཚིག་ཟིན་དངོས་སུ་བསྟན་པས་གནད་བཞི་དང་གདམ་ང་ཅན་ལ། གནད་གསུམ་གྱི་ཚིག་སྒྲར་བྱུང་བ་ནི། རླུང་རིག་དལ་བས་ཡེ་ཤེས་འགྲུབ། ཅེས་དེ་གཉིས་བྱེད་ལས་གཅིག་པའི་སྒོ་ནས་གསུམ་དུ་བསྡུས་པར་བཀྲལ་ཀྱང་མི་འགལ་ལ། དེར་མ་ལྟོས་པའི་སྒྲུབ་ཕྱོགས་གཞན་ཡང་ཡོད་དོ།། །།དེ་ལ་དང་པོ་འཆར་བྱེད་སྒོའི་གནད་ནི། རྩ་རྒྱུད་ལས། སྒོ་གནད་ལྡོག་ཕབ་ཟུར་གྱིས་བལྟ། །ཞེས་ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་གཟིགས་སྟངས་གྱེན་དུ་ལྡོག་ནས་གཙུག་ཏོར་གྱི་རྣམ་པར་བལྟས་པས་བག་ཆགས་ཐུར་ལ་སེལ་བའི་གནད། ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས་གཟིགས་སྟངས་ཟུར་ལ་གཏད་པས་འཁོར་འདས་རོ་མཉམ་དུ་བསྲེ་བའི་གནད། སྤྲུལ་སྐུ་ལ་ཤེས་རབ་ཀྱི་སྤྱན་ཡོད་པས་གཟིགས་སྟངས་ཐུར་ལ་བབ་པས་ཡེ་ཤེས་ཀྱི་སྣང་བ་དངོས་སུ་ཕེབས་པའི་གནད་ཡོད་དོ། །དེ་ལྟ་ནའང་སྒོའི་གནད་དེ་ཙམ་གྱིས་ཟད་པ་ནི་མ་ཡིན་ཏེ་གོ་དོན་གྱི་དབྱིངས་འཇལ་ན། ཕྲེང་བ་ལས། རིག་པ་རྟོག་མེད་ལུ་གུ་རྒྱུད། །བདེ་ཆེན་ཚངས་པའི་སྒོ་ནས་སྣང༌། །ཞེས་འཕོ་བ་ཡེ་ཤེས་ཀྱི་སྒོས་མཚོན་ཏེ་དབུ་མའི་འོད་རྩ་ལས་ངོ་བོའི་སྟོང་གདངས་འཆར་བ་དང༌། གློ་བའི་རྩ་སྦུབས་ནས་ཐུགས་རྗེའི་རིགས་གདངས་འཆར་


JLAZ012_Page_0313
[མ་དཔེ་གཟིགས་ན་འདིར་གནོན།]

བ་སོགས་ཀྱི་རྣམ་གཞག་ཡོད་པའི་ཕྱིར་ཉི་ཟླ་གཟའ་སྐར་ལས། ཕལ་གྱི་མིག་རྩ་གཉིས་ལ་ལམ་དུ་ངོས་བཟུང་བ་ནི་རྒྱ་ཆུང་བས་མ་གོ་བར་ཟད་དོ། ། ཞེས་གསུངས་ལ། འོན་ཀྱང་ད་ལྟའི་ཉམས་ལེན་ལ་སྒོ་གཉིས་པོས་ཆོག་སྟེ། ཙཀྵུ་ཟིམ་བུས་སཱུརྱར་བལྟ། །ཤར་གྱི་རྒྱུ་སྐར་བཞིན་དུ་གསལ། །ཞེས་པས། ཕྱེད་བཙུམས་ཟིམ་བུས་ཉི་མ་ལ་འཁྲུ་གང་ཙམ་གྱིས་མ་རེག་པའི་སར་བལྟ་བ་གནད་ཡིན་ལ། སྒོའི་གནད་འབྱོངས་པའི་རྟགས་སུ་མིག་ཡུལ་ལ་ཇི་ཙམ་བལྟས་ཀྱང་ཚུགས་པ་ཡིན་ནོ། །གཉིས་པ་འཆར་གཞི་ཡུལ་གྱི་གནད་ནི། གནས་རྐྱེན་བྲལ་མཐོ་ཞིང་དྭངས་སངས་ཕྱེད་པ་ནས། དབྱར་མ་སྟོན་དང་དགུན་ཆུང༌། དཔྱིད་ལ་སོགས་པ་ཡུལ་ན་བུན་དང་དྲིའི་བཞོན་པ་ལ་སོགས་པའི་རྐྱེན་རྣམས་དང་རབ་ཏུ་བྲལ་བའི་ནམ་མཁའ་ཤིན་ཏུ་དྭངས་པར་ལས་དང་པོ་པས་ཟེར་གཉིས་དང་སྦྱར་ཞིང༌། དབྱིངས་རིག་སྨིན་མཚམས་བྲལ་བ་ནས་སྔ་དྲོ་ཆུ་བདག་དང༌། ཕྱི་དྲོ་རྡོ་རྗེ་ཅན་གྱི་ཕྱོགས་ག་ལ་བར་གདོང་རབ་ཏུ་དང་བས་དབང་པོའི་རྐྱེན་བྲལ་ཆུའི་སྒྲོན་མ་བཞག་པར་བྱ་སྟེ། ཀློང་གསལ་ལས། རྐྱེན་བྲལ་གསུམ་ལ་གསལ་བར་འགྱུར། །ཞེས་དང༌། སྡུད་པ་ལས། དོན་འདི་གང་ཡིན་ནམ་མཁའ་དག་ལ་བརྟག་པར་བགྱི། །ཞེས་གསུངས་པའི་ཕྱིར་རོ། །གསུམ་པ་ལ་གཉིས། དང་པོ་རླུང་


JLAZ012_Page_0314
[མ་དཔེ་གཟིགས་ན་འདིར་གནོན།]

གི་གནད་ནི། རླུང་ཞེས་བྱ་བ་ནི་གྱ་གྱུ་ཅན་ཏེ། རྣམ་རྟོག་གི་བཞོན་པར་གྱུར་ནས་བདེ་བར་གཤེགས་པའི་སྙིང་པོ་ཅན་ཡང་བསླུ་བར་འགྱུར་བས་ན་དེའི་རྒྱུ་འགགས་པར་བྱེད་པའི་ཐབས་སུ། སྙིང་ཏིག་པས་རླུང་སྣ་ནས་མི་གཏོང་བར་ཁ་ནས་མཆུ་སོ་གཉིས་བག་ཙམ་མ་རེག་པའི་བར་ནས་ཤིན་ཏུ་དལ་བུས་འབྱུང་འཇུག་བྱེད་པ་ཁྱད་ཆོས་ཡིན་ཏེ། ཁྱད་གཞི་རླུང་ནི་སྣ་ནས་འདྲེན་པའི་མན་ངག་རྣམས་ལ་འཁོར་ལོ་བཞིར་སྦྱང་བྱའི་རླུང་སྟོབས་སུ་གྱུར་པའི་གེགས་སྐྱོན་འབྱུང་ཉེ་ལ། འདིར་ཁ་ནས་དྲངས་པས་གློ་བའི་རླུང་འགྲོ་འོང་གི་རྣམ་པ་ཅན་རང་བབས་སུ་དག་པས་གདངས་སྙིང་གར་ཐིམ། སྦྱང་བྱའི་རླུང་རྟོག་མ་སྤངས་རང་སར་དག །འཁོར་ལོ་སོ་སོའི་ཡོན་ཏན་མ་བཙལ་ལྷུན་གྱིས་གྲུབ་ནས་ཡེ་ཤེས་ཀྱི་རླུང་འོད་གསལ་དུ་གྲོལ་བའི་གནད་ཡོད་ལ། དེ་ཡང་ཤེད་མ་བསྐྱེད་པའི་ངང་ནས་ཡིད་ཙམ་ཕྱིར་གནས་རིང་བར་བྱ་བ་ནི། ཀློང་གསལ་ལས། ཕྱི་ནང་རླུང་ནི་དལ་ཞིང་མཉམ། །ཡིད་ཙམ་ཕྱི་རུ་འདུར་བ་ཡིས། །རླུང་གི་འགྲོ་འོང་ཆད་པར་འགྱུར། །ཞེས་དབྱིངས་རིག་མི་འགུལ་བའི་གནད་ལ་ཤིན་ཏུ་གཅེས་པ་ཡིན་ནོ། །གསུམ་པ་རིག་པའི་གནད་ནི། དེ་ལྟར་བཤད་མ་ཐག་པའི་བཞུགས་སྟངས་དང་གཟིགས་སྟངས་ཀྱི་བྱ་བ་བྱས་ལ། སྒོ་ཡུལ་


JLAZ012_Page_0315
[མ་དཔེ་གཟིགས་ན་འདིར་གནོན།]

རླུང་གི་གནད་རྣམ་པ་གསུམ་དུ་བསྟུན་པའི་བྱེད་པ་བྱེད་ཅིང༌། བྱ་བ་དགུ་ཕྲུགས་སུ་བཏང་ནས་ཁུར་བོར་བས། སྲིད་པ་ཤིན་ཏུ་རྣམ་པར་གྲོལ་བའི་རྟགས་སུ། ཕྱིའི་དབྱིངས་ནམ་མཁའི་ཀློང་གསལ་གོ་ལ་འབྱེད་པའི་དཀྱིལ་དུ་རིག་པ་ཐིམ་འགྲོ་བ་ལྟ་བུར་གཏད་པས། འོད་གདངས་སྔོ་རིབ་ཤིན་ཏུ་དག་པ་ཞིག་ཐོག་མར་སྣང་ལ། དེ་ལས་སྣང་བ་མཆེད་པའི་ཚུལ་དུ་འོད་ལྔའི་གདངས་ཁ་དོག་ལྔ་པ་ཟ་འོག་ཁ་ཕྱེ་བ་ལྟ་བུར་གསལ་བ་ནི་ནང་གི་དབྱིངས་ཕྱི་རུ་གསལ་བ་ཞེས་བྱ་སྟེ། རྒྱུད་ལས། དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་མཁའ་ལ་འཛིན། །ནང་དབྱིངས་སྒྲོན་མ་དག་ཏུའོ། །ཞེས་སོ། །སྔོན་ཆད་ཕྱི་དབྱིངས་ནང་དབྱིངས་ཀྱི་གནད་འདི་གོ་དོན་ལྷོངས་པ་མ་མཐོང་བས། གུ་རུ་དང་པོའི་སངས་རྒྱས་ཀྱི་ལུང་འདི་བཞག་པར་བྱའོ། །ཁ་ཅིག་ཕྱིའི་ནམ་མཁའ་སྤྲིན་མེད་རྐྱང་པ་དེ་ལ་ངོས་འཛིན་པ་ནི་ཤིན་ཏུ་མི་རིགས་ཏེ། ནམ་མཁའ་སྐྱེས་བུ་དང་འབྲེལ་བ་མ་གྲུབ་ལ། སྒྲོན་མ་སྐྱེས་བུ་ཡོད་མེད་ཀྱི་རྗེས་སུ་བྱེད་པའི་ཕྱིར་རོ། །འདིར་ནང་གི་ནམ་མཁའ་གདངས་སྔོ་བ་དེ་ཕྱིར་ཤར་བ་ལ་ཕྱིའི་དབྱིངས་ཞེས་བྱའོ། །དེས་ན་ནམ་མཁའ་གོ་འབྱེད་འཆར་གཞིའི་ཆ་ཙམ་ལས་དབྱིངས་དངོས་མ་ཡིན་ནོ། །དངོས་ནི་མཐིང་ཁ་ཡིན་ལ། དབྱིངས་ནང་གི་དབྱིངས་ཏེ། དེ་ལྟར་ན་དབྱིངས་དེ་ལས་


JLAZ012_Page_0316
[མ་དཔེ་གཟིགས་ན་འདིར་གནོན།]

སྣང་བ་དེ་བྱུང་བར་སྣང་བས་འདི་གཉིས་ཕྱི་ནང་དབྱིངས་ཞེས་སོ་སོར་བརྗོད་ཀྱང་འཇའ་འོད་ཀྱི་གུར་ཁྱིམ་དུ་མི་གསལ་བ་གསལ་བར་གོ་འཕོས་པ་ཙམ་དུ་ཤེས་པར་བྱའོ། །ནང་ཚུར་ལ་བྱས་ཕྱི་ཕར་ལ་བྱས་པ་ལྟ་བུ་མ་ཡིན་གྱི། དེ་ལས་དེ་བྱུང་བར་སྣང་བའི་ཕྱི་ནང་དུ་ཤེས་པར་བྱའོ། །ཞེས་སོ། །དེ་ལྟར་ཤེས་པས་དག་པ་དབྱིངས་ཀྱི་སྒྲོན་མའི་ནང་དུ་ལས་ཀྱི་རླུང་དག་པའི་ཆ་ལས་བྱུང་བའི་ཐིག་ལེ་སྟོང་པའི་སྒྲོན་མ། ཀོ་མོའི་ཆུ་ལ་རྡོ་བོར་བའི་རྣམ་པས་མཚོན་པའི་ཐིག་ཟླུམ་འོད་ལྔའི་མུ་ཁྱུད་ཅན་ལ་སོགས་པར་སྣང་ཞིང༌། དེར་རྒྱང་ཞགས་གཟིགས་སྟངས་ཀྱིས་གཅུན་པས་ནང་གི་རིག་པ་ཤིན་ཏུ་དྭངས་ལ་ཡུལ་མེད་པ་ཞིག་ཉམས་སུ་མྱོང་བ་དེ་ནི་ཤེས་རབ་རང་བྱུང་གི་སྒྲོན་མའི་ངོ་བོ་ཡིན་ནོ། །དེ་ལས་ཡུལ་ཤེས་ཀྱི་ཤེས་རབ་རྣོ་ལ་མྱུར་བ་དང༌། ཚིག་དོན་ཀློང་རྡོལ་དུ་འཆར་བ་ནི་དེའི་རྩལ་ཡིན་ནོ།། །།དེ་ལས་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་མུ་ཏིག་བསྟར་ལ་བརྒྱུས་པའམ། གསེར་གྱི་སྐུད་པ་ལྡིང་བ་ལྟར་སྣང་བ་ལ་ཤེས་རབ་ཀྱི་གདངས་ཞེས་བྱ་སྟེ། ངོ་བོ་གཅིག་ལ་ལྡོག་པ་གསུམ་གྱིས་དབྱེ་བ་ངོས་ཟིན་དགོས་སོ། །འདི་དག་མ་ཕྱེད་ན། ཀུན་མཁྱེན་གྱིས། རེས་ཤེས་པ་ལ་ཤེས་རབ་རང་བྱུང་གི་སྒྲོན་མར་བཏགས། རེས་ནང་གདངས་ལ་བཏགས། རེས་ལུ་གུ་རྒྱུད་ལ་བཏགས་


JLAZ012_Page_0317
[མ་དཔེ་གཟིགས་ན་འདིར་གནོན།]

པས་མགོ་རྨོངས་པར་ཟད་དོ། །ཞེས་གསུངས་སོ། །དེ་ལྟར་མཐོང་བའི་རིག་གདངས་རྡོ་རྗེ་ལུ་གུ་རྒྱུད་དེ་དབྱིངས་དང་ཐིག་ལེའི་ར་བར་བཙུད་ནས་སྒོམ་པ་ནི་རིག་པའི་གནད་ཡིན་ཏེ། ཀློང་གསལ་ལས། རིག་གནད་ལུག་རྒྱུད་བཙོན་དུ་བཟུང༌། །དངོས་སྣང་དལ་བ་ཉིད་ཀྱིས་རྟེན། །ཞེས་སོ། །འདི་དག་གི་ཚེ་འོད་སྣང་ལ་སྤུ་རིས་འབྱེད་པའི་དཔྱད་པ་ཤོར་ན། ལུ་གུ་རྒྱུད་དངོས་པོར་གོལ་བའི་གེགས་དང་གོལ་སས་འཆིང་ལ། སྒྲོན་མའི་སྣང་བ་ལས་རང་གི་ཆོས་ཉིད་རང་གིས་གསལ་བ་བཞིན་དུ་ཞེན་པ་མེད་པའི་བརྟུལ་ཞུགས་ལ་བསླབ་ཅིང༌། དེ་ཡང་མ་གོམས་བར་ལ་སྨིག་རྒྱུ་གཡོ་བ་བཞིན་འགུལ་འཕྲིགས་ཅན་དུ་འཆར་བ་དེ་ཉིད་ལྟ་སྟངས་ཀྱིས་རིམ་པར་ཁྲིད་པ་ལ་གོམས་སུ་བཅུག་པས་ནང་གི་རྩ་ཁམས་རྣམས་འོད་དུ་ཇི་ཙམ་དྭངས་སྟོབས་ཆེ་བ་དེ་ཙམ་དུ་དབྱིངས་རིག་སྨིན་མཚམས་བྲལ་ནས་ཡུལ་རྐྱེན་ལ་ལྟོས་པ་ཇེ་ཆུང་ལ་སོང་ནས་སྣང་བ་བཞི་པོའི་ཉམས་རིམ་གྱིས་འཕེལ་བར་འགྱུར་ལ། འདི་ནི་ཆུ་བུར་གྱི་མིག་གིས་མཐོང་བ་ཡིན་པའི་ཕྱིར་ཟད་པའི་ས་ལ་བསྐྱོད་དགོས་སོ། །ཤེས་རབ་ཀྱིས་མིག་གིས་མཐོང་ན་གོ་རིམ་གྱི་ངེས་པ་སྤངས་ནས་ཅིག་ཅར་དུ་ཟད་པར་འགྱུར་ཏེ་གང་ཟག་གི་ཁྱད་པར་བསམ་གྱིས་མི་ཁྱབ་པའི་ཕྱིར་རོ། །འོན་ཀྱང་དེ་གཉིས་གང་དུའང་མ་རེག་པའི་རྩ་བཟང་བ་འགའ་ཞིག་ལ་ངེས་པ་མེད་པའི་འཆར་ལུགས་


JLAZ012_Page_0318
[མ་དཔེ་གཟིགས་ན་འདིར་གནོན།]

ཡོད་དེ། དེ་དང་དེའི་ལམ་རྟགས་སུ་རློམ་པ་མི་བྱ་སྟེ། དྲོད་གཤེར་གྱི་རྒྱུ་རྐྱེན་གཅིག་ལས་སྲུས་ཤིན་ཏུ་སྔ་བར་སྨིན་པ་ལས་ས་རྫི་ཀར་འགྱུར་བའང་ཡོད་པའི་ཕྱིར་ཚད་མཐའ་རྟེན་གྱིས་མན་ངག་ཁོ་ནས་གཟུང་བ་གཅེས་སོ།། །། གསུམ་པ་ལ་གཉིས། རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་འཇུག་པ་དང༌། གཤིས་ཐོག་ཏུ་རིག་པའི་རྩལ་དབང་བསྐུར་བའོ། །དང་པོ་ནི་རི་རྩེའམ། ཤིན་ཏུ་དབེན་ཞིང་མངོན་སུམ་གྱི་སྣང་བ་འཆར་བདེ་བའི་གནས་དུས་ཕུན་སུམ་ཚོགས་པར་ཚོགས་ཀྱི་འཁོར་ལོ་དང་གཏོར་མས་མཆོད་ཅིང༌། བླ་མ་ལ་གསེར་གྱི་མཎྜལ་ཕུལ་ནས་གསོལ་བ་གདབ་པ་ནི། བླ་མ་རྡོ་རྗེ་འཛིན་པ་ཆེཿ བདག་ནི་འཁོར་བ་ལས་བསྒྲལ་ཕྱིརཿ རྡོ་རྗེ་སེམས་དཔའི་གསང་ལམ་ཆེཿ རིག་པའི་རྩལ་དབང་བསྐུར་དུ་གསོལཿ ཞེས་ལན་གསུམ་གྱིས་གསོལ་བ་བཏབ་པས། དཔོན་སློབ་ཐམས་ཅད་འོད་གསལ་གྱི་སྣང་བ་སྒྲིབ་གཡོགས་དང་བྲལ་བའི་བརྡར་སྟོད་གཡོགས་བསལ་ཏེ། བླ་མའི་ཐུགས་ཀར་ཡི་གེ་ཨ་མཐིང་ག་གཅིག་བཀོད་པ་ལ་མིག་མི་འཛུམ་པར་བལྟ་ཞིང་སེམས་མ་ཡེངས་པའི་ངང་དུ་ཞོག་ཅེས་བརྡ་སྤྲད། སློབ་དཔོན་གྱི་ཌཱ་མ་རུའི་སྒྲ་དང་བཅས་པས་བྱིན་དབབ་པའི་མཐར། ཡིད་ལ་མེད་པ་གཅིག་ཏུ། བླ་མས་ཕཊ་དྲག་པོ་ཞིག་བརྗོད་


JLAZ012_Page_0319
[མ་དཔེ་གཟིགས་ན་འདིར་གནོན།]

པའི་དེ་མ་ཐག་པར། སེམས་གང་ཡིན་ཞེས་ལན་གསུམ་རིངས་སྟབས་སུ་བརྗོད་པས། སློབ་མ་ཅི་ཟེར་གཏད་པ་དང་བྲལ་བའི་ཧ་ཕྱད་དེ་ལུས་པའི་ཚེ། རིག་པ་མ་བཅོས་པ་ལྷག་གེར་ཤར་བ་ནི། མ་མཐོང་བའི་མཐོང་བ་ཆེན་པོ་ཞེས་བྱ་སྟེ། ཆོས་སྐུའི་ངང་དུ་ཡེ་ཤེས་དབབ་པ་ཞེས་བྱའོ། །དེ་ནས་འཇུག་པ་དངོས་ནི། སློབ་མ་རྣམས་དྲང་སྲོང་ཙོག་པུར་འདུག །མིག་བར་སྣང་ལ་རྟེན་མེད་དུ་བཞག་ནས་རང་བཞིན་གྱི་ཞིང་ཁམས་ཡིད་ལ་བྱར་གཞུག་ཅིང༌། ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག །ཤར་ཕྱོགས་ན་མངོན་པར་དགའ་བའི་ཞིང་ཁམས་མཛེས་ཤིང་ཉམས་དགའ་ཡིད་དུ་འོང་བ་ན། བཅོམ་ལྡན་འདས་རྡོ་རྗེ་མི་འཁྲུགས་པ་ཞེས་བྱ་བ་སྐུ་མདོག་མཐིང་ག་རིན་པོ་ཆེའི་རྒྱན་གྱིས་བརྒྱན་པ་ཡོད་དོ། །ལྷོ་ཕྱོགས་ན་དཔལ་དང་ལྡན་པའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་ཡིད་དུ་འོང་བ་ན། བཅོམ་ལྡན་འདས་རིན་ཆེན་འབྱུང་ལྡན་ཞེས་བྱ་བ་སྐུ་མདོག་སེར་པོ་རིན་པོ་ཆེའི་རྒྱན་གྱིས་བརྒྱན་པ་ཡོད་དོ། །ནུབ་ཕྱོགས་ན་པདྨ་བརྩེགས་པའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་ཡིད་དུ་འོང་བ་ན། བཅོམ་ལྡན་འདས་སྣང་བ་མཐའ་ཡས་ཞེས་བྱ་བ། སྐུ་མདོག་དམར་པོ་རིན་པོ་ཆེའི་རྒྱན་གྱིས་བརྒྱན་པ་ཡོད་དོ། །བྱང་ཕྱོགས་ན་ལས་རབ་རྫོགས་པའི་ཞིང་ཁམས་ཤིན་ཏུ་


JLAZ012_Page_0320
[མ་དཔེ་གཟིགས་ན་འདིར་གནོན།]

མཛེས་ཤིང་ཉམས་དགའ་ཡིད་དུ་འོང་བ་ན། བཅོམ་ལྡན་འདས་གདོན་མི་ཟ་བའི་རྒྱལ་པོ་ཞེས་བྱ་བ། སྐུ་མདོག་ལྗང་གུ་རིན་པོ་ཆེའི་རྒྱན་གྱིས་བརྒྱན་པ་ཡོད་དོ། །དེ་དག་ཐམས་ཅད་ཀྱང་ཡབ་ཡུམ་གཉིས་སུ་མེད་པ། འཁོར་རྡུལ་གཅིག་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་བཞུགས་ཤིང༌། རང་རང་གི་སྟོན་པ་ལ་ཆོས་ཉན་ཅིང༌། རང་རང་གི་ཉེ་འཁོར་ལ་ཆོས་སྟོན་པ། རང་གི་སེམས་ཀྱི་དམ་པ་འོད་གསལ་བ། གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་ཤར་ཕྱོགས་ཀྱི་ཞིང་ཁམས་སུ་གླང་པོ་ཆེའི་ལྟ་སྟངས་ཀྱིས་ལྟོས་ལ། སེང་གེའི་མཆོངས་སྟངས་ཀྱིས་མཆོངས་ཤིག །ལྷོ་ཕྱོགས་ཀྱི་ཞིང་ཁམས་སུ་སེང་གེའི་ལྟ་སྟངས་ཀྱིས་ལྟོས་ལ། སྟག་མོའི་མཆོངས་སྟངས་ཀྱིས་མཆོངས་ཤིག །ནུབ་ཕྱོགས་ཀྱི་ཞིང་ཁམས་སུ་དཔལ་གྱི་རྔམས་སྟབས་ཀྱིས་ལྟོས་ལ། ཁྱུང་གི་ལྡིང་སྟངས་ཀྱིས་འཕུར་ཅིག །བྱང་ཕྱོགས་ཀྱི་ཞིང་ཁམས་སུ་རྡོ་རྗེ་འཆང་གི་ལྟ་སྟངས་ཀྱིས་ལྟོས་ལ། གློག་དམར་འཁྱུག་སྟངས་ཀྱིས་སོང་ཞིག །ཨ་ཨ་ཨཿ ཞེས་ཕྱིར་མི་ལྡོག་པའི་རྒྱས་གདབ་བོ། །དེ་ལྟར་རིག་པའི་དཀྱིལ་འཁོར་གྱི་སྒོ་བཞི་ནས་བཅུག་པས། སློབ་དཔོན་ལྟ་དགོངས་ཅན་དང༌། སློབ་མ་དད་དམ་ཅན་འཛོམ་ན་ཚེ་འདིར་ཉམས་སུ་མ་ལོངས་ཀྱང་རང་བཞིན་སྤྲུལ་


JLAZ012_Page_0321
[མ་དཔེ་གཟིགས་ན་འདིར་གནོན།]

པའི་ཞིང་དུ་དབུགས་འབྱིན་པ་གསང་སྔགས་འདིའི་ཁྱད་ཆོས་སོ།། །།དེ་ནས་ལོངས་སྐུའི་དཀྱིལ་འཁོར་དུ་འཇུག་པ་ནི། རྡོ་རྗེའི་སྐྱིལ་ཀྲུང་གིས་འདུག་ལ། མིག་བར་སྣང་ལ་ཧར་རེ་བ་ལས་རྒྱན་སྟུག་པོ་བཀོད་པའི་ཞིང་ཁམས་ཡིད་ལ་བྱར་གཞུག་ཅིང༌། བླ་མས། ཨེ་མ་སྐལ་ལྡན་སེམས་ཀྱི་བུ་རྣམས་ཉོན་ཅིག །དེ་དག་ཐམས་ཅད་ལས་འདས་པའི་ཕ་རོལ་ན་རང་བཞིན་སྤྲུལ་པའི་སྐུའི་ཞིང་ཁམས་དེ་དག་མ་ལུས་ཤིང་ལུས་པ་མེད་པའི་འཆར་གཞི་བདག་པོའི་བྱད་དང་འདྲ་བ་རྒྱན་སྟུག་པོ་བཀོད་པའི་ཞིང་ཁམས། ཡེ་ཤེས་ལྔས་ཁྱབ་ཅིང་ཀུན་ཏུ་གསལ་བ། ཤིན་ཏུ་མཉམ་ཞིང་མི་གཡོ་བ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ། ཟག་པ་ཟད་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ཞེས་བྱ་བ། འཁོར་ཡང་དག་པར་རྫོགས་པའི་སངས་རྒྱས་བརྒྱ་སྟོང་བྱེ་བ་དཔག་ཏུ་མེད་པས་བསྐོར་བ། ཆོས་ཉིད་ཤིན་ཏུ་རྣམ་པར་དག་པ་ལ་རོལ་པ་ཞིག་ཡོད་ཀྱིས། བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ། སེང་གེའི་མཆོངས་སྟངས་ཀྱིས་སོང་ཞིག །ཨ་ཨ་ཨཿ ཞེས་སྟོང་པ་ཉིད་ཀྱིས་སླར་ལ་མི་ལྡོག་


JLAZ012_Page_0322
[མ་དཔེ་གཟིགས་ན་འདིར་གནོན།]

པར་རྒྱས་གདབ་བོ། །དེ་ནས་ཆོས་སྐུའི་དཀྱིལ་འཁོར་དུ་གཞུག་པ་ནི། སེང་གེའི་འདུག་སྟངས་ཀྱིས་འདུག་ལ། སངས་རྒྱས་ཀྱི་ས་ན་ཡོད་པའི་སྤྱན་ལྔ་ཁྱད་པར་ཅན་ཐོབ་པའི་རྟེན་འབྲེལ་དུ། མིག་གྱེན་དང་ཐུར་དང་གཡས་གཡོན་དང་ཐད་དྲང་དུ་བལྟས་ཏེ། རིག་སྟོང་རྗེན་པའི་ཡེ་ཤེས་གསལ་གདབ་པ་ནི། བླ་མས། ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག །གཟུགས་སྐུ་གཉིས་ལས་འདས་པའི་ཕ་རོལ་ན་དེ་གཉིས་ཀའི་འཆར་གཞིར་གྱུར་པ་རང་གི་རིག་པ་བསམ་ངོ་དང་བྲལ་བའི་ངོ་བོ། ཡེ་ཤེས་ཐིམ་ལ་མ་རྨུགས་པ། གང་དུའང་མ་ཕྱེ་བའི་ཆོས་ཉིད་ཚད་མེད་དཔག་ཏུ་མེད་དམིགས་སུ་མེད་པ་བཞུགས་ཀྱིས། བུ་ཁྱོད་འགྲོ་ས་མེད་པའི་གཤིས་ལ་འགྲོ་མཁན་རྩ་གདར་ཆོད་ལ་ཞོག་ཅིག །རིག་སྟོང་དུ་ཤེས་པས་གནད་ཚུགས་ཤིག །མ་འགགས་པར་འགྱུར་བས་རྩལ་སྦྱོངས་ཤིག །ཡེ་ཤེས་སུ་གསལ་བས་ལམ་སྦྱོངས་ཤིག །སྣ་ཚོགས་སུ་འཆར་བ་ལ་མ་ཞེན་ཅིག །བསམ་གྱིས་མི་ཁྱབ་པའི་ངང་དུ་ཨ་ཨཿ ཞེས་བརྗོད། དཀྱིལ་འཁོར་འདིར་དབང་ཐོབ་ནས་མ་རིག་པ་གཞི་ལ་སངས་ཏེ། རིག་པ་ཡེ་ཤེས་སུ་རྒྱས་པས་མངོན་སུམ་སྒོམ་པ་ལ་དབང་ཞིང༌། གོམས་ཤུགས་ཆུང་བ་རྣམས་བར་དོར་གྲོལ་ལ། མཆོག་རྣམས་ཚེ་འདིར་གྲོལ་བ་ཡིན་ནོ། །གཉིས་པ་ནི། སློབ་


JLAZ012_Page_0323
[མ་དཔེ་གཟིགས་ན་འདིར་གནོན།]

མ་རྣམས་སྒོ་གསུམ་བཞུགས་སྟངས་དང་གཟིགས་སྟངས་ཀྱི་གནད་འཆུན་དུ་བཅུག །འོད་གསལ་ཐོད་རྒལ་ཆེན་པོའི་གནད་མཚོན་པར་བྱས་ལ། ཀྱེ་སྐལ་ལྡན་སེམས་ཀྱི་བུ། ཙིཏྟ་རིན་པོ་ཆེ་གསང་བའི་སྦུབས་ན་ཐིག་ལེ་ཡེ་ཤེས་ཀྱི་ས་བོན་ངོ་བོའི་ཆ་ནས་སྟོང་ཞིང་བདག་མེད་པ། རང་བཞིན་གྱི་ཆ་ནས་འགག་མེད་དུ་གསལ་བ། ཐུགས་རྗེའི་རྩལ་ལས་སྐུ་དང་ཡེ་ཤེས་དབྱེར་མེད་བུམ་ནང་གི་སྒྲོན་མེ་ལྟར་གསལ་བའི་འོད་གདངས་རིན་པོ་ཆེ་ཤེལ་བུག་ཅན་ལས་འཐོན་ཏེ་སྒྲོན་མ་བཞིའི་རང་བཞིན་དུ་གསལ་བ་འདིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཆོས་ཉིད་མངོན་དུ་མཐོང་ནས་རིག་པ་རྩལ་གྱི་དབང་ཆེན་ཐོབ་པ་ཡིན་ནོ། །ཇི་ལྟར་ན། རིག་པའི་ཡེ་ཤེས་འོད་དུ་གསལ་བ་ནི་རྣམ་པར་སྣང་མཛད། དེ་ཉིད་འཕོ་འགྱུར་མེད་པས་མི་བསྐྱོད་རྡོ་རྗེ། འོད་གསལ་འཕེལ་ཆ་དང་བཅས་པས་རིན་ཆེན་འབྱུང་ལྡན། འོད་སྣང་ཚད་མེད་པས་སྣང་བ་མཐའ་ཡས། མ་བཙལ་རང་ལ་རྫོགས་པས་དོན་ཡོད་གྲུབ་པ་སྟེ། རིགས་ལྔའི་སངས་རྒྱས་རྣམས་ཀྱི་ཞལ་མངོན་སུམ་དུ་མཐོང་བ་ཡིན་ནོ། །དེའི་ཡེ་ཤེས་ཀྱི་ཆོས་ཉིད་ཀྱང་རིག་པ་དྲི་མེད་དུ་མཐོང་བས་མེ་ལོང༌། འོད་གསལ་དང་ངོ་བོ་གཉིས་སུ་མི་ཕྱེད་པས་མཉམ་ཉིད། བྱེ་བྲག་མ་འདྲེས་པར་འཆར་བས་སོར་རྟོགས། མ་བཙལ་


JLAZ012_Page_0324
[མ་དཔེ་གཟིགས་ན་འདིར་གནོན།]

ལྷུན་གྱིས་གྲུབ་པས་བྱ་གྲུབ། ཡེ་སྟོང་རྩ་བ་བྲལ་བས་ཆོས་དབྱིངས་ཏེ་ཡེ་ཤེས་རྣམ་པ་ལྔའི་རང་བཞིན་ནོ། །ངོ་བོ་འཕོ་འགྱུར་མེད་པས་རྡོ་རྗེ། ཡོན་ཏན་ཕུན་སུམ་ཚོགས་པས་རིན་པོ་ཆེ། སྣང་བ་ལ་སྐྱོན་གྱིས་མ་གོས་པས་པདྨ། དེ་གོམས་པ་ལས་ལྷག་མེད་འགྲུབ་པས་ལས་ཀྱི་རིགས། འདི་དག་སངས་རྒྱས་ཐམས་ཅད་ཀྱི་གཤེགས་ཤུལ་ཡིན་པས་དེ་བཞིན་གཤེགས་པའི་རིགས་སོ། །འོད་གསལ་དེ་དག་དྲི་མ་མེད་པས་དཀར་པོ། ཡོན་ཏན་རྫོགས་པས་སེར་པོ། མ་བཙལ་བཞག་པས་དམར་པོ། བྱ་རྩོལ་རྫོགས་པས་ལྗང་གུ། མི་འགྱུར་བརྟན་པས་མཐིང་གའོ། །རླུང་ལྔར་གནས་པའི་ཚུལ་ཡང༌། འོད་གསལ་གྱི་སྣང་བ་འདི་ཡེ་ཤེས་ཀྱི་དྲོད་དང་མ་བྲལ་བས་མེ་མཉམ་ཀྱི་རླུང༌། འཁོར་འདས་ཀྱི་སྲོག་འཛིན་པས་སྲོག་འཛིན་གྱི་རླུང༌། འཁོར་འདས་དྭངས་སྙིགས་འབྱེད་པས་དྭངས་སྙིགས་འབྱེད་པའི་རླུང༌། ཀུན་ལ་སྙོམས་པར་བརྡལ་བས་ཁྱབ་བྱེད་ཀྱི་རླུང༌། འཁོར་བའི་སྲོག་བཅད་ནས་མྱ་ངན་ལས་འདའ་བར་བྱེད་པས་སྙིང་རྗེ་མེད་པ་སྐལ་པ་ལས་ཀྱི་རླུང་ངོ༌། །ཤེས་རབ་ལྔར་གནས་པའང༌། འོད་གསལ་གྱི་ཆོས་ཉིད་རྟོགས་མ་རྟོགས་ལས་འཁོར་འདས་སུ་འབྱེད་པས་འབྱེད་པའི་ཤེས་རབ། ཉམས་གོང་འཕེལ་ལ་སོགས་ཏེ་ཡེ་ཤེས་ཀྱི་རྩལ་སྣང་སྡུད་པས་སྡུད་པའི་ཤེས་རབ། ཀུན་ལ་ཁྱབ་


JLAZ012_Page_0325
[མ་དཔེ་གཟིགས་ན་འདིར་གནོན།]

པས་ཁྱབ་བྱེད་ཀྱི་ཤེས་རབ། འོད་སྣང་འགྲོ་འོང་དང་བཅས་པས་བསྐྱོད་པའི་ཤེས་རབ། དེ་ཉིད་རྟོགས་ན་འཁོར་བ་ལས་སྒྲོལ་བས་སྒྲོལ་བའི་ཤེས་རབ་སྟེ་ལྔ་ཚན་དྲུག་གམ། འོད་མཐིང་ག་སངས་རྒྱས་ཌཱཀྐིར་ཤེས་པའི་རིག་པ་གཞན་བཞི་ལའང་མཆིས་པའི་དག་བྱ་དག་བྱེད་ཀྱི་མཁའ་འགྲོ་ལྔའི་ཞལ་མཐོང་བས་ལྔ་ཚན་བདུན་དུ་བྱས་པའི་བདག་ཉིད་རྣམས་ཀྱང་ངང་ལ་གནས་པ་ལམ་མཐར་ཕྱིན་པ་འབྲས་བུའི་ཆོས་ཉིད་དུ་གྲུབ་པའི་ཚུལ་ཡང༌། ཀློང་གསལ་ལས། རང་བྱུང་རིག་པའི་རང་རྩལ་ལས། །སྐུ་ལྔ་དང་ནི་ཡེ་ཤེས་ལྔ། །རིགས་ལྔ་འོད་ལྔ་རླུང་ནི་ལྔ། །ཤེས་རབ་ལྔ་ལ་སོགས་པར་གནས། །ཞེས་སོ། །མདོར་བསྡུ་ན། དེ་ལྟར་དུ་བཞུགས་པའི་ཆོས་ཉིད་རྣམས་བློས་རྣམ་པར་བཏགས་ཤིང་རྩལ་རླུང་འཛིན་རྩོལ་གྱི་རྟེན་འབྲེལ་ལས་བྱུང་བའི་སྟོང་གཟུགས་ཤེས་ཉམས་ཡིད་དཔྱོད་ཀྱི་བརྟགས་པའི་བློའི་རི་མོ་ཅན་མ་ཡིན་པར། གདོད་ནས་གྲུབ་པའི་སྣང་ཉམས་ཆོས་ཉིད་མངོན་སུམ་མི་བསླུ་བའི་བདག་ཉིད་ཅན་དུ་མཐོང་བ་ནི། སངས་རྒྱས་པའི་ཆོས་ཁམས་དཀོན་མཆོག་གསུམ་ལ་བླ་མར་བྱ་ནས་རྒྱུད་སྡེ་རྒྱ་མཚོའི་དངོས་པོ་བཅུའམ། དེ་ཉིད་ཡོངས་སུ་རྫོགས་པའི་བར་གྱི་ལམ་དང་འབྲས་བུའི་ཆོས་ཐམས་ཅད་མངོན་དུ་བྱས་པའི་ཚུལ། ཀློང་དྲུག་པ་ལས། སངས་རྒྱས་


JLAZ012_Page_0326
[མ་དཔེ་གཟིགས་ན་འདིར་གནོན།]

ཆོས་དང་དགེ་འདུན་ནི། །ཡེ་རྫོགས་རང་གི་ལུས་ལ་གནས། །ཞེས་སེམས་ཉིད་མ་འཁྲུལ་བ་གཞིའི་སངས་རྒྱས། སྒྲ་ཚིག་ལས་འདས་པ་དོན་གྱི་དམ་ཆོས། གཡོ་འགུལ་དང་བྲལ་བ་སྙིང་པོའི་དགེ་འདུན་ཏེ། འདུན་པས་འགྲོ་བ་དང༌། ཞེ་སྡང་གིས་འགྲོ་བ་དང༌། གཏི་མུག་གིས་འགྲོ་བའི་སྐྱབས་འགྲོ་ཉི་ཚེ་བ་ཙམ་མ་ཡིན་པར་གནས་ལུགས་རྡོ་རྗེའི་སྐྱབས་འགྲོ་དང་མི་འབྲལ་བའི་ངང་ནས་སྣང་བ་བཞིའི་འོད་གསལ་ལ་སྤྱོད་ཅིང༌། དེ་ལྟར་སྤྱོད་པའང༌། སྒྲོན་མ་སྣང་བྱེད་ལས། ཡེ་ནས་དེ་ལྟར་ཤར་ནས་ཡོད། །སྐྱེས་བུས་རྩོལ་བས་བྱུང་བ་མིན། །དཀྱིལ་འཁོར་དེ་ཡིན་ལྷ་དེ་རང༌། །སྔགས་དང་ཕྱག་རྒྱ་མཆོད་པ་དེ། །བསྐྱེད་དང་རྫོགས་པའི་རིམ་པ་དེ། །སངས་རྒྱས་སེམས་ཅན་འཁོར་འདས་ཡིན། །དབང་དང་སྡོམ་པ་དམ་ཚིག་ཡིན། །རང་གི་བླ་མ་ལྷ་ཡང་ངོ༌། །ཞེས་སོ། །དེའི་ཕྱིར་དབྱིངས་སྣང་ཐིག་ལེའི་དབུས་སུ་རྡོ་རྗེ་ལུ་གུ་རྒྱུད་ཀྱི་སྣང་བ་དང་མི་འབྲལ་བ་ཤིན་ཏུ་གཅེས་ཏེ། ནོར་བུ་ཕྲ་བཀོད་ལས། སངས་རྒྱས་ཐམས་ཅད་ཀྱི་ཐུགས་ལ་བལྟ་བར་འདོད་ན་རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག །སངས་རྒྱས་ཐམས་ཅད་ཀྱི་དགོངས་པ་ཐུགས་སུ་ཆུད་པར་འདོད་ན་རྡོ་རྗེ་ལུ་གུ་རྒྱུད་དང་མ་འབྲལ་ཅིག །ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འདོད་


JLAZ012_Page_0327
[མ་དཔེ་གཟིགས་ན་འདིར་གནོན།]

ན་རྡོ་རྗེ་ལུ་གུ་རྒྱུད་ཀྱི་འདུག་ཚུལ་ལ་ལྟོས་ཤིག །གསང་བའི་ཡེ་ཤེས་ཐམས་ཅད་ལ་མཁས་པར་འདོད་ན་རྡོ་རྗེ་ལུ་གུ་རྒྱུད་ཀྱི་ཟེར་ལ་ལྟོས་ཤིག །ལྟ་སྒོམ་སྤྱོད་པ་གསུམ་འདུ་འབྲལ་མེད་པར་འདོད་ན་རྡོ་རྗེ་ལུ་གུ་རྒྱུད་ཀྱི་སྐུ་ལ་མ་ཡེངས་ཤིག །ཆོས་ཐམས་ཅད་ཀྱི་གཞལ་ཡས་ཁང་འཛིན་པར་འདོད་ན་དབྱིངས་དང་རིག་པའི་དོན་ཁོང་དུ་ཆུད་པར་གྱིས་ཤིག །རྡོ་རྗེ་སེམས་དཔའི་གདུང་འཛིན་པར་འདོད་ན་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་དང་མ་འབྲལ་ཅིག །ཅེས་གསུངས་ལ་འདི་ལྟ་བུའི་ཆོས་ཉིད་རིག་པ་མངོན་སུམ་གྱི་དོན་མཐོང་བ་ནི་ཐོག་མའི་མགོན་པོ་ཀུན་ཏུ་བཟང་པོ་དང་སྐལ་བ་མཉམ་པ་ཞེས་བྱ་སྟེ། གསང་བ་སྤྱོད་པ་ལས། འདི་ལྟར་སུ་ཡིས་མཐོང་བའི་མི། །ཐོག་མའི་ཀུན་ཏུ་བཟང་པོ་དང༌། །སྐལ་བ་མཉམ་པ་ཁོ་ནའོ། །ཞེས་གསུངས་པས། དེ་རིང་ཁྱོད་ཀྱིས་རྙེད་པ་ཆེན་པོ་ལེགས་པར་རྙེད་པ་རིག་པ་རྩལ་གྱི་དབང་ཐོབ་པས་སངས་རྒྱས་སུམ་སྟོང་གི་ཞལ་མཐོང༌། མངལ་གྱི་གྲོང་ཁྱེར་རྒྱུན་གཅོད་པས་ཐར་པའི་ལམ་སྣ་ཟིན་པ་ཡིན་ནོ། །དེ་ལྟར་ནའང་བྱང་ཆུབ་སེམས་དཔའི་ས་བཅུ་རིམ་གྱིས་བགྲོད་པས་ཀྱང་དེ་བཞིན་གཤེགས་པའི་ཁམས་ཀྱི་ཡོན་ཏན་མཐའ་དག་མངོན་དུ་མཐོང་བ་མ་ཡིན་པའི་ཕྱིར། དུས་དེ་རིང་ནས་སྣང་བ་བཞིའི་ཡོན་ཏན་མཐར་ཐུག་པའི་ཉམས་ལེན་ལ་བརྩོན་པར་བྱས་ཏེ།


JLAZ012_Page_0328
[མ་དཔེ་གཟིགས་ན་འདིར་གནོན།]

ཆོས་ཉིད་ཟད་པའི་བྱང་ཆུབ་ལ་རེག་པར་གྱིས་ཤིག །ཅེས་སྤྲོ་བའང་བསྐྱེད་དོ། །ཞར་ལ་ཉམས་ལེན་སྲང་དུ་འཛུད་པའི་ཚུལ་གཉིས་ལས། དང་པོ་སྤྲོས་པ་ཅན་ཐུན་བཞིའི་རྣལ་འབྱོར་ལ་བསླབ་སྟེ། ཀློང་གསལ་ལས། དགེ་སྦྱོར་སྲང་དུ་འཇུག་པའི་ཚུལ། །ཐུན་བཞིའི་རྣལ་འབྱོར་ཉིད་ལ་བསླབ། །ཅེས་པས། དེའང་ཐོ་རངས་དང་པོ་བླ་མའི་རྣལ་འབྱོར་སྒོམ། བར་པ་ལ་ཁྲེགས་ཆོད་བསྐྱང༌། ཐ་མལ་བདེ་སྟོང་དང་གཏུམ་མོ་སྒོམ། ནམ་ལངས་ནས་ཉི་ཤར་གྱི་བར་ལ་ཁ་ཏོན་དང་སྒོམ་བཟླས་ལ་སོགས་པའོ། །ཉི་ཤར་ནས་གུང་གི་བར་ལ་ཐོད་རྒལ་བལྟ། གུང་ལ་ཕྱག་དང་ཆོས་སྤྱོད་ཀྱི་རིགས་བྱ། ཕྱི་དྲོའང་ཐོད་རྒལ་སྒོམ། དགོང་མོ་གཏོར་མ་དང་རླུང་འཛིན། སྲོད་ཐུན་དང་པོ་ལ་འཆི་བ་མི་རྟག་པ་སྒོམ། བར་པ་ལ་བསྐྱེད་རིམ་དང་བཟླས་པ་བྱ། གུང་ཐུན་ལ་གཉིད་འོད་གསལ་གྱི་སྦུབས་སུ་སྦ། ཐམས་ཅད་ལ་ཐུན་འགོར་སེམས་བསྐྱེད། དངོས་གཞི་དམིགས་པ་མེད་པ། རྗེས་བསྔོ་སྨོན་གྱི་རྒྱས་ཐེབས་པ་ནི་དམ་པ་གསུམ་དང་འབྲེལ་བ་ཞེས་བྱ་སྟེ། མེད་ཐབས་མེད་དོ། །གཉིས་པ་སྤྲོས་པ་མེད་པ་ནི། སྒྲོན་མ་སྣང་བྱེད་ལས། ཉིན་མཚན་ཁ་སྦྱོར་རིམ་ཐེབས་བཞིན། །ཞེས་པས་འོད་གསལ་ཐོད་རྒལ་ཉག་གཅིག་ལ་བསླབ་པ་རྣམས་དང༌།


JLAZ012_Page_0329
[མ་དཔེ་གཟིགས་ན་འདིར་གནོན།]

གནས་ལུགས་ལ་དྲོད་ཐོབ་པའི་སྤྱོད་ཡུལ་ཡིན་ཏེ། ཉིན་མོ་བྱ་བ་དགུ་ཕྲུགས་སུ་བཏང་ནས་བཞུགས་སྟངས་དང་མི་འབྲལ་བས་སྐུ་དང་ཐིག་ལེའི་ཀློང་དུ་རིག་པ་བརྗོད་མེད་དུ་གཞག །མཚན་མོ་ལ་ཆ་གསུམ་དུ་བྱས་པའི་སྲོད་ལ་དྲང་སྲོང་གི་འདུག་སྟངས་དང་བཅས་དབང་པོ་གནད་དུ་བསྡུ་བ་ནི། ལྟེ་བར་པདྨ་དམར་པོ་འདབ་བཞིའི་སྟེང་དུ་ཨ་ཐུང་དམར་པོ་རེག་བྱ་ཚ་བ་ལས་མེ་འབར། དབུ་མ་ནས་ཡར་སོང༌། སྤྱི་བོའི་ཧཾ་ལ་ཕོག་པས་ཐིག་ལེའི་ཐིགས་པས་མེའི་གསོས་བྱས། ཤིན་ཏུ་འབར། ལས་དང་བག་ཆགས་བསྲེགས། བདེ་སྟོང་གི་ངང་ལ་བཞག དགུང་ལ་སེང་གེའི་འདུག་སྟངས་དང་བཅས་ཤེས་བྱ་བུམ་པར་བསྡུ་བ་ནི། སྙིང་གི་ནང་དུ་ཨ་དཀར་པོ་ཤིན་ཏུ་འཚེར་བ་གཅིག་དང༌། ཚངས་པའི་བུ་གར་ཨ་དཀར་པོ་གཅིག །དེ་གཉིས་ཀྱི་བར་ཨ་བ་དྷཱུ་ཏཱིའི་ནང་ནས་ཨ་དཀར་ཤེལ་གྱི་ཕྲེང་བ་བརྒྱུས་པ་ལྟ་བུ་གཅིག་ལ་གཅིག་ཐིམ་གྱི་རྐྱེན་ལས་དབུ་མའི་ནང་རྒྱུ་སྐར་ཉི་ཤུར་གསལ་བ་ལྟ་བུར་སྒོམ་པ་ནི་གཉིད་འོད་གསལ་གྱི་སྦུབས་སུ་སྦ་བའི་གནད་དོ། །ཐོ་རེངས་ལངས་མ་ཐག་ཏུ་ཧ་ཞེས་དབུགས་རིང་བ་གསུམ་བུས་ལ་སེང་གེའི་འདུག་སྟངས་དང་བཅས་སྤྱི་བོའི་ནམ་མཁའ་ལ་གཞུ་གང་གི་ཐད་ཙམ་དུ་སྙིང་གའི་ཨ་ལས་ཨ་དཀར་པོ་གཉིས་པ་ཞིག་ཆད་དེ་ལིང་ངེར་འདུག་པ་ལ་སེམས་


JLAZ012_Page_0330
[མ་དཔེ་གཟིགས་ན་འདིར་གནོན།]

བཟུང་ངོ༌། །དེ་བཞིན་དུ་བསམ་གཏན་བཞི་དང་འགོག་པའི་ཡེ་ཤེས་རྣམ་པ་མི་རྟོག་པ་སྐྱེ་བའི་ཡན་ལག་རླུང་ལྔའི་ཁམས་རང་སར་ཟད་པར་བྱེད་པའི་གནད། ཨ་དམར་པོ་ལྔ་མེ།བརྩེགས་དང༌། དཀར་པོ་བཞི་ཆུ།བརྩེགས་དང༌། ལྗང་གུ་གསུམ་ རླུང་།བརྩེགས་དང༌། སེར་པོ་གཉིས་ས།བརྩེགས་དང༌། མཐིང་ཀ་ནམ་མཁའ། རྐྱང་པ་ལ་སོགས་པའང་རིམ་པར་སྒོམ་པས་ཨ་ནི་སྐྱེ་མེད་པ་ལ་གནས་པའི་དོན་གྱིས། རྟོག་དཔྱོད་མེ་དང་འདྲ་བ་དང༌། དགའ་བདེའི་ཉམས་ཆུ་དང་འདྲ་བ་དང༌། དྲན་རྟོག་རླུང་འདྲ་བ་དང༌། དྲན་པའི་གཉེན་པོས་བཅིངས་པས་འདྲ་བ་དང༌། སྤང་གཉེན་རང་གི་ངོ་བོ་ཆ་དང་བཅས་པ་དག་པར་བྱེད་པའི་གནད་འདི་ནི་པཎྜིཏ་ཆེན་པོ་བི་མ་ལའི་དགོངས་པ་ཐུན་མོང་མ་ཡིན་པའོ། །དེ་དག་གི་ཚེ་བོགས་སྤྱོད་པས་འདོན་པའང༌། ཉི་ཟླ་ཁ་སྦྱོར་ལས། བུང་བ་ལྟ་བུའི་སྤྱོད་པ་ཡིས། །ཆོས་རྣམས་ཀུན་གྱི་རོ་མྱང་བྱ། །རི་དྭགས་ལྟ་བུའི་སྤྱོད་པ་ཡིས། །འཁྲུལ་བའི་རྐྱེན་གྱུར་ཡུལ་རྣམས་སྤངས། །ལྐུགས་པ་ལྟ་བུའི་སྤྱོད་པ་ཡིས། །འཁྲུལ་པའི་ངག་ནི་མ་ལུས་སྤངས། །ཐི་བྱ་ལྟ་བུའི་སྤྱོད་པ་ཡིས། །གསང་བ་ཐབས་ཀྱི་ཐེ་ཚོམ་བཅད། །སྨྱོན་པ་ལྟ་བུའི་སྤྱོད་པ་ཡིས། །གཅིག་ཏུ་གནས་པའི་ཡུལ་རྣམས་སྤངས། །སེང་གེ་ལྟ་བུའི་སྤྱོད་པ་ཡིས། །འཇིགས་པའི་སེམས་སྤངས་དུར་ཁྲོད་


JLAZ012_Page_0331
[མ་དཔེ་གཟིགས་ན་འདིར་གནོན།]

རྒྱུ། །ཁྱི་ཕག་ལྟ་བུའི་སྤྱོད་པ་ཡིས། །གཙང་དང་དམེ་བའི་རྣམ་རྟོག་སྤངས། །ཞེས་ལས་དང་པོ་པ་ཐོས་བསམ་འཚོ་བ་ལ་ཞུགས་པ་བུང་བ་ལྟ་བུ་ནས། བདེ་སྡུག་དང་བཟང་ངན་རོ་སྙོམས་པ་རྣལ་འབྱོར་དབང་ཕྱུག་གི་སྤྱོད་པའི་བར་རྣམ་པ་བདུན་པོ་རང་གི་རྒྱུད་ཚོད་ལ་དཔགས་ཏེ་སྤྱོད་པས་ལྟ་སྒོམ་ལ་བོགས་ཐོན་པ་ཡིན་ནོ།། །།གསུམ་པ་སྣང་བ་བཞིའི་ས་མཚམས་བཤད་པ་ནི། ཐལ་འགྱུར་ལས། དེ་ལས་སྣང་བ་བཞིར་འགྱུར་ཏེ། །ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ཚིག་ལས་འདས། །ཉམས་སྣང་གོང་དུ་འཕེལ་བ་ཡིས། །འཁྲུལ་པའི་སྣང་བ་ནུབ་པ་དང༌། །བར་དོའི་ཡེ་ཤེས་མངོན་དུ་བྱེད། །རིག་པ་ཚད་ཕེབས་སྣང་བ་ཡིས། །སྐུ་གསུམ་རྟོག་པའི་ལམ་སྣང་འདས། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་བཅད། །ཅེས་དག་བྱ་དག་འབྲས་ལས་ས་མཚམས་བཞིར་བྱུང་བ་ཕར་ཕྱིན་ཐེག་པའི་ལམ་ལྔ་དང་ཕྱོགས་མཚུངས་པ་ལས། ལམ་ཁྱད་མྱུར་བུལ་གྱི་སྒོ་ནས་ཤིང་རྟ་དང་ཉི་ཟླའི་འགྲོས་ལྟ་བུའི་ཁྱད་པར་ཆེ་བ་རང་བཞིན་ཐེག་མཆོག་རྒྱལ་པོའི་སྣང་བ་བཞི་ལས་དང་པོ་ཆོས་ཉིད་མངོན་སུམ་གྱི་སྣང་བ་ནི། དེ་ལྟར་ཉིན་མོ་ཆོས་སྐུའི་རྟེན་ཉི་མ་དང་མན་ཤེལ་བསླབ་ཅིང༌། མཚན་མོ་ལོངས་སྐུའི་རྟེན་ཟླ་བ་དང་ཆུ་ཤེལ་ལ་བསླབ་


JLAZ012_Page_0332
[མ་དཔེ་གཟིགས་ན་འདིར་གནོན།]

པས། ཉིན་པར་མིག་གི་ཚ་བ་འཕེལ་བའི་གེགས་སྒྲོལ་ཞིང་ཚ་གྲང་སྙོམས་པར་བྱེད་ལ། ནང་ནུབ་སྤྲུལ་སྐུའི་རྟེན་ཨ་ལོ་ཀེ་ལ་བལྟས་པས་བརྩོན་འགྲུས་ལམ་དུ་ཁྱེར་བདེ་ཞིང་དེ་དག་ཀྱང་བལྟ་བྱའི་རྟེན་དང་མ་རེག་ཙམ་ལ་ཐོག་མར་གོམས་སུ་བཅུག་ནས། རིམ་གྱིས་འོག་དང་ཟུར་ལ་ཁྲིད་པར་བྱ་ཞིང༌། དེ་ཡང་དཀར་ཤས་ཆེ་ན་གཡས། སེར་ཤས་ཆེ་ན་གྱེན། ལྗང་ཤས་ཆེ་ན་གཡོན། དམར་ཤས་ཆེ་ན་ཐུར། མཐིང་ཤས་ཆེ་ན་དབུས། ལྔ་ལྡན་མཉམ་པར་ཤར་ན་རང་སོར་གཞག་ཅིང༌། ཐིག་ལེའི་སྣང་བ་མ་མཐོང་ན་མིག་གཉིས་མཉམ་པར་བལྟ་བ་གནད་ཡིན་ལ། དེའི་ཚེ་སྙིང་གའི་བདེ་གཤེགས་སྙིང་པོའི་གདངས་དབྱིངས་ཀྱི་སྣང་བ་འཇའ་ཚོན་རིས་དང་པོར་མཐོང་བ་ནས་བཟུང་སྟེ། ཐིག་ལེ་སྟོང་པའི་སྒྲོན་མ་འོད་ཟླུམ། ཐིག་ཕྲན་རྣམ་པ་གསུམ་འབྲེལ་ལ་སོགས་པ་གསལ་འགྲིབ་ཀྱི་རྣམ་པ་ཅན་དུ་འཆར་ལ། དེ་དག་གི་གོ་མཚམས་སུ་ཉི་མ་དང་འོད་ཟེར་བཞིན་ཀ་དག་གི་རིག་པ་སྟོང་གསལ་བརྗོད་དུ་མེད་པའི་གདངས་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དུ་སྣང་བ་ལ། བྱད་དང་མེ་ལོང་གི་གཟུགས་བརྙན་བཞིན་དངོས་དང་བདག་ཉིད་གཅིག་པ་དེ་ལས་དེ་བྱུང་གི་འབྲེལ་པར་གྲུབ་པའི་ཆ་ནས་རིག་པ་རྡོ་རྗེ་ལུ་གུ་རྒྱུད་ཅེས་རྒྱུ་མིང་འབྲས་བུར་ཆགས་པའང༌


JLAZ012_Page_0333
[མ་དཔེ་གཟིགས་ན་འདིར་གནོན།]

ཤེས་དགོས་ལ། གནད་འདི་མ་རྟོགས་པར་ཆོས་ཉིད་དངོས་པོར་འཛིན་པའི་སྒྲིབ་བྱེད་ལ་དམ་དུ་འཁྱུད་པ་དག་གིས་རྫོགས་པ་ཆེན་པོའི་གྲུབ་མཐའི་ཕྱོགས་ཙམ་ཡང་ཤེས་པ་མ་ཡིན་ནོ། །དེའི་ཕྱིར་རིག་པ་དེ་རྩའི་གནད་ལ་བརྟེན་ནས་གྲོལ་བའི་རྟགས་སུ་ཕྲ་ཞིང་འཁྱོག་པའི་བྲེང་ཡོད་ལ་ཐིག་ལེ་ལ་བརྟེན་ནས་གྲོལ་བའི་རྟགས་སུ་འཁྱོགས་མཚམས་ལ་ཐིག་ལེ་ཕྲ་མོ་ཟུང་འབྲེལ་ཡོད་ཅིང༌། རླུང་གི་གནད་ལ་བརྟེན་ནས་གྲོལ་བའི་རྟགས་སུ་འགྲོ་འོང་ཅན་དུ་ཡོད་པས་ཡན་དུ་མི་འཇུག་པར་དབྱིངས་དང་ཐིག་ལེའི་རྭ་བར་འཛུད་པ་ལ་གོམས་སུ་བཅུག་པས་གདངས་ཀྱི་སྒྲོན་མ་རྣམས་རྩོལ་བ་མེད་པ་ཇེ་གསལ་ཇེ་བརྟན་དུ་འགྲོ་ཞིང༌། སྒོ་གསུམ་རང་བབས་སུ་དལ་བས་བདེ་གསལ་མི་རྟོག་པའི་ཏིང་འཛིན་དང༌། རྟོག་དཔྱོད་ཀྱི་ཤེས་རབ་ཁྱད་པར་ཅན་འཆར་བས་ཡེ་ཤེས་ཀྱི་གསུམ་ཆ་ལ་དབང་ཐོབ་པས་འདིའི་དུས་སུ་བར་ཆད་ནའང་རང་བཞིན་སྤྲུལ་པར་དབུགས་འབྱིན་པ་ནི་ཕྱིའི་དབྱིངས་སྣང་གི་རྟགས་དང་པོ་ཙམ་མཐོང་བས་མ་ཡིན་པར་ནང་དུ་ཤེས་རབ་ཀྱི་མིག་རྡུལ་དང་བྲལ་བའི་བདེན་པ་མཐོང་བའི་གནད་ཀྱིས་ཡིན་ཏེ། ཀློང་གསལ་ལས། རིག་པ་མངོན་སུམ་མཐོང་བ་ནི། །བདེན་པ་མཐོང་བའི་གནད་ཀྱིས་སུ། །ཁམས་གསུམ་ལྡོག་པ་མ་ཡིན་ནོ། །ཞེས་སོ། །གཉིས་


JLAZ012_Page_0334
[མ་དཔེ་གཟིགས་ན་འདིར་གནོན།]

པ་ཉམས་གོང་འཕེལ་ནི། ཀློང་གསལ། གོང་དུ་འཕེལ་བའི་སྣང་བ་ཡིས། །ཉམས་ཀྱི་འཕེལ་ཤན་དབྱེ་བ་གཅེས། །ཞེས་པས། གཞན་དུ་རླུང་སེམས་ཀྱི་འདུ་བས་བསྐྱེད་པའི་བདེ་གསལ་མི་རྟོག་པ་དང༌། དེའི་ཉམས་དུ་བ་དང་སྨིག་རྒྱུ་ལ་སོགས་པ་ཤེས་ཉམས་འདག་བྱའི་རྟགས་བཅུ་ནི་བློའི་འཛིན་པ་དང་བཅས་པས་བཏང་བ་མེད་པའི་ཚུལ། ཀློང་གསལ་ལས། བློ་ནི་ཀུན་རྫོབ་འཁྲུལ་པར་བཤད། །ཅེས་དང༌། དེ་བཞིན་སྤྱོད་འཇུག་ལས་ཀྱང༌། དོན་དམ་བློ་ཡིས་སྤྱོད་ཡུལ་མིན། །ཞེས་གསུངས་པའི་ཕྱིར་རོ། །འདིར་རང་བཞིན་རྫོགས་པ་ཆེན་པོ་ནི། རྒྱུད་ལས། ནང་དུ་སྟོང་པའི་ཉམས་ཤར་བས། །ཕྱི་རུ་གསལ་བའི་ཡེ་ཤེས་ནི། །ཞེས་ནང་དུ་ཆོས་ཉིད་ཀྱི་ངོ་བོ་སྟོང་པར་མཐོང་བས། དེའི་གདངས་རང་བཞིན་གསལ་བའི་ཡེ་ཤེས་ཕྱི་རོལ་དུ་མི་འགྱུར་བར་འཕེལ་བ་དང༌། ནང་དུ་རྩལ་འོད་དུ་དྭངས་པ་དང༌། གསང་བར་ཉོན་མོངས་པ་གྲོལ་བ་མཉམ་པར་སྟོན་པས་ཡིད་དཔྱོད་ལ་རག་མ་ལུས་ཤིང༌། མི་བསླུ་བར་ངེས་པའི་ཕྱིར་སྣང་ཉམས་ཞེས་བརྗོད་ལ། ཇི་ལྟར་འཕེལ་ན་རྩ་རྒྱུད་ལས། ཉམས་ཀྱི་སྣང་བ་གོང་འཕེལ་ནི། །ཡེ་ཤེས་ཁ་དོག་ཕྱིར་བྱུང་ནས། །གྱེན་འགྲེང་དང་ནི་རྩིབས་ཤར་དང༌། །ཐིག་ལེ་སྣ་ཚོགས་སྐུ་ཉིད་དང༌། །


JLAZ012_Page_0335
[མ་དཔེ་གཟིགས་ན་འདིར་གནོན།]

རགས་པར་སྣང་བའི་ཡུལ་ལས་འདས། །ཞེས་པས་འོད་སྣང་ཆེར་མཆེད་དེ་དབྱིངས་རིག་སྨིན་མཚམས་ལས་བྲལ་བར་གྱུར་ཏེ། འོད་ལྔ་རྩིབས་ཤར་དང༌། གྱེན་འགྲེང་དང༌། ཟླུམ་འཁྲིགས་དང༌། མཆོད་རྟེན་ལྟ་བུ་དང༌། པདྨ་སྟོང་ལྡན། མཁར་ཐབས་དང༌། མདའ་དང་མདུང་རྩེ་ལྟ་བུ་དང༌། དྲྭ་བ་དྲྭ་ཕྱེད། མིག་མངས་རིས་ལ་སོགས་པ་མ་ངེས་པར་སྣང་ལ། ཐིག་ལེའི་སྒྲོན་མ་ཡང་སྲན་མ་ཙམ་ནས་བསེ་ཕུབ་ཙམ་དུ་རིམ་གྱིས་འཕེལ་ཞིང༌། རིག་པ་འདབ་ཆགས་འཕུར་སྐྱེན་པ་དང༌། རི་དྭགས་རྩིབས་ལ་རྒྱུག་པ་དང༌། ཤར་ཎ་དལ་གྱིས་འགྲོ་བ་དང༌། བུང་བ་མེ་ཏོག་ལ་ལྡིང་བ་ཙམ་དུ་དལ་བུར་འགྲོ། མདོར་བསྡུ་ན་ཇི་ཙམ་གོམས་པ་བརྟས་པ་ལས་འོད་སྣང་རྒྱ་ཆེར་འཕེལ། རིག་པ་དལ་དུ་འགྲོ་བ་ལ་ཅུང་ཟད་གོམས་པ་དང༌། བར་དུ་གོམས་པའི་ཐ་སྙད་བཏགས་ཤིང་མཆོག་ཏུ་གོམས་པའི་ཚད་ནི་སྒྲོན་མ་སྣང་བྱེད་ལས། སྣང་བ་ཐམས་ཅད་ཐིག་ལེ་རུ། །ཤར་ནས་དཀྲིག་གིས་གནས་པ་ན། །མཆོག་ཏུ་གོམས་པའི་ཚད་ཡིན་ནོ། །ཞེས་གང་དུ་བལྟས་པའི་སྟོང་ཁམས་འོད་གསལ་གྱི་སྣང་བས་ཁྱབ་ཅིང་འགུལ་འཕྲིགས་མེད་པར་གཏན་ལ་ཕབ་པ་ཡིན་ལ། དེའང་དབྱིངས་སྣང་རེ་ལྡེ་ཙམ་ལ་མཆེད་དུས། རྩིབས་ཤར་ལ་མདུན། གྱེན་འགྲེང་ལ་ཐུར། གྲུ་བཞི་ལ་གཡས། ཟླ་གམ་ལ་


JLAZ012_Page_0336
[མ་དཔེ་གཟིགས་ན་འདིར་གནོན།]

སྟེང༌། གྲུ་གསུམ་ལ་ཐུར། ཟླུམ་པོ་ལ་གཡོན། མཁར་ཐབས་ལ་མཉམ་པར་བལྟ་བ་གནད་ཡིན་ལ། གོམས་པ་ཆེ་ཆུང་གི་བར་ཆད་པའི་གྲོལ་ཚད་ཀྱིས་མཚམས་དབྱེ་ན། དབྱིངས་རིག་སྨིན་མཚམས་བྲལ་ནས་ཡེ་ཤེས་བཞི་སྦྱོར་གྱི་སྣང་བས་གྲོལ་ནས་ཕྱིན་ཆད་འཁོར་བར་མི་འཇུག །གྲུ་ཆད་ཀྱི་རྣམ་པར་ཤར་ན་ཚོམ་བུའི་སྣང་བ་ལ་གྲོལ་ནས་རང་བཞིན་སྤྲུལ་པར་དབུགས་འབྱིན། སྣང་བ་ཐམས་ཅད་འོད་ལྔར་སྨིན་ཅིང་དབྱིངས་སྣང་ཟླུམ་འཁྲིགས་སུ་པད་འདབ་བཞི་བཞིས་བརྒྱན་པའི་ཚོམ་བུ་ཤར་ན་འོད་གསལ་ཤར་བའི་སྐད་ཅིག་མ་དང་པོར་བར་དོ་མེད་པར་དབུགས་འབྱིན་པ་ནི་རྒྱུད་ཀྱི་བུའི་དགོངས་པ་ཡིན་ཏེ། ཡར་མཚམས་ལས་ནི་སོར་བཞི་ལས། །བྲལ་བའི་སྐྱེས་བུ་སྐལ་བཟང་དེ། །འཁོར་བར་འཇུག་པ་ག་ལ་སྲིད། །གྲུ་ཆད་རྣམ་པར་གང་སྣང་བ། །སྤྲུལ་པའི་ཡོན་ཏན་འདིས་བསྒྲུབ་པོ། །མཐོང་བའི་ཡུལ་ཙམ་གང་སྣང་བ། །ཚོམ་བུ་ལ་ནི་དེ་བཞིན་ནོ། །ཞེས་སོ། །རྒྱུ་མཚན་དེས་པཎྜི་ཏ་ཆེན་པོ་བི་མ་ལས་བཤད་མ་ཐག་པའི་ཚོམ་བུའི་སྣང་བ་ཉམས་གོང་འཕེལ་གྱི་མཐར་ཐུག་པར་བཞེད་ནས། ལྷ་སྐུར་ཤར་བ་ཕན་ཆད་རིག་པ་ཚད་ཕེབས་སུ་མཛད། སློབ་དཔོན་ཆེན་པོ་པདྨའི་ཞབས་ཡབ་ཡུམ་ཟུང་འབྲེལ་ནས་སྣང་བའི་འཕེལ་ཆ་ཟད་པའི་བར་ལ་རིག་


JLAZ012_Page_0337
[མ་དཔེ་གཟིགས་ན་འདིར་གནོན།]

པ་ཚད་ཕེབས་སུ་བཞེད་པས། སྐུ་རྐྱང་པ་ཉམས་གོང་འཕེལ་དུ་བཞག་པ་ལྟར་མཛད་པ་ཡང་ཁོ་བོས་དགོངས་པ་གཅིག་པར་མཐོང་སྟེ། ཀློང་གསལ་ལས། སྐུ་ཤར་ཉམས་ཀྱི་འཕེལ་རྫོགས་ན། །བར་དོའི་སྣང་བ་འདིར་ཆོད་པས། །ལོངས་སྤྱོད་ངོས་ཟིན་བར་དོ་སྟོངས། །ཞེས་སྐུ་ཤར་པ་དེ་ཉམས་གོང་འཕེལ་གདོན་མི་ཟ་བར་རྫོགས་པའི་རྟགས་སུ་བཤད་པས། ཚད་ཕེབས་ཀྱི་འགོ་ཟིན་པར་ཡང་དོན་གྱིས་བསྟན་ལ། འདི་ལྟར་ཕ་རི་ལ་བལྟོས་ནས་ཚུར་རི། ཚུར་རི་ལ་བལྟོས་ནས་ཕ་རིར་བཞག་པ་བཞིན། ལྷ་སྐུ་རྐྱང་པ་ནི་ཉམས་དེ་གཉིས་ཀ་ལ་རེག་ཅིང་དེ་ལ་དེར་བརྟེན་གྱིས་འབྲེལ་བ་ཅན་དུ་གྲུབ་པས་སོ། །སློབ་དཔོན་རྣམ་གཉིས་ཀྱི་དགོངས་པ་ཀུན་མཁྱེན་ཆེན་པོས་ཐད་ཀར་ཕྱེས་ནས་བཞག་པ་ཙམ་ལ། རྗེས་འཇུག་རྣམས་ནས་དོན་གྱི་དབྱིངས་འཇལ་མ་ཤེས་པར་འདི་དང་འདིའོ་ཞེས་དཔྱད་བཟོད་པར་རློམ་པ་ནི། བྱིས་པའི་རྣམ་ཐར་ཙམ་དུ་ཟད་དོ། །ཕྱིར་སྣང་བའི་འོད་གསལ་ལ་རྩལ་འཕེལ་བ་བཞིན་དུ་ནང་དུའང་རིག་པའི་འོད་གསལ་ཏིང་ངེ་འཛིན་སྤྱན་དང་མངོན་ཤེས་ལ་སོགས་པ་འཆར་བ་ཡིན་ནོ། །གསུམ་པ་རིག་པ་ཚད་ཕེབས་ཀྱི་སྣང་བ་ནི། ཆོས་ཉིད་གང་དུའང་མ་ཕྱེ་བའི་རྩལ་བྱད་དང་མེ་ལོང་གི་རྣམ་པར་ཤར་བས་རིག་པའི་གཤིས་ལ་སྐུ་གསུམ་ཡེ་རྫོགས་སུ་ཡོད་པའི་ལོངས་སྤྱོད་རྫོགས་པའི་


JLAZ012_Page_0338
[མ་དཔེ་གཟིགས་ན་འདིར་གནོན།]

སྐུའི་ཡོན་ཏན་མ་ལུས་ཤིང་ལུས་པ་མེད་པ་འདིར་ལམ་གྱི་སྣང་བ་ལ་རྩལ་རྫོགས་པ་ནི་རིག་པ་ཚད་ཕེབས་ཀྱི་དོན་པོ་ཡིན་པར་དུས་དེ་ཙམ་ན་ཁོ་བོ་ཅག་གིས་རྟོགས་ཏེ། གྲུབ་པའི་མཐའ་གཞན་དུ། དེ་བཞིན་གཤེགས་པའི་ཁམས་ལ་སྐུ་དང་ཡེ་ཤེས་ཀྱི་ཡོན་ཏན་ཡོད་པ་དེ་ཉིད་ཐོབ་བྱའི་མཐར་འཛིན་དུ་འདོད་ནས་བཞིན་ལག་གི་རྣམ་པ་ཅན་དུ་ཤར་བའི་མཚན་དཔེ་དོན་དུ་གཉེར་བ་གང་ཞིག་ལ་འབྲས་བུ་རང་རྒྱུད་པར་གོལ་བའི་ཆོམ་རྐུན་ལྟར་མི་མངོན་པར་འཇུག་པ་ནི་ཆོས་ཅན། ཨ་ལ་ལ་རང་བཞིན་ཐེག་མཆོག་རྒྱལ་པོའི་དགོངས་པ་འདི་ཙམ་ཡང་བསམ་གྱིས་མི་ཁྱབ་པར་སྣང་མོད་དེ། གྲུབ་པའི་མཐའ་ཇི་བཞིན་སློང་མི་ཤེས་པ་དག་གིས་སྣང་བའི་འཆར་ཚུལ་ཙམ་ལ་སྤྱི་བརྟོལ་གྱིས་བསྔགས་པ་བརྗོད་པ་ལས་དོན་ཁྱད་པར་བ་ཅང་སྟོན་པར་མ་ནུས་ཤིང༌། ཕྱོགས་རེའི་གཞུང་ལ་འདྲིས་པ་དག་གིས་ཁ་ཟེར་བ་དང༌། ཕྱར་ཀ་སྒྲོག་པའི་རྐྱེན་དུ་གྱུར་པའི་ལམ་ལྟར་སྣང་བ་དུ་མས་ཁེངས་པ་ནི་གྱ་ཚོམ་ཅན་དང༌། རྣམ་པར་མ་བརྟགས་པ་གཉིས་ནང་འཛོམས་པ་ལས་བྱུང་གིས། དེའི་ཕྱིར་གངས་ཅན་འདིར་མཆོག་ཏུ་གསང་བའི་ཐེག་པ་འདི་སྒྲོག་པ་ལ་རྒྱལ་བའི་དབང་པོ་དྲི་མེད་འོད་ཟེར་གྱི་གྲུབ་པའི་མཐའ་ཙམ་དུ་ཟད་པ་གདོན་མི་ཟ་བར་ཤེས་པར་བྱའོ། །ཞེས་གླེང་ནས། ཚད་ཕེབས་ཀྱི་


JLAZ012_Page_0339
[མ་དཔེ་གཟིགས་ན་འདིར་གནོན།]

རང་བཞིན་ནི། རིག་པའི་ཡོན་ཏན་འཕེལ་བའི་ཆ་སྟོབས་སུ་གྱུར་པ་ལས་སྣང་བ་ཐམས་ཅད་འོད་དུ་གསལ་ཞིང༌། ཡེ་ཤེས་ལྔའི་ཆོས་ཉིད་ལ་བྱན་ཚུད་པས་ཐིག་ལེ་ལྔ་ཚོམ་དུ་ཤར་བའི་དབུས་ན་སྤྲུལ་སྐུའི་སྦྱངས་པ་རྣམ་པར་དག་པ་ལས་བྱུང་བའི་གཙུག་ཏོར་དང་བཅས་པའི་དབུ་ཕྱེད་པ་ནས་སྐུ་རྐྱང་པའི་བར་དང་ལོངས་སྐུའི་ཡེ་ཤེས་ཚད་དུ་ཕྱིན་པས། བཅོམ་ལྡན་འདས་མི་བསྐྱོད་རྡོ་རྗེ་ལ་སོགས་པའི་རིགས་ལྔའི་སངས་རྒྱས་རྣམས། སྐུ་ཉི་ཚེ་བ་དང༌། རྒྱན་རྫོགས་ནས་ཡུམ་དང་བཅས་པའི་རྣམ་པ་རྫོགས་པར་འཆར་ཞིང༌། ཆོས་སྐུའི་སྦྱངས་པ་རྣམ་དག་པ་ལས་བྱུང་བའི་གཙོ་དང་འཁོར་གྱི་ཚོམ་བུ་ཐ་དད་པའི་དཀྱིལ་འཁོར་མུ་ཁྱུད་ཀྱིས་ར་བ་དང་བཅས་པར་མཆོག་ཏུ་གསལ་བས་གདོས་བཅས་ཀྱི་སྣང་བ་རང་འགགས་ཏེ། ཤེས་པ་གང་དུའང་ཚུད་པས་བེམ་པོ་འགུལ་བ་དང་ལུས་ཀྱང་རྡུལ་ཕྲན་ཆ་མེད་དུ་མཐོང་ཞིང་རི་བྲག་ལ་སོགས་པ་ཟང་ཐལ། གཟུང་འཛིན་ཐད་ཀར་ཞིག་པས་སྨྱོན་པ་ཁྲོག་ལངས་པ་བཞིན་གང་ལའང་ཉམ་ང་དང་བག་ཚ་བའི་ཁུངས་སྟོར་ནས་ཅིར་སྣང་དག་པ་རབ་འབྱམས་སུ་ཤར་བའི་སྐབས་ཡིན་ཏེ། སྐུ་གདུང་འབར་བ་ལས། གང་གི་འོད་ལ་སུ་གོམས་པ། །རང་གིས་མཐོང་བའི་སྤྱོད་ཡུལ་དུ། །ས་དང་ཆུ་དང་མེ་དང་རླུང༌། །འབྱུང་བཞིའི་སྣང་བ་རང་ནུབ་ནས། །


JLAZ012_Page_0340
[མ་དཔེ་གཟིགས་ན་འདིར་གནོན།]

རིམ་གྱིས་ཁ་དོག་ལྔ་ལ་སྤྱོད། །འོད་དང་བྲལ་བ་མེད་པའི་རྟགས། །གཞན་ཡང་མཐོང་བའི་སྤྱོད་ཡུལ་དུ། །སྨྱོན་པ་བཞིན་དུ་ཐོགས་མེད་པར། །རི་བྲག་རྣམས་ལ་ཟང་ཐལ་དང༌། །དེ་བཞིན་ས་གཏིང་འཛུལ་བར་ནུས། །ཆུ་རྣམས་ལ་ཡང་བྱིང་བ་མེད། །ཅེས་སོ། །དེ་དག་ནི་ཚད་ཕེབས་ཀྱི་རང་བཞིན་སྤྱིར་བསྟན་པ་སྟེ། ནང་གསེས་ཀྱི་ཁྱད་པར་ཅུང་ཕྱེ་ན། རྩ་རྒྱུད་ལས། སོ་སོའི་ལུས་ཀྱི་རྡུལ་ཕྲན་ནས། །བར་སྣང་འོད་ཀྱི་སྐར་ཁུར་སྣང༌། །དེ་ལས་འོད་ཟེར་ལྕགས་ཀྱུའི་དབྱིབས། །ཕྲ་ཞིང་འཁྲིལ་བས་སྣང་བ་འཛིན། །ལུས་ཀྱི་རྡོས་པ་རང་འགགས་ནས། །ཟང་ཐལ་དྲི་མེད་འོད་ཀྱི་ལུས། །དབུས་ན་ཨ་ཡི་མཚན་མ་དང༌། །མཛོད་སྤུ་འོད་ཟེར་འདོམ་གང་ཚད། །ཐོར་ཚུགས་རླུང་གིས་འདེགས་པར་སྣང༌། །ཞི་སྐུ་ལག་པའི་སོར་མོ་ལས། །འོད་ཀྱི་ཕྲེང་བས་རྣམ་པར་འཁྲིགས། །སྒྲ་མེད་སེམས་ཀྱིས་སྤྱོད་པ་སྟེ། །མགོ་བོ་ཐོད་པའི་གཞལ་ཡས་ལས། །ཧེ་རུ་ཀ་རྣམས་མངོན་པར་འབྱུང༌། །འདི་དུས་རང་ལུས་ཚད་ལ་ཕེབས། །ཞེས་ལུས་ཚད་ལ་ཕེབས་པས་སྣང་བ་མ་ལུས་པ་སངས་རྒྱས་ལྔའི་ཞིང་དུ་གསལ་བའི་ཐུགས་ཀ་འོད་ཟེར་ཀྱི་སྐར་ཁུང་ནས་རང་གི་སྙིང་དབུས་ཨའི་རྣམ་པ་ཅན་ལ་འོད་


JLAZ012_Page_0341
[མ་དཔེ་གཟིགས་ན་འདིར་གནོན།]

གདངས་ཟུག་པར་འབྲེལ་བས་འོད་ཟེར་ཆེན་པོའི་དབང་ནོད་ཅིང༌། མཛོད་སྤུའི་འོད་ཟེར་འདོམ་གང་བར་གསལ་བས་སྤྱི་བོའི་གཙུག་ན་ཡེ་ཤེས་ཀྱི་རླུང་གི་ཐིག་ལེ་འཁར་གཞོང་ཙམ་དགུའམ། ལྔ་བརྩེགས་པར་སྣང་ཞིང༌། དེ་ཡང་དོན་དམ་པར་ཐོར་ཚུགས་ནི་གཙུག་ཏོར་ཡིན་ལ། རླུང་གིས་འདེགས་པའི་སྒྲས་ཡེ་ཤེས་ཀྱི་རླུང་དབྱིངས་སུ་འཁྱིལ་བས་དེ་ཉིད་བལྟར་མི་མངོན་པའི་ཆོས་སུ་གྲུབ་པས་མཚོན་མཚན་དང་དཔེ་བྱད་ཀྱི་ངོ་བོར་འབར། ཡེ་ཤེས་ཀྱི་རླུང་ལག་སོར་ལ་ཆུད་པས་དེ་ཉིད་འོད་ལྔར་འཁྲིགས་འོད་རྩ་ཕྲ་མོ་རྣམས་སུའང་ཡེ་ཤེས་ཀྱི་གདངས་གསལ་བས་བ་སྤུའི་སྒོ་དང༌། རྡུལ་ཕྲ་རབ་རེ་རེའང་སངས་རྒྱས་ཀྱི་ཞིང་ཁམས་ལོངས་སྐུའི་སྙིང་པོ་ཅན་དུ་རྫོགས་པས་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དང༌། དུང་ཁང་དུ་ཁྲོ་བོའི་དཀྱིལ་འཁོར་སྣང་བའི་གདངས་ཚངས་བུག་གི་འོད་རྩ་ལས་འཐོན་ཏེ་སྟེང་གཞི་མ་ལུས་པ་ཁྲག་འཐུང་རོལ་པའི་དཀྱིལ་འཁོར་དུ་གསལ་བ་ནི་ཞི་ཁྲོ་ལོངས་སྤྱོད་རྫོགས་པའི་སྐུར་ལམ་དུ་ཤར་བས་ལུས་ཚད་ལ་ཕེབས་པ་ཞེས་བྱའོ། །དེ་བཞིན་དུ་སེམས་ཚད་ལ་ཕེབས་པས་ཀུན་ཏུ་རྟོག་པའི་སེམས་དང༌། ཡིད་དང༌། རྣམ་པར་ཤེས་པ་རྣམས་ནུབ་ནས་ཆོས་དབྱིངས་དྲི་མེད་དུ་རང་གསལ་བས་གཞན་གྱི་སེམས་ཤེས་པ་ལ་སོགས་པའི་


JLAZ012_Page_0342
[མ་དཔེ་གཟིགས་ན་འདིར་གནོན།]

མངོན་པར་ཤེས་པ་དྲུག་དང༌། ཐོགས་རེག་གིས་བཅད་པའི་ཕ་རོལ་གྱི་ཡུལ་དང་རྒྱལ་བའི་ཞིང་ཁམས་ཚད་མེད་པ་མཐོང་བའི་སྤྱན་ཏེ་སྣང་བའི་སེམས་རྣམ་པར་དག་པ་དང། སྟོང་པའི་སེམས་དག་པས་ཤེས་རབ་དང་ཏིང་ངེ་འཛིན་གྱི་སྒོ་དཔག་ཏུ་མེད་པ་ལ་དབང་འབྱོར་བ་ལ་སོགས་ཏེ། མདོར་ན་ལུས་ཀྱི་རྡོས་པ་དག་པས་རྩ་རླུང་རང་དག །དེ་དག་པས་གློ་བུར་གྱིས་བསྡུས་པའི་ཚོགས་པ་ཞིག་སྟེ་ལུས་སེམས་ཀྱི་འབྲེལ་མངོན་གྱུར་རགས་པ་ལོག །ཕྲ་བ་བག་ལ་ཉལ་གྱི་ཆ་སྐར་མདའ་རྒྱུག་པ་ཙམ་ལས་བསྐྱེད་སྡུད་ཀྱི་སྣང་ཆ་གཉིས་འཛིན་པའི་དུས་ཏེ། ཐལ་འགྱུར་ལས། ལུས་སེམས་འབྲེལ་བ་ཆོད་པ་ནི། །ཟག་བཅས་ཟད་པའི་ལུས་ལ་ཡང༌། །ཕྱིར་འབྱུང་མཚན་ཉིད་གསལ་བའི་སེམས། །སྐར་མདའ་འཕྲོ་བའི་ཚུལ་གྱིས་ཀྱང༌། །ནམ་མཁའི་ཁམས་སུ་གསལ་བར་མཐོང༌། །ཞེས་དང༌། ལུས་ནི་འོད་གསལ་དག་པ་ལ། །རླུང་ནི་མེ་སྟག་འཕྲོ་བ་བཞིན། །གཅིག་ཏུ་མི་གནས་རང་གསལ་གཞི། །སྣང་ཆ་གཉིས་ཀྱི་ཚུལ་དུ་འབྱུང༌།།འདིས་ནི་ལུས་སེམས་འབྲེལ་བཅད་ནས། །ཁམས་གསུམ་ལྡོག་པ་མ་ཡིན་ནོ། །ཞེས་སོ། །ཞར་ལ་འཕྲོས་པ་འདི་བརྗོད་དེ། དེ་ཡང་གངས་རིའི་ཁྲོད་འདིར་མོས་པས་བཟུང་བའི་གྲུབ་པའི་མཐའ་ཐ་དད་པ་ལས་


JLAZ012_Page_0343
[མ་དཔེ་གཟིགས་ན་འདིར་གནོན།]

ཁ་ཅིག་ནི་སྟོང་གཟུགས་ཀྱི་སྣང་བ་འཁྲུལ་སྣང་ཉག་གཅིག་ཏུ་འཇོག་ཅིང༌། རྫོགས་པ་ཆེན་པོའི་སྣང་བཞི་ལའང་མུ་སྟེགས་ཉི་མ་བལྟ་བའི་ལུགས་ཞེས་ཆོས་ལ་སྡང་བའི་རྩ་ལྟུང་སོགས་ལ་བག་ཚ་བ་མེད་པར་འཇུག་པའི་བཤེས་གཉེན་སྤྱང་ཀི་དང་བྱི་ལའི་སྡེ་ཚོགས་དག་གིས། རང་ཉིད་དགའ་བའི་དུས་ཀྱི་འཁོར་ལོ་ལ་སོགས་པའི་སྟོང་གཟུགས་ཀྱི་སྣང་བ་ལ་བརྒྱུད་ནས་ཆུ་འདྲེན་པའི་རྣམ་པར་ཤེས་པ་ལྐོག་ཏུ་གྱུར་པས་བློ་གྲོས་ཕུར་ཁུང་ཐུག་པའོ།།ཁ་ཅིག་ནི་སངས་རྒྱས་ལ་སྐུ་དང་ཡེ་ཤེས་མེད་པར་འདོད་པ་ནི་ལོག་པར་བལྟ་བའོ་ཞེས་སྒྱུ་མའི་སྐུ་ལ་སོགས་པ་མཐར་ཐུག་གི་བསྒྲུབ་བྱར་བྱེད་ཅིང་དོན་དམ་པར་འདོད་པའི་ཕྱོགས་གཉིས་སུ་སྣང་ཡང༌། ཁོ་བོ་ཅག་ནི་བདེ་བཤེགས་སྙིང་པོའི་ཁམས་ཀྱི་ཡོན་ཏན་གཟུགས་ཀྱི་སྐུ་ཡིན་པས་འཁྲུལ་སྣང་ཕྱོགས་གཅིག་ཏུའང་མི་འཇོག་པས་ཟླ་བའི་ཆོས་ཉིད་རང་གི་བོ་ངོས་ཉ་གང་བ་ལྟར་ཡར་འཕེལ་གྱི་ཡོན་ཏན་ཉམས་གོང་འཕེལ་གྱི་སྣང་བས་སྐུ་གསུམ་ལམ་སྣང་དུ་རྩལ་རྫོགས་པར་བྱེད། དེ་ལྟར་སྣང་བའང་རིག་གདངས་ཕྱིར་ཤར་གྱི་གཟུགས་བརྙན་ཙམ་ལས་ངོ་བོ་ཉིད་མ་ཡིན་པས་དོན་དམ་དུའང་མི་འཛིན་པ་གནམ་སྟོང་གི་ཟླ་བ་རང་ངོ་ལ་བཅོས་སུ་མེད་པར་འགྲིབ་པ་ལྟར་སྙིང་པོའི་རང་གདངས་ཕྱིར་སྣང་བ་ཟད་དགོས་པའི་གནད་ཀྱིས་རིག་པ་གཡོ་བྱེད་ཀྱི་རླུང་


JLAZ012_Page_0344
[མ་དཔེ་གཟིགས་ན་འདིར་གནོན།]

ཕྲ་བ་དང་བཅས་ཤིན་ཏུ་རྣམ་པར་དག་པ་བློ་ཟད་ཆོས་ཟད་ཀྱི་སྣང་བ་གདོད་མའི་ནང་དབྱིངས་སུ་བཙན་ས་ཟིན་པར་འདོད་པས་གྲུབ་མཐའ་བློས་བཀོད་པར་ཤེས་ནས་རྩོད་པ་ཆོས་ཉིད་བསམ་གྱིས་མི་ཁྱབ་པའི་ངང་དུ་ཞི་བར་བྱ་སྟེ། ཆོས་རྣམས་ཟད་སར་ཕྱིན་པ་དང༌། །རང་གི་གྲུབ་པའི་མཐའ་ཡང་འཇིག །འདི་དུས་བླ་མའི་མན་ངག་ནུབ། །ལྟ་སྒོམ་སྤྱོད་པའི་མཐའ་སྟོངས་པས། །ཆོས་སྐུའི་སྣང་བ་ཡོད་མ་ཡིན། །སྐུ་དང་ཡེ་ཤེས་རྒྱུན་ཆད་པས། །སངས་རྒྱས་མེད་ཅིང་སེམས་ཅན་མེད། །མདོར་ན་གང་ཡང་གནས་པ་མེད། །སོང་མེད་འོངས་པ་མེད་པའོ། །ཞེས་དབུ་མ་རབ་ཏུ་མི་གནས་པའི་དགོངས་པ་ལ་གཞག་པར་བྱའོ། །བཞི་པ་ཆོས་ཉིད་ཟད་པའི་སྣང་བ་ནི། རྩ་རྒྱུད་ལས། ཆོས་ཉིད་ཟད་པའི་སྣང་བ་ནི། །ཉམས་ཀྱི་སྣང་བ་སྟོངས་ནས་ནི། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་པ་ལས་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་རྣལ་འབྱོར་ཆེན་པོའི་གཞུང་མན་ཆད་དུའང་ཐབས་སྣང་བའི་ཆ་ལ་བསྐྱེད་པའི་རིམ་པ་མུ་མེད་པར་བཀོད་པ་ཉིད་སླར་ངེས་པར་རྫོགས་པའི་རིམ་པ་ཤེས་རབ་སྟོང་པ་ཉིད་དུ་བསྡུ་བ་བཞིན། འདིར་གནད་རྣམ་པ་གསུམ་ལ་བརྟེན་ནས་རླུང་གི་


JLAZ012_Page_0345
[མ་དཔེ་གཟིགས་ན་འདིར་གནོན།]

གཡོ་བ་ཡེ་ཤེས་སུ་འཕེལ། ཆོས་ཉིད་དུ་དག་པའི་མཐུ་ལས་ཕྱི་འབྱུང་ཡུལ་གྱི་འཁྲུལ་སྣང་གི་ཆ་དང་ནང་འཁྲུལ་རྟོག་སེམས་དང་སེམས་བྱུང་གི་བག་ཆགས་རང་འགགས། གསང་བ་འོད་གསལ་གྱི་སྣང་བ་ཐམས་ཅད་ཀྱང་ཆོས་ཉིད་གང་དུའང་བརྗོད་དུ་མེད་པའི་དབྱིངས་སུ་ཐིམ་པ་ལ་ཟད་པའི་བརྡར་བཏགས་པ་སྟེ། དོན་དམ་པར་གནམ་སྟོང་གི་ཟླ་བ་ཅི་ཡང་མེད་པ་ལྟར་སྣང་ཡང་རང་གི་ངོ་བོ་ཆེར་སོང་བ་དང༌། ཆུང་ངུར་སོང་བ་གང་ཡང་མེད་པས་རང་གདངས་དབྱིངས་སུ་ནུབ་པ་ཤེལ་འོད་ནང་དུ་ནུབ་པ་ལྟ་བུའོ། །དེ་ལྟར་དུ་ཟད་པའི་རང་བཞིན་ལ་ཟད་ལུགས་གཉིས་ཀྱི། རིམ་གྱིས་ཟད་པ་ནི་སྣང་བ་བཞི་ཚད་དུ་ཕྱིན་པ་གང་ཡིན་པའོ། །བློ་མཆོག་ཅིག་ཅར་བ་རེ་ཙམ་ནི་མངོན་སུམ་གྱི་སྣང་བ་མཐོང་བ་ཉིད་གོམས་སུ་བཅུག་པ་ལས། གོང་འཕེལ་དང་ཚད་ཕེབས་ཀྱི་རིམ་པ་ལ་མ་ལྟོས་པར་ཟད་པའང་ཡོད་དོ། །ཇི་ལྟར་ནའང་དེའི་ཚེ་གདོས་བཅས་དེངས་པས་འབྱུང་བའི་དགྲས་མི་ཚུགས། ཉོན་མོངས་པ་དེངས་པས་དྲན་པ་དང་དྲན་གཞི་ཝལ་པོ་རྗེས་མེད་དུ་སོང༌། སྣང་བ་དེངས་པས་འགྲོ་བ་དང༌། འདུག་པ་དང༌། ཉི་ཟླའི་སྣང་བ་ལ་སོགས་པ་རང་ཡལ་རྗེས་མེད་དུ་སོང་ནས་འདི་ལྟར་ཡིན་ནོ་ཙམ་དུའང་མ་གྲུབ་པས་གཟུགས་སྣང་ཐམས་ཅད་མྱ་ངན་ལས་འདས་པ་ཞེས་བྱའོ། །དེའི་དུས་ན་ཐོབ་པ་གཉིས་འབྱུང་བ་ནི་འདི་ལྟ་སྟེ།


JLAZ012_Page_0346
[མ་དཔེ་གཟིགས་ན་འདིར་གནོན།]

སྐྱེ་བ་ལ་དབང་ཐོབ་པས་འཕོ་བ་ཆེན་པོའི་སྐུར་བཞེངས་ཏེ་སེམས་ཅན་གྱི་དོན་མཛད་ན་སྣང་བ་རིམ་གྱིས་ཟད་དུས་ལག་སོར་ལྔ་འོད་ཀྱིས་དཀྲིགས་པར་སྣང་བ་ལ་ཤེས་པ་གཏད་པས་སྣང་བ་ལོག་ནས་སྣོད་བཅུད་ཀྱི་རྟེན་དང་བརྟེན་པ་ཆུ་ཟླ་དང་རྨི་ལམ་ལྟ་བུར་མཐོང་ལ། རང་ལུས་ཀྱང་མེ་ལོང་གི་གཟུགས་བརྙན་ལྟར་སྣང་ལ་རང་བཞིན་མེད་པར་ཟང་ཐལ་ཙམ་དུ་རང་གིས་མཐོང་ལ་གཞན་གྱི་མིག་མ་དག་པས་དེ་ལྟར་མི་མཐོང་བའི་ཚུལ་སློབ་དཔོན་ཆེན་པོ་པདྨའི་སྐུ་ལ་བཙན་པོས་ཕྱག་གིས་བཏུད་པས་སྟན་ལ་རེག་པའི་ལོ་རྒྱུས་བཞིན་ནོ། །དེ་ལྟར་རྡུལ་ཕྲན་དེངས་པ་འོད་དུ་གསལ་བས་སྐྱེ་འཇུག་གཉིས་ལ་དབང་ཐོབ་པ་ཐོད་རྒལ་ཁོ་ནའི་ཁྱད་ཆོས་ཡིན་ལ། ཁྲེག་ཆོད་ལ་ལུས་རྡུལ་ཕྲན་དང་སེམས་ཆོས་ཉིད་དུ་དེངས་ནས་ཀ་དག་གི་སར་གྲོལ་བ་ཙམ་ལས་མེད་པའི་ཕྱིར་རོ། །དུས་དེ་ཙམ་ན་བསམ་གྱིས་མི་ཁྱབ་པའི་ཕྲིན་ལས་ཀྱང་དངོས་དང་བརྒྱུད་ནས་རིགས་དྲུག་སོ་སོའི་གནས་སུ་དོན་མཛད་ཅིང༌། ཁྱད་པར་མིའི་འགྲོ་བ་སྨོན་ལམ་མཐུན་པ་སུམ་སྟོང་ལྷག་མེད་དུ་གྲོལ་བར་མཛད་ནས་སླར་ཆོས་ཉིད་གཞོན་ནུ་བུམ་པའི་སྐུར་སངས་རྒྱ་བ་ནི་སློབ་དཔོན་ཆེན་པོ་པདྨའི་ཞབས་དང༌། དྲི་མེད་ཆོས་ཀྱི་བཤེས་གཉེན་མངོན་སུམ་ཚད་མའོ། །ཀུན་མཁྱེན་གྱིས་བཤད་པ་འགའ་


JLAZ012_Page_0347
[མ་དཔེ་གཟིགས་ན་འདིར་གནོན།]

ཞིག་ཏུ་བར་དོའི་སེམས་ཅན་སུམ་སྟོང་ཞེས་པའང་ཡོད་དེ་མིའི་འགྲོ་བའང་སྐྱེས་གནས་ཀྱི་བར་དོ་ཡིན་པས་མི་འགལ་ལོ། །འཇུག་པ་ལ་དབང་ཐོབ་པ་ནི་སྐུའི་རྣམ་པ་དེ་ཉིད་ཀྱི་དུས་དེར་གཞན་དོན་རླབས་པོ་ཆེ་མི་མཛད་པ་ན་སེམས་ཅན་སུམ་སྟོང་ལ་རིག་པ་གཏད་པའི་མོད། ལས་ལ་བཟང་ངན་མེད་པའི་གནད་ཀྱིས་གྲོལ་བར་མཛད་ནས་ན་བུན་ནམ་མཁའ་ལ་དེངས་པ་བཞིན་ནང་དབྱིངས་སུ་ཞུགས་ནས་སྐུ་དང་ཡེ་ཤེས་འདུ་འབྲལ་མེད་པའི་ཕྲིན་ལས་ཀྱིས་འཁོར་བ་མ་སྟོངས་ཀྱི་བར་དུ་གཞན་དོན་མཛད་པའི་ཚུལ། ནང་གསལ་ཐིམ་ལ་མ་རྨུགས་པའི་གདངས་ཕྱིར་གསལ་དུ་སྣང་བ་ལྷུན་སྟུག་པོ་བཀོད་པའི་ཞིང་ཁམས་ལས་བྱད་དང་མེ་ལོང་གི་རྣམ་ཆར་ཤར་བ་ཕྱེད་སྤྲུལ་ལོངས་སྐུ་ལ་སོགས་པ་དང༌། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཆོས་ཉིད་ལས། སེམས་དཔའ་ས་བཅུ་པ་ལ་ལོངས་སྐུ་རིགས་ལྔ་དང་སོ་སོ་སྐྱེ་བོ་དང༌། ཉན་ཐོས། རང་སངས་རྒྱས་ཀྱི་རིགས་ཅན་རྣམས་ལ་མཆོག་གི་སྤྲུལ་པའི་སྐུ་དང་གཞན་ཡང་སེམས་ཅན་གྱི་ཁམས་ཐམས་ཅད་དུ་བཟོ་དང༌། སྐྱེ་བ་སྤྲུལ་པ་ལ་སོགས་པ་འགྲོ་བ་སོ་སོའི་ཁམས་དང༌། དབང་པོ་དང༌། མོས་པ་དང་འཚམ་པས་དོན་མཛད་པའི་ཚུལ་བསྐྱེད་རིམ་གྱི་རྣམ་གཞག་འོག་མིན་བགྲོད་པའི་ཐེམ་སྐས་སུའང་ལེགས་པར་འདོམས་ཟིན་ཏོ།། །།བཞི་པ་མཐའ་རྟེན་


JLAZ012_Page_0348
[མ་དཔེ་གཟིགས་ན་འདིར་གནོན།]

གྱི་མན་ངག་ནི། ཀློང་གསལ་ལས། དེ་ལ་མཐའ་རྟེན་མན་ངག་བཞི། །གོང་མའི་རྒྱབ་ཏུ་མེད་ཐབས་མེད། །ཅེས་མི་འགུལ་བ་གསུམ་གྱིས་གཞི་བཅའ། སྡོད་པ་གསུམ་གྱིས་ཚད་བཟུང༌། ཐོབ་པ་གསུམ་གྱིས་གཟེར་གདབ། གདེང་བཞིས་གྲོལ་ཚད་སྟོན་པ་ལས། དང་པོ་ནི་རྩ་རྒྱུད་ལས། མི་འགུལ་གསུམ་ལ་གཞི་བཅས་པས། །རླུང་སེམས་གནད་དུ་ཕེབས་པའོ། །ཞེས་ལུས་བཞུགས་སྟེང་མི་འགུལ་བས་རྩ་རླུང་རང་དལ། མིག་གཟིགས་སྟངས་ལས་མི་འགུལ་བས་སྣང་བའི་འཕེལ་འཛིན། སེམས་བཟོད་མེད་ལས་མི་འགུལ་བས་དབྱིངས་རིག་ཟུང་དུ་ཆུད་པར་བྱེད་དོ།། །།གཉིས་པ་ནི་རྩ་རྒྱུད་ལས། སྡོད་པ་གསུམ་གྱིས་ཚད་བཟུང་བས། །རྨི་ལམ་ལྡོག་དང་ལུས་ངག་ཡིད། །རྟགས་དང་ཚད་ནི་ངེས་བཟུང་བའོ། །ཞེས་པས། ལུས་བྱ་བ་ལ་མི་གནས་པར་སྡོད་པས་འཁོར་བའི་འཁྲུལ་རྟོག་དང༌། རླུང་འཕེལ་མེད་དུ་སྡོད་པས་རྣམ་རྟོག་གཡོ་བའི་རྐྱེན་ཟད། སྣང་བ་འདར་འཕྲིགས་མེད་པར་སྡོད་པས་ཞིང་ཁམས་ཚད་ལ་ཕེབས་པར་བྱེད་དོ། །འདིའི་ཚེ་རྟགས་སྒོ་གསུམ་ལ་འཆར་བ་དང་ཚད་རྨི་ལམ་གྱིས་བཟུང་བ་གཉིས་ལས། དང་པོ་ཆོས་ཉིད་མངོན་སུམ་གྱི་དུས་བུམ་དབང་གིས་ལུས་སྨིན་པས་བྱ་རྩོལ་མེད་པའི་དོན་ཡན་ལག་ལ་ཞུགས་ནས་རྩ་དལ་བའི་


JLAZ012_Page_0349
[མ་དཔེ་གཟིགས་ན་འདིར་གནོན།]

རྟེན་འབྲེལ་ལུས་རུས་སྦལ་འཁར་གཞོང་དུ་བཅུག་པ་ལྟ་བུའོ། །རྩ་ནང་དུ་རྣམ་ཤེས་ཚུད་པས་བརྗོད་གཞི་དག་པའི་གདངས་ངག་གི་བརྡ་ལ་ཞུགས་ནས་ལྐུག་པ་བཞིན་དུ་སྨྲ་བ་ལ་མི་བརྩོན་ནོ། །རྫོགས་པ་ཆེན་པོ་འཛིན་མེད་རང་གྲོལ་གྱི་དོན་སེམས་ལ་ཞུགས་པས་སེམས་མཁའ་འགྲོ་རྙི་ལ་ཟིན་པ་བཞིན་གར་གཏད་དུ་སྡོད་པའོ། །ཉམས་གོང་འཕེལ་གྱི་ཚེ་རླུང་དབུ་མར་ཐིམ་པས་བཟང་ངན་མེད་པའི་དོན་ལུས་ལ་ཞུགས་པས་ལུས་སྒེག་ཆོས་ངོ་ཚ་དང་བྲལ་བ་སྐྱེས་བུ་ནད་ཀྱིས་གདུངས་པ་ལྟ་བུའོ། །གསང་དབང་གི་ངག་དག་པས་རྫོགས་པ་ཆེན་པོ་དགག་སྒྲུབ་ལས་འདས་པའི་དོན་ངག་ལ་ཞུགས་ནས་ངག་སྨྱོན་པ་རང་ཚིག་རྡོལ་བ་བཞིན་ལྟོས་མེད་བྱུང་རྒྱལ་དུ་སྨྲ་བའོ། །སེམས་བྱུང་གི་རྟོག་ཚོགས་སེམས་སུ་ཞུགས་པས་རྩི་དུག་གིས་ལན་བདུན་མྱོས་པའི་སྐྱེས་བུ་བཞིན་སྐྱེ་མེད་རང་གྲོལ་གྱི་དྲན་སེམས་འཁོར་བའི་བྱ་བ་ལ་མི་འཇུག་གོ། །ཚད་ཕེབས་ཀྱི་དུས་ན་ཤེར་དབང་གི་ནུས་པ་རྩ་རླུང་ལ་ཐེབས་པས་ལུས་འབྱུང་བ་ལྔ་ལ་ཐོགས་པ་མེད་པར་ཟང་ཐལ་བ་གླང་པོ་ཆེ་འདམ་དུ་ཚུད་ཀྱང་གཞན་ལ་མི་ལྟོས་པར་རང་སྟོབས་ཀྱིས་འཐོན་པ་ལྟ་བུའོ། །རྫོགས་པ་ཆེན་པོ་སྨྲ་བརྗོད་ལས་འདས་པའི་དོན་ངག་གིས་སྒྱུར་བྱེད་ལ་ཞུགས་པས་ཤེས་རབ་ཀྱི་དབང་དུ་སྙིང་རྗེ་འདུས་པའི་རྟེན་འབྲེལ་


JLAZ012_Page_0350
[མ་དཔེ་གཟིགས་ན་འདིར་གནོན།]

ལས་ངག་གྲུལ་བུམ་གྱི་ཕྲུ་གུ་གླུ་ལེན་པ་ལྟར་སོང་ནས་ཅི་སྨྲས་གཞན་གྱི་རྣ་བར་འཇུག་ཅིང་ཕན་ཐོགས་པའོ། །རང་ངོ་ཀ་ནས་དག་པས་ཡེ་གྲོལ་བསྐྱར་གཞི་མེད་པའི་དོན་སེམས་ཀྱི་གནས་པ་ལ་ཞུགས་པས་འབྲུམ་ནད་བྱང་བའི་སྐྱེས་བུ་སླར་བསྐྱར་ནས་མི་ལྡོག་པ་བཞིན་ཕྱིན་ཆད་འཁོར་བར་མི་འཇུག་པར་ཐག་ཆོད་པའོ། །ཆོས་ཉིད་ཟད་པའི་དུས་ན་རྫོགས་པ་ཆེན་པོ་སྐྱེ་མཆེད་ལས་འདས་པའི་དོན་གྱིས་རྡོས་པ་དག་པའི་ལུས་དུར་ཁྲོད་ཀྱི་མི་རོ་བཞིན་དུ་གཤེད་མ་བརྒྱས་བསྐོར་ཀྱང་བག་ཚ་བ་ཅུང་ཟད་ཙམ་ཡང་མེད་པའོ། །རྩ་གནས་ཀྱི་ཡི་གེ་ཡེ་ཤེས་ཀྱི་རླུང་གི་དྲ་བར་ཚུད་པ་ལས་ཐེག་པའི་རྒྱལ་པོ་བརྗོད་དུ་མེད་པའི་དོན་ངག་གི་གྲག་པ་ལ་ཞུགས་ནས་བརྗོད་པ་སྟོང་པའི་སྒྲ་བྲག་ཅའི་རྣམ་པར་སོང་ནས་ཕ་རོལ་གྱི་རྗེས་སུ་བཟློ་བའོ། །ཚིག་དབང་གིས་སེམས་དག་པས་སྐྱེས་བུའི་སྙིང་ལ་མདས་ཟིན་པའི་རྣམ་ཤེས་ལྟར་སྐད་ཅིག་གཅིག་གིས་བྱེ་བྲག་ཕྱེད་པའི་རིག་པ་གདོད་མའི་ས་ལ་ན་བུན་ཡལ་བ་ལྟར་སོང་བ་ནི་སྐད་ཅིག་གཅིག་གིས་རྫོགས་སངས་རྒྱ་བའི་ཡེ་ཤེས་ལ་རང་དབང་འབྱོར་བ་ལས་བྱུང་བའོ། །ཞར་ལ་འདི་སྐད་ཅེས་བརྗོད་དེ། རང་ཤར་ལས། ཤེས་རབ་ཁྱད་པར་ཅན་རྒྱུད་ལ་སྐྱེས་པའི་དུས་ན་བདུད་ཀྱིས་བསླུ་བ་ངོ་ཤེས་པར་གྱིས་ཤིག །ཉམ་ང་མེད་པའི་སྤྱོད་པ་ཀློང་བརྡོལ་བའི་


JLAZ012_Page_0351
[མ་དཔེ་གཟིགས་ན་འདིར་གནོན།]

དུས་ན་ཤེས་རབ་ཀྱི་འཇུག་ཕྱོགས་ངོ་ཤེས་པར་གྱིས་ཤིག །ཅེས་ཤེས་པའི་ཉམས་ལ་རྟགས་ཚད་ངེས་པའི་བྱེ་བྲག་མ་ཕྱེད་ན་བདུད་དང་གོལ་སྒྲིབ་ཀྱི་འཕྲང་ལས་མི་སྒྲོལ་བས་རྒྱུད་ལས་གསུངས་པའི་དོན་མདོར་བསྡུས་ན་བར་ཆད་བདུད་ཀྱི་རྟགས། འཕེལ་འགྲིབ་ཉམས་ཀྱི་རྟགས། མི་འགྱུར་གསང་བའི་རྟགས་གསུམ་གྱིས་སྟོན་པ་ལ། དང་པོ་ནི། དབང་པོ་རྟུལ་པོ་སྣང་བ་ལ་འཛིན་པའི་མངོན་རློམ་ཞུགས་པས་ཁ་ཚིག་ལ་སྤྱོད་ཅིང་གཏིང་མ་གཏོགས་པའི་རིགས་ཅན་འགའ་ཞིག་ལ། ལུས་སྣ་ཚོགས་སུ་སྤྲུལ་ནུས་པ་དང༌། ཁ་དོག་སྣ་ཚོགས་སུ་ཤར་བ་དང༌། གྲིབ་མའི་མེ་ལོང་དུ་གཟུགས་བརྙན་གཉིས་པར་འཆར་བ་དང༌། གཞན་གྱིས་སེམས་ཤེས་པ་སྙམ་བྱེད་པ་ལ་སོགས་ཏེ། དེའི་ཚེ་གུ་གུལ་དང་བདུད་རྩི་ཆེ་ཆུང་གིས་མགོ་མཇུག་མེད་པར་བཀྲུ་ཞིང༌། ཡན་ལག་ལ་ལྡེར་ཚོ་རྙིང་པའི་མ་དག་པ་བྱུགས་པས་ཁྲ་བོར་འོང་ངོ༌། །གཞན་ཡང་བགེགས་ཡི་དམ་གྱི་གཟུགས་སུ་བརྫུ་བ་དང༌། ཁྱད་པར་ཡེ་ཤེས་དག་པའི་མཁའ་འགྲོ་འཇིག་རྟེན་དུ་མི་རྒྱུ་ཞིང༌། སྣ་ཚོགས་ལས་ཀྱི་མཁའ་འགྲོ་མས་ནམ་མཁའ་ལས་གཟུགས་སྟོན་པ་དང༌། ལུང་སྟོན་པ་སོགས་བྱེད་ཅིང་ཐུན་མོང་གི་དངོས་གྲུབ་ཞར་ལ་བསྒྲུབ་པ་ཡོད་དེ། ཡང་དག་མ་ཡིན་པའི་རྟགས་སྔར་བས་ཤེས་པ་འགྱུར་ཞིང་བློའི་ཞེན་པ་ཆགས་


JLAZ012_Page_0352
[མ་དཔེ་གཟིགས་ན་འདིར་གནོན།]

སྡང་དང་དགག་བསྒྲུབ་རང་མཚན་པར་ཤར་ཏེ་ཆོས་དང་ཇེ་འགལ་ལ་འགྲོ་བ་ནི་བདག་ཉིད་མཁའ་འགྲོ་མའི་དབང་དུ་སོང་བ་ཞེས་བྱ་སྟེ། དེ་ལ་རང་ཤར་ལས། མཁའ་འགྲོ་མ་དག་ལུང་སྟོན་པ་བྱུང་ན་ཉམས་བལྟ་བ་ཡིན་པས་དགོངས་པ་ལ་གཏད་དོ། །ཞེས་གསུང་པས། རང་བཞིན་མེད་པའི་དོན་ལ་མཉམ་པར་གཞག་པས་མཁའ་འགྲོ་མ་བདག་གི་དབང་དུ་གྱུར་ནས་ལྟར་སྣང་གི་དངོས་གྲུབ་ཀྱི་རྗེས་སུ་ཁྲིད་ནས་བསླུ་བར་མི་ནུས་སོ། །གཞན་ཡང་སྤྱིར་ཁྲོ་བོ་སྒོམ་པ་དང༌། དྲག་སྔགས་དང་ཧཱུྃ་གླུ་བརྗོད་ཅིང༌། སེམས་བསྐྱེད་སྒོམ་པས་དེ་ལས་ལྡོག་པར་འགྱུར་རོ།། །།གཉིས་པ་འཕེལ་ཉམས་ཀྱི་རྟགས་ནི། རླུང་སེམས་འདུས་ཚུལ་གྱི་རྐྱེན་ལས་ཡིད་བརྟན་མི་རུང་བའི་ཏིང་འཛིན་གློ་བུར་དུ་སྐྱེ་བ་དང༌། ནམ་མཁར་ལྷར་སྐུ་དང་འོད་སྣང་འཁྲིགས་པ་སོགས་མ་ངེས་པར་བྱུང་ན། རེས་འགའ་ཆུའི་དཀྱིལ་དུ་འདུག །ཤིང་གི་བྱང་བུ་སོར་བཅུ་དྲུག་པའི་བར་དུ་མཇིང་པ་ལྟེམས་ནས། ལུས་ལ་ཙན་དན་གྱི་མར་ཁུས་བསྐུ་མཉེ་བྱ་བ་དང༌། བསིལ་བའི་ཁ་ཟས་བརྟེན། སྐྱེ་མེད་ཀྱི་སྙིང་པོ་ཨ་ཡིག་བགྲང་བ་སོགས་པས་ཡང་དག་པའི་ལམ་དུ་སོར་ཆུད་པར་འགྱུར་རོ།། །།གསུམ་པ་མི་འགྱུར་གསང་བའི་རྟགས་ནི། ལུས་ཤིང་བལ་ལྟར་ཡང་ཞིང་ཟོ་མདོག་བཟང་ལ་སྐྲ་དཀར་དང་གཉེར་


JLAZ012_Page_0353
[མ་དཔེ་གཟིགས་ན་འདིར་གནོན།]

མ་མེད་པ་དང༌། སྐྲ་སེན་སྐྱེ་བའི་རྒྱུན་ཆད་པ་དང༌། ལུས་ལ་རིགས་ལྔའི་ཕྱག་རྒྱ་དང་སྐུ་གཟུགས་ཡི་གེའི་རྣམ་པ་གསལ་བ་དང༌། གཞོན་ཤ་ཆགས་ཤིང་སྐྲ་དཀར་ནག་པོར་འགྱུར་ནས་སོའུ་སྐྱེ་བ་སོགས་ཏེ་ལུས་ཤིན་ཏུ་སྦྱངས་པའི་ཡན་ལག་ལ་དབང་ཐོབ་པའོ། །དེ་བཞིན་དུ་ངག་ལ་བདེན་པ་འགྲུབ་པས་ཅི་སྨྲས་གཞན་ལ་ཕན་པ་དང༌། འཁྲུལ་པའི་ཚིག་མི་འབྱུང་ཞིང་ཆོས་སྣ་ཚོགས་རང་རྡཽལ་དུ་ཤེས་པ་དང༌། གཏམ་རྒྱུད་དང་སྒྲ་སྐད་སྣ་ཚོགས་ཤེས་པ་དང༌། རིགས་དྲུག་སོ་སོའི་སྒྲ་སྐད་ཤེས་པ་དང༌། ཉན་ཐོས་དང་རང་སངས་རྒྱས་བྱང་ཆུབ་སེམས་དཔའི་གསུང་ཐོས་ཤིང༌། དབུགས་ཕྱི་ནང་དུ་རྒྱུ་བ་མེད་པ་ལ་སོགས་པའོ། །སེམས་འབྱོངས་པས་ཟས་གོས་མི་དགོས་ཤིང༌། ཏིང་ངེ་འཛིན་ལོ་ཟླར་བརྟན་པ་དང༌། རླུང་གར་གཏད་དུ་འདྲོངས་པ་དང༌། འདས་མ་འོངས་ཀྱི་རྣམ་རྟོག་དག་པས་བྱ་བའི་འཁྲིགས་འགགས་པ་དང༌། སྙིང་རྗེ་ཚད་མེད་པར་སྐྱེ་ཞིང་ཉོན་མོངས་པ་རང་རྒྱུད་དུ་མི་འཆར་བ་སོགས་མདོར་ན་བཟང་ངན་གང་ལའང་རེ་དོགས་ཀྱི་མཐར་ལྷུང་བའི་དགག་བསྒྲུབ་ཀྱི་བློས་མ་གོས་པ་གནད་དམ་པའོ།། །།གཉིས་པ་ཚད་རྨི་ལམ་གྱིས་བཟུང་བ་ནི། གསང་བ་སྒྲ་རྒྱུད་ལས། རབ་ལ་འཆར་དང་འབྲིང་གི་ཤེས། །ཐ་མ་འགྱུར་བ་ངེས་པ་སྟེ། །ཞེས་དབང་པོ་རྣོན་པོ་


JLAZ012_Page_0354
[མ་དཔེ་གཟིགས་ན་འདིར་གནོན།]

དང་བརྩོན་འགྲུས་རབ་ཏུ་གྱུར་པ་རྣམས་ལས་དང་བག་ཆགས་ཀྱི་འབྲེལ་བ་ཆོད་པས་སྐྱེ་བ་འདི་ཉིད་ལ་སངས་རྒྱ་བའི་རྟགས་སུ་རྨི་ལམ་དབྱིངས་སུ་དག་ནས་གཉིད་འོད་གསལ་དུ་འཆར། འབྲིང་རྨི་ལམ་ལ་རྨི་ལམ་དུ་ཤེས་པ་སྤྲུལ་བསྒྱུར་གྱི་གོམས་པ་ངེས་པ་ལས་བར་དོར་འཚང་རྒྱ། ཐ་མ་བག་ཆགས་ངན་པའི་རྨི་ལམ་རྒྱུན་ཆད་ནས་བཟང་པོ་ཤ་སྟག་ཏུ་རྨི་བ་ནི་རང་བཞིན་སྤྲུལ་པར་དབུགས་འབྱིན་པའོ།། །།གསུམ་པ་ཐོབ་པ་གསུམ་གྱི་གཟེར་ནི། སྔ་མ་ལས། ཐོབ་པ་གསུམ་གྱིས་གཟེར་བཏབ་པས། །ཟག་བཅས་ཕུང་པོ་མི་སྣང་ངོ༌། །ཞེས་པས་ཚིག་གིས་འགྲེལ་ཕྱོགས་དོན་གཅིག་ལ་བསྐྱར་ཟློས་ཡང་ཡང་མ་བྱས་ན་ཚི་མི་ཆད་པས། ཕྱི་སྣང་བ་ལ་དབང་ཐོབ་པས་རྐྱེན་སྣང་ཞིང་ཁམས་སུ་འཆར། ནང་སྒྱུ་ལུས་ལ་དབང་ཐོབ་པས་གདོས་བཅས་འོད་གསལ་དུ་དག །གསང་བ་རླུང་སེམས་ལ་དབང་ཐོབ་པས་མཚམས་མེད་ལྔ་དང་ལྡན་པའི་རྣམ་པར་ཤེས་པ་ཡང་རིག་པ་གཏད་པས་འདྲོངས་པའོ།། །།བཞི་བ་གདེང་བཞི་ནི། རིན་པོ་ཆེ་སྤུངས་པར། མི་འགྱུར་བལྟ་བའི་གདེང་ཆེན་བཞིས། །མི་ལྡོག་ཡེ་ཤེས་ཚད་ཀྱང་བཟུང༌། །ཞེས་པས། ངན་སོང་གསུམ་གྱི་སྡུག་བསྔལ་དང་ཚེ་ཚད་ལ་སོགས་པ་ཐོས་ཀྱང་རང་ངོ་གདོད་ནས་འཁྲུལ་མི་ཤེས་པའི་ཐོག་ཏུ་བདེ་སྡུག་ཤེས་བྱ་ལ་མི་སྲིད་པར་ཐག་


JLAZ012_Page_0355
[མ་དཔེ་གཟིགས་ན་འདིར་གནོན།]

ཆོད་པས་ངན་སོང་ལ་བག་མི་ཚ་བའི་གདེང༌། རིག་པ་གཞི་ཐོག་ཏུ་ཕེབས་པ་ལ་འཁོར་བ་མིང་ཙམ་དུའང་མ་གྲུབ་པས་རྒྱུ་འབྲས་རྣམ་སྨིན་ལ་མི་རེ་བའི་གདེང༌། ཆོས་ཉིད་ཀྱི་གཤིས་ལ་འདི་ལྟར་གྲོལ་ནས་འདི་ཙམ་དུ་བདེའོ་སྙམ་པའི་མྱང་འདས་རང་ཚན་པ་མེད་པས་ཐོབ་བྱ་ལ་རེ་བ་མེད་པའི་གདེང༌། རྒྱལ་བའི་ཁམས་ལ་ཡོན་ཏན་ཚད་མེད་པར་ཐོས་ཀྱང་རང་ངོ་རིག་པ་ལས་ཐ་དད་པའི་སངས་རྒྱས་རྒྱུ་སྤུའི་རྩེ་མོ་ཙམ་དུའང་མེད་པ་གཤིས་ཐོག་ཏུ་ཕེབས་པས་དགའ་བྲོད་མཉམ་པ་ཉིད་དུ་དག་པའི་གདེང་སྟེ། རྣམ་པ་བཞིས་ཚད་དུ་བསྐྱོལ་ནས་མྱ་ངན་ལས་འདས་པའི་གྲོང་ཁྱེར་དམ་པར་འཇུག་པ་ནི། རྡོ་རྗེ་སེམས་དཔའི་སྙིང་གི་མེ་ལོང་གི་རྒྱུད་ལས། མྱ་ངན་ལས་འདས་པ་དེ་ཡང་གཉིས་ཏེ། ཡང་དག་པར་རྫོགས་པར་སངས་རྒྱས་པ་དང༌། མངོན་པར་རྫོགས་པར་སངས་རྒྱས་པའོ། །དེ་ལ་ཡང་དག་པར་རྫོགས་པས་སངས་རྒྱས་པ་ནི། ཕུང་པོ་ལྷག་མ་མེད་པར་སངས་རྒྱས་པའོ། །མངོན་པར་རྫོགས་པར་སངས་རྒྱས་པའི་སྐྱེས་བུ་དེ་ལ། འོད་དང༌། སྒྲ་དང༌། གདུང་དང༌། སྐུ་དང༌། ས་གཡོ་བ་ལ་སོགས་པར་འབྱུང་ངོ༌། །ཞེས་བཤད་པའི་སྔ་མ་ནི་ལྕེ་བཙུན་ཆེན་པོ་ཡན་གྲགས་པ་མངོན་གྱུར་བ་ཡིན་ལ། ཕྱི་མ་ནི་རྒྱལ་བའི་དབང་པོ་དྲི་མེད་འོད་ཟེར་མཆིམས་ཕུ་ནགས་ཀྱི་དུར་ཁྲོད་ཆེན་


JLAZ012_Page_0356
[མ་དཔེ་གཟིགས་ན་འདིར་གནོན།]

པོར་འོད་རྣམ་པ་གཉིས་ལས་ཁྱིམ། སྒྲ་རྣམ་པ་གཉིས་ལས་འུར་བ། སྐུ་རྣམ་པ་གཉིས་ལས་ཁྲོ་བོ། འབྱུང་བས་མི་བཤིག་པའི་གདུང་དང་རིང་བསྲེལ་རྣམ་པ་གཉིས་ཀ་ས་ཆེན་པོ་འདི་འུར་རབ་ཏུ་འུར། འགུལ་རབ་ཏུ་འགུལ། ལྡེག་རབ་ཏུ་ལྡེག་པའི་གཡོ་བ་རྣམ་པ་དྲུག་ལན་བདུན་དུ་བསྒྲགས་ནས་མྱུར་དུ་མངོན་པར་རྫོགས་པར་སངས་རྒྱ་བའི་རྟགས་མ་ཚང་བ་མེད་པ་བསྟན་ནས་གདོད་མའི་ས་ལ་གཤེགས་པ་བཞིན་ནོ།། །།དོན་གཉིས་པ་དབང་པོ་འབྲིང་བར་དོར་གྲོལ་བའི་གདམས་པའི་ངེས་འབྱེད་ནི། ཐལ་འགྱུར་ལས། དབྱེ་ན་རྣམ་པ་བཞི་དག་ལས། །ཅེས་རང་བཞིན། འཆི་ཀ །ཆོས་ཉིད། སྲིད་པ་སྟེ་བར་མ་དོའི་ས་མཚམས་བཞིར་ངེས་པ་ལས། དང་པོ་རང་བཞིན་གྱི་བར་དོ་ནི། སེམས་ཅན་གྱི་ཁམས་སྤྱི་ཚན་ལ་ཀུན་གཞིའི་སྟེང་དུ་ཉོན་མོངས་སྔ་མས་བཞག་པས་བག་ཆགས། ཕྱི་མ་བསྐྱེད་པའི་ཆ་ནས་ས་བོན། ལས་ཐ་དད་པའི་དབང་གིས་གནས་རིགས་བདེ་བ་དང༌། སྡུག་བསྔལ་བ་དང༌། བར་པ་ལ་སོགས་ཏེ་སྣ་ཚོགས་སུ་འཕེན་པའི་མཐུ་ཡོད་པས། ནུས་པ་ཞེས་རྩ་བ་མ་རིག་པ་གཅིག་གིས་གཟུང་འཛིན་ཐ་དད་དུ་བསྐྱེད་པའི་འབྲས་བུ་ལས་མཐུན་གྱིས་ཆ་སོ་སོ་བསྡེབས་པས་སྒོས་ཚན་འགྲོ་བ་དྲུག་ཏུ་སྣང་ཞིང་


JLAZ012_Page_0357
[མ་དཔེ་གཟིགས་ན་འདིར་གནོན།]

དེར་ཡང་དངོས་གཅིག་ལ་སེམས་ཅན་རང་རང་གི་ལས་ཀྱི་དབང་ལས་ཆུ་གཅིག་པུ་ཉིད་ལའང་ལྷས་བདུད་རྩི། མིས་ཆུ། དུད་འགྲོས་བཏུང་བ། ཡི་དྭགས་ཀྱིས་རྣག་ཁྲག །དམྱལ་བས་མེ་མདག་གི་ཆར་དུ་མཐོང་ཡང་ཕྱི་རོལ་ནས་བདེན་གྲུབ་ཏུ་མེད་པ་ནི། སྤྱོད་འཇུག་ལས། ལྕགས་བསྲེགས་ས་གཞི་སུ་ཡིས་བྱས། །མེ་ཚོགས་དེ་དག་གང་ལས་བྱུང༌། །དེ་འདྲ་དེ་དག་ཐམས་ཅད་ནི། །སྡིག་སེམས་ལགས་པར་ཐུབ་པས་གསུངས། །ཞེས་གསུངས་པ་བཞིན་ནོ། །དེའི་ཕྱིར་ཁམས་གསུམ་པའི་སྣང་བ་བཀོད་པ་ཙམ་ནས་རང་བཞིན་གྱི་བར་དོར་ཆུད་པ་ལས། འདིར་རང་ཅག་འགྲོ་བ་མི་རྣམས་ནི་ཕུང་པོ་ལྔས་སྐུ་ལྔའི་སྣང་བ་ལ་བསྒྲིབས། ཁམས་དང་སྐྱེ་མཆེད་ཀྱིས་དྭངས་མའི་འོད་གསལ་ལ་བསྒྲིབས། ལས་དང་ཉོན་མོངས་པས་ཆོས་ཉིད་ཀྱི་སྣང་བ་ལ་བསྒྲིབས་པས་ད་ལྟའི་བདེ་སྡུག་རང་ཚན་པ་ལ་སྤྱོད་ཅིང༌། ཕྱི་མའི་སྲིད་པ་འདྲེན་པ་ལས་འོས་མེད་པའི་མཚང་ཆེན་པོ་འདི་ཤེས་པར་བྱས་ནས་དེ་ལས་ལྡོག་པའི་ཐབས་རང་བཞིན་གྱི་བར་དོ་འདིར་ཤེས་བྱའི་སྒྲོ་འདོགས་གཅོད་ལུགས་དཔེར་ན་ཐི་བྱ་ནི་འདབ་ཆགས་ཅང་ཤེས་པས་དང་པོར་ཚང་འཆའ་དུས་ཙམ་ནས་མི་ལ་སོགས་པའི་གནོད་པ་ལེགས་པར་བརྟགས་ཏེ་བཙན་སར་བཅས་ཚར་ནས་ཕྱིས་ཚང་དུ་ནམ་འཇུག་ཀྱང་ཚམ་ཚོམ་མེད་པར་འཇུག་པ་བཞིན། ད་ལྟ་ཉིད་ནས་


JLAZ012_Page_0358
[མ་དཔེ་གཟིགས་ན་འདིར་གནོན།]

ཕྲང་དམ་པོ་ལ་བསྐྱེལ་མའི་ཉེར་བསྡོགས་བླ་ན་མེད་པ། ཐོས་པ་མ་རིག་མུན་སེལ་སྒྲོན་མེ་ཡིན། །ཞེས་པ་ལ་སོགས་པའི་དོན་ལ་ཡིད་རབ་ཏུ་གཞུངས་ནས་ཐོས་བསམ་གྱི་སྒྲོ་འདོགས་ངེས་པར་ཆོད་པ་གཅེས་ཏེ། དེའང་དེང་སང་དུས་ཀྱི་རྒུད་པ་དང་སྐྱོ་བ་སྣ་ཚོགས་པས་གདུངས་པར་སྣང་བའི་ཕྱིར་ཚིག་དོན་རིན་པོ་ཆེར། སྔོན་བསྐལ་པ་བཟང་དུས་སུ་བླ་མ་ཡང་གྲུབ་ཆེན་ཤ་སྟག་བྱོན། རང་གི་ལས་འཕྲོ་དང་བླ་མའི་ཐུགས་རྗེ་དང༌། མངོན་པར་མཁྱེན་པས་གནད་དུ་འགྲོ་བའི་ཆོས་རང་གང་མོས་ལས་འཕྲོ་ཡོད་པ་གཅིག་པུ་དེས་གྲོལ་བ་ཡིན་ཀྱང༌། ད་ལྟའི་དུས་ན་ལས་འཕྲོ་བཟང་པོའང་དཀའ་ལ། རྣམ་རྟོག་གྲངས་མང་བས་སྤྲོས་པ་གཅིག་གིས་ཆོད་པའང་སྲིད་མཐའ་མ་ཁེགས་པ་ཙམ་ལས། ཕལ་པ་ཀུན་ཐོས་བསམ་ཕྱོགས་མེད་དུ་སྦྱོང་དགོས་ཏེ། ད་ལྟའི་སྙིང་ཏིག་འདིའི་བསྟན་པའི་མཐའ་མ་མོས་པས་སྤྱོད་པའི་ས་ཞེས་བྱ་བ་ལ་སླེབ་པའི་དུས་ཏེ། ཁྱད་པར་དུ་གསང་བ་རྒྱལ་པོ་འདི་ཀུན་ཀྱི་རྩེད་མོ་ཡིན་པས་ཀྱང་ཐོས་བསམ་ཆེ་ལ་ཤེས་རབ་དང་སྐལ་བ་མཆོག་མ་གཏོགས་པས་འདིའི་དོན་རྟོགས་མི་སྲིད་པའི་ཕྱིར་ཐེག་པ་འདིར་འཇུག་པ་ལ་ཐོས་བསམ་ཆེ་བ་ཞིག་བསྟེན་དགོས་ཏེ། ཞེས་དང་། ལྷག་པར་སློབ་དཔོན་དེ་ལམ་མ་ནོར་བ་དགོས་ཏེ། ནོར་ན་དེས་བསྟན་ཚད་ནོར་བ་


JLAZ012_Page_0359
[མ་དཔེ་གཟིགས་ན་འདིར་གནོན།]

ལ་འགྲོ་བའི་ཕྱིར་དང་པོ་ཐོས་བསམ་རྒྱ་ཆེ་བ་གཅེས་སོ། །ཞེས་ལྔ་བརྒྱའི་འགྲོ་བ་ལ་ཤིན་ཏུ་བརྩེ་བས་གདམས་པ་ཡིན་ནོ།། །།གཉིས་པ་འཆི་ཀའི་བར་དོ་ནི། ཉི་ཟླ་ཁ་སྦྱོར་ལས། ཚེ་ནི་མི་རྟག་མགྲོན་པོ་འདྲ། །མགྲོན་པོས་རྟག་ཏུ་སྡོད་པ་མེད། །ཅེས་སྐྱེས་པ་ཙམ་ནས་འཆི་བའི་རང་བཞིན་མདུན་ནས་སྒུག་པར་སྣང་བའི་ཕྱིར། ཉི་ཟླ་ཁ་སྦྱོར་དང་མན་ངག་གི་ཡི་གེ་རྣམས་སུ་འཆི་བ་བརྟག་བསླུའི་ཡན་ལག་རྒྱས་པར་བཤད་པ་རྣམས་ཉམས་འོག་ཏུ་ཆུད་པས་གློ་བུར་གྱི་བར་ཆད་ལས་གྲོལ་བར་བྱ་ཞིང་དེར་མ་ལྟོས་པ། གང་དུ་གནས་ཀྱང་འཆི་བས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །ཞེས་པའི་ངེས་པ་རྒྱལ་པོ་ལ་གདམས་པའི་མདོ་ལས་ཇི་ལྟར་བཤད་པ་བཞིན་ཐོག་ཏུ་འབབ་པའི་ས་མཚམས་ནི། འཆི་རྐྱེན་གྱི་ནད་ཀྱིས་ཐེབས་པ་ནས་ནང་དབུགས་ཁྲོག་གིས་ཆད་པ་ཚུན་ཆད་དོ། །དེའི་ཚེ་དེའི་དུས་ན་མི་གསལ་བ་གསལ་གདབ་པ་སྒེག་མོ་མེ་ལོང་ལ་ལྟ་བ་ལྟ་བུའི་གདམས་པ་དགོས་ཏེ། ཁ་སྦྱོར་ལས། དེ་ཚེ་བླ་མའི་མན་ངག་རྣམས། །རང་གིརྒྱུད་ལ་འདྲིས་པར་བྱ། །ཞེས་པས། འཆི་བའི་རྟགས་དང་གར་འཆི་ནམ་འཆིའི་རྩིས་གདབ་མེད་པ་བུ་ཆུང་ལྟ་བུར་འཆི་བའི་གང་ཟག་རྫོགས་པ་ཆེན་པོར་གྱུར་པ་རྣམས་ལ་གདམས་པ་འདི་མི་དགོས་ཀྱང༌། འབྲིང་གི་རབ་ཡུལ་རྐྱེན་གྱིས་མི་གནོད་པས་རྒྱ་ལམ་དང་


JLAZ012_Page_0360
[མ་དཔེ་གཟིགས་ན་འདིར་གནོན།]

གྲོང་ཁྱེར་གྱི་སྲང་མདོར་འཆི་བ་སྤྲང་པོ་ལྟ་བུའི་འཆི་ལུགས་སམ། འབྲིང་ཡུལ་རྐྱེན་ལས་འདས་པར་འཆི་བ་གངས་ཁྲོད་དང་རི་ཕུག་ལུང་སྟོངས་སོགས་པར་རི་དྭགས་དང་སེང་གེ་ལྟ་བུར་འཆི་བ་དག་གིས་སྐུ་དང་ཡེ་ཤེས་ལ་འཇུག་པ་འོད་གསལ་སྦུབས་འཇུག་གམ། ཡུལ་དང་གནས་ལ་འཇུག་པ་འཕོ་བའི་གདམས་པ་གཉིས་གང་ལ་འདྲིས་ཤིང་གོམས་པའི་བློའི་ནུས་པ་དང་སྦྱར་ནས་གསལ་གདབ་པའི་སྔ་མ་ནི། ཉི་ཟླ་ཁ་སྦྱོར་ལས། སྐུ་དང་ཡེ་ཤེས་འཇུག་ལུགས་ནི། །རིག་པ་འདི་ལྟར་གཏད་པར་བྱ། །ཕུང་པོ་སེང་གེའི་ཉལ་ལུགས་ཀྱིས། །རིག་པ་ཉིད་ནི་མིག་ལ་གཏད། །ཡིད་ཙམ་བར་སྣང་ལམ་དུ་བྱ། །དབྱིངས་དང་རིག་པ་མི་འགྱུར་ན། །མི་དེ་བར་དོ་མེད་པར་ནི། །སངས་རྒྱ་བ་ལ་ཐེ་ཚོམ་མེད། །ཅེས་པའི་དོན་བཞུགས་སྟངས་གསུམ་མམ། སེང་གེའི་ཉལ་ལུགས་ལ་གནས་པས་ཤེས་པ་མིག་ལ་གཏད། མིག་དབྱིངས་རིག་པ་ལ་གཏད་ནས་ཀ་དག་གི་ངང་ལ་སྤྲོ་བསྡུ་མེད་པའི་ངང་ནས་འཚོ་བའི་འདུ་བྱེད་བཏང་བས་སྐད་ཅིག་ལ་གྲོལ་བར་འགྱུར་རོ། །འདི་ལ་གསང་ལམ་ངོ་སྤྲོད་ཀྱང་བྱ་སྟེ་ཤིན་ཏུ་གནད་ཟབ་པའི་ཕྱིར་ད་ལྟའང་ནམ་མཁའ་དྭངས་པའི་ཚེ་རིག་པ་དབྱིངས་སུ་གཏད་དེ། བདག་ངེས་པར་འཆི་བའི་དུས་ལ་བབས་པ་ཡིན་པས་སྤྲོས་པ་མེད་པས་ཀློང་དུ་མྱ་ངན་


JLAZ012_Page_0361
[མ་དཔེ་གཟིགས་ན་འདིར་གནོན།]

ལས་འདའ་བར་བྱའོ་སྙམ་དུ་དབུགས་ཕྱིར་འཕངས་པའི་ཕྱི་ལ་ཤེས་པ་གཏད་མེད་དུ་འཇོག་པ་ཤིན་ཏུ་མྱུར་བའི་ལམ་ཡིན་ནོ།། །།ཕྱི་མ་ནི་རྒྱུད་ལས། ཡུལ་གནས་དག་ལ་འཇུག་ལུགས་ནི། །གྲོང་འཕོ་གྲོང་འཇུག་གདམས་པ་སྟེ། །རྣམ་ཤེས་རླུང་ལ་ཞོན་ནས་སྦྱང༌། །དེ་ཡང་གོང་དུ་འབྱོངས་པ་གཅེས། །རིག་པ་བསྡུ་དང་འཕངས་པ་གཅེས། །དེ་ཡང་ཧིག་གིས་འཕངས་པའོ།།དེ་ཉིད་བླ་མའི་ཞལ་ལ་ཐུག །ཅེས་པས་རླུང་ཐ་མ་ཕྱིར་འགྲོ་དུས་སྙིང་ག་ན་རིག་པ་ཨ་དཀར་པོ་ཞིག་ཏུ་བསམ་པ་ཚངས་བུག་ནས་ཡར་རྒྱང་གིས་སོང་བར་བསམ་པའི་མོད་ལ་ཧིག་ཉི་ཤུ་རྩ་གཅིག་བརྩེགས་མར་བརྗོད་པས་གྲོལ་ལོ། །དེ་ཡང་རྒྱུད་ཀྱི་ཚིག་ཟིན་གྱི་ཇི་ལྟར་བསྟན་པ་བཞིན་ད་ལྟ་ནས་འབྱོངས་པ་ལེགས་སོ། །གནད་དེ་ལྟ་བུ་དང་ལྡན་པ་རྣམས་ནི་ཐིམ་རིམ་གྱི་ངེས་པ་ལ་མ་ལྟོས་པར་བྱང་ཆུབ་སེམས་དཔའི་དབུགས་འཕོ་ལུགས་དག་གི་མྱ་ངན་ལས་འདའ་བ་ཡང་ཡོད་དོ། །འདིའི་ཚེ་ཚིག་གི་སྤྲོས་པས་གསལ་འདེབས་ན། རབ་ཏུ་བླ་མའམ། མེད་ན་རྡོ་རྗེའི་སྤུན་སྲིང་དམ་ཚིག་ལ་སེལ་མེད་པ་ཅིག་གིས་འདི་སྐད་དུ། ཀྱེ་རིགས་ཀྱི་བུ། ད་ལྟའི་འོད་གསལ་འདི་རང་བྱུང་གི་ཡེ་ཤེས་དངོས་ཡིན་གྱིས་འདིའི་ངང་ལ་སེམས་མ་བཅོས་པར་ཞོགས་དང༌། ཡར་གྱི་ཟང་ཐལ་དུ་ཁྱོད་སངས་རྒྱའོ། །དེས་བློའི་


JLAZ012_Page_0362
[མ་དཔེ་གཟིགས་ན་འདིར་གནོན།]

སྤྲོས་པ་མ་ཞིག་ན་ཁྱེད་རང་གི་རིག་པ་ཨ་དཀར་པོའི་རྣམ་པར་ཚངས་བུག་ནས་དཔག་ཆེན་གྱིས་མདའ་འཕངས་པ་བཞིན་སོང་ལ་སྟེང་གི་ཕྱོགས་ན་ནམ་མཁའ་རྣམ་པར་དག་པའི་འཇིག་རྟེན་ཡོད་དེ། དེ་ན་བཅོམ་ལྡན་འདས་ནམ་མཁའི་རྒྱལ་པོ་ཞེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་མ་འཇིགས་པར་ལྟ་བའི་གནས་ལུགས་རྫོགས་པ་ཆེན་པོ་གཞིའི་དབང་ཡོད་ཀྱིས། དབང་དེ་ཞུས་ལ་ཆོས་ཉིད་ཀྱི་གཞི་སྣང་ལ་བཞུད་ཅིག །དེའི་ཚེ་ཁྱོད་ཀ་དག་གི་ས་ལ་སངས་རྒྱ་བར་འགྱུར་རོ། །གལ་ཏེ་མ་གྲོལ་ན་ཆོས་ཉིད་བར་དོའི་སྣང་བ་ཐམས་ཅད་རང་སྣང་དུ་ངོ་ཤེས་པར་གྱིས་ཤིག །རང་ངོ་ཤེས་མ་ཐག་ཏུ་ཀ་དག་གི་དབྱིངས་སུ་བདེ་བར་གཤེགས་ཤིག །ཅེས་ལན་གསུམ་བརྗོད་ལ་རང་ཉིད་ཀྱང་མཉམ་པར་བཞག་གོ། །འདི་ནི་རྫོགས་པ་རང་བྱུང་སོགས་ནས་བཏུས་པ་ཡིན་པས། མཆོག་ཏུ་འཕགས་པའོ། །དེ་ཡང་མན་ངག་ཐོབ་ཀྱང་གདིང་དང་མི་ལྡན་པའམ། ཐ་མལ་པའི་རྣམ་པ་སྤྱི་ལ་རྩ་རླུང་གི་འདུ་བའི་བྱེད་པས་ཕྱི་འབྱུང་བ་བཞི། ནང་ནམ་མཁའ་ལྔ། གསང་བ་སྲོག་ལྔ། ཡོངས་རྫོགས་རླུང་ལྷག་མ་ཉི་ཤུ་དང་བཅས་པའི་ཐིམ་ལུགས་ཕྲ་བ་རང་ཤར་གྱིས་རྒྱུད་ལས་ཞིབ་པར་བསྟན་ཀྱང༌། འདིར་ཕལ་གྱིས་རྟོགས་སླ་བའི་ཕྱིར་འབྱུང་བའི་ཐིམ་ཚུལ་དང་རླུང་གིས་འགྲོས་ཚུལ་ནི་ཉི་ཟླ་ཁ་སྦྱོར་ལས། ས་ནི་ས་ལ་


JLAZ012_Page_0363
[མ་དཔེ་གཟིགས་ན་འདིར་གནོན།]

རང་ཐིམ་ནས། །ལུས་ནི་ལྕི་ཞིང་ལྡང་མི་ནུས། །ལངས་ནས་འགྲོ་བའི་སྟོབས་ཀུན་ཟད། །ཆུ་ནི་ཆུ་ལ་ཐིམ་པའི་ཚེ། །ཁ་ཆུ་སྣ་ཆུ་འཛག་པར་བྱེད། །དེ་བཞིན་མེ་ལ་མེ་ཐིམ་པས། །ཁ་སྣ་དག་ནི་རབ་ཏུ་སྐམ།།ལུས་ཀྱི་མཐའ་ཡི་དྲོད་རྣམས་འཆོར། །དེ་བཞིན་རླུང་ལ་རླུང་ཐིམ་པས། །དབུགས་ནི་ངར་ངར་ཡན་ལག་འཕྲ། །མིག་ཀྱང་གྱེན་ལ་ལྡོག་པའོ། །རྟགས་ནི་སུ་ལ་བྱུང་བ་དེ། །འདི་ལ་མི་གནས་ཕ་རོལ་འགྲོ། །ཞེས་དང༌། ཀློང་གསལ་ལས། འདེགས་བྱེད་དོན་གྱི་རླུང་བྲོས་པས། །ལུས་ནི་མི་ཐེག་སྒྱིད་པ་སྐྱུར། །ཡན་ལག་མི་འདུས་སྨྲ་བར་དཀའ། །མིག་ལྡོག་དབུགས་ནི་ཕྱི་རུ་འཕུལ། །བཀྲག་མདངས་བསྐྱེད་པའི་རླུང་བྲོས་པས། །ལུས་རྣམས་ཁ་སྣ་བལ་དུད་ཆགས། །ཤ་ཚ་ཁ་སྣ་གཤིན་དྲི་སྣོམ། །དྭངས་སྙིགས་འབྱེད་པའི་རླུང་བྲོས་པས། །བཟའ་བཏུང་མི་ལེན་ལུས་སྟོབས་འཆོར། །མེ་དང་མཉམ་པའི་རླུང་བྲོས་པས། །ལུས་ཀྱི་དྲོད་ནི་མཐའ་ནས་འཆོར།།ལུས་ཀྱི་བཀྲག་དང་གཟི་མདངས་ཉམས། །བསྐལ་པ་ལས་ཀྱི་རླུང་བྲོས་པས། །ལུས་ལ་ཟ་ཟི་ཕྱད་ཕྱོད་མང༌། །རྩ་ཕྲན་ཁྲག་ནི་སྲོག་རྩར་འདུས། །ཞེས་དང༌། དེ་ཚེ་སྣང་བ་འདི་ལྟར་འདུ། །ཕྱི་ཡི་དབང་པོ་དྲན་བྱེད་རྣམས། །མུན་སྲོས་བཞིན་དུ་འུབ་ཀྱིས་འདུ། །རིག་པ་སྙིང་གི་དཀྱིལ་དུ་འདུས། །སྨྲ་ཡང་མི་ཤེས་དྲན་པ་ཉམས། །


JLAZ012_Page_0364
[མ་དཔེ་གཟིགས་ན་འདིར་གནོན།]

ཞེས་དུས་དེ་ཙམ་ན་གློ་བའི་ནང་གི་རླུང་སེམས་དོན་རྟ་ལོང་བ་ལྟ་བུའི་རླུང་གིས་རིག་གདངས་ཁུར་བའི་ཆ་ལ་སེམས་ཞེས་བཏགས་པའི་ཚོགས་པ་གྱེས་ཏེ་རིག་གདངས་སྙིང་གའི་རིག་པ་མི་འཕྱེའོ་འདྲ་བ་ལ་ཐིམ། རླུང་གི་ཆ་མ་ལུས་པ་མིད་པ་དཀར་ནག་གི་ལམ་ནས་ཁ་སྣར་འཐོན་ཏེ། ཚུར་འོང་མི་ཤེས་པར་སོང་དུས། སེམས་དང་ཡེ་ཤེས་རྒྱབ་གྱེས་པ་ཞེས་བྱ་སྟེ་ཤི་བ་ཡིན་ནོ། །དུས་དེའི་ཚེ་རྒྱུད་ཆེན་ཟབ་མོ་ཉི་ཟླ་ཁ་སྦྱོར་གྱི་མན་ངག་རིན་པོ་ཆེ་རྣམ་པ་གསུམ་གྱིས་ཕན་གདགས་པར་བྱ་སྟེ། དྲན་པ་ཉམས་པར་གྱུར་པ་དེའི་ཁ་སྣ་གསུམ་དང་རང་གི་ཁ་དང་སྣ་བུག་གཉིས་ཏེ་གསུམ་པོ་སྤྲད་ནས་རླུང་དུམ་བུ་གསུམ་དུ་འཕངས་པའི་དང་པོའི་ཚེ་ཨོཾ་དཀར་པོ་བསམ་ལ་འཕངས། གཉིས་པའི་ཚེ་ཨཱཿདམར་པོ། གསུམ་པའི་ཚེ་སྟོང་པ་ཉིད་ཀྱི་ངང་ནས་འཕངས་ཤིང༌། ཀུན་ལ་ཚུར་སྡུད་པའི་ཚེ་ཧཱུྃ་མཐིང་ཀའི་རྣམ་པར་ཁོའི་ཤེས་པ་ཡུལ་ལ་དྲང་བ་དང་ཆབས་ཅིག་ངག་ཏུའང་ཧཱུྃ་ཞེས་རྒྱུ་ཞབས་སྒལ་པ་ལ་བཅར་བའི་ཤུགས་ཀྱིས་དྲངས་པས་ཕ་རོལ་པོ་མིག་ཧྲིག་གིས་འབྱུང་བའང་ཡོད། དེའི་ཚེ་ཐིག་ལེ་སྟོང་པའི་སྒྲོན་མ་མཐེབ་མཛུབ་ཀྱི་སྦྱོར་བས་བསྟན་ལ། ཀྱེ་སྐལ་ལྡན། རང་ལ་ཡོད་པའི་འོད་གསལ་འདི་ཀ་ཡིན་ཏེ། ལུས་དང་བྲལ་བའི་ཚེ་འདི་ལ་སྒོ་གསུམ་གྱི་སྒྲིབ་བྱེད་མེད་པས་


JLAZ012_Page_0365
[མ་དཔེ་གཟིགས་ན་འདིར་གནོན།]

ཆོས་ཉིད་ཀྱི་བར་དོ་སྒྲ་འོད་ཟེར་དང་བཅས་པའི་རྣམ་པར་རྒྱ་ཆེར་འཆར་བའང་རང་སྣང་ལས་མ་འདས་སོ། །དེ་ངོ་ཤེས་པར་གྱིས་ཤིག །ད་ལྟའི་རིག་པ་རྗེན་པ་འདི་ཀ་ངོ་བོའི་གྲོལ་ས་ཡིན་པས། འདིའི་ངང་ལ་མ་འགྱུར་བར་གྱིས་ཤིག །སྣང་བ་དེ་མཐོང་ངམ། གདམས་ངག་དེ་གོའམ། ཞེས་བརྗོད་པས་སྐད་ཐོན་པའམ། བརྡ་བྱུང་ཡང་ཐེབས་པ་ཡིན་ནོ། །གལ་ཏེ་ཤེས་པ་གསལ་བའི་རྟགས་སམ། དབང་པོ་རྣམས་གྲུང་པ་ཙམ་བྱུང་ན་རྣ་བར་སྨྱུག་མའམ་ཤོག་བུའི་སྦུབས་མཆུ་བཙུགས་ནས། རིགས་ཀྱི་བུ། ཅི་ལ་ཡང་མ་ཆགས་ཤིག །ཁྱོད་གདོས་བཅས་ཤ་ཁྲག་གི་ལུས་དང་བྲལ་བས་ཆོས་ཉིད་བར་དོའི་སྒྲ་དང་འོད་དང༌། ཟེར་གྱིས་སྐྲག་པའི་དོན་མེད་དོ། །རང་སྣང་རང་བཞིན་མེད་པར་ཤེས་པར་གྱིས་ལ་བཙན་ས་ཟུངས་ཤིག །རྣལ་དུ་མི་ཕེབས་ན་བདེ་བ་ཅན་གྱི་ཞིང་ཁམས་ཡིད་ལ་གྱིས་ཤིག །མོས་གུས་སྐྱེད་ཅིག་དེར་སོང་ཞིག །སངས་རྒྱས་སྣང་བ་མཐའ་ཡས་དང་ཞལ་མཇལ་བ་ལ་ཐེ་ཚོམ་མེད་དོ། །ཞེས་སྙན་པའི་ངག་གིས་བརྗོད། འདི་ནི་ཐིམ་རིམ་གྱི་མགོ་ཟིན་པ་ཙམ་ནས་བརྗོད་ཀྱང་ཤིན་ཏུ་ལེགས་པར་འགྱུར་རོ། །དེ་དག་ནི་ཚང་སྤྲུགས་སུ་གདབ་པ་ཞེས་གནད་ཁྱད་པར་ཅན་ཡིན་ལ། གཞན་ཡང་ཉི་ཟླ་ཁ་སྦྱོར་ལས། མི་དེ་དབུགས་དང་མ་བྲལ་ན། །ཡི་གེ་དབུས་དང་བཅས་པ་ཡིས། །


JLAZ012_Page_0366
[མ་དཔེ་གཟིགས་ན་འདིར་གནོན།]

ཐེ་ཚོམ་མེད་པར་གནས་ནས་སྦྱོངས། །ཞེས་ཆོས་འདིའི་སྒོ་མ་མཐོང་བའི་འགྲོ་བ་ཕལ་མོ་ཆེ་བྱ་བྱེད་རྟགས་ལ་སོགས་པའི་སྒོ་ནས་སྐྱེ་གནས་ཀྱིས་ངེས་པ་གསལ་བའི་ཕྱིར་དེ་དག་གོང་ནས་གོང་དུ་འདྲེན་པའི་ཐབས་ལ་དབུགས་འགྲོ་བར་རྩོམ་པ་ནས་རྣམ་ཤེས་མ་ཐོན་པ་འདི་ཡན་ཆོད་དུ། ཁོའི་སྙིང་ནང་ན་ཨ་དཀར་པོ་བསམ། རང་གི་ཁ་དེའི་སྤྱི་གཙུག་ཏུ་གཏད་ནས། ཁོང་གི་ལོ་གྲངས་དང་བཅས་པའི་ཨ་སྙན་ལ་དལ་བ་རླུང་ཕྱིར་འགྲོ་བ་དང་བསྟུན་ནས་ཟློས་ཤིང༌། དབུགས་ཁྲོག་གིས་ཆད་པའམ། ཆད་མ་ཐག་པའི་སྐབས་སུ་ཨ་ཉི་ཤུ་རྩ་གཅིག་བརྗོད་པས་རླངས་པ་ཕྱུ་རུ་རུ་འོང་སྟེ་སྡིག་ཅན་ཡིན་ཡང་མཐོ་རིས་སུ་འདྲོངས་ལ། བདེ་འགྲོར་འཕེན་པ་རྣམས་གོང་ནས་གོང་དུ་འདྲོངས་སོ། །གལ་ཏེ་དམྱལ་བར་སྐྱེ་བའི་རྟགས་ཅན་ཡིན་ན་མར་གྱི་ཟང་ཐལ་དགག་པའི་ཕྱིར་དབུགས་དང་འབྲལ་བའི་ཚེ་ཁོའི་རྣམ་ཤེས་སྙིང་ཁར་ཨར་གསལ་བདོ་བའི་ངང་ལ་ཨ་བརྗོད་པ་དང་ལྷན་ཅིག་འོད་ལྔར་མེར་གྱིས་ཞུ་བ་དང་རང་སེམས་བསྲེས་ཏེ་མཉམ་པར་བཞག་པས་འདྲེན་པ་པོ་རྟོགས་པ་མཆོག་དང་ལྡན་ན་ཁོའི་རྣམ་ཤེས་རང་བཞིན་གྱི་འོད་གསལ་ལ་ཡོད་པའི་ཕྱིར་དང་ཆོས་ཉིད་ཀྱི་བདེན་པ་ནང་འཕྲད་ནས་འདྲོངས་པའི་གནད་ཁྱད་པར་ཅན་ཞིག་ཡོད་པ་ཐེག་པའི་རྒྱལ་པོ་འདིའི་


JLAZ012_Page_0367
[མ་དཔེ་གཟིགས་ན་འདིར་གནོན།]

ཁྱད་ཆོས་སོ། །འདི་དག་གི་ཚེ་རྒྱལ་པོ་གདན་ལ་བཞུགས་པ་ལ་བློན་པོའི་སྒྱོགས་རྡོ་འཕོག་པའི་དཔེར་བཏགས་ནས་ལུས་ཀྱི་ཁྲག་རྣམས་སྲོག་རྩར་འདུས་པའི་བྱེད་ལས། ཁྲག་ཐིགས་རིམ་པ་གསུམ་རྒྱབ་པས་དབུགས་ཀྱང་རིང་ཐུང་གི་རྣམ་པས་རིམ་པ་གསུམ་གྱིས་ཐ་མར་ཕྱི་དབུགས་ཆད། རླུང་རྣམ་པར་ཤེས་པ་ལ་ཐིམ་ནས་དར་ཅིག་རིག་པ་སྙིང་དབུས་སུ་བརྒྱལ་ནས་དྲན་པ་མེད་པའི་ཚེ་ནང་དབུགས་ཆད་པའི་སྐབས་ཏེ། ཀློང་གསལ་ལས། དེ་ནས་ལུས་ཀྱི་ཁྲག་འདུས་ནས། །སྲོག་རྩའི་ནང་ནས་ཁྲག་ཐིགས་རྒྱབ། །ཁ་དང་མིག་གཉིས་སྐྱ་ལོག་འགྲོ། །དབུགས་ནི་ཁྲུ་གང་ཙམ་དུ་ཆད། །དེ་ནས་ཁྲག་ཐིགས་གཉིས་རྒྱབ་པས། །མགོ་ཁུག་དབུགས་ནི་མདའ་གང་ཆད། །དེ་ནས་ཁྲག་ཐིགས་གསུམ་རྒྱབ་པས། །ཨིག་ཅེས་དབུགས་ནི་འདོམ་གང་ཆད། །དེ་ནས་ཕྱི་དབུགས་ཆད་པ་དང༌། །རིག་པ་སྙིང་དཀྱིལ་བརྒྱལ་ནས་སྡོད། །དེ་ནས་ནང་གི་དབུགས་ཆད་ནས། །ཆོས་ཉིད་བར་དོ་འཆར་བ་ཡིན། །ཞེས་སོ། །གསུམ་པ་ཆོས་ཉིད་ཀྱི་བར་དོ་ནི། ཕུང་པོ་བདག་འཛིན་གྱི་རྟེན་བོར་བས་རང་སྣང་ཡིན་ལུགས་ཀྱི་འོད་གསལ་སྣང་བ་སྟེ། དེའི་ཚེ་རང་སྣང་ལ་རང་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་ངག་དགོས་ཏེ། དཔེ་ནི་མ་བུ་འབྲེལ་ཟབ་པར་མ་ཟད་ལས་ཀྱི་དབང་ལས་དུད་འགྲོ་སྐྱེས་མ་ཐག་


JLAZ012_Page_0368
[མ་དཔེ་གཟིགས་ན་འདིར་གནོན།]

པས་ཀྱང་རང་གི་མ་ལ་མང་པོའི་གསེབ་ནས་ཡིད་གཉིས་མེད་པར་ནུ་བ་བཞིན། གཞིའི་རིག་པ་ངོ་བོ་ཀ་དག་ཆེན་པོ་མ་ལྟར་གནས་པ་དེ་ཁྲེགས་ཆོད་ཀྱིས་རྟོགས་ལ། དེ་ལས་གཞི་སྣང་དུ་མཆེད་པའི་རྩལ་གྱི་སྣང་བ་བུ་ལྟ་བུ་དེ་ཐོད་རྒལ་གྱིས་གོམས་པས། ངོ་བོ་དང་རང་རྩལ་གཉིས་བར་དོར་ཉི་མ་དང་ཟེར་གྱིས་རང་བཞིན་དུ་རང་སྣང་ལས་གཞན་དུ་མ་ཡིན་པར་ངེས་ཤེས་འདྲོངས་པས་མ་པང་དུ་བུ་འཇུག་པ་ལྟར་བྱེ་བྲག་ཕྱེད་པའི་མོད་ལ་བར་དོ་རང་བཞིན་མེད་པར་སངས་རྒྱ་བའོ། །དེ་ལ་གསང་ལམ་ཁྱད་པར་ཅན་འདི་ཡོད་དེ། གདོས་བཅས་ཀྱིས་བཅིངས་པའི་ཐིམ་རིམ་ཐམས་ཅད་རྫོགས་ནས་ལུས་སེམས་འབྲེལ་པ་ཆད་པའི་གནས་སྐབས་ན། ཀུན་གཞིའི་རྣམ་པར་ཤེས་པ་དྲན་པ་དང་དྲན་བྱེད་མེད་པ་ནམ་མཁའ་ལ་ཐིམ་པའི་ཐ་སྙད་ཀྱིས་དོན་དམ་པར་ཆོས་ཀྱི་དབྱིངས་སུ་ཐིམ་པའི་སྐད་ཅིག་མ་རང་བཞིན་གྱི་འོད་གསལ་སྟོན་ཀའི་ནམ་མཁའ་སྤྲིན་དང་བྲལ་བ་ལྟ་བུ། རྒྱ་གར་ཡང་མ་ཆད། ཕྱོགས་གང་དུའང་མ་ལྷུང་སྟོང་གསལ་སྒྲིབ་གཡོགས་དང་བྲལ་བར་འཆར་བས་དེ་ངོས་ཟིན་པར་བྱས་ཏེ་གཤིས་ཐོག་ཏུ་བཅས་བཅོས་མེད་པར་བཞག་པས། གདོད་མའི་གྲོལ་གཞི་ཆེན་པོ་ཞེས་བྱ་སྟེ། འཁྲུལ་གཞི་ལས་ཁྱད་ཆོས་དྲུག་གིས་བྱེ་བྲག་ཕྱེད་པའི་ཀ་དག་གི་ནང་


JLAZ012_Page_0369
[མ་དཔེ་གཟིགས་ན་འདིར་གནོན།]

དབྱིངས་ཆེན་པོར་བཙན་ཐབས་སུ་གྲོལ་བ་ཡིན་ནོ། །འདིར་ཀུན་མཁྱེན་གྱིས། ཟབ་དོན་རྒྱ་མཚོར་ནམ་མཁའ་འོད་གསལ་ལ་ཐིམ་པའི་སྐབས་སུ་གྲོལ་ས་འདི་བསྟན་པ་ནི། སྐད་ཅིག་མ་དང་པོར་ཞེས་པའི་ཚིག་གི་འོག་མ་ལ་འབྲེལ་སྦྱར་ནས་བཀོད་པ་ཡིན་གྱི་རྒྱུ་མཚན་དཔྱད་པ་རྫོགས་པའི་མན་ངག་ཏུ་ཞལ་གདམས་ཀྱིས་བསྟན་པ་ཉམས་ལེན་གནད་ཀྱི་སྒྲོན་མེ་ལ་སོགས་པས་ཤེས་སོ། །ལར་རྒྱས་བསྡུས་ཀྱི་བཤད་པ་དང༌། གབ་སྦས་ཀྱི་བཤད་པ་ལ་སོགས་མཐའ་དྲུག་དང་ཚུལ་བཞིས་བཅིངས་པ་དག་ལ་སྣང་བ་གདོང་གཏད་ཀྱི་ཤེས་བྱ་མི་འཇུག་པས་འདི་དག་ལ་ལུང་སྦྱོར་དང་རིག་པའི་ཉག་ཕྲན་ཅུང་ཟད་འཕེན་པར་སྤྲོ་ནའང་འདི་ནི་མན་ངག་གི་ཡི་གེ་ཡིན་པས་དོན་ལ་རྟོན་པའི་ཆ་ནས་ཚིག་མང་པོ་ལ་འཛེམས་སོ། །དེར་མ་གྲོལ་ན་ནམ་མཁའ་འོད་གསལ་ལ་ཐིམ་པ་ཞེས་བྱ་སྟེ། ཉི་ཟླ་ཁ་སྦྱོར་ལས། སྐྱེས་བུ་རྣམས་ཀྱི་རྣམ་པར་ཤེས་པ་འོད་གསལ་ལ་ཐིམ་པ་ཞེས་བྱ་སྟེ། དབུགས་ཕྱི་ནང་གི་འགྲུལ་ཐག་ཆད་མ་ཐག་ཏུ་རང་གི་དབང་པོ་རྣམས་ཀྱི་ཆ་ལས་དངོས་པོར་སྣང་བ་ནི་མེད་དེ། ཡོད་སྙམ་པའི་ཤེས་པ་ནི་འབྱུང་ངོ༌། །གདོས་བཅས་ཀྱི་ལུས་འདི་མི་སྣང་སྟེ་འོད་ཀྱི་ལུས་སུ་གསལ་ལོ། །དེའི་ཚེ་སྤྱོད་ཡུལ་དུ་གྱུར་ཚད་ཙམ་འོད་ཟེར་ལྔའི་དཀྱིལ་འཁོར་དུ་སྣང་ངོ༌། །ཞེས་དེའི་ཚེ་དུས་མ་འགྱུར་བར་སྣང་བ་འགྱུར་ནས་ཕྱི་ས་རྡོ་རི་


JLAZ012_Page_0370
[མ་དཔེ་གཟིགས་ན་འདིར་གནོན།]

བྲག་རྩི་ཤིང་ནགས་ཚལ་ཉི་ཟླ་དང་བཅས་པའི་བརྟན་གཡོའི་སྣང་བ་ནི་ནུབ། གང་དུ་བལྟས་ཀྱང་ཟ་འོག་ཁ་ཕྱེ་བའམ། སེང་རས་བཀབ་པའི་མིག་ཉི་ཟེར་ལ་བལྟས་པ་བཞིན། སྣང་བ་ཐམས་ཅད་ཤིན་ཏུ་བཀྲ་བ། ཁ་དོག་སྣ་ཚོགས་པ། ཕྱི་ནང་དང་ཡང་དོག་མེད་པ། འགུལ་འཕྲིག་གི་རྣམ་པ་ཅན་རབ་ཏུ་འཚེར་བའོ། །དེའི་ཚེ་ད་ལྟ་ཐོད་རྒལ་ལ་ཇི་ཙམ་གོམས་པ་ཙམ་གྱི་སྣང་བ་དེ་རིག་པའི་གྲོགས་སུ་གྲོལ་ལོང་ཡོད་པར་འཆར་ཞིང༌། མ་གོམས་པ་དག་ལ་སྐར་མདའ་རྒྱུག་པའི་ཆ་ཙམ་ལས་མེད་པའང་ཡོད་དེ། རིག་པ་རང་ས་འཛིན་པའི་ཚུལ་རྩ་རྒྱུད་ལས། དེ་ཚེ་འོད་སྣང་དུམ་བུའི་ཚེ། །མཁས་པས་སྣང་བ་མཆེད་པ་བཟུང༌། །ཞེས་རང་བཞིན་གྱིས་བསམ་གཏན་ལ་བག་ཕེབས་ནས་སྣང་བ་མཆེད་པ་རང་སྣང་དུ་ངོས་བཟུང་བས། སྐད་ཅིག་མ་དང་པོར་རང་སྣང་རང་བཞིན་མེད་པར་ཡིད་ཆེས། གཉིས་པ་རང་ས་རུ་གྲོལ། གསུམ་པར་གྲོལ་ཐོག་ཏུ་བཙན་ས་ཟིན་པས་དེ་ཕན་ཆད་ཀྱི་སྣང་བ་གང་ཡང་མེད་དོ། །དེ་ནས་འོད་གསལ་ཟུང་འཇུག་ལ་ཐིམ་པ་ནི། ཉི་ཟླ་ཁ་སྦྱོར་ལས། ཡང་སྐྱེས་བུའི་འོད་གསལ་དེ་ཟུང་འཇུག་ལ་ཐིམ་པ་ཞེས་བྱ་སྟེ། སྣང་བ་དེ་དག་སྐུའི་རྣམ་པར་རང་ཤར་ཏེ། སྐུ་དེ་དག་ཀྱང་མི་ཆེ་བ། མི་ཆུང་བ། ཆ་མཉམ་པ། རྒྱན་དང༌། ཁ་དོག་དང༌། བཞུགས་ཚུལ་


JLAZ012_Page_0371
[མ་དཔེ་གཟིགས་ན་འདིར་གནོན།]

དང༌། གདན་ཁྲི་དང༌། རང་རང་གི་ཕྱག་རྒྱ་དང་བཅས་པ་སྟེ། ཞེས་པས་ཁྲོ་བོའི་རྣམ་པར་ཤར་བའི་ཚེ། སྐུ་དེ་དག་ཀྱང་དུང་ཁང་ན་ཡུངས་འབྲུའི་རྣམ་པ་ཙམ་ལས་མེད་ཀྱང་བར་དོར་འཇིག་རྟེན་གྱི་ཁམས་ཁྱབ་པ་ཙམ་དུ་ཆེ་བ་ནས། ཡུངས་འབྲུ་ཙམ་དུ་ཆུང་བའི་བར་ཆ་མཉམ་ཞིང༌། དེ་དག་ཀྱང་མགོ་བརྙན་མ་ངེས་པ་ལ་མཚོན་ཆ་སྣ་ཚོགས་པའི་འཁྲུལ་འཁོར་གྱིས་རང་ཉིད་ལ་བརྡེག་པའི་སྣང་བས་སྐྲག་པ་དང༌། འབྲུག་སྟོང་ལྡིར་བ་ཙམ་དུ་ཆེ་བའི་སྒྲ་བཟད་པས་སྔངས་པ་དང༌། མཚོན་ཆའི་རྣམ་པར་ཟུག་པའི་ཟེར་གྱིས་འཇིག་པ་སྟེ། ཀློང་གསལ་ལས། དེ་ཚེ་སྒྲ་འོད་ཟེར་དུ་འཁྲིགས། །སྐུ་ཡིས་སྣང་བས་སྐྲག་པར་བྱེད། །ཅེས་སོ། །དེ་ལ་སེང་གེའི་གསོབ་མཐོང་བས་མཚང་ཕུགས་ནས་རིག་པ་བཞིན་རང་སྣང་ལ་བག་མི་ཚ་བའི་གདེང་དགོས་ཏེ། ཐུན་མོང་བའི་གང་ཟག་བཟང་པོ་དག་ཀྱང་འདི་ནས་ལྡོག་པའི་ཚུལ་མན་ངག་སྙིང་དགོངས་ལས། ཀྱེ་གསང་བའི་བདག་པོ། ད་ལྟ་ངོ་མ་འཕྲོད་ན་སྒོམ་སྒྲུབ་ཇི་ཙམ་བྱས་ཀྱང་སངས་མི་རྒྱའོ། །གདམས་ངག་དང་མ་ཕྲད་པས་འོད་ཀྱིས་འཇིགས་སོ། །སྒྲས་སྔངས་སོ། །ཟེར་གྱིས་སྐྲག་གོ། །གདམས་པའི་གནད་ངོ་མ་འཕྲད་ན་སྒྲ་འོད་ཟེར་གསུམ་ངོ་མ་ཤེས་པས་འཁོར་བར་འཁྱམ་མོ། །ཞེས་སོ། །རྒྱུ་མཚན་དེས་རྣལ་འབྱོར་ཆེན་པོའི་རྒྱུད་དག་ལས་


JLAZ012_Page_0372
[མ་དཔེ་གཟིགས་ན་འདིར་གནོན།]

བར་དོ་སྒྱུ་ལུས་ལོངས་སྐུར་ལྡང་བའི་དོད་ཐུབ་བསྟན་མོད་དེ། དེ་དག་མན་ངག་གི་རྒྱུད་མ་ཡིན་པས་རང་བཞིན་ལྷུན་གྲུབ་ཀྱི་སྣང་ཆ་སྒྲ་ཇི་བཞིན་པ་འདི་གབ་སྟེ། རང་སྣང་ལོངས་སྐུར་ཤར་བའི་དབྱིངས་སུ་སངས་རྒྱ་མི་ཤེས་པར་སྣང་བ་རང་ཚན་པར་འཛིན་པ་ལས་ཆེས་འཕགས་པའོ། །དེ་སྐད་དུ་ཀློང་དྲུག་པར། ཆོས་ཉིད་དག་པའི་བར་དོ་དང༌། །ཡི་དམ་ལྷ་ཡི་སྒྱུ་ལུས་གཉིས། །འདྲའོ་འདྲའོ་ནོར་ར་རེ། །ཞེས་སོ། །དེ་བཞིན་དུ་ཞི་བའི་སྣང་བ་ནི། །ཁ་སྦྱོར་ལས། སྐུ་དེ་ཀུན་ཀྱང་ལྔ་ལྔའི་ཟུང་གིས་ཁྱབ་པ། ལྔ་ཚན་རེ་ལ་འོད་ཀྱི་མུ་ཁྱུད་དང་བཅས་པ། ཡབ་ཀྱི་ཆ་འཛིན་པའི་རིགས་དང༌། སེམས་དཔའ་དང༌། སེམས་མ་དང༌། དཀྱིལ་འཁོར་ཐམས་ཅད་གཅིག་ལ་རྫོགས་པར་གནས་སོ། །ཞེས་རིགས་ལྔ་ཡབ་ཡུམ་གྱི་ཚོམ་བུའི་སྣང་བ་དེ་ནི་རིམ་གྱིས་སྨིན་པ་འབྲས་ཀྱི་ལྗང་པ་ལྟར་བསམ་གཏན་གྱི་ཞག་ལྔར་རིམ་པ་བཞིན་འཆར་བའི་ཚུལ་ཞག་དང་པོར་རྣམ་པར་སྣང་མཛད་ཡུམ་དང་བཅས་པ་གཙོ་བོར་བཞུགས་པའི་ལྔ་ཚོམ། གཉིས་པ་མི་བསྐྱོད་རྡོ་རྗེ། གསུམ་པ་ལ་རིན་ཆེན་འབྱུང་ལྡན། བཞི་པར་སྣང་བ་མཐའ་ཡས། ལྔ་པ་དོན་ཡོད་གྲུབ་པ་གཙོ་བོར་བཞུགས་པའི་ཚོམ་བུ་སྟེ། དེ་ལ་བསམ་གཏན་གྱི་ཞག་ནི་ད་ལྟ་ཏིང་ངེ་འཛིན་ལ་ཇི་ཙམ་གནས་པའི་ཡུན་རིང་ཐུང་ཡིན་ནོ། །


JLAZ012_Page_0373
[མ་དཔེ་གཟིགས་ན་འདིར་གནོན།]

དུས་དེར་གནད་གསུམ་གྱིས་གྲོལ་བ་ནི་སྔ་མ་ལས། དེའི་ཚེ་རང་གི་སྙིང་ག་ནས་འོད་ཤིན་ཏུ་ཕྲ་བ་ཞིག་འཆར་ཏེ། དེ་སྐུ་ཐམས་ཅད་ཀྱི་ཐུགས་ཀར་འབྲེལ་བར་འཆར་རོ། །དེ་ལ་རང་གི་ཤེས་པ་ཟིན་ན་མི་རྟོག་པའི་བསམ་གཏན་ལ་རང་བཞིན་དུ་གནས་སོ། །དེ་ནི་རིག་པ་འོད་ལ་འཇུག་པ་ཞེས་བྱའོ། །སྣང་བ་དེ་ཀུན་རབ་ཏུ་འཁྲིགས་པ་མངོན་པར་འགྱུར་ཏེ། སྙིང་གའི་ཟེར་ཐག་དེ་ལས་ཀྱང་ཐིག་ལེ་ཕྲ་མོ་གྲངས་མེད་པར་འཆར་རོ། །དེ་ནས་རང་གི་སྙིང་ག་ནས་འོད་ཐག་ཚོན་སྐུད་སྒྲིལ་བ་ཙམ་ཞིག་འཆར་རོ། །དེ་ནས་སྐུ་དེ་དག་ཐམས་ཅད་རང་གི་ལུས་ལ་ཐིམ་པ་སྙམ་བྱེད་པའི་སྣང་བ་འཆར་ཏེ། དེ་ནི་འོད་རིག་པ་ལ་ཚུར་འཇུག་པ་ཞེས་བྱའོ། །དེའི་ཚེ་སྐྱེས་བུ་རྣམས་ཀྱི་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་ཐབས་མཆོག་ཏུ་དྲན་པར་བྱའོ། །ཞེས་སོ། །དེ་ལ་བརྟན་པ་མ་ཐོབ་ན། ཟུང་འཇུག་ཡེ་ཤེས་ལ་ཐིམ་པ་ཞེས་བྱ་སྟེ་ཡེ་ཤེས་བཞི་སྦྱོར་གྱི་སྣང་བ་རྡོ་རྗེ་སེམས་དཔའ་ཁོང་སེང་གི་ལམ་ནི་མ་བཀྲལ་ཡང་ལུང་གིས་གོ་བ། ཉི་ཟླ་ཁ་སྦྱོར་ལས། ཡང་རང་གི་སྙིང་ག་ནས་འོད་ཀྱི་ཐག་པ་ཤིན་ཏུ་ཕྲ་བ་ཞིག་འཆར་ཏེ། དེ་ནི་སྟེང་གི་ནམ་མཁའ་ལ་གྱེན་དུ་ཟུག་པར་སྣང་བ་འོང་ངོ༌། །དེ་ལ་རང་གི་མིག་མ་ཡེངས་པར་བལྟས་པས་སྣང་བ་དེ་གཞན་དང་མ་འདྲེས་པར་ཤིན་ཏུ་རྒྱ་ཆེ་


JLAZ012_Page_0374
[མ་དཔེ་གཟིགས་ན་འདིར་གནོན།]

བར་འཆར་ཏེ། དེ་ཡང་མཐིང་ཁའི་སྣམ་བུའི་སྟེང་དུ་ཐིག་ལེ་ཟེར་དང་ལྡན་པ་མེ་ལོང་ཁ་སྦུབ་པ་ཙམ། དཔེར་ན་མུ་མེན་གྱི་ཕོར་པ་ཁ་སྦུབ་པ་ལྟ་བུ་ལ་ཡེ་ཤེས་ཀྱི་གཏིང་མདངས་དང་ལྡན་པ་ཤིན་ཏུ་གསལ་ལ་འཚེར་བ་དེ་ཡང་རང་བཞིན་གྱི་ཐིག་ལེ་ལྔ་ལྔས་བརྒྱན་པའོ། །ཡང་དེའི་སྟེང་དུ་དཀར་པོའི་སྣམ་བུའི་སྟེང་དུ་ཐིག་ལེ་ཤིན་ཏུ་གསལ་བ་དཔེར་ན་ཤེལ་གྱི་ཕོར་པ་ཁ་སྦུབ་པ་ལྟ་བུ་ཡེ་ཤེས་ཀྱི་གཏིང་མདངས་དང་བཅས་པ་སྔ་མ་ལྟར་འཆར་རོ། །ཡང་དེའི་སྟེང་དུ་སེར་པོའི་སྣམ་བུའི་སྟེང་དུ་དཔེར་ན་གསེར་གྱི་ཕོར་པ་ཁ་སྦུབ་པ་ལྟ་བུ་གོང་དང་འདྲ་བར་འཆར་རོ། །དེའི་སྟེང་དུ་འོད་ཟླུམ་པོ་ཤིན་ཏུ་གསལ་བ་རྨ་བྱའི་གདུགས་ལྟ་བུ་འཆར་རོ། །དེ་དག་ཀྱང་ཡེ་ཤེས་ལྔའི་སྣང་བ་སྟེ་བྱ་བ་གྲུབ་པའི་ཡེ་ཤེས་རྩལ་མ་རྫོགས་པས་མི་སྣང་ངོ༌། །དེ་ནི་ཡེ་ཤེས་བཞི་སྦྱོར་གྱི་སྣང་བ་ཞེས་བྱ་སྟེ། རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱའོ། །དེའི་ཚེ་མི་འགྱུར་བ་གསེར་གྱི་ཐུར་མ་ལྟ་བུའི་ཐབས་མཆོག་ཏུ་དྲན་པར་བྱའོ། །ཞེས་གསུང་པ་ནི་སྣང་བ་རང་རང་གི་ཐད་ཀར་རིག་པའི་རང་སོ་མ་ཡེངས་པར་བཞག་པས། དཔེར་ན་སྨན་པ་མཁས་པས་སྙིང་


JLAZ012_Page_0375
[མ་དཔེ་གཟིགས་ན་འདིར་གནོན།]

ཆུ་འདྲེན་པའི་ཚེ་སྙིང་ཐུར་བཙུགས་པ་རང་ས་ལས་སྤུ་ཙམ་མ་གཡོས་པའི་གནད་ཀྱིས་སྙིང་ཆུ་དྲངས་ནས་གསོ་བ་བཞིན་རིག་པ་རང་ས་ལས་མ་གཡོས་པས་གྲོལ་བ་ཡིན་ནོ། །དེའང་འདིར་དབྱིངས་ཀྱི་ཡོན་ཏན་མཐར་མ་ཕྱིན་པས་རྩལ་མ་རྫོགས་ཞེས་ཡེ་ཤེས་བཞི་སྦྱོར་གྱི་དོན་བླང་དགོས་ལ། ཀུན་མཁྱེན་གྱིས། འདིར་ད་དུང་ཀ་དག་ཏུ་གྲོལ་མ་ཟིན་པ་དང་སྦྱར་ནས་བཞི་སྦྱོར་དུ་བཞག་སྟེ། བློ་རྩིང་བ་དག་བྱ་བ་གྲུབ་པའི་སྣང་བ་མེད་པར་འདོད་པ་ནི་ཧ་ཅང་མི་རིགས་པའོ། །ཞེས་གསུངས་པས་དངོས་ཀྱི་འབྲས་བུ་རྫོགས་པ་ནི་ཡེ་ཤེས་ལྔའི་སྣང་བ་ཡིན་པས་རྒྱུད་ཀྱི་དགོངས་པ་ནི་ཤིན་ཏུ་ཟབ་ལ་བརླིང་བར་ཤེས་དགོས་སོ། །དེ་ནས་ཡེ་ཤེས་ལྷུན་གྲུབ་ལ་ཐིམ་པ་ཞེས་བྱ་སྟེ། སྔར་གྱི་སྣང་བ་དེ་དག་དང་རིག་པ་སྟེང་གི་འོད་ཟླུམ་ལ་འདུས་པ་སྙམ་བྱེད་པའི་རྩལ་ལས། སྟེང་ན་ཀ་དག་གི་སྣང་བ་ནམ་མཁའ་གཡའ་དག་པ་ལྟ་བུ། དེའི་འོག་ན་ལོངས་སྐུ་ཁྲོ་བོའི་དཀྱིལ་འཁོར་རྒྱ་ཆེ་ལ་ལྷུན་སྟུག་པ། དེའི་འོག་ན་ལོངས་སྐུ་ཞི་བའི་དཀྱིར་འཁོར་འོད་གསལ་བ། ཕྱོགས་མཚམས་ན་རང་བཞིན་སྤྲུལ་པའི་ཞིང་ཁམས་བཀོད་ལེགས་པ། འོག་ན་རིགས་དྲུག་འཁྲུལ་པའི་སྣང་བ་འདུལ་བྱེད་སྟོན་པ་དྲུག་དང་བཅས་པ་རང་སྣང་གཟུགས་བརྙན་ལྟར་ཤར་བ་ནི་གཞི་ལས་མ་གཡོས་པའི་གཞི་སྣང་ཞེས་བྱ་


JLAZ012_Page_0376
[མ་དཔེ་གཟིགས་ན་འདིར་གནོན།]

སྟེ་འཆར་ལུགས་བརྒྱད་དུ་སྣང་བའི་ཚུལ། ཐུགས་རྗེ་ལྟར་ཤར་བས་སྙིང་རྗེའི་ཤུགས་འཁོར་བ་ལ་འཇུག་པས་འཁོར་འདས་རྒྱ་མ་ཆད། འོད་ལྟར་ཤར་བས་སྣང་ཆ་ནང་ན་གསལ། སྐུ་ལྟར་ཤར་བས་སྣང་བ་གང་དུའང་མི་འབྱེད། ཡེ་ཤེས་ལྟར་ཤར་བས་སྣང་བ་ཟང་ཐལ། གཉིས་མེད་ལྟར་ཤར་བས་ཤེས་པ་རྩེ་གཅིག་ཏུ་གནས། མཐའ་གྲོལ་ལྟར་ཤར་བས་ངོ་བོ་ཉིད་དུ་སངས། མ་དག་པ་ལྟར་ཤར་བས་སྲིད་པའི་འབྱུང་ཁུངས་མ་འགགས། དག་པ་ལྟར་ཤར་བས་ཡེ་ཤེས་མ་བུ་འབྲེལ་བའོ། །དེའི་ཚེ་སྔར་འདྲིས་ཀྱི་མི་དང་འཕྲད་པ་ལྟར་རང་སྣང་ལ་ཐེ་ཚོམ་མི་ཟ་བར་ཡིད་ཆེས། མི་འགྱུར་བ་གསེར་གྱི་ཐུར་མའི་དཔེས་ཡིད་ཆེས་ཐོག་ལས་གཞན་དུ་མི་ཡེངས་པར་བཙན་ས་བཟུང༌། དཔག་ཆེན་མདའ་ཚུར་ལ་མི་ལྡོག་པའི་དཔེས་བཙན་ས་བཟུང་བའི་གཤིས་ལ་མི་གཡོ་བར་བཞག་པས་གྲོལ་བ་ཡིན་ནོ། །དེ་ལྟར་འཆར་ལུགས་བརྒྱད་དུ་བསྟན་པའང་འཁོར་འདས་སོ་སོའི་འཇུག་ལྡོག་རིག་པ་དང་མ་འདྲེས་ཤིང་འབྲེལ་བ་ལྟར་གནས་པའི་མ་ཚང་བསྟན་པའི་ཚུལ་རང་བཞིན་དུ་དབང་པོ་དྲུག་ལ་རྣམ་ཤེས་གཅིག་ཉིད་ཐ་དད་པར་འཇུག་པ་ལྟ་བུའི་དཔེས་གོ་བའི་དོན། རིན་པོ་ཆེ་སྤུངས་པའི་རྒྱུད་ནས་ངོ་བོ་དབྱིངས་ཆེ་ལ་འཐད་པས་གསལ་བར་བསྟན་པའི་ཆིངས་རླབས་པོ་ཆེའི་དོན་


JLAZ012_Page_0377
[མ་དཔེ་གཟིགས་ན་འདིར་གནོན།]

ལ་རྨོངས་པར་གྱུར་ནས། ལྷུན་གྲུབ་རིན་པོ་ཆེའི་སྣང་བ་ཡུལ་རང་ཚན་པ་བརྒྱད་དུ་བཟུང་བའི་འབྲེལ་ཚུལ་མང་པོ་བྱུང་བ་ནི་ནོར་བ་ཡིན་ལ། རྒྱུ་མཚན་དེས་ཚིག་དོན་རིན་པོ་ཆེར། ཁོ་བོས་ཀྱང་འདི་ཉིད་ལས། སྙིང་ཏིག་གི་གནད་ངེས་པ་རྣམས་རྙེད་པ་ཡིན་ཞེས་རང་བཞིན་ལེགས་པར་འདོམས་པའི་དོན་ལ་རྟོག་པ་དེངས་སོང་ཡང་སྲིད་ན་རྫོགས་པ་ཆེན་པོའི་བསྟན་པ་ཉི་ཞུར་ཙམ་གནས་སོ་སྙམ་ནས་དང་བ་སྟོན་པ་ལ་མཆོག་ཏུ་སྤྲོའོ། །འདིའི་སྐབས་ན་ཀློང་གསལ་ལས། དེ་ཚེ་རིགས་ཀྱི་བུ་དེ་ལ། །མངོན་པར་ཤེས་པ་དགུ་འཆར་ཏེ། །ཞེས་གསུངས་པ་ནི་རྣམ་པར་དཔྱད་ན་ལྷུན་གྲུབ་ཀྱི་སྣང་བ་ཆེན་པོའི་རྩལ་ལམ་རོལ་པ་ཆེན་པོ་ཉིད་ལས་ངོ་བོ་གཞན་དུ་མེད་པས་དོན་མཐོང་བར་ཤེས་ནས། འདིར་སྤྱིར་བཏང་གི་མངོན་ཤེས་ལྔ་དང་རྗེས་དྲན་གྱི་རིམ་པ་འགྲེལ་ཆེན་རིན་པོ་ཆེ་གསེར་གྱི་ཕྲེང་བའི་དགོངས་པ་ལྟར་སྐྱེ་ཚུལ་གྱི་དབང་ལས་རྗེས་དྲན་སྔོན་ལས་འབྱུང་བ་ནི། ཉི་ཟླ་ལས། ལྷ་རྗེས་སུ་དྲན་པས་དེ་ཉིད་ཡི་དམ་ལྷའི་ཞལ་མཐོང་བ་དང༌། ལམ་རྣམས་རྗེས་སུ་དྲན་པས་བར་མ་དོའི་ཆོས་ཉིད་ལ་དབང་བསྒྱུར་བ་དང༌། སྐྱེ་གནས་རྗེས་སུ་དྲན་པས་དབང་པོ་ཐ་མ་རྣམས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་འབྱིན་པ་དང༌། བསམ་གཏན་རྣམས་རྗེས་སུ་དྲན་པས་ཞག་ལྔར་བསམ་གཏན་


JLAZ012_Page_0378
[མ་དཔེ་གཟིགས་ན་འདིར་གནོན།]

ལ་གནས་པ་དང༌། བླ་མའི་མན་ངག་རྗེས་སུ་དྲན་པས་རང་གི་སྣང་བ་རྣམས་དང་གཉིས་སུ་མེད་པར་སྤྱོད་པ་དང༌། ལྟ་བ་རྗེས་སུ་དྲན་པས་སྔར་འདྲིས་པའི་མི་ཕྱིས་ཕྲད་པ་ཙམ་གྱིས་ངོ་ཤེས་པ་ལྟ་བུའོ། །ཞེས་གསུངས་པས། བསྐྱེད་རིམ་ལ་གོམས་པ་རྣམས་ཡི་དམ་རྗེས་སུ་དྲན་པས་ཞལ་མཐོང་བ་དང༌། བླ་མ་མཆོག་ལ་གདུང་བ་དང་ལྡན་པ་རྣམས་མོས་གུས་དྲན་པའི་མོད་མདུན་དུ་བྱོན་ནས་མན་ངག་སྟོན་པ་དང༌། གདམས་པ་རྣམས་དྲན་པ་ལས་དེ་དང་དེའི་བྱེད་ལས་ཀྱི་བར་མ་དོའི་གྲོང་ཁྱེར་ལས་དབུགས་འབྱིན་པའི་ཕྱིར་ད་ལྟ་ཉིད་ནས་གོམས་པ་གཅེས་སོ། །དེ་བཞིན་དུ་ཀློང་གསལ་ལས། མངོན་པར་ཤེས་པ་དྲུག་ཕྲག་དྲུག །ཅེས་པས་དབང་པོ་དང༌། སེམས་ལས་སུ་རུང་བ་དང༌། ཤེས་རབ་ལ་དབང་ཐོབ་པ་དང༌། ཡེ་ཤེས་ཀྱི་མཐོང་བ་དག་པ་དང༌། ཆོས་ཉིད་ཕྱིན་ཅི་མ་ལོག་པར་མཐོང་བ་དང༌། སངས་རྒྱས་ཀྱི་གཟིགས་པ་ཕྱིན་ཅི་མ་ལོག་པར་མཐོང་བ་སྟེ། རེ་རེ་ལའང་རྣམ་པར་དག་པ་དང༌། ཤིན་ཏུ་རྣམ་པར་དག་པ་དང༌། རབ་ཏུ་རྣམ་པར་དག་པ་དང༌། མཆོག་ཏུ་དག་པ་ལ་སོགས་ཀྱིས་དབྱེ་བས་སུམ་ཅུ་རྩ་དྲུག་ཏུ་ཡོད་པ་ཐེག་པའི་མཆོག་ལས་ཤེས་པར་བྱ་ཞིང༌། འདིར་ཉི་ཟླ་ཁ་སྦྱོར་ལས། རིགས་ཀྱི་བུ་དེ་ལ་མངོན་པར་ཤེས་པ་དྲུག་འཆར་ཏེ།


JLAZ012_Page_0379
[མ་དཔེ་གཟིགས་ན་འདིར་གནོན།]

སྔོན་གྱི་སྐྱེ་གནས་ཤེས་པ་དང༌། འཆི་འཕོ་དང་སྐྱེ་བ་ཤེས་པ་དང༌། ཕ་རོལ་གྱི་སེམས་ཤེས་པ་དང༌། སྣང་བ་ལྐོག་ཏུ་གྱུར་པ་ཐམས་ཅད་ཤེས་པ་དང༌། རིགས་དྲུག་གི་གནས་མཐོང་ཞིང་ཤེས་པ་དང༌། དབང་པོ་རྣམས་རྣམ་པར་དག་པའི་མངོན་པར་ཤེས་པ་དང་དྲུག་འཆར་རོ། །ཞེས་དོན་བསྡུའོ། །དེ་བཞིན་དུ་སྔོན་ཐོས་པའི་ཆོས་སུ་གྱུར་ཏོ་ཅོག་དུས་གཅིག་ཏུ་རང་རྒྱུད་ལ་འཆར་ཞིང་མ་ཐོས་པའི་ཆོས་ཀྱི་རྣམ་གྲངས་ཀྱང་ཚད་མེད་པར་འཆར་བས་ན་མི་བརྗེད་པའི་གཟུངས་ཐོབ་པ་སྟེ། དེ་ཉིད་ལས། དེའི་ཚེ་མི་བརྗེད་པའི་གཟུངས་རྣམས་ཀྱང་རང་གི་རྒྱུད་ལ་སྐྱེ་སྟེ། སྔོན་གྱིས་ཆོས་རྣམས་ཐམས་ཅད་རྒྱུད་ལ་དུས་གཅིག་ལ་འཆར་རོ། །དེ་བཞིན་དུ་སྔར་མ་ཐོས་པའི་ཆོས་རྣམས་ཀྱང་འཆར་བས་ན་ཆོས་ཉིད་ཀྱི་བར་དོ་ཞེས་བྱའོ། །ཞེས་དང་ཆོས་ཉིད་བསམ་གྱིས་མི་ཁྱབ་པའི་ངང་དུ་བློའི་འཇུག་པ་ཞི་བས་ཏིང་ངེ་འཛིན་ལ་གནས་པའི་ཚུལ་ཡང༌། ཁ་སྦྱོར་ལས། རྒྱུན་གྱི་ཏིང་ངེ་འཛིན་རྒྱུད་ལ་རང་བཞིན་དུ་ཤར་བས། རྣམ་པར་རྟོག་པ་ངན་པ་ནི་གཏན་ནས་མི་སྐྱེ་ཞེས་སོ། །སྐབས་འདི་དག་ཏུ་དབང་པོའི་རིམ་པས་བར་དོའི་གྲོལ་ཚད་ནི་མ་ངེས་པ་ཡོད་དོ། །སེང་གེ་རྩལ་རྫོགས་ལས་ཞག་ལྔ། སྐུ་གདུང་འབར་བ་ལས་སྐད་ཅིག་མ་ལྔ་དང༌། ཉི་ཟླ་ཁ་སྦྱོར་ལས། དེ་ལྟར་ན་དབང་པོ་ནི་གསུམ་སྟེ། རབ་ཀྱིས་སྐད་ཅིག་གསུམ་ལ་གྲོལ་བར་


JLAZ012_Page_0380
[མ་དཔེ་གཟིགས་ན་འདིར་གནོན།]

འགྱུར་རོ། །འབྲིང་ཞག་ལྔ་ལ་བརྟན་པ་ཐོབ་པ་ཡོད་དོ། །ཐ་མ་ནི་སྐད་ཅིག་མ་ཉི་ཤུ་རྩ་གཅིག་ན་བརྟན་པ་ཐོབ་པར་ངེས་པ་ཡིན་ནོ། །ཞེས་དང༌། རང་ཤར་ལས། དབང་པོའི་བྱེ་བྲག་གིས་ཞག་ཉི་ཤུ་རྩ་གཅིག་ཏུའང་བཤད་ཅིང༌། འདིར་སྐད་ཅིག་མ་དང་བསམ་གཏན་གྱི་ཞག་ཤན་མ་ཕྱེད་པར་གཅིག་ཏུ་སྨྲ་བ་དག་ལ་ངག་གི་དབང་པོའི་ལུང་རིགས་ཀྱི་སྡེར་མོས་བསྣད་པར་འགྱུར་ཏོ། །དེ་བས་ན་སྣང་བ་ལ་ཤེས་པ་ཤར་ནས་དེར་འདུག་གོ་སྙམ་དུ་ཡུལ་རྟོག་པའི་ཡུན་ལ་རྣམ་གྲོལ་གྱི་སྐད་ཅིག་ཏུ་བྱེད་ལ། བྱ་བ་རྫོགས་པའི་སྐད་ཅིག་ནི་དེ་བས་ཡུན་རིང་བ་སྟེ། དཔེར་ན་དབང་པོ་ཡུལ་ལ་སད་པ་དང༌། རང་བཞིན་ཤེས་པ་དང༌། རྩལ་རྫོགས་པ་ལ་ལྟོས་པའི་ཁྱད་པར་རོ། །ཇི་ལྟར་ཡང༌། སྔར་ཤར་བའི་ལྷུན་གྲུབ་ཀྱི་སྣང་བ་ནང་དུ་སྡུད་པའི་ཚེ་ཐིམ་ལུགས་བརྒྱད་དུས་གཅིག་ལ་འབྱུང་བའི་ཚུལ་རང་ཤར་ལས། དེ་ཡང་ཐུགས་རྗེ་ཐུགས་རྗེ་ལ་ཐིམ་པ་དཔེར་ན་ཉི་མ་ནུབ་པའི་ཟེར་ལྟ་བུའོ། །ཞེས་རིགས་དྲུག་གི་སྣང་ཆ་རང་ངོ་ལ་མི་སྣང་བས་འཁྲུལ་བའི་མིང་མེད། ཡེ་ཤེས་ཡེ་ཤེས་ལ་ཐིམ་པ་ནི། དཔེར་ན་མ་པང་དུ་བུ་འཇུག་པ་ལྟ་བུའོ། །ཞེས་པས་ཆོས་ཉིད་མ་བུ་འདྲེས་པས་ཡེ་ཤེས་ལོགས་ན་མེད། འོད་འོད་ལ་ཐིམ་པ་ནི་དཔེར་ན་འཇའ་ཚོན་ནམ་མཁའ་ལ་ཡལ་བ་ལྟ་བུའོ། །སྐུ་སྐུ་ལ་ཐིམ་པ་ནི་


JLAZ012_Page_0381
[མ་དཔེ་གཟིགས་ན་འདིར་གནོན།]

དཔེར་ན་བུམ་པའི་སྐུ་ལྟ་བུའོ། །ཞེས་མཚན་མ་རིས་ཅན་གྱི་ཞལ་ཕྱག་ཏུ་མ་གྲུབ་པར་ཡེ་ཤེས་ནང་དུ་གསལ་བའི་དོན་ནོ། །གཉིས་མེད་གཉིས་མེད་ལ་ཐིམ་པ་ནི་དཔེར་ན་ཆུ་བོ་ཆུ་བོ་ལ་ཐིམ་པ་ལྟ་བུའོ། །མཐའ་གྲོལ་མཐའ་གྲོལ་ལ་ཐིམ་པ་ནི་དཔེར་ན་ནམ་མཁའ་ལ་ནམ་མཁའ་ཐིམ་པ་ལྟ་བུའོ། །ཞེས་པ་ནི་ཐིམ་བྱ་དང་ཐིམ་བྱེད་འདྲེས་ཏེ་སྟོང་པ་ལ་གཏད་པའི་ཡུལ་མེད་པས་བསམ་འདས་ཆེན་པོའི་དགོངས་པ་ལ་གནས་པའི་ཚུལ་ལོ། །དག་པ་ཡེ་ཤེས་ཀྱི་སྒོ་ངོ་བོ་ཀ་དག་ལ་ཐིམ་པ་དཔེར་ན་སེང་གེས་གངས་ཟིན་པ་ལྟ་བུའོ། །ཞེས་པ་ནི་རིག་པ་རང་ཡུལ་ལ་སླེབས་པས་ཡ་ང་བ་དང་བག་ཚ་བ་མེད་པའི་ཚད་དོ། །མ་དག་པ་འཁོར་བའི་སྒོ་དག་པ་ཡེ་ཤེས་ཀྱི་སྒོ་ལ་ཐིམ་པ་ནི་དཔེར་ན་སྦྲའི་ཆོན་ཐག་བཏུལ་བ་ལྟ་བུའོ། །ཞེས་པ་ནི། ཐིག་ལེ་ཉག་གཅིག་ལ་འདུས་པའི་དཔེ་དོན་ཏེ། དེ་དག་ཏུ་གྲོལ་བར་བྱེད་པའི་གནད་རིག་པ་སྟོང་ཉིད་ཟང་ཐལ་བསམ་བརྗོད་ལས་འདས་པ་དེ་ཀ་དག་གི་རང་ངོར་འདུག་པས་མཐར་ཐུག་གི་གྲོལ་ས་ཅེར་མཐོང་ཡིན་པར་རང་ཐོག་ཏུ་ཤེས་དགོས། ཡིན་ཐོག་ཏུ་ཐག་ཆོད་དགོས། གྲོལ་ཐོག་ཏུ་གདེང་བཅའ་དགོས། རང་བཞིན་གྱི་སྣང་བ་ལ་ཕར་བལྟས་ན་མཐའ་ཡས་ཀྱང༌། ཚུར་བལྟས་ན་གཅིག་ཀྱང་མེད་པས། མེད་དོ་སྙམ་པའི་འཛིན་པ་ཡང་རང་གྲོལ་བའི་སྐད་ཅིག་མ་རྗེན་པའི་རང་ངོ་རྟོག་དཔྱོད་


JLAZ012_Page_0382
[མ་དཔེ་གཟིགས་ན་འདིར་གནོན།]

མེད་པ་ནི་གདོད་མའི་གྲོལ་ས་བར་གྱིས་བཏབ་པའི་གནད། ཐུགས་རྗེ་ཡུལ་ལ་ཇི་ལྟར་འཇུག་ཀྱང་དེ་ཉིད་ཀྱི་རྗེས་མི་བཅད། ནང་དུ་མི་དགག་པར་ཤར་ས་དེ་ཀར་ཅོག་གིས་བཞག་པས། ཕྱི་ནང་བར་མེད་ཀྱི་ཤེས་པ་ཟང་ཐལ་ལེ་བས་བར་དོའི་སྣང་བ་རིག་མདངས་སུ་རང་དག་ནས་གྲོལ་ས་ཅེར་མཐོང་དུ་ངོ་ཤེས་པའི་གནད་སྙིང་གི་ཞུན་ཐིགས་ཏེ། གནད་གསུམ་གྱི་མན་ངག་འདི་ཀུན་མཁྱེན་བླ་མས་ཁོ་བོའི་བགོ་སྐལ་དུ་བཞག་ནས་མཆིམས་ཕུ་ནགས་ཀྱི་དུར་ཁྲོད་དུ་བྱིན་པ་ཡིན་ཏེ། འདི་སྐད་དུ། ཁ་འདུམས་ལ་ཆོད་ཆེ་བ། མདོ་འདུས་ལ་ཆིངས་ཆེ་བ། གནད་ཟབ་ལ་གལ་ཆེ་བ། མན་ངག་གིས་རྙེད་པ་སྟེ། སྙིང་གི་བུ་མཆོག་དག་ལས་གཞན་ལ་གསང་བའི་རྒྱས་གདབ་པའི་མན་ངག་གོ། །ཞེས་བཀའ་གཙིགས་ཀྱི་ཕྱག་རྒྱས་བཏབ་ཅིང་ཀུན་གྱིས་རྟོགས་པར་དཀའ་བའང༌། འདི་ནི་རྒྱུད་ཀྱི་རྡོ་རྗེའི་གནས་ལས་རང་གིས་རྙེད་པ་སྟེ། འདི་དང་གཞན་མང་པོ་དག་རང་གིས་རྟོགས་ཀྱང་གཞན་ལ་བཤད་པས་ནི་མི་གོ། །བསྟན་པས་ནི་མི་རྟོགས། སླར་རང་ལ་ཐིམ་ཞིང་ནུབ་པ་རྒྱ་མཚོ་ལས་ཆུ་བོ་བབས་པ་སླར་དེ་ཉིད་དུ་ཐིམ་པ་བཞིན་ནོ། །ཞེས་གསུངས་པ་སྟེ། མདོར་བསྡུ་ན། དེ་ལྟར་ལྷུན་གྲུབ་ཀྱི་སྣང་བའི་ཆ་ཐིམ་ལུགས་བརྒྱད་དུ་བསྟན་པ་སོགས་བར་མ་དོའི་གནས་སྐབས་གང་དུའང་ངོ་བོ་རང་ས་ཟིན་


JLAZ012_Page_0383
[མ་དཔེ་གཟིགས་ན་འདིར་གནོན།]

པ་དེའི་ཚེ། རིག་པ་དང་པོའི་འཁྲུལ་གཞི་ལས་ནི་འཕགས། རང་ངོའི་ཆོས་ཉིད་ནི་གསལ། སོ་སོ་རང་རིག་པའི་བྱེ་བྲག་ནི་ཕྱེད། ཡེ་ཤེས་ཀྱི་སྤྱོད་ཡུལ་དུ་གྲོལ། འབྲས་བུ་གཞན་བྱུང་གི་རྐྱེན་ལ་རག་ནི་མ་ལུས། ཐད་ཀའི་ཆོས་ཉིད་བསམ་གྱི་མི་ཁྱབ་པའི་གཤིས་སུ་གཏན་ལ་ཕེབས་པ་གང་ཡིན་པ་དེ་ནི་གདོད་མའི་གྲོལ་ས་ཆེན་པོ་ཞེས་བྱ་སྟེ། རང་ཤར་ལས། གྲོལ་ས་ཐོག་མ་གང་ཡིན་པའོ། །ཞེས་གསུངས་ལ་རང་བཞིན་བརྗོད་ན། ཕྱིར་གསལ་གྱི་མཁྱེན་ཆ་ཤེལ་འོད་ནང་དུ་ནུབ་པ་ལྟར་ཐིམ་ལ་མ་རྨུགས་པ་ཆོས་སྐུའི་ངོ་བོ། རང་བཞིན་གསལ་ལ་མི་རྟོག་པ་གཟུགས་སྐུ་གཉིས་ཀྱི་འཆར་གཞི། ཐུགས་རྗེའི་འཇུག་པ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཆོས་ཉིད་གདུལ་བྱའི་ཁམས་ལ་ཆུ་སྣོད་ཇི་ཙམ་ཡོད་པ་ལ་ཟླ་གཟུགས་དེ་རྙེད་དུ་འཆར་བར་ནུས་པ་ནི་ཆོས་ཀྱི་དབྱིངས་གཞོན་ནུ་བུམ་པའི་སྐུའི་བཞུགས་ཚུལ་ཏེ་ཀློང་གསལ་ལས། ངོ་བོ་སྟོང་གསལ་ཡེ་ཤེས་སྐུ། །རང་བཞིན་ཐུགས་རྗེ་ཕྱོགས་རིས་མེད། །དབྱེར་མེད་ཆེན་པོར་ཡེ་སངས་རྒྱས། །ཞེས་སོ། །དེ་ལྟ་བུའི་ཀ་དག་གཞིའི་རང་ས་ནས་སྤྲུལ་པ་མི་འགྱེད་ཀྱང༌། གཞི་སྣང་ལྷུན་གྲུབ་ཀྱི་རྩལ་ལས་གཟུགས་སྐུར་འཆར་བའི་གནད་གྲུབ་མཐའ་འདི་འཛིན་པ་རྣམས་ཀྱིས་ཤེས་དགོས་ཏེ་རྒྱལ་བའི་དབང་པོས།


JLAZ012_Page_0384
[མ་དཔེ་གཟིགས་ན་འདིར་གནོན།]

དེ་ཡང་ཀ་དག་གི་རང་ས་དེ་ནས་སྤྲུལ་པ་མི་འགྱེད་དེ། སྐུ་དང་ཡེ་ཤེས་ཀྱི་སྣང་བ་རགས་པ་ལས་འདས་པའི་ས་ཡིན་པའི་ཕྱིར་རོ། །སྤྲུལ་པ་ཡང་ཡས་མར་འགྱེད་པ་སེམས་ཅན་དངོས་ཀྱི་དོན་བྱེད་པ་ནི་ཀ་དག་ལས་ལྷུན་གྲུབ་ཀྱི་གཞི་སྣང་ཤར་བ་ནས་འགྱེད་དོ། །ལམ་ནས་འགྱེད་པ་ལ་འཕོ་བ་ཆེན་པོའི་ལུས་བཟུང་བ་དང༌། རང་བཞིན་སྤྲུལ་པར་བགྲོད་པ་གཉིས་ཀྱིས་སེམས་ཅན་རང་ལས་རྒྱུད་གཞན་རྣམས་ཀྱི་དོན་ལ། བར་དོ་སྤྲུལ་པ་འགྱེད་ཚད་ལྷུན་གྲུབ་ཀྱི་སྒོ་ལས་རང་སྣང་འཁོར་བར་སྣང་བ་དེའི་དོན་བྱེད་པར་སྣང་སྟེ། རྨི་ལམ་དུ་སེམས་ཅན་དོན་བྱས་ཀྱང་རང་སྣང་ཙམ་ལས་གཞན་ངོར་ཕན་པ་མ་བྱུང་བ་དང་འདྲ་བར་ཤེས་པར་བྱའོ། །གནས་འདི་རྫོགས་པ་ཆེན་པོའི་ཁྱད་པར་གྱི་གྲུབ་མཐའ་གཅིག་ཡིན་པས་ཅུང་ཟད་རྟོགས་དཀའ་བར་བྱེད་དོ། །ཞེས་སོ། །བཞི་པ་སྲིད་པ་བར་དོ་ནི། ཕྱི་ལུས་ཀྱི་སྲིད་པ་ཡིད་ལུས་དབང་པོ་ཀུན་ཚང་ཐོགས་མེད་དུ་རྒྱུ། ནང་སེམས་ཀྱི་སྲིད་པ་སྙམ་བྱེད་ཀྱི་རྣམ་པར་རྟོག་པ་དུ་མ་ལ་ཡིད་འཇུག །ལུས་སེམས་གཉིས་འདུས་ཀྱི་སྲིད་པ་རྡོ་རྗེའི་གདན་དང༌། མའི་མངལ་ཏེ་རྟེན་གཉིས་པོ་མ་གཏོགས་གང་དུའང་ཐོགས་མེད་དུ་འཇུག་ཅིང་བག་གྲང༌། འདིར་རྒྱ་གར་རྡོ་རྗེའི་གནད་ནི་སྤྱིར་བསྐལ་པ་བཟང་པོའི་སངས་རྒྱས་རྣམས་ཀྱི་ཐུན་མོང་དུ་སངས་རྒྱ་


JLAZ012_Page_0385
[མ་དཔེ་གཟིགས་ན་འདིར་གནོན།]

བའི་མཛད་པ་སྟོན་པའི་གནས་ཆེས་མཆོག་ཏུ་གདོན་མི་ཟ་མོད་ཀྱི། དག་དང་མ་དག་གི་འགྲོ་བ་ཕལ་མོ་ཆེའི་སྤྱོད་ཡུལ་དུ་མངོན་སུམ་ན། གང་དུ་བསམ་པ་དེར་སྐད་ཅིག་ལ་བརྟོལ་བའི་བར་དོ་རྫུ་འཕྲུལ་གྱི་ལུས་ཅན་ལ་དེར་ཐོགས་པའི་དགག་བྱ་ཅི་ཞིག་ཡོད། ལས་འཕྲོ་ངན་པས་མ་ཡིན་ཟེར་ན་དེང་གི་ཚེ་མུ་སྟེགས་དང་ཀླ་ཀློའི་ཚོགས་ཀྱང་བག་མི་ཚ་བར་རྒྱུ་བའི་ཕྱིར་དབང་པོ་ཡིད་ཀྱི་གཟུགས་ཅན་དེར་ཐོགས་པའི་རྒྱུ་རྐྱེན་གང་ཡང་མེད། དེའི་ཕྱིར་དག་བྱ་དང་ལྡན་པའི་མཐུས་རྣམ་པར་གྲོལ་བའི་ས་ལ་ཐོགས། ལས་ཀྱི་མཐུས་མའི་སྐྱེ་གནས་ལ་ཐོགས་པས་རྟེན་གཉིས་པོའི་ངོས་འཛིན་འདི་ལྟར་འདོད་དེ་རྒྱལ་བའི་དབང་པོ་པདྨ་ལས་གྲོལ་གྱིས། དེ་ལ་སློབ་དཔོན་ཕལ་པ་དག་རྡོ་རྗེའི་གདན་རྒྱ་གར་གྱི་དེ་ལ་ངོས་འཛིན་ཡང༌། འདིར་ཀ་དག་མི་འགྱུར་བའི་ནང་དབྱིངས་སངས་རྒྱས་ཐམས་ཅད་སངས་རྒྱ་བའི་གནས་མཆོག་དག་པ་མྱ་ངན་ལས་འདས་པའི་སྒོར་ཞུགས་པ་དེ་ལ་འདོད་ལ། མའི་མངལ་ནི་མ་དག་པ་འཁོར་བའི་སྒོ་འགྲོ་དྲུག་གི་སྐྱེ་གནས་གང་རུང་ལ་འདོད་པ་ཡིན་པས། སྒྲ་ཇི་བཞིན་པ་མ་ཡིན་པར་ཤེས་བྱའོ། །ཞེས་སོ། །གཞན་ཡང་འདིས་ཤེས་ཏེ་བར་དོའི་སྲིད་པ་ཅན་དེ་ཉིད་རི་བྲག་ལ་སོགས་པ་འབྱུང་བ་གང་ལའང་ཐོགས་མེད་དུ་འཇུག་པའི་ནུས་པ་ཡོད་པས་བྲག་གི་ཁོང༌། གོར་མའི་ནང༌། སྒོ་ང་དང་


JLAZ012_Page_0386
[མ་དཔེ་གཟིགས་ན་འདིར་གནོན།]

ཤིང་གི་སྦུབས་ལ་སོགས་པར་ཡང་སེམས་ཅན་འོང་བ་ནི་མཐོང་བའི་ཆོས་ཅན། དེ་ཡང་ཤ་གཟུགས་དང་དབང་པོ་རང་མཚན་དུ་ཡོད་ན་ཡིད་ལུས་དང་འགལ་བར་འགྱུར་ཏེ་རང་ངོ་ལ་ཡོད་ཡོད་འདྲ་བ་རྨི་ལམ་གྱི་སྣང་བ་ལྟ་བུར་འཆར་བའི་ཆ་ལ་བཏགས་པར་ཟད་དེ་འདི་སྐད་དུ། སྔོན་བྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་ལྡན། །རིགས་མཐུན་ལྷ་མིག་དག་པས་མཐོང༌། །མི་ཟློག་དེ་ནི་དྲི་ཟའོ། །ཞེས་རང་དང་རིགས་མཐུན་པའམ། ལྷ་མིག་ཐོབ་པ་མ་གཏོགས་གཞན་གྱིས་ཕར་མི་མཐོང་ཞིང༌། དེས་ཚུལ་སེམས་ཅན་གྱི་གནས་རིགས་ཐམས་ཅད་མཐོང་ལ། མིང་གཞི་འདུས་པའི་ཕུང་པོ་ལས་རླུང་གིས་བསྐྱོད་པས། གང་དུའང་རང་ས་མི་ཟིན་ཅིང་བྱ་སྒྲོ་རླུང་གིས་ཁྱེར་བ་ལྟ་བུ་དང༌། ཤེས་པ་ཕྱད་ཕྱོད་བན་བུན་སྔར་བས་དྲན་པ་བདུན་འགྱུར་གྱིས་གསལ་བའི་ངང་ནས་ད་ནི་ཤི་བའོ་སྙམ་ནས་བློས་མི་འཁྱུད་པ་ཙམ་གྱི་སྡུག་བསྔལ་དྲག་པོ་འབྱུང་ངོ༌། །དེ་ཡང་བར་དོར་ཇི་ཙམ་གནས་དགོས་པའི་ཡར་ཕྱེད་སྔ་མའི་ལུས་ཀྱི་རྣམ་པ་ཅན་དང༌། མར་ཕྱེད་ཕྱི་མ་གང་དུ་སྐྱེ་བ་དེའི་ལུས་དང་རྣམ་འགྱུར་ཅན་དུ་སྣང་ནའང་ཁམས་གོང་མ་ལ་གཟུགས་མེད་པས་རྣམ་པ་འཆར་རྒྱུ་མེད་ཚེ་ཅི་ཡང་མེད་པའི་སྟོང་ཕྱད་ཀྱི་སྣང་བ་འཆར་བར་ཤེས་དགོས་ལ། ཡང་གསང་སྔགས་ཀྱི་སྒོར་ཞུགས་ནས་རྡོ་རྗེའི་


JLAZ012_Page_0387
[མ་དཔེ་གཟིགས་ན་འདིར་གནོན།]

བླ་མ་ལ་དམ་ཚིག་ཆེན་པོ་ཉམས་པས་རྡོ་རྗེའི་དམྱལ་བ་དང༌། མཚམས་མེད་ལ་སོགས་པའི་སྟེང་དུ་ཆོས་སྤངས་པའི་ལས་ཀྱིས་མནར་མེད་དུ་སྐྱེ་བ་ནི་མར་གྱི་ཟང་ཐལ། རྟོགས་པས་གྲོལ་བ་ནི་ཡར་གྱི་ཟང་ཐལ། འཕོ་བ་འབྱོངས་པས་སྐྱེ་གནས་གང་དུའང་ཟང་ཐལ་བས་བར་དོ་མེད་ལ། འགྲོ་བ་གཞན་ཆོས་འདིའི་སྒོ་མ་མཐོང་བའམ། མཐོང་ཡང་ཡིད་མ་ཆེས་པ་དང་མ་དག་པ་དང༌། ཉམས་སུ་མ་ལོངས་པ་རྣམས་ལ་ཆོས་ཉིད་བར་དོ་ཡུན་ཐུང་བས་གྲོལ་བ་ལོང་ཡོད་དུ་མ་ཤར། བྲེད་སྔངས་དང་བཅས་སྲིད་པའི་བར་དོར་ཡང་ནས་ཡང་དུ་ཁ་འཁྱལ་བའི་ཚུལ། ཞག་བདུན་བདུན་ལ་སྐྱེ་འཆིའི་སྣང་བ་རེ་ཤར་ནས་ཤིན་ཏུ་སྡུག་བསྔལ་བས་དགེ་བའི་སྟོབས་འདེགས་པ་ལའང་བདུན་ཚིགས་ཕན་ཡོན་ཆེ་བའི་རྒྱུ་མཚན་ནོ། །སྤྱིར་བར་སྲིད་ཀྱི་ཚེ་རིང་མཐའ་ཞག་བཞི་བཅུ་རྩ་དགུ། ཐུང་མཐའ་བདུན་དུ་བཤད་པ་ནི་སྤྱི་ཚན་གྱི་དབང་དུ་བྱས་ལ། གཞན་དགེ་བའི་སྟོབས་ཀྱི་གློ་བུར་དུ་འཕོ་བ་དང༌། ལས་འགའ་ཞིག་གིས་དེ་ལས་རིང་བར་སྲིད་པའང་བཤད་པ་ཡིན་ཏེ། དཔེར་ན་ཚེ་ལོ་བརྒྱ་པ་ལ་སོགས་དུས་ཀྱི་ཚེ་ཚད་ངེས་པ་ལྟར་བཤད་ཀྱང་འདོད་པའི་ཁམས་ན་དུས་མ་ཡིན་པའི་འཆི་བས་འཚེ་བའང་ཡོད་ལ། བཅུད་ལེན་གྲུབ་པས་རིང་པོར་འཚོ་བའང་ཡོད་པ་བཞིན་ནོ། །ཇི་ལྟར་ཡང་དུས་དེའི་ཚེ་ཡུར་


JLAZ012_Page_0388
[མ་དཔེ་གཟིགས་ན་འདིར་གནོན།]

བ་རྐང་ཆག་པ་ལ་ཝ་འཛུགས་པ་ལྟ་བུའི་དཔེས་གང་དུ་བསམ་པའི་ཡུལ་ལ་སྐད་ཅིག་གིས་སླེབས་པའི་རྫུ་འཕྲུལ་ཡོད་པའི་དུས་དེར་ཆོས་འདིའི་སྒོ་མཐོང་བ་རྣམས་ཀྱིས་བར་མ་དོའི་ཤེས་པ་ངོས་ཟིན་པའི་མོད་ལ་ཕྱོགས་བཅུ་སྤྲུལ་པའི་ཞིང་ཡིད་ལ་དྲན་པར་བྱས་ཏེ། དེར་འགྲོ་བའི་འདུན་པ་དྲག་པོ་གཏད་པས་སྲིད་པ་བར་དོ་ལ་རང་གར་འཛིན་པའི་བག་ཆགས་དག །ཆོས་ཉིད་བདེན་པའི་བྱིན་རླབས་རྒྱུད་ལ་ཞུགས་པས་སྲིད་པ་ཕྱི་མར་བརྒྱུད་པའི་ནུས་པ་ཟད་དེ། དག་པའི་ཞིང་དེ་ཉིད་དུ་སྐྱེས་ནས་འཚང་རྒྱའོ། །ཡང་ཆོས་སྒོ་འདིའི་བདེན་པ་མ་མཐོང་ཡང་རྣལ་འབྱོར་ཆེན་པོའི་སྒྱུ་ལུས་ལ་གོམས་པ་ཡོད་སྲིད་ན་ཆོས་ཀྱི་སྤྱན་ལྡན་ཤནྟ་པུ་རི་པས། གཉིད་དམ་འཆི་བའི་འོད་གསལ་ལུགས་ལྡོག་ཏུ། །སླར་ཡང་མཆེད་པ་ཀུན་གཞིའི་རྣམ་ཤེས་ལས། །ཡིད་ཉིད་གཅིག་པུར་ལངས་པས་རྨི་ལམ་སེམས། །དབང་པོ་ཀུན་ཚང་ཡིད་ཀྱི་ལུས་གྲུབ་པ། །དེ་མཚུངས་སྐད་ཅིག་མངོན་བྱང་ལྔ་ལས་ནི། །དང་པོའི་མགོན་པོ་ལེགས་པར་བསྐྱེད་པའི་ཚུལ། །བར་དོ་སྒྱུ་ལུས་ལོངས་སྐུར་ལྡང་བར་ཤོག །ཅེས་པའི་ཚུལ་དྲན་པར་བྱ་ཞིང༌། དེར་རང་དབང་མི་འདུ་བ་གང་ཞིག་སྐྱེ་གནས་ངན་པའི་རྣམ་པ་བརྟགས་ཏེ་འབྲེལ་པ་གཅད་པའི་ཚུལ། །ཉི་ཟླ་ཁ་སྦྱོར་ལས། ལྷ་དང་མི་ནི་ཁ་


JLAZ012_Page_0389
[མ་དཔེ་གཟིགས་ན་འདིར་གནོན།]

དོག་དཀར། །ཡི་དྭགས་འོད་ནི་དུ་བ་འདྲ། །དམྱལ་བ་སྡོང་དུམ་ལྟ་བུའམ། །ཡང་ན་བལ་ནག་གཡེངས་པ་འདྲ། །བྱོལ་སོང་ཡང་ན་ཁྲག་བཙོ་བཞིན། །ལྷ་མིན་ཁ་ཆར་འབབ་པ་བཞིན། །ཞེས་དང་། མགོའི་ལྟ་ཕྱོགས་ནི་དེ་ཉིད་ལས། དེ་ཚེ་ཁ་ནི་འདི་ལྟ་སྟེ། །ལྷ་དང་མི་ནི་གྱེན་ལ་ལྟ། །ལྷ་མིན་བྱོལ་སོང་དེ་བཞིན་ཕྲེད། །ཡི་དྭགས་དམྱལ་བ་ཐུར་དུ་ལྟ། །འདི་དག་ད་གཟོད་སྐྱེ་བའི་དབང༌། །ཞེས་འགྲོ་བ་དྲུག་གི་གནས་སུ་ད་གཟོད་སྐྱེ་བའི་རྟགས་འོད་དང་གཟུགས་བརྙན་ལ་སོགས་པའི་རྣམ་པ་ཅན་དུ་འཆར་བ་ནི་འདི་ལྟ་སྟེ། མཐོ་རིས་ནི་འོད་དཀར་དཔག་ཚད་ཙམ་དུ་གསལ་བ་དང༌། མགོ་ཡང་གྱེན་ལ་སྟོན་ཞིང༌། མ་དག་པ་ངན་འགྲོའི་གནས་ལ་ཡི་དྭགས་ལ་དུ་བ། དམྱལ་བ་ལ་སྡོང་དུམ་མམ་བལ་ནག་གསེད་པ་ལྟ་བུ། བྱོལ་སོང་ལ་ཁྲག་བཙོ། ལྷ་མིན་ལ་ཁ་ཆར་རྣམས་སུ་སྣང་ཞིང༌། མགོ་ཡང་ལྷ་མིན་དང་བྱོལ་སོང་ཕྲེད། དམྱལ་བ་དང་ཡི་དྭགས་ཐུར་ལ་ལྟ་བའི་ཁྱད་པར་ལེགས་པར་བརྟགས་ཤིང་གཞན་ཡང་མངོན་གྱུར་དུ་ལྷ་མིའི་གནས་མཐོང་བའམ། དེ་བཞིན་དུ་དུད་འགྲོ་ལ་ནགས་ཚལ་དང་མཚོ་གླིང༌། དམྱལ་བ་དང་ཡི་དྭགས་མེའི་འོད་ཟེར་མཛེས་པ་ལ་སོགས་མདོར་ན་འདོད་པར་སྐྱེ་བ་རྣམས་ཡུལ་ལ་དགའ་གདུང༌། གཟུགས་སུ་སྐྱེ་བ་རྣམས་འོད་ལ་དགའ་གདུང༌། གཟུགས་མེད་དུ་སྐྱེ་བ་ཅི་ཡང་མེད་པའི་


JLAZ012_Page_0390
[མ་དཔེ་གཟིགས་ན་འདིར་གནོན།]

སེམས་གནས་ལ་དགའ་གདུང་འཆར་ཞིང༌། གར་སྐྱེའི་གནས་ཡིད་དུ་ལྷག་པར་འོང་ཞིང་གདུང་བ་འཕེལ་ནས་བལྟར་ཕྱིན་པའམ། འཇིགས་སྐྲག་གི་སྣང་བས་དེད་པས་དེ་དག་ལ་སྐྱབས་སུ་མཐོང་ནས་གབ་པའི་སེམས་དར་གཅིག་ཆགས་པ་ལས་སྐྱེ་བ་ཡིན་པས། རགས་པའི་ལུས་རྟེན་མེད་པའི་རྐྱེན་གྱིས་ལུས་འཚོལ་བ་ལ་སྲེད་པ་ཇི་ལྟར་འཕེལ་ཡང་གནས་ངན་ལེན་གྱི་ཀློང་དུ་མི་འཇུག་པ་ལ་གཟབས་པར་བྱའོ། །དེ་ལྟར་སྐྱེ་གནས་ཀྱི་མཚང་འདིར་མཁས་པ་དང་གྲུབ་པར་གྲགས་པའི་ཁྲིད་ཡིག་རྣམས་སུའང་གདོད་འཇུག་པའི་ལྟས་བཤད་མ་ཐག་པ་ཉིད་མ་བརྗོད་པར། ཞུགས་ཟིན་པའི་ལྟས་ལྷ་ལ་གཞལ་ཡས་ཁང༌། ལྷ་མིན་ལ་འོད་ཀྱི་འཁོར་ལོ། མི་ལ་ཁང་མཛེས་སོགས་བསྟན་པ་ནི་ནོར་བར་ཤེས་ཏེ་ཉི་ཟླ་ཁ་སྦྱོར་ལས། འགལ་མེའམ་ནི་ཆར་པའམ། །དེ་བཞིན་གྲང་བ་ནམ་རྨུགས་པ། །སྐྱེ་བོ་འདུས་པའི་ཅ་ཅོ་དང༌། །ལྷ་ཁང་ངམ་ནི་ཡང་ཐོག་གམ། །ཁང་བུ་དག་ནི་བརྩེགས་པར་མཐོང༌། །ངན་སོང་རྣམས་ནི་སྤྱིལ་བུའམ། །ཕུགས་རྡུགས་གྲོག་པོ་སྟོང་པར་མཐོང༌། །འདི་དང་མངལ་དུ་ཚུད་པའི་ལྟས། །འགྲོ་བར་འདོད་ཀྱང་རྒྱས་འཐུམས་ཏེ། །ཐོགས་པ་ཉིད་དང་བཅས་པའོ། །ཞེས་པས་གསལ་ལོ། །འོན་ཀྱང་རྒྱ་མཚོ་སྤྲིན་ཕུང་དེ་ལྟར་གསུངས་པ་ནི་རེ་ཞིག་སྔ་རབས་པ་དག་གི་ཡི་གེའི་


JLAZ012_Page_0391
[མ་དཔེ་གཟིགས་ན་འདིར་གནོན།]

རྗེས་སུ་འབྲངས་པ་སྟེ། ལར་ས་ནས་སར་འཕར་བའི་སྤངས་རྟོགས་ལ་ཁྱད་པར་ཡོད་པ་བཞིན་དཔྱད་པ་རྫོགས་པའི་མན་ངག་ཐེག་མཆོག་རིན་པོ་ཆེར་དེ་ལྟར་ཞལ་གྱིས་མ་བཞེས་པའི་ཕྱིར་རོ། །གཞན་ཡང་བཤད་ཚུལ་གྱི་ཁྱད་པར་ཁ་ཅིག་ཏུ། ལུས་འཕགས་པོར་སྐྱེ་ན་ངང་པ། སྒྲ་མི་སྙན་ཉ། བ་གླང་སྤྱོད་དུ་གླང༌། འཛམ་བུ་གླིང་དུ་མི་ཕོ་མོ་ཆགས་པ་སྤྱོད་པར་མཐོང་བས། དེ་ལ་རབ་ཀྱིས་ཆགས་སྡང་དང་མིག་སེར་སྤངས་ནས་སྣང་བ་བདེན་མེད་དུ་སྦྱོང༌། འབྲིང་གིས་དབང་དུས་ཀྱི་ཉམས་ལེན་ངེས་པས་བླ་མའམ་ཡི་དམ་ཡབ་ཡུམ་སྒོམ་ནས་གསང་དབང་གི་དོན་ཉམས་སུ་མྱོང་ཞིང་ཤེར་དབང་གིས་བདེ་སྟོང་ལམ་དུ་སློང༌། དེ་ཙམ་གྱི་བློ་ནུས་དང་མི་ལྡན་ན་བྱང་ཆུབ་སེམས་དཔའི་སྡེ་སྣོད་ལས་གསུངས་པའི་འདོད་ཆགས་ལ་མི་གཙང་བའི་འདུ་ཤེས་དགུ་སོགས་ཞེན་ལོག་གི་གཉེན་པོ་བསྟེན་ཅིང་དག་པའི་ཞིང་ཡིད་ལ་བྱས་པས་མངལ་སྒོ་ཁེགས་ཏེ་མངོན་དགའ་དང་བདེ་བ་ཅན་ལ་སོགས་པར་པདྨོའི་སྦུབས་ལས་རྫུས་ཏེ་སྐྱེ་བ་ལེན། བརྩོན་འགྲུས་ཞན་པས་དབང་པོ་ཐ་མར་བཞག་ཀྱང༌། ཤེས་རབ་ཀྱི་སྒོ་ནས་ལམ་གྱི་གནད་ཤེས་པ་དག་ནི་ཁམས་དྲུག་ལྡན་གྱི་རྟེན་ལ་དངོས་གྲུབ་ཐོབ་པའི་རྟེན་ཁྱད་པར་ཅན་འཛམ་བུའི་གླིང་ལས་ཀྱི་ས་པའི་གཞན་འབྱོར་དམ་པ་ལྔ་དང་རང་ཉིད་འབྱོར་པའི་དཔལ་ལྔ་སྟེར་


JLAZ012_Page_0392
[མ་དཔེ་གཟིགས་ན་འདིར་གནོན།]

བའི་མངལ་དུ་ཇི་ལྟར་འཇུག་པའི་ཚུལ་ཤནྟ་པུ་རི་པས། བར་དོའི་ལུས་དེ་མ་ཡི་མངལ་དུ་ནི། །ཞུགས་ཚུལ་དང་པོ་མགོན་པོ་མི་བསྐྱོད་པའི། །སྐུ་ལས་ཞུགས་པའི་རྡོ་རྗེའི་སེམས་བསྐྱེད་ཅིང༌། །དེ་ལས་ལུས་དཀྱིལ་བཀོད་ཅིང་སྒོ་གསུམ་དག །བྱིན་གྱིས་བརླབས་ཤིང་སེམས་དཔའ་སུམ་བརྩེགས་སུ། །བྱས་ནས་རིག་མའི་འདོད་ཡོན་རྣམ་རོལ་པའི། །ཉིན་སྣང་སྐྱེ་ཤི་བར་དོའི་གོམས་འདྲིས་ཀྱིས། །སྐྱེ་བ་སྤྲུལ་སྐུའི་རྣལ་འབྱོར་ལམ་བྱེད་ཤོག །ཅེས་པའི་ངེས་པ་ལ་ད་ལྟ་ནས་འདྲིས་པར་བྱ་ཞིང་དུས་དེའི་ཚེ་ལས་ལ་སྦྱར་བར་བྱའོ། །ཐ་མའི་ཐ་ཤལ་ཆོས་ཀྱི་བག་ཆགས་མེད་པ་དག་ནི་རྒྱུད་ལས། དཔེར་ན་རྩྭས་ནི་མེ་འཛིན་དང༌། །དེ་བཞིན་འདམ་གྱིས་རྫས་འཛིན་དང༌། །མཁའ་འགྲོ་འདོད་པའི་དབང་གིས་ནི། །ས་ཁུང་བྲུས་པའི་རྙིས་འཛིན་ལྟར། །དབང་མེད་ཆགས་པའི་རྙིས་འཛིན་ཏོ། །ཞེས་ཕ་མའི་སྙོམས་འཇུག་གི་རྙིས་བར་སྲིད་ཀྱི་སེམས་ཅན་འཛིན་པའི་དབང་ལས་ཕོ་མོ་འཁྲིག་པ་བསྟན་པའི་མངལ་སྒོར་དབྱར་གྱི་ཤ་རུལ་ལ་སྦྲང་མ་འདུ་བ་ལྟར་བར་སྲིད་དབྱེ་བ་དཔག་མེད་འཕངས་པ་ལས་དེར་སྐྱེ་བའི་ལས་ཅན་དེ་བཤང་ལམ་ནས་རང་དབང་བྲལ་བར་འཇུག་པས་དེའི་ཚེ་ཞིང་དག་པར་སྨོན་ལམ་འདེབས་པ་དང༌། སྐྱབས་འགྲོ་བྱེད་པ་དང༌། མངལ་སྒོ་ངན་པ་ལས་ལོག་སྟེ་བཟང་པོ་འདེམ་པར་འདུན་པ་བསྒྱུར་བས་དལ་འབྱོར་


JLAZ012_Page_0393
[མ་དཔེ་གཟིགས་ན་འདིར་གནོན།]

བཅོ་བརྒྱད་དང་ལྡན་པའི་མི་ལུས་རིན་པོ་ཆེ་ཐོབ། བླ་མ་དམ་པ་དགེ་བའི་བཤེས་གཉེན་དང་མཇལ་ཏེ་རྗེས་སུ་བཟུང་ནས་གྲོལ་བ་ཡིན་ནོ། །དེ་ལྟར་བར་དོའི་རང་བཞིན་རྣམས་ཅུད་ཟད་གསལ་བར་བཤད་པ་ནི་ད་ནི་དུས་དང་བསོད་ནམས་ཀྱིས་དབང་ལས་སྙིང་ཏིག་ལ་མོས་པས་སྤྱོད་པ་ཉུང་ཟད་ཡོད་སྲིད་ནའང་ཕྱིན་ཅི་མ་ལོག་པའི་གནས་ལུགས་རྟོགས་པ་དང༌། སྐྱེ་བ་འདི་འམ། འཆི་ཁར་གྲོལ་བའི་གདེང་ཐོབ་པ་དཀོན་པར་ཤེས་ནས་འདི་དག་ཏུ་གྲོལ་བར་ཐོབ་པའི་རེ་བ་ལ་ཡིད་གདུངས་པའོ།། །།སྤྱི་དོན་གསུམ་པ་དབང་པོ་ཐ་མ་རང་བཞིན་སྤྲུལ་པའི་ཞིང་དུ་དབུགས་འབྱིན་པ་ནི། འདི་ལྟ་བུའི་མངོན་སུམ་འོད་གསལ་གྱི་སྒོ་མཐོང་ཡང༌། མི་ཚེ་སོས་དལ་དུ་རྒ་བའི་སྙིང་རུས་ཀྱིས་ཉམས་སུ་མ་ལོངས། ལམ་གྱི་གནས་སྐབས་སུ་བླ་མ་དམ་པས་མ་ཟིན་པས་ངའི་མན་ངག་འདི་གཞན་ལས་ཁྱད་པར་འཕགས་སོ་སྙམ་པའི་གློ་བ་དགའ་ཙམ་ལས་ལམ་རྟགས་དང་སྣང་བ་འཕེལ་བའི་ས་ཟིན་གང་ཡང་མེད། ཤེས་རབ་ཞན་པས་ཆོས་བརྒྱུད་རྫོགས་པ་ཆེན་པོར་བློ་བདེ་ཡང་གང་ཟག་རྫོགས་པ་ཆེན་པོར་མ་སོང་བས་ཆོད་ཆུང༌། དེ་ལྟ་ནའང་མོས་པ་ཆོས་ཕྱོགས་སུ་སྤྱད་པས་མི་དགེ་བའི་འཇུག་པ་སྲབ་པས་རྨི་ལམ་དགེ་བ་ཙམ་དུ་གྱུར་པའི་ལས་ཅན་གང་ཞིག་སྲིད་པའི་བར་དོ་རྨི་ལམ་གྱི་སྣང་ཆ་ལྟ་བུར་སླེབས་དུས་


JLAZ012_Page_0394
[མ་དཔེ་གཟིགས་ན་འདིར་གནོན།]

ང་ཤི་འདུག་སྙམ་དུ་ངོ་ཤེས། བླ་མ་ལ་མོས་གུས་ཡོད་པ་གཞིར་བཞག་ནས་དེ་ཉིད་དྲན་པ་ལས་དེས་གསུངས་པའི་གདམས་པ་དྲན་པར་གྱུར་ཏེ། སྔོན་དུ་ཆོས་ཉིད་ཀྱི་བར་དོ་ངོས་མ་ཟིན་ཅིང་བདེན་སྟོབས་མ་རྙེད་པས་སྲིད་པ་བར་དོར་ཁ་འཁྱལ་བ་དེ་ངོ་ཤེས། ད་ནི་རང་བཞིན་སྤྲུལ་པའི་ཞིང་དུ་འགྲོ་བར་བྱའོ་སྙམ་པ་ཙམ་ལས་ཆོས་ཉིད་ཀྱི་བྱིན་རླབས་ཀྱིས་ཞིང་ཁམས་དེར་པདྨའི་སྦུབས་སུ་རྫུས་ཏེ་སྐྱེ་བའི་ཚུལ། ཉི་ཟླ་ཁ་སྦྱོར་ལས། སྐྱེ་གནས་རྗེས་སུ་དྲན་པས་དབང་པོ་ཐ་མ་རྣམས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་འབྱིན། ཞེས་པས་གདམས་ངག་གབ་པ་ནི་ཅི་ཡང་མེད་དེ་བྱ་སླ་ལ་ཆོད་ཆེ་བ་ཡིན་ནོ། །དེ་ལ་ད་ལྟ་ནས་མན་ངག་སྟོན་པའི་བླ་མ་ལ་གདུང་བ་ཡོད་པ་དང༌། ཉིན་དུས་རང་སྣང་མངོན་སུམ་ལ་ལྟ་བ་དང༌། མཚན་མོ་གཉིད་དུ་འགྲོ་ཁར་ཡང་ང་འཆི་བ་ཡིན། ཐིམ་རིམ་ངོ་ཤེས་པར་བྱས་ཏེ་རང་བཞིན་སྤྲུལ་པའི་ཞིང་དུ་འགྲོ་བར་བྱའོ་སྙམ་པའི་འདུན་པ་དྲག་པོ་དང་བཅས་སྤྲུལ་པའི་ཞིང་གི་བཀོད་པ་དང་ཡོན་ཏན་ལ་ལྟ་བའི་ངང་དུ་ཉལ་ཞིང༌། ཐུན་བར་དག་ཏུའང་གོང་དུ་བཤད་པའི་རྣམ་ཤེས་རླུང་ཞོན་གྱིས་རྩལ་འབྱོངས་པ་ཞིག་ནི་ངེས་པར་དགོས་པས་འཁོར་བ་དང་ངན་སོང་ལ་འཇིགས་པ་འགའ་ཙམ་ཡོད་ན་དེ་དག་ལ་སྙིང་གཏམ་དུ་བྱས་


JLAZ012_Page_0395
[མ་དཔེ་གཟིགས་ན་འདིར་གནོན།]

པའོ། །དེ་ལ་རང་བཞིན་སྤྲུལ་པའི་ཞིང་གི་ཡོན་ཏན་བཤད་པ་ནི་འདི་ལྟ་སྟེ། རིག་པ་རང་ཤར་ཆེན་པོའི་རྒྱུད་ལས། འདི་ནས་ཤར་ཕྱོགས་ཀྱི་འཇིག་རྟེན་གྱི་ཁམས་ན། ཞིང་ཁམས་མངོན་པར་དགའ་བ་ཞེས་བྱ་བ་ཡོད་དེ། སྤྲུལ་པའི་སྐུའི་ཞིང་ཁམས་དེ་ན། སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་དམ་པ་ཐོབ་པའི་གནས་དེ་ན། གཞལ་ཡས་ཁང་གི་ཡོན་ཏན་དཔག་ཏུ་མེད་པ་ཡོད་དེ། དེ་ཡང་འདི་ལྟ་སྟེ་རིན་པོ་ཆེ་ཤེལ་ལས་གྲུབ་པའི་ཁང་པ་སྒོ་བཞི་དང་ལྡན་པ། རིན་པོ་ཆེའི་རྟ་བབས་དང་ལྡན་པ། ས་གཞི་ཐམས་ཅད་ཀྱང་རིན་པོ་ཆེ་ཤེལ་ལས་གྲུབ་པ། ཤིན་ཏུ་ཡིད་དུ་འོང་བ། བལྟ་ན་སྡུག་པ། ཐེམ་སྐས་དང༌། སྐར་ཁུང་དང་ལྡན་པ། སྒོ་བཞི་ན་སེང་སྐར་ཆེན་པོ་བཞི་ཡོད་པ། སེང་སྐར་ནས་ཉི་མ་འཆར་བས་རིན་པོ་ཆེ་ཤེལ་ལས་གྲུབ་པ་ལ་ཕོག་ནས་ནང་དུ་ཉིན་མོ་འོད་ལྔའི་སྣང་བ་ལྷུག་པར་འཆར་བའོ། །གཞལ་ཡས་ཁང་དེའི་ཕྱི་རིམ་ན། ཡན་ལག་བརྒྱད་དང་ལྡན་པའི་ཆུའི་འོབས་ཡོད་པ་དེ་ལ་ནད་ཀྱིས་བཏབ་པ་རྣམས་ཀྱིས་འཐུངས་པ་ན་ནད་འཚོ་བར་འགྱུར་ལ། དེའི་ཕྱི་རིམ་ན་མཚེའུ་བརྒྱད་ཡོད་དེ། དེ་རྣམས་ཀྱི་ནང་ནའང་བྱ་སྐད་སྙན་པ་སྣ་ཚོགས་ཏེ། དེའང་འདི་ལྟ་སྟེ། བྱའི་རྒྱལ་པོ་ངང་པ་གསེར་ལྡན་དང༌།


JLAZ012_Page_0396
[མ་དཔེ་གཟིགས་ན་འདིར་གནོན།]

འཐིང་རིལ་དང༌། བྱ་ཀ་ཏི་དང༌། ནེ་ཙོ་མི་སྐད་ཤེས་པ་དང༌། ཁུ་བྱུག་དང༌། ཤང་ཤང་ཏེའུ་དང༌། རི་སྐེགས་དང༌། དེ་ལ་སོགས་ཏེ་བྱ་སྐད་སྙན་པའི་བྱ་རིགས་སྟོང་ཕྲག་བརྒྱད་ཅུ་དང༌། ཡིད་དུ་འོང་བའི་བྱ་རིགས་འདི་ལྟ་སྟེ། ཀང་ཀ་རི་དང༌། སྦབ་དང༌། ཟེར་མོ་དང༌། ལྷའི་བྱ་དྲིལ་བུའི་སྐད་ཅན་དང༌། བྱ་ཀྲི་ཏི་པ་གསེར་གྱི་རྡོ་རྗེའི་གཟུགས་ལ་སོགས་ཏེ། གཡུའི་མདོག་ལྟར་སྔོ་བ་དང༌། དུང་གི་མདོག་ལྟར་དཀར་བ་དང༌། བྱི་རུའི་མདོག་ལྟར་དམར་བ་དང༌། ཨིནྡྲ་ནཱི་ལ་ལྟར་ལྗང་བ་ལ་སོགས་ཏེ། ཡིད་དུ་འོང་བ་དང༌། སྐད་སྙན་པ་བསམ་གྱིས་མི་ཁྱབ་པ་ཡོད་དོ། །དེའི་ཕྱི་རིམ་ན་རིན་པོ་ཆེ་སྣ་བདུན་གྱི་ལྕགས་རི་ཡོད་དོ། །དེ་རྣམས་ཀྱི་དབུས་ན་རིན་པོའི་ཆེ་སྣ་བདུན་ལས་བྱས་པའི་ཁྲི་ཆོས་འཆད་པའི་སྟན་དང་ལྡན་པ་ཡོད་དོ། །དེར་སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ་དེ། སྲོད་ལ་འཁོར་རྣམས་ལ་རྒྱུའི་ཆོས་འཆད་དོ།།ནམ་ཕྱེད་ན་གསང་སྔགས་ཕྱིའི་ཆོས་འཆད་དོ། །ཐོ་རེངས་ནང་གི་ཆོས་འཆད་དོ། །ཉི་མ་ཕྱེད་ན་རྫོགས་པ་ཆེན་པོ་འབྲས་བུ་བླ་ན་མེད་པའི་ཆོས་འཆད་དོ། །དེ་ཡང་ཞག་རེ་ལ་ཆོས་ཐུན་བཞི་བཞི་འབྱུང་ངོ༌། །དེ་ན་གནས་པའི་བྱང་ཆུབ་སེམས་དཔའ་དེ་དག་ཀྱང་སྐྱེ་བ་གཅིག་གིས་ཐོགས་པ་ཤ་སྟག་གོ། །ལོ་ཡང་


JLAZ012_Page_0397
[མ་དཔེ་གཟིགས་ན་འདིར་གནོན།]

ལྔ་བརྒྱ་ལྔ་བཅུ་ཐུབ་བོ། །ཞིང་ཁམས་དེ་ན་ཟས་དང་སྐོམ་ཡང་ཡིད་ལ་དྲན་པ་ཙམ་གྱིས་ཚིམ་པ་ཡོད་དོ། །དེ་ན་ནད་མེད་པས་མཆོག་ཏུ་བདེ་ལ། བྱུང་སྲིད་ནའང་ཆུ་ཡན་ལག་བརྒྱད་དང་ལྡན་པ་དེ་འཐུང་བས་ནད་སེལ་ཏོ། །མེ་ཏོག་སྣ་ཚོགས་ཀྱིས་སྤྲུལ་པའི་སྐུ་དེ་ལ་མཆོད་པ་ཆེར་བྱེད་པ་ཤ་སྟག་གོ། །གཞལ་ཡས་ཁང་དེའི་ཟུར་བཞི་ན། མུ་ཏིག་ལས་བསྐྲུན་པའི་མཆོད་རྟེན་བཞི་ཡོད་དོ། །དེ་བཞིའི་བར་ན་དྲིལ་བུ་གཡེར་ཁའི་དྲྭ་བའི་ཐག་པས་སྦྲེལ་ནས་ཡོད་དོ། །ཐག་པ་དེ་རླུང་གིས་བསྐྱོད་པ་དང་དྲིལ་བུའི་སྒྲ་ཡིད་དུ་འོང་བ་སྣ་ཚོགས་འབྱུང་ངོ༌། །ཕྱོགས་བཞི་ན་དར་སྣ་ཚོགས་ཀྱིས་བ་དན་བཞི་ཡོད་དེ། དེ་རླུང་གིས་བསྐྱོད་པ་ལས་དྲི་ཞིམ་པ་སྣ་ཚོགས་འབྱུང་ངོ༌། །གཞལ་ཡས་ཁང་དེ་ནི་ཤར་ཕྱོགས་ན་དཔག་ཚད་ལྔ་བརྒྱ་འདས་པའི་སྟེང་ན་ཡོད་དོ། །དེར་སྐྱེས་པའི་བྱང་ཆུབ་སེམས་དཔའ་དེ་དག་ཀྱང་སུམ་ཅུ་རྩ་གསུམ་གྱི་ལྷ་དང་ལོངས་སྤྱོད་མཉམ་པ་ཤ་སྟག་གོ། །ཤར་ཕྱོགས་ཀྱི་སྤྲུལ་པ་སྐུའི་ཞིང་ཁམས་དེ་ན་དེ་བཞིན་དུ་ཡོད་དོ། །ཞེས་པས་ཕྱོགས་གཞན་གསུམ་གྱི་བཀོད་པ་དང་ཚེ་ཚད་དང༌། ལོངས་སྤྱོད་ལ་སོགས་པའི་ཁྱད་པར་ཅུང་ཟད་མ་གཏོགས་ཤེས་པར་འགྱུར་ལ། །རྟེན་དང་བརྟེན་པའི་མངོན་བརྗོད་ཀྱི་ཁྱད་པར་གཞན་ནི་ཨ་ཏི་བཀོད་པ་ཆེན་པོ་ལས། དཔལ་དང་ལྡན་


JLAZ012_Page_0398
[མ་དཔེ་གཟིགས་ན་འདིར་གནོན།]

དང་པདྨ་བརྩེགས་པ་དང༌། །ལས་རབ་ཉིད་ནི་ཡོངས་སུ་རྫོགས་པའི་ཞིང༌། །རིན་ཆེན་འབྱུང་ལྡན་པདྨ་གར་དབང་རྟ། །དོན་ཡོད་གྲུབ་པས་ཤེས་བྱའི་སྒྲིབ་པ་སྦྱོང༌། །དཀར་སེར་དམར་དང་ལྗང་ཁུའི་ཁ་དོག་གསལ། །ཞེས་དང༌། དེ་དག་གི་དབུས་ན་བཅོས་ལྡན་འདས་གཟུགས་ཀྱི་རྒྱལ་པོའི་ལྷ་ཚོགས་ཁྲོ་བོའི་དཀྱིལ་འཁོར་གྱི་རྣམ་པར་ཞུགས་པའི་ཚུལ་ཡང་རང་ཤར་ལས། ཞིང་དེ་དག་གི་མདུན་གྱི་བར་སྣང་ལ་སྤྲུལ་པའི་སྐུ་ཁྲོ་བོའི་ཞིང་ཁམས་ཡོད་དེ། དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ཡོད་དེ། དེ་ཡང་གཞལ་ཡས་ཁང་འདི་ལྟ་བུ་ཡོད་དེ། ཐོད་པའི་ཁང་པ་གྲུ་བཞི་དང་ལྡན་པ་ཡོད་དེ། དེ་ཡང་འདི་ལྟ་སྟེ། ཐོད་པ་སྐམ་པོས་འབྲས་བུ་བྱས་པ། ཤ་ར་རི་ཡོད་པས་རྩིག་པ་བྱས་པ། བྷནྡྷ་ལྕང་ལོ་ཅན་གྱི་ཁ་བད་བྱས་པ། རྒྱ་དང་དཔངས་སུ་དཔག་ཏུ་མེད་དེ། གནམ་ལྕགས་ཀྱི་གཟེར་བཏབ་པ། རཀྟའི་ཞམ་ཆུ་འབབ་པ། ཉི་ཟླའི་ཀ་གདན་བྱས་པ། ཆུ་སྲིན་ཁའི་ཀ་གཞུ་བྱས་པ། ལྷ་ཆེན་པོ་བརྒྱད་གདུང་དུ་བྲེས་པ། མཆོག་ཆེན་པོའི་གྲབ་བཏང་བ་ཡོད་དོ། །ཉིན་མོ་རླུང་འཚུབས་པ། མཚན་མོ་མེ་འབར་བ། གཞལ་ཡས་ཁང་དེའི་གྲུ་བཞི་ན་ཞིང་ཆེན་གྱི་གདུགས་ཕུབ་པ། ལྷ་མོ་ལྔ་གར་བྱེད་པ། ས་གཞི་ཐམས་ཅད་ཀྱང་རཀྟའི་རྦ་ཀློང་འཁྲུག་པའོ། །གཞལ་


JLAZ012_Page_0399
[མ་དཔེ་གཟིགས་ན་འདིར་གནོན།]

ཡས་ཁང་དེའི་ནང་ན་བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་ཞེས་བྱ་བ། ཐུགས་ཞི་བ་ལས་མ་གཡོས་ཀྱང༌། སྐུ་ཁྲོ་བོའི་ཆ་བྱད་དུ་བསྟན་པ། མཁའ་འགྲོ་མ་དང༌། ཁྲོ་བོའི་ཚོགས་དཔག་ཏུ་མེད་པས་བསྐོར་ནས་ཡོད་དེ། དེ་ཡང་འདི་ལྟ་སྟེ། མཁའ་འགྲོ་མ་སུརྣ་ཉེ་བར་ཞི་བ་དང༌། ཚངས་པ་དུང་མགྲིན་ཅན་དང༌། དྲང་སྲོང་ཟླ་འོད་གཞོན་ནུ་དང༌། ཡང་འཁོར་གྱི་མཁའ་འགྲོ་མ་ཨེ་ཀ་ཙ་ཏི་སྤུན་དྲུག་དང༌། དེའི་བྲན་མོ་བཅུ་བཞི་དང༌། གཡོག་མོ་ལྔ་བཅུ་རྩ་བརྒྱད་དང༌། ཡང་གཡོག་འབུམ་ཁྲི་འབུམ་སྟོང་ལ་སོགས་ཏེ། མཁའ་འགྲོ་མའི་འཁོར་དཔག་ཏུ་མེད་པས་བསྐོར་བའོ། །བཅོམ་ལྡན་འདས་དེའི་ཐུགས་ལས་སྤྲུལ་པའི་འཁོར་ཕྱག་ན་རྡོ་རྗེ་ལ་སོགས་ཏེ། མཁའ་འགྲོ་མའི་འཁོར་དཔག་ཏུ་མེད་པས་བསྐོར་བའོ། །བཅོམ་ལྡན་འདས་དེའི་ཐུགས་ལས་སྤྲུལ་པའི་འཁོར་ཕྱག་ན་རྡོ་རྗེ་ལ་སོགས་ཏེ། ཁྲོ་བོའི་དཀྱིལ་འཁོར་བསམ་གྱིས་མི་ཁྱབ་པས་བསྐོར་བ། དགའ་རབ་རྡོ་རྗེ་ལ་སོགས་ཏེ་མི་འཁོར་དཔག་ཏུ་མེད་པས་བསྐོར་བའོ། །འཁོར་རྣམས་ལ་འབྲས་བུ་གསང་སྔགས་བླ་ན་མེད་པའི་ཆོས་ཀྱི་འཁོར་ལོ་བསྐོར་བས་ཞི་བ་སྤྲུལ་པའི་སྐུ་བྱང་ཆུབ་སེམས་དཔའ་རྣམས་གྲོལ་བར་བྱེད་པ། ཐམས་ཅད་ཀྱང་ཁྲོ་བོའི་གཉེར་མ་དང་ལྡན་པ་ཤ་སྟག་གོ། །གཞལ་ཡས་ཁང་དེ་ནི་ཤིན་ཏུ་ཡངས་པ་དང་ལྡན་པའོ། །ཞེས་སོ། །འདི་ལྟར་རྣམ་གྲོལ་དབུགས་ཆེན་འབྱིན་པའི་ཞིང་ཁམས་ལྔ་ནི་བཅོམ་ལྡན་འདས་རྡོ་རྗེ་འཆང་གི་བྱིན་རླབས་ལས་རང་


JLAZ012_Page_0400
[མ་དཔེ་གཟིགས་ན་འདིར་གནོན།]

བཞིན་དུ་བཀོད་པས་ན་རང་བཞིན་སྤྲུལ་པའི་ཞིང་ཁམས་ཞེས་བྱ་ལ། ལས་འཕྲོ་ཅན་ལས་དེ་ཉིད་མངོན་དུ་སྣང་བའི་རྒྱུ་ནི་ཁམས་བདེ་གཤེགས་སྙིང་པོའི་ཁྱབ་བྱེད་ཀྱི་སྙིང་ཁ་ན་མེ་ལོང་ལྟ་བུ་ལ་སོགས་པའི་ཡེ་ཤེས་བཞི་རང་གསལ་བའི་གཞི་སྣང་ལྷུན་གྲུབ་རིན་པོ་ཆེའི་སྒོ་ལོངས་སྐུའི་ཕྱོགས་བཞིན་དུ་གདོད་མ་ཉིད་ནས་ལམ་གྱི་སྣང་བར་ཡོད་པའི་རང་བཞིན་དུ་གསལ་བ་ལ་ཤར་ལ་སོགས་པའི་བརྡས་བཏགས་པ་ཉིད་ཐུན་མོང་བ་ཁ་ཅིག་ལྟར་ཕྱོགས་ག་ཤེད་ན་ཡོད་པར་ནི་མི་བལྟའོ།།དཔག་ཚད་ཀྱི་ངེས་པ་བཤད་པས་འགལ་ལོ་སྙམ་ན། ཞིང་ཁམས་དེ་དག་ཁམས་གསུམ་པའི་ཆོས་ཉིད་ལས་རྒྱང་རིང་པོ་ཉིད་དུ་འཕགས་པས་དེ་སྐད་བཤད་པས་སྒྲ་ཇི་བཞིན་པ་མ་ཡིན་ལ་དེ་བཞིན་དུ་ཁྲོ་བོའི་དཀྱིལ་འཁོར་སྟེང་ན་བཞུགས་པའང་དུང་ཁང་དུ་ཁྲོ་བོའི་ལྷ་ཚོགས་ཡེ་ནས་བཞུགས་པའི་རྣམ་ཆ་ལས་ཤར་བ་ཡིན་ནོ། །དེ་ཡང་སྤྱིར་རང་བཞིན་ཞེས་པའི་སྒྲས་གནས་པའི་རང་བཞིན་སྤྲུལ་པ་དང༌། བགྲངས་པའི་རང་བཞིན་གཉིས་སུ་ཕྱེ་བ་འདི་ཉིད་གོ་དོན་སློངས་ཆེ་སྟེ། སྔ་མའི་ཚུལ་གསང་བ་སྤྱོད་པ་ས་བོན་གྱི་རྒྱུད་ལས། ངོ་བོ་ཉིད་ཀྱི་སྣང་བ་ལ། །ངོ་བོ་ཉིད་ཀྱི་སྐུ་ཤར་བ། །དཔེར་ན་རང་དང་གཟུགས་


JLAZ012_Page_0401
[མ་དཔེ་གཟིགས་ན་འདིར་གནོན།]

བརྙན་བཞིན། །ཞེས་འབྲས་བུའི་ལོངས་སྐུ་བྱད་ལྟ་བུ་ལས་ཆོས་ཉིད་ཀྱི་ལོངས་སྐུ་མེ་ལོང་དུ་གཟུགས་བརྙན་ཤར་བ་ལྟ་བུ་སེམས་ཅན་ཐམས་ཅད་ལ་བར་མ་དོའི་ལམ་དུ་སྣང་བ་དེས་གདུལ་བྱའི་དོན་དངོས་སུ་བྱེད་པའི་ཕྱིར་ཕྱེད་སྤྲུལ་ལོངས་སྐུའི་རྣམ་པར་བཞག་ལ། ཕྱི་མ་ནི་ཕ་རོལ་ཏུ་ཕྱིན་པའི་བཅུ་གཅིག་ཀུན་ཏུ་འོད་ཀྱི་སའི་སྣང་བ་དེ། རང་ལམ་གྱི་བྱང་ཆུབ་སེམས་དཔའ་རྣམས་སངས་རྒྱས་ཀྱི་གསུང་ནི་ཐོས་ལ། ཤེས་བྱའི་སྒྲིབ་པས་སྐུ་ནི་མི་མཐོང་སྟེ། སྐུ་ནམ་མཐོང་བ་ན་ཤེས་བྱའི་སྒྲིབ་པ་ཟད་ནས་སངས་རྒྱ་བར་འདོད་པའི་ཕྱིར་རོ། །གྲུབ་པའི་མཐའ་འདི་འཛིན་པ་རྣམས་ཀྱིས་ཤེས་པར་བྱ་བའི་གནས་གཅིག་ཏུ་ཡོད་པས་དེང་བདག་ཉིད་ཀྱི་འདུན་སར་རྫོགས་པ་ཆེན་པོའི་བསྟན་པའི་སྣང་བ་ཉི་ཞུར་ཙམ་སྣང་བའི་ངེས་བརྗོད་དུ་བྱས་པ་སྟེ། འདི་ཙམ་གྱི་སྐུ་གསུམ་ལྷུན་གྱིས་གྲུབ་པའི་འབྲས་བུའི་ས་ལ་ལེགས་པར་སྦྱོར་བའི་སྡོམ་ཚིག་བསྟན་ཟིན་ལ། རང་བཞིན་གྱི་རྣམ་པར་གཞག་པ་དཔྱིས་ཕྱིན་པའི་མཐའ་རེག་པར་འདོད་པའི་ཤེས་རབ་ཅན་ཡོད་ན། དེ་བཞིན་གཤེགས་པས་ལེགས་པར་གསུངས་པའི་གནས་གང་ཡིན་པ་དོན་བཟང་པོ། ཚིག་འབྲུ་བཟང་པོ། མ་འདྲེས་པ་ལ་སོགས་ཏེ་གསུང་གི་གསང་བ་བསམ་གྱིས་མི་ཁྱབ་


JLAZ012_Page_0402
[མ་དཔེ་གཟིགས་ན་འདིར་གནོན།]

པའི་ཡོན་ཏན་མ་ལུས་ཤིང་ལུས་པ་མེད་པར་ཡོངས་སུ་ཚང་བས་བྱིན་གྱིས་བརླབས་པའི་བཀར་རྩོད་པ་མེད་ཅིང༌། རེ་ཞིག་བོད་ཡུལ་འདི་ན་ཤིང་རྟ་ཆེན་པོ་ཀླུ་སྒྲུབ་ཀྱི་གཞུང་ལྟར་འཆོས་སྐྱོབ་ཀྱི་ཡོན་ཏན་གཉིས་དང་ལྡན་ཞིང་དགོངས་འགྲེལ་རྒྱ་མཚོའི་རྩེ་མོར་ཕྱིན་པས་ལུས་ཅན་མ་ལུས་པ་ཐར་པ་ཆེན་པོའི་གྲོང་ཁྱེར་དུ་ཁྲིད་པའི་རྣམ་གསུམ་ཤིང་རྟ་དགོངས་འགྲེལ་དང་བཅས་པ་དང༌། དུས་གསུམ་གྱི་རྒྱལ་བ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་མཛོད་ཆེན་པོར་དོན་དམ་པར་ལྷུན་གྱིས་གྲུབ་ཅིང༌། ཞར་ལ་ཐེག་པའི་རྒྱལ་པོར་འཁུ་བའི་སྐལ་པ་ངན་པའི་རི་དྭགས་དང༌། ཀླ་ཀློའི་གྲུབ་མཐའ་ལུང་དང་རིགས་པའི་མཚོན་ཆས་ཚར་གཅོད་པ་ལ་ཆོས་ཀྱི་གྲགས་པའི་བརྟུལ་ཞུགས་མ་སྨད་པས་རིན་པོ་ཆེ་སྣ་བདུན་གྱི་ངེས་ཚིག་བཟང་པོས་ལེགས་པར་བསྲུངས་པ་དག་ལས་ཤེས་པར་བྱ་བ་ཁོ་ནའོ། །ཞེས་རང་གི་སློབ་མའི་ཚོགས་ལ་གདམས་པའོ།། །།ཉི་ཟླ་ཇི་བཞིན་འཕགས་པའི་ལམ་གྱིས་རྗེས་སུ་འགྲོ་བའི་བློ་གྲོས་དྲི་མ་མེད་པ་གང༌། །ལེགས་གསུངས་ཡོན་ཏན་མཆོག་ཏུ་རྒྱ་ཆེའི་དོན་འབྲས་འདིར་མཆིས་ཨུ་དུམ་ཝཱ་རའི་མེ་ཏོག་བཞིན། །འདི་ཐོས་རང་བཞིན་ལེགས་པར་ཤེས་ནས་ཀླུ་


JLAZ012_Page_0403
[མ་དཔེ་གཟིགས་ན་འདིར་གནོན།]

དབང་གཙུག་གིས་ནོར་བུ་ལྟ་བུར་འཛིན་པའི་རིགས། །རྫོགས་པ་ཆེན་པོའི་སྣོད་མཆོག་ཉིད་དོ་སྲིད་པ་ཐ་མའི་བྱང་ཆུབ་སེམས་དཔར་གྲགས་པ་ཅན། །འདིར་སྣང་བདེ་སྡུག་གདེངས་ཀས་བརྩེན་ལ་ཕྱི་མའི་འཇིག་རྟེན་བལྟར་མི་མངོན། །བདག་འཛིན་ནགས་ཚལ་ཤིན་ཏུ་སྟུག་པོར་ཀུན་འབྱུང་གཉིད་དུ་ཡུར་བ་ཅན། །སྲིད་པའི་འཁོར་ལོ་གང་དུ་འཁྱིལ་བས་གྲོང་ཁྱེར་བཞི་ཡིས་ཆུ་བོ་ལ། །བརྒལ་བའི་ཕ་མཐའ་ཐུག་པ་མ་ཡིན་འཁོར་བས་བསྡུས་པའི་རྣམ་རྟོག་ཅན། །སྣ་ཚོགས་སྡུག་བསྔལ་ཕྲག་པར་ལྕི་ཡང་བྲེད་དུ་མ་ཚོར་དམ་པའི་མགོན་དང་མཛའ་བ་མིན། །མ་ལུས་མི་ལུས་ལུས་པ་མེད་པའི་ཆོས་ཀྱི་མིག་ནི་ཟླ་བས་གདུངས་པའི་པདྨོ་བཞིན། །དཔལ་དང་འབྱོར་བའི་སྣ་ཞགས་རིང་པོའང་སླད་ཀྱི་སྲིད་པ་བག་ལ་ཉལ་དུ་འགུགས་པའི་རྟེན། །སུ་ཞིག་གླང་པོའི་རང་བཞིན་ཤེས་ནས་དམ་ཆོས་སྒྲུབ་པ་མི་ཡི་ནང་ན་ཁྱུ་མཆོག་གོ། །ཞེ་སྡང་ལྟ་བུའི་སྡིག་པ་ཡོད་མིན་སྲོག་གིས་ཅི་བྱ་དེ་བཟློག་བརྩོན། །བཟོད་དང་མཚུངས་པའི་དཀའ་ཐུབ་ཅི་ཞིག་འདི་ནི་བྱང་ཆུབ་སེམས་དཔའི་ལམ། །དམིགས་པ་མེད་པའི་ཤེས་རབ་ལ་སོགས་ཕྱིན་


JLAZ012_Page_0404
[མ་དཔེ་གཟིགས་ན་འདིར་གནོན།]

དྲུག་སྤྱོད་པའི་གྲོགས་དང་བཅས། །ཤིན་ཏུ་ཞི་བའི་གནས་སུ་འགྲོ་བ་སྐྱེས་བུ་ཆེན་པོའི་ངང་ཚུལ་ལགས། །གང་ན་སྐྱེ་བོས་ཀུན་ནས་སྟོངས་པའི་བྲག་རིའི་ཁང་བཟང་བཀོད་ལེགས་ཤིང༌། །ནགས་ཚལ་མེ་ཏོག་འབབ་ཆུའི་སྒྲ་བཅས་བདག་ལ་སྐྱོ་བ་བསྐུལ་བ་བཞིན། །བྱ་དང་རི་དྭགས་ཁྲོ་བ་མེད་གང་ཚངས་པའི་གནས་པ་བཞི་ཡི་རྟེན། །སྲོག་དང་བཅས་པའི་ལུས་ནི་དེར་གཡོ་རང་དོན་མངོན་པར་བྱང་ཆུབ་ཤོག །ཞིང་རྡུལ་མཉམ་པའི་འགྲོ་འདིའི་ཀུན་རྟོག་རྒྱ་མཚོ་ཆེན་པོའི་རྡུལ་ཇི་བཞིན། །དེ་རྙེད་འདུལ་བའི་ཆོས་ཚུལ་རྒྱ་མཚོར་བདག་གི་ཕྲིན་ལས་དཔལ་འབར་ནས། །སེམས་ཅན་མ་ལུས་སྨིན་པར་བྱེད་པས་རྒྱལ་བ་རྒྱ་མཚོ་མཉེས་བྱས་ཏེ། །སླར་ཡང་གདོད་མའི་ནང་དབྱིངས་རྒྱ་མཚོར་སྙེལ་བ་མེད་པར་འཇུག་གྱུར་ཅིག །ཚུལ་འདི་ཀོང་སྨྱོན་དཔའ་བོའི་དབང་ཕྱུག་སོགས། །དམ་པའི་རིགས་ཅན་འགའ་ཡིས་སྔོན་བསྐུལ་ཡང༌། །རེ་ཞིག་སྤེལ་བའི་དུས་ལ་མ་བབས་པས། །མཁའ་འགྲོ་རྒྱ་མཚོས་ཀློང་གིས་རྒྱ་བསྡམས་སོ། །ནམ་ཞིག་སྔགས་ཀྱི་བདག་མོའི་ཡང་སྤྲུལ་ནི། །ཞིང་སྐྱོང་ཌཱཀྐིའི་དབང་མོ་ཚེ་རིང་མས། །ཧི་ཧིའི་


JLAZ012_Page_0405
[མ་དཔེ་གཟིགས་ན་འདིར་གནོན།]

བཞད་སྒྲ་གཡོ་བའི་ལུང་བསྟན་བཅས། །ཆོས་འདིས་འགྲོ་ལ་ཕན་པའི་གཉེར་བླང་ཞིང༌། །འཆི་མེད་རི་བོའི་སྤོ་ན་མངོན་མཐོ་ལ། །བསྟེན་མཁས་ཡོན་ཏན་རྫོགས་པའི་བསྟན་འཛིན་རྗེས། །རིན་ཆེན་ཤེལ་གྱི་ཕྲེང་བ་བརྒྱ་རྩ་དང༌། །གསེར་གྱི་མེ་ཏོག་བཅས་པའི་བཀས་བསྐུལ་ནས། །བྱང་ཆུབ་ལྗོན་པའི་ནགས་ཁྲོད་ཚེ་རིང་ལྗོངས། །གང་ན་པདྨའི་ཐུགས་རྗེ་ཉེར་བསྟེན་པ། །རང་བྱུང་རྡོ་རྗེ་འཇིགས་མེད་གླིང་པས་བཀོད། །སྲིད་མཚོར་དུབ་པའི་འགྲོན་པོ་དབུགས་འབྱིན་ཕྱིར། །བར་སྣང་ཟླ་བ་རྫིང་བུར་ཆས་པ་རླུང་གིས་ཤིན་ཏུ་གཡོ་བ་གང༌། །བྱིས་པ་རྣམས་ནི་དེ་དང་དེར་འཛིན་རྒན་པོས་བྱེ་བྲག་ཕྱེད་པའི་གཏམ། །ཟླ་


JLAZ012_Page_0406
[མ་དཔེ་གཟིགས་ན་འདིར་གནོན།]

བ་གཡོ་མིན་རླུང་གིས་བསྐྱོད་པའི་ངེས་པ་བརྗོད་ནས་ཟླ་བའི་དངོས། །བདེན་གྲུབ་སྨྲ་བ་དེ་ཡང་རྫོགས་པའི་བྱང་ཆུབ་ཆོས་ལ་ཡོད་མ་ཡིན། །དེ་ཕྱིར་ལྟ་བའི་སྙིགས་མར་གྱུར་པའི་སེམས་ཅན་སེམས་ཀྱི་གཞན་དབང་ཅན་ཡང་ཆོས་འདིའི་སྒོ། །མཐོང་བའི་མོད་ལ་ཚུལ་མིན་ཡིད་བྱེད་འཇིག་ལྟའི་རི་བོ་ཉེ་བར་ལེན་བཅས་ཞིག་གྱུར་ཏེ། །ཆོས་དང་གང་ཟག་གཉིས་ཀའི་ལྟོས་གྲུབ་བསམ་གྱིས་མི་ཁྱབ་རྫོགས་པ་ཆེན་པོའི་དབྱིངས་ཞི་ནས། །ལྔ་བརྒྱའི་ཐ་མར་ཤིན་ཏུ་བསྲུང་དཀའི་རྒྱལ་བའི་ཕྲིན་ལས་ཆུད་མི་གསན་པའི་བཀྲ་ཤིས་ཤོག །སརྦ་མངྒ་ལཾ་ཛ་ཡནྟུ།། །།

ཀློང་ཆེན་སྙིང་གི་ཐིག་ལེ་ལས། རྡོ་རྗེ་ཐེག་པའི་སྨིན་གྲོལ་ལམ་གྱི་རིམ་པ་ལས་འཕྲོས་པའི་མན་ངག་གི་རྒྱབ་རྟེན་པདྨ་དཀར་པོ།


JLAZ012_Page_0408
[མ་དཔེ་གཟིགས་ན་འདིར་གནོན།]

ཀློང་ཆེན་སྙིང་གི་ཐིག་ལེ་ལས། རྡོ་རྗེ་ཐེག་པའི་སྨིན་གྲོལ་ལམ་གྱི་རིམ་པ་ལས་འཕྲོས་པའི་མན་ངག་གི་རྒྱབ་རྟེན་པདྨ་དཀར་པོ་ཞེས་བྱ་བ་བཞུགས། །


JLAZ012_Page_0409
[མ་དཔེ་གཟིགས་ན་འདིར་གནོན།]

བདེ་གཤེགས་སྙིང་པོ་འགྲོ་བའི་ཁམས་ལ་ཏིལ་མར་བཞིན་དུ་ཁྱབ་གདལ་ཡང༌། །གློ་བུར་སྒྲིབ་གཉིས་རྟག་ཏུ་མི་བཟོད་བྲལ་བྱའི་ཚུལ་དུ་ནོགས་པ་དག །ཅིག་ཆར་སེལ་བའི་ནུས་མཐུ་ཚད་མེད་རྡོ་རྗེའི་ཐེག་པ་ལས་གཞན་མིན། །དེ་ཡི་རང་བཞིན་རྣམ་པར་དཔྱོད་མཁས་ཀུན་མཁྱེན་གྲུབ་དབང་ཚོགས་ལ་འདུད། །འཕགས་ཆོས་དུ་མའི་ནོར་གྱིས་ཡོངས་ཕྱུག་ལ། །དབང་རྣོན་མཆོག་གི་གདུལ་བྱའི་ཐབས་ཀྱི་ལམ། །སྨིན་གྲོལ་རྒྱ་འཚོའི་དབའ་ལ་བརྒལ་བ་འདི། །རིག་འཛིན་རྣམ་འབྱོར་དེད་དཔོན་དམ་པའི་སྲོལ། །ཤེས་རབ་གསུམ་གྱི་མེ་ལོང་ཕྱིས་པའི་ངོགས། །ཆོས་ཀྱི་གླེང་མོ་བྱེད་པའི་བཞིན་བཟང་མས། །དྲི་ཚིག་བརྡ་ཐབས་གླིང་བུ་


JLAZ012_Page_0410
[མ་དཔེ་གཟིགས་ན་འདིར་གནོན།]

འབུད་པའི་ཚེ། །མཆིད་ལན་ཀ་ལ་པིང་ཀའི་དབྱངས་སུ་ལེན། །མི་ཆོས་གཙང་མ་བཅུ་དྲུག་གི་ཐ་གྲུ་ཡངས་པའི་ཞིང་ས་ལ། ལྷ་ཆོས་དད་ནོར་གཏོང་བའི་མྱུ་གུས་ཡོངས་སུ་བསྲུངས་ཤིང༌། ཐོས་བསམ་སྒོམ་པའི་སྙིང་པོ་ནོ་པི་ཀ་ལ་གཅིག་ཏུ་གཞོལ་བའི་ལོ་འབྲས་ཀྱིས་དུད་ཅིང་དམ་པའི་རྣམ་ཐར་བཟང་པོ་དང་ལྡན་པ་གང་གི་རྡོ་རྗེ་ཐེག་པའི་སྨིན་གྲོལ་གྱི་ལམ་གྱི་གནད་དང་དེ་ལ་ཕར་ཕྱིན་གྱི་བགྲོད་འགྱུར་རྩི་ཚུལ་ཇི་ལྟར་གྱི་དྲི་བ་ཆེད་དུ་མཛད་པའི་ཆ་ལ་འོ་སྐོལ་གྱིས་སྲིད་པ་འདི་ལ་རིག་གྲྭ་སོགས་བརྒལ་བརྟག་རྩོད་པའི་འཁོར་ལོའི་གྲར་མཆི་མ་མྱོང་བར། རྡོ་རྗེ་ཐེག་པའི་དབང་དང་སྙན་བརྒྱུད་ལས་བྱུང་བའི་ཡེ་ཤེས་ཁོང་ནས་དོན་བརྒྱུད་བཟུང་སྟེ་ཀུ་སུ་


JLAZ012_Page_0411
[མ་དཔེ་གཟིགས་ན་འདིར་གནོན།]

ལུའི་སྒྲུབ་པ་ལ་གཞོལ་བ་ལགས་ཚེ། རྒྱ་ཆེའི་བཤད་ཡམས་ཀྱིས་སྨྲ་བར་མ་སྤོབས་ཀྱང༌། ཀློང་གསལ་རིག་པའི་རྩལ་གྱིས་སྣང་བ་དཔེ་ཆར་ཤར་བའི་གོ་ཡུལ་གྱི་ལམ་དུ་གཞལ་ན། རྒྱུ་མཚན་ཉིད་ཀྱི་ཐེག་པས་སྐྱེད་བྱ་སྐྱེད་བྱེད་ལ་སོགས་པའི་ཀུན་རྫོབ་སྔོན་དུ་སོང་ནས་དོན་དམ་རྟོགས་པར་འདོད་ཅིང༌། དེ་ཡང་ལམ་དུས་སུ་ཚོགས་གཉིས་ལ་མཉམ་རྗེས་རེས་འཇོག་ཏུ་གྱུར་པས་ས་ལམ་གྱི་བགྲོད་པ་ལ་བསྐལ་པའི་བར་དུ་ཐོགས་པར་བཤད་པ་ཉིད། རྡོ་རྗེ་ཐེག་པའི་སྐབས་སུ་རྗེས་དཔག་གཏན་ཚིགས་ལ་མ་ལྟོས་པར་དབང་ལས་བྱུང་བའི་ཡེ་ཤེས་སྐད་ཅིག་མས་རང་གནས་ཀྱི་ཡེ་ཤེས་མངོན་སུམ་བཙན་ཐབས་སུ་ངོ་སྤྲད་དེ་སྒོམ་པས་སྤང་གཉེན་རང་གྲོལ་དུ་དག་ནས་ས་ལམ་ཆིག་རྫོགས་ཡེ་གྲོལ་ཡིན་ལ། དེ་ལྟར་ནའང་ཕར་ཕྱིན་གྱི་རྗོད་བྱེད་ལམ་ལྔའི་གོ་དོན་མ་ལྷོངས་ན་བརྗོད་བྱའི་དོན་ལ་རྨོངས་པར་འགྱུར་བས་འདི་ལྟར་ཁོ་བོའི་བླ་མ་ཀུན་མཁྱེན་ཀློང་ཆེན་པས། ཐོས་བསམ་དང་བསོད་ནམས་ཀྱི་ཚོགས་གཙོ་ཆེར་སྤྱོད་པས་ཚོགས་ལམ། རྣམ་པར་མི་རྟོག་པའི་ཡེ་ཤེས་མཐོང་ལམ་ལ་སྦྱོར་བས་སྦྱོར་ལམ། ཆོས་ཉིད་དངོས་སུ་མཐོང་བས་མཐོང་ལམ། མཐོང་ཟིན་སྒོམ་པར་བྱེད་པས་སྒོམ་ལམ། བསླབ་བྱ་མཐར་ཐུག་ནས་སྒོམ་དུ་མེད་པས་མི་སློབ་པའི་ལམ་ཞེས་བཞེད་པའི་ཚོགས་སྦྱོར་ནི་དོན་དམ་གྱི་ངོ་བོ་ཡོད་ངེས་ཡིན་


JLAZ012_Page_0412
[མ་དཔེ་གཟིགས་ན་འདིར་གནོན།]

སྙམ་དུ་ཡིད་ཀྱི་དཔྱོད་པ་ལས་བདེན་པས་མངོན་སུམ་དུ་མཐོང་བའི་སྐལ་བ་ཕྲ་བས་མོས་པས་སྤྱོད་པའི་ལམ་ཡིན་ལ་མཐོང་ལམ་ནས་ཕྱོགས་རེ་མཐོང་བའི་རྩལ་ཇེ་ཆེར་འཕེལ་བས་ས་དང་པོ་རྩིས་ཏེ། སྒོམ་པའི་ལམ་དུ་ས་བཅུ་རིམ་ཅན་དུ་བགྲོད་པས། དེ་ཡང་ནང་གསེས་སུ་ས་བདུན་པ་རིང་དུ་སོང་བ་མན་ཆད་ལ་མ་དག་པའི་ས་དང༌། བརྒྱད་པ་མི་གཡོ་བ་ནས་བཟུང་དག་ས་གསུམ་དུ་བརྩི་ཞིང༌། མི་སློབ་པའི་ལམ་ནི་རང་བཞིན་ཅི་ཡིན་པ་མངོན་སུམ་དུ་གཟིགས་པས་སངས་རྒྱས་ཀྱི་ས་ཁོ་ནར་ངེས་ལ། ལམ་དེ་དག་གི་བྲལ་བྱའི་དྲི་མ་དཔེ་ཡང་ཨཱརྱ་མཻ་ཏྲིས་རྒྱུད་བླ་མར་དཔེ་རྣམ་པ་དགུས་བསྟན་པ་ནི་གཞུང་འགྲེལ་ཆེན་པོ་རྣམས་སུ་བརྟག་པར་བྱ་ལ། དེ་སྐད་དུ། ས་བདུན་ལ་བརྟེན་དྲི་མ་ནི། །མངལ་སྦུབས་དྲི་མ་དག་དང་མཚུངས། །མངལ་སྦུབས་བྲལ་འདྲ་མི་རྟོག་པའི། །ཡེ་ཤེས་རྣམ་པར་སྨིན་པ་བཞིན། །ས་གསུམ་རྗེས་འབྲེལ་དྲི་མ་རྣམས། །ས་འདམ་གོས་བཞིན་ཤེས་བྱ་སྟེ། །བདག་ཉིད་ཆེན་པོ་རྡོ་རྗེ་ལྟའི། །ཏིང་ངེ་འཛིན་གྱི་གཞོམ་བྱ་ཡིན། །ཞེས་བཤད་པ་ལྟར་འདི་དག་གི་རང་བཞིན་དཔྱིས་ཕྱིན་པ་ནི་རྗོད་བྱེད་ཀྱི་ཚིག་ཉུང་ངུས་དཔོགས་པར་མི་ནུས་པས་བདག་ཅག་གི་བསྟན་པ་ཡོངས་རྫོགས་ཀྱི་གྲུབ་མཐའ་ཇི་ལྟར་འདོད་པའི་ཞེ་ཕུགས་སུ་ཡིད་བརྟན་འཆའ་རུང་བ་དཔལ་བསམ་ཡས་པ་དག་གི་


JLAZ012_Page_0413
[མ་དཔེ་གཟིགས་ན་འདིར་གནོན།]

དབང་པོའི་བསྟན་བཅོས་སྤྱི་དང༌། ཁྱད་པར་གྲུབ་མཐའ་རིན་པོ་ཆེའི་མཛོད་ཀྱི་ལེའུ་བཞི་པ་ལ་བརྟག་པར་བྱ་ལ། སྒོམ་ཆེན་པ་ནི་བཤད་ཡམས་དང་རྟོག་དཔྱོད་ལ་གཙོ་བོར་མི་བྱེད་པས་དོན་གྱི་སྙིང་པོར། ས་ལམ་གྱི་ཡོན་ཏན་དང་སྤངས་རྟོགས་མཐར་ཕྱིན་པའི་ཐམས་ཅད་མཁྱེན་པའི་ཡེ་ཤེས་དེ་ཡང་གནས་སྐབས་སུ་ཚོགས་བརྒྱད་ཀྱི་འཛིན་པས་བཅིངས་ཏེ་མངོན་མ་ནུས་པ་ཙམ་ལས་སེམས་ཅན་ཐམས་ཅད་ཀྱི་རྒྱུད་ལ་མ་ཞུགས་པ་འགའ་ཡང་མེད་ལ། དེའི་དཔེ་ནི་སངས་རྒྱས་ཕལ་པོ་ཆེའི་མདོ་ལས་སྟོང་གསུམ་དར་ཡུག་ཆེན་པོའི་དཔེས་གསལ་བར་བསྟན་པ་བཞིན་ནོ། །དེ་ཉིད་རང་གནས་སུ་ཡོད་ཀྱང་རྒྱལ་རིགས་ཀྱི་བུ་རྒྱལ་སར་དབང་བསྐུར་བ་བཞིན་རྡོ་རྗེ་ཐེག་པའི་སྐབས་འདིར་སྨིན་གྲོལ་གྱི་གསང་ལམ་ཟབ་མོའི་བརྡ་ཐབས་རྟེན་འབྲེལ་གྱིས་གསལ་བར་བྱེད་པ་སྟེ། གླང་པོ་ཆེ་ཆུར་འཇུག་གི་རྒྱུད་ཕྱི་མ་ལས། འགྲོ་བའི་སེམས་ཉིད་རང་རིག་འོད་གསལ་དོན། །སངས་རྒྱས་མ་བཅོས་ལྷུན་གྲུབ་གནས་པའི་རྒྱུ། །དོན་གསལ་སྨིན་ཅིང་གྲོལ་བའི་ལམ་ཞུགས་ནས། །འབྲས་བུ་རང་རྒྱུད་གསལ་བར་མཐོང་བ་ཡིན། །ཞེས་དང༌། དེ་ལ་དང་པོར་དབང་གི་བདག་པོའི་རྐྱེན་རྡོ་རྗེ་སློབ་དཔོན་ཁོ་ན་ལས་གཞན་དུ་མ་ཡིན་པས་དཔོན་སློབ་ཀྱི་འབྲེལ་པ་བརྟགས་པ་གལ་ཆེ་སྟེ། ཨོ་རྒྱན་ཆེན་པོས། བླ་མ་མ་བརྟགས་གཡང་


JLAZ012_Page_0414
[མ་དཔེ་གཟིགས་ན་འདིར་གནོན།]

མཆོང་འདྲ། །སློབ་མ་མ་བརྟགས་དུག་འཐུངས་འདྲ། །ཞེས་པས་རྟེན་འབྲེལ་གྱི་རྩ་བ་འདི་ནས་མ་འཕྱུགས་པར་དགོས་པའི་ཕྱིར་དེའི་རང་བཞིན་བརྟག་པ་ལ། སློབ་དཔོན་གྱི་མཚན་ཉིད་ནི། རང་ཤར་གྱི་རྒྱུད་ལས། རྡོ་རྗེའི་དོན་ལྡན་སློབ་དཔོན་ནི། །ངང་རྒྱུད་བཟང་ཞེས་སློབ་ལ་མཁས། །དབང་ཐོབ་གསང་སྔགས་དོན་ལ་སྦྱོར། །ཕྱི་ནང་བྱ་བ་ཐམས་ཅད་ཤེས། །ཡི་དམ་ལྷ་དང་འདུ་འབྲལ་མེད། །ཏིང་ངེ་འཛིན་ལ་ཡེངས་པ་མེད། །རྫོགས་ཆེན་མན་ངག་དོན་ལྡན་པའི། །གསང་སྔགས་གསང་བའི་རྒྱུད་ལ་མཁས། །ཕྱི་ནང་སྒྲུབ་པ་ཐམས་ཅད་བྱེད། །ལྟ་བའི་དོན་ལས་མི་འདའ་ཞིང༌། །ཕྱི་ནང་གསང་བའི་བྱ་བ་བཏང༌། །ཡོན་ཏན་ནོར་བུ་རིན་ཆེན་ལྟར། །ཟད་མེད་གཏེར་ལ་སྤྱོད་པའོ། །ཞེས་གསུངས་པ་ལྟར་ལས་འདིར་མཚན་ཉིད་དྲུག་ལྡན་ཞེས་པ་འཁོར་བའི་ཆོས་རྒྱབ་ཏུ་དོར་བ། འདོད་པ་ཆུང་ཞིང་ཆོག་ཤེས་པ། ལག་ལེན་མཁས་ཤིང་ཉམས་མྱོང་ཡོད་པ། རྒྱུད་ཀྱི་ཚིག་དོན་ལ་མཁས་ཤིང་སྒྲུབ་པ་ལ་བརྩོན་པ། ལྟ་བའི་དོན་ལ་མཁས་ཤིང་ནུས་པ་རྫོགས་པ། སྙིང་རྗེ་ཆེ་ཞིང་གཏོང་ལ་དགའ་བ་སྟེ། ཡོན་ཏན་དེ་དག་རྫོགས་པ་ཞིག་དགོས་པར་གསུངས་ལ། གལ་ཏེ་གཞན་དུ་འདི་ནི་སྤྲུལ་གཞི་ཕུན་སུམ་ཚོགས་པའོ། །འདི་ནི་གོ་ས་བླ་ན་མེད་


JLAZ012_Page_0415
[མ་དཔེ་གཟིགས་ན་འདིར་གནོན།]

པའོ། །འདི་ནི་འཇིག་རྟེན་མཐུན་འཇུག་གི་བཀུར་བའི་ཡུལ་དམ་པའོ།། ཞེས་པ་ལ་སོགས་པའི་གསོབ་ཏུ་ཞུགས་པ་ཙམ་གྱིས་ནི་མ་ཡིན་ཏེ། རྒྱུད་དེ་ཉིད་ལས། མི་ཤེས་ང་རྒྱལ་ཆེན་པོ་དང༌། །བླུན་རྨོངས་ཚིག་ཕྱིར་འབྲེང་བ་དང༌། །གསང་སྔགས་དོན་ལ་མི་དགོངས་དང༌། །གཞན་གྱི་ཞེ་གཅོད་ཁེངས་ཚིག་དང༌། །ལོག་པའི་ལམ་དུ་ཞུགས་པ་དང༌། །དབང་གི་དཀྱིལ་འཁོར་ཞལ་མ་མཐོང༌། །དམ་ཚིག་ཕྱལ་བར་གྱུར་པ་དང༌། །དྲིས་པ་དག་ལ་ལེན་མི་ཐེབས། །ཐོས་ཆུང་ང་རྒྱལ་ཆེ་བ་སྟེ། །སློབ་དཔོན་མ་བརྟགས་སློབ་མའི་བདུད། །ཅེས་གསུངས་པའི་ཕྱིར་བདུད་ལྟ་བུ་དང་མ་འཕྲད་པར་བྱའོ། །དེ་བཞིན་དུ་སློབ་མའི་མཚན་ཉིད་ཀྱང༌། རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །བྲེང་ངེ་དུང་ངེ་བརྩེ་དུང་ལྡན། །ལྷང་ངེ་ལྷན་ནེ་སྒོམ་ལ་སྤྱོད། །སློབ་དཔོན་གསུང་བ་ཇི་བཞིན་སྤྱོད། །ཅེས་པ་ལ་སོགས་པས་མཚོན་ཏེ་མདོར་ན་གསང་སྔགས་སྟོན་པའི་སློབ་མ་དེ་པཎ་ཆེན་ནཱ་རོ་དང༌། མི་ལ་བཞད་པ་རྡོ་རྗོའི་དཔེ་ཟླར་འོས་པ་ཉིད་དོ། །དེ་ལྟ་བུའི་དཔོན་སློབ་ཀྱི་རྟེན་འབྲེལ་བརྟག་པ་སྔོན་དུ་སོང་ནས་དབང་


JLAZ012_Page_0416
[མ་དཔེ་གཟིགས་ན་འདིར་གནོན།]

དང་གདམས་པའང་བཙན་ཐབས་སུ་མི་ཞུ་བར་ལོ་ཟླ་མང་པོའི་སྔ་རོལ་ནས་སྙན་གསན་དབབ་ཅིང༌། དུས་ལ་བབས་ན་གནས་ཡོ་ལ་སོགས་པའི་རྟེན་ཅིང་འབྲེལ་འབྱུང་ཐམས་ཅད་ཚུལ་བཞིན་དུ་ཚོགས་པར་བྱས་ལ་ཟབ་མོའི་དབང་ནོད་ཅིང༌། དེའི་ཚེ་བླ་མ་ལ་ཕྱོགས་བཅུའི་སངས་རྒྱས་ཐམས་ཅད་ཀྱི་བྱིན་རླབས་གཅིག་ཏུ་འདུས་ཏེ་དབང་བསྐུར་བའི་བྱ་བ་མཛད་པས་དུས་གཞན་དུ་ཟས་སྐོམ་ལ་སོགས་པ་བྱེ་བའི་བསྙེན་བསྐུར་ལས་འདིར་སྣ་རེ་ཕུལ་བ་ཚོགས་ཆེ་བར་བཤད་ཅིང༌། དེ་བཞིན་དུ་དབང་རྟེན་ཁྱད་པར་ཅན་ལ་བྱིན་ནའང་དཔའ་བོ་དང་དཔའ་མོ་ཐམས་ཅད་དེ་ལ་རྟེན་བཅས་ཏེ་ཐུགས་རྗེ་དང་དམ་ཚིག་གིས་འཁོད་པ་ཡིན་པས་གཞན་ལས་འབུམ་འགྱུར་གྱིས་འཕེལ་ཆེ་བ་སྟེ། ཚུལ་དེ་དག་ནི་རྩ་བའི་བླ་མ་སངས་རྒྱས་ཀུན་འདུས་ཀྱི་ངོ་བོ་ཡིན་ཞིང༌། རང་ངོས་ལ་སྐུ་དངོས་ཀྱི་རྗེས་སུ་བཟུང་བའི་ཐུགས་རྗེའི་ཆ་ནས་ལྷག་པའི་གོ་དོན་ཀྱང་ལྷོངས་པ་ཡིན་ནོ། །དེ་ལྟར་རྒྱུ་རྐྱེན་ཕུན་སུམ་ཚོགས་པས་གོ་ཕྱེ་ནས་དངོས་གཞི་དབང་གི་ངོ་བོ་ནི། སྒྲ་ཐལ་འགྱུར་གྱི་རྒྱུད་ལས། སྤྲོས་བཅས་ཉིད་དང་སྤྲོས་མེད་དང༌། །ཤིན་ཏུ་སྤྲོས་པ་མེད་པ་དང༌། །དེ་བཞིན་རབ་ཏུ་སྤྲོས་པ་མེད། །དབྱེ་བ་བཞི་ཡི་ཚུལ་གྱིས་ནི། །དད་ལྡན་རང་རྒྱུད་སྨིན་


JLAZ012_Page_0417
[མ་དཔེ་གཟིགས་ན་འདིར་གནོན།]

པར་བྱེད། །ཅེས་གསུངས་པའི་དབང་བཞིའི་ཁོངས་སུ་དོན་དབང་ཡོངས་སུ་རྫོགས་པ་འདུ་ལ། གཞན་དུ་ན་གསར་རྙིང་གི་རྒྱུད་སྡེ་དང་མན་ངག་སོ་སོའི་དགོངས་པས་དབྱེ་བསྡུའི་ཁྱད་པར་གྱི་རིམ་པ་ནི་བསམ་གྱིས་མི་ཁྱབ་པ་ཡོད་དོ། །དེའི་ཕྱིར་ནུས་པ་འཇུག་པའི་དབང་བཞི་པོའི་སྦྱོང་གཞི་སྦྱོང་བྱེད་སྦྱངས་འབྲས་དང་དག་པ་སྦྱོར་བའི་ཚུལ་ནི། ཕྱི་ལྟར་དུ་དུས་བཞི། ནང་ལྟར་དུ་ལུས་ངག་ཡིད་དེ་ཚོགས་པ་བཞི། གསང་བ་ལྟར་དུ་གཏི་མུག་དང༌། ཞེ་སྡང་དང་འདོད་ཆགས་དང༌། ཆ་མཉམ་པ་བཞི་སྦྱང་གཞི་ཡིན་ལ། སྦྱོང་བྱེད་ནི། བུམ་པ་དང༌། གསང་བ་དང༌། ཤེས་རབ་ཡེ་ཤེས་དང༌། ཚིག་དབང་རིན་པོ་ཆེ་སྟེ་བཞིས་སྦྱངས་པས། དང་པོ་བུམ་དབང་གིས་ལུས་འཁྲུལ་རྟོག་རྩ་ཡིས་བཅིངས་པའི་དྲི་མ་སྦྱངས་ཏེ་ཚོགས་ལམ་བཅུ་གཉིས་རྫོགས་པའི་རྟེན་དང་སྐུའི་ནུས་པ་འཇུག་ཅིང་ཁྱད་པར་རྣམ་སྨིན་གྱི་རིག་འཛིན་ཐོབ་པའི་རྟེན་བྱེད་ལ། དེའི་དམ་ཚིག་ནི། མཉམ་གཞག་ཏུ་ཟབ་གསལ་གཉིས་སུ་མེད་པའི་བསྐྱེད་རིམ་སྒོམ་ལ། རྗེས་ཐོབ་ཏུ་སྤྲུལ་པ་སྒྱུ་མ་ལྟ་བུའི་སྣང་ཞེན་ལྷ་ཡི་ཕྱག་རྒྱ་ལས་མི་འདའོ། །བཟའ་བའི་དམ་ཚིག་ནི། གཙང་དམེའི་གཉིས་རྟོག་བསལ་ནས་ཤ་ལྔ་བདུད་རྩི་ལྔར་བསམས་ནས་ལོངས་སྤྱོད་དོ། །བཅའ་བའི་དམ་ཚིག་ཏུ་རྡོར་དྲིལ་མཚན་ཉིད་


JLAZ012_Page_0418
[མ་དཔེ་གཟིགས་ན་འདིར་གནོན།]

དང་ལྡན་པ་རང་བཞིན་ཤེས་པའི་ངང་ནས་འཆང་ངོ༌། །བསྲུང་བའི་དམ་ཚིག་ནི་སྣང་གྲགས་རིག་གསུམ་དཀྱིལ་འཁོར་གསུམ་གྱི་རྣམ་རོལ་དུ་རྩལ་སྦྱང་ངོ༌། །གཉིས་པ་གསང་དབང་གིས་ངག་འཁྲུལ་རྟོག་རླུང་གིས་བཅིངས་པའི་དྲི་མ་སྦྱངས་ཏེ་སྦྱོར་ལམ་ངེས་འབྱེད་ཆ་བཞི་རྫོགས་པའི་རྟེན་དང་གསུང་གི་ནུས་པ་འཇུག་ཅིང་ཁྱད་པར་ཚེ་དབང་རིག་འཛིན་ཐོབ་པའི་རྟེན་བྱེད་ལ། དེའི་དམ་ཚིག་ནི་མཉམ་གཞག་ཏུ་ཆགས་བྲལ་གཏུམ་མོ་ཙཎྜ་ལི་དང་བཟླས་པ་སྔགས་ཀྱི་རྣལ་འབྱོར་ལ་འཇུག་གོ། །རྗེས་ཐོབ་ཏུ་ཤེས་རབ་ཡེ་ཤེས་ཀྱི་མེའི་ངོ་བོ་ཨ་ཐུང་གི་དྲོད་ལ་སེམས་འཛིན་ནོ། །བཟའ་བཏུང་གི་དམ་ཚིག་ནི་བྱང་སེམས་དཀར་དམར་གྱི་རང་བཞིན་ཏུ་ལོངས་སྤྱོད་དོ། །བཅང་བའི་དམ་ཚིག་བགྲང་ཕྲེང་དང་བྷན་དྷ་མཚན་ལྡན་ནོ། །བསྲུང་བའི་དམ་ཚིག་དོན་དམ་བྱང་ཆུབ་ཀྱི་སེམས་མཆོག་མི་ཉམས་པར་སྲུང་ངོ༌། །གསུམ་པ་ཤེར་དབང་གིས་རགས་པ་ཚོགས་བདུན་དང་ཕྲ་བ་འཁྲུལ་རྟོག་ཡིད་ཀྱིས་བཅིངས་པའི་དྲི་མ་སྦྱངས་ཏེ་མཐོང་ལམ་རྫོགས་པའི་རྟེན་དང་ཐུགས་ཀྱི་ནུས་པ་འཇུག་ཅིང༌། ཁྱད་པར་ཕྱག་རྒྱ་ཆེན་པོའི་རིག་འཛིན་ཐོབ་པའི་རྟེན་བྱེད་ལ། དེའི་དམ་ཚིག་ནི་མཉམ་གཞག་ཏུ་རྩ་འབྱོངས་རླུང་ཆུན་ཐིག་ལེ་དག་སྟེ་སྲོག་རྩོལ་གྱི་ནུས་པ་ལ་དབང་བསྒྱུར་ནུས་ནས་བླ་མའི་གནང་བ་ཐོབ་པའི་ཚེ། དངོས་སམ། ཡིད་


JLAZ012_Page_0419
[མ་དཔེ་གཟིགས་ན་འདིར་གནོན།]

རིག་ལ་འདུ་ཤེས་གསུམ་ལྡན་གྱི་སྒོ་ནས་སྙོམས་པར་འཇུག་གོ། །རྗེས་ཐོབ་ཏུ་བདེ་སྡུག་བཟང་ངན་གྱི་སྣང་ཆ་ཐམས་ཅད་བདེ་སྟོང་ཡེ་ཤེས་ཀྱི་འཁོར་ལོར་རྩལ་སྦྱང་ངོ༌། །བཟའ་བའི་དམ་ཚིག་ཏུ་སྙོམ་འཇུག་དགའ་བཞིའི་རྣམ་རོལ་ཆེན་པོར་ལ་བཟླའོ། །བཅང་བའི་དམ་ཚིག་ནི། ཀུནྡ་བྱང་ཆུབ་སེམས་རིན་པོ་ཆེ་སྲོག་ལས་གཅེས་པར་བཟུང་ངོ༌། །བསྲུང་བའི་དམ་ཚིག་ནི་ཤེས་རབ་མི་མོའི་རིགས་ལ་ལོག་ལྟ་སྐད་ཅིག་མ་ཙམ་ཡང་སྤང་ངོ༌། །བཞི་པ་ཚིག་དབང་རིན་པོ་ཆེས་ཀུན་གཞི་ཤེས་བྱའི་དྲི་མ་སྦྱངས་ཏེ་སྒོམ་ལམ་ས་དགུ་རྫོགས་པའི་རྟེན་དང་རང་བྱུང་འོད་གསལ་གྱི་ནུས་པ་འཇུག་ཅིང་ཁྱད་པར་ལྷུན་གྲུབ་རིགས་འཛིན་ཐོབ་པའི་རྟེན་བྱེད་ལ། དེའི་དམ་ཚིག་ནི་མཉམ་གཞག་ཏུ་བློ་འདས་ཁྲེགས་ཆོད་ཀྱི་དོན་ལ་ཡང་དག་གི་དགོངས་པས་བལྟ་ཞིང༌། རྗེས་ཐོབ་ཏུ་ བྱེ་བྲག་དབྱེ་ན་རིག་པ་རྩལ་དབང་གི་ལམ་ཁྱེར་ཡིན། དབྱིངས་རིག་དབྱེར་མེད་རྡོ་རྗེ་ལུ་གུ་རྒྱུད་ཀྱི་གནད་ལ་གཟིར་ཞིང་བཞུགས་སྟངས་གསུམ་དང་མ་བྲལ་བར་བྱའོ། །བཟའ་བའི་དམ་ཚིག་ནི་སྟོང་ཉིད་གསལ་ཁྱབ་ཆེན་པོའི་དགོངས་པར་ལ་བཟློས་པས་ཆོས་ཉིད་ལ་ཆོས་ཉིད་ཀྱིས་རོལ་ལོ། །བཅང་བའི་དམ་ཚིག་ནི་རྡོ་རྗེ་སེམས་དཔའི་མེ་ལོང་མཚན་ཉིད་དང་ལྡན་པའོ། །བསྲུང་བའི་དམ་ཚིག་ལ་མེད་པ་གཅིག་པུ་ཕྱལ་བ་ལྷུན་གྲུབ་ལ་སོགས་ཏེ་མཐར་བསྲུང་མཚམས་དང་བྲལ་བར་བལྟའོ། །དེ་ལྟར་ལམ་བཞིས་


JLAZ012_Page_0420
[མ་དཔེ་གཟིགས་ན་འདིར་གནོན།]

བགྲོད་པས་སྦྱངས་འབྲས་ནི་སློབ་བྱ་མཐར་ཐུག་ནས་མི་སློབ་པའི་ས་སྟེ་དབྱེ་ན། བུམ་དབང་གིས་སྟོབས་བཅུ་མི་འཇིགས་རྣམ་བཞིའི་ནུས་པ་མངའ་བ་མཆོག་གི་སྤྲུལ་སྐུ་ཤཱཀྱ་ཐུབ་པ་ལྟ་བུ། གསང་དབང་གིས་ངེས་པ་ལྔ་དང་ཁ་སྦྱོར་ཡན་ལག་བདུན་ལྡན་གྱི་ལོངས་སྤྱོད་རྫོགས་སྐུ་རིགས་ལྔའི་ཞིང་གི་སྟོན་པ་ལྟ་བུ། ཤེར་དབང་གིས་དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་དྲི་མ་མཐའ་དག་དང་བྲལ་བའི་རྟོགས་པ་མཐར་ཕྱིན་པ་ནམ་མཁའ་ལྟ་བུའི་ཆོས་སྐུ། ཚིག་དབང་གིས་རྫོགས་པ་ཆེན་པོའི་ནང་གསལ་གཞོན་ནུ་བུམ་སྐུ་དང་རྣམ་དབྱེར་མི་ཕྱེད་པ་ངོ་བོ་ཉིད་སྐུ་སྟེ། དེའི་རང་བཞིན་ནི། ཐུན་མོང་ཐེག་པ་ལྟར་ན། མངོན་རྟོག་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་དང༌། དེང་སང་ཆོས་སྐུ་དང་ངོ་བོ་ཉིད་སྐུའི་རྣམ་དབྱེ་ཕྱེད་པ་ཉུང་སྟེ་ཁྱད་པར་ནི། དབྱིངས་དག་མཉམ་སྟོང་པ་སྐུ་རྣམས་ཀྱི་ཆོས་ཉིད་བྱེད་པའི་ཆ་ནས་ངོ་བོ་ཉིད་ཀྱི་སྐུ་དང༌། ཡེ་ཤེས་སྤངས་རྟོགས་མཐར་ཕྱིན་པ་རིག་པའི་ངོ་བོ་སྟེ་མཚན་ཉིད་ཉི་ཤུ་རྩ་གཅིག་ནི་རྟོགས་པ་ཡེ་ཤེས་ཀྱི་ཆོས་ཀྱི་སྐུར་འགྱུར་ཏེ། ཀུན་མཁྱེན་གྱིས། སངས་རྒྱས་ཀྱི་ཡེ་ཤེས་ཡིན་པ་གང་ཞིག་དབྱིངས་རིག་མཐར་ཐུག་


JLAZ012_Page_0421
[མ་དཔེ་གཟིགས་ན་འདིར་གནོན།]

མངོན་དུ་གྱུར་པའི་ཕྱིར་རོ། །ཞེས་དབྱེ་བ་ཕྱེ་བ་ཡིན་ནོ། །དེ་ལྟར་སྨིན་བྱེད་དབང་གིས་མཚམས་དང་དག་སྦྱོར་འདི་ཙམ་དབང་བཞི་ཁོ་ནའི་སྤྱི་དོན་རྩ་བར་བཞག་ནས་མདོ་ཙམ་སྙིང་པོར་དྲིལ་ཏེ་བརྗོད་ཀྱིས། དེ་ལས་དག་བྱ་དག་བྱེད་ཀྱི་འགྱུར་གྱི་རྣམ་པར་ཕྱེ་ནས་དབང་བསྒྱུར་ཐབས་ཀྱི་ཐེག་པའི་དབང་གིས་རྣམ་པར་དབྱེ་བ་བསམ་གྱིས་མི་ཁྱབ་པ་དང་ཚུལ་མཚུངས་པར་ས་བཅུ་དྲུག་ཏུ་སྤར་ཏེ་རྫུ་འཕྲུལ་བརྒྱ་ཐམ་པ་དང་རིག་འཛིན་བཞིའི་ས་མཚམས་སྦྱར་བ་ཐུན་མོང་གི་ཡོན་ཏན་དུ་བཤད་ནས། མཐར་ཐུག་འབྲས་བུ་མགོན་པོ་རྡོ་རྗེ་འཆང་གི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་རྫོགས་པ་ལས་བྱུང་བ་སའི་ཡོན་ཏན་གཉིས་སྟོང་སུམ་བརྒྱ་དྲུག་ཅུ་ཐམ་པ། ཡེ་ཤེས་ཀྱི་དབྱེ་བ་དྲུག་བརྒྱ་དྲུག་ཅུ། ཆོས་ཀྱི་རྣམ་གྲངས་སུམ་སྟོང་བརྒྱ་དང་ཉི་ཤུ་ལ་སོགས་པའི་རྣམ་དབྱེ་དང་དབྱེ་བསྡུ་ནི་ཐེག་པའི་མཆོག་རིན་པོ་ཆེའི་མཛོད་ཀྱི་རིམ་ཁང་དྲུག་པ་ལ་དཔྱད་པར་བྱ་ཞིང༌། འདི་ཙམ་ཞིག་གིས་རྡོ་རྗེ་ཐེག་པའི་བསྟན་པ་ཐོ་ཅོ་འུད་སྐད་ཙམ་གྱི་ནུབ་རིའི་མལ་དུ་གཟིམས་པའི་སྐབས་འདིའི་གཏི་མུག་ཅན་དག་གཉིད་ལས་སློང་བའི་རྐྱེན་ཙམ་དུ་གྱུར་ན་ཅི་མ་རུང་སྙམ་ནས་ཟློས་པའོ། །འོ་ན་དེ་ལྟར་དབང་བསྐུར་བ་ཙམ་གྱིས་ས་ལམ་གྱི་ཡོན་ཏན་དེ་དག་མངོན་དུ་འགྱུར་རམ་ཞེ་ན་དེ་ནི་མ་ལགས་ཏེ། འགྲོ་བའི་ཁམས་ལ་རྡོ་རྗེ་བཞིའི་རིགས་གནས་པ་དབང་བཞིའི་ནུས་


JLAZ012_Page_0422
[མ་དཔེ་གཟིགས་ན་འདིར་གནོན།]

པས་སད་པར་བྱེད་པའི་ཕྱིར་དུ་སྟེ། དེ་ཡང་དབང་རྣོན་མཆོག་གི་གདུལ་བྱ་དགའ་རབ་རྡོ་རྗེ་དང༌། རང་བྱུང་པདྨ་ཨིནྡྲ་བྷཱུ་ཏི་ལ་སོགས་པ་ནི་དཀྱིལ་འཁོར་གྱི་བདག་པོ་ཉིད་ཐུན་མོང་གདུལ་བྱའི་སྣང་ངོར་ལམ་ལ་འཇུག་པའི་ཚུལ་བསྟན་པ་ཙམ་ཡིན་ཕྱིར་རང་བྱུང་ཐོས་གྲོལ་དུ་གྱུར་ཀྱང༌། གང་ཟག་རིམ་གྱིས་པ་ལ་ནི་དེ་ལྟའི་རིག་པ་མི་འགྲོ་སྟེ། དེའི་ཕྱིར་སྐབས་འདིར་ཡང་གྲོལ་བ་དོན་དུ་གཉེར་བ་ཞིག་ཡིན་ཕྱིན་ཆད། དབང་ནོད་པའི་ལམ་སྟོན་གྱི་བླ་མ་དེ་ཡང་གཙོ་བོར་རང་རིག་ཡེ་ཤེས་ཀྱི་དགོངས་པ་ཚད་དུ་ཕྱིན་པའི་གྲུབ་ཐོབ་ཅིག་དང༌། གདུལ་བྱ་སློབ་མའི་རང་བཞིན་ཡང་བསྐལ་པ་མང་པོ་ནས་ཚོགས་བསགས་པའི་བསོད་ནམས་ཀྱི་རྒྱབ་འཁྱོར་བའི་གང་ཟག་མོས་གུས་ཅན་ཞིག་འཛོམ་པ་ཁོ་ན་ཁག་ཆེ་ལ། དེ་ལྟ་བུའི་བླ་སློབ་ཀྱི་རྟེན་འབྲེལ་འཛོམ་ན་བླ་མས་དགོངས་པ་གཏད་པ་ཙམ་གྱིས་གྲོལ་བ་ཡང་སྲིད་དེ། དགའ་རབ་རྡོ་རྗེས་འཇམ་དཔལ་བཤེས་གཉེན་ལ་བརྡ་བསྟན་པ་ཙམ་གྱིས་སྡེ་གསུམ་ཀློང་དགུའི་མན་ངག་ཐུགས་ལ་ཆུད་དེ་རྟོགས་གྲོལ་དུས་མཉམ་དུ་གྱུར་པ་དང༌། ཏེ་ལོས་ནཱ་རོའི་དབུ་ལ་མཆིལ་ལྷྭམ་བརྡབ་པས་གྲོལ་བ་ཐོབ་པའི་ལོ་རྒྱུས་ལྟ་བུ་སྟེ། དེ་ལྟ་མ་ཡིན་ཡང་རྐྱེན་མོས་གུས་ཀྱིས་བྱས་ཏེ་རིམ་གྱིས་གྲོལ་བ་ཐོབ་ནས་ཚེ་གཅིག་ལ་སོགས་པར་སངས་རྒྱ་བར་ནུས་ལ།


JLAZ012_Page_0423
[མ་དཔེ་གཟིགས་ན་འདིར་གནོན།]

གལ་ཏེ་དེ་ལྟ་བུའི་བླ་སློབ་ཀྱི་རྟེན་འབྲེལ་འཛོམ་པ་ཞིག་མ་བྱུང་ན་མི་ག་གེ་མོ་དང༌། དུད་འགྲོ་ཆེ་གེ་མོའི་སྐྱེ་སྤྲུལ་གྱི་སྟོང་སྒྲ་ལ་སོགས་པའི་རིག་འཛིན་གྱི་ཞལ་ཚབ། བསྟན་པའི་སྲོག་ཤིང་ལ་སོགས་པའི་མཚན་སྙན་པོའམ། སྡེ་སྣོད་དང་རྒྱུད་སྡེའི་གསན་རྒྱ་དཔག་ཏུ་མེད་པ་ལ་སོགས་པའི་སྐུ་བསོད་ཅན་ལ་བཅར་ཏེ། དཀྱིལ་འཁོར་ཕྱར་བའི་རྒྱ་ཁྱོན་ལ་འགྲན་བཟོད་པ་ཙམ་བཞེངས། བྷ་ལིང་རི་རབ་ལྟར་སྤུངས། རིན་ཐང་ཅན་གྱི་དབང་རྫས་དང་བཅས་ཏེ་བུམ་པས་མོག་མོག་མཛད་པ་དང༌། མདུད་རྩིས་སྒྲུབ་ཁང་ཁེངས་པ་ཙམ་བྱིན་ཡང་ཡེ་ཤེས་འཕོ་བྱ་འཕོ་བྱེད་ཀྱིས་གདོད་ནས་སྟོངས་པའི་ཕྱིར་སློབ་མའི་ཤེས་རྒྱུད་ལ་ནུས་པ་འཇོག་རྒྱུ་མེད་པས་ཉོན་མོངས་པ་ཁ་བྲི་བ་ཙམ་ཡང་མི་སྲིད་ལ། འོན་ཀྱང་ཐོབ་ཐོབ་དང་ཞུས་ཞུས་ཀྱི་ཡི་གེ་བསགས་པ་ལ་ནི་ཕན་ལོས་ཐོགས། ཀྱེེ་མ་བསྟན་པའི་ཉི་མ་ཆུ་ལྷའི་མགྲོན་དུ་ཕྱོགས་པ་དེས། །འགྲོ་མགྱོགས་ཤུགས་འཆང་རྐང་ཕྲན་བཞོན་པའི་ཁྲི་ཡི་སྟེང༌། །སྣ་ཚོགས་ཝསྟྲའི་གཟི་བརྗིད་ཆེན་པོས་ཉེར་བཀླུབས་ཤིང༌། །སྲིད་པའི་ཕུན་ཚོགས་ཕྲག་པའི་རྒྱན་དུ་ཡོངས་བཟུང་ནས། །ཤུགས་འགྲོའི་ཁལ་གྱིས་མདུན་ནས་བསུ་བའི་སྟོབས་ལྡན་འགས། །སྲིད་པའི་མྱོས་མས་ཡོངས་སུ་བཏང་ལ་གསང་རྒྱུད་ཆེའི། །ཟག་མེད་བློ་ལྡན་དུག་པོའི་མལ་དུ་


JLAZ012_Page_0424
[མ་དཔེ་གཟིགས་ན་འདིར་གནོན།]

མནལ་རྣམས་ཀྱིས། །སྨིན་གྲོལ་ལམ་དེར་གོམ་པ་འདེགས་ལ་ག་ཞར་བྱེད། །ཤེས་བྱ་སྤྲོས་མེད་དངོས་པོར་མི་སྣང་བས། །གྱི་ནའི་རྒྱུད་ཚོད་དཔག་པར་ནུས་མིན་ཡང༌། །ཁྱོད་འདྲས་གཞན་དོན་བྱ་བ་མི་རིགས་ཞེས། །ལུང་རྟོགས་ཡོན་ཏན་དབུ་མར་གཟིམས་སུ་བཅུག །དེ་ལྟ་ན་ཡང་ཆོས་ཉིད་བདེན་པ་དང༌། །ཚོགས་ཞིང་དུས་བབ་རྟེན་འབྲེལ་ཉི་མའི་འོད། །སུས་ཀྱང་དགག་པའི་ཡུལ་དུ་མ་གྱུར་པས།། སྦས་པའི་རྣལ་འབྱོར་རྣམས་ཚོ་ཐུགས་ངལ་བསྐྱུངས། །ཞེས་བར་སྐབས་ཀྱི་གཏམ་དུ་བྱས་ནས་མི་སྲུན་པའི་ལུང་བསྟན་དུས་ལ་བབས་པར་བག་ཟོན་དུ་གདམས་པ་ནི། ཨོ་རྒྱན་ཆེན་པོས། མ་ཧཱ་ཡོ་ག་ཉམས་པའི་རྟགས། །གསང་སྔགས་ཨ་ནུ་ཡོ་ག་དང༌། །ཨ་ཏིའི་ལྷ་དང་དཀྱིལ་འཁོར་རྣམས། །སྲང་མདོར་བཞེངས་པའི་དུས་བྱུང་ནས། །ཨ་ནུའི་བསྟན་པ་ཉམས་རྟགས་སུ། །རྩ་རླུང་ཐིག་ལེ་གསང་བའི་ཆོས། །སྲང་མདོར་སྟོན་ཅིང་ཐོ་ཅོ་དང༌། །དྲོད་མེད་རུས་རྒྱན་ཁ་ཊྭཱུཾ་འཆང༌། །ངོ་མཚར་ཆེ་བར་གུས་བྱེད་ཅིང༌། །ཁྲོམ་ལ་དབང་བསྐུར་བྱེད་པ་འབྱུང༌། །ཨ་ཏིའི་བསྟན་པ་ཉམས་རྟགས་སུ།།ཁ་ལྟ་སྟོང་སྐད་རྦད་ཁམ་ཆེ། །དགེ་མེད་སྡིག་མེད་ཡིན་ཞེས་གླིང༌། །ཁྲིམས་སྤངས་ཐ་མལ་སྤྱོད་པ་སྐྱོང༌། །ཚོགས་འཁོར་ཡིན་ཞེས་སྲོག་ཆགས་གསོད། །སྒོམ་སྒྲུབ་དོར་


JLAZ012_Page_0425
[མ་དཔེ་གཟིགས་ན་འདིར་གནོན།]

ནས་སྲང་མདོར་འཁྱབ། །ཞེས་པ་རྣམས་ཇི་བཞིན་པ་མངོན་དུ་གྱུར་ཅིང༌། ཁྱད་པར་གསང་སྔགས་ཁྲོམ་དབང་དུ་བྱེད་པས་དངོས་གྲུབ་འཇིག་པའི་སྐབས་སུ་བཤད་སྲོལ་འདི་དག་ལ་ལས་སྒོ་ཡོད་པ་མ་ལགས་སྙམ་ནས་སྙིང་ལས་ཆེན་པོར་གྱུར་པ་ལགས། འོ་ན་དབང་ཐོབ་པའི་ཚད་གང་གིས་བྱེད་ཅེས་པ་ནི། གཏེར་ལུང་ལས། ཆོས་སྐུ་ཀུན་ཏུ་བཟང་པོ་ལ། །བླ་མ་བྱ་བ་ཡོད་མ་ཡིན། །དབང་ཆོས་བཤད་བྱེད་མཁན་པོ་མེད། །རང་སེམས་ཆོས་སྐུར་རྟོགས་ཙ་ན། །དུས་གསུམ་རྒྱལ་བའི་དབང་ལུང་ཐོབ། །བརྒྱུད་པ་འཛིན་པ་རྣམ་རྟོག་ཡིན། །ཞེས་གསུངས་པས་དེ་ཉིད་དབང་ཐོབ་པའི་ཚད་དུ་ཁོ་བོ་འདོད་པ་ལགས་པས་རྒྱས་སྤྲོས་མི་འཚལ་ལོ། །དེ་ལྟར་སྨིན་བྱེད་ཀྱི་དབང་ཟབ་མོས་རྒྱུད་སྦྱངས་ཏེ་གྲོལ་ལམ་དངོས་ཀྱི་སྐབས་དོན་ལ། ཕར་ཕྱིན་གྱི་ཚོགས་ལམ་དང་འགྱུར་རྩི་བའི་སྔོན་འགྲོ་ཕྱི་ནང་གསང་གསུམ་ནས་བརྩམས་ཏེ། ལས་དང་པོ་པའི་འཁྲིད་ཚུལ་ནི་ཁྲིད་ཡིག་དང༌། བླ་མའི་མན་ངག་གིས་འཆད་པ་ཡིན་ཕྱིར་འདིར་བརྗོད་བྱའི་སྐབས་མ་ཡིན་ལ། དེ་ལས་ཉམས་སྐྱེ་ཚུལ་དང་ས་ལམ་ལྟོ་སྦྱར་བའི་ཚུལ་ནི། རང་ལུགས་རྫོགས་པ་ཆེན་པོའི་རྒྱུད་སྡེ་ནམ་མཁའི་སྐར་ཚོགས་ལྟ་བུ་ནས་སེམས་ཀློང་མན་ངག་སྡེ་སོ་སོའི་ངེས་པས་ཟབ་ཁྱད་བཤད་པ་ཙམ་ལས་སྙིང་ཐིག་པས་གནས་ལུགས་ཡེ་


JLAZ012_Page_0426
[མ་དཔེ་གཟིགས་ན་འདིར་གནོན།]

གྲོལ་དུ་འཆད་ཅིང་རྒྱུ་འབྲས་ལས་འདས་པར་སྟོན་པ་སྟེ། དེ་ཡང་རྒྱུད་ཀློང་གསལ་ལས། བདེན་པ་མཐོང་བའི་གང་ཟག་གིས། །དང་པོའི་ས་ནས་བཅུ་དྲུག་བར། །རིམ་པས་ཉམས་སུ་བླངས་པས་འབྱུང༌། །གཞན་དང་སྒོ་བསྟུན་གནས་སྐབས་ཀྱི། །ཡོན་ཏན་འབྲས་བུ་ཐོབ་ཚུལ་ལོ། །ཞེས་གསུངས་པ་ལྟར་ཕར་ཕྱིན་དང་སྒོ་བསྟུན་ནས་ས་ལམ་རིམ་གྱིས་འགྱུར་བ་རྩི་ཚུལ་ནི་རིག་པ་རང་ཤར་གྱི་རྒྱུད་དོན་ཇི་ལྟ་བ་ཁོ་བོས་མཁྱེན་བརྩེའི་མེ་ལོང་གི་གཞི་ལམ་འབྲས་བུའི་སྐབས་སུ་བཤད་པ་ལྟར་ཡིན་ལ། དེ་ལས་གཞན་པའི་ས་ལམ་རིམ་གྱིས་སུ་ཕར་ཕྱིན་ལྟར་རྩི་བའི་སྲོལ་མེད་དེ་ཀུན་བྱེད་ལས། ལྟ་བ་སྒོམ་མེད་དམ་ཚིག་བསྲུང་དུ་མེད།། ས་ལ་སྦྱང་མེད་ལམ་ལ་བགྲོད་དུ་མེད། །ཕྲིན་ལས་རྩལ་མེད་དབང་ལ་བསྐུར་དུ་མེད། །སྒོ་གསུམ་རྩོལ་མེད་དཀྱིལ་འཁོར་བསྐྱེད་དུ་མེད། །རྒྱུ་འབྲས་གཉིས་མེད་ནམ་མཁའ་ལྟ་བུའོ། །ཞེས་གསུངས་ལ། འདིར་བློ་ཆུང་བ་དག་ཁམས་ཀྱི་དྲི་མ་བླང་དོར་གྱིས་སྦྱང་དུ་མེད་པར་ཡེ་བཞག་ཁོ་ན་ཡིན་ན་ཐ་མལ་པ་དང་ཁྱད་པར་མེད་དམ་སྙམ་ན་མ་ཡིན་ཏེ། རང་བཞིན་རྫོགས་པ་ཆེན་པོའི་ཡེ་ཤེས་ནི་སངས་རྒྱས་ཀྱི་ཆེ་བའི་ཡོན་ཏན་ལྷུན་གྲུབ་ཏུ་ཡོད་ཅིང༌། སྐུ་གསུམ་རང་ཆས་སུ་ཚང་བའི་ཕྱིར་རྟ་བབས་ནས་མགྲིན་བཟང་ཞོན་པ་ལྟར་ཡིན་བཞིན་པ་སྤངས་ནས་མ་


JLAZ012_Page_0427
[མ་དཔེ་གཟིགས་ན་འདིར་གནོན།]

ཡིན་པ་ལོགས་ནས་བཙལ་མི་དགོས་ཏེ། མ་བཅོས་རང་བྱུང་གི་གནས་ལུགས་ཇི་བཞིན་པའི་ངང་ལས་མ་གཡོས་པས་འགྲུབ་པར་བསྟན་ཏེ། རྒྱུད་དེ་ཉིད་ལས། སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟ་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་སེམས་ཏེ། །མ་བཅོས་ཇི་བཞིན་རྟོགས་གྱུར་པས། །ད་ལྟར་འགྲོ་བའི་དོན་ཡང་མཛད། །སླད་ནས་འབྱོན་པའི་སངས་རྒྱས་རྣམས། །རང་སེམས་བྱང་ཆུབ་སེམས་ཉིད་འདི། །སྔ་མ་བཅོས་པར་ལུང་མ་བསྟན།།ད་ལྟ་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཅེས་གསུངས་པ་ལྟར་སྤྲོས་བྲལ་རང་བྱུང་གི་ཡེ་ཤེས་རྒྱ་ཆད་དང་ཕྱོགས་ལྷུང་མེད་པ་ལ་བཟོ་མི་འཆོས་པས་བྱ་རྩོལ་དང་བྲལ་བའི་ངང་དུ་སངས་རྒྱས་ལག་པའི་མཐིལ་དུ་ཟིན་པའི་ཕྱིར་ཐེག་པ་མཐའ་དག་གི་རྩེ་མོར་གྱུར་པ་སྟེ། རང་བཞིན་རྒྱས་པ་ནི་ཀུན་མཁྱེན་ཀློང་ཆེན་པའི་བཀའ་འབུམ་རྒྱ་མཚོ་ལྟ་བུ་དང༌། ཀཿཐོག་ཤཱཀྱ་རྡོ་རྗེ། མངའ་རིས་རིག་འཛིན་པཎ་ཆེན། ཆེན་པོ་སོགས་ཀྱི་ཡིག་ཆ་ཇི་སྙེད་ཡོད་པས་བདག་ཅག་སེམས་ཁྲལ་བསྐྱུངས་ཏེ་ཉལ་ནས་འདུག་པ་གཅིག་པུས་ཆོག་པ་ལགས་སོ། །དེ་ལྟ་ནའང་ཁྱོད་ཀྱིས་དྲིས་པའི་དོན་ཅུང་ཟད་གང་ཟག་རིམ་གྱིས་པའི་


JLAZ012_Page_0428
[མ་དཔེ་གཟིགས་ན་འདིར་གནོན།]

སླད་དུ་བརྗོད་པ་ལ། རྩེ་གཅིག་སྤྲོས་བྲལ་རོ་གཅིག་སྒོམ་མེད་ལ་སོགས་པའི་རྣམ་གཞག་གཙོ་བོར་ཕྱག་རྒྱ་ཆེན་པོའི་ཕྱོགས་ལ་གྲགས་ཆེ་བར་འདུག་པས་མི་ལའི་མགུར་ནའང་གསལ་ཞིང༌། ཨོ་རྒྱན་ཆེན་པོ་གྲུབ་པའི་རིག་འཛིན་གྱི་བརྫུ་ལ་ཞུགས་པ་ཆོས་རྒྱལ་དྭགས་པོ་ལྷ་རྗེས་སྲོལ་གཏོད་པར་གྲགས་པའི་རྣལ་འབྱོར་བཞི་རིམ་འདི་བཞིན་ར་ལི་བསམ་གྱིས་མི་ཁྱབ་པའི་རྒྱུད་རྩ་བར་བཞག་སྟེ་དོན་གྱིས་ཐོབ་པར་དགོངས་ནས་ས་ལམ་གྱི་དོད་པོ་རྩིས་ནས་གསུངས་པ་ལ་སྔ་རབས་པ་ཁ་ཅིག་གིས་གཞུང་བརྟག་བྱས་ཀྱང༌། བཤད་མ་ཐག་པ་ལྟར་ར་ལིའི་རྒྱུད་ཀྱི་ཁུངས་སྟོན་རྒྱུ་ཡོད་ཅིང༌། ཇོ་བོ་རྗེས་ཀྱང་ཉེ་གནས་དགོན་པ་བར་ལྷན་ཅིག་སྐྱེས་སྦྱོར་གསུངས་དུས་སྦྱོར་བཞིའི་བཤད་པ་བདེ་མཆོག་གི་རྒྱུད་ནས་ལུང་དྲངས་ཏེ་བཤད་པར་མངོན་པས་བརྒལ་བ་བྱེད་པ་མུན་སྤྲུལ་དུ་ངེས་ལ། རྒྱུད་འདི་ཡང་དག་པ་མ་ཡིན་པར་བཞེད་པ་ནི་ཕྱོགས་སུ་ལྷུང་བ་ཙམ་མོ། །དེའི་ཕྱིར་ཡང་དགོན་པ། ཕ་ཝང་ཁ་པ་སོགས་ཀྱིས་ཀྱང་རྒྱ་ཆེར་ལྟོ་སྦྱར་ནས་བཤད་ཅིང༌། རང་ཅག་ཀྱང་རོང་པ་རྫོགས་ཆེན་པས་ཇི་སྐད་དུ་གསུངས་པ་བཞིན། ཨོ་རྒྱན་གྱི་རིག་འཛིན་ཤྲཱི་སིདྷ་ལ་ཞུས་པ་དང༌། འཚོ་རྒྱལ་གྱིས་ཉམས་མྱོང་དུའང་ཆ་འདྲ་གསལ་ཞིང༌། མཁས་མཆོག་སོགས་བཟློག་


JLAZ012_Page_0429
[མ་དཔེ་གཟིགས་ན་འདིར་གནོན།]

པས་ཀྱང་སེམས་སྡེའི་ཉམས་རིམ་དང་སྦྱར་ནས་བཤད་ལ་ཁྱད་པར་ཐུགས་གཏེར་ཆེན་པོ་རྩོད་པ་དང་བྲལ་བ་གྲོལ་ཐིག་དགོངས་པ་རང་གྲོལ་ལས་རྣལ་འབྱོར་བཞིའི་མིང་མ་བཏགས་པ་ཙམ་ལས་ཕར་ཕྱིན་གྱི་ལམ་ལྔའི་འགྲོས་དང་བསྟུན་ནས་བཤད་ཚུལ་ཁྱད་དུ་འཕགས་པ་གསུངས་པས་གང་ཟག་རིམ་གྱིས་པའི་དོན་དུ་དཔྱད་པའི་མན་ངག་འདི་ཁོ་ནའི་དགོངས་པ་ལྟར་བཤད་པར་བྱའོ། །འོ་ན་རྫོགས་པ་ཆེན་པོ་རྒྱུད་ལས་ཡེ་གྲོལ་ཡིན་པར་འཆད་ན་ཁྱེད་ཀྱིས་འདིར་རིམ་ཅན་དུ་བཤད་པས་འགལ་བ་ཅན་དུ་འགྱུར་རོ་སྙམ་ནའང་མ་ཡིན་ཏེ། སྟོན་པ་རྡོ་རྗེ་འཆང་ཐབས་ལ་མཁས་པས་ཉན་ཐོས་ཐེག་པ་ནས་ཨ་ཏི་ཡོ་གའི་བར་ལ་རིམ་པ་དགུར་དབྱེ་བའི་དབང་པོ་རབ་འབྲིང་ཐ་གསུམ་ལའང་ནང་གསེས་ཀྱིས་ཕྱེ་ནས་བཤད་པའི་ཕྱིར་རོ། །དེས་ན་རྫོགས་པ་ཆེན་པོ་ནི་དབང་པོ་ཤིན་ཏུ་རྣོན་པོའི་ལམ་ཡིན་ཀྱང་འཇུག་པ་པོའི་གང་ཟག་ཐམས་ཅད་དབང་པོ་ཤིན་ཏུ་རྣོན་པོ་ཤ་སྟག་ཡིན་པས་མ་ཁྱབ་སྟེ། དེ་ལ་དགོངས་ནས་རིག་འཛིན་རྣམས་ཀྱི་དབང་པོ་འབྲིང་དམན་གྱི་ཁྱད་པར་ལ་དཔགས་ནས་སྲོལ་འདི་ལྟ་བུའང་བཏོད་པ་སྟེ། ཚུལ་འདི་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཐབས་མཁས་ཤིང་ཐུགས་རྗེ་ཆེ་བའི་འཕྲིན་ལས་ཡིན་པར་བལྟའོ། །ཞེས་བསྒྲུབ་དང་སུན་འབྱིན་གྱི་ཉི་མས་ལོག་སྨྲའི་མུན་པ་


JLAZ012_Page_0430
[མ་དཔེ་གཟིགས་ན་འདིར་གནོན།]

ཡོངས་སུ་བསལ་ནས་བརྗོད་བྱའི་དོན་དངོས་ལ། དང་པོ་ཕར་ཕྱིན་གྱི་སྦྱོར་ལམ་དང་མཚུངས་པར་སྟོན་པ་འཇིག་རྟེན་གྱི་རྣལ་འབྱོར་ལ་ནང་གསེས་ཆེ་འབྲིང་ཆུང་གསུམ་ལས་དང་པོ་འཇིག་རྟེན་ཆུང་ངུའི་རྣལ་འབྱོར་ནི། ཐུགས་གཏེར་ཆེན་པོ་གྲོལ་བའི་ཐིག་ལེ་ལས། །ངོ་བོ་ངོས་བཟུང་མེད་པ་སྟོང་པའི་རང་བཞིན་ལ། །རང་བཞིན་མ་འགགས་ས་ལེ་སིང་ངེ་རྗེན་ནེ་བ། །འཇིག་རྟེན་ཆུང་ངུའི་རྣལ་འབྱོར་ཞེས་བྱ་དེ་ཉིད་ཡིན། །ཞེས་པ་དེའི་དགོངས་པ་ཉམས་མྱོང་གིས་བཀྲལ་བ་ན། རིམ་གྱིས་པའི་གང་ཟག་དེས་བླ་མ་དམ་པ་ཞིག་གི་དྲུང་དུ་རྣམ་གཡེང་སྤངས་ཏེ་བསྒོམས་པས་སེམས་ཀྱི་ངོ་བོ་ཡོད་མེད་མུ་བཞི་དང་བྲལ་བར་ཐག་ཆོད་ཅིང༌། དེ་ལྟར་ཆོད་པས་གསལ་ལ་རྟོག་པ་མེད་པའི་ཞི་གནས་དེ་ཉིད་བསྒོམ་བྱའི་རང་བཞིན་དུ་ངོ་སྤྲད་ལག་བཅང་མཛད་པ་ལ་དྲན་པ་གཞུར་ཏེ་བསྒོམས་པས་རྣམ་རྟོག་འདི་ཉི་ཟེར་གྱི་སྦྲང་བུ་བས་ཀྱང་བྱ་བྱེད་མང་ལ་འགྱུར་ལྡོག་ཆེ་བས་སྒོམ་གྱི་ལས་འཕྲོ་མེད་དམ་སྙམ་སྐྱུགས་ལོག་པ་ཞིག་གི་རྗེས་སུ་ཇི་ཞིག་ན་དྲན་པའི་ངོ་བོ་གསལ་ལ་གོ་མ་འགགས་པ། དྭངས་སིང་ངེ་བ་རྗེན་ཡེ་རེ་བ་ལས་སྟོང་པའི་ཉམས་ཤུགས་ཆེ་བ་ཞིག་འཆར་བ་དེ་ཉིད་ཇི་ཙམ་སྒོམ་རིང་ལ་ཡོད། མ་བསྒོམ་ན་ཐ་མལ་དུ་འཆོར་བ་ཞིག་འབྱུང་བ་སྟེ། འདི་ལ་མ་ཧཱ་མུ་དྲས་རྩེ་གཅིག་ཆུང་ངུར་འབོད། འགའ་


JLAZ012_Page_0431
[མ་དཔེ་གཟིགས་ན་འདིར་གནོན།]

ཞིག་གིས་ཕོ་ཚོད་བྱས་པའི་དེ་ལྟ་བུའོ་སྙམ་པ་ནི་གོ་བ་ཡིན་པས་གྲུལ་མི་བཏུབ་བོ། །གཉིས་པ་འཇིག་རྟེན་འབྲིང་པོའི་རྣལ་འབྱོར་ནི། དེ་ཉིད་ལས། གང་དེ་མ་ཡེངས་བསྐྱངས་པས་བརྟན་པ་ཆེར་ཐོབ་ཅིངཿ བསྒོམས་ཀྱང་ཡོད་ལ་མ་བསྒོམ་ཆ་ཤས་ཡོད་པ་ནིཿ འཇིག་རྟེན་འབྲིང་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་སྔ་མའི་འཕྲོ་མཐུད་དེ་སྙིང་རུས་ལ་ནན་ཏན་བསྐྱེད་པས་ཉམས་ཀྱི་འཛིན་སྟངས་སྔ་མ་ལྟར་ལས་ཅུང་ཟད་དྭངས་ཆ་ཆེ་རུ་འགྲོ་ཞིང༌། དེ་ཉིད་མ་བསྒོམ་པའི་གནས་སྐབས་འགའ་ལའང་དྲན་པས་ཧྲིག་ཧྲིག་སླེབས་ནས་གསལ་སྟོང་རྗེན་ཡེ་རེ་བར་འཆར་བས་འདི་ལ་མ་ཧཱ་མུ་དྲ་བས་རྩེ་གཅིག་འབྲིང་པོ་ཟེར་རོ། །གསུམ་པ་འཇིག་རྟེན་ཆེན་པོའི་རྣལ་འབྱོར་ནི། དེ་ཉིད་ལས། ཏིང་འཛིན་དེ་ཉིད་སྔར་བས་གསལ་མདངས་ཆེར་སོང་ཞིངཿ རྩོལ་མེད་ཉིན་མཚན་འཁོར་ཡུག་ཉིད་དུ་འབྱུང་བ་ནིཿ འཇིག་རྟེན་ཆེན་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་བརྟན་པ་ཆེར་ཐོབ་སྟེ་གསལ་སྟོང་རྗེན་པ་ངོས་བཟུང་དང་བྲལ་བའི་ཉམས་ཉིན་མཚན་ཁོར་ཡུག་ཏུ་འབྱམས་པ་ལ་མ་ཧཱ་མུ་དྲས་རྩེ་གཅིག་ཆེན་པོར་བཏགས། རྫོགས་ཆེན་སེམས་སྡེ་པས་གནས་པའི་ཉམས་ཤེས་པ་ཡུལ་ཕྱིར་མི་འཕྲོ་བ་ཞེས་པའང་འདིར་མཚུངས། འདིའི་ཉམས་ལ་ལུས་ལ་བདེ་ཉམས་དང་སེམས་ལ་དགའ་སྤྲོ་དཔག་


JLAZ012_Page_0432
[མ་དཔེ་གཟིགས་ན་འདིར་གནོན།]

མེད་འཆར། མར་མེ་རླུང་གིས་མ་བསྐྱོད་པ་ལྟ་བུའི་སྒོམ་ལ་ངེས་ཤེས་དང༌། བྲོད་ཁ་སྐྱེ། ལུས་ཡོད་དུ་མི་ཚོར། འཇིག་རྟེན་མི་ཆོས་ལ་ཞེན་པ་ཆུང་ངུ་འགྲོ། ཉམས་ཀྱི་མཐོ་དམན་ཤིན་ཏུ་ཆེ་བ་འོང་ངོ༌། །རེས་འགའ་འདི་ལས་ལྷག་པ་སུ་ལ་ཡོད་སྙམ་པའི་རང་མཐོང་སྐྱེ། རེས་ཤེས་པ་རླན་དང་བྲལ་ནས་ང་ལ་སྒོམ་མེད་སྙམ་པའི་ཡི་མུག་སྐྱེ་བའང་ཡོད། རེས་སེམས་ཅན་ལ་སྙིང་རྗེ་སྐྱེ་ཞིང་སངས་རྒྱ་རྒྱུ་དང་འཁོར་བར་འཁྱམས་རྒྱུ་མི་འདུག་སྙམ་པའི་སྟོང་འུད་ཀྱང་འཆར། གསལ་སྣང་ལ་འདུ་ཤེས་གྲུང་པོས་དཔྱད་ན་མཐོང་སྣང་མང་བ་འབྱུང་སྟེ་ཞལ་གཟིགས་ལུང་བསྟན་དུ་བཟུང་ན་ནོར་ས་རྔམ་པོ་ཆེ་ཡིན་ཏེ་བྱེད་མཁན་མང༌། འདིའི་མཉམ་གཞག་གནད་དུ་སོང་ན་སྒོ་ལྔའི་རྣམ་ཤེས་ཐད་ཀར་བག་ལ་ཞ་འགྲོ་བས་ཕྱིའི་སྒྲ་སྐད་གཟུང་ཡུལ་ལ་སོགས་པའི་ཡུལ་རྐྱེན་གྱིས་མི་འཕྲོག །འོན་ཀྱང་ཕར་ཕྱིན་ཐེག་པ་དང་བསྟུན་ན་དག་པ་ས་གསུམ་ནས་སྒོ་ལྔའི་རྣམ་ཤེས་གནས་འགྱུར་ཏེ་ཞིང་ཁམས་རྣམ་དག་ལ་དབང་ཞིང༌། དག་པའི་ཚེ་བྱ་གྲུབ་ཡེ་ཤེས་སུ་ཤར་བར་བཤད་པའི་ཕྱིར། འདི་ཉིད་དངོས་གནས་མ་ཡིན་ཀྱང་སེམས་འཛིན་ཡུལ་རྐྱེན་གྱིས་མི་འཕྲོག་པའི་ཆ་ནས་དེ་སྐད་དུ་བཏགས་པའང་ཤེས་པར་བྱའོ། །དེ་ཡང་ཚོགས་ལམ་པས་གོ། །སྦྱོར་ལམ་པས་མྱོང༌། མཐོང་ལམ་པས་རྟོགས་པ་ཞེས་གོ་མྱོང་རྟོགས་གསུམ་དུ་སྦྱོར་བ་དང་།


JLAZ012_Page_0433
[མ་དཔེ་གཟིགས་ན་འདིར་གནོན།]

བླ་མ་ཡང་ཏིག་ལས། ལྷ་མིའི་སེམས་འཛིན། བྱང་ཆུབ་སེམས་དཔའི་བསམ་གཏན། སངས་རྒྱས་ཀྱི་དགོངས་པ་ཞེས་བཤད་པ་ལའང་རྣམ་པར་དཔྱད་ན་དབྱེ་བ་ཁྱད་པར་ཅན་དུ་ཁོ་བོས་རྟོགས་ལ་དེའི་ཕྱིར་འདི་ཡན་ཆད་ནི་སོ་སྐྱེའི་ལམ་དུ་བཞག་པས་ལྷག་མཐོང་མཚན་ཉིད་པ་མེད་པའི་ཕྱིར་ཐུགས་དམ་གྱི་ངོ་བོ་ཇི་ལྟར་བཟང་ཡང་ཉམས་ཙམ་མྱོང་བ་ཙམ་ཡིན་པས་རྩ་གཟུགས་ཀྱི་རྟེན་འབྲེལ་ལ་མངོན་ཤེས་དང་གྲུབ་རྟགས་ཐོན་པ་བྱུང་ཡང་རློམ་སེམས་བྱ་བའི་ཡུལ་མ་ཡིན་མོད། དེ་ལྟ་ནའང་ཕྱི་དུས་འདིར་ལམ་འདི་མཐར་སོན་པའང་རྙེད་པར་དཀའ་ཞིང༌། སྙིང་རུས་ཅན་རེ་རེ་ཙམ་སྣང་བ་ལའང་བཤེས་གཉེན་རྣམས་ཀྱིས་རྟོགས་པ་ཉིན་མཚན་འདྲེས་པར་ངོ་སྤྲོད་བྱེད་པ་འདུག་པས་ལོང་བས་ལོང་བ་ཁྲིད་དེ་སྒོམ་དམིགས་གཏད་ཉམས་མྱོང་ཅན་སྟོང་པ་དགྲར་ལངས་ཀྱི་བདུད་ཞུགས་པ་ཞིག་ལ་མི་ཚེ་སྟོང་པར་འཛད་པ་ལས་ཡོན་ཏན་སྐྱེ་བའི་རེ་བ་ཟད་མོད། འགའ་ཞིག་ནི་མཉམ་གཞག་གནད་དུ་མ་སོང་བ་ཅི་ཡིན་འདི་ཡིན་མེད་པའི་ལུང་མ་བསྟན་ཐོམ་ཡོ་རེ་བ་ཞིག་གི་ངོ་བོ་སྨྲ་བརྗོད་མི་ཤེས་པ་ལྟ་བུ་ཞིག་ལ་ང་འདྲའི་རྟོགས་པ་སུ་ལ་ཡོད། སྒོམ་མེད་བྱ་བའང་འདི་ཁ་ཡིན་སྙམ་པའི་རང་རྩིས་སྐྱེས་ཏེ་ཡུལ་གོང་མ་ལ་དག་སྣང་གཏན་ནས་མི་སྐྱེ་ཞིང་བོགས་འདོན་བྱེད་པའི་བློ་དང་བྲལ་བས་ནོར་ས་རྔམ་པོ་ཆེར་སོང་སྟེ་རྒྱུ་འབྲས་རྟེན་འབྲེལ་མི་བསླུ་བའི་བསྟན་པ་ཐམས་ཅད་བསྣུབས་པས།


JLAZ012_Page_0434
[མ་དཔེ་གཟིགས་ན་འདིར་གནོན།]

དགེ་སྟོང་སྡིག་སྟོང་དུ་གོལ་བ་འབའ་ཞིག་ལས་མི་འདའ་བས་ཚུལ་དེ་ལ་བསམ་ནས་ཨོ་རྒྱན་ཆེན་པོས་རྒྱལ་པོ་ལ་གདམས་པ་བཞིན་ལྟ་བའི་ཕྱོགས་སུ་སྤྱོད་པ་མ་ཤོར་བ་དང༌། སྤྱོད་པའི་ཕྱོགས་སུ་ལྟ་བ་མ་ཤོར་བ་ལ་བསླབ་ཅིང་ཉམས་མྱོང་དང་ལྡན་པའི་བླ་མ་དམ་པ་མིག་བཞིན་དུ་བརྟེན་ལ། གསོལ་འདེབས་མོས་གུས་དང་ལྡན་པས་དབང་བཞི་ཡང་ཡང་བླང༌། ལྕགས་ལ་ཞུན་ཐར་གཏོང་བ་ལྟར་བརྡར་ཤ་ཤིན་ཏུ་ཆོད་པ་གལ་ཆེ་བ་ཡིན་ནོ། །འདིར་ཕར་ཕྱིན་ཐེག་པ་ལྟར་ན་དྲོད་རྩེ་གཉིས་སུ་དབང་པོ་ལྔ་དང༌། བཟོད་ཆོས་གཉིས་སུ་སྟོབས་ལྔ་སྒོམ་པའི་སྦྱོར་ལམ་ངེས་འབྱེད་ཆ་བཞིའི་ཡེ་ཤེས་ཀྱི་ངོ་བོ་མཉམ་གཞག་གི་ཆ་རྣམ་པར་མི་རྟོག་པའི་ཡེ་ཤེས་ལ་རྗེས་ཐོབ་ཀྱི་ཆ་རྟོག་བཅས་རྟོག་མེད་ཅི་རིགས་སུ་ཡོད་ཅིང་གཉེན་པོ་བཞི་ལ་བརྟེན་ནས་སྤང་བྱ་སྒྲིབ་པའི་ས་བོན་ཉམས་སྨད་པས་རྟོགས་པའི་ཁྱད་པར་སྒོམ་བྱུང་ཡེ་ཤེས་ཀྱི་བདག་མེད་གཉིས་རྟོགས་ཏེ། ཡོན་ཏན་གྱི་ཁྱད་པར་སྤྱན་དང་མངོན་ཤེས་སོགས་དུ་མ་དང་ལྡན་ཞིང༌། ཚོགས་ལམ་ཆེན་པོ་ལས་འདིའི་ཡེ་ཤེས་དྲོད་བརྟན་པས་མཐོང་ལམ་ཐག་ཉེ་བ་སྟེ། བརྒྱད་སྟོང་འགྲེལ་ཆེན་ལས། བར་ཆད་མེད་ན་མཐོང་བའི་ལམ་ཆེས་ཉེ་བར་འབྱུང་བ་ཞེས་བྱ་བ་ནི་ཐར་པའི་ཆ་དང་མཐུན་པ་ལས་འདིའི་ཁྱད་ཡིན་པར་རིག་པར་བྱའོ། །ཞེས་གསུངས་པ་སྟེ། དེ་ལྟ་བུའི་སྦྱོར་


JLAZ012_Page_0435
[མ་དཔེ་གཟིགས་ན་འདིར་གནོན།]

ལམ་གྱི་འགྱུར་འདི་རུ་བརྩི་བ་ཡིན་ནོ། །གཉིས་པ་ཕར་ཕྱིན་གྱི་མཐོང་ལམ་དང་མཚུངས་པར་སྟོན་པས་མིང་དེ་སྐད་དུ་བཏགས་པ་མཐོང་ལམ་གྱི་རྣལ་འབྱོར་ཆེ་འབྲིང་ཆུང་གསུམ་ལས། དང་པོ་ཆུང་ངུའི་རྣལ་འབྱོར་ནི། དེ་ཉིད་ལས། མཁན་པོ་ཉིད་དང་གནས་ཉམས་དེ་དག་ཡུལ་ཕུད་ནསཿ སེམས་མེད་སྟོང་པ་དྲི་མེད་མཁའ་ལྟར་རྟོགས་པ་ནིཿ མཐོང་ལམ་ཆུང་ངུའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་སྔར་གྱི་རྩེ་གཅིག་གི་རྣལ་འབྱོར་དེ་ཟབ་ཟབ་དང་གོ་བ་སྐམ་པོ་ལ་མ་ལུས་པར་རིག་པ་ལ་ངར་ཆ་བཏགས་ཏེ་སྒོམ་པས་གནད་དུ་སོང་ན། རང་གི་མོས་གུས་དང་བླ་མའི་རྣལ་འབྱོར་གྱི་ནུས་པས་ཆན་ལ་ཕབས་བཏབ་པ་ལྟ་བུའམ་གུ་ཡངས་ལྟོ་འཚོལ་གྱི་སླད་དུ་མ་ཡིན་པར་སྐབས་འདིར་སྙིང་ཐག་པ་ནས་སེང་གེ་རི་སུལ་འགྲིམ་པ་ལྟར་དུར་ཁྲོད་ཉུལ་བའི་གཅོད་ཡུལ་ཟབ་མོའི་ལྷོངས་འཚུབས་འཇིགས་སྐྲག་ལ་སོགས་པ་དེ་མ་ཐག་པའི་རྐྱེན་གྱིས་སྔར་གཉེན་པོས་སོས་གཅུན་པའི་སྒོམ་གསལ་སྟོང་ཙམ་དུ་ཁས་ལེན་དང་དམིགས་གཏད་ཡོད་པའི། བདེ་བདེ་མོ་སྤྲོ་སྤྲོ་མོ་སྒོམ་བྱེད་ཀྱི་མཁན་པོ་དང་ཞི་གནས་ཀྱི་མྱོང་བ་སྦྲང་མ་རྩི་ལ་འབྱར་བ་ལྟ་བུ་དེ་གཏད་ཡལ་སོང་ནས་ཤེས་པའི་ངོ་བོ་གསལ་ལ་རྟོག་མེད་ཀྱི་ངང་དུ་འཁོར་འདས་ཀྱི་ཆོས་ཐམས་ཅད་རང་སར་དག །ཡོད་མེད་རྟག་ཆད་ལ་སོགས་པའི་ཁས་ལེན་དང་


JLAZ012_Page_0436
[མ་དཔེ་གཟིགས་ན་འདིར་གནོན།]

བྲལ་བ་ནམ་མཁའི་དཀྱིལ་ལྟ་བུ་ཞིག་འཆར་བ་དེ་ལ་མ་ཧཱ་མུ་དྲས་སྤྲོས་བྲལ་ཆུང་ངུར་བཏགས། འདིའི་ཚེ་ཐོས་པ་ཉུང་བ་དང་བླ་མ་དམ་པས་མ་ཟིན་པ་རྣམས་སྔར་གྱི་བདེ་གསལ་མི་རྟོག་པའི་ཉམས་དེ་ཡལ་བས་ང་ཡི་སྒོམ་བོར་བའམ་སྙམ་ནས་ཙབ་ཙུབ་བློ་མང་ཅི་ཡང་དྲན་ཞིང་ཡི་མུག་སྐྱེ་བའང་འདུག་གོ། །རློམ་པ་ཆེ་བ་དག་སྒོམ་མེད་དམ་དེ་འདི་ཁ་ཡིན་སྙམ་ནས་འགྲོ་དོན་ལ་རིངས་ནས་གཡེང་བས་ཁྱེར་བའང་འདུག་གོ། །དེའི་ཚེ་དེ་དག་གེགས་སུ་ཤེས་པར་བྱས་དེ་ཞུམ་པ་དང་ལྷག་པའི་ཕྱོགས་ལྷུང་གཉིས་ཀ་སྤངས་ནས་ད་ལྟའི་དྲན་པ་དེ་ལས་སྒོམ་གོ་ཆོད་པར་བྱའོ། །འདི་ཤེས་པའི་ངར་གདངས་བྲལ་བའི་ལུང་མ་བསྟན་གྱིས་གཏད་མེད་དང་མ་ནོར་བ་གལ་པོ་ཆེ་ཡིན་ནོ། །གཉིས་པ་འབྲིང་པོའི་རྣལ་འབྱོར་ནི། དེ་ཉིད་ལས། སྟོང་འཛིན་ཡིད་ཆོས་ཉམས་ཀྱི་དྲི་མ་དེ་བུད་ཅིངཿ གང་ཤར་དྲན་རྟོག་ཡུལ་མེད་རྩ་བྲལ་རྟོགས་པ་ནིཿ མཐོང་ལམ་འབྲིང་པོའི་རྣམ་འབྱོར་ཞེས་བྱ་དེ་ཉིད་ཡིནཿ ཞེས་པས། སྔར་གྱི་གསལ་སྟོང་ནམ་མཁའི་དཀྱིལ་ལྟ་བུ་ཡོད་མེད་རྟག་ཆད་ཀྱི་མཐའ་ལས་འདས་པ་དེ་ལ་ངེས་ཤེས་སྐྱེས་པའི་སྟོང་འཛིན་ཕྲ་མོ་ཡོད་པ་དེ་སྦྲུལ་གྱི་ཤུན་པ་ལྟར་བུད། རྟོག་པ་གང་ཤར་ལ་ཅེར་འཛིན་གྱིས་དྲན་པས་རྒྱས་འདེབས་བྱེད་མི་དགོས་པར་རྣམ་རྟོག་རང་སྟོང༌། གཞི་མེད་རྩ་བྲལ་དུ་ཤར་བ་


JLAZ012_Page_0437
[མ་དཔེ་གཟིགས་ན་འདིར་གནོན།]

ཞིག་འོང༌། འདི་ནི་དྲན་པ་ཙམ་གྱི་ངོ་བོར་ཁྲེལ་གྱིས་འགྲོ། དྲན་པས་གསལ་ཐེབས་ནས་ཐ་མལ་དང་ཁྱད་པར་མེད་པས་འདིའི་ཚེ་མ་ཡེངས་མི་སྒོམ་ལ་ལྟ་བའི་མཐིལ་བཅོལ་བ་ཡིན་ལ་མ་ཧཱ་མུ་དྲས་སྤྲོས་བྲལ་འབྲིང་བོར་བཏགས་སོ། །གསུམ་པ་ནི་དེ་ཉིད་ལས། སྣང་བ་སེམས་སུ་ཤེས་ཤིང་སེམས་ཉིད་རྩ་བྲལ་ཡངཿ སྟོང་འཛིན་སེམས་ཀྱི་དྲི་མ་ཕྲ་མོ་ཡོད་པ་ནིཿ མཐོང་ལམ་ཆེན་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་འདི་ལྟར་རྟོག་པས་བཏགས་པའི་ཚེ་སྣང་བ་སེམས་ཀྱི་ཆོ་འཕྲུལ་དུ་གོལ། སེམས་སྣང་ཐོག་དུ་བཞག་པས་སྣང་སེམས་ཡུལ་མེད་རྩ་བྲལ་དུ་གྲོལ་ཞིང༌། རང་ངོར་སྟོང་འཛིན་ཞིག་པ་ལྟར་སྣང་ཡང་ལམ་གོང་མས་ཡས་གཞལ་ན་རིག་པ་ལ་སེམས་ཀྱི་དྲི་མས་སྦགས་པའི་སྟོང་འཛིན་ཕྲ་མོ་ཡོད་ལ་རྫོགས་ཆེན་སེམས་སྡེ་པས་ཏིང་ངེ་འཛིན་ལ་བྱིང་རྒོད་ལ་སོགས་པའི་རྐྱེན་གྱིས་མི་གནོད་པར་བཤད་པ་དང་མཚུངས། འདི་ལ་ཐུགས་དམ་གྱི་ངོ་བོ་བྱ་རྒྱུ་གང་ཡང་མེད་ཅིང་གནད་དུ་སོང་ན་ཡིད་ཀྱི་རྣམ་ཤེས་གནས་འགྱུར་བས་ཆེད་དུ་སྒོམ་པས་མྱོང་རྒྱུ་དང་བྲལ་ཡང་ལྷུན་གྲུབ་ཀྱི་དྲན་པས་མ་བསྐྱངས་ན་བྲལ་ཐོབ་ཤིན་ཏུ་ཆེ་བ་ཡོད་དོ། །དེ་ལྟ་ནའང་སྦྱོར་བཞིའི་བཤད་པ་གཞན་དག་ནས་འདི་ལ་མ་བསྒོམ་ཀྱང་ཡེངས་འཁྲུལ་མེད་པ་དང༌། རྨི་ལམ་ལའང་མི་འབྲལ་བར་འཆད་ཀྱང་རང་གཞུང་འདི་ནས་སྒོམ་ལམ་ཆེན་པོའི་སྐབས་སུ་ཡང་མཚན་འཁྲུལ་ཡོད་པར་བཤད་ཅིང༌། རང་


JLAZ012_Page_0438
[མ་དཔེ་གཟིགས་ན་འདིར་གནོན།]

གི་མྱོང་བ་དང་ཡང་མ་འབྱོར་བས་བཏང་སྙོམས་སུ་བཞག་གོ། །དེ་ཅིའི་ཕྱིར་སྙམ་ན། ལྷུན་གྲུབ་ཀྱི་དྲན་པ་ལ་ཉིན་མཚན་ཁོར་ཡུག་ཏུ་ལ་བཟླ་བ་དྲི་མ་མཐའ་དག་ལས་རྣམ་པར་གྲོལ་བ་སངས་རྒྱས་ཁོ་ནའི་སྐབས་ལས་གཞན་དུ་མ་ཡིན་ཏེ། ཕར་ཕྱིན་ཐེག་པར། མ་དག་པ་སེམས་ཅན་གྱི་རིགས། དག་པ་བྱང་ཆུབ་སེམས་དཔའི་རིགས། ཤིན་ཏུ་དག་པ་དེ་བཞིན་གཤེགས་པའི་རིགས་ཞེས་གནས་སྐབས་ཀྱི་སྒོ་ནས་དབྱེ་སྟེ་ས་ལམ་གོང་འོག་གི་རིམ་པས་མིང་འདོགས་ཐ་དད་དུ་བཞག་པའི་ཕྱིར་ཏེ། འགྲོ་བའི་ཁམས་ལ་བདེ་གཤེགས་སྙིང་པོ་ཡོད་པ་གཞིར་བཞག་ནས་བྲལ་བྱའི་དྲི་མའི་དཔེ་ཡང་མགོན་པོ་བྱམས་པས་རྒྱུད་བླ་མར། འཆིང་བ་མཐའ་དག་གིས་བཅིངས་པའི་སོ་སོའི་སྐྱེ་བོ་པདྨ་དང༌། སྦྲང་མ་དང༌། སྦུན་པ་དང༌། འདམ་རྫབ་ཀྱི་སྦུབས་ན་སངས་རྒྱས་གཏུམས་པའི་དཔེ་དང༌། ཉན་རང་དགྲ་བཅོམ་པའི་རྒྱུད་ལ་ཡོད་པའི་མ་རིག་པས་སྙིང་པོ་བསྒྲིབས་པས་འོག་གི་དབུལ་པོའི་གཏེར་གྱི་དཔེས་བསྟན་པ་དང༌། སློབ་པ་སོ་སོའི་སྐྱེ་བོའི་རྒྱུད་ལ་ཡོད་པའི་ཐེག་ཆེན་མཐོང་སྤངས་ཀྱི་དྲི་རགས་པ་ཡིན།མ་དང༌། འཕགས་པའི་རྒྱུད་ཀྱི་ཕྲ་བ་ལྷན་སྐྱེས་ལྟར་མི་མངོན་པའི་ཁྱད་དོ། །སྒོམ་སྤངས་ཀྱི་དྲི་མ་གཉིས་ནི། ཤུན་ལྤགས་དང༌། གོས་ཧྲུལ་གྱིས་དཔེས་བསྟན་པ་ཡིན་ལ། ཁྱད་པར་སྐབས་འདིར་བདེན་པ་


JLAZ012_Page_0439
[མ་དཔེ་གཟིགས་ན་འདིར་གནོན།]

མཐོང་བའི་ལམ་དུ་བྱེད་པས་ས་གནས་ཀྱི་ས་བཅུའི་དྲི་མའང་མ་དག་ས་བདུན་མན་ལ་བརྟེན་པའི་དྲི་མ་དང༌། དག་པ་ས་གསུམ་ལ་བརྟེན་པའི་དྲི་མ་ནི། མངལ་དང་འདམ་གྱི་གསེར་དཔེ་གཉིས་ཀྱིས་བསྟན་པའི་ཕྱིར་ཏེ། དེ་སྐད་དུ། ས་བདུན་ལ་བརྟེན་དྲི་མ་ནི། །མངལ་སྦུབས་དྲི་མ་དག་དང་མཚུངས། །མངལ་སྦུབས་བྲལ་འདྲ་མི་རྟོག་པའི། །ཡེ་ཤེས་རྣམ་པར་སྨིན་པ་བཞིན། །ས་གསུམ་རྗེས་འབྲེལ་དྲི་མ་རྣམས། །ས་འདམ་གོས་བཞིན་ཤེས་བྱ་སྟེ། །བདག་ཉིད་ཆེན་པོ་རྡོ་རྗེ་ལྟའི། །ཏིང་ངེ་འཛིན་གྱི་གཞོམ་བྱ་ཡིན། །ཞེས་སོ། །དེ་ལྟར་སྐབས་འདིར་མཐོང་ལམ་གྱི་བརྡ་ཆད་བཞག་པའང་ཕར་ཕྱིན་ཐེག་པའི་སྐབས་སུ་བྱང་ཆུབ་ཀྱི་ཡན་ལག་བདུན་བསྒོམ་པས་ཆོས་ཀྱི་མིག་རྡུལ་དང་བྲལ་བ་ཐོབ་ཅེས་པ་དང་མཚུངས་ལ། དེའི་ཚེ་འཇིག་རྟེན་ལས་འདས་པའི་ཡེ་ཤེས་ཐོག་མར་ཐོབ་པས་དགའ་བ་རྒྱ་ཆེན་པོ་སྔོན་བས་ཆེས་འཕགས་པ་ཐོབ་པས་ས་དང་པོ་རབ་ཏུ་དགའ་བ་ཞེས་བྱ་ཞིང༌། འདིའི་ལམ་རྟགས་སུའང་རྗེས་ཐོབ་ལ་དགའ་སྤྲོའི་སྣང་བ་དཔག་ཏུ་མེད་པ་འཆར། ཐམས་ཅད་མཁྱེན་པའི་ཉེ་རྒྱུ་ཤེས་རབ་ཀྱི་རལ་ཁ་བྱེ་བ་སོགས་ངེས་པར་འབྱུང་བས་མཐོང་ལམ་མངོན་དུ་བྱས་ཏེ་ས་དང་པོ་ནོན་པའི་འགྱུར་རྩི་བ་ཡིན་ནོ། །འོ་ན་ཡོན་ཏན་གྱི་ཁྱད་པར་དུས་སྐད་ཅིག་མ་ལ་


JLAZ012_Page_0440
[མ་དཔེ་གཟིགས་ན་འདིར་གནོན།]

སངས་རྒྱས་བརྒྱའི་ཞལ་བལྟ་བ་ནས། ལུས་རེ་རེ་ལའང་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བར་སྟོན་པའི་བར་གྱི་ཡོན་ཏན་བརྒྱ་ཕྲག་བཅུ་གཉིས། སྤྱན་དང་མངོན་ཤེས། སྐྱེ་འཆི་རང་ཚན་པ་མེད་པ། འཛམ་བུའི་གླིང་གི་རྒྱལ་པོའི་སྐྱེ་བ་འཛིན་ནུས་པ་ལ་སོགས་པའི་ནུས་པ་མངོན་གྱུར་དུ་མེད་པས་སོ་སྙམ་ན། རྫོགས་པ་ཆེན་པོའི་རྒྱུད་ནས་ཁྱུང་ཕྲུག་སྒོ་ངའི་སྦུབས་ནས་རྩལ་རྫོགས་ཏེ་སྒོ་ངའི་རྒྱ་ལས་གྲོལ་མ་ཐག་འཕུར་བ་ལ་ཆགས་ཐོགས་མི་མངའ་བ་དང༌། བྱ་བྲན་སྒོ་ང་རྒྱ་ལས་གྲོལ་ནས་ཀྱང་ཡུན་རིང་པོར་ཚང་དུ་བསྐྱེད་བསྲིང་བྱའི་དཔེས་བསྟན་ཏེ། ཕར་ཕྱིན་དུ་བསྐལ་པ་གྲངས་མེད་ལ་སོགས་པར་ལམ་ལ་ཞུགས་ནས་ཅི་ཞིག་ན་འབྲས་བུ་མངོན་གྱུར་དུ་བྱ་བ་དང༌། རྡོ་རྗེ་ཐེག་པའི་སྐབས་སུ་སྤངས་རྟོགས་ཀྱི་ཡོན་ཏན་ཐམས་ཅད་སྒོམ་ཆེན་གྱི་ལུས་རྒྱའི་སྦུབས་སུ་རྩལ་རྫོགས་ཏེ་ལུས་ཀྱི་སྒོ་ངའི་རྒྱ་ལས་གྲོལ་མ་ཐག་དག་པ་གཉིས་ལྡན་གྱི་ས་ལ་མིག་འཕྲུལ་ལྟར་བཙན་ས་ཟིན་པའི་ངེས་པ་འདྲེན་རྒྱུ་ཡོད་པས་ཅིས་ཀྱང་ཡོན་ཏན་དེ་དག་མངོན་གྱུར་དུ་མཐོང་མི་དགོས་སོ། །འདིའི་ཚུལ་ཞིབ་པ་ནི། མཛོད་བདུན་ལ་སོགས་པ་མན་ངག་གི་བསྟན་བཅོས་རྣམས་སུ་བལྟའོ། །གསུམ་པ་ཕར་ཕྱིན་གྱི་སྒོམ་ལམ་དང་མཚུངས་པས་དེ་སྐད་དུ་བཏགས་པ་སྒོམ་ལམ་གྱི་རྣལ་འབྱོར་ཆེ་འབྲིང་ཆུང་གསུམ་ལས། དང་པོ་ཆུང་ངུའི་རྣལ་འབྱོར་


JLAZ012_Page_0441
[མ་དཔེ་གཟིགས་ན་འདིར་གནོན།]

ནི། དེ་ཉིད་ལས། སྟོང་འཛིན་ཡུལ་ཕུད་སྟོང་དང་མི་སྟོང་རྩིས་ལས་འདསཿ གཉིས་ཆོས་ལས་འདས་གཉིས་མེད་རོ་གཅིག་རྟོགས་པ་ནིཿ སྒོམ་ལམ་ཆུང་ངུའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས། སྔར་གྱི་སྟོང་པ་ཉིད་སྤྲོས་བྲལ་གྱི་གནས་ལུགས་དབུ་མ་ལ་འཇོག་པའི་སྟོང་འཛིན་གྱི་ཤེས་སྒྲིབ་དེ་ཡལ་ནས། སྣང་བ་དཀར་དམར་ལ་སོགས་པའི་འཆར་སྒོ་མཐའ་དག་སེམས་ལ་ཐིམ་པས་ཕྱི་གཟུང་ཡུལ་མངོན་དུ་འགྱུར་བ་མེད། སེམས་ཀྱི་འགྱུ་དྲན་ཐམས་ཅད་རིག་པ་བརྗོད་བྲལ་ལ་ཐིམ་པས་ནང་འཛིན་པའི་འདུ་ཤེས་གྲུང་པོ་དང་བྲལ་ཞིང་འཁོར་འདས་ཀྱི་རྟེན་འབྲེལ་ཐམས་ཅད་དུ་མ་རོ་གཅིག་ཏུ་ཤར་བ་ལ་མ་ཧཱ་མུ་དྲས་རོ་གཅིག་ཆུང་ངུར་བཏགས་པའོ། །གཉིས་པ་འབྲིང་པོའི་རྣལ་འབྱོར་ནི། དེ་ཉིད་ལས། ཡིད་ཆོས་ཉམས་ཟད་གང་ཤར་ཡུལ་ལ་འཛིན་པ་བྲལཿ སྣང་སེམས་འདྲེས་ཤིང་མཉམ་རྗེས་ཕལ་ཆེར་འདྲེས་པ་ནིཿ སྒོམ་ལམ་འབྲིང་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་འཁོར་འདས་ཀྱི་ཆོས་ཐམས་ཅད་སྒྲོག་རང་གྲོལ་ལ་སོང་ནས་ཆུ་ལ་ཆུ་བཞག་པ་ལྟར་ཟུང་འཇུག་བློ་འདས་སུ་རྟོགས་པའི་བསམ་གཏན་དེ་ལ་དེར་འཛིན་ཡིད་ཆེས་ཀྱི་གཉེན་པོའི་སྒྲིབ་པ་ཅུང་ཟད་ཡོད་པ་དེ་ཡང་བྲལ་བས་ཉོན་ཡིད་ཀྱི་རྣམ་ཤེས་དག །སྣང་སེམས་ལ་རང་བྱན་ཆུད་པའི་མཐུ་ལས་ཡང་དག་གི་དྲན་པས་སླེབས་པ་ཙམ་གྱིས་སྤངས་གཉེན་རང་


JLAZ012_Page_0442
[མ་དཔེ་གཟིགས་ན་འདིར་གནོན།]

གྲོལ་དུ་ཤར། ཡུལ་དང་ཡུལ་ཅན་ཐ་དད་དུ་འཛིན་པའི་འདུ་ཤེས་སྤངས་པའི་མཉམ་རྗེས་ཕལ་ཆེར་དུ་འདྲེས་པས་ཇི་ལྟ་བའི་མཉམ་རྗེས་སུ་གོལ། འདིའི་མཉམ་རྗེས་ཀྱི་ངོས་འཛིན་ནི་རང་ལུགས་རྫོགས་པ་ཆེན་པོའི་ཐུན་མོང་མ་ཡིན་པའི་འདོད་པ་ཁོ་བོའི་མན་ངག་གོལ་ཤོར་ཚར་གཅོད་དུ་ཤེས་པར་བྱས་ལ། སྐབས་སུ་མཉམ་རྗེས་རང་ཚན་པར་ཤར་བའི་ཕྱིར་རྫོགས་ཆེན་སེམས་སྡེ་པས། མཉམ་གཞག་ལ་འཁོར་འདས་རོ་མཉམ། རྗེས་ཤེས་ཚོགས་བརྒྱད་སྒྱུ་མ་ལྟར་ཁོང་དུ་ཆུད་ནས་འཇིགས་པ་དང་བྲལ་བར་བཤད་པའང་འདིར་མཚུངས་ལ་སྦྱོར་བཞིའི་བཤད་པ་བཞིན་དུ་སྤྲོས་བྲལ་ཆེན་པོ་མི་ཐོས། རོ་གཅིག་འབྲིང་པོས་སྨྲས་ཏེ་འདི་དང་མི་མཚུངས་ཙམ་སྣང་སྟེ། ལུགས་སྲོལ་འདི་ལ་རྡོ་རྗེའི་ཚིག་རྐང་གི་དགོངས་པ་འཕྱུགས་པ་མེད་པར་བཀོད་པས་བསྲེ་བསླད་མི་བྱ་ལ། རྣལ་འབྱོར་དབང་ཕྱུག་མི་ལའང་འདི་ལྟར་བཞེད་པ་ཡིན་ནོ། །གསུམ་པ་སྒོམ་ལམ་ཆེན་པོ་ནི། དེ་ཉིད་ལས། ཡུལ་སྣང་སོ་མ་བཅོས་བསླད་མི་དགོས་སྒོམ་དུ་ཤརཿ མཉམ་རྗེས་ཁོར་ཡུག་འདྲེས་ཀྱང་མཚན་འཁྲུལ་ཡོད་པ་ནིཿ སྒོམ་ལམ་ཆེན་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས། སྔར་སྣང་སེམས་རོ་གཅིག་ཏུ་འདྲེས་ཤིང༌། ཇི་ལྟ་བའི་མཉམ་རྗེས་ལ་རེས་འཇོག་ཡོད་པ་དེ་ཡང་བརྟན་པ་ཆེར་ཐོབ་སྟེ་ཉིན་


JLAZ012_Page_0443
[མ་དཔེ་གཟིགས་ན་འདིར་གནོན།]

སྣང་ལ་འཁོར་ཡུག་ཏུ་འདྲེས། འཇིགས་སྐྲག་ལ་སོགས་གློ་བུར་བའི་ཡུལ་སྣང་ལ་གཉེན་པོས་འཇུན་མི་དགོས་པར་རྗེས་ཐོབ་ཀྱི་རྩལ་དུ་འཆར་བ་ལ་མ་ཧཱ་མུ་དྲས་རོ་གཅིག་ཆེན་པོར་བཏགས་པའོ། །ཕར་ཕྱིན་ཐེག་པ་དང་བསྟུན་ནས་སྐབས་འདིར་སྒོམ་ལམ་ཆེ་འབྲིང་ཆུང་གསུམ་གྱི་ཐ་སྙད་བཞག་ནས་འཕགས་ལམ་ཡན་ལག་བརྒྱད་བསྒོམས་ཏེ་ས་གཉིས་པ་དྲི་མ་མེད་པ་ནས་བཟུང་བཅུ་པ་ཆོས་ཀྱི་སྤྲིན་གྱི་བར་དུ་བགྲོད་པ་ཡིན་ལ། དེ་ཡང་འདི་ལྟར་མདོ་སྡེ་རྒྱན་གྱི་དགོངས་པ་ལྟར་ཆེ་འབྲིང་ཆུང་གསུམ་སོ་སོ་ལའང་ནང་གསེས་གསུམ་གསུམ་དུ་ཕྱེ་བས་དགུར་འགྱུར་བའི་ཆུང་ངུའི་ཆུང་ངུས་ས་གཉིས་པ་དྲི་མ་མེད་པ་སྟེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཆུང་ངུའི་འབྲིང་གིས་ས་གསུམ་པ་འོད་བྱེད་པ་སྟེ་བཟོད་པའི་ཕ་རོལ་ཏུ་ཕྱིན་པའོ། །ཆུང་ངུའི་ཆེན་པོས་ས་བཞི་པ་འོད་འཕྲོ་བ་སྟེ་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །འབྲིང་གི་ཆུང་ངུས་ས་ལྔ་པ་སྦྱང་དཀའ་བ་སྟེ་བསམ་གཏན་གྱི་ཕ་རོལ་ཏུ་ཕྱིན་པའོ། །འབྲིང་གི་འབྲིང་པོས་ས་དྲུག་པ་མངོན་དུ་གྱུར་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །འབྲིང་གི་ཆེན་པོས་ས་བདུན་པ་རིང་དུ་སོང་བ་སྟེ་ཐབས་ཀྱི་ཕ་རོལ་ཏུ་ཕྱིན་པའོ། །ཆེན་པོའི་ཆུང་ངུས་ས་བརྒྱད་པ་མི་གཡོ་བ་སྟེ་སྟོབས་ཀྱི་ཕ་རོལ་ཏུ་ཕྱིན་པའོ། །


JLAZ012_Page_0444
[མ་དཔེ་གཟིགས་ན་འདིར་གནོན།]

ཆེན་པོའི་འབྲིང་གི་ས་དགུ་པ་ལེགས་པའི་བློ་གྲོས་ཏེ་སྨོན་ལམ་གྱི་ཕ་རོལ་ཏུ་ཕྱིན་པའོ། །ཆེན་པོའི་ཆེན་པོས་ས་བཅུ་པ་ཆོས་ཀྱི་སྤྲིན་ཏེ་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ་ས་བཅུའི་འགྱུར་འདི་རུ་བརྩི་བ་ཡིན་པས་བྱང་ཆུབ་སེམས་དཔའ་དང་མཚུངས་ལ། དེའི་ངང་ཚུལ་ནི་རྒྱུད་བླ་མ་ལས། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་དང༌། །སེམས་ཅན་ཡང་དག་སྒྲོལ་བ་ལ། །འཇིག་རྟེན་ན་ནི་མཉམ་པ་ཉིད། །དེ་ལྟ་མོད་ཀྱི་ས་རྡུལ་དང༌། །རྒྱ་མཚོ་བ་གླང་རྨིག་རྗེས་ཆུ། །ཁྱད་པར་གང་ཡིན་སངས་རྒྱས་དང༌།།བྱང་ཆུབ་སེམས་དཔའི་ཁྱད་པར་ཉིད། །ཅེས་ཕྲིན་ལས་ཀྱི་བྱེད་ཚུལ་འདྲ་བའི་ཆ་ནས་སེམས་ཅན་སྒྲོལ་བ་ལ་སངས་རྒྱས་དང་ཕྱོགས་མཚུངས་པར་བསྟན་ཀྱང༌། དོན་དུ་བྱ་བ་དང་བྱེད་པ་གཉིས་ཀའི་སྒོ་ནས་སངས་རྒྱས་ལྷག་པར་ས་རྡུལ་ལ་སོགས་པའི་དཔེས་བསྟན་པ་ཡིན་ལ། ཡོན་ཏན་གྱི་ཁྱད་པར་ས་གཉིས་པ་ནས་བཟུང་དང་པོའི་ཡོན་ཏན་བརྒྱ་ཕྲག་བཅུ་གཉིས་སྐད་ཅིག་མ་རེ་རེ་བཞིན་སྟོང་འགྱུར་དུ་སྦྲེ་བའི་ནུས་པ་མངོན་གྱུར་དུ་ཡོད་མེད་ནི་སྔར་ཁྱུང་དང་བྱ་བྲན་གྱི་དཔེས་བཤད་ཟིན་ཏོ།། །།བཞི་པ་མི་སློབ་པའི་ལམ་ལ་ཆེ་འབྲིང་ཆུང་གསུམ་གྱི་དབྱེ་བ་ལས་དང་པོ་ཆུང་ངུའི་རྣལ་འབྱོར་ནི། དེ་ཉིད་ལས། དྲན་འདུན་རྩོལ་བའི་བློ་ཟད་མཉམ་རྗེས་ཁོར་ཡུག་འདྲེསཿ གཉིད་དུས་འཁྲུལ་བའི་དྲི་མ་ཕྲ་མོ་ཡོད་པ་ནིཿ མི་སློབ་ཆུང་ངུའི་རྣལ་


JLAZ012_Page_0445
[མ་དཔེ་གཟིགས་ན་འདིར་གནོན།]

འབྱོར་ཞེས་བྱ་དེ་ཉིད་ཡིནཿ ཞེས་པས་ལམ་འོག་མ་རྣམས་སུ་རྗེས་ཐོབ་ཀྱི་རྩལ་ལ་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པར་རྫོགས་པའི་མཐུ་ལས། །འདོད་ཁའི་ལྟ་བ་ལུང་རིགས་ཀྱི་དངོས་པོས་རྟག་ཏུ་བཟོད་པ་ཟུང་འཇུག་དང༌། གཉིས་མེད་དང༌། བརྗོད་བྲལ་ཙམ་དུའང་འཛིན་པའི་ཁས་ལེན་མཐའ་དག་རང་སར་ཞིག་སྟེ་ད་ལྟའི་ཤེས་པ་གྲ་མ་ཉམས་ཤིང་མདོག་མ་བསྒྱུར་ལ། བློས་མ་བྱས་པའི་ཡེ་ཤེས་ཀྱི་ངོ་བོར་བསྒོམ་བྱ་རྡུལ་ཙམ་མི་འདུག་པ་ལ་སྒོམ་བྱེད་གང་ནས་རྙེད་མཉམ་པར་བཞག་བྱ་འཇོག་བྱེད་དང་བྲལ་བ་ལ་རྗེས་ཐོབ་གང་ནས་འཚོལ། ལྟ་བ་བཟང་པོ་ཤུབས་ནས་དོན་པ་ལ་དྲན་པས་གང་ལ་འཛིན། ཡེངས་ཡུལ་ཆོས་ཉིད་དུ་སོང་བ་ལ་ཡེངས་མཁན་སུས་བྱེད། དགོངས་པ་ཀློང་ནས་གྲོལ་ཏེ་གཏད་མེད་ཡེ་འབྱམས་སུ་སོང་བ་ལ་བྱ་རྩོལ་གང་ནས་བསྒྲུབ། འཁོར་འདས་ཀྱི་སྣང་ཆ་ཇི་ལྟར་ཤར་ཡང་ཞེན་མེད་ལྷུན་གྲུབ་ཏུ་མྱོང་བ་ལ་དྲན་པའི་སོ་བ་གང་ལ་འཛུགས་སྒོམ་པའི་ཞེ་འདོད་རྨིང་ནས་ཞིག་པས་བཞག་པས་ཆོག་གོ། །འཇོག་རྒྱུ་ནི་མེད་དེ་ལྷུན་གྲུབ་ཏུ་འདུག་གོ། །ཡོད་པ་ནི་མ་ལགས་ངོས་བཟུང་དང་བྲལ་ལོ། །མེད་པ་ནི་མ་ལགས་སངས་རྒྱས་ཀྱི་དགོངས་པ་ལགས་སོ། །ད་རེས་ཀློང་ཆེན་རབ་འབྱམས་ཀྱི་བུ་རྒྱུད་དུ་སོང་བས་རང་ཉིད་གཅིག་པུར་བྲག་ཕུག་ནང་དུ་ཆིག་དགོད་ཤོར་ནས། ཨ་ལ་ལ་ཧོ།


JLAZ012_Page_0446
[མ་དཔེ་གཟིགས་ན་འདིར་གནོན།]

ཨ་ལ་ལ་ཧོ། ཨ་ལ་ལ་ཧོ། །ཞེས་མགྲིན་པ་ལོངས་སྤྱོད་ཀྱི་འཁོར་ལོའི་རྫ་རྔ་བརྡུངས་སོ། །དོན་རྨོངས་ཚིག་ལ་ཞེན་པ་ཁྱེད་ཅིག་གིས་བལྟས་ན་ཧ་ཤང་གི་ལྟ་བ་ཨི་ཡིན་སྙམ་པ་ལོས་ཡོང་ངོ༌། །བོན་པོའི་ལྟ་བ་ཡིན་པ་འདྲ་དགོངས་པ་ལོས་ཡོང་ངོ༌། །གཅེར་བུ་རྒྱང་འཕེན་པའི་གྲུབ་མཐའ་ཡིན་པ་འདྲ་སྙམ་པ་འདུག་གོ། །ཧེ་ཧེ་དབུ་མ་རབ་ཏུ་མི་གནས་པ་ཡང་འདི་གར་འདུག་གོ། །ཕྱག་རྒྱ་ཆེན་པོ་བློ་ལས་འདས་པ་ཡང་འདི་གར་འདུག་གོ། །རྫོགས་པ་ཆེན་པོ་གདོད་ནས་རྣམ་དག་ཀྱང་འདི་གར་འདུག་གོ། །གཞི་མེད་རྩ་བྲལ་གྱི་གདོན་ཆེན་རྣལ་འབྱོར་པའི་སྙིང་ལ་ཞུགས་ནས་ཅི་བྱེད་མི་གདའོ། །ཀུན་གཞིའི་རྣམ་ཤེས་ཆོས་སྐུར་ཐིམ་པའི་སྨྱོན་པ་ལ་གཟའ་གཏད་ཀྱི་དྲན་པ་ཡོད་པ་མ་ལགས་པས། བྱ་རྒྱུ་དང་བྱེད་རྒྱུ་མེད་པའི་ངང་ལ་འདར་ཉལ་བྱས་ཏེ་བསྡད་པས་ཡུལ་ལྔའི་རང་གདངས་ཀྱི་ཤེས་པ་ཕྲ་མོ་དེ་ཉིད་ཡིད་ཀྱི་རྣམ་པར་ཤེས་པ་དང་འདྲེས་ནས་མི་གདའོ། །འདྲེས་པ་དེ་སླར་ཡང་ཀུན་གཞིའི་རྣམ་ཤེས་ཀྱི་སྦུབས་སུ་ཆུད་པ་ལ་ཆོས་སྐུའི་འོད་གསལ་གྱི་མར་མེ་རང་འབར་བས་རང་བཞིན་གྱི་སྤྲོས་པ་དང་བྲལ་བར་གནས་སོ། །དེ་ལྟ་ནའང་ལྷག་མཐོང་གསལ་བའི་ཡེ་ཤེས་ཀྱི་རྩལ་མ་རྫོགས་པས་སྔར་གྱི་ཀུན་གཞིའི་སྦུབས་སུ་འཐུམས་ནས་འོད་གསལ་གྱི་མར་མེ་


JLAZ012_Page_0447
[མ་དཔེ་གཟིགས་ན་འདིར་གནོན།]

དེ་ནི་ཤི་ནས་མི་འདུག་གོ། །དེའི་ཚེ་ཡིད་ཤེས་ཁོ་གཅིག་པུར་ལངས་ནས་རྨི་ལམ་གྱི་གྲོང་ཁྱེར་ག་ལ་བ་དེར་ཕྱིན་ནས་སྣང་བ་དཀར་དམར་སྣ་ཚོགས་ཀྱི་བསླུས་པ་ཞིག་བྱུང་བས་འཁྲུལ་པའི་ཆ་ཤས་ཤིག་ད་རུང་འདུག་གོ། །ཞེས་རང་ཉིད་ཀྱིས་ཇི་ལྟར་མཐོང་བའི་སྟེང་ནས་མིང་ཚིག་གིས་དྲངས་ནས་གསལ་ལ་དབྱིངས་ཆེ་བར་བཤད་པ་སྟེ། མ་ཧཱ་མུ་དྲ་བས་སྒོམ་མེད་ཆུང་ངུའི་མིང་འདོག་ཙམ་ཆ་མཚུངས་སུ་སྦྱོར། གཉིས་པ་མི་སློབ་འབྲིང་པོའི་རྣལ་འབྱོར་ནི། དེ་ཉིད་ལས། ཉིན་མཚན་ཀུན་ཏུ་འོད་གསལ་འཁོར་ཡུག་གཅིག་ཏུ་གྱུརཿ གཉིད་ཀྱི་འོད་གསལ་ཕྲ་མོ་ཉམས་སུ་ཤར་བ་ནིཿ མི་སློབ་འབྲིང་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པ་ལ་འདི་སྐད་འཆད་དོ། །ཉིན་སྣང་ལ་སྔ་མ་ལས་ལྷག་པའི་རྟོག་པ་ཞིག་བཙལ་ཀྱང་མི་རྙེད་པ་ཞིག་ལགས་སོ། །མཚན་སྣང་ལ་སྔ་མ་ལྟར་སྣང་མཆེད་ཀྱི་ཐིམ་རིམ་ལུགས་འབྱུང་ལུགས་ལྡོག་གི་རྟེན་འབྲེལ་སྣ་ཚོགས་ལ་བརྟེན་མ་དགོས་པར། ཡུལ་ལྔའི་གཟུང་ཡུལ་ནུབ་པའི་ངང་ལས་ཡིད་གསུམ་གྱི་རྩལ་བག་ལ་ཞ་སྟེ་མུན་པ་ལྟ་བུའི་གཏི་མུག་ཀྱང་མ་ཡིན་ལ། གསལ་ཚེའི་གོ་ཡང་མི་ཕྱེད་པའི་མིང་རྟོགས་པའི་འོད་གསལ་ཞིག་ལ་གནས་སོ། །དེ་ནི་ལྷག་མཐོང་གསལ་བའི་ཡེ་ཤེས་ཀྱིས་སད་པར་མ་བྱས་ན་གཟུགས་མེད་སྐྱེ་མཆེད་མུ་བཞིར་གོལ་བ་ཡིན་ནོ། །ཞེས་ཀུན་མཁྱེན་རྡོ་རྗེ་གཟི་


JLAZ012_Page_0448
[མ་དཔེ་གཟིགས་ན་འདིར་གནོན།]

བརྗིད་ཀྱིས་ངོ་སྤྲོད་མཛད་བྱུང་བ་ཡིད་ལ་བཅགས་ནས་གྲུང་ཆ་བཏོན་པས་མི་མཇེད་ཀྱི་བཀོད་པའང་གསལ་ལམ་སྙམ་པའི་སྣང་ཆ་གོ་མ་འགགས་ལ་འདུ་ཤེས་གྲུང་པོ་ལས་འདས་པ་ཞིག་བྱུང་ངོ༌། །དེ་ནི་གསལ་བའི་འོད་གསལ་གྱི་རང་བཞིན་ཡིན་ཏེ་ཆགས་ན་གཟུགས་ཁམས་སུ་སྐྱེ་བ་ཡིན་ནོ་ཞེས་ཀུན་མཁྱེན་བླ་མས་ཞལ་ཆེམས་སུ་བཞག་འདུག་པས་མཐའ་གྲོལ་ཀློང་ཡངས་ཆེན་པོའི་གནད་ལ་རྒྱུད་དུ་སློབ་པ་ཞིག་ལགས་སོ། །ཨ་ལ་ལ་ཧོ ཕ་ཨོ་རྒྱན་ཆོས་རྗེའི་བྱིན་རླབས་དང༌། །མ་ཡེ་ཤེས་ཌཱཀྐིའི་ཐུགས་རྗེ་ཡིས། །དབུ་མ་འོད་གསལ་གྱི་ཁང་མཛེས་ནང༌། །ངའི་དགོངས་པ་ཅོག་བཞག་ཆེན་པོར་འཁྱིལ། །སྤྱིར་སྙིང་ཏིག་ཟབ་མོའི་བཀའ་དྲིན་དང༌། །སྒོས་ཀུན་མཁྱེན་བླ་མའི་དགོངས་གཏེར་གྱིས། །ངའི་ཉམས་མྱོང་སོམ་ཉིའི་སྒྲོག་ལས་གྲོལ། །གྲོགས་གྲུབ་ཐོབ་ཚོགས་ཀྱང་གནོང་རྒྱུ་མེད། །ཚིག་དཔྱད་ལེགས་ཀྱི་སྟོང་པའི་འབྲུག་སྒྲ་དང༌། །དོན་ལག་བསྟར་གྱི་གསེར་ཞུན་དྭངས་མའི་བཅུད། །དེ་བསྲེས་ཀྱང་འདྲེས་པ་མ་ལགས་པས། །ངའི་མན་ངག་ལ་བཅོས་བསླད་མ་བྱེད་ཅིག།།ཐབས་ལམ་གྱི་བདེ་བའི་འོད་གསལ་དང༌། །ཐོད་རྒལ་གྱི་སྣང་བའི་འོད་གསལ་གཉིས། །འདིར་འཆད་པའི་སྐབས་སུ་མ་བབས་པས། །མ་མཁའ་འགྲོའི་ཡང་ཏིག་དེ་ལ་དྲིས། །གསུམ་པ་མི་སློབ་ཆེན་


JLAZ012_Page_0449
[མ་དཔེ་གཟིགས་ན་འདིར་གནོན།]

པོའི་རྣལ་འབྱོར་ནི། དེ་ཉིད་ལས། གཉིས་སྣང་ཤེས་བྱའི་དྲི་མ་ཕྲ་མོ་དེ་ཟད་ཅིངཿ གཞི་དང་ལམ་གྱི་འོད་གསལ་གཅིག་ཏུ་འདྲེས་པ་ནིཿ མི་སློབ་ཆེན་པོའི་རྣལ་འབྱོར་ཞེས་བྱ་དེ་ཉིད་ཡིནཿ ཞེས་པས་ཕྱི་སྣང་བའི་ཡུལ་ཟད། ནང་འཛིན་པའི་སེམས་ཟད། ལས་དང་བག་ཆགས་ཀྱི་མཐའ་སྟོངས་ཏེ། གདོད་མ་གཞིའི་གནས་ལུགས་འཁོར་འདས་ཀྱི་བློས་སྒྲོ་མ་བཏགས་ཤིང༌། འཁྲུལ་གྲོལ་གྱི་ས་མཚམས་ལས་འདས་པ། ཅི་ཡང་མ་ཡིན་ལ་ཅི་ཡང་བྱར་བཏུབ་པ། གཞི་ཐོག་ནས་ཆོས་དྲུག་གིས་སངས་རྒྱས་པའི་ཡེ་ཤེས་འོད་གསལ་གྱི་སྦུབས་རང་བཞིན་གྱི་རྣམ་པར་དག་པ་དེའི་ངང་དུ་ད་ལྟའི་ལམ་གྱི་རིག་པ་བཟང་རྟོག་ངན་རྟོག་ལུང་མ་བསྟན་གསུམ་ཀའི་སྐྱོན་ཡོན་དགག་སྒྲུབ་ལས་འདས་པ་ནམ་མཁའ་དྭངས་པའི་ཀློང་ལྟ་བུ་འདི་འདྲེས་པས། བསྒོམ་བྱའི་ཆོས་མེད། བླང་དོར་གྱི་རིས་མེད། ཡིན་མིན་གྱི་རྩིས་མེད། ས་ལམ་གྱི་འཕྲང་མེད། སྐུ་གསུམ་འདུ་འབྲལ་མེད་པའི་ངང་དུ་ཉིན་མཚན་རིས་མེད་དུ་ལ་བཟློས་པ་ཞིག་ལ་ཟེར་བ་གདའ་སྟེ། རྫོགས་ཆེན་སེམས་སྡེ་ལས་ལྷུན་གྲུབ་ཀྱི་ཉམས་ཏིང་ངེ་འཛིན་ཐུན་མཚམས་ལས་འདས་པ་ཞེས་འཆད་ལ། མ་ཧཱ་མུ་དྲའི་སྒོམ་མེད་ཆེན་པོ་སྟེ་མན་ངག་དངོས་ནི་སྙིང་ཏིག་གི་དགོངས་པ་དང་སྦྱར་ནས་བཤད་པས་ཁྱད་པར་ཅུང་ཟད་ཡོད་པར་ཤེས་དགོས་སོ། །འདི་ལྟ་བུའི་


JLAZ012_Page_0450
[མ་དཔེ་གཟིགས་ན་འདིར་གནོན།]

དགོངས་པ་དེ་སུ་ལ་མངའ་ན་གྲུབ་ཐོབ་ཆེན་པོ་རྣམས་ལའང་མནལ་ལམ་བྱུང་བའི་ལོ་རྒྱུས་འདུག་པས་རྒྱལ་དབང་མཚོ་སྐྱེས་རྡོ་རྗེ་དང༌། པཎ་ཆེན་བི་མ་ལའི་དགོངས་པའི་ཀློང་ཆེན་པོར་འཁྱིལ་བར་རྟོགས་པས་བླུན་སྒོམ་མུ་ཅོར་སྨྲ་བ་རྣམས་ཕུ་ཐག་མ་ཆོད་པའི་ཅལ་ཅོལ་འུར་སྐད་དུ་མི་སྨྲ་བར་བག་ཡོད་པར་བགྱིད་ན་ཅི་མ་རུང་སྙམ་པ་ཤར་ཏེ་ཡི་གེར་འགོད་པའང་ཐལ་ལོ། །སྐབས་འདིར་ཕར་ཕྱིན་ཐེག་པ་དང་བསྟུན་ན། སློབ་ལམ་བཞིར་བསླབ་བྱའི་ཚོགས་གཉིས་མཐར་ཐུག་པས་སྤངས་རྟོགས་ཀྱི་ཡོན་ཏན་མ་ལུས་པ་མངོན་དུ་གྱུར་ཏེ། ཕྲིན་ལས་ཕུན་སུམ་ཚོགས་པས་འགྲོ་བ་མཐའ་དག་བྱང་ཆུབ་གསུམ་ལ་འགོད་པ་སྟེ། དེའི་ངོ་བོའི་རྟེན་གྱི་ཁྱད་ནི་སྐུ་གསུམ་ཡིན་ལ། དང་པོ་ཆོས་སྐུ་ལ་དབྱེ་ན་གཉིས་སུ་ཡོད་པས་སྔར་སྨིན་བྱེད་ཀྱི་མཐར་བཤད་ཟིན་ལ། བརྗོད་བྱ་རྒྱས་པ་ནི་མངོན་རྟོགས་རྒྱན་དང༌། རང་བཞིན་གྱི་རྣམ་དབྱེ་ནི་ཀུན་མཁྱེན་སངས་རྒྱས་གཉིས་པས་གསང་རྒྱུད་ཀྱི་དགོངས་པ་རྒྱ་མཚོ་ལྟ་བུར་དཔྱད་གསུམ་དག་པའི་གྲུ་གཟིངས་ཀྱིས་བརྒལ་ནས་བཤད་པའི་ཕྱིར་བདག་འདྲས་སྨོས་ཅི་འཚལ་ལོ། །གཉིས་པ་ལོངས་སྐུ་ནི། འཁོར་བའི་ཆ་ཀུན་གཞི་ཚོགས་བརྒྱད་དང་བཅས་པ་དབྱིངས་སུ་ནུབ་པས་ཆོས་སྐུ་དང་ངོ་བོ་གཅིག་ཀྱང༌། སྣང་ཆའི་ཡོན་ཏན་མ་ལུས་པ་རྫོགས་ཏེ་ངེས་པ་ལྔ་དང་ཁ་སྦྱོར་ཡན་


JLAZ012_Page_0451
[མ་དཔེ་གཟིགས་ན་འདིར་གནོན།]

ལག་བདུན་ལྡན་གྱི་ཚུལ་གྱིས་རྟག་པ་རྒྱུན་དུ་བཞུགས་པ་སྟེ། དེ་ལ་ངེས་པ་ལྔ་ནི། གནས་ངེས་པ་འོག་མིན་སྟུག་པོ་བཀོད་པར། སྟོན་པ་ངེས་པ་མཚན་དཔེ་རྫོགས་པའི་རྣམ་པར་སྣང་མཛད་ཀྱིས། འཁོར་ངེས་པ་ས་བཅུའི་སེམས་དཔའ་ལ། ཆོས་ངེས་པ་ཐེག་པ་ཆེན་པོ་འབའ་ཞིག །དུས་ངེས་པ་རྟག་པ་རྒྱུན་གྱི་འཁོར་ལོར་ཕུན་སུམ་ཚོགས་པ་ལྔའི་རང་བཞིན་གྱི་སྟོན་ལ། སྐུ་གསུམ་ཡན་ལག་བདུན་ལྡན་ནི། སེམས་ཅན་ཀུན་ལ་བརྩེ་བའི་ཐུགས་རྗེས་རྒྱུན་མི་ཆད་ལ། ཐུགས་རྗེ་ཆེན་པོས་ཐུགས་རྒྱུད་ཡོངས་སུ་གང་བ། འགོག་པ་མེད་པ་སྟེ་སྤྲུལ་སྐུའི་ཡན་ལག་གསུམ། སྟོང་ཉིད་སྙིང་རྗེ་ཟུང་འཇུག་སྤྲོས་པ་ཐམས་ཅད་དང་བྲལ་བ་རང་བཞིན་མེད་པ་སྟེ་ཆོས་སྐུའི་ཡན་ལག་གཅིག །ཟབ་རྒྱས་སྔགས་ཀྱི་ཆོས་འཁོར་ལ་རྟག་པར་ལོངས་སྤྱོད་པ་དང༌། ཡེ་ཤེས་ཀྱི་སྐུ་རང་འོད་ཀྱི་ཡུམ་དང་སྦྱོར་བས་ཁ་སྦྱོར། ཟག་མེད་ཀྱི་བདེ་བ་ཆེན་པོ་རྒྱུན་ཆད་མེད་པ་སྟེ་ལོངས་སྐུའི་ཡན་ལག་གསུམ་དང་བདུན་ནོ། །གསུམ་པ་སྤྲུལ་སྐུ་ནི་ལོངས་སྐུའི་དབྱིངས་ཆོས་སྐུའི་ངང་ལས་མ་གཡོས་བཞིན་དུ་གདུལ་བྱའི་ངོར་གང་འདུལ་གྱི་སྤྲུལ་པའི་རོལ་པ་ཚད་མེད་པས། དབྱེ་ན་གསུམ། མདོ་སྡེ་རྒྱན་ལས། བཟོ་དང་སྐྱེ་བ་དེ་བཞིན་དུ། །བྱང་ཆུབ་མཆོག་གི་སྤྲུལ་པ་སྟེ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཅེས་སོ། །


JLAZ012_Page_0452
[མ་དཔེ་གཟིགས་ན་འདིར་གནོན།]

དེའི་ཕྱིར་ལུགས་དང་། བྲིས་དང་གླེགས་བམ་ལ་སོགས་པ་ཐམས་ཅད་ནི་འགྲོ་བའི་བསོད་ནམས་འཕེལ་བའི་ཕྱིར་བཟོ་སྤྲུལ་པའོ། །དེས་ས་ལ་སོགས་པར་སྤྲུལ་ནས་ནད་དང་མུ་གེ་ལ་སོགས་པ་སྐྱོབ་པ་ནི་སྐྱེ་བ་སྤྲུལ་སྐུའོ། །མཆོག་གི་སྤྲུལ་སྐུ་ནི་མཛད་པ་བཅུ་གཉིས་ལ་སོགས་པ་སེམས་ཅན་འདུལ་བ་འགྲོ་བའི་བླ་མ་ཤཱཀྱ་སེང་གེ་ལྟ་བུ་སྟེ། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌།། ལྷུམས་སུ་ཞུགས་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་པ་དང༌། །ངེས་འབྱུང་དཀའ་བ་སྤྱད་པ་དང༌། །བྱང་ཆུབ་སྙིང་པོར་གཤེགས་པ་དང༌། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང༌། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཅེས་སོ། །དེ་དག་གི་བརྟེན་པ་ཡེ་ཤེས་ཀྱི་རང་བཞིན་ནི། གཞུང་ལུགས་ཆེན་པོ་རྣམས་སུ་ཤེས་ལ་ཁྱད་པར་ཀུན་མཁྱེན་ཆེན་པོའི་མན་ངག་གི་བསྟན་བཅོས་རྣམས་སུ་རིག་པར་བྱའོ། །དེ་ལྟ་ནའང་


JLAZ012_Page_0453
[མ་དཔེ་གཟིགས་ན་འདིར་གནོན།]

དེང་བརྗོད་བྱའི་ལམ་གྱི་གཙོ་བོ་རྡོ་རྗེ་ཐེག་པའི་བསྒྲུབ་བྱ་སྐུ་གསུམ་རང་ཆས་ཀྱིས་མཚན་ཉིད་ནི། རྡོ་རྗེ་ཚིག་རྐང་ལས། རིག་སྟོང་དབྱེར་མེད་གང་དེ་ཆོས་སྐུ་ཉག་གཅིག་ཡིནཿ རིག་པའི་ངོ་བོ་ཅིར་ཡང་མ་གྲུབ་སྟོང་པ་ཉིདཿ ངོ་བོ་སྟོང་པ་ཆོས་ཀྱི་སྐུ་ཞེས་དེ་ལ་བརྗོདཿ རང་བཞིན་མ་འགགས་འཁོར་འདས་ཀུན་ཏུ་རང་གསལ་བཿ རང་བཞིན་གསལ་བ་ལོངས་སྤྱོད་རྫོགས་སྐུ་དེ་ཉིད་ཡིནཿ རིག་པའི་ཆོ་འཕྲུལ་མ་འགགས་ཅིར་ཡང་འཆར་བ་ནིཿ ཐུགས་རྗེ་མ་འགགས་སྤྲུལ་པའི་སྐུ་ཞེས་དེ་ལ་བརྗོདཿ དེ་གསུམ་དབྱེར་མེད་རོ་མཉམ་བསམ་བརྗོད་བྲལ་བ་ནིཿ ངོ་བོ་ཉིད་སྐུ་ཞེས་བྱ་དེ་ལ་བརྗོད་པ་ཡིནཿ རང་རིག་ངོ་བོ་ཅིར་ཡང་མ་གྲུབ་མཁའ་ལྟར་དགཿ དང་པོའི་སངས་རྒྱས་ཆོས་སྐུ་ཐིག་ལེ་ཉག་གཅིག་ཡིནཿ ཞེས་གསུངས་ལ་རྡོ་རྗེ་ཐེག་པའི་གྲོལ་སའི་མཐར་ཐུག་འདི་ཁོ་ན་ཡིན་པས་འཁོར་འདས་སོ་སོའི་འཇུག་ལྡོག་ཐམས་ཅད་ཀྱི་རྩ་བ་རང་རིག་ཡེ་ཤེས་ཆེན་པོར་ལ་བཟློས་པ་ཞིག་གི་ཉམས་ལེན་ལ་ལག་བཅངས་སུ་བྱེད་པ་འོ་སྐོལ་རྣལ་འབྱོར་པའི་ལམ་ཡིན་པས་ཕར་ཕྱིན་གཞུང་ལུགས་པའི་འགལ་གྲུབ་བརྒལ་བརྟག་གི་རྟོག་པའི་དྲ་བ་དང༌། ས་ལམ་གྱི་གཟེབ་ཏུ་ཆུད་པའི་ངལ་བ་མཐའ་དག་ལས་གྲོལ་བའི་བློ་བདེ་རྒྱུན་ཆད་མེད་པ་ཞིག་ལགས་སོ། །དེ་ལྟ་ནའང་གཞུང་ལུགས་པར་རློམ་སེམས་ཆེ་བ་དག་གིས་


JLAZ012_Page_0454
[མ་དཔེ་གཟིགས་ན་འདིར་གནོན།]

རྡོ་རྗེ་ཐེག་པའི་ལམ་ལ་ཡིད་གཉིས་ཟ་བའི་ཅ་ཅོའི་འགལ་སྒྲོག་དང་རྣལ་འབྱོར་པས་ལམ་གྱི་གནད་ཅུང་ཟད་ཙམ་ཡང་མི་ཤེས་པར་དོགས་པའི་ཉེས་པ་འགེགས་ཕྱིར་ཕ་རོལ་ཕྱིན་པའི་ལམ་ལ་གོམ་པའི་འདེགས་འཇོག་ཙམ་ཡང་བསྒྱུར་མ་མྱོང་སྟེ་ཀློང་ཆེན་རིག་པའི་རྩལ་གྱི་རྣམ་པར་དཔྱད་ནས་དབུ་མའི་རྩ་མདུད་གྲོལ་བའི་ལག་རྗེས་སུ་བྱས་པ་ལགས། སླར་སྨྲས་པ། དེ་ལྟར་དྲི་ཚིག་འོད་ཟེར་བརྒྱ་པ་ལས། །ལེགས་འོངས་མཆིད་ལན་པདྨ་དཀར་པོ་ནི། །དགོས་འབྲེལ་མེད་པའི་ངག་གིས་བསྔགས་པ་མིན། །ངེས་པའི་དོན་ལ་སྦྱོར་བའི་ཕོ་ཉ་ཡིན། །ཤེས་རབ་གསུམ་གྱི་ལུས་སྟོབས་ཆེ་བའི་མཁས་གྲུབ་ཀློང་ཆེན་གཟིམས་པ་ལས། །མདོ་སྔགས་གཞུང་ལ་རྣམ་པར་དཔྱོད་པའི་སོར་རྟོག་ཡེ་ཤེས་མིག་ཟུམ་ལ། །ཟབ་དང་རྒྱ་ཆེའི་ཆོས་ཚུལ་གནད་ལ་རྟོག་བཏགས་འགལ་འདུའི་གྲུབ་མཐའ་ཡིས། །ནོར་འཛིན་བུ་མོའི་ལྟོ་བ་སྦྲུམ་ཚེ་ངེས་དོན་མན་ངག་འདི་བྱས་སོ། །ཐོས་བསམ་རྒྱ་མཚོ་ལམ་གྱི་གྲོགས་ཡིན་ལ། །བསྟན་པའི་སྙིང་པོ་སྒྲུབ་པར་བསྔགས་ན་ཡང༌། །རྒྱ་ཆེའི་གཞུང་ལ་དཔྱོད་པ་ཆེས་དཀོན་ཞིང༌། །གལ་ཏེ་སྲིད་རྣམས་རྣམ་གཡེང་དགའ་མས་མྱོས། །དེ་ཕྱིར་དཔྱད་གསུམ་དག་པའི་མ་ཎི་ཀཿ། །ངེས་དོན་དངོས་གྲུབ་རྒྱ་མཚོའི་འཇུག་ངོགས་མཆོག །ཟབ་དང་རྒྱ་ཆེའི་འོད་སྟོང་བཅུད་འདྲིལ་བ། །དེད་དཔོན་གྲུབ་པའི་


JLAZ012_Page_0455
[མ་དཔེ་གཟིགས་ན་འདིར་གནོན།]

དཔའ་བོས་བླངས་དེ་མཚར། །དོན་རྒྱུད་བྱིན་རླབས་ཕབས་ཀྱིས་བྲན་པ་ཡིས། །ཀ་དག་བདུད་རྩིའི་ཉིང་ཁུ་འཐུངས་པ་ལས།།ཆོས་ཟད་རྟོགས་པས་མྱོས་པའི་རྒྱང་གླུ་དེར། །གྲུབ་པའི་རིག་འཛིན་ཡོད་ན་གསན་པར་རིག །རྣམ་གཡེང་ཚང་ཚིང་ནགས་ཀྱི་བས་མཐའ་རུ། །ཉོན་མོངས་རྩེད་འཇོར་རོལ་དང་ཆབ་གཅིག་པར། །མཐུན་འཇུག་ལག་རྐྱོང་གར་གྱི་འཚོ་བ་ཡིས། །ཡལ་གའི་རི་དྭགས་རྣམས་ལ་འདི་མ་འཚལ། །སྲིད་པ་ཆུ་ཤིང་ལྟ་བུའི་གྲོང་ཁྱེར་ནས། །གཡའ་གངས་བྲག་རིའི་གམ་དུ་བྲོས་ནས་ཀྱང༌། །འོད་གསལ་ཏིང་འཛིན་གྲུབ་པ་དོན་གཉེར་བའི། །སྐལ་བཟང་གྲོགས་རྣམས་མཉེས་པའི་དགའ་སྟོན་མཛོད། །ཚེ་འདི་མི་རྟག་ལ་ཁའི་ན་བུན་འདྲ། །སྐྱེ་འཆིའི་སྣང་ཚུལ་བར་སྣང་གློག་ལས་མྱུར། །འཁོར་བ་གང་ལ་བརྟགས་ཀྱང་དུཿཁའི་གཞིར། །ངེས་པས་མི་ཚེའི་ལྷག་མ་ཆུད་མི་གསོན། །ཧ་ཅང་ཐོས་པར་ཞེན་ཡང་གྲོལ་བ་མིན། །འཆད་རྩོད་རྩོམ་ལ་ཨ་འཐས་རློམ་སེམས་རྒྱུ། །དེ་ཕྱིར་འདུ་འཛིས་དབེན་པའི་བྲག་སྐྱིབས་སུ། །དབྱིངས་རིག་བསྲེ་བ་སྤྲང་པོའི་མདུན་མ་ཡིན། །འབྱུང་འགྱུར་ལུང་གི་རྔ་སྒྲ་མཐུ་ཆེ་བས། །འཚོ་བའི་འདུ་བྱེད་འཕྲོག་པའི་ཡ་མཱནྟ། །བོས་ཏེ་རིང་བོར་མི་ཐོགས་བཀུམ་ན་ཡང༌། །གོང་མའི་གྲུབ་མཐའ་སྙོགས་ནས་སོང་བར་ངེས། །ད་ལྟ་ལས་ཀྱིས་འབྲེལ་བའི་མཆེད་ལྕམ་དང༌། །ཕྱི་མཐར་


JLAZ012_Page_0456
[མ་དཔེ་གཟིགས་ན་འདིར་གནོན།]

བདག་ལ་དགའ་བའི་རྗེས་འཇུག་ཀུན། །གཅིག་པུར་སྙིང་པོའི་སྒྲུབ་པ་ལྷུར་ལེན་ལ། །ཁོ་བོའི་མྱོང་ཡིག་རྣམས་ལ་ནན་ཏན་གཟིགས། །དབང་ཆེན་མཁྱེན་བརྩེའི་འོད་ཟེར་ན་ཕྲ་ཡང༌། །གུ་རུས་བྱིན་བརླབས་ཀློང་ཆེན་ཐུགས་ཀྱིས་བཟུང༌། །ཐོས་བསམ་གོམ་པའི་ན་ཚོད་བརླིང་བ་དེས། །གདམས་པའི་གནད་ལ་འཕྱུགས་པ་མེད་པར་ངེས། །དབེན་པར་བག་ཡངས་སྤྱོད་པས་ལ་བཟླས་ཤིང༌།།གང་དྲན་ཐོལ་བྱུང་སྨྲས་པའི་མཐུ་བརྟས་ལས། །རེ་དང་དོགས་པའི་ཟོལ་གྱིས་མ་ཟློས་ཕྱིར། །ནོངས་ན་འཆགས་སོ་ཆོས་ཀྱི་དབྱིངས་སུ་མཉམ། །ལྷག་བསམ་དཀར་པོའི་ཆུ་ཁུར་ཞུ་བ་ལས། །མན་ངག་བདུད་རྩིའི་ཟིལ་མངར་བབས་པ་དེས། །ཉོན་མོངས་བག་ཆགས་ཚ་གདུང་བསལ་ནས་ཀྱང༌། །རང་སྣང་གདོད་མའི་མགོན་པོར་བྱང་ཆུབ་ཤོག། །།

གནས་ལུགས་རྡོ་རྗེའི་ཚིག་རྐང་།


JLAZ012_Page_0458
[མ་དཔེ་གཟིགས་ན་འདིར་གནོན།]

༂ གནས་ལུགས་རྡོ་རྗེའི་ཚིག་རྐང་བཞུགསཿ དཔལ་ཀུན་ཏུ་བཟང་པོ་ལ་ཕྱག་འཚལ་ལོཿ གཞི་ཡི་གནས་ལུགས་སྤྲོས་དང་བྲལཿ གཞི་སྣང་རིག་པ་ཆོས་ཀྱི་སྐུཿ ལམ་ལ་བྱ་རྩོལ་ཡེ་ནས་དགཿ དེ་ཉིད་མངོན་གྱུར་གྲོལ་ས་ཆེཿ འབྲས་བུ་གུད་དུ་བཅད་མ་ཡིནཿ འབྲས་ཉིད་རྒྱུ་རུ་ཡོད་པའི་དུསཿ ཆམ་གྱིས་གནས་པ་ཞི་གནས་ཡིནཿ ཐོལ་གྱིས་ཤར་བ་རིག་པའི་གདངསཿ ཧྲིག་གིས་རིག་པ་ལྷག་མཐོང་ཡིནཿ ཅེར་གྱིས་ཡལ་བ་གདོད་མའི་ངངཿ གཉུག་མར་གནས་པ་ཆོས་ཀྱི་སྐུཿ ཤེས་བཞིན་འཆར་བ་ལོངས་སྤྱོད་རྫོགསཿ གནས་འགྱུ་གཉིས་མེད་སྤྲུལ་པའི་སྐུཿ སྐུ་གསུམ་རིག་པ་དེ་ལ་ཟེརཿ ལྷོད་དེ་གནས་ལ་དེར་འཛིན་མེདཿ ཧྲིག་གེར་འགྱུ་བ་ངོས་བཟུང་བྲལཿ ལྷང་ངེར་གྲོལ་ལ་རྗེས་ཤེས་མེདཿ སྐུ་གསུམ་ལྷུན་གྲུབ་དེ་ལ་ཟེརཿ ལྟ་བ་མེད་ལ་བྱིང་རྒོད་བྲལཿ སྒོམ་པ་མེད་ལ་ལྷུམས་སུ་ཞུགསཿ སྤྱོད་པ་མེད་ལ་གཟའ་གཏད་བྲལཿ རྣམ་འབྱོར་དབང་ཕྱུག་དེ་ལ་ཟེརཿ ཐོལ་གྱིས་ཤར་བའི་རྣམ་རྟོག་དེཿ རིག་ཅིང་དེ་ཁའི་རྒྱུན་སྐྱོང་ནཿ གཤིས་ལ་ཤོར་བའི་ལྷག་མཐོང་ཡིནཿ མིང་ལ་རྗེས་ཐོབ་འདོགས་ན་ཐོགསཿ རྣམ་རྟོག་ཆོས་སྐུར་གྲོལ་བ་མིནཿ ཐད་ཀར་རྩ་གདར་ཆོད་པ་དགོསཿ ཡེ་ནས་རིག་པ་སྤྲོས་བྲལ་ལཿ ལྟ་སྒོམ་སྤྱོད་པའི་ཐ་སྙད་དངཿ


JLAZ012_Page_0459
[མ་དཔེ་གཟིགས་ན་འདིར་གནོན།]

དེར་འཛིན་གཞི་རྩ་མེད་པར་སངསཿ བཟང་རྟོག་ངན་རྟོག་ལུང་མ་བསྟནཿ གང་གི་ཕྱོགས་སུ་མ་ལྷུང་ཞིངཿ ཤར་གྲོལ་དབྱེ་བའི་མཁན་པོ་མེདཿ ཤེས་རིག་རང་ཚུགས་མ་ཤོར་ནཿ འདི་ལས་ལྷག་པ་གཞན་མ་དགོསཿ མཁས་བཙུན་བརྒྱ་དང་གྲུབ་ཐོབ་སྟོངཿ ལོ་པཎ་ཁྲི་དང་མན་ངག་འབུམཿ བསྟན་བཅོས་བྱེ་བ་ས་ཡ་དངཿ མཇལ་ཀྱང་ཐེ་ཚོམ་བཅད་མ་དགོསཿ ས་མ་ཡཿ དྷ་ཐིམཿ བུ་གཅིག་མཁྱེན་བརྩེའི་འོད་ཟེར་ལཿ ཤེས་རིག་ཀུན་ཏུ་བཟང་པོ་ཡིས། །བྱིན་རླབས་དགོངས་བརྒྱུད་ཚུལ་དུ་གནངཿ ཀུན་ལ་མ་སྟོན་སྙིང་གར་སྦོསཿ དེ་སྐད་འོག་མིན་བྲག་ཕུག་ཏུཿ ཆོ་འཕྲུལ་ཟླ་བའི་ཉེར་དྲུག་གིཿ མུན་མཚམས་མཁའ་འགྲོ་འདུ་བའི་ཚེཿ རིན་ཆེན་ཤོག་སྐྱའི་ལོགས་སུ་ཕབཿ སྙན་བརྒྱུད་ཟབ་མོ་ཨ་ཐམ་རྒྱཿ འདི་ཁོ་ནའོཿ འདི་ཁོ་ནའོཿ འདིའི་དོན་འགྲེལ་ཀུན་མཁྱེན་ཞལ་ལུངཿ ཿ

རིག་འཛིན་མཁའ་འགྲོ་དགྱེས་པའི་གསང་གཏམ། ཡིད་དཔྱོད་གྲུབ་མཐའ་འཇིག་པའི་ཐོ་ལུམ། སྙིང་ཕྱུང་ལག་མཐིལ་བཀྲམ་པའི་མན་ངག །གསང་བདག་དགའ་རབ་དཔའ་བོའི་ཐོལ་གླུ། ཀུན་མཁྱེན་ཞལ་ལུང་།


JLAZ012_Page_0460
[མ་དཔེ་གཟིགས་ན་འདིར་གནོན།]

རིག་འཛིན་མཁའ་འགྲོ་དགྱེས་པའི་གསང་གཏམ། ཡིད་དཔྱོད་གྲུབ་མཐའ་འཇིག་པའི་ཐོ་ལུམ། སྙིང་ཕྱུང་ལག་མཐིལ་བཀྲམ་པའི་མན་ངག །གསང་བདག་དགའ་རབ་དཔའ་བོའི་ཐོལ་གླུ། ཀུན་མཁྱེན་ཞལ་ལུང་བདུད་རྩིའི་ཐིགས་པ་ཞེས་བྱ་བ་བཞུགས།


JLAZ012_Page_0461
[མ་དཔེ་གཟིགས་ན་འདིར་གནོན།]

དཔལ་གདོད་མའི་མགོན་པོ་ལ་ཕྱག་འཚལ་ལོ། །གང་གི་རང་བཞིན་ལྟ་སྒོམ་སྤྱོད་འབྲས་དང༌། །བྱ་རྩོལ་འཛིན་ཞེན་རང་སངས་གཉུག་མའི་ཀློང༌། །ཐེག་པ་ཀུན་དང་མི་འདྲ་ས་ལམ་རྫོགས། །ཨ་ཏི་གསང་བ་ཆེན་པོར་ཕྱག་བགྱིའོ། །རིག་པའི་རྒྱུད་སྡེ་རང་བཞིན་རྫོགས་པ་ཆེའི། །རྣལ་མའི་དགོངས་པ་རིག་འཛིན་ཐུགས་ཀྱི་བཅུད། །མཁའ་འགྲོའི་སྲོག་ཏིག་ཀློང་ཆེན་རབ་འབྱམས་མཛོད། །འདི་ནི་སྙིང་དང་མིག་ལས་ངེས་པར་གཅེས། །དེང་སང་འདི་ན་ལོ་ཟླ་ཇི་སྙེད་དུ། །ལམ་ལ་ཞུགས་རློམ་ལྷག་མཐོང་རྟོགས་མེད་ཀྱིས། །མ་ཟིན་དཔྱོད་པའི་འདུ་ཤེས་གྲུང་པོ་ཡིས། །བསླུས་དག་ཡང་དག་ལམ་ལ་གཟུང་ཕྱིར་བཤད། །རང་ལྟ་མཆོག་འཛིན་ང་རྒྱལ་བདུད་ཀྱི་བློས། །


JLAZ012_Page_0462
[མ་དཔེ་གཟིགས་ན་འདིར་གནོན།]

མཐོང་མ་ཐག་ཏུ་སུན་འབྱིན་མ་སྨྲ་བར། །གཟུ་བོའི་བློ་ཡིས་ཅུང་ཟད་ཡིད་གཞུངས་ལ། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཞེས་གདམས་ཏེ། དེ་ལ་བགྲང་བྱའི་ཁུར་མང་པོར་དབེན་པའི་བརྟུལ་ཞུགས་ཀྱིས་དུབ་པའི་སྒོམ་ཆེན་པ་ཇི་སྙེད་ཅིག་དང༌། དེ་དག་གི་བོགས་དབྱུང་བའི་བཤེས་གཉེན་ངེས་གསང་རྫོགས་པ་ཆེན་པོའི་དོན་ལས་རིང་བ་ཕལ་གྱིས་སྒོམ་དོན་མཐར་ཐུག་གི་སྐྱེལ་སོ་གནས་ཀྱང་ངོ་ཤེས། འགྱུས་ཀྱང་ངོ་ཤེས་ན་དེ་ལས་གཞན་པའི་ཐུགས་དམ་ཞིག་མི་དགོས་ཞེས་གསུང་གཅིག་ཏུ་བསྐྱུར་བས་ཀ་དག་ཕྱོགས་ཡན་ཆེན་པོའི་དགོངས་པ་ལ་སྔ་འདྲིས་གཅིག་གིས་ཀྱང་ཉེ་རུ་མ་སོང་བར་ཧ་ཅང་རང་ཚོད་ཟིན་དྲག་ཅིང་མི་ཚེ་སྟོང་པར་


JLAZ012_Page_0463
[མ་དཔེ་གཟིགས་ན་འདིར་གནོན།]

འཛད་པ་ཕངས་ཆེས་ནས་དྲེགས་པ་དང་རྒྱགས་པ་སོགས་མ་ཡིན་པར་དོན་དམ་ལྷག་བསམ་གྱི་ཀུན་མཁྱེན་ཞལ་ལུང་ཞེས་བྱ་བའི་ཨུ་པ་དེ་ཤ་འདྲི་བ་ལ་ཡིད་ཕྱོགས་སོ། །དེ་ལ་སྙིང་ཏིག་ཐུན་མོང་མ་ཡིན་པའི་དགོངས་པ་རང་ལ་གནས་ལུགས་ཡེ་གྲོལ་རྒྱུ་འབྲས་ལས་འདས་ཤིང་ལྟ་སྒོམ་སྤྱོད་འབྲས་ཀྱི་ཕན་གནོད་མེད་པར་སྟོན་ཏེ། འོད་གསལ་གྱི་རྒྱུད་སེང་གེ་རྩལ་རྫོགས་ལས། རིག་པ་མ་བསྒོམས་ལྷུན་གྲུབ་ལ། །བསྒོམ་པ་བྱས་པས་ང་མི་རྙེད། །རང་བྱུང་ཡེ་ནས་རྩོལ་མེད་ལ། །དཔྱོད་པ་བྱས་པས་ང་མི་མཐོང༌། །ཆོས་སྐུ་ཡེ་ནས་མཐའ་བྲལ་ལ། །ལྟ་བ་བལྟས་པས་ང་མི་མཐོང༌། །ཞེས་གསུངས་ཤིང༌། ཁྱད་པར་རང་རིག་ཡེ་ཤེས་ཟང་ཐལ་དང་སེམས་རྟོག་མ་རིག་འཁྲུལ་གཟུགས་གཉིས་དབྱེ་ནས་རིག་པ་ཀློང་ཆེན་ཡངས་པའི་ངང་དུ་མཐའ་གྲོལ་རྗེས་མེད་དུ་བསྐྱངས་པས། སེམས་རྟོག་འགྱུ་འཕྲོའི་བག་ཆགས་ཐད་ཀར་དག་སྟེ་གོལ་ཤོར་ལས་འདས་པར་འཆད་ཀྱང༌། དབང་པོ་ཤིན་ཏུ་རྣོན་པོའི་གང་ཟག་ལས་སད་པར་ཙམ་གྱིས་མ་གཏོགས་ཇི་བཞིན་རྟོགས་དཀའ་བས། འདིར་ཆེད་དུ་སྨྲ་བའི་སྙིང་པོ་ངོ་བོ་ལ་འཕེལ་འགྲིབ་དང་བཟང་ངན་བྲལ་ཐོབ་མེད་ཀྱང༌། རྩལ་གྱི་རྣམ་རྟོག་ཁོ་ནས་འཁོར་འདས་བར་ལག་འབྱེད་ཅིང་སྒོམ་ཆེན་པ་བསླུ་བའི་ཕྱིར་དེའི་རང་བཞིན་ཞིབ་ཏུ་སྙད་པ་ལ། དེ་ཡང་རིམ་སྐྱེས་པའི་དབང་དུ་བྱས་ན།


JLAZ012_Page_0464
[མ་དཔེ་གཟིགས་ན་འདིར་གནོན།]

རྣམ་རྟོག་ལ་གྲོལ་ལུགས་གསུམ་དུ་པཎ་ཆེན་བི་མ་ལའི་རྗེས་འབྲངས་རྣམས་བཞེད་པའི། འདི་ལྟར་རྣམ་རྟོག་ངོ་ཤེས་པས་གྲོལ་བ་སྔར་འདྲིས་ཀྱི་མི་དང་འཕྲད་པ་ལྟ་བུར་གྲོལ་བ། རྣམ་རྟོག་ཁོ་རང་གྲོལ་བ་སྦྲུལ་གྱི་མདུད་པ་ཞིག་པ་ལྟར་གྲོལ་བ། རྣམ་རྟོག་ཕན་གནོད་མེད་པར་ཆོས་སྐུར་གྲོལ་བ་ཁང་སྟོང་གི་རྐུན་མ་ལྟ་བུར་གྲོལ་བ་ཞེས་མཚོན་དཔེ་རྣམ་གྲངས་གསུམ་གྱིས་བཤད་པའི་དང་པོ་ནི། ཤེས་པ་གསལ་སྟོང་རྩེ་གཅིག་ཏུ་གནས་དུས་དེའི་ངང་ལས་རྣམ་རྟོག་ཐོལ་གྱིས་འཆར་བ་རིག་པ་སྟེ་གཟུགས་མེད་ཀྱི་ལྷ་དང་རྗེས་མཐུན་པའི་མཉམ་གཞག་ དབྱེ་ན་དབང་པོའི་ཡུལ་རྒྱུན་འགགས་པ་ནམ་མཁའ་མཐའ་ཡས། གཉིད་འཐུགས་ལྟར་བྱུང་ཚོར་འགགས་པ་ཅི་ཡང་མེད་པ། ཤེས་ངོ་ལ་གསལ་སྣང་ངོ་ལ་འགགས་པ་རྣམ་ཤེས་མཐའ་ཡས། བདེ་བ་འབྲིང་ཙམ་ཡོད་ཀྱང་སྣང་ངོ་ལ་ཅི་ཡང་མེད་པར་རྟོགས་པ་ཡོད་མིན་མེད་མིན་ཏེ་རང་བཞིན་རྒྱས་པ་ཀུན་མཁྱེན་ཆེན་པོའི་ཟབ་དོན་རྒྱ་མཚོའི་སྤྲིན་ཕུང་གིས་དབྱེའོ། །དང་པོ་སྐྱེ་དུས་ནས་ཡོད་ཅིང༌། དེ་ལ་བལྟ་བྱའི་རྣམ་རྟོག་དང༌། ལྟ་མཁན་གྱི་དྲན་པ་གཉིས་སུ་ཡོད་པས་གཉིས་འཛིན་ནི་འཁོར་བའི་རྩ་བ་སྡུག་བསྔལ་གྱི་འབྱུང་ཁུངས་ས་ལམ་གྱི་བཀག་སོ་ཡིན་ཕྱིར་གནས་ཀྱང་ངོ་ཤེས་འགྱུས་ཀྱང་ངོ་ཤེས་པ་འདི་རྟོགས་པ་ཀློང་དུ་གྱུར་པའི་ཚེ་ནོར་ས་རྔམ་པོ་ཆེ་ཡིན་ནོ། །འོ་ན་སྔོན་གྱི་མཁས་གྲུབ་ཁ་ཅིག་གིས་དྲིས་ལན་དུ་འདི་ལྟར་བཤད་འདུག་པས་ཇི་ག་སྙམ་ན། དེ་ནི་ལས་


JLAZ012_Page_0465
[མ་དཔེ་གཟིགས་ན་འདིར་གནོན།]

དང་པོ་པའི་གང་ཟག་མོས་པས་སྤྱོད་པ་རྣམས་ལ་དྲན་པ་སྒོམ་གྱི་དངོས་གཞིར་བསྟན་ནས་འཁྲིད་པའི་སྐབས་ལ་དགོངས་ཀྱི་རྫོགས་ཆེན་གྱི་ལམ་ཅིག་ཆར་དུ་སྒྲ་ཇི་བཞིན་པར་བསྟན་པའི་སྐབས་མ་ཡིན་པར་ཤེས་པར་བྱ་ལ། དེ་ལྟ་མ་ཡིན་སྙམ་ན་ཀུན་མཁྱེན་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཀྱི་འགྲེལ་པ་པདྨ་དཀར་པོར། དེང་སང་གི་བསམ་གཏན་པ་ཁ་ཅིག་ད་ལྟའི་རིག་པ་འོག་འགྱུ་འཕྲེང་གསུམ་པོ་འདི་སྤྲོས་བྲལ་ཡིན། གང་ཤར་ཅི་འགྱུས་སེམས་སུ་ངོ་ཤེས་ན་དེས་ཆོག་ཅེས་སྐྱེ་འགགས་གྲངས་སུ་འདེབས་པ་རྣམས་ཀྱང་གནས་ལུགས་ཀྱི་དོན་དང་གནམ་ས་བས་ཀྱང་རིང་བ་ཡིན་ནོ། །ཞེས་གསུངས་པས་ཁྱེད་རང་ལ་ཆོས་སྐལ་མེད་པ་ཞིག་གོ། །གཉིས་པ་ནི། དེ་ལ་ཞེན་པ་མེད་པར་བསྐྱང་ཤེས་ན་བལྟ་བྱ་དང་ལྟ་མཁན་གྱི་འཛིན་སྟངས་ཞིག་ནས་མཉམ་གཞག་རྩེ་གཅིག་པས། ལྟ་མ་དགོས་པར་རྣམ་རྟོག་ཁོ་རང་གིས་ཁོ་རང་ངོ་ཤེས་ནས་རང་གྲོལ་དུ་སོང་བ་ལ་སྦྲུལ་གྱི་མདུད་པ་ལྟར་གྲོལ་བའི་ཐ་སྙད་བཏགས་ཤིང༌། ཆོས་སྐད་ཀྱི་དབང་དུ་བྱས་ན། ཐབས་ཀྱིས་ཟིན་པས་རྗེས་ཐོབ་མཚན་ཉིད་པ་ཡིན་ལ། འདི་ལ་ཐེག་པ་གཞན་དག་ནས་རྩིས་ཅན་དུ་བྱེད་ཀྱང་རྫོགས་ཆེན་པས་ངོ་ཤེས་མཁན་གྱི་འདུ་ཤེས་གྲུང་པོ་དེ་ཁ་གོལ་སྒྲིབ་ཏུ་བཤད་ནས་གཉིས་སྣང་གི་ཤེས་སྒྲིབ་ཕྲ་མོ་ཡོད་པར་འདོད་ལ། དེའི་ཕྱིར་


JLAZ012_Page_0466
[མ་དཔེ་གཟིགས་ན་འདིར་གནོན།]

གནས་ཀྱང་ངོ་ཤེས་འགྱུས་ཀྱང་ངོ་ཤེས་པ་འདི་ལ་རྟོགས་པ་ཀློང་དུ་གྱུར་པའི་རྣལ་འབྱོར་པས་དཔྱད་ན་རྣམ་འབྱེད་ཤིན་ཏུ་ཕྲ་བ་ཡོད་པས་འདི་ཡང་ཐེག་རྩེ་ཤིན་ཏུ་རྣལ་འབྱོར་གྱི་དགོངས་པ་མིན་ནོ། །འདི་ལ་གྲུབ་པའི་མཐའ་ཁྱད་པར་ཅན་ལ་ཐོས་བསམ་གྱིས་དཔྱོད་པའི་མིག་ཟུམ་ཞིང་རང་བཞིན་རྫོགས་པ་ཆེན་པོའི་དགོངས་པ་ཟང་ཀ་མ་བྲག་གི་སྐྱིབས་དང་མལ་གྱི་ནང་སོགས་དབེན་པར་མོས་གུས་ལམ་ལྷོངས་ཀྱི་ཕོ་ཚུགས་ཁོ་ནའི་མཐུ་ལས་ཀློང་ཆེན་དགོངས་པའི་གསང་མཛོད་མ་ལོངས་པའི་འཁྲུལ་ཞིག་ཏུ་རློམ་པ་ཁ་ཅིག་དང་རྟོག་གེ་པ་ན་རེ། འོ་ན་ངོ་ཤེས་མཁན་གྱི་རྟོག་པ་དེ་ཡང་མེད་ན་ཧ་ཤང་གི་ལྟ་བ་མུན་རྡོ་བ་དང་མཚུངས་སོ་ཞེས་ཟེར་རོ། །ལན་བཤད་པ་ཧ་ཤང་ལ་ཡུལ་སེམས་རྟོག་དང་ཡུལ་ཅན་རིག་པ་ཟང་ཀ་མ་འབྱེད་པའི་གནད་མེད་ནས། སེམས་རིག་སྐབས་མ་ཕྱེད་པའི་ཤེས་པ་ལུང་མ་བསྟན་གྱི་ངང་དུ་དྲན་བསམ་ཚོར་བ་ཐམས་ཅད་འགགས་ནས་བརྒྱལ་བའམ། གཉིད་འཐུག་ལྟ་བུའི་གཏི་མུག་ཕྱོགས་གཅིག་ཏུ་ལྷུང་ངོ་སྙམ་ཁྱེད་ཅག་གི་འདོད་པར་ཧ་ཤང་ལ་ལྟ་བ་ནོར་བ་འདི་ལྟ་བུ་ཞིག་ཡོད་དོ་སྙམ་པ་ཅི་ཡང་མི་སེམས་པ་སྒོ་ང་ལྟ་བུའི་ཕྱོགས་སྔ་ཇི་བཞིན་འདིར་བཀོད་ནས་བརྗོད་ཀྱི་གཞན་དུ་ན་སངས་རྒྱས་ཕལ་པོ་ཆེ་ལ་སོགས་པའི་གསུང་རབ་མང་པོ་ཧ་ཤང་གི་བློ་ལ་བཞུགས་ཤིང༌། ཀཱ་མ་ལ་ཤི་ལས་སྒྲ་རྩོད་དྲིས་པའི་ཚེ་ཕྱགས་ཤིང་ཀླད་ལ་བསྐོར་བའི་


JLAZ012_Page_0467
[མ་དཔེ་གཟིགས་ན་འདིར་གནོན།]

བརྡས་འཁོར་བའི་རྒྱུ་དྲིས་པ་ན་བེར་གྱི་ཐུལ་གཉིས་སྤྲུགས་ནས་གཟུང་འཛིན་གྱིས་ལན་བྱ་བའི་བརྡ་ལན་སྟོན་ནུས་པ་སོགས་དབང་པོ་ཤིན་ཏུ་རྣོན་པོའི་གང་ཟག་ཡིན་པར་བསྙོན་དུ་མེད་ལ། གང་དྲན་པ་མེད་ཅིང་ཡིད་ལ་བྱར་མེད་པ་ལ་སོ་སོར་རྟོག་པའི་ཤེས་རབ་སྤངས་པའི་ཉེས་པ་འཇུག་ན་སྐྱོན་འདི་རྒྱལ་བའི་ཡུམ་ལའང་འཇུག་པས་དོན་དམ་པར་ཧ་ཤང་གི་ལྟ་བ་ཡིན་མིན་རྫོགས་པའི་སངས་རྒྱས་ཁོ་ནས་མཁྱེན་གྱིས་གཞན་གྱིས་མ་ཡིན་ནོ། །པ་དང༌། རྫོགས་པ་ཆེན་པོ་ཡུལ་སེམས་རྟོག་ལ་ཡུལ་ཅན་ཡེ་ཤེས་ཀྱིས་རྟོག་དཔྱོད་མ་ཤོར་བས་རང་རིག་གི་དྲན་པ་ཤེལ་གོང་གཡའ་དག་པ་ལྟ་བུའི་ངང་དུ་ཀུན་རྟོག་བག་ལ་ཞ་ནས་རང་ངོ་ལ་བྲི་གང་དང་འཕོ་འགྱུར་མེད་པ་མཐའ་གྲོལ་ཀློང་ཡངས་ཆེན་པོའི་དགོངས་པ་ལ་བཞུགས་པ་གཉིས་མཚུངས་པའི་ཡུལ་མེད་ལ། ཁྱད་པར་རྟོག་གེའི་རིག་པ་ངན་སྐྱུགས་དང་འདྲ་བ་ལ་བདུད་རྩིར་མངོན་ནས་སྤྱོད་ཅིང་འོད་གསལ་རྡོ་རྗེ་སྙིང་པོའི་ལམ་ལ་གོམ་པའི་འདེགས་འཇོག་གཅིག་ཀྱང་མ་མྱོང་བར་རང་ས་ན་རྡོལ་ཐབས་སུ་ཟུག་པ་ཁ་ཅིག་གིས་ཐེག་པ་འདིའི་དགོངས་པ་ལ་ཧ་ཤང་མཚུངས་ཟླར་སྦྲན་ནས་སྤྱོ་བར་བྱེད་ན། རྒྱན་སྟུག་པོ་བཀོད་པའི་མདོ་ལས། སྟོང་པ་ཉིད་ཀྱི་ལྟ་ཐོས་ཀྱང༌། །དེ་ཉིད་ལྟ་བ་མ་ཞིག་ན། །གསོར་མི་རུང་བའི་ལྟ་ཅན་དེ། །སྨན་པས་བཏང་བའི་ནད་པ་བཞིན། །གསུངས་པ་འདི་ཁོ་ནའི་དགོངས་པ་ལ་ཤེས་རབ་གསུམ་གྱི་མིག་སྒྲུབས་ཤིག །གཞན་ཡང་ཡུམ་ལས།


JLAZ012_Page_0468
[མ་དཔེ་གཟིགས་ན་འདིར་གནོན།]

སྟོང་པ་ཉིད་ལ་གཟུགས་མེད། ཚོར་བ་མེད། འདུ་ཤེས་མེད། འདུ་བྱེད་མེད། རྣམ་པར་ཤེས་པ་མེད་སོགས་ཀྱི་དོན་དཔྱིས་ཕྱིན་པར་སོམས་ལ། སེང་གེའི་ཕྱི་ལ་གད་མཆོང་གཡང་མཆོང་མ་བྱེད་ཅིག་ཅེས་གདམས་སོ། །ད་ནི་ཚུལ་མ་ཡིན་པ་དེ་དག་བླ་ན་མེད་པའི་ལུང་གིས་རྒྱབ་སྐྱོར་ནས་བཟློག་པ་ནི། ཀུན་བྱེད་ལས། རང་བྱུང་ཡེ་ཤེས་ཡེ་ནས་ཤེས། །ཡུལ་ལ་རྟོགས་པའི་ཡེ་ཤེས་དེ། །ཡུལ་ལས་བྱུང་བས་རང་བྱུང་མིན། །ཞེས་དང༌། རྩལ་རྫོགས་ལས། ཡེ་ཤེས་རང་སྣང་ངོ་བོ་ནི། །ཡིད་ཀྱི་རྣམ་རྟོག་མེད་པ་སྟེ། །འདས་པའི་ཡུལ་དང་མ་འོངས་ཡུལ། །སྣང་བ་ཐད་ཀར་བཅད་པའོ། །ཞེས་གསུངས་ལ།དེ་དག་གི་རྒྱུད་དོན་བདེ་བླག་ཏུ་བཀྲལ་བ་ནི་གདོད་མའི་མགོན་པོ་དང་ཞལ་མི་གཉིས་པ་ཀུན་མཁྱེན་ངག་གི་དབང་པོས་ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་པ་ལུང་གི་གཏེར་མཛོད་དུ། དེང་སང་ཨ་ཏིར་རློམ་པའི་གླང་ཆེན་དག །འགྱུ་འཕྲོའི་རྟོག་ཚོགས་བྱང་ཆུབ་སེམས་ཡིན་ལོ། །རྨོངས་པ་འདི་ཀུན་མུན་པའི་ཀློང་ཉིད་ངང༌། །རང་བཞིན་རྫོགས་པ་ཆེན་པོའི་དོན་ལ་རིང༌། །རྩལ་དང་རྩལ་ལས་ཤར་བའང་མི་ཤེས་ན། །བྱང་ཆུབ་སེམས་ཀྱི་ངོ་བོ་སྨོས་ཅི་དགོས། །ཐེག་པ་འདིར་མོས་པ་ཙམ་དང་ལྡན་ཡང་ལེགས་པར་མཐོང་བའི་


JLAZ012_Page_0469
[མ་དཔེ་གཟིགས་ན་འདིར་གནོན།]

སྐལ་པ་ནི་སྐྲའི་ཉག་མ་ལ་བརྒྱལ་བགོས་པའི་ཆ་ཙམ་ཡང་མེད་ལ། ཀུན་ཏུ་བརྟགས་པའི་གཏི་མུག་གིས་ལུས་སྒྱིངས་ཤིང༌། ཕྲག་དོག་དང་ལོག་པར་རྟོགས་པའི་གསེར་གྱི་དྲ་བས་གདོང་བརྒྱན་པ། གླང་པོའི་ངང་ཚུལ་གྱིས་ཤེས་པར་རློམ་ལ་ཁ་གསག་དང་ལྡན་པ་ཁ་ཅིག་དག །རང་ཡང་ཉོན་མོངས་པ་གཏི་མུག་དང་ལོག་པའི་ལམ་དུ་ཞུགས་པར་མ་ཟད། ཐར་པར་ཕྱོགས་པའི་སྐྱེ་བོ་བསོད་ནམས་ཆུང་ངུ་ཉེས་པ་དག་དང་ཕྲད་པ་ཀུན་ལ་འདི་སྐད་དུ་འདོམས་ཏེ་གང་ཤར་ཆོས་སྐུའི་རང་བཞིན་རྟོག་པ་ཟ་ཁས་འདི་ཉིད་རང་བྱུང་གི་ཡེ་ཤེས་སོ། །ཞེས་པ་དང༌། ཏིང་འཛིན་ཡིད་བཞིན་མ་རིག་ཡིད། །ཅེས་པ་ལ་སོགས་པས་འགྲོ་བ་བསླུ་བའི་བཅོས་མ་ཉེ་བར་སྟོན་པས་གཞན་ལ་མེད་པའི་ཟབ་ཆོས་སུ་འཆད་པ་དག་མཐོང་སྟེ། འདི་ནི་ཐེག་པ་འདིའི་ཆོམ་རྐུན་པ་ཞིག་དེང་སང་བྱུང་བར་ཟད་མོད། འདི་ལྟར་རང་བྱུང་གི་ཡེ་ཤེས་ལས་ཐུགས་རྗེའི་རྩལ་གཡོས་ཏེ། ཡུལ་ལ་ཤར་བའི་ཤེས་པ་དེ་ཉིད་ལ།།རྩལ་ལས་ཤར་བའི་རོལ་པ་ཞེས་བཤད་ཀྱི། །རང་བྱུང་གི་ཡེ་ཤེས་ཉིད་མ་ཡིན་ཏེ། ཡུལ་ཡོད་མེད་ཀྱི་རྗེས་སུ་བྱེད་པའི་ཕྱིར་དང༌། ཐབས་ཀྱི་རྗེས་སུ་བྱེད་པའི་ཕྱིར་དང༌། ཐབས་ཀྱི་མ་ཟིན་ན་སྲིད་པར་འཇུག་པའི་ལས་དང་ཉོན་མོངས་སུ་བྱེད་པའི་ཕྱིར་དང༌། རྟོགས་པ་དང་དཔྱོད་པའི་རང་བཞིན་འཁོར་


JLAZ012_Page_0470
[མ་དཔེ་གཟིགས་ན་འདིར་གནོན།]

བའི་རང་ངོ་ལས་མ་འདས་པའི་ཕྱིར་རོ། །ཞེས་གསུངས་པ་ལྟར་ངོ་ཤེས་མཁན་གྱི་འདུ་ཤེས་གྲུང་པོ་དེ་རྟོག་དཔྱོད་ཀྱི་རང་བཞིན་ཁོ་ན་ཏེ། ནམ་མཁའི་རྣལ་འབྱོར་ལྷ་བཙུན་ཆེན་པོས་ཀྱང༌། སྒོམ་ཉམས་ཅན་གྱི་མདུན་སར། ལྷག་མཐོང་དང་བརྟག་དཔྱད་མ་ནོར་བ། ཞེས་གྲགས་ལ། དེ་བཞིན་དུ་གང་ཤར་གྱི་ངོ་བོ་ལ་ལྟ་བ་དང༌། རང་ངོ་འཛིན་པ་དང༌། གཤིས་ཐོག་ཏུ་གློད་པ་སྐད་དེང་སང་དར་ཆ་ཆེ་སྟེ་འདི་ཡང་ལམ་ཡང་དག་པ་མ་ཡིན་པའི་ཚུལ་ཀུན་མཁྱེན་བླ་མས། འདིར་ངོ་སྤྲོད་ལ་མ་འཕྲོད་པ་ཀུན་ཤར་ཐོག་དེར་གློད་པ་དང་ལྟ་བ་རང་ངོས་འཛིན་ཏེ། རྟོག་པ་ཉིང་འཁྲུལ་ཞེས་བྱ་བའི་གནད་མ་གོ་བ་ཡིན་ནོ། །ཤར་དུས་ནས་ཤར་ས་ཤར་མཁན་མེད་པའི་རིག་པ་རྗེན་སང་ངེ་བ་ཐུགས་རྗེ་འཆར་ཚུལ་མ་འགགས་པའི་ཡེ་ཤེས་སུ་གནས་པ་དེ་ངོས་བཟུང་བས། རྩ་བ་རང་བྱུང་གི་ཡེ་ཤེས་རང་ས་ན་རྗེན་པར་གནས་པ་དེ་ཞར་ལ་ངོས་ཟིན་པས། ངོ་བོ་དང་རང་རྩལ་གཉིས་སུ་མེད་པས་གཉིས་མེད་རང་བྱུང་གི་ཡེ་ཤེས་སྤྲོས་བྲལ་ཐིག་ལེ་ཉག་གཅིག་ཅེས་བྱ་སྟེ་ཞེས་གསུངས་སོ། །འོ་ན་འདིའི་སྐབས་སུ་སྒྲུབ་བྱེད་རྣམ་པར་དག་པ་དེ་གང་ཡིན་ཞེ་ན། གྲོལ་ལུགས་གསུམ་པ་རྣམ་རྟོག་ཕན་གནོད་མེད་པར་གྲོལ་བ་ཁང་སྟོང་གི་རྐུན་མ་ལྟ་བུ་དེ་ཉིད་རྣལ་འབྱོར་དབང་ཕྱུག་གི་ལམ་ཡིན་ཏེ་འདི་ལྟར་ཁང་པ་སྟོང་པའི་ནང་དུ་རྐུན་པོ་ཞུགས་ཀྱང་ཆོམ་རྐུན་ལ་ཐོབ་རྒྱུ་མེད། ཁང་སྟོང་ལ་ཤོར་རྒྱུ་མེད་པས་ཕན་གནོད་ཐོབ་ཤོར་གྱི་རང་བཞིན་ལས་ཡེ་ནས་


JLAZ012_Page_0471
[མ་དཔེ་གཟིགས་ན་འདིར་གནོན།]

འདས་པ་ལྟར། འདིར་རིག་པའི་ངོ་བོ་ཟང་ཐལ་རྟོག་དཔྱོད་ཀྱི་ཤེས་སྒྲིབ་དང་བྲལ་བའི་ཚུགས་མ་ཤོར་བ་དེ་ཉིད་སྒོམ་གྱི་སྙིང་རྡོའམ། གཉུག་མའི་དྲན་རིག་ཡིན་ལ། རྩལ་གྱི་རྣམ་རྟོག་ཇི་ལྟར་གཡོ་ཡང་དཔྱོད་བྱེད་ཀྱི་འདུ་ཤེས་དག་པས་ཤར་ས་ཤར་མཁན་མེད་པའི་རིག་སྟོང་རྗེན་པ་བློ་འདས་རྒྱ་ཡན་གྱི་ངང་དུ་ཆོས་སྐུ་འཕོ་མེད་རྒྱལ་པོའི་བཙན་ས་ཟིན་པའི་ཕྱིར་རྣམ་རྟོག་གི་ཕན་གནོད་མ་བྱས་པའི་སྒྲ་བཤད་བཞག་ལ། འདི་ནི་ཤིན་ཏུ་རྣམ་དག་བཤད་དུ་ཕངས་པའི་ཨུ་པ་དེ་ཤ་སྟེ། གནས་འགྱུ་གང་ཡིན་ཡང་འདྲ་སྟེ་ངོ་ཤེས་མཁན་ཁོ་རང་ཡུལ་མེད་མཐའ་བྲལ་དུ་མ་སངས་ན། རིག་པ་རང་གསལ་མལ་ལས་གཡོས་ཏེ། ཡུལ་ཐོག་ཏུ་ཤོར་འབྱམས་ལ་གོམས་པའི་འཁྲུལ་སྣང་མཐུ་བརྟས་པ་ཉིད་ལས་རྟོགས་པ་མཐོན་པོར་ཇི་ལྟར་རློམ་ཡང་འཁོར་བའི་ས་བོན་རྒྱུན་ཆགས་སུ་གནས་ཤིང༌། ད་ལྟ་ལམ་དུས་སུའང་དཔེར་མཚོན་ན་སྡུག་བསྔལ་དང་འཇིགས་སྐྲག་ལྟ་བུའི་རྣམ་རྟོག་དོས་དྲག་པ་ཤར་བའི་ཚེ་རྣམ་རྟོག་ཁོ་རང་ངོ་ཤེས་པ་ཙམ་གྱིས་ཁྱེད་ཀྱི་སྡུག་བསྔལ་དང་འཇིགས་སྐྲག་མཐའ་གྲོལ་དུ་སངས་པ་དེ་དགོད་འཆོར།


JLAZ012_Page_0472
[མ་དཔེ་གཟིགས་ན་འདིར་གནོན།]

རྣམ་རྟོག་དང་ལག་གདང་སྦྲེལ་བའི་སྒོམ་ཆེན་པ་དག་ལ་ངེས་གསང་རྫོགས་པ་ཆེན་པོའི་ལས་འབྲེལ་མེད་པས་ཅི་ཚུག་དྲག །ད་དུང་སྙིང་འགས་པ་འདྲ་བའི་གདམས་ངག་ཟབ་མོའི་གནད་བསྟན་གྱིས་ལོག་པའི་འདུ་ཤེས་རྒྱང་རིང་པོར་ཐོང་ལ་དར་ཅིག་ཉོན་དང་ཁོ་བོ་ནི་འདི་ལྟར་སེམས་སོ། །རྣམ་རྟོག་གི་ཕན་གནོད་མེད་པའི་གནད་ཀ་ནི་འོད་གསལ་རྫོགས་པ་ཆེན་པོའི་ཉམས་ལེན་མཐར་སོན་ཏེ་ཁྲེགས་ཆོད་ཀྱིས་ལུས་རྡུལ་ཕྲན་དུ་དེངས། སེམས་ཆོས་ཉིད་དུ་དེངས་ནས་ཀ་དག་གི་སར་གྲོལ་དུ་ཉེ་བ་དང༌། ཐོད་རྒལ་གྱིས་སྣང་བཞི་ཟད་པའི་ཚེ་ལུས་རྡུལ་ཕྲན་དུ་དེངས་པ་འོད་དུ་གསལ་བས་སྐྱེ་འཇུག་ལ་རང་དབང་ཐོབ་ཅིང་འཕོ་བ་ཆེན་པོའི་སྐུར་བཞེངས་སུ་ཉེ་བ་ན། དེའི་ལམ་རྟགས་སུ་ལུས་དུར་ཁྲོད་ཀྱི་རོ་ལྟ་བུར་འགྱུར་རོ། །ངག་བྲག་ཅ་ལྟ་བུར་འགྱུར་རོ། །སེམས་བར་སྣང་གི་ན་བུན་ལྟ་བུར་འགྱུར་རོ། །ཞེས་བཤད་པ་འདི་ཁོ་ནས་ཤེས་ཏེ། ལུས་དུར་ཁྲོད་ཀྱི་རོ་ལྟ་བུ་ནི་གཤེད་མ་བརྒྱས་བསྐོར་ཀྱང་ཉམ་ང་དང་བག་ཚ་བའི་ཀུན་རྟོག་རིག་པ་གཏད་མེད་ཀྱི་ངང་དུ་སངས་པ་ཡིན་ཏེ། འགོག་པའི་སྙོམ་འཇུག་ལྟ་བུའམ་དྲན་མེད་ནི་མ་ཡིན་ནོ། །ངག་བྲག་ཆ་ལྟ་བུ་ནི་རིག་གདངས་ཀྱི་ཚོར་བ་གྲ་མ་ཉམས་པས་གཞན་གྱི་རྗེས་སུ་བཟློ་ཞིང༌། སེམས་རྟོག་ཡུལ་དུ་འཛིན་པ་གཏན་ཟད་དུ་སོང་བས་ལན་འདེབས་པའི་འདུ་ཤེས་ཟད་པ་དེ་ལྟད་མོ་ཆེ། འཇའ་སྐུར་ཡལ་བའི་གང་ཟག་ལ་ཞལ་ཆེམས་ཡོད་པར་གླེང་བ་ནི། རྫོགས་པ་ཆེན་པོའི་རྒྱུད་དང༌།


JLAZ012_Page_0473
[མ་དཔེ་གཟིགས་ན་འདིར་གནོན།]

མན་ངག་གི་སྲང་ལ་བཏེག་ཚེ་བློ་ཆུང་དེ་དག་ཐོས་པ་ཆུང་བའི་སྐྱོན་དུ་ངེས་ལ། སྐུ་གདུང་འབར་བའི་རྒྱུད་ནས་ཐོག་རྒལ་གྱི་ཐིག་ལེ་གོམས་པའི་ཚད་བསྟན་པའི་སྐབས་སུ་ཡང༌། གཏམ་རྒྱུད་བརྗོད་པ་ཟད་པའི་ཕྱིར།།གཞན་ལ་སྨྲ་བྱེད་བསམ་པ་ཡང༌། །སྐྱེས་བུ་འདི་ལ་འབྱུང་མི་སྲིད། །སྒྲ་ཚིག་རྗེས་སུ་ག་ལ་འགྱུར། །ཞེས་དང༌། འོད་གསལ་རྡོ་རྗེ་སྙིང་པོའི་གནས་གསུམ་གསལ་བར་བྱེད་པ་ཚིག་དོན་རིན་པོ་ཆེའི་མཛོད་ལས་ཀྱང༌། ངག་བྲག་ཆའི་རྣམ་པ་ལྟར་བརྗོད་འཛིན་མེད་པར་སོང་བ་ནི་རྩ་གནས་ཀྱི་ཡི་གེ་རླུང་གི་ཐིག་ལེར་ཚུད་པ་ལས་བྱུང་བ་སྟེ། རྫོགས་པ་ཆེན་པོ་བརྗོད་དུ་མེད་པའི་དོན་ངག་གི་གྲགས་པ་ལ་ཞུགས་ཏེ། རབ་ཏུ་སྤྲོས་མེད་སྨྲ་བྱའི་ཡུལ་ལས་འདས་པའི་ཡེ་ཤེས་ལ་དབང་བའོ། །ཞེས་གསུངས་པས་ཀྱང་གོ་ལ་དེས་ན་ཐེག་པ་གཞན་གྱིས་བསྐྱེད་རིམ་ལ་གོམས་ནས་འདོད་གཟུགས་གྱི་ལྷ་དང་རྗེས་མཐུན་པར་རགས་ལུས་དྭངས་མར་གནས་འགྱུར་ནས། ཞིང་ཁམས་རྣམ་དག་ཏུ་སོང་སྟེ་ལམ་ལྷག་མ་བགྲོད་པ་ལ་འཇའ་ལུས་ཀྱི་མིང་བཏགས་པ་དང༌། རྫོགས་པ་ཆེན་པོའི་སྣང་བཞི་མཐར་སོན་པ་དགའ་རབ་རྡོ་རྗེ་ལྟ་བུའི་འཇའ་ལུས་གཉིས་གོ་འཕང་མཆོག་དམན་ཡོད་པ་མ་རྟོགས་པས་ནོངས་ཏེ། གནད་འདི་ནི་ཁོ་བོས་ཀུན་མཁྱེན་ཆེན་པོའི་མན་ངག་ལ་བརྟེན་ནས་རིག་སྟེ། འདིར་


JLAZ012_Page_0474
[མ་དཔེ་གཟིགས་ན་འདིར་གནོན།]

བཀོད་པ་ལ་རིག་འཛིན་གྱི་ས་ལ་བཞུགས་པའི་བླ་མ་དམ་པ་རྣམས་མཉེས་ནས་ཨེ་མ་ཧོ། ཨ་ལ་ལ་ཞེས་གསུངས་པར་གདོན་མི་ཟའོ། །སེམས་བར་སྣང་གི་ན་བུན་ལྟ་བུ་ཞེས་པ་ནི། ཀློང་དྲུག་པ་ལས། རང་རིག་བསམ་ངོ་བྲལ་བ་དང༌། །སེམས་ཀྱི་བྱུང་ཚོར་སྣ་ཚོགས་གཉིས། །འདྲའོ་འདྲའོ་ནོར་ར་རེ། །ཞེས་པ་ལྟར་རང་བཞིན་རྫོགས་པ་ཆེན་པོའི་དགོངས་པ་ཐུན་མོང་མ་ཡིན་པར་སེམས་དང་རིག་པ། ཀུན་གཞི་དང་ཆོས་སྐུ་ཐ་དད་དུ་དབྱེ་བའི་ཕྱིར། རིག་པའི་ཡེ་ཤེས་ཐིག་ལེ་ཉག་གཅིག་ཁྱད་ཆོས་དྲུག་དང་ལྡན་པའི་གཞི་དབྱིངས་ཀུན་ཏུ་བཟང་མོའི་ཀློང་ཡངས་པར་འཁྱིལ་ཞིང་སེམས་རྟོག་དཔྱོད་བྱེད་ཀྱི་འདུ་ཤེས་བར་སྣང་ལ་ན་བུན་ཡལ་བ་ལྟར་གཞི་མེད་དུ་དེངས་པའི་དགོངས་པ་སྟེ། གནས་ལུགས་རིན་པོ་ཆེའི་མཛོད་ལས་ཀྱང༌། ནམ་མཁའི་ངང་དུ་སྣོད་བཅུད་སྟོང་པ་བཞིན། །དགག་སྒྲུབ་ཆགས་སྡང་དང་པོའི་དབྱིངས་སུ་ཡལ། །འདིར་སོང་མེད་པའི་རྟོག་ཚོགས་རྗེས་མེད་དེ། །བར་མེད་རིག་པའི་ངང་དུ་ཕྱལ་ཡས་ནས། །རེ་དོགས་འཛིན་པའི་ཆོས་ལས་འདས་པ་ཡིན། །གཟུང་འཛིན་སེམས་ཀྱི་བརྟོད་ཕུར་ཐོན་པ་ཡིན། །འཁྲུལ་སྣང་འཁོར་བའི་གྲོང་ཁྱེར་སྟོངས་པ་ཡིན། །དེ་ཕྱིར་ཕྱི་རོལ་ཡུལ་སྣང་ཆོས་རྣམས་དང༌། །ནང་གི་རང་སེམས་འཆར་ཚུལ་རོལ་པའི་རྩལ། །ཐམས་ཅད་ཡེ་སྟོང་ཕྱལ་


JLAZ012_Page_0475
[མ་དཔེ་གཟིགས་ན་འདིར་གནོན།]

བར་སུས་ཤེས་པ། །ཕྱལ་བའི་གནད་དུ་ཆོས་རྣམས་བཀྲོལ་བ་ཡིན། །ཞེས་དང༌། འཛིན་པས་མ་བཅིངས་གཟུང་བའི་ཡུལ་ལས་འདས། །དམིགས་གཏད་ཆོས་མེད་ཧར་སངས་རྒྱ་ཡན་པ། །མ་ཡེངས་དྲན་པ་ཟད་པའི་དགོངས་པ་ནི། །མཁའ་ལྟར་ཕྱལ་ཡས་སྒོམ་དང་མི་སྒོམ་མེད། །འདི་ནི་ཀུན་བཟང་དགོངས་པའི་ཀློང་ཆེན་ནོ། །ཞེས་གསུངས་པའི་ཕྱིར་རོ། །རྒྱུ་མཚན་འདི་ལྟ་བུའི་རྡོ་རྗེའི་ཚིག་བཀྲོལ་ནས་གསལ་བར་བཤད་ཀྱང་ད་དུང་ཡིད་ཆེས་མི་སྐྱེ་བར་གྱུར་ན་ནི་གདོད་མའི་མགོན་པོ་མིའི་རྫུ་ལ་ཞུགས་པ་ཀུན་མཁྱེན་དྲི་མེད་འོད་ཟེར་གྱིས་འདི་སྐད་དུ་ཨ་ལ་ལ་འདིའི་ཐེག་པ་དང་གཞན་ལ་ཁྱད་པར་གནམ་ས་བས་ཀྱང་ཆེ་སྟེ། བསྟན་ཡང་མི་རྟོགས། བཤད་ཀྱང་མི་གོ། །ད་དུང་ཆོས་ཀྱི་ཁ་འཛིན་ཙམ་ལས་ངོ་སྤྲོད་སྔ་མའི་སྟེང་དུ་འཇོག་པ་རྣམས་ལ། རང་བཞིན་རྫོགས་པ་ཆེན་པོ་སྙིང་ཐིག་གི་ལས་འབྲེལ་མེད་པས་ཅི་བྱས་ཀྱང་སངས་རྒྱས་པ་ལ་སྔ་འདྲིས་གཅིག་གིས་ཉེ་རུ་མ་སོང་བ། ཡི་མུག་ལ་དགོད་འཆོར་བ་མཚར་ཆེའོ་ཞེས་གསུངས་པའི་དོན་ཐོག་ཏུ་ཕེབས་པ་ཉིད་དོ། །འདི་ལྟར་ཁོ་བོས་རྒྱུད་ལུང་དཔང་པོར་བཞག །ཉམས་མྱོང་དཔའ་གདེང་དུ་བསྐྱེད་ནས་རྫོགས་པ་ཆེན་པོའི་ལམ་དྲང་པོར་བཤད་ཅིང༌། རིག་པ་མ་ཡིན་པ་སུན་ཕྱུང་བ་ཡང་སྡང་ཞེན་གྱི་ཕྱོགས་སུ་རྒྱུག་པ་མ་ལགས་ཏེ། མདོ་སྡེ་


JLAZ012_Page_0476
[མ་དཔེ་གཟིགས་ན་འདིར་གནོན།]

རྒྱན་ལས། ཆོས་བཟང་རིག་པས་རྣམ་དཔྱོད་བསམ་པ་ཅན། །རྟག་ཏུ་བདུད་ཀྱིས་བར་ཆད་བྱེད་པ་མེད། །ཁྱད་པར་རྙེད་དང་གཞན་གྱི་ཕྱོགས་སུན་འབྱིན། །མི་འཕྲོགས་ཡོངས་སུ་སྨིན་པའི་མཚན་ཉིད་དོ། །ཞེས་གསུངས་པས་ན་དེང་སང་སྙིགས་མའི་དུས་ཐེག་པ་འདིའི་དགོངས་པ་ཀློང་དུ་གྱུར་ནས་གྲུབ་མཐའ་སློང་ཤེས་པའི་བཤེས་གཉེན་དཀོན་ཅིང༌། ཀུན་མཁྱེན་ཆེན་པོ་དངོས་དང་མཚུངས་པའི་རྒྱལ་ཚབ་རྫོགས་ཆེན་སྡེ་གསུམ་གྱི་དགོངས་པ་ཕྱིན་ཅི་མ་ལོག་པར་བཀྲལ་བ་མཛོད་བདུན་རྩ་འགྲེལ་དང་སྙིང་ཏིག་གི་དགོངས་གཏེར་ཆོས་སྐུའི་རིང་བསྲེལ་དུ་ལྷུན་གྱིས་གྲུབ་པའི་བསྟན་བཅོས་རྣམས་ཀྱི་གཞུང་ལ་བལྟ་བར་མི་ནུས་ཤིང་དཔྱོད་པའི་ཤེས་རབ་ཀྱིས་ཕོངས་པས། ཐེག་མཆོག་སྙིང་པོའི་ལྟ་བའི་ཉིང་ཁུ་ཡིད་དཔྱོད་ཀྱི་ལྟ་སྒོམ་དང་འདྲེས་ནས་ཆོས་སྐད་གྱ་གྱུར་སྨྲ་ཞིང་འཆལ་བར་ཤིན་ཏུ་ཕངས་ནས་ཚིག་ཉུང་དོན་གསལ་གྱི་མན་ངག་འདི་ལྟར་ཆེད་དུ་བརྗོད་པའི་ཕྱིར་བསོད་ནམས་ཀྱི་ཚོགས་ཀྱང་འཕེལ་ཏེ། རྩ་ལྟུང་གི་འགྲེལ་པར། ལྟ་བ་འོག་མ་གོང་མ་ལ་གཟུད་པ་དང་འདུལ་བའི་བསམ་པས་གཞན་དུ་གྲུབ་མཐའ་དམོད་པ་ནི་ཉེས་པ་མེད་དེ་བསོད་ནམས་ཀྱང་མང་དུ་འཕེལ་ལོ། །ཞེས་བཤད་ལ། དེའི་མཐུས་ཡེ་ཤེས་ཀྱི་ཚོགས་ཆེན་པོར་འཕེལ་བ་ནི་གདོན་མི་ཟ་བ་ཉིད་དོ། །དེ་ལྟར་ཡང་མན་ངག་འདི་ཉིད་ལྟ་བ་གོ་ཡུལ་རྒྱས་འདེབས་སུ་ཤོར་


JLAZ012_Page_0477
[མ་དཔེ་གཟིགས་ན་འདིར་གནོན།]

བའི་གང་ཟག་ལ་བསྟན་ན་བྱ་ཤོར་ཁ་ལྟ་དྲེད་པོར་འགྲོ་ཞིང༌། ལས་དང་པོ་པ་རྣམས་ནི་སོ་སོའི་རྒྱུད་ཚོད་ཉམས་དང་སྦྱར་ནས་རྣམ་རྟོག་ལམ་ཁྱེར་ལ་རིམ་པས་བསླབ་དགོས་ཕྱིར། འགའ་ཞིག་སྔངས་སྐྲག་སྐྱེས་ནས་འདོར་བའི་ཉེན་ཡོད་པས་ཁྱབ་གདལ་དུ་མི་སྟོན་པའི་བཀའ་རྒྱ་སྟོབས་བཅུ་མངའ་བ་ཉིད་ཀྱིས་གདམས་ཏེ་ཡུམ་བར་མ་ལས། རབ་འབྱོར་ཆོས་ཐམས་ཅད་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའོ་ཞེས་ལས་དང་པོ་པ་ཐེག་པ་ལ་གསར་དུ་ཞུགས་པ་དག་གི་མདུན་དུ་བརྗོད་པར་མི་བྱའོ། །དེ་ཅིའི་ཕྱིར་ཞེ་ན་སྔངས་ཤིང་སྐྲག་ནས་ལོག་པར་ལྟ་བས་འདོར་དུ་འོང་བའི་ཕྱིར་རོ་ཞེས་གསུངས་ལ། དེ་བཞིན་དུ་མུ་ཅོར་སྨྲ་བའི་རྟོག་གེ་བ་དག་ལའང་མན་ངག་འདི་དག་གི་ཟུར་ཙམ་ཡང་བསྟན་པར་མི་བྱ་སྟེ། རིན་པོ་ཆེ་སྤུངས་པའི་རྒྱུད་ལས། ཚིག་འདི་དག་ནི་ཉན་ཐོས་དང་རང་སངས་རྒྱས་ལ་སོགས་པའི་ནང་དུ་ཟུར་ཙམ་ཡང་བརྗོད་པར་མ་བྱེད་ཅིག །དེ་ཅིའི་ཕྱིར་ཞེ་ན། དེ་དག་རྣམས་ཀྱིས་ཚིག་འདི་ཀུན་ཐོས་པས། སྐྲག་པ་དང་སྔངས་པ་དང་བརྒྱལ་བར་འགྱུར་ཏེ། གསང་སྔགས་རྣམས་ལ་མི་མོས་ཏེ། ཡིད་ཕྱུང་ནས་སྐུར་པ་འདེབས་པས་དེའི་རྣམ་པར་སྨིན་པས་སེམས་ཅན་དམྱལ་བ་ཆེན་པོ་དེ་ཉམས་སུ་མྱོང་བར་གྱུར་པས་ན་བསྟན་ཅིང་ཐོས་པ་ལྟ་ཅི་སྨོས་ཏེ། རླུང་ཕྱོགས་ཙམ་དུ་ཡང་བརྗོད་པར་མི་བྱའོ། །གསུང་གི་རྡོ་རྗེས་གསོལ་པ། ཀྱེ་བཅོམ་ལྡན་འདས་ཉན་ཐོས་ལ་


JLAZ012_Page_0478
[མ་དཔེ་གཟིགས་ན་འདིར་གནོན།]

སོགས་པ་དེ་དག་ཀུན་དེ་ལྟར་འབྱུང་བ་དེ་ཅིའི་རྒྱུ་ལགས་ཞེས་དྲིས་སོ། །བཀའ་སྩལ་པ། ཉན་ཐོས་དང་རང་སངས་རྒྱས་རྣམས་ནི་བསྐལ་པ་གྲངས་མེད་ནས་གསང་སྔགས་ཀྱི་སྣོད་དུ་མ་གྱུར་ནས་བློ་ཆུང་བའི་ཕྱིར་ཏེ། དཔེར་ན་ཁབ་ཀྱི་མིག་ཏུ་རས་ཡུག་བརྫངས་པས་ཤོང་པ་མེད་ཅིང་འགྲོ་བའི་སྐབས་མེད་པ་དང་འདྲའོ། །ཞེས་གསུངས་པའི་དོན་ཐོག་ཏུ་བབ་ཕྱིར་ཤིན་ཏུ་གསང་བར་བྱ་ལ། དེ་ལས་གཞན་དུ་ཐེག་པ་འདི་ལ་མོས་པས་ཞུགས་ཤིང་ལམ་གྱི་གནད་མ་ལོངས་པའི་གྲུབ་པའི་དབང་ཕྱུག་ཆེན་པོ་ཆོས་ཉིད་ཟད་པར་ཐུགས་རྒྱལ་བ་རྣམས་ཀྱིས་འདི་ལ་གཟིགས་ཤིག །གཟིགས་ནས་ཀྱང་ཆོས་ཀྱི་དབྱིངས་ཅི་ཡང་མ་ཡིན་པའི་བདེན་པ་ཆེན་པོ་དང༌། རིག་འཛིན་བརྒྱུད་པ་དང་བཅས་པ་རྣམས་ཀྱི་ཐུགས་རྗེ་རྨད་བྱུང་དང༌། ནགས་ཁྲོད་ཀྱི་སྤྲང་པོ་ཀུ་སུ་ལུ་པ་བདག་གིས་ལྷག་བསམ་རྣམ་པར་དག་པའི་མཐུ་རྣམས་ལས། འཆིང་བ་མཐའ་དག་སྐད་ཅིག་ལ་གྲོལ་ཏེ་མྱུར་དུ་ཀུན་ཏུ་བཟང་པོའི་དགོངས་པ་བརྗོད་མི་ཤེས་པ་ལ་རེག་པར་གྱུར་ཅིག །གལ་ཏེ་སྐལ་བ་དམན་ལ་ལོག་ལྟ་ཆེ་ཞིང་རང་རྩིས་ཀྱི་དྲེགས་པས་རྒྱགས་པ་མཐའ་དག་གིས་མི་མཐོང་བར་རིག་འཛིན་བརྒྱུད་པ་དང་བཅས་པས་བྱིན་གྱིས་རློབས་ཤིག །ཨ་ལ་ལ་ཧོ། ཀློང་ཆེན་པོའི་མཁའ། སྙིང་ཆེན་པོའི་ཏིག །མིག་ཆེན་པོའི་འགྲིའུ། མཛོད་བདུན་གྱི་བཅུད་ལྟ་བུའི་ཤོག་དྲིལ་འདི་ཉིད་སྙིང་ཏིག་གཉན་པོའི་


JLAZ012_Page_0479
[མ་དཔེ་གཟིགས་ན་འདིར་གནོན།]

བཀའ་སྲུང་རྣམས་ལ་གཉེར་རོ། །ས་མ་ཡ། ས་མ་ཡ། ས་མ་ཡ། རྒྱ་རྒྱ་རྒྱ། ཧོ་ཧོ། སྣང་བ་ནི་གཏད་མེད་རིག་པ་ནི་ཡེ་གྲོལ། །ལྟ་སྒོམ་ནི་བྱར་མེད་ཚོགས་དྲུག་ནི་རང་ཡན། །དྲན་འཛིན་དང་གཉེན་པོར་ལྟོས་གཞག་ནི་མ་དགོས། །རྫོགས་ཆེན་གྱི་བྱ་བྲལ་ཆོས་ཟད་དུ་ཐལ་ཐལ། །ཐོས་བསམ་གྱིས་ཕོངས་པའི་བླུན་སྒོམ་ཀྱི་ཇོ་རྫུས།། རྒྱུད་ལུང་དང་མན་ངག་དགྲ་བོ་རུ་མ་མངོན། །ཐ་སྙད་ཀྱི་རྟོག་བཏགས་མུ་ཅོར་ལ་ཞེས་པས། །ཆོས་བརྒྱད་ཀྱི་གྲོང་དུ་མི་མགོ་ནི་མ་བསྐོར། །བྲག་ཕུག་ཏུ་སྙིང་པོའི་སྒྲུབ་པ་ལ་གཞོལ་བས། །རང་བྱུང་གི་སློབ་དཔོན་པདྨ་དང་ཡབ་ཡུམ། །ནམ་མཁའི་དང་རྣལ་འབྱོར་ཀློང་ཆེན་གྱི་བྱིན་རླབས། །སྙིང་དབུས་ཀྱི་མི་ཤིག་ཐིག་ལེ་རུ་བབས་ནས། །འབད་རྩོལ་ལ་མ་ལྟོས་ལྷོད་གྲོལ་ལ་ལངས་སོང༌། །སྣང་གྲགས་ནི་བརྡ་དང་དཔེ་ཆ་རུ་ཤར་མོད། །མགྲིན་པ་འདི་གདམས་པའི་བང་མཛོད་དུ་འདུག་གོ། །གདམས་ངག་ནི་ཚིག་དང་དཔེ་ཧྲུལ་ལ་མ་ལྟོས། །ཀློང་ཆེན་གྱི་དགོངས་པའི་གསང་མཛོད་ནས་རྡོལ་བྱུང༌། །གཟུང་འཛིན་གྱི་རྩ་རླུང་དབུ་མ་རུ་ཆུད་པས། །ཡེ་ཤེས་ལ་ཕོ་ཚོད་མ་དགོས་པ་ངོ་མཚར། །བྱིང་རྒོད་དང་འགྱུ་དྲན་གཏད་མེད་དུ་སངས་ནས། །རང་གྲོལ་ལ་གསལ་འགྲིབ་མེད་པ་འདི་སྐྱིད་དོ། །བསྒོམས་པའི་དང་སྡུག་བཙིར་བློས་བྱས་ཀྱི་ཅི་བྱེད། །མི་སྒོམ་པའི་བློས་བཏད་ཐ་མལ་དང་མ་ནོར། །སྒོམ་པ་དང་མི་སྒོམ་ཞེ་འདོད་ལས་


JLAZ012_Page_0480
[མ་དཔེ་གཟིགས་ན་འདིར་གནོན།]

ཐར་བའི། །ད་ལྟ་ཡི་ཤེས་རིག་གདོང་གཏད་འདི་ཧོ་ཧོ། །ལོ་ཟླའི་དང་དཀའ་སྤྱད་སྡུག་བཙིར་གྱི་ཞེ་ཡུས། །མངོན་ཤེས་དང་རྫུ་འཕྲུལ་གྲུབ་རྟགས་ལས་འདས་ཀྱང༌། །གཟུང་འཛིན་གྱི་རྩ་མདུད་སྙིང་ཁ་རུ་གྲོལ་བས། །རྫོགས་ཆེན་ཁོས་བསླུས་ཡོང་བསམ་པ་རང་མི་གདའ། །རྒྱ་གར་གྱི་རིག་འཛིན་པད་འབྱུང་དང་བི་མ།།བོད་ཡུལ་གྱི་བཻ་རོ་ཀློང་ཆེན་གྱི་དྲིན་ལས། །གངས་ཅན་འདིར་སྙིང་པོའི་བསྟན་པ་ནི་དར་ཟིན། །བྲག་ཕུག་ཏུ་ཆོས་ཉིད་ཟད་སར་རང་བསྐྱལ་གཏོང༌། །དབང་བསྐུར་དང་བཀླགས་ལུང་བཤད་འབྱམས་ཀྱི་ཁྲིད་རྒྱུན། །འཇུག་སྒོ་ལས་བསྟན་པའི་སྙིང་པོ་ནི་མ་ཡིན། །མོས་གུས་དང་སྒྲུབ་ཚུགས་ཞེ་རུས་ཀྱི་ངང་ནས། །དོན་བརྒྱུད་དེ་སྙིང་ལ་བབ་པ་ཞིག་དགོས་སོ། །སྒྲུབ་བརྩོན་གྱི་སློབ་མ་ཀློང་གྲོལ་དང་སྐུ་གསུམ། །དག་སྣང་གི་བློ་ཅན་འོད་གསལ་དང་རིག་གྲོལ། །རྐྱེན་ངན་དང་ལྟ་སྒོམ་རྡོ་རུས་སུ་ཐུག་པས། །གྲུབ་ཐོབ་དེ་གོང་མའི་བཤུལ་ལམ་ལ་མཆོངས་ཤོག །མདོ་མེད་ཀྱི་སྤྲང་པོ་འཁོས་ཁྱེར་དང་བྲལ་ཡང༌། །སྔོན་སྦྱངས་ཀྱི་ལས་འཕྲོ་ཅུང་ཟད་ཅིག་ཡོད་དྲག །ཨོ་རྒྱན་གྱི་རྒྱལ་ཚབ་དམ་པ་དང་མཇལ་ནས། །ཉམས་རྟོགས་ཀྱི་ཕ་ཕོགས་དངོས་གྲུབ་ཏུ་ཐོབ་བོ། །ཀུན་མཁྱེན་གྱི་བླ་མ་དྲི་མེད་དང་འོད་ཟེར། །ཀུན་རྟོགས་གི་སྣང་ཆར་ཞལ་མཇལ་དང་དབུགས་དབྱུང༌། །བརྡ་ཚིག་གིས་བྱིན་


JLAZ012_Page_0481
[མ་དཔེ་གཟིགས་ན་འདིར་གནོན།]

བརྒྱུད་སྙིང་དབུས་སུ་ཕབ་པས། །རྫོགས་ཆེན་གྱི་དགོངས་པ་འཁྲུལ་མེད་ཞིག་རྟོགས་སོ། །དེ་ཕྱིར་ན་འདི་རུ་ཀུན་མཁྱེན་གྱི་ཞལ་ལུང༌། །ཡིད་དཔྱོད་དང་འདྲེས་པའི་རྫོགས་ཆེན་གྱི་ལྟ་བ། །ངང་པས་ནི་ཆུ་དང་འོ་མ་ལ་ཇི་བཞིན། །སོ་སོ་རུ་འབྱེད་པའི་ཕོ་ཉ་རུ་མངགས་སོ། །འདི་ཀོས་ཀྱང་སྙིང་པོའི་བསྟན་པ་ལ་ཕན་ནས། །རི་སུལ་ཀུན་འཁྲུལ་ཞིག་བྱ་བྲལ་གྱིས་ཁེངས་ཤིང༌། །སྐྲ་སེན་ཙམ་སྙིགས་མའི་ལྷག་མ་རུ་བཞག་སྟེ། །དགའ་རབ་དང་འཇམ་དཔལ་བཤེས་གཉེན་ལྟར་གྱུར་ཤོག །ཅེས་པའང་དཔལ་གྱི་བསམ་ཡས་མཆིམས་ཕུའི་གནས་ཀྱི་ལྟེ་བ་འོག་མིན་བྲག །བྲེ་གུ་བརྩེགས་པའི་དགེའུ་འོག་གི་དབང་པོས་བསྲུང་བའི་ཕྱོགས། གསང་ཆེན་མཁའ་འགྲོའི་ཚོགས་ཁང་མེ་ཏོག་ཕུག་ཏུ་བཏགས་ཤིང་ངོས་འཛིན་བགྱིས་པའི་གནས་མཆོག་ག་ལ་བར། ལོ་གསུམ་སྙིང་པོའི་སྒྲུབ་པ་ལ་གཞོལ་བའི་ཚེ། འཁྲུལ་བའི་སྣང་ཆ་ལ་ཀུན་མཁྱེན་ངག་གི་དབང་པོའི་ཞལ་ཐེངས་གསུམ་མཇལ་ཞིང༌། གསུང་གི་བདུད་རྩིས་དབུགས་དབྱུང་ནས་རྒྱུད་བྱིན་གྱིས་བརླབས་པའི་སྐལ་བཟང་དཔག་ཏུ་མེད་པའི་མཐུ་ལས། མཉམ་རྗེས་རིས་མེད་དུ་སངས་ཤིང་ཐེག་པ་འདིའི་རྒྱུད་དང་མན་ངག་བསྟན་བཅོས་རྣམས་ཀྱི་གཞུང་ལ་ཕྱི་ནང་ཞུས་དག་ཕེར་བའི་ངེས་ཤེས་གཏིང་ཚུགས་པའི་སྤོབས་པ་ཅུང་ཟད་རྙེད་པ་ལ་བརྟེན་རང་བཞིན་རྫོགས་པ་ཆེན་པོའི་དོན་རྒྱུད་ཀྱི་དགོངས་པ་


JLAZ012_Page_0482
[མ་དཔེ་གཟིགས་ན་འདིར་གནོན།]

ཟབ་མོ་ནུབ་པར་ཕངས་ནས། པདྨ་དབང་ཆེན་མཁྱེན་བརྩེའི་འོད་ཟེར་ཞེས་བགྱི་བའི་ཀུ་སུ་ལུ་པས་རང་ལོ་སོ་གཉིས་པར་སླེབས་ཤིང༌། ཀུན་མཁྱེན་སངས་རྒྱས་གཉིས་པ་དེ་ཉིད་ཀྱིས་ཀྱང་སྒྲུབ་གནས་འདི་ཉིད་རྒྱ་གར་དུར་ཁྲོད་བསིལ་བའི་ཚལ་དང་མཚུངས་པར་བསྔགས་ནས་ཆུ་ཡོས་དགུང་ལོ་ལྔ་བཅུ་རྩ་དྲུག་བཞེས་པའི་རྒྱལ་ཟླ་བའི་ཚེས་བཅོ་བརྒྱད་ཀྱི་ཉིན། སྐུ་གདུང་ཉིད་ཆོས་སྐུའི་བཞུགས་སྟངས་ཀྱི་གདུང་ཆེན་ལྔ་དང་རིང་བསྲེལ་གྱི་འབྱུང་གནས་སུ་གཞག་ནས། འཇའ་འོད་ལ་སོགས་ཏེ་ཐེག་པ་མཆོག་གི་གདོད་མའི་ས་ལ་གྲུབ་མཐའ་སྙོགས་པའི་རྟགས་མཚན་ཕུལ་ཏུ་ཕྱིན་པས་འགྲོ་བ་རྒྱ་མཚོ་དད་པའི་ཞིང་ས་ལ་བཀོད་དེ། དགོངས་པ་གདོད་མའི་གཞི་དབྱིངས་སུ་རེ་ཞིག་ཐིམ་ནས་བགྲང་བྱའི་ཕུང་པོ་དུས་བུག་ཡོན་ཏན་གྱི་གྲངས་སུ་བརྒལ་བའི་དུས་ཀྱི་མཆོད་པར་ཉེ་བའི་ཚེ་ཡི་གེར་བཀོད་པ་ཤིན་ཏུ་གསང་བའི་སྡེ་ཚན་ནོ། །

སྙིང་ཏིག་སྒོམ་པའི་བྱ་བྲལ་གྱི། གོལ་ཤོར་ཚར་གཅོད་སེང་གེའི་ང་རོ།


JLAZ012_Page_0484
[མ་དཔེ་གཟིགས་ན་འདིར་གནོན།]

སྙིང་ཏིག་སྒོམ་པའི་བྱ་བྲལ་གྱི། གོལ་ཤོར་ཚར་གཅོད་སེང་གེའི་ང་རོ་བཞུགས།།


JLAZ012_Page_0485
[མ་དཔེ་གཟིགས་ན་འདིར་གནོན།]

ཡེ་ནས་མ་བསྒོམས་མ་བསྒྱུར་མ་བཅོས་ཤིང༌། །མ་ཡེངས་མ་བཟུང་རིག་པའི་སྙིང་པོ་ཅན། ། བཏང་བཞག་ཆེད་འཛིན་བློ་བྲལ་རྫོགས་པ་ཆེར། །རང་བབས་གཉུག་མའི་རྒྱུན་གྱིས་ཕྱག་བགྱིའོ། །འོད་གསལ་རྒྱུད་སྡེ་རྫོགས་པ་ཆེན་པོའི་བཅུད། །པདྨའི་ཐུགས་ཏིག་མཁའ་འགྲོའི་སྙིང་གི་ཁྲག །རིམ་དགུའི་ཐེག་པ་ཀུན་ལས་འདས་པའི་དོན། །དགོངས་བརྒྱུད་ཁོ་ནའི་མཐུ་ལས་བརྗོད་བྱ་མིན། །དེ་ལྟ་ན་ཡང་སྙིང་པོའི་དོན་མཆོག་ལ། །གཅིག་ཏུ་གཞོལ་བའི་སྒོམ་ཆེན་རྣམས་ཀྱི་དོན། །རྟོག་དཔྱོད་འཇུར་བཙིར་ཁྲིགས་བཅད་མ་ཡིན་པར། །ཀློང་ཆེན་དགོངས་པའི་མཛོད་ནས་འདི་བྱས་སོ། །དེ་ལ་འདིར་སྔོན་གྱི་སྨོན་ལམ་དག་པས་མཚམས་སྦྱར། རྟོགས་པ་དོན་གྱི་བརྒྱུད་པ་དང་ལྡན་པའི་བླ་མ་དམ་པ་


JLAZ012_Page_0486
[མ་དཔེ་གཟིགས་ན་འདིར་གནོན།]

མཚན་ཉིད་དང་ལྡན་པ་ཞིག་དང་མཇལ། དེ་ལ་རྩེ་གཅིག་གི་དད་འདུན་དྲག་པོས་ཡིད་ཁྱེད་ཤེས་ཀྱི་བློ་ཁེལ་བས་གསོལ་བ་འདེབས་ཤེས་ན་རྐྱེན་མོས་གུས་ཀྱིས་བྱས་ཏེ་བླ་མའི་རྟོགས་པ་སློབ་མ་ལ་འཕོས་ནས་རང་བཞིན་སྤྲོས་བྲལ་རྫོགས་པ་ཆེན་པོའི་གནས་ལུགས་ཚིག་དང་དཔེ་ཡིས་མི་མཚོན་ལ། གོ་མ་འགགས་ཤིང༌། རྒྱ་མ་ཆད། ཕྱོགས་སུ་མ་ལྷུང་བ་ད་ལྟའི་ཁྲེགས་ཆོད་ཀྱི་ཤེས་པ་སྤུ་མ་བརྗེས་མདོག་མ་བསྒྱུར་བ་འདི་ཀ་སྒོམ་ལ་ཁྲིལ་གྱིས་སོང་ནས་སྒོམ་རྒྱུའི་ཞེན་པ་དག །ལྟ་སྒོམ་གྱི་སྒྲོག་ལས་གྲོལ། ངེས་ཤེས་ནང་ནས་སྐྱེ། སྐྱེ་མཁན་ཡུལ་མེད་དུ་སོང༌། བཟང་རྟོག་གིས་ཕན་མ་བཏགས། ངན་རྟོག་གིས་གནོད་མ་བསྐྱལ། ལུང་མ་བསྟན་གྱིས་མགོ་མ་བསྐོར་བར་


JLAZ012_Page_0487
[མ་དཔེ་གཟིགས་ན་འདིར་གནོན།]

དབྱིངས་རིག་ཆམ་བརྡལ་དུ་སོང་ནས་ལམ་རྟགས་ཀྱི་ཡོན་ཏན་མངོན་དུ་འགྱུར་ཞིང༌། དེ་ལ་གོལ་ས་དང༌། ནོར་ས་དང༌། ཤོར་ས་ཞེས་བྱ་བའི་མིང་མེད་པ་ཞིག་ལགས་སོ། །དེ་ལྟ་ནའང༌། ཆོས་འདི་ཐེག་པའི་རྩེ་རྒྱལ་ཡིན་ཀྱང་གང་ཟག་ལ་མཆོག་དམན་འབྲིང་གསུམ་སྣ་ཚོགས་ཡོད་ཅིང་དབང་པོ་ཡང་རབ་ཤ་སྟག་ཚོགས་དཀའ་བས་གདུལ་བྱ་དང་འདུལ་བྱེད་ཀྱི་བར་དུ་འཛོལ་ཤོར་ནས་བསྒོམས་ཀྱང་ཡོན་ཏན་སྐྱེ་དཀའ་བའི་སྐྱོན་འདི་ནས་ཤོར་རོ། །དེ་ལ་རིམ་སྐྱེས་པའི་དབང་དུ་བྱས་ན་ཐུགས་དམ་ལ་གོ་བ་མྱོང་བ་རྟོགས་པ་གསུམ་ཐུན་མོང་ཐེག་པའི་ལམ་རིམ་དང་སྦྱར་ན། ཚོགས་ལམ་པས་གོ། སྦྱོར་ལམ་པས་མྱོང༌། མཐོང་ལམ་པས་རྟོགས་ཞེས་མཁས་གྲུབ་རྣམས་གསུངས་པ་འདི་ཤིན་ཏུ་བཀའ་བཙན་པར་སྣང་ངོ༌། །ཡོད་པ། དེང་སང་གི་དུས་སུ་ཕལ་ཆེར་གོ་བ་ལ་སྒོམ་རྣལ་མར་བཟུང་ནས་རྒྱས་འདེབས་སུ་ཤོར་བ་མང༌། དེ་ཇི་ལྟ་བུ་ཞེ་ན། ཤེས་པ་གསལ་སྟོང་གང་དུའང་མི་རྟོག་པའི་མཉམ་གཞག་ལྷོད་ལྷོད་འབོལ་འབོལ་འདི་སྐྱེས་དུས་བདེ་ཉམས་ཁོ་ན་ཤས་ཆེ། ངའི་སྒོམ་འདི་ཀ་ཡིན། འདི་ལས་ལྷག་པ་སུས་ཀྱང་མི་ཤེས། ངས་འདི་ལྟ་བུ་རྟོགས་སྙམ་པའི་རང་མཐོང་ཡང་སྐྱེ་བ་ཡོད་པས་འདིའི་ཚེ་བླ་མ་ཚད་ལྡན་གྱིས་མ་ཟིན་ན། ཇི་སྐད་དུ་རྫོགས་ཆེན་ནས། གོ་བ་ལྷན་པ་འདྲ་སྟེ་གོག་ནས་འགྲོ། །ཞེས་བཤད་པ་ལྟར། རྐྱེན་བཟང་ངན་དང་


JLAZ012_Page_0488
[མ་དཔེ་གཟིགས་ན་འདིར་གནོན།]

འཕྲད་ཚེ་ཆུ་དང་འོ་མ་སོ་སོར་ཕྱེ་བ་མང་ཞིང༌། དེ་ཡང་རྐྱེན་ངན་ལམ་དུ་ལྷོངས་པ་ནི་ཅུང་ཟད་སླ་མོད། བཟང་རྐྱེན་ལམ་དུ་ལྷོངས་པ་ཤིན་ཏུ་དཀའ་བས་རྟོགས་པ་མཐོན་པོར་རློམ་པ་དག་ཀྱང་ཚེ་འདིའི་ཆེ་ཐབས་འབའ་ཞིག་ལྷུར་ལེན་ཅིང༌། རྣམ་གཡེང་ལྷའི་བུའི་བདུད་ལ་ཞེན་པ་ཁོ་ནས་གང་བ་འདི་ནི་ཚོགས་དྲུག་རང་གྲོལ་གྱི་གནད་མ་རྟོགས་པས་ལན་ལ། དེང་སང་ནི་འདི་ལ་ཡ་མཚན་དང་གྲུབ་རྟགས་སུ་བྱེད་པས་འདི་སྨྲ་བ་པོ་བྱ་རོག་དཀར་པོར་ཟད་མོད། འོན་ཀྱང་སྙིང་ནས་དམ་ཆོས་བྱེད་པ་དག་འདིའི་ཚེ་མཚན་མ་ཅན་གྱི་ལྟ་བ་ཐོམ་ཡོ་རེ་བ་དེ་ལ་སྒོམ་གོ་མི་གཅོད་པར་ཐུན་བཞིར་བླ་མའི་རྣལ་འབྱོར་ལ་རྩལ་འདོན་ཅིང་དབང་བཞི་བླངས་རྗེས་ཐུགས་ཡིད་བསྲེས་པའི་ངང་ལ་རིག་པ་ཁ་ཡན་དུ་གློད་ལ་ཉམས་དེའི་ངོ་བོ་གཏད་མེད་ཁུངས་མེད་དུ་མ་སོང་བར་སྙིང་ལ་རྡོ་རུས་གཏུག་གོ། །དེ་བཞིན་དུ་ཉམས་མྱོང་ལ་ཞི་གནས་ཤས་ཆེ་བའི་སྟོང་ཉམས་དང༌། ལྷག་མཐོང་ཤས་ཆེ་བའི་གསལ་ཉམས་སོགས་མདོར་ན་འགྱུ་དྲན་གྱི་མཚང་རིག་ཅིང་སོ་སོར་རྟོག་པའི་ཤེས་རབ་ཀྱི་རྩལ་འབར་ནས་གནས་འགྱུ་གཉིས་ཀ་སྒོམ་དུ་ཁྱེར་ཤེས་པ་ཡོད་ཀྱང༌། ཤེས་མཁན་གྱི་ངོ་བོ་ལ་ང་བདག་གི་འཛིན་སྟངས་དམ་སྤྲིང་ངེ་བ་དང༌། བརྟག་དཔྱད་བསམ་གཞིགས་ཀྱི་གཤིས་ལ་ཤོར་བ་སོགས་ཤིན་ཏུ་ལྐོག་ཏུ་གྱུར་པའི་ཤེས་བྱའི་སྒྲིབ་པ་རྔམ་པོ་ཆེ་


JLAZ012_Page_0489
[མ་དཔེ་གཟིགས་ན་འདིར་གནོན།]

འདི་ན་ཡོད་པས་རྣམ་རྟོག་ལ་ཆོས་སྐུའི་མིང་འདོགས་ལ་མི་སྔ་བར་ད་ལྟར་གྱི་ཤེས་པ་གྲ་མ་ཉམས་ཤིང་ཟུར་མ་ཆགས་པ་འདི་ཀ་ལ་སྒོམ་མཁན་གྱི་གཉེན་པོ་དང༌། ལྟ་བའི་ཞེན་པས་མ་བཅིངས་པར་ཟང་ཐལ་ཁ་ཡན་དུ་ལམ་དུ་འཁྱེར་བ་ཁོ་ན་ལས་ལྷག་པའི་མཉམ་གཞག་དང་རྗེས་ཐོབ་ཀྱི་གོ་བ་ལ་བརྟག་དཔྱད་ཀྱི་བྱ་ཤོར་ན། ལམ་གོལ་ས་དང༌། ནོར་ས་དང༌། ཤོར་ས་གསུམ་གྱི་འཕྲང་ཡོད་དེ་དེ་ལ་དེ་དག་གི་ངོས་ཟིན་མ་ཤེས་ན། ཡིན་པ་དང་མིན་པའི་སྟངས་མི་ཕྱེད་པས་འདིར་དེ་དག་གི་མཚང་འཆད་ན། སྟོང་པ་ཉིད་ཅེས་པ་དེ་ཡེ་གདོད་མ་ནས་སྟོང་ཞིང་བདག་མེད་པ་སྤྲོས་པའི་མཐའ་བཞིའམ་བརྒྱད་དང་བྲལ་བ་ད་ལྟའི་ཤེས་པ་བློ་འདས་ཁ་ཡན་འདི་ཀ་རིག་པ་ལ་ཟེར་བ་དེ་མ་གོལ་བར། ཐེག་པ་འོག་མ་ལྟར་ཡོད་མེད་དགག་སྒྲུབ་ཀྱི་བློས་དཔྱད་པའི་རྗེས་ཀྱི་ཅི་ཡང་མེད་པའི་སྟོང་པའམ། རྒྱུད་སྡེ་འོག་མ་ལྟར་སྭ་བྷ་ཝའི་སྔགས་སོགས་ཀྱིས་སྟོང་པར་སྤྱངས་པའི་ཏིང་ངེ་འཛིན་གསལ་སྟོང་ཙམ་དུ་ཁས་ལེན་ཅིང་སྒྱུ་མ་ལྟ་བུའི་ལྟ་བ་ལྟར་མྱོང་ན་ནོར། དེ་བཞིན་དུ་གཞི་གནས་ནི་ཕྲ་རགས་ཀྱི་རྣམ་རྟོག་རང་སར་ཞི་སྟེ། སེམས་ཉིད་འགྱུ་དྲན་གྱི་རླབས་དང་བྲལ་ནས་དྭངས་སེང་ངེ་གནས་པའི་ཆ་རང་རིག་རང་གསལ་དེ་ཡིན་པ་མ་གོ་བར་གནས་པ་དྲན་མེད་ཧད་པོ་ལ་གོ་ན་ནོར། ལྷག་མཐོང་ནི་གནས་འགྱུ་གཉིས་ཀ་རང་ངོ་རིག་པའི་ཤེས་


JLAZ012_Page_0490
[མ་དཔེ་གཟིགས་ན་འདིར་གནོན།]

པའི་ངང་གདངས་གསལ་རིག་འཛིན་མེད་འདི་ཀ་ཡིན་པ་ལ། དེ་མ་གོ་བར་གནས་འགྱུ་ལ་བརྟག་དཔྱད་བྱེད་པའི་བློ་དང་ནོར་ས་ཡོད། མཉམ་གཞག་རྗེས་ཐོབ་ཅེས་པ་ལ་བཞེད་ལུགས་སྣ་ཚོགས་ཡོད་ཀྱང༌། རྫོགས་ཆེན་རང་སྐད་དུ་གང་ཤར་གྱི་ངོ་བོ་དྲན་པའི་རྩིས་ཟིན་བཞིན་པའི་ངང་དུ་གནས་པ་ལ་མཉམ་གཞག་དང༌། དེ་ཉིད་ཤེས་བཞིན་ཀྱི་ངང་དུ་སྤྲུལ་བསྒྱུར་སོགས་འགྱུར་བའི་ཆ་དེ་རྗེས་ཐོབ་ཡིན་པ་མ་གོ་བར། ལྟ་སྟངས་ཀྱི་སྟོང་པ་ལ་རྩེ་གཅིག་ཏུ་འཇོག་པ་ལ་མཉམ་གཞག་དང༌། དེ་ལས་ལངས་ནས་གང་ཤར་སྒྱུ་མ་ལྟ་བུའི་སྟོང་ཉིད་ཀྱི་རྒྱས་འདེབས་བྱེད་པ་ལ་རྗེས་ཐོབ་ཏུ་འདོགས་པ་ནོར། ཡེངས་མེད་ནི། འཁྲུལ་འབྱམས་ཀྱི་རྣམ་རྟོག་འོག་འགྱུར་ཤོར་བ་དང་ལུང་མ་བསྟན་དུ་མ་སོང་བར་ཡང་དག་གཉུག་མའི་དྲན་པ་ལ་ཟེར་གྱིས་ཡེངས་ཀྱི་དོགས་པའི་ཟོན་འཇུག་པ་དང༌། སྡུག་བཙིར་འཇུར་དྲན་གྱིས་བཅིངས་ན་ནོར། ཐ་མལ་གྱི་ཤེས་པ་ནི་ད་ལྟའི་ཤེས་པ་སྐྱོན་ཡོན་གང་གིས་ཀྱང་མ་བསླད་པའི་རང་བབས་འདི་ཀ་རིག་པའི་རྒྱུན་གྱིས་སྐྱོང་བ་ལ་ཟེར་བ་མ་གོ་བར། འཇིག་རྟེན་ཐ་མལ་གྱི་རྣམ་རྟོག་རང་རྒྱུད་པ་ལ་ངོས་འཛིན་པ་ནོར། སྒོམ་མེད་ནི་གནས་ལུགས་ལྷུམས་སུ་ཞུགས་ནས་སྒོམ་མི་སྒོམ་གྱི་ཞེན་པ་དག་སྟེ་སེམས་ལ་བཟོ་བཅོས་དང་དམིགས་གཏད་གང་ཡང་མེད་པར་ཁྱབ་གདལ་གྱི་དྲན་


JLAZ012_Page_0491
[མ་དཔེ་གཟིགས་ན་འདིར་གནོན།]

པའི་མཁར་ཚུགས་པ་ལ་ཟེར་གྱིས། བློས་བཏང་བའི་བཏང་སྙོམས་ཐ་མལ་དུ་སྡོད་པའམ། ཅི་ཡིན་འདི་ཡིན་མེད་པའི་ལུང་མ་བསྟན་དུ་རྒྱ་འབྱམས་ན་ནོར། གང་ཤར་སྐྱོང་བ་ཟེར་བ་དེ། གང་ཤར་ཀྱི་རྣམ་རྟོག་དེ་ལ་ཅེར་གྱིས་བལྟས་ནས་དགག་པ་ཡང་མ་ཡིན། དེ་ལ་བརྟག་གཞིག་བྱེད་པ་ཡང་མ་ཡིན། དེའི་རྗེས་སུ་འབྲང་བ་ཡང་མ་ཡིན་པར་རྣམ་རྟོག་ཤར་མཁན་ཁོ་རང་གི་ཐོག་ཏུ་གློད་ནས་གནས་འགྱུ་ཟང་ཐལ་དུ་སྐྱོང་བ་ལ་ཟེར་བ་མ་གོ་བར། གང་ཤར་རང་དགར་རྗེས་སུ་འབྲང་ཞིང་རྟོག་དཔྱོད་བྱེད་ན་ནོར། དེ་བཞིན་དུ་གོལ་ས་གསུམ་ནི། བདེ་བ་ལ་ཞེན་ན་འདོད་ཁམས་ཀྱི་ལྷར་སྐྱེ། གསལ་བ་ལ་ཞེན་ན་གཟུགས་ཁམས་ཀྱི་ལྷར་སྐྱེ། མི་རྟོག་པ་ལ་ཞེན་ན་གཟུགས་མེད་ཀྱི་ལྷར་སྐྱེ་བས་གོལ་ས་ཞེས་བྱ་ལ། དེའི་ངོས་འཛིན་དང་ནོར་ས་བཤད་ན། བདེ་བ་ཞེས་བྱ་བ་དེ་རྩ་བའི་སྡུག་བསྔལ་ཆེན་པོ་གསུམ་གྱིས་མ་བསླད་པར་གནས་ལུགས་དེའི་ངང་ལ་འབྲལ་མི་ཕོད་པ་ལྟ་བུའི་དགའ་བདེའི་ཉམས་འཆར་བ་ལ་ཟེར་གྱིས། ཟག་བཅས་འདོད་ཆགས་ཀྱི་བདེ་བ་ལྟ་བུའམ། ཡུལ་རྐྱེན་གྱིས་བསྒྱུར་བའི་སྐྱིད་སྣང་དང་དགའ་སྤྲོའི་རྣམ་རྟོག་འཆར་བ་ལྟ་བུ་ལ་ཟེར་བ་མ་ཡིན། གསལ་བ་ཞེས་པ་དེ་རྨུགས་པའམ་བྱིང་འཐིབས་ལྟ་བུའི་བགེགས་ཀྱིས་མ་བསླད་པར་རིག་པའི་ངར་ཆའམ་འཆར་སྒོ།


JLAZ012_Page_0492
[མ་དཔེ་གཟིགས་ན་འདིར་གནོན།]

འགག་མེད་དུ་གསལ་བ་ལ་ཟེར་གྱིས། ཡུལ་སྣང་གི་ཁ་དོག་བཟོ་དབྱིབས་སོགས་མཚན་བཅས་ཀྱི་འཆར་སྒོ་འཁྲུལ་སྣང་གི་རང་གཟུགས་ལ་ཟེར་བ་མ་ཡིན་ནོ། །མི་རྟོག་པ་ཡང༌། རྣམ་རྟོག་མི་འགྱུ་དགུ་འགྱུ་ཨ་འཐས་འཁྲུལ་རྟོག་གི་གཡོ་འཁྲུགས་དང་བྲལ་བའི་རྟོག་མེད་ནམ་མཁའ་ལྟ་བུ་ལ་ཟེར་གྱིས། དྲན་མེད་དུ་བརྒྱལ་བ་ལྟ་བུའི་ཚོར་བ་འགགས་པའམ་གཉིད་འཐུག་ལྟ་བུའི་མུན་ནག་ལ་ཟེར་བ་མ་ཡིན་ནོ། །མདོར་ན་ཉམས་གསུམ་པོ་འདི་ཡང་ལམ་རྟགས་ཀྱི་འཆར་ཚུལ་ཙམ་དུ་ཤུགས་འབྱུང་དུ་བྱུང་བ་ཡིན་པ་མ་རྟོགས། དེ་ཡོད་དུ་རེ་ནས་ཆེད་དུ་སྒོམ་པ་དང༌། བྱུང་བ་ལ་སྒོམ་རྣལ་མར་བཟུང་ནས་ཞེན་ཅིང་ཆགས་ན་ཁམས་གསུམ་དུ་གོལ་བའི་རྒྱུ་ལས་མ་འདས་སོ། །དེ་བཞིན་དུ་ཤོར་ས་བཞི་ལ་སྟོང་པ་ཉིད་ཤེས་བྱའི་གཤིས་ལ་ཤོར་བ། སྟོང་པ་ཉིད་ལམ་དུ་ཤོར་བ། སྟོང་ཉིད་གཉེན་པོར་ཤོར་བ། སྟོང་ཉིད་རྒྱས་འདེབས་སུ་ཤོར་བ་དང་བཞི་ཡོད་ཅིང་དེ་དག་རེ་རེ་ལའང་ཡེ་ཤོར་དང་འཕྲལ་ཤོར་གཉིས་སུ་དབྱེ་བར་བཤད་ཀྱང༌། མདོར་ཧྲིལ་གྱིས་དྲིལ་ན་དོན་དམ་པའི་སྟོང་ཉིད་ཀྱི་ངོ་བོ་གདོད་ནས་རྣམ་པར་དག་པ་བྱས་ཆོས་དང་བློས་བཏགས་ཀྱི་སྒྲོག་ལས་གྲོལ་བ་ད་ལྟའི་རིག་པ་ཀ་དག་ཕྱོགས་ཡན་ཆེན་པོའི་གནད་མ་གོ་བར། སྣང་བ་ལ་སྟོང་པས་རྒྱས་


JLAZ012_Page_0493
[མ་དཔེ་གཟིགས་ན་འདིར་གནོན།]

འདེབས་ལྟ་བུའི་སྟོང་པ་ལོགས་ནས་བསྒྲུབ་ན་གཤིས་ལ་ཤོར་བའོ། །དེ་བཞིན་དུ་རང་རིག་ཐ་མལ་ཤེས་པའི་ལམ་ཁྱེར་ལ་ཡིད་མ་ཆེས་ཤིང་རྒྱུ་འབྲས་དབྱེར་མེད་ཀྱི་རང་བཞིན་ཡེ་ནས་ལྷུན་གྲུབ་ཏུ་ཚང་བ་མ་ཤེས་པར། ལམ་སྟོང་ཉིད་སྒོམ་པས་འབྲས་བུ་ཆོས་ཀྱི་སྐུ་གཞན་ནས་འབྱུང་དུ་རེ་ནས་འབད་པས་བློས་བཏགས་ཏེ་སྒོམ་པ་ནི་ལམ་དུ་ཤོར་བའོ། །ཉོན་མོངས་པ་དང་རྣམ་རྟོག་གང་ཤར་ཡང་དེ་ཁའི་ངོ་བོ་ཡེ་ནས་སྟོང་པ་ཉིད་ལས་མ་འདས་པས་སྤང་རྒྱུའི་ཉོན་མོངས་དང༌། གཉེན་པོའི་སྟོང་ཉིད་གཉིས་སུ་མ་དགོས་པར་སྤང་བྱ་ཁོ་རང་རིག་པས་ངོས་ཟིན་པ་དང་མཉམ་དུ་སྦྲུལ་གྱི་མདུད་པ་ཞིག་པ་ལྟར་རང་གྲོལ་དུ་སོང་བའི་གནད་མ་གོ་བར། སྤང་བྱའི་རྣམ་རྟོག་དང་ཉོན་མོངས་ཀྱི་སྟེང་དུ་གཉེན་པོའི་སྟོང་ཉིད་ལོགས་སུ་བསྒོམ་དགོས་ན་གཉེན་པོར་ཤོར་བའོ། །རྒྱས་འདེབས་ལ་ཤོར་བ་ནི་སྤྲོས་བཅས་དང་སྤྲོས་མེད་གང་ཡིན་ཀྱང་ཡེ་ནས་ཀློང་ཆེན་ཀུན་ཏུ་བཟང་མོའི་མཁའ་དབྱིངས་སུ་གསལ་སྟོང་ཟུང་འཇུག་ཆེན་པོར་ལྷུན་གྲུབ་ཏུ་མ་ཤེས་པར་ཨ་འཐས་ཀྱི་སྒོམ་མཁན་དང་དམིགས་མེད་དུ་སྦྱོང་བའི་འཛིན་སྟངས་ཟུང་དུ་མ་ཆུད་པས་ཐབས་ཤེས་ཡ་བྲལ་བ་དང༌། ཐ་མལ་གྱི་རིག་པ་བློ་འདས་ཀྱི་རྒྱུན་དམིགས་མེད་ཀྱི་བྱ་རས་མི་སྐྱོང་བར་ཐོག་མའི་གོ་ཡུལ་དེ་ཡིད་ལ་བཞག་ནས་བསྒོམ་བྱ་སྒོམ་


JLAZ012_Page_0494
[མ་དཔེ་གཟིགས་ན་འདིར་གནོན།]

བྱེད་མེད་དོ། །ཐམས་ཅད་སྟོང་པ་ཉིད་དོ། །ཐམས་ཅད་ཆོས་སྐུའོ། །ལས་འབྲས་མི་བདེན་ནོ། །བློ་ཡིན་ནོ། །རྣམ་རྟོག་ཡིན་ནོ། །གང་ཡང་མ་གྲུབ་བོ་ཞེས་ཐག་ཆོད་ཀྱི་སྟོང་ལྟས་རྒྱས་འདེབས་པ་ལ་ཟེར་གྱིས་འདི་ནི་དེང་སང་ཤིན་ཏུ་མང་ངོ༌། །མདོར་ན་སྒོམ་བདག་པོའི་ལག་ཏུ་འཕྲོད་ནས་རྣམ་ཀུན་མཆོག་ལྡན་གྱི་སར་བགྲོད་པ་ལ་ཤོར་གོར་ནོར་ས་གསུམ་གྱི་བསྐུངས་ས་དང་འཕྲང་ཤིན་ཏུ་དོག་པས་ཉམས་མྱོང་དེ་དག་ལ་བརྡར་ཤ་མ་ཆོད་ན་ཁ་ཁྱེར་དང་ཚིག་ཁྱེར་མཁས་ཀྱང༌། ཇི་སྐད་དུ་རྫོགས་ཆེན་ནས། ཉམས་ན་བུན་འདྲ་སྟེ་ཡལ་ནས་འགྲོ། །ཞེས་བཤད་པ་ལྟར་ཡུལ་གྱི་རྐྱེན་བཟང་ངན་ཕྲན་བུས་ཀྱང་སྒོམ་ཆེན་པ་བསླུས་ནས་རྐྱེན་ཐོག་ཏུ་འཚོལ་བ་དེས་ལེན་པར་གདའ་སྟེ། དེའི་ཕྱིར་གེགས་སེལ་བོགས་འདོན་གྱི་གནད་ཁྱད་པར་ཅན་གྱིས་མ་ཟིན་ན་མི་དང་མ་འཕྲད་པའི་བཅད་རྒྱ་དམ་པོ་བྱེད་པ་དང༌། སྡུག་བཙིར་བྱས་ཡུས་ཅན་གྱི་སེམས་འཛིན་ལུས་གནད་དམ་པོས་འཆིང་བ་དང༌། ལྷ་སྒོམ་པ་དང་སྔགས་བཟླ་བ་དང༌། རྩ་རླུང་སྒོམ་པ་ལ་སོགས་སྡུག་པོ་སྤུས་བཙལ་ནས་ཉོས་པ་གཅིག་པུས་ཐར་པ་བྱང་ཆུབ་ག་ལ་ཐོབ་སྟེ། འཕགས་པ་སྡུད་པ་ལས། གང་ཞིག་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱིས་གང་བར་ལོ་མང་བྱེ་བར་གནས་བྱས་ཀྱང༌། །དབེན་


JLAZ012_Page_0495
[མ་དཔེ་གཟིགས་ན་འདིར་གནོན།]

པ་འདི་མི་ཤེས་པའི་བྱང་ཆུབ་སེམས་དཔའ་ནི། །ལྷག་པའི་ང་རྒྱལ་རྙེད་ནས་འགྲོ་བར་གནས་པ་ཡིན། །ཞེས་གསུངས་སོ། །དེའི་ཕྱིར་ན་གང་ཤར་ལམ་འཁྱེར་གྱི་གནད་ཤེས་ནས་ལུས་ཀྱི་མཚམས་ཁང་དུ་སེམས་ཀྱི་སྒྲུབ་པ་པོ་དབེན་པར་གནས་པའི་སྒྲུབ་པ་ཁོ་ན་ལས་ཆོད་ཆེ་བའི་ལམ་མེད་པས་ལོ་མཚམས་ཟླ་མཚམས་ཀྱི་བྱས་ཡུས་ལ་རེ་ལྟོས་མི་འཆའ་བར་མི་ཚེ་ཁོ་ན་ལ་ཚད་བཙུགས་ནས་གནས་ལུགས་མ་བཅོས་པའི་རྒྱུན་སྐྱོང་བ་ལ་འབད་ཅིང༌། བཟང་ངན་ཀྱི་རྣམ་རྟོག་གང་ཤར་ཡང་རྣམ་རྟོག་གོ་སྙམ་པའི་ཅེར་འཛིན་གྱི་ལྷན་པ་འདེབས་པ་དང་སྤང་བྱའི་སྟེང་དུ་གཉེན་པོའི་མེ་བཙའ་རྒྱག་པ་སོགས་གང་ཡང་མི་བྱེད་པར་མི་རྒན་གྱིས་བྱིས་པའི་རྩེད་མོ་ལ་བལྟ་བ་ལྟར་སྣང་མེད་སྤྲོས་བྲལ་གྱི་ངང་དུ་ཉིན་མཚན་བར་མེད་དུ་ལ་བཟློ་བར་བྱས་པས་ལྷག་མཐོང་རྟོག་མེད་ཀྱི་རྩལ་རྫོགས་ཏེ། གནས་འགྱུ་དྲན་རིག་བཟང་རྟོག་ངན་རྟོག་ཇི་ལྟ་བུ་འཆར་ཡང་རིག་སྟོང་བློ་འདས་རྫོགས་པ་ཆེན་པོའི་ཀློང་དུ་བཙན་ས་ཟིན་པས་ན་རྫོགས་ཆེན་ནས། རྟོགས་པ་ནམ་མཁའ་འདྲ་སྟེ་འགྱུར་བ་མེད། །ཅེས་པ་ལྟར་རྣལ་འབྱོར་པ་དེ་ལུས་ཐ་མལ་པ་ལྟར་སྣང་ཡང་སེམས་ཆོས་སྐུ་བྱ་རྩོལ་དང་བྲལ་བའི་དགོངས་པ་ལ་བཞུགས་པས་སྣང་སྲིད་བླ་མའི་དཀྱིལ་འཁོར་གང་ཤར་ཡེ་ཤེས་ཕྱམ་བརྡལ་ཡུལ་སྣང་བརྡ་དང་དཔེ་ཆ། ས་ལམ་བྱར་


JLAZ012_Page_0496
[མ་དཔེ་གཟིགས་ན་འདིར་གནོན།]

མེད་ལྷུག་པ་དགོངས་པ་འཁོར་འདས་ཡེ་གྲོལ་ཀྱི་ཀློང་ནས་གནས་སྐབས་སུ་བསྟན་པ་དང་སེམས་ཅན་གྱི་དོན་འབད་མེད་ལྷུན་གྲུབ་ཏུ་འབྱུང་ཞིང༌། ལུས་རྒྱའི་འཆིང་བ་ཞིག་པ་དང་དུས་མཚུངས་པར་བུམ་ནང་གི་ནམ་མཁའ་བུམ་པ་ཆག་པ་དང་ལྷན་ཅིག་ཕྱིའི་ནམ་མཁའ་དང་དབྱེར་མེད་རོ་གཅིག་ཏུ་གྱུར་པ་ལྟར། གདོད་མའི་གཞི་དབྱིངས་ནང་གསལ་དཔྱོད་བྱེད་ཀྱི་ཤེས་པ་དང་བྲལ་བའི་གཞོན་ནུ་བུམ་པའི་སྐུར་མངོན་སངས་རྒྱ་བ་ནི་བསྒྲུབ་བྱའི་མཐར་ཐུག་གོ། །འདིར་སྨྲས་པ། ཀུན་རྫོབ་འཁྲུལ་པའི་སྣང་བ་རྫུན་པོ་ཆེ། །ཀློང་ཆེན་རིག་པའི་གཤིས་སུ་འུབ་ཆུབ་པའི།།འགྱུ་དྲན་སེམས་ཀྱི་བྱ་བྱེད་བྱིས་པའི་གར། །བློ་འདས་དྲན་པའི་ངང་དུ་བག་ལ་ཞ།། །ལྟ་བ་མཐོན་པོར་སྙེགས་པའི་བཟང་རྟོག་དང༌། །ཐེ་ཚོམ་སྒྲོག་ཏུ་ཆུད་པའི་ངན་རྟོག་ཆང༌། །བཏུངས་པའི་གཏི་མུག་གཉིད་ཀྱིས་མ་བཟི་བར། །ཐ་མལ་རིག་པ་རྗེན་པ་ལྷོད་དེར་གནས། །གོ་ཡུལ་ཁ་ལྟར་འབྱམས་པའི་འུད་གོག་དང༌། །གནས་འགྱུའི་འཕྲང་ལ་འཛེར་བའི་དུཿཁ་སོགས། །དགོངས་བརྒྱུད་རྡོ་རྗེའི་ཚིག་རྐང་ཟབ་མོ་ཡི། །ཉུང་ངུའི་གཏམ་གྱིས་ལན་བརྒྱར་ཟིལ་གྱིས་མནན། །སྔོན་བསགས་སྨོན་ལམ་དཀར་པོའི་རྟེན་འབྲེལ་དང༌། །ཟབ་ལམ་རྡོ་རྗེའི་རྣལ་འབྱོར་བཀའ་དྲིན་ལས། །དབུ་


JLAZ012_Page_0497
[མ་དཔེ་གཟིགས་ན་འདིར་གནོན།]

མའི་རྩ་མདུད་གྲོལ་བའི་ལག་རྗེས་སུ། །ཉམས་མྱོང་གནད་ཀྱི་མན་ངག་འདི་ཀོ་བྱས། །དེ་ལྟའི་དབྱར་རྔའི་ང་རོ་བསྒྲགས་པ་ན། །མཁས་རློམ་ས་ཀུ་ཙི་ཡི་སྙིང་འགས་ཀྱང༌། །ཉམས་རྟོགས་ཟབ་མོ་ཁོང་ནས་ལུད་པའི་ཕྱིར། །ཀློང་བརྡོལ་གཏམ་ལ་སྦ་གསང་བྱ་མ་ཐུབ། །དགེ་དེས་རང་བབས་དྲན་པ་སྐྱོང་བ་ལ། །འཇུར་དྲན་ཆལ་བར་ཤོར་བའི་མི་དགེ་ཀུན། །ཤུགས་འབྱུང་གཉུག་མའི་ངང་དུ་དག་ནས་ཀྱང༌། །ཀུན་གྱིས་རྫོགས་པ་ཆེན་པོ་རྟོགས་པར་ཤོག །ཅེས་གོལ་ཤོར་ཚར་གཅོད་སེང་གེའི་ང་རོ་ཞེས་བྱ་བ་འདི་ཡང་དད་གཏོང་ཐོས་པའི་ནོར་གྱིས་ཕྱུག་ཅིང༌། འོད་གསལ་རྫོགས་པ་ཆེན་པོ་ལ་འཕྲོ་ཞུད་མེད་པར་སྐྱོང་བའི་སྔོན་དགེའི་ལས་འཕྲོ་ཅན་ཆོས་དྲུང་དམ་པ་ཀློང་གྲོལ་དབྱིངས་རིག་དང༌། དབེན་པ་གསུམ་གྱིས་རྒྱུད་བསྡམས་ཏེ་འདག་འབྱར་ཁོ་ན་ལ་གནས་པས་འོད་གསལ་རྡོ་རྗེ་སྙིང་པོའི་སྒྲུབ་པ་ལ་བརྩོན་པ་སྐུ་གསུམ་དབྱིངས་རིག་སོགས་ཀྱིས་ལན་གཅིག་མ་ཡིན་པར་ཡང་ཡང་བསྐུལ་འདེབས་བྱུང་བར་བརྟེན། འོད་གསལ་རྫོགས་པ་ཆེན་པོ་མངོན་སུམ་གྱི་གནས་ལ་གོམས་པར་རློམ་པའི་ཀུ་སུ་ལུའི་རྣལ་འབྱོར་པ་པདྨ་དབང་ཆེན་ཡེ་ཤེས་དཔལ་གྱི་རོལ་མཚོས། དཔལ་གྱི་མཆིམས་ཕུའི་ལྟེ་བ་འོག་མིན་མཁའ་འགྲོའི་


JLAZ012_Page_0498
[མ་དཔེ་གཟིགས་ན་འདིར་གནོན།]

ཚོགས་ཁང་གསང་ཆེན་མེ་ཏོག་ཕུག་གི་མཚམས་མལ་དུ་བྲིས་པ་འདི་ཁྲིད་མ་ཐོབ་པ་དང༌། ཐོབ་ཀྱང་རང་རྩིས་ཀྱི་དུག་ཆུས་མྱོས་ཤིང་ལམ་གྱི་གནད་མ་ལོངས་པའི་སྐལ་མེད་ལོག་ལྟ་ཅན་གྱི་རིགས་ལ་བསྟན་པར་མི་བྱའོ། །སྒྲུབ་པ་སྙིང་པོར་བྱེད་པ་རྣམས་ཀྱིས་ཡི་གེ་འདི་ལ་ནན་ཏན་དུ་གཟིགས་ཤིག །ངེས་ཤེས་སྐྱེས་ཚད་ལ་ལུང་བྱིན་པ་ཡིན་ནོ། །སྙིང་ཏིག་གཉེན་པོའི་བཀའ་སྲུང་རྣམས་ལ་གཉེར་རོ། །ས་མ་ཡཿ རྒྱ་རྒྱ་རྒྱཿ

རྫོགས་པ་ཆེན་པོ་གནས་ལུགས་ཅེར་མཐོང་།


JLAZ012_Page_0500
[མ་དཔེ་གཟིགས་ན་འདིར་གནོན།]

རྫོགས་པ་ཆེན་པོ་གནས་ལུགས་ཅེར་མཐོང་ཞེས་བྱ་བ་བཞུགས། ལས་དང་པོ་པ་ལ་འདི་མཁོ།


JLAZ012_Page_0501
[མ་དཔེ་གཟིགས་ན་འདིར་གནོན།]

གཞི་རང་གྲོལ་རྫོགས་པ་ཆེན་པོ་ལ། །བློ་འདུད་བྱེད་བྲལ་བས་ཕྱག་བགྱིའོ། །དོན་རང་རིག་བློ་བྲལ་རྫོགས་ཆེན་ཞལ། །དུས་ད་ལྟ་མཐོང་བར་བྱིན་གྱིས་རློབས། ། རྫོགས་པ་ཆེན་པོའི་དོན་གྱི་འཇོག་སོ་ནི། ད་ལྟའི་རང་སེམས་བཅོས་མེད་ལྷུག་པར་བསྒྱུར་བཀོད་སྤུ་ཙམ་མ་སོང་བའི་གསལ་རིག་རྗེན་པ་འདི་ཀ་ཡིན། དེ་ཉིད་དུས་རྟག་པར་ཟ་ཉལ་འགྲོ་འདུག་གང་གི་སྐབས་སུ་ཡང་མ་བརྗེད་ཙམ་པའི་དྲན་པས་སྐྱོང་བ་དེ་ལ་སྒོམ་ཟེར་བ་ཡིན་ཀྱང་ཤེས་བྱའི་སྒྲིབ་པ་དང་མ་བྲལ་བར་དུ་བདེ་གསལ་མི་རྟོག་གསུམ་གྱི་ཉམས་དང་མ་འདྲེས་པ་ཞིག་འོང་མི་སྲིད་ཀྱང་དྲན་པས་ཆེད་དུ་གཅུར་བའི་འཇུར་དྲན་མ་ཡིན་པའི་ངོས་ནས་རང་ངོ་རང་ཤེས་མ་བརྗེད་ཙམ་དུ་བསྐྱངས་པས་ཅི་ཞིག་


JLAZ012_Page_0502
[མ་དཔེ་གཟིགས་ན་འདིར་གནོན།]

ན་དོན་དམ་སྤྲོས་བྲལ་གྱི་བདེན་པ་དཔེ་དང་ཐ་སྙད་ལས་འདས་པ་ཞིག་འཆར་ནས་ཡོང༌། དེ་ཡང་རེ་ཞིག་ལས་དང་པོའི་རིགས་ལ་རྣམ་རྟོག་ནག་པོ་ཁ་འབྱམས་ཀྱིས་དྲན་པ་ཡེངས་སུ་བཅུག་ཡོང་བས་རྣམ་རྟོག་བརྟད་འགྲིལ་མང་ཙམ་འོག་འགྱུར་སོང་རྗེས་སྐབས་ཤིག་ན་དྲན་པ་ཧྲིག་གེ་སླེབས་ནས་ང་ཡེངས་འདུག་སྙམ་པའི་འགྱོད་པ་སྐྱེ་ཡང༌། དེ་ཚེ་རྣམ་རྟོག་སྔ་མའི་གཞུག་གཅོད་དང་ཡེངས་པ་ལ་འགྱོད་པ་སོགས་གང་ཡང་མི་བྱ་བར་དྲན་པ་ཧྲིག་གེ་སླེབས་པ་དེ་ཁའི་ཐོག་ཏུ་རང་བབས་ཀྱི་རྒྱུན་སྐྱོང་རྣམ་རྟོག་ལ་ཆོས་སྐུར་ལྟ་མི་སྤང་ཟེར་བ་གྲགས་ཆེ་ཡང༌། ལྷག་མཐོང་གི་རྩལ་མ་རྫོགས་རིང་དེ་ལྟར་བྱས་ན་ཅི་ཡིན་འདི་ཡིན་མེད་པའི་ཟབས་སུ་ཚུད་ངེས་པས་དེས་


JLAZ012_Page_0503
[མ་དཔེ་གཟིགས་ན་འདིར་གནོན།]

ན་དང་པོའི་རིང་རྣམ་རྟོག་གང་ཤར་ལ་ཅེར་གྱིས་བལྟས་ནས་རྟག་དཔྱད་བསམ་གཞིག་གང་ཡང་མི་བྱ་བར་རྣམ་རྟོག་ངོ་ཤེས་མཁན་རང་གི་ཐོག་ཏུ་བྱིས་པའི་རྩེད་མོ་ལ་མི་རྒན་གྱིས་སུན་འབྱིན་སྣང་མེད་བྱེད་པ་བཞིན་དུ་རྩིས་མེད་བདེན་མེད་གཡས་ཆུང་དུ་འཇོག །དེ་ལ་རྒྱུན་རིང་བར་གོམས་ཙ་ན་ཅི་ཞིག་ན་རྣམ་རྟོག་སྒོམ་ལ་ཤར་ནས་གནས་འགྱུ་མཉམ་གྲོལ་དུ་འགྲོ་བ་ཡིན། འདིའི་ཚེ་རྣམ་རྟོག་ངོ་ཤེས་ནས་ཆོས་སྐུར་གྲོལ་བ། རྣམ་རྟོག་ཁོ་རང་ཆོས་སྐུར་གྲོལ་བ། རྣམ་རྟོག་ཕན་མེད་གནོད་མེད་དུ་ཆོས་སྐུར་གྲོལ་བ་སོགས་རིམ་པར་འབྱུང་བ་རྫོགས་པ་ཆེན་པོའི་དགོངས་བརྒྱུད་ཀྱི་ཕ་ཕོགས་ཐོབ་པའི་བཤེས་གཉེན་དམ་པས་སོ་མཚམས་འབྱེད་དགོས་ལ། ཐེག་པ་གཞན་པ་དང་ཡིད་དཔྱོད་པའི་རྣམ་རྟོག་ཆོས་སྐུར་ལྟ་བའི་ལུགས་དང་མི་འདྲ་བའི་གནད་ཆེ་ཤོས་ཞིག་འདི་ན་ཡོད་དེ་མན་ངག་སྡེའི་དགོངས་པ་ཐུན་མོང་མ་ཡིན་པ་ལོན་པའི་ས་གནས་ཀྱི་སེམས་དཔའ་རྣམས་ཀྱིས་གྲུབ་མཐའ་སྙོགས། དེ་ནས་སྤངས་ཐོབ་བྲལ་བའི་སྤྲོས་བྲལ་ནམ་མཁའ་ལྟ་བུ་རྟོགས་པའི་ཚེ་སྒོམ་བྱེད་དང་དྲན་རིག་གི་གཉེན་པོ་གཏད་ཡལ་ལ་སོང་ནས་ཤེས་རྒྱུད་མཁའ་ལྟར་དག་སྟེ་ཐེ་ཚོམ་དང་ཡིན་མིན་གྱི་འཆིང་བ་རང་སར་གྲོལ་བ་ཞིག་འབྱུང་བ་སུས་ཀྱང་མ་བྱས་པའི་རིག་པ་བློ་འདས་ཟང་ཁ་རྒྱ་ཡན་ཆེན་


JLAZ012_Page_0504
[མ་དཔེ་གཟིགས་ན་འདིར་གནོན།]

པོར་ལ་བཟློ་བའི་ཚེ་ན། འདི་ཉིད་སངས་རྒྱས་ཀྱི་བདེན་མཐོང་མོས་དཔྱོད་ལས་འཕགས་པ་ཡིན་ངེས་པས་ཁམས་གསུམ་དུ་ལྡོག་པའི་གོལ་ས་ཆོད། འདི་ནས་ཀ་དག་གི་གནས་ལུགས་ཡེ་ཇི་བཞིན་པ་རྟོགས་པ་ཡིན་ཡང་ད་དུང་ཕོ་ཆུག་མ་བསྐྱེད་ན་དག་པའི་ས་གསུམ་ལ་མ་སླེབས་པར་བྲལ་ཐོབ་དང་ལྡོག་པ་ལ་ཚེགས་མེད་པས་ཤེས་སྒྲིབ་དག་པའི་སླད་དུ་དབེན་པ་བསྟེན་དགོས། རྡོ་རུས་གཏུག་དགོས་ཕྱག་རྫོགས་གཉིས་ཀའི་རྒྱུད་དང་མན་ངག་ནས་རིག་པ་གཅིག་ཆོད་རང་གྲོལ་ལ་ས་ལམ་གྱི་རྣམ་གཞག་མ་གསུངས་ཀྱང༌། སྔོན་བྱོན་གྲུབ་ཐོབ་བྱང་ཆུབ་སེམས་དཔའ་ཆེན་པོ་རྣམས་ཀྱིས་བསྟན་པ་རྗེས་ཐོབ་ཀྱི་རིག་པའི་རྩལ་ཆེན་རྫོགས་པ་ལ་དགོངས་ནས། རྩེ་གཅིག་སྤྲོས་བྲལ་རོ་གཅིག་སྒོམ་མེད་སོ་སོར་ཆེ་འབྲིང་ཆུང་གསུམ་གྱི་མིང་བཏགས་ནས་ས་ལམ་གྱི་དོད་པོ་བརྩི་བར་མཛད་པ་བཞིན་ནོ། །ལྷག་དོན་ཕྱི་རབས་པ་དག་སྤྲོས་བྲལ་མཚན་མ་ཅན་དུ་གོལ་བ་དང༌། རྩེ་གཅིག་ཆེན་པོའི་བག་ཆགས་ལ་སྒོམ་པ་ཉིན་མཚན་ཁ་སྦྱོར་དུ་རློམས་སེམས་སྐྱེ་བ་སོགས། ཤེས་རབ་རྣམ་པ་གསུམ་གྱིས་བཏང་བར་ཟད་མོད། འདིས་མཚུངས་པར་མཐར་ཐུག་གི་གྲོལ་གཞི་དང་གྲོལ་ས་ཁྱད་ཆོས་དྲུག་ལྡན་གྱི་ཀུན་ཏུ་བཟང་པོའི་དགོངས་པ་ངེས་པར་ཤེས་དགོས་པ་ནི་རྫོགས་ཆེན་གསང་བ་སྙིང་


JLAZ012_Page_0505
[མ་དཔེ་གཟིགས་ན་འདིར་གནོན།]

ཐིག་པའི་ཟུར་སྐད་དེ། གནད་འདི་ལྟ་བུ་གོ་བར་བྱེད་པ་ལ་ཀུན་མཁྱེན་ཀློང་ཆེན་པའི་གསང་མཛོད་རྟོལ་དགོས་པས་ཕྱི་རབས་སུ་དགོངས་བརྒྱུད་ཀྱི་འཕོ་བ་ཐོབ་པའི་དོན་གྱི་རྣལ་འབྱོར་པ་རིམ་པར་བྱོན་པ་དག་ལ། ཀློང་ཆེན་ནམ་མཁའི་རྣལ་འབྱོར་གྱི་ཁ་ཆེམས་སུ་བྲིས་ཤིང་ད་ལྟ་བའི་དམིགས་བསལ་དག་པའི་སྣང་བ་ཅན་ཁྱབ་གདལ་ནམ་མཁའི་ཤེས་པས་ཟིན་བྲིས་སུ་བགྱིས་པའོ། །སྣང་བ་ནི་སྐྱེ་མེད་རིག་པ་ནི་ཡེ་གྲོལ། །ཤེས་པ་ནི་ཟང་ཐལ་ཟུང་འཇུག་ནི་སྒྲོ་བཏགས། །ཁྱབ་བརྡལ་གྱི་དྲན་པ་བཟོ་མེད་དུ་ཆམ་ཆམ། །གདོང་འདེད་ཀྱི་སྣང་བ་ཅེར་གྲོལ་དུ་ཐལ་ཐལ། །ཕྱོགས་ལྷུང་ནི་མི་འདུག་རྫོགས་ཆེན་གྱི་ལྟ་བ། །སྣང་སྟོང་དང་ཟུང་འཇུག་མིང་ཚིག་དང་ཐ་སྙད། །ཨ་ཧོ་ཡེ་སྤྲོས་བྲལ་ལ་སྒོམ་རྒྱུ་ནི་མི་གདའ། །སྲ་མཁྲེགས་ཀྱི་རྡོ་གདན་འགྱུར་མེད་ཀྱི་གདེང་ཆེན། །རས་དཀར་གྱི་གུར་ཆུང་འཁོར་བ་ཡི་འཇིགས་སྐྱོབས། །བཟོ་མེད་ཀྱི་མཆེད་ལྕམ་རང་གྲོལ་གྱི་ཚོམ་བུ། །ཨ་ཧོ་ཡེ་སྣང་སེམས་ནི་སུ་འདྲ་ལས་བདེ་འདུག །ལྟ་སྒོམ་ལས་འདས་པ་རྫོགས་ཆེན་གྱི་རྣལ་འབྱོར། །བྱུང་རྒྱལ་གྱི་སྤྱོད་པ་ཚད་ཕེབས་ཀྱི་རིག་མདངས། །སྐྱིད་ཉལ་གྱི་ངང་དུ་སྣང་སེམས་ཁོ་ཁྲལ་ཁྲོལ། །རྟོགས་གྲོལ་ཁོང་ཉམས་ལེན་གྱི་མཐར་ཐུག་རང་ཡིན་ནོ། །ཐབས་ཤེས་ཀྱི་རྐང་པ་འདེགས་འཇོག་


JLAZ012_Page_0506
[མ་དཔེ་གཟིགས་ན་འདིར་གནོན།]

ཏུ་བསྒྱུར་ནས། །རི་སུལ་གྱི་དབེན་ཁྲོད་འབད་རྩོལ་གྱིས་སྙོགས་པས། །བྲག་སྐྱིབས་ཀྱི་བསྟི་གནས་རྟོག་བྲལ་གྱི་གནས་སུ། །ནམ་མཁའི་ངང་རྣལ་འབྱོར་ཀློང་ཆེན་དང་མཇལ་ནས། །ཤུགས་འབྱུང་གི་ཉམས་རྟོགས་རྒྱང་གླུ་རུ་བླངས་ཡོད། །ཡེ་གདངས་ལ་བདེ་སྡུག་བླང་དོར་ནི་མ་གྲུབ། །སྣང་བ་ཡི་རྫུན་ཕུག་རིག་སྟོང་གི་ཚད་དུ། །མཉམ་རྫོགས་སུ་ཐིམ་པ་ཀུན་བཟང་གི་དགོངས་ཀློང༌། །ཆམ་བརྡལ་གྱི་ཆོས་སྐུའི་རྒྱལ་སྲིད་དང་མཇལ་བྱུང༌། །འདིར་འདུས་ཀྱི་སྐལ་ལྡན་མཆེད་ལྕམ་དེ་ཕོ་མོ། །འཁོར་བ་ལ་མ་ཞེན་འཛིན་མེད་ཀྱི་རིག་སྟོང༌། །ཆམ་ཡངས་ཀྱི་རང་གཤིས་ལྷུག་པ་རུ་སྐྱོངས་དང༌། །གདོད་མ་ཡི་གཞི་དབྱིངས་ལ་མཉམ་གྲོལ་དུ་ཆས་འགྲོ། །ཞེས་རྡོ་རྗེ་གླུ་གར་ཀྱང་མིག་འཕྲུལ་ལྟ་བུར་བརྩེས་པའོ།། །།

རི་ཆོས་ཞལ་གདམས་ངོ་མཚར་རྒྱ་མཚོ།


JLAZ012_Page_0508
[མ་དཔེ་གཟིགས་ན་འདིར་གནོན།]

རི་ཆོས་ཞལ་གདམས་ངོ་མཚར་རྒྱ་མཚོ་བཞུགས། །


JLAZ012_Page_0509
[མ་དཔེ་གཟིགས་ན་འདིར་གནོན།]

དཔལ་ལྡན་སངས་རྒྱས་ཀུན་གྱི་དངོས། །པདྨ་འབྱུང་གནས་ཐུགས་རྗེའི་བདག །མཐོན་མཐིང་རལ་པའི་ཅོད་པན་རྩེར། །བཞུགས་ལ་བདག་རྒྱུད་བྱིན་གྱིས་རློབས། །ཁྱོད་དད་པ་དམ་ཚིག་དང་ལྡན་ཞིང་སྙིང་ནས་ཆོས་དོན་དུ་གཉེར་བ་རྣམས་གསན་པར་ཞུ། ཐོག་མཐའ་མེད་པའི་འཁོར་བ་ནས་ལས་ངན་གྱི་རྒྱུ་བྱས། རྐྱེན་ངན་གྱི་དབང་དུ་ཤོར། གང་ནས་བསམས་ཀྱང་ཡ་ང་ཞིང་སྡུག་བསྔལ་འབའ་ཞིག་ལ་སྤྱོད་པའི་རིགས་དྲུག་བཙོན་པ་ཁྲི་མུན་དུ་བཅུག་པ་ལྟ་བུའི་གནས་སུ་ཁོར་ར་ཁོར་ཡུག་ཏུ་སྤྱོད་དགོས་པ་ཅི་ཡིས་ལན་མནོ་བསམ་ལེགས་པར་ཐོང༌། ད་ལྟ་ལུས་ལ་ན་ཚ། སེམས་ལ་སྡུག་བསྔལ། རྐྱེན་མི་འདོད་པ་ཕྲན་བུ་ལའང་བག་ཚ་ནས་བློ་མི་བདེ་སིང་སིང༌།


JLAZ012_Page_0510
[མ་དཔེ་གཟིགས་ན་འདིར་གནོན།]

སྣང་བ་ཐམས་ཅད་དོགས་པར་འཆར་ནས་ཡི་ག་འཆུས་པ་འདྲ་ན་ངན་སོང་གསུམ་གྱི་སྡུག་བསྔལ་མྱོང་དུས་ཨ་ཙ་མ། ད་དེ་དག་ལ་ཐར་པའི་ཐབས་ནི་གཏན་གྱི་འདུན་མ་དམ་པའི་ཆོས་ཁོ་ན་བསྒྲུབ་པ་ལས་གཞན་ཅི་ཡང་མ་ཡིན། སྣང་བ་སྒྱུ་མ་ཡིན་ཟེར། ཉིན་མོར་རྟ་ཞོན། ཆང་བཏུངས། རྩེད་འཇོ་ལ་རོལ། དགོངས་མོ་རས་གཟན་གྱོན། སྤུད་པའི་དགང་སྟོང་འདྲ་བའི་རླུང་ཕིང་ཕིང༌། ཌཱ་དྲིལ་ཁྲོལ་ཁྲོལ་གཅིག་པོས་སངས་མི་རྒྱ། འཁོར་བ་ལ་འཁྱམས་པའི་རྩ་བ་བདག་འཛིན་ཡིན་ཏེ་བཤེས་སྤྲིང་ལས། འདོད་པ་རྣམས་ནི་ཕུང་ཀྲོལ་བསྐྱེད་པ་སྟེ། །ཐུབ་པའི་དབང་པོས་ཀིམ་པའི་འབྲས་འདྲར་གསུངས། །དེ་དག་སྤང་བགྱིད་དེ་ཡི་ལྕགས་སྒྲོག་གིས། །


JLAZ012_Page_0511
[མ་དཔེ་གཟིགས་ན་འདིར་གནོན།]

འཁོར་བའི་བཙོན་རར་འཇིག་ཏེན་འདི་དག་བཅིངས། །ཞེས་པའི་བདག་འཛིན་ལ་མདོར་བསྡུ་ན། ཡུལ་མཁར་དང་ནོར་རྫས་ལ་ཞེན་ཅིང་ཆགས་ནས་ཆོས་ལ་ཕྱི་བཤོལ་བྱེད། ཁབ་དང་སྐུད་པ་རྙེད་ཀྱང་ལྷ་གསོལ། སྙུང་བུ་དང་ལྷམ་སྒྲོག་བོར་ཀྱང་སྙིང་འཁུམ་པ་དེ་ཚོ་ཕྱི་ཡི་བདག་འཛིན་ཡིན། ཆོས་ལ་ཕྱོགས་རིས་བཅད། རང་ཕྱོགས་ལྷ་རུ་མཐོང༌། གཞན་ཕྱོགས་འདྲེ་རུ་འཛིན། རང་རྒྱུད་ཀྱི་ཡོན་ཏན་ལ་རྟོག་དཔྱོད་མི་གཏང་བར་ཤཱཀྱ་ཐུབ་པའི་གྲལ་མགོར་སྡོད་རྒྱུ་བྱུང་ཡང་ང་རང་ཨ་ཐོབ་ཡིན་བསམ་བྱེད་པ་དེ་ཚོ་ནང་གི་བདག་འཛིན་ཡིན། བསྐྱེད་རིམ་དངོས་ཞེན་ཅན། སེམས་བསྐྱེད་ཕྱོགས་རིས་ཅན། རྫོགས་རིམ་དམིགས་གཏད་ཅན། ཆོས་ཐམས་ཅད་སྟོང་ཞིང་བདག་མེད་པ་ཁ་ནས་ཟེར་རུང་སྟོང་པའི་ངོ་བོ་ལ་འདོད་སྲེད་ཅན་སྒེག་མོའི་ལུས་ལ་ཆགས་པ་བཞིན་དམ་སྤྲིང་ངེ་། ཐོམ་ཡོ་རེ་བ་ལྟ་ཞིང༌། ང་འདྲའི་ཐུགས་དམ་སུ་ལ་ཡོད་སྙམ་ནས་འདྲི་ས་དང་གླེང་ས་མེད་པས་མི་ཚེ་དོན་མེད་ལ་འཛད་པ་དེ་ཚོ་གསང་བའི་བདག་འཛིན་ཡིན། དེ་ཁྱེད་རྣམས་ལ་དྲང་པོར་གླེང་ན། ཡུལ་དང་ནོར་རྫས་ལ་སྲེད་པ་གཏིང་ནས་སྤངས་པ་ཞིག་བྱུང་ན་ཆོས་ཕྱེད་ཚར་བ་ཡིན། ངས་དང་པོར་ངེས་དོན་གྱི་སྒོར་ཞུགས་པ་ཙམ་ནས་བདག་འཛིན་མཆིལ་མའི་ཐལ་བ་བཞིན་དུ་འབོར་ནུས་པ་ཡོད་དེ། གནས་ལུགས་བཙན་ས་ཟིན།


JLAZ012_Page_0512
[མ་དཔེ་གཟིགས་ན་འདིར་གནོན།]

འཁོར་སློབ་འདུ་བའི་སྒོ་ཚུགས། གཞན་དོན་ནུས་པའི་ཁུངས་སུ་གྱུར་པ་ནས། གདུལ་བྱ་ཐབས་ཀྱིས་འདུལ་བའི་དགོངས་གཞི་དང་དགོངས་པ་མཐའ་ཡས་པ་བྱུང་ནས། འཕྲལ་གྱིས་ཉེ་བར་སྤྱད་པ་འགའ་ཙམ་བདག་གིར་བཟུང་བ་ལས་གཏིང་ནོར་ཡིན་ཟེར། ན་ན་དགོས་ཟེར། ཤི་ན་སྤྱོད་ཟེར་བའི་ཕྱི་ཚིག་རེ་དོགས་ལྷུར་ལེན་ཙམ་མ་བྱས་པས་གཙོ་བོར་དཀོན་མཆོག་ལ་མཆོད་པ། སེམས་ཅན་གྱི་སྲོག་བསླུ་བ། དགེ་འདུན་ལ་བསྙེན་བཀུར། ཞར་ལ་ངན་སློང་ལ་སྦྱིན་པ་སོགས་ཤི་གསོན་གྱི་དངོས་པོ་གནས་མ་ཡིན་པར་ཆུད་མཛའ་བ་དང༌། བུང་བའི་ཚང་གསོག་གསོག་བྱས་པ་མེད། མཛོད་རྒྱབ་ཁུར་མ་ཡིན་པ་ངེད་རང་ལ་བཅར་བ་རྣམས་ཞེ་མི་ཁྲེལ་བ་ཡིན་མོད། འཆི་བ་ཀུན་ལ་ཡོད་པས་ཐུགས་ལ་དགོངས་པར་མཛོད། ཆོས་ལ་ཕྱོགས་རིས་མེད་པས་ཐམས་ཅད་ལ་དག་སྣང་སྦྱངས་ཅི་ཐོབ་ཞུས། ལྟད་མོ་ཀུན་ལ་བལྟས་པས་རང་ས་རང་ས་ན་ཟབ་པ་འདྲ་བ་རྐྱང་པ་འདུག་སྟེ་ལྟ་བ་རྫོགས་པ་ཆེན་པོས་ཆོག་པར་བྱུང༌། རྩ་ལྟུང་དབྱིངས་ལ་བཞག་པ་ཡིན། ད་ཉམས་ལེན་གྱི་སྔོན་འགྲོ་དེ་དག་ལྟ་བའི་ཕྱོགས་སུ་སྤྱོད་པ་ཤོར་བའི་སྟོང་སྐད་ཀྱིས་ཁྱད་དུ་མི་གསོད་པ་གཞིར་བཞག་ནས། དངོས་གཞིའི་སྐབས་དོན་ལ། མི་མེད་ཀྱི་ལུང་པར་བཤེས་མེད་རིག་པའི་


JLAZ012_Page_0513
[མ་དཔེ་གཟིགས་ན་འདིར་གནོན།]

གྲོགས་དང་འགྲོགས་ནས་གནས་ལུགས་མ་བཅོས་པའི་རྒྱུན་སྐྱོང་བར་དམ་བཅའ་བཟུང༌། བཟང་ངན་དང་རེ་དོགས་ཀྱི་གཏམ་ལ་བདེན་འཛིན་དགག་བསྒྲུབ་མི་བྱེད་པར་མི་ཤི་བའི་ཤུལ་གྱི་གཏམ་བཞིན་ཅི་ལབ་ལབ་ཏུ་བཅུག །མི་ལུས་ཐོབ་པའི་དཀའ་ལུགས། ཆོས་དང་མཇལ་བའི་ཁག་ལུགས། མཚན་ལྡན་གྱི་བླ་མ་དཀོན་ལུགས། བདུད་ཀྱི་འཇུག་སྒོ་མང་ལུགས། ཚེ་ལ་ནམ་འཆི་མེད་ལུགས་འཇིག་རྟེན་ཁྱིམ་པའི་མནར་སྤྱོད་དང་སྡུག་བསྔལ་རྣམས་ལེགས་པར་བསམ་ནས་འཁོར་བ་ལ་སྐྱུགས་ལོག་པ་མཁྲིས་ནད་ཀྱིས་གདུང་པ་ལ་བཙོ་ཟན་བྱིན་པ་ལྟ་བུ་ཞིག་དགོས། དེ་ལྟར་མ་ཡིན་པའི་གཏོ་འབེལ་བ། སྦྱིན་བདག་ལེགས་པ། གོས་དྲོ་བ། སྡོད་གནས་སྐྱིད་པ། གཏམ་སྙན་པ། མི་ཆོས་དང་མཐུན་པ་ཞིག་གི་སྟ་གོན་བྱེད་ཕན་ཆད་ཆོས་མ་བྱས་གོང་དུ་བདུད་འགྲུབ་ཚར་བ་ཡིན། ལར་མིག་རུ་ཟང་ཟང་དང༌། རྟོགས་པ་མཐོ་མཐོ་མོའི་ཆོས་སྐད་བྱས་ཀྱང་བདག་འཛིན་དང་སྐྱིད་འདོད་ཀྱི་འགོང་པོ་མ་ཐུལ་ན་རྟགས་སྤྱོད་པས་སྟོན། ཚད་རྨི་ལམ་གྱིས་བཟུང་ཟེར་བ་ཡིན་པས་གོ་དགོས། སྡེ་དཔོན་ཆེན་པོའི་ཕོག་ཟ་བ་འདི་ཡང༌། གང་ལ་དབང་ཡོད་དེ་ལ་སྡིག་པ་ཡོད། ཟེར་བ་ལྟར་དེ་ཚོའི་ནོར་དང་ཟང་ཟིང་གི་འབྱུང་ཁུངས་ལ་བསམ་མནོ་ལེགས་པར་བཏང་ན་རང་གི་དགེ་སྦྱོར་ལ་ཡར་སྐྱེད་འཕེལ་


JLAZ012_Page_0514
[མ་དཔེ་གཟིགས་ན་འདིར་གནོན།]

བ་ལྟ་ཞོག །དཀོར་ནག་པོ་སྲོག་གི་སྤུ་གྲི་ཡིན། །ཟོས་དྲག་ན་ཐར་བའི་སྲོག་རྩ་གཅོད། །ཅེས་པ་ལྟར་མཐར་དམྱལ་བའི་གཏིང་རྡོ་ཆེན་པོར་མི་འགྱུར་བའི་ངེས་པ་མི་འདུག་པ་ལ་ལེགས་པར་གཞིག་སྟེ་འཚོ་བ་བསོད་སྙོམས་ཙམ་ལ་བརྟེན་ནས་མིའི་ངོས་བཟུང་སྤང༌། རྒྱལ་བ་གོང་མས་ལྟོ་ཚད་ལ་ཕབ། གཉིད་སྲང་ལ་གཅུར། རིག་པ་ཞུར་ལ་དྲོངས། གསུངས་པ་ལྟར་ལྟོ་ཆས་འདི་ཡང་བཟའ་ཆེ་ན་ཉོན་མོངས་པ་ཤུགས་ཀྱིས་ལྡང༌། ལྡེངས་ཚོད་ཀྱིས་མ་ལྡེངས་པས། རྔ་བརྡུང༌། གླུད་གྱེར། གཏོ་ཡས་ལ་མགོ་འཁོར། འདི་མ་བྱས་ན་ལྟོ་མི་འདུག་ཟེར། སྲང་ཁའི་ཁྱི་ལས་ཀྱང་བྲེལ་ཚུབས་ཆེ་བར་སོང་གིས་དོགས་པས་ཚོད་ཟིན་པར་བྱ། ཆང་ནི་ཉེས་པ་ཐམས་ཅད་ཀྱི་འབྱུང་ཁུངས་ཡིན་པས། ཕོར་པ་གང་ལས་མང་བར་མི་འཐུང༌། ཤ་སྤོང་མ་ནུས་ན་རན་པར་བཟའ་ཞིང་ཟས་ཀྱི་རྣལ་འབྱོར་ལ་སྤྱོད་ཚུལ་ཁོ་བོའི་སྤྱོད་ཡུལ་ལམ་ཁྱེར་ལྟར་བྱ། གཏན་གྱི་དགེ་སྦྱོར་བྱེད་ལུགས་ལ་མཚོན་ན། གང་ཟག་དབང་པོ་རབ་འབྲིང་དང༌། སོ་སོའི་འཁོས་བབས་ཀྱིས་གཅིག་ལ་ཚད་བཟུང་དཀའ་ཡང༌། ཧ་ལམ་ངེད་ཀྱིས་དཔལ་གྱི་རི་བོར་ལོ་གསུམ་དང་ཟླ་བ་ལྔའི་བར་ལ་དཔེ་བྱས་ན། ཐོ་རངས་ཕྱེ་མཐའ་བྱས་པའི་གཉིད་ནམ་སད་ལ་མལ་ནས་ཧར་གྱིས་ལངས། རླུང་རོ་དགུ་ཕྲུགས་སུ་བུས་པས་རླུང་ཁམས་དྭངས་སྙིགས་ཕྱེད་པར་ཡོང༌། དེ་ནས་སྔོན་


JLAZ012_Page_0515
[མ་དཔེ་གཟིགས་ན་འདིར་གནོན།]

འགྲོ་ཐོན་རྗེས་གསོལ་འདེབས་དྲག་པོ་གདུང་ཤུགས་མཆི་མ་ཐོན་པ་རེ་བྱས། ཐུན་མོང་མ་ཡིན་པའི་གྲོལ་ཐིག་སྙན་རྒྱུད་རླུང་གི་རྫོགས་རིམ་ཚ་རྟིང་བར་ཐུན་གཅིག་ཏུ་བསྒོམ་པས་དང་པོ་རླུང་གི་ཟུག་གཟེར་ལ་སྙིང་རུས་བསྐྱེད་དགོས་པ་བྱུང་སྟེ། རེ་ཞིག་ནས་གེགས་རྣམས་ངང་གིས་སངས། རླུང་རང་མལ་དུ་ཚུད། གཡས་གཡོན་གྱི་འཕོ་བ་དང་ཕྱེད་བཅས་སོ་གཉིས་ཀྱི་གནད་ཐིངས། ཉི་མ་རིང་ཐུང་གི་ལྡོག་པ་ཤེས། སྲོག་ཐུར་གཅིག་ཏུ་འདྲེས། བུམ་ཆེན་རིལ་བ་ཞབས་ཚགས་ཅན་མིག་གིས་བལྟར་ཡོད་ཅིང༌། ཐུན་མོང་དང་ཐུན་མོང་མ་ཡིན་པའི་ལམ་རྟགས་ཀྱང་མངོན་དུ་གྱུར་པ་འབྱུང་བ་འདི་ཡིན་པས་རླུང་ཡུན་ཐུང་ལ་དམིགས་པ་མི་གསལ་བ་ཞིག་བསྒོམས་པ་ལ་བྱས་ཡུས་མི་ཆེ་བ་གལ་ཆེ། དེ་ནས་ཚ་རྟིང་གི་ཆར་ཇའམ་ཐུག་པ་གང་རིགས་བཏུང༌། གསུར་བསྔོ་བྱས། དེ་མ་ཐག་བསྙེན་སྒྲུབ་ཀྱི་ཐུན་ལ་ཞུགས། དེ་ཡང་བསྐྱེད་རིམ་གྱི་ངོ་བོ་ཞེན་པ་མེད་པ། རང་བཞིན་ཞལ་ཕྱག་གསལ་བ། ཐུགས་རྗེ་འོད་ཟེར་སྤྲོ་བསྡུའི་དམིགས་པ་གསལ་བ་ལ་དྲན་པ་གཅིག་ཏུ་གཞུར་བས་བསྐྱེད་རྫོགས་ཀྱི་རྩལ་འབྱོངས་པ་མ་གཏོགས། དེང་སང་ཁ་ཅིག་ལྟར་མོས་པ་ལམ་ཁྱེར་ཉར་ཉོར་རང་གི་ཁམས་ཀྱིས་གང་ལྕོགས། རྒན་བུ་མ་ཎི་འདྲེན་འདྲེན་བྱས་པས་ཡོད་པ་མེད། དེ་ལྟ་བུའི་ཐུན་དེ་ཉིད་གུང་ཡོལ་བ་ཙམ་ལ་གྲོལ། ཆུ་གཏོར་གཏོང༌། ལྟུང་བཤགས། བསམ་ལྷུན། གཙུག་ཏོར་


JLAZ012_Page_0516
[མ་དཔེ་གཟིགས་ན་འདིར་གནོན།]

རྣམ་རྒྱལ། ཡེ་ཤེས་སྐུ་མཆོག་སོགས་ཆོས་སྤྱོད་གཟུངས་སྔགས་སྨོན་ལམ་གྱིས་མཐའ་བརྟེན་དང་བཅས་པ་སོང་རྗེས། དཔེ་ཆ་ཤོག་བུ་བརྒྱད་ཙམ་རེ་མྱུར་པོར་འབྲི་རྒྱུ་ཡོད་ན་དང༌། དམིགས་བསལ་མེད་སྐབས་ཐོད་རྒལ་སྒོམ། དེ་ནས་གུང་ཚིགས་ཟ་བའི་ཚེ། ཤ་ལ་གཟུངས་སྔགས་ཁྱད་པར་ཅན་མང་པོ་བཏབ། སྙིང་རྗེ་བསྐྱེད། སྨོན་ལམ་བཏབ་རྗེས་ཕུང་ཁམས་ལྷར་གསལ་བས་ཟས་ཀྱི་རྣལ་འབྱོར་ལ་སྤྱད། ཡོན་སྦྱོང་གི་མདོ་འདོན། དེ་ནས་ཕྱག་བརྒྱ་ཕྲག་གཉིས་གསུམ་རེ་བཙལ་བ་དང་སྦྲགས། མདོ་སྔགས་ཀྱི་སྨོན་ལམ་སོགས་བཏབ་བོ། །དེ་མ་ཐག་མལ་དུ་ཞུགས་ཡི་དམ་གྱི་སྒོམ་བཟླས་ཁོ་ན་ལ་བརྩོན་པས། ཡི་དམ་རིགས་མི་འདྲ་བ་མང་པོའི་བསྙེན་པ་ཚད་དུ་ལོངས་པ་བསམ་ལས་འདས་པར་སོང༌། སྲོད་ཚོགས་རེ་གཏོང༌། གཏོར་བསྔོས་བྱས། རྗེས་ཆོག་རྣམས་དང༌། རྫོགས་རིམ་བསྡུས། འོད་གསལ་ཟིན་པའི་གསོལ་འདེབས་གདུང་ཤུགས་ཆེ་བ་རེ་དང་བསམ་པ་ལྷུན་གྲུབ་མ་རང་གཞན་ཀུན་ལ་ཕྱོགས་རིས་མེད་པའི་སྨོན་ལམ་མདོས་དྲག་པ་རེ་བྱས། རླུང་ཐུན་མཚམས་པ་གཅིག་བསྒོམ་རྗེས་གཉིད་ཀྱི་རྣལ་འབྱོར་ལ་ཞུགས། སད་རེས་འཁྲུལ་པ་རྒྱ་འབྱམས་སུ་མ་བཏང་བར་རྩེ་གཅིག་འདུན་པའི་ཞུར་ལ་དྲངས་པས་བོགས་ཤིན་ཏུ་ཐོན་པ་བྱུང༌། མདོར་ན་ལོ་གསུམ་འདིའི་རིང་ཟས་ལ་མང་ཉུང་མེད། གོས་རས་གཟན་གཅིག་ཁོ་ནས་འཁྱོལ་བ་བྱས།


JLAZ012_Page_0517
[མ་དཔེ་གཟིགས་ན་འདིར་གནོན།]

བུག་སྒོར་ངག་ཚིག་གཅིག་ཀྱང་བཏང་བ་མེད། ནང་ན་མཚམས་གཡོག་ཡོད་སྐབས་ཀྱང་ཤོག་སྒོ་ཕྱི་ནང་གིས་མཚམས་ཆོད་པའི་བུག་སྒོ་ནང་མ་ལས་འདས་པ་མེད་འཁོར་བ་ལ་ངེས་འབྱུང་དང༌། སྐྱོ་ཤས། ནམ་འཆི་ཆ་མེད་ཀྱི་བློ་དུང་ངེ་སྐྱེས་པས། ངག་འཁྱལ་དང་རང་བཞིན་གྱི་འཕྲོས་གཏམ་སོགས་ཕྲན་བུ་ཙམ་ཡང་ལབ་པ་མེད་པས། ངོས་ཀྱི་རྗེས་སུ་འཇུག་པ་རྣམས་མཚམས་ཀྱི་མིང་བཏགས། སྒོ་དྲུང་དུ་ཐོ་བརྩིགས། རྣམ་རྟོག་རྒྱ་འབྱམས་སུ་བཏང༌། ཕྱི་རོལ་ཏུ་ཐག་ཟེར་ན་བྱ་ར། ཅ་ཅོ་སྒྲོགས་ན་རྣ་ཉན། བུག་སྒོར་མི་དང་འཕྲད་ན་རྒྱ་བོད་ཧོར་གསུམ་གྱི་གཏམ་བརྗོད་གླེང་བ་སོགས་ཚོགས་དྲུག་ཡུལ་ཕྱིར་སོང་བ། མཚམས་ཀྱི་གཡང་ཤོར་བ། སྣང་བ་ཡུལ་ཕྱིར་འབྲེངས་པ། དངོས་གྲུབ་ཕྱི་ལ་ཡལ་བ། བར་ཆོད་ནང་དུ་འགུགས་པ། བློ་ལང་ཤོར་དུ་ཐལ་བའི་ངང་ལ་ལོ་མཚམས་ཟླ་མཚམས་ཀྱི་ཞག་གྲངས་རྫོགས། ཤེས་རྒྱུད་སྔར་ལས་སྤུ་གང་གིས་བཟང་དུ་མ་སོང་བར། མཚམས་ཐ་མལ་དུ་གྲོལ་བ་དེ་ནམ་ཡང་མ་བྱེད་པར། སྙིང་ལ་རུས་པ་བསྐྱེད་ལ། ན་རུང༌། ཚ་རུང༌། ཤི་རུང༌། མཚམས་བྱས་རུང༌། བསྐྱེད་རིམ་སྒོམ་རུང༌། རྫོགས་རིམ་སྒོམ་རུང༌། ཡི་གེ་འབྲི་རུང༌། ཆོས་སྤྱོད་འདོན་རུང༌། ཅི་བྱེད་ཀྱང༌། རང་སེམས་ཀྱི་ངོ་བོ་བརྗོད་དུ་མེད་པ། བློས་བཏང་མ་ཡིན། ཧ་ཅང་གཅུར་བ་མ་ཡིན། ཧ་ཅང་གློད་པ་མ་ཡིན་པ། སྒོམ་རྒྱུ་མེད་ལ་ཡེངས་སུ་སྤུ་ཙམ་མེད་པ། ད་ལྟའི་ཤེས་


JLAZ012_Page_0518
[མ་དཔེ་གཟིགས་ན་འདིར་གནོན།]

པ་ལ་བསྒྱུར་བཀོད་དང་བཅོས་བསླད་མ་བྱས་པར་འདི་དང་མ་བྲལ་བར་གྱིས་ཤིག །འདི་དང་བྲལ་ན་རྣམ་རྟོག་ལ་ཅི་ཤར་ཆ་མེད་པ་ལ་བདག་སྤྲད་པས་སྒོམ་ཆེན་པ་བློ་རྒྱ་ཆེ་རུ་སོང༌། ཆོས་ལ་རྒྱུས་ཡོད། བླ་མ་ལ་ངོས་འཛིན། མཆེད་གྲོགས་ལ་སྐྱོན་བརྗོད། ཕྱུག་བསྲེལ་འདུ་ལོངས་བསྒྲུབ། མི་བྱེད་དགུ་བྱེད་ཅིག་གི་སྟེང་དུ་འཁྱོལ་བའི་ཚེ། སྐྱེ་བོ་ཀླད་མེད་ཆོས་སྐུ་བསོད་ཆེ་ཟེར། འགྲོ་དོན་རྒྱས་ཟེར། རྩེ་གཏོར་འགམ་པ་ནི་བར་ཆོད་ཀྱི་བདུད་ཞུགས་པའི་རྟགས་མཐར་ཕྱིན་པ་ཡིན་པས། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུག་གྲོག་སྟོངས་ལ་གཏད་ཅེས། ཇོ་བོ་བཀའ་གདམས་པའི་གཏད་པ་བཞི་པོ་འདི་ཆོས་པ་ཀུན་གྱིས་སྤྱི་ནོར་དུ་བྱས་པས་བདུད་ཀྱིས་གླགས་མི་ཁེལ་བ་ཡིན་ལ། གཞན་ཡང་ཉམས་རྟོགས་དང་རྨི་ལམ་གཞན་ལ་བཤད་པ་ཆོས་གཏམ་དང་མཚམས་སྒྲུབ་ཀྱིས་སྡུག་ཡུས་འདྲེན་པ། དམ་ཚིག་མི་གཅིག་པ་ལ་གྲུབ་མཐའ་ཆོས་རྒྱུད་ཀྱི་མཚང་བརྗོད་པ་སོགས་དངོས་གྲུབ་ཡལ་ཞིང་རང་མཚང་སྟོན་པའི་རྒྱུ་ཡིན་པས་དམའ་མོའི་ས་བཟུང༌། ཀུན་དང་མཐུན་པར་བྱ། ཧྲུལ་པོའི་གོས་གྱོན། སྣང་བ་གཏད་མེད་དུ་བཏང༌། གཏིང་ནས་འཆི་བདག་གཤིན་རྗེའི་རྒྱལ་བོ་ལ་ཡང་མི་འཇིགས་པ་ལ། ལྟར་སྣང་ངང་པའི་རྒྱལ་པོ་ཡུལ་འཁོར་སྲུང་ལས་ཀྱང་


JLAZ012_Page_0519
[མ་དཔེ་གཟིགས་ན་འདིར་གནོན།]

དུལ་བས་གཞན་སྣང་དགེ་ལ་འགྱུར་ནུས་པ་ཞིག་དགོས། མདོར་ན་ཆོས་རྣམ་དག་བྱེད་པ་ལ་མཚན་ལྡན་གྱི་བླ་མ་མ་གཏོགས། བསླབ་བྱ་དྲང་པོར་བཤད་མཁན་ཕ་མ་ཡིན་ཀྱང་མི་ཡོང་བས་རང་ཚོད་རང་གིས་བཟུང༌། སུའི་ཁ་ལ་ཡང་མི་ཉན་པར་རི་དྭགས་རྒྱ་ནང་ནས་ཤོར་བ་ལྟ་བུ་ཞིག་དགོས། མཚམས་དང་སྒྲུབ་པ་ལ་གནས་པའི་ཚེ་དམ་བཅའ་རིས་སུ་མ་བོར་བ་སྤང་ལ་བེ་ཕུར་བཏབ་པ་བཞིན་ལྷན་ནེར་སྡོད་ཚུགས་ས་ཞིག་དགོས། གཏམ་ངན་དང་རྐྱེན་ངན་བྱུང་ཚེ་སེམས་ལ་འཕྲིག་མི་ཚུད་པ་སྨྱོན་པ་འུར་ལངས་པ་ལྟ་བུ་ཞིག་དགོས། མི་མང་དང་ལྷན་ཅིག་གནས་པའི་ཚེ་དྲན་པ་ཐ་མལ་དུ་མ་ཡེངས་པར་མ་གསར་གཅེས་ཕྲུག་དང་བྲལ་བ་ལྟ་བུ་ཞིག་དགོས། ལྷ་སྐུ་དང་དག་དྲན་སྒོམ་པའི་ཚེ་སྣང་སྲིད་དག་པ་རབ་འབྱམས་སུ་བསླབ་པ་ཞིག་དགོས། རླུང་དང་རྫོགས་རིམ་སྒོམ་པའི་ཚེ་ཁབ་མིག་ཏུ་སྐུད་པ་འཛུད་པ་ལྟར་གྲིམས་ཆ་བག་ཡངས་སུ་མ་སོང་བར་དགོས། འཆི་བ་ཐོག་བབས་སུ་བྱུང་ཡང་སྐྱོ་སུན་དང་བློ་ལྷག་མེད་པ་བྱ་རྒོད་གནམ་འཕང་གཅོད་པ་ལྟ་བུ་ཞིག་དགོས། དགོས་པ་བདུན་དང་ལྡན་པ་ཞིག་བྱུང་ན་རྒྱལ་བ་གོང་མའི་གྲུབ་མཐའ་སྙོགས་ཤིང་བདག་གི་བསམ་པ་རྫོགས་པ་ལགས་སོ། །ཁྱོད་ཀྱིས་མི་ལུས་ཐོབ་པ་དོན་དང་ལྡན་ནོ། །དམ་པའི་ཆོས་སྒོར་ཞུགས་པ་ལ་འབྲས་བུ་བྱུང་ངོ༌། །


JLAZ012_Page_0520
[མ་དཔེ་གཟིགས་ན་འདིར་གནོན།]

ཨ་ལ་ལ་ཧོ། ཞེས་པ་འདི་ཡང་དད་པ་མོས་གུས་ཀྱི་སྒོ་ནས་གསང་སྔགས་ཀྱི་སྣོད་མཆོག་ཏུ་གྱུར་པ་གཅོད་པའི་དབང་ཕྱུག་འཇའ་ལུས་རྡོ་རྗེའི་ངོར་རྫོགས་ཆེན་པ་ཀློང་ཆེན་ནམ་མཁའི་རྣལ་འབྱོར་གྱིས་སྙིང་གཏམ་ཉམས་མྱོང་གི་སྒོ་ནས་བཤད་པ་ཀུན་གྱིས་དབུ་སྔས་སུ་གླན་པར་ཞུ།། །།

ཀློང་ཆེན་སྙིང་ཐིག་གི་གཏོར་མའི་རེག་ཟིག་གསལ་བ།


JLAZ012_Page_0522
[མ་དཔེ་གཟིགས་ན་འདིར་གནོན།]

ཀློང་ཆེན་སྙིང་ཐིག་གི་གཏོར་མའི་རེག་ཟིག་གསལ་བ་བཞུགས།། ༈ མཆོག་ཏུ་མི་འགྱུར་བདེ་བ་ཆེ། །རྣམ་ཀུན་མཆོག་ལྡན་སྟོང་པ་ཉིད། །ཟུང་འཇུག་རང་བྱུང་རྡོ་རྗེའི་སྐུ། ། དཀྱིལ་འཁོར་ཀུན་བདག་བླ་མར་འདུད། །དེ་ལ་འདིར་རང་གཞུང་དུ་མི་གསལ་བའི་རིགས་ཞལ་ཤེས་སུ་སྩལ་བ་ཇི་བཞིན་གཏོར་མའི་རེག་ཟིག་ཅུང་ཟད་ཅིག་སྤེལ་བ་ལ་གཉིས་ལས། དང་པོ་བླ་མ་མཆོད་པ་དང་ཡང་གསང་བླ་སྒྲུབ་འདྲ་བར་ཟླུམ་གཏོར་དམར་པོ་པད་འདབ་བཞི་པ། ༈ ནང་སྒྲུབ་རིག་འཛིན་འདུས་པ་ལས། བང་རིམ་དམར་པོ་གསུམ་གྱི་འོག་མ་ལ་འཁོར་ཚོགས་སྤྱི་བསྡུས་སུ་མཐེབ་ཀྱུ་ཅི་མང༌། བར་མ་ལ་རྗེ་འབངས་ཉེར་ལྔ་མཚོན་བྱེད་མར་གྱི་ནོར་བུ་ཉེར་ལྔ། སྟེང་མ་ལ་རིག་འཛིན་བརྒྱད་མཚོན་བྱེད་རིན་པོ་ཆེ་ཟུར་བརྒྱད་པ་སེར་པོ། དེ་སྟེང་བདེ་སྟོང་ཡེ་ཤེས་བསྐྱེད་པ་མཚོན་བྱེད་ཉི་ཟླ་གཉིས་ཀྱི་སྟེང་འཁོར་བའི་སྐྱོན་གྱིས་མ་གོས་པའི་རྟགས་པདྨ་འདབ་བཞི་མཛེས་ཚོན་ཅན་གྱི་དབུས་སུ་ཟླུམ་གཏོར་དམར་པོ་བརྗིད་ལྡན། ༈ ཡུམ་ཀ་བདེ་ཆེན་རྒྱལ་མོ་ལ། ཆོས་འབྱུང་གཉིས་བསྣོལ་སྟེང་མའི་རྩེ་མོ་མདུན་བསྟན་གྱི་ཐོག་ཏུ་དཔལ་གཏོར་དམར་པོ་པདྨ་འདབ་བཞི་མཛེས་ཚོན་ཅན་གྱི་བར་མཚམས་རྣམས་སུ་མཐེབ་ཀྱུ་རིལ་བུས་མཚན་པ། ༈ གསང་སྒྲུབ་སེང་གདོང་མ་ལ། ཆོས་འབྱུང་སྔ་མ་ལྟར་གྱི་དབུས་སུ་དཔལ་གཏོར་


JLAZ012_Page_0523
[མ་དཔེ་གཟིགས་ན་འདིར་གནོན།]

དང༌། ཟུར་དྲུག་ལ་འཁོར་ཕྲ་མེན་མ་དྲུག་རང་འདྲ་དམར་པོ་རེ་མཐའ་བསྐོར་དུ་མཁའ་འགྲོ་སོ་གཉིས་སོགས་ལ་ཐེབ་ཀྱུ་གྲངས་མཉམ། ༈ ཐུགས་སྒྲུབ་དཔལ་ཆེན་འདུས་པ་ལ། ཁམས་གསུམ་ཟིལ་གྱིས་གནོན་པ་མཚོན་བྱེད་བང་རིམ་དམར་པོ་གསུམ་གྱི་འོག་མ་གཉིས་ལ་བདུན་བརྒྱ་དང་ཉེར་ལྔའི་ལྷ་ཚོགས་མཚོན་པའི་ཐེབ་ཀྱུ་གང་མང༌། སྟེང་མར་དཔལ་གྱི་འཁོར་བརྒྱད་མཚོན་པའི་རྩིབས་བརྒྱད་སྔོན་པོ། དེ་སྟེང་ཐབས་ཤེས་གཉིས་མེད་མཚོན་པའི་ཉི་མ་དང་ཟླ་བ། དེ་སྟེང་ཡུམ་གནམ་ཞལ་མ་མཚོན་བྱེད་པདྨ་འདབ་བཞི་མཛེས་ཚོན་གྱི་དབུས་དཔལ་གཏོར་བརྗིད་ལྡན། ༈ གཤིན་རྗེ་འཆི་བདག་ཟིལ་གནོན་ལ། དཔལ་གཏོར་དམར་པོ་བྲང་སྟེང་ཁྲམ་རིས་ཅན་ལ་འཁོར་གྱད་གནོན་སྤྲུལ་པའི་ལྷ་བརྒྱད་མཚོན་པའི་ཟུར་གསུམ་དམར་པོ་བརྒྱད་དང་མཐེབ་ཀྱུ་ལྷ་གྲངས་དང་མཉམ་པ། ༈ རྟ་མགྲིན་ཁམས་གསུམ་རོལ་པ་ལ། དཔལ་གཏོར་དམར་པོ་འཁོར་གོ་ལམ་དྲུག་མཚོན་པའི་རང་འདྲ་དྲུག་དང་མཐེབ་ཀྱུ་གང་མང་གིས་བསྐོར་བ། ༈ ཡང་དག་སངས་རྒྱས་མཉམ་སྦྱོར་ལ། དཔལ་གཏོར་དམར་པོ་བྲང་རིས་ཟླ་གམ་ཅན་ལ་འཁོར་ཀཽ་རི་མ་བརྒྱད་མཚོན་པའི་རང་འདྲ་བརྒྱད་དང་མཐེབ་ཀྱུ་གང་མང༌། ༈ ཕུར་པ་བདུད་དཔུང་ཟིལ་གནོན་ལ། དཔལ་གཏོར་དམར་པོ་འཁོར་སྲས་མཆོག་ལྔ་དང་ཁྲོ་བཅུ་མཚོན་པའི་རང་འདྲ་བཅོ་ལྔ་དག་མཐེབ་ཀྱུས་བསྐོར་བ། ༈ གསང་


JLAZ012_Page_0524
[མ་དཔེ་གཟིགས་ན་འདིར་གནོན།]

སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ་ལ། རིག་བྱེད་དབང་མོ་མཚོན་བྱེད་པདྨ་འདབ་བཞི་མཛེས་ཚོན་ཅན་ཟེའུ་འབྲུ་སེར་པོ་དང་བཅས་པའི་ཁར་འོད་ཟེར་ཅན་མ་མཚོན་བྱེད་དམར་ཆ་ཉི་མ། དེ་སྟེང་ནོར་རྒྱུན་མ་མཚོན་བྱེད་གཏེར་བུམ་ལྗང་ཁུ། དེ་སྟེང་རྗེ་བཙུན་སྒྲོལ་མ་མཚོན་བྱེད་དཀར་ཆ་ཟླ་བ། དེ་སྟེང་ཟླུམ་གཏོར་དཀར་པོ་པདྨའི་རྒྱན་ལྡན། ༈ དྲག་པོ་རྟ་ཁྱུང་འབར་བ་ལ། དཔལ་གཏོར་དམར་པོ་པད་འདབ་བཞི་པ། ༈ ཞི་ཁྲོ་ངན་སོང་སྦྱོང་བ་ལ། འོག་གཞི་བང་རིམ་དམར་པོ་གསུམ་གྱི་རྨིང་ལ་དབང་མོ་ཉེར་བརྒྱད་མཚོན་པའི་ཕྱོགས་རེར་དཔལ་གཏོར་དམར་པོ་གྲི་རིས་ཅན་བདུན་རེ། བང་རིམ་འོག་མའི་སྟེང་ལ་ཞི་བ་ལྷག་མ་རྣམས་མཚོན་བྱེད་མཐེབ་ཀྱུ་དང་རིལ་བུ་དཀར་པོ། བར་མའི་སྟེང་ལ་མཐེབ་ཀྱུ་དམར་པོ། སྟེང་མའི་ཁར་སེམས་དཔའ་རྣམ་བརྒྱད་མཚོན་པའི་རིན་པོ་ཆེ་ཟུར་བརྒྱད་པ་སེར་པོ། དེ་སྟེང་ཧེ་རུ་ཀའི་དཀྱིལ་འཁོར་མཚོན་པའི་རྩིབས་བརྒྱད་སྔོན་པོ། དེ་སྟེང་སྣང་སྟོང་གཉིས་མེད་མཚོན་པའི་ཉི་མ་དང་ཟླ་བ། དེ་སྟེང་རྒྱལ་བ་རིགས་བཞི་མཚོན་པའི་པདྨ་འདབ་བཞི་མཛེས་ཚོན་ཅན་གྱི་དབུས་སུ་དབྱིངས་དང་ཡེ་ཤེས་མཚོན་པའི་གཙོ་བོ་གཉིས་ལ་ཟླུམ་གཏོར་དམར་པོ་འཁོར་ལོས་བརྒྱན་པ་སྟེ། རྩ་བ་གསུམ་གྱི་གཏོར་མ་དེ་དག་ལ་རྒྱན་ཡང༌། ཞི་བ་རྣམས་ལ་པ་ཏྲ་དང༌། དྲག་པོར་མེ་རི་གཉིས་ཀར་པད་སྤུངས་སོགས་ཀྱི་


JLAZ012_Page_0525
[མ་དཔེ་གཟིགས་ན་འདིར་གནོན།]

དབུས་སུ་རང་རྟགས་ཕྱག་མཚན་དང་བཅས་པས་ཀུན་ནས་མཛེས་པར་བྱའོ། ། ༈ གཉིས་པ་ཆོས་སྐྱོང་གི་སྐོར། མ་མགོན་ལྕམ་དྲལ་ལ། གཙོ་མོ་ཨེ་ཀ་ཙ་ཊི་དཔལ་གཏོར་དམར་པོ། དེའི་གཡས་སུ་མགོན་པོ་ཟུར་གསུམ་གྲི་རིས་ཅན། གཡོན་དུ་དམ་ཅན་ཟུར་གསུམ་ར་མགོས་མཚན་པ། རྒྱབ་ཏུ་དྲང་སྲོང་ཟུར་གསུམ་གཡས་གཅུས། མདུན་དུ་དུར་ཁྲོད་ལྷ་མོ་ཟུར་གསུམ་མཐའ་བསྐོར་དུ་དཔལ་མགོན་བདུན་ཅུ་རྩ་ལྔར་མཐེབ་ཀྱུ་དེ་གྲངས་ཐམས་ཅད་དམར་པོ། ༈ གཟའ་བདུད་ཆེན་པོ་ལ། གཙོ་བོ་ཟུར་གསུམ་དམར་པོ་གཡས་གཅུས། དེ་ལ་འཁོར་གཟའ་བརྒྱད་རང་འདྲ་བརྒྱད་དང་མཐེབ་ཀྱུ། རྩེ་མོར་མི་རོ་དང་ཤ་དར། གཏོར་མ་སོ་སོར་མེ་རི་དང་དཀར་རྒྱན་མིག་གི་རྣམ་པས་བརྒྱན་པ། ༈ ཚེ་རིང་མའི་རྟེན་གཏོར་ལ། ཁང་བཟང་ལྗང་གུ་ལ་ཁ་བད་དམར་པོས་མཛེས་པའི་སྟེང་གི་དབུས་སུ་གཙོ་མོར་ནོར་བུ་འབར་བ་དང་ཟུར་བཞིར་མཆེད་བཞི་བུམ་སྟེང་འབྲང་རྒྱས་དཀར་པོ་ནོར་བུས་མཚན་པ་བཞི། རྨིང་མཐའ་གངས་རིས་བསྐོར་བའི་ནང་ཁོངས་སུ་སྐྱེད་མོས་ཚལ། མཐུན་རྫས་དང་གཟུགས་འགྲོས་སྣ་ཚོགས་བྲིས་འབུར་ཅི་རིགས་པ། རྒྱབ་ཏུ་མདའ་དར་སོགས་དང༌། མཆོད་གཏོར་ལ། བུམ་སྟེང་ཟླུམ་གཏོར་དཀར་པོ་དང༌། ཕྱོགས་བཞིར་དཀར་ཟླུམ་བཞི། བར་མཚམས་སུ་མཐེབ་ཀྱུ་རིལ་བུ་ཅན། ༈ ཆད་


JLAZ012_Page_0526
[མ་དཔེ་གཟིགས་ན་འདིར་གནོན།]

ཐོ་ལ། ཟུར་གསུམ་དམར་པོ་གྲི་རིས་ཅན་གྱི་ལོགས་གསུམ་ལ་མཐེབ་ཀྱུ་སུམ་བརྩེགས་རེ། ༈ བསྟན་མ་ལ། ཟུར་གསུམ་གསུམ་གྱི་དབུས་མ་ནག་པོ། གཡས་དམར་པོ། གཡོན་དཀར་པོ་སོ་སོའི་མདུན་དུ་རང་མདོག་གི་མཐེབ་ཀྱུ་སུམ་བརྩེགས་རེ། ༈ སྔོན་གཏོར་ལ། དཀར་ཟླུམ་འདབ་བཞི། མཐའ་ཆང་བུས་དཀྲིས་པའི་མདུན་དུ་མཐེབ་ཀྱུ་རིལ་བུ་ཅན་ཏེ། དེ་ལྟར་མཐའ་གཅིག་ཏུ་ངེས་པའི་ཁ་ཚོན་ཆོད་པར་དཀའ་ཡང་འཇིག་རྟེན་མིག་གཅིག་སྐྱབས་མགོན་མཆོག་གི་གསུང་རྡོ་རྗེའི་སྒྲ་གདངས་ཆེན་པོ་རྣ་བའི་བདུད་རྩི་སོན་པ་ཇི་བཞིན་གང་ཞབས་སྤྱི་བོའི་ཅོད་པཎ་དུ་ཐོབ་པ་འབངས་ཨ་བྷཱ་ཡ་དྷཱི་ཀཱ་ཤས་རེག་ཟིག་ཏུ་སྤེལ་བས་གཞན་ལ་ཕན་པར་གྱུར་ཅིག་གུ། །

རྗེ་གྲུབ་ཐོབ་ཆེན་པོས་ཀློང་ཆེན་ནམ་མཁའི་རྣལ་འབྱོར་ལ་དག་སྣང་དུ་སྩལ་བ་ཐུགས་རྗེ་བྱམས་པའི་མན་ངག་འགྲོ་བའི་སྲོག་འཛིན།


JLAZ012_Page_0528
[མ་དཔེ་གཟིགས་ན་འདིར་གནོན།]

རྗེ་གྲུབ་ཐོབ་ཆེན་པོས་ཀློང་ཆེན་ནམ་མཁའི་རྣལ་འབྱོར་ལ་དག་སྣང་དུ་སྩལ་བ་ཐུགས་རྗེ་བྱམས་པའི་མན་ངག་འགྲོ་བའི་སྲོག་འཛིན་བཞུགས།། དཔལ་མཆིམས་ཕུའི་མེ་ཏོག་ཕུག་ཉང་ཕུག་འོག་མར་ལོ་གསུམ་གྱི་དུས་རེ་ཞིག་ན། ལུས་ཀྱི་འདུ་བ་ཤིན་ཏུ་འཁྲུགས་ཏེ་ཚ་གྲང་ཁོད་མི་སྙོམ་པའི་ཟུག་རྔུས་མནར་བའི་ཚེ་ན་ཚ་རྐྱེན་ཐོག་ཏུ་རོ་སྙོམས། དམ་ཚིག་ཅན་འདྲས་ཚོགས་སྐོང་བགྱིས་པའི་ཚེ། མདུན་གྱི་ནམ་མཁར་གྲུབ་ཐོབ་ཐང་སྟོང་རྒྱལ་པོ་སྐུ་སྨད་བལྟར་མི་མངོན་པ་ལ། སྐུ་སྟོད་ཧེ་རུ་ཀ་ལ་གཟི་བརྗིད་ཅན། དབུ་སྐྲའི་ཐོར་ཚུགས་སྦ་ལྷས་ཀྱིས་བསྡམས་པ་ཞིག་མཇལ་བ་ལ་མོས་གུས་ཆེན་པོ་སྐྱེས་པའི་མོད་ལས་འདི་སྐད་གསུངས་བའི་སྣང་བ་ཤར་རོ། །ཐང་སྟོང་རྒྱལ་པོ་ལྟ་བ་ངོས་གཟུང་དང་བྲལ་བའི་རྒྱུད་ཅེས་བྱ་བ། ཐང་ནི་སྣ་ཚོགས་ཀུན་གཞིའི་ཐང༌། །སྟོང་ནི་རྒྱུ་འབྲས་ངོ་བོས་སྟོང༌། །རྒྱལ་ནི་འཁོར་བའི་གཡུལ་ལས་རྒྱལ། །རྒྱལ་ཁབ་སྤངས་པའི་རྒྱལ་པོ་ངས། །ཅི་ཡང་མ་ཡིན་གཞི་ཐོག་ནས། །སེམས་ཅན་འཁོར་བར་འཁྱམས་པ་མཐོང༌། །ཐང་སྟོང་རྒྱལ་པོ་རང་ངོར་གྲོལ། །གྲོལ་ཅེས་བྱ་བའང་བློས་བཏགས་ཙམ། །རྒྱུ་འབྲས་འདི་ལ་ཡིད་མ་ཆེས། །རྒྱུ་འབྲས་འདི་ལ་ཡིད་ཆེས་ན། །གཏད་མེད་ནམ་མཁའ་སྟོང་པ་ནས། །བདེན་མེད་འཇའ་ཚོན་གང་ནས་བྱུང༌། །འཁོར་འདས་འདི་ལ་ཡིད་མ་ཆེས། །


JLAZ012_Page_0529
[མ་དཔེ་གཟིགས་ན་འདིར་གནོན།]

འཁོར་འདས་འདི་ལ་ཡིད་ཆེས་ན། །འཁོར་བ་སྤངས་པའི་ཕ་རོལ་ན། །མྱ་ངན་འདས་པ་ག་ལ་ཞིག །ལྟ་བ་འདི་ལ་ཡིད་མ་ཆེས། །ལྟ་བ་འདི་ལ་ཡིད་ཆེས་ན། །ལྟ་བ་ཐམས་ཅད་བཅོས་མ་སྟེ། །མ་བཅོས་ངོ་བོ་ཇི་ལྟར་མཐོང༌། །སྒོམ་པ་འདི་ལ་ཡིད་མ་ཆེས། །སྒོམ་པ་འདི་ལ་ཡིད་ཆེས་ན། །སྒོམ་དུ་མེད་པའི་ཆོས་ཉིད་ལ། །འཇུར་བུས་བཅིངས་པ་ཐང་རེ་ཆད། །སྤྱོད་པ་འདི་ལ་ཡིད་མ་ཆེས། །སྤྱོད་པ་འདི་ལ་ཡིད་ཆེས་ན། །ཐང་སྟོང་རྒྱལ་པོའི་སྨྱོ་སྤྱོད་ཀྱིས། །གྲུབ་པ་ཐོབ་པ་ག་ལ་སྲིད། །རྒྱུ་འབྲས་ཉན་ཐོས་བྱིས་པའི་ཆོས། །འཁོར་འདས་ལག་པའི་ཕྱི་ནང་འདྲ། །ལྟ་སྒོམ་སྤྱོད་འབྲས་བློས་བཏགས་ཙམ། །ཡིད་ཆེས་ཡོད་ན་གཏད་སོ་ཡིན། །ཡིད་མ་ཆེས་ན་དངོས་གྲུབ་བསྐལ། །དེ་ཕྱིར་ཆོས་ཀུན་རང་ངོ་ནས། །དེར་འཛིན་བྲལ་བའི་གཤིས་ལུགས་ལ། །ལྷུག་པར་ཞོགས་དང་སྙིང་གི་བུ། །ཞེས་གསུངས་པའི་མོད་ལ་གདམས་ངག་འདི་བཀའ་རྒྱས་བཏབ་ནས་གནང་བྱུང་ངོ༌། ། ༈ ཆུ་བོ་འཁོར་བའི་རྒྱ་མཚོ་ཡིན། །གྲུ་གཟིངས་ཐར་པའི་ལམ་ཆེན་ཡིན། །སེམས་ཅན་སྲོག་ལ་སྐྱོབ་པའི་ཕྱིར། །བརྟན་བྱེད་ལྷུན་པོའི་འཁོར་ལོ་དང༌། །འཇིགས་སྐྱོབས་ཐུགས་རྗེའི་འཁོར་ལོ་ཡིས། །འགྲོ་བའི་སྡུག་བསྔལ་སོལ་ཅིག་བུ། །དེ་ལ་ལྷུན་པོའི་འཁོར་ལོ་ནི། །ཙཀྲ་མུ་ཁྱུད་བཞི་སྐོར་བའི། །ལྟེ་བར་རི་རབ་བང་རིམ་


JLAZ012_Page_0530
[མ་དཔེ་གཟིགས་ན་འདིར་གནོན།]

བཞིར། །འོག་ནས་རིམ་བཞིན་འབྱུང་བཞིའི་སྔགས། །དེ་ཕྱིར་བསྟན་མའི་སྙིང་པོ་ནི། །ཙི་རི་ཙི་རི་ལ་སོགས་མཐར། །ས་འཛིན་ལག་པ་ཆེན་པོའི་སྔགས། །ལཾ་ལཾ་ཧསྟ་མ་ཧཱ་རཏྣ་སྤོ་ཊ་བཾ་སྭཱ་ཧཱ། ཞེས་དང་དེའི་ཕྱིར་མུ་ཁྱུད་ལ། སངས་རྒྱས་ཀྱི་བདེན་པས་གྲུ་གཟིངས་བརྟན་པར་གྱུར་ཅིག །ཆོས་ཀྱི་བདེན་པས་གྲུ་གཟིངས་བརྟན་པར་གྱུར་ཅིག །དགེ་འདུན་གྱི་བདེན་པས་གྲུ་གཟིངས་བརྟན་པར་གྱུར་ཅིག །ལྷ་དང་དྲང་སྲོང་གི་བདེན་པས་གྲུ་གཟིངས་བརྟན་པར་གྱུར་ཅིག །ཐང་སྟོང་རྒྱལ་པོའི་བདེན་པས་གྲུ་གཟིངས་བརྟན་པར་གྱུར་ཅིག །སྟོང་ཉིད་ཀྱི་བདེན་པས་གྲུ་གཟིངས་བརྟན་པར་གྱུར་ཅིག །དེའི་ཕྱིར་ཡེ་དྷར་ཅི་མང་བཀོད། ། གཙུག་ལག་གསུམ་གྱི་ཐམ་ཤིང་དང༌། །བཀྲ་ཤིས་རི་ཆེན་དགུ་ཡི་རྨིངས། །གསེར་གཡུ་ཕ་ཝང་ལོང་བུ་རྣམས། །ཞ་ཉེའི་པར་བུའི་ནང་དུ་བཅུག །བདེན་ཚིག་གྲུབ་པས་རབ་ཏུ་གནས། །རྟ་མགོའི་ཚུགས་ཤིང་འོག་ཏུ་བཏགས། །བརླན་དང་མ་བྲལ་དམ་ཚིག་ཡིན། །ཨེ་ཝཾ་ཧཱཾ། འཇིགས་སྐྱོབ་ཐུགས་རྗེའི་འཁོར་ལོ་ནི། །ཐང་སྟོང་རྒྱལ་པོ་ང་ཡི་གཟུགས། །གཡོན་པ་བདེ་སྦྱིན་བྷནྡྷ་དང༌། །གཡས་པ་སྐྱབས་སྦྱིན་ཕྱག་རྒྱ་ཅན། །རླུང་ལྷའི་སྟེང་ན་བརྗིད་པ་ཡི། །ཐུགས་ཀར་འཁོར་ལོ་མུ་ཁྱུད་བཞིའི། །དབུས་ན་གསེར་གྱི་རྣམ་བཅུ་དབང༌། །དེ་ཡི་མུ་ཁྱུད་ཕྱི་མ་ལ། །


JLAZ012_Page_0531
[མ་དཔེ་གཟིགས་ན་འདིར་གནོན།]

མཚལ་དང་ཅུ་གང་བསྲེས་པ་ཡི། །ཀླུ་དབང་རྒྱལ་པོའི་སྔགས་ཤམ་དུ། །ཏདྱ་ཐཱ་ག་ཏེ་ག་ཏེ་པ་ར་ག་ཏེ་པ་ར་སཾ་ག་ཏེ་བོ་དྷི་སྭཱ་ཧཱ། ཞེས་དང་། རིགས་གསུམ་མགོན་པོའི་གཟུངས། དེ་ཡི་མུ་ཁྱུད་ཐ་མ་ལ། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿཨཱརྱ་ཏཱ་རེ་དུཿཁ་ཤཱནྟིཾ་ཀུ་རུ་ཧོཿ ཨོཾ་པདྨ་ཏ་ཀྲིཏ་ཧ་ཡ་གྲཱི་ཝ་མ་ཧཱ་ཡཀྴ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊཿ གནོད་བྱེད་ཐམས་ཅད་མཱ་ར་ཡ་ཆིངས་ནན། ཞེས་དང་ཕྱི་ལ་དབྱངས་གསལ་བཀོད། དྲི་བཟང་བདུད་རྩིའི་སྨན་གྱིས་བྱུགས། །རབ་གནས་བདེ་གཤེགས་རིང་བསྲེལ་དང༌། །ཁྲིམས་ལྡན་དགེ་སློང་གཙུག་གི་སྐྲ། །གྲུབ་ཐོབ་དབུ་ལོ་ཕྱག་སེན་བཅས། །སེལ་མེད་བཙོར་བཏོན་རིན་ཆེན་གྱི། །ཟ་མ་ཏོག་གི་ནང་དུ་བཅུག །གྲུ་ཤན་རྟ་མགོའི་གཙུག་ཏུ་བསྐྱོན། །མི་ལག་མི་རེག་འགོམ་ཡུགས་སྤོངས། །གྲུ་གཟིངས་མགོ་འཇུག་ལྡོག་མི་སྲིད། །ཤིན་ཏུ་གསལ་ཞིང་གདམས་ངག་ཏུ། །སྙིང་རྗེ་བྱང་ཆུབ་སེམས་ལྡན་པས། །འབུ་སྲིན་སྦྲང་མ་ཡན་ཆད་ཀྱི། །ཆུ་ནང་བྱིངས་པའི་སྲོག་ཆགས་སྟོང༌། །ལོ་ལོ་བཞིན་དུ་ཚེ་ཐར་དང༌། །ཁ་འབར་གཏོར་གླུད་བརྒྱ་རྩ་བརྒྱད། །ཆུ་ལ་གཤེགས་ཤིང་ཐེ་ཚོམ་སྤོངས། །ཆོས་ཉིད་བདེན་པ་མཐུ་ཆེ་བའི། །རྟེན་འབྲེལ་ནུས་པ་མངོན་ཕྱུང་ནས། །མ་སྦས་མ་གབ་བུ་ལ་གདམས། །གཞན་དོན་སྒྲུབ་པ་སྙིང་སྟོབས་བསྐྱེད། །ཅེས་གསུངས་ནས་རང་སྣང་འོད་གསལ་ཆེན་པོའི་ཀློང་དུ་ཐིམ་པར་གྱུར་ཏོ། །

མདོ་སྔགས་ཟུང་དུ་འཇུག་པའི་སྤྱོད་ཡུལ་ལམ་ཁྱེར་སངས་རྒྱས་ལམ་ཞུགས།


JLAZ012_Page_0532
[མ་དཔེ་གཟིགས་ན་འདིར་གནོན།]

མདོ་སྔགས་ཟུང་དུ་འཇུག་པའི་སྤྱོད་ཡུལ་ལམ་ཁྱེར་སངས་རྒྱས་ལམ་ཞུགས་ཞེས་བྱ་བ་བཞུགས།།


JLAZ012_Page_0533
[མ་དཔེ་གཟིགས་ན་འདིར་གནོན།]

ཐམས་ཅད་མཁྱེན་པ་ལ་ཕྱག་འཚལ་ལོ། །འདི་ལྟར་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་གང་ཟག་དེས་ཚོགས་བསག་སྒྲིབ་སྦྱང་ཐབས་དུ་མའི་སྒོ་ནས་བྱ་དགོས་ལ། དེའི་བྱ་ཐབས་ནི་ཐམས་ཅད་མཁྱེན་པ་ཐབས་མཁས་ལ་ཐུགས་རྗེ་ཆེ་བའི་ཕྱིར་སྤྱོད་ལམ་གྱི་ཞོར་ཙམ་ལའང་དགེ་བ་དཔག་ཏུ་མེད་པ་བསག་ཐབས་བསྟན་པས་འདིར་འདུམས་ཏེ་བློ་དམན་ལ་ཕན་པའི་ཕྱིར་བསྟན་པར་བྱའོ། །དེ་ལ་དང་པོར་སྔ་ཞོག་གཉིད་ཁྲ་ལྷག་གིས་སད་ཙ་ན་སེམས་ཅན་ཐམས་ཅད་མ་རིག་པ་ལས་སད་པར་གྱུར་ཅིག་སྙམ་དུ་སེམས་བསྐྱེད། མལ་ལས་ལྡང་བ་ན་སེམས་ཅན་ཐམས་ཅད་སངས་རྒྱས་ཀྱི་སྐུ་ཐོབ་པར་ཤོག་ཅིག་སྙམ་པ་དང༌། གོས་གྱོན་པའི་ཚེ་སེམས་


JLAZ012_Page_0534
[མ་དཔེ་གཟིགས་ན་འདིར་གནོན།]

ཅན་ཐམས་ཅད་ངོ་ཚ་དང་ཁྲེལ་ཡོད་ཀྱི་གོས་གྱོན་པར་ཤོག་ཅིག །སྐ་རགས་འཆིང་བ་ན་དགེ་བའི་རྩ་བ་ཟུང་དུ་འབྲེལ་བར་ཤོག་ཅིག །སྟན་ལ་འདུག་པ་ན་རྡོ་རྗེའི་སྟན་ཐོབ་པར་ཤོག་ཅིག །ཁང་པའི་ནང་དུ་འཇུག་པ་ན་སེམས་ཅན་ཐམས་ཅད་ཐར་པའི་གྲོང་ཁྱེར་དུ་འཇུག་པར་ཤོག་ཅིག །ཉལ་བའི་ཚེ་སེམས་ཅན་ཐམས་ཅད་སངས་རྒྱས་ཆོས་སྐུ་ཐོབ་པར་ཤོག་ཅིག །རྨི་ལམ་རྨིས་པ་ན་ཆོས་ཐམས་ཅད་རྨི་ལམ་ལྟ་བུར་བདེན་མེད་དུ་རྟོགས་པར་ཤོག་ཅིག །སྐྱོ་ཚ་གཡོ་སྐོལ་གྱི་ཚེ་མེ་ལྷབ་ཀྱིས་འབར་བ་དང༌། མེ་དེ་ཉིད་གདོད་ནས་ཡུམ་གོས་དཀར་མོའི་ངོ་བོ་ཡིན་ལ་ཡིན་པར་ངེས་ཤེས་བསྐྱེད། དེའི་ཀློང་དུ་རྣམ་པ་ཧཱུྃ་ལས་ཟ་བྱེད་རྡོ་རྗེ་མཁའ་འགྲོ་སྐུ་མདོག་ནག་པོ་ཞལ་གཅིག་ཕྱག་གཉིས་ཧཱུྃ་མཛད་


JLAZ012_Page_0535
[མ་དཔེ་གཟིགས་ན་འདིར་གནོན།]

ཀྱི་ཕྱག་རྒྱས་རྡོར་དྲིལ་མཛིན་པ། ཞབས་གཡས་བསྐུམས་གཡོན་བརྐྱངས་པ་རིན་པོ་ཆེའི་རྒྱན་སྣ་ཚོགས་པས་སྤྲས་ཤིང་ཞལ་གདངས་པའི་ལྗགས་རཾ་ཡིག་གིས་མཚན་པ་ལ་དུས་གསུམ་བདེ་གཤེགས་ཐམས་ཅད་ཀྱི་ལྗགས་ཀྱང་འདུས་པའི་ངོ་བོར་བསམ། མདུན་དུ་ཏིལ་ཅུང་ཟད་འདུ་བགྱིས་པ་དེར་རང་གི་སྙིང་ཁར་སྡིག་སྒྲིབ་རྣམས་བཾ་ཡིག་ནག་པོའི་རྣམ་པར་གནས་པ་ལ་སྒོ་གསུམ་གྱི་སྡིག་སྒྲིབ་ཐམས་ཅད་འདུས་པར་གསལ་གདབ། དེ་བཞིན་དུ་ལྟེ་བར་རཾ་དང་རྐང་མཐིལ་དུ་ཡཾ་ལས་རླུང་དཀྱིལ་གསལ་བས་རླུང་གཡོས་ལྟེ་བའི་མེ་འབར་གྱེན་ལ་སོང་སྙིང་ཁའི་བཾ་ཡིག་རྔོན་པས་རི་དྭགས་དེད་པ་ལྟར་སྣ་བུག་ནས་ཐོན་མདུན་གྱི་ཏིལ་ལ་སྡིག་པ་རྭ་ཅན་གྱི་རྣམ་པས་ཐིམ་པར་བསམས། ཨོཾ་ཨཱཿཧཱུྃ་ལན་ཅི་རིགས་ཀྱིས་བདུད་རྩིར་བསྒྱུར། དེ་ནས་ཨོཾ་བཛྲ་ཊཱ་ཀ་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་ད་ཧ་ན་བྷསྨི་ཀུ་རུ་ཡེ་སྭཱ་ཧཱ། ཞེས་བཟླ་བ་དང་སྦྲགས་མཐེབ་མཛུབ་ཀྱིས་ཏིལ་ཐབ་ནང་དུ་འབུལ། རྫས་རྫོགས་པ་དང་ཡི་གེ་བརྒྱ་པ་ཚར་གསུམ་བརྗོད་ནས་ནོངས་པ་བཤགས། བཛྲ་མུས་ཡེ་ཤེས་པ་རང་གནས་སུ་གཤེགས། དམ་ཚིག་པ་མེ་དང་དབྱེར་མེད་དུ་འདྲེས་པར་བསམ་ལ། དགེ་བ་སེམས་ཅན་ཐམས་ཅད་ལ་བསྔོ། འགྲོ་བའི་ཚེ་སངས་རྒྱས་ཀྱི་ཞིང་ཁམས་རྡུལ་ཕྲ་རབས་ལ་སྐོར་བ་བྱེད་པར་བསམ། གོས་གསར་པ་ལྟ་བུ་གྱོན་རྒྱུ་བྱུང་ན་གོས་དེ་སྭ་བྷཱའི་སྔགས་ཀྱིས་སྟོང་པར་


JLAZ012_Page_0536
[མ་དཔེ་གཟིགས་ན་འདིར་གནོན།]

སྦྱངས། སྟོང་པའི་ངང་ལས་ཏྲཱཾ་ལས་ལྷའི་གོས་རིན་ཐང་དང་བྲལ་བར་བསམ་ལ། རང་གི་རྩ་བའི་བླ་མ་བཞུགས་ཕྱོགས་སུ་འབུལ་བའི་འདུ་ཤེས་ཀྱི་དེང་ཙམ་བྱ། དེ་ནས་རང་ཡི་དམ་གང་བྱེད་དུ་གསལ་ལ་གྱོན། ཁྲུས་བྱེད་པ་དང་ཆུ་ལ་འཇུག་པ་སོགས་ཀྱི་ཚེ་ཆུ་དེ་ཡང་གདོད་མ་ཉིད་ནས་མཱ་མ་ཀཱིའི་ངོ་བོ་ཡིན་ལ་ཡིན་པར་ངེས་ཤེས་བསྐྱེད། རྣམ་པ་བཾ་ལས་ཆུའི་ལྷ་མོ་རྡོ་རྗེ་ཌཱ་ཀྐིའི་སྐུར་གསལ་བཛྲ་ཌཱཀྐི་ཤཱནྟིཾ་ཀུ་རུ་སྭཱ་ཧྭ། ཞེས་བཟླ་ཞིང་ནད་གདོན་སྡིག་སྒྲིབ་ཞི་བའི་གསོལ་བ་བཏབ། མཐར་དེ་ཉིད་འོད་དུ་ཞུ་ནས་བདུད་རྩིའི་རང་བཞིན་དུ་གྱུར་པར་བསམ་ལ་ཁྲུས་དང་ཆུ་རྒལ་བ་ལ་སོགས་པ་བྱ། གུང་ཚིགས་ཟ་བ་ན། ཡོ་བྱད་རྣམས་མདུན་དུ་བརྡར་ལ་དེ་ཡང་ཇི་ལྟར་འདོད་པའི་ཡོན་ཏན་ལམ་དུ་ཁྱེར་བ་གསང་སྔགས་ཀྱི་འཕགས་ཆོས་ཡིན་ཀྱང༌། ཇི་སྲིད་བསྐྱེད་རྫོགས་ཀྱི་ནུས་པ་མངོན་དུ་གྱུར་པའམ། དྲོད་ཐོབ་པ་ཙམ་མ་བྱུང་བར་ལ་ལྟ་བའི་ཕྱོགས་སུ་སྤྱོད་པ་ཤོར་བའི་དགེ་སྟོང་སྡིག་སྟོང་དང༌། སྤྱོད་པའི་ཕྱོགས་སུ་ལྟ་བ་ཤོར་བའི་ཨ་འཐས་མངོན་ཞེན་དུ་གོལ་བའི་ལས་མི་བྱེད་པ་ཨོ་རྒྱན་སངས་རྒྱས་གཉིས་པའི་དགོངས་པ་ཐུན་མོང་མ་ཡིན་པས་འདི་ལྟར་ཤ་ཆང་ལ་སོགས་པ་ཟ་རྒྱུ་ཡོད་ན། ག་རེ་སྟོན་པ་སངས་རྒྱས་ཀྱི་བཀའ་ལས། ངས་ཤའི་ཟས་ནི་སུ་ལའང་མ་གནང་མི་གནང་གནང་བར་མི་འགྱུར་རོ། །ཞེས་དང༌།


JLAZ012_Page_0537
[མ་དཔེ་གཟིགས་ན་འདིར་གནོན།]

དེང་ཕྱིན་ཆད་ངའི་ཉན་ཐོས་རྣམས་ཤ་བཟའ་བར་མི་རུང་ངོ༌། །ཞེས་ཁྲིམས་བསྒྲགས་པ་ཡིན་ནོ། །རྡོ་རྗེ་ཐེག་པའི་སྐབས་སུའང་ཏིང་ངེ་འཛིན་གྱི་ནུས་པ་མངོན་དུ་གྱུར་ནས་རང་ལ་སྒྲིབ་པས་མི་གོས་ཤིང༌། སེམས་ཅན་དེ་ལ་ཤ་ཁྲག་གི་འབྲེལ་པས་ཕན་ཐོག་ནུས་པ་ཡིན་ན་དང་གོ་བཅད། བདག་ལ་དེ་ལྟར་གྱི་གདེང་མི་འདུག །སེམས་ཅན་ཐམས་ཅད་ཀྱིས་ཕ་མ་མ་བྱས་པ་མེད། ཤ་འདིའི་བདག་པོ་སྲོག་ཆགས་དེ་འཕགས་པ་ཀཱ་ཏྱ་ཡ་ནས་བསོད་སྙོམས་ལ་གཤེགས་པའི་ལོ་རྒྱུས་ལྟར་སྐྱེ་བ་སྔ་མའི་ཕ་མ་ནི་ཡིན་ངེས་ཏེ་ཡིན་ན་ད་ལྟའི་ཕ་མ་ལ་ཤན་པས་སྲོག་ལས་བྱས་པའི་ཤ་བྱིན་ན་བཟའ་བར་འདོད་དམ་སྙིང་རེ་རྗེ་སྙམ་དུ་བསམ་མནོ་ཞིག་བཏང་ན་བློ་གཟུར་གནས་ཤིག་ཡིན་ཕྱིན་ཆད་སྙིང་རྩི་ཤུམ་ཤུམ་པ་དང་སེམས་ཅན་དེ་ལ་སྙིང་རྗེ་དབང་མེད་དུ་མི་སྐྱེ་བའི་ཐབས་མེད། དེའི་ཚེ་བྱང་ཆུབ་ཀྱི་སེམས་མཚན་ཉིད་དང་ལྡན་པ་མ་བྱུང་ཡང་རྗེས་མཐུན་ཞིག་ངེས་པར་སྐྱེ་བས་དེ་ཁའི་ཤེས་པ་ངར་མ་ཉམས་པས་ཀཾ་ཀ་ནི་དང༌། གཙུག་ཏོར་མའི་གཟུངས། བཏགས་གྲོལ་གྱིས་ཡང་སྙིང་སོགས་ཅི་ནུས་བཟླ། ཤ་ལ་ཕུས་འདེབས། དེ་ལ་དམིགས་ནས་སྨོན་ལམ་དྲག་པོ་གདབ། འདི་ལ་སྟོང་ཉིད་ལས་འབྲས་སུ་ཤར་བ་ཟེར། དེ་མགོན་སྔགས་པར་ཁས་བླངས་ནས་ཤ་ཆང་བག་མེད་དུ་ཟ་བ་དང༌། ཁྲ་སྦྱང་ལས་


JLAZ012_Page_0538
[མ་དཔེ་གཟིགས་ན་འདིར་གནོན།]

ཁྱད་པར་ག་ལ་ཡོད། དེ་བཞིན་དུ་ཆང་ལ་རྡོ་རྗེ་ཐེག་པའི་དམ་ཚིག་ཙམ་དུ་རོལ་པ་ལའང༌། ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་པས་བྱིན་གྱིས་མ་བརླབས་པར་སྐྱེ་བོ་མི་ནག་པ་ལྟར་འཐུངས་ན་དམ་ཚིག་དང་དངོས་གྲུབ་གཉིས་ཀ་ཉམས་པར་བཤད་དེ་སྡོམ་བྱུང་ལས། ཧ་གསུམ་ལ་སོགས་དང་བྲལ་བར། །ཅི་སྟེ་དམ་ཚིག་ཅན་གྱིས་འཐུང༌། །དེ་ནི་དུག་འགྱུར་ཐེ་ཚོམ་མེད། །སྔགས་ཀྱི་དངོས་གྲུབ་མི་འབྱུང་ངོ༌། །ཞེས་གསུངས། མང་ཉུང་ཡང་ཟ་ཐོད་གང་ལས་མང་བར་མི་འཐུངས། གལ་ཏེ་དེ་བས་མང་བར་འཐུངས་ནས་མྱོས་ན་དམྱལ་བ་ངུ་འབོད་ཀྱི་གནས་སུ་སྐྱེས་ཏེ། རྒྱུད་ལས། སུ་ཞིག་ཆང་གིས་མྱོས་གྱུར་པ། །དེ་ལ་གེགས་ནི་མང་པོ་འབྱུང༌། །སྔགས་པ་ཆང་གིས་མྱོས་གྱུར་གང༌། །ངུ་འབོད་གནས་སུ་འཚོད་པར་འགྱུར། །ཞེས་སོ། །འོ་ན་སློབ་དཔོན་པདྨ་དང་གྲུབ་ཐོབ་བིརྺ་པ་སོགས་ཀྱིས་ཆང་ཁལ་ལྔ་བརྒྱ་དུས་གཅིག་ལ་བཞེས་པ་མ་ཡིན་ནམ་སྙམ་ན། དེ་དག་ཆང་ཁལ་ལྔ་བརྒྱས་བཟི་བ་དང་ལྟ་ཅི་ངོམ་པ་ཙམ་ཡང་མ་བྱུང་བས་ཆང་རིན་མ་འཁྱོངས་པར་ཉི་མ་རྟོད་ལ་མནན་པའི་ལོ་རྒྱུས་འདུག་པ་ལྟར་ཁྱེད་ཀྱང་དུག་ལ་རྗེན་ཟས་ཀྱིས། ཉི་ཟླ་བཙོན་དུ་བཟུང༌། རི་བོ་ཕན་ཚུན་བརྗེས། ནམ་མཁར་འཕུར་ནས་སོང༌། སྤྱིར་བསྟན་པ་ལ་ཕན། སྒོས་རྡོ་རྗེ་ཐེག་པ་ལ་ཕན། དད་ལོག་སྣང་བ་བསྒྱུར་ནུས་པ་ཞིག་འོང་


JLAZ012_Page_0539
[མ་དཔེ་གཟིགས་ན་འདིར་གནོན།]

བར་གདའ་སྟེ་བཀའ་དྲིན་ཆེ། དེ་ལྟ་མ་ཡིན་པར་སྐད་ཅིག་ལ་འདུ་ཤེས་འཁྲུལ། སྲོག་རྩལ་རླུང་ཞུགས་པའི་སྨྱོན་པ་ལྟར་ཅི་ཟེར་མང༌། ཅི་བྱེད་མེད་པ་དེ་འདྲ་གྲུབ་རྟགས་ཡིན་ན་ངོ་མཚར་ཆེའོ། །དེ་སྐད་དུ་ལུང་ལས། སྙིགས་མ་ལྔ་བདོར་གྱུར་པའི་དུས། །གསང་སྔགས་དམ་རྫས་ཤ་ཆང་ལ། །སྤྱོད་དུ་རུང་བའི་ཁུངས་སྨོས་ཏེ། །ཏིང་འཛིན་ཉམས་ཀྱི་དྲོད་མེད་པར། །ཤ་ཁྲག་ཆང་ལ་ཐམས་ཅད་སྤྱོད། །འདི་ཡང་དམ་ཚིག་མེད་དོ་ཞེས། །ཆོས་བཞིན་སྤྱོད་རྣམས་ཐབས་ཀྱིས་སྨོད། །དེ་འདྲ་བསྟན་པའི་མཐའ་རུ་འབྱུང། །ཀྱེ་མ་ཀྱི་ཧུད་དམྱལ་བ་ལས། །འགྲོ་ས་མེད་དོ་སྙིང་རེ་རྗེ། །ཞེས་བཤད་དོ། །དེའི་ཕྱིར་བླང་དོར་དེ་དག་ངེས་པར་བྱས་ལ་བྱང་ཆུབ་བསྒྲུབ་པའི་ལུས་རྟེན་ཆུད་མི་ཟ་བ་དང་རྡོ་རྗེ་ཐེག་པའི་དམ་ཚིག་ཚོགས་ཀྱི་འཁོར་ལོས་ལུས་དཀྱིལ་གྱི་འཁོར་ལོར་མཆོད་པའི་འདུན་པ་ལས་རྒྱགས་པ་དང་གཟི་བརྗིད་འཕེལ་བ་ལ་སོགས་པའི་ཆེད་དུ་མ་ཡིན་པར་དཀྱིལ་འཁོར་གསུམ་ལྡན་གྱི་ངང། ཧོ་བཟའ་བཅའ་བཏུང་བ་ཡང་དག་རྫས། །གདོད་ནས་ཚོགས་ཀྱི་འཁོར་ལོ་ཆེ། །ཨོཾ་ཨཱཿཧཱུྃ་དང་ཧ་ཧོ་ཧྲཱིཿས། །ཟག་མེད་བདེ་ཆེན་བདུད་རྩིར་གྱུར། །བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པའི་རིགས་བརྒྱའི་དཀྱིལ་འཁོར་ལྷ། །འགུལ་བསྐྱོད་ཐམས་ཅད་བདེ་བ་


JLAZ012_Page_0540
[མ་དཔེ་གཟིགས་ན་འདིར་གནོན།]

ཆེ། །རྡོ་རྗེ་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོར། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ནས། །ཟས་ཀྱི་སྒྲིབ་པར་མི་འགྱུར་ཞིང༌། །གཏན་པ་མེད་པའི་སྦྱིན་བདག་ཀྱང༌། །ཐེག་ཆེན་འབྲས་བུར་སྤྱོད་པར་ཤོག །ཅེས་བརྗོད་ནས་རྡོ་རྗེ་ལུས་ཀྱི་དག་དྲན་འདི་ལྟར་ངེས་པར་བྱ་སྟེ། རྐང་མཐིལ་རླུང༌། སུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིག་རི་རབ། མགོ་བོ་རི་རབ་ཀྱི་སྟོད་ཆ། ལུས་ཀྱི་དཀྱིལ་འཁོར་མི་མཉམ་པ་མེད་པ་གྲུ་བཞི། རྐང་བརྒྱད་ཀ་བ་བརྒྱད། མིག་པཉྩ་རཱ་བ། སྣ་ཕ་གུ། སོ་དྲ་བ་དྲྭ་ཕྱེད། ལྕེ་མཆུ་འདོད་སྣམ། རྣ་བ་རྟ་བབས། སྙིང་གའི་རླུང་རྒྱུ་བའི་རྩ་བཞི་སྒོ་བཞི། རྣམ་པར་ཤེས་པ་ཧེ་རུ་ཀ །ཚོགས་བརྒྱད་ཀོའུ་རི་མ་བརྒྱད། ཡུལ་བརྒྱད་ཕྲ་མེན་མ་བརྒྱད། རྟག་ཆད་མུ་བཞི་སྒོ་མ་བཞི། སྒལ་ཚིགས་ཉེར་བརྒྱད་དབང་ཕྱུག་ཉི་ཤུ་རྩ་བརྒྱད། མི་དགེ་བ་བཅུ་ཁྲོ་བོ་བཅུ། དགེ་བ་བཅུ་ཁྲོ་མོ་བཅུ། རྩིབ་མ་བཅོ་བརྒྱད་གིང་ཆེན་བཅོ་བརྒྱད། རུས་མགོ་སུམ་བརྒྱ་དྲུག་ཅུ་ཕོ་ཉ་སུམ་བརྒྱ་དྲུག་ཅུ། དབང་པོའི་སྒོ་བདུན་མ་མོ་བདུན། ལྷུ་ཚིགས་བཅུ་གཉིས་བསྟན་མ་བཅུ་གཉིས། མདོར་ན་ལུས་རྩའི་དཀྱིལ་འཁོར། རྩ་ཡི་གེའི་དཀྱིལ་འཁོར། ཁམས་བདུད་རྩིའི་དཀྱིལ་འཁོར། རླུང་ཡེ་ཤེས་ཀྱི་


JLAZ012_Page_0541
[མ་དཔེ་གཟིགས་ན་འདིར་གནོན།]

དཀྱིལ་འཁོར། རིག་པ་བྱང་ཆུབ་སེམས་ཀྱི་དཀྱིལ་འཁོར་ཏེ་དཀྱིལ་འཁོར་རྣམ་པ་ལྔའི་རང་བཞིན་དུ་ཡེ་ནས་ལྷུན་གྲུབ་ཏུ་མཆིས་པ་ལ། ལག་པའི་སོར་མོ་ལྔ་འདོད་ཡོན་གྱི་ལྷ་མོ་ལྔར་ཤེས་པས་བཟའ་བཏུང་རྣམས་དབང་བཞིའི་དམ་ཚིག་དང་བསྟུན་པའམ། ཡང་ན་ཐབས་ལམ་པ་ཡིན་ན་བདེ་སྟོང་གི་བདུད་རྩི་གྲོལ་ལམ་པ་ཡིན་ན་ཟག་མེད་ཀྱི་བདུད་རྩིར་བསམས་ལ་མཆོད་པ་འབུལ་བའི་ཚུལ་དུ་སྐད་ཅིག་ཀྱང་མ་ཡེངས་པར་ལོངས་སྤྱད་པར་བྱ་ཞིང༌། རོ་ལ་ཁ་མངར་གྱི་རྟོག་པའང་མེད་པར་སྟོང་ཉིད་གསལ་ཁྱབ་ཅན་དུ་ཤེས་པར་བྱ། ཚུལ་འདིའི་རིགས་པ་ནི་བཟའ་བཏུང་ཐམས་ཅད་ལ་བརྩི་བར་བྱའོ། །འོན་ཏེ་དེ་ཙམ་གོ་བའི་སྐལ་བ་དང་མི་ལྡན་པའམ། གལ་ཏེ་ལྡན་ཀྱང་སྡེ་སྣོད་འཛིན་པ་དང་བསྟུན་ནས་ཕུན་སུམ་ཚོགས་པའི་ཡན་ལག་ཏུ་གུང་ཚིགས་ཀྱི་སྔ་རོལ་དུ་ཕུད་མཆོད་བྱེད་པར་སྤྲོ་ན། ཁ་ཟས་དེ་ཉིད་ཨོཾ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ཕུད་དང་པོ་བཤོས་བུའི་ཚུལ་དུ་བྱས་པ་གུ་རུ་བཛྲ་ནཻ་ཝི་ཏྱ་ཨཱཿཧཱུྃ། ཞེས་བླ་མ་ལ་དབུལ། རཏྣ་བཛྲ་ནཻ་ཝིཏྱ་ཨཱཿཧཱུྃ། དཀོན་མཆོག་སྤྱི་ལ་དབུལ། ལོ་ཀི་ཤྭ་ར་བཛྲ་ནཻ་ཝི་ཧྱ་ཨཱཿཧཱུྃ། ཐུགས་རྗེ་ཆེན་པོ་ལ་དབུལ། ཨོཾ་ཨཱཿཧཱུྃ་བཛྲ་གུ་རུ་དེ་ཝ་ཌཱཀྐི་ནི་བཛྲ་ནཻ་ཝི་ཏྱེ་ཨཱཿཧཱུྃ་གིས་རྩ་གསུམ་སྤྱི་ལ་དབུལ། ཨོཾ་ཧ་རི་ཏི་པནྚི་ཨ་ཁཾ་སྭཱ་ཧཱ། ཞེས་པས་འཕྲོག་མ་ལ་ཆང་བུ་གཅིག་བྱིན། ཨོཾ་ཧ་རི་


JLAZ012_Page_0542
[མ་དཔེ་གཟིགས་ན་འདིར་གནོན།]

ཏི་པནྚི་ནི་ཁཾ་སྭཱ་ཧཱ། ཞེས་འཕྲོག་མའི་བུ་ལྔ་བརྒྱ་ལ་ཆང་བུ་གཅིག་བྱིན། ཨོཾ་ཨཱཿགྲ་པནྚི་ཨ་སིབྷྱ་སྭཱ་ཧཱ། ཞེས་འབྱུང་པོ་ཕུད་ལ་དབང་བ་དག་ལ་ཆང་བུ་གཅིག་བྱིན། དེ་ནས་བཟའ་བའི་རྣལ་འབྱོར་དང་ལྡན་པས་ལོངས་སྤྱོད་པའམ། མི་ནུས་ན་རང་ལུས་ལ་གནས་པའི་སྲིན་བུ་རྣམས་ལ་སྙིང་རྗེའི་བསམ་པས་ད་ལྟ་ཟས་ཀྱིས་བསྐྱང༌། མཐར་སངས་རྒྱས་ནས་ཆོས་ཀྱིས་བསྐྱང་བའི་འདུན་པས་རོལ་རྗེས། ཨོཾ་ཨུཙྪིཥྟ་པནྚི་ཨ་ཤི་བྷྱ་སྭཱ་ཧཱ། ཞེས་འབྱུང་པོ་ལྷག་མ་ལ་དབང་བ་རྣམས་ལ་ཆང་བུ་གཅིག་བྱིན་པར་བྱའོ། །དེ་ནས་ཁ་བཤལ་ཏེ། ཡོན་ཡོངས་སུ་སྦྱོང་བའི་གཟུངས་འདོན་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །ན་མཿས་མནྟ་པྲ་བྷ་རཱ་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སམྱཀ་སཾ་བྷུདྡྷ་ཡ། ཏདྱ་ཐཱ། ན་མོ་མཉྫུ་ཤྲཱི་ཡེ་ཀུ་མ་ར་བྷུ་ཏ་ཡ་བྷོ་དྷི་ས་ཏྭ་ཡ་མ་ཧཱ་ས་ཏྭ་ཡ། མ་ཧཱ་ཀ་རུ་ཎི་ཀ་ཡ་ཏདྱ་ཐཱ་ཨོཾ་ནི་ར་ལམ་བེ་ནི་ར་བྷ་སེ་ཛ་ཡེ་ཛ་ཡ་ལ་ལབ་དྷེ། མ་ཧཱ་མ་ཏེ། དཀྵཻ་དཀྵཻ་ཎཱཾ་པ་རི་ཤྭ་དྷ་ཡ་སྭ་ཧྭ། གང་གིས་སྦྱིན་པ་གང་ལ་བཏང༌། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་དེ་ལ་ཡོངས་རྫོགས་ཤོག །ཅེས་དང་ཤ་ཟོས་པའི་ཉེས་པ་བསལ་ཕྱིར་འཇམ་དཔལ་རྩ་རྒྱུད་ལས་


JLAZ012_Page_0543
[མ་དཔེ་གཟིགས་ན་འདིར་གནོན།]

བཤད་པའི་རིག་སྔགས་ཨོཾ་ཨཱཿབྷི་ར་ཧཱུྃ་ཥེ་ཙ་ར་མཾ། ཞེས་ཚར་བརྒྱ་ཙམ་བརྗོད་ཅིང་རུས་པ་ལ་ཧུས་གདབ། ངན་སོང་སྡུག་བསྔལ་མི་འབྱུང་ཞིང༌། །དཀའ་བ་སྤྱད་པ་མེད་པར་ཡང༌། །ལྷ་ལས་ལྷག་པའི་ལུས་ཐོབ་ནས། །དེ་ཡང་སངས་རྒྱས་མྱུར་ཐོབ་ཤོག །ཅེས་སྨོན་ལམ་གདབ། ཟག་པ་འདོར་བའི་ཚེ་མི་གཡོ་བ་དཀར་པོའི་རྒྱུད་ནས་གསུངས་པའི་ཟག་པ་ལུས་སྦྱིན་བྱ་བ་ནི། མཆིལ་མ་ལ་ཨོཾ་ཨཱ་ཤུ་ཨ་ཧ་རི་བྷྱ་སྭཱ་ཧཱ། སྣབས་ལ་ཨོཾ་སིང་ག་ན་ཨ་ཧ་རི་བྷྱ་སྭཱ་ཧཱ། ལུས་ཀྱི་དྲི་མ་སྤྱིར་ཨོཾ་མ་ལ་ཨ་ཧ་རི་བྷྱ་སྭཱ་ཧཱ། དྲི་ཆེན་ལ་ཨོཾ་བྷི་ཏ་ཧ་རི་བྷྱ་སྭཱ་ཧཱ། དྲི་ཆུ་ལ་ཨོཾ་ནུཉྩ་ཨ་ཧ་རི་བྷྱ་སྭཱ་ཧཱ། ལྷག་མའི་རིགས་སྤྱི་ལ། ཨོཾ་ཨུཙྪིཥྟ་ཨ་ཧ་རི་བྷྱ་སྭཱ་ཧཱ། ཞེས་སོ་སོའི་དུས་གནད་དང་མཐུན་པར་བརྗོད་པས་ཡི་དྭགས་རྣམས་ལ་ཞར་བྱུང་གི་སྦྱིན་པ་རྒྱ་ཆེན་པོར་འགྱུར་རོ། །གཞན་ཡང་འགྱུར་སྔགས་ཁྱད་པར་ཅན་ནི་མཆོད་རྟེན་ལ་སོགས་པར་སྐོར་བ་བྱེད་པའི་ཚེ། ན་མོ་བྷ་ག་ཝཱ་ཏེ་རཏྣ་ཀེ་ཏུ་རཱ་ཛ་ཡ། ཏ་ཐཱ་ག་ཏ་ཡ་ཨརྷ་ཏེ་སམྱཀ་སཾ་བྷུདྡྷ་ཡ། ཏདྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ་རཏྣ་བྷི་ཛ་ཡ་སྭཱ་ཧཱ། ཞེས་བརྗོད་པས་སྐོར་བ་གཅིག་བྱེ་བའི་གྲངས་སུ་འགྱུར། གལ་ཏེ་ཉི་ཟླའི་བགྲོད་སྟོབས་ཀྱིས་མཆོད་རྟེན་ལ་སོགས་པའི་གྲིབ་མར་འགོམ་དགོས་ན་གྲིབ་མའི་འོག་ཏུ་འཛུལ་ནས་དེ་ཉིད་བཏེགས་པར་བསམ་ཞིང༌། བཛྲ་བེ་ག་ཨ་ཀྲ་མ་ཧཱུྃ།


JLAZ012_Page_0544
[མ་དཔེ་གཟིགས་ན་འདིར་གནོན།]

ཞེས་བརྗོད་པས་ཉེས་པ་སེལ་ལོ། །ཕྱག་བྱེད་པའི་ཚེ། ཨོཾ་ན་མོ་མཉྫུ་ཤྲཱི་ཡེ། ན་མཿསུ་ཤྲཱི་ཡེ། ན་མཿཨུཏྟ་མ་ཤྲཱི་ཡེ་སྭཱ་ཧཱ། ཞེས་བརྗོད་པས་འགྱུར་སྔགས་གོང་དང་འདྲ། དེ་བཞིན་དུ་མེ་ཏོག་འབུལ་ན། ཨོཾ་ན་མོ་བྷ་ག་ཝ་ཏེ་པུཥྤེ་ཀེ་ཏུ་རཱ་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སམྱཀ་སཾ་བྷུདྡྷ་ཡ་ཏདྱ་ཐཱ། ཨོཾ་པུཥྤེ་པུཥྤེ་མ་ཧཱ་པུཥྤེ་པུཥྤེ་སུ་པུཥྤེ་ཨུརྦྷ་ཝེ་པུཥྤེ་སཾ་བྷ་ཝེ། པུཥྤེ་ཨ་ཝ་ཀི་ར་ཎི་སྭཱ་ཧཱ། ཞེས་བདུན་བཟླས་ཏེ་སྔགས་ནས་ཕུལ་ན་མེ་ཏོག་ཇི་སྙེད་ཕུལ་བ་དེ་སྙེད་ཀྱི་མེ་ཏོག་བྱེ་བ་ཕུལ་བར་འགྱུར་རོ། །གཞན་ཡང་སྐུ་གཉེར་བ་ལྟར་ལྷ་བཤོས་ལ་འབག་དགོས་ན་ཨོཾ་དེ་ཝ་ཡ་ན་མ་ནི་དྷ་ས་སྭཱ་ཧཱ། ཞེས་བརྗོད་པས་ཉེས་པ་མི་འབྱུང་ཞིང༌། དངོས་གྲུབ་ཏུ་འགྱུར་བར་བཤད་དོ། །དགེ་སྦྱོང་སྤྱིའི་འགྱུར་སྔགས། ཨོཾ་སཾ་བྷ་ར་སཾ་བྷ་ར་བི་མ་ན་ས་ར་མ་ཧཱ་ཛཾ་བྷ་ཧཱུྃ་ཕཊ། ཅེས་དང༌། ཨོཾ་རུ་ཙི་ར་མ་ཎི་པྲ་ཝརྟ་ཡ་སྭཱ་ཧཱ། ཞེས་བརྗོད་ཅིང་དེ་ཐམས་ཅད་ལ་དམིགས་པ་མེད་པའི་སེམས་བསྐྱེད་དང༌། རྗེས་བསྔོ་བ་སྨོན་ལམ་གྱིས་རྩིས་ཟིན་པར་གཅེས་སོ། །ཞེས་པའང་རྫོགས་ཆེན་པ་རང་བྱུང་རྡོ་རྗེས་གོ་བདེ་བར་བརྗོད་པའོ།། །།

བདག་ཉིད་ཆེན་པོ་བཻ་རོའི་སྒྲུབ་ཐབས།


JLAZ012_Page_0546
[མ་དཔེ་གཟིགས་ན་འདིར་གནོན།]

བདག་ཉིད་ཆེན་པོ་བཻ་རོའི་སྒྲུབ་ཐབས་བཞུགས། །


JLAZ012_Page_0547
[མ་དཔེ་གཟིགས་ན་འདིར་གནོན།]

ཨེ་མ་ཧོ། འཁོར་བའི་འཇིགས་པ་སྐྱོབས་པའི་དམ་ཆོས་དང༌། །རིག་གྲོལ་སྤོབས་པའི་འབྱུང་གནས་རྫོགས་སངས་རྒྱས། །གསུམ་ཀའི་བདག་ཉིད་རྩ་བ་གསུམ་གྱི་དངོས། །བླ་མའི་སྐུ་གསུང་ཐུགས་ལ་སྐྱབས་སུ་མཆི། །ལན་གསུམ། སེམས་ཅན་ཁམས་ནི་ནམ་མཁའི་མཐའ་བཞིན་ཏེ། །གང་ཕྱིར་དམིགས་པ་མེད་པའི་བྱང་ཆུབ་སེམས། །སྨོན་འཇུག་དོན་དམ་སེམས་ལ་རབ་སྦྱར་ནས། །མཐའ་ཡས་འགྲོ་བ་བསྒྲོལ་བར་དམ་བཅའོ། །གསུམ། ཨཱཿ ཤེས་རབ་རང་བྱུང་སྒྲོན་མའི་དེ་བཞིན་ཉིད། །ཀུན་སྣང་རྒྱང་ཞགས་སྒྲོན་མའི་དག་ཆེན་དབྱིངས། །བྲལ་ཐོབ་མེད་པའི་ཐིག་ལེ་སྟོང་སྒྲོན་ཀློང༌། །ཆོས་ཉིད་མངོན་སུམ་རྣམ་སྣང་གང་ཆེན་མཚོ། །ཉམས་སྣང་


JLAZ012_Page_0548
[མ་དཔེ་གཟིགས་ན་འདིར་གནོན།]

གོང་འཕེལ་བཻ་རོ་ཙ་ནའི་ཞལ། །རིག་པ་ཚད་ཕེབ་ཀུན་མཁྱེན་ཡེ་ཤེས་ལུས། །ཆོས་ཟད་བློ་འདས་མཉམ་གཞག་ཆེན་པོར་བཞུགས། །རྡོ་རྗེ་སྐྱིལ་ཀྲུང་གདོད་ནས་རྫོགས་སངས་རྒྱས། །ཐེག་པ་ཡོངས་རྫོགས་ཆོས་གོས་རྣམ་གསུམ་དང༌། །གནས་ལུགས་རྫོགས་པ་ཆེན་པོའི་པཎ་ཞུས་མཛེས། །གཡས་གཡོན་རྨ་བན་རིན་ཆེན་གཉགས་ལོ་མཆོག །ཆོས་རབ་འབྱེད་པའི་རྣམ་དཔྱོད་ཟད་མི་ཤེས། །གཙོ་འཁོར་གསུམ་གྱི་སྤྱི་མགྲིན་སྙིང་ཁ་རུ། །བདེ་གཤེགས་ཀུན་ཀྱི་ཐུགས་གསུང་སྐུའི་བཀོད་པ། །ཡི་གེ་གསུམ་གྱི་བདག་ཉིད་ཆེན་པོས་མཚན། །གདན་གསུམ་ཡོངས་རྫོགས་སྐུ་ལས་འོད་འཕྲོས་པས། །རང་བཞིན་ཆོས་དབྱིངས་བདེ་བ་ཆེན་པོ་ནས། །ཡེ་ཤེས་ལྷ་ཚོགས་བཛྲ་


JLAZ012_Page_0549
[མ་དཔེ་གཟིགས་ན་འདིར་གནོན།]

ས་མཱ་ཛཿ། ཧཱུྃ་རྣམ་སྣང་གང་ཆེན་མཚོ་ཡི་ཐུགས་ཀ་ནས། །སྒྲ་བསྒྱུར་བཻ་རོ་ཙ་ན་གཤེགས་སུ་གསོལ། །ལྕང་ལོ་ཅན་གྱི་གནས་མཆོག་དམ་པ་ནས། །རྨ་བན་རིན་ཆེན་འོད་མཆོག་གཤེགས་སུ་གསོལ། །མཁྱེན་རབ་རལ་གྲི་རྣོན་པོའི་ཟུར་ཕུད་ནས། །གཉགས་ཆེན་ཡེ་ཤེས་གཞོན་ནུ་གཤེགས་སུ་གསོལ། །རྣམ་གསུམ་ཐུགས་དང་བདག་ཡིད་མ་འདྲེས་པར། །བརྟན་པར་བཞུགས་ལ་མཆོད་སྤྲིན་རྒྱ་མཚོས་མཆོད། །ལུས་དང་ལོངས་སྤྱོད་ལྟོས་པ་མེད་པར་འབུལ། །གསང་བ་གསུམ་གྱི་ཡོན་ཏན་དྲན་པས་བསྟོད། །ཁྱེད་ཤེས་དད་པས་སྙིང་ནས་གསོལ་བ་འདེབས། །ཐུགས་ཡིད་གཅིག་ཏུ་འདྲེས་པའི་དངོས་གྲུབ་སྩོལ། ཨོཾ་ཨཱཿགུ་རུ་བཻ་རོ་ཙ་ན་རཏྣ་ཛྙཱ་ན་ཧཱུྃ་སྭཱ་ཧཱ། ཞེས་ཆུ་བོའི་རྒྱུན་བཞིན་བཟླ་ཞིང་ཐུན་མཚམས་ཀྱི་ཉེར་བསྡུ་སྤྱི་དང་འདྲ་ལ། དགེ་བ་རྫོགས་བྱང་དུ་བསྔོའོ། །རྒྱ་རོང་སྐུ་ཆུང་གི་ངོར་རིག་འཛིན་འཇིགས་མེད་གླིང་པས་སོ།། དགེའོ།། ༈ རིག་འཛིན་འཇིགས་མེད་གླིང་པ་ལ་བརྟེན་པའི་བླ་མའི་རྣལ་འབྱོར་ནི། ཨེ་མ་ཧོ། བདག་ལུས་ཕུང་པོ་ཁམས་དང་སྐྱེ་མཆེད་རྣམས། །གདན་གསུམ་ཡོངས་རྫོགས་ངོ་བོ་ལྷུན་གྲུབ་པའི། །སྙིང་དབུས་དད་པའི་གེ་སར་རྒྱས་པའི་ཀློང༌། །ཁུ་རྡུལ་རྣམ་པར་བྱང་བ་ཉི་ཟླའི་སྟེང༌། །རྒྱལ་ཀུན་འདུས་ཞལ་རིག་འཛིན་


JLAZ012_Page_0550
[མ་དཔེ་གཟིགས་ན་འདིར་གནོན།]

འཇིགས་མེད་གླིང༌། །རྣམ་པ་ཀུན་ཀྱི་མཆོག་ལྡན་ཞལ་སྐྱིན་ནི། །གོས་དཀར་མཐོན་མཐིང་ཟུར་ཕུད་ལྡན་པའི་རྩེར། །འབུམ་ཕྲག་དྲུག་ཅུའི་ངོ་བོ་གླེགས་བམ་མཛེས། །དཀར་དམར་མདངས་ལྡན་ཞི་འཛུམ་མཛེས་པའི་སྐུ། །སྲིད་ལམ་དུབ་པའི་འགྲོན་པོ་དབུགས་འབྱིན་ཤིང༌། །བདེན་པ་དབྱེར་མེད་དོན་ལ་རྟག་གཟིགས་ཕྱིར། །སེམས་ཉིད་ངལ་བསོའི་བཞུགས་སྟངས་ཕྱག་རྒྱ་ཅན། །སྣང་ལ་རང་བཞིན་མེད་པར་ལམ་གྱིས་གསལ། །བདེ་གཤེགས་ཀུན་ཀྱི་བགྲོད་པ་གཅིག་པའི་ལམ། །མོས་གུས་འདུ་འབྲལ་མེད་པར་ཕྱག་འཚལ་ལོ། །དྲན་པ་ཡེངས་མེད་མཆོད་པའི་ཕྱག་རྒྱར་འབུལ། །སྟོང་འཛིན་ཤེས་བྱའི་སྒྲིབ་པ་དབྱིངས་སུ་བཤགས། །མཉམ་པར་མ་བཞག་མེད་ལ་རྗེས་ཡི་རང༌། །ལྷག་མཐོང་ཡེ་ཤེས་གསལ་བའི་ཆོས་འཁོར་བསྐུལ། །ས་ལམ་གཅིག་ཆོད་ངང་དུ་བཞུགས་གསོལ་འདེབས། །དགེ་ཚོགས་ཆོས་དབྱིངས་གཞོན་ནུ་བུམ་སྐུར་བསྔོ། །ཀྱེ་ཀྱེ་བླ་མ་རིན་པོ་ཆེ། །བདག་གིས་འབད་པ་ཐམས་ཅད་ཀྱང༌། །རེ་དོགས་རྣམ་གཡེང་འདུ་འཛི་དང༌། །ཆོས་བརྒྱད་ཉོན་མོངས་གྱི་ནར་འཕྱན། །སྙིགས་མ་ལྔ་ཡི་མཐར་སྐྱེས་ཤིང༌། །བྱིས་དང་སྡིག་གྲོགས་གཞན་དབང་གིས། །ཟིལ་གྱིས་ནོན་པའི་དུས་འདི་རུ། །ངེས་འབྱུང་རྒྱུད་ལ་སྐྱེ་བྱིན་རློབས། །དེ་ཡང་ཞི་བདེ་


JLAZ012_Page_0551
[མ་དཔེ་གཟིགས་ན་འདིར་གནོན།]

དབང་གྱུར་ནས། །ཐེག་དམན་ལམ་དུ་མི་འཕྱན་པར། །བྱང་ཆུབ་སྤྱོད་པ་རྒྱ་མཚོའི་ཀུན། །སེམས་ཅན་དོན་དུ་འགྱུར་བར་ཤོག །བླ་མ་སངས་རྒྱས་འདུས་པའི་སྐུར། །ཐེ་ཚོམ་ལོག་ལྟ་བྲལ་གྱུར་ནས། །སློབ་པ་ལམ་གྱི་ཡོན་ཏན་ཀུན། །ཚེ་འདི་ཉིད་ལ་རྫོགས་པར་ཤོག །བདག་གིས་འབད་ཀྱང་ཐར་བར་དཀའ། །བླ་མའི་ཐུགས་རྗེས་གྲོལ་བ་ནི། །མོས་གུས་ཁོ་ནའི་རྒྱུ་འབྲས་ཕྱིར། །ཐུགས་ཡིད་གཅིག་ཏུ་འདྲེས་གྱུར་ཅིག །༈ ཨོཾ་ཨཱཿགུ་རུ་ཨ་བྷཱ་ཡ་དྭཱི་པ་སིདྡྷི་ཧཱུྃཿ ཞེས་བཟླ་ཞིང༌། མོས་གུས་བསྙེན་པས་བླ་མའི་ཐུགས་རྒྱུད་བསྐུལ། །གནས་གསུམ་ཨོཾ་དཀར་ཨཱཿདམར་ཧཱུྃ་མཐིང་ལས། །རང་རང་འོད་བྱུང་བདག་གི་གནས་གསུམ་ཐིམ། །སྒོ་གསུམ་ཤེས་བྱའི་སྒྲིབ་པར་བཅས་པ་སྦྱངས། །དབང་བཞི་ཐོབ་ནས་ཐུགས་ཡིད་གཅིག་ཏུ་འདྲེས། །སྐུ་བཞི་ལྷུན་རྫོགས་ལྷན་སྐྱེས་བདེ་ཆེན་ངང༌། །དྲན་པ་རང་སྟོང་བླ་མའི་ཞལ་མཐོང་གྱུར། །ཅེས་དབང་བཞི་བླང་བར་བྱའོ། །ཞེས་པའང་མདོ་ཁམས་ནས་རྒྱ་རོང་སྐུ་སྐྱེ་རྣམ་གཉིས་དང༌། སྒྲུབ་བརྩོན་ཀརྨ་བསམ་འགྲུབ་ཀྱིས་ནན་ཏན་ཆེན་པོས་བསྐུལ་ངོར་རྫོགས་ཆེན་པ་རང་བྱུང་རྡོ་རྗེས་སྨྲས་པའོ། ། ༈རྒྱལ་གདོན་ཞི་བའི་སྒོམ་བཟླས་བཞུགས། ། སྐྱབས་འགྲོ་སེམས་བསྐྱེད་ལན་གསུམ། རང་གི་སྙིང་ཁར་རྟ་མགྲིན་དམར། །ཕྱག་གཡས་ཐོད་དབྱུག་གཡོན་སྡིགས་མཛུབ། །


JLAZ012_Page_0552
[མ་དཔེ་གཟིགས་ན་འདིར་གནོན།]

ཞལ་རྔམ་དབུ་གཙུག་རྟ་མགོ་མཚེར། །པད་ཉིའི་གདན་ལ་དོར་སྟབས་བཞུགས། །སྤྱི་བོར་ཀརྨ་ཐོད་ཕྲེང་རྩལ། །ཁྲོ་འཛུམ་རྡོ་རྗེ་ཕུར་བུ་བསྣམས། །བླ་མ་ཡི་དམ་གཉིས་མེད་ལ། །མོས་གུས་དྲག་པོས་གསོལ་བ་འདེབས། །ནད་གདོན་ཞི་བར་བྱིན་གྱིས་རློབས། །ཞེས་བརྗོད་ལ། ཨོཾ་ཨཱཿཧཱུྃ། མ་ཧཱ་གུ་རུ་ཧྱ་གྷྲི་ཝ་ཧཱུྃ་ཕཊཿཅེས་མོས་གུས་རྩེ་གཅིག་པས་བརྒྱ་སྟོང་ཁྲི་འབུམ་ཅི་ནུས་བཟླའོ། ། ༈ བསྙེན་གནས་ཀྱི་ཆོ་ག་བྱ་རྒྱུད་བདེ་ལམ་བཞུགས། ། བསྙེན་གནས་ཀྱི་ཆོ་ག་ཤིན་ཏུ་བསྡུ་ན། ཐོ་རངས་ལངས་ལ་ཁྲུས་བྱ་སྐྱབས་སེམས་ནི། འཕགས་པའི་ཐུགས་ནི་སངས་རྒྱས་ཏེ། །གསུང་ནི་དམ་ཆོས་སྐུ་དགེ་འདུན། །གང་ལ་སྐྱབས་མཆི་སེམས་ཅན་དོན། །ཚད་མེད་བཞི་བསྒོམ་ཁྱོད་བསྒྲུབ་བྱ། །ཤེས་ན་སེམས་ཅན་ཐམས་ཅད་བདེ་བ་དང་སོགས་བརྗོད། དེ་ནས་སྡོམ་པ་བླང་བ་ནི། སངས་རྒྱས་འཕགས་པ་དགོངས་སུ་གསོལ། །དེང་ནས་ཉ་སྟོང་བརྒྱད་རྣམས་སུ། །སྲོག་གཅོད་བརྐུ་དང་མི་ཚངས་སྤྱོད། །རྫུན་དང་ཆང་དང་གླུ་གར་རྒྱན། །ཁྲི་སྟན་མཐོ་དང་ཕྱི་དྲོའི་ཟས། །སྤངས་ཏེ་ཡན་ལག་བརྒྱད་པ་བསྲུང༌། །ཉོན་མོངས་དགྲ་སྡེ་འཇོམས་པར་ཤོག །ལན་གསུམ། དེ་ནས་མདུན་བསྐྱེད་གསལ་གདབ་པ་ནི། སྭ་བྷཱ་ཝས་སྦྱངས། སྟོང་པའི་ངང་ལས་རི་བོ་ཏ་ལའི་ཞིང༌། །འོད་སྣང་དཀྱིལ་འཁོར་ཆུ་སྐྱེས་ཟླ་གདན་སྟེང༌། །ཧྲཱིཿཡིག་ཡོངས་གྱུར་འཕགས་པ་འཇིག་རྟེན་དབང༌། །སྐུ་མདོག་དཀར་གསལ་མཉམ་པའི་སྟབས་ཀྱིས་བཞེངས། །


JLAZ012_Page_0553
[མ་དཔེ་གཟིགས་ན་འདིར་གནོན།]

གཡས་པ་མཆོད་སྦྱིན་གཡོན་པ་པད་དཀར་འཆང༌། །དབུ་སྐུ་ཐོར་ཚུགས་ཟུར་ཕུད་ནོར་བུས་སྤྲས། །རི་དྭགས་ཀྲྀཥྞའི་ཤུན་པས་ནུ་མ་བཀབ། །ཀ་ཤིའི་ཤམ་ཐབས་སྟ་ཟུར་གཡོན་དུ་དཀྲིས། །ཞི་ཚུལ་དགུ་ལྡན་སྙན་ཆ་གདུ་བུས་མཛེས། །བྱང་ཆུབ་སེམས་དཔའི་འོད་ཟེར་ཀུན་ནས་འཕྲོ། །སངས་རྒྱས་བྱང་སེམས་རིག་འཛིན་དྲང་སྲོང་བསྐོར། །དེ་ལྟར་གསལ་བའི་གནས་གསུམ་ཡིག་འབྲུ་ལས། །རང་འདྲའི་ཡེ་ཤེས་སེམས་དཔའ་སྤྱན་དྲངས་བསྟིམ། །དེ་ནས་སྤྱན་འདྲེན་ནི། མ་ལུས་སེམས་ཅན་སོགས་དང༌། མཆོད་པ་ནི། ཇི་སྙེད་སུ་དག་སོགས་ཡན་ལག་བདུན་པ་དང༌། མཎྜལ་རྒྱས་བསྡུས་ཅི་རིགས་འབུལ། དེ་ནས་བྱང་སྡོམ་བླང་བ་ནི། རྫོགས་པའི་སངས་རྒྱས་གང་བཞུགས་དང༌། །གང་དག་འདས་དང་མ་བྱོན་པ། །དེ་དག་རྗེས་སུ་བདག་སློབ་ཅིང༌། །བྱང་ཆུབ་སྤྱད་པ་སྤྱོད་གྱུར་ཅིག །ཕ་རོལ་ཕྱིན་དྲུག་རྫོགས་བགྱིས་ནས། །འགྲོ་དྲུག་སེམས་ཅན་མཐར་བགྱིད་ཤོག །ཅེས་ལན་གསུམ་བརྗོད་ཅིང་ཡི་གེ་དྲུག་མ་ལ་འབད། ཐུན་མཚམས་སུ་ཨོཾ་འཇིག་རྟེན་མགོན་པོ་སོགས་ཀྱིས་ཕྱག་གང་འགྲུབ་བྱའོ། །ལྟུང་བཤགས་དང༌། བཟང་སྤྱོད་ལ་སོགས་པའི་བཤགས་བསྔོ་སྨོན་ལམ་བྱའོ། །ཞེས་པའང་རྒྱལ་བའི་མྱུ་གུ་མཁྱེན་བརྩེའི་ལྷས་སོ།།

ཚེས་བཅུའི་ཕན་ཡོན་གསོལ་འདེབས།


JLAZ012_Page_0554
[མ་དཔེ་གཟིགས་ན་འདིར་གནོན།]

ཚེས་བཅུའི་ཕན་ཡོན་གསོལ་འདེབས་བཞུགས། །


JLAZ012_Page_0555
[མ་དཔེ་གཟིགས་ན་འདིར་གནོན།]

སངས་རྒྱས་གཉིས་པ་སློབ་དཔོན་ཆེན་པོ་ལ་རྣམ་པ་ཀུན་ཏུ་ཕྱག་འཚལ་ཞིང་སྐྱབས་སུ་མཆིའོ། །བསྐལ་བཟང་འདིར་བྱོན་སངས་རྒྱས་སྟོང་རྩ་ཀུན། །སྤངས་རྟོགས་མཉམ་ཞིང་འགྲོ་ལ་ཐུགས་བརྩེ་ཡང༌། །གངས་རིའི་ཁྲོད་འདིར་ཁྱོད་དང་མཚུངས་པ་ཡི། །བཀའ་དྲིན་བརྗོད་དུ་མེད་པར་བསམས་ཀྱིན་དད། །ཁ་བ་ཅན་འདི་ལག་ན་པདྨ་ཡིས། །གདུལ་བྱར་རྒྱལ་བའི་ལུང་བསྟན་མཛད་པའི་དོན། །མེས་དཔོན་གསུམ་དང་ཨོ་རྒྱན་ཆེན་པོ་ཡིས། །མཛད་པའི་རྣམ་ཐར་ལས་གཞན་དམིགས་སུ་མེད། །གུ་རུ་ང་སྒོམས་ང་སྒྲུབས་ང་རྗེས་སྙེགས། །ང་མཐོང་སངས་རྒྱས་ཀུན་མཐོང་ང་ཉིད་ནི། །བདེ་གཤེགས་འདུས་པའི་ངོ་བོ་ཉིད་ཡིན་པས། །ཚེས་བཅུ་བྱུང་རེས་བོད་དུ་འབྱོན་ཞེས་


JLAZ012_Page_0556
[མ་དཔེ་གཟིགས་ན་འདིར་གནོན།]

གསུངས། །དེ་ཕྱིར་རྣམ་ཐར་དྲན་པས་གསོལ་བ་འདེབས། །ཧོར་ཟླ་དྲུག་པའི་བཅུའི་ཉི་ཤར་ལ། །དྷ་ན་ཀོ་ཤར་པདྨའི་སྦུབས་ལ་བྱོན། །རྒྱལ་ཟླར་ཨིནྡྲ་བོ་དྷིས་སྤྱན་དྲངས་ཏེ། །རྒྱལ་བུར་མངལ་གསོལ་རྡོ་རྗེའི་ལམ་མཆོག་བསྟེན། །མཆུ་ཟླར་རྒྱལ་སྲིད་སྤངས་ནས་བསིལ་ཚལ་དུ། །བརྟུལ་ཞུགས་སྤྱོད་པས་མཁའ་འགྲོ་དབང་དུ་བསྡུས། །དབོ་ཟླར་བསྟན་ལ་རིམ་བཞིན་དཀྲི་བའི་སླད། །སློབ་དཔོན་པྲ་བྷ་ཧསྟིར་རབ་ཏུ་བྱུང༌། །ནག་ཟླར་ཟ་ཧོར་རྒྱལ་པོས་གསོན་བསྲེགས་ཚེ། །མེ་ཡང་ཆུར་བསྒྱུར་སུམ་རྩེན་ལྷ་ཡིས་བསྟོད། །ས་ཟླར་ཨོ་རྒྱན་རྒྱལ་པོས་ཡབ་ཡུམ་གཉིས། །ལྷན་ཅིག་མེར་བསྲེགས་ལོག་སྲེད་ཅན་དག་ཀྱང༌། །རང་དབང་མེད་པར་དད་པའི་


JLAZ012_Page_0557
[མ་དཔེ་གཟིགས་ན་འདིར་གནོན།]

གནས་ལ་བཀོད། །སྣྲོན་ཟླར་ལྷོ་ཕྱོགས་མཐར་སྐྱེས་རྒྱལ་ཁམས་སུ། །བསྟན་ལ་འཁུ་བའི་མུ་སྟེགས་ཐོག་གིས་བསྒྲལ། །གྲོ་བཞིན་ཟླ་བར་མཐའ་འཁོབ་ཟངས་གླིང་གི། །མུ་སྟེགས་རྒྱལ་པོས་ཟངས་ཆེན་ཁ་སྦྱོར་ནང༌། །བཅུག་ནས་ཆུ་ཀླུང་བསྐྱར་ཀྱང་རྫུ་འཕྲུལ་གྱིས། །ནམ་མཁར་གཤེགས་པའི་མོད་ལ་ཆུ་ཀླུང་ཡང༌། །གྱེན་ལྡོག་སྡིག་སྤྱོད་རྒྱལ་པོའི་གནས་འཇིག་ལ། །ཉེ་བས་སྤ་བཀོངས་བཟོད་གསོལ་སྐྱབས་སུ་བསྟེན། །ཁྲུམས་ཟླར་མུ་སྟེགས་ངན་པའི་ཟས་དུག་གིས། །བཀྲོངས་པར་སེམས་ཀྱང་གནོད་པ་མེད་ཀྱི་སྟེང༌། །གཟི་མདངས་ལྷག་པར་རྒྱས་པའི་ངང་ཚུལ་བསྟན། །ཐ་སྐར་ཟླ་ལ་ཡང་ལེ་ཤོད་དུ་ཕེབས། །བལ་བོད་གཉིས་ཀའི་ལྷ་འདྲེས་མཐོ་མཚམས་ཀྱང༌། །རྡོ་རྗེ་གཞོན་ནུའི་སྐུར་བཞེངས་དམ་ལ་བཞག །སྨིན་དྲུག་ཟླ་བར་བོད་ཡུལ་དབུས་སུ་བྱོན། །ཧས་པོ་རི་རྩེར་ལྷ་སྲིན་དམ་ལ་བཞག །རྒྱལ་བསྟན་བོད་དུ་དར་བ་ཁྱོད་གཅིག་པུའི། །དྲིན་ལ་གཞན་དྲིང་མི་འཇོག་བསམ་ཀྱིན་དད། །མགོ་ཟླར་སྲིན་ཡུལ་གཤེགས་པ་ལ་དགོངས་ནས། །མཆིམས་ཕུར་ཡོན་མཆོད་བཀའ་བགྲོས་བོད་ཡུལ་ཀུན། །གཏེར་གྱིས་གཏམས་པའི་སྟ་གོན་དང་འབྲེལ་བར། །གཞི་བདག་དབང་བསྡུས་གཏེར་གྱི་གཉེར་བྱང་གཏད། །དེ་ཕྱིར་བྱུང་ངོ་ཅོག་གི་ཚེས་བཅུ་རྣམས། །ཁྱོད་ཀྱིས་མཛད་པ་འཕྲིན་ལས་དུས་ཆེན་དང༌། །མ་དང་མཁའ་


JLAZ012_Page_0558
[མ་དཔེ་གཟིགས་ན་འདིར་གནོན།]

འགྲོ་འདུ་བའི་སྐབས་ཡིན་པས། །ནང་དུ་རྡོ་རྗེའི་ལུས་ལ་རྩ་ཐིག་རླུང༌། །འདུ་བ་ངོ་མཚར་ཅན་གྱི་རྟེན་འབྲེལ་ལས། །རྣམ་བཞིའི་ཕྲིན་ལས་ཀུན་ལ་དབང་འབྱོར་ཞིང༌། །ཆར་ཆུ་འབེབས་ཤིང་མི་ཕྱུགས་ནད་རིམས་ཞི། །སད་སེར་དབུལ་ཕོངས་དམག་འཁྲུགས་གོད་ཁ་སོགས། །འཇིག་རྟེན་དུས་ཀྱི་རྒུད་པ་ཇི་སྙེད་ཀུན། །ཚེས་བཅུའི་དུས་མཆོད་བཟུང་ནས་གསོལ་འདེབས་ཀྱི། །བྱིན་རླབས་ཁོ་ནས་ཞི་བ་མངོན་སུམ་ཕྱིར། །ཞལ་བཞེས་དུས་ལ་བབ་པོ་ཐུགས་རྗེས་གཟིགས། །བོད་འབངས་བསམ་ཡོད་ཐམས་ཅད་ཁྱོད་ལ་དད། །བསམ་མེད་དྲིན་ཆེན་ཕ་མ་དག་ལ་ཡང༌། །འཁུ་བར་བྱེད་ན་ཁྱེད་ཀྱི་ཐུགས་རྗེ་ལ། །ཉེ་རང་མ་མཆིས་ཐུགས་དམ་རྒྱུད་བསྐུལ་ལོ། །བོད་འབངས་ནམ་ཡང་ཡལ་བར་མི་འདོར་བའི། །ཞལ་བཞེས་དུས་ལ་བབ་པོ་ཐུགས་རྗེས་གཟིགས། །བསམ་དོན་ཡིད་བཞིན་འགྲུབ་པར་བྱིན་གྱིས་རློབས། །ཞེས་པའང་བསམ་ཡས་རབ་བྱུང་བ་དབྱངས་ཡིག་དང་པོའི་མིང་ཅན་གྱི་ངོར་རིག་འཛིན་འཇིགས་མེད་གླིང་པས་སོ། ། ༈ ཨེ་མ་ཧོ། དུས་གསུམ་སངས་རྒྱས་ཀུན་གྱི་ཐུགས་རྗེའི་གཏེར། །ཁམས་གསུམ་མ་ལུས་སྒྲོལ་བའི་དེད་དཔོན་མཆོག །བོད་ཁམས་འགྲོ་བ་ཡོངས་ཀྱི་གཉེན་གཅིག་པུ། །བཀའ་དྲིན་མཚུངས་མེད་ཨོ་རྒྱན་ཆེན་པོ་ལ། །ལུས་དང་ལོངས་སྤྱོད་བློ་སྙིང་


JLAZ012_Page_0559
[མ་དཔེ་གཟིགས་ན་འདིར་གནོན།]

བྲང་གསུམ་འབུལ། །ཁ་ཞེ་ངོ་ལྐོག་མེད་པར་གསོལ་བ་འདེབས། །འཁོར་ཚེ་ཐོག་མ་མེད་ནས་ད་ལྟའི་བར། །མ་རིག་ལས་དང་ཉོན་མོང་དབང་གྱུར་ནས། །ཁམས་གསུམ་རྒྱུད་དྲུག་གནས་སུ་འཁྱམས་པ་བདག །སྡུག་བསྔལ་གསུམ་གྱི་ཞགས་པས་བཅིང་པ་ལས། །མྱུར་དུ་ཐུགས་རྗེས་སྒྲོལ་ཅིག་གུ་རུ་རྗེ། །འདི་ནས་བཟུང་སྟེ་བྱང་ཆུབ་མ་ཐོབ་བར། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང༌། །རྗེ་བཙུན་ཆེན་པོ་པདྨ་འབྱུང་གནས་མཁྱེན། །གསོལ་བ་སྙིང་ནས་འདེབས་པའི་གང་ཟག་ལ། །ཐུགས་རྗེ་རྒྱུན་ཆད་མེད་པར་ཞལ་བཞེས་པའི། །ཐོས་གྲོལ་གསུང་གི་དོན་འབྲས་མ་ལུས་པ། །མངོན་སུམ་མིག་གི་བདུད་རྩིར་སྩལ་དུ་གསོལ། །ཁྱད་པར་ནམ་ཞིག་ཚེ་ཡི་དུས་བྱས་ཏེ། །བེམ་རིག་འབྲལ་བའི་དུས་ལ་བབ་པ་ན། །སྐྱེ་འཆི་བར་དོ་གནད་གཅོད་སྡུག་བསྔལ་འཕྲང༌། །ཤིན་ཏུ་འཇིགས་པ་ཆེན་པོའི་གཡང་ས་ལས། །སྐྱོབས་ཏེ་ངན་སོང་གསུམ་དུ་མ་བཏང་བར། །རང་སྣང་རྣམ་དག་ཟངས་མདོག་དཔལ་རིའི་ཞིང༌། །སྐུ་གསུམ་བདེ་བ་ཆེན་པོའི་ཕོ་བྲང་ཆེར། །མགོན་པོ་ཁྱོད་ཀྱི་ཐུགས་དང་དབྱེར་མེད་དུ། །འདྲེན་པའི་དེད་དཔོན་མཛོད་ཅིག་མ་ཧཱ་གུ་རུ། །སྐྱབས་གནས་ཀུན་འདུས་ཨོ་རྒྱན་ཆེན་པོ་མཁྱེན། །སངས་


JLAZ012_Page_0560
[མ་དཔེ་གཟིགས་ན་འདིར་གནོན།]

རྒྱས་ཀུན་འདུས་ཨོ་རྒྱན་ཆེན་པོ་མཁྱེན། །དམ་ཆོས་ཀུན་འདུས་ཨོ་རྒྱན་ཆེན་པོ་མཁྱེན། །དགེ་འདུན་ཀུན་འདུས་ཨོ་རྒྱན་ཆེན་པོ་མཁྱེན། །རྩ་གསུམ་ཀུན་འདུས་ཨོ་རྒྱན་ཆེན་པོ་མཁྱེན། །ད་ནི་དུས་ངན་སྙིགས་མའི་མཐའ་ལ་ཐུག། །དམ་ཆོས་ཚུལ་བཞིན་བྱེད་པའི་ལོང་མ་ཁོམ། །སད་སེར་བཙན་ཐན་ནད་ཡམས་མུ་གེ་དང༌། །འཁྲུགས་རྩོད་དུས་ཀྱི་རྒུད་པས་ཀུན་ཏུ་མནར། །འབྱུང་བ་སྒང་གཤོངས་སྣོད་བཅུད་རྟེན་འབྲེལ་འཕྱུགས། །བོད་ཁམས་སེམས་ཅན་སྡུག་བསྔལ་དྲག་པོ་ལ། །སྤྱོད་ཚེ་རྗེ་བཙུན་གུ་རུའི་ཐུགས་རྗེ་ཡིས། །གནས་སྐབས་རྫོགས་ལྡན་གསར་བའི་སྒོ་འཕར་ཕྱེད། །མཐར་ཐུག་འོད་གསལ་ཆོས་སྐུའི་ཕོ་བྲང་དུ། །ཁམས་གསུམ་ལས་ཅན་མཐའ་དག་དབུགས་དབྱུང་ནས། །འཁོར་བ་དོང་ནས་སྤྲུགས་པར་མཛད་དུ་གསོལ། །ཞེས་མིག་ནས་མཆི་མ་ཐོན་པའི་མོས་གུས་ཀྱིས་གསོལ་བ་གདབ་པར་བྱའོ། །ཞེས་པའང་ཡར་ཀླུང་ཤེལ་གྱི་བྲག་ཕུག་ཏུ་ཚོགས་ཀྱི་འཁོར་ལོ་དཔག་ཏུ་མེད་པར་བསྐོར་བའི་ཚེ། གྲོགས་མཆེད་རྣམས་ཀྱི་ནན་ཏན་གྱིས་བསྐུལ་ངོར་བྲག་ཉག་གུར་ཅོག་འོག་ཏུ་ཀློང་ཆེན་ནམ་མཁའི་རྣལ་འབྱོར་གྱིས་སྨྲས་པའོ།།

ཐུན་མོང་དང་ཐུན་མོང་མ་ཡིན་པའི་སྔོན་འགྲོ་སོགས་ངག་འདོན་འཐོར་བུའི་སྐོར།


JLAZ012_Page_0562
[མ་དཔེ་གཟིགས་ན་འདིར་གནོན།]

ཐུན་མོང་དང་ཐུན་མོང་མ་ཡིན་པའི་སྔོན་འགྲོ་སོགས་ངག་འདོན་འཐོར་བུའི་སྐོར་བཞུགས།།


JLAZ012_Page_0563
[མ་དཔེ་གཟིགས་ན་འདིར་གནོན།]

ཐོག་མར་ངག་བྱིན་བརླབ་ནི། ཨོཾ་ཨཱཿཧཱུྃ། ལྕེ་དབང་རཾ་ཡིག་ལས་བྱུང་མེས་བསྲེགས་ནས། །འོད་དམར་རྣམ་པའི་རྡོ་རྗེ་རྩེ་གསུམ་སྦུབས། །ཨཱ་ལི་ཀཱ་ལི་མཐའ་བསྐོར་རྟེན་འབྲེལ་སྙིང༌། །མུ་ཏིག་ཕྲེང་བ་ལྟ་བུའི་ཡིག་འབྲུ་ལས། །འོད་འཕྲོས་རྒྱལ་བ་སྲས་བཅས་མཆོད་པས་མཉེས། །སླར་འདུས་ངག་སྒྲིབ་དག་ནས་གསུང་རྡོ་རྗེའི། །བྱིན་རླབས་དངོས་གྲུབ་ཐམས་ཅད་ཐོབ་པར་བསམ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ། ལན་བདུན། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ། ལན་བདུན། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་


JLAZ012_Page_0564
[མ་དཔེ་གཟིགས་ན་འདིར་གནོན།]

དུན་ཏེ་ཥཱནྟ་ཐཱ་ག་ཏྭ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲཱ་མ་ཎ་སྭཱ་ཧཱ། ལན་བདུན། ༈ བཞེངས་བསྐུལ་བླ་མ་རྒྱང་འབོད་ནི། ཐོ་རངས་ལྡངས་བའི་རྣལ་འབྱོལ་ལ་བབ་པ་ན། བླ་མ་མཁྱེན། བླ་མ་མཁྱེན། བླ་མ་མཁྱེན། ཞེས་གདུང་བ་དྲག་པོས་བོས་ནས། སྙིང་དབུས་དད་པའི་གེ་སར་བཞད་པ་ནས། །སྐྱབས་གཅིག་དྲིན་ཅན་བླ་མ་ཡར་ལ་བཞེངས། །ལས་དང་ཉོན་མོངས་དྲག་པོས་གཟིར་བ་ཡི། །སྐལ་བ་ངན་པ་བདག་ལ་སྐྱོབ་པའི་ཕྱིར། །སྤྱི་བོ་བདེ་ཆེན་འཁོར་ལོའི་རྒྱན་དུ་བཞུགས། །དྲན་དང་ཤེས་བཞིན་ཀུན་ཀྱང་བཞེངས་སུ་གསོལ། །ད་རེས་དམྱལ་བ་ཡི་དྭགས་དུད་འགྲོ་དང༌། །ཚེ་རིང་ལྷ་དང་ཀླ་ཀློ་ལོག་ལྟ་ཅན། །སངས་རྒྱས་མ་བྱོན་ཞིང་


JLAZ012_Page_0565
[མ་དཔེ་གཟིགས་ན་འདིར་གནོན།]

དང་ལྐུགས་པ་སྟེ། །མི་ཁོམ་བརྒྱད་ལས་ཐར་པའི་དལ་བ་ཐོབ། །མིར་གྱུར་དབང་པོ་ཚང་དང་ཡུལ་དབུས་སྐྱེས། །ལས་མཐའ་མ་ལོག་བསྟན་ལ་དད་པ་སྟེ། །རང་ཉིད་འབྱོར་པ་ལྔ་ཚང་སངས་རྒྱས་བྱོན། །ཆོས་གསུངས་བསྟན་པ་གནས་དང་དེ་ལ་ཞུགས། །བཤེས་གཉེན་དམ་པས་ཟིན་དང་གཞན་འབྱོར་ལྔ། །ཐམས་ཅད་རང་ལ་ཚང་བའི་གནས་ཐོབ་ཀྱང༌། །རྐྱེན་མང་ངེས་པ་མེད་པའི་ཆོས་སྤངས་ནས། །འཇིག་རྟེན་ཕ་རོལ་ཉིད་དུ་སོན་པར་འགྱུར། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །ད་རེས་དལ་རྟེན་དོན་ཡོད་མ་བྱས་ན། །ཕྱི་ནས་ཐར་པ་བསྒྲུབ་པའི་རྟེན་མི་རྙེད། །བདེ་འགྲོའི་རྟེན་ལ་བསོད་ནམས་ཟད་གྱུར་ནས། །ཤི་བའི་འོག་ཏུ་ངན་སོང་ངན་འགྲོར་འཁྱམས། །དགེ་སྡིག་མི་ཤེས་ཆོས་ཀྱི་སྒྲ་མི་ཐོས། །དགེ་བའི་བཤེས་དང་མི་མཇལ་མཚང་རེ་ཆེ། །སེམས་ཅན་ཙམ་གྱི་གྲངས་དང་རིམ་པ་ལ། །བསམས་ན་མི་ལུས་ཐོབ་པ་སྲིད་མཐའ་ཙམ། །མི་ཡང་ཆོས་མེད་སྡིག་ལ་སྤྱོད་མཐོང་ན། །ཆོས་བཞིན་སྤྱོད་པ་ཉིན་མོའི་སྐར་མ་ཙམ། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །གལ་ཏེ་མི་ལུས་རིན་ཆེན་གླིང་ཕྱིན་ཡང༌། །ལུས་རྟེན་བཟང་ལ་བྱུར་པོ་ཆེ་ཡི་སེམས། །


JLAZ012_Page_0566
[མ་དཔེ་གཟིགས་ན་འདིར་གནོན།]

ཐར་པ་བསྒྲུབ་པའི་རྟེན་དུ་མི་རུང་ཞིང༌། །ཁྱད་པར་བདུད་ཀྱིས་ཟིན་དང་དུག་ལྔ་འཁྲུགས། །ལས་ངན་ཐོག་ཏུ་བབས་དང་ལེ་ལོས་གཡེངས། །གཞན་ཁོལ་བྲན་གཡོག་འཇིགས་སྐྱོབ་ཆོས་ལྟར་བཅོས། །རྨོངས་སོགས་འཕྲལ་བྱུང་རྐྱེན་གྱི་མི་ཁོམ་བརྒྱད། །བདག་ལ་ཆོས་ཀྱི་འགལ་ཟླར་ལྷགས་པའི་ཚེ། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །སྐྱོ་ཤས་ཆུང་ཞིང་དད་པའི་ནོར་དང་བྲལ། །འདོད་སྲེད་ཞགས་པས་བཅིངས་དང་ཀུན་སྤྱོད་རྩུབ། །མི་དགེ་སྡིག་ལ་མི་འཛེམ་ལས་མཐའ་ལོག །སྡོམ་པ་ཉམས་ཤིང་དམ་ཚིག་རལ་པ་སྟེ། །རིས་ཆད་བློ་ཡི་མི་ཁོམ་རྣམ་པ་བརྒྱད། །བདག་ལ་ཆོས་ཀྱི་འགལ་ཟླར་ལྷགས་པའི་ཚེ། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །ད་ལྟ་ནད་དང་སྡུག་བསྔལ་གྱིས་མ་གཟིར། །བྲན་ཁོལ་ལ་སོགས་གཞན་དབང་མ་གྱུར་པས། །རང་དབང་ཐོབ་པའི་རྟེན་འབྲེལ་འགྲིག་དུས་འདིར། །སྙོམ་ལས་ངང་དུ་དལ་འབྱོར་ཆུད་གསོན་ན། །འཁོར་དང་ལོངས་སྤྱོད་ཉེ་དུ་འབྲེལ་པ་ལྟ། །ལྟ་ཅི་གཅེས་པར་བཟུང་བའི་ལུས་འདི་ཡང༌། །མལ་གྱི་ནང་ནས་ས་ཕྱོགས་སྟོང་པར་བསྐྱལ། །ཝ་དང་བྱ་རྒོད་ཁྱི་ཡིས་འདྲད་པའི་དུས། །བར་དོའི་ཡུལ་ན་འཇིགས་པ་ཤིན་ཏུ་ཆེ། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །དགེ་སྡིག་ལས་ཀྱི་རྣམ་སྨིན་


JLAZ012_Page_0567
[མ་དཔེ་གཟིགས་ན་འདིར་གནོན།]

ཕྱི་བཞིན་འབྲང༌། །ཁྱད་པར་དམྱལ་བའི་འཇིག་རྟེན་ཉིད་སོན་ན། །ལྕགས་སྲེགས་ས་གཞིར་མཚོན་གྱིས་མགོ་ལུས་འདྲལ། །སོགས་ལེས་གཤོགས་དང་ཐོ་ལུམ་འབར་བས་འཚིར།།སྒོ་མེད་ལྕགས་ཁྱིམ་འཐུམས་པར་འོ་དོད་འབོད། །འབར་བའི་གསལ་ཤིང་གིས་འབུགས་ཁྲོ་ཆུར་འཚོད། །ཀུན་ནས་ཚ་བའི་མེས་བསྲེགས་བརྒྱད་ཚན་གཅིག །གངས་རི་སྟུག་པོའི་འདབ་དང་ཆུ་འཁྱགས་ཀྱི། །གཅོང་རོང་ཡ་ངའི་གནས་སུ་བུ་ཡུག་སྦྲེབས། །གྲང་རེག་རླུང་གིས་བཏབ་པའི་ལངས་ཚོ་ནི། །ཆུ་བུར་ཅན་དང་ལྷག་པར་བརྡོལ་བ་ཅན། །སྨྲེ་ངག་རྒྱུན་མི་འཆད་པར་འདོན་པ་ཡང༌། །ཚོར་བའི་སྡུག་བསྔལ་བརྣག་པར་དཀའ་བ་ཡིས། །ཟུངས་ཀྱིས་རབ་བཏང་འཆི་ཁའི་ནད་པ་བཞིན། །ཤུགས་རིང་འདོན་ཅིང་སོ་ཐམ་པགས་པ་འགས། །ཤའུ་ཐོན་ནས་ལྷག་པར་འགས་ཏེ་བརྒྱད། །དེ་བཞིན་སྤུ་གྲིའི་ཐང་ལ་རྐང་པ་གཤོགས། །རལ་གྲིའི་ཚལ་དུ་ལུས་ལ་གཅད་གཏུབས་བྱེད།།རོ་མྱགས་འདམ་ཚུད་ཐལ་ཚན་རབས་མེད་ཀློང༌། །མནར་བའི་ཉེ་འཁོར་བ་དང་འགྱུར་བ་ཅན། །སྒོ་དང་ཀ་བ་ཐབ་དང་ཐག་པ་སོགས། །རྟག་ཏུ་བཀོལ་ཞིང་སྤྱོད་པའི་ཉི་ཚེ་བ། །རྣམ་གྲངས་བཅོ་བརྒྱད་གང་ལས་འབྱུང་བའི་རྒྱུ། །ཞེ་སྡང་དྲག་པོའི་ཀུན་སློང་སྐྱེས་པའི་ཚེ། །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །


JLAZ012_Page_0568
[མ་དཔེ་གཟིགས་ན་འདིར་གནོན།]

གཉིས་སུ་མེད་དོ་དྲིན་ཆེན་བླ་མ་མཁྱེན། །དེ་བཞིན་ཕོངས་ལ་ཉམས་མི་དགའ་བའི་ཡུལ། །བཟའ་བཏུང་ལོངས་སྤྱོད་མིང་ཡང་མི་གྲགས་པར། །ཟས་སྐོམ་ལོ་ཟླར་མི་རྙེད་ཡི་དྭགས་ལུས། །རིད་ཅིང་ལྡང་བའི་སྟོབས་ཉམས་རྣམ་པ་གསུམ། །གང་ལས་འབྱུང་བའི་རྒྱུ་ནི་སེར་སྣ་ཡིན། །གཅིག་ལ་གཅིག་ཟ་གསོད་པའི་འཇིགས་པ་ཆེ། །བཀོལ་ཞིང་སྤྱོད་པས་ཉམ་ཐག་བླང་དོར་རྨོངས། །ཕ་མཐའ་མེད་པའི་སྡུག་བསྔལ་གྱིས་གཟིར་བའི། །ས་བོན་གཏི་མུག་མུན་པར་འཁྱམས་པ་བདག །བློ་སྣ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །ཆོས་ལམ་ཞུགས་ཀྱང་ཉེས་སྤྱོད་མི་སྡོམ་ཞིང༌། །ཐེག་ཆེན་སྒོར་ཞུགས་གཞན་ཕན་སེམས་དང་བྲལ། །དབང་བཞི་ཐོབ་ཀྱང་བསྐྱེད་རྫོགས་མི་སྒོམ་པའི། །ལམ་གོལ་འདི་ལས་བླ་མས་བསྒྲལ་དུ་གསོལ། །ལྟ་བ་མ་རྟོགས་ཐོ་ཅོའི་སྤྱོད་པ་ཅན། །སྒོམ་པ་ཡེངས་ཀྱང་གོ་ཡུལ་འུད་གོག་འཐག །སྤྱོད་པ་ནོར་ཀྱང་རང་སྐྱོན་མི་སེམས་པའི། །ཆོས་དྲེད་འདི་ལས་བླ་མས་བསྒྲལ་དུ་གསོལ། །ནངས་པར་འཆི་ཡང་གནས་གོས་ནོར་ལ་སྲེད། །ན་ཚོད་ཡོལ་ཡང་ངེས་འབྱུང་སྐྱོ་ཤས་བྲལ། །ཐོས་པ་ཆུང་ཡང་ཡོན་ཏན་ཅན་དུ་རློམ། །མ་རིག་འདི་ལས་བླ་མས་བསྒྲལ་དུ་གསོལ། །རྐྱེན་ཁར་འཆོར་ཡང་འདུ་


JLAZ012_Page_0569
[མ་དཔེ་གཟིགས་ན་འདིར་གནོན།]

འཛི་གནས་སྐོར་སེམས། །དབེན་པ་བརྟེན་ཀྱང་རང་རྒྱུད་ཤིང་ལྟར་རེངས། །དུལ་བར་སྨྲ་ཡང་ཆགས་སྡང་མ་ཞིག་པའི། །ཆོས་བརྒྱད་འདི་ལས་བླ་མས་བསྒྲལ་དུ་གསོལ། །གཉིད་འཐུག་འདི་ལས་མྱུར་དུ་སད་དུ་གསོལ། །ཁྲི་མུན་འདི་ལས་མྱུར་དུ་དབྱུང་དུ་གསོལ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བརྟན་པར་བཞུགས། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །པདྨ་ཀ་མ་ལཱ་ཡེ་སྟྭཾ། ཁྲུས་ཀྱི་ཁང་པ་ཤིན་ཏུ་དྲི་ཞིམ་པར། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །ཇི་ལྟར་བལྟམས་པ་ཙམ་གྱིས་ནི། །


JLAZ012_Page_0570
[མ་དཔེ་གཟིགས་ན་འདིར་གནོན།]

ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བའི་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ཨོཾ་ཧཱུྃ་ཏྲཱྃ་ཧྲཱིཿཨཱ། ཀཱ་ཡ་བི་ཤྭ་དྷ་ན་ཡེ་སྭཱ་ཧཱ། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང༌། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱིས། །ཨོཾ་བཛྲ་ཝཥྚ་ཡེ་སྭཱ་ཧཱ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་དབུལ་བར་བགྱི། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །མཉེས་ཕྱིར་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང༌། །དུས་གསུམ་བདེ་གཤེགས་དགོངས་པ་རྟོགས་པ་དང༌། །སྲིད་པར་མི་འཁྲུལ་ཞི་བར་མི་གནས་ཤིང༌། །མཁའ་དང་མཉམ་པའི་འགྲོ་རྣམས་སྒྲོལ་བར་ཤོག །ཏྲཱཾ་གུ་རུ་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཨཱཿཧཱུྃ། ཇི་སྙེད་སུ་དག་ཕྱོགས་བཅུའི་འཇིག་


JLAZ012_Page_0571
[མ་དཔེ་གཟིགས་ན་འདིར་གནོན།]

རྟེན་ན། །སོགས་ནས། ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ལན་གསུམ་གྱིས་ཚད་མེད་བཞི་སྒོམ། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང༌། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང༌། །དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ལན་གསུམ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་བགྱི། ། ༈ མཛད་བཅུ་ནི། དགའ་བ་བརྒྱ་ལྡན་འཆི་མེད་གྲོང་


JLAZ012_Page_0572
[མ་དཔེ་གཟིགས་ན་འདིར་གནོན།]

ཁྱེར་ནས། །བྱང་ཆུབ་སེམས་ཀྱི་དམ་པ་ཏོག་དཀར་པོ། །ཤཱཀྱའི་རིགས་ཀྱི་ཐིག་ལེར་འཛིན་པའི་སྣོད། །སྒྱུ་འཕྲུལ་ལྷ་མོ་རི་དྭགས་མིག་ཅན་ཡིན། །འོད་སྟོང་ཤར་གྱི་རི་ལ་ཆས་པ་བཞིན། །ལྷུམས་ཀྱི་གེ་སར་བཞད་པ་ལུམྦིའི་ཚལ། །ཚངས་དང་དབང་པོའི་སྲི་ཞུས་མཛེས་བྱས་ཤིང༌། །བྱང་ཆུབ་རིགས་སུ་ལུང་བསྟན་ལ་ཕྱག་འཚལ། །ལང་ཚོས་དྲེགས་པའི་ཤཱཀྱ་གཞོན་ནུའི་དབུས། །སྒྱུ་སྩལ་དྲུག་ཅུ་རྩ་བཞིའི་རོལ་རྩེད་མཐུ། །ཀུན་གྱིས་ཁྱོད་ལ་བཏུད་ཅིང་གྲགས་པ་ཡི། །སྐྱེ་དགུའི་རྣམ་ཤེས་མིག་དང་རྣ་བར་རྫོགས། །འདོད་སྲེད་ཞགས་པས་གཞན་དབང་མ་གྱུར་བཞིན། །ཡབ་ཅིག་དགྱེས་སླད་བཙུན་མོའི་སྒྱུ་མ་ལ། །སྒྱུ་མའི་ལྟ་བས་བལྟས་ནས་རྒྱལ་པོའི་ཁབ། །བསྐྱངས་པས་དོན་ཀུན་གྲུབ་པ་ལ་ཕྱག་འཚལ། །ཤིན་ཏུ་གཡོ་ཞིང་འཇིགས་པ་རྒྱལ་སྲིད་ཀྱི། །ལྕགས་ཀྱུའི་དབང་དུ་མ་གྱུར་འགའ་མེད་ཀྱང༌། །ངེས་པར་འབྱུང་བའི་རྐྱེན་བཞིས་ཁྱོད་ཀྱི་ཐུགས། །འཕྲོག་ནས་རང་བྱུང་དགེ་སློང་ཉིད་དུ་བསྟན། །བརྩོན་འགྲུས་རླབས་ཀྱིས་མི་དལ་ནཻ་རཛྙར། །དཀའ་ཐུབ་གདུང་བ་བཟོད་པའི་སྙིང་སྟོབས་དང༌། །ཀུན་རྟོག་འདུལ་བ་འཛིན་པའི་བསམ་གཏན་ལ། །ཕྱོགས་བཅུའི་བདེ་གཤེགས་དགྱེས་ལ་ཕྱག་འཚལ་ལོ། །གྲངས་མེད་གསུམ་གྱི་སྲིད་དུ་རྣམ་རིག་ཀུན། །ཚོགས་གཉིས་ཐ་གུས་


JLAZ012_Page_0573
[མ་དཔེ་གཟིགས་ན་འདིར་གནོན།]

བཅིངས་པ་དོན་ཡོད་ཕྱིར། །བྱང་ཆུབ་ཤིང་དྲུང་བདུད་རྣམས་སྐྲག་བྱས་ནས། །མངོན་པར་རྫོགས་སངས་རྒྱ་བ་རྒྱལ་ཀུན་གཤིས། །འཁོར་བ་གཏིང་མཐའ་མེད་པའི་གཡང་ས་ལ། །རྒྱུག་པའི་འགྲོ་བ་འཁོར་ལོ་གསུམ་གྱི་གྲུས། །བསྒྲལ་ནས་ཐར་པ་དང་ནི་རྣམ་མཁྱེན་གྱི། །གོ་འཕང་བཀྲི་བ་ཁྱོད་ལ་ཕྱག་འཚལ་ལོ། །རྟོག་ཅིང་དཔྱོད་ཀྱང་སྡོམ་པ་མིན་པའི་ཆང༌། །འཐུང་པས་ཆེས་བཟིས་མུ་སྟེགས་སྟོན་པའི་ལྕེ། །མཉན་དུ་ཡོད་པའི་ཆོ་འཕྲུལ་མཐུས་བཅད་པས། །སྐྱེངས་དང་གཟི་བརྗིད་ཉམས་པའི་ཆོ་ག་རྫོགས། །རྫུ་འཕྲུལ་རྐང་པ་བཞི་ལ་མཆོག་ཐོབ་ཁྱོད། །སྐྱེ་རྒ་ན་འཆིའི་ཚོར་བ་མི་མྱོང་ཡང༌། །ངེས་པར་ཕ་རོལ་འགྲོ་འདི་མི་སེམས་རྣམས། །སྐྱོ་སླད་མྱ་ངན་འདའ་སྟོན་དེར་ཕྱག་འཚལ། །བསོད་ནམས་ཉམ་ཆུང་གྱུར་པའི་འགྲོ་བ་རྣམས། །དཀར་པོའི་ཆོས་རབ་འཕེལ་བའི་ཚོང་ཟོང་ནི། །འཛད་པ་མེད་པའི་རིང་བསྲེལ་ཆ་བརྒྱད་དུ། །བཞག་སྟེ་ཆོས་ཀྱི་དབྱིངས་སུ་གཟིམས་པ་ལྟར། །བདག་ཀྱང་རྫོགས་སྨིན་སྦྱངས་གསུམ་མཐར་ཕྱིན་ནས། །ཁམས་གསུམ་ལས་འདས་འོག་མིན་ཆེན་པོ་རུ། །མངོན་པར་སངས་རྒྱས་སྤྲུལ་པའི་མཛད་པ་བཅུས། །ཀུན་མཁྱེན་ཁྱེད་དང་འགྲོ་དོན་ཉམས་པར་ཤོག །དེ་བཞིན་གཤེགས་པ་ཁྱེད་སྐུ་ཅི་འདྲ་དང། །འཁོར་དང་སྐུ་ཚེའི་ཚད་དང་ཞིང་ཁམས་སོགས། །ཁྱེད་ཀྱི་མཚན་མཆོག་བཟང་


JLAZ012_Page_0574
[མ་དཔེ་གཟིགས་ན་འདིར་གནོན།]

པོ་ཅི་འདྲ་བ།། དེ་འདྲ་ཁོ་ནར་བདག་ཀྱང་འགྱུར་བར་ཤོག །མཐར་ལྟུང་བཤགས་འདོན། དེ་ནས་ཐུན་མོང་མ་ཡིན་པའི་སྔོན་འགྲོ་རྣམས་ཁྲིད་ཡིག་དྲན་པ་ཉེར་གཞག་ལྟར་ཤེས་པར་བྱའོ། །མངྒ་ལཾ། ༈ གཉིས་པ་ཐུན་མོང་མ་ཡིན་པའི་སྔོན་འགྲོ་ལ། དང་པོ་སྐྱབས་སུ་འགྲོ་བ་ནི། དཀོན་མཆོག་གསུམ་དངོས་བདེ་གཤེགས་རྩ་བ་གསུམཿ རྩ་རླུང་ཐིག་ལེའི་རང་བཞིན་བྱང་ཆུབ་སེམསཿ ངོ་བོ་རང་བཞིན་ཐུགས་རྗེའི་དཀྱིལ་འཁོར་ལཿ བྱང་ཆུབ་སྙིང་པོའི་བར་དུ་སྐྱབས་སུ་མཆིཿ ལན་གསུམ། གཉིས་པ་སེམས་བསྐྱེད་ནིཿ ཧོཿ སྣ་ཚོགས་སྣང་བ་ཆུ་ཟླའི་རྫུན་རིས་ཀྱིཿ འཁོར་བ་ལུ་གུ་རྒྱུད་དུ་འཁྱམས་པའི་འགྲོཿ རང་རིག་འོད་གསལ་དབྱིངས་སུ་ངལ་བསོ་ཕྱིརཿ ཚད་མེད་བཞི་ཡི་ངང་ནས་སེམས་བསྐྱེད་དོཿ ལན་གསུམ། གསུམ་པ་རྡོར་སེམས་བསྒོམ་བཟླས་ནིཿ ཨཱཿ བདག་ཉིད་ཐ་མལ་སྤྱི་བོ་རུཿ པད་དཀར་ཟླ་བའི་གདན་གྱི་དབུསཿ ཧཱུྃ་ལས་བླ་མ་རྡོ་རྗེ་སེམསཿ དཀར་གསལ་ལོངས་སྤྱོད་རྫོགས་པའི་སྐུཿ རྡོ་རྗེ་དྲིལ་འཛིན་སྙེམས་མ་འཁྲིལཿ ཁྱོད་ལ་སྐྱབས་གསོལ་སྡིག་པ་སྦྱོངསཿ འགྱོད་སེམས་དྲག་པོས་མཐོལ་ལོ་བཤགསཿ ཕྱིན་ཆད་སྲོག་ལ་བབས་ཀྱང་སྡོམཿ ཁྱེད་ཐུགས་ཟླ་བ་རྒྱས་པའི་སྟེངཿ ཧཱུྃ་ཡིག་མཐའ་མར་སྔགས་ཀྱིས་བསྐོརཿ བཟླས་པ་སྔགས་ཀྱིས་རྒྱུད་བསྐུལ་བསཿ ཡབ་ཡུམ་བདེ་རོལ་སྦྱོར་མཚམས་ནསཿ བདུད་རྩི་བྱང་ཆུབ་སེམས་ཀྱི་སྤྲིནཿ


JLAZ012_Page_0575
[མ་དཔེ་གཟིགས་ན་འདིར་གནོན།]

ག་བུར་རྡུལ་ལྟར་འཛག་པ་ཡིསཿ བདག་དང་ཁམས་གསུམ་སེམས་ཅན་གྱིཿ ལས་དང་ཉོན་མོངས་སྡུག་བསྔལ་རྒྱུཿ ནད་གདོན་སྡིག་སྒྲིབ་ཉེས་ལྟུང་གྲིབཿ མ་ལུས་བྱང་བར་མཛད་དུ་གསོལཿ ཨོཾ་བཛྲ་ས་ཏྭ་ས་མ་ཡཿ སོགས་དངཿ ཨོཾ་བཛྲ་ས་ཏྭ་ཧཱུྃ། ཅི་ནུས་བཟླཿ བཞི་པ་མཎྜལ་ནིཿ ཨོཾ་ཨཱཿཧཱུྃ། སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིངཿ རིན་ཆེན་སྣ་བདུན་ལྷ་མིའི་འབྱོར་པས་གཏམསཿ བདག་ལུས་ལོངས་སྤྱོད་བཅས་པ་ཡོངས་འབུལ་གྱིཿ ཆོས་ཀྱི་འཁོར་ལོས་སྒྱུར་བའི་སྲིད་ཐོབ་ཤོགཿ འོག་མིན་བདེ་ཆེན་སྟུག་པོ་བཀོད་པའི་ཞིངཿ ངེས་པ་ལྔ་ལྡན་རིགས་ལྔའི་ཚོམ་བུ་ཅནཿ འདོད་ཡོན་མཆོད་པའི་སྤྲིན་ཕུང་བསམ་ཡས་པཿ ཕུལ་བས་ལོངས་སྐུའི་ཞིང་ལ་སྤྱོད་པར་ཤོགཿ སྣང་སྲིད་རྣམ་དག་གཞོན་ནུ་བུམ་པའི་སྐུཿ ཐུགས་རྗེ་མ་འགགས་ཆོས་ཉིད་རོལ་པའི་རྒྱནཿ སྐུ་དང་ཐིག་ལེའི་འཛིན་པ་རྣམ་དག་ཞིངཿ ཕུལ་བས་ཆོས་སྐུའི་ཞིང་ལ་སྤྱོད་པར་ཤོགཿ ལྔ་པ་ཀུ་སུ་ལིའི་ཚོགས་གསོག་ནིཿ ཕཊཿ ལུས་གཅེས་འཛིན་བོར་བས་ལྷ་བདུད་ཆོམཿ སེམས་ཚངས་པའི་སྒོ་ནས་དབྱིངས་ལ་ཐོནཿ འཆི་བདག་གི་བདུད་བཅོམ་ཁྲོས་མར་གྱུརཿ གཡས་ཉོན་མོངས་བདུད་འཇོམས་གྲི་གུག་གིསཿ གཟུགས་ཕུང་པོའི་བདུད་བཅོམ་ཐོད་པ་བྲེགསཿ གཡོན་ལས་བྱེད་ཚུལ་གྱིས་བྷནྡྷ་ཐོགསཿ སྐུ་གསུམ་གྱི་མི་མགོའི་སྒྱེད་པུར་བཞགཿ ནང་སྟོང་གསུམ་གང་བའི་བམ་རོ་དེཿ ཨ་ཐུང་དང་ཧཾ་ཡིག་གིས་


JLAZ012_Page_0576
[མ་དཔེ་གཟིགས་ན་འདིར་གནོན།]

བདུད་རྩིར་བཞུཿ འབྲུུ་གསུམ་གྱི་ནུས་པས་སྦྱངས་སྤེལ་བསྒྱུརཿ ཨོཾ་ཨཱཿཧཱུྃཿ གྲངས་མེད་བརྗོད་མཐར། ཕཊཿ ཡར་མཆོད་ཡུལ་མགྲོན་གྱི་ཐུགས་དམ་བསྐངསཿ ཚོགས་རྫོགས་ནས་མཆོག་ཐུན་དངོས་གྲུབ་ཐོབཿ མར་འཁོར་བའི་མགྲོན་མཉེས་ལན་ཆགས་བྱངཿ ཁྱད་པར་དུ་གནོད་བྱེད་བགེགས་རིགས་ཚིམསཿ ནད་གདོན་དང་བར་ཆད་དབྱིངས་སུ་ཞིཿ རྐྱེན་ངན་དང་བདག་འཛིན་རྡུལ་དུ་བརླགསཿ མཐར་མཆོད་བྱ་དང་མཆོད་ཡུལ་མ་ལུས་ཀུནཿ གཤིས་རྫོགས་པ་ཆེན་པོར་མ་བཅོས་ཨཱཿ དྲུག་པ་བླ་མའི་རྣལ་འབྱོར་ནི་ཕྱི་སྒྲུབ་ལྟར་རོཿ ༈ སྤུངས་གཏོར་བསྡུས་པ་བཞུགས།། སྤུངས་གཏོར་ཤིན་ཏུ་ཁྱེར་བདེ་བ་གཏོང་ན། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །སོགས་ལན་གསུམ། ཨོཾསྭ་བྷ་ཝ་སོགས། སྟོང་པའི་ངང་ལས་སྐད་ཅིག་དྲན་རྫོགས་སུ། །རང་ཉིད་ཇོ་བོ་ཁ་སར་པཱ་ཎིའི་སྐུ། །བཞེངས་སྟབས་ཕྱག་གཡས་མཆོག་སྦྱིན་ཅན་གསལ་བའི། །མདུན་དུ་རྣམ་པར་སྣང་མཛད་གང་ཆེན་མཚོ། །སྐུ་ལ་ཞིང་ཁམས་རྫོགས་པའི་གཙུག་ཏོར་ནས། །མགྲིན་པ་ཡན་ཆད་དཀོན་མཆོག་སྲི་ཞུའི་མགྲོན། །དེ་བཞིན་ཐུགས་ཀར་ལྟེ་བའི་བར་དག་ལ། །མགོན་པོ་ཡོན་ཏན་སྐུ་སྨད་སྙིང་རྗེའི་མགྲོན། །པད་གདན་བགེགས་རིགས་ལན་ཆགས་གསལ་བ་ལས། །ཐུགས་ཀར་ཡི་གེ་དྲུག་མའི་འོད་ཟེར་གྱིས། །མཆོད་ཡུལ་མཉེས་བྱས་སྦྱིན་


JLAZ012_Page_0577
[མ་དཔེ་གཟིགས་ན་འདིར་གནོན།]

ཡུལ་སྡིག་སྒྲིབ་སྦྱངས། །ཁམས་གསུམ་མ་ལུས་དག་པའི་ཞིང་དུ་གྱུར། །ཨོཾ་མ་ཎི་པདྨེ་ཧཱུྃ་ཧྲཱིཿ བརྒྱ་རྩ་བརྗོདཿ ཧྲཱིཿ བདག་ཉིད་ཐུགས་ལས་བྷྲཱུྃ་ཆད་ཡོངས་གྱུར་ལས། །སྟོང་གསུམ་དང་མཉམ་རིན་ཆེན་སྣོད་ནང་དུ། །འབྲུ་གསུམ་ཞུ་ལས་བདུད་རྩིའི་རྒྱ་མཚོ་ནི། །འདོད་ཡོན་ལོངས་སྤྱོད་ནམ་མཁའི་མཛོད་དུ་གྱུར། །ཁམས་གསུམ་དག་པའི་ཞིང༌། སྲིད་གསུམ་ཐུགས་རྗེའི་མགྲོན། མ་ལུས་ཁྱབ་པའི་ཟས། ཆོས་ཉིད་ནུས་པའི་མཐུས། གཏོར་མ་མི་ཟད་པའི་གཏེར་དུ་སྤྲུལ་ནས་འབུལ་ལོ། །ཨོཾ་ཨཱཿཧཱུྃ། ལན་བདུན། ནམཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་སོགས། སམ་བྷ་ར་བརྒྱ་རྩ་དང་ཆུ་ཐིགས་རིལ་བུ་དེ་མཚུངས་ཕུལ། མས་མགྲོན་ལ་དམིགས་ནས་དེ་བཞིན་གཤེགས་པ་རིན་ཆེན་མངས་སོགས་བཞིའི་མཚན་བརྗོད་ལ་གཤེགས། དེ་ནས་ཆུ་སྦྱིན་ནི། འཕགས་པ་སྤྱན་རས་གཟིགས་དབང་གི། །ཕྱག་ནས་བབས་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམས་བྱས་ནས། །ཁྲུས་བྱས་རྟག་ཏུ་བསིལ་བར་ཤོག །ཨོཾ་མ་ཎི་པདྨེ་ཧཱུྃ་ཧྲཱིཿ བརྒྱ་རྩ་བརྗོད། དེ་ནས་པྲེ་ཏ་ལ་དམིགས་ནས། ཨོཾ་ཛྭ་ལ་མེ་ཏཾ་སརྦ་པྲེ་ཏ་བྷྱ་སྭཱ་ཧཱ། ཚར་གསུམ། ཡི་དྭགས་ཀྱི་ཚོགས་གང་གཱའི་ཀླུང་གི་བྱེ་མ་སྙེད་ངོམས་ཤིང་ཚིམ་པར་གྱུར་ཅིག །ཆོས་སྦྱིན་ནི། སྡིག་པ་ཅི་ཡང་མི་བྱ་ཞིང༌། །སོགས། སྨོན་ལམ་ནི། སྦྱིན་པ་རྒྱ་ཆེན་གྱུར་པ་འདི་ཡིས་ནི། །སོགས་བརྗོད། ཅེས་པ་ཙམ་གྱིས་ཀྱང་རྒན་རྒོན་དང་ཤེས་བྱ་ལ་རྨོངས་པ་རྣམས་ལ་དགེ་བའི་


JLAZ012_Page_0578
[མ་དཔེ་གཟིགས་ན་འདིར་གནོན།]

གྲོགས་སུ་འགྱུར་ཏེ། ཁ་འབར་མ་དང༌། གཟུགས་ལེགས་ལ་སོགས་པ་སྟོན་པའི་གསུང་རབ་རྣམས་ནས་མཚན་བཞི་ཡོད་མེད་གཉིས་ཀྱིས་ཁྱད་ཙམ་ལས་གཞན་མ་གཏོར་མའི་དོན་པོ་གཟུངས་སྔགས་ཁོ་ནའི་ཕན་ཡོན་ལས་ཚིག་གི་སྦྱོར་བ་མ་གསུང་པའི་ཕྱིར་རོ། །ཞེས་པའང་བློ་དམན་འགའ་ཞིག་གིས་ཆུ་གཏོར་གྱི་ཆོ་ག་ཁོང་དུ་མི་ཆུད་པ་ལ་ཕན་བློས་རང་བྱུང་རྡོ་རྗེས་སོ།། ༈ དཀར་གསུར་ཞིང་ཁམས་ཀུན་ཁྱབ་བཞུགས། །དཀར་གསུར་ཞིང་ཁམས་ཀུན་ཁྱབ་ཅེས་བྱ་བ། དཀར་ཕྱེ་གཙང་མ་མར་དཀར་གྱི་ཁུ་བས་སྦགས་པ་སྣུམ་བག་ཅན་གྱི་ཁྲོད། ཤིང་ཏོག །དཀར་གསུམ། མངར་གསུམ། རིན་པོ་ཆེ། བདུད་རྩིའི་ཕུར་མ་སོགས་ཀྱང་བཏགས་ནས་འདྲེས་པར་བྱས་པ་སོལ་མེ་དང༌། སོ་ཏོག་ལ་སོགས་མ་ཡིན་པའི་མེ་ཐལ་འཇམ་པོ་ལ་བཏབ། ཆུ་གཙང་ཁོ་ནས་བྲན། རང་ཉིད་ཇོ་བོ་ཁ་སར་པཱ་ཎིར་གསལ། སྐྱབས་སེམས་སྔོན་དུ་འགྲོ་བས། ན་མོ། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལ་མི་འདའ་ཐུགས་རྗེའི་དབང་གིས་ན། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་བཤམས་པའི་གནས་འདི་རུ། །རྒྱལ་བ་འཁོར་བཅས་མ་ལུས་གཤེགས་སུ་གསོལ། །ཞིང་ཁམས་རྒྱ་མཚོའི་མགྲོན་རིགས་


JLAZ012_Page_0579
[མ་དཔེ་གཟིགས་ན་འདིར་གནོན།]

མཆོག་དམན་ཐམས་ཅད་བྱོན་ནས་མདུན་གྱི་ནམ་མཁར་བཞུགས་པར་གྱུར། ཨོཾ་ཨཱཿཧཱུྃ། ལན་བདུན་བརྗོད། དུ་བ་འདི་འདོད་ཡོན་གྱི་ལྷ་མོ་གཟུགས་རྡོ་རྗེ་མ་མཛེས་ཤིང་ལྟ་ན་སྡུག་པ། དབྱངས་སྙན་པ། དྲི་ཞིམ་པ། རེག་བྱ་འཇམ་པ། ཕྱག་གཉིས་ན་ལྷའི་བདུད་རྩི་རོ་བརྒྱ་དང་ལྡན་པའི་བུམ་པ་བསྣམས་ནས་མཆོད་པའི་སྤྲིན་ཕུང་དཔག་ཏུ་མེད་པར་སྤྲོ་ཞིང༌། སྣོད་བཅུད་ཀྱི་ཉམས་གྲིབ་དང་རྨུག་པ་དག་པར་བྱེད་པའི་སྤྱི་གཙུག་ནས་སངས་རྒྱས་རིན་ཆེན་མངས་ཕྱག་གཡས་མཆོག་སྦྱིན་ཀྱི་རྒྱས་དབུལ་བ་སེལ་ཞིང༌། འདོད་ཡོན་གྱི་ལོངས་སྤྱོད་ཟད་མི་ཤེས་པའི་གཏེར་དུ་སྤྲུལ་པར་གྱུར། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ན་མོ་ཆོས་སྐུ་ཀུན་ཏུ་བཟང་པོ་ནས་དྲིན་ཆེན་རྩ་བའི་བླ་མའི་བར་དུ་བྱོན་པའི་དགོངས་བརྡ་སྙན་རྒྱུད་ཀྱི་བླ་མ་དམ་པ་མ་ཚང་བ་མེད་པ་རྣམས་དང༌། ཐེག་པ་རིམ་པ་དགུ། མདོ་སྒྱུ་སེམས་གསུམ། སྒྲུབ་སྡེ་བཀའ་བརྒྱད་རྒྱུད་སྡེ་ཕྱི་ནང༌། དུས་ཀྱི་འཁོར་ལོ་ཕྱི་ནང་གཞན་གསུམ་གྱི་དཀྱིལ་འཁོར་གྱི་ལྷ་ཚོགས་བསམ་ཡས་གྲངས་མེད་པ་ལ་འབུལ་ལོ། །བདག་གི་རིག་འཛིན་གྱི་སྡོམ་པ་དང་དམ་ཚིག་ལ་ཉེས་པའི་སྐྱོན་བྱུང་བ་ཐམས་ཅད་སོར་ཆུད་ནས། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་ཨཱཿཧཱུྃ། ཕྱི་སྣོད་ཀྱི་འཇིགས་རྟེན་ཡུམ་ལྔའི་རང་


JLAZ012_Page_0580
[མ་དཔེ་གཟིགས་ན་འདིར་གནོན།]

བཞིན། ནང་བཅུད་ཀྱི་སེམས་ཅན་དཔའ་བོ་མཁའ་འགྲོའི་གྲོང་ཁྱེར། ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད། མཁའ་སྤྱོད་དང་ས་སྤྱོད་ཀྱི་བདག་པོ་དཔལ་ལྡན་རྡོ་རྗེ་ཕག་མོ། རྒྱལ་ཡུམ་རྡོ་རྗེ་རྣལ་འབྱོར་མ། ཁྲོས་མ་ནག་མོ་དང་སེང་གེའི་གདོང་ཅན། ཀུ་རུ་ཀུལླེ་དང་འོད་ཟེར་ཅན། དཔལ་དང་ནོར་རྒྱུན་མ། བཀྲ་ཤིས་ཀྱི་ལྷ་མོ་བརྒྱད། ཁྲོ་གཉེར་ཅན་དང་རི་ཁྲོད་མ། ཡུམ་ཆེན་མོ་ལ་སོགས་ཏེ་གསང་སྔགས་དང་རིག་སྔགས་གཟུངས་སྔགས་ཀྱི་ལྷ་མོ་རྣམས་ལ་འབུལ་ལོ། །བདག་གི་དམ་ཚིག་ཉམས་ཆག་ཐམས་ཅད་བསྐོངས་ནས་ཕྲིན་ལས་རྣམ་པ་བཞི་ཐོགས་མེད་དུ་འགྲུབ་བ་དང༌། འཆི་ཁར་གནད་གཅོད་ཀྱི་སྡུག་བསྔལ་མི་འབྱུང་ཞིང་ལམ་སྣ་དང་བསུན་མ་མཛད་དུ་གསོལ། ཨོཾ་ཨཱཿཧཱུྃ། བཅོམ་ལྡན་འདས་ཤཱཀྱ་ཐུབ་པས་མཚོན་བསྐལ་པ་བཟང་པོའི་སངས་རྒྱས་སྟོང་རྩ་གཉིས། སངས་རྒྱས་དགའ་བའི་དཔལ་ལ་སོགས་ཕྱོགས་བཅུ་དང་མར་མེ་མཛད་དང་རྣམ་གཟིགས་ལ་སོགས་དུས་གསུམ་གྱི་སངས་རྒྱས། མཆོག་ཟུང་དང་སྒྲ་གཅན་འཛིན་ལ་སོགས་ཉན་ཐོས་ཀྱི་དགེ་འདུན་ཟུང་བཞི་ཡ་བརྒྱད། རང་སངས་རྒྱས་རིགས་གཉིས། གནས་བརྟན་ཆེན་པོ་བཅུ་དྲུག་འཁོར་དགྲ་བཅོམ་པའི་ཚོགས་བསམ་གྱིས་མི་ཁྱབ་པ་དང་བཅས་པ་རྣམས་ལ་


JLAZ012_Page_0581
[མ་དཔེ་གཟིགས་ན་འདིར་གནོན།]

འབུལ་ལོ། །བདག་གིས་སོ་སོར་ཐར་པའི་སྡོམ་པ་དང་འགལ་བ་ཐམས་ཅད་སོར་ཆུད་ནས་ངན་སོང་གསུམ་དང་མི་ཁོམ་པའི་གནས་རིགས་ལས་ཐར་ཏེ་ཉན་རང་དགྲ་བཅོམ་པའི་གོ་འཕང་ཐོབ་པར་གྱུར་ཅིག །ཨོཾ་ཨཱཿཧཱུྃ། འཕགས་པ་འཇམ་དཔལ་གྱིས་མཚོན་བྱང་ཆུབ་སེམས་དཔའི་དགེ་འདུན་ཉེ་བའི་སྲས་བརྒྱད། རྡོ་རྗེ་སྙིང་པོ་དང་བློ་གྲོས་མི་ཟད་པ་ལ་སོགས་བསྐལ་བཟང་གི་སེམས་དཔའ་བཅུ་དྲུག །ཆོས་འཕགས་དང༌། རྟག་ཏུ་ངུ་ལ་སོགས་བྱང་བྱུང་སེམས་དཔའི་ཚོགས་དཔག་ཏུ་མེད་པ་རྣམས་ལ་འབུལ་ལོ། །བདག་གིས་བྱང་ཆུབ་སེམས་དཔའི་སྡེ་སྣོད་ལས་གསུངས་པའི་ལྟུང་བ་ཉམས་སུ་མྱོང་བ་མཐའ་དག་ལྷག་མེད་དུ་བྱང་ནས་ཐེག་པ་ཆེན་པོའི་ལམ་ལ་བར་ཆད་མེད་པར་གྱུར་ཅིག །ཨོཾ་ཨཱཿཧཱུྃ། ཡེ་ཤེས་དང་ལས་གྲུབ་པའི་ཆོས་སྐྱོང་མ་མགོན་ལྕམ་དྲལ། དཔལ་མགོན་བདུན་ཅུ་རྩ་ལྔ། དྲེགས་པ་ཕོ་རྒྱུད་མོ་རྒྱུད། ལྷ་ཀླུ་ཡུལ་ལྷ་གཞི་བདག །འཛམ་བུ་གླིང་དང་གངས་ཅན་ན་གནས་པའི་དགེ་བསྙེན་དཀར་ཕྱོགས་སྐྱོང་བ་མིང་དང་མཚན་ནས་མ་ཐོན་པ་ཐམས་ཅད་ལ་འབུལ་ལོ། །སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། འཇིག་རྟེན་གྱི་ཁམས་སུ་ཆར་ཆུ་དུས་སུ་ཕོབས། ནད་མུག་འཁྲུགས་རྩོད་སོལ། རྣལ་འབྱོར་པ་བདག་ཅག་


JLAZ012_Page_0582
[མ་དཔེ་གཟིགས་ན་འདིར་གནོན།]

ཆོས་སྒྲུབ་པའི་བར་ཆད་སྲུང་ཞིང་ཡོན་བདག་དང་གནས་མལ་མཛད་དུ་གསོལ། ཨོཾ་ཨཱཿཧཱུྃ། གཞན་ཡང་ལྷ་ཀླུ་མི་དང་བྲམ་ཟེའི་དྲང་སྲོང་བདེན་ཚིག་གྲུབ་པའི་ཚོགས། གནོད་སྦྱིན་ཛམ་བྷ་ལ། ལྷན་ཅིག་སྐྱེས་པའི་ལྷ་འགོ་བའི་ལྷ་ལྔ། ཁྱིམ་ལྷ་དང་ཞིང་ལྷ་ལ་སོགས་ཁ་རྗེ་དང་དབང་ཐང་བསྐྱེད་པའི་ལྷ་འབྱུང་བ་བཞི་དང་རི་དང་ནགས་ཚལ་གྱི་ལྷ་རྣམས་ལ་འབུལ་ལོ། །བདག་གི་ལེགས་པ་དང་དཀར་པོའི་ཕྱོགས་ཐམས་ཅད་བསྐྱེད་པའི་སྡོང་གྲོགས་མཛད་དུ་གསོལ། ཨོཾ་ཨཱཿཧཱུྃ། དྲི་ཟའི་རྒྱལ་པོ་ལྗོན་པ་རྟ་མགོ་ཅན་དང༌། གླུ་དང་གར་ལ་སྲེད་པའི་དྲི་ཟ་རབ་དགའ། མིའམ་ཅི་གྲོང་ཁྱེར་བར་སྣང་ལ་བཅས་པའི་སྡེ་ཚན་གྱིས་མཚོན་གདོན་གྱི་རིགས་སུ་གྱུར་པ་ཐམས་ཅད་དང༌། ལན་ཆགས་ཤ་འཁོན་ཆགས་པའི་རིགས། འཕྲོག་མ་མ་བུ་ལྔ་བརྒྱ། བགེགས་རིགས་སྟོང་ཕྲག་བརྒྱད་ཅུ་དང་བཅས་པའི་ཚོགས་ལ་འབུལ་ལོ། །གདོན་དང་གནོད་པ་མ་མཛད། ཁ་རྗེ་དང་དབང་ཐང་མ་འཕྲོག །རུ་ང་དང་གདུག་རྩུབ་སྤོངས་ཤིག །ཨོཾ་ཨཱཿཧཱུྃ། ཁྱད་པར་དུ་འགྲོ་བ་རིགས་དྲུག །ལམ་རྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སྙིང་རྗེའི་མགྲོན་དུ་གྱུར་པ་ཐམས་ཅད་དང༌། དབུལ་ཞིང་ཕོངས་པར་གྱུར་པའི་ཡི་དྭགས་སྡེ་ཚན་གཉིས། ཁར་སང་ད་ནངས་སམ།


JLAZ012_Page_0583
[མ་དཔེ་གཟིགས་ན་འདིར་གནོན།]

ན་ནིང་གི་ལོ་ཟླ་ཞག་དུས་ནས་སྔ་མའི་ལུས་རྟེན་བོར། ཕྱི་མའི་ལུས་རྟེན་མ་རྙེད། སྲིད་པ་བར་མ་དོར་ཉམ་ང་བའི་འཕྲང་ལ་སྐྱབས་དང་སྐྱོབ་པ་མེད་པ། མགོན་དང་དཔུང་གཉེན་མེད་པ། སྔོན་གྱི་བསགས་རྒྱབ་མེད་པ། དགེ་བའི་ར་མདའ་ཉུང་བ། མིང་བཞི་འདུས་པའི་ཕུང་པོ། ཚོར་བ་སྡུག་བསྔལ་གྱི་རང་བཞིན། འཇིགས་སྐྲག་འཁྲུལ་སྣང་གིས་མནར་བ། འཁྱགས་ལྟོགས་སྐོམ་གསུམ་གྱིས་གདུང་བ། ཚེ་ཚད་ངེས་པ་མེད་པ། བྱ་སྒྲོ་རླུང་གིས་བཏེགས་པ་བཞིན། གར་འགྲོའི་རང་དབང་དང་བྲལ་བའི་བར་དོའི་སེམས་ཅན་ཆེ་གེ་མོས་གཙོ་བྱས་པའི་བར་དོར་གནས་པ་ཐམས་ཅད་ལ་འབུལ་ལོ། །གནས་གྲོགས་ལོངས་སྤྱོད་བཟའ་བཏུང་ཕུན་སུམ་ཚོགས་པ་དང་ཕྲད་ནས་བག་ཕེབས་པར་གྱུར་ཅིག །དེ་ལྟར་གྱུར་པའི་མོད་ལ་འཕགས་པ་སྤྱན་རས་གཟིགས་དང༌། བྱང་ཆུབ་སེམས་དཔའ་སྒྲིབ་པ་རྣམ་སེལ་མཐོང་ནས་བར་དོ་ལ་བར་དོ་ཡིན་པར་ངོ་ཤེས། འཁྲུལ་སྣང་རྒྱས་ཐེབས། བླ་མ་དང་དཀོན་མཆོག །ཡི་དམ་དང་ལྟ་བ་རྗེས་སུ་དྲན་ཏེ། ལས་ངན་པའི་སྒྲིབ་པ་སྐད་ཅིག་ལ་དག་ནས་རིག་པ་ལ་རང་དབང་ཐོབ། བདེ་བ་ཅན་དང་པདྨ་འོད་ལ་སོགས་པའི་ཞིང་ཁམས་ཁྱད་པར་ཅན་བཙན་ཐམས་སུ་བགྲོད་ནུས་པར་ཤོག་ཅིག །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་


JLAZ012_Page_0584
[མ་དཔེ་གཟིགས་ན་འདིར་གནོན།]

པ་ཚིམ་གྱུར་ཅིག །ལན་ཆགས་བུ་ལོན་འཁོར་གྱུར་ཅིག །ཁམས་གསུམ་དག་པའི་ཞིང༌། སྲིད་གསུམ་ཐུགས་རྗེའི་མགྲོན། མ་ལུས་ཁྱབ་པའི་ཟས། ཆོས་ཉིད་ནུས་པའི་མཐུས། འདོད་ཡོན་མི་ཟད་པའི་གཏེར་ལ་ལོངས་སྤྱོད་པར་གྱུར་ཅིག །སྡིག་པ་ཅི་ཡང་མི་བྱ་ཞིང་སོགས་པས་ཆོས་སྦྱིན་དང་བསྔོ་སྨོན་ཀྱང་བྱའོ། །རང་བྱུང་རྡོ་རྗེས་གཞན་ལ་ཕན་པའི་བློས་བཀོད་པའོ། །༈ དམར་གསུར་ལ་བརྟེན་ནས་རང་གཞན་གྱི་འཆི་བ་བསླུ་བ་བཞུགས། ། དམར་གསུར་ལ་བརྟེན་ནས་རང་གཞན་གྱི་འཆི་བ་བསླུ་བ་ནི། ཨོཾ་ཨཱཿཧཱུྃ། ལན་གསུམ་བརྗོད། དམར་གསུར་འདོད་ཡོན་རྒྱ་མཚོ་འདི། །དཀོན་མཆོག་སྲིད་ཞུའི་མགྲོན་རྣམས་ལ། །ཟས་ཀྱི་ཉེར་ལེན་མི་མངའ་ཡང༌།། མཆོད་པའི་ཡུལ་དུ་དམིགས་ནས་འབུལ། །བདག་ཅག་བསོད་ནམས་ཚོགས་རྫོགས་ནས། །མྱུར་དུ་ཡེ་ཤེས་མཐོང་བར་ཤོག །མགོན་པོ་ཡོན་ཏན་མགྲོན་རྣམས་ལ། །ཟག་མེད་བདུད་རྩིར་དམིགས་ནས་འབུལ། །བྱང་ཆུབ་སྒྲུབ་ལ་བར་གཅོད་པའི། །འགལ་རྐྱེན་མི་མཐུན་ཕྱོགས་ལས་སྲུང༌། །རིགས་དྲུག་སྙིང་རྗེའི་མགྲོན་རྣམས་ཀྱིས།། རང་རང་འདོད་པའི་ལོངས་སྤྱོད་དུ། །མཐོང་ནས་ཟད་མེད་གཏེར་ལ་སྤྱོད། །དགའ་མགུ་ཚིམ་ཞིང་ཡི་རང་ནས། །སོ་སོའི་སྡུག་བསྔལ་བྲལ་བར་ཤོག །བགེགས་རིགས་ལན་ཆགས་མགྲོན་རྣམས་ལ། །ཕམ་རྒྱལ་འཐབ་རྩོད་མེད་


JLAZ012_Page_0585
[མ་དཔེ་གཟིགས་ན་འདིར་གནོན།]

པར་བསྔོ། །སོ་སོའི་ཡིད་ལ་གང་འདོད་པའི། །ཟད་མི་ཤེས་པའི་ལོངས་སྤྱོད་དུ། །གྱུར་ནས་ཤ་འཁོན་བུ་ལོན་བྱང༌། །གནོད་སེམས་འཁོན་འཛིན་དག་པར་ཤོག །ཁྱད་པར་གཞན་གྱི་ལུས་སྲོག་ལ། །རྣམ་པར་སྡང་བའི་གནོད་སྦྱིན་དང༌། །ཤ་ཟ་སྲིན་པོ་འབྱུང་པོའི་གདོན། །ཚེ་བརྐུ་མདངས་འཕྲོག་སྲོག་ལེན་ཅིང༌། །ཤ་དང་ཁྲག་ལ་གདུང་བ་རྣམས། །དམར་གསུར་འདོད་ཡོན་ཀུན་ཁྱབ་འདིས། །ངོམས་ཤིང་ཚིམས་ལ་མཐུན་གྱུར་ཅིང༌། །ཁྲོ་ཞིང་གཏུམ་པའི་སེམས་བོར་ནས། །བྱང་ཆུབ་སེམས་དང་ལྡན་པར་ཤོག །རྒྱུ་འབྲས་བསླུ་བ་མེད་པ་དང༌། །དཀོན་མཆོག་གསུམ་གྱི་བདེན་པ་དང༌། །བདག་གི་ལྷག་བསམ་རྣམ་དག་མཐུས། །བྱམས་པའི་སྟོབས་ཀྱིས་གནོད་སྦྱིན་ལས། །རང་གི་ཡུལ་ཁམས་བསྲུངས་པ་བཞིན། །མཐར་ཐུག་རང་གཞན་དོན་ཡོད་ཅིང༌། །གནས་སྐབས་འཆི་བས་འཇིགས་པ་ལས། །འགྲོ་བ་མང་པོའི་སྲོག་ཐར་ཤོག །གང་ཞིག་འདི་རུ་ལྷགས་པ་ཡི། །སའམ་འོན་ཏེ་བར་སྣང་གནས། །འབྱུང་པོ་གདུག་པའི་སེམས་ལྡན་ཀྱང༌།།རྒྱུད་ལ་བྱང་ཆུབ་སེམས་སྐྱེས་ནས། །གཞན་ལ་འཚེ་བའི་བློ་སྤངས་ཏེ། །ཐར་པའི་ས་བོན་ཐེབས་པར་ཤོག །ཆོས་རྣམས་ཐམས་ཅད་རྒྱུ་ལས་བྱུང༌། །སོགས་དགེ་བ་བསྔོ། སྤྱིར་དུས་ལ་ངེས་པ་མེད་ཅིང་ཁྱད་པར་མུན་སྲོས་ལ་གནོད་སྦྱིན་རྣམས་གཞན་


JLAZ012_Page_0586
[མ་དཔེ་གཟིགས་ན་འདིར་གནོན།]

གྱི་སྲོག་ལ་འཚེ་བའི་སླད་དུ་རྒྱུ་བ་ཡིན་པས། དེ་ཚེ་དམར་གསུར་སྦྱར་ཞིང་རང་གི་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པས་ཆོས་དང་ཟང་ཟིང་གི་སྦྱིན་པ་ཐུན་མོང་དུ་གྱུར་པ་འདི་བྱས་ན་ཕན་ཡོན་བསམ་གྱིས་མི་ཁྱབ་པ་ཡིན་ནོ། །ཞེས་པའང་ཀློང་གསལ་བ་དང་ཆོས་ལྡན་པས་བསྐུར་ངོར་རིག་པ་འཛིན་པ་མཁྱེན་བརྩེའི་ལྷས་སོ། ། ༈ གསོན་གཤིན་གྱི་བསྔོ་བ་ཉི་མའི་འོད་ཟེར་ཞེས་བྱ་བ་བཞུགས། ༈ གསོན་བསྔོ་ནི། ཕྱོགས་བཅུའི་ཞིང་ཁམས་རབ་འབྱམས་རྣམ་པ་ཐམས་ཅད་དང༌། རིགས་ལྔ་གང་ཆེན་མཚོའི་རྣམ་འཕྲུལ་རྒྱ་མཚོས་བཀོད་པའི་ཞིང་ཁམས་མཐའ་ཡས་མུ་མེད་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བྱང་སེམས་དཔའ་བོ་མཁའ་འགྲོ། ལྷ་དང་དྲང་སྲོང་བདེན་ཚིག་སྨོན་ལམ་ལ་མངའ་བརྙེས་པ་ཐམས་ཅད་སྦྱིན་པའི་བདག་པོ་ཆེ་གེས་ཐོག་དྲངས། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་གཟིགས་ཤིང་དགོངས་སུ་གསོལ། དེང་སྦྱིན་པའི་བདག་པོས་ལྷག་བསམ་རྣམ་དག་གིས་བསྒྲུབས་པའི་དགེ་བའི་རྩ་བ་འདིས་མཚོན། རང་གཞན་རྣམས་ཀྱིས་དུས་གསུམ་བསགས་ཡོད་ཀྱི་རྣམ་པར་དཀར་བའི་བྱེད་འབྲས་ལ་བརྟེན་ནས་ཕན་བདེའི་འབྱུང་གནས་ཀུན་མཁྱེན་རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །བསྟན་པའི་རྩ་ལག་གཏད་


JLAZ012_Page_0587
[མ་དཔེ་གཟིགས་ན་འདིར་གནོན།]

རབས་བདུན་དང་རྒྱན་དྲུག་མཆོག་གཉིས། འདས་རྗེས་ཐོབ་པའི་པཎ་གྲུབ་རྣམ་གསུམ། རྣལ་འབྱོར་དབང་ཕྱུག་བརྒྱད་ཅུ་རྩ་གཞི། ཤམྦྷ་ལའི་རིགས་ལྡན་ཆོས་རྒྱལ། རིགས་གསུམ་སྒྱུ་འཕྲུལ་མེས་དབོན་རྣམ་གསུམ། མཁན་སློབ་ཟུང་གཅིག་དང་སྐ་ཅོག་ཞང་གསུམ་ལ་སོགས་སྤྲུལ་པའི་ལོ་པཎ་མཁས་གྲུབ་ཆེན་པོ་བསྟན་པ་ལ་བྱ་བ་མཛད་ནས་ཆོས་ཀྱི་དབྱིངས་སུ་ཞི་བར་གཤེགས་པ་ཐམས་ཅད་ཀྱི་ཐུགས་ཀྱི་དགོངས་པ་ཟག་པ་མེད་པ་གོང་ནས་གོང་དུ་ཡོངས་སུ་རྫོགས་པར་གྱུར་ཅིག །ད་ལྟར་བཞུགས་པའི་བསྟན་འཛིན་གྱི་སྐྱེས་བུ་དམ་པ་སྤངས་རྟོགས་ཕུན་སུམ་ཚོགས་པ་མཐའ་དག་དང༌། བྱང་ཆུབ་སེམས་ཀྱི་རིགས་ཡོངས་སུ་སད་པ་ལས་དངོས་སམ་རྒྱུད་ནས་སེམས་ཅན་ལ་སྨན་པའི་རིགས། སྐྱེས་བུ་གསུམ་གྱི་ལམ་ནས་དོན་གཉིས་བསྒྲུབ་པ་ལ་འདུན་པ་ཐམས་ཅད་ཀྱི་ཐུགས་ཀྱི་བཞེད་དོན་འབད་མེད་དུ་འགྲུབ་ཅིང་སྐུ་ཚེའི་རྒྱལ་མཚན་ཡུན་རིང་དུ་བརྟན་པར་གྱུར་ཅིག །དགེ་འདུན་མ་ལུས་པ་རྒྱལ་བས་གནང་བའི་ཟས་གོས་གནས་མལ་གྱི་ཆོག་ཤེས་ཤིང༌། ཆོས་སྤྱོད་བཅུ་དང་འབྲེལ་བར་བརྗོད་བྱ་བསླབ་པ་གསུམ་དང་རྗོད་བྱེད་སྡེ་སྣོད་གསུམ་གྱི་བསྒྲུབ་པ་ལ་བརྩོན་ཞིང་བསྟན་པ་འཛིན་སྐྱོང་སྤེལ་བའི་ཐུགས་བསྐྱེད་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག །ཐེག་པ་ཆེན་པོའི་


JLAZ012_Page_0588
[མ་དཔེ་གཟིགས་ན་འདིར་གནོན།]

སེམས་བསྐྱེད་ནས་རྣམ་མཁྱེན་གྱི་གོ་འཕང་གཉེར་བའི་རྟེན་གང་ཞིག་སྡོམ་པ་གསུམ་གྱིས་རྣམ་པར་མཛེས་ཤིང་ཉེས་ལྟུང་གི་དྲི་མས་མ་གོས་པར་སྨིན་གྲོལ་ཟབ་མོའི་ལམ་ལ་རྣལ་དུ་འབྱོར་པ་དང་མི་འབྲལ་བར་གྱུར་ཅིག །སློབ་པ་ལམ་གྱི་ཡོན་ཏན་མཐའ་དག་དབང་པོ་རྣོན་པོའི་དབང་དུ་གྱུར་ནས་དྲན་པ་ཉེ་བར་གཞག་པ་བཞི་ལ་སོགས་པ་ཚོགས་ལམ་ཆུང་ངུས་བསྡུས་པའི་ཡོན་ཏན་དང༌། ཡང་དག་པར་སྤོང་བ་བཞི་ལ་སོགས་པ་ཚོགས་ལམ་འབྲིང་གིས་བསྡུས་པའི་ཡོན་ཏན་དང༌། རྫུ་འཕྲུལ་གྱི་རྐང་པ་བཞི་ལ་སོགས་པ་ཚོགས་ལམ་ཆེན་པོས་བསྡུས་པའི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར་ཅིག །རྣམ་བྱང་སྟོབས་ལྔ་ལ་སོགས་པ་སྦྱོར་ལམ་བཟོད་པ་ཆོས་མཆོག་གིས་བསྡུས་པའི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར་ཅིག །བྱང་ཆུབ་ཀྱི་ཡན་ལག་བདུན་ལ་སོགས་པ་མཐོང་ལམ་གྱིས་བསྡུས་པའི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར་ཅིག །འཕགས་པའི་ལམ་ཡན་ལག་བརྒྱད་ལ་སོགས་པ་སྒོམ་ལམ་གྱིས་བསྡུས་པའི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར་ཅིག །སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་མི་སློབ་པའི་ལམ་གྱི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར་ཅིག །ཚུལ་དེ་དག་གིས་ཐུབ་པའི་


JLAZ012_Page_0589
[མ་དཔེ་གཟིགས་ན་འདིར་གནོན།]

ལུང་རྟོགས་ཀྱི་བསྟན་པ་རིན་པོ་ཆེ་ཡུན་དུ་གནས་པའི་མཐུ་ལ་བརྟེན་ནས་འཇིག་རྟེན་གྱི་ཁམས་སུ་དུས་ལ་བབ་པའི་ཆར་ཆུ་འབད་མེད་དུ་འབྱུང་ཞིང་ལོ་ཏོག་འབྲས་བུའི་ཡོན་ཏན་ཕུན་སུམ་ཚོགས་པ་དང་ལྡན་པར་གྱུར་ཅིག །ལས་ངན་གྱི་རྒྱུ་ལས་བསྐྱེད་པའི་འཇིགས་པ་ཆེན་པོ་བརྒྱད་དང་བཅུ་དྲུག །སད་སེར། བཙའ་ཐན། འབྱུང་བ་སྒང་གཤོངས། མི་ནད་ཕྱུགས་ནད་དམག་འཁྲུགས་མུ་གེ། གདོན་གྱི་གནོད་པ་ལ་སོགས་པའི་དུས་ཀྱིས་ཆད་པ་ཐམས་ཅད་ཉེ་བར་ཞི་བར་གྱུར་ཅིག །སྐྱེ་དགུ་ཐམས་ཅད་ལ་རང་བཞིན་དུ་མཐོ་རིས་ཀྱི་ཡོན་ཏན་བདུན་དང་ལྡན་ཞིང༌། ཕན་ཚུན་མཛའ་བཤེས་ཀྱི་སེམས་དང་ལྡན་པས་སྙིགས་མ་ལྔའི་རྒུད་པ་བཅོམ་སྟེ་ལས་ངན་གྱི་རྒྱུ་འབྲས་སྟོངས་ནས་རྫོགས་ལྡན་གྱི་བདེ་བ་ལ་ངང་གིས་སྤྱོད་པར་གྱུར་ཅིག །རྒྱལ་བློན་དང་ཁྱིམ་བདག་དྲ་མའི་ཚོགས་རྣམས་རང་དབང་གི་དཔལ་ལ་ཆོག་ཤེས་པས་བག་ཡོད་དུ་འཚོ་ཞིང་མངའ་འབངས་བྱམས་པས་སྐྱོབ་པའི་འདུན་པ་བཟང་པོ་དང་མི་འབྲལ་བར་གྱུར་ཅིག །ཁྱད་པར་དུ་སྦྱིན་པའི་བདག་པོས་ཐོག་དྲངས་པའི་སེམས་ཅན་ཐམས་ཅད་ཆོས་མཐུན་གྱི་བསམ་པ་ཡིད་བཞིན་དུ་འགྲུབ་ཅིང༌། ཚེ་རབས་ཐམས་ཅད་དུ་དལ་འབྱོར་གྱི་ལུས་རྟེན་ཁྱད་པར་ཅན་ཐོབ། བླ་མ་དགེ་བའི་བཤེས་གཉེན་ཡང་དག་པ་


JLAZ012_Page_0590
[མ་དཔེ་གཟིགས་ན་འདིར་གནོན།]

དང་མཇལ། མཉེས་པ་གསུམ་གྱིས་བསྒྲུབ་པ་མཐར་ཕྱིན་ནས་དབང་བཅུ་བྱང་ཆུབ་ཕྱོགས་ཀྱི་ཆོས་ལ་གནས་པས་རང་དོན་དུ་ཆོས་སྐུ་མངོན་དུ་བྱས། གཞན་དོན་དུ་གཟུགས་སྐུ་རྣམ་པ་གཉིས་ཀྱི་སྒོ་ནས་སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་མཛད་ནུས་པར་གྱུར་ཅིག །འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །སོགས་དང༌། བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱུང་ཤོག །ཕན་བདེ་འབྱུང་བའི་གནས་གཅིག་པུ། སོགས་བརྗོད། ༈ གཤིན་བསྔོ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་གསུམ་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་ཆོ་འཕྲུལ་གྱིས་བཀོད་པའི་ཞིང་ཁམས་རབ་འབྱམས་རྡུལ་སྙེད་ན་བཞུགས་པའི་རྒྱལ་བ་སྲས་དང་སློབ་མར་བཅས་པ་འཇིག་རྟེན་ཕ་རོལ་ཏུ་ཉིང་མཚམས་སྦྱར་བའི་ལས་ཀྱི་གཞན་དབང་ཅན་ཆེ་གེ་མོས་ཐོག་དྲངས་པའི་སེམས་ཅན་ཐམས་ཅད་ལ་ཐུགས་རྗེའི་གཟིགས་པ་ལྷུར་མཛད་དེ་དགོངས་སུ་གསོལ། དེ་ཉིད་ལ་སོགས་པའི་སེམས་ཅན་གང་ཞིག་འཆི་ཀའི་བར་དོ་ལ་གནས་ན་མིང་བཞིའི་ཕུང་པོ་དང་རྣམ་པར་ཤེས་པའི་ཚོགས་བརྒྱད་ཆོས་ཉིད་འདུས་མ་བྱས་པའི་དབྱིངས་སུ་ཉེ་བར་ཞི་ནས་མི་སློབ་པའི་


JLAZ012_Page_0591
[མ་དཔེ་གཟིགས་ན་འདིར་གནོན།]

ལམ་གྱི་ཡོན་ཏན་མངོན་དུ་གྱུར་ཏེ་འཆི་བ་འོད་གསལ་གདོད་མའི་གཞི་ལ་མངོན་པར་རྫོགས་པར་སངས་རྒྱ་བར་གྱུར་ཅིག །ཆོས་ཉིད་ཀྱི་བར་དོ་ལ་གནས་ན་སྒྲ་འོད་ཟེར་གསུམ་ལ་སོགས་པའི་སྣང་ཚུལ་མ་ངེས་པ་ཐམས་ཅད་རང་བཞིན་གྱིས་མ་གྲུབ་པའི་ཆོས་ཉིད་སྟོང་པར་ཤེས་ནས་ཞི་ཁྲོ་ལོངས་སྤྱོད་རྫོགས་པའི་སྐུ་རང་བཞིན་ཡོངས་གྲུབ་ཆེན་པོའི་བདག་ཉིད་དུ་སངས་རྒྱ་བར་གྱུར་ཅིག །སྲིད་པ་བར་དོ་ལ་ཁ་འཁྱལ་ན་སྨིན་གྲོལ་དང་དམ་ཚིག་གིས་རྒྱུད་སྦྱངས་པ་རྣམས་དག་པ་མཁའ་སྤྱོད་དང་རང་བཞིན་སྤྲུལ་པའི་སྐུའི་ཞིང་དུ་དབུགས་འབྱིན་ཞིང༌། སྐྱེ་བ་སྤྲུལ་པའི་སྐུར་སངས་རྒྱ་ནུས་པར་གྱུར་ཅིག །ལམ་ལ་མ་ཞུགས་པ་མཐའ་དག་རང་སྟོབས་ཀྱིས་དགེ་བའི་རྩ་བ་དང༌། གཞན་སྟོབས་ཀྱིས་རྗེས་འཛིན་སྨོན་ལམ་ལ་བརྟེན་ནས་བསོད་ནམས་མ་ཡིན་པའི་ལས་ཞེ་སྡང་མཚུངས་ལྡན་གྱི་རང་གཟུགས་དམྱལ་བ་ཚ་གྲང་གི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །སེར་སྣ་མཚུངས་ལྡན་གྱི་རང་གཟུགས་ཡི་དྭགས་བཀྲེས་སྐོམ་གྱི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །གཏི་མུག་མཚུངས་ལྡན་གྱི་རང་གཟུགས་དུད་འགྲོ་བཀོལ་སྤྱོད་ཀྱི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །ཕྲག་དོག་མཚུངས་ལྡན་གྱི་རང་གཟུགས་ལྷ་མིན་འཐབ་རྩོད་ཀྱི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །ང་རྒྱལ་མཚུངས་


JLAZ012_Page_0592
[མ་དཔེ་གཟིགས་ན་འདིར་གནོན།]

ལྡན་གྱི་རང་གཟུགས་ལྷ་འཕོ་ལྟུང་གི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །མི་གཡོ་བའི་ལས་དང་སྙོམས་འཇུག་བཞིའི་རང་གཟུགས་བསམ་གཏན་གཟུགས་མེད་ཀྱི་འགྱུར་བའི་སྡུག་བསྔལ་ལས་གྲོལ་ཞིང་ཐར་བར་གྱུར་ཅིག །མདོར་ན་རྟེན་འབྲེལ་ལུགས་འབྱུང་གིས་བསྡུས་པའི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་མྱུར་དུ་ཐར་ནས་རྣམ་པ་ཐམས་ཅད་མཁྱེན་པའི་གོ་འཕང་རིན་པོ་ཆེ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུའང་མཐོ་རིས་ཀྱི་ཡོན་ཏན་བདུན་དང་ལྡན་པའི་རྟེན་ལ་དལ་འབྱོར་གྱི་ཆོས་བཅོ་བརྒྱད་ཚང་བའི་ལུས་རྟེན་ཁྱད་པར་ཅན་ཐོབ་པར་གྱུར་ཅིག །ཁྱད་པར་དུ་གཞོན་ནུ་ཉིད་ནས་ངེས་འབྱུང་གི་སེམས་དང་ལྡན་པས་རྒྱལ་བའི་བསྟན་པ་ལ་འཇུག་ཅིང་ཡང་དག་པའི་དགེ་བའི་བཤེས་གཉེན་གྱིས་ཟིན་པར་གྱུར་ཅིག །དེ་ཡང་མཉེས་པ་གསུམ་གྱིས་ལེགས་པར་བསྟེན་ཅིང་བསྟན་པ་ཡོངས་སུ་རྫོགས་པའི་སྐལ་བ་དང་ལྡན་པར་གྱུར་ཅིག །ཁྱད་པར་དུ་ཐེག་པ་ཆེན་པོའི་སྡེ་སྣོད་གཉིས་ལ་ཐོས་བསམ་སྒོམ་གསུམ་བྱེད་ཅིང་ཉེས་ལྟུང་གི་དྲི་མས་མ་གོས་པར་རྒྱལ་བས་བརྙེས་པའི་སྤངས་རྟོགས་ཀྱི་ཡོན་ཏན་མངོན་དུ་བརྙེས་ནས་རང་དོན་དུ་ཆོས་སྐུ་མངོན་དུ་གྱུར། གཞན་དོན་དུ་གཟུགས་སྐུ་རྣམ་པ་གཉིས་ཀྱི་སྒོ་ནས་འགྲོ་བ་སེམས་ཅན་གྱི་དོན་དཔག་ཏུ་མེད་པ་མཛད་ནུས་པར་


JLAZ012_Page_0593
[མ་དཔེ་གཟིགས་ན་འདིར་གནོན།]

གྱུར་ཅིག །འཁོར་བར་འཁོར་ཚེ་ཤློ་ཀ་གཅིག་དང༌། བྱང་ཆུབ་མ་ཐོབ་བར་དུ་རྟག་པར་སོགས་དང༌། རྒྱལ་བའི་དཀྱིལ་འཁོར་སོགས་དང༌། སངས་རྒྱས་སྐུ་གསུམ་སོགས་བརྗོད་པར་བྱའོ། ། ༈ དུས་མཐར་གདབ་པའི་སྨོན་ལམ་ཞེས་བྱ་བ་བཞུགས། །ན་མོ། དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །སྐྱེ་མེད་ཆོས་ལ་བཟོད་པ་མ་ཐོབ་པར། །ངན་འགྲོའི་གནས་སུ་ནམ་ཡང་མི་ལྟུང་ཞིང༌། །ལྷ་བས་ལྷག་པའི་ལུས་རྟེན་ཐོབ་པར་ཤོག །མཐོ་རིས་ཐོབ་ཀྱང་སྡུག་བསྔལ་རྣམ་གསུམ་གྱིས། །དམ་ལ་མ་བཞག་འཁོར་བ་ཡོད་མིན་ན། །བདེ་འགྲོའི་རྟེན་ལ་མྱ་ངན་འདའ་བའི་གེགས། །མི་ཁོམ་གནས་དང་མཚུངས་ལྡན་ལུས་སྤོང་ཤོག །སྡོམ་མིན་རྒྱུན་ལྡན་རྒྱལ་བློན་སྡིག་ཏོ་ཅན། །གཡུལ་ལས་དགའ་དང་ཞལ་ལྕེ་འཁྱོག་པོར་སྤྱོད། །རྗེ་བོའི་བྲན་གྱུར་ཉམ་ཆུང་མནར་བ་དང༌། །ཚོང་པ་དང་ནི་གཡོ་ཅན་ལུས་སྤོང་ཤོག །དཀོན་མཆོག་དཀོར་འཕྲོག་དགེ་འདུན་ལས་བྱེད་དང༌། །ལྡན་གྲོལ་གཉིས་མེད་དཀོར་ལ་རང་དགར་སྤྱོད། །ལེགས་སྨོན་དོན་གཉེར་ཁྱིམ་པ་སུན་འབྱིན་ཅན། །གཞན་རྒྱུད་བསྲེགས་པའི་དགེ་སྦྱོང་ལུས་སྤོང་ཤོག །རང་བཞིན་ངན་པ་སྦྲུལ་གདུག་ལྟ་བུ་དང༌། །གཞན་འབྱོར་ལ་སྡང་ལྷ་མ་ཡིན་གྱི་སེམས། །སྐྱབས་འོས་བསླུ་ཞིང་ཆོས་ལ་སྡང་བ་དང༌། །བརྐུ་དང་འཕྲོག་འཇོམས་རྔོན་པའི་ལུས་སྤོང་ཤོག །མཚམས་མེད་ལྔའམ་


JLAZ012_Page_0594
[མ་དཔེ་གཟིགས་ན་འདིར་གནོན།]

དེ་དང་ཉེ་བ་ལྔ། །མི་དགེ་བཅུ་ལ་འགྱོད་སེམས་མེད་པར་སྤྱོད། །ནགས་ལ་མེད་སྦར་སྦྲང་ཚང་གཏིབས་པ་སོགས། །ཁ་ན་མ་ཐོ་ཆེ་ལས་ཐར་བར་ཤོག །དེ་ལྟར་ཐར་ནས་ད་ནི་ལྔ་བརྒྱའི་མཐར། །སྐྱེས་བུའི་ལུས་རྟེན་མི་ལུས་རིན་པོ་ཆེ། །རབ་ཏུ་བྱུང་ངམ་ཅིག་ཤོས་ཡང་ནི་རུང༌། །བྱང་ཆུབ་སེམས་དཔའི་རིགས་ཅན་ཐོབ་པར་ཤོག །སྐྱེས་མ་ཐག་ཏུ་ཐེག་པ་ཆེན་པོའི་ལམ། །མ་ནོར་མངོན་སུམ་སྟོན་པའི་བླ་མ་དང༌། །མཇལ་ནས་རྣམ་པ་ཀུན་ཏུ་མཉེས་བྱེད་ཅིང༌། །ཐོས་བསམ་སྒོམ་པའི་ཤེས་རབ་ལྡན་པར་ཤོག །དེ་ཡང་བསམ་པ་བྱང་ཆུབ་སེམས་དང་ལྡན། །སྦྱོར་བ་ཕ་རོལ་ཕྱིན་དྲུག་ལ་གོམས་པས། །ལམ་ལྔ་ས་བཅུ་སྔགས་ཀྱི་སྡེ་སྣོད་ལ། །ཅིག་ཅར་བགྲོད་པའི་སྐལ་བ་མཆོག་ལྡན་ཤོག །ཅེས་པའང་གདུང་བསམ་པ་བྱང་ཆུབ་རྒྱལ་མཚན་གྱིས་བསྐུལ་བ་བཞིན་གནས་དུས་ལ་སྐྱོ་བ་སྣ་ཚོགས་སྐྱེས་པའི་དོན་དང་མཐུན་པར་རྫོགས་ཆེན་པ་རང་བྱུང་རྡོ་རྗེས་སོ།།

རབ་གནས་ཀྱི་རྒྱུད་ལས་གསུངས་པའི་མཆོད་ཕྲེང་།


JLAZ012_Page_0596
[མ་དཔེ་གཟིགས་ན་འདིར་གནོན།]

༈ རབ་གནས་ཀྱི་རྒྱུད་ལས་གསུངས་པའི་མཆོད་ཕྲེང་ཀུན་ཏུ་རྒྱུ། མཆོག་གི་མེ་ཏོག་འདི་དག་ནི། །ཆུ་དང་ཐང་ལས་དེ་བཞིན་སྐྱེས། །མཆོག་དུ་དད་པས་ཁྱེད་ལ་དབུལ། །ཅི་བདེ་བར་ནི་སོ་སོར་བཞེས། །ལྷན་ཅིག་སྐྱེས་དང་སྦྱར་ལས་བྱུང༌། །མཆོག་གི་བདུག་པ་འདི་དག་ནི། །བདག་གིས་དད་པས་འབུལ་ལགས་ཀྱིས། །ཅི་བདེ་བར་ནི་བཞེས་སུ་གསོལ། །ལྷན་ཅིག་སྐྱེད་དང་སྦྱར་ལས་བྱུང༌། །མཆོག་ཏུ་གྱུར་པའི་དྲི་འདི་ནི། །མཆོག་གི་དད་པས་འབུལ་ལགས་ཀྱིས། །ཅི་བདེ་བར་ནི་སོ་སོར་བཞེས། །མུན་པ་འཇོམས་བྱེད་སྣང་བའི་མཆོག །མར་དང་ཏིལ་གྱི་མར་མེ་འདི། །ཡང་དག་ཡེ་ཤེས་སྤྱན་དབྱེ་ཕྱིར། །དད་པས་བདག་གིས་དབུལ་བར་བགྱི། །བཟའ་དང་བཅའ་བ་ཕུན་སུམ་ཚོགས། །ཁ་དོག་དྲི་རོ་རྣམས་དང་ལྡན། །ཐམས་ཅད་ལྡན་པར་ལྷ་ཡི་བཤོས། །བདག་གིས་དབུལ་གྱིས་སོ་སོར་བཞེས། ། ༈ཞར་ལ་རབ་གནས་ཀྱི་ཡན་ལག་བཤད་པ་ནི། དེ་ཡང་སྐུ་གཟུགས་དང་མཆོད་རྟེན་གཙུག་ལག་ཁང་ལ་སོགས་ཆག་གྲུམས་སུ་གྱུར་པ། གསོ་བ་དང༌། རྒྱུ་བཟོ་དམན་པ་རྣམས་བཟང་དུ་བཏང་བ་དང༌། འོ་བརྒྱལ་སར་བཞུགས་པ་རྣམས་གནས་ཕུན་སུམ་ཚོགས་པར་སྤོ་བ་སོགས། མདོར་ན་སྔར་ལས་ལེགས་པ་དང་ཆེ་རུ་བཏང་བ་སོགས་ལ་ཨརྒའི་ཆོ་ག་བྱར་རུང་ཞིང་བྱས་ནས་གསོ་བ་ཡང་གསུངས་པས་དེའི་ལག་ལེན་ནི། ཡི་དམ་


JLAZ012_Page_0597
[མ་དཔེ་གཟིགས་ན་འདིར་གནོན།]

གང་ལ་བརྟེན་པའི་ལྷའི་རྣལ་འབྱོར་བཟླས་པ་དང་བཅས་རྫོགས་པར་བྱ། རྟེན་དེའི་མདུན་དུ་མཆོད་པ་དང་ཆོས་སྐྱོང་གཞི་བདག་སོགས་ལ་གཏོར་མ་རྒྱས་པར་ཕུལ། རང་གི་མདུན་དུ་མེ་ལོང་གཡའ་དག་པ་གཅིག་སྟེགས་ཀྱི་ཁར་བཞག་ལ་རྟེན་དེའི་སྣང་བརྙན་འཆར་དུ་བཅུག་ལ། བདག་གིས་སེམས་ཅན་ཐམས་ཅད་ཀྱི་དོན་དུ་རྟེན་འདིའི་རབ་གནས་སྤོས་ལ་སྐུ་རྒྱུ་ངན་པ་བཟང་པོར་བྱའོ། །སྙམ་པའི་བསམ་པས་རྡོ་དྲིལ་དང་བཅས། ན་མོ། ཕྱོགས་བཅུའི་ཞིང་ཁམས་རབ་འབྱམས་རྒྱ་མཚོ་མཐའ་ཡས་ན། །བཞུགས་པའི་བླ་མ་སངས་རྒྱས་བྱང་ཆུབ་སེམས་དཔའི་ཚོགས། །བདེ་གཤེགས་རྒྱལ་བ་སྲས་བཅས་མ་ལུས་འཁོར་དང་བཅས། །འདུས་པ་རྒྱ་མཚོའི་ཚོགས་རྣམས་བདག་ལ་དགོངས་སུ་གསོལ། །ཁྱེད་རྣམས་མཆོད་ཕྱིར་རབ་ཏུ་གནས་པ་སྤོ་འཚལ་ན། །འདུས་པ་རྒྱ་མཚོའི་ཚོགས་རྣམས་བྱིན་གྱིས་བརླབ་པ་དང༌། །སྣང་བརྙན་ཤར་བ་འདི་ལ་འབྱོན་པར་མཛད་དུ་གསོལ། །ཞེས་ཚར་གསུམ་བརྗོད་རྗེས། རང་གི་ཐུགས་ཀ་ནས་ལྕགས་ཀྱུ་ལྟ་བུའི་འོད་ཟེར་འཕྲོས་པས་རྟེན་གྱི་ཡེ་ཤེས་པ་ཡི་གེ་གསུམ་གྱི་རྣམ་པར་སྤྱན་དྲངས་ནས་མེ་ལོང་ནང་གི་སྣང་བརྙན་ལ་གཉིས་སུ་མེད་པར་བཞུགས་ཤིང༌། ཛཿཧཱུྃ་བཾ་ཧོཿ ཞེས་ཕྱག་རྒྱ་བཞིས་བཅིངས། ཡི་གེ་བརྒྱ་པ་དང་སུ་པྲ་ཏིཥྛས་བརྟན་པར་བྱ། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཤིས་པ་བརྗོད་ཅིང་མེ་ཏོག་གཏོར། དེ་ནས་མེ་ལོང་དབུ་


JLAZ012_Page_0598
[མ་དཔེ་གཟིགས་ན་འདིར་གནོན།]

ཞབས་མ་ལོག་པ་བྱས་ལ་དར་དམར་སེར་ཇི་ལྟར་རིགས་པས་གཡོགས། རྒྱབ་ཏུ་རྒྱས་བཏབ། བཀུར་སྟི་དང་བཅས་མཆོད་གྲལ་དུ་བཞུགས་གསོལ་བྱ། རྟེན་གསར་པ་བཞེངས་གྲུབ་ནས་རབ་གནས་དངོས་གཞིའི་ཚེ་མེ་ལོང་རྟེན་དྲུང་དུ་སྤྱན་དྲངས་ཁེབས་བསལ། ཡེ་ཤེས་པ་དགུག་གཞུག་རན་པ་ན་སྔར་ལྟར་འོད་ཟེར་སྤྲོ་བསྡུ་དང་ཚད་མེད་བཞིའི་སྔགས་རྒྱས་རྟེན་གསར་པའི་དམ་ཚིག་པ་དང་དབྱེར་མེད་དུ་བསྲེ་ཞིང༌། དེ་རྗེས་སྤྱན་འདྲེན་ལ་སོགས་རབ་གནས་ཀྱི་དཀྱུས་བཞིན་བྱས་པས་འགྲུབ་བོ། །སྐུ་རྒྱུ་རྙིང་པ་ནི་གསར་པ་ལ་ཅི་འདྲེས་དང༌། རྒྱུ་ཐ་དད་དུ་གྱུར་པ་དག་ཕལ་པ་དང་མ་འདྲེས་པར་བྱས་ལ་མཆོད་རྟེན་དང་སཙྪ་ལྟ་བུ་བཞེངས་ནས་རབ་གནས་བྱའོ།། །།


JLAZ012_Page_0599
[མ་དཔེ་གཟིགས་ན་འདིར་གནོན།]

ཤོག་ཏོང་།

རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ།


JLAZ012_Page_0600
[མ་དཔེ་གཟིགས་ན་འདིར་གནོན།]

རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ་བཞུགས། །


JLAZ012_Page_0601
[མ་དཔེ་གཟིགས་ན་འདིར་གནོན།]

རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ། དཀོན་མཆོག་བཞི་པ་བླ་མ་སངས་རྒྱས་ལ་ཕྱག་འཚལ་ལོ། །ཤིན་ཏུ་དག་པ་གདོད་མའི་ཡེ་ཤེས་ཀྱི། །གཟུགས་བརྙན་སྤྲུལ་པ་ཕྱག་རྒྱ་བཞི་ཡི་གྲོང༌། །གཅིག་ཆར་འཇུག་པ་བདེ་ཆེན་རྡོ་རྗེའི་དངོས། །ཁྱད་ཆོས་བདུན་དང་ལྡན་པ་དེ་ལ་འདུད། །འདིར་གང་བཤད་བྱའི་གཞི་སྐུ་གསུང་ཐུགས་ཀྱི་རྟེན་རབ་གནས་ཀྱི་ཆོ་ག་ནི། ཧེ་རུ་ཀ་གལ་པོར། སྐུ་གསུང་ཐུགས་ཀྱི་རྟེན་རྣམས་ལ། །ཡེ་ཤེས་གཞུག་པ་བྱིན་རླབས་ཅན། །འཁོར་བ་འབྱུང་བ་ལྔ་ཡི་གནས། །སྐུ་དང་གསུང་དང་ཐུགས་ཉིད་ཡིན། །ཞེས་བླ་ན་མེད་པའི་རྒྱུད་སྡེ་རིན་པོ་ཆེ་ནས་ཤིན་ཏུ་གཅེས་པར་བསྟན་ཅིང༌། དེ་ཉིད་ཀྱང་ཆོ་ག་རྣམ་དག་ལ་བརྟེན་དགོས་པའི་ཚུལ། རྒྱུད་ལས། ཆོ་ག་དམན་པས་མི་བྱ་སྟེ། །རབ་གནས་རྟག་པར་བཀྲ་མི་ཤིས། །འཇིག་རྟེན་འདིར་ཡང་སྡུག་བསྔལ་ལ། །འཇིག་རྟེན་ཕ་རོལ་འཇིགས་པ་ཆེ། །


JLAZ012_Page_0602
[མ་དཔེ་གཟིགས་ན་འདིར་གནོན།]

ཞེས་དང༌། དེ་བས་འབད་པ་ཐམས་ཅད་ཀྱི། །དངོས་གྲུབ་འདོད་པས་ནན་ཏན་བྱ། །ཞེས་གསུངས་པས་དེ་ཉིད་བཅུའམ། རང་བཞིན་བརྒྱད་ལྡན་གྱི་རྡོ་རྗེའི་སློབ་དཔོན་དག་གིས་བསྙེན་པ་ཞལ་གསོ་དང་བཅས་ཉི་མ་བྱང་བགྲོད་ཀྱི་དུས་ཚེས་དགེ་བ་ལ་བརྩམ་མོ། །གཉིས་པ་བཤད་བྱ་ཇི་ལྟར་བྱ་བའི་ཆོ་ག་དངོས་ལ་གསུམ། སྦྱོར་བ། དངོས་གཞི། རྗེས་ཀྱི་རིམ་པའོ། །དང་པོ་ལ་གཉིས། ཐོག་མར་དཀྱིལ་འཁོར་གྱི་བྱ་བ་ནི་ཚོན་དཀྱིལ་གཉིས་གང་ལ་བརྟེན་ཡང་ས་ཆོག་ནས་བཟུང་རྡུལ་ཚོན་ལ་བྲི་ཐིག་ལ་སོགས་པ་དང་ཐུན་མོང་དུ་བུམ་ལྷའི་སྟ་གོན་སོགས་རང་རང་གི་སྒོས་ཆོས་འབྱིན་འཇུག་དཀྱིལ་འཁོར་གྱི་ལས་རིམ་གང་ལ་བརྟེན་པ་བཞིན་ཤེས་པར་བྱས་ནས་རྒྱན་དགྲམ་དང་དབང་རྫས་མཆོད་གཏོར་ལ་སོགས་འདུ་བྱའོ། །གཉིས་པ་རབ་གནས་ཀྱི་ཡོ་བྱད་ནི། རྟེན་གྱི་མདུན་ལ་སོགས་སྐབས་ཕྱེད་པར་མངའ་དབུལ་གྱི་མཎྜལ་རི་རབ་གླིང་བཞིའི་བཀོད་པ་ཅན་གྱི་


JLAZ012_Page_0603
[མ་དཔེ་གཟིགས་ན་འདིར་གནོན།]

དབུས་སུ་དཀར་གསུམ་མངར་གསུམ་གཙོ་བོར་གྱུར་པའི་ཙཱ་རུའི་བཟའ་བ་དཔལ་བཤོས་ཀྱི་དབྱིབས་ཅན་ཁ་ཟས་བཟང་པོས་བསྐོར་བ་དང༌། དཀྱིལ་འཁོར་གྱི་མདུན་ནམ་གཡས་ལོགས་སོགས་སྐབས་བཙལ་ནས་ཁྲུས་སྟེགས་གྲུ་བཞི་པ་དྲི་དང་བ་བྱུང་གིས་ཆག་ཆག་བཏབ་པའི་སྟེང་པདྨ་འདབ་བརྒྱད་སྤྲོ་ན་བཀྲ་ཤིས་རྫས་བརྒྱད་བྲིས་པ་དར་དཀར་པོས་གཡོགས། སྟེང་དུ་རྟེན་རྙིང་པ་བྱིན་ཅན་ཞིག་དང་སརྦ་བིདྱཱ་སྭཱ་ཧཱ་ཞེས་བྲིས་པའང་བཞུགས་སུ་གསོལ་ལོ། །རེ་ཁཱ་ཅན་གྱི་དབུས་སུ་མཉྫི་ལ་ཁྲུས་གཞོང་མེ་ལོང་དང་བཅས་པ་བཞག །འདབ་མ་བརྒྱད་ལ་ཁྲུས་བུམ་བརྒྱད་བཀོད་པའི་ཤར་ནས་བརྩམས་ཏེ་དྲི་ལྔ། མངར་གསུམ། ཞོ་གསར། ཤིང་འབྲས། འབྲུ་ལྔ། འབྲས་ཡོས། སྨན་ལྔ། རིན་པོ་ཆེ་ལྔ་སོ་སོར་བླུགས་པའམ། མ་འབྱོར་ན་བུམ་པ་ལྔའམ་གཅིག །ཐམས་ཅད་ལ་རྫས་ཉེར་ལྔ་ཁོ་ནས་ཀྱང་རུང༌། ཁ་ཚར་མ་ཉམས་པའི་རས་དྲི་མེད་ལ་དྲིའི་ཐིག་ལེ་ལྔ་བྱས་པའི་སྐུ་ཕྱིས། གོས་ཟུང་དང་རྒྱན་ཆའི་རིགས། རིན་པོ་ཆེ་དང་འཁར་བ་ལ་སོགས་པའི་སྣོད་དུ་ཁྲུས་ཆལ་སྡེ་ཚན་བཞིའི་དང་པོ་ལ་ཆོ་ག་དང་དག་པས་སྦྱར་བའི་འབྱུང་ལྔ། གཉིས་པ་ལ་ཞོ། འོ་མ། མར། ཀ་ར། སྦྲང་རྩི་སྟེ་ཕྱིའི་བདུད་རྩི་ལྔ། གསུམ་པ་ལ་དྲི་བཟང་དང་ཉེ་ཤིང་ཤུ་ཏི། བཞི་པ་ལ་སྐྱུ་རུ་ར་དང་ཡུང་བའི་ཕྱེ་མ་རྣམས་བླུག །སིལླ་སོགས་དྲི་ཞིམ་པོས་བགོས་པའི་ཏིལ་མར་རམ་འབྲུ་མར་གྱིས་བསྐུ་མཉེ། དྲིལ་ཕྱིའི་རྫས་ཤིང་ཤུན་ལྔ་ནི་སངས་རྒྱས་ཐོད་པར། ཨ་ཤཱཏྠ་དང་ནྱ་གྲོ་དྷ། ། ཨུ་དུམ་ཝཱ་ར་བརྐ་ཏི། །པ་ལ་ཤ་སྟེ་ཤིང་ལྔ་ལས། །ཞེས་བཤད་ཀྱང་ཇི་བཞིན་མི་རྙེད་པས། ཙན་དན་དཀར་དམར་ལ་འོ་མ་ཅན་གྱི་ཤིང་ཤུན་རུང་མཐུན་བསྲེས་པའི་ཕྱེ་མ། དུང་ཞལ་དུ་ཙན་


JLAZ012_Page_0604
[མ་དཔེ་གཟིགས་ན་འདིར་གནོན།]

དན་དཀར་པོ། གུར་ཀུམ། ཨ་ཀ་རུ། གླ་རྩི། ག་བུར་ཏེ་དྲི་ལྔའི་བྱུག་པ་སོ་སོར་དུར་ཝ་ཕོན་པོར་བྱས་པའི་པིར་དང་བཅས་གོ་རིམ་མ་འཆོལ་བར་བཞག་པའི་མཐར་མཆོད་པས་བསྐོར། སྟེང་ནས་གདུགས་དབུབ། ཅི་བདེ་བར་རིན་པོ་ཆེའི་སྣོད་མེ་ཏོག་དཀར་པོས་བཀང་བའི་དབུས་སུ་གཟུངས་བུམ་དྲིའི་ཆུས་སུམ་གཉིས་གང་བའི་སྟེང་མེ་ལོང་ལ་ཙན་དན་དཀར་པོ། གི་ཝཾ། གུར་ཀུམ། ཨ་རུ་ར་རྣམས་འོ་མར་སྦྱར་བས་རྟེན་འབྲེལ་སྙིང་པོ་ཚར་བདུན་བྲིས་པ་དང༌། དྲི་ཆུས་གང་བའི་དུང་ཞལ་ཡང་བསྡོགས། གཞན་ཡང་སྤྱོད་ཆས། དབང་པོ་གསལ་བྱེད་ཀྱི་མིག་ཐུར་སོགས་ལྔ། གུ་གུལ། ཡུངས་དཀར། རོལ་མོའི་བྱེ་བྲག་སོགས་འོག་ནས་འབྱུང་བ་ཐམས་ཅད་མ་ཚང་བ་མེད་པར་འདུ་བྱའོ། ། གཉིས་པ་ཆོ་ག་ལ། སྟ་གོན་དང་དངོས་གཞི་གཉིས་ལས། དང་པོ་སྟ་གོན་ལའང་ནང་གསེས་བཅུ་གསུམ་ལས། དང་པོ་དཀྱིལ་འཁོར་སྒྲུབ་མཆོད་ནི། མདོ་སྒྱུ་སེམས་གསུམ། ཞི་ཁྲོ་བཀའ་བརྒྱད། ཡང་ཕུར་ལ་སོགས་སྔ་འགྱུར་གྱི་རྒྱུད་སྡེ་ཆེན་པོ་གང་ལ་བརྟེན་པ་དེ་ཉིད་ཀྱི་སྒྲུབ་ཐབས་དཀྱིལ་ཆོག་བཞིན་ནོ། །བཟླས་པའི་མཇུག་ཏུ་རྣམ་བུམ་དུ་དཀྱིལ་འཁོར་གྱི་ལྷ་ཚོགས་དམིགས་ཕྱེད་པར་གསལ་བཏབ་ནས་གཟུངས་ཐག་ལ་འཇུས་ཏེ། རྩ་སྔགས་ཀྱི་ཤམ་བུར་དབྱངས་གསལ་དང་སུ་པྲ་ཏིཥྛ་སྦྲེལ་བ་བཟླ་ཞིངཿ ལྷ་ཚོགས་རྣམས་ཀྱི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་མཐར་མཆོད་བསྟོད་དང༌། ལྷ་ཚོགས་རྣམས་བདེ་སྟོང་ཆེན་པོའི་ངོ་བོར་ཞུ་བ་བུམ་ཆུ་དང་རོ་གཅིག་ཏུ་གྱུར། ཞེས་འོད་ཞུ་བྱ། ཞར་ལ་ལས་བུམ་སྒྲུབ་པ་ནི། ལས་


JLAZ012_Page_0605
[མ་དཔེ་གཟིགས་ན་འདིར་གནོན།]

ཐམས་ཅད་པའི་བུམ་པར་པད་ཉིའི་གདན་ལ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཞལ་གཅིག་ཕྱག་གཉིས་གཡས་རྡོ་རྗེའི་དབྱུག་པ་དང༌། གཡོན་སྡིགས་མཛུབ་མཛད་པ་ཁྲོ་བོའི་རྒྱན་དང་ཆ་ལུགས་རྫོགས་པར་གསལ་བར་གྱུར། ཨོཾ་བཛྲ་ས་མཱ་ཛཿ ཡེ་ཤེས་པ་བྱོན། ཛ་ཧཱུྃ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་ཨ་མྲྀ་ཏ་ཀུཎྜ་ལི་སོགས་ཇི་ལྟར་རིགས་པར་བཟླས་རྗེས་མཆོད་ཅིང་བསྟོད་ལ། བཛྲ་མུས་ཡེ་ཤེས་པ་གཤེགས། དམ་ཚིག་པ་འོད་དུ་ཞུ་བ་ཁྲོ་བོའི་རྡུལ་ཕྲ་རབ་ཏུ་གྱུར་པར་བསམ། གཉིས་པ་གཟུངས་ཁྲུས་ཀྱི་བུམ་པ་བསྒྲུབ་པ་ནི། གཟུངས་བུམ་ཐོག་མར་བསྒྲུབ་པ་གལ་པོའི་དགོངས་པ་ཡིན་ཡང་བུམ་པའི་བསྐྱེད་ཆོག་ཆོ་ག་གཅིག་གིས་འགྲུབ་སྟེ། སྭ་བྷ་ཝས་སྦྱངས། སྟོང་པའི་ངང་ལས་མེ་ཏོག་ལ་གནས་པའི་གཟུངས་བུམ་དང༌། འདབ་མ་བརྒྱད་ལ་གནས་པའི་ཁྲུས་བུམ་རྣམས་བྷྲཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་ཞིང་མཆུ་འཕྱང་བ། ལྷའི་གོས་པཉྩ་ལི་ཀའི་མགུལ་ཆིངས་དང༌། དཔག་བསམ་ཤིང་གིས་ཁ་རྒྱན་ཅན་ཤ་སྟག་གི་གཟུངས་བུམ་ནང་དུ་ཟླ་བ་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་འོད་དང་ཟེར་དུ་འབར་བས་འཁོར་འདས་ཀྱི་དངོས་བཅུད་བསྡུ་བ་དང༌། ཁྲུས་བུམ་རྣམས་སུའང་ཟླ་བའི་སྟེང་ན་རང་རང་གི་སྔགས་རྣམས་འོད་ཟེར་འཕྲོ་ཞིང༌།


JLAZ012_Page_0606
[མ་དཔེ་གཟིགས་ན་འདིར་གནོན།]

དྲི་མ་སྦྱོང་བའི་མཐུ་ལྡན་གྱི་བདུད་རྩིའི་རྒྱུན་བབས་པས་བུམ་པ་གང་བར་གྱུར་པར་བསམ་ཞིང་སོ་སོའི་གཟུངས་ཐག་སྤོ་བཞིན་པར། ཐོག་མར་གཟུངས་བུམ་ལ་དམིགས། རྟེན་འབྲེལ་སྙིང་པོ་ཅི་ནུས་བཟླས་མཐར་དུང་ཞལ་གྱི་ཆུས་མེ་ལོང་གི་ཡི་གེ་རྣམས་གཟུངས་བུམ་དུ་སྦྱངས་ནས་གཙོ་ལས་ཁྲུས་བུམ་མེ་ཏོག་ཐམས་ཅད་ལ་ཅུང་ཟད་རེ་བྲན། དེ་ནས་ཁྲུས་བུམ་དང་པོར་དམིགས་ནས་ཨོཾ་སརྦ་ཏ་ཐཱ་ག་ཏ་གྷནྡྷེ་སྣཱ་ན་པཱུ་ཛ་མེ་ག་ས་མུ་དྲ་སྥ་ར་ཎ་ས་མ་ཡ་ཤྲཱི་ཧཱུྃ། དེ་བཞིན་དུ་གཉིས་པར། ཐོག་མཐའ་འདྲ་བ་ལ་གནྡྷེའི་གནས་སུ། ཏྲི་མ་དྷུ་སྣཱ་ན། གསུམ་པར་ད་དྷི། བཞི་པར་ཕ་ལ། ལྔ་པར་པྲཱུ་ཏི། དྲུག་པར་ལཱཛྫ། བདུན་པར་ཨེ་ཥ་དྷི། བརྒྱད་པར་མ་ཎི་ཞེས་སྦྱར་ལ། ཚར་བདུན་རེ་ཙམ་དང༌། སྤྱིར་ཁྲུས་སྔགས་ཨ་བྷི་ཥེ་ཀ་དང༌། སྤྱན་མའི་སྔགས། ཨོཾ་རུ་རུ་སྥུ་རུ་ཛཱ་ལ་ཏིཥྛ་སིད་དྷི་ལོ་ཙ་ན་སརྦ་ཨརྠསྭཱ་དྷ་ནི་སྭ་ཧཱ། ཞེས་ཅི་ནུས་རེ་བཟླ། བུམ་རྫས་སོ་སོར་མ་ཕྱེ་ཞིང༌། བུམ་པ་གྲངས་གསལ་མ་འཛོམས་ན་ཁྲུས་སྔགས་ཀྱིས་ཆོག །ཞར་བྱུང་དུ་སྤྱོད་པའི་རྫས་གུ་གུལ་དང༌། ཡུངས་ཐུན་ལ་ཨོཾ་ཨཱ་བིགྣཾ་ཏ་ཀྲི་ཏ་ཧཱུྃ་ཕཊ་དང༌། ཧཱུྃ་བཞི་པ། ཁྲུས་ཀྱི་རྗེས་སུ་དུག་པའི་སྤོས་མར་ལ་བདུད་རྩི་འཁྱིལ་བའི་སྔགས་དང་ཧཱུྃ་བཟླ་བས་བརླབ་བོ། །གསུམ་པ་བདག་མཇུག་ནི། དབང་དོན་གྱིས་གསལ་བ་བཞིན་ནོ། །བཞི་པ་སྦྱོང་བ་ལ་གསུམ་གྱི་དང་པོ་གེགས་སྦྱོང་བ་ནི་ཞི་བས་སྦྱོང་བ་གཏོར་མ་གསུམ་རེ་རེ་ནས་རྟེན་ལ་བསྐོར་ཚུལ་གྱིས། ཨོཾ་སརྦ་བིགྷྣཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཏཏྑཾ་ཨུདྒ་ཏེ་


JLAZ012_Page_0607
[མ་དཔེ་གཟིགས་ན་འདིར་གནོན།]

སྥ་ར་ཎ་ཧི་མཾ་ག་ག་ན་ཁཾ་གྲིཧྞ་ཨེ་དཾ་བྷ་ལིཾ་ཏ་སྭཱ་ཧཱ། ལན་གསུམ་གྱིས་བཟེད་ཞལ་དུ་དོར། ཕྱེད་མས་སྦྱོང་བ་རྫས་ཞི་བ་ཏིང་ལོ་དང་ཆང་བུས་སྔར་ལྟར་བསྐོར་ཞིང༌། སྔགས་དྲག་པོ། སུཾ་བྷ་ནི་གསུམ་གྱིས་བཟེད་ཞལ་དུ་དོར། དྲག་པོས་སྦྱོང་བ་ནི། ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊཿ ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ར་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་འབར་བའི་ནང་དུ་རང་ཉིད་སྐད་ཅིག་གིས་ཁྲོ་བོའི་རྒྱལ་པོ་རྟ་མཆོག་རོལ་པ་འཇིགས་སུ་རུང་བའི་སྐུར་གྱུར་པའི་གནས་གསུམ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་བགེགས་ཀྱི་དགྲ་བོ་ཁྲོ་བོའི་སྤྲིན་རབ་འབྱམས་བཛྲ་ས་མཱ་ཛཿ ཧཱུྃ། ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེགས། །ཞེ་སྡང་གཤིན་རྗེའི་འཇིག་རྟེན་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྟེང་གི་ནམ་མཁར་ཁྲོ་བོ་དབང་ཆེན་དཔག་ཏུ་མེད་པ་བྱོན། །ཨོཾ་བཛྲ་ཀྲོ་ཏས་པཱ་རི་ཝཱ་ར་ཨརྒྷཾ་སོགས་ཀྱིས་མཆོད། ཧཱུྃ། འཇིགས་པའི་ཧཱུྃ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་


JLAZ012_Page_0608
[མ་དཔེ་གཟིགས་ན་འདིར་གནོན།]

ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང༌། གསང་སྔགས་དང༌། རིག་སྔགས་དང༌། གཟུངས་སྔགས་དང༌། སྙིང་པོ་དང༌། ཕྱག་རྒྱ་དང༌། ཏིང་ངེ་འཛིན་གྱི་བདེན་པ་དང༌། ཆོས་ཉིད་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་བདེན་པ་ཆེན་པོའི་བྱིན་རླབས་ཀྱིས། རྡོ་རྗེ་འཛིན་པ་བདག་གིས་སེམས་རྣམ་པ་གཉིས་བསྐྱེད་ནས་གནས་སྐབས་སུ་འཇིག་རྟེན་གྱི་ཁམས་ལ་ཕན་པ་རྒྱ་ཆེན་པོ་བསྒྲུབ་པ་དང༌། མཐར་ཐུག་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་འབྲས་བུ་ཐོབ་པར་བྱ་བའི་ཆེད་དུ། བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་རབ་ཏུ་གནས་པར་བགྱི་བ་ལ་བར་དུ་གཅོད་ཅིང༌། གླགས་བལྟ་བའི་འབྱུང་པོ་གཏུམ་པོ་གཟུ་ལུམས་ཅན་གང་དུ་ཡང་རུང་བ་དང་གཡོག་དང་འཁོར་དུ་བཅས་པ་ཐམས་ཅད་འདི་རུ་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་སངས་རྒྱས་རྣམས་ཀྱི་མངོན་སྤྱོད་ཀྱི་ཕྲིན་ལས་ཁྲོ་བོ་འཆོལ་བའི་ཚོགས་དང༌། རྡོ་རྗེ་མེའི་མཚོན་ཆས་ཁྱོད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཧཱུྃ་བཞིའི་སྔགས་དང་བཅས་ཡུངས་ཐུན་གྱིས་བྲབ། གུ་གུལ་དང་བདུད་རྩི་ལྔ་བདུག །རོལ་མོའི་ཚམ་རྔམས་དང་བཅས་ཕྱི་རོལ་ཏུ་བསྐྲད།


JLAZ012_Page_0609
[མ་དཔེ་གཟིགས་ན་འདིར་གནོན།]

གཉིས་པ་བྱུར་དང་སྐལ་ངན་སྦྱོང་བ་ནི། འབྲས་ཆན་ནམ་གྲོ་ཟན་གྱིས་རྟེན་ལ་དྲིལ་ཕྱིས་བྱས་པའི་ཆང་བུས་ཀྱང་བསྐོར་ཞིང༌། ལས་སྔགས་བཟླ་བཞིན་པས་བཟེད་ཞལ་དུ་དོར། དེ་ནས་ལག་གཉིས་ཀས་ཡུངས་ཀར་བཟུང་བ་ཧཱུྃ་བཟླ་བས་གཡོན་དུ་བསྐོར་ཞིང༌། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། ཞེས་མེར་སྲེག་ཅིང་ཆུ་ནང་དུ་དོར། དེ་བཞིན་དུ་ཆུ་སྣོད་བཟུང་བ་ཨོཾ་བཟླ་ཞིང་གཡས་སུ་བསྐོར་ནས་སརྦ་པཱ་པཾ་གྱིས་མེ་ཆུར་བླུགས། མེ་ཆུ་གཉིས་ཀྱང་སྔ་མའི་བཟེད་ཞལ་ལ་བླུགས་ཏེ། དཀོན་མཆོག་གསུམ་གྱི་བདེན་པས་རབ་ཏུ་གནས་བྱའི་རྟེན་དང་བདག་ཅག་དཔོན་སློབ་ཡོན་མཆོད་རྣམས་ལ་མི་ཤིས་པར་བྱེད་པའི་བྱུར་དང་སྐལ་བ་ངན་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་རོལ་མོ་དང་བཅས་ཕྱིར་དོར། གསུམ་པ་སྡིག་པ་སྦྱོང་བ་ནི། བདག་དང་སྦྱིན་པའི་བདག་པོ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་རང་རང་གི་སྙིང་གར་ཀཾ་ནག་པོའི་རྣམ་པར་གྱུར་པ་ལྟེ་བའི་ཡེ་ཤེས་ཀྱི་མེས་དེད་སྣ་སྒོར་སྡིག་པ་རྭ་ཅན་གྱི་རྣམ་པས་ཐོན་ནས་ཏིལ་ལ་ཐིམ་པ་དེ་ཉིད་གཡས་སུ་ཡེ་ཤེས་ཀྱི་མེས་བསྲེགས། གཡོན་དུ་ཆོས་ཉིད་ཀྱི་རྒྱ་མཚོར་དོར་བར་བསམ་ལ། ཨོཾ་སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱ་ཧཱ། ཞེས་ལན་གྲངས་ཅི་རིགས་པས་མེ་ཆུར་དོར། བདག་དང་སྦྱིན་པའི་བདག་པོས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཤཱནྟིཾ་ཀུ་རུ་སྭཱ་ཧཱ། ཞེས་མེ་ཡང་ཆུ་ནང་དུ་བླུགས་ནས་ཕྱིར་དོར་རོ། །ལྔ་པ་རྟེན་དང་བཟོ་བོ་ལ་སོགས་པའི་དག་


JLAZ012_Page_0610
[མ་དཔེ་གཟིགས་ན་འདིར་གནོན།]

བྱ་དག་བྱེད་ཁྲུས་ཀྱི་བྱ་བ་ནི། རྟེན་དངོས་སུ་བཀྲུ་བར་འོས་པ་རྣམས་དྲི་དང་སུག་བུལ་གྱི་འདག་ཆལ་དང་བཅས་བཀྲུ། འོག་ནས་འབྱུང་བའི་བསྐུ་མཉེ་དང་དྲིལ་ཕྱིས་ཀྱང་བྱ། ཕལ་ཆེར་མེ་ལོང་དུ་གཟུགས་བརྙན་བཀྲུ་བ་ལས་ཁྲུས་ཆལ་ཚར་བཞི། བསྐུ་མཉེ། དྲིལ་ཕྱིས། མེ་ལོང༌། ཁྲུས་བུམ། ཁྲུས་རས། སྤོས་མར། དྲི་ལྔའི་བྱུག་པ་རྣམས་བསྡོགས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་ལ་ཡོ་བྱད་ཐམས་ཅད་དང་ལྡན་པའི་ཁྲུས་འདི་གསོལ་བར་བགྱིའོ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་ལྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དེ་བཞིན་གཤེགས་དང་དེ་ཡི་སྲས་རྣམས་ལ།།རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཞེས་ཕྱེད་རོལ་དང་བཅས་སྙན་གསན་བྱས་ལ། སློབ་དཔོན་གྱིས་ཁྲུས་ཆལ་དང་པོ་འབྱུང་ལྔ་དཱུར་ཝའི་པིར་གྱིས་ཨ་མྲྀ་ཏའི་ལས་སྔགས་བཟླ་བཞིན་དུ་མེ་ལོང་ལ་བྱུག །ཨོཾ་ཧཱུྃ་ཏྲཱཾ་ཧྲཱིཿཨཱཿ ཞེས་འབྲུ་མར་གྱིས་བསྐུ་མཉེ་བྱ། སྣུམ་


JLAZ012_Page_0611
[མ་དཔེ་གཟིགས་ན་འདིར་གནོན།]

བསལ་བའི་ཕྱིར་ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ནེ་སྭཱཧཱ། ཞེས་ཤིང་ཤུན་ལྔའི་ཕྱེ་མས་དྲིལ་ཕྱིས་བྱ། བུམ་པ་དང་པོར། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཁྲུས་རས་ཀྱིས་ཕྱི་ཞིང༌། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཏྲཱཾ་ཧྲཱིཿཨཱཿཀཱ་ཡ་བི་ཤྭ་དྷ་ནེ་སྭཱ་ཧཱ། ཁྲུས་དང་པོ་དྲིའི་བུམ་པ་འདི་མདུན་དུ་བཟུང་ལ་འོག་མ་འོག་མ་རྣམས་ནས་ཐིགས་པ་རེ་བླུགས་སོ། །ཡང་ཁྲུས་ཆལ་སྔ་མ་ལྡབ་ལ་བསྐུ་མཉེ་དང་དྲིལ་ཕྱིས། རང་སྔགས་བཅས་ལ་འགྲེ། བུམ་པ་གཉིས་པས། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་གཉིས་པ་ཕྱིའི་བདུད་རྩི་ལྔ་བྱུག་ཅིང་བསྐུ་མཉེ། དྲིལ་ཕྱི་འགྲེ། བུམ་པ་གསུམ་པས། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང༌། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་ལྡབ་ཅིང༌། བསྐུ་མཉེ་དང༌། དྲིལ་ཕྱི་འགྲེ། བུམ་པ་བཞི་པས། འདི་ནི་ཚུལ་ཁྲིམས་རང་བཞིན་ཆུ། །


JLAZ012_Page_0612
[མ་དཔེ་གཟིགས་ན་འདིར་གནོན།]

ཁྲིམས་འཆལ་དྲི་མ་སྦྱོང་མཛད་ཅིང༌། །ཚུལ་ཁྲིམས་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་གསུམ་པ་དྲི་བཟང་དང་ཉེ་ཤིང་བྱུག་ཅིང༌། བསྐུ་མཉེ་དང༌། དྲིལ་ཕྱི་འགྲེ། བུམ་པ་ལྔ་པས། འདི་ནི་བཟོད་པའི་རང་བཞིན་ཆུ། །ཁོང་ཁྲོའི་དྲི་མ་སྦྱོང་མཛད་ཅིང༌། །བཟོད་པ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང་། དེ་དག་སྐུ་ལ་སོགས། ཁྲུས་ཆལ་ལྔས། བསྐུ་མཉེ། དྲིལ་ཕྱི་འགྲེ། བུམ་པ་དྲུག་པས། འདི་ནི་བརྩོན་འགྲུས་རང་བཞིན་ཆུ། །ལེ་ལོའི་དྲི་མ་སྦྱོང་མཛད་ཅིང༌། །བརྩོན་འགྲུས་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་བཞི་པ་སྐྱུ་རུ་ར་སོགས་བྱུག་ཅིང༌། བསྐུ་མཉེ། དྲིལ་ཕྱི་འགྲེ། བུམ་པ་བདུན་པས། འདི་ནི་བསམ་གཏན་རང་བཞིན་ཆུ། །རྣམ་གཡེང་དྲི་མ་སྦྱོང་མཛད་ཅིང༌། །བསམ་གཏན་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང་དེ་དག་སྐུ་ལ་སོགས། ཁྲུས་ཆལ་ལྡབ་ཅིང༌། བསྐུ་མཉེ། དྲིལ་ཕྱི་འགྲེ། བུམ་པ་བརྒྱད་པས། འདི་ནི་ཤེས་རབ་རང་བཞིན་ཆུ། །ཤེས་འཆལ་དྲི་མ་སྦྱོང་མཛད་ཅིང༌། །


JLAZ012_Page_0613
[མ་དཔེ་གཟིགས་ན་འདིར་གནོན།]

ཤེས་རབ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཡུལ་དུས་ཀྱིས་མ་ལྕོགས་ན་ཁྲུས་ཆལ་རྣམས་གཅིག་ཏུ་བསྡུས་པས་ཀྱང་རུང་ངོ༌། །སྔར་མདུན་དུ་བཟུང་བའི་བུམ་པ་བརྒྱད་ཀའི་ཆུ་གཅིག་ཏུ་བྱས་པས་བཀྲུ་ཞིང༌། སྐུ་མཆོག་རྣམ་དག་བལྟ་བས་མི་ངོམ་ལ། །ངོ་མཚར་སྐྱོན་བྲལ་མཁའ་དབྱིངས་ཉི་གསལ་འདྲ། །ཆོས་ཀྱི་སྐུ་ལ་བགྲེས་པ་མི་མངའ་ཡང༌། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །ཆུ་གཙང་སྨན་སྤོས་འོ་མ་འདག་ཆལ་ཆུས། །འགྲོ་བའི་ལུས་སེམས་སྡུག་བསྔལ་ནད་བསལ་ཏེ། །ཉེས་པའི་སྐྱོན་བྲལ་འགྲོ་བའི་ཡིད་འོང་བ། །དམ་པའི་སྐུ་མཆོག་བདག་གིས་ཐོབ་པར་ཤོག །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཙན་དན་སོགས་དྲི་ལྔ་དུང་ཞལ་དུ་གནས་པས་ཉེ་རེག་དང་ཐུགས་ཀར་བྱུགས་ལ། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱང་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཨོཾ་བཛྲ་གྷནྡྷེ་སྭཱ་ཧཱ། ན་བཟའ་དང་རྒྱན་འབུལ་ཞིང༌། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང༌། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཨོཾ་བཛྲ་ཝསྟྲ་ཡེ་པྲ་


JLAZ012_Page_0614
[མ་དཔེ་གཟིགས་ན་འདིར་གནོན།]

ཏིཙྪ་སྭཱཧཱ། སྤོས་མར་གྱིས་བདུག །རྗེས་འབྲེལ་དུ་བཀྲ་ཤིས་ཀྱི་གླུ་གར་བྱ་བ་ནི། མེ་ཏོག་འཐོར་ཞིང་རོལ་མོའི་སྒྲ་སྣ་ཚོགས་དང་དབྱངས་སྙན་པོས། ༈ སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །རྐང་གཉིས་གཙོ་བོ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །ཞི་བ་ཆགས་བྲལ་ལྷ་མིའི་མཆོད་འོས་པ། །ཆོས་ལ་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅན་དེང་འདིར་བདེ་གྱུར་ཅིག །ཚོགས་ཀྱི་མཆོག་རབ་ལྷ་མིའི་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །དྲུག་པ་རྟེན་བསྐྱེད་པ་ནི། ཨོཾ་ཤུ་ནྱ་ཏཱས་མཚན་མའི་རྟོག་པ་བསལ། སྤྱི་ཁྱབ་ཏུ། སྒྲུབ་དཀྱིལ་གྱི་མདུན་བསྐྱེད་ལྟར་རམ། བྱེ་བྲག་ཏུ་བསྐྱེད་ན། ཕྱི་ནང་གི་ཆོས་ཐམས་ཅད་སྟོང་པ་ཆེན་པོའི་ངང་ལས་རབ་ཏུ་གནས་བྱའི་རྟེན་སྐུ་གཟུགས་དང་མཆོད་རྟེན་གཙུག་ལག་ཁང་དང་སྐྱེད་མོས་ཚལ་ལ་སོགས་པ་ཨོཾ་སཾ་ཨོཾ་ལས་སེང་གེས་བཏེགས་པའི་རིན་པོ་ཆེའི་ཁྲི་པཾ་ཨ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཨོཾ་ཛི་ན་ཛིག །ལཾ་དཱེ་ཁ་ར་ཏི་རྣམ་སྣང་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གསུམ་


JLAZ012_Page_0615
[མ་དཔེ་གཟིགས་ན་འདིར་གནོན།]

འཁོར་ལོ་རྡོ་རྗེ་རིན་ཆེན། གཡོན་གསུམ་དྲིལ་བུ་པདྨ་རལ་གྲི་འཛིན་པ། སྤྱན་མ་དཀར་མོ་འཁོར་ལོ་དང་དྲིལ་བུ་འཛིན་པས་འཁྱུད་པའོ། །ལུང་གི་ཆོས་གསུང་རབ་ཡན་ལག་བཅུ་གཉིས་དགོངས་འགྲེལ་དང་བཅས་པའི་གླེགས་བམ་གྱི་རྣམ་པ་ཅན་རྣམས་ཧྲཱི་མཾ་ཧྲཱི་ལས་རྨ་བྱའི་ཁྲི་ལ་ཨ་པཾ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཨཾ་ཨཱ་རོ་ལིཀ །པཱཾ་རཱ་ག་ར་ཏི། སྣང་བ་མཐའ་ཡས་དམར་པོ་དམར་དཀར་སྔོ་བའི་ཞལ་གསུམ་ཕྱག་དྲུག་གིས་གཡས་གསུམ་པདྨ་རྡོ་རྗེ་འཁོར་ལོ། གཡོན་གསུམ་དྲིལ་བུ་རིན་ཆེན་རལ་གྲི་འཛིན་པ། གོས་དཀར་མོ་པདྨ་དང་དྲིལ་བུ་འཛིན་པས་འཁྱུད་པའོ། །རྟོགས་པའི་ཆོས་ས་དང་འབྲས་བུའི་ཡེ་ཤེས་ཐུགས་ཕྱག་མཚན་གྱི་བརྡ་དང་རྣམ་པར་གྲུབ་པ་ཧཱུྃ་གཾ་ཧཱུྃ་ལས་གླང་པོ་ཆེའི་ཁྲི་པཾ་ཨ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཧཱུྃ་བཛྲ་དྷྲིཀ་མཱུཾ་དྷཱ་ཏེ་ཤྭ་རཱི། མི་བསྐྱོད་པ་སྔོན་པོ་མཐིང་དཀར་དམར་བའི་ཞལ་གསུམ་ཕྱག་དྲུག་གིས། གཡས་གསུམ་རྡོ་རྗེ་འཁོར་ལོ་རིན་ཆེན། གཡོན་གསུམ་དྲིལ་བུ་པདྨ་རལ་གྲི། དབྱིངས་ཕྱུག་མ་སྔོན་མོ་རྡོར་དྲིལ་འཛིན་པས་འཁྱུད་པའོ། །དེ་བཞིན་དུ་རིན་པོ་ཆེའི་རྒྱན་ཆ་སོགས་ལ་རིན་འབྱུང་དང༌། གོ་ཆ་སོགས་ལ་དོན་གྲུབ་ཏུ་སྦྱར་བ་ཡོད་ཀྱང་སྐུ་གསུང་ཐུགས་རྟེན་ལ་འདིས་ཆོག་གོ །དེ་ཐམས་ཅད་ཀྱང་ཞི་བའི་ཚུལ་དགུ་དང་རིན་པོ་ཆེའི་རྒྱན་ཆ་བཅུ་གསུམ་གྱིས་མཛེས་པའི་མཚན་


JLAZ012_Page_0616
[མ་དཔེ་གཟིགས་ན་འདིར་གནོན།]

དཔེའི་ལང་ཚོ་རབ་ཏུ་རྒྱས་ཤིང་འཁོར་འདས་ཐམས་ཅད་ཀྱི་སྤྱི་དཔལ་ཆེན་པོར་བཞུགས་པའོ། །དེ་ལྟར་དུ་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། བདག་དང་རྟེན་གྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་དུས་བཞིའི་དེ་བཞིན་གཤེགས་པ་མ་ལུས་ཤིང་ལུས་པ་མེད་པའི་ཡེ་ཤེས་ཀྱི་འཁོར་ལོར་བཛྲ་ས་མཱ་ཛཿ བདུན་པ་སྤྱན་དྲང་བ་ནི། རྡོ་རྗེ་བསྡུ་བའི་རྒྱ་དང་རྡོར་དྲིལ་སྤོས་བཅས། ན་མོ། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་ཅིང༌། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལས་མི་འདའ་ཐུགས་རྗེའི་དབང་གིས་ནི། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་བཤམས་པའི་གནས་འདིར་གཤེགས། །ཇི་ལྟར་སངས་རྒྱས་རྣམས་ནི་དགའ་ལྡན་ནས། །སྤྲུལ་པ་དམ་པ་ཏོག་དཀར་ལྷ་ཡི་བུས། །མི་ཕམ་མགོན་ལ་རྒྱལ་ཚབ་དབང་བསྐུར་ནས། །གཟིགས་པ་རྣམ་ལྔས་འཛམ་གླིང་ཀུན་གཟིགས་ཤིང༌། །གླང་ཆེན་ཐལ་དཀར་ལྟར་གཤེགས་ལྷུམས་ཞུགས་ལྟར། །རྡོ་རྗེ་རིན་ཆེན་པདྨའི་རིགས་མཆོག་དང༌། །ལས་ཀྱི་རིགས་དང་དེ་བཞིན་གཤེགས་པའི་རིགས། །ཕྱོགས་བཅུའི་རྒྱལ་བ་སྲས་དང་


JLAZ012_Page_0617
[མ་དཔེ་གཟིགས་ན་འདིར་གནོན།]

བཅས་པ་རྣམས། །དུས་འདིར་བདག་གིས་དད་པས་སྤྱན་འདྲེན་ན། །རྟེན་མཆོག་འདི་ལ་བྱོན་པར་མཛད་དུ་གསོལ། །ན་མཿསརྦ་ཏ་ཐཱ་ག་ཏ་གུ་རུ་དེ་ཝ་ཌཱཀྐི་ནི། བཛྲ་ས་མ་ཡ་ཛཿ ཅེས་དང༌། སྙན་མནན་པ་ནི། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །ཐུགས་ལ་དགོངས་ཤིང་གནང་བར་མཛོད། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །པདྨ་ཀ་མ་ལཱ་ཡེ་སྟཾ་གྱིས་གདན་དང༌། ཨརྒྷཾ་སོགས་ཀྱིས་ཉེར་སྤྱོད་ཕུལ། བརྒྱད་པ་དགུག་གཞུག་བྱ་བ་ནི། རང་རང་གི་ཕྱག་རྒྱ་བཅས་ཏེ། ཨོཾ་བཛྲ་ཨངྐུ་ཤ་ཛཿ རྟེན་དམ་ཚིག་པའི་སྤྱི་བོར་དགུག །ཨོཾ་བཛྲ་པཱ་ཤ་ཧཱུྃ། རྟེན་ལ་བཅུག །ཨོཾ་བཛྲ་སྥོ་ཊ་བྃ་གྱིས་དབྱེར་མེད་དུ་བཅིངས། ཨོཾ་བཛྲ་ཨཱ་བེ་ཤ་ཧོཿ དགྱེས་པ་བསྐྱེད་དོ། །དགུ་པ་རྒྱས་གདབ་པ་ནི། རང་རང་གི་ཕྱག་རྒྱ་རྟེན་གྱི་གནས་གསུམ་དུ་བཞག་ལ། གནས་བྱའི་རྟེན་རྣམས་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་རྩིབས་བརྒྱད་པ་ཨོཾ་གྱིས་མཚན་པ། མགྲིན་པར་ཨཱཿ པདྨ་དམར་པོ་འདབ་མ་བརྒྱད་པ་ཨཱཿས་མཚན་པ། ཐུགས་ཀའི་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པས་རྒྱས་བཏབ་པར་གྱུར། ཧཱུྃ། དཔལ་ལྡན་སངས་རྒྱས་ཀུན་བདག་ཉིད། །རྡོ་རྗེ་མི་ཕྱེད་གསུམ་


JLAZ012_Page_0618
[མ་དཔེ་གཟིགས་ན་འདིར་གནོན།]

གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །སྐུ་གསུང་ཐུགས་སུ་རྒྱས་གདབ་བོ། །རྡོ་རྗེ་རྩེ་ལྔ་པའི་ཕྱག་རྒྱས་གནས་གསུམ་དུ་གཏུག་ཅིང༌། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷ་ཝ་ཨཱཏྨ་ཀོ྅ཧཾ། དེ་བཞིན་དུ་ཀཱ་ཡའི་གནས་སུ་ཝཱཀྐ་དང༌། ཙིཏྟ་ཡང་སྦྱར་རོ། །བཅུ་པ་དབང་བསྐུར་བ་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས་གདན་གསུམ་ཚང་བའི་དབང་གི་ལྷ་མདུན་གྱི་ནམ་མཁར་སྤྱན་དྲངས་མཆོད་ཅིང་བསྟོད་ལ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་སྩལ་ཏུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། གཤེགས་པ་རྣམས་ཀྱིས་བུམ་པའི་ཆུས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་པའི་གླུ་དབྱངས་བརྗོད། ལྷ་མོ་རྣམས་ཀྱིས་གདུགས་དང་བ་དན་ལ་སོགས་པ་བསྒྲེངས་ཤིང་མཆོད་རྫས་ཀྱི་ཆར་འབེབས། ཁྲོ་བོ་རྣམས་ཀྱིས་བགེགས་བསྐྲད་པའི་ལས་མཛད་ནས་རྒྱལ་ཚབ་ཀྱི་ས་ལ་མངོན་པར་དབང་བསྐུར་བར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །རྣམ་བུམ་བཟུང་ལ། ཇི་


JLAZ012_Page_0619
[མ་དཔེ་གཟིགས་ན་འདིར་གནོན།]

ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾཿཞེས་དབང་བསྐུར་བས་སྐུ་གང་དྲི་མ་དག་ཆུའི་དབའ་རླབས་སྤྱི་བོར་བརྟན་པ་ལས་རང་རང་གི་རིགས་ཀྱི་བདག་པོས་དབུ་བརྒྱན་པར་གྱུར། རིགས་དབང་ཐམས་ཅད་ཀྱི་བདག་ཉིད་དབུ་རྒྱན་བཟུང་ལ། དབང་བསྐུར་རྡོ་རྗེ་ཆེན་པོ་སྟེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཧཱུྃ་ཏྲཱཾ་ཧྲཱིཿཨཱཿ རཏྣ་མུ་ཀུ་ཊ་ཨ་བྷི་ཥིཉྩ་མཾ། ཞེས་དབང་བསྐུར། ཨོཾ་ཏྲཱུཾ། ཞེས་རྡོ་རྗེ་བཀང་ནན་གྱིས་གོ་བགོ། ཨོཾ་བཛྲ་ཏུཥྱ་ཧོཿ ཞེས་ཐལ་མོས་མཉེས་པར་བྱས། བཅུ་གཅིག་པ་མཆོད་བསྟོད་ནི། ལྷ་མོ་བཅུ་དྲུག་གིས་མཆོད། དེ་དག་བསྔགས་པ་མི་ཟད་སོགས་ཀྱིས་བསྟོད། བཅུ་གཉིས་པ་སྙན་གསན་དབབ་ཅིང་གཤེགས་གསོལ་བྱ་བ་ནི། པུས་མོ་གཡས་པའི་ལྷ་ང་ས་ལ་བཙུགས་རྡོ་རྗེ་དང་བཅས་པས་སྤོས་ཕོར་བཟུང༌། དྲིལ་བུ་བསིལ་བས། ཨོཾ་བཛྲ་ཛི་ཧཱཿ ལྕེ་ཧཱུྃ་ལས་སྐྱེས་པའི་རྡོ་རྗེར་མོས་ལ། ཨོཾ་ས་མ་ཡ་སྟྭཾ། ས་མ་ཡ་ཧོཿ ས་མ་ཡ་ཧཾཿ ཇི་ལྟར་སངས་རྒྱས་ཐམས་ཅད་ནི། །དགའ་ལྡན་དུ་ནི་གནས་པ་ན། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་འདིར་བཞུགས་ཤིག །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང༌། །སེམས་ཅན་


JLAZ012_Page_0620
[མ་དཔེ་གཟིགས་ན་འདིར་གནོན།]

རྣམས་ཀྱི་དོན་སླད་དུ། །བདག་གི་འབྱོར་པ་ཉིད་ཀྱིས་ནི། །ཅི་འབྱོར་པ་ཡི་མཆོད་པ་རྣམས། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་པ་ལ། །རྗེས་སུ་བརྩེ་བས་དགོངས་སུ་གསོལ། །ཀུན་གྱིས་འདི་ལ་བྱིན་བརླབས་ཤིང༌། །དེ་ཉིད་དུ་ནི་བཞུགས་པར་རིགས། །ཞེས་ལན་གསུམ་གྱིས་གསོལ་བ་གདབ། མཆོད་ཕྲེང་ཀུན་ཏུ་རྒྱུ་བ་དང༌། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཡི་གེ་བརྒྱ་པ་ལན་གསུམ་གྱིས་བཤགས། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །སོགས་དང༌། སེམས་མ་རྡོ་རྗེ་མའི་རྒྱ་ཐུར་ལྡོག་སྤྱི་བོར་བསྟན་ལ། ཨོཾ་ཨཱཿཧཱུྃ་མུཾ། བཛྲོ་ཏིཥྛ། རྟེན་གྱི་ཡེ་ཤེས་པ་མདུན་གྱི་ནམ་མཁར་བཞུགས་པར་གྱུར་པ་ལ། སླར་ཡང་མཆོད་བསྟོད་བྱ། བཅུ་གསུམ་པ་རྟེན་དགབ་པ་ནི། སྐུ་གཟུགས་ཀྱི་གནས་གསུམ་དུ་དྲིའི་ཐིག་ལེ་བྱུག་ཅིང་ལས་སྔགས་བཟླ། རྡོ་རྗེས་རེག་ནས། བཛྲ་རཀྵ་ཧཾ། ཞེས་བསྲུང་བར་བྱ། གཙུག་ཏོར་འཁོར་ལོས་བསྒྱུར་བའི་དབྱིངས་སུ་སྲུང་བར་བསམ་ལ། ཨོཾ་བཛྲ་ཙཀྲ་ཝཱརྟི་བྷྲཱུཾ། ཞེས་མཚོན་བྱ་དར་སེར་པོས་དགབ། ཆོ་གའི་རྗེས་ཆོག་རྣམས་དང་ཆོས་སྐྱོང་ལ་གཏོར་མ་བསྔོ། འཇིག་རྟེན་པ་རྣམས་ལ་ཆ་གསུམ་སོགས་བྱ་ཞིང་ཐུན་མཚམས་ཀྱི་རྣལ་འབྱོར་ལ་འཇུག་གོ། །གཉིས་པ་དངོས་གཞི་ལ་རྣམ་གྲངས་བཅུ་བདུན་ལས། དང་པོ་དཀྱིལ་འཁོར་སྒྲུབ་མཆོད། གཉིས་པ་བུམ་སྒྲུབ། གསུམ་པ་བདག་འཇུག །བཞི་པ་སྤྱོད་པ། ལྔ་པ་བཀྲུ་ཕྱི་རྣམས་སྟ་གོན་བཞིན་ལས་


JLAZ012_Page_0621
[མ་དཔེ་གཟིགས་ན་འདིར་གནོན།]

ཁྲུས་ཀྱི་བྱ་བ་ཉི་མ་འཆར་ཀ་དང་བསྒྲིག་གོ། །སྤྲོ་ན་འདིར་རིང་བསྲེལ་གཞུག་པའི་སྲོལ་ཡོད་དེ། དེ་བཞིན་གཤེགས་པའི་རིང་བསྲེལ་དངོས་སམ། ཡང་ན་སརྦ་བིདྱཱ་སྭཱ་ཧཱ་དང༌། རྟེན་འབྲེལ་སྙིང་པོ་གི་ཝཾ་དང༌། གུར་ཀུམ་བསྲེས་པས་བྲིས་ལ་སྐུ་གཟུགས་ཀྱི་དབུ་དང་མཆོད་རྟེན་གྱི་བྲེ་ལ་གདགས་པའམ་རྒྱབ་ཏུ་བྲིས་བ་གང་བདེ་བྱའོ། །དྲུག་པ་གསོལ་བ་གདབ་པ་ནི། དུལ་ཞིང་གུས་པས་ཚུལ་གྱིས་ལངས། སྤོས་དང་མེ་ཏོག །དད་པ་ནི་ཆོས་སྣང་བའི་སྒོ་སྟེ་དཀོན་མཆོག་གི་ཡོན་ཏན་རྗེས་སུ་དྲན་པས། གང་འདིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་བརྒྱན་པ། ཡོན་ཏན་ཐམས་ཅད་ཀྱི་མངའ་བདག་རྡོ་རྗེའི་རིགས་དང༌། རིན་པོ་ཆེའི་རིགས་དང༌། པདྨའི་རིགས་དང༌། ལས་ཀྱི་རིགས་དང༌། དེ་བཞིན་གཤེགས་པའི་རིགས་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ལྷ་དང་བཅས་པའི་འགྲོ་བ་མཐའ་དག་ལ་ཕན་པ་དང་བདེ་བའི་ཕྱིར་རྟེན་འདི་རྣམས་ལ་འབྱོན་པར་མཛད་དུ་གསོལ། ཞེས་མེ་


JLAZ012_Page_0622
[མ་དཔེ་གཟིགས་ན་འདིར་གནོན།]

ཏོག་འཐོར་ཞིང་ཕྱག་འཚལ་བ་ལན་གསུམ། བདུན་པ་སེམས་བསྐྱེད་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང༌། །བརྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་དུ་གྱུར། །གླིང་དོན་གཉེར་ལ་གླིང་དང་ནི། །གནས་མལ་འདོད་ལ་གནས་མལ་དང༌། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཡིད་བཞིན་ནོར་དང་བུམ་པ་བཟང༌། །རིག་སྔགས་གྲུབ་དང་སྨན་ཆེན་དང༌། །དཔག་བསམ་གྱི་ནི་ཤིང་དག་དང༌། །ལུས་ཅན་རྣམས་ཀྱི་འདོད་འཇོར་གྱུར། །ས་སོགས་འབྱུང་བ་ཆེན་པོ་དང༌། །ནམ་མཁའ་བཞིན་དུ་རྟག་པར་ཡང༌། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་རྒྱུར་ཡང་ཤོག །འགྲོ་བ་ནད་པ་ཇི་སྲིད་དུ། །ནད་གསོས་གྱུར་གྱི་བར་དུ་ནི། །སྨན་དང་སྨན་པ་ཉིད་དག་དང༌། །དེ་ཡི་ནད་གཡོག་བྱེད་པར་ཤོག །ཟས་དང་སྐོམ་གྱི་ཆར་ཕབ་སྟེ། །བཀྲེས་དང་སྐོམ་པའི་སྡུག་བསྔལ་བསལ། །མུ་གེའི་བསྐལ་པ་བར་


JLAZ012_Page_0623
[མ་དཔེ་གཟིགས་ན་འདིར་གནོན།]

མའི་ཚེ། །བདག་ནི་ཟས་དང་སྐོམ་དུ་གྱུར། །སེམས་ཅན་ཕོངས་ཤིང་དབུལ་བ་ལ། །བདག་ནི་མི་ཟད་གཏེར་གྱུར་ཏེ། །ཡོ་བྱད་མཁོ་དགུ་སྣ་ཚོགས་སུ། །མདུན་དུ་ཉེ་བར་གནས་གྱུར་ཅིག །ལུས་དང་དེ་བཞིན་ལོངས་སྤྱོད་དང༌། །དུས་གསུམ་དགེ་བ་ཐམས་ཅད་ཀྱང༌། །སེམས་ཅན་ཀུན་གྱི་དོན་བསྒྲུབ་ཕྱིར། །ཕོངས་པ་མེད་པར་གཏང་བར་བྱ། །ཞེས་མེ་ཏོག་འཐོར། བརྒྱད་པ་རྟེན་བསྐྱེད་པ་དང༌། དགུ་པ་ཡེ་ཤེས་སྤྱན་དྲངས་པ་དང༌། བཅུ་པ་དགུག་གཞུག་རྣམས་སྟ་གོན་བཞིན་ནོ། །བཅུ་གཅིག་པ་དབང་བསྐུར་བ་ནི། དཀྱིལ་འཁོར་ཆེན་པོ་གང་ལ་བརྟེན་པ་དེའི་དབང་ཆོས་ལས་བྱུང་བ་ལྟར་ཤེས་པར་བྱ་བའམ། མ་ནུས་ན། རང་གི་སྙིང་གའི་ས་བོན་ལས་འོད་ཟེར་འཕྲོས་པས་གདན་གསུམ་ཚང་བའི་དབང་གིས་ལྷ་མདུན་གྱི་ནམ་མཁར་སྤྱན་དྲངས་མཆོད་ཅིང་བསྟོད་ལ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་སྩལ་ཏུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་པའི་དགོངས་པ་མཛད། གཤེགས་མ་རྣམས་ཀྱིས་བུམ་པའི་ཆུས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་པའི་གླུ་དབྱངས་བརྗོད། ལྷ་མོ་རྣམས་ཀྱིས་གདུགས་དང་བ་དན་ལ་སོགས་པ་བསྒྲེངས་ཤིང་མཆོད་རྫས་ཀྱི་ཆར་འབེབས། ཁྲོ་བོ་རྣམས་


JLAZ012_Page_0624
[མ་དཔེ་གཟིགས་ན་འདིར་གནོན།]

ཀྱིས་བགེགས་བསྐྲད་པའི་ལས་མཛད་ནས་རྒྱལ་ཚབ་ཀྱི་ས་ལ་མངོན་པར་དབང་བསྐུར་བར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །རྣམ་རྒྱལ་བུམ་པ་བཏེགས་ལ། དབང་བསྐུར་རྡོ་རྗེ་ཆེན་པོ་སྟེ། །ཁམས་གསུམ་པ་ཡིས་ཕྱག་བྱས་པས། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཧཱུྃ། གཟུགས་ཀྱི་ཕུང་པོ་རྣམ་དག་ཅིང༌། །ཉོན་མོངས་ཞེ་སྡང་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱི། །དཔལ་ལྡན་སྐུ་ཡི་དབང་བསྐུར་རོ། །ཨོཾ་ཧཱུྃ་ཏྲཱཾ་ཧྲཱིཿཨཱཿབཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། དབུ་རྒྱན་བཟུང་ལ། ཧཱུྃ། ཚོར་བའི་ཕུང་པོ་རྣམ་དག་ཅིང༌། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱི། །དཔལ་ལྡན་ཡོན་ཏན་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཏྲཱཾཿ རྡོ་རྗེ་བཟུང་ལ། ཧཱུྃ། འདུ་ཤེས་ཕུང་པོ་རྣམ་དག་ཅིང༌། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱི། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨབྷི་ཥིཉྩ་ཧྲཱིཿ དྲིལ་བུ་བཟུང་ལ། ཧཱུྃ། འདུ་བྱེད་ཕུང་པོ་རྣམ་དག་ཅིང༌། །ཉོན་མོངས་ཕྲག་


JLAZ012_Page_0625
[མ་དཔེ་གཟིགས་ན་འདིར་གནོན།]

དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱི། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ རྡོར་དྲིལ་སྤྱི་བོར་འཛིན་པས། ཧཱུྃ། རྣམ་ཤེས་ཕུང་པོ་རྣམ་དག་ཅིང༌། །ཉོན་མོངས་གཏི་མུག་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱི། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བུདྡྷ་ཨ་བྷི་ཥིཉྩ་ཨོཾ། །ཞེས་རིག་པའི་དབང་ལྔ་དང༌། རྡོ་རྗེ་སློབ་དཔོན་གྱི་དབང་ནི། གནས་བྱའི་ལྷ་ཐམས་ཅད་རང་རང་གི་རིགས་ཀྱི་ཡུམ་དང་འཁྱུད་རྒྱ་བྱས་ནས། དམ་ཚིག་གསུམ་དང་དུ་བཞེས་པར་བསམ། ཨོཾ་ཨཱཿཧཱུྃ། ཐབས་དང་ཤེས་རབ་དབྱེར་མེད་ཅིང༌། །སྣང་སྟོང་དབྱེར་མེད་འདི་བཟུང་ལ། །སྟོང་ཉིད་སྙིང་རྗེའི་སྙིང་པོ་ཡི། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་བཟུང་བར་མཛོད། །ཨོཾ་མ་ཧཱ་བཛྲ་ཧཱུྃ། ཞེས་རྡོ་རྗེ་གསོར། ཨོཾ་བཛྲ་གཎྜེ་ཨ། ཞེས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་འཁྱུད་རྒྱ་བྱ། སླར་ཡང་མཐའ་རྟེན་བུམ་པའི་ཆུས་དབང་བསྐུར་བ་ནི། ནམ་མཁར་བཞུགས་པའི་དེ་བཞིན་གཤེགས་པ་སྲས་དང་བཅས་པ་རྣམས་དབང་གི་བྱ་བ་ལ་དགྱེས་པས་རིན་པོ་ཆེའི་བུམ་པ་བདུད་རྩིས་གང་བ་ཡོད་པར་བཟུང་སྟེ་དབང་བསྐུར་བར་གྱུར། བཀྲ་ཤིས་ཆེན་པོའི་བུམ་པ་ནི། །བདེ་གཤེགས་བཞུགས་པའི་ཕོ་བྲང་སྟེ། །དཀྱིལ་འཁོར་རྫོགས་པར་གྱུར་པ་ཡི། །དབང་མཆོག་


JLAZ012_Page_0626
[མ་དཔེ་གཟིགས་ན་འདིར་གནོན།]

དེ་ཡང་སྦྱིན་པར་བྱ། །ཨོཾ་རཏྣ་ཀརྨ་བྷུདྡྷ་ཀ་ལ་ཤ་ཨབྷི་ཥིཉྩ་ཧཱུྃ། ཞེས་དབང་བསྐུར་བས་སྐུ་གང༌དག་བྱ་མ་ལུས་པ་སྦྱངས། ཆུའི་ལྷག་མ་སྤྱི་བོར་འཁྱིལ་བ་ལས་རང་རང་གི་རིགས་ཀྱི་བདག་པོས་དབུ་བརྒྱན། ནམ་མཁའི་རྡོ་རྗེ་དེ་བཞིན་གཤེགས་པ་ཐམས་ཅད་ཀྱང་ཡེ་ཤེས་སེམས་དཔའི་རང་བཞིན་དུ་བརྟེན་ལ་འཐིམ་པར་གྱུར། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་མེ་ཏོག་འཐོར། གསང་དབང་ནི། དཀྱིལ་འཁོར་གྱི་བདག་པོ་ཡབ་ཡུམ་གྱི་སྦྱོར་མཚམས་ནས་ཉི་ཟླ་བྱང་ཆུབ་སེམས་ཀྱི་སྤྲིན་རྡོ་རྗེའི་ལྗགས་ལ་སྤྲོ་བར་མོས་ལ། ཧཱུྃ། དགའ་བ་བྱང་ཆུབ་སེམས་ཆེན་པོ། །ཀུན་ཏུ་ཚིམས་པར་བྱེད་པ་ཡི། །དཀར་དམར་ལྷག་པའི་བྱང་ཆུབ་སེམས། །དབང་ཐོབ་ཁྱེད་ཀྱི་ལྕེ་ལ་བཞག །ཨ་ཧོ་མ་ཧཱ་སུ་ཁ་ཧོཿ ཤེས་རབ་ཡེ་ཤེས་ནི། འཁོར་ལོའི་དབང་ཕྱུག་གི་ཐུགས་ཀ་ནས་ཐར་པ་བསྟེན་པ་ལ་བསྐུལ་བའི་རིག་མ་གཟུགས་དང་ལང་ཚོ་དཔལ་གྱིས་འབྱོར་བ་དུ་མ་བྱོན་ནས་གནས་བྱའི་ལྷ་ཚོགས་རྣམས་ཀྱི་པང་དུ་བྱོན་པས་དགའ་བཞིའི་ཡེ་ཤེས་ལ་རོལ་པ་མཛད་པར་བསམ་སྟེ། རིག་ཙཀ་གམ། དྲིལ་བུ་བཟུང་ལ། ཁྱེར་ཅིག་ཁྱེར་ཅིག་བདེ་བ་ཅན། །ཤེས་རབ་དམ་པ་འདི་ཡིན་ནོ། །ཁྱོད་ཀྱིས་ཡེ་ཤེས་སྐྱེད་པར་བྱེད། །འདི་ལ་རྟག་ཏུ་རོལ་མོ་གྱིས། །ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཎ་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། དབང་བཞི་པ་ནི།


JLAZ012_Page_0627
[མ་དཔེ་གཟིགས་ན་འདིར་གནོན།]

རང་བཞིན་མེད་པའི་བདག་ཉིད་ཆེན་པོ་བྱང་ཆུབ་སེམས་ཀྱི་དབང་ལ་བསྐུར་བྱ་སྐུར་བྱེད་ཀྱིས་རྒྱུ་འབྲས་དག་པར་བསམ་ལ། ཆོས་རྣམས་ཐམས་ཅད་ནམ་མཁའི་ཁམས། །དངོས་པོ་མཚན་མ་ཀུན་ལས་འདས། །ནམ་མཁའ་བཞིན་དུ་ཡེ་གནས་ལ། །དེ་ལ་མཁས་པས་བཅོས་སུ་མེད། །ཅེས་མཉམ་པར་གཞག །བཅུ་གཉིས་པ་མཆོད་པ་ནི། རྡོ་རྗེ་ལྷ་མོ་བཅུ་དྲུག་གིས་མཆོད། བཅུ་གསུམ་པ་བསྟོད་པ་ནི། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌སོགས་དང༌། བརྗོད་མེད་ཤེས་རབ་མི་གཡོ་ཆོས་ཀྱི་སྐུ་སོགས། དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །ཅེས་སོ། །བཅུ་གསུམ་པ་དབང་པོའི་སྐྱོན་བསལ་བ་ནི། དངུལ་སྣོད་དུ་མར་དཀར་དང་སྦྲང་རྩི། ཀ་ར། ནིར་མ་ལི་ལ་སོགས་པའི་མིག་སྨན་སྦྱངས་པ་གསེར་ཐུར་གྱིས་བླངས་པ་ཐོགས་ དཀྱིལ་འཁོར་གྱི་རྡུལ་ཚོན་ལས་ཅུང་ཟད་བླང་བའང་ཡོད། ལ། ཇི་ལྟར་མིག་མཁན་རྒྱལ་པོས་འཇིག་རྟེན་གྱི། །རབ་རིབ་གསེར་གྱི་ཐུར་མས་བསལ་བ་ལྟར། །སེམས་ཅན་རྣམས་ལ་གཟིགས་པ་ལྷུར་མཛད་ཕྱིར། །ཡེ་ཤེས་སྤྱན་མཆོག་སྲི་ཞུས་དབྱེ་བར་བྱ། །ཨོཾ་ཙཀྵུཿཙཀྵུཿས་མནྟ་ཙཀྵུ་བི་ཤྭ་དྷ་ནི་སྭཱ་ཧཱ། ལན་གསུམ། རྣ་དྲུད་ཐོགས་ལ། འོན་པ་ལྟ་བུའི་འགྲོ་བ་རྣམས། །ཆོས་ཀྱི་དུང་


JLAZ012_Page_0628
[མ་དཔེ་གཟིགས་ན་འདིར་གནོན།]

སྒྲས་སད་པའི་ཕྱིར། །རྒྱལ་བའི་སྙན་ནི་དབྱེ་བགྱིས་པས། །ལྷ་ཡི་རྣ་བ་ཐོབ་པར་ཤོག །ཨོཾ་དྭཱི་བྱ་ཀརྣ་ཡ་སྭཱ་ཧཱ། རྨང་གཟེར་ཐོགས་ལ། གཟུང་འཛིན་དྲི་ཡི་བཞོན་པ་ལ། །བླང་དོར་ཆགས་པའི་འགྲོ་བ་རྣམས། །འཕགས་པའི་ཚུལ་ཁྲིམས་དྲི་བསུང་ལ། །སྤྱོད་ཕྱིར་ཤངས་ནི་དབྱེ་བར་བྱ། །ཨོཾ་དྭཱི་བྱ་གྷཱ་ཎཱ་ཡེ་སྭཱ་ཧཱ། ཐུར་དཔྱད་ཐོགས་ལ། འགྲོ་ཀུན་བརྗོད་པ་རྣམ་དག་པ། །རྡོ་རྗེའི་ལྗགས་ལ་དབང་ཐོབ་ཕྱིར། །ཡེ་ཤེས་ཞལ་མཆོག་དབྱེ་བགྱིས་པས། །ཆོས་ཀྱི་རོ་ཡིས་ཚིམ་པར་ཤོག །ཨོཾ་དྭཱི་བྱ་མུ་ཁ་ཡ་སྭཱ་ཧཱ། ཚེམས་ཤིང་ཐོགས་ལ། མཚན་དཔེས་འཁྱུད་པའི་ཐགས་བཟང་ཚེམས། །ཉེས་སྐྱོན་དྲི་ཡིས་མ་གོས་ཀྱང༌། །མྱུ་གུ་གསར་པའི་ཚེམས་ཤིང་འདྲིས། །བཀུར་སྟི་མཆོག་ལ་བརྩོན་པར་བགྱི། །ཨོཾ་དྭཱི་བྱ་དནྟྲ་ཡ་སྭཱ་ཧཱ། ཞེས་དང༌། དེ་ལ་འདོད་ཡོན་ལྔས་མཆོད་པ་ནི། ཨོཾ་རཱུ་པ་པྲ་ཏིཙྪ་ཨཱཿཧཱུྃ། ཤཔྟ། གནྡྷེ། རཱ་ས། པརྴེ་པྲ་ཏཱིཙྪ་ཨཱཿཧཱུྃ། བཅུ་བཞི་པ་རྟེན་བསྒྱུར་བ་ནི། སློབ་དཔོན་གྱིས་རྡོ་རྗེ་དང་བཅས་པའི་ཐལ་མོས་རྟེན་ལ་རེག་ཅིང་སེ་གོལ་གྱི་སྒྲས་མཚོན་པ་གནས་བྱའི་སྔགས་དང༌། ཨོཾ་ཨཱཿཧཱུྃ་སྭཱ་ཧཱ། ལན་གསུམ་བརྗོད་ལ། རིགས་ཀྱིས་མཚོན་པའི་ལྷ་རྣམས་ཡོངས་སུ་གྱུར་པ་ལས་སྐུ་གསུང་ཐུགས་ཀྱི་རྟེན་སོ་སོའི་རྣམ་པར་གྱུར། ཞེས་བརྗོད། བཅོ་ལྔ་པ་རབ་ཏུ་གནས་པ་ནི། རྟེན་ལ་གཟུངས་ཐག་


JLAZ012_Page_0629
[མ་དཔེ་གཟིགས་ན་འདིར་གནོན།]

བཏགས་པའི་སྣེ་མོ་སློབ་དཔོན་གྱིས་བཟུང་ལ། གནས་བྱའི་རྟེན་རྣམས་ཀྱི་ཐུགས་ཀར་ཟླ་བ་ལ་གནས་པའི་སྔགས་ཕྲེང་འཁོར་བའི་འོད་ཟེར་གྱིས་ཕྱོགས་བཅུའི་སངས་རྒྱས་སྲས་དང་བཅས་པ་རྟེན་སོ་སོའི་རྣམ་པར་བྱོན་ནས་དེ་ལ་བཞུགས་པར་གྱུར། སྐུ་གཟུགས་ལ་སུ་པྲ་ཏིཥྛ་དང༌། མཆོད་རྟེན་དང་གཙུག་ལག་ཁང་ལ། ཨོཾ་ཧཱུྃ་ཧྲཱིཿབྷུ་ཁཾ་བཛྲཱི་བྷ་ཝ་དྲྀ་ཌྷ་ཏིཥྛ་བྷུ་ཁཾ་སྭཱ་ཧཱ། གསུང་རྟེན་ལ་གཉིས་ཀ་དང༌། ཐུན་མོང་དུ། རྟེན་འབྲེལ་སྙིང་པོ་ཅི་མང་བཟླ། བྲིས་སྐུ་ཡིན་ན། ཨོཾ་སརྦ་བིདྱཱ་སྭཱ་ཧཱ། ལ་སོགས་པའི་རྒྱབ་ཡིག་གདབ། རྗེས་འབྲེལ་དུ་ཤིས་པ་བརྗོད་པ་ནི། སྔར་གཟུངས་བུམ་གྱི་ཆུས་བྲན་པའི་མེ་ཏོག་འཐོར་ཞིང༌། ༈ བྱང་ཆུབ་སྙིང་པོར་གཤེགས་པ་ན། །ས་རྣམས་དྲུག་པོ་གཡོས་གྱུར་ཞིང༌། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ་ལེགས་མཛད་པར་གྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུང་ཞིང༌། །ཐུབ་པའི་སྙན་པ་གང་བྱུང་དེས། །ཁྱོད་ལ་བདེ་ལེགས་མཛད་པར་གྱུར། །ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཚོགས་ཀུན་དབང་དུ་མཛད་པ་དེས། །ཁྱོད་ལ་བདེ་ལེགས་མཛད་པར་གྱུར། །ཞེས་དང༌། ན་མོ་རཏྣཱ་ཏྲ་ཡཱ་ཡ། ཡེ་དྷརྨཱ་ཧེ་ཏུ་སོགས་བཟླ། བཅུ་དྲུག་པ་གསོལ་བ་གདབ་པ་ནི། མེ་ཏོག་དམ་པ་ཕྲེང་བ་དམ་པ་དང༌། །སིལ་སྙན་རྣམས་དང་སོགས་ཤློ་ཀ་གཉིས་པོས་


JLAZ012_Page_0630
[མ་དཔེ་གཟིགས་ན་འདིར་གནོན།]

མཆོད་དེ། རྟེན་གྱི་ཁྲིའམ། དེ་ལ་མེ་ཏོག་གི་ཕྲེང་བ་བཏགས་པ་ནས་བཟུང་སྟེ། ཐལ་མོ་སྦྱར་བས་བཏུད་དེ། ཇི་སྲིད་ས་ཆུ་མེ་དང་ནི།།རླུང་གིས་བསྐལ་པས་འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། །འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་དང༌། །མཆོག་རྣམས་ལེགས་པར་སྩལ་ཏུ་གསོལ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་ཡང་སྐུ་གསུང་ཐུགས་ཀྱི་རྟེན་འདི་རྣམས་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་ཏུ་གསོལ། ཞེས་ལན་གསུམ་གྱིས་གསོལ་བ་བཏབ། བཅུ་བདུན་པ་མངའ་དབུལ་ལ། སྤྱི་དང་བྱེ་བྲག་གཉིས་ལས། དང་པོ་ལ་མཆོད་པ་མངའ་དབུལ་བ་ནི། ཐུབ་དབང་མཆོད་གནས་མཆོག་


JLAZ012_Page_0631
[མ་དཔེ་གཟིགས་ན་འདིར་གནོན།]

ལ་ཡིད་འོང་བའི། །མེ་ཏོག་མནྡ་ར་དང་པདྨ་དང༌། །ཨུཏྤལ་ལ་སོགས་དྲི་ཞིམ་ཐམས་ཅད་དང༌།། ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད། །སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི།།བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞལ་ཟས་བཟའ་བཏུང་སྣ་ཚོགས་བཅས་པ་ཡི།།ལྷ་བཤོས་རྣམས་ཀྱང་དེ་ལ་དབུལ་བར་བགྱི། །གསེར་གྱི་པདྨ་ཚལ་དུ་དངར་བ་ཡི། །རིན་ཆེན་སྒྲོན་མེ་རྣམས་ཀྱང་དབུལ་བར་བགྱི། །དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་ཚིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་དང༌། དེ་བཞིན་དུ་བླ་ན་ཡོད་པའི་མཆོད་པ་རྣམས་བྲིས་འབུར་གྱི་རྣམ་པར་བཀོད་པ་འབུལ་བ་ལས། མཎྜལ་དབུལ་རྗེས། དེའི་བཀོད་པ་གླིང་བཞི་རི་རབ་བཅས་ཕུལ་ལ། ཁོར་ཡུག་རིར་བཅས་བྱེ་བ་ཕྲག་བརྒྱའི་ཞིང༌། །མ་ལུས་ཡོངས་བཀང་འདོད་དགུས་འབྱོར་པ་དང༌། ཕྱོགས་བཅུའི་ཞིང་ཁམས་རྒྱ་མཚོ་ཇི་སྙེད་ཀུན། །བློ་ཡིས་བླངས་ཏེ་ཐུབ་དབང་སྲས་བཅས་མཆོད། །སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་བྲལ་རྒྱུ་སྐར་ཕྲེང་བས་བསྐོར་བ་དང༌། །ཉིན་བྱེད་འོད་སྟོང་དྲྭ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །ཅེས་དང༌། རིན་ཆེན་སྣ་བདུན་རྫས་བརྒྱད། ཉེ་བའི་རིན་ཆེན་བདུན་སོགས་ཕུལ་ལ། ༈


JLAZ012_Page_0632
[མ་དཔེ་གཟིགས་ན་འདིར་གནོན།]

བུམ་བཟང་དཔག་བསམ་ཤིང་དང་འདོད་འཇོའི་བ། །རྒྱལ་སྲིད་བདུན་དང་བཀྲ་ཤིས་རྫས་བརྒྱད་དང༌། །ཉེ་བའི་རིན་ཆེན་བདུན་སོགས་རྒྱ་ཆེ་བས། །ཡོན་གནས་དམ་པ་ཐུགས་རྗེ་ཆེ་རྣམས་མཆོད། །རྟགས་བརྒྱད་ཕུལ་ལ། ༈ རིན་ཆེན་གདུགས་མཛེས་གསེར་གྱི་ཡུ་བ་ཅན། །ཁོར་ཡུག་རྒྱན་གྱི་རྣམ་པ་ཡིད་འོང་ལྡན། །དབྱིབས་ལེགས་ལྟ་ན་སྡུག་པའི་བཀྲ་ཤིས་རྟགས། །རྟག་ཏུ་ཐུབ་དབང་རྣམས་ལ་དབུལ་བར་བགྱི། །ཞེས་དང༌། ཏིང་ངེ་འཛིན་གྱིས་མཆོད་པ། ༈ ལྷ་སོགས་འཇིག་རྟེན་ཀུན་ན་ཡིད་འོང་བའི། །གཞལ་མེད་ཁང་བརྩེགས་རིན་ཆེན་དྲྭ་བ་ཅན།།གླུ་གར་སིལ་སྙན་བསྟོད་དབྱངས་ཆར་འབབ་ཅིང༌། །རྒྱན་མཆོག་བརྒྱ་ཕྲག་མངའ་བ་རྣམས་ཀྱིས་མཆོད། །རིན་ཆེན་རི་བོ་ནགས་ཚལ་པདྨོའི་ཚལ། །ངང་མོའི་འགྲོས་ཀྱིས་གཉེར་བ་དེ་དག་དང༌། །སྨན་སོགས་དྲི་ཞིམ་དད་ལྡན་དཔག་བསམ་ཤིང༌། །མེ་ཏོག་འབྲས་བུས་དུད་པའི་ཚོགས་ཀྱིས་མཆོད། །འདབ་སྟོང་གཡོ་བས་བུང་བ་བཟུང་བ་ཡི། །ལག་པའི་གདུ་བུ་ཀུ་མུ་དས་མཚན་ཞིང༌། །སྤྲིན་བྲལ་ཉི་ཟླའི་ཟེར་གྱིས་རབ་ཕྱེ་བའི། །ཨུཏྤལ་ལ་སོགས་ཡིད་འོང་རྣམས་ཀྱིས་མཆོད། །ཙན་དན་བསིལ་བའི་ཁ་ཡི་སྦུབས་བསྐྱོད་པའི། །དྲི་ཞིམ་བསེར་བུ་བདེ་བའི་ངད་རྣམས་དང༌། །ཕུག་དང་བྲག་རིའི་སྨན་ལྗོངས་ཉམས་


JLAZ012_Page_0633
[མ་དཔེ་གཟིགས་ན་འདིར་གནོན།]

དགའ་བ། །ཆུ་བསིལ་རྫིང་བུས་གང་བ་རྣམས་ཀྱིས་མཆོད། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པའི། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་དབང་སྐྱེས་ཀྱི་མཆོག །སྲས་དང་བཅས་པ་རྣམས་ལ་འབུལ་ལགས་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེར་དགོངས་འདི་དག་བཞེས་སུ་གསོལ། །ཞེས་སོ། །གཉིས་པ་བྱེ་བྲག་ནི་སྐུ་གསུང་ཐུགས་ཀྱི་རྟེན་སོ་སོ་ལ་འབུལ་བ་ལས། ཆགས་བྲལ་གྱི་རྣམ་པ་ཅན་ལ། འདྲེག་སྤྱད་ཕུལ་ལ། ༈ གཞོན་ནུ་ལང་ཚོ་གསར་བའི་མཐོང་མཐིང་ཡང༌། །མཆོད་རྟེན་རྣམ་དག་དྲུང་དུ་སྤངས་གྱུར་པས། །ཁྱིམ་པའི་རྟགས་ལས་གྲོལ་བའི་འདྲེག་སྤྱད་ནི། །ཕུལ་བས་འགྲོ་ཀུན་ཁྱིམ་ལས་དབུགས་འབྱིན་ཤོག །ཨོཾ་སརྦ་ཤོ་དྷ་ན་ཥ་ཙྪེ་ད་ཧཱུྃ། ཆོས་གོས་གསུམ་ཕུལ་ལ། ༈ མཚན་བཟང་སྐུ་ཡི་ལྗོན་པས་ངུར་སྨྲིག་གི། །རྒྱལ་མཚན་གསལ་པའི་ལྷབ་ལྷུབ་གཡོ་བ་ཅན། །བསླབ་གསུམ་དོན་དང་ལྡན་པའི་ཆོས་གོས་གསུམ། །ཕུལ་བས་འགྲོ་རྣམས་བརྟུལ་ཞུགས་དེར་གནས་ཤོག །ཨོཾ་དྭཱི་བྱ་ཝསྟྲ་པ་ཎ་ཡེ་སྭཱ་ཧཱ། ཆུ་ཚགས་དང་ལྷུང་བཟེད་སོགས་ཕུལ་ལ། ༈ དྲང་སྲོང་མཆོག་ལ་འོས་པའི་ཉེར་སྤྱད་ནི། །བཻ་ཌཱུརྱ་ཡི་ལྷུང་བཟེད་དམ་པ་དང༌། །ཆུ་ཚགས་ལ་སོགས་ཕུལ་བས་འགྲོ་བ་ཀུན། །སྦྱངས་པའི་ཡོན་ཏན་བཅུ་གཉིས་ཐོབ་པར་


JLAZ012_Page_0634
[མ་དཔེ་གཟིགས་ན་འདིར་གནོན།]

ཤོག །ཨོཾ་ཨུ་པ་ཡོ་ཛྱ་ཏེ་པཱ་རིསྐཱ་རཱ་ཡ་སྭཱ་ཧཱ། ལོངས་སྐུའི་རྣམ་པ་ཅན་ལ། དུང་གི་སོ་མངས་ཕུལ་ལ། ༈ མཐོན་མཐིང་གཡས་སུ་འཁྱིལ་བའི་ཟུར་ཕུད་ཅན། །རིན་ཆེན་ནོར་བུའི་ཏོག་གིས་ལྷམ་པར་མཛེས། །སྐྱེ་དགུ་ཀུན་གྱིས་བལྟ་བས་མི་ངོམས་དེར། །སྐྱང་ནུལ་ཆོ་ག་གསར་པས་སྲི་ཞུ་བགྱིད།།ཨོཾ་ཀཱ་མ་མ་ལ་དྷ་ར་ལི་ཧཱུྃ། ཁ་དོག་སྣ་ཚོགས་པའི་ན་བཟའ་ཕུལ་ལ། ༈ གང་ལ་རེག་ན་འཇམ་པའི་ལྷ་རྫས་ཀྱང༌། །དབང་པོའི་ཚོན་གྱིས་འཁྱུད་པའི་སྨིག་སྒྱུ་ཡིས། །བར་སྣང་ཟ་འོག་གཅལ་དུ་བཀྲམ་པ་ལྟར། །འབར་བས་འགྲོ་ཀུན་བཟོད་པའི་གོས་ཐོབ་ཤོག །ཨོཾ་བཛྲ་ཝསྟྲ་ཡེ་སྭཱ་ཧཱ། རིན་པོ་ཆེའི་རྒྱན་སྣ་ཚོགས་ཕུལ་ལ། ༈རང་བཞིན་བལྟ་ན་སྡུག་པའི་མཚན་དཔེ་ལ། །བཅོས་མའི་རྒྱན་གྱིས་བརྒྱན་པར་མ་འཚལ་ཡང༌། །དོ་ཤལ་དཔུང་རྒྱན་སེ་མོ་དོ་ལ་སོགས། །ཁ་སྦྱོར་བདུན་གྱི་བདག་ཉིད་མཚོན་ཕྱིར་ཕུལ།། ཨོཾ་རཏྣ་ཨ་ལངྐཱ་རཱ་ཧཱུྃ། དེ་བཞིན་དུ་སོ་མངས། ཁབ་སྙུང༌། ཆུ་གྲི་སོགས་ཕུལ་ལ། ༈ བཟོ་གནས་ལ་སོགས་རིག་པའི་འཁྱུད་དཔྱད་ཀྱིས། །འཇིག་རྟེན་རྗེས་སུ་འཛིན་པ་སྟོན་པའི་ཕྱིར། །རྣམ་པ་སྣ་ཚོགས་ཉེར་སྤྱད་འདི་ཕུལ་བས། །སེམས་ཅན་རྨོངས་དང་ནད་ལས་ཐར་བར་ཤོག །ཨོཾ་ཨུ་པ་ཡོ་ཛྱ་པཱ་རིསྐཱ་རཱ་ཡ་སྭཱ་ཧཱ། ཁྲོ་བོའི་སྐུ་རྣམས་ལ་དུར་ཁྲོད་ཆས་བརྒྱད་ཕུལ་ལ། ༈ འཇིག་རྟེན་ན་ནི་


JLAZ012_Page_0635
[མ་དཔེ་གཟིགས་ན་འདིར་གནོན།]

དཔའ་བོ་ཡི། །མི་བསྲུན་ཚར་གཅོད་གོས་གྱོན་བཞིན།། སྔོན་ཚེ་དཔལ་ཆེན་ཧེ་རུ་ཀས། །རུ་ཏྲ་བསྒྲལ་བའི་དཔའ་རྟགས་ནི། །ཐབས་མཁས་ཕྲིན་ལས་ཞིང་ཆེན་དང༌། །ཁྱབ་པ་ཐུགས་རྗེ་གླང་པོའི་ཀོ། །དབང་སྡུད་སྟག་ལྤགས་ཤམ་ཐབས་གོས། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །༈རྒྱལ་རིགས་དཀར་ཁྲའི་དབུ་རྒྱན་དང༌། །རྗེ་རིགས་སེར་ཁྲའི་སྙན་ཆ་སྟེ། །བྲམ་ཟེ་དམར་སྐྱའི་མགུར་ཆུ་ཅན། །དམངས་རིགས་ནག་ཁྲའི་སྐ་རགས་དང༌། །གདོལ་བ་ལྗང་ནག་གདུ་བུའི་རྒྱན། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །ཐོད་པ་སྐམ་པོའི་དབུ་རྒྱན་དང༌།།རློན་པའི་སེ་རལ་ཚལ་བུ་ནི། །དཔུང་རྒྱན་དག་ཏུ་དཔྱངས་པའོ། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །དཔྲལ་བར་ཐལ་ཆེན་ཚོམ་བུ་དང༌། །སྨིན་དབྲག་རཀྟའི་ཐིག་ལེ་སྟེ། །ཨོ་ཀོར་ཞག་གི་ཟོ་རིས་གདབ། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །དེ་ནས་གདན་སོགས་ཕུལ་ལ། ༈ པད་ཉི་དྲེགས་པ་ཁྱོ་ཤུག་གདན། །རུས་པའི་རྒྱན་དྲུག་ཕྱག་མཚན་དང༌། །དུག་གསུམ་སྲེག་བྱེད་མེ་དཔུང་སོགས། །དྲག་པོའི་འདོད་ཡོན་མཐའ་ཡས་པས། །ཁྲོ་རྒྱལ་ཚོགས་ལ་བསྟི་སྟངས་བགྱི། །གསུང་རྟེན་ལ། ཁྲི་དང་


JLAZ012_Page_0636
[མ་དཔེ་གཟིགས་ན་འདིར་གནོན།]

གླེགས་ཆབ་ན་བཟའ་སོགས་ཕུལ་ལ། །༈ སྣ་ཚོགས་དར་གྱིས་བཀབ་པའི་སེང་གེའི་ཁྲི། །ཐབས་དང་ཤེས་རབ་ལྗོན་པའི་གླེགས་བུ་ཟུང༌། །མཐའ་དག་གཅིག་ཏུ་བྱེད་པའི་སྐུ་ཆིངས་དང༌། །ལྔ་ཕྲག་བརྩེགས་པའི་ན་བཟའང་དབུལ་བར་བགྱི། །ཨོཾ་བཛྲ་པུསྟ་ཀ་ཨཱ་ས་ནཱ་ཝསྟྲ་ཡེ་སྭཱ་ཧཱ། ཐུགས་རྟེན་ལ། སྲོག་ཤིང་དང་ཆོས་འཁོར་ཕུལ་ལ། ༈ ཐུབ་པའི་ལུང་རྟོགས་བསྟན་པ་རིན་པོ་ཆེ། །ཡུན་དུ་གནས་ཕྱིར་སྲོག་ཤིང་དམ་པ་དང༌། །འཁོར་ལོ་བརྩེགས་མ་ཕུལ་བས་འགྲོ་བ་ཀུན། །སྐུ་གསུམ་ཡེ་ཤེས་ལྔ་ཡི་གནས་ཐོབ་ཤོག།།ཨོཾ་སརྦ་བིདྱ་དྷཱརྨཱ་དྷརྟུ་ཙཀྲ་སྭཱ་ཧཱ། ཅོད་པཎ་དང་འཕན་ཕུལ་ལ། ༈ དྲན་པ་ཉེ་བར་གཞག་པ་ལ་སོགས་པ། །བྱང་ཆུབ་ཕྱོགས་ཀྱི་གྲགས་སྙན་མཐའ་དག་ཀུན། །ཡེ་ཤེས་ལྔ་མཚོན་དར་གྱི་ཅོད་པཎ་དང༌། །འཕུར་ལྡིང་གཡོ་བའི་བ་དན་འདིས་ཐོབ་ཤོག །ཨོཾ་པ་ཏཾ་ཀཱ་ལཾ་པཱ་ཡ་ཀུ་མ་དྷི་ར་དྷྭ་ཛ་སྭཱ་ཧཱ། གདུགས་དང་མེ་ཏོག་གི་ཕྲེང་བ་ཕུལ་ལ། ༈ འགྲོ་འདི་དཀོན་མཆོག་རིན་ཆེན་རྣམ་གསུམ་གྱི། །གྲིབ་བསིལ་ཉིད་དུ་བསྟི་དང་དབུགས་འབྱིན་ཕྱིར། །གདུགས་དང་མེ་ཏོག་ཕྲེང་བ་འདི་ཕུལ་བས། །འཁོར་བའི་ཚ་གདུང་གཏན་ནས་བཅིང་བར་ཤོག །ཨོཾ་བྷྲ་མ་ཎཱ་ཡ་རཏྣ་མཱ་ལ་ཏྲཱཾཿ ཁྲི་གདན་ཁྱད་པར་བ་རྣམས་ཕུལ་ལ། ༈ སྟོབས་བཅུ་ལྡན་པ་གླང་པོའི་ཁྲི་མཆོག་དང༌། །མི་འཇིགས་བཞི་


JLAZ012_Page_0637
[མ་དཔེ་གཟིགས་ན་འདིར་གནོན།]

ལྡན་སེང་གེ་རྫུ་འཕྲུལ་རྟ། །དབང་བཅུ་ལྡན་པའི་རྨ་བྱ་མཁའ་ལྡིང་སྟོབས། །འགྲོ་བའི་རེ་སྐོང་རིན་པོ་ཆེ་ཡི་བསྟན། །ཆགས་པའི་སྐྱོན་བྲལ་པདྨ་ཉི་ཟླ་ནི། །རང་བཞིན་འོད་གསལ་རྣམ་པ་ཐམས་ཅད་པའི། །གདན་ཁྲི་ཕུལ་བས་འགྲོ་བ་མ་ལུས་ཀུན། །ཐེག་པ་ཆེན་པོའི་ལམ་ལ་གནས་པར་ཤོག །ཅེས་ཕུལ། གསུམ་པ་ཁྱད་པར་ཙཱ་རུའི་བཟའ་བས་མངའ་གསོལ་བ་ནི། ལྷ་བཤོས་གཙང་མ་དེ་ཉིད་ཆུས་བྲན་ནམ་མཁའ་མཛོད་ཀྱི་སྔགས་རྒྱས་བརླབས། རྟེན་གྱི་དྲུང་དུ་ཁྱོགས་ལ་བཏེག་ནས། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ་སོགས་ཀྱིས་ཕུལ། གྲུབ་ན་སྐབས་འདིར་རྒྱས་པའི་སྦྱིན་སྲེག་གི་ཆོ་གས་གནས་བྱའི་ལྷ་རྣམས་ཀྱི་ཡེ་ཤེས་སེམས་དཔའ་ཐབ་ཏུ་སྤྱན་དྲངས་ལ་དཀར་གསུམ་མངར་གསུམ་ཤིང་འབྲས་འོ་ཐུག་འབྲས་ཆན་གཙོ་བོར་གྱུར་པའི་སྲེག་རྫས་དང་ཙཱ་རུའི་ཆ་ཤས་ཀྱང་འབུལ་ཞིང༌། གཤེགས་གསོལ་གྱི་ཚེ་སླར་ཡང་རྟེན་གྱི་ཐུགས་ཀར་གཞུག་གོ། །ཇི་ལྟར་ཡང༌། མཐའ་རྟེན་བཀྲ་ཤིས་ཀྱི་མངའ་གསོལ་ནི། ཡེ་དྷརྨཱ་སོགས་དང༌། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་འདབ་མ་རྒྱས་པའི་སྤྱན་མངའ་བ། །བཀྲ་ཤིས་དང་པོ་དེས་ཀྱང་དེང་འདིར་བདེ་ལེགས་ཤོག །དེ་ཡི་ཉེ་བར་བརྟེན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་


JLAZ012_Page_0638
[མ་དཔེ་གཟིགས་ན་འདིར་གནོན།]

དགུ་རྣམས་ལ་ཞི་བྱེད་པ། །བཀྲ་ཤིས་གཉིས་པོ་དེས་ཀྱང་དེང་འདིར་བདེ་ལེགས་ཤོག །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །བཀྲ་ཤིས་གསུམ་པོ་དེས་ཀྱང་དེང་འདིར་བདེ་ལེགས་ཤོག །བསོད་ནམས་རི་བོ་བཞིན་དུ་བརྟན་པ་དང༌། །བརྒྱུད་འཛིན་ཉི་ཟླ་བཞིན་དུ་གསལ་བ་དང༌། །སྙན་པས་ནམ་མཁའ་བཞིན་དུ་ཁྱབ་པ་སྟེ། །གསུམ་པོ་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་བརྒྱད་ཅུ་ཞི་བ་དང༌། །མི་མཐུན་གནོད་པའི་ཕྱོགས་ལས་གྲོལ་བ་དང༌། །འདོད་པ་འགྲུབ་ཅིང་ཕུན་སུམ་ཚོགས་གྱུར་པའི། །བཞི་པོ་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང༌། །ཚེ་རིང་ནད་མེད་བདེ་ལེགས་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་གྱུར་པའི། །ལྔ་པོ་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་ཁྲིམས་སྲུང་བ་དང༌། །བཟོད་པ་སྒོམ་ཞིང་བརྩོན་འགྲུས་བརྩམ་པ་དང༌། །མཉམ་པར་འཇོག་ཅིང་གནས་ལུགས་རྟོགས་གྱུར་པའི། །དྲུག་པོ་དེས་ཀྱང་དེང་འདིར་བདེ་ལེགས་ཤོག །རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་སྣང་བ་མཐའ་


JLAZ012_Page_0639
[མ་དཔེ་གཟིགས་ན་འདིར་གནོན།]

ཡས་དང༌། །དོན་ཡོད་གྲུབ་ཅེས་རིགས་ལྔའི་བཀྲ་ཤིས་གང༌། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ཆེན་རྣམ་དག་ཆོས་དབྱིངས་གང་ཆེན་མཚོ། །མཁའ་འགྲོ་རིགས་ལྔ་ཡེ་ཤེས་སྤྲིན་འཕྲོ་བ། །སྣང་སྲིད་རྣམ་དག་ལྷ་དང་ལྷ་མོའི་ཞིང༌། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གསུམ་པ་རྗེས་ཀྱི་བྱ་བ་ལ་བཅུ་ལས། དང་པོ་གཏོར་མ་གཏོང་བ་ནི། ཕྱོགས་སྐྱོང་དང་འབྱུང་པོ་སྤྱི་ལ་ཕྱི་རོལ་ཏུ་ཆ་གསུམ་གྱི་ཆོ་གས་བསྔོ། འདས་གཏོར་དང༌། ཆོས་སྐྱོང་རྣམས་ཀྱི་སྐོང་བ་ཅི་ནུས་བྱའོ། །གཉིས་པ་སྲུང་མ་བསྒོ་བ་ནི། གནས་གཞི་དེའི་སྲུང་མ་དང༌། སྒོས་སུ་གཉེར་གཏད་དམིགས་བསལ་ཡོད་ན་དེའི་གཏོར་མ་ཟུང་དུ་བཤམས་པ་ཕུལ་ལ། རྡོ་རྗེ་བཀའ་ནན་གྱི་རྒྱ་བཅིངས་ཏེ། བཛྲ་རཀྵ་ཧཾཿཞེས་དང༌། ཨོཾ་བཛྲ་ས་མ་ཧ་ན་ཧ་ན་ཧཱུྃ་ཕཊཿ ཅེས་དམ་ལ་བཞག །རྡོ་རྗེའི་ཆོས་སྐྱོང་ཆེ་གེ་མོ་མ་མགོན་ལྕམ་དྲལ། འཁོར་དང་བཅས་པ་རྣམས་ཀྱིས་རྟེན་འདི་རྣམས་ཀྱི་སྲུང་མ་དང་ཡོན་བདག་གིས་ལ་འདི་དག་དངོས་དང་དཀོར་ཆ་ལ་མི་བསྲུན་པར་བགྱིད་པ་རྣམས་ལ་ཆད་པས་གཅོད་ཅིང་སྲུང་བ་དང་སྐྱོང་བའི་ཕྲིན་ལས་རྒྱུན་མི་འཆད་པར་མཛོད་ཅིག །ཅེས་གཉེར་གཏད་བྱའོ། །གསུམ་པ་དཀྱིལ་འཁོར་གྱི་ལྷ་ལ་གཏང་རག་གི་མཆོད་བསྟོད་ནི། ༈ མེ་ཏོག་མཆོད་ཕྲེང་རིང་བའམ།སྤྲིན་མཛེས་ལྡིང་ཁང་མཛེས་འབར་བ། །སྤོས་དང་སྨན་སྦྱར་བདུད་རྩིའི་སྤྲིན་ཕུང་དང༌། །གཟི་ལྡན་སྒྲོན་མེ་ཞལ་ཟས་


JLAZ012_Page_0640
[མ་དཔེ་གཟིགས་ན་འདིར་གནོན།]

རོལ་མོའི་སྤྲིན། །བསྟོད་དབྱངས་ཡན་ལག་རྒྱ་མཚོའི་སྤྲིན་གྱིས་མཆོད། །ཅེས་དང༌། དམ་ཆོས་དཀོན་མཆོག་ཐམས་ཅད་དང༌། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར།།རྒྱུན་མི་ཆད་པར་འབབ་པར་ཤོག །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་མཆོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཅེས་རོལ་མོ་བྱ། བཞི་པ་ནོངས་བཤགས་ནི། བརྗོད་མེད་དོན་བཤགས་དང༌། ཁྱད་པར་ཆོ་གའི་བྱ་བ་ནོངས་པ་ལ་དམིགས་ཏེ་ཐལ་མོ་སྦྱར་ནས། རྫོགས་སངས་རྒྱས་དང་དེ་ཡི་སྲས། །ཚངས་སོགས་ལྷ་ཡི་ཚོགས་རྣམས་ཀྱིས། །གང་དག་ཆོ་ག་མ་ཚང་བ། །དེ་དག་བཟོད་པར་མཛད་པའི་རིགས། །དབྱངས་གསལ་ལ་ཡིག་བརྒྱ་སྦྲེལ་བ་ཚར་གསུམ་བརྗོད། གྲུབ་ན་ཞི་བའི་སྦྱིན་སྲེག་ཀྱང་བྱའོ། །ལྔ་པ་ཡོན་བདག་བསྒོ་བ་ནི། སློབ་དཔོན་གྱི་མདུན་དུ་བཀྲ་ཤིས་པའི་རྫས་རྣམས་འདུ་བྱ། དེ་དང་ཉེ་བར་བསྟན་བཟང་པོ་མེ་ཏོག་གི་ཚོམ་བུ་ཅན་ལ་ཡོན་བདག་གོས་རྒྱན་བཟང་པོ་བྱས་ལ་འཁོད། ཉེ་ལོགས་སུ་རྟེན་ལ་འབུལ་རྒྱུའི་མཆོད་པ་སྣ་ལྔ་ཡང་བསྡོགས། དཔོན་སློབ་ཡོན་བདག་བཅས་པར་ཙཱ་རུའི་བཟའ་བའང་འགྲིམས་ཤིང༌། ༈ བདེ་གཤེགས་ལྷག་མ་འདི་དག་ནི། །གསོལ་ཞིག་སྡིག་པ་བྱང་བར་འགྱུར། །ཞེས་དང༌། ཁྱེད་ཀྱིས་ང་ལ་གང་གསོལ་བའི། །སྐུ་གཟུགས་དག་ནི་ཁྱད་པར་དུ། །ཇི་ལྟར་གསུངས་པར་


JLAZ012_Page_0641
[མ་དཔེ་གཟིགས་ན་འདིར་གནོན།]

རབ་གནས་པར། །དེ་དག་དོན་ནི་ངས་བྱས་ཏེ། །དེ་རྣམས་དོན་ནི་གྲུབ་ཟིན་གྱིས། །ཅི་བདེ་བར་ནི་མཆོད་པར་བྱོས། །གུས་དང་སྲི་ཞུ་ཡང་དག་གྱིས། །ཡོན་གནས་མཆོག་ལ་བསྙེན་བསྐུར་བའི། །བསོད་ནམས་དེ་ནི་བརྗོད་མི་ལངས། །རྣམ་པར་གཟིགས་ལ་སྲན་རྡོག་བདུན། །ཕུལ་བས་གཞོན་ནུ་ང་ལས་ནི། །འཁོར་ལོས་སྒྱུར་རྒྱལ་གྱུར་ལ་ལྟོས། །དེ་བཞིན་སྟོན་པས་འཇམ་དཔལ་ལ། །ང་ཡི་འཁོར་ནི་རྣམ་བཞི་ཡིས། །ད་ལྟ་ང་ལ་མཆོད་བྱས་དང༌། །མ་འོངས་པ་ན་དད་པ་ཡིས། །གཟུགས་བརྙན་རྣམས་ནི་མཆོད་པ་ལ། །ཁྱད་པར་ཅུང་ཟད་ཡོད་མ་ཡིན། །བསོད་ནམས་མཉམ་ཞིང་རྣམ་སྨིན་མཉམ། །ཞེས་གསུངས་སྙིང་ལ་ཡང་དག་ཟུངས། །ཞེས་བསྒོས་པའི་དེ་མ་ཐག་པར་ཡོན་བདག་གིས་ཀྱང་སྔར་བཤམས་པའི་མཆོད་པ་རྣམས་ལག་བསྟར་ཏེ་རྟེན་ལ་དབུལ་ཞིང་ཕྱག་བྱས་ནས་སྟན་ལ་འཁོད། དྲུག་པ་བཀྲ་ཤིས་པར་བྱ་བ་ནི། ལས་བུམ་གྱི་ཆུས་རྫས་དང་ཡོན་བདག་ལ་འཐོར་བས་བགེགས་བསྐྲད། སྟོང་པའི་ངང་ལས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བཀྲ་ཤིས་པའི་རྫས་བརྒྱད་སོ་སོའི་བྱེད་ལས་གྲུབ་པའི་རྣམ་པ་དང་ཡོན་བདག་ཀྱང་གནོད་སྦྱིན་གྱི་སྡེ་དཔོན་ཛམ་བྷ་ལར་གྱུར་པར་བསམ་ལ་མེ་ཏོག་འཐོར་ཞིང༌། དཔའ་བོ་ཆེན་པོ་གང་སྐྱེས་པར། །ཕུན་ཚོགས་དོན་ཀུན་འབྱོར་གྱུར་ཞིང༌། །དོན་གྲུབ་ཚོགས་ཀྱང་གྲུབ་པ་དེས། །ཁྱོད་ལ་བདེ་ལེགས་


JLAZ012_Page_0642
[མ་དཔེ་གཟིགས་ན་འདིར་གནོན།]

མཛད་པར་གྱུར། །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོས་ཏེ། །སེམས་ཅན་ཐམས་ཅད་རབ་དགའ་དེས། །ཁྱོད་ལ་བདེ་ལེགས་མཛད་པར་གྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པ་ལྷ་རྣམས་དང༌། །འབྱུང་པོ་ཀུན་གྱི་བདེ་ལེགས་ནི། །ཁྱོད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང༌། །ལྷ་རྣམས་ཀྱི་ནི་བསམ་པ་ཡིས། །ཁྱོད་ཀྱི་འདོད་དོན་གང་ཡིན་པའི། །དོན་དེ་དེ་རིང་འགྲུབ་གྱུར་ཅིག །ཅེས་བརྗོད་ཅིང་མེ་ཏོག་གཏོར་ནས་བཀྲ་ཤིས་ཀྱི་རྫས་རེ་རེ་བཞིན་ཡོན་བདག་ལ་གཏོད་ཅིང༌། ༈མེ་ལོང་ཡེ་ཤེས་རྒྱ་མཚོ་ཆེན་པོ་ཡིས། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི།།བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །༈ གི་ཝང་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ནས། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་ཞི་གྱུར་ཅིག །༈ ཞོ་ནི་ཀུན་གྱི་སྙིང་པོར་གྱུར་པ་ཡི། །སྙིང་པོ་རྣམ་དག་ཡེ་ཤེས་རྣམ་རྟོགས་ཏེ། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་གྱུར་ཅིག །༈དཱུརྺས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་འདི་རབ་བསྒྲུབས་


JLAZ012_Page_0643
[མ་དཔེ་གཟིགས་ན་འདིར་གནོན།]

ནས། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡིས། །བཀྲ་ཤིས་དེས་ཀྱང་ཚེ་ཡང་འཕེལ་བར་ཤོག །༈བིལྦ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་ཀུན་འགྲུབ་གྱུར་ཅིག །༈ དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་དབང་ཐོབ་གྱུར་ཅིག །༈ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ལུས་དབང་དུ་བསྡུས་ནས་ཀྱང༌། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པས། །བཀྲ་ཤིས་དེས་ཀྱང་ཆོས་སྲིད་བརྟན་གྱུར་ཅིག །༈ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་ཡིས། །མཐུ་སྟོབས་ཡོན་ཏན་ཕུན་སུམ་ཚོགས་གྱུར་པའི། །བཀྲ་ཤིས་དེས་ཀྱང་བགེགས་རྣམས་ཞི་གྱུར་ཅིག །ཅེས་པའི་མཐར་ཡོན་བདག་གིས་རྟེན་ལ་འབུལ་ཚུལ་བྱ་ཞིང༌། དེར་འཁོད་ཐམས་ཅད་ཀྱིས་ཀྱང་རེག་ནས་མཐར་ཡོན་བདག་ལ་གཏད་དོ། །འདིར་རྫས་བཤད་ཡོངས་སུ་གྲགས་པ་ལྟར་སྤྲོ་ན་དེ་ལྟར་བགྱིད་ཅིང༌། དེ་ལྟ་ནའང་ཁྱེའུ་བཀྲ་ཤིས་ཀྱི་རྩྭ་ནི་དཱུརྺ་ཡིན་པ་མདོ་ལས་མ་མཐོང༌། དེ་བཞིན་དུ་མ་སྐྱེས་དགྲའི་གླང་པོ་ནོར་སྐྱོང་


JLAZ012_Page_0644
[མ་དཔེ་གཟིགས་ན་འདིར་གནོན།]

ལྷས་བྱིན་གྱིས་སྟོན་པ་ལ་རྦད་པས་སྟོན་པའི་བྱིན་རླབས་ཀྱིས་དེའི་སེམས་ཉེ་བར་ཞི་བ་ལ་སོགས་པ་བཤད་པ་བྱེ་བྲག་པས་སྐབས་ཕྱེད་པ་སྨྲ་བ་ཡོད་ན་ལེགས་སོ། །བདུན་པ་རྟེན་ལ་མཆོད་པ་ནི། ༈ དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་པ་བླ་མེད་རྒྱ་ཆེན་རྣམས་ཀྱིས་མཆོད། །མེ་ཏོག་ཕལ་ཆེར་མེ་ཏོག་བླ་རེ་དང༌། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་དེ་དག་མཆོད། །མེ་ཏོག་སྤོས་དང་མར་མེ་ཞལ་ཟས་ཆུ། །བླ་བྲེ་འཕན་ལྡིང་གདུགས་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་རྔ་ལ་སོགས་དང༌། །ལུས་དང་ལོངས་སྤྱོད་མཁོ་དགུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །དམ་ཆོས་དཀོན་མཆོག་ཐམས་ཅད་དང༌། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་ཆད་པ་འབབ་པར་ཤོག །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་མཆོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཅེས་སྨོན་ལམ་ཡང་གདབ་བོ། །བརྒྱད་པ་དགའ་སྟོན་བྱ་བ་ནི། ཚོགས་ཀྱི་འཁོར་ལོ་ཚིམས་པ་དྲུག་ལྡན་དུ་བསྐོར་ཞིང༌། གཞན་ཡང་ཡོན་གནས་མཆོག་དམན་ཐམས་ཅད་ལ་བཟའ་བཏུང་གི་རྙེད་པས་ཚིམ་པར་བྱ། སློབ་དཔོན་དང་བཟོ་དེའི་གྲོགས་སུ་གྱུར་པ་རྣམས་ལའང་དྲིན་དུ་གཟོ་


JLAZ012_Page_0645
[མ་དཔེ་གཟིགས་ན་འདིར་གནོན།]

བའི་བསྟི་སྟངས་དང་རོལ་མོར་བགྱིད་པས་མཚོན་དགའ་སྟོན་རྒྱ་ཆེན་པོ་བགྱིད་པར་བཤད་པ་ཡིན་ནོ། །དགུ་པ་བསྔོ་བ་ནི། ནང་པ་སངས་རྒྱས་པའི་ཁྱད་ཆོས་ཏེ་ལས་དོན་ཡོད་པར་བྱས་པའི་ཆེད་དུ་བཟང་པོ་བཞི་ལྡན་གྱི་བསྔོ་བའང་ཁྲི་བརྒྱད་སྟོང་པར། ཕ་རོལ་ཏུ་ཕྱིན་པ་ལྔ་པོ་དང་ནམ་ཤེས་རབ་ཀྱི་ཕ་རོལ་ཏུ་ཕྱིན་པས་ཟིན་པ་དེའི་ཚེ་ཐར་པའི་གྲོང་ཁྱེར་དུ་འཇུག་པར་འགྱུར་རོ། །ཞེས་གསུངས་པས་འཁོར་གསུམ་ཡོངས་སུ་དག་པའི་བསྔོ་བས་རྒྱས་གདབ་ཅིང་སླར་ཡང་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད། བཟང་པོ་སྤྱོད་པ་ལ་སོགས་པའི་སྨོན་ལམ་རྣམ་དག་ཀྱང་གདབ་བོ། །བཅུ་པ་ལས་ཀྱི་རྗེས་ཆོག་ནི། རྡུལ་ཚོན་གྱི་ཆོ་ག་དང་འབྲེལ་ན་དེའི་བྱ་བ་སོགས་མཐའ་རྒྱས་རྣམས་དཀྱིལ་འཁོར་གྱི་ལས་གཞུང་བཞིན་དུ་བྱ་བ་ཡིན་ནོ། །དེ་ལྟར་དངོས་སྟ་ཉིན་གཉིས་མའི། །རབ་གནས་ཉིན་ཞག་མང་སྤྲེལ་ན། །ཐོག་མའི་ཉི་མ་གཉིས་པ་ཡི། །དངོས་གཞིའི་བརྟན་བཞུགས་གསོལ་གདབ་རྗེས། །ཕྱི་དྲོ་སྟ་གོན་ཆོ་ག་བྱ། །དེ་ལྟར་སྦྲེལ་ནས་ཉིན་ཐ་མར། །སྟ་གོན་གྱི་ནི་མལ་དག་ཏུ། །མངའ་དབུལ་ལ་སོགས་རྗེས་ཆོག་རྣམས། །དཀྱུས་སུ་བྱས་པས་འགྲུབ་པ་ཡིན། །ཉིན་ཆོག་ལ་ནི་བུམ་པ་གཙོ་ལས་ཁྲུས།གསུམ། །བཀོད་ལ་དཀྱིལ་འཁོར་བསྒྲུབ་མཆོད་དང༌། །རྟེན་སྦྱོང་བཀྲུ་ཕྱི་བསྐྱེད་སྤྱན་དྲངས། །དགུག་དང་རྒྱས་གདབ་སོང་བའི་རྗེས། །དངོས་གཞིའི་དབང་བསྐུར་མཆོད་བསྟོད་དང༌། །སྤྱན་དབྱེ་རྟེན་བསྒྱུར་རབ་གནས་སོགས། །དཀྱུས་བཞིན་བྱས་པས་ཚང་བའོ། །ཤིན་ཏུ་བསྡུ་ན་བསྐྱེད་བཟླས་མཐར། །བགེགས་བསྐྲད་དམ་ཚིག་བསྐྱེད་སྤྱན་དྲངས། །དགུག་གཞུག་རྒྱས་གདབ་དབང་བསྐུར་དང༌། །སྤྱན་དབྱེ་མཆོད་བསྟོད་བརྟན་བཞུགས་མཐར། །ཤིས་པ་བརྗོད་པས་འགྲུབ་པ་


JLAZ012_Page_0646
[མ་དཔེ་གཟིགས་ན་འདིར་གནོན།]

སྟེ། །མདོ་ལུགས་རྟེན་འབྲེལ་རབ་གནས་ལས། །སྔགས་ཀྱི་ཆོ་ག་འདི་ཡང་འཕགས། །སྤྱིར་ནི་རྟེན་བསྐྱེད་དགུག་བསྟིམ་དང༌། །དབང་བསྐུར་བརྟན་བཞུགས་བཞི་པོ་འདི། །རབ་གནས་ཉིད་ཀྱི་ངོ་བོ་ཡིན། །དེ་ལ་ཡི་གེ་ནོར་བའི་ཕྲེང༌། །མང་དུ་མཐོང་བས་འདི་བྱས་སོ། །ཅིའི་སླད་ཞེ་ན་སྟོན་པའི་བཀས། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང༌། །མཐའ་འཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང༌། །མུ་སྟེགས་བྱོལ་སོང་སོགས་མི་མཐོང༌། །དེ་ཕྱིར་སྐུ་གཟུགས་སྤྲུལ་པ་ཡིན། །ཞེས་གསུངས་དེ་ལ་རབ་གནས་པའི། །ཕན་ཡོན་བསམ་གྱིས་མི་ཁྱབ་ཀྱང༌། །ཆོ་ག་ནོར་ན་ནོངས་པའི་ཚུལ། །རྒྱུད་ལ་བཤད་པ་སྔར་སྨོས་ཤིང༌། །ཇི་བཞིན་གྲུབ་པའི་ཕན་ཡོན་ནི། །རྒྱ་ཆེར་བཤད་མོད་གསང་སྙིང་ལས། །ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིག་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉམས་མིན། །ཞེས་གསུངས་སོ། །རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ། རྒྱལ་བའི་བསྟན་པ་རིན་པོ་ཆེ་མི་ནུབ་པར་བྱ་བའི་རྟེན་འབྲེལ་དང༌། སེམས་ཅན་རྣམས་ཀྱི་བསོད་ནམས་རྒྱ་ཆེན་པོ་འཕེལ་ཞིང༌། འཇིག་རྟེན་བདེ་བའི་ཆེད། བཀྲ་ཤིས་སྲོང་བཙན་བང་སོར་རྟེན་བཞེངས་ཀྱི་རིམ་པ་བགྱིས་པའི་ཚེ་རིག་པ་འཛིན་པ་མཁྱེན་བརྩེའི་ལྷས་སྦྱར་བའོ།། །།

སྔོན་འགྲོ་དངོས་གཞིའི་ལམ་བསྡུས།


JLAZ012_Page_0648
[མ་དཔེ་གཟིགས་ན་འདིར་གནོན།]

སྔོན་འགྲོ་དངོས་གཞིའི་ལམ་བསྡུས་བཞུགས། །སེམས་ཅན་ཐམས་ཅད་སངས་རྒྱས་འཐོབ་བྱའི་ཕྱིར། །དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །ན་མ་པཱུ་ཛ་ཧོ། བཛྲ་ས་ཏྭ་ཨཿ དགེ་ལ་ཡི་རང་ཆོས་འཁོར་བསྐོར་བཞིན་བཞུགས། །ཀུན་ཏུ་བཟང་པོའི་ཡོངས་བསྔོ་འགྲུབ་པར་ཤོག །ཆོས་ཉིད་མི་འགྱུར་སྣང་བ་མཐས་ཡས་ནི། །འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས། །ཨོ་རྒྱན་པཎ་ཆེན་རྫུས་སྐྱེས་སྤྲུལ་པའི་སྐུར། ། གསོལ་བ་འདེབས་སོ་ནད་གདོན་བར་ཆད་སོལ། །འཆི་བར་གནད་གཅོད་སྡུག་བསྔལ་མི་འབྱུང་ཞིང་། །ཚེ་འདིའི་སྣང་བ་ནུབ་པར་གྱུར་མ་ཐག །བདེ་བ་ཅན་དང་རི་བོ་པོ་ཏ་ལ། །ཟངས་མདོག་དཔལ་གྱི་རི་བོར་སྐྱེ་བར་ཤོག །ཨོཾ་མ་ཎི་པདྨེ་ཧཱུཾ། ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་བར་མེད་དུ་བཟླའོ། །རྒན་རྒོན་རྣམས་ཀྱི་དོན་དུ་རྒྱལ་བའི་མྱུ་གུ་མཁྱེན་བརྩེའི་ལྷས་སོ།། །།ཆབ་གཏོར་རྒྱས་པའི་སྐབས། ལན་ཆགས་བུ་ལོན་འཁོར་བའི་དོན་ལ། སྤྱིར་དྲི་མ་དང་། སྒྲིབ་གཉིས་ལ་སོགས་པ་ནི། རིངས་ནས་དག་བྱ་ཡིན་པས་བྱང་དག་གི་སྒྲ་འཇུག་ལ། ཕ་མའི་དྲིན་ལན་དང་ལན་ཆགས་བུ་ལོན་ལ་སོགས་པ་ནི་གཞན་ལ་ལན་སློན་པ་ཡིན་པས་འཁོར་བའི་སྒྲ་སྟེ། དཔེར་ན་མུ་མ་འབྲེལ་བའམ་རྒྱུན་ཆད་པ་མེད་པར་ལན་ཆགས་


JLAZ012_Page_0649
[མ་དཔེ་གཟིགས་ན་འདིར་གནོན།]

ཁ་མ་འཁོར་བ་མེད་པའི་དོན་ཏེ། འཇིག་རྟེན་པའི་ཁ་སྐད་ཙམ་ལའང་ཕ་མའི་དྲིན་ལན་འཁོར་ཞེས་སྨྲ་བའི་ཕྱིར་རོ། །སྤྱིར་ཆབ་གཏོར་གྱི་ཁུངས་ནི་བཀའ་འགྱུར་ནང་ནས་གཟུགས་ལེགས་ཞེས་བྱ་བ་བའི་གཟུངས་དང་ཡེ་ཤེས་སྐར་མདའི་སྙིང་པོ། ཡི་དྭགས་མོ་ཁ་འབར་མ་དབུགས་ཕྱུང་བའི་གཏོར་ཆོག་དང་། ཁ་ལས་མེ་འབར་མ་ལ་སྐྱབས་སྦྱིན་པའི་གཟུངས་དང་། འཇུར་གེགས་ཞེས་བྱ་བའི་གཟུངས་རྣམས་ལས། ཁ་ལས་མེ་འབར་མའི་གཟུངས་ལས་མཚན་བཞི་བཤད་ཅིང་། འགའ་ཞིག་སྤྱི་ལ་སོགས་པར་དེ་བཞིན་གཤེགས་པ་བཞི་པོ་སྒོམ་ཟེར་བའང་བཀའ་དངོས་བསྟན་ལ་ནི་མཚན་བརྗོད་པའི་བྱིན་རླབས་དང་ཕན་ཡོན་ཙམ་ལས་མངོན་རྟོགས་དང་སྒོམ་ཡུལ་མ་བཤད། དེ་བཞིན་དུ་མགྲོན་བཞིའི་ཐ་སྙད་ཀྱང་མ་བཤད་མོད། གཏོར་མའི་རིང་ལུགས་མི་མཐུན་པ་མང་པོ་ནི་བོད་འདིར་རང་སྟོངས་ཀྱི་བློའི་འཇུག་པ་དང་མཐུན་པར་བཤད་འབའ་ཞིག་ཡིན་ནོ། །ཞེས་པའང་ལན་ཆགས་བུ་ལོན་ལ་འཁོར་སྒྲ་མི་འཐད་ཟེར་བའི་བླུན་གཏམ་ཟློག་ཕྱིར་རོ།། །།

སྐྱབས་སྡོམ་འབོག་ཆོག་མཐོ་རིས་འཁྲི་ཤིང་།


JLAZ012_Page_0650
[མ་དཔེ་གཟིགས་ན་འདིར་གནོན།]

སྐྱབས་སྡོམ་འབོག་ཆོག་མཐོ་རིས་འཁྲི་ཤིང་ཞེས་བྱ་བ་བཞུགས།


JLAZ012_Page_0651
[མ་དཔེ་གཟིགས་ན་འདིར་གནོན།]

ཐམས་ཅད་མཁྱེན་པ་ལ་ཕྱག་འཚལ་ལོ། འདིར་ཡོན་ཏན་ཐམས་ཅད་ཀྱི་རྟེན་གཞི་སྐྱབས་འགྲོའི་སྡོམ་པ་འབོགས་ན། །གནས་གཙང་མར་དཀོན་མཆོག་གསུམ་གྱི་རྟེན་དང་། །མཆོད་པ་བཟང་པོ་བཤམ། ཞུ་བ་པོས་ཐོག་མར་རྟེན་དང་། །དེ་ནས་བླ་མ་ལ་ཕྱག་གསུམ་རེ། པུས་མོ་གཡས་པའི་རླངས་ལ་བཙུགས། ཐལ་མོ་སྦྱར་ནས་འདུག་པ་ལ། བློ་བཅོས་པ་ནི། ཁྱོད་ཀྱིས་རྙེད་པར་དཀའ་བ་དལ་བའི་རྟེན་བཟང་པོ་འདི་འདྲ་ཐོབས་པས་འཚོངས། དེ་ལ་འབྱོར་པའི་ཁྱད་པར་ཕལ་མོ་ཆེ་ཚང་བའི་སྐབས་འདིར། གཞན་འབྱོར་རྟེན་འབྲེལ་གྱི་སྒོ་བཞི་བའང་དཀོན་མཆོག་གསུམ་ལ་སྐྱབས་སུ་སོང་བ་ལས་འགྲིག་པ་ཡིན། ཡོན་ཏན་ཐམས་ཅད་ཀྱི་རྟེན་གཞི་ལྷག་པ་ཚུལ་


JLAZ012_Page_0652
[མ་དཔེ་གཟིགས་ན་འདིར་གནོན།]

ཁྲིམས་ཀྱི་བསླབ་པ་རིན་པོ་ཆེའང་ཐོག་མར་དཀོན་མཆོག་གསུམ་ལ་སྐྱབས་སུ་སོང་བའི་རྟེན་ཅན་ལས་གཞན་གྱིས་དབང་དུ་མི་འགྱུར་བས་འདི་ནི་ལམ་གྱི་རྨང་རྡོ་ལྟ་བུར་གཅེས་ལ། དེ་ལྟ་བུའི་སྐྱབས་འགྲོའི་སྡོམ་པའང་དབང་པོར་དགེ་བའི་གཤེས་གཉེན་ལས་བླངས་ན། རང་ངོ་ལ་ལྟོས་པའི་ངོ་ཚ་དང་། གཞན་ངོ་ལ་བརྟེན་པའི་ཁྲེལ་ཡོད་ཀྱི་ཅན་དུ་འགྱུར་བ་སོགས་དགོས་པ་ཁྱད་པར་ཅན་ཡོད་པས་རང་དགར་འཇུག་པ་སྤངས་ནས་སྐྱབས་སྡོམ་ལེན་པ་ཤིན་ཏུ་གལ་ཆེའོ། ཕན་ཡོན་གྱི་སྐོ་ནས་བསམས་ན་སྐྱེས་བུའི་བློ་སྟོབས་རིམ་པ་གསུམ་ལ་ཡོན་ཏན་འཐོབ་ཚུལ་ཡང་དེ་དང་མཚུངས་ཏེ། ཐ་ན་གྲུབ་མཐའ་ལམ་ཞུགས་པའི་གང་ཟག་གིས་དཀོན་མཆོག་ལ་སྐྱབས་སུ་


JLAZ012_Page_0653
[མ་དཔེ་གཟིགས་ན་འདིར་གནོན།]

སོང་བས་ཀྱང་ངན་སོང་གསུམ་དང་། བར་མ་དོ། མེ་ཆུ། གཅན་གཟན། རྒྱལ་པོའི་ཆད་པ། ནད་གདོན་ལ་སོགས་པ་སྡུག་བསྔལ་ཉི་ཚེ་བའི་འཇིགས་པ་ལས་སྐྱོབ་པའང་མངོན་སུམ་པས་ན། སྐྱབས་སོང་འདི་ལ་གཟུགས་མཆི་ན། ནམ་མཁའ་དག་ཀྱང་སྣོད་དུ་ཆུང་། རྒྱ་མཚོ་ཆེན་པོ་ཆུ་ཡི་གཏེར། ཕུལ་ལ་གཞལ་བས་ཟད་མི་འགྱུར། ཅེས་མང་ཚིག་ཏུ་འདོམས་པ་ཡིན་ནོ། དེ་ལྟར་སྐྱོབ་པ་འང་གསུམ་ལ་ཡོན་ཏན་ཚད་མེད་པས་ཡིན་ཏེ། དཀོན་མཆོག་གསུམ་རྗེས་སུ་དྲན་པ་ལས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་སོགས། དཀོན་མཆོག་རྗེས་དྲན་བཏོན་ནས་དེའི་དོན་འཕགས་པའི་བསྟན་བཅོས་དགོངས་འགྲེལ་དང་བཅས་པས་ཅུང་ཟད་བསྙན་ན། བཤེས་སྤྲིང་ལས། ཐར་པ་བདག་ལ་རག་ལས་འདིལ་ནི། གཞན་གྱིས་གྲོགས་བགྱིར་ཅི་ཡང་མ་མཆིས་ཀྱི། ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། བདེན་པ་རྣམ་པ་བཞི་ལ་འབད་པར་མཛོད། ལྷག་པའི་ཚུལ་ཁྲིམས་ལྷག་པའི་ཤེས་རབ་དང་། ལྷག་པའི་སེམས་པ་རྟག་ཏུ་བསླབ་པར་བགྱི། བསླབ་པ་བརྒྱ་རྩ་ལྔ་བཅུ་ལྷག་ཅིག་ཀྱང་། གསུམ་པོ་དེ་ནང་ཡང་དག་འདུ་བར་འགྱུར། ཅེས་གསུངས་པ་བཞིན། ཐར་པ་ནི་གྲོགས་ཀྱིས་བསྟང་བའི་ཁ་ན་རག་ལུས་པ་མ་ཡིན་པར་བདག་འབའ་ཞིག་གི་ལུང་དང་། རིག་


JLAZ012_Page_0654
[མ་དཔེ་གཟིགས་ན་འདིར་གནོན།]

པ་དང་། གཏན་ཚིགས་དང་། དཔྱད་བཟོད་པ་དང་། ལྕག་པ་དང་མཐུན་པའི་མང་དུ་ཐོས་པ། ཉམས་པ། བཅོམ་པ། ལྟུང་བ། ཕམ་པར་གྱུར་པ་མེད་པའི་ཚུལ་ཁྲིམས། ངེས་པར་འབྱེད་པའི་ཆ་དང་མཐུན་པའི་བསམ་གཏན་རྣམས་དང་ལྡན་པས་འཕགས་པའི་བདེན་པ་བཞི་ལ་དམིགས་པར་བྱའོ། བཞི་གང་ཞེ་ན། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་གྱི་བདེན་པ་བཞིའོ། དང་པོ་ནི། ཉེ་བར་ལེན་པའི་ཕུང་པོ་ལྔའི་མཚན་ཉིད་ཀྱི་སྐྱེ་བ་གང་ཡིན་པ་དེ་ནི་སྡུག་བསྔལ་གྱི་བདེན་པའོ། གཉིས་པ་ནི། ཡང་འབྱུང་བའི་སྲེད་པ། དགའ་བའི་འདོད་ཆགས་དང་ལྷན་ཅིག་པ། དེ་དང་དེར་མངོན་པར་དགའ་བ་གང་ཡིན་པ་སྟེ། འདི་ལས་སྡུག་བསྔལ་ཀུན་འབྱུང་བས་ན་ཀུན་འབྱུང་སྟེ་སྡུག་བསྔལ་གྱི་རྒྱུར་བསྟན་ནོ། གསུམ་པ་ནི། སྲེད་པ་དེ་ཉིད་གཏན་འགོག་པ་དང་། རྣམ་པར་ཞི་བ་གང་ཡིན་པ་དེ་ནི་ཐར་པའོ། བཞི་པ་ནི། མྱ་ངན་ལས་འདས་པ་དེ་འཐོབ་པར་བྱེད་པའི་ལམ་གྱི་བདེན་པ་འཕགས་པའི་ལམ་ཡན་ལག་བརྒྱད་དེ་ཡང་དག་པའི་ལྟ་བ་ནི་ཟག་པ་མེད་པའི་ཤེས་རབ་བོ། ཡང་དག་པའི་འཚོ་བ་གསགས་ལ་སོགས་ལོག་པའི་འཚོ་བ་ལྔ་སྤངས་བའོ། ཡང་དག་པའི་རྩོལ་བ་ནི་བརྩོན་འགྲུས་བརྩམ་པའོ། ཡང་དག་པའིདྲན་


JLAZ012_Page_0655
[མ་དཔེ་གཟིགས་ན་འདིར་གནོན།]

པ་ནི་དམིགས་པ་མ་བརྗེད་པའོ། །ཡང་དག་པའི་རིང་ངེ་འཛིན་ནི་བསམ་གཏན་བཞི་བའོ། ཡང་དག་པའི་ངག་ནི་དགེ་བའི་ལས་ཀྱི་ལམ་བཞིའོ། །ཡང་དག་པའི་ལས་མཐའ་ནི་ལུས་ཀྱི་མི་དགེ་བའི་ལས་ལམ་སྤོང་པའི་རང་བཞིན་གསུམ་མོ། ཡང་དག་པའི་རྟོག་པ་ནི་གནོད་སེམས་མེད་པ་དང་། ངེས་པར་འབྱུང་བའི་རྟོག་པ་ལ་སོགས་དགེ་བའི་རྟོག་པ་རྣམ་པ་དུ་མའོ། །དེ་བཞིན་དུ་ལྷག་པའི་ཚུལ་ནི་མྱ་ངན་ལས་འདའ་བ་ལོངས་སུ་བསྔོ་བ་གང་ཡིན་པའོ། ལྷག་པའི་སེམས་ནི་འཕགས་པའི་ལམ་གྱི་རྟེན་བསམ་གཏན་བཞི་པའོ། ལྷག་པའི་ཤེས་རབ་ནི་ངེས་པར་འབྱེད་པའི་ཆ་དང་མཐུན་པའོ། བསླབ་པ་གསུམ་པོ་འདིའི་ནང་དུ་བསླབ་པ་བརྒྱ་ལྔ་བཅུ་ལྷག་ཅིག་འདུ་བར་འགྱུར་བ་དེ་ལ་འབད་པས་བསླབ་པར་བྱེད་པ་གང་ཞིག་ལ་འཕགས་པའི་དགེ་འདུན་ཞེས་བྱའོ། དེ་ལྟ་བུའི་སྤངས་རྟོགས་ཕུན་སུམ་ཚོགས་པའི་ཡོན་ཏན་རྒྱ་མཚོའི་བདག་ཉིད་ཆེན་པོ་དཀོན་ཅོག་གསུམ་སྤྲིན་ཕུང་གཏི་བས་པ་ཙམ་བྱོན་པ་རང་གི་མདུན་དུ་བཞུགས་པ་ལ་སྙིང་ཁོང་རུས་པའི་གཏིང་ནས་སྐྱབས་སུ་འགྲོ་བའི་བསམ་པས་འདིའི་རྗེས་ཟློས་མཛོད། ཅེས་བརྡ་སྦྱར་ལ། བཙུན་པ་དགོངས་སུ་གསོལ། བདག་མིང་འདི་ཞེས་བྱ་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་འཆི་འོ། འདོ་


JLAZ012_Page_0656
[མ་དཔེ་གཟིགས་ན་འདིར་གནོན།]

ཆགས་དང་བྲལ་བ་རྣམས་ཀྱི་མཆོག ཆོས་ལ་སྐྱབས་སུ་མཆིའོ། ཚོགས་ཀྱི་རྣམས་ཀྱི་མཆོག དགེ་འདུན་ལ་སྐྱབས་སུ་མཆིའོ། བདག་དུས་འདི་ནས་བཟུང་སྟེ་ཇི་སྲིད་མཚོའི་བར་དུ། སྐྱབས་སུ་འཛིན་པའི་དགེ་བསྙེན་དུ་བཙུན་པས་གཟུང་དུ་གསོལ། ཞེས་ལན་གསུམ་ཟློས་ནས། སློབ་དཔོན་གྱིས། ཐབས་ཡིན་ནོ། སློབ་མས་ལེགས་སོ་ཞེས་བརྗོད། དེ་ལྟར་བརྗོད་པ་གསུམ་གྱིས་སྐྱབས་སྡོམ་ལེགས་པར་ཐོབ་ནས་བསླབ་བྱ་ལ་གསུམ་ལས། དང་པོ་དགག་པའི་བསླབ་བྱ་ནི། མྱ་ངན་ལས་འདས་པ་ཆེན་པོ་མདོ་ལས། གང་ཞིག་སངས་རྒྱས་སྐྱབས་འགྲོ་བ། དེ་ནི་ཡང་དག་དགེ་བསྙེན་ཏེ། ནམ་དུ་ཡང་ནི་ལྟ་གཞན་ལ། སྐྱབས་སུ་སོང་བ་མ་ཡིན་ནོ། དམ་པའི་ཆོས་ལ་སྐྱབས་འགྲོ་བ། འཚེ་ཞིང་གནོད་པའི་སེམས་དང་བྲལ། དགེ་འདུན་ལ་ཡང་སྐྱབས་འགྲོ་བ། མུ་སྟེགས་གཞན་ལ་ཕྱོགས་མི་བྱེད། ཅེས་གསུངས་པས། སངས་རྒྱས་ལ་སྐྱབས་སུ་སོང་ནས། འཇིག་རྟེན་པའི་ལྷ་ལ་སྐྱབས་སུ་མི་འགྲོ་ཞིང་ཕྱག་མི་འཚལ། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤང་། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་དང་མི་འགྲོགས། གཉིས་པ་བསྒྲུབ་པའི་བསླབ་བྱ་ནི། རྒྱས་སྲས་དྲི་མེད་ཀྱིས། དེ་དག་གཟུགས་ལའང་དད་པས་རབ་མཆོད་ཅིང་། ཉིན་མཚན་རྗེས་དྲན་རྟག་པར་སྐྱབས་སུ་འགྲོ། ཞེས་གསུངས་པས་སངས་རྒྱས་ལ་སྐྱབས་སུ་སོང་ནས་དེ་བཞིན་གཤེགས་པའི་སྐུ་གཟུགས་ཀྱི་རྣམ་པ་


JLAZ012_Page_0657
[མ་དཔེ་གཟིགས་ན་འདིར་གནོན།]

ཙམ་ལའང་མི་སྨན་ཅིང་། གྲིབ་མ་ལ་མི་འའགོམ། མཆོད་པ་དང་བསྟི་ལྟར་བྱ། ཆོས་ལ་སྐྱབས་སུ་སོང་བས་དེ་ཉིད་ཀྱི་མི་གེའི་གཟུགས་སུ་གནས་པ་གསུང་རབ་ཚིགས་བཞི་པ་གཅིག་ལའང་གུས་པ་བླ་ལྷག་བསྐྱེད་ཅིང་ལི་གེ་འབྲུ་གཅིག་ལའང་མི་འགོང་། དགེ་འདུན་ལ་སྐྱབས་སུ་སོང་ནས། དེ་ཉིད་ཀྱི་རྟེན་རབ་ཏུ་བྱུང་བ་ནས་སེར་མོའི་གོས་ཅན་ཡན་ཆད་ལ་བཀུར་སྟི་བྱ། གསུམ་པ་ཆ་མཐུན་གྱི་བསླབ་བྱ་ནི། གཞི་བསྡུ་བར། སྐྱས་བུ་དམ་པ་ལ་བརྟེན་པ་དང་། དམ་པའི་ཆོས་ཉན་པ་དང་། དགེ་འདུན་དང་རྗེས་སུ་མཐུན་པ་ནི་སྐྱབས་སུ་འགྲོ་བའོ། ཞེས་བཤད་པས་སྐྱེས་བུ་དམ་པ་ལ་བརྟེན། ཆོས་ཀྱི་རྗེས་སུ་འཇུག །ཆོས་དང་རྗེས་སུ་མཐུན་པའི་སྤྱོད་པ་ལ་བསླབ་ཅིང་། བཟའ་བཏུང་གི་ཕུང་དང་པོས་དཀོན་མཆོག་མཆོད་པ་དང་། ཉིན་མཚན་འཁོར་མོའམ། དུས་དྲུག་གམ། གསུམ་སམ། ཐ་ནའང་ངས་ན་གཅིག་ཏུ་དཀོན་མཆོག་གི་ཡོན་ཏན་དྲན་པས་སྐྱབས་སུ་འགྲོ་བ་རྣམས་ལ་བརྩོན་པར་གྱིས་ཤིག །ཅེས་བརྗོད་ལ་ཕྱག་གསུམ་འཚལ་དུ་བཅུག་ནས་དགེ་བ་བསྔོ། ཚུལ་འདི་ལྟ་བུའི་ཆོ་གར་བརྟེན་པའི་ཁྱིམ་པ་དག་ལའང་བསོད་ནམས་དཔག་ཏུ་མེད་པ་ཐོབ་ན། སྙིགས་མའི་དུས་ན་གཙུག་སྐྲར་སྤུ་བཞིན་དུ་བྲེགས་ནས་སེར་མོའི་ཕྱོགས་ལ་བརྟེན་ཅིང་བརྟེན་དུ་འཇུག་པ་རྣམས་ལ་སྡོམ་པ་སམ་བསྡམས་པ་ལམ་དང་བྲལ་བའི་ཕྱོགས་མཐུན་ཙམ་སྟོན་པའི་ལྷག་བསམ་གྱི་བློས་རང་བྱུང་རྡོ་རྗེས་དཔལ་ལྡན་པདྨ་འོད་གླིང་དུ་སྦྱར་བའོ།། །།

ཆོས་སྤྱོད་བསྟན་པ་ཡོངས་རྫོགས།


JLAZ012_Page_0658
[མ་དཔེ་གཟིགས་ན་འདིར་གནོན།]

ཆོས་སྤྱོད་བསྟན་པ་ཡོངས་རྫོགས་ཞེས་བྱ་བ་བཞུགས། །


JLAZ012_Page_0659
[མ་དཔེ་གཟིགས་ན་འདིར་གནོན།]

སྔགས་ཀྱི་ལམ་ཞུགས་རྣམས་ཀྱི་ཐུན་མོང་མ་ཡིན་པ་དང་འབྲེལ་བའི་ཆོས་སྤྱོད་ལ་དང་པོ་ངག་བྱིན་བརླབ་ནི། ཨོཾ་ཨཱཿཧཱུྃ། ལྕེ་དབང་རཾ་ཡིག་ལས་བྱུང་མེ་བསྲེགས་ནས། །འོད་དམར་རྣམ་པའི་རྡོ་རྗེ་རྩེ་གསུམ་སྦུབས། །ཨཱ་ལི་ཀཱ་ལི་མཐར་བསྐོར་རྟེན་འབྲེལ་སྙིང༌། །མུ་ཏིག་ཕྲེང་བ་ལྟ་བུའི་ཡིག་འབྲུ་ལས། །འོད་འཕྲོས་རྒྱལ་བ་སྲས་བཅས་མཆོད་པས་མཉེས། །སླར་འདུས་ངག་སྒྲིབ་དག་ནས་གསུང་རྡོ་རྗེའི། །བྱིན་རླབས་དངོས་གྲུབ་ཐམས་ཅད་ཐོབ་པར་བསམ། །ཨོཾ་ཨ་ཨཱཿཨི་ཨཱིཿརྀ་རཱྀཿལྀ་ལཱྀཿཨེ་ཨཻཿཨོ་ཨཽཿཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ༔ ཨོཾ་ཡེ་དྷརྨཱ་ཧེ་ཏུ་པྲ་བྷ་ཝ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་


JLAZ012_Page_0660
[མ་དཔེ་གཟིགས་ན་འདིར་གནོན།]

ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿསྭ་ཧཱ། ལན་བདུན་རེ་བརྗོད། གཉིས་པ་བླ་མ་རྒྱང་འབོད་ནི། ཀུན་བཟང་རྡོར་སེམས་དགའ་རབ་ཤྲཱི་སིང༌། །པདྨ་ཀཱ་ར་རྗེ་འབངས་ཉི་ཤུ་ལྔ། །སོ་ཟུར་ནུབ་དང་གཏེར་སྟོནབརྒྱ་རྩ་སོགས། །བཀའ་གཏེར་བླ་མ་རྣམས་ལ་གསོལ་བ་འདེབས། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང༌། །ཐུགས་རྗེས་ལུང་རྟོགས་མཉམ་པའི་མཐུ་མངའ་ཡང༌། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྫོགས་པའི་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །ཤེས་བྱ་ཀུན་མཁྱེན༷་འགྲོ་ལ་རྗེས་བརྩེ༷འི་གཏེར། །དྲི་མེད་འོ༷ད་ཟེ༷ར་ཡང་སྤྲུལ་ཐུགས་གཏེར་མཛོད། །


JLAZ012_Page_0661
[མ་དཔེ་གཟིགས་ན་འདིར་གནོན།]

འོད་གསལ་ཀློང་ཆེན་ནམ་མཁའི་རྣལ་འབྱོར་པ། །འཇིགས་མེད་གླིང་པའི་ཞབས་ལ་གསོལ་བ་འདེབས། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མའི་སྐུ་གསུང་ཐུགས་ལ་འདུད། །འདྲེན་པ་རྣམས་ཀྱིས་ཡོངས་སྤངས་ཤིང༌། །ངན་འགྲོའི་གཡང་སར་ཕྱོགས་པ་བདག།།ཐར་བའི་ལམ་དང་རབ་སྤྲོད་པའི། །དེད་དཔོན་ཆེན་པོ་ཁྱོད་ལ་འདུད། །གནས་དང་གནས་མིན་མི་ཤེས་ཤིང༌། །ལམ་དང་ལམ་མིན་གྱི་ནར་འཕྱན། །མུན་པ་ལས་ཀྱང་མུན་ནག་ཅན། །བདག་ལྟའི་སྒྲོན་མ་ཁྱོད་ལ་བསྟོད། །གང་སྐུ་མཐོང་བས་སྣང་བ་འགྱུར། །ཞི་བར་གཟིམས་རྒྱན་སྟུག་པོ་བཀོད་པ་ལས། འཇམ་དཔལ་ཕྱོགས་གང་ན་ཆོས་སྨྲ་བ་དེ་འདུག་གམ། དེའི་རུས་བུའམ། རོ་བམ་པ་ཞིག་མཐོང་ན་ཡང་མཚམས་མེད་པའི་ལས་ལྔ་རྣམ་པར་བྱང་བར་འགྱུར་རོ། །ཞེས་སོ། །པའི་སྙིགས་མས་ཀྱང༌། །མཚམས་མེད་བྱང་ཞེས་མདོ་ལས་གསུངས། །འབྲེལ་ཚད་དོན་ལྡན་ཆེན་པོར་འདུད། །ཁྱེད་གསུང་ཐོས་པས་བླང་དོར་ཤེས། །ཉེས་སྤྱོད་ཆེན་པོའི་གཡང་ལས་སྐྱོབ། །འགོག་ལམ་བདེ་པའི་ངོ་བོ་ཉིད། །ཐོས་གྲོལ་ཆེན་པོའི་དབྱངས་ལ་བསྟོད། །བདག་གིས་འབད་ཀྱང་མི་ཐར་བ། །ཁྱེད་ཐུགས་གཏད་པས་ཡུད་ལ་སྨིན། ། མོས་གུས་ཐོབ་ན་རྟོགས་པ་འཆར། །སྤྲོས་བྲལ་བསམ་མི་ཁྱབ་ལ་དུ་འདུད། །གྲངས་མེད་གསུམ་དུ་དཀའ་ཐུབ་


JLAZ012_Page_0662
[མ་དཔེ་གཟིགས་ན་འདིར་གནོན།]

ཀྱི། གདུང་བས་དབང་པོ་ཚར་བཅད་ཀྱང༌། །ཐོབ་པར་དཀའ་བའི་རྡོ་རྗེ་སེམས། །མ་ནོར་མངོན་སུམ་སྟོན་ལ་འདུད། །བླ་མ་སངས་རྒྱས་རིན་པོ་ཆེ། །བདག་ལ་རེས་གཞན་ན་མེད། །ཐུགས་རྗེའི་སྤྱན་གྱིས་གཟིགས་མཛོད་ལ། །འཁོར་བའི་མཚོ་ལས་བསྒྲལ་དུ་གསོལ། །ཚེ་འདིའི་ལེགས་པ་ཀུན་འགྲུབ་ཅིང༌། །གེགས་དང་བར་ཆད་མེད་པ་དང༌། །འཆི་ཁར་ཟབ་མོའི་འོད་གསལ་ཟིན། །བར་དོའི་འཕྲང་ལས་སྒྲོལ་བར་མཛོད། །ལུས་དང་ངག་ཡིད་རྩོམ་པ་ཀུན། །རྟག་ཏུ་གཞན་ལ་ཕན་པ་དང༌། ། རྐྱེན་རྣམས་བྱང་ཆུབ་ལམ་མཆོག་ཏུ། །དེ་རིང་ཉིད་ནས་བསྒྱུར་དུ་གསོལ། །བདག་གིས་འབད་ཀྱང་ཐར་བར་དཀའ། །མགོན་པོ་ཁྱེད་ཀྱི་ཐུགས་རྗེའི་གྲུས། །མགོན་མེད་བདག་དང་འགྲོ་བ་ཀུན། །ཐར་བའི་གླིང་དུ་ཕྱིན་པར་མཛོད། །གང་དག་བདག་ལ་དད་གྱུར་ཏམ། །སྨོད་དམ་སྐུར་བ་འདེབས་ཀྱང་རུང༌། །དེ་དག་སྡིག་ཟད་ཉོན་མོངས་མེད། །སྲིད་པའི་ཆུ་བོ་སྤང་བར་ཤོག། ནམ་ཞིག་བདག་གི་མིང་ཙམ་གྱིས། །འགྲོ་བའི་འདོད་དགུ་རབ་འགྲུབ་ཅིང༌། །ཕྱོགས་བཅུ་གང་བའི་ཞིང་རྣམས་སུ། །མཆོད་པའི་སྤྲིན་གྱི་ཆར་འབེབས་ཤོག །དགེ་བ་འདི་ཡིས་ལུས་ཅན་ཀུན། །ཐམས་ཅད་སྲིད་ལས་རྣམ་གྲོལ་ནས། །ཡེ་ཤེས་དམ་པ་གཉིས་ཐོབ་སྟེ། །དོན་གཉིས་ལྷུན་གྱིས་གྲུབ་པར་མཛོད། །


JLAZ012_Page_0663
[མ་དཔེ་གཟིགས་ན་འདིར་གནོན།]

སྙིང་དབུས་དད་པའི་གེ་སར་བཞད་པ་ནས། །སྐྱབས་གཅིག་དྲིན་ཅན་བླ་མ་ཡར་ལ་བཞེངས། །ལས་དང་ཉོན་མོངས་དྲག་པོས་གཟིར་བ་ཡི། །སྐལ་པ་ངན་པ་བདག་ལ་སྐྱོབ་པའ་ཕྱིར། །སྤྱི་བོ་བདེ་ཆེན་འཁོར་ལོའིརྒྱན་དུ་བཞུགས། །དྲན་དང་ཤེས་བཞིན་ཀུན་ཀྱང་བཞེངས་སུ་གསོལ། །ད་རེས་དམྱལ་བ་ཡི་དྭགས་དུད་འགྲོ་དང༌། །ཚེ་རིང་ལྷ་དང་ཀླ་ཀློ་ལོག་ལྟ་ཅན། །སངས་རྒྱས་མ་བྱོན་ཞིང་དང་ལྐུག་པ་སྟེ། །མི་ཁོམ་བརྒྱད་ལས་ཐར་བའི་དལ་བ་ཐོབ། །མི་གྱུར་དབང་པོ་ཚང་དང་ཡུལ་དབུས་སྐྱེས། །ལས་མཐའ་མ་ལོག་བསྟན་ལ་དད་པ་སྟེ། །རང་ཉིད་འབྱོར་བ་ལྔ་ཚང་སངས་རྒྱས་བྱོན། །ཆོས་གསུངས་བསྟན་པ་གནས་དང་དེ་ལ་ཞུགས། །བཤེས་གཉེན་དམ་པས་ཟིན་དང་གཞན་འབྱོར་ལྔ། །ཐམས་ཅད་རང་ལ་ཚང་བའི་གནས་ཐོབ་ཀྱང༌། །རྐྱེན་མང་ངེས་པ་མེད་པའི་ཚེས་སྤངས་ནས། །འཇིག་རྟེན་ཕ་རོལ་ཉིད་དུ་སོན་པར་འགྱུར། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །ད་རེས་དལ་རྟེན་དོན་ཡོན་མ་བྱས་ན། །ཕྱི་ནས་ཐར་བ་བསྒྲུབ་པའི་རྟེན་མི་རྙེད། །བདེ་འགྲོའི་རྟེན་ལ་བསོད་ནམས་ཟད་གྱུར་ནས། །ཤི་བའི་འོག་ཏུ་ངན་སོང་ངན་འགྲོར་འཁྱམ། །དགེ་སྡིག་མི་ཤེས་


JLAZ012_Page_0664
[མ་དཔེ་གཟིགས་ན་འདིར་གནོན།]

ཆོས་ཀྱི་སྒྲ་མི་ཐོས། །དགེ་བའི་བཤེས་དང་མི་མཇལ་མཚང་རེ་ཆེ། །སེམས་ཅན་ཙམ་གྱི་གྲངས་དང་རིམ་པ་ལ། །བསམ་ན་མི་ལུས་ཐོབ་པ་སྲིད་མཐའ་ཙམ། །མི་ཡང་ཆོས་མེད་སྡུག་ལ་སྤྱོད་མཐོང་ན། །ཆོས་བཞིན་སྤྱོད་པ་ཉིན་མོའི་སྐར་མ་ཙམ། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །གལ་ཏེ་མི་ལུས་རིན་ཆེན་གླིང་ཕྱིན་ཡང༌། །ལུས་རྟེན་བཟང་ལ་བྱུར་པོ་ཆེ་ཡི་སེམས། །ཐར་བ་བསྒྲུབ་པའི་རྟེན་དུ་མི་རུང་ཞིང༌། །ཁྱད་པར་བདུད་ཀྱི་ཟིན་དང་དུག་ལྔ་འཁྲུག །ལས་ངན་ཐོག་ཏུ་འབབ་དང་ལེ་ལོས་གཡེངས། །གཞན་ཁོལ་བྲན་གཡོག་འཇིག་སྐྱོབས་ཆོས་ལྟར་བཅོས། །རྨོངས་སོགས་ཕྲལ་བྱུང་རྐྱེན་གྱིས་མི་ཁོམ་བརྒྱད། །བདག་ལ་ཆོས་ཀྱི་འགལ་ཟླར་ལྷགས་པའི་ཚེ། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །སྐྱོ་ཤས་ཆུང་ཞིང་དད་པའི་ནོར་དང་བྲལ། ། འདོད་སྲེད་ཞགས་པའི་བཅིངས་དང་ཀུན་སྤྱོད་རྩུབ། །མི་དགེ་སྡིག་ལ་མི་འཛེམས་ལས་མཐའ་ལོག །སྡོམ་པ་ཉམས་ཤིང་དམ་ཚིག་རལ་བ་སྟེ། །རིས་ཆད་བློ་ཡི་མི་ཁོམ་རྣམ་པ་བརྒྱད། །བདག་ལ་


JLAZ012_Page_0665
[མ་དཔེ་གཟིགས་ན་འདིར་གནོན།]

ཆོས་ཀྱི་འགལ་ཟླར་གྱུར་པའི་ཚེ། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །ད་ལྟ་ནད་དང་སྡུག་བསྔལ་གྱིས་མ་གཟིར། །བྲན་ཁོལ་ལ་སོགས་གཞན་དབང་མ་གྱུར་བས། །རང་དབང་ཐོབ་པའི་རྟེན་འབྲེལ་འགྲིག་དུས་འདིར། །སྙོམས་ལས་ངང་དུ་དལ་འབྱོར་ཆུད་གསན་ན། །འཁོར་དང་ལོངས་སྤྱོད་ཉེ་དུ་འབྲེལ་བ་ལྟ། །ལྟ་ཅི་གཅེས་པར་བཟུང་བའི་ལུས་འདི་ཡང༌། །མལ་གྱི་ནང་ནས་ས་ཕྱོགས་སྟོངས་པར་བསྐྱལ། །ཝ་དང་བྱ་རྒོད་ཁྱི་ཡིས་འདྲད་པའི་དུས། །བར་དོའི་ཡུལ་ན་འཇིགས་པ་ཤིན་ཏུ་ཆེ། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །དགེ་སྡུག་ལས་ཀྱི་རྣམ་སྨིན་ཕྱི་མཞིན་འབྲང༌། །ཁྱད་པར་དམྱལ་བའི་འཇིག་རྟེན་ཉིད་སོན་ན། །ལྕགས་བསྲེགས་ས་གཞིར་མཚོན་གྱིས་མགོ་ལུས་འདྲལ། །སོག་ལེས་གཤོག་དང་ཐོ་ལུམ་འབར་བས་འཚིར། །སྒོ་མེད་ལྕགས་ཁྱིམ་འཐུམ་པར་འོ་དོད་འབོད། །འབར་བའི་གསལ་ཤིང་གིས་འབུགས་ཁྲོ་ཆུར་འཚོད། །ཀུན་ནས་ཚ་བའི་མེས་བསྲེགས་བརྒྱད་ཚན་གཅིག། གངས་རི་སྟུག་པོའི་འདབས་དང་ཆུ་འཁྱགས་ཀྱི། །གཅོང་རོང་ཡ་ངའི་གནས་སུ་བུ་ཡུག་སྦྲེབས། ། གྲང་རེག་རླུང་གིས་བཏབ་པའི་ལང་ཚོ་ནི། །ཆུ་བུར་ཅན་དང་ལྷག་པར་བརྡོལ་བ་ཅན། །སྨྲེ་ངག་རྒྱུན་མི་ཆད་པར་འདོན་པ་ཡང༌། །ཚོར་བའི་སྡུག་བསྔལ་བརྣག་པར་དཀའ་བ་ཡི། །


JLAZ012_Page_0666
[མ་དཔེ་གཟིགས་ན་འདིར་གནོན།]

ཟུངས་ཀྱིས་རབ་བཏང་འཆི་ཁའི་ནད་པ་བཞིན། །ཤུགས་རིང་འདོན་ཞིང་སོ་ཐམ་པགས་པ་འགས། །ཤ་འུ་ཐོན་ནས་ལྷག་པར་འགས་ཏེ་བརྒྱད། །དེ་བཞིན་སྤུ་གྲིའི་ཐང་ལ་རྐང་པ་གཤོག །རལ་གྲིའི་ཚལ་དུ་ལུས་ལ་གཅད་གཏུབས་བྱེད། །རོ་མྱགས་འདམ་ཚུད་ཐལ་ཚན་རབས་མེད་ཀློང༌། །མནར་བའི་ཉེ་འཁོར་པ་དང་འགྱུར་བ་ཅན། །སྒོ་དང་ཀ་བ་ཐབ་དང་ཐག་པ་སོགས། །རྟག་ཏུ་བཀོལ་ཞིང་སྤྱོད་པའི་ཉི་ཚེ་བ། །རྣམ་གྲངས་བཅོ་བརྒྱད་གང་ལས་འབྱུང་བའི་རྒྱུ། །ཞེ་སྡང་དྲག་པོས་ཀུན་སློང་སྐྱེས་པའི་ཚེ། །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །དེ་བཞིན་ཕོངས་ལ་ཉམས་མི་དགའ་བའི་ཡུལ། །བཟའ་བཏུང་ལོངས་སྤྱོད་མིང་ཡང་མི་གྲག་པར། །ཟས་སྐོམ་ལོ་ཟླར་མི་རྙེད་ཡི་དྭགས་ལུས། །རིད་ཅིང་འདོང་བའི་སྟོབས་ཉམས་རྣམ་པ་གསུམ། །གང་ལས་འབྱུང་བའི་རྒྱུ་ནི་སེར་སྣ་ཡིན། །གཅིག་ལ་གཅིག་ཟ་གསོད་པའི་འཇིགས་པ་ཆེ། །བཀོལ་ཞིང་སྤྱོད་པས་ཉམས་ཐག་བླང་དོར་རྨོངས། །ཕ་མཐའ་མེད་པའི་སྡུག་བསྔལ་གྱིས་གཟིར་བའི། །ས་བོན་གཏི་མིག་མུན་པར་འཁྱམས་པ་བདག །བློ་སྣ་ལ་ཆོས་ལ་བསྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཅན་བླ་མ་མཁྱེན། །ཆོས་ལམ་ཞུགས་ཀྱང་ཉེས་སྤྱོད་མི་བསྡམ་


JLAZ012_Page_0667
[མ་དཔེ་གཟིགས་ན་འདིར་གནོན།]

ཞིང༌། །ཐེ་ཆེན་སྒོར་ཞུགས་གཞན་ཕན་སེམས་དང་བྲལ། །དབང་བཞི་ཐོབ་ཀྱང་བསྐྱེད་རྫོགས་མི་བསྒོམ་པའི། །ལམ་གོལ་འདི་ལས་བླ་མས་བསྒྲལ་དུ་གསོལ། །ལྟ་བ་མ་རྟོགས་ཐོ་ཅོའི་སྤྱོད་པ་ཅན། །སྒོམ་པ་ཡེངས་ཀྱང་གོ་ཡུལ་འུད་གོག་འཐག།།སྤྱོད་པ་ནོར་ཡང་རང་སྐྱོན་མི་སེམས་པའི། །ཆོས་དྲེད་འདི་ལས་བླ་མའི་བསྒྲལ་དུ་གསོལ། །ནངས་བར་འཆི་ཡང་གནས་གོས་ནོར་ལ་སྲེད། །ན་ཚོད་ཡོལ་ཡང་ངེས་འབྱུང་སྐྱོ་ཤས་བྲལ། །ཐོས་པ་ཆུང་ཡང་ཡོན་ཏན་ཅན་དུ་རློམ། །མ་རིག་འདི་ལས་བླ་མས་བསྒྲལ་དུ་གསོལ། །རྐྱེན་ཁར་འཆོར་ཡང་འདུ་འཛི་གནས་སྐོར་སེམས། །དབེན་པ་བརྟེན་ཀྱང་རང་རྒྱུད་ཤིང་ལྟར་རེངས། །དུལ་བར་སྨྲ་ཡང་ཆགས་སྡང་མ་ཞིག་པའི། །ཆོས་བརྒྱད་འདི་ལས་བླ་མའི་བསྒྲལ་དུ་གསོལ། །གཉིད་འཐུད་འདི་ལས་མྱུར་དུ་སད་དུ་གསོལ། །ཁྲི་མུན་འདི་ལས་མྱུར་དུ་དབྱུང་དུ་གསོལ། །ཞེས་འབོད་པ་དྲག་པོས་ཐུགས་རྗེས་ལྷོངས་པར་བྱའོ།། །།གསུམ་པ་སོ་ཐར་བརྒྱུད་འདེབས་ཀྱི་ཐོག་མར་བསྟན་པའི་བདག་པོ་སྟོན་པའི་མཛད་པ་བཅུ་ནི། དགའ་བ་བརྒྱད་ལྡན་འཆི་མེད་གྲོང་ཁྱེར་ནས། །བྱང་ཆུབ་སེམས་ཀྱི་དམ་པ་ཏོག་དཀར་པོ། །ཤཱཀྱའི་རིགས་ཀྱི་ཐིག་ལེར་འཛིན་པའི་སྣོད། །སྒྱུ་འཕྲུལ་ལྷ་མོའི་རི་དྭགས་མིག་ཅན་ཡིན། །འོད་སྟོང་ཤར་གྱི་རི་ལ་ཆས་པ་བཞིན། །ལྷུམས་ཀྱི་གེ་སར་བཞད་


JLAZ012_Page_0668
[མ་དཔེ་གཟིགས་ན་འདིར་གནོན།]

པ་ལུམ་བིའི་ཚལ། །ཚངས་དང་དབང་པོའི་སྲི་ཞུས་མཛེས་བྱས་ཤིང༌། །བྱང་ཆུབ་རིགས་སུ་ལུང་བསྟན་ལ་ཕྱག་འཚལ། །ལང་ཚོས་དྲེགས་པའི་ཤཱཀྱ་གཞོན་ནུའི་དབུས། །སྒྱུ་རྩལ་དྲུག་ཅུ་རྩ་བཞིའི་རོལ་རྩེད་མཐུས། །ཀུན་གྱིས་ཁྱོད་ལ་བཏུད་ཅིང་གྲགས་པ་ཡིས། །སྐྱེ་དགུའི་རྣམ་ཤེས་མིག་དང་རྣ་བར་རྫོགས། །འདོད་སྲེད་ཞགས་པའི་གཞན་དབང་མ་གྱུར་བཞིན། །ཡབ་གཅིག་དགྱེས་སླད་བཙུན་མོའི་སྒྱུ་མ་ལ། །སྒྱུ་མའི་ལྟ་བས་བལྟས་ནས་རྒྱལ་པོའི་ཁབ། །བསྐྱང་པས་དོན་ཀུན་གྲུབ་པ་ལ་ཕྱག་འཚལ། །ཤིན་ཏུ་གཡོ་ཞིང་འཇིགས་པ་རྒྱལ་སྲིད་ཀྱི། །ལྕགས་ཀྱུའི་དབང་དུ་མ་གྱུར་འགའ་མེད་ཀྱང༌། །ངེས་པར་འབྱུང་བའི་རྐྱེན་བཞིས་ཁྱོད་ཀྱི་ཐུགས། །ཕྲོགས་ནས་རང་བྱུང་དགེ་སློང་ཉིད་དུ་བསྟན། །བརྩོན་འགྲུས་རླབས་ཀྱིས་མི་དལ་ནཻརཉྫར། །དཀའ་ཐུབ་གདུང་བ་བཟོད་པའི་སྙིང་སྟོབས་དང༌། །ཀུན་རྟོགས་འདུལ་བ་འཛིན་པའི་བསམ་གཏན་ལ། །ཕྱོགས་བཅུའི་བདེ་གཤེགས་དགྱེས་ལ་ཕྱག་འཚལ་ལོ། །གྲངས་མེད་གསུམ་གྱི་སྲིད་དུ་རྣམ་རིག་ཀུན། །ཚོགས་གཉིས་ཐ་གུས་བཅིངས་པ་དོན་ཡོད་ཕྱིར། །བྱང་ཆུབ་ཤིང་དྲུང་བདུད་རྣམས་སྐྲག་བྱས་ནས། །མངོན་པར་རྫོགས་སངས་རྒྱ་བ་རྒྱལ་ཀུན་གཤིས། །འཁོར་བ་གཏིང་མཐའ་མེད་པའི་གཡང་ས་ལ། །རྒྱུག་པའི་འགྲོ་བ་


JLAZ012_Page_0669
[མ་དཔེ་གཟིགས་ན་འདིར་གནོན།]

འཁོར་ལོ་གསུམ་གྱི་གྲུས། །བསྒྲལ་ནས་ཐར་པ་དང་ནི་རྣམ་མཁྱེན་གྱི། །གོ་འཕང་བཀྲི་བ་ཁྱོད་ལ་ཕྱག་འཚལ་ལོ། །རྟོག་ཅིང་དཔྱོད་ཀྱང་སྡོམ་པ་མིན་པའི་ཆང༌། །འཐུངས་པས་ཆེས་གཟིར་མུ་སྟེགས་སྟོན་པའི་ལྕེ། །མཉམ་དུ་ཡོད་པའི་ཆོ་འཕྲུལ་མཐུས་བཅད་པས། །སྐྱེངས་དང་གཟི་བརྗིད་ཉམས་པའི་ཆོ་ག་རྫོགས། །རྫུ་འཕྲུལ་རྐང་པ་བཞི་ལ་མཆོག་ཐོབ་ཁྱོད། །སྐྱེ་རྒ་ན་འཆིའི་ཚོར་བ་མི་མྱོང་ཡང༌། །ངེས་བར་ཕ་རོལ་འགྲོ་འདི་མི་སེམས་རྣམས། །སྐྱོ་སླད་མྱང་ངན་འདའ་སྟོན་དེར་ཕྱག་འཚལ། །བསོད་ནམས་ཉམ་ཆུང་གྱུར་པའི་འགྲོ་བ་རྣམས། །དཀར་བོའི་ཆོས་རབ་འཕེལ་བའི་ཚོང་ཟོང་ནི། །འཛད་པ་མེད་པའི་རིང་བསྲེལ་ཆ་བརྒྱད་དུ། །གཞག་སྟེ་ཆོས་ཀྱི་དབྱིངས་སུ་གཟིམས་པ་ལྟར། །བདག་ཀྱང་རྫོགས་སྨིན་སྦྱངས་གསུམ་མཐར་ཕྱིན་ནས། །ཁམས་གསུམ་ལས་འདས་འོག་མིན་ཆེན་པོ་རུ། །མངོན་པར་སངས་རྒྱས་སྤྲུལ་པའི་མཛད་པ་བཅུས། །ཀུན་མཁྱེན་ཁྱེད་དང་འགྲོ་དོན་མཉམ་པར་ཤོག། །མི་མཇེད་ཞིང་གི་སྟོན་པ་ཤཱཀྱའི་ཏོག།།ཤཱ་རིའི་བུ་དང་སྒྲ་གཅན་འཛིན་བཟང་པོ། །འདུལ་བ་རྒྱ་མཚོའི་སྡུད་བྱེད་ཉེ་བ་འཁོར། །གཏད་རབས་བདུན་སོགས་ཐོས་པ་སྒྲོག་པའི་སྡེ། །ཉེས་སྤྱོད་སྡོམ་པ་རིག་བྱེད་མིན་པའི་གཟུགས། །སོ་ཐར་བརྟུལ་ཞུགས་ཆུ་ལོན་ལྟ་བུ་ལས། །ཉིས་བརྒྱ་ལྔ་བཅུ་སྤོང་བའི་


JLAZ012_Page_0670
[མ་དཔེ་གཟིགས་ན་འདིར་གནོན།]

ཚུལ་ཁྲིམས་དང༌། །བཅུ་བདུན་བླང་བྱ་འཇུག་པའི་ཁྲིམས་དག་ཅིང༌། །བདེན་པ་བཞི་ཡི་ལམ་ལ་དགྲ་བཅོམ་པ། །འཁོར་ལོ་དང་པོའི་བརྒྱུད་རིམ་ལ་གསོལ་བ་འདེབས།། །།བཞི་པ་བྱང་སྡོམ་བརྒྱུད་པ་ནི། ཐུབ་ཆེན་འཇལ་དཔལ་དབྱངས་དང་ཞི་བའི་ལྷ། །ཨེ་ལ་དྷ་རི་མ་ཧཱ་ཤྲཱི་དང༌། །རཏྣ་བྷ་ཝ་བཛྲ་ཆོས་ཀྱི་གྲགས། །དཱི་པཾ་ཀཱ་ར་ཡབ་སྲས་རྔོག་ལོ་ཆེ། །ཆོས་ཀྱི་བླ་མ་ཕྱཱ་པ་ཆོས་སེང་དང༌། །དྷརྨ་བཀྲ་ཤིས་ཤེས་རབ་མཚན་ཅན་ཟུང༌། །སངས་རྒྱས་བརྩོན་འགྲུས་ཤཱཀྱ་སེང་གེ་དང༌། །ཆོས་དཔལ་རྒྱལ་མཚན་ཀུན་མཁྱེན་བསམ་ཡས་པ། །དེ་ཡི་ཞལ་བསྟན་མཁྱེན་བརྩེའི་འོད་ཟེར་སོགས། །རྒྱ་ཆེན་སྤྱོད་པའི་བརྒྱུད་པ་ལ་གསོལ་བ་འདེབས། །སྟོན་མཆོག་ཐོགས་མེད་དབྱིག་གཉེན་རྣམ་གྲོལ་གཉིས། །མཆོག་སྡེ་འདུལ་བའི་སྡེ་དང་སྣང་མཛད་བཟང༌། །སེང་གེ་བཟང་པོས་སངས་རྒྱས་ཡེ་ཤེས་ཞབས། །གུ་ཎ་མི་ཏྲ་རཏྣ་པརྦ་ཐཱ། །འབུམ་གསུམ་བློ་ལྡན་ཤེས་རབ་འགྲེ་ཤེས་འབར། །བྱང་ཡེ་ཁུ་བརྩོན་དཀར་ཆུང་ཞང་གཡེ་པ། །གཉའ་ཞིག་རྒྱ་ཕྱིང་སེང་དཔལ་མ་ཏི་གྲགས། ། བཙན་དགོན་དབེན་དགེ་རྣམ་གཉིས་བླ་བྲང་བ། །ཆོས་གྲགས་ཀུན་མཁྱེན་རྗེ་དང་མཁྱེན་བརྩེའི་འོད། །ཟབ་ཅིང་རྒྱ་ཆེའི་བརྒྱུད་པ་ལ་གསོལ་བ་འདེབས། །སངས་རྒྱས་འཇམ་དཔལ་


JLAZ012_Page_0671
[མ་དཔེ་གཟིགས་ན་འདིར་གནོན།]

དབྱངས་དང་ཀླུ་སྒྲུབ་རྗེ། །ཟླ་བ་གྲགས་པ་རིག་པའི་ཁུ་བྱུག་དང༌། །ཀུ་ས་ལི་བ་ཆེ་ཆུང་ཨ་ཏི་ཤ །བལ་པོ་ཐང་པ་ཛ་དང་ཨ་བྷྱ་ཀཱར། །ཟླ་བ་རྒྱལ་མཚན་གྲོ་ལུང་སྤྱི་བོ་ལྷས། །རྨ་ཤཱཀ་ནམ་མཁའ་གྲགས་དང་སྨོན་བྱང་གཞོན། །ཀུན་མཁྱེན་རྒྱལ་བའི་མྱུ་གུ་མཁྱེན་བརྩེའི་འོད། །ཟབ་མོ་ལྟ་བའི་བརྒྱུད་པ་ལ་གསོལ་བ་འདེབས། །འཁོར་ལོ་བར་མཐའི་དྲང་ངེས་ལྡེམ་དགོངས་དང༌། །སྐྱེས་བུ་གསུམ་གྱི་ལམ་རིམ་སྒྲ་ཇི་བཞིན། །གདུལ་བྱའི་ཡུལ་ལ་མངོན་སུམ་འདོམས་མཁས་ཤིང༌། །འཆད་རྩོད་རྩོམ་པའི་ཉི་མ་འབུམ་ཕྲག་གིས། །རྒྱལ་བསྟན་གསལ་མཛད་རྒྱན་དྲུག་མཆོག་བརྒྱད་སོགས། །བསྟན་པའི་རྩལ་ལག་ཀུན་ལ་གསོལ་བ་འདེབས།། །།ལྔ་པ་སྔགས་སྡོམ་ནི། རང་བཞིན་གདོད་མའི་སངས་རྒྱས་ཀུན་ཏུ་བཟང༌། །སྣང་ཆར་ལོངས་སྤྱོད་རྫོགས་པ་སྤྲུལ་པའི་སྐུར། །བསྟན་ནས་སྒྲ་ཚིག་བརྗོད་པར་སྣང་བའི་རྒྱུད། །འབུམ་ཕྲག་དྲུག་ཅུ་རྩ་བཞིའི་ངོ་བོ་ཉིད། །མངོན་སུམ་སྟོན་པའི་ཤིང་རྟ་རྡོ་རྗེ་ཆོས། །དགའ་རབ་རྡོ་རྗེའི་ཞབས་ལ་གསོལ་བ་འདེབས། །གནས་པ་སེམས་དང་བྱ་བྲལ་ཀློང་གི་སྡེ། །གནད་དོན་མན་ངག་སྡེ་ཡི་ཤིང་རྟའི་སྲོལ། །འབྱེད་མཁས་འཇམ་དཔལ་རྣོན་པོ་ཤྲཱི་སིང༌། །དཔལ་བཟང་ཡེ་ཤེས་མདོ་དང་བི་མ་ལ། །ཉང་བན་ལྷ་ཡི་མེ་ཏོག་གནས་བརྟན་སོགས། །མན་ངག་སྡེ་པའི་རྒྱུད་པ་


JLAZ012_Page_0672
[མ་དཔེ་གཟིགས་ན་འདིར་གནོན།]

ཐམས་ཅད་དང༌། །སྡེ་གསུམ་ཀློང་དགུའི་གཙུག་ཏོར་ཀུན་མཁྱེན་རྗེ། །བསྟན་པ་རྒྱ་མཚོའི་ཤིང་རྟར་གསོལ་བ་འདེབས། །ཕུང་པོ་འོད་སྐུར་དེང་བར་བྱིན་གྱིས་རློབས། །ཡེ་ཤེས་སྤྱན་ལྡན་བཻ་རོ་ཙཱ་ན་ཡིས། །གཡུ་སྒྲ་ཡེ་ཤེས་བླ་མ་སངས་རྒྱས་མགོན། །གཉགས་དང་ལི་བཟའ་རིམ་པ་ལྔར་གསུངས་བརྒྱུད། །དཔལ་གྱི་སྙིང་པོ་ལྷ་ལུང་རྡོ་རྗེ་ཞབས། །འོ་བྲན་གཞོན་ནུ་སངས་རྒྱས་ཡེ་ཤེས་རྩལ། །སྤང་དང་ཡ་ཟི་ཟིར་དགེ་ཤེས་རབ་འོད། །ངན་ལམ་བྱང་ཆུབ་ཟ་དམ་རིན་ཆེན་དབྱིག།།ཁུ་འགྱུར་གསལ་དང་ཉང་བྱང་ཤེས་རབ་གྲགས། །སྦ་སྒོམ་འཛེང་དང་འཛེང་ཆུང་ཨནནྡ། །ཡེ་ཤེས་དབང་པོ་མཁན་པོ་རྣམ་བཞི་དང༌། །བརྩོན་འགྲུས་དབང་ཕྱུག་མཐའ་བཞི་གྲགས་པའི་མཚན། །ཤཱཀྱ་རྒྱལ་པོ་འགོས་ལོ་གཞོན་ནུ་སོགས། །ཀློང་སྡེ་བརྒྱུད་པའི་བླ་མར་གསོལ་བ་འདེབས། །མཁའ་འགྲོ་མ་ཡི་འཆི་ལུགས་མངོན་གྱུར་ཤོག །མཁས་པ་ཉེར་གཅིག་ལས་བརྒྱུད་བཻ་རོ་དང༌། །གཡུ་སྒྲ་ཡེ་ཤེས་གཞོན་ནུ་སོག་དཔལ་གནུབས། །གནུབས་ཆུང་རིགས་ཀྱི་སྲས་དང་ཉང་ཤེར་མཆོག །ཡེ་འབྱུང་བསྟན་པའི་རྩ་ལག་ཟུར་ཆེ་ཆུང༌། །ཤཱཀྲ་ཡེ་བརྒྱུད་བཤད་བདག་པོ་སྒྲོ་ཕུག་པ། །དམ་པ་ཤཱཀྲ་རྒྱལ་ལྕེ་སྟོན་ལབ་སྲས་དཔོན། །ཟུང་རེ་བཀྲ་ཤིས་ཐན་སྟོན་བླ་སྐྱབས་


JLAZ012_Page_0673
[མ་དཔེ་གཟིགས་ན་འདིར་གནོན།]

རྡོར། །དགེ་འདུན་འབུམ་དང་གཡུ་སྟོན་མཁས་པ་སོགས། །སེམས་ཕྱོགས་བརྒྱུད་པའི་བླ་མར་གསོལ་བ་འདེབས། །ཆོས་ཀུན་སེམས་ཀྱི་རྒྱན་དུ་རྟོགས་པར་ཤོག །རིགས་ཅན་དྲ་མ་ལྔ་དང་རྒྱལ་པོ་ཛ༔ །ཨུ་པ་རཱ་ཛ་ཨིནྡྲ་བྷ་ཏི་དང༌། །པུ་ཏྲི་རྣམ་གཉིས་ཀུ་ཀུ་རཱ་ཛའི་ཞབས། །རོ་ལངས་རྡོ་རྗེ་བཞད་པ་པྲ་བྷ་ཧ། །ཤཱཀྱ་སེང་གེ་རཀྵི་ཧཱུྃ་ཀཱ་ར། །མ་ཏི་བདེ་གསལ་བྱང་ཆུབ་ཆོས་རྒྱལ་སྐྱོང༌། །བ་སུ་དྷ་ར་ཆེ་བཙན་གནུབས་ཡབ་སྲས། །བློ་གྲོས་ནམ་མཁའ་ལྡེ་དང་ཟུར་ཆེ་ཆུང༌། །མང་ཁྱེང་སྒྲོ་ཕུག་འགར་སྲོག་གླན་སེང་སོགས། །འདུས་པ་མདོ་ཡི་བརྒྱུད་པར་གསོལ་བ་འདེབས། །རླུང་སེམས་དྷི་ཏིར་ཐིམ་པའི་དངོས་གྲུབ་སྩོལ། །སིདྷ་ཀུ་ཀུ་རཱ་ཛ་གོ་མ་ས། །སྒེག་རྡོར་སངས་རྒྱས་གསང་བ་དྲི་མེད་བཤེས། །རྨ་རིན་གཙུག་གྱེར་རྣམ་གཉིས་ལས་བརྒྱུད་དེ། །འཇིག་རྟེན་མིག་གཅིག་རོང་ཟོམ་ཆོས་བཟང་སོགས། །སྒྱུ་འཕྲུལ་བཤད་སྒྲུབ་བརྒྱུད་པར་གསོལ་བ་འདེབས། །སྣང་ཞེན་དཀྱིལ་འཁོར་གསུམ་དུ་རྫོགས་བྱིན་རློབས། །རྡོ་རྗེ་བཞད་པ་ཧཱུྃ་མཛད་པདྨའི་ཞབས། །ནམ་སྙིང་གཉགས་དང་དཔལ་གནུབས་ཡེ་དབང་ཀལ། །གཙུག་ཏོར་ཆོས་སེང་རྒྱལ་འབར་ཆོས་ཡེ་སོགས། །ཡང་དག་བརྒྱུད་པའི་བླ་མར་གསོལ་བ་འདེབས། །སེམས་ཉིད་རྡོ་རྗེ་སེམས་དཔར་རྟོགས་བྱིན་རློབས། །མདོར་ན་ལྷ་གནས་གསུམ་དང་ཨོ་རྒྱན་སོགས། །ཉི་


JLAZ012_Page_0674
[མ་དཔེ་གཟིགས་ན་འདིར་གནོན།]

ཤུ་རྩ་བཞིའི་ཡུལ་དང་གནས་སོ་གཉིས། །ཤམྦྷ་ལ་དང་ཟ་ཧོར་འགྲོ་ལྡིང་སོགས། །འཕགས་ཡུལ་ཆོས་ཀྱི་གན་མཛོད་ཆེན་པོ་ནས། །རིག་འཛིན་སྡེ་སྣོད་རྒྱ་མཚོའི་བདག་ཉིད་ཆེ། །ཀླུ་སྒྲུབ་སྙིང་པོ་པདྨ་ཐོད་ཕྲེང་དང༌། །རིག་འཛིན་བརྒྱད་དང་དབང་ཕྱུག་བརྒྱད་ཅུ་སོགས། །མཆོག་གཟིགས་པཎ་གྲུབ་རྣམས་ལས་ལེགས་འོངས་པའི། །རྒྱུད་སྡེ་རྒྱ་མཚོའི་ཚོགས་དང་བྱེ་བྲག་ཏུ། །སངས་རྒྱས་མཉམ་སྦྱོར་ཧེ་རུ་ཀ་ག་ལ་པོ། །རྟ་མཆོག་རོལ་པ་རྔོགས་མ་ལེབ་རྒན་དང༌། །ཟླ་གསང་གཤེད་སྐོར་ཕུར་བ་རྒྱ་མཚོའི་སྡེ། །བདུད་རྩི་བམ་བརྒྱད་ཡུམ་གཟུངས་སྲིད་པ་བེམ། །མགོན་པོ་མངོན་བྱུང་མེ་ལྕེ་འབར་མ་སོགས། །ཆོས་ཀྱི་རྣམ་གྲངས་བཅུ་ཕྲག་ལྔ་སྟོང་གི། །སྒྱུར་བྱེད་ལོ་པཎ་མཁས་དང་སོ་ཟུར་གནུབས། །བབས་སོ་གསུམ་གྱི་བཀའ་བབས་གསུམ་ལྡན་ལས། །སྙན་ནས་སྙན་བརྒྱུད་རིམ་བྱོན་བླ་མ་དང༌། །རྒྱལ་དབང་པདྨའི་གདུང་འཚོབ་འཇིགས་མེད་གླིང༌། །བཀའ་དྲིན་གསུམ་ལྡན་དགོངས་བརྡ་སྙན་བརྒྱུད་བདག །རྒྱལ་ཀུན་འདུས་ཞལ་ངོ་བོར་གསོལ་བ་འདེབས། །གཞི་རྒྱུད་བདེ་གཤེགས་སྙིང་པོའི་དག་བྱ་རྣམས། །ལམ་རྒྱུད་འཕགས་པའི་སྤངས་རྟོགས་ཀྱིས་སྦྱངས་ནས། །སློབ་པ་མིན་པའི་བདེ་ཆེན་འབྲས་བུའི་རྒྱུད། །ཚེ་འདིར་མངོན་གྱུར་སངས་རྒྱས་ཐོབ་བྱིན་རློབས།། །།


JLAZ012_Page_0675
[མ་དཔེ་གཟིགས་ན་འདིར་གནོན།]

དྲུག་པ་ཕྱག་འཚལ་བ་ནི། ཨ་ལ་ལ་ཧོཿཆོས་རྣམས་རྣམ་དག་ཡེ་ནས་ལྷུན་གྲུབ་ཅིང༌། །བྱ་བ་བྱེད་དང་ཡིད་ཆོས་རྣམ་པར་དག། ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ཀྱི་ཡུམ་གྱུར་རྣམས་ལ་ཕྱག་འཚལ་ལོ། །རྣམ་ཤེས་དབང་པོ་དག་པས་ཐུགས་དང་གསུང༌། །བདེ་བར་གཤེགས་པ་ཀུན་གྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་མ། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང༌། །ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །རྟག་ཆད་ལྟ་འབྱིན་གསང་བ་ཡུམ་གྱི་ངང༌། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། །སྒོ་མ་ཆེན་མོ་བཞི་ལ་ཕྱག་


JLAZ012_Page_0676
[མ་དཔེ་གཟིགས་ན་འདིར་གནོན།]

འཚལ་ལོ། །སྟེང་འོག་ཕྱོགས་བཞི་འཇིག་རྟེད་འདུལ་བའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང༌། །བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ། །འཇིགས་བྱེད་འདས་པའི་དུས་ན་སྔོན་བྱུང་བ། །གདུག་པ་འདུལ་ཕྱིར་དུས་ལས་མི་འདའ་བའི། །དཔལ་ཆེན་ཧེ་རུ་ཀ་རྣམས་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང༌། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཡེ་ཤེས་སྐུ་མཆོག་འཇིགས་བྱེད་བརྒྱན་གྱིས་བཞུགས། །ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོ། །ནམ་མཁའི་ལུས་ཅན་གང་ཡང་ཐོགས་མེད་ཅིང༌། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །ཕྲ་མེན་ཆེན་མོ་བརྒྱད་ལ་ཕྱག་འཚལ་ལོ། །རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་སྲུང༌། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོ། །དཔལ་གྱི་འཁོར་ཚོགས་བཛྲ་ཨ་ར་ལི། །མཁའ་ལ་ཤུགས་འགྲོ་མ་ཚོགས་དབང་ཕྱུག་མ། །རྣལ་འབྱོར་ཉི་ཤུ་བརྒྱད་ལ་ཕྱག་འཚལ་ལོ། །ཕྱོགས་བཅུ་དྲེགས་པ་བསྣོལ་བའི་གདན་སྟེངས་སུ། །ཡེ་ཤེས་བསྐལ་བའི་མེ་དཔུང་འབར་བའི་དབུས། །བདུད་འདུལ་ཡབ་ཡུམ་རྣམས་ལ་ཕྱག་འཚལ་


JLAZ012_Page_0677
[མ་དཔེ་གཟིགས་ན་འདིར་གནོན།]

ལོ། །དམིགས་མེད་ཆོས་ཀྱི་སྐུུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་བའི་སྐུུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་པའི་ཡོན་ཏན་མཐར་ཕྱིན་པ། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ།། །།བདུན་པ་སྤྱི་བཤགས་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པ་དང༌། ཕྱོགས་བཅུའི་རྒྱལ་བ་སྲས་བཅས་བདག་ལ་དགོངས་སུ་གསོལ། བདག་ཆྒཻ་མོ་ཐོག་མར་འཁྲུལ་པ་ནས་བཟུང་སྟེ་དུས་དེ་རིང་ལ་ཐུག་གི་བར་དུ་མ་རིག་པས་གཞན་དབང་དུ་སོང་སྟེ་ཀུན་འབྱུང་གི་ཉེ་བར་ལེན་པས་ཉོན་མོངས་པ་འདོད་ཆགས་དང༌། ཞེ་སྡང༌། གཏི་མུག་མངོན་པར་འདུ་བྱས་ཏེ། ལུས་ཀྱི་སྒོ་ནས་སྲོག་བཅད་པ་དང༌། གསོད་སེམས་བསྐྱེད་པ་དང༌། མ་བྱིན་བླངས་པ་དང༌། འདོད་པས་ལོག་པར་གཡེམ་པའི་རིགས། ངག་གི་སྒོ་ནས་བརྫུན། ཕྲ་མ་ཚིག་རྩུབ་ངག་ཀྱལ། ཡིད་ཀྱི་སྒོ་ནས་བརྣབ་སེམས། གནོད་སེམས། ལོག་ལྟ་སྟེ། མི་དགེ་བཅུ། དེ་བཞིན་གཤེགས་པའི་སྐུུ་ལ་ངན་སེམས་ཀྱི་ཁྲག་འབྱིན་པ་ལ་སོགས་ཏེ་མཚམས་མེད་པ་ལྔ། དེ་དང་ཉེ་བ་ལྔ་ལ་སོགས་ཏེ་མི་དགེ་བའི་ཕྱི་མོ་རྣམས་ཀྱི་


JLAZ012_Page_0678
[མ་དཔེ་གཟིགས་ན་འདིར་གནོན།]

སྟེང༌། བཅས་པའི་ཁྲིམས་དགེ་བསྙེན་དང༌། དགེ་ཚུལ་དང༌། དགེ་སློང་སྟེ་སོ་སོར་ཐར་པའི་སྡོམ་པ་རིགས་བདུན་ལ་ཕམ་ལྟུང་དང་ཉེས་བྱས་བྱུང་བ་དང༌། བྱང་ཆུབ་སེམས་དཔའི་སྨོན་འཇུག་གི་བསླབ་བྱ་སྤྱི་དང༌། རྩ་ལྟུང་དང་སྦོམ་པོའི་རྣམ་གྲངས་ཐ་དད་པ་དང་འགལ་བ་དང༌། ཁྱད་པར་དུ་རིག་པ་འཛིན་པའི་ཚུལ་ཁྲིམས་ཀྱི་བསླབ་པའི་གཞི་ལས། རྡོ་རྗེ་ཐེག་པའི་འདུལ་བ་དང་འགལ་བའི་ནོང་པ་བླ་མ་ལ་སྨོད་པ་ལ་སོགས་པའི་རྩ་བའི་ལྟུང་བ་བཅུ་བཞི་དང༌། ཡན་ལག་སྦོམ་པོའི་རྣམ་གྲངས་བརྒྱད་ལས་ཕས་ཕམ་པ་དང༌། ཁ་ན་མ་ཐོ་བའི་མཐུས་བཅོམ་སྟེ་གསང་སྔགས་ཀྱི་དམ་ཚིག་སྤྱི་དང་བྱེ་བྲག་པ་ཕྲ་ཞིབ་བསྲུང་དཀའ་བ་ལས་འདས་པ་ཐམས་ཅད་དང༌། རང་བཞིན་དུ་ཉོན་མོངས་པའི་གཞན་དབང་གིས་སེམས་ཟིལ་གྱིས་ནོན་ནས་དཀོན་ཅོག་གསུམ་དང་བླ་མ་ལ་བརྙས་པ་དང༌། དམ་པའི་ཆོས་སྤངས་པ་དང༌། མཁན་པོ་ལ་མ་གུས་པ་དང༌། བྱང་ཆུབ་སེམས་དཔའ་ལ་སྐུར་བ་བཏབ་པ་དང༌། ཕ་མའི་དྲིན་ལན་མ་བཙལ་བ་དང༌། དཀོན་ཅོག་གི་དཀོར་ཕྲོགས་པ་དང༌། ཚངས་པར་མཚུངས་སྤྱོད་སུན་ཕྱུང་བ་དང༌། བསམ་གཏན་སྒོམ་པའི་ཐུགས་དཀྲུགས་པ་དང༌། དགེ་བ་ཅན་གྱི་ཚོགས་བཅག་པ་དང༌། དད་པ་ཅན་


JLAZ012_Page_0679
[མ་དཔེ་གཟིགས་ན་འདིར་གནོན།]

སུན་ཕྱུང་བ་དང༌། རྒྱུ་འབྲས་ལ་སྐུར་བ་བཏབ་པ་དང༌། སེམས་ཅན་ལ་གནོད་པའི་ལས་བྱས་པ་དང༌། ཁྲེལ་དང་ངོ་ཚ་སྤངས་པ་ལ་སོགས་ཏེ་མདོར་ན་སྡིག་པ་མི་དགེ་བའི་ལས་རང་གིས་བགྱིས་པ་དང༌། གཞན་ལ་བྱེད་དུ་བཅུག་པ་དང༌། བྱས་པ་ལ་རྗེས་སུ་ཡི་རང་བ་ལ་སོགས་པ་དེ་དག་ཀྱང་རྟག་པའི་སེམས་དང༌། མངོན་པར་ཞེན་པ་དང༌། གཉེན་པོ་སྟོབས་ཞན་པ་དང༌། ཡུལ་ཁྱད་པར་ཅན་དང་གཞི་ལས་བྱུང་བ་ལ་སོགས་པ་ཁ་ན་མ་ཐོ་བ་ཆེན་པོར་གྱུར་པས་མཚོན། མདོར་ན་མངོན་པར་མཐོ་བ་དང༌། ངེས་པར་ལེགས་པའི་གོ་འཕང་ཐོབ་པ་ལ་བར་དུ་གཅོད་ཅིང༌། འཁོར་བ་དང་ངན་སོང་གི་རྒྱུར་གྱུར་པ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཀུན་ཏུ་ཐོགས་མེད་ཀྱི་གཟིགས་པར་ལྡན་པ་རྣམས་ཀྱི་སྤྱན་སྔར་ཤིན་ཏུ་གནོང་ཞིང་འགྱོད་པས་མཐོལ་ལོ་བཤགས་སོ། །སྔོན་ཆད་ནི་བཀའ་ལས་འདས་སོ། །དེ་ནི་ཉེས་པ་ལ་ཉེས་པར་མཐོང་ལགས་པས་མི་འཆབ་བོ། །མངོན་གྱུར་དུ་སྒྲོག་པས་མི་སྦེད་དོ། །ཕྱིན་ཆད་སྲོག་ལ་བབ་ཀྱང་སྡོམ་ལགས་སོ། །མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་སྡིག་ལྡན་བདག་ལ་དགོངས་ཤིག །དེང་བདག་གི་འགྱོད་ཚངས་དང་དུ་མ་བཞེས་ན་སྐྱབས་མེད་དོ། །མགོན་མེད་དོ། །དཔུང་གཉེན་དང་བྲལ་ལོ། །དེ་བས་


JLAZ012_Page_0680
[མ་དཔེ་གཟིགས་ན་འདིར་གནོན།]

ན་སེམས་ཅན་གྱི་རང་བཞིན་ལས་དང་ཉོན་མོངས་པའི་གཞན་དབང་ཅན་ལགས་པས་དེ་ལ་དགོངས་ཏེ་ཚངས་པར་སྩལ་དུ་གསོལ། ཞེས་སྙིང་ཐག་པ་ནས་ཉིན་ལན་གསུམ་དང་མཚན་ལན་གསུམ་དུ་འགྲུབ་ན་རབ། མ་ལྕོགས་ན་ཉིན་ནུབ་རེ་རེ་མ་ཆག་པར་བྱས་པས་སྡིག་ལྟུང་སོར་ཆུད་པར་འགྱུར་རོ།། །།བརྒྱད་པ་སྤྱན་འདྲེན་ཁྲུས་གསོལ་སོགས་ཚོགས་གསོག་གི་རིམ་པ་ནི། གང་ཞིག་ལུས་པ་མེད་པའི་སེམས་ཅན་གྱི། །མགོན་དང་དཔུང་གཉེན་གྱུར་ཀྱང་བདུད་སྡེའི་དགྲ། །ཇི་ལྟ་ཇི་སྙེད་མཁྱེན་ཅིང་གཟིགས་པ་ཡི། །བཅོམ་ལྡན་བདག་གི་སྡུམ་པར་མཆིས་སུ་གསོལ། །ལས་ཀྱིས་སྤྲུལ་པ་མ་ཡིན་འབྱོན་པའི་ཤུལ། །ཁྲུས་ཀྱི་ཁང་བུ་བརྩེགས་པ་དྲི་བསུང་ཅན། །ཤེལ་དང་ནོར་བུའི་ས་གཞི་ཀ་བར་ལྡན། །གཡུ་དམར་མུ་ཏིག་བླ་བྲེ་དཔྱངས་པ་དེར། །བདེ་གཤེགས་རིགས་ཀྱི་བུ་མཆོག་བཅས་པ་ལ། །སྤོས་ཆུའི་གང་བའི་ནོར་བུའི་བུམ་པ་ནས། །ཁྲུས་ཀྱི་རིམ་གྲོ་བགྱིད་པའི་སྨིན་ལེགས་མ། །གླུ་གར་རོལ་མོའི་འགྱུར་བ་འགྲན་ལ་བརྩོན། །ཉེ་རེག་ཆོ་ག་མཁས་པའི་རི་དྭགས་མིག །དྲིལ་ཕྱིས་བཀུ་མཉེའི་སྲི་ཞུས་གཡེང་བ་ཡང༌། །ཁ་དོག་གཅིག་ཏུ་མི་གནས་དབང་པོའི་ཚོན། །ཐགས་སུ་བཏགས་པ་མེད་པའི་ལྷ་རྫས་ཉོ། །དཔག་བསམ་ལྗོན་པས་བཙོང་བའི་པཉྩ་ལི། །


JLAZ012_Page_0681
[མ་དཔེ་གཟིགས་ན་འདིར་གནོན།]

ལྕིད་ཀྱིས་ནོན་སྤངས་སྲབ་འཇམ་ཡང་བའི་གོས། །དྲི་དང་སྤོས་ཆུས་བསྒོས་ཤིང་བྱུགས་པ་དང༌། །རིན་ཐང་བརྗོད་ལ་ཁྲེལ་བའི་རིན་ཆེན་རྒྱན། །གདུ་བུ་དཔུང་རྒྱན་སྙན་ཆ་ཅོད་པན་སོགས། །འདོད་པའི་ཡོན་ཏན་སྤངས་པའི་ཐུབ་དབང་ཡང༌། །བཀྲེན་ལྡན་བསོད་ནམས་སླད་དུ་བདག་གིར་བཞེས། །འཇིག་རྟེན་དབང་ཕྱུག་ལ་སོགས་ཉེ་བའི་སྲས། །ངན་སོང་ཀུན་འདྲེན་ལ་སོགས་བསྐལ་བཟང་གི། །སེམས་དཔའ་བཅུ་དྲུག་དང་ནི་ཁྱིམ་པའི་ཚུལ། །ཆོས་འཕགས་རྟག་ཏུ་ངུ་དང་ལི་ཙ་བཱི། །དྲི་མ་མེད་པར་གྲགས་ལའང་དབུལ་བར་བགྱི། །སྟོང་གསུམ་ཅིག་ཅར་ཁྱབ་པའི་དྲིའི་བཞོན་པར། །འཁྱུད་པའི་ཙནྡན་སྤོས་ཀྱི་བསུང་ཞིམ་དྲིས། །བསོད་ནམས་བྱེ་བའི་འབྱུང་གནས་མཚན་དཔེའི་བྱད། །གསེར་སྦྱངས་བརྟན་པ་འཕྲོག་ལ་བྱུག་པར་བགྱི། །བཏང་སྙོམས་ཡངས་པའི་ཤེལ་གྱི་ས་གཞི་ལ། །བྱམས་པའི་པདྨོ་གེ་སར་སྟོང་བརྡལ་བར། །སྙིང་རྗེའི་ཉི་ཟླ་བཀྲག་ཏུ་འཚེར་བ་བསྟར། །དགའ་ཆེན་བཅོམ་ལྡན་སྲས་བཅས་བཞུགས་སུ་གསོལ། །བབ་ཅོལ་གོམས་པ་མིན་པའི་ལུས་བཏུད་ཀྱི། །སྙིང་གར་གུས་བཅས་མངོན་རྟོགས་ངོམ་པ་ལ། །མེ་ཏོག་དོག་པས་རབ་བཟུང་སྙིམ་པའི་སྣོད། །ག་བུ་ཆུང་གི་བརྟུལ་ཞུགས་འཛིན་པ་ཡིན། ། རིགས་དང་ཞབས་སུ་ལྡན་སོགས་བདེ་


JLAZ012_Page_0682
[མ་དཔེ་གཟིགས་ན་འདིར་གནོན།]

གཤེགས་ཀྱི། །ཡོན་ཏན་མཐའ་དག་གནས་ཀྱིས་བསྐལ་པ་བཞིན། །དད་པའི་སྐྱེད་མོས་ཚལ་དུ་འོང་བའི་མོད། །སྐྱོ་བ་མིན་པའི་བ་སྤུ་གཅིག་ཏུ་ཟིང༌། །ཟླ་གཞོན་ཁྲུས་ལ་འཇུག་པའི་རྫིང་བུའི་ནང༌། །རྨ་བྱའི་བུ་མོ་འཇོ་སྒེག་རོལ་པ་ལྟའི། །ལང་ཚོའི་གྲངས་སྙེད་རྡུལ་གྱི་རྣམ་གྲངས་དང༌། །ཤིན་ཏུ་འཁྲུལ་བ་སྐྱེད་བྱེད་ཕྱག་གིས་བྲེལ། །གཏོང་བའི་ཡན་ལག་རྫོགས་པའི་དངོས་འབྱོར་དང༌། །དེས་ཀྱང་མཚོན་པར་དཔེ་མེད་ཡིད་ཀྱིས་སྤྲུལ། །བླ་ན་མཆིས་པ་མ་ཡིན་མཆོད་པའི་སྤྲིན། །ཀུན་ཏུ་བཟང་པོའི་ཡོན་ལ་ཕྲག་དོག་བགྱིད། །མུ་ཅོར་སྨྲ་བའི་ལས་དང་བག་ཆགས་སྡིག།།དགེ་ལ་འཇིགས་ནས་གཞན་དུ་བྲོས་པའི་གཟུགས། །སྲིད་པའི་མུན་ནག་སྟུག་པོར་འཆབ་པ་ཀུན། །སྟོབས་བཞིའི་ཉིན་བྱེད་འབར་བས་སྦྱངས་ཤིང་བཤགས། །སྦྱོར་བ་གང་གིས་བདག་ཉིད་མ་འཁྲུགས་བཞིན། །བསམ་པའི་ཁྱད་པར་གཅིག་གིས་གཞན་དག་པའི། །རྣམ་དཀར་ཡུད་ལ་འཕྲོག་པའི་ཆོམ་རྐུན་གྱི། །བརྟུལ་ཞུགས་རྗེས་སུ་ཡི་རང་ཁོ་ནས་བྱས། །ཐར་མེད་འཁོར་བའི་སྤྱོད་པ་མ་དུལ་ཞིང༌། །རྣམ་པར་སྲ་མཁྲེགས་ཐ་བ་གང་གིས་ཀྱང༌། །གདུལ་ཐབས་བརྟན་པ་བྲལ་ལ་ཆོས་འཁོར་གྱི། །རྩིབས་རྣོན་མུ་ཁྱུད་འཛིན་དེ་བསྐོར་བར་བསྐུལ། །རྒྱལ་དང་དེ་སྲས་རྣམས་ཀྱིས་སྤངས་གྱུར་


JLAZ012_Page_0683
[མ་དཔེ་གཟིགས་ན་འདིར་གནོན།]

པའི། །འགྲོ་འདིས་སྡུག་བསྔལ་གནས་སྐབས་རྟེན་མཐོང་ནས། །མྱ་ངན་འདའ་བ་མེད་པའི་གདན་ཁྲི་ལ། །དངོས་པོ་ཀུན་གྱི་རིན་ཐང་གཅིག་ཏུ་སྤུངས། །བདག་ཏུ་བལྟ་བས་འདར་བའི་རྣམ་དཀར་ཡང༌། །སྲིད་པར་ལན་གཅིག་མཐོ་བའི་ཆོ་ངེ་སྟེ། །བྱང་ཆུབ་བསྔོ་བའི་གསེར་འགྱུར་རྩིས་ཐེབས་པ། །འདི་ནི་སྟོན་པ་གཞན་གྱི་ལུགས་ལ་མེད། །ཆོག་ཤེས་བདུད་རྩིའི་བཏུང་བས་མ་ངོམས་ན། །སྐྱེས་བུའི་ཡིད་ལ་མ་གཟུང་མཆོད་སྤྲིན་ཡང༌། །ཚིག་གི་ཕ་མཐར་འཁྱམས་ལ་སྐྲག་གྱུར་ནས། །བདག་ལུས་སྟན་དུ་དབུལ་ལའང་དོ་གལ་བགྱིད། །དཀོན་ཅོག་གསུམ་གྱི་འབངས་སུ་དམ་བཅས་པའི། །གྲིབ་བསིལ་སོ་ཀའི་མེ་ཏོག་འཇོ་སྒེག་ཅན། །རྣམ་ཀུན་འཁྲུག་པའི་གཤིན་རྗེའི་འདུན་སར་ཡང༌། །ཁྲོ་གཉེར་འཇིགས་པའི་རིན་ཐང་ཟད་མི་ཤེས། །དེས་ནི་གཏི་མུག་མཐུས་ནོན་སྡིག་ལྡན་བདག །བྱི་དོར་ཤིན་ཏུ་བརྟེན་པའི་དྭངས་ཤེལ་ལྟར། །བསོད་ནམས་རྙོག་པ་དྭངས་པའི་སེམས་ཀྱི་ནང༌། །སེམས་བསྐྱེད་ཆོ་གས་ཐོབ་པའི་གཟུགས་བརྙན་རྔོམ། །ཉེས་པ་བརྒྱ་ཕྲག་གཡང་སར་ལྷུང་བ་ཡི། །རིམས་ཀྱིས་ཤིན་ཏུ་བཏབ་པའི་ནད་པ་རྣམས། །གསོ་དཔྱད་ཕལ་པའི་མདུན་སར་དབུགས་མི་ཕྱིན། །སྨན་པ་མཆོག་ལ་སྐྱབས་སུ་ལྷག་པར་དོང༌། །མོས་པ་གང་གི་སླད་དུ་འདིར་གཤེགས་ནས། །


JLAZ012_Page_0684
[མ་དཔེ་གཟིགས་ན་འདིར་གནོན།]

སེམས་ཅན་ཁམས་ལ་དགོངས་པའི་སྟོན་མཆོག་ནི། །ཐེག་པ་ཆེན་པོའི་སྐྱེས་བུ་འབའ་ཞིག་པའི། །ཚོགས་ཀྱི་དབུས་ན་ལྷམ་མེར་མཛེས་པ་ལ། །སྐྱབས་སུ་འགྲོ་བ་གསུམ་གྱིས་གཞི་བཅས་ལ། །དགོངས་སུ་གསོལ་བ་གསུམ་གྱིས་སད་བྱས་ནས། །རྒྱལ་བ་སྲས་དང་བཅས་པའི་ཐུགས་བསྐྱེད་དང༌། །བསླབ་པའི་བརྟུལ་ཞུགས་མཐའ་དག་བླང་བ་ཡིན། །ཉོན་སྒྲིབ་ཟུག་རྔུའི་དུམ་བུ་བཅད་གྱུར་ཀྱང༌། །ཤེས་སྒྲིབ་ཡུལ་གྱི་རོ་ལ་ཆགས་པ་ཡི། །ཉན་རང་དགྲ་བཅོམ་མ་བསྒྲལ་བ་ལས་བསྒྲལ། །གཉིས་ཀའི་འཆིང་བས་ཀུན་ནས་དཀྲིགས་པ་ཡི། །ཚངས་པ་ལ་སོགས་སོ་སོ་སྐྱེ་བོ་ནས། །སློབ་པ་འཕགས་པའྀ་བར་ལ་གནས་པ་ཡི། །སེམས་ཅན་མ་གྲོལ་བ་རྣམས་དགྲོལ་བ་དང༌། །ཤིན་ཏུ་སྡུག་བསྔལ་དྲག་པོའི་ཤུགས་རིང་ལས། །དབུགས་འབྱིན་ཐོབ་པ་མེད་པའི་ངན་སོང་གསུམ། །དབུགས་འབྱིན་ཆེན་པོའི་གནས་ལ་སྦྱར་བ་དང༌། །མདོར་ན་རྟེན་ཅིང་འབྲེལ་འབྱུང་བཅུ་གཉིས་ཀྱི། །འཁོར་ལོའི་རྒྱར་ཆུད་སེམས་ཅན་ཡོད་དོ་ཅོག།།མི་གནས་ཡེ་ཤེས་མྱ་ངན་འདས་པའི་གྲོང༌། །འགོད་བྱེད་ཆོ་གས་བཟུང་བའི་བརྗོད་པ་ནི། །སྔོན་བྱོན་དྲང་སྲོང་རྣམས་ཀྱི་ལུགས་ལ་བརྟེན།། །།དགུ་པ་ཚད་མེད་བཞི་སྒོམ་པ་ནི། གང་རྣམས་སྡུག་བསྔལ་ཉེན་པ་ལས། །བྲལ་བར་འདོད་པ་སྙིང་རྗེ་ཡིན། །


JLAZ012_Page_0685
[མ་དཔེ་གཟིགས་ན་འདིར་གནོན།]

བྱམས་པ་ཕན་པ་བསྒྲུབ་པ་སྟེ། །ཀུན་ལ་སྐྱོབ་ཅིང་ཕན་པར་དགའ། །རབ་ཏུ་དགའ་བ་དགའ་བ་སྟེ། །དམ་པའི་དོན་ལ་འདུན་པའོ། །ཆགས་སྡང་གཉིས་དང་བྲལ་བ་ནི། །བར་མའི་སེམས་དང་ལྡན་པས་ཏེ། །དོན་དམ་པ་ཡི་བཏང་སྙོམས་སྒོམ།། །།བཅུ་པ་བྱང་སྔགས་སྡོམ་བཟུང་དང་འབྲེལ་བར་ཐེག་པ་ཆེན་པོའི་ལམ་ལ་དམ་བཅའ་བ་ནི། ཨོཾ། རྣལ་འབྱོར་དབང་པོ་ཡེ་ཤེས་མཐར་ཕྱིན་པ། །འགྲོ་ལ་ཕན་མཛད་ཐུགས་རྗེས་དབང་བསྒྱུར་ཞིང༌། །སྲིད་པ་གསུམ་གྱི་གཉེན་རྒྱུད་གཅིག་པུ་པ། །ལྷ་ཡི་ལྷ་ཁྱོད་བདག་ལ་དགོངས་སུ་གསོལ། །བདེ་བར་གཤེགས་པའི་སྤྲུལ་པ་རྒྱ་མཚོ་དང༌། །རྣལ་འབྱོར་དབང་ཕྱུག་གྲུབ་པའི་ཚོགས་ཆེན་པོ། །ལྷ་དང་ལྷ་མིན་སྔགས་འཆང་དམ་ཚིག་ཅན། །ཀུན་ནས་འདུས་པ་རྣམས་ཀྱང་དགོངས་སུ་གསོལ། །བདག་ནི་རྒྱལ་སྲིད་མཐོ་རིས་ལོངས་སྤྱོད་དང༌། །འདོད་པའི་ཡོན་ཏན་བདག་སྒྲུབ་མ་ལགས་ཏེ། །འགྲོ་བ་སྙིང་བརྩེ་ཁོ་ནས་དོན་བརྩོན་པ། །འདི་ལ་ཀུན་མཁྱེན་ཁྱོད་ནི་དཔང་དུ་གསོལ། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །འཕགས་མཆོག་སྤྱན་སྔར་ཇི་ལྟར་དམ་བཅས་པ། །སུན་པར་མི་བགྱི་མགོན་ཁྱོད་བསླུ་མ་ལགས། །སྙིང་ནས་བདག་ནི་ཁེ་དང་གྲགས་ལ་སོགས། །


JLAZ012_Page_0686
[མ་དཔེ་གཟིགས་ན་འདིར་གནོན།]

གཡོ་དང་ཟང་ཟིང་སེམས་ནི་གཏན་སྤངས་ནས། །གཞན་དོན་བསྒྲུབ་པ་གཅིག་པོའི་སེམས་བཞག་སྟེ། །རྣལ་འབྱོར་སྤྱོད་པ་ཆེན་པོ་བདག་གིས་སྤྱོད། །ཀུན་ཏུ་བཟང་པོ་བླ་ན་མེད་པ་ཡིས། །བྱང་ཆུབ་མཆོག་ཏུ་བདག་གི་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་གཟུང་བར་བགྱི། །སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་བཏབས་ཀྱང༌། །བྱང་ཆུབ་སེམས་མཆོག་ཤེས་རབ་སྙིང་རྗེ་དང༌། །ཡི་དམ་རྒྱལ་བ་ཁྱོད་ནི་ཡོངས་མི་སྤོང༌། །རྡོ་རྗེའི་དམ་ཚིག་ཆེན་པོ་རྣམས་དང་ནི། །རྡོ་རྗེ་སློབ་དཔོན་རྡོ་རྗེ་མཆེད་ལྕམ་དང༌། །གཞན་ཡང་ཐེག་པ་མཆོག་ལ་ཞུགས་པ་རྣམས། །སྲོག་གི་ཕྱིར་ཡང་མི་གཏོང་ཅི་ནུས་བསྲུང༌། །འཁོར་བ་བདག་མེད་སྒྱུ་མའི་རང་བཞིན་ལ། །བདག་ནི་འཇིགས་པ་ཅི་ཡང་མི་མཆིས་ཏེ། །མ་རིག་སྐྱེ་བོ་རྣམས་ཀྱི་དོན་སླད་དུ། །ཕྱི་མཐར་ཐུག་གི་བར་དུ་གནས་པར་སྤྲོ། །གཞན་དོན་འཁོར་བ་རྣམས་སུ་སྤྱོད་པ་ན། །བྱང་ཆུབ་སྤྱོད་པ་རླབས་ཆེན་བདག་གིས་སྤྱད། །འགྲོ་དྲུག་སེམས་ཅན་རྣམས་ལ་ཕན་གདགས་ཕྱིར། །རང་དབང་དུ་ནི་སྐྱེ་བ་བླང་བར་བགྱི། །བདག་ནི་ཡོངས་སུ་བཟུང་བའི་འཇིག་རྟེན་ནམ། །མྱ་ངན་འདས་ལ་སྤྲོ་བ་མ་མཆིས་ཏེ། །གང་དང་གང་དུ་


JLAZ012_Page_0687
[མ་དཔེ་གཟིགས་ན་འདིར་གནོན།]

སྡུག་བསྔལ་གནས་རྣམས་སུ། །བསྐལ་པ་རྒྱ་མཚོར་གནས་ཤིང་ཕན་པ་བགྱི། །སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཇི་སྲིད་ངན་སོང་སྟོངས་པར་མ་གྱུར་པར། །དེ་སྲིད་བདག་གིས་སྐྱོ་བའི་སེམས་མི་བསྐྱེད། །ཤེས་རབ་ཐབས་ཀྱིས་འགྲོ་བའི་དོན་བགྱིད་པ། །སྙིང་རྗེས་ལོངས་སྤྱོད་དེ་ལས་མ་མཆིས་པས། །སེམས་དམྱལ་ཡི་དྭགས་གཤིན་རྗེའི་འཇིག་རྟེན་ཡང༌། །ལྷ་ཡི་དགའ་ཚལ་ལྟ་བུར་བལྟ་བར་བགྱི། །འགྲོ་ལ་སྙིང་རྗེས་དཔལ་གྱི་མགུར་ནས་གསུངས། །རྣལ་འབྱོར་དམ་ཆོས་བདུད་རྩི་མཆོག་རྣམས་ནི། །བདག་གིས་འཇིག་རྟེན་ཐུག་པར་མ་མཆིས་པར། །ཇི་ལྟར་འཚམ་པ་བཞིན་དུ་རྒྱས་པར་བགྱི། །སྲིད་པ་ལས་དང་རྐྱེན་གྱི་དབང་གྱུར་ཏེ། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་གཟུང༌། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པ་མཆོག་ལ་ཞུགས་པའི་སྐྱེ་བོ་ལ། །ཚེ་རབས་རྣམས་སུ་མཐུ་རྩལ་ཅི་མཆིས་ཀྱིས། །སྐྱེས་ཆེན་རྣམས་ཀྱི་དགོངས་པ་རྟག་ཏུ་བསྐང༌། །དམ་པའི་ཆོས་དང་སྒྲུབ་པའི་གེགས་གྱུར་པ། །མི་དང་མི་མིན་གདུག་པ་གང་ཡང་རུང༌། །བདག་གིས་ཞི་དང་ཁྲོ་བོའི་ཕྲིན་ལས་ཀྱིས། །ཡོངས་སུ་ཞི་ཞིང་རྣམ་པར་གཞོམ་པར་བགྱི། །རྣལ་འབྱོར་མཆོག་གི་


JLAZ012_Page_0688
[མ་དཔེ་གཟིགས་ན་འདིར་གནོན།]

ཐེག་ཆེན་བླ་མེད་དང༌། །རྡོ་རྗེ་རྒྱལ་པོ་ཁྱོད་ལ་བརྟེན་ནས་ནི། །སངས་རྒྱས་ཞིང་སྦྱང་འགྲོ་ལ་སྨན་སླད་དུ། །བྱང་ཆུབ་སྙིང་པོ་བདག་གིས་རྟོགས་པར་བགྱི། །བདག་ནི་འཕགས་མཆོགས་ཕྱག་རྒྱ་མངོན་སྤྲུལ་ཏེ། །གལ་ཏེ་སྐབས་མེད་འཆི་བའི་དུས་བྱུང་ཚེ། །གསང་སྔགས་མགོན་པོ་ཡེ་ཤེས་དཀྱིལ་འཁོར་ཅན། །ཁྱེད་ཀྱི་ཞབས་ཀྱི་དྲུང་དུ་མཆི་བར་བགྱི། །སྲིད་གསུམ་སྡུག་བསྔལ་ཅི་འདྲ་ཁྱེད་ཀྱིས་མཁྱེན། །དམྱལ་སོགས་མེ་དཔུང་ཞི་བར་བགྱིད་ལ་སོགས། །སེམས་ཅན་དོན་ལ་མྱུར་ཏུ་བདག་མཆི་ན། །དམ་པ་རྣམས་ཀྱི་ནུས་མཐུ་སྩལ་དུ་གསོལ། །སངས་རྒྱས་ཆོས་ཚོགས་ཀྱི་སྐྱབས་སེམས་ལན་གསུམ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་འཁོར་བཅས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བརྟན་པར་བཞུགས། ། སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པ་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །པདྨ་ཀ་མ་ལ་ཡེ་སྟྭཾ། ཁྲུས་ཀྱི་ཁང་པ་


JLAZ012_Page_0689
[མ་དཔེ་གཟིགས་ན་འདིར་གནོན།]

ཤིན་ཏུ་དྲི་ཞིམ་པར། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲིས་པ་དེར། །ཇི་ལྟར་བསྟམས་པ་ཙམ་ཀྱིས་ནི། །ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་སྐུ་ཁྲུས་གསོལ། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏ་ས་མ་ཡ་ཤྲཱི་ཧཱུྃ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཏྲཱཾ་ཧྲཱིཿཨཿཀཱ་ཡ་བི་ཤྭ་དྷ་ན་ཡེ་སྭཱ་ཧཱ། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང༌། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱིས། །ཨོཾ་བཛྲ་ཝཥྟ་ཡེ་སྭཱ་ཧཱ། སྐབས་འདིར་སྤྲོ་ན་མཎྜལ་ཚོམ་བུ་སོ་བདུན་མ་བླ་མ་འཕགས་པའི་ལུགས་ལྟར་འབུལ། དེ་བཞིན་བསྡུ་ན། ས་གཞི་སྤོས་ཆུས་བྱུགས་ཤིང་ཞེས་པ་ནས། འགྲོ་ཀུན་རྣམས་དག་ཞིང་ལ་སྤྱོད་པར་ཤོག །མཉེས་བྱེད་མཎྜལ་བཟང་པོ་སོགས་ནས། མཁའ་དང་མཉམ་པའི་འགྲོ་རྣམས་སྒྲོལ་བར་ཤོག །ཇི་སྙེད་སུ་དག་སོགས་ཀྱི་ཡན་ལག་བདུན་པ་


JLAZ012_Page_0690
[མ་དཔེ་གཟིགས་ན་འདིར་གནོན།]

འབུལ། སེམས་ཅན་ཐམས་ཅད་བདེ་བ་དང་སོགས་ལན་གསུམ་གྱིས་ཚད་མེད་བཞི་བསྒོམ་རྗེས། བྱང་སྡོམ་གཟུང་བ་ནི། བྱང་ཆུབ་སྙིང་པོར་མཆིས་གྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང༌། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང༌། །དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ལན་གསུམ། དེང་དུ་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། ། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །བདག་གིས་དེ་རིང་སྐྱོབ་པ་ཐམས་ཅད་གྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་བགྱི།། །།དེ་ནས་རིམ་བཞིན་ཀློང་སྙིང་བརྒྱུད་འདེབས། ཁྲིད་ཡིག་དྲན་པ་ཉེར་གཞག་གི་ངག་འདོན་སྐོར། བླ་མའི་རྣལ་འབྱོར། ཆུ་གཏོར་བརྒྱ་རྩའི་ལྷན་ཐབས། དཀར་དམར་གྱི་གསུར། གསོན་གཤིན་གྱི་བསྔོ་བ། ལེགས་སྨོན་དངོས་གྲུབ་རྒྱ་མཚོ། བར་དོའི་སྨོན་ལམ། དུས་མཐར་གདབ་པའི་སྨོན་ལམ། སྐུ་གསུམ་ཞིང་སྦྱོང་སྨོན་


JLAZ012_Page_0691
[མ་དཔེ་གཟིགས་ན་འདིར་གནོན།]

ལམ་སོགས་བཞུགས་ཀྱང་དེ་རྣམས་ནི་སྔ་ལོ་ནས་ཀློང་སྙིང་པོདགཉིས་སུ་བྱོན་ཟིན་ལ། །༈ རིག་པ་གསུམ་བསྐྱེད་སྨོན་ལམ་ནི། འཁོར་ལོ་འབར་བའི་རྣམ་ཐར་སྒོ་གསུམ་དོན། །དུས་གསུམ་རྟོག་བྲལ་ཡོངས་གྲུབ་ཆེན་པོའི་ངང༌། །སྔོན་གྱི་གནས་དང་འཆི་འཕོ་སྐྱེ་བ་ཤེས། །ཟག་པ་ཟད་དེ་རིག་པ་གསུམ་བསྐྱེད་ཤོག།།འགྲོ་ལ་ཕན་མཆོག་རྒྱལ་བའི་ཐུགས་ལའང་སྨན། །གང་ལ་གནོད་མཆོག་ཀྱང་ནི་དེ་བཞིན་ཕྱིར། །ང་དང་སེམས་ཅན་བདེ་སྡུག་མཚུངས་ཞེས་གསུངས། །དེ་ཕྱིར་འཕགས་པའི་སྤངས་རྟོགས་བདེན་པས་སྐྱོབས། །རྒྱལ་བསྟན་ལྔ་ཕྲག་ཐ་མས་མི་བརྫི་ཞིང༌། །འགྲོ་བའི་བདེ་སྐྱིད་བདུན་གྱི་བདུན་པའི་ཞལ། །ནད་མཚོན་མུ་གེའི་བསྐལ་པ་ངན་པ་དང༌། ། ལོག་སྨོན་བདུད་ཀྱི་གཡུལ་ལས་རྒྱལ་བར་ཤོག །ཞེས་པའང་འབྲུག་པ་ཆོས་གྲགས་ཀྱི་ངོར་རང་བྱུང་རྡོ་རྗེས་སོ།། །།༈ གསོལ་འདེབས་བསམ་པ་མྱུར་འགྲུབ་མ་བཞུགས། ཨེ་མ་ཧོ། མཚོ་དབུས་གེ་སར་པདྨའི་སྡོང་པོ་ལ། ། སྐུ་ལྔ་ཡེ་ཤེས་ལྷུན་གྱིས་གྲུབ་པའི་ལྷ། །རང་བྱུང་ཆེན་པོ་པདྨ་ཡབ་ཡུབ་ནི། །མཁའ་འགྲོའི་སྤྲིན་ཕུང་འཁྲིགས་ལ་གསོལ་བ་འདེབས། །བསམ་པ་མྱུར་ཏུ་འགྲུབ་པར་བྱིན་གྱིས་རློབས། །ལས་ངན་སྤྱད་པའི་རྣམ་སྨིན་མཐུས་བསྐྱེད་པའི། །ནད་གདོན་བར་གཅོད་དམག་འཁྲུགས་མུ་གེའི་ཚོགས། །ཁྱོད་ཞལ་དྲན་པའི་མོད་ལ་ཟད་བྱེད་པའི། །ཞལ་


JLAZ012_Page_0692
[མ་དཔེ་གཟིགས་ན་འདིར་གནོན།]

བཞེས་སྙིང་ནས་བསྐུལ་ལོ་ཨོ་རྒྱན་རྗེ། །བསམ་པ་མྱུར་ཏུ་འགྲུབ་པར་བྱིན་གྱིས་རློབས། །དད་དང་ཚུལ་ཁྲིམས་གཏོང་ལ་གོམས་པ་དང༌། །ཐོས་པས་རྒྱུད་གྲོལ་ཁྲེལ་ཡོད་ངོ་ཚ་ཤེས། །ཤེས་རབ་ཕུན་སུམ་ཚོགས་པའི་ནོར་བདུན་པོ། །སེམས་ཅན་ཀུན་གྱི་རྒྱུད་ལ་རང་ཞུགས་ནས། །འཇིག་རྟེན་བདེ་སྐྱིད་ལྡན་པར་དབུགས་འབྱིན་མཛོད། །བསམ་པ་མྱུར་ཏུ་འགྲུབ་པར་བྱིན་གྱིས་རློབས། །གང་ལ་ནད་དང་སྡུག་བསྔལ་མི་འདོད་རྐྱེན། །འབྱུང་པོའི་གདོན་དང་རྒྱལ་པོའི་ཆད་པ་དང༌། །མེ་ཆུ་གཅན་གཟན་ལམ་ཕྲང་འཇིགས་པ་ཆེ། །ཚེ་ཡི་ཕ་མཐར་གཏུགས་པའི་གནས་སྐབས་ཀུན། །སྐྱབས་དང་རེ་ས་གཞན་དུ་མ་མཆིས་པས། །ཐུགས་རྗེས་ཟུང་ཞིག་གུ་རུ་ཨོ་རྒྱན་རྗེ། །བསམ་པ་མྱུར་ཏུ་འགྲུབ་པར་བྱིན་གྱིས་རློབས། །ཞེས་བོད་ཁམས་ནད་མུག་མཐའ་དམག་ཞི་ཞིང་བསྟན་འགྲོའི་བདེ་སྐྱིད་གསོ་བར་ཕན་ན་སྙམ་པས་དད་ལྡན་རྣམས་ཀྱིས་ཐུགས་ལ་བཞུགས།། །། ༈ ལྷ་མོ་འོད་ཟེར་ཅན་ལ་བསྟོད་པ། ཨོཾ་ལྷ་མོ་འོད་ཟེར་ཅན་མ་ལ་ཕྱག་འཚལ་ལོ། །ཕྱག་འཚལ་བདུད་ཀྱི་བདུད་དགྲ་ཆེན་མོ། །གཞན་གྱིས་མི་ཐུབ་རྣམ་པར་འཇོམས་མ། །ཉི་མ་ཟླ་བའི་མདུན་ནས་འགྲོ་ཞིང༌། །ཆུ་སྲིན་རྒྱལ་མཚན་རྣམ་པར་སྐྲོད་མ། །ཁྱོད་ལ་གསོལ་བ་བཏབ་པ་ཙམ་གྱིས། །དགྲ་ཡི་དཔུང་ནི་རྣམ་པར་ཆོམས་ཤིག །བསད་དང་དབྱེ་དང་བསྐྲད་རྨོངས་བྱེར་བས། །ཕྱོགས་ལས་རྣམ་


JLAZ012_Page_0693
[མ་དཔེ་གཟིགས་ན་འདིར་གནོན།]

རྒྱལ་དངོས་གྲུབ་སྩོལ་ཅིག །དུས་འཁྲུགས་གི་འཇིགས་པ་སྐྱོབ་ཕྱིར་རིག་འཛིན་འཇིགས་བྲལ་གླིང་པས་སོ།། །། ༈ རྒྱ་རོང་དབོན་སྤྲུལ་ལ་གནང་བའི་སྨོན་ལམ། ཀ་བ་མེད་པའི་བྲག་ཕུག་རང་ཤོང་ནང༌། །ཁ་ཏོན་བརྩོན་ཞིང་ངེས་འབྱུང་སྐྱོ་ཤས་བསྒོམ། །ག་བུར་ངད་ལྡང་ཚུལ་ཁྲིམས་དག་པའི་རྒྱུ། །ང་རྒྱལ་གཞན་གནོད་གཞི་བཅས་སྤང་བར་ཤོག །ཅ་ཅོའི་ངག་འཁྱལ་གྲོགས་ངན་ལ་བརྟེན་འབྱུང༌། །ཆ་མེད་གནས་སུ་གཅིག་པུར་སྡེ་སྣོད་བལྟ། །ཇ་ཆང་ལོག་འཚོའི་དཀོར་ལ་བམི་རྔམས་པར། །ཉ་སྟོང་ཡང་དག་གསོ་སྦྱོང་ལེན་པར་ཤོག །ཏ་ཐཱ་ག་ཐའི་བསྟན་ལ་རབ་བྱུང་ནས། །ཐ་ཆད་ཁྱིམ་པའི་བྱ་བ་མི་བྱེད་ཅིང༌། ། ད་ལྟ་ཉིད་ནས་བདེན་བཞིའི་དོན་བསྒོམ་སྟེ། །ན་རྒ་སྐྱེ་འཆིའི་མཚོ་ལས་སྒྲོལ་བར་ཤོག །པ་ཙ་ཀླ་ཀློའི་ཆོས་ལུགས་མི་བགྱིད་པར། །ཕ་རོལ་ཕྱིན་པའི་ལམ་ལ་དད་བྱས་ཏེ། །བ་ལང་ལྟ་བུའི་འགྲོ་ལ་སྙིང་རྗེ་བསྐྱེད། །མ་རིག་སྲིད་པའི་རྒྱ་མཚོ་སྐེམས་ནུས་ཤོག །ཙ་ན་ཤི་ཡོངས་སྙམ་པའི་ངེས་འབྱུང་གིས། །ཚ་གྲང་དཀའ་སྤྱད་ཆོས་ལ་བཟོད་པ་དང༌། །ཛཱ་ཏི་སྲུང་བ་བཞིན་དུ་བྱང་ཆུབ་སེམས། །ཝ་ལྟར་རི་སུལ་འགྲིམས་ནས་བསྒོམ་པར་ཤོག །ཞྭ་ཐོད་བཞིན་དུ་བླ་མ་དཀོན་མཆོག་བསྟེན། །ཟ་མ་ཏོག་བཞིན་སྡོམ་པ་དམ་ཚིག་བསྲུང༌། །འ་ཅག་འབའ་ཞིག་བསམ་ན་གཞན་དོན་ཉམས། །ཡ་རབས་སྤྱོད་པས་འགྲོ་དོན་བྱེད་པར་ཤོག །རྭ་ཚགས་གསོད་ཅིང་


JLAZ012_Page_0694
[མ་དཔེ་གཟིགས་ན་འདིར་གནོན།]

རྔོག་ཆགས་རྟ་ཁལ་བརྟེན། །ལ་ཀླུང་ཉུལ་བའི་ཚོང་དང་སྒར་བསྐོར་སོགས། །ཤཱཀྱ་ཐུབ་པའི་རིང་ལུགས་མ་ཡིན་པས། །སཱ་ལའི་ཤིང་དྲུང་སྦྱངས་ཡོན་ལ་གནས་ཤོག།།ཧ་ཅང་སྙིགས་མར་གྱུར་པའི་དུས་ཚོད་འདིར། །ཨ་དོན་ཆོས་ཉིད་བདེན་པ་མ་མཐོང་ན། །ཆོས་ལྟར་བཅོས་པ་ཐམས་ཅད་ངན་སོང་རྒྱུར། །མཐོང་ནས་སྨོན་ལམ་དྲང་པོར་བཏབ་པའོ། །མདོ་ཁམས་རྒྱ་རོང་པ་དབོན་སྤྲུལ་གྱི་ངོར་རྫོགས་ཆེན་པ་རང་བྱུང་རྡོ་རྗེས་སོ།། །།དགེའོ། །དགེའོ། །དགེའོ།། །།