ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས།
ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་བ་བཞུགས།
དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གང་གི་རང་བཞིན་ཤིན་ཏུ་རྣམ་དག་རྒྱ་ཆད་ཕྱོགས་སུ་མ་ལྷུང་ཞིང༌། །མ་སྐྱེས་མི་འགག་སྤྲོས་པ་ཀུན་བྲལ་ཡེ་བབས་གཉུག་མ་བྱང་ཆུབ་སེམས། །དུས་གསུམ་དུས་མེད་རྣམ་ཀུན་མཆོག་ལྡན་འཕོ་མེད་འདུས་མ་བྱས་ཀྱི་སྐུ། །འཁོར་འདས་བདག་མེད་ཁྱད་ཆོས་དྲུག་ལྡན་གདོད་མའི་མགོན་པོ་དེ་ལ་འདུད། །གང་གི་གཞི་སྣང་རོལ་པ་ཆུ་ཟླའི་གར། །སྲིད་མཚོར་བཅུད་དུ་སྨིན་པའི་དཔལ་ཡོན་ཅན། །འོད་ལུས་སྒྱུ་འཕྲུལ་དྲྭ་བའི་སྐུར་བཞེངས་པ། །སངས་རྒྱས་གཉིས་པ་པདྨ་འབྱུང་གནས་མཆོད། །རྐང་གཉིས་གཙོ་བོ་མི་ཡི་སེང་གེ་ཤཱཀྱའི་རྒྱལ་དང་དེ་ཡི་སྲས། །ཤིང་རྟ་གཉིས་སོགས་རྒྱན་དྲུག་མཆོག་
གཉིས་འཇིག་རྟེན་མིག་གཅིག་ཞི་བ་འཚོ། །སད་མི་བདུན་དང་མར་མེ་མཛད་དཔལ་ཤཱཀ་ཤྲཱི་ཀུན་མཁྱེན་ལྔ་པ་སོགས། །བསྟན་པའི་གཞི་རྟེན་ཚུལ་ཁྲིམས་གསུམ་གྱི་བདག་པོ་རྣམས་ལ་ཅིས་མི་དད། །གསང་བདག་དཔའ་བོས་རྒྱལ་ཐབས་སྤྱི་བླུགས་དབང་བསྐུར་བྱིན་པའི་ཐེག་མཆོག་སྟོན་པ་དགའ་རབ་རྗེ། །དམ་པའི་རིགས་ཅན་དྲ་མ་ལྔ་དང་ཏནྟྲ་བཅོ་བརྒྱད་གླེགས་བམ་དབང་ཐོབ་རྒྱལ་པོ་ཛ། །རྣམ་གསུམ་ཡོ་གའི་དོན་བརྒྱུད་བདག་པོ་བི་མ་ལ་དང་བཻ་རོ་ལ་སོགས་ཉི་ཤུ་ལྔ། །ཀློང་ལྔའི་མཛོད་ནས་ཟབ་རྒྱའི་སྒོ་འབྱེད་བཅུ་ཕྲག་བཅུ་ཡི་ཕ་མཐར་བརྒལ་ལ་སྙིང་ནས་དད། །བརྗོད་བྱ་གསུང་རབ་ཡན་ལག་བཅུ་གཉིས་དང༌། །བརྗོད་དོན་རང་བཞིན་མེད་པའི་སྟོང་པ་ཉིད། །
ཐུབ་པའི་ལུང་རྟོགས་བསྟན་པ་གངས་ཅན་འདིར། །གསལ་མཁས་ཀུན་མཁྱེན་ངག་གི་དབང་པོར་ངེས། །མདོ་སྔགས་ཆོས་རྣམས་བསྟན་པ་ཡོངས་རྫོགས་སུ། །སྟན་ཐོག་གཅིག་གི་གོ་ན་བསྟན་པའི་མཐར། །བྱ་རྩོལ་མེད་པ་ཆོས་སྐུའི་དགོངས་པ་ལ། །སྦྱོར་བ་རྫོགས་པ་ཆེན་པོའི་ཁྱད་ནོར་ཡིན། །དེ་ཕྱིར་དེ་ཡི་འཁྲིད་ཚུལ་རབ་འབྱམས་ཀྱི། །ཐུན་མོང་སྔོན་འགྲོ་སེམས་སྦྱོང་རྣམ་པ་བདུན། །རྒྱས་བསྡུས་གཉིས་ཀའི་ཕྱོགས་སུ་མ་ལྷུང་བར། །ཚད་མ་གསུམ་གྱིས་གཉེར་ཁས་བཤད་པར་བྱ། །དེ་ལ་འདིར་བརྒྱུད་པའི་ཁྱད་པར་དྲུག་དང་ལྡན་པའི་སྒོ་ནས་མདོ་སྔགས་ཀྱི་ཆོས་ཚུལ་རབ་འབྱམས་མཐའ་དག་སྟན་ཐོག་གཅིག་ཏུ་འཆད་ནུས་པའི་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོ་ལ་འཇུག་པའི་ལམ་སྟེགས་ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་འཁྲིད་ནི་ཇི་སྐད་དུ། བདག་གི་བླ་མ་རྒྱལ་དབང་པདྨའི་དོན་གྱི་རྒྱལ་ཚབ་ཀུན་མཁྱེན་ཤནྟ་པུ་རི་པས། མངོན་མཐོ་སྒྲུབ་བྱེད་རྒྱལ་བའི་གསུང་རབ་ཀུན། །དོན་རྣམས་སྐྱེས་བུ་ཆུང་ངུའི་ལམ་དང་ནི། །ཐར་པ་བསྒྲུབ་པའི་ཐབས་ལ་བརྩོན་པ་ཡི། །ཆོས་ཀྱི་རྣམ་གྲངས་ཀུན་གྱི་བརྗོད་བྱའི་དོན། །སྐྱེས་བུ་འབྲིང་གི་ལམ་གྱི་རིམ་པ་སྟེ། །ཞེས་གསུངས་པ་ལྟར་འདི་ཉིད་ས་བཅད་ཀྱི་དབང་གིས་སྐྱེས་བུ་འབྲིང་མན་ཆད་ཀྱི་ལམ་དུ་བཞག་ནའང༌།
དངོས་གཞིར་སྟོན་བྱའི་ལམ་གྱི་ངོ་བོ་ཐེག་པའི་མཆོག་རབ་ཡིན་པར་ཡང་མ་ཟད་ཐེག་པ་ཆེན་པོའི་སེམས་བསྐྱེད་ཀྱི་འཕེལ་བ་ལན་རེ་རེའི་ནུས་སྟོབས་ཀྱང་བསམ་གྱིས་མི་ཁྱབ་པ་ཉིད་ལ་དཔགས་ནས་ལམ་གྱི་ཐོག་མ་ཉིད་ནས་སེམས་བསྐྱེད་ཁྱད་པར་བ་ཡོད་པའི་ཕྱིར་སྐྱེས་བུ་ཆེན་པོའི་ལམ་དུ་བཞག་ཀྱང་མི་འགལ་ལོ། །དེ་ལྟ་བུའི་སྐྱེས་བུ་གསུམ་གྱི་རྣམ་པར་བཞག་པ་ནི་ཚེ་དབང་རིག་འཛིན་སླར་ཡང་སྡེ་སྣོད་གསུམ་གྱི་སྤངས་རྟོགས་ཀྱི་བསྟན་པ་སྤེལ་བའི་སླད་དུ་ཚངས་པར་མཚུངས་སྤྱོད་ཀྱི་བརྫུ་ལ་ཞུགས་པ་ལྷ་གཅིག་དཱི་པམ་ཀཱ་རས་བྱང་ཆུབ་ལམ་གྱི་སྒྲོན་མར་བསྟན་པ་ལྟར་ལས། དོན་གྱི་ས་ཟིན་ཟུར་པ་མེད་ཅིང་ངོ་བོ་ལ་ཆོས་སྐད་ཀྱི་འཇུག་ལྡོག་ཙམ་ཡིན་པ་ལ་དགོངས་ནས་སྔ་འགྱུར་བའི་ཕྱོགས་ལ་གྲགས་ཆུང་བ་ཡིན་ནོ། །དེ་ལྟ་ནའང་རྣམ་པར་ཤེས་བྱ་འབྱེད་པའི་བློ་གྲོས་དཔྱད་བཟོད་པ་ཉིད་དང་སྔོན་གྱི་ལམ་སྟོན་ཆེན་པོ་རྣམས་ནས་སྲོལ་བཏོད་པའི་ཕྱིར་མདོ་སྔགས་ཀྱི་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་ཤེས་པས་བཀའ་ལུང་རང་དབང་དུ་བཀྲལ་བའི་ནུས་པ་འཇོག་ཕྱིར་དང༌། མདོ་ལས། འཇམ་དཔལ་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་ཕྲའོ། །འཇམ་དཔལ་གང་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་
ཤེས་པ་ནི་ཆོས་སྤོང་པའོ། །ཞེས་གསུངས་པ་ལྟར་བསྟན་པའི་བར་སྐབས་སུ་ཕྱོགས་རེའི་མིག་ཅན་འགའ་ཞིག་གིས་བསྟན་པ་རྣམ་དག་ལ་རྟོག་བཏགས་འགལ་འདུའི་རྫུན་ཕྲེང་གིས་དྲི་བཅས་སུ་བསྒྲུབས་པས་རྐྱེན་བྱས་ཤིན་ཏུ་གསང་བ་ཆེན་པོའི་ཐེག་པ་ལ་ལམ་གྱི་གོ་རིམ་ཙམ་ཡང་མེད་པར་སྤྱོད་ཕྱོགས་ཁྱད་དུ་བསད་སྙམ་པའི་བཙན་ཐབས་ཉིད་དུ་ཆོས་ཐམས་ཅད་རང་བཞིན་མེད་པར་བསྟན་པར་གོ་ནས་ཡང་དག་པའི་ལམ་ལ་ཆོས་མ་ཡིན་པར་འདུ་ཤེས་ཏེ་གཤེ་ཞིང་སྡང་བའི་ཉེས་སྤྱོད་ཆེན་པོའི་གཡང་ས་ལས་སྐྱོབ་ཕྱིར་ཡང་ཡིན་ནོ། །དེ་ཡང་རྟེན་འབྲེལ་གྱི་སྒོ་དང་པོ་སྟོན་པ་དང་ཆོས་ལ་རིམ་གྲོ་དང་བཀུར་བསྟི་བྱ་བར་རྒྱལ་བའི་ཡུམ་དང་སའི་སྙིང་པོའི་མདོ་སོགས་ལས་རྒྱ་ཆེར་བཤད་ཅིང་དེ་སྐད་དུ་ཀུན་ཏུ་བཟང་པོའི་ཏནྟྲ་ལས། དང་པོར་སློབ་མས་བླ་མ་ལ། །སྡོམ་ཆོས་ཞུ་ཚེ་འདི་ལྟར་བྱ། །སྔ་བར་ལངས་ལ་ཁ་ལག་བཀྲུས། །ལུས་ཀྱི་ཆས་རྣམས་ལེགས་པར་གཟབས། །མཆེད་གྲོགས་དམ་ཚིག་ལྡན་མི་ལྡན། །སྟ་གོན་རྣམ་དབྱེ་ལེགས་པར་བྱ། །ཆོས་རར་ཆག་ཆག་བྱི་དོར་བྱ། །ཞེས་པ་ལྟར་ཁྲུས་བྱ་ཞིང་གོས་གཙང་མ་གྱོན། མཆེད་དམ་ཚིག་དང་མི་ལྡན་པ་དག་ཕྱིར་བསལ་ཏེ་ཐབས་ཀྱིས་སྤངས། ཆོས་རར་ཡུལ་དུས་དང་བསྟུན་པའི་བྱི་དོར་བྱ་བ་སོགས་བྱི་དོར་རྣམ་པ་
གསུམ་དུ་ངེས་པར་བྱ་ཞིང༌། དེ་ནས་བཞུགས་ཁྲི་བླ་ཡོལ་ལྡ་ལྡི་དང༌། །ཕྱི་ནང་མཆོད་པ་རྒྱས་པར་བཤམ། །བཀོད་པས་ཁྱད་པར་འཕགས་པ་ནི། །ངག་གི་དང་འདྲེན་བློ་ཕེབས་བཅའ། །དེ་ནས་ཆོས་འཁོར་བསྐུལ་བའི་སྒྲ། །ཆོས་ཀྱི་དུང་ཆེན་ལན་དགུ་པོ། །བླ་མའི་ཕྱོགས་སུ་ཁ་བལྟས་འབུད། །ཀུན་གྱིས་གསོལ་འདེབས་དུང་བར་བྱ། །བླ་མ་སྤོས་དང་རོལ་མོས་བསུ། །བདེ་བའི་སྟན་ལ་བཞུགས་སུ་གསོལ། །ཞེས་པ་ལྟར་བརྙས་སྟབས་སུ་མ་སོང་བར་བླ་མ་དང་དཀོན་མཆོག་མཉེས་པའི་མཆོད་པ་དང་ཁྲི་སྟན་མཐོན་པོ་བཤམས་པ་སོགས་བྱ། ཆོས་ལ་བསྐུལ་བའི་དུང་འབུད་པའི་ཚེ་ཡང་བླ་མ་ལ་ཁ་བསྟན་ཏེ་བུས་པས་མཆོད་པའི་ཚུལ་དུ་འགྲོ། སྒྲ་དེ་ཐོས་པའི་སེམས་ཅན་མང་པོ་ཡང་ངན་སོང་ལས་ཐར་བར་བཤད་པས་སངས་རྒྱས་དང་བྱང་ཆུབ་སེམས་དཔའི་སྤྱོད་ཡུལ་དང་ཐབས་བསམ་གྱིས་མི་ཁྱབ་པར་ཤེས་པར་བྱས་ལ་ཐུན་ཐམས་ཅད་ཀྱི་བརྡར་དུང་འབུད་པ་ལ་ཡང་གནད་ཆེན་པོ་དེ་ལྟ་བུ་ཡོད་པ་ཡིན་ནོ། །དེའི་ཚེ་བླ་མས་ཀྱང་གདུལ་བྱ་དང་བ་འདྲེན་པའི་སྤྱོད་ལམ་ལ་བསླབ་དགོས་ཏེ་ཀློང་གསལ་ལས། སློབ་མའི་མོས་གུས་ཆེ་ཆུང་དེ། །བླ་མའི་མཛད་སྤྱོད་ལེགས་ཉེས་ཡིན། །འགྲོ་ཆག་ཉལ་དང་ཟ་བ་སོགས། །སྤྱོད་ལམ་ཐབས་ལ་ལེགས་པར་
བསླབ། །ཅེས་གསུངས་ཤིང་རྒྱུད་སྡེ་རྒྱ་མཚོ་ནས་དམ་ཚིག་གི་རྣམ་བཤད་སྟོན་པའི་སྐབས་སུའང༌།དཔོན་གྱིས་ཉམས་ན་སྦྱང་ཐབས་མེད། །གཉིས་ཀ་ན་རག་ཆེན་པོར་འགྲོ། །ཞེས་གསུངས་པས་སྤྱིར་རྣམ་པ་ཐམས་ཅད་དུ་ཤིན་ཏུ་རིགས་པའི་སྤྱོད་ལམ་ལ་བསླབ་ཅིང་ཁྱད་པར་ཆོས་སྟོན་པ་ལ་སོགས་འདི་དག་གི་ཚེ་སྤོམ་ཡོར་ཡོམ་ཡུགས་སུ་མ་སོང་བ་ཞིག་དགོས་ཏེ། ཀློང་གསལ་ལས། དེ་ལྟར་སྣོད་ལྡན་སློབ་མ་ལ། །ཟབ་ཆོས་བསྟན་པའི་དུས་ཀྱི་ཚེ། །བླ་མའི་སྤྱོད་ལམ་འདི་ལྟར་བྱ། །བདེ་བའི་སྟན་ལ་སྐྱིལ་ཀྲུང་བཅས། །རང་ཉིད་ཐེག་པ་གང་སྟོན་པའི། །དཀྱིལ་འཁོར་གཙོ་བོར་གསལ་བཏབ་ལ། །འགྲོ་དྲུག་སེམས་ཅན་མ་ལུས་ཀུན། །མདུན་དུ་སྐད་ཅིག་འཁོད་པར་བསམ། །རང་རང་སྐད་དང་བློ་འཚམ་པའི། །ཐེག་ཆེན་ཆོས་སྟོན་སེམས་ཀྱང་བསྐྱེད། །ཆོས་སྐྱོང་དཀར་ཕྱོགས་ཐམས་ཅད་ལ། །ལེགས་སྤེལ་བར་ཆད་སྲུངས་ཤིག་ཅེས། །རང་རང་ལས་ཀྱི་ཕྲིན་ལས་བཅོལ། །ཆོས་གྲལ་དབུས་སུ་སྟོང་པར་གཞག །མི་དང་མི་མིན་དཀར་ཕྱོགས་ཀུན། །མོས་པས་དམ་ཆོས་ཉན་པར་བསམ། །མིག་གིས་སློབ་མ་ཀུན་ལ་བལྟ། །ལག་པ་ཆོས་འཆད་མཉམ་བཞག་བྱ། །ངག་གི་ཚིག་གསལ་གདངས་སྙན་པས། །དཔེ་དོན་རྟགས་གསུམ་འབྲེལ་བར་བཤད། །དབང་
པོ་གང་ལ་འཚམ་པ་ཡི། །ཆོས་སྒོ་ཐེག་པ་རིམ་པར་བསྟན། །ཞེས་འདི་ལྟ་བུའི་ཆོས་འཆད་ལུགས་ནི་ཐེག་པ་གང་དང་གང་སྟོན་པ་ཐམས་ཅད་ཀྱི་ཁོག་འབུབས་ཀྱང་ཡིན་ལ། དེའི་ཕྱིར་ལུས་ཀྱི་སྤྱོད་ལམ་བག་མེད་པ་འགྱེལ་བུབ་གཞོགས་སྙེས་ལ་སོགས་པ་སྤང༌། གཡོན་མཉམ་གཞག་དང་གཡས་ཆོས་འཆད་ཀྱི་ཕྱག་རྒྱ་བཅའ་བ་སྔོན་དུ་འགྲོ་བས་སྔོན་དུ་འགྲོའི་ཚེ་ཤཱཀྱ་ཐུབ་པ་དང་དངོས་གཞིའི་ཚེ་རྒྱུད་ལུང་མན་ངག་ཇི་ལྟར་དུ་སྟོན་པའི་དཀྱིལ་འཁོར་གྱི་བདག་པོར་གསལ་བཏབ་ནས་སེམས་ཅན་ཐམས་ཅད་རྣམ་བྱང་ལ་འགོད་པའི་སེམས་བསྐྱེད་ཀྱིས་འཕེན་པས་གཞི་བཟུང༌། དེའི་ཚེ་རིགས་དྲུག་གི་སེམས་ཅན་ཐམས་ཅད་རང་གི་མདུན་དུ་ཆོས་ཉན་པའི་ཕྱིར་འཁོད་པར་བསམ་ཞིང༌། ཁྱད་པར་ཆོས་རའི་དབུས་སྟོང་པར་བཞག་པ་ལ་མི་མ་ཡིན་དཀར་ཕྱོགས་པ་ཀུན་ཀྱང་འདུས་ནས་མོས་པས་ཆོས་ཉན་པར་བསམ་ཞིང༌། བར་ཆད་ཞི་བ་དང་ལེགས་སྤེལ་གྱི་འཕྲིན་ལས་བཅོལ། འདོད་ལྷ་སྡེ་བཅས་ཀྱི་གཉེན་པོར་བློ་གྲོས་རྒྱ་མཚོར་ཞུས་པའི་མདོ་ལས་བདུད་ཚར་གཅོད་པའི་སྔགས་བཏོན་ན་དཔག་ཚད་བརྒྱ་ཚུན་ཆད་དུ་གླགས་ལྟ་བར་མི་ནུས་པར་བཤད་པས་དེ་ལྟར་འདོན། ངག་བུལ་མགྱོགས་ལྡབ་ལྡིབ་ལ་སོགས་པས་ཐོས་འཛིན་གྱི་ཚེར་མར་གྱུར་པ་སྤངས་ལ་གསལ་དག་སྙན་པའི་སྒྲས་དཔེ་དོན་
རྟགས་གསུམ་འབྲེལ་བར་བཤད་ཅིང༌། དེ་ཡང་ངེས་དོན་གྱི་ཚིག་ཐོག་མ་ཉིད་ནས་འཆད་པ་དང་ཏན་གན་གྱི་སྤྱོད་པ་ཟུར་འཕྲིག་པ་ལ་སོགས་ཀྱིས་གདུལ་བྱ་བློ་ལས་སུ་མི་རུང་བར་འགྱུར་ཕྱིར་སྤང་པར་བྱ་ལ་དེ་སྐད་དུ། ཀློང་གསལ་ཉི་མ་ལས། བླ་མས་སློབ་མ་གསོ་བའི་ཚེ། །སློབ་མ་གསར་བུ་དད་ལྡན་དེ། །ཐོག་མར་ཐབས་ཀྱིས་འཁྲིད་པར་བྱ། །ངེས་དོན་སྙིང་པོ་མ་གོའི་བར། །རྒྱུ་འབྲས་གཉིས་ཀྱི་ཆོས་རྣམས་བཤད། །སྒྲུང་དང་དཔེ་དང་བསྟན་བཅོས་དང༌། །མགུར་གླུ་ལ་སོགས་འཁོར་བ་ལ། །ཡིད་དབྱུང་ངན་སོང་སྡུག་བསྔལ་དང༌། །སངས་རྒྱས་ཡོན་ཏན་ལ་སོགས་བཤད། །བླ་མ་ཉིད་ཀྱང་སྤྱོད་ལམ་གཟབས། །གལ་ཏེ་ཏན་གན་ཟུར་འཕྲིག་ན། །བློ་ཆུང་དད་ལོག་རྫ་མི་དོས། །དེ་ལ་བྱིན་རླབས་གཞན་མི་འགོ། །ཞེས་སོ། །དེའི་ཕྱིར་ཚུལ་འདི་ལྟ་བུའི་སེམས་སྦྱོང་ལུགས་ནི་ལས་དང་པོ་པ་བློ་སྦྱོང་བའི་ཐབས་ཁྱད་པར་ཅན་ཡིན་པར་ཡང་ཤེས་པར་བྱ་ལ། དངོས་གཞིའི་ཚེ་དེ་ཉིད་ལས། རྡོ་རྗེའི་ཚིག་རྐང་བཀྲོལ་ལ་བཤད། །རྒྱུད་དཀྲུགས་པ་རྣམས་བསྡེབས་ལ་བཤད། །ལུང་གཅུས་པ་རྣམས་བརྐྱངས་ལ་བཤད། །དྲང་པོར་དགོངས་དང་ལྡེམ་པོར་དགོངས། །མ་འོངས་འཇུག་དོན་དགོངས་པ་དང༌། །དྲང་དོན་ངེས་དོན་སྙིང་པོའི་དོན། །གཉིས་སུ་མེད་པའི་དོན་ཚིག་རྣམས། །
རྒྱུད་ལུང་མན་ངག་ཕྱེ་ལ་བཤད། །མུན་ནག་མཛུབ་གཡུག་མ་སོང་བར། །སློབ་བུའི་རྒྱུད་ལ་ཐེབས་པར་གདབ། །དམུས་ལོང་མིག་ཕྱེ་ཇི་བཞིན་དུ། །ལག་ལེན་མྱོང་བས་ཡིད་ཆེས་འཇུག །ཅེས་པ་ལྟར་རྡོ་རྗེའི་ཚིག་རྐང་རྣམས་དོན་བརྒྱུད་ཀྱི་དགོངས་པས་བཀྲལ་ཞིང༌། དེ་ཡང་རྒྱུད་དཀྲུགས་པ་རྣམས་མུ་ཏིག་བསྟར་ལ་བརྒྱུས་པ་བཞིན་དུ་བསྡེབས། ལུང་གཅུས་པ་རྣམས་སྦྲུལ་གྱི་མདུད་པ་བརྐྱངས་པ་ལྟར་བསྲང༌། མན་ངག་གབ་པ་རྣམས་ཉི་མས་མུན་པ་བསལ་བ་བཞིན་མངོན་དུ་ཕྱུང་ནས་དྲང་ངེས་ལྡེམ་དགོངས་ཀྱི་ལུང་དོན་རིགས་པས་འབྱེད་པ་ལ་སྔ་འགྱུར་བཀའ་བབས་ཀྱི་ཆུ་བོ་བཞི་དང་མདོ་སྒྱུ་སེམས་གསུམ་གྱི་བཤད་པའི་རྒྱུན་མ་ཉམས་པ་ཀུན་མཁྱེན་ངག་གི་དབང་པོའི་མན་ངག་གི་བསྟན་བཅོས་རྒྱ་མཚོ་ལྟ་བུས་བཤད་དགོས་པ་ཉིད་དོ། །དེ་ལྟར་སྦྱོར་དངོས་རྗེས་གསུམ་གྱི་སྒོ་ནས་ལམ་གྱི་རིམ་པ་ཅི་ལྟ་བུ་འཆད་པ་ནའང༌། ཆོས་མཚམས་ལེའུའམ་ཐུན་གྱི་མཚམས་སོ་སོར། ཇི་ལྟར་བཤད་པའི་ཚིག་ཐམས་ཅད་དོན་ཐོག་ཏུ་ཧྲིལ་གྱིས་བསྡུས་ལ་བསྒོམ་བྱའི་དམིགས་པའི་ཐོག་དྲིལ་ནས་སློབ་བུའི་རྒྱུད་ལ་འདྲེས་ངེས་པར་བྱ། སྐབས་ཅི་རིགས་པར་གྲུབ་ཐོབ་གོང་མའི་རྣམ་པར་ཐར་པ་དང༌། དགོས་འབྲེལ་གཉིས་དང་ལྡན་པའི་སྒྲུང་རྒྱུད་ངོ་མཚར་བས་བྱིང་བ་བསང་ཞིང་སློབ་བུའི་སྐྱོན་
མཚང་འདོན་པ་སོགས་ཐབས་ཀྱིས་འདུལ་བའི་མན་ངག་ལ་མཁས་པར་བྱས་པས་བརྐོས་ཕོར་ལས་སཙྪ་འབྱུང་བ་བཞིན་དུ་བླ་མའི་ཐུགས་རྗེ་དང་བྱིན་རླབས་ཐམས་ཅད་སློབ་མའི་རྒྱུད་ལ་བསྲེ་ནུས་པ་ཡིན་ནོ། །ཁྱད་པར་ཐུན་སོ་སོའི་འགོར་སེམས་བསྐྱེད་དང་མཇུག་ཏུ་དམིགས་པ་མེད་པའི་བསྔོ་སྨོན་གྱིས་མཚམས་སྦྱོར་བ་ཡང་ནང་པ་སངས་རྒྱས་པའི་ཁྱད་ཆོས་ཡིན་ལ་དེ་སྐད་དུ། ཀློང་གསལ་ལས། ཆོས་མཚམས་ལེའུའི་ཐུན་གྱི་དུས། །ཡས་དྲིལ་མས་དྲིལ་དོན་ཀུན་བསྡུ། །བསྒོམ་བྱའི་དམིགས་པ་བརྟན་དུ་གཞུག །བསམ་བྱའི་གོ་བ་ལེན་དུ་གཞུག །སྐབས་སུ་སྒྲུང་རྒྱུད་ལ་སོགས་པ། །ངོ་མཚར་གཏམ་གྱིས་བྱིང་བ་བསྲིང༌། །སློབ་བུའི་སྐྱོན་མཚང་འདོན་པའི་ཕྱིར། །སྔོན་གྱི་སྒྲུང་རྒྱུད་ལྡེའུ་ཆུང་བརྡེག །རྗེས་སུ་བསྔོ་བ་སྨོན་ལམ་གདབ། །ཀུན་ལ་བྱང་སེམས་བརྩེ་ལྡན་གཅེས། །དེ་ལྟར་ལག་ལེན་སྟོན་མཁས་ན། །བླ་མ་སངས་རྒྱས་བརྐོས་ཕོར་ལ། །དམ་པ་ཆོས་ཀྱི་རི་མོ་ཡོད། །སློབ་མ་སྣོད་ལྡན་བྷི་བྷི་བཅུག །བརྐོས་ཕོར་རི་མོ་དེ་ལ་ཐེབས། །སྐུ་གསུམ་ཚྭ་ཚྭར་དཀྲོང་གིས་འགྱུར། །དེ་ལྟར་སློབ་དཔོན་ལག་ལེན་གཅེས། །ཞེས་གསུངས་པའི་སྟ་གོན་དང་ཕྱག་ལེན་ཆེ་ཕྲ་མཐའ་དག་ལ་ཆོས་ལ་དབང་ཟ་བའི་རང་བཟོའི་དྲི་མས་མ་སྦགས་པ་ཉིད་སྔོན་དུ་སོང་ནས་མཎྜལ་འབུལ་དུ་གཞུག །༈
ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་བའི་ཕྱིར་དུ། སྟོན་པ་བདེ་བར་གཤེགས་པའི་གསུང་གི་བདུད་རྩི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མཐའ་དག་གི་ཡང་ཞུན་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོའི་འབྲས་བུ་དོན་དུ་གཉེར་བའི་ལམ་ལ་འཇུག་གོ་སྙམ་པའི་མོས་པ་མི་ཕྱེད་པས་གཞི་བཟུང༌། དེ་ཡང་མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུང་ཞིག་ཅེས་པ་ལྟར་སྣོད་ཀྱི་སྐྱོན་གསུམ་སྤངས་ཏེ་རང་ལ་ནད་པ། ཆོས་ལ་སྨན། སྟོན་པ་ལ་སྨན་པ། ནན་ཏན་ཉམས་སུ་ལེན་པ་ལ་ནད་གསོ་བ། དེ་བཞིན་གཤེགས་པ་ལ་སྐྱེས་བུ་དམ་པ། ཆོས་ཀྱི་ཚུལ་ལ་རིངས་སུ་གནས་པ་སྟེ་འདུ་ཤེས་དྲུག་དང༌། ཀུན་ཏུ་བཟང་པོའི་རྒྱུད་ལས། བདེ་བའི་ས་ལ་སྐྱིལ་ཀྲུང་བཅའ། །ས་གཅིག་དག་ལས་གནས་མི་སྤོ། །ཞྭ་མོ་ཡོན་ན་མདུན་དུ་བཞག །སྐྲ་ལོ་ཡོད་ན་མདུན་དུ་ཕབ། །ལག་པ་ཐལ་སྦྱར་མཉམ་གཞག་བཅའ། །ལག་གིས་འདུ་བྱེད་ཐམས་ཅད་སྤང༌། །མིག་གིས་བླ་མའི་ཞལ་ལ་བལྟ། །རྣ་བས་བླ་མའི་གསུང་ལ་ཉན། །སེམས་ཀྱིས་ཚིག་དོན་གཏན་ལ་འབེབས། །ཐེ་ཚོམ་དུས་སུ་ལོག་ལ་ཞུ། །ངག་ཏུ་ཤུབ་བུའི་ཚིག་རྣམས་སྤང༌། །རྐང་བརྐྱང་གཞོགས་སྙེས་ཆེ་བཅོས་དང༌། །མ་
གནང་ཁྲི་དང་སྟན་སྟེགས་སྤང༌། །མི་ན་བ་ལ་མགོ་གཡོགས་དང༌། །དགྲ་མེད་པ་ལ་མཚོན་ཐོགས་དང༌། །མ་རྒས་པ་ལ་དབྱུག་ཐོགས་དང༌། །ཚུལ་དང་མི་མཐུན་ཐམས་ཅད་སྤང༌། །ཚིག་དོན་རེ་རེ་གཞག་འབྲེལ་བྱ། །ཆོས་ཐུན་མཇུག་གི་དམིགས་པ་ལ། །ནན་ཆགས་ཆེན་པོས་གོང་འོག་མཐུད། །ཐ་མལ་སྤྱོད་པ་ཐམས་ཅད་སྤང༌། །ཆོས་ཁྲིམས་ལུང་བཞིན་བག་ཡོད་སྤྱད། །ཅེས་གསུངས་པས་ཀུན་སློང་དང་ཀུན་སྤྱོད་ཐམས་ཅད་གསལ་བཏབ་སྟེ་གསན་འཚལ། སྐབས་འདིར་སྙིང་ཐིག་ཡ་བཞི་ལ་སོགས་ཏེ་མན་ངག་གི་གཞུང་གཞན་གྱིས་འཆད་ན། ཆོས་ཀྱི་ཆེ་བ་དང་བརྒྱུད་རིམ་སློབ་མའི་དབང་པོ་དང་བསྟུན་ནས་དང་བ་འདྲེན་པར་བཤད་རྗེས། སེམས་སྦྱོང་དང་པོ་ནི། བུ་ཡིག་ལས། འདུས་བྱས་ཐམས་ཅད་མི་རྟག་པར་བསམ་པ་དང༌། ཞེས་པས། དང་པོ་ལུང་ལ་རྗེས་སུ་དཔགས་ནས་བསམ་པ་ནི། དེ་ཡང་རང་རེ་སྔོན་གྱི་བསགས་པ་ཕུལ་དུ་ཕྱིན་པའི་མཐུ་ཁོ་ན་ལ་བརྟེན་ནས་དཔེ་གྲངས་ངོ་བོའི་སྒོ་ནས་རྙེད་པར་དཀའ་བའི་དལ་འབྱོར་གྱི་མི་ལུས་རིན་པོ་ཆེ་ཐོབ་པ་སྐལ་བ་བཟང་སྟེ། བསམས་ན་གློ་བུར་གྱི་རྐྱེན་མི་ཟད་པས་དོ་ནུབ་ཤི་ནས་སང་ནངས་པར་མལ་དུ་རོ་ལ་སོང་ན་ཇི་ལྟར་བྱེད། བླུན་རྨོངས་ཕལ་ནི་འཆི་བ་འོང་མི་འོང་གི་རྟོག་དཔྱོད་ཙམ་ཡང་མི་བྱེད་པར་སྣང་བ་གདོང་འདེད་ཁོ་ནའི་ངང་ལ་
ཐུག་སྟེ་འཆི། འགའ་ཞིག་འཆི་བ་འོངས་སྙམ་པ་ཡོད་ཀྱང་མ་རྒས་ཀྱི་བར་ལ་དགའ་རབ་ཡོད་རེའི་བསམ་པས་རིམ་གྲོ་དང་ཐབས་སྣ་ཚོགས་ཀྱི་སྒོ་ནས་ཕྱི་ཚིག་དང་རེ་དོགས་ཁོ་ན་ལྷུར་ལེན་ཅིང་ཚེ་འདིའི་འདུན་མ་འབའ་ཞིག་གི་དབང་དུ་འགྲོ། དེ་ལྟ་མི་ཀུན་ཟླ་བ་རྟིང་མའི་བྱ་བྱེད་ཀྱི་གཤོམ་ར་དང་རྒྱགས་ཕྱེ་ལ་སོགས་འོག་གྲབས་བྱེད་ཀྱང་དེའི་དུས་ན་རང་རེ་ལུས་རྟེན་འདི་འདྲ་མིན་པའི་མགོ་དང་ཁ་ལ་རྭ་ཅོ་ཡོད་པ་ཞིག་ཏུ་སྐྱེས་ནས་ལུས་རྟེན་འདིའི་རུས་པ་ཙམ་ཡང་ཤུལ་མེད་དུ་མི་བྱེད་པའི་གདེངས་ཨེ་འདུག །གདེང་མི་འདུག་ན་དེའི་ཚེ་ཐབས་ནི་གང་ཡང་མེད་དེ་རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ། དཔེར་ན་ཕྱོགས་བཞི་ནས་རི་སྲ་བ། བརྟན་པ། དཔང་མཐོ་བ་བཞི་འགྱེལ་ནས་རྩྭ་དང༌། ཤིང་གེལ་པ་དང༌། སྲོག་ཆགས་ཐམས་ཅད་ཕྱེ་མར་འཐག་ཅིང་རུབ་རུབ་བྱུང་ན། དེ་ལ་མགྱོགས་པར་འབྲོས་པ་དང༌། སྟོབས་ཀྱིས་བཟློག་པའམ། ནོར་གྱིས་བསླུ་བའམ། རྫས་དང་སྔགས་དང་སྨན་གྱིས་བཟློག་པ་སླ་བ་མ་ཡིན་ནོ། །དེ་བཞིན་དུ་སེམས་ཅན་ཐམས་ཅད་ལ། ན་བ་དང༌། རྒ་བ་དང༌། འཆི་བ་དང༌། རྒུད་པ་ཞེས་བྱ་བའི་འཇིགས་པ་ཆེན་པོ་བཞི་འབྱུང་སྟེ། དེ་ལ་མགྱོགས་པར་འབྲོས་པའམ། སྟོབས་ཀྱིས་བཟློག་པའམ།
ནོར་གྱིས་བསླུ་བའམ། རྫས་དང༌། སྔགས་དང༌། སྨན་གྱིས་བཟློག་པར་སླ་བ་མ་ཡིན་ནོ། །ཞེས་གསུངས་ལ། དེའི་ཕྱིར་ན་རང་ཅག་རྣམས་ངེས་པར་འཆི་སྟེ། མྱ་ངན་བསལ་བའི་མདོ་ལས། ཅི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པའི། །རྡོ་རྗེ་སྐུ་ཡང་མི་རྟག་ན། །ཆུ་ཤིང་སྡོང་པོ་ལྟ་བུ་ཡི། །ལུས་ཅན་རྣམས་ལྟ་སྨོས་ཅི་དགོས། །ཞེེས་པས་སྐྱེ་འཆི་ལ་རང་དབང་ཐོབ་པའི་འོ་སྐོལ་གྱི་སྟོན་པ་ཤཱཀྱ་ཐུབ་པ་ཡང་གདུལ་བྱ་རྟག་འཛིན་ཅན་གདུལ་བའི་ཕྱིར་ཐ་མའི་གཟིམས་ཁྲི་ལ་མནལ་བས་ཡིད་སྐྱོ། དེ་བཞིན་དུ་རྒྱ་བོད་ཀྱི་པཎ་གྲུབ་རྒྱལ་བློན་བྱང་ཆུབ་སེམས་དཔའི་རྣམ་འཕྲུལ་དེ་དག་ཀྱང་བྱོན་ནས་བསྟན་པ་ལ་བྱ་བ་འདི་ལྟར་མཛད་ཅེས་པའི་གཏམ་རྒྱུད་ཆོས་འབྱུང༌། དེབ་ཐེར། རྣམ་ཐར་སོགས་ལ་བཤད་པའི་མཛུབ་མོ་རི་སྟོན་ལས་དེ་དག་གཅིག་ཀྱང་ཡང་མ་བཞུགས་པ་མངོན་སུམ་ཚད་མས་གྲུབ་པས་སྙིང་རླུང་ལྡང༌། རང་གི་གཉེན་བཤེས་བར་མའི་འགྲོ་བ་ལ་སོགས་ཏེ་ཇི་སྙེད་ཅིག་ན་ནིང་དང༌། ཁ་སང་ཟླ་བ་སྔོན་མ་ཕན་ཆད་ཡོད་པ་འཇིག་རྟེན་ཕ་རོལ་ཏུ་སོང་སྟེ་རོ་མེད་པར་ཟིན་པ་དང་མིང་ཙམ་ཤུལ་དུ་ལུས་པས་རང་རེ་ཡང་ངེས་པར་འཆི། ད་ནི་བསྐལ་བའི་སྙིགས་མ་ལ་ཐུག་ཅིང་ཚེ་ཚད་ཇི་བཞིན་ཐུབ་ནའང་དབུགས་ཉི་ཁྲི་ཆིག་སྟོང་རྒྱུ་རིང་ལ་ཞག་གཅིག་གི་མི་ཚེ་ཐུང་དུ་
སོང་ངོ༌། །ཞག་སུམ་ཅུས་ཟླ་བ། ཟླ་བ་བཅུ་གཉིས་ཀྱིས་ལོ་འཛད་པས་ཚེ་འཛད་པ་ལ་ཚེགས་མེད་དེ། རྒྱ་ཆེ་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་སྐད་ཅིག་ཀྱང་སྡོད་དབང་མེད་པ་ལ་ལེགས་པར་བསམས་ནས་སྙིང་པོ་ལེན་པ་ལ་མགོ་ལ་མེ་ཤོར་གྱི་བརྩོན་འགྲུས་སྐྱེད་པར་བྱའོ། །གཉིས་པ་དེ་ཉིད་མན་ངག་གི་སྒོ་ནས་རྒྱུད་ལ་སྒོམ་པ་ནི། གང་ཟག་ཆོས་ཀྱི་གོ་རྟོགས་ཅན་ལ་ལུང་ལ་དཔགས་ནས་སྐྱོ་བ་བསྐུལ་བ་ཉིད་རྣམ་པ་གཙང་ཞིང་རྒྱུད་ལ་འཕྲོད། ལས་དང་པོ་པ་རྣམ་པར་ཤེས་པ་ཤིན་ཏུ་ལྐོག་ཏུ་གྱུར་པའི་རིགས་ཅན་འགའ་ཞིག་ལ་དཔེ་ཆོས་དང༌། སྒྲུང་རྒྱུད་དང༌། བློ་འདྲིད་པ་འདི་གནད་ཟབ་པ་ཡིན་པས་སློབ་མའི་ཁམས་དང་སྦྱར་རོ། །དེ་ཡང་བདག་ཉིད་ཡིད་ལ་མེད་པ་ཞིག་ལ་ངོ་མི་ཤེས་པའི་ལུང་པ་འཇིགས་སུ་རུང་བ་ཐང་ཤིན་ཏུ་རྒྱ་ཆེ་བ། མིའི་རྒྱུ་འགྲུལ་ཙམ་ཡང་མེད་པ། རླུང་སི་རི་རི་སྒྲོག་པ། འཇག་རྐྱང་པུ་རུ་རུ་ཟེར་བའི་ས་ཆ་ཞིག་ཏུ་སླེབས་ནས་ཅི་བྱ་བརྟོལ་མེད་ཅིང་ཡིད་སློང་སློང་པོར་ཡོད་ཙ་ན། གང་ནས་འོངས་ཆ་མེད་པའི་སྐྱེ་བོ་ཕོ་མོ་ཁ་དོག་དཀར་ནག་གཉིས་བྱུང་ནས་ཚོགས་དྲུག་སྒྱུ་མའི་གྲོང་ཁྱེར་བྱ་བ་ན་ཡིད་བཞིན་ནོར་བུ་
འཆིང་བུ་བྱ་བ་ཡོད། དེ་ལེན་པ་ལ་ཆུ་བོ་ཆེན་པོ་ལ་གཟིངས་སུ་ཞུགས་ནས་འགྲོ་དགོས། རང་རེ་གསུམ་ལྷན་དུ་འགྲོགས་པར་འདོད་དམ་ཞེས་ཟེར། དེ་ལ་རང་ཉིད་བློ་ཡིད་ཕྱོགས་ཏེ་ཁོང་གཉིས་ཀྱི་རྗེས་སུ་འབྲངས་ནས་སོང་སོང་བ་ལས། ཅི་ཞིག་ན་རྒྱ་མཚོ་ཆེན་པོ་གནམ་ཐང་ལ་ཕབ་པ་འདྲ་བ། རྒྱ་ཁྱོན་བློས་མི་ཆོད་པ། དབའ་རླབས་བར་སྣང་ལ་འཕྱོ་བ། དེའི་ནང་ན་ཆུ་སྲིན་དང༌། ཉ་བོ་ཆེ་དང༌། ཆུ་མི་དང༌། ཆུ་རྟ་ལ་སོགས་པ་མདོར་ན་མིག་གིས་སྔར་མ་མཐོང་བ་སྐྱི་གཡའ་བའི་སྲོག་ཆགས་མགོ་ལུས་མི་མཚུངས་པ་མང་པོས་ཁེངས་ཤིང༌། རླབས་ཀྱི་གཉེར་མ་ལ་འཇུག་ལྡོག་བྱེད་པ་ཞིག་གི་རྩར་སླེབས་དེར་རང་ཉིད་ཤིན་ཏུ་འཇིགས་ཤིང་བྲོས་འཚལ་ནའང་ནོར་བུ་ལོན་དུ་རེ་བའི་འདོད་པས་གདུངས་ཏེ་ཁོང་གཉིས་ཀྱིས་བཏང་བའི་གཟིངས་སུ་ཞུགས་ཏེ་རྒྱ་མཚོ་ཆེན་པོ་ལ་བརྒལ་བ་ལས་མཚོ་ཆེན་པོ་དེའི་དཀྱིལ་ཙམ་དུ་སླེབས་པ་དང༌། རླུང་དམར་ཤིན་ཏུ་མི་བཟད་པ་ཞིག་ལངས། དེའི་འཇིགས་སྐྲག་གིས་མ་བཟོད་པར་སྐྱ་བ་ཤིན་ཏུ་དུབ་ཅིང་རྩོལ་བར་བརྒྱབ་པ་ལས་དེ་གཉིས་ཀྱི་ལག་པའི་སྐྱ་བ་ཟུང་ཀྱང་དུས་གཅིག་ལ་ཐུག་སྟེ་ཆག །ཆུའི་དབའ་རླབས་ནམ་མཁའ་ལ་འཕྱོ་བ་ལྟ་བུས་རེས་འགའ་གྲུ་གཟིངས་སྲིད་པའི་རྩེ་མོ་ལ་ལྡིང་བ་སྙམ་བྱེད། རེས་འགའ་ཆུ་བོ་བར་སྣང་ལ་འཕྱོ་ཞིང་གྲུ་གཟིངས་རྒྱ་མཚོའི་གཏིང་དུ་ཆུད་པ་སྙམ་བྱེད།
དེའི་ཚེ་བྲོས་པས་ཐར་བ་དང༌། ར་མདའ་སྦྲན་པ་དང༌། ལག་པ་འཇུ་ས་ནི་མེད། འཆི་བ་འཆི་བ་ཟེར་བའི་འཇིགས་པ་ཅན་དེ། དབུགས་འབྱུང་འཇུག་ཙམ་གྱི་ཁོངས་སུ་བཙན་ཐབས་སུ་སླེབས། སྔོན་ཆད་འཆི་བ་ཡེ་མ་དྲན་པས་ཆོས་བྱས་པའི་གདེང་ནི་མེད། བུ་དང་ནོར་རྫས་གཉེན་འདུན་ཡུལ་མི་ཁྱིམ་མཚེས་དང༌། དེ་རིང་ནས་བྲལ་ཞིང་དེ་དག་གི་ཕན་པ་ནི་ཏིལ་ཙམ་མེད། ཨ་ཙི་འཇིགས་པ་ལ། ད་ཅི་དྲག །ཨ་ཙ་མ། ཀྱེ་ཧུད། ཀྱི་ཧུད་ཀྱི་ཧུད། ཅེས་སྨྲེ་སྔགས་དང་འོ་དོད་དྲག་པོ་འདོན་གྱིན་ཡོད་པའི་ཚེ། མདུན་གྱི་ནམ་མཁར་སྐུ་དྲིན་ཅན་གྱི་བླ་མ་དེ་ཉིད་ཨོ་རྒྱན་ཆེན་པོ་པདྨ་ཐོད་ཕྲེང་རྩལ་གྱི་རྣམ་འགྱུར་ཅན་དུ་གར་སྟབས་ལིང་ལིང་བྱོན་ནས། ཀྱེ་ཁྱོད་ཀྱིས་འཁོར་བ་སྡུག་བསྔལ་གྱི་རང་བཞིན་ལ་ཡིད་བཞིན་གྱི་ནོར་བུ་ལྟ་བུར་མཐོང་སྟེ་འཆི་ཆོས་ཡེ་ནས་མ་དྲན་བས་ལེན། ཁྱོད་རང་གི་ད་ལྟའི་སྣང་བ་ཨ་འཐས་མངོན་ཞེན་ཅན་འདི་ནི་རྒྱུ་བདག་ཉིད་གཅིག་པའི་མ་རིག་པ་ལས་བྱུང་ངོ༌། །བསླུ་བྲིད་མཁན་གྱི་སྐྱེ་བོ་ཕོ་མོ་གཉིས་ནི་ལྷན་སྐྱེས་དང་ཀུན་བརྟགས་ཀྱི་མ་རིག་པའོ། །རྒྱ་མཚོ་ཆེན་པོ་ནི་འཁོར་བའི་རྒྱ་མཚོ་མཐའ་མེད་པའོ། །གྲུ་གཟིངས་ནི་དབུ་བ་རྡོས་པ་ལྟ་བུའི་ཟག་བཅས་སྒྱུ་ལུས་ཀྱི་ཕུང་པོའོ། །སྐྱེ་བ་གཉིས་
ཐུག་གི་ཆག་པ་ནི་ཉིན་མཚན་ལྟེབ་བསྣོལ་གྱི་མི་ཚེ་བཅར་གྱིས་ཟད་ནས་བསབས་ཐེབས་ཅིས་ཀྱང་མེད་པའོ། །ཀྱེ་རིགས་ཀྱི་བུ། ད་ནི་ཤི་བས་ཀྱང་མི་ཆོག་ཤི་ཚར་ནས་གཅེར་བུ་རྒྱང་འཕེན་པའི་འདོད་པ་བཞིན་ཁྲོན་པའི་ནང་དུ་རྡོ་འཕངས་བ་བཞིན་སོང་ན་དེ་ཀས་ཆོག་སྟེ། དཀར་ནག་གི་ལས་ཁྲེ་འུར་བསགས་པ་ཐམས་ཅད་གནམ་ཐིག་དྲང་པོར་བཏབ་པ་བཞིན་དུ་འཕྱུགས་པ་མེད་པར་འབབ་པས་ཇི་ལྟར་བགྱི། ཞེས་གསུངས་པས་སླར་འཇིགས་སྐྲག་དང་སྡུག་བསྔལ་ཤིན་ཏུ་ཆེར་སོང་བླ་མ་ལ་གསོལ་བ་རྩེ་གཅིག་ཏུ་འདེབས་ཤིང་ཅི་བྱ་བརྟོལ་མེད་པར་ཡོད་ཙ་ན། བླ་མའི་ཐུགས་ཀ་ནས་འོད་ཟེར་བ་ཐག་འཛིངས་པ་ལྟ་བུ་ཞིག་སྐྱ་ནར་གྱིས་བྱུང༌།རང་གི་སྙིང་གར་ཟུག་པ་དང་གྲུ་གཟིངས་མགོ་མཇུག་ལྡོག་པ་དུས་མཉམ་སྟེ་བེམ་རིག་བྲལ། སྐུ་གསུམ་པདྨ་འོད་ཀྱི་ཕོ་བྲང་དུ་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས། དེ་ལྟ་བུའི་རྒྱུ་མཐུན་གྱི་འཇིགས་པས་མནར་བའི་སེམས་ཅན་ཐམས་ཅད་བདག་གིས་འདྲེན་ནུས་པའི་སྐལ་བརྒྱུད་ལ་བཞག་པར་བསམས་རྗེས་དུས་གསུམ་གྱི་རྣམ་རྟོག་ཐམས་ཅད་རྟེན་མེད་ཁ་ཡན་དུ་གློད་ལ་འཕྲོ་གནས་སོ་སོའི་ཐོག་ཏུ་དྲན་པའི་བྱ་ར་བཞག་གོ ། སེམས་སྦྱོང་གཉིས་པ་ནི། བུ་ཡིག་ལས། བྱས་པ་ཐམས་ཅད་སྡུག་བསྔལ་གྱི་རྒྱུར་སྣང་བ་བསམ་པ་དང༌།
ཞེས་པས། དང་པོ་ལུང་ལ་རྗེས་སུ་དཔག་ནས་བསམ་པ་ནི། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །ཞེས་གསུངས་པས་རང་རེ་རྣམས་ཀྱི་བདེ་སྡུག་བཟང་ངན་ལེགས་ཉེས་ཐམས་ཅད་ནི་ལས་ཁོ་ནའི་རྗེས་སུ་འབྲང་བར་གདོན་མི་ཟ་ན། དེའི་མི་མཐུན་ཕྱོགས་ཚེ་འདིའི་བྱ་བཞག་དགྲ་འདུལ་གཉེན་སྐྱོང་སོ་ནམ་ཚོང་ཁེ། ཁེ་དྲག་ལོ་འདོད་ཆགས་སྡང་ཁོང་ཁྲོ། གཞན་ལ་ཤ་ཚ་གྲོས་འདེབས། ཆེ་ཐབས་དང་སྙན་གྲགས་བསྒྲུབ་པ་ལ་སོགས་ཅི་དང་ཅི་བྱས་ཀྱང་ཡིད་བརྟན་དང་བློ་ལྟོས་རུང་བ་མི་འདུག །ཡོ་བྱད་ཐབས་སྣ་ཚོགས་ཀྱིས་བསགས་ཀྱང་དགྲ་རྐུན་གྱི་འདོད་པ་བསྒྲུབས་པ་ཡོད། ཞིམ་དུ་རེ་བའི་ཟས་སྐོམ་ཟོས་ཀྱང་ནད་རོ་སློང་ཞིང་འཆི་བའི་རྐྱེན་དུ་གྱུར་པ་དང༌། ཕན་དུ་རེ་ནས་གཉེན་བཤེས་མཛའ་གཅུགས་སུ་བཏགས་ཀྱང་དགྲའི་དྭངས་མར་གྱུར་པ་དང༌། གཞན་ལ་གནོད་པ་ལ་སོགས་མ་བྱས་ཀྱང་དོན་མེད་ལ་ངན་སྨྲས་དང༌། འཕྱ་ཚིག་དང༌། སྐུར་འདེབས་ཟུར་ཟས་ཤེས་རྒྱུད་བསྲེགས་པ་སོགས་སྣང་ཚུལ་
ཐམས་ཅད་སྡུག་བསྔལ་གྱི་རང་བཞིན་དང༌། སྡུག་བསྔལ་བསྐྱེད་པའི་རྒྱུ་ཁོ་ནར་འདུག་པས་ད་ལྟ་ཕན་དེ་ལྟར་མ་གོ་བ་མཚང་རེ་ཆེ། ད་ལེགས་པར་བསམས་ན་ཁ་སང་ཕན་ཆད་ཀྱི་བྱ་བྱེད་ཐམས་ཅད་ཀྱང་ཡིད་ཡུལ་དུ་དྲན་པ་ཙམ་ལས་རྗེས་སུ་མི་འབྲང་བས་མདང་གི་རྨི་ལམ་དང་འདྲ། དེ་རིང་གི་སྣང་བ་ཡང་དོ་ནུབ་ཀྱི་རྨི་ལམ་དང་མཚུངས། སང་ཕན་ཆད་ཀྱི་བྱ་བྱེད་རྣམས་ཀྱང་སང་ནུབ་ཀྱི་རྨི་ལམ་དང་འདྲ་བ་ཞིག་ཡིན་པ་ལས་རྟག་ཐུབ་པ་ཞིག་མི་འདུག་ཀྱང༌། དོན་མེད་མངོན་ཞེན་གྱི་སྣང་བས་ཆགས་སྡང་འཐབ་རྩོད་སྙན་མི་སྙན། གསོག་འཇོག །བདེ་སྡུག །ཁ་འཛིན་གྱི་སྤྱོད་པས་དུས་འདའ་བ་འདི་རང་རེ་སྐྱོན་གྱི་གོང་བུར་འདུག །འཇིག་རྟེན་གྱི་སྣང་བ་འདི་ཀུན་བསླུ་བྲིད་སྒྱུ་མའི་རང་བཞིན་དུ་འདུག་པ་ལ་རྟག་བརྟན་ཐེར་ཟུག་ཏུ་བལྟ་བ་ང་རེ་འགྱོད། ད་ནི་སང་ཕན་ཆད་ཀྱི་བསམ་མནོ་གང་ཡང་མི་གཏོང་བར་བདག་ཏུ་འཛིན་པ་ལ་སྐྱོན་དུ་བལྟ་བར་བྱའོ་སྙམ་དུ་ཞེ་ཐག་པ་ནས་བསམ་མོ། །གཉིས་པ་བློ་བྲིད་དེ་ཐབས་ཀྱིས་སྒོམ་པ་ནི། ཡང་རང་ཉིད་གང་ནས་ཕྱིན་ཆ་མེད་པའི་ལུང་པ་ཐག་རིང་ངོ་མི་འཚལ་བ་ཞིག་དུ་སླེབས། གར་འགྲོའི་གཏད་སོ་མེད་པར་ཐོམ་ཐོམ་ཡོད་ཙ་ན། ངོ་མི་ཤེས་པའི་ཕོ་སྐྱེས་གཞོན་ནུ་བརྒྱད་འབྱུང་ནས་དེ་དག་ན་རེ། བདག་ཅག་ནི་ཀུན་གཞི་
མུན་པའི་གླིང་བྱ་བ་ནས་འོངས། འདི་ནས་ཕར་ལ་ལོ་ཟླ་མང་པོ་བརྒལ་བའི་ས་ན་ཡུལ་རིན་པོ་ཆེའི་གླིང་བྱ་བ་ན་ནོར་བུའི་རིགས་བྱེད་བསམ་གྱིས་མི་ཁྱབ་པ་མཆིས། དེ་དག་ལེན་པ་ལ་ངལ་བ་ཁྱད་དུ་བསད་ནས་འགྲོ་བ་ཡིན། ཁྱོད་ཅག་ཀྱང་དེ་ལྟར་མི་བགྱིའམ་ཟེར་བས་བློ་འགྱུར་ཏེ་དེ་དག་དང་བསྡོངས་ནས་བསྐྱོད་དེ། རེས་ནི་རྫི་ངར་ཅན་གྱི་རླུང་ལ་འགམས། རེས་ནི་གཅན་གཟན་གདུག་པའི་འཕྲང་ལ་བཤར། རེས་ནི་ཆུ་བོ་ཆེན་པོའི་དཔའ་ལ་བཤམས། རྒྱུ་སྟོང་རྐེད་པར་དཀྲིས། མི་ཚེ་རིང་པོ་ལ་དུས་ཀྱི་ཚད་བཙུགས་ནས་ཉིན་མཚན་བར་མེད་དུ་ཤིན་ཏུ་ཐང་ཆད་པའི་ངང་ལ་ཕྱིན་ཕྱིན་པ་ལས། ཅི་ཞིག་ན་མི་ཚེ་ཡང་ཕལ་ཆེར་ཟད། སྐྲ་དང་ཁ་སྤུ་ཡང་དཀར་པོར་སོང་བའི་སྐབས་ཤིག་ན་འདོད་པའི་དོན་གྲུབ་སྟེ་རིན་པོ་ཆེའི་གླིང་ནས་ནོར་བུའི་བྱེ་བྲག་བསམ་གྱིས་མི་ཁྱབ་པ་ཐོབ། དགའ་སྤྲོ་ཡང་དཔག་ཏུ་མེད་པ་བཅས་རང་གི་ཡུལ་དུ་ལྡོག་ནས་ཡོང་ཙ་ན། ཞག་གསུམ་གྱིས་སླེབས་རྒྱུའི་སའི་ཆ་འདུ་བ་རྣམ་བཞིའི་ཐང་བྱ་བ་དེར་ཇག་པ་ཤིན་ཏུ་མི་བསྲུན་པ་སྤུན་བདུན་དང་ཕྲད་དེ། དགའ་བས་བཙལ་བའི་ནོར་བུ་རྣམས་ཕྲོགས། ལུས་ལ་འཇག་པའི་གོས་ནི་བཤུས། ཡན་ལག་ཐམས་ཅད་སྒྲོག་དམ་པོས་བཅིངས། མདའ་མདུང་རལ་གྲི་ལ་སོགས་
པའི་མཚོན་ཆ་ཤིན་ཏུ་རྣོན་པོ་ཐོགས་ནས་བརླང་པོའི་ངག་གིས་ལས་ངན་ཁྱོད་ལ་བླ་མ་ཡོད་ན་གསོལ་བ་ཐོབ། ཡི་དམ་ཡོད་ན་ཐུགས་རྗེ་བསྐུལ། མཁའ་འགྲོ་དང་ཆོས་སྐྱོང་ཡོད་ན་ར་མདའ་སྦྲོན། དེ་དག་གང་ཡང་མེད་ན་འཆི་བ་ཟེར་བའི་སྒྲ་བོ་ཆེ་དེ་སྒོམ། ཚེ་འདི་ཕྱི་ཟེར་བའི་མཚམས་སུ་སླེབས་པ་ཡིན་ནོ། །ཟེར་ང་ཐོས་པས་སྙིང་རྩེ་ཤུམ་གྱིས་སོང༌། ཨ་ཙ་མ། བདག་གིས་མི་ཚེ་ཁོ་ན་ལ་ཚད་བཙུགས་ནས་དཀའ་བ་དེ་ཙམ་ཞིག་བྱས་པ་དོན་མེད་དུ་སོང་བས་མ་ཆོག་ད་ནི་རིན་ཆེན་སྲོག་དང་བྲལ་བ་ལ་ཐུག །བདག་མེད་ཀྱི་ལུང་པར་གཤེད་མ་འདི་ལྟ་བུ་དང་འཕྲད་དུས་སྐྱབས་མགོན་དང་དཔུང་གཉེན་རེ་ས་ནི་མེད། སྔར་དཀའ་བ་སྤྱད་པའི་ལས་ཐམས་ཅད་ཀྱིས་ཕན་པ་ནི་མ་བྱུང༌། ཚེ་ཟད་ལོང་མེད་པར་འཆི་བ་བཙན་ཐབས་སུ་སླེབས་ནས་གདའ། ཨ་ཙ་མ། འཇིགས་པ་ལ། ཀྱི་ཧུད་ཀྱི་ཧུད། ཅེས་སྨྲེ་སྔགས་དང་འོ་དོད་དྲག་པོ་འབོད་ཀྱིན་ཡོད་པའི་ཚེ། མདུན་གྱི་ནམ་མཁར་ཨོ་རྒྱན་ཆེན་པོ་ཕྱག་རྒྱ་བཞི་ལྡན་གྱི་རྣམ་པར་བྱོན་ནས་འོད་ཟེར་སྤྲོ་བསྡུས་མི་རྒོད་རྣམས་རྒྱང་རིང་པོར་བསྐྲད་རྗེས། ཀྱེ་ལས་ངན་གྱི་སེམས་ཅན་ཁྱོད་ཀྱིས་འཁོར་བའི་བྱ་བ་བཙན་དུག་ལྟ་བུ་ལ་རོ་བརྒྱ་དང་ལྡན་པའི་བདུད་རྩི་ལྟ་བུར་ཆགས་པས་ལེན། སྔར་ངོ་མ་ཤེས་པའི་ཕོ་སྐྱེས་བརྒྱད་ནི་རྣམ་ཤེས་
ཚོགས་བརྒྱད་བཞོན་པས་རིག་པའི་ཡེ་ཤེས་བསླུས་པ་ཡིན། རིན་པོ་ཆེའི་གླིང་གི་ནོར་བུ་ནི་ཚེ་འདིའི་བདེ་སྐྱིད་རྨི་ལམ་ལྟ་བུ་བརྟག་མི་ཐུབ་པ་ཡིན། དཀའ་བ་སྣ་ཚོགས་སྤྱད་པ་ནི་སྡུག་བསྔལ་དང་དུ་བླངས་པས་བསླུ་བའི་གཞི་བསྒྲུབ་པ་ཡིན། སྐྲ་དང་ཁ་སྤུ་མདོག་འགྱུར་བ་ནི། སྡུག་བསྔལ་བདེ་བར་འཛིན་པ་ལ་འཁྲུལ་བཞིན་པའི་ངང་དུ་མི་ཚེ་འཛད་པ་ཡིན། འདུ་བ་རྣམ་བཞིའི་ཐང་དུ་ཇག་པས་སྲོག་ལ་རྒོལ་བ་ནི་བཞི་བརྒྱ་རྩ་བཞིའི་ནད་ཀྱིས་གཙེས་ཏེ་འཆི་བདག་གཤིན་རྗེས་དབང་མེད་དུ་སྲོག་གཏོར་བ་ཡིན། ཀྱེ་ཁྱོད་འདྲ་བའི་ལས་ངན། ཁྱོད་ཀྱིས་སྲིད་པ་ལ་ཞེན་པའི་བྱ་བ་ཇི་སྙེད་པ་ཅིག་བྱས་ཀྱང་འགག་ལ་ཐུག་ན་དེ་དང་འདྲ་བ་ཡིན་ཞེས་གསུངས་པ་ཐོས་པས་སྔར་བྱས་ལ་ལྷག་པར་འགྱོད། ཚེ་འདིའི་བྱ་བ་ཐམས་ཅད་སྡུག་བསྔལ་ཁོ་ནའི་རང་བཞིན་དུ་ཤེས་ནས། ཨོ་རྒྱན་ཆེན་པོ་ལ་གསོལ་བ་ཕུར་ཚུགས་སུ་འདེབས་པའི་སྣང་བ་ཤར་བ་ན་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་ཞིག་བྱུང་བ་རང་གི་སྙིང་གར་ཟུག་པ་དང་དུས་མཉམ་དུ་པདྨ་འོད་ཀྱི་ཞིང་དུ་སྐད་ཅིག་ལ་སྐྱེས་ནས་སེམས་ཅན་ཐམས་ཅད་འདྲེན་པའི་དེད་དཔོན་དམ་པར་གྱུར་པར་བསམ་ལ་ཤེས་པ་རང་བབས་སུ་ངལ་གསོ་བར་བྱའོ། །གསུམ་པ་ནི། བུ་ཡིག་ལས། རིགས་དྲུག་གི་སེམས་ཅན་ལ་སྙིང་རྗེ་སྐྱེ་ཞིང༌། ལས་སུ་དཀོན་
མཆོག་མཆོད་ཅིང་དཀར་པོ་དགེ་བའི་ལས་བསྐྱེད་པ་དང༌། ཞེས་པས་དེ་ལྟར་འཆི་བ་མི་རྟག་པ་དང་བྱས་པ་ཐམས་ཅད་སྡུག་བསྔལ་གྱི་རང་བཞིན་དུ་གོ་བ་ཙམ་གྱི་བློ་ཡོད་ཀྱང་ཆོས་བྱེད་ལུགས་ཀྱི་གནད་འགག་མ་གོ་ན། ཆོས་ཀྱི་མཐུན་རྐྱེན་དུ་མིང་བཏགས་པའི་ཟས་གོས་ལོངས་སྤྱོད་སྲིད་པའི་ཕུན་ཚོགས་ལ་ཆོག་མི་ཤེས། གཅིག་ཟླར་གཅིག་དགོས། བློ་ངན་ལང་ཤོར་གྱི་ཡོ་བྱད་སྣ་ཚོགས་པ་ཐབས་དུ་མས་རྩོལ་སྒྲུབ་ལ་རེམ། ཆོས་བརྒྱད་ཁོ་ནས་མི་ཚེ་འཛད་པ་མང་བས་དེའི་ཕྱིར་འཁོར་བའི་སྡུག་བསྔལ་བསམ་ཞིང་རིགས་དྲུག་གི་སེམས་ཅན་ལ་སྙིང་རྗེ་བསྐྱེད་པར་བྱ། དེ་ཡང་མདོ་དྲན་པ་ཉེར་བཞག་ལས། འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་འཁོར་བ་ལ་སྡུག་བསྔལ་ཁོ་ན་ལས་བདེ་བ་ཡོད་པར་མ་གསུངས། དེའི་ནང་ནས་ཀྱང་ངན་འགྲོའི་སྡུག་བསྔལ་ནི་སློབ་དཔོན་ཞི་བ་ལྷས། དམྱལ་སོགས་སྡུག་བསྔལ་བསམ་བྱས་ན། །འདོད་པ་རྣམས་ལ་མཚོན་དང་ནི། །དུག་དང་མེ་དང་གཡང་ས་དང༌། །དགྲ་རྣམས་ཀྱིས་ཀྱང་དཔེར་མི་ཕོད། །ཅེས་སྡུག་བསྔལ་ཤིན་ཏུ་མི་བཟད་པར་གསུངས་པ་ལྟར་ལས་རང་ཉིད་ཀྱང་ཤི་བའི་འོག་ཏུ་མར་མེ་ཤི་བའམ་རྩྭ་ཕུང་མེས་བསྲེགས་པ་ལྟར་ཤུལ་མེད་དུ་སོང་ནས་དེ་ཀས་ཆོག་ཀྱང༌། སྐྱེ་བ་ཞིག་མི་འདོད་ཀྱང་ལེན་དགོས། སྐྱེ་བ་དེ་ཡང་བདེ་འགྲོར་ལེན་པའི་རྒྱུ་སྔོན་
ཆད་རང་གིས་བློ་བདེ་སིང་ངེ་བ་བྱས་པའི་རིགས་ནི་ཆེར་མི་གདའ།ཚེ་རབས་སྔ་མ་རྣམས་སུའང་ཆེར་མ་བསགས་པའི་རྒྱུ་མཐུན་གྱི་འབྲས་བུས་ད་ལྟ་སླེབས་གདའ་མོད།མི་དགེ་བའི་ལས་ནི་རྩེད་མོའི་ཞོར་ཙམ་དུའང་བསམ་གྱིས་མི་ཁྱབ་པ་བསགས་ཚར། དེའི་འབྲས་བུས་ངན་འགྲོའི་སྡུག་བསྔལ་མྱོང་དགོས་པ་བྱུང་ན་ཚེ་འདི་ག་ལ་བྱུང་བ་དང༌། ལུས་རྟེན་ཕྱི་མ་ལ་བྱུང་བ་གཉིས་ཁྱད་པར་རྡུལ་ཙམ་མེད། འདི་ལྟར་དམྱལ་བའི་སྡུག་བསྔལ་ནི། བཤེས་སྤྲིངས་ལས། དམྱལ་བ་བྲིས་པ་མཐོང་དང་ཐོས་པ་དང༌། །དྲན་དང་བཀླགས་སམ་གཟུགས་སུ་བགྱིས་པས་ཀྱང༌། །སྡུག་བསྔལ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་གསུངས། དེ་ལྟ་བུའི་སྡུག་བསྔལ་རང་གི་རྒྱུད་ཐོག་ཏུ་མ་བསམས་ན་གཞན་གྱི་སྡུག་བསྔལ་ལ་ལྟད་མོ་བལྟ་བ་ལྟ་བུས་རང་རྒྱུད་ལ་མི་སྐྱེ། ལས་དང་པོ་པས་རུང་མཐུན་གྱི་སེམས་ཅན་ལ་སྙིང་རྗེ་ཡང་སྐྱེ་དཀའ་བས་སྡུག་བསྔལ་དེ་རང་ཐོག་ལ་བྱུང་བར་བསམས་པའི་བློ་ནང་དུ་བཀུག་ནས་སྒོམ་དགོས་ཏེ་རྫོགས་པ་ཆེན་པོའི་འདས་རྗེས་ལས་ཀྱང༌། རིགས་དྲུག་སྡུག་བསྔལ་བློ་ལ་བླངས། །ཞེས་གསུངས་པའི་ཕྱིར་རོ། །དེའི་དོན་བསམ་པར་བྱ་བ་ནི། གནས་དབེན་པར་སོང་སྟེ། གང་ན་ཕྱིན་ཆ་མེད་པར་གངས་རི་ཆེན་པོའི་སྟོངས།
ཞབས་ཐམས་ཅད་འཁྱགས་སྦུག་གིས་གང་ལ། ཆར་རླུང་ཤིན་ཏུ་མི་བཟད་པས་མུན་པ་ནོག་ནོག་པོར་བྱེད་པ་ཞིག་ཏུ་སླེབས་པས་ཤིན་ཏུ་གྲང་བའི་སྣང་བ་ཤར་ཏེ་ཚ་བ་དོན་དུ་གཉེར་བའི་བསམ་པ་ཤར་བ་ན་སྐད་ཅིག་ལ་རྨི་ལམ་འཁྲུལ་པ་ལྟར་ཚད་དམྱལ་དུ་སྐྱེས་ཏེ་འོག་ཐམས་ཅད་ལྕགས་བསྲེགས་ཀྱི་ས་གཞི། འཁོར་ཡུག་ཐམས་ཅད་ཀྱང་ལྕགས་བསྲེགས་ཀྱི་རྭ་བ། སྟེང་འོག་གོ་མཚམས་མེད་པ་མེ་ལྕེ་དམར་ལྷབ་ལྷབ་པས་ཁེངས་ཤིང་འཁྲུགས་པའི་ཀློང་དུ་ཡང་སོས་ཚེ་ཚད་མི་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང༌། ཀྱི་སྡུག་བསྔལ་མྱོང་བའི་སེམས་ཅན་རང་དང་རང་འདྲ་དཔག་ཏུ་མེད་པ་དེ་དག་ཞེ་སྡང་གི་དབང་ལས་ཕན་ཚུན་གཅིག་གིས་གཅིག་ལ་མཚོན་ཆ་སྣ་ཚོགས་བརྡེག་རེས་བྱས་པས་ལུས་ཚལ་པ་བརྒྱ་སྟོང་དུ་སོང་བས་ན་ཚ་མ་བཟོད་པར་རེས་འགའ་དྲན་མེད་དུ་བརྒྱལ་ཞིང༌། ཤི་བ་སྙམ་བྱེད་པའི་ཚེ་ནམ་མཁའི་དཀྱིལ་ནས། ཡང་སོས་པར་གྱུར་ཅིག་ཅེས་པའི་སྒྲ་སྐད་ལྷང་ལྷང་བྱུང་བས་རྐྱེན་བྱས། ཡང་སྔར་ལྟར་སོས་ཏེ་སྡུག་བསྔལ་ཤིན་ཏུ་མི་བཟོད་པ་ཁོར་ཡུག་ཏུ་མྱོང་ངོ༌། །དམྱལ་བ་ཐིག་ནག་ནི་མི་ལོ་བྱེ་བ་ཕྲག་ས་ཡ་ཉིས་འབུམ་དགུ་ཁྲི་དྲུག་སྟོང་བཅུ་གཉིས། དམྱལ་སྲུང་འཇིགས་སུ་རུང་བས་རང་ལུས་ལ་ཐིག་བརྒྱད་བཏབ་སྟེ་སོག་ལེ་རྣོན་པོས་གཤགས། དེའི་ན་ཚ་ཤིན་ཏུ་མ་བཟོད་ནས་འོ་དོད་འབོད་ཅིང་འབྲོས་པའི་སྣང་བ་ཤར་རོ། །
དེ་ནས་བསྡུས་འཇོམས་མི་ལོ་བྱེ་བ་ཕྲག་གསུམ་འབུམ་ཕྲག་དྲུག་ཁྲི་བརྒྱད་སྟོང་རྩ་གཅིག །སྒོམ་སྟེ། རི་བོ་གླང་སེང་ར་ལུག་ལྟ་བུའི་གདོང་དབྱིབས་ཅན་གྱི་བར་དུ་ཚུད། ལུས་དེ་དག་གི་བར་དུ་སྒང་ལྤགས་བཅར་བ་ལྟར་བཙིར་བས་བ་སྤུའི་བུ་ག་ཚུན་ཆད་ནས་ཁྲག་གི་རྒྱུན་ཆི་ལི་ལི་འབབ། ན་ཚ་དང་སྡུག་བསྔལ་མ་བཟོད་པར་དེ་ནས་འབྲོས་པའི་སྣང་བ་ཤར་རོ། །དམྱལ་བ་ངུ་འབོད་ནི་མི་ལོ་བྱེ་བ་ཕྲག་ས་ཡ་གཉིས་དང་བྱེ་བ་ཕྲག་དགུ་འབུམ་བཞི་ཁྲི་སྟོང་བྱེ་བ་བདུན། ལྕགས་ཀྱི་ཁང་པའི་ནང་དུ་སླེབས་པ་དང་སྒོ་དབྱེར་མེད་དུ་འགྲིག །ཕྱོགས་མཚམས་ཐམས་ཅད་ནས་མེ་འབར་བས་ལུས་རྡུལ་ཕྲན་ལྟ་བུར་བསྲེག་གོ། །ད་ནི་འབྲོས་ས་ཡང་མི་འདུག་སྙམ་ནས་ངུ་སྐད་ལྷང་ལྷང་འབོད་པའི་ཚེ། ངུ་འབོད་ཆེན་པོ་མི་ལོ་བྱེ་བ་ཕྲག་ས་ཡ་གསུམ་དང་བྱེ་བ་ཕྲག་ལྔ་འབུམ་ལྔ་ཁྲི་གཉིས་སྟོང་དྲུག་ཅུ་རྩ་དྲུག །ཞེས་ལྕགས་ཁང་དེ་ལ་སླར་ཡང་ལྕགས་ཁང་རིམ་པ་གཅིག་གིས་གཏུམས་པའི་ནང་དུ་ཚུད་པས་ད་ནི་ནང་མ་ནས་ཐོན་ཀྱང་ཕྱི་མ་ནས་མི་ཐོན་སྙམ་པའི་སྡུག་བསྔལ་སྔ་མ་ལས་ཉིས་འགྱུར་གྱིས་ཆེ་བ་མྱོང་ཞིང་ཤིན་ཏུ་ཉམ་ཐག་གོ། །ཚ་བ་ནི་མི་ལོ་བྱེ་བ་ཕྲག་ས་ཡ་བརྒྱད་དང་བཞི་འབུམ་བྱེ་བ་ཕྲག་ཁྲི་དྲུག་སྟོང་ལྔ་བརྒྱ་སུམ་ཅུའོ། །ལྕགས་ཀྱི་གསལ་ཤིང་མེ་འབར་བས་འཕོངས་ནས་སྤྱི་བོའི་བར་ཏལ་མར་ཕུག་སྟེ་དབང་པོའི་སྒོ་ཐམས་ཅད་ནས་མེ་ལྕེ་དམར་ལྷབ་ལྷབ་འབར་བ་དང༌། རེས་འགའ་ལུས་རིལ་པོ་ཁྲོ་ཆུ་ཁོལ་མའི་
ནང་དུ་བཙོས་ནས་ཤ་རུས་སྐྱ་ཁྲོལ་གྱིས་འབྲལ་བའི་སྡུག་བསྔལ་མྱོང་ངོ༌། །ཡང་རབ་ཏུ་ཚ་བའི་དམྱལ་བ་ཚེ་ཚད་བར་གྱི་བསྐལ་པ་ཕྱེད་དེ་མིའི་ལོ་གྲངས་ཀྱི་གཞལ་བའི་ཡུལ་ལས་འདས། གསལ་ཤིང་རྩེ་གསུམ་གྱི་དབུས་མ་སྤྱི་བོ་དང་ལོགས་གཉིས་པོ་ཕྲག་པ་གཡས་གཡོན་དུ་ཏལ་མར་ཕུག་དང༌། ལྕགས་བསྲེགས་ལེབ་མོས་ལུས་ལ་སྣམ་བུ་ལྟར་དཀྲི་བ་དང༌། ཁྲོ་ཆུ་ཁོལ་མའི་ནང་དུ་ཤ་རྗེན་ལ་བཙོས་པས་ཤ་ལྤགས་རྣམས་འཐོར་ཀེང་རུས་ལྟར་སྐྱ་ཁྲོལ་གྱི་འགྲོ་བར་སྐྱེས་ནས་སྔ་མའི་སྡུག་བསྔལ་ལས་བརྒྱ་འགྱུར་གྱི་ཆེ་བས་ཟུག་རྔུ་མ་བཟོད་པར། ཨ་ར་དང༌། ཨུ་ཁྱུ་དང༌། ཀྱི་ཧུད་ཀྱི་སྒྲ་དྲག་པོས་འབོད་ཅིང་དེ་ནས་འབྲོས་པའི་སྣང་བ་ཤར་རོ། །མནར་མེད་འཇིག་རྟེན་ཆགས་འཇིག་གནས་སྟོངས་ཏེ་བསྐལ་ཆུང་བཞིར་བར་བསྐལ་གཅིག་སྟེ་དེའི་ཚེ་ཚད་ཡུན་ནོ། །པའི་དམྱལ་བ་ཕྱོགས་མཚམས་དང་མུ་མེད་པར་རབ་ཏུ་ཚ་བའི་མེ་འབར་བས་ལུས་དང་མེ་གཉིས་སུ་མེད་པར་བསྲེག་ཅིང་ངུ་བའི་སྐད་ལྷང་ལྷང་ཐོས་པ་ཙམ་ལས་ལུས་ཀྱི་དངོས་པོ་འདི་ཞེས་མི་མངོན་པའི་སྡུག་བསྔལ་བཟོད་བླག་མེད་པར་མྱོང་ཞིང༌། ཨ་ཙ་མ། ཨ་ར་ར། ཨུ་ཁྱུ། ཀྱི་ཧུད་ཀྱི་ཧུད་ཞེས་འོ་འདོད་དང་སྨྲེ་སྔགས་དྲག་པོ་འདོན་གྱིན་ཡོད་པར་སྒོམ། སླར་མདུན་གྱི་ནམ་མཁའ་ཨོ་རྒྱན་བདེ་ཆེན་རྒྱལ་པོ་སྐད་ཅིག་ལ་བྱོན་ནས། ཀྱེ་མ་ལས་ངན་གྱི་སེམས་ཅན། ཁྱོད་ཀྱིས་རྒྱུ་ཞེ་
སྡང་གིས་ཀུན་ནས་བླངས་པའི་ལས་རྔམ་པོ་ཆེ་བསགས། ཡུལ་ཁྱད་པར་ཅན་ལ་ཁོང་ཁྲོ་དྲག་པོ་བྱས་པས་འབྲས་བུ་དམྱལ་བའི་སྡུག་བསྔལ་དེ་ལྟ་བུ་མྱོང་བ་ཡིན། ད་མི་དགེ་བའི་ལས་རྣམས་འགྱོད་པ་དྲག་པོས་བཤགས། རང་དང་རིགས་མཐུན་པའི་སེམས་ཅན་ཐམས་ཅད་ལ་སྙིང་རྗེ་དྲག་པོ་བསྒོམ། གཞན་གྱི་སྡུག་བསྔལ་ཡང་རང་གིས་ལེན་པའི་སྙིང་སྟོབས་བསྐྱེད་ན་འདི་ལས་ཐར་བ་སྲིད་དེ། སྔོན་ཤཱཀྱ་ཐུབ་པ་དམྱལ་བའི་གནས་སུ་གྱད་པཀྴི་ཏ་བྱ་བར་སྐྱེས་ནས་ཤིང་རྟ་འདྲེན་པ་ལ། གྲོགས་ཀ་མ་རུ་པས་ཤིང་རྟ་མ་འདྲོངས་ནས་དམྱལ་སྲུང་ཁྲོས་ཏེ་མགོ་ལ་ལྕགས་ཀྱི་ཐོ་ལུམ་བསྣུན་པས་གྲོགས་པོ་ལ་སྙིང་རྗེ་ཚད་མེད་པར་སྐྱེས། འདིའི་ཤིང་རྟའི་ཐག་པ་ཡང་བདག་གི་གཉའ་བར་ཐོགས་ཤིག་ཅེས་བདེ་སྡུག་བརྗེ་བར་ཐུགས་བསྐྱེད་པས། དམྱལ་སྲུང་ན་རེ་རང་རང་གི་ལས་ལ་སྤྱོད་པ་སུས་ཅི་བྱ་ཞེས་དབུ་ལ་ཐོ་བས་བསྡིགས་པ་སྐད་ཅིག་ལ་ཚེ་འཕོས་ནས་སུམ་ཅུ་རྩ་གསུམ་དུ་སྐྱེས་ཏེ་སྡུག་བསྔལ་ལས་གྲོལ་ལོ། །ཞེས་གཏམ་རྒྱུད་དང་བཅས་གསུངས་པ་ཐོས་པས། རང་འདྲའི་སེམས་ཅན་ཐམས་ཅད་སྡུག་བསྔལ་འདི་ལས་ཐར་ན་བདག་ད་དུང་འདི་ཁར་གནས་ནའང་བཟོད་པར་བྱའོ་སྙམ་པའི་སེམས་བསྐྱེད་མ་ཐག་ཨོ་རྒྱན་ཆེན་པོའི་ཐུགས་ཀ་ནས་འོད་ཟེར་དཀར་པོ་ལྕགས་ཀྱུ་ལྟ་བུ་ཞིག་སྐྱ་ཏལ་གྱིས་བྱུང༌།
དེ་དང་གཉིས་སུ་མེད་པར་སངས་རྒྱས་དོན་གཉིས་ལྷུན་གྲུབ་གྱི་མཐུ་ཅན་དུ་གྱུར། རང་གི་ཐུགས་ཀ་ནས་སྔར་ལྟར་འོད་ཟེར་སྤྲོས་པས་སེམས་ཅན་དེ་དག་སྐད་ཅིག་ལ་འདྲོངས་ཏེ་དམྱལ་བའི་གནས་སྟོངས་པར་བསམ་མོ། །ཞར་ལ་དམྱལ་བ་དེ་དག་གི་ཚེ་ཚད་ནི། ཐུན་མོང་གི་མདོ་སྡེ་དྲན་པ་ཉེར་བཞག་དང༌། ལས་རྣམ་འབྱེད། མངོན་པ་མཛོད་ལ་སོགས་ལས་བགྲང་བྱར་གསུངས་ཀྱང༌། འདིར་གཉེན་པོས་ཟིན་པའི་དབང་དུ་བྱས་ཏེ་ངེས་པ་མེད་པར་བཤད་པ་སྟེ། ཀུན་མཁྱེན་ཆེན་པོས། གཉེན་པོ་དྲག་པོ་རྒྱུད་ལ་སྐྱེས་པ་ལ་སོགས་པས་གློ་བུར་དུའང་འཕོ་བ་དང༌། རྡོ་རྗེ་སློབ་དཔོན་ལ་བརྙས་པ་ལ་སོགས་པས་བསྐལ་ཆེན་དུ་མར་གནས་དགོས་པར་བཤད་པས་ལས་ཀྱི་སྒྲིབ་པས་ཕྱེ་བ་ཡིན་ནོ། །ཞེས་དང༌། གོང་དུ་བཤད་མ་ཐག་པའི་གྱད་པཀྴི་ཏ་དང༌། མཛའ་བོའི་བུ་མོའི་གཏམ་རྒྱུད་ལ་སོགས་པས་ཀྱང་ཤེས་སོ། །དེ་ནས་གྲང་དམྱལ་བསམ་པ་ནི། ཡང་རང་ཉིད་གང་ན་ཕྱིན་ཆ་མེད་པའི་ས་གཞི་ཐམས་ཅད་བྱེ་ཚན་གྱི་རང་བཞིན་ལ་བསིར་བུའི་རླུང་ཙམ་ཡང་མི་འགུལ་ཞིང༌། ཉི་མའི་ཚ་གདུང་གིས་ཤིན་ཏུ་དུབ་པའི་ལུང་པ་ཞིག་ཏུ་སླེབས།ཤེས་པ་ལུང་མ་བསྟན་དུ་ཐོམ་ཐོམ་འགྲོ་ཞིང་འདི་ལས་ཅུང་ཞིག་བསིལ་བ་ཞིག་ཡོད་ན་སྙམ་པས་རྐྱེན་བྱས། ཚ་གདུང་གི་སྣང་བ་འགགས་
ནས་སྐད་ཅིག་ལ་གྲང་དམྱལ་བརྒྱད་དུ་སྐྱེ་བ་སྒོམ་སྟེ་ས་གཞི་ཐམས་ཅད་ཁ་བའི་རང་བཞིན། ཅོང་རོང་དང་ངམ་གྲོག་ཐམས་ཅད་འཁྱགས་རམ་གྱིས་གང་བ་མཐའ་ཐམས་ཅད་གངས་རི་ཆེན་པོས་བསྐོར་ཞིང༌། སྟེང་ནས་ཁ་བ་བུ་ཡུག་འཚུབས་པ་མུན་པ་ནག་ཐུམ་ཐུམ་བྱེད་ཅིང་རླུང་གི་ངར་སྒྲ་འུ་རུ་རུ་སྒྲོགས་པའི་ནང་དུ། ཆུ་བུར་ཅན་གྱི་དམྱལ་བ་ཁ་བའི་བུ་ཡུག་དང་རླུང་གི་རེག་བྱས་ལུས་ལ་བཏབ་པས་སྐད་ཅིག་སྐད་ཅིག་ལ་ལུས་ལ་ཆུ་བུར་མི་བཟོད་པ་འཆར་ཞིང་ཤ་ལྤགས་ཐམས་ཅད་འཁུམས་ནས་སྐྱི་བུང་བྱེད་པའི་སྡུག་བསྔལ་མི་བཟད་པ་དང༌། དེ་ལས་ཆུ་བུར་དེ་དག་བརྡོལ་ནས་རྣག་ཁྲག་ཆི་ལི་ལི་འཛག་པ་དང༌། དེ་བས་སྡུག་བསྔལ་ཆེར་སོང་སྟེ་ཨ་ཆུ་ཞེས་སྐད་ཀྱི་གདངས་དྲག་པོར་འདོན་པ་དང༌། ད་དུང་སྔར་བས་སྡུག་བསྔལ་ཇེ་ཆེར་སོང་བས་སྐད་ཀྱི་ཟུངས་ཀྱང་ཆག་སྟེ་ཀྱི་ཧུད་ཅེས་རྐན་གྱི་ཕུགས་ནས་འདོན་པ་དང༌། དེ་བས་ཀྱང་ཇེ་ཆེར་འཕེལ་བས་སྐད་ཀྱང་མ་ཐོན་པར་སོ་ཐམ་ཐམ་བྱེད་པ་དང༌། དེ་ལ་རླུང་ཆེན་པོའི་ངར་གྱིས་བཏབ་པས་ཁ་དོག་ཀྱང་སྔོ་ལྷང་གི་སོང་ཞིང་ཨུཏྤལ་ལྟར་སེར་ཁ་ཕྲ་མོ་དྲུག་ཏུ་གས་པ་དང༌། ད་དུང་གྲང་ཟུག་གིས་པགས་པ་རྣམས་ཀྱང་བཤུས་ཏེ་ཤའུ་དམར་ཧུ་རེ་པདྨ་ལྟར་ཚལ་པ་བཅུར་གས་པ་དང༌། སླར་སེར་ཁ་དེ་བས་ཀྱང་མང་དུ་སོང་སྟེ་པདྨ་ལྟར་ཆེར་
གས་ནས་སྔ་མ་རྣམས་ཀྱི་སྡུག་བསྔལ་ལས་བརྒྱ་འགྱུར་གྱིས་ཆེ་བ་མྱོང་ཞིང་སྡུག་བསྔལ་དེ་ཡང་གྲོང་ཁྱེར་མ་ག་དྷའི་བྲེ་པོ་ཆེའི་ཁལ་བརྒྱད་ཅུ་ཤོང་བའི་ཏིལ་གྱི་བང་བ་ནས་ལོ་བརྒྱ་བརྒྱའི་མཚམས་སུ་ཏིལ་རྡོག་རེ་ཕྱུང་བས་དེ་ཟད་པའི་ཚེ་ཆུ་བུར་ཅན་གྱི་ཚེ་ཚད་དུ་བཤད་པ་སོགས་གོ་ནས་ཤིན་ཏུ་ཡི་མུག་ཅིང་སྒྱིད་ལུག་པར་སྒོམ། སླར་མདུན་གྱི་ནམ་མཁའ་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་ལུགས་སུ་བྱོན་ནས་བུ་རང་གི་སྡུག་བསྔལ་ལས་སུ་ཤེས་པར་གྱིས་ལ་ཟད་པའི་དགའ་བ་སྒོམ། གཞན་གྱི་སྡུག་བསྔལ་སྙིང་རྗེ་དྲག་པོའི་བསམ་པས་ད་དུང་བསྣོན་མར་ལོང་ལ་གཉེན་པོ་ཁྱད་པར་ཅན་བརྟེན་ཅིག །ཅེས་གསུང་ཐོས་པ་ཙམ་གྱིས། བདག་ལྟ་བུའི་སྡུག་བསྔལ་མྱོང་བའི་གྲང་དམྱལ་གྱི་སེམས་ཅན་ཐམས་ཅད་སྙིང་རེ་རྗེ། བདག་གིས་དེ་དག་གི་སྐལ་བ་མྱོང་ནས་འདི་བས་སྡུག་བསྔལ་འབུམ་འགྱུར་གྱིས་ཆེ་བ་བྱུང་ཡང་བཟོད་པར་བྱའོ། །སེམས་ཅན་དེ་དག་སྡུག་བསྔལ་ལས་ཐར་བར་ཤོག་ཅིག་ཅེས་པའི་སེམས་བསྐྱེད་མ་ཐག་ལས་ངན་སྐད་ཅིག་ལ་ཟད་དེ་ཨོ་རྒྱན་ཆེན་པོའི་ཐུགས་ཀར་ཡེར་གྱི་འཕོས་ནས་འགྲོ་བ་འདྲེན་པའི་དེད་དཔོན་དམ་པར་གྱུར་པར་བསམས་ལ། བདེ་སྡུག་གང་ཤར་གྱི་རང་ངོ་ལ་ལྟ་ཞིང་ཤེས་པ་རྣལ་དུ་དབབ་བོ། །དེ་ནས་ཡི་དྭགས་ཀྱི་སྡུག་བསྔལ་བསམ་པ་ནི། བཤེས་པའི་སྤྲིངས་ཡིག་ལས། ཡི་དྭགས་ནའང་
འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་ལ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་ཟད་བསྟན་འཚལ་ལོ། །ཞེས་ཡི་དྭགས་ལ་རིགས་གསུམ་དུ་ཡོད་པར་བཤད་པའི་སྡུག་བསྔལ་རགས་པ་ཙམ་བློ་ལ་བླང་བ་ནི། ཡང་རང་ཉིད་ཟས་གོས་དང་དངོས་པོ་ལ་ཆགས་སྲེད་ཞེན་པའི་དབང་གིས་ཡུལ་ཁྱད་པར་ཅན་མཆོད་པ་དང་བཀུར་སྟི་ལྟ་བུ་ལ་སེར་སྣ་སྐྱེས་པའི་བསམ་པས་རྐྱེན་བྱས་སྐད་ཅིག་ལ་ཡི་དྭགས་ཕྱིའི་སྒྲིབ་པ་ཅན་དུ་སྐྱེ་བ་བསྒོམ་སྟེ། ལྗོན་ཤིང་གི་འབྲས་བུ་དང༌། ཆུ་ཀླུང་སོགས་ལ་ལོངས་སྤྱོད་པའི་བསམ་པས་ཐག་རིང་པོར་ཐང་ཆད་ཆད་ཕྱིན་པ་ན། སྐྱེ་བོ་མཚོན་ཆ་ཐོགས་པས་བསྲུངས་པ་དང༌། རྣག་ཁྲག་ལ་སོགས་ཡིད་དུ་མི་འོངས་བར་སོང་ནས་ཤིན་ཏུ་སྐྱེངས་ཤིང་བཀྲེས་སྐོམ་གྱི་སྡུག་བསྔལ་བཟོད་མི་ཕོད་པ་དང༌། ཡང་ནང་གི་སྒྲིབ་པ་ཅན་གྲོང་ཁྱེར་སེར་སྐྱ་ཆུ་དང་རྩི་ཤིང་སོགས་འདོད་པའི་དངོས་པོ་ཅི་ཡང་མེད་པའི་མྱ་ངན་གྱི་གནས་དེར་ཟས་སྐོམ་ལོ་ཟླའི་བར་དུ་མི་རྙེད་པས་སྡུག་བསྔལ། གལ་ཏེ་སྨན་ཙམ་རྙེད་ཀྱང་ཁ་ཁབ་མིག་ཙམ་གྱི་ནང་དུ་མི་ཤོང༌། ཅུང་ཟད་ཤོང་ཡང་མགྲིན་པ་རྟ་རྔ་ཙམ་གྱི་སྦུབས་ལ་མི་ཐར། ཐར་ཀྱང་ལྟོ་བ་རི་རབ་ཙམ་པ་མི་ཁེངས་ཤིང་ཡན་ལག་འཇག་མ་ཙམ་གྱིས་ལུས་མི་ཐེག་པ་སོགས་ཀྱི་
སྡུག་བསྔལ་ཤིན་ཏུ་ཉམ་ཐག་པ་མྱོང༌། ཡང་ཟས་སྐོམ་གྱི་སྒྲིབ་པ་ཅན་ཟས་སྐོམ་ལྟོ་བའི་ནང་དུ་ཚུད་པ་དང་དེ་དག་ཀྱང་མེར་འབར་ནས་ལུས་ཚིག །རང་ཤ་རང་གིས་ཟ་བ་དང༌། བཤང་གཅི་ཟ་བས་ཉམ་ཐག །སོ་ཀ་དྲོད་དང་ལྡན་པའི་ཚེ་ཟླ་བའི་རེག་བྱ་གྲང་བ་དེ་ཡང་ཚ་བར་འགྱུར། དགུན་གྲང་བའི་ངར་དང་ལྡན་པའི་ཚེ་ཉི་མའི་འོད་ཟེར་ཡང་བསིལ་བར་གྱུར་ནས་ཚ་གྲང་ཁོད་མི་སྙོམས། ཆུ་ཀླུང་གི་རིགས་བལྟས་པ་ཙམ་གྱིས་སྐམས་ཏེ་ངམ་གྲོག་ཉམས་མི་དགའ་བར་འཆར་བ་སོགས་བཀྲེས་སྐོམ་གྱི་སྡུག་བསྔལ་དཔག་ཏུ་མེད་པ་མྱོང༌། དེ་ལྟ་བུའི་སྡུག་བསྔལ་ཡང་ཡུན་ཐུང་ངུས་མི་ཆོག་པར་མི་ལོ་ཆིག་ཁྲི་ལྔ་སྟོང་མྱོང་དགོས་པར་ཤེས་པས་ཡི་མུག་ཅིང་སྒྱིད་ལུག་པར་སྒོམ། སླར་མདུན་གྱི་ནམ་མཁར་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་བྱད་ཅན་དུ་བྱོན་ནས། ཀྱེ་ཁྱོད་ཀྱིས་སེར་སྣས་བསགས་པའི་སྡུག་བསྔལ་རང་ཐོག་ཏུ་འཕྱུགས་པ་མེད་པར་བབས་པ་ལ་དུས་གསུམ་སངས་རྒྱས་ཀྱིས་ཀྱང་སྐྱོབ་པར་དཀའ།རྒྱལ་བ་ཤཱཀྱ་ཐུབ་པས་རྒྱལ་པོ་གཟུགས་ཅན་སྙིང་པོ་ལ་གསུངས་པ་ལྟར་ལས་བདག་གིར་བྱོས་ལ་ལས་ངན་ཟད་པའི་དགའ་བ་སྒོམ། རང་འདྲའི་སེམས་ཅན་གྱི་སྡུག་བསྔལ་ལ་སྙིང་རྗེའི་བསམ་པས། རང་གི་སྡུག་བསྔལ་གྱི་ཁ་སྣོན་ལ་ལེན་པའི་སྙིང་སྟོབས་བསྐྱེད་ལ་གཉེན་པོ་བརྟེན་ཅིག །ཅེས་གསུང་ཐོས་
པ་ཙམ་གྱིས་ཨ་ཙ་མ། བདག་འདྲ་བའི་སེམས་ཅན་གཅེས་འཛིན་ཁོ་ནས་ད་ལྟ་ཕན་འཁོར་བ་མཐའ་མེད་དུ་འཁྱམས་ཤིང་སྡུག་བསྔལ་འདི་ལྟ་བུ་མྱོང༌། བདག་དང་རིགས་མཐུན་པའི་ཡི་དྭགས་གངྒཱའི་ཀླུང་གི་བྱེ་མ་སྙེད་ཀྱི་རྡུལ་གྲངས་དང་ལྡན་པ་དག་ལའང་སྡུག་བསྔལ་འདི་ཁོ་ན་ཡོད་པས་ཤིན་ཏུ་སྙིང་རྗེ། ད་ནི་རང་གི་སྡུག་བསྔལ་བཟོད་པར་བྱས་ནས་སེམས་ཅན་གཞན་གྱི་སྡུག་བསྔལ་ཡང་དང་དུ་བླང་བར་བྱ། ཡི་དྭགས་ཀྱི་གྲོང་ཁྱེར་རྨང་ནས་སྟོངས་པར་ཤོག་ཅིག་བསམ་པའི་མོད་ལས་ངན་སྐད་ཅིག་ལ་ཟད་དེ་ཨོ་རྒྱན་ཆེན་པོའི་དགོངས་པ་དང་གཉིས་སུ་མེད་པར་སངས་རྒྱས། སེམས་ཅན་དེ་དག་ཀྱང་བདག་གི་ཐུགས་ཀའི་འོད་ཟེར་གྱིས་དྲངས་པར་བསམས་ལ་འཕྲོག་ནས་ཀྱི་མཁན་པོ་ལ་བརྟག་གོ །དེ་ཡང་གོང་གི་དམྱལ་བ་ལ་ཇི་སྐད་དུ། འདུལ་བ་ལུང་ལས། དེ་ནས་མོའུ་འགལ་གྱི་བུས་རྒྱ་མཚོའི་མཐར་ཕྱིན་པ་ལས། ཉི་ཚེ་བའི་སེམས་ཅན་དམྱལ་བ་གཏུན་ལྟ་བུ་དང༌། ཕྱགས་མ་ལྟ་བུ་དང༌། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱིས་གདུངས་བ་མཐོང་སྟེ། ཞེས་དང༌། ཉེ་འཁོར་བ་ནི་བརྒྱད་ཚན་གཉིས་ཀྱི་ཁོངས་ན་ཡོད་པ་སོ་སོའི་གནས་ནི་ཐེག་མཆོག་མཛོད་དུ། ཉི་ཚེ་བ་ནི་ས་ཆུ་མེ་རླུང་སྣ་ཚོགས་ན་ངེས་པ་མེད་པར་ཡོད་ལ། ཉེ་འཁོར་བ་ནི་བརྒྱད་
ཚན་གཉིས་ཀྱི་འཁོར་ན་ཡོད་དོ། །ཞེས་རིགས་གཅིག་གིས་བསྡུས་པ་དང༌། བཤད་མ་ཐག་པའི་ཡི་དྭགས་ལའང་ཀུན་མཁྱེན་ཆེན་པོས། ཡི་དྭགས་དབྱིངས་མཁར་རྒྱུ་བའི་དབྱིངས་གནས་པ། །ཞེས་པའི་དབྱིངས་ན་གནས་པ་སྔ་མའི་གསུམ་པོ་ཡིན་ལ། མཁའ་ལ་རྒྱུ་བའམ་ཕྲན་ཚེགས་པ་ནི་ཤིང་རྟ་རྩ་བར། མཁའ་ལ་རྒྱུ་བའི་ཡི་དྭགས་འདྲེ་རྣམས་དང༌། །གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ཞེས་པ་ལ་སོགས་པས་བསྟན་པ་ལྟར་སློབ་མ་དབང་པོ་རྣོན་པོ་ལ་སྤྲོས་ནས་འཆད་དགེ་བ་གསུམ་གྱི་དོན་འཁྲིད་ནང༌། ཤེས་པར་བྱ་ཞིང་གཞན་དུ་ནི་དཀྱུས་སུ་བཤད་པས་དོན་འགྲུབ་བོ། །དེ་ནས་དུད་འགྲོའི་སྡུག་བསྔལ་བསམ་ཞིང་བློ་སྦྱང་བ་ནི། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང༌། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་དུད་འགྲོ་ལ་བྱིངས་དང་ཁ་འཐོར་བ་སྟེ་རྣམ་གྲངས་གཉིས་སུ་རིགས་བསྡུས་ཏེ་ས་སྡེ་ལས་བཤད་པའི་སྡུག་བསྔལ་བསམས་ཤིང་བློ་ལ་བླང་བ་ནི། ཡང་རང་ཉིད་གཏི་མུག་མུན་པ་ལྟ་བུའི་ཉོན་མོངས་པས་རྐྱེན་བྱས་ཏེ་སྐད་ཅིག་ཉིད་ལ་ཕྱིའི་རྒྱ་མཚོ་ཆེན་པོའི་ནང་དུ་བྱིངས་ན་གནས་པའི་དུད་འགྲོ་ཉ་དང༌། དུང་དང་ཆུ་སྲིན་ལ་སོགས་པས་གོ་
མཚམས་མེད་པ་ཆང་འགག་གི་སྦང་མ་ལྟར་ལྕིག་ལྕིག་ཡོད་པའི་ནང་དུ་སྐྱེས་པར་སྒོམ། རེས་འགའ་རང་ཉིད་ཆེ་བར་གྱུར་པའི་ཚེ་ཆུང་བ་རྣམས་ཀྱིས་ལུས་ཏལ་མར་ཕུགས་ནས་སྙིང་ལ་མདའ་ཕོག་པ་ལྟ་བུའི་ན་ཚ། རེས་འགའ་ཆུང་བར་གྱུར་པའི་ཚེ་ཆེ་བ་རྣམས་ཀྱིས་གྱུར་མིད་དུ་ཟོས་ནས་ལུས་ལྕགས་ཀྱི་པར་བུར་བཅུག་པ་ལྟ་བུའི་སྡུག་བསྔལ། གླིང་འདི་དང་གླིང་གཞན་གྱི་ཕྱི་མཐའི་ལྕགས་རི་གཉིས་ཀྱི་གོ་དབར་ཉི་ཟླའི་སྣང་བ་མེད་པའི་མུན་ནག་གི་ཁྲོད་རང་གི་ལག་པ་བརྐྱང་བསྐུམ་ཙམ་མི་མཐོང་བའི་ཁྲོད་དུ་སྡུག་བསྔལ་དུ་བྲོ་བ་དང༌། ཁ་མཐོར་བའི་དུད་འགྲོ་བྱ་རི་དྭགས་འབུ་སྦྲང་གཅན་གཟན་ལ་སོགས་ཏེ་བདག་ཏུ་མ་བཟུང་བ་རྣམས་ལ་རང་བཞིན་གྱི་སྡུག་བསྔལ་ཚ་གྲང་བཀྲེས་སྐོམ་གཅིག་གིས་གཅིག་ཟ་བས་དོ་ནུབ་ད་ལྟ་སེ་གོལ་གཏོགས་ཡུན་ཙམ་གྱི་རིང་ལ་ཚེ་འདི་ཕྱིའི་མཚམས་སུ་ཡོད་ཅིང་མི་སོགས་མིག་གིས་མཐོང་ཚད་གཤེད་མ་ཁོང་ལག་ཅན་དུ་མཐོང་ནས་སྣང་བ་ཐམས་ཅད་དོགས་པར་འཆར་བས་ལྟོ་ཁམ་རེ་ཟ་བའི་རིང་ལ་མགོ་བོ་ཕྱོགས་མཚམས་བརྒྱད་དུ་བྱ་རར་གཡེང་བ་དང༌། ཁྱད་པར་དུ་རྔོན་པ་དང༌། ཉ་པ་དང༌། བྱ་གཤོར་བ་དག་གིས་བརྩེ་བ་མེད་པའི་འཇིགས་པ་དུ་མས་སྐད་ཅིག་ལ་གསོད་པ་དང༌། བདག་དུ་བཟུང་བའི་དུད་འགྲོ། རྟ་ནོར་
དང༌། ར་ལུག །བ་གླང་ལ་སོགས་པ་ཐམས་ཅད་ཀྱང༌། ཁ་ལ་ལྕགས་ཀྱི་སྒྲོག་གཡོགས་ཏེ་ཞོན་ནས་རྒྱང་རིང་བོར་མནར་བ་དང༌། འགའ་ཞིག་ལུས་གནམ་ས་བསྒྱུར་ཏེ་བྲང་དྲོན་མོའི་ཁ་གྲི་རྣོན་པོས་གཤགས་ནས་ལྟོ་ལག་བཏང་སྟེ་སྲོག་དབུགས་ཀྱི་རྒྱུ་བ་གཅོད་པ་དང༌། གཞན་དག་སྣ་འབིགས་པ་དང༌། བྱ་གཅོད་པ་དང༌། བརྡེག་པ་དང༌། གསོན་ཁྲག་འབྱིན་པ་དང༌། ཁལ་ཐེག་ཚད་འགེལ་བ་དང༌། དེ་བཞིན་དུ་ཀླུ་རྣམས་ལ་ཡང་བྱེ་ཚན་དང༌། ནམ་མཁའ་ལྡིང་གི་འཇིགས་པ་དང༌། རིགས་སྔགས་དང༌། གཅིག་གིས་གཅིག་སྤང་སྟེ་ཁྱུར་མི་ཚུད་ཅིང་གྲོགས་མེད་པ་དང༌། སྤྱི་མཐུན་དུ་རྨོངས་པ་ལ་སོགས་པའི་སྡུག་བསྔལ་དང་ཚེ་ཚད་མ་ངེས་པར་མྱོང་བ་སོགས་དུད་འགྲོ་དེ་དག་ཐམས་ཅད་ཀྱང་བླང་དོར་མི་ཤེས་པའི་རང་བཞིན་ཅན་ཏེ་དེ་དག་གི་སྡུག་བསྔལ་རེ་རེ་ནས་བསམ་སྟེ་འཁོར་བ་ལ་སྐྱུགས་ལོག་གི་འགྲོ་བར་བྱ་དགོས་ཏེ། ཀུན་མཁྱེན་གྱིས། འདི་དག་བསམས་ནས་བྱོལ་སོང་འཇིག་རྟེན་ལས། །ཐར་འདོད་རྣམས་ཀྱི་ཕན་བདེ་བསྒྲུབ་པའི་ཕྱིར། །མངོན་མཐོ་ངེས་ལེགས་ལམ་བཟང་སྲོལ་གཏོད་ལ། །ཉིན་མཚན་བརྩོན་པས་དགེ་ལ་གཞོལ་བར་མཛོད། །ཅེས་གསུངས་སོ། །དེ་དག་ཀྱང་མཐར་ཆགས་སུ་སྡུག་བསྔལ་མྱོང་ཟིན་པའི་མཐར་རང་ཉིད་ཀླུར་སྐྱེས་པ། ནམ་མཁའ་
ལྡིང་གིས་བར་སྣང་ལ་ཁྱེར་ནས་ད་ནི་དབུགས་ཕྱི་ནང་གང་གི་མཚམས་ཀྱང་ཚེ་འདི་ཕྱིའི་སོ་མཚམས་སུ་སླེབས་པ་ཨ་རེ་འཇིགས། སྟོབས་ལྡན་གྱི་འདབ་ཆགས་འཇིགས་པ་ཅན་འདི་ལྟ་བུས་བདག་ཉིད་གསོན་ཟས་བྱེད་པ་ཨ་ཙི། འཇིགས་པ་ལ། འཇིགས་པ་ལ། ཀྱི་ཧུད། ཀྱི་ཧུད་ཅེས་དྲན་པ་འཐོར་བ་ཙམ་གྱི་འཇིགས་སྐྲག་གི་རོ་མྱོང༌། སླར་སྟེང་གི་ནམ་མཁའ་ལ་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་ལུགས་སུ་བྱོན་ནས། ཀྱེ་ལས་ངན་གྱི་སེམས་ཅན་འདི་ལྟ་བུའི་སྡུག་བསྔལ་དང་འཇིགས་སྐྲག་མྱོང་དགོས་པའང་འཁོར་བ་མཐའ་མེད་དུ་བདག་གཅེས་འཛིན་ཁོ་ན་ལྷུར་བླངས་པས་ལེན། ད་ནི་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ཁྱད་པར་ཅན་སྒོམ་ན་འདི་ལས་གྲོལ་བའི་ཐབས་ཡིན་ཏེ། སྔོན་བསྟན་པའི་བདག་པོ་ཤཱཀྱ་སེང་གེས་བྱང་ཆུབ་ཀྱི་སྤྱོད་པ་ལ་བསླབས་པའི་ཚེ་མཛའ་བོའི་བུ་མོ་ཞེས་བྱ་བར་སྐྱེས་ནས་མས་བསྲུངས་ཀྱང་མ་ཉན་པར་མའི་མགོ་ལ་འགོངས་ནས་རྒྱ་མཚོར་ནོར་བུ་ལེན་དུ་ཕྱིན་པས་གྲུ་གཟིངས་ཞིག །ཤིང་ལེབ་གཅིག་ལ་འཇུས་པས། མཚོ་གླིང་ཞིག་ཏུ་འཐོན། དེ་ནས་རིམ་པར་ཕྱིན་པའི་ཅི་ཞིག་ན་ལྕགས་ཀྱི་ཁང་པ་ཞིག་ཏུ་མི་ཞིག་གི་མགོ་ལ་ལྕགས་ཀྱི་འཁོར་ལོ་བསྐོར་ནས་ཀླད་པའི་དཀྱིལ་དུ་འབུགས་ཀྱིན་འདུག །ཅི་བྱས་པ་ཡིན་དྲིས་
པས་མའི་མགོ་ལ་འགོངས་པའི་རྣམ་སྨིན་ཡིན་ཟེར། འོ་ན་ང་ཡང་ལས་ཀྱིས་འདིར་ཁྲིད་པ་ཡིན་སྙམ་པ་དང༌། ནམ་མཁའ་ལས་སྒྲ་བྱུང་སྟེ་བཅིངས་པ་གང་ཡིན་པ་གྲོལ་བར་འགྱུར་རོ། །གྲོལ་བ་གང་ཡིན་པ་བཅིང་བར་འགྱུར་རོ་ཟེར་ནས་འཁོར་ལོ་རང་གི་མགོ་ཐོག་ཏུ་བྱུང་སྟེ་བསྐོར་བས་བཟོད་ཐབས་མེད་པའི་སྡུག་བསྔལ་བྱུང་ངོ༌། །དེའི་རྐྱེན་གྱིས་རང་འདྲའི་སེམས་ཅན་རྣམས་ལ་སྙིང་རྗེ་དྲག་པོ་སྐྱེས། འདི་ལྟ་བུའི་སྡུག་བསྔལ་མྱོང་བའི་སེམས་ཅན་མང་པོ་ཡོད་པས་སྙིང་རེ་རྗེ། དེ་དག་གི་སྡིག་པ་དང་སྡུག་བསྔལ་བདག་ལ་འབྱུང་བར་ཤོག་ཅིག་སྙམ་དུ་དགོངས་པ་དང་དེ་མ་ཐག་འཁོར་ལོ་ནམ་མཁའ་ལ་འཕུར་ཏེ་སྡུག་བསྔལ་ལས་གྲོལ་ལོ། །དེས་ན་བདག་བས་གཞན་གཅེས་ཀྱི་བསམ་པ་འདི་ནུས་པ་ཤིན་ཏུ་ཆེ་བ་ཡིན་པས་རང་འདྲའི་སེམས་ཅན་དཔག་ཏུ་མེད་པ་ཡོད་པ་དེ་དག་ལ་སྙིང་རྗེ་ཆེན་པོ་བསྐྱེད་དོ།།དེ་དག་གི་སྡུག་བསྔལ་ཁྱོད་རང་གི་འདིའི་བསྣོན་མར་ལོང་ལ་དགའ་བ་སྒོམས་ཤིག །ཅེས་གསུང་ཐོས་པ་ཙམ་གྱིས་རང་འདྲའི་སེམས་ཅན་ལ་སྙིང་རྗེ་དྲག་པོ་བསྐྱེད་ཅིང་བདེ་སྡུག་གཏོང་ལེན་གྱི་སྙིང་སྟོབས་བསྐྱེད་པ་ཙམ་གྱིས་ལས་ངན་སྐད་ཅིག་ལ་ཟད། འཇིགས་པ་ལ་རྨི་ལམ་གྱི་སྣང་བ་ལྟར་བདེན་མེད་དུ་ཡལ་ནས་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས། དུད་འགྲོའི་རིགས་ཀྱི་སེམས་ཅན་ཐམས་
ཅད་ལ་འོད་ཟེར་སྤྲོས་པས་དེ་དག་གཅིག་ཀྱང་མ་ལུས་པ་བྱ་ཁྱུ་ལ་འུར་རྡོ་འཕངས་པ་ལྟར་རིག་འཛིན་རྣམ་པ་བཞིའི་གྲལ་དུ་དྲངས་པར་བསམ་ལ་རྟོགས་པའི་སྤུན་ཐག་བཅད་ནས་དྲན་ཤེས་ཁ་ཡན་དུ་གློད་པར་བྱའོ། ། ༈ དེ་ནས་བདེ་འགྲོ་ལའང་བདེ་བ་མེད་པར་བསམ་པ་ནི། འོ་ན་ངན་སོང་གསུམ་ལ་སྐྱེས་ན་དེ་ལྟར་ཡིན་ཀྱང་བདེ་འགྲོ་ཐོབ་ན་སྡུག་བསྔལ་མེད་པའི་བདེ་བ་འབའ་ཞིག་གོ་སྙམ་ན་མ་ཡིན་ཏེ་བཤེས་སྤྲིང་དུ། མཐོ་རིས་ན་ཡང་བདེ་ཆེན་དེ་དག་གི །འཆི་འཕོའི་སྡུག་བསྔལ་ཉིད་ནི་དེ་བས་ཆེ། །ཞེས་དང༌། ལྷ་ཡི་འཇིག་རྟེན་དག་ན་འཕོས་པ་ལ། །གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང༌། །དམྱལ་བར་གནས་པ་གང་ཡང་རུང་བར་འགྱུར། །ཞེས་དང༌། མདོ་དྲན་པ་ཉེར་གཞག་ལས། མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པ་ལྟར་མཐོ་རིས་མིའི་བདེ་འགྲོ་ཐོབ་ཀྱང༌། སྡུག་བསྔལ་གྱི་སྡུག་བསྔལ་བརྩེགས་མར་འབྱུང་བ་ཕ་ཤི་བའི་ཐོག་ཏུ་མ་ཡང་འདས་པ་ལྟ་བུ། འགྱུར་བའི་སྡུག་བསྔལ་ད་ལྟ་བདེ་བ་ལྟར་ཡོད་འཕྲོ་ཁོ་ན་ལ་གློ་བུར་གྱི་སྡུག་བསྔལ་
དུག་དང་འདྲེས་པའི་ཁ་ཟས་ཟོས་པའམ། རྩེད་མོའི་ཆེད་དུ་ཆུ་བརྒལ་བས་བྱིང་སྟེ་སྐད་ཅིག་ལ་སྲོག་འདོར་བ་ལྟ་བུ། ཁྱབ་པ་འདུ་བྱེད་ཀྱི་སྡུག་བསྔལ་ནི་ཟས་གོས་དང་སྤྱོད་ལམ་ཉེས་པས་ཤིན་ཏུ་དོས་དྲག་པའི་ནད་མྱོང་བའམ། མི་བཙན་པོ་ལ་རྒོལ་བ་བྱས་པས་ཕྱིས་གནོད་པའི་ལན་འདུ་བྱེད་པ་ལྟ་བུ་སྟེ། རྩ་བའི་སྡུག་བསྔལ་ཆེན་པོ་གསུམ། དེ་སྐད་དུ་འདུལ་བ་ལུང་ལས། འཁོར་བ་སྡུག་བསྔལ་ཅན་ཕུང་པོ། །སྡུག་བསྔལ་སྡུག་བསྔལ་འདུ་བྱེད་དང༌། །འགྱུར་བ་ཉིད་གསུམ་བརྒྱད་རྣམས་ཀྱིས། །མི་རྣམས་ཤིན་ཏུ་སྡུག་བསྔལ་ལོ། །ཞེས་གསུངས་པ་ལྟར་རྩ་བའི་སྡུག་བསྔལ་གསུམ་གྱི་སྟེང་དུ་སྐྱེ་བ་དང༌། རྒས་པ་དང༌། ན་བ་དང༌། འཆི་བ་དང༌། དགྲ་མི་སྡུག་པ་དང་འཕྲད་པ་དང༌། གཉེན་བྱམས་པ་དང་བྲལ་བ་དང༌། འདོད་པ་ཐོག་ཏུ་མ་ཁེལ་བས་ཕོངས་པ་དང༌། ཉེར་ལེན་གྱི་ཕུང་པོ་ལྔས་སྡུག་བསྔལ་གཏན་དུ་འཛིན་པ་སྟེ་རྣམ་པ་བརྒྱད་ཀྱིས་མནར་བས་ཤིན་ཏུ་སྡུག་བསྔལ་ལོ། །དེའི་ཕྱིར་ཀུན་མཁྱེན་ཆེན་པོས། དེ་ལྟར་མི་ཡི་འཇིག་རྟེན་མཐའ་དག་ནའང༌། །སྡུག་བསྔལ་རྒྱུ་འབྲས་ཉིད་ཕྱིར་བདེ་བ་མེད། །དེ་ལས་ཐར་ཕྱིར་ལེགས་པའི་ཆོས་བསམ་སྟེ། །འཁོར་བའི་གནས་ལས་ཐར་བའི་ཐབས་འཚལ་ལོ། །ཞེས་གསུངས་སོ། །དེ་བཞིན་དུ་འདོད་ལྷའི་གནས་
ནའང་སྡུག་བསྔལ་ཚད་མེད་དེ། འདི་ལྟར་རྒྱལ་ཆེན་རིགས་བཞི་དང༌།༤༠ ཨངྐི་རྣམས་ནི་མིའི་ལོ་གྲངས་ཏེ། ལྷ་གནས་སོ་སོའི་ཞག་རེ་ཡིན་ལ། དེའི་ལོ་ཟླའི་འགྱུར་གྱིས་རྩིས་ནས་རྒྱལ་ཆེན་རིགས་བཞིའི་ལོ་ལྔ་བརྒྱ་ལ་ཡང་སོས་ཀྱི་ཞག་གཅིག །སུམ་ཅུ་རྩ་གསུམ་པ་ནས་རིམ་པར་ལ་སྟོང་དང༌། ཉིས་སྟོང་དང༌། བཞི་སྟོང་དང༌། བརྒྱད་སྟོང་དང༌། ཁྲི་དྲུག་སྟོང་རྣམས་ཐིག་ནག་དང༌། བསྡུས་འཇོམས་དང༌། ངུ་འབོད་དང༌། ངུ་འབོད་ཆེན་པོ་དང༌། ཚ་བ་རྣམས་ཀྱི་ཞག་རེ་ཡིན་ལ། རབ་ཏུ་ཚ་བ་དང་མནར་མེད་པ་ནི་གཞལ་བྱ་དེས་མ་ཡིན་ཏེ་གོང་དུ་བཤད། སུམ་ཅུ་རྩ་གསུམ་ ༡༠༠ དང༌། མཚེ་མ་༢༠༠ དང༌། དགའ་ལྡན་༤༠༠ དང༌། འཕྲུལ་དགའ་༨༠༠ དང༌། གཞན་འཕྲུལ་༡༦༠༠ དབང་བྱེད་ཀྱི་བར་དེ་དག་བདེ་བ་ལྟར་སྣང་ཡང༌། འགྱུར་བ་དང༌། འདུ་བྱེད་ཀྱི་སྡུག་བསྔལ་ཁོ་ནས་མནར། འཆི་བའི་ཚེ་ལུས་ཀྱི་མདོག་མི་སྡུག་པ་དང༌། མེ་ཏོག་རྙིང་པ་དང༌། ཉམས་མི་དགའ་བ་དང༌། ལྷ་ཟླ་བོས་སྤོང་ཞིང་འདུ་ཤེས་འཁྲུགས་པ་དང༌། ཕྱི་མ་གང་དུ་སྐྱེས་པའི་གནས་ལྷ་ཡི་མིག་གིས་མཐོང་བས་རྐྱེན་བྱས་སྐྲས་སྟེ་བརྒྱལ་བ་ན་ལྷ་ཕ་མའམ། མཛའ་བཤེས་ལ་སོགས་པས་རྒྱང་རིང་པོ་ནས་བོས་ཏེ། འཛམ་བུའི་གླིང་དུ་མི་རྣམས་ཀྱི་ནང་དུ་སྐྱེ་བར་ཤོག་ཅིག །དེར་ཡང་དགེ་བཅུ་སྤྱད་ནས་ཕྱིས་ཀྱང་ལྷའི་གནས་འདིར་སྐྱེ་བར་ཤོག་ཅིག །ཅེས་ཡིད་སྨོན་ཁར་བཏོན། མེ་ཏོག་གཏོར་ནས་རྒྱང་རིང་བོར་འབྲོས་པ་དེ་ལྟ་བུའི་སྡུག་བསྔལ་ལྷའི་ཞག་
བདུན་དུ་སྤྱོད་པས་ཉམ་ཐག །འོ་སྐོལ་མི་རྣམས་འཆི་བའི་ཚེ་གཉེན་བཤེས་ཀྱིས་མལ་མཐའ་བསྐོར་ནས་དེའི་འདོད་པ་ཐབས་དུ་མས་སྐོང་ནའང་ཤིན་ཏུ་སྡུག་བསྔལ་ཅིང་ཡི་མུག་ན་ལྷ་དག་འཆི་འཕོའི་སྡུག་བསྔལ་ལྟ་ཅི་སྨོས། གཞན་ཡང་ཚངས་རིས་ནས་འབྲས་བུ་ཆེན་པོའི་བར་ཏེ་གཟུགས་ཁམས་བསམ་གཏན་གྱི་ལྷ་གཟི་བྱིན་གྱི་དཔལ་དང་ལྡན་པ་དེ་དག་ཀྱང་འཆི་བའི་ཚེ། ད་ལྟའི་བདེ་བ་དེ་ཉིད་འགྱུར་ནས་སྲིད་པ་ཕྱི་མར་འཇུག་པའི་སྡུག་བསྔལ་དཔག་ཏུ་མེད་དེ་འཕགས་པ་ཀླུ་སྒྲུབ་ཀྱིས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐོངས་བས་ཀྱང༌། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་གསུངས་ལ། དེ་བཞིན་དུ་གཟུགས་མེད་སྐྱེ་མཆེད་མུ་བཞི་ནི་ཐམས་ཅད་མཁྱེན་པའི་ཉེ་རྒྱུ་མ་ཡིན་པའི་ལུང་མ་བསྟན་གྱི་བསམ་གཏན་ཉི་ཚེ་བར་འབྱམས། ཅི་ཞིག་ན་འཆི་འཕོས་ནས་སྲིད་པ་ཕྱི་མའི་སྡུག་བསྔལ་ནམ་མཁའ་ལ་འཕུར་བའི་འདབ་ཆགས་ངེས་པར་ས་ལ་བབས་པ་བཞིན་ངེས་མེད་དུ་མྱོང་ན་གནས་སྐབས་ཀྱི་བདེ་བ་ལ་ཡིད་བརྟན་པར་བྱེད་པ་ནི་མཚང་རེ་ཆེ་སྟེ། སློབ་སྤྲིང་ལས། སྡུག་བསྔལ་མེ་ཚོགས་ཕུང་པོས་འཇིགས་པའི་འཇིག་རྟེན་འདིར། །སྐྱེ་བོ་བདེ་སྙམས་
མངོན་པའི་ང་རྒྱལ་བྱེད་པ་གང༌། །དེ་ནི་གཤིན་རྗེའི་ཁ་ཡང་འབྱེད་པ་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཞེས་གསུངས་སོ། །གཞན་ཡང་འདི་ལྟར་ལྷ་མིན་རྣམས་ལ་ནི་སྡུག་བསྔལ་དེ་བས་ཀྱང་དབལ་ཚ་སྟེ། བཤེས་སྤྲིང་ལས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་སུམ་ཅུ་རྩ་གསུམ་པའི་སྐྱིད་པ་དང་འབྱོར་བ་མཐོང་ནས། ཁོང་ཁྲོ་དང་ཕྲག་དོག་གི་མེས་གདུངས་ནས་ལྷ་དང་འཐབས་པའི་ཚེ་གཡུལ་ངོར། རྡོ་རྗེ་དང༌། མདའ་དང༌། འཁོར་ལོ་ལ་སོགས་པའི་མཚོན་ཆ་སྣ་ཚོགས་པས་མགོ་དང་ཡན་ལག་གཅོད་ཅིང༌། སྲོག་འགག །ལུས་ཤིན་ཏུ་སྣད་པ་དང༌། འཆི་བ་ལ་ཐུག་པའི་སྡུག་བསྔལ་ཤིན་ཏུ་མི་བཟད་པས་མནར་རོ། །གལ་ཏེ་བློ་དང་ལྡན་པ་དག་ཡོད་ཀྱང་སྒྲིབ་པའི་དབང་གིས་ཉན་ཐོས་རང་གི་མཐོང་ལམ་མི་ཐོབ་པས་བདེན་པ་མི་མཐོང་ཞེས་བཤད་ལ་ཐེག་པ་ཆེན་པོའི་ལུགས་སུ་ནི་དེ་ལྟར་མ་ཡིན་པར་དཀོན་ཅོག་བརྩེགས་པ་ལས་གསུངས་པ་ཀུན་མཁྱེན་ཆེན་པོས་ལུང་འདྲེན་མཛད་མོད། ཇི་ལྟར་ཡང་དེར་སྲིད་པ་སྤོང་བའི་ཐབས་ལ་
འབད་དགོས་པ་ནི་ཀུན་མཁྱེན་གྱིས། ལྷ་མིན་པ་དག་ཤིན་ཏུ་སྡུག་བསྔལ་ན། །དེ་བས་དགེ་ལས་ཞི་བའི་འགྲོ་བ་དག །མྱུར་བ་ཉིད་དུ་དམ་པའི་ཆོས་མཛོད་ཅིག །ཅེས་གསུངས་པ་ལྟར་རོ། །དེ་ལྟར་འཁོར་བའི་སྡུག་བསྔལ་མཐའ་མེད་ཅིང་དོས་དྲག་པ་གཅིག་ནས་ཐར་ཀྱང་གཅིག་ཏུ་འཛུད་པ་ཟོ་ཆུའི་ཁྱུད་མོའམ། བུམ་ནང་གི་བུང་བ་བཞིན་སྡུག་བསྔལ་ཁོ་ནའི་རང་བཞིན་ཅན་ཏེ། སློབ་སྤྲིང་ལས། གང་ཞིག་འཁོར་བའི་འཁོར་ལོར་རྟག་ཏུ་འཁོར་འགྱུར་བའི། །ནང་དུ་ཞུགས་ནས་བསྟི་བ་ཙམ་ལ་བདེར་སེམས་པ། །དེ་ནི་ངེས་པར་དབང་མེད་རིམ་གྱིས་བརྒྱ་ཕྲག་ཏུ། །འགྲོ་བ་མཉམ་དང་མི་མཉམ་ཀུན་ཏུ་འཁྱམས་པར་འགྱུར། །ཞེས་གསུངས་སོ། །འོ་ན་ངན་འགྲོའི་གནས་དང་རིགས་དྲུག་ཐུན་མོང་གི་སྡུག་བསྔལ་ཐམས་ཅད་སངས་རྒྱས་ཀྱིས་སྐྱོབས་པས་ཨའུ་ཙི་མོད་སྙམ་ན། དེ་ལྟར་མ་ཡིན་ཏེ། འདུལ་བ་ལུང་ལས། ངས་ནི་ཁྱོད་ལ་ཐར་བའི་ལམ་བསྟན་གྱི། །ཐར་བ་རང་ལ་རག་ལས་བརྩོན་པར་གྱིས། །ཞེས་གསུངས་པས་རང་ཅག་རྣམས་བླང་དོར་ལ་རྨོངས་པའི་ཕྱིར་བདེ་བར་གཤེགས་པས་ཐབས་དུ་མའི་སྒོ་ནས་ཐར་པའི་ལམ་བསྟན་པ་ཙམ་ལས། འཁོར་བ་དང་ངན་སོང་ལས་ཐར་བ་ནི་རང་གི་བརྩོན་པ་ཁོ་ན་ཡིན་
པས་དཔེར་ན་གཉིད་ཀྱིས་མྱོས་པའི་ཚེ་རྨི་ལམ་སུས་ཀྱང་དགག་ནི་མི་ནུས་པ་བཞིན་ནོ། །གལ་ཏེ་དེ་ལྟ་མིན་ན་སངས་རྒྱས་ཐུགས་རྗེ་ཅན་དེ་དག་གཅིག་གི་ཐུགས་རྗེའི་འོད་ཟེར་གྱིས་ཀྱང་སྲིད་པ་འདི་དཔག་ཏུ་མེད་པའི་སྔ་རོལ་ནས་སྟོངས་པར་མཛད་ཟིན་ངེས་སོ། །དེ་བས་ན་འོ་སྐོལ་འཁོར་བའི་དོང་དུ་ནི་ལྷུང༌། བཟུང་འཛིན་གྱི་སྒྲོག་དམ་པོས་ནི་བཅིངས། ཉོན་མོངས་པའི་མཚོན་གྱིས་ནི་བསྔུན། ད་ལྟའི་སྡུག་བསྔལ་ལ་སྤྱོད་ཅིང་ཕྱི་མའི་སྡུག་བསྔལ་འདྲེན་པ་ལས་འོས་མེད་པ་འདིར་ལེགས་པར་བསམས་ནས་རིགས་དྲུག་གི་སེམས་ཅན་ཐམས་ཅད་ལ་སྙིང་རྗེ་དཔག་ཏུ་མེད་པར་བསྐྱེད། སེམས་ཅན་དེ་དག་ཐམས་ཅད་ཐར་པའི་ལམ་ལ་བཀྲི་བའི་ཆེད་དུ་ཉི་མ་དེ་རིང་ནས་བཟུང་ཡོན་ཏན་ཐམས་ཅད་འབྱུང་གནས་དཀོན་མཆོག་གསུམ་ཐབས་དུ་མའི་སྒོ་ནས་མཆོད་པ་དང༌། མི་དགེ་བའི་བསམ་པ་སྐད་ཅིག་མ་ཡན་ཆད་ལ་གཉེན་པོ་དྲག་པོས་གཅུན་ནས་བཤགས་སྡོམ་བྱ་སྟེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང༌། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་དག་གིས་ཀྱང༌། །རྩྭ་ཕུང་རི་ཙམ་སྲེག་པར་བྱེད། །ཅེས་གསུངས་ལ། དགེ་བའི་བསམ་པ་ཆ་ཤས་ཕྲ་མོ་ཚུན་ཆོད་ནས་གསག་ཅིང་དཀར་པོ་དགེ་བའི་
ལས་འབའ་ཞིག་གིས་དུས་འདའ་བར་བྱེད་དགོས། འགའ་ཞིག་བདག་ཤེས་རབ་ཆུང་བས་ཐོས་བསམ་མི་ནུས་སྐད་པ་དང༌། འགའ་ཞིག་བདག་ལོངས་སྤྱོད་དམན་པས་ཟག་བཅས་ཟང་ཟིང་གི་མཆོད་སྦྱིན་མི་འགྲུབ་སྐད་པ་དང༌། འགའ་ཞིག་བདག་ན་སོ་རྒས་པས་ཆོས་མི་ཡོང་སྐད་པ་སོགས་སྨྲ་ཞིང་སེམས་པའང་གཙོ་བོར་སེམས་ཁོ་ནས་མ་ནུས་པ་ཡིན་ཏེ་བརྩོན་འགྲུས་དང་སྤོབས་པ་བསྐྱེད་ན་དུད་འགྲོས་ཀྱང་ཐར་པ་བསྒྲུབ་ནུས་པར་གསུངས་ན་མི་ཡིས་ལྟ་ཅི་སྨོས་ཏེ། ཤཱནྟ་དེ་ཝས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པར་གསུངས་པས་བདེན་འདི་གསུངས། །སྦྲང་བུ་ཤ་སྦྲང་བུང་བ་དང༌། །དེ་བཞིན་སྲིན་བུར་གང་གྱུར་པ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའི་བླ་མེད་ཐོབ། །བདག་ལྟའི་རིགས་ཀྱི་མིར་སྐྱེས་ལ། །ཕན་དང་གནོད་པ་ངོ་ཤེས་ནས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་ཐོབ། །ཅེས་དང༌། མདོ་སྡེ་རྒྱན་ལས། གལ་ཏེ་སེམས་ཅན་མིར་གྱུར་པ། །ཚད་མེད་སྐད་ཅིག་རེ་རེ་ལ། །རྫོགས་པའི་བྱང་ཆུབ་ཐོབ་དེའི་ཕྱིར། །ཞུམ་པ་དང་དུ་བླང་མི་བྱ། །ཞེས་གསུངས་པའི་ཕྱིར་རོ། །གཞན་ཡང་
དགེ་བའི་ལས་ཇི་སྙེད་པ་ལའང་ཆོག་ཚོད་དང༌། རྩིས་གྲངས་ཀྱིས་ཁྲིགས་སུ་བཅད་པར་མི་བྱ་སྟེ། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག །ཆོས་ཀྱི་སྒོ་གཅིག་དང༌། སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་འཛིན་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔས་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །ཞེས་གསུངས། ད་ལྟ་འོ་སྐོལ་གྱི་དགེ་བ་ཇི་ཙམ་ཞིག་འབད་ཀྱང་དེ་ཉིད་སྡིག་པ་མི་དགེ་བའི་ལས་དང་མ་འདྲེས་པའང་རྣམ་པར་དཔྱད་ན་འོང་མི་ཐར་བའི་ཕྱིར་དང༌། གལ་ཏེ་རེ་རེ་ཙམ་སྲིད་ནའང་ཡིད་ཅན་ཕལ་ཆེར་བློ་མིག་མ་དག་པས་སྦྱོར་དངོས་རྗེས་གསུམ་གྱིས་ཟིན་པའི་དམ་པ་གསུམ་དང་འབྲེལ་བའི་དགེ་བའི་རྩ་བ་གསོག་པ་ཤིན་ཏུ་དཀོན་ལ། དེའི་ཕྱིར་བསོད་ནམས་ཆ་མཐུན་གྱི་དགེ་འབྲས་ལན་གཅིག་སྨིན་ནས་ཟད་པར་གྱུར་བ་དག་ནི་དབུས་ཀྱི་རི་བོ་མཆོག་རབ་ཙམ་ཡོད་པར་རློམ་ཡང་སྟོན་ཀའི་སྤྲིན་དང་འདྲ་སྟེ་ཤིན་ཏུ་ཡ་མ་བརླ་བས་ལག་པ་བརྐྱང་བསྐུམ་ཙམ་གྱི་བསམ་པའང་དགེ་བའི་ལས་འབའ་ཞིག་ཏུ་འགྲོ་བར་བྱ་དགོས་སོ། །སེམས་སྦྱོང་བཞི་པ་ནི། བུ་ཡིག་ལས། བླ་མའི་གདམས་ངག་ཅིག་ཅི་ནས་
ཀྱང་ཐོབ་པར་བྱ་ཞིང༌། ཐབས་གང་གི་སྒོ་ནས་ཀྱང་ཐོབ་པར་བྱ་དགོས་སྙམ་པ་དང༌། ཞེས་པས། དེ་ལྟར་སྔར་བཤད་མ་ཐག་པའི་རིགས་དྲུག་གང་དུ་འཁོར་ཀྱང་སྡུག་བསྔལ་འབའ་ཞིག་ལས་བདེ་བ་ཁབ་ཀྱི་རྩེ་ཙམ་མ་མཆིས་པར་ཤེས་པ་དང༌། གོ་བ་ཙམ་ཡོད་ཀྱང་དེ་ལ་ཡི་མུག་བྱས་པ་གཅིག་པུས་སྡུག་བསྔལ་དེ་ལས་ཐར་བ་མ་ཡིན་ཏེ། དེ་ལ་ཕན་པའི་ཐབས་ཁོ་ནར་ལྷུར་ལེན་དགོས། དེ་གང་ཡིན་ན། གསལ་རྒྱལ་ལ་གདམས་པའི་མདོ་ལས། རྒྱལ་པོ་ཆེན་པོ་དེའི་ཚེ། དེའི་དུས་ན་དམ་པའི་ཆོས་མ་གཏོགས་མགོན་དང་སྐྱབས་མེད་དོ། །དམ་པའི་ཆོས་ནི་དེའི་ཚེ་མགོན་དང་སྐྱབས་དང་རྟེན་དང་གླིང་དང་དཔུང་གཉེན་ཡིན་ནོ། །ཞེས་གསུངས་ཤིང་དེ་ཡང་ཡིག་ནག་ཀློག་པ་ཙམ་ནི་མ་ཡིན་ཏེ་དཔེར་ན་འོ་མ་ལས་མར་དང༌། མེ་ལས་དུ་བ་འབྱུང་བ་ལྟར་ལམ་གྱི་རྩ་བ་དགེ་བའི་བཤེས་གཉེན་ཁོ་ན་བསྟེན་ནས་སྙིང་པོ་ལེན་པར་བྱ་སྟེ། སྡུད་པ་ལས། བླ་མ་མཁས་པ་རྣམས་ནི་རྟག་ཏུ་བསྟེན་བྱ་སྟེ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །ཞེས་གསུངས་པ་དེ་ལ་བསྟེན་བྱ་བླ་མའི་མཚན་ཉིན་ནི། རིན་པོ་ཆེ་
ཕུང་པོའི་མདོར། བྱམས་པས་གསོལ་བ། དགེ་བའི་བཤེས་གཉེན་ཇི་ལྟ་བུར་བསྟེན་པར་བགྱི། བཀའ་སྩལ་པ། དགེ་བའི་བཤེས་གཉེན་ནི་ཆོས་ཅི་དང་ཅི་སྟོན་པ་ཐམས་ཅད། ཆོས་ཀྱི་དབྱིངས་དོན་དམ་པའི་བདེན་པ་འབའ་ཞིག་སེམས་ཏེ་སྟོན་པར་བྱེད་གསལ་བར་བྱེད་པ་དེ་ནི་དགེ་བའི་བཤེས་གཉེན་ལམ་དྲང་པོ་ནས་འཁྲིད་པར་བྱ་བ་ཡིན་ནོ། །ཞེས་གསུངས་པ་དེ་གཞིར་བཞག་ནས་མདོ་སྡེ་རྒྱན་ལས་གསུངས་པ་ལྟར་ལྷག་པའི་བསླབ་པ་གསུམ་གྱིས་རྒྱུད་ལེགས་པར་དུལ་བ་ཕྱོགས་རེ་ཙམ་མ་ཡིན་པར་མང་དུ་ཐོས་པ་ལུང་གི་ཡོན་ཏན། དེ་ཁོ་ན་ཉིད་རྟོགས་པའི་ཤེས་རབ་ཀྱི་བསླབ་པ་སློབ་མ་རྣམས་ལས་ཆེས་ལྷག་པའི་ཁྱད་པར་གྱི་ཡོན་ཏན། ལུང་དོན་རིག་པས་འབྱེད་པ་ལ་རྣམ་དཔྱོད་ཀྱི་མཐུ་ཕུན་སུམ་ཚོགས་པས་གདུལ་བྱའི་རྣ་བར་འཇེབས་ཤིང་དོན་དམ་པའི་ལམ་ལ་བཀྲི་བར་མཁས་པས། རྙེད་པ་དང་བཀུར་སྟི་སོགས་ལ་མི་གཟིགས་པར་འགྲོ་བ་ཉམ་ཆུང་བ་ལ་བརྩེ་བའི་སྙིང་རྗེ་ཅན། གཞན་དོན་བསྒྲུབ་པ་ལ་སྐྱོ་དུབ་མེད་པའི་བརྩོན་འགྲུས། ཡང་ཡང་འཆད་པ་ལ་སྐྱོ་ངལ་མེད་ཅིང་ལོག་སྒྲུབ་བཟོད་པའི་སྙིང་སྟོབས་ཅན་གྱི་བླ་མ་དམ་པ་ཞིག་བསྟེན་དགོས། དེ་ལ་ནང་གསེས་སུ་དབྱེ་ན་སྤྱི་མདོ་དགོངས་པ་འདུས་པ་
ལས། ཕྱི་སྒྲོ་འདོགས་གཅོད་པ་ལ་མཁས་པའི་བླ་མ། ནང་གསང་སྔགས་ཀྱི་གདམས་ངག་སྟོན་པ་དྲིན་ཅན་གྱི་བླ་མ། གསང་བ་སེམས་ཉིད་སྐྱེ་བ་མེད་པ་སྟོན་པ་རྩ་བའི་བླ་མ། རང་བཞིན་གཞིའི་བླ་མ། དག་པ་རང་སེམས་ཀྱི་བླ་མ། སྣང་བ་བརྡའི་བླ་མ་གང་ཟག་བརྒྱུད་པའི་བླ་མ་རྣམས་ལ་འདུས་པའོ། །ཞར་ལ་སློབ་མའི་མཚན་ཉིད་ཀྱང༌། རྒྱུད་ཀློང་གསལ་ལས། སྣོད་དང་མི་ལྡན་སློབ་མ་ནི། །ཤེས་ཆུང་ཁ་གསགས་གདོང་ལྟས་ཆེ། །ཁ་མཁས་ལག་དམ་གཡོ་སྒྱུ་ཆེ། །བླ་མའི་གསུང་བཅག་དྲིན་ལ་རྩོད། །ཡོན་ཏན་མི་མཐོང་སྐྱོན་ལ་རྟོག །རིགས་བརྒྱུད་དང་རྒྱུད་ངན་པ་དང༌། །བཀའ་དྲིན་ཁྱད་གསོད་རང་ལ་བསྟོད། །དོན་དམ་དམ་ཚིག་ཉམས་ལེན་འཆལ། །སློབ་མ་མ་བརྟག་སློབ་དཔོན་དགྲ། །ཞེས་གསུངས་པ་ལ་བརྟགས་པ་སྔོན་དུ་འགྲོ་བས་བསྟེན་བྱ་མཚན་ཉིད་དང་ལྡན་པ་ནི། འོད་གསལ་གྱི་རྒྱུད་རིག་པ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །ཞེས་གསུངས་པ་ཁོ་ན་ལས། གཞན་དུ་མ་ཡིན་ལ། དེ་ལྟ་བུའི་དཔོན་སློབ་ཟུང་དུ་འབྲེལ་ན་གཤོག་པ་གཉིས་ལྡན་གྱི་
འདབ་ཆགས་མཁའ་ལ་འཕུར་བ་ལ་ཚེགས་མེད་པ་བཞིན་བྱང་ཆུབ་བསྒྲུབ་པ་ལ་དེ་ཙམ་གྱི་དཀའ་ལས་མེད་པས་སློབ་མས་ཀྱང་བླ་མ་མཚན་ཉིད་དང་ལྡན་པ་བསྟེན་ཞིང༌། རང་ཉིད་ལའང་ལུང་དང་འགལ་བའི་ཉེས་པའི་སྐྱོན་གང་ཆེ། ངོས་ཙེར་གྱིས་བཟུང་ནས་གཉེན་པོས་རྒྱུད་བསྡམས་རྗེས་བཤེས་གཉེན་བསྟེན་པ་དངོས་ལ་བསམ་པས་བསྟེན་པའི་ཚུལ་དང༌། སྦྱོར་བས་བསྟེན་པའི་ཚུལ་གཉིས་ཀྱི་སྔ་མ་ནི་དཀོན་མཆོག་ཏ་ལའི་གཟུངས་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །དད་པ་རྙོག་པ་མེད་ཅིང་སེམས་དྭངས་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་གསུངས་པ་ལྟར་དགེ་བའི་བཤེས་གཉེན་དེ་ལ་མཉམ་འགྲོགས་མ་ཡིན་པར་ཞེ་ཐག་པ་ནས་མི་ཕྱེད་པའི་དད་པ་ལྡན་པ་འཕགས་པ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་ཀྱི་ཡོན་ཏན་མཐོང་བ་ལྟ་བུ་ཞིག་ངེས་པར་དགོས། འོ་སྐོལ་ལས་མ་དག་པའི་དབང་གིས་བླ་མ་མཚན་ལྡན་ལའང་དེ་དག་གིས་དྲང་ངེས་ལྡེམ་
དགོངས་རྣམ་པ་བཞིའི་མཛད་པ་སྣ་ཚོགས་བསྟན་པའི་གནད་མ་གོ་བར་སྐྱོན་ཡོན་འདྲེས་མར་སྣང་བ་སྲིད་པས་དེའི་ཚེ་སྐྱོན་རྟོག་ཤར་བའི་བློ་དེ་དགག་དགོས། དེ་དགག་ནུས་ན་ཅི་མཛད་ལེགས་མཐོང་ངམ་ངམ་ཤུགས་ཀྱིས་འོང་བ་ལས་འོས་མེད། དེའི་ཕྱིར་འདི་ལྟར་བླ་མ་དེའི་མཛད་པ་སྐྱོན་ལྟར་སྣང་བ་ཐམས་ཅད་ལ་ཆེད་དུ་གཉེར་ནས་གཉེན་པོའི་གསལ་འདེབས་བྱ་བ་ནི། བླ་མ་དེའི་མཛད་པ་ལེགས་ཉེས། གསུང་བགྲོས་གནང་ལུགས། ཐ་ན་ན་བཟའ་བཞེས་ལུགས་ལྟ་བུ་ཞིག་གི་མཚམས་སུ་ཡང་འདི་ལྟར་མ་ལེགས་སྙམ་པའི་བསམ་པ་ཞིག་ཧུར་གྱིས་ཤར་བྱུང་ན། དེ་མ་ཐག་རྣམ་རྟོག་དེ་ལ་བདག་འཛིན་རྗེས་གཅོད་མི་བྱ་བར་བདག་ལྟ་བུའི་ལས་ངན་གྱི་སེམས་ཅན། འདི་ལྟ་བུའི་བླ་མ་ཁྱད་པར་ཅན་ལ་དེ་འདྲའི་ཉེས་སྐྱོན་ཡོང་བ་མི་སྲིད། རང་ཉིད་ཐོག་མ་མེད་པ་ནས་གོམས་པའི་ལས་ཉོན་གྱི་མཐུས་སྐྱོན་དུ་ཤར་བར་འདུག །ཐང་ཕྲོམ་ཟོས་པའི་རྒན་མོའི་མིག་སྔར་ནམ་མཁའ་ནས་སྐྲ་ཤད་འཛག་པ་དང༌། མཁྲིས་ནད་ཀྱིས་གདུངས་བའི་མིག་ཤེས་ལ་དུང་གི་ཁ་དོག་ཀྱང་སེར་པོར་སྣང་བ་དང་ཁྱད་པར་ག་ལ་ཡོད། རང་རེ་འདོད་པའི་མདའ་ལྔས་སྙིང་ཕུགས་པའི་འགྲོ་བ་དག་གི་སྤྱོད་ཚུལ་དང་བསྟུན་ཀྱིན་དགོངས་པ་ཅན་གྱི་ཚུལ་དུ་མ་དག་པའི་མཛད་པ་དེ་དག་ཆེད་དུ་མ་བསྟན་པའི་ངེས་པ་ཅི་ཆ།
སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་འདྲེན་པ་ཤཱཀྱ་ཐུབ་པ་ལའང་དགེ་སློང་ལེགས་སྐར་དང་ལྷས་བྱིན་མུ་སྟེགས་ཀྱི་སྟོན་པ་དྲུག་ལ་སོགས་པ་དག་གིས་སྐྱོན་གྱི་གོང་བུར་མཐོང་བ་དང༌། སྔོན་གྱི་པཎ་གྲུབ་མཁན་སློབ་རྒྱལ་བློན་བྱང་ཆུབ་སེམས་དཔའི་དེ་དག་ལའང༌། བོན་དང་སྡིག་བློན་མ་རུངས་པ་དེ་དག་གིས་ཉེས་པའི་གོང་བུར་མཐོང་བ་དང༌། འཕགས་པ་ཐོགས་མེད་ཀྱིས་མི་ཕམ་མགོན་པོ་ཁྱི་མོ་ཁོག་སྨད་འབུས་གཡེང་བར་གཟིགས་པ་དང་ཁྱད་པར་མེད། ཡབ་སྲས་མཇལ་བའི་མདོ་ལས་བདེ་བར་གཤེགས་པས་བདུད་དུ་སྤྲུལ་ནས་སེམས་ཅན་གྱི་དོན་མཛད་པར་ཡང་གསུངས་པའི་ཕྱིར་ན་སངས་རྒྱས་ལ་བདུད་དུ་མཐོང་བའང་རང་གི་སྣང་བ་མ་དག་པ་ཁོ་ན་ལས་ཡུལ་དེ་དག་ལ་སྐྱོན་ཡེ་ནས་མེད་པར་ངེས་ཤེས་བསྐྱེད་ཡང་ཡང་བསམས་ནས་སྐྱོན་དུ་ལྟ་མཁན་གྱི་ཀུན་རྟོག་དེ་ཟིལ་གྱིས་གནོན་དགོས་ཏེ། རྒྱུད་དོན་མདོར་བསྡུས་ལས། བླ་མའི་མཛད་པ་ཐམས་ཅད་ལ། །སངས་རྒྱས་མཛད་པ་ཉིད་དུ་བསམ། །གལ་ཏེ་གཟིམས་སམ་བཞེངས་པ་ནི། །འོད་གསལ་སྒྱུ་མར་སྣང་བར་བལྟ། །ཕྱག་དང་བསྐོར་བ་གང་མཛད་ཀྱང༌། །སངས་རྒྱས་རོལ་པ་ཉིད་དུ་སྟོན། །གར་དང་རྣམ་འགྱུར་བཞད་པ་ན། །སངས་རྒྱས་དགོངས་པའི་མཛད་པ་ཅན། །ཁྲོ་དང་ཆགས་པ་ཅིར་སྟོན་ཡང༌། །
སངས་རྒྱས་བྱང་ཆུབ་ཉིད་དུ་བསམས། །མི་བརྒྱ་དུས་གཅིག་བསད་ན་ཡང༌། །སངས་རྒྱས་འགྲོ་ལ་ཕན་མཛད་ཉིད། །བཙུན་མོ་བརྒྱ་དང་རོལ་ན་ཡང༌། །བདེ་ཆེན་ཡེ་ཤེས་ཕྱག་རྒྱ་ཆེ། །འདོད་པ་འདུན་པ་ཅིར་སྣང་ཡང༌། །སངས་རྒྱས་འདོད་པ་བྲལ་བ་ཡིན། །ཐམས་ཅད་སངས་རྒྱས་མཛད་པ་སྟེ། །ཅི་མཛད་མཐོང་བ་ལེགས་པའི་ལམ། །ཅི་གསུང་ཐོས་པ་དམ་པའི་ཆོས། །ཅི་དགོངས་ཐམས་ཅད་མཁྱེན་པའི་དཔལ། །བླ་མ་འཁྲུལ་པ་སྲིད་མཐར་ཡང༌། །འབྱུང་བ་མེད་ཀྱི་གལ་ཏེ་ན། །མཐོང་སྣང་འཁྲུལ་པ་ལྟར་སྣང་སྟེ། །རང་སྣང་བསམ་པ་མ་དག་པས། །མིག་སྐྱོན་ཅན་གྱིས་གངས་ཉིད་ལ། །རྒྱུན་དུ་ནག་པོར་མི་སྲིད་ཀྱང༌། །ནག་པོར་དངོས་སུ་མཐོང་དང་མཚུངས། །མཁྲིས་ནད་ཅན་གྱིས་དུང་ཉིད་ལ། །རྒྱུན་དུ་དཀར་པོ་ཉིད་ཡིན་ཀྱང༌། །སེར་པོར་མཐོང་བ་ཉིད་དང་མཚུངས། །ལོག་སྲེད་ཅན་གྱིས་ཆུ་ཉིད་ལ། །ཁྲག་རྣག་མཚོན་ཆ་མེད་ན་ཡང༌། །རྣག་ཁྲག་མཚོན་ཆར་མཐོང་དང་མཚུངས། །དེ་ཕྱིར་བླ་མའི་རྣམ་ཐར་ལ། །ལོག་ལྟ་སྐྱེས་ན་ཐར་ལམ་འགག །འགྲོ་འདུལ་ཐབས་མཁས་སྤྱོད་པས་ཏེ། །བརྡ་དང་ཐབས་སུ་ཤེས་པར་བྱ། །ཞེས་གསུངས་སོ། །དེའི་ཕྱིར་ངེས་པའི་དོན་དུ་དམ་པ་དེ་ལ་སྐྱོན་ཡེ་ནས་མི་མངའ་བར་ངེས་ཤེས་
གཏིང་ཚུགས་པ་ཞིག་སྐྱེས་ཕྱིན་ཆད་ལེགས་པའི་ཡོན་ཏན་ཐམས་ཅད་ངམ་ངམ་ཤུགས་ལ་འབྱུང་བ་ནི། སློབ་དཔོན་ནཱ་ག་རྫུ་ནས། རི་དབང་རྩེ་ལས་འགའ་ཞིག་ལྷུང་གྱུར་ན། །ལྷུང་བར་མི་འགྱུར་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ནས། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་གསུངས་སོ། །གུས་པ་ཆེན་པོ་བསྐྱེད་པར་བྱེད་པ་ལ་བཀའ་བཀྱོན་ཡང་ཆོས་བཤད་པ་དང༌། བརྡུང་བཙོག་མཛད་ཀྱང་བྱིན་གྱིས་བརླབས་པར་མཐོང་བ་ཞིག་དགོས་ཏེ། ལུང་གིས་དབྱེ་བར། མདོར་ན་བརྡུང་བཙོག་བཀའ་བཀྱོན་དང༌། །དྲག་སྔགས་གཡུལ་སྤྲོད་མཚོན་ཕུགས་བརྡེག །ཅི་ལྟར་མཛད་ཀྱང་རང་སྐྱོན་གྱི། །དྲི་མ་སེལ་བའི་ཐབས་ཡིན་གྱི། །དེ་ལ་མ་གུས་སྤང་བྱ་སྟེ། །སྐུ་གསུང་ཐུགས་ཀྱི་མཛད་པ་ནི། །ཅི་ལྟར་མཛད་ཀྱང་སངས་རྒྱས་ཀྱི། །གར་གྱི་ཆོ་འཕྲུལ་རོལ་པ་ལས། །གཞན་དུ་ཅི་ཡང་བསམ་མི་བྱ། །བྱས་ན་དངོས་གྲུབ་རྒྱབ་ཀྱིས་ཕྱོགས། །མོས་གུས་ལོག་པས་བདུད་ཀྱིས་འཛིན། །ནད་མང་ཚེ་ཐུང་ངན་འགྲོར་ལྷུང༌། །ཞེས་སོ། །དེའི་ཕྱིར་འདི་ལྟར་བདག་གི་བླ་མ་འདི་སྐྱོན་ཀུན་ཟད་ཡོན་ཏན་ཀུན་རྫོགས། སྤངས་རྟོགས་མཐར་ཕྱིན་པའི་སངས་རྒྱས་རྣམས་དང་ཁྱད་པར་མེད་ཀྱང༌། རང་རེ་བསོད་ནམས་
དང་སྐལ་བ་དམན་པས་བླ་མ་འདིའི་སྐུ་གསུམ་གྱི་སྣང་ཆ་ཇི་བཞིན་པ་རང་ངོར་སྣང་དབང་མ་མཆིས་པས་ཐ་མལ་གྱི་ཚུལ་བསྟན་པ་སྟེ། རིག་འཛིན་འདུས་རྒྱུད་ལས། སངས་རྒྱས་རྣམས་དང་དེ་ཡི་སྲས། །གང་གིས་གདུལ་བྱ་དེ་ཉིད་ལ། །དེ་དང་མཐུན་པའི་གཟུགས་སྟོན་ཏེ། །ཞེས་སོ། །དེའང་འདི་ལྟར་སངས་རྒྱས་ཆོས་ཀྱི་སྐུ་ནང་གསལ་གཞོན་ནུ་བུམ་པའི་སྐུ་ཀུན་གཞིའི་སྟེང་ནས་ཁྱད་ཆོས་དྲུག་གིས་འཕགས་པའི་གདོད་མའི་མགོན་པོ་དེ་ནི། སྤངས་རྟོགས་ཕུལ་དུ་ཕྱིན་པའི་ཡེ་ཤེས་ཀྱི་མཐོང་བ་ལས་གཞན་གྱིས་སྤྱོད་ཡུལ་དུ་མ་གྱུར། ལོངས་སྤྱོད་རྫོགས་པའི་སྐུ་ངེས་པ་ལྔ་དང་ཁ་སྦྱོར་ཡན་ལག་བདུན་ལྡན་དེ་ནི་ཐུན་མོང་མ་ཡིན་པའི་གདུལ་བྱ་ས་བཅུའི་དབང་ཕྱུག་ཁོ་ན་ལས་གཞན་ལ་མི་སྣང༌། སངས་རྒྱས་སྤྲུལ་པའི་སྐུ་སྟོབས་བཅུ་མི་འཇིགས་རྣམ་བཞི་ལ་སོགས་པའི་རྩལ་མངའ་བ་དེ་ནི་ཉན་རང་གི་སྟོན་པར་གྱུར་ཀྱང་དེ་དག་ལས་བཀའ་དྲིན་ནོད་པའི་བསོད་ནམས་ཀྱིས་ཕོངས། དེའང་སྐུ་གསུམ་སྟོན་པ་དེ་དག་ལ་ཉེ་རིང་མངའ་ནས་རང་རེ་རྣམས་ཆེད་དུ་དོར་བ་མ་ཡིན་ཀྱང༌། བྲག་ཕུག་ཁ་བྱང་བསྟན་ལ་ཉི་མའི་སྣང་བ་མི་འཆར་བ་བཞིན་རང་ཉིད་ལས་དང་སྐལ་བ་དམན་པས་སངས་རྒྱས་དེ་དག་མཇལ་བ་དང་གསུང་ཐོས་པའི་སྣོད་དུ་མ་གྱུར་པས་ད་ལྟ་ཕན་མཐའ་མེད་ཀྱི་འཁོར་བ་བཙོན་དོང་ལྟ་བུར་ལྷུང་
བ་འདི་ཙམ་དུ་ཟད། དེ་ལྟར་ནའང་ད་རེས་མི་ལུས་ཐོབ་པའི་དུས་འདིར་བཤེས་གཉེན་དམ་པ་འདི་ལྟ་བུ་དང་མཇལ་བ་བསོད་ནམས་ཤིན་ཏུ་ཆེ། རང་རེ་ལྔ་བརྒྱ་ཐ་མའི་སེམས་ཅན་རྣམས་ཀྱི་དོན་དུ་སངས་རྒྱས་དེ་དག་སོ་སོའི་སྐྱེ་བོའི་སློབ་དཔོན་གྱི་ཚུལ་དུ་སྤྲུལ་ནས་གདུལ་བྱ་འདུལ་བར་མདོ་རྒྱུད་མང་པོ་ནས་གསུངས་པས་བདག་གི་བླ་མ་དམ་པ་འདི་ཡང་ངེས་པའི་དོན་དུ་ཐ་མལ་མ་ཡིན་ལ། རང་ངོས་ནས་དངོས་ཀྱི་གདམས་པ་བསྟན་པས་སངས་རྒྱས་ལས་ཀྱང་ལྷག །མཚན་དཔེས་སྤྲས་པའི་སངས་རྒྱས་དངོས་སུ་མཇལ་ཡང་ཟབ་པ་དང་རྒྱ་ཆེ་བའི་དམ་ཆོས་བསྟན་ནས་ཐར་པ་དང་ཐམས་ཅད་མཁྱེན་པའི་གོ་འཕང་ལ་བཀྲི་བ་ཉིད་ལས་ལྷག་པ་ནི་མཛད་རྒྱུ་མེད། དེའི་ཕྱིར་དགེ་བའི་བཤེས་གཉེན་ལེགས་པར་བསྟེན་པའི་དོན་རང་གིས་ཉམས་སུ་ལེན་ནུས་ན་མངོན་མཐོ་དང་ངེས་ལེགས་ཀྱི་གོ་འཕང་ཐོབ་པར་ཐེ་མི་ཚོམ། ཚེ་འདིའི་ཟས་གོས་གྱི་ན་དང་དགྲ་གདོན་སོགས་ལས་སྐྱོབ་པ་དག་ལའང་བཀའ་དྲིན་ཆེ་བར་རྩི་ན། འཁོར་བ་མཐའ་མེད་ཀྱི་སྡུག་བསྔལ་སེལ་ཞིང་གཏན་གྱི་བདེ་བ་ལ་བཀོད་པར་མཛད་པའི་བཀའ་དྲིན་ནི་དབང་ཆེན་གསེར་གྱི་ས་གཞི་འཛམ་བུ་ཆུ་བོའི་གསེར་གྱིས་བཀང་ཡང་གཞལ་བར་ག་ལ་ནུས། དེའི་ཕྱིར་གདུལ་བྱ་རང་ངོས་
ནས་སངས་རྒྱས་ཐམས་ཅད་ལས་བླ་མ་དམ་པ་བཀའ་དྲིན་ཆེ་ཞིང་ལྷག་གོ་སྙམ་པའི་དད་གུས་དང་མོས་པ་སྙིང་ཁུང་རུས་པའི་གཏིང་ནས་བསྐྱེད་དགོས་ཏེ། མ་རྒྱུད་ཀློང་གསལ་ལས། ནད་གདོན་ཞི་བྱེད་སྨན་པའི་མཆོག །དགོས་འདོད་འབྱུང་བའི་རིན་པོ་ཆེ། །ཐམས་ཅད་དབང་དུ་སྡུད་བྱེད་རྩི། །འགྲོ་བ་མ་ལུས་སྒྲོལ་བའི་གྲུ། །ཕྲིན་ལས་ཀུན་གྱི་མངའ་བདག་མཆོག །ཐོག་མར་བླ་མ་གལ་ཆེའོ། །གང་ཟག་འཁོར་བར་ཞེན་པ་རྣམས། །ཞེན་པ་ལྡོག་ཐབས་བླ་མ་གཙོ། །གང་ཟག་དམ་ཆོས་མ་དྲན་ཞིང༌། །དགེ་སྡིག་ངོ་མི་ཤེས་པ་རྣམས། །ཆོས་སྟོན་དགེ་སྡིག་ངོས་སྟོན་ཕྱིར། །བླ་མ་དམ་པ་ཤིན་ཏུ་གཅེས། །སྒོམ་སྐྱེས་གེགས་ཀྱིས་ཐུམས་པ་ལ། །གེགས་སེལ་འབྲས་བུ་འབྱུང་བ་ཡང༌། །བླ་མ་དག་གི་དྲིན་ལས་འབྱུང༌། །ཞེས་དང༌། རྒྱུ་དང་འབྲས་བུའི་ཆོས་རྣམས་ཀུན། །བླ་མའི་ཞལ་ལས་འབྱོན་པ་ཡིན། །དུས་གསུམ་སངས་རྒྱས་ཐམས་ཅད་ཀྱང༌། །བླ་མ་དམ་པ་བསྟེན་ལས་བྱུང༌། །ཞེས་གསུངས་ལ། དེའི་ཕྱིར་ཐོག་མ་ཉིད་ནས་བདུད་དང་བསླུ་བ་མཁན་མ་ཡིན་པའི་བླ་མ་དམ་པ་མཚན་ཉིད་དང་ལྡན་པ་ཞིག་དང་མཇལ་བའི་རྗེས་ཐོག་ཏུ་ཅི་མཛད་ལེགས་མཐོང་གི་མོས་གུས་སྐྱེ་བ་ནི་ཞེ་ནས་སྐྱེས་པའི་དད་པ་སྟེ་བྱིན་རླབས་ཞུགས་པའི་རྟགས་སུ་ངེས་ལ། བཅོས་མའི་མོས་གུས་ཀྱིས་ནི་
དད་པ་ཚུགས་མི་ཐུབ་ཅིང་སྤྱོད་ལམ་མ་དག་པ་བག་ཙམ་མཐོང་བས་ལྡོག་པའི་ཕྱིར་ཡིད་བརྟན་རུང་བའི་དད་པ་མ་ཡིན་ནོ། །གཉིས་པ་སྦྱོར་བས་བསྟེན་ཚུལ་ནི། ལུས་ངག་ཡིད་གསུམ་གྱི་སྒོ་ནས་བཅུ་ཚན་གསུམ་གྱི་དམ་ཚིག་བསྲུང་མཚམས་དེའི་རྗེས་འབྲེལ་དང་བཅས་པ་ནི། རང་བྱུང་རང་ཤར་གྱི་རྒྱུད་ལས། དང་པོ་སྐུ་ཡི་དམ་ཚིག་ནི། །དང་པོ་ལུས་ཀྱི་བསྲུང་བྱ་བཅུ། །བླ་མའི་གདོང་ནས་འགྲོ་མི་བྱ། །ཅི་ཕྱིར་ཁྲེལ་ནས་རྒྱབ་ཕྱོགས་འདྲ། །ཆོས་མེད་དུད་འགྲོའི་གནས་སུ་སྐྱེ། །བླ་མའི་གཞུག་ནས་འགྲོ་མི་བྱ། །ཅི་ཕྱིར་ཞབས་རྗེས་གནོན་པའོ། །སྐྱབས་མེད་མགོན་དང་བྲལ་བར་སྐྱེ། །བླ་མའི་གཡས་ནས་འགྲོ་མི་བྱ། །ཅི་ཕྱིར་བརྡེག་པའི་སྟབས་སུའོ། །ཚེ་ཐུང་ནད་མང་དམྱལ་བར་ལྟུང༌། །དབུ་ཡི་གྲིབ་མ་མནན་མི་བྱ། །ཅི་ཕྱིར་ཁྱད་དུ་བསད་པ་ཡིན། །ངུ་འབོད་ཆེན་པོའི་དམྱལ་བར་ལྟུང༌། །དབུ་སྐྲ་རྡོག་པས་བརྫི་མི་བྱ། །ཅི་ཕྱིར་སངས་རྒྱས་གཤུང་པ་འདྲ། །ཐིག་ནག་འདྲི་བའི་དམྱལ་བར་སྐྱེ། །དབུ་སྔས་བཞུགས་གདན་བརྫི་མི་བྱ། །ཅི་ཕྱིར་སངས་རྒྱས་བླ་མེད་སྨད། །བཤལ་མ་རི་ལ་འཛེགས་པ་སྐྱེ། །སྐུ་ལ་མཐོ་ཡིས་གཞལ་མི་བྱ། །ཅི་ཕྱིར་ལག་གིས་བརྒྱབ་དང་མཚུངས། །མདུང་ཐུང་སུམ་བརྒྱས་འཇོམས་པར་འགྱུར། །
བླ་མའི་བཞེངས་ཕྱག་ཚུར་མི་བླང༌། །མཐོ་རིས་ཐར་པའི་ལམ་སྣ་འགག །འདུ་ཤེས་མེད་པའི་དམྱལ་བར་སྐྱེ། །ཟབ་མོའི་མན་ངག་ཚིག་གསུམ་ཡང༌། །མཉན་ནས་དེ་ཡི་གོང་དུ་མིན། །ཤེས་རབ་འཆལ་བའི་འདམ་དུ་འཛུད། །བླ་མའི་ཞལ་དུ་མ་གསོལ་བར། །ལོངས་སྤྱོད་ཟས་ལ་ཕུད་བཅད་ན། །ཤ་ཁྲག་འབར་བའི་ལུས་སུ་སྐྱེ། །གཞན་ཡང་བཞེངས་ཚེ་བསྡད་པ་ནི། །མགོ་ལུས་བྲལ་བའི་དམྱལ་བར་སྐྱེ། །བཞུགས་ཚེ་སྟེགས་ལ་བསྡད་པ་ན། །དམྱལ་བ་མགོ་འཕྱང་ལུས་སུ་སྐྱེ། །དེ་རྣམས་སྐུ་ཡི་དམ་ཚིག་བཅུ། །ཉམས་ན་བསྐལ་པ་ཆེན་པོ་གཅིག །ཚ་གྲང་ལས་ཀྱི་དམྱལ་བར་སྐྱེ། །ཉམས་པ་སྐོང་ན་མཆོད་རྟེན་བཞེངས། །བུམ་པར་བླ་མའི་སྐུ་གཟུགས་བཞེངས། །མཆོད་ཅིང་བསྐོར་བ་རྒྱུན་མི་གཅད། །ཅེས་དང༌། ངག་གི་སྒོ་ནས་དམ་བཅུ་བསྲུང༌། །བླ་མ་སངས་རྒྱས་ཀུན་ལས་ལྷག །དེ་ལ་རྟོགས་བཅས་བྱ་མི་རུང༌། །རྒྱབ་ནས་འཕྱ་གཏམ་ཟེར་བ་དེ། །སངས་རྒྱས་རྒྱབ་ཀྱིས་ཕྱོགས་པ་ཡིན། །འབྲས་བུ་མེད་པར་ངན་སོང་ལྟུང༌། །ལུས་རུལ་མགུལ་འགག་ནད་ཀྱིས་འདེབས། །བླ་མ་བླུན་ཞེས་བརྗོད་མི་རུང༌། །བརྗོད་ན་བསྐལ་པ་ཕྲ་མོ་གཅིག །བྱང་ཆུབ་ལམ་དང་ཕྲད་མི་སྲིད། །བླ་མ་ཟོག་ཆེ་བྱ་མི་རུང༌། །རལ་གྲི་སོ་མས་ལྕེ་གཏུབས་ནས། །
ལྐུགས་པའི་གནས་སུ་སྐྱེ་བར་འགྱུར། །བླ་མ་རྡོ་རྗེ་སློབ་དཔོན་ལ། །ཞེ་ལ་འབབ་པའི་ཚིག་མི་སྨྲ། །སྨྲས་ན་རི་འཐབ་བར་དུ་སྐྱེ། །ལེགས་པར་གསུངས་པའི་བཀའ་མི་བཅག །བཅག་ནས་མནར་མེད་གནས་སུ་སྐྱེ། །ངག་ཚིག་བརླང་པོས་ཞེ་འགེམས་ན། །འོ་དོད་འབོད་པའི་གནས་ངན་དུ། །བསྐལ་པ་སྟོང་ཕྲག་དྲུག་ཏུ་གནས། །སྨྲས་པའི་ཚིག་ལ་མི་གནས་པ། །སྡུག་བསྔལ་ལས་ལ་ཡུན་རིང་སྤྱོད། །སྒྲོ་སྐུར་མང་པོ་འདོགས་པ་དེ། །དགེ་སློང་འབུམ་ཕྲག་བསད་དང་མཉམ། །མནར་མེད་དམྱལ་བ་ཁོ་ནར་ལྟུང༌། །ཁྱོད་བས་ང་བཟང་ཟེར་བ་དེ། །དམྱལ་བར་བསྐལ་པ་ཡུན་རིང་གནས། །དམོད་པའི་གཡོ་སྒྱུ་སྣ་ཚོགས་སྨྲ། །རྟག་ཏུ་རྐེ་བཅད་དམྱལ་བར་ལྟུང༌། །དེ་ཡང་སྐུ་ཡི་དམ་ཚིག་ཡིན། །ཉམས་པ་སྐོང་ན་གཟུངས་སྔགས་འབུམ། །བྲིས་ལ་མཆོད་རྟེན་ནང་དུ་གཞུག །དྲིལ་བུ་ཟུང་འབྲེལ་མང་དུ་བཏག །ཅེས་དང༌། ཡིད་ཀྱི་སྒོ་ནས་དམ་བཅུ་བསྲུང༌། །བླ་མའི་དཀོར་ལ་བརྣབ་སེམས་བྱེད། །ཡི་དྭགས་གནས་སུ་བསྐལ་པ་གཉིས། །བཀྲེས་སྐོམ་མི་བཟོད་མྱོང་བར་འགྱུར། །བླ་མ་དག་ལ་འགྲན་སེམས་བྱེད། །འཁོར་བའི་གཅོང་རོང་ཐར་མེད་དུ། །ཆོས་སྤྱོད་བརྩོན་ཡང་སྐྱེ་བར་
འགྱུར། །ཞེ་འགྲས་པ་ཡི་སེམས་བྱེད་ན། །རལ་གྲིས་གཅོད་པའི་དམྱལ་བར་སྐྱེ། །རྡོ་རྗེ་སློབ་དཔོན་འདོད་ཆགས་ཆེ། །སེམས་ན་ངན་སོང་ཀུན་ཏུ་འཁྱམས། །རྡོ་རྗེ་སློབ་དཔོན་ཞེ་སྡང་ཆེ། །སེམས་ན་དམྱལ་བ་དྲུག་ཅུར་འཚོད། །རྡོ་རྗེ་སློབ་དཔོན་འདུ་ཤེས་ཆུང༌། སེམས་ན་ངུ་འབོད་དམྱར་བར་སྐྱེ། །རྡོ་རྗེ་སློབ་དཔོན་གྲོད་པ་ཆེ། །སེམས་ན་མནར་མེད་དམྱལ་བར་སྐྱེ། །རྡོ་རྗེ་སློབ་དཔོན་ང་རྒྱལ་ཆེ། །སེམས་ན་ཁ་འཐབས་གནས་སུ་སྐྱེ། །རྡོ་རྗེ་སློབ་དཔོན་ཁ་ཞན་དུ། །སེམས་ན་བླ་མེད་ལམ་མི་རྙེད། །རྡོ་རྗེ་སློབ་དཔོན་སྐྱོན་བཞིར་ སྐྱོན་བཞི་ནི་བླ་མ་འདི་འཇིག་རྟེན་གྱི་བྱ་བ་ལ་མི་མཁས་སྙམ་པ་དང༌། རང་བས་ན་ཚོད་གཞོན་སྙམ་པ་དང༌། བཟའ་ཚོ་དང་ཉེ་འབྲེལ་ཡིན་སྙམ་པ་དང༌། རང་ལས་རིགས་དམན་པ་ཡིན་སྙམ་པའི་ལོག་པའི་འདུ་ཤེས་བཞིའོ། །སེམས། ། རྟག་ཏུ་བསམ་ངན་མཚང་འབྲུ་བ། །ལྷ་ཀླུ་གདུགས་པས་སྲོག་བཅད་ནས། །མྱུར་དུ་དམྱལ་བའི་གནས་སུ་ལྷུང༌། །འདི་ཡང་སྐུ་ཡི་དམ་ཚིག་ཡིན། །ཉམས་པ་གསོ་ན་མཚན་གྱི་མཐར། །གསོལ་འདེབས་བསྟོད་པ་བྲིས་པ་འབུམ། །བཤགས་པའི་ཚིག་བྲིས་འབུམ་ཐེར་གཞུག །ལོ་ཟླ་དུས་མཆོད་རྒྱུན་དུ་བཟུང༌། །ཞེས་སོ། །དེ་བཞིན་དུ་བླ་མའི་གནང་བ་མ་ཐོབ་ཀྱི་བར་ལ་ལུང་དང་རྟོགས་པའི་ཡོན་ཏན་གྱིས་
གཞན་དོན་བྱེད་པའི་ནུས་པ་མངའ་བ་ཡིན་ནའང་སྨོན་པའི་ཡུལ་དུ་བྱ་བ་ལས་འཇུག་པས་དངོས་སུ་མི་བྱ་སྟེ། རྒྱུད་དེ་ཉིད་ལས། གཞན་ཡང་རྡོ་རྗེ་སློབ་དཔོན་གྱི། །བྱ་བའི་ལས་རྣམས་སློབ་མས་མིན། །བླ་མའི་སློབ་བུ་སློབ་མ་རུ། །བཅུག་ན་སྐྱབས་མེད་དམྱལ་བར་ལྟུང༌། །རྡོ་རྗེ་སློབ་དཔོན་ཆོས་ཀྱི་རྒྱལ། །རྒྱལ་པོའི་བྱ་བ་མངའ་ཐང་སྐྱོང༌། །དེ་བཞིན་ཆོས་ཀྱི་རྩ་བ་དྲུག །ཐེག་པ་འོག་མའི་རྩ་བ་གཉིས། །སེམས་བསྐྱེད་པ་དང་སྡོམ་པ་འབོགས། །ཐེག་པ་གོང་མའི་རྩ་བ་གཉིས། །དབང་བསྐུར་བ་དང་ངོ་སྤྲད་པ། །ཐེག་པ་ཐུན་མོང་རྩ་བ་གཉིས། །རབ་ཏུ་གནས་དང་གནས་སྤོར་བའོ། །རྡོ་རྗེ་སློབ་དཔོན་རྒྱལ་པོ་ཡི། །མངའ་ཐང་སྐྱོང་བའི་ཆོས་ཡིན་པས། །ཕྱོགས་བཞིར་དཔག་ཚད་བཅུ་གཉིས་ཏེ། །མ་འདས་བར་ལ་རྩ་བ་དྲུག །དེ་ཡི་སློབ་མས་བསྙེན་པ་ན། །བསྐལ་པ་དྲུག་ཅུ་རྩ་བརྒྱད་དུ། །རི་རབ་ཆེན་པོའི་འོག་ཏུ་སྐྱེ། །ཅི་ཕྱིར་ཞེ་ན་རྒྱལ་པོ་ཡི། །རྒྱལ་སྲིད་འབངས་ཀྱིས་ཕྲོགས་པ་ལྟར། །བླ་མའི་ཡོན་ཏན་སློབ་བུས་བསྣུབས། །དེ་ཡི་ཕྱི་མ་དམྱལ་བ་ལས། །འགྲོ་ས་མེད་པར་ང་ཡིས་བཤད། །དཔག་ཚད་བཅུ་གཉིས་ཕར་ཚད་དུ། །སློབ་དཔོན་དེ་ཡིས་མ་ཁྱབ་ན། །རྒྱལ་ཚབ་བསྐོས་ལ་གནང་བ་བྱིན། །དེ་ཡང་ལོ་ཡི་དུས་
སུ་མཇལ། །མཉེས་པའི་ལོངས་སྤྱོད་དད་པས་འབུལ། །ཞེས་དང༌། རྒྱུད་དོན་མདོར་བསྡུས་ལས་ཀྱང༌། རང་ཉིད་ཡོན་ཏན་བསམ་ཡས་ཀྱང། །བླ་མས་རྗེས་སུ་མ་གནང་ན། །ཁ་རོག་འདུག་ལ་མཁས་པ་དང༌། །གྲུབ་པའི་སྤྱོད་པ་ཐམས་ཅད་སྤངས། །ལོངས་སྤྱོད་ལྡན་ཞིང་ཕུན་ཚོགས་ཀྱང༌། །ལྟོ་གོས་སྤོང་ཞིང་སྡུག་སྲན་གྱིས། །དམའ་ས་བཟུང་ལ་སྒེག་ཆོས་སྤོང༌། །གསུང་ཡང་དེ་ཉིད་དོན་བཞིན་བསྒྲུབ། །ཅེས་གསུངས་སོ། ། གལ་ཏེ་བླ་མས་བཀའ་གནང་ན། འཇིག་རྟེན་གྱི་སྣང་ངོར་མི་རིག་པ་ལྟར་སྣང་བའི་ངན་སྤྱོད་མི་རུང་བ་ཡང་བསྒྲུབ་དགོས་ཏེ། རང་བྱུང་གི་རྒྱུད་ལས། ཁྱོད་ཀྱིས་བརྐུས་ཕྲོགས་དམག་ཁྱེར་དང༌། །བརྡུང་བཙོག་གཞན་བརྙས་སྨྱོན་བཅོས་དང༌། །ཁྲེལ་མེད་ངོ་ཚ་མེད་པའི་ལས། །བྱ་རུ་མི་རུང་སྣ་ཚོགས་པ། །གྱིས་ཞེས་བཀའ་སྩལ་ལུང་བཞིན་བསྒྲུབ། །ལས་ཀ་ཚོང་ཁེ་བག་མ་ལེན། །ཕྲག་དོག་འཐབ་འཛིང་ཞིང་གཞིས་དང༌། །བེའུ་ལུག་སྤེལ་ཞེས་བཀའ་སྩལ་ཡང༌། །ཐེ་ཚོམ་མེད་པར་གསུང་བཞིན་བསྒྲུབ། །ཅེས་སོ། །གང་ཟག་ཐོས་པ་ཉུང་ཞིང་རྟོག་པ་ཅན་ཁ་གཅིག་དེ་ལྟར་སློབ་ན་བཤེས་གཉེན་ཚུལ་ལྡན་དུ་མི་འགྱུར་རམ་སྙམ་ན་མ་ཡིན་ཏེ། བླ་མའི་མཚན་ཉིད་ཀྱང་རྒྱུད་སྡེ་ནས་གསུངས་པ་ལྟར་བཙལ་བ་ལས་འདོད་ཁ་
དང་ཉོན་མོངས་གང་ཆེ་སྙན་པ་ཙམ་གྱི་རྗེས་སུ་ཕྱོགས་ནས་འཚོལ་མ་ཉེས་པ་དགོས་ཏེ། བཀའ་བརྒྱད་ཡོངས་འདུས་ལས། ཕྱི་མར་གྱུར་པའི་དུས་ཀྱི་ཚེ། །བསོད་ནམས་དམན་པའི་སེམས་ཅན་གྱིས། །དམ་པ་རྙེད་པར་མི་འགྱུར་ཞིང༌། །ཚུལ་མིན་སློབ་དཔོན་ནག་པོའི་བདུད།།འབྱུང་བར་འགྱུར་གྱི་དེ་བས་ན། །ནོར་བ་སྤང་བ་ཉིད་དུ་བྱ། །ཞེས་གསུངས་ལ། དེ་ལྟར་མིན་ཕྱིན་ཆད་མཚན་ཉིད་ཚང་བའི་བླ་མེད་ཉིད་ཆ་ལུགས་དང་ལྟར་སྣང་ཇི་ལྟར་སྣང་ཡང་སྐྱེས་བུ་དམ་པ་ཡིན་པར་ངེས་ལ། དེས་ལོག་པའི་སྤྱོད་པ་མི་སློབ་ཅིང་གལ་ཏེ་སློབ་ན་རང་རྒྱུད་གདུལ་བའི་ཕྱིར་ངེས་པར་དགོངས་པ་ཅན་གྱིས་སློབ་པའི་ཕྱིར། པཎ་ཆེན་ནཱ་རོ་པས་ཏེ་ལོའི་ཞབས་པད་བརྟེན་པ་བཞིན་ཐེ་ཚོམ་མེད་པར་བྱ་དགོས་པ་ཉིད་དོ། །དེའི་ཕྱིར་རིག་པ་ལྟར་རྗེས་སུ་གནང་བ་ནི་ཤིན་ཏུའང་བསྒྲུབ་དགོས་ཏེ། རྒྱུད་དེ་ཉིད་ལས། བླ་མའི་ཞབས་ཏོག་ཆོས་བཤད་དང༌། །སྡོམ་པ་འབོག་ཅིང་སྡེ་དགོན་བཟུང༌། །འཁོར་དང་སློབ་མ་ཚོགས་སུ་བསྡུས། །འགྲོ་ཕན་སྐྱིད་སྡུག་རོ་མཉམ་གྱིས། །རི་ཁྲོད་བསྟན་པ་སྐྱོང་སྤེལ་གྱིས། །ནའམ་ཤི་ཡང་བྱ་བ་ལ། །ཐང་ལྷོད་མེད་པར་གྱིས་གསུངས་ཡང༌། །ཇི་ལྟར་བཀའ་སྩལ་དེ་བཞིན་བསྒྲུབ། །ཅེས་
གསུངས་པའི་ཕྱིར་རོ། །དེ་བཞིན་གཤེགས་བཞུགས་གང་གི་ཐད་དུ་བསྙེན་བཀུར་བྱ་ཚུལ་ཡང་རྒྱུད་ལས། གཤེགས་ན་འདས་པའི་མཆོད་པ་འབུལ། །བཞུགས་ན་མཉེས་པའི་མཆོད་པ་བྱ། །གཤེགས་ནས་འདས་མཆོད་མི་འབུལ་ན། །རྩ་བའི་ཉམས་པ་ཆེན་པོ་སྟེ། །ངན་སོང་གནས་ནས་ཐར་མི་སྲིད། །དེ་དག་ཉམས་ན་བླ་མའི་སྐུ། །བརྒྱ་རྩ་བཞེངས་ལ་མཆོད་པ་གསུམ། །རྒྱུན་མི་ཆད་པ་ཟླ་དྲུག་འབུལ། །སྐུ་ཡི་མཆོད་པ་ཕྱག་འཚལ་འབུམ། །གསུང་གི་མཆོད་པ་བཤགས་པ་སྟོང༌། །ཐུགས་ཀྱི་མཆོད་པ་མར་མེ་བརྒྱ། །དང་པོར་ཟླ་བ་དྲུག་ཏུ་འབུལ། །ཕྱིན་ཆད་དུས་ཀྱི་མཆོད་པ་བཟུང༌། །ཞེས་དང༌། བླ་མའི་ཡུམ་དང་སྲས་པོ་དང༌། །མཆེད་ལྕམ་ལ་ཡང་རིམ་པ་ལྟར། །མཉམ་དང་འདྲ་དང་སུམ་ཆ་ཡིས། །བཀུར་སྟི་རིམ་གྲོ་བརྩོན་པར་གྱིས། །ཉམས་ན་བཤགས་པ་བརྒྱ་རྩ་འབུལ། །ཞེས་སོ། །དེ་ལྟར་གནང་བཀག་གི་རིམ་པ་ལ་བསོད་ནམས་ཀྱི་འཕེན་པས་བློ་ལས་སུ་རུང་བའི་བསམ་སྦྱོར་གཉིས་ཀྱིས་ཤིན་ཏུ་རིག་པར་དཔྱད་པས་ལམ་ལྔའི་ཡོན་ཏན་ལག་པའི་མཐིལ་དུ་ཟིན་ནས། གནས་སྐབས་སུ་མངོན་མཐོའི་དཔལ་ལ་སྤྱོད་ཅིང་མཐར་ཐུག་ངེས་ལེགས་ཀྱི་ས་ལ་ཐོགས་པ་མེད་པར་ཕྱིན་པར་འགྱུར་ཏེ། དེའང་
འདི་ལྟར་བླ་མ་དམ་པ་ལ་བསོད་ནམས་ཀྱི་ཚོགས་ཆེན་པོས་བསྙེན་བཀུར་ཡོངས་སུ་རྫོགས་བཞིན་པས་དྲུང་ན་གནས་ཤིང་དེའི་ཚེ་ཐོས་བསམ་གྱི་ཚོགས་རྒྱ་ཆེན་སྤྱད་པས་ཚོགས་ལམ། ཇི་ལྟར་བསྟན་པའི་གསུང་གི་བདུད་རྩིའི་རོ་མྱོང་བས་རྣམ་པར་མི་རྟོག་པའི་ཡེ་ཤེས་ལ་བཙན་ཐབས་སུ་སྦྱོར་བས་སྦྱོར་ལམ། ཆོས་ཉིད་ཀྱི་རང་བཞིན་ཅི་ཡང་མ་ཡིན་པ་དཔེ་གང་གིས་ཀྱང་མཐོང་བར་དཀའ་བའི་ངེས་པའི་བདེན་པ་ཆེན་པོ་བརྡ་ཐབས་རྣམ་པ་བཞི་ལ་སོགས་པས་མངོན་སུམ་པར་སྟོན་པས་མཐོང་ལམ། དེའི་རང་བཞིན་སྒོམ་པ་དང་མི་སྒོམ་པ་ལ་སོགས་ཏེ་མཐའ་གཉིས་ཀྱི་ཕྱོགས་སུ་ལྷུང་བའི་གེགས་དང་གོལ་ས་ཚར་བཅད་དེ་འདུ་འབྲལ་མེད་པའི་སྒོམ་པ་ཁྱབ་གདལ་རང་བྱུང་དུ་ཤེས་པས་སྒོམ་ལམ། གདེང་ཆེན་བཞིས་དགོངས་པ་ཚད་དུ་སྐྱེལ་བས་བསླབ་བྱ་མཐར་ཐུག་སྟེ་སྒོམ་དུ་མེད་པའི་རང་ས་ཟིན་པ་མི་སློབ་པའི་ལམ་སྟེ་རྒྱུད་ལས། བླ་མ་བསྙེན་བཀུར་ཡོངས་རྫོགས་ནས། །དམ་པའི་དྲུང་ན་གནས་པ་ནི། །ཚོགས་ཀྱི་ལམ་ཞེས་དེ་ལ་བྱ། །བླ་མ་དམ་པས་དོན་བཤད་ཅིང༌། །གདམས་ངག་གཉིས་ཀྱང་རྒྱུད་ལ་སྦྱོར། །སྦྱོར་བའི་ལམ་དུ་ང་ཡིས་བསྟན། །ངོ་སྤྲོད་རྣམ་པ་བཞིའི་སྒོ་ནས། །ཚེ་འདིར་ངེས་པའི་བདེན་པ་མཐོང༌། །མཐོང་བའི་ལམ་དུང་ང་
ཡིས་བཤད། །སྒོམ་དུ་མེད་པའི་སྒོམ་པ་དང༌། །སྒོམ་དུ་ཡོད་པ་མེད་པ་གཉིས། །འདུ་འབྲལ་མེད་པར་གནས་པ་ནི། །སྒོམ་པའི་ལམ་དུ་ང་ཡིས་བསྟན། །སངས་རྒྱས་དགོས་པ་གདེང་ཆེན་བཞི། །མི་གནས་ཚུལ་གྱིས་མཐར་ཕྱིན་པས། །མཐར་ཕྱིན་ལམ་དུ་ང་ཡིས་བཤད། །ཅེས་གསུངས་སོ། །དེའི་ཕྱིར་ན་རྣམ་པ་ཐམས་ཅད་མཁྱེན་པའི་གོ་འཕང་ཉིད་བླ་མ་དམ་པ་ཁོ་ན་ལས་བྱུང་བ་ཡིན་ཕྱིར། བྱང་ཆུབ་སེམས་དཔའ་རྟག་ཏུ་ངུས་འཕགས་པ་ཆོས་འཕགས་བསྟེན་པ་དང༌། སློབ་དཔོན་ཆེན་པོ་ཀླུ་སྒྲུབ་གྱིས་བྲམ་ཟེ་ཆེན་པོ་ས་ར་ཧ་ལ་མོས་གུས་ཆེན་པོ་བྱས་པས་ཐུན་གཅིག་གིས་གྲོལ་བ་དང༌། ཨ་ཏི་ཤས་བླ་མ་གསེར་གླིང་པ་ལ་བྱང་སེམས་ཞུ་བའི་ཕྱིར་རྒྱ་མཚོ་ཆེན་པོར་དཀའ་བ་དཔག་མེད་སྤྱད་པ་དང༌། ནཱ་རོས་ཏེ་ལོ། རྗེ་བཙུན་བཞད་པ་རྡོ་རྗེས་མར་པ་བསྟེན་པ་ལ། དཀའ་བ་ཇི་ལྟར་སྤྱད་པ་ལྟར་ཅི་གསུང་དང་དུ་བླང༌། ཅི་ཡོད་བླ་མར་འབུལ། གང་ཤར་མོས་གུས་སུ་འཁྱེར་ཤེས་པ་ཞིག་བློ་དང་ལྡན་པས་བླ་མ་འདི་གདམས་པའི་གནད་ལ་མཁས། ཉམས་མྱོང་དྲོད་ཐོབ། བྱིན་རླབས་དང་ནུས་པ་ཆེ། རྟོགས་པ་ཡང་མཆོག་ཏུ་མཐོ། ད་ལྟའི་དུས་སྐབས་ན་ཀུན་ཏུ་བཟང་པོ་འདི་ཁ་ཡིན་པས་རང་རེ་སྐལ་པ་
བཟང༌། ད་ནི་གཡག་འདྲོགས་མི་བྱ་བར་གུས་པ་ཆེན་པོས་བསྟེན་ཏེ་གདམས་ངག་ཟབ་མོ་ཅི་ནས་ཐོབ་པར་བྱས་ནས་བླ་མ་དང་དགོངས་པ་མཉམ་པ་ཞིག་མི་བྱེད་རེ་སྙམ་དུ་ཡང་ཡང་བསམ་མོ། །དེ་ལྟར་རྒྱུད་ལ་སྐྱེས་ཙ་ན་བླ་མའི་བྱིན་རླབས་ཞུགས་ནས་དང་པོར་འཁོར་བ་ལ་བློ་ལྡོག །གཉིས་པ་ཡེ་ཤེས་ཀྱི་མཐོངས་ཕྱེད། གསུམ་པར་ལྷན་ཅིག་སྐྱེས་པའི་རྟོག་པ་ཤར་ནས། ཐ་སྙད་ཤེས་བྱའི་ཆོས་ཐམས་ཅད་སྒྲོག་རང་གྲོལ་ལ་སོང་སྟེ། དོན་དམ་ཡེ་ཤེས་ཀྱི་རིག་པའི་སྒྲོ་འདོགས་ནང་ནས་ཆོད་པ་ཞིག་ཡོད་པ་ཡིན་ལ། དེ་ལྟར་བཤད་མ་ཐག་པ་དེ་དག་གི་བསྟེན་ཚུལ་ནི་གཙོ་བོར་ལས་དང་པོ་པའི་སྤྱོད་པ་ཁོ་ན་ཡིན་ལ། དངོས་གཞིའི་དུས་སུ་མཉེས་པ་རྣམ་པ་གསུམ་ལས་སྒྲུབ་པའི་མཆོད་པ་ཁོ་ནས་མཉེས་པར་བྱ་དགོས་ཏེ་བཀའ་བརྒྱད་ཡོངས་འདུས་ལས། ད་ལྟར་བླ་མ་དེ་མཉེས་པའི། །ཐབས་ཀྱི་བྱེ་བྲག་ཁྱད་པར་ཅན། །བྱང་ཆུབ་སྒྲུབ་པ་ལྷུར་ལེན་པ། །ཇི་ལྟར་བཀའ་སྩལ་བསྒྲུབ་པའི་ཕྱིར། །ཟླ་གཅིག་དྲུག་དང་བཅུ་གཉིས་དང༌།།དེ་བཞིན་ལོ་གཅིག་དྲུག་དང་ནི། །བཅུ་གཉིས་བསྒྲུབ་པའི་ཞེ་དམ་འབུལ། །དེ་བཞིན་བླ་མའི་ཞབས་ཏོག་དང༌། །སེམས་ཅན་དོན་དུ་གང་འགྱུར་བའི། །ལུང་དང་མཐུན་པའི་འགྲོ་དོན་དང༌། །
སངས་རྒྱས་བསྟན་པ་རྣམ་པ་གསུམ། །སྐྱོང་དང་བྱི་དོར་གྱིས་ཤིག་ཅེས། །བཀའ་སྩལ་དེ་ལ་བཀའ་བཞིན་དུ། །མི་སྒྲུབ་སྙམ་པའི་བློ་སྤངས་ལ། །འདོགས་པ་མེད་པར་བསྒྲུབ་བྱས་ན། །ཅི་བསམ་དོན་ལ་ཐོག་མེད་འགྲུབ། །ཅེས་གསུངས་པའི་ཕྱིར་རོ། །དེས་ན་ཇི་ལྟར་ཐོབ་པའི་ཆོས་རྣམས་ཀྱང་ཐོས་པས་ཁོག་དབུབ། བསམ་པས་དམར་ཐག་བཅད། སྒོམ་པས་རྒྱུད་ལ་བཀལ་ཏེ། ཤེས་རབ་རྣམ་པ་གསུམ་གྱིས་གཏན་ལ་ཕབ་ནས་གྲུབ་པའི་དབང་ཕྱུག་གི་སར་ཕྱིན་པར་བྱ་དགོས་ལ། དེ་ལྟར་ནའང་རེ་ཞིག་ལས་དང་པོ་པ་རྣམས་ཀྱིས་དངོས་སུ་བསྒྲུབ་མི་ནུས་པས་སྨོན་པའི་ཡུལ་དུ་བྱ་ཞིང༌། ཇི་ལྟར་སྒྲུབ་ནུས་པ་དག་ཡུལ་དུས་གནས་སྐབས་དང་བསྟུན་ནས་ལག་ཏུ་བླངས། ཚུལ་འདི་ནི་སྡོང་པོ་བཀོད་པའི་མདོ་དང༌། ལག་ན་རྡོ་རྗེ་མངོན་པར་དབང་བསྐུར་བའི་རྒྱུད། དམ་ཚིག་ས་མ་ཡ་འབུམ་སྡེ་བཀོད་པ་སོགས་སྔ་འགྱུར་གྱི་རྒྱུད་སྡེ་རྒྱ་མཚོ་ལྟ་བུ། གཞན་ཡང་ཁ་འཐོར་མན་ངག་ཇི་སྙིད་ལས་གསུངས་པ་ལྟར་བླང་བྱ་དོར་ན་ཉེས་དམིགས་ཐམས་ཅད་ཀྱི་རྩ་བ་དང༌། བསྒྲུབ་བྱ་བླངས་ན་ལེགས་ཚོགས་ཐམས་ཅད་ཀྱི་འབྱུང་གནས་ཡིན་པས་ལམ་གྱི་རྩ་བ་ཡིན་པར་བཟུང་ངོ༌། །སེམས་སྦྱོང་ལྔ་པ་ནི། བུ་ཡིག་ལས། གདམས་པ་རྙེད་ནས་མ་བསྒོམས་ན་སངས་མི་རྒྱ་བར་ངེས་ནས།
རྩེ་གཅིག་ཏུ་ལེ་ལོ་སྤངས་ནས་བསྒོམ་པ་དང༌། ཞེས་པས། དེ་ལྟར་དགེ་བའི་བཤེས་གཉེན་མིག་བཞིན་དུ་བསྟེན་ནས་ཟབ་པ་དང་རྒྱ་ཆེ་བའི་གདམས་པ་ཇི་སྙེད་ཅིག་ཡོད་ནའང་དེ་ཉིད་རྣམ་གཡེང་སྤངས་ནས་རྩེ་གཅིག་ཏུ་མ་བསྒོམས་ན་ཞུས་བློ་དང་ཐོས་བློ་ཙམ་གྱིས་རྣམ་ཀུན་མཆོག་ལྡན་གྱི་དོན་ལ་རེག་པར་མི་འགྱུར་ཏེ། ཕལ་པོ་ཆེ་ལས། ཇི་ལྟར་མཉན་པ་མཁས་པ་ཞིག །སྐྱེ་བོ་མང་པོ་སྒྲོལ་བྱེད་ཀྱང༌། །རང་ཉིད་དེ་ན་འཆི་བ་ལྟར། །མ་བསྒོམས་ཆོས་ཀྱང་དེ་དང་འདྲ། །ཞེས་སོགས་དང༌། སློབ་དཔོན་འཕགས་པ་ལྷས། བསྐལ་པ་བྱེ་བ་དུ་མ་རུ། །ཐོས་པའི་ཕ་རོལ་སོན་གྱུར་པ། །བདག་བྱིན་རླབས་ལ་ཕྱིར་བལྟས་པས། །དེ་ཡིས་དེ་ཉིད་རྟོགས་མི་འགྱུར། །ཞེས་གསུངས་ལ། འདི་ལྟར་ཐུབ་པའི་ཞམ་རིང་ཀུན་དགའ་བོས་ཀྱང་ཤཱཀྱ་ཐུབ་པའི་ཞབས་པད་བསྙེན་ཅིང་ཐོས་པ་རྒྱ་མཚོ་ལྟ་བུའི་ཕ་རོལ་ཏུ་སོན་ཀྱང་བཀའ་བསྡུད་དང་པོ་ལ་ཐུག་གི་བར་རྒྱུན་ཞུགས་ཁོ་ན་ལས་དགྲ་བཅོམ་པའི་གོ་འཕང་མ་ཐོབ། འཕགས་པ་འདི་ཉིད་ངེས་པའི་དོན་དུ་རྡོ་རྗེ་འཛིན་པའི་སྤྲུལ་པར་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས་གསུངས་ན། རང་ཅག་བྱིས་པ་སོ་སོ་སྐྱེ་བོས་མ་བསྒོམས་པར་སངས་རྒྱ་བར་འདོད་པ་ཤིན་ཏུ་རྨོངས་པའི་རང་བཞིན་ཅན་ཏེ།
དེའི་ཕྱིར་རང་རྒྱུད་ལ་གདོད་ནས་གནས་པའི་ཡེ་ཤེས་ཟབ་མོ་སད་པར་བྱ་བའི་ཕྱིར་མཚན་ཉིད་དང་ལྡན་པའི་དགེ་བའི་བཤེས་གཉེན་དམ་པས་བརྡ་དོན་རྟགས་གསུམ་གྱི་ལམ་ཟབ་མོ་ནས་འཁྲིད་པའི་རྗེས་སུ་གཡེལ་བ་མེད་པར་སློབ་ཅིང༌། ལེ་ལོ་དང་སྙོམས་ལས་ཀྱི་དབང་དུ་སྐད་ཅིག་ཀྱང་གཏོང་རེ། ཟླ་དགའ་དང་ཟས་འཚོལ་གྱི་དབང་དུ་ཕྱི་བཤོལ་དུ་འཇོག་རེ། ཕྱི་ཚིག་དང་རེ་དོགས་ཀྱི་དབང་དུ་བཏང་སྙོམས་སུ་ལུས་རེ། སྙམ་པས་རྒྱུད་ལེགས་པར་བསྡམས་ཤིང་མ་གཅིག་བུ་གཅིག་གི་མ་བུ་སྟོར་བ་འཚོལ་བའི་འདུ་ཤེས་ལྟར་ཚེ་འདིའི་རྗེས་སུ་སྐད་ཅིག་ཀྱང་མི་འབྲེང་བར་ལེ་ལོ་རྡོག་པས་བརྫིས། ཕྱི་བཤོལ་ཁྱུར་མིད་བཏང༌། སྙོམས་ལས་ཟིལ་གྱིས་གནོན་ནས་རི་དྭགས་རྨས་མ་དང༌། བསེ་རུ་ལྟ་བུར་དབེན་པ་བརྟེན་ནས་ཇི་ལྟར་ཐོས་པའི་གདམས་པ་འདི་ཉིད་རྩེ་གཅིག་ཏུ་ཉམས་སུ་མི་ལེན་རེ་སྙམ་དུ་ཞེ་ཐག་པ་ནས་བསམ་མོ། །སེམས་སྦྱོང་དྲུག་པ་ནི། བུ་ཡུག་ལས། འཇིག་རྟེན་གྱི་ལོངས་སྤྱོད་ནི། དུག་གིས་བསྐྱེད་པའི་སྦྲང་རྩི་དང་འདྲ་སྟེ། ཇི་ཙམ་ལོངས་སྤྱོད་པ་ཙམ་གྱིས་སྡུག་བསྔལ་བསྐྱེད་པར་བསམ་པ་དང༌། ཞེས་པས། སྤྱོད་འཇུག་ལས། སྡུག་བསྔལ་འདོར་འདོད་བློ་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །
རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར། རང་རེ་རྣམས་བླང་དོར་ལ་ཤིན་ཏུ་རྨོངས་པས་འདོད་པ་བདེ་བ་འདོད་ཀྱང་སྒྲུབ་པ་སྡུག་བསྔལ་གྱི་རྒྱུ་འབའ་ཞིག་སྒྲུབ་པ་ནི། དཔེར་ན་བྱེ་མ་ལེབ་མར་མེའི་འོད་ལ་དགའ་ནས་དེར་ཕྱིན་ནས་གསོན་པོར་འཚིག་ནས་ཤི་བ་དང༌། བུང་བའི་སྦྲང་རྩིའི་བཅུད་ལ་ཆགས་ནས་མེ་ཏོག་འཇིབས་པས་དེར་འབྱར་བའམ། ཁ་ཟུམ་ནས་ཤི་བ་དང༌། རི་དྭགས་གླིང་བུའི་སྒྲ་ལ་ཉན་པས་བསད་པ་དང༌། ཉ་རྣམས་རྔོན་པའི་ལྕགས་ཀྱུའི་རྩེའི་ཟས་ཀྱི་རོ་ལ་ཞེས་པས་བྱེ་ཚན་ལ་འཆི་བ་དང༌། གླང་པོ་ཆེ་བསིལ་བའི་རེག་བྱ་འདོད་ནས་མཚོར་ཞུགས་ནས་ཤི་བ་ལྟ་བུ་སྟེ། དོ་ཧ་མཛོད་ལས། ཉ་དང་བྱེ་ལེབ་གླིང་ཆེན་བུང་བ་དང༌། །འདི་ནི་རི་དྭགས་བཞིན་དུ་ལྟ་བར་བྱོས། །ཞེས་གསུངས་པ་ལ། དེའི་ཕྱིར་ན་རང་ཅག་རྣམས་ཀྱི་སེམས་རྒྱུད་ལའང་ལྐོག་གྱུར་བག་ལ་ཉལ་གྱི་ཉོན་མོངས་པ་དཔེར་ན་ཆུ་ནང་དུ་ལན་ཚྭ་ཞུ་བ་བཞིན་མཆིས་པ་དེ་ཉིད། ནད་རོ་ཅན་གྱི་མི་ད་ལྟ་ཐར་པ་ལྟར་སྣང་ཡང་ནད་སློང་བྱེད་ཀྱི་ཟས་སྤྱོད་ཕྲན་བུ་དང་འཕྲད་ཚེ་ནད་དེ་མངོན་གྱུར་དུ་ལྡང་བ་བཞིན་འདོད་པའི་ཡུལ་ལྔ་ལ་ཆགས་ཤིང་ཞེས་པས་མཚམས་སྦྱོར་ཏེ། ངན་སོང་གསུམ་གྱི་རྒྱུ་མི་དགེ་བ་ཁོ་ན་འབད་པས་བསྒྲུབས་པས་དེའི་འབྲས་བུ་མི་འདོད་
བཞིན་དུ་སྡུག་བསྔལ་ཁོ་ན་མྱོང་བ་ལས་འོས་མ་མཆིས། ད་སྡུག་བསྔལ་དེ་སྤོང་བ་ལ་དེའི་རྒྱུའམ། འབྱུང་བའི་ཁུངས་སྡིག་པ་དེ་ངེས་པར་སྤོང་དགོས། དེ་ཡང་དཔེར་ན་ན་ཚ་ཟུག་རྔུ་ཡིན་ཞེས་སྨན་བཏང་བ་གཅིག་པུས་མི་ཆོག །ནད་དེའི་རྒྱུ་རྐྱེན་ངོ་བོ་ཚ་གྲང་སོགས་བཅར་ཕོག་ཏུ་ངོས་ཟིན་པར་བྱས་ལ་དེའི་གཉེན་པོའི་སྨན་གཏོང་བ་བཞིན་སྡིག་པའི་ཕྱི་མོ་མི་དགེ་བ་ངོ་ཤེས་དགོས། དེ་ཡང་མཛོད་ལས། དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་པ་ལྟར་བསྡུ་ན་མི་དགེ་བཅུར་འདུ་བས། དེ་ལ་ལུས་ཀྱི་གསུམ། སྲོག་གཅོད། མ་བྱིན་ལེན། ལོག་གཡེམ། ངག་གི་རྣམ་པ་བཞི། རྫུན། ཕྲ་མ། ཚིག་རྩུབ། ངག་བཀྱལ། ཡིད་ཀྱི་གསུམ། བརྣབ་སེམས། གནོད་སེམས། ལོག་ལྟ་རྣམས་ལས། སྤྱིར་སེམས་ཅན་གྱི་རིགས་གང་སད་ཀྱང་སྲོག་གཅོད་ཀྱི་མི་དགེ་བ་ཡིན་པ་སྨོས་མ་དགོས། ནང་གསེས་ཀྱི་དབྱེ་ན། བསམ་པས་བསད་པ། སྦྱོར་བས་བསད་པ། མཐར་ཐུག་ཚང་བ་སྟེ། གསུམ་ཀ་རྫོགས་ན་སྲོག་གཅོད་ཀྱི་མི་དགེ་བ་མཐའ་དག་ཚང་བས་རྣམ་སྨིན་ཤིན་ཏུ་ལྕི་ལ། བསམ་པས་བསད་པ་ནི་གསོད་སེམས་སྐྱེས་ཚད་དོ། །སྦྱོར་བས་བསད་པ་ནི་འདུ་ཤེས་འཁྲུལ་པ་དང༌། གསོད་སེམས་མེད་པར་
རྐང་འོག་ཏུ་ཤི་བ་སོགས་ཡིན་ཕྱིར། ད་ལྟར་རང་རེས་སེམས་ཅན་བསད་པའི་གྲངས་མི་ཆོད། དེ་དག་ལ་ཡང་མི་དགེ་བའི་འབྲས་བུ་གཅིག་མྱོང་བས་མི་ཆོག །རྣམ་སྨིན་གྱི་འབྲས་བུ་མཚམས་མེད་ལྔའི་ཆར་གཏོགས་པ་ཕ་མ་དང་སློབ་དཔོན་དགྲ་བཅོམ་པ་ལ་སོགས་གསོད་པས་མཚོན་ཏེ་ལྕི་ཡང་གིས་ཁྱད་པར་ཕྱེ་བས། དམྱལ་བ་ལ་སོགས་ངན་སོང་གསུམ། རྒྱུ་མཐུན་གྱི་འབྲས་བུར་རེ་ཞིག་བདེ་འགྲོ་ཐོབ་ཀྱང་ཚེ་ཐུང༌། བདག་པོའི་འབྲས་བུར་བཟའ་བཏུང་དང་སྨན་ཟོས་ཀྱང་ནུས་པ་མི་འབྱུང༌། མ་བྱིན་ལེན་ནི། གཞི་རང་ཉིད་མི་དབང་ཞིང་གཞན་གྱིས་བདག་ཏུ་བཟུང་བའི་དངོས་པོ་གསེར་ལ་སོགས་རིན་ཐང་ཅན། མཐུས་ལེན་པ་དབང་ཤེད་ཀྱིས་འཕྲོག་པའམ་ཆད་པས་ལེན་པ། གཡོ་སྒྱུས་ལེན་པ་ཚོང་དང་འབུན་བསྐྱེད་བྲེ་ལོག་སྲང་ལོག་བྱེད་པ། འཇབ་བུས་ལེན་པ་བརྐུ་བའམ། ངེད་ལ་དངོས་པོ་འདི་ལྟ་བུ་ཞིག་དགོས་གནད་ཆེ་ཡང་མ་བྱུང་ཟེར་བ་ལྟ་བུའི་གཡོ་ཐབས་སོགས་ཐབས་སྣ་ཚོགས་ཀྱིས་བླངས་ཤིང་མཐར་ཐུག་ཐོབ་བློ་སྐྱེས་པ་སྟེ། དེའི་རྣམ་སྨིན་གྱི་འབྲས་བུ་སྔ་མ་དང་མཚུངས། རྒྱུ་མཐུན་གྱི་འབྲས་བུར་ལོངས་སྤྱོད་དབུལ། བདག་པོའི་འབྲས་བུར་ལོ་འབྲས་ཉུང་ངུར་འགྱུར། ལོག་གཡེམ་ནི། སྡོམ་ལྡན་ནམ། གཞན་
གྱིས་བདག་ཏུ་བཟུང་བའི་བུད་མེད་ལ་སྤྱོད་པ་དང༌། གཞན་ཡང་རང་གི་ཉེ་དུ་དང༌། དེ་ཡང་དེང་སང་གི་ཉེ་དུས་མཚམས་ཕྱེད་པ་དཀའ་བས་འདུལ་བ་ལས་ཕྱི་མོ་དང༌། མེས་པོ་དང༌། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །ཞེས་གསུངས་པས་མི་རབ་བདུན་བརྒྱུད་ཚུན་ཆད་དུ་སྤང་བྱ་ཡིན་ལ། གཞན་ཡང་རང་གི་ཆུང་མ་སོགས་བགྲོད་ཡུལ་ཡིན་ཡང་རྟེན་གྱི་དྲུང་དང༌། ཁ་དང་བཤང་ལམ་སོགས་བགྲོད་བྱ་མ་ཡིན་པ་དང༌། སྦྲུམ་མ་དང་བསྙེན་གནས་པ་ལྟ་བུའི་ཚེ་དེར་འདུ་ཤེས་ཏེ་ཉོན་མོངས་ཀྱི་སྒོ་ནས་མི་ཚང་པར་སྤྱོད་འདོད་ཀྱི་སྦྱོར་བ་དེའི་དོན་ལ་བརྩོན་པས། མཐར་ཐུག་དབང་པོ་གཉིས་སྦྱོར་ཚང་བ་སྟེ། དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུན་མཐུན་གྱི་འབྲས་བུར་རང་གི་ཆུང་མ་བསྲུང་དུ་མི་བཏུབ། བདག་པོའི་འབྲས་བུར་འདམ་རྫབ་དང་ཡང་བའི་གནས་སུ་སྐྱེ། རྫུན་དུ་སྨྲ་བ་ནི། ཡོན་ཏན་མེད་པར་ཡོད་ཚུལ། གྲུབ་པ་མ་ཐོབ་པར་ཐོབ་ཚུལ། ཆོས་མི་ཤེས་པར་ཤེས་ཚུལ་སོགས་ལྷག་མའི་རྫུན་དང་ཕམ་པའི་རྫུན། ལྷ་མ་མཐོང་བར་མཐོང༌། ས་མ་ཐོབ་པར་ཐོབ། མངོན་ཤེས་མེད་པ་ལ་ཡོད་ཅེས་སྨྲ་བ་མི་ཆོས་བླ་མའི་རྫུན་ལྟ་བུས་མཚོན་ཏེ་ཉོན་མོངས་པ་གང་རུང་གི་སྒོ་ནས་ཀུན་སློང་གི་གཏམ་སྨྲ་བར་འདོད་དེ་སྦྱོར་བ་
ལུས་ངག་གང་ཡང་རུང་བས་རྣམ་འགྱུར་བསྟན་པས་མཐར་ཐུག་ཕ་རོལ་པོས་དོན་གོ་བ་སྟེ། དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་མི་ཁ་སྡང༌། བདག་པོའི་འབྲས་བུར་བསླུ་བྲིད་དང་འཇིགས་པ་ཆེ་བའི་ཡུལ་དུ་སྐྱེའོ། །ཕྲ་མ་ནི་མདོ་ལས། ཁྱུ་མཆོག་དང་མ་ཧེ་མཛའ་བཤེས་སུ་གྱུར་པ་ཝ་སྐྱེས་ཀྱིས་དབྱེན་བྱས་ཏེ་མི་མཛའ་བར་བྱས་པ་བཤད་པ་ལྟར་ཕན་ཚུན་སྙིང་ཉེ་ཞིང་ཡིད་གཅུགས་པའམ། མིན་ནའང་བཏང་སྙོམས་ལྟ་བུའི་འདུ་ཤེས་ལ་གནས་པ་དག་ཉོན་མོངས་གང་རུང་གི་ཀུན་སློང་དམ་པོས་དབྱེ་བར་འདོད་ནས། སྦྱོར་བ་འབྱེད་ནུས་ཀྱི་ཚིག་སྨྲས་པ་དང༌། གཞོགས་ཕྲའམ། ལྐོག་གྱུར་གྱི་ཕྲ་མའི་རིགས་རྫས་སྔགས་ལ་བརྟེན་པའི་ཉེ་འབྱེད་ལྟ་བུས་དབྱེ་སྟེ་མཐར་ཐུག་ཕ་རོལ་པོས་དེའི་དོན་གོ་བའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་མཛའ་བཤེས་ཉུང༌། བདག་པོའི་འབྲས་བུར་ཕྱོགས་མི་སྙོམས་ཤིང་བགྲོད་དཀའོ། །ཚིག་རྩུབ་ནི། དཔེར་ན་སྐྱེ་བོ་བྱད་མི་མཛེས་པའམ། མིའུ་ཐུང་ལྟ་བུ་དེར་འདུ་ཤེས་ཤིང་ཉོན་མོངས་གསུམ་གང་རུང་གི་སྒོ་ནས་དེའི་སྐྱོན་མངོན་གྱུར་དུ་སྒྲོག་པར་འདོད་པའི་ངག་རྩུབ་མོའི་སྦྱོར་བས། ཕ་རོལ་པོའི་སྙིང་ལ་མདའ་གཟིར་བ་ལྟ་བུའི་མི་སྙན་པ་བརྗོད་པས་མཐར་ཐུག་དེའི་དོན་གོ་བ་སྟེ།
དེའི་རྣམ་སྨིན་གྱི་འབྲས་བུར་སྔ་མ་དང་མཚུངས། རྒྱུ་མཐུན་གྱི་འབྲས་བུར་མི་སྙན་པ་མང་དུ་ཐོས། བདག་པོའི་འབྲས་བུར་སྡོང་དུམ་དང་ཚེར་མ་སོགས་ཡིད་དུ་མི་འོང་བའི་གནས་སུ་ཆགས་དགོས་པའོ། །ངག་བཀྱལ་ནི། དེ་དག་གསུམ་གང་རུང་དུ་མི་གཏོགས་པའི་དོན་ཆུང་དང་ལྡན་པའི་དོན་ཙམ་ལ་དེར་འདུ་ཤེས་ཏེ་ཉོན་མོངས་གང་རུང་གི་སྒོ་ནས་ཀུན་སློང་མི་བཟད་པས་སྨྲ་བར་འདོད་དེ། སྦྱོར་བ་ཐ་མ་ཟེའི་ངན་སྔགས་འདོན་པའམ། གཅེར་བུ་པའི་བསྟན་བཅོས། དམག་དང་ཆོམ་རྐུན་ལ་སོགས་འདུ་འཛིའི་གཏམ་འབྲེལ་མེད་བྱུང་རྒྱལ་དུ་སྒྲོག་པ། ཆགས་སེམས་ཀྱིས་གླུ་ལེན་པ་དང༌། ཟློས་གར་གྱི་ཚིག་བརྗོད་ཅིང༌། དགེ་སྦྱོང་གང་ཞིག་རྙེད་པ་འཚོལ་བའི་ཕྱིར་གཞན་གྱི་དྲུང་དུ་ཁ་གསག་སྨྲ་བ་བརྩམས་ནས་མཐར་ཐུག་དོན་གོ་བར་བྱེད་པའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་ཚིག་མི་བཙུན། བདག་པོའི་འབྲས་བུ་ལྗོན་ཤིང་ལ་འབྲས་བུ་མི་ཆགས་པ་ཉིད་དུ་འགྱུར་རོ། །བརྣབ་སེམས་ནི། གཞན་གྱི་ནོར་ལ་དེར་འདུ་ཤེས་པས་ཆགས་སེམས་དང་འཁུ་སེམས་ཀྱི་རོ་མྱང་བ། རང་ནོར་ལ་གཅེས་འཛིན་དང་གསོག་སེམས། ཆོས་ལྔ་ལྡན་གྱི་ཉོན་མོངས་མི་བཟད་པས་ངོ་ཚ་དང་ཉེས་དམིགས་ཟིལ་གྱིས་གནོན་པའི་ཀུན་སློང་གིས་གཞན་ནོར་དེ་རང་ལ་བྱུང་ན་སྙམ་
པའི་རྔམ་སེམས་ངམ་ངམ་གྱི་སྦྱོར་བ་ཡིད་ཀྱིས་རྩོལ་ནས་མཐར་ཐུག་དེར་སྨོན་པའོ། །དེའི་རྣམ་སྨིན་གྱི་འབྲས་བུ་སྔ་མ་དང་མཚུངས། རྒྱུ་མཐུན་གྱི་འབྲས་བུར་ཡིད་ཀྱི་རེ་བ་མི་འགྲུབ། བདག་པོའི་འབྲས་བུར་ཕུན་ཚོགས་ཐམས་ཅད་རིམ་གྱིས་འགྲིབ་པར་འགྱུར་རོ། །གནོད་སེམས་ནི། གཞི་ཡིད་དུ་མི་འཐད་པའི་འགྲོ་བ་ལ་དེར་འདུ་ཤེས་ཤིང་གནོད་སེམས་ཀྱི་ངོ་བོ་ལ་རྟག་ཆོས་ཐེར་ཟུག་ཏུ་འཛིན་པ་ཞེ་སྡང་གི་སེམས། ཚུལ་མ་ཡིན་པ་ཡིད་ལ་བྱེད་པ་ཡང་ཡང་དྲན་པ་འཁོན་འཛིན་གྱི་སེམས། གནོད་བྱེད་ལ་ཤིན་ཏུ་མི་བཟོད་པ་ང་རྒྱལ་གྱི་སེམས། འདི་དག་བསད་ན་དང་བརྡེག་ན་ཅི་མ་རུང་སྙམ་པ་འཁུ་བའི་སེམས། ངོ་ཚ་དང་ཉེས་དམིགས་ཟིལ་གྱིས་གནོན་པའི་སེམས་ལྔ་ལྡན་གྱི་ཉོན་མོངས་གང་རུང་གིས་ཀུན་ནས་བླངས་ཏེ། བཟུང་འཁྱིག་དང་གསོད་པ་ལ་སོགས་པའི་སྦྱོར་བ་བྱེད་པར་རྩོལ་ཞིང་མཐར་ཐུག་དངོས་སུ་ནུས་ན་བྱེད་པ་ཐག་ཆོད་པའོ། །དེའི་རྣམ་སྨིན་གྱི་འབྲས་བུར་ངན་སོང་གསུམ། རྒྱུ་མཐུན་གྱི་འབྲས་བུར་འཇིགས་སྐྲག་ཆེ། བདག་པོའི་འབྲས་བུར་ནད་འཁྲུགས་དང༌། མི་དང་མི་མ་ཡིན་པའི་གནོད་འཚེ་མང་བ་ཡིན་ནོ། །ལོག་ལྟ་ནི། གཞི་ལས་རྒྱུ་འབྲས་ལྟ་བུའི་མི་བསླུ་བའི་ཆོས་ཅན་ལ་རྒྱང་འཕེན་པ་ལྟ་བུའི་འདོད་པས་དེ་མི་བདེན་པར་འདུ་ཤེས་ཤིང་ཉོན་མོངས་
གང་རུང་གིས་ཀུན་ནས་བླངས་ཏེ་སྐུར་པ་འདེབས་པར་འདོད་པས་སྦྱོར་བ་ནི་ཇི་ལྟར་བསམ་པ་ལྟར་མེད་པ་ཉིད་དུ་གོ་ཞིང་མཐར་ཐུག་ཐག་བཅད་པའོ། །དེའི་རྣམ་སྨིན་ངན་སོང་ཅི་རིགས་པ་དང༌། རྒྱུ་མཐུན་གྱི་འབྲས་བུར་ཡང་དག་པའི་ལྟ་བ་ལ་རྨོངས། བདག་པོའི་འབྲས་བུར་བཟང་ངན་གོ་ལྡོག་པར་འགྱུར་བ་ཉིད་དོ། །དེ་ལྟར་མི་དགེ་བའི་ལས་བཅུ་པོ་དེ་དག་ཀྱང་ནང་གསེས་ཀྱི་སྒོ་ནས་སྡིག་པ་ལྕི་ཡང་དབྱེ་ན། བསམ་པ་ཉོན་མོངས་པ་དྲག་པོས་ཀུན་ནས་བླངས་པ། ལྷ་ཆོས་སུ་གཉན་པ་བླ་མ་དང༌། མི་ཆོས་སུ་གཉན་པ་ཕ་མ་སྟེ། ཡུལ་ཁྱད་པར་ཅན་དེ་ལྟ་བུ་བསད་པ་དང༌། དེ་དག་བསླུས་ཤིང་དཀོར་ཕྲོགས་པ་དང་དབྱེ་བ། ཚིག་རྩུབ་བརྣབ་སེམས་གནོད་སེམས་བྱེད་པ། གཞན་ཡང་སྡོམ་པའི་ཚུལ་ཁྲིམས་ལ་གནས་པ་སོགས་བགྲོད་བྱ་མིན་པ་ལ་འདོད་པ་སྤྱོད་པ། ལྷས་བྱིན་ལྟར་དགེ་འདུན་འབྱེད་པའི་རྫུན་དང་ཕྲ་མ་བྱེད་པ། དགྲ་བཅོམ་པ་འབྱུང་བ་མེད་པར་འདོད་པ། དུད་འགྲོ་ལྟ་བུ་ལ་ཤ་ཁྲག་གི་རློམ་སེམས་ཀྱི་ལུས་བོངས་ཆེ་བ་གསོད་པ། དངོས་པོ་མང་ཞིང་རིན་ཐང་ཆེ་བ་བརྐུ་བ། སྡིག་པ་ལ་བཤགས་སྡོམ་མེད་པར་དགའ་བཞིན་དུ་བྱེད་པ་སོགས་ཤིན་ཏུ་ལྕི་ལ། དེའི་ལྡོག་ཕྱོགས་རྣམས་ནི་ཡང་བ་སྟེ། ཇི་ལྟར་ཡང་རྒྱལ་སྲས་པདྨས། མི་དགེ་བཅུ་དང་
མཚམས་མེད་རྣམ་པ་ལྔ། །ཉེ་བ་ལྔ་དང་ལྕི་བ་རྣམ་པ་བཞི། །ལོག་པའི་ལས་བརྒྱད་ཁ་ན་མ་ཐོའི་ལས། །སྲོག་ལ་བབ་ཀྱང་ཕྲ་མོའང་སྤང་བར་མཛོད། །དགེ་བ་བཅུ་དང་མཐུན་པར་འཇུག་པ་ཡི། །དགེ་བསྙེན་དགེ་ཚུལ་བསྙེན་གནས་དགེ་སློང་སོགས། །སོ་སོ་ཐར་དང་བྱང་སེམས་གསང་སྔགས་ཀྱི། །སྡོམ་པ་གང་བླངས་བླང་ཞིང་བསྲུང་བ་ལ། །ཐར་པ་འདོད་ཁྱོད་ནན་ཏན་སྲོག་ལྟར་སྲུངས། །ཞེས་གསུངས་པ་ལྟར་བཤད་མ་ཐག་པའི་ལས་འབྲས་ཀྱི་རྣམ་གཞག་དེ་དག་ངེས་པར་བྱས་ཏེ། རང་རྒྱུད་ལ་དེ་དག་གང་ཤས་ཆེ་བ་བརྟགས་ནས་ངོས་ཚིར་གྱིས་བཟུང༌། ག་རེ་སྔོན་ཆད་འདི་ལྟ་བུའི་སྡིག་པ་གྲངས་ཀྱིས་མི་ཆོད་པ་བསགས་ཡོད་འདུག་ཀྱང་ཤེས་བཞིན་གྱི་དྲན་པས་མ་ཟིན་པས་ལུང་མ་བསྟན་དུ་འཕྱན་ཏེ་ལས་བསགས་པ་ལ་བསགས་པར་ངོ་མ་འཕྲོད་པ་ཀླ་ཀློ་ལྟར་ནོངས་པ་ཤིན་ཏུ་ཆེ། ད་ནས་བཟུང་མི་དགེ་བཅུས་མཚོན་ཕྲ་རགས་ཀྱི་སྡིག་སེམས་ནམ་བྱུང་ཙ་ན་གཉེན་པོ་བསྟེན་ནས་གདོང་ཟློག་ཏུ་བྱོལ་ཐུབ་པ་ཞིག་དང༌། དེ་ཙམ་གྱིས་ཀྱང་མི་ཆོག་པར་དེའི་ལྡོག་ཕྱོགས་དགེ་བ་སྟོབས་ཆེན་གྱི་སྒོ་ནས་སྲོག་གཅོད་སྤོང་བ་སོགས་དགེ་བ་བཅུའི་ལམ་ལ་མགོའམ་གོས་ལ་མེ་ཤོར་བ་བཟློག་པའི་བརྩོན་པ་ལྟ་བུ་བསྐྱེད་པར་བྱའོ་སྙམ་དུ་མོས་པ་དང་སྤྲོ་བ་མ་བྱུང་བར་དུ་སྒོམ། དེ་ཡང་
སློབ་དཔོན་དབྱིག་གཉེན་གྱིས། མཐོང་བའི་ཆོས་ལ་སོགས་པ་ལ། །མྱོང་གྱུར་ལ་སོགས་ངེས་རྣམ་གསུམ། །ཞེས་གསུངས་པ་ལྟར་དཔེར་ན་སྡིག་ཅན་ལྷས་བྱིན་དང༌། ཤ་ས་རཀྵི། དཔལ་འཛིན་ལ་སོགས་པ་རྣམས་ལུས་མ་སྤངས་པར་དམྱལ་བར་སོང་བའི་མཐོང་ཆོས་མྱོང་འགྱུར་གྱི་གཏམ་རྒྱུད་ལྟ་བུས་མཚོན་ཏེ་རང་ལ་ངན་སོང་གསུམ་དུ་སྐྱེ་ངེས་ཀྱི་ལས་ཤིག་ཡོད་པའི་སྡིག་ཅན་ཞིག་ཡིན་ན་མ་གཏོགས། གཞན་མ་འདི་སྙམ་དུ། ཀྱེ་མ་དེ་ལྟ་ན་ཐར་པ་ཐམས་ཅད་མཁྱེན་པ་ཐོབ་པར་བྱེད་པ་ལ་མི་དགེ་བ་དེ་དག་གི་རྩ་བ་སྟོངས་པ་ཞིག་དགོས་འདུག་ཀྱང༌། བསམ་ན་རང་གི་ཚེ་འདི་ཁ་ལ་མངོན་སུམ་དུ་གྲུབ་པའི་སྡིག་པ་དེ་ཙམ་ཞིག་བསག་མོད། དེས་ཆ་ཙམ་དུ་ཡང་མི་མཚོན་པའི་སྐྱེ་བ་སྔ་མ་རྣམས་སུ་རང་འཁོར་སློབ་འབངས་སྡེ་རིགས་སོགས་ཀྱི་ཆེད་དུ་བསམ་གྱིས་མི་ཁྱབ་པའི་སྡིག་པ་བསགས་པ་ཚད་མས་གྲུབ། དེ་དག་གི་འབྲས་བུ་ཡང་རང་ཉིད་ཁོ་ནས་མྱོང་བ་མ་གཏོགས་གང་གི་ཆེད་དུ་བྱས་པ་དེ་དག་ལ་བགོ་བཤའ་བྱ་རུ་མེད་པ་ནི། སློབ་དཔོན་ཀླུ་སྒྲུབ་ཀྱིས། ཁྱོད་ཀྱིས་བྲམ་ཟེ་དགེ་སློང་ལྷ་དང་ནི། །མགྲོན་དང་ཡབ་ཡུམ་དག་དང་བཙུན་མོ་དང༌། །འཁོར་གྱི་སླད་དུ་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་གསུངས་འདུག་པས་ཧ་བྷོ་ཧ་བྷོ། ང་ནི་མེད་དོ། །ང་ནི་མེད་དོ། །འདི་
ནས་འཕོས་ཏེ་ངན་སོང་མྱོང་བ་ལས་འོས་མེད་པ་ཞིག་འདྲའོ་འདྲའོ་སྙམས་ནས་ཡིད་སློང་སློང་པོར་མི་འགྱུར་བའི་ཐབས་མེད། དེའི་ཚེ་ལས་འབྲས་ཀྱི་མཚང་རིག་པ་ཡིན། ད་ལྟ་མི་ཀུན་དགེ་སྡིག་གི་གླེང་མོ་ཙམ་བྱེད་པ་ལས་བླང་དོར་གྱི་རྩ་བ་བཅར་ཕོག་ཏུ་ངོ་ཤེས་པ་མེད་པས་ཀླ་ཀློ་ལས་དྲག་ཙམ་ལས་དོན་ལ་ལུང་མ་བསྟན་ཡིན། ད་རེས་རང་ཉིད་ཀྱི་བཤེས་གཉེན་དམ་པའི་བཀའ་དྲིན་ལ་ལས་དང་ལས་ཀྱི་འབྲས་བུ་ཆུད་མི་ཟ་བ་ཉིད་དུ་མཐོང་བ་དེ་བསོད་ནམས་ཆེ། དེ་ལྟར་མཐོང་བ་ལ་འཇིགས་སེམས་དང་ཡིད་ཁོང་དུ་ཆུད་པ་གཅིག་པོས་ཀྱང་མི་ཆོག་སྟོབས་བཞི་ཚང་བའི་སྒོ་ནས་བཤགས་སྡོམ་དྲག་པོ་དང་འགྱོད་སེམས་བརྟན་ཏེ་བྱང་ཆུབ་ཀྱི་སྤྱོད་པ་ལ་བསླབ་དགོས། དེའི་བླང་དོར་མ་ནོར་ན་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེ་བས་སྔར་བྱས་ཀྱི་སྡིག་པ་མཚམས་མེད་ལྟ་བུའི་ལས་རྔམ་ཆེན་བྱས་པ་ཡང་ཕྱི་ནས་བཤགས་སྡོམ་དྲག་པོས་འདག་པར་གསུངས་ཏེ། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱི་ནས་བག་དང་ལྡན་པར་གྱུར་དེ་ཡང༌། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གཅུང་དགའ་བོ་ཆུང་མ་པུནྚ་རི་ཀ་ལ་ལྷག་པར་ཡིད་ཆགས་པ་དེ་བཞིན་གཤེགས་པས་ལྷའི་གྲོང་ཁྱེར་དང༌། དམྱལ་
བའི་གནས་རྣམས་སུ་ཁྲིད་དེ་ཐབས་ཀྱིས་བཏུལ་བས་མཐར་དགྲ་བཅོམ་ཐོབ། སོར་ཕྲེང་གིས་མི་དགུ་བརྒྱ་དང་གོ་དགུ་བསད། མ་སྐྱེས་དགྲས་ཡབ་གཟུགས་ཅན་སྙིང་པོ་བསད་དེ་མཚམས་མེད་ཀྱི་ལས་བྱས་པའང་བཤགས་སྡོམ་གྱིས་དག་ཅིང་སྔ་མས་དགྲ་བཅོམ། བདེ་བྱེད་ཀྱིས་རང་གི་མ་བསད་པ། ཕྱིན་ཆད་འགྱོད་སེམས་ཀྱི་སྒོ་ནས་བླང་དོར་ཚུལ་བཞིན་དུ་བྱས་པས་དམྱལ་བར་དར་གྱི་ཕོ་ལོང་བརྡབས་པ་ཙམ་ཞིག་སྐྱེས་ནས་མཐར་རྒྱུན་ཞུགས་ཐོབ་པར་བཤད་པས་སྡིག་པ་དེ་དག་དྲན་པའི་མོད་ལ་འགྱོད་པ་ཡང་ཆེ་ཞིང་བཤགས་པའི་ཐབས་ལ་འབད་པ་ནི། གནད་ཟབ་ཤོས་ཡིན་པས་ཕུང་པོ་གསུམ་པའི་མདོ་འདོན་པ་ལ་བསླབ་པར་བྱའོ། །དེ་ཡང་ཁྲིད་ཀྱི་སྐབས་འདིར་གོང་གི་མི་དགེ་བ་བཅུ་དང་དེའི་འབྲས་བུ་ངོས་མ་ཟིན་པར་བྱ་བ་ནི་སྤང་བྱ་ཡིན་ལ། དེ་ཉིད་བློ་ལ་ནམ་འཆར་འཆར་གྱི་དུས་སུ་སྟོབས་བཞིའི་གནད་དང་ལྡན་པས་ཕུང་པོ་གསུམ་པའི་མདོ་འདོན་པ་ནི། གཉེན་པོ་ཡིན་པས་འདི་གཉིས་རེས་འཇོག་ཏུ་ཡང་ཡང་སྒོམ། དུས་འདི་ནས་བཟུང་སྟེ་མི་དགེ་བའི་ཕྱོགས་ལ་ཤེས་བཞིན་གྱི་དྲན་པ་བརྟེན་ལ་དེ་དག་གི་བསམ་པ་ནམ་སྐྱེས་འབུར་འཇོམས་སུ་གཏོང༌། དངོས་གཞིའི་སྐབས་དུས་རྟག་པར་ཡང་ཇོ་བོ་དཱི་པམ་ཀཱ་རའི་རྣམ་ཐར་ལྟར། ནངས་པར་བསགས་པ་སྔ་དྲོ་བཤགས། ཕྱི་དྲོ་བསགས་པ་
ཉལ་ཁ་བཤགས་ཏེ་སྡིག་ལྟུང་དང་ཞག་གཅིག་ཀྱང་མ་འགྲོགས་པར་བྱའོ། །ཁ་ཅིག་དེ་ལྟར་བཤགས་པ་ཁོ་ནས་ཆོག་པར་གོ་ནས་ཉེས་སྤྱོད་དང་མི་དགེ་བའི་ཕྱོགས་ལ་སྡོམ་སེམས་མེད་པར་འབྱོལ་ཉོག་ཏུ་སྤྱོད། ནངས་ནུབ་བཤགས་ཚིག་རེ་ཙམ་ཁ་ནས་བཏོན་པས་ཆོག་པར་བསམ་པ་ནི་ནོར་བ་རྔམ་པོ་ཆེ་ཡིན་ཏེ། བཤགས་པ་སྔ་མ་ལ་སྟོབས་བཞིས་བཤགས་པའི་འགྱོད་སེམས་ཟིལ་གྱིས་མནན་ཅིང༌། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་ལས་འཕྲལ་དུ་ཉམས་པའི་ཕྱིར་ལས་དང་དེ་འབྲས་ཀྱི་རྟེན་འབྲེལ་མི་བསླུ་བའི་ཆོས་ཐམས་ཅད་བསྣུབས་པའི་ལོག་པར་ལྟ་བ་ཡིན་ནོ། །དེ་ལྟར་འདི་ཡན་ཆོད་ཀྱི་ཚིག་དོན་ལ་ཞེ་ཐག་པ་ནས་ལེགས་པར་བསམ་སྟེ་འཇིག་རྟེན་གྱི་བྱ་བ་མཐའ་དག་ལ་མཁྲིས་ནད་ཅན་གྱིས་ཟས་མཐོང་བ་ལྟར་སྐྱུགས་ལོག་པ་ཞིག་མ་བྱུང་ན། ཐོས་པ་ལུང་ཡིན་ལ། ཀློག་པ་ཚིག་ཡིན་པས་བློ་ལ་འབྱོངས་པའི་སྐབས་མི་སྲིད་དེ། ཨོ་རྒྱན་ཆེན་པོས། སངས་རྒྱས་བཀའ་ལུང་དམ་ཆོས་གང་ཡོད་དུ། །ལེགས་པར་བཙལ་ཞིང་དམ་ཆོས་ཐོས་པའི་ཚེ། །ཡང་དག་བསམ་པས་ཚིག་དོན་མ་བཟུང་ན། །ཁ་སྦུབ་སྣོད་དུ་ཆུ་རྒྱུན་མི་འཇུག་ལྟར། །འཁོར་བའི་ཚ་གདུང་རྒྱས་ཚེ་ཕན་པ་མེད། །ཅེས་སོ། །དེའི་ཕྱིར་འཇིག་རྟེན་གྱི་ལོངས་སྤྱོད་ཇི་ལྟར་ཕུན་སུམ་ཚོགས་ཀྱང་
རླུང་ནང་གི་མར་མེའམ། དབྱར་གྱི་ཆུ་བྲན་ནམ། ནམ་མཁའི་གློག་གམ། མདང་གི་རྨི་ལམ་ལྟ་བུ་ཤིན་ཏུ་མི་རྟག་ཅིང་བདེན་པ་མེད་པ་ཡིན་པས་རྟག་ཏུ་དབེན་པ་བརྟེན། སྐྱོ་བའི་འདུ་ཤེས་བསྐྱེད། གང་བྱུང་དེས་ཆོག་ལ་བློ་ཕུགས་གཏད། ན་དགའ་ཤི་སྐྱིད་ལ་སྐྱབས་བཅོལ། མི་ཤི་བའི་ཤུལ་ལྟར་སུ་གང་ལབ་ལབ་ཏུ་བཅུག །མཛེ་སྤྲང་ཡུལ་འཁྱར་བ་ལྟར་འཁོར་མཁན་བྱ་དང་བྱིའུ་གཅིག་ཀྱང་མེད་པ་ལ་ཡིད་སྨོན་ནས་བླ་མ་དམ་པའི་གདམས་ངག་སྒོམ་པ་ལ་བློ་འཇུག་པ་ཞིག་དགོས་ཏེ། ཨོ་རྒྱན་ཆེན་པོས། འདི་ནི་འཇིག་རྟེན་སྐྱོ་བའི་ཡུལ་ཡིན་པས། །སྐྱེ་བོའི་བདེ་སྐྱིད་ཕུན་སུམ་ཚོགས་འདྲ་བ། །དབྱར་གྱི་ཆུ་དང་རྨི་ལམ་ནོར་རྫས་ལྟར། །བདེན་པ་མེད་ཅིང་མྱུར་དུ་མི་རྟག་པས། །སྐྱོ་བའི་འདུ་ཤེས་རྟག་ཏུ་བསྐྱེད་འཚལ་ལོ། །འདི་ཉིད་ལས་ལོག་ཆགས་དང་འཁྱལ་བ་དང༌། །སྐྱེ་དགུའི་དཔལ་ལ་ངོ་མཚར་ཆེར་བྱེད་པ། །དེ་ནི་བསོད་ནམས་དམན་པའི་རིགས་ཅན་ཏེ། །ཁྱེད་ཀྱི་སྙིང་ནི་ཤིང་སྡོང་ཁོང་རུལ་ལྟར། །ཕྱི་ནས་ཐར་པའི་ལོ་འབྲས་མི་འབྱུང་ངོ༌། །ཀྱེ་མ་ཀྱི་ཧུད་ཚེ་འདིའི་དཔལ་འབྱོར་ལ། །རྟག་ཅིང་ཕུན་སུམ་ཚོགས་འདྲར་ཤེས་པའི་བློ། །བྱིས་པའི་ནང་ནས་ཐ་ཤལ་སྐྱེས་བུ་སྟེ། །འཇིག་རྟེན་འདི་ན་དེ་བས་བླུན་པ་སུ། །སྔར་ཡང་མ་བྱུང་ཕྱིས་ཀྱང་མི་འབྱུང་ངོ༌། །ཞེས་གསུངས་པ་
ཡིན་ནོ། །སེམས་སྦྱོང་བདུན་པ་ནི། བུ་ཡིག་ལས། དེ་ལྟར་ཕྱི་ནང་གི་རྣམ་གཡེང་སྤངས་ནས་མི་རྟོག་པའི་བསམ་གཏན་ལ་བཞག་པས་ཉམས་མྱོང་འཕེལ་ནས་ཡུན་ཇེ་རིང་ལ་སོང་བས། དོན་འདི་ཉིད་དང་ནམ་ཡང་མི་འབྲལ་བར་བྱ་སྙམ་པའི་རྒྱུད་ལ་ངེས་ཤེས་བསྐྱེད་པ་དང༌། བདུན་གྱིས་སེམས་སྦྱང་བའོ། །ཞེས་མཇུག་བསྡུ་བ་ལས། རྣམ་པར་མི་རྟོག་པ་ལ་བརྟེན་ནས། སེམས་སྦྱོང་བ་ནི་ཏིང་ངེ་འཛིན་གྱི་ལམ་ལ་འཇུག་པའི་སྒོ་བླ་ན་མེད་པ་ཡིན་ཏེ། གྲོལ་བའི་ཐིག་ལེ་ལས། སྟེང་རླུང་རྔུབས་པས་སྣང་བ་དབང་དུ་འདུ། །འོག་རླུང་རྔུབས་པས་སྟོང་བ་དབང་དུ་འདུ། །བར་རླུང་བསྐྱིལ་ཞིང་དཀྲུགས་པས་ཟུང་དུ་ཆུད། །ཅེས་གསུངས་པ་ལྟར་སེམས་ཅན་རྣམས་སྣང་བ་ཕྱི་རུ་ལུས། རིག་པ་ནང་དུ་ལུས། བར་དུ་ལས་རླུང་གི་བཞོན་པས་སེམས་ཀྱི་རྟ་བྱས། གཟུང་བ་དང༌། འཛིན་པའི་ངང་དུ་འཕྱན་ཏེ་འཁོར་བ་ལུ་གུ་རྒྱུད་དུ་འཁྲུལ་པ་དག །རྡོ་རྗེ་ཐེག་པའི་མྱུར་ལམ་ཟབ་མོས་འགྲོ་འོང་ལས་ཀྱི་རླུང་གི་བྱེད་པ་བཅིངས་པ་ལ་བརྟེན་ཐེག་པ་འོག་མ་ལྟར་ཡུན་རིང་པོར་རྟོག་པའི་དྲ་བར་རིག་པས་རྗེས་སུ་དཔག་པའི་བསམ་གཏན་ལ་མ་ལྟོས་པར་བཙན་ཐབས་སུ་གཉུག་མའི་ཡེ་ཤེས་ངོས་ཟིན་པར་བྱ་བའི་མན་ངག་སྟེ། དེ་ལ་གསུམ། དང་པོ་ནི། རང་ལུས་བསམ་
གཏན་གྱི་ཆོས་བདུན་དང་ལྡན་པའི་ངང་ནས། ཁོང་པའི་ནང་སྟོང་སངས་ཕྲུ་མ་ཕུས་བཏབ་པ་ལྟ་བུའི་དབུས་དྲང་པོར་རྩ་དབུ་མ་ཆུ་ཤིང་གི་ལྡེམ་བུ་ལྟར་དྲང་བ། པདྨའི་འདབ་མ་ལྟར་སྲབ་པ། ནམ་མཁའི་སྤྲིན་བྲལ་ལྟར་སྔོ་བ། ཏིལ་ཞུན་གྱི་མར་མེ་ལྟར་གསལ་བ་སྟེ། ཆོས་བཞི་ལྡན་དུ་སྒོམ་པའི་སྤྱི་གཙུག་གི་ཡར་སྣར་ཧཾ་ཡིག་དཀར་པོ། ལྟེ་འོག་གི་མར་སྣར་ཨ་ཡིག་དམར་པོ་གསལ་བ་ལ་སྦྱོར་བ་བཞི་ལྡན་གྱི་ངང་ནས་སྟེང་རླུང་མནན། འོག་རླུང་ཐེན་པས་ལྟེ་བའི་ཨ་ལས་མེ་འབར། རིམ་གྱིས་ཡར་སྣའི་ཧཾ་ཡིག་ཞུ་བ་ལས་བདུད་རྩིའི་རྒྱུན་བབས་འཁོར་ལོ་བཞི་དང་རྩ་ཕྲན་ཐམས་ཅད་ཁྱབ་པས་བདེ་སྟོང་གི་ཡེ་ཤེས་སྐྱེས་པར་བསམ་ཞིང་སྙིང་གར་ཡི་གེ་ཨ་དཀར་པོ་གཅིག་ལ་སེམས་བཟུང་སྟེ་རྩེ་གཅིག་ཏུ་འགྱུ་བ་སྤུན་ཐག་བཅད་ནས་བཞག་པས། བདེ་བས་ཐབས་བྱས་པའི་ཤེས་རབ་སྟོང་ཉིད་ཀྱི་ཡེ་ཤེས་སྐྱེ་བ་ཡིན། མ་གོམས་བར་དུ་ཡུན་ཐུང་གྲངས་མང་ལ་བསླབ་བོ། །གཉིས་པ་གསལ་སྟོང་མི་རྟོག་པ་ལ་སེམས་སྦྱོང་བ་ནི། རླུང་རོ་ལན་གསུམ་མམ་དགུ་ཕྲུགས་སུ་ཕུད་པས་འབྱུང་བའི་རླུང་དུག་ཐོན་པའི་དགོས་པ་ཡོད་དོ། །དེ་ནས་ནང་དུ་རྔུབ་པའི་ཚེ་ཕྱིའི་ཨ་འཐས་ཀྱི་སྣང་བ་ཐམས་ཅད་འོད་དུ་ཕྲི་ལི་ལི་ཞུ་སྟེ་ནམ་མཁའ་སྔོ་སངས་དང་འདྲེས། དེ་ཉིད་རང་གི་ལུས་ནང་དུ་བྱུང་བས་ལུས་ཐམས་ཅད་སྔོ་མེར་གྱིས་
ཁེངས་པར་བསམ་སྟེ་རླུང་འོག་ཏུ་ཚིར་གྱིས་མནན། འོག་རླུང་ཅུང་ཟད་ཐེན་ལ་ཁ་སྦྱར་ཏེ་བསྒོམས་པས་གསལ་སྟོང་གི་ཉམས་སྐྱེའོ། །དེ་ཡང་གྲང་ཤས་ཆེ་ན་རླུང་དེ་ཚ་བ། ཚ་ཤེས་ཆེ་ན་བསིལ་བའི་རེག་བྱ་ཡོད་པར་བསྒོམ་པ་ནི་གནད་དོ། །ཞེས་དཔལ་བསམ་ཡས་པས་གསུངས་སོ། །སྤྲོས་པ་ལ་དགའ་བ་རྣམས་འབྱུང་བ་སོ་སོའི་རླུང་སྒོམ་པར་འདོན་ན། བུ་ཡིག་ཡེ་ཤེས་གསལ་སྒྲོན་ལྟར་ཉམས་སུ་བླང་བར་བྱ་ལ། འོན་ཀྱང་བླ་མ་ཡང་ཏིག་གི་སེམས་སྦྱོང་དོན་ཁྲིད་དུ། ནམ་མཁའི་རླུང་ནི་ཀུན་གྱི་དུས་ན་ཤིས་ལ་རེག་བྱའང་གཉིས་པོ་དེར་འདུས་པས། ཉམས་ལེན་ལ་འདིས་ཆོག་གོ །ཞེས་གསུངས་སོ། །འདི་ལྟ་བུའི་བུམ་པ་ཅན་ནི་ཡོན་ཏན་ཐམས་ཅད་ཀྱི་འབྱུང་ཁུངས་ཡིན་ཏེ། ཞལ་གདམས་ནོར་བུའི་ཕྲེང་བར། དེ་ཡང་དབུ་མ་མཆོག་ཡིན་པས་མཐོང་ཉམས་དེ་ག་མི་སྟོན། སླར་ཡང་རླུང་མི་གཏོང་བར་ནང་དུ་རྔུབ་ཅིང་བསྡམས་པས། རླུང་རོ་རྐྱང་གི་ལམ་བརྒྱུད་དེ། དབུ་མའི་མས་སྣ་ཡི་གེ་ཆའི་འཕོངས་ལྟ་བུ་ནས་ཞུགས། རྩ་དབུ་མའི་ལམ་ལ་འཇུག་པས། ས་དང་པོའི་རྟོགས་པ་ཕྱིན་ཅི་མ་ལོག་པ་སྐྱེའོ། །ཞུགས་གནས་ཐིམ་གསུམ་གྱི་རྟགས་རེ་རེ་འཆར་བ་ལས། རྩ་དབུ་མའི་མདུད་པ་དང་པོ་ཞིག་སྟེ། རླུང་འཇུག་པ་ལས་ས་དང་པོའི་ཡོན་ཏན་སྐྱེ། དེར་
རླུང་སེམས་གནས་པས་ས་གཉིས་པའི་ཡོན་ཏན་སྐྱེ། དེར་རླུང་སེམས་ཐམས་ཅད་ཐིམས་པས་གཟུང་འཛིན་གྱི་རྟོགས་ཚོགས་མཁའ་ལྟར་དག །མཁྱེན་པའི་ཡོན་ཏན་མཐའ་དག་རྒྱས་པའོ། །གནས་སྐབས་སུའང་ཚེ་རིང༌། ནད་དཀོན། ལུས་བདེ་ཞིང་བྱ་ལྟར་མགྱོགས་པ་ལ་སོགས་པའི་ཡོན་ཏན་ནི། རླུང་བུམ་ཅན་གནད་དུ་བསྣུན་པའི་ཡོན་ཏན་ཡིན་ནོ། །དེས་ན་རླུང་གི་ཡོན་ཏན་ཐམས་ཅད་བུམ་ཅན་ལ་བརྟེན་ནས་སྐྱེ་དགོས་པས། འཚོ་རྒྱལ་རླུང་སྒོམ་པ་ཐམས་ཅད་བུམ་པ་ཅན་ལ་གནད་དུ་བསྣུན་ཅིག །ཅེས་གསུངས་པའི་ཕྱིར་རོ། །གསུམ་པ་ཆོས་ཉིད་རྣམ་པར་མི་རྟོག་པ་ལ་སེམས་སྦྱོང་བ་ནི། ལུས་སེམས་ཁོང་གློད། མིག་མི་འགུལ་བས་དྲན་བསམ་འཕྲོ་འདུའི་རྟོག་པ་ཐམས་ཅད་དང་བྲལ་བའི་ངང་ནས་རླུང་ཆེད་འཛིན་གྱི་འབད་རྩོལ་ལ་མ་ལྟོས་པར་བར་རླུང་ཐད་ཀར་རྒྱངས་པ་ཤིན་ཏུ་ཟབ་པའི་མན་ངག་ཡིན་ཏེ། ཞལ་གདམས་ནོར་བུའི་ཕྲེང་བ་ལས། འཚོ་རྒྱལ་ཉོན་ཅིག་ལུས་སྐྱིལ་དྲུང་དང་ལྡན་པའི་སྒོ་ནས། འོག་རླུང་གི་སྦྱོར་བ་ཅུང་ཟད་རྔུབ། སྟེང་རླུང་ཅུང་ཟད་མནན། བར་རླུང་ལྟེ་བའི་ཐད་ཀར་རྒྱངས་པའི་བསོད་ནམས་ནི། ཡེ་ཤེས་རང་སར་གནས་པའི་རླུང་སྦྱོར་ཡིན་ཏེ། ལུས་བསྐྱེད་རིམ་བསྒོམ་པ་དང༌། སེམས་འོད་གསལ་དུ་བསྒོམ་པ་ལ་
སོགས་གང་གི་ཡང་གྲོགས་སུ་འགྲོ། ཐིག་ལེ་འཛིན་འདྲེན་དགྲམ་གསུམ་ཐམས་ཅད་ཀྱང་ངང་གིས་འགྲུབ་པའི་རླུང་སྦྱོར་ཡིན། གཟུང་འཛིན་གྱི་རྟོགས་ཚོགས་ཀྱང་ངང་གིས་དག །རིག་པ་བྱིང་རྨུགས་རྒོད་གསུམ་གྱི་སྐྱོན་དང་བྲལ། མིག་འགྲིབ་པ་ལ་སོགས་དབང་པོའི་སྐྱོན་མི་འབྱུང༌། བད་ཀན་དང་མཁྲིས་པའི་ནད་ཀྱིས་མི་ཚུགས། ཕོ་བ་སྦོས་འཁྲོག་ངང་གིས་སེལ། རིམས་ནད་ལ་སོགས་འགོ་བའི་ནད་བྱང༌། སྲོ་མ་མི་འབྱུང༌། ཚེ་ཉི་ཟླ་དང་མཉམ་པའི་རླུང་སྦྱོར་ཡིན་པས། རང་ལུས་ཡི་དམ་གྱི་ལྷར་གསལ། ལུས་ཀྱག་ཀྱོག་དང་ཡ་ཡོ་མེད་པོ་རླུང་ལྟེ་བའི་འོག་ཏུ་འཚིར་ཏེ་རྒྱངས། མིག་བར་སྣང་ལ་ལྟ་སྟངས་ཧར་རེ་བཞག །ཤེས་པ་ཀ་དག་གི་ངང་ལ་འཇོག་པ་ནི། ཡེ་ཤེས་ཆེན་པོའི་རླུང་སྦྱོར་ཞེས་ཀྱང་བྱ། སེམས་དང་རིག་པ་དབྱེ་བའི་རླུང་སྦྱོར་ཞེས་ཀྱང་བྱ། རླུང་སྦྱོར་འདིའི་དུས་སུ་སྐེད་པ་ཅུང་ཟད་ཉེག་བྱས། ལྟེ་བ་ཐད་ཀར་རྒྱངས། རྔུབ་དགང་རླུང་གི་ལས་ཐམས་ཅད་ཀྱི་དུས་སུ་ཡང་ཕྱིར་རྒྱངས་པའོ། །རྩེ་གཅིག་ཏུ་འདི་ལ་གནད་དུ་བསྣུན་པས། སྟེང་འོག་གི་རླུང་ཡང་ངང་གིས་འདྲེན། འདི་ཡང་དུས་ཐམས་ཅད་དུ་ལྟེ་བ་ཐད་ཀར་རྒྱངས་པས། དྲན་པའི་རྟེན་དུ་ཡང་ལྟེ་བ་རྒྱངས་པས་བྱེད། ཡི་དམ་
གྱི་ལྷ་བསྒོམ་ན་ཡང་ལྟེ་བའི་ཐད་ཀར་རྒྱངས་ཏེ་སྒོམ། སྙིང་པོ་བཟླས་བརྗོད་བྱེད་ཀྱང་ལྟེ་བ་ཐད་ཀར་རྒྱངས་པའི་ངང་ནས་འདྲེན། ཆོས་ཉིད་རྣམ་པར་མི་རྟོག་པའི་ཡེ་ཤེས་བསྒོམ་ཀྱང་ལྟེ་བ་ཐད་ཀར་རྒྱངས། འགྲོ་འཆག་ཉལ་འདུག་ལ་སོགས་སྤྱོད་ལམ་རྣམ་པ་བཞི་གང་གི་དུས་སུ་ཡང༌། གསང་བ་ཡེ་ཤེས་ཆེན་པོ་འདི་དང་མ་བྲལ་བར་བྱའོ། །ཞེས་གསུངས་པས་འདི་ལྟ་བུའི་བར་རླུང་ནི་སེམས་སྦྱོང་གི་སྐབས་ཙམ་དུ་ཡང་མ་ཟད་བྱང་ཆུབ་བསྒྲུབ་པའི་ལམ་གྱི་སྟེགས་ཐམས་ཅད་ཀྱི་མཐུན་རྐྱེན་ཕུན་སུམ་ཚོགས་པའི་གནད་ཆེན་པོར་ཡང་རིག་པར་བྱའོ། །དེ་ལྟར་རྣམ་པར་མི་རྟོག་པ་གསུམ་གྱི་སྒོ་ནས་སེམས་སྦྱངས་པས། ཤེས་པ་གར་གཏད་དུ་ཟིན་ཅིང་རྟོག་མེད་ནམ་མཁའ་ལྟ་བུའི་ངང་དུ་ཡུན་ཇེ་རིང་ལ་གནས་པ་ནི་རང་རང་གིས་གོམས་པའི་ཚད་དོ། །འདི་ལྟ་བུའི་སེམས་སྦྱོང་བདུན་པོ་ནི། ཁ་ཙམ་ཚིག་ཙམ་དུ་མ་སོང་བར་འཁོར་བའི་རང་བཞིན་ཁྲི་མུན་དུ་ཆུད་པ་ལྟ་བུའི་སྡུག་བསྔལ་དང་སྐྱོ་ཤས་ཡིད་ལ་དྲན་པས་སྤྱིར་དུས་རྣམས་ཐམས་ཅད་དང༌། ཁྱད་པར་སྨིན་འཁྲིད་ལ་སོགས་པའི་ཚེ་ཞག་ཉི་ཤུ་རྩ་གཅིག་གམ། བཅུ་བཞིའམ་ཐ་ནའང་བདུན་ལ་སོགས་པར་ཉམས་སུ་བླངས་ཏེ་རྒྱུད་ལ་འདྲེས་པར་མ་བྱས་ན་ལུང་ཉན་པ་ལྟ་བུས་བློ་ལས་སུ་རུང་བར་མི་
འགྱུར་ཏེ། ཨོ་རྒྱན་ཆེན་པོས། དེ་ལྟར་ཚིག་ཙམ་མ་ཡིན་པར་འཁོར་བའི་གནས་ཚུལ་འགྱུར་ཞིང་མི་རྟག་སྡུག་བསྔལ་བའི་རང་བཞིན་དང༌། སྐྱོ་ཤས་དང༌། ངེས་འབྱུང་ཉིད་དང་བསྲེས་ནས་ཉམས་སུ་མ་བླངས་ན། བཀྲེས་སྐོམ་གྱིས་ཉེ་བར་གདུངས་བ་དག་ལ། ཟས་སྐོམ་ལག་ན་ཡོད་པའམ། ལོངས་མ་སྤྱད་ན་དེ་ཉིད་ལ་ཕན་པར་ཤེས་པ་ཙམ་གྱིས་མི་ཡོང་ཞིང༌། ངེས་པར་བཟའ་བཏུང་བྱེད་དགོས་པ་བཞིན། གོ་དོན་ཉམས་སུ་བླངས་པས་འཁོར་བ་ཁྲི་མུན་ནང་དུ་ཆུད་པ་དང་འདྲ་བ་གོ་ནས། བློ་འཕྲལ་དང༌། ཡུན་གྱི་བདེ་བ་ཁོ་ན་ལ་གོ་འཕོ་བའོ། །ཞེས་གསུངས་ལ། རིམ་པ་དེ་ལྟ་བུས་སློབ་མའི་རྒྱུད་ཤིན་ཏུ་དུལ་ཞིང་ལས་སུ་རུང་བར་གྱུར་པའི་ཚེ། ཐུན་མོངས་མ་ཡིན་པའི་སྔོན་འགྲོ་སྐྱབས་འགྲོ་ལ་སོགས་པ་དྲུག་དང༌། ཁྱད་པར་ཅན་གྱི་སྔོན་འགྲོ་འཁོར་འདས་རུ་ཤན་དབྱེ་བ་ལ་སོགས་པར་གོ་ཕྱེ་སྟེ། དངོས་གཞིའི་ལམ་འགྲོ་བའི་ཁམས་ལ་རྡོ་རྗེ་བཞིའི་རིགས་གནས་པ་བརྡ་ཐབས་རྟེན་འབྲེལ་གྱི་ཆོ་གས་སད་པར་བྱས་ཏེ་སློབ་མའི་རྒྱུད་དག་པ་རབ་འབྱམས་སུ་སྨིན་པར་བྱེད་པའི་དབང་གཟུང་བ་དང་འཛིན་པའི་ཆོས་ཐམས་ཅད་དྲན་རིག་སྐྱེ་འགག་གནས་གསུམ་དང་བྲལ་བའི་རོལ་རྩལ་དུ་ངོ་སྤྲད་དེ་བྱ་རྩོལ་མེད་པ་ཆོས་སྐུའི་དགོངས་པ་ལ་སྦྱོར་བའི་
གྲོལ་བྱེད་ཀྱི་ཁྲིད། སྣང་གྲགས་གློ་བུར་བའི་བག་ཆགས་རང་ཁ་མ་བརྡ་དོན་རྟགས་གསུམ་གྱི་སྒོ་ནས་དཀྱིལ་འཁོར་གསུམ་གྱི་རྣམ་རོལ་དུ་འཆར་བ་སྣང་སྟོང་ཟུང་དུ་འཇུག་པའི་བསྐྱེད་རིམ། རྒྱུད་ལུང་མན་ངག་གསུམ་གྱི་གནད་དོན་རྡོ་རྗེའི་ཚིག་གིས་བཅིངས་པ་མཐའ་དྲུག་ཚུལ་བཞིའི་སྒོ་ནས་གསལ་བར་སྟོན་པའི་བཤད་པ་སྟེ་རང་ལུགས་གསང་སྔགས་སྔ་འགྱུར་བའི་ཆུ་བོ་བཞིའི་བཤད་རྒྱུན་རྣམ་པར་དག་པས་སློབ་མའི་རྒྱུད་རྡོ་རྗེ་གསུམ་གྱི་རང་བཞིན་དུ་བསྒྲུབ་པའི་ཐབས་ལ་མཁས་པར་བྱ་ཞིང༌། དེའི་ཚེ་སློབ་མ་རབ་ཀྱིས་རང་རིག་མི་འགྱུར་བའི་གཟེར་ཐེབས་ནས་དགོངས་པ་ཚད་དུ་ཕྱིན་པ་ན་སྐྱོ་ངལ་དང་ལོག་སྒྲུབ་མཐའ་དག་བཟོད་པར་བྱས་ཏེ་གཞན་དོན་ཕྲིན་ལས་ཀྱི་འཇུག་པ་ལ་སྤྱོད་པའི་རྒྱལ་ཚབ་ཏུ་དབང་བསྐུར་ནས་རྡོ་རྗེ་རྒྱལ་པོའི་བཀའ་གཏད་འབོག །འབྲིང་སྣང་རིག་ཟུང་འཇུག་གི་རྩལ་མ་རྫོགས་ཤིང་སོ་ཀའི་ཆུ་ཕྲན་ལྟར་འཁྲུལ་གྲོལ་རེས་འཇོག་ཏུ་གྱུར་པ་རྣམས་བར་ཆད་དང་དངོས་གྲུབ་ནོར་བ་འདྲ་མིན་ལུང་བསྟན་གྱི་བདུད་ལ་སོགས་རྐྱེན་ཁར་ཤོར་ནས་རང་དོན་མ་འགྲུབ་པར་གཞན་དོན་ལ་རྔམས་ཤིང་ལོག་འཚོ་བྱུང་རྒྱལ་དུ་སྤྱོད་པས་འབྲེལ་ཚད་ངན་སོང་ལ་སྦྱོར་བ་དམྱལ་བའི་ལམ་མཁན་དུ་མི་འཕྱན་པར་བསྒྲུབ་པའི་རྒྱལ་མཚན་བཙུགས་ནས་དོན་གཉིས་མཉམ་སྒྲུབ་བྱེད་པའི་ལུང་ཕོག །
ཐ་མའང་ཟླ་དགའ་དང་ཟས་འཚོལ་ལྟོ་ཕྱིར་གནམ་རྡིབ་ལ་སོགས་པའི་སྤྱོད་པ་མི་རིགས་པས་བསྟན་པ་སྤྱི་དང་བྱེ་བྲག་གི་མིག་ལྟོས་ལ་གནོད་པའི་བློ་ངན་ལང་ཤོར་ཆོས་དྲེད་ཉམས་ཆག་གི་གོང་བུར་མ་སོང་བར་ཞི་དུལ་ཆོས་མཐུན་གྱི་སྤྱོད་པས་གཞན་སྣང་དང་བ་འདྲེན་པའི་སྤྱོད་ལམ་དང་ཆོས་སྤྱོད་ལ་བསླབ་པའི་འགག་བསྡམས་པ་སོགས་མདོར་ན་སློབ་མ་རྗེས་སུ་འཛིན་པའི་ཐབས་དང་རྟེན་འབྲེལ་ལ་མཁས་ཤིང་སོ་སོ་ཐར་པ་ནས་བཟུང་རྡོ་རྗེ་ཐེག་པའི་བར་གྱི་དམ་ཚིག་དང་སྡོམ་པའི་གནས་ངེས་པའི་གནང་བཀག་གི་རིམ་པ་ཕྱེད་པས་རྒྱལ་བའི་གདུང་འཚོབ་པ་ལ་དཔའ་བ་པཎ་ཆེན་བི་མ་ལ་དང༌། ཨོ་རྒྱན་སངས་རྒྱས་གཉིས་པ། ཀུན་མཁྱེན་ཆོས་ཀྱི་རྒྱལ་པོ། མངའ་རིའི་མ་ཧཱ་པཎྜི་ཏ་ལ་སོགས་པ་ལྟ་བུ་ནི་རྡོ་རྗེ་འཛིན་པའི་སྤྱོད་པའི་དཔེར་འོས་སུ་གྱུར་པ་སྟེ་ཐབས་དེ་ལྟ་བུ་ལ་རྨོངས་པ་དག་ནི་བསྟན་པའི་སྲོག་ཤིང་ལ་སོགས་པའི་མིང་བཟང་པོར་ཁུངས་ཕྱུང་ཡང་ཉོན་མོངས་པ་དང་གཏི་མུག་དང་ལོག་པའི་ལམ་དུ་རང་ཉིད་འཇུག་ཅིང་བསོད་ནམས་དམན་པ་དག་ཀྱང་སྒྲོལ་བ་ཙམ་དུ་ཟད་དེ། དེའི་ཕྱིར་རྒྱུད་དོན་རྒྱ་མཚོའི་དགོངས་པ་ཕྱིན་ཅི་མ་ལོག་པར་བཀྲལ་བ་འདི་ལྟ་བུའི་རིགས་པས་གསང་སྔགས་སྔ་འགྱུར་གྱི་བསྟན་པའི་རྒྱལ་མཚན་ཕྲག་པར་འཛིན་པར་འཚལ་ཅེས་རྡོ་རྗེའི་རིག་འཛིན་དམ་པ་གྲགས་པ་དང༌། སྦས་
པ་ཇི་སྙེད་མཆིས་པ་རྣམས་ལ་རློམ་སེམས་མེད་པའི་ཡིད་ཀྱིས་གསོལ་བ་བཏབ་པ་སྟེ། དེ་སྐད་དུ་རྫོགས་པ་ཆེན་པོའི་རྒྱུད་ལས། ཁྱད་པར་ཐེག་པ་འདི་ཉིད་ཀྱི། །ཆོས་སྤྱོད་ལག་ལེན་ཀུན་ལ་བསླབ། །འཁོར་བའི་བྱ་བ་འབྲེལ་འཁྲིས་ཀུན། །ཐབས་ཀྱིས་སྤང་ཞིང་དལ་དུ་གཞུག །སྤྲོས་བཅས་ལ་སོགས་དབང་བསྐུར་ནས། །དེ་ཡི་ལྷ་ལ་བསྙེན་སྒྲུབ་འཇུག །ཐེག་པ་རིམ་གྱིས་དབང་བསྐུར་ནས། །གཡའ་གངས་དུར་ཁྲོད་དབེན་པ་རུ། །ལུས་ངག་རུ་ཤན་དབྱེ་རུ་གཞུག །ཐོས་པའི་སྒྲོ་འདོགས་ཆོད་དུ་གཞུག །སྤྲོས་མེད་ལ་སོགས་དབང་བསྐུར་ནས། །དུས་དང་མཐུན་པའི་སྤྱོད་པ་བསླབ། །ལུང་དང་མཐུན་པའི་བསླབ་བྱ་བྱ། །དཔེར་ན་བུ་གཅིག་ཆུང་མ་དེ། །མ་ཡིས་ཇི་ལྟར་གསོ་བ་ལྟར། །བརྩེ་བའི་གདུང་ཤུགས་ཆེན་པོ་ཡིས། །དམ་ཚིག་བདུད་རྩིའི་ནུ་མ་བླུད། །ཆོས་རྣམས་མ་ལུས་ཐམས་ཅད་ཀུན། །རྩ་བ་ཐིག་ལེ་གཅིག་ལས་གྱེས། །གཅིག་པོ་ཐུགས་རྗེའི་རྩ་བ་ཡིན། །ཤེས་རབ་ཡེ་ཤེས་དབང་བསྐུར་ནས། །དབང་པོ་དང་འཚམ་རིག་པ་སྦྱིན། །དྲེད་མོ་ལྟ་བུའི་སྤྱོད་པ་བསླབ། །རང་ཡང་སློབ་བུའི་བློ་བསྐང་ཕྱིར། །དངོས་བསྟན་རྟགས་ཚད་དབྱུང་བར་བྱ། །ཚིག་དབང་རྩལ་གྱི་དབང་བསྐུར་ནས། །སྤྲོས་བཅས་བྱ་བ་ཀུན་བོར་ལས། །སྤྲོས་མེད་ངང་དེར་ལྷོད་ཀྱིས་
གློད། །རི་དྭགས་ལྟ་བུའི་སྤྱོད་པ་བསླབ། །ངེས་དོན་སྙིང་པོའི་ངོ་སྤྲོད་གདབ། །རང་རིག་མི་འགྱུར་གཟེར་ཐེབས་ནས། །རྒྱལ་ཚབ་དག་ཏུ་དབང་བསྐུར་ལ། །འགྲོ་དོན་གྱིས་ཞེས་བཀའ་ལུང་སྦྱིན།།རང་ཉིད་ཏིང་ངེ་འཛིན་ལ་བཞུགས། །གཞན་དོན་བྱང་ཆུབ་སེམས་དཔའ་ཡི། །བསླབ་བྱ་ཐམས་ཅད་བསླབ་པར་བྱ། །དང་པོ་སློབ་མས་དམ་ཚིག་གི །རྣམ་དབྱེ་བསྲུང་མཚམས་མ་ཤེས་པར། །བླ་མས་དམ་ཚིག་སུམ་གཉིས་སྲུང༌། །རགས་པ་ཤེས་ན་སུམ་ཆ་སྟེ།། ཞིབ་པར་ཤེས་ན་གསུམ་གཉིས་སོ། །སློབ་མ་ཉིད་ཀྱིས་བསྲུང་བར་བྱ། །དུས་དང་གནས་སྐབས་ཡུལ་ཉིད་དུ། །གནང་བཀག་རིམ་པ་མ་ལུས་པ། །བླ་མས་སློབ་བུ་འཁྲུད་པར་བྱ། །དེ་ཡིས་ཡོན་ཏན་བསམ་མི་ཁྱབ། །སངས་རྒྱས་ཀུན་གྱི་གདུང་མི་ཆད། །དུས་གསུམ་སངས་རྒྱས་ཐམས་ཅད་ཀྱང༌། །དེ་ལྟར་བསླབ་པས་རིམ་གྱིས་བྱུང༌། །རྒྱལ་ཚབ་སློབ་བུ་གཅིག་ཚར་ནས། །འཁོར་བ་དོང་ནས་སྤྲུགས་པར་འགྱུར། །ཁམས་གསུམ་སེམས་ཅན་མ་ལུས་པ། །འདྲེན་པའི་ལྕགས་ཀྱུ་དེ་ལས་འབྱུང༌། །དེ་ཕྱིར་སློབ་མ་བླ་མ་གཉིས། །ཕན་ཚུན་རྟེན་འབྲེལ་མ་འཕྱུགས་ཤིག །ཅེས་གསུངས་པའི་ཕྱིར་རོ། །དེ་ལྟར་ཆོས་ཚུལ་ཐར་པའི་གྲུ་གཟིངས་བཤད་གྲོལ་མན་ངག་ལ་བརྟེན་ནས། །བདག་བློའི་རྣམ་དཔྱོད་དེད་དཔོན་གཞོན་ནུས་རྣམ་མཁྱེན་རིན་ཆེན་གླིང་མཆོག་ཏུ། །སྐྱོ་དུབ་ངལ་བ་མཐའ་དག་སྤངས་ཏེ་ལྷག་བསམ་ཁུར་གྱིས་བསྐྱོད་པ་ན། །རྒྱལ་དང་
དེ་སྲས་དབྱིངས་ནས་དགྱེས་ཏེ་དོན་གཉིས་གྲུབ་པའི་ནོར་བུ་བྱིན། །ཀྱེ་ཧོ་དལ་འབྱོར་རིན་ཆེན་ཉིན་སྐར་ཙམ། །གལ་ཏེ་རྙེད་ཀྱང་རླུང་ནང་མར་མེ་ལྟར། །སྐད་ཅིག་ཉིད་ལ་མི་རྟག་འདི་བསམས་ན། །སྐྱེ་བོ་ཕལ་ཆེར་སྨྱོན་པའི་དེད་དཔོན་འདྲ། །ཆོས་ལ་འཇུག་པའི་རྩ་བ་ངེས་འབྱུང་སྟེ། །དེ་ཡི་ཐར་པར་རེངས་པའི་ཤེས་རྒྱུད་ལ། །སེམས་སྦྱོང་གནད་ཀྱི་ཕྲུ་སློག་མ་བྱས་ན། །འཆི་ཁར་བྲང་ལག་འཐབ་ཚེ་འགྱོད་ཀྱང་འཕྱིས། །ལས་རླུང་ཡེ་ཤེས་ཁམས་སུ་གནས་གྱུར་ཚེ། །འཁོར་འདས་གཉིས་སྣང་ཟད་དང་ཆབས་ཅིག་པར། །ཆོས་སྐུའི་རྒྱལ་ས་ཟིན་པའི་རིག་འཛིན་ལ། །སེམས་སྦྱོང་རྟོག་པའི་དྲ་བ་དགོས་མིན་ཡང༌། །དྲ་བའི་སྣོད་དང་གླིང་བུའི་སྟོང་ཆེན་སྒྲས། །ཕུར་བུའི་གྲུབ་མཐར་འཁྱོགས་པའི་རིགས་ཅན་དང༌། །འཁོར་བ་བདེ་བར་འཛིན་པའི་བྱིས་པ་རྣམས། །བརྩེ་བའི་སེམས་ཀྱིས་མ་བཟོད་ལས་གཞན་ཅི། །རྟོག་གེའི་རྩལ་བཤད་སྨིག་རྒྱུའི་ཆུ་ཀླུང་གིས། །རྨོངས་ཆེན་གླང་པོའི་ཡིད་དབང་འཕྲོག་པའི་ཚིག །མ་ཡིན་ལུང་དོན་རྒྱ་མཚོ་དོན་རྒྱུད་ཀྱི། །བྱིན་རླབས་གྲུ་གཟིགས་གསར་པས་བརྒལ་བའི་གཏམ། །སྔོན་བྱོན་མཁས་གྲུབ་ཟླ་བ་དབྱིངས་སུ་གཟིམས། །ལུང་རྟོགས་བཤད་སྒྲུབ་ཉི་མ་ཆུ་ལྟར་ཕྱོགས། །རྟ་ནོར་གཟི་བརྗིད་འགྲན་པའི་གཟའ་སྐར་ཤར། །རྒྱལ་བསྟན་མུན་པའི་སྨག་ལ་འོ་རེ་རྒྱལ། །ཐེག་རིམ་དགུ་ཡི་ས་མང་ནས་མྱོས་པའི། །མཛོད་ཆེན་བདུན་དང་ཤིང་རྟའི་རྒྱང་གླུ་ཡིས། །
སྔ་འགྱུར་བསྟན་སྲོག་འཛིན་པའི་ཀུན་མཁྱེན་དེའི། །ལུང་རྟོགས་ཁྱད་ནོར་དེང་སང་ཁོ་བོས་འཛིན། །དེ་ཕྱིར་འདི་ཡི་ཉེ་བརྒྱུད་གང་ཞེ་ན། །ཁོ་བོའི་གཙུག་ན་དྲི་མེད་འོད་ཟེར་བཞུགས། །སྔ་འགྱུར་སྤྱི་དང་ཁྱད་པར་སྙིང་ཐིག་གི། །བསྟན་པའི་བདག་པོ་གང་ལས་དམིགས་སུ་མེད། །གདོད་མའི་མགོན་དེ་མི་ཡི་བརྫུར་ཞུགས་ནས། །ལྗོངས་འདིར་བསྟན་པའི་སྙིང་པོ་གསལ་ལོ་ཞེས། །མཚོ་སྐྱེས་རྡོ་རྗེས་ལུང་གིས་དབང་བསྐུར་ཞིང༌། །རིག་འཛིན་ཐམས་ཅད་དགོངས་པ་གཅིག་ཏུ་མཐུན། །དང་པོ་འཁོར་བའི་འཇིགས་པས་བས་མཐར་ཕྱོགས། །བར་དུ་ལས་འབྲས་བསླུ་མེད་འཕྲང་ལ་བཤར། །ཐ་མར་རྟོགས་པས་འཁོར་གསུམ་བདེན་མེད་དུ། །ཤེས་འདི་གྲུབ་ཐོབ་སྤྱི་ཡི་རྣམ་ཐར་ཡིན། །སྙིང་ཏིག་རིན་ཆེན་ཡི་གེ་རྣམ་ལྔ་ལས། །ཟངས་ཡིག་ཅན་གྱི་དགོངས་པ་སེམས་སྦྱོང་བདུན། །རྒྱ་ཆེར་བཀྲལ་བའི་བསོད་ནམས་གང་ཡིན་པ། །རྣམ་མཁྱེན་རིན་ཆེན་ཐོབ་པའི་རྒྱུ་རུ་བསྔོ། །བདག་བློའི་པད་ཚལ་དྲི་མེད་ཉི་མའི་འོད་ཟེར་གྱིས། །བསྐུལ་བས་ཐུན་མོང་ལམ་གྱི་འཇུག་སྒོའི་སྐྱེད་མོའི་ཚལ། །ཤིན་ཏུ་བཀོད་མཛེས་ཐ་གྲུ་ཡངས་པའི་བསྟི་གནས་འདི། །རིང་པོར་གནས་ནས་དོན་གཉེར་མགྲོན་པོ་དགའ་བར་ཤོག །ཅེས་རིན་ཆེན་ཟངས་ཀྱི་ཡི་གེ་ཅན་གྱི་དགོངས་པ། རྗོགས་པ་ཆེན་པོའི་ཁྲིད་ཡིག་སྤྱི་དང་ཁྱད་པར་ཐུན་མོང་གི་སྔོན་འགྲོར་འཇུག་པ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་
བ་འདི་ནི་རང་བྱུང་པདྨའི་བསྒྲུབ་གནས་སུ་སྙིང་པོའི་སྒྲུབ་པ་ལ་གཞོལ་བའི་ཚེ་ཀུན་མཁྱེན་དྲི་མེད་འོད་ཟེར་གྱི་ཡེ་ཤེས་ཀྱི་སྐུ་དང་ལན་གསུམ་མཇལ་བའི་བར་པ་ལ། དཔེ་ཆ་བམ་པོ་ཞིག་གནང་ནས་འདིས་ཤིང་རྟ་ཆེན་མོ་ན་གབ་པའི་ཚུལ་དུ་ཡོད་པ་མཐའ་དག་གསལ་བ་ཡོད་སོགས་ཀློང་ལྔའི་གསང་མཛོད་བྱིན་གྱིས་བརླབས་པ་ལ་བརྟེན་ཟིན་བྲིས་སུ་བགྱིས་ཏེ་ལོ་ཤས་རྩིས་རྒྱར་བཞག་པའི་ཐོག་མངའ་བདག་ཉང་ཉི་མ་འོད་ཟེར་གྱི་རིགས་རུས་ཆོ་འབྲང་གིས་བསྲུངས་པའི་ཀོང་སྨྱོན་རིག་པའི་དཔའ་བོ་དང༌། དག་པའི་སྣང་བ་ཅན་ཝ་གིནྡྲའི་མིང་ཅན་གྱིས་དོན་གཉེར་ཆེན་པོས་བསྐུལ་བའི་རྟེན་འབྲེལ་གྱི་ཕོ་ཉས་མཚམས་སྦྱར་བ་ལས། སངས་རྒྱས་གཉིས་པ་སློབ་དཔོན་ཆེན་པོ། ཉི་སྒྲོལ་ཞེས་པ་ཤིང་ཕོ་སྤྲེའུའི་ལོར་སིནྡྷུའི་རྒྱ་མཚོར་ཆུ་སྐྱེས་གཞོན་ནུའི་སྦུབས་ལས་གྲོལ་ནས་ཉིས་སྟོང་དྲུག་བརྒྱ་སུམ་ཅུ་སོ་བདུན། ཕུར་བུ་ས་སྤྲེལ་ལོར་རིག་འཛིན་རྡོ་རྗེ་ཆོས་ཀྱི་རི་རྒྱལ་མ་ལ་ཡའི་རྩེ་མོར་ལྷ་ཀླུ་གནོད་སྦྱིན་མིའི་རིག་འཛིན་དེ་དམ་པའི་རིགས་ཅན་དྲ་མ་ལྔ་ལ་གསང་རྒྱུད་རྒྱ་མཚོའི་ཆོས་འཁོར་བསྐོར་ཞིང་ཟ་ཧོར་རྒྱལ་པོ་ཨིནྡྲ་བྷུ་ཏིའི་ཕོ་བྲང་གི་ཡང་སྟེང་ཏནྟྲའི་གླེགས་བམ་གྱི་ཆར་པ་ཕབ་ནས་ཉིས་སྟོང་དྲུག་བརྒྱ་དང་འདོད་པའི་གྲངས་ལྡན། ཁྲོ་བོ་ཤིང་གླང་ལོར་གསང་བདག་དཔའ་བོས་རྒྱལ་ཐབས་སྤྱི་བླུགས་ཀྱི་དབང་བསྐུར་བྱིན་པའི་རྒྱུད་ལུང་མན་ངག་ཀུན་
གྱི་བསྟན་པའི་བདག་པོ་མི་ཕམ་མགོན་གྱི་སྤྲུལ་པའི་སྣང་བརྙན་དགའ་རབ་རྡོ་རྗེའི་ཟློས་གར་བསྒྱུར་ནས་ཉིས་སྟོང་ཉིས་བརྒྱ་དགུ་བཅུ་གོ་དྲུག །རྣམ་གནོན་ལྕགས་འབྲུག་པཎ་ཆེན་ལྔ་བརྒྱའི་གཙུག་གི་རྒྱན་གྱུར་འཇའ་ལུས་སྐུ་བརྙེས་བི་མ་ལ་མི་ཏྲ་འཁྲུངས་ནས་ཆིག་སྟོང་བདུན་བརྒྱ་བཞི་བཅུ་རྩ་གཅིག །ཕུར་བུ་ས་སྤྲེལ་ངེས་པ་དོན་གྱི་ཐམས་ཅད་མཁྱེན་པ་དཔལ་བསམ་ཡས་པ་ཀློང་གསལ་དྲི་མེད་དམ། ཀུན་མཁྱེན་ངག་གི་དབང་བོ་འཁྲུངས་ནས་བཞི་བརྒྱ་ལྔ་བཅུ་ང་གསུམ་འདས་ཤིང༌། རབ་བྱུང་བཅུ་གསུམ་པའི་ནང་ཚན་ལྕགས་མོ་སྦྲུལ་གྱི་ལོ། རྟ་བདུན་དབང་པོ་སྡིག་པའི་ཁྱིམ་ན་གནས་པའི་ཚེ། གསུང་གི་དབེན་གནས་བསམ་ཡས་མཆིམས་ཕུའི་བྲེ་གུ་དགེའུའི་རང་བྱུང་བྲག་གི་ཁང་མཛེས་ག་ལ་བ་དེར་བྱ་བྲལ་ཆོས་རྗེ་མཁྱེན་བརྩེའི་འོད་ཟེར་གྱིས་གྲུབ་པར་བགྱིས་པ་ཐོག་མཐའ་བར་གསུམ་དུ་དགེ་བར་གྱུར་ཅིག། །།