རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ།
རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ་བཞུགས། །
རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ། དཀོན་མཆོག་བཞི་པ་བླ་མ་སངས་རྒྱས་ལ་ཕྱག་འཚལ་ལོ། །ཤིན་ཏུ་དག་པ་གདོད་མའི་ཡེ་ཤེས་ཀྱི། །གཟུགས་བརྙན་སྤྲུལ་པ་ཕྱག་རྒྱ་བཞི་ཡི་གྲོང༌། །གཅིག་ཆར་འཇུག་པ་བདེ་ཆེན་རྡོ་རྗེའི་དངོས། །ཁྱད་ཆོས་བདུན་དང་ལྡན་པ་དེ་ལ་འདུད། །འདིར་གང་བཤད་བྱའི་གཞི་སྐུ་གསུང་ཐུགས་ཀྱི་རྟེན་རབ་གནས་ཀྱི་ཆོ་ག་ནི། ཧེ་རུ་ཀ་གལ་པོར། སྐུ་གསུང་ཐུགས་ཀྱི་རྟེན་རྣམས་ལ། །ཡེ་ཤེས་གཞུག་པ་བྱིན་རླབས་ཅན། །འཁོར་བ་འབྱུང་བ་ལྔ་ཡི་གནས། །སྐུ་དང་གསུང་དང་ཐུགས་ཉིད་ཡིན། །ཞེས་བླ་ན་མེད་པའི་རྒྱུད་སྡེ་རིན་པོ་ཆེ་ནས་ཤིན་ཏུ་གཅེས་པར་བསྟན་ཅིང༌། དེ་ཉིད་ཀྱང་ཆོ་ག་རྣམ་དག་ལ་བརྟེན་དགོས་པའི་ཚུལ། རྒྱུད་ལས། ཆོ་ག་དམན་པས་མི་བྱ་སྟེ། །རབ་གནས་རྟག་པར་བཀྲ་མི་ཤིས། །འཇིག་རྟེན་འདིར་ཡང་སྡུག་བསྔལ་ལ། །འཇིག་རྟེན་ཕ་རོལ་འཇིགས་པ་ཆེ། །
ཞེས་དང༌། དེ་བས་འབད་པ་ཐམས་ཅད་ཀྱི། །དངོས་གྲུབ་འདོད་པས་ནན་ཏན་བྱ། །ཞེས་གསུངས་པས་དེ་ཉིད་བཅུའམ། རང་བཞིན་བརྒྱད་ལྡན་གྱི་རྡོ་རྗེའི་སློབ་དཔོན་དག་གིས་བསྙེན་པ་ཞལ་གསོ་དང་བཅས་ཉི་མ་བྱང་བགྲོད་ཀྱི་དུས་ཚེས་དགེ་བ་ལ་བརྩམ་མོ། །གཉིས་པ་བཤད་བྱ་ཇི་ལྟར་བྱ་བའི་ཆོ་ག་དངོས་ལ་གསུམ། སྦྱོར་བ། དངོས་གཞི། རྗེས་ཀྱི་རིམ་པའོ། །དང་པོ་ལ་གཉིས། ཐོག་མར་དཀྱིལ་འཁོར་གྱི་བྱ་བ་ནི་ཚོན་དཀྱིལ་གཉིས་གང་ལ་བརྟེན་ཡང་ས་ཆོག་ནས་བཟུང་རྡུལ་ཚོན་ལ་བྲི་ཐིག་ལ་སོགས་པ་དང་ཐུན་མོང་དུ་བུམ་ལྷའི་སྟ་གོན་སོགས་རང་རང་གི་སྒོས་ཆོས་འབྱིན་འཇུག་དཀྱིལ་འཁོར་གྱི་ལས་རིམ་གང་ལ་བརྟེན་པ་བཞིན་ཤེས་པར་བྱས་ནས་རྒྱན་དགྲམ་དང་དབང་རྫས་མཆོད་གཏོར་ལ་སོགས་འདུ་བྱའོ། །གཉིས་པ་རབ་གནས་ཀྱི་ཡོ་བྱད་ནི། རྟེན་གྱི་མདུན་ལ་སོགས་སྐབས་ཕྱེད་པར་མངའ་དབུལ་གྱི་མཎྜལ་རི་རབ་གླིང་བཞིའི་བཀོད་པ་ཅན་གྱི་
དབུས་སུ་དཀར་གསུམ་མངར་གསུམ་གཙོ་བོར་གྱུར་པའི་ཙཱ་རུའི་བཟའ་བ་དཔལ་བཤོས་ཀྱི་དབྱིབས་ཅན་ཁ་ཟས་བཟང་པོས་བསྐོར་བ་དང༌། དཀྱིལ་འཁོར་གྱི་མདུན་ནམ་གཡས་ལོགས་སོགས་སྐབས་བཙལ་ནས་ཁྲུས་སྟེགས་གྲུ་བཞི་པ་དྲི་དང་བ་བྱུང་གིས་ཆག་ཆག་བཏབ་པའི་སྟེང་པདྨ་འདབ་བརྒྱད་སྤྲོ་ན་བཀྲ་ཤིས་རྫས་བརྒྱད་བྲིས་པ་དར་དཀར་པོས་གཡོགས། སྟེང་དུ་རྟེན་རྙིང་པ་བྱིན་ཅན་ཞིག་དང་སརྦ་བིདྱཱ་སྭཱ་ཧཱ་ཞེས་བྲིས་པའང་བཞུགས་སུ་གསོལ་ལོ། །རེ་ཁཱ་ཅན་གྱི་དབུས་སུ་མཉྫི་ལ་ཁྲུས་གཞོང་མེ་ལོང་དང་བཅས་པ་བཞག །འདབ་མ་བརྒྱད་ལ་ཁྲུས་བུམ་བརྒྱད་བཀོད་པའི་ཤར་ནས་བརྩམས་ཏེ་དྲི་ལྔ། མངར་གསུམ། ཞོ་གསར། ཤིང་འབྲས། འབྲུ་ལྔ། འབྲས་ཡོས། སྨན་ལྔ། རིན་པོ་ཆེ་ལྔ་སོ་སོར་བླུགས་པའམ། མ་འབྱོར་ན་བུམ་པ་ལྔའམ་གཅིག །ཐམས་ཅད་ལ་རྫས་ཉེར་ལྔ་ཁོ་ནས་ཀྱང་རུང༌། ཁ་ཚར་མ་ཉམས་པའི་རས་དྲི་མེད་ལ་དྲིའི་ཐིག་ལེ་ལྔ་བྱས་པའི་སྐུ་ཕྱིས། གོས་ཟུང་དང་རྒྱན་ཆའི་རིགས། རིན་པོ་ཆེ་དང་འཁར་བ་ལ་སོགས་པའི་སྣོད་དུ་ཁྲུས་ཆལ་སྡེ་ཚན་བཞིའི་དང་པོ་ལ་ཆོ་ག་དང་དག་པས་སྦྱར་བའི་འབྱུང་ལྔ། གཉིས་པ་ལ་ཞོ། འོ་མ། མར། ཀ་ར། སྦྲང་རྩི་སྟེ་ཕྱིའི་བདུད་རྩི་ལྔ། གསུམ་པ་ལ་དྲི་བཟང་དང་ཉེ་ཤིང་ཤུ་ཏི། བཞི་པ་ལ་སྐྱུ་རུ་ར་དང་ཡུང་བའི་ཕྱེ་མ་རྣམས་བླུག །སིལླ་སོགས་དྲི་ཞིམ་པོས་བགོས་པའི་ཏིལ་མར་རམ་འབྲུ་མར་གྱིས་བསྐུ་མཉེ། དྲིལ་ཕྱིའི་རྫས་ཤིང་ཤུན་ལྔ་ནི་སངས་རྒྱས་ཐོད་པར། ཨ་ཤཱཏྠ་དང་ནྱ་གྲོ་དྷ། ། ཨུ་དུམ་ཝཱ་ར་བརྐ་ཏི། །པ་ལ་ཤ་སྟེ་ཤིང་ལྔ་ལས། །ཞེས་བཤད་ཀྱང་ཇི་བཞིན་མི་རྙེད་པས། ཙན་དན་དཀར་དམར་ལ་འོ་མ་ཅན་གྱི་ཤིང་ཤུན་རུང་མཐུན་བསྲེས་པའི་ཕྱེ་མ། དུང་ཞལ་དུ་ཙན་
དན་དཀར་པོ། གུར་ཀུམ། ཨ་ཀ་རུ། གླ་རྩི། ག་བུར་ཏེ་དྲི་ལྔའི་བྱུག་པ་སོ་སོར་དུར་ཝ་ཕོན་པོར་བྱས་པའི་པིར་དང་བཅས་གོ་རིམ་མ་འཆོལ་བར་བཞག་པའི་མཐར་མཆོད་པས་བསྐོར། སྟེང་ནས་གདུགས་དབུབ། ཅི་བདེ་བར་རིན་པོ་ཆེའི་སྣོད་མེ་ཏོག་དཀར་པོས་བཀང་བའི་དབུས་སུ་གཟུངས་བུམ་དྲིའི་ཆུས་སུམ་གཉིས་གང་བའི་སྟེང་མེ་ལོང་ལ་ཙན་དན་དཀར་པོ། གི་ཝཾ། གུར་ཀུམ། ཨ་རུ་ར་རྣམས་འོ་མར་སྦྱར་བས་རྟེན་འབྲེལ་སྙིང་པོ་ཚར་བདུན་བྲིས་པ་དང༌། དྲི་ཆུས་གང་བའི་དུང་ཞལ་ཡང་བསྡོགས། གཞན་ཡང་སྤྱོད་ཆས། དབང་པོ་གསལ་བྱེད་ཀྱི་མིག་ཐུར་སོགས་ལྔ། གུ་གུལ། ཡུངས་དཀར། རོལ་མོའི་བྱེ་བྲག་སོགས་འོག་ནས་འབྱུང་བ་ཐམས་ཅད་མ་ཚང་བ་མེད་པར་འདུ་བྱའོ། ། གཉིས་པ་ཆོ་ག་ལ། སྟ་གོན་དང་དངོས་གཞི་གཉིས་ལས། དང་པོ་སྟ་གོན་ལའང་ནང་གསེས་བཅུ་གསུམ་ལས། དང་པོ་དཀྱིལ་འཁོར་སྒྲུབ་མཆོད་ནི། མདོ་སྒྱུ་སེམས་གསུམ། ཞི་ཁྲོ་བཀའ་བརྒྱད། ཡང་ཕུར་ལ་སོགས་སྔ་འགྱུར་གྱི་རྒྱུད་སྡེ་ཆེན་པོ་གང་ལ་བརྟེན་པ་དེ་ཉིད་ཀྱི་སྒྲུབ་ཐབས་དཀྱིལ་ཆོག་བཞིན་ནོ། །བཟླས་པའི་མཇུག་ཏུ་རྣམ་བུམ་དུ་དཀྱིལ་འཁོར་གྱི་ལྷ་ཚོགས་དམིགས་ཕྱེད་པར་གསལ་བཏབ་ནས་གཟུངས་ཐག་ལ་འཇུས་ཏེ། རྩ་སྔགས་ཀྱི་ཤམ་བུར་དབྱངས་གསལ་དང་སུ་པྲ་ཏིཥྛ་སྦྲེལ་བ་བཟླ་ཞིངཿ ལྷ་ཚོགས་རྣམས་ཀྱི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་མཐར་མཆོད་བསྟོད་དང༌། ལྷ་ཚོགས་རྣམས་བདེ་སྟོང་ཆེན་པོའི་ངོ་བོར་ཞུ་བ་བུམ་ཆུ་དང་རོ་གཅིག་ཏུ་གྱུར། ཞེས་འོད་ཞུ་བྱ། ཞར་ལ་ལས་བུམ་སྒྲུབ་པ་ནི། ལས་
ཐམས་ཅད་པའི་བུམ་པར་པད་ཉིའི་གདན་ལ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཞལ་གཅིག་ཕྱག་གཉིས་གཡས་རྡོ་རྗེའི་དབྱུག་པ་དང༌། གཡོན་སྡིགས་མཛུབ་མཛད་པ་ཁྲོ་བོའི་རྒྱན་དང་ཆ་ལུགས་རྫོགས་པར་གསལ་བར་གྱུར། ཨོཾ་བཛྲ་ས་མཱ་ཛཿ ཡེ་ཤེས་པ་བྱོན། ཛ་ཧཱུྃ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་ཨ་མྲྀ་ཏ་ཀུཎྜ་ལི་སོགས་ཇི་ལྟར་རིགས་པར་བཟླས་རྗེས་མཆོད་ཅིང་བསྟོད་ལ། བཛྲ་མུས་ཡེ་ཤེས་པ་གཤེགས། དམ་ཚིག་པ་འོད་དུ་ཞུ་བ་ཁྲོ་བོའི་རྡུལ་ཕྲ་རབ་ཏུ་གྱུར་པར་བསམ། གཉིས་པ་གཟུངས་ཁྲུས་ཀྱི་བུམ་པ་བསྒྲུབ་པ་ནི། གཟུངས་བུམ་ཐོག་མར་བསྒྲུབ་པ་གལ་པོའི་དགོངས་པ་ཡིན་ཡང་བུམ་པའི་བསྐྱེད་ཆོག་ཆོ་ག་གཅིག་གིས་འགྲུབ་སྟེ། སྭ་བྷ་ཝས་སྦྱངས། སྟོང་པའི་ངང་ལས་མེ་ཏོག་ལ་གནས་པའི་གཟུངས་བུམ་དང༌། འདབ་མ་བརྒྱད་ལ་གནས་པའི་ཁྲུས་བུམ་རྣམས་བྷྲཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་ཞིང་མཆུ་འཕྱང་བ། ལྷའི་གོས་པཉྩ་ལི་ཀའི་མགུལ་ཆིངས་དང༌། དཔག་བསམ་ཤིང་གིས་ཁ་རྒྱན་ཅན་ཤ་སྟག་གི་གཟུངས་བུམ་ནང་དུ་ཟླ་བ་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་འོད་དང་ཟེར་དུ་འབར་བས་འཁོར་འདས་ཀྱི་དངོས་བཅུད་བསྡུ་བ་དང༌། ཁྲུས་བུམ་རྣམས་སུའང་ཟླ་བའི་སྟེང་ན་རང་རང་གི་སྔགས་རྣམས་འོད་ཟེར་འཕྲོ་ཞིང༌།
དྲི་མ་སྦྱོང་བའི་མཐུ་ལྡན་གྱི་བདུད་རྩིའི་རྒྱུན་བབས་པས་བུམ་པ་གང་བར་གྱུར་པར་བསམ་ཞིང་སོ་སོའི་གཟུངས་ཐག་སྤོ་བཞིན་པར། ཐོག་མར་གཟུངས་བུམ་ལ་དམིགས། རྟེན་འབྲེལ་སྙིང་པོ་ཅི་ནུས་བཟླས་མཐར་དུང་ཞལ་གྱི་ཆུས་མེ་ལོང་གི་ཡི་གེ་རྣམས་གཟུངས་བུམ་དུ་སྦྱངས་ནས་གཙོ་ལས་ཁྲུས་བུམ་མེ་ཏོག་ཐམས་ཅད་ལ་ཅུང་ཟད་རེ་བྲན། དེ་ནས་ཁྲུས་བུམ་དང་པོར་དམིགས་ནས་ཨོཾ་སརྦ་ཏ་ཐཱ་ག་ཏ་གྷནྡྷེ་སྣཱ་ན་པཱུ་ཛ་མེ་ག་ས་མུ་དྲ་སྥ་ར་ཎ་ས་མ་ཡ་ཤྲཱི་ཧཱུྃ། དེ་བཞིན་དུ་གཉིས་པར། ཐོག་མཐའ་འདྲ་བ་ལ་གནྡྷེའི་གནས་སུ། ཏྲི་མ་དྷུ་སྣཱ་ན། གསུམ་པར་ད་དྷི། བཞི་པར་ཕ་ལ། ལྔ་པར་པྲཱུ་ཏི། དྲུག་པར་ལཱཛྫ། བདུན་པར་ཨེ་ཥ་དྷི། བརྒྱད་པར་མ་ཎི་ཞེས་སྦྱར་ལ། ཚར་བདུན་རེ་ཙམ་དང༌། སྤྱིར་ཁྲུས་སྔགས་ཨ་བྷི་ཥེ་ཀ་དང༌། སྤྱན་མའི་སྔགས། ཨོཾ་རུ་རུ་སྥུ་རུ་ཛཱ་ལ་ཏིཥྛ་སིད་དྷི་ལོ་ཙ་ན་སརྦ་ཨརྠསྭཱ་དྷ་ནི་སྭ་ཧཱ། ཞེས་ཅི་ནུས་རེ་བཟླ། བུམ་རྫས་སོ་སོར་མ་ཕྱེ་ཞིང༌། བུམ་པ་གྲངས་གསལ་མ་འཛོམས་ན་ཁྲུས་སྔགས་ཀྱིས་ཆོག །ཞར་བྱུང་དུ་སྤྱོད་པའི་རྫས་གུ་གུལ་དང༌། ཡུངས་ཐུན་ལ་ཨོཾ་ཨཱ་བིགྣཾ་ཏ་ཀྲི་ཏ་ཧཱུྃ་ཕཊ་དང༌། ཧཱུྃ་བཞི་པ། ཁྲུས་ཀྱི་རྗེས་སུ་དུག་པའི་སྤོས་མར་ལ་བདུད་རྩི་འཁྱིལ་བའི་སྔགས་དང་ཧཱུྃ་བཟླ་བས་བརླབ་བོ། །གསུམ་པ་བདག་མཇུག་ནི། དབང་དོན་གྱིས་གསལ་བ་བཞིན་ནོ། །བཞི་པ་སྦྱོང་བ་ལ་གསུམ་གྱི་དང་པོ་གེགས་སྦྱོང་བ་ནི་ཞི་བས་སྦྱོང་བ་གཏོར་མ་གསུམ་རེ་རེ་ནས་རྟེན་ལ་བསྐོར་ཚུལ་གྱིས། ཨོཾ་སརྦ་བིགྷྣཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཏཏྑཾ་ཨུདྒ་ཏེ་
སྥ་ར་ཎ་ཧི་མཾ་ག་ག་ན་ཁཾ་གྲིཧྞ་ཨེ་དཾ་བྷ་ལིཾ་ཏ་སྭཱ་ཧཱ། ལན་གསུམ་གྱིས་བཟེད་ཞལ་དུ་དོར། ཕྱེད་མས་སྦྱོང་བ་རྫས་ཞི་བ་ཏིང་ལོ་དང་ཆང་བུས་སྔར་ལྟར་བསྐོར་ཞིང༌། སྔགས་དྲག་པོ། སུཾ་བྷ་ནི་གསུམ་གྱིས་བཟེད་ཞལ་དུ་དོར། དྲག་པོས་སྦྱོང་བ་ནི། ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊཿ ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ར་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་འབར་བའི་ནང་དུ་རང་ཉིད་སྐད་ཅིག་གིས་ཁྲོ་བོའི་རྒྱལ་པོ་རྟ་མཆོག་རོལ་པ་འཇིགས་སུ་རུང་བའི་སྐུར་གྱུར་པའི་གནས་གསུམ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་བགེགས་ཀྱི་དགྲ་བོ་ཁྲོ་བོའི་སྤྲིན་རབ་འབྱམས་བཛྲ་ས་མཱ་ཛཿ ཧཱུྃ། ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེགས། །ཞེ་སྡང་གཤིན་རྗེའི་འཇིག་རྟེན་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྟེང་གི་ནམ་མཁར་ཁྲོ་བོ་དབང་ཆེན་དཔག་ཏུ་མེད་པ་བྱོན། །ཨོཾ་བཛྲ་ཀྲོ་ཏས་པཱ་རི་ཝཱ་ར་ཨརྒྷཾ་སོགས་ཀྱིས་མཆོད། ཧཱུྃ། འཇིགས་པའི་ཧཱུྃ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་
ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང༌། གསང་སྔགས་དང༌། རིག་སྔགས་དང༌། གཟུངས་སྔགས་དང༌། སྙིང་པོ་དང༌། ཕྱག་རྒྱ་དང༌། ཏིང་ངེ་འཛིན་གྱི་བདེན་པ་དང༌། ཆོས་ཉིད་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་བདེན་པ་ཆེན་པོའི་བྱིན་རླབས་ཀྱིས། རྡོ་རྗེ་འཛིན་པ་བདག་གིས་སེམས་རྣམ་པ་གཉིས་བསྐྱེད་ནས་གནས་སྐབས་སུ་འཇིག་རྟེན་གྱི་ཁམས་ལ་ཕན་པ་རྒྱ་ཆེན་པོ་བསྒྲུབ་པ་དང༌། མཐར་ཐུག་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་འབྲས་བུ་ཐོབ་པར་བྱ་བའི་ཆེད་དུ། བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་རབ་ཏུ་གནས་པར་བགྱི་བ་ལ་བར་དུ་གཅོད་ཅིང༌། གླགས་བལྟ་བའི་འབྱུང་པོ་གཏུམ་པོ་གཟུ་ལུམས་ཅན་གང་དུ་ཡང་རུང་བ་དང་གཡོག་དང་འཁོར་དུ་བཅས་པ་ཐམས་ཅད་འདི་རུ་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་སངས་རྒྱས་རྣམས་ཀྱི་མངོན་སྤྱོད་ཀྱི་ཕྲིན་ལས་ཁྲོ་བོ་འཆོལ་བའི་ཚོགས་དང༌། རྡོ་རྗེ་མེའི་མཚོན་ཆས་ཁྱོད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཧཱུྃ་བཞིའི་སྔགས་དང་བཅས་ཡུངས་ཐུན་གྱིས་བྲབ། གུ་གུལ་དང་བདུད་རྩི་ལྔ་བདུག །རོལ་མོའི་ཚམ་རྔམས་དང་བཅས་ཕྱི་རོལ་ཏུ་བསྐྲད།
གཉིས་པ་བྱུར་དང་སྐལ་ངན་སྦྱོང་བ་ནི། འབྲས་ཆན་ནམ་གྲོ་ཟན་གྱིས་རྟེན་ལ་དྲིལ་ཕྱིས་བྱས་པའི་ཆང་བུས་ཀྱང་བསྐོར་ཞིང༌། ལས་སྔགས་བཟླ་བཞིན་པས་བཟེད་ཞལ་དུ་དོར། དེ་ནས་ལག་གཉིས་ཀས་ཡུངས་ཀར་བཟུང་བ་ཧཱུྃ་བཟླ་བས་གཡོན་དུ་བསྐོར་ཞིང༌། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། ཞེས་མེར་སྲེག་ཅིང་ཆུ་ནང་དུ་དོར། དེ་བཞིན་དུ་ཆུ་སྣོད་བཟུང་བ་ཨོཾ་བཟླ་ཞིང་གཡས་སུ་བསྐོར་ནས་སརྦ་པཱ་པཾ་གྱིས་མེ་ཆུར་བླུགས། མེ་ཆུ་གཉིས་ཀྱང་སྔ་མའི་བཟེད་ཞལ་ལ་བླུགས་ཏེ། དཀོན་མཆོག་གསུམ་གྱི་བདེན་པས་རབ་ཏུ་གནས་བྱའི་རྟེན་དང་བདག་ཅག་དཔོན་སློབ་ཡོན་མཆོད་རྣམས་ལ་མི་ཤིས་པར་བྱེད་པའི་བྱུར་དང་སྐལ་བ་ངན་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་རོལ་མོ་དང་བཅས་ཕྱིར་དོར། གསུམ་པ་སྡིག་པ་སྦྱོང་བ་ནི། བདག་དང་སྦྱིན་པའི་བདག་པོ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་རང་རང་གི་སྙིང་གར་ཀཾ་ནག་པོའི་རྣམ་པར་གྱུར་པ་ལྟེ་བའི་ཡེ་ཤེས་ཀྱི་མེས་དེད་སྣ་སྒོར་སྡིག་པ་རྭ་ཅན་གྱི་རྣམ་པས་ཐོན་ནས་ཏིལ་ལ་ཐིམ་པ་དེ་ཉིད་གཡས་སུ་ཡེ་ཤེས་ཀྱི་མེས་བསྲེགས། གཡོན་དུ་ཆོས་ཉིད་ཀྱི་རྒྱ་མཚོར་དོར་བར་བསམ་ལ། ཨོཾ་སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱ་ཧཱ། ཞེས་ལན་གྲངས་ཅི་རིགས་པས་མེ་ཆུར་དོར། བདག་དང་སྦྱིན་པའི་བདག་པོས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཤཱནྟིཾ་ཀུ་རུ་སྭཱ་ཧཱ། ཞེས་མེ་ཡང་ཆུ་ནང་དུ་བླུགས་ནས་ཕྱིར་དོར་རོ། །ལྔ་པ་རྟེན་དང་བཟོ་བོ་ལ་སོགས་པའི་དག་
བྱ་དག་བྱེད་ཁྲུས་ཀྱི་བྱ་བ་ནི། རྟེན་དངོས་སུ་བཀྲུ་བར་འོས་པ་རྣམས་དྲི་དང་སུག་བུལ་གྱི་འདག་ཆལ་དང་བཅས་བཀྲུ། འོག་ནས་འབྱུང་བའི་བསྐུ་མཉེ་དང་དྲིལ་ཕྱིས་ཀྱང་བྱ། ཕལ་ཆེར་མེ་ལོང་དུ་གཟུགས་བརྙན་བཀྲུ་བ་ལས་ཁྲུས་ཆལ་ཚར་བཞི། བསྐུ་མཉེ། དྲིལ་ཕྱིས། མེ་ལོང༌། ཁྲུས་བུམ། ཁྲུས་རས། སྤོས་མར། དྲི་ལྔའི་བྱུག་པ་རྣམས་བསྡོགས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་ལ་ཡོ་བྱད་ཐམས་ཅད་དང་ལྡན་པའི་ཁྲུས་འདི་གསོལ་བར་བགྱིའོ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་ལྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དེ་བཞིན་གཤེགས་དང་དེ་ཡི་སྲས་རྣམས་ལ།།རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཞེས་ཕྱེད་རོལ་དང་བཅས་སྙན་གསན་བྱས་ལ། སློབ་དཔོན་གྱིས་ཁྲུས་ཆལ་དང་པོ་འབྱུང་ལྔ་དཱུར་ཝའི་པིར་གྱིས་ཨ་མྲྀ་ཏའི་ལས་སྔགས་བཟླ་བཞིན་དུ་མེ་ལོང་ལ་བྱུག །ཨོཾ་ཧཱུྃ་ཏྲཱཾ་ཧྲཱིཿཨཱཿ ཞེས་འབྲུ་མར་གྱིས་བསྐུ་མཉེ་བྱ། སྣུམ་
བསལ་བའི་ཕྱིར་ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ནེ་སྭཱཧཱ། ཞེས་ཤིང་ཤུན་ལྔའི་ཕྱེ་མས་དྲིལ་ཕྱིས་བྱ། བུམ་པ་དང་པོར། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཁྲུས་རས་ཀྱིས་ཕྱི་ཞིང༌། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཏྲཱཾ་ཧྲཱིཿཨཱཿཀཱ་ཡ་བི་ཤྭ་དྷ་ནེ་སྭཱ་ཧཱ། ཁྲུས་དང་པོ་དྲིའི་བུམ་པ་འདི་མདུན་དུ་བཟུང་ལ་འོག་མ་འོག་མ་རྣམས་ནས་ཐིགས་པ་རེ་བླུགས་སོ། །ཡང་ཁྲུས་ཆལ་སྔ་མ་ལྡབ་ལ་བསྐུ་མཉེ་དང་དྲིལ་ཕྱིས། རང་སྔགས་བཅས་ལ་འགྲེ། བུམ་པ་གཉིས་པས། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་གཉིས་པ་ཕྱིའི་བདུད་རྩི་ལྔ་བྱུག་ཅིང་བསྐུ་མཉེ། དྲིལ་ཕྱི་འགྲེ། བུམ་པ་གསུམ་པས། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང༌། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་ལྡབ་ཅིང༌། བསྐུ་མཉེ་དང༌། དྲིལ་ཕྱི་འགྲེ། བུམ་པ་བཞི་པས། འདི་ནི་ཚུལ་ཁྲིམས་རང་བཞིན་ཆུ། །
ཁྲིམས་འཆལ་དྲི་མ་སྦྱོང་མཛད་ཅིང༌། །ཚུལ་ཁྲིམས་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་གསུམ་པ་དྲི་བཟང་དང་ཉེ་ཤིང་བྱུག་ཅིང༌། བསྐུ་མཉེ་དང༌། དྲིལ་ཕྱི་འགྲེ། བུམ་པ་ལྔ་པས། འདི་ནི་བཟོད་པའི་རང་བཞིན་ཆུ། །ཁོང་ཁྲོའི་དྲི་མ་སྦྱོང་མཛད་ཅིང༌། །བཟོད་པ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང་། དེ་དག་སྐུ་ལ་སོགས། ཁྲུས་ཆལ་ལྔས། བསྐུ་མཉེ། དྲིལ་ཕྱི་འགྲེ། བུམ་པ་དྲུག་པས། འདི་ནི་བརྩོན་འགྲུས་རང་བཞིན་ཆུ། །ལེ་ལོའི་དྲི་མ་སྦྱོང་མཛད་ཅིང༌། །བརྩོན་འགྲུས་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཁྲུས་ཆལ་བཞི་པ་སྐྱུ་རུ་ར་སོགས་བྱུག་ཅིང༌། བསྐུ་མཉེ། དྲིལ་ཕྱི་འགྲེ། བུམ་པ་བདུན་པས། འདི་ནི་བསམ་གཏན་རང་བཞིན་ཆུ། །རྣམ་གཡེང་དྲི་མ་སྦྱོང་མཛད་ཅིང༌། །བསམ་གཏན་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང་དེ་དག་སྐུ་ལ་སོགས། ཁྲུས་ཆལ་ལྡབ་ཅིང༌། བསྐུ་མཉེ། དྲིལ་ཕྱི་འགྲེ། བུམ་པ་བརྒྱད་པས། འདི་ནི་ཤེས་རབ་རང་བཞིན་ཆུ། །ཤེས་འཆལ་དྲི་མ་སྦྱོང་མཛད་ཅིང༌། །
ཤེས་རབ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས། ཕྱི་ཞིང༌། དེ་དག་སྐུ་ལ་སོགས། ཡུལ་དུས་ཀྱིས་མ་ལྕོགས་ན་ཁྲུས་ཆལ་རྣམས་གཅིག་ཏུ་བསྡུས་པས་ཀྱང་རུང་ངོ༌། །སྔར་མདུན་དུ་བཟུང་བའི་བུམ་པ་བརྒྱད་ཀའི་ཆུ་གཅིག་ཏུ་བྱས་པས་བཀྲུ་ཞིང༌། སྐུ་མཆོག་རྣམ་དག་བལྟ་བས་མི་ངོམ་ལ། །ངོ་མཚར་སྐྱོན་བྲལ་མཁའ་དབྱིངས་ཉི་གསལ་འདྲ། །ཆོས་ཀྱི་སྐུ་ལ་བགྲེས་པ་མི་མངའ་ཡང༌། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །ཆུ་གཙང་སྨན་སྤོས་འོ་མ་འདག་ཆལ་ཆུས། །འགྲོ་བའི་ལུས་སེམས་སྡུག་བསྔལ་ནད་བསལ་ཏེ། །ཉེས་པའི་སྐྱོན་བྲལ་འགྲོ་བའི་ཡིད་འོང་བ། །དམ་པའི་སྐུ་མཆོག་བདག་གིས་ཐོབ་པར་ཤོག །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཙན་དན་སོགས་དྲི་ལྔ་དུང་ཞལ་དུ་གནས་པས་ཉེ་རེག་དང་ཐུགས་ཀར་བྱུགས་ལ། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱང་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཨོཾ་བཛྲ་གྷནྡྷེ་སྭཱ་ཧཱ། ན་བཟའ་དང་རྒྱན་འབུལ་ཞིང༌། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང༌། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཨོཾ་བཛྲ་ཝསྟྲ་ཡེ་པྲ་
ཏིཙྪ་སྭཱཧཱ། སྤོས་མར་གྱིས་བདུག །རྗེས་འབྲེལ་དུ་བཀྲ་ཤིས་ཀྱི་གླུ་གར་བྱ་བ་ནི། མེ་ཏོག་འཐོར་ཞིང་རོལ་མོའི་སྒྲ་སྣ་ཚོགས་དང་དབྱངས་སྙན་པོས། ༈ སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །རྐང་གཉིས་གཙོ་བོ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །ཞི་བ་ཆགས་བྲལ་ལྷ་མིའི་མཆོད་འོས་པ། །ཆོས་ལ་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅན་དེང་འདིར་བདེ་གྱུར་ཅིག །ཚོགས་ཀྱི་མཆོག་རབ་ལྷ་མིའི་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །དྲུག་པ་རྟེན་བསྐྱེད་པ་ནི། ཨོཾ་ཤུ་ནྱ་ཏཱས་མཚན་མའི་རྟོག་པ་བསལ། སྤྱི་ཁྱབ་ཏུ། སྒྲུབ་དཀྱིལ་གྱི་མདུན་བསྐྱེད་ལྟར་རམ། བྱེ་བྲག་ཏུ་བསྐྱེད་ན། ཕྱི་ནང་གི་ཆོས་ཐམས་ཅད་སྟོང་པ་ཆེན་པོའི་ངང་ལས་རབ་ཏུ་གནས་བྱའི་རྟེན་སྐུ་གཟུགས་དང་མཆོད་རྟེན་གཙུག་ལག་ཁང་དང་སྐྱེད་མོས་ཚལ་ལ་སོགས་པ་ཨོཾ་སཾ་ཨོཾ་ལས་སེང་གེས་བཏེགས་པའི་རིན་པོ་ཆེའི་ཁྲི་པཾ་ཨ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཨོཾ་ཛི་ན་ཛིག །ལཾ་དཱེ་ཁ་ར་ཏི་རྣམ་སྣང་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གསུམ་
འཁོར་ལོ་རྡོ་རྗེ་རིན་ཆེན། གཡོན་གསུམ་དྲིལ་བུ་པདྨ་རལ་གྲི་འཛིན་པ། སྤྱན་མ་དཀར་མོ་འཁོར་ལོ་དང་དྲིལ་བུ་འཛིན་པས་འཁྱུད་པའོ། །ལུང་གི་ཆོས་གསུང་རབ་ཡན་ལག་བཅུ་གཉིས་དགོངས་འགྲེལ་དང་བཅས་པའི་གླེགས་བམ་གྱི་རྣམ་པ་ཅན་རྣམས་ཧྲཱི་མཾ་ཧྲཱི་ལས་རྨ་བྱའི་ཁྲི་ལ་ཨ་པཾ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཨཾ་ཨཱ་རོ་ལིཀ །པཱཾ་རཱ་ག་ར་ཏི། སྣང་བ་མཐའ་ཡས་དམར་པོ་དམར་དཀར་སྔོ་བའི་ཞལ་གསུམ་ཕྱག་དྲུག་གིས་གཡས་གསུམ་པདྨ་རྡོ་རྗེ་འཁོར་ལོ། གཡོན་གསུམ་དྲིལ་བུ་རིན་ཆེན་རལ་གྲི་འཛིན་པ། གོས་དཀར་མོ་པདྨ་དང་དྲིལ་བུ་འཛིན་པས་འཁྱུད་པའོ། །རྟོགས་པའི་ཆོས་ས་དང་འབྲས་བུའི་ཡེ་ཤེས་ཐུགས་ཕྱག་མཚན་གྱི་བརྡ་དང་རྣམ་པར་གྲུབ་པ་ཧཱུྃ་གཾ་ཧཱུྃ་ལས་གླང་པོ་ཆེའི་ཁྲི་པཾ་ཨ་རཾ་ལས་སྣ་ཚོགས་པདྨ་དང་ཉི་ཟླ་བརྩེགས་པའི་སྟེང་དུ་ཧཱུྃ་བཛྲ་དྷྲིཀ་མཱུཾ་དྷཱ་ཏེ་ཤྭ་རཱི། མི་བསྐྱོད་པ་སྔོན་པོ་མཐིང་དཀར་དམར་བའི་ཞལ་གསུམ་ཕྱག་དྲུག་གིས། གཡས་གསུམ་རྡོ་རྗེ་འཁོར་ལོ་རིན་ཆེན། གཡོན་གསུམ་དྲིལ་བུ་པདྨ་རལ་གྲི། དབྱིངས་ཕྱུག་མ་སྔོན་མོ་རྡོར་དྲིལ་འཛིན་པས་འཁྱུད་པའོ། །དེ་བཞིན་དུ་རིན་པོ་ཆེའི་རྒྱན་ཆ་སོགས་ལ་རིན་འབྱུང་དང༌། གོ་ཆ་སོགས་ལ་དོན་གྲུབ་ཏུ་སྦྱར་བ་ཡོད་ཀྱང་སྐུ་གསུང་ཐུགས་རྟེན་ལ་འདིས་ཆོག་གོ །དེ་ཐམས་ཅད་ཀྱང་ཞི་བའི་ཚུལ་དགུ་དང་རིན་པོ་ཆེའི་རྒྱན་ཆ་བཅུ་གསུམ་གྱིས་མཛེས་པའི་མཚན་
དཔེའི་ལང་ཚོ་རབ་ཏུ་རྒྱས་ཤིང་འཁོར་འདས་ཐམས་ཅད་ཀྱི་སྤྱི་དཔལ་ཆེན་པོར་བཞུགས་པའོ། །དེ་ལྟར་དུ་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། བདག་དང་རྟེན་གྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་དུས་བཞིའི་དེ་བཞིན་གཤེགས་པ་མ་ལུས་ཤིང་ལུས་པ་མེད་པའི་ཡེ་ཤེས་ཀྱི་འཁོར་ལོར་བཛྲ་ས་མཱ་ཛཿ བདུན་པ་སྤྱན་དྲང་བ་ནི། རྡོ་རྗེ་བསྡུ་བའི་རྒྱ་དང་རྡོར་དྲིལ་སྤོས་བཅས། ན་མོ། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་ཅིང༌། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལས་མི་འདའ་ཐུགས་རྗེའི་དབང་གིས་ནི། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་བཤམས་པའི་གནས་འདིར་གཤེགས། །ཇི་ལྟར་སངས་རྒྱས་རྣམས་ནི་དགའ་ལྡན་ནས། །སྤྲུལ་པ་དམ་པ་ཏོག་དཀར་ལྷ་ཡི་བུས། །མི་ཕམ་མགོན་ལ་རྒྱལ་ཚབ་དབང་བསྐུར་ནས། །གཟིགས་པ་རྣམ་ལྔས་འཛམ་གླིང་ཀུན་གཟིགས་ཤིང༌། །གླང་ཆེན་ཐལ་དཀར་ལྟར་གཤེགས་ལྷུམས་ཞུགས་ལྟར། །རྡོ་རྗེ་རིན་ཆེན་པདྨའི་རིགས་མཆོག་དང༌། །ལས་ཀྱི་རིགས་དང་དེ་བཞིན་གཤེགས་པའི་རིགས། །ཕྱོགས་བཅུའི་རྒྱལ་བ་སྲས་དང་
བཅས་པ་རྣམས། །དུས་འདིར་བདག་གིས་དད་པས་སྤྱན་འདྲེན་ན། །རྟེན་མཆོག་འདི་ལ་བྱོན་པར་མཛད་དུ་གསོལ། །ན་མཿསརྦ་ཏ་ཐཱ་ག་ཏ་གུ་རུ་དེ་ཝ་ཌཱཀྐི་ནི། བཛྲ་ས་མ་ཡ་ཛཿ ཅེས་དང༌། སྙན་མནན་པ་ནི། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །ཐུགས་ལ་དགོངས་ཤིང་གནང་བར་མཛོད། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །པདྨ་ཀ་མ་ལཱ་ཡེ་སྟཾ་གྱིས་གདན་དང༌། ཨརྒྷཾ་སོགས་ཀྱིས་ཉེར་སྤྱོད་ཕུལ། བརྒྱད་པ་དགུག་གཞུག་བྱ་བ་ནི། རང་རང་གི་ཕྱག་རྒྱ་བཅས་ཏེ། ཨོཾ་བཛྲ་ཨངྐུ་ཤ་ཛཿ རྟེན་དམ་ཚིག་པའི་སྤྱི་བོར་དགུག །ཨོཾ་བཛྲ་པཱ་ཤ་ཧཱུྃ། རྟེན་ལ་བཅུག །ཨོཾ་བཛྲ་སྥོ་ཊ་བྃ་གྱིས་དབྱེར་མེད་དུ་བཅིངས། ཨོཾ་བཛྲ་ཨཱ་བེ་ཤ་ཧོཿ དགྱེས་པ་བསྐྱེད་དོ། །དགུ་པ་རྒྱས་གདབ་པ་ནི། རང་རང་གི་ཕྱག་རྒྱ་རྟེན་གྱི་གནས་གསུམ་དུ་བཞག་ལ། གནས་བྱའི་རྟེན་རྣམས་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་རྩིབས་བརྒྱད་པ་ཨོཾ་གྱིས་མཚན་པ། མགྲིན་པར་ཨཱཿ པདྨ་དམར་པོ་འདབ་མ་བརྒྱད་པ་ཨཱཿས་མཚན་པ། ཐུགས་ཀའི་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པས་རྒྱས་བཏབ་པར་གྱུར། ཧཱུྃ། དཔལ་ལྡན་སངས་རྒྱས་ཀུན་བདག་ཉིད། །རྡོ་རྗེ་མི་ཕྱེད་གསུམ་
གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །སྐུ་གསུང་ཐུགས་སུ་རྒྱས་གདབ་བོ། །རྡོ་རྗེ་རྩེ་ལྔ་པའི་ཕྱག་རྒྱས་གནས་གསུམ་དུ་གཏུག་ཅིང༌། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷ་ཝ་ཨཱཏྨ་ཀོ྅ཧཾ། དེ་བཞིན་དུ་ཀཱ་ཡའི་གནས་སུ་ཝཱཀྐ་དང༌། ཙིཏྟ་ཡང་སྦྱར་རོ། །བཅུ་པ་དབང་བསྐུར་བ་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས་གདན་གསུམ་ཚང་བའི་དབང་གི་ལྷ་མདུན་གྱི་ནམ་མཁར་སྤྱན་དྲངས་མཆོད་ཅིང་བསྟོད་ལ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་སྩལ་ཏུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། གཤེགས་པ་རྣམས་ཀྱིས་བུམ་པའི་ཆུས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་པའི་གླུ་དབྱངས་བརྗོད། ལྷ་མོ་རྣམས་ཀྱིས་གདུགས་དང་བ་དན་ལ་སོགས་པ་བསྒྲེངས་ཤིང་མཆོད་རྫས་ཀྱི་ཆར་འབེབས། ཁྲོ་བོ་རྣམས་ཀྱིས་བགེགས་བསྐྲད་པའི་ལས་མཛད་ནས་རྒྱལ་ཚབ་ཀྱི་ས་ལ་མངོན་པར་དབང་བསྐུར་བར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །རྣམ་བུམ་བཟུང་ལ། ཇི་
ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾཿཞེས་དབང་བསྐུར་བས་སྐུ་གང་དྲི་མ་དག་ཆུའི་དབའ་རླབས་སྤྱི་བོར་བརྟན་པ་ལས་རང་རང་གི་རིགས་ཀྱི་བདག་པོས་དབུ་བརྒྱན་པར་གྱུར། རིགས་དབང་ཐམས་ཅད་ཀྱི་བདག་ཉིད་དབུ་རྒྱན་བཟུང་ལ། དབང་བསྐུར་རྡོ་རྗེ་ཆེན་པོ་སྟེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཧཱུྃ་ཏྲཱཾ་ཧྲཱིཿཨཱཿ རཏྣ་མུ་ཀུ་ཊ་ཨ་བྷི་ཥིཉྩ་མཾ། ཞེས་དབང་བསྐུར། ཨོཾ་ཏྲཱུཾ། ཞེས་རྡོ་རྗེ་བཀང་ནན་གྱིས་གོ་བགོ། ཨོཾ་བཛྲ་ཏུཥྱ་ཧོཿ ཞེས་ཐལ་མོས་མཉེས་པར་བྱས། བཅུ་གཅིག་པ་མཆོད་བསྟོད་ནི། ལྷ་མོ་བཅུ་དྲུག་གིས་མཆོད། དེ་དག་བསྔགས་པ་མི་ཟད་སོགས་ཀྱིས་བསྟོད། བཅུ་གཉིས་པ་སྙན་གསན་དབབ་ཅིང་གཤེགས་གསོལ་བྱ་བ་ནི། པུས་མོ་གཡས་པའི་ལྷ་ང་ས་ལ་བཙུགས་རྡོ་རྗེ་དང་བཅས་པས་སྤོས་ཕོར་བཟུང༌། དྲིལ་བུ་བསིལ་བས། ཨོཾ་བཛྲ་ཛི་ཧཱཿ ལྕེ་ཧཱུྃ་ལས་སྐྱེས་པའི་རྡོ་རྗེར་མོས་ལ། ཨོཾ་ས་མ་ཡ་སྟྭཾ། ས་མ་ཡ་ཧོཿ ས་མ་ཡ་ཧཾཿ ཇི་ལྟར་སངས་རྒྱས་ཐམས་ཅད་ནི། །དགའ་ལྡན་དུ་ནི་གནས་པ་ན། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་འདིར་བཞུགས་ཤིག །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང༌། །སེམས་ཅན་
རྣམས་ཀྱི་དོན་སླད་དུ། །བདག་གི་འབྱོར་པ་ཉིད་ཀྱིས་ནི། །ཅི་འབྱོར་པ་ཡི་མཆོད་པ་རྣམས། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་པ་ལ། །རྗེས་སུ་བརྩེ་བས་དགོངས་སུ་གསོལ། །ཀུན་གྱིས་འདི་ལ་བྱིན་བརླབས་ཤིང༌། །དེ་ཉིད་དུ་ནི་བཞུགས་པར་རིགས། །ཞེས་ལན་གསུམ་གྱིས་གསོལ་བ་གདབ། མཆོད་ཕྲེང་ཀུན་ཏུ་རྒྱུ་བ་དང༌། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཡི་གེ་བརྒྱ་པ་ལན་གསུམ་གྱིས་བཤགས། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །སོགས་དང༌། སེམས་མ་རྡོ་རྗེ་མའི་རྒྱ་ཐུར་ལྡོག་སྤྱི་བོར་བསྟན་ལ། ཨོཾ་ཨཱཿཧཱུྃ་མུཾ། བཛྲོ་ཏིཥྛ། རྟེན་གྱི་ཡེ་ཤེས་པ་མདུན་གྱི་ནམ་མཁར་བཞུགས་པར་གྱུར་པ་ལ། སླར་ཡང་མཆོད་བསྟོད་བྱ། བཅུ་གསུམ་པ་རྟེན་དགབ་པ་ནི། སྐུ་གཟུགས་ཀྱི་གནས་གསུམ་དུ་དྲིའི་ཐིག་ལེ་བྱུག་ཅིང་ལས་སྔགས་བཟླ། རྡོ་རྗེས་རེག་ནས། བཛྲ་རཀྵ་ཧཾ། ཞེས་བསྲུང་བར་བྱ། གཙུག་ཏོར་འཁོར་ལོས་བསྒྱུར་བའི་དབྱིངས་སུ་སྲུང་བར་བསམ་ལ། ཨོཾ་བཛྲ་ཙཀྲ་ཝཱརྟི་བྷྲཱུཾ། ཞེས་མཚོན་བྱ་དར་སེར་པོས་དགབ། ཆོ་གའི་རྗེས་ཆོག་རྣམས་དང་ཆོས་སྐྱོང་ལ་གཏོར་མ་བསྔོ། འཇིག་རྟེན་པ་རྣམས་ལ་ཆ་གསུམ་སོགས་བྱ་ཞིང་ཐུན་མཚམས་ཀྱི་རྣལ་འབྱོར་ལ་འཇུག་གོ། །གཉིས་པ་དངོས་གཞི་ལ་རྣམ་གྲངས་བཅུ་བདུན་ལས། དང་པོ་དཀྱིལ་འཁོར་སྒྲུབ་མཆོད། གཉིས་པ་བུམ་སྒྲུབ། གསུམ་པ་བདག་འཇུག །བཞི་པ་སྤྱོད་པ། ལྔ་པ་བཀྲུ་ཕྱི་རྣམས་སྟ་གོན་བཞིན་ལས་
ཁྲུས་ཀྱི་བྱ་བ་ཉི་མ་འཆར་ཀ་དང་བསྒྲིག་གོ། །སྤྲོ་ན་འདིར་རིང་བསྲེལ་གཞུག་པའི་སྲོལ་ཡོད་དེ། དེ་བཞིན་གཤེགས་པའི་རིང་བསྲེལ་དངོས་སམ། ཡང་ན་སརྦ་བིདྱཱ་སྭཱ་ཧཱ་དང༌། རྟེན་འབྲེལ་སྙིང་པོ་གི་ཝཾ་དང༌། གུར་ཀུམ་བསྲེས་པས་བྲིས་ལ་སྐུ་གཟུགས་ཀྱི་དབུ་དང་མཆོད་རྟེན་གྱི་བྲེ་ལ་གདགས་པའམ་རྒྱབ་ཏུ་བྲིས་བ་གང་བདེ་བྱའོ། །དྲུག་པ་གསོལ་བ་གདབ་པ་ནི། དུལ་ཞིང་གུས་པས་ཚུལ་གྱིས་ལངས། སྤོས་དང་མེ་ཏོག །དད་པ་ནི་ཆོས་སྣང་བའི་སྒོ་སྟེ་དཀོན་མཆོག་གི་ཡོན་ཏན་རྗེས་སུ་དྲན་པས། གང་འདིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་བརྒྱན་པ། ཡོན་ཏན་ཐམས་ཅད་ཀྱི་མངའ་བདག་རྡོ་རྗེའི་རིགས་དང༌། རིན་པོ་ཆེའི་རིགས་དང༌། པདྨའི་རིགས་དང༌། ལས་ཀྱི་རིགས་དང༌། དེ་བཞིན་གཤེགས་པའི་རིགས་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ལྷ་དང་བཅས་པའི་འགྲོ་བ་མཐའ་དག་ལ་ཕན་པ་དང་བདེ་བའི་ཕྱིར་རྟེན་འདི་རྣམས་ལ་འབྱོན་པར་མཛད་དུ་གསོལ། ཞེས་མེ་
ཏོག་འཐོར་ཞིང་ཕྱག་འཚལ་བ་ལན་གསུམ། བདུན་པ་སེམས་བསྐྱེད་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང༌། །བརྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་དུ་གྱུར། །གླིང་དོན་གཉེར་ལ་གླིང་དང་ནི། །གནས་མལ་འདོད་ལ་གནས་མལ་དང༌། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཡིད་བཞིན་ནོར་དང་བུམ་པ་བཟང༌། །རིག་སྔགས་གྲུབ་དང་སྨན་ཆེན་དང༌། །དཔག་བསམ་གྱི་ནི་ཤིང་དག་དང༌། །ལུས་ཅན་རྣམས་ཀྱི་འདོད་འཇོར་གྱུར། །ས་སོགས་འབྱུང་བ་ཆེན་པོ་དང༌། །ནམ་མཁའ་བཞིན་དུ་རྟག་པར་ཡང༌། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་རྒྱུར་ཡང་ཤོག །འགྲོ་བ་ནད་པ་ཇི་སྲིད་དུ། །ནད་གསོས་གྱུར་གྱི་བར་དུ་ནི། །སྨན་དང་སྨན་པ་ཉིད་དག་དང༌། །དེ་ཡི་ནད་གཡོག་བྱེད་པར་ཤོག །ཟས་དང་སྐོམ་གྱི་ཆར་ཕབ་སྟེ། །བཀྲེས་དང་སྐོམ་པའི་སྡུག་བསྔལ་བསལ། །མུ་གེའི་བསྐལ་པ་བར་
མའི་ཚེ། །བདག་ནི་ཟས་དང་སྐོམ་དུ་གྱུར། །སེམས་ཅན་ཕོངས་ཤིང་དབུལ་བ་ལ། །བདག་ནི་མི་ཟད་གཏེར་གྱུར་ཏེ། །ཡོ་བྱད་མཁོ་དགུ་སྣ་ཚོགས་སུ། །མདུན་དུ་ཉེ་བར་གནས་གྱུར་ཅིག །ལུས་དང་དེ་བཞིན་ལོངས་སྤྱོད་དང༌། །དུས་གསུམ་དགེ་བ་ཐམས་ཅད་ཀྱང༌། །སེམས་ཅན་ཀུན་གྱི་དོན་བསྒྲུབ་ཕྱིར། །ཕོངས་པ་མེད་པར་གཏང་བར་བྱ། །ཞེས་མེ་ཏོག་འཐོར། བརྒྱད་པ་རྟེན་བསྐྱེད་པ་དང༌། དགུ་པ་ཡེ་ཤེས་སྤྱན་དྲངས་པ་དང༌། བཅུ་པ་དགུག་གཞུག་རྣམས་སྟ་གོན་བཞིན་ནོ། །བཅུ་གཅིག་པ་དབང་བསྐུར་བ་ནི། དཀྱིལ་འཁོར་ཆེན་པོ་གང་ལ་བརྟེན་པ་དེའི་དབང་ཆོས་ལས་བྱུང་བ་ལྟར་ཤེས་པར་བྱ་བའམ། མ་ནུས་ན། རང་གི་སྙིང་གའི་ས་བོན་ལས་འོད་ཟེར་འཕྲོས་པས་གདན་གསུམ་ཚང་བའི་དབང་གིས་ལྷ་མདུན་གྱི་ནམ་མཁར་སྤྱན་དྲངས་མཆོད་ཅིང་བསྟོད་ལ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་སྩལ་ཏུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་པའི་དགོངས་པ་མཛད། གཤེགས་མ་རྣམས་ཀྱིས་བུམ་པའི་ཆུས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་པའི་གླུ་དབྱངས་བརྗོད། ལྷ་མོ་རྣམས་ཀྱིས་གདུགས་དང་བ་དན་ལ་སོགས་པ་བསྒྲེངས་ཤིང་མཆོད་རྫས་ཀྱི་ཆར་འབེབས། ཁྲོ་བོ་རྣམས་
ཀྱིས་བགེགས་བསྐྲད་པའི་ལས་མཛད་ནས་རྒྱལ་ཚབ་ཀྱི་ས་ལ་མངོན་པར་དབང་བསྐུར་བར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །རྣམ་རྒྱལ་བུམ་པ་བཏེགས་ལ། དབང་བསྐུར་རྡོ་རྗེ་ཆེན་པོ་སྟེ། །ཁམས་གསུམ་པ་ཡིས་ཕྱག་བྱས་པས། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཧཱུྃ། གཟུགས་ཀྱི་ཕུང་པོ་རྣམ་དག་ཅིང༌། །ཉོན་མོངས་ཞེ་སྡང་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱི། །དཔལ་ལྡན་སྐུ་ཡི་དབང་བསྐུར་རོ། །ཨོཾ་ཧཱུྃ་ཏྲཱཾ་ཧྲཱིཿཨཱཿབཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། དབུ་རྒྱན་བཟུང་ལ། ཧཱུྃ། ཚོར་བའི་ཕུང་པོ་རྣམ་དག་ཅིང༌། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱི། །དཔལ་ལྡན་ཡོན་ཏན་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཏྲཱཾཿ རྡོ་རྗེ་བཟུང་ལ། ཧཱུྃ། འདུ་ཤེས་ཕུང་པོ་རྣམ་དག་ཅིང༌། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱི། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨབྷི་ཥིཉྩ་ཧྲཱིཿ དྲིལ་བུ་བཟུང་ལ། ཧཱུྃ། འདུ་བྱེད་ཕུང་པོ་རྣམ་དག་ཅིང༌། །ཉོན་མོངས་ཕྲག་
དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱི། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ རྡོར་དྲིལ་སྤྱི་བོར་འཛིན་པས། ཧཱུྃ། རྣམ་ཤེས་ཕུང་པོ་རྣམ་དག་ཅིང༌། །ཉོན་མོངས་གཏི་མུག་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱི། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བུདྡྷ་ཨ་བྷི་ཥིཉྩ་ཨོཾ། །ཞེས་རིག་པའི་དབང་ལྔ་དང༌། རྡོ་རྗེ་སློབ་དཔོན་གྱི་དབང་ནི། གནས་བྱའི་ལྷ་ཐམས་ཅད་རང་རང་གི་རིགས་ཀྱི་ཡུམ་དང་འཁྱུད་རྒྱ་བྱས་ནས། དམ་ཚིག་གསུམ་དང་དུ་བཞེས་པར་བསམ། ཨོཾ་ཨཱཿཧཱུྃ། ཐབས་དང་ཤེས་རབ་དབྱེར་མེད་ཅིང༌། །སྣང་སྟོང་དབྱེར་མེད་འདི་བཟུང་ལ། །སྟོང་ཉིད་སྙིང་རྗེའི་སྙིང་པོ་ཡི། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་བཟུང་བར་མཛོད། །ཨོཾ་མ་ཧཱ་བཛྲ་ཧཱུྃ། ཞེས་རྡོ་རྗེ་གསོར། ཨོཾ་བཛྲ་གཎྜེ་ཨ། ཞེས་དྲིལ་བུ་འཁྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་འཁྱུད་རྒྱ་བྱ། སླར་ཡང་མཐའ་རྟེན་བུམ་པའི་ཆུས་དབང་བསྐུར་བ་ནི། ནམ་མཁར་བཞུགས་པའི་དེ་བཞིན་གཤེགས་པ་སྲས་དང་བཅས་པ་རྣམས་དབང་གི་བྱ་བ་ལ་དགྱེས་པས་རིན་པོ་ཆེའི་བུམ་པ་བདུད་རྩིས་གང་བ་ཡོད་པར་བཟུང་སྟེ་དབང་བསྐུར་བར་གྱུར། བཀྲ་ཤིས་ཆེན་པོའི་བུམ་པ་ནི། །བདེ་གཤེགས་བཞུགས་པའི་ཕོ་བྲང་སྟེ། །དཀྱིལ་འཁོར་རྫོགས་པར་གྱུར་པ་ཡི། །དབང་མཆོག་
དེ་ཡང་སྦྱིན་པར་བྱ། །ཨོཾ་རཏྣ་ཀརྨ་བྷུདྡྷ་ཀ་ལ་ཤ་ཨབྷི་ཥིཉྩ་ཧཱུྃ། ཞེས་དབང་བསྐུར་བས་སྐུ་གང༌དག་བྱ་མ་ལུས་པ་སྦྱངས། ཆུའི་ལྷག་མ་སྤྱི་བོར་འཁྱིལ་བ་ལས་རང་རང་གི་རིགས་ཀྱི་བདག་པོས་དབུ་བརྒྱན། ནམ་མཁའི་རྡོ་རྗེ་དེ་བཞིན་གཤེགས་པ་ཐམས་ཅད་ཀྱང་ཡེ་ཤེས་སེམས་དཔའི་རང་བཞིན་དུ་བརྟེན་ལ་འཐིམ་པར་གྱུར། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་མེ་ཏོག་འཐོར། གསང་དབང་ནི། དཀྱིལ་འཁོར་གྱི་བདག་པོ་ཡབ་ཡུམ་གྱི་སྦྱོར་མཚམས་ནས་ཉི་ཟླ་བྱང་ཆུབ་སེམས་ཀྱི་སྤྲིན་རྡོ་རྗེའི་ལྗགས་ལ་སྤྲོ་བར་མོས་ལ། ཧཱུྃ། དགའ་བ་བྱང་ཆུབ་སེམས་ཆེན་པོ། །ཀུན་ཏུ་ཚིམས་པར་བྱེད་པ་ཡི། །དཀར་དམར་ལྷག་པའི་བྱང་ཆུབ་སེམས། །དབང་ཐོབ་ཁྱེད་ཀྱི་ལྕེ་ལ་བཞག །ཨ་ཧོ་མ་ཧཱ་སུ་ཁ་ཧོཿ ཤེས་རབ་ཡེ་ཤེས་ནི། འཁོར་ལོའི་དབང་ཕྱུག་གི་ཐུགས་ཀ་ནས་ཐར་པ་བསྟེན་པ་ལ་བསྐུལ་བའི་རིག་མ་གཟུགས་དང་ལང་ཚོ་དཔལ་གྱིས་འབྱོར་བ་དུ་མ་བྱོན་ནས་གནས་བྱའི་ལྷ་ཚོགས་རྣམས་ཀྱི་པང་དུ་བྱོན་པས་དགའ་བཞིའི་ཡེ་ཤེས་ལ་རོལ་པ་མཛད་པར་བསམ་སྟེ། རིག་ཙཀ་གམ། དྲིལ་བུ་བཟུང་ལ། ཁྱེར་ཅིག་ཁྱེར་ཅིག་བདེ་བ་ཅན། །ཤེས་རབ་དམ་པ་འདི་ཡིན་ནོ། །ཁྱོད་ཀྱིས་ཡེ་ཤེས་སྐྱེད་པར་བྱེད། །འདི་ལ་རྟག་ཏུ་རོལ་མོ་གྱིས། །ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཎ་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། དབང་བཞི་པ་ནི།
རང་བཞིན་མེད་པའི་བདག་ཉིད་ཆེན་པོ་བྱང་ཆུབ་སེམས་ཀྱི་དབང་ལ་བསྐུར་བྱ་སྐུར་བྱེད་ཀྱིས་རྒྱུ་འབྲས་དག་པར་བསམ་ལ། ཆོས་རྣམས་ཐམས་ཅད་ནམ་མཁའི་ཁམས། །དངོས་པོ་མཚན་མ་ཀུན་ལས་འདས། །ནམ་མཁའ་བཞིན་དུ་ཡེ་གནས་ལ། །དེ་ལ་མཁས་པས་བཅོས་སུ་མེད། །ཅེས་མཉམ་པར་གཞག །བཅུ་གཉིས་པ་མཆོད་པ་ནི། རྡོ་རྗེ་ལྷ་མོ་བཅུ་དྲུག་གིས་མཆོད། བཅུ་གསུམ་པ་བསྟོད་པ་ནི། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌སོགས་དང༌། བརྗོད་མེད་ཤེས་རབ་མི་གཡོ་ཆོས་ཀྱི་སྐུ་སོགས། དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །ཅེས་སོ། །བཅུ་གསུམ་པ་དབང་པོའི་སྐྱོན་བསལ་བ་ནི། དངུལ་སྣོད་དུ་མར་དཀར་དང་སྦྲང་རྩི། ཀ་ར། ནིར་མ་ལི་ལ་སོགས་པའི་མིག་སྨན་སྦྱངས་པ་གསེར་ཐུར་གྱིས་བླངས་པ་ཐོགས་ དཀྱིལ་འཁོར་གྱི་རྡུལ་ཚོན་ལས་ཅུང་ཟད་བླང་བའང་ཡོད། ལ། ཇི་ལྟར་མིག་མཁན་རྒྱལ་པོས་འཇིག་རྟེན་གྱི། །རབ་རིབ་གསེར་གྱི་ཐུར་མས་བསལ་བ་ལྟར། །སེམས་ཅན་རྣམས་ལ་གཟིགས་པ་ལྷུར་མཛད་ཕྱིར། །ཡེ་ཤེས་སྤྱན་མཆོག་སྲི་ཞུས་དབྱེ་བར་བྱ། །ཨོཾ་ཙཀྵུཿཙཀྵུཿས་མནྟ་ཙཀྵུ་བི་ཤྭ་དྷ་ནི་སྭཱ་ཧཱ། ལན་གསུམ། རྣ་དྲུད་ཐོགས་ལ། འོན་པ་ལྟ་བུའི་འགྲོ་བ་རྣམས། །ཆོས་ཀྱི་དུང་
སྒྲས་སད་པའི་ཕྱིར། །རྒྱལ་བའི་སྙན་ནི་དབྱེ་བགྱིས་པས། །ལྷ་ཡི་རྣ་བ་ཐོབ་པར་ཤོག །ཨོཾ་དྭཱི་བྱ་ཀརྣ་ཡ་སྭཱ་ཧཱ། རྨང་གཟེར་ཐོགས་ལ། གཟུང་འཛིན་དྲི་ཡི་བཞོན་པ་ལ། །བླང་དོར་ཆགས་པའི་འགྲོ་བ་རྣམས། །འཕགས་པའི་ཚུལ་ཁྲིམས་དྲི་བསུང་ལ། །སྤྱོད་ཕྱིར་ཤངས་ནི་དབྱེ་བར་བྱ། །ཨོཾ་དྭཱི་བྱ་གྷཱ་ཎཱ་ཡེ་སྭཱ་ཧཱ། ཐུར་དཔྱད་ཐོགས་ལ། འགྲོ་ཀུན་བརྗོད་པ་རྣམ་དག་པ། །རྡོ་རྗེའི་ལྗགས་ལ་དབང་ཐོབ་ཕྱིར། །ཡེ་ཤེས་ཞལ་མཆོག་དབྱེ་བགྱིས་པས། །ཆོས་ཀྱི་རོ་ཡིས་ཚིམ་པར་ཤོག །ཨོཾ་དྭཱི་བྱ་མུ་ཁ་ཡ་སྭཱ་ཧཱ། ཚེམས་ཤིང་ཐོགས་ལ། མཚན་དཔེས་འཁྱུད་པའི་ཐགས་བཟང་ཚེམས། །ཉེས་སྐྱོན་དྲི་ཡིས་མ་གོས་ཀྱང༌། །མྱུ་གུ་གསར་པའི་ཚེམས་ཤིང་འདྲིས། །བཀུར་སྟི་མཆོག་ལ་བརྩོན་པར་བགྱི། །ཨོཾ་དྭཱི་བྱ་དནྟྲ་ཡ་སྭཱ་ཧཱ། ཞེས་དང༌། དེ་ལ་འདོད་ཡོན་ལྔས་མཆོད་པ་ནི། ཨོཾ་རཱུ་པ་པྲ་ཏིཙྪ་ཨཱཿཧཱུྃ། ཤཔྟ། གནྡྷེ། རཱ་ས། པརྴེ་པྲ་ཏཱིཙྪ་ཨཱཿཧཱུྃ། བཅུ་བཞི་པ་རྟེན་བསྒྱུར་བ་ནི། སློབ་དཔོན་གྱིས་རྡོ་རྗེ་དང་བཅས་པའི་ཐལ་མོས་རྟེན་ལ་རེག་ཅིང་སེ་གོལ་གྱི་སྒྲས་མཚོན་པ་གནས་བྱའི་སྔགས་དང༌། ཨོཾ་ཨཱཿཧཱུྃ་སྭཱ་ཧཱ། ལན་གསུམ་བརྗོད་ལ། རིགས་ཀྱིས་མཚོན་པའི་ལྷ་རྣམས་ཡོངས་སུ་གྱུར་པ་ལས་སྐུ་གསུང་ཐུགས་ཀྱི་རྟེན་སོ་སོའི་རྣམ་པར་གྱུར། ཞེས་བརྗོད། བཅོ་ལྔ་པ་རབ་ཏུ་གནས་པ་ནི། རྟེན་ལ་གཟུངས་ཐག་
བཏགས་པའི་སྣེ་མོ་སློབ་དཔོན་གྱིས་བཟུང་ལ། གནས་བྱའི་རྟེན་རྣམས་ཀྱི་ཐུགས་ཀར་ཟླ་བ་ལ་གནས་པའི་སྔགས་ཕྲེང་འཁོར་བའི་འོད་ཟེར་གྱིས་ཕྱོགས་བཅུའི་སངས་རྒྱས་སྲས་དང་བཅས་པ་རྟེན་སོ་སོའི་རྣམ་པར་བྱོན་ནས་དེ་ལ་བཞུགས་པར་གྱུར། སྐུ་གཟུགས་ལ་སུ་པྲ་ཏིཥྛ་དང༌། མཆོད་རྟེན་དང་གཙུག་ལག་ཁང་ལ། ཨོཾ་ཧཱུྃ་ཧྲཱིཿབྷུ་ཁཾ་བཛྲཱི་བྷ་ཝ་དྲྀ་ཌྷ་ཏིཥྛ་བྷུ་ཁཾ་སྭཱ་ཧཱ། གསུང་རྟེན་ལ་གཉིས་ཀ་དང༌། ཐུན་མོང་དུ། རྟེན་འབྲེལ་སྙིང་པོ་ཅི་མང་བཟླ། བྲིས་སྐུ་ཡིན་ན། ཨོཾ་སརྦ་བིདྱཱ་སྭཱ་ཧཱ། ལ་སོགས་པའི་རྒྱབ་ཡིག་གདབ། རྗེས་འབྲེལ་དུ་ཤིས་པ་བརྗོད་པ་ནི། སྔར་གཟུངས་བུམ་གྱི་ཆུས་བྲན་པའི་མེ་ཏོག་འཐོར་ཞིང༌། ༈ བྱང་ཆུབ་སྙིང་པོར་གཤེགས་པ་ན། །ས་རྣམས་དྲུག་པོ་གཡོས་གྱུར་ཞིང༌། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ་ལེགས་མཛད་པར་གྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུང་ཞིང༌། །ཐུབ་པའི་སྙན་པ་གང་བྱུང་དེས། །ཁྱོད་ལ་བདེ་ལེགས་མཛད་པར་གྱུར། །ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཚོགས་ཀུན་དབང་དུ་མཛད་པ་དེས། །ཁྱོད་ལ་བདེ་ལེགས་མཛད་པར་གྱུར། །ཞེས་དང༌། ན་མོ་རཏྣཱ་ཏྲ་ཡཱ་ཡ། ཡེ་དྷརྨཱ་ཧེ་ཏུ་སོགས་བཟླ། བཅུ་དྲུག་པ་གསོལ་བ་གདབ་པ་ནི། མེ་ཏོག་དམ་པ་ཕྲེང་བ་དམ་པ་དང༌། །སིལ་སྙན་རྣམས་དང་སོགས་ཤློ་ཀ་གཉིས་པོས་
མཆོད་དེ། རྟེན་གྱི་ཁྲིའམ། དེ་ལ་མེ་ཏོག་གི་ཕྲེང་བ་བཏགས་པ་ནས་བཟུང་སྟེ། ཐལ་མོ་སྦྱར་བས་བཏུད་དེ། ཇི་སྲིད་ས་ཆུ་མེ་དང་ནི།།རླུང་གིས་བསྐལ་པས་འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། །འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་དང༌། །མཆོག་རྣམས་ལེགས་པར་སྩལ་ཏུ་གསོལ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་ཡང་སྐུ་གསུང་ཐུགས་ཀྱི་རྟེན་འདི་རྣམས་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་ཏུ་གསོལ། ཞེས་ལན་གསུམ་གྱིས་གསོལ་བ་བཏབ། བཅུ་བདུན་པ་མངའ་དབུལ་ལ། སྤྱི་དང་བྱེ་བྲག་གཉིས་ལས། དང་པོ་ལ་མཆོད་པ་མངའ་དབུལ་བ་ནི། ཐུབ་དབང་མཆོད་གནས་མཆོག་
ལ་ཡིད་འོང་བའི། །མེ་ཏོག་མནྡ་ར་དང་པདྨ་དང༌། །ཨུཏྤལ་ལ་སོགས་དྲི་ཞིམ་ཐམས་ཅད་དང༌།། ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད། །སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི།།བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞལ་ཟས་བཟའ་བཏུང་སྣ་ཚོགས་བཅས་པ་ཡི།།ལྷ་བཤོས་རྣམས་ཀྱང་དེ་ལ་དབུལ་བར་བགྱི། །གསེར་གྱི་པདྨ་ཚལ་དུ་དངར་བ་ཡི། །རིན་ཆེན་སྒྲོན་མེ་རྣམས་ཀྱང་དབུལ་བར་བགྱི། །དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་ཚིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་དང༌། དེ་བཞིན་དུ་བླ་ན་ཡོད་པའི་མཆོད་པ་རྣམས་བྲིས་འབུར་གྱི་རྣམ་པར་བཀོད་པ་འབུལ་བ་ལས། མཎྜལ་དབུལ་རྗེས། དེའི་བཀོད་པ་གླིང་བཞི་རི་རབ་བཅས་ཕུལ་ལ། ཁོར་ཡུག་རིར་བཅས་བྱེ་བ་ཕྲག་བརྒྱའི་ཞིང༌། །མ་ལུས་ཡོངས་བཀང་འདོད་དགུས་འབྱོར་པ་དང༌། ཕྱོགས་བཅུའི་ཞིང་ཁམས་རྒྱ་མཚོ་ཇི་སྙེད་ཀུན། །བློ་ཡིས་བླངས་ཏེ་ཐུབ་དབང་སྲས་བཅས་མཆོད། །སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་བྲལ་རྒྱུ་སྐར་ཕྲེང་བས་བསྐོར་བ་དང༌། །ཉིན་བྱེད་འོད་སྟོང་དྲྭ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །ཅེས་དང༌། རིན་ཆེན་སྣ་བདུན་རྫས་བརྒྱད། ཉེ་བའི་རིན་ཆེན་བདུན་སོགས་ཕུལ་ལ། ༈
བུམ་བཟང་དཔག་བསམ་ཤིང་དང་འདོད་འཇོའི་བ། །རྒྱལ་སྲིད་བདུན་དང་བཀྲ་ཤིས་རྫས་བརྒྱད་དང༌། །ཉེ་བའི་རིན་ཆེན་བདུན་སོགས་རྒྱ་ཆེ་བས། །ཡོན་གནས་དམ་པ་ཐུགས་རྗེ་ཆེ་རྣམས་མཆོད། །རྟགས་བརྒྱད་ཕུལ་ལ། ༈ རིན་ཆེན་གདུགས་མཛེས་གསེར་གྱི་ཡུ་བ་ཅན། །ཁོར་ཡུག་རྒྱན་གྱི་རྣམ་པ་ཡིད་འོང་ལྡན། །དབྱིབས་ལེགས་ལྟ་ན་སྡུག་པའི་བཀྲ་ཤིས་རྟགས། །རྟག་ཏུ་ཐུབ་དབང་རྣམས་ལ་དབུལ་བར་བགྱི། །ཞེས་དང༌། ཏིང་ངེ་འཛིན་གྱིས་མཆོད་པ། ༈ ལྷ་སོགས་འཇིག་རྟེན་ཀུན་ན་ཡིད་འོང་བའི། །གཞལ་མེད་ཁང་བརྩེགས་རིན་ཆེན་དྲྭ་བ་ཅན།།གླུ་གར་སིལ་སྙན་བསྟོད་དབྱངས་ཆར་འབབ་ཅིང༌། །རྒྱན་མཆོག་བརྒྱ་ཕྲག་མངའ་བ་རྣམས་ཀྱིས་མཆོད། །རིན་ཆེན་རི་བོ་ནགས་ཚལ་པདྨོའི་ཚལ། །ངང་མོའི་འགྲོས་ཀྱིས་གཉེར་བ་དེ་དག་དང༌། །སྨན་སོགས་དྲི་ཞིམ་དད་ལྡན་དཔག་བསམ་ཤིང༌། །མེ་ཏོག་འབྲས་བུས་དུད་པའི་ཚོགས་ཀྱིས་མཆོད། །འདབ་སྟོང་གཡོ་བས་བུང་བ་བཟུང་བ་ཡི། །ལག་པའི་གདུ་བུ་ཀུ་མུ་དས་མཚན་ཞིང༌། །སྤྲིན་བྲལ་ཉི་ཟླའི་ཟེར་གྱིས་རབ་ཕྱེ་བའི། །ཨུཏྤལ་ལ་སོགས་ཡིད་འོང་རྣམས་ཀྱིས་མཆོད། །ཙན་དན་བསིལ་བའི་ཁ་ཡི་སྦུབས་བསྐྱོད་པའི། །དྲི་ཞིམ་བསེར་བུ་བདེ་བའི་ངད་རྣམས་དང༌། །ཕུག་དང་བྲག་རིའི་སྨན་ལྗོངས་ཉམས་
དགའ་བ། །ཆུ་བསིལ་རྫིང་བུས་གང་བ་རྣམས་ཀྱིས་མཆོད། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པའི། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་དབང་སྐྱེས་ཀྱི་མཆོག །སྲས་དང་བཅས་པ་རྣམས་ལ་འབུལ་ལགས་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེར་དགོངས་འདི་དག་བཞེས་སུ་གསོལ། །ཞེས་སོ། །གཉིས་པ་བྱེ་བྲག་ནི་སྐུ་གསུང་ཐུགས་ཀྱི་རྟེན་སོ་སོ་ལ་འབུལ་བ་ལས། ཆགས་བྲལ་གྱི་རྣམ་པ་ཅན་ལ། འདྲེག་སྤྱད་ཕུལ་ལ། ༈ གཞོན་ནུ་ལང་ཚོ་གསར་བའི་མཐོང་མཐིང་ཡང༌། །མཆོད་རྟེན་རྣམ་དག་དྲུང་དུ་སྤངས་གྱུར་པས། །ཁྱིམ་པའི་རྟགས་ལས་གྲོལ་བའི་འདྲེག་སྤྱད་ནི། །ཕུལ་བས་འགྲོ་ཀུན་ཁྱིམ་ལས་དབུགས་འབྱིན་ཤོག །ཨོཾ་སརྦ་ཤོ་དྷ་ན་ཥ་ཙྪེ་ད་ཧཱུྃ། ཆོས་གོས་གསུམ་ཕུལ་ལ། ༈ མཚན་བཟང་སྐུ་ཡི་ལྗོན་པས་ངུར་སྨྲིག་གི། །རྒྱལ་མཚན་གསལ་པའི་ལྷབ་ལྷུབ་གཡོ་བ་ཅན། །བསླབ་གསུམ་དོན་དང་ལྡན་པའི་ཆོས་གོས་གསུམ། །ཕུལ་བས་འགྲོ་རྣམས་བརྟུལ་ཞུགས་དེར་གནས་ཤོག །ཨོཾ་དྭཱི་བྱ་ཝསྟྲ་པ་ཎ་ཡེ་སྭཱ་ཧཱ། ཆུ་ཚགས་དང་ལྷུང་བཟེད་སོགས་ཕུལ་ལ། ༈ དྲང་སྲོང་མཆོག་ལ་འོས་པའི་ཉེར་སྤྱད་ནི། །བཻ་ཌཱུརྱ་ཡི་ལྷུང་བཟེད་དམ་པ་དང༌། །ཆུ་ཚགས་ལ་སོགས་ཕུལ་བས་འགྲོ་བ་ཀུན། །སྦྱངས་པའི་ཡོན་ཏན་བཅུ་གཉིས་ཐོབ་པར་
ཤོག །ཨོཾ་ཨུ་པ་ཡོ་ཛྱ་ཏེ་པཱ་རིསྐཱ་རཱ་ཡ་སྭཱ་ཧཱ། ལོངས་སྐུའི་རྣམ་པ་ཅན་ལ། དུང་གི་སོ་མངས་ཕུལ་ལ། ༈ མཐོན་མཐིང་གཡས་སུ་འཁྱིལ་བའི་ཟུར་ཕུད་ཅན། །རིན་ཆེན་ནོར་བུའི་ཏོག་གིས་ལྷམ་པར་མཛེས། །སྐྱེ་དགུ་ཀུན་གྱིས་བལྟ་བས་མི་ངོམས་དེར། །སྐྱང་ནུལ་ཆོ་ག་གསར་པས་སྲི་ཞུ་བགྱིད།།ཨོཾ་ཀཱ་མ་མ་ལ་དྷ་ར་ལི་ཧཱུྃ། ཁ་དོག་སྣ་ཚོགས་པའི་ན་བཟའ་ཕུལ་ལ། ༈ གང་ལ་རེག་ན་འཇམ་པའི་ལྷ་རྫས་ཀྱང༌། །དབང་པོའི་ཚོན་གྱིས་འཁྱུད་པའི་སྨིག་སྒྱུ་ཡིས། །བར་སྣང་ཟ་འོག་གཅལ་དུ་བཀྲམ་པ་ལྟར། །འབར་བས་འགྲོ་ཀུན་བཟོད་པའི་གོས་ཐོབ་ཤོག །ཨོཾ་བཛྲ་ཝསྟྲ་ཡེ་སྭཱ་ཧཱ། རིན་པོ་ཆེའི་རྒྱན་སྣ་ཚོགས་ཕུལ་ལ། ༈རང་བཞིན་བལྟ་ན་སྡུག་པའི་མཚན་དཔེ་ལ། །བཅོས་མའི་རྒྱན་གྱིས་བརྒྱན་པར་མ་འཚལ་ཡང༌། །དོ་ཤལ་དཔུང་རྒྱན་སེ་མོ་དོ་ལ་སོགས། །ཁ་སྦྱོར་བདུན་གྱི་བདག་ཉིད་མཚོན་ཕྱིར་ཕུལ།། ཨོཾ་རཏྣ་ཨ་ལངྐཱ་རཱ་ཧཱུྃ། དེ་བཞིན་དུ་སོ་མངས། ཁབ་སྙུང༌། ཆུ་གྲི་སོགས་ཕུལ་ལ། ༈ བཟོ་གནས་ལ་སོགས་རིག་པའི་འཁྱུད་དཔྱད་ཀྱིས། །འཇིག་རྟེན་རྗེས་སུ་འཛིན་པ་སྟོན་པའི་ཕྱིར། །རྣམ་པ་སྣ་ཚོགས་ཉེར་སྤྱད་འདི་ཕུལ་བས། །སེམས་ཅན་རྨོངས་དང་ནད་ལས་ཐར་བར་ཤོག །ཨོཾ་ཨུ་པ་ཡོ་ཛྱ་པཱ་རིསྐཱ་རཱ་ཡ་སྭཱ་ཧཱ། ཁྲོ་བོའི་སྐུ་རྣམས་ལ་དུར་ཁྲོད་ཆས་བརྒྱད་ཕུལ་ལ། ༈ འཇིག་རྟེན་ན་ནི་
དཔའ་བོ་ཡི། །མི་བསྲུན་ཚར་གཅོད་གོས་གྱོན་བཞིན།། སྔོན་ཚེ་དཔལ་ཆེན་ཧེ་རུ་ཀས། །རུ་ཏྲ་བསྒྲལ་བའི་དཔའ་རྟགས་ནི། །ཐབས་མཁས་ཕྲིན་ལས་ཞིང་ཆེན་དང༌། །ཁྱབ་པ་ཐུགས་རྗེ་གླང་པོའི་ཀོ། །དབང་སྡུད་སྟག་ལྤགས་ཤམ་ཐབས་གོས། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །༈རྒྱལ་རིགས་དཀར་ཁྲའི་དབུ་རྒྱན་དང༌། །རྗེ་རིགས་སེར་ཁྲའི་སྙན་ཆ་སྟེ། །བྲམ་ཟེ་དམར་སྐྱའི་མགུར་ཆུ་ཅན། །དམངས་རིགས་ནག་ཁྲའི་སྐ་རགས་དང༌། །གདོལ་བ་ལྗང་ནག་གདུ་བུའི་རྒྱན། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །ཐོད་པ་སྐམ་པོའི་དབུ་རྒྱན་དང༌།།རློན་པའི་སེ་རལ་ཚལ་བུ་ནི། །དཔུང་རྒྱན་དག་ཏུ་དཔྱངས་པའོ། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །དཔྲལ་བར་ཐལ་ཆེན་ཚོམ་བུ་དང༌། །སྨིན་དབྲག་རཀྟའི་ཐིག་ལེ་སྟེ། །ཨོ་ཀོར་ཞག་གི་ཟོ་རིས་གདབ། །འདི་ཡང་དཔལ་གྱི་དམ་ཚིག་སྟེ། །འདི་ཡང་རྟགས་ཀྱི་ཕྱག་རྒྱར་ལོངས། །དེ་ནས་གདན་སོགས་ཕུལ་ལ། ༈ པད་ཉི་དྲེགས་པ་ཁྱོ་ཤུག་གདན། །རུས་པའི་རྒྱན་དྲུག་ཕྱག་མཚན་དང༌། །དུག་གསུམ་སྲེག་བྱེད་མེ་དཔུང་སོགས། །དྲག་པོའི་འདོད་ཡོན་མཐའ་ཡས་པས། །ཁྲོ་རྒྱལ་ཚོགས་ལ་བསྟི་སྟངས་བགྱི། །གསུང་རྟེན་ལ། ཁྲི་དང་
གླེགས་ཆབ་ན་བཟའ་སོགས་ཕུལ་ལ། །༈ སྣ་ཚོགས་དར་གྱིས་བཀབ་པའི་སེང་གེའི་ཁྲི། །ཐབས་དང་ཤེས་རབ་ལྗོན་པའི་གླེགས་བུ་ཟུང༌། །མཐའ་དག་གཅིག་ཏུ་བྱེད་པའི་སྐུ་ཆིངས་དང༌། །ལྔ་ཕྲག་བརྩེགས་པའི་ན་བཟའང་དབུལ་བར་བགྱི། །ཨོཾ་བཛྲ་པུསྟ་ཀ་ཨཱ་ས་ནཱ་ཝསྟྲ་ཡེ་སྭཱ་ཧཱ། ཐུགས་རྟེན་ལ། སྲོག་ཤིང་དང་ཆོས་འཁོར་ཕུལ་ལ། ༈ ཐུབ་པའི་ལུང་རྟོགས་བསྟན་པ་རིན་པོ་ཆེ། །ཡུན་དུ་གནས་ཕྱིར་སྲོག་ཤིང་དམ་པ་དང༌། །འཁོར་ལོ་བརྩེགས་མ་ཕུལ་བས་འགྲོ་བ་ཀུན། །སྐུ་གསུམ་ཡེ་ཤེས་ལྔ་ཡི་གནས་ཐོབ་ཤོག།།ཨོཾ་སརྦ་བིདྱ་དྷཱརྨཱ་དྷརྟུ་ཙཀྲ་སྭཱ་ཧཱ། ཅོད་པཎ་དང་འཕན་ཕུལ་ལ། ༈ དྲན་པ་ཉེ་བར་གཞག་པ་ལ་སོགས་པ། །བྱང་ཆུབ་ཕྱོགས་ཀྱི་གྲགས་སྙན་མཐའ་དག་ཀུན། །ཡེ་ཤེས་ལྔ་མཚོན་དར་གྱི་ཅོད་པཎ་དང༌། །འཕུར་ལྡིང་གཡོ་བའི་བ་དན་འདིས་ཐོབ་ཤོག །ཨོཾ་པ་ཏཾ་ཀཱ་ལཾ་པཱ་ཡ་ཀུ་མ་དྷི་ར་དྷྭ་ཛ་སྭཱ་ཧཱ། གདུགས་དང་མེ་ཏོག་གི་ཕྲེང་བ་ཕུལ་ལ། ༈ འགྲོ་འདི་དཀོན་མཆོག་རིན་ཆེན་རྣམ་གསུམ་གྱི། །གྲིབ་བསིལ་ཉིད་དུ་བསྟི་དང་དབུགས་འབྱིན་ཕྱིར། །གདུགས་དང་མེ་ཏོག་ཕྲེང་བ་འདི་ཕུལ་བས། །འཁོར་བའི་ཚ་གདུང་གཏན་ནས་བཅིང་བར་ཤོག །ཨོཾ་བྷྲ་མ་ཎཱ་ཡ་རཏྣ་མཱ་ལ་ཏྲཱཾཿ ཁྲི་གདན་ཁྱད་པར་བ་རྣམས་ཕུལ་ལ། ༈ སྟོབས་བཅུ་ལྡན་པ་གླང་པོའི་ཁྲི་མཆོག་དང༌། །མི་འཇིགས་བཞི་
ལྡན་སེང་གེ་རྫུ་འཕྲུལ་རྟ། །དབང་བཅུ་ལྡན་པའི་རྨ་བྱ་མཁའ་ལྡིང་སྟོབས། །འགྲོ་བའི་རེ་སྐོང་རིན་པོ་ཆེ་ཡི་བསྟན། །ཆགས་པའི་སྐྱོན་བྲལ་པདྨ་ཉི་ཟླ་ནི། །རང་བཞིན་འོད་གསལ་རྣམ་པ་ཐམས་ཅད་པའི། །གདན་ཁྲི་ཕུལ་བས་འགྲོ་བ་མ་ལུས་ཀུན། །ཐེག་པ་ཆེན་པོའི་ལམ་ལ་གནས་པར་ཤོག །ཅེས་ཕུལ། གསུམ་པ་ཁྱད་པར་ཙཱ་རུའི་བཟའ་བས་མངའ་གསོལ་བ་ནི། ལྷ་བཤོས་གཙང་མ་དེ་ཉིད་ཆུས་བྲན་ནམ་མཁའ་མཛོད་ཀྱི་སྔགས་རྒྱས་བརླབས། རྟེན་གྱི་དྲུང་དུ་ཁྱོགས་ལ་བཏེག་ནས། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ་སོགས་ཀྱིས་ཕུལ། གྲུབ་ན་སྐབས་འདིར་རྒྱས་པའི་སྦྱིན་སྲེག་གི་ཆོ་གས་གནས་བྱའི་ལྷ་རྣམས་ཀྱི་ཡེ་ཤེས་སེམས་དཔའ་ཐབ་ཏུ་སྤྱན་དྲངས་ལ་དཀར་གསུམ་མངར་གསུམ་ཤིང་འབྲས་འོ་ཐུག་འབྲས་ཆན་གཙོ་བོར་གྱུར་པའི་སྲེག་རྫས་དང་ཙཱ་རུའི་ཆ་ཤས་ཀྱང་འབུལ་ཞིང༌། གཤེགས་གསོལ་གྱི་ཚེ་སླར་ཡང་རྟེན་གྱི་ཐུགས་ཀར་གཞུག་གོ། །ཇི་ལྟར་ཡང༌། མཐའ་རྟེན་བཀྲ་ཤིས་ཀྱི་མངའ་གསོལ་ནི། ཡེ་དྷརྨཱ་སོགས་དང༌། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་འདབ་མ་རྒྱས་པའི་སྤྱན་མངའ་བ། །བཀྲ་ཤིས་དང་པོ་དེས་ཀྱང་དེང་འདིར་བདེ་ལེགས་ཤོག །དེ་ཡི་ཉེ་བར་བརྟེན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་
དགུ་རྣམས་ལ་ཞི་བྱེད་པ། །བཀྲ་ཤིས་གཉིས་པོ་དེས་ཀྱང་དེང་འདིར་བདེ་ལེགས་ཤོག །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །བཀྲ་ཤིས་གསུམ་པོ་དེས་ཀྱང་དེང་འདིར་བདེ་ལེགས་ཤོག །བསོད་ནམས་རི་བོ་བཞིན་དུ་བརྟན་པ་དང༌། །བརྒྱུད་འཛིན་ཉི་ཟླ་བཞིན་དུ་གསལ་བ་དང༌། །སྙན་པས་ནམ་མཁའ་བཞིན་དུ་ཁྱབ་པ་སྟེ། །གསུམ་པོ་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་བརྒྱད་ཅུ་ཞི་བ་དང༌། །མི་མཐུན་གནོད་པའི་ཕྱོགས་ལས་གྲོལ་བ་དང༌། །འདོད་པ་འགྲུབ་ཅིང་ཕུན་སུམ་ཚོགས་གྱུར་པའི། །བཞི་པོ་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང༌། །ཚེ་རིང་ནད་མེད་བདེ་ལེགས་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་གྱུར་པའི། །ལྔ་པོ་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་ཁྲིམས་སྲུང་བ་དང༌། །བཟོད་པ་སྒོམ་ཞིང་བརྩོན་འགྲུས་བརྩམ་པ་དང༌། །མཉམ་པར་འཇོག་ཅིང་གནས་ལུགས་རྟོགས་གྱུར་པའི། །དྲུག་པོ་དེས་ཀྱང་དེང་འདིར་བདེ་ལེགས་ཤོག །རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་སྣང་བ་མཐའ་
ཡས་དང༌། །དོན་ཡོད་གྲུབ་ཅེས་རིགས་ལྔའི་བཀྲ་ཤིས་གང༌། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ཆེན་རྣམ་དག་ཆོས་དབྱིངས་གང་ཆེན་མཚོ། །མཁའ་འགྲོ་རིགས་ལྔ་ཡེ་ཤེས་སྤྲིན་འཕྲོ་བ། །སྣང་སྲིད་རྣམ་དག་ལྷ་དང་ལྷ་མོའི་ཞིང༌། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གསུམ་པ་རྗེས་ཀྱི་བྱ་བ་ལ་བཅུ་ལས། དང་པོ་གཏོར་མ་གཏོང་བ་ནི། ཕྱོགས་སྐྱོང་དང་འབྱུང་པོ་སྤྱི་ལ་ཕྱི་རོལ་ཏུ་ཆ་གསུམ་གྱི་ཆོ་གས་བསྔོ། འདས་གཏོར་དང༌། ཆོས་སྐྱོང་རྣམས་ཀྱི་སྐོང་བ་ཅི་ནུས་བྱའོ། །གཉིས་པ་སྲུང་མ་བསྒོ་བ་ནི། གནས་གཞི་དེའི་སྲུང་མ་དང༌། སྒོས་སུ་གཉེར་གཏད་དམིགས་བསལ་ཡོད་ན་དེའི་གཏོར་མ་ཟུང་དུ་བཤམས་པ་ཕུལ་ལ། རྡོ་རྗེ་བཀའ་ནན་གྱི་རྒྱ་བཅིངས་ཏེ། བཛྲ་རཀྵ་ཧཾཿཞེས་དང༌། ཨོཾ་བཛྲ་ས་མ་ཧ་ན་ཧ་ན་ཧཱུྃ་ཕཊཿ ཅེས་དམ་ལ་བཞག །རྡོ་རྗེའི་ཆོས་སྐྱོང་ཆེ་གེ་མོ་མ་མགོན་ལྕམ་དྲལ། འཁོར་དང་བཅས་པ་རྣམས་ཀྱིས་རྟེན་འདི་རྣམས་ཀྱི་སྲུང་མ་དང་ཡོན་བདག་གིས་ལ་འདི་དག་དངོས་དང་དཀོར་ཆ་ལ་མི་བསྲུན་པར་བགྱིད་པ་རྣམས་ལ་ཆད་པས་གཅོད་ཅིང་སྲུང་བ་དང་སྐྱོང་བའི་ཕྲིན་ལས་རྒྱུན་མི་འཆད་པར་མཛོད་ཅིག །ཅེས་གཉེར་གཏད་བྱའོ། །གསུམ་པ་དཀྱིལ་འཁོར་གྱི་ལྷ་ལ་གཏང་རག་གི་མཆོད་བསྟོད་ནི། ༈ མེ་ཏོག་མཆོད་ཕྲེང་རིང་བའམ།སྤྲིན་མཛེས་ལྡིང་ཁང་མཛེས་འབར་བ། །སྤོས་དང་སྨན་སྦྱར་བདུད་རྩིའི་སྤྲིན་ཕུང་དང༌། །གཟི་ལྡན་སྒྲོན་མེ་ཞལ་ཟས་
རོལ་མོའི་སྤྲིན། །བསྟོད་དབྱངས་ཡན་ལག་རྒྱ་མཚོའི་སྤྲིན་གྱིས་མཆོད། །ཅེས་དང༌། དམ་ཆོས་དཀོན་མཆོག་ཐམས་ཅད་དང༌། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར།།རྒྱུན་མི་ཆད་པར་འབབ་པར་ཤོག །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་མཆོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཅེས་རོལ་མོ་བྱ། བཞི་པ་ནོངས་བཤགས་ནི། བརྗོད་མེད་དོན་བཤགས་དང༌། ཁྱད་པར་ཆོ་གའི་བྱ་བ་ནོངས་པ་ལ་དམིགས་ཏེ་ཐལ་མོ་སྦྱར་ནས། རྫོགས་སངས་རྒྱས་དང་དེ་ཡི་སྲས། །ཚངས་སོགས་ལྷ་ཡི་ཚོགས་རྣམས་ཀྱིས། །གང་དག་ཆོ་ག་མ་ཚང་བ། །དེ་དག་བཟོད་པར་མཛད་པའི་རིགས། །དབྱངས་གསལ་ལ་ཡིག་བརྒྱ་སྦྲེལ་བ་ཚར་གསུམ་བརྗོད། གྲུབ་ན་ཞི་བའི་སྦྱིན་སྲེག་ཀྱང་བྱའོ། །ལྔ་པ་ཡོན་བདག་བསྒོ་བ་ནི། སློབ་དཔོན་གྱི་མདུན་དུ་བཀྲ་ཤིས་པའི་རྫས་རྣམས་འདུ་བྱ། དེ་དང་ཉེ་བར་བསྟན་བཟང་པོ་མེ་ཏོག་གི་ཚོམ་བུ་ཅན་ལ་ཡོན་བདག་གོས་རྒྱན་བཟང་པོ་བྱས་ལ་འཁོད། ཉེ་ལོགས་སུ་རྟེན་ལ་འབུལ་རྒྱུའི་མཆོད་པ་སྣ་ལྔ་ཡང་བསྡོགས། དཔོན་སློབ་ཡོན་བདག་བཅས་པར་ཙཱ་རུའི་བཟའ་བའང་འགྲིམས་ཤིང༌། ༈ བདེ་གཤེགས་ལྷག་མ་འདི་དག་ནི། །གསོལ་ཞིག་སྡིག་པ་བྱང་བར་འགྱུར། །ཞེས་དང༌། ཁྱེད་ཀྱིས་ང་ལ་གང་གསོལ་བའི། །སྐུ་གཟུགས་དག་ནི་ཁྱད་པར་དུ། །ཇི་ལྟར་གསུངས་པར་
རབ་གནས་པར། །དེ་དག་དོན་ནི་ངས་བྱས་ཏེ། །དེ་རྣམས་དོན་ནི་གྲུབ་ཟིན་གྱིས། །ཅི་བདེ་བར་ནི་མཆོད་པར་བྱོས། །གུས་དང་སྲི་ཞུ་ཡང་དག་གྱིས། །ཡོན་གནས་མཆོག་ལ་བསྙེན་བསྐུར་བའི། །བསོད་ནམས་དེ་ནི་བརྗོད་མི་ལངས། །རྣམ་པར་གཟིགས་ལ་སྲན་རྡོག་བདུན། །ཕུལ་བས་གཞོན་ནུ་ང་ལས་ནི། །འཁོར་ལོས་སྒྱུར་རྒྱལ་གྱུར་ལ་ལྟོས། །དེ་བཞིན་སྟོན་པས་འཇམ་དཔལ་ལ། །ང་ཡི་འཁོར་ནི་རྣམ་བཞི་ཡིས། །ད་ལྟ་ང་ལ་མཆོད་བྱས་དང༌། །མ་འོངས་པ་ན་དད་པ་ཡིས། །གཟུགས་བརྙན་རྣམས་ནི་མཆོད་པ་ལ། །ཁྱད་པར་ཅུང་ཟད་ཡོད་མ་ཡིན། །བསོད་ནམས་མཉམ་ཞིང་རྣམ་སྨིན་མཉམ། །ཞེས་གསུངས་སྙིང་ལ་ཡང་དག་ཟུངས། །ཞེས་བསྒོས་པའི་དེ་མ་ཐག་པར་ཡོན་བདག་གིས་ཀྱང་སྔར་བཤམས་པའི་མཆོད་པ་རྣམས་ལག་བསྟར་ཏེ་རྟེན་ལ་དབུལ་ཞིང་ཕྱག་བྱས་ནས་སྟན་ལ་འཁོད། དྲུག་པ་བཀྲ་ཤིས་པར་བྱ་བ་ནི། ལས་བུམ་གྱི་ཆུས་རྫས་དང་ཡོན་བདག་ལ་འཐོར་བས་བགེགས་བསྐྲད། སྟོང་པའི་ངང་ལས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བཀྲ་ཤིས་པའི་རྫས་བརྒྱད་སོ་སོའི་བྱེད་ལས་གྲུབ་པའི་རྣམ་པ་དང་ཡོན་བདག་ཀྱང་གནོད་སྦྱིན་གྱི་སྡེ་དཔོན་ཛམ་བྷ་ལར་གྱུར་པར་བསམ་ལ་མེ་ཏོག་འཐོར་ཞིང༌། དཔའ་བོ་ཆེན་པོ་གང་སྐྱེས་པར། །ཕུན་ཚོགས་དོན་ཀུན་འབྱོར་གྱུར་ཞིང༌། །དོན་གྲུབ་ཚོགས་ཀྱང་གྲུབ་པ་དེས། །ཁྱོད་ལ་བདེ་ལེགས་
མཛད་པར་གྱུར། །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོས་ཏེ། །སེམས་ཅན་ཐམས་ཅད་རབ་དགའ་དེས། །ཁྱོད་ལ་བདེ་ལེགས་མཛད་པར་གྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པ་ལྷ་རྣམས་དང༌། །འབྱུང་པོ་ཀུན་གྱི་བདེ་ལེགས་ནི། །ཁྱོད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང༌། །ལྷ་རྣམས་ཀྱི་ནི་བསམ་པ་ཡིས། །ཁྱོད་ཀྱི་འདོད་དོན་གང་ཡིན་པའི། །དོན་དེ་དེ་རིང་འགྲུབ་གྱུར་ཅིག །ཅེས་བརྗོད་ཅིང་མེ་ཏོག་གཏོར་ནས་བཀྲ་ཤིས་ཀྱི་རྫས་རེ་རེ་བཞིན་ཡོན་བདག་ལ་གཏོད་ཅིང༌། ༈མེ་ལོང་ཡེ་ཤེས་རྒྱ་མཚོ་ཆེན་པོ་ཡིས། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི།།བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །༈ གི་ཝང་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ནས། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་ཞི་གྱུར་ཅིག །༈ ཞོ་ནི་ཀུན་གྱི་སྙིང་པོར་གྱུར་པ་ཡི། །སྙིང་པོ་རྣམ་དག་ཡེ་ཤེས་རྣམ་རྟོགས་ཏེ། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་གྱུར་ཅིག །༈དཱུརྺས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་འདི་རབ་བསྒྲུབས་
ནས། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡིས། །བཀྲ་ཤིས་དེས་ཀྱང་ཚེ་ཡང་འཕེལ་བར་ཤོག །༈བིལྦ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་ཀུན་འགྲུབ་གྱུར་ཅིག །༈ དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་དབང་ཐོབ་གྱུར་ཅིག །༈ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ལུས་དབང་དུ་བསྡུས་ནས་ཀྱང༌། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པས། །བཀྲ་ཤིས་དེས་ཀྱང་ཆོས་སྲིད་བརྟན་གྱུར་ཅིག །༈ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་ཡིས། །མཐུ་སྟོབས་ཡོན་ཏན་ཕུན་སུམ་ཚོགས་གྱུར་པའི། །བཀྲ་ཤིས་དེས་ཀྱང་བགེགས་རྣམས་ཞི་གྱུར་ཅིག །ཅེས་པའི་མཐར་ཡོན་བདག་གིས་རྟེན་ལ་འབུལ་ཚུལ་བྱ་ཞིང༌། དེར་འཁོད་ཐམས་ཅད་ཀྱིས་ཀྱང་རེག་ནས་མཐར་ཡོན་བདག་ལ་གཏད་དོ། །འདིར་རྫས་བཤད་ཡོངས་སུ་གྲགས་པ་ལྟར་སྤྲོ་ན་དེ་ལྟར་བགྱིད་ཅིང༌། དེ་ལྟ་ནའང་ཁྱེའུ་བཀྲ་ཤིས་ཀྱི་རྩྭ་ནི་དཱུརྺ་ཡིན་པ་མདོ་ལས་མ་མཐོང༌། དེ་བཞིན་དུ་མ་སྐྱེས་དགྲའི་གླང་པོ་ནོར་སྐྱོང་
ལྷས་བྱིན་གྱིས་སྟོན་པ་ལ་རྦད་པས་སྟོན་པའི་བྱིན་རླབས་ཀྱིས་དེའི་སེམས་ཉེ་བར་ཞི་བ་ལ་སོགས་པ་བཤད་པ་བྱེ་བྲག་པས་སྐབས་ཕྱེད་པ་སྨྲ་བ་ཡོད་ན་ལེགས་སོ། །བདུན་པ་རྟེན་ལ་མཆོད་པ་ནི། ༈ དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་པ་བླ་མེད་རྒྱ་ཆེན་རྣམས་ཀྱིས་མཆོད། །མེ་ཏོག་ཕལ་ཆེར་མེ་ཏོག་བླ་རེ་དང༌། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་དེ་དག་མཆོད། །མེ་ཏོག་སྤོས་དང་མར་མེ་ཞལ་ཟས་ཆུ། །བླ་བྲེ་འཕན་ལྡིང་གདུགས་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་རྔ་ལ་སོགས་དང༌། །ལུས་དང་ལོངས་སྤྱོད་མཁོ་དགུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །དམ་ཆོས་དཀོན་མཆོག་ཐམས་ཅད་དང༌། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་ཆད་པ་འབབ་པར་ཤོག །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་མཆོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཅེས་སྨོན་ལམ་ཡང་གདབ་བོ། །བརྒྱད་པ་དགའ་སྟོན་བྱ་བ་ནི། ཚོགས་ཀྱི་འཁོར་ལོ་ཚིམས་པ་དྲུག་ལྡན་དུ་བསྐོར་ཞིང༌། གཞན་ཡང་ཡོན་གནས་མཆོག་དམན་ཐམས་ཅད་ལ་བཟའ་བཏུང་གི་རྙེད་པས་ཚིམ་པར་བྱ། སློབ་དཔོན་དང་བཟོ་དེའི་གྲོགས་སུ་གྱུར་པ་རྣམས་ལའང་དྲིན་དུ་གཟོ་
བའི་བསྟི་སྟངས་དང་རོལ་མོར་བགྱིད་པས་མཚོན་དགའ་སྟོན་རྒྱ་ཆེན་པོ་བགྱིད་པར་བཤད་པ་ཡིན་ནོ། །དགུ་པ་བསྔོ་བ་ནི། ནང་པ་སངས་རྒྱས་པའི་ཁྱད་ཆོས་ཏེ་ལས་དོན་ཡོད་པར་བྱས་པའི་ཆེད་དུ་བཟང་པོ་བཞི་ལྡན་གྱི་བསྔོ་བའང་ཁྲི་བརྒྱད་སྟོང་པར། ཕ་རོལ་ཏུ་ཕྱིན་པ་ལྔ་པོ་དང་ནམ་ཤེས་རབ་ཀྱི་ཕ་རོལ་ཏུ་ཕྱིན་པས་ཟིན་པ་དེའི་ཚེ་ཐར་པའི་གྲོང་ཁྱེར་དུ་འཇུག་པར་འགྱུར་རོ། །ཞེས་གསུངས་པས་འཁོར་གསུམ་ཡོངས་སུ་དག་པའི་བསྔོ་བས་རྒྱས་གདབ་ཅིང་སླར་ཡང་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད། བཟང་པོ་སྤྱོད་པ་ལ་སོགས་པའི་སྨོན་ལམ་རྣམ་དག་ཀྱང་གདབ་བོ། །བཅུ་པ་ལས་ཀྱི་རྗེས་ཆོག་ནི། རྡུལ་ཚོན་གྱི་ཆོ་ག་དང་འབྲེལ་ན་དེའི་བྱ་བ་སོགས་མཐའ་རྒྱས་རྣམས་དཀྱིལ་འཁོར་གྱི་ལས་གཞུང་བཞིན་དུ་བྱ་བ་ཡིན་ནོ། །དེ་ལྟར་དངོས་སྟ་ཉིན་གཉིས་མའི། །རབ་གནས་ཉིན་ཞག་མང་སྤྲེལ་ན། །ཐོག་མའི་ཉི་མ་གཉིས་པ་ཡི། །དངོས་གཞིའི་བརྟན་བཞུགས་གསོལ་གདབ་རྗེས། །ཕྱི་དྲོ་སྟ་གོན་ཆོ་ག་བྱ། །དེ་ལྟར་སྦྲེལ་ནས་ཉིན་ཐ་མར། །སྟ་གོན་གྱི་ནི་མལ་དག་ཏུ། །མངའ་དབུལ་ལ་སོགས་རྗེས་ཆོག་རྣམས། །དཀྱུས་སུ་བྱས་པས་འགྲུབ་པ་ཡིན། །ཉིན་ཆོག་ལ་ནི་བུམ་པ་གཙོ་ལས་ཁྲུས།གསུམ། །བཀོད་ལ་དཀྱིལ་འཁོར་བསྒྲུབ་མཆོད་དང༌། །རྟེན་སྦྱོང་བཀྲུ་ཕྱི་བསྐྱེད་སྤྱན་དྲངས། །དགུག་དང་རྒྱས་གདབ་སོང་བའི་རྗེས། །དངོས་གཞིའི་དབང་བསྐུར་མཆོད་བསྟོད་དང༌། །སྤྱན་དབྱེ་རྟེན་བསྒྱུར་རབ་གནས་སོགས། །དཀྱུས་བཞིན་བྱས་པས་ཚང་བའོ། །ཤིན་ཏུ་བསྡུ་ན་བསྐྱེད་བཟླས་མཐར། །བགེགས་བསྐྲད་དམ་ཚིག་བསྐྱེད་སྤྱན་དྲངས། །དགུག་གཞུག་རྒྱས་གདབ་དབང་བསྐུར་དང༌། །སྤྱན་དབྱེ་མཆོད་བསྟོད་བརྟན་བཞུགས་མཐར། །ཤིས་པ་བརྗོད་པས་འགྲུབ་པ་
སྟེ། །མདོ་ལུགས་རྟེན་འབྲེལ་རབ་གནས་ལས། །སྔགས་ཀྱི་ཆོ་ག་འདི་ཡང་འཕགས། །སྤྱིར་ནི་རྟེན་བསྐྱེད་དགུག་བསྟིམ་དང༌། །དབང་བསྐུར་བརྟན་བཞུགས་བཞི་པོ་འདི། །རབ་གནས་ཉིད་ཀྱི་ངོ་བོ་ཡིན། །དེ་ལ་ཡི་གེ་ནོར་བའི་ཕྲེང༌། །མང་དུ་མཐོང་བས་འདི་བྱས་སོ། །ཅིའི་སླད་ཞེ་ན་སྟོན་པའི་བཀས། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང༌། །མཐའ་འཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང༌། །མུ་སྟེགས་བྱོལ་སོང་སོགས་མི་མཐོང༌། །དེ་ཕྱིར་སྐུ་གཟུགས་སྤྲུལ་པ་ཡིན། །ཞེས་གསུངས་དེ་ལ་རབ་གནས་པའི། །ཕན་ཡོན་བསམ་གྱིས་མི་ཁྱབ་ཀྱང༌། །ཆོ་ག་ནོར་ན་ནོངས་པའི་ཚུལ། །རྒྱུད་ལ་བཤད་པ་སྔར་སྨོས་ཤིང༌། །ཇི་བཞིན་གྲུབ་པའི་ཕན་ཡོན་ནི། །རྒྱ་ཆེར་བཤད་མོད་གསང་སྙིང་ལས། །ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིག་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉམས་མིན། །ཞེས་གསུངས་སོ། །རྟེན་གསུམ་རབ་ཏུ་གནས་པའི་ཆོ་ག་བཀྲ་ཤིས་འདོད་འཇོ་ཞེས་བྱ་བ། རྒྱལ་བའི་བསྟན་པ་རིན་པོ་ཆེ་མི་ནུབ་པར་བྱ་བའི་རྟེན་འབྲེལ་དང༌། སེམས་ཅན་རྣམས་ཀྱི་བསོད་ནམས་རྒྱ་ཆེན་པོ་འཕེལ་ཞིང༌། འཇིག་རྟེན་བདེ་བའི་ཆེད། བཀྲ་ཤིས་སྲོང་བཙན་བང་སོར་རྟེན་བཞེངས་ཀྱི་རིམ་པ་བགྱིས་པའི་ཚེ་རིག་པ་འཛིན་པ་མཁྱེན་བརྩེའི་ལྷས་སྦྱར་བའོ།། །།