བསྟན་པ་དེ་ཉིད་བོད་དུ་བྱོན་ཚུལ།
སྤྱི་དོན་གསུམ་པ། གངས་རིའི་ཁྲོད་དུ་རྒྱལ་བསྟན་ཇི་ལྟར་བྱོན་པའི་རྣམ་གཞག་ནི། དག་བྱེད་ཀྱི་གཏེར་ཆེན་པོ་བྲི་ནས་ཡུལ་དུ་རུང་བའི་གནས་ལ་རིགས་པར་མི་བྱེད་པ་ལ། ཁ་བ་ཅན་དུ་མཚོ་བྲི་ནས་། ཞེས་པས་གནོད་དོ། །འདིར་རི་བྲག་དང་། ལྗོངས་བདེ་བ་གཉིས་གང་ལ་ཡུལ་དུ་རུང་བའི་ཐ་སྙད་ཀྱིས་ཕྱེ་བ་མི་འགལ་བར་བྱས་ནས་ཡུལ་དང་མི་ལ་སོགས་པ་གདོད་ནས་ཡོད་པའམ། རྒྱལ་པོ་རུ་པ་ཏི་དཔུང་དང་བཅས་པ་རི་ཁ་བ་ཅན་དུ་བྲོས་པ་ལས་འཕེལ་བ་སོགས་སྐབས་དེ་དང་དེར་བྱུང་བ་ཇི་ལྟར་ཡང་བོད་ཀྱི་རྒྱལ་པོ་རྣམས་ཀྱི་རྒྱུད་ནི། རྒྱ་གར་ཤཱཀྱ་ཆེན་པོ་དང་། ལི་ཙ་བྱི་དང་། རི་བྲག་པ་སྟེ་ཤཱཀྱ་རིགས་གསུམ་ལས། འཇམ་དཔལ་རྩ་རྒྱུད་ཀྱི་བཞེད་པས་ལི་ཙ་བྱིའི་རིགས་ལས་མཆེད་པ་ཞིག་ཆུ་བོ་གངྒཱ་ལས་བརྒྱུད་རི་ཁ་བ་ཅན་གྱི་བྲག་ཏུ་སླེབས། རེ་ཞིག་ན་ལྷ་རི་གྱང་མཐོའི་རྩེ་ནས་གཟིཊ་པས། ཡུལ་ཡར་ཀླུངས་དགེ་བཅུའི་དཔལ་གྱིས་མཛེས་པར་དཔྱད་ནས་ལྷ་རི་རོལ་པོའི་རྩེ་ལས་བཙན་ཐང་སྒོ་བཞིར་ཐོན། དངོས་ལ་ཁྱོད་སུ་ཞིག་དྲིས་པས། བཙན་པོའོ། །གང་ནས་བྱོན་དྲིས་པར་ནམ་མཁའ་ལ་མཛུབ་མོ་བསྒྲེངས་པས། བོན་རྣམས་དམུ་ཐག་དང་དམུ་སྐས་ལས་བབས་པའི་ལྷ་ཡིན་ཞེས་སྨྲས་པའོ། །དེར་ལྷ་ལས་ཆད་པའི་རྗེར་བཟུང་སྟེ་གཉའ་བར་ཁྲི་བྱས་ནས་བཏེགས་པས་གཉའ་ཁྲི་བཙན་པོའོ། །དེ་ལྟར་བཙན་པོ་འོད་ལྡེ་ནས་
གནམ་གྱི་ཁྲི་བདུན། བར་གྱི་ལྟེང་གཉིས། སའི་ལེགས་དྲུག །འོག་གི་ལྡེ་བརྒྱད། བཙན་གསུམ་པའི་བར་ཆོས་སྲིད་བོན་ལུགས་སུ་བསྐྱངས། བཙན་བཞི་པ་ལྷ་ཐོ་ཐོ་རི་གཉན་བཙན་གྱི་དུས་ན། དེ་བཞིན་གཤེགས་པའི་ལུང་བསྟན་གྱི་བདེན་པའི་རྒྱུད་མངས་སྟོང་གི་འགྱུར་བ་བསིལ་ལྡན་འགྲོ་བའི་བསོད་ནམས་ཀྱི་ཟ་མ་ཏོག་ཏུ་ལྷུང་བའི་དུས་ལ་བབ་སྟེ། ཕོ་བྲང་ཡུམ་བུ་བླ་སྒང་དུ་ཟ་མ་ཏོག་བཀོད་པ་དང་། སྤང་བསྐོང་ཕྱག་རྒྱ་པ། གསེར་གྱི་མཆོད་རྟེན་རྣམས་ནམ་མཁའ་ལས་བབས། མཚན་གཉན་པོ་གསང་བར་བཏགས། མཆོད་པ་བྱས་པས་རྒྱལ་པོའི་སྲིད་དང་ཚེ་རབ་ཏུ་འཕེལ། དམ་པའི་ཆོས་ཀྱི་དབུ་བརྙེས་པར་གྲགས་ཏེ་གླེགས་བམ་བྱུང་བ་ཙམ་མོ། །འདིའི་ཚེ་རྒྱ་གར་ནས་སྨན་པ་པི་བྱི་དང་བི་ལྷ་མ་བྱོན་ནས་གསོ་དཔྱད་ཀྱི་བསྟན་པ་ཡང་བྱུང་། ལ་ལ་ནམ་མཁའ་ལས་བབས་པ་བོན་པོའི་གཏམ་ཡིན་ཟེར་མོད། ནམ་མཁའ་ལས་བབས་ཚད་བོན་ལུགས་ཡིན་ན་འདྲེན་པ་མཆོག་གླང་ཆེན་ཐལ་དཀར་གྱི་རྣམ་པས་ལྷུམས་སུ་ཞུགས་པ་དང་། གྲོང་ཁྱེར་གསལ་ལྡན་དུ་ལྷ་ལས་བབས་པ་དང་། ཨིནྡྲ་བྷུ་ཏིའི་ཕོ་བྲང་གི་ནམ་མཁའ་ལ་སངས་རྒྱས་འཁོར་དང་བཅས་པ་གཤེགས་བཞུད་སོགས་རྫུ་འཕྲུལ་གྱིས་བཀོད་པའང་། ངེས་པའི་དོན་དུ། སངས་རྒྱས་ཡིན། ཆོས་ཡིན། དགེ་འདུན་ཡིན། པོ་ཏི་དང་གླེགས་བམ་གྱི་རང་བཞིན་ཡིན་པ་
དེ་ཡང་བོན་ལུགས་སུ་ཐལ་བར་འགྱུར་བས། སངས་རྒྱས་ཀྱི་འཕྲིན་ལས་དང་བསྟན་པའི་བབས་ལུགས་བསམ་གྱིས་མི་ཁྱབ་པའང་དྲན་པར་བྱའོ། །དེ་ནས་རྒྱལ་རབས་ལྔ་པ་གནམ་རི་སྲོང་བཙན་ལ་སྲས་དབུའི་གཙུག་ན་ཨ་མི་ཏཱ་བྷ་ལ་སོགས་པ་ལེགས་པའི་མཚན་དང་ལྡན་པ་ལ། བཟོ་དང་། སྒྱུ་རྩལ་དང་། རིག་པའི་གནས་ལ་མཁས་ཤིང་ཐུགས་སྒམ་པས་བློན་པོ་རྣམས་ཀྱིས་རང་གི་མཚན་ཉིད་ལས་སྲོང་བཙན་སྒམ་པོར་མཚན་གསོལ་བའི་ཆོས་རྒྱལ་བྱོན་ཏོ། །དེས་རང་གི་སྐུ་རིང་ལ་དམ་པའི་ཆོས་ཀྱི་སྲོལ་བཏོད་པའི་སླད་དུ། ཐོན་མི་ཨ་ནུའི་བུ་འཁོར་དང་བཅས་པ་རྒྱ་གར་དུ་མངགས། པཎྜི་ཏ་ལྷ་རིག་པའི་སེངྒེ་དང་། བྲམ་ཟེ་ལི་བྱིན་ལ་ཡིག་རིགས་དང་བརྡའ་སྤྲོད་པའི་གཞུང་ལུགས་ལ་སྦྱངས་པ་མཐར་སོན། རྒྱ་གར་གྱི་ཕྱི་མོ་ལྔ་བཅུ་ལ་དབྲི་བསྣན་གྱི་སྒོ་ནས་བོད་ཡིག་སུམ་ཅུར་མཛད། འཕགས་ཡུལ་བརྡའ་སྤྲོད་ཀྱི་གཞུང་ཆེན་པོ་བརྒྱད་དང་གྲངས་མཚུངས་སུ་བྱས་ནས་བོད་སྐད་དང་རྗེས་སུ་མཐུན་པའི་བརྡའ་སྤྲོད་ཀྱི་བསྟན་བཅོས་བརྒྱད་མཛད། མདོ་སྡེ་དཀོན་མཆོག་སྤྲིན་བསྒྱུར། བསྟན་པའི་སྲོག་ཡི་གེས་བསྟན་པ་ཡིན་པས་ཐུག་མཐའ་མེད་པའི་བཀའ་དྲིན་དུ་གྱུར། དེ་ལས་རྒྱལ་པོས་ཀྱང་བསླབས་ཏེ་ཟ་མ་ཏོག་བཀོད་པ་ལ་སོགས་པ་བསྒྱུར། ཡི་གེ་དྲུག་མ་དང་། གཤིན་རྗེའི་གཤེད་དང་། ཆོས་སྐྱོང་ལྷ་མགོན་ལ་སོགས་པའི་
ཆོས་མང་དུ་བསྟན། རྣལ་འབྱོར་དུ་བྱ་བའི་གནས་ལ་སློབ་ཏུ་བཅུག་པས་གྲུབ་པ་ཐོབ་པའང་མང་དུ་བྱུང་། བོད་སྲིན་མོ་གན་རྐྱལ་གྱི་རྣམ་པར་ཡོད་པའི་ས་དགྲའི་གཉེན་པོར་མཐའ་འདུལ། ཡང་འདུལ། རུ་གནོན་གྱི་གཙུག་ལག་ཁང་རྣམས་བཏབ། ཐབས་དང་རྫུ་འཕྲུལ་གྱི་བཀོད་པ་འབྱམས་ཀླས་པས་ཇོ་ཤཱཀྱ་རྣམ་གཉིས་དང་། ལོ་ཀེ་ཤྭ་ར་སྤྱན་དྲངས། ལྷ་ལྡན་སྤྲུལ་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། མི་ཆོས་གཙང་མ་བཅུ་དྲུག་གིས་ཆོས་ལུགས་ལེགས་པར་བཅས། རྒྱ་གར་བལ་པོ་རྒྱ་ནག་གསུམ་ནས་སློབ་དཔོན་སྤྱན་དྲངས། ཐོན་མིས་ལོ་ཙཱ་བྱས་ནས་དམ་པའི་ཆོས་ཀྱང་འགའ་ཞིག་བསྒྱུར་བས་བོད་མུན་པའི་གླིང་དཀར་པོར་བྱས་པ་ཡིན། དེ་ནས་རྒྱལ་རབས་ལྔ་ན་རྗེ་བཙུན་བརྟན་པའི་འཁོར་ལོ་མིའི་སྒྱུ་འཕྲུལ་རྣམ་པར་རོལ་པ་ལྷ་བཙན་པོ་ཁྲི་སྲོང་ལྡེའུ་བཙན་བྱོན། སྐུ་གཞོན་ནུའི་ཚེ་མ་ཞང་ཞེས་བྱ་བའི་བློན་པོ་ཆོས་ལ་མི་དགའ་བས་ལྷ་སའི་ཇོ་བོ་སྐྱི་རོང་དུ་བསྐྱལ། གཙུག་ལག་ཁང་དུ་བཤས་ར་བྱས། རྒྱལ་པོ་ཆོས་ལ་ཤིན་ཏུ་དད་པ་ལ་རེ་ཞིག་གཞན་དབང་གི་ཚེར་མ་མི་བསྲུན་པས་བཏབ་པ་གང་འདི་ལྟར་གླང་པོ་ཆེ་ཆུ་ཀླུང་ཆེན་པོར་འཇུག་པར་རྩོམ་པ་ན་ལང་ཚོའི་བ་གམ་ཆུའི་ཕང་པ་ན་ནུབ་པ་ལྟར་སྣང་ཡང་། རང་སྟོབས་ཀྱི་དཔུང་པ་བཙན་པོས་གདོན་མི་ཟ་བར་བདེ་བའི་གནས་སུ་ཕྱིན་པ་བཞིན་དུ། ཐུགས་
བསྐྱེད་དང་སྨོན་ལམ་གྱིས་དམ་བཅའི་རི་མོ་བསུབ་ཏུ་མེད་པའི་མཐུ་མངོན་དུ་བདོ་བར་གྱུར་ཏེ། ཆོས་བློན་ཆེན་པོ་འགོས་ཀྱི་བློ་གྲོས་སྡིག་ཅན་བསླུ་བའི་གཡོ་སྒྱུའི་ཆོམ་རྐུན་དུ་ཤར་ཏེ་མ་ཞང་སྟོད་ལུངས་སུ་གསོན་དུར་དུ་བཅུག །སློབ་དཔོན་ཧྭ་ཤང་གིས་ལུང་བསྟན་པ་ལྟར། དབའ་གསལ་སྣང་མཁན་པོ་ཞི་བ་འཚོ་སྤྱན་འདྲེན་དུ་བཏང་། བདེ་བར་སོན་ནས་བསམ་ཡས་འོམ་བུའི་ཚལ་དུ་མཇལ། མཁན་པོས་འོ་སྐོལ་གྱིས་འོད་སྲུངས་ཀྱི་བསྟན་པ་ལ་བལ་པོའི་མཆོད་རྟེན་བྱ་རུང་ཁ་ཤོར་དུ། བོད་དུ་དམ་པའི་ཆོས་དར་བར་སྨོན་ལམ་བཏབ་པ་དེ་བསྙེལ་ཏམ་གསུངས་པས། བཙན་པོས་སྒོམ་ཡུན་ཐུང་བས་མ་འཚལ་ཞུས། དེར་མཁན་པོས་བྱིན་གྱིས་བརླབས་ཏེ་སྔོན་གནས་རྗེས་སུ་དྲན། བཙན་པོ་ལ་དགེ་བ་བཅུ་དང་ཁམས་བཅོ་བརྒྱད་ལ་སོགས་པའི་ཆོས་བཤད་པས་བོད་ཀྱི་ལྷ་སྲིན་རྣམས་ཁྲོས། དམར་པོ་རི་ལ་ཐོག་བརྒྱབ། འཕང་ཐང་གི་ཕོ་བྲང་ཆུས་ཁྱེར། ལོ་ཉེས་དང་རྩུབ་འགྱུར་ཆེན་པོ་བྱུང་བས། སྡིག་བློན་རྣམས་ཀྱིས་འདི་ཆོས་བྱས་པས་ལན། ཨ་ཙ་ར་རང་ཡུལ་དུ་བཏང་དགོས་ཟེར། བཙན་པོས་མཁན་པོ་ལ་གསེར་མང་པོ་ཕུལ་ནས་ལོ་རྒྱུས་བསྙད་པས། བོད་ཀྱི་མི་མ་ཡིན་རྣམས་མ་དགའ་བ་ཡིན། ཁོ་བོ་བལ་པོར་འགྲོ་ཨོ་རྒྱན་གྱི་སློབ་དཔོན་པདྨ་སམ་བྷ་ཝ་ཞེས་བྱ་བ་འཛམ་
བུའི་གླིང་ན་ཆེ་བ་ཞིག་ཡོད། དེ་ངས་ཀྱང་སྤྱན་འདྲེན་དུ་གཏོང་། བཙན་པོ་རང་ཡང་དེ་བཞིན་འཚལ་གསུངས་པས་ཕོ་ཉ་སྔ་རྟིང་དུ་རྫངས། སླར་སྣ་སྣམ་རྡོ་རྗེ་བདུད་འཇོམས་ལ་སོགས་པ་ལམ་དུ་སྟབས་མྱུར་པོས་མངགས་པ་སློབ་དཔོན་གྱིས་མཁྱེན་ནས། མང་ཡུལ་གུང་ཐང་དུ་ཡུད་ཙམ་ལ་ཕེབས་ནས་མཇལ། ཕྱག་རྟེན་གྱི་གསེར་རྣམས་ངའི་སྣང་བ་གསེར་དུ་ཡོད་གསུང་ནས་མངའ་རིས་ཕྱོགས་སུ་གཏོར། སླར་བོད་དུ་གསེར་གྱི་འདོད་དགུ་འབྱུང་བའི་རྟེན་འབྲེལ་མཛད། མང་ཡུལ་གྱི་རི་བོ་དཔལ་འབར་ཕན་ཚུན་བརྗེས། ཉི་ཟླ་ཐང་ལ་ཕབ། ཆུ་བོ་གྱེན་ལ་བཟློག་པ་སོགས་རྫུ་འཕྲུལ་གྱི་བཀོད་པ་མཐའ་ཀླས་པ་བསྟན། ལམ་དུ་བསྟན་མ་བཅུ་གཉིས་དང་། གཉན་ཆེན་ཐང་ལྷ་ལ་སོགས་པས་མཐོ་འཚམས་པར། ནུས་མཐུའི་ཟིལ་འོག་ཏུ་སྤ་བཀོང་། སྟོད་ལུང་གཞོང་པ་ནས་ཕྱག་མཁར་གྱིས་སྒྲུབ་ཆུ་བཏོན། མངའ་བདག་རྒྱལ་པོས་བསུ་བར་དྲེགས་རློམ་གྱིས་ཀུན་ཏུ་རྟོག་པ་བག་ལ་ཉལ་བརྟན་པ་གཏིང་ནས་དབྲོག་པར་མཛད་པའི་རྗེས་ཤུལ་ཀྱང་མངོན་སུམ་ཚད་མའོ། །དེ་ནས་རང་གི་ཡབ་མེས་ཨག་ཚོམ་གྱིས་བརྩིགས་པའི་ཕོ་བྲང་བྲག་དམར་མགྲིན་བཟང་དུ་སྤྱན་དྲངས་ནས་བཞུགས། རྒྱལ་པོ་ཡིད་ཆེས་སུ་བྱ་ཕྱིར་བྱིས་པ་ལ་རྒྱལ་ཆེན་རིགས་བཞི་པའི་ལྷ་ཞིག་ཕབ་པས། དེས་དམར་པོ་
རི་ལ་ཐང་ལྷས་ཐོག་བརྒྱབ། ཤམ་པོས་འཕང་ཐང་ཆུ་ལ་བསྐྱུར། ཞེས་སོགས་ལྷ་འདྲེ་འདིས་འདི་བྱས་ཐམས་ཅད་བཤད་པས། དཔལ་སངས་རྒྱས་གཉིས་པ་རྫུ་འཕྲུལ་གྱི་རྐང་པ་བཞི་ལ་མཆོག་ཐོབ་པའི་རོལ་པ་རྣམ་པར་བཀོད་པའི་གཡུལ་ངོ་ནི་བཤམས། རྣམ་པར་ཐར་པའི་སྒོ་སྟོང་པ་ཉིད་ལ་སོཊ་པའི་ཏིང་ངེ་འཛིན་གྱི་ཆོ་འཕྲུལ་ཟད་མི་ཤེས་པའི་ནུས་མཐུས། གཞན་འཕྲུལ་དབང་བྱེད་ཀྱི་བདག་པོའི་བྱེད་ལས་སུ་གྱུར་པའི་ལྷ་སྲིན་གདུག་པ་ཅན་ཐམས་ཅད་ཀྱི་གདུག་རྩུབ་ཀྱི་འཐོར་རླུང་ནི་མནན། ང་རྒྱལ་གྱི་བྲག་རི་ནི་བཤིག །ཕྲག་དོག་གི་མེ་ལྕེ་ནི་བསྙིལ། སྲོག་གི་སྙིང་པོ་བླངས་ཏེ་བརྟན་པ་དང་བྲལ་བར་བྱས་པས། གངས་རིའི་ཁྲོད་ནག་ཕྱོགས་ཀྱི་ལྷ་སྲིན་གདུག་པའི་ཚང་ཚིང་འཁྲིགས་པའི་གནས་སུའང་། རྒྱལ་བའི་བསྟན་པ་དཀར་འཇམ་དུ་བརྡལ་བ་འདི་ཉིད་གཅིག་པུའི་མཐུར་ཤེས་པར་བྱའོ། །དེ་ནས་ཇོ་བོ་མང་ཡུལ་ནས་སྤྱན་དྲངས། མཁན་པོ་ཡང་སླར་སྤྱོན་པར་བྱས། སློབ་དཔོན་ཆེན་པོས་དཔལ་གྱི་མགུར་ལས་དྲེགས་པ་ཟིལ་གནོན་གྱི་ཐ་ཚིག་དང་། ནམ་མཁའ་ལ་རྡོ་རྗེའི་གར་འགྲོས་ཀྱིས་གཞི་བྱིན་གྱིས་བརླབས། མཁན་པོའི་གསུང་བཞིན་ཨོ་ཏནྟ་པུ་རིའི་གཙུག་ལག་ཁང་ལ་དཔེ་བྱས། སློབ་
དཔོན་ཆེན་པོས་དྲེགས་པ་ཅན་ཐམས་ཅད་ཀྱང་ལས་ལ་བཀོལ་བས་ཉིན་མི་ཡིས་བརྩིགས་པ་དང་མཚན་མི་མ་ཡིན་པས་བརྩིགས་པ་མཐོ་བར་བྱུང་སྟེ་ཆོས་འཁོར་དཔལ་གྱི་བསམ་ཡས་རྒྱ་ཁྱོན་འདི་ཙམ་ལོ་ལྔ་ལ་གྲུབ། མཁན་སློབ་གཉིས་ཀྱིས་རབ་ཏུ་གནས་པས་དབུ་རྩེའི་ལྷ་རྣམས་ཕྱི་རོལ་དུ་བྱོན། སློབ་དཔོན་གྱིས་བཙན་པོ་ལ་རྟ་མགྲིན་གནང་བ་ཡང་གྲུབ་སྟེ་འཛམ་བུའི་གླིང་དུ་གྲགས་པའི་རྟ་སྐད་ཐོན། སྦ་བཞེད་དུ་འདི་དག་གསལ་བར་མ་བྲིས་པས་དེ་ལ་ཁུངས་སུ་འཚོལ་བ་དག་ཀྱང་དེ་ལྟ་མོད། བསམ་ཡས་ཞིག་གསོ་སྔ་ཕྱི་ཐ་དད་དུ་གྱང་གསེབ་ལས་མི་མ་ཡིན་གྱི་རྗེས་ཁྲུ་གང་པ་ལ་སོགས་ཆེ་ཆུང་མ་ངེས་པ་མང་པོ་ཀུན་གྱི་མཐུན་གྲུབ་ཏུ་ཐོན་པས། ཐང་ཡིག་ལ་སོགས་པ་ལོ་རྒྱུས་བྱེ་བྲག་པ་ལ་ངེས་པ་ལྷག་པར་དུ་རྙེད་པའི་སྐབས་བྱུང་བ་ཡིན། དེ་ནས་ཐམས་ཅད་ཡོད་སྨྲའི་སྡེའི་ལུགས་སུ་སད་མི་བདུན་རབ་ཏུ་བྱུང་སྟེ་དམ་པའི་ཆོས་འདུལ་བའི་གཞི་བཏིང་། རྒྱ་གར་གྱི་པཎྜི་ཏ་ཆེན་པོ་བཱི་མ་ལ་མི་ཏྲ་དང་། སངས་རྒྱས་གསང་བ་དང་། རྣམ་དག་སེངྒེ་ལ་སོགས་པ་དང་། བོད་ཀྱི་ལོ་ཙཱ་བ་པ་གོར་བཻ་རོ་དང་། རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་དང་། སྐ་ཅོག་ཞང་གསུམ་ལ་སོགས་པའི་ལོ་ཙཱ་བ་བརྒྱ་ཕྲག་བཅུར་ལོངས་པ་ཙམ་གྱིས། སྡེ་སྣོད་གསུམ་དང་། རྒྱུད་སྡེ་དྲུག་གམ་བཞིའི་ངེས་པ་ཅན། དེ་
དག་གི་དགོངས་འགྲེལ་དང་བཅས་པའི་ཆོས་མང་པོ་བསྒྱུར་ཞིང་། ཤེས་རབ་རྣམ་པ་གསུམ་གྱིས་གཏན་ལ་ཕབ། སློབ་དཔོན་ཆེན་པོས་བསམ་ཡས་མཆིམས་ཕུར་སྒྲུབ་སྡེ་ཆེན་པོ་བརྒྱད་ལ་སོགས་ཏེ་རྡོ་རྗེ་ཐེག་པའི་རྒྱུད་དང་སྒྲུབ་ཐབས་མང་དུ་བསྒྱུར་ཞིང་བསྟན་ནས་རྗེ་འབངས་ཉེར་ལྔར་གྲགས་པས་མཚོན་ལས་ཅན་གྱི་སྐྱེས་བུ་རྣམས་རྗེས་སུ་བཟུང་། ཡེར་པ་དང་མཆིམས་ཕུར་སྒོམ་གྲྭ་གཙུགས་པས་ནམ་མཁའི་ལམ་ལ་གྱ་གྱུར་འགྲོ་བ་མང་པོ་བྱུང་། དེ་དུས་ཀྱི་བསྟན་པ་དར་བ་ལྟ་བུ་རྒྱ་གར་དུའང་མ་བྱུང་ཞེས་ཇོ་བོ་དཱི་པཾ་ཀ་ར་གསུངས། ཁྲི་སྲོང་གི་སྲས་སད་ན་ལེགས་མཇིང་ཡོན་ཏེ་མུ་ཏིག་བཙན་པོས་ཡབ་མེས་ཀྱི་གཙུག་ལག་ཁང་དང་། ལོ་པཎ་ཐམས་ཅད་ལ་བསྟི་སྟངས་ཕུལ་དུ་ཕྱིན་པ་མཛད། རྒྱལ་སྡེ་སྐར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། སྔར་མ་འགྱུར་བའི་གསུང་རབ་ཀྱང་ཐོགས་ཤིག་བསྒྱུར། བོད་འབངས་ཀུན་བདེ་སྐྱིད་ཀྱི་གྲིབ་བསིལ་ལ་ངལ་གསོ་བའི་དབུགས་འབྱིན་ཆེན་པོ་མཛད། ཨུ་རྒྱན་སངས་རྒྱས་གཉིས་པ་ལ་མི་ཕྱེད་པའི་དད་པ་དང་ལྡན་པས་ཟབ་རྒྱས་ཀྱི་གདམས་པ་མང་པོས་རྗེས་སུ་བཟུང་ཞིང་གུང་ཐང་ལ་ཁར་གཤེགས་སྐྱེལ་མ་མཛད་པ་ལ་སོགས་པའི་ཞལ་ཆེམས་ཡི་གེ་ཀྱང་སྣང་། དེའི་སྲས། གཙང་མ། ལྷ་རྗེ། ལྷུན་གྲུབ། དར་མ། རལ་པ་ཅན་
དང་ལྔ་ལས། འཕགས་ཆེན་ལག་ན་རྡོ་རྗེའི་སྒྱུ་འཕྲུལ་རྣམ་པར་རོལ་པ་ཁྲི་རལ་པ་ཅན་གྱིས་རྒྱལ་སྲིད་བཟུང་། རྒྱ་བལ་གྱི་པཎྜི་ཏ་མང་པོའང་སྤྱན་དྲངས། ཉི་འོག་གི་མཁན་པོ་ཛི་ན་མི་ཏྲ་ལ་སོགས་པ་དང་། ལོ་ཙཱ་བ་སྐ་ཅོག་སོགས་གདན་འཛོམས་པར་བྱས། སྔར་ཡབ་མེས་ཀྱི་དུས་བསྒྱུར་བའི་ཆོས། ཨོ་རྒྱན། བལ་ཡུལ། རྒྱ་ནག་སོགས་སྐད་དུ་མ་ལ་བརྟེན་ནས་བསྒྱུར་བས་བོད་སྐད་ལ་འཇུག་དཀའ་བར་རང་སོར་བཞག་པ་རྣམས་ཡུལ་དབུས་འགྱུར་འཆང་གི་རྒྱ་དཔེ་དང་བསྟུན་ནས་སྐད་གསར་བཅད་ཀྱིས་གཏན་ལ་ཕབ། ཡབ་མེས་ཀྱི་གཙུག་ལག་ཁང་ལ་བསྙེན་བཀུར་དང་། བཤད་སྒྲུབ་ཀྱི་སྲོལ་ཤིན་ཏུ་དར། འོན་ཅང་རྡོའི་ལྷ་ཁང་། རྨང་ཐོག་གསུམ་རྡོ་བ། བར་ཐོག་གསུམ་སོ་ཕག །སྟེང་ཐོག་གསུམ་ཤིང་ལས་གྲུབ་པ། ཐོག་རེ་རེ་བཞིན་བྱ་འདབ་དང་སྒོ་དང་ཕ་གུ་ལ་སོགས་ཀྱིས་རྣམ་པར་མཛེས་ཤིང་། སྟེང་གི་རྒྱ་ཕུབས་རླུང་གི་འཁྲུལ་འཁོར་ལས་གདུགས་ལྟར་བསྐྱོད་པ་ལ་སོགས་པའི་ངོ་མཚར་གྱི་བཀོད་པ། མིག་འཕྲུལ་གྱི་དཔེ་ཟླར་བྱས་པ་བཞེངས། བསྟན་པ་ལ་ཤིན་ཏུ་གུས་པས་དགེ་འདུན་རེ་ལ་འབངས་མི་ཁྱིམ་བདུན་ཕུལ་པ་སོགས་མདོར་ན་བསྟན་པའི་རྩ་ལག་ཆེན་པོ། ཆོས་རྒྱལ་མེས་དབོན་རྣམ་གསུམ་ཞེས་གྲགས་པའི་བ་དན་དཀར་པོས་སྲིད་རྩེའི་བསམ་གཏན་པ་དག་ཀྱང་ཚོར་བ་ལ་སོགས་པའི་ཉེ་བར་ལེན་པ་
དྲིའི་བཞོན་པ་ཅན་དང་འགྲོགས་སུ་བཅུག་ནས་དད་པ་དང་རྗེས་སུ་ཡི་རང་བའི་རྣམ་རྟོག་གི་འདུ་འགོད་རྒྱ་ཆེན་པོ་ལ་འགོད་པར་ནུས་པའི་འཕྲིན་ལས་ཅན། ཐུགས་བསྐྱེད་ཀྱི་རྩ་བ་བརླིང་བ། སྙིང་རྗེའི་བ་གམ་བརྗིད་པ། དད་པའི་གཏེར་མཛོད་ཕྱུག་པ། སྙིང་སྟོབས་ཀྱི་གྲྭ་ཟུར་རྣོ་བ། གཞན་ཕན་གྱི་ཁྱད་ནོར་འཛོམས་པ། སྨོན་ལམ་གྱི་སྲོག་ཤིང་བརྟན་པ། འཕྲིན་ལས་ཀྱི་ལོ་འདབ་རྒྱས་པ། ཕན་བདེའི་གྲིབ་བསིལ་མང་བ། ཉོན་མོངས་ཀྱི་ཚ་གདུང་ལས་སྐྱོབ་པ། ཐར་པ་དང་ཐམས་ཅད་མཁྱེན་པའི་འབབ་སྟེགས་ལ་བདག་ཅག་གངས་ཅན་པ་རྣམས་གཞོལ་བར་བྱེད། འབབ་པར་བྱེད་པའི་བདག་ཉིད་ཆེན་པོ་འདི་དག་གི་བཀའ་དྲིན་ལ་རྣམ་པ་ཐམས་ཅད་ནས་བསམས་ཤིང་། དེ་དག་གིས་བསྟན་པའི་སྲོག་ཤིང་གཅིག་ཏུ་བཀུར་བའི་ཆོས་དང་གང་ཟག་གི་གནས་ཆུད་གཟོན་པའི་ཀུན་སློང་གི་གདོན་ཆེན་པོ་དང་མ་འགྲོཊ་པའི་སྐྱེས་བུ་དམ་པ་རྣམས་ལའང་ཕྱག་བྱ་བར་འོས་སོ། །དེ་ལྟར་སྐྱེ་དགུ་ཀུན་གྱི་ཕན་བདེའི་སྐྱེད་མོས་ཚལ་ལོག་པའི་སྨོན་ལམ་གྱིས་རྣམ་པར་བརྫི་བའི་སྤྲིན་གྱི་དུམ་བུ་གླང་དར་མ་འུ་དུམ་བཙན་རྗེ་བློན་གྱི་སྙིང་ལ་ཡིད་ཀྱི་སྲུབ་ཤིང་དྲག་པོས་རབ་ཏུ་བསྲུབས་ནས། མངའ་བདག་རལ་པ་ཅན་བཀྲོངས། ལོ་པཎ་འདུ་བའི་པད་ཚལ་བཤིག །རབ་བྱུང་རྣམས་རྟགས་དང་ཕྲལ།
ལ་ལ་རྔོན་པར་བཙུད། གསུང་རབ་ཕལ་ཆེར་ལྷ་སའི་བྲག་ལ་སྦས། འགའ་ཞིག་མེ་དང་ཆུར་སྦྱངས། ཇོ་ཤཱཀ་རྣམ་གཉིས་ཀྱང་ཆུ་ལ་བསྐྱུར་བའི་གཏམ། ཆོས་བློན་རྣམས་ཀྱི་རྣ་བར་གཟོན་པར་གྱུར་ཏེ། སྐུ་གཟུགས་ཀྱི་ལྕིད་ལ་བསྙད་ནས་བྱེ་སྟོངས་སུ་སྦས། ལྷ་ས། བསམ་ཡས། ར་མོ་ཆེ་རྣམས་ཀྱི་གཙུག་ལག་ཁང་གི་སྒོར་ཞལ་བ་བྱས་པ་ལ་རྒྱལ་པོ་མགུ་བའི་སླད་དུ་བཙུན་པ་ཆང་འཐུང་བའི་ཆ་བྱད་བྲིས། རྒྱལ་བའི་བསྟན་པ་རིན་པོ་ཆེའི་ལོ་ཏོག་ལ་སེར་བས་བྱ་བ་བཞིན་དུ་བསྣུབས་སོ། །དེ་ལྟ་ནའང་རྒྱལ་བའི་ཐུགས་རྗེའི་རོལ་པ་ནི་ཟད་མི་ཤེས་པས། དཔལ་ཨོ་རྒྱན་སངས་རྒྱས་གཉིས་པའི་དངོས་སློབ། རི་བྲག་ལ་ཐོགས་རེག་སྤངས་པའི་རྣལ་འབྱོར་གྱི་དབང་ཕྱུག་ཆེན་པོ། གསང་བའི་བདག་པོ་ལག་ན་རྡོ་རྗེའི་ཡེ་ཤེས་སྒྱུ་མའི་རོལ་པ། ལྷ་ལུང་དཔལ་གྱི་རྡོ་རྗེས། ཆུ་སྲིན་རྒྱལ་མཚན་གྱི་དཔུང་པ་བླ་ན་མཐོ་བའི་རྒྱལ་པོ་སྡིག་ཅན་གྱི་སྙིང་ལྕགས་མདས་རྣམ་པར་བཀས་པས། མདའ་ལ་འཇུ་ཞིང་། ཡང་ན་ལོ་གསུམ་གྱི་སྔས། ཡང་ན་ལོ་གསུམ་གྱི་ཕྱིས་ཞེས་པའི་ཀུ་ཅོ་དྲག་པོ་འདོན་བཞིན་དུ་དམྱལ་བ་མནར་མེད་པའི་གྲོང་ཁྱེར་ཆེན་པོར་ཆས་སོ། །སྐབས་འདིར་འགོས་ལོ་ཆེན་པོའི་དེབ་གཏེར་དུ། བསྟན་པ་བསྣུབས་རྗེས་བོད་ཀྱི་ཁྱིམ་པ་རྣམས་ཀྱིས་ཀྱང་དཀོན་མཆོག་གསུམ་ལ་གུས་པར་བྱས་པས། ལྷ་ས་དང་བསམ་ཡས་
ལ་སོགས་པའི་གཙུག་ལག་ཁང་རྣམས་མ་ཞིག །ཁྱིམ་དང་རི་སུལ་ན་གནས་པའི་སྔགས་པ་རྟེན་སྐྱ་བོར་གྱུར་པ་དེ་དག་གིས་ཀྱང་རང་ཉིད་ཀྱི་བསྒྲུབ་པ་ཚུལ་བཞིན་དུ་ཉམས་སུ་བླངས། བསྟན་པ་སྤྱི་ལ་ཡང་གུས་པར་བྱས་པས། མངའ་བདག་རལ་པ་ཅན་ཡན་ཆོད་དུ་འགྱུར་བའི་བཀའ་དང་བསྟན་བཅོས་ཀྱི་པོ་ཏི་རྣམས་ལེགས་པར་བསྲུངས་པས། སྔོན་འགྱུར་བ་ཕལ་ཆེར་ད་ལྟ་ལོངས་སྤྱོད་དུ་ཡོད་པ་འདི་ཡིན་ལ་ཞེས་གསུངས། རིང་མིན་སྲས་འོད་སྲུངས་དང་། ཡུམ་བརྟན་ཆེར་སོན་ནས་ཇོ་བོ་རྣམ་གཉིས་ཁྲི་ལ་བཞུགས་སུ་བཅུག །གཙུག་ལག་ཁང་ལ་ཡང་སྲི་ཞུ་མཛད་མོད་དེ། གླང་དར་གྱིས་བསོད་ནམས་མ་ཡིན་པ་བྱེད་པས་མངའ་རིས་བགོ་བཤར་སོང་། བོད་རྗེའི་གདུང་གིས་བོད་ཁམས་ལ་དབང་བསྒྱུར་བའི་རྟེན་འབྲེལ་གཞན་དུ་གྱུར་ཏོ། །རེ་ཞིག་ན་པཎྜི་ཏ་སྨྲྀ་ཏི་དང་། ཕྲ་ལ་རིང་བ་བོད་དུ་བྱོན། སྤྱན་འདྲེན་པ་པོའི་ལོ་ཙཱ་བ་སླེ་རུ་རྩེ་བྱ་བ་འདས་པས་པཎྜི་ཏ་གཉིས་ཡུན་རིང་པོར་འཁྱམས། སྨྲྀ་ཏིས་རྟ་ནག་ཏུ་རྫི་བོ་མཛད། མཐར་གཉིས་ཀ་ཁམས་ལ་བྱོན་ཏེ་སྨྲྀ་ཏིས་སྨྲ་བའི་སྒོ་མཚོན་ཆར་གྲགས་པའི་བསྟན་བཅོས་ཀྱང་མཛད་དོ། །དེ་ནས་བསྟན་པ་ཕྱི་དར་བྱུང་སྟེ། དར་མས་བསྟན་པ་བསྣུབས་དུས་དཔལ་ཆུ་བོ་རིའི་སྒོམ་གྲྭ་ན་སྨར་ཤཱཀྱ་དང་། གཡོ་དགེ་འབྱུང་དང་། གཙང་རབ་གསལ་གསུམ་གྱི་
བཙུན་པ་རི་དྭགས་འདེད་པ་གཟིགས་པས། བསྟན་པ་བསྣུབས་པའི་ཚུལ་མཁྱེན་ནས་ཉིན་པར་ཡིབ་ཅིང་། མཚན་མོ་བཤུལ་དུ་ཞུགས་ནས་མངའ་རིས་སུ་བྲོས། དེར་ཡང་བཞུགས་པར་མ་ནུས་ནས་བྱང་ལམ་བརྒྱུད། མདོ་སྨད་སྲོ་གུ་ལུང་དུ་བརྟོལ། སྨོན་ལམ་གྱི་མཐུ་ཚད་མེད་པའི་བླ་ཆེན་དགེ་བ་རབ་གསལ་རབ་ཏུ་བྱུང་བའི་མཁན་སློབ་གསུམ་པོས་མཛད་པ་ལས་བསྟན་པའི་མེ་རོ་མདོ་སྨད་ནས་བསླངས། དེ་བཞིན་དུ་སྟོད་ནས་པཱ་ལའི་མཐའ་ཅན་རྣམ་པ་གསུམ་ལས་རིམ་པར་གསོས། དེའི་ཕྱི་ན་འཕགས་པའི་ཡུལ་བི་ཀ་མ་ལ་ཤི་ལའི་གཙུག་ལག་ཁང་གི་པཎྜི་ཏ་རྒྱ་མཚོའི་གཙུག་རྒྱན་ཇོ་བོ་དཱི་བཾ་ཀ་ར་དང་། མ་བྱོན་སངས་རྒྱས་གསུམ་པར་གྲགས་པ་ཁ་ཆེའི་པཎྜི་ཏ་ཤཱཀྱ་ཤྲཱི་ལ་སོགས་པ་ལྗོངས་འདིར་བྱོན་ནས་དམ་པའི་ཆོས་འདུལ་བའི་སྡེ་སྣོད་གཙོ་བོར་གྱུར་པའི་བསྟན་པ་རིན་པོ་ཆེའི་ལྗོན་ཤིང་ཡལ་ག་མང་པོར་བརྐྱང་ངོ་། །དེ་བཞིན་དུ་རྡོ་རྗེ་ཐེག་པའི་གནས་ལའང་མཁས་པ་དང་གྲུབ་པ་བརྙེས་པའི་སྐྱེས་བུ་དམ་པ་མང་དུ་བྱོན་པ་ཀུན་ཀྱང་དེ་བཞིན་གཤེགས་པའི་འཕྲིན་ལས་ཀྱི་རོལ་པ་ཟད་མི་ཤེས་པའི་མཐུ་ལས་བྱུང་བ། བསྟན་པའི་ལམ་སྲོལ་ལ་ཡང་དག་པར་ཞུགས་པ། དངོས་དང་བརྒྱུད་ནས་སེམས་ཅན་ལ་ཕན་པ་རྒྱ་ཆེན་པོ་དང་། ཐར་པ་དང་ཐམས་ཅད་མཁྱེན་པའི་ལམ་ལ་བདེ་བླག་ཏུ་དཀྲི་བའི་ས་མཁན་འབའ་ཞིག་ཏུ་གྱུར་པའོ། །
དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་པ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་མཐའ་གྲུར་ཁྱབ་པའི་རྒྱན་ཞེས་བྱ་བ་ལས། གངས་རིའི་ཁྲོད་དུ་རྒྱལ་བསྟན་ཇི་ལྟར་བྱོན་པའི་རྣམ་གཞག་མདོ་ཙམ་བརྗོད་པའི་རབ་ཏུ་བྱེད་པ་སྟེ་གསུམ་པའོ།། །།