 རྡོ་གྲུབ་ཆེན་ཀུན་བཟང་གཞན་ཕན་གྱི་གསུང་འབུམ།གླེགས་བམ། དང་པོ༽རྡོ་གྲུབ་ཆེན་ཀུན་བཟང་གཞན་ཕན།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཡོན་ཏན་རིན་པོའི་ཆེའི་མཛོད་ཀྱི་འགྲེལ་པ་རྒྱ་མཚོའི་ཆུ་ཐིགས་ནོར་བུའི་ཕྲེང་བ།ལེའུ་དང་པོ།རྡོ་གྲུབ་ཆེན་ཀུན་བཟང་གཞན་ཕན་གྱི་གསུང་འབུམ་གླེགས་བམ་དང་པ་ོབཞུགས་སོ།། མཁྱེན་རབ་འཇམ་དཔལ་རྣོན་པོའི་རྗེས་འགྲོ་ཞིང། །བྱམས་བརྩེའི་འོད་དཀར་ཟེར་ལྡན་སྤྱན་རས་གཟིགས། །མཐུ་སྟོབས་རང་བྱུང་གསང་བདག་རྡོ་རྗེ་འཛིན། །རིག་གསུམ་སྤྱི་གཟུགས་འཇིགས་མེད་གླིང་པར་འདུད། །གང་དེའི་བཞེད་གཞུང་མདོ་སྔགས་ཡོངས་འདུས་ཆོས། །སྐལ་བཟང་གདུལ་བྱའི་རེ་སྐོང་ཡིད་བཞིན་དབང། །འདི་ཀོ་ཐེག་དགུའི་དགོངས་མཛོད་བླ་ན་མེད། །དེ་ཕྱིར་དེ་ཡི་འབྲུ་འགྲེལ་གསལ་བར་བྱ། །དེ་ཡང་རིག་འཛིན་འཇིགས་མེད་གླིང་པའི་བཞེད་གཞུང་མདོ་སྔགས་ཀྱི་དགོངས་དོན་མ་ཚང་བ་མེད་པ་གཏན་ལ་ཕབ་པའི་བསྟན་བཅོས་འདི་ཉིད་ཀྱི་བསྡུས་འགྲེལ་ལམ་ཚིག་འགྲེལ་རང་བློས་དཔོགས་ཚོད་ཙམ་ཞིག་ཡི་གེའི་རིས་སུ་འགོད་པ་ལ། དང་པོ་རྒྱ་གར་སྐད་དུ་ནི། རྒྱ་དཀར་ནག་གཉིས་སུ་ཡོད་པ་ལས། དང་པོ་སངས་རྒྱས་སྟོང་གི་འབྱོན་བཞུགས་ཀྱི་ཡུལ་དང་དམ་པའི་ཆོས་ཀྱི་འབྱུང་ཁུངས་ཡིན་པའི་ཕྱིར་དང་རྟེན་འབྲེལ་དང་གོས་རྒྱན་སོགས་དཀར་པོ་ལ་དགའ་བས་དེ་སྐད་དུ་གྲགས་པ་ལ། དེ་ཡང་དཀར་པོ་ལ་གར་ཞེས་བསྒྱུར་བ་ནི་ལོ་ཙཱ་བ་རྣམས་ཀྱིས་སུམ་རྟགས་དང་མཐུན་པར་འཇུག་པ་བདེ་བའི་ཕྱིར། ཡིན་པ་གཞུང་ཁུངས་ལྡན་རྣམས་ནས་གསུང་པ་དང་། རྒྱ་ནག་ཅེས་པ་སྤྱིར་འཇིག་རྟེན་གྱི་ཁྲིམས་དང་ལུགས་ཀྱི་བྱ་བ་གཙིགས་སུ་བྱེད་པ་དང། གོས་རྒྱན་དང་རྟེན་འབྲེལ་ནག་པོ་བཟང་པོར་འཛིན་པས་དེ་སྐད་ཅེས་བཏགས་པའོ། །དེ་ལ་རྒྱ་གར་སྟེ་འཕགས་ཡུལ་བར་སྐད་རིགས་མི་འདྲ་བ་མང་དུ་ཡོད་ཀྱང། སཾ་སྐྲྀཾ་ཏ་ལྷའི་སྐད་ལྟར་ན། གུ་ཎ་ཡོན་ཏན། ཀོ་ཤ་མཛོད། རཏྣ་རིན་ཆེན། དེ་ཙམ་གྱིས་མཚན་ངོས་ཟིན་པར་བྱས་པའི་ཁོངས་སུ་ཐོག་མཐའ་བར་གསུམ་གྱི་དོན་ཚང་བར་བྱས་ཀྱང་རུང་མོད། འོན་ཀྱང་དེའི་གཤམ་དུ་པྲ་མོ་དྲ་པྲྀཥྚི་ཞེས་ཚུར་མཐོང་བྱིས་པའི་བློས་འཛུད་པར་བྱས་པ་དང་། མཇུག་ཏུ་ན་མཿསྟེ་ཀུན་བསྡོམས་པ་བོད་སྐད་དུ་བསྒྱུར་ན། ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ཡིན་ལ། དེ་ནི་རྒྱལ་བ་རྣམས་ཀྱི་གསང་བ་གསུམ་གྱི་དཔལ་ཡོན་གཅིག་ཏུ་དྲིལ་བ་རིན་པོ་ཆེའི་མཛོད་ལྟ་བུའི་བསྟན་བཅོས་བྱང་ཆུབ་མཆོག་གི་གཞུང་ལམ་རིམ་དགུའི་ཐེག་པའི་དགོངས་དོན་མ་ལུས་པ་ཚང་ཞིང་སྐལ་བཟང་རྗེས་འཇུག་རྣམས་དགའ་བར་བྱེད་པའི་ཞིང་པ་རྣམས་ཀྱི་ལོ་ཏོག་ལ་ཆར་བབ་པ་ལྟ་བུའི་དགའ་སྤྲོ་ཐོབ་བར་བྱེད་པ་ཞེས་བྱ་བ་མཚན་སྨོས་པའོ། །དཀོན་མཆོག་གསུམ་ལ་ཕྱག་འཚལ་ལོ། ཞེས་པའི་དོན་ནི། འཇིག་རྟེན་འདི་ན་གང་དཀོན་ན་ཨུ་དུམ་ཝཱ་རའི་མེ་ཏོག་དཀོན། དེ་བས་ཀྱང་སངས་རྒྱས་འཇིག་རྟེན་དུ་འབྱོན་པ་དཀོན། དེ་ལས་ཀྱང་གསང་སྔགས་རྡོ་རྗེ་ཐེག་པ་ལ་སོགས་དམ་པའི་ཆོས་སྟོན་པ་དཀོན་ཞིང་། དེ་འཛིན་པར་བྱེད་པའི་རིག་གྲོལ་གཉིས་ལྡན་གྱི་འཕགས་པའི་དགེ་འདུན་ཡང་དཀོན་ཏེ། དཔེར་ན་རིན་པོ་ཆེའི་རིགས་ཐམས་ཅད་དང་ཁྱད་པར་ཡིད་བཞིན་ནོར་བུ་དབང་གི་རྒྱལ་པོ་དཀོན་པ་དེ་ལས་ནི་སངས་རྒྱས་བཅོམ་ལྡན་འདས་རྣམས་གྲངས་མེད་གསུམ་དུ་ཚོགས་བསགས་ཤིང་སྒྲིབ་པ་སྤྱངས་པའི་སྟོབས་ཀྱིས་སངས་རྒྱས་ཀྱི་གོ་འཕངས་ཐོབ་དགོས་པ་ཡིན་པས་དེ་ལས་དཀོན་པའི་མཆོག་འཇིག་རྟེན་འདི་ན་གང་ཡང་ཡོད་པ་མ་ཡིན་ནོ། ཡུལ་དེ་གསུམ་ལ་ཕྱག་འཚལ་བའང་རྗེ་བཙུན་ཆོས་ཀྱི་རྒྱལ་པོས་བསྟན་བཅོས་རྩོམ་པ་ལ་བར་ཆད་མེད་པ་དང་མཐར་ཕྱིན་པའི་ཆེད་དུ་ཡིན་ཞིང་། ཕྱག་གི་སྒྲ་བཤད་ནི། དད་པ་དང་གུས་པའི་མངོན་རྟོགས་ཀྱིིས་ལག་པའི་ཕྱག་རྒྱ་པདྨ་ཁ་འབུས་པ་ལྟར་བཅས་ཏེ་གནས་གསུམ་དུ་བཞག་པས་སྒོ་གསུམ་གྱི་སྒྲིབ་པ་འདག་པར་འདོད་པ་ལ་འཚལ་ལོ་ཞེས་པའོ། །རིན་ཆེན་རྣམ་གསུམ་ནི། སྟོན་པ་བླ་མེད་སངས་རྒྱས་རིན་པོ་ཆེ། སྐྱོབས་པ་བླ་མེད༴ འདྲེན་པ༴ ཞེས་ཡོངས་སུ་གྲགས་པའི་སྤྲིངས་ཡིག་གིས་མི་ཁོམ་པའི་གནས་བརྒྱད་མ་གཏོགས་གཞན་ལས་དང་སྐལ་བར་ལྡན་པས་ཡུལ་ཀུན་ཏུ་ཁྱབ་པ་ཡིན་ཞིང་། དཔེར་ན་རྒྱལ་པོ་ཆེན་པོའི་བཀའ་རྟགས་ཀྱིས་སྤྲིངས་ཡིག་ཕྱག་རྒྱས་བཏབ་སྟེ་མངའ་ཞབས་པ་སུ་ལ་སྤྲིངས་ཀྱང་བཟློག་ཏུ་མེད་པའོ། །འདིའི་གཏམ་རྒྱུད་ནི། སྔོན་ཡུལ་ཝཱ་ར་ཎཱ་སིར་ནོར་ཆེན་ཞེས་པའི་ཚོང་དཔོན་ཞིག་ལ་ཆུང་མ་བསོད་ནམས་ཅན་རིན་ཆེན་ལྡན་ཞེས་བྱ་བ་ཡོད་པ་བདག་པོ་ལྔ་ལམ་དུ་གྱུར་ཚེ་བུད་མེད་དེའི་མཆོད་རྟེན་ཆེན་པོའི་རྩེར་དོ་ཤལ་གྱི་སྤུད་པར་བྱས་པའི་བསོད་ནམས་དང་རྣམ་སྨིན་གྱིས་སཾ་ག་ལའི་རྒྱལ་པོའི་བུ་མོར་སྐྱེས་པ་ཡིན་ལ། དེ་ཉིད་སྐྱི་བ་གཞན་འགར་ཕྱུག་པས་རྒྱགས་ཤིང་རྨོངས་པའི་དབང་གིས་མཆོད་སྦྱིན་ལ་སྨོད་ཅིང་སེར་སྣ་ཆེན་པོའི་ལས་འབྲས་ཀྱིས་ཡུན་རིང་པོར་འབངས་མོར་གྱུར་པ་ནི། ཤཱཀྱའི་ཁྱིམ་དུ་འབངས་མོ་རོ་ཧི་ཏ་ཞེས་བྱ་བར་གྱུར་ཚེ་ཤཱ་ཀྱ་མིང་ཅན་གྱི་ཆུང་མ་དང་འབངས་མོ་གཉིས་སྟོན་པས་ཆོས་གསུངས་པས་གྲལ་དུ་ཕྱིན་ཚེ་རྗེ་མོའི་མུ་ཏིག་གི་དོ་ཤལ་ཁྱིམ་དུ་ལུས་པ་བྲན་མོ་མངགས་ཚེ། དེ་ཆོས་ཉན་ལོངས་མེད་པར་འགྲོ་དགོས་པར་འགྱོད་པ་སྐྱེས་པ་སྟོན་པས་མཁྱེན་ནས་ཚིགས་སུ་བཅད་པ། གཅིག་གནང་བ་འདོན་བཞིན་ཕྱིན་པའི་ལམ་བར་དུ་བ་དྲུས་མ་ཞིག་གིས་བརྡུངས་ཏེ་ཤི་བ་སཾ་ག་ལའི་རྒྱལ་པོའི་བུ་མོར་སྐྱེས་པའི་ཚེ་མུ་ཏིག་གིས་ཆར་བབས་པ་མུ་ཏིག་ཅན་ནམ་མུ་ཏིག་འཁྲི་ཤིང་དུ་བཏགས་པའོ། དེ་ནས་རེ་ཞིག་ན་དེའི་བསོད་ནམས་ཀྱི་མཐུས་མཉན་ཡོད་ཀྱི་ཚོང་པ་རྣམས་རྒྱ་མཚོར་བརྒལ་ནས་སཾ་ག་ལར་སླེབས་ཚེ་མཚན་མོར་སངས་རྒྱས་ཀྱིས་གསུངས་པའི་ཚིགས་སུ་བཅད་པ་དག་གླུར་བླངས་པ་ཐོས་ཚེ་བུ་མོའི་ཡིད་ཕྲོགས་ཏེ་གླུ་དེ་ད་རུང་ལོངས་དང་ཟེར་བར། དེ་རྣམས་ཀྱིས་དེ་ནི་གླུ་མ་ཡིན། སྟོན་པ་སངས་རྒྱས་ཀྱི་གསུང་ཡིན་ཚུལ་བསྙད་པར་བུ་མོ་དད་པ་དང་དགའ་བ་ཆེར་སྐྱེས་ནས་སངས་རྒྱས་ཀྱི་ལོ་རྒྱུས་དྲིས་པས། ཚོང་པ་རྣམས་ཀྱིས་ཅི་ནུས་ཀྱི་ཡོན་ཏན་བརྗོད་པས་བུ་མོ་སྔོན་ལས་ཀྱང་དད་པ་དང་རབ་ཏུ་དགའ་བར་བྱས་ནས་བཅོམ་ལྡན་འདས་ལ་སྤྲིངས་ཡིག་འདི་ལྟར་ཕུལ་བ། ཀྱཻ་མ་བསོད་ནམས་ཚོངས་ཟོང་དག་གིས་རྙེད་པར་གྱུར་བ་ཁྱོད་ནི་དྲན་པ་ཉིད། རྒུད་དང་གདུང་བ་དང་ནི་སྲིད་པ་འཇོམས་པའི་སྲིད་པའི་སྨན་བཟང་ཅི་ཡང་ཡིན། བཅོམ་ལྡན་ལས་བྱུང་གཏམ་གྱིས་ཉེར་བསྐྲུན་ཡང་དག་རིག་པ་མྱོང་བའི་ས། བཅོམ་ལྡན་འདི་དེ་བདག་གི་བདུད་རྩི་ཅི་ཡང་བགོ་སྐལ་ཆེན་པོར་གྱུར་བ་ཡིན། ཞེས་ཕུལ་བར་སྟོན་པས་གཟིགས་བཞིན། རི་མོ་མཁན་གྱི་བྲིར་མ་ནུས་པའི་སྐུ་གཟུགས་རས་ལ་བཀོད་པའི་འོག་ཏུ་བཀའི་ཚིགས་བཅད་འགའ་དང་བཅས་ཏེ་དེ་ལ་སྤྲིངས་བ་མཐོང་བའི་མོད་ལ་དེ་ལས་བྱུང་བའི་བསམ་གཏན་དགོངས་པ་གཅིག་པ་ལྟ་བུ་ཉམས་སུ་མྱོང་ནས་སྐྱབས་སུ་འགྲོ་བ་གསུམ་དང་། བསླབ་པའི་གནས་ལྔ། རྟེན་འབྲེལ་བཅུ་གཉིས། འཕགས་ལམ་ཡན་ལག་བརྒྱད་སོགས་ཀྱི་རང་བཞིན་ཤེས་ནས་རྒྱུན་ཞུགས་ཀྱི་འབྲས་བུ་ཐོབ་བོ། །བུ་མོས་ཡུལ་དེའི་མི་རྣམས་ནང་པའི་བསྟན་པའི་སྒོར་བཙུད་ཅིང་སྐུ་གཟུགས་དེ་ལ་ཐུབ་པ་འོད་ཟེར་མ་ཞེས་གྲགས་ཤིང་སྐུ་གཟུགས་ཀུན་གྱི་ཐོག་མ་ཡིན་ཞེས་བཤད་དོ། །སཾ་ག་ལའི་རྒྱལ་པོ་ནི་སྔོན་ཆད་ཕྱི་པའི་རྒྱུད་པ་འཛིན་ཞིང་བུ་མོ་ཡང་དེ་ལས་མ་འདས་པས། ཉོན་མོངས་བརྒྱད་ཁྲི་བཞི་སྟོང་ཉན་རང་ལྟར་མ་སྤངས། བྱང་སེམས་ལྟར་གཉེན་པོས་མ་བཅིལ། གསང་སྔགས་ལྟར་རང་ངོར་མ་གྲོལ་བའི་ཉོན་མོངས་པ་རང་རྒྱུད་ལྡན་ཕྱིར་བདུད་ཀྱི་བུ་མོའི་ཞེས་སྨོད་པའི་སྒྲ་དང་། དེའི་བཞིན་རས་མེ་ཏོག་ཀུནྡྷའི་ཚལ་ལྟར་ཤིན་ཏུ་དཀར་ཡང་སྔོན་ཆད་ཕྱི་པས་བཀབ་བའི་སྐྱོན་སྐལ་བ་ངན་པར་བགྱི་ལ་མངོན་པར་ཕྱོགས་པ་ནི་སངས་རྒྱས་ཀྱི་མཐུ་ཁོ་ནས་སྐལ་བཟང་དུ་བྱས་པའོ། བློ་མཆོག་སངས་རྒྱས་བྱང་སེམས་རྣམས་དང། གཏད་རབས་བདུན། འཛམ་གླིང་མཛེས་པའི་རྒྱན་དྲུག་མཆོག་གཉིས་སོགས་སྔོན་ཆད་འཕགས་བོད་དུ་མཁས་གྲུབ་ཇི་སྙེད་བྱོན་པ་རྣམས་ཀྱི་གསུངས་རབ་ཀྱིས་ཡོན་ཏན་དག་བྱེད་ཀྱི་གཏེར་ནི་རྒྱ་མཚོར་ཆེན་པོ་ལྟར་བོ་རལ་ཟག་གསུམ་གྱི་སྐྱོན་དང་བྲལ་ཞིང་གཞོམ་གཞིག་མེད་པར་གཅིག་ཏུ་བརླིངས་པར་གྱུར་ན། ད་དུས་ཀྱི་བསྟན་བཅོས་རྩོམ་འདོད་ཕལ་མོ་ཆེས་རྩོམ་པའི་སྐྱོན་དོན་མེད་པ་དང་། དོན་ལོག་པ་དང། ངན་གཡོ་དང་། སྙིང་པོ་དང་བྲལ་བ་དང། ཐོས་པ་ལྷུར་ལེན་པ་དང་། རྩོད་པ་ལྷུར་ལེན་པ་སྟེ་ཕྱི་པའི་ངན་པ་དྲུག་དང་མ་བྲལ་ཞིང་། དོན་དང་ལྡན་པ་དང་། སྡུག་བསྔལ་སྤོང་བ་དང། སྒྲུབ་པ་ལྷུར་ལེན་པ་སྟེ་ནང་པའི་ཚུལ་གསུམ་གྱི་ཡོན་ཏན་དང་མི་ལྡན་བཞིན་དུ་རྩོམ་པ་ལ་འཇུག་པ་ནི་སྤྱི་བརྟོལ་ངོ་ཚ་དང་བྲལ་ཞིང་དཔྲལ་ཀོ་འཐུག་པོས་བརྩོམ་པ་ནི་རྒྱ་མཚོར་རླུང་གི་སྐྱོན་གྱིས་རླབས་ཕྲེང་གི་ཅ་ཅོ་སྒྲོགས་པ་ལྟ་བུ་འདི་རིགས་སྔོན་ལས་ལྷག་པའི་མཛེས་པ་གང་ཡང་མི་ངོམ་ཡང་། དམ་ཆོས་ཀྱི་རིགས་གང་ཡང་བརྗོད་པ་ལ་བརྟེན་དགོས་པའི་སླད་དུ་ན་གཞུང་འདི་ཉིད་མཉན་པར་འོས་སོ་ཞེས་འགྲེལ་ཏོ། །དེ་ཡང་གང་འཆད་པར་བྱེད་པའི་ཆོས་ལ་རྣམ་པ་གཉིས་ཏེ་མདོ་ལམ་དང་སྔགས་ལམ་གཉིས་སུ་བྱས་ཏེ། དང་པོ་ནི་སྐས་ཐེམ་བཞིན་མས་ནས་འཆད་དགོས་པས་ཐོག་མར་དལ་འབྱོར་བཅུའི་རང་བཞིན་ངོས་བཟུང་བའི་དོན་དུ་དང་པོར་དལ་འབྱོར་གྱི་ཚོམས་རྣམ་པར་བཞག་པ་ལ་ལྔ། མི་ལུས་རྣམ་པར་དབྱེ་བ། འགལ་ཟླ་མི་ཁོམ་པ་བརྒྱད་བཤད་པ། དལ་འབྱོར་གྱི་རང་བཞིན་ངོས་བཟུང་བ། རྙེད་པར་དཀའ་བའི་རྒྱུ་མཚན་བཤད་པས་འདི་ལྟ་སྟེ། ཐོག་མ་མེད་པའི་དུས་ནས་ད་ལྟ་ལ་མ་ཐུག་བར་དུ་སྐྱེ་རྒ་ན་འཆིའི་རིམས་ཀྱིས་བཏབས་པར་གྱུར་པའི་བྲོ་འཚལ་བ་དག་ལ། སྨན་ཆེན་ཏེ་དཀར་པོ་གཅིག་ཐུབ་ལྟ་བུ་ནི་མྱོང་གྲོལ་བདུད་རྩིའི་རོ་བཅུད་དང་ལྡན་པ་དམ་པའི་ཆོས་ཡིན་ལ། དེ་ཉིད་ལག་ཏུ་མཆིས་པ་ཉམས་སུ་མི་ལེན་པར་ཅི་དགར་སྤོང་བར་བྱེད་པའི་སྐྱེ་བོ་ལས་སྐལ་ངན་པ་རྣམས་ལ་བདག་གིས་ཇི་ལྟར་འདོམ་ཞེས་སྐྱོ་ཤས་ཀྱི་གསུངས་སོ། །རིང་ནས་ཞེས་ཐོག་མ་མེད་པའི་དུས་ནས་སུ་དང་མཛའ་ཞིང་བཤེས་པ་འཁོར་བའི་གནས་རིགས་དྲུག་པོ་ནི། འབྲོག་དགོན་ཏེ་ལུས་སྲོག་ལ་ཉེ་ཞོ་ཡོད་པའི་གནས་ཡུལ་མ་རུང་པར་ཡང་ནས་ཡང་དུ་སྐྱེ་སྲིད་བཟུང་སྟེ། མགོ་དང་ཡན་ལག་བཅད་བའི་སྡུག་བསྔལ་གྱི་ཚོར་བས་ཡང་ནས་ཡང་དུ་གདུང་བར་བྱས་ཤིང་འདིར་ཡང་ངན་སོང་གསུམ་སོགས་མི་ཁོམ་པའི་གནས་བརྒྱད་དུ་མི་སྐྱེ་བའི་དགེ་བསྒྲུབ་སྡིག་སྤང་སོགས་རྒྱ་ཆེར་བགྱིས་པའི་གདེང་ཅི་ཡང་མི་འདུག་པས། སྐྱེ་སྔོན་བཞིན་ཕྱིན་ཆད་ཀྱང་གནས་ངན་རྣམས་སུ་སྡུག་བསྔལ་གྱིས་གདུང་བར་གྱུར་པ་ད་ལྟ་བལྟར་མི་མངོན་པར་ལྐོག་ཏུ་གྱུར་པ་རྣམས་ནི། རང་སྐྱོན་གྱི་མི་དགེ་བའི་ལས་ལ་ཅང་མི་སེམས་པར་ད་དུང་མཐོ་རིས་བདེ་བ་ལོས་ཐོབ་སྙམ་ནས་དེ་ལ་སྲེད་ཅིང་ཞེན་པ་ཤིན་ཏུ་བླུན་རྨོངས་ཡིན་པའི་ཕྱིར། རང་ཉིད་ཀྱི་བསམ་པ་གོ་ལོག་ཏུ་སོང་བས་ཐར་ལམ་གྱིས་འཐས་བཟང་བརླག་པར་བྱེད་པ་པོ་དེ་ནི་ཚེ་འདི་ནས་ཕྱི་མར་ཉིང་མཚམས་སྦྱོར་ཚེ་ཡང་འོག་ནས་འོག་ཏུ་ལྟུང་བར་འགྱུར་ལ། ངན་སོང་གསུམ་དང་འདུ་ཤེས་མེད་པའི་ལྷ། མཐའ་འཁོབ་དབང་པོ་མ་ཚང་ལྟ་བ་ལོག སངས་རྒྱས་འབྱུང་བ་མེད་པ་དག་ཏུ་འཁྱམས། ཞེས་སྨོས་ཏེ། ཇི་སྐད་དུ། དམྱལ་བ་ཡི་དྭགས་དུད་འགྲོ་དང་། ཀླ་ཀློ་ཚེ་རིང་ལྷ་དང་ནི། ལོག་ལྟ་སངས་རྒྱས་ཀྱིས་སྟོང་པ། ལྐུགས་པ་འདི་དང་མི་ཁོམ་བརྒྱད། ཅེས་པ་ལྟར་རོ། གནས་ངན་དེ་དག་ཏུ་སྐད་གཅིག་ཐང་གཅིག་ཙམ་ལའང་བདེ་བའི་གོ་སྐབས་བཙལ་ཏུ་ཡོད་པ་མ་ཡིན་ཞིང་ལྕགས་བསྲེགས་ཀྱི་ས་གཞི་མཚོན་ཆ་སྣ་ཚོགས་ཀྱིས་ཆད་པ་རྩུབ་མོས་ཡང་དང་ཡང་དུ་སྲོག་འཕྲོག་པར་བྱས་ཀྱང་ལས་མ་ཟད་བར་དུ་འཆི་བར་མི་ནུས་པའི་དམྱལ་བ་པ་དེ་དག་ད་དུང་ཁོང་ཁྲོའི་ལས་ངན་གྱིས་རྙི་ལ་ཐོགས་ནས་རྣམ་སྨིན་དེ་ནས་ཟད་པ་ན་ཚེ་ཚད་རྫོགས་པའོ། །དེ་བཞིན་དུ་ཡི་དྭགས་སུ་སྐྱེས་ན་རྣག་ཁྲག་ཕྱི་ས་སོགས་ཀྱི་བཟའ་བ་ཅུང་ཟད་ཀྱང་མི་རྙེད་པའི་སྐྱོན་གྱིས་ཡི་དྭགས་རྣམས་ཕོངས་ཤིང་དབུལ་བའི་ཉམ་ཐག་པ་སྨོས་ཅི་དགོས་ཏེ། ཆུ་ཀླུང་དང་ལྗོན་པ་ལ་སྲེད་དེ་བལྟས་པའི་མོད་ལ་སྐམ་པ་དང་། བཟའ་བཏུང་ཅུང་ཟད་ཙམ་ཡང་ཁོང་དུ་སོང་ཡང་མེ་རུ་འབར་ནས་ནང་ཁྲོལ་འཚིག་པའི་སྡུག་བསྔལ་ཟད་མི་ཤེས་ཏེ། སྔོན་ཚེ་ལས་ངན་གྱི་རྒྱུ་བསགས་ཡུན་རིང་ཐུང་གི་སྒྲིབ་པའི་མཐུས་བྱས་པས་ཚེ་ཚད་ལ་ངེས་པ་མེད་དོ། །དུད་འགྲོ་ལའང་ཤ་ཁྲག་གི་འཚོ་བ་རྣམས་ཀྱིས་གཅིག་ལ་གཅིག་བཟའ་ཞིང་རྔོན་པའི་དམ་བཞག་ནི་འཇམ་པོའི་ལས་དབེན་ཞིང་ཤིན་ཏུ་རྩུབ་མོས་སྲོག་འཕྲོག་ཅིང་། ཞོན་པ་དང་ཁལ་འགེལ་བ་ལ་བཀོལ་ཕྱིར་འདུལ་བ་འཛིན་སར་བསླབ་པས་ཉམ་ཐག་པས་གནས་རྣམས་སུ་སྐྱེ་བ་ཐོབ་པར་གྱུར་ན་ཅི་བྱར་ཡོད་ཅེས་མེད་ཚུལ་བསྟན་པའོ། འཚོ་བའི་ལས་མཐའ་སྟེ་ཚེ་ཤིན་ཏུ་རིང་པོས་བསྲེངས་ནའང་། འཁོར་བའི་སྡུག་བསྔལ་ལ་སྐྱོ་བའི་གོ་སྐབས་ཅུང་ཟད་ཀྱང་མི་དབྱེ་བས་གཟུགས་མེད་དང་། ཐོས་བསམ་གྱི་རྟེན་འགགས་པ་སྟེ་ལུས་དང་འདུ་ཤེས་མེད་པའི་ལྷ་དེ་ནི་གཉིད་འཐུག་དང་བརྒྱལ་བའི་སྐབས་ལྟར་གནས་ཤིང་། ནམ་ཞིག་འཆི་ཁར་བབས་ཚེ། དེར་སྐྱེ་བའི་རྒྱུ་དགེ་བ་བཅུ་དང་གཟུགས་མེད་ཀྱི་ཏིང་ངེ་འཛིན་ཡིན་པ་དང་། དེའི་ནུས་པ་ལས་གནས་ངན་དུ་སྐྱེ་བ་ལ་ལོག་པར་ལྟ་བས་ཁོམ་ལྡན་གྱི་ལུས་མིན་ཞེས་པའོ། །རྐང་པ་གཉིས་པའི་ཁྱོགས་ཏེ་བཏེགས་པ་ལ་རབ་ཏུ་བརྟེན་ཡང་། དེ་ཡི་འདུ་ཤེས་སམ་ཀུན་སློང་བསོད་ནམས་མ་ཡིན་པས་དམ་ལ་བཞག་ཅིང་མི་དགེ་བའི་དབང་དུ་གྱུར་ཞིང་གཞུངས་པ་སྟེ། དེའི་ལས་ཐབས་ལ་མཁས་པའི་ཀླ་ཀློ་རྣམས་ནི་བླང་བྱའི་དགེ་བ་སྤང་ཞིང་དོར་བྱའི་སྡིག་པ་དང་དུ་བླངས་ཏེ་ཤིན་ཏུ་རྨོངས་པས་ལས་བཟང་ངན་འཆོལ་བའི་ནགས་ཚལ་རྒྱུས་མེད་པའི་གནས་ན་བྱིས་པ་གྲོགས་མེད་འཁྱམས་པ་ལྟ་བུའོ། །དབང་པོའི་དམ་བཅའ་ཉམས་པ་སྟེ་ངག་ལྐུགས་པ་ཚིག་གི་བརྡ་མི་འཕྲོད་པ་དང་། ཡིད་ལྐུགས་པས་དགེ་སྡིག་ཤན་མི་འབྱེད་པ་རྣམས་ནི། །འཕགས་པའི་དེད་དཔོན་སངས་རྒྱས་བྱང་སེམས་ཀྱི་སྤྲུལ་པ་དགེ་བའི་བཤེས་གཉེན་དག་དང་འཕྲད་པར་གྱུར་ཀྱང་། བྲག་ཆའི་ཆོ་ག་བཟུང་བའི་བྲག་རིའི་དྲུང་དུ་དགེ་སྡིག་གི་སྐད་ཆ་ཇི་ཙམ་བཤད་ཀྱང་ཅ་ཅོ་ཙམ་ལས་ལན་ལྡོན་མི་ནུས་པ་བཞིན། དགེ་སྡིག་སོགས་ཀྱི་བརྡ་མི་འཕྲོད་པའི་འབྲོག་དགོན་ཆེན་པོར་སྟེ་འདུ་འཛི་དང་རྣམ་གཡེང་གིས་སེམས་བག་མི་ཕེབ་པས་གདུང་བའོ། །སྐྱེ་བའི་རྐྱེན་གྱིས་གཞན་གསུམ་གྱིས་རྒྱུར་གྱུར་བ་རྒྱ་མཚོ་ལྟ་བུ་བརྒལ་བའི་གྲུ་བོ་ཆེ་ལྟ་བུ་ལུས་རྟེན་རྣམ་རིག་གི་བ་དན་ག་ཡོ་བ་ཅན་འདི་ཐོབ་ནས། སླར་ཡང་ཐར་ལམ་མི་གཉེར་ཞིང་སངས་རྒྱས་འབྱུང་བ་ལ་མཉེས་པར་མི་བགྱིད་ཅིང་། དགེ་བའི་བཤེས་གཉེན་གྱིས་བསླབས་པའི་དགེ་སྒྲུབ་སྡིག་སྤང་གི་བླང་དོར་ལ་ལོག་པར་ལྟ་བ་འཛིན་པ་དེ་ནི་བདུད་ཀྱིས་གཙེས་པ་ལྟ་བའི་དེའི་དབང་དུ་གྱུར་བའོ། །ཐུབ་པ་རྣམས་ཀྱིས་སྤངས་བའི་བསྐལ་བ་ནི་མུན་པའི་བསྐལ་བ་སྟེ། དེ་ནི་གཅོང་རོང་གི་གནས་སུ་མུན་ནག་འཐུག་པོར་ཞུགས་པ་གད་གཡང་དུ་ལྷུང་བ་དེ་ཉིད་སླར་ཡར་ལ་བདེ་བའི་སར་ཨེ་སླེབ་ཀྱིས་རེ་བས་ལྡང་བར་བརྩོན་ཀྱང་ལམ་མིན་རྒྱུན་ལྡན་ཏེ། ལས་ངན་གྱི་རྒྱུ་ལས་ཉམ་ངའི་གནས་སུ་ལྟུང་བར་འོག་ནས་འོག་ཏུ་འགྲོ་ཞིང་དེ་ཡང་སྡིག་པས་འཕང་བཞིན་སྡུག་བསྔལ་སྣ་ཚོགས་འཐོར་རླུང་འཁྲུགས་པའི་གནས་རིགས་རྣམས་སུ་ངལ་ཞིང་སྐྲག་པ་དང་བཅས་པའི་བསོད་ནམས་མ་ཡིན་པའི་ལས་རྙོག་པ་ཅན་སྟེ་ཆོས་ལ་མི་མཐུན་པར་ཕྲག་པ་དོག་པའི་མི་ཁོམ་པ་བརྒྱད་པོའི་སྐྱོན་ཆེན་ལ་བསམ་ནས་རང་གིས་རྙེད་པར་དཀའ་བའི་དལ་བ་དོན་ཡོད་པར་མཛོད་གཅིག་ཅེས་པའོ། །རང་རྒྱུད་རྟེན་གྱིས་མི་ཁོམ་པ་བརྒྱད་དུ་མ་སྐྱེས་ཤིང་མི་ལུས་ཐོབ་ནའང་འཕྲལ་བྱུང་རྐྱེན་གྱི་མི་ཁོམ་པ་བརྒྱད་དང་རིས་ཆད་བློའི་མི་ཁོམ་པ་བརྒྱད་ཀྱིས་ཆོས་ལ་བར་ཆད་བྱེད་པའི་ཚུལ་ཡང་ཡིད་བཞིན་རིན་པོ་ཆེར། དུག་ལྔ་འཁྲུགས་དང་བླུན་རྨོངས་བདུད་ཀྱི་ཟིན། །ལེ་ལོ་ཅན་དང་ལས་ངན་མཚོ་ཆེན་བརྡོལ། །གཞན་དབང་འཇིགས་སྐྱོབས་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱི་མི་ཁོམ་རྣམ་པ་བརྒྱད། །ཅེས་དང་། འཆང་བ་དམ་ལྡན་ཀུན་སྤྱོད་ཤིན་ཏུ་རྩུབ། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་བྲལ། །སྡོམ་དང་དམ་ཚིག་འཆལ་བ་ཞེས་བྱ་སྟེ། །རིས་ཆད་བློ་ཡི་མི་ཁོམ་རྣམ་པ་བརྒྱད། །ཅེས་མི་ཁོམ་པ་བརྒྱད་གཉིས་བཅུ་དྲུག་པོ་དེ་ལུས་ཐོབ་ཀྱང་འོང་ངེས་ཡིན་པ་གཞུང་གཞན་ན་འཐོར་བུའི་ཚུལ་དུ་ཡོད་ཀྱང་། འདིར་ཀུན་མཁྱེན་རྣམ་གཉིས་ཀྱིས་གོ་བདེའི་ཆེད་དུ་བསྡུས་ཏེ་བཀོད་པའོ། །འབྱོར་པ་བཅུ་ལས་དང་པོ་རང་འབྱོར་ལྔ་ནི། ཡུལ་དབུས་ས་གཞི་གཙང་མར་དབང་པོ་ཚང་། །ཡན་ལག་རབ་རྫོགས་དད་པའི་གནས་ལ་དད། །ལས་མཐའི་མེ་ཏོག་སྡིག་ཐོས་མ་བཅོམ་པའི། །མི་འགྱུར་དཔག་གསམ་ལྗོན་པ་ཤིན་ཏུ་དཀོན། །ཞེས་པ་ནི། ཇི་སྐད་དུ། མི་ཉིད་དབུས་སྐྱེས་དཔོང་ཚང་། ལས་མཐའ་མ་ལོག་གནས་ལ་དད། ཅེས་དང་། གཞན་འབྱོར་ལྔ་ནི། རྒྱལ་བ་ཨུ་དུམ་ཝཱ་ར་འཇིག་རྟེན་འབྱོན། །ཆོས་ཀྱི་མེ་ཏོག་ཁ་ཕྱེ་བསྟན་པའི་ཚལ། །ནུབ་པ་མེད་པའི་གནས་ལ་ཡང་དག་ཞུགས། །དམ་པའི་གྲིབ་བསིལ་ལ་བརྟེན་དེ་བས་ཉུང་། །གང་ཕྱིར་རང་ཉིད་འབྱོར་བའི་ལྗོན་པ་དང་། །གཞན་དབང་རྐྱེན་གྱིས་འབྱོར་བའི་ཨུ་དུམ་ཝཱ་ར། ཅེས་གསུངས་པ་སྟེ། སངས་རྒྱས་བྱོན་དང་དེས་ཆོས་གསུང་། བསྟན་པ་གནས་དང་དེའི་རྗེས་ཞུགས། གཞན་ཕྱིར་སྙིང་ནས་བརྩེ་བའོ། །ཅེས་རང་འབྱོར་ནི་དཔག་བསམ་གྱི་ལྗོན་པ་ལྟ་བུ་དང་། དེ་ལ་གཞན་རྐྱེན་གྱིས་འབྱོར་བ་ཨུ་དུམ་ཝཱ་ར་ལྟ་བུ་སྟེ། གཉིས་ཀའི་ཡོན་ཏན་འབྱོར་བ་རྣམ་པ་བཅུས། །དལ་བ་བརྒྱད་ལ་འཁྱུད་འདི་སླར་མི་རྙེད། །ཅེས་པ་ནི་དལ་འབྱོར་རྙེད་པར་དཀའ་བའི་དཔེའོ། །དེ་ཡང་དལ་འབྱོར་རྙེད་པར་དཀའ་ཚུལ་ནི། །ཅིའི་ཕྱིར་རུས་སྦལ་གྱི་མགྲིན་པ་གཉའ་ཤིང་གི་བུ་གར་མ་འཕྲད་པའི་དཔེ་ཁྲིད་ཡིག་རྣམས་སུ་གསལ་བ་བཞིན་དང་། གྲངས་ཀྱི་སྒོ་ནས་རྙེད་པར་དཀའ་བ་ནི། མི་དང་དུད་འགྲོ་ཉིན་མཚན་གྱི་སྐར་མས་ཕྱེ་བའི་དེ་སྙེད་ཡི་དྭགས་དང་དམྱལ་བ་རྣམས་ལ་རིམ་པས་སྦྱར་བས་ཤེས་པར་ཡང་འགྱུར་ལ། དེའི་ཕྱིར་ན་དལ་བའི་གྲུ་ཆེན་དེ། ལུས་རྟེན་འདི་སྲོག་དབང་གིས་འཛིན་པ་མ་བཏང་བའི་དུས་འདིར། འཁོར་བ་སྡུག་བསྔལ་གྱི་ཆུ་གཏེར་ཆེན་པོའི་ཕ་མཐའ་མ་བརྒལ་ན། མདོ་སྔགས་ཀྱི་ཆོས་ལམ་མགྲོན་པོས་དོན་གཉེར་བ་ལྟ་བུ་མང་དུ་འབྱུང་ཞིང་། ཆུའི་ཕར་ཁར་བགྲོད་འདོད་པས་སྐབས་བཙལ་བའི་དོན་མ་བསྒྲུབས་ན། མཉན་པ་འབྲས་མེད་བགྱིད་པ་ལ་ཕྱོགས་པ་ཡིན་པས་འདུ་འཛི་དང་། ལེ་ལོ་སྤངས་ནས་ཆོས་ལ་བརྩོན་པ་བསྐྱེད་དགོས་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་དང་པོའི་བསྡུས་འགྲེལ་ལོ། ལེའུ་གཉིས་པ།༈ སྲིད་པ་བརྟན་གཡོ་སྟེ་ཕྱི་སྣོད་འཇིག་རྟེན་དང་ནང་བཅུད་སེམས་ཅན་གཉིས་ཡིན་ལ། དེ་ཉིད་ཆགས་པ་ལ་བར་བསྐལ་ཉི་ཤུ་སྟེ། མི་རྣམས་ཚེ་ལོ་གྲངས་མེད་པ་ནས་རིམ་གྱིས་ཕྲི་སྟེ་ཚེ་ལོ་བཅུ་པ་ལ་ཐུག་གི་བར་དུ་འགྲིབ་ཅིང་། དེ་ནས་ཡར་ཡར་འཕེལ་ཏེ། བརྒྱད་ཁྲི་ལ་རྒྱལ་བ་བྱམས་པ་འཇིག་རྟེན་དུ་བྱོན་པར་བཤད་ཅིང་། དེ་བཞིན་དུ་མར་ཕྲིས་ནས་ཚེ་ལོ་བཅུ་བ་ལ་ཐུག་པ་དང་། དེ་ལྟར་གྱི་ཡར་འཕེལ་མར་འགྲིབ་བཅོོ་བརྒྱད་ལ་བར་ཁུག་བཅོ་བརྒྱད་དང་། བཅོ་བརྒྱད་རྗེས་མའི་སྐབས་ཚེ་ལོ་གྲངས་མེད་པའི་བར་དུ་འཕེལ་ཚེ་སངས་རྒྱས་མོས་པ་འཇིག་རྟེན་དུ་བྱོན་ནས་སྐུ་ཚེ་དང་བསྟན་པ་འགྲོ་དོན་རྣམས་སངས་རྒྱས་སྟོང་དང་མཉམ་པར་བཤད་པ་ཡོད་དོ། །མདོར་ན་བར་ཁུག་བཅོ་བརྒྱད་ཀྱི་གོང་དུ་ཚེ་ལོ་གྲངས་མེད་པ་ནས་བཅུ་པར་ཐུག་གི་བར་ལ་ཡ་ཐོག་རིང་མོ་དང་། བར་ཁུག་བཅོ་བརྒྱད་ཀྱི་རྗེས་སུ་ཡང་ཚེ་ལོ་གྲངས་མེད་པ་ནས་བཅུ་པ་ལ་ཐུག་གི་བར་ལ་མ་ཐོག་རིང་མོ་ཞེས་སུ་གྲགས་ཤིང་། ཡ་ཐོག་མ་ཐོག་གཉིས་དང་ཁུག་པ་བཅོ་བརྒྱད་བསྡམས་པ་ལ་བར་བསྐལ་ཉི་ཤུ་ཞེས་སུ་གྲགས་ལ། དེ་ལྟར་ཆགས་པ་དང་། གནས་པ་དང་འཇིག་པ་སྟོང་པ་བཞིའི་སོ་སོར་བར་བསྐལ་ཉི་ཤུ་རེ་བྱས་པའི་བར་བསྐལ་བརྒྱད་ཅུ་པོར་བསྐལ་པ་ཆེན་པོ་གཅིག་ཅེས་ངོ་བོས་བསྐལ་བས་ཚད་ཙམ་དུ་བཏགས་པ་ཡང་འཇིག་པ་ལ་བརྟེན་པའི་མིང་གི་སྨྲ་ཕབ་པའི་སྐྱོན་གྱིས། ཆད་པ་བཅོད་ལ་མེ་བདུན་ཆུ་གཅིག་འོང་ཞེས་ད་ལྟའི་ཉི་མ་འདི་ལ་གཞན་དྲུག་འཁོར་དུ་འོང་བ་དང་། འདི་གཅིག་པོ་ཉི་མ་བདུན་གྱི་ཚ་ཁྱད་ཡོད་པ་གཉིས་སུ་གསུང་ཡོད་པས། གང་ལྟར་ཡང་ཉི་མའི་དཀྱིལ་འཁོར་མེ་དཔུང་ཆེན་པོ་བཟོད་པར་དཀའ་བའི་དབལ་གྱིས་འཇིག་རྟེན་གྱིས་ཁམས་འདིའི་ས་དང་ཆུ་ལས་གྱུར་པའི་དངོས་པོར་གྱུར་ཚད་ལྷག་མ་མ་ལུས་པར་བསྲེགས་ནས་ཏིལ་འབྲུ་ཙམ་ཡང་མེད་པར་བྱེད་པའོ། །དེ་འཕྲལ་སྟེང་འོག་གི་ཆུའི་དཀྱིལ་འཁོར་ཆེན་པོ་རབ་ཏུ་འཁྲུགས་ཤིང་གཡོས་ནས། མེས་ཚིག་པའི་ལྷག་མ་ཐལ་བ་སོགས་ལན་ཚྭ་ཆུ་ལ་ཐིམ་པ་བཞིན་མེད་པར་བྱེད་པའོ་དེ་རྗེས་འོག་གཞི་རླུང་རྡོ་རྗེ་རྒྱ་གྲམ་ལངས་ཤིང་འཁྲུགས་ནས་འབྱུང་བའི་ལྷག་མ་རྡུལ་ཕྲ་རབ་ཙམ་ཡང་མེད་པར་གཏོར་ནས་འཇིག་རྟེན་གྱི་ཁམས་ནམ་མཁའ་སྟོང་པ་གཅིག་གི་རང་བཞིན་དུ་གྱུར་པའོ། །དེ་ལྟར་སྤྱིར་ཕྱི་སྣོད་ཀྱི་འཇིག་རྟེན་དང་། ནང་བཅུད་སེམས་ཅན་མི་རྟག་པའི་ཚུལ་མདོར་བསྟན་པ་ནི། ཁྱད་པར་ལྷ་མིའི་སྟོན་པ་ཞེས་རྣམ་འདྲེན་བཞི་པ་ཤཱཀྱ་ཐུབ་པ་སོགས་བསྐལ་བཟང་གི་སངས་རྒྱས་སྟོང་རྩ་གཉིས་པོ་དེ་དག་སྐྱོན་ཀུན་ཟད་ཡོན་ཏན་ཀུན་རྫོགས་ཡིན་པའི་རྡོ་རྗེའི་སྐུ་མཆོག་ཏུ་གྲུབ་ཀྱང་རྟག་པར་ལྟ་བ་སུན་འབྱིན་ཕྱིར་སྐུ་མྱ་ངན་ལས་མི་འདའ་བ་ལ་གཟིགས་པ་ཡོལ་བ་ནི། ཞེས་མི་རྟག་པ་སྟོན་ཕྱིར་གཞོམ་གཞིག་དང་བྲལ་བའི་སྲི་ཞུ་ལྷོད་པར་གྱུར་ནས་ཞི་བའི་དབྱིངས་ལ་སྟེ་ལོངས་སྐུ་དང་ཆོས་སྐུའི་ཞིང་དུ་དགྱེས་པའི་མངོན་རྟོགས་ངོམ་བཞིན་བཞུགས་པའོ། །བསམ་གཏན་གྲུབ་ནས་ཞེས་པ་ཡང་གཟུགས་ཁམས་གནས་རིགས་བཅུ་བདུན་པོ་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པའི་འབྲས་བུ་གཙང་རིས་ལྔ་སོགས་བསྐྲུན་པ་ཡིན་ཕྱིར་བསྐལ་པ་བརྒྱད་ཁྲིའི་བར་དུ་གནས་པ་མང་ཞིང་། དེ་སྲིད་དུ་འཚོ་བའི་ཁུར་ཐོབ་ཀྱང་དེར་སྐྱེ་བའི་རྒྱུ་ཟད་ཚེ་དགེ་འབྲས་དེ་དོན་མེད་པར་གྱུར་ཏེ་རང་རང་སོ་སོ་འཆི་བར་གྱུར་པ་དེ་མཐོང་ནས། ལྷ་གཞན་ཚངས་པ་དང་། དབང་པོ་དང་། བདེ་འབྱུང་དང་། མིའི་རྒྱལ་པོ་འཁོར་ལོར་བསྒྱུར་བ་རྣམས་སྡུག་བསྔལ་བཟོད་བརླག་མེད་ཀྱང་། འཆི་བདག་བདུད་ལས་བྲོས་ཤིང་གཟུར་བའི་ཐབས་མི་བསམས་ཤིང་དབང་མེད་དུ་འཆི་དགོས་སོ། །ཁྱད་པར་མིའི་འགྲོ་བ་རྣམས་ནི་མཐོ་རིས་སྨན་ལྗོངས་ཏེ། སྨན་ཤིང་དང་མེ་ཏོག་སྣ་ཚོགས་ཀྱིས་གང་བའི་ས་ཕྱོགས་ཉམས་དགའ་བར་རི་དྭགས་ཀྱི་ཁྱུ་བདེ་བར་འཚོ་བ་ལྟ་བུའི་འཁྲིགས་པའི་སྐྱེས་བུ་རྣམས་ཀྱི་ཚེ་སྲོག་དབང་མེད་དུ་འཕྲོག་པར་ཡིད་ལ་ཡང་ནས་ཡང་དུ་བགྱིད་ཅིང་སྐབས་བཙལ་བའི་རྔོན་པ་ལག་ན་བེ་ཅོན་ཅན་གཤིན་རྗེའི་ཕོ་ཉ་སྟེ། དོན་གཉེར་སྔོན་མ་གཅིག་པུ་ཉིད་ལས་གཞན་གང་ཡང་མི་སེམས་སོགས། རྒྱུ་དཀར་ནག་སོགས་ཡུལ་དྲོད་ཀྱི་སོས་ཀའི་ཚ་བའི་བར་དུ་གདུང་རབ་གྱུར་བའི་ཚེ་སྐྱེ་བོ་དག་རྣམས་ནི་སྟོན་ཟླ་གསལ་བའི་འོད་ལ་དགའ་བར་གྱུར་ནས། དེ་ལ་ཡིད་སྨོན་བྱེད་པ་རྨོངས་པ་ཡིན་ཏེ། ཉིན་ཞག་བརྒྱ་ཡིས་རང་གི་ཚེ་ཐལ་བའི་སྐྱོན་དུ་གྱུར་པ་མི་ཤེས་ཤིང་། དེ་ལྟའི་གནས་ལ་སེམས་ནས་ཅུང་ཟད་ཀྱང་སྐྲག་པར་གྱུར་པ་མེད་འདི་ནི་བླུན་པོའི་མངོན་རྟོགས་གོ། སྐྱེས་བུའི་ལག་པའི་རྩོལ་བས་བྱས་པའི་རིགས་ལ་ཉག་ཕྲན་གྱིས་མདའ་མྱུར་ཡང་། དེ་བས་ས་ལ་རྒྱུ་པའི་ཡི་དྭགས་དེ་བྱིང་གནས་རྣམས་དང་། དེ་བས་མཁའ་ལ་རྒྱུ་བ་རྣམས་མགྱོགས་ཤིང་། དེ་བས་ཉི་ཟླ་དང་ལྷ་དང་། དེ་དག་ཀུན་ལས་ཀྱང་མགྱོགས་པ་མིའི་ཚེ་འགྲོ་བ་ཡིན་ཞེས་གསུངས་པའོ། །མི་རྣམས་དར་ལ་བབ་པ་དག་ཀྱང་རྒ་བའི་ཆད་པས་འཚེ་བ་དང་། རླུང་མཁྲིས་བད་ཀུན་འདུ་བ་རྣམ་པ་བཞི་པོ་རྣལ་མར་གནས་པ་སྟེ་ཆ་སྙོམས་དུས་ནད་ཉུང་ཡང་དེ་བཞི་པོ་འཁྲུགས་པར་གྱུར་ཚེ་ན་བས་དཀྲུག་ཤིང་། འཇིག་རྟེན་གྱི་འབྱོར་བ་ལོངས་སྤྱོད་སོགས་ཕུན་སུམ་ཚོགས་པ་རྟེན་ཅིང་འབྲེལ་འབྱུང་གི་ཚུལ་གྱིས་མངོན་པར་མཐོ་བ་ཕལ་མོ་ཆེ་ཡང་རྒུད་པར་འགྱུར་བས་འཇོམས་ཤིང་དུས་ལ་བབས་སམ་མ་བབ་ཀྱང་རུང་སྟེ་འཆི་བའི་སྲོག་ལ་རྒོལ་བ་ཤོལ་འགྱངས་མེད་པར་མྱུར་པོར་འོང་ཞིང་། གང་ཚེ་སྟེ་དེའི་ཚེ་གཤིན་རྗེའི་གཡུལ་ངོར་ཕམ་ནས་འཆི་བ་ལ་བབས་པ་དེ་ཉིད་སྐྱབས་མགོན་དང་དཔུང་གཉེན་བྲལ་བའི་གཡང་སར་རྒྱུག་པ་ལས་དབང་གིས་སྲིད་པ་བར་དོར་འཁྱམས་དགོས་པའོ། །སྐབས་དེར་འཚོ་བའི་མདངས་དང་དབང་པོའི་རྣམ་པར་སྤངས་ནས་མིག་གི་གཟུགས་དང་། རྣ་བས་སྒྲ་ སྣས་དྲི་ ལྕེས་རོ་ ལུས་ཀྱིས་རེག་བྱ་མི་འཛིན་པས་རྣམ་པར་སྤངས་ཞེས་པའོ། །དེ་ཡང་སྨན་གྱིས་ཕན་མ་ཐོགས་པ་དང་། སྨན་པ་དང་རིམ་གྲོ་གཞན་དག་ཀྱང་ཁ་སྐྱངས་ནས་དེ་ལ་འབྲོས་པ་ལྟ་བུ་ལས་གཞན་ཐབས་ཡང་བསམ་དུ་མེད་དེ། སྔ་མ་ལག་པའི་ལས་ཀ་དང་རྐང་པས་འགྲུལ་བགྲོད་སོགས་བྱེད་དུ་ཡོད་ཀྱང་སྐབས་འདིར་སྐྱོད་ལ་དལ་བ་ཐོབ་པའི་ཡན་ལག་རྣམས་དང་དབུགས་ནི་རང་དབང་མེད་པར་མཐུ་ཡིས་གཡོབ་ཅིང་ངར་བར་བྱེད་དུས་ཉེ་དུ་འབྲེལ་བས་མལ་མཐའ་བསྐོར་ཞིང་སྡུག་བསྔལ་གྱིས་གདུང་ན་ཡང་མི་འཆི་བའི་བཤོལ་འདེབས་ཀྱི་ལྕགས་ཀྱུས་བཟུང་ནས་སྡོད་པའི་བརྟན་པ་བྲལ་བར་འགྱུར་བའོ། །དེའི་དབུགས་ཀྱི་འགྱུ་བ་རྟ་རྔའི་རྩེ་ལྟ་བུ་དེ་འཆི་བདག་གི་དགྲ་སྟ་རྣོན་པོས་གཟས་པའི་བཀས་པར་གྱུར་པས་གསོན་པོའི་དུས་ལྟར་མ་ཡིན་པས་མཛེས་པ་སྤངས་པའི་སོ་ཞོ་ངོམ་པ་བཞིན་དུ་ལས་དབང་གི་དགེ་སྡིག་གང་ཡོད་ལྟར་སྲིད་པའི་མུན་ནག་སྟུག་པོར་འཇུག་དགོས་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་གཉིས་པའི་བསྡུས་འབྲེལ་ལོ། ལེའུ་གསུམ་པ།༈ དེ་ལྟར་འཇིག་རྟེན་ཕ་རོལ་ཏུ་སོན་པ་རྣམས་ནི། ལས་དཀར་ནག་གི་དབང་གིས་འགྲོ་བ་རིགས་དྲུག་པོའི་གོ་འཕང་གང་གིས་ཐ་གུས་འདོགས་པའི་ཚུལ་ཡང་། ཚེ་འདི་དགེ་བར་སྤྱད་པ་དང་སྡིག་པ་བྱས་པ་ལ་གོམས་ཤུགས་ཆེ་ཆུང་ཁོ་ནས་ཉེ་བར་ལེན་པ་སྟེ། ཀུན་རྫོབ་རྟེན་ཅིང་འབྲེལ་འབྱུང་གི་བདེན་པ་བསླུ་བ་མེད་པ་ཡིན་ཞེས་རྒྱལ་བ་རྣམས་ཀྱིས་གསུངས་པའོ། །གང་ཞིག་ས་བོན་རྣམ་པ་སྣ་ཚོགས་མཐུ། ཞིང་པ་རྣམས་ཀྱིས་ཐོག་ལ་གསལ་བ་བཞིན། ཡིན་ལ། སྐྱེ་བ་གཞན་ཞེས་ཐོག་མའི་དུས་ནས་ད་ལྟའི་བར་དུ་དགེ་སྡིག་གང་ལ་འདྲིས་ཤིང་གོམས་པར་བྱས་པའི་ལས་བསགས་ཚུལ་མང་པོས་འགྲོ་བའི་གནས་རིགས་མཐོ་དམན་འདི་དག་སྣ་ཚོགས་བྱས་པའོ། །ས་བླ་མཐོན་པོ་སྟེ་ནམ་མཁར་གཤེགས་པའི་མཁའ་ལྡིང་ནི་བྱ་རིགས་ཕལ་མོ་ཆེ་ཡིན་ཞིང་། དེ་དག་གི་གྲིབ་མ་རེ་ཞིག་བལྟ་བར་མི་མངོན་ན་ཡང་། གཟུགས་ཅན་གྱི་བྱ་དེ་ཉིད་དང་གྲིབ་མ་འདུ་འབྲལ་སྤངས་པ་བཞིན་དུ་ཚོགས་ཤིང་དུས་ལ་བབས་པ་ཞེས་བྱ་སར་བབས་ཚེ་གྲིབ་མ་ལྷག་པར་མངོན་པ་ལྟ་བུའོ། །བསོད་ནམས་མ་ཡིན་བྱ་བ་རྟ་གདོང་མེས། ལྷ་མི་གཉིས་སུ་སྐྱེ་བའི་རྒྱུ་བསོད་ནམས་ཆ་མཐུན་གྱི་དགེ་རྩ་མཐོ་རིས་རྒྱ་མཚོའི་རླབས་ཀྱང་སྐེམ་པར་ནུས་ཤིིང་། དེ་མ་ཟད་རྣམ་མཁྱེན་སངས་རྒྱས་ཀྱི་གོ་འཕང་བསྒྲུབ་པའི་རྟེན་མི་ལུས་རིན་པོ་ཆེ་ནི་གྲུ་གཟིངས་ལྟ་བུ་སྟེ། དེ་ཉིད་བཤིག་པར་བྱེད་པའི་དཔེ་དང་དོན་ནི། མདོ་སྡེ་ལས་བརྒྱ་བ་དང་རྒྱ་ཆེར་རོ་ལ་པ་ལས་བསྟན་པ་བཞིན་ནོ། མི་དགེ་བའི་རྒྱུས་འཕངས་པའི་འགྲོ་བ་གང་ཞིག་མནར་བ་ལ་ཤིན་ཏུ་དཔའ་ཞིང་བརྟུལ་ཕོད་པའི་ངན་སོང་གི་འཇིགས་པས། དགེ་བ་བཅུའི་དཔུང་པ་གོ་ཆ་བཙན་པའི་དཔའ་བོ་གནས་པའི་ཡུལ་དུ་གཡུལ་གྱི་ཕྲུ་མས་བཏབ་པ་སྟེ་ངན་སོང་གི་དམག་སྒར་བཏབ་པ་མ་མཆིས་ཏེ། དམ་བཅའ་ཉམས་པ་མཐའ་དག་ནི་སྡོམ་པ་གསུམ་དང་འགལ་བའི་ལས་བགྱིས་པ་རྣམས་ནི་ཁྱོད་ཀྱི་དབང་དུ་སོང་བ་ཡིན་ཞེས་སུན་འབྱིན་པ་དང་བཅས་པའོ། །དེ་ལས་སྲུང་སྡོམ་གྱི་རིགས་སྤྱི་ལ་བླང་དོར་འཛོལ་ནས་ལ་ལས་ཚུལ་ཁྲིམས་དང་གཞན་གནོད་རྒྱུ་དང་བཅས་པ་སྒྲུབ་མཁན་རྣམས་དང་། ལ་ལས་ཚེ་དང་སྲོག་གཏོང་ཞིང་། བཅས་རང་གི་སྡོམ་པ་ལ། ལ་ལས་དཀའ་ཐུབ་དང་ཡུལ་ཁམས་དཀྲུགས་པའི་རྒྱུ་རྐྱེན་སོགས་མི་དགེ་བའི་ཚོགས་མང་དུ་བསྒྲུབ་བ་དང་། ལ་ལས་ཆོས་བསྒྲུབ་རྒྱུ་བཤོལ་བ་དང་། ལ་ལས་ནོར་རྫས་བརླག་རྒྱུ་དང་། ལ་ལས་རང་ངོ་ལ་ལྟོས་པའི་ངོ་ཚ་དང་། ལ་ལས་གཞན་ངོ་ལ་ལྟོས་པའི་ཁྲེལ་ཡོད་རྣམས་ལ་བག་མི་ཚ་བར་སྡོམ་པ་གཏོང་རྐྱེན་སོགས་ཅང་མི་སེམས་པར། བསྲུང་སྡོམ་ཕལ་ཆེར་སྡིག་པའི་ཆེད་དུ་གཏོང་བ་ཤིན་ཏུ་མང་ངོ་། གང་གི་ཕྱིར་ན་རང་ཉིད་ཀྱི་བླ་མཆོད་སོགས་ཡོན་གནས་དང་ཉེ་དུ་འཁོར་འབངས་སོགས་དང་། བླ་དཔོན་ཆེ་ཀ་རྣམས་ཀྱི་ཡུལ་ཁམས་སོགས་བསྲུང་བའི་སླད་དུ་སྟོབས་ཆེན་གྱི་སྡིག་པའི་དཔེ་གཉིས་འཐུང་སྟེ་གླང་ཆེན་སྨྱོན་པ་སྣ་རྩེར་མཚོན་འཁོར་དཀྲིས་པ་བཏང་ནའང་། དེ་ཉིད་ཀྱི་བྱེད་པོ་གང་ཡིན་པ་དེ་མ་གཏོགས་རྣམ་སྨིན་གྱི་འབྲས་བུ་བགོ་བཤའ་བྱ་རྒྱུ་མེད་པ་ཡིན་ནོ། །ལུགས་ཟུང་གང་ཐད་ནས་ནོར་རྫས་སོགས་རྙེད་པ་ལ་བརྐམ་པ་སྟེ་ཆགས་ཞེན་ཆེ་ཞིང་རང་ཉིད་ཁོ་ན་བདེ་བའི་ཐབས་འབའ་ཞིག་ལ་སྲེད་པ་དང་། དེ་བཞིན་དུ་རང་གཞན་སུས་ཐད་ནས་སྙན་པའི་གཏམ་གྱི་རྣམ་པ་ཐོས་ན་ལྷུར་ལེན་ཞིང་བསྟོད་སྔགས་བརྗོད་པ་ཐོས་ན་ང་རྒྱལ་གྱི་སྣོན་པར་སོང་ནས་ཁེངས་པར་གྱུར་ལ། གང་ལས་ཞེས་སྔོན་མ་བཞི་པོའི་ལྡོག་ཕྱོགས་ཅིག་ཤོས་བཞི་ནི། མ་རྙེད་པ་དང་། མི་བདེ་བ་དང་། མི་སྙན་པ་དང་། སྨད་པ་སོགས་བཞི་ཡིས་སྨ་ཕབ་པའི་ཆོས་མིན་ཆོས་སུ་བརྫུས་པའི་བྱིས་པ་འདི་དག་འཇིག་རྟེན་ཆོས་བརྒྱད་ཀྱིས་བསླུས་སོ། །ཞེས་པའོ། རིགས་དང་གཟུགས་དང་དབང་ཐང་ལང་ཚོ་ཐོས་པས་རྒྱགས་པ་ལ་སོགས་ཕུན་སུམ་ཚོགས་པ་ལ་ཁེངས་སེམས་ཀྱི་དབང་གིས་རང་ཉིད་མགོ་འཕང་བསྟོད་ཅིང་། དགེ་བསྒྲུབ་སྡིག་སྤངས་ལ་སོགས་མི་བརྩོན་པར་སྙོམ་ལས་ཀྱིས་དུས་འདའ་བ་དཔེར་ན་མི་འཕྱེ་བོའི་ཞེས་མི་རྐང་པ་ཞ་བ་ཞིག་རང་གཞན་སུས་ཀྱང་ལས་ཀ་ལ་བཀོལ་འོས་སུ་མ་གྱུར་པ་བཞིན་སྐྱོན་གྱིས་ཕག་ཏུ་ཡིབས་པ་དང་། མངོན་པའི་ང་རྒྱལ་ནི་གཞན་གྱིས་མཐོང་ཐོས་ཡོད་པའི་ཁེངས་སེམས་མ་རུང་སློང་བ་རྣམས་ནི་དཀའ་ཐུབ་སྟེ་སྡོམ་པ་གསུམ་གའི་དཔལ་ཡོན་ལ་སྡང་བའི་སྲིན་པོར་གྱུར་པ་ནི་ཆགས་སྡང་ཡིན་ན་དེའི་རྒྱུ་རྐྱེན་དུ་གྱུར་པའོ། །བསྐམ་ཞེས་གཞན་གྱིས་ནོར་རྫས་ལ་བརྣབས་སེམས་དང་། ཆགས་སེམས་ཀྱིས་རང་གི་ཡོ་བྱད་ལ་སེར་སྣ་ཆེ་བའི་ནུས་པ་བརྟན་པོ་དེ་ཡིས་མཆོད་སྦྱིན་འགོགས་པ་སོགས་འཇུངས་སེམས་ཀྱི་ཟིལ་གྱིས་གནོན་པའི་གཡོ་སྒྱུའི་འཁྲི་ཤིང་གིས་གཞན་དག་མགོ་རྨོངས་པར་བྱས་ནས་བདག་ཉིད་བསྲུང་བའི་ཐབས་ལ་མཁས་ནའང་། ཐར་པ་དང་རྣམ་མཁྱེན་གྱི་ལམ་འགོགས་པའི་གནོད་ཆེན་དེ་ནི་རང་གི་ཁོངས་སུ་ཞུགས་པའོ། །འཁོར་བར་འདུ་བྱེད་དཀར་ནག་ལས་འབྲས་གཉིས་ཏེ། ས་བོན་ཉུང་ངུ་ལས་ཀྱང་འབྲས་བུར་སྨིན་པའི་གཟུགས་སྦོམ་པོར་བསྐྱེད་པ་ལ། མི་དབང་ང་ལས་ནུའམ། སྤྱི་བོར་སྐྱེས་པ་དེ་སྔོན་བྱིས་པ་ཞིག་ཏུ་གྱུར་ཚེ། སངས་རྒྱས་རྣམ་གཟིགས་ལ་སྲན་མ་སྤར་གང་གཏོར་བས་རྡོག་པོ་བདུན་ལྷུང་བཟེད་དུ་ཆགས་པའི་ལས་ཀྱིས་གསེར་གྱི་འཁོར་ལོས་བསྒྱུར་རྒྱལ་དུ་གྱུར་པ་བཞིན་ནོ། །གང་ཞིག་ས་བོན་ཡུངས་འབྲུ་ཙམ་པའི་ཤིང་ནི། ཨ་ཤོ་ཏ་ཡི་འབྲས་བུ་སྟེ་དེ་ཉིད་སར་བཙུགས་ནས་ལོ་དུས་སུ་འདས་ན་ཡལ་ག་རེ་ལའང་དཔག་ཚད་ཙམ་འཕེལ་བས་ན་དེ་ལས་ཀྱང་དགེ་སྡིག་གི་གཟུགས་བརྙན་འཕེལ་བའི་དཔེར་མི་ཕོད་དོ། དགེ་སྡིག་གང་ལའང་བྱེད་པ་མ་མཆིས་བཞིན་དུ་རང་བཞིན་མིན་གྱི་བདེ་སྡུག་སྲིད་པ་ཡིན་ཏེ། བསམ་པ་དཀར་ནག་གི་ཚོས་ཀྱིས་བཙོས་པའི་ཀུན་སློང་སྣ་ཚོགས་ཤིག །འཕྲལ་དུ་ལས་དགེ་སྡིག་གང་ཡིན་ལྟར་དང་ཕུགས་སུ་དེའི་འབྲས་བུ་མཐུ་ཆེན་པོར་བྱས་ཞེས་པའོ། །སྡིག་པ་བྱས་པའི་སྔོན་དུ་ཞེ་སྡང་དང་ཁོང་ཁྲོའི་སེམས་དང་བཅས་ཏེ། སྲོག་གཅོད་ལ་སྦྱོར་བ་དང་། རྗེས་སུ་སྡིག་པ་བྱས་པ་ལ་འགྱོད་པ་མེད་པའི་ཐོག་ཏུ་དགའ་བར་གྱུར་པ་སྟེ་སྔོན་རྗེས་གཉིས་པོ་དང་མི་ལྡན་ན་ནུས་པ་ཆུང་ཞིང་། རྩ་བ་ཕན་བྱེད་ཀྱི་སྨན་དུ་མཆིས་ན་མྱུ་གུ་ཡང་སྨན་ཡིན་ལ། རྩ་བ་དུག་ཡིན་ན་མྱུ་གུའང་དུག་ཡིན་པར་སྨོས་ཅི་དགོས། དེའི་དོན་ཡང་བསམ་པ་དགེ་དང་མི་དགའི་འཕེན་བྱེད་ལས། དགེ་སྡིག་གང་ཡིན་ཀྱང་གཟུགས་བརྙན་ཆེ་ཆུང་གི་རྗེས་སུ་མི་འགྲོ་སྟེ། དགེ་བ་དམ་པ་གསུམ་གྱིས་ཟིན་མིན་གྱི་ཁྱད་ཤེས་དགོས་པའི་ཕྱིར་དང་། འདི་ལྟར་སྡིག་པ་བྱེད་པ་ལ་རྟག་པའི་སེམས་དང་། མདོན་པར་ཞེན་ནས་ཡིད་ལ་བཅགས་པ་དང་འགྱོད་སེམས་ཀྱི་གཉེན་པོ་མེད་པ་དང་། ཡོ༷ན༷་ཏན༷་ག༷ཙོ་ལྡ༷ན་ནི་བླ་མ་དང་མཁན་པོ་བྱང་ཆུབ་སེམས་དཔའ་གཙོ་བོར་གྱུར་པ་ལ་བརྟེན་པའི་སྡིག་པ་དང་གཞི་ལས་བྱུང་བ་ཕ་མ་དང་དྲིན་ཆེན་རྣམས་ལ་ལོག་སྦྱོར་བྱས་པས་ལས་རྣམ་པ་ལྔ་པོ་དེ་དག་ལ་བརྟེན་པའི་དགེ་བ་ཡིན་ན་སྟོབས་ཆེ་ཞིང་སྡིག་པ་ལྕི་ལ་དེ་ལྟར་མ་ཡིན་པ་གཞན་དག་ཅུང་ཟད་ཡང་པ་དག་གི། ཉེ་བར་ལེན་པའི་རྣམ་རིག་ལེགས་པར་གསུངས་པའོ། །འཁོར་བ་ཀུན་གྱི་རྟེན་ཡུལ་བྱེད་པ་ཀུན་གཞི་དགེ་སྡིག་གང་དུ་ལུང་མ་བསྟན་པ་གཏི་མུག་གི་ས་པ་དེ་དང་། དེ་ལས་ཕྱི་རོལ་གྱི་ཆགས་སྡང་སོགས་ནང་དུ་འཛིན་བྱེད་ཀྱི་ཡིད་དང་། ཡུལ་ལྔའི་ཤེས་པ་ནི་དབང་པོའི་སྒོ་ལྔའི་ཤེས་པ་ལངས་པ་ཡིན་པ་ལས། དེ་རྣམས་ཀུན་ལ་ཁྱབ་བྱེད་ལྷན་སྐྱེས་དང་ཀུན་བརྟག་གི་མ་རིག་པའི་གདོན་ཆེན་གྱིས། འདོད་ཆགས་ཞེ་སྡང་གཏི་མུག་སྟེ་ཉོན་མོངས་པ་གསུམ་པོ་བདག་ཏུ་བཟུང་སྐྱོན་གྱི་འཁོར་བའི་གནས་རིགས་མཐོ་དམན་བྱས་པ་ཡིན་ནོ། །ཇི་ལྟར་ཡིན་ན་མེ་ནི་འབར་ཞིང་དངོས་རྫས་རྣམས་བསྲེག་པར་གྱུར་བ་དེའི་གཉེན་པོར་ཆས་པ་ནི་ཆུ་ལས་གཞན་གང་ཡང་མེད་པར་གྱུར་ན། སྐུ་གསུང་ཐུགས་རྟེན་ཟོང་དུ་བཙོང་པ་དང་། དཔང་དུ་བཙུགས་ནས་མནའ་ཟོས་པ་སོགས་ཀྱིས་དཀོན་མཆོག་གསུམ་པོ་བསླུས་ཤིང་སྤངས་པའི་ལས་ངན་སྡིག་ཆེན་དེ་ལ་སྡིག་པ་གང་གིས་ཀྱང་དོ་ཟླ་རྙེད་པ་མིན་ཞེས་པའོ། །དེ་ལས་གཞན་དུ་གྱུར་པའི་འགྲོ་བའི་ཀུན་རྟོགས་སྣ་ཚོགས་ལ་རང་བཞིན་དུ་འབྲེལ་པར་གྱུར་པའི་སེམས་དང་སེམས་བྱུང་གི་ལས་མཐའ་དག་མང་དུ་མཆིས་པའི་བློ་ཡིས་ཐུག་པ་མ་མཆིས་ཀྱང་། ལུས་དང་ངག་དང་ཡིད་ལ་རྟེན་དང་བརྟེན་པ་ཅན་ལྟར། སྤང་བར་བྱ་བའི་རྒྱུ་འབྲས་རྣམ་བ་བཅུར་གནས་པའི། ལུས་ཀྱི་གསུམ་པོ་ནི་སྲོག་གཅོད་པ་དང་། མ་བྱིན་བླང་བ་ལོག་པར་གཡེམ་པ་དང་གསུམ་ལས། དང་པོ་སྲོག་གཅོད་ནི། འདུ་ཤེས་མ་འཁྲུལ་བཞིན་དུ་མི་གཙོ་བོར་གྱུར་པའི་འགྲོ་བ་གཞན་གྱི་སྲོག་བསམ་བཞིན་གཅོད་པ་དང་། ཕྱོགས་མཐུན་དབྱུག་པ་སོགས་ཀྱིས་བརྡེག་པ་དང་བཙོག་པ་ལ་སོགས་འཚེ་བ་བགྱིད་པ་དང་། མ་བྱིན་བླང་བ་ནི་གཞན་ནོར་ཡིན་པར་ཤེས་བཞིན་དུ་བརྐུ་བ་དང་། ཕྱོགས་མཐུན་བྲེ་དང་སྲང་ལོག་པར་བཅོས་ཏེ་གཡོ་དང་སྒྱུ་ཡིས་ལེན་པའི་ཐབས་བྱས་པ་དང་། འདོད་ལོག་ནི་ཡུལ་འདི་ལས་གཞན་དུ་གྱུར་པའི་ཚོང་དུས་ཆེན་པོ་རྣམས་སུ་སྨད་འཚོང་མའི་རིགས་ལ་གླ་བརྔན་ཐོབ་པ་དག་ལ་དེ་མ་ཡིན་པའི་རེག་པ་སྤྲོད་པ་དང་། ཕྱོགས་མཐུན་བགྲོད་བྱ་མ་ཡིན་པར་འཁྲིགས་པའི་ཆོས་གཞན་ནི། མྱ་ངན་གྱིས་ནོན་པ་དང་། བང་མ་སངས་པ་དང་། ཟླ་མཚན་ཡོད་པ། སྨྱུངས་གནས་དང་བསྙེན་གནས་ལ་གནས་པ་དང་། མ་སྨིན་པའི་གཞོན་ནུ་མ་ལ་སོགས་པའོ། །ངག་གི་བཞི་ནི། ཕམ་པའི་རྫུན་དང་། རྫུན་ཆེན་པོ་དང་། ཆུང་ངུ་གང་ཡང་རུང་བ་སྨྲས་ནས་གཞན་དག་འཁྲུལ་དུ་བཅུག་པ་དང་། ཕྱོགས་མཐུན་གཡོ་སྒྱུས་འདུ་ཤེས་བསླད་ནས་གཞན་གྱི་སེམས་བསླུ་བ་ལ་ཞུགས་པ་དེ་དང་། ཕྲ་མ་ནི་ལུགས་ཟུང་གང་ཐད་ནས་མཛའ་ཞིང་མཐུན་ནམ་བཏང་སྙོམས་ལ་གནས་པ་རྣམས་དབྱེན་སྦྱོར་གྱིས་འདྲལ་བཅུག་པ་དང་། ཕྱོགས་མཐུན་དངོས་ཕྲ་སོགས་སྐྱོན་ཚིག་གཞན་ཟློས་མཁོན་དུ་འཆོས་པ་དང་། ངག་འཁྱལ་ནི། བྲེ་མོའི་གཏམ་སྟེ་ཀུ་རེ་རྩེད་མོ་སོགས་ལས་ཆགས་སྡང་བསྐྱེད་པ་དང་། ཕྱོགས་མཐུན་དམག་ཇག་དང་ཆོམ་རྐུན་སོགས་ཆོས་དང་འགལ་བའི་འབྲེལ་མེད་ཀྱི་གཏམ་སྨྲ་བ་དང་། ཚིག་རྩུབ་ནི་ཕ་རོལ་པོའི་ལྐོག་གྱུར་གྱི་སྐྱོན་མངོན་གྱུར་དུ་བརྗོད་ནས་སྙིང་ལ་འབིགས་པ་སྟེ་ཡིད་ཀྱི་ཚེར་མར་གྱུར་པ་ལྟ་བུ་དང་། ཕྱོགས་མཐུན་གཞན་དག་གང་ཡང་རུང་བའི་ཡིད་དབང་མི་བདེ་བའི་རྐྱེན་དང་སྤྲོད་ཐབས་བྱས་པའོ། །ཡིད་ཀྱི་གསུམ་ལས་དང་པོ་བརྣབ་སེམས་ནི། གཞན་མཆོག་དམན་གང་ཡང་རུང་བའི་ནོར་རྫས་སོགས་འབྱོར་བའི་དཔལ་ལ་རྔམས་ཤིང་ཁོ་རང་ལ་མི་ཐོབ་ཀྱང་ཐོབ་རློམ་གྱིས་བདག་གིར་བྱེད་པ་དང་ཕྱོགས་མཐུན་ཕ་རོལ་པོའི་ཟས་ནོར་ལོངས་སྤྱོད་སོགས་རྫས་དང་ཡོ་བྱད་ལ་བསྐམ་ཞིང་རོ་མྱང་བ་དང་། གནོད་སེམས་ནི་གཞན་ལ་བསམ་ངན་སྦྱོར་རྩུབ་ཀྱི་སྒོ་ནས་ཁོང་འཁྲུག་དང་འཚེ་བ་སློང་བ་དང་། ཕྱོགས་མཐུན་ཕན་པས་འབྲེལ་བ་ལ་འདུ་འབྲལ་བསྒོམ་ནས་དེའི་ཐབས་ལ་བརྩོན་པ་དང་། ལོག་ལྟ་ནི་དགེ་བའི་ཕན་ཡོན་དང་སྡིག་པའི་ཉེས་དམིགས་སོགས་རྒྱུ་འབྲས་མེད་པར་འཛིན་པ་དང་། རྟག་ཆད་བལྟ་བ་དང་། ཕྱོགས་མཐུན་གནས་ལུགས་རྫོགས་པ་ཆེན་པོར་མེད་པ་ལ་སྒྲོ་འདོགས་པ་དང་། ཡོད་པ་ལ་སྐུར་བ་འདེབས་པའོ། །དེ་ལྟར་མི་དགེ་བ་བཅུ་པོ་ཀུན་ལ་འབྲས་བུ་བཞི་བཞིར་སྨིན་ཚུལ་ནི། རྣམ་སྨིན་རྒྱུ་མཐུན། དབང་དང་། བྱེད་པ་ལས། རྣམ་སྨིན་འབྲས་བུ་ཆོས་ལྔ་ལྡན་ནམ་མིན་ཞེས་པ། སྲོག་གཅོད་ལ་མཚོན་ན། གཞི་སེམས་ཅན་ཡིན་པར་ཤེས་པ་དང་། གསོད་སེམས་སྐྱེས་པ། བསད་ཐབས་བྱས་པ་བསད་པ། རྗེས་སུ་ཡི་རངས་སྟེ་ཆོས་ལྔ་ཚང་བའམ་མིན་ཀྱང་། ཀུན་སློང་གསུམ་གྱི་ཆུང་ངུས་ཏེ་གཏི་མུག་གིས་དུད་འགྲོ་དང་། འབྲིང་འདོད་ཆགས་ཀྱི་དབང་གིས་ཡི་དྭགས། ཆེན་པོ་ཞེས་ཞེ་སྡང་གིས་དམྱལ་བར་འཕེན་པ་དང་། རྒྱུ་མཐུན་གྱི་འབྲས་བུ་རྣམ་པ་གཉིས་སུ་གྲུབ་སྟེ། བྱེད་པ་རྒྱུ་མཐུན་གྱི་སྲོག་གཅོད་ལ་མཚོན་ན། གསོད་ལ་དགའ་བ་སོགས་བྱེད་ལས་མཐུན་པར་སྐྱེ་ཞིང་། མྱོང་བ་རྒྱུ་མཐུན་གྱི་འབྲས་བུ་མཐོ་རིས་མི་ལུས་ཐོབ་པར་གྱུར་ཡང་། རིམ་པ་བཞིན་དུ་མི་དགེ་བ་བཅུ་ལ་འབྲས་བུ་གཉིས་གཉིས་དང་ལྡན་ཏེ། འཚོ་བ་ཐུང་ལ་ནད་ཀྱང་རྣམ་གྲགས་མང་པོས་མནར་ཞིང་། ཡོ་བྱད་ཉུང་ཞིང་དགྲ་དང་ཐུན་མོང་ཅན་དང་། ཁྱིམ་ཐབས་མི་མཛེས་ཤིང་དགྲ་ཟླར་འབྲེལ་བ་དང་། ངན་བསྐུར་འདེབས་པའི་གདུང་ཞིང་གཞན་གྱིས་བསླུ་བ་དང་། མགོ་བསྐོར་མང་བ་དང་། འཁོར་གཡོག་ངན་ཞིང་འདུམ་པར་དཀའ་བ་དང་། ཚིག་ལ་འཆོལ་ནས་བཟུང་བར་མི་འོས་པ་དང་། གཞན་གྱིས་ཡིད་ཆེས་ཞན་པ་དང་། མི་སྙན་པ་མང་དུ་ཐོས་ཤིང་རང་གི་སྨྲ་བ་འཐབ་མོའི་ཚིག་ཏུ་འདྲུལ་བ། ཚིག་དོན་གང་ཡང་གཟུང་བར་མི་ནུས་ཤིང་ཁོ་རང་གི་ཚིག་ལའང་གཞན་དག་ཡིད་ཆེས་ཞན་པས་དོན་མེད་དུ་འགྱུར་བ་དང་། ལོངས་སྤྱོད་ཕུན་སུམ་ཚོགས་ཀྱང་ཆོག་མི་ཤེས་པ་དང་། ཡིད་ལ་འདོད་པས་རབ་ཏུ་གདུང་བ་དང་། གནོད་པ་འདུ་ཞིང་ཕན་པ་འདྲལ་བ་དང་། རྟག་ཆད་སོགས་ལྟ་བ་ངན་པ་དང་གཡོ་སྒྱུས་སེམས་མི་གཟོ་བས་འཁྲུགས་པ་དང་བཅས་པའོ། །དབང་གི་འབྲས་བུའམ་བདག་པོའི་འབྲས་བུ་ནི། གང་དུ་སྐྱེ་བའི་ཡུལ་དང་རྟེན་ཅིང་འབྲེལ་འབྱུང་གི་ཚུལ་དུ་འོང་སྟེ། སྲོག་གཅོད་ཀྱི་ལས་ལ་དགའ་ཞིང་སྡིག་ཏོའི་ཁུར་གྱིས་ནོན་པ་དེ་ཉིད་ས་ཕྱོགས་བག་ཆུང་ཞིང་སྨན་ཤིང་དང་མེ་ཏོག་ཉུང་ཞིང་། ལོ་འབྲས་དང་བཟའ་བཏུང་ལ་བཅུད་མེད་ཅིང་མཐུ་ཉམས་པས་འཇུ་དཀའ་ཞིང་ཉམས་མི་དགའ་བར་སྲོག་ལ་ཡ་ང་ཆེ་བའི་གནས་སུ་ཕྱིན་པར་འགྱུར་དགོས་པའོ། །མ་བྱིན་བླང་བའི་དབང་འབྲས་ནི། ཞིང་གི་ལོ་ཐོག་གི་མྱུ་གུ་རྣམས་འཇོམས་པར་སླ་ཞིང་བཟའ་ཤིང་ཡོད་ཀྱང་འབྲས་བུ་རྣམ་པར་སྨད་ཅིང་སད་ཀྱིས་གདུངས་ཤིང་སེར་བས་རྣམ་པར་འཐགས་པས་མུ་གེའི་སྡུག་བསྔལ་སྙིང་ལ་འཕོ་བར་སྐྱེ་བ་དང་། ལོག་པར་གཡེམ་པའི་དབང་འབྲས་ནི། གཤང་གཅིའི་འདམ་རྫབ་ཁྲོད་དུ་དྲི་ང་བའི་ཚོར་བ་རྩུབ་མོའི་དབུགས་མི་འབྱིན་པའི་སར་མི་གཙང་བའི་ལྗན་ལྗིན་དོག་ཅིང་ཉམས་མི་དགའ་བའི་ཡུལ་དུ་སྐྱེ་བའི་འཁྲི་ཤིང་དབང་མེད་དུ་འཛུགས་དགོས་པའོ། །རྫུན་གྱིས་འབྱོར་བ་གཡོ་ཞིང་མི་བརྟན་པ་དང་ཡུལ་དགྲ་ཟླ་ལྟ་བུ་མི་མཐུན་པ་ཁོ་ན་དང་འཕྲད་པ་དང་། གཞན་གྱིས་བསླུ་བ་མང་བ་དང་། འཇིགས་པ་སྣ་ཚོགས་ཀྱིས་རྟབས་ཤིང་སྐྲགས་པའོ། །ཕྲ་མས་ས་ཕྱོགས་ངམ་འགྲོགས་གཅོང་རོང་ཆེ་ཞིང་གདུག་པ་ཅན་དང་། བགྲོད་པར་དཀའ་བའི་ཡུལ་མཐོ་དམན་ཅན་གྱི་ཡུལ་ལ་གནས་དགོས་སོ། །བརྗོད་པ་རྩུབ་མོའི་རྡོ་གསེག་མང་བ་དང་ཚེར་མ་ཅན་དང་། སྡོང་དུམ་འབྲས་ངན་རྩུབ་པ་དང་ཉམས་མི་བདེ་བ་དང་། ཚྭ་སྒོ་ཅན་དང་རྡུལ་མང་བ་ཉལ་ཉིལ་གྱི་ཁྲོད་དུ་སྐྱེ་ཞིང་ཡིད་མི་བདེ་བའི་ཚོར་བ་ཉམས་སུ་མྱོང་བའོ། །ངག་འཁྱལ་ལམ་ཀྱལ་ཀས་སོ་ནམས་ལ་བརྩོན་པ་དང་ངལ་བ་དང་དུབ་པའི་ལས་ཅི་ཙམ་བྱས་ཀྱང་དེའི་འབྲས་བུ་མེད་ཅིང་ཚ་གྲང་གོ་ལྡོག་པ་ལྟ་བུའི་དུས་ཀྱི་རྗེས་སུ་མི་འགྲོ་ཞིང་མི་བརྟན་པར་འགྱུར་བའོ། །བརྣབ་སེམས་ཀྱིས་སྤུན་པ་དང་འབྲས་བུ་གོ་ལྡོག་ཅིང་གནས་དང་དུས་འཕོ་འགྱུར་ལྟ་བུའི་གདུག་པའི་བསམ་སྦྱོར་གྱིས་སྐབས་བཙལ་མཐོང་བར་སྐྱེ་བའོ། །གནོད་སེམས་ཀྱིས་སྡིག་སྤྱོད་ཀྱི་རྒྱལ་པོ་དང་འབྲེལ་ཞིང་། དེར་ཡང་ཆོམ་རྐུན་དང་སྦྲུལ་གདུག་དང་མི་རྒོད་གཅན་གཟན་རྩུབ་སྤྱོད་ཅན་མ་རུང་པའི་འཚེ་བ་མང་ཞིང་ལོ་ཏོག་དང་འབྲས་བུའི་རོ་ཡང་ཚ་ཞིང་ཁ་བ་སོགས་རང་བཞིན་གྱིས་གནོད་པས་བཀབ་པའི་ཡུལ་དུ་སྐྱེ་བའོ། །ལོག་པར་ལྟ་བས་རིན་པོ་ཆེ་སོགས་ཕུན་ཚོགས་ཀྱིས་འབྱོར་བས་ཀུན་ནས་སྤོང་ཞིང་དབུལ་བ་དང་སྨན་ཤིང་གི་འབྲས་བུ་ཉུང་བ་དང་མེ་ཏོག་འབྲས་བུ་དག་ཀྱང་ནུས་པ་ཞན་པས་མཐུ་ཆུང་ལ། སྐྱབས་དང་སྐྱོབས་པ་དཔུང་གཉན་མེད་པར་སྐྱེ་བའོ། །སྐྱེས་བུ་བྱེད་པའི་འབྲས་བུ་ཚེ་འདིར་གང་བྱས་ཀྱི་མི་དགེ་བའི་ལས་ཕྱིར་ཞིང་མང་པོ་འཕེལ་བའི་སྡུག་བསྔལ་གྱི་རྒྱུ་འབྲས་མཐའ་དག་བསྐྱེད་པའོ། །འདི་ལྟར་འཁོར་གནས་མུན་པ་འདྲ་བ་ལས་ཀྱང་མི་དགེ་བ་མུན་ནག་འཐིབ་པོ་ཅན་ལྟ་བུ་ནི་འཁོར་བའི་བཙོར་རར་ཤིན་ཏུ་བརྣག་དཀའ་བར་ཉེར་ལེན་ཕུང་པོའི་སྟེང་དུ་རིགས་དྲུག་གི་སྡུག་བསྔལ་སྣ་ཚོགས་ཀྱི་དབལ་བཟོད་པར་དཀའ་བའི་ཚོར་བ་ཐོབ་པར་བྱས་པ་འདི་སྡིག་པའི་སྐྱོན་གྱིས་བྱས་པ་ཡིན་ལ། དེའི་ཕྱིར་ན་མ་དག་པའི་གཞན་དབང་སྲིད་པ་འདིར་གནས་པའི་སྐབས་ན་སྒོ་གསུམ་རྣམ་དཀར་གྱིས་ལས་སུ་བསྒྱུར་ཏེ། མཐོ་རིས་འཕེན་བྱེད་དགེ་བའི་ལས་ལམ་བཅུ་པོ་ལ་སྤང་བྱ་མི་དགེ་བ་བཅུ་ལས་ཕྱི་རོལ་ཏུ་ཕྱོགས་པ་དེ་ལྡོག་པའི་ཆ། རྣམ་དཀར་དགེ་བའི་ལས་བཅུ་པོ་བླངས་བྱ་དེ་ལ་ཡང་དག་པར་བསྙེན་པར་མཛོད་ཅེས་པའོ། །དེའི་བསྙེན་པར་གྱུར་པའི་ལས་ནི་བསོད་ནམས་ཆ་མཐུན་ཞེས་ལྷ་མིའི་དགེ་འབྲས་བཅུ་པོས་བདེ་འགྲོར་འཕེན་ཅིང་། མི་དགེ་བ་རྣམ་པ་བཅུའི་ལས་འབྲས་ཀྱིས་ངན་འགྲོར་འཕེན་པའི་དཀར་ནག་གི་རྒྱུ་འབྲས་ལ་བླང་དོར་བགྱིད་པ་ནི་སྐྱེས་བུ་ཆུང་ངུའི་ལམ་ཡིན་ནོ། །དམ་པ་གསུམ་གྱིས་ཟིན་པའི་རྣམ་དཀར་གྱི་ལས་ཐར་པ་ཆ་མཐུན་ཟག་མེད་དམ་པ་མྱ་ངན་ལས་འདས་པའི་རྒྱུ་སྟེ་དགེ་བ་བཅུ་དང་། བསམ་གཏན་བཞི་དང་། གཟུགས་མེད་བཞི་དང་། སྦྱིན་པ་ལ་སོགས་ཕར་ཕྱིན་དྲུག་དང་བཅས་པ་རྣམས་ནི། ཚོགས་ལམ་དང་སྦྱོར་ལམ་མཐོང་ལམ་སྒོམ་ལམ་མི་སློབ་པའི་ལམ་དང་རྣམ་པ་ལྔས་བསྡུས་པ་ཡིན་ལ། དེའང་གང་ཟག་གི་བདག་འཛིན་པ་རང་བཞིན་མེད་པར་ཤེས་པ་དང་། ཆོས་ཀྱི་བདག་བཟུང་བ་རང་བཞིན་མེད་པར་ཤེས་པ་གཉིས་ཀྱི་དོན་རྟོགས་ན། ཐབས་སྤྱོད་པའི་ཕྱོགས་ཀྱི་ཆོས་ཕ་རོལ་ཏུ་ཕྱིན་པ་ལྔ་ལ་སོགས་པ་དང་། ཤེས་རབ་སྟོང་པ་ཉིད་ཀྱི་ཆོས་གཉིས་ཡ་བྲལ་དུ་མ་སོང་བཞིན་ཟུང་འབྲེལ་གྱི་དགེ་བ་གསེར་འགྱུར་གྱི་རྩིས། སྲིད་པ་འཁྲུལ་བའི་མངོན་རྟོགས་དང་ནི་ཞི་བ་མྱ་འདས་འཁྲུལ་པ་སད་པའི་རང་བཞིན་ཅན་གཉིས་དངོས་འགལ་བའི་འཁོར་བའི་ལྕགས་ཁམས་ལ་བདག་མེད་གཉིས་ཀྱིས་ནུས་པ་ཐེབས་པས་མི་གནས་ཡེ་ཤེས་རྒྱལ་བའི་ཁམས་ཀྱི་ཡོན་ཏན་གྲུབ་པ་འཇིག་རྟེན་ལས་འདས་པའི་དགེ་བ་ཡིན་ཞེས་པའོ། །ལམ་ལྔའི་དུས་སུ་སྒོ་གསུམ་གྱི་དགེ་བ་དམིགས་པ་དང་བཅས་པ་རྒྱུ་བསོད་ནམས་ཀྱི་ཚོགས་དང་། སྣང་ལ་རང་བཞིན་མ་གྲུབ་པའི་དམིགས་པ་མེད་པའི་དོན་རྟོགས་པ་ནི་འབྲས་བུ་ཡེ་ཤེས་ཀྱི་ཚོགས་ཏེ། གཉིས་ཀ་ཟུང་འཇུག་གིས་ཉོན་སྒྲིབ་དང་ཤེས་བྱའི་སྒྲིབ་པ་གཉིས་སྦྱངས་ལོངས་སྐུ་དང་སྤྲུལ་སྐུ་གཉིས་མངོན་དུ་འཐོབ་པ་ནི་དག་པའི་རྒྱུ་འབྲས་ཟབ་མོ་འགྲུབ་པའི་རྟེན་ཅིང་འབྲེལ་འབྱུང་ལགས་སོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་གསུམ་པའི་བསྡུས་འགྲེལ་ལོ། ལེའུ་བཞི་པ།༈ མངོན་མཐོའི་གྲུ་པོ་མཆོག་ནི། དལ་འབྱོར་གྱི་མི་ལུས་རིན་པོ་ཆེ་འདི་ཡིན་ལ། འདི་ལ་བརྟེན་པ་རྣམས་རེ་ཞིག་ངན་སོང་གསུམ་ཆུ་སྲིན་གདུག་པའི་ལྕེས་ཉེ་ཞོ་མ་རེག་པར་བཏང་ཡང་། ད་དུང་འཁོར་བ་སྡུག་བསྔལ་གྱི་རྒྱ་མཚོ་ལས་མ་བརྒལ་སྐྱོན་གྱིས་ཐར་པའི་སྐམ་སར་མ་ཕྱིན་པ་ཡིན་པས། དེའི་འགལ་རྐྱེན་སྤོང་ཞིང་མཐུན་རྐྱེན་འགྲུབ་པའི་ཆེད་དུ་འཕགས་པའི་བདེན་པ་བཞིའི་དེད་དཔོན་མགོན་དང་སྐྱབས་སུ་བརྟེན་དགོས་པ་ཡིན་སྟེ། དེ་ལ་སྡུག་བསྔལ་གྱི་བདེན་པ་ཤེས་པར་བྱ་བ་ནི། འཁོར་བའི་གནས་རིགས་དྲུག་པོ་དམའ་བ་ངན་སོང་གསུམ་པོའམ། མཐོ་བ་ལྷ་མི་གཉིས་ལྷ་མིན་གང་ཡང་རུང་སྟེ། སྡུག་བསྔལ་གྱི་སྡུག་བསྔལ་ནི་སྡུག་བསྔལ་གཅིག་གི་མི་ཆོག་པར་བརྩེགས་མར་བྱུང་བ་ལྟ་བུ་དང་། མཐོན་པོའི་བདེ་སྐྱིད་ཕུན་སུམ་ཚོགས་པ་མྱོང་བ་གང་ཞིག་རྨི་ལམ་སད་པ་བཞིན་དུ་འགྱུར་བ་དང་། ཁྱབ་པ་འདུ་བྱེད་ནི་ཚོ་འདིའི་བདེ་སྐྱིད་ཀྱི་ཕུན་སུམ་ཚོགས་པ་ཕལ་མོ་ཚེ་སྡིག་པ་ཁོ་ནས་འགྲུབ་པ་ཡིན་ཕྱིར་ད་ལྟ་སྡུག་བསྔལ་བ་ལྟར་མི་མངོན་ཡང་ཕྱིས་ནི་མངོན་གྱུར་ལ་སྤྱོད་པའོ། །དེ་ལྟར་སྡུག་བསྔལ་གསུམ་གྱིས་དམ་ལ་མ་བཞག་པའི་འཁོར་བ་གཞན་སུ་ཡང་ཡོད་པ་མ་ཡིན་ཞིང་། འཕྲལ་ཕུགས་གཉིས་ཀར་ཕུང་དཀྲོལ་བསྐྱེད་པ་ལ་མགོ་འཕང་བསྟོད་པའི་མ་རུང་འདོད་པའི་གདོན་དང་ཡུལ་གྱི་དུག་རྣམས་ཕན་ཚུན་འཛིངས་ཤིང་གཏུག་པ་ནི་འདོད་པ་ལ་ཆགས་པ་དང་། ཡུལ་ལྔའི་སྣང་བ་ལ་ཆགས་སྡང་ཤོར་ནས་རང་དབང་མེད་པའི་བཙོན་ར་ལྟ་བུ་ནས་ཐར་པའི་སྐབས་མེད་ཅིང་ཉམ་ཐག་སྐྱོ་བ་འཕེལ་ཞེས་པའོ། །བདེ་བ་འདོད་པ་ལ་མངོན་པར་སྦྱོར་བར་རེ་ནས་བརྩོན་པ་ཆེན་པོ་བསྐྱེད་པ་དག །གཏི་མུག་གི་མཐུས་ནོན་པ་སྡུག་བསྔལ་རྒྱུ་འབྲས་ཀྱི་རང་བཞིན་ལྡོག་ཏུ་མེད་པའི་བཙོན་པ་མཚོན་ཆ་རྣོན་པོའི་དབལ་ལ་བརྟེན་པར་བྱས་པའི་གནོད་པའི་གནས་སུ་རང་ཉིད་ཡང་དག་པར་ཏེ་ངེས་པར་སྦྱར་བའི་དཔེ་ཡང་འདི་བཞིན་ཏེ། མར་མེའི་གཟུགས་དང་བྱེ་མ་ལེབ་འཕྲད་པ་ཙམ་གྱིས་འཚིག་པ་བཞིན་དུ། སྒྲ་དང་དྲི་རོ་རེག་བྱས་བསླུ་བ་ནི། རི་དྭགས་སྒྲ་ལ་ཆགས་ནས་བསད་པ་དང་། བུང་བ་དྲིར་ཆགས་པས་ཤི་བ། ཉ་ལྕགས་ཀྱུའི་ཤ་ལ་སྲེད་པས་གཟུང་བ་དང་། གླང་པོ་ཆེ་དགའ་མའི་རེག་བྱར་ཆགས་པས་མཚོར་ལྷུང་ནས་ཤི་བ་སྟེ། འདོད་པའི་ཡུལ་ལྔ་དག་དང་རྟེན་ཅིང་འབྲེལ་བར་འབྱུང་བའོ། །ཅིའི་ཕྱིར་ཞེ་ན། སྲིད་པའི་ཡུལ་ལ་འཕྲད་པ་ཙམ་གྱིས་གཞོམ་པ་ལ་ཐུ་བ་གཏུམ་པོའི་མེ་དང་། ཁྲོ་བོའི་མངོན་སྤྱོད་ནི་དྲག་ཤུལ་གྱིས་ལས་རྩུབ་མོ་སྟོན་པ་གཅན་གཟན་དང་། མི་རྒོད་རྒྱལ་པོས་ཆད་པ་ལས་མྱུར་བས་སྡུག་བསྔལ་སྔ་མ་མ་སངས་གོང་ནས་ཕྱི་མ་སླེབས་ཤིང་བརྒྱུད་མས་འགྲོ་བ་འདི་རྣམས་མནར་ཞེས་པའོ། །བདག་ལ་མཛའ་བཤེས་སམ་མི་མཐུན་པ་དང་། ཉེ་དུ་དང་། འཁོན་ཟླ་སོགས་བསམ་པར་མི་ནུས་ཤིང་། མཐའ་དག་སེམས་དང་ལྡན་པའི་འགྲོ་བ་ཐམས་ཅད་ཀྱིས་རེས་འགའ་དགྲ་དང་། རེས་འགའ་མཛའ་བཤེས་རེས་འགའ་བར་མའི་ཕྱོགས་བཟུང་ནས་ཕན་པ་དང་གནོད་པ་སྦྱིན་པ་སོགས་བསམ་ལས་འདས་ཤིང་སེམས་ཅན་ཕྲ་མོ་རྡུལ་ཕྲན་ལྟ་བུའི་ལུས་ཀྱི་བདག་གཅིག་པུའི་སྲོག་རྟེན་པ་དང་། གཟུགས་སུ་གྱུར་པ་གཞན་གྱི་ཤ་ཁྲག་དང་ལྤགས་པ་འདོད་པའི་ཕྱིར་མགོ་དང་། ཡན་ལག་བཅད་གཏུབས་བགྱིས་སོ་ཅོག་མཉམ་དུ་སྤུངས་ན་ལྷུན་པོའི་ཆེ་ཐང་ཉམས་པར་འགྱུར་ཞིང་དེ་ལས་ཀྱང་མཐོ་ཞེས་པའོ། །དམྱལ་གནས་སུ་སྐྱེས་དུས་ཟངས་ཞུན་ཁོལ་མ་དབང་མེད་དུ་འཐུང་བ་དང་། ཡི་དྭགས་ཀྱི་ལུས་སུ་གྱུར་དུས་རྣག་ཁྲག་དང་མི་གཙང་བ་ཟོས་པ་དུས་རྣམས་ཀུན་ཏུ་སྡུག་བསྔལ་གྱི་རྒྱུ་ལས་མཆི་མ་ཟག་པ་གཅིག་ཏུ་བསྡོམས་ན་ཕྱོགས་བཞི་མཚམས་བརྒྱད་ཀྱི་མཐའ་ལ་གཏུགས་པའི་ཆུ་ཀླུང་དག་ལས་མང་ཞེས་པའོ། །འགྲོ་བ་གཞན་ལས་ཁྱད་པར་དམྱལ་བའི་སྡུག་བསྔལ་ཚད་བཟུང་མེད་དེ། ཕན་ཚུན་གཅིག་གི་གཅིག་ལས་མཚོན་ཆ་སྣ་ཚོགས་ཀྱིས་གསོད་པ་ཡང་ཤི་ཡང་སོས་ལ། དེ་བཞིན་དུ་ལུས་ལ་ཐིག་ནག་པོ་གྲགས་ངེས་མ་ངེས་མང་དུ་བཏབ་ནས་དེར་སོག་ལེས་གཤོག་འཕྲལ་འབྱར་བ་རྒྱུན་མི་ཆད་པ་དང་། བསྡུས་འཇོམས་ནི་རི་ཕན་ཚུན་རྣམས་སྲོག་ཆགས་འཇིགས་པའི་མགོ་བརྙན་ཅན་དུ་གྱུར་ནས་རི་བར་དུ་བཅར་བ་དང་ཐོ་བས་འཐགས་པ་དང་། ངུ་འབོད་ཆུང་ངུ་ནི་ལྕགས་ཁྱིམ་རིམ་པ་གཅིག་གི་ནང་དུ་ལྕགས་ཀྱི་ཡོལ་གོར་ལྕགས་ཞུན་བསྐོལ་བར་འཚོད་ཅིང་ཕྱི་རོལ་ནས་མཚོན་ཆས་དབད་པ་དང་། ངུ་འབོད་ཆེན་པོའམ་འབོད་སྒྲོག་ཆེན་པོ་ནི་ལྕགས་ཁྱིམ་འབར་བ་ཉིས་རིམ་དུ་བསྲེགས་པ་དང་། ཚ་བ་ནི་གསལ་ཤིང་འབར་བས་ལུས་ལ་འབིགས་པ་དང་། རབ་ཏུ་ཚ་བ་ནི་མདུང་ཐུང་རྩེ་གསུམ་པས་ལུས་ཀྱི་གཞུང་འབིགས་ཤིང་ཕྱི་ནས་ལྕགས་བསྲེགས་སྣམ་བུ་ལྟ་བུས་དཀྲིས་པ་དང་། ཁྲོ་ཆུ་ཁོལ་མར་འཚོད་པ་དང་བཅས་ཏེ་སྡུག་བསྔལ་བའོ། །མནར་མེད་པ་ནི། ལྕགས་ཁྱིམ་འབར་བར་མེ་དང་དེར་སྐྱེ་བའི་འགྲོ་བའི་ལུས་གཉིས་སུ་མེད་པར་བསྲེག་ཚེ་སྡུག་བསྔལ་དེ་ཉིད་ལས་དབུགས་འབྱིན་ཏེ་བདེ་བ་སྐབས་བཙལ་བའི་ཀུན་རྟོག་གིས་ཉེ་འཁོར་གྱི་སྒོ་འཕར་ད་བྱེ་བའི་སྐབས་སུ། དང་པོ་མདག་མའི་འོབས་དང་། གཉིས་པ་རོ་མྱ་གས་ཀྱི་འདམ་རྫབ་སྟུག་པོ་དང་། གསུམ་པ་རལ་གྲི་ལོ་མའི་ནགས་ཚལ་དང་། བཞི་པ་ཐལ་ཚན་གྱི་ཆུ་བོ་རབ་མེད་ཀྱི་ནང་དུ་འཚོད་པ་གཤིན་རྗེ་འཕྲད་འཇོམས་ཀྱི་ཁ་བས་ཐུ་ཞིང་། ཤལ་མ་རིའི་སྡོང་པོ་ནི། དེར་སྐྱེ་བའི་འགྲོ་བས་གསོན་ཚེ་མཛའ་གཅུགས་ཀྱི་དམ་བཅའ་དྲན་ནས་འཕྲད་ལ་རེ་བ་ཕོ་ཡིན་ན་མོས་འབོད་པ་དང་། མོ་ཡིན་ན་ཕོས་འབོད་པ་མཐོང་ནས་བསྙེགས་པའི་ལམ་དེར་ཚེར་མ་རྣོན་པོས་ཚབས་ཆེན་ཕུག་པའི་བག་ཆགས་ཀྱི་ལུས་དེ་ལ་འབར་ཞིང་རྩུབ་པའི་ལྕགས་ཀྱི་སྐྱེས་པ་བུད་མེད་ཀྱིས་འཁྱུད་ནས་སྡུག་བསྔལ་མྱོང་མཐར་ཁྭ་དང་བྱ་རྒོད་སྣ་ཚོགས་ཀྱིས་མིག་ལ་འདྲུ་བའོ། །གྲངས་དམྱལ་ནི་བུ་ཡུག་སྟེ་རླུང་གི་རེག་བྱ་རྩུབ་མོས་སྦྲེབས་པ་གྲང་ཆེ་བའི་སྐྱོན་གྱིས་བག་ཆགས་ཀྱི་ལུས་པོ་ཤིན་ཏུ་འདར་བས་ཐག་པ་ཡིས། བཅིངས་ཏེ་བསྐྱོད་པར་མི་ནུས་པར་བཞིན་གསོན་པོར་སྣང་ཡང་། རླུང་གི་མཚོན་ཆས་རུས་པའི་གཏིང་ཕུག་པའི་རྐྱེན་གྱིས། གྲང་བའི་རེག་བྱ་སོའི་བར་དུ་འཚིར་ལྟར་གདུངས་པས་ཉམ་ཐག་པའོ། །དེ་ལས་ཀྱང་ཆུ་བུར་ཅན་དང་། ཆུ་བུར་རྡོལ་བ་དང་། ཨ་ཆུའི་སྨྲེ་སྔགས་དང་། ཀྱེ་ཧུད་ཀྱི་སྒྲ་འདོན་པ་དང་། སོ་འཐམས་པ་ཅན་དང་། ཨུད་པ་ལ་ལྟར་པགས་པ་དྲུག་ཚལ་དུ་གས་པ་དང་། པདྨ་དང་ནི་པདྨ་ཆེན་པོ་ལྟར་བརྒྱད་དང་བཅུ་དྲུག་གྲངས་མེད་གས་པའི་རྨ་ལ་སྲོག་ཆགས་མཆུ་རྣོན་ཅན་གྱིས་ལུས་ལ་འབིགས་ཤིང་བཟའ་བའོ། །ཉི་ཚེ་བ་ནི། འགལ་དུམ་ལམ་ཤིང་སྡོང་ཆེ་ཆུང་ལ་བཅད་གཏུབས་བྱས་པ་ཁོ་རང་གི་ལུས་ཡིན་པར་སྙམས་པ་དང་། སྒོ་འཕར་མེད་པའི་རྡོ་དང་བྲག་ལ་སོགས་པའི་ནང་དུ་འཐུམས་པ་དང་། ཁོ་རང་གི་ལུས་སྒོ་དང་ཀ་བ་དང་ཐབ་ཀ་དང་ཐགས་པ་སོགས་སྣ་ཚོགས་ལས་ཀྱིས་སྤྲུལ་པའི་རང་གཟུགས་ལ་འཁྲུལ་སྣང་དུ་ཤར་ཏེ་ཉེ་བར་ལེན་པའི་སྡུག་བསྔལ་ཟད་མི་ཤེས་པ་ལ་སྤྱོད་དགོས་པའོ། །སེར་སྣའི་རྒྱུས་འཕངས་པའི་ཡི་དྭགས་ཀྱི་ཡུལ་ནའང་འདོད་པ་དང་ཆགས་པས་ཕོངས་པའི་རྒྱུས་བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ་སྟེ། བར་མ་ཆད་པ་ལྟ་བུའི་བཀྲེས་སྐོམ་དང་གྲང་དྲོ་དང་ངལ་དུབ་དང་འཇིགས་པ་བསྐྱེད་པ་ཤིན་ཏུ་མི་བཟོད་པ་བརྟེན་འཚལ་ལོ། །ཞེས་པ་དེ་བཞིན་དུ་གོ་དགོས་པའོ། །ཉོན་མོངས་པ་གཏི་མུག་གི་རྒྱུས་དུད་འགྲོར་སྐྱེས་ཤིང་གནས་ན་ཡང་། མི་ལ་སོགས་པས་གསོད་པ་དང་། ཐག་སྒྲོགས་ལ་སོགས་པས་བཅིངས་པ་དང་། རྡོ་དང་ཤིང་ལ་སོགས་པའི་བརྡེག་པ་དང་བཙོག་པ་སོགས་སྡུག་བསྔལ་སྣ་ཚོགས་པ་ཉམས་སུ་མྱོང་དགོས་ཤིང་། ཁྱད་པར་བྱིང་གནས་ལ། ཞི་འགྱུར་དགེ་བ་སྤང་བ་སྟེ། བསོད་ནམས་ཆ་མཐུན་ཙམ་ལ་བློ་མ་ཕྱོགས་པ་རྣམས་ལ་ནི་ཉི་ཟླའི་སྣང་བ་ཙམ་ཡང་མེད་པའི་གནས་སུ་གཅིག་ལ་གཅིག་ཟ་ཞིང་དུད་འགྲོའི་སྡུག་བསྔལ་ཤིན་ཏུ་མི་བཟོད་པ་སྣ་ཚོགས་མྱོང་དགོས་པ་ཁྲིད་ཡིག་རྣམས་ལས་གསལ་བ་ལྟར་རོ། །དེའི་ཕྱིར་ན་སྐྱེ་བའི་ཤྭ་འོད་ཅེས་ཆུ་ལོག་གིས་ཉེན་བཞིན་དེའི་རྒྱུ་རྐྱེན་སྡུག་བསྔལ་གྱི་རྦ་རླབས་ཅ་ཅོ་སྒྲོག་པ་ལྟ་བུ་འདི་ག་མ་བཟློག་ན། ལྷ་བས་ལྷག་པའི་ལུས་རྟེན་ནི། མི་ལུས་རིན་པོ་ཆེ་ཡིན་ཏེ། ཆུ་ལོན་ཡང་ཞེས་ར་བས་བཀག་པ་གཟུགས་ཅན་གྱི་རྒྱན་དུ་བཀོད་ན་ས་སྐྱེ་བའི་སྐྱོན་ཉམས་ལེན་གྱིས་བཟློག་པར་མ་བྱས་ན་བརྟན་པ་བྲལ་བའི་མྱ་ངན་ཐང་དུ་འཁྱམས་ཞེས་པའོ། །གཟུགས་མེད་ཀྱི་ཏེང་ངེ་འཛིན་ནི་ལུང་མ་བསྟན་པའི་ལས་ཡིན་ཕྱིར། དེར་སྐྱེ་བའི་རྒྱུ་མི་གཡོ་བའི་རྒྱུ་འབྲས་ཡིན་པས་དེ་ཟད་ནས་སྲིད་པ་ཕྱི་མར་འདུ་བྱེད་པ་དང་། གཟུགས་ཁམས་སུ་སྐྱེ་བའི་རྒྱུ་ཡང་དགེ་བ་བཅུ་དང་བསམ་གཏན་བཞི་གང་རུང་གི་འཕེན་བྱེད་ཀྱི་སྔ་མའི་ལས་ཟད་དེ། འོག་ཏུ་མར་ལྟུང་བར་འགྱུར་བའི་སྡུག་བསྔལ་མྱོང་དགོས་པའོ། །ཚངས་པ་དང་། ལྷའི་དབང་པོ་དང་། འཁོར་ལོས་སྒྱུར་བ་རྣམས་ཡང་། མངོན་པར་མཐོ་བའི་ལུས་རྟེན་དེ་རྣམས་སྤྲིན་བར་གྱི་ཉི་མ་སྣང་བ་བཞིན། སྔོན་བསགས་དཀར་པོའི་རྣམ་སྨིན་གྱིས་རེ་ཞིག་བདེ་བའི་སྐབས་བཙལ་བ་ལྟར་ཡང་དེར་སྐྱེ་བའི་རྒྱུ་དེས་སྤངས་པའི་མོད་ལ་མར་མེའི་ལྕེས་འཐུངས་པའི་ཞུན་མར་བཞིན་དུ་ཉམས་པར་འགྱུར་ཞེས་པའོ། །འདོད་པའི་ཁམས་སུ་རྐང་པས་མནན་ན་ནེ་མས་བྱེད་པའི་རེག་པ་རྩུབ་མོ་མ་ཡིན་པར་ཤིན་ཏུ་འཇམ་པོ་དང་། ལྷ་དང་ཀླུ་དང་མིའམ་ཅིའི་ལ་ཐོད་ཀྱིས་ལྷ་དབང་གི་ཞབས་ལ་བཏུད་པས་རྐང་པའི་ཆུ་སྐྱེས་ཏེ་ཞབས་པད་དམར་པོར་བསྒྱུར་བར་བྱས་པའི། ལྷའི་གཙོ་བོའི་དབང་པོ་དེ་ཡང་ལྕགས་ཀྱི་གསལ་ཤིང་འབར་བའི་རྩེ་མོར་གདུང་དགོས་སོ། །མཐོ་རིས་བུ་མོའི་ནུ་མ་གསར་པ་ལ་རེག་པའི་འཁྲི་ཤིང་བརྟེན་པར་གྱུར་ཏེ། ལྷ་གཞོན་ནུ་རྣམས་དང་འཁྲིལ་སྦྱོར་བྱེད་ཡུལ་གྱི་དགའ་ཚལ་དང་། གཞལ་མེད་ཁང་མཛེས་ཀྱི་མུ་ཏིག་དྲྭ་ཕྱེད་ཅན་སོགས་རང་རང་གི་དཔལ་འབྱོར་ལོངས་སྤྱོད་ཕུན་སུམ་ཚོགས་པ་སྤངས་ནས་མེ་མུར་གྱི་འོབས་ནང་ལ་སོགས་པར་སྤྱི་ཚུགས་སུ་ལྟུང་ནས་སྡུག་བསྔལ་ལ་སྤྱོད་དགོས་པའོ། །གོས་དང་སྟན་དང་མེ་ཏོག་གི་རྒྱན་སོགས་རྙིངས་པས་འཆི་བའི་ལྟས་བྱུང་བའི་ལྷ་མོ་དག་ནི་སྔ་མ་རྔུལ་ཆུ་དང་གདོང་པ་སོགས་ཀྱི་དྲི་མ་བཀྲུ་བ་ཡིན་ཞིང་སྐབས་དེར་དེའི་ཟོལ་ཞིག་ནས་རང་རང་གི་ཉེ་དུ་རྣམས་ལ་བལྟ་ཞིང་ངུ་བའི་ཕ་མ་ལྟུང་དང་འཆི་འཕོའི་སྡུག་བསྔལ་དེ་ལྟ་བུ་མི་ལ་མེད་དོ། །གཉའ་ཤིང་འཛིན་རིའི་ས་བླ་སྟེ་བར་སྣང་གི་ལམ་འགགས་ནུས་པའི་གླིང་བཞིའི་གདུགས་སུ་གྱུར་པའི་སྣང་བྱེད་ཆེན་པོ་ཉི་ཟླ་གཉིས་ཀྱང་སླན་ཆད་སྣོད་བཅུད་འཇིག་པ་ལ་ཕྱོགས་ཚེ་མུན་པའི་སྨག་གི་བཙོན་ཏུ་ཚུད་པ་ལྟར་གྱུར་དུས་འགྲོ་བ་ཕལ་མོ་ཆེ་ལོང་པ་ཆེན་པོའི་གནས་སྐབས་འཐོབ་པར་འགྱུར་བའོ། །ལྷ་མིན་ནི་ལྷ་རྣམས་ཀྱི་དཔལ་དང་མངོན་པར་མཐོ་བ་ལ་སྡང་བའི་ཕྲག་དོག་གི་དགྲ་སྟས་རང་སྙིང་ཚལ་པར་བཀས་ནས་སླར་ཡང་དྲག་ཤུལ་གྱིས་དཔུང་པ་གཏུམ་པོའི་གཡུལ་ཆེན་པོ་བཤམས་པའི་ངོར་བདག་ཉིད་ཀྱི་མགོ་དང་ཡན་ལག་རྣམས་གཏུབ་པས་ལྷ་མིན་མནར་པའོ། །འཚོ་བ་སྟེ་ཚེ་སྲོག་ཆུ་བུར་ལྟ་བུར་གཡོ་བའི་མི་དག་ནི་ཡིད་མི་བདེ་དང་འཁྲུགས་པ་སོགས་སྡུག་བསྔལ་སྔ་མས་ཕྱི་མ་ཉེ་བར་ལེན་དགོས་སོ། །དཔེར་ན་མཛེ་ཅན་ཕོ་ལ་མིག་གི་ཐོག་ཏུ་རྨས་གཏུགས་པ་བཞིན་ལ། དེར་མ་ཟད་མངོན་མཐོའི་ཡོན་ཏན་རྫོགས་པའི་སྐྱེད་མོས་ཚལ་དུ་འདོད་པའི་ལོངས་སྤྱོད་ཀྱི་རོ་ལ་གདུང་བ་དུག་ཅན་གྱིས་བཟའ་བས་སྲོག་ལ་ཉེ་ཞོའི་རྒྱུ་བྱེད་པས་ན་རྣམ་པར་སྨ་ཕབ་སྟེ། ནད་ཀྱི་ཉེ་བར་འཚོ་བས་དཀའ་ཐུབ་ལུས་མིག་འཁྲུལ་ལྟ་བུར་ཐོབ་འདི་འགྱུར་བ་ཅན་ཡིན་ཞིང་། རྐང་པའི་རེག་པ་ཁུར་དུ་མི་བཟོད་པས་སྐྱོ་བས་ངལ་དུབ་དང་བཅས་པས་སེམས་ཀྱིས་གླང་པོ་ཆེའི་གཉའ་བར་འཛེགས་ཀྱང་གླང་མོའི་དྲི་ཕོག་པ་ཙམ་གྱིས་དེའི་་བསམ་པ་རྩེ་དགའི་རྒོད་པར་གྱུར་ནས་བརྒྱུགས་པས་གཡང་སར་ལྷུང་ཞིང་སྨད་པས་འདུ་བྱེད་སྡུག་བསྔལ་དུ་ཤར་བ་མཚོན་ནོ། །འདིའི་གཏམ་རྒྱུད་ནི། དོན་འདི་ལ་སྐྱེས་རབས་ཀྱི་རྒྱུད་སྡེ་དང་དཔེ་སྦྱར་ཏེ། འོད་ལྡན་ཞེས་བྱ་བའི་རྒྱལ་པོའི་ཁབ་ཏུ་རྒྱལ་པོ་རབ་གསལ་གླང་པོའི་གཉའ་བ་ལ་འཛེགས་པར་སྤྲོ་བ་བཏེགས་ནས་གླང་པོ་ཆེ་འདུལ་སྦྱོང་མཁན་ལ་སྨྲས་པ། ཀ་ཡེ་ཤེས་པར་གྱིས་ཤིག གླང་པོའི་མཆོག་འདི་ནི་བདག་ཅག་གི་རྐང་པས་ལ་རེག་པར་མི་བཟོད་པའི་བསོད་ནམས་ཀྱིས་མཐུས་འཐོབ་ན་ཁྱོད་ཀྱིས་འདི་ཉིད་འདུལ་བ་འཛིན་དུ་ཆུག་ཅིག །དེས་ཀྱང་ལྷ་བཀའ་བཞིན་འཚལ་ལོ་ཞེས་ཁས་བླངས་ནས་ལྕགས་ཀྱི་ཐོ་ལུམ་མེ་འབར་བའང་སྣས་ཚམ་ཚོམ་མེད་པར་ལེན་པ་བསྒོབ་མཉན་པ་དེ་སྲིད་དུ་འདུལ་བ་འཛིན་པར་བྱས་སོ། །དེ་ནས་རྗེ་འབངས་གཉིས་གླང་པོའི་གཉའ་བ་ལ་ཞོན་ནས་ཡུལ་ཉེ་བར་སྤྱོད་པའི་སྐྱོ་བསངས་ལ་སྦྲོ་བཞིན་དུ་བཏེགས་པ་ན་བདག་ཉིད་ལ་སྡུག་བསྔལ་བསྒྲུབ་པའི་རྒྱུ་ཐམས་ཅད་བལྟར་མི་མངོན་པ་འདུ་བྱས་པ་ཉིད་ཀྱི་ཕྱིར་དང་། གླང་པོ་ཆེ་གང་དག་ནི་ཐུབ་པ་མཆོག་གིས་ཉོན་མོངས་པ་འདུལ་བའི་སྡོམ་པས་སེམས་མ་དུལ་ལ། འདུལ་སྦྱོང་མཁན་གྱིས་ལྕགས་ཀྱུས་ལུས་དུལ་བ་ཙམ་དུ་གྱུར་པའི་ཕྱིར་གླང་མོའི་དྲི་བསྣོམས་པའི་རྩེ་དགས་ཡིད་རབ་ཏུ་རྒོད་པར་གྱུར་ནས། ས་གཞི་ཐམས་ཅད་ཤིང་རྟའི་འཁོར་ལོས་བསྐོར་བ་ཉིད་དང་འཁྲུལ་བ་བསྐྱེད་པ་ཙམ་དུ་རྒྱུག་པས་རྒྱལ་པོ་རབ་གསལ་ཉིད་སྲོག་དང་བྲལ་བ་ལ་ཉེ་བའི་སྡུག་བསྔལ་ཐོབ་པ་ལྟ་བུ་སྟེ། འདུ་བྱེད་ཀྱི་སྡུག་བསྔལ་འདི་ན་སེམས་ཅན་ཐམས་ཅད་ལ་བལྟར་མི་མངོན་པ་ཉིད་དུ་ཤས་ཆེ་བར་རིག་པར་བྱའོ། །དེ་ལྟར་སྡུག་བསྔལ་ཉིད་གསུམ་འབྲོག་དགོན་ན་ཞེས་ཐར་པ་དང་རྣམ་མཁྱེན་གྱི་དཔུང་གྲོགས་ཉུང་བའི་སར་སྐྱེ་བའི་སྡུག་བསྔལ་དང་། ན་བ་དང་འཆི་བའི་སྡུག་བསྔལ་གྱི་ཚོར་བ་རྣམ་པར་འཁྱམས་བཞིན། མཐོང་ན་སྨོན་པ་མེད་པའི་མི་སྡུག་པའི་དགྲ་དང་འཕྲད་ཅིང་། འབྲལ་དུ་མི་ཕོད་པའི་གཅེས་ཤིང་སྡུག་པ་ཡིད་ལ་གོམས་པར་བྱས་པ་དག་གནས་མིན་ཏེ་ཕ་རོལ་དུ་ཕྱོགས་ཤིང་། འདོད་པའི་ཡུལ་ཀུན་ལ་འབྱོར་བས་ངོ་ཚར་བྱས་བཞིན་འབྲོས་ལ་རིངས་པ་སོགས་ཉེར་ལེན་ཕུང་པོའི་སྟེང་དུ་དཀའ་ཐུབ་འདུས་པའོ། །དེ་ལྟར་རྣམ་པ་བརྒྱད་པོ་ནི་བཤད་མ་ཐག་པ་ལྟར་གྱི་སྡུག་བསྔལ་བརྟུལ་ཕོད་པས་མནར་ཞིང་གདུང་བས་མིའི་སྐྱེ་བའི་འཁྲི་ཤིང་རྟག་ཏུ་གཙེར་ནས་སྡུག་བསྔལ་བའོ། །སྐྱེ་བའི་སྡུག་བསྔལ་ནི་ཤིན་ཏུ་དྲི་ང་མི་གཙང་བ་དང་ལྷན་ཅིག་གནས་དགོས་ཤིང་སྐྱུགས་བྲོ་བའི་རྙོག་མ་ཅན། ཀུན་ནས་དོག་པ་སྣང་བའི་ཆ་མེད་པའི་མུན་ནག་འཐིབ་པོའི་ཁྲོད་མངལ་གནས་ལྕགས་ཀྱི་ཁྱིམ་སྒོ་འཕར་སྤུངས་པ་ལྟ་བུའི་ནང་དུ་མ་རིག་པའི་རྣམ་པར་ཤེས་པ་ཕའི་ཁུ་བ་དང་མའི་ཁྲག་གི་དབུས་ན་བརྟེན་པར་བྱས་ཤིང་། མེར་མེར་པོ་དང་ནུར་ནུར་པོ་ལྟར་ལྟར་པོ་མཁྲང་གྱུར་དང་གོར་གོར་པོ་དང་ཉ་དང་རུས་སྦལ་བཞིན་གཟུགས་རྣམ་པར་འགྱུར་ཏེ་བདུན་ཕྲག་སུམ་ཅུ་རྩ་དྲུག་གི་གྲངས་སུ་གནས་འགྱུར་ཡིད་མི་འོང་བའི་རྣམ་པ་དེ་སྙེད་ཀྱི་གྲངས་ཚད་ལ། དབང་པོ་དང་ཡན་ལག་བ་སྤུ་ལ་སོགས་འགྲུབ་ཅིང། བདུན་ཕྲག་སུམ་ཅུ་རྩ་བདུན་གྲངས་སྙེད་ཀྱི་སྐབས་ལ་བབས་ཚེ་མངལ་དུ་གནས་པ་དེ་ཉིད་བརྟས་དང་ཆེར་བསྐྱེད་གཡོ་ཞིང་འགུལ་བའི་ཚོར་བས་གདུང་བ་དང་མའི་སྤྱོད་ལམ་བཀྲེས་སྐོམ་ཚ་གྲང་དང་བཟའ་བཏུང་གི་རྣམ་འགྱུར་ལས་བྱུང་བའི་སྡུག་བསྔལ་དཔག་ཏུ་མེད་དོ། །བཙའ་བའི་དུས་ཀྱི་རྗེས་སུ་འགྲོ་དགོས་པས་ཆུང་ངུ་དེའི་ལུས་བཟོད་པར་དཀའ་བའི་བསྡུས་འཇོམས་ཁུར་དུ་འཕོས་པ་ལྟ་བུའི་སྡུག་བསྔལ་ཉེ་བར་སྤྱད་པས་ཐོ་བརྩམས་ནས་མ་བུ་གཉིས་ཀ་དེའི་མོད་ལ་སྲོག་འདོར་རམ་གཅིག་ཤོས་དེ་བྱིས་པ་ཉིད་གནོད་པ་བདོ་བའི་ཁུར་དང་བཅས་པའི་ཚུལ་གྱིས་བཙལ་བའོ། །མངའ་གནས་རློན་པ་དེར་བསྟི་རིང་ལ་ཤིན་ཏུ་བཙོག་པས་དཀྲིས་ཤིང་དྲི་ང་བ་ལ་སྲན་ཏུ་མི་བཟོད་པ་ཤ་རྨེན་ཞིག་པ་ལྟ་བུའི་སྐབས་ལ་བབས་ཚེ་སྔོན་གྱི་དྲན་པའི་སྟོབས་རྣམས་ཡོངས་སུ་ཉམས་པར་བྱས་ཤིང་རེག་པའི་རྣམ་པས་གཟིར་བས་སྡུག་བསྔལ་ཉམས་སུ་མྱོང་བའོ། །རྒ་བའི་རྒས་པའི་ཆད་པས་ནོན་པའི་ལང་ཚོ་ལ། ཉམས་འཁྲུགས་པ་དང་། ཡིད་མི་བདེ་བའི་ཁུར་བབས་པས་ལུས་བསྐྱོད་པའི་མཐུ་ཉམས་སྐྱོན་གྱི་མཁར་བའི་གཞན་དབང་ཅན་དེ་འགྲོ་ཞིང་ལྡོག་པའི་གཡོ་འགུལ་གྱིས་བྱ་བའི་ལུས་ལམ་དུ་འགྲོ་དཀའ་ཞིང་ལྷུ་ཚིགས་རྣམ་པར་འགྱུར་བ་དང་། དབང་པོ་ཀུན་ནས་འདོད་པའི་ཡོན་ཏན་ལྔ་དང་ཡུལ་གྱི་ཕུན་སུམ་ཚོགས་པའི་ལོངས་སྤྱོད་སྤྲིན་གྱིས་བཀབ་པའི་ཚ་ཟེར་བཞིན་དུ་གྱུར་པས་ཤེས་བྱར་རྨོངས་པ་དང་། བློ་གྲོས་ཀྱི་མཐུ་ཉམས་པས་འདུ་ཤེས་འཁྲུགས་པའི་མལ་དུ་ཤིན་ཏུ་འཁྱམས་པའོ། །དེ་ཡང་རླུང་དང་མཁྲིས་པ་དང་བད་ཀན་དང་འདུས་པ་སྟེ་བཞི་པོ་རང་བཞིན་སྙོམས་ལྡན་དུ་གནས་ཚེ་ན་བར་མི་འགྱུར། འཁྲུགས་ཚེ་འདུ་བའི་རྫིང་བུ་ནི་རྙོག་མ་ཅན་གྱི་ན་བའི་ཚོར་བས་ཕུང་པོ་ལྔའི་ཉེ་བར་ལེན་པ་དུབ་པར་བྱས་ཏེ། ཚེ་སྲོག་འཚོ་བའི་བརྟན་པ་དང་བྲལ་བའི་དོགས་པས་སྐྲག་པར་འགྱུར་ལ། དེ་ཡང་སྲིད་པ་འདི་ན་རང་སྲོག་གི་རིན་ཐང་ལ་ནོར་རྫས་རི་ཙམ་སྤུངས་ཡང་ཐུག་པ་མེད་པའི་འཆི་བའི་སྡུག་བསྔལ་ཐོག་ཏུ་བབ་པའི་ཉེར་ལེན་གྱིས་ཕ་རོལ་ཏུ་ཉིང་མཚམས་སྦྱོར་བ་ལ་རྣམ་པར་གཏུགས་པའི་སྐྱེས་བུ་གང་ཡིན་པ་དེ་ནི་གཉེན་འདུན་དང་། ལོངས་སྤྱོད་དང་བྲལ་ཞིང་ཚེ་འདིའི་སྣང་བ་ལས་ཐལ་ཏེ་ས་ཚུགས་མེད་པར་འགྲོ་དགོས་ཤིང་། མི་སྡུག་པའི་ཡུལ་ནི་བར་དོའི་འཇིགས་སྐྲགས་དང་འཆི་བདག་གི་ཞགས་པས་ཟིན་པ་ལ་བྱ་སྟེ། དེ་དག་དང་འཕྲད་པའི་སྡུག་བསྔལ་གྱི་ཕོ་ཉས་རྣམ་པར་གཟིར་ཞིང་སྨད་པ་རྣམས་ནི། ཚེ་འདིའི་སྣང་བ་ནུབ་རྐྱེན་གྱིས་བདེ་བའི་འབབ་སྟེགས་ཞིག་པའི་ངལ་གསོ་ལྟར་གནས་པ་དེ་བདེ་བར་དབུགས་འབྱིན་ཐོབ་པ་མེད་པས་ལྷག་པར་ཉེན་ཞིང་། ཉེ་དུ་ཉེ་འབྲེལ་སོགས་བྱམས་སྡུག་རྣམས་དང་གློ་བུར་དུ་འདུ་འབྲལ་གསར་བར་བཀོད་པའི་ཚུལ་ཡང་། སྡུག་བསྔལ་གྱིས་གདུང་བས་ཉམས་པའི་དཀའ་ཐུབ་གཟུགས་སུ་གྱུར་ན། རྒྱལ་སྲས་ནོར་བུ་བཟང་པོ་དྲི་ཟ་མོ་དང་བྲལ་བའི་སྡུག་བསྔལ་གྱིས་དབང་དུ་གྱུར་པས་མོ་རང་གི་རྗེས་སུ་སྙེགས་ཏེ་ཕྱིན་པའི་ལམ་འཕྲང་འཚེ་བ་སྣ་ཚོགས་ཀྱིས་བཀབ་པ་ལས་ཕྱི་མའི་ལས་མཐའ་རིང་ཞེས་སྨྲེང་ན། སྤྱིར་ཡང་འདོད་པས་ཕོངས་པ་དང་སྔོན་གྱི་བསོད་ནམས་ཞན་པའི་སྟོབས་ཀྱིས་དབུལ་བའི་སྡུག་བསྔལ་ཐོག་ཏུ་བབས་པའི་སྐྱེས་བུ་རྣམས་ནི། བཀྲེས་པ་ཟས་དང་སྐོམ་པ་བཏུང་བའི་དོན་མ་གྲུབ་པའི་རེ་དོགས་ཀྱི་གཞན་དབང་ཁོ་ནར་ལུས་ངག་ཆུད་གསོན་པའི་མི་རྣམས་སྡུག་བསྔལ་བའི་ཚུལ། ས་ལ་རྒྱུ་བའི་ཡི་དྭགས་དངོས་དང་མཚུངས་ཞེས་པའོ། དེ་ཡང་རང་ཉིད་ཀྱི་གཟུགས་ལ་རྟེན་བཅས་ཤིང་། ཚོར་བས་བདེ་སྡུག་སོགས་ཀྱི་རང་བཞིན་ཤེས། འདུ་ཤེས་ལས་བཟང་ངན་གང་ཡིན་དེ་རྒྱུན་ཆགས་ཤིང་། འདུ་བྱེད་ཀྱིས་ལས་དཀར་ནག་གི་རྗེས་སུ་འགྲོ་བའི་ཕྱིན་ཆད་ཀྱི་ས་བོན་བསྐྲུན་པ་དང་། རྣམ་ཤེས་ཀྱི་བདེ་བ་དང་སྡུག་བསྔལ་ཉམས་སུ་མྱོང་བའི་ལས་ཉེ་བར་ལེན་པའོ། །དེ་ལྟ་བུའི་ཕུང་པོ་ལྔ་པོ་འདི་དག་སྡུག་བསྔལ་རྣམ་པ་སྣ་ཚོགས་ཀུན་གྱི་འབྱུང་གནས་དང་། ཀུན་གྱི་རྟེན་དང་། སྣོད་དང་ཀུན་གྱི་རྒྱུ་འབྲས་དང་བདག་པོར་མཁྱེན་པར་འཚལ་ནས། རྒྱུ་ཀུན་འབྱུང་སྟེ་ལས་དང་ཉོན་མོངས་པའི་ཚོགས་སྤངས་པར་འཚལ་ལོ། དེ་ལྟར་སྤངས་ནས་སྐྱེས་བུ་འབྲིང་པོ་ཉན་རང་གི་ལམ་སྡུག་བསྔལ་ཤེས་བྱ་ཀུན་འབྱུང་སྤང་བྱ་ལམ་རྒྱུད་ལ་བརྟེན་བྱ་འགོག་པ་མངོན་དུ་ཐོབ་བྱ་སྟེ་བདེན་པ་བཞིའི་ཤིང་རྟ་ལ་ཞོན་པ་རྣམས་འགོག་པ་མངོན་གྱུར་མྱ་ངན་འདས་པའི་ཁམས་ཏེ་ཐར་པ་མཆོག་གི་གོ་འཕང་ཉིད་སངས་རྒྱས་ཀྱི་ཞིང་དུ་འགྲོ་ཞེས་པའོ། །རྟེན་མཆོག་དམན་ཀུན་དང་གཉིས་ཆོས་ཀུན་གྱི་རྩ་བ་ལྷན་སྐྱེས་དང་ཀུན་བརྟག་གི་མ་རིག་པ་དེ་ལས་འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དེ་ལས་སྐྱེ་ཞིང་མཆེད་བ་རྣམ་པ་དྲུག་དང་། དེ་ལས་རེག་པ་དང་ རེག་པ་ལས་ཚོར་བ་སྟེ། དེ་ལས་སྲེད་པ་སྲེད་པ་ལས་ལེན་པ་དང་། དེ་ལས་སྲིད་པ་ སྲིད་པ་ལས་སྐྱེ་བ་སྟེ། སྐྱེ་བ་ཡོད་ཕན་ཆད་ན་འདོད་པས་ཕོངས་པ་དང་། མྱ་ངན་དང་ ན་བ་དང་ རྒ་བ་དང་ འཆི་བ་སོགས་སྡུག་བསྔལ་གྱི་ཕུང་པོ་ཤིན་ཏུ་ཆེ་བ་གྲུབ་པའི་ཕྱིར་ན། སྐྱེ་བ་འགག་ན་འཁོར་བའི་རྟེན་འབྱུང་གཞན་ཐམས་ཅད་འགག་པར་འགྱུར་བའི་རྟེན་ཅིང་འབྲེལ་བར་འབྱུང་བའི་རྒྱུ་འབྲས་ཟབ་མོ་ནི་རྒྱལ་བ་བདེན་པར་སྨྲ་བ་རྣམས་ཀྱི་གསུང་གི་མཛོད་ཡིན་པར་ངེས་ལ། དེ་ལྟ་མོད་ཀྱི་སྲིད་པ་འདུ་བྱེད་པའི་མཐོ་དམན་ལས་ནི་བསོད་ནམས་ཀྱི་ལས་འབྲས་དགེ་བ་བཅུ་དང་། བསོད་ནམས་མ་ཡིན་པའི་ལས་མི་དགེ་བ་བཅུ་མི་གཡོ་བའི་ལས་བསམ་གཏན་བཞི་དང་། གཟུགས་མེད་བཞི་སོགས་དཀར་ནག་རྒྱུ་འབྲས་ཆོས་རྣམས་ཀུན་ལས་འདས་པ་ནི་ཞི་བ་དམ་པའི་དངོས་ཞེས་པ། སྐྱེ་བ་མེད་པའི་ཆོས་ཉིད་རྟོགས་ལས་བྱུང་བ་ཡིན་ནོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཞི་པའི་བསྡུས་འགྲེལ་ལོ། ལེའུ་ལྔ་པ།༈ དེ་ཡང་ཐེག་པ་གསུམ་པོ་གང་གི་ལམ་དུ་ཞུགས་ཀྱང་ཐོས་བསམ་སྒོམ་གསུམ་ལ་འཇུག་དགོས་པའི་ཕྱིར། དེའི་ཡུལ་ནི་མི་མཐུན་པའི་ཚོགས་སྤང་སྟེ་མཐུན་པར་གྱུར་པ་དག་ལ་བརྟེན་དགོས་པའི་ཕྱིར། སྡིག་པའི་གྲོགས་དང་བྱིས་པའི་གྲོགས་སོགས་སྤང་ཤིང་། སྐྱེས་བུ་དམ་པ་ཕྱི་ནང་གསང་གསུམ་གྱི་དཔལ་ཡོན་དང་ལྡན་པ་དག་བརྟེན་པ་ལས་ཡོན་ཏན་འཐོབ་ཅེས་པ་དང་། ལེགས་པར་སྨོན་པ་ནི་ཐར་པ་དོན་གཉེར་དང་བསོད་ནམས་ཀྱི་རྒྱུ་འབྲས་ལ་བླང་དོར་འཛོལ་མེད་བྱེད་པ་རྣམ་མཁྱེན་གྱི་སར་སྐྱབས་འདུན་བྱེད་པ་ཡིན་ལ། དེ་བཞི་ཀ་ལ་འཁོར་ལོ་ཆེན་པོ་བཞི་ཞེས། འཕགས་པ་ཀླུའི་དབང་པོས་བཞེད་པ་ལེགས་སོ། །ཉོན་མོངས་པ་ཁ་མ་བྲི་བས་ལྟར་སྣང་གི་དགེ་འདུན་པ་ན་བཟའི་ཕག་ག་ཡར་བ་ཙམ་གྱི་ཚོགས་ཀྱི་དབུས་ན་དུག་ཅན་གྱི་ཟས་ཁོང་དུ་སོང་བ་ལྟ་བུའི་སྐྱོན་གྱིས་ཡུལ་གཟུགས་སྒྲ་དྲི་རོ་རེག་བྱ་དང་། རྐྱེན་ཆགས་སྡང་བར་མ་གསུམ་གྱི་རྣམ་འགྱུར་ཤིན་ཏུ་རྒོད་པར་འགྱུར་བ་ཡིན་ན། དེ་ལས་འབྲོས་པའམ། བསྲིངས་ནས་དབེན་པའི་གནས་སུ་རང་ཉིད་གཅིག་པུར་རྣམ་རྟོག་ཞི་བའི་ཐབས་ལ་མོས་བཞིན་འདུ་འཛིན་སྤང་བ་གལ་ཆེ་ཞིང་། རྙེད་པ་ལ་ཆགས་ན་ཆོས་གང་ཡང་ལམ་དུ་འགྲོ་དཀའ་བར་ངེས། དེ་ལ་མ་ཆགས་པར་རླུང་ཐོགས་མེད་དུ་རྒྱུ་བ་དང་། མཁའ་ལྡིང་ཡང་དེ་ལྟར་བགྲོད་པའི་དཔེ་བཞིིན་དང་རི་དྭགས་གྲོང་དུ་མི་འབབ་པ་བཞིན་དབེན་པར་གནས་པ་དེ་ཉིད་སྒོ་གསུམ་བབ་ཅོལ་གྱི་སྤྱོད་པས་འཁྲུགས་པར་མི་འགྱུར་ལ། དེ་ལས་ལྡོག་ཏེག་ཞི་ལ་བརྟེན་ན་གཞན་ངོ་བསྲུང་བ་དང་། རང་ལས་ལྷག་པར་ཕྲག་པ་དོག་པ་དང་། གཞན་གྱིས་གནོད་པ་བཟོད་པའི་སྙིང་སྟོབས་བྲི་བར་འགྱུར་བར་ངེས་ལ། ཡིད་ནི་ཤིན་ཏུ་རིངས་པའི་བྱི་བ་སྡིག་ལྡན་གང་ཡང་ལྟར་སྣང་ལ་འགྲོ་འདུག་ཞི་ཞིང་སྤྱོད་ལམ་དེས་པ་ལྟར་སྣང་ཡང་ཡིད་ཆེས་མེད་པ་བཞིན་མི་དགེ་བའི་ལས་ཐབས་ལ་མཁས་པའི་སྡིག་པའི་གྲོགས་ཀྱི་གཡོ་དང་སྒྱུའི་སྒོ་ནས་ཁོ་རང་དང་བསམ་སྤྱོད་གཅིག་ཕྱིར་བག་ཕེབས་བསྟེན་པའི་ཡུལ་དུ་བཅོས་ན་ཡང་ལོངས་སྤྱོད་ཕུན་སུམ་ཚོགས་ཀྱང་ཆོས་ལས་འཕྲལ་དུ་ཉམས་པའི་རྒྱུར་འགྱུར་ངེས་ན། དེ་ལས་ལྡོག་ཏེ་ཆགས་ཞེན་མེད་པའི་དཔེ་ནི་བསྐྱོད་པ་ཡང་བའི་ཉི་ཟླ་གཉིས་རེས་མོས་སྣང་བར་བྱེད་པས་ཀུན་དང་མཛའ་ཞིང་། འཁོན་འགྲས་མེད་པ་བཞིན། ཡུལ་གཅིག་ཏུ་རྟག་པར་བསྡད་ནས་མཆོག་དམན་ཀུན་དང་འདྲིས་ཤིང་གཉུག་མར་གནས་པ་དག་འདྲིས་སུན་ཁུར་བའི་སྐྱོན་གྱིས་ཕན་ཚུན་ཁྲོ་བས་གདུང་ནའང་གསར་པ་གསར་པར་གྱུར་བའི་ཡུལ་དང་། མི་རྣམས་འཇམ་ཞིང་སྐྱེ་བོ་གཞན་ཀུན་དང་མཛའ་ཞིང་བཤེས་པར་གྱུར་པ་མཐོང་ཞིང་ཐོས་པ་ལྟར་མོད། དེ་ཡང་སེམས་ལྡན་ལྟ་བུར་གཞན་གྱི་རྗེས་སུ་བཟློ་བ་ལྟར་ཅ་ཅོ་སྒྲོག་པར་གྱུར་ཡང་བརྗོད་པ་བཟང་པོ་ལ་དགའ་བ་དང་ངན་པ་ལ་མི་དགའ་བའི་རྗེས་སུ་དེའི་སེམས་འགྲོ་བ་མ་ཡིན་པའི་བྲག་ཆ་ལྟ་བུའི་ཀུན་སྤྱོད་ཅན་ནི་གཉིས་འཛིན་དབྱིངས་སུ་ཡལ་བ་དག་ཡིན་ཏེ། དེ་འདྲ་ལ་ཡུལ་བཟང་ངན་དང་དབེན་མིན་གྱི་དམ་བཅའ་བྲལ་བའོ། །སོ་ཐར་ལ་ཡི་དམ་དུ་བྱེད་པའི་སྐྱེས་སུ་ཚངས་པར་སྤྱོད་པ་རྣམས་དང་། བསམ་གཏན་གྱི་དོན་ལ་གཅིག་ཏུ་སེམས་པའི་ཏིང་ངེ་འཛིན་དོན་དུ་གཉེར་བ་གང་ཞིག་བརྟུལ་ཞུགས་ཏེ་ཉམས་མྱོང་བརྟན་པར་མ་སོན་པ་གང་དང་གང་ཞེས་མཆོག་དམན་སུ་ཡང་རུང་སྟེ། ཆགས་སྡང་སྐྱེ་བའི་ཡུལ་དང་གྲོགས་ཆོས་དང་མཐུན་མིན་ལ་བརྟེན་ནས་རང་གི་དགེ་སྦྱོར་ལ་མཐོ་དམན་བྱེད་ཅེས་པའོ། །སྤྱིར་ཡང་སྟོན་པས་གནང་བས་གཞན་ལ་བསོད་ནམས་བསྐྱེད་པའི་ཐབས་དང་། བདག་ཀྱང་དཀའ་ཐུབ་སྟེ་སྡོམ་པ་ཉམས་པར་མི་འགྱུར་ལ། སློབ་པ་རྣམས་ཀྱིས་རེ་བ་སྐོངས་བའི་ཡིད་བཞིན་ནོར་བུར་བལྟ་ཞིང་སྡེ་སྣོད་གསུམ་དང་མཐུན་པར་གྱུར་བའི་སྤྱོད་ཡུལ་ནི་བསོད་སྙམས་ཁོ་ན་ཡིན་ཞེས་པའོ། །འཚོ་བ་ཤིན་ཏུ་མ་དག་པ་ནི་རང་ཕྱོགས་ཐབས་ཀྱིས་བསྟོད་ཅིང་གཞན་ཕྱོགས་སྨད་པའི་ལས་སོགས་གཡོ་སྒྱུས་མ་བྱིན་པ་ལེན་པ་ནི་བརྐུ་བ་དང་མཚུངས་པའོ། །རྙེད་པས་རྙེད་འཚོལ་ནི་ཕར་སྟོན་མོ་སོགས་ནོར་རྫས་ཆུང་ངུ་བཏང་ནས་འབུལ་སྡུད་སོགས་ཀྱིས་རྙེད་པ་འཚོལ་བའོ། །ཁ་གསག་ནི། རྟེན་གསུམ་སོགས་རྣམ་དཀར་གྱི་བྱ་བ་རྒྱ་ཆེན་དགོས་ཚུལ་ལ་བརྫུས་ཏེ་རྙེད་པ་འཚོལ་བའོ། །ཚུལ་འཆོས་ནི། རང་ཉིད་སོ་ཐར་རབ་བྱུང་ཁྱད་པར་དུ་འཆོས་པ་དང་། ཡང་ན་བསྐྱེད་རྫོགས་བསྒོམ་བཟླས་དང་ལྟ་སྒོམ་སྤྱོད་གསུམ་གྱི་ཉམས་མྱོང་དང་མི་ལྡན་བཞིན་དུ་རྣལ་འབྱོར་དབང་ཕྱུག་གི་ཟོལ་གྱིས་མི་མགོ་བསྐོར་བ་དང་། ཐོབ་ཀྱིས་འཇལ་བ་ནི། སྦྱིན་བདག་ཕྱུག་པོ་དང་འབྲེལ་འདྲིས་ཡོད་པའི་ཐབས་བྱས་ནས་ཆོ་ག་ཆོས་སྤྱོད་སོགས་ཀྱི་ཡོན་འབུལ་ཆེ་དགོས་ཚུལ་གྱིས་གཡོ་སྒྱུ་བྱེད་པ་སྟེ་ལོག་འཚོ་རྣམ་པ་ལྔ་པོ་དེ། དྲང་སྲོང་རྣམས་ཀྱི་ཞེས་སྔོན་བྱོན་རྒྱལ་བ་སྲས་བཅས་ཀྱི་བརྟུལ་ཞུགས་སྨ་ཕབ་པར་འགྱུར་བའོ། །དེའི་ཕྱིར་ན་གནས་མལ་བཟང་པོ་ཆོས་ལ་བར་ཆད་མེད་ཅིང་མཐུན་རྐྱེན་འཛོམས་པའི་དབེན་རི་སོགས་དང་། འཚོ་བ་བཟང་པོ་སྨན་ཤིང་མེ་ཏོག་སོགས་ཀྱི་བཅུད་ལེན་དང་། དེ་ལྟར་མིན་ཀྱང་གོང་གསལ་ལྟར་སློང་མོ་འཚོ་བ་དང་། ཆོས་དང་ཤིན་ཏུ་མཐུན་པའི་གྲོགས་དང་སྤྱོད་བ་བཟང་པོ་ནི། ཐོས་བསམ་སྒོམ་གསུམ་སོགས་ལ་མཐུན་སྦྱོར་གྱི་སྟོབས་བསྐྱེད་ཅིང་སློང་བའོ། །སོ་སོར་ཐར་བ་དང་། བྱང་ཆུབ་སེམས་དཔའ་དང་། རིག་འཛིན་སྔགས་ཀྱི་དམ་ཚིག་སོགས་བསླབ་པ་ཀུན་གྱི་ཡོན་ཏན་རྫོགས་པར་བྱ་བའི་ཕྱིར་དུ་སྐྱེས་བུ་དམ་པ་སྟེ་ཤེས་བྱ་ཀུན་ལ་མ་རྨོངས་ཤིང་སྟོང་ཉིད་སྙིང་རྗེ་ཡ་བྲལ་དུ་མ་སོང་བའི་བཤེས་གཉེན་དག་ལ་བརྟེན་པར་བགྱིད་ཅེས་པའོ། །དེ་ལྟར་བགྱིས་པའི་ཕན་ཡོན་ནི། ཇི་ལྟར་མ་ལ་ཡའི་ནགས་ཀྱི་ཀླུང་དུ་ཤིང་གཞན་རྣམ་པར་འཁྱམས་པའི་སྡོང་དུམ་ཕལ་པའང་ཡུན་རིང་པོར་འགྲོགས་ཤིང་ཡལ་འདབ་དྲི་བཟང་གིས་ཡང་ཡང་བརླན་པས་ཙནྜན་གྱི་དྲི་བསུང་གིས་གོས་པ་ལྟར་གང་ལ་བརྟེན་པའི་སྐྱེས་བུ་དེའི་རྗེས་སུ་འགྲོ་ཞེས་པའོ། །དེ་ཡང་དམ་པའི་ཆོས་ཚུལ་ཡོན་ཏན་མཐའ་དག་རྫོགས་པའི་བཤེས་གཉེན་དམ་པ་ནི། སྙིགས་མ་ལྔ་བདོའི་མཐུས་སྐྱོན་བྱས་རྙེད་པར་དཀའ་ནའང་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་དོན་བྱེད་ཀྱི་ཚུལ་ཁྲིམས་ཏེ། སྡོམ་གསུམ་གནང་བཀག་གཙང་མའི་ས་གཞི་ལྟ་བུ་ལ། ཐོས་བསམ་དང་སྙིང་རྗེ་ཆེན་པོས་ཐུགས་བརྒྱུད་རབ་ཏུ་བརླན་ཞིང་། སྡེ་སྣོད་གསུམ་དང་སྔགས་རྒྱུད་རྒྱ་མཚོའི་ཆོ་ག་ལག་ལེན་མཁས་ཤིང་། སྤངས་པ་དང་རྟོགས་པའི་ཡེ་ཤེས་དྲི་མ་མེད་པའི་འབྲས་བུས་ཕྱུག་པ། མཁོ་བ་སྦྱིན་པ་སྙན་པར་སྨ་བ་དང་། འཇིག་རྟེན་གྱི་དོན་དང་མཐུན་པ་དང་། གདུལ་བྱའི་དོན་ལ་སྤྱོད་པ་སྟེ་བསྡུ་བའི་དངོས་པོ་བཞིའི་མེ་ཏོག་རྣམ་པར་བཀྲ་བས། སྐལ་བ་བཟང་པོ་ལྡན་ཞིང་དད་དམ་གྱི་ནོར་བུ་གཅེས་ནོར་དུ་བྱེད་པའི་སློབ་མའི་བུང་བ་སྡུད་པ་ལ་བརྟེན་དགོས་པར་གསུངས་པའོ། །ཁྱད་པར་རྒྱུད་ལུང་སོགས་བཀའ་རྒྱ་ཆེ་བ་རྟོགས་སླ་བའི་ཆེད་དུ་མན་ངག་གནད་དུ་དྲིལ་བ་སྟོན་པའི་བླ་མ་དམ་པ་ནི། གསང་སྔགས་རྡོ་རྗེ་ཐེག་པའི་དབང་བཞི་ཐོབ་ཅིང་དེ་དག་སོ་སོའི་དམ་ཚིག་ལ་གནས་པ་ཤིན་ཏུ་ཞི་ཞིང་གཞི་རྒྱུད་བདེ་གཤེགས་སྙིང་པོ། ལམ་རྒྱུད་བསྐྱེད་རྫོགས་བསྒོམ་བཟླས་འབྲས་བུའི་རྒྱུད་སྐུ་དང་ཡེ་ཤེས་སོགས་ཀྱི་དོན་ཁོང་དུ་ཆུད་ཅིང་བསྙེན་པ་དང་བསྒྲུབ་པའི་རྟགས་རྫོགས་ཤིང་ལྟ་སྒོམ་ཇི་བཞིན་རྟོགས་པའི་བདག་རྒྱུད་གྲོལ་བ་དང་། ལས་རབ་འབྱམས་ཀྱི་སྒོ་ནས་སྙིང་རྗེའི་འཇུག་པ་ཚད་མེད་པས་གཞན་དོན་འབའ་ཞིག་གཉེར་བ། འཇིག་རྟེན་ཆོས་བརྒྱད་སོགས་ཀྱི་བྱ་བ་ཉུང་ཞིང་ཐོས་བསམ་སྒོམ་གསུམ་ལ་ནན་ཏན་བྱེད་ཅིང་ཆོས་ལ་རྟག་པར་སེམས་པ་དང་མི་འབྲལ་ཞིང་། འཁོར་བའི་སྡུག་བསྔལ་གྱི་སྐྱོ་ཤས་རྒྱ་ཆེར་ལྡན་ཞིང་གཞན་ཡང་ཚུལ་དེ་ལ་བསྐུལ་བ་དང་། རང་གཞན་དོན་གཉིས་བསྒྲུབ་པའི་ཐབས་ལ་མཁས་ཤིང་བརྒྱུད་པ་གོང་མའི་བྱིན་རླབས་དང་ལྡན་པ་དེ་ལྟ་བུའི་བླ་མ་དམ་པ་ལ་བརྟེན་ན་མཆོག་དང་ཐུན་མོང་གི་དངོས་གྲུབ་ཐོབ་པ་མྱུར་ཞེས་པའོ། །བྲམ་ཟེ་རང་ལུགས་ཀྱི་ཆོས་བསྲུང་བ་ལ་མཁས་པ་བཞིན་དུ་ཆོ་སྟེ་ཞང་པོའི་ཕྱོགས་དང་། རིགས་ནི་ཕའི་རིགས་ཡིན་ལ་དེ་གཉིས་མི་ཉམས་པར་བསྲུང་བའམ། བསྟི་གནས་ཏེ་རང་གི་གནས་དགོན་སོགས་ཉམས་པར་དོགས་པའི་རྫིང་བུ་རུ་སྐྱེས་བུ་གསུམ་གྱི་གཉེར་བྱའི་ལམ་གང་ཡང་མིན་པའི། ཐོས་བསམ་འབྲས་བུ་ཚེ་འདིི་ཁོ་ནའི་ཆེད་དུ་གནས་མིན་གྱི་ཁྲུས་ལ་ཞུགས་ཅེས་པའོ། །ཤིང་གི་རང་འཐག་གིས་འབྲས་བུའི་རིགས་གང་ཡང་མི་ཆོམ་པ་ལྟ་བུའི་རང་རྒྱུད་ཐ་མལ་དུ་ལུས་པས་སློབ་དཔོན་ཡོན་ཏན་གྱི་དབེན་པའི་ལམ་སྟོན་དང་། སོ་སོའི་སྐྱེ་བོའི་རང་བཞིན་ཏེ་བསམ་སྦྱོར་གང་ཡང་ཐ་མལ་པ་རྣམས་དང་ཅུང་ཟད་ཀྱང་མ་འགལ་ཡང་། རང་རང་གི་ཉེ་དུ་སོགས་བླུན་པོའི་དད་པས་བབ་ཅོལ་གནས་ལ་སྦྱར་ཞེས་པའོ། །གཞན་མ་འགའི་རྨོངས་ཞེན་གྱི་རྙེད་པ་དང་བཀུར་སྟིའི་མཆོད་པས་ཁེངས་པར་གྱུར་པ་དང་། རང་མཐོང་ཤིན་ཏུ་ཆེ་བས་ཁྲོན་པས་ལག་འགྲོའི་གཏམ་རྒྱུད་ལྟ་བུའི་བཤེས་གཉེན་ང་རྒྱལ་གྱིས་སྦོས་པ་དག་དང་། ཐོས་པ་སྤྱི་དང་ཁྱད་པར་རང་ལུགས་ཀྱི་ལོ་རྒྱུས་སོགས་ལ་གོམས་འདྲིས་ཉུང་ཞིང་སྡོམ་གསུམ་སྤྱི་དང་ཁྱད་པར་དམ་ཚིག་ཉམས་འགལ་རལ་གསུམ་དུ་གྱུར་པས་འཆལ་ནས། རྒྱུད་ཚོད་ཤིན་ཏུ་དམའ་བ་ཐ་མལ་པ་དང་ཆོས་མཚུངས་ཀྱང་རྒྱན་ཆས་གཟི་བྱིན་ཨང་རྡིར་སོགས་ཐབས་ཀྱིས་བསྒྲུབ་ནས་ཀུན་སྤྱོད་ས་བླར་གཤེགས་པ་འདྲ་མོའི་ཆེ་བཅོས་དང་། ཡུལ་དམན་པའི་རིགས་གང་ལ་ཡང་བྱམས་པ་དང་སྙིང་རྗེའི་དཔྱང་ཐག་ཆད་པའི་སྨྱོན་པའི་ལམ་མཁན་ལྟ་བུའི་མི་དགེའི་བཤེས་གཉེན་རྣམས་ལས་སྡིག་པ་འཕེལ་ཞེས་པ་དང་། ཁྱད་པར་ཐོས་བསམ་སྒོམ་གསུམ་སྤྱི་དང་། བྱེ་བྲག་གཞན་ཕན་གྱི་ལྷག་བསམ་རང་དང་མཉམ་པ་ཙམ་ལས་ཡོན་ཏན་གང་ཡང་ལྷག་བཅས་མིན་པ་དང་། བྱང་ཆུབ་ཀྱི་སེམས་དང་བྲལ་ཡང་གྲགས་པ་ཆེ་བས་མཐུས་བརྟེན་པར་གྱུར་ན་ལོང་བའི་མི་ཞིག་དེད་དཔོན་ནམ་ལམ་མཁན་དུ་རེ་ནས་ལམ་འཁྲིད་བྱེད་བཅུག་ན་ནོར་བ་ཆེན་པོ་སྟེ་ཡིད་ཆེས་དང་བྲལ་བཞིན་ཟོལ་གྱི་འགྲོགས་པས་མུན་པའི་སྨག་ཏུ་འཁྱམས་པར་གྱུར་ཞེས་པའོ། །དེ་ཕྱིར་ལམ་སྟོན་དུ་རེ་བའི་དམ་པ་ཤིན་ཏུ་མ་བརྟགས་ན། བླུན་པོ་དད་པ་ཅན་གྱི་དགེ་བའི་ཚོགས་ཆུད་གསན་ཞིང་དལ་བ་སྐབས་ཤིག་སྟེ། ལན་ཅིག་ཙམ་རྙེད་པ། གཏམ་རྒྱུད་དང་སྦྱར་ན་སྔོོན་མི་ཞིག་གི་ཁུར་ཆེན་པོ་ཁུར་ནས་ཟླ་དཀར་མིན་གྱི་ངོགས་སུ་ཕྱིན་པའི་ནགས་འདབ་ཞིག་ན་སྦྲུལ་གདུག་ཆེན་པོ་ཞིག་ཤད་བརྐྱང་ས་ཏེ་ཡོད་པ་དང་། ཤིང་སྡོང་གི་གྲིབ་མ་གཉིས་མི་དེས་ནོར་ནས་འཕྲད་འཇོམས་བྱས་པ་བཞིན་བསླུ་བར་འགྱུར་རོ། །མདོ་རྒྱུད་ནས་བཤད་པའི་སྐྱོན་ཀུན་ཟད་མཐའ་དག་ཡོན་ཏན་འབྱོར་བའི་བླ་མ་ནི། སངས་རྒྱས་ཀུན་གྱི་མཁྱེན་པའི་ཡེ་ཤེས་དང་། བརྩེ་བའི་ཐུགས་རྗེའི་ཁམས་གཅིག་ཏུ་དྲིལ་བའི་སྤྱི་གཟུགས་གདུལ་བྱའི་འགྲོ་བ་རྣམས་ཀྱི་ཡུལ་ལ་སྐྱེས་བུའི་གཟུགས་ཀྱི་བྱོན་པ་ཡིན་ཕྱིར་མཆོག་དང་ཐུན་མོང་སོགས་དངོས་གྲུབ་ཀུན་གྱི་རྩ་བ་བླ་ན་མེད་པ་ཡིན་ལ། དྲང་བའི་དོན་དུ་མཛད་སྤྱོད་སོགས་ཀུན་དང་ཕྱོགས་མཐུན་ཡིན་ན། ངེས་པའི་དོན་དུ་འཇིག་རྟེན་ཆོས་བརྒྱད་ཀྱི་བསམ་སྤྱོད་ཅན་ཀུན་དང་རྣམ་བཞག་འགལ་ཞིང་། དགོངས་པ་ཅན་ཕྱིར་ཐ་སྙད་ཀྱི་གནས་ལ་གོམས་པ་ཀུན་ལས་ཁྱད་པར་འཕགས་ཤིང་ཐེ་ཚོམ་གྱི་གཉིས་འཛིན་གཅོད་པ་ལ་མཁས་ཤིང་གཞན་མས་ལོག་སྒྲུབ་དང་དཀའ་ཐུབ་ཀྱི་སྐྱོ་ངལ་བཟོད་པ་ལ་དམ་པའི་མགོན་དེ་ལྟ་བུ་ནི་སྲིད་པའི་མཚོ་ལས་སྒྲོལ་བའི་གྲུ་བོ་ཆེ་ལྟ་བུ་དང་། ཐར་པ་དང་རྣམ་མཁྱེན་གྱི་ལམ་མཆོག་འཁྲུལ་པར་མི་འགྱུར་བས་རྒྱ་མཚོའི་གླིང་དུ་བགྲོད་པའི་ཚོང་པའི་དེད་དཔོན་དངོས་དང་མཚུངས་ཤིང་། ལས་དང་ཉོན་མོངས་པའི་མེ་ཚོགས་འཛོམས་པའི་བདུད་རྩིའི་ཆར་ཆེན་པོ་ལྟ་བུ། མ་རིག་པའི་མུན་པ་སེལ་བའི་ཉི་ཟླར་མཚུངས་ལ། ཐེག་པ་སྟེ་ཁུར་སྟོབས་ཤིན་ཏུ་ཆེ་བས་ས་གཞི་དང་འདྲ་ཞིང་། ཕན་དང་བདེ་བའི་འབྱུང་གནས་དཔག་བསམ་ཤིང་ལྟ་བུ། མདོ་དང་སྔགས་ཀྱི་ཆོས་རྣམས་ཀུན་གྱི་མཛོད་ལྡན་བུམ་པ་བཟང་པོ་ལྟ་བུ་སྟེ། དགོས་འདོད་ཀུན་འབྱུང་ཡིད་བཞིན་ནོར་བུ་ལས་ཀྱང་ལྷག་ཅིང་། མཆོག་དམན་ཀུན་ལ་ཉེ་རིང་ཆགས་སྔང་དང་བྲལ་ཞིང་སྙོམས་པར་བྱམས་པས་ཕ་མ་ཡིན་ཞིང་། འདོད་པའི་བྱམས་བརྩེ་ལས་འཕགས་པས་ཆེ་ཞིང་མྱུར་བའི་སྙིང་རྗེ་ཆུ་ཀླུང་དང་མཚུངས་ལ། ང་རྒྱལ་ཙམ་མ་ཡིན་པས་འཕོ་འགྱུར་མེད་པའི་དགའ་བ་རི་དབང་འདྲ་ཞིང་ཉེ་རིང་ཆགས་སྡང་གི་ཀུན་རྟོག་གིས་འཁྲུགས་པ་མེད་པའི་བཏང་སྙོམས་ཆར་སྤྲིན་བཞིན་ལ། དེ་འདྲ་བའི་བླ་མ་དགེ་བའི་བཤེས་གཉེན་དེ་ཉིད་གསང་བ་གསུམ་གྱི་ཡོན་ཏན་སངས་རྒྱས་ཀུན་དང་མཉམ་པར་འགྱུར་ན། དེ་ལ་གནོད་པ་བྱས་ཀྱང་བདེ་བ་ཐོབ་པའི་ལམ་དང་འབྲེལ་ན་གཡོ་ཟོལ་མེད་པར་དད་དང་གུས་པའི་སེམས་ཀྱིས་བསྟེན་པའི་སྐྱེས་བུ་དེ་ལ། མངོན་པར་མཐོ་བ་དང་ངེས་པར་ལེགས་པའི་དཔལ་དང་ཡོན་ཏན་གྱི་འབྲས་བཟང་ཆར་བཞིན་འབབ་པར་ངེས་ཤིང་། དེ་ཡང་ཐར་ལམ་མཆོག་སྟོན་བླ་མ་དེ་ནི། ནད་པ ས་སྨན་པ་དང་། མགྲོན་པོས་སྐྱེལ་མ་དང་། འཇིགས་པས་ར་མདའ་དང་། ཚོང་པས་དེད་དཔོན་དང་། གྲུ་བས་མཉན་པ་བཞིན་དུ་སྐྱེ་ཤི་དང་ཉོན་མོངས་པའི་དགྲའི་འཇིགས་པས་མི་ཚུགས་ཕྱིར་སྐྱབས་སུ་བསྟེན་པར་བྱ་ཞེས་པའོ། །དེ་ལས་ཉེ་བར་ལེན་པ་སྐལ་ལྡན་གྱི་སློབ་མ་སྟེ། དེ་ལས་ལོག་པ་རྣམས་མ་ཡིན་ཏེ། སྣོད་གས་ཆག་དང་ལྡན་བཞིན་སློབ་མ་དམ་བྲལ་ལ་བཅུད་ཅེས་པ་ཆོས་ཀྱིས་ཕན་མི་ཐོགས་ཤིང་། སློབ་མ་ལས་སྐལ་ངན་པ་དག་ནི་ཟང་ཟིང་ཙམ་གྱི་ནོར་རྫས་ཅུང་ཟད་བྱིན་པས་ཚིམ་པ་ཐོབ་པར་གྱུར་ནས་ཞེས་པ། སྐབས་དེར་བཅོས་མའི་སྒོ་ནས་དད་པ་མོས་གུས་ཡོད་ཡོད་འདྲ་ཡང་། སླར་དབྱར་དགུན་སྟོན་དཔྱིད་འགྱུར་བ་ལྟ་བུའི་དུས་བཞི་འགྱུར་ལྡོག་ངོམ་པ་དང་འདྲ་ཞེས་པའོ། །སྤངས་བྱའི་སློབ་མ་དག་གི་མཚན་ཉིད་ནི། དང་པོ་དགེ་བསྒྲུབ་སྡིག་སྤངས་གིས་ལམ་དུ་བཙུད་ཀྱང་བློ་ངན་ལིང་ཤོར་གྱིས་ཆོས་ལམ་དུ་མི་ཚུད་པ་གཡག་རྒོད་ར་བར་བཙུད་པ་བཞིན། བར་དུ་ཐོས་བསམ་ལ་སློབ་དགོས་ཞེས་བསྐུལ་ཡང་། དཀའ་ཐུབ་ལ་སྡང་ཞིང་། ཚེ་འདི་ཁོ་ནར་གཉེར་བ་ལ་འདུན་ཞིང་། ཐ་མར་སྡིག་པའི་གྲོགས་རྣམས་ཀྱིས་མི་དགེ་ལ་སྤྱོད་པའི་ལད་མོ་བྱེད་ཅིང་དེའི་ཕྱོགས་བཟུང་ནས་ལས་ཀྱི་མཐའ་ལོག་པ་ནགས་མཐའི་མི་རྒོད་དང་འདྲ་ཞེས་པའོ། །སློབ་མ་ཡིད་གཉིས་ལྡན་པ་རྣམས་ནི་བླ་མ་དམ་པའི་དྲུང་ན་གནས་ཚེ་ཡུལ་གཞན་ཞིག་ཏུ་འབྲོས་ལ་རིངས་ཞིང་ཡུལ་གང་སྟེ་གཞན་དུ་བགྲོད་པ་ལ་མངོན་པར་ཕྱོགས་ན་སྡིག་པའི་འཛིན་ཞེས་པའོ། །དམ་པའི་མགོན་གྱིས་དབེན་པར་སོང་ལ་བསྒྲུབ་ལ་བརྩོན་དགོས་ཞེས་ཆེད་དུ་བསྐུལ་ན་ཆོས་ཚུགས་ཞིག་ནས་ཅི་བྱར་གཏོལ་མེད་ལ་ཐུག་ནས་རླུང་གི་རྗེས་སུ་འགྲོ་བའི་ཀུ་ཤའི་རྩེ་མོ་ལན་རེ་ཤར་དང་། ལན་རེ་ནུབ་ཕྱོགས་སུ་བསྐྱོད་བཞིན་གུག་པ་དང་མཚུངས་ཤིང་། ལུགས་ཟུང་གང་ལའང་ཚུགས་མ་ཟིན་པའི་མི་གཞི་ངན་པའི་གཡོ་ཟོལ་གྱིས་སྦྱོར་བ་ཐ་གུས་བརྐྱང་བསྐུམ་ལྟ་བུའི་དབྱེན་སྦྱོར་གྱི་ལྕེས་བླ་མ་སྤོས་ཀྱི་གླང་པོ་སྟེ། གླ་བ་ལྟར་བརྫུ་བག་གིས་བསྙེན་ནས་སྨིན་གྲོལ་གྱི་གདམས་པ་སོགས་དམ་ཆོས་གླ་རྩིའི་རྙེད་པ་རྫུན་རིས་གྱིས་ཐོབ་པར་བྱས་ནས་སླར་ཡང་བླ་མ་ལ་གཤེ་བསྐུར་དང་ལོག་ལྟ་སོགས་རྔོོན་ལ་ཡང་དག་པར་དགའ་ཞིང་སྤྲོ་བའི་དམ་ཚིག་གི་རིམ་པ་ཆུ་ལ་རྡོ་བསྐུར་བ་བཞིན་འཕེན་པ་དག་མི་དགེ་བ་ཤུགས་ཆེ་བས་རང་གི་བློ་སྣ་ཉམས་འོག་ཏུ་མ་ཚུད་པ་མཐའ་དག་ནི་བསྐྱེད་རྫོགས་ཀྱི་གདམས་པའི་གནད་འགག་ཐོབ་པ་རྣམས་སླར་བཏང་ནས་ཞེས་ཡལ་བར་དོར་ནས་ད་དུང་སྣ་ཚོགས་ཡིག་སྣ་མང་པོ་འཚོལ་བས། ངལ་དུབ་བྱས་པའི་མཐར་རང་རྒྱུད་ལ་ཕན་ཐོགས་པ་གསར་པ་ཅི་ཡང་མ་མཐོང་ཞིང་སྔོན་མ་མཐའ་དག་ཉམས་པར་འགྱུར་ལ། དེ་ཡང་ཡང་དག་པའི་དོན་ལ་སྦྱོར་བའི་དད་པ་དང་། ལྟར་སྣང་ཚེ་འདིར་བསྒྲུབ་པའི་འདོད་པ་དང་། དེ་གཉིས་ཀར་ལུང་དུ་མ་བསྟན་པ་སྟེ་ལུགས་ཟུང་གཉིས་ཀར་ཕན་པ་མ་ཡིན་པའི་གཟུ་ལམ་ཅན་དང་། གསུམ་དུ་གནས་པའི་མཚན་ཉིད་བརྟགས་ནས་སོ་སོར་འབྱེད་པ་གཅེས་ཞེས་པའོ། །བརྩོན་འགྲུས་རྣམ་པ་གསུམ་ལས་འདིར་གོ་ཆའི་བརྩོན་འགྲུས་ལེ་ལོའི་དབང་དུ་སྐད་གཅིག་ཀྱང་མི་གཏོང་བར་ཆོས་ལ་བརྩོན་འགྲུས་ཆེ་ལ་བློ་གྲོས་ཤིན་ཏུ་བརྟན་པ་དང་། ལུས་དང་སྲོག་ལ་མི་བལྟ་ཞིང་བླ་མ་ཁོ་ནར་སྲི་ཞུའི་ཆེད་དུ་རིམ་གྲོ་བགྱིད་པར་མི་ལྷོད་ཅིང་ཅི་གསུངས་དང་དུ་བླང་བ་རྒྱལ་བའི་བཀའ་དང་མཚུངས་པར་དཀྲི་ཞིང་བདག་ཉིད་ཀྱིས་མི་ལྕོགས་མི་འགྲུབ་བསྙམས་ནས་ཞོ་ཤའི་ངལ་དུབ་མི་བསྲུང་བའི་སྐྱེས་བུ་དེ་ནི་མོས་གུས་ཁོ་ནས་གྲོལ་ཞེས་པའོ། །དད་པ་དང་། ཤེས་རབ་དང་། ཐོས་པ་དང་། སྙིང་རྗེ་ཆེ་བ་སྡོམ་པ་གསུམ་དང་དམ་ཚིག་གི་གནས་ལ་གུས་ཤིང་སྒོ་གསུམ་དུལ་བའི་མངོན་རྟོག་ཟོལ་ཟོག་བྲལ་ཞིང་། ཁོངས་ཡངས་ཤིང་གཏོང་ཕོད་ཆེ་བ་དག་སྣང་དང་ཁྲེལ་ཡོད་ལྡན་པ། བླ་མའི་གསང་བ་གསུམ་དང་འགལ་བའི་བསམ་སྦྱོར་ཤིན་ཏུ་བསྲུངས་བས་འཛངས་པ་དང་། བླ་མས་བཀའ་བཀྱོན་ཇི་ལྟར་མཛད་ཀྱང་དེ་དག་ལ་མི་ཁྲོ་བའི་དཔེ་རྟ་མཆོག་ལྕགས་གིས་ཇི་ལྟར་བྲབ་ཀྱང་ལན་མི་བྱེད་པ་བཞིན་དང་། བང་མི་སོགས་ལ་ལན་མང་མངག་ཀྱང་གྲུ་ལྟར་འགྲོ་འོང་གི་གནས་ལ་སྐྱོ་ངལ་སྤངས་པ་ལྟ་བུའི་འཇུག་ལྡོག་ཅང་མི་སེམས་པ་དང་། མཆོག་དམན་སུས་ཐད་ནས་བྱ་བ་བཟང་ངན་བརྙས་བཅོས་ལྟ་བུའི་ལས་ཞིག་ཐོག་ཏུ་བཀལ་ཡང་ཟམ་པ་ལྟ་བུར་བཟང་ངན་ཐམས་ཅད་ཐེག་པ་དང། ལས་འཇམ་རྩུབ་ཇི་ལྟ་བུ་ཞིག་བསྒྲུབ་དགོས་ཞེས་གསུངས་ནའང་། དར་གོས་རས་འཕྲུག་བཟོ་སྟེགས་ཀྱི་སྟེང་དུ་ལྕགས་བསྲེག་དང་མེ་ཆུ་སོགས་ཀྱིས་གཅར་བཞར་བྱས་པ་བཞིན་དུ་གཙེས་ཀྱང་ཚ་གྲང་གང་ཡང་བཟོད་པའོ། །བཀའ་ཇི་ལྟར་ཕེབ་བཞིན་ཉན་པ་རང་གི་བྲན་ཁོལ་ལྟ་བུ་དང། རང་མཐོང་དང་ང་རྒྱལ་སྤངས་ནས་དམན་ས་འཛིན་པ་རྡུལ་ཕྱགས་པའམ་ཕྱགས་དར་ཁྲོད་པ་ལྟ་བུ་དང་། དྲེགས་པ་སྤངས་པ་ཁྱུ་མཆོག་རྭ་ཆད་པ་ལྟ་བུས་བླ་མ་བསྟེན་ཞེས་སྡེ་སྣོད་དག་ལས་གསུངས་པ་བཞིན་གལ་ཆེ། རང་ཉིད་ལ་འབྱོར་བ་ཡོད་ན་དཀོན་མཆོག་བཞི་པ་བླ་མ་མཆོད་ཅིང་། ཞབས་ཏོག་སྲི་ཞུ་སོགས་ནམ་དགོས་དུས་སུ་ལུས་ངག་བཀོལ་བའི་ལས་མཐའ་དག་ནམ་ཡང་ཆུད་ཟོས་སུ་གྱུར་པ་མེད་དེ། ཟང་ཟིང་གི་འབུལ་བ་དང་། ལུས་ངག་གི་ཞབས་ཏོག་དང། བསྒྲུབ་པ་སྟེ་མཉེས་པ་གསུམ་གྱི་ནང་ནས་བསྒྲུབ་པ་མཆོག་ཏུ་གསུངས་པའོ། །བླ་མའི་མཛད་པ་སྤྱོད་པ་གང་ལ་ཡང་ལོག་པར་མི་བལྟ་སྟེ། འཕགས་པའི་ཡུལ་གྱི་རྣལ་འབྱོར་དབང་ཕྱུག་ཕལ་མོ་ཆེ་རྣམས་ལ་ལ་ཙམ་ལས་གདོལ་པ་སྟེ་གཙང་རྩོག་མེད་པར་ཟ་ཞིང་རིགས་འཚོལ་བ་དང་གཡུང་པོ་དང་བྲན་གཡོག་སོགས་ཞོ་ཤས་འཚོ་བའི་ལས་ཁོ་ན་ལ་བརྩོན་པ་དང་། གཞན་ཡང་རྔོན་པ་དང་ཉ་བ་དང་བྱ་བྱིའུ་བསོད་པའི་ལས་ལ་འཇུག་པའི་སྡིག་སྤྱོད་ཕལ་པའི་ཚུལ་བཟུང་བའི། ཉམས་པ་ལས་ཀྱང་ཤིན་ཏུ་ཉམས་པར་གྱུར་པ་དག་ཡོད་མོད། འོན་ཀྱང་རང་གི་ཉེར་ལེན་ཀུན་བྱེད་རྒྱལ་པོས་དབང་དུ་མ་གྱུར་གྱི་བར། གཞན་གྱི་འཁྲུལ་པ་བརྟགས་པའི་ཉེས་པ་ཚད་མེད་ཡིན་ཏེ། སྡེ་སྣོད་བཅུ་གཉིས་བློ་ལ་བྱང་ཞིང་ཆུབ་པ་དགེ་སློང་ལེགས་སྐར་རམ་སྐར་བཟང་སྡིག་པའི་དབང་དུ་གྱུར་པ་ལ་མཐུས་བཏབ་ནས་ཞེས། སྟོན་པས་མཛད་པ་རྣམ་པར་དག་ཀྱང་ཁོས་གཡོ་སྒྱུར་མཐོང་བའི་ཚུལ་ལེགས་བར་བསམས་པས་རང་གི་རང་ཉིད་ལོག་རྟོག་ངན་པ་སོགས་ཀྱིས་དབང་དུ་མི་འགྱུར་ཐབས་སུ་འཆོས་ཤིང་། གལ་ཏེ་བདག་ལ་བླ་མ་སྡང་བའི་བྱམས་བརྩེ་ཆུང་བར་མངོན་པར་གྱུར་ན། དམ་པའི་མགོན་གྱིས་བདག་གི་ཕྱི་ནང་གསང་གསུམ་གྱི་སྐྱོན་ལྐོག་གྱུར་རྣམས་གཟིགས་ནས་སྤྱོ་བས་འདུལ་བའི་དུས་ལ་བབ་པར་རིག་ནས་དྲག་ཤུལ་གྱིས་གདུལ་ཐབས་བྱས་པར་རྗེས་སུ་ཡི་རང་དང་བཤགས་སྡོམ་བྱ་བའི་ཅང་ཤེས་སྐྱེས་བུ་དེ་ལྟ་བུ་ནི་བདུད་ཀྱི་དབང་དུ་མི་འགྲོའོ། །ཞེས་པའོ། །བླ་མ་བཞེངས་པའི་ཚེ་རང་ཉིད་འཕྲལ་དུ་ལྡང་བ་ལས་སྟན་ལ་འདུག་པ་མིན་ཞིང་། བཞུགས་པའི་དུས་ན་མདུན་སར་སླེབ་ཚེ་སྙུན་འདྲི་བ་དང་། མཁོ་བའི་ཉེར་སྤྱོད་ཅི་ཡང་དབུལ་བ་དང་། བཞུད་ཅེས་གཤེགས་ན་ཞབས་འབྲིང་དུ་ཕྱིན་ཚེ་སྔོན་ནས་རྒྱབ་བསྟན་བཞིན་མི་འགྲོ་བ་དང་། རྗེས་སམ་རྒྱབ་ནས་ཞབས་རྗེས་བརྫི་མི་རུང་བ་དང་། གཡས་གྲལ་མགོ་ཡིན་པས་དེ་གསུམ་ནས་བགྲོད་པ་མིན་པ་དང་སྟན་དང་བཞོན་པ་ནི་ཆིབས་པ་སྨད་པ་སྟེ། རང་རང་གིས་ཆིབས་པ་སོགས་ཀྱིས་བསོད་ནམས་ཉམས་ཞེས་པའོ། །གཞན་ཡང་སྒོ་འཕར་འབྱེད་གཅོད་ཀྱི་སྐབས་སུ་སྒོ་བརྡེག་པ་དང་། སྒེག་ཆོས་ཏེ་གོས་རྒྱན་སོགས་ཚད་ལས་ཐལ་བ་དང་། ངོ་འཛུམ་མ་ཡིན་པར་གནག་ཅིང་ཁྲོ་ཚུལ་སྟོན་པ་དང་། རྫུན་དང་བབ་ཅོལ་གྱི་བཞད་གད་དང་། འབྲེལ་མེད་ཀྱི་གཏམ་བྱུང་རྒྱལ་དུ་སྨྲ་བ་བླ་མ་ལ་གུས་པ་དང་། འཇིགས་བཅས་མ་ཡིན་པར་འདྲིས་སུན་ཁུར་ནས་ཅི་མི་སྙམ་པ་རྣམས་སྤངས་ལ་སྒོ་གསུམ་ཉེ་བར་ཞི་ནས་བསྟེན་པ་གལ་ཆེ་ཞིང་། བླ་མ་ལ་འབར་ཞིང་གཤེ་བསྐུར་འདེབས་པ་ནི་དམོད་ཅིང་སྡང་བའི་གང་ཟག་ཡིན་པས་དེ་དང་། མཛའ་ཞིང་བཤེས་པར་མི་བྱ་ཞིང་སྤོབས་པ་ཡོད་ན་ནུས་པས་དེའི་རྒོལ་བ་བཟློག་ཅིང་དེ་ལས་ལྡོག་སྟེ་བག་ཕེབས་སྨྲ་ན་ཉམས་པ་དེའི་སྡིག་པའི་གཞན་དབང་ནི་ལྷག་པར་མཐུ་ཆེ་བས་རང་གི་དམ་ཚིག་སྐྱོན་ཅན་དུ་བྱེད་པ་ལ་དོགས་ཟོན་གལ་ཆེ་ཞིང་། དེ་ལས་དེམ་ཚིག་གི་རྣམ་གྲངས་ནི་མཆེད་ལྕམ་སུ་དང་འགྲོགས་པར་བདེ་བ་སྐེ་རགས་ལྟ་བུར་འདྲིས་སུན་མེད་པ་དང་། མཆོག་དམན་འབྲིང་གསུམ་སུ་ལའང་བསམ་སྤྱོད་མཐུན་པར་འཇུག་པ་བདེ་བ་ལན་ཚྭ་བཟའ་བཏུང་གང་ལའང་རོ་བཅུད་བདའ་བར་བྱེད་པ་ལྟ་བུ་དང་། གཞན་གནོད་དང་ཁྱད་པར་བླ་མས་བཀའ་བཀྱོན་སོགས་ལ་བཟོད་སྲན་ཆེ་བ་ཀ་བ་ལྟ་བུའི་དཀའ་ཐུབ་ཀྱིས་བླ་མའི་འཁོར་ཉེ་དུ་ལྟོས་བཅས་རྣམས་དང་། རྡོ་རྗེའི་སྤུན་སྲིང་རྣམས་ལ་བསྙེན་ཞིང་བཤེས་པར་བྱ་དགོས་པ་ཡང་། རྫིང་བུ་མཆོག་ལ་བརྟེན་པའི་ཞེས། འཇིག་རྟེན་ན་ཆུ་མཚོ་ཆེ་ཆུང་དུ་གྲགས་པ་རྣམས་ལ་བརྟེན་པའི་ངང་པ་སོགས་ཆུ་བྱ་རྣམས་དང་། བུང་བས་མེ་ཏོག་སྣ་ཚོགས་ཀྱི་ཚལ་ལ་དགའ་ཞིང་། རྩི་བཅུད་ལ་རོ་མྱོང་བ་བཞིན། སྐྱེས་བུ་དམ་པ་ལ་རྟག་ཏུ་འགྲོགས་པའི་དགའ་དང་གུས་དང་དད་པའི་མཆོག་ནི་ཉེ་བར་བཞག་པའི་སྤྱོད་པ་ངོ་མཚར་ཅན་ལ་གཞིར་བཅས་ཏེ་སྐྱོ་སེམས་དང་ངལ་དུབ་མེད་པས་བླ་མའི་ཐུགས་བཀའ་བཞིནའཛོལ་མེད་དུ་བཟུང་ནས་དད་པས་ཉེ་བར་ལེན་པས་བླ་མའི་ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་དང་ཡོན་ཏན་རང་རྒྱུད་ལ་འདྲིས་པའི་རོ་མྱོང་བར་བྱ་ཞིང་། བླ་མའི་རྗེས་སུ་འཇུག་པའི་སྤྱོད་པ་ལ་ངེས་པར་ཞུགས་པའི་སློབ་བུ་དམ་ལྡན་གྱིས་དམ་པ་མཆོག་གི་བསོ༷ད་ནམ༷ས་ཀྱི་ཚོ༷གས་ཡར་མཆོད་མར་སྦྱིན་དང་ཡེ༷་ཤེས༷་ཀྱི་ཚོ༷གས་ལྟ་སྒོམ་སྤྱོད་འབྲས་ཀྱི་དོན་ལ་ཐོས་བསམ་སྒོམ་གསུམ་དང་བསྐྱེད་རྫོགས་གང་གི་ཁྲོད་དུའང་བླ་མ་དང་དོན་མཐུན་པའི་སྤྱོད་པ་གཅིག་དྲིལ་དང་། མངག་གཞུག་དང་བང་མིར་ཕྱིན་པ་དང་གཟིམ་ཁང་ཕྱི་ནང་བྱི་དོར་བྱེད་པ་ཚུན་ཆོད་ཀྱང་ངལ་བ་དོན་ལྡན་འབྲས་བུ་དང་བཅས་ཏེ་ཚོགས་ཀྱི་ལམ་མཆོག་ཏུ་འགྲོ་བ་ཡིན་ཏེ། ཅིའི་ཕྱིར་ན་སྐྱབས་སུ་འགྲོ་བ་དང་། ཚོགས་གཉིས་བསགས་པའི་ཐབས་ཀྱི་ཞིང་གི་རབ་དང་ཕུལ་དུ་གྱུར་པའི་བླ་མ་བསྒྲུབས་པའི་རྣལ་འབྱོར་ཕྱི་ལྟར་བསྒྲུབ་ནས་ལམ་དབང་བླང་བའི་རྟེན་བྱེད་པ་དང་། ནང་ལྟར་རང་གི་སྒོ་གསུམ་བླ་མའི་གསང་བ་གསུམ་དུ་བསྒྲུབ་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བྱིན་རླབས་འཇུག་པའི་ཐབས་ལ་བརྩོན་པ་དང་གཉིས་པོ་བསྐྱེད་རྫོགས་དང་བསྒྲུབ་བྱའི་ངོ་བོ་ཐམས་ཅད་འདིར་འདུས་པའི་ཕྱིར་ན་མདོ་རྒྱུད་ཀུན་ན་སངས་རྒྱས་ཉིད་དུ་བསྟན་པ་ཡིན་ལ། རྨོངས་པ་ཕལ་ཆེར་བླ་མའི་གཟུགས་བརྙན་འདྲི་ཞིང་བསྒོམ་པར་བྱེད་ནའང་། དངོས་སུ་བཞུགས་པ་ལ་སྲི་ཞུ་དང་རིམ་གྲོ་བགྱིད་བ་མེད་ཅིང་། གནས་ལུགས་བསྒོམ་པ་ཡིན་ཟེར་ནའང་། བླ་མའི་ཐུགས་ཀྱི་དེ་ཉིད་མི་ཤེས་པ་དག །བསྒྲུབ་པ་དང་། བསྒྲུབ་པར་བྱ་བ་གཉིས་འགལ་བ་ཉོན་རེ་མོངས་ཞེས་པའོ། །དངོས་སུ་བཞུགས་ཚེ་དད་པ་དང་མོས་གུས་ཅི་ཡང་མེད་བཞིན་བར་དོའི་སྐབས་སུ་མཇལ་བར་རློམ་པ་རྫུན་རེ་ཡིན་པས་ངོ་མཚར་ཞེས་པའོ། །དང་པོ་བླ་མ་གཞན་ཕན་གྱི་མཁྱེན་བརྩེ་ནུས་པ་ལྡན་པ་དང་། དེ་ལས་གཞན་པའི་འཇིག་རྟེན་ཆོས་བརྒྱད་ཀྱི་འཁོར་ལོ་བསྐོར་བ་གཉིས་གང་ཡིན་བརྟགས་པ་ལ་མཁས་པ་དང་། བར་དུ་ཇི་མཛད་ལེགས་མཐོང་གི་མོས་གུས་དང་ལྡན་པས་བླ་མ་བསྟེན་པ་ལ་མཁས་པ་དང་། ཐ་མར་བླ་མའི་དགོངས་པ་དགོངས་གཞི་སོགས་དང་ཕྲིན་ལས་རྣམ་བཞིའི་སྤྱོད་ཚུལ་བསླབ་པ་ལ་མཁས་པའི་སྐྱེས་བུ་དེ་ནི་ཡང་དག་པའི་ལམ་དུ་འགྲོ་ཞེས་པའོ། །བླ་སློབ་ལྷན་ཅིག་གནས་པ་གང་གི་ཚེ་སྟེ་དེའི་ཚེ་ཞི་ལ་སྡང་བའི་འབྱུང་པོ་ཞེས་བྱང་ཆུབ་བསྒྲུབ་པ་ལ་མི་མོས་པའི་འབྱུང་པོའི་བསམ་པ་མི་དགེ་བ་སྐྱེས་བུའི་གཟུགས་སུ་འོང་བ་དང་། དེ་ཡང་གཡོ་ཞེས་རང་རྒྱུད་དྲང་པོར་མི་གནས་པ་དང་སྒྱུས་སྤྱོད་ཅེས་གཞན་མགོ་བསྐོར་བའི་ཐབས་ནག་པོའི་ཆོས་བཞི་ལ་བརྟེན་ཞིང་། དམ་པར་དམོད་པ་སོགས་དཀར་པོའི་ཆོས་ལ་སྡང་ཞིང་ཅི་ཙམ་དུ་འགྲོགས་བཞིན་དེ་ཙམ་སྡིག་སྤྱོད་སྣ་ཚོགས་ཀྱི་འཐོར་རླུང་འཚུབས་བཞིན་རྣམ་དཀར་གྱི་དགེ་བའི་ལོ་ཏོག་ཡོངས་སུ་འཇོམས་པའི་སྡིག་གྲོགས་ལས་ངན་ལ་བསྟེན་པའི་བློ་གྲོས་དམན་པའི་བླུན་པོ་གང་ཡིན་བ་དེ་ཉིད་བདུད་སྡེས་བཅོམ་པ་ཡིན་ཞེས་བསྟན་ཞིང་། དགེ་ཚོགས་ལམ་དུ་འགྲོ་བ་ལ་སློབ་དགོས་ཏེ། དེའི་ཕྱིར་ན་བླ་མ་དགེ་བའི་བཤེས་གཉེན་དང་ཆོས་ཀྱི་གྲོགས་པོ་དག་ལ་བསྟེན་པས་འཕྲལ་ཕུགས་ཀྱི་བདེ་ལེགས་ཡོན་ཏན་ཐམས་ཅད་མཐོང་བའི་ཆོས་ལ་མངོན་སུམ་དུ་ཟིན་ཞེས་པ་དང་། རྒྱལ་དང་རྒྱལ་སྲས་རྣམས་ཀྱིས་རྟག་ཏུ་དགོངས་ཤིང་བྱིན་གྱིས་རློབས་པར་གོར་མ་ཆག་ལ་མངོན་མཐོ་དང་ངེས་ལེགས་ཀྱི་ཡོན་ཏན་ཀུན་གྱིས་འབྱོར་ཞིང་། ཚོགས་ཆེན་རྣམ་པ་གཉིས་རྫོགས་ཤིང་སྒྲིབ་པ་རྣམ་པ་གཉིས་དག་པ་དང་། མཆོག་ཐུན་མོང་གི་དངོས་གྲུབ་རྣམ་པ་གཉིས་འཐོབ་ཅིང་། ས་དང་ལམ་གྱི་ཡོན་ཏན་རྣམས་གོང་ནས་གོང་དུ་འཕེལ་བའམ། བླ་ནས་བླར་འགྲོ་བའི་ཐབས་དང་ཡང་དག་པའི་བླ་མའི་རྣལ་འབྱོར་བསྒོམ་ཞིང་བསྒྲུབ་པ་བསོད་ནམས་ཀྱི་ཚོགས་དང་། བླ་མ་དང་ཐུགས་རྒྱུད་བསྲེ་པ་ཡེ་ཤེས་ཀྱི་ཚོགས་ཏེ། ཚོགས་གཉིས་འབྲས་བུའི་ཐུས་ཀ་ནི་དེར་བསྐྱལ་བའམ་དབྱེར་མེད་བྱས་པ་ཡིན་པའི་ཕྱིར་རོ། དེ་ཡང་བསྐལ་པའི་བར་དུ་རྒྱལ་དང་རྒྱལ་སྲས་བསྙེན་བཀུར་རྒྱ་ཆེར་བགྱིས་ཤིང་། བསྐྱེད་རིམ་བརྒྱ་ཕྲག་བསྒོམ་པ་ལས་བླ་མ་མཆོག་ནི་སྐད་ཅིག་དྲན་པ་ཁོ་ན་མཆོག། ཅེས་རྒྱལ་བས་གསུངས་པ་ཤེས་པར་བྱ་བ་གཅེས་ཤིང་། དམ་ཆོས་བདུད་རྩིའི་ཆུ་ཀླུང་དཔག་མེད་ནི་མདོ་སྔགས་ཀྱི་ཆོས་སོ་ཅོག་སྟེ་དམ་པ་ཆོས་ཀྱི་མཛོད་རྒྱ་མཚོ་ལྟ་བུ་རང་རྒྱུད་ལ་འདྲོངས་པའི་དམིགས་པ་བཟང་པོ་རྣམས་ཏེ། དང་པོ་ཐོས་བསམ་བསྒོམ་གསུམ་དང་། བར་དུ་གོ་མྱོང་རྟོགས་གསུམ་གྱི་དོན་སྟོན་པར་བྱེད་པའི་བླ་མ་བཟང་པོར་རྟེན་ཅིང་འབྲེལ་བ་དང་། དེས་ཐབས་བཟང་བ་ལ་བརྟེན་ནས་བྱང་ཆུབ་བསྒྲུབ་པའི་མན་ངག་དོན་མེད་དུ་འཁྱམས་པར་མི་འགྱུར་ཞེས་དང་། འཁོར་བའི་སྡུག་བསྔལ་ལ་སྐྱོ་ཤས་དང་། ཐར་པའི་ཕན་ཡོན་ལ་ངེས་འབྱུང་བཟང་པོའི་རིགས་སྔགས་ནུས་པ་ཅན་ནི་ས་བཅུའི་ལམ་ལྔའི་སྤངས་རྟོགས་ཀྱི་ནུས་པ་འཁོར་བར་སྐྱོ་བ་མེད་པའི་གདོན་ལ་ཐེབས་ཞེས་པ་ཡིན། དེ་ཉིད་བཟང་པོ་བཞི་དང་ལྡན་པའི་ལེགས་སྨོན་ཡིན་ཞིང་། དེ་ཡང་ཆོས་སྒོར་ཞུགས་ཀྱང་མོད་ལ་སུན་ནས་དད་པ་སྣུམ་དྲེད་ཁྱེར་བ་དང་། ཀུན་སློང་དུག་ཅན་ཏེ། འཇིག་རྟེན་ཆོས་བརྒྱད་དང་། འདྲེས་པའི་ཐོས་བསམ་བསྒོམ་པ་ཡང་། འཕྲལ་དུ་ཆོས་ལས་བློ་ཉམས་ཤིང་བསྲུང་བྱའི་སྡོམ་པ་སོགས་ཁུར་དུ་སོང་ཞིང་ཆོས་བརྒྱད་དམོད་པས་ཐེག་པ་ཆེན་པོའི་བརྟུལ་ཞུགས་དོན་མེད་དུ་འཁྱམས་པ་ཡིན་ལ། དེར་མ་ཟད་ལེགས་པར་སྨོན་པའི་དཀའ་ཐུབ་བཤིག་པས་རྙོགས་པ་ཡིན་ཞེས་དང་། དེ་ལ་གློ་བུར་དུ་བྱུང་བའི་ཐད་ཀ་ཐད་ཀའི་ཉོན་མོངས་དུག་ཆེན་ལྔའི་གཉེན་པོར་ཆེ་བ་སྐྱེས་བུ་ཆུང་ངུ་དང་། འབྲིང་པོ་དང་། ཆེན་པོ་སྟེ་རྣམ་པ་གསུམ་གྱི་ཤིང་རྟ་སྟེ་ལྷ་མི་དང་། ཉན་རང་གཉིས་ཐེག་ཆེན་སྟེ་གསུམ་གྱི་ལམ་དུ་ཞུགས་པའི་དེར་འཛེག་པ་ལ་འདས་པ་དང་། མ་འོངས་པ་དང་། ད་ལྟ་དང་། དུས་གསུམ་མཉམ་པ་ཉིད་དེ། དུས་བཞིར་སྐྱོ་བ་མེད་ཅེས་དང་། ཚོགས་དྲུག་གི་ཡུལ་གྱི་སྣང་བ་མཐའ་དག་ཆོས་དང་བླ་མར་ཤར་ན་རྣམ་མཁྱེན་སངས་རྒྱས་ཀྱི་རྒྱུར་སོང་ཞིང་ལེགས་སྨོན་གྲུབ་པ་ཡིན་ནོ། །དེ་ཡང་མཐོ་རིས་ཀྱི་ཡོན་ཏན་བདུན་ནི། སྔོན་བསོད་ནམས་རྒྱ་མཚོ་ཆེན་པོ་བར་མ་ཆད་པ་འདུ་བྱས་པ་དག་ནི་ད་རེས་ཀྱི་སྲིད་པ་འདི་རིགས་གཟུགས་དང་།༡ འབྱོར་པ་༢ དབང་ཕྱུག་༣ ཤེས་རབ་༤ ཚེ་རིང་བ་༥ ནད་མེད་པ༦་ བདེ་སྐྱིད་༧དང་ལྡན་པའི་དགའ་བ་དང་། དལ་བ་ཡང་དག་མཐོ་བ་ནི་ལུས་རྟེན་འདི་ལ་ནད་མེད་ཅིང་། ཏིང་ངེ་འཛིན་དང་། རྣམ་འབྱེད་ཤེས་རབ་དང་ལྔ་པོ་སྔོོན་ཆད་བསོད་ནམས་བསགས་པ་ལ་གུས་པའི་མངོན་རྟགས་ཡིན་ནོ། །ཐོས་པས་རིག་གནས་ཀུན་ལ་སྦྱངས་ཤིང་། བསམ་པས་དྲང་ངེས་ཀྱི་དགོངས་དོན་རྟོགས་བཞིན། བསྒོམས་པས་ཉམས་སུ་ལེན་དགོས་པ་དོར་ནས་མ་བསྒོམ་པས་ནི་བླུན་རྨོངས་ཀྱི་གཉེན་པོ་རིག་པ་འཇོམས་ཤིང་འོང་བ་དང་། མི་ཤེས་བཞིན་དུ་རང་མཐོང་དང་ང་རྒྱལ་གྱིས་རྒྱགས་པས་དཔལ་འབྱོར་འཇོམས་ཤིང་འོང་བ་དང་། རྣམ་པར་སྡང་བ་སྟེ་ཁོང་ཁྲོས་ཆ་ལས་གྱུར་པས་མི་དགེ་བས་ལེགས་པའི་ཚོགས་རྣམས་འཇོམས་ཞིང་འོང་བ་དང་། ཆགས་པ་སྤྱི་དང་བྱེ་བྲག་བུད་མེད་ལ་ཆགས་པས་ཡང་དག་མཐོ་བ་སྟེ་མི་ལུས་ཐོབ་པ་འཇོམས་ཤིང་འོང་། ཞེས་འགྲེལ་ལོ། དེ་གང་གི་ཕྱིར་ན་ལས་མི་དགེ་བ་དང་ཉོན་མོངས་དུག་ལྔ་དུག་གསུམ་ལས་གྱུར་པའི་སྡིག་པས་རྣམ་པར་དཀྲུགས་པ་མ་ཡིན་པའི་བློ་གྲོས་ནི་ཤེས་རབ་ཀྱི་མཐུ་དང་རང་གི་བསོད་ནམས་ཀྱི་སྐལ་བས་བཀོལ་ཐུབ་པ་ནི་ཚེ་སྔོན་བསོད་ནམས་བསགས་པའི་རྟགས་སུ་མདོ་སྡེ་རྒྱན་ལས་བཤད་པ་ལྟར་རོ། །ཆོས་ཉམས་སུ་ལེན་པའི་ཐབས་ལ་སེམས་པའི་གོ་ཆ་རྣམ་པར་སྲ་ཞིང་ཟབ་རྒྱས་ཆོས་ཁམས་རྒྱ་མཚོ་ནི། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་སྟེ། དབང་པོའི་མཚོན་ཞེས་ལྷའི་དབང་པོའི་གཞུ་གྱད་སྟོབས་པོ་ཆེ་གང་གིས་ཀྱང་འགུག་པར་ནུས་པ་མ་ཡིན་པ་དེ་ཉིད་བདུང་བར་བློ་ཡིས་སྤོབས་སམ་མི་སྤོབས་པའི་གང་ཟག་ངེས་མེད་ཀུན་ཐེག་པ་ཆེན་པོའི་ལམ་དུ་ཞུགས་པའི་སྙིང་སྟོབས་མི་དམན་ཞིང་གཞན་ཕན་གྱི་བློ་གྲོས་གཉེན་པོའི་དབང་དུ་གཏོང་བ་རྣམས་ནི་ལམ་སྐད་ཅིག་ཀྱང་མི་འཆུག་པར་ཕ་རོལ་ཏུ་ཕྱིན་པ་དྲུག་གི་སྟེང་དུ་འགྲོ་བ་ཡིན་ཏེ། དེའི་མཐུན་ཕྱོགས་ཕྱག་འཚལ་བ་དང་། དངོས་བཤམས་ཡིད་སྤྲུལ་གྱི་མཆོད་ཚོགས་འབུལ་བ་དང་། དུས་གསུམ་གྱི་དགེ་བའི་ཉམས་ཆགས་ཉེས་ལྟུང་བཤགས་པ་དང་། རྒྱལ་བ་སྲས་དང་བཅས་པ་རྣམས་ཀྱི་དགེ་བའི་ཚོགས་རྒྱ་ཆེན་པོ་དང་། རང་གཞན་གྱི་རྣམ་དཀར་གྱི་དགེ་རྩ་ལ་རྗེས་སུ་ཡི་རང་བ་། རྒྱལ་བ་སྲས་བཅས་དང་བླ་མ་དགེ་བའི་བཤེས་གཉེན་གྱི་ཚོགས་དང་བཅས་པ་རྣམས་ལ་གཞན་དོན་དུ་ཆོས་ཀྱི་འཁོར་ལོ་བསྐོར་བར་བསྐུལ་བ། འགྲོ་བའི་དོན་དུ་སྐུ་མྱ་ངན་ལས་མི་འདའ་བར་གསོལ་བ་གདབ་པ་སྟེ་ཡན་ལག་བདུན་པ་བཟང་སྤྱོད་ལས་བྱུང་ལྟར་དང་། ཆུ་གཏོར་ལ་སོགས་བསགས་སྦྱངས་མཐའ་དག་ཡིན་གསུངས་པ་ལྟར་བསྒྲུབ་ན་མི་མཐུན་ཕྱོགས་ཀྱིས་དེ་ལ་མི་བརྗི་ཞིང་མཐུན་རྐྱེན་ཕུན་སུམ་ཚོགས་པ་དང་བཅས་ཏེ་ལམ་ལྔར་རིམ་བཞིན་དུ་འགྲོ་བ་བསོད་ནམས་བསགས་པ་དག་ལ་བསྟེན་ཞེས་འགྲེལ་ནས་འདི་ནི་སྐྱེས་བུ་ཆེན་པོ་སྟེ་ཐེག་པ་མཆོག་གི་རྣལ་འབྱོར་པ་རྣམས་ཀྱི་ལམ་སྟེགས་ཡིན་ཞེས་སྨོས་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་ལྔ་པའི་བསྡུས་འགྲེལ་ལོ། ལེའུ་དྲུག་པ།༈ སྐྱབས་སུ་འགྲོ་བ་ནི། འཇིགས་པ་གསུམ་སྟེ། སྦྱིར་འཁོར་བའི་སྡུག་བསྔལ་དང་། སྒོས་རང་དོན་ཡིད་བྱེད་དང་། ཉིང་དགོས་ཐ་མལ་འཁྲུལ་འཛིན་གྱི་འཇིགས་པའི་ཆུ་གཏེར་འཁྲུགས་པ་དང་འདྲ་བ་ལ་གཞན་སུས་ཀྱང་སྐྱོབ་པར་མི་ནུས་ཀྱང་སྐྱབས་སུ་འོས་པར་ཡིད་ཆེས་ཤིང་སྲོག་བརྟེན་པའི་སྐྱབས་དང་མགོན་དུ་གྱུར་པའི་དཀོན་མཆོག་གསུམ་གྱི་གྲགས་པའི་གདུགས་དཀར་པོ་ནི་ནམ་མཁར་སྤྲིན་དཀར་གྱིས་ཕུང་པོའི་ཁྱབ་པ་དང་མཚུངས་པས་ནང་པའི་བསྟན་པ་ལ་འཇུག་པའི་ཐོག་མ་ཉིད་དུ་འཛིན་དགོས་ཞེས་པའོ། །ཐར་བར་འགྲོ་བའི་ལམ་རྣམས་དང་ཡོན་ཏན་གྱི་རྟེན་མཆོག་དང་སྣོད་དུ་ཞེས་སྐྱབས་ཡུལ་གྱི་འབྱུང་གནས་སུ་དམ་བཅས་ཀྱང་མི་བསླུ་བ་སྐྱབས་སུ་འགྲོ་བ་ཁོ་ན་ཉིད་ཡིན་ཏེ། དེའི་སྔོན་དུ་ཡང་སྟོན་པ་སངས་རྒྱས་རྣམས་དང་། བསྟན་པ་དམ་པའི་ཆོས་ཀྱི་ཡོན་ཏན་ཤེས་པར་གཅེས་ན། ཆོས་རྣམས་ཀུན་གྱིས་རྩ་བའམ་གཞི་དད་པ་ནི། སྐྱེས་བུ་ཕལ་མོ་ཆེའི་སེམས་ལ་ལུང་དུ་མ་བསྟན་པར་གནས་པ། སྟོན་པ་དགེ་བའི་བཤེས་གཉེན་མཐོང་བ་དང་། སྡེ་སྣོད་ཀྱི་ཆོས་བཀླག་པའི་མོད་ལ་བ་སྤུའི་འཁྲི་ཤིང་སློང་བཞིན་ལྡང་བ་ནི། དེ་ལ་དད་པ་དང་པོ་སྟེ། དེ་བཞིན་ཐར་པ་དང་རྣམ་མཁྱེན་གྱི་གོ་འཕང་ཐོབ་པར་འདོད་པའི་ཆེད་དུ་དཀོན་མཆོག་གསུམ་ལ་སྙིང་ནས་དད་པ་གཉིས་པ་དང་། མཆོག་གསུམ་རིན་པོ་ཆེར་དད་པས་བརྟེན་ན་སྡུག་བསྔལ་ཀུན་ལས་སྐྱོབས་པར་ནུས་པ་ཡིན་ཆེས་ཀྱི་དད་པ་གསུམ། གཞན་མཆོག་དམན་སུས་ཀྱང་མཆོག་གསུམ་རིན་པོ་ཆེར་དད་པ་ལྡོག་པའི་ཐབས་སྣ་ཚོགས་འཇམ་རྩུབ་གང་གི་སྒོ་ནས་བྱས་ཀྱང་ཕྱིར་མི་ལྡོག་པའི་དད་པ་རྣམ་པ་བཞི་ལས། སྐྱབས་འགྲོ་ནི་གནས་སྐབས་འདིར་སྲོག་ལ་བབ་ཀྱང་ཕྱིར་མི་ལྡོག་པ་དགོས་ཞེས་པའོ། །དད་པ་སྐྱེ་བའི་རྒྱུ་དང་ཐབས་ནི་རྣམ་པ་བཞི་ཡིན་ཏེ། སྐྱེས་བུ་དམ་པ་བསྟེན་པ་དང་དམ་པའི་གྲོགས་དགེ་བ་གོང་འཕེལ་དུ་འགྱུར་བ་དང་འགྲོགས་ཤིང་། དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པ་དང་། འཁོར་བ་ལ་སྙིང་པོ་ཅི་ཡང་མེད་པའི་ཉེས་དམིགས་བསམ་པ་ལས་སྐྱེས་ཞེས་པའོ། །ཐུབ་པ་སངས་རྒྱས་བཅོམ་ལྡ་འདས་རྣམས་ཀྱི་ཡོན་ཏན་མཐའ་ཡས་པ་ཡིན་ཏེ། མཐོང་སྤངས་དང་བསྒོམ་པས་སྤངས་པ་གཉིས་ཀྱིས་ཉོན་སྒྲིབ་དང་ཤེས་བྱའི་སྒྲིབ་པ་བཅོམ་པའོ། །དེའི་ཚེ་སྤྱན་ལྔ་ལ་སོགས་ཡོན་ཏན་རིམ་པར་ཐོབ་པ་ཡིན་ཏེ། སྤྱན་ལྔ་ནི། སངས་རྒྱས་ཀྱི་སྤྱན་དང་། ཆོས་ཀྱི་སྤྱན་དང་། ཤེས་རབ་ཀྱི༴ ལྷའི་སྤྱན༴ ཤའི་སྤྱན་ནོ། །མངོན་པར་ཤེས་པ་དྲུག་ནི། རྫུ་འཕྲུལ་གྱི་མངོན་པར་ཤེས་པ་དང་། ལྷའི་རྣ་བའི༴ གཞན་སེམས་ཤེས་པའི༴ སྔོན་གནས་རྗེས་དྲན༴ ལྷའི་མིག་གི༴ ཟག་པ་ཟད་པའི་མངོན་པར་ཤེས་པའོ། །དབང་བཅུ་ནི་ ཚེ་ལ་དབང་བ་ སེམས་ལ་དབང་༴ ཡོ་བྱད་ལ༴ ལས་ལ༴ སྐྱེ་བ་ལ༴ མོས་པ་ལ༴ སྨོན་ལམ་ལ༴ རྫུ་འཕྲུལ་ལ༴ ཡེ་ཤེས་ལ༴ ཆོས་ལ་དབང་པའོ། །གཟུངས་ཀྱི་སྒོ་ནི་དྲན་པ་མ་ཉམས་པ། རྟོགས་པ་མ་གཡེངས་པ བློ་གྲོས་མ་རྨོངས་པ་ ཤེས་རབ་མངོན་དུ་བྱེད་པ ཆོས་ཐམས་ཅད་ཀྱི་ཚིག་ཐ་དད་པ་ཤེས་པའོ། །སྟོབས་བཅུ་ནི། གནས་དང་གནས་མིན་མཁྱེན་པའི་སྟོབས་དང་། དེ་བཞིན་དུ་ལས་ཀྱི་རྣམ་པར་སྨིན་པ་དང་། མོས་པ་སྣ་ཚོགས་ཐུགས་སུ་ཆུད་པ་དང་། སྣ་ཚོགས་ཁམས་ཀྱི་མཁྱེན༴ དེ་བཞིན་དབང་པོ་མཆོག་དང་མཆོག་མ་ཡིན་པ་མཁྱེན༴ ཐམས་ཅད་དུ་འགྲོ་བའི་ལམ༴ ཀུན་ནས་ཉོན་མོངས་པ་དང་རྣམ་པར་བྱང་བ༴ སྔོན་གྱི་གནས་རྗེས་སུ་དྲན་པ༴ འཆི་འཕོ་བ་དང་སྐྱེ་བ་ཤེས་པ༴ ཟག་པ་ཟད་པ་མཁྱེན་པའི་སྟོབས་རྣམས་སོ། །མི་འཇིགས་པ་བཞི་ནི། རང་དོན་སྤངས་པ་དམ་བཅས་པ་ལས་མི་འཇིགས་པ། རྟོགས་པ་དམ་བཅས་པ་ལས་མི༴ གཞན་དོན་མ་སྤངས་པ་དམ་བཅས་པ༴ གཉེན་པོ་དམ་བཅས་ལས་མི་འཇིགས་པ་དང་བཞིའོ། །སོ་སོ་ཡང་དག་པར་རིག་པ་བཞི་ནི། ཆོས་སོ་སོ་ཡང་དག་པར་རིག་པ༴ དོན་སོ་སོ༴ ངེས་ཚིག་སོ་སོ༴ སྤོབས་པ་སོ་སོ་ཡང་དག་པར་རིག་པ་རྣམས་སོ། །མ་འདྲེས་པ་བཅྭོ་བརྒྱད་ནི། སྐུའི་སྤྱོད་པ་ལ་འཁྲུལ་པ་མི་མངའ་བ༴ ཐུགས་ལ་འཁྲུལ་པ་མི་མངའ་བ༴ གསུང་ལ་ཅ་ཅོ༴ མཉམ་པར་མ་བཞག་པ་མི༴ སོ་སོར་མ་བརྟགས་པའི་བཏང་སྙོམས་མི༴ འདུན་པ་ཉམས་པ༴ བརྩོན་འགྲུས་ཉམས་པ༴ དྲན་པ་ཉམས་པ༴ ཏིང་ངེ་འཛིན་ཉམས་པ༴ ཤེས་རབ་ཉམས་པ༴ རྣམ་པར་གྲོལ་བ་ཉམས༴ སྐུ་ཡི་ཕྲིན་ལས་ཡེ་ཤེས་སྔོན་དུ་འགྲོ་ཞིང་ཡེ་ཤེས་རྗེས་སུ་འབྲང་བ་གསུང་གི་ཕྲིན་ལས་ཡེ་ཤེས༴ ཐུགས་ཀྱི་ཕྲིན་ལས་ཡེ་ཤེས༴ འདས་པ་ལ་མ་ཆགས་མ་ཐོགས་པའི་ཡེ་ཤེས་འཇུག་པ། མ་འོངས་པ་ལ་མ་ཆགས༴ ད་ལྟ་བ་ལ་མ་ཆགས་མ་ཐོགས་པ་རྣམས་སོ། །རྫོགས་པའི་སངས་རྒྱས་ཏེ་ཞེས་སངས་རྒྱས་ཀྱི་སྐུའི་ཆེ་བའི་ཡོན་ཏན་རྣམས་བསྟན་ཏེ། རྣམ་པ་ཀུན་གྱི་མཆོག་ལྡན་ཆོས་ཀྱི་སྐུ་སྟེ། བྱང་སེམས་ས་བཅུའི་འཁོར་རྣམས་ལ་སྐུ་ལོངས་སྤྱོད་རྫོགས་པར་བཞེངས་པའི་ཚུལ་གྱིས་ཆོས་སྟོན་པ་སྟེ། དམ་པའི་ཆོས་ནི་བསོད་ནམས་བསགས་པའི་ཐབས་དང་ལམ་ལྔ་བགྲོད་པའི་ཐེམ་སྐས་དང་། མྱ་ངན་ལས་འདའ་བར་བྱེད་པའི་གདམ་པའོ། །དེའང་བརྗོད་བྱའི་དོན་ཏེ་དེ་ལའང་འབྲས་བུ་དང་། བྱ་བའི་རང་བཞིན་གཉིས་སུ་གནས་པ་ལ་དོན་དམ་པའི་བདེན་པ་དང་། ཀུན་རྫོབ་ཀྱི་བདེན་པ་ལ་བདེན་གཉིས་ཞེས་བྱ་སྟེ། འགོགས་པ་དང་ལམ་རྣམ་པ་གཉིས་ཡིན་ནོ། །དེ་ཡང་བརྗོད་བྱ་ནི་དོན་དང་རྗོད་བྱེད་ཚིག་ཡིན་ཏེ། དེ་གཉིས་ཀ་ལ་ལྟོས་པའི་ལུངས་དང་རྟོགས་པའི་ཆོས་གཉིས་ལས་ལུང་ནི་གསུང་རབ་ཡན་ལག་བཅུ་གཉིས་དང་། གཉེན་པོའི་སྒོ་ནས་སྡེ་སྣོད་གསུམ་དུ་ཤར་ཞེས་པ། ཉོན་མོངས་པ་འདོད་ཆགས་འདུལ་བའི་གཉེན་པོར་འདུལ་བ་ཉི་ཁྲི་ཆིག་སྟོང་དང་། དེ་བཞིན་དུ་ཞེ་སྡང་གི་གཉེན་པོར་མདོ་སྡེ་ཉི་ཁྲི་ཆིག་སྟོང་དང་། གཏི་མུག་གི་གཉེན་པོར་མངོན་པ་ཉི་ཁྲི་ཆིག་སྟོང་། དུག་གསུམ་ཆ་མཉམ་སྤྱིའི་གཉེན་པོར་གསང་སྔགས་ཉི་ཁྲི་ཆིག་སྟོང་སྟེ། དེ་ལས་ཐབས་ཀྱི་ཆེ་བ་རིག་འཛིན་སྡེ་སྣོད་ཡིན་ཏེ། ཐབས་མང་བ་དང་དཀའ་བ་མེད་པ་སོགས་ཀྱིས་སོ། །གླེགས་བམ་ཡི་གེར་བྲིས་འཆང་ཞིང་གནས་པ་དམ་ཚིག་གི་རྟེན་ཡིན་ལ། རྟོགས་པའི་ཆོས་ནི། དྲན་པ་ཉེ་བར་བཞག་པ་ནས་གཟུང་སྟེ། རིམ་པ་བཞིན་དུ་ཚོགས་ལམ་དང་། སྦྱོར་ལམ་ མཐོང་ལམ༴ སྒོམ་ལམ༴ མི་སློབ་པའི་ལམ་སྟེ། ལམ་ལྔའི་ཡོན་ཏན་མཐའ་དག་དང་། འཕགས་པ་རྣམས་ཀྱི་སྤངས་པ་དང་རྟོགས་པའི་ཡེ་ཤེས་བདེ་གཤེགས་སྙིང་པོ་ཅན་ལགས་མོད། དེ་ཡང་བསྐྱེད་པ་དང་ རྫོགས་པ་དང་ གཟུངས་དང་། ཟད་པར་དང་། སློབ་ལམ་བཞི་དང་མི་སློབ་པའི་ལམ་གྱི་དངོས་གཞི་རྒྱུའི་ཐེག་པའི་ས་བཅུ་དང་འབྲས༷་བུའི་ཐེག་པའི་བཅུ་གསུམ་སོགས་རྡོ་རྗེ་ཐེག་པའི་ས་ལམ་གྱི་རིགས་དབྱེ་དཔག་ཏུ་མེད་ཅིང་། གང་གི་ཡེ་ཤེས་ནི་སའི་རྩེ་མོ་རྣམས་ཀྱི་འབྲས་བུ་ལ་རེག་པས་ན་རྒྱུད་ལ་བརྟེན་ཅེས་བའོ། །དགེ་འདུན་ངོ་བོ་རིག་གྲོལ་གཉིས་ལྡན་ཏེ། ཞེས་པ་ཇི་ལྟར་བ་རིག་པ་དང་། ཇི་སྙེད་པ་རིག་པ་ཤེས་བྱ་གཟིགས་པ་སྟེ་རིག་པའི་ཡོན་ཏན་གསུམ་དང་། ཆགས་སྒྲིབ་ལས་གྲོལ་བ་ཐོགས་སྒྲིབ་ལས་གྲོལ་བ་ དམན་སྒྲིབ་ལས་གྲོལ་བ་སྟེ། གྲོལ་བའི་ཡོན་ཏན་གསུམ་དང་ལྡན་པ་དང་། ཉན་རང་ཞུགས་གནས་སྐྱེས་བུ་ཟུང་བཞིའམ་ཞེས་པ་ནི། རྒྱུན་དུ་ཞུགས་པ་དང་གནས་པ་གཉིས། དེ་བཞིན་དུ་ཕྱིར་འོང་ཞུགས་པ་དང་གནས་པ་གཉིས། ཕྱིར་མི་འོང་བ་ཞུགས་གནས་གཉིས། དགྲ་བཅོམ་ཞུགས་གནས་གཉིས་ཏེ། ཡ་བརྒྱད་རྒྱལ་སྲས་ས་ལ་གནས་པ་མཐའ་དག་པའི་རང་སའི་ཡོན་ཏན་བརྗོད་ཀྱི་མི་ལང་ལྟར་ཡང་ལམ་ལ་འཇུག་ཡུལ་དང་སྐྱོབ་པར་བྱེད་པའི་ངོ་བོ་དམ་པའི་ཆོས་ཡིན་ཏེ། ཆོས་ནི་སྟོན་པ་ལས་བྱུང་བ་ཡིན་ཞིང་དེ་བསྒྲུབ་པའི་གྲོགས་སམ་བསླབ་པ་ཆགས་པའི་བརྟེན་གནས་དགེ་འདུན་པ་ཡིན་ཕྱིར། དཀོན་མཆོག་གསུམ་ཞེས་སྐྱབས་ཀྱི་ཡུལ་མཆོག་ཏུ་འགྲུབ་པའོ། །དེ་ལ་རྒྱུ་དང་འབྲས་བུའི་སྐྱབས་འགྲོ་ཡི་དམ་བཅའ་གཉིས་ལས། སྐྱེས་བུ་ཆུང་ངུས༵་སྐྱབས་སོང་གི་འབྲས་བུ་ངན་སོང་གསུམ་དུ་མི་ལྟུང་བ་དང་། འབྲིང་པོ༵འི་འཁོར་བའི་གནས་མཆོག་དམན་གང་དུའང་མི་ལྟུང་བ་དང་། ཆེ༵ན་པོ༵ས་འགྲོ་རྣམས་སངས་རྒྱས་ཀྱི་སར་འགོད་ནུས་ཏེ། དུས་གཞན་འགྲུབ་འདོད་རྒྱུའི་སྐྱབས་འགྲོའོ། །དེ་ལྟར་གྲུབ་པ་ན་རང་གི་སེམས་ཀྱི་གནས་ལུགས་ངོ༵་བོ༵་སྟོང་པ་སངས་རྒྱས་དང་། རང་བ༵ཞིན་གསལ་བ་ཆོས་ཐུག༵ས་རྗེ་ཀུན་ཁྱབ་དགེ་འདུན་ཏེ་འབྲས་བུའི་སྐྱབས་འགྲོ་ཡིན་ཕྱིར་རྡོ་རྗེ་ཐེག་པ་དག་གི་ཁྱད་ཆོས་ཡིན་ནོ། །རྒྱུའི་སྐྱབས་འགྲོའི་ཡུལ་ནི་དཀོན་མཆོག་རྣམ་པ་གསུམ་ཡིན་ཀྱང་། སྔགས་སུ་དེའི་ངོ་བོ་བླ་མར་འདུས་པ་ཡིན་ཞིང་། ཉི་ཚེ་མཆོག་དང་བླ་ན་མེད་པ་ཡི་ཀུན་སློང་གསུམ་ལས། སྐྱེས་བུ་ཆུང་ངུ་ནི། ངན་འགྲོའི་སྡུག་བསྔལ་ལ་འཇིགས་ནས་མངོན་མཐོའི་གོ་འཕང་ཐོབ་ཀྱི་བར་དུ་འགྲོ། འབྲིང་ཉན་རང་གཉིས་སྲིད་པའི་སྡུག་བསྔལ་གྱིས་འཇིགས་ནས་ཐར་པ་དོན་དུ་གཉེར་ཞིང་གནས་སྐབས་ཇི་སྲིད་འཚོའི་བར་དང་མཐར་ཐུག་ནི་ཉན་རང་གི་འབྲས་བུ་ཐོབ་པའི་བར་འགྲོ། སྐྱེས་བུ་ཆེན་པོའི་གཞན་དོན་སྤངས་པས་རང་ཉིད་ཞི་བདེར་གཞོལ་བས་འཇིགས་ཤིང་འཁོར་བའི་འགྲོ་རྣམས་རྣམ་མཁྱེན་གྱི་སར་དབུགས་འབྱིན་ཆེན་པོ་ལ་བསྒྲལ་ཕྱིར་བྱང་ཆུབ་བར་འགྲོ། དེ་ཡང་རང་གི་སེམས་ལས་གཞན་དུ་མ་མཆིས་ཤིང་དེ་ལ་སྐྱབས་དང་བྲལ་རྒྱུའི་དོགས་པ་དང་། ཐོབ་རྒྱུའི་རེ་བ་ཡང་མེད་པ་བསླུ་བ་སྤངས་པ་འབྲས་བུའི་སྐྱབས་ཅེས་པའོ། །ལམ་བགྲོད་པའི་དུས་སུ་སངས་རྒྱས་རྣམས་ནི་སེམས་ཅན་གྱི་ཁམས་ལ་ཐུགས་རྗེ་འཇུག་པ་དུས་ལས་ཡོལ་བ་མེད་ཅིང་། སངས་རྒྱས་ཀྱི་བ་སྤུའི་ཁུང་བུ་གཅིག་གི་ཡོན་ཏན་ཡང་མཐའ་དག་བརྗོད་པས་མ་ཐུག་ནམ་མཁར་ལྡིང་ཞེས་དཔགས་ཀྱིས་མི་ལོངས་པར་བསྟན་ཞིང་། བྱ་རྣམས་ནམ་མཁར་ལམ་བྱས་ནས་མཐའ་ཚོལ་བ་ལ་གྲུབ་པའི་མཐའ་མ་གཏུགས་སླར་རང་སར་འབབས་པ་དང་འདྲ་བའོ། །འདི་ན་འཁོར་བའི་འཁོར་ལོར་ཞེས་འགྲོ་བ་རིགས་དྲུག་གི་གནས་རིགས་མཐོ་དམན་ཀུན་ཏུ་ཡང་ནས་ཡང་དུ་བརྒྱུད་དེ་ལས་ངན་བསགས་པའི་སྐྱོན་གྱིས་མཚང་ཅན་རྣམས་ནི། མིའི་འཁོར་ལོས་སྒྱུར་བའི་རྒྱལ་པོ་རྣམས་དང། དབང་ཕྱུག་ཆེན་པོ། ལ་སོགས་པ་མཐུ་སྟོབས་ཀྱི་སྙེམས་པས་སྐྱབས་གཞན་གང་གིས་ཀྱང་བསླུ་བར་མཐོང་ནས་ནི། འཁོར་བའི་སྡུག་བསྔལ་ལ་འཇིགས་པ་དང་། ཐར་པའི་ཕན་ཡོན་ལ་དད་པ་དང་། ཡོངས་ཀྱི་འགྲོ་བ་ལ་སྙིང་རྗེ་བ་དང་རྣམ་པ་གསུམ་གྱི་སྒོ་ནས་གཞན་དོན་དུ་སེམས་བསྐྱེད་པ་སྐྱེས་བུ་ཆེན་པོའི་བློས་དཀོན་མཆོག་གསུམ་གྱི་ཡོན་ཏན་རྗེས་དྲན་པས་སྐྱབས་སུ་འགྲོ་བ་སྟེ། ཇི་ལྟར་ན་ནམ་མཁའ་ལ་ཚད་བཟུང་མེད་པ་ལྟར་དཀོན་མཆོག་གསུམ་ལ་བརྟེན་པའི་དཀར་པོ་དགེ་བའི་ལས་དང་ནག་པོ་སྡིག་པའི་ལས་འབྲས་ཀྱི་ཕ་མཐའ་མི་དཔོག་ཞེས་མང་ཤིང་། སྐྱབས་སུ་སོང་བ་འདི་ལ་རྫས་དང་གཟུགས་ཤིག་ཡོད་པར་གྱུར་ན་ནམ་མཁའི་སྣོད་ཀྱི་ནང་དུ་མི་ཤོང་ཞིང་བརྟེན་པར་ནུས་པ་མ་ཡིན་ཞེས་པའོ། །དེ་ལྟར་སྐྱབས་སུ་སོང་བའི་ཕན་ཡོན་ནང་པ་སངས་རྒྱས་པའི་ཁྱུར་འགྲོ་བ་དང་། སྡོམ་པ་མཐའ་དག་གི་བརྟེན་གཞིར་གྱུར་པ་སྡིག་སྒྲིབ་ཀུན་འཛད་གནོད་པའི་ཕྱོགས་ཀྱིས་སྤོངས་པ་བཞིན་དུ་འགྱུར་ཞིང་། ངན་འགྲོའི་གཡང་སར་མི་ལྟུང་བའི་བསྲུངས་སྐྱོབས་དང་དཀོན་མཆོག་གསུམ་དང་མི་འབྲལ་ཞིང་བདེ་སྐྱིད་ཕུན་སུམ་ཚོགས་པ་མཐོང་བའི་ཆོས་ལ་འོངས་པ་དང་། རྒྱུ་བསོད་ནམས་ཀྱི་ཚོགས་རྫོགས་ཤིང་གཟུགས་ཀྱི་སྐུ་གཉིས་ཏེ་ལོངས་སྐུ་དང་སྤྲུལ་སྐུའི་གོ་འཕང་འགྲུབ་པར་གདོན་མི་ཟ་ཞིང་། རྒྱུ་ལས་འདས་པ་འབྲས་བུའི་སྐྱབས་འགྲོ་བསླུ་བ་མེད་པ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་གསུམ་སྟེ། དེ་དག་སྤྲོས་བྲལ་ཆོས་སྐུའི་ངང་དུ་ལ་བཟླ་བས་སྨོན་པ་མེད་པའི་དབྱིངས་སུ་བྱང་ཆུབ་པ་ནི་གནས་ལུགས་རྡོ་རྗེ་འདུས་མ་བྱས་པ་ཡིན་ལ། དེའི་འབྲས་བུ་ཡེ་ཤེས་ཀྱི་ཚོགས་ཏེ་དག་པ་གཉིས་ལྡན་ཞེས་ཡེ་ནས་དག་པ་དང་། གློ་བུར་གྱི་དྲི་མ་དག་པའི་གོ་ས་འཐོབ་པའོ། །དེ་ཡང་བསླབ་བྱ་རྒྱུ་དང་འབྲས་བུ་གཉིས་ལས། དང་པོ་ནི་མངའ་རིས་འབྱོར་པ་ལོངས་སྤྱོད་ཕུན་སུམ་ཚོགས་པ་སོགས་བྱ་དགའི་ཞེས་དཀོན་མཆོག་གསུམ་གྱི་རྗེས་སུ་འཇུག་པ་སྤངས་ནས་ཕྱི་རོལ་པའམ། འཇིག་རྟེན་པའི་སྐྱེ་བོ་དྲེགས་པ་ཅན་རྣམས་ཀྱི་རྗེས་སུ་འབྲངས་ཤིང་། མི་དགེ་བའི་ལས་ལ་ཞུགས་ནས་གླ་རྔན་ཅི་ཙམ་སྟེར་བར་བྱས་ཀྱང་དེའི་སླད་དུ་སྐྱབས་འགྲོ་གཏོང་བ་སྨོས་ཅི་དགོས། སྲོག་གི་ཕྱིར་ཡང་དཀོན་མཆོག་གཏོང་བ་མིན། ཞེས་པ་དང་། དེའི་ངོ་བོ་བླ་མ་ལ་སྐྱབས་སུ་སོང་ནས། དམ་པ་བསླུ་བ་དང་མི་སྙན་སྒྲོགས་པ་སོགས་ནག་པོའི་ཆོས་རྣམས་སྤང་ཞིང་། དེ་བཞིན་དུ་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་སོང་ནས་རིམ་པ་བཞིན་དུ་བདག་ཉིད་ནི་འཁོར་བར་འཁོར་བའི་ལྷ་སྟོབས་པོ་ཆེ་ཅི་འདྲ་ཡིན་ཀྱང་དེ་ལ་ཕྱག་མི་འཚལ་ཞིང་། གཞན་ལ་མི་འཚེ་བ་དང་གྲོགས་མུ་སྟེགས་ཅན་ལ་མི་འགྲོགས་པ་དང་། དཀོན་མཆོག་གསུམ་གྱི་རྟེན་ལ་དད་པས་བསྙེན་བཀུར་དང་སྲི་ཞུ་བྱ་ཞིང་ཉིན་མཚན་གྱི་ཐུན་རྣམས་སུ་དཀོན་མཆོག་གསུམ་བརྗེད་པ་སྤངས་ནས་དྲན་པས་གསོས་བཏབ་ནས་སྐྱབས་སུ་འགྲོ་བར་བྱ་བ་དང་། འབྲས་བའི་བསླབ་བྱ་ནི། ཐུབ་པ་ཆོས་ཀྱི་སྐུ་ཡིན་པས་དེ་ཉིད་བྲལ་བ་དང་ཐོབ་རྒྱུ་སྤངས་པའི་དབྱིངས་འགྱུར་བ་མེད་པ་ལ་བྱང་ཆུབ་པས་སྐྱོབས་དང་སྐྱབས་བྱར་མི་འཛིན་ཞིང་ཐ་སྙད་ལས་འདས་པ་ཡིན་ཕྱིར་སྐྱབས་འགྲོའི་སྡོམ་པ་གཏོང་རྒྱུའང་བཏགས་པ་བླ་དགས་ཡིན། རྒྱུའི་བསྲུང་སྡོམ་གཏོང་མཚམས་སྐྱབས་འགྲོ་མཚན་ཉིད་པ་འགྲོ་བའི་ཡུལ་ལ་ལོག་ལྟ་སྐྱེས་པས་གཏོང་བ་ཡིན་ལ། བསླབ་བྱའི་བསྲུང་སྡོམ་ཉམས་ན་ཐ་མལ་དམན་པའི་སར་ལྷུང་བའི་ཕྱིར་ན་རྨའི་བག་བཞིན་བསྒྲིམས་ཏེ་བསྲུངས་བར་བྱ་བ་དང་། མི་དགེ་བའི་ལས་ངན་གྱི་ཐབས་ལ་བརྩོན་པའི་ཅེ་སྤྱང་གི་སེམས་ལྡན་གདུག་པས་སྐབས་བཙལ་བ་རྣམས་ཚིག་གྲིམ་ཡང་དོན་མ་རྟོགས་པར་འཛོལ་བའི་ཡིད་གཉིས་དང་ཐེ་ཚོམ་གྱིིས་སྣོད་ངན་དུ་མཆོག་གསུམ་རིན་པོ་ཆེ་བསླུ་བ་མེད་པའི་ངེས་ཤེས་བྲི་བའི་རྟགས་སུ་གདུག་འདྲེ་ཁོག་ཞུགས་སོགས་མཁའ་རྒྱུའི་ཡི་དྭགས་ལེགས་ཉེས་སྟོན་རློམ་རྣམས་ལ་བརྟེན་པས་ཚེ་འདི་ཉིད་ལ་ཉམས་པར་འགྱུར་ཞེས་པའོ། །འཇིག་རྟེན་འདི་ནས་ས་དང་ནམ་མཁའ་རི་རབ་དང་བཅས་པ་རྣམས། ཡན་མན་གནས་འགྱུར་ཞིང་གོ་ལྡོག་ཏུ་འགྱུར་བ་དང་། ཉི་ཟླ་ཐང་དུ་ལྷུང་བའི་སྐབས་སྲིད་མོད་ཀྱང་། དཀོན་མཆོག་གསུམ་གྱི་བསླུ་བར་མི་སྲིད་ངེས་ཅན་ལགས་པས། དེ་ལྟ་བུའི་ངེས་ཤེས་བརྟན་པ་ཀུན་ཏུ་དོན་ཆེན་པོ་ཡོད་པ་ཡིན་ཞིང་། དེ་ལྟར་ཡིད་ཆེས་ཐོབ་པ་དག་ལ་རྨི་ལམ་ན་ཡང་དཀོན་མཆོག་གསུམ་མཐོངབ་དང་། བག་མེད་ཀྱི་སྤྱོད་པ་དོར་ནས་བག་ཡོད་པ་དྲན་ཞིང་། ལུགས་ཟུང་གི་ཡོན་ཏན་ཀུན་གྱིས་འབྱོར་པ་དང་། ཚེ་རབས་དྲན་ཞིང་བར་དོའི་འཇིགས་པའི་འཕྲང་ལས་བགྲོད་པར་སླ་བ་སོགས་ལས་ཅན་ཀུན་གྱི་དཔུང་གྲོགས་དང་གཉེན་དུ་འགྱུར་བར་ངེས་སོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་དྲུག་པའི་བསྡུས་འགྲེལ་ལོ། ། ལེའུ་བདུན་པ།༈ བྱང་ཆུབ་མཆོག་ཏུ་སེམས་བསྐྱེད་པ་ནི། ཐེག་དམན་ཏེ་ཉན་རང་གི་བསམ་སྤྱོད་རྫིང་བུ་ལྟར་འཁྱིལ་བ་ལ་བྱང་ཆུབ་སེམས་ཀྱི་ཁམས་ཐེག་པ་ཆེན་པོའི་རིགས་ལས་ཉམས་པའི་ཉན་རང་སྐྱེས་བུའི་སེམས་གཉིད་དུ་སོང་བ་ལྟ་བུ། སྟོང་ཉིད་སྙིང་རྗེ་ཟུང་འབྲེལ་དེད་དཔོན་དང་མཚུངས་པའི་མཐུས་སད་པར་བྱས་ནས་ཐེག་པ་ཆེན་པོ་རྒྱ་མཚོ་ལྟ་བུའི་ཀུན་མཁྱེན་རྒྱལ་བའི་གླིང་དུ་འགྲོ་བར་འདོད་པ་ལ་སྦྱིན་པ་ལ་སོགས་ཕ་རོལ་ཕྱིན་པ་རྣམ་པ་ལྔའི། ངོ་བོ་ལུང་དུ་མ་བསྟན་ཞེས་པ་ནི་ཚིག་ཙམ་ལས་དོན་མ་རྟོགས་པ་དག་ལྕགས་ཁམས་ལྟར་ལ་དོན་བྱེད་མ་ནུས་པ་ཐ་མལ་གྱི་ལུས་སུ་རྣམ་པར་གྱུར་པ་ཐབས་དང་ཤེས་རབ་ཡ་མ་བྲལ་བའི་དགེ་བ་གསེར་འགྱུར་གྱི་རྩི་ལྟ་བུས་ཐེབས་པའི་མོད་ལ་ཐེག་ཆེན་དུ་གནས་འགྱུར་ནས་རིན་ཐང་ཆེན་པོར་བྱེད་པའོ། །གང་གི་ཕྱིར་ན་སྙིང་རྗེ་ཐབས་ཀྱི་ཆ་ལས་གྱུར་པའི་དགེ་བའི་རྩ་བ་དང་། དེ་ལ་སྟོང་ཉིད་ཀྱིས་རྒྱས་ཐེབས་པ་ནི་ཤེས་རབ་སྟེ་དེ་གཉིས་ཟུང་དུ་འཇུག་པའི་བྱང་ཆུབ་ཀྱི་སེམས་རིན་པོ་ཆེ་སྦྱོར་བ་ཚད་མེད་པ་རྣམ་པ་བཞིའི་ས་མཁན་ཡིད་ཆེས་ལྡན་པ་ཉིད་ཀྱི་བྱང་ཆུབ་སྨོན་པའི་སེམས་དང་འཇུག་པའི་སེམས་གཉིས་དང་བཅས་པའི་བསླབ་བྱའི་རིམ་པ་རྣམས་སློབ་མ་ལས་སྐྱེ་བ་ཡིན་ཞེས་པའོ། །དེ་ཡང་བྱམས་པའི་ངོ་བོ་ནི། གཞན་ཉེ་རིང་མེད་པའི་སེམས་ཅན་དུ་གྱུར་པ་ཐམས་ཅད་བདེ་བར་འདོད་པ་ཡིན་ཞིང་། དཔེར་ན། སྙིང་ཤིན་ཏུ་ཉེ་ཤིང་ཡིད་ལ་སྡུག་བའི་མ་ཡི་བུ་ལ་བརྩེ་ཞིང་བྱམས་པར་བྱེད་པ་ཇི་བཞིན་དུ། ལུས་དང་ལོངས་སྤྱོད་སོགས་རྣམ་དཀར་གྱི་དགེ་བ་ཀུན་གཅིག་ཏུ་སྤུང་ནས་ཕན་པ་རྒྱ་ཆེ་རྒྱུན་མི་ཆད་པར་འདོགས་ཤིང་ལོག་སྒྲུབ་དང་གནོད་པ་བཟོད་པ་ལ་བསླབ་དགོས་པའོ། །སྙིང་རྗེའི་ངོ་བོ་ནི། གཞན་ཉེ་རིང་མེད་པའི་སེམས་ཅན་ཐམས་ཅད་ཀྱི་སྡུག་བསྔལ་ལ། བཟོད་མི་ཕོད་པའི་སྐྱོ་ཤེས་དང་སྙིང་རྗེའི་སེམས་སྟོབས་དྲག་པོ་དང་། དེ་ལས་ཀྱང་འགྲོ་བ་རིགས་དྲུག་གི་སེམས་ཅན་མཐའ་དག་སྡུག་བསྔལ་རྣམ་པ་སྣ་ཚོགས་པའི་རྒྱུ་འབྲས་ཀྱི་མཐའ་ལ་གཅུར་བར་མཐོང་ནས་མཆི་མ་སློང་བ་ཡིན་ནོ། །དགའ་བའི་ངོ་བོ་ནི། གཞན་ཕྲག་དོག་གི་ཡུལ་དུ་གྱུར་བ་མཐའ་དག་འབྱོར་པ་ལོངས་སྤྱོད་ཕུན་སུམ་ཚོགས་པ་ལ་དགའ་ཞིང་སྤྲོ་བའི་སེམས་འཇུག་པའི་ཐབས་ལ་བརྩོན་ཞིང་ཀུན་ལ་ལེགས་སྨོན་བསྒོམ་ཞིང་ད་ལྟའི་བསོད་ནམས་ནི་རང་རང་གི་སྔོན་བསགས་ཀྱི་མཐུས་ཐོབ་པ་ལ་དགའ་བར་བྱེད་ཅིང་། ཕྱིན་ཆད་དེ་མི་འབྲལ་བར་སྨོན་པ་ཡིན་ནོ། །བཏང་སྙོམས་ངོ་བོ་ནི། བྱམས་སྡང་འདྲལ་བ་སྟེ། གཉེན་བྱམས་པ་པོ་དང་དགྲ་སྡང་བ་གཉིས་ལ་ཆགས་སྡང་བཏང་སྙོམས་པ་ཡིན་ཏེ། རང་ཕྱོགས་དང་གཞན་ཕྱོགས་དེ་གཉིས་ལ་ཕྱོགས་དང་རིས་སུ་ཆད་པ་མ་ཡིན་པར་མཉམ་པ་ཉིད་དུ་བརྡལ་ནས་དགྲ་དང་གཉེན་བར་མའི་འདུ་ཤེས་གསུམ་པོ་ཕན་འདོགས་པའི་ཡུལ་ལ་ཁྱད་པར་ཅི་ཡང་མེད་པར་མཉམ་པར་རབ་ཏུ་སྤྱད་ཅིང་རྣམ་པའི་སྟེ་དམིགས་བཅས་ཟང་ཟིང་དངོས་པོ་མངོན་གྱུར་དུ་ཕན་བཏགས་པ་དང་། དམིགས་མེད་ཅེས་པ་དགེ་སྡིག་གཏོང་ལེན་སོགས་ཀྱི་སྒོ་ནས་ཕན་འདོགས་པ་ལ་རྩིས་སྦྱར་ཞེས་པའོ། །དེ་ལ་ཡང་འདོད་པའི་བྱམས་པ་ནི་རང་ཕྱོགས་ལ་ཤིན་ཏུ་བྱམས་ཤིང་གཞན་ལ་མི་བྱམས་པ་དང་། སེར་སྣའི་སྙིང་རྗེ་ནི། རང་གི་འཁོར་དང་ཆིབས་རྟ་བཀལ་མཛོ་བཞོ་མ་སོགས་ལ་ཤིན་ཏུ་སྙིང་རྗེ་ཡང་གཞན་ལ་དེ་ལྟར་མ་ཡིན་པ་དང་། ང་རྒྱལ་དགའ་བ་ནི། རང་གི་རིགས་རུས་དང་འབྱོར་བ་ལོངས་སྤྱོད་སོགས་ཀྱིས་ཁེངས་ནས་དགའ་བ་དང་། གཏི་མུག་བཏང་སྙོམས་ནི། རང་གཞན་སུ་ལའང་ཕན་བཏགས་དགོས་ཀྱང་དེ་ལྟར་མི་བྱེད་པ་དང་། སྡིག་པ་ལས་བཟློག་ཐུབ་ཀྱང་མི་བཟློག་པ་སོགས་མདོར་ན་བཟང་མེད་ངན་མེད་དུ་གནས་པ་བཞི་སྟེ། དེ་ལྟ་བུའི་ཚད་མེད་རྣམ་བཞི་དམན་པ་ནི་ཐར་པའི་ལམ་མིན་ཞིང་ཚངས་པའི་གནས་པ་བཞིའི་ཕྱོགས་དང་ཉེ་བ་ཡིན་པས་དེ་ལྟ་བུའི་དམིགས་བཅས་རྣམ་པར་སྤང་དགོས་ཞེས་པའོ། །དེ་ཡང་གནས་སྐབས་འདི་ནི་ཞི་བ་མྱང་འདས་ཀྱི་ལམ་དང་འབྲེལ་བའི་དམིགས་པའི་ཡུལ་ནི་ཕྱོགས་དང་རིས་སུ་མ་ཆད་པའི་སེམས་ཅན་ཐམས་ཅད་ཡིན་ཀྱང་དེ་སྒྱུ་མ་དང་རྨི་ལམ་གྱི་སྐབས་བཞིན་སྣང་ལ་རང་བཞིན་མེད་པའི་ཆོས་ཐམས་ཅད་ཀྱི་རྣམ་པའི་བསྒོམ་ཚུལ་སྟོབས་སུ་གྱུར་པ་ལས་བྱང་ཆུབ་སེམས་གཉིས་སྐྱེ་བའི་རྒྱུར་འགྲོ་བའི་ཕྱིར་འཕགས་པ་སྤྱན་རས་གཟིགས་ཀྱི་ཚད་མེད་ཁྱད་ཆོས་བཞི་དང་ལྡན་པའི་ཁྱད་ཆོས་བཞི་རུ་འདོད། ཚངས་པའི་གནས་པ་བཞི་ཡི་དབེན་པར་མཛད་པའོ། །ཞེས་པས་ཚད་མེད་རྣམ་པ་བཞི་པོ་དེ་ཡང་སྒོམ་ཚུལ་གོ་རིམ་ཅན་དང་ངེས་པ་མེད་པར་གསུངས་དེ་ཡང་དམིགས་པའི་ཡུལ་གང་ཡང་རུང་བ་སྐྱེ་བར་སླ་བ་དེ་ལ་གཏད་དགོས་ནའང་། འོན་ཀྱང་བྱམས་པ་བསྒོམ་ཐལ་ཆེས་པས་ཆགས་པའི་རྟེན་དུ་གྱུར་ནའང་། ཉེ་རིང་ཆགས་སྡང་དང་བྲལ་བའི་བཏང་སྙོམས་བསྒོམ་པར་སྤོ་བར་བྱས་ན་ཆགས་པའི་གེགས་ལས་གྲོལ་ཞིང་། བཏང་སྙོམས་བསྒོམ་ཐལ་བས་དེ་ཉིད་རྨོངས་ནས་ལུང་མ་བསྟན་དུ་གྱུར་ན་སྙིང་རྗེ་བསྒོམ་པས་སྡུག་བསྔལ་གྱི་རྒྱུ་འབྲས་འགོག་ལ། སྙིང་རྗེའི་སྟོབས་ཞན་ནས་སེམས་ཅན་རིས་སུ་ཆད་པ་ན། དགའ་བ་བསྒོམ་པར་སྤོས་པས་དམན་པའི་སེམས་སྐྱ྄ེ་བ་འགོག་ཅིང་། དགའ་བ་བསྒོམས་ཐལ་བས་སེམས་རྒོད་ཅིང་སྤྲོས་པའི་ཡུལ་དུ་འགྱུར་ན། བྱམས་པ་སོགས་མཐའ་དབུས་བརྗེས་ནས་སྤེལ་མར་བསྒོམ་པ་གལ་ཆེ་ཞིང་། དེ་ལྟར་བསྒོམས་པས་རྣམ་སྨིན་གྱི་འབྲས་བུ་མངོན་པར་མཐོ་ཞིང་འདོད་པར་ལྷ་མིའི་ལུས་རྟེན་ཐོབ་པ་དང་། དེ་ལ་བརྟེན་ནས་ངེས་ལེགས་ཀྱི་གོ་འཕང་ཐོབ་པ་གཉིས། རྒྱུ་མཐུན་དང་བྱེད་པའི་འབྲས་བུ་དེ་འདྲ་མྱོང་བས་ན་འཕྲལ་ཕུགས་གང་དུའང་། མི་མཐུན་པའི་ཕྱོགས་དང་བྲལ་ཞིང་བདེ་བ་ཐོབ་པ་དང་། དབང་གི་འབྲས་བུ་ཡུལ་ཡིད་དུ་འོང་ཞིང་བདེ་ཞིང་དགའ་བའི་ཡུལ་ལ་སྤྱོད་པའོ། །ཚད་མེད་བཞིའི་བྱེད་པ་བཞི་པོ་སྟོབས་སུ་གྱུར་པས་རང་གཞན་གྱིས་དོན་གཉིས་འབྱོར་བའི་ཡོན་ཏན་སྣ་ཚོགས་འཐོབ་པར་གྱུར་ཏེ། བྱམས་པ་འབྱོངས་བས་འགྲོ་བ་རྣམས་ལ་བུ་ལྟར་བརྩེ་བ་དང་། ཞེ་སྡང་མེད་ཅིང་གཞན་གྱི་ཡིད་དུ་འོང་བ་དང་། བྱམས་པའི་ངོ་བོ་སྤྲོས་པ་ཀུན་དང་བྲལ་ཞིང་སྟོང་ལ་རང་བཞིན་མེད་ཅིང་། མེ་ལོང་ཡེ་ཤེས་ལོངས་སྤྱོད་རྫོགས་པའི་སྐུ་འཐོབ་པའོ། །དེ་བཞིན་དུ་སྙིང་རྗེ་འབྱོངས་བས་གཞན་རྣམས་ཀྱི་སྡུག་བསྔལ་གང་ཡིན་ཀྱང་བདག་གི་ཁུར་དུ་འགྲོ་ཞིང་གཞན་སུ་ལའང་འཚེ་བ་བྲལ་བའི་སེམས་ཐོབ་ཅིང་འདོད་ཆགས་དང་བྲལ་ནས་སྟོང་ཉིད་སྙིང་རྗེ་ཟུང་དུ་འབྲེལ་ཞིང་། སོ་སོར་རྟོགས་པའི་ཡེ་ཤེས་ཆོས་ཀྱི་སྐུ་འགྲུབ་པའོ། །དགའ་བ་འབྱོངས་བས་ཕྲག་དོག་གི་རྩ་བ་ཆོད་ཅིང་ཆོས་སྲིད་འབྱོར་བ་བརྟན་ཞིང་ཞི་བདེ་རྒྱུན་མི་འཆད་ཅིང་སེམས་ལས་སུ་རུང་ནས་བསམ་གཏན་གྱི་དགའ་བ་ལ་དམིགས་པ་མེད་པ་དང་། བྱ་བ་གྲུབ་པའི་ཡེ་ཤེས་སྤྲུལ་པའི་སྐུ་མཆོག་ཐོབ་པའོ། །བཏང་སྙོམས་འབྱོངས་བས་བདག་གཞན་དང་དགྲ་གཉེན་སོགས་ལ་ཆགས་སྡང་གི་རྟོག་ངན་མི་སྐྱེ་ཞིང་མཉམ་པ་ཉིད་དུ་རྟོགས་ཤིང་ང་རྒྱལ་མེད་ཅིང་ཟབ་ཞིའི་རྟོགས་པ་རྒྱུད་ལ་སྐྱེ་བ་དང་། གཏི་མུག་གིས་བསྐྱེད་པའི་རྨོངས་པ་མེད་ཅིང་ཆོས་ཀྱི་དབྱིངས་ཀྱི་ཡེ་ཤེས་དང་ངོ་བོ་ཉིད་སྐུ་མངོན་དུ་འཐོབ་པར་འགྱུར་བའོ། །དེ་ལྟ་བུའི་ཚད་མེད་རྣམ་པ་བཞིའི་ཡོན་ཏན་ནི། རྒྱུ་འབྲས་དཔག་པར་དཀའ་ཞིང་ཤིན་ཏུ་མཐའ་ཡས་པའི་ཕྱིར་བསླུ་བ་མེད་པའོ། །ལམ་ངན་མ་རྟོགས་པའི་འགྲོ་བ་གཞན་རྣམས་དང་། ལོག་པར་རྟོགས་པ་ཕྱི་རོལ་པ་ཕྱོགས་ཙམ་རྟོགས་པ་ཉན་རང་སོགས་ཀྱིི་གྲུབ་མཐའ་སྲིད་པའི་རྒྱུ་ཡིན་ན། སྟོང་ཉིད་སྙིང་རྗེར་འགལ་ལ་མི་བརྟེན་པར། ཐར་པ་དྲི་མེད་ནི་ཐེག་པ་ཆེན་པོ་ཡིན་ཏེ། རྒྱལ་སྲས་དམ་པའི་ལམ་རྨད་དུ་བྱུང་བ་ཡིན་པས་རྙོག་པ་ཞི་བ་ནི། རང་དོན་ཡིད་བྱེད་དང་བྲལ་བ་ཡིན་པས་དེ་ལྟ་བུའི་དགེ་བ་ལ་ཡང་ཡང་བརྩོན་པས་གོམས་པར་འཚལ་ལོ། ཞེས་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བདུན་པའི་བསྡུས་འགྲེལ་ལོ། ། ལེའུ་བརྒྱད་པ།༈ རྙེད་པ་གང་གི་དོན་ལ་ཞེས་རྙེད་པ་དོན་དུ་གཉེར་བས་དེ་ལ་དམིགས་པའི་ཡོན་གྱི་མཆོག་སྟོབས་པ་བཞིན། ཚད་མེད་པ་རྣམ་པ་བཞིའི་རྒྱུ་བྱས་ཏེ། ཐོབ་པའི་འབྲས་བུ་ནི་བྱང་ཆུབ་ཀྱི་སེམས་རིན་པོ་ཆེ་སྨོན་པ་དང་འཇུག་པའི་ཤིང་རྟའི་སྒྱུ་མའི་འཕྲུལ་ལམ་ཐབས་ལ་དྲངས་པའི་ཞི་བདེས་ནི་ཉན་རང་གི་གཞན་དོན་སྤང་པའི་ལྟ་བ་ངན་པ་ཉམས་པར་བྱེད། ཅེས་པའོ། །སྡིག་པ་ནི་ལས་ཏེ་མི་དགེ་བ་བཅུས་བསྐྱེད་པའི་རྒྱུ་རྐྱེན་ལས་གྱུར་པ་དང་། སྡུག་བསྔལ་ནི་ལས་ཀྱི་འབྲས་བུ་འཕང་བའི་འཁོར་བར་རང་དབང་མེད་པར་བཙོན་རར་བཅིངས་པ་རྣམས་ཀྱང་བྱང་ཆུབ་མཆོག་ཏུ་སེམས་བསྐྱེད་པའི་མོད་ལ་སྟེ། དེ་མ་ཐག་ཏུ་རྒྱལ་བའི་སྲས་ཀྱི་མིང་གི་ཅོད་པན་འཐོབ་པ་ལ་རབ་ཏུ་དགའ་ནས་འཇིག་རྟེན་གྱི་བདག་པོར་ལྷ་དང་མིར་བཅས་པས་ཀྱང་བསྟི་སྟང་དུ་བྱེད་པའོ། །ལས་མི་དགེ་བ་དང་ཉོན་མོངས་བརྒྱད་ཁྲི་བཞི་སྟོང་མུན་ནག་འཁྲིགས་པ་ལྟ་བུའི་སྤྲིན་གྱི་བར་ནས་གཏུམ་པའི་གློག་འོད་སྐད་གཅིག་ཙམ་འཁྱུག་ལྟའི། དམ་པ་གསུམ་གྱིས་མ་ཟིན་པའི་དགེ་བ་ལ་སྐབས་འགར་གོམས་པའི་བསོད་ནམས་ཙམ་པོ་བ་སྟེ། སྦྱོར་དངོས་རྗེས་གསུམ་མ་ཚང་བའི་དགེ་བ་གང་ཡང་རུང་བ་ཆུ་ཤིང་བཞིན་དུ་འབྲས་བུའི་རྩ་བ་སྨད་ཅེས་པའོ། །ས་གཞི་བཟང་པོས་བརྟེན་པའི་ཞིང་ས་གང་ཡང་རུང་བ་ལ་དགེ་བའི་ལོ་ཏོག་ཅི་འདྲ་ཞིག་བཏབ་ཀྱང་ཆུད་མི་ཟོས་པར་ཕུན་སུམ་ཚོགས་པ་སྐྱེད་འཁྱུངས་བྱེད་པ་ལྟར། གཞན་ཕན་བྱང་ཆུབ་སེམས་ཀྱི་ལྗོན་ཤིང་སྲིད་པའི་ཁམས་འདི་ན་དགེ་པའི་འབྲས་བུ་མང་ཞིང་ཞི་བའི་བར་དུ་སྟེ། ཐར་པ་དང་རྣམ་མཁྱེན་གྱི་གོ་འཕང་མ་ཐོབ་ཀྱི་བར་དུ་གོང་ནས་གོང་དུ་འཕེལ་བར་འགྱུར་ཞེས་པའོ། །ལས་དང་ཉོན་མོངས་པ་འདུ་བར་བྱེད་པའི་སྡུག་བསྔལ་ཀུན་གྱི་སྣོད་དུ་གྱུར་པ་ལྟ་བུ་ནི། འཁོར་བའི་རྒྱ་མཚོ་ཉོན་མོངས་བརྒྱད་ཁྲི་བཞི་སྟོང་གི་རྣམ་རྟོག་རྒྱུན་ཆད་མེད་པའི་རྦ་རླབས་གཡོ་བ་ཅན་དེ་ནི་སེམས་ཅན་རྣམས་ཀྱི་སྡོད་ཡུལ་གྱི་ཁྱིམ་ལྟར་རབ་ཏུ་བཟུང་བ་ལས་གདོན་པར་བྱེད་པའི་སྙིང་སྟོབས་ཆེན་པོ་ནི་བྱང་ཆུབ་མཆོག་ཏུ་སེམས་བསྐྱེད་པ་ཡིན་ཏེ། གང་ལ་རང་དོན་ཡིད་བྱེད་ཀྱི་སེམས་པ་ཡོད་མ་ཡིན་ཞིང་། བཀྲེས་པ་ཟས་དང་སྐོམ་པ་ཆུ་ལ་གདུང་བ་བཞིན་དུ། སེམས་ཅན་འབའ་ཞིག་གི་དོན་དུ་རྣམ་མཁྱེན་སངས་རྒྱས་ཀྱི་གོ་འཕང་གཉེར་བ་ལ་བྱང་ཆུབ་ཀྱི་སེམས་ཞེས་གྲགས། དེའང་འབྲས་བུར་དམ་བཅའ་བ་སྨོན་པའི་སེམས་བསྐྱེད་ཡིན་ཏེ། བདག་གིས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བགྱིའོ་བསྙམ་པའི་འབྲས་བུར་དམ་བཅའ་བ་ཡིན་ཞིང་། དེའི་བསླབ་བྱ་ནི་བདག་གཞན་མཉམ་པ་སྟེ། ཕན་ཚུན་གཉིས་ཀ་གང་གིས་ཀྱང་བདེ་བ་འདོད། སྡུག་བསྔལ་མི་འདོད་པ་མཉམ་བཞིན་དེའི་དོན་ལ་གོམས་པར་བྱེད་པ་དང་། བརྗེ་བ་ནི། བདག་དགེ་མ་ལུས་འགྲོ་ལ་གཏོང་ཞིང་། འགྲོ་བའི་སྡུག་བསྔལ་བདག་ཉིད་ཀྱིས་ལེན་པ་དང་། བདག་བས་གཞན་གཅེས་ནི། བདག་ངན་སོང་གསུམ་སོགས་སྡུག་བསྔལ་གྱི་གནས་གང་དུ་གནས་དགོས་ཀྱང་སེམས་ཅན་ཐམས་ཅད་ཀྱི་སྡུག་བསྔལ་རང་ཐོག་ཏུ་སྨིན་པར་ཤོག་ཅིག་བསམ་པ་གསུམ་དུ་བཞག་པའང་། བསླབ་པ་མདོར་བསྡུས་ཡིན་གྱི་དེའི་ངོ་བོ་བྱམས་པ་ལ་སོགས་ཚད་མེད་བཞི་ལ་ཡང་དག་པར་གནས་པ་ཡིན་ནོ། །རྒྱུ་ལ་དམ་བཅའ་བྱེད་པ་ནི་འཇུག་པ་བྱང་ཆུབ་མཆོག་ཏུ་སེམས་བསྐྱེད་པ་ཡིན་ཏེ། དེའི་བསླབ་བྱ་ཕ་རོལ་དུ་ཕྱིན་པ་དྲུག་ཡིན་ལ་སྤྱོད་ཡུལ་ཡོངས་སུ་དག་པ་རྣམས་ལ་བསྟེན་པ་ཡིན་ཏེ། དབྱེ་བའི་སྒོ་ནས་སོ་སྐྱེས་དང་། འཕགས་པའི་སེམས་བསྐྱེད་གཉིས་དང་ཚུལ་ཁྲིམས་གསུམ་གྱི་བསླབ་པ་དང་། ཏིང་ངེ་འཛིན་གྱི་བསླབ་པ་དང་། ཤེས་རབ་ཀྱི་བསླབ་པ་སྟེ། བསླབ་པ་གསུམ་ལ་ལྟོས་པའི་སེམས་བསྐྱེད་གསུམ་ཡོད་པ་ལས། ཁྱད་པར་ཚོགས་སྦྱོར་གྱི་ལམ་ན་མོས་པས་སྤྱོད་པའི་སེམས་བསྐྱེད། དང་པོའི་ས་ནས་བདུན་པའི་བར་ལྷག་བསམ་རྣམ་དག་གི་སེམས་བསྐྱེད། དག་པ་གསུམ་ན་རྣམ་པར་སྨིན་པའི་སེམས་བསྐྱེད་དང་། སངས་རྒྱས་ས་ན་སྒྲིབ་པ་སྤངས་པའི་སེམས་བསྐྱེད་དེེ་བཞི། དེ་བཞིན་ཚོགས་ལམ་དང་། སྦྱོར་ལམ་ མཐོང་ལམ་ བསྒོམ་ལམ་ མི་སློབ་པའི་ལམ་དང་ལྔའི་རྗེས་སུ་འགྲོ་བའི་སེམས་བསྐྱེད་ལྔ། ཕ་རོལ་དུ་ཕྱིན་པ་དྲུག་ལ་ལྟོས་པའི་དེ་སྙེད་གྲངས་ནི་སེམས་བསྐྱེད་རྣམ་པ་དྲུག་སྟེ། ས་མཚམས་དབྱེ་བས་ཉི་ཤུ་རྩ་གཉིས་ནི། འཕགས་པ་བྱམས་པས། དེ་ཡང་ས་གསེར་ཟླ་བ་མེ། གཏེར་དང་རིན་ཆེན་འབྱུང་གནས་མཚོ། རྡོ་རྗེ་རི་སྨན་བཤེས་གཉེན་དང་། ཡིད་བཞིན་ནོར་བུ་ཉི་མ་གླུ། རྒྱལ་པོ་མཛོད་དང་ལམ་པོ་ཆེ། བཞོན་པ་བཀོད་མའི་ཆུ་དང་ནི། སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །དེ་སོགས་བསམ་པས་སྨོན་པ་དང་འཇུག་པས་ཁྱབ་ལ་འདུ་ཞེས་པའོ། །གང་སུ་ཞིག་རང་ཉིད་ལེགས་པ་དོན་དུ་གཉེར་ནས། རྟག་ཏུ་གཅོད་པ་མེད་པའི་སྒོ་འཕར་ནང་དུ། དུས་རེ་འགའ་ཙམ་མ་ཡིན་པར་སློང་བ་པོའི་ཡིད་ལ་འཁྲུགས་པ་མི་སྟེར་བར་རྒྱུན་དུ་ཚིམ་པར་བྱེད་པ་དེ་ལ་གཏན་པ་མེད་པའི་མཆོད་སྦྱིན་ཞེས་བསྟོད་ཅིང་བསྔགས་པར་འོས་ན་མཐའ་དག་སེམས་ཅན་རྣམས་ཀྱི་དོན་དུ་ཕན་པའི་སྨོན་སེམས་ཐང་ག་ཅིག་སྐྱེས་པ་ཙམ་གྱིས་ཀྱང་། ངན་སོང་གསུམ་གྱི་སྒོ་གཅོད་ཅིང་ལྷ་དང་མིའི་གནས་རིགས་སུ་དགའ་བ་དང་བདེ་བ་བསྟེན་ཅིང་འཕོ་འགྱུར་མེད་པའི་ཡོན་ཏན་ཟད་མི་ཤེས་པ་འཐོབ་ཅིང་། ཁྱད་པར་འཇུག་པའི་ཡོན་ཏན་བསམ་གྱིས་མི་ཁྱབ་ཅིང་མཐའ་ཡས་པ་སྟེ་དངོས་སུ་བྱང་ཆུབ་ཀྱི་སེམས་རིན་པོ་ཆེ་གཉིས་སྦྱོར་བས་ཁྱབ་པའི་ཆོ་ག་ལ། གང་ནས་བཟུང་སྟེ་ཞེས་བྱང་ཆུབ་མཆོག་ཏུ་སེམས་བསྐྱེད་པའི་བསླབ་པ་བླང་བ་དེ་ནས་བཟུང་སྟེ་ནམ་ཡང་ལྡོག་པ་མེད་པའི་སེམས་ཀྱིས་འགྲོ་རྣམས་འཁོར་བ་སྡུག་བསྔལ་གྱི་རྒྱ་མཚོར་སྒྲོལ་བའི་དམ་བཅའ་བར་ཤིན་ཏུ་ཡིད་བརྟན་པ། དེ་ནས་བཟུང་སྟེ་བག་མེད་ཀྱིས་སེམས་ལས་སུ་མི་རུང་བའི་སྐབས་རྣམས་དང་། རྟག་པར་གཉིད་ལོག་ཀྱང་བྱང་ཆུབ་སེམས་ཀྱི་བསོད་ནམས་རྒྱུན་ཆགས་ཞེས་བར་མ་ཆད་པ་ཉིད་དུ་འབྲེལ་བར་འགྱུར་བ། བྱང་ཆུབ་སྤྱོད་པའི་ས་ལས་འཐད་པ་དང་བཅས་བཤད་པ་ལྟར་རོ། །དེའི་ཕན་ཡོན་ནི་བསྐལ་པ་མང་པོའི་ཚོགས་ཀྱང་འདུམ་པར་འགྱུར་བ་དང་། ཕྱུགས་དང་གླང་པོ་ཤིང་རྟ་ཉི་ཟླ་སོགས་ ཞེས་པ་ནི། ལྷ་མའི་ཐེག་པ་པ་དང་། ཉན་རང་གི་ཐེག་པ་པ་དང་། ཐེག་པ་ཆེན་པོ་པ་རྣམས་བློ་སྟོབས་ཀྱི་ཤུགས་ཆེ་ཆུང་གི་ཁྱད་པར་གྱིས་བགྲོད་པའི་བརྟུལ་ཞུགས་མྱུར་བུལ་མཐའ་ཡས་པ་ལྟར་བློ་སྟོབས་ཆེན་པོ་སྟེ། ཐེག་པ་ཆེན་པོ་པས་ཐབས་ཀྱི་རིམ་པ་མཐའ་མ་བཀག་པ་ལ་བརྩོན་བཞིན་ཤེས་རབ་ཀྱི་མཐའ་བཞིི་བརྒྱད་ཀྱི་དྲི་མ་བསལ་ནས་ཉམས་སུ་བླངས་འབྲས་ཀྱིས་བསྐལ་བ་ཆེན་པོ་གྲངས་མེད་པ་གསུམ་མ་རྫོགས་ཀྱི་བར་དུ་སངས་རྒྱས་མི་ཐོབ་ཅེས་དམ་བཅའ་བྱས་པའི་ཐ་ཚིག་འཇིག་པ་ཡིན་ལ། དེ་ཡང་ཕྱུགས་ཀྱི་ཤིང་རྟ་ལྟ་བུས་འགྲོ་བ་དང་། གླང་པོ་ཆེའི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་རྣམས་ནི་བྱང་ཆུབ་ལས་ཕྱིར་ལྡོག་གོ། །ཉི་ཟླ་ལྟ་བུས་འགྲོ་བ་དང་། ཉན་ཐོས་ཀྱི་རྫུ་འཕྲུལ་དང་། དེ་བཞིན་གཤེགས་པའི་རྫུ་འཕྲུལ་ལྟ་བུའི་འགྲོ་བའི་བྱང་ཆུབ་སེམས་དཔའ་རྣམས་ནི་བྱང་ཆུབ་ལས་ཕྱིར་མི་ལྡོག་གོ །ཇི་ལྟར་ས་བོན་གྱི་རིམ་པ་ས་ལ་བཏབ་ཅིང་ལྟུང་བ་བཞིན་དུ་ཁ་ཙམ་གྱི་སེམས་མཆོག་བསྐྱེད་པ་མི་གཙོ་ཞིང་། སྙིང་ཐག་པ་ནས་སྔོན་སྨོན་དུས་བབ་ལྟ་བུས་སེམས་མཆོག་རང་བཞིན་གྱི་སྐྱེས་པ་གཙོ་ཆེ་བ་ཡིན་ཞིང་། དེ་ཡང་སྟོབས་གསུམ་ལས་ནི་བྱང་ཆུབ་ཀྱི་སེམས་སྐྱེས་སླ་བས་སྙིང་རྗེ་ཆེ་བ་དང་། ཚོགས་བསགས་པ་དང་། སྐྱབས་སུ་འགྲོ་བ་སྟེ། བསམ་དང་སྦྱོར་བ་གཉིས་ཡ་མ་བྲལ་བར་ཐེག་ཆེན་གྱི་ལམ་དུ་སོང་བ་རྒྱུའི་སྟོབས་སུ་བཤད་པ་དང་། རྟེན་གྱི་གང་ཟག་ཀྱང་རྣམ་པ་གཉིས་སུ་བསྟན་ཏེ། སོ་སོར་ཐར་པ་རིགས་བདུན་གང་རུང་གི་སྡོམ་ལྡན་ནམ། དཀོན་མཆོག་ཏཱ་ལར་བསམ་པའི་རྟེན་གཙོ་ཆེ་བར་གསུངས་ཕྱིར། དེའི་རྗེས་སུ་ཕྱོགས་པའི་དབུ་མའི་ལམ་སྲོལ་འཇུག་པ་ཡངས་པ་ཡིན་ཏེ། ཚོགས་རྒྱ་ཆེར་བསགས་པ་ནི་བྱང་ཆུབ་ཀྱི་སེམས་ལྷག་པར་སྐྱེ་བའི་ཐབས་མཆོག་ཏུ་གྱུར་པ་ཡིན་ནོ་དེ་ཡང་སངས་རྒྱས་ཀྱི་རྒྱུ་ནི་འཁོར་འདས་ཀུན་ཀྱང་བདེ་བར་གཤེགས་པའི་སྙིང་པོ་ཅན་ཡིན་ཞིང་། དེ་རྟོགས་པའི་ཐབས་སམ་རྐྱེན་ནི་དགེ་བའི་བཤེས་གཉེན་ལ་རབ་ཏུ་བརྟེན་པའི་དོན་ཆེད་ཐོས་བསམ་ཡོངས་ཀྱི་འབྱུང་གནས་ཡིད་བཞིན་ནོར་བུའི་བླ་མ་མཆོག་ནི་མདོ་སྔགས་སྤྱི་དང་བྱང་ཆུབ་སེམས་ཀྱི་ཐུགས་རྒྱུད་ཡོངས་སུ་གང་ཞིང་གཞན་ཕན་ལ་རྟག་ཏུ་བརྩོན་པ་དེས། ཐོག་མཐའ་བར་དུ་དགེ་བའི་ཆོས་རྣམས་དང་མདོ་སྡེ་རྒྱན་དང་སྡོང་པོ་བཀོད་པའི་མདོ་ལས་ལེགས་པར་གསུངས་པའི་བྱང་ཆུབ་སེམས་ཀྱི་ཡོན་ཏན་དཔག་ཡས་བརྗོད་ཅིང་། དེ་ཡང་བྱང་ཆུབ་སེམས་དཔའི་བསླབ་པ་རིན་པོ་ཆེ་བླང་བའི་གནས་དེ་ཉིད་དྲི་བཟངས་ཀྱི་ཆག་ཆག་དང་། སྐྱང་ནུལ་ཏེ་བྱི་དོར་གྱིས་མཛེས་ཤིང་སྡུག་པའི་བཞིན་མདངས་ངོམ་པ་གཞལ་ཡས་ཁང་གནས་ཁང་གང་རུང་བར་གུར་གུམ་སྤོས་ཆུ་སོགས་ཀྱིས་བྲན་པ་དང་བཅས་ཏེ། བསླབ་པ་བླང་བ་པོས་ཀྱང་གདོང་སོགས་ཡན་ལག་དག་པར་བཀྲུ་ཞིང་། དཀོན་མཆོག་གསུམ་འབའ་ཞིག་ཡིད་ལ་སེམས་པའི་ངང་ནས། ཕྱི་ནང་གི་མཆོད་ཚོགས་མཐོང་བ་དང་བརྒྱུད་པ་བཞིན་དུ་སྣ་ཚོགས་ཕྲུ་མ་འདེབས་ལ་ཞེས་མང་པོ་བཤམས་པ་ལ་དགའ་ཞིང་དགོད་པའོ། །དེ་ལྟར་མཎྜལ་གྱི་བཀོད་པ་ཕུན་སུམ་ཚོགས་པར་བྱས་པའི་སྟེང་དུ་དམ་ཚིག་གི་གཟུགས་བརྙན་ཞེས་སྐུ་གསུང་ཐུགས་རྟེན་གྱི་རིགས་མཐའ་དག་དེར་བོས་ནས་ཞེས་གདན་དྲངས་ཤིང་བཞུགས་སུ་གསོལ་བར་བྱས་ནས་སྐུ་གསུམ་རྒྱལ་བའི་ཞིང་ན་བཞུགས་པའི་ཡེ་ཤེས་སེམས་དཔའ་རྣམས་དབྱིངས་ནས་དགུགས་པ་དང་། དམ་ཚིག་གི་རྟེན་ལ་གཞུག་པའི་ཆོ་ག་ནི། མཛའ་གཅུགས་ཀྱི་དུས་བཏབ་པའི་དམ་བཅའ་དྲན་པ་ལས་མྱུར་བས་ཐུགས་རྗེ་འཇུག་པ་བདག་ཁོ་ནར་དགོངས་བཞིན་རྒྱལ་བ་སྲས་དང་བཅས་པ་རྣམས་ཞིང་ཁམས་གཞན་དུ་གཟིགས་པ་ཡོལ་ནས་གནས་འདི་ཁོ་ནར་དགྱེས་ཤིང་བརྩེ་བའོ། །དེ་ལ་དད་པས་སྤྱན་འདྲེན་གྱི་ཡན་ལག་ནི། གང་ཞིག་ལུས་པ་མེད་པ་སྟེ་འཁོར་བའི་གནས་ན་ཡོད་དོ་ཅོག་གི་འགྲོ་བ་སེམས་ཅན་ཐམས་ཅད་ཀྱི་མགོན་སྐྱབས་དང་དཔུང་གཉེན་དུ་གྱུར་ཡང་། བདུད་བཞི་སོགས་ཆོས་ལ་སྡང་བའི་བདུད་རིགས་བྱེ་བ་བསམ་གྱིས་མི་ཁྱབ་པའི་སྡེ་དང་དཔུང་ཚོགས་ཀྱི་དགྲ་རུ་གྱུར་པ། ཇི་ལྟ་སྟེ་དོན་དམ་མཁྱེན་པ་དང་། ཇི་སྙེད་ཀུན་རྫོབ་ཀྱི་ཆོས་ལག་མཐིལ་དུ་རྫས་ཀྱི་དངོས་པོ་བཞག་པ་བཞིན་མི་སྒྲིབ་པར་མཁྱེན་ཅིང་གཟིགས་པའི་བཅོམ་ལྡན་འདས་འཁོར་དང་བཅས་པ་བདག་གིས་སྡུམ་པར་མཆིས་སུ་གསོལ། ཞེས་པ་ནི་གནས་ཁང་འདི་ཉིད་དུ་འབྱོར་པར་མཛད་དུ་གསོལ། ཞེས་སྤྱན་དྲངས་ཤིང་རྒྱན་དང་ཡོ་བྱད་སྟོབས་པ་ནི། ལས་ཀྱིས་རྣམ་པར་འཕྲུལ་པའི་སྤྲུལ་པ་མ་ཡིན་པར་རྒྱལ་བ་སྲས་དང་བཅས་པ་ཁྱེད་རྣམས་འབྱོན་པའི་ཤུལ་ལམ་དུ་བདག་སོགས་སེམས་ཅན་རྣམས་སྒོ་གསུམ་གྱི་དྲི་མ་བཀྲུ་ཕྱིར་སྐུ་ཁྲུས་ཀྱི་ཁང་བུ་བརྩེགས་པ་དྲི་བསུང་ཅན་དང་། ཤེལ་དང་ནོར་བུ་སྣ་ཚོགས་ཀྱི་ས་གཞི་དང་ཀ་བར་ལྡན་ཞིང་། གཡུ་དམར་དང་མུ་ཏིག་གི་བླ་བྲེ་དཔྱངས་ཤིང་མཛེས་པར་བྱས་པ་ཏེ། བདེ་གཤེགས་རིགས་ཀྱི་བུ་མཆོག་ནི། ཉེ་སྲས་བརྒྱད་དང་། བསྐལ་བཟང་གི་སེམས་དཔའ་བཅུ་དྲུག་སོགས་བྱང་ཆུབ་སེམས་དཔའི་ཚོགས་དང་བཅས་པ་ལ་སྤོས་ཆུས་གང་བའི་ནོར་བུ་སྣ་ཚོགས་ཀྱི་བུམ་པ་ནས། ཁྲུས་ཀྱི་རིམ་གྲོ་བགྱིད་པའི་བྱ་བ་ལ་མཁས་པའི་སྨིན་ལེགས་མ་སྟེ། ལྷ་མོ་རིན་པོ་ཆེའི་རྒྱན་ལྡན་རྣམས་ཀྱིས་གླུ་གར་དང་རོལ་མོའི་འགྱུར་བ་འགྲན་པ་ལ་བརྩོན་བཞིན་ཁྲུས་ཀྱི་བྱ་བ་བྱེད་ཅིང་། ཉེ་རེག་ཆོ་ག་མཁས་པའི་རི་དྭགས་མིག་ལྡན་ནི། འཆི་མེད་ནི་གུའི་ཚོགས་ཀྱིས་ཁྲུས་ཀྱིས་དྲི་མ་འདག་པའི་དྲི་ལ་ཕྱིས་དང་སྤོས་མར་གྱིས་བསྐུ་གཉེས་སོགས་སྲི་ཞུས་བྲེལ་ཞིང་། གཡེང་བའང་ཁ་དོག་གཅིག་ཏུ་མི་གནས་ཤིང་དབང་པོའི་མཚོན་ཏེ་རེག་བྱའི་རིགས་འཇའ་ཚོན་དང་མཚུངས་པའི་གོས་རྒྱན་སྣ་ཚོགས་པ་ཐ་མལ་གྱི་ཐགས་སུ་བཏགས་པ་མེད་པའི་ལྷ་རྫས་ཀྱི་རིགས་རྣམས་སྣང་བའི་རྫུ་འཕྲུལ་གྱིས་ཉོ་བར་བགྱིའོ། །དཔག་བསམ་གྱི་ལྗོན་པ་ལས་ལྷ་མིའི་ཡོ་བྱད་རྣམས་འབྱུང་བའི་ཁོངས་སུ་གྱུར་བཞིན་དེས་བཙོང་བའི་པཉྩ་ལི་ཀ་ཞེས་ཁ་དོག་ལྔ་པ་སྟེ་ལྕིིད་ཀྱི་སྐྱོན་མེད་པས་ནོན་པ་སྤངས་པའི་སྲབ་ལ་འཇམ་ཞིང་ཡང་བའི་གོས་དེ་ཉིད་ལ་དྲི་བཟང་དང་སྤོས་ཆུས་བགོས་ཤིང་བྱུགས་པ་དང་། སུས་ཀྱང་རིན་ཐང་དཔག་པར་མི་ནུས་བཞིན་བརྗོད་པ་ལ་ཁྲེལ་བའི་རིན་ཆེན་སྣ་ཚོགས་ཀྱི་རྒྱན་དང་། བྱེ་བྲག་གདུ་བུ་དཔུང་རྒྱན་སྙན་ཆ་ཅོད་པན་ལ་སོགས་པ་འདི་རྣམས་བདག་སོགས་འགྲོ་བའི་བསོད་ནམས་བསག་པའི་ཆེད་དུ་འབུལ་བར་བགྱི་ན་འདོད་པའི་ཡོན་ཏན་སྤངས་བའི་ཐུབ་དབང་འཁོར་དང་བཅས་པ་རྣམས་ཀྱང་བཀྲེན་ལྡན་སྟེ་དབུལ་ཞིང་ཕོངས་པའི་ཉམ་ཐག་པ་རྣམས་ལ་བསོད་ནམས་རྒྱ་ཆེན་པོ་ཐོབ་པའི་སླད་དུ་ཐུགས་རྗེའི་བདག་ཉིད་ཁྱེད་རྣམས་ཀྱིས་བདག་གིར་བཞེས་ཞེས་པའོ། །གཞན་ཡང་འཕགས་པ་འཇིག་རྟེན་དབང་ཕྱུག་ཉེ་བའི་སྲས་ཆེན་བརྒྱད་དང་། ངན་སོང་ཀུན་འདྲེན་ལ་སོགས་པ་བསྐལ་བཟང་གི་སེམས་དཔའ་བཅུ་དྲུག་དང་། ཁྱིམ་པའི་ཚུལ་འཛིན་བའི་བྱང་ཆུབ་སེམས་དཔའ་ཆོས་འཕགས་དང་། རྟག་ཏུ་ངུ་དང་། ལི་ཙཱ་བཱི་དྲི་མ་མེད་པར་གྲགས་པ་ལ་སོགས་པ་ལའང་དབུལ་བར་བགྱིའོ། །སྟོང་གསུམ་གཅིག་ཆར་ཁྱབ་པའི་དྲིའི་བཞོན་པ་ནི་རླུང་ཡིན་ཏེ། དེ་ལ་འཁྱུད་པའི་ཙན་དན་དང་སྤོས་སྣ་ཚོགས་ཀྱི་བསུང་ཞིམ་དྲིས། བསོད་ནམས་བྱེ་བའི་འབྱུང་གནས་སངས་རྒྱས་བཅོམ་ལྡན་འདས་རྣམས་ཀྱི་མཚན་དཔེའི་དཀྱིལ་འཁོར་ནི་སྐུའི་བྱད་དེ་དེ་ཉིད་ནི་གསེར་སྦྱངས་བཞུ་བཏུལ་བྱས་པ་སྟོང་ལས་ལྷག་པའི་དཔལ་ཡོན་ལྡན་པས་གསེར་གཞན་གྱི་བརྟན་པ་འཕྲོག་ཅེས་པས་བསྟོད་བསྔགས་བགྱི་བ་ལ་བྱུགས་པར་བགྱི་ཞེས་པའོ། །བཏང་སྙོམས་ཚད་མེད་ཀྱི་ཡངས་པའི་ཤེལ་གྱི་གཞི་དཔལ་ཡོན་ཕུན་སུམ་ཚོགས་ལ་བྱམས་པ་ཚད་མེད་ཀྱི་པདྨ་གེ་སར་སྟོང་བརྡལ་བར་སྙིང་རྗེ་ཚད་མེད་ཀྱི་ཉི་ཟླ་བཀྲག་ཏུ་འཚེར་བ་བསྟར་བར་དགའ་བ་ཆེན་པོའི་བདག་ཉིད་བཅོམ་ལྡན་འདས་འཁོར་དང་བཅས་པ་བཞུགས་སུ་གསོལ། བབ་ཅོལ་གྱིས་གོམས་པ་ནི་མ་གུས་ཤིང་མ་དད་བཞིན་དུ་སྨྱོན་སྤྱོད་ཀྱི་ཚུལ་མ་ཡིན་པའི་དད་པ་དང་གུས་པས་ལུས་བཏུད་ཀྱི་རྣམ་པས་སྙིང་ཁར་གུས་བཅས་མངོན་རྟོགས་ངོམ་པ་ལ་ནི་ཐལ་མོ་སྦྱར་བར་དུ་མེ་ཏོག་དོག་པས་རབ་ཏུ་བཟུངས་སྙིམ་པའི་སྣོད་ནི་ཐལ་མོའི་ཕྱག་རྒྱ་གའུ་ཆུང་གི་བརྟུལ་ཞུགས་ངོམ་བཞིན་འཛིན་པ་ཡིན། རིག་པ་དང་ཞབས་སུ་ལྡན་པ་སོགས་བདེ་བར་གཤེགས་པ་རྣམས་ཀྱི་ཡོན་ཏན་མཐའ་དག་ནི་ཚང་ཞིང་ཚང་མ་སྟེ་ལྷག་མ་མེད་པར་གནས་ཀྱི་བསྐལ་པ་བཞིན་ནི། གཞན་གང་དུའང་འགྲོ་ལམ་རིང་ལྟ་བའི་དད་པའི་སྐྱིད་མོས་ཚལ་དུ་འོངས་པའི་མོད་ལ་སྐྱོ་ཤས་ཀྱི་སེམས་སློང་བ་མིན་པའི་དད་པའི་བ་སྤུ་གཅིག་ཏུ་གཟེངས་པའོ། །ཟླ་གཞོན་ཞེས་ཟླ་བ་སྤྲིན་བྲལ་ཆུར་སྣང་བ་ཁྲུས་ལ་འཇུག་པའི་རྫིང་བུའི་ནང་དུ་རྨ་བྱའི་བུ་མོའི་ཁྱུ་འཇོ་སྒེག་རོལ་པ་ལྟ་བུའི་ལང་ཚོ་སྟེ། ལུས་ཀྱི་གྲངས་སྙེད་རྡུལ་གྱི་རྣམ་གྲངས་དང་ཤིན་ཏུ་འཁྲུལ་པ་སྐྱེད་བྱེད་ཞེས་གྲངས་གང་མང་འགྲན་པ་ལྟ་བུའི་ཕྱག་གིས་བྲེལ་ཞེས་པའོ། །གཏོང་བའི་ཡན་ལག་རྫོགས་པའི་དངོས་འབྱོར་གྱི་མཆོད་སྦྱིན་གཞི་བསམ་སྦྱོར་བ་མཐར་ཐུག་བཞི་ཀ་རྣམ་པར་དག་པ་དང་། དེས་ཀྱང་མཚོན་པར་དཔེ་མེད་ཡིད་ཀྱིིས་སྤྲུལ་བའི་མཆོད་ཚོགས་བླ་ན་མཆིས་པ་མ་ཡིན་པའི་ཕྱི་ནང་གསང་གསུམ་གྱི་མཆོད་པའི་སྤྲིན་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་ཡོན་ཏན་ནི་འཇིག་རྟེན་གྱི་ཁམས་སུ་མི་ཤོང་བ་ཙམ་ཡིན་ནའང་བདག་གིས་ཀྱང་བླ་ན་མེད་པའི་མཆོད་སྤྲིན་རྒྱ་ཆེན་པོ་སྔགས་དང་ཕྱག་རྒྱ་ཏིང་ངེ་འཛིན་གྱི་བསམ་གྱིས་མི་ཁྱབ་པར་སྤེལ་ནས། དེ་ལ་འགྲན་ནུས་པ་ཕུལ་ན་གོང་གསལ་ལ་ཕྲག་དོག་བགྱིད་པ་ལྟ་བུའོ། །མུ་ཅོར་སྨྲ་བ་ནི་ངག་གི་མི་དགེ་བཞི་ལ་བརྩོན་པའི་ལས་མི་དགེ་བ་དང་བག་ཆགས་བསགས་པའི་སྡིག་སྒྲིབ་བཅས་དགེ་བའི་ལས་ལ་འཇིགས་ནས་གཞན་དུ་བྲོས་པའི་གཟུགས་ནི། མི་དགེའི་ཉེས་བྱས་མཚང་འདོན་མི་བྱེད་པར་སྲིད་པའི་མུན་པ་མུན་ནག་སྟུག་པོ་སྟེ་མ་རིག་པ་གཏི་མུག་གི་ཀླུང་དུ་འཆབ་ཅིང་སྦེད་གསང་བྱེད་པ་ཀུན་ཀྱང་རྟེན་གྱི་སྟོབས་དང་། གཉེན་པོ་ཀུན་ཏུ་སྤྱོད་པའི་སྟོབས་དང་། རྣམ་པར་སུན་འབྱིན་པའི་སྟོབས་དང་། ཉེས་པ་ལྡོག་པའི་སྟོབས་ཏེ། སྟོབས་བཞིའི་ཉིན་བྱེད་འབར་བས་སྦྱང་ཞིང་བཤགས་པའོ། །སྦྱོར་བ་གང་གིས་བདག་ཉིད་ཀྱི་སེམས་མ་འཁྲུགས་བཞིན་དུ་བསམ་པའི་ཁྱད་པར་ནི། གཞན་གྱིས་དགེ་བ་བསྒྲུབ་པ་ལ་དགའ་བ་བསམ་པའི་ཁྱད་པར་གཅིག་གིས་གཞན་དག་གི་རྣམ་དཀར་གྱི་དགེ་ཚོགས་ཡུད་ཙམ་ལ་འཕྲོག་པའི་ཆོམ་རྐུན་གྱི་བརྟུལ་ཞུགས་རྗེས་སུ་ཡིད་རང་བ་ཁོ་ནས་བྱས་པའོ། །ཐར་བ་མེད་པ་ལྟ་བུའི་འཁོར་བའི་སྤྱོད་བ་ནི་མ་དུལ་ཞིང་ལས་དང་ཉོན་མོངས་པའི་སྟོབས་ཀྱིས་རྣམ་པར་སྲ་ཞིང་མཁྲེགས་པ་ཐ་བ་སྟེ་གང་གི་ཀྱང་ཕེད་པར་དཀའ་བ་ལ་གདུལ་ཐབས་བརྟན་པ་བྲལ་བ་ལ་ཆོས་འཁོར་གྱིས་གཞན་དོན་མཐའ་ཡས་ལ་འཇུག་པའི་རྩིབས་རྣོན་ཕྲིན་ལས་སྣ་ཚོགས་ཀྱི་མི་ཁྱུད་འཛིན་པ་དེ་བསྐོར་བར་བསྐུལ་ཞེས་པའོ། །སྔོན་བྱོན་གྱི་རྒྱལ་བ་སྲས་བཅས་ཕལ་མོ་ཆེ་དང་དེ་སྲས་བྱང་ཆུབ་སེམས་དཔའ་རྣམས་ཀྱིས་སྤངས་པར་གྱུར་པའི་སྙིགས་མའི་དུས་ཀྱི་འགྲོ་བ་འདི་རྣམས་ཀྱི་སྡུག་བསྔལ་གནས་སྐབས་ཙམ་གྱིས་བསྟེན་པར་མཐོང་ནས་རྒྱལ་བ་སྲས་བཅས་མྱ་ངན་ལས་འདའ་བ་མིན་པའི་གདན་ཁྲི་ལ་བཞུགས་སུ་གསོལ་བའི་ཆེད་དུ་དངོས་པོ་ཀུན་གྱི་རིན་ཐང་གཅིག་ཏུ་སྤུངས་ནས་གསོལ་བ་གདབ་པ་ལགས་སོ། །བདག་ཏུ་ལྟ་བའི་འཛིན་པ་མ་བྲལ་བཞིན་དུ་དགེ་རྩ་ཅི་ཙམ་བསྐྱེད་ཀྱང་བདག་མེད་ཀྱི་དོན་མ་རྟོགས་པའི་ངར་འཛིན་དང་བཅས་པས་རང་མཐོང་གིས་འདར་བའི་རྣམ་དཀར་དེ་ཡང་སྲིད་པར་ལན་ཅིག་མཐོ་བའི་ཚེ་སྟེ་ཞེས་པ་ནི། བདག་འཛིན་དང་མ་བྲལ་བའི་དེ་ལྟའི་དགེ་བས་ལྷ་མིའི་ལུས་རྟེན་ཙམ་ཞིག་ཐོབ་ཀྱང་འཕྲལ་དུ་དེ་ལས་ཉམས་ནས་སྲིད་པ་འོག་མ་རྣམས་སུ་སྐྱེ་བར་འགྱུར་བ་དེ་ལྟ་ཕན་ངེས་ཀྱི་ཐབས་མཆོག་གྱུར་པ་ནི། བྱང་ཆུབ་བསྔོ་བ་སྟེ་དགེ་བའི་རྩ་བ་གང་ཡིན་ཀྱང་སངས་རྒྱས་པར་བསྔོ་བར་བྱས་ན་ལྕགས་ཀྱི་ཁམས་ཇི་སྙེད་པ་དངུལ་ཆུས་སྦྱོར་བས་གསེར་འགྱུར་རྩིས་ཐེབས་པ་བཞིན་དགེ་ཚོགས་གོང་འཕེལ་དུ་འགྱུར་བ་ཡིན་ལ། ཚུལ་འདི་ནི་ཕྱི་རོལ་པ་དང་ཉན་རང་སོགས་སྟོན་པ་གཞན་གྱི་ལུགས་ལ་མེད་པའོ། །རང་ཉིད་ཀྱི་འབྱོར་བ་དང་ལོངས་སྤྱོད་ལ་ཆོག་ཤེས་ཀྱི་བདུད་རྩིའི་བཏུང་བས་མ་ངོམས་པར་གྱུར་ན། སྐྱེས་བུ་རྣམས་ཀྱི་ཡིད་ལ་མ་བཟུང་བའི་བློས་སྤྲུལ་བར་རློམ་པའི་མཆོད་པའི་སྤྲིན་ཞེས་ངོ་མཚར་དུ་བྱེད་ཀྱང་ཁ་ཚིག་གིས་ཕ་མཐར་འཁྱམས་པ་ཙམ་ལས་དོན་ལག་ཏུ་བླང་རྒྱུའི་མཆོད་པའི་བྱེ་བྲག་གང་ཡང་མེད་པ་ལ་སྐྲག་པར་གྱུར་ནས་བདག་གི་ལུས་འདི་ཡང་ཕངས་པ་ཅུང་ཟད་ཀྱང་མེད་པའི་སེམས་ཀྱིས་རྒྱལ་བ་སྲས་བཅས་ལ་གཏན་དུ་དབུལ་བ་ལའང་དོ་གལ་ཆེན་པོ་བགྱིད་འཚལ་ལོ། དཀོན་མཆོག་གསུམ་གྱི་འབངས་སུ་དམ་བཅས་པའི་བདག་སོགས་དད་ལྡན་གྱི་འགྲོ་བ་སུ་ཡང་རུང་སྟེ་མཆོག་གསུམ་རིན་པོ་ཆེའི་སྐྱབས་གྲིབ་ཚ་དབལ་གྱིས་མི་འཚེ་བར་བསིལ་བའི་ཡོན་ཏན་གྱིས་བསྲིངས་པའི་སོས་ཀའི་མེ་ཏོག་ལང་ཚོའི་འཇོ་སྒེག་ཅན་འདི་ལྟ་བུ་རྣམ་པ་ཀུན་ཏུ་འཁྲུགས་པའི་མངོན་རྟོགས་མ་རུང་ངོམ་པའི་གཤིན་རྗེའི་མདུན་སར་ཡང་ཁྲོ་གཉེར་འཇིག་པའི་རིན་ཐང་དང་ཡོན་ཏན་ཟད་མི་ཤེས་པ་ཡིན་ལ། དེའི་ཕྱིར་ནི་བླུན་རྨོངས་དང་གཏི་མུག་གི་མཐུས་ནོན་པའི་སྡིག་ལྡན་བདག་དང་བདག་འདྲའི་ཚོགས་རྣམས་དྲི་མའི་སྐྱོན་དག་བྱི་དོར་ཤིན་ཏུ་བརྟེན་པའི་དྭངས་ཤེལ་ལྟར་ཡིན་ནའང་བསོད་ནམས་རྙོགས་པ་སྟེ་བསོད་ནམས་མ་ཡིན་པའི་ལས་རྒྱུ་འབྲས་དག་ཅིང་གཙང་མར་བྱེད་པའི་རང་སེམས་དྲི་མེད་ཀྱི་ནང་དུ། བྱང་ཆུབ་མཆོག་ཏུ་སེམས་བསྐྱེད་ཀྱི་ཆོ་གས་ཐོབ་པའི་གཟུགས་བརྙན་གྱི་སྨོན་འཇུག་བྱང་ཆུབ་ཀྱི་སེམས་ཡིན་ཕྱིར་དེ་ངོམ་པར་བྱའོ། །སྒོ་གསུམ་བྱ་བ་བག་མེད་པར་གྱུར་ཏེ་ཉེས་པ་བརྒྱ་ཕྲག་གི་གཡང་སར་ལྷུང་བའི་རིམས་ཀྱིས་ཤིན་ཏུ་བཏབ་པ་ལྟ་བུའི་ནད་ཀྱིས་ཉེས་པ་རྣམས་གསོ་དཔྱད་ཕལ་པ་དག་གི་མདུན་སར་དབུགས་མི་འབྱིན་མོད། སྨན་པ་མཆོག་ནི་མཆོག་གསུམ་ངོ་བོ་བླ་མ་དགེ་བའི་བཤེས་གཉེན་རིན་པོ་ཆེ་ཡིན་ཕྱིར་དེ་ལ་སྐྱབས་སུ་ལྷགས་པར་དོང་སྟེ་ཞེས་པའོ། །མོས་པ་གང་གི་སླད་དུ་ཚོགས་ཞིང་དུ་གྱུར་པ་རྣམས་འདིར་གཤེགས་ཤིང་བཞུགས་སུ་གསོལ་ནས་སེམས་ཅན་ཐམས་ཅད་ཀྱི་ཁམས་ལ་དགོངས་པའི་སྟོན་པ་མཆོག་ནི་ཐེག་པ་ཆེན་པོའི་དགོངས་དོན་འཛིན་པའི་སྐྱེས་བུ་ཆེན་པོ་འབའ་ཞིག་པའི་ཚོགས་བསགས་ཀྱི་ཡུལ་དུ་གྱུར་པ་ཡིན་པའི་ཕྱིར་ཚོགས་ཀྱི་དབུས་ན་མཚན་དཔེའི་མངོན་རྟོགས་ལྷམ་མེར་མཛེས་པ་ལ་སྐྱབས་སུ་འགྲོ་བ་གསུམ་གྱི་གཞི་བཅས་ལ། དགོངས་སུ་གསོལ་བ་ལན་གསུམ་གྱིས་སད་པར་བྱས་ནས་རྒྱལ་བ་སྲས་དང་བཅས་པ་རྣམས་ཀྱི་འགྲོ་བ་རྣམས་ཀྱི་དོན་དུ་བྱང་ཆུབ་མཆོག་ཏུ་ཐུགས་བསྐྱེད་པ་དང་། བྱང་ཆུབ་སེམས་དཔའི་བསླབ་པའི་བརྟུལ་ཞུགས་མཐའ་དག་སྟེ་བྱང་ཆུབ་ཀྱི་སྤྱོད་པ་མ་ལུས་པ་བླང་བ་ཡིན་པར་ངེས་ན་ཉོན་མོངས་པའི་སྒྲིབ་པ་ནད་ཀྱི་ཟུག་རྔུ་ལྟ་བུའི་དུམ་བུ་བཅད་པར་གྱུར་ཡང་ཤེས་སྒྲིབ་ཡུལ་གྱི་རོ་སྟེ་གཟུང་བ་ཆོས་ཀྱི་བདག་དང་། འཛིན་པ་གང་ཟག་གི་བདག་གཉིས་རང་བཞིན་མེད་པར་མ་རྟོགས་པར་དངོས་མཚན་ཅན་དུ་བཟུང་བའི་རོ་ལ་བཅགས་པའི་ཉན་རང་དགྲ་བཅོམ་རྣམས་ཐེག་པ་ཆེན་པོའི་སར་མ་བསྒྲལ་བ་རྣམས་བསྒྲལ་བ་དང་། སྒྲིབ་པ་གཉིས་ཀའི་འཆིང་བས་ཀུན་ནས་དཀྲིགས་ཤིང་དམ་པོར་གྱུར་བའི་ཚངས་པ་ལ་སོགས་པ་སོ་སོའི་སྐྱེ་བོ་ནས་སློབ་པ་འཕགས་པའི་བར་ལ་གནས་པའི་སེམས་ཅན་མ་གྲོལ་བ་རྣམས་གྲོལ་བར་བྱ་བ་དང་། ཤིན་དུ་སྡུག་བསྔལ་བ་ནི་དམྱལ་བ་ཚ་གྲང་ཡི་དྭགས་བཀྲེས་སྐོམ་དུད་འགྲོ་བཀོལ་སྤྱོད་སོགས་ཤིན་ཏུ་མང་ཞིང་བཟོད་པར་དཀའ་བའི་མནར་སྤྱོད་དྲག་པོའི་ཤུགས་རིང་ལས་དབུགས་འབྱིན་ཐོབ་པ་མེད་པའི་ངན་སོང་གསུམ་པོ་དབུགས་འབྱིན་ཆེན་པོ་སྟེ། ལྷ་དང་མིའི་གནས་ལ་སྦྱར་བ་ནི་གོ་འཕང་ལ་བཀོད་པ་དང་། མདོར་དྲིལ་ན་རྟེན་ཅིང་འབྲེལ་འབྱུང་བཅུ་གཉིས་ཀྱི་འཁོར་ལོའི་རྒྱར་ཆུད་པའི་སེམས་ཅན་ཡོད་དོ་ཅོག་སྟེ་སེམས་ཅན་ཐམས་ཅད་མི་གནས་ཡེ་ཤེས་མྱ་ངན་ལས་འདས་པའི་གྲོང་ནི་ཆོས་སྐུའི་ཞིང་ཁམས་དེར་འགོད་བྱེད་ཆོ་ག་སྟེ་བྱང་ཆུབ་སེམས་དཔའི་བསླབ་པ་རིན་པོ་ཆེ་བླང་ཞིང་བཟུང་བའི་བརྗོད་པ་ནི་སྔོན་ཚེ་བྱོན་པའི་དྲང་སྲོང་རྣམས་ཏེ་རྒྱལ་བ་སྲས་བཅས་ལུགས་སྲོལ་འཛིན་པའི་གཞུང་རྣམ་པར་དག་པ་ལ་བསྟེན་པའོ། །བྱང་ཆུབ་སེམས་ཀྱི་བསླབ་པ་ཡིད་བཞིན་ནོར་བུ་འདི་ཉིད་ཐོབ་ཕྱིན་ཆད་རྟག་ཏུ་ཉིན་ལན་གསུམ་དང་མཚན་མོ་ལན་གསུམ་དུ་བྱང་ཆུབ་ཀྱི་སེམས་གཉིས་བསྐྱེད་པ་ལ་བླ་མའི་དྲུང་དུ་བླང་བ་བཞིན་ནན་ཏན་བྱ་ཞིང་འདུན་པའི་རྩེ་ལ་ཆོས་རྣམས་ཀྱི་རྐྱེན་ཏེ་ཕན་ཡོན་ཆགས་པ་ཡིན་པའི་བརྗོད་པ་དང་པོའི་སྨོན་པ་དང་། གཉིས་པའི་འཇུག་པ་དང་། གསུམ་པས་གཉིས་ཀ་བརྟན་པ་འཐོབ་པ་ནི། པཎྜི་ཏ་རྒྱ་མཚོའི་སྤྲིན་གྱིས་བཞེད་པ་བླ་ན་མེད་པའི་ཆོས་སོ། །བྱང་ཆུབ་སེམས་དཔའི་བསླབ་པ་རིན་པོ་ཆེ་འདི་ལྟ་བུ་ནི་སྔོན་ཆད་གཞན་གྱི་དོན་ལ་ཐོབ་པ་ལྟ་ཅི་སྨོས། རང་དོན་ཉིད་དུ་རྨི་བའང་མ་མྱོང་བའི་རིན་ཆེན་སེམས་ཀྱི་ཁྱད་པར་འཕགས་པའི་ངོ་མཚར་གསར་པ་འདིས་དེ་སྔོན་བདག་གི་མི་ལུས་ཐོབ་པ་རང་མཐོང་ཆེན་བྱས་ཀྱང་བྱང་ཆུབ་སེམས་བསྐྱེད་ཀྱི་བསླབ་པ་བླངས་པས་སྲིད་པ་རིན་ཐང་མེད་པར་བྱས་པའོ། །རིགས་ལས་ཉམས་པ་གང་ཞིག་སྟེ། སྔོན་རྒྱལ་བུ་རྐང་འཁྱམས་པ་ཞིག་ཁྲོམ་ཆེན་པོའི་ནང་ནས་སྤྲང་པོའི་གྲལ་དུ་འཁྱམས་པ་སླར་གཞན་གྱི་མཐོང་ཐོས་ལ་བརྟེན་ནས་རྩད་བཅད་པ་སྔོན་གྱི་རྒྱལ་པོའི་ཕྱག་ཏུ་བྱུང་འཕྲལ་ཁྲུས་ཀྱི་ཆོ་གས་ལུས་ཀྱི་མགོ་མཇུག་ཀུན་ཁྲུས་བཀྲུས་ནས་དྲི་བསྲུངས་ཀྱིས་བདུག་ཅིང་རྒྱལ་པོའི་ཁྲི་ལ་མངའ་གསོལ་བྱས་པ་བཞིན་ཆོ༷་སྟེེ་ཞང་པོའི་ཕྱོགས་དང་རིགས་ཀྱི་ཁུངས་རྒྱལ་པོ་ལས་ལྷག་པར་བཙུན་པའི་གནས་ཐོབ་པ་ཇི་བཞིན་དུ་རྒྱལ་བ་ཀུན་གྱི་སྲས་སུ་དུས་དེ་རིང་ནས་གྱུར་པས་བྱང་ཆུབ་སེམས་དཔའི་མིང་གི་ཅོད་པན་ངོ་མཚར་རྨད་དུ་བྱུང་བ་འདི་ལྟ་བུ་ཐོབ་པ་ནི་རྙེད་པའི་མཆོག་ཡང་དག་པ་སྟེ། དེ་ཡང་སྲིད་གསུམ་བདག་པོ་བྱས་དང་ནི་ལྷའི་གཙོ་བོ་ཆེན་པོ་རྣམས་དང་དེ་དག་ཉིད་ཀྱི་དཔལ་དང་འབྱོར་པའི་དབང་ཐང་བྱིན་པ་ལྟ་བུས་གནམ་སྐོས་ཀྱི་རྒྱལ་པོ་ས་དབང་ས་ཆེན་ཆོས་བཞིན་སྐྱོང་བ་སོགས་རྨོངས་པའི་བླ་དགས་དཔྱངས་ལ་དགའ་བར་བྱེད་ན་དེ་དག་ལས་བསམ་གྱིས་མི་ཁྱབ་པའི་སྒོ་ནས་འཕགས་པ་བྱང་ཆུབ་སེམས་དཔའི་གནས་ཐོབ་པ་དེ་རིང་ཙམ་ཡིན་ན་དགའ་བའི་འཁྲི་ཤིང་ས་ལ་འགྱེལ་ནས་སློང་མ་མྱོང་བ་སློང་བ་ལ་ལྷ་རྣམས་ཀྱང་ཕྱོགས་སོ་ཞེས་པ་ལྟ་བུའོ། །འཆི་བདག་གི་བདུད་དཔུང་འཇོམས་པའི་བདུད་རྩི་མི་ཟད་པའི་གཏེར་ལྟ་བུ་དང་། དབུལ་བ་སེལ་བའི་ཡིད་བཞིན་གྱི་ནོར་བུ་རིན་པོ་ཆེ་དང་མཚུངས་ཤིང་། ནད་རྣམས་ཞི་བའི་བདུད་རྩིའི་སྨན་མཆོག་ལྟ་བུ་སྲིད་པའི་ལམ་ནས་ཡུན་རིང་གཤར་བས་ངལ་ཞིང་དུབ་པའི་མགྲོན་པོའི་ངལ་སྟེགས་ཡིན་ཕྱིར་བདག་ནི་དེང་ནས་འགྲོ་བ་སེམས་ཅན་ཐམས་ཅད་ཉེར་འཚོའི་དཔལ་ཡོན་བླ་ན་མེད་པར་གྱུར། །ཞེས་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བརྒྱད་པའི་བསྡུས་འགྲེལ་ལོ། ལེའུ་དགུ་པ།༈ དེ་ཡང་སྔོན་ཆད་ལེགས་པར་མ་བརྟགས་ཤིང་བརླང་པོར་སྤྱོད་པའི་བབ་ཅོལ་གྱིས་བྱང་ཆུབ་སེམས་དཔའི་བསླབ་པའི་དམ་བཅའ་གཏོང་བ་ལའང་ཡིད་གཉིས་ཀྱི་གནས་མཆིས་ན་རྒྱལ་དང་དེ་སྲས་རྣམས་ཀྱི་ཤེས་རབ་ཆེན་པོའི་མཐུས་གདོན་མི་ཟ་བར་བརྟགས་ཤིང་དཔྱད་པས་བླང་བ་དོར་བའི་གནས་གང་གསུངས་པ་དེ་ཉིད་བཏང་བདག་གིས་སེམས་ཅན་ཀུན་བསླུས་པས་མུ་མཐའ་མེད་པའི་ངན་འགྲོ་ནི་ངན་སོང་གསུམ་ཡིན་ཏེ་དེ་དག་རྣམས་སུ་འཁྱམས་པར་འགྱུར་རོ། །དེ་ཕྱིར་སེམས་ཅན་གཅིག་གི་བདེ་དང་སྐྱིད་པའང་བཤིག་ནས་བདག་ཉིད་ཉམས་པའི་ལས་གཞན་གནོད་རྒྱུ་དང་བཅས་པ་མི་བགྱིད་ཅེས་པའོ། །དེ་བཞིན་དུ་བྱང་ཆུབ་སེམས་དཔའི་བསླབ་པ་བླང་བ་ལ་ལྟུང་བ་དང་། བྱང་ཆུབ་སེམས་སྟོབས་གཉིས་ཀར་ལྡན་པ་གང་གིས་འཁོར་བར་རེས་ཀྱི་འདྲེ་ལྡོག་བྱེད་ཅེས་པ་ནི་རེས་འགའ་མཐོ་རིས་གསུམ་དང་། རེས་འགའ་ངན་སོང་གསུམ་སོགས་སུ་སྲིད་པ་བཟུང་དགོས་པ་གང་ཡིན་པ་དེ་ཉིད་བྱང་ཆུབ་སེམས་དཔའི་ས་རྣམས་ཐོབ་པ་ལ་ཡུན་རིང་འཐོག་པར་འགྱུར་ན། ཐེག་པ་ཆེན་པོའི་བསླབ་བྱ་གཏོང་བའི་སྐྱེས་བུ་དེ་ནི་སྨྱོན་པ་མ་རུང་པ་ཡིན། གང་ཞིག་གནོད་པའི་རྒྱུ་འབྲས་མངོན་གྱུར་བ་དང་། ཤུགས་ཀྱི་འཚོ་བ་ཆུང་ངུ་ལའང་འཕྲལ་དུ་རྒོལ་ལན་གྱིས་ཁྲོས་བའི་ང་རྒྱལ་ཤིན་ཏུ་བདོ་བ་རྣམས་ནི་མདའ་མདུང་སོགས་མཚོན་གྱིས་ཆད་པ་བཟོད་པར་བྱས་ནས་དགྲ་ཟླ་དེ་ལ་ཐུབ་ཚོད་ཞིག་དོན་མ་གྲུབ་གྱི་བར་དུ་གདོང་ཕྱིར་ཕྱོགས་པར་མི་བྱེད་ན་དུས་དང་རྣམ་པ་ཀུན་ཏུ་བདག་ལ་དགྲར་གྱུར་པའི་ཉོན་མོངས་པ་དུག་གསུམ་སོགས་བརྒྱད་ཁྲི་བཞི་སྟོང་གི་དམག་དཔུང་སྟོབས་ཆེན་འདི་དང་གཡུལ་སྤྲད་ནས་འཁོན་དུ་བཟུང་བའི་ཆོ་ག་གཉེན་པོ་བསྒོམ་སྟོབས་ཀྱིས་མ་ཞིག་བར་དུ་བསླབ་པ་བསྲུང་བའི་བརྟུལ་ཞུགས་སུ་ཞིག་གཏོང་ཞེས་མི་གཏོང་བར་དམ་བཅས་པའོ། །འཇིག་རྟེན་འདི་ན་ཉོན་མོངས་པའི་བཙོན་རར་བསྡམས་པའི་གང་ཟག་རྣམས་བདག་གི་ཚོད་ཀྱང་རིག་པར་མི་འགྱུར་ན། མཐའ་དག་འགྲོ་བ་དེ་ལས་དབུགས་འབྱིན་ཞིང་། ལས་དང་ཉོན་མོངས་པའི་མཚོ་ལས་འགྲོ་རྣམས་སྒྲོལ་བའི་བརྟན་པ་མི་ཉམས་པའི་ཐེག་པ་ཆེན་པོའི་བརྟུལ་ཞུགས་བྲི་གང་མེད་པ་ག་ལ་ཞིག་ཅེས་བྱང་ཆུབ་སེམས་ཀྱི་བསླབ་སྡོམ་བསྲུང་བ་ཕན་ཡོན་ཤིན་ཏུ་ཆེ་ཡང་གང་ཟག་རྣམས་ལས་དང་སྐལ་བ་དམན་པས་ཉམས་པར་ཉེ་བ་ཡིན་ན་བསླབ་པ་རིན་པོ་ཆེ་རང་སྟོབས་ཀྱིས་ཡང་ཡང་བླང་ཞིང་ཉམས་པ་ཕྱིར་འཆོས་དགོས་པ་དང་། སྒོ་གསུམ་བག་མེད་ཀྱི་སྤྱོད་པ་ནི་ཐ་མལ་བའི་བསམ་སྤྱོད་ཡིན་པས་དེ་ལས་ལྡོག་ཏེ་བག་ཡོད་དང་ཤེས་བཞིན་ལྡན་པའི་ས་གཞི་བཟང་པོ་ལ་བྱང་ཆུབ་སེམས་ཀྱི་མྱུ་གུ་རང་གཞན་གྱི་དོན་གཉིས་འགྲུབ་པའི་ཐབས་བསྐྱེད་སླ་བའི་ཕྱིར་ན། ཇི་ལྟར་བླངས་པའི་བསླབ་པ་མི་ཉམས་པར་བཟུང་ཞིངགནས་པ་འདི་ཡིས་ཉམས་པའི་དྲི་མ་སྦྱོང་བ་དང་། གཞན་ལ་སྤེལ་བའི་ཐབས་ལ་ནན་ཏན་བགྱིད་པར་འཚལ་ལོ། །ཞེས་པའོ། །དེ་ལ་ཡང་ལྟུང་བའི་རབ་ཏུ་དབྱེ་བ་ཉི་ཤུ་ནི། རྒྱལ་པོ་གང་ཞིག་དཀོན་མཆོག་གི་དཀོར་མཆོད་རྟེན་གྱི་རྫས། དགེ་འདུན་གྱི་དཀོར་ཕྲོག་པ་དང་འཕྲོག་ཏུ་བཅུག་པ་ནི་ལྟུང་བ་དང་པོ་དང་། གང་ཡང་ཉན་ཐོས་ཀྱི་རང་ལམ་ནས་ལྡོག་ཏེ་འགོག་ཏུ་འཇུག་པ་དང་། ཐེག་པ་ཆེན་པོ་རང་ལམ་ནས་ལྡོག་ཅིང་འགོག་ཏུ་འཇུག་པ་ནི་གཉིས་པའོ། །གང་ཡང་རབ་བྱུང་གི་རྟགས་དང་ཆོ་ག་རྫོགས་པར་བྱས་ནས་བསླབ་པ་འཆལ་མིན་གང་ཡིན་ཀྱང་རུང་སྟེ། དེའི་ཆོས་གོས་ཕྲོག་ཅིང་ཁྱིམ་དུ་གནས་པར་བྱེད་པའམ། བརྡེག་བཙོག་གམ། ནོར་ཕྲོག་པ་བཙོན་རར་འཇུག་པ་ནི་གསུམ་པའོ། །རྒྱལ་པོ་གང་དག་ཕ་མ་དང་། ཉན་ཐོས་དགྲ་བཅོམ་པ་བསད་པ་དང་། དགེ་འདུན་བར་དབྱེན་བྱེད་པ་དང་སངས་རྒྱས་ཀྱི་སྐུ་ལ་ངན་སེམས་ཀྱི་ཁྲག་འབྱིན་པ་དང་བཞི་པོ་ནི་ལྟུང་བ་བཞི་པའོ། །རྒྱལ་རིགས་གང་དག་རང་ཡང་མི་དགེ་བ་བཅུའི་ལས་ལམ་ཡངདག་པར་བཟུང་བ་དང་གནས་ཤིང་། གཞན་དག་ཀྱང་དེ་ལ་འཇུག་ཅིང་འཛིན་དུ་བཅུག་པ་དང་། ཐེག་པ་གང་ལ་ཡང་ལོག་པར་འཛིན་དུ་བཅུག་པ་སོགས་ལྟུང་བ་ལྔ་པོ་འདི་ནི་རྒྱལ་པོ་ལས་བྱུང་བའི་ལྔའོ། །བློན་པོ་གང་ཡང་མཆོད་རྟེན་གྱིས་རྫས་དང་། ཕྱོགས་བཞིའི་དགེ་འདུན་གྱི་རྫས་འཕྲོག་པ་འདི་ནི་དང་པོ་དང་། བློན་པོ་གང་ཡང་གྲོང་དང་། ལྗོངས་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་འཇོམས་པ་སོགས་དང་བཞི་ནི་གཉིས་པའོ། །གང་ཡང་ཉན་ཐོས་དང་། རང་རྒྱལ་དང་། ཐེག་པ་ཆེན་པོ་རྣམས་སྤོང་ཞིང་འགོག་ལ་བསུབས་པར་བྱེད་པ་འདི་ནི་གསུམ་པའོ། །བློན་པོ་གང་ཡང་བཅོམ་ལྡན་འདས་ཀྱི་རྗེས་སུ་ཞུགས་པའི་རབ་བྱུང་ཚུལ་ཁྲིམས་འཆལ་མིན་གང་ཡང་དེའི་ཆོས་གོས་འཕྲོག་པ་དང་། ཁྱིམ་དུ་གནས་པར་བྱེད་པ་དང་། བཙོན་རར་བཅུག་གམ། ནོར་འཕྲོག་གམ། གསོད་པ་སོགས་ནི་བཞི་པའོ། །བློན་པོ་གང་ཡང་མཚམས་མེད་ལྔ་ལས་གང་རུང་གཅིག་བྱེད་དུ་བཅུག་པ་འདི་ནི་ལྔ་པ་སྟེ། འདི་དག་ནི་བློན་པོ་ལས་བྱུང་བའི་ལྔའོ། །དེ་ཡང་གྲོང་ནི་ཁྱིམ་གཅིག་པ་དང་། ལྗོངས་ནི་མི་རིགས་བཞི་གནས་པ་དང་། གྲོང་ཁྱེར་ནི་བཟོ་སྣ་བཅོ་བརྒྱད་ཡོད་པ་དང་། གྲོང་རྡལ་ནི་ཚོང་པ་མང་པོ་འདུས་དང་། ཡུལ་འཁོར་ནི་ཡུལ་ཙམ་པ་ཀ་ཞེས་པ་ལྟ་བུའོ། །ཕལ་པའི་ལྟུང་བ་བརྒྱད་ནི་སྟོང་པ་ཉིད་ལ་བློོ་མ་སྦྱང་པའི་གང་ཟག་དཀྱུས་མ་དག་ལ་སྟོང་པ་ཉིད་སྒྲ་ཇི་བཞིན་པར་སྟོན་པ་དང་། ཐེག་ཆེན་ལམ་ལ་ཞུགས་པ་གང་ཞིག་དེར་ལྡོག་པའི་ཕྱིར་ཐེག་དམན་ལ་བསྔགས་པ་བརྗོད་ནས་ཐེག་དམན་ལ་སེམས་བསྐྱེད་དུ་འཇུག་པ་དང་། ཉན་ཐོས་པ་གང་ཞིག་སོ་ཐར་ལ་མོས་ཤིང་དོན་དུ་མི་འགྱུར་བཞིན་དུ་ཐེག་ཆེན་གྱི་སྟོང་པས་སྐྲག་ནས་གཉིས་ཀ་མིན་པར་འཆོས་པ་དང་། ལས་དང་པོ་པ་ཐེག་པ་ཆེན་པོར་ལུང་དུ་མ་བསྟན་པའི་གང་ཟག་གང་ཞིག་བློ་བསྒྱུར་ནས་ཐེག་ཆེན་ལ་བསྟོད་ནས་ཉན་རང་གི་ལམ་འདོར་དུ་འཇུག་པ་དང་། རྙེད་བཀུར་གྱིས་དོན་དུ་བདག་ལ་བསྟོད་ཅིང་ཕྲག་དོག་གི་དབང་གིས་གཞན་ལ་སྨོད་པ་དང་། གཞན་མ་དག་གིས་བདག་ཡོན་གནས་བཟང་པོར་མཐོང་སྟེ་བདག་གིས་ཡོན་ཏན་ཟབ་མོ་རྟོགས་སོ་ཞེས་གཞན་མགོ་བསྐོར་བ་དང་། རྒྱལ་པོ་དང་དབང་ཆེན་སོགས་ལ་བཤེས་པར་བྱས་ནས། དགེ་སྦྱོང་གཞན་ལ་འཕྲོག་དོག་བརྡེག་དང་། དཀོན་མཆོག་གི་སྦྱིན་བདག་འཕྲོག་ཅིང་དཀོར་ལ་ཅི་མི་སྙམ་པར་ལོངས་སྤྱོད་པ་དང་། སྤོང་བ་བསམ་གཏན་པའི་ལོངས་སྤྱོད་ལས་ཕྲི་ཞིང་ཕྲོག་ནས་ཁ་ཏོན་པའམ་ཀློག་པ་ལ་སྟེར་ཞིང་ཆོས་བཞིན་སྤྱོད་པའི་རྣལ་འབྱོར་འདོར་དུ་འཇུག་པ་སོགས་བརྒྱད་པོ་ཕལ་པའི་བརྒྱད་ཡིན་ལ། དེའི་སྟེང་དུ་སྨོན་སེམས་འཇུག་སེམས་གཏོང་བ་རྣམས་སྤངས་དགོས་པ་ཡིན། མདོར་དྲིལ་ན་རྨི་ལམ་ནང་དུ་བྱང་ཆུབ་སེམས་དཔའི་བསླབ་པ་དང་འགལ་བའི་སྡིག་པའི་ལས་བྱེད་པ་མཐོང་ན་ཡང་དེ་མ་ཐག་ཏུ་འགྱོད་པ་དང་བཅས་པས་ཕུང་པོ་གསུམ་པ་གདོན་པས་བཤགས་ཤིང་ལྟུང་བ་ལས་ལྡང་ངོ་། །དེ་ཡང་རྟེན་གཞི་སངས་རྒྱས་ཀྱི་གོ་འཕང་ཐོབ་བྱའོ་སྙམ་པའི་འབྲས་བུ་ལ་དམ་བཅའ་བ་སྨོན་སེམས་ཤོར་བ་དང་། འགལ་ཟླ་ནག་པོའི་ཆོས་བཞི་བྱུང་བ་དང། སྨོན་སེམས་སྤོང་རྐྱེན་བྱང་སེམས་བསྲུང་བར་དཀའ་བའི་རྟོག་ངན་ཤར་ནས་བསླབ་པ་ཉན་རང་གི་སྡོམ་པ་ཕུལ་བ་བཞིན་བྱས་པ་དང་གསུམ་དག་ལས། ཐུན་ཚོད་ནི་ཉིན་མཚན་ཆ་དྲུག་ལས་དབྱེ་བས་གང་རུང་ཞིག་ལ་ལྟུང་བ་བྱུང་ན་ཐུན་ཚོད་འོག་མ་ལས་ཐལ་ནས་ལྟུང་ཉམས་ཤོར་ན་འགྱོད་སེམས་ཀྱིས་ནམ་ཐོ་རངས་ལ་བབ་ཚེ་ལངས་ཏེ་ཡན་ལག་ལྔ་ཁྲུས་བྱ་ཞིང་སྐྱ་རེངས་མདུན་དུ་འཕགས་པ་ནམ་མཁའི་སྙིང་པོ་བོས་ནས་ཡན་ལག་བདུན་པས་ལྟུང་བ་ལས་ལྡང་ངོ་། བདག་གི་བདེ་བ་གཞན་ལ་ཡང་དག་པའི་སེམས་ཀྱིས་སྤོ་བ་དང་གཞན་གྱི་སྡུག་བསྔལ་བདག་གིས་ཁུར་བཟོད་པའི་སེམས་ཀྱིས་ལེན། དེ་ལྟའི་དགེ་སྡིག་གཏོང་ལེན་གྱི་སྙིང་སྟོབས་རྨད་དུ་བྱུང་བ་འདུ་བར་བྱེད་ཅིང་། དེ་ལྟར་བུའི་ལྷག་བསམ་དང་བྱང་ཆུབ་བར་དུ་མི་འབྲལ་བའི་སེམས་བསྐྱེད་ཀྱི་ཕྱིར་སྨོན་པའོ། །སྨོན་པའི་བསླབ་བྱ་ནི། བྱམས་པ་སྙིང་རྗེ་དགའ་བ་བཏང་སྙོམས་ཏེ་ཚད་མེད་བཞི་པོ་ལའང་། ཕན་ཐོགས་སོགས་ཀྱི་བྱས་པ་དྲིན་དུ་གཟོ་བ་ལས་བྱམས་པ་སྐྱེ་ཞིང་། བྱམས་པ་ལས་སྙིང་རྗེ་དང་བྱང་ཆུབ་ཀྱི་སེམས་སྐྱེ་བ་ནི་ཚད་མའི་ལུང་གིས་ཡང་དག་པར་གྲུབ་པའོ། །དེ་ལ་མའི་ལྷུམས་ནས་བཙས་མ་ཐག་པའི་སྐྱེས་བུ་བཞིན་གཟུགས་ངན་ཉ་ར་ཉོ་རེ་ལས་འགུལ་བསྐྱོད་མེད་པ་དེ་ག་མའི་པང་པའི་ཁྲུས་ཁང་ལྟར་བྱས་ནས་དེའི་ལུས་ལ་བགོས་པའི་མི་གཙང་བ་མཐའ་དག་ལག་པས་ཉེ་རེག་བྱས་ཤིང་ནུ་ཞོས་བརྙེན་བཀུར་ལུས་ཀྱི་རེག་བྱའི་གཡོགས་བཞིན་བུ་ཆུང་དེ་ཉིད་ཅུང་ཟད་ན་བ་ལས་མའི་བདག་ཉིད་འཆི་བར་འདམས་ཤིང་། སྡིག་པ་དང་སྡུག་བསྔལ་གཏམ་ངན་མཐའ་དག་བསྲན་པར་ནུས་པའི་དྲིན་དང་རི་མ་གྲོ་སོགས་བགྱིས་པའི་དྲིན་ལན་ཁྱད་དུ་གསོད་པར་བྱེད་པ་དག་ཡོད་ན། དེ་ཉིད་ལས་ལོད་པའི་ཆོ་ག་འཁྲུལ་བ་སུ་ཞིག་ཡོད་ཅེས་མེད་པར་བསྟན་པའོ། །ས་འདི་རི་དང་བཅས་པ་བདག་གིས་ཁུར་དགོས་མ་ཡིན་མོད་ཀྱང་ཕན་ཆེན་བཏགས་པའི་དྲིན་ལན་བྱས་པ་མ་གཟོ་བའི་ཁུར་ཆེན་འདི་རེག་ན་ཕུང་པའི་ཁ་ཟས་དུག་ལྡན་གྱིས་བཟའ་བ་ཁོང་དུ་ཟོས་པའི་སྐྱེ་བོ་བག་དང་མི་ལྡན་པ་བཞིན་ནོ། །དེའི་ཕྱིར་ན་ཕ་མཐའ་ཡས་པའི་སེམས་ཅན་ཚད་ལས་འདས་པ་ཀུན་ཀྱང་མ་རུ་གྱུར་ནས་ཕན་མང་དུ་བཏགས་པ་ལ་དམ་པའི་དྲིན་ཞེས་པ་སྟེ། དེ་ལྟར་དྲན་པས་བྱམས་པ་སྙིང་རྫེ་དགའ་བ་བཏང་སྙོམས་སོགས་བཞི་པོ་གོང་ནས་གོང་དུ་འཕེལ་ཞིང་། ཕན་བཏགས་པས་བྱས་པ་ཤེས་པ་དང་། དྲིན་དུ་གཟོ་བའི་སྐྱེས་བུ་གང་ལ་འཕགས་པའི་ནོར་བདུན་གྱིས་བསྙེན་ཅེས་པའོ། །དེ་ལ་ཡང་སྨོན་པ་སེམས་བསྐྱེད་སྟོན་ཀའི་ཟླ་བ་སྤྲིན་བྲལ་གསར་པའི་དཀྱིལ་འཁོར་རྒྱས་པ་ལ། སྒྲ་གཅན་གདོང་བའི་ཐུ་བའི་མི་མཐུན་ཕྱོགས། གཞན་ཕན་བྲལ་བའི་རང་འདོད་ཁོ་ནའི་དབང་དུ་ཤོར་བས་ནག་པོའི་ཆོས་བཞིའི་ཉེས་ཚོགས་རྒྱང་རིང་དུ་བསྐྲད་པར་བྱ་དགོས་པ་ཡིན་ན། དེ་ཡང་མཆོད་པར་འོས་པ་བླ་མ་དང་མཆོད་འོས་གཞན་ཡིན་ཡང་རུང་སྟེ་གཡོ་དང་སྒྱུའི་སྒོ་ནས་བསླུ་བ་དང་། གཞན་མཆོག་དམན་ཕལ་གྱི་མཆོད་སྦྱིན་གྱི་བསོད་ནམས་བསགས་པ་ལ་ཐེ་ཚོམ་བསྐྱེད་ནས་ཟས་ནོར་གང་མང་བཏང་བ་ལ་འགྱོད་པའི་གནས་ལ་སྦྱར་བ་དང་། སྐྱེས་བུ་དམ་པ་གང་སུ་ཡང་རུང་སྟེ་ཡུལ་ཁྱད་པར་བ་རྣམས་ལ་བསྐུར་བ་འདེབས་ཤིངམི་སྙན་སྒྲོགས་པ་དང་། རང་རྒྱུད་གཡོ་དང་ལྡན་ཞིང་དེ་ཉིད་ལ་བརྟེན་པའི་སྒྱུས་སྤྱོད་གཞན་དག་མགོ་བོ་བསྐོར་བ་སྟེ། དེ་ལྟ་བུའི་ཆོས་བཞི་པོ་གང་ཡང་རུང་བ་དང་། ཉམས་སུ་མྱོང་ཞེས་སྨོན་སེམས་ཤོར་པའི་མོད་ལ་འགྱོད་པ་དང་། གཉེན་པོའི་མ་སླེབ་པར་ཐུན་ཆོད་ལས་འདས་ཤིང་ཐལ་བར་གྱུར་ན་དེའི་མོད་ལ་བྱང་ཆུབ་མཆོག་ཏུ་སེམས་བསྐྱེད་ཀྱི་བསླབ་བྱ་སེམས་བསྐྱེད་འཚོར་བ་ཡིན་ན། དེའི་གཉེན་པོར་ཆེ་བ་དཀར་པོའི་ཆོས་བཞི་ནི། སྲོག་ལ་བབས་ཀྱང་བསམ་བཞིན་རྫུན་མི་སྨྲ་བ་དང་། རྒྱལ་སྲས་བྱང་ཆུབ་སེམས་དཔའ་རྣམས་ལ་ཐེག་པ་ཆེན་པོའི་ལམ་སྟོན་པ་ཡིན་པར་གུས་ཤིང་བསྔགས་པ་བརྗོད་པ་དང་། གཡོ་དང་སྒྱུ་ཅུང་ཟད་ཀྱང་མེད་པས་སེམས་ཅན་ཐམས་ཅད་ཀྱི་དོན་བསྒྲུབ་པར་གཉེར་བ་དང་། འགྲོ་བ་མཐའ་དག་བྱང་ཆུབ་སྟེ་སངས་རྒྱས་ཀྱི་ལམ་ལ་དཀྲི་བའོ། །བརྟེན་བྱའི་སྒོ་ནས་བསྲུང་བའི་འདུ་ཤེས་བཞི་བསྒོམ་དགོས་པ་སྟེ། དགེ་བའི་བཤེས་གཉེན་ལ་སངས་རྒྱས་ཀྱི་འདུ་ཤེས་དང་། དེས་བསྟན་པའི་ཆོས་ལ་ལམ་གྱི་འདུ་ཤེས་དང་། དེ་བསྒྲུབ་པའི་དགེ་འདུན་རྣམས་ལ་གྲོགས་ཀྱི་འདུ་ཤེས་དང་། སེམས་ཅན་ཀུན་ལ་བུ་གཅིག་པ་ལྟ་བུའི་འདུ་ཤེས་ཏེ་འདི་དག་རྣམས་ནི་སྨོན་སེམས་བསླབ་བྱ་ཡང་དག་གོ། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ཡོད་པ་ལས། དང་པོ་ནི། སྦྱིན་པ་ནས་ཚུལ་ཁྲིམས་བཟོད་པ། བརྩོན་འགྲུས། བསམ་གཏན་ལྔ་པོ་ནི་རྒྱུ་བསོད་ནམས་དམ་པའི་ཚོགས་ཡིན་ལ། ཕྱི་མ་གཅིག་ནི་ཤེས་རབ་སྟེ། དེ་ཉིད་ཡེ་ཤེས་དམ་པའི་ཚོགས་ཆེན་ཏེ། དེ་ལྟ་བུས་ཐབས་ཤེས་གཉིས་ལ་མ་བསྟེན་པའི་སངས་རྒྱས་འཇིག་རྟེན་འདི་ན་ཡོད་པ་མ་ཡིན་པས། ཐབས་དང་། སྟོབས། སྨོན་ལམ། ཡེ་ཤེས་དང་བཞི་བསྣན་པའི་ཕ་རོལ་ཏུ་ཕྱིན་པ་བཅུ་པོ་རྣམས་བློ་སྟོབས་མཐུ་ཡིས་སྒྲུབ་བྱེད་ཐེག་པ་ཆེན་པའི་ལམ་དུ་ཞུགས་ནས་མཐར་ཕྱིན་པའི་རྒྱལ་སྲས་རྣམ་པ་གསུམ་སྟེ། རང་དོན་སྔོན་དུ་བྱས་ཟིན་ནས་རྗེས་སུ་འགྲོ་བ་རྣམ་སྒྲོལ་བར་འདོད་པ་ལ་སྐྱོ་ངལ་མེད་པ་རྒྱལ་པོ་ལྟ་བུས་འདོད་ཆེན་སེམས་བསྐྱེད་དང་། རང་དང་འགྲོ་བ་རྣམས་སྟབས་གཅིག་གིས་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་བར་འདོད་པ་གྲུ་ བ་ལྟ་བུ་སྟེ་ཡེ་ཤེས་དམ་བའི་སེམས་བསྐྱེད། འཁོར་བར་འཁྱམས་པའི་འགྲོ་བ་རྣམས་སྔོན་དུ་བསྒྲལ་ནས་དེའི་རྗེས་ལ་རང་ཉིད་ཞི་བར་འདོད་པ་སྐྱོང་བྱེད་ལྟ་བུ་ནི་དཔེ་མེད་སེམས་བསྐྱེད་ཡིན་ཏེ། ཉན་ཐོས་ཀྱི་རིགས་ཅན་དབང་པོ་བརྟུལ་པོས་གྲངས་མེད་སུམ་བཅུ་རྩ་གསུམ་ན་སངས་རྒྱས་ཐོབ་པར་འདོད་པ་དང་འབྲིང་པོས་གྲངས་མེད་བདུན་དང་། རྣོན་པོས་གྲངས་མེད་གསུམ་ན་གྲོལ་བ་ཐོབ་པར་འདོད་པ་སོགས་མཚན་ཉིད་ཐེག་པའི་ལུགས་སོ། །ཕ་རོལ་དུ་ཕྱིན་པ་དྲུག་ལས་སྦྱིན་པའི་ངོ་བོ་ནི། དངོས་པོ་གང་ལའང་ཆགས་པ་མེད་པ་སྟེ། དབྱེ་ན་ཆོས་ཀྱི་སྦྱིན་པ་ཆོས་སྦྱོད་བཅུ་དོན་དུ་གཉེར་བའི་རེ་འདོད་སྐོང་བ་དང་། ཟང་ཟིང་ནི་ཆེ་བ་རྟ་གླང་རིན་པོ་ཆེ་མན་ཆད་ཆུང་བ་ཁབ་དང་སྐུད་པ་ཡན་ཆད་དངོས་རྫས་ཆེ་ཆུང་གང་སློང་མོ་བའི་ཡིད་ལ་འདོད་བཞིན་སྟེར་བ། མི་འཇིགས་པའི་སྦྱིན་པའམ་སྐྱབས་ཀྱི་སྦྱིན་པ་ནི། འཕྲལ་དུ་འཇིགས་པ་ཆེན་པོ་བརྒྱད་དང་བཅུ་དྲུག་སོགས་འཇིགས་པ་ཆེ་ཆུང་ཀུན་དང་ཕུགས་སུ་བར་དོ་དང་ངན་སོང་གསུམ་གྱི་འཇིགས་པ་ལས་སྐྱོབས་པ་དང་གསུམ་ལས། དབྱེ་ན། ཟང་ཟིང་ལའང་རྣམ་པ་གསུམ་ཡོད་པ་ཡིན་ཏེ། གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་གསུམ་ཡོད་པ་ལས། གཏོང་བ་ཞེས་བྱ་བ་ནི། ཟས་དང་གོས་དང་ཤིང་རྟ་དང་གླང་པོ་དང་། ཡུལ་ཁམས་སོགས་རང་ལ་གང་དབང་ཚོད་རྣམས་གཞན་ལ་བྱིན་པའོ། །གཏོང་བ་ཆེན་པོ་ནི། སྔོན་རྒྱལ་སྲས་དྲི་མེད་ཀུན་ལྡན་བཞིན་བུ་དང་། བུ་མོ་དང་ཁྱིམ་ཐབས་སོགས་ཆགས་ཞེན་མེད་པའི་སེམས་ཀྱི་གཏོང་བ་ཡིན་པ་དང་། ཤིན་ཏུ་གཏོང་བ་ནི། བྱ་དཀའ་བའི་གནས་ཏེ་མདོར་ན་མགོ་འདོད་པ་ལ་མགོ་དང་། ཡན་ལག་འདོད་པ་ལ་ཡན་ལག་རྣམས་གཏོང་བ་དང་འདི་ནས་ཐོག་མར་སྦྱིན་གཏོང་ལ་གོམས་སུ་འཇུག་པ་རྣམས་ནི། སེར་སྣས་བསྡམས་པའི་སྐྱེས་བུའི་ལག་བ་ནས། གཅིག་ནི་སྦྱིན་པ་སྟེར་མཁན་དང་། དེ་ནས་གཅིག་ཤོས་སློང་མོ་བར་སྦྱིན་པར་བསམ་པའི་སེམས་ཡང་ཡང་སྤོས་པས་ཚོད་མ་ལ་སོགས་བཟའ་བཏུང་གང་ཡང་རུང་བ་ལ་བསྐམ་ཆགས་འཇིག་པ་སྟོབས་སུ་གྱུར་པ་ལ་བསླབ་དགོས་པ་ལགས་ཤིང་། མི་འཇིགས་པའི་སྦྱིན་པ་ནི། གཞན་དག་འཆི་ངེས་པ་རྣམས་ཀྱི་སྲོག་བསྲུང་བ་དང་། །འཇིགས་པའི་ཡུལ་གང་དག་ཅི་རུང་བ་ལས་བསྒྲལ་འདོན་དང་དབུགས་འབྱིན་གྱི་གནས་ལས་འཇིགས་པ་མེད་པ་དགོད་པའོ། །ལུས་སྲོག་བཏང་ཡང་འགྱོད་མེད་ཀྱི་ཞེ་སྡང་མེད་ན་མི་ནུས་བཞིན་དུ་བབ་ཅོལ་ཆོ་གས་རྣམ་པར་མ་དག་པ་དང་སྦྱར་བའི་སྦྱིན་པ་འང་སྨད་པའི་གནས་ཡིན་ཏེ། སྙིང་རྗེའི་བསམ་པ་ཤིན་ཏུ་མ་དག་གི་བར་དུ་ལུས་དང་སྲོག་གཏོང་བ་ནི་བསླབ་པ་ཀུན་ལས་བཏུས་ཉིད་ལས་བཀག་ཡོད་པ་བཞིན་དང་། ཁ་ན་མ་ཐོ་ཞེས་མི་དགེ་བ་བཅུས་ཟས་ནོར་བསྐྲུན་པའི་སྦྱིན་པ་ཡང་། གནས་མིན་སྨད་བའི་གནས་ཤིན་ཏུ་ལོད་པ་སྟེ་སྦྱིན་འབྲས་དོན་མེད་པས་དེ་བས་རང་གི་ཟས་ནོར་གྱི་དངོས་པོ་བདོག་པའི་རིགས་ལ་ཞེན་པ་དང་ཆགས་པ་བཏང་བ་ནི། སྦྱིན་པའི་མཐར་ཐུག་པའི་ཚད་དུ་བཞེད་པའོ། །ཆོས་ཀྱི་སྦྱིན་པ་རྣམ་པ་གསུམ་ཡོད་པ་ལས། ཆོས་སྦྱིན་དངོས་ནི། མོས་པས་སྤྱོད་པ་རྣམས་ལ་ཇི་བཞིན་པ་འདོམས་པར་དཀའ་ན། དེ་ལས་རང་གི་ཉོན་མོངས་པ་བསལ་བའི་ཆོ་ག་དང་། བྱམས་པ་དང་སྙིང་རྗེར་ལྡན་པའི་གསུང་རབ་དག་བཀླགས་པས་རང་གཞན་དཀར་པོའི་ཕྱོགས་ཀྱིས་རྒྱུད་གྲོལ་བའི་སྨོན་ལམ་གདབ་ཅིང་། རང་རྒྱུད་གྲོལ་ནས་འགྲོ་བའི་སྐལ་བ་དང་རང་གཞིན་འཚམས་པས་གཞན་དོན་གཙོ་བོར་བྱ་དགོས་པའོ། །ཚུལ་ཁྲིམས་ཀྱི་ངོ་བོ་ནི་མི་མཐུན་པ་སྡོོམ་པ་ཡིན་ཏེ། དབྱེ་ན་ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་གྱི་དོན་བྱེེད་དེ་རྣམ་པ་གསུམ་དུ་བཤད་པ། སྒོ་གསུམ་གྱི་མི་དགེ་བ་མཐའ་དག་སྡོམ་པ་ནི་ཉེས་སྤྱོད་སྡོམ་པ་དང་། ཕ་རོལ་ཏུ་ཕྱིན་པ་དྲུག་དང་ལྡན་པའི་ངང་ནས་དགེ་ཆོས་སྡུད་པ། སྔོན་མ་གཉིས་ཀྱི་སྒོ་ནས་གཞན་ལ་ཕན་གདག་པ་སེམས་ཅན་དོན་བྱེད་ཡིན་ལ། ནང་གསེས་སོ་སོར་ཐར་པ་ལས་བྱང་ཆུབ་སེམས་དཔའ་ནི་ཁྱད་པར་བཞིའི་སྒོ་ནས་འཕགས་པ་འདི་བཞིན་ཏེ། སོ་སོར་ཐར་པ་གཞན་གནོད་གཞི་དང་བཅས་པ་ལས་ལྡོག་པ་ཙམ་ཡིན་ལ། བྱང་སེམས་གཞན་ལ་གནོད་པ་མི་བྱེད་པ་དེའི་སྟེང་དུ་ཕན་འདོགས་པ་སྣོོན་པ་སྟེ། སོ་ཐར་སྤང་བ་བདུན་བསྡུས་ལུས་དང་ངག་གཙོ་ཆེ་བར་བྱེད། བྱང་སེམས་ཀྱི་ལུས་ངག་ཡིད་གསུམ་གྱི་སྤང་བ་བཅུ་ཀ་གཙོ་བོར་བྱེད་པའོ། །ཁྱད་པར་བསླབ་པའི་གནས་ནི་སོ་སོར་ཐར་པའི་སྐབས་སུ་གཞན་གྱི་དོན་དུ་བཅས་པའི་སྡོམ་བ་མི་འདྲལ་ལ། བྱང་ཆུབ་སེམས་དཔའ་གཞན་གྱི་དོན་དུ་འགྱུར་ན་ལུས་ངག་གཉིས་ཀྱི་མི་དགེ་བ་རྣམ་པ་བདུན་པོ་ཡང་གཞན་དོན་དུ་འགྱུར་བ་དང་། འགྱུར་བར་ཤེས་པ་དང་། རང་གི་དམིགས་བཅས་དམིགས་མེད་ཀྱི་དགེ་ཚོགས་མི་སྒྲིབ་ཅིང་འཕེལ་བའི་གནས་སྐབས་གསུམ་ཞིབ་ཏུ་བརྟགས་ན་གནང་བའི་སྐབས་ཡོད་དེ། ཚོང་དཔོན་སྙིང་སྟོབས་ཆེན་པོས་མི་ནག་མདུང་ཐུང་ཅན་བསྒྲལ་བ་དང་། བྲམ་ཟེ་ཁྱེའུ་སྐར་མ་ཞེས་བྱ་བ་ཚངས་སྤྱོད་ལ་བསྐལ་པ་མང་པོར་བཞུགས་པ་དེ་ཚོང་དཔོན་བུ་མོ་འདོད་པས་གདུང་བ་ལ་བཀྲོལ་པས་བསྐལ་པ་མང་པོའི་ཚོགས་འདུམ་པ་དཔེར་མཚོན་ནས་རྣམ་པའི་ཉེས་པ་དེ་གཉིས་ལྟ་བུ་ཡང་དོན་ལ་དགེ་བ་ཡིན་ཏེ། རྒྱུ་འབྲས་ཀྱི་མཐུ་ཆེ་ཆུང་ཅན་བསམ་པས་བྱས་བའི་ཕྱིར་ན། ཡིད་ཀྱི་གསུམ་པོ་ནི་ཐོག་མཐའ་བར་གསུམ་མི་དགེ་བ་ཁོ་ནའི་ཕྱིར་དེ་ལ་ནི་གནང་པའི་སྐབས་མེད་དོ། །དེ་ལྟ་ནའང་རྒྱལ་སྲས་བྱང་ཆུབ་སེམས་དཔའི་སྡོམ་པ་ལ། རང་དོན་དུ་སངས་རྒྱས་ཐོབ་འདོད་ལ་རེ་བས་ཞི་བདེ་དོན་དུ་གཉེར་བ་དང་། གཞན་དོན་དུ་བྱ་དཀའ་བའི་ལས་རང་གི་ལུས་སྲོག་ལའང་གཅེས་འཕང་མི་བྱེད་པ་སྤངས་ཤིང་། གཞན་གྱི་ཕྱིར་ཕན་པ་ཆེ་ཆུང་གང་ཡང་སེམས་ཞུམ་ནས་མི་བསྒྲུབ་པ་གང་དང་གང་ཡིན་ཀྱང་ལྟུང་བའི་རྒྱུ་རུ་གཅིག་པར་གསུངས་པ་ཡིན་ཞིང་། དང་པོའི་ལས་ཅན་ཐེག་ཆེན་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་བློ་ནི་གོང་ནས་གོང་དུ་སྤྱོད་པ་གཙོ་ཆེ་བས། ཐོག་མར་སོ་ཐར་སྡོམ་པའི་ཚུལ་ཁྲིམས་བླང་བ་དེ། མ་དག་པ་གཞན་ཐེག་ཆེན་རྣམས་གཉིས་བསྲུང་སྡོམ་གཙོ་བོར་གཉེར་ན་བར་ཆད་མང་བས་རབ་ཏུ་བྱུང་བའི་བྱང་ཆུབ་སེམས་དཔའ་ནི་ཁྱད་པར་ཅན་དུ་ཡིན་པར་མདོ་སྡེའི་རྒྱན་ལས་བཤད་ཅེས་པའོ། །བྱང་ཆུབ་སེམས་དཔའ་རང་སའི་ཞེས་ཐེག་པ་ཆེན་པོའི་གཞུང་ཕལ་མོ་ཆེར་སྡོམ་པ་ལ་སོ་སོར་ཐར་པའི་ཁྲིམས་མཚན་ཉིད་པ་ཆོ་གས་གསལ་བ་མེད་ཅིང་། སྡོམ་གསུམ་སོགས་སྦྱངས་བ་སྔོན་དུ་སོང་བའི་སེམས་སྟོབས་ཆེན་པོོ་དག་ནི་བསམ་པའི་རྟེན་གཙོ་སྟེ་ཆོས་རྒྱལ་ཨིནྡྲ་བྷུ་ཏི་བཞིན་ནོ། །གང་ཞིག་ཁྱིམ་པའི་ཚུལ་ཕྱོགས་ལ་བརྟེན་བའི་ཁྱིམ་གནས་ཀྱི་རིགས་རྣམས་ནི་དགེ་བསྙེན་དང་ནི་བསྙེན་གནས་ཀྱི་སྡོམ་པའི་སྟེང་དུ་སྨོན་པ་དང་འཇུག་པའི་བྱང་ཆུབ་སེམས་གཉིས་རྟག་ཏུ་བསྲུང་བ་ལ་དགེ་བསྙེན་བྱང་ཆུབ་སེམས་དཔའ་ཞེས་སུ་གྲགས་ཤིང་རབ་ཏུ་བྱུང་བ་རྣམས་ལ་དགེ་ཚུལ་དང་། དགེ་སློང་དང་། དགེ་སློང་མའི་སྡོམ་བ་གང་བླང་ཞིང་ལྡན་པར་གནས་སྟེང་དུ་སྨོན་པ་དང་འཇུག་པ་གཉིས་བསྲུང་བ་རང་སའི་ཚུལ་ཁྲིམས་ཡིན་ཞེས་སོ། །དབྱེ་ན། དགེ་བསྙེན་ལ་ཡང་རྣམ་པ་ལྔ་ཡིན་ཏེ། སྣ་གཅིག་བསྲུང་བ་ནི། སྲོག་གཅོད་པ་ལྟ་བུ་རྩ་བ་བཞི་གང་ཡང་རུང་བ་གཅིག་སྤང་པ་དང་། དེའི་སྟེང་དུ་མ་བྱིན་ལེན་སྤང་པ་ཕྱོགས་གཅིག་ལྡན་པ་དང་། དེའི་སྟེང་དུ་རྫུན་སྨྲ་སྤང་པ་ཕལ་ཆེར་བསྲུང་བའོ། །དེའི་སྟེང་དུ་འདོད་པའི་ལོག་པར་གཡེམས་པ་ཆ་དང་བཅས་པ་སྤང་ན་ཡོངས་རྫོགས་བསྲུང་བའི་དགེ་བསྙེན་དག་ཏུ་འདོད་པ་ཡིན་ཞིང་། རྩ་བ་བཞི་ཆང་དང་ལྔ་ག་སྤང་པ་ལ། ཚངས་པར་སྤྱོད་པའི་དགེ་བསྙེན་ཞེས་སུ་གྲགས་པ་ཡིན་ལ། རབ་ཏུ་བྱུང་བའི་བསླབ་པའི་གནས་བཅུ་པོ་ལས་གསེར་དངུལ་ལེན་པ་དགེ་བསྙེན་ལ་བུ་སྨད་གསོ་ཕྱིར་གནང་བ་དང་། དེ་སྟེང་གར་དང་ཕྲེང་བ་གཉིས་པོ་མཚང་ཆུང་བའི་གཅིག་ཏུ་བགྲང་བ་ལ། ཡན་ལག་བརྒྱད་པའི་ཁྲིམས་ཞེས་གྲགས་པ། གང་ཞིག་བསྲུང་མཚམས་མེད་པར་ཇི་སྲིད་འཚོ་བའི་བར་རྟག་ཏུ་བསྲུང་བ་དེ་ནི་ཙནྡྲ་གོ་མི་ལྟ་བུའི་དགེ་བསྙེན་ཡིན་ཞིང་། དགེ་ཚུལ་སྲོག་གཅོད་པ་དང་།༡ གཞན་གྱི་ནོར་འཕྲོག་པ་དང་།༢ མི་ཚངས་བ་སྤྱོད་པ་དང་།༣ རྫུན་དང་།༤ བཅོས་པའི་ཆང་ལ་སོགས་དང་།༥ གར་བྱེད་པ་སོགས་དང་།༦ ཕྲེང་བ་རྒྱན་ལྡན་བཅངས་པ་སོགས་དང་།༧ མལ་ས་ཆེན་པོ་བཅོས་ཏེ་མཐོ་བར་བྱེད་པ་དང་།༨ གུང་གཅིག་ཟ་བ་ལས་ལྡོག་ཏེ་ཕྱི་དྲོ་ཡང་ཁ་ཟས་ཟ་བ་དང་།༩ གསེར་དངུལ་ལེན་པ་སོགས་༡༠སྤོང་བ་བསླབ་པའི་གནས་བཅུ་འཛིན་པའི་ཡན་ལག་བརྒྱད་ཀྱི་ཁྲིམས་ལས་ཁྱད་པར་འཕགས་པ་ཡིན་ཞིང་། དགེ་སློབ་མ་ནི་དེ་བཅུ་པོ་དེའི་སྟེང་དུ་སྐྱེས་པ་ལ་རེག་པ་ལ་སོགས་སྤྱོད་བྱེད་བཅུ་གཉིས་ཀྱི་གཉེན་པོ་དང་བཅས་བུད་མེད་རིགས་གང་ཡིན་ཀྱང་ཆགས་པ་སོགས་ཉོན་མོངས་ལ་ཆེ་བའི་ཕྱིར་ན་ལོ་གཉིས་ལ་སོགས་ཐུབ་བམ་མི་ཐུབ་ནན་དུ་བརྟག་དགོས་པ་གལ་ཆེ་ཞིང་། དགེ་སློང་ལ་ཡང་མི་ཚངས་སྤྱོད། སྲོག་གཅོད། མ་བྱིིན་བླངས། རྫུན། རྩ་བའི་ཕམ་པ་བཞི་དག་དང་། ལྷག་མ་བཅུ་གསུམ་པོ་འདི་བྱུང་བར་གྱུར་ན་མལ་སྟན་དང། ཟས་ལ་སོགས་བ། རྒན་པོ་དང་། བར་མ་དང་། གཞོན་ནུའི་རྗེས་ལ་ལྷག་མར་སྤྱོད་པའི་ན་དགེ་འདུན་ལྷག་མའོ། །དེའི་རྒྱུད་ལ་ད་དུང་སྡོམ་པ་རྣམ་དག་གི་ལྷག་ལུས་ཤིང་། དགེ་འདུན་ལ་བརྟེན་ནས་བཅས་འགལ་གྱི་ལྟུང་བ་གང་དག་ལྷག་མའི་མིང་གི་ཕྱིར་བཅོས་ན་དག་ཏུ་རུང་ཡང་། དགེ་འདུན་རྣམས་ཀྱི་གྲལ་གཤམ་ལ་གནས་ཤིང་། བཟའ་བཏུང་གི་ལྷག་མ་ལ་སྤྱོད་པས་དགེ་འདུན་ལྷག་མ་ཞེས་བྱའོ། །དང་པོ་འབྱིན་པའི་ལྷག་མ་ནི། རང་ངམ་གཞན་གྱི་ཡན་ལག་གི་གནས་སུ་འདོད་པའི་བདེ་བ་ཉམས་སུ་མྱོང་ཞིང་ཁུ་བ་འཕོས་པའོ། །གཉིས་པ་ནི་བུད་མེད་ལ་ཆགས་པར་འདོད་པས་དེའི་ལུས་དངོས་སམ་སྐྲ་སོགས་ལུས་ཀྱི་ཆ་ཤས་ལ་བར་དུ་ཆོད་པ་མེད་པར་རེག་པ་ལས་བྱུང་བས་བདེ་བ་ཉམས་སུ་བསྟར་བའོ། །གསུམ་པ་ནི་བརྡའ་འཕྲོད་པའི་བུད་མེད་ལ་ཆགས་སེམས་ཀྱིས་འཁྲིག་ཚིག་རྫེན་པར་སྨྲ་བ་དེས་གོ་བའོ། །བཞི་པ་ནི་ཆགས་སེམས་ཀྱི་བུད་མེད་ལ་འཁྲིག་པ་དོན་དུ་གཉེར་ཕྱིར་བསྙེན་བཀུར་གྱིི་ནང་ནས་བདག་དང་འདོད་པ་བསྟེན་པ་ནི་མཆོག་གོ་ཞེས་སྨྲས་ཕ་རོལ་པོས་གོ་ཞིང་བརྡའ་འཕྲོད་པའོ། །ལྔ་པ་ནི་རང་ལས་གཞན་པའི་ཕོ་མོ་སྤྲད་དུ་རུང་བ་ཕན་ཚུན་རེག་པ་འཕྲོད་འདོད་ཀྱིས་རང་ངམ་བསྐོས་པས་འཕྲིན་གསུམ་གྱི་སྒོ་ནས་སྨྱན་བྱས་ཤིང་དེ་གཉིས་འདུས་ཏེ་དབང་པོ་འཕྲད་པའོ། །དྲུག་པ་ནི་རང་དོན་དུ་ཁང་པ་རྩིག་པར་འདོད་ཅིང་དེ་ལ་ཁྲུ་བཅོ་བརྒྱད་པའི་སྲིད་དང་། ཞིང་ཕྱེད་དངབཅུ་གཅིག་པའི་ཚད་ལས་ལྷག་པའི་ཁང་པ་རང་ངམ་གཞན་ལ་བསྐོས་ཀྱང་རུང་སྟེ་བརྩིག་པས་བསྐོར་ཞིང་ཐོག་ཕུབ་པའོ། །བདུན་པ་ནི། གང་ཟག་བཞིར་ལོངས་པ་ཡན་ཆོད་ཀྱི་དོན་དུ་བརྩིག་པ་སྟེ། གཞན་ལས་འབད་པས་བླངས་པ་དང་། ཚད་ལས་ཐལ་བ་ཡན་ལག་ཏུ་འགྲོ་མི་དགོས་པའི་ཁྱད་པར་རོ། །བརྒྱད་པ་ནི་ཡུལ་དགེ་སློང་ཚངས་པ་མཚུངས་པར་སྤྱོད་པ་ལ་བརྗོད་གཞི་མཐོང་ཐོས་དོགས་གསུམ་མེད་པར་ཕམ་པ་བཞི་གང་རུང་གི་སྒོ་ནས་བཀུར་འདེབས་ཀྱི་ཚིག་མངོན་དུ་བསྒྲག་པ་ཡུལ་གྱིས་གོ་བའོ། །དགུ་བ་ནི་ཡུལ་དགེ་སློང་གཞན་ལ་བསྙད་ཀ་བག་ཙམ་ཡོད་པ་རྒྱུ་མཚན་དུ་བྱས་ནས་ཚིག་ཟུར་གྱི་ཤུགས་ཀྱིས་ཕམ་པའི་སྒོ་ནས་བསྐུར་བ་བཏབ་པ་དེས་གོ་བའོ། །བཅུ་པ་ནི་འདུ་ས་གཅིག་ཏུ་བཅས་ལྡན་དགེ་སློང་གིས་རང་ལས་གཞན་པས་དབྱེ་བྱ་དགེ་འདུན་དུ་ལོངས་བ་གཉིས་ཆོས་མ་ཡིན་པས་ཕན་ཚུན་འབྱེད་པའོ། །བཅུ་གཅིག་པ་ནི་དགེ་སློང་གང་དག་དགེ་འདུན་གྱི་དབྱེན་བྱེད་པ་ལ་ཞུགས་པ་དེ་དང་བསམ་སྦྱོར་མཐུན་པར་བྱས་ནས་བཟློག་བྱེད་ལྔའི་མཐའ་ལ་མ་བཏང་བའོ། །བཅུ་གཉིས་པ་ནི་བུད་མེད་དང་ལྷན་གཅིག་རྩེད་མོ་དང། བཟའ་བཏུང་བྱེད་པ་ལ་སོགས་བསླབ་པ་དང་འགལ་བའི་སྤྱོད་ངན་གྱིས་ཁྱིམ་པ་སུན་འབྱིན་པར་བྱེད་པ་གནས་ནས་བསྐྲོད་དམ་སྐྲོད་བྱེད་ཀྱི་དགེ་འདུན་ལ་འགྲོ་མིན་བཞིའི་བསྐྲོད་ཚིག་གིས་བསྐུར་འདེབས་ལ་ཞུགས་ཤིང་བཟློག་བྱེད་ལྔའི་མཐར་མ་བཏང་བའོ། །བཅུ་གསུམ་པ་ནི་ལྟུང་བ་བྱུང་བ་ལ་གླེང་དྲན་བྱས་ལ་ཆགས་པའི་དགེ་སློང་ལ་དགེ་འདུན་གྱི་ཕྱིར་བཅོས་བྱ་བར་བསྐུལ་བ་ལ། ཁྱེད་ཅག་དགེ་ཡང་རུང་སྡིག་ཀྱང་རུང་ཁོ་བོ་ཅག་ལ་ཅི་ཡང་མ་སྨྲ་ཞིག་ཅེས་བཀའ་བློ་མི་བདེ་བའི་གཞིར་ཞུགས་པ་ཉིད་བཟློག་བྱེད་ལྔ་པའི་མཐའ་མ་མ་བཏང་བ་ནི། དེ་ཡང་བཟློག་བྱེད་ལྔ་ནི། བཞམས་བསྒོ་དང་། དགེ་འདུན་གྱིས་གསོལ་བ་དང་། བརྗོད་པའི་ལས་གསུམ་དང་འབྲེལ་པའོ། །སྤང་ལྟུང་སུམ་ཅུ་ཐམ་པ་ལ་སོགས་པ་ཚིག་བསྡུས་པའི་ལུགས་ཀྱི་གྲངས་ཀ་ཚང་ཙམ་ལས་རྒྱས་པ་གཞུང་དུ་བལྟ་བ་ལས་འདིར་ཡི་གེས་འཇིགས་ནས་བཀྲོལ་བར་མ་ནུས་པ་དང་། དེ་ལས་གཞན་སྐབས་སུ་མ་བབ་མོད། འོན་ཀྱང་ལྟུང་བྱེད་འབའ་ཞིག་དགུ་བཅུ་ཐམ་པ་དང། སོར་བཤགས་སྡེ་བཞི་དང་། ཉེས་བྱས་བརྒྱ་དང་བཅུ་གཉིས་ལ་སོགས་པ་རྣམས་ཆབ་གཅིག་ཏུ་བསྡོམས་པས་ཉིས་བརྒྱ་དང་ལྔ་བཅུ་རྩ་གསུམ་གྱི་རྣམ་གྲངས་དང་། དེ་ལས་ཀྱང་དགེ་སློང་མ་ལ་སུམ་བརྒྱ་དང་དྲུག་ཅུ་རྩ་བཞི་ཡོད་པ་ལས། སོ་སོའི་རྩ་བ་བཞི་བརྒྱད་ཕམ་པ་དང་། ཉེས་བྱས་སྤོམ་པོ་ལ་ཕྱོགས་མཐུན་གྱིས་ཁྱད་པར་ཡོད་པ་ཡིན་ལ། ཕམ་པ་སྡོམ་པ་ལྗོན་ཤིང་རྩ་བ་ནས་བཏོན་པ་ལྟར་གཏོང་བ་ཡིན་པས་ཕྱིན་ཆད་སྡོམ་པ་ཕྱིར་བཅོས་ཀྱི་སོར་ཆུད་རུང་དང་མི་རུང་གི་མཚམས་འཆབ་སེམས་ཏེ། སྡོམ་པ་གང་ཞིག་མངོན་གྱུར་སྒྲོགས་མིན་ལ་སྦེད་བསམ་སྐྱེས་དང་མ་སྐྱེས་དག་ལ་རག་ལས་པའོ། །བསྲུང་བྱ་མི་ཤེས་བཞིན་དུ་སྡོམ་པ་བསྲུང་བར་རློམ་པ་ཉམས་མཚར་ལ། ལྟུང་བ་ཤེས་པ་ཙམ་གྱི་ཉམས་པ་གསོ་བ་དང་། ལྟུང་བ་གསོ་སྦྱོང་སླ་ཞིང་། དེ་ཡང་ལྟུང་བ་འབྱུང་བའི་སྒོ་བཞི་ཡོད་པའི་ངོ་བོ། མི་ཤེས་པ་ཞེས་ཐོགས་མེད་བཞེད་པ་ཡིན་ལ། བསྒྲུབ་པའི་བསླབ་བྱ་ནི། གཞི་གསུམ་ཆོག་ལས་བྱུང་བའོ། །གཞུང་འདི་ན་ཕམ་པ་བཞི་དང་ལྷག་མ་བཅུ་གསུམ་སྟེ་བསྡོམ་པའི་བཅུ་བདུན་མ་གཏོག་པའི། མི་རུང་ལོངས་སྤྱོད་བྱིན་གྱིས་སློབ་པ་ནི། དུས་མ་ཡིན་པའི་ཁ་ཟས་སྤྱོད་དགོས་པར་གྱུར་ན་རང་ཉིད་སྡོད་པ་དེ་ཉིད་སྒྲ་མི་སྙན་གྱི་གླིང་དུ་མོས་པ་དང་། དེ་བཞིན་དུ་ཁྲུས་ལྷག་མ་བྱེད་དགོས་པ་བྱུང་བ་ལ་ནད་པ་ཡིན་པས་འདུ་ཤེས་དང་། མདོག་པོ་མི་འོས་པ་སོགས་གོས་ལྷག་མ་རུང་བ་མ་ཡིན་པའི་བགོ་བ་དཀར་པོ་གྱོན་པ་དང་། ཀོ་ལྤགས་སོགས་འོས་མིན་བཅངས་དགོས་བྱུང་བ་ལ་དབུལ་ཞིང་ཕོངས་པས་ཉམ་ཐག་པར། སྲོག་བསྲུང་པའི་སླད་དུ་གནང་བ་ཡིན་སྙམ་པ་དང་། རིན་པོ་ཆེར་རེག་པ་དཀོན་མཆོག་མཆོད་པ་དང་། སེམས་ཅན་གསོ་བའི་སླད་དུ་གནང་བར་བསྒོམ་དགོས་པ་ཡིན་ལ། དེ་ལ་ཡང་གནང་བ་མེད་ལ་བཀག་པ་མེད་པའི་རིགས་རྣམས་དེ་གཉིས་ཀ་དང་རྗེས་སུ་མཐུན་པར་བརྩི་བ་ཡིན་ནོ། །ཐམས་ཅད་ཡོད་པར་སྨྲ་བ་དང་། ཕར་ཆེར་སྡེ་པ་དང་། གནས་བརྟེན་པ་དང་། མང་པོས་བཀུར་བའི་སྡེ་བ་སྟེ། སྡེ་བ་ཆེན་པོ་དེ་བཞི་ཀའི་བསླབ་པ་ཐམས་ཅད་ལ། སྟོན་པ་ཐམས་ཅད་མཁྱེན་པའི་བཅས་པས་མ་ཁྱབ་པ་མི་སྲིད་པས་ན། བསླབ་པ་ཀུན་ལ་དབང་ཐོབ་བྱེད་པ་ཡིན་ལ། མྱ་ངན་འདས་པར་བསྔོ་བས་ལྷག་པའི་ཚུལ་ཁྲིམས་ཡིན་ཞིང་། གཞན་ལ་ཕན་པས་བསྒྲུབ་པའི་བྱང་ཆུབ་སེམས་དཔའི་སྡོམ་པ་ཡིན་ལ། དབང་བསྐུར་རྣལ་མ་སྟེ་དབང་བཞིའི་རིམ་པ་བླ་མ་ཉམས་མྱོང་ཅན་གྱིས་སྒྲ་ཇི་བཞིན་པ་བསྐུར་བ་ཐོབ་ན་སྔགས་ཀྱི་སྡོམ་པ་ཐོབ་པ་ཡིན་ཏེ། དེ་ལྟར་སྡོམ་པ་གསུམ་ཀ་རྫོགས་ཚེ་བསླབ་བྱ་དང་། ཡོན་ཏན་མཐའ་དག་ཇེ་མང་དུ་སོང་བས་འཕགས་ཤིང་། ངོ་བོ་གཅིག་ལ་ཞེས་སྡོམ་གསུམ་ནང་འཛོམ་བྱུང་དུས་ངོ་བོ་རང་སེམས་ཁོ་ན་ལས་མ་འདས་ཤིང་ལྡོག་པ་སྡོམ་པ་གསུམ་པོ་ཐ་དད་དུ་གང་ཟག་གཅིག་གི་རྒྱུད་ལ་གནས་པ་ཡིན་ཞིང་ནང་འགལ་བྱུང་ན། སོ་ཐར་ལས་བྱང་སེམས་བྱང་སེམས་ལས། སྔགས་སྡོམ་སྟེ་གོང་མ་གཙོ་བོར་བཏོན་པ་ནི་སྔོན་བྱོན་གྱི་མཁས་གྲུབ་རྣམས་ཀྱི་ལུགས་ལ་གྲགས་པ་ཡིན་ཞིང་། འོག་མའི་སོ་ཐར་ལྟར་རྣམ་པ་འགལ་བ་ལྟར་སྣང་ཡང་། གནོད་པ་སྤོངས་དང་། ཕན་འདོགས་པ་གཉིས་དོན་ལ་དགོས་པ་མཐུན་ལ། གང་ཞིག་འགལ་བར་འགྱུར་ན་གནང་བར་མི་སྲིད་ལ། གནང་བར་འགྱུར་ན་འགལ་བར་མི་སྲིད་དེ་ཆོས་ཅན། འདི་ལྟར་ཉོན་ཐོས་སྡོམ་བར་གནས་པ་དག་ལ་ལྟུང་བ་དང་། བྱང་ཆུབ་སེམས་དཔའི་བསླབ་པར་གནས་པ་ལ་སྔོན་མར་མཚུངས་ཤིང་ཕྱོགས་མཐུན་ཉེས་བྱས་སུ་འགྱུར་བའི་མྱོསབྱེད་ནི་གསང་སྔགས་ཀྱི་ཐེག་པའི་དམ་རྫས་སུ་སྤྱོད་པའི་སྐྱེས་བུའི་རྟོག་ཚོགས་སུམ་བརྒྱ་དང་དྲུག་ཅུ་ཞི་ཁྲོའི་ལྷར་ཤར་བས་གཞི་ཆང་དང་བསམ་པ་བཏུང་འདོད་ཀྱི་སེམས་གཉིས་ཀ་གཞན་དུ་འགྱུར་བཞིན་བླང་དོར་གྱི་རྟོག་ངན་དྲུང་ན་མི་གནས་པའི་ཚེ་གང་ཟག་དེ་ཉིད་དགེ་སློང་མ་ཡིན་ཞིང་བྱང་ཆུབ་སེམས་དཔའ་འང་མིན་ཞིང་། ཐབས་ཀྱི་གདམ་པ་དང་བྲལ་བའི་ཆགས་སྤོངས་དང་། ཉོན་མོངས་པའི་མཐུས་ནོན་པའང་མིན་ལ། སྣང་བ་མཐའ་དག་ལྷ་དང་དཀྱིལ་འཁོར་དང་། སྤྱད་པར་བྱ་བའི་དམ་རྫས་བདུད་རྩིའི་རང་བཞིན་དུ་འདུ་ཤེས་གནས་འགྱུར་གང་ལ་སྟེ། གང་ཟག་དེ་ཉིད་ལ་གནང་བ་ཡིན་ཅེས་པའོ། །སོ་སོར་ཐར་པ་དང་། བྱང་ཆུབ་སེམས་དཔའི་དགེ་སློང་དང་ནི་དགེ་འདུན་ལ་བྱིན་པ་ལས། ཡི་དམ་གྱི་དཀྱིལ་འཁོར་ལ་ཕུལ་བས་ཚོགས་ཀྱང་ཡར་ལྡན་དུ་འགྱུར་བའོ། །བསླབ་པའི་ཆ་ཤས་གཞན་རྣམས་ལ་ཡང་དེའི་འགྲེས་སུ་ཤེས་པར་བྱའོ། །འོན་ཀྱང་རང་ལྡོག་མ་འདྲེས་པ་ནི། སོ་ཐར་དང་། བྱང་སེམས། སྔགས་གསུམ་པོ། གང་ལས་བླང་བའི་ཡུལ། གང་གིས་ལེན་པའི་བསམ་པ། ཇི་ལྟར་ལེན་པར་བྱེད་པའི་ཆོ་ག་བཅས་གཞི་མཐུན་པ་མི་སྲིད་ཅིང་མཚན་ཉིད་སོ་སོར་འཛིན་པས་རང་ལྡོག་མ་འདྲེས་པར་ཡོད་དོ། དགག་དགོས་ཚང་བ་ནི། དགག་བྱ་ཉོན་མོངས་པ་དང་། དགོས་པ་དེས་མི་འཆིང་བར་རང་ལམ་སོ་སོར་གཅིག་པའི་ཚུལ། སོ་ཐར་དུ་སྤོང་ བྱང་སེམས་སུ་བསྒྱུར་ སྔགས་སུ་ལམ་དུ་བྱེད་པའོ། །ངོ་བོ་གནས་འགྱུར་ནི་སྔགས་ཀྱི་སྐབས་སུ་གསལ་བའི་ཤེས་ཤིང་། ཡོན་ཏན་ཡར་ལྡན་ནི། སོ་བྱང་གི་བསླབ་བྱ་མཐའ་དག་སྔགས་ཀྱི་དུས་ན་སྤྱི་དང་བྱེ་བྲག་གི་དམ་ཚིག་ཏུ་འདུས་ཤིང་། ཐབས་དང་རྣམ་པར་དག་པའི་ཟིན་པ་ལ་ཤེས་བྱའི་སྟེང་དུ་འགལ་བ་འདུ་བའི་ཉེས་ལྟུང་གི་རྡུལ་ཕྲ་མོ་ཙམ་ཡང་མི་མངའ་བས་ཡོན་ཏན་མཐའ་དག་ཡར་ལྡན་དུ་ཚང་ཞིང་འདུས་པ་ཡིན་ནོ། གནད་ཀྱི་མི་འགལ་བ་ནི། སོ་ཐར་གྱི་ཚེ་རྩ་བཞི་སོགས་དེ་ལུགས་བཞིན་དུ་བསྲུང་བ་དང་། བྱང་སེམས་ཀྱི་ཚེ་གཞན་ཕན་གཙོ་བོར་བྱེད་དགོས་པས་བསྲུང་སྡོམ་ཡང་དེ་ལུགས་དང་། སྔགས་ཀྱི་ཚེ་འཁོར་གསུམ་དག་པ་བསྐྱེད་རྫོགས་ཀྱི་རང་བཞིན་དུ་ཤེས་དགོས་སོ། །དུས་སྐབས་ཀྱི་གང་དང་གང་གཙོ་བོར་སྤྱད་པ་ནི། སྤྱིར་ལས་དང་པོ་པ་ནས་རྣལ་འབྱོར་དབང་ཕྱུག་གི་བར་དུ་རང་ཉམས་ལ་དཔག་པས་སྤྱོད་པ་དུས་ཚོད་དང་འབྲེལ་བར་སྤྱད་དགོས་པ་ཡང་། མདོར་ན་ལས་དང་པོ་པ་དང་། ལམ་ལ་རྣལ་དུ་འབྱོར་བ་དང་། གྲུབ་པ་ཐོབ་པ་ཐམས་ཅད་མཁྱེན་པའི་གནས་སྐབས་དེ་དང་དེ་དག་གི་སྤྱོད་པ་མ་འདྲེས་པར་བླང་དོར་བྱའོ། །གཞན་གྲུབ་པའི་མཐའ་ལ་དཔྱད་པ་ཞུགས་པ་རྣམས་ནི་གནས་འགྱུར་ངོ་བོ་གཅིག་ཏུ་འདོད་པ་དང་། ཅེས་པ་ཡོངས་གྲུབ་ཆེན་པོའི་རྟོགས་པས་རྒྱུད་གྲོལ་བ་ལ་བྱ་ཞིང་གཅིག་ལ་མི་མཐུན་དུ་འདོད་པ་དང་ཞེས་ཤེས་རབ་ཀྱི་དོན་གཅིག་ཏུ་ཡོད་ཀྱང་། འདུ་ཤེས་ཀྱི་ཆ་ནས་གཞི་མི་མཐུན་པར་ཐ་དད་དུ་འདོད་པའོ། །གསུམ་ཀ་རྫས་འགལ་གོང་འཕེལ་དུ་འདོད་པ་དང་ཞེས་པ་ནི། སྡོམ་གསུམ་རྫོགས་པའི་གང་ཟག་དེ་བློའི་རིམ་པ་ལ་སོ་སོར་ཡོད་དོ་སྙམ་བྱེད་ཀྱི་ཤེས་ངོར་རྫས་འགལ་བས་གོང་མའི་ཐབས་ཤེས་ཀྱི་འོག་མའི་སྡོམ་པ་དངོས་པོར་འགལ་བ་ཟིལ་གྱིས་གནོན་པར་མི་ནུས་ཏེ། དམན་སེམས་ཀྱི་བླངས་པའི་སོ་ཐར་དེ་ཉིད་བྱང་སེམས་ཀྱི་ཉེས་སྤྱོད་སྡོམ་པའི་ཚུལ་ཁྲིམས་སུ་གནས་འགྱུར་བ་ཡིན་ལ། གཏོང་ཐོབ་མཚམས་ནས་རྣམ་པར་དབྱེ་བ་དང་། ཞེས་པ་ནི། གནས་དུས་ཀྱི་དགག་བྱ་དམིགས་གསལ་ལ་ངེས་པ་མེད་པ་ལ། ཐམས་ཅད་ནས་ཐམས་ཅད་དུ་ཀུན་ནས་ཀུན་ཏུ་དེ་ལྟར་འདོད་ནས་གོང་མ་ཐོབ་ཚེ་འོག་མ་གཏོང་བའི་ཤེས་བྱེད་དགོད་ན་ནི་སྔགས་ཀྱི་དགེ་སློང་རྡོ་རྗེ་འཛིན་པའང་མི་འབྱུང་ཞིང་དབང་བཞི་མ་རྫོགས་ན་སངས་རྒྱས་མི་ཐོབ་པ་དང་འགལ་ལོ། །དོང་རྩེ་བརྩེགས་བཞིན་མ་འདྲེས་འདོད་པ་དང་ཞེས་དང་པོ་གང་ཟག་གཅིག་གི་རྒྱུ་ཚོགས་ལས་སྐྱེས་པ་བར་དུ་སྡོམ་པ་གསུམ་གྱི་འགལ་བ་ལྟག་མི་སྤྲོད་པ། ཐ་མར་གྲུབ་སྡེ་གཅིག་པ་སྟེ་ཆོས་གསུམ་ཚང་བས་རྫས་ལྡོག་དང་སྔ་ཕྱི་ཐམས་ཅད་གཅིག་པ་མེད་པའི་དབང་དུ་འཐད་དུ་རུང་ངོ་། །ཉི་ཟླ་སྐར་གསུམ་རིམ་ཅན་ཚོགས་པ་ལྟར་ཞེས་པ་ནི། སྐར་མ་འོད་སྣང་ཡང་རང་འོད་མ་ཉམས་པར་ཡོད་པ་དང་། ཉི་ཟླ་གཉིས་ཀྱང་རང་ས་ན་འོད་མ་ཉམས་པར་ཡོད་པ་དེ་ནུས་པས་ཁྱད་ཞུགས་འདོད་པས་སོ། །དེ་ལ་སོགས་པའི་རྣམ་པས་ཁས་བླངས་པ་མཐའ་དག་ཀུན་ཀྱང་། རང་རང་གི་ཆོ་གའི་དུས་ལྟར་རང་ལྡོག་མ་འདྲེས་པ་དང་། བསྲུངས་མཚམས་དུས་ན་དགག་བྱ་དང་། དགོས་བྱ་ཚང་བ་དང་། གནས་འགྱུར་ངོ་བོ་ཡེ་ཤེས་མཐུས་བྱེད་པ་ཡིན་པས། སྤྱིར་བཏང་གནས་འགྱུར་འདོད་པ་དང་། དམིགས་པས་ཡེ་ཤེས་མཐོང་མིན་གྱི་དབྱེ་བསལ་ཕྱེད་པ་ཁྱད་པར་ཡིན། དེ་ཡང་གླེང་གཞི་སྡོམ་གསུམ་གནས་འགྱུར་འདོད་པ་དག་ལ་ཕྱིར་བཅོས་མེད་དེ། སོ་སོར་ཐར་པའི་ངོས་ནས་བྱུང་བའི་ལྟུང་བ་གཅིག་སོ་ཐར་རང་ངོ་ནས་འཆོས་ན་བྱང་སེམས་སུ་གནས་འགྱུར་ཟིན་པས་འགལ་ཞིང་། གོང་མ་གཉིས་ཀྱི་དེས་ནས་འཆོས་ན་དེ་ཉིད་ལའང་ལྟུང་བ་མ་བྱུང་བའི་ཕྱིར་ན་འཆོས་མི་དགོས་ཞེས་སྙོན་ནོ། །སོ་ཐར་ནི་ལུས་ངག་ལས་སྐྱེས་པའི་སྡོམ་པ་གཟུགས་ཅན་ནམ་ཉོན་མོངས་པ་སྤོང་སེམས་རྒྱུན་ཆགས་སུ་ཡོད་པ་དང་། དེའི་བག་ཆགས་ཀྱི་ས་བོན་བདེན་ཞེན་དང་ལྡན་ན་ཉོན་མོངས་པ་བསྒྱུར་བ་དང་། ཐེག་པ་ཆེན་པོའི་ལམ་འཁྱེར་སོགས་ཐབས་ཀྱིས་མ་ཟིན་བར་དུ། ཐེག་པ་ཆེན་པོའི་ལམ་དུ་ཞུགས་ནས་དབང་བསྐུར་ཇི་བཞིན་པར་ནོད་ནའང་། སྡོམ་གསུམ་གནས་འགྱུར་ཐོབ་པའི་རྡོ་རྗེ་འཛིན་པ་མིན་ལ། སྡོམ་པ་དག་པར་བྱེད་པ་ཀུན་སློང་རྣམ་དག་གི་འདུ་ཤེས་དང་། འདུ་ཤེས་དག་པར་བྱེད་པ་ལྷའི་རྣལ་འབྱོར་ཡིན་ལ། དེ་ཉིད་དག་བྱེད་བསྐྱེད་རྫོགས་དབྱེར་མེད་ཀྱི་ཡེ་ཤེས་ལ་གོམས་པར་གྱུར་ན། བཅས་པའི་ལྟུང་བ་ཆོས་ཅན་ནི། གཞན་ལ་བརྟེན་ནས་བླང་དགོས་པས་སྐྱེ་བ་དང་། རྐྱེན་གྱིས་འཇིག་པས་འགྱུར་བ་ཅན་དང་། དེ་གཉིས་པོ་ཡང་རང་རང་གི་མཚན་ཉིད་རྟག་བརྟན་ཅན་དུ་མི་འཛིན་པས་ཐོབ་པ་དང་ཤོར་བ་མེད་ཅིང་། ཐོག་མཐའ་བར་གསུམ་གང་དུའང་མི་འགལ་བར་མི་གནས་པའི་སྡོམ་པའི་ངོ་བོ་ཀུན་རྫོབ་ཡིན་པས་གནས་འགྱུར་གྲུབ་ཟིན་ན། གཞི་སྡོམ་པ་དང་བསམ་པ་གནས་འགྱུར་གཉིས་ཀ་མངོན་གྱུར་ལྡན་ཕྱིར་མོས་པའི་སྤྱོད་པའི་སོ་སོར་ཐར་པ་དང་། བྱང་ཆུབ་སེམས་དཔའ་དང་། སྔགས་ཀྱི་སྡོམ་པ་སྟེ་གསུམ་ལྡན་གྱི་གང་ཟག་ལ། གནས་ན་གསུམ་པོ་བྱེ་བྲག་ཏུ་གནས་ཤིང་། བསྲུང་ན་འཆོལ་བར་བསྲུང་བ་ཡིན་ལ། མ་ཉམས་པར་ལྡན་ན་ཡར་ལྡན་དང་། འཆོལ་ན་གང་ཉམས་པའི་རང་ས་ནས་ཉམས་པ་ཁོལ་བུར་ཕྱུང་ནས་བཤགས་པས་ཕྱིར་བཅོས་གྲུབ་པ་ཡིན་ལ། དོན་ཅིའི་ཕྱིར་ན་ཉེས་པ་བསྐྱེད་རྒྱུར་སོང་ན་གང་ཡང་འགོག་ཅིང་། དགེ་བ་དང་ཡོན་ཏན་བསྐྱེད་པའི་རྒྱུ་རུ་འགྱུར་ན་གནང་བའི་ཕྱིར་དང་། གནང་བ་བཀག་པ་གཉིས་ཀ་དོན་གྱིས་དབྱེ་བ་ལས་ཚིག་གི་ལམ་ན་གནས་པ་མིན་མོད། གང་ཟག་སོ་སོའི་རང་རྒྱུད་དང་འབྲེལ་ནས་གྲུབ་པའོ། །ཕ་རོལ་ཏུ་ཕྱིན་པ་དྲུག་དང་རྒྱུ་བསོད་ནམས་དང་འབྲས་བུ་ཡེ་ཤེས་ཀྱི་ཚོགས་ཆེན་རྣམ་པ་གཉིས་ཀྱི་ཡོན་ཏན་མ་སྐྱེས་པ་སྐྱེད་པར་བྱེད་པ་དང་། སྐྱེས་པ་སྤེལ་བར་བྱེད་པ་ལ་དགེ་བ་ཆོས་སྡུད་ཀྱི་ཚུལ་ཁྲིམས་ཞེས་བྱ་བ་སེམས་ཀྱི་བསླབ་པས་བསྡུས་པ་སྟེ། དེ་ཡང་བྱམས་པ་སྙིང་རྗེས་ཟིན་པའི་དགེ་བའི་དངོས་པོ་ནི། གང་དང་གང་དུ་སེམས་ཅན་དོན་བྱེད་པ་སྦྱིན་པ་ཡིན་ཞིང་། དེ་ལ་རང་འདོད་ཀྱི་འཁྲི་བ་མེད་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ། གཞན་དོན་བསྒྲུབ་པ་ལ་སྐྱོ་ངལ་མེད་པ་བཟོད་པའི་ཕ་རོལ་ཏུ་ཕྱིན་པའོ། །དགེ་རྩ་ཆེ་ཆུང་གང་བསྒྲུབ་ཀྱང་ལྷག་པར་སྤྲོ་བཞིན་འཇུག་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡིན་ཏེ། སེམས་ཅན་གྱི་དོན་ལ་གཡེལ་བ་མེད་པར་སྦྱིན་པ། ཚུལ་ཁྲིམས། བཟོད་པ་བརྩོན་སོགས་ལས་འདའ་བ་མེད་པ་རྩེ་གཅིག་ཏུ་བསྒྲུབ་པ་བསམ་གཏན་གྱི་ཕ་རོལ་ཏུ་ཕྱིན་པ་དང་། དངོས་པོ་དང་མཚན་མར་འཛིན་ཞེན་སྤང་པ་ཤེས་རབ་སྟེ། དེ་ལྟ་བུའི་ཕ་རོལ་ཏུ་ཕྱིན་པ་དྲུག་པོ་དུས་ནམ་ཡང་འདུ་འབྲལ་མེད་པའོ། །སྤྱོད་ལམ་རྣམ་པ་བཞི་པོ་ཀུན་ལ་དྲན་པ་དང་ཤེས་བཞིན་ལྡན་པར་བྱ་བ་དང་། སྤྱོད་ཡུལ་ཡོངས་སུ་དག་པའི་དགེ་བའི་ཚོགས་ཀྱིས་ཟིན་པར་གྱུར་ན་གོམ་པ་འདེགས་པ་དང་འཇོག་པ་དག་ཀྱང་ཕ་རོལ་ཏུ་ཕྱིན་པ་དྲུག་གི་ལམ་དུ་ངེས་ན། རྩོལ་བ་མེད་པར་འཇུག་པས་ཚོགས་གཉིས་རྫོགས་པར་ཤིན་ཏུ་མྱུར་བའོ། །ཐབས་མཁས་པར་གྱུར་བས་དངོས་སམ་བརྒྱུད་མ་གང་ཡང་རུང་བ་ནས་སེམས་ཅན་ཀུན་ལ་ཕན་པའི་ཐབས་ལྷུར་ལེན་པར་བྱེད་ཅིང་གཞན་དོན་ཁོ་ནར་དམིགས་པའི་སྦྱིན་པ་རྣམ་པ་གསུམ་དང་། གཞན་དགའ་བར་བྱེད་པའི་གཏམ་སྙན་སྨྲ་བ་དང་། སེམས་ཅན་གང་དང་གང་གི་དོན་ཇི་ལྟར་རེ་བ་བཞིན་དེའི་དོན་སྒྲུབ་པ་ལ་སྤྱོད་པ་དང། འགྲོ་བ་གཞན་གྱི་བསམ་པ་དང་ད་ལྟ་སྣང་ཙམ་དུ་དོན་དང་མཐུན་པར་བྱ་བ་རྣམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་ཞེས་གཏན་པ་མེད་པའི་སྒོ་འཕར་ཡངས་པ་ལྟ་བུའོ། །གང་ལ་ཞེས་ཐེག་ཆེན་གྱི་ལམ་དུ་ཞུགས་པ་ལ་བསླབ་པ་བརྟགས་པ་དྲུག་ཏུ་གསུངས་པའང་རང་གི་ཆོས་ལ་འབྱོར་པ་དང་རྒུད་པ་ཅི་འདྲ་འདུག་བརྟགས་པར་འདུ་ཞིང་། རང་ཉིད་ཆོས་ལམ་ལ་ཞུགས་པའི་དོན་མ་ཉམས་པར་གཞན་གྱི་དོན་ཅི་འགྲུབ་བྱ། རང་དོན་ཉམས་པའི་སོ་སོའི་སྐྱེ་བོའི་འཁྲུལ་པ་ལ་བརྟགས་ནས། དེ་ལས་བཟློག་ཐབས་བཏང་བ་དང་། གཞན་ལ་ཕན་པ་རླབས་ཆེན་འགྲུབ་ཏུ་སྲིད་ན། བསླབ་སྡོམ་གྱི་བཅས་པ་ཆུང་ངུ་བག་ཡངས་སུ་གནང་བའི་སྐབས་ཡོད་དེ། གྲོང་ཁྱེར་ལ་འགལ་སྤོང་མཐུན་སྒྲུབ་ཀྱི་ཕྱིར་ན་གྲོང་རྡལ་བློས་བཏང་བ་དང་། བདག་བསྲུང་བའི་ཕྱིར་སྡོད་ཡུལ་གྱི་ས་གཏོང་ཞིང་ཡུལ་གཞན་དུ་སྤྱོད་པ་དང་། བདག་གི་སྒོ་གསུམ་གྱི་ཆོས་ལ་ཉམས་ཉེས་འགོག་པའི་ཕྱིར་བདག་གི་ཀྱང་ལུས་སྲོག་གཏོང་བ་ལ་ཅི་མི་སྙམས་པ་དང་། འདི་ན་མི་འཇེད་ཅེས་སྐྱིད་སྡུག་གང་ཡང་ཁུར་བཟོད་པའི་ས་གཞི་ལྟ་བུ་ལ་ཆོས་ཀྱི་དྲི་བཟང་རྒྱས་པ་མི་ཉམས་པར་རབ་ཏུ་བསྲུང་བའི་དོན་ལ་ཆོས་ཕྱིར་དཀའ་བ་སྣ་ཚོགས་དང་དུ་ལེན་པ་དང་། གཞན་གྱིས་གནོན་པ་བཟོད་པར་དཀའ་བ་ལ་ཇི་མི་སྙམ་པའི་བཟོད་པ་དང་། ཟབ་མོའི་དོན་ལ་འདི་ཤིན་ཏུ་རྟོགས་པར་དཀའ་བའི་གནས་སོ་བསྙམ་ནས་མི་སྐྲག་ཅིང་མི་འདོར་བ་དང་རྣམ་པ་གསུམ་མོ། །ཡིད་ནི་ཤིན་ཏུ་རེངས་པར་བྱས་པའི་ཁོང་ཁྲོ་དང་ཞེ་སྡང་གི་སྡིག་པའི་མངོན་རྟོགས་མུན་པའི་མདངས་ལས་ཀྱང་གནག་པའི་འཁྲི་ཤིང་ལྟ་བུས་འཁྱུད་པ་ཅན་ཐར་མེད་དམྱལ་བའི་བཙོན་ཁང་ནག་པོར་འཛུལ་བ་ལ་སྐྲག་པར་གྱུར་རྣམས་དུས་ནམ་དུ་ཡང་ཁྲོ་བའི་གོ་སྐབས་དབྱེ་བར་མི་བགྱིད་ཅེས་བཟོད་པའི་མི་མཐུན་ཕྱོགས་སྡོམ་པར་འཆད་ཅིང་དེ་ཡང་གནོད་པའི་ཡུལ་ནི་ནགས་ཀྱི་ཚེར་མས་ཀུན་གཏིབས་པ་བཞིན་ལགས་པས་དེ་དག་སོ་སོར་གདུལ་གྱིས་མི་ལངས་ཤིང་ཁ་ཤས་བཏུལ་ཡང་ཕྱིར་ཞིངཀུན་ནས་འཕེལ་བ་ཅན་ཡིན་ཕྱིར། དེ་བས་ན་འཁོན་དང་ཁྲོ་བའི་བྱེད་པོ་གཅིག་པུ་ནི་བདག་འཛིན་ཡིན་པས་དེ་བཏུལ་ན་བཟོད་པའི་དཀའ་ཐུབ་ནི་མྱང་འདས་ཀྱི་རྒྱུ་ཡང་དག་ཡིན་ཕྱིར་དེ་ཉིད་བདག་ལ་མཛའ་བར་འགྱུར་ཞེས་པའོ། །འདི་ལྟར་རེག་པ་ཤིན་ཏུ་རྩུབ་པའི་ཞེས་ཁྲོ་སྡང་དང་སུན་འབྱིན་སོགས་ཚིག་གི་མདའི་ཟུག་ངུ་སྐྱེས་བུའི་སྙིང་ལ་ཟུག་པ་ནི་མཆིའམ་ཞེས་མ་མཆིས་ནའང་ཚིག་རྩུབ་དེ་ཉིད་དང་དུ་བླང་བའི་ཉེར་ལེན་སྐྱོན་གྱིས་ཕན་ཚུན་རྟེན་དང་བརྟེན་པ་གཉིས་ཀ་འཁྲུགས་གཞིན་མནར་བའོ། །ཚེ་འདི་སྣང་གི་བྱ་བ་དབང་བཙན་པའི་སྐབས་འདི་ན་གནོད་པའི་རྒྱུ་དང་འབྲས་བུ་གཉིས་ཀ་མཐའ་ཡས་སུ་ཞེས་པ་མང་དུ་འབྱུང་བ་ཡང་བདག་ཉིད་ལས་བྱུང་བ་ཡིན་ཏེ་དཔེར་ན་བདག་གི་ཁ་ནས་སྒྲ་དང་ཚིག་མ་བྱུང་བར་བྲག་ཆ་ལས་སྒྲ་ཚིག་མི་འབྱུང་བ་བཞིན། བདག་ཉིད་ལས་བྱུང་ན་གནོད་པའི་ཡུལ་མེད་པས་རང་གི་འཁོན་ཚིག་སོགས་སྔོན་དུ་བྱས་ནས་གློ་བུར་རྐྱེན་གྱིས་བོས་ལ་ལྟོས་དང་། ཞིབ་ཏུ་བརྟགས་ན་གནོད་ཆེན་མ་ཡིན་ཕན་ཆེན་ཡིན་ཏེ་བཟོད་པ་བསྒོམ་ཡུལ་གྱི་འཚེ་སྦྱོར་གང་ལ་བརྟེན་ནས་བཟོད་པའི་རང་བཞིན་གྲུ་དང་གཟིངས་ལྟ་བུ་དེ་དག་ལ་གྲོགས་སུ་བྱས་ནས་བྱང་ཆུབ་སེམས་ཀྱི་ནོར་བུ་རིན་པོ་ཆེ་འཐོབ་པར་འགྱུར་བས་དེ་འདྲའི་འཕྲལ་གྱི་གནོད་པ་ཕུགས་སུ་བདེ་ཆེན་འགྱུར་མེད་ལ་སྦྱོར་བར་བྱེད་པ་དེ་ནི་དམ་པའི་ཆོས་ལྟར་མཆོད་ཅེས་པའོ། །མ་བརྟགས་ཚེ་གནོད་པ་རང་རྒྱུད་པ་ཞིག་ཡོད་ཡོད་འདྲ་ཡང་། ཤིན་ཏུ་བརྟགས་ན་གནོད་པའི་ངོ་བོ་སྟོང་པ་རང་བཞིན་གསལ་ལ་རྩལ་མ་འགགས་པ་ཙམ་ཞིག་ཡིན་ལ་མཚན་ཉིད་ཅི་ཡང་མེད་དེ་ཆུའི་རི་མོ་བཞིན་ཡིན་པས་རྣམ་རྟོག་ཁྲོ་གཉེར་རྩུབ་མོ་སྟེ་བཞིན་རས་མི་སྡུག་པའི་ཚུལ་ཅུང་ཟད་བསྟན་པ། ཞིག་པའམ་ཡལ་བའི་མོད་ལ་རྟེན་པའི་རང་བཞིན་ཚུགས་མི་ཐུབ་པར་མཁའ་བཞིན་རྣམ་པར་སྟོང་པར་གྱུར་པ་ལ་ཐོབ་དང་ཤོར་བ་མེད་པའོ། །སྤྱིར་ཡང་གང་ཅིའི་ཕྱིར་ན་བཟོད་པའི་དཀའ་ཐུབ་གསུམ་པོ་ཉམས་པར་གྱུར་ན་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་གཞན་ལྔ་པོ་ཡང་ཕྱི་མཐའ་སྟེ་མགྲོན་པོའི་ཕྱི་ལམ་དགྲའི་བསྐོར་བའི་བཤུལ་ལམ་བཞིན་དུ། འདོད་པའི་གནས་སུ་སྟེ་ཐར་པ་དང་རྣམ་མཁྱེན་གྱི་གོ་སར་ཕྱིན་པར་དཀའ་ན་བློ་སྟོབས་ཅེས། སེམས་མཆོག་བསྐྱེད་ལ་བཟོད་པ་རྣམ་པ་གསུམ་ལ་བསླབ་པར་བྱ་བ་གལ་ཆེ་བར་བསྟན་པའོ། །དུས་ལས་སྐད་གཅིག་ཀྱང་ཡོལ་བ་མེད་པའི་བརྩོན་འགྲུས་ཀྱིས་གཞན་དབང་ལ་མ་ལྟོས་པའི་རང་དབང་ཉིད་དུ་དགེ་བའི་ཆོས་མཐའ་དག་རྣམས་སྐྱེད་མོས་ཚལ་དུ་ངང་པ་རྣམས་དགའ་ཞིང་འགྲོ་བ་བཞིན་ཐོས་བསམ་བསྒོམ་གསུམ་སོགས་ལ་ནན་གྱིས་འཇུག་ཅིང་ལེ་ལོའི་གཡང་ས་ལ་བརྩོན་འགྲུས་རྣམ་པ་གསུམ་བསྒྱུད་པ་མེད་པ་སྟེ་བརྗེད་པ་མེད་བར་མྱུར་དུ་སྤྲོ་སེམས་ཀྱིས་འཇུག་པ་གལ་ཆེ་ཞིང་། དེ་ཡང་འཇིག་རྟེན་ཆོས་བརྒྱད་ལ་སོགས་བྱ་བ་ང་ན་ཞེན་གྱི་འདུ་འཛིའི་ཐེག་པས་དཀྲིས་ཤིང་སྒྱིད་ལུགས་མཐུས་ནོན་ཏེ་ཆོས་ལ་འཇུག་པའི་སྒོ་དང་པོ་སྦྱོར་བའི་ནུས་པའང་བཏང་ཞིང་བདག་ཉིད་བརྙས་ནས་སེམས་ཞུམ་པའི་བརྟུལ་ཞུགས་བླངས་པ་དེ་འདྲའི་གང་ཟག་ཉེས་པའི་གཟིངས་ཞེས་གྲུ་སོགས་འཐོར་ལ་ཁད་དུ་ཞུགས་པ་ལ་ཞོན་ཞེས་སྨད་སྒྲ་ཞུགས་པའོ། །དེ་ལྟར་མ་ཡིན་པར་བདུད་ཞི་འཇོམས་པ་གོ་ཆའི་བརྩོན་འགྲུས་བགོ་བ་དང་། ས་བཅུའི་ལམ་ལ་འགྲོ་ཞིང་བགྲོད་པ་སྦྱོར་བའི་བརྩོན་འགྲུས་དང་མི་འགོང་ཞེས་དགེ་བ་རྣམས་ཆེ་རློམ་ཆུང་བརྙས་མི་བྱེད་པ་དང་། མི་ལྡོག་པ་ནི་ཆོས་ཉམས་སུ་བླངས་པ་གང་ཡིན་པ་དེ་ཉིད་མཐར་མ་ཕྱིན་པར་ཆོག་ཤེས་མེད་པའི་ངང་དུ་མཐར་སྐྱོལ་ཚེ་བརྩོན་འགྲུས་ཅན་གྱིས་སྨོན་པའི་དོན་ཀུན་གྲུབ་པའོ། །དེ་ཡང་མྱུར་བ་ཆོས་ལ་བརྩོན་འགྲུས་དྲག་པོ་མ་བསྐྱེད་ན་བདག་གི་ཚེ་ནི་ཉིན་མོའི་གྲངས་གཅིག་གི་མཐར་གྱུར་པ་དང་འདྲ་སྟེ་ཡུན་རིང་པོར་མི་སྡོད་པར་མྱུར་བ་མྱུར་བར་འཆི་བའི་མུན་ནག་གིས་གཏུགས་པར་གྱུར་ན་འཁོར་བའི་སྤྱོད་པ་སྟེ་འགྲོ་བ་རིགས་དྲུག་གི་སྡུག་བསྔལ་རྒྱུ་སྐར་ལས་རྣམ་གྲངས་མང་བས་དེས་དབུགས་མི་འབྱིན་ན་ལེ་ལོའི་ཆུའི་རྙོག་པ་དྭངས་པ་འདྲ་བའི་བརྩོན་འགྲུས་ཀྱི་དལ་འབབས་ཏེ་ཆུ་ཕྱོགས་གཅིག་ཁོ་ནར་འབབས་པའི་མཐར་ལྷུང་གིས་སྐྱོན་སྟོན་པ་མ་ཡིན་པར་རྣམ་པ་ཀུན་མཁྱེན་རྒྱ་མཚོར་མ་ཕྱིན་པ་དེ་སྲིད་བྱང་ཆུབ་ཀྱི་ལམ་དུ་འགྲོ་བའི་སྤྱོད་པ་གཡོ་ཞིང་མྱུར་བའི་བརྟུལ་ཞུགས་ཉམས་པར་མི་བགྱིད་པའོ། །གནས་དབེན་པའི་རྒྱུ་མཚན་དང་ཡོན་ཏན་འདི་བཞིན་ཏེ་ནགས་ཚལ་དང་མེ་ཏོག་སྣ་ཚོགས་འཁྲིགས་པའི་སྨན་ལྗོངས་ཡིད་དུ་འོང་བ་དག་ནི་ངང་པ་ཤིན་ཏུ་ཞི་བས་བསྟེན་པར་བྱས་ཤིང་། དེ་ལྟ་བུའི་གནས་དེ་ནི་བལྟ་ན་སྡུག་པ་བྲག་རིའི་ཕ་གུ་དང། རྟ་བབས་རི་དྭགས་གཞོན་ནུའི་མཛེས་པ་ལྟར་ཡོད་པའི་ཉམས་དབང་ཤེས་ཀྱི་འཇུག་པ་མི་དགའ་བའི་ཡུལ་དག་ཉུང་ཞིང་དགའ་བའི་ནགས་ཚལ་ལྷ་མོའི་རྐེད་ཆིངས་ལྟ་བུ་ནི། ཤིང་བལ་གཞོན་ནུའི་དྲྭ་བ་དྲྭ་ཕྱེད་གཡོ་བ་ལྟ་བུ་ན་དོགས་པས་སྐྲགས་པའི་སྐད་ངན་བྱུང་བ་མིན་པའི་ཁུ་བྱུག་རྣམས་ཀྱང་འཁོར་བར་སྐྱོ་བའི་གཏམ་གྱི་སྤྲིངས་ཡིག་འགྲིམས་པ་བཞིན་དུ་རང་སྐད་སྒྲོགས་པ་ལ་སྐྱོ་ཤེས་དང་ངེས་འབྱུང་སྐྱེ་བའི་ས་དེ་རུ་གཤེགས་ཤིག་བསམ་གཏན་སྒོམ་པར་འདོད་པ་རྣམས་ཞེས་དམིགས་ཀྱིས་བསལ་བའོ། །འཇིག་རྟེན་འདིའི་ལོངས་སྤྱོད་ཕུན་སུམ་ཚོགས་པ་རྣམས་ནི་སྤྲིན་གྱིས་ཕུང་པོ་གཅིག་ཏུ་ཚོགས་པ་བླ་བྲེ་ལྟ་བའི་ནང་ཤེད་ན། ཞེས་མི་རྟག་པར་བསྟན་པ་ནི། དེ་ལས་ཀྱང་མྱུར་དུ་འགྱུར་བ་ཚེ་སྲོག་གི་རོལ་བའི་གློག་ནི་སྐད་ཅིག་གིས་གཡོ་ཞིང་འདར་བ་ལྟ་བུ་ལས། འགྱུར་བའི་སྡུག་བསྔལ་དང། སྡུག་བསྔལ་གྱི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་གསུམ་གྱིས་ཆོམ་རྐུན་དཀྱུ་བ་ལྟ་བུའི་ཚེ་སྲོག་ལ་རྒོལ་བ་དང་། འཕྲལ་ཕུག་གཉིས་ཀར་ཕུང་དཀྲོལ་བསྐྱེད་པའི་ཆུ་ཀླུང་ཅ་ཅོ་ཅན་ལྟ་བུ་ནི། ཟས་ནོར་ལོངས་སྤྱོད་ཀྱི་དངོས་པོ་གསོག་དང་བསྲུང་དང་སྤེལ་བའི་འདོད་པས་རྟག་ཏུ་འཁྲུགས་ཤིང་དེ་ལ་བརྟེན་ནས་ཁེངས་སེམས་དང་འཇུངས་དང་སེར་སྣས་ཚེ་ཟད་པ་ལ་གཏུགས་ནས། དེའི་འོག་ཏུ་ངན་འགྲོའི་ཆུ་གཏེར་མུ་མཐའ་མེད་པའི་ནང་དུ་འཁྱམས་པར་འགྱུར་ལ། གཡོ་སྒྱུས་ཆར་སྤྲིན་རྟག་ཏུ་བརྣག་པའི་རིན་ཐང་ཅན་གྱི་ནོར་ནི་ཇི་ཙམ་འབྱོར་བ་བཞིན་དུ་སྡུག་བསྔལ་ཁོ་ནའི་རྒྱུ་ལས་མ་འདས་ཤིང་ཡོ་བྱད་ཅི་ཙམ་ཉུང་བ་རྣམས་དགྲ་རྐུན་དང་འཚེ་བས་སྤོང་བ་ཡིན་ཞིང་། དེ་ལས་ཀྱང་ཆོག་ཤེས་ཐོབ་པ་ནི་འབྱོར་བ་ཕུན་སུམ་ཚོགས་པའི་རྩེ་མོར་འགྲོ་བ་ཡིན་ལ། སོ་སོའི་སྐྱེ་བོ་རྣམས་ཀྱི་རང་བཞིན་ནི་བྱིས་པ་དང་འདྲ་སྟེ། བྱིས་པ་རྣམས་ནི་མི་དགེ་བའི་ཉེས་པའི་སྤྲིན་གྱི་འཁྲིགས་པ་ཡིན་ཕྱིར་བདག་ཉིད་ལ་ཐབས་ཀྱིས་བསྟོད་ཅིང་། གཞན་དག་ལ་དངོས་བརྒྱུད་གང་ནས་མི་སྙན་པར་སྒྲོགས་ཅིང་ཉོན་མོངས་པ་དུག་ལྔ་དུག་གསུམ་སོགས་ཀྱིས་གཞན་དབང་གིས་སྦྲུལ་ལྕེ་རྩུབ་མོའི་ཉམས་དང་བག་ལ་བསྟེན། དཔལ་དང་འབྱོར་བ་མི་རྟག་ཅིང་གཡོ་བ་དང་གང་ལའང་རྟག་པར་སེམས་ཤིང་། ཕན་ཆེན་བཏགས་པའི་བྱས་པ་མི་གཟོ་ཞིང་མི་དགའ་བའི་རྣམ་འགྱུར་གྱིས་མགུ་བའི་གཟུགས་བརྙན་འཁྱོགས་པོར་སྟོན་ཞིང་། ཀུན་སློང་འཚུབས་པའི་འཁོན་གྱི་མེ་ལྕེ་ཕྲ་མའི་རླུང་གིས་བསྐྱོད་ནས་སྤྲེའུ་བཞིན་དུ་གནོད་པ་སྣ་ཚོགས་སྟེར་བ་དང་། ཆུ་སྲིན་བཞིན་དུ་སྡིག་པ་མི་དགེ་བའི་ལས་སྣ་ཚོགས་ཀྱི་ལྟོ་བ་ཡངས་ཤིང་ཤོང་ཆེ་བ་དང་། དམ་ཚིག་ལ་བརྩེ་གདུང་ཆུང་བས་སྤྲུལ་གདུག་པ་ཅན་བཞིན་དུ་སུ་དང་འཕྲད་པ་འཇོམས་པར་འགྱུར་ཞིང་། མེ་བཞིན་དུ་དགེ་བའི་ལྗོན་ཤིང་བསྲེག་པར་འགྱུར་བའི་སྐྱོན་འདུ་ན་བྱིས་པའི་གྲོགས་ལ་རྒྱང་རིང་དུ་བསྲིང་བར་བྱ་བ་གལ་ཆེ་འདོད་པའི་ཡུལ་ལྔ་ནི་དུག་ལས་ཐུ་སྟེ་རྣམ་སྨིན་རྩུབ་པ་ཡིན་ཏེ་ཆགས་སྲེད་ཀྱི་སྤྱད་པའི་མོད་ལ་བདའ་བར་རོ་བྲོ་བ་ལྟར་སྣང་ཡང་། ཚེ་རབས་གཅིག་པོ་འདི་ཁོ་ན་མིན་ཞིང་སྐྱེ་བ་ཐམས་ཅད་དུ་གསང་སྔགས་མཆོག་དང་སྨན་རིགས་སུམ་བརྒྱ་དྲུག་ཅུ་སོགས་ཀྱིས་གསོར་མི་རུང་ཞིང་བཅོས་པར་དཀའ་བའི་དོན་ནི་གང་ཞིག་སེམས་ཀྱི་གླང་པོ་མ་དུལ་གྱི་བར་དུ་བསླུ་བའི་རྫུ་འཕྲུལ་འདོད་པའི་ཡུལ་ལྔའི་ཆེ་བ་ལས་ཆོ་འཕྲུལ་གཞན་མེད་ལ། གདོས་བཅས་ཀྱི་ཕུང་པོ་འདི་ཉིད་འདུ་བྱེད་ཀྱི་ཁྱོགས་ལ་བཞག་པ་སྟེ་མེ་ཆུ་ས་གསུམ་སོགས་ཀྱི་མི་མངོན་པར་མ་བྱས་པ་དེ་སྲིད་དུ་ཞི་བའི་ནགས་མཐོངས་ནི་དབེན་གནས་ནགས་རིའི་ཚལ་དང་། བྲག་ཕུག་དག་ལ་བསྙེན་པར་མཛོད་ཅེས་པས། བས་མཐའ་དང་འབྲོག་ནི་སྟེ་མི་སོགས་ཀྱི་བསྟེན་པའི་ཡུལ་མ་ཡིན་པའི་ཡིད་དུ་འོང་བ་དང་། སྐྱོ་ཤས་འཕེལ་ཞིང་ཚོང་དང་སོ་ནམས་སྡིག་པའི་གྲོགས་པོ་སོགས་ཀྱིས་རིང་དུ་སྤངས་པས། དཔྱ་དང་ཁྲལ་སོགས་ལུས་བཀོལ་བའི་ཞོ་ཤའི་འཚོ་བས་མི་གདུང་ཞིང་བྱ་དང་རི་དྭགས་སོགས་ཀྱིས་མི་སྙན་པ་ཅི་ཡང་སྒྲོགས་པ་མེད་ལ། ཆུ་གཙང་དང་བཟའ་ཤིངགི་འབྲས་བུའི་ཉེར་སྤྱོད་རྒྱ་ཆེ་ལ་བྲག་རིའི་ཕུག་པ་དང་ལོ་མའི་ཁང་བཟང་ཡངས་ཤིང་། ལྗོན་པའི་ཤིང་གི་གྲིབ་བསིལ་འགྲོགས་ན་རབ་ཏུ་བདེ་བ་དང་། དུས་ནམ་ཞིག་ཙམ་ན་བདག་ནི་ལྷན་ཅིག་གནས་པར་འགྱུར། ཞེས་བསམ་ནས་སྤྲོ་བ་བསྐྱེད་པའོ། །གནས་དེ་ན་དབྱར་དགུན་སྟོན་དཔྱིད་དུས་བཞིའི་མགྲོན་པོ་གསར་པས་ཁ་དོག་དང་ལང་ཚོའི་འཕོ་འགྱུར་དང་མངོན་རྟོགས་ངོམ་པའི་ནགས་ཚལ་རྣམས་ཀྱིས་རང་ཉིད་ཉོན་མོངས་པས་དབེན་པར་བསྟི་བ་མ་ཡིན་པའི་གཏན་ཚིགས་སུ་འདུ་འཛིས་སྐྲག་སྟེ་དབེན་པར་གོམ་བདུན་ཕྱོགས་པའི་བསོད་ནམས་སྒྲོག་པ་ལ་ལྟོས་དང་། གང་དུ་ཞེས་དེ་གར་བསམ་གཏན་ཤིན་ཏུ་མི་གཡོ་ཞིང་བརྟེན་པ་ནི་ལྷག་པ་སེམས་ཀྱི་བསླབ་པའི་མཚན་ཉིད་ཡིན་ཏེ་རྟེན་ཅིང་འབྲེལ་འབྱུང་ཞེས་རྟེན་འབྲེལ་ལུས་ལ་བསྒྲིགས་ན་རྟོགས་པ་སེམས་ལ་འཆར་བ་དེ་ཉིད་ཀྱི་ཐབས་དང་ཆོ་ག་ནི་རྣམ་པར་སྣང་མཛད་ཀྱི་ཆོས ་བདུན་དང་ལྡན་པའི་རྣམ་འགྱུར་ལ་སེམས་ཀྱི་སྲོག་ཤིང་ཅན་དེ་ཉིད་གཅིག་ལས་གཉིས་པ་ཅན་མ་ཡིན་པའི་མཉམ་བཞག་ལ་བརྩོན་པར་མཛོད་ཅེས་པའོ། །དམིགས་པ་གང་ཡང་རུང་བའི་སྟེ་སེམས་འཛིན་པའི་ཐབས་དང་དཔྱད་པའི་ཚུལ་གྱིིས་ཡིད་ཀྱི་ཤེས་པ་ནི་དགེ་བའི་དོན་ལ་རྣམ་པར་བཅིངས་ཏེ་གནས་ཚེ་སྤྲོས་པའི་སྣང་བ་ཐམས་ཅད་ཆོས་ཉིད་གཅིག་ཏུ་ནུབ་ཅིང་སྣང་ཡུལ་མ་འགགས་ལ་དེར་འཛིན་མེད་པ་ཡིན། དེ་ཡང་ཤེས་པ་ཡུལ་ལ་མི་རྟོག་པར་མཉམ་བཞག་ལ་ངོ་བོ་གཅིག་པའི་སྟེ་མཉམ་པར་བཞག་བཞིན་ཏུ་རྣམ་རྟོག་གི་ཕྲེང་བ་ཅི་ཙམ་ཤར་ཡང་གཡེང་བར་མི་འགྱུར་བ་ནི་རྗེས་ལ་ཐོབ་པའི་ལྷག་མཐོང་སྟེ། དབྱེ་ན་བྱིས་པ་ཉེར་སྤྱོད་ཡི་བསམ་གཏན་དང་། དོན་རབ་འབྱེད་པའི་བསམ་གཏན་དང་། དེ་བཞིན་གཤེགས་དགེའི་བསམ་གཏན་རྣམ་པ་གསུམ་དང་། བསམ་གཏན་དང་པོར་རྟོག་དཔྱོད་གཉིས་ཀ་ཡོད་པ་དང་། གཉིས་པར་རྟོག་པ་ཡོད་པ་ལ་དཔྱོད་པ་མེད་པ་དང་། གསུམ་པ་དཔྱོད་པ་ཡོད་ལ་རྟོག་པ་མེད་པ་དང་། བཞི་པ་རྟོག་དཔྱོད་གཉིས་ཀ་མེད་པ་སྟེ། མུ་བཞིའི་བསམ་གཏན་དང་བཞི། དེ་བཞིན་དུ་གཟུགས་མེད་བཞི་སྟེ་ཞེས་པ་ནི། ནམ་མཁའ་མཐའ་ཡས་སྐྱེ་མཆེད། རྣམ་ཤེས་མཐའ་ཡས་སྐྱེ་མཆེད། ཡོད་མིན་མེད་མིན་གྱི་སྐྱེ་མཆེད། ཅི་ཡང་མེད་པའི་སྐྱེ་མཆེད་དེ་རྣམས་པའི་གྲངས་སོ། །ལམ་དུ་མ་ཞུགས་པའི་རྒྱུད་ཀྱི་ཏིང་ངེ་འཛིན་གྱི་ནུས་པ་སྟེ། རྒྱུ་བསོད་ནམས་ཀྱི་ཚོགས་ཡར་མཆོད་མར་སྦྱིན་སོགས་ལ་བརྩོན་པ་དང་། དེའི་མཐུ་ལས་སྦྱོར་བའི་ལམ་དུ་ཞི་ལྷག་གི་ཏིང་ངེ་འཛིན་གྱི་ནུས་པ་བརྟན་པར་བྱས་ནས་ཐར་པའི་ལམ་མངོན་སུམ་འབྱེད་པ་དོན་རབ་འབྱེད་པའི་བསམ་གཏན། ཞེས་སུ་གྲགས་ལ། དང་པོའི་ས་ཡན་ཏེ་འཕགས་པའི་ཏིང་ངེ་འཛིན་དེ་ནི་ཀུན་གཞི་ལུང་མ་བསྟན་པའི་ཆ་སྟེ་བསམ་གཏན་བཞི་དང་གཟུགས་མེད་བཞི་རྣམས། ཟག་པ་མེད་པས་དེ་བཞིན་གཤེགས་དགེའི་བསམ་གཏན་ཡིན་ཞིང་དེ་ཀུན་ངོ་བོ་ནི་ནང་དུ་སེམས་དྲན་པས་ཡང་ཡང་དུ་འཛིན་པ་ཡིན་ལ། དེ་དག་འགྲུབ་པའི་རྒྱུ་ནི་དྲན་པ་རྒྱུན་ཆགས་ཞེས་དྲན་རྒྱུན་མི་ལྷོད་པའི་བརྩོན་འགྲུས་ཅན་གྱི་དབང་པོའི་ཡུལ་ལྔ་སོགས་ལ་རྣམ་པར་གཡེང་ན་སླར་ཡང་དེར་བསླན་པར་བྱས་ནས། དེའི་བྱེད་ལས་ཀྱིས་ལུས་སེམས་ལ་བདེ་བ་བསྐྱེད་ཅིང་རང་གི་ནུས་པའི་ཚོད་ཀྱི་རྫུ་འཕྲུལ་ཀྱང་འགྲུབ་པའོ། །འབྲས་བུ་ཉན་ཐོས་ཀྱི་མངོན་པར་ཤེས་པ་ལ་སོགས་ཐོབ་པ་ཡིན། ཞེས་པའོ། །བསམ་གཏན་དང་པོའི་ཉེར་བསྡོགས་སམ་སྟ་གོན་ནི་བདེ་གསལ་མི་རྟོག་གི་ཉམས་གང་རུང་ལ་འདིའོ་ཞེས་རྟོག་ཅིང་དེའི་རང་བཞིན་ལ་དཔྱོད་པ་ཙམ་དང་། དེ་ཉིད་ཀློང་དུ་གྱུར་ནས་དངོས་གཞིའི་སྐབས་ལ་བབས་ཚེ་རྟོག་པ་མེད་ལ་དཔྱོད་པ་དགའ་བ་དང་། བདེ་བ་དང་ལྡན་པ་ཙམ་ཡོད་པ་དང་། ལྷག་མ་གསུམ་པོར་རིམ་གྱིས་རང་སའི་ཞེན་འཛིན་དང་བྲལ་ནས་བཞི་པའི་སྐབས་གང་ཡང་ཡིད་ལ་མི་འཛིན་པ་སྟེ་རྟོག་དཔྱོད་གཉིས་ཀ་མེད་ཅེས་པའོ། །དེ་ཡང་སྔ་མ་སྔ་མས་ཞེས་པ་ནི། བསམ་གཏན་དང་པོས་གཉིས་པ་དང་། དགའ་བ་དང་བདེ་བ་དང་། ནང་ཡོངས་སུ་དང་པ་དང་ལྡན་པར་གྱུར་པ་དེའི་ཚེ། གཉིས་པས་གསུམ་པ་དང་། བདེ་བ་བཏང་སྙོམས་དང་དྲན་པ་དང་ཤེས་བཞིན་དང་ལྡན་པ་གསུམ་པ་དང་། གསུམ་པས་བཞི་པ། སྡུག་བསྔལ་མ་ཡིན་ བདེ་བ་མ་ཡིན་ བཏང་སྙོམས་ཡིན་ བཏང་སྙོམས་དང་དྲན་པ་དང་ལྡན་བཞི་པ་ཕྱི་མའི་ཉེར་བསྡོགས་བྱེད་པ་ལ་འཕགས་པའི་ལམ་གྱི་བརྟེན་གཞི་ཞེས་སུ་གྲགས་ཤིང་། དེ་ལ་ཡོན་ཏན་ཐམས་ཅད་བསྐྱེད་པའི་བསམ་གཏན་ནི། ཐབས་སྙིང་རྗེ་ཆེན་པོ་དང་ནི་ཡེ་ཤེས་ཀྱིས་ཟིན་པ་ཡིན་ཏེ། དེས་ནི་ཏིང་ངེ་འཛིན་མང་པོ་ལྡན་པར་བྱེད་ཅིང་རྣམ་པ་ཐམས་ཅད་ཀྱི་དོན་མངོན་དུ་བསྒྲུབ་ཅིང་བློ་དང་རྫས་གཅིག་པའི་མཉམ་བཞག་དང་རྗེས་ཐོབ་ཀྱི་ཞེན་པ་དང་གཟུང་འཛིན་ཕྲ་མོ་སྤང་བའོ། །མཉམ་བཞག་ལས་ལངས་པའི་རྗེས་ཐོབ་རྒྱ་ཡན་པ་ནི། ས་བདུན་པ་ཚུན་ཆད་ཀུན་ལ་ཡོད་པ་ཡིན། ཞེས་པ་སྔོན་བྱོན་པ་རྣམས་ཀྱིས་བཞེད་པ་ཡིན་ནོ། །དེ་ལྟར་གང་ཟག་རྣམས་ཀྱིས་སྒོམ་པའི་བསམ་གཏན་གྱི་རིམ་པ་བཤད་ཟིན་ལ། ལྷག་པ་ཤེས་རབ་བསླབ་པའི་ངེས་འབྱེད་ནི། ཏིང་ངེ་འཛིན་རྣམས་བསམ་གཏན་གྱི་སྦྱོར་བ་ལས་སྐྱེས་ཤིང་། དངོས་དང་རྗེས་ལས་བྱུང་བའི་ཤེས་རབ་བམ། ཐོས་པ་དང་བསམ་པ་དང་། བསྒོམ་པ་ལས་བྱུང་བའི་ཤེས་རབ་སྟེ། རྣམ་པ་གསུམ་གྱི་ལྷག་མཐོང་ཡང་དག་པ་འགྲུབ་པའི་ཕྱིར། དེའི་དོན་གྱིས་ཉོན་མོངས་པའི་ཚོགས་འཇོམས་ཤིང་ཆོས་དང་ཆོས་ཤེས་པ་སྟེ། ཀུན་རྫོབ་བདེན་པ་དང་། སྲིད་པའི་གྲོང་ལས་མྱ་ངན་མེད་པར་འདའ་ཞིང་སྦྱིན་པ་ལ་སོགས་ཕ་རོལ་ཏུ་ཕྱིན་པ་རྣམ་པ་དྲུག་པོའང་གོང་ནས་གོང་དུ་ཁྱད་ཞུགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་པ་མཆོག་ཡིན་ཞིང་། དེའང་འདི་ན་སོ་སོའི་སྐྱེ་བོའི་ས་ལས་མ་འདས་བར་དུ། ཐོས་པ་ལས་བྱུང་ཤེས་རབ་མ་བརྟེན་ན། བསམ་པ་དང་སྒོམ་པའི་ཡོན་ཏན་གནས་མིན་ཞེས་གེགས་དང་གོལ་སའི་ལམ་དུ་འཁྱམས་པར་འགྱུར་བས་ན། ཐོས་པའི་ཤེས་རབ་ཀུན་གྱི་རྒྱུ་རུ་གསུངས་ཞེས་པའོ། །གཞལ་བྱའི་ཆོས་ཏེ་གསུང་རབ་ཡན་ལག་བཅུ་གཉིས་དང་། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་རྣམ་གྲངས་ཡང་འཇལ་བྱེད་ཤེས་རབ་གསུམ་གྱིས། དྲང་དོན། ངེས་དོན་རྣམ་པ་གཉིས་དང་། ལྡེམ་དགོངས་རྣམ་པ་བཞིར་གཞལ་དགོས་པ་ཡིན་ཏེ། དེ་ཡང་ཆོས་རྣམས་ཀུན་གྱི་ངོ་བོ་དེ་བཞིན་ཉིད་ཅེས་པ་ནི་སྤྲོས་བྲལ་རྣམ་པར་མི་རྟོག་པའི་ངོ་བོ་ཡིན་ཏེ། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་སྨོན་པ་མེད་པ་སྟེ་གསུམ་དུ་གནས་པ་ངེས་དོན་ཡིན་ལ། ཆོས་ཅན་ཏེ་ཀུན་རྫོབ་སྣང་ཚོད་ཀྱི་ལམ་ལ་འཇུག་པའི་ཕྱིར་རིག་པས་གཞལ་ནས་འདི་འདྲ། འདི་བཞིན་ཞེས་སྒྲོ་བཏགས་པ་དྲང་བས་ལམ་ཡིན་ལ། དེ་ལྟར་གཉིས་པོས་དྲང་དོན་དང་ངེས་དོན་གང་ལ་ཡིད་རྟོན་མི་རྟོན་ཅེས་པ་ནི། དེ་གཉིས་གང་གི་དོན་དུ་ངེས་པར་ཤེས་པ་དེ་གསུངས་རབ་ཀུན་ལ་བལྟ་བའི་ལྡེ་མིག་ཡིན་ཞེས་པ་དང་། དེ་དག་གི་རང་བཞིན་གསལ་བར་བྱ་བ་དང་། དོན་གྱི་དགོངས་པ་རྟོགས་པར་བྱ་བའི་ཕྱིར་དུ། དགོངས་པ་ཅན་དང་ལྡེམ་པོར་དགོངས་པ་གཉིས་བཤད་པ་ལ། དང་པོ་དགོངས་པ་ཅན་ནི། ཅུང་ཟད་སྒྲོ་བཏགས་ཏེ་ཟུར་ཙམ་བཤད་དུ་ཡང་ཡོད་ལ། གདུལ་བར་བྱ་བའི་ཡུལ་རྣམས་རེ་ཞིག་ཁ་དྲངས་པ་གཅིག་པུའི་སླད་དུ་མ་ཡིན་པ་དང་། སྡིག་པ་སྟོབས་ཆེན་བྱེད་པའི་གང་ཟག་གཅིག་ལ་ཁྱོད་ཀྱི་ལས་འདི་བཟའ་བཏུང་ལོངས་སྤྱོད་ཕུན་སུམ་ཚོགས་པ་ལ་བཟང་བར་འདུག་ཀྱང་ཞེས་ཐེ་ཚོམ་ཅུང་ཟད་སྐྱེ་རུ་བཅུག་པ་དགོངས་པ་ཅན་གཅིག་པུ་དང་། དགོས་ཆེད་སྡིག་པ་ལས་ལྡོག་དགེ་བ་ལ་འཇུག་ཐབས་དང་བཅས་ནས་དགོངས་པ་རྣམ་པ་བཞིར་སྟོན་པ་སྟེ། མཉམ་པ་ཉིད་དགོངས་འགལ་བའང་གཅིག་ཏུ་བསྟན། ཞེས་པ་ནི། ཆོས་ཐམས་ཅད་ངོ་བོས་སྟོང་ཞིང་། རང་བཞིན་གསལ་བ་དང་། རྩལ་འཁོར་འདས་གཉིས་སུ་སྣང་བ་ལྟར་ཤར་ཡང་དེ་དག་ཀུན་ངོ་བོ་མཉམ་པ་ཉིད་ལས་མ་འདས་ན་རྩལ་སྣང་དུ་འགལ་བ་ལྟར་ཤར་ཡང་དོན་ལ་རོ་གཅིག་ཏུ་བསྟན་པ་དང་། དོན་གཞན་ལ་དགོངས་པ་ནི་གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་འཁྲུལ་ངོར་ཡོད་པ་ལྟར་སྣང་ཡང་དོན་ལ་དཔྱད་ན་མ་གྲུབ་པར་བསྟན་པ་དང་། དུས་གཞན་ལ་དགོངས་པ་ནི། ཐོག་མེད་དུས་ནས་ད་ལ་ཐུག་གི་བར་དུ་ཕར་ཕྱིན་དྲུག་སོགས་ཟག་བཅས་དང་ཟག་མེད་ཀྱི་དགེ་རྩ་སྔོན་དུ་སོང་བ་ཞིག་གིས་ད་ལྟ་ཡུན་ཐུང་ངུས་འབད་པ་མེད་པར་འཚང་རྒྱ་བར་བསྟན་པ་དང་། གང་ཟག་ལ་དགོངས་པ་ནི། ཉན་རང་གི་རིགས་ཅན་དེ་ལ་རང་ལམ་དེའི་མཆོག་ཏུ་འཛིན་ཞིང་གཞན་དག་སྨད་པ་དང་། གཞན་ཡང་རང་ཉིད་ལམ་གང་ལ་ཞུགས་པ་དེ་ཉིད་མཆོག་ཏུ་འཛིན་ན་དེ་ཉིད་ཐར་པ་དང་རྣམ་མཁྱེན་གྱི་ལམ་ལ་སྒྲིབ་བྱེད་དུ་འགྱུར་བ་འགོག་ཕྱིར་སྨད་པའོ། །ལྡེམ་པོར་དགོངས་པ་ནི་གདུལ་བར་བྱ་བའི་ཡུལ་གང་ཞིག་གི་བློ་ལ་མི་ཆུད་པའི་ཡིད་གཉིས་ཀྱི་གནས་ཐོབ་སྟེ། ཐེ་ཚོམ་བསལ་བའི་རྒྱུ་ཉན་རང་གི་ཐེག་པ་ལ་ཞུགས་པའི་གང་ཟག་རྒྱུ་འབྲས་དངོས་པོར་འཛིན་པ་རྣམས་ལ། འཁོར་ལོ་བར་བའི་དགོངས་པ་ཐད་དྲངས་སུ་གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་དོན་ལ་མེད་པ་ཡིན་ཡང་། གདུལ་བྱ་བློ་དམན་དེ་ཉིད་དགའ་བའི་མིང་དང་ཆ་ལྡན་ཏེ། དྲང་ངེས་ཀྱི་ཆོས་རྣམས་མཚན་མ་དང་བཅས་པའོ། །ཞེས་རྣམ་པར་ཀྱོག་ནས་ཡང་དག་པའི་ལམ་ལ་གཟུད་པའི་ཕྱིར། ཚིག་ཐེག་དམན་པ་དང་མཐུན་ཡང་དོན་མི་མཐུན་པར་བཤད་པ་སྟེ། འཆད་པོ་རྨི་ལམ་སྒྱུ་མའི་ཚུལ་གྱིས་བསྟན་པར་སེམས་པའོ། །དབྱེ་ན་ཞུགས་པ་ལྡེམ་པོར་དགོངས་པ་དང་། དེ་བཞིན་དུ་མཚན་ཉིད་དང་། གཉེན་པོ་དང་བསྒྱུར་བ་ལྡེམ་སོགས་དགོངས་པ་བཞི་སྟེ། ཞུགས་པ་ལྡེམ་པོར་དགོངས་པ་ནི། གང་ཞིག་ཉན་ཐོས་པ་དག་ཆོས་ཐམས་ཅད་སྟོང་པར་འཆད་པས་སྐྲག་ནས་ཐེག་ཆེན། སྤོང་བར་བྱེད་པ་ལ། གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་ཡོད་པར་སྨོས་པས་གྲུབ་པའམ་བདེན་པར་གོ་ནས་ད་གདོད་འཇུག་པ་ཡིན་ལ་སྣང་ཚོད་ནི་རྨི་ལམ་ལྟ་བུར་དགོངས་པའོ། །མཚན་ཉིད་ལྡེམ་པོར་དགོངས་པ་ནི་ཀུན་རྫོབ་ཀྱི་ཆོས་རྣམས་ལ་ངོ་བོ་ཉིད་མེད་པའི་དོན་ཤེས་པའི་དོན་དུ་རིམ་བཞིན་ཀུན་བརྟགས་ངོ་བོ་ཉིད་མེད་པ་དང་། གཞན་དབང་ངོ་བོ་ཉིད་མེད་པ་དང་། ཡོངས་གྲུབ་ངོ་བོ་ཉིད་མེད་པ་སྟེ། རྣམ་པ་གསུམ་དག་ལས། དང་པོ་མཚན་ཉིད་མེད་པ་དང་། གཉིས་པར་སྐྱེ་བ་ངོ་བོ་ཉིད་མེད་པ་དང་། གསུམ་པར་དོན་དམ་ངོ་བོ་ཉིད་མེད་པ་སྟེ། ཆོས་རྣམས་ཐམས་ཅད་ཚིག་ཉུང་ངུ་ཙམ་གྱིས་དོན་དཔག་ནུས་པ་མ་ཡིན་ཏེ། བརྗོད་པ་ཟབ་པ་དག་ཏུ་སྟོན་ཞེས་པའོ། །གཉེན་པོ་ལྡེམ་པོར་དགོངས་པ་ནི། གཞན་གྱི་ལོག་པར་རྟོག་པ་ལྡོག་པ་སྟེ་སྐུ་ཚེའི་རིང་ཐུང་དང་རིགས་དང་སྐུ་བོངས་ཚད་ཀྱིས་མཆོག་དམན་དུ་དབྱེ་བ་མིན། སངས་རྒྱས་ཐམས་ཅད་ཀྱི་གཟུགས་སྐུ་གཉིས་ཀྱི་ཆོས་སྐུར་མཉམ་སྟེ། ཚོགས་བསགས་ཀྱི་ཡུལ་ལའང་མཉམ་པ་ལྟ་བུར་དགོངས་པ་སྟེ། ངོ་བོ༷་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས༷་རྗེ་ཀུན༷་ཁྱབ་སྤྲུལ་སྐུ་ཡིན་པའི་ཕྱིར་རོ། བསྒྱུར་བ་ལྡེམ་པོར་དགོངས་པ་ནི། བསད་བྱ་མ་ཡིན་པའི་ཕ་མ་གསོད་པ་དང་། དེ་བཞིན་དུ་བཅོམ་བྱ་མིན་པ། རྒྱལ་པོ་དང་ནི་གཙང་སྦྲ་ཅན་གཉིས་བཅོམ་པ་སོགས་གསུངས་པ་འདི་ལྟར་ཡིན་ཏེ། ཕ་ནི་སྲིད་པ་དང་མ་ནི་ལེན་པ་སྟེ། དེ་གཉིས་ལས་རླུང་དང་འགྲོག་པ་དབུ་མར་ཚུད་ནས་དག་པར་བྱས་པ་ལ་བསད་པའི་སྒྲར་ཞུགས་པ་དང་། ཀུན་གཞི་ནི་རྒྱལ་པོ་དང་། དེ་བཞིན་དུ་བྲམ་ཟེ་འཇིགས་ཚོགས་ལ་བལྟ་བ་དང་དགེ་སྦྱོང་ཚུལ་ཁྲིམས་དང་བརྟུལ་ཞུགས་ལ་མཆོག་འཛིན་གྱི་བལྟ་བའི་གཙང་སྦྲ་ཅན་གཉིས་ཡིན་ལ་ནང་གི་སྐྱེ་མཆེད་གཟུང་འཛིན་གྱིས་བསྡུས་པའི་རྣམ་ཤེས་ཚོགས་བརྒྱད་ནི་ཡུལ་འཁོར་བསྐོར་བཅས་ཏེ། དེ་དག་ལ་སོགས་རང་རྒྱུད་ལ་མི་གནས་དག་པར་བྱེད་པ་ལ་བཅོམ་པའི་ཐ་སྙད་དུ་བཏགས་པ་ཙམ་གྱི་དོན་ལས་རྣལ་མར་བཟུང་ན་ནོར་བ་ཆེན་པོ་ཡིན་ཞེས་པའོ། །མདོར་ན་དགོངས་པ་ཅན་དང་ལྡེམ་པོའི་ཁྱད་པར་ནི། དགོངས་པ་ནི་གདུལ་བྱ་གང་ཞིག་སྡིག་པ་ལས་ལྡོག་ཐབས་དང་། དགེ་བ་ལ་སྦྱོར་ཐབས་ཡིད་ལ་རྣམ་པར་བཞག་པ་ཙམ་ཡིན་གྱི། ཕ་རོལ་པོ་བཟུང་པའི་ཐབས་མངོན་གྱུར་པ་ལ་སོགས་པར་ལྟོས་པ་མིན་པའོ། །ལྡེམ་པོར་དགོངས་པ་ནི། གདུལ་བྱའི་ཡུལ་ཕ་རོལ་པོ་གང་ཡིན་དེ་ཉིད་གཟུང་པ་ལ་ལྟོས་པའི་བསམ་སྦྱོར་དང་། རྣམ་འབྱེད་ནི་གསུང་རབ་ཀུན་ལ་བལྟ་བའི་མིག་དང་མཚུངས་ཤིང་། གཞལ་བྱའི་ངོས་ནས་རྒྱལ་བའི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུང་པ་མཐའ་དག་གི་དོན་གཅིག་ཏུ་བསྡུས་ན། འཇིག་རྟེན་ཀུན་རྫོབ་དང་ནི་དོན་དམ་གཉིས་ཏེ། བདེན་པ་གཉིས་པོ་དེ་ལས་གསུམ་པ་གཞན་མ་མཆིས་སོ། །ཀུན་རྫོབ་པ་ལ་སྣང་ལུགས་རྣམ་པ་གཉིས་ཡོད་དེ། འཁྲུལ་པའི་ཤེས་ངོ་ལ་སྣང་བ་ཇི་སྙེད་ཀྱི་སྣང་ཚོད་ཉིད་དང་དོན་མཐུན་པར་དོན་བྱེད་རྣམས་ཅེས་པ་ནི། ཉི་ཟླ་དང་མར་མེ་སོགས་ཀྱིས་མུན་པ་སེལ་བ་དང་། རྟ་གླང་སོགས་ཞོན་པ་དང་ཁལ་འགེལ་བ་སོགས་ལ་བཀོལ་དུ་བཏུབ་པ་ལ་ཡང་དག་པའི་ཀུན་རྫོབ་ཉིད་དོ། །གཞན་རི་མོའི་མར་མེ་དང་། ཉི་ཟླ་དང་ཤིང་རྟ་སོགས་ཀྱི་གཟུགས་བརྙན་སྣང་ནའང་ཡང་དག་ཀུན་རྫོབ་བཞིན་དོན་མི་བྱེད་པ་ལ་ལོག་པའི་ཀུན་རྫོབ་ཅེས་གྲགས་སོ། །དོན་དམ་བདེན་པ་ནི་རང་སེམས་ཀྱི་གནས་ལུགས་གཤིས་ཀྱི་བཞུགས་ཚུལ་ཏེ་འཁོར་བ་དང་ནི་མྱ་ངན་འདས་པའི་ཆོས་གཉིས་ཀ་ངོ་བོ་གཉིས་སུ་མེད་དེ། གདོད་མ་ཉིད་ནས་བསམ་བརྗོད་ལས་འདས་པའི་ངོ་བོ་སྤྲོས་དང་བྲལ་བ་དེ་ཉིད་རྟོགས་ཞེས་བཟང་པོར་བཟུང་རྒྱུ་དང་། མ་རྟོགས་ཞེས་ངན་པར་བཟུང་རྒྱུ་གཉིས་ཀ་བློས་མ་བཞག་གོ། དེ་ཡང་བདེན་པ་གཉིས་ནི། སྣང་བ་ཀུན་རྫོབ་དང་སྟོང་པ་དོན་དམ་སྟེ་གཉིས་འདྲེས་བའི་སྣང་སྟོང་ཟུང་འཇུག་ནི། དཔེར་ན་རྫིང་བུར་ཞུགས་པའི་ཟླ་བའི་སྐྱེ་མཆེད་བཞིན་ཏེ། སྣང་བའི་ཆ་ནས་ཀུན་རྫོབ་ཀྱི་བདེན་པ་དང་། ཟླ་བའི་གཟུགས་བརྙན་རང་བཞིན་མ་གྲུབ་པ་ནི་དོན་དམ་པའི་བདེན་པའོ། །ཡུལ་ལྔའི་ཤེས་པ་ནི། མིག་དང་། རྣ་བ་དང། སྣ་དང་ལྕེ་དང་ལུས་ཀྱི་རྣམ་པར་ཤེས་པ་རྣམས་ཚོན་རིས་ཏེ་འཇའ་ཚོན་རི་མོ་ཁ་དོག་མ་འདྲེས་པ་ལྟ་བུས། གཟུགས་སྒྲ་དྲི་རོ་རེག་བྱ་སོགས་འདོད་པའི་ལོངས་སྤྱོད་ལྔའི་ཆ་བཟུང་བ། དེ་དང་དེ་ལ་དེར་འཛིན་སོགས་དགག་བསྒྲུབ་ཀྱི་བློ་རྟོག་གི་འཁྲུལ་བའི་སྣང་བ་འདི་རྣམས་སྒྱུ་མའི་དཔེ་བརྒྱད་ཉིད་དུ་བརྟག་དགོས་པ་སྟེ། མིག་གི་ཡུལ་དུ་ཤར་བའི་གཟུགས་ཐམས་ཅད་ནི། སྒྱུ་མ་དང་། མིག་ཡོར་དང་། སྨིག་སྒྱུ་ལྟར་བལྟ་ཞིང་། རྣ་བའི་ཡུལ་དུ་སྒྲ་གྲགས་ཚད། བྲག་ཆ་ལྟ་བུ་དང་། སྣའི་ཡུལ་དུ་དྲི་དང་། ལྕེའི་ཡུལ་དུ་རོ་དང་། ལུས་ཀྱི་ཡུལ་དུ་རེག་བྱར་སྣང་བ། སྒྱུ་མ་དང་། རྨི་ལམ་དང་། གློག་དང་། སྤྲིན་རྣམས་ཀྱི་རྣམ་པར་བལྟ་ཞིང་། ཡིད་ཀྱི་ཡུལ་དུ་དུས་གསུམ་དུ་རྣམ་པར་ཤར་བའི་ཆོས་རྣམས་ཆུ་ཟླ་དང་། ཆུ་བུར་བཞིན་མཐར་ཐུག་བློ་ཡི་རྣམ་པར་རྟོག་པས་དཔྱད་ཅིང་བཟོད་པར་གྱུར་ན། དོན་དམ་མ་ཡིན་ཞིང་བློ་ནི་ཀུན་རྫོབ་འཁྲུལ་བའི་རང་གཟུགས་ཡིན་ཕྱིར། རང་སེམས་ཀྱི་གནས་ལུགས་གཅིག་ཡིན་བྱས་ཀྱང་མ་འགྲུབ་པ་དང་། དུ་མར་མ་གྲུབ་པས་སྔ་མ་ལས་ཀྱང་ལྷག་པར་འགལ་བའི་མཚན་ཉིད་རྣམ་པ་སྣ་ཚོགས་ནི། བློ་ཡི་ཡུལ་ན་ནམ་ཡང་གནས་མ་མྱོང་ཡང་གནས་པ་ལྟར་སྣང་བ་ནི་བློ་བྱས་ཁོ་ན་ལས་མ་འདས་སོ། །རེ་ཞིག་གྲུབ་པའི་མཐའི་རྣམ་བཞག་ནི་ཤེས་པའི་དོན་དམ་ཞེས་བློས་ཐོག་མཐའ་བར་གསུམ་ལ་དཔྱད་ཀྱང་འདི་ཞེས་དངོས་མཚན་མ་གྲུབ་པ་དང་། དངོས་པོའི་དོན་དམ་ཐོབ་བས་བཅོམ་པ་ཡི་ཞེས་གཟུགས་ཀྱི་དངོས་པོ་ཆེ་ཆུང་གང་ཡང་རུང་བ་དེ་དང་མཚམས་པའི་ཐོ་བ་དང་གཏུན་བུས་བརྡུངས་ཤིང་འཐག་ནས་རྡུལ་ཕྲན་ཆ་མེད་དུ་གྱུར་ཚེ་ཉན་ཐོས་སྡེ་པའི་ལུགས་ཀྱི་དོན་དམ་དུ་འདོད་པ་དང་། དོན་བྱེད་ནུས་པ་གང་ཡིན་པ་དེ་འདིར་ནི་ཡང་དག་པའི་ཀུན་རྫོབ་སྟེ། དེ་ལས་གཞན་པའི་དོན་དམ་ཞེས་དངོས་པོ་མཚན་མ་ཅན་ཞིག་ཡོད་པ་མིན་ཀྱང་ངོ་བོ་མི་སྟོང་པའི་ཆ་ནས་ཡོད་པ་ཡིན་ཞེས་འདོད་ལ། གཞན་ནི་ཀུན་རྫོབ་ཀྱི་ཆོས་རྣམས་དངོས་པོ་དང་མཚན་མ་ཅན་དུ་ཡོད་པར་འདོད་ཅིང་། དེ་ཡང་རང་སྤྱིའི་མཚན་ཉིད་ཀྱིས་བཤད་ཅེས་པ་ནི། འདི་ལྟར་ན་མངོན་སུམ་གྱི་སྣང་ཡུལ་ནི་དབང་པོ་སྒོ་ལྔའི་ཡུལ་ལ་ཤར་བའི་དོན་བྱེད་ནུས་པ་རྣམས་ལ་ཡང་དག་ཀུན་རྫོབ་ཏེ་རང་མཚན་གྱིས་ཁྱབ་པ་ཞེས་སོ་སོར་མི་དབྱེ་ལ། རང་མཚན་དང་། དངོས་པོ་དང་། དོན་དམ་བདེན་པ་ཞེས་ཡང་དག་ཀུན་རྫོབ་རྣམས་ཡིན་ཁྱབ་མཉམ་པ་དང་། རྟོག་པའི་སྣང་ཡུལ་ལ་སྤྱི་མཚན་ཞེས་ལོག་པའི་ཀུན་རྫོབ་ལྟར་ཤར་བ་དང་། སྤྱི་མཚན་དང་། དངོས་མེད་ཀྱི་ཆོས་དང་། བདེན་པ་ཀུན་རྫོབ་པ་ནི། ཉན་ཐོས་པས་རྡུལ་ཕྲན་ཆ་མེད་སིལ་བུར་དོན་དམ་དུ་འདོད་པ་རྣམས་ལ་ཡིན་ཁྱབ་མཉམ་དུ་འདོད་པའོ། །འདི་དག་ནི་ཧ་ལམ་ཙམ་དུ་མདོ་སྡེ་པའི་ལུགས་སུ་བཞག་ཅིང་ངོ་བོར་རྟོག་གེར་མཐུན་ཅེས་པའོ། །གཟུང་འཛིན་གཉིས་སུ་སྣང་བ་སྟེ། གཟུང་བ་ཆོས་ཀྱི་བདག་དང་། འཛིན་པ་གང་ཟག་གི་བདག་གཉིས་སུ་སྣང་བའི་ཡུལ་དབང་པོ་སྒོ་ལྔ་དང་། ཡུལ་ཅན་ཡིད་ཀྱི་རྣམ་ཤེས་ཏེ། ཀུན་རྫོབ་བདེན་པ་ཉིད་དེ་གང་ལས་གཞན་དུ་ཆོས་རྣམས་གཉིས་སུ་མེད་པར་ཤེས་པ་ནི། དོན་དམ་བདེན་པ་རུ་འདོད་པ་སེམས་ཙམ་པའི་གྲུབ་པའི་མཐའ་འོ། །ཇི་ལྟར་ཚོགས་དྲུག་གི་ཡུལ་དུ་སྣང་བ་ཐམས་ཅད་ཀུན་རྫོབ་ཏུ་གྲུབ་པ་རྒྱུ་མ་ལྟ་བུའི་མཚན་ཉིད་དོ། །དོན་དམ་པར་ཅིའི་ངོ་བོར་ཡང་གྲུབ་པ་མེད་པ་ནམ་མཁའ་ལྟར་འདོད་པ་ནི། དབུ་མ་རང་རྒྱུད་པའི་ལུགས་དང་། འདི་ལྟར་སྣང་བ་ཉིད་ནི་ཀུན་རྫོབ་བདེན་པ་དང་། སྟོང་པ་དོན་དམ་བདེན་པ་ཞེས་བྱ་བའི་ཐ་སྙད་ཀྱི་བཏགས་པ་གང་ཡང་སྤྲོས་པའི་མཐའ་དང་བྲལ་ཞིང་། སྣང་དུས་ཉིད་ནས་སྐྱེ་བ་དང་། འགག་པ་དང་འགྲོ་བ་དང་། འོང་བ་མེད་ལ། གཞན་དབང་དུ་གྱུར་པའི་དངོས་པོར་འདོད་པའི་ཀུན་རྫོབ་ཀྱི་ཆོས་རྣམས་ཀྱང་དེའི་གྲུབ་པའི་མཐའ་རུ་ཞེས་དྲང་དོན་བསླུ་བའི་ཆོས་ཅན་དུ་ཁས་མ་བླངས་པ་དེ་ནི་དབུ་མ་ཐལ་འགྱུར་བའི། ཤིང་རྟའི་སྲོལ་འབྱེད་ཆེ་ཞེས། འཕགས་པ་ཀླུའི་དབང་པོ་དང་ཟླ་བ་གྲགས་པའི་ཁྱད་ཆོས་ཡིན་ཅེས་པའོ། །འདིར་ནི་གྲུབ་མཐའ་འོག་མའི་རྣམ་པ་ཐམས་ཅད་གང་ལ་ཡང་རང་གཞུང་གི་ཚིག་དོན་ལ་བརྩད་ཅིང་བརྟགས་པས་གོང་མ་སྟེ། དབུ་མའི་གཞུང་ལམ་ནོར་བར་མི་འགྱུར་ཞིང་། རང་རང་གི་འདོད་ཞེན་གྱིས་སྦྱར་བ་གཞུང་ལ་ལྟོས་གྲུབ་ཀྱི། གྲུབ་པའི་མཐའི་མཚན་ཉིད་ཀུན་ཉམས་འོག་ཏུ་ཆུད་ཅིང་དེ་དག་ལས་ཀྱང་དངོས་དང་། དངོས་འདྲ་དངོས་མིན་གྱི་མཚན་ཉིད་ཇི་ལྟ་བ་བཞིན་ལེགས་པར་ཕྱེད་པའི་ཤེས་རབ་ཀྱང་ཐོས་པ་ལ་བརྟེན་ནས་ཤེས་བྱའི་ཆོས་རྣམས་འབྱུང་ཞིང་། དེས་ཉོན་མོངས་པའི་ཚོགས་རྣམས་བཅིལ་བར་འགྱུར་ཞིང་། དེ་ལྟར་ཉོན་མོངས་པ་མེད་པར་གྱུར་པ་ལ་བདུད་ཀྱི་གླགས་མི་རྙེད་དོ། །འདིར་གང་བཟུང་ན་སེམས་ཀྱི་གནས་ལུགས་གཤིས་ཀྱི་བཞུགས་ཚུལ་ལ། ཇི་ལྟ་བུར་འཆད་ན་སྨྲ་བསམ་བརྗོད་པ་དང་བྲལ་བའི་དབྱིངས་འགྱུར་བ་མེད་པ་དེ་དོན་དམ་པའི་བདེན་པ་ཡིན་མོད། འོན་ཀྱང་བློ་ཡི་ཆ་ནས་སྨྲ་བསམ་བརྗོད་པ་དང་བཅས་པ་རུ་སྒྲོ་བཏགས་ཤིང་། འཁྲུལ་པའི་སྣང་བ་འདི་ཀུན། ཀུན་རྫོབ་བདེན་པའི་ཆར་བཞག་ནས་བདེན་པ་གཉིས་པོ་རྟོགས་བྱ་དང་རྟོགས་བྱེད་ལས་འདས་པ་སུས་ཀྱང་མངོན་དུ་བྱར་མེད་ལ། དེ་ལྟར་རྟོགས་ཚེ་བལྟར་མེད་ཅིང་། རྟོགས་ནས་ཐོབ་རྒྱུ་དང་། མ་རྟོགས་ནས་མ་ཐོབ་པའི་འགལ་བ་གཉིས་ཀ་མེད་ཅིང་། བརྗོད་བྱ་སྟོད་པ་ཉིད་ཅེས་པ་དང་ངེེས་པར་རྗེས་སུ་མཐུན་པའི་བློ་སྐྱེས་པ་ལ་རྟོགས་པའི་བླ་དགས་སམ་ཐ་སྙད་དུ་བཏགས་པའོ། །དེ་ཡང་རང་བཞིན་ཇི་ལྟ་བུར་འཆད་པ་ནི་གང་ཞིག་རྟེན་ཅིང་འབྲེལ་བར་འབྱུང་བའི་མཚན་ཉིན་ནི། འཁོར་འདས་ཀྱི་ཆོས་རྣམས་མ་ལུས་པ་ཀུན་གྱི་མཛོད་ཡིན་ཞིང་གང་ལ་ཞེས་དེ་ལ་བསམ་པའི་ཤེས་རབ་ཀྱིས་ཡང་དག་པར་འཇུག་པ་ཤེས་བྱ་ཐམས་ཅད་འབྱེད་པའི་ལྡེ་མིག་ལྟ་བུ་ཡིན་ལ། དེ་ཡང་སྣང་སྲིད་འཁོར་འདས་ཀྱིས་བསྡུས་པའི་ཆོས་རྣམས་མ་ལུས་ཀུན་ཀྱང་། ཕྱོགས་བཅུ་དུས་གསུམ་གང་ནས་ཀྱང་ནི་མ་འོངས་ལ། གང་དུའང་མ་སོང་ཞིང་། ད་ལྟ་གང་དུའང་མི་གནས་པ་འདི་ལྟ་བུ་ནི་རང་སེམས་ཀྱི་གཤིས་ལ་གནས་པ་རྟེན་ཅིང་འབྲེལ་འབྱུང་དེ་ཆོས་ཅན་ཉིད་ཀྱང་སྐྱེ་འགགས་གནས་གསུམ་བྱེད་པ་ལྟར་ལགས་ཀྱང་། འཁྲུལ་སྣང་དུ་ཤར་བའི་དུས་ཉིད་ནས་སྟོང་པར་ཤར་ཞིང་། སྤྲོས་པ་ཀུན་གྱིས་མཐའ་ལ་མི་གནས་པ་དེ་ནི་མཐའ་གང་དུའང་མ་ལྟུང་བའི་དབུ་མའི་རང་བཞིན་ཉིད་དུ་བསྟན་པ་ལ། དེ་ལ་ཡང་འཁྲུལ་བའི་སྣང་ངོར་དག་པ་དང་། མ་དག་པ་དུ་མ་ཞིག་བྱུང་བ་གློ་བུར་བ་སྟེ་སེམས་ཀྱི་ཆོ་འཕྲུལ་དོན་ལ་མེད་ཀྱང་། མེད་བཞིན་སྣང་བ་རྨི་ལམ་གྱི་ཆོས་དང་མཚུངས་ཤིང་ཀུན་བཏགས་པས་ཉེ་བར་ལེན་པའོ། །དེ་ཡང་གནས་ལུགས་རང་ངོ་མ་མཐོང་ཞིང་རང་བབས་སུ་མ་བཞག་ནས་རྟོག་ཅིང་དཔྱད་པའི་སྐྱོན་གྱིས་མཐའ་བཞི་བྱུང་བ་ཡང་། ཡོད་མཐའ་དང་། མེད་མཐའ་དང་། རྟག་མཐའ་དང་། ཆད་མཐའ་སྟེ་བཞི་ལ་མ་གནས་ཀྱང་། དབུས་ལ་མཆོག་འཛིན་བྱས་ནས་གནས་པའང་མཁས་པ་མིན་ཏེ། ཇི་ལྟར་ན་དར་གྱི་སྲིན་བུ་བཞིན་ཞེས་པ་ནི། སྡོམ་སྲིན་གྱི་ཐག་རྒྱ་བྲན་ཚེ་ཐབས་ལ་མ་མཁས་པའི་སྐྱོན་རང་གི་རྐང་ལག་ཁ་ཆུའི་དར་སྐུད་ཀྱིས་འཆིང་བ་བཞིན། འདོད་པའི་གྲུབ་མཐའ་སྟེ། བོད་ཡུལ་འདིར་རང་འདོད་ཀྱི་གྲུབ་མཐའ་མང་པོ་ཞིག་བྱུང་ཞིང་། རྒྱལ་བསྟན་ལ་ཕན་འདོགས་པའི་སྒྱུ་འཕྲུལ་གྱིས་གནོད་པར་འགྱུར་ཞེས་རང་ཉིད་བཅིངས་པ་ཡང་སྟོན་པས་མུ་སྟེགས་པ་དང་། མི་སྟུགས་པས་ང་ཡི་བསྟན་པ་མི་འཇིག་སྟེ། ང་འདྲ་བའི་དགེ་སློང་ཞིག་གིས་རྐྱེན་གྱིས་འཇིག་པར་འགྱུར་རོ། །ཞེས་གསུངས་པས། འཇིག་རྟེན་འདི་ན་བློས་བཏགས་པའི་ཆོས་ཇི་སྙེད་ཅིག་མཆིས་ཀྱང་། དོན་ལ་སྐྱེ་བ་དང་། འགགས་པ་དང་། གནས་པ་དང་། འགྲོ་བ་དང་། འོང་བ་སོགས་མིན་ལ། དོན་གཅིག་པ་ཡང་མ་ཡིན་ལ་ཐ་དད་པ་མིན། རྟག་པ་ཡང་མ་ཡིན་ལ། ཆད་པའང་མིན་ཏེ། དུས་གསུམ་གྱི་སྤྲོས་པ་མཐའ་དག་ཉེ་བར་ཞི་བའི་རང་བཞིན་ཉིད་དུ་ཤེས་པར་བྱ་བ་ནི། བསམ་བྱུང་གི་ཤེས་རབ་ཀྱིངོ་བོ་ཡིན་ཞིང་། སྣང་བའི་ཡུལ་ས་ཆུ་མེ་རླུང་ནམ་མཁའ་དང་ལྔ་པོ་འབྱུང་ཆེན་ཡིན་ལ། དེ་ལ་བརྟེན་པའི་རི་དང་ནགས་ཚལ་དང་། ཁང་བུ་བརྩེགས་པ་སོགས་འདུས་བྱས་ཀྱི་རྒྱུ་ལས་ སྣང་སྲིད་ཐམས་ཅད་སྐྱེས་པས་ན་འཁོར་བ་རྟེན་ཅིང་འབྲེལ་བར་འབྱུང་བ་ཡིན་ཏེ། ཅིའི་ཕྱིར་ན་འཁོར་བའི་ཐོག་མ་མ་རིག་པས་བཟུང་བ་ལ། འདུ་བྱེད་དང་། རྣམ་པར་ཤེས་པ་དང། མིང་གཟུགས་དང་། སྐྱེ་མཆེད་དྲུག་དང་། རེག་པ་དང། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒས་པ་དང་། ན་བ་དང་། འཆི་བ་སྟེ། དེ་བཞིན་དུ་གཅིག་ལ་གཅིག་བརྟེན་གྱིས་རྒ་ཤིའི་བར་དུ་རིམ་བཞིན་འབྲེལ་བ་ནི། ནང་གི་རྟེན་ཅིང་འབྲེལ་ བར་འབྱུང་བ་ཞེས་སུ་གྲགས་ཤིང། མྱ་ངན་ལས་འདས་པའི་རྟེན་ཅིང་འབྲེལ་བར་འབྱུང་བ་ནི། ལམ་དང་འབྲས་བུ་གཉིས་སུ་གནས་པ་སྟེ། ལམ་ནི་འཁོར་བའི་རྟེན་ཅིང་འབྲེལ་འབྱུང་ཡིན་ཏེ། ལུགས་སུ་འཇུག་པ་བཅུ་གཉིས་སམ། རྟེན་འབྲེལ་བཅུ་གཉིས་ཀྱི་མ་རིག་པའི་སྨག་རུམ་ཆེན་པོ་ནི། རིག་པ་ཡེ་ཤེས་ཀྱི་སྣང་བ་ཆེན་པོས་ལྡོག་པས་འདུ་བྱེད་ལ་སོགས་པའི་རྟེན་འབྲེལ་གཞན་རྣམས་ཀྱང་ལུགས་ལས་ལྡོག་སྟེེ། སྲིད་པའི་རྩ་བ་ཆད་པར་འགྱུར་བ་ཡིན་ལ། དེ་ལྟར་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་ལུགས་འབྱུང་གི་སྐྱོན་དང་། ལུགས་ལས་ལྡོག་པའི་ཡོན་ཏན་གྱི་མཚན་ཉིད་མཐོང་བའི་སྐྱེས་བུས་སྡུག་བསྔལ་གྱི་བདེན་པ་ཤེས་པར་བྱ་ཞིང་། ཀུན་འབྱུང་སྤོང་ཞིང་ལམ་རྒྱུད་ལ་བརྟེན་ནས་འགོགས་པ་མངོན་དུ་གྱུར་ནས་ལམ་མཆོག་མཐོང་བའོ། །དེ་ལྟར་འཁྲུལ་ངོར་སྣང་བ་ཐམས་ཅད། སྐྱེ་བ་མེད་པའི་ངང་དུ། བསམ་པས་གཏན་ལ་ཕབ་པ་དེའི་རང་བཞིན་ནི་སེམས་ཀྱི་གནས་ལུགས་ཤེས་པའི་ཆོས་ཉིད་འགྱུར་བ་མེད་པའི་ངང་དུ་མཉམ་པར་བཞག་པ་ལ་བསྒོམ་པའི་ཤེས་རབ་ཅེས་སུ་གྲགས་པ་སྟེ། དེ་ཉིད་ཀྱི་རང་བཞིན་ནི་ནམ་མཁའ་རྣམ་པར་དག་པའི་དབྱིངས་བསྒོམ་པའི་དོན་དང་རོ་གཅིག་འདྲེས་པའི་ཕྱིར། དེ་ལ་གཟུགས་སྒྲ་དྲི་རོ་རེག་བྱ་སྟེ་ཕུང་པོ་ལྔ་དང་། རྣམ་པར་ཤེས་པའི་ཚོགས་བརྒྱད་སོགས་འཁོར་བའི་འཁྲུལ་སྣང་ཀུན་ཀྱང་ཡོད་པ་མ་ཡིན་ན་མེད་ཅེས་བློས་བཀག་པར་གྱུར་ན་ཤེས་རབ་ཉིད་དང་ལྷག་པར་འགལ་ཞིང་། རིག་པའི་གནས་ལུགས་ནི་ཅང་མེད་པའི་སྟོང་པ་ཕྱང་ཆད་པ་ཉིད་མ་ཡིན་ཏེ། སྐུ་གསུམ་དང་སྐུ་བཞི་སྐུ་ལྔ་སོགས་དང་ཡེ་ཤེས་ཀུན་ཀྱི་མཛོད་ཡིན་པར་ངེས་ཤིང་། རང་བཞིན་ཉིད་དུ་རྣམ་པར་དག་པའི་ཕྱིར་རང་སེམས་ཀྱི་གནས་ལུགས་ལ་ཡང་དག་ཉིད་ལ་ཡང་དག་བལྟ་ཞེས་པ་བལྟར་མེད་ཀྱི་ཚུལ་དུ་གོམས་པར་བྱ་བ་ཙམ་ལས་གཉིས་སུ་འཛིན་པའི་ཚུལ་གྱིས་བལྟ་ཞེས་བྱ་བའང་ཀུན་རྫོབ་བ༷དེ༷ན་པ༷་སྟེ༷། དེ་ལྟར་མ་ཡིན་པའི་གནས་ལུགས་ཀྱི་ངང་ལས་མ་གཡོས་པ་བསྒོམ་པའི་མཆོག་ཡིན་ཏེ། དེའི་མདུན་ན་སྙེམས་བྱེད་ཀྱི་བློ་དང་ནི། ཐེ་ཚོམ་སོགས་ཡིད་ལ་བྱེད་པ་ཐམས་ཅད་གནས་པ་མིན་ན། དེ་ལྟ་བའི་ཤེས་རབ་དེ་འདྲར་ཡོངས་སུ་ཤེས་ན། ཐབས་རྣམས་སྣ་ཚོགས་ཀྱིས་རྣམ་པར་གྲོལ་བར་འགྱུར་ལ། ཤེས་རབ་མེད་པའི་ཐབས་ཀྱིས་ནི། བཅིངས་བ་ཉིད་ལས་གྲོལ་བ་མེད། གང་དུ་སྟོངཔ་ཉིད་དང་སྙིང་རྗེ་གཉིས་པོ་རྒྱུད་ལ་བསྟེན་པ་ཚོགས་ལམ་ཆེ་བ་སྟེ། སྦྱོར་ལམ་བཟོད་པ་ཆོས་མཆོག་མན་ཆད་མཉམ་བཞག་དང་རྗེས་ཐོབ་གཉིས་ལས། གོང་མ་ལ་སྟོང་པ་དང་། འོག་མ་ལ་སྙིང་རྗེ་གཉིས་པོ་ཡ་མ་བྲལ་བར་འཆར་ཞིང་། མཐོང་ལམ་ཐོབ་ནས་སྟོང་ཉིད་སྙིང་རྗེ་གཉིས་པོ་ནི་ཟུང་དུ་འཇུག་ཅིང་འདུ་འབྲལ་མེད་ཅིང་རབ་ཏུ་དགའ་བ་སྟེ། དང་པོའི་སར་སླེབས་ཚེ་ཆོས་ཉིད་ཀྱི་བདེན་པ་མངོན་སུམ་དུ་མཐོང་ཞིང་། དེ་ནས་འཕགས་པའི་བསྒོམ་ལམ་དག་པ་ས་གསུམ་ཚུན་ཆད་དུ། ས་ལ་མ་གྱི་ཡོན་ཏན་རྣམས་རིམ་བཞིན་རྫོགས་ནས། ས་བཅུ་རྒྱུན་གྱི་མཐའ་མ་ལ་ཐུག་ཚེ། རྡོ་རྗེ་ལྟ་བའི་ཏིང་ངེ་འཛིན་གྱིས་ཤེས་བྱའི་སྒྲིབ་པ་མ་ལུས་པ་བཅོམ་ནས་མངོན་བྱང་ཆུབ་པ་ཡིན་ལ། དུས་དེར་མཉམ་པར་མ་བཞག་པ་མེད་པ་སོགས་སངས་རྒྱས་ཀྱི་སའི་ཡོན་ཏན་རྒྱལ་བའི་མ་འདྲེས་པའི་ཆོས་བཅོ་བརྒྱད་ནི། སྐུའི་སྤྱོད་པ་འཁྲུལ་པ་མི་མངའ་བ། གསུང་ལ་དྲན་པ་ཉམས་པ་ཅ་ཅོ་མི་མངའ་བ། ཐུགས་ལ་མཉམ་པར་མ་བཞག་པར་མི་མངའ་བ། ཐ་དད་པ་ཉིད་ཀྱི་འདུ་ཤེས་མི་མངའ་བ། སོ་སོར་མ་བརྟགས་པའི་བཏང་སྙོམས་མི་མངའ་བ་སྟེ། སྤྱོད་པ་མ་འདྲེས་པ་དྲུག འདུན་པ་ཉམས་པ་མི་མངའ་བ། བརྩོན་འགྲུས་ཉམས་པ་མི༴ དྲན་པ་ཉམས༴ ཏིང་ངེ་འཛིན་ཉམས་པ༴ ཤེས་རབ་ཉམས་པ༴ རྣམ་པར་གྲོལ་བ་ཉམས་པ་མི་མངའ་བ་སྟེ། རྟོགས་པ་མ་འདྲེས་པ་དྲུག། སྐུའི་ཕྲིན་ལས་རྣམས་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ༴ གསུང་གི་ཕྲིན་ལས་རྣམས༴ ཐུགས་ཀྱི་ཕྲིན་ལས༴ འབྲང་བ་སྟེ། ཕྲིན་ལས་མ་འདྲེས་པ་གསུམ། འདས་པ་ལ་མ་ཆགས་མ་ཐོགས་པའི་ཡེ་ཤེས༴ མ་འོངས་པ་ལ་མ་ཆགས༴ ད་ལྟར་འབྱུང་བ་ལ་མ་ཆགས་ཏེ། མ་འདྲེས་པ་གསུམ་རྣམས་སོ། །སྟོབས་བཅུ་ནི། གནས་དང་གནས་མ་ཡིན་པ་མཁྱེན་པའི་སྟོབས། ལས་ཀྱི་རྣམ་པར་སྨིན་པ་མཁྱེན༴ མོས་པ་སྣ་ཚོགས༴ ཁམས་སྣ་ཚོགས༴ དབང་པོ་མཆོག་དང་མཆོག་མ་ཡིན་པ༴ ཐམས་ཅད་དུ་འགྲོ་བའི་ལམ༴ ཀུན་ནས་ཉོན་མོངས་པ་དང་རྣམ་པར་བྱང་བ༴ སྔོན་གྱི་གནས་རྗེས་སུ་དྲན་པ༴ འཆི་འཕོ་བ་དང་སྐྱེ་བ༴ ཟག་པ་ཟད་པ་མཁྱེན་པའི་སྟོབས་རྣམས་དང་ནི། མ་འདྲེས་བཞིའམ། གཞན་ཡང་མི་འཇིགས་པ་བཞི་ནི། རང་དོན་སྤངས་པ་ལ་དམ་བཅའ་བ་ལ་མི་འཇིགས་པ་དང་། རྟོགས་པ་དམ་བཅའ་བ་ལ་མི༴ གཞན་དོན་སྤང་བ་དམ་བཅའ་བ༴ གཉེན་པོ་དམ་བཅའ་བ་ལ་མི་འཇིགས་པ་བཅས་མཐའ་དག་མངོན་དུ་གྱུར་པ་ལ་ནི་སངས་རྒྱས་ཀྱི་ཐ་སྙད་བཞག་པ་ཙམ་ཡིན་ནོ། །འདི་ལྟར་བཤད་ཟིན་པའི་ཕ་རོལ་ཏུ་ཕྱིན་པ་དྲུག་པོ་འདི་ནི། དུས་གསུམ་དུ་བྱོན་པའི་རྒྱལ་བ་ཀུན་གྱི་གཤེགས་ཤུལ་གྱི་གཞུང་ལམ་ཡིན་ཏེ། དེ་ནི་ལྟ་བའི་ཕྱོགས་མེད་པའི་དོན་རྟོགས་པའི་མ་རྨོངས་པ་དང་། སྤྱོད་པའང་ཤིན་ཏུ་རྣམ་དག་སྟེ། ཐབས་ཤེས་ཡ་མ་བྲལ་བའི་ངང་ནས་ཀ་དག་དོན་གྱི་འོག་མིན་ཞེས་རྣམ་པར་གྲོལ་བའི་ས་ལ་འགྲོ་བའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་དགུ་པའི་བསྡུས་འགྲེལ་ལོ། ལེའུ་བཅུ་པ།༈ ཚོགས་ལམ་ཆུང་ངུ་དྲན་པ་ཉེ་བར་བཞག་པ་བཞིི། ཚོགས་ལམ་འབྲིང་པོ་ཡང་དག་པར་སྤོང་བ་བཞི། ཚོགས་ལམ་ཆེན་པོ་རྫུ་འཕྲུལ་གྱི་རྐང་པ་བཞིའོ། །རྫུ་འཕྲུལ་རྐང་པ་བཞི་ནི། འདུན་པའི་ཏིང་ངེ་འཛིན་དང་། བརྩོན་འགྲུས་ཀྱི་ཏིང་ངེ་འཛིན་དང་། སེམས་ཀྱི་ཏིང་ངེ་འཛིན༴ དཔྱོད་པའི་ཏིང་ངེ་འཛིན་དང་བཞིའོ། །སྦྱོར་ལམ་གྱི་དྲོད་རྩེ་མོ་ཆུང་ངུ། བཟོད་པ་འབྲིངཔོ་དང་། ཆོས་མཆོག་ཆེན་པོའོ། །དྲོད་རྩེ་གཉིས་སུ་དབང་པོ་ལྔ་བསྒོམ་པ་ནི། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོའོ། །བཟོད་ཆོས་གཉིས་སུ་སྟོབས་ལྔ་བསྒོམ་སྟེ། དད་པའི་སྟོབས་སོགས་གོང་ལྟར་བསྒྱུར་རོ། །འཕགས་ཆོས་ལྔ་ནི། སུན་འབྱིན་གཉེན་པོ་དང་། སྤོང་བའི༴ རྟེན་གྱི༴ ཐག་བསྲིང་གི་སོགས་ལྔའོ། །མཐོང་ལམ་གྱི་རྟེན་བྱང་ཆུབ་ཀྱི་ཡན་ལག་བདུན་ཡིན་ཏེ། དྲན་དང་ཆོས་རབ་རྣམ་འབྱེད་བརྩོན་འགྲུས་དང་། དགའ་དང་ཤིན་ཏུ་སྦྱངས་དང་ཏིང་འཛིན་དང་། བཏང་སྙོམས་འདི་བདུན་བྱང་ཆུབ་ཡན་ལག་སྟེེ། ཞེས་བཤེས་སྤྲིངས་ལས་སོ། །འཕགས་པའི་ལམ་ཡན་ལག་བརྒྱད་སྔ་མ་དེ་རུ། ཡང་དག་ལྟ་དང་འཚོ་དང་རྩོལ་བ་དང་། དྲན་དང་ཏིང་འཛིན་ངག་དང་ལས་མཐའ་དང་། ཡང་དག་རྟོགས་ཉིད་ལམ་གྱི་ཡན་ལག་བརྒྱད། ཅེས་བཤེས་སྤྲིངས་ལས་སོ། །དེ་ཡང་ཐེག་ཆེན་རྣམ་པ་གཉིས་སུ་གསུངས་པའི། བྱང་ཆུབ་སེམས་དཔའི་གཞི་ལ་སྔགས་ཀྱི་ཐེག་པ་ཁྱད་པར་དོན་གྱི་ཚོམ་བུ་བཀོད་པ་ལ། འབྲས་བུ་ནི་གཞོམ་གཞིག་དང་འགྱུར་བ་མེད་པའི་ཆ་ནས་རྡོ་རྗེའི་ཐེག་པ་དང་། ཐབས་མང་ཞིང་དཀའ་བ་མེད་པའི་དབང་རྣོན་གྱི་ཐེག་པ་ལ་རིག་པ་འཛིན་པའི་སྡེ་སྣོད་ཅེས་ཡོངས་སུ་གྲགས་ཤིང་། རྒྱུའི་ཐེག་པ་ལས་ཁྱད་པར་དུ་འཕགས་པ་ཡིན་ལ། རྒྱུན་ཆགས་སམ་རྒྱུན་ཆད་མེད་པའི་ངོས་ནས། གཞི་རྒྱུད་བདེ་གཤེགས་སྙིང་པོ་དང་། ལམ་རྒྱུད་བསྐྱེད་རྫོགས་བསྒོམ་བཟླས། འབྲས་བུའི་རྒྱུད་སྐུ་དང་ཡེ་ཤེས་རྣམས་ལས། བསྐྱེད་རིམ་དང་རྫོགས་རིམ་གཉིས་ལ་བརྟེན་ནས་ཐབས་དང་ཤེས་རབ་ཟུང་དུ་འབྲེལ་བའི་ལམ་ལ་ཞུགས་པའི་གསང་སྔགས་ཕྱི་རྒྱུད་གསུམ་ལྟར། དཀའ་ཐུབ་མཐུ་ཡིས་མི་གདུང་ཞིང་འཇུག་སྒོ་ཡངས་པ་དང་། དབང་པོ་རྣམ་པ་གསུམ་ལས་རྣོན་པོའི་དབང་དུ་བྱས་ཏེ་སྔགས་ཀྱི་ལམ་ལ་བསླབ་པའི་བརྟུལ་ཞུགས་མྱུར་བ་དང་། དུས་ལ་དགོངས་པ་སྟེ་རྫོགས་ལྡན་གྱི་དུས་བྱ་རྒྱུད་དང་། གསུམ་ལྡན་ལ་སྤྱོད་རྒྱུད་དང་། གཉིས་ལྡན་ལ་རྣལ་འབྱོར་དང་ནི་རྩོད་པར་ལྡན་པ་ལ་བླ་མེད་དང་བཞིའོ། །རིགས་ལ་དགོངས་པ་ནི། བྲམ་ཟེ་དང་རྗེ་འུ་རིགས་དང་། རྒྱལ་པོ་དང་ནི། དམངས་སམ། གདོལ་བའོ། །དབང་པོར་དགོངས་པ་ནི། རྟུལ་པོ་དང་། འབྲིང་དང་། རྣོན་པོ་དང་། མཆོག་གོ་ཆོས་ནི་དེ་དག་སོ་སོའི་རིམ་པར་བྱ་བ་དང་། སྤྱོད་པ། རྣམ་འབྱོར། བླ་ན་མེད་པའོ། །དང་པོ་གསུམ་ནི་གསང་སྔགས་ཕྱི་པ་སྟེ། ཐུབ་པས་དངོས་སུ་གསུངས་པའི་མཚན་ཉིད་ཀྱི་ཐེག་པ་དང་། གཙང་སྦྲ་དང་སྡོམ་པའི་ཀུན་སྤྱོད་ཕལ་ཆེར་མཚུངས་ཤིང་རྩོད་པའི་དུས་འགལ་བའི་ཞེས་མི་མཚུངས་པའི་འདོད་ཆགས་ཀྱི་ཀུན་སྤྱོད་ལམ་དུ་བྱེད་ཅིང་། ལྷ་ཡང་གཅིག་ལ་གཅིག་བལྟས་པའི་དགའ་བས་ཚིམ་པ་ཙམ་ལས་ཟུང་འབྲེལ་དུ་རོལ་པ་མིན་ལ། ཤ་ལྔ་དང་བདུན་རྩི་ལྔ་ལ་ལོངས་མི་སྤྱོད་ཅིང་སྤང་བྱའི་རྫས་སུ་འཇོག་པའོ། །དེ་དག་གི་རིམ་པ་དབྱེ་ན། བྱ་བ་དང་ནི་སྤྱོད་པའི་རྒྱུད་ལའང་སེམས་དཔའ་སེམས་མ་དང་། རིགས་སྔགས་དང་། གཟུངས་སྔགས་ཀྱི་ལྷ་རྣམས་ཇི་ལྟར་བསྒྲུབ་ཚུལ་ནི། བྱ་བས་ཡེ་ཤེས་པ་རྗེ་བོ་དང་། བདག་ཉིད་བྲན་ནམ་ཁོལ་པོའི་ཚུལ་དང་། སྤྱོད་པས་སྤུན་ནམ་གྲོགས་པོའི་ཚུལ་དུ་བསྒྲུབ་དགོས་རྒྱུ་སྟེ། བྱ་བས་རྗེ་བོདང་ཁོལ་པོའི་རྣམ་པར་བསྒྲུབ་པ་ལའང་བདག་བསྐྱེད་མེད་པས་རང་ཉིད་དམན་སར་བཞག་པ་དང་། ལ་ལར་བདག་བསྐྱེད་ཡོད་དེ་གཙོ་བོར་མདུན་བསྐྱེད་སྟོན་པ་ཡིན་ལ། ཕྱིའི་བྱ་བ་ཡན་ལག་ལྔ་ཁྲུས་སོགས་གཙང་སྦྲ་གཙོ་བོར་སྟོན་ཅིང་མཆོག་དམན་གྱི་ཚུལ་དུ་བསྒྲུབ་ནས་དངོས་གྲུབ་ཐོབ་པར་འདོད་པའོ། །བྱ་བའི་རྒྱུད་ལས་བཤད་པའི་ལུས་ཀྱི་སྤྱོད་པ་གཙོ་བོར་བྱེད་པ་ཐབས་དང་། ནང་གི་རྣལ་འབྱོར་ལ་ཆ་མཉམ་པར་སྤྱོད་པས་རྒྱུད་དུ་གྲགས་ལ། རང་ཉིད་དམ་ཚིག་སེམས་དཔའ་མདུན་དུ་བཞུགས་པའི་མོས་པ་དང་། དེའི་མདུན་དུ་ཡེ་ཤེས་པ་བཞུགས་པར་མོས་པའི་ལྷ་དེ་དག་སྤུན་ཟླ་འམ་གྲོགས་པོའི་ཚུལ་གྱིས་དངོས་གྲུབ་ལེན་པའོ། །རྣལ་འབྱོར་རྒྱུད་གྱི་གྲུ་ཆད་ཅེས་པ་ནི། གཞལ་ཡས་ཁང་གི་གྲུ་ཟུར་བཅད་པ་མན་ཆད་ལ་བཀོད་པ་ཆེན་པོ་ལོངས་སྤྱོད་རྫོགས་པ་ནི། འོག་མིན་ལོངས་སྐུའི་ཞིང་ཁམས་ཡིན་ལ། དེ་ཉིད་བཞུགས་ཚུལ་ལྟར་བསྟན་ཡང་སྟངས་དཔྱལ་ཟུང་འབྲེལ་མ་ཡིན་ཞིང་། བསྐྱེད་པ་དང་རྫོགས་པ་དང་། ཐབས་དང་ཤེས་རབ་རིམ་པ་ཅན་ཐ་དད་དམ་སོ་སོ་བ་ནང་གི་རྣམ་འབྱོར་གཙོ་བོར་སྤྱོད་ཅིང་ལུས་ངག་གི་སྤྱོད་པ་གྲོགས་སུ་སྟོན་པ། ཡེ་ཤེས་པ་འགུག་ཅིང་བསྟིམ་པ་ལ་ཕྱག་རྒྱ་བཞི་བཅིངས་ཏེ་དམ་ཚིག་པ་དང་ཡེ་ཤེས་པ་གཅིག་པའི་ངང་ནས་དངོས་གྲུབ་བླངས་ནས་བཟླས་པའི་མཐའ་ལ་གཤེགས་གསོལ་བྱའོ། །བླ་ན་མེད་པ་གསང་སྔགས་ནང་པ་གསུམ་ལས། དང་པོ་ནི། བསྐྱེད་པ་མ་ཧཱ་ཡོ་ག་དང་། རྫོགས་པ་ཆེན་པོ་ཨ་ནུ་ཡོ་ག་དང་། ཟུང་དུ་འཇུག་པ་ལས། ཕ་རྒྱུད་དང་། མ་རྒྱུད་དང་གཉིས་མེད་རྒྱུད་གསུམ་དུ་བཞག་པ་ཡིན་ལ། ལྷ་ནི་འཁྲིལ་སྦྱོར་དང་དམ་རྫས་ཁྱད་པར་ཅན་ཞེས་བྱ། ཤ་ལྔ་བདུད་རྩི་ལྔར་ལོངས་སྤྱོད་ཅིང་གཙང་བཙོག་ལ་སྤོང་བ་དང་ལེན་པ་མེད་པའི་རང་བཞིན་ཅན་ཡིན་ཏེ། དེ་ཡང་རྣལ་འབྱོར་ཆེན་པོ་ནི་ཕ་རྒྱུད་ཐབས་ཀྱི་ལམ་ཡིན་པསབསྐྱེད་རིམ་གཙོ་བོར་བྱས་ནས་གྱེན་རྒྱུ་དང་། ཐུར་སེལ་དང་། མེ་མཉམ་དང་། སྲོག་འཛིན་དང་། ཁྱབ་བྱེད་དེ། རླུང་ལྔ་པོ་དག་པར་བྱེད་ཅིང་། རྗེས་སུ་རྣལ་འབྱོར་ནི། མ་རྒྱུད་ནི་རྣམ་ཀུན་མཆོག་ལྡན་ཤེས་རབ་ཀྱི་ལམ་སྟེ། རྫོགས་རིམ་གཙོ་བོར་བྱེད་པས་ཁམས་བྱང་ཆུབ་སེམས་ལས་ཞུ་བདེ་བསྐྱེད་ཅིང་། འབྲས་བུ་འབྱིན་པ་ཡིན་ལ། ཤིན་ཏུ་རྣལ་འབྱོར་ནི་གཉིས་མེད་ཡེ་ཤེས་ཀྱི་ལམ་ཡིན་ཏེ། གཅིག་དང་དུ་མ་བྲལ་བའི་འོད་གསལ་ཆེན་པོ་ནི། བདེ་གཤེགས་སྙིང་པོ་ཡིན་ཏེ། དེ་དང་གཉིས་སུ་མེད་པར་སྦྱོར་བ་སྟེ། དེ་དག་ཀུན་གྱི་གནད་དུ་ཁམས་དྲུག་ལྡན་པའི་ལུས་ཏེ། འབྱུང་བ་ལྔའི་ཁམས་དང་། དེའི་སྟེང་དུ་ཡེ་ཤེས་ཀྱི་ཁམས་བསྣན་པའི་དྲུག་ཡིན་ལ། དེ་ལྟར་ཕུང་པོ་ཁམས་དང་། སྐྱེ་མཆེད་རྣམས་དང་། རྩ་གསུམ་འཁོར་ལོ་ལྔའི་རྩ་རྣམས་གཙོ་བོར་གྱུར་བའི་སྤྱིར་རྡོ་རྗེའི་ལུས་ལ་རྩ་སྟོང་ཕྲག་བདུན་ཅུ་དོན་གཉིས་ཡོད་པར་གསུང་བཞིན། དེ་ལ་རྟེན་དང་བརྟེན་པའི་ཚུལ་གྱི་ཐིག་ལེ་དཀར་དམར་གྱི་རྣམ་པར་གནས་པ་རླུང་གི་འགྲོ་འོང་ལས་སྤྲོ་བསྡུ་བྱེད་པ་མིན་ཀྱང་རླུང་སེམས་ལས་སུ་རུང་བ་ལས་བསྐྱེད་པ་དང་། རྫོགས་པ་དང་། ཟུང་འཇུག་གསུམ་ཀའི་དཔལ་དང་ཡོན་ཏན་ཀུན་བསྐྱེད་པ་རྡོ་རྗེ་ཐེག་པའི་ལམ་སྒྲ་ཇི་བཞིན་པ་ཡིན་ཏེ། དེ་ཉིད་རང་བཞིན་ལྷུན་གྲུབ་ཀྱི་དཀྱིལ་འཁོར་ཆེན་པོ་ཡིན་ལ། ཡིན་བཞིན་རྟོགས་པ་རྒྱུ་ལྟ་བས་ཐེག་བཅད་ཅིང་། བསྒོམ་པས་ཉམས་སུ་བླངས་ནས། སྤྱོད་པས་ལ་དོར་ནས་འབྲས་བུ་རང་གཞན་དོན་གཉིས་བསྒྲུབ་པ་ནི། གཞི་དང་། ལམ་དང་། འབྲས་བུའི་རྒྱུད་ལ་ཡང་དག་པར་བརྟེན་པའོ། །འཇུག་པའི་སྒོ་ནི་སྨིན་པར་བྱེད་པ་དབང་གི་རིམ་པ་དང་། གྲོལ་བར་བྱེད་པ་ལའང་བསྐྱེད་པའི་རིམ་པ་དང་། རྫོགས་པའི་རིམ་པ་སྟེ་རྣམ་པ་གཉིས་དང་། དེའི་སྟེང་དུ་མཐུན་པའི་གྲོགས་སུ་དམ་ཚིག་སྤྱོད་པ་གསུམ་དུ་ཡོད་པ་ལ་སྔགས་ཀྱི་ལམ་མཆོག་རྣལ་མར་ངེས་པ་ལ། གསང་སྔགས་ཉམས་སུ་ལེན་པའི། དང་པོ་དབང་བསྐུར་མ་ཐོབ་ན་དངོས་གྲུབ་མེད་ཅིང་། བྱེ་མ་ཅི་ཙམ་བཙིར་བ་ལ་ཞུན་མར་འདོད་པ་བཞིན་དུ་འཆད་པ་དང་ཉན་པ་དང་བསྒོམ་པ་ལ་བརྩོན་པར་གྱུར་ཀྱང་དམྱལ་བར་འགྲོ་བ་ལས་འོས་མེད་ཅིང་། དབང་ཇི་བཞིན་ཐོབ་པའི་སྐྱེས་བུ་དེ་ཉིད་རྒྱལ་བའི་སྲས་སུ་འགྱུར་བར་གདོན་མི་ཟ་ལ། དེར་མ་ཟད་དཀྱིལ་འཁོར་གྱི་ཚོན་རྩི་མཐོང་བའི་མོད་ལ་སྡིག་པ་ཀུན་ལས་རྣམ་པར་གྲོལ་བར་འགྱུར་ཞིང་གཙང་མའི་རིས་ཀྱི་ལྷ་ལྔའི་ནང་དུ་སྐྱེ་ཞིང་། དེ་ནས་སྐྱེ་བ་བདུན་དག་ན་སངས་རྒྱས་ངེས་པར་འགྲུབ་ཅིང་ས་བཅུ་འཐོབ་པར་བཤད་པ་ནི་སྒྲ་ཇི་བཞིན་པའོ། །དེ་ཡང་དབང་སྐུར་བྱེད་ཀྱི་སློབ་དཔོན་ནི་བསྐྱེད་རིམ་དང་རྫོགས་རིམ་གཉིས་ཀའི་གདེང་དང་བྲལ་ཞིང་། བསྟི་གནས་དཀོར་སྤྱོད་ཅེས་རང་གི་སྡོད་གནས་ཁྱིམ་ཆེན་ཁྱིམ་ཆུང་གང་ཡང་འདྲ་སྟེ། དེ་ཉིད་བསྲུང་བས་ཆེད་དུ་ལོག་འཚོ་ལྔ་སོགས་དཀོར་ཟས་ལ་བག་མེད་དུ་སྤྱོད་པ་དང་། མ་བསྡམ་པ་ཞེས་སྡོམ་པ་གསུམ་དང་འགལ་བའི་ལས་ལ་ཅང་མི་སེམས་ཤིང་ཁྱིམ་ལ་ཆགས་པ་དང་། ཆོས་ཀྱི་རྩ་བ་སྙིང་རྗེ་ཆུང་བ་དང་། རྟོག་གེས་ཟིལ་གྱི་གནོན་པ་དེས་རང་གི་ཡོ་བྱད་ཕན་སུམ་ཚོགས་པ་བསྒྲུབས་ཤིང་། གར་ཐིག་དབྱངས་རོལ་འཛོམ་པར་དབང་བསྐུར་བྱས་ཀྱང་། བེའུ་སྦྲེལ་གཡང་སར་ལྷུང་བ་དང་མཚུངས་ཏེ། ངན་སོང་དུ་འགྲོ་བའི་རྒྱུ་བྱེད་པ་ལས་གཞན་མེད་དོ། ཕྱི་ནང་གསང་བའི་དེ་ཉིད་རྣམ་པ་བཅུ་ནི། དཀྱིལ་འཁོར་ཏིང་འཛིན་ཕྱག་རྒྱ་དང་། སྟངས་སྟབས་འདུག་སྟངས་བཟླས་བརྗོད་དང་། སྦྱིན་བསྲེག་མཆོད་པ་ལས་སྦྱོར་དང་། སླར་སྡུད་པ་ཡི་རྣམ་པ་ནི། ཕྱིའི་དེ་ཉིད་བཅུ་ཡིན་ནོ། །ཕྱིར་བཟློག་གཉིས་ཀྱི་ཆོ་ག་དང་། གསང་དང་ཤེས་རབ་ཡེ་ཤེས་དང་། ཁ་སྦྱོར་དབྱེ་བའི་ཆོ་ག་དང་། གཏོར་མ་རྡོ་རྗེའི་བཟླས་པ་དང་། དྲག་ཤུལ་བསྒྲུབ་པའི་ཆོ་ག་དང་། རབ་ཏུ་གནས་དང་དཀྱིལ་འཁོར་བསྒྲུབ། གསང་བའི་དེ་ཉིད་བཅུ་ཡིན་ནོ། །དེ་ལྟར་ཕྱི་ནང་གསང་བའི་དེ་ཉིད་བཅུའི་དོན་རྟོགས་པ་ལ་རིག་ཅིང་ཞེས་རང་ཉིད་གྲོལ་བའི་བླ་མས། བཅོས་མིན་གྱི་དད་པ་དང་ངོ་ཚ་དང་ཁྲེལ་ཡོད་ཤེས་པའི་སློབ་མའི་གཞི་རྒྱུད་ཞིབ་ཏུ་བརྟགས་ལ་སྐྱོན་བྲལ་ཡོན་ཏན་ལྡན་པ་དག་ལ་དབང་བསྐུར་རིམ་པས་སྦྱིན་པར་བྱ་དགོས་པ་ལ་ཡང་། བདག་བྱིན་གྱིས་བརླབས་པ་བསྙེན་པ་དང་། ཉེ་བསྙེན་དང་། བསྒྲུབ་པ་ བསྒྲུབ་པ་ཆེན་པོ་དང་ནི་བཞིའོ། །སའི་ཆོ་ག་ལ་ཡང་ས་སྤྱིར་བརྟགས་པ་དང་། སའི་བདག་པོ་རྒྱལ་པོ་ལ་སོགས་དང་སའི་ལྷ་མོ་རྣམས་ལ་བསླང་བ་དང་། སྦྱང་བ་དང་། བཟུང་བ་དང་། བསྲུང་བ་དང་ལྔ་པོ་དཀྱུས་ལྟར་དུ་བྱའོ། །སྟ་གོན་དང་ནི་ཞེས་དང་པོ་བུམ་པ་ནི། རྟེན་བུམ་པ་གཞལ་ཡས་ཁང་དུ་གསལ་བ་དང་། བརྟེན་པ་ཞི་ཁྲོ་གང་ཡིན་གྱི་ལྷ་ཡོངས་རྫོགས་སུ་གསལ་བ་དང་། དེ་ཉིད་བསྒྲུབ་ཚུལ་གྱིས་རིམ་པ་ཡང་ཆོ་ག་རང་གཞུང་གི་དཀྱུས་ལྟར་བྱ་བ་དང་། མཐར་མཆོད་ཅིང་བསྟོད་ནས་ལྷ་འོད་དུ་ཞུ་བ་ལས་བདུད་རྩིའི་རྒྱ་མཚོ་ཆེན་པོར་གྱུར། བར་བདག་དབང་ལེན་པ་དང་བཅས་པའོ། །སློབ་མ་འཇུག་ཅིང་སྨིན་ནས། དོན་གཉིས་ཀྱི་དང་པོ་ནི། སློབ་མ་གྲངས་ཉི་ཤུ་རྩ་ལྔ་མན་ཆད་ཁ་ཡར་བ་ཞིག་ངེས་པར་དགོས་གསུངས་ན་ཡང་། རྒྱུད་གཞན་དུ་མང་ཉུང་མི་དཔྱད་པའི་མཐའ་བསྡུས་ཏེ། མདོར་ན་སློབ་མ་པན་ཚུན་དུ་མི་གཤིན་པ་བཟུང་བར་མི་བྱ། གཅིག་ལ་གཅིག་ནི་སེམས་བཟུང་ཞིང་། ཞི་དུལ་བླ་མ་ལ་ཕན་པ་ཞེས་གསུངས་པས་དཀྱིལ་འཁོར་དུ་གཞུག་པ་ཙམ་ལ་ནི་གྲངས་མ་ངེས་ཏེ། སེམས་ཅན་གྱི་ཁམས་མཐའ་ཡས་པ་བསྒྲལ་བར་ཡི་དམ་བཅའ་བ་ཐེག་པ་ཆེན་པོའི་ཁྱད་ཆོས་ཡིན་པས་དེ་དག་གིས་ཚོན་རྩི་མཐོང་བའི་ཕན་ཡོན་ཀྱང་བསམ་གྱིས་མི་ཁྱབ་པའོ། །འཇུག་པའི་སྔོན་དུ་སློབ་མ་སྟ་གོན་ལ། སྭོ་ཤིང་བྱིན་ནས་དངོས་གྲུབ་ཐོབ་མིན་རྟེན་འབྲེལ་བརྟགས་པ་དང་། ཁྱོར་ཆུས་སྡིག་པ་སྦྱངས་པ་དང་། དེ་བཞིན་དུ་ཀུ་ཤས་རྨི་ལམ་བརྟགས་པ་དང་། སྲུང་སྐུད་ཀྱིས་རྨི་ལམ་བརྟགས་པ་དང་། ཅི་བཞིན་མཐོང་བ་ལ་བར་ཆད་མི་འབྱུང་བ་དང་བཞིའོ། །གཉིས་པ་རྒྱུད་སྨིན་བྱེད་དབང་ལའང་། སོ་སོར་དཀྱུས་ལྟར་རོ། །མངོན་རྟོགས་བཞི་པོ་ནི་བཤད་ཟིན་པ་ལྟར་ལས། རེ་རེ་ཉིད་ལའང་། བཞི་བཞིར་རྫོགས་པའི་ཡན་ལག་མ་ཚང་བར་གྱུར་ན། ཆོ་ག་ཉམས་པའི་སྐྱོན་གྱིས་སློབ་མ་དག་སྨིན་པར་ནུས་པ་མ་ཡིན་ནོ། །དེ་ཡང་རྒྱུད་སྡེ་སོ་སོར་དབང་གི་རིགས་དབྱེ་ལ། བྱ་བའི་རྒྱུད་ལ་ཆུའི་དབང་དང་ཅོད་པན་གྱི་དབང་གཉིས་སོ། །དེ་ལ་བྱ་རྒྱུད་ནི། སྨྱུང་གནས་དང་། སྨན་བླ་དང་དོན་ཞགས་སོགས་སོ། །སྤྱོད་པའི་རྒྱུད་ལ་དེའི་སྟེང་དུ་རྡོ་རྗེ་མིང་གི་དབང་བསྐུར་བའོ། །རྣལ་འབྱོར་གྱི་རྒྱུད་ཀུན་རིགས་ལ་སོགས་པ་ལ་ཆུ་དང་དབུ་རྒྱན་རྡོ་རྗེ་དྲིལ་བུ། མིང་སྟེ་རིག་པའི་དབང་ལྔ་དང་། གསང་བའི་བཀའ་དབང་ནི་ཕན་ཡོན་བཤད་པ་དང་། མཐའ་རྟེན་སྦྱིན་པའི་རྫོགས་པའོ། །བླ་མེད་རྒྱུད་ལ་ཕ་རྒྱུད་མ་རྒྱུད་གསང་འདུས་དང་། མ་རྒྱུད་མ་ཧཱ་མ་ཡ། སྤྱི་རྒྱུད་དུས་ཀྱི་འཁོར་ལོ། སྙིང་པོ་ཀྱཻ་རྡོ་རྗེ། ཡང་སྙིང་འཁོར་ལོ་བདེ་མཆོག་ལ་སོགས་གསར་མའི་ཡི་དམ་རྣམས་དང་། ནང་རྒྱུད་སྡེ་གསུམ་བསྐྱེད་པ་མ་ཧཱ་ཡོ་ག །ལུང་ཨ་ནུ་ཡོ་ག། རྫོགས་པ་ཆེན་པོ་ཨ་ཏི་ཡོ་ག་གསུམ་ཀྱང་སྤྱིར་བཏང་ཙམ་དུ། བུམ་དབང་དང་། གསང་དབང་དང་། ཤེས་རབ་ཡེ་ཤེས་ཀྱི་དབང་། ཚིག་དབང་དང་བཞིའོ། །ཐེག་པའི་རྩེ་མོ་ཨ་ཏི་ཡོ་ག་རུ། དབང་གི་རིམ་པ་བྱེ་བྲག་པ་ལའང་སྤྲོས་བཅས་བུམ་པའི་དབང་དང་། སྤྲོས་མེད་གསང་བའི་དབང་དང་། ཤིན་ཏུ་སྤྲོས་མེད་ཤེར་དབང་དང་། རབ་ཏུ་སྤྲོས་མེད་ཚིག་དབང་ངོ་། སྤྱིར་ན་གསང་སྔགས་རྡོ་རྗེ་ཐེག་པའི་དབང་གི་དབྱེ་བ་ལ་རྒྱས་བསྡུས་མཐའ་ཡས་པ་ཞིག་ཡོད་ཀྱང་ས་བཅད་ཀྱིས་ཟིན་པ་དང་། འཇོག་མཚམས་རྣམ་པ་བཞི་པོ་ཡིན། གཞི་བུམ་དབང་དང་། ལམ་གསང་དབང་དང་ཤེར་དབང་། འབྲས་བུ་དབང་བཞི་པ་སྟེ་རིག་པ་རྩལ་གྱིས་དབང་བཞི་རུ་གདོད་ནས་གྲུབ་པ་སྟེ། རྩ་དང་ལུས་གཙོ་བོར་གྱུར་པ་བུམ་དབང་བསྐུར་ཡུལ། རླུང་བཅུ་གསང་དབང་བསྐུར་ཡུལ། ཁམས་དཀར་དམར་གྱི་ཐིག་ལེ་ཤེར་དབང་བསྐུར་ཡུལ་གྱི་རྟེན། དབང་བཞི་པ་བསྐུར་ཡུལ་ནི། ཀུན་གཞིའི་སེམས་ཡིན་པ་སྤྱི་དང་མཚུངས་ཤིང་། དེ་དག་རྣམས་རྩོལ་སྒྲུབ་ལས་བྱུང་བ་མ་ཡིན་ཏེ། རང་ཆས་ཉིད་དེ་བཞི་པོ་མཚུངས་པར་ལྡན་དང་དེ་དག་ལྷན་ཅིག་བྱེད་པའི་རྒྱུ་ནི་རྣམ་པ་གཉིས་ལ། སྣོད་དུ་རུང་བའི་སློབ་བུ་ནི་རྒྱུའི་རྐྱེན་དང་། ལྟ་བ་ཡངས་ཤིང་དགོངས་པ་ལྡན་པའི་སློབ་དཔོན་བདག་པོའི་རྐྱེན་དང་ལྟ་སྔགས་ཏིང་འཛིན་ནུས་པའི་ཆོ་ག་མཁྱེན་པ་དམིགས་པའི་རྐྱེན། དབང་བཞིའི་རིམ་པ་གཅིག་ལ་གཅིག་བརྟེན་གྱི་རྟེན་ཅིང་འབྲེལ་འབྱུང་གི་ཚུལ་དུ་བྱུང་བ་དེ་མ་ཐག་པའི་རྐྱེན་དང་། རྒྱུ་གཉིས་རྐྱེན་བཞི་ཚོགས་པ་ལས་དབང་བསྐུར་འགྲུབ་པའོ། །དེ་ལ་ཡང་གཉེན་པོ་དྲང་དོན་ངེས་དོན་གྱིས་སྒོ་ནས་རྣམ་པར་བཞག་པ་ནི། ལུས་ཀྱི་གཙོ་བོར་རྩ་དབུ་རྐྱང་རོ་གསུམ་ཆོས་ལོངས་སྤྲུལ་གསུམ་གྱི་མཚོན་བྱེད་དང་། གནས་ལྔའི་འཁོར་ལོ་ལྔ་པོ་རིགས་ལྔའི་མཚོན་པ་ཡིན་ཏེ། རྩའི་རྣམ་པ་ཡི་གེའི་གཟུགས་སུ་གནས་པ་ནི་ལུས་གནས་རྣམས་པ་དྲུག་ན་མ་དག་པ་འགྲོ་བ་རིགས་དྲུག་ས་བོན་དང་། དག་པར་སངས་རྒྱས་སྐུ་གསུམ་གྱི་ངོ་བོ་ཡི་གེ་འབྲུ་གསུམ་དུ་གནས་ཤིང་། དེ་ལས་ཀྱང་རོ་མ་ཐབས་ཀྱི་རྩ་གནས་ན་དབྱངས་ཡིག་དང་། རྐྱང་མ་ཤེས་རབ་ཀྱི་རྩ་གནས་ན་གསལ་བྱེད་ཀྱི་ཡི་གེ་སོགས་མང་དུ་ཡོད་པར་གསུངས་པ་བཞིན་ནོ། །དེ་ལྟར་རྩལ་རླུང་བརྟེན་པ་ནི། གྱེན་རྒྱུ་སྟེ་ཁ་དབུགས་ཀྱི་རླུང་གིས་བཟའ་བཏུང་ལེན་པར་བྱེད་པ་དང་། ཕོ་བ་ལ་མེ་མཉམ་གྱི་རླུང་གནས་ཏེ། དེས་བཟའ་བཏུང་འཇུ་བར་བྱེད་པ་དང་། བཤིང་གཅིའི་ལམ་ལ་ཐུར་སེལ་གྱི་རླུང་གནས་ཏེ་དེས་མི་གཙང་བ་འདོར་བའི་ལས་བྱེད་པ་དང་། སྲོག་རྩའི་སྙིང་ལ་སྲོག་རླུང་ངམ། སྙིང་རྗེ་མེད་པ་བསྐལ་པ་ལས་ཀྱི་རླུང་ཞེས་བྱ་བ་གནས་ཏེ། དེས་གནས་མ་འཕྱུག་བར་དུ་སྲོག་འཛིན་པ་དང་། འཕྱུག་ཚེ་ལུས་སྲོག་འབྱེད་པའི་ལས་བྱེད་པ་དང་། ཁྱབ་བྱེད་དམ་གཡོ་བྱེད་ཀྱི་རླུང་ནི། ལུས་སྤྱི་དང་ཁྱད་པར་ཡན་ལག་ཉིང་ལག་རྣམས་ལ་གནས་ཏེ་དེས་འགྲོ་སྡོད་དང་བྱ་བ་སྣ་ཚོགས་ཀྱི་ལས་བྱེད་དོ། དེ་ལས་གཞན་དུ་འབྱུང་བ་ལྔའི་རླུང་གི་སོ་སོའི་ལས་བྱེད་པ་སྟེ། དེ་ལྟར་རླུང་བཅུ་པོ་ལ་ཁམས་ཀྱི་རྣམ་པ་ཁམས་དཀར་དམར་བརྟེན་ཞིང་། ཁམས་ལ་དོན་དམ་བྱང་ཆུབ་ཀྱི་སེམས་ཏེ། དོན་དམ་བདེ་གཤེགས་སྙིང་པོ། བརྟེན་པ་བཞི་ལ། དེ་ལས་ཀྱང་འདོད་པའི་ཁམས་ཀྱི་གང་ཟག་རང་རྒྱུད་པ་ཀུན་ལ། འདོད་ཆགས་རྣམ་པ་བཞིར་གནས་པ་སོགས་ནི། དག་བྱ་འདོད་ཆགས་བཞི་དང་། དག་བྱེད་དབང་བཞིའི་རིམ་པ་ལ་བརྟེན་ནས་འབྱུང་བར་ངེས་པ་ཡང་། དང་པོ་དག་བྱ་བལྟས་པའི་ཚིམ་པའི་འདོད་ཆགས་ནི། གཞན་འཕྲུལ་དབང་བྱེད་པ་ལ་གནས་པ་ཡིན་ཏེ། དག་བྱེད་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བུམ་པའི་དབང་ཡིན་ཞིང་། དབང་བསྐུར་བས་སྒྲིབ་པ་བཞི་ལས་གཙོ་བོར་ལུས་ཀྱི་སྒྲིབ་པ་འདག་ཅིང་། ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་བརྟན་གཡོ་དང་ཕུང་པོ་ཁམས་དང་སྐྱེ་མཆེད་ཀུན་ཀྱང་གདན་གསུམ་ཚང་བ་སྟེ། ཕུང་ཁམས་གཤེགས་པ་གཤེགས་མ་དང་། དབང་ཡུལ་སེམས་དཔའ་སེམས་མ་དང་། ལུས་ཀྱི་རྣམ་ཤེས་དང་། དབང་པོ་དང་། རེག་བྱ་རེག་ཤེས་བཞི་པོ་གནས་སུ་དག་པ་སྒོ་བ་བཞི་དང་། རྟག་པར་ལྟ་བ་དང་། ཆད་པར་ལྟ་བ་བདག་ཏུ་ལྟ་བ། མཚན་མར་ལྟ་བ། བཞི་པོ་གནས་སུ་དག་པ་སྒོ་མ་བཞི་སྟེ་སྒོ་བ་ཡབ་ཡུམ་བརྒྱད་སོགས་དཀྱིལ་འཁོར་གཅིག་གི་རྣམ་རོལ་ཏུ་ཤར་བ་ཡིན་ལ། སྣང་བ་དང་། སྟོང་པ་དང་། དེ་གཉིས་ཟུང་འཇུག་སྟེ་ཀུན་བརྟགས་དང་། གཞན་དབང་། ཡོངས་གྲུབ་སྟེ། ངོ་བོ་ཉིད་གསུམ་གྱི་རང་བཞིན་ལ། དེའི་གྲུབ་པའི་མཐའ་ནི་འཁོར་བ་ཞེས་མར་མ་ཆད་མྱང་འདས་ཞེས་ཡར་མ་ཆད་པར་གཉིས་སུ་མེད་པའི་ནང་དབྱིངས་ཆེན་པོ་ལ་མཚན་མའི་རྣམ་རྟོག་གིས་གོས་པར་མི་འགྱུར་ཞིང་འདའ་ཀ་ཞེས་ནམ་ཞིག་འཆི་བའི་སྐབས་ལ་བབས་པའི་ཚེ་མ་བསྒོམ་པར་སངས་རྒྱས་པའི་གདམ་པ་རང་གི་རྣམ་ཤེས་ཀྱི་རྟེན་འོད་ཀྱི་གོང་བུར་གསལ་བ་ཧིག་གི་སྒྲས་བདེ་བ་ཅན་སོགས་དག་པའི་ཞིང་ཁམས་སུ་འཕོ་བ་ཡིན་ལ། དེའི་ཚེ་རྩའི་འགྲོས་ཐིམ་བསྐྱེད་རིམ་སྤྲུལ་པའི་སྐུ་ཞེས་པ་ནི་བུམ་དབང་གི་བྱེད་པས་ལུས་དག་པས་བསྐྱེད་ཀྱིས་རྩའི་མ་དག་པའི་འགྲོས་ཐ་མལ་དུ་འཛིན་པའི་སྒྲིབ་བྱེད་རྣམ་པར་དག་པའི་ལུས་ཤིན་ཏུ་སྦྱངས་པའི་ཡོན་ཏན་འཐོབ་ནས་རྡོས་བཅས་ལ་ཐོགས་པ་མེད་ཅིང་། ཁམས་རྣམ་པར་དག་པ་ལྡོག་པའི་ཆུ་བོ་གྱེན་དུ་ལྡོག་པ་དང་། དམར་ཆ་དབུ་མར་ཆིངས་པའི་ཉི་མ་རྟོད་ལ་གནོད་ཅིང་གཅིག་ལས་དུ་མ་དང་། དུ་མ་ནི་གཅིག་ཏུ་བྱེད་པར་ནུས་ཤིང་། སྟོང་གསུམ་ཡུངས་འབྲུར་ཚུད་པ་སྟེ། ས་དྲུག་པ་དང་གྲུབ་མཐའ་འཁོར་འདས་གཉིས་མེད་ལ་དབང་བསྒྱུར་བ་ཡིན་ཞིང་། མཐར་ཐུག་གི་འབྲས་བུ་ནི་སངས་རྒྱས་ཐམས་ཅད་ཀྱི་རྡོ་རྗེ་སྤྲུལ་པའི་སྐུ་ལ་སྦྱོར་བ་ཡང་མཁའ་ཁྱབ་རྡོ་རྗེ་འདུས་མ་བྱས་ཞེས་པ་ལྟར་རོ། །བྷ་གའི་དཀྱིལ་འཁོར་གསང་དབང་བསྐུར་ཞེས་པ་ནི་རང་ལུས་ཐབས་ལྡན་གཏུམ་མོའི་གདམ་པ་ལ་གོམས་པར་བྱས་ནས་གཞན་ལུས་ཕྱག་རྒྱས་མན་ངག་རྣམས་ལག་ལེན་ལ་ཐེབས་དགོས་པ་སྟེ། དགོད་པས་ཚིམ་པ་ནི། འཕྲུལ་དགའི་ལྷ་ལ་ཡོད་པས། དག་བྱ་འདོད་ཆགས་དང་ངག་གི་སྒྲིབ་པ་གཉིས་ཀྱི་གཉེན་པོར། དག་བྱེད་གསང་དབང་བསྐུར་བས་ངག་གི་སྒྲིབ་པ་སྦྱངས་ཞིང་། བདག་བྱིན་གྱིས་བརློབས་པའི་ལམ་གཏུམ་མོས། གཟུང་འཛིན་རོ་རྐྱང་གི་རླུང་དབུ་མར་འཛུད་ཅིང་། རང་བྱུང་ཡེ་ཤེས་ནི་རྣམ་པར་མི་རྟོག་པ་སྟེ། གྲུབ་མཐའ་མ་རྟོག་ལོག་རྟོག་ཕྱོགས་རྟོག་གི་གྲུབ་མཐའ་མ་འདྲེས་པར་རྫོགས་པའོ། །འདའ་ཀ་མའི་དུས་དཔེའི་འོད་གསལ་ཞེས་དབང་ལས་བྱུང་བའི་ཡེ་ཤེས་ཆེན་པོའི་ངང་ལས་འཇོག་པ་ཡིན་ལ། ཡི་གེའི་འགྲོས་ཐིམ་ནི། འཇིག་རྟེན་དང་འཇིག་རྟེན་ལས་འདས་པའི་ཚིག་རྣམས་རླུང་གི་བྱེད་ལས་ཀྱི་བྱུང་བ་ཡིན་པས་དེ་དག་གི་གཟུང་འཛིན་དབྱིངས་སུ་ཐིམ་པ་ལས་ལོངས་སྤྱོད་རྫོགས་པའི་སྐུ། འབྲས་བུའི་དུས་ན་ཡན་ལག་དྲུག་ཅུར་རྫོགས་པའི་གསུང་རྡོ་རྗེའི་གོ་འཕང་ཐོབ་པ་ཡིན་ནོ། །ཕུང་ཁམས་གཤེགས་པ་གཤེགས་མའི་གདན། དབང་ཡུལ་སེམས་དཔའ་སེམས་མའི་གདན། ལུས་ཀྱི་སྒོ་བ་བཞི་དང་། རྟག་ཆད་མུ་བཞི་ཁྲོ་བོ་ཁྲོ་མོའི་གདན་དང་གསུམ་མངོན་རྟོགས་ངོམ་པའི་མཛེས་མ་ཞེས་དབང་གསུམ་པའི་རྟེན་གྱི་ཕྱག་རྒྱ་མའི་གསང་བའི་དཀྱིལ་འཁོར་ལ་བརྟེན་ནས་ཤེས་རབ་ཡེ་ཤེས་ཀྱི་གསང་དབང་བསྐུར་བ་ཡང་གཞུང་བཞིན་འཁྲིལ་སྦྱོར་དང་། ལག་བཅངས་ཀྱིས་ཚིམས་པ་ལྷ་དགའ་ལྡན་པའི་འདོད་ཆགས་དག་པ་དང་། ཡིད་ཀྱི་སྒྲིབ་པ་སྦྱངས་ཞིང་སྣང་མཆེད་ཐོབ་པ་གསུམ་དང་། དགའ་བ་དང་། མཆོག་དགའ་དང་། ཁྱད་པར་གྱི་དགའ་བ་དང་། ལྷན་སྐྱེས་དགའ་བ་བཞིའི་ཡེ་ཤེས་ཀྱི་ཞུ་བདེས་འགྲུབ་ཅིང་། གྲུབ་མཐའ་བདེ་སྟོང་དབྱེར་མེད་པའི་དོན་ཉམས་སུ་མྱོང་ཞིང་། འདའ་ཀ་མའི་ཚེ་དེར་སྣང་ཞེས་དམིགས་པའི་བཞག་པ་ཙམ་ཡང་མ་གྲུབ་པར་རྡོ་རྗེ་སེམས་ཞེས་འགྱུར་བ་མེད་པའི་ངོ་བོ་ཡིན་ཏེ། སྙིང་གའི་རྩ་མདུན་གྲོལ་བ་དཔེའི་ཡེ་ཤེས་ཏེ། མཁའ་ཁྱབ་རྒྱལ་བ་ཀུན་གྱི་ཐུགས་ཀྱི་རྡོ་རྗེ་མི་ཤིགས་དངས་མའི་སྐུ་ཐོབ་པ་ཡིན་ནོ། །ཁམས་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས་གསུམ་པ་ཤེས་རབ་ཡེ་ཤེས་ཤེར་དབང་གི་དེ་དག་ཉམས་སུ་མྱོང་བ་ཚིག་གི་མཚོན་པའི་དབང་ནི། ལྷ་མཐའ་བྲལ་མན་ཆད་འཁྱུད་སྦྱོར་གྱི་འདོད་ཆགས་དང་། སྒོ་གསུམ་གྱི་སྒྲིབ་པ་དེ་དག་ཐ་དད་འཛིན་པ་སྦྱོང་ནས། སྟོང་པའི་ཐིག་ལེ་སྟེ་རྣམ་པར་མི་རྟོག་པའི་དབྱིངས་རིག་པའི་སྙིང་པོ་ཅན་ཡིན་ལ། གྲུབ་མཐའ་ནི་བསམ་གྱིས་མི་ཁྱབ་པའི་ཡེ་ཤེས་དེ། འདའ་ཀ་མའི་ཚེ་གསང་ཆེན་ཕྱག་རྒྱ་ཆེན་པོ་ལ་ཞེས་པ་ནི། སངས་རྒྱས་ཐམས་ཅད་ཀྱི་གསང་བའི་མཐར་ཐུག་པ་འབྲས་བུ་མཁའ་ཁྱབ་ངོ་བོ་ཉིད་ཀྱི་སྐུ་སྒྲ་ཇི་བཞིན་པར་ཐོབ་པའོ། །སྒྲ་དང་དོན་གཉིས་ཤན་སྦྱར་ན་ཨབྷི་ཥིཉྩ་ཞེས་པའི་སྒྲ་ལས། གློ་བུར་དྲི་མ་གཏོར་བ་དང་། ཥི་ཀ་ཏས་རང་གི་སྐལ་བ་དང་མཚམས་པ་བཅུད་བླུགས་པ་རྣམ་པ་གཉིས་སུ་གྲུབ་པ་ཡིན་པ་ལ། དབང་མཆོག་རང་ལ་གནས་པ་སྟེ། མི་ལུས་རིན་པོ་ཆེ་འབྱུང་ལྔའི་ཁམས་དང་ཡིད་ཤེས་ཀྱི་ཁམས་ཏེ། དྲུག་གི་རྟེན་དང་། རྩ་ཐིག་རླུང་གསུམ་གྱི་འབྱོར་བ་ཚང་བ་ནི་ས་བོན་ནམ་རྒྱུའི་དབང་ཡིན་ཏེ། སློབ་དཔོན་ཉིད་ཀྱིས་དཀྱིལ་འཁོར་དང་ཆོ་ག་བསྐུར་བ་གཞིའི་དབང་དང་། རང་གི་བླ་མའི་རྣལ་འབྱོར་སོགས་ལ་བརྟེན་ནས་དམིགས་པ་འདྲེས་པ་ལམ་གྱི་དབང་དང་། མཚན་ཉིད་རྒྱུའི་ཐེག་པར། ས་དང་པོ་ནས་བཅུ་པའི་བར་བསྒྲོད་པས་དུས་དེར་སངས་རྒྱས་རྣམས་ཀྱིས་འོད་ཟེར་ཆེན་པོའི་དབང་བསྐུར་བཞིན་དུ། རང་སེམས་སྤྲུལ་སྐུ་དང་ལོངས་སྐུ་དང་ཆོས་སྐུ་ངོ་བོ་ཉིད་སྐུ་སྟེ། སྐུ་བཞིར་སྨིན་པ་འབྲས་བུའི་དབང་རྫོགས་པ་ཡིན་ཕྱིར་དབང་བཞི་རྫོགས་པའི་ཚེ་རིག་འཛིན་སྔགས་ཀྱི་སྡོམ་པ་ཐོབ་པ་ཡིན་ལ། དེ་ལྟར་དབང་བཞི་རྣལ་མ་ཐོབ་པའི་སྐྱེས་བུ་དེ་ནི་ཞིང་ས་ཐ་རེངས་སུ་གྱུར་པའི་སྐྱོན་ཐབས་ལ་མཁས་པའི་རླན་གྱིས་སྦྱངས་པའི། ཞིང་སར་ས་བོན་བཟང་པོ་བཞག་པ་ཇི་བཞིནདུ་གྱུར་ནས་ལུས་ངག་ཡིད་གསུམ་གྱི་སྒྲིབ་པ་དང་སྒོ་གསུམ་ཆ་མཉམ་གྱི་སྒྲིབ་པ་སྟེ། བཞི་པོ་དག་ཅིང་། སྐུ་བཞི་མངོན་དུ་བྱེད་པ་ཡིན་ནོ། ༈ གཉིས་པ་གསང་སྔགས་རྡོ་རྗེ་ཐེག་པའི་ལམ་ལ་བསྐྱེད་པའི་རིམ་པ་དང་། རྫོགས་པའི་རིམ་པ་གཉིས་སུ་གསུངས་པ་ལས། དང་པོ་བསྐྱེད་རིམ་ལ། སྐྱེ་གནས་བཞིའི་བག་ཆགས་སྦྱོང་ཕྱིར་དེ་དང་མཐུན་པར་བསྐྱེད་རིམ་ཡང་སྟོན་པ་སྟེ། བསྐྱེད་པའི་ཚུལ་ནི། འཁོར་བའི་རྣམ་པ་དང་མཐུན་པའི་བསྐྱེད་རིམ་ལ་བསླབས་ཤིང་གོམས་པས་སྲིད་པ་གསུམ་པོ་མ་ལུས་པའི་བག་ཆགས་སྦྱོང་ཞིང་དག་ནས། མྱ་ངན་ལས་འདས་པའི་རྣམ་པ་དང་བཞུགས་ཚུལ་མཐུན་པའི་ལྷའི་རྣམ་པ་འབྲས་བུ་གཞི་ལ་རྫོགས་ཤིང་། གཉིས་ཀའང་རྫོགས་པའི་རིམ་པའི་སྨིན་བྱེད་དུ་འགྲོ་བའི་དག་རྫོགས་སྨིན་གསུམ་སྤྱི་ལ་གཅེས་པ་ཡིན་ལ། དེ་ལ་ཡང་ཇི་ལྟར་ན་སྒོང་སྐྱེས་ཀྱི་རིགས་རྣམས་ལན་གཉིས་སྐྱེ་བ་ལྟར། བདག་སྲས་དང་གཞན་སྲས་རྣམ་པ་གཉིས་སུ་བསྐྱེད་པར་བྱ་བ་སྟེ། བདག་གི་སྲས་སུ་གཞན་བྱ་བ་ལ་ལྔ་སྟེ། ས་བོན་ལས་ནི་གཙོ་བོར་གང་ཡིན་པ་བསྐྱེད་པ་དང་། ཕྱོགས་བཅུའི་སངས་རྒྱས་རྣམས་བཀུག་ནས་ཡུམ་གྱི་མཁར་བ་སྟིམ་པ་དང་། དེ་བཞིན་སེམས་ཅན་རྣམས་ཀྱང་སྔར་བཞིན་བཀུགས་ནས་ཡུམ་མཁར་བསྟིམ་སྒྲིབ་པ་སྦྱང་བ་དང་བཅས་རྫོགས་པས་སྲིད་ཞི་གཉིས་སུ་མེད་པའི་བདག་ཉིད་ངའོ་སྙམ་པས་ཆེ་བ་བསྐྱེད་པ་དང་མཐར་ཡུམ་མཁའ་ནས་བཏོན་ནས་སོ་སོའི་གདན་ལ་འགོད་པའོ། །གཞན་གྱི་སྲས་སུ་བདག་བྱ་བ་ལ་ཡང་བརྒྱད་དེ། བྱ་རྣམས་དང་པོ་སྒོ་ང་སྨིན་པ་དང་། གདོད་བྱ་གཟུགས་སུ་སྨིན་པ་ལ་དེར་གྱུར་པ་བཞིན་དུ། གཙོ་བོ་འོད་དུ་ཞུ་ནས་ལྷ་གང་ཡིན་པ་དེའི་ཐུགས་སྲོག་ས་བོན་དུ་གྱུར་པ་དང་། དེ་ལས་ཡབ་ཡུམ་གཉིས་ཀའི་སྐྱེ་མཆེད་རྣམས་ཚང་བར་རྫོགས་པ་དང་། དེ་ཡང་ཡབ་ཀྱི་ཀུན་ཏུ་རྟོག་པ་རྣམ་པར་དག་པའི་ངོ་བོ་རིགས་ལྔ་ཡབ་ཡུམ་གྱིི་ས་བོན་དང་། སེམས་དཔའ་ལྕམ་དྲལ་ཐུབ་དྲུག་ཡབ་ཡུམ་བརྒྱད་ལ་སོགས་ཞི་བ་བཞི་བཅུ་དང་། འབར་བ་ཁྲག་འཐུང་ལྔ་བཅུ་སོགས་རིམ་གྱི་སྤྲོས་དགོས་པའི་རྟོགས་ཚོགས་ཡི་གེར་གྱུར་པ་སླར་ལྷར་བསྒྱུར་བར་བྱེད་པ་དང་། ཡུམ་ལས་འོད་འཕྲོས་སྲས་བསྐྱེད་པའི་ཕྱིར་ལྷ་ལ་གསོལ་བ་གདབ་པ་དང་། དབྱིངས་ཀྱི་ལྷ་རྣམས་ཀུན་ཀྱང་རང་ལ་བསྟིམ་ཞིང་། ལྷ་ཐམས་ཅད་ཀྱི་བདག་ཉིད་ངའོ་སྙམ་པས་ང་རྒྱལ་བཟུང་བ་དང་། བདག་ཉིད་ཡབ་ཡུམ་སྙོམས་པར་ཞུགས་ནས་ཡུམ་གྱི་མཁའ་རུ་དཀྱིལ་འཁོར་བསྐྱེད་པ་དང་། རྟོག་པ་ཞེ་གཉིས་ནི་སེམས་བྱུང་ལྔ་བཅུའི་རྟོགས་ཚོགས་རགས་རིམ་ཙམ་བཞིན། དེ་དག་ལྷར་གསལ་བ་མངལ་འབྱིན་ཚུལ་གྱི་ཕྱིར་འདོན་པ་དང་། དེ་རྣམས་ལྕགས་ཀྱུའི་ཕྱག་རྒྱས་སྤྱན་དྲངས་ཤིང་། ཞགས་པའི་གདན་ལ་བཞུགས་པ་དང་། ལྕགས་སྒྲོགས་ཀྱིི་དམ་ཡེ་དབྱེར་མེད་དུ་བརྟན་པར་གནས་པ་དང་། དྲིལ་བུས་ཐམས་ཅད་དགྱེས་པ་ཆེན་པོའི་ངང་ནས་བཞུགས་པར་བསམ་པ་སོགས་ཕྱག་རྒྱ་བཞིས་བཅིངས་དང་རྒྱས་གདབ་པའོ། །ཆོ་ག་བསྡུས་པའི་ལུགས་ལྟར་ན། ཐོག་མར་རང་ཉིད་བསྒྲུབ་བྱའི་ལྷ་གང་ཡིན་པ་དེའི་སྐུར་གསལ་བའི་མདུན་གྱི་ནམ་མཁར་དཀྱིལ་འཁོར་གྱི་ལྷ་གསལ་གདབ་པ་དང་། རང་གི་ཐུགས་ཀ་ནས་དཀྱིལ་འཁོར་སྤྲོས་པ་དང་དབྱིངས་ནས་སྤྱན་དྲངས་ཤིང་། མདུན་མཁར་བཞུགས་པར་དམིགས་པ་དང་། གསུམ་དུ་ཡོད་པ་དཀྱུས་ལྟར། གསལ་བཏབ་ནས་རྒྱུན་བཤགས་ཡན་ལག་བདུན་པ་དང་། བརྒྱད་པ་སོགས་བྱ་ཞིང་། བདག་དང་ཚོགས་ཞིང་གཉིས་ཀ་མི་དམིགས་པའི་ངང་ལས། ལྷ་སོ་སོའི་དཀྱིལ་འཁོར་དང་མངོན་རྟོགས་ཇི་བཞིན་པར་བསྒོམ་པའོ། །འཁོར་བའི་མངལ་སྐྱེས་ཀྱི་བག་ཆགས་སྦྱང་ཕྱིར་མངོན་པར་བྱང་ཆུབ་པ་བཞིའམ་ལྔ་ར་དབྱེ་བ་ཡང་། དང་པོ་ཁྲག་འཐུང་ཧེ་རུ་ཀ་གལ་པོའི་དགོངས་པ་སྟེ། འཆི་སྲིད་དང་བར་དོར་རྣམ་ཤེས་བཅས་པ་ནི་སྟོང་ཉིད་སེམས་ཀྱི་རང་བཞིན་ཡིན་ལ། དྲི་ཟ་ཉེ་བར་ལེན་པ་ནི། སྲིད་པ་བར་དོའི་སྐབས་ཡིན་པས་དེ་རྣམས་ནི་ལྷའི་ས་བོན་ཧཱུཾ་ལ་སོགས་པ་བསྒོམ་པའི་ནུས་སྟོབས་ཀྱིས་སྦྱོང་ཞིང་། དེ་ཉིད་ཀྱང་ཁུ་རྡུལ་རླུང་དང་འདྲེས་པའི་མེར་མེར་པོ་དང་། ནུར་ནུར་པོ་རྣམས་ས་བོན་ཉིད་ལས་ཐུགས་ཕྱག་མཚན་དུ་གྱུར་པས་སྦྱོང་ཞིང་། ལྟར་ལྟར་པོ་དང་མཁྲང་གྱུར་པོ་གཉིས་ཕྱག་མཚན་འོད་གོང་དུ་གྱུར་པས་སྦྱོང་ཞིང་། ཁྱབ་མཇུག་ཉ་དང་རུས་སྦལ་དབང་པོ་རྫོགས་པ་སོགས་ལྷའི་རྣམ་པར་གྱུར་ནས་སྦྱོང་བའོ། །ལྷ་གང་ཡིན་པ་དེའི་ ཕྱག་རྒྱ་སྐུའི་རང་བཞིན་ལ། ས་བོན་ཡིག་འབྲུ་ནི་གསུང་རྡོ་རྗེ། ཐུགས་ནི་ཡེ་ཤེས་ཀྱི་ཕྱག་མཚན་གྱི་རྣམ་པ་ཉིད་དུ་སྦྱོར་བ་ལ་རྡོ་རྗེའི་ཆོ་ག་གསུམ་ཞེས་ཕ་རྒྱུད་བླ་ན་མེད་པའི་ལུགས་ཡིན་ལ། སྲིད་པ་བར་མ་དོ་ནས་ལུས་འཚོལ་བ་ལ་ཞུགས་པས་ཚོགས་ཀྱི་ལམ་དང་། མངལ་དུ་རྣམ་ཤེས་འཇུག་པ་སྦྱོར་ལམ་སྟེ། ལྷུམས་ཞུགས་བྱང་ཆུབ་སེམས་ལྔ་པོ་མཐོང་སྒོམ་དང་། ཞེས་མངོན་བྱང་དང་པོ་གཉིས་ཀྱིས་ཕ་མའི་ཁུ་ཁྲག་འཚོགས་པ། གསུམ་པའི་དྲི་ཟའི་རྣམ་ཤེས་ཞུགས་པ། བཞི་པས་ཁུ་རྡུལ་རྣམ་ཤེས་གསུམ་འདྲེས་ནས་འགྱུར་བའི་གནས་ཉམས་སུ་མྱོང་བ། ལྔ་པས་མངལ་གྱི་གནས་སྐབས་རྫོགས་པ་སྟེ། ཟླ་བ་བཅུ་ནི་ས་དང་རབ་ཏུ་སྦྱར་ནས་བཙའ་བས་གནས་སྐབས་ནི། མི་སློབ་པའི་ལམ་དུ་གྱུར་ནས་སྤྲུལ་སྐུའོ། །དེ་ལ་ཡང་མངོན་བྱང་དང་པོ་ཟླ་བའི་དཀྱིལ་འཁོར་ནི། མངལ་སྐྱེས་ཀྱི་ཁུ་བ་དང་། དྲོད་གཤེར་སྐྱེས་ཀྱི་གཤེར་བའི་ཆ། སྒོང་སྐྱེས་ཀྱི་ཕ་དང་། རྫུས་སྐྱེས་ཀྱི་སྟོང་པའི་ཆ་རྣམས་ཡིན་ལ། དེ་བཞིན་མངོན་བྱང་གཉིས་པ་ཉི་མའི་དཀྱིལ་འཁོར་ཡང་། མངལ་སྐྱེས་ཀྱི་རྡུལ་དང་། དྲོད་གཤེར་སྐྱེས་ཀྱི་དྲོད། སྒོང་སྐྱེས་མ་དང་། རྫུས་སྐྱེས་ཀྱི་གསལ་བའི་ཆ་རྣམས་སོ། །མངོན་བྱང་གསུམ་པ་ས་བོན་ཕྱག་མཚན་དང་བཅས་པས་ཁུ་རྡུལ་གཉིས་ཀྱི་བར་དུ་རྣམ་ཤེས་ཞུགས་པ་དང་། སྐྱེ་གནས་བཞི་པོའི་བར་དོའི་རྣམ་ཤེས་སྦྱོང་བ་ཡིན་ལ། མངོན་བྱང་བཞི་པ་རྣམ་གསུམ་གཅིག་ཏུ་འདྲེས་པ་ནི། ཁུ་རྡུལ་གཉིས་དང་སེམས་གསུམ་རོ་གཅིག་ཏུ་འདྲེས་པ་དང་། དྲེད་གཤེར་སྐྱེས་ཀྱི་དྲོད་དང་རྣམ་པར་ཤེས་པ་དང་། རྫུས་སྐྱེས་ཀྱི་གསལ་ལ་སྟོང་པའི་ཆ་ཙམ་དང་། བར་དོའི་སྲིད་པ་འདྲེས་པའི་ཆ་རྣམས་སྦྱོང་བ་ཡིན་ལ། མངོན་བྱང་ལྔ་པ་སྐུ་རུ་གྲུབ་པ་ནི་ཞེས་སྐུ་ཡོངས་རྫོགས་སུ་གྱུར་པས། སྐྱེ་གནས་བཞི་པོའི་སྐྱེ་མཆེད་རྣམས་ཡོངས་སུ་རྫོགས་ནས། བཙའ་བའི་དུས་རིག་པའི་ཡུལ་ལ་ཞེས་དབང་པོའི་སྒོ་ལྔར་རྣམ་ཤེས་སད་པའམ། ཤར་བའི་འཁོར་བའི་རྣམ་པ་ཆ་དང་བཅས་པ་སྦྱོང་ཞིང་། ཁམས་ལྔ་དང་ཕུང་པོ་ལྔ་དང་རྣམ་པར་ཤེས་པའི་ཆོགས་རྣམས་གནས་སུ་དག་པ་ནི་གདན་གསུམ་ཚང་བའི་ལྷ་སྟེ། མྱ་ངན་ལས་འདས་པ་སངས་རྒྱས་དང་བཞུགས་ཚུལ་མཐུན་པ་ནི་རྒྱུའི་ཧེ་རུ་ཀ་ལས་འབྲས་བུའི་ཧེ་རུ་ཀར་གནས་གྱུར་བའོ། །ཁུ་རྡུལ་རླུང་གསུམ་སེམས་དང་བཅས་པའི་ཆ་མ་ལུས་པ་རྣམ་པར་དག་པའི་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །དྲོད་གཤེར་སྐྱེས་ནི་གཉིས་པོ་འདུས་པ་ལ་བར་དོའི་རྣམ་ཤེས་ཞུགས་པས་མོད་ལ་གཟུགས་གྲུབ་པ་བཞིན་དུ་ལྷ་སྔགས་མཚན་བརྗོད་པ་དང་། མངོན་རྟོགས་ཡིད་ལ་དྲན་པ་ཙམ་ལ་ཕྱག་རྒྱ་སྟེ། ལྷའི་སྐུ་ཡོངས་སུ་རྫོགས་པའི་བསྐྱེད་རིམ་ཚང་བར་བསྒོམ་པའོ། །རྫུས་ཏེ་སྐྱེ་བ་ནི་རྒྱུ་རྐྱེན་ལ་མ་ལྟོས་པར་སྐད་གཅིག་དྲན་རྫོགས་སུ་བསྒོམ་པ་སྟེ། མིང་དང་གཟུགས་ལ་མ་བརྟེན་པར་སྐད་ཅིག་ལ་ཝལ་གྱིས་གསལ་བའོ། །བསྒོམ་ཚུལ་བཞི་པོ་དེ་ཡང་དང་པོའི་ལས་ཅན་ལ་ཞེས་པ་ནི། བསྐྱེད་རྫོགས་ལ་བློ་མ་སྦྱང་པ་རྣམས་ཀྱིས་སྒོང་སྐྱེས་སྦྱོང་བའི་བསྐྱེད་རིམ་གཙོ་བོར་བསྒོམ་ཞིང་རིམ་པ་བཞིན་དུ་གོམས་པ་བརྟན་པ་ཆེ་ཞིང་། ཤིན་ཏུ་བརྟན་པའི་རིགས་ཅན་དག་ལ་དེ་དང་དེའི་མཐུ་དང་མཐུན་པར་སློབ་དགོས་པ་ཡིན་ལ། དེ་དག་ཀུན་ཀྱང་དེ་བཞིན་ཉིད་ཀྱི་ཏིང་ངེ་འཛིན་ཞེས་པ་སྤྲོས་པ་ཀུན་དང་བྲལ་བའི་ཤེས་རབ་བརྗོད་པ་དང་བྲལ་བ་ཡིན་ལ། ཀུན་སྣང་གི་ཏིང་ངེ་འཛིན་ནི་གོང་གི་ཏིང་ངེ་འཛིན་གྱི་རྩལ་ལས་སྙིང་རྗེས་འཕེན་པ་བསྐྱེད་རིམ་དུ་ཤར་བ་ཐབས་ཀྱི་ལམ་མཆོག་མ་ནོར་བ་ཡིན་ཞིང་། སྣང་བའི་དུས་ཉིད་ནས་ངོ་བོས་སྟོང་ཞིང་རང་བཞིན་མ་གྲུབ་པ། ཟབ་མོ་སྣང་སྟོང་ཐབས་དང་ཤེས་རབ་ཟུང་དུ་འབྲེལ་བའི་ལམ་མཆོག་ཏུ་གྱུར་པ་ཡིན་ལ། དེ་ལས་འགལ་བའི་དམིགས་པ་དང་བཅས་པའི་བསྐྱེད་རིམ་ནི། མུ་སྟེགས་དང་། གདོན་གྱི་རིགས་ཕལ་མོ་ཆེ་ལའང་ཡོད་པ་མཐོང་ཐོས་སུ་གྱུར་པ་བཞིན་ནོ། །སྔགས་སུ་བྱང་ཆུབ་སེམས་དཔའི་མཐོང་ལམ་སྟེ། ས་དང་པོ་རབ་ཏུ་དགའ་བ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས། སྤྲོས་བྲལ་དེ་བཞིན་ཉིད་ཀྱི་བདེན་པ་མངོན་སུམ་མཐོང་བ་སྟེ། ཤིན་ཏུ་གྲགས་པ་མངོན་དུ་བྱེད་པའི་ཐབས་ཀྱི་མཆོག་ཏུ་གྱུར་པ་སྣང་ཆ་ལྷ་སྐུར་གསལ་བ་རྒྱུ་བསོད་ནམས་ཀྱི་ཚོགས་དང་། དེ་ལ་རང་བཞིན་མ་གྲུབ་པ་འབྲས་བུ་ཡེ་ཤེས་ཀྱི་ཚོགས་ཏེ། ཚོགས་གཉིས་ཉེ་རྒྱུར་བསྟེན་པའི་དབང་རྣོན་དག་དང་། བྱང་ཆུབ་སེམས་དཔའ་ལམ་ལྔར་འབྲེལ་པ་རྡོ་རྗེ་ཐེག་པའི་ལུགས་ཀྱི་རིག་འཛིན་རྣམ་པ་བཞིའི་ཐེམ་སྐས་ཉིད་ལ་འཛེགས་ནས་ངེས་པ་ལྔ་ལྡན་སོགས་སྐུ་ལྔའི་ཞིང་དུ་མིག་འཕྲུལ་ལྟ་བུར་འགྲོ་བའོ། །གཉིས་པ་རྫོགས་པའི་རིམ་པ་ཉིད་ལའང་གཉིས་ཏེ། ཕ་རྒྱུད་རྣམས་ལས་འབྱུང་བ་ལྔའི་རླུང་། རྣམ་པར་དག་པའི་གསལ་སྟོང་ཡེ་ཤེས་བསྐྱེད་ཅེས། དཔལ་གསང་བ་འདུས་པ་དང་། གཤིན་རྗེ་གཤེད་ལ་སོགས་རྣལ་འབྱོར་ཆེན་པོའི་རྒྱུད་རྣམས་ལ་འབྱུང་བ་ལྔས་རླུང་ལ་གནད་དུ་བསྣུན་པའི་ཟབ་གསལ་ལམ། གསལ་སྟོང་རྣམ་པར་མི་རྟོག་པའི་ཡེ་ཤེས་ལ་གཙོ་བོར་དམིགས་ནས་དངོས་གྲུབ་རྣམ་པ་གཉིས་བསྒྲུབ་པ་ཡིན་ལ། མ་རྒྱུད་ཡང་ཕུར་དང་། ཀུན་འདུས་རིག་པ་དང་། འཁོར་ལོ་སྡོམ་པ་དང་། དགྱེས་རྡོར་ལ་སོགས་རྗེས་སུ་རྣལ་འབྱོར་རྣམས་ལས་ནི་ཁམས་ལ་ཞུ་བདེའི་ཡེ་ཤེས་བསྐྱེད་ཕྱིར། རང་ལུས་ཐབས་ལྡན་དང་ཞེས་པས། རྩ་རླུང་ལ་གནད་དུ་བསྣུན་པ་དང་། གཞན་ལས་ལ་བརྟེན་ནས་དགའ་བ་བཞིའི་ཡེ་ཤེས་བསྐྱེད་ཅེས་པ་ནི། གཞན་ལུས་ལ་བརྟེན་ནས་དགའ་བ་བཞིའི་ཡེ་ཤེས་ཀྱི་ཞུ་བདེ་འདྲེས་པས་བདེ་སྟོང་རྣམ་པར་མི་རྟོག་པའི་རྫོགས་རིམ་གཙོ་ཆེ་ཡིན་ནོ། །གཉིས་སུ་མེད་པའི་རྒྱུད་ལས་རྡོ་རྗེ་སེམས་དཔའ་སྒྱུ་འཕྲུལ་དྲ་བ་དང་། དུས་ཀྱི་འཁོར་ལོ་དང་། སངས་རྒྱས་མཉམ་སྦྱོར་ལ་སོགས་པ་ལས་ནི། རྩ་ཐིག་རླུང་གསུམ་གྱི་ཞུ་བདེས་དྲངས་པས་གསལ་བ་དང་། མི་རྟོག་པ་དང་། བསམ་གྱིས་མི་ཁྱབ་པའི་གཅིག་དང་དུ་བྲལ་གྱི་ཡེ་ཤེས་ཐིག་ལེ་ཆེན་པོའི་འོད་གསལ་གཙོ་བོར་བྱེད་པ་ལས། སྔ་མ་གཉིས་ནི་བསྐྱེད་རིམ་དང་སྣང་བཅས་དམིགས་པའི་ལམ་དང་། ཕྱི་མ་གཅིག་ནི་སྣང་མེད་འོད་གསལ་གྱི་ལམ་ཡིན་ཏེ། དང་པོའི་ཕྱོགས་ལ་གནས་པ་རྩ་དང་རླུང་ནི་ཞེས་པས་སྤྱིར་རྡོ་རྗེའི་ལུས་ལ་རྩ་སྟོང་ཕྲག་བདུན་ཅུ་རྩ་གཉིས་ཡོད་པར་བཤད་ཅིང་། གཡོ་བ་རླུང་ལ་གྱེན་རྒྱུ་དང། ཐུར་སེལ་དང་། མེ་མཉམ། སྲོག་འཛིན། ཁྱབ་བྱེད་དང་འབྱུང་བ་ལྔའི་རླུང་ཡང་ཡོད་པའོ། །བཀོད་པ་བྱང་ཆུབ་སེམས་ཀྱི་ཐིག་ལེ་ཐབས་ཕ་ལས་བྱུང་བའི་དཀར་ཆ་དང་། ཤེས་རབ་མ་ལ་ས་བྱུང་བའི་དམར་ཆ་གཉིས། རྩ་གནས་ཀུན་ཏུ་རྒྱུ་ཞིང་སྤྲོ་བསྡུ་བྱེད་པའོ། །དེ་ལྟར་གསུམ་དུ་གནས་པ་ནི་རྡོ་རྗེ་ཕུང་པོའི་གྲོང་ཁྱེར་ཡིན་ལ། དེ་ཡང་དང་པོ་མའི་མངལ་གནས་འཛིན་པའི་ཐོག་མ་རུ། དབང་པོ་དངས་མ་མིག་གཉིས་དང་ནི་ལྟེ་བའི་རྩ་མདུད་ཆགས་པ་ཡིན་ལ། དེ་ལས་ལུས་བསྐྱེད་བྱེད་དངས་མར་གྱུར་བའི་རྩ་གསུམ་ཀ་བ་ལྟ་བུར་གནས་པའི་ནང་ན། ཕྱི་རུ་ལུས་ངག་ཡིད་གསུམ། ནང་དུ་ཉོན་མོངས་དུག་གསུམ། གསང་བ་སྐུ་གསུང་ཐུགས་གསུམ་ཀྱི་རྟེན་བྱེད་པའི་ཡི་གེ་གསུམ་དུ་གནས་པ་དང་། དབུ་མའི་ཡས་མར་གྱིས་སྣ་གཉིས་ཀྱི་གོང་མ་ཚངས་པའི་སྒོ་སྤྱི་བོ་དང་གསང་གནས་གཉིས་སུ་ཟུག་པ་དང་གཡས་གཡོན་ན་རོ་མ་རྐྱང་མ་གཉིས་དཀར་བ་དང་དམར་བ་ཉིད་དེ། བུད་མེད་ཉིད་ལ་རྩ་གཉིས་གོ་ལྡོག་པས་རྐྱང་མ་གཡས་དང་རོ་མ་གཡོན་ན་ཡོད་ཅིང་། དབུ་མ་སྔོ་སྐྱར་རོ་རྐྱང་གཉིས་པོས་ལུ་གུ་རྒྱུད་དུ་མདུད་པ་ཉི་ཤུ་རྩ་གཅིག་བྱས་ཡོད་པ་ལ། རིམ་པ་བཞིན་དུ་སྐུ་གསུང་ཐུགས་གསུམ། སྐུ་བཞི་འམ། སྐུ་ལྔ་ཕ་རོལ་ཏུ་ཕྱིན་པ་དྲུག་གི་གྲངས་ཀྱི་འཁོར་ལོའི་རྩ་འདབ་རྣམས། ཕྲི་ཞེས་འཁོར་ལོ་ཉུང་སྐབས་དང་། བསྣན་པ་མང་སྐབས་ལྟར་གྱུར་པ་སྦྱང་གཞི་བདེ་གཤེགས་སྙིང་པོའི་རང་བཞིན་ལ། སྦྱོང་བྱེད་བསྐྱེད་རྫོགས་རྣམ་གཉིས་ཀྱི་ཚུལ་དུ་ཡོད་པས། ལྟེ་བར་དྲུག་ཅུ་རྩ་བཞི་དང་། མགྲིན་པ་ལ་བརྒྱད་ཚན་གཉིས། སྙིང་ཁར་རྩ་འདབ་བརྒྱད་དང་། སྤྱི་བོར་སུམ་ཅུ་རྩ་གཉིས། བདེ་སྐྱོང་འཁོར་ལོ་ན་བདུན་ཅུ་རྩ་གཉིས་དང་། དེ་བཞིན་དུ་གཙུག་ཏོར་ལ་ནམ་མཁའི་ཁམས་ཀྱི་འཁོར་ལོ་ཞེས་སུ་གྲགས་པའོ། །འཁོར་ལོ་རེ་དང་དེ་དག་སོ་སོའི་བར་མཚམས་རྣམས་སུ་འཕོ་བ་བཅུ་གཉིས་ཀྱི་རླུང་གི་དུས་སྦྱོར་གྱི་ཚུལ་དང་། དེ་བཞིན་དུ་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་ཚུལ་དུ་གནས་ཤིང་། ཁམས་ལ་ཕྱིར་འཕོ་བ་སྤངས་བའི་ཐིག་ལེ་ལུགས་ལྡོག་གི་འགྲོས་ཀྱིས་གསང་གནས་ཡེ་ཤེས་ཀྱི་འཁོར་ལོར་ཕྱིན་པ་དང་། རླུང་གི་འཕོ་བ་གཅིག་དང་། རྟེན་འབྲེལ་བཅུ་གཉིས་ལས་གཅིག་འགགས་ནས། དང་པོའི་ས་ཞེས་རབ་ཏུ་དགའ་བའི་རྟོགས་པ་འཆར་ལ། རིམ་པ་བཞིན་དུ་གཙུག་ཏོར་ནམ་མཁའི་ཁམས་ཀྱིས་འཁོར་ལོའི་བར་གྱི་རླུང་དང་། རྟེན་འབྲེལ་རེ་རེའི་ཆ་ལྡོག་པས་ས་བཅུ་གཉིས་པོ་རབ་ཏུ་རྫོགས་པའི་མཐར། ཐིག་ལེ་གཙུག་ཏོར་ནམ་མཁའི་འཁོར་ལོ་ལ་སླེབས་ཤིང་དེའི་ཁམས་དང་འདྲེས་པའི་ཚེ། མངོན་པར་འཚང་རྒྱ་བའི་དང་པོ་རབ་ཏུ་སངས་རྒྱས་དུས་ཀྱི་འཁོར་ལོའི་ལུགས་ཡིན་ལ། དེ་དང་རྣམ་གྲངས་མཐུན་པའི་རྩ་འདབ་རྣམས་ལ་སྦྱང་གཞིར་གནས་པའི་རིགས་དྲུག་གི་ས་བོན་རྣམས་ནི། སྦྱོང་བྱེད་རིག་པའི་སྐྱེས་བུ་ཐུབ་པ་དྲུག་རྣམས་དང་། ཕ་རོལ་དུ་ཕྱིན་པ་དྲུག་གི་སྦྱང་བ་ལས། ཐ་དད་པའི་ཡེ་ཤེས་རྣམ་པ་ལྔ་ནི། ཆོས་དབྱིངས། མེ་ལོང་། མཉམ་ཉིད། སོར་རྟོགས། བྱ་གྲུབ་དང་བསམ་གྱིས་མི་ཁྱབ་པའི་ཡེ་ཤེས་གཅིག་དང་དྲུག་འཐོབ་པའོ། །དེ་བཞིན་དུ་སྙིང་ཁ་ཞི་བའི་འཁོར་ལོ་དང་། སྤྱི་གཙུག་ན་ཁྲོ་བོའི་འཁོར་ལོ་རྣམ་པ་གཉིས་སུ་ཡོད་པ་ལ་ལྷ་ཞི་ཁྲོ་གཉིས་དང་རྣམ་གྲངས་མཉམ་པའི་རྩ་འདབ་དང། ཐབས་བདེ་བ་ཆེན་པོ་དང་། གྲོལ་ལམ་སྟོང་པ་ཉིད་དེ། སྟེང་འོག་ལམ་གྱི་སྒོ་གཉིས་སུ་འདོད་པ་ནི། རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བའི་ལུགས་སོ། །གཡོ་བ་རླུང་ལའང་འབྱུང་བ་ཆེ་ཆུང་གཉིས་ཏེ། ཆེ་བ་ཉིན་ཞག་ཕྲག་གཅིག་དག་ལ་ནི་ཉི་ཁྲི་དང་། ཆིག་སྟོང་དྲུག་བརྒྱའི་གྲངས་སུ་འགྱུར་ཞིང་ཆུང་བ་ཡང་ཀུན་རྟོག་བརྒྱད་ཁྲི་དང་བཞི་སྟོང་གི་གྲངས་དང་མཉམ་པའི་བཞོན་པ་ལྟ་བུར་གནས་ཤིང་། རྩ་བའི་རླུང་ནི་སྲོག་འཛིན་དང་། མེ་མཉམ་དང་ཁྱབ་བྱེད། གྱེན་རྒྱུ་ཐུར་སེལ་དང་ལྔར་གནས་པའི། བྱེད་ལས་ནི་རིམ་བཞིན། སྲོག་བརྟེན་པ་དང་། མེ་དྲོད་བསྐྱེད་པ་དང་། ལུས་ཉམས་བརྟས་པ་དང་། དབུགས་ཀྱི་འགྲོ་འོང་དང་། འགྲོ་འདུག་དང་། བཤང་གཅི་འཕེན་པའི་བྱ་བ་བྱེད་ཅིང་། དེའང་ཕོ་རླུང་གྱེན་རྒྱུ་སྟོད་ན་གནས་ཤིང་། མོ་རླུང་ཐུར་སེལ་སྨད་དང་། མ་ནིང་གི་རླུང་མཉམ་པར་གནས་པ་དང་། ནང་གི་རླུང་ནི་འབྱུང་ལྔའི་ཁ་དོག་ཅན་ཕུང་པོ་ཁམས་དང་སྐྱེ་མཆེད་གནས་པའི་རྟེན་ཡིན་ལ། མ་དག་པ་དུག་ལྔ་དང་། དག་པ་ཡེ་ཤེས་རྣམ་པ་ལྔ་བཅས། རྒྱུ་དང་འབྲས་བུ་ལྟ་བུར་མཆེད་པའི་རྟེན་བྱེད་དོ། །ཁྱད་པར་ས་ཆུ་མེ་རླུང་ནམ་མཁའི་ཁམས་ཀྱི་དངས་མའི་རླུང་ལྔ་པོ་དྷུ་ཏིར་ཏེ། དབུ་མར་ཆུད་པར་གྱུར་ན། ཟད་པར་ས་དང་། ཆུ་དང་། མེ་དང་། རླུང་དང་། ནམ་མཁའི་ཏིང་ངེ་འཛིན་དང་ཡོན་ཏན་དང་རྫུ་འཕྲུལ་རྣམས་འགྲུབ་པའོ། །གསང་བའི་རླུང་ནི་ཡེ་ཤེས་རྣམ་པ་ལྔ་ཡིན་ཏེ། རགས་པས་ཆོས་ཀུན་རྫོབ་དང་རྣམ་པར་འགལ་བ་ཡིན་ནོ། །གསུམ་པ་རྩ་ལ་རླུང་། རླུང་ལ་བཀོད་པ་བྱང་ཆུབ་སེམས་ཀྱི་ཁམས་བརྟེན་པ་ཡིན་ཏེ། གཡས་པ་རོ་མ་ལས་ནི་ཟླ་བའི་བདུད་རྩི་དང་། གཡོན་པ་རྐྱང་མ་ལས་ནི་ཉི་མའི་རྡུལ་འབབ་ཅིང་། ཕོའི་རྐྱང་མ་དང་མོའི་རོ་མའི་སྣ་གཉིས་མདུད་པར་གྱུར་པའི་ཁམས་དཀར་དམར་གཉིས་འཛག་པ་བསྲུང་ཞིང་། དེ་བས་གཞན་དུ་རོ་རྐྱང་གཉིས་པོ་ལས་མཆེད་པའི་རྩ་མདུད་ཀུན་ན་དངས་མ་དཀར་དམར་གཉིས། དཔའ་བོ་དང་ནི་རྣམ་འབྱོར་མའི་ཚུལ་དུ་འཁྲིལ་ཞིང་སྦྱོར་བས་བདེ་སྟོང་མཆོད་པ་ལེན་ཞིང་། མདོར་ན་གནས་པ་རྩ་ནི་ཆུ་འདྲེན་པའི་ཡུར་བ་འདྲ་ཞིང་། གཡོ་བ་རླུང་ནི་ཡུར་བར་ཆུ་འཁྲིད་པའི་འགྲོ་འོང་བྱེད་པའི་ཁ་ལོ་བ་ལྟ་བུ་ལ་ཁམས་ཆུ་བྱང་ཆུབ་སེམས་ནི་ཆུ་དང་འདྲ་ཞིང་གང་དུ་ཁྲིད་སར་འདུ་བ་ཡིན་ལ། འཁོར་ལོ་དྲུག་ཏུ་བརྩེགས་པའི་སྒྲ་གཅན་གྱི་དབྱིངས་སུ། སྲོག་སྟེ་རོ་མ་དང་རྩོལ་བ་ནི་རྐྱང་མ་ཡིན་ལ། དེ་གཉིས་ཀྱི་ཤིང་རྟས་དྲངས་པ་ལས། དབུ་མ་ལ་རོ་རྐྱང་གཉིས་ཀའི་མདུད་པ་གཉིས་གཉིས་གྲོལ་བ་དང་། རླུང་དང་ཁམས་ཀྱི་དངས་མ་རྣམ་པ་གཉིས་རེ་སྒྲ་གཅན་སྟེ་དབུ་མའི་ལྟོ་བར་ཞུགས་པས་དང་པོས་ས་ནས་བཟུང་ཞེས་རབ་ཏུ་དགའ་བའི་ས་ནས་ས་རྣམ་རིམ་གྱིས་བགྲོད་བཞིན། ས་བཅུ་པར་སླེབས་ཚེ་དེའི་ཡོན་ཏན་གོང་དུ་འཕེལ་ནས་གཙུག་ཏོར་གྱི་བར་དུ་འགྲོ་བའོ། ཁྱད་པར་དུ་ཞི་ཁྲོ་སྒྱུ་འཕྲུལ་དྲ་བ་གསང་ཐིག་གི་ལུགས་ལྟར་ན། ཕྱི་སྣོད་འཇིག་རྟེན་དང་། ནང་བཅུད་སེམས་ཅན་གྱི་དཔལ་དང་ཡོན་ཏན་རང་ལ་རྫོགས་པ་ཕུང་པོའི་གྲོང་ཁྱེར་ན། འདས་པ་དང་། མ་འོངས་པ་དང་། ད་ལྟ་བ་སྟེ་དུས་གསུམ་གང་དུའང་ལུང་དུ་མ་བསྟན་པ་བདེ་གཤེགས་སྙིང་པོ་སྟེ། སྔགས་ཀྱི་ལྟ་བསྒོམ་སྤྱོད་གསུམ་ཚུལ་བཞིན་ཉམས་སུ་བླང་བ་མཐའ་དག་མངོན་འཚང་རྒྱ་བ་རྡོ་རྗེའི་གདན་ཞེས། སྙིང་ཁ་དཔལ་གྱི་བེའུའི་ཁོང་སེང་ན་རྩའི་དངས་མ་བརྒྱད་དུ་གནས་པ་ལས། འདི་ལྟར་དབུས་མ་གསུམ་ནི་ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་གྱི་ཆོས་ཉིད་ཅེས་ངོ་བོ་འགྱུར་བ་མེད་པའི་རྟེན་ཡིན་ལ། དེ་དག་གི་མདུན་མ་གཅིག་ནི་ཡེ་ཤེས་འཆར་བའི་རྩ་དང། རྒྱབ་ན་ཡོན་ཏན་གྱི་རྩ་ལས་ཞིང་ཁམས་ཀྱི་བཀོད་པ་འཆར་ཞིང་། གཡོན་ན་ཐ་མལ་རང་རྒྱུད་ཀྱི་རྩ་གསུམ་ནི་འཁྲུལ་སྣང་གི་རྟེན་བྱེད་ཅིང་། དེ་དག་སོ་སོའི་དབུས་ན་འཁོར་འདས་ཡིག་འབྲུ་ནི་ཞེས་པ་སྙིང་ཐིག་ཡ་བཞི་སོགས་ན་རྩ་ཡིག་རྒྱས་པར་གསལ་བ་ལྟར་ཡིན། དེ་དག་སྦྱང་གཞི་སྦྱོང་བྱེད་ཀྱི་ཚུལ་དུ་གནས་པ་རྣམས་སྐུ་གསུང་ཐུགས་ཀྱི་ཡི་གེ་ཨོཾོ་ཨཱཿཧཱུཾ་གི་ནུས་པས་དག་པར་བྱེད་པའོ། །རྩ་དེ་དག་ཀུན་གྱི་དབུས་ན་ཁྲག་དང་ཆུ་སེར་གྱིས་མ་གོས་པའི་དངས་མའི་རྩ་དཀར་པོ་རྟ་རྔའི་བཅུ་ཆ་ཙམ་དུ་ཕྲ་བའི་ནང་ན་རྡུལ་ཞེས་ཁམས་དམར་ཆ་དང་དབུགས་ཀྱི་དངས་མ་འདྲེས་པའི་འོད་ཁ་དོག་ལྔ་པ་ཤིན་ཏུ་ཕྲ་བ་ཉིད་དེ། རང་བཞིན་འོད་གསལ་བྱང་ཆུབ་སེམས་ཀྱི་རྟེན་ཡིན་ལ། ཀུན་ཏུ་བཟང་པོ་རིགས་ལྔ་བཞུགས་པའི་གཞལ་མེད་ཁང་ཡིན་ཏེ། གང་དུ་རླུང་དང་བྱང་ཆུབ་སེམས་ཀྱི་དངས་མ་འདུས་པའི་ཚེ་མྱ་ངན་ལས་འདས་པའི་ཞིང་གི་སྣང་བ་མཐའ་དག་འཆར་ཞིང་། དེ་ཡང་སྣང་ཆའི་འོད་ཁ་དོག་ལྔ་དང་། སྟོང་ཆའི་ཆོས་སྐུ་གཉིས་པོ་རོ་གཅིག་ཏུ་འདྲེས་པའི་ལམ་གྱི་ཚོགས་ཆེན་རྣམ་པ་གཉིས་རྫོགས་ནས། འོག་མིན་རྣམ་པར་དག་པ་སྡུག་པོ་བཀོད་པ་ཞེས་བྱ་བ་དེ་གཞན་གང་དུའང་མི་གནས་ཤིང་། སྒྲིབ་པ་མཐའ་དག་ནམ་ཞིག་སྤངས་པར་གྱུར་པའི་དུས་དེར་ལྷུན་གྱིས་གྲུབ་པའོ། །དེའི་ཕྱིར་ན་ལུས་ནི་ཡེ་ཤེས་ཆེན་པོའི་རྟེན་ཡིན་ཏེ། འཁོར་བ་ཉིད་ནའང་བདེ་གཤེགས་སྙིང་པོ་ངོ་བོའི་བཞུགས་ཚུལ་མ་ཉམས་པ་དང་། དམན་པར་གྱུར་པ་གཉིས་ཀ་མེད་ཅིང་འགྱུར་བ་མེད་པའི་དོན་དམ་བྱང་ཆུབ་སེམས་ཉིད་དེ་ནི། ཏིལ་འབྲུ་ལ་མར་གྱི་ཁྱབ་པ་ཇི་བཞིན་དུ་གནས་པ་ཡིན་ནོ། །འདི་ལྟར་རྡོ་རྗེའི་ལུས་ཀྱི་གནས་ལུགས་ཇི་ལྟ་བ་བཞིན་དང་། གདོད་མ་གཞིའི་བཞུགས་ཚུལ་ཤེས་པར་བྱས་ནས། ལམ་གྱི་རྩ་བ་གཏུམ་མོའི་གདམ་པ་དང་། གཞི་མ་ནི་སྒྱུ་ལུས་ཀྱི་གདམ་པ། རྟག་ཚད་ཉིད་འཁྲུལ་ལམ་གྱི་རྨི་ལམ་གྱི་གདམ་པ། སྙིང་པོ་འོད་གསལ་གདམ་པ། བསུན་མ་བར་དོའི་གདམ་པ། བློ་ཆོད་འཕོ་བའི་གདམ་པ་དང་རྣམས་པ་དྲུག་པོ་དེ་ནི། སྐྱེས་བའི་རྩོལ་བ་དང་བརྩོན་འགྲུས་ཀྱིས་འགྲུབ་པ་ཡིན་གྱི་གཞན་གྱི་རྐྱེན་ལ་རག་མ་ལུས་ཕྱིར་རང་ལུས་ཐབས་ཀྱི་ལམ་ཞེས་བྱའོ། །དེ་ལྟར་རྩ་ཐིག་རླུང་གི་སློབ་སྦྱོང་གོམས་པ་གནད་དུ་སོང་ན། སླར་ཡང་བདེ་སྟོང་ལམ་དུ་བྱེད་པ་གཞན་ལུས་ཕྱག་རྒྱ་བསྟེན་པ་སྟེ། ཀུན་ཀྱང་ལམ་དུ་འགྲོ་བས་ན་ཐབས་ཀྱི་ལམ་མོ། གཉིས་པ་སྣང་བ་མེད་པའི་རྫོགས་རིམ་ནི། རྣམ་པར་གྱུར་པའི་གོང་གསལ་གྱི་ཆོས་དྲུག་གི་བསླབ་སྦྱངས་ལྟ་བུ་དེ་དག་ནི། རྣམ་པ་ལས་རྣམ་པར་གྱུར་པའི་བསྐྱེད་རྫོགས་གང་ཡིན་ཡང་འདྲ་སྟེ། མཐར་དག་པའི་སྣོད་གཞལ་ཡས་ཁང་དང་། བཅུད་ལྷའི་རྣམ་པར་གསལ་བ་ལ་བརྟན་གཡོའི་སྣང་བ་འདི་ཀུན་ཀྱང་། འོད་ཀྱི་རང་བཞིན་དུ་ཞུ་ནས་གཙོ་འཁོར་རྣམས་ཀྱི་སྙིང་གའི་ས་བོན་རྣམས་ཐིག་ལེར་ཐིམ་པ་དེ་ཡང་མས་རིམ་ནས་ཐིམ་བཞིན་སྟོང་པར་གྱུར་པ་ནམ་མཁའི་ངོ་བོ་ཉིད་ཀྱི་ངང་དུ། ཡེ་ཤེས་ཆེན་པོའི་སྤྱོད་ཡུལ་ཉིད་ལ་བཞག་གོ །དེ་ལྟར་བསྐྱེད་རིམ་གྱིས་ནི་སྣང་བའི་བདེན་ཞེན་འགོག་ཅིང་། རྫོགས་རིམ་གྱིས་ནི་སྒྱུ་མར་འཛིན་པའི་ཞེན་རྟོག་སྤོང་ཞིང་། བདེ་གསལ་མི་རྟོག་གི་ཉམས་དང་། ལྷན་སྐྱེས་ཡེ་ཤེས་བློས་བཅོས་པ་མེད་པ་དེ་འཆར་རོ། ཤིན་ཏུ་ཟབ་པའི་རྫོགས་རིམ་བླ་ན་མེད་པ་རྣམས་ནི་བླ་མེད་རྒྱུད་ལས་གསུངས་པ་མ་གཏོགས་འོག་མར་གང་དུ་ཡང་གསུང་པ་མེད་དོ། །དབང་པོ་རྣོན་པོ་ཚེ་གཅིག་གི་རྡོ་རྗེ་འཆང་གི་སར་འགྲོ་བའི་ཉེ་ལམ་སྦས་པ་ཤིན་ཏུ་ཟབ་མོ་ཞེས་བྱ་བའོ། །གསུམ་པ་གསང་སྔགས་རྡོ་རྗེ་ཐེག་པ་དང་མཐུན་པའི་གྲོགས་སུ་གྱུར་པ་དམ་ཚིག་གི་རིམ་པ་ནི། སྔགས་ཀྱི་ལམ་ལ་ཞུགས་པའི་བརྟུལ་ཞུགས་ཏེ་སྤྱོད་པ་མི་ཉམས་པར་བསྲུང་དགོས་པ་གལ་ཆེ་ཞིང་། ཐབས་ནི་དུག་ལ་སྔགས་ཀྱིས་ཐེབས་པ་ལྟ་བུས་གདམ་པ་དང་། གཉེན་པོ་ནི་ཉོན་མོངས་པ་གང་ཡིན་གྱི་དབང་དུ་མི་གཏོང་བའི་དབང་གིས་རྟེན་འབྲེལ་བཟང་ངན་མི་འཆོལ་བ་སྟེ། བྱ་གཞན་གྱིས་དུག་ཟོས་ན་འཆི་བ་ཡིན་ཀྱང་། རྨ་བྱའི་མགྲིན་པར་བཙན་དུག་ཞུགས་ན་རོ་ནུས་རྒྱན་དུ་སྨིན་པ་ལྟར་སྤྱོད་དགོས་པའོ། །དེ་ལ་ཡང་དམ་ཚིག་དང་ནི་སྡོམ་པའི་ཁྱད་པར་ནི། དམ་ཚིག་ནི་འདའ་བར་བྱེད་བ་མ་ཡིན་ཞིང་། འདས་ན་འདི་ཕྱི་གཉིས་ཕུང་གི་རྒྱུར་འགྱུར་ཞིང་། སྡོམ་པ་ནི་ལུས་ངག་གི་མི་དགེ་བ་བདུན་པོ་ཉན་རང་གི་སྙིང་ནས་སྤང་དགོས་ཀྱང་། ཐེག་པ་ཆེན་པོའི་བྱ་དང་མི་བྱའི་ངེས་པ་སྟེ། འོན་ཀྱང་མི་དགེ་བ་བཅུ་པོ་སྤང་བ་གཙོ་བོར་བྱེད་པ་ཡིན་ཞིང་། སྡོམ་པ་ངོ་བོ་གཅིག་ཡིན་ལ་ལྡོག་ཆའི་དབྱེ་བའོ། །དེའང་སྔགས་སྡོམ་ཡིན་ན་དམ་ཚིག་འདྲེས་ཏེ། སྔགས་ཀྱི་དབང་བཞིའི་སྡོམ་བཟུང་གི་སྐབས་སུ་སྡོམ་པ་གསུམ་ག་བླངས་ནས་གདོད་དབང་ལ་འཇུག་དགོས་པའི་ཕྱིར་དང་དེར་མ་ཟད་དམ་ཚིག་ཁོ་ན་ལས་སྡོམ་པ་འདྲེས་པར་མི་འགྱུར་བ་རྒྱ་གར་གྲུབ་པའི་དབང་ཕྱུག་ཕལ་མོ་ཆེའི་ལུགས་དང་མཚུངས་སོ། །ཀུན་གྱི་སྤྱི་དོན་ཞེས་དབང་བཞི་སྤྱི་ལ་དགོས་པའི་སྔགས་སྡོམ་མ་ཐོབ་པ་དང་། ཐོབ་ཀྱང་སྨྱོ་བ་ལ་སོགས་པའི་སྐྱོན་གྱིས་འདུ་ཤེས་རངབཞིན་དུ་མི་གནས་པ་ལ་ལྟུང་བའི་ཉེས་པ་དང་། བསྲུང་བའི་དངོས་གྲུབ་གཉིས་མེད་དོ། སྔགས་སྡོམ་བླངས་ནས། དེའི་རྒྱུད་ལ་ལྡན་ཞིང་མ་ཉམས་པ་དང་། མ་བཏང་ལ་ཤེས་པ་རང་བཞིན་གྱི་རྣལ་དུ་གནས་པ་དེ་ཉིད། ལྟུང་བ་དང་ནི་དངོས་གྲུབ་གཉིས་ཀའི་སྣོད་ཡིན་ལ། བྱང་ཆུབ་ཀྱི་སེམས་ལས་གཞན་པའི་རྩ་ལྟུང་ལ་ཀུན་དཀྲིས་ཞེས་བྱ་བ། ལྟུང་བའི་བྱ་བ་དེ་ཉེས་པ་ཡིན་པར་ཤེས་བཞིན་དུ་ད་དུང་བྱ་བ་དེ་བྱེད་འདོད་མ་ལོག་པ་དང་། དེ་ལ་འགྱོད་པ་མེད་པ་དང་། རང་ངོར་ལྟོས་པའི་ངོ་ཚ་ཤེས་པ་དང་། གཞན་ངོར་ལྟོས་པའི་ཁྲེལ་ཡོད་མེད་པ་སྟེ། ཆོས་གསུམ་པོ་དེ་ཚང་བའི་ཀུན་སློང་བྱ་བའི་མཐའ་རུ་གཏུག་པ་དེ་སྲིད་རྒྱུན་ཆགས་སུ་ཡོད་པར་གྱུར་ན་ཀུན་དཀྲིས་ཚང་བའི་ཕམ་པ་ཞེས་ལྟུང་བ་ཆེན་པོར་འགྱུར་བ་ཡིན་ལ། དུས་ཀྱི་བར་ཆད་ནས་ཉེས་ལྟུང་གི་མཇུག་སྐྱོང་རྒྱུ་མ་བྱུང་བའི་རྒྱུན་ཆགས་སུ་མེད་པའམ། ཆོས་གསུམ་པོ་དེ་དག་གང་ལས་གཅིག་ཤོས་མ་ཚང་ན་བྱ་བའི་ཡན་ལག་མ་ཚོགས་པ་ཡིན་པས་ལྟུང་བ་སྦོམ་པོར་འགྱུར་བའོ། །དེས་ཤེས་པར་བྱ་བའི་ལྟུང་བའི་རྩ་བ་དང་ཡན་ལག་ཀུན་ཀྱང་ཡིད་ཀྱིས་མི་སྤོང་ཞིང་། ལུས་ཀྱི་དོར་བར་མི་བྱའོ། །ཉིན་ཐུན་གསུམ་དང་། མཚན་ཐུན་གསུམ་སྟེ། ཆ་དྲུག་ཏུ་བགོས་པ་ལ། ཆ་རེ་རེའི་ནང་དུ་རྩ་ལྟུང་བཅུ་བཞི་པོའི་ཉེས་བ་བྱུང་ངམ། མ་བྱུང་ཞིབ་ཏུ་བརྟགས་ཏེ་བསྔོ་བགྲང་བྱ་དགོས་པ་ལ། ལྟུང་བའམ་ཉེས་པས་གོས་ན་འགྱོད་པ་དྲག་པོ་བསྐྱེད་ཅིང་། ཕྱིར་འཆོས་ལ་སེམས་བཞིན་ཉེས་བཅོས་ལ་འབུངས་བ་གལ་ཆེ་ལ། གོས་པ་མིན་ན་དགའ་བ་བསྒོམ་ཞིང་བསྔོ་ལ། སྔོན་ཆད་ཉེས་ལྟུང་གི་གོས་སམ་མ་གོས་པ་གང་ཡིན་ཀྱང་རུང་སྟེ། ད་ཕྱིན་ཆད་སྲོག་ལ་བབ་ཀྱང་ཉེས་བྱས་ཀྱིས་གོས་པར་མི་བྱ་བའི། སྡོམ་སེམས་ཤིན་ཏུ་བརྟན་པར་བྱ་དགོས་ཤིང་། གང་ཚེ་ཉིད་མཚན་ཆ་དྲུག་ཏུ་བགོས་པ་གང་ཡང་རུང་བའི་ནང་དུ་ལྟུང་བ་ཡིན་མིན་བསྔོ་བགྲང་བྱེད་པའི་འདུ་ཤེས་རྨོངས་བར་གྱུར་ན། ཁ་ན་མ་ཐོ་བའི་སྦོམ་པོ་ཞེས་བྱ་བ་འབྱུང་བར་འགྱུར་ལ། ཉིན་མཚན་ཆ་དྲུག་ཀ་འདས་ནས་སྦོམ་པོ་དྲུག་ཏུ་འགྱུར་པ་ཤེས་དགོས་ཤིང་། ཉམས་ཉེས་བྱུང་བའི་ཞག་དེའི་ཁོངས་སུ་ཕྱིར་བཅོས་མ་གྲུབ་ན་ཞག་ཕྱི་མའི་སྐྱ་རིངས་དང་པོ་འཆར་བ་དང་། སྦོམ་པོ་བཅུ་གཉིས་དག་ཏུ་འགྱུར་བར་བཤད་པས་ཞིབ་ཏུ་བརྟག་གོ། ཡན་ལག་གི་དམ་ཚིག་ལ་ཡང་དེས་འགྲེས་ཀྱིས་ཤེས་པར་བྱའོ། །ཐོག་མར་བླ་མེད་ཀྱི་རྒྱུད་སྡེ་སྤྱི་ལ་བཅེས་པའི་དམ་ཚིག་གི་ཆིངས་ནི། རྩ་ལྟུང་བཅུ་བཞི་ཡོད་པའི་རབ་ཏུ་དབྱེ་བ་འདི་ལྟར་བརྟགས་ཕར་བྱ་སྟེ། དང་པོ་དབང་ཐོབ་བླ་མ་རྡོ་རྗེ་སློབ་དཔོན་སྨོས་ཅི་དགོས། ཞེས་ཤིན་ཏུ་གཉན་པའི་དབང་དུ་བཞག་ནས། དེ་ལས་གཞན་པའི་སྔགས་རྒྱུད་ཚིག་བཅད་གཅིག་པ་ཡན་ཆད་ཀྱི་དོན་བཀྲལ་ནས་བསླབ་པ་དང་། ལམ་གྱི་མན་ངག་ཟབ་མོ་ནི་བསྐྱེད་རྫོགས་བཟླས་ཀྱི་གནད་མཚངས་ཐེ་ཚོམ་དུ་གྱུར་པ་བསལ་ཞིང་སྟོན་པ་དང་གསུམ་ལ། ཆོས་ཀྱི་འབྲེལ་བའི་བཀའ་དྲིན་མ་བསམ་པ་བསྙེན་ཞིང་བསྟོད་བཀུར་གྱི་ཁུར་བོར་ནས་བརྙས་ཤིང་གཤུང་པར་བྱེད་པ་དེ་ལ་སྔགས་ཀྱི་དངོས་གྲུབ་ཡོད་པ་མ་ཡིན་ཞིང་། གཉིས་པ་ནི། ཕྱི་སོ་སོར་ཐར་པ་དང་། བར་བྱང་ཆུབ་སེམས་དཔའ་ནང་རིག་འཛིན་སྔགས་ཀྱི་དམ་ཚིག་སྟེ་སྡོམ་པ་གསུམ་དང་། བསླབ་པའི་གནས་སྤྱི་དང་བྱེ་བྲག་རྣམས་དང་། བདེ་བར་གཤེགས་པའི་གནང་བཀག་གི་མཚམས་ལས་འདས་པ་དང་། དེ་བཞིན་ཏུ་མཚན་ཉིད་དང་ལྡན་པའི་བླ་མས་ཡུལ་དང་། དུས་ལ་དགོངས་ཏེ་བླང་དོར་འདི་ལྟར་དགོས་ཞེས་པར་འཛོལ་ཞིང་བཀའ་ལ་ཁྱད་བསད་བྱས་པ་ཡིན་ཞིང་། གསུམ་པ་ནི་བླ་མ་དང་དཀྱིལ་འཁོར་གཅིག་ལ་བརྟེན་ནས་དབང་གི་གྲལ་གཅིག་ཏུ་ཞུགས་ཤིང་འདྲེས་པའི་མཆེད་ལྕམ་གྱི་རིགས་ལ་བསྐུར་བ་འདེབས་ཤིང་བརྙས་པར་བྱས་པ་ཁོ་ན་དམིགས་ཀྱིས་བསལ་ནའང་། དེར་མ་ཟད་མཐའ་ཡས་པའི་སེམས་ཅན་བདེ་གཤེགས་སྙིང་པོ་གཅིག་གིས་བསྡུས་པའི་སྤུན་ཡིན་པའི་ཕྱིར་ན། རིང་བའི་མཆེད་སེམས་ཅན་སྤྱི་དང་། ཉེ་བའི་མཆེད་ནང་པ་སངས་རྒྱས་ཀྱི་རྗེས་འཇུག་ཡོངས་ཏེ་མཆེད་ལའང་མཚུངས་སོ། །བཞི་པ་ནི་གཞན་ལ་གསོད་གཅོད་དང། རྐུ་འཕྲོག་སོགས་སྦྱོར་བ་རྩུབ་པའི་སེམས་ཅན་ཞིག་མཐོང་བའི་ཆོས་ལ་རྒྱལ་པོའི་ཆད་པ་འབེབས་པ་གསོད་གཅོད་བཀྱིག་བརྡུངས་སོགས་ལས་ཀྱིས་མནར་བར་གྱུར་པ་དེ་དག་ལ་དགའ་བ་བསྒོམ་ནས་བྱམས་པའི་སེམས་གཏོང་བ་ནི་བྱང་ཆུབ་སེམས་དཔར་རབ་ཏུ་ལྕི་ན་གཞན་བདེ་བ་དང་བྲལ་འདོད་སྨོས་ཅི་དགོས་ལ། ལྔ་པ་ནི་གཞན་དོན་གཉེར་བར་དམ་བཅས་པའི་བྱང་ཆུབ་ཀྱི་སེམས་སྤང་པའི་མོད་ལ། སྨོན་སེམས་གཏོང་བའི་ཕྱིར་ཀུན་དཀྲིས་ཚང་བའི་ཕམ་པར་འགྱུར་བ་ཡིན་ལ། གནང་བའི་སྐབས་བདུན་མིན་པར་ཁུ་བ་ཕྱུངས་ཞེས་པ་ནི། ཇི་སྐད་དུ། གསང་བའི་དབང་དང་གསུམ་པ་དང། རོ་མཉམ་དང་ལྷ་མཆོད་དང་། རིགས་རྒྱུད་སྤེལ་དང་རིལ་བུ་དང་། འཆི་ལྟས་བརྟགས་པའི་དུས་ཡིན་ཏེ། ཞེས་སོ། དྲུག་པ་ནི་ཉན་རང་གི་ཐེག་པ་དང་། བྱང་ཆུབ་སེམས་དཔའི་ཐེག་པ། རིག་འཛིན་སྔགས་ཀྱི་ཐེག་པ་སྟེ། གསུམ་ལ་ལྟོས་པའི་རྒྱལ་བའི་བཀའ་གཞུང་རྣམས་ལ་དཔྱས་ཤིང་སྟོན་པས་མ་གསུངས་ཞེས་རྫུན་ཚིག་སྨས་པ་དང་། ལས་བཞི་དང་། རབ་འབྱམས་ཀྱི་ལས་དང་། མཆོག་ཐུན་གྱི་དངོས་གྲུབ་ཀྱི་རྒྱུར་རུང་བའི་བསྟན་བཅོས་དག་ཀྱང་རྗེས་སུ་གནང་བ་དང་། བྱིན་གྱིས་བརླབས་པའི་བཀའ་རུ་མ་བལྟས་ཤིང་བརྙས་པའོ། །བདུན་པ་ནི་དབང་གི་ཆོ་ག་མ་བྱས་པ་དང་། དཀྱིལ་འཁོར་གྱི་སྒོར་མ་ཞུགས་པ་དང་། ཞུགས་ཀྱང་དབང་བཞི་མ་རྫོགས་པ་དང་། རྫོགས་ཀྱང་ཉམས་པ་དང་། འགལ་བ་དང་། རལ་བའི་ཉེས་པ་བྱུང་བ་སོར་མ་ཚུད་པ་དང་། ཉན་རང་ལ་སོགས་སྣོད་ངན་སྨིན་གྲོལ་གྱིས་ཆོས་ཟབ་མོས་སྐྲག་བ་དང་། གསང་སྔགས་ཀྱིས་འདུལ་བའི་དུས་སྐབས་གནས་ཀྱིས་བསྐལ་བ་སྟེ། དུས་ལམ་བབ་པའི་རིགས་ལ་གསང་སྔགས་ཟབ་མོའི་དོན་དང་ལྟ་དགོངས་དང་སྤྱོད་པའི་ཚུལ་བསྒྲགས་པ་སོགས། དམིགས་གསལ་ཡིན་མོད་ཀྱི་དབང་བཞི་མ་རྫོགས་བར་རྗེས་གནང་ཙམ་གྱིས་ཆོག་པར་རློམ་པ་དང་། དེ་ལས་བཟླས་ལུང་ཡང་། གསང་བ་སྒྲོགས་པ་ལ་རིངས་ནས་ལྷ་གང་ཡིན་པ་ངོས་འཛིན་སོགས་བཀག་པ་ཡིན་ཀྱང་། འདིར་ནི་སྣོད་དུ་རུང་མིན་ལ་བརྟག་དགོས་པ་ཡིན་ནོ། །བརྒྱད་པ་ནི་གཟུགས་ཕུང་རྣམ་པར་སྣང་མཛད་དང་། རྣམ་ཤེས་མི་བསྐྱོད་པ། ཚོར་བ་རིན་འབྱུང་། འདུ་ཤེས་སྣང་མཐའ། འདུ་བྱེད་དོན་གྲུབ་ལ་སོགས་ལྔ་དང་། དེ་བཞིན་དུ་སྐྱེ་མཆེད་རྣམས་ལྷ་དང་ལྷ་མོའི་སྐུར་མི་ཤེས་པར་སྡུག་བསྔལ་གྱིས་བདེན་པའི་རང་བཞིན་དུ་བསྒྲུབ་པའི་རྟོག་གེའི་བློས་བརྙས་པ་དང་། བསྙུང་གནས་ལ་སོགས་དཀའ་ཐུབ་མཐུས་ལྷག་པར་གདུང་དུ་བཅུག་པའོ། །དགུ་པ་ནི་ཆོས་ཐམས་ཅད་ཀྱི་དབྱིངས་རང་བཞིན་གྱི་དག་པའི་སྟོང་པ་ཉིད་དོན། སངས་རྒྱས་ཁོ་ནའི་སྤྱོད་ཡུལ་ཉིད་ལས་གཞན་སེམས་ཅན་རྣམས་ཀྱི་ཁམས་དང་འབྲེལ་བ་ལྡེམ་དགོངས་སུ་ཐེ་ཚོམ་ཟོས་ནས་དེ་ལ་དཀྲི་བར་སྤངས་པའོ། །བཅུ་པ་ནི་ཕྱི་ནང་གསང་བའི་དཀོན་མཆོག་གསུམ་དང་རྩ་བ་དང་བརྒྱུད་པའི་བླ་མ་རྣམས་སྨོད་པ་དང་། མདོ་སྔགས་ཀྱི་བསྟན་པ་འཇིག་པའི་ལས་ལ་སྦྱོར་བ་སོགས་ཡིན་ཡང་རུང་སྟེ། དྲག་ཤུལ་ཆོ་གའི་མངོན་དུ་སྤྱོད་པའི་མཐུ་རྩལ་དང་ལྡན་བཞིན། གནོད་ཅིང་འཚེ་བ་སྦྱོར་བའི་ཡུལ་ལ་བསྲན་ཅིང་བཟོད་པར་བྱས་ཏེ། འདྲིས་ཤིང་མཛའ་བཤེས་བྱས་ནས་བྱམས་ཤིང་བརྩེ་བར་བྱས་པའོ། །བཅུ་གཅིག་པ་ནི། མིང་བྲལ་ཆོས་ལ་ཞེས་པ་ནི། ཀུན་རྫོབ་རྟེན་འབྲེལ་གྱིས་སྒོ་ནས་ཐ་སྙད་ཙམ་གྱིས་མིང་བཏགས་པ། ཀུན་བརྟགས་ལས་མ་འདས་ཀྱང་ཚད་མས་གཞལ་ཏེ། ཡོད་མེད་དང་རྟག་ཆད་ལ་སོགས་སུ་བསྒྲུབ་ཅིང་། ཆོས་ཀྱི་བདག་མེད་ནི། བློས་བཏགས་པ་ཙམ་དང་གཞན་བཟུང་རྒྱུའི་རྫས་འགལ་བ་བཞིན་དུ། ཕུང་པོ་ལྔ་སོགས་སྟོང་པར་བལྟ་བ་མཆོག་ཏུ་འཛིན་པའི་བློས་སྐྱེ་མེད་གྲུབ་མཐའ་རྟོག་པས་མཇལ་བའོ། །བཅུ་གཉིས་པ་ནི་སྔགས་ཀྱིས་སྣོད་དུ་རུང་བའི་གདུལ་བྱ་གང་ཡང་རུང་བའམ། དང་བའི་དད་པ། འདོད་པའི་དད་པ། ཡིད་ཆེས་ཀྱི་དད་པ་སྟེ། གསུམ་དུ་ལྡན་པ་ལ་དོན་གཉེར་བའི་ཆོས་མི་སྟོན་ཞིང་། ཆོས་ཡོན་སོགས་ལ་མ་མགུ་བའི་ཀུན་སློང་ངན་པས་གཞན་སེམས་སུན་ཕྱུང་ནས། དད་པ་དང་འདུན་པ་ལོག་ལྟར་བསྒྱུར་བ་ལ་ཕྱིན་ཅི་ལོག་ཏུ་སྐྱོགས་པའོ། །བཅུ་གསུམ་པ་ནི་སྤྱད་བྱའི་དམ་རྫས་རྣམས་རང་རྒྱུད་ཐ་མལ་དུ་བལྟས་ནས། ལ་ལ་མི་གཙང་བའི་འདུ་ཤེས་ཀྱིས་སྤོངས་ཤིང་། ལ་ལར་གཙང་ཞིང་ཞིམ་པའི་འདུ་ཤེས་ཀྱིས་སྲེད་པ་ལ། སྔགས་ཀྱི་བརྟུལ་ཞུགས་ནི། གཙང་བཙོག་དང་། བཟང་ངན་དང་བླང་དོར་སོགས་ཀྱི་དབྱེ་བ་མེད་ཅིང་མཉམ་པ་ཉིད་དུ་ལམ་དུ་ཁྱེར་དགོས་ལ། དེ་ཇི་ལྟ་བ་བཞིན་དུ་དགོངས་དོན་ཉམས་འོག་ཏུ་མ་ཆུད་ནས། གཟུང་འཛིན་དབང་གིས་མཐའ་གཉིས་ཀྱི་མལ་དུ་འཁྱམས་པའོ། །བཅུ་བཞི་པ་ནི་རྡོ་རྗེ་རྣལ་འབྱོར་མ་སོགས་འཇིག་རྟེན་ལས་འདས་པའི་མ་མོ་མཁའ་འགྲོ་ལ་སོགས་འཁོར་འདས་ཀྱི་སོ་མཚམས་འཛིན་པའི་འཇིག་རྟེན་པའི་ཚུལ་བཟུང་བ་རྣམས་དང་། འབྱུང་བ་ལྔའི་ཁམས་ནི་ཡུམ་ལྔའི་རང་བཞིན་ཡིན་པར་མ་ཤེས་པར་དེ་རང་རྒྱུད་ཐ་མལ་གྱི་ས་ཆུ་མེ་རླུང་ནམ་མཁའ་སོགས་སུ་བལྟས་ནས་འཁྲུལ་པའི་སྣང་བར་ཞེན་པ་དང་། དབང་གི་རྟེན་དུ་གྱུར་པའི་བུད་མེད་ལ་སྨོད་པའོ། །རྩ་ལྟུང་བཅུ་བཞི་སྤྱིའི་ཡན་ལག་སྡོམ་པ་གཏོང་བྱེད་ཀྱི་རྐྱེན། ཕ་མ་དངོས་མིན་ཡང་དངོས་གྲུབ་རྣམ་གཉིས་ཐོབ་པ་ལ་གེགས་སུ་ཆེ་བའི་སྦོམ་པོ་བརྒྱད་ཡོད་དེ། སྨིན་བྱེད་ཀྱི་དབང་དང་། དམ་ཚིག་དང་སྡོམ་པས་རྒྱུད་མ་སྦྱངས་པའི་ཐ་མལ་གྱི་བུད་མེད་རིག་མར་བསྟེན་པ་དང་། དེའི་བདུད་རྩི་སྟེ་རྡུལ་རང་སྟོབས་ཀྱིས་ལེན་པ་དང་། དབང་མ་ཐོབ་པའི་རིགས་དང་ལྷག་པར་མ་རྟོག་ལོག་རྟོག་ཕྱོགས་རྟོགས་རིགས་ཅན་དང་། མདོར་ན་དད་མེད་རྣམས་ལ། རང་གི་ཡི་དམ་གྱི་སྐུ་གཟུགས་དང་། གླེགས་བམ། ཕྱག་མཚན་ཕྱག་རྒྱ་སྟོན་པ་ལ་ཅང་མི་སེམས་པ་དང་། ཚོགས་ཀྱི་འཁོར་ལོའི་དུས་ན་འཐབ་རྩོད་དང་། གཞན་ཡང་ཚོགས་འཁོར་གྱི་སྐབས་སུ་ལུགས་ཟུང་ཐད་ནས། རྩོད་གླེང་དང་། བབ་ཅོལ་ད། ཀྱལ་ཀས་སྔགས་ཀྱི་བརྟུལ་ཞུགས་ཐ་མལ་ལ་སྦྱར་བ་དང་། སྣོད་ལྡན་དག་ཆོས་འདྲི་བ་ལ་ཤེས་བཞིན་དུ། ཡུལ་གྱིས་དྲིས་པའི་ལན་མི་ལྡོན་པར་དེ་ལས་འགལ་བའི་མ་ཡིན་པ་བསྙོན་དོར་པ་ལན་དུ་ལྡོན་པ་དང་། སྔགས་ཀྱི་གཞུང་དང་ལྟ་སྒོམ་སྤྱོད་པའི་གནས་ལ་བསྐུར་བ་འདེབས་ཤིང་ཉམས་སད་པའི་ཉན་ཐོས་ཀྱི་རིགས་ཅན་རྣམས་དང་། གྲུབ་མཐའ་མི་གཅིག་པའི་སེར་གཟུགས་འགོང་པོའི་ཚོགས་ཀྱི་ནང་དུ་ཞག་བདུན་ལོངས་པར་བསྡད་ཅིང་། སྔགས་རྒྱུད་ཀྱི་དེ་ཉིད་དང་ཆོ་ག་མི་ཤེས་བཞིན་དུ་རྡོ་རྗེ་འཛིན་པ་ཆེན་པོར་སྙེམས་ནས་ང་རྒྱལ་དང་། བརྫུན་རིབ་དང་འགྲོགས་ཤིང་། དབང་བསྐུར་ཇི་བཞིན་ཐོབ་ཀྱང་སྔགས་ལ་མི་དད་པའི་ཐེ་ཚོམ་ཅན་དག་ལ་སླར་ཡང་སྔགས་ཀྱི་གསང་བ་རྣམས་ཀྱང་འཆད་པའོ། །དེ་ལྟར་སྦོོམ་པོ་བརྒྱད་ཀྱི་རྣམ་གྲངས་འདི་དག་ནི་འཕགས་པ་ཀླུ་གྲུབ་ཀྱིས་བསྡུས་ཤིང་། དེ་བཞིན་སློབ་དཔོན་དཔའ་བོ་དང་། ལཀྵིཾ་ཀ་རཱས་དེ་ལ་དོན་གཞན་པ་བསྙེན་པ་དག་པར་མ་བྱས་པར་དབང་བསྐུར་གྱི་ཆོ་ག་ལ་འཇུག་པ་དང་། རབ་གནས་དང་། སྦྱིན་བསྲེག་དང་། སློབ་མ་མང་པོའི་འཁོར་ཚོགས་བསྡུ་བ་རིངས་ནས་མྱུར་དུ་བསྡུ་བའི་ཐབས་དང་གཡོ་ཟོལ་བྱེད་པ་དང་། །ཚོགས་འཁོར་ལས་གཞན་བཟའ་བཏུང་། སྤྱོད་པ་དུས་ཀྱི་ངེས་པ་མེད་ཀྱང་། ཕྱི་དྲོའི་ཁ་ཟས་ཟ་བ་སོགས། སོ་ཐར་དང་། བྱང་སེམས་ཀྱི་བཅས་པ་དགོས་པ་མེད་བཞིན་འདའ་བའི་ཉེས་པས། བདག་ཉིད་སུན་འབྱིན་ཞིང་། དངོས་གྲུབ་འཕྲོག་བའི་རྒྱུར་འགྱུར་བར་གསུངས་པའི་དོན་སྦོམ་པོ་རྣམས་ལའང་བརྟག་པར་བྱ་དགོས་སོ། །འདི་ལྟར་རྣལ་འབྱོར་རྒྱུད་དང་བླ་མེད་རྒྱུད་ཐུན་མོང་གི་ལུགས་ཀྱི་རྩ་ལྟུང་བཅུ་བཞིར་བྷ་ཝི་ལྷས་བསྡུས་བ་ཉིད་ཀུན་ལ་ཁྱབ་ཆེ་ཞིང་ཡོངས་སུ་གྲགས་པ་སྟེ། གཞན་དུ་རྒྱུད་སྡེ་བཞི་པོའི་རང་རང་གི་ལུགས་གི་དམ་ཚིག་བཅུ་བཞིའི་གྲངས་ངེས་དཔལ་དུས་ཀྱི་འཁོར་ལོ་དང་སྤྱི་རྒྱུད་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་སྡེ་ལ་སོགས་ལས་གསལ་པོར་གསུངས་པ་བཞིན་ནོ། །སྔགས་ཀྱི་རྣལ་འབྱོར་དང་ལྡན་པ་འཆིའམ་སྲོག་གཏོང་བར་ཡང་སླ་ན། རྟག་ཏུ་དབང་བཞིའི་དམ་ཚིག་བསྲུང་བར་མ་བྱས་ན། སྔགས་ལ་སྤྱོད་པའི་སྐྱེས་བུ་དེ་ཉིད་དམ་ཚིག་ཉམས་ཆགས་ཆེན་པོས་གོས་པར་གྱུར་ན་ངན་སོང་གསུམ་དང་། དེ་ལྟར་མ་ཡིན་ན་སངས་རྒྱས་ཀྱི་གོ་འཕང་གཉིས་ལས་འགྲོ་ས་གསུམ་པ་མེད་ལ། དེ་ཕྱིར་ལྟུང་བ་བྱུང་ན། བདག་ཉིད་སུན་ཕྱུང་ནས་ཕྱིར་བཅོས་པའི་ཐབས་ལ་དེ་མ་ཐག་ཏུ་འབད་དགོས་ལ། ཁྱད་པར་རྩ་ལྟུང་དང་པོ་ཤིན་ཏུ་ལྕི་བ་ཤེས་པ་ནི་གལ་ཤིན་ཏུ་ཆེ་བས་བླ་མ་བསྙེན་བཀུར་འཁོར་གསུམ་ཡོངས་སུ་དག་པ་འབུལ་ལ་དབང་བསྐུར་བསྐྱར་ནས། སྡོམ་པ་གསོར་གཞུག། བླ་མ་དང་ས་ཐག་གིས་བསྐལ་ཏེ། ཉེ་བར་མི་གནས་ན་བདག་འཇུག་ལན་མང་བླང་བ་གལ་ཆེ་ཞིང་དེ་བཞིན་དུ་གཞན་ངོ་ལ་ལྟོས་ནས་ཁྲེལ་ཡོད་དང་། རང་ངོར་ལྟོས་པའི་ངོ་ཚའི་རྟེན་ལ་བླ་མ་མེད་ན་ཡང་སྔགས་ཀྱི་སྡོམ་ལྡན་ཟུང་གང་རུང་གི་མདུན་དུ་ཕྱག་དང་སྤྱོད་ལམ་དེས་ཤིང་དུལ་བས་རང་གི་མིང་སྨོས་ནས། རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ་སློབ་དཔོན་སྨོད་པ་ལ་སོགས་འདི་དང་འདི་བྱུང་བས། ནོངས་པ་འཆབ་ན་བདག་ཉིད་བདེ་བར་གནས་པར་མི་འགྱུར་ཞིང་། འཆབ་པ་མེད་ཅེས་ལེགས་པར་གསོལ་ནས། བཤགས་ཡུལ་བླ་མའམ་སྡོམ་ལྡན་རྣམས་ཀྱིས་ཁྱོད་ཀྱིས་ནོངས་པ་ཉེས་པར་མཐོང་ངམ་དྲིས་པར། རང་གིས་མཐོང་ལགས་ཞེས་བརྗོད་ཅིང་། ཡང་ཡུལ་གྱིས་ཕྱིན་ཆད་སྡོམ་པར་བྱེད་དམ་དྲི། ཆོས་བཞིན་འདུལ་བ་བཞིན་དུ་སྤྱི་བོས་ནོད་པར་བགྱིའོ། །ཅེས་ལན་གསུམ་བརྗོད་ལ་ཐབས་ལགས་བྱའོ། །གལ་ཏེ་ཉམས་པ་བྱུང་ནས་ཕྱིར་བཅོས་འགྱངས་ན་ཞག་རེ་སོང་བཞིན། གོང་འཕེལ་དུ་འགྲོ་བར་འགྱུར་བ་དེའི་གཉེན་པོ་རུ་སྟོབས་བཞི་ཚང་བའི་ཡིག་བརྒྱས་རྟག་ཏུ་བཤགས་པ་བྱ་ཞིང་། གོང་ལྟར་རྩ་ལྟུང་བཅུ་བཞི་པོའི་བསྔོ་བགྲང་བརྗོད་པའི་བཤགས་ཚིག་འདོན་པར་བྱའོ། །ཁྱད་པར་དུ་མདོ་སྒྱུ་སེམས་གསུམ་གྱི་རིང་ལུགས་ནི། སྤྱི་མདོར་སྐུ་དང་གསུང་དང་ཐུགས་རྡོ་རྗེའི་ལུགས་ཀྱི་བསྲུང་བྱ་དང་། སྤྱད་པར་བྱ་བ་དང་། ཡིད་འོང་མི་འདོར་བ་དང་། ཤེས་པར་བྱ་བ་དང་། བསྒྲུབ་པར་བྱ་བའི་དམ་ཚིག་གི་དབྱེ་བས་ཉི་ཤུ་རྩ་བརྒྱད་དང་། སྒྱུ་འཕྲུལ་རྩ་བ་གཞུང་གི་དམ་ཚིག་རྣམ་པ་ལྔ་དང་། ཡན་ལག་རྣམ་པ་བཅུར་བཤད་པའི་རྩ་བའི་ཕྱོགས་ལ་ནི་འདི་བཞིན་ཏེ། རྡོ་རྗེ་སློབ་དཔོན་མི་སྤོང་ཞིང་བཀུར་སྟིས་བསྙེན་པ་དང་། ལྷའི་སྔགས་དང་ཕྱག་རྒྱ་སོགས་རྒྱུན་མི་གཅོད་པ་དང་། མདོ་དང་སྔགས་ཀྱི་གཞུང་ཡང་དག་པའི་ལམ་དུ་ཞུགས་པ་ལ་བརྩེ་ཞིང་བྱམས་པར་བྱེད་པ་དང་། གསང་བའི་དོན་རྣམས་མ་ལུས་པ་གཞན་སུ་ལ་ཡང་མི་བསྒྲགས་པའོ། །ཡན་ལག་གི་དམ་ཚིག་རྣམས་སྡེ་ཚན་གཉིས་སུ་བསྡུ་བ་འདི་ལྟ་སྟེ། དང་པོའི་ཕྱོགས་ནི་ཉོན་མོངས་པ་ལྔ་མི་སྤང་སྟེ། རང་བཞིན་ཤེས་པའི་ཉོན་མོངས་པ་དེ་བཞིན་ཉིད་དང་རོ་གཅིག་སྟེ། ཉོན་མོངས་པ་ཐབས་ཀྱིས་ཟིན་པས་རྨ་བྱའི་དུག་ཟོས་པ་འཚོ་བའི་མཆོག་ཏུ་འགྲོ་བ་དང་འདྲ་ཞིང་། ཡེ་ནས་རིགས་ལྔར་ཤེས་པའི་ཡེ་ཤེས་སུ་འགྱུར་ལ། གཉིས་པའི་ཕྱོགས་ནི་བདུད་རྩི་ཆེན་པོ་ལྔ་ནི་སྔགས་ཀྱིས་དམ་ཚིག་ཏུ་བླང་བྱར་ངེས་པ་ཡིན་པས་ཆོས་ཉིད་རོལ་པ་གཅིག་ཏུ་ཤེས་པས་བླང་བ་དང་། རིགས་ལྔའི་རང་བཞིན་ཉིད་དུ་ཤེས་པས་བླང་བ་དང་། དངོས་གྲུབ་བསྒྲུབ་པའི་དམ་རྫས་ཡིན་པར་ཤེས་པས་བླང་བ་དང་། མཁའ་འགྲོ་རྣམས་འདུ་ཤིང་དངོས་གྲུབ་ཉེ་བས་བླང་བ་དང་། སངས་རྒྱས་ཀུན་གྱི་བརྟུལ་ཞུགས་ཡིན་པས་བླང་བ་ཡིན་པ། དེ་སོགས་ཆ་ཤས་དབྱེ་བ་ཉིས་བརྒྱའི་གྲངས་སུ་ངེས་པ་ནི། ཉི་ཤུར་བསྡུ་བ་འདི་ནི་ཤེས་བྱ་ཀུན་གཟིགས་རོང་པ་ཆོས་ཀྱི་བཟང་པོའི་ལུགས་ཡིན་ལ། རྫོགས་ཆེན་སེམས་ཀྱི་ཕྱོགས་ཀྱི་དམ་ཚིག་ལ། མེད་པ་དང་། གཅིག་པུ་དང་། ཕྱལ་བ་དང་ནི་ལྷུན་གྲུབ་ཞེས་སུ་གྲགས་པའི་དམ་ཚིག་ལ་བསྲུང་བྱ་དང་སྲུང་བྱེད་ཀྱི་མཚམས་བྲལ་བ་ལ་འདའ་བྱ་མི་དམིགས་པས་ན། གནས་ལུགས་ཀྱིས་ངོ་བོའི་བཞུགས་ཚུལ་ལ་དམ་ཚིག་ཆིངས་ཀྱིས་བཅིངས་པ་ཡིན་ལ། ཚུལ་དེ་ལ་ཡེ་ནས་ཉམས་བྱ་དང་ཉམས་པ་མེད་པས་རྡོ་རྗེ་རྒྱལ་པོའི་ལུགས་ཞེས་པའོ། །ལམ་དུ་ཞུགས་པ་རྣམས་ཀྱིས་རང་གི་རྒྱུད་དག་པར་བྱ་བའི་ཕྱིར་དུ་དམ་ཚིག་ཉམས་ཆགས་བྱུང་ན་ཕྱིར་བཅོས་ཤིང་། རིན་ཆེན་བུམ་པ་བཟང་པོ་ལྟ་བུའི་དམ་ཚིག་རྣམ་པར་བཀོད་པ་ཞེས་བྱ་བའི་གྲུབ་མཐའ་ནི། རྩ་བའི་བླ་མའི་སྐུ་གསུང་ཐུགས་གསུམ་ལ། ཕྱི་ནང་གསང་བའི་དམ་ཚིག་གསུམ་ཚན་དུ་ཡོད་པ་ལ། སྐུའི་ཕྱིའི་དམ་ཚིག་གསུམ་ནི། སྲོག་གཅོད་པ་མི་ཚངས་སྤྱོད་པ་དང་། བརྐུ་བ་དང་གསུམ་སྤང་ཞིང་། སྐུའི་ནང་གི་གསུམ་ནི། ཕ་མ་དང་། སྤུན་སྲིང་དང་། རང་ལུས་ཀྱི་ཆོས་གང་ཡང་སྨོད་པ་དང་གསུམ། གསང་བ་གསུམ་ནི། གྲིབ་མ་འགོམ་པ། ཡུམ་གཙེས་པ། སྤུན་སྲིང་ལ་བརྡེག་པའོ། །གསུང་གི་ཕྱིའི་གསུམ་ལ་ནི། རྫུན་དང་། ཕྲ་མ། ཚིག་རྩུབ་སྤང་ཞིང་། གསུང་གི་ནང་གི་གསུམ་ནི། ཆོས་སྨྲ་དང་། དོན་སེམས་པ་དང། གནས་ལུགས་བསྒོམ་པ་མི་བཀུར་བ་དང་། གསུང་གི་གསང་བ་གསུམ་ནི། བླ་མའི་ཡུམ་དང་། སྤུན་སྲིང་གི་ཚིག་ལ་མི་བརྙས་པའོ། །ཐུགས་ཀྱི་ཕྱིའི་གསུམ་ལ། ཡིད་ཀྱི་བརྣབ་སེམས་དང་། གནོད་སེམས་དང་། ལོག་ལྟ་སྟེ། རྣམ་པ་གསུམ་དང་། ཐུགས་ཀྱི་ནང་གི་གསུམ་ནི། སྤྱོད་པ་དང་། བ་སྒོམ་པ་དང་། ལྟ་བ་ལོག་པ་སྤང་བ་དང་། ཐུགས་ཀྱི་གསང་བ་གསུམ་ནི། བླ་མ་དང་། ཡི་དམ་གྱི་ལྷ་དང་མཆེད་དང་ལྕམ་དྲལ་ཐམས་ཅད་ལྟ་སྒོམ་སོ་སོ་མ་ཡིན་གཅིག་ཏུ་ཐུན་ཀུན་སེམས་པའོ། །ཐབས་ཀྱི་དབང་དུ་གྱུར་པ་ཡན་ལག་གི་དམ་ཚིག་ཉི་ཤུ་རྩ་ལྔ་ནི། ཏ་ན་ཞེས་སྒྲོལ་བ་དང་། ག་ན་སྦྱོར་བ་དང་། གཟུངས་མ་དང་། ཐོད་པ་མཚན་ལྡན་སོགས་མ་བྱིན་པར་ལེན་པ་དང་། གཞན་ལ་ཕན་པའི་ཕྱིར་རྫུན་སྨྲ་བ་དང་། གཞན་གྱི་ངན་སེམས་རྒྱུན་གཅོད་པའི་ཕྱིར་ཀྱལ་བའི་ཚིག་སྨྲ་བ་སོགས། སྤྱད་པར་བྱ་བའི་དམ་ཚིག་ལྔ་ནི་གནང་བཀག་གི་མཚམས་ཤེས་པས་སྤྱོད་པ་དང་། འདོད་ཆགས་ཞེ་སྡང་ལ་སོགས་ཉོན་མོངས་ལྔ་ནི། མི་སྤང་བ་ལྔ་ཡིན་པས་ཐ་མལ་པ་རང་རྒྱུད་པ་བྲལ་ནས་བརྟེན་པར་བྱའོ། །དྲི་ཆེན་དང་། དྲི་ཆུ་དང་། མཾ་ས་དང་། རཀྟ་དང་། རྡོ་རྗེའི་ཟིལ་བ་སྟེ། དང་དུ་ལེན་པའི་དམ་ཚིག་ལྔ་ལ་གཙང་སྨེ་དང་གཉིས་འཛིན་གྱི་རྟོག་པ་འདྲལ་དགོས་པའོ། །ཕུང་པོ་ལྔ་དང་། འབྱུང་བ་ལྔ་དང་། ཡུལ་ལྔ་དང་། དབང་པོ་ལྔ་དང་། ཁ་དོག་ལྔ། རྣམས་ལྷར་ཤེས་པར་བྱ་དགོས་པ་ལྔ་ནི། ཤེས་རབ་ཀྱི་སྟོབས་ཀྱིས་སྤྱོད་དགོས་པའོ། །རྡོ་རྗེ་དང་། རིན་ཆེན་དང་། པདྨ་དང་། ལས་དང་། དེ་བཞིན་ཉིད་དེ་བསྒྲུབ་བྱ་ལྔ་ནི། རང་རང་གི་དོན་རྟོགས་ཤིང་གོམས་པའི་མཐུས་བསྒྲུབ་དགོས་པ་སྟེ། འདི་དག་ནི་དམ་ཚིག་གསལ་བཀྲའི་དགོངས་པ་ཇི་བཞིན་པ་སྟེ། དེ་བཞིན་དུ་དཔལ་དུས་ཀྱི་འཁོར་ལོའི་བརྟུལ་ཞུགས་ཉི་ཤུ་རྩ་ལྔ་ནི། དཔལ་གསང་བ་འདུས་པ་དང་། སངས་རྒྱས་མཉམ་སྦྱོར། ཟླ་གསང་ཐིག་ལེ་ལ་སོགས་པ་སྔོན་ཆད་དང་། ཕྱིན་ཆད་འགྱུར་བའི་རྒྱུད་སྡེའི་སྤྱི་དོན་དུ་གྱུར་པ། རིགས་ལྔའི་སྡོམ་པ་ལ། སངས་རྒྱས་རྣལ་འབྱོར་དུ་བྱ་བ་དང་། སྨོན་པ་དང་། འཇུག་པ་སྟེ། ཚུལ་ཁྲིམས་རྣམ་པ་གསུམ། མི་བསྐྱོད་པའི་དམ་ཚིག་ཏུ། རྡོ་རྗེ་དང་། དྲིལ་བུ་དང་། ཕྱག་རྒྱ་དང་། བླ་མ་རྣམས་བཟུང་བ་དང་། རིན་འབྱུང་གི་དམ་ཚིག་ཏུ། ཆོས་དང་། ནོར་དང་། མི་འཇིགས་པ་དང་། བྱམས་པ་སྟེ། སྦྱིན་པ་རྣམ་བཞི་སྦྱིན་དང་སྣང་མཐའི་དམ་ཚིག་ཏུ། ཕྱི་སོ་སོར་ཐར་པ་དང་། ནང་བྱང་ཆུབ་སེམས་དཔའ་དང་། གསང་བ་སྔགས་ཀྱི་ཐེག་པ་གསུམ་གྱི་དམ་ཚིག་རིམ་པ་འཛིན་ཞིང་དེ་དག་གི་ཆོས་རྣམས་བཤད་པ་དང་། དོན་འགྲུབ་ཀྱི་དམ་ཚིག་ཏུ། རྒྱལ་བ་སྲས་བཅས་ལ་མཆོད་ཅིང་། བསྟོད་བསྔགས་བརྗོད་པ་དང་། ཕྲིན་ལས་ཀུན་ལ་གུས་པའོ། །ཁྱད་པར་གསང་སྔགས་བླ་ན་མེད་པ་རིགས་ལྔའི་སྡོམ་པ་ནི། རྡོ་རྗེའི་རིགས་གྱུར་སྲོག་ལ་འཚེ་བ་ལ་སོགས་པ་ལའང་། བསྒྲལ་བའི་ཞིང་བཅུ་དང་། ཉམས་པ་བདུན་སོགས་བསྒྲལ་བྱ་ཡིན་ལ། དེ་ལས་གཞན་དབུ་མར་ལས་རླུང་དང་། དེས་བསྐྱེད་པའི་ཉོན་མོངས་པ་བརྒྱད་ཁྲི་བཞི་སྟོང་གི་ཀུན་ཏུ་རྟོག་པ་གསོད་པའོ། །རིན་ཆེན་རིགས་ལ་མ་བྱིན་པ་བླང་བྱ་ནི། མཚན་ལྡན་གཟུངས་མ་དང་སྐལ་མེད་སྐྱེ་བོའི་ལག་ན་ཡོད་པའི་ཐོད་པ་མཚན་ལྡན་སོགས་སྔགས་ལ་མཁོ་བའི་ནོར་དང་ཡོ་བྱད་བཅས་ཁྱད་པར་དུ་རྫོགས་པའི་བྱང་ཆུབ་རང་སྟོབས་མཐུ་ཡིས་བླང་བ་དང་། པདྨའི་རིགས་ལ་གཟུངས་མ་རི་དྭགས་མིག་ཅན་མཆོད་པ་དང་། སྟོད་པ་ཉིད་ཀྱི་བུད་མེད་ཞེས་རང་གི་སེམསཀྱི་གནས་ལུགས་མི་བསྒོམ་བར་ངང་ལ་འཇོག་པ་ལ་ཀུན་ཏུ་སྤྱོད་ཅེས་ཐ་སྙད་བཏགས་པ་ཡིན་ལ། ཆོས་ཀྱི་ཕྱག་རྒྱ་ནི། རིག་ལྔ་གང་རུང་གི་སྔགས་འཁོར་དང་འོད་ཟེར་སྤྲོ་བསྡུ་དང་། སྔགས་ལ་བརྩོན་པ་དང་། དམ་ཚིག་གི་ཕྱག་རྒྱ་ནི། རིགས་ལྔ་གང་ཡིན་གྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་ཀྱི་མཛད་པ་དང་བསྲུང་སྡོམ་སོགས་གཞུང་བཞིན་བྱེད་པ་དང་། ཕྱག་རྒྱ་ཆེན་པོ་ནི། རིགས་ལྔ་གང་རུང་གི་སྐུ་མདོག་ཕྱག་མཚན་ཆ་ལུགས་བཅས་མ་འདྲེས་ཡོངས་རྫོགས་སུ་གསལ་བ་མེ་ལོང་དུ་གཟུགས་བརྙན་ཤར་བ་ལྟར་བསྒོམ་ཞིང་བརྟེན་པའོ། །དེ་ཡང་འཁོར་ལོའི་རིགས་ལ་སྟེ། དེ་བཞིན་གཤེགས་བའི་རིགས་རྫས་དང་། ཚོགས་དྲུག་གི་ཡུལ་རྣམས་ཀྱི་འདོད་པའི་ཡོན་ཏན་ལྔ་པོ་སྒྱུ་མ་དང་རྨི་ལམ་ལྟ་བུར་སྤྱོད་པ་དང་། ལས་ཀྱི་རིགས་ལ་རྫུན་ཚིག་སྒྱུ་མ་ལྟ་བུར་སྒྲོགས་པ་ཞེས་པའོ། །དེའི་ཡན་ལག་མངོན་གྱུར་དུ་མ་བསྒྲགས་ཤིང་ཚིག་གི་གབ་པ་ནི། མ་བསྒྲལ་བསྒྲལ་དང་མ་གྲོོལ་གྲོལ། དབུགས་དབྱུང་མྱ་ངན་འདས་ལ་འགོད་ཅེས་སོགས་བྱང་ཆུབ་སེམས་དཔའི་ས་དང་ཐུན་མོང་ལ། ལྷ་དང་ལྷ་མིན་ཞེས་པ་ཡེ་ཤེས་པ་དང་འཇིག་རྟེན་པའི་ཚོགས་ཕལ་མོ་ཆེ་ཡིན་ཞིང་གསང་བ་པ་གནོན་སྦྱིན་དང་ནོར་ལྷའི་རིགས་དང་། གཞན་ཡང་ཕན་འདོགས་ནུས་པའི་རིགས་གང་ལ་ཡང་མི་བརྙས་ཤིང་། ཕྱག་རྒྱ་ཞེས་ལག་པས་བཅས་པའི་ཕྱག་རྒྱའི་གཟུགས་བརྙན་དང་། བཞོན་པ་ནི་བླ་མའི་ཆིབས་པ་དང་། ལྷའི་ཕྱག་མཚན་གྱི་རིགས་གྱུར་མཚོན་ཆ་དང་། མཚན་མ་བཀོད་པ་ལ་སོགས་ལ་འགོམ་ཡུག་དང་སྨད་པར་མི་བྱ་བ་གཉིས་ནི་དངོས་སུ་བསྟན་པ་སྟེ། གསང་བ་གནོད་སྦྱིན་དང་ཕྱག་རྒྱའི་སྐུའི་གཟུགས་བརྙན་རྫོགས་པ་དང་དེའི་ཕྱག་རྒྱ་བཅའ་བའོ། །བཞོན་པ་བླ་མའི་སྟན་དང་ཆིབས་པ་ལ་སོགས་དང་མཚོན་ཆ་ལྷའི་ཕྱག་མཚན་ཆེད་དུ་བྱས་པའི་རིགས་དང་། མཚན་མ་དང་ཕྱག་མཚན་དང་། ལྷ་དང་། བླ་མ་དང་། མཆོད་རྟེན་གྲིབ་མ་སོགས་འགོམ་པ་ལ་སྨད་པའི་སྒྲ་ཞུགས་པའོ། །དེ་བཞིན་མཆོད་རྫས་རྙིང་པའི་རིགས་ལ་དམན་པར་གྲགས་ཤིང་ཕྱག་མཚན་གྱི་རྣམ་བར་བཅོས་པ་གང་ཡང་བཟའ་བར་མི་རུང་ཞིང་བཀག་པ་ཡིན་ནོ། །ཁྱད་པར་དུ་གསོད་པ་དང་མ་བྱིན་ལེན་པ་སོགས་དངོས་བསྟན་ཉིད་དང་། དགོངས་པ་ལུང་སྟོན་གྱི་ཚུལ་དུ་གསུང་པའི་རྣམ་པ་དབྱེ་བ་མ་ཕྱེད་པའི་སྔགས་པ་ངན་སོང་གསུམ་དུ་ཐུར་ལ་ལྟུང་བར་འགྱུར་ཞིང་། མདོར་ན་གབ་པའི་གསང་བ་རྣམས་མ་རྟོགས་པར་སྦས་པའི་གསང་བར་མངོན་དུ་འཆེལ་ཞིང་ཀུན་ལ་གཟུར་ཞེས་མངོན་དུ་བསྒྲགས་པའོ། །དེ་ཡངཉིན་བཞིན་བྲམ་ཟེ་གསོད་པ་ནི་སྡིག་པའི་ཆེ་ཤོས་ཏེ། དེ་དང་མཚམས་མེད་ལྔ་ལ་སྤྱོད་པ་རྣམས་ཀྱང་། སྔགས་ཀྱི་སྡོམ་པ་སྐྱེ་བའི་རྟེན་དུ་རུང་བས་ན་གསང་སྔགས་ཐབས་མང་བ་དང་ཐབས་ཀྱི་ཆེ་བ་ནི་སྨོས་ཅི་དགོས་ཏེ་མ་སྨོས་ཀྱང་ལོས་ཤེས། སྔོན་གྱི་དམ་ཚིག་རྣམས་ངོ་མི་ཤེས་པ་དང་། དེ་བཞིན་དུ་བསྲུང་མཚམས་མི་ཤེས་ཤིང་བླ་མར་མི་གུས་པ་དང་། རྩིང་སྤྱོད་བག་མེད་ལ་གོམས་པ་ཞེས་མ་དུལ་བས་ཉོན་མོངས་པ་མཐུ་ཆེ་བ་དང་བཞི་སྟེ། ལྟུང་བ་འབྱུང་བའི་སྒོ་བཞི་ཡིན་ལ། དེའི་སྟེང་དུ་བརྗེད་ངེས་ཆེ་བ་དང་། དྲན་པ་མི་གསལ་བ། བསྣན་པ་དམ་ཚིག་ཉམས་པའི་རྒྱུ་དྲུག་ཡིན་ཞིང་། དེ་བས་དྲན་པ་དང་། ཤེས་བཞིན་དང་གཉེན་པོས་ཟིན་པས་ལོང་བ་དབྱེ་བའི་གནས་སྐབས་ཐོབ་པའི་ཚེ། བག་ཡོད་ཀྱིས་འགུལ་སྐྱོད་སོགས་བསྲུང་བ་ཇི་བཞིན་ཉིད་མཚན་ཐུན་དྲུག་ཏུ་སྤང་བླང་གི་གནས་ལ་བསྒྲིམ་ཤིང་བརྩོན་པས་དཔྱད་པ་གལ་ཆེ་ཞིང་། ཉམས་ན་གསོ་བའང་ཐེག་པ་འོག་མ་ལས་འཕགས་སྟེ། ཉན་ཐོས་པའི་སྡོམ་ཁྲིམས་ནི་འཆབ་སེམས་མ་སྐྱེས་ན། ལན་བདུན་དུ་གསོལ་ཡོད་པར་གསུངས་ཤིང་སྤེད་པར་བྱེད་ཅིང་འཆབ་པ་བཅས་ན་ལན་གཅིག་ཀྱང་གསོ་བའི་ཡུལ་མེད་དེ་རྫ་བེའུ་ཆག་པ་བཞིན་ཡིན་ལ། བྱང་ཆུབ་སེམས་དཔའི་སྡོམ་པ་ཉམས་པར་གྱུར་ཡང་། རིན་ཆེན་ལས་བྱས་ཉེར་སྤྱད་ཆག་པ་དང་འདྲ་སྟེ། གཞན་གྱི་རྐྱེན་དགེ་བའི་བཤེས་གཉེན་ལ་བརྟེན་ནས་གསོ་རུང་བའི་འཕགས་པ་ཡིན་ལ། གསང་སྔགས་ཀྱི་སྡོམ་པ་ནི་རིན་ཆེན་གྱི་སྣོད་ཞོམ་པ་ལྟར་རང་གི་སྟོབས་མཐུས་གསོ་རུ་བྱར་ཡོད་པ་ཡང་། བླ་མ་དང་རྡོ་རྗེ་སྤུན་གྲོགས་ལ་བརྙེས་པ་ཤོར་ན་འཕྲལ་དུ་ཚོགས་ཀྱི་འཁོར་ལོ་ལ་སོགས་པས་མཉེས་པར་བྱས་ན་ཉམས་ཆགས་བསྐོང་བར་འགྱུར་རོ། །གསུང་གི་ཐ་ཚིག་ཉམས་ན་རྡོ་རྗེ་ཆོས་སམ་རྡོ་རྗེ་སེམས་དཔའ་བསྒོམ་ལ་སྙིང་པོའམ་ཡིག་བརྒྱ་འབུམ་ཐེར་གདོན་པར་བྱའོ། །ཐུགས་ཀྱི་དམ་ཚིག་ལས་ཉམས་པར་གྱུར་ན་རྡོ་རྗེའི་བཟླས་པ་སོགས་ལ་བརྩོན་བཞིན་ལོ་གསུམ་སྨྲ་བ་བཅད་ལ། རྩེ་གཅིག་ཏུ་མཉམ་པར་བཞག་པ་གསོ་བའི་ཐབས་མཆོག་ཡིན་ལ། ཉིན་མཚན་ཐུན་དྲུག་ཆ་ལས་ཐལ་ན་ཐུན་ཚོད་འདས་བའི་མཚམས་སོགས་ལ། འགལ་དང་། ཉམས་དང་། འདས་དང་། རལ་པ་ཞེས་པ་རྣམས་རིམ་བཞིན་དུ། ཞག་དང་། ཟླ་བ་དང་། ལོ་གཅིག་དང་ལོ་གཉིས་ལས་འདས་པ་གསོ་བར་རུང་སྟེ། དེ་ཡང་ཕྱི་མ་ལྕི་ཞིང་། ལོ་གསུམ་འདས་པར་གྱུར་ན་གསོ་བར་རུང་བ་མ་ཡིན་ལ། རིམ་པ་བཞིན་དུ། འགལ་ན་ཚོགས་ཀྱི་འཁོར་ལོ་དང་། ཉམས་པར་གྱུར་ན་བདོག་དགུ་སྤོང་དག་བྱས་ནས་ཕུལ་བས་བསྐོང་ཞིང་། འདས་ན་བུ་ཆུང་དང་མ་ནོར་གྱི་དབྱིག་ལ་སོགས་པ་ཕུལ་ནས་བཤགས་ཤིང་སྐོང་ན་ཉམས་ཆགས་དག་པ་དང་། རལ་ན་བླ་མའི་སྐུ་གླུད་དུ་རང་གི་ལུས་སྲོག་གི་བྱས་ཏེ་བཤགས་ན་གསོ་ཐུབ་པའི་རྣམ་བཞག་འདི་རྣམས་རྡོ་རྗེ་ཉི་མ་རྣམ་པར་བཀོད་པའི་རྒྱུད་ལས་གསུངས་པའོ། །གཞན་ཡང་དབང་བཞི་བསྐྱར་ནས་ཞུས་པ་དང་། བདག་འཇུག་མང་དུ་བླང་བ་གལ་ཆེ་ཞིང་། བསྐྱེད་རིམ་དང་རྫོགས་རིམ་དང་། བསྙེན་བསྒྲུབ་དང་བཟླས་བརྗོད་དང་། འཕོ་མད་ཀྱི་ཚུལ་ཁྲིམས་ཞེས་ཐིག་ལེ་འཛག་མེད་དུ་བསྲུང་བ་ལ་ཐིག་ལེའི་རྣལ་འབྱོར་དང་། གཞན་ཡང་སྦྱིན་སྲེག་དང་། གཏོར་མ་གཏོང་བ་དང་། ངན་སོང་གསུམ་གྱི་སྡིག་སྒྲིབ་དྲལ་བའི་སྔགས་དང་ཕྱག་རྒྱ་སོགས་ཀྱིས་བཀྲུ་བ་དང་གཏུམ་མོས་བསྲེག་ཅིང་། དགེ་འདུན་འདུས་པའི་ཚོགས་སམ་རྟེན་གསུམ་གྱི་དྲུངདུ་རང་གིས་ཉེས་པ་བསྒྲག་ཅིང་འཆི་ངེས་པའི་སེམས་ཅན་གྱི་སྲོག་བསླུ་བ་དང་། གསུང་རབ་བཀླག་པ་དང་། ཡིག་བརྒྱ་བཟླ་བ། མཎྜལ་གང་ནུས་འབུལ་བ། ཡན་ལག་བདུན་པ་དང་། མཆོད་རྟེན་བཞེངས་པ་ལ་སོགས་བཤགས་པའི་རིགས་པ་ཐབས་ཀྱིས་ཤེས་པར་བྱ་བའོ། །དེ་ཡང་དམིགས་བཅས་ཀྱི་ཉེས་ལྟུང་ཀུན་ལ་འགྱོད་སེམས་སྐྱེས་པ་ལྷག་པར་གཅེས་ཏེ། ཉེས་ལྟུང་ཅི་བྱས་མ་བཤགས་ན་ཅི་མི་སྙམ་དུ་བསྐྱུར་ན། ཚེ་འདིར་བདེ་ལེགས་དང་ཡོན་ཏན་གྱི་ཚོགས་རྣམས་འགྲིབ་པར་འགྱུར་ཞིང་སྡུག་བསྔལ་དོ་ཟླ་མེད་པའི་རྡོ་རྗེ་དམྱལ་བའི་གནས་སུ་ལྟུང་བ་ཡིན། དམ་ཚིག་དང་ལྡན་པ་དག་སྐྱེ་བ་བཅུ་དྲུག་གམ། མྱུར་ན་ཚེ་འདིའམ། འཆི་ཁ་བར་དོར། ཐུན་མོང་གི་དངོས་གྲུབ། གྲུབ་པ་བརྒྱད་ཐོབ་པ་ཡང་མཁའ་སྤྱོད་ནི་མཁའ་ལ་གནས་ནུས་ཤིང་འཆི་བ་མེད་དོ། །རལ་གྲི་ནི་ཕ་རོལ་ནས་རྒྱལ་བར་བྱེད་པའོ། །རིལ་བུ་གང་དག་བསྒྲུབ་པ་ལག་ཏུ་ཐོགས་པས་ལུས་མི་སྣང་བའོ། །རྐང་མགྱོགས་ནི་མཆིལ་ལྷམ་གྲུབ་སྟེ་གྱོན་པས་ཡུད་ཙམ་ལ་རྒྱ་མཚོའི་མཐའ་ཡང་འཁོར་བའོ། །བུམ་པ་ནི་དེའི་ནང་དུ་ཟད་མེ་ཤེས་པའི་འདོད་དགུའི་གཏེར་འབྱུང་བའོ། །གནོད་སྦྱིན་གྱི་ཁོལ་པོ་ནི་དེ་བྲན་དུ་བྱས་ནས་ཅི་དགོས་པ་གྲུབ་ཅིང་མི་འབུམ་ཕྲག་གིས་བསྒྲུབ་དགོས་པའི་ལས། ཉིན་གཅིག་ལ་ཟིན་པ་རྒྱལ་པོ་མྱ་ངན་མེད་ཀྱི་ཙཻ་ཏྱཾ་སྟེ། མཆོད་རྟེན་བྱེ་བ་ནུབ་གཅིག་ལ་བཞེངས་པ་ལྟ་བུའོ། །བཅུད་ལེན་ནི་ཉི་ཟླའི་ཚེ་གླང་པོ་ཆེའི་སྟོབས་པདྨའི་མདངས་ལྡན་ཞིང་། ལྡང་བ་ན་ཤིང་བལ་ལས་ཡང་བ་སློབ་དཔོན་པདྨ་ལྟ་བུ་སྐྱེ་འཆི་མེད་པའི་སྐུ་བརྙེས་ཤིང་དབང་ཕྱུག་བརྒྱད་དང་ལྡན་པའི་མཁའ་ལ་སྤྱོད་སྟོབས་མང་ཡུལ་གྱི་རི་བོ་དཔལ་འབར་ཕན་ཚུན་བརྗེ་ལྟ་བུའོ། །མིག་སྨན་ནི་མིག་ལ་སྨན་བྱུགས་ནས་ས་འོག་གཏེར་མཐོང་བ་ཁྱིམ་བདག་མགོན་མེད་ཟས་སྦྱིན་དང་། ཁྱད་པར་དུ་ཡང་ས་དང་པོ་ནས་བདུན་པའི་བར་ལ་དབང་བཅུ་ཕྱི་ལྟར་ཡོད་དེ། ཚེ་ལ་དབང་བས་བསྐལ་པ་ཅི་ཙམ་འདོད་པར་གནས་པ་དང་། སེམས་ལ་དབང་བས་ཏིང་ངེ་འཛིན་དཔག་ཏུ་མེད་པ་ལ་སྐད་གཅིག་རེ་རེར་མཉམ་པར་འཇོག་པ་དང་། ཡོ་བྱད་ལ་དབང་བས་བསམ་པ་ཙམ་གྱིས་འཇིག་རྟེན་དུ་ཟས་ནོར་སྣ་ཚོགས་པས་གང་བར་ནུས་པ་དང་། ལས་ལ་དབང་བས་བཟོ་དང་ལས་ཀྱི་གནས་སྐབས་ཐམས་ཅད་ལ་ཇི་ལྟར་འདོད་པ་བཞིན་སྤྱོད་པ་དང་། སྐྱེ་བ་ལ་དབང་བས་ལྷ་དང་མིའི་གནས་གང་འདོད་དུ་སྐྱེ་བ་དང་། མོས་པ་ལ་དབང་བས་ས་གཞི་ཐམས་ཅད་རིན་པོ་ཆེ་སྣ་ཚོགས་སུ་བསྒྱུར་བ་ལ་སོགས་མདོར་ན་དངོས་པོ་ཐམས་ཅད་ཇི་ལྟར་འདོད་པ་སེམས་ཅན་སྤྱིའི་སྣང་དོར་མཐུན་སྣང་གྲུབ་པར་བསྒྱུར་བ་དཔེར་ན་སློབ་དཔོན་སངས་རྒྱས་གཉིས་པས་བསམ་ཡས་ཀྱི་གསག་མ་ནིའུ་སེང་དུ་བསྒྱུར་ནས་ཀུན་གྱི་ལོངས་སྤྱོད་དུ་རུང་བ་ལྟར་དང་། སྨོན་ལམ་ལ་དབང་བས་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་གང་བ་ལ་སོགས་ཇི་ལྟར་སྨོན་པ་བཞིན་འགྲུབ་པ་དང་། རྫུ་འཕྲུལ་ལ་དབང་བའི་ཞིང་ཁམས་དཔག་ཏུ་མེད་པ་སྐྲ་རྩེ་གཅིག་གིས་ནམ་མཁར་འཛིན་པ་ལ་སོགས་གང་འདོད་དུ་སྤྲུལ་ནུས་པ་དང་། ཡེ་ཤེས་ལ་དབང་བས་ཤེས་བྱ་གང་ཤེས་པར་འདོད་པ་དེ་ཤེས་པ་དང་། ཆོས་ལ་དབང་བ་ནི་ཆོས་ཐམས་ཅད་ཀྱི་མིང་དང་དོན་རྣམ་པར་བཞག་པ་ལ་མཁས་པའོ། །དེ་ཡང་དབང་བཅུ་ཕུལ་བྱུང་ནི་དག་པ་ས་གསུམ་ནས་ཡོད་པས་ནང་དུ་བཞག་ལ། དེ་ཉིད་ཀྱི་རྒྱུན་མཐར་འོད་ཟེར་ཆེན་པོའི་དབང་བསྐུར་བ་ཡོད་པའི་ཚུལ་མདོ་སྡེ་དཀོན་མཆོག་སྤྲིན་ལས། བྱང་ཆུབ་སེམས་དཔའ་ས་ཆེན་པོར་ཐོབ་པ་འོད་ཟེར་གྱི་སྤྲིན་ཆེན་པོའི་དབང་བསྐུར་བས་དབང་བཅུ་ཐོབ་པ་ཤ་སྟག་ཏུ་གྱུར་ཏེ། དེའི་དོན་ནི་མ་དག་ས་བདུན་མན་ཆད་བགྲོད་པ་མན་ཆད་ནང་དབང་དུ་མ་བཞག་ཅིང་ས་གསུམ་ནས་བརྩིས་པའི་ས་བཅུ་ཆོས་ཀྱི་སྤྲིན་རྫོགས་ཚེ། ནང་གི་དབང་བཅུ་ཐོབ་པ་དང་། དབང་བཅུ་ཤིན་ཏུ་རྣམ་དག་ནི་སངས་རྒྱས་ཀྱི་ས་ན་ཡོད་པའོ། །དེ་ལྟར་གཉིས་པོ་དང་དབང་ཕྱུག་བརྒྱད་ཀྱི། དང་པོ་ཕྲ་བ་ནི་འཁོར་འདས་ཀྱི་ཆོས་ཐམས་ཅད་དབུ་མའི་རང་བཞིན་དུ་མཐོང་བའོ། །ཡང་བ་ནི་ཡེ་ཤེས་ཀྱི་རླུང་སྟེ། དེའི་སྟོབས་ཀྱི་མཁའ་ཁྱབ་ཀྱི་འཇིག་རྟེན་གྱི་ཁམས་སུ་རྫུ་འཕྲུལ་གྱིས་སྐད་ཅིག་ཙམ་ལ་འགྲོ་བ་དང་། བལྟ་བར་ནུས་པའོ། །ཕྲ་བར་ནུས་པ་ནི། དབུ་མར་རླུང་སེམས་ཞུགས་པའི་བདག་གཞན་མཐའ་དག་སྟོང་པ་ཉིད་དུ་ཐིམ་པར་རྟོགས་པས་གཉིས་སྣང་ནུབ་པའོ། །སྤྱོད་པར་ནུས་པ་ནི། ནང་གི་བཙུན་མོ་ནི་དབུ་མ་ཡིན་པས་རླུང་སེམས་ཞུགས་པའི་རྟེན་འབྲེལ་གྱིས་ཕྱི་རོལ་དུ་གཟུགས་རྡོ་རྗེའི་བདག་ཉིད་ཅན་ལ་སོགས་པ་ཟག་མེད་ཀྱི་འདོད་ཡོན་ལྔ་ལ་སྤྱོད་པའོ། །བདག་ཉིད་ཆེན་པོ་ནི་མཚན་དཔེ་འབར་བ་ལ་སོགས་པ་དང་། བདུད་བཞི་ལས་རྣམ་པར་རྒྱལ་བ་དང་། མཐུ་སྟོབས་ཀྱི་བདག་པོར་གྱུར་བའོ། །དགའ་མགུར་བྱེད་པ་ནི། འགྲོ་བ་རྣམས་ལ་ཇི་ལྟར་འདོད་པའི་སྐུ་དང་གསུང་ལ་སོགས་པའི་རྣམ་པར་འཕྲུལ་བ་སྣ་ཚོགས་བསྟན་ནས་བསམ་པ་ཚིམ་པར་བྱེད་ནུས་པའོ། །ཐམས་ཅད་དབང་དུ་གྱུར་པ་ནི། སེམས་ཅན་རྣམས་ཚོགས་གཉིས་རྫོགས་པའི་གོ་འཕང་ལ་འགོད་ནུས་པས་གཞན་དོན་དུ་མི་འགྱུར་བ་སྐད་ཅིག་ཀྱང་མེད་པའོ། །ཅི་འདོད་བྱེད་པ་ནི། རང་གཞན་གཉིས་ཀའི་དོན་དུ་གནམ་རྡོ་ལྷུང་བ་དང་། རྒྱ་མཚོ་འཁྲུགས་པའི་སྒྲ་དང། གཅིག་ལས་དུ་མ་དང་། དུ་མ་ལས་གཅིག་ཏུ་བྱེད་པ་ལ་སོགས་པའི་རྫུ་འཕྲུལ་ལ་དབང་ཐོབ་པའོ། །དེ་ཀུན་ཀྱང་རང་རང་གི་བཞེད་པ་ཙམ་ལ་རག་ལས་པ་ཡིན་པས་ཟག་མེད་ཀྱི་ཡོན་ཏན་མ་ལུས་པ་ལ་དབང་འབྱོར་བའི་ཕྱིར་དབང་ཕྱུག་དང་ལྡན་པ་ཞེས་བྱའོ། །དེ་ལྟར་བརྒྱད་པོ་དང་རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན་དང་། ཕྱག་རྒྱ་ཆེན་པོའི་དང་། ལྷུན་གྱིས་གྲུབ་པའི་རིག་འཛིན་དང་། རིག་འཛིན་རྣམ་པ་བཞི་ཐོབ་པར་འགྱུར་ཞིང་མཆོག་གི་དངོས་གྲུབ་ཁ་སྦྱོར་ཡན་ལག་བདུན་ནི། སྐུ་རྣམ་པ་ཐམས་ཅད་པ་ཤེས་བྱའི་སྣང་བརྙན་ཡོད་དགུ་འཆར་བ་ནི་ཁ་སྦྱོར་དང། གསུང་རྣམ་པར་དག་པ་སྒྲིབ་པ་དང་བྲལ་བ་ནི་ལོངས་སྤྱོད་རྫོགས་པ་དང་། ཐུགས་རྣམ་པར་དག་པ་ཐམས་ཅད་པ་གཟུང་འཛིན་གྱི་རྟོག་པ་ལས་གྲོལ་ཞིང་འགྱུར་བ་མེད་པའི་བདེ་ཆེན་ལ་རོལ་པ་དང་། དེ་ཡང་རང་བཞིན་མེད་པ་སྟེ་མེད་དགག་གི་མཐའ་ལས་གྲོལ་བའི་སོ་སོར་རང་རིག་པ་མཚན་ཉིད་ཅན་བཞིས་རང་དོན་ཕུན་སུམ་ཚོགས་པ་དང་སྙིང་རྗེས་ཡོངས་སུ་གང་བ་ལས་ཡིད་བཞིན་གྱི་ནོར་བུའམ། དཔག་བསམ་གྱི་ཤིང་ལྟར་གཞན་དོན་འབད་མེད་དུ་འབྱུང་བ་དམིགས་པ་མེད་པའི་ཐུགས་རྗེ་དང་། ཐུགས་རྗེ་ཆེན་པོ་དེ་ཉིད་ནམ་ཡང་རྒྱུན་ཆད་མེད་པས་རྟག་པ་དང་། གདུལ་བྱའི་མོས་པ་དང་། དབང་པོ་ལ་འཚམས་པའི་གཟུགས་སྐུའི་སྣང་བརྙན་དང་། ཆོས་ཀྱི་སྒོ་མཐའ་ཡས་ལ་ནམ་ཡང་འགོག་པ་མེད་པར་འཆར་བ་དང་གསུམ་གྱིས་གཞན་དོན་ཕུན་སུམ་ཚོགས་པ་ཤུགས་ལ་གྲུབ་པའི་དོན་གཉིས་ལྷུན་གྱིས་གྲུབ་པའི་སངས་རྒྱས་ཞེས་བྱའོ། །དེ་ལྟར་ས་བཅུ་ལམ་ལྔའི་སྤངས་རྟོགས་མཐར་ཕྱིན་ནས་སངས་རྒྱས་སྤྲུལ་སྐུ་དང་། ལོངས་སྐུ་དང་། ཆོས་སྐུ་དང་། ངོ་བོ་ཉིད་སྐུ་དང་། མངོན་པར་བྱང་ཆུབ་པའི་སྐུ་དང་ལྔའི་རྣམ་དབྱེ་ཡོད་པས། དེའི་སྟེང་དུ་མི་འགྱུར་རྡོ་རྗེའི་སྐུ་བསྣན་པའི་དྲུག་ནི། རྫོགས་པ་ཆེན་པོའི་ཁྱད་ཆོས་ཡིན་པས་དེ་རྣམས་ཀྱི་ཞིང་དུ་དོན་གཉིས་ཞེས་རང་དོན་དང་གཞན་དོན་ལྷུན་གྱིས་གྲུབ་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པའི་བསྡུས་འགྲེལ་ལོ། ལེའུ་བཅུ་གཅིག་པ།༈ རྒྱལ་བས་འཁོར་ལོ་དང་པོ་བདེན་པ་བཞིའི་ཆོས་འཁོར་དང་། བར་པར་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་སྟེ་གསུམ་དུ་གསུང་པ་ནི་གཟུགས་ནས་རྣམ་མཁྱེན་གྱི་ཆོས་རྣམས་སྐྱེ་འགག་མེད་པའི་རང་བཞིན་དུ་བསྟན་བྱའི་ངོ་བོ་ནི། སོ་སོ་རང་རིག་པ་དེ་ཉིད་སེམས་ཅན་ཐམས་ཅད་ཀྱི་ཁམས་ལ་བདེ་གཤེགས་སྙིང་པོའི་ངོ་བོ་རུ། རྒྱུ་རྐྱེན་གྱིས་མ་བསྐྱེད་པར་རང་བཞིན་དུ་བཞུགས་པ་ལ་རྫོགས་པ་ཆེན་པོ་ཞེས་སུ་གྲགས་པ་ཡིན་ལ། གང་དུ་ཞེས་རྫོགས་པ་ཆེན་པོའི་གཞུང་ལམ་འདི་ནམ་མཁའ་ལྟར་རྒྱ་ཆེའི་ལམ་བཟང་རབ་དང་མཆོག་ཏུ་གྱུར་པ་དམ་པའི་དོན་ཡིན་པར་གྲུབ་ལ། དེ་ལས་གཞན་པའི་ཆོས་ཚུལ་མཐའ་དག་བློའི་བྱི་དོར་ཁོ་ན་ཡིན་པའི་ཕྱིར། སོ་སོར་ཐར་པ་དང་། བྱང་ཆུབ་སེམས་དཔའ་དང་རིག་འཛིན་སྔགས་ཀྱི་བསླབ་པ། སྡོམ་པ་གསུམ་དང་། ཕ་རོལ་ཕྱིན་པ་དྲུག་དང་བསྐྱེད་རྫོགས་གཉིས་སོགས་ལམ་གྱི་ཆོས་རྣམས་ཀུན་ཀྱང་རྫོགས་པ་ཆེན་པོའི་ལམ་སྟེགས་ཡིན་ལ། དེ་ཡང་འདིར་ནི་འཁོར་བ་དང་མྱ་ངན་འདས་པའི་ཆོས་རྣམས་ནི། དབྱིངས་ལས་མ་གཡོས་ཤིང་གཞན་དུ་གྱུར་པའང་མེད་ཅིང་། འཁོར་བ་དང་མྱང་འདས་གཉིས་སུ་མ་གྲུབ་པའི་གཞིའི་དབྱིངས་ལས་མ་གཡོས་ཤིང་གཞན་དུ་གྱུར་པའང་མེད་ཅིང་། འཁོར་བ་དང་མྱང་འདས་གཉིས་སུ་མ་གྲུབ་པའི་ཆོས་ཉིད་རྣམ་དག་ཀྱང་ངོ་བོ་སྟོང་པ་དང་། རང་བཞིན་ལྷུན་གྲུབ་ཐུགས་རྗེ་འགག་མེད་གསུམ་དུ་རྫོགས་པ་ཡིན་ཞིང་། དེ་ཉིད་ཀྱི་ངང་ནས་དག་པ་སངས་རྒྱས་དང་། མ་དག་སེམས་ཅན་ཏེ། འཁོར་བ་དང་མྱ་ངན་ལས་འདས་པ་གཉིས་ཀྱི་ཆ་རུ་གྱུར་ཚེ། གཉིད་ཀྱི་ངང་ནས་རྨི་ལམ་མི་གཡོ་བ་བཞིན་དུ། གང་ནས་ཀྱང་མ་འོངས་ལ། གཞན་དུ་འཕོ་བའང་མེད་མོད། འོན་ཀྱང་རེ་ཞིག་གཞི་ཉིད་ཁོ་ནའི་གཞུགས་ཚུལ་གྱི་གྲུབ་པའི་མཐའི་རྣམ་པར་བཞག་པ་དང་། གཞི་ཀ་དག་ཏུ་འདོད་པ་དང་། ལྷུན་གྲུབ་ཏུ་འདོད་པ་དང་། དེ་བཞིན་དུ་མ་ངེས་པར་འདོད་པ་ངེས་པ་དོན་དུ་འདོད་པ་དང་། ཅིར་ཡང་བཏུབ་ཏུ་འདོད་པ་དང་། ཅིར་ཡང་ཁས་བླང་བཏུབ་ཏུ་འདོད་པ། སྣ་ཚོགས་སུ་འདོད་པའི། གཞི་བདུན་པོ་ཐམས་ཅད་ཀྱང་ངོ་བོ་ཀ་དག་ཏུ་འདོད་པ་གཅིག་པའི་ཕྱོགས་རེ་ལ་སོ་སོར་བརྟགས་པའི་རང་གཞུང་གི་གྲུབ་མཐའ་འཛིན་པ་གཞན་རྣམས་ནི། ཁོང་ལོང་བདུན་གྱིས་གླང་པོའི་སྐྱེ་མཆེད་ལ་རེག་ཏུ་བཅུག་པའི་མིག་ལ་རེག་པས་གླང་པོ་ཆེ་ཕོར་བ་འདྲ་ཞེས་ཟེར་སྣ་ལ་རེག་པས་ལྕགས་ཀྱུ་དང་། རྣ་བ་ལ་རེག་པས་ཞིབ་མ་དང་། རྒྱབ་ལ་རེག་པས་ཁྱོགས་དང་། མཇུག་མ་ལ་རེག་པའི་ཐིག་གུ་དང་འདྲ་ཞེས་ཟེར་ཞིང་གང་ཡང་ཐོག་ཏུ་མ་ཁེལ་བ་དང་། ངང་པའི་ཁ་དོག་དྲིས་པར། ངང་པའི་ཁ་དོག་ལ་འུར་འུར་པོ་བརྗོད་པ་ཇི་བཞིན་པར་ཐོག་ཏུ་མ་ཁེལ་བ་བཞིན་ནོ། །འདིར་ནི་དོན་དམ་སྒྲ་ཇི་བཞིན་པར་བཤད་ན། གནས་ལུགས་ངོ་བོ་ཀ་ནས་དག་པ་སྟེ། ཡེ་ནས་དག་ཅིང་འཁོར་འདས་གཉིས་ཀའི་མཆེད་གཞིར་གྱུར་པ་ལ་ཡོན་ཏན་ལྷུན་གྲུབ་སྟེ། དེ་གཉིས་ཀ་ཐོག་མཐའ་བར་གསུམ་འདི་རུ་གཅིག་ཅེས་པ་དང་། ཐ་དད་པ་གང་ཡང་མིན་ཞིང་། དངོས་པོ་དང་མཚན་མ་སོགས། སྤྲོས་པ་ཐམས་ཅད་དང་བྲལ་བའི་དབྱིངས་ཆེན་ཀ་དག་ལ། གཏིང་གསལ་ཞེས་གདངས་འཁོར་འདས་ཐམས་ཅད་ཀྱི་འཆར་གཞི་འགགས་པ་མེད་པས་ལྷུན་གྱིས་གྲུབ་བོ། གཞི་གཅིག་ཡིན་པ་ལ་རྫས་སུ་འགལ་བའང་མ་ཡིན་ཏེ། དཔེར་ན། གཉིད་དུ་ཕྱོགས་ཚེ་དབང་ལྔའི་ཤེས་པ་ནུབ་པ་དང་། གཉིད་དུས་ཀྱི་ཤེས་པ་ལྟར་གཉིས་ཀ་དབྱེར་མེད་དེ། ངོ་བོ་ཀ་དག་དྲི་བྲལ་ཡིན་པས་འཁོར་མ་མྱོང་ཡང་། ལྷུན་གྲུབ་ཀྱི་གདངས་སམ་རྩལ་ལས་རོལ་པ་བཟང་ངན་སོགས་ཅིར་ཡང་སྣང་སྟེ། ཇི་ལྟར་ན་རིན་པོ་ཆེ་བཻཌཱུཪྱའི་རང་འོད་ནི་གཏིང་གསལ་བའི། རྐྱེན་ཉི་མ་སོགས་ཀྱིས་མ་བསྐྱེད་པར་ཕྱིར་མི་སྣང་། ངོ་བོ་བཻཌཱུཪྱ་དང་འདུ་འབྲལ་མེད་མོད། དེའི་ཕྱིར་ན། ཀ་དག་དངོས་མཚན་སྤངས་བའི་གདངས། བཻཌཱུཪྱའི་རང་འོད་ནང་དུ་གསལ་བ་ལྟར་གནས་པ། ལྷུན་གྲུབ་ཕྱི་རྒྱ་མ་རལ་བར་གཞོན་ནུ་བུམ་པའི་སྐུར་བཞུགས་ཚེ། ངོ་བོས་སྟོང་པ་ཞེས་དངོས་མཚན་མ་གྲུབ་ལ། གདངས་ཀྱིས་མ་འགགས་པས་སྣང་བ་ཀུན་གྱི་འཆར་གཞིར་དེ་ཉིད་བཞུགས་པ་ལ་ལེགས་ཀྱང་། གཞི་ངོ་བོ་སྟོང་པ་ཉིད་ལས་གཡོས་པ་མེད་པའི་བྱང་ཆུབ་ཀྱི་སེམས་རིན་པོ་ཆེ་དེ་ཉིད་དངོས་པོ་དང་། མཚན་མར་མ་གྲུབ་པས་གཅིག་ལས་གཉིས་སུ་ཕྱེས་པ་ལྟ་བུའི་རིས་ཆད་ཅན་དུ་ཕྱི་རོལ་གྱི་ཡུལ་དུ་མི་གསལ་ཡང་ཀུན་གྱི་གཞིར་གྱུར་པ་དེ་ནི་སངས་རྒྱས་ཞེས་བཟང་པོ་ཡང་མ་ཡིན་ལ། སེམས་ཅན་ཞེས་ངན་པ་ཞིག་ཀྱང་མིན་ཏེ། དངོས་པོ་མཚན་མ་གང་ཡང་མེད་པས་གཅིག་དང་། ཐ་དད་ཀྱང་མ་ཡིན་ཏེ་སོ་སོར་འབྱེད་རྒྱུ་མེད་པའི་ཕྱིར་དང་། མཐའ་དབུས་གཉིས་ཀ་མི་དམིགས་པའི་ཕྱིར་མེད་པ་ལ་ཡོད་པར་སྒྲོ་བཏགས་བ་ལྟར་ལས་གང་ཡང་མིན་མོད༴ སྟོང་པ་ཕྱང་ཆད་ཅེས་དངོས་པོ་ཡོད་པ་མེད་པར་སོང་བ་ལྟ་བུ་དང་། སྣོད་སྟོང་པ་དང་ནམ་མཁའ་སྟོང་པ་སོགས་ཅི་ཡང་མེད་པ་ཞིག་མ་ཡིན་ཏེ། མེད་པར་འཛིན་པ་ཞིག་ཡོད་པ་དེ་ཉིད་མ་རྟོག་པའི་སྐྱོན་ནོ། །དངོས་པོ་བཟང་ངན་གང་ཡང་མ་ཡིན་ཞིང་། སྐྱེ་བ་མེད་པ་དང་། འགག་པ་མེད་པ་དང་གནས་པ་མེད་པ་སྟེ་སྣང་བ་གསུམ་དང་ཐབས་གཅིག་གོ། དེ་ཉིད་ཀྱི་ངང་ལས་རིག་པའི་བདག་ཉིད་ཅན་ནི། རྩ་བ་རླུང་ལྔའི། སྙིང་པོ་ཤེལ་འོད་ནང་དུ་ཐིམ་པ་ལྟ་བུ་དེ་ཉིད་ལྷུན་གྲུབ་ཀྱི་གདངས་ཀྱིས་ཕྱིར་འཕགས་པའི་ཚེ། ནང་གསལ་གཞོན་ནུ་བུམ་པའི་རྒྱ་རལ་ནས། བདེ་གཤེགས་སྙིང་པོ་གཞི་ལས་གཡོས་པ་མེད་བཞིན་གཞིའི་སྣང་བ་ཤར་བ་དེ་གདུལ་བྱར་མཆེད་པའི། དུས་ལ་བབ་པ་གང་གི་ཚེ་ཐུགས་རྗེའི་རིག་གདངས་ཞེས་ཐ་མལ་གྱི་ཀུན་རྟོག་ལས་འདས་པའི་རིག་རྩལ་ཤར་གྲོལ་དེ་ཉིད་འཁོར་འདས་དང་། བདག་གཞན་ལྷ་འདྲེ་སོགས་རྣམ་པར་གྱུར་པའི་ཡུལ་ལ་དཔྱོད་བྱེད་ཤེས་པར་ཤར་བའི་རིག་ལ་ལྟོས་པའི་མ་རིག་ཅན་གྱི་ཞེས། རང་ངོ་རང་གི་མ་རིག་པ་དང་། ཡེངས་འཁྲུལ་མཐའ་མེད་དུ་གྱུར་ནས་རིག་མདངས་མ་ཤེས་ཞིང་རྨོངས་པས་ཆ་བཟུང་བས་འཁྲུལ་པ་ལུ་གུ་རྒྱུད་དུ་གྱུར་ཏེ། དེ་ཡང་སྤྲིན་དང་བྲལ་བའི་མཁའ་བཞིན་སྒྲིབ་པ་དངས་པ་ས་ཀ་དག་སྤྲོས་བ་ཀུན་བྲལ་ལས་ལྷུན་གྲུབ་ངོ་བོའི་ཆ་ནས་གཡོ་བ་མེད་ཀྱང་། རང་བཞིན་གྱི་ཆ་ལས་གཡོ་བའི་འཆར་ཚུལ་རྣམ་པ་བརྒྱད་དུ་ཤར་བ་འདི་ནི་འཁོར་འདས་འབྲེལ་བའི་སྒོ་འཕར་ཏེ། ཞེས་པ་ནི་གཞོན་ནུ་བུམ་སྐུའི་རྒྱ་རལ་ཏེ། ཕྱེད་སྣང་ལོངས་སྐུ་དང་། དེ་ལས་སྤྲུལ་སྐུའི་གདུལ་བྱའི་དོན་མཛད་པ་ལ་འཁོར་བའི་སྒྲ་བཏགས་ཤིང་ནང་གསལ་ཐིམ་ལ་མ་རྨུགས་པའི་ཡེ་ཤེས་ལ་མྱང་འདས་ཞེས་གྲགས་ལ། དོན་ལ་བདེ་གཤེགས་སྙིང་པོའི་རང་མདངས་ལས་མ་འདས་སོ། །ཚུལ་འདི་ནི་ཀུན་མཁྱེན་དོལ་བོ་ཤེས་རབ་རྒྱལ་མཚན་སོགས་དབུ་མ་གཞན་སྟོང་གི་གྲུབ་མཐའ་འཛིན་པ་རྣམས་དང་མཚུངས་སོ། །གཞན་ཁ་ཟེར་བ་དག་ཡོད་མོད་དེ། །དམུས་ལོང་རྣམས་ཀྱིས་ཉི་མ་མ་མཐོང་བ་དང་འདྲའོ། །དེ་ལ་ཐེག་རྩེ་ཤིན་ཏུ་རྣལ་འབྱོར་ཞེས་རྫོགས་པ་ཆེན་པོ་སེམས་ཀློང་མན་ངག་གི་རྒྱུད་སྡེ་རྣམས་དང་། ཁྱད་པར་དེ་ངག་གི་མན་ངག་ཀུན་གྱི་ལྔེ་མིག་གངས་ཅན་ཞེས་བོད་ཁ་བ་ཅན་གྱི་རིའི་ལྗོངས་འདིར། དྲི་མེད་འོད་ཟེར་སྟོང་ལྡན་གཅིག་གིས་ཕྱེས་ནས་མ་རྟོག་ལོག་རྟོག་ཕྱོགས་རྟོག་གི་སྨག་རིམ་བསལ་བར་བྱས་པའོ། །དེ་ཚེ་ཞེས་ནང་གསལ་བུམ་སྐུའི་རྒྱ་རལ་བ་དང་དུས་མཚུངས་སུ་གཞི་སྣང་མཐོང་བའི་སྐད་ཅིག་མར། དང་པོའི་སངས་རྒྱས་ཀུན་ཏུ་བཟང་པོའམ། ཐོག་མའི་མགོན་པོ་འོད་མི་འགྱུར་བ་དེས། གཞི་སྣང་དང་པོ་ཤར་བ་དེ་འཁྲུལ་བར་མ་མཆེད་ཅིང་རང་སྣང་དུ་རིག་པས་ཀུན་གཞི་ལུང་མ་བསྟན་གྱི་གཞི་ལས་འཕགས་ཏེ། གཞི་ཉིད་འབྲས་བུར་སྨིན་པའི་གཞི་སྣང་འཁྲུལ་བར་མ་སོང་ནས་རང་ངོ་རང་གིས་རིག་པ་དང་གྲོལ་བ་ཐོབ་པ་དུས་མཉམ་དུ་འོང་བ་ལ་ཤེས་རབ་ཐོགས་མེད་ཀྱིས་སྐད་ཅིག་མ་གཅིག་གི་ཡུན་ཙམ་ལ་རིག་མ་རིག་གི་བྱེ་བྲག་རབ་ཏུ་ཕྱེད་བཞིན། ཕྱེད་ཐོག་ཤེས་རབ་ཉིད་ཀྱང་སྐུར་སྨིན་པ་སྟེ། ཆོས་སྐུའི་གདུལ་བྱ་ལ་ཀུན་ཏུ་བཟང་པོ་དང་། ལོངས་སྐུ་རྒྱལ་བ་རིགས་ལྔ་ལྟ་བུ་ཡིན་ལ། དེ་རྣམས་ཀྱང་གཞན་བྱུང་གི་རྐྱེན་ལ་མ་ལྟོས་པར་རང་སར་གནས་པ་ཞེས་གྲོལ་གཞི་དེ་ཀའི་ངང་དུའོ། །སྐུ་གསུམ་གྱི་རྒྱལ་བ་རྣམས་དང་ཡེ་ཤེས་རྒྱ་མཚོའི་བདག་ཉིད་དུ་སྐད་ཅིག་གཅིག་ལ་མངོན་པར་གྱུར་བཞིན་སངས་རྒྱས་སོ། །གང་གི་ཚེ་ཆོས་སྐུའི་དབྱིངས་འཕོ་འགྱུར་བྲལ་བ་ལས་མ་གཡོས་བཞིན་དུ་བཟང་ངན་སོགས་འཁོར་འདས་ཀྱི་རྣམ་པར་འཛིན་པ་ལས་གྲོལ་བཞིན་ཡོན་ཏན་རྒྱས་པའི་ལྷུན་གྲུབ་ཀྱི་སྒོ་ལོངས་སྤྱོད་རྫོགས་པའི་སྐུ་རུ་སྣང་བར་བྱས་ནས་དེའི་རྩལ་ལམ་རོལ་པ་ལས་ཚངས་ཆེན་གྱི་བསྐལ་པ་བཀོད་ཅིང་། དག་པ་རང་བཞིན་གྱི་སྤྲུལ་པ་སྐུའི་སྣང་བ་དང་། མ་དག་འཁོར་བའི་སྒོ་སྟེ་འཁོར་བའི་ལམ་ལྔར་འཕྱན་པ་ལམ་སེམས་ཅན་གྱི་འཁྲུལ་པའི་སྣང་བ་ཉིད་དང་མཐུན་པའི་སྟོན་པ་ཡིས་འཁོར་བ་མ་སྟོངས་པའི་ཕྲིན་ལས་ཟད་མི་ཤེས་ཤིང་ཟག་མེད་རང་ངོ་ཤེས་པའི་དགེ་བའི་ཚོགས། རྒྱ་ཆེ་རྒྱུན་མི་ཆད་པའི་སྟོབས་ཀྱིས་མངའ་དབང་རྫོགས་པའི་སྟོན་པ་ཀུན་བཟང་རྡོ་རྗེ་འཆང་ཆེན་པོ་དེའི་ཞིང་ཁམས་དང་མཛད་པ་ཆོས་ཀྱི་དབྱིངས་ཏེ་བསམ་གྱིས་མི་ཁྱབ་པའི་ཆོས་ཉིད་དང་མཉམ་ཞིང་། སངས་རྒྱས་ཉིད་ཀྱི་སྣང་བ་དེ་ཙམ་མོ། །དེ་ལ་གཉིས་སུ་འཛིན་པའི་ཀུན་རྟོག་ཡོད་པ་མིན་པས་འདུལ་བྱའི་ཡུལ་དང་གདུལ་བྱེད་ཀྱི་སྟོན་པ་རྣམ་པར་མི་རྟོག་ཀྱང་ཡིད་བཞིན་གྱི་ནོར་བུ་མཆོག་ནི་དགོས་འདོད་ཀུན་འབྱུང་ཡིན་པ་དང་། དཔག་བསམ་གྱི་ཤིང་ཆེན་ཡང་དགོས་འདོད་ཀྱི་རེ་བ་སྐོང་བའི་རྫས་མཆོག་ལྟར་དང་། རྩོལ་བ་མེད་པའི་ཐུགས་རྗེ་གཞན་ངོར་སྣང་བ་ཉི་ཟླ་ལ་རྣམ་རྟོག་མི་མངའ་ཡང་། འོད་ཟེར་གྱིས་གཞན་ལ་ཕན་ནུས་པ་ལྟར་རོ། །དེ་ཉིད་མ་རིག་ཅིང་མ་རྟོག་པའི་ཁམས་གསུམ་གྱིས་སེམས་ཅན་རྣམས་ནི་ཐོག་མའི་ཡེ་གཞི་ནམ་མཁའ་སྟོང་པ་ལྟ་བུ་ལ་འཁྲུལ་བ་མ་མཆིས་ཀྱང་། གཞི་སྣང་ཤར་བའི་རྣམ་པ་མ་རིག་ཅིང་འཁྲུལ་བའི་རྒྱུར་གྱུར་པའི་གློ་བུར་གྱི་རྐྱེན་ནི་བདག་ཉིད་གཅིག་པ་སྟེ། ཞེས་པ་ནི་འཁྲུལ་པ་ཀུན་གྱི་ཐོག་མ་ལས་རླུང་གི་རྩལ་ལས་འགྱུ་བ་གཅིག་བྱུང་བ་ངའོ་བསམ་པའི་རྟོག་པ་ཁོ་ན་ལས་གཞན་མ་ཡིན་ཞེས། ངའོ་བསམ་པ་དེ་ཉིད་རྒྱུ་བདག་ཉིད་གཅིག་པའི་མ་རིག་པ་དང་། དེ་ཉིད་ཇེ་འཐས་སུ་ཐུར་དུ་སོང་བ་ལྷན་གཅིག་སྐྱེས་པའི་མ་རིག་པ་ལ་མིང་དང་དོན་དང་བདག་རྟོག་ཀུན་ཏུ་བརྟགས་པའི་མ་རིག་པ་གསུམ་གྲུབ་ཅིང་། དེ་ལ་འཁྲུལ་པའི་རྐྱེན་བཞི་མཆེད་དེ། ཀུན་གཞི་ཉིད་ཁྱིམ་ལྟར་གནས་པ་རྒྱུའི་རྐྱེན། དེ་ལས་རྟོག་ཅིང་དཔྱོད་པར་ཤར་བ་བདག་པོའི་རྐྱེན། དེ་ལས་ཡུལ་གཞན་དང་ཡུལ་ཅན་གཞན་དུ་འཛིན་པ་ནི་དམིགས་པའི་རྐྱེན། དེ་ལྟར་གསུམ་པོ་དུས་མཚུངས་པར་འཁྲུལ་པའི་རྐྱེན་དུ་གྱུར་པ་ནི་དེ་མ་ཐག་པའི་རྐྱེན་དང་བཞི་ཚོགས་པ་ལས་རིམ་བཞིན་འཁྲུལ་པ་སྟོབས་སུ་གྱུར་ནས། ཉོན་མོངས་དུག་ལྔ་དུག་གསུམ་སོགས་བརྒྱད་ཁྲི་བཞི་སྟོང་གི་ཚོགས་སུ་འཕེལ་ཞིང་འཁོར་བའི་གནས་རིགས་མཐོ་དམན་རྣམས་གྲུབ་པའོ། །མ་དག་འཁོར་བའི་རྒྱུ་རྐྱེན་ལུགས་འབྱུང་གི་རྟེན་འབྲེལ་བཅུ་གཉིས་ཤིང་རྟའི་འཕང་ལོ་བཞིན་དུ་འཁོར་ཞིང་། འདི་ལྟར་འགྲོ་བ་རིགས་དྲུག་དང་། སྐྱེ་གནས་རྣམ་པ་བཞི་པོ་དང་བཅས་པའང་། དོན་ལ་མེད་ཀྱང་སྣང་དུ་ཡོད་པ་སྨིག་རྒྱུ་དང་ཆུ་ཟླ་བཞིན་འཆར་བ་ནི་སྒྱུ་མའི་རང་གཟུགས་སུ་མཆིས་པའི་སྣང་དུས་ཉིད་ནས་ཡོད་མ་མྱོང་བའི་སྟོང་པའི་གཟུགས་བརྙན་ཐོག་མ་ལ་དཔྱོད་པར་བྱེད་པའི་ཡིད་དྲུག་ནི། མ་རིག་པ་དང་མཚུངས་པའི་ཡིད་ནི། རྩ་བ་མ་རིག་པ་དངོས་ཡིན་ལ་འགྱུ་བ་དང་བཅས་པའོ། །ཡིད་ཀྱི་རྣམ་པར་ཤེས་པའི་ཡིད་ནི། ཡུལ་ལ་ང་བདག་ཏུ་བཟུང་བའི་ཉོན་མོངས་པའི་དབང་དུ་སོང་བས་ན་ཡིད་ཀྱི་རྣམ་པར་ཤེས་པའོ། །གཏན་ལ་འབེབས་པའི་ཡིད་ནི། ཡུལ་ངའི་ཡུལ་ཡིན་ནོ་སྙམས་པའི་ཤེས་པའི་བཟུང་བ་དེ་ལ་ཆགས་པ་སྐྱེས་པས་གཏན་ལ་འབེབ་པ་ཞེས་བྱའོ། །ཀུན་ཏུ་ཚོལ་བའི་ཡིད་ནི། ཡུལ་དབང་དུ་སོང་ནས་ཉོན་མོངས་པ་ཕྲ་བ་ཐམས་ཅད་ཟླར་སྡུད་བའོ། །རྣམ་པར་དག་པའི་ཡིད་ནི། ཉོན་མོངས་རགས་པས་སྲོག་གཅོད་དང་དམ་ཉམས་ཀྱི་ལས་བྱེད་དོ། །ངེས་པར་འཇོག་པའི་ཡིད་ནི། དེ་རྣམས་ཀྱི་སྣང་བར་ངའི་ཡིན་སྙམ་པ་དང་། གཞན་གྱི་ཡིན་སྙམ་གྱི་གཉིས་འཛིན་དེ་ནི་ངེས་འཇོག་གི་ཡིད་དང་དྲུག་པོ་དེ་ལངས་ནས་ཚོགས་དྲུག་ཤར་བ་ཡང་འདི་ལྟར་མིག་གི་ཡུལ་དུ་གཟུགས། རྣ་བའི་སྒྲ་ སྣའི་དྲི་ལྕེའི་རོ་ ལུས་ཀྱི་རེག་བྱ་ ཡིད་ལ་ཆོས་སྟེ་ རྣམ་པར་རྟོག་པ་བདག་ཏུ་འཛིན་པའི་འཆིང་བ་ནི། རབ་ཏུ་མཐུ་ཆེ་བས་སེམས་ཉིད་ནམ་མཁའི་ཁམས་ངོ་བོ་ཉིད་མེད་པ་འདི་ཡང་རབ་ཏུ་བཅིངས་ནས། བདག་མེད་ཀྱང་བདག་ཡོད་ལ་ཞེན་ནས་ཀུན་རྟོག་འགལ་མེའི་འཁོར་ལོ་བསྐོར་བ་བཞིན་དུ་འཁོར་བ་ལ། འཇིག་རྟེན་སྲིད་པའི་གནས་སྐབས་འདི་ནི་ལ་ལའི་སྣང་བ་ནི། མི་དང་དུད་འགྲོ་འགྲོ་བ་ལ་དེ་ལྟར་དང་། ལ་ལས་མུན་པ་ནི་འབྱུང་པོའི་བྱ་སོགས་སོ། ཆུ་གཅིག་པུ་ཉིད་ལའང་། ལ་ལའི་བདུད་རྩི་མཐོང་བའི་ལྷ་རྣམས་དང་། ལ་ལའི་ཆུར་མཐོང་བ་མི་དང་། དུད་འགྲོའི་བཏུང་བ་ཙམ་དུ་མཐོང་བ་དང་། ཡི་དྭགས་ཀྱི་རྣག་ཁྲག་དང་། དམྱལ་བའི་མེ་སོགས་ཀུན་ནས་རྣམ་པར་འགལ་བའི་འདུ་ཤེས་རྣམས་ནི། བག་ཆགས་སྣ་ཚོགས་ཀྱི་རྗེས་སུ་འགྲོ་བ་ལས་འདི་ཁོ་ནའོ། །ཞེས་ངེས་པ་འགའ་ཡང་མེད་དོ། །དེ་ལྟར་ནའང་སྣང་བའི་ཡུལ་གཟུགས་ལ་མཚོན་ན། འཇིགས་སྐྲག་སྐྱེ་བའི་སྟག་གཟིག་སོགས་དང་། དགྲ་ཟླ་མཐོང་ན་དེ་ཉིད་སྣང་བའི་ཡུལ་ཡིན་པས་སེམས་མ་ཡིན་ཏེ། བཞིན་གྱི་གཟུགས་བརྙན་མེ་ལོང་གི་ནང་དུ་ཞུགས་ཀྱང་རྟེན་ཅིང་འབྲེལ་བར་འབྱུང་བའི་རྐྱེན་གྱིས་ཤར་བ་ཙམ་ལས་བཞིན་གཟུགས་དང་མེ་ལོང་ནམ་ཡང་འཕྲད་པའམ་འདྲེས་པ་མ་མྱོང་ཡང་མེད་བཞིན་དུ་སྣང་ལ་དེར་འཛིན་འཁྲུལ་པའི་སེམས་རྟོག་ཁོ་ན་ཡིན་ཏེ། ཐག་ཁྲ་མཐོང་ཚེ་སྦྲུལ་དུ་འཛིན་བྱེད་ཀྱི་ཤེས་པ་དང་པོ་དེ་ག་གཟུང་བའི་ཆོས་ཡིན་ལ། རྗེས་ལ་རྟོག་ཅིང་དཔྱོད་པ་ཞུགས་པ་འཛིན་པའོ། །གལ་ཏེ་སྦྲུལ་དུ་སྣང་བ་དེ་གཟུང་བ་ལ་འཛིན་བ་བདག་པོའི་ཤེས་པ་ཡིན་ཞེས་སྨྲ་བར་བྱེད་ན། སྣང་བ་དང་སྣང་ཡུལ་མ་ཕྱེད་པའི་སྐྱེས་བུ་སུ་ཡང་རུང་སྟེ། སྣང་བ་ཉིད་དང་ལྷན་ཅིག་ཡོད་མེད་བྱེད་པ་ཡང་དཔེར་ན་མིག་ལམ་ན་རྫས་དང་ཡོ་བྱད་སོགས་ཡོད་པ་གཞན་གྱིས་ཁྱེར་བའམ། ཆག་པར་གྱུར་ན་སྐྱེས་བུ་དེ་ཡང་དེ་ལྟར་དུ་མི་འགྱུར་བའི་གནོད་བྱེད་མང་ངོ་། །གོང་དུའང་མ་རིག་གཟུང་འཛིན་གློ་བུར་རྐྱེན་ཞེས་ནི། ཐོག་མར་རང་ངོ་རང་གིས་མ་རིག་པས་འཁྲུལ་བའི་རྒྱུ་བྱས། བར་དུ་གཞི་སྣང་ཤར་བ་གཞན་དུ་བཟུང་བས་འཁྲུལ་པའི་རྐྱེན་བྱས་ཏེ། སྲིད་པའི་བདག་བོ་ང་ཞེས་གང་ཟག་གི་བདག་དང་། ང་ཡི་བར་ཞེས་བདག་དེའི་རང་གི་སྒོ་གསུམ་ལ་གཏོགས་པའི་ཆོས་རྣམས་བདག་གིར་བྱེད་པ་ཡིན་ཏེ། དཔེར་ན། ང་མེད་ལ་ངར་བཟུང་བའི་ཤེས་པ་དང་པོ་དེ། ང་བདག་དང་དེའི་བདག་གི་ལུས་ངའི་ཡིན་ནོ་སྙམ་པ་ནི་ང་ཡིར་འཛིན་པ་དང་། དེས་གཞན་དུ་བཟུང་བ་ཐམས་ཅད་ཆོས་ཀྱི་བདག་ཡིན་ནོ། །དེ་དག་རྣམས་མེད་བཞིན་དུ་སྣང་བ་རང་སེམས་འཁྲུལ་པ་ལས་བྱུང་བ་ཡིན་པས་རྩ་བ་ཆོད་པར་གྱུར་ན་ཀུན་བྱེད་རྒྱལ་པོ་སྟེ། བདེ་གཤེགས་སྙིང་པོའི་རྩལ་སྣང་རང་ལས་བྱུང་ཞིང་རང་ལ་ཐིམ་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་གཅིག་པའི་བསྡུས་འགྲེལ་ལོ། ལེའུ་བཅུ་གཉིས་པ།༈ གང་ཞིག་སློབ་པ་མིན་པའི་ཟུང་འཇུག་ལ་ཞེས་པ་སློབ་པའི་ལམ་བཞི་མཐར་ཕྱིན་ནས་མི་སློབ་པའི་ལམ་སྣང་སྟོང་དང་། བདེ་སྟོང་སོགས་ཟུང་དུ་འཇུག་པ་ལ་དཀྲི་བའི་ཐབས་སམ་ལམ་ཆེན་དུ་གྱུར་བ་ཕ་རོལ་ཏུ་ཕྱིན་པ་དྲུག་གི་ཡོན་ཏན་ཀུན་ཀྱང་། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལ་ཡང་དག་པར་བརྟེན་པ་ཡིན་ན། ལམ་དེ་ཉིད་ནི་དུས་ནམ་ཡང་ཕྱི་རོལ་པ་དང་ཉན་རང་སོགས་ཀྱི་རྒྱུར་མི་འགྱུར་ལ། འདི་ལྟར་རྫོགས་པས་སངས་རྒྱས་ཀུན་གྱི་སྐུ་གསུང་ཐུགས་ཀྱི་གསང་བ་ནི། སྟོང་པ་ཉིད་དེ། དེ་ལ་དངོས་པོ་དང་མཚན་ཉིད་གང་ཡང་མི་གནས་ཤིང་མཐའ་ཐམས་ཅད་དང་བྲལ་བའི་དོན་ཀ་དག་རྫོགས་པ་ཆེན་པོ་ལ་དབུ་མར་བཟུང་དགོས་པའང་མེད་ཅིང་། ཀུན་རྫོབ་དང་དོན་དམ་ཞེས་ངོ་བོ་ཉིད་གང་ཡང་སྤང་པས་དམིགས་སུ་མེད་པ་ནི་རྫོགས་པ་ཆེན་པོར་གྲུབ་ལ། དེ་ཡང་རྩོད་པ་མངོན་པར་འཕེལ་བ་ཞེས་བདེན་གཉིས་གོ་ལོག་ཏུ་འཛིན་པའི་རྟོག་གེ་མགོ་མཁྲེགས་ཀྱི་ཚོགས་རྣམས་ནི། བདེན་གཉིས་ཤ་བའི་རྭ་ལྟར་ཐ་དད་བཟུང་ནས་བརྟགས་ཤིང་རྗེས་སུ་དཔག་པའི་ཕྱི་བཞིན་དུ་འབྲང་ཞིང་རང་གི་ངན་རྟོག་ཁོ་ནས་དཔྱད་པ་ཞེས་པ་དང་། དོན་དམ་ཡུལ་ནི་དེ་དང་འགལ་བ་ཅན་ཡིན་ཏེ། ཆོས་དྲང་དོན་ལ་བསླབ་སྦྱང་ཅི་ཙམ་བྱས་ཀྱང་ངེས་དོན་རང་སེམས་ཀྱི་གནས་ལུགས་མ་མཐོང་བར་དུ་འཁོར་བའི་ས་ལས་མ་འདས་ཤིང་། སོ་སོ་རང་གི་རིག་པ་བརྗོད་པའི་ཡུལ་ལས་འདས་པ་སྒྲ་ཇི་བཞིན་པར་རྟོགས་ཚེ་མི་སློབ་པའི་ལམ་གྱི་བདེན་པ་མཐོང་བའོ། །དེ་ལས་དངོས་པོར་སྨྲ་བ་གྲུབ་མཐའི་རྟོག་གེ་བ་ནི་ཉན་ཐོས་ཕལ་མོ་ཆེ་དང་། ས་མཚམས་དམའ་བ་སོ་སོའི་སྐྱེ་བོ་རྟོག་གེ་ཡི་ཞེས་ད་ལྟའི་བདེན་རྫུན་གོ་ལོག་དང་། ཡིན་མིན་གོ་ལོག་ཏུ་འཆད་པའི་མཚན་ཉིད་ཕལ་མོ་ཆེ་མཚུངས་སོ། །རྟོག་དཔྱོད་ལས་འདས་པའི་རྒྱལ་པའི་ཡེ་ཤེས་བརྗོད་པ་ཐམས་ཅད་དང་བྲལ་བ་ནི་གདོད་ནས་གྲོལ་བ་སྟེ། ཡེ་ནས་སུས་ཀྱང་བཅིངས་པ་མེད་པའི་རང་གྲོལ་རྫོགས་པ་ཆེན་པོའི་ལམ་མཆོག་རྨད་དུ་བྱུང་བ་གང་། ཤེས་བྱ་སྣང་བས་མ་བཅིངས་སྟོང་པའི་དངོས་ལས་མི་འགྱུར་ཞིང་། སྟོང་པ་རང་བཞིན་གསལ་བའི་སྙིང་པོ་འགག་པ་མེད་པ་ནི། རིག་པར་བཞུགས་པའི་སྐུ་དང་ཡེ་ཤེས་ཀྱི་ཁམས་འདུ་འབྲལ་མེད་པ་སོ་སོ་མ་ཡིན་ཐ་མི་དད་དེ་ཉི་མའི་སྙིང་པོ་བཞིན་དུ་སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དཔལ་ཡོན་ཡོངས་སུ་རྫོགས་པ་ནི་ཉི་མའི་དཔལ་ཡོན་ཕུན་སུམ་ཚོགས་པ་བཞིན་ནོ། །དེ་ལྟ་བུའི་རྫོགས་པ་ཆེན་པོའི་དགོངས་པའི་དོན་གང་ལ་དབང་པོ་རབ་འབྲིང་ཐ་མ་དང་། བློའི་རིམ་པ་ཡང་དེ་ལྟ་བུའི་སྟོབས་ཆེ་ཆུང་གི་ཁྱད་ཆོས་ཀྱིས་མཇལ་ལུགས་སམ་རྟོགས་ལུགས་གསུམ་དུ་ཡོད་པ་ལ། རྫོགས་ཆེན་སེམས་སྡེ་པས་ནི་སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ཉིད་ཀྱི་རོལ་པའི་རྩལ་དུ་ཤར་བར་འདོད་ཅིང་། ཀློང་གི་སྡེ་ནི་རང་སྣང་བཀོད་པའི་རྒྱན་ཞེས་ཆོས་ཐམས་ཅད་རྣམ་ཀུན་མཆོག་ལྡན་ཀུན་ཏུ་བཟང་མོའི་ཀློང་ལས་མ་འདས་འདོད་ལ། མན་ངག་སྡེ་ནི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་ཡོད་མ་མྱོང་བ་ཡིན་ནའང་མེད་སྣང་སྟོང་པའི་གཟུགས་ལ་བདག་ཏུ་བཟུང་ནས་འཁྲུལ་སྣང་བརྟས་པ་ཙམ་ལས་དོན་ལ་མེད་པ་ཡོད་པར་བཟུང་བ་ཙམ་མོ། །དེ་དག་ཀུན་ཀྱང་དགྲོལ་གཞི་དངོས་པོ་མཚན་མ་གང་ཡང་མེད་པའི་བྱང་ཆུབ་ཀྱི་སེམས་ལས་གཞན་མ་མཆིས་ཤིང་། གང་གིས་དགྲོལ་བ་སྤངས་པའི་སེམས་ཉིད་རང་གསལ་གྱི་གདངས་སམ་དབྱིངས་ནི། གཞི་འབྱུང་ཡུལ་དང་རྩ་བ་འབྱུང་ཁུངས་མེད་པའི་ཀློང་ན་འགགས་པ་མེད་ཅིང་གསལ་ལ། དེ་ཡང་སུས་ཀྱང་བྱས་ཤིང་བཅོས་པ་མེད་པས་ཡེ་ནས་གྲོལ་བ་ཡིན་ལ། དེ་ཉིད་ཀྱང་རང་གིས་རང་གྲོལ་བ་ལས་རྐྱེན་ལ་རེག་མ་ལུས་ཤིང་། ཅེར་གྲོལ་ཡིན་པས་ལྟོས་གཞི་ཀུན་དང་བྲལ་ཞིང་། གཅིག་ཡིན་ཞེས་དུམ་བུར་གཅོད་རྒྱུ་དང་། དུ་མ་ཡིན་ཞེས་གྲངས་ལ་འདེབས་རྒྱུ་དང་། མིང་གདག་པས་མཐའ་ལས་གྲོལ་ཞིང་། གཅིག་པོར་ཡང་རིག་པར་གྲོལ་བས་མཚན་ཉིད་ལོག་ན་གང་ཡང་མེད་ཅིང་། གང་དག་སེམས་ནི་ཀུན་རྟོག་གི་རྣམ་རྟོག་འཁྲུལ་སྣང་གི་རང་བཞིན་ཅན་ཡིན་ལ། དེ་ལས་འདས་པའི་རིག་པ་ནི་བལྟ་བྱ་ལྟ་བྱེད་བསྒོམ་བྱ་བསྒོམ་བྱེད་སོགས་ཀྱི་བློ་དང་བྲལ་བའི་བདག་མེད་ཡིན་མིན་དང་ཡོད་མེད་སོགས་ཀྱི་ཐ་སྙད་བྲལ་བ་ནི། རང་བཞིན་རྫོགས་པ་ཆེན་པོའི་ཁྱད་ཆོས་ཡིན་ལ་རྟོགས་པ་རྣམས་ནི་གཞི་དེ་ཉིད་ལས་རིག་པར་གྲོལ་བས་དམིགས་གཏད་དབྱིངས་སུ་ཡལ་བའོ། །མ་རྟོག་སེམས་ཅན་རྣམས་ནི་གཞི་སྟོང་པ་དེ་ཉིད་ཀྱི་ངང་དུ་འཁོར་བའོ། །རྣམ་པས་དབྱེ་ན་གཞི་ཆུ་ལྟ་བུ་དང་། སེམས་བྱུང་གི་རྣམ་རྟོག་ཆུ་བུར་བཞིན་དུ་འཕྲོ་བ་དང་། རྟོག་མེད་ཙམ་དུ་སེམས་དང་རིག་པ་གཉིས་འདྲ་ནའང་། རིག་པ་ནི་གང་ལའང་མ་གྲུབ་པས་རང་བཞིན་མེད་པ་ཟང་ཐལ་ལ། སེམས་ནི་ལྡེང་ཀའི་ཆུ་ལྟ་བུར་འཁྱིལ་ཞིང་རྨོངས་པས་རིག་ཆ་བྲལ་ཞིང་། རིག་པ་ནི་གནམ་སྟོང་གི་ཟླ་བ་བླ་འོག་ཡོད་ཀྱང་། ཟླ་བའི་འོད་དཀར་གྱི་ཡོན་ཏན་ཅུང་ཟད་ཀྱང་མ་བྲི་བར་གཏིང་ན་གསལ་བ་དང་འདྲ་ཞིང་། སེམས་ནི་བཅོ་ལྔའི་ཟླ་བ་ཕྱི་རོལ་གྱི་ཡུལ་ཀུན་ལ་འདྲེས་པ་དང་མཚུངས་ཤིང་། མ་སྒྲིབ་དངས་ལ་ཡུལ་མེད་པ་རིག་པའི་ཡོན་ཏན་ཡིན་ཏེ། ཆགས་སྡང་སོགས་ཀུན་རྫོབ་ཀྱི་ཡུལ་དང་ཀུན་ནས་འདྲེས་པ་སེམས་ཀྱི་ཁྱད་པར་ཡིན་པ་དང་། དེ་བཞིན་དུ་རིག་པ་རང་གནས་ཀྱི་ཤེས་རབ་སྟེ། དེ་ཉིད་གཟུང་འཛིན་དང་བྲལ་བའི་རྟོགས་པ་ཡིན་ལ། བསམ་གཏན་གྱི་ཐབས་ལ་མ་ལྟོས་ཤིང་། བྱིང་བ་ཞེས་རིག་གདངས་ཉམས་ཀྱི་འདམ་དུ་ཚུད་པ་ལྟ་བུ་དང་། རྒོད་པ་ཞེས་ཉོན་མོངས་རགས་པའི་སྐྱོན་དང་བྲལ་བའོ། །སེམས་ནི་གང་ལ་དམིགས་པའི་ཡུལ་ལ་རྩེ་གཅིག་ཏུ་འཇུག་ཅིང་ཞེན་པའི་ཏིང་ངེ་འཛིན་དང་། རྟེན་དང་བརྟེན་པར་འབྲེལ་ཞིང་། རིག་པ་ཡུལ་ལ་ཤར་ཡང་སྣང་བའི་ཟིལ་གྱིས་མི་ནོན་ཏེ་དངུལ་ཆུ་སར་ལྷུང་ཡང་རྡུལ་གྱི་དྲི་མས་མི་གོས་པ་དང་འདྲ་ཞིང་། སེམས་ནི་གཟུང་འཛིན་གྱི་ཆ་དང་བཅས་པས་རྣམ་རྟོག་བཟང་ངན་ཉེ་བར་ལེན་པའི་ཕྱོགས་དང་འདྲེས་ཤིང་། རིག་པས་སེམས་ཉིད་གཞན་དུ་མ་སྤང་མོད་ཀྱང་། སེམས་དང་རིག་པ་གཉིས་ལྷན་ཅིག་ཏུ་མི་འདུ་བའི་དོན་ནི་ཕྱི་རོལ་གྱི་ཡུལ་ལྔ་དང་བཟང་ངན་སོགས་གཉིས་འཛིན་གྱི་རྣམ་པར་ཤར་བ་རང་དང་རྫས་གཅིག་པའི་ཕྱིར་ན་ཉོན་མོངས་པ་རྣམས་ནི་ལྷན་ཅིག་ཏུ་སྦྲན་ནས་བྲོས་པ་ལྟར་འགྱུར་ཞིང་། དེ་ལྟར་བྲོས་པས་ཉོན་མོངས་པའི་བཙོན་ར་ལས། ངེས་པར་འབྱིན་པའི་ཐར་པ་རྫོགས་ཆེན་མན་ངག་སྡེ་པའི་ཁྱད་པར་གྱི་ཆོས་ཏེ། དེ་ལས་གཞན་དུ་ཉོན་མོངས་པ་ཕྲ་རགས་ཀྱི་ཚོགས་རྣམས་ཉན་རང་གི་དུག་ལྟར་སྤོང་ཞིང་། བྱང་སེམས་ཀྱིས་གཉེན་པོས་འདུལ་བ་ཡིན། སྔགས་སྤྱིར་ལམ་དུ་གཏོང་ངམ་ལམ་ཁྱེར་བྱ་བ་དང་། སེམས་སྡེར་གནས་ལུགས་ཀྱིས་གཤིས་ཐོག་ཏུ་དགྲོལ་བར་བྱ་བ་དང་། ཀློང་སྡེར་སྤང་གཉེན་གཉིས་ཆོས་ཉིད་གཅིག་ཏུ་དག་པར་བྱེད་པ་རྣམས་རིག་པའི་ཀློང་ན་གཟུང་འཛིན་ཕྲ་མོའི་རང་ཚུགས་ཏེ་དམིགས་པ་ཤིན་ཏུ་ཕྲ་བ་ཡོད་དེ་ཞིག་ནས་དམིགས་མེད་དུ་འགྱུར་བ་མཚར་ཞེས་པ་དེ་ལྟར་ཅུང་ཟད་མ་ཡིན་པས་སོམ་ཉིའི་གསུངས་སོ། །དེ་བཞིན་དུ་འཁོར་བའི་ཀུན་གཞི་དང་ནི། མྱ་ངན་འདས་པའི་ཆོས་སྐུ་གཉིས་པོ་སྟོང་བའི་དབྱིངས་སུ་གཅིག་ཀྱང་། ཆོས་སྐུ་རྟོག་མེད་རྒྱ་མཚོ་དང་འདྲ་ཞིང་། ཀུན་གཞིའི་རྣམ་ཤེས་ནི་འཁོར་བའི་ཐོག་མ་གཞི་སྣང་ཤར་བར་གྱུར་པ་དེའི་སྒྲིབ་ཆ་སྟེ། དཔེར་རྒྱ་མཚོ་ཁར་གྲུ་བས་བསྒྲོད་པ་བཞིན་དུ་འཁོར་འདས་གཉིས་ཀར་ལྡང་ཞིང་། གཞི་དེ་ཉིད་ནས་འཁྲུལ་པའི་སྐྱོན་གྱིས་འཁོར་བ་དང་། གྲོལ་བའི་ཡོན་ཏན་གྱི་མྱ་ངན་ལས་འདས་ཆོས་ཉིད་ཀྱང་གཉིད་དུ་སོང་བཞིན་འཁོར་བའི་སྡུག་བསྔལ་ལ་སྤྱོད་པ་དང་། དེ་ལས་སད་པ་བཞིན་དུ་འཁྲུལ་སྣང་སངས་པ་གཉིས་ཀྱང་། འཁྲུལ་སྣང་དབང་པོ་ཉམས་པའི་གཉིད་སྟུག་བཞིན་དང་། གྲོལ་བ་དེ་ལས་སད་པའི་གནས་སྐབས་དང་འདྲ་སྟེ། དེ་ཡང་ཐོག་མའི་ངེས་མེད་གཞིའི་ལྷུན་གྲུབ་དང་། མཐར་གྱི་གྲོལ་བའི་ཀ་དག་དྲི་མ་ཀུན་བྲལ་གཉིས་པོ་ཡང་། རྫས་གཅིག་པ་ལྟ་བུའི་ཐ་སྙད་བཞག་ཆོག་ཀྱང་། སླད་ཀྱི་འཁྲུལ་པའི་གཞི་བྱེད་པ་དང་མི་བྱེད་པའི་ཁྱད་པར་ཤེས་པ་གཅེས་ཞེས་པ་ནི། ཐོག་མའི་ངེས་མེད་ལྷུན་གྲུབ་ཀྱི་འཁྲུལ་གཞི་བྱེད་ཀྱང་། མཐར་གྱིས་གྲོལ་བའི་ཀ་དག་གི་ལམ་གྱི་སྒྲིབ་པ་མཐའ་དག་སྦྱང་བ་ཡིན་པས་འབྲས་བུ་རྒྱུར་མི་ལྡོག་པའི་ཕྱིར་རོ། །དེ་བཞིན་དུ་དབྱིངས་ཀྱི་གྲོལ་ས་ཀ་དག་དང་ཅེས་ཐོག་མའི་གྲོལ་གཞི་དང་། ད་ལྟའི་ལམ་གྱི་རིག་པ་ཀ་དག་གཉིས་ལ་ཁྱད་པར་ཡོད་དེ། རྟོགས་ཚུལ་ཙམ་ལ་རྒྱ་ཆད་ཕྱོགས་ལྷུང་མེད་པར་མཉམ་ནའང་། གྲོལ་ས་ཉིད་ནི་རླུང་སེམས་ཆ་དང་བཅས་པ་ཉིད་རྣམ་པར་བྱང་བའི་དག་པར་གྱུར་པའི་འཁོར་འདས་གཉིས་ཀ་ན་དག་པ་སྟེ། ལམ་གྱི་དུས་སུ་རླུང་སེམས་གཉིས་མ་དག་པའི་རྐྱེན་དབང་ཁོ་ན་དང་འགྲོགས་ཤིང་། སེམས་དང་སེམས་བྱུང་ལས་བྱུང་བའི་དྲི་མ་དང་བཅས་པ་སྟེ་ཆོས་ཀྱི་བསླད་ཅིང་། ཁུར་བུས་རྟོག་བྲལ་གྱི་ངང་དུ་དངོས་སུ་གནས་པ་རེས་འགའ་ཙམ་མོ། །དེ་བཞིན་ཆོས་ཉིད་བར་དོའི་རིག་གདངས་ནི། རིག་པའི་ཆོས་ཉིད་ལ་ཡེ་ནས་རྒྱལ་བ་སྐུ་གསུམ་གྱི་རྟེན་དང་བརྟེན་པར་བཅས་བ་རྫོགས་པ་དང་། རྒྱུད་སྡེ་གཞན་མར་རྟོག་བཅས་གོམས་པའམ། བསྐྱེད་རིམས་ལ་གོམས་པའི་ལྷའི་སྒྱུ་ལུས་གཉིས་ལྟར་སྣང་ལྷ་སྐུར་མཚུངས་ཀྱང་དོན་ལ་སྣང་བ་ལོངས་སྐུའི་ཞིང་ཁམས་སུ་ཤར་ཞིང་། ལྷ་རྣམས་ངོ་ཤེས་ཐོག་ཏུ་གྲོལ་བ་དང་། མི་གྲོལ་ཁྱད་པར་ཆེ་ཞིང་། དེ་ལས་ཁྱད་པར་ལམ་འདིར་ཞུགས་པའི་དམ་ཚིག་ཅན་རྣམས་ནི། ས་བཅུ་པའི་སྣང་བས་བསྡུས་པའི་ལོངས་སྐུ་ལ། ཐོགས་པ་མ་ཡིན་ཞིང་དེའི་དཔེ་བྱད་ནི་ཞེས་པ་དེའི་མངོན་པར་རྟོགས་པ་དེ་ཉིད་རང་བཞིན་སྤྲུལ་པའི་ཞིང་ཁམས་བཅུའམ་ལྔར་བཀོད་པ་ལ་མྱུར་བ་ཉིད་དུ་མི་ཐོགས་པར་འགྲོ་བའོ། །དེའི་ཕྱིར་ན་འདི་ནི་འགྱུར་བ་མེད་པའི་རྡོ་རྗེའི་ལམ་མཆོག་སྟེ། གདོད་ནས་ཞེས་ཡེ་ནས་གྲོལ་བའི་རིག་པའི་ངོ་བོ་ཀ་ནས་དག་པ་ནི། སྟོང་པ་ངོ་བོ་ཉིད་མེད་པ་སྟེ། བསམ་པ་དང་བརྗོད་པའི་ཡུལ་ལས་འདས་ཤིང་མཚན་ཉིད་བློའི་དཔྱད་ནས་བརྗོད་པས་ཐུག་པ་མེད་པ་ལ་སྤང་ཞེས་པའོ། །ད་གདོད་གྲོལ་བ་ཐོབ་འདོད་ཀྱི་སྨོན་པ་མེད་ལ་རིག་པའི་ཡོན་ཏན་རྫོགས་པའོ། །རིག་པའང་ཤེས་པར་བྱ་བའི་ཡུལ་ལ་མི་གནས་པས་ན། ང་དང་ཞེས་རིག་པ་ལ་བདག་ཏུ་འཛིན་པ་དང་། ང་ཡིར་འཛིན་པ་ངའི་རིག་པ་ཞེས་གཉིས་སུ་འཛིན་པའི་ཆོས་དང་བྲལ་བའོ། །དེ་ལ་སྒོམ་དང་བསྒོམ་པར་བྱ་བའི་ཆོས་གཉིས་ཀ་མེད་ལ། མ་བཅོས་པར་རྣལ་མར་བཞག་ན་རིག་པ་རྗེན་པ་སྟེ། སྒྲིབ་པ་དང་བྲལ་བ་མངོན་སུམ་དུ་མཐོང་ཞེས་པའོ། །རང་གི་གནས་ལུགས་ཀྱི་ངོ་བོ་མཐའ་དང་བྲལ་བ་དེ་གཞན་དུ་མི་འགྱུར་བའི་ཕྱིར་ན། མ་རིག་འཛིན་པའི་འཁྲུལ་སྣང་གིས་སྲིད་པར་དེ་འཁོར་བར་འཁྲིད་མི་ནུས་ལ། ཕྱི་རོལ་གྱི་ཡུལ་དང་བདག་ཏུ་ཞེན་པའི་འཁྲུལ་སྣང་རྣམས་ནི། བྱེད་པོས་མ་བྱས་ཤིང་རང་སེམས་ཀྱི་རྟོག་པ་བརྟས་པ་ལས་གྲུབ་ཅིང་། གཞི་དང་རྩ་བ་མེད་པ་ལས་ཐམས་ཅད་སྐྱེས་ཀྱང་སྐྱེས་ཙམ་ཉིད་ནས་སྐྱེ་བ་མེད་པར་རྫོགས་པར་རྟོགས་པ་སྟེ། དེ་ལས་གཞན་པའི་རྟོགས་པ་ཡོད་མི་དགོས་ཤིང་ ཀློག་པ་དང་། འཛིན་པ་དང་། བསྒོམ་པ་དང་། བསྟན་བཅོས་རྩོམ་པ་དང་། དེའི་དོན་ལ་སེམས་པ་སོགས་མཐའ་དག་བློའི་བྱས་པའི་ཆོས་ཡིན་པས་ལྡེམ་པོའི་གྲུབ་མཐར་ཞིག་པར་གྱུར་ན། ཡིད་སྨོན་མེད་པའི་སངས་རྒྱས་དེ་ཉིད་ཡིན་ནོ། །ཁྱད་པར་སེམས་སྡེ་དང་། ནང་ཀློང་སྡེ་གཉིས་ཀ་ལས་མ་བསྟན་པའི་བླ་ན་མེད་པའི་ལམ་ཐོད་རྒལ་ནི། རིག་གདངས་མངོན་སུམ་དུ་མཐོང་བས་གེགས་དང་གོལ་ས་ཉུང་ཞིང་། ཕྱིའི་འབྱུང་བ་ས་རྡོ་རི་བྲག་སོགས་ཡུལ་སྣང་གི་རྡོས་བཅས་ཀྱི་དྲི་མ་ཟད་པས་འབྱུང་ཆེན་གྱི་སྣང་བ་ཡེ་ཤེས་འོད་གསལ་ཆེན་པོར་དྭངས་པའི་ལམ་མཆོག་མངོན་དུ་བྱེད་པས་ནང་གི་འབྱུང་བ་ཁྲེགས་ཆོད་ཀྱིས་སྦྱངས་པས་རྡུལ་ཕྲན་ཉིད་ལས་དྭངས་པར་མ་ནུས་པའང་། འཇའ་ལུས་འཕོ་བ་ཆེན་པོ་རྡོ་རྗེའི་སྐུར་སྨིན་ནས་གཞན་གྱི་དོན་འཁོར་བ་མ་སྟོངས་ཀྱི་བར་དུ་མཛད་ཅིང་། དེ་ཕྱིར་སྔ་འགྱུར་བ་རང་གི་སྡེ་བས་ཡིད་དཔྱོད་ཀྱི་ལྟ་སྒོམ་སྤྱོད་འབྲས་བཞི་པོ་ཀུན་དང་ཁྱད་ཞུགས་པའི་མཚན་ཉིད་ལེགས་པར་ཕྱེ་བ་མན་ངག་གི་དམ་པ་ཡིན་ནོ། །དེ་ལྟར་མོད་ཀྱི་བདག་ཏུ་འཛིན་པ་གློ་བུར་གྱི་རྐྱེན་ལས་བྱུང་བ་ཡིན་པས། འདི་ཉིད་ཆོས་དབྱིངས་དག་པའི་ཀློད་དུ་མ་ནུབ་པར་དུ་གློ་བུར་རྐྱེན་གྱིས་བསླུ་བའི་རྟོག་ཚོགས་ཞེས། ཚོགས་དྲུག་ལས་བྱུང་བའི་རྣམ་རྟོག་ལུ་གུ་རྒྱུད་དུ་ཤར་བའི་ཆོས་སྣ་ཚོགས་ཀྱི་དབང་གིས། ཐ་མར་རང་ལུགས་སྲིད་པའི་བདག་པོའི་སེམས་ཉིད་བདག་མེད་ལ་བདག་ཏུ་བཟུང་ཞིང་། སྣང་བ་གཞན་མེད་གཞན་དུ་བཟུང་བས། དང་པོའི་ལུས་ཅན་རྣམས་ལ་སྒྲིབ་པའི་རྒྱུར་འགྱུར་བའི་ཕྱིར་རོ། །ཞི་གནས་དང་ལྷག་མཐོང་གཉིས་ཀ་ངོ་བོ་གཅིག་པ་དང་། སོ་སོ་བའི་འཁྲིད་ཚུལ་རྣམ་པ་གཉིས་ཡོད་པ་ལས། དང་པོའི་ཞི་གནས་ཀྱི་ཕྱོགས་ལ་གནས་ཆའི་བསམ་གཏན་དང་གསལ་ཆའི་ཤེས་རབ་གཉིས་པོ་ཞི་ལྷག་ཟུང་དུ་འབྲེལ་བ་ལས། གཉིས་པ་མིན་པའི་མཐའ་དང་བྲལ་བའི་དོན་ལ་བཞག་དགོས་པའོ། །གཉིས་པའི་ཕྱོགས་ལའང་དབྱེ་བ་གཉིས་སུ་གྲུབ་པ་སྟེ། ཤེས་རབ་ལས་བྱུང་བ་དང་། གདམས་ངག་ལས་བྱུང་ངོ། ཞེས་པའི་དོན་ནི་ཤེས་རབ་ལས་བྱུང་བ་སྒྲའི་རྗེས་སུ་མཐུན་པ་ལྟར་ཐོས་པའི་དོན་ལ་རྩེ་གཅིག་ཏུ་ཞི་བ་སྟེ། རྣམ་རྟོག་གི་མི་བསྐྱོད་པ་དང་། དེ་ལས་ཀྱང་བལྟ་བྱ་ལྟ་བྱེད་སོགས། གཉིས་འཛིན་དང་བྲལ་བའི་དོན་རྟོགས་པས་ལྷག་མཐོང་གི་མཚན་ཉིད་རྣམ་པར་དག་པ་ཉིད་དོ། །མན་ངག་ལས་བྱུང་བ་ནི་དོན་གྱི་རྗེས་སུ་འགྲོ་བའི་ཕྱིར། སེམས་ནི་རྟོག་པ་དང་བྲལ་བཞིན་གཡོ་བ་མེད་པ་ནི་ཞི་གནས་ཡིན་ལ། དེའི་རང་བཞིན་སྨྲ་བསམ་བརྗོད་མེད་དུ་ཤེས་པ་ལྷག་མཐོང་སྟེ། དེ་ཡང་མདོར་བསྡུ་ན་རབ་ཀྱིས་ངན་པའི་རྟོགས་ཚོགས་ཆོས་སྐུར་ལྷོངས་ཤིང་། བཟང་ངན་མཉམ་པ་ཉིད་དུ་རྟོགས་ན་སྤང་བྱེད་ཀྱི་གཉེན་པོ་བརྟེན་མི་དགོས་ལ། འབྲིང་གིས་གནས་ལུགས་ཀྱི་ངང་དུ་རྟོག་ཚོགས་གང་ཤར་དྭངས་ཤིང་ཞི་ལྷག་ཟུང་འབྲེལ་གྱི་ལམ་ལ་གོམས་པས་བཟང་ངན་གྱི་རྟོག་པ་མཐའ་དག་དབྱིངས་སུ་ནུབ་ནས་གཉིས་སུ་འཛིན་པ་དང་བྲལ་བའོ། །ཐ་མས་ཐོག་མར་ཞི་གནས་འབའ་ཞིག་བཙལ་ནས་སེམས་མི་གཡོ་བའི་ཐབས་ལ་བརྩོན་པ་གལ་ཆེ་ཞིང་། གང་དམིགས་བརྟན་པ་ཐོབ་ནས་ལྷག་མཐོང་གི་ཡེ་ཤེས་སོ་སོར་རྟོགས་པའི་ཤེས་རབ་ལ་གོམས་བར་གྱུར་ན། གནས་ལུགས་ཀྱི་དོན་ཇི་བཞིན་པ་རྟོགས་ཚེ། མཐར་གྱི་གསེར་གླིང་དུ་ཕྱིན་པས་ས་རྡོ་བཙལ་ཡང་མི་རྙེད་པ་བཞིན་དུ་སེམས་དང་སེམས་བྱུང་གི་རྟོག་པ་གང་སྐྱེས་ཀྱང་། སྣང་སེམས་གཉིས་དབྱེར་མེད་པའི་དོན་རྟོགས་ནས་གཞི་གྲོལ་ཆེན་པོར་བལྟ་བྱ་ལྟ་བྱེད་མེད་པའི་རྟོགས་པ་འཆར་རོ། །ཐབས་ཀྱི་མཆོག་ཏུ་རྟོག་པ་བཟང་ངན་གང་ཤར་ཡང་དགག་པར་མི་བྱ་ཞིང་བསྒྲུབ་པར་བྱ་བ་ཡང་མེད་ཅིང་། རྗེས་སུ་མི་འབྲང་ཞིང་ངང་ལས་མ་གཡོས་འཕོ་འགྱུར་མེད་ན། ལྷའི་མིག་དང་སྤྱན་དང་མངོན་པར་ཤེས་པ་དྲུག་སོགས་དབང་པོ་དྭངས་པའི་ཡོན་ཏན་མཐའ་དག་འཐོབ་ཅིང་། རྟོག་པ་གང་སྐྱེས་ཡུལ་ལྔའི་རྗེས་སུ་འབྲང་ཞིང་ཆགས་སྡང་དང་འབྲེལ་ན་ཐ་མལ་ཏེ། མེ་ལོང་ལྟ་བུར་དྭངས་པའི་གསལ་སྒྲིབ་མེད་པའི་ཤེས་པ་ལ། སྣང་ཡུལ་གཟུགས་སྒྲ་དྲི་རོ་རེག་བྱ་སོགས་མ་འགག་པར། རྒྱ་མཚོར་གཟའ་སྐར་ཤར་བ་བཞིན་དུ་བཀྲ་ཡང་རྣམ་པའི་བློ་ཡིས་ཞེས་ཀུན་ལ་ཆེད་དུ་འཛིན་པས་གོས་པར་མ་གྱུར་ན། གཟུང་བའི་ཡུལ་དང་འཛིན་སེམས་གཉིས་འབྲེལ་པ་ཆད་པས་ན། སོ་སོ་རང་རིག་རྣམ་པར་མི་རྟོག་པའི་ལྟ་བའི་ཡང་རྩེ་བཅུ་དྲུག་ཡེ་ཤེས་བླ་མའི་ས་ལ་དུས་ད་ལྟ་ནས་ཕྱིན་པའོ། །མདོར་དྲིལ་ན་རྫོགས་པ་ཆེན་པོའི་ལམ་ལྔ་ནི། དབྱིངས་ཀྱི་ལམ་ནི་ཆོས་ཐམས་ཅད་ཀྱི་ཆོས་ཉིད་འགྱུར་བ་མེད་པ་གཅིག་པུ་དང་། རིག་པའི་ལམ་ནི་ཆོས་རྣམས་རབ་ཏུ་འབྱེད་པའི་ཤེས་རབ་ཁྱད་པར་ཅན་དང་། འོད་གསལ་གྱི་ལམ་ནི་ཐོད་རྒལ་ཏེ། དབྱིངས་རྣམ་དག་གི་སྒྲོན་མ། རིག་པ་རྡོ་རྗེ་ལུ་གུ་རྒྱུད་ཀྱི་སྒྲོན་མ་སྟེ་རྣམ་པ་གཉིས་སོ། །ཁྲེགས་ཆོད་ལམ་ནི་རྣམ་རྟོག་གང་ཤར་བ་དང་གྲོལ་བ་དུས་མཉམ་སྟེ། ཆུ་དང་རླབས་བཞིན་ནོ། །ཐོད་རྒལ་གྱི་ལམ་ནི་ཕྱི་དབྱིངས་ནམ་མཁའ་སྟོང་པ་དང་། ནང་དབྱིངས་སེམས་ཀྱི་ནམ་མཁའ་རྟག་ཆད་དང་བྲལ་བ་ཡིན་ལ། རིག་པ་ནི་ཤེས་རབ་རང་བྱུང་གི་རྩལ་ལས་ལུ་གུ་རྒྱུད་འཆར་བ་དེ་ཡིན་ནོ། །འདི་དག་རྣམས་ནི་རང་བཞིན་རྫོགས་པ་ཆེན་པོའི་ཐུན་མོང་མ་ཡིན་པའི་ལམ་ལྔ་མཁྱེན་པར་འཚལ་ནས། མ་རིག་གྲོགས་ཞེས་གཏི་མུག་རྨོངས་པའི་སྐྱོན་དང་། འཁྲུལ་སྣང་སྣ་ཚོགས་ཀྱི་རྣམ་པར་གཡེང་བའི་བསླུ་བྲིད་ཀྱིས་མཐའ་མེད་འཁོར་བའི་འབྲོག་དགོན་པ་འཇིགས་སུ་རུང་བར། ལས་མི་དགེ་བ་བཅུ་དང་ཉོན་མོངས་བ་དུག་ལྔ་དུག་གསུམ་གྱི་སྐྱོན་ཆེན་མང་པོ་འདུ་བར་བྱེད་པའི་གཟུང་འཛིན་ལྕགས་སྒྲོག་གིས། དེ་རིང་ཕན་ཆད་ནས་ཐོག་མ་མེད་པའི་བར་དུ་བཅིངས་པ་ལ་སྐྱོ་བའི་སེམས་དང་། གཞན་ཕན་གྱི་ལྷག་བསམ་མཆོག་ཏུ་བསྐྱེད་ནས། ཞི་བ་དམ་པའི་གྲོང་ཁྱེར་དུ་ཞེས་མྱ་ངན་ལས་འདས་པའི་ལམ་མཆོག་ཏུ་གྱུར་པ་རྫོགས་པ་ཆེན་པོ་ལ་བསྙེན་པར་མཛོད། ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་གཉིས་པའི་བསྡུས་འགྲེལ་ལོ། ལེའུ་བཅུ་གསུམ་པ།༈ དེ་ལྟར་གཞི་ལམ་གྱི་མཚན་ཉིད་ལེགས་པར་རྟོགས་པར་བྱས་ནས། མཐར་ཕྱིན་པར་གྱུར་ཚེ་འབྲས་བུ་སྐུ་དང་ཡེ་ཤེས་ཇི་ལྟར་ཐོབ་ཚུལ་ནི། གཞན་གང་ལས་ཀྱང་མ་བྱུང་སྟེ་རང་གི་སེམས་ཀུན་གཞིའི་རྙོགས་པ་དྭངས་ཤིང་། སེམས་ཞེས་མ་རིག་གཏི་མུག་གི་སེམས་དང་། གཞི་དེ་ལས་བྱུང་བའི་སེམས་བྱུང་ངམ་རྣམ་རྟོག་ནི་འཁོར་བའི་རྒྱུ་རྐྱེན་ལས་མ་འདས་པའི་ཕྱིར་དེ་དག་ཆོས་ཀྱི་དབྱིངས་སུ་ཞི་བ་ཡིན་ལ་གང་དུ་ངེས་མེད་ཀྱི་གཞི་ལས་གཞི་སྣང་ཅུང་ཟད་གཡོས་པའི་སྐྱོན་གྱིས་ང་བདག་ཏུ་འཛིན་པའི་བག་ཆགས་ཀྱིས་སྦགས་པའི་ཤེས་བྱའི་ཆ་འཛིན་པར་བྱེད་པའི་ཚོགས་བརྒྱད་ཉེར་ལེན་གྱི་སྤྲིན་དང་འདྲ་བ་རྣམས། རང་བཞིན་རྣམ་པར་དག་པའི་དབྱིངས་སུ་ཡེ་ཤེས་ཀྱི་སྙིང་པོའི་ཉི་མ་ནུབ་པ་མེད་པ་ནི། སྒྲིབ་པ་གང་ཡང་མེད་པ་རང་བཞིན་ཀྱི་འོད་དུ་གསལ་བའི་གློ་བུར་གྱི་དྲི་མ་མུན་པ་དང་འདྲ་བའི་ཆ་དང་བཅས་པ་སྤང་པ་ནི། ངོ་བོ་ཡེ་ནས་དག་པ་དང་། གློ་བུར་གྱི་དྲི་མ་དག་པ་སྟེ། དག་པ་གཉིས་ལྡན་ནི་བྱང་ཆུབ་མཆོག་གི་དངོས་པོར་གྲུབ་པ་ལ་གདོད་མའི་སངས་རྒྱས་ཞེས་སྨོན་པ་མེད་པའི་དབྱིངས་འགྱུར་བ་མེད་པ་སྟེ་ཉ་རྒྱས་ཟླ་བ་སྤྲོས་པ་ཞེས་འོད་དཀར་ཕྱིར་གསལ་བ་ཅན་ཡང་། སྟོང་གི་ཆ་ལ་འོད་དཀར་དབྱིངས་སུ་ནུབ་པ་ལྟར། རྣམ་པ་ཀུན་ཏུ་མི་རྟོག་ཅིང་ཆོས་ཉིད་ལ་འཕོ་འགྱུར་མེད་ཅིང་དབྱིངས་ཀྱི་རྟག་པ་ཞེས་ནམ་མཁའ་འཕོ་འགྱུར་དང་གཞོམ་གཞིག་བྲལ་བ་ནི་མི་འགྱུར་རྡོ་རྗེའི་སྐུ་ཞེས་འདོད་དོ། །རྣམ་པ་ཀུན་གྱི་མཆོག་ལྡན་ནི། ཤེས་རབ་སྟོང་པ་ཉིད་རྣམ་པར་རྟོག་པ་ཐམས་ཅད་ཞི་བའི་དབྱིངས་ཡིན་ལ། དེ་ནི་སྟོབས་བཅུ་སོགས་སངས་རྒྱས་ཀྱི་ཡོན་ཏན་རྒྱ་མཚོ་ཀུན་མངོན་པར་ཆུབ་ཀྱང་། སྣང་ཆ་ལ་ངོ་བོར་མ་འདྲེས་ཤིང་སྤང་རྟོགས་ཀྱི་ཡོན་ཏན་རྣམས་ཡོངས་སུ་རྫོགས་པའི་ཆ་ནས་གཞལ་བ་མངོན་པར་བྱང་ཆུབ་ཀྱི་སྐུར་བཞག་པའོ། །དེ་ཡང་ཤེས་བྱའི་ཡུལ་ལ་བློའི་འཇུག་པ་ཞི་ཞིང་། ཤེས་བྱེད་ཀྱི་བློ་ལ་ཡང་གཉིས་སུ་འཛིན་པའི་ཀུན་རྫོབ་སྤངས་པ་ཡིན་པས། སོ་སོ་རང་གི་རིག་པ་གཉིས་འཛིན་ལས་གྲོལ་བ་དེ་རྟག་ཆད་ཀྱི་མཐར་མ་ལྷུང་ཞིང་། ཀུན་རྫོབ་ཀྱི་ཆོས་རྣམས་ནང་དབྱིངས་སུ་ཐིམ་པའི་རང་གདངས་ཐིམ་ལ་མ་རྨུགས་པ་ཤིན་ཏུ་ཕྲ་བའི་ཡེ་ཤེས་ནི་ཇི་ལྟ་བ་དོན་དམ་མཁྱེན་པ། ཇི་སྙེད་པ་ཀུན་རྫོབ་གཟིགས་པ་སྟེ། མཁྱེན་ཆ་འགག་པ་མེད་པ་སྐུ་དང་ཡེ་ཤེས་ཀྱི་རྟེན་དུ་གྱུར་པ་ནི་ཤིན་ཏུ་མཉམ་པར་བཞག་པ་སྟེ། འདུ་འཛི་དང་ལེ་ལོའི་དབང་དུ་མ་གྱུར་པའི་མཉམ་རྗེས་རིས་མེད་ཀྱི་རྟོགས་པ་ཐོབ་པ་རྣམས་ཀྱིས་མཐོང་བ་ཡིན་ལ། གང་ལ་ཞི་བ་ཆོས་ཀྱི་སྐུ་ཞེས་བརྗོད་པའི་སོ་སོ་རང་གིས་རིག་པར་བྱ་བ་རྒྱལ་བའི་ཁམས་བདེ་གཤེགས་སྙིང་པོ་ནི། གཅིག་ཅེས་ཚུར་བཅད་རྒྱུ་དང་། དུ་མར་ཞེས་ཕར་བཅད་རྒྱུ་མ་ཡིན་ཞེས། དངོས་པོ་དང་། དངོས་མེད་ལས་ཀྱང་འདས་པ་ནམ་མཁའ་ལྟར་རྣམ་པར་མི་རྟོག་པ་མཚན་མའི་ཆོས་ཀྱིས་གོས་པ་མེད་ཅིང་རྣམ་འགྱུར་དང་སྤྲོས་པ་ཐམས་ཅད་ཞི་བའི་དབྱིངས་དེ་ཉིད། ངག་གིས་བརྗོད་པའི་ཡུལ་ལས་འདས་ཤིང་། དོན་དམ་གྱི་བདེན་པས་བསྡུས་པ་ཡིན་ལ་རྟོག་དཔྱོད་རྣོན་པོ་དང་། ཐ་སྙད་གཏན་ཚིགས་ཀྱིས་ཀྱང་མི་མཚོན་ལ། བློའི་བསྒྱུར་བཀོད་དང་ཐེ་ཚོམ་དང་སྙམ་བྱེད་སོགས་དཔེ་དང་འགལ་བའི་ཕྱིར་ས་བཅུའི་དབང་ཕྱུག་སྟེ་བྱང་ཆུབ་སེམས་དཔའ་ཆེན་པོ་དག་གིས་ཀྱང་སྤྱོད་ཡུལ་མིན་ཞིང་། འདྲེན་པ་ཞེས་སངས་རྒྱས་རྣམས་ལ་མངོན་སུམ་དུ་གྱུར་པའི་གནས། ཟབ་ཞི་སྟེ་རྫོགས་པ་ཆེན་པོའི་ལྟ་བསྒོམ་གཞོན་ནུ་བུམ་པའི་ཁང་བཟང་མཛེས་པའི་ནང་ན་དུས་གསུམ་གྱི་སངས་རྒྱས་རྣམས་ནི་རྟག་པར་བཞུགས་ཀྱང་། རྣམ་པའི་ཆ་ནས་གཉིས་འཛིན་བྲལ་ཕྱིར་གཅིག་གིས་གཅིག་མི་གཟིགས་པ་ལྟར་ཡང་རང་བཞིན་སྤྲོས་བྲལ་གྱི་དབྱིངས་ན་དགོངས་པའི་ཀློང་གཅིག་ཏུ་འཁྱིལ་བ་ཡིན་ཞིང་། མཁྱེན་པའི་ཆ་འགག་པ་མེད་པའི་རང་གདངས་རྙོགས་པ་མེད་པ་ལས། ཐུགས་རྗེའི་རྩལ་ཕྱིར་གསལ་བ་ལོངས་སྤྱོད་རྫོགས་པའི་སྐུ་ཡིན་ཏེ། དེ་ཡང་གནས་དང་དུས་དང་སྟོན་པ་དང་ཆོས་དང་འཁོར་ཏེ་ངེས་པ་ལྔ་ལྡན་སྐུ་དང་ཞིང་ཁམས་ཞེས་པ་ནི། ནམ་མཁའི་གར་ཁྱབ་སངས་རྒྱས་ཀྱི་ཆོས་སྐུ་དང་ལོངས་སྐུའི་ཁྱབ་ཅིང་། སེམས་ཅན་གྱིས་གར་ཁྱབ་སྤྲུལ་སྐུ་དང་ཕྲིན་ལས་ཀྱི་ཁྱབ་པ་ཡིན་ལ། སྐུ་གསུམ་གྱི་རྒྱལ་བ་དེ་རྣམས་མཚན་བཟང་པོ་སོ་གཉིས་དང་། དཔེ་བྱད་བཟང་པོ་བརྒྱད་ཅུ་སོགས་སངས་རྒྱས་ཀྱི་ཡོན་ཏན་རྒྱ་མཚོའི་བདག་ཉིད་ཅན་དུ་བཞུགས་པའོ། །གནས་ནི་ལྷུན་གྲུབ་ལོངས་སྤྱོད་རྫོགས་པ་སྟེ། འོག་མིན་སྟུག་པོ་བཀོད་པའི་ཞིང་ཁམས་ཞེས་མཐའ་དབུས་ལས་འདས་པ། ཡེ་ཤེས་ལྔའི་རང་མདངས་ཀྱི་འོད་དང་འོད་ཟེར་གསལ་འཚེར་འབར་བ་ཡང་། མཁའ་དབྱིངས་དབང་པོའི་མཚོན་ཆ་སྟེ་འཇའ་ཚོན་སྣ་ལྔས་བཀབ་པ་བཞིན་དང་། དེ་ཡང་མནན་ན་ནེམ་ཞིང་བཏེགས་ན་འཕར་བ་ལྟ་བུའི་བློས་གཞལ་དུ་མེད་པའི་ཁང་མཛེས་ཕྱོགས་བཞི་སྒོ་འཕར་རྣམ་པ་བཞི་དང་ལྡན་པ་རྟ་རྐང་རྣམ་པ་བརྒྱད་དང་ལྡན་ཞིང་ཡེ་ཤེས་ལྔའི་རྩིག་པ་ ཕ་གུ་དང་ དྲྭ་ཕྱེད་དང་ མདའ་ཡབ་དང་ པུ་ཤུ་ཅན་གྱི་སྣམ་བུར་འདོད་པའི་ཡོན་ཏན་གྱི་བདག་ཉིད་མིག་ཡངས་མ་སྟེ། མཆོད་པའི་ལྷ་མོ་སྣ་ཚོགས་བདེ་སྟོང་གི་མཆོད་སྤྲིན་རྩེ་ཞིང་དགའ་བའི་རྣམ་འགྱུར་གཡོ་བའི་ཆོ་འཕྲུལ་ཅན་རྣམས་དང་། གཞན་ཡང་རྔ་ཡབ་ འཕན་གདུགས་ རྒྱལ་མཚན་ནོར་བུའི་ཏོག་གིས་མཛེས་པ་ བླ་བྲེ་དང་ ཟར་ཚགས་དང་ གཙང་ཁང་ཕྱུར་བུར་མཛེས་པ་ ཆུ་ཞིང་སྲིད་དུ་མི་མངོན་པར་གང་དུ་བལྟས་པ་སྣང་ཡུལ་དུ་གང་ཡང་གྲངས་ཀྱིས་མི་གཏུགས་ནམ་མཁའི་དབྱིངས་སྣོད་དུ་གྱུར་པ་བཞིན་དུ། རྟེན་གཞི་གཞལ་མེད་ཁང་པ་རེ་རེའི་ནང་། བརྟེན་པའི་གཙོ་བོ་རྒྱལ་བ་རིགས་མཆོག་ལྔའི་གདན་ཁྲི་ནི་འཕྲོག་བྱེད་ནི་སེང་གེ་དང་། གཉིས་འཐུང་གླང་པོ་ཆེ། ཅང་ཤེས་རྟ་ ཟློས་གར་ཅན་རྨ་བྱ་ ཤང་ཤང་ཏེའུ་རྣམས་ནི་སྔོན་གྱི་བྱང་ཆུབ་སེམས་དཔའ་ལམ་ལ་སློབ་པ་རྣམས་ཀྱི་གདན་ཁྲིའི་མཛེས་རྒྱན་བྱེད་པའི་སྨོན་ལམ་བཏབ་པ་ལས་བྱུང་བ་མ་གཏོགས་དུད་འགྲོ་རང་རྒྱུད་པ་མིན་པ་ཤེས་དགོས་སོ། །དེ་ལྟར་རིན་པོ་ཆེ་སྣ་ཚོགས་ཀྱི་ཁྲི་རྒྱན་དང་བཅས་པའི་སྟེང་ན། ཆུ་སྐྱེས་ཞེས་སྣ་ཚོགས་པདྨ་དང་། ཉི་མ་དང་ཟླ་བའི་གདན་སུམ་བརྩེགས་ཀྱི་སྟེང་ན། འདས་མ་འོངས་ད་ལྟ་སྟེ་དུས་གསུམ་གཞི་ལ་རྫོགས་པ་ཀུན་ཏུ་བཟང་པོའི་དུས་ཞེས་འཕོ་འགྱུར་བྲལ་བའི་མཚན་རྫོགས་ཀྱི་སྟོོན་པ་ལྔ་ནི་ རྣམ་པར་སྣང་མཛད་དང་ མེ་བསྐྱོད་རྡོ་རྗེ་དང་ རིན་ཆེན་འབྱུང་ལྡན་དང་ སྣང་བ་མཐའ་ཡས་སམ་འོད་མཚན་སྟོང་འབར་དང་ དོན་ཡོད་གྲུབ་པ་ལྔ་ནི། རང་རང་རིགས་ཀྱི་ཡུམ་དང་བཅས་པ་རྣམས་ནི་ཁ་སྦྱོར་བདུན་གྱི་བདག་ཉིད་ཆེན་པོར་བཞུགས་པ་ཡིན་ལ། སྟོན་པ་རང་ལས་མི་གཞན་པའི་སེམས་དཔའ་དང་སེམས་མའི་འཁོར་རྣམས་དང་སྒོ་བ་བཞི་དངདེ་བཞིན་སོ་སོའི་ཡུམ་དང་བཅས་པའོ། །དེ་ཡང་རང་བཞིན་རྫོགས་པ་ཆེན་པོའི་ཆོས་ཀྱི་འཁོར་ལོ་ནི། སྒྲ་ཚིག་དང་མཚན་མའི་ཡུལ་ལས་འདས་པར་བསྐོར་ཞིང་། གཞལ་ཡས་ཁང་ཆེན་པོའི་སྟེང་ཁང་ཞི་བ་བྱང་ཆུབ་སྙིང་པོའི་གནས་ཞེས་བྱ་བ་ན། དབང་མཛད་ཞི་བའི་ལྷ་ཚོགས་བཞི་བཅུ་རྩ་གཉིས་ལས། དམ་པའི་སྟངས་དཔྱལ་གཉིས་ནི་ཞེས། ཀུན་བཟང་ཡབ་ཡུམ་ཡིན་ལ། དེ་ནི་ཞི་བའི་ལྷ་ཚོགས་ཀྱི་སྤྲུལ་གཞི་སྟེ། ཀུན་ལ་ཞེས་འཁོར་འདས་གཉིས་ཀར་ཁྱབ་པར་བརྡལ་བས་ཆོས་ཀྱི་སྐུ་ཡིན་ལ། འགྲོ་བ་རིགས་དྲུག་སོ་སོའི་གནས་སུ་སྤྲུལ་པ་དེ་དག་གི་དོན་མཛད་པའི་རིག་པའི་སྐྱེས་བུ་བཅོམ་ལྡན་འདས་ཐུབ་དྲུག་ནི་གོང་གི་རྒྱལ་བ་རིགས་ལྔའི་སྤྲུལ་པ་ཤར་བ་ཡིན་ཞིང་། རང་སྣང་ལོངས་སྐུའི་ཞིང་ན་ལྷ་ཚོགས་སུམ་ཅུ་རྩ་བཞི་ཡོད་པ་ལས། གཙོ་བོ་རིགས་ལྔ་ཡབ་ཡུམ་བཅུ་ལ་སེམས་དཔའ་སེམས་མ་བཅུ་དྲུག་དང་། སྒོ་བ་ཡབ་ཡུམ་བརྒྱད་དང་ཉེར་བཞི་པོ་དེ་ནི་འཁོར་གྱི་ཚུལ་དུ་ཡོད་པའོ། །དེ་རྣམས་དོན་ལ་ཕུང་པོ་ལྔ་རྒྱལ་བ་རིག་ལྔ་ཁམས་ལྔ་ཡུམ་ལྔ་དབང་ཡུལ་སྐྱེ་མཆེད་སེམས་དཔའ་སེམས་མ་སྒོ་བཞི་སྒོ་བ་ཡབ་ཡུམ་བརྒྱད་ལ་སོགས་པར་གནས་སུ་དག་པའི་ལྷ་རྣམས་གདན་གསུམ་ཚང་པའི་དཀྱིལ་འཁོར་ཆེན་པོ་ཡིན་ནོ། །འདི་དག་ནི་ཞི་ཁྲོ་སྒྱུ་འཕྲུལ་དྲྭ་བ་དང་། སངས་རྒྱས་མཉམ་སྦྱོར་བླ་ན་མེད་པའི་རྒྱུད་ལས་ལུས་གྲུབ་ཀྱི་དཀྱིལ་འཁོར་ཇི་སྙེད་ཅིག་བསྟན་པ་དང་རྣམ་དག་མཚུངས་བ་ཡིན་ལ། གཞན་ཡས་ཁང་ཆེན་པོའི་འོག་ཁང་ཚོགས་ཆེན་འདུས་པའི་ཕོ་བྲང་ནི། འབར་བའི་གཞལ་ཡས་ཏེ་དྲག་པོའི་གཞལ་ཡས་ཁང་ཕྱི་ནང་རིམ་པ་དགུ་དང་ལྡན་པ་ལ། སྒོ་ཁྱམས་ཡང་དེ་བཞིན་ཡོད་པའི་དགུ་པའི་ཕྱི་མར་རྒྱུའི་རྟ་བབ་སྒོ་བདུན་དང་། འབྲས་བུའི་ཆོས་ཀྱི་མཚོན་བྱེད་རྟ་བབ་སྒོ་སྟེང་ཡོད་པའི་རྒྱུ་འབྲས་གཉིས་ལྡན་ཚུལ་གྱིས། ཕོ་བྲང་དབུས་མའི་ནང་གི་འོག་གཞི་རྡོ་རྗེ་བྲག་ཆེན་དང་པདྨ་སྟོང་བརྡལ་གྱི་གཞི་ལ་ཐབས་ཤེས་ཉི་ཟླ་བརྩེགས་པའི་གདན་ལ། དབང་ཕྱུག་ཁྱོ་ཤུག་ནི་ཞེས་པ་ཡང་། ལྷ་ཆེན་བརྒྱད་ཀླུ་ཆེན་བརྒྱད། གཟའ་ཆེན་བརྒྱད་དེ་དྲེགས་པ་ཕོ་མོ་ཉི་ཤུ་རྩ་བཞིའོ། །ཕོ་རྣམ་ཁ་སྦུབས་དང་། མོ་རྣམས་གན་རྐྱལ་བསྒྱེལ་བའི་སྟེང་དུ་དཔའ་གཏུམ་སྟག་དང་། འཇིགས་བྱེད་སེང་གེ། གདུག་པ་གཟིག་དང་ནི། གཏུམ་པ་དོམ་དང་། སྟོབས་ཆེན་གླང་པོ་དང་། བརྗིད་པའི་མ་ཧེ་དང་། འཛིན་པའི་ཆུ་སྲིན་དང་། ཞེ་སྡང་ལྟོ་འགྲོ་སྟེ། བྱོལ་སོང་གཙོ་བོ་བརྒྱད་པོ་དེ་ཡང་རིག་པ་འཛིན་པའི་ལམ་ལ་སྦྱངས་མཐར་ཤེས་བྱའི་སྒྲིབ་པ་འདག་པའི་ཕྱིར་ལྷ་རྣམས་ཀྱི་གདན་བྱས་ཏེ་དེ་དག་རེ་རེས་ཀྱང་། དྲེགས་པ་ཕོ་མོ་དེ་དག་གི་རྒྱུད་ཀྱི་ཉོན་མོངས་པ་སྦྱང་བའི་ཐབས་སུ་ཡན་ལག་བཞིའི་སྡེར་མོས་བཟུང་ཞིང་མནན་པའི་ཚུལ་བྱས་པ་ནི་གཞུང་གི་དགོངས་དོན་ཡིན་ལ། དེ་ཡང་དྲེགས་པ་ཕོ་མོ་དེ་དག་རྣམས་ཁྲོ་སྡང་གི་སེམས་ཀྱིས་མ་མིན་པར་ཞི་ཞིང་བྱམས་པའི་ཐུགས་ཀྱིས་དེ་དག་གི་ལས་ཉོན་རྒྱུན་གཅོད་པའི་ཕྱིར། དེ་དག་ཅུང་ཟད་ཀྱང་འགུལ་དབང་མེད་པར་བརྫིས་པའི་སྟེང་དུ་བཞུགས་པའོ། །དེ་ལྟར་གདུལ་བྱ་འདུལ་བྱེད་ཆེད་དུ་ཁྲི་གདན་སོགས་ཡོངས་རྫོགས་པའི་སྟེང་དུ། འཁོར་བ་དང་མྱ་ངན་ལས་འདས་པ་ཀུན་གྱི་སྤྱི་དཔལ་དུ་གྱུར་པ་བཅོམ་ལྡན་འདས་སྲིད་ཞིའི་ཁམས་ན་ཆེ་བའི་ཆེ་མཆོག་ཧེ་རུ་ཀ་སྐུ་མདོག་ཨིནྡྲ་ནཱི་ལའི་མདངས་ཞེས་རྣམ་མཁའ་གཡའ་དག་པ་ལྟ་བུ་ལ། ཉི་མ་བྱེ་བའི་འོད་ལས་ཀྱང་ལྷག་པའི་གཟི་བརྗིད་ལྡན་པའི་བདུན་གསུམ་ཉི་ཤུ་རྩ་གཅིག་གི་ཞལ་རྣམས་རབ་ཏུ་འཇིགས་ཤིང་གདང་པ། ཞབས་བརྒྱད་བྱོལ་སོང་གཙོ་བོ་བརྒྱད་ཀྱི་གདན་ལ་འགྱིང་བ། གཡས་གཡོན་ཕྱག་ནི་བཞི་བཅུ་རྩ་གཉིས་ན་བདེ་གཤེགས་ཞི་བའི་ལྷ་ཚོགས་བཞི་བཅུ་རྩ་གཉིས་པོ་ཡབ་རྣམས་གཡས་དང་ཡུམ་རྣམས་གཡོན་དུ་བསྣམས་ཤིང་ངོམ་པའོ། །གནམ་ཞལ་ཡུམ་མཆོག་ཡང་དབུ་དགུ་ཕྱག་བཅོ་བརྒྱད་དེ་རྩ་བའི་ཕྱག་གཉིས་ཀྱིས་རྡོ་རྗེ་དང་དུང་ཁྲག་འཛིན་པ། ཕྱག་ལྷག་མ་གཡས་རྣམས་གནས་ཀྱི་ཀོའུ་རི་བརྒྱད་དང་། གཡོན་པ་རྣམས་ནི་ཡུལ་གྱི་སེང་ཧ་བརྒྱད་མུ་ཁ་ལ་སོགས་མ་མོ་དང་ཕྲ་མེན་རྣམས་བསྣམས་པ། ཡབ་ཡུམ་ཁྲོ་མཁར་ཚུལ་ལམ་ཞེས་པ་ནི་བདུད་རྩི་སྨན་སྒྲུབ་ཀྱི་གཞུང་ལྟར་རང་བྱུང་རྣམ་དག་བདུད་རྩིའི་ཕོ་བྲང་སྟེང་འགྲོ་འདུལ་ཁྲོ་བོའི་དཀྱིལ་འཁོར་དང་། སྐུ་གདུང་འབར་བའི་དཀྱིལ་འཁོར་དང་། མཁའ་མཉམ་ཀློང་གི་དཀྱིལ་འཁོར་དང་། འཆི་མེད་རྡོ་རྗེའི་དཀྱིལ་འཁོར་ཏེ། དཀྱིལ་འཁོར་ལྔ་དང་སྦྱོར་བ་བརྒྱད་སྨན་སྒྲུབ་གཞུང་ཤེས་པར་བྱེད་པ་ཁོ་ནའོ། །ཡང་ན་བཀའ་བརྒྱད་རྣམས་གསུམ་གྱི་གཞུང་བཞིན་ཡབ་ཡུམ་བདེ་སྟོང་ཟུང་འཇུག་གི་ཚུལ་དུ་མཉམ་པར་སྦྱོར་ཞིང་། སྲིད་པ་འགྲོ་བ་རིགས་དྲུག་དང་། ཞི་བའི་ལྷ་སྐུ་གསུམ་རྒྱལ་བའི་ཞིང་ཁམས་ཀྱི་ཆོས་ཁམས་མཐའ་ཡས་མ་ལུས་པ་བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས་བཟུང་། དབུ་རྒྱན་གྱི་འཁོར་ལོའི་བར་ལ་རང་བཞིན་གྱིས་རྫོགས་ཞེས་པ་ཡང་། འཁོར་བའི་ཆགས་གནས་དང་མཚུངས་པའི་ཞབས་ཀྱི་གདན་ཁྲིའི་དྲེགས་པ་ཉེར་བཞི་དང་། དུག་ལྔ་དུག་གསུམ་མམ་རྣམ་པར་ཤེས་པ་ཚོགས་བརྒྱད་གནས་སུ་དག་པའི་མཚོན། བྱོལ་སོང་གཙོ་བརྒྱད་ལ་སོགས་པ་རེ་ཞིག་འཁོར་བ་དང་ཆོས་མཚུངས་ཡང་དོན་ལ་དེ་ལྟར་མ་ཡིན་པས་ཁྱད་ཤེས་པར་བྱས་ནས། སོ་སོར་ཐར་པ་དང་། བྱང་ཆུབ་སེམས་དཔའ་དང་། རིག་པ་འཛིན་པ་སྔགས་ཀྱི་གཞི་ལམ་འབྲས་བུའི་ཆོས་རྣམས་དབུ་རྒྱན་འཁོར་ལོའི་བར་ལ་རང་བཞིན་གྱིས་རྫོགས་པའོ། །དབང་མཆོག་བཅོམ་ལྡན་འདས་དཔལ་ཆེན་པོ་དང་ནི་ཧེ་རུ་ཀ་དཔལ་དགུ་ནི། བཀའ་བརྒྱད་རྣམ་གསུམ་གྱི་གཞུང་བཞིན་ཕྱོགས་བཞི་མཚམས་བརྒྱད་ཀྱི་དཀྱིལ་འཁོར་བརྒྱད་ལ་འགོད་རྒྱུ་ཡིན་པའོ། །དེ་བཞིན་དུ་གློ་འབུར་བཞི་དང་གྲུ་ཆད་རྣམ་པ་བཞི་ལ། རྣམ་པར་ཤེས་པ་ཚོགས་བརྒྱད་གནས་སུ་དག་པའི་མ་མོ་ཀོའུ་རི་ལ་སོགས་བརྒྱད་དང་། དཀྱིལ་འཁོར་དང་པོ་ཞེས་དཔལ་ཆེན་གཙོ་དགུ་བཞུགས་པའི་ཁྱམས་དང་པོར་སིང་ཧ་མུ་ཁ་ལ་སོགས་ཕྲ་མེན་བརྒྱད་དང་། གཞལ་ཡས་ཁང་གཉིས་པའི་ཁྱམས་ལ། སྤོར་མ་རྣམ་པ་བརྒྱད་དང་། དེ་བཞིན་དུ་གསུམ་པའི་ཁྱམས་ལ་དབང་མོ་ཉི་ཤུ་རྩ་བརྒྱད་རྣམས་ཡིན་ལ། ཁྱམས་གསུམ་པོ་དེ་ལ་ཕྱོགས་བཞིར་སྒོ་བཞི་བཞི་དང་ལྡན་པ་ཀུན་ལ་རང་རང་གི་སྒོ་བ་བཞི་བཞིར་ལྡན་པ་དེ་དག་ཀྱང་། འབར་བའི་རྣམ་རོལ་དང་གར་དགུའི་ཉམས་ཀྱིས་བརྗིད་པ་འདི་དག་ནི་རང་སྣང་ལོངས་སྐུའི་དཀྱིལ་འཁོར་ཡིན་ཏེ། གཞི་སྣང་ལྷུན་གྲུབ་མྱ་ངན་ལས་འདས་པའི་དོན་གྱི་འོག་མིན་ཡིན་ནོ། །གཞལ་ཡས་ཁང་བཞི་པའི་ཁྱམས་ལ་མཁའ་འགྲོ་སུམ་ཅུ་རྩ་གཉིས་དང་། དེ་བཞིན་དུ་ལྔ་པའི་ཁྱམས་ལ་མ་མོ་བདུན་དང་སྲིང་མོ་བཞི་དང་། དྲུག་པའི་ཁྱམས་ལ་གིང་ཆེན་བཅུ་དྲུག་ཚན་གསུམ་སྟེ་བཅོ་བརྒྱད་དང་། བདུན་པར་ཁྲོ་བོ་ཡབ་ཡུམ་བཅུ་ཕྲག་དྲུག་དང་། བརྒྱད་པར་ཕོ་ཉ་ཉིས་བརྒྱ་དང་བཞི་བཅུ་སྟེ་ཡོངས་སུ་ཚང་བ་དང་། དགུ་པའི་ཁྱམས་ལ་མ་མོ་དྲུག་ཅུ་རྩ་བཞི་རྣམས་བཞུགས་པའོ། །དེ་དག་རྣམས་ནི་ལོག་འདྲེན་རཱུ་ཏྲ་གདུལ་བའི་ཕྱིར་དུ་སྤྲུལ་པས་བསྡུས་པའི་ཕྱིར། བགེགས་སོགས་གདུལ་བྱ་སོ་སོའི་རང་ངོར་སྣང་བ་སྟེ། དེ་ཕྱིར་རང་སྣང་གི་འོག་མིན་ལོངས་སྤྱོད་རྫོགས་པའི་དཀྱིལ་འཁོར་མིན་ལ། ཆོས་སྐུའི་ཡེ་ཤེས་ཕྱི་རུ་གསལ་བའི་གདངས་ལས། ཕུན་སུམ་ཚོགས་པ་ལྔ་ལྡན་ནི། གནས་ཕུན་སུམ་ཚོགས་པ་དབུས་སྟུག་པོ་བཀོད་པ། ཤར་མངོན་པར་དགའ་བ། ལྷོར་དཔལ་ལྡན་ ནུབ་བདེ་ཆེན་ བྱང་ལས་རབ་གྲུབ་པའོ། །སྟོན་པ་ཕུན་སུམ་ཚོགས་པ་དཔལ་རིགས་ལྔའི་སངས་རྒྱས་སོ། །འཁོར་ཕུན་སུམ་ཚོགས་པ་ཉིད་ལས་མི་གཞན་པའི་འབྲས་བུའི་སེམས་དཔའ་འོ། །ཆོས་ཕུན་སུམ་ཚོགས་པ་ཐེག་ཆེན་འབའ་ཞིག་གོ། དུས་ཕུན་སུམ་ཚོགས་པ་བསྐལ་པ་ཇི་སྲིད་གནས་ཀྱི་བར་དུའོ། །དེ་དག་ནི་ལོངས་སྐུར་རྫོགས་པའི་གནས་སོ། །གང་དུ་ཉོན་མོངས་པའི་སྒྲིབ་པ་ཤེས་བྱའི་སྒྲིབ་པ་སྟེ། དེ་གཉིས་ཀར་གཏོགས་པའི་སྒྲིབ་པ་མཐའ་དག་སྤངས་པར་གྱུར་པའི་གནས་ནི་སངས་རྒྱས་ཁོ་ནའི་རྒྱུད་ཀྱིས་བསྡུས་པའི་རོལ་པ་ཉིད་ཀྱི་ཕྱིར་གཙོ་འཁོར་མཆོག་དམན་ཐམས་ཅད་དགོངས་པ་མཉམ་པ་ཉིད་ལས་མ་མཆིས་སོ། །གཙོ་འཁོར་ཀུན་གྱི་ཐུགས་ཀྱང་རྣམ་པར་མི་རྟོག་ཅིང་། གསུང་ནི་བརྗོད་པ་དང་བྲལ་ཞིང་། སྐུ་ནི་མཚན་དང་དཔེ་བྱད་ཡོངས་སུ་རྫོགས་ཤིང་། རང་སྣང་ཡེ་ཤེས་མཐོང་བ་དག་པའི་སྤྱན་ཏེ། རང་རིག་སྒྲིབ་གཡོགས་དང་བྲལ་བའི་བལྟ་བྱ་ལྟ་བྱེད་མེད་པའི་དོན་རྟོགས་པའི་ངང་ནས་གཅིག་གིས་གཅིག་གཟིགས་པའི་ཚུལ་ལ་ནམ་ཡང་སྒྲིབ་པ་མེད་དོ། །དུས་གསུམ་གྱི་རྒྱལ་བ་རྣམས་ཀྱི་སྤྱོད་ཡུལ་རྣམ་པར་དག་པ་ནི། དེའི་གོང་ན་གཞན་མེད་པའི་ཕྱིར་དང་། བླ་ན་མེད་པའི་ཕྱིར་དང་། སྲིད་པ་དང་ཞི་བས་མ་བསྡུས་པའི་ཕྱིར་ན། དག་པའི་སེམས་ཅན་ཆེན་པོ་རྣམས་ནི་ས་བཅུའི་སེམས་དཔའ་རྣམས་ཡིན་ཏེ། དེ་རྣམས་ཀྱིས་ཀྱང་མཐོང་བར་ཇི་བཞིན་མི་ནུས་ཤིང་། རྒྱལ་བའི་ཡེ་ཤེས་དང་འགལ་བའི་སྒྲིབ་ཆ་ད་དུང་མ་སྤང་པའི་ཕྱིར། འདས་པ་དང་། མ་འོངས་པ་དང་། ད་ལྟ་སྟེ། དུས་གསུམ་འདི་ཡིན་གྱི་ངེས་པ་ལས་འདས་པའི་འོག་མིན་ཆེན་པོ་ན་བཞུགས་པའི་སངས་རྒྱས་འདས་པའི་དུས་དང་། མ་འོངས་པ་ ད་ལྟར་གྱི་དུས་ཏེ་གསུམ་དང་། མཉམ་པ་ཉིད་ཀྱི་དུས་དང་བཞིའི་བདག་ཉིད་ཅན་དེ་དག་ནི་གཙོ་འཁོར་ངོ་བོར་མཐུན་པའི་རང་སྣང་ངོ་ཞེས་པ་ནི་གཙོ་འཁོར་རྣམས་ངོ་བོ་གཅིག་ལས་གཞན་དུ་མ་གྱུར་པའི་དོན་ནོ། །དེ་ཉིད་ཀྱི་ངང་ལས་སེམས་ཅན་རྣམས་གདུལ་བའི་ཕྱིར་དུ། འདུལ་བྱེད་སྟོན་པ་རྣམ་པ་གསུམ་དུ་བཀོད་པ་ནི། རང་བཞིན་སྤྲུལ་པ་དང་། འགྲོ་བ་རིགས་དྲུག་འདུལ་ཕྱིར་སྤྲུལ་པ་དང་། སྣ་ཚོགས་གང་ལ་གང་འདུལ་དུ་སྤྲུལ་པ་དང་གསུམ་ལས། རང་བཞིན་སྤྲུལ་པ་ནི། རྒྱལ་བ་རྣམས་ཀྱི་ཡེ་ཤེས་ཀྱི་སྣང་བ་འོག་མིན་གྱི་དབྱིངས་སྣང་ལོངས་སྐུ་ནི། རྫོགས་པ་ཆེན་པོའི་ཁྱད་ཆོས་ཡིན་ཏེ། དཔེ་བྱད་ཀྱི་མངོན་རྟོགས་དྭངས་ཤེལ་གྱི་ནང་དུ་འཕྲོས་པ་ལྟ་བུས་གཟུགས་བརྙན་ནི་ཕྱེད་སྤྲུལ་ལོངས་སྐུའི་གནས་སམ། རང་བཞིན་སྤྲུལ་སྐུའི་ཞིང་ཁམས་ཡིན་ཏེ། དེ་ཡང་དབུས་ན་འོག་མིན་སྟུག་པོ་བཀོད་པ། ཤར་མངོན་པར་དགའ་བ། ལྷོ་དཔལ་དང་ལྡན་པ། ནུབ་ན་པདྨ་བརྩེགས་པ། བྱང་ན་ལས་རབ་རྫོགས་གྲུབ་པ་རྣམ་པ་ལྔ་གཟུགས་ཀྱི་རྒྱལ་པོ་སྟེ་རྣམ་པར་སྣང་མཛད་དང་། དེ་བཞིན་དུ་མངོན་དགའ་རྡོ་རྗེ་མི་བསྐྱོད་པ། ལྷོར་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ་ལ་སོགས་སྟོན་མཆོག་ལྔ་ནི། མཚན་དང་དཔེ་བྱེད་ཡོན་ཏན་རྒྱ་མཚོའི་བདག་ཉིད་ཅན་རྣམས་ནི། ཞི་བ་དང་ཁྲོ་བོ་སོགས་ཀྱི་རྣམ་འགྱུར་དཔག་ཏུ་མེད་ཅིང་། ཡེ་ཤེས་རྣམ་པ་ལྔ་པོ་རེ་རེ་ལའང་བཞི་བཞིའི་འཁོར་དང་བཅས་པའི་ཉི་ཤུ་རྩ་ལྔ་སྟེ། ཆོས་དབྱིངས་ཡེ་ཤེས་ལ་མཚོན་ན་མེ་ལོང་ མཉམ་ཉིད། སོར་རྟོགས། བྱ་གྲུབ་ཡེ་ཤེས་ཏེ། བཞི་པོ་འཁོར་གྱི་ཚུལ་དུ་ཡོད་པ་ཇི་བཞིན་གཞན་མ་རྣམས་ཀྱང་དེའི་འགྲེས་ཀྱིས་ཤེས་པར་བྱ་དགོས་ཤིང་། དེ་ཡང་ཆོས་དབྱིངས་ཡེ་ཤེས་གཡོ་བ་མེད་པ་ནི། ནམ་མཁའི་གཟུགས་བཞིན་ཀུན་རྫོབ་ཤེས་པར་བྱ་བའི་མཐའ་ལས་འདས་ཤིང་། མེ་ལོང་ཡེ་ཤེས་གཟུང་བྱ་འཛིན་བྱེད་ཀྱི་རྡུལ་དང་བྲལ་བ་ནི། མངོན་པར་འདུ་བྱ་དང་འདུ་བྱེད་མེད་བཞིན་སྣང་བ་སྣ་ཚོགས་མཆེད་པའི་གཞིར་གྱུར་ཞིང་། མཉམ་ཉིད་ཡེ་ཤེས་ནི་ཆོས་རྣམས་ཀུན་ལ་དངོས་པོ་མཚན་ཉིད་ཀྱི་དམིགས་པ་གང་ཡང་མེད་དེ། སྲིད་དང་ཞི་བ་དབྱེར་མེད་པ་ལྟར་ལགས་ཀྱང་སྤྲོས་པའི་མཚན་མ་ཞི་བའི་དབྱིངས་སུ་ཞུགས་པ་ཡིན་ཞིང་། སོར་རྟོགས་ཡེ་ཤེས་ནི་ཆོས་ཉིད་ཇི་ལྟ་བ་དང་། ཆོས་ཅན་ཤེས་བྱའི་ཇི་སྙེད་རྟོགས་པ་དང་ཐོགས་པ་མེད་པའོ། །བྱ་གྲུབ་ཡེ་ཤེས་ནི་ཕྲིན་ལས་གཞན་ལ་ཕན་པ་ཅན་ཏེེ། ཆགས་ཐོགས་སྤང་པའི་མཛད་པ་ལྷུན་གྱིས་གྲུབ་པར་འབྱུང་ཞིང་། འཁོར་ནི་ས་བཅུ་ཐོབ་པའི་བྱང་ཆུབ་སེམས་དཔའ་འབའ་ཞིག་ཡིན་ལ། སྐུ་ཡི་ཆོས་རྣམས་མཇལ་བའི་སྟེ་རྟོགས་པའི་འོད་ཟེར་བཀྱེ་བས་བྱད་ཀྱི་གྲིབ་མ་མེ་ལོང་ནང་དུ་གསལ་པ་ལྟར། ད་དུང་བདག་དང་སྟོན་པའི་ཁྱད་མཆོག་དམན་གྱི་ཁྱད་པར་མཐོང་ནས། བྱང་ཆུབ་ལ་སྒྲིབ་པ་གཏིང་དཔག་དཀའ་བ་དག་སྦྱངས་ནས། བཅུ་གཅིག་ཀུན་ཏུ་འོད་ཀྱི་ས་ལ་འགྲོ་བའོ། །དུས་ནི་ས་བཅུའི་དབང་ཕྱུག་ཆེན་པོ་རྣམས་ཏེ། ས་བཅུ་ཐོབ་པའི་འཕགས་པ་འཇིག་རྟེན་མགོན་པོ་ངོ་བོ་མེད་པའི་དབྱིངས། ཞེས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་སངས་རྒྱས་ཀུན་གྱི་སྐུ་གསུང་ཐུགས་ཀྱི་ངང་ལས་མ་གཡོས་པས། སྟོན་པ་དང་འཁོར་དགོངས་པ་གཅིག་ཏུ་མ་གྱུར་གྱི་བར་དུ་འཆི་བའི་བདུད་བཅོམ་ཞིང་། འཇིག་རྟེན་གྱི་ཕུན་སུམ་ཚོགས་པ་རྣམས་འབྱོར་བཞིན། སྟོན་པའི་དགོངས་པ་དང་མཉམ་པའི་སླད་དུ་རྟག་ཅིང་། གདུལ་བྱའི་སེམས་ཅན་རྣམས་ཀྱི་གཏི་མུག་ལ་སོགས་ཉོན་མོངས་པ་ལྔ་པོ་གང་གི་གཉེན་པོར། ཆེ་བའི་ཞིང་ཁམས་དང་སྟོན་པར་བསྟན་པའི་སྐུ་ལྔ་རྒྱལ་བ་རིགས་ལྔ་དང་ཆོས་རབ་ལྔ་ཡང་། གདུལ་བྱའི་དུག་ལྔ་འདུལ་བའི་གཉེན་པོའི་ཆོས་ལྔའོ། །དུག་ལྔ་གནས་འགྱུར་ཡེ་ཤེས་རྣམ་པ་ལྔ་པོ་ཡང་། ས་དང་པོ་རབ་ཏུ་དགའ་བ་མཐོང་ལམ་ནས་བཟུང་སྟེ་ས་བཅུའི་རྒྱུན་མཐའི་བར་རྣམས་རིམ་པ་བཞིན་དུ་རྫོགས་ནས་རྫོགས་པའི་བྱང་ཆུབ་སྙིང་པོར་འགྲོ་བ་སྟེ། ཞིང་འདི་ས་བཅུའི་བྱང་ཆུབ་སེམས་དཔའ་ལས་གཞན་མ་རྣམས་ཀྱི་སྤྱོད་པའི་ཡུལ་དུ་སྣང་བ་མིན་ཞིང་། དེ་བཞིན་དུ་སྟོན་པ་ལྔ་པོ་རང་སྣང་གི་ཞིང་ཁམས་ལྟར་སྣང་ལོངས་སྤྱོད་རྫོགས་པར་གྱུར་ནའང་། འཁོར་སོགས་རང་སྣང་གཅིག་གིས་བསྡུས་པའི་ཉིད་ལས་མི་གཞན་པ་མ་ཡིན་ཞིང་། རྒྱུད་གཞན་ནས་བསྡུས་པ་ཡིན་ཕྱིར། ཕྱེད་སྣང་རང་བཞིན་སྤྲུལ་པའི་སྐུའི་ཞིང་ཁམས་ཞེས་ཉི་ཟླ་ཁ་སྦྱོར་ཆེན་པོའི་རྒྱུད་ཀྱིས་བསྟན་པ་བཞིན་ནོ། །ཁྱད་པར་དུ་ཡང་རང་བཞིན་རྫོགས་པ་ཆེན་པོའི་རང་སྣང་ཡེ་ཤེས་དཀྱིལ་འཁོར་དམ་པ་རུ་མཆོག་གཟིགས་བླ་མས་དབང་བཞི་བསྐུར་བ་མ་ཉམས་ལ། ཉིན་དུས་རང་སྣང་མངོན་སུམ་འོད་གསལ་དང་། ཞེས་པ་ སྔ་དྲོ་དང་ཕྱི་དྲོའི་བལྟ་ཚུལ་གཞུང་བཞིན་དང་། མཚན་མོ་གཉིད་ཀྱི་སྐབས་སུ་སྙིང་གའི་འོད་གསལ་ལ་གོམས་པ་རྣམས་ནི། རྫོགས་པ་ཆེན་པོའི་གཞི་ཁྲེགས་ཆོད་དང་། ལམ་ཐོད་རྒལ་གྱི་རྟོགས་པའི་རང་བཞིན་ཚད་དུ་མ་ཕྱིན་ཡང་། ཆོས་ཉིད་འགྱུར་བ་མེད་པའི་བདེན་པ་དང་། བླ་མའི་བྱིན་རླབས་བསླུ་མེད་ཀྱིས་བདེན་མཐུས་ས་ཐོབ་པ་རྣམས་དང་སྐལ་པ་མཚུངས་པར་གྱུར་ནས་གཞི་སྣང་ལྷུན་གྲུབ་ཕྱོགས་བཅུར་སྤྲུལ་པར་ཏེ་རང་བཞིན་སྤྲུལ་པའི་ཞིང་དུ་འགྲོ་བ་ཡིན་ལ། ཁྱད་པར་དུ་རྣམ་གྲོལ་དབུགས་ཆེན་འབྱིན་པའི་ཞིང་ཁམས་ནི། རང་བཞིན་སྤྲུལ་སྐུའི་ཞིང་ཁམས་ཏེ། ཤར་ནས་རིམ་པ་བཞིན་དུ་ཤེལ་དང་། སུ་ཝརྞ་སྟེ། གསེར་དང་། པད་རཱག་དང་། ཨིནྟྲ་ནཱི་ལེའི་གཞལ་མེད་ཁང་། སྒོ་བཞི་ཁྱམས་དང་བཅས་པ། སོ་སོའི་རྟ་བབས་སྣང་བྱེད་ཅེས་ཉི་མའི་མཐོང་ཁུང་བ་ལང་གི་མིག་ལྟས་མཛེས་པར་བྱས་པའི་ཟུར་བཞིར། མུ་ཏིག་གི་མཆོད་རྟེན་དང་། དྲིལ་བུ་དང་། གཡེར་ཁའི་སྦྲེལ་བའི་དཔྱང་ཐག་རླུང་གིས་བསྐྱོད་པ་འདྲ་ཞིང་། རྣམ་ཐར་གསུམ་ལྡན་ཞེས་སྟོང་པ་ཉིད་དང་། མཚན་མ་མེད་པ་ སྨོན་པ་མེད་པ་སྟེ། ཆོས་ཀྱི་དབྱིངས་ཀྱི་སྒྲ་དར་དིར་སྒྲོགས་ཞིང་། ཕྱོགས་བཞིར་སྤོས་སྤྲིན་གཡོ་བའི་བ་དན་བཞི་དང་། ཕྱི་རིམ་འཁོར་ཡུག་ཏུ་ཡན་ལག་བརྒྱད་དང་ལྡན་པའི་རྫིང་བུའི་འགྲམ་ན། ཤིང་ཏ་ལའི་ལྗོན་པ་རིན་པོ་ཆེའི་དྲྭ་བ་ཕྱེད་པའི་འཕྱང་འཕྲུལ་ཅན་དང་། བྱའི་ཚོགས་ཀྱང་འདི་ལྷར་ཤང་ཤང་ཏེའུ་རྨ་བྱ། ཀ་ཏ་རི་ ནེ་ཙོ་མི་སྐད་འབྱིན་པ་དང་། ངང་པ་གཞོན་ནུ་ རི་སྐེགས་དང་། ཟེར་མོ་ སྤབ་དང། ཀཾ་ཀ་རི་ལྷའི་བྱ་དྲིལ་བུའི་སྒྲ་ཅན། ཁུ་བྱུག་དང་། གསེར་གྱི་རྡོ་རྗེའི་གཟུགས་ཅན། ཀྲི་ཏི་པ་ གཡུ་དང་། བྱུ་རུ་དང་ ཨིནྟྲ་ནཱི་ལ་དང་ དུང་ལྟར་ཁ་དོག་ཕྱེད་པའི་བྱ་སྣ་ཚོགས་ཀྱིས་སྐད་སྙན་སྒྲོགས་ཅིང་། མགྲིན་པའི་ནང་ནས་རྒྱུད་མངས་ལྟ་བུ་ཀུན་དུ་འཁྲོལ་ཞིང་རྣ་བར་བདུད་རྩི་འབྱིན་པ། དེ་ན་བཞུགས་པའི་བྱང་ཆུབ་སེམས་དཔའ་རྣམས་ནི། ཉོན་མོངས་པའི་གནོད་པ་ཞི་བར་ནུས་པའི་ཆུ་ཀླུང་ལ་སྤྱད་པ་ཙམ་གྱིས། འདུ་བའི་ནད་མི་འབྱུང་ཞིང་། ཡིད་ལ་ཅི་བསམ་པ་དྲན་པའི་མོད་ལ་ཐོགས་པ་མེད་པར་འབྱུང་ཞིང་། དེ་ཡང་སུམ་ཅུ་རྩ་གསུམ་གྱི་ལྷ་དང་ལོངས་སྤྱོད་མཉམ་ལ། ཕྱི་རིམ་ཀུན་ཏུ་རིན་ཆེན་སྣ་བདུན་གྱི་ཕ་གུ་ཅན་ལེགས་ཤིང་ཞིང་མཆོག་དེ་ན་རིགས་བཞིའི་སྟོན་པ་ཡིས་ཉིན་མཚན་དུས་བཞིར་ཆོས་ཀྱི་སྒྲ་སྒྲོགས་པའི་རྒྱུན་མི་འཆད་ཅིང་དེ་དག་ཀུན་གྱི་བར་སྣང་གི་དབྱིངས་ན་ཧེ་རུ་ཀ་དཔལ་གྱི་ཞིང་ཁམས་ཞེས་བྱ་བ་ཡོད་ཅིང་། དེ་ལ་གསར་མའི་རྒྱུད་ཕལ་ཆེར་ན་འོག་མིན་རྣམ་པར་སྣང་མཛད་གྱི་དུར་ཁྲོད་ཅེས་ཀྱང་བཤད་ལ། རྙིང་མའི་རིང་ལུགས་ལྟར་ན། དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ན་སྟོན་པ་གཞོན་ནུ་སྟོབས་ལྡན་ཞེས་བྱ་བའི་བཅོམ་ལྡན་འདས་ལ། ལག་ན་རྡོ་རྗེ་ལ་སོགས་པའི་དཔའ་བོ་དང་མཁའ་འགྲོའི་སྤྲིན་ཕུང་འཕྲོ་བའི་དབུས་ཉིད་ན་བཞུགས་བཞིན་འབྲས་བུ་བླ་ན་མེད་པའི་ཆོས་ཀྱི་འཁོར་ལོ་བསྐོར་ཞིང་བཞུགས་པ། པདྨ་ལས་སྐྱེས་པའི་རྒྱལ་སྲས་དཔག་ཏུ་མེད་པ་དེ་དག་ཀུན་ཀྱང་ལྷ་དང་། ལྷ་མོ་དང་། ཁྱེའུ་དང་། བུ་མོའི་རྣམ་པ། དྲང་སྲོང་གྲུབ་པ་ཅན་རྣམས་ནི། རྣམ་པར་རྟོག་པ་མེད་ཅིང་སེམས་གསུམ་མེད་ལ། ཡིད་དྲུག་དང་ཉོན་མོངས་པ་དྲུག་ཀྱང་མེད་དེ། མ་རིག་པའང་མེད་ཅིང་རྐྱེན་བཞི་ཡོད་པ་མ་ཡིན། དེ་དང་མཚུངས་པར་ལྡན་པ་རྣམས་ཀྱང་མེད་དེ། དེ་ཡང་སྟོན་པ་རྡོ་རྗེ་འཆང་ཆེན་པོ་གང་གི་བྱིན་རླབས་ལས་རང་བཞིན་ཉིད་དུ་བཀོད་པ་ཡིན་ཕྱིར། དེའི་རང་བཞིན་ནི་སྤྲུལ་པའི་ཞིང་ཞེས་པ་ནི་སྟོན་པ་རྡོ་རྗེ་འཆང་གི་རྣམ་པར་འཕྲུལ་པ་ལས་བྱུང་བ་རྒྱལ་སྲས་སར་གནས་རྣམས་ལ་གྲགས་ཤིང་། དེ་ཡང་རང་བཞིན་རྫོགས་པ་ཆེན་པོའི་གསང་ལམ་དུ་གང་ལས་བཤད་ན། རིག་པ་རང་ཤར་ཆེན་པོའི་རྒྱུད་ལས་བསྟན་པ་ལགས་ཤིང་། གཞན་དུ་ན་བདེ་ཆེན་མཁའ་ལ་སྤྱོད་པ་དང་། ས་སྤྱོད་ཅེས་སུ་གྲགས་པ་དོན་གྱི་འོད་གསལ་ཡིན་པ་ལ། དབང་ཐོབ་ལྷན་ཅིག་སྐྱེས་མའི་ཌཱཀྐི་མ་རྣམས་དང་། ཡུལ་ཆེན་ཉེར་བཞིར་སྐྱེས་ཤིང་སྤྱོད་པའི་ཞིང་སྐྱེས་མ་ལ་སོགས་དཔའ་བོ་དང་རྣལ་འབྱོར་མའི་ཚོགས་རྣམས་དང་སྐལ་པ་མཉམ་པའི་རིག་འཛིན་གྱི་གྲལ་གང་དུ་ལམ་གྱི་འཕྲོ་སྦྱང་ཕྱིར། རིག་པ་འཛིན་པའི་རྡོ་རྗེའི་བླ་མ་ཞེས་གསང་སྔགས་རྡོ་རྗེ་ཐེག་པའི་དོན་སྟོན་པར་བྱེད་པའི་བླ་མ་རྣམས་ནི་རབ་ཏུ་བཞུགས་ནས་སྔགས་ཀྱི་ལྟ་བ་དང་། སྤྱོད་པ་རླབས་པོ་ཆེ་ལ་སྤྱོད་པ་ཡིན་ལ། འདི་དག་རང་སྣང་དགེ་བའི་ས་བོན་རྣམ་པར་དག་པ་དང་། བསྐྱེད་རིམ་དང་རྫོགས་རིམ་ཟབ་མོའི་བརྟུལ་ཞུགས་མཐར་ཕྱིན་པའི་དོན་འབྲས་ནི། གསང་སྔགས་གྲུབ་པ་རྣམས་ལ་སྣང་བ་ལས་རྟོག་འདོད་ཅན་ཞེས་རང་འདོད་ཁོ་ནའི་ཕྱིན་ཏུ་ཡོད་པའི་ཕྱོགས་དང་རིས་ཆད་ཅན་དུ་བསམ་པར་མི་བྱའོ། །དེ་ཉིད་ངང་ལས་རང་སྣང་ལོངས་སྤྱོད་རྫོགས་པའི་སངས་རྒྱས་རྣམས་ཀྱི་ཡི་གེའི་སྤྲིན་གྱི་འོད་ཟེར་འགྲོ་བ་རིགས་དྲུག་གི་གནས་སུ། སྦྱང་གཞི་བདེ་གཤེགས་སྙིང་པོ་ལ། སྦྱང་བྱ་ཉོན་མོངས་པ་དྲུག་གི་ས་བོན་བག་ཆགས་དང་བཅས་པ་སྦྱང་ཕྱིར། རྒྱལ་བ་རྣམས་ཀྱི་ཐུགས་རྗེ་འོད་ཟེར་རབ་ཏུ་འཕྲོས་པས། མངོན་རྟོགས་ནི་འཇིག་རྟེན་འདུལ་བྱེད་སྤྲུལ་པའི་སྐུ་མཆོག་ནི་གནས་རིགས་དྲུག་གི་གདུལ་བྱའི་འགྲོ་བ་རྣམས་ཀྱི་སྣང་བ་ལ། རང་རང་མིང་གི་མངོན་བརྗོད་ནི། ལྷ་དང་། མི་དང་། ལྷ་མ་ཡིན་དང་། དུད་འགྲོ་དང་། ཡི་དྭགས་དང་། དམྱལ་བ་སྟེ། འགྲོ་བ་རིགས་དྲུག་པོའི་རྗེས་སུ་འགྲོ་བའི་འདུལ་བྱེད་ཀྱི་གཉེན་པོ་རིག་པའི་སྐྱེས་བུ་ཐུབ་པ་དྲུག་པོ་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་འཇིག་རྟེན་གྱི་ཁམས་སྟོང་ཆེན་ཇི་སྙེད་དང་མཉམ་པར་རབ་ཏུ་སྤྲུལ་ནས། གདུལ་བ་བཞིའི་འགྲོ་བ་བསམ་གྱིས་མི་ཁྱབ་པའི་དོན་མཛད་ཅིང་། དེ་ནས་ང་བསོད་ནམས་ཆེན་པོས་འདུལ་བ་ནི། སྐུའི་མཛད་པ་ཆེན་པོ་བཅུ་གཉིས་ཡིན་ལ། གསུང་གི་མཛད་པ་ནི། ཐེག་པ་གསུམ་མམ་གཅིག་ནི་རྫོགས་པ་ཆེན་པའོ། །དེ་དག་གང་ཡང་འདུ་ཤེས་ཀྱི་རྗེས་སུ་འགྲོ་ཞིང་སེམས་ཅན་རྣམས་ཀྱི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་དགོངས་ཏེ་གསུངས་པ་ལ། ཆོས་ཀྱི་སྒོ་འཕར་རམ། སྒོ་མོ་བརྒྱད་ཁྲི་བཞི་སྟོང་གི་གྲངས་སུ་ངེས་པ་དང་། མ་ངེས་གསུངས་པ་ལྟར་སྣང་ཡང་། སྒྲ་ཚིག་རང་མཚན་པ་མ་ཡིན་ཞིང་། གདུལ་བྱའི་སེམས་ཅན་རྣམས་ཀྱི་ཁམས་ལ་རྒྱལ་བ་རྣམས་ཀྱི་ཐུགས་རྗེ་དང་། བྱིན་རླབས་ཀྱི་མཐུས་རྣམ་པར་རིག་པ་ཉིད་དང་མཐུན་པར་ཤར་བའོ། །ཐུགས་ཀྱི་གདུལ་བ་ནི། འདས་མ་འོངས་ད་ལྟ་དུས་གསུམ་ཆགས་ཐོག་མེད་ཅིང་གཟིགས་པ་ཡིན་ལ། དུས་ཀྱང་འདི་ཙམ་ཞེས་སོ་སོར་མི་རྟོག་ཅིང་དུས་མེད་དུས་ཞེས་ངོས་འཛིན་བྲལ་བའོ། །རང་བཞིན་གདོད་མའི་གནས་སྐབས་ནི། ཀུན་ཏུ་བཟང་པོའི་དུས་ལས་གཞན་ཞིག་མི་མངའ་བ་དང་། དེ་ཡང་གཞན་གྱི་སེམས་རྒྱུད་མཁྱེན་པ་དང་། དེ་བཞིན་དུ་རྫུ་འཕྲུལ་ཆེན་པོའི་སྤྱན་དང་། སྙན་ལ་སོགས་པ་མངོན་པར་ཤེས་པ་དྲུག་པོ་དུས་ལས་ཡོལ་བ་མེད་པའོ། །ཕྲིན་ལས་ཀྱིས་འདུལ་བ་ནི། གང་ལ་གང་འདུལ་སྐུ་དཔག་ཏུ་མེད་པ་དང་། ཞིང་དཔག་ཏུ་མེད་པ་དང་། ཀུན་ཏུ་ཐུགས་ཀྱིས་མི་ཁྱབ་པ་མེད་པ་དང་། ཀུན་ཏུ་ཞལ་ཞེས་མདུན་རྒྱབ་དང་གཡས་གཡོན་སོགས་ཀྱི་འཛིན་པ་དག་པའི་ཕྱིར་དང་། ཀུན་ཏུ་གསུང་གི་གསང་བ་བསམ་གྱིས་མི་ཁྱབ་པའི་ཚིག་གི་དངོས་འཛིན་སོགས་ལས་འདས་པའི་ཕྱིར་དང་། སྐུ་གསུང་ཐུགས་ཀྱི་འགྲོ་བ་རྣམས་ལ་དངོས་སུ་དོན་མཛད་པ་ཡིན་ལ། ཕྲིན་ལས་ཀྱི་དངོས་དང་བརྒྱུད་དེ་ཀུན་ནས་ཀུན་ཏུ་མཛད་པ་དང་། དེ་ལྟར་དུ་རྒྱལ་བ་ཀུན་གྱི་ཐུགས་ཀྱི་དབྱིངས་ལས་སྤྲུལ་པའི་སྐུ་མཆོག་རྣམས་ཀྱི་ནི། ཆོས་ཉིད་ལ་ལྟོས་པའི་ཇི་ལྟ་བའི་ཡེ་ཤེས་དང་། ཆོས་ཅན་ལ་ལྟོས་པའི་ཇི་སྙེད་མཁྱེན་པའི་ཡེ་ཤེས་གཉིས་ཀྱིས་གདུལ་བྱའི་རྒྱུད་འགྲོལ་ཞིང་ཉེ་བར་ཞི་བ་དང་། མ་འདྲེས་པ་ལ་སོགས་པའི་ཆོས་ཚུལ་དཔག་མེད་སྟོན་ཅིང་དེ་ལས་ཡང་སྤྲུལ་གྱི་རྣམ་པ་བརྗོད་ཀྱི་མི་ལང་བར་འཕྲོས་ཤིང་། འགྲོ་བ་རིགས་དྲུག་གི་གནས་རིགས་དེ་སྙེད་དུ། ལྷ་རྣམས་གདུལ་བར་བྱེད་པའི་ཆེད་དུ། ཚངས་པ་དང་། དབང་པོ་དང་། བདེ་འབྱུང་ལ་སོགས་པ་དང་། མི་ལ་ཉན་ཐོས་དང་། རང་རྒྱལ་དང་། བྱང་སེམས་དང། འཁོར་ལོས་སྒྱུར་དང་། དེ་བཞིན་དུ་ལྷ་མ་ཡིན་ལ་ཐག་བཟང་རིས་དང་། བྱ་ལ་ཡང་ཤིང་རྟ་མོ་དང་། རི་དྭགས་ལ་ཕན་པའི་ཕྱིར་དུ། སེང་གེའི་རྒྱལ་པོ་ཡི་དམ་བརྟན་པ་སོགས་མདོར་ན་དམྱལ་བ་ཡི་དྭགས་གང་དང་གང་ཡང་འདུལ་བྱེད་དེ་དང་། དེ་ལྟ་བུའི་གཟུགས་སུ་སྤྲུལ་ནས་སེམས་ཅན་གྱི་དོན་ལ་ནམ་ཡང་གཡེལ་བ་མེད་བཞིན་འདི་ནི་འཇིག་རྟེན་དྲུག་ཅེས་འགྲོ་བ་རིགས་དྲུག་གི་ཞིང་ཁམས་རྣམས་སུ་ ལས་དང་བག་ཆགས་དང་། དགེ་སྡུག་གི་རྒྱུ་འབྲས་ཀྱི་གནས་རིགས་ཀྱང་བདེ་བ་ལྟར་སྣང་བ་དང་། སྡུག་བསྔལ་ལྟར་སྣང་བ་ནི། མཐོ་བ་ལྷ་གནས་གསུམ་དང་། དམན་པ་ངན་སོང་གསུམ་ལྟར་སྣང་བའི་དོན་ལ། རང་སྣང་དང་མཐུན་པའི་སྟོན་པ་ནི། ཐུབ་པ་དྲུག་ཡིན་ཏེ་དེ་དག་གི་འགྲོ་བའི་དོན་མཛད་ཅིང་། ཆོས་ཀྱང་མ་ངེས་ཏེ་གདུལ་བྱའི་འགྲོ་བ་རྣམས་ཀྱི་བློ་རྟོག་མང་ཉུང་ལྟར་དེ་དང་མཐུན་པའི་ཆོས་བསྟན་པ་ཡིན་ལ། དུས་ཀྱང་སོ་སོ་རང་རང་གི་བསྐལ་པའི་རྗེས་སུ་འགྲོ་བ་ཡིན་ཞིང་། མ་དག་ཞིང་གི་འགྲོ་བ་ལ་དེ་ལྟར་སྣང་ཞིང་། གང་ཞིག་རྨི་ལམ་གྱི་ནང་དུ་སངས་རྒྱས་མཐོང་ཞིང་དེ་ཉིད་རྨི་ལམ་ལྟ་བུར་སྤྲུལ་པའི་ཆོས་བསྟན་ཡང་། དེ་ལ་ངོ་བོ་ཉིད་མེད་ཅིང་། རང་བཞིན་ཅི་ལ་ཡང་མ་གྲུབ་པ་ལ། བདག་ཏུ་འཛིན་པ་མེད་ཅིང་སྟོང་པ་ཉིད་དེ་གསོག་ཏུ་ཅེས་རྫུན་དུ་རིག་པར་བྱ་ཞེས། ཟབ་མོའི་མདོ་སྡེ་དུ་མ་ལས་གསུང་པས་ནི། །འཁོར་བའི་སྡུག་བསྔལ་དང་མྱ་ངན་ལས་འདས་པའི་བདེ་བ་གཉིས་ཀ་རྨི་ལམ་ལྟ་བུའི་རོལ་པ་ཉིད་ལ་སྣང་བས་སངས་རྒྱས་ངོ་བོར་དག་ནའང་། སྤྲུལ་པ་ནི་གདུལ་བྱའི་སེམས་ཉིད་ལྟར་སྣང་བའི་ཕྱིར་ན། མ་དག་པ་ཐུགས་རྗེས་རོལ་པའི་སྤྲུལ་པ་ཡང་། ཇི་སྲིད་འཁོར་བ་དང་མཐུན་པའི་རྗེས་སུ་འགྲོ་བའི་རྒྱུན་མི་ཆད་ཅིང་། དེ་ཉིད་ཀྱི་ངང་ནས་སྣ་ཚོགས་སྤྲུལ་པ་ནི་རང་བཞིན་དུ་བྱོན་པ་དང་། རྒྱལ་བའི་སྐུ་གསུང་ཐུགས་རྟེན་གནས་རིགས་རྣམས་ལ་རང་བྱུང་དུ་མངོན་པ་དང་། དེ་ལས་ཀྱང་ད་ལྟའི་གནས་འདུས་ལ་སོགས་པའང་དེ་དང་མཚུངས་ཤིང་ལག་པས་འདུ་བྱེད་ལས་བྱུང་བ་ནི། འབུར་དུ་བྱས་པ་དང་། རིས་སུ་བྲིས་པ་དང་། གནྡྷོ་ལ་ཞེས་གཙུག་ལག་ཁང་དང་། ཁང་བཟང་དང་། སྐྱེད་མོས་ཚལ་དང་། མྱ་ངམ་གྱི་ཐང་ལ་སྤྲུལ་པའི་གྲོང་ཁྱེར་དང་། པདྨ་དང་། དཔག་བསམ་གྱི་ཤིང་དང་། ཡིད་བཞིན་གྱི་ནོར་བུ་དང་། གྲུ་གཟིངས་དང་། ཟམ་པ་དང་། ཤིང་རྟ་དང་། ཟས་དང་གོས་ལ་སེམས་མེད་བེམ་པོའི་ཚུལ་དུ་སྣང་བ་དང་། སྐྱེ་བ་མུ་གེས་གདུང་བར་ཉ་བོ་ཆེ་དང་། ནད་ཀྱིས་གདུང་པ་ལ་སྲོག་ཆགས་དེས་པ་དང་། སྲིན་མོའི་གླིང་དུ་རྟ་ཅང་ཤེས་བཱ་ལ་ཧ་དང་། མི་གཙང་བའི་འདམ་དུ་གསེར་གྱི་བུང་བ་སོགས་སྤྲུལ་པ་སྣ་ཚོགས། རྣམ་པ་ཀུན་ཏུ་བདེ་བར་བྱེད་པའི་གཞིར་རྟོག་པ་བཟང་ངན་གང་ཡང་མེད་ཅིང་། གཡོ་བ་མེད་པ་ལྟ་བུའི་དོན་ཆེན་གྱི་ནི་ཞེས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའི་དཔལ་དུ་ཉེ་བར་གནས་ཤིང་། གལ་ཏེ་གདུལ་བར་བྱ་བའི་དུས་ཡོལ་ན་ཞེས། གདུལ་བྱ་མེད་ན་འདུལ་བྱེད་ཀྱི་སྟོན་པ་དབྱིངས་སུ་ནུབ་པའི་མཚན་དཔེ་ནི། ཇི་ལྟར་ཆུ་སྣོད་མེད་པར་གྱུར་ཚེ་ཆུ་ཟླའི་གཟུགས་བརྙན་ཡང་། སྤྲུལ་གཞིའི་ཟླ་བ་ཉིད་ལ་ཐིམ་པ་ལྟར་གདུལ་བྱའི་སེམས་ཅན་རྣམས་ལ་གང་ལ་གང་འདུལ་གྱི་ཚུལ་དུ་སྣང་བས་བསྡུས་པའི་སྤྲུལ་པ་རྣམས་ནི། རང་སྣང་ལོངས་སྤྱོད་རྫོགས་པའི་དབྱིངས་སུ་ཐིམ་པ་ནི། དེ་ཡང་གནམ་སྟོང་ཟླ་བ་གཅིག་ཤོས་ནས་ཞེས། ཉ་ཟླ་གནམ་སྟོང་ཟླ་བ་ལ་གཅིག་ཏུ་ཐིམ་པ་མེད་ཀྱང་འོད་དཀར་ཕྱིར་གསལ་གདངས་ནང་དབྱིིངས་སྤྲོས་པ་མེད་པའི་ངང་དུ་ཐིམ་པ་ལྟར། ལོངས་སྤྱོད་རྫོགས་པའི་རང་སྣང་སྐུ་དང་ཞིང་ཁམས་སུ་གསལ་བ་དེའང་། ཆོས་ཀྱི་སྐུའི་ཡེ་ཤེས་ཆེན་པོར་འཁྱིལ་པ་དེ་ཉིད་ལས། དབུ་མ་པ་རྣམས་འཇུག་པ་ཆོས་ཀྱི་དབྱིངས་སུ་ཞི་བའི་འགོག་པ་དམ་པ་ཞེས་འདོད་ལ། དོན་དུ་ནི་ཉན་རང་གི་འགོག་པ་དང་མི་མཚུངས་པ་ནི་ཤེས་དགོས་ཤིང་། འདིར་ནི་སོ་སོ་རང་རིག་ཡེ་ཤེས་ཉིད་ནི་ཕྲ་བའི་ཡེ་ཤེས་ནང་གསལ་ཆོས་ཀྱི་དབྱིངས་ཏེ། ཐིམ་ལ་ཞེས་གཟུགས་སྐུ་གཉིས་ཀྱི་སྣང་ཆ་ཆོས་སྐུར་ཐིམ་ཡང་། དེ་ཉིད་ནི་མ་རྨུགས་པ་ཞེས་གཞོན་ནུ་བུམ་པའི་སྐུ་ནི་ཤེལ་ནང་དུ་བསྡུས་ཚེ་འཇའ་ཚོན་ཁོང་ན་གསལ་བ་བཞིན་ལགས་མོད་ཀྱང་། གང་གི་གདུལ་བྱ་སྣང་བའི་མོད་དེ་ཉིད་ལ་འགག་པ་མེད་པ་ཐུགས་རྗེའི་ཡེ་ཤེས་མཆེད་པའི་གཞི་དེ་ཉིད་ནི། ཤིན་ཏུ་མཉམ་པར་བཞག་པའི་ཆོས་ཉིད་གཏིང་གསལ་ནི། འབྲས་བུ་འཁོར་འདས་རྒྱབ་གྱེས་པའི་ལྷུན་གྲུབ་ཆེན་པོའི་གོ་འཕང་ཡིན་ནོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་གསུམ་པའི་བསྡུས་འགྲེལ་ལོ། ༈ དེ་ལྟར་ཡོན་ཏན་རིན་པོ་ཆེའི་མཛོད་ཀྱི་བསྟན་བཅོས་ཀྱི་རྩ་བ་མཛད་ཟིན་ནས་གཤམ་དུ་སྦྱར་བྱང་གསུང་པ། བདག་རྒྱུད་སྣོད་ཀྱི་དཔྱད་པ་རྫོགས་གྱུར་ནས། འཇིག་རྟེན་མགོན་པོ་དྲི་མེད་འོད་ཟེར་གྱི། ཞལ་མཐོང་ཐུགས་རྗེས་དབུགས་འབྱིན་མ་ཐོབ་ན། ལམ་མིན་གཡང་སར་དལ་རྟེན་སྟོང་ལོག་བྱས། ཞེས་པ་ནི། བདག་རྒྱུད་སྣོད་ཀྱི་ཞེས་རང་རྒྱུད་ན་ཡོད་པའི་དྲང་ངེས་ཀྱི་དཔྱད་ཡོངས་སུ་རྫོགས་པར་བྱས་པ་ཡང་། རྒྱལ་དབང་དྲི་མེད་འོད་ཟེར་གྱི་ཐུགས་རྗེ་དང་སྟོབས་ལས་བྱུང་བ་ཡིན་ཏེ། གང་གི་ཞལ་མཐོང་བ་དང་། བྱིན་གྱིས་བརླབས་ནས་དབུགས་དབྱུང་ཐོབ་པར་མ་གྱུར་ན། འཁོར་བའི་ལམ་ལྔའི་གནས་སུ་དལ་རྟེན་སྟོང་ལོག་བྱས་ཀྱང་། དེ་ལས་ལྡོག་ཏེ་ཀུན་མཁྱེན་ཆོས་ཀྱི་རྒྱལ་པོའི་བཀའ་དྲིན་ལས་འདི་ལྟ་བུའི་གཞུང་བཟང་རྩོམ་པ་སྤོབ་པར་ཐོབ་པ་ཡིན་ལ། དེ་ཕྱིར་འདི་ལ་ལེགས་པར་བཤད་པའི་ཆ། །བླ་མའི་བྱིན་རླབས་སྒོམ་བྱུང་ཤེས་རབ་ལས། །ཐོས་བསམ་རྟོག་གེའི་རིག་པས་མ་བསྐྱེད་པས། །རང་རང་འདོད་གཞུང་ཕྱོགས་དང་འགལ་ན་འཆགས། །ཅེས་པ་ནི། དེ་ཡང་ཐོག་མཐའ་བར་གསུམ་དགེ་བའི་གཞུང་བཟང་དྲི་མ་མེད་པ་འདི་ཉིད་ནི། བླ་མ་དམ་པའི་བྱིན་རླབས་དང་། སྔོན་སྦྱངས་ཀྱི་ལས་འཕྲོ་སད་ནས་བསྒོམ་བྱུང་གི་ཤེས་རབ་གཏིང་རྡོལ་བའི་རྩལ་དུ་ཤར་བ་ལགས་ཀྱང་། དེང་དུས་བོད་ལུགས་ཁོ་ནའི་གྲུབ་མཐའ་རང་འདོད་ཀྱིས་བཟུང་བའི་ཐོས་བསམ་ཚིག་ལ་གྲིམ་ཞིང་དོན་དང་མི་མཐུན་པའི་རྟོག་གེའི་རིག་པས་མ་བསྐྱེད་པས། རང་རང་སོ་སོའི་ཕྱོགས་འཛིན་གྱིས་འདོད་གཞུང་དག་དང་ཕྱོགས་འགལ་སྲིད་ན་འཆགས་ཞེས་དགོངས་པ་ཅན་གྱིས་གསུངས་སོ། །ཆོས་ཚུལ་རྒྱ་མཚོ་གཏིང་དཔག་དཀའ་བའི་དོན། །མཉམ་པར་བཞག་པ་ཁོ་ནའི་ཁྱད་ཆོས་ལས། །ཇི་ལྟ་ཇི་སྙེད་མཁྱེན་པའི་ཡེ་ཤེས་གནས། །ཡང་དག་མཐོང་ལ་ནམ་ཡང་བསླུ་བ་མེད། །ཅེས་པ་ནི། སྤྱིར་མདོ་སྔགས་ཀྱི་ཆོས་ཚུལ་རྒྱ་མཚོ། རྒྱ་ཆེ་ཞིང་དཔག་པར་དཀའ་བའི་དོན་ཇི་ལྟ་བར་རྟོགས་པ་ཡང་། རང་སེམས་ཀྱི་གནས་ལུགས་ཇི་བཞིན་དུ་རྟོགས་ནས་ཀློང་དུ་གྱུར་ཞིང་མཐར་མ་ཕྱིན་གྱི་བར་དུ། མཉམ་པར་བཞག་པ་ཁོ་ནའི་ཁྱད་ཆོས་ལས་ཇི་ལྟ་བ་དང་ཇི་སྙེད་མཁྱེན་པའི་ཟག་པ་མེད་པའི་ཡེ་ཤེས་ཀྱི་གནས་ཡང་དག་པ་ཇི་བཞིན་པར་མཐོང་བ་ལ་ནམ་ཡང་བསླུ་བ་མེད་ཅེས་གསུངས་པ་བཞིན་སྒྲ་ཇི་བཞིན་པར་རྟོགས་པའོ། །དགེ་བ་འདི་ཡིས་བདག་དང་སེམས་ཅན་རྣམས། །རྒྱལ་བའི་རིང་ལུགས་ནོར་བ་མེད་པའི་ལམ། །སྒྲིབ་གཉིས་རྙོགས་པ་དྭངས་པའི་གཟིངས་ཞུགས་ནས། །བྱང་ཆུབ་ཞི་བ་རིན་ཆེན་གླིང་ཕྱིན་ཤོག །དེ་ལྟ་བུའི་དགེ་བའི་རྩ་བ་འདི་ལ་བརྟེན་ནས་བདག་དང་མཁའ་མཉམ་གྱི་སེམས་ཅན་ཐམས་ཅད། སྔ་འགྱུར་རྒྱལ་བ་ཀུན་བཟང་རྡོ་རྗེ་འཆང་ཆེན་པོའི་རིང་ལུགས་ནོར་བ་མེད་པའི་ལམ་མཆོག། ནང་རྒྱུད་སྡེ་གསུམ་ཞེས་སྒྲིབ་པ་གཉིས་ཀྱི་རྙོགས་པ་དྭངས་པའི་རྒྱ་མཚོར་རིམ་གཉིས་ཀྱི་གཟིངས་ལ་ཞུགས་ནས། བྱང་ཆུབ་སེམས་དཔའ་ཞི་བ་རིན་པོ་ཆེའི་གླིང་ཞེས་རྒྱལ་བ་རྣམ་ཀྱི་གྲོལ་གཞི་མངོན་དུ་འགྱུར་བར་ཤོག་ཅེས་སྨོན་ལམ་བཏབ་པའོ། །ནགས་མཐོང་རི་དྭགས་དཀྱུ་བའི་སྨན་ལྗོངས་ན། །དུས་བཞིའི་མངོན་རྟགས་ངོམ་པའི་ལྗོན་པ་ནི། །དྲང་སྲོང་རྣམས་ལ་མི་སྙན་སྒྲོགས་མ་བྱེད། །སྙིང་ལ་འབབ་པར་སྨྲ་བའི་བྱ་ཚོགས་ཀྱང་། །དབེན་པའི་གནས་མིའི་རྒྱུ་འགྲུལ་མེད་ཅིང་བྱ་རིགས་དང་། རི་དྭགས་ཁོ་ནས་བཟུང་བའི་གནས་ལ་བསྟོད་བསྔགས་བརྗོད་དེ་དེར་གཤེགས་ནས་རིམ་གཉིས་ལ་བརྩོན་པ་ལས། །སྦྲུལ་གདུག་འཁྲི་ཤིང་ལྟ་བུའི་འཁོར་བ་འདིར། །སྐྱོ་བའི་ངེས་འབྱུང་ཤིང་རྟས་ཡིད་འདྲེན་པའི། །ཅ་ཅོ་ཤིན་ཏུ་ཞི་བ་སྒྲོག་ཐོས་ནས། །དབང་པོ་ཉེ་བར་ཞི་བའི་དཔལ་ཐོབ་ཤོག །སྦྲུལ་གདུག་པ་ཅན་གྱི་འཁྲི་ཤིང་ལྟར་སྐྱོན་དང་ལྡན་པའི་འཁོར་བའི་གནས་འདིར་སྐྱོ་ཤེས་ངེས་འབྱུང་དྲག་པོའི་ཤིང་རྟས་ཡིད་འདྲེས་པའི་རྣམ་གཡེང་དང་འདུ་འཛི་ལ་རྒྱབ་ཀྱིས་ཕྱོགས་བཞིན། དབང་པོ་ཡུལ་ལྔར་རྒྱུ་བ་ལྡོག་ཏེ། རང་སེམས་གཅིག་ཏུ་གནས་ཤིང་རང་བཞིན་མེད་པ་རྟོགས་པའི་དོན་ལ་གནས་པར་ཤོག་ཅིག་ཅེས་སྨོན་པའོ། །ལྟ་བ་ཡིད་བྱེད་རླུང་གིས་མ་དཀྲུགས་ལ། །སྤྱོད་པ་རྒྱལ་སྲས་དམ་པའི་རྗེས་འགྲོ་བས། །ནམ་ཡང་གཞན་གྱི་ཁུར་དུ་མི་འགྲོ་ཞིང་། །རླབས་ཆེན་ཕྲིན་ལས་འགྲོ་བའི་དཔལ་དུ་ཤོག །ད་དུས་ཀྱི་སྒོམ་ཆེན་དུ་རློམ་པའི་བསམ་གཏན་པ་ཕལ་མོ་ཆེ་ལྟ་བ་ཡིད་བྱེད་དང་མ་བྲལ་བའི་གཉིས་འཛིན་དམ་པོ་དང་། དེ་བཞིན་དུ་དམིགས་པ་ཤིན་ཏུ་འཐས་པ་ལ་མཆོག་ཏུ་འཛིན་པ་དང་། སྤྱོད་པ་བཅོས་མ་སྣ་ཚོགས་ཀྱིས་སེམས་རྣལ་དུ་ཕེབ་མི་བཅུག་པ་སོགས་སྐྱོན་རྣམས་དོར་ནས། ལྟ་སྒོམ་སྤྱོད་འབྲས་གསུམ་པོ་གེགས་དང་གོལ་སའི་འཕྲང་ལས་གྲོལ་ཞིང་། རབ་འབྱམས་ཕྲིན་ལས་ཀྱི་འཇུག་པ་རྒྱ་ཆེ་ཞིང་རྒྱུན་མི་ཆད་བ་འགྲོ་བའི་དཔལ་དུ་འགྱུར་བར་ཤོག་ཅིག། ཅེས་རང་གཞན་དོན་གཉིས་ལྷུན་གྲུབ་ཏུ་འབྱུང་བའི་སྨོན་ལམ་བཏབ་པའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ། ལ་སྟོད་ཆོས་རྗེ་བྲག་ཕུག་པས་བསྐུལ་བའི་ངོར། སངས་རྒྱས་གཉིས་པ་པདྨ་སམ་བྷ་ཝའི་ཞབས་རྡུལ་ལ་སྤྱི་བོ་རེག་པའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱིས་དཔལ་ལྡན་པདྨ་འོད་གླིང་དུ་སྦྱར་བའོ། །འདིར་སྨྲས་པ། ས་བཅུའི་བྱང་ཆུབ་སེམས་དཔའ་འཇམ་དཔལ་དབྱངས། །གདུལ་བྱའི་ཆེད་དུ་བྷོ་ཊའི་རྒྱལ་ཁམས་སུ། །བྱོན་ནས་མཁན་སློབ་རྣམ་གཉིས་ལ་སོགས་པའི། །རྒྱ་གར་པཎ་ཆེན་མང་པོ་སྤྱན་དྲངས་ནས། །མདོ་སྔགས་བསྟན་པ་ཟླ་ཉའི་དཀྱིལ་འཁོར་ལྟར། །མཐའ་འཁོབ་སྨག་རུམ་བསལ་བའི་གཉེན་གྱུར་པ། །འདི་འདྲ་སངས་རྒྱས་འཇིག་རྟེན་བྱོན་དང་མཚུངས། །དེ་ཕྱིར་བཀའ་དྲིན་དྲན་བཞིན་གསོལ་བ་འདེབས། །འཕགས་པའི་ཡང་སྤྲུལ་ཆོས་རྒྱལ་ཆེན་པོ་དེ། །སླར་ཡང་བསམ་བཞིན་མི་ཡི་སྲིད་བཟུང་པ། །རིག་འཛིན་ཆེན་པོ་འཇིགས་མེད་གླིངཔ་ཞེས། །ཨུ་རྒྱན་དྲི་མེད་འོད་ཟེར་དངོས་མཇལ་བཞིན། །སྔ་འགྱུར་བསྟན་པ་འོད་ཟེར་འབུམ་ལྡན་དལ། །བོད་འདིར་ཕྱི་དར་ཆོས་ལས་ཕྱིས་དར་བའི། །ཆུ་འཛིན་རབ་ཏུ་འཁྲིགས་པའི་མཐུས་སྒྲིབ་ནས། །གསལ་མ་ནུས་པ་སྔོན་སྨོན་འཐོར་རླུང་གིས། །སྒྲིབ་བྱེད་ནམ་མཁའི་ན་བུན་མཐར་བསྐྲད་ནས། །རྫོགས་པ་ཆེན་པོའི་འོད་ཟེར་སྟོང་འབར་གཟི། །རྙིང་བསྟན་ཆུ་སྐྱེས་ཚལ་ཆེན་བཞད་པ་དང་། །ཆབས་གཅིག་རིང་ལུགས་བསྟན་པའི་དྲི་བཟང་སྤྲོས། །དེ་ཕྱིར་མདོ་སྔགས་ཆོས་ཀྱི་གན་མཛོད་རྒྱ། །ཡོན་ཏན་རིན་ཆེན་མཛོད་ཀྱི་སྒོ་ཕྱེས་ནས། །རྗེས་འཇུག་སྐལ་ལྡན་ཚོགས་ལ་འཛད་མེད་གཏེར། །སྦྱིན་འདི་བསྟན་པའི་བཙས་སུ་གདོན་མི་ཟ། །འོན་ཀྱང་སྙིགས་མའི་དུས་ཀྱི་སེར་གཟུགས་རྣམས། །ཐོས་བསམ་སྒོམ་ལ་གཡེལ་ཞིང་ཚིག་དོན་འཆོལ། །གཞུང་བཟང་འདི་འདྲ་འདོར་བར་ཕངས་ནས་སུ། །བླུན་པོ་འཇུག་པ་བདེ་ཕྱིར་བྱིས་པའི་བློས། །བརྩམས་པར་ཐ་མི་དད་ཀྱངབློོ་ངན་དྲིས། །མ་གོས་དམ་པ་གསུམ་གྱིས་ཟིན་རློམ་བཞིན། །མིག་ཤེས་ཡུལ་ལ་འཇུག་པའི་མཐའ་བྲལ་ཡང་། །གཞན་གྱི་ངག་ནས་ཚིག་བླངས་འདིར་བཀོད་དོན། །གཞུང་འདི་སྔ་མ་སློབ་འདོད་འགའ་ཞིག་ལ། །བསླབ་ཀྱང་དོན་དུ་གཉེར་བ་ཕལ་མོ་ཆེར། །མ་བསླབ་བསླབ་ཀྱང་མཐའ་རུ་མ་ཕྱིན་པའི། །སྐྱོན་སྤང་ཕྱིར་དུ་སྙིང་རུས་བསྐྱེད་ནས་སུ། །སྤེལ་བ་ཡི་གེ་གཉིས་པ་འབེབ་བྱེད་གང་། །དམ་ལྡན་ཀུན་བཟང་ཕུན་ཚོགས་ཞེས་བགྱི་བས། །བརྩོན་པ་བསྐྱེད་ནས་བྲིས་འདིའི་རྣམ་དཀར་དགེས། །བསྟན་འགྲོ་ཡོངས་ལ་ཕན་པའི་རྒྱུར་གྱུར་ཅིག། དགེའོ། དགེའོ། དགེའོ།། །།སརྦ་མངྒ་ལམ།། །། དམ་ཆོས་བདེ་ཆེན་ལམ་མཆོག་ལས་གཤིན་པོ་ལ་འཕོ་བ་འདེབས་ཚུལ་རྣམ་གྲོལ་མྱུར་ལམ།དམ་ཆོས་བདེ་ཆེན་ལམ་མཆོག་ལསཿ གཤིན་པོ་ལ་འཕོ་བ་འདེབས་ཚུལ་རྣམ་གྲོལ་མྱུར་ལམ་བཞུགས།། ན་མོ་གུ་རུ་ཨ་མི་དཱ་བྷ་ཡེ༔ སྔོན་དུས་དགེ་སློང་རྒྱལ་བའི་སྲས་པོ་མཆོག༔ ཆོས་ཀྱི་འབྱུང་གནས་ཞེས་གྲགས་གང་དེ་ཡིས༔ རྒྱལ་བ་འཇིག་རྟེན་དབང་ཕྱུག་ཞབས་བསྙེན་ཚེ༔ སྨོན་ལམ་བཏབ་བཞིན་འགྲུབ་ཏེ་ཚེ་མཐའ་ཡས༔ གང་གི་སྐུ་གསུང་ཐུགས་ཡོན་ཕྲིན་ལས་ཀྱི༔ དཔལ་ཡོན་མཛད་པ་ཕྲིན་ལས་བསམ་མི་ཁྱབ༔ དེ་ཕྱིར་གདུལ་བྱ་འདུལ་ཐབས་བསམ་འདས་ལས༔ འདི་ན་གཞན་ཕན་རྣམ་གྲོལ་བགྲོད་པའི་ལམ༔ དེ་ཡང་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམ་པ་ཟབ་ལམ་འཕོ་བའི་མན་ངག་འདི་ལ་དོན་གསུམ་སྟེ༔ སྦྱོར་དངོས་རྗེས་གསུམ༔ དང་པོ་ལ་གཉིས་ཏེ༔ འཕོ་ལུང་ཇི་ལྟར་བྱ་ཚུལ་དང་༔ ངག་འདོན་གྱི་རིམ་པའོ༔ དང་པོ་ནི་ཚེ་འདས་དབུགས་དང་བྲལ་མ་ཐག་པར་འཕོ་ལུང་བྱ་བ་ལས་ཤི་ནས་ཡུན་རིང་འགྱང་ན་རྣམ་ཤེས་བཏོན་ནས་གཤེད་འཁྱམས་ཚར་བ༔ ལུང་དང་རིགས་པས་འགྲུབ་མོད༔ འོན་ཀྱང་འགའ་རེ་ཞག་གསུམ་དྲོས་བཞིན་རྣམ་ཤེས་ཕུང་པོར་གནས་ཞེས་འདོད་པ་བསམ་གཏན་གྱི་ཞག་ཡིན་ཞེས་མཁས་གྲུབ་དུ་མས་བཞེད་པ་དྲན་དགོས་ཤིང་༔ དེ་ལྟ་ནའང་ཚེ་འདས་བག་ཆགས་ཀྱི་རྟེན་ཕུང་པོ་དེར་རྣམ་ཤེས་བཀུགས་ནས་སྦྱང་བཀྲུ་དབང་བསྐུར་ལམ་སྟོན་གནས་སྤར་སོགས་བྱེད་སྲོལ་ཡོད་བཞིན་འཕོ་ལུང་ཡང་དེ་དང་ཅིས་ཕྱིར་མི་མཚུངས་ཏེ༔ མཚན་བྱང་ལ་བཀུགས་ནས་སྤར་ཆོག་བྱེད་པ་བཞིན་ནོ༔ དེས་ན་ཤི་མ་ཐག་པའམ་དེ་ལྟར་མ་ཡིན་ཡང་ཟབ་ལམ་འཕོ་བའི་གདམ་པ་འདེབས་པར་སྤྲོ་ན་ཁྲུས་ཆོག་དང་འབྲེལ་ཚེ་གཞུང་གང་ཡིན་གྱི་ལམ་སྟོན་གྱི་མགོར་སྦྱར་ཞིང་༔ གཞན་འཕོ་ལུང་ཁོ་ནས་ཚེ༔ ངག་འདོན་ནི་བདག་ཉིད་ཡི་དམ་གང་རུང་ངམ༔ ཁྱད་པར་ཐུགས་རྗེ་ཆེན་པོར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་སྤྲིན་གྱི་ལྕུག་མ་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་བཀུགས་ནས་ཕུང་པོ་དང་དབྱེར་མེད་དུ་ཐིམ་པར་བསམ་ཞིང་༔ ན་མོ་ཕྱོགས་བཅུ་དུས་གསུམ་གྱི་རྒྱལ་བ་སྲས་བཅས་ཉན་ཐོས་དང་རང་རྒྱལ་རྩ་གསུམ་ཞི་ཁྲོ་བཀའ་སྲུང་དམ་ཅན་རྒྱ་མཚོ་ཆོས་ཉིད་འགྱུར་མེད་རྟེན་འབྱུང་བསླུ་མེད་དང་བཅས་པའི་བདེན་པ་ཆེན་པོའི་མཐུ་སྟོབས་ནུས་པའི་བྱིན་རླབས་དང་༔ ཁྱད་པར་དུ་བཅོམ་ལྡན་འདས་མགོན་པོ་འོད་དཔག་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདེན་པ་དང་རྒྱལ་བ་གང་གི་ཐུགས་བསྐྱེད་སྨོན་ལམ་རྒྱ་ཆེན་པོའི་མཐུ་སྟོབས་ཀྱིས་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པ་ཆྒཻ་མོའི་རྣམ་པར་ཤེས་པ་འཁོར་བ་སྡུག་བསྔལ་གྱི་གནས་ཡུལ་གང་ན་ཡོད་ཀྱང་སྐད་ཅིག་ཡུད་ཙམ་གྱིས་རྟེན་ཕུང་པོ་འདི་དང་དབྱེར་མེད་དུ་ཁུག་ཅིག༔ ནྲྀཿཨ་ཀརྵྱ་ཛཿ ལན་གྲངས་ཅི་ནུས་ལྡབ་མཐརཿ ཛཿཧཱུྃ་བཾ་ཧོཿ ཆུ་ལ་ཆུ་བཞག་པ་བཞིན་དུ་གྱུར་ནས་དགའ་བ་དང་གུས་པའི་སེམས་ཀྱིས་བག་ཕེབས་བཞིན་གནས་པར་བསམ་ལ༔ གཤེད་དང་ཕྲལ་བ་ནི༔ མཐེབ་སྐྱུ་ཏིང་ལོ་ཆངས་བུ་བཅས་བསང་སྦྱང་བྱས་ནསཿ ཨོཾ་སརྦ་བིགྣཾ་ན་མཿསརྦ་ཏ་ཐ་ག་ཏ་བྷྱོ་བྷི་ཤོ་མུ་ཁཾ་བྷྱ༴ མཐེབ་སྐྱུ་གཡས་བསྐོར་བཅས་ལན་གསུམ་དང་ཿ ཨོཾ་སུམ་བྷ་ནི་སུམ་བྷ༴ སོགས་ ཏིང་ལོ་ཆངས་བུ་གཡོན་བསྐོར་བཅས་གསུམ་གྱི་མཐར་བདེན་སྟོབས་དང་དྲག་སྔགས་རོལ་མོའི་ཚམ་རྔམས་དང་བཅས་པས་ཕྱི་རོལ་དུ་དོར་ནས་ཟ་འདྲེ་ཤི་གཤེད་དང་ཕྲལ་ཞིང་སླར་ཡང་གཤེད་ཀྱིས་མི་ཚུགས་པའི་ཕྱིར་བསྲུང་བའི་འཁོར་ལོ་གསལ་ཞིང༔ བཛྲ་རཀྵ་རཀྵ་ཧཱུཾ྄ཿ གིས་བསྲུང་བར་བྱས་ནས་སྐྱབས་སུ་འགྲོ་བ་ནི༔ མདུན་གྱི་ནམ་མཁར་ནུབ་ཕྱོགས་བདེ་བ་ཅན་གྱི་རྟེན་དང་བརྟེན་པར་བཅས་པ་ནམ་མཁའ་ལ་འཇའ་ཚོན་ཇི་བཞིན་གསལ་བར་གྱུར༔ བསམ་ལ། ན་མོ་དེང་ནས་བཟུང་སྟེ་བླ་མེད་བྱང་ཆུབ་པར༔ བདག་སོགས་རིགས་དྲུག་འཁོར་བའི་སེམས་ཅན་རྣམས༔ མགོན་པོ་འོད་དཔག་མེད་པའི་ལྷ་ཚོགས་ལཿ ལུས་ངག་ཡིད་གསུམ་གུས་པས་སྐྱབས་སུ་མཆིཿ ལན་གསུམ་ལ་སོགས་གང་ནུས་ལྡབཿ གཉིས་པ་སེམས་བསྐྱེད་པ་ནི། ཧོ་ཐོག་མཐའ་མེད་པའི་རིགས་དྲུག་རྒྱུད་ལྔའི་འགྲོཿ འོད་དཔག་མེད་པའི་གོ་འཕང་ལ་འགོད་ཕྱིརཿ སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་མོ་འཕོ་བའི་རྣལ་འབྱོར་བསྒོམ་པར་བྱ། །ལན་གསུམ་གོང་ལྟར་བྱའོ། །གསུམ་པ་ཡན་ལག་བདུན་པ་ནི། ན་མོ་བདག་ལུས་རབ་འབྱམས་རྒྱ་མཚོའི་རྡུལ་སྙེད་དུ། །སྤྲུལ་ནས་འཆི་མེད་མགོན་པོ་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་དཔག་མེད་ཀུན། །བདེ་ཆེན་ཞིང་གི་ལྷ་ཚོགས་རྣས་ལ་འབུལ། །ལུས་ངག་ཡིད་གསུམ་སྡིག་གྲིབ་ཉེས་ལྟུང་ཀུན།།གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས། །བདེན་གཉིས་ཀྱིས་བསྡུས་དགེ་ཚོགས་ཇི་སྙེད་ལ། །སྙིང་ནས་དགའ་བའི་རྗེས་སུ་ཡི་རང་ངོ་། །གདུལ་བྱའི་དབང་པོའི་སྐལ་བ་བསམ་པ་བཞིན། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །རྒྱལ་བ་སྲས་བཅས་མྱ་ངན་མི་འདའ་བར། །སྲིད་མཐའི་བར་དུ་བཞུགས་པར་གསོལ་བ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །འགྲོ་རྣམས་བདེ་ཆེན་ཞིང་ཁམས་ཐོབ་ཕྱིར་བསྔོ། །དེ་དག་གི་དམིགས་རིམ་རྣམས་ཀྱང་གསལ་ཐེབས་པར་བྱའོ། །གཞན་ཡང་ཚད་མེད་རྣམ་བཞི་དམིགས་འདོན་ཡ་མ་བྲལ་བའི་ངང་ནས། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག། སོགས་ནས། གནས་པར་གྱུར་ཅིག། ལན་གསུམ་བརྗོད་མཐར་སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་པ་ནི། བྱང་ཆུབ་སྙིང་པོ་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དེ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ལན་གསུམ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །བདག་གི་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ལན་གསུམ་བརྗོད། མཉམ་བཞག་གི་ངང་ནསཿ རླུང་ཞིག་ཕར་བཏང་བའི་ཚེ། བདག་གི་དུས་གསུམ་གྱི་དགེ་ཚོགས་བདེ་སྐྱིད་གང་ཡོད་རྣམས། དམིགས་ཡུལ་དེ་ལ་ཐིམ། དེ་ཉིད་བདེ་བ་དང་ལྡན་སྡུག་བསྔལ་དང་བྲལ་བར་བསམ། རླུང་ཞིག་ཚུར་རྔུབ་ཚེ། དམིགས་ཡུལ་དེ་ཉིད་ཀྱི་སྡིག་སྒྲིབ་ཉེས་ལྟུང་ཐམས་ཅད། རྡོ་ཁབ་ལེན་ལ་ལྕགས་ཕྱེ་འདུ་བ་བཞིན་དུ། རང་ཉིད་ཀྱི་སྒོ་གསུམ་ལ་ཐིམ་པས། དམིགས་ཡུལ་གྱི་སྒོ་གསུམ་གྱི་ཉེས་ཚོགས་ཐམས་ཅད་ཤེལ་སྒོང་ཕྱེས་པ་ལྟར་དག་པར་བསམ། དང་པོ་ནི། སྟོང་ཉིད་སྙིང་རྗེ་ཟུང་འཇུག་གི་ངང་ནསཿ གཤིན་པོ་དབུགས་དང་བྲལ་མ་ཐག་ལ་འདི་བཞིན་བརྗོད་དེ། མིང་རན་པར་བོས་ལཿ ཁྱོད་རང་ལ་འཆི་བ་ཞེས་བྱ་བ་དེ་སླེབས་ནས་ད་ལྟ་དབུགས་དང་བྲལ་མ་ཐག་ཡིན་ནོ། །ཞེས་ལན་གསུམ་བརྗོད། ཤི་ནས་ཡུན་རིང་འགྱང་ན་དེ་ལྟར་མ་བྱས་ན་ཆོག་ཅིང་། གང་ལྟར་ཡང་འདི་བཞིན་བརྗོད། འོ་འཇིག་རྟེན་འདི་ནས་ཕ་རོལ་དུ་ཚེ་ལས་འདས་པ་ཆྒཻ་མོ་ཁྱོད་ད་ལྟ་དབུགས་དང་བྲལ་བའི་སྐབས་ཡིན་པས་མ་ཡེངས་པར་ཉོན་ཅིག། དེ་ཡང་འཆི་བ་ཞེས་བྱ་བ་དེ་ཁྱོད་རང་གཅིག་པུ་ལ་བྱུང་བ་མ་ཡིན། འགྲོ་བ་རྒྱུད་ལྔ་པོ་ཐམས་ཅད་ཀྱི་ལམ་པོ་ཆེ་ཡིན་པས། ལན་གཅིག་སྐྱེས་ཚར་ནས་མཐར་འཆི་བ་ཆོས་ཉིད་ཡིན། འཇིག་རྟེན་ན་མཐུ་ཆེ་དཔལ་འབྱོར་ལོངས་སྤྱོད་དང་ལྡན་པའི། འཁོར་ལོས་སྒྱུར་པའི་རྒྱལ་པོ་ནས། འཚོ་བ་ལམ་ཟན་ལ་བརྟེན་པའི་མུ་ཏོས་ཡན་ཆདཿ ཚེ་ཐར་ལ་སོང་བ་གཅིག་ཀྱང་མེད་པས། སེམས་ཁོང་དུ་ཆུད་པར་མ་མཛད་ཅིགཿ དེ་བཞིན་གཉེན་འཁོར་ཡུལ་གཞི། ནོར་རྫས་ལ་སོགས་པ་གང་ལ་ཆགས་ཀྱང་ཿ དེ་དག་ཁྱོད་རང་གི་རྗེས་སུ་མི་འབྲང་། རང་ཉིད་དེ་དག་དང་འགྲོགས་པའི་དུས་ལས་ཡོལ་བའི་ཚུལཿ རྒྱལ་པོ་ལ་གདམ་པའི་མདོ་ལས། དུས་ཀྱིས་ཉོན་ཏེ་རྒྱལ་པོ་འགྲོ་གྱུར་ན། ལོང་སྤྱོད་གཉེན་དང་མཛའ་བཤེས་རྗེས་མི་འབྲང་ཿ སྐྱེས་སུ་དེ་ནི་གང་ནས་གར་འགྲོ་ཡང་ཿ ལས་ནི་ལུས་དང་གྲིབ་མ་བཞིན་དུ་འགྲོགསཿ ཞེས་སྡུག་བསྔལ་བདེན་པའི་ཆོས་མངོན་སུམ་བར་སྨིན་པའི་དུས་འདིརཿ ཉེ་དུ་དང་ནོར་རྫས་ལ་ཆགས་ནསཿ གནས་རིགས་དམན་པར་ལྟུང་ཉེན་ཡོད་པཿ བུ་མོ་རིན་ཆེན་གྱིས་ཞུས་པའི་མདོ་ལསཿ འདི་ན་ཕ་དང་མ་དང་བཤེས་རྣམས་དང་ཿ གཉེན་དང་རྩ་ལག་སྐྱབས་སུ་མི་འགྱུར་ཏེཿ བུ་དང་བུ་མོའང་དེ་བཞིན་མགོན་སྐྱབས་མིནཿ ཡོན་ཏན་ལྡན་པ་འདི་དག་མ་གཏོགས་པཿ འཇིག་རྟེན་མགོན་སྐྱབས་གྱུར་པ་གཞན་འགའ་མེདཿ ཅེས་གསུངས་པས་རང་ཅག་སངས་རྒྱས་ཀྱི་བསྟན་པ་ཡོད་པའི་སྐལ་བ་བཟང་པོ་འདི་ལ་འཆི་འཕོ་བའི་གནས་སྐབསཿ ཉམས་སུ་མྱོང་བ་ལ་དགའ་བ་སྒོམས་ཤིག། དེའི་རྒྱུ་གང་ཡིན་སྙམ་ན། སངས་རྒྱས་བཅོམ་ལྡན་འདས་རྣམས་ཀྱི་མཚན་ཐོས་པ་དོན་ཆེན་པོ་དང་ལྡན་པ་ཡིན་ཏེཿ དེ་ལ་མངོན་པར་དད་པ་དང་ཿ དགའ་བའི་སེམས་ཀྱིས་ཤི་འཕོས་པ་དག་ཀྱང་ཿ ངན་སོང་ལས་ཐར་ནས་ལྷ་དང་མིའི་གོ་འཕང་ཐོབ་པའི་ཚུལཿ མདོ་སྡེ་ལས་བརྒྱ་བ་ལས། དགེ་སློང་དག་བྱ་ཞིག་ནམ་མཁའ་ལས་བབས་ནསཿ ངའི་མདུན་ན་འདུག་པ་མཐོང་ངམཿ གསོལ་པ་བཙུན་པ་བཅོམ་ལྡན་འདས་མཐོང་ལགསཿ བཀའ་སྩལ་པཿ དགེ་སློང་དག་བྱ་དེ་ང་ལ་སེམས་དགའ་བར་གྱུར་ནས་སོང་བ་ལས་ཁྲས་བསད་དེཿ དེ་ང་ལ་སེམས་དགའ་བཞིན་དུ་ཤི་འཕོས་ནསཿ རྒྱལ་པོའི་ཁབ་འདིར་ཚོང་དཔོན་གྱི་རིགས་སུ་སྐྱེས་ནསཿ ཆེར་སྐྱེས་པ་དང་ང་ཉིད་ཀྱི་བསྟན་པ་ལས་རབ་ཏུ་བྱུང་ངོ་ཿ དེ་རབ་ཏུ་བྱུང་ན་ཚོད་ཀྱི་ལོ་བདུན་ལོན་པ་ཁོ་ནས། ཉོན་མོངས་པ་ཐམས་ཅད་བཅོམས་ཏེ། དགྲ་བཅོམ་པ་ཉིད་མངོན་སུམ་དུ་བྱས་སོ། །ཞེས་གསུངས་པ་བཞིན་སངས་རྒྱས་ལ་ལན་གཅིག་དད་པའི་ཕན་ཡོན་ཡང་དེ་འདྲ་ན། ཁྱོད་ཀྱང་རྒྱལ་བའི་བསྟན་པ་ཡོད་པའི་ཞིང་ཁམས་སུ་སྐྱེས་ཤིང་ཿ སངས་རྒྱས་ཀྱི་མཚན་ཐོས་པ་དང་ཿ དེའི་སྡེ་སྣོད་ལས་དབུགས་འབྱིན་ཐོབ་པའི་སྐལ་བ་དང་ལྡན་པ་ཡིན་པས། སྟོན་པ་དེ་བཞིན་གཤེགས་པ་ལ་དད་པ་བླ་ལྷག་ཏུ་སྐྱེད་ཅིག། བསྟན་པ་དམ་པའི་ཆོས་ལ་སྐྱབས་སུ་སོང་ཞིག། བྱང་ཆུབ་སེམས་དཔའི་དགེ་འདུན་རྣམས་རམ་ཟླར་སྦྲོན་ཅིག། ཁྱད་པར་དུའང་གང་གི་མཚན་དང་སྒྲ་དང་ལྟ་བ་ལ་ཞུགས་པས་ཀྱང་། བར་དོའི་འཇིགས་པ་དང་ཿ ངན་སོང་གི་རྒྱུད་ཡོངས་སུ་གཅོད་པར་ཞལ་གྱིས་བཞེས་པ། བཅོམ་ལྡན་འདས་མགོན་པོ་འོད་དཔག་མེད་དང་ཿ བྱང་ཆུབ་སེམས་དཔའ་སྤྱན་རས་གཟིགས་དང་དང་། །མཐུ་ཆེན་ཐོབ་ཀྱི་ཡོངས་སུ་བརྟེན་པ་དང་ཿ དེའི་ཞིང་ཁམས་བདེ་བ་ཅན་ཞེས་བྱ་བ་དེ་ཡིད་ལ་མ་བརྗེད་པར་ཟུངས་ལ། ཁྱོད་གདོས་བཅས་ཤ་ཁྲག་གི་ལུས་ལས་འདས་པའི་ཕྱིར་རོ། །ཞིང་མཆོག་དེ་རུ་ཏ་ལ་ལར་སོང་ཞིག། ཁྱོད་རང་དད་པ་ཐོབ་པའི་བླ་མ་ཡིད་ལ་སྒོམས་ཤིག། ཐེག་པ་ཆེན་པོའི་སྨོན་འཇུག་བྱང་ཆུབ་མཆོག་ཏུ་སེམས་སྐྱེད་ཅིག། ཡི་དམ་དང་ལྟ་བ་རྗེས་སུ་དྲན་པར་གྱིས་ཤིག། དེ་དག་གནད་དུ་འགྲོ་བའི་རྟེན་འབྲེལ་དུ་མ་བསྒོམ་པར་འཚང་རྒྱ་བ། འཕོ་བའི་གདམ་པ་འདེབས་པའི་དུས་ལ་བབས་པ་ཡིན་ནོ། །ཞེས་བརྗོད གཉིས་པ་ནི། ཟབ་ལམ་འཕོ་བའི་མན་ངག་འདི་ཉིད་ཇི་ལྟར་བྱུང་བའི་ལོ་རྒྱུས་ནི། སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱིས། སྟོན་པ་ཤཱཀྱ་ཐུབ་པའི་ཞལ་སྐྱིན། ཨོ་རྒྱན་གྱི་སློབ་དཔོན་པདྨ་འབྱུང་གནས་སྤྱན་དྲངས་ནས། བསམ་ཡས་ཀྱི་གོང་བ། མཆིམས་ཕུར་བཞུགས་པའི་སྐབས་ཤིག་ཏུ། བློོན་པོ་ཉི་མ་ཞེས་བྱ་བ། འཇིག་རྟེན་ལུགས་ཀྱི་བྱ་བ་ལ་མཁས་པའི་རྩེ་མོར་སོན་པ་ཞིག་ཡོད་པ། དེ་ཉིད་ཀྱིས་རང་གི་གནས་ཁང་ནས་ཀ་ཅ་འབྱིན་འཇུག་གི་ཆེད་དུ། མཚན་མོ་ལྕེ་སྡེ་འབར་བ་ཐོགས་ནས། ཁྱིམ་ཕུག་ཉུལ་བས། རྫས་ཁྲོད་དུ་མེ་ཤོར་བས། མཆོད་གནས་གཅིག་དང་། ཕ་མ་གཉིས། བྲན་ཁོལ་སུམ་ཅུ་སྐོར། རྟ་ནོར་ར་ལུག་སོགས། ནོར་རྫས་ཀྱི་དངོས་པོ་གང་ཡོད་ལྷག་མེད་དུ་ཚིག་པར་གྱུར་པས། བློན་པོ་བཟོད་གླགས་མེད་པའི་སྡུག་བསྔལ་གྱིས་ནོན་ཚེ། རྒྱལ་པོས་སློབ་དཔོན་ཆེན་པོ་ལ། དེ་ཚུལ་གྱི་ལོ་རྒྱུས་ཞིབ་ཏུ་གསོལ་ནས། བློན་པོ་ཉི་མ་སྡུག་བསྔལ་ལས་གྲོལ་བའི་གསོལ་བ་བཏབ་བཞིན། གུ་རུ་རིན་པོ་ཆེས་ནུབ་ཕྱོགས་བདེ་བ་ཅན་གྱི་ཞིང་ཁམས་སུ། བཅོམ་ལྡན་འདས་མགོན་པོ་འོད་དཔག་ཏུ་མེད་པའི་ཞབས་དྲུང་དུ་ཕྱིན་ནས། ཟབ་ལམ་འཕོ་བའི་གདམ་པ་འདི་ཉིདཿ བློན་པོ་ཉི་མ་ཁོ་ན་ལས་གཞན་ལ་མི་འཆད་པའི་བཀའ་རྒྱས་བཏབ་སྟེ་གནང་བཞིན། སློབ་དཔོན་གྱིས་བློན་པོ་གཅིག་པུ་ལ་གནང་ཞིང་། ཉམས་སུ་བླངས་པས་གྲུབ་འབྲས་མངོན་དུ་གྱུར་ནས། མེས་ཚིག་པའི་སེམས་ཅན་རྣམས། ཐར་ལམ་དུ་དྲངས་པའི་རྟགས་མཚན་ཁྱད་པར་ཅན་བྱུང་བར་གྱུར་ཏོ། །དེ་ནས་གདམ་པ་ཟབ་མོ་འདི་ཉིད། གུ་རུ་རིན་པོ་ཆེའི་ཤངས་མཚལ་གྱིས་ཏ་ལའི་ལོ་མར་བྲིས་ཏེ། མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་གྱི་དབུ་སྐྲས་བཅིངས་ནས། རིན་པོ་ཆེ་སྣ་བཞིའི་སྒྲོམ་ཕྱི་ནང་གི་ཚུལ་དུ་བྱས་པ། ཆུ་དར་སྔོན་པོས་དྲིལ་དེ་བསྩལ་ནས། དྭགས་ལྷ་སྒམ་པོའི་རྒྱབ། མཚོ་མཎྜལ་ནག་པོར་གྲགས་པའི་དབུས་སུ། གཏེར་དུ་སྦས་ཤིང་ཀླུ་རྒྱལ་གཙུག་ན་རིན་ཆེན་གཏེར་གྱི་སྲུང་མར་བསྐོས་ཏེ། མ་འོངས་པའི་དུས་ཀྱི་ཚེ། གཏེར་སྟོན་ཉི་ཟླ་སངས་རྒྱས་ཉིད་མ་བྱུང་གི་བར་དུ། སུ་ལའང་མ་གཏད་ཅིག་ཅེས་གསུངས་བཞིན། གཏེར་འདོན་པའི་དུས་ལ་བབས་པའི་ཚེ། བློན་པོ་ཉི་མས་གདམ་པ་འདི་ཉིད་ཞུ་བའི་ཡོན་དུ་གསེར་དངུལ་ཉི་ཟླའི་རྣམ་པ་ལྟ་བུ་ཟུང་ཞིག་ཕུལ་རྟེན་འབྲེལ་གྱིས་གཏེར་སྟོན་ཉི་ཟླ་སངས་རྒྱས་ཞེས་གྲགས་པ་དེ་ཉིད། དུས་རྟགས་མངོན་གྱུར་གྱི་སྐབས་སུ་བྱོན་ནས། ཟབ་ཆོས་འདི་ཉིད་གཏེར་ནས་དྲངས་ཤིང་། མཚོ་དེར་གནས་པའི་ཀླུ་རྣམས་ཀྱི་གཙོས་སྲོག་ཆགས་ཕྲ་མོ་ཡན་ཆོད། རང་སྐལ་དང་མཚམས་པའི་ཐར་ལམ་ལ་བཀོད་པ་ཡང་། ཟབ་ཆོས་འདི་ཉིད་ཁོ་ནའི་བྱིན་རླབས་ཡིན་པར་རིགས་ཏེ། མདོ་ལམ་དུ་གྲངས་མེད་གསུམ་གྱི་དམ་བཅའ། སྔགས་ཀྱི་ཚེ་གཅིག་ལུས་གཅིག་ལ་གྲོལ་བ་ཐོབ་པར་གསུངས་པའི་དགོངས་པ་དང་། སྔགས་ཀྱི་ཚེ་གཅིག་ལུས་གཅིག་གི་དམ་བཅའ་ཡང་། མྱོང་གྲོལ་དམ་རྫས་བཏགས་གྲོལ་འཁོར་ལོཿ རེག་གྲོལ་མུ་ཏྲཿ མཐོང་གྲོལ་ཙཀྲ་ཐོས་གྲོལ་འཕོ་བ་སོགས་མང་དུ་ཡོད་པ་བཞིན། འཕགས་ཆོས་སོ་སོར་སྣང་ཞིང་སངས་རྒྱས་སྨན་བླའི་མཚན་གཅིག་ཐོས་པས་ངན་སོང་གི་སྡུག་བསྔལ་སེལ་བ་དང་། རིན་ཆེན་གཙུག་ཏོར་ཅན་གྱི་མཚན་འཆི་ཁ་མའི་རྣ་ལམ་དུ་བསྒྲགས་ན། སུམ་ཅུ་རྩ་གསུམ་གྱི་ལྷར་སྐྱེ་བ་དང་། སོར་འབྲང་འཁོར་ལོས་བར་དོའི་འཇིགས་པ་དང་སྡུག་བསྔལ་བསལ་བ་སོགས། ཟབ་ཁྱད་ཅན་གྱི་གདམ་པ་སྔགས་གསར་རྙིངགཉིས་ཀ་ན་མང་དུ་ཡོད་མོད། དེ་དག་ལས་ཁྱད་པར་དུ་འཕགས་པ། མྱུར་ལམ་འཕོ་བའི་མན་ངག་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམ་ངག་འདི་ལ་དད་གུས་བསྐྱེད་དེ་ཉན་པ་གལ་ཆེ་སྟེ། མཚན་བརྗོད་ལས། སྐད་ཅིག་གཅིག་གིས་བྱེ་བྲག་བྱེད། སྐད་ཅིག་གཅིག་གིས་རྫོགས་སངས་རྒྱས། ཞེས་དང་། རྒྱུད་ཀྱི་རྒྱལ་པོ་སམ་བྷི་ཊི་ལས། བུ་ག་དགུ་ཡི་སྟེང་ཕྱོགས་ནས། །འཕྲལ་དུ་ཡིད་ཀྱིས་འཕོ་བྱེད་ན། །ཉིན་རེར་བྲམ་ཟེ་གསོད་པ་དང་། །མཚམས་མེད་ལྔ་ནི་བྱེད་པ་དང་། །སྲོག་ཆགས་གསོད་ལ་དགའ་བ་རྣམས། །འདི་ཡི་ལམ་གྱིས་གྲོལ་བར་འགྱུར། །ཞེས་གསུངས་པ་སྡིག་པའི་ཕུང་པོ་ཅི་ཙམ་ཡོད་ཀྱང་སྦྱོང་། ནུས་པ་སྔགས་ཀྱི་ཁྱད་ཆོས་ཡིན་ཏེ། དཔལ་དུས་ཀྱི་འཁོར་ལོའི་རྒྱུད་ལས། །གདོལ་བ་སྨྱིག་མ་མཁན་ལ་སོགས། །མཚམས་མེད་ལྔ་ནི་བྱེད་པ་དག །སྔགས་ཀྱི་སྤྱོད་པ་རྗེས་སྤྱད་ན། །སྐྱེ་འདི་ཉིད་ལ་སངས་རྒྱས་འགྱུར། །ཞེས་གསང་སྔགས་སྤྱིའི་ཁྱད་ཆོས་དང་། ཁྱད་པར་འཕོ་བ་དངོས་ཀྱི་ཁྱད་པར་ནི། ཀྱེ་རྡོར་རྩ་རྒྱུད་ལས། བདེ་བ་གང་ཡིན་འཆི་བ་སྟེ། དེ་ཡི་བདེ་བ་བསམ་གཏན་བརྗོད། ཅེས་འཕོ་བའི་སྟོབས་ཀྱིས་བདེ་བ་ཐོབ་པར་གསུངས་པ་དང་། རྡོ་རྗེ་གདན་བཞིའི་རྒྱུད་ལས་ཀྱང་། །ཉེས་པ་ཀུན་གྱིས་གོས་པ་ཡང་། །འཕོ་བའི་སྦྱོར་བ་སྦྱར་བས་གྲོལ། །སྡིག་པས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། །ཞེས་སོགས་སྔགས་གསར་རྙིང་གཉིས་ཀར་འཕོ་བའི་འཕགས་ཆོས་དང་ཕན་ཡོན་མང་དུ་གསུངས་པ་ལ་དད་པ་དང་མོས་གུས་སྐྱེད་ཅིག། གསུམ་པ་ནི། དེ་ཡང་གཤིན་པོ་དེ་ཉིད་དབུགས་དང་བྲལ་ཉེའི་སྐབས་རང་ཉིད་སྔས་དྲུང་འདྲ་མོར་ཡོད་ན་མན་ངག་ཟབ་མོ་འདི་བཞིན་གལ་ཆེ་བས་མཉམ་བཞག་གི་ངང་ནས། འོ་ཆྒཻ་མོ་ཁྱོད་རང་གི་སྙིང་ནང་དུ་ཡི་གེ་ཨཱཿ དམིགས་གསལ་ལ་ཡི་གེ་ཧྲཱིཿཞེས་ཀྱང་བསྒྱུར་ཆོག། དཀར་པོ་ཞིག་སྒོམ་ལ་ངེད་ཀྱིས་ཨའི་སྒྲ་བརྩེགས་མར་བརྗོད་པ་དང་ལྷན་ཅིག་བརྡ་དོན་ངོ་འཕྲོད་པར་མཛོད་ལ། ཨཱཿ དེ་ཉིད་བདེ་བ་ཅན་གྱི་ཞིང་ཁམས་སུ་དཔག་ཆེན་གྱི་མདའ་འཕང་བ་བཞིན་དུ་སོང་བར་དམིགས་ཤིག། ཅེས་བརྗོད་ལ་གཙོ་བོར་རང་ཉིད་ཀྱི་འདུན་པ་གཅུར་ནས་དེའི་ལོ་གྲངས་ཀྱི་ཨཱཿསྙན་པོར་བཟླས་རྗེས། གཙུག་སྐྲ་འཐེན་པ་དང་ཿ ཨཱཿཉི་ཤུ་རྩ་གཅིག་བརྩེགས་མར་བརྗོད་པས་མཐོ་རིས་སུ་དྲངས་ཏེཿ ཉི་ཟླ་ཁ་སྦྱོར་ལས། ཡི་གེ་ཨཱཿཡི་སྦྱོར་བ་ཡིས། དབུགས་དང་དེ་ཡི་ལོ་གྲངས་སྦྱར། གལ་ཏེ་དེ་ལ་མ་ཤི་ན། སྤྱི་བོར་ཁ་གཏད་དབུགས་ཀྱིས་ནི། ཤེས་པ་ལུས་ཀྱི་དཀྱིལ་དུ་ཡང་། ཨ་རུ་དམིགས་ཏེ་བསྡུ་བར་བྱ། ཞེས་དང་། དེ་ལྟར་ཆོ་ག་ལྡན་པའི་ཚེ། །མི་དེ་དབུགས་དང་མ་བྲལ་ན། །ཡི་གེ་དབུགས་དང་བཅས་པ་ཡིས། །ཐེ་ཚོམ་མེད་པར་གནས་ནས་སྦྱོང་། །ཞེས་ཐིམ་རིམ་འཆར་པའི་དུས་རླུང་ཕྱིར་འགྲོ་བ་དང་བསྟུན་སྐྱེ་མེད་ཡི་གེས་སྦྱང་བར་བྱ་བ་ནི། ཤིན་ཏུ་ཟབ་པོ། འཕོ་བའི་དུས་ནི། རྒྱུད་ལས་ དུས་ལ་བབས་ན་འཕོ་བྱ་སྟེ། དུས་མིན་ལྷ་རྣམས་བསད་པར་འགྱུར། ཞེས་དང་། ཕྱི་འབྱུང་རྣམས་ཐིམ་རྗེས་སུ་འཕོ་བ་འདེབས་པ་ལ་ལ་དག་བཞེད་པ་ཡོད་ཀྱང་། གདོན་བགེགས་སོགས་ཀྱིས་དེ་ལྟར་བྱུང་བ་སླར་ལྡོག་སྲིད་ན་ཆོས་དང་གང་ཟག་ལ་བསྐུར་བ་སོགས་ཀྱིས་སྡིག་པ་བསགས་རྐྱེན་འགྱུར་སྲིད་པའི་ཕྱིར། ཕྱི་དབུགས་ཆད་ནས་ནང་གི་ཐིམ་རིམ་གྱི་སྐབས་སུ་བཏབ་ན་ལེགས་པར་གསུངས་སོ། །འཕོ་བ་སྦྱོངཐབས་ཀྱི་རྣམ་གྲངས་མང་ཡང་བསྡུ་ན་གསུམ་དུ་འདུས་ཏེ། དང་པོ་ཆོས་སྐུ་གཏད་མེད་ཀྱི་འཕོ་བ་ནི། རྣལ་འབྱོར་པ་རབ་ཕྱག་རྫོགས་ཀྱི་དོན་མངོན་དུ་གྱུར་ནས་དབུགས་ཆད་པ་དང་གྲོལ་བ་དུས་མཉམ་གྱི་གདེང་དང་ལྡན་པ་རྣམས་ལ་ནི་འཕོ་བ་སྦྱང་པ་དང་འདེབས་པ་གང་ཡང་མི་དགོས་ཏེ། འཕགས་ཡུལ་གྱི་པཎ་གྲུབ་མང་པོ་དང་། བོད་ཀྱི་རྗེ་འབངས་ཉེར་ལྔ་སོགས་འདས་ཚུལ་ལྟར་དང་། རྗེས་མར་པ་གཤེགས་ཁར་སྐུ་ལུས་བསྲངས་ནས་བུ་ཀུན་འཕོ་བ་འདི་ལྟར་གྱིས་གསུངས་ནས་སྤར་ཆོག་མཛད་པས་དབུ་གཙུག་གི་རུས་པའི་ཚལ་བུ་ཡལ་བའི་ཤུལ་ནས་འོད་ཁ་དོག་ལྔ་ལྡན་བྱ་སྒོང་ཙམ་ཞིག་ནམ་མཁར་ཐིམ་པ་ཀུན་གྱིས་མཐོང་བ་དང་། གྲུབ་ཐོབ་མེ་ལུང་རྡོ་རྗེས་ཚོགས་འཁོར་གྱི་དབུས་སུ་ཞལ་ཆེམས་ཀྱི་མགུར་གསུངས་མཐར་དབུ་གཙུག་ནས་འོད་ཟེར་དཀར་པོ་རྦ་ཕུབ་ཙམ་ཞིག་ནམ་མཁར་འཕགས་པ་ཇེ་ཆེར་གྱུར་པའི་འཇའ་འོད་དང་ཐིག་ལེས་ཁྱབ་པར་མཛད་པ་དང་། རྗེ་མི་ལ་ཡབ་སྲས་དང་། སྒམ་པོ་ཡབ་སྲས་སོགས་གསར་རྙིང་གི་སྐྱེ་ཆེན་མང་པོའི་མཛད་ཚུལ་ངོ་མཚར་བ་དག་ནི་ཕྱག་རྫོགས་ལ་བརྟན་པ་ཐོབ་པའི་ལོགས་སུ་སྦྱོང་ཐབས་མི་དགོས་སོ། །གཉིས་པ་ལོངས་སྐུ་ཟུང་འཇུག་གི་འཕོ་བ་ནི། གང་ཟག་བསྐྱེད་རིམ་ཚུལ་ལྡན་ལ་རང་དབང་ཐོབ་པ་དང་། སྒྱུ་ལུས་ལ་ཤིན་ཏུ་གོམས་པ་དག་གི་ལུས་སེམས་བྲལ་བ་དང་མཉམ་དུ་ཡི་དམ་གང་ཡིན་གྱི་གསང་གསུམ་རྒྱན་གྱི་འཁོར་ལོ་གནས་འགྱུར་གྱི་ཚུལ་དུ་འཕོ་བའོ། །གསུམ་པ་སྤྲུལ་སྐུ་རྩལ་སྦྱོང་གི་འཕོ་བ་ནི། སྤྱིར་ཁྲིད་རིམ་གངདག་གི་དཀྱུས་ནས་འབྱུང་བ་ལྟར་བླ་མ་མཉམ་མྱོང་ཅན་ལ་ཞུས་ནས་རྟགས་ཐོན་དུ་སྦྱོང་དགོས་པ་ཡིན་ནོ། །གང་ཞིག་རྩ་བའི་དམ་ཚིག་ཉམས་ཤིང་བཤགས་པས་མ་སྦྱང་བའི་རིགས་ལ་འཕོ་བ་བཏབ་ཀྱང་མི་ཐེབས་ཏེ། འཕོ་བ་སོགས་གདམ་ངག་རྣམས་བྱིན་རླབས་ལ་རག་ལས་ཤིང་། དེ་ཉིད་བླ་མ་ལ་རག་ལས་པའི་ཕྱིར་རོ། །འོ་ན་གོང་དུ་གསང་སྔགས་དང་ཁྱད་པར་འཕོ་བའི་ཁྱད་ཆོས་བཤད་པ་དང་འགལ་ལོ་ཞེན་མི་འགལ་ཏེ། དེ་ཉིད་སྡིག་པ་ཅན་གྱི་གང་ཟག་གིས་བླ་མ་དམ་པ་ལ་བརྟེན་ནས་འཕོ་བ་སོགས་མན་ངག་ཞུས་ནས་གྲོལ་བ་ཐོབ་པ་ལ་དགོངས་པའོ། །ཁྱད་པར་མན་ངག་འདི་ཉིད་ཀྱི་ལུགས་ལ་སྐབས་འདིར་ཐུན་མོང་དང་ཁྱད་པར་གྱི་སྔོན་འགྲོ་དབང་བཞི་བླང་བ་བཅསཿ བསྔོ་སྨོན་མ་གཏོགས་ཚང་མ་བཏང་རྗེས། ལྟུང་བཤགས་ཚར་ཅི་ནུས་དལ་བྲེལ་དང་བསྟུན་ནས་བཏངས་ལ་ཚེ་འདས་ཀྱི་ལུས་རྟེན་སྦྱང་བ་ནི། ཨོཾ་མ་ཧཱ་ཤུ་ནྱཻ་ཏ་ཛྙཱ་ན་བཛྲ་སྭ་བྷ་ཝ༴ སོགས་ཀྱི་སྦྱངས། སྟོང་པའི་ངང་ལས་དག་ཆེན་ཡེ་ཤེས་ཀྱི་རང་སྣང་ལས་གྲུབ་པའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་ཆུ་སྐྱེས་དང་ཚ་ཟེར་བརྩེགས་པའི་སྟེང་དུ་བམ་རོ་སེར་པོ་མགོ་གཡོན་བསྟན་གན་རྐྱལ་དུ་བསྒྱེེལ་བའི་གདན་ཁར་བྃཿཡིག་བྱུ་རུའི་མདོག་ཅན་གསལ་བ་ལས་འོད་ཟེར་ཡར་འཕྲོས་རྒྱལ་བ་སྲས་དང་བཅས་པ་མཆོད། མར་འཕྲོས་སེམས་ཅན་ཐམས་ཅད་ཀྱི་སྡིག་གྲིབ་སྦྱངས། ཚུར་འདུས་ས་བོན་ལ་ཐིམ། དེ་ཡོངས་སུ་གྱུར་པ་ལས། ཚེ་འདས་ཀྱི་ལུས་རྟེན་དེ་ཉིད་བཅོམ་ལྡན་འདས་མ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་ཁྲོ་ཞིང་འཛུམ་ལ་ཆགས་པའི་ཉམས་དང་ལྡན་ཞིང་ནུ་འབུར་ཟུང་གིས་མཛེས་པ་དམར་ལ་ཟླུམ་པའི་སྤྱན་གསུམ་དང་ལྡན་ཞིང་ཞལ་གདངས་ལྗགས་འདྲིལ་མཆེ་བའི་མྱུ་གུ་བཞི་ངོམ་ཞིང་རྣ་ལྟག་གཡས་སུ་ཕག་ཞལ་ནག་པོ་ངུར་སྒྲ་སྒྲོགས་པ། དབུ་སྐྲ་ཐོར་ཅོག་བྱས་ཤིང་ལྷག་མས་སྐུ་རྒྱབ་ཁེབས་པ། ཐོད་སྐམ་ལྔས་དབུ་རྒྱན་དང་། རློན་པ་ཁྲག་འཛག་པ་ལྔ་བཅུས་དོ་ཤལ། རུས་པའི་རྒྱན་དྲུག་དང་ཕྱག་རྒྱ་ལྔས་བརྒྱན་པ། ཞབས་གཡས་བསྐུམ་པའི་རྟིང་པ་བྷ་གར་གཏད་ཅིང་གཡོན་བརྐྱངས་བམ་རོའི་སྙིང་གར་བརྫིས་པ། ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བཞུགས་པ། ཕྱག་གཡས་རྡོ་རྗེའི་གྲི་གུག་ནམ་མཁར་ཕྱར་བས་རྟོག་པའི་ཟུག་རྔུ་མ་ལུས་པ་གཅོད་ཅིང་། གཡོན་པས་ཐོད་ཁྲག་ཐུགས་དཀར་འཛིན་པས་ཟག་མེད་བདེ་བའི་རོས་ཚིམས་པར་མཛད་པ། མཆན་ཁུང་གཡོན་ན་ཡབ་ཧེ་རུ་ཀ་མཚོན་ཕྱིར་ཁ་ཊཱཾ་རྩེ་གསུམ་ཊཱ་མ་རུ་དང་དར་དཔྱང་གིས་སྤྲས་པ་བཅིང་པ། སྣང་ལ་རང་བཞིན་མེད་པ་མེ་ལོང་དུ་གཟུགས་བརྙན་ཤར་བ་ལྟ་བུ་གསལ་ལ་འཛིན་པ་མེད་པ་ཆུ་ནང་དུ་ཟླ་བ་ཤར་བ་ལྟ་བུ། ཐོགས་པ་དང་རེག་པའི་སྐྱོན་དང་བྲལ་བའི་ལུས་དབུས་སུ་རྩ་ཨ་ཝ་དྷུ་ཏིའམ། དབུ་མ་ཤེལ་དཀར་གྱི་ཀ་བ་བཙུག་པ་ལྟ་བུ་ཕྱི་གསལ་ནང་གསལ་འོད་ཀྱི་རང་བཞིན། ཆུ་ཤིང་གི་སྡོང་པོ་ལྟར་དྲང་བ། པདྨའི་འདབ་མ་ལྟར་མཉེན་པ། རྒྱ་སྐྱེགས་ཀྱི་ཁུ་བ་ལྟར་དྭངས་པ། ཏིལ་གྱི་མར་མེ་ལྟར་གསལ་བ། མར་སྣེ་ལྟེ་འོག་སོར་བཞིའི་ཐད་དུ་ཟུག་ཅིང་ཕུག་རྡུགས་སུ་འགགས་པ། ཡར་སྣེ་ཚངས་པའི་བུ་གར་ཟུག་པ་ཟང་ཐལ་དུ་ཁ་ཕྱེ་བ། སྙིང་ཀའི་ཐད་དུ་སྨྱུག་མ་ཚིགས་ཀྱིས་འགགས་པ་ལྟར་པདྨ་དཀར་པོ་འདབ་བརྒྱད་ཀྱིས་བཀག་པའི་ཟེའུ་འབྲུའི་སྟེང་དུ། ཚེ་འདས་ཀྱི་རླུང་སེམས་དབྱེར་མེད་ཀྱི་ངོ་བོ་འོད་ཀྱི་ཐིག་ལེ་དཀར་ལ་དམར་བའི་མདངས་ཆགས་པ་རྒྱ་སྲན་ཙམ་ཞིག་འཕར་འདར་གྱི་རྣམ་པར་གནས་པར་བསམ་ལ། དབུ་མའི་ཡར་སྣེའི་བླར་སེང་གེ་བརྒྱད་ཀྱིས་བཏགས་པའི་རིན་པོ་ཆེའི་ཁྲི་སྟེང་དུ་སྣ་ཚོགས་པདྨ་འདབ་མ་མང་དུ་གྱེས་པའི་གདན་ཁར་ཟླ་བའི་དཀྱིལ་འཁོར་ཉ་གང་བ། དེའི་སྟེང་དུ་ཕྱོགས་བཅུ་དུས་གསུམ་གྱི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དཔལ་ཡོན་གཅིག་ཏུ་དྲིལ་བའི་སྤྱི་གཟུགས་བཅོམ་ལྡན་འདས་རྒྱལ་བ་འོད་མཚན་སྟོང་འབར་སྐུ་མདོག་པདྨ་ར་གའི་ལྷུན་པོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུའི་གཟི་འོད་ཀྱིས་སྲིད་ཞིའི་གནས་ཀུན་ཡོངས་སུ་ཁྱབ་པའི་བདག་ཉིད་ཅན། ཞལ་གཅིག་ཕྱག་གཉིས་མཉམ་བཞག་གི་སྟེང་ན་ཡེ་ཤེས་ཀྱི་བདུད་རྩིས་བཀང་བའི་ལྷུང་བཟེད་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་། དབུ་ལ་གཙུག་ཏོར་ཞབས་ལ་འཁོར་ལོ་སོགས་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་མཛེས་པ། ཆོས་གོས་རྣམ་གསུམ་སྐུ་ལ་གསོལ་བ། དེའི་གཡས་སུ་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དཀར་པོ་ཕྱག་གཡས་སྐྱབས་སྦྱིན་དང་གཡོན་པདྨ་དཀར་པོའི་ཡུ་བ་མཐེབ་མཛུབ་ཀྱིས་ཐུགས་ཀར་འཛིན་པ། གཡོན་དུ་རྒྱལ་བ་ཀུན་གྱི་མཐུ་སྟོབས་ཀྱི་མངའ་བདག་སེམས་དཔའ་མཐུ་ཆེན་ཐོབས་མཐིང་ག་གཡས་སྐྱབས་སྦྱིན་དང་གཡོན་ཆུ་སྐྱེས་ཀྱིས་བཏེགས་པའི་རྡོ་རྗེ་འཛིན་པ་གཉིས་ཀའང་གཙོ་བོ་ལ་ཞལ་ཕྱོགས་པའི་བཞེངས་སྟབས་ཀྱིས་བཞུགས་པ། མཐའ་བསྐོར་དུ་བཅོམ་ལྡན་འདས་སྨན་གྱི་བླ་བཻཌཱུཪྱའི་འོད་ཀྱི་རྒྱལ་པོ་དང་། གཡས་སུ་བྱང་སེམས་ཉི་མ་ལྟར་སྣང་བྱེད་དང་། གཡོན་དུ་ཟླ་བ་ལྟར་གསལ་བྱེད་སོགས་དང་། གཞན་ཡང་བདེ་གཤེགས་མཆེད་བདུན་བྱང་སེམས་ཉན་རང་སོགས་མདོར་ན་བདེ་ཆེན་ཞིང་གི་རྟེན་དང་བརྟེན་པར་བཅས་པ་རྣམས་དང་། ཁྱད་པར་ཟབ་ལམ་འཕོ་བའི་བརྒྱུད་ལྡན་བླ་མ་དམ་པ་རྣམས་དང་། ཡི་དམ་དཔའ་བོ་མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས་སྤྲིན་གྱི་ཕུང་པོ་གཏིབས་པ་ལྟར་བཞུགས་པ་དེ་རྣམས་ཀྱི་མཁྱེན་པའི་ཡེ་ཤེས་ཀྱིས་དགོངས་ཤིང་བྱམས་བརྩེའི་ཐུགས་རྗེས་གཟིགས་བཞིན་མཛད་ཕྲིན་མཐུ་སྟོབས་ཀྱི་ནུས་པས་ཚེ་ལས་འདས་པ་ལས་ངན་འཁྲུལ་པའི་དབང་དུ་མི་གཏོང་བར་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་མྱུར་བ་ཉིད་དུ་འདྲེན་པའི་ཐུགས་དམ་ཞལ་བཞེས་དུས་ལས་མི་ཡོལ་བ་ཞིག་མགོན་པོ་འོད་དཔག་ཏུ་མེད་པ་ཁྱེད་མཁྱེན་ནོ་ཁྱེད་ལ་བརྟེན་ནོ། །སྐྱབས་དང་རེ་ས་ཁྱེད་ལས་གཞན་མེད་པས་བཀའ་དྲིན་དང་ཐུགས་རྗེ་མ་ཆུང་ཞིག །ཅེས་བློ་སྙིང་རྩེ་གཅིག་ཏུ་བཀལ་བཞིན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་མ་ཡེངས་པའི་ངང་ནས་བརྒྱ་རྩ་བརྒྱད་ལ་སོགས་པ་དལ་ཁོམ་དང་བསྟུན་ཏེ་རིགས་པར་བརྗོད། སྤྲོ་ན་རིན་ཆེན་གཙུག་ཏོར་ཅན་གྱི་མཚན་དང་། སེམས་དཔའ་གཉིས་ཀྱི་མཚན་སོགས་ཅི་ནུས་བརྗོད་ནས། སྐབས་འདིའི་དགོས་དོན་ནི། ཕ་དམ་པས། འཆི་བ་འཆི་བ་མ་ཡིན་ཏེ། རྣལ་འབྱོར་སངས་ཆུང་རྒྱ་བ་ཡིན། ཞེས་གསུངས་པ་ལ། ཚེ་འདས་ཀྱི་རྣམ་ཤེས་འོད་དཔག་མེད་པའི་ཐུགས་ཀར་གནས་སྤར་དགོས་པ་ལ་རྟེན་འབྱུང་བསླུ་མེད་ལྟར་གལ་ཆེ་བ་ཡང་། ཨོ་རྒྱན་ཆེན་པོའི་ཐུགས་ཀྱི་འོད་ཟེར་ལས་སྤྲུལ་པའི་རིག་འཛིན་ཆེན་པོ་མི་འགྱུར་རྡོ་རྗེའི་དགོངས་གཏེར་འཕོ་ལུང་ལས་མ་དག་འཁོར་བའི་སྒོ་དགུ་དགག་དགོས་པར་གསུངས་པ་སྔགས་གསར་མ་དང་ཤིན་ཏུ་མཐུན་ཏེ། རྡོ་རྗེ་གདན་བཞིའི་རྒྱུད་ལས། སྒོ་རྣམས་ཀྱི་ནི་བྱེ་བྲག་ལས། །འཁོར་བའི་བྱེ་བྲག་འབྱུང་བ་ཡིན། །དེ་ཡང་སྒོ་ཡི་བྱེ་བྲག་ལས། །བསྒྲུབ་པའི་ལམ་ནི་བཟང་པོ་བསྟེན། །ཞེས་གསུངས་པས། ལུས་ཀྱི་བུ་ག་དགུ་པོ་ལས་རྣམ་ཤེས་ཐོན་འབྲས་སོ་སོར་ཡོད་དེ། གང་ཞེ་ན་བཤང་ལམ་ནི་དམྱལ་བ། གསང་གནས་དུད་འགྲོ། ལྟེ་བ་འདོད་ལྷ། ཁ་ཡི་དྭགས། སྣ་བུག་གནོད་སྦྱིན། མིག་གཡས་མིའི་རྒྱལ་པོ་གཡོན་མི་ཕལ་བ། རྣ་བ་མིའམ་ཅི། མཛོད་སྤུ་ནི་གཟུགས་ཁམས་ཀྱི་འདོད་ལྷ། མཚོགས་མ་ནི་གཟུགས་མེད་ཀྱི་ཁམས། ཚངས་བུག་དག་པ་མཁའ་སྤྱོད་ཀྱི་ལམ་ཞེས་བཤད་དོ། །དེ་ལ་ཚངས་བུག་མ་གཏོགས་གཞན་རྣམས་དགག་དགོས་པ་ཡང་། བྱང་ཕྱོགས་སྒོ་སྲུང་ན་རོ་པས། །སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་ཕྱེ། །ཐར་བའི་ལམ་ལ་ཐེ་མི་ཚོམ། །ཞེས་གསུངས་པ་བཞིན་རང་ཉིད་ཐུགས་རྗེ་ཆེན་པོའི་ཐུགས་ཀ་ནས་ཧྲཱིཿཡིག་དམར་པོ་དགུ་འཕྲོས་པས་མ་དག་འཁོར་བའི་སྒོ་དགུ་པོ་བུག་པ་འདག་ཞལ་གྱིས་བཀག་པ་ལྟར་བསེར་བུ་ཙམ་ཡང་རྒྱུ་བའི་སྐབས་དང་བྲལ་བར་བསམ། ལ། ཧྲཱིཿ དགུ་བརྗོད དེ་ནས་དད་པ་རྣམ་གསུམ་དང་ལྡན་བཞིན་བདག་དང་འཕོ་བྱ་ཟུང་འཇུག་གི་འདུན་པ་དམིགས་འདོན་ཡ་མ་བྲལ་བའི་ངང་ནས། རབ་ཏུ་སྙན་པའི་དབྱངས་ཀྱིས་གསོལ་བ་འདི་བཞིན་གདབ་པོ། །སངས་རྒྱས་འོད་དཔག་མེད་ལ་ཕྱག་འཚལ་ལོ། ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། ཟབ་ལམ་འཕོ་བ་འབྱོང་བར་བྱིན་གྱིས་རློབས། མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། སངས་རྒྱས་འོད་དཔག་མེད་ལ་ཕྱག་འཚལ་ལོ། ལོངས་སྐུ་ཐུགས་རྗེ་ཆེན་པོ་ལ་གསོལ༴ ཟབ་ལམ༴ སོགས༴ སངས་རྒྱས་འོད་དཔག༴ སྤྲུལ་སྐུ་པདྨ་འབྱུང་གནས་ལ་གསོལ༴ ཟབ་ལམ༴ སོགས༴ སངས་རྒྱས་འོད་དཔག༴ མཁའ་འགྲོ་ཡེ་ཤེས་མཚོ་རྒྱལ་ལ་གསོལ༴ ཟབ་ལམ༴ སོགས༴ སངས་རྒྱས་འོད་དཔག༴ གཏེར་སྟོན་ཉི་ཟླ་སངས་རྒྱས་ལ༴ ཟབ་ལམ་འཕོ་བ་འབྱོང་བར་བྱིན་གྱིས་རློབས། མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། སངས་རྒྱས་འོད་དཔག༴ མཚུངས་མེད་ནམ་མཁའ་རྒྱལ་མཚན་ལ༴ ཟབ་ལམ༴ སངས་རྒྱས་འོད་དཔག༴ རྟོགས་ལྡན་སཾ་ག་བྷ་ཏྲ་ལ༴ ཟབ་ལམ༴ སངས་རྒྱས་འོད་དཔག་མེད༴ ཕ་རྒོད་དྲི་མེད་བློ་གྲོས་ལ༴ ཟབ་ལམ༴ སངས་རྒྱས་འོད་དཔག༴ ཆོས་རྗེ་སངས་རྒྱས་རྒྱལ་མཚན་ལ༴ ཟབ་ལམ་འཕོ༴ སངས་རྒྱས་འོད་དཔག༴ མཚུངས་མེད་མ་ཏིའི་མཚན་ཅན་ལ་གསོལ༴ ཟབ་ལམ༴ སངས་རྒྱས་འོད་དཔག༴ ཡོངས་འཛིན་ཕུན་ཚོགས་རྣམ་རྒྱལ་ལ༴ ཟབ་ལམ༴ སངས་རྒྱས་འོད་དཔག༴ འདྲེན་མཆོག་ཀརྨ་ཆོས་རྒྱལ་ལ༴ ཟབ་ལམ༴ སངས་རྒྱས་འོད༴ གསང་སྔགས་འཆང་པདྨ་དབང་དྲག་ལ་གསོལ༴ ཟབ་ལམ༴ སངས་རྒྱས་འོད་དཔག་མེད་ལ༴ ཐུགས་ཆེན་ཀརྨ་ཆགས་མེད་ལ༴ ཟབ་ལམ༴ སངས་རྒྱས་འོད་དཔག་མེད༴ གྲུབ་ཐོབ་པདྨ་རིག་འཛིན་ལ༴ ཟབ་ལམ༴ སངས་རྒྱས་འོད་དཔག་མེད་ལ༴ འདྲེན་མཆོག་ནམ་མཁའ་འོད་གསལ་ལ་གསོལ༴ ཟབ་ལམ༴ སངས་རྒྱས་འོད་དཔག་མེད༴ འགྱུར་མེད་ཐེག་མཆོག་བསྟན་འཛིན་ལ༴ ཟབ་ལམ༴ སངས་རྒྱས་འོད་དཔག་མེད་ལ༴ པདྨ་ཀུན་གྲོལ་རྣམ་རྒྱལ་ལ༴ ཟབ་ལམ༴ སངས་རྒྱས་འོད་དཔག༴ ངེས་དོན་བསྟན་འཛིན་བཟང་པོ་ལ༴ ཟབ་ལམ༴ སངས་རྒྱས་འོད་དཔག་མེད༴ འཇིགས་མེད་ཕྲིན་ལས་འོད་ཟེར་ལ༴ ཟབ་ལམ༴ སངས་རྒྱས་འོད་དཔག༴ མི་འགྱུར་ནམ་མཁའི་རྡོ་རྗེ་ལ༴ ཟབ་ལམ༴ སངས་རྒྱས་འོད་དཔག་མེད༴ གྲུབ་དབང་ཛྙཱ་ན་བཛྲ་ལ༴ ཟབ་ལམ༴ སངས་རྒྱས་འོད་དཔག༴ འཇིགས་མེད་ཆོས་ཀྱི་དབང་པོ་ལ༴ ཟབ་ལམ༴ སངས་རྒྱས་འོད་དཔག༴ འཇིགས་མེད་ཕུན་ཚོགས་འབྱུང་གནས་ལ༴ ཟབ་ལམ༴ སངས་རྒྱས་འོད་དཔག༴ འཇམ་དབྱངས་མཁྱེན་བརྩེའི་དབང་པོ་ལ༴ ཟབ་ལམ༴ སངས་རྒྱས་འོད་དཔག༴ འཇིགས་མེད་བསྟན་པའི་ཉི་མ་ལ༴ ཟབ་ལམ༴ སངས་རྒྱས་འོད་དཔག༴ དྲིན་ཆེན་རྩ་བའི་བླ་མ་ལ་གསོལ༴ ཟབ་ལམ༴ མྱུར་ལམ༴ ཚེས་འདས༴ བདེ་བ་ཅན་དུ་སྐྱེ་བར་བྱིན་གྱིས་རློབས། ཞེས་གསོལ་བ་བཏབ་མཐར། ཚེ་འདས་ཀྱི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་འཕང་བ་བཞིན་འོད་དཔག་མེད་ཀྱི་ཐུགས་ཀར་འཕོས་ཤིག །ཅེས་བསམ་ལ། ཧིཀ། ཉེར་གཅིག་ཙམ་བརྗོད་པས་འཕོ་ཞིང་། ཡང་འོད་དཔག་མེད་ཀྱི་མཚན་བརྗོད་ལན་གསུམ་མཐར། གོང་བཞིན་གསོལ་འདེབས་སྤར་ཆོག་བཅས་ལན་གཉིས་ལྡབ་མཐར། མཚན་ལན་གསུམ་བརྗོད་མཐར། གསོལ་འདེབས་འབྲིང་པོ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཆོས་སྐུ་སྣང་བ་མཐའ་ཡས་ལ་གསོལ༴ ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན༴ ཚེ་འདས་འདི་ནས་ཚེ་འཕོས་གྱུར་མ་ཐགཿ བདེ་བ་ཅན་དུ་སྐྱེ་བར་བྱིན་གྱིས་རློབས། སངས་རྒྱས་འོད་དཔག༴ ལོངས་སྐུ་ཐུགས་རྗེ་ཆེན་པོ་ལ་གསོལ༴ ཟབ་ལམ༴ སངས་རྒྱས་འོད་དཔག་མེད༴ སྤྲུལ་སྐུ་པདྨ་འབྱུང་གནས་ལ༴ ཟབ་ལམ༴ སངས་རྒྱས་འོད་དཔག༴ མཁའ་འགྲོ་ཡེ་ཤེས་མཚོ་རྒྱལ་ལ༴ ཟབ་ལམ༴ སངས་རྒྱས་འོད་དཔག༴ གཏེར་སྟོན་ཉི་ཟླ་སངས་རྒྱས་ལ༴ ཟབ་ལམ༴ སངས་རྒྱས་འོད་དཔག༴ རྩ་བ་བརྒྱུད་པའི་བླ་མ་ལ༴ ཟབ་ལམ༴ སངས་རྒྱས་འོད་དཔག༴ དྲིན་ཅན་རྩ་བའི་བླ་མ་ལ༴ ཟབ་ལམ༴ སངས་རྒྱས་འོད་དཔག་མེད་ལ༴ ཡི་དམ་ཞི་ཁྲོ་རབ་འབྱམས་ལ༴ ཟབ་ལམ༴ སངས་རྒྱས་འོད་དཔག་མེད་ལ༴ མཁའ་འགྲོ་རྡོ་རྗེ་ཕག་མོ་ལ༴ ཟབ་ལམ༴ སངས་རྒྱས་འོད་དཔག༴ ཆོས་སྐྱོང་མ་མགོན་ལྕམ་དྲལ་ལ༴ ཟབ་ལམ༴ མྱུར་ལམ༴ ཚེ་འདས༴ བདེ་བ་ཅན་དུ་སྐྱེ་བར་བྱིན་གྱིས་རློབས། དམིགས་པ་དང་བཅས། ཧིཀཿ བདུན་ནམ་གསུམ་བརྗོད། གསོལ་འདེབས་བསྡུས་པ་ནི། མཚན་བརྗོད་ལན་གསུམ་མཐར། སངས་རྒྱས་འོད་དཔག་མེད་ལ་ཕྱག་འཚལ་ལོ། ཨོ་རྒྱན་པདྨ་འབྱུང་གནས་ལ་གསོལ༴ དྲིན་ཅན་རྩ་བའི་བླ་མས་ཐུགས་རྗེས་ཟུངས། རྩ་བ་བརྒྱུད་པའི་བླ་མས་ལམ་སྣ་དྲོངསཿ ཟབ་ལམ༴ མྱུར་ལམ༴ ཚེ་འདས༴ བདེ་བ་ཅན༴ གོང་བཞིན། ཚེ་འདས་ཀྱི་རྣམ་ཤེས་ཐིག་ལེ་དེ་སྐར་མདའ་འཕང་བ་བཞིན་འོད་དཔག་མེད་ཀྱི་ཐུགས་ཀར་ཐིམ་པར་བསམ། ལ་ ཧིཀཿ ཉེར་གཅིག་བརྗོད་པས་འཕོ་ཞིང་། དམིགས་པ་སྤར་ཆོག་བཅས་བཏང་ངོཿ དེ་ཡང་གསོལ་འདེབས་རྒྱས་པ་ལན་གསུམ་མམ། མ་ལྕོགས་ཚེ་རྒྱས་འབྲིང་བསྡུས་གསུམ་ཚར་རེ་བཏང་ཡང་རུང་མོདཿ གང་ལྟར་ཡང་ཁྱད་པར་འབྲི་གོང་ཆོས་ཀྱི་གྲག་པས་འཕོ་བ་འཇའ་ཟུག་མ་འདོན་འགྲིགས་སུ་བཀོད་པ་ལས། སེམས་ཅན་འཆི་ཁ་མའི་རྣ་ལམ་དུ་སངས་རྒྱས་སྨན་བླའི་མཚན་བརྗོད་ནཿ བདེ་བར་གཤེགས་པ་བརྒྱད་ཀྱིས་ནུབ་ཕྱོགས་བདེ་བ་ཅན་དུ་སྐྱེལ་བར་གསུངས་བཞིནཿ གལ་ཤིན་ཏུ་ཆེ་སྟེ་མཚན་བརྗོད་འདི་ལྟར་རོཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་དུ། བཅོམ་ལྡན་དེ་བཞིན་གཤེགས༴ རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ༴ བཅོམ་ལྡན་དེ་བཞིན་གཤེགས༴ གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པའི་རྒྱལ་པོ་ལ༴ བཅོམ་ལྡན་འདས་དེ༴ སངས་རྒྱས་མྱ་ངན་མེད་མཆོག་དཔལ་ལ༴ བཅོམ་ལྡན་འདས་དེ་བཞིན༴ སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ༴ བཅོམ་ལྡན་འདས༴ ཆོས་རྒྱ་མཚོ་མཆོག་གི་བློས་རྣམ་པར་རོལ་པའི་མངོན་པར་མཁྱེན་པའི་རྒྱལ་པོ་ལ༴ བཅོམ་ལྡན་འདས༴ སངས་རྒྱས་སྨན་གྱི་བླ་བཻཌཱུཪྱའི་འོད་ཀྱི་རྒྱལ་པོ་ལ༴ བཅོམ་ལྡན་འདས༴ དཔལ་རྒྱལ་བ་ཤཱཀྱ་ཐུབ་པ་ལ༴ བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ༴ བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་དབྱངས་དང་སྐྱབས་གྲོལ་མཛད་རྡོ་རྗེ་འཛིན་པ་ཉི་མ་ལྟར་རྣམ་པར་སྣང་བྱེད་དང་ཟླ་བ་ལྟར་གསལ་བྱེད་ལ་སོགས་པའི་སེམས་དཔའ་ཆེན་པོ་བཅུ་དྲུག་གཙོ་བོར་བཞུགས་པའི་བྱང་ཆུབ་སེམས་དཔའི་ཚོགས་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །གསོལ་འདེབས་ནི། ཨོཾ་སྭ་སྟི། གསེར་གྱི་མདོག་ཅན་སྐྱབས་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིདཿ གཞན་གྱིས་མི་ཐུབ་ཞིང་གི་དཔལ་གྱུར་པའི། །མཚན་ལེགས་ཡོངས་བསྒྲགས་དཔལ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་སེར་པོ་མཆོད་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་ལྡན་པའི་ཞིང་གི་དཔལ་གྱུར་བའི། །རིན་ཆེན་ཟླ་བའི་ཞབས་ལ༴ མགོན་པོ་ཁྱེད་ལ༴ ཚེ་འདས་བདེ་ཆེན༴ འཛམ་བུའི་གསེར་འདྲ་ཆོས་སྟོན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །སྤོས་ཀྱི་ཡོངས་གང་ཞིང་གི་དཔལ་གྱུར་པའི། །གསེར་བཟང་དྲི་མེད་སྣང་ལ༴ མགོན་པོ་ཁྱེད༴ ཚེ་འདས་བདེ་ཆེན༴ སྐུ་མདོག་དམར་སྐྱ་མཉམ་བཞག་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །མྱ་ངན་མེད་པའི་ཞིང་གི་དཔལ་གྱུར་པའི། །མྱ་ངན་མེད་མཆོག་དཔལ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་དཀར་དམར་ཆོས་སྟོན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །ཆོས་ཀྱི་རྒྱལ་མཚན་ཞིང་གི་དཔལ་གྱུར་པའི། །ཆོས་བསྒྲགས་རྒྱ་མཚོའི་དབྱངས་ལ༴ མགོན་པོ༴ ཚེ་འདས༴ བྱུ་རུའི་མདོག་ཅན་མཆོག་སྦྱིན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་རྒྱ་མཚོའི་ཞིང་གི་དཔལ་གྱུར་པའི། །མངོན་མཁྱེན་རྒྱལ་པོ་དེ་ལ༴ མགོན་པོ༴ ཚེ་འདས༴ སྐུ་མདོག་སྔོན་པོ་མཆོག་སྦྱིན་ཕྱག་རྒྱ་ཅན། །བཅུ་གཉིས་སྨོན་གྲུབ་ཚོགས་གཉིས་དཔལ་གྱིས་བརྗིད། །བཻཌཱུཪྱ་སྣང་ཞིང་གི་དཔལ་གྱུར་པའི། །སྨན་པའི་རྒྱལ་པོ་དེ་ལ་ཕྱག་འཚལ་ལོ། །མགོན་པོ༴ ཚེ་འདས༴ གསེར་གྱི་མདོག་ཅན་ས་གནོན་ཕྱག་རྒྱ་ཅན། །རྨད་བྱུང་ཐུགས་རྗེ་བརྩོན་འགྲུས་ཆེན་པོའི་མཐུས། །མི་མཇེད་འཇིག་རྟེན་ཁམས་ཀྱིི་དཔལ་གྱུར་པའི། །འདྲེན་མཆོག་ཤཱཀྱའི་ཏོག་ལ༴ མགོན་པོ༴ ཚེ་འདས༴ དམར་སེར་ཕྱག་གཡས་ཆོས་འཆད་རྡོ་རྗེ་ཅན། །གཡོན་པ་མཉམ་བཞག་པོ་ཏི་ལེགས་པར་བསྣམས། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །ཤེས་རབ་ཕ་རོལ་ཕྱིན་ལ༴ ཡུམ་ཆེན་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས༴ རབ་མཛེས་ཡིད་འོང་རིན་ཆེན་རྒྱན་གྱིས་སྤྲས། །ཟླ་བའི་གདན་ལ་སྐྱིལ་ཀྲུང་ཚུལ་གྱིས་བཞུགས། །མཁྱེན་དང་བརྩེ་དང་ནུས་པ་ཕུན་སུམ་ཚོགས། །སེམས་དཔའ་ཆེན་པོ་རྣམས་ལ་ཕྱག་འཚལ་ལོ། །འཕགས་པའི་ཚོགས་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །ཞེས་གསོལ་བ་བཏབ་མཐར། ཚེ་འདས་ཀྱི་རྣམ་ཤེས་ཀྱི་ངོ་བོ་སྙིང་གའི་ཐིག་ལེ་དེ་ཉིད་མེ་སྟག་ཡལ་བ་བཞིན་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་བསམ་བཞིན། ཧིཀཿ ཉེར་གཅིག་གམ་བདུན་བརྗོད། ༈ སྔགས་གསར་མའི་ལུགས་ལས་འཕོ་བའི་གདམ་པ་མང་དུ་ཡོད་ཀྱང་། གང་ཟག་སྙན་བརྒྱུད་དང་བཀའ་བབས་དོན་གྱི་བརྒྱུད་པ་ལྟར་འགོད་པ་ལ། རྗེས་མར་པ་ནས་མི་ལ་རས་པ་སྒམ་པོ་པ་སོགས་བཀའ་བརྒྱུད་གསེར་གྱི་ཕྲེང་བ་རིམ་བྱོན་གྱི་རྗེས་སུ་འབྲང་ནས་རྗོད་བྱེད་མདོར་དྲིལ་ཏེ་བསྟན་པ་ལ། འཕོ་བྱ་འཕོ་བྱེད་འཕོ་ཡུལ་སོགས་ཕྱིར་གོང་ལྟར་ལ། སྒོས་སུ་སྙིང་གའི་ཐིག་ལེ་ཧཱུཾ་སྔོན་པོར་གྱུར་བ། འཕོ་ཡུལ་གྱི་ཐུགས་ཀ་ནས་ཐུགས་རྗེའི་དཔྱང་ཐག་ཡེ་ཤེས་ལྔའི་འོད་ཟེར་འཇའ་ཚོན་གྱི་ཆུན་པོ་ལྟ་བུ་བྱུང་ནས་རང་གི་སྙིང་གའི་ཧཱུྃ་ཡིག་ལ་རེག་པས་རྣམ་ཤེས་ཀྱི་ངོ་བོ་ཧཱུཾ་ཡིག་དེ་སྦུབ་ཆུ་ནས་ཆུ་དྲངས་བ་བཞིན་འཇའ་ཚོན་གྱི་ཐག་པ་བརྒྱུད་དེ་སངས་རྒྱས་ཀྱི་ཐུགས་ཀར་ཐིམ་པའི་དམིགས་པ་དང་བསྒྲགས་ཏེ་སྤར་ཆོག་བྱེད་དགོས་པའི་ཁྱད་པར་ཙམ་མོ། །གསོལ་འདེབས་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །བཅོམ་ལྡན་རིགས་ཀུན་ཁྱབ་བདག་རྡོ་རྗེ་འཆང་། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །སྒྱུ་མའི་གྲོངཁྱེར་མི་རྟག་ཆུ་བུར་ལུས། །མི་གཙང་ལས་ཉོན་འཁྲུལ་པའི་གནས་ཁང་ན། །རང་རིག་འོད་གསལ་སེམས་ཉིད་ཆོས་ཀྱི་སྐུ། །སྣང་མཐའ་ཡས་པའི་ཞིང་དུ་འཕོ་བར་ཤོག །ཤར་ཟ་ཧོར་ནོར་བུའི་དགོན་པ་ན། །ཏེ་ལོ་ཤེས་རབ་བཟང་པོ་གསང་བའི་བདག །བཟོད་མེད་གདུང་ཤུགས༴ གོང་ལྟར་འགྲེས་སོ། །བྱང་ཕུ་ལ་ཧ་རིའི་དགོན་པ་ན། ན་རོ་ཡེ་ཤེས་དངོས་གྲུབ་པཎྜི་ཏ། བཟོད་མེད་གདུང་ཤུགས༴ སོགས༴ ལྷོ་གྲོ་བོ་ལུང་གི་དགོན་པ་ན། སྒྲ་བསྒྱུར་མར་པ་ཆོས་ཀྱི་བློ་གྲོས་རྗེ། བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །སྒྱུ་མའི་གྲོང་ཁྱེར་མི་རྟག་ཆུ་བུར་ལུས། །མི་གཙང་ལས་ཉོན་འཁྲུལ་པའི་གནས་ཁང་ན། །རང་རིག་འོད་གསལ་སེམས་ཉིད་ཆོས་ཀྱི་སྐུ། །སྣང་མཐའ་ཡས་པའི་ཞིང་དུ་འཕོ་བར་ཤོག །ནུབ་ལ་ཕྱི་གངས་ཀྱི་ར་བ་ན། །མི་ལ་བཞད་པ་རྡོ་རྗེ་གྲུབ་པའི་གཙོ། བཟོད་མེད་གདུང༴ སོགས༴ ཤར་དྭགས་ལྷ་སྒམ་པོའི་གནས་མཆོག་ན། །ཆོས་རྒྱལ་ཟླ་འོད་གཞོན་ནུ་རིན་པོ་ཆེ། །བཟོད་མེད༴ སོགས༴ རྣམ་དག་བཤད་སྒྲུབ་རྒྱ་མཚོའི་ཕོ་བྲང་ན། རྒྱལ་བསྟན་འཛིན་སྐྱོང་སྤེལ་མཛད་བརྒྱུད་འཛིན་སྡེ། བཟོད་མེད༴ སོགས༴ སྤྱི་གཙུག་ཉི་ཟླ་པདྨའི་གདན་སྟེང་ན། དྲིན་ཆེན་རྩ་བའི་བླ་མ་རིན་པོ་ཆེ། བཟོད་མེད༴ སོགས༴ མཆོག་ཐུན་དངོས་གྲུབ་རྒྱ་མཚོའི་མངའ་བདག་མཆོག །རྒྱུད་སྡེ་བཞི་དྲུག་ཡི་དམ་དཀྱིལ་འཁོར་ལྷ། །བཟོད་མེད༴ སོགས༴ བཀའ་གསང་དམ་ཚིག་རྡོ་རྗེའི་གན་མཛོད་ལ། །དབང་བསྒྱུར་མཁའ་འགྲོ་ཆོས་སྐྱོང་མཐུ་སྟོབས་བདག །བཟོད་མེད༴ སོགས༴ འཕོ་བྱ་འཕོ་བྱེད་འཕོ་ཡུལ་ཀུན་རྫོབ་ཆོས། །ཡོད་མེད་ལ་སོགས་མཐའ་ལ་མི་གནས་པ། །སྐུ་བཞི་ཡེ་ཤེས་ལྔ་ཡི་བདག་ཉིད་ཅན། །དོན་དམ་ཆོས་ཉིད་འཕོ་བ་མངོན་གྱུར་ཤོག །ཅེས་འདི་ཉིད་ཀྱི་དམིགས་གནད་བཤད་མ་ཐག་བཞིན། འཕོ་ཡུལ་གྱི་ཐུགས་ཀ་ནས་ཐུགས་རྗེའི་དཔྱང་ཐག་ཡེ་ཤེས་ལྔའི་འོད་ཟེར་འཇའ་ཚོན་གྱི་ཆུན་པོ་ལྟ་བུ་བྱུང་ནས་རང་གི་སྙིང་གའི་ཧཱུཾཿཡིག་དེ་སྦུབ་ཆུ་ནས་ཆུ་དྲངས་པ་བཞིན་འཇའ་ཚོན་གྱི་ཐག་པ་བརྒྱུད་དེ་སངས་རྒྱས་ཀྱི་ཐུགས་ཀར་ཐིམ། ཧཱུྃ་གསུམ་དང་ཕཊ྄ཿལྔའམ་གསུམ་བརྗོད་དོ། ། རང་ལུགས་དོན་བརྒྱུད་བླ་མའི་གསོལ་འདེབས་འཕོ་བ།རང་ལུགས་དོན་བརྒྱུད་བླ་མའི་གསོལ་འདེབས་འཕོ་བ་ནི། ཨེ་མ་ཧོ། ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས། ཟབ་ལམ་འཕོ་བ་འབྱུང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པ་དང་། །ཕྱིར་མི་ལྡོག་པའི་ཆོས་སྐུ་ཐོབ་པར་ཤོག །ལོངས་སྐུ་རྒྱལ་བ་རིགས་ལྔ་ལ་གསོལ༴ ཟབ་ལམ༴ སོགས༴ སྤྲུལ་སྐུ་རིགས་གསུམ་མགོན་པོ་ལ་གསོལ༴ ཟབ་ལམ་འཕོ༴ རིག་འཛིན་དགའ་རབ་རྡོ་རྗེ་ལ༴ ཟབ་ལམ༴ སོགས༴ མཁས་པ་ཤྲྀ་སིང་ཧ་ལ༴ ཟབ་ལམ༴ སོགས༴ སློབ་དཔོན་འཇམ་དཔལ་བཤེས་གཉེན་ལ་གསོལ༴ ཟབ་ལམ༴ སོགས༴ གུ་རུ་ཛྙཱ་ན་སུ་ཏྲ་ལ༴ ཟབ་ལམ༴ སོགས༴ པཎ་ཆེན་བི་མ་མི་ཏྲ་ལ༴ ཟབ་ལམ༴ སོགས༴ སློབ་དཔོན་པདྨ་འབྱུངགནས་ལ་གསོལ༴ ཟབ་ལམ༴ སོགས༴ ཆོས་རྒྱལ་ཁྲི་སྲོང་ལྡེའུ་བཙན་ལ་གསོལ༴ ཟབ་ལམ་འཕོ་བ༴ སོགས༴ མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ༴ ཟབ་ལམ༴ སོགས༴ ལོ་ཆེན་བཻ་རོ་ཙ་ན་ལ་གསོལ༴ ཟབ་ལམ༴ སོགས༴ གཏེར་སྟོན་པདྨ་ལས་འབྲེལ་ལ༴ ཟབ་ལམ༴ སོགས༴ ཀློང་ཆེན་རྡོ་རྗེ་གཟི་བརྗིད་ལ་གསོལ་བ༴ ཟབ་ལམ༴ སོགས༴ རིག་འཛིན་འཇིགས་མེད་གླིང་པ་ལ་གསོལ༴ ཟབ་ལམ༴ སོགས༴ འཇིགས་མེད་ཕྲིན་ལས་འོད་ཟེར་ལ་གསོལ༴ ཟབ་ལམ༴ སོགས༴ མི་འགྱུར་ནམ་མཁའི་རྡོ་རྗེ་ལ་གསོལ༴ ཟབ་ལམ༴ སོགས༴ འགྲོ་མགོན་ཡེ་ཤེས་རྡོ་རྗེ་ལ་གསོལ་བ༴ ཟབ་ལམ༴ སོགས༴ འཇིགས་མེད་ཆོས་ཀྱི་དབང་པོ་ལ༴ ཟབ་ལམ༴ སོགས༴ འཇིགས་མེད་ཕུན་ཚོགས་འབྱུང་གནས་ལ་གསོལ༴ ཟབ་ལམ༴ སོགས༴ ༈ འཇིགས་མེད་ཡེ་ཤེས་རྡོ་རྗེ། །འཇིགས་མེད་རྒྱལ་བའི་མྱུ་གུ། །མི་འགྱུར་ནམ་མཁའི་རྡོ་རྗེ། །རྒྱལ་སྲས་གཞན་ཕན་མཐའ་ཡས། །འཇིགས་མེད་ཆོས་ཀྱི་དབང་པོ། །མཁན་ཆེན་པདྨ་བཛྲ། །འཇམ་དབྱངས་མཁྱེན་བརྩེའི་དབང་པོ། །འཇིགས་མེད་བསྟན་པའི་ཉི་མ། །དྲིན་ཅན་རྩ་བའི་བླ་མ། །དྲིན་ཅན་རྩ་བའི་བླ་མ་ལ༴ ཟབ་ལམ༴ སོགས༴ མྱུར་ལམ་འཕོ་བས་མཁའ་སྤྱོད་འགྲུབ་པ་དང་། ཕྱིར་མི་ལྡོག་པའི་ཆོས་སྐུ་ཐོབ་པར་ཤོག །ཅེས་བརྗོད་ལ་ཧྲཱིཿ སྒྲ་ལྔ་ཚར་བརྗོད་པ་དང་ཆབས་ཅིག་ཧིཀ༔ སྒྲ་ལྔ་བརྗོད་དོ༔ ༈ ཁྱད་པར་ཡབ་རྗེ་བླ་མའི་དགོངས་གཏེར་ལས་བྱུང་བའི་འཕོ་བ་འདི་ཉིདཿ དམིགས་གནད་གཞུང་ལྟར་གསལ་བའི་ངང་ནས། འོད་དཔག་མེད་ཀྱི་མཚན་བརྗོད་ཅི་ནུས་ལྡབ་མཐར་གསོལ་འདེབས་འདི་བཞིན་བཏང་ངོཿ ཨེ་མ་ཧོཿ གནས་རང་སྣང་དོན་གྱི་འོག་མིན་ནཿ ཡིད་དད་བརྒྱའི་འཇའ་གུར་འཁྲིགས་པའི་ཀློང་ཿ སྐྱབས་ཀུན་འདུས་རྩ་བའི་བླ་མ་ནིཿ སྐུ་ཐ་མལ་མ་ཡིན་དྭངས་མའི་ལུསཿ དཔལ་སངས་རྒྱས་སྣང་མཐའི་ངོ་བོར་བཞུགསཿ ཡིད་མོས་གུས་གདུང་བས་གསོལ་བ༴ ལམ་འཕོ་བ་འབྱོང་བར་བྱིན་གྱིས་རློབསཿ གནས་འོག་མིན་བགྲོད་པར་བྱིན་གྱིས་རློབསཿ དབྱིངས་ཆོས་སྐུའི་རྒྱལ་ས་ཟིན་པར་ཤོགཿ ཅེས་ལན་གསུམ་བསྐྱལ་ནས་སྤར་ཆོག་དམིགས་པ་བཅས་ཧྲཱིཿལྔ་བརྗོད། ཕཊ྄ཿ སྤྲུལ་སྐུ་ ཕཊ྄ཿ ལོངས་སྐུ ཕཊ྄ཿ ཆོས་སྐུ ཕཊ྄ཿ མི་འགྱུར་རྡོ་རྗེའི་སྐུ། ཕཊ྄ཿ མངོན་པར་བྱང་ཆུབ་སྐུཿ ༈ སྤྲུལ་པའི་སྐུ་མཆོག་རིག་འཛིན་ཆེན་པོ་མི་འགྱུར་རྡོ་རྗེའི་གནམ་གཏེར་དུ་གྲགས་པའི་འཕོ་ལུང་འདི་ཡང་འཕོ་བྱ་འཕོ་བྱེད་འཕོ་ཡུལ་བཅས་རྟེན་འབྱུང་བསླུ་མེད་ལྟར་ངེས་པར་བྱས་ནས། མཚན་བརྗོད་ཅི་ནུས་བཏང་མཐརཿ གསོལ་འདེབས་ནིཿ ཨེ་མ་ཧོཿ ཤིན་ཏུ་ངོ་མཚར་འོད་དཔག་མེད་མགོན་དང་ཿ ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབཿ བདག་སོགས་རྩེ་གཅིག་ཡིད་ཀྱིས་གསོལ་བ་འདེབསཿ ཟབ་ལམ་འཕོ་བ་འབྱུང་བར་བྱིན་གྱིས་རློབསཿ འཇིག་རྟེན་ཕྱི་མར་སོང་བའི་ཚེ་འདས་ཀྱིཿ རྣམ་ཤེས་བདེ་ཆེན་འཕོ་བར་བྱིན་གྱིས་རློབསཿ ཞེས་དམིགས་པ་བཅས་གོང་བཞིན་སྤར་ཆོག་བྱའོ། ། ༈ དེ་ནས་སྐྱབས་ཡུལ་གཅིག་ཆོག་རྣམས་ཀྱང་ཐུགས་རྒྱུད་བསྐུལ་ནས་འཕོ་བ་མངོན་གྱུར་དུ་འབྱུང་བའི་གསོལ་འདེབས་ནིཿ ཨེ་མ་ཧོཿ མ་ལུས་འགྲོ་བའི་སྐྱབས་མཆོག་བཅོམ་ལྡན་འདསཿ མགོན་པོ་འོད་དཔག་མེད་ལ་གསོལ༴ བདག་སོགས་ལས་ཉོན་དབང་དུ་མི་གཏོང་བར། ཁྱེད་ཐུགས་མཁའ་དབྱིངས་ཀློང་དུ་སྟིམས་པར་མཛོདཿ ཀྱེ་མ་ལྔ་བརྒྱ་སྙིགས་མའི་མཐུས་ནོན་བདག་དང་འགྲོཿ དམ་ཆོས་སྒྲུབ་པའི་ལོང་མེད་གློ་བུར་འཆིཿ འདི་ལ་མགོན་པོ་ཁྱེད་ཀྱིས་མི་གཟིགས་ནཿ དུས་ལས་ཡོལ་བའི་ལོང་མེད་འཇུག་པ་གང་ཿ ཀྱེ་མ་མྱུར་མགྱོགས་ཐུགས་རྗེའི་ལྕགས་ཀྱུའི་སྒྱུ་འཕྲུལ་གྱིསཿ འཁོར་བའི་འདམ་ནས་བདག་སེམས་ཐུགས་རྗེས་ཟུངསཿ སྐད་ཅིག་ཡིད་ཙམ་མགོན་ཁྱོད་ཐུགས་གསང་དང་ཿ དབྱེར་མེད་གཅིག་ཏུ་འདྲེས་པར་བྱིན་གྱིས་རློབསཿ ཀྱེ་མ་འཆི་མེད་མགོན་པོ་སྤྱན་རས་གཟིགས་དབང་དང་ཿ རྡོ་རྗེ་འཛིན་སོགས་སངས་རྒྱས་བྱང་སེམས་ཚོགསཿ ཉན་རང་དང་བཅས་བདེ་ཆེན་དཀྱིལ་འཁོར་ལཿ གསོལ་བ་འདེབས་སོ་འཕོ་བ་མངོན་གྱུར་ཤོགཿ ཀྱེ་མ་ཆོས་ཅན་རྟེན་ཅིངའབྲེལ་འབྱུང་འཕོ་བ་དང་ཿ རང་བཞིན་མེད་པ་སྒྱུ་མ་རྨི་ལམ་འཕྲུལཿ དོན་དམ་མཐའ་བཞིར་མི་གནས་དབུ་མའི་ལམཿ མངོན་གྱུར་རྫོགས་ཆེན་འབྲས་བུ་ཡོངས་སྨིན་ཤོགཿ ཞེས་དམིགས་པ་དང་བཅས་ཕཊ྄ཿ ལྔ་བརྗོད། དེ་བཞིན་དུ་སྐྲ་ལངས་པ་དང་ཿ ཆུ་སེར་མ་ཐོན་བར་དུ་གསོལ་འདེབས་རྣམས་ཡང་ཡང་བསྐྱར་ནས། སྤར་ཆོག་བཅས་བྱའོ། །རྟགས་ཟོལ་མེད་ཐོན་མཐར། སྔོན་བཞིན་དམིགས་གནད་སོགས། མ་ཡེངས་པའི་ངང་ནས་འོད་དཔག་མེད་ཀྱི་མཚན་བརྗོད་ཅི་ནུས་མཐར། གསོལ་འདེབས་ནི། ཨེ་མ་ཧོ། སྔོན་འདས་དུས་བསྐལ་བའི་དགེ་སློང་མཆོག༔ དཔལ་རྒྱལ་སྲས་ཆོས་ཀྱི་འབྱུང་གནས་ཀྱིས། མགོན་འཇིག་རྟེན་དབང་ཕྱུག་རྒྱལ་བའི་དྲུང་། ཡོངས་འགྲོ་རྣམས་སྒྲོལ་ཕྱིར་དམ་བཅས་ནས། །ནུབ་བདེ་ཆེན་ཞིངགི་རྟེན་བརྟེན་པར། །དབང་བསྒྱུར་བའི་ཐུགས་བསྐྱེད་སྨོན་པའི་འབྲས། །མགོན་ཚེ་མཐའ་ཡས་པ་སྟོན་འཁོར་བཅས། །མ་འགྲོ་བའི་དཔལ་དུ་ཡོངས་ཤར་བཞིན། །བདག་གསོལ་བ་འདེབས་སོ་མཁྱེན་བརྩེའི་གཏེར། །ཚེ་འདི་སྣང་ལས་ཐལ་ཚེ་འདས་དེ། །སྲིད་འཁོར་བའི་འཇིགས་ལས་དབྱུགས་དབྱུང་ཞིང་། །ནུབ་བདེ་ཆེན་པདྨ་བཀོད་ཞིང་དུ། །དུས་སྐད་ཅིག་ཡུད་ཙམ་འདི་ཉིད་ལ། །མགོན་ཁྱེད་ཀྱི་ཐུགས་རྗེས་འདྲེན་པར་མཛོད། །ལས་ཉོན་མོངས་དབང་དུ་བཏང་གྱུར་ན། །མགོན་ཁྱེད་ཀྱི་དམ་བཅའ་གང་དུ་ཐལ། །གནས་ངན་འགྲོར་སྙོགས་ལས་མ་བཟློག་ན། །མགོན་ཐུགས་རྗེ་ཆེ་ཞེས་ཚིག་ཏུ་བས། །སེམས་གདུང་བའི་གསོལ་འདེབས་འདིར་གསོན་ལ། །ཚེ་ཕྱི་མར་སོང་བའི་ཚེ་འདས་དེ། །ནུབ་བདེ་ཆེན་ཞིང་དུ་འདྲེན་པར་མཛོད། །སྐྱབས་བསླུ་མེད་མགོན་པོ་འོད་དཔག་མེད། །ལྷ་ཐུགས་རྗེའི་གཏེར་མཛོད་སྤྱན་རས་གཟིགས། །སྟོབས་ནུས་པའི་མངའ་བདག་རྡོ་རྗེ་འཛིན། །དཔལ་འདྲེན་པ་སྟོང་རྩ་རྒྱལ་སྲས་ཚོགས། །ཚེ་ཕྱི་མའི་ལམ་ཞུགས་ཚེ་འདས་ཀྱི། །བཤེས་ར་མདའ་མཛོད་ལ་སྣང་མཐའ་ཡས། །འཁོར་སེམས་དཔའི་གྲལ་དུ་སྐྱེལ་བར་མཛོད། །སེམས་འོད་ཀྱི་ཐིག་ལེ་དཀར་དམར་མདངས། །དཔེ་མཁའ་ལ་སྐར་མདའ་རྒྱུག་པ་བཞིན། །དཔལ་འཆི་མེད་མགོན་པོའི་ཐུགས་ཀར་ཐིམ། །སླར་ལྡོག་མེད་སྐུ་ལྔའི་རྒྱས་གདབས་སོ། །ཞེས་བརྗོད་མཐར་ ཕཊཿ ལན་ལྔ་བརྗོད་ཅིང་ཀུན་རྟོག་སྤྲོ་བའི་རྒྱུན་བཅད་ནས་སླར་ཡང་འདི་བཞིན་བརྗོད། ཀྱེ་མ་ཚེ་འདས་ཕུང་ཁམས་ལྷར་གསལ་རྟེན། །མགོན་འོད་དཔག་མེད་པའི་གསང་གསུམ་ལ། །དཔེ་འཇའ་ཚོན་མཁའ་ལ་ཐིམ་བཞིན་དུ། །ཀློང་དབྱེར་མེད་རོ་གཅིག་འདྲེས་པར་གྱུར། །ཞེས་བརྗོད་ཅིང་། ཚེ་འདས་ཀྱི་ལུས་རྟེན་རྣལ་འབྱོར་མར་གསལ་བ་འཇའ་ཚོན་ནམ་མཁར་ཐིམ་པ་ལྟར་སྐྱབས་ཡུལ་ཀྱི་ལྷ་ལ་ཐིམ། དེ་ཉིད་ཀྱང་འོད་ཀྱི་ཕུང་པོར་གྱུར་ཏེ་རང་སྣང་ལོངས་སྐུའི་ཞིང་དུ་བཅོམ་ལྡན་འདས་རྒྱལ་བ་འོད་མི་འགྱུར་བ་དང་དབྱེར་མེད་དུ་གྱུར་བར་བསམ་ལ་ཕཊཿ ལན་གསུམ་བརྗོད་ཅིང་སྐྱེ་མེད་ཀྱི་ཆོས་སྐུ། འགགས་མེད་ཀྱི་ལོངས་སྐུ། རྩོལ་མེད་ཀྱི་སྤྲུལ་སྐུར་བྱང་ཆུབ་པར་མོས་ལ། དམིགས་བསམ་སྤྲོས་པ་དང་བྲལ་བའི་ངང་ལ་ཅི་གནས་སུ་མཉམ་པར་བཞག་ཅིང་དེ་ལས་ལངས་པའི་ཚེ་བྱམས་དང་སྙིང་རྗེ་ཆེན་པོའི་ངང་ནས་སྨོན་ལམ་འདི་བཞིན་གདབ་པོ། །ལྡེབ་༣༠ནས་༣༣བར་ཆད་ཡོད། ཀྱི་རྒྱལ་བའི་མྱུ་གུ་མཁྱེན་བརྩེ་ལྷས་སོ། །སངས་རྒྱས་སྐུགསུམ་བརྙེས་པའི་བྱིན་རླབས་དང་། བསོད་ནམས་འདི་ཡིས་ཐམས་ཅད་གཟིགས་པ། སོགས༴ དགེ་བ་འདི་ཡིས་སྐྱེ་བོ་ཀུན། བསོད་ནམས་ཡེ་ཤེས༴ སོགས༴ འགྲོ་ཀུན་དགེ་བ་ཇི་སྙེད་ཡོད༴ སོགས འཇམ་དཔལ་དཔའ་བོ༴ སོགས་བྱའོ། བཀྲ་ཤིས་སོ། །སྨོན་ལམ་ནི། གང་དུ་སྐྱེས་པའི་སྐྱེ་བ༴ སོགས། སངས་རྒྱས་ཐོབ་པར་ཤོག ཞེས་དང་གཞན་ཡང་སྨོན་ལམ་ཅི་ནུས་བརྗོད། འདིར་སྨྲས་པ། སྟོན་མཆོག་དམ་པ་ཤཱཀྱའི་རྒྱལ་པོ་དེའི། རྗེས་འབྲང་ཉན་རང་གཉིས་དང་བྱང་སེམས་སྡེ། གསང་སྔགས་ཕྱི་བ་གསང་གསུམ་ནང་བ་གསུམ། །དེ་སོགས་རྒྱུ་འབྲས་ཐེག་པ་ཡོངས་ཀྱི་རྩེ། །མ་བསྒོམ་སངས་རྒྱས་ཆོས་ལྔའི་ལམ་མཆོག་ལ། །ཁྱད་འཕགས་སྐད་ཅིག་གཅིག་གིས་གྲོལ་བའི་ཆོས། །མ་བསྒོམ་སངས་རྒྱས་འཕོ་བའི་ལམ་མཆོག་ཡིན། །འདི་ལ་འཕྱང་མོ་ཉུག་གང་ཐར་ལམ་འགགས། །ཅིས་ཕྱིར་ཞེ་ན་སྔགས་ཀྱི་མྱུར་ལམ་ལ། །སོམ་ཉི་སྨད་རྣམས་རྡོ་རྗེ་དམྱལ་བ་རུ། །སྐྱེ་བར་ངེས་ཞེས་སྔགས་ལུང་ཚད་མས་གྲུབ། །དེ་ཕྱིར་ལམ་མཆོག་འདི་ལ་བརྩོན་པར་རིགས། །ད་དུང་མདོ་དང་སྔགས་ཀྱི་ཁྱད་པར་དང་། སྔགས་ལས་གསང་སྔགས་གསར་རྙིང་ཁྱད་པར་དང་། །དེ་ལས་བསྒོམ་དང་མ་བསྒོམ་སངས་རྒྱས་ཚུལ། །ཁྱད་པར་དབྱེ་བ་ཤེས་གང་བསྟན་འགྲོའི་རྒྱན། །འོན་ཀྱང་ཐོས་བསམ་བྲལ་བའི་བླུན་སྒོམ་དང་། །ལྟ་སྒོམ་ཡིད་ལ་མི་བྱེད་ཐ་སྙད་མཁན། །དེ་འདྲ་འཕོ་བའི་གྲོལ་འདོད་ཡ་ར་ཆ། །ཅི་ཕྱིར་ཞེ་ན་དད་དམ་མི་ལྡན་ཕྱིར། །ཁོ་བོས་ཐོས་བསམ་སྒོམ་ལ་ཅི་ནུས་སྦྱངས། །རྣམ་པ་ཉི་ཤུའི་གྲངས་ལྡན་བླ་མ་བསྙེན། །བསྟན་དང་འགྲོ་ལ་ཕན་སེམས་ཟླ་བཞིན་དཀར། །དེ་ཕྱིར་གདམ་པ་འདི་བྲིས་དགེ་བའི་རྒྱུན། །སྲིད་དང་ཉན་རང་ལམ་དུ་མི་འཇུག་པར། །ཐེག་པ་ཆེན་པོའི་ལམ་མཆོག་དང་འཕྲད་ནས། །རྣམ་མཁྱེན་གདོད་མའི་རྒྱ་མཚོར་རོ་གཅིག་ཤོག །ཅེས་གཤིན་འཕོ་རྣམ་གྲོལ་མྱུར་ལམ་ཞེས་པ་འདི་ཉིད་རང་གི་ཉེ་གནས་དྷརྨཱ་ཀིརྟིས་ནན་ཏན་ཆེན་པོས་ཡང་ཡང་བསྐུལ་ངོར། རྫོགས་པ་ཆེན་པོའི་རྣལ་འབྱོར་པ་འཇིགས་མེད་ཕྲིན་ལས་འོད་ཟེར་གྱིས་གཏེར་སྟོན་ཉི་ཟླ་སངས་རྒྱས་ཀྱི་འཕོ་བར་གཞི་བྱས་མན་ངག་གཞན་གྱི་ཁ་བསྐང་དེ་སྤེལ་བས་ཡི་གེ་པ་ནི་རང་ཉིད་ཀྱི་སློབ་བུར་གྱུར་པ་མགོན་པོ་བསམ་འགྲུབ་ཀྱིས་བགྱིས་པའི་དགེ་བས་འགྲོ་རྣམས་བདེ་ཆེན་ཞིང་དུ་སྐྱེ་བའི་རྒྱུར་གྱུར་གུ་ཅིག །དགེའོ། དགེའོ། དགེའོ།། །།བཀྲ་ཤིས་དཔལ་འབར་འཛམ་གླིང་རྒྱན་དུག་ཤོག། །། གནས་འོག་མིན་བདེ་ཆེན་ཞིང་ཁམས་་་་ཨོཾ་ཨཱ་ཧཱུྃ༔ གནས་འོག་མིན་བདེ་ཆེན་ཞིང་ཁམས་སུ། །མགོན་བཅོམ་ལྡན་སྣང་བ་མཐའ་ཡས་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་པོ་ཏ་ལ་ཡི་ཞིང་ཁམས་སུ། །ལྷ་སྙིང་རྗེའི་གཏེར་མཛོད་སྤྱན་རས་གཟིགས། །བདག་སྒོ་གསུམ༴ ལམ་འཕོ་བ༴ གནས་ཟངས་མདོག་དཔལ་རིའི་ཕོ་བྲང་དུ། སྐྱབས་པདྨ་འབྱུང་གནས་སྤྲུལ་པའི་སྐུ། བདག་སྒོ་གསུམ༴ ལམ་འཕོ་བ༴ གནས་རང་སྣང་རྣམ་དག་འོག་མིན་དུ། རྗེ་མཁྱེན་བརྩེའི་མངའ་བདག་འཇིགས་མེད་གླིང་། བདག་སྒོ་གསུམ༴ ལམ་འཕོ་བ༴ གནས་གང་ལ་གང་འདུལ་ཞིང་ཁམས་སུ། དཔལ་འཇིགས་མེད་ཡེ་ཤེས་རྡོ་རྗེ་ལ། བདག་སྒོ་གསུམ༴ ལམ་འཕོ་བ༴ གནས་བདེ་ཆེན་པདྨ་བཀོད་གླིང་དུ། རྗེ་འཇིགས་མེད་འཕྲིན་ལས་འོད་ཟེར་ལ། བདག་སྒོ་གསུམ༴ ལམ་འཕོ་བ༴ གནས་གང་འདུལ་གདུལ་བྱའི་ཞིང་ཁམས་སུ། སྐྱབས་དམ་ཚིག་རྡོ་རྗེ་སྤྱན་རས་གཟིགས། བདག་སྒོ་གསུམ༴ ལམ་འཕོ་བ༴ གནས་སྤྱི་གཙུགས་ཉི་ཟླའི་གདན་སྟེང་ནས། །རྗེ་རྩ་བའི་བླ་མ་ལུང་རིགས་གླིང་། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱི་རློབས། །ཞེས་པ་འདི་ཡང་ཀུན་བཟང་གཞན་ཕན་གྱིས་སོ། ། དམ་ཆོས་བདེ་ཆེན་ལམ་མཆོག་ལསཿ འབྱུང་འགྱུར་ལུང་བསྟན་སྒྱུ་འཕྲུལ་མེ་ལོང་།དམ་ཆོས་བདེ་ཆེན་ལམ་མཆོག་ལསཿ འབྱུང་འགྱུར་ལུང་བསྟན་སྒྱུ་འཕྲུལ་མེ་ལོང་བཞུགསཿ རང་རིག་ཆོས་སྐུ་སྣང་བ་མཐའ་ཡསཿ ཕྱོགས་རིས་རྟག་ཆད་མཐར་འདས་ཀྱང་ཿ རང་གསལ་འཁོར་འདས་ལྷུན་གྱིས་གྲུབཿ མ་འགགས་ཐུགས་རྗེའི་རྩལ་སྣང་ལསཿ རང་བྱུང་རང་སྒྲ་འདི་ལྟར་བྱུང་ཿ ཐུབ་བསྟན་ལྔ་བརྒྱ་ཕྲག་བཅུ་ཡིསཿ ཕྲི་ཞིང་རྟགས་ཙམ་འཛིན་ལ་ཉེཿ པད་འབྱུང་བོད་དུ་བྱོན་མོད་དེཿ དམ་སྲིའི་སྤྲུལ་བས་འགྲོ་བློ་བསྒྱུརཿ ཐུགས་རྗེའི་སྤྲུལ་སྐུ་མང་བྱོན་ཀྱང་ཿ སྙིགས་མའི་འགྲོ་བ་དད་མོས་ཆུང་ཿ ཁྱད་པར་ཀུ་ཀུ་ལྕགས་སྡེར་ལོརཿ སྟོད་ནས་སྔར་མེད་སྒྲ་གསར་གྲགསཿ བར་དུ་སྡེ་དགེ་གཡོ་ཞིང་འགུལཿ སྟག་དང་འབྲོང་གི་གཡུལ་ཆེན་གཤོམཿ གཡུལ་སྣ་ཉི་མའི་འོག་ཏུ་གཏདཿ ནག་པོ་རྒྱ་ཡི་ཉུལ་མི་ཡིཿ རྗེས་སུ་བདུན་དྲུག་ཁྱི་ལྟར་འབྲངསཿ མཐོང་ཐོས་མ་མྱོང་མི་ཞིག་གིསཿ ཡུལ་ཀུན་ཉུལ་ཞིང་ཆོ་འཕྲུལ་སྟོནཿ དེ་དང་གང་འབྲེལ་ལོག་ལམ་འགྲོཿ བརྟུལ་ཞུགས་ཞི་དྲག་འདྲེས་པ་ཡིཿ རྣལ་འབྱོར་ཧེ་རུ་ཀ་པ་ཡིསཿ ཕྱོགས་ཀུན་ཉུལ་ནས་བསྟན་འགྲོ་གསོཿ དམར་པོའི་ཞིང་ལ་ངང་བ་འཁོརཿ མི་དགེའི་ཕྱུ་གུ་སྡིག་པས་གསོཿ བསྟན་སྲུང་རྙིང་མས་གནམ་ལྕགས་འབེབསཿ ལྷོ་བྱང་ཇོ་དར་སེར་པོ་སྦྲེལཿ དར་ཡུ་ཁུ་ལེ་ལག་དགུས་འཛིནཿ དར་ཐིག་ས་ཐེལ་སྤྲུལ་པས་འཐེནཿ མཐུན་རྐྱེན་གུར་དཀར་སྤྲུལ་པས་སྦྱོརཿ འགལ་རྐྱེན་གཟའ་བདུད་ཆེན་པོས་བྱེདཿ དེ་མཐུས་ཡུལ་ཁམས་རླུང་ལྟར་འཚུབསཿ ཚ་ཁོའི་ཕྱོགས་སུ་སེར་པོའི་ཞིང་ཿ ལོ་ཐོག་སྨིན་ཀྱང་སྲིན་བུས་འཚེཿ ཁྲོ་སྐྱབས་གོང་ནས་གནམ་རྡོ་འབེབསཿ རྡོ་སྟོད་རྡོ་སྨད་མ་བུའི་ཚུལཿ སྲིད་སྡེབས་དགྲ་དཔུང་ཟིལ་གྱིས་གནོནཿ གསེར་ཤོད་བཻ་རོའི་སྤྲུལ་པས་སྐྱོང་ཿ གསེར་སྟོད་གྲུབ་མཐའི་རུ་འཛིངས་འོང་ཿ མགོ་ལོག་སྟོད་པ་སྐྱས་ཆེན་འདེགསཿ བར་མ་གནམ་ས་གོ་ལོག་འོང་ཿ སྨད་པ་སྣལ་མ་མགོ་བྲེག་འདྲཿ ཕ་ནོར་བུས་འཕྲོག་ཉེ་དུ་དགྲཿ བྱ་རིགས་གཅན་གཟན་སྔར་མེད་མང་ཿ ལྷ་འདྲེ་དངོས་རྒྱུ་ཆུ་ལོག་དང་ཿ ས་འཇིགས་ས་རལ་གཟུགས་མེད་སྒྲཿ མཐའ་མི་མང་འཚོགས་མཚོན་ཆ་དརཿ རྡོ་སྟོད་སྨྱོན་པའི་བརྟུལ་ཞུགས་ཅནཿ རྣལ་འབྱོར་ཞིག་གིས་དགེ་བཅུ་སྤེལཿ བར་དུ་དད་མེད་སྙིང་རྗེ་དབེནཿ བླུན་པོ་གོ་ས་མཐོ་བ་ཞིགཿ མཐོན་པོར་བཀུར་ཀྱང་དམའ་བ་འབྱུང་ཿ སྨད་དུ་འདྲེ་བབ་མི་ཞིག་དང་ཿ དེར་མཚུངས་བུད་མེད་རྒན་ཞིག་གིསཿ རྐྱེན་བྱས་ལོག་ལྟ་དར་བར་འབྱུང་ཿ རྣལ་འབྱོར་མི་ལས་བྱིན་བརླབས་པའིཿ བླུན་ཚུལ་ངེས་མེད་སྤྱོད་པ་ཅནཿ ཐུགས་རྗེ་ཆེན་པོའི་རྣལ་འབྱོར་པསཿ སྔར་མེད་གནས་སུ་རྟེན་གསུམ་བཞེངསཿ དད་ལྡན་འབྲེལ་ཐོག་འགའ་ལ་ཕནཿ བདུད་སྤྲུལ་ཞིག་གིས་རྐྱེན་བྱས་ནསཿ མི་མོས་གཤེ་ཞིང་ཁ་མཆུ་འབེབསཿ ཆོས་སྐྱོང་ཆད་པས་དེ་དག་མནརཿ བྱང་གི་རི་དྭགས་ཀླུང་དུ་འབེབསཿ རོང་གི་གཅན་གཟན་བྱང་དུ་རྒྱུཿ འཇམ་དབྱངས་བཞད་སྒྲའི་གླིང་བུ་ཡིསཿ རྐང་གཉིས་རི་དྭགས་རྣམ་ཤེས་འཕྲོགཿ སྔར་དར་དམ་ཆོས་ཟོང་ལ་འཆོརཿ དེའི་རིན་གཙུག་ལ་རྒྱན་སེར་དང་ཿ མགུལ་དུ་དེ་བཞིན་སྔར་མེད་པའིཿ བཟླས་པ་ཞིག་གིས་ཁྲལ་ཆོས་འགེལཿ ཐང་ནག་བོན་པོའི་སྤྲུལ་པ་ཡིསཿ བླ་ཆེན་གཅིག་དང་དམར་རྒྱན་གྱིཿ སྤྲུལ་པ་དབང་ཆེན་མི་དཔོན་ཞིགཿ བུད་མེད་དབང་ཆེན་བསེན་མོའི་རིགསཿ གསུམ་གྱིས་རྐྱེན་བྱས་མགོ་ལོག་ཁྲཿ གོ་ས་མཐོན་པོའི་དཀོར་སྡུད་མཁནཿ འགྲོ་མགོན་ཚུལ་བཟུང་ནང་གནག་པའིཿ བླ་མ་ཞིག་གིས་དམག་འཁྲུགས་སྤེལཿ དེས་རྐྱེན་ཁོ་རང་ལྔ་ལམ་ལཿ ཞུགས་ཚེ་འགོང་པོར་སྐྱེས་པའི་ལྟསཿ མངོན་དུ་བྱུང་ནས་ཡུལ་དེར་གནོདཿ སྔགས་འཆང་ཧཱུཾ་ནག་མེ་འབར་གྱིཿ སྤྲུལ་པས་འདུལ་ཞིང་མགོ་ལོག་བདེཿ རྡོ་ཡུལ་འདི་གར་སྔར་མེད་པའིཿ སྡེ་གསར་ཞིག་གིས་ས་མཁར་འཛུགསཿ ཡུལ་རིགས་མི་གཅིག་མི་མང་པོསཿ རྡོ་སྟོད་བཟུང་ནས་ཕན་གྲོགས་བྱེདཿ གསེར་གྱི་ལྷ་སེར་གདོང་ལྔ་པའིཿ སྒྲ་སྐད་གྲགས་པས་ཝ་སྙིང་འགསཿ སྔར་མེད་ནོར་དང་ལས་ཀ་ཞིགཿ རྡོ༷་འདི༷ར་དར་ནས་ངོ་མཚར་བྱེདཿ ནག་པོ་རྒྱ་ཡི་ཉུལ་མི་ཡིསཿ ཡུལ་ཀུན་གཡེངས་ཞིང་ས་སྲུང་འཇོགཿ ཕལ་ཆེར་གཞན་གྱི་དབང་དུ་འགྲོཿ ཆོས་དང་འཇིག་རྟེན་བྱ་བ་གཉིསཿ སྔོན་དང་མི་མཚུངས་འགྱུར་ལྡོག་མང་ཿ ཡུལ་ཕྱོགས་གཞན་གྱི་ལྷ་རྫུ་ཞིགཿ འཁོར་མང་ཁྲིད་ནས་ཆོས་མིན་པའིཿ གཏེར་འདོན་ལག་རྗེས་རྡོ་ལ་འཇོགཿ སྤྲུལ་པ་མང་སྟོན་མངོན་ཤེས་འཆདཿ དེར་འབྲེལ་བསོད་ནམས་ཉེར་དགུའི་ཟླཿ རྫོགས་པ་ཆེན་པོའི་དོན་སྟོན་པའིཿ སྔར་མེད་རྙིང་མའི་བླ་མ་ཞིགཿ ཡུལ་འདིར་འཇགས་ནས་ཕན་བདེ་སྤེལཿ མི་རྗེ་དྲིལ་དཀར་རྒྱན་ཆས་འབྱོརཿ བཙུན་མོ་གཞན་དབང་གཞན་སེམས་འཛིནཿ སྡེ་བ་གཅིག་དྲིལ་གྲུ་ནང་མགྲོནཿ ལྕགས་ཁྱི་ལྕགས་ཕག་མན་ཆད་ནསཿ ཆུ་ཡི་ཁྱི་ཕག་ཚུན་ཆད་དུཿ དེ་ལྟར་ངོམ་མོ་པདྨའིབཀའཿ གཞན་ཡང་ཡུལ་དུ་ལེགས་ཉེས་དང་ཿ གང་ཟག་བཟང་ངན་ལ་སོགས་པའིཿ རྣམ་གྲངས་རྒྱུ་མཚན་མང་ཡོད་ཀྱང་ཿ རེ་ཞིག་འདིར་གབ་སླད་ཀྱི་འཆདཿ སྤྲོའམ་ཡང་ན་བཤོལ་ཡང་ལེགསཿ ཅིས་ཕྱིར་ཞན་ལོ་རེར་བཞིནཿ བཟང་ལ་ངན་དང་ཡིན་ལ་མིནཿ བདེན་ལ་རྫུན་སོགས་འགལ་ཟླ་ཡིཿ རྟེན་འབྱུང་གོ་ལོག་མང་འབྱུང་དོགསཿ འདི་འདྲའི་དུས་འདིར་ཕན་བྱེད་ཆོསཿ ཆོས་གཞན་བྱིན་རླབས་ཡལ་གྱུར་ནཿ སྨན་བླའི་ཆོ་ག་ཡིག་དྲུག་པཿ རྡོ་ལ་བརྐོ་དང་བཟླས་རྒྱུན་འཛིནཿ བཛྲ་གུ་རུ་མཐོན་པོར་བཟླཿ བུམ་གཏེར་མང་སྦ་ཆུ་གཏོར་འབུམཿ བསང་འབུམ་སྦྱིན་བསྲེགས་འབུམ་ཐེར་དང་ཿ སྡེ་བརྒྱད་ཁང་བཟློག་མདོས་གཏོང་ཞིང་ཿ ཁ་འབར་མ་དང་བརྒྱ་བཞི་གཏོང་ཿ འདི་རྣམས་སྤྱི་རིམ་བྱས་ན་ཕནཿ ཁྱད་པར་བཛྲ་གུ་རུ་དང་ཿ མ་ཎི་རྡོ་བརྐོས་ཤིན་ཏུ་ཕནཿ ཇོ་དར་ལ་བརྒལ་ཕན་སྟོབས་མཆོགཿ མཆོག་ཏུ་ཡུལ་ཀུན་སྤྱི་རིམ་དང་ཿ འབྲིང་དུ་གྲོང་ཚོས་མཉམ་པར་བྱཿ ཐ་ན་རང་སྒོོས་རིམ་གྲོར་འབདཿ འབད་པས་བདེ་བ་མྱུར་དུ་ཐོབཿ དམ་སྲི་སྤུན་དགུ་མནན་གཟིར་བསྲེགསཿ སྙིང་རྗེའི་བློ་ཡིས་བྱེད་པ་གཅེསཿ རྒྱ་སྟག་རི་རྩེར་ངར་གྱུར་ཚེཿ དེ་ལ་ཚོགས་བདག་ས་མདའི་གཟིརཿ འབྲོང་བུ་ཀླུང་དུ་རྒྱུག་པའི་ཚེཿ དེ་ལ་ཕུར་བའི་རྔོན་པས་དགུགཿ ངེས་མེད་ཐན་གཟུགས་མང་ངོམ་ཚེཿ དེ་ལ་བྱ་ཁྱུང་དམར་ནག་འབེབསཿ བསྟན་སེལ་ཁྲག་ཡིག་གཏན་འབེབ་ཚེཿ དེ་ལ་གཟའ་བདུད་ཁ་ཆུས་བྲནཿ ཐེའུ་རང་གཅེར་རྒྱུག་ངོམ་པ་ལཿ དེ་ལ་གཟའ་ཀླུས་གྲང་རེག་འབེབསཿ བདུན་དྲུག་གཅན་སྤྱང་རྒྱུ་བ་ལཿ དེ་ལ་རྟ་ནག་རལ་གྲིས་བརྡེགཿ གནམ་ས་གོ་ལོག་ལྟས་མཐོང་ཚེཿ དེ་ལ་པདྨའི་བཀའ་དམ་བསྒྲགསཿ ལྷོ་བྱང་ཟས་སྤྱོད་ལོག་པ་ནཿ དེ་ལ་སྦྱིན་བསྲེགས་རྒྱ་ཆེན་བཏང་ཿ དབྱར་དགུན་དྲོ་གྲང་ལོག་པ་ནཿ དེ་ལ་མཁའ་འགྲོའི་མེ་མཆོད་བྱཿ སེར་སྐྱའི་བསམ་སྤྱོད་ལོག་པ་ནཿ དེ་ལ་གསོལ་འདེབས་ལེའུ་བདུན་འབུམཿ དགྲ་གཉེན་མཐུན་པ་གོ་ལོག་ནཿ དེ་ལ་སྐུ་ལྔའི་གསོལ་མཆོད་གཟབཿ ས་གཞིའི་གོམ་པ་འདེགས་གྱུར་ནཿ དེ་ལ་དབང་ཆེན་ཆོ་ག་གཟབཿ བར་སྣང་རླུང་ཐན་མང་བྱུང་ཚེཿ དེ་ལ་སྡེ་བརྒྱད་གསེར་སྐྱེམས་གཟབཿ དེ་ཀུན་སྤྱི་ལུང་སྒོས་ལུང་འགྲེསཿ ཁྱད་པར་རྡོ་འདིར་སྐོར་གྱི་གནསཿ སྤོར་དགེ་ལྷུན་པོ་དཔལ་བརྩེགས་དང་ཿ ཤུགས་ཆེན་འགྲོ་དོན་ལྷུན་གྲུབ་གསུམཿ རྡོར་འཆང་ཏེ་ལོ་ནཱ་རོ་པཿ མར་པ་མི་ལ་སྒམ་པོ་པཿ ཕག་གྲུ་དུས་མཁྱེན་ལྕེ་སྒོམ་པཿ པཀྴི་རང་བྱུང་རྡོ་རྗེ་རྣམསཿ སྤྲུལ་པ་བྱོན་ནས་བྱིན་རླབས་མཛདཿ དེ་ཕྱིར་འབྲེལ་ཐོག་ཀུན་ལ་ཕནཿ དད་ཅིང་གུས་པས་ཕྱག་མཆོད་སོགསཿ སྤེལ་ན་ཕན་བདེ་གོང་དུ་འཕེལཿ འདི་ཕྱིའི་དོན་ཆེན་འགྲུབ་པར་ངེསཿ འདི་ཉིད་ལྕགས་ཕོ་ཁྱི་ཡི་ལོརཿ རྣལ་འབྱོར་བྱང་ཆུབ་རྡོ་རྗེ་ལཿ རང་བྱུང་པདྨས་གསུངས་བཞིན་བྲིསཿ དགེ་བའི་བསྟན་འགྲོར་སྨན་ནུས་ཤོག དགེའོ།། །། གང་ཟག་སྒོས་ཀྱི་ལུང་བསྟན་དོན་གསལ་མེ་ལོང་།གང་ཟག་སྒོས་ཀྱི་ལུང་བསྟན་དོན་གསལ་མེ་ལོང་ཞེས་བྱ་བ་བཞུགས་སོ། ། ན་མོ་གུ་རུ་བྷྱཿ དཔལ་དུས་གསུམ་ཀུན་མཁྱེན་པད་འབྱུང་དང་། །དོན་དབྱེར་མེད་རིག་འཛིན་མཁྱེན་བརྩེའི་ཞབས། །འབངས་བདག་གི་གཙུག་ཏུ་བཀོད་ནས་སུ། །དུས་འབྱུང་འགྱུར་གྱི་ལུང་བསྟན་ཚོམ་མེར་སྒྲོགས། །དབྱིངས་ཀུན་རྟོག་འཁྲུལ་བྲལ་ཨ་དཪྴའི། །གཟུགས་མ་འདྲེས་རྟེན་འབྲེལ་ལེགས་ཤར་བ། །སྤྱིར་འཛམ་གླིང་ཡོངས་ཀྱི་ལེགས་ཉེས་དང་། །སྒོས་སྨར་ཁམས་ཡུལ་གྱི་བདེ་སྡུག་འཆད། །ཡུལ་རྨ་སྟོད་ཀྱི་རྐྱང་འབྲོང་ཕྱོགས་ཕྱོགས་འབྲོས། །རྨ་རྐེད་དུ་མ་མོའི་རལ་བ་བསིགས། །རྨ་སྨད་དུ་རྒྱ་མི་ནག་པོས་གང་། །བར་སྐབས་རེར་སྤྲིན་བར་ཉི་མ་འཆར། །མཐའ་མ་ཡང་ས་མཁར་སྐྱ་བོའི་གང་། །རྒྱ་བོད་གཉིས་ཕྱི་ནང་རྩོད་པས་འདར། །ཀུན་ཐེ་ཚོམ་གྱི་བསེར་བུས་ངེས་མེད་འགྱུར། །རྨ་སྟོད་དུ་མཐའ་མི་མང་པོ་འཚོགས། །ཐམས་ཅད་ཀྱི་ཕན་ཚུན་ཐེ་ཚོམ་ཟ། །ལྷ་སྡེེ་དང་མི་སྡེ་འདར་ཤིག་ཤིག །སྔར་མེད་སར་གནས་གཞི་བཅག་ལ་ཁད། །བར་སྐབས་སུ་རང་བྱས་ལས་ཀྱིས་ཕུང་། །དར༷་ཐ༷ང་དང་ཡུལ་དེའི་དགོན་ཕལ་མོ། །མི་སྣ་ནི་འབྲུ་ཚོགས་བསྲེ་བ་བཞིན། །གྲོས་མི་མཐུན་ནས་བྱ་ཚོགས་ཀུ་ཅོ་འདོན། །དུས་ནམ་ཞིག་ནི་ལྷ་ཡིས་མགོན་སྐྱབས་བྱེད། །ལྷ་འཇམ་དབྱངས་སྤྲུལ་དང་ཕྱག་རྡོར་སྤྲུལ། །དགོན་དེ་རུ་ནམ་ཡང་རྒྱུན་ཆད་མེད། །དགོན་དེ་ཡི་བྱང་ཕྱོགས་རི་ཐང་མཚམས། །དཔལ་བདུད་འདུལ་མཆོད་རྟེན་ཚད་གྲུབ་ན། །ས་དེ་རུ་བསྟན་འཛིན་བསྟན་པ་རྒྱས། །རྨར་སེ་ལེ་ཐང་ལ་དམག་སྒར་བཅའ། །དམག་ནག་པོའི་དལ་ཁ་ཕུར་བས་བཤོལ། །ཡ༷ར་ཐ༷ང་གི་བསྟན་པ་ཡ་མ་ཟུང་། །རེ་ཞིག་ནི་རྨ་བྱ་ཚང་ལ་ཞུགས། །ཐ་མ་ཡང་གོས་དཀར་བ་མོ་ཅན། །གསང་སྔགས་ཀྱི་བསྒྲུབ་སྡེ་འཐོར་ལ་ལྟོས། །བར་མ་ཡང་ཡ་མ་ཟུང་དུ་གནས། །ཡོ༷་སྟ༷ག་དང་ཁྱེ༷་མདར༷་རྒྱ་གྲོང་ཆགས། །ཁ་མི་འཆམས་འབྲོག་པའི་ཁྱི་ཚོགས་འདྲ། །བར་སྐབས་ཤིག་དགོ༷ན་གན༷ས་བརྒྱ༷་ཕྲག་འབྱུང། །གསང་སྔགས་ཀྱི་བསྟན་ལ་བྱ་ར་བྱེད། །རྡོ་སྟོད་ཀྱི་ཡུལ་སྡེ་རྐྱང་འབྲོང་འདྲེས། །ཐམས་ཅད་ཀུན་བདེ་སྡུག་སྣ་ཚོགས་ངོམ། །སྔར་བྱས་ཀྱི་འབྲས་བུ་སྨིན་ལ་ལྟོས་། །ཆོས་དཀོན་མཆོག་གི་བདེན་པ་མང་བརྗོད་ན། །མཐའ་མ་ཡང་ལེགས་པའི་ལྟས་བཟང་འཆར། །རྡོ་རྐེད་དུ་གསེར་གྱི་ཉི་ཟླ་ཟུང་། །སྔ་དགོང་གཉིས་རེ་མོས་འཆར་བ་མཚར། །དགོན་ཕྲ་མོའི་གྲགས་པས་ས་སྟེང་ཁྱབ། །དཔལ་ཨོ་རྒྱན་གྱི་སྤྲུལ་པ་རྒྱུན་ཆད་མེད། །གསར་རྙིང་གི་བསྟན་ལ་བྱ་ར་བྱེད། །ང་རྒྱལ་གྱི་རི་བོ་མ་མཐོ་ན། །མདོ་སྨད་ཀུན་ཉི་ཟླའི་འོད་ཀྱིས་ཁྱབ། །དོན་དེའི་ཕྱིར་ན་བླང་དོར་ཞིབ་མོ་མཛོད། །གནས་ཤུགས༵་འབྱུང༵་གི་དགོན་པ་ལྷ་ཡི་ལམ། །དཔལ་སངས་རྒྱས་ཀྱི་སྤྲུལ་པ་བར་བར་འབྱུང་། །ཆོས་སྔར་དར་ལ་བཟོ་བཅོས་མང་བྱས་ན། །བཀའ་བསྟན་སྲུང་གི་ཕྲག་དོག་བྱས་པའི་སྐྱོན། །དགོན་དེ་ལ་ནི་ནང་འཁྲུགས་དམག་སྣ་ཞུགས། །ལས་མཐོ་དམན་དུ་གྱུར་པ་འཕྱང་མོ་ཉུག །གནས་དེ་ལ་ནི་དད་གུས་བསྒྲུབ་པའི་ཚེ། །དུས་ནམ་ཡང་ནི་བདེ་སྐྱིད་ལེགས་ཚོགས་འཕེལ། །མཐར་ནམ་ཞིག་ཚེ་ཟངས་མདོག་དཔལ་གྱི་རིར། །དེར་ཐེ་ཚོམ་མེད་དོ་ཨོ་རྒྱན་བཀའ། །དཔལ་བཀའ་བརྒྱུད་པའི་སྒྲུབ་གནས་རྣ༵མ་རྒྱལ༵་དགོ༵ན། །ཁོང་བསྟན་འཛིན་གྱི་སྐྱེས་བུ་བར་བར་འབྱུང་། །དགོན་དེ་ལ་ནི་སྦས་པའི་རྣལ་འབྱོར་གཅིག །དཔལ་ན་རོའི་སྤྲུལ་པས་འགྲོ་དོན་བྱ། །མགོན་བེར་ནག་གིས་བསྟན་ལ་བྱ་ར་བྱེད། །དགོན་དེ་ལ་ནི་འཕོ་འགྱུར་ག་ལ་འབྱུང་། །ཡུལ་རྡོ་སྨད་ཀུན་རྩིད་རྐུད་རྩེ་བྲེགས་འདྲ། །ལྷ་སྡེ་དང་མི་སྡེ་ཐམས་ཅད་ཀྱིས། །འདི་སྣང་གི་ལས་ལ་འབད་ལ་ལྟོས། །མཐའ་མ་ཡང་ཅིར་འགྱུར་ཆ་མ་མཆིས། །གསེར་ལྷ་ཚེ་དགོན་སྒྱུ་མའི་འཁྲུལ་འཁོར་འབྱུང་། །ཡུལ་དེ་ཕྱོགས་སུ་སྐྱས་ཆེན་ཡང་ཡང་འདེགས། །དགོན་ཕལ་ཆེར་ཞིག་བྱ་ཁྱུ་རྡོས་དཀྲོགས་བཞིན། །ལས་ཅིི་བྱ་དང་འདི་བྱ་མེད་ལ་ཐུག །ལྷ་དཀོན་མཆོག་ལ་རྒྱུན་དུ་གསོལ་བཏབ་ན། །དེ་ནམ་ཞིག་ཚེ་སྔར་དཔེ་འདྲེན་ལ་ཁད། །ལྷོ་དེ་ཕྱོགས་ཀྱི་གསར་རྙིང་དགོན་སྣ་ཚོགས། །བདེ་སྡུག་གི་བླང་དོར་མང་པོ་འབྱུང་། །མཐའ་མི་ཡི་ཉུལ་མས་བར་བར་བྲེལ། །ཐ་མ་ཡང་དོན་མེད་མི་ཚོགས་ལ། །བཀུར་སྟི་དང་ཞེ་ས་བྱེེད་དགོས་སྡུག །ཡུལ་སུ་ཝརྞའི་སྡེ་དཔོན་མཆོག་དམན་ཀུན། །དུས་རེ་ཞིག་ནི་ཡུལ་ལྷའི་བྱ་ར་བྱེད། །དེ་མི་བརྟན་ནི་ཡ་མ་བླ་རུ་འགྱུར། །ལྷ་ཨོ་རྒྱན་གྱིས་བྱིན་ཐོབ་པུཎྱེའི་མཚན། །དཔལ་རྒོད་མ་ཡི་ཐང་གི་ས་མིག་དེར། །སྔར་མེད་ཀྱི་བྱིན་རྟེན་རྣམ་པར་རྒྱལ། །མཐུ་དེ་ལ་ནི་བརྟེན་ནས་ཡུལ་ཁམས་བདེ། །དེ་ལོ་རེ་བཞིན་རྟེན་བཞུགས་ཞིག་གསོ་དང་། །རྟེན་ཆ་བརྒྱད་དང་རྡོ་བརྐོས་ཇོ་དར་སོགས། །ལས་དཀའ་ཚེགས་ཡང་མེད་པར་མང་བསྒྲུབ་ན། །ལས་དེར་གཏོགས་ཀྱི་མི་སྡེ་ལྷ་སྡེ་རྣམས། །དུས་ནམ་ཡང་ནི་བདེ་སྐྱིད་དཔལ་ལ་སྤྱོད། །ཚ༷་ཁྲོ༷་སྐྱབ་གཉིས་མ་བུ་ཟུང་འབྲེལ་ཡང་། །བར་སྐབས་རེར་མི་བདེའི་ནང་སྡུག་འབྱུང་། །སྟོད་སྨད་ཀུན་དམག་གི་ལས་ལ་འབད། །བདེ་སྡུག་གཉིས་སོས་ཀའི་ཉིན་མོ་བཞིན། །ཐམས་ཅད་ཀྱིས་བསམ་པ་གཅིག་དྲིལ་དུ། །ལྷ་སྤྱན་གཟིགས་ཀྱི་སྣང་བསྙན་ཁྱད་འཕགས་མདུན། །ལས་དགེ་བསྒྲུབ་དང་བསྙེན་གནས་བསྙུང་གནས་དང་། །ཇོ་དར་དང་མར་མེ་ཁྲི་འབུམ་སོགས། །རྟེན་བཞུགས་དང་ཚོགས་མཆོད་གྲངས་མེད་དང་། །ཁྱད་པར་དུ་ཕྱི་བསྐོར་ནང་བསྐོར་བཞིན། །མ་ཎི་དང་སིངྔྷིའི་སྒྲ་དབྱངས་ལ། །ལོ་དུས་བཞིན་ཀུན་གྱིས་འབད་གྱུར་ན། །གནས་སྐབས་སུ་བསྐལ་པ་རྫོགས་ལྡན་བཞིན། །མཐར་ཐུག་ནི་བདེ་ཆེན་ས་ལ་འཕོ། །ཡུལ་འཛི་སྟོད་དུ་རང་བྱས་རང་ལ་སྨིན། །ལས་འབྲས་ཀྱི་ལྟས་ངན་རང་གིས་བསྒྲུབ། །རང་ཉིད་ལ་འབྱུང་བའི་སྔ་ལྟས་སུ། །སྔར་མེད་སར་ཆུ་ཤིང་སོལ་མདོག་དང་། །བར་སྐབས་རེར་རེ་ནག་སྦྲ་བའི་གང་། །ཆོས་དགེ་བསྒྲུབ་དང་སྡིག་སྤངས་ལས་ལ་འབད། །ལས་འབྲས་ལ་ཞིབ་མོ་ནན་བསྐྱེད་ན། །གནས་སྐབས་རེར་བདེ་བའི་ཁྲི་གདུགས་གསལ། །ཡུལ་ཛམ་བྷ་ལའི་ཐང༵་ཡང་ཁྲ་བོར་འགྱུར། །དཔལ་ཀ་ལ་ཙཀྲའི་རྣལ་འབྱོར་པ། །དེས་སྦས་པའི་ཚུལ་བཟུང་བསྟན་པ་གསོ། །ཆོས་ཕྱོགས་རིས་བྲལ་བའི་བསྟན་འཛིན་འབྱུང་། །ལྷ་ཨོ་རྒྱན་གྱི་སྣང་བསྙན་ང་འདྲ་དང་། །མགོན་བསྟན་པའི་བདག་པོའི་གཟུགས་སྐུ་གཉིས། །འདི་མཐོང་ཐོས་ཀུན་བདེ་ཆེན་ས་ལ་རེག། །དུས་རྒྱུན་དུ་ཚོགས་མཆོད་རྟེན་བཞུགས་གལ། །བར་སྐབས་རེར་སྐུ་ལ་བསེར་བུ་འབྱུང་། །འཛི༷་སྐེད༷་གཉིས་དཔུང་ཚོགས་འགྲན་བཞིན་དུ། །རང་གཞན་གཉིས་གཅིག་སེམས་གཅིག་གིས་དཀྲུགས། །དགྲ་ཟིན་གྱི་བྱ་ར་རེས་མོས་བྱེད། །དབལ་ཤུལ་དང་ཨ་སྐྱོང་གཉིས་པོ་གཏུག། །སྡེ་གཉིས་དེ་ཡ་མ་བླ་རུ་འགྱུར། །འཛི༷་སྨད༷་དུ་དགེ་བའི་ལྟས་བཟང་འཆར། །ཤི་འདྲེ་ཡིས་སྣ་འདྲེན་དར་རྒུད་འབྱུང་། །བར་སྐབས་ཞིག་སངས་རྒྱས་སྤྲུལ་པ་འབྱུང་། །ཁྱད་པར་དུ་འཕགས་པའི་རྗེས་བཟུང་བ། །ཉི་ཕུག་གི་སྤྲུལ་པའི་སྐྱེས་བུ་ཞིག །དེ་ག་རུ་བཞུགས་ནས་འགྲོ་ཚོགས་འདུལ། །ཡུལ་གཞན་འགའ་ཐར་བའི་ལམ་ལ་བཀོད། །སྔར་མེད་ཀྱི་གནས་སམ་གནས་ཆེན་ལ། །རྟེན་བཞེངས་ནས་དེར་འབྲེལ་སེམས་ཅན་ཀུན། །བདེ་ཆེན་གྱི་ས་ལ་བཀོད་ངེས་སོ། །བན་གཟུགས་དང་བུད་མེད་གཉིས་འཚོགས་ནས། །དགེ་བ་ལ་བར་ཆད་མ་བརྩམ་ན། །རྡོར་སེམས་དང་འཕགས་པའི་སྒྲུབ་བཙུགས་ནས། །དེར་འབྲེལ་ཀུན་ཐར་བའི་ལམ་ལ་སྙེགས། །ཡུལ་སྨར༷་རོང་དུ་མུན་པའི་ས་ཆ་ལ། །ཆོས་དགེ་སྡིག་གཉིས་ཡ་མ་ཟུང་དུ་འགྲོ། །ཡུལ་དེར་གནས་ཀྱི་མི་ཆེན་དབང་མཐོ་རྣམས། །ལྷ་ཨོ་རྒྱན་གྱི་གསོལ་འདེབས་ཁྲི་འབུམ་དང་། །མ་ཎི་དང་ཇོ་དར་གྲངས་མེད་ཀྱིས། །རི་ལུང་ཀུན་འགེངས་དང་སྡིག་སྤོངས་རེམས། །ཁྱད་པར་དུ་སེམས་ཅན་སྲོག་བླུ་དང་། །དོན་མེད་ཀྱི་རི་དྭགས་བྱ་གཅན་སོགས། །སྲོག་སྐྱོབས་དང་ཚེ་ཐར་མང་བྱས་ན། །འདི་ཕྱི་གཉིས་བདེ་སྐྱིད་ཉི་མ་འཆར། །བར་སྐབས་ཀྱི་སྡུག་བསྔལ་དེ་ཡིས་སེལ། །རྔ་སྟོད༷་ཀུན་དྲི་ཟའི་གྲོང་ཁྱེར་འདྲ། །རྔ་རྐེད་རྣམས་ཡ་མ་བླ་རྒྱུ་འགྲོ། །རྔ་སྨད་ཀྱི་ཤ་བ་རྒྱ་བོ་དེ། །ཤ་བ་དེ་རྐྱང་ལ་འགྱུར་ཉེན་ཆེ། །རྐྱང་བུ་དེ་འབྲོང་གིས་མ་བསད་ན། །རེ་ཞིག་ནི་ཡུལ་དེའི་བདག་པོར་འགྱུར། །ཐ་མ་བྱང་གི་ཡུལ་དུ་འཕོ། །ཡུལ་སྡེ་གཞན་རབ་ཁའི་ཁྱི་རྒན་འདྲ། །དེར་གནས་ཀྱི་དགོན་སྡེ་ཕལ་མོ་ཆེ། །ཆོས་བཤད་སྒྲུབ་ཀྱི་གྲུབ་མཐའི་རུ་འཛིངས་ངོམ། །དགོན་ལ་ལ་ཞིག་སྟོང་པའི་མཁའ་ལ་ཡལ། །ལ་ལ་ཞིག་དམག་གི་ལས་ལ་རྒྱུག །ལ་ལ་ཞིག་ཅི་བྱ་གཏོལ་མེད་འགྱུར། །ཤར་བཀྲ་ཤིས་སྒོ་མང་རྣར་སྙན་ཡང་། །དུས་དེ་ནས་བཟུང་ཀུན་གྱི་རྩོད་གཞིར་འགྱུར། །དེར་བསྟི་བའི་མཆོག་དམན་ཕལ་མོ་ཆེ། །ཆོས་ཐོས་བསམ་ལ་ཁག་བཞག་རང་གཞན་ཕུང་། །ར༷་རྒྱ༷་དགོན་མི་ནག་འོ་དོད་འབོད། །གསེར༵་ཁང༵་དང་ཆུ༵་བཟང༵་དུང་སྐད༵་སྙན། །བྱ༵་ཁྱུང༵་དགོན༵་ཆུ་དཀྱིལ་ཕ་ཝོང་བཞིན། །སྐུ༵་འབུམ༵་དང་ཇོ༵་ནེ༵་དགུང༵་ལ་རེག །སྟག༵་ཚ༵ང་དང་ལྷ་མོར་དབྱར་རྔ་ལྡིར། །རྒྱལ་ཚ་ཁག་སྣལ་མ་མགོ་བྲེག་འདྲ། །ཟེད་ཟེད་དུ་གྱུར་ནས་ཐ་མ་འཐོར། །ཙི་ན་ཡི་རྒྱལ་ཁབ་དམར་པོས་བཟུང་། །ཡུལ་གྲུ་འགའ་དེ་ཡི་དབང་དུ་འགྲོ། །དེ་སོགས་ཀྱི་ལེགས་ཉེས་མང་འཆར་ཡང་། །དུས་རེ་ཞིག་བཞག་ལ་ནམ་ཞིག་འཆད། །ཨེ་མ། ཡང་ཅིག་སྒྱུ༷་འཕྲུལ༷་མེ༷་ལོང༷་སྐབས། །ཡུལ་དང་དུས་ལ་ཕན་བྱེད་པའི། །གང་ཟག་བཟང་ངན་འབྱོན་ཚུལ་རྣམས། །རེ་ཞིག་གབ་ལ་སླད༷་འཆད༷་ཚུལ༷། །སྣང་མཐའི་སྤྲུལ་པ་པཎ་ཆེན་ནི། །ཙི་ནའི་ཡུལ་བྱོན་ཆོས་ལ་བཙུད། །བདུད་སྤྲུལ་ཁྱི་ཡི་མིང་ཅན་གྱིས། །ཡུལ་སྡེ་ལ་ལ་ཕུང་དུ་བཅུག །སྤྱན་གཟིགས་སྤྲུལ་པས་ལྷ་ལྡན་གྱི། །འགྲོ་བློ་ཆོས་ལ་བསྒྱུར་ནས་ཀྱང་། །མཐའ་ཡི་དམག་ཚོགས་རིམ་བཞིིན་བཟློག །ཙི་ནའི་དམག་ཚོགས་ལོ་རེ་བཞིན། །འུར་ཞིང་ཡུལ་འགར་འཕོ་སྐྱས་བྱེད། །དགོན་ཚོགས་མང་བཅོམ་བསྟན་འཛིན་གསོད། །ནད་མཚོན་མུ་གེའི་སྣ་ཡང་འདྲེན། །ཆོམ་རྐུན་སྣ་ཚོགས་རླུང་ལྟར་འཚུབས། །ལང་གྲོ་པ་དང་གྲུབ་ཆེན་སཱ་ར་ཧའི། །རྣམ་སྤྲུལ་ལྕགས་ཁམས་རྡོ༷་རྗེ༷་གྲོ༷་བོ༷་ལོད༷། །དེར་འབྲེལ་ཕྱིར་མི་ལྡོག་པའི་སོ་ལ་རེག །སངས་རྒྱས་སྤྲུལ་པ་མང་བྱོན་འགྲོ་ཁམས་འདྲེན། །མཆོག་དབྱངས་སྤྲུལ་པ་ཉག་གི་ཕྱོགས་ནས་འབྱུང་། །ཆོས་འབྲེལ་ཐོབ་དང་དེ་ལ་དད་བྱས་ན། །ཨོ་རྒྱན་པདྨ་མཇལ་དང་ཁྱད་པར་མེད། །གང་ཟག་ལས་རབ་དེ་ལ་འཕྲད་པར་ངེས། །འཇམ་དབྱངས་སྤྲུལ་པ་སྨར་གྱི་ཕྱོགས་ནས་འབྱུང་། །གསང་སྔགས་ཆོས་ཀྱི་བསྟན་པའི་སྒྲོན་མེ་སྦར། །ཕྱག་རྡོར་སྤྲུལ་པ་ག༷ར་གྱི་མིང་ཅན་གྱིས། །རེ་ཞིག་བར་དུ་མཐའ་ཡིི་དམག་སྣ་བཟློག །འཇམ་དཔལ་སྤྲུལ་པ་བྱང་གི་ཕྱོགས་ནས་འབྱོན། །འབྲེལ་བ་ཐོབ་ཚད་དཀར་པོའི་ཆོས་ལ་བསྒྱུར། །མདོ་ཁམས་སྟོད་ནས་པདྨའི་མིང་ཅན་གྱིས། །སྔར་མེད་གནས་སུ་རྟེན་བཞེངས་འགྲོ་བ་འདྲེན། །གསེར་གྱི་ཡུལ་ནས་པུ༷ཎྱེ༷་ས་ཁམས་པ། །སྐྱེས་བུ་དེ་ཡིས་སྔར་མེད་རྟེན་བཞེངས་ནས། །རྒྱ་འདྲེ་མ་རུང་འཚོགས་པའི་མགོ་བོ་མནན། །ཡུལ་ཁམས་དེ་རུ་བདེ་སྐྱིད་རེ་ཞིག་འབྱུང་། །ལྷོ་ཡུལ་བྱང་ཆུབ་སེམས་དཔའི་སྤྲུལ་པ་ཞིག །བར་སྐབས་རེར་བྱུང་ཐམས་ཅད་ཆོས་ལ་བསྒྱུར། །ལྷོ་ཁམས་བྲག་ནས་སྤྱན་གཟིགས་སྤྲུལ་པ་འབྱུང་། །འབྲེལ་བ་ཐོབ་ཚད་དཀར་པོའི་ལམ་ལ་འཁྲིད། །བུད་མེད་བདུད་སྤྲུལ་དེ་ཡི་གྲོགས་བྱས་ནས། །རྡོ༷་འཛི༷་སྨར༷་གསུམ་བདེ་ཆེན་ལམ་ལ་བཀོད། །བྱང་སེམས་སྤྱན་རས་གཟིགས་ཀྱི་སྤྲུལ་པ་གཅིག །ཨ་ཡི་ཕྱོགས་ནས་པ༷དྨ༷་དངོ༷ས་གྲུབ༷་མཚན། །དེ་དང་འབྲེལ་ཚད་ངན་སོང་དོང་ནས་སྤྲུགས། །ཐམས་ཅད་ཀུན་གྱིས་བླ་མར་འཛིན་པར་བྱེད། །ཕྱག་རྡོར་སྤྲུལ་པ་རྡོ་ཡི་ཡུལ་ནས་འབྱོན། །གསང་སྔགས་བསྟན་པ་ཉིན་མོ་བཞིན་དུ་རྒྱས། །བཻ་རོའི་སྤྲུལ་པ་སྨར་ཁམས་ཕྱོགས་ནས་འབྱུང་། །ཡུལ་ཁམས་སྤྱི་ལ་དགེ་བའི་ལྟས་བཟང་འཆར། །གཡུ་སྒྲའི་སྤྲུལ་པ་མདོ་ཁམས་སྨད་ནས་འབྱུང་། །ཆོས་ཀྱི་མིང་ཅན་རྫོགས་ཆེན་རྣལ་འབྱོར་པ། །གསང་སྔགས་བསྟན་པའི་བདག་པོ་ཁྱད་པར་འཕགས། །རེ་ཞིག་བར་དུ་རྒྱ་འདྲེ་བཟློག་པར་བྱེད། །མཚོ་རྒྱལ་སྤྲུལ་པ་བདེ༷་བའི༷་རྡོ༷་རྗེའི༷་མཚན། །དེར་འབྲེལ་དད་ལྡན་ཕོ་མོ་བདེ་ལ་བཀོད། །འཕགས་པའི་རྣམ་སྤྲུལ་འཛི་ཀའི་ཡུལ་དུ་བྱུང་། །རྟེན་བཞེངས་འབྲེལ་ཐོག་ཐར་བའི་ལམ་ལ་འགྲོ། །ཚ་ཡི་ཕྱོགས་ནས་པདྨའི་མིང་ཅན་ཞིག །སྔར་མེད་གནས་སུ་རྟེན་བཞེངས་འགྲོ་ལ་སྨན། །རྔ་ཡི་ཕྱོགས་ནས་བློ༷་ཡི་མིང་ཅན་གྱིས། །སྒྲུབ་སྡེ་གསར་བཞེངས་བསྟན་པའི་བདག་པོར་འགྱུར། །བདུད་སྤྲུལ་སྤྱོད་པ་ཡ་མ་ཟུང་ཅན་ཞིག །ཡུལ་གྲུ་སོ་སོར་ཆོས་ལུགས་མི་འདྲ་སྟོན། །དེ་དང་འབྲེལ་ཚད་ངན་སོང་གནས་སུ་ལྟུང་། །དེ་ཡི་རྟགས་སུ་ཧ་ལའི་ཚོང་དུས་འོང་། །དེ་སོགས་བཟང་ངན་མང་སྣང་རེ་ཞིག་བཞག ། ༈ ཡང་ཅིག་ནི་སྤྱི་དང་བྱེ་བྲག་གིས། །མཆོག་དམན་ཀུན་བསམ་པ་གཅིག་དྲིལ་དུ། །སོ་སོ་ཡི་དགེ་བསྒྲུབ་སྡིག་སྤངས་རེམ། །ནམ་ཞིག་ཡང་དགེ་བའི་ལྟས་བཟང་འཆར། །ཀཿརྫོགས་དང་དཔལ་ཡུལ་བསྟན་འཛིན་རྣམས། །ཐུགས་མཐུན་ཞིང་གཅིག་གྲོགས་གཅིག་བྱས་ན། །རྙིང་བསྟན་འདི་བླ་ནས་བླ་རུ་འཕགས། །སངས་རྒྱས་ཀྱི་བསྟན་པའི་སྲོག་ཤིང་ཡིན། །ས་བརྟན་གྱི་སྤོ་ལ་ཉི་ཤར་བཞིན། །འཛམ་གླིང་གི་འགྲོ་ལ་ལྷག་པར་སྨན། །དགེ་ལུགས་ཀྱི་བསྟན་པ་རིན་པོ་ཆེ། །ཡུལ་ཕྱོགས་ཀུན་དབྱར་རྔ་བཞིན་དུ་གྲགས། །ཁྱད་པར་དུ་བྱང་གི་ཕྱོགས་སུ་རྒྱས། །མཐའ་མ་ཡང་རྙིང་མའི་ཁུངས་སུ་ཐིམ། །ཇོ༷་ན༷ང་གི་བསྟན་པ་བྱིན་ཆེ་ཡང་། །གསར་རྙིང་ནི་གང་ལ་མ་གཏོགས་པའི། །གྲུབ་མཐའ་འདི་བཞི་ལྔའི་ཕྱོགས་བརྩད་ནས། །ཐ་མ་ཡང་གཞན་གྱི་ཁུངས་སུ་ཐིམ། །བཀ༷འ་བརྒྱུད༷་ཀྱི་བསྟན་པ་འཛིན་མའི་སྤོར། །ཁྲི་གདུགས་ཀྱིས་བསྐོར་བ་བྱེད་བཞིན་རྒྱས། །བཀ༷འ་གད༷མས་ཀྱི་བསྟན་པ་འཕེལ་འགྲིབ་མེད། །ཞི༷་གཅོད༷་གཉིས་གངྒཱའི་རྒྱུན་བཞིན་རིང་། །གྲུབ་མཐའ་གཞན་དུས་ཀྱི་འཕོ་འགྱུར་མཚུངས། །དོན་དེ་ཕྱིར་ན་མཆོག་དམན་འགྲོ་ཚོགས་ཀུན། །ཆོས་དགེ་བསྒྲུབ་དང་སྡིག་སྤངས་མ་བྱས་ན། །དུས་ལྔ་བདོ་ཡི་སྙིགས་མའི་མར་གཤམ་ལ། །ལས་ཅི་འགྱུར་རེ་མི་ཤེས་ཨ་རེ་སྡུག །བྱ་དགེ་དང་མི་དགེའི་སེར་གཟུགས་འགས། །ཡུལ་ལ་ལ་ཙམ་ལ་ལ་ཕལ་མོ་ཆེར། །ཁྲ་གླག་དང་འཕར་སྤྱང་བརྟུལ་ཞུགས་འཛིན། །ཡང་ལ་ལ་ཞིག་བྱི་ལའི་བསམ་སྦྱོར་ངོམ། །གཞན་འགའ་ཞིག་རང་མཐོང་ང་རྒྱལ་གྱིས། །སྦོས་ཆེ་བས་ཁ་ནས་སྒྲེགས་པ་དང་། །དེ་བཞིན་དུ་རྐུབ་ནས་དྲི་ངན་གཏོང་། །དགེ་འདུན་པའི་གཟུགས་བརྙན་བན་འགོང་འགས། །རྩ་བཞི་ཡི་ཁྲིམས་དང་དབང་བཞི་ཡི། །དམ་ཚིག་གི་རིམ་པ་ཆུ་ནང་དུ། །རྡོ་འཕང་བཞིན་བསྐྱུར་ནས་འཁྲུག་ལོང་སྤེལ། །སྤྱི་བྱེ་བྲག་གི་སེར་གཟུགས་ལྟོ་འགྲོ་ཡི། །སེམས་ཇི་ལྟར་འཁྲོས་པས་དམར་སེར་གྱི། །ཕག་གཡར་ནས་ཧ་ལའི་བཟའ་བའི་བཅུད། །དེ་སྙིང་པོར་བཅངས་ནས་ཆེ་དགུ་འགར། །གཡོ་ཟོལ་གྱི་མགོ་སྐོར་རྫུན་ལ་རངས་། །དེ་བཞིན་དུ་མཚོན་ཆའི་ཕུགས་ནོར་གསོག །ལུགས་ཟུང་གཉིས་ཤར་རིའི་ཉི་གྲིབ་བཞིན། །ཆེར་མི་འགྱང་མཚན་མོར་འགྲོ་འདིས་སྐྱོ། །དོན་དེ་ཕྱིར་མཆོག་དམན་འགྲོ་བ་ཀུན། །སྐྱབས་དཀོན་མཆོག་གསུམ་ལ་དད་པ་དང་། །ལར་མ་ལུས་འགྲོ་ལ་སྙིང་རྗེ་དང་། །ཆོས་རྟེན་འབྲེལ་གྱི་བདེན་པ་འདི་ལྟར་སྒྲུབས། །ལྷ་དཀར་ཕྱོགས་ལ་གཏང་རག་བཟང་པོ་དང་། །ནག་ཕྱོགས་ལ་སྦྱིན་པ་གྲངས་མང་སྒྲུབས། །ཁྱད་པར་དུ་གུ་རུའི་རྣམ་ཐར་དང་། །ལེའུ་བདུན་དང་བསམ་ལྷུན་ཁྲི་འབུམ་སྒྲུབས། །ཞི་དྲག་གི་སྦྱིན་བསྲེག་གྲངས་མང་པོ། །གུ་དྲག་དང་རྟ་ཕྱག་ཁྱུང་གསུམ་གྱི། །སྒྲུབ་བསྙེན་དང་བཀའ་བརྒྱད་གཤིན་རྗེ་ཕུར། །འཁྲུགས་སྐོང་དང་སྡེ་བརྒྱད་ཁང་བཟློག་མདོས། །ཁྱད་པར་དུ་མ་ཎི་སིདྡྷི་དང་། །སྒྲོལ་མ་ཡི་ཇོ་དར་རྡོ་བརྐོས་གནད། །དེའི་ཕྱིར་ན་བཟླས་བརྗོད་རེམ་ལ་གྱིས། །དེས་རང་གཞན་དོན་གཉིས་ལྷུན་གྲུབ་འགྱུར། །དོན་དེ་ཕྱིར་ལུང་བསྟན་ཟོལ་མ་འདི། །མི་མདོ་ཁམས་སྨད་དུ་སྐྱེས་པའི་མི། །མིང་བྱང་ཆུབ་རྡོ་རྗེར་འབོད་པ་འདིས། །ཡིད་སྣང་ངོར་གང་ཤར་ལྷུགས་པར་བྲིས། །དབྱིངས་ཆོས་ཉིད་འགྱུར་མེད་བདེན་པ་དང་། །ཆོས་བསླུ་མེད་རྟེན་འབྲེལ་འབྱུང་བའི་མཐུས། །མ་འགྲོ་བའི་སྡུག་བསྔལ་རྒྱུ་རྐྱེན་འབྲས། །ཡོངས་ཟད་ནས་བདེ་ཆེན་འགྱུར་མེད་སྨོན། །ཞེས་འབྱུང་འགྱུར་ལུང་བསྟན་ཐོལ་བྱུང་ཐོགས་མེད་དུ་སྤེལ་བ་འདི་ནི་ཟབ་མོ་གཅོད་ཀྱི་རྣལ་འབྱོར་པ་འཇིགས་མེད་གཞན་ཕན་མཐའ་ཡས་དང་། སྔགས་ཀྱི་རྣལ་འབྱོར་པ་རྔ་བླ་རྒྱལ་བ་མཆོག་དབྱངས་གཉིས་ཀྱིས་བསྐུལ་ངོར། བྱ་བྲལ་རྡོ་བླའི་བྲིས་པ་རིས་མེད་འགྲོ་ལ་ཕན་པའི་རྒྱུར་གྱུར་ཅིག་གུ། །དགེའོ། །དགེའོ། །དགེའོ།། ཨེ་མ་ངོ་མཚར་་་་ཨེ་མ་ངོ་མཚར་རྨད་ཀྱི་ཆོས། །སྣང་བའི་རྨི་ལམ་སྒྱུ་མ་ལྟར། །བཟང་ངན་སོགས་འཆར་སྒོ་ཆུ་རིས་བཞིན། །འགགས་མེད་དུ་སྣ་ཚོགས་མེ་རེ་རེ། །སྟོངཔ་འདི་ཀུན་གསལ་དབྱིངས་བཞིན་དུ། །ཕྱོགས་ཆ་སོགས་དངོས་མཚན་ལས་འདས་ཀྱང། །དྲན་རིག་གི་ཤེལ་སྒོང་དྲི་བྲལ་ལ། །རང་བྱུང་གི་ཡེ་ཤེས་ཝ་ལ་ལ། །ལྷ་འདྲེ་གཉིས་རྟོག་པས་བཏགས་མོད་ཀྱང་། །སེམས་ཉིད་ཀྱི་རང་རྩལ་འགག་མེད་ལས། །སྣ་ཚོགས་ཀྱི་ཆོ་འཕྲུལ་སྨིག་རྒྱུ་ལྟར། །དྲན་ཤེས་ཀྱི་མིག་སྔར་རབ་མ་རིབ། །དུས་གསུམ་གྱི་ཐ་སྙད་རྫུན་རིས་ཚིག །ཟོལ་ཟོག་གི་རང་བཞིན་ཤེས་མོད་ཀྱང་། །འབྱུང་འགྱུར་གྱི་རྟེན་འབྲེལ་བཟང་ངན་གཟུགས། །སྣ་ཚོགས་ཀུན་རྦ་རླབས་བཞིན་ཤ་ར་ར། །རཱ་ཛ་གང་དུས་འདིར་བྲོ་འཚལ་ཡང་། །སྤྱོད་ལམ་གྱི་ཉེས་པས་མ་བསླད་ན། །ལྷུན་པོ་ཡི་སྤོར་ཆགས་ན་བུན་དེ། །བསེར་བུ་ཡིས་བསྐྱོད་བཞིན་ཡ་ལ་ལ། །མཛའ་འཁོན་གྱི་ཡུལ་གྱུར་ལ་ལ་ཞིག །དགའ་སྐྱོ་ཡི་ཉམས་ཀྱིས་འགྲོགས་གྱུར་ནས། །ཡར་མར་གྱི་སོ་མཚམས་མཚང་ཞིག་ནས། །ཅི་བྱེད་ཀྱི་གཏད་སོ་འཁོར་རོ་རོ། །ཧ་ལ་ཡི་སེམས་ལྡན་ལྟོ་འགྲོའི་ཁྱུ། །བྱ་ཁྱུང་གིས་བསྲུང་བའི་བསྲུང་བྱ་ལ། །འཁྲེན་གྱུར་ཞིང་དུར་གྱི་མངོན་རྟོག་གིས། །གཡོ་འཕྲུལ་གྱི་ཐབས་མང་ཐོ་ལོ་ལོ། །འདི་དག་སོགས་མང་ཞིག་ཆུ་རྒྱུན་བཞིན། །ཐོལ་བྱུང་དུ་ཤར་ཡང་ཐོག་མ་ཙམ། །སྨྲོས་པ་ལས་གཞུང་གཤམ་སྙིང་གཏེར་གཏམ། །བྱུང་བ་དང་འབྱུང་འགྱུར་ཡོངས་ལ་དགེ། །ཡང་ད་དུང་མ་ཚང་ཁ་སྐོང་གི། །ཚིག་བྲག་ཆ་བཞིན་བདེན་རྫུན་བྲལ་བར་སྒྲོགས། །ཤར་རྒྱ་སྟག་གི་ངར་སྒྲས་ཡུལ་འགའ་ཡི། །མི་མང་པོ་ཞིག་རབ་ཏུ་སྐྱོ་ནས་སུ། །དགྲ་ཟིན་གཉིས་ཀྱི་ཕྱོགས་འཛིན་རང་ཞིག་ནས། །རང་གང་དགའ་རུ་ཡིན་པའི་ལྟད་མོ་ངོམ། །ལྷོ་རིན་ཆེན་འབྱུང་གནས་སྡེ༵་དཔོན་ཕལ། །ཆོས་དགེ༵་སྡིག་གཉིས་གོ་ས་བརྗེ་འབྲས་ཀྱིས། །ལས་རྣམ་སྨིན་གྱི་གཟུགས་བརྙན་སྒྲ་རུ་གྲགས། །ནུབ་ལྷ་མི་ཡི་མཆོད་སྡོང་ཕྱི་མའི་མཚོར། །མི་མངོན་པའི་རྒྱ་ཡིས་བཏབ་མོད་ཀྱང་། །ཡོངས་འགྲོ་བ་ཡི་བསོད་ནམས་སྐྱ་རེངས་ཀྱིས། །དུས་ཡུན་རིང་དུ་ཐོགས་མིན་རྟ་བདུན་ཅན་། །གསལ་ངེས་འགྱུར་ལོག་རྟོག་ཆུ་ཁུར་གྱིས། །དཔུང་འཐིབས་སྲིད་ན་སོམ་ཉིའི་འབྱུང་བྱ་དགོད། །བྱང་བཻཌཱུར་ཞུན་མའི་ཆུ་གཏེར་དེར། །སྔར་མི་སྲིད་པའི་རྫས་གཟུགས་ཕུང་འཚེངས་ཅན། །ཡུལ་དེ་ཉིད་དང་གཞན་ཡང་དེ་འདྲའི་འཁྲིད། །འཕྲལ་ལེགས་ཉེས་གཉིས་གང་ཡིན་མི་འཚལ་ཡང་། །ཕུགས་མང་པོ་ཞིག་དགའ་སྐྱོའི་རྒྱུ་རུ་འབྱུང་། །དབུས་བཱཻ་རོ་ཡི་གདུལ་ཞིང་ཡུལ་འདི་ཡི། །རྗེ་རཱ་ཛ་དང་རིགས་ཀྱི་མྱུ་གུ་ཟུང་། །རྫས་མིག་སྨན་གྱི་མདངས་འཛིན་གུར་དབུས་སུ། །ཡུལ་གསེར་ཆ་རུ་གཏོགས་སར་གནས་བཟུང་ངམ། །དེ་གནས་དུས་ཀྱིས་བསྐལ་ནས་བློ་བསྒྱུར་ན། །ས་ཡུལ་རི་འདིའི་གང་འགོམ་བཟང་པོའི་སར། །ཚུལ་གོང་བཤད་བཞིན་བཞུགས་ཁྱིམ་རྨད་བྱུང་དུ། །གཞི་ལེགས་ཕེབས་ན་བཟང་པོའི་མངོན་རྟོགས་མཐོང་། །ཡུལ་གོང་འོག་གི་རྫོང་དྲུག་གྲགས་པ་ཅན། །མིང་བཞི་ལུས་ཀྱི་ཕུང་པོ་གནོད་སྦྱིན་དང་། །ལྷ་དཀོར་བདག་ཏུ་བརྫུས་པའི་གཤིན་འདྲེས་བཟུངས། །དོན་དེ་ཕྱིར་ནི་སྤང་བླང་མི་འཛོལ་གལ། །ཡུལ་གསེར་འཛིན་གྱི་དགའ་མར་རྟེན་བཅས་པའི། །ལྷ་ཡོངས་གྲགས་ལ་བསྙེན་ཞིང་སྲིད་ཞུ་བཀུར། །དེས་ཕན་བདེ་ཡི་གྲོགས་བྱེད་དེར་བརྟེན་པས། །གང་མཛའ་བཤེས་ཀྱི་མཆོག་ཏུ་འཛིན་པར་ངེས། །ཚུལ་དེ་མཐུ་ཡིས་འཕྲལ་ཕུགས་དགའ་བདེའི་རྒྱུར། །འགྲོ་ངེས་པ་ཡི་འབྲས་བཟང་སུས་འགོག་ནུས། །མོ་གདོང་གཅིག་མས་ནག་མོའི་བརྡུལ་ཞུགས་ཀྱིས། །ལྷ་རྒྱང་དུ་བྲོས་ཀྱང་རྟོད་ལ་གནོན། །འདྲེ་ལྷར་རློམ་ཡང་ཕན་གནོད་འཕྱང་མོ་ཉུག །དུས་ཇི་ཞིག་ན་དགའ་སྐྱོའི་མིག་མང་རྩེ། །དེའི་ཕན་གནོད་ཀྱིས་མཆོག་དམན་འབྲིང་གསུམ་གཡོ། །རྐྱེན་དེས་བྱས་ནས་སྲིན་བུ་མགོ་མང་གཟིང་། །དེར་ཀླད་མེད་འགས་སྲི་ཞུ་ཕུ་དུད་བརྩོན། །རྐྱེན་དེ་ཀུན་གྱི་ས་བོན་སུས་བཏབ་ན། །འདྲེ་བྲག་གནས་ཀྱི་རཀྴ་མིར་བབས་དོགས། །དེར་ལྟོས་བཅས་ཕལ་སྡིག་ཏོའི་རབ་ནོན་ནས། །འཕྲལ་ཕུགས་ཟུང་གི་བདེ་ལེགས་ས་བོན་འདོར། །ཡུལ་མི་རེ་ཡི་ཕྱོགས་ནས་མཐུན་སྦྱོར་དང་། །ཡང་མི་དོགས་པའི་ཕྱོགས་ནས་ཁོང་སྲིན་ལངས། །ལྷ་མིར་བརྫུས་ཀྱིས་དངོས་དང་བརྒྱུད་ནས་སྨིན། །འདྲེ་གྲོགས་བརྫུས་ཀྱིས་ལུགས་ཟུང་དུམ་བུར་གཏོང་། །མི་བཟང་བརྫུས་འགས་ཕྱི་ནང་མངོན་རྟོགས་གབ། །ལར་བཟང་ངན་གྱི་རྟགས་མཚན་མང་གསལ་ཡང་། །ཚིག་བསེར་བུ་ཡིས་སྙིགས་དུས་ཤོག་གུའི་བློ། །གཏོར་དོགས་པ་ཡིས་དེ་ལས་མ་སྤྲོས་ཀྱང་། །སླར་སྐབས་ཤིག་ཏུ་བླང་དོར་སྤྲོ་གྱུར་དུས། །དེར་ཅི་དགོས་ཀྱི་རྟེན་འབྲེལ་འགྲིགས་པར་མཛོད། །ཚིག་དེ་སྐད་ཅེས་བྱ་བྲལ་རྡོ་རྒན་གྱིས། །ཚུལ་བྱུང་རྒྱལ་དུ་སྨྲས་སོ་ཡོངས་ལ་དགེ། །དགེའོ།། །། ཐོལ་བྱུང་གི་གཏམ་ཐོགས་མེད་དུ་སྨྲས་པ།ཨོཾ་སྭ་སྟི། རབ་འབྱམས་རྒྱལ་ཀུན་གྱི་མཁྱེན་བརྩེའི་ནུས་པའི་བདག །དུས་གསུམ་ཀུན་མཁྱེན་གྱི་སློབ་དཔོན་པད་འབྱུང་དང་། །དབྱེར་མེད་མཁྱེན་བརྩེ་ཡི་འོད་ཟེར་སྟོང་འབར་གཟིས། །སྙིགས་དུས་སྐྱེ་དགུ་ཡི་སྨག་རུམ་ཡོངས་གསལ་མཛོད། །ལེགས་པར་གསོན་མཛོད་དང་བསོད་ནམས་ནོར་བུ་ཀྱེ། །དུས་ངན་མེ་གླང་ལ་ཤར་བ་ཙམ་ཉིད་ནས། །སྙིགས་མའི་མངོན་རྟོགས་ཀྱི་ངན་ལྟས་ཤར་བ་ཡིན། །ད་སྟེ་བགྲང་བྱ་གྲངས་མང་ཞིག་མ་འདས་པར། །སྟོད་སྨད་བར་གསུམ་སོགས་དམག་འཁྲུག་མུ་གེ་དང་། །ལོ་ཉེས་སད་སེར་སོགས་མང་ཞིག་འབྱུང་ལྟས་དང་། །ཁྱད་པར་མདོ་སྨད་འདིར་དཀར་ནག་ཁྲ་བོའི་གཟུགས། །མངོན་ཞིངསྣ་ཚོགས་ཀྱི་སྤྱོད་པའི་མིག་མང་རྩེ། །ཤར་ཕྱོགས་ཁྲི་ལྡན་གྱི་རཱ་ཛས་ལྕེ་གཉིས་སྐྱོང་། །ལྷོ་ཕྱོགས་གཅན་གཟན་གྱི་ཁྱུ་སྡེབ་ཀུ་ཅོ་འདོན། །ནུབ་ཕྱོགས་ཆོས་མདོག་གིས་གྲུབ་མཐའི་སྒྲ་རྣམས་སྒྲོགས། །བྱང་ཕྱོགས་རི་འགལ་གྱི་བྱ་སྤྲེལ་མང་ཞིག་འཐབས། །ངང་ཁྱུའི་སྡེ་ཚོགས་ལ་རྒྱ་ཁྲའི་འུར་ཞོགས་སློང་། །པད་རག་གཙུག་རྒྱན་ལ་ཚ་ཟེར་འོད་མདངས་འབར། །དུང་མདོག་ཞྭ་མོའི་རྩེར་ཁུ་བྱུག་གསུང་སྙན་སྒྲོགས། །དཀར་མདོག་ས་བོན་ལ་དམར་པོའི་འབྲས་བུ་སྨིན། །དབུས་གཙང་རི་བཞི་ལ་སྣ་ཚོགས་གཟུགས་བརྙན་ངོམ། ། མདོ་ཁམས་སྒང་དྲུག་ལ་མིག་མང་ཆོ་ལོ་འགྱེད། །རྒྱལ་རོང་རྒྱལ་ཁག་རྣམས་དགྲ་ཟུན་ཡོས་ལྟར་རྔོ། །རྒྱ་སོག་བོད་གསུམ་པོ་ཐག་བྲན་ཇི་བཞིན་བྲེལ། །ཡུལ་ཕྱོགས་ཕལ་མོ་ཆེ་བྱ་ཁྱུ་སྡེབ་བཞིན་འུར། །ཡུལ་འབྲོག་ངེས་མེད་ཀུན་བག་མི་ཕེབས་བཞིན་འདྲོག །ཅི་བྱ་གཏོལ་མེད་ཀྱི་བསམ་སྤྱོད་ཐགས་བྲེགས་བཞིན། །དེ་འདྲེའི་དུས་ངན་གྱི་མངོན་རྟོགས་ངོམ་གྱུར་ཡང་། །སྙིགས་དུས་སྐྱོབས་ངེས་ཀྱི་ལྷ་མཆོག་པད་འབྱུང་ལ། །ཁ་ཞེ་མེད་པ་ཡིས་གསོལ་བ་ཐོབ་དང་ནི། །ངེས་པར་ཕན་བདེ་ཡི་མངོན་རྟོགས་མཐོང་ཞེས་སྨྲ། །མཆོག་གསུམ་རྩ་གསུམ་གྱི་བདེན་པའི་བྱིན་རླབས་དང་། །བདག་གི་ལྷག་བསམ་གྱི་མཐུ་སྟོབས་ནུས་པ་ཡིས། །འགྲོ་རྣམས་དགའ་བདེ་ཡི་དཔལ་ལ་ལོངས་སྤྱོད་ཤོག །ཅེས་འདི་ཡང་རྒྱལ་རོང་པ་བསོད་ནམས་ནོར་བུའི་ངོར་རྡོ་བླ་འཇིགས་མེད་ཕྲིན་ལས་འོད་ཟེར་གྱིས་ཐོལ་བྱུང་གི་གཏམ་ཐོགས་མེད་དུ་སྨྲས་པའི་དགེ་བའི་འགྲོ་རྣམས་རྫོགས་ལྡན་གྱི་དཔལ་ལ་ལོངས་སྤྱོད་པའི་སྐལ་པ་དང་ལྡན་པར་གྱུར་ཅིག། །།དགེའོ།། །། ཨེ་མ་ངོ་མཚར་རྨད་ཀྱི་ཆོསཿ༄༅། །ཨེ་མ་ངོ་མཚར་རྨད་ཀྱི་ཆོསཿ འདི་ལྟར་སྣང་བའི་ཆོས་རྣམས་ཀུནཿ སྣང་ཡང་འཛིན་པ་སྤུ་ཙམ་མེདཿ འོན་ཀྱང་རྟེན་འབྱུང་མ་འགག་ཙམཿ བྲག་ཆ་ཇི་བཞིན་འདིར་སྒྲོགས་ནཿ ཐེ་ཚོམ་ཅན་གྱི་བླུན་རྨོངས་དང་ཿ ང་རྒྱལ་ཅན་གྱི་ཐོས་བྲལ་འགསཿ སྨད་དུ་སྲིད་ཀྱང་བདག་ལ་ཅིཿ དེ་ཕྱིར་རེ་དོགས་བྲལ་བར་སྨྲཿ མཁྱེན་བརྩེའི་འོད་ཟེར་སྟོང་འབར་གཟིསཿ ཤེས་རབ་པདྨོའི་ཁ་ཕྱེ་བསཿ ལྐོག་གྱུར་དྲི་བཟང་ངད་འདི་ངོམཿ རྒྱ་སྟག་གྲོག་མས་གཙེར་སུན་གྱིསཿ ལ་ལུང་ཉུལ་མི་སྡོད་པ་འདམཿ སྣ་ཚོགས་སྒྱུ་མའི་བྱེད་པོ་ཡིསཿ རི་རབ་སྤོ་ཞིང་རྒྱ་མཚོ་དཀྲུགསཿ ལྷ་ལྡན་ཞིང་ལ་སྟོད་སྨད་སྤེལཿ སྟོད་སྨད་ཞིང་ལ་དགའ་དང་སྐྱོཿ རྒྱལ་མོ་དམུ་རྡོ་གནམ་དུ་སློང་ཿ ལུགས་ཟུང་ཆབ་ཀྱིས་ས་ཆེན་འགེབཿ ཡུལ་འདིར་ཉུལ་མའི་ཡན་ལག་སྦྲེལཿ ས་འདིར་ཕྲ་མེན་སེར་སྐྱའི་ཁྱུཿ བྱ་ཚོགས་ཇི་བཞིན་སྤྲོ་བསྡུ་བྱེདཿ རྡོ་ལ་གཞན་གྱིས་རྐང་ལག་རྗེསཿ ཡང་ཡང་འཇོག་ཅིང་འཐབ་ར་འཆའཿ ཤིང་ལྕགས་བར་དུ་དཔུང་ཚོགས་བཞིའིཿ གཡུལ་གྱི་ཕྲུ་མའི་ཆོ་འཕྲུལ་སྟོནཿ མེ་ཆུའི་བར་དུ་སྔར་མེད་མིཿ བང་མིའི་ཚུལ་བགྲོོད་གཉུག་གནས་དང་ཿ འཕྲལ་རྒྱུ་རྩིས་ཀྱི་སྲང་ལ་འདེགསཿ ལ་རྩེར་བྱ་རའི་ལྟད་མོ་དང་ཿ ཀླུང་འགར་ཉུལ་མི་སྔར་མེད་རྒྱུཿ འདི་སོགས་ཕན་ཚུན་ཡུལ་འགའ་རེཿ མི་ཚོགས་འབྲུ་སྣ་བསྲེས་བཞིན་ངོམཿ ལྷ་འདྲེ་མི་གསུམ་ཐག་ཕྲན་བཞིནཿ ལྷ་ཡིན་བསམ་ཙ་འདྲེ་རུ་འགྱུརཿ མི་ཡིན་བསམ་ཙ་བཙན་གཟུགས་ངོམཿ ལྷ་བརྫུ་འདྲེ་བརྫུས་ལུང་པ་འུརཿ སེར་སྐྱ་ཕལ་ཆེར་སྙིང་རླུང་ལྡང་ཿ གནམ་ལ་སྔར་མེད་གཟུགས་སྒྲ་དང་ཿ ས་ལ་སྔར་མེད་ལྟས་མང་འབྱུང་ཿ བར་དུ་སྔར་མེད་སེམས་ཅན་དང་ཿ དེ་བཞིན་བཟང་ངན་གོ་ལྡོག་སོགསཿ མི་རུང་མཐོང་ཐོས་མང་ཞིག་འབྱུང་ཿ དར་མདོ་ཤིང་སྡོང་འགྱེལ་བའི་རོཿ ཡ་མན་མང་པོས་ཧབ་ཐོབ་བྱེདཿ ཆབ་ཀྱི་འཁྱགས་རོམ་ཚད་པའི་གདུངསཿ ཧོར་དྲེ་ཁང་པ་གསར་དང་རྙིང་ཿ སེང་གེའི་ཁོག་པ་རང་ལུས་ཀྱིཿ སྲོག་ཆགས་ཕལ་གྱིས་འབིགས་དང་མཚུངསཿ སྡེ་བཞིའི་དཔལ་ཡོན་དགེ་བཅུའི་གཟུགསཿ བྲག་ལ་བརྐོས་པའི་རི་མོའི་ཟླཿ གེ་སར་གསེར་གྱི་ག་ཤ་ཅནཿ གཅིག་ཏུ་དྲིལ་ཡང་དུམ་བུར་འཐོརཿ ཡུལ་འདིའི་བསམ་སྤྱོད་ཟིལ་བའི་ཆབཿ འགོ་བར་སླ་ཡང་འབྲོས་ལ་རིངསཿ ལ་ལུང་ཀུན་ཉུལ་སྐྱབས་ཡུལ་འཚོལཿ རྒྱལ་རོང་ཕལ་ཆེར་ཁྱི་མོའི་ཚང་ཿ དོར་ཞིང་གཏོལ་མེད་འཐོར་ཞིང་འདུཿ རྡོ་ཡི་སྟོད་སྨད་འཛི་གསུམ་པོཿ འབྲེལ་ཞིང་རེས་འགའ་བྱེར་ལ་རིངསཿ ཡ་མ་ཟུང་གི་ཆོ་རོལ་མེསཿ དགྲ་ཟླའི་རྩྭ་སྦུར་བསྲེགས་ལ་བརྩོནཿ མགོ་ལོག་སྟོད་སྨད་བར་གསུམ་གཿ གོ་མོག་སྐམ་པའི་ཤུལ་བཞིན་ཡང་ཿ ད་རུང་གཞན་ལ་ཇེ་ཆེར་འཚེཿ ཡང་ཅིག་ཆོས་དང་འཇིག་རྟེན་གྱིཿ བཟང་ངན་རྟེན་འབྲེལ་མང་སྣང་ཡང་ཿ རེ་ཞིག་བཏང་སྙོམས་བཞག་ནས་སླརཿ སྤྲོ་འམ་ཡང་ན་ཤོལ་ཡང་སྲིདཿ འདི་རྣམས་ཀུན་ལ་སོ་སོ་ཡིཿ ཕན་དང་བཟློག་པའི་ཐབས་སྣ་ཚོགསཿ ཡོད་ཀྱང་ད་ལམ་དེ་ག་ཙམཿ འདི་ལྟར་ཀུན་གཞིའི་མེ་ལོང་ལཿ སྣང་བའི་གཟུགས་བརྙན་ཇི་བཞིན་དུཿ སྤེལ་འདིས་ཡོངས་ལ་སྨན་གྱུར་ཅིགཿ དགེའོཿ ཿ ན་མོ་གུ་རུ།ན་མོ་གུ་རུ། རྗེ་མཆོག་གསུམ་ངོ་བོ་རྡོ་རྗེ་འཆང་། །མགོན་ཨོ་རྒྱན་པདྨ་དབྱེར་མེད་པའི། །དཔལ་མཁྱེན་བརྩེའི་འོད་ཟེར་རིན་པོ་ཆེས། །ཁོངས་དབང་དམ་པར་བྱིན་གྱིས་རློབས། །བདག་ཆུང་ནས་ཤེས་བྱར་མ་སྦྱངས་པས། །ཚིག་སྐྱོན་མེད་ཀྱི་ལན་ལྡོན་དཀའ་མོད་ཀྱང་། །ཕ་བླ་མ་རྣམ་པ་ཉི་ཤུའི་གྲངས། །ཡོངས་སྐྱབས་ཡུལ་དུ་བརྟེན་བཞིན་སེལ་མེད་མཐུས། །ཆོས་རྟེན་འབྲེལ་བདེན་པ་གསལ་སྙམས་ཡོད། །དོན་དེ་ཕྱིར་འཕགས་མཆོག་དམ་པ་ཡིས། །བཀའ་ཇི་ལྟར་ཕེབས་བཞིན་འདིར་སྤེལ་ན། །ཡོངས་ཐོག་ཏུ་ཁེལ་ཞིག་བླ་མ་མཁྱེན། །ད་གསོན་དང་ཆོས་རྒྱལ་རྡོ་རྗེ་འཛིན། །ཐུགས་འཕྱང་མོ་ཉུག་གི་བློ་སྤོང་ལ། །དོན་འདི་རྣམས་དགོངས་པར་བསྟིམས་འཚལ་ལོ། །ཤར་མ་ཧཱ་ཙི་ནའི་རྒྱལ་ཁམས་སུ། །སྔར་མི་སྲིད་པའི་ཁྲིམས་གསར་མངོན་རྟོགས་ངོམ། །རྐྱེན་དེས་བྱས་ནས་གོ་ལོག་སྣ་དགུ་འབྱུང་། །འོན་ཀྱང་ནི་སྔ་འགྱུར་རཏྣའི་སྒྲོམ། །ཡོངས་སྡེ་བརྒྱད་ཀྱིས་གབ་པ་མངོན་ཕྱུང་ནས། །ཡུལ་དེ་ག་རུ་མི་མངོན་ཚུལ་གྱིས་ནི། །དུག་རེག་ཕུང་རྫས་འཚོ་བྱེད་སྨན་མཆོག་ཏུ། །བསྒྱུར་ངེས་གྱུར་ན་དགའ་སྐྱོའི་གཏམ་མང་སྦིར། །འཕྲལ་ཕམ་རྒྱལ་གྱི་མིག་མང་རྩེ་གྱུར་ཡང་། །ཕུགས་སྔ་འགྱུར་གྱི་གངས་རྩེར་གདོང་ལྔ་འགྱིང། །ཚུལ་དེ་མཐུ་ཡིས་གནམ་ས་གོ་འཕྱུག་བྲལ། །ལྷ་མི་སྡེ་ཕལ་ཆེར་བྱེར་ཞིང་འདུ། །ཧོར་ཕལ་མོ་ཆེས་རང་ཕུང་རང་བརླག་བྱེད། །དེའི་ནང་ཚན་ལ་བྲག་རྩེར་བྱ་འུག་འཚོགས། །རྐྱེན་དེས་བྱས་ནས་རྒྱ་བོད་ཐན་ལྟས་རིགས། །མི་གཡོ་ཅན་གྱི་རྗེས་སུ་འབྲང་སྟེ་མཆི། །ཧོར་དྲེ་བོ་ཡང་ཕྱི་མཛེས་ནང་རུལ་བཞིན། །ཆོས་འཇིག་རྟེན་ཟུང་དབྱར་ཁའི་འཁྱག་རོམ་བཞིན། །ཞག་འགའ་སོང་གི་རྗེས་སུ་ཡོན་ཏན་བྲི། །དགོས་ནི་རི་བ་གྲུབ་མཐའི་བསམ་ངན་འཆང་། །དུས་ཡང་ཡང་དུ་མངོན་མིན་མཐོང་ཆེས་སྐྱོན། །དཔོན་ཆབ་འབངས་ཀུན་བདེ་དོགས་རེས་འགའ་ལྟར། །འགྱུར་མོད་ཀྱང་དཔོན་གྱིས་རེ་ཞིག་སྐྱོབས། །འོན་ཀྱང་་ནི་ལོ་ལྔ་ཚུན་དུ་འཚུབས། །ཡོངས་རྒྱལ་བསྟན་གྱི་འབྱུང་གནས་སྡེ་བཞི་དང་། །དགེ་བཅུ་སོགས་མདོ་སྔགས་ཆུ་མགོ་ཡི། །གངས་རི་ལྟར་དཀར་ཞིང་བརྟན་པའི་གནས། །དུས་དབང་གི་ཁྲ་བོར་འགྱུར་ངེས་ན། །མཆོག་གསུམ་གྱི་བདེན་མཐུས་དེ་བཟློོག་ནས། །རབ་དཀར་གྱི་འོད་མདངས་འཕྲོ་ཡང་སྲིད། །ཞབས་པད་ཉིད་ད་ལྟའི་བགྲང་བྱའི་གྲངས། །བཞི་ལྔ་ཚུན་གེགས་འཚུབས་ཅུང་ཟད་ཅིག །འབྱུང་བའི་ལྟས་ཤར་བའི་འགལ་སྤོངས་ཕྱིར། །ཚེ་བསྙེན་གྱི་གཟུངས་གཞུག་ལྡན་པ་ཡི། །ཚྭ་འབུམ་ཡང་གསུམ་ལས་མི་ཉུང་དང་། །དེ་བཞིན་དུ་ཆུ་གཏོར་འབུམ་ཕྲག་བཅུ། །མཎྜལ་ཡང་དེའི་གྲངས་འདོད་གསོལ་བཅས། །བྱ་སྟོན་དང་བྱིས་པས་སྟོན་མོ་གཟབ། །སྔོན་ཞུས་བཞིན་སྤྲང་སྦྱིན་ཕྱོགས་མེད་བཏང་། །གསར་རྙིང་གི་དགོན་སྡེ་ཐམས་ཅད་དང་། །གཤེན་བོན་དང་བཅས་པ་ཀུན་ལ་ཡང་། །སོ་སོ་ཡི་ཚེ་སྒྲུབ་ཚེ་བསྙེན་དང་། །ཚེ་གཟུངས་ཀྱང་འབུམ་རེའི་གསུངས་བསྐུལ་གནད། །བརྒྱ་བཞི་ཡང་ལོ་གྲངས་བརྒྱ་རྩ་རེ། །ཁ་འབར་མའི་མདོས་བཏང་ཆུ་ལ་བསྐྱལ། །ལན་ཆགས་ཀྱི་གླུད་བསྔོས་གང་མང་བཏང་། །རང་ཡུལ་དུ་བཞུགས་གདན་གཏན་འཇགས་ལས། གཞན་ཡུལ་དང་ལ་རྩེ་ཆུ་སྒྲོལ་སོགས། །འབྱོན་བཞུགས་ཀྱི་མཛད་པ་མ་སྤངས་ན། །འགྱོད་ཆེན་གྱི་མངོན་རྟོགས་གསལ་བར་ངེས། དེའི་ཕྱིར་ན་བླ་དོར་མི་འཛོལ་གནད། །ཚིག་འདི་རྣམས་ཡལ་བར་མི་དོར་གལ། །ནུབ་དབུས་གཙང་རུ་བཞི་མ་ངེས་གཟུགས། །ལྟས་མི་རུང་སྣ་དགུ་འགྲན་པ་བཞིན། །ཆོས་འཇིག་རྟེན་གཉིས་ཀ་ཁྲ་བོ་རུ། །འགྱུར་ངེས་པ་ཡི་སྔོན་ལྟས་འབྱུང་འགྱུར་ཚེ། །དབུས་ལྷ་ལྡན་གྱི་མཆོད་སྡེ་གསར་སློང་ཡང་། །དེར་རེ་དོགས་ཀྱི་དགའ་སྐྱོའི་ཚོན་མང་བྱུགས། །རྐྱེན་དེ་ལངས་པས་བོད་ཡུལ་འཚུབས་མས་ཁྱབ། །བཀྲ་ཤིས་ཀྱིས་ལྷུན་པོའི་ལྷུམས་བྲལ་བའི། །རྐྱེན་བྱས་ནས་ཕ་བི་བི་དང་། །མ་མ་དང་མི་མིའི་ཆོ་རོལ་ངོམ། །དེ་ལྟར་ཡང་རེ་ཞིག་མོག་པོར་འགྱུར། །དེ་ཕྱིན་ཆད་ནས་ངང་བའི་ཁྱུ་ཆེན་པོ། །རྒྱ་ཁྲ་ཡི་འཇིགས་པས་སྐྲག་གྱུར་ནས། །དོགས་ཟོན་གྱི་ངང་དུ་གནས་དགོས་ཀྱང་། །སོ་ཐར་གྱི་ན་བཟའ་རལ་བས་བཏུམ། །ཡུལ་ཕལ་མོ་ཆེར་འཁྱམས་ཡང་སྐྱོ་དགའ་འཕེལ། །ཆོས་བརྒྱད་ཀྱི་མངའ་བདག་སྟོན་གཟུགས་ཕལ། །ཆོས་མིན་གྱི་སྤྱོད་པའི་ཆེ་ཐང་གི །ཁེངས་དྲེགས་ཀྱི་སྐྱོན་ཆེན་རང་ཐོག་ཏུ། །ལྡོག་གྱུར་ན་ཅི་བྱ་གཏོལ་མེད་འགྱུར། །རྨ་བྱ་ལྟར་དུག་གི་ལྟོ་ཟ་ཡང་། །གསང་སྔགས་ཀྱི་དུག་སེལ་སྔགས་དབེན་པས། །ཧ་ལ་ཡིས་ཐར་ལམ་སྲོག་གཅོད་འགྱུར། །དེ་ལ་སོགས་མི་རུང་མི་ཤིས་ལྟས། །མང་རབ་ཞིག་གསལ་ཡང་དེ་ཙམ་མོ། །བྱང་ཕྱོགས་ནས་གངས་ཆེན་ཞུ་བའི་ཆབ། །མཚོ་སྔོན་དང་འདྲེས་པའི་ཆོ་རོལ་གྱིས། །རྒྱ་སོག་གི་རི་བོ་གང་མང་གི། །ལྟོ་དྲལ་ནས་ཤྭ་འུད་རྒྱུག་གྱུར་ན། །ཁམས་ཡུལ་འདིའི་ཞིང་མང་གྲམ་པར་བརྡལ། །རང་འབྱོར་གྱི་མ་ངོམས་གཅན་གཟན་ཁྱུས། །གཞན་སྡེ་ཡང་བག་མེད་ཟས་སྐྱེན་གྱིས། །བླར་གནས་ཀྱི་བྱ་ཁྱུང་ག་རུ་ཊས། །ཁྲེལ་མེད་ཀྱི་གཅན་གཟན་གདུག་པའི་ཁྱུ། །ལྷག་མེད་དུ་གཞོམཚེ་སྐྱབས་ཡུལ་བྲལ། །དེ་ཐམས་ཅད་དགོས་པ་ཆུང་ན་ཡང་། །ཚིག་ཐོལ་བྱུང་དུ་ཤར་བ་ཐོགས་མེད་སྨྲས། །མདོར་རྒྱལ་ཁབ་དེའི་ཆབ་འབངས་ཕལ་མོ་ཆེས། །ཕྱོགས་གཞན་ཞིག་ལ་བལྟ་འདོད་ལམ་རྒྱུག་མིན། །རྗེ་རྒྱལ་པོ་ཉིད་འབངས་འཁོར་ཐམས་ཅད་ལ། །ཕ་མ་ལྟར་བྱམས་པར་གྱུར་ན་ནི། །ཁོང་མངའ་འོག་ཐམས་ཅད་བུ་ལྟར་འདུད། །དོན་དེ་ཕྱིར་ན་ཞལ་ཆེམས་ཐུགས་ལ་ཆོངས། །དུས་ས་ཡོས་ལོ་ལོ་ཐོག་གསར་སྐྱེས་ལ། །ཉེར་འཚེ་ཡང་ཅུང་ཟད་ཆེ་བའི་ལྟས། །ཤར་གྱུར་ན་དེ་ལ་ཕན་བྱེད་ཆོས། །སྟོད་སྨད་ཀྱི་གྲོང་པ་ཐམས་ཅད་ཀུན། །སྤྱི་རིམ་དང་སྒོས་རིམ་ཅི་འདོད་བཞིན། །སྤྲིན་ཆེན་མདོ་སྟོང་ཚར་གསུང་སྒྲོགས་དང་། །ཀླུ་ཆོག་དང་ས་བདག་འཁྲུགས་བཅོས་ལ། །བརྟེན་ས་ཡི་བཅོས་ཕྲན་གཟབ་རྒྱས་དང་། །སྒྲོལ་མ་དང་རིག་བྱེད་ལྷ་མོ་ཡི། །ཆོ་ག་དང་བསྐང་ཚོགས་ཅི་མང་དང་། །བསྟན་མ་དང་ཚེ་རིང་མཆེད་ལྔ་ཡི། །གསལ་མཆོད་དང་ལོ་ཏོག་སྤེལ་ཐབས་འབུངས། །ཁྱད་པར་དུ་འཁོར་འདས་མཆོད་པ་དང་། །སྡེ་བརྒྱད་ཀྱི་མཆོད་པ་ཅི་མང་དང་། །ཆུ་གཏོར་ཡང་འབུམ་ཕྲག་གྲོང་བའི་གྲངས། །རི་རྒྱ་དང་ཀླུང་རྒྱ་བྱ་བྱིས་སྟོན། །སྤྲང་སྦྱིན་དང་བཀྲ་ཤིས་བརྩེགས་མདོ་ཡང་། །སྟོང་ཕྲག་གི་བར་དུ་ཀློག་བཅོལ་གལ། །ཚུལ་དེ་དག་ཇི་བཞིན་ཐོག་ཁེལ་ན། །ཕན་ངེས་པ་བླ་མའི་བཀའ་རྗེས་འགྲོ། །སྐྱབས་མཆོག་གསུམ་བདེན་པའི་བྱིན་རླབས་དང་། །མི་བདག་གི་ལྷག་བསམ་རྣམ་དག་མཐུས། །འདིར་འགལ་སྤོང་མཐུན་བསྒྲུབ་སྨོན་པའི་དོན། །ཀུན་ཡོངས་སུ་འགྲུབ་པའི་བཀྲ་ཤིས་ཤོག། །། འབྲེལ་ཐོགས་རྣམས་འཕྲལ་ཕུགས་ཀུན་བདེ།ཨེ་མ་ཧོ། ཞིང་རབ་འབྱམས་རྒྱལ་བ་སྲས་བཅས་ཀྱི། །དཔལ་ཡོན་ཏན་གྱི་མངའ་བདག་ཨོ་རྒྱན་རྗེ། །གང་མངལ་སྐྱེས་ཀྱི་ཚུལ་བཟུང་གྲུབ་མཆོག་གཙོ། །ཨོ་རྒྱན་འཇིགས་མེད་གླིང་པས་དགེ་ལེགས་སྩོལ། །དུས་སྔོན་བྱོན་གྱི་སངས་རྒྱས་བྱང་སེམས་དང་། །ཉན་རང་དང་འཕགས་བོད་གྲུབ་ཐོབ་རྣམས། །ཆོས་ལྐོག་གྱུར་གནས་མངོན་སུམ་གཟིགས་ལགས་ཀྱང་། །དུས་ད་ལྟ་ཡི་བདག་དང་བདག་འདྲ་ཡིས། །ཚུལ་ཇི་བཞིན་དུ་ཤེས་རློམ་ནོངས་པའི་རྒྱུ། །ཡིན་མོད་ཀྱང་བཛྲ་པཱ་ཎི་ཡིས། །རྒྱུད་བྱིན་གྱིས་རླབས་པའི་ནིརྨ་ཀའི། །གསུང་ལན་མེད་བྲག་ཆ་ལྟར་གྱུར་ན། །ཐུགས་རངས་མིན་དོགས་ནས་འབྱུང་འགྱུར་གྱི། །རྟེན་འབྲེལ་དང་ལེགས་ཉེས་བཟང་ངན་གྱི། །གཟུགས་ཨ་ཪྴར་སྣང་བཞིན་འདིར་ངོམ་ན། །སེམས་ཐེ་ཚོམ་དང་བྲལ་བས་ལྟད་མོ་ལྟོས། །སྟོད་དབུས་གཙང་དུ་གཅན་གཟན་མགོ་དགུ་འབྱུང་། །རྐྱེན་དེས་བྱས་ནས་འཁྲུག་རྩོད་ཡོས་ལྟར་རྔོ། །དེར་གསེར་མདོག་གི་པུཥྤེའི་ཞིང་ས་ལ། །གཞན་ལྷ་མིན་གྱི་སྒྱུ་འཕྲུལ་སེར་བས་འཚེ། །དེའི་རྐྱེན་ལངས་ཏེ་དབུས་གཙང་ཁམས་གསུམ་སོགས། །ཡོངས་རྒྱལ་ཁམས་ཀུན་ཝ་སྤྲེལ་ཁྱི་སྤྱང་གི །དུད་མོ་དང་ཕ་ཕ་བི་བིའི་སྒྲ། །མ་མ་དང་མི་མིས་སྣང་བ་གཙེར། །བར་མདོ་སྔགས་ཀྱི་མ་ཕྱིའི་འབྱུང་གནས་སུ། །ཆོས་སྔ་དར་གྱི་ས་བོན་དུག་འབྲུ་བསྲེ། །དེས་རྐྱེན་བྱས་ནས་ལྷ་འདྲེ་མི་གསུམ་འཁྲུག །མཐོ་འཆི་མེད་ལམ་གནས་བྱ་རྒྱལ་རྒོད། །དམའ་དོག་མོ་ཡི་ས་དོང་རྙིས་འཛིན་སྲིད། །སྐྱོན་སྣ་ཚོགས་ཀྱི་བྱ་རིགས་མང་འདུས་ནས། །བར་མདོ་ཁམས་སྟོད་སྣ་ཚོགས་སྒྲ་ཡིས་འགེངས། །སྨད་དར་མདོ་ཡན་སྟག་གཟིག་དོམ་དྲེད་དང་། །འཕར་སྤྱང་སྡིག་སྦྲུལ་སོགས་འཁྲུག་ལྟས་ཤིག་ཤིག་གཟེངས། །ཡུལ་མདོ་སྨད་ཀྱི་རྒྱལ་རོང་ས་ཆ་ཀུན། །ཕལ་མོ་ཆེ་ཁྱི་ཕག་ཚང་འཐོར་བཞིན། །མཆོག་དམན་གྱི་གོ་ས་འཆོལ་ཡང་རྩོད། །ཤར་ཉི་འོག་གི་ཙི་ནའི་རཱ་ཛ་ཆེས། །ཁྲིམས་ཁྲ་བོ་རུ་སྟོན་བཞིན་གོལ་འཆུག་ངོམ། །དེས་རྐྱེན་བྱས་ནས་རྒྱ་བོད་དུམ་བུར་བགོ། །ལྷོ་ཉག་རོང་གི་སྟོད་སྨད་བར་གསུམ་པོར། །སྔར་མ་དར་བའི་ཟ་བྱེད་མཆུ་རྣོན་གྱིས། །དུས་ངེས་མེད་དུ་འབིགས་ཀྱང་རང་བྱས་ལས། །ཡུལ་དེ་ནས་བཟུང་སྟེ་ལྷོའི་རྒྱལ་ཁམས། །ཀུན་ས་འོག་གི་ལྟོ་འགྲོའི་རྩེད་མོས་ཕུངས། །དེའི་ནང་ཚན་ལས་ཧོར་ཞེས་ཁོལ་བུ་པ། །ཀུན་ཕྱི་ནང་དང་བར་གྱི་འཚེ་བས་འགྲོགས། །བྱང་བོད་སོག་གི་ལྷ་སྡེ་མི་སྡེ་དང་། །སྔར་སྡེ་དང་བོན་སྡེ་ཀླ་ཀློའི་སྡེ། །ཀུན་ལུགས་ཟུང་གི་ཁྲིམས་གསར་རེ་འབྱམས་ཀྱི། །ལྕེ་དུག་དང་ཁ་རླངས་ཀྱི་དུག་གིས་མནར། །རྐྱེན་དེས་བྱས་ནས་སེར་བོའི་བསྟན་པའི་ཁྱུ། །དཔེར་ངང་བའི་ཁྱུ་འགྲོགས་བཞིན་བྱེར་ཞིང་སྡུད། །ནུབ་དཀར་སེར་དམར་མཐིང་ནག་ཆོས་ལུགས་སྡེབ། །དཀར་པོའི་དཔུང་བསིལ་རིར་ཉི་མས་བཞིན། །སེར་བོའི་ཞིང་སྒྱུ་མའི་སྲིན་བུས་ཟ། །དམར་པོ་ལ་མཐིང་ནག་རྒྱན་ཆ་འདོག །དེས་རྐྱེན་གྱིས་གསང་སྔགས་འཆོལ་བར་སྤྱོད། །འོན་ཀྱང་ནི་གཏེར་ཆོས་འགྲོ་ལ་སྨན། །ཞྭ་དུང་མདོག་ལ་ལྗང་གུའི་རྒྱན་ཆས་འདོགས། །ཤར་ཀཿཐོག་ལ་ས་བདག་ཀླུ་གཉན་གྱིས། །ཕན་གནོད་གཉིས་རེས་མོས་བྱེེད་ལྟར་འགྲན། །ལྷོ་བལ་ཡུལ་དུ་ཆ་ལུགས་ཆོས་ལུགས་ཚུལ། །རང་ལུགས་ཞེས་སད་ཀྱིས་བཀྲག་མེད་བྱེད། །འཛི་སྟག་མོ་དགོན་སྟག་ལྤགས་རི་མོ་བཞིན། །བཀྲག་གཟི་མདངས་ངོམ་ཡང་གསོབ་ལས་ཅི། །བྱང་ཨ་ཏི་ཡི་ཚོམ་བུའི་རྟེན་བརྟེན་པ། །ཀུན་ཡར་མཐའ་དང་མར་མཐའ་མ་ལྷུང་བཞིན། །དུས་རེ་ཞིག་ལ་མིང་དོན་མ་འཆོལ་ཙམ། །གནས་རྒྱལ་རོང་གི་དབེན་གནས་རི་ཁྲོད་ཀྱང་། །དུས་རེ་ཞིག་ལྷ་ཁང་རི་མོ་བཞིན། །སྟོན་འཁོར་བཅས་དཱི་བཾ་རི་མོར་མཚུངས། །འོན་ཀྱང་ནི་སྟོན་པ་དབྱིངས་བཞུགས་ཀྱི། །མངོན་རྟོགས་ཀྱི་ཐུགས་རྗེས་མ་དོར་ན། །ལྷ་མིའི་སྡེ་ཡ་བྲལ་མ་སོང་ཙམ། །འོང་གྱུར་ན་དགྲ་ཟླ་གྲོགས་སུ་གྱུར། །ལར་དུས་འདི་ནས་བཟུང་སྟེ་བགྲང་བྱ་ཡང་། །ལྔ་དྲུག་ཚུན་དུས་ལོག་གི་གཟུགས་བརྙན་ཡང་། །ལོ་རེ་བཞིན་མི་སྡུག་གཟུགས་དང་སྒྲ། །འབྱུང་བཞི་ཡི་གཡོ་འཁྲུག་སྣ་ཚོགས་གཟུགས། །འབྱུང་ངེས་ཀྱང་སུས་ཀྱང་བཟློག་པར་དཀའ། །འོན་ཀྱང་ནི་སྙིགས་དུས་སྐྱོབས་པའི་ལྷ། །ཨོ་རྒྱན་གྱི་སློབ་དཔོན་པད་འབྱུང་ལས། །གཞན་པ་སུས་བཟློག་པར་དཀའ་ངེས་ཕྱིར། །ཨོ་རྒྱན་གྱི་རྣམ་ཐར་སྟོང་ཚར་དང་། །ལེའུ་བདུན་མ་ཁྲི་དང་བསམ་ལྷུན་འབུམ། །གུ་རུ་ཡི་བསྙེན་པ་དུང་ཕྱུར་གྲངས། །ཆོས་རྒྱལ་གྱི་ཡང་སྲིད་ཉང་རལ་དང་། །ཆོས་དབང་དང་རྒོད་ལྡེམ་པ་གསུམ་གྱིི། །གཏེར་བྱོན་གྱི་བཀའ་བརྒྱད་རྣམ་གསུམ་དང་། །ཕུར་སྒྲུབ་དང་གུ་རུ་དྲག་པོ་ཡི། །སྒྲུབ་པ་དང་འབྲེལ་བའི་ལས་མཐའ་ཡང་། །བསྲེག་མནན་དང་འཕང་བའི་ལས་ལ་བརྩོན། །བྱ་ཁྱུང་གི་གཤོག་པ་གཡོས་གྱུར་ན། །སྔ་འགྱུར་གྱི་ཁྲོ་བོ་བཅུ་ལ་སོགས། །ཁྲག་འཐུང་གི་ཚོགས་ཀྱི་འཐོར་རླུང་དང་། །རིགས་སྔགས་ཀྱི་བརྫུས་པའི་མེ་དཔུང་གིས། །ཡང་ཡང་གིས་བཟློག་ན་ཞི་བར་ངེས། །ས་འོག་གི་ལྟོ་འཕྱེས་འགྲེ་ལྡོག་གིས། །ཡུལ་ཕྲན་འགའི་དབྱིག་འཛིན་སློག་གྱུར་ན། །ག་རུ་ཊ་དམར་ནག་གིས་བསྙེན་སྒྲུབ་དང་། །ལས་སྦྱོར་དང་ས་བདག་དབང་ཆེན་གྱི། །སྒྲུབ་པ་ལ་ནན་གྱིས་འབུངས་གྱུར་ན། །རེ་ཞིག་ཙམ་ཞི་ཞིང་བཟློག་པར་འགྱུར། །འབྲུག་སྦྲུལ་ལ་མཐོ་དམན་གོ་ལྡོག་དང་། །བཟང་ངན་དང་ཡུལ་འབྲོག་དེ་བཞིན་འགྱུར། །རྟ་ལུག་ལ་སྐམ་གཤེར་གོ་ལྡོག་དང་། །སེར་སྐྱ་ཡི་བསམ་སྦྱོར་གོ་ལོག་འབྱུང་། །སྤྲེལ་བྱ་ལ་རི་ཐང་བརྗེ་ལེན་དང་། །དལ་འགྲོའི་རྒྱུན་མགོ་མཇུག་ལྡོག་འདྲ་ལ། །རྐྱེན་བྱས་ཏེ་རྟེན་གསུམ་ག་གེ་གཡོ། །ཁྱི་ཕག་ལ་ནད་མུག་མཚོན་འཁྲུག་དང་། །དབུས་མཐའ་སོགས་མི་འགའ་སྡོད་པ་འདམས། །ནུབ་བྱི་གླང་ལ་ཆོས་དང་འཇིག་རྟེན་ཟུང་། །བབ་ཆོལ་གྱི་ཁྲ་བོའི་གཟུགས་བརྙན་ངོམ། །སྟག་ཡོས་ལ་ཕྱོགས་མཚམས་ཕལ་མོ་ཆེ། །ཡོས་རྔོད་བཞིན་འདུ་ཞིང་འཐོར་ཡང་སྲིད། །དེ་ཕན་གྱིས་བགྲངས་བྱ་འགའ་དང་འགར། །རྫོགས་ལྡན་དང་གསུམ་ལྡན་གཉིས་ལྡན་དང་། །རྩོད་ལྡན་དང་བཅས་པའི་སྒྱུ་མ་ངོམ། །དེའི་རྗེས་སུ་བདེ་ཆེན་འགྱུར་མེད་གྱུར། །མཆོག་གསུམ་དང་རྩ་གསུམ་བདེན་སྟོབས་དང་། །ཁོ་བོ་ཡི་ལྷག་བསམ་རྣམ་དག་མཐུས། །བསྟན་གཡོའི་ཁམས་བདེ་ཆེན་ཞིང་ཁམས་ལྟར། །སྡུག་བསྔལ་གྱི་མིང་མེད་བདེ་སྐྱིད་འཛོམས། །འགྱུར་མེད་ཀྱི་དཔལ་ཡོན་ཕུན་ཚོགས་ཤོག། །།དགེའོ།། །། དཔལ་ཨོ་རྒྱན་གྱི་ཐུགས་རྗེའི་འོད་ཟེར་འཕྲུལ།དཔལ་ཨོ་རྒྱན་གྱི་ཐུགས་རྗེའི་འོད་ཟེར་འཕྲུལ། །དུས་སྙིགས་མའི་འདྲེན་མཆོག་ཨ་བྷྱཿ དཱི་པ་ཡིས་ཇི་བཞིན་གསལ་མཛད་ན། །ཀུན་དག་སྣང་དང་དད་མོས་གསལ་པོར་ངོམ། །གནས་མཆོག་དེའི་སྒོ་མོ་འབྱེད་པའི་ལྟས། །སྟེང་ནམ་མཁའ་སྟོང་པའི་དབྱིངས་རུམ་ནས། །སྔར་མ་མངོན་པའི་གཟུགས་དང་མ་ཐོས་སྒྲ། །འོག་དབྱིག་འཛིན་གྱི་བུ་མོས་གར་བསྒྱུར་ནས། །ཤར་མ་ཧཱ་ཙི་དང་བྷོ་ཊའི་ཡུལ། །དབུས་གཙང་དང་ཁམས་གསུམ་རི་མོར་འགོད། །ཡུལ་འདི་ཡི་དབ༵ལ་མིའི་བྱེའུ་ཚང་དུ། །གཞན་ཟ་འདོད་ལྟོ་འགྲོ་ཞུགས་ལ་ལྟོས། །རྩེ་རྣོ་རྟུལ་གསུམ་གྱི་རྭ་བར་དུ། །གཞན་ཚ༷་དྲོད༷་ཁོལ༷་མའི་ཁྲོ༷་ཆུའི༷་ཞུན། །བླུགས་བྱུང་ན་སྔོན་གྱི་ལས་སུ་སོམ། །ཚད་ལས་ཐལ་གླང་ལོ་དྲེགས་ཤིང་རྒྱགས། །ཆུང་སྲེ་མོ་མ་བུའི་ཚང་བརྡིབས་པས། །སྐྱོན་རང་གཟུགས་སྟེང་དུ་ཆས་པ་བཞིན། །དེ་དཀར་ནག་བསོད་ནམས་གོ་ལྡོག་དོན། །ཡུལ་རྡོ༷་སྟོ༷ད་འཇིགས་བརྒྱད་སེར་བས་དོགས་རྡོའི༷་སྨད༷་ཀྱང་ཕུན་ཚོགས་འཕྱང་མོ་ཉུག །བྱང་གཞན་གནོད་རྒྱུ་སྒྲུབ་ཀྱི་གཅན་གཟན་ཁྱུ། །ལྷ་མ་ཧཱ་རཱ་ཛའི་གམ་དུ་ཐོགས། །ཡུལ་འདི་ཡི་མཛའ་འཁོན་བར་མའི་འགྲོ། །ཡོངས་གོ་ལོག་ཚུལ་གྱིས་འཆལ་ སྤྱོད་ངོམ། །གནས་འདི་ལ་དང་བ་སྟོན་པའི་མི། །དཔལ་ཡོན་ཏན་ཀུན་ལྡན་བོས་པ་བཞིན། །མགོན་མཆོག་གསུམ་རྩ་གསུམ་བྱིན་ནུས་མཐུས། །དུས་རྒྱལ་པོ་ལྕགས་ཀྱི་རྟ་ལུག་ནས། །ལོ་ལེགས་ཤིང་ཆར་ཆུ་དུས་སུ་འབེབས། །མི་ཀུན་ཀྱང་དགེ་ལ་རབ་དད་ཅིང་། །ཕྱུགས་ཐམས་ཅད་ནད་མེད་བདེ་བར་འཚོ། །ཡུལ་ཕལ་ཆེར་རྩི་ཤིང་ལོ་ཐོག་རྒྱས། །ཁོང་འཕགས་པའི་སྒྱུ་འཕྲུལ་གཏམ་གྱིས་བྲེལ། །མོ་བྲག་གནས་མིར་བརྫུས་དུཿཁས་གདུང། །གྱོད་དྲག་རྒན་དུས་ཀྱི་བསེར་བུས་འདག །སྟོད་སྡེ༷་བཞིའི་སྤྲིན་ཕུང་དྲི་བཞོན་འཕྲད། །དགེ༷་མི་དགེར་གྱུར་པ་རྗེ་འབངས་དམན། །ཡུལ་ལྷ༷་ལྡན༷་མི༷་དགའ་དམན་མཆོག་བརྗེས། །ཁོང་དྲེགས་ལྡན་ལ་ལ་སོམ་ཉིས་འདར། །ཡུལ་འགའ་འགར་དམན་མཆོག་གོ་ས་འཛོལ། །ལྷ་ཨོ༷་རྒྱན༷་སྤྲུལ་པ་མང་དུ་ངོམ། །བདུད༷་ཕོ༷་མོ༷འི་སྤྲུལ༷་པའ༷ང་དེའི་རྗེས་འབྲངས། །གནས་སྐལ་བཟང་གི་རྟེན་ལ་བརྟེན་པ་དེས། །འདྲེ་བྲག་ལ་གནས་པ་ཐབས་ཀྱིས་འདྲི། །གདོན་ཕུན༷་ཚོ༷གས་དབ༷ང་རྒྱལ༷་མཁར་ཁང་ནང་། །མགོན་དགྲར་ལངས་ཀྱི་འཇིགས་ཚོགས་སུ་ཡིས་འགོག །བདུད་རྡོ་རྗེ་དམྱལ་བའི་སྙིང་རྩ་དེ། །ལྷ་སྒེག་པའི་རྡོ་རྗེའི་མཚོན་གྱིས་གཞོམ། །ཡུལ་པ༷དྨ་ཅན་དུ་གནས་གསར་འཛུགས། །དེར་ལེགས་སོ་སྒྲ་ཡིས་ཕྱོགས་མཚམས་འུར། །མ་མཁའ་འགྲོ་ཤྲཱྀ་དྷཱ༷་ར༷་རྒྱལ། །གང་བཤེས་ཀུན་དགའ་བདེའི་རྫོགས་ལྡན་མཇལ། །དེ་ལྟར་ཡང་གཟུགས་སྐུ་དབང་པོའི་མཚོན། །རྟེན་འབྱུང་གི་བདེན་པའི་བྱེད་ལས་ཀྱིས། །ཞག་སྟོང་ཕྲག་དང་བརྒྱད་ཅུ་མ་འཁྱོལ་ཙམ། །དབྱིངས་སྟོང་པའི་ངང་གར་སོང་ཆ་མེད་འགྱུར། །ཁོང་སྦས་པའི་རྣལ་འབྱོར་འཕགས༷་པའི་མིང་། །ཡུལ་མཐའ་འཁོབ་ཀྱི་མུན་པ་སེལ་སླད་དུ། །རྡོ་ཐལ་བའི་འོག་ནས་ཐོན་སྲིད་ཚེ། །རྟེན་འབྲེལ་གྱི་སྣ་ཁ་མ་ལོག་ན། །ངམ་གྲོག་དང་གཡང་སའི་གཅོང་རོང་འགའ། །ཕན་བདེ་ཡི་ལེགས་ཚོགས་སྤེལ་ཡང་སྲིད། །གླིང་བདུད་འཇོམས་རྡོ་རྗེ་གནས་འདི་རུ། །ལྷ་མཚོ་སྐྱེས་རྡོ་རྗེས་མངགས་བྱུང་ན། །ཡོངས་ཕྱོགས་འདིའི་འགྲོ་ལ་ཕན་བདེ་མོ། །ཁོང་གང་ལ་གང་འདུལ་དཔལ་མངའ་ཞིང་། །ཚུལ་མ་ངེས་སྤྱོད་པས་བསྟན་འགྲོ་གསོ། །མགོན་ཨོ་རྒྱན་མཁན་པོ་བསྟན་འཛིན་པ། །མི་གཞན་ལས་འཕགས་པའི་སྐྱེས་མཆོག་དེས། །གནས་འདི་ཡི་བཀོད་པ་གཞན་ལ་འདོམས། །དེར་གཤེ་སྐུར་འདེབས་མཁན་ས༷པྟ༷་འབྱུང་། །ཡུལ་འཛམ༷་བུའི་གླིང་གི་ཐ༷ང་ཆེན་ན། །བློ་ཀཱ་ལ་ཙཀྲར་གཞོལ་བའི་མ། །མིང་པུཎྱེ་དྷ༷རྨཱའི༷་སྲོག་ཤིང་ཅན། །ཕྱོགས་རིས་བྲལ་བསྟན་འགྲོར་སྨན་ལགས་ཀྱང་། །དུས་ཡུན་རིང་མ་ཡིན་བདུད་དང་རྩོད། །ཚུལ་དེ་ལས་རྒྱལ་ན་གནས་འདི་དང་། །དཔལ་ལག༷་ན༷་རྡོ༷རྗེས༷་བྱིན་རླབས་པའི། །ཁོང་ཀརྨ་དཔའ་བོ་ཧེ་རུ་ཀས། །གནས་འདི་ལ་རྒྱན་གྱིས་བརྒྱན་གྱུར་ན། །ཡུལ་འདི་གའི་བདེ་སྐྱིད་བོས་པ་བཞིན། །ལྷ་ཚེ་དཔག་མེད་ཀྱི་དཔལ་བྱིན་པ། །ཁོང་ཆོས་ལ་དབང་ཐོབ་དམ་པ་དང་། །དཔལ་ཛྙཱ༷་ན༷་སིང༷་ཧཱ༷་སླར་ཡང་འདིར། །གནསཕབ་ན་རང་དང་གཞན་ལ་སྨན། །གནས་རྫོང་ཆེན་རྫོང་ཆུང་ཆུ་གཏེར་གྱི། །རྟེན་འགའ་ལ་བརྟེན་བཅས་ཆོས་ནོར་རྫས། །བདུད་ཕོ་མོས་མ་བཀག་མངོན་ཕྱུང་ན། །དེས་བསྟན་འགྲོའི་རྒུད་པ་རེ་ཞིག་གསོ། །མི་བདག་གི་དགོས་འདོད་གཏེར་གྱི་ནོར། །ཡོངས་བསྟན་འགྲོའི་དབུལ་སེལ་མཆིས་པ་དག །ཚེ་ཕྱི་མར་སྨོན་ལམ་སྙིང་གི་བུ། །ཕ་པདྨའི་གདུང་འཛིན་འགྲོ་ཕན་གླིང་། །མིང་དེ་ལྡན་སྔགས་སྤྱོད་སྐྱེས་བུ་ལ། །གཏེར་དངོས་སམ་དག་སྣང་གསལ་བའི་ངོར། །ཆོས་ཕྱག་རྫོགས་དབུ་མ་ཞི་གཅོད་སོགས། །མཐའ་མ་བཀག་མེ་ལོང་བཞིན་འཕྲད་དེ། །ཚུལ་དེས་ནི་བསྟན་འགྲོར་ཕན་བདེ་སྟེར། །གནས་ལྷ༷་ཚེ༷འི་གུ༷་རུ༷་ཀ༷རྨཱ༷འི་མིང་། །ཡང༷་བཱི༷དྱ༷་དྷཱ༷་ར༷་ཆུ་སྐྱེས་དང་། །དཔལ་ཡོན་ཏན་ཀུན་ལྡན་པུ༷ཎྱེ༷་གཞན། །ཁྱད་པར་དུ་ག་ག་རཏྣ་ཡིས། །བྱིན་རླབས་ཀྱི་སྤྲུལ་སྐུཤཱི་ལས་མཚན། །དེ་རྣམས་ཀྱིས་གནས་འདི་དགའ་ཞིང་མཆོད། །ཚུལ་དེ་མཐུས་ཡུལ་འདིར་ལུགས་ཟུང་དར། །སྐྱབས་རྡོ་རྗེ་ཆོས་ཀྱིས་བྱིན་རླབས་པའི། །མི་རྣམ་གསུམ་བཟོད་པའི་བརྟུལ་ཞུགས་ཅན། །ཁོང་འོད་ཟེར་རྡོ་རྗེའི་ཟེར་མདངས་ཀྱིས། །ཡུལ་ཆེ་ཕྲ་འགའ་ལ་ཕན་སྲིད་ཀྱང་། །མི་བདག་དང་འབྲེལ་མིན་རྗེས་སུ་འགྲོ། །གནས་ལྷ༷་ཚེ་དགོན་གྱི་དོ་ར་རུ། །དཔལ་ཨོ་རྒྱན་མཁན་པོའི་བྱིན་ཐོབ་མགོན། །ཆོས་ཡོ་ག་གསུམ་གྱི་ཡེ་ཤེས་ལ། །དབང་བསྒྱུར་དེའི་ཟློས་གར་པདྨའི་གཉེན། །དཔལ་རྙིང་མའི་ཕྲིན་ལས་གསལ་བྱེད་ཉི། །གེགས་དཀར་ནག་སྤྲིན་གྱིས་མ་བསྒྲིབ་ན། །དེས་གནས་དེའི་ཆུ་སྐྱེས་དགའ་བར་བྱེད། །གནས་དེ་རུ་སྔོན་དར་མདོ་རྒྱུ་སེམས། །དཔལ་བཀའ་དགོངས་དང་ཕུར་བ་བཀའ་མ་སོགས། །དཀྱིལ་གསར་རྙིང་གི་ཞི་དྲག་སྒྲུབ་མཆོད་རིགས། །ཕྱོགས་རིས་གཅོད་ཀྱི་བར་ཆོད་མ་ཞུགས་བཞིན། །ཚུལ་ཇི་ལྟར་དུ་བསྒྲུབ་ན་དར་རྒྱས་ཤིང་། །དེ་བཟློག་འགྱུར་ན་དགོན་དེ་ཁྲ་བོར་འགྱུར། །ལར་མདོ་སྨད་འདིར་གཞན་གྱི་རྦོད་གཏོང་གི །ཤྭ་འུད་ཀྱིས་མི་སྡེ་འཛིན་མའི་ཞིང་། །ལུགས་ཟུང་གི་ལོ་འབྲས་ལེགས་པ་འགའ། །འཁྲུག་རྩོད་ཀྱི་གྲམ་པར་བརྡལ་ལ་ལྟོས། །དཔལ་ཨོ་རྒྱན་ཆེན་པོའི་རྗེས་འཇུག་པའི། །ཀཿརྫོགས་དང་དཔལ་ཡུལ་བསྟན་འཛིན་རྣམས། །ཐུགས་མཐུན་དང་བསྟན་ལ་ཐུགས་བསྐྱེད་ན། །རྙིངབསྟན་འདི་བླ་ནས་བླ་རུ་འཕགས། །མཁོན་རིགས་ལས་མཆེད་པའི་ས༷་བསྟན༷་དང་། །རི་མོ་ཡི་འཆད་རྩོད་རྩོམ་པའི་གཟུགས། །ཀར༷་བསྟན༷་གྱི་ཉི་འོད་ཤར་རའི་སྤོར། །གསལ་གྱུར་ཡང་སྤྲིན་གྱིས་མི་སྒྲིབ་སྨོན། །མི་དགེ༷་བ་སྡོམ་རློམ་ཆོས་ལུགས༷་ཀྱང་། །ཕྱོགས་ལྷུང་གི་གདོན་གྱི་ཆུ་འཁྱགས་ཀྱིས། །དགེ་བཅུ་ཡི་ལོ་ཐོག་ལྷག་མེད་དུ། །གཞོམ་སྐྱོན་གྱིས་དཔལ་ཡོན་རི་མོའི་ཆབ། །ཞི༷་གཅོད་ཟུང་འཕེལ་མེད་འགྲིབ་པའང་མེད། །གནས་འདི་ཡི་ཤར་ནས་ལྷ་མིན་གྱི། །སེམས་མི་ལ་ཞུགས་འགས་ཀུ་ཅོ་འདོན། །ལྷོར་གནས་པའི་སྤྲ་སྤྲེལ་ཙི་སྦིར་སྒྲས། །ཁེང་ནགས་ཉལ་གཉིད་ལོག་ཕལ་ཆེར་སད། །ནུབ་གངས་ཆེན་ཞུ་བའི་ཆུ་རྒྱུན་སྒྲས། །བོད་ཆེ་ཆུང་འདྲོོག་པ་ཙི་ནར་གྲགས། །བྱང་གཅན་སྤྱང་སེམས་ལྡན་བྱུར་པོ་ཆེའི། །ལས་ནག་པོའི་སྟོབས་རྒྱས་རང་ཕུང་བརྩོན། །ཁོང་བླ་དཔོན་ལ་ལ་ཕྱོགས་ཕྱོགས་རྒྱུ། །ཡུལ་ཀུན་གྱི་བསམ་སྦྱོར་དཀར་ནག་ཁྲ། །སྔོན་མ་དེ་འཕགས་པའི་ཟླ་རུ་ངེས། །བར་མ་དེས་གཞན་གནོད་གཞིར་བཅས་སྤྱོད། །ཐ་མ་དེས་དཀར་ནག་འདྲེས་མར་བརྩོན། །དེ་ཀུན་ཀྱང་གཟུང་འཛིན་མཐུས་བསྐྲུན་ལས། །ཆོས་བདག་མེད་དོན་རྟོགས་ན་རེ་དོགས་བྲལ། །དབལ་ཤུལ་ཁག་རྩེ་མོ་སྲད་བུས་སྦྲེལ། །མགོ༷་ལོག་པ༷་ཕུ༷་བ༷་གཞན་ཡུལ་སྙེགས། །སྨད༷་པ༷་ཡང་སྲིན་བུའི་ཚང་འཐོར་འདྲ། །བར༷་མ༷་རྡོ་བརྐོས་གཟུགས་བརྙན་བཞིན། །འཛི༷་ཀའི༷་ཡུལ་ཁོལ་བུར་སྟོང་ལ་ཉེ། །ཛམ༷་བྷ༷་ལའི་ཐང༷་ཡང་ཁྲ་བོར་འགྱུར། །རྒྱལ༷་རོང༷་ཁག་གཅིག་སྟེང་གཅིག་གིས་གནོན། །ཅི་ཞིག་ནས་གཞན་གྱིས་འཐེན་ཁྱེར་བྱེད། །སུ༷་ཝ༷རྞའི༷་མཆོག་དམན་སྡེ་འགའ་ཡིས། །དོན་ཆུང་ལ་ཉེས་ཆེན་བསླངས་ནས་སུ། །འདུམ་མེད་ཀྱི་ལས་ལ་སྦྱོར་དེར་ལྟོས། །གེ༷་འཕན༷་ཡང་སྣལ་མ་མགོ་བྲེགས་ཟླ། །ཧོར༷་སྡེ༷་ཁག་སེང་གེའི་ཁོག་པའི་འབུས། །རང་ལུས་ཀྱི་ལྟོ་བ་འབིགས་དང་མཚུངས། །དོན་དེ་ཕྱིར་ན་མཆོག་དམན་བར་གསུམ་གྱི། །མི་སེར་སྐྱ་རྣམས་མཆོག་གསུམ་སྐྱབས་བརྟེན་ལ། །ཆོས་དགེ་བསྒྲུབ་དང་སྡིག་སྤང་བླང་དོར་རེམ། །སྤྱི་དང་ནི་བྱེ་བྲག་ཡུལ་འདི་ཡི། །སྡེ་མཆོག་དམན་ཀུན་བསམ་པ་སྤྱི་དྲིལ་གྱིས། །ལྷ་ཨོ་རྒྱན་གྱི་རྣམ་ཐར་གསུང་སྒྲོགས་དང་། །ལེའུ་བདུན་མ་བཛྲ་གུ་རུ་སོགས། །གང་མང་དུ་འདོན་དང་བཀའ་ཀླུ་ཡི། །ཞི་དྲག་དང་གཏོར་བཟློག་མདོས་གཏོར་བརྡེག །ཉེས་སེལ་དང་རྒྱལ་མཚན་རྩེ་མོའི་གཟུངས། །དར་ཅོག་ཏུ་བྲིས་ལ་གང་མང་འཛུགས། །ཡུལ་འདི་ཡི་མངའ་ཞབས་སུ་གཏོགས་རྣམས། །འཆི་ངེས་པ་ཅན་གྱི་སྲོག་བླུ་དང་། །ཚེ་ཐར་དང་ཁྱད་པར་གནས་འདི་ཡི། །སྐོར་ལམ་གྱི་ནང་གནས་རི་དྭགས་དང་། །བྱ་རིགས་དང་ཆུ་གནས་ལ་སོགས་པའི། །སྲོག་ཆགས་རིགས་མི་གསོད་དམ་མནོས་ན། །དེ་མཐུ་ཡིས་མི་ཕྱུགས་བདེ་ལྡན་ཞིང་། །ལོ་ལེགས་དང་འབྲུ་འཕེལ་དཔལ་འབྱོར་ལྡན། །འཕྲལ་ཕུགས་གཉིས་བདེ་བའི་རྒྱུ་རུ་འགྱུར། །ཚུལ་དེ་ལས་བཟློག་ཅིང་བླང་དོར་གནས། །གོ་ལྡོག་ན་བླ་དཔོན་ཐམས་ཅད་དང་། །ཡུལ་མི་བདེ་ནད་རིམས་སད་སེར་ལྡང་། །རྟ་ནོར་དང་ར་ལུག་ཤི་གོད་མང་། །འཕྲལ་ཕུག་གཉིས་མི་བདེའི་རྒྱུ་རུ་འགྱུར། །དེའི་ཕྱིར་ན་སྤང་བྱ་ཡོངས་སྤངས་ཤིང་། །བླང་བྱ་རྣམས་ཇི་བཞིན་བསྒྲུབ་གྱུར་ན། །འདི་ཕྱི་གཉིས་དགའ་བདེའི་འབྲས་བཟང་མཐོང་། །ཚུལ་དེ་སྐད་ཅེས་སྨྲ་མཁན་གང་ཞེ་ན། །ཕ་མཁྱེན་བརྩེའི་འོད་ཟེར་རིགས་བདག་ཏུ། །དུས་ནམ་ཡང་མི་འབྲལ་རྣལ་འབྱོར་པ། །དཔལ་བྱང་ཆུབ་རྡོ་རྗེ་ཞེས་འབོད་པའི། །ཉམས་ཤེལ་གྱི་གོང་བུར་ཤར་བའི་གླུ། །འདི་ཤར་མར་སྤེལ་བའི་ཡི་གེ་པ། །རང་ཉིད་ཀྱི་སློབ་བུ་དད་དམ་དང་། །ཐོས་བསམ་དང་སྒོམ་གྱི་ནོར་ལྡན་པ། །མིང་འཇིགས་མེད་སྐལ་པ་བཟང་པོ་ཞེས། །རྗེ་བླ་མས་ལུང་དུ་བསྟན་པའི་བུ། །དེས་བྲིས་པའི་དགེ་བས་གནས་འདི་དང་། །འབྲེལ་ཐོགས་རྣམས་འཕྲལ་ཕུགས་ཀུན་བདེ་ཤོག། །།དགེའོ།། དགེའོ།། དགེའོ།། །། ན་མོ་རཏྣ་གུ་རུ་ཡེཿན་མོ་རཏྣ་གུ་རུ་ཡེཿ སྐྱགས་མཆོག་གསུམ་གྱི་སྤྱི་གཟུགས་ལྷ་ཡི་ལྷཿ ཕ་འཇིགས་མེད་གླིང་པ་དུས་འདིར་དྲནཿ གནས་སྤྱི་གཙུག་གི་རྒྱན་དུ་ལེགས་བཞུགས་ནསཿ ཆོས་རྟེན་འབྱུང་གི་བདེན་པ་མངོན་གྱུར་མཛོདཿ མཐོ་འཆི་མེད་ཀྱི་ལམ་བགྲོད་བྱ་རྒྱལ་རྒོདཿ ཡུལ་ས་རོང་གི་རྙི་ལ་མ་དོགས་ནཿ གདོན་ལྷ་མིན་འདི་སྒྱུ་ཐབས་འཕྲུལ་ལ་མཁསཿ དོན་དེ་ཕྱིར་ན་རང་བསྲུང་མེལ་ཚེ་གཅེསཿ བར་ན་བུན་གྱི་ཕུང་པོ་མཚམས་སྤྲིན་མཛེསཿ ཁོ་བ་ཡ་བེའི་ཁུ་རླངས་བསེར་བུ་ཡིསཿ ཕྱོགས་མི་འོས་པར་བསྐྱོད་པའི་འཕྲུལ་ངོམ་ནཿ ལྷ་ཨོ་རྒྱན་གྱི་བརྟུལ་ཞུགས་སྟོབས་ཀྱིས་ནོནཿ གནས་དབྱིག་འཛིན་གྱི་ཟླ་བའི་མ་མ་དེཿ ཁོ་ལྷ་མིན་གྱིས་བསུབ་འདོད་སྟ་གོན་བསྒྲིགསཿ དེར་ལོག་སྦྱོར་གྱི་འཐོར་རླུང་གནམ་ལྕགས་དབལཿ ཚུལ་ཇི་བཞིན་དུ་ངོམ་ཚེ་ཚངས་པ་འདརཿ ལས་དགེ་སྡིག་གི་ས་འཛིན་བུ་མོའི་ལྟོརཿ ཆོས་ཕུང་འཚེངས་ཀྱི་ལྗོན་པ་མགོ་གཉིས་འཁྲུངསཿ དེར་དཀར་ནག་གི་བྱ་ཚོགས་ཚང་མང་འཚོལཿ འབྲས་བསད་གསོ་ཡི་ཐོག་བུ་སུས་ཐོབ་རྩོདཿ ཕྱོགས་ཤར་ནུབ་གཉིས་ཉི་ཟླའི་ལམ་གོ་ལོགཿ ལྷོ་བྱང་ཡང་སོ་སོའི་རྫོང་ལ་ཞནཿ དཔལ་ཡོན་ཏན་གྱི་ས་སྙིང་ཟ་མ་ཏོགཿ ཁོང་སྒྱུ་འཕྲུལ་གྱི་ཚངས་པའི་ཐོབ་རློམ་ཡང་ཿ ལས་རྒྱུ་འབྲས་ཡི་མཐུ་ཡིས་ནམ་མཁར་འཕགསཿ མཚོན་རེག་ཆོད་ཀྱི་རལ་གྲི་ཁ་མང་དེཿ མི་རྒྱུས་མེད་ཀྱི་རང་སྟོབས་རྩལ་ཕྱུང་ནསཿ རྫས་སྦྲང་ཆང་གིས་མྱོས་པའི་གླང་སྨྱོན་སྣརཿ རང་རྒྱལ་འདོད་ཀྱིས་བཏགས་པ་རྦད་གྱུར་ཡང་ཿ ཕར་འགྲོ་རྒྱུ་ལས་ལྡོག་ཏེ་རང་དཔུང་སྙོགསཿ ཚུར་དེར་བྲེད་ནས་ཕྱོགས་བཞི་མཚམས་བརྒྱད་དུཿ ཡང་ཐར་འདོད་ཀྱི་འབྲོས་ལ་རངས་བས་བྲེལཿ སྐྱོན་དེར་ལངས་པས་གནམ་ས་བར་སྣང་གསུམཿ རྡུལ་འཐོར་རླུང་དང་འདྲེས་པའི་མངོན་རྟོགས་ངོམཿ བདུད་འཇོམས་བྱེད་ཀྱི་བཛྲ་དྷ་ར་གང་ཿ སླར་གདུལ་བྱ་ཡིི་མཚོ་གླིང་ཨ་དཪྴརཿ དེར་གེགས་མེད་དུ་མངོན་པ་རྐྱེན་ངན་གྱིསཿ བསྒྱུར་མ་ནུས་ཚེ་ངན་ལྟས་བཟློག་སྲིད་ཀྱང་ཿ མི་རུ་དྲ་ཡི་སེམས་ལྡན་ཀླུ་ཡིས་ནིཿ ཡུལ་འཇིགས་མེད་ལ་འཇིགས་པ་ཐབས་མང་རྩོམཿ ཕྱོགས་འདི་ག་ཡི་མཚམས་བཞིར་སྙན་མིན་སྒྲཿ ལན་མང་རབ་ཞིག་གྲགས་མཐར་འར་མ་འུརཿ ཤར་ཉི་ཟླ་དང་སྨིན་དྲུག་རྩོད་པས་གཡེང་ཿ ལྷོ་ཁ་དོག་སྣ་ཚོགས་ལང་ཚོ་འགྲནཿ ནུབ་མགོ་མང་སྲིན་བུས་བསྟན་སེལ་སློང་ཿ བྱང་རི་དྭགས་ཕལ་ཆེར་རྫི་ཡིས་འུརཿ དབུས་ཟོ་དོར་བཟང་པ་ོདངོས་སུ་རྒྱུཿ གླང་ས་རྒོད་ཐ་བ་རྨོད་ལ་བརྩོནཿ སྟག་བཀྲེས་པའི་ང་རོ་གནམ་དུ་སྒྲོགསཿ ཡོས་རིགས་མི་མཐུན་པ་འགའ་འདུན་མར་འདུཿ འབྲུག་ཕྱོགས་བཞིའི་རྒྱ་མཚོ་ཀླུ་དང་རྩེཿ སྦྲུལ་མཆོད་པའི་རྟེན་འགའ་ཟོང་དུ་འཚོང་ཿ རྟ་མཐུན་དབྱེའི་མཚེར་སྐད་ལྷངས་སེ་ལྷང་ཿ ལུག་གོང་འོག་གོ་ས་སོ་སོར་ལྡོགཿ སྤྲེལ་བྱང་དུ་འཚེ་ཡང་ལྷོར་རྒྱར་ཚུརཿ བྱ་མཁའ་ལ་མེ་འབར་ཆུ་ཕྲན་གདུང་ཿ ཁྱི་སྣ་ཚོགས་སྒྲ་ཡི་རོལ་མོ་འཁྲོལཿ ཕག་བསྟན་པའི་འཁོར་ལོ་གསར་དུ་གནསཿ བྱི་འབྱུང་འགྱུར་གྱི་རྟེན་འབྱུང་རི་མོ་མཐོང་ཿ ཡུལ་ཟླ་སྟོད་དུ་ལྷ་འདྲེའི་ཁེངས་ལོག་འབྱུང་ཿ བར་ཉིན་སྲིབས་ཟུང་ཕྱོགས་ཞེན་ཚོན་ཁྲས་བྱུགཿ སྨད་ཁོལ་བུར་འགར་དྲི་ཟའི་གྲོང་ཁྱེར་ངོམཿ ཡུལ་ཟླ་སྒོ་རུ་སྐྱོ་དགའི་ལྟད་མོ་མཐོང་ཿ གནས་གསལ་བྱེད་ཀྱི་ཐོག་མ་ཁྲ་བོར་འགྱུརཿ དཔལ་ཀུན་འབྱུང་གི་ཡུལ་ཡང་རི་མོའི་ཟླཿ བྱང་སྔགས་སྟོན་གྱི་ཚོམ་བུ་མདོག་གསུམ་གྱིསཿ གནས་གྲུ་འཛིན་གྱི་ཕུགས་ནས་དབང་སྔོན་རྙེདཿ ཡུལ་གྱིི་ལུང་གི་ཕུ་མདར་ཚོམ་བུ་མཛེསཿ རེས་དུམ་བུ་རུ་གྱུར་ཡང་གཅིག་ཏུ་བཟླུམཿ ལམ་འགའ་ཞིག་བཙལ་ཡང་ཐོག་ཁེལ་བཤོལཿ རྗེ་བླ་མ་ཡི་ཞལ་སྐྱིན་གང་ཉིད་ཀྱང་ཿ ལོ་ཁ་ཤས་འདི་འདྲ་འདི་བཞིན་མིནཿ ཚུལ་སོ་སོ་ཡི་མངོན་རྟོགས་གསལ་གྱུར་ཡང་ཿ དོན་བཟང་ངན་གྱི་དབྱེ་རྒྱུ་རེ་ཞིག་བཤོལཿ འཕྲལ་མར་གོང་གིས་བཏུམ་པའི་གཟེ་མའི་དཔེཿ རྐྱེན་མངོན་སུམ་དུ་འདོན་རྒྱུ་འགའ་ཡི་སྐྱོནཿ ཡུལ་དབང་པོ་ཡི་སྒོར་མཐོང་ཐོས་གྱུར་ཡང་ཿ ཀུན་བཏང་སྙོམས་ཀྱི་ཟིལ་གྱིས་གནོན་པ་གནདཿ ལར་འབྱུང་འགྱུར་གྱི་རི་མོ་དྲག་ཤུལ་གཟུགསཿ ཅང་མི་སེམས་པར་ཚོམ་མེད་ཀློང་རྒྱས་གདབཿ དཔལ་མཚོ་སྐྱེས་ཀྱི་སྐུ་བརྙན་གང་མང་དང་ཿ ཆོས་ཐེག་ཆེན་གྱི་མདོ་བཀླག་མདོ་བཟློག་གལཿ ཚུལ་དེ་ཡིས་ཀུན་ནས་ཀུན་དགེ་ཞིང་ཿ དུས་རྫོགས་ལྡན་གསར་བའི་ཞལ་མཐོང་ཤོགཿཿ ཡང་ཅིག་ནི་རྟེན་འབྱུང་གཟུགས་འདི་ངོམཿཡང་ཅིག་ནི་རྟེན་འབྱུང་གཟུགས་འདི་ངོམཿ འཆི་མེད་ཀྱི་ལམ་དོགས་དང་ཉེ་གྱུར་ནཿ སྤྲིན་ཕུང་ཞིག་ཆུ་གཏེར་དབྱིངས་སུ་འགྲོཿ དེར་འཁྲེན་པའི་གདེངས་ཅན་དབང་པོ་རྣམསཿ འབྱིག་འཛིན་གྱི་བླ་ལ་འཕགས་རློམ་ཡང་ཿ མཁའ་ལྡིང་གི་འཇིགས་པས་རབ་སྐྲག་ནསཿ རང་གནས་སུ་ཡིབ་ལ་ལྟད་མོ་ལྟོསཿ ཤར་ནུབ་ཟུང་ཞགས་པས་སྦྲེལ་གྱུར་ནཿ ལྷོ་བྱང་གཉིས་འགྲུལ་བགྲོད་ཤ་ར་རཿ གནམ་ཐིགས་ཀྱིས་དོག་མོ་འབིགས་སྲིད་ནཿ ཕ་ལམ་གྱི་ཞལ་བས་གཡོགས་ནས་འོངཿ ས་རླངས་ཀྱི་བླ་བྲེ་བྲེས་གྱུར་ནཿ ཆུ་འཁྱགས་ཀྱི་ཇག་པར་ཟོབ་འཇུག་གལཿ གསེར་མདོག་གི་རྒྱན་གྱིས་གཙེས་གྱུར་ནཿ ཕ་ལམ་བཞིན་གཞོམ་དུ་མེད་པ་དང་ཿ རྡོ་བརྐོས་ཀྱི་རི་མོ་བསུབ་མེད་གལཿ ཁྱིམ་དབུས་ཀྱི་ཡོལ་གོའི་དུག་ཆུ་དེསཿ མཆོག་དམན་འགའ་མྱོས་པར་བྱེད་ཀྱང་སྲིདཿ ལུགས་ཟུང་གི་སྡེ༷་ཆེན་ཆུ་གཏེར་ཆེཿ དགེ༷་བཅུ་ཡི་ནོར་གྱིས་ཡོངས་གཏམས་ཡང་ཿ དེར་བསྟི་བའི་གདེངས་ཅན་དབང་པོའི་གཙོའིཿ ཆུར་ཉལ་རིགས་སྡིག་ལྡན་འཛིན་ཁྲི་ཡིསཿ དབང་མེད་དུ་འཁྲིད་པའི་ནག་ཕྱོགས་བདུདཿ རྒྱལ་གྱུར་ན་བླ་ལ་ཞབས་རྗེས་འཇོགཿ དེའི་རྐྱེན་གྱིས་ལུགས་ཟུང་སྡེ་རྣམས་ཕལཿ ཕྱོགས་མཚམས་སུ་བལྟ་ཞིང་ཁྲ་བོར་འགྱུརཿ མི་རེ་ཡི་ཕྱོགས་ནས་མཐུན་སྦྱོར་ཞིང་ཿ མི་དོགས་པའི་ཕྱོགས་ནས་འགལ་སྦྱོར་མངོནཿ སྟེང་དབྱིངས་ནས་རྡོ་ཆར་རླུང་ཐོག་དང་ཿ ས་གཞི་ཡི་གོམ་འདེགས་རི་རྒྱུད་དང་ཿ ས་ཤལ་ཡང་མི་རོ་གཅན་གཟུགས་ངོམཿ ཆུ་བོ་ཡི་གཡོ་འཁྲུག་ལམ་ལོག་སྙེགསཿ རྩི་ཐོག་ཀྱང་བཅུད་བྲལ་རྐྱེན་གྱིས་ཕྲིཿ རི་མེ་དང་ཁང་མེས་འཚེ་བ་མང་ཿ དབུས་གཙང་དུ་སྔར་མེད་ལུགས་ཟུང་ཆོསཿ གསར་དར་གྱི་འཕྲུལ་ལས་མཆོག་དམན་འགའཿ ཆོ་ལོ་དང་མིག་མང་རྩེད་མོས་བྲེལཿ རུ་བཞི་ཡི་དབུས་ཀྱི་མཆོད་སྡོང་ལྗོནཿ དམར་སེར་གྱི་ཚོན་རྩིས་བྱུགས་རློམ་ཡང་ཿ ཐོག་ཁེལ་ཞིག་མི་འོང་ཇེ་ཞིག་དང་ཿ ཆུ་འབུར་གྱི་དཔེ་བཞིན་རྡོལ་ཡང་སྲིདཿ དེ་ལྟ་ན་དེ་ལ་ཀུན་དགའ་ཞིང་ཿ པུཥྤ་ཡི་ཆར་གྱིས་འབྲན་ཡང་སྲིདཿ མདོ་སྟོད་གཤིན་རྗེ་གནས་ཕྱོགས་སུཿ སྔར་མེད་ཀྱི་ཆོས་གསར་ངོམ་ཡང་སྲིདཿ དེར་བརྟེན་པ་འགའ་དང་གཞན་འགའ་ལཿ དགའ་སྐྱོ་ཡི་ཉམས་མྱོང་ཅིར་ཡང་འཆརཿ མདོ་སྨད་ཀྱི་ཕྱོགས་བཞི་མཚམས་བརྒྱད་ནསཿ ཤིང་དགྲ་ལ་ལྕགས་དང་ལྕགས་སྒྲ་མེཿ དེ་སོགས་ཀྱི་དགྲ་གཤེད་དུ་མ་ཡིས། །རང་གནས་དང་རང་སྡེ་ཕལ་ཆེར་དབྱེཿ གཅིག་སྟེང་ནས་གཅིག་གིས་གནོན་འགྱུར་ཞིང་ཿ དགྲ་ཟླ་དང་ཉེ་དུ་གོ་ལོག་གིསཿ ཡིད་ཆེས་ཀྱི་གྲོགས་ཉུང་གཞུངས་ངན་མང་ཿ བྲག་རི་དང་ནགས་ཚལ་བཙན་པོའི་སརཿ སྐྱབས་བཅོལ་བའི་བྱ་གཅན་ཇག་པའི་ཁྱུཿ ཅི་ཞིག་ནས་ལས་ངན་མེ་དཔུང་ཆེཿ འཕྲལ་རྐྱེན་གྱི་འཐོར་རླུང་ཤུགས་དྲག་གིསཿ བསྐྱོད་ཚེས་པས་ལ་ལ་ཙམ་ལས་གཞནཿ བྱ་སྒྲོ་བཞིན་བསྲེག་པར་གྱུར་ལ་ལྟོསཿ དར་མདོ་ཡི་ཕྱོགས་བཞི་དབུས་ལྔ་རུཿ ལྷ་མིན་གྱི་སྤྲུལ་པའི་སྡིག་ཏོ་ཅནཿ མིའི་གཟུགས་ལ་གླང་གི་སེམས་ལྡན་འགའིཿ མི་མིན་ཀྱང་མི་རུ་བརྫུ་བ་དང་ཿ ལྷ་མིན་ཡང་ལྷ་བརྫུའི་གཡོ་འཕྲུལ་གྱིསཿ དེ་ཕྱོགས་སུ་སྣ་ཚོགས་སྒྱུ་མ་ངོམཿ དེ་མཐུ་ཡིས་མཆོག་དམན་གོ་ལོག་དང་ཿ ལྷ་འདྲེ་ཡང་གོ་ལོག་ཕན་གནོད་འཛོལཿ རྒྱ་བོད་ཀྱི་བསམ་སྤྱོད་གོ་ལོག་ཅིང་ཿ ཚོང་དུས་སུ་ཇག་རྐུན་གཅན་ལྟར་རྔམཿ མཆོག་གསུམ་གྱི་རྟེན་འགའ་བཤིག་བཀྲལ་ནསཿ མི་དགེ་ཡི་ཉོ་ཚོང་ལས་ལ་སྤྱོདཿ ཧོར་ཁག་འགའ་སེང་གེའི་ཁོག་པའི་འབུསཿ རང་རང་གི་ལུས་རྟེན་གཞིག་དང་མཚུངསཿ འགའ་ཞིག་ནི་དགྲ་ཟིན་མ་ཕྱེད་པའིཿ མགྲོན་པོ་ཡི་སྐྱེལ་མར་ཟོན་འཇུག་ལྟརཿ ཐེ་ཚོམ་གྱི་རྒྱ་ནས་ཐོན་སྐབས་དབེནཿ དེ་ཕྱོགས་སུ་རྒྱ་འདྲེའི་སྣ་ཆེན་པོའིཿ ཆོ་འཕྲུལ་གྱིས་སྲོག་ཆགས་ཕྲ་མོའི་གཟུགསཿ ལྡོག་མེད་དུ་མངོན་རྒྱུ་འཚེ་བ་རྩོམཿ མཛའ་གྲོགས་དང་དགྲ་ཟླ་གོ་ལོག་གིསཿ རང་རང་གི་ལོངས་སྤྱོད་བརླག་ལ་བརྩོནཿ ལུགས་ཟུང་འདིས་མངོན་པར་མཐོ་བ་འགའཿ སྐྱབས་ཡུལ་དུ་འཚོལ་ཕྱིར་བྲེལ་བྲེལ་ཡང་ཿ ཕན་གནོད་གཉིས་རི་མོའི་གཟུགས་བརྙན་བཞིནཿ ཡུལ་དེ་རུ་མི་དགེའི་ཆོས་ཞིག་དརཿ དེ་མཐུ་ཡིས་དེར་ཉེའི་ཚོགས་འཚུབས་ནསཿ ཕག་པའི་ཚང་བེར་གས་དཀྲུགས་པ་བཞིནཿ ཟི་ལོང་གིས་རྣ་བ་གཙེར་འགྱུར་ཞིང་ཿ མགྲིན་བཟང་དག་མུན་ཁང་དུ་བསྐྱལ་བ་ལྟརཿ མགོ་འཐོམས་ཀྱིས་གར་བསྒྲོད་མི་ཤེས་བཞིནཿ ལུགས་ཟུང་གཉིས་རིམ་གྱིས་ཤི་ལྟར་འགྱུརཿ ལྷོ་རོང་གི་གཅན་གཟན་ལ་ལ་ཞིགཿ བྱང་ཕྱོགས་ཀྱི་རྫ་བྲག་སྙོགས་འགྱུར་ཞིང་ཿ བྱང་གནས་ཀྱི་རི་དྭགས་འགའ་ཡི་ཁྱུཿ ཆ་མེད་ཀྱི་ཡུལ་དུ་འབྲོས་ལ་རིངསཿ དེའི་རྐྱེན་གྱིས་རི་དྭགས་ཕལ་མོ་ཆེཿ འདྲོག་གྱུར་ཡང་ཕལ་ཆེར་རྒྱ་ལ་འཐོགསཿ སེར་སྐྱ་ཡི་བསམ་སྤྱོད་གོ་ལོག་གིསཿ ནང་འཁྲུག་དང་བཅོམ་བརླག་མི་རུང་ཚོགསཿ བཙུན་གཟུགས་འགས་བྱེད་ཅིང་མི་ནག་པཿ ལ་ལ་ཡི་དགེ་བསྒྲུབ་སྡིག་སྤངས་འཆདཿ ཐུབ་དབང་གི་བསྟན་ལྷག་ཉི་མའི་ཟེརཿ ནུབ་ཀྱི་རིར་བསྐྱལ་ལ་རིངས་པ་འགསཿ བསྟན་སེལ་གྱི་ཚིག་གིས་སྣ་དྲངས་ནསཿ འོ་མཚོ་ལྟར་དཀར་བའི་རྒྱལ་བསྟན་ཆེཿ ཁྲག་བླུག་བཞིན་དཀྲུགས་པའི་འཁྲེན་རྔུར་གྱིསཿ ནམ་མཁའ་དང་ས་གཞི་མི་རུང་ལྟསཿ རྒྱུ་ཐལ་བས་ཕལ་ཆེར་རྙི་ཡིས་ཟིནཿ ཤ་ཁྲག་གི་སྟོན་མོ་བཟའ་བཏུང་བཅུདཿ ཡོན་སྦྱོར་སོགས་གཉེར་བས་བན་གཟུགས་འགའཿ ཝ་མོ་བཞིན་གལ་ལ་ཟིན་གྱུར་ནཿ འགྲོ་སྡོད་ལ་རང་དབང་མེད་པར་འགྱུརཿ ལན་ཆགས་ཀྱིས་བསྐོས་པའི་དཔོན་དང་སྡེཿ ཕལ་མོ་ཆེ་རྡོ་ཆག་དུམ་བུ་བཞིནཿ འདུམ་མེད་ལྟར་བྱེར་ཞིང་བདེ་བ་བྲལཿ ཆོས་སྡེ་འགའ་བླ་སློབ་གོ་ལོག་ཅིང་ཿ སོལ་བ་ལ་དངུལ་དཀར་བྱུགས་འདྲ་འགསཿ ཚུལ་ལྡན་གྱི་སློབ་དཔོན་ས་བཟུང་ནསཿ ཟས་ནོར་དང་ལོངས་སྤྱོད་བསགས་བསྲུང་བྱེདཿ མཆོད་འོས་ལ་མི་དད་སྐུར་བ་འདེབསཿ སྦྱིན་ཡུལ་ལ་མི་གཏོང་ཁྲོ་སྡང་སྐྱེཿ དེ་མཐུ་ཡིས་འཇིགས་བརྒྱད་ཐོག་ཏུ་བབསཿ དེ་སོགས་ཀྱི་སྤྱི་སྒོས་འབྱུང་འགྱུར་ལུང་ཿ མང་པོ་ཞིག་གསལ་ཡང་བྱ་བྲལ་བཿ མལ་ས་རུ་ལྷུངས་ཤིང་འཆིར་ཉེན་པསཿ དེ་ཙམ་ལས་སྤེལ་དུ་མ་ཐུབ་ཀྱང་ཿ ལྔ་ལམ་དུ་ཞུགས་པར་མ་གྱུར་ནཿ སླར་ནས་སླར་སྤྲོ་ཞིང་སྤེལ་བར་བགྱིཿ འདི་ཉིད་ནི་རེ་གཅིག་ལོ་ཀེག་དུསཿ རྣལ་འབྱོར་པ་ཀུན་བཟང་གཞན་ཕན་ཞེསཿ མཆོག་གསུམ་གྱི་ཁོལ་པོོ་གང་དེ་ཉིདཿ གསར་རྙིང་གི་ནད་ཀྱིས་རབ་གདུང་ཚེཿ ཡིད་ཤེས་ཀྱི་མེ་ལོང་ངོར་གསལ་ཚིགཿ དོགས་མེད་དུ་སྨྲས་པ་ཡོངས་སུ་དགེཿ ཚུལ་འདི་ནི་ལོ་གྲངས་བསེ་རུ་ཚུནཿ གཞན་དག་ལ་ཟུར་ཙམ་མི་འཆད་གནདཿ འདི་ཉིད་ཀྱི་བླང་དོར་བསྲུང་བཟློག་རིགསཿ སྐབས་ཤིག་ཏུ་ཁྱོད་ལ་འཕྲོད་འོང་གིསཿ དེ་དག་གིས་ཟུང་སྦྲེལ་སྤེལ་མཁས་གལཿ དེ་ཡི་དགེ་བས་བསྟན་འགྲོར་སྨན་པར་ཤོགཿ དགེའོཿ ཿ འབྱུང་འགྱུར་ལུང་བསྟན་གསལ་བའི་མེ་ལོང་།འབྱུང་འགྱུར་ལུང་བསྟན་གསལ་བའི་མེ་ལོང་བཞུགས། །ཞིང་རབ་འབྱམས་ཀྱི་རྒྱལ་བ་ཀུན་གྱི་དངོས། །དཔལ་ཨོ་རྒྱན་གྱི་མཁན་པོའི་ཞལ་སྐྱིན་མཆོག །ཕ་བླ་མ་མཆོག་མཁྱེན་བརྩེའི་འོད་སྟོང་ཟེར། །བུ་རང་གི་སྙིང་དབུས་པདྨ་རུ། །དུས་རྟག་པ་རུ་འབྲལ་མེད་རྒྱུན་བཞུགས་ནས། །ཆོས་རྟེན་འབྲེལ་གྱི་གནས་ཀུན་ཡོངས་གསལ་མཛོད། །དུས་སྙིགས་མ་ཡི་མར་གཤམ་ལྕགས་ཕོ་རྟ། །འདི་ཆུ་རྟ་ལ་མ་ཐུག་དེ་ཡི་བར། །དགེ་མི་དགེའི་རྟགས་མཚན་སྣ་ཚོགས་གཟུགས། །གཟུགས་མེ་ལོང་དུ་གསལ་བཞིན་འདི་ན་ངོམ། །ཡུལ་འདི་ག་ཡི་སྟོད་དུ་མེ་སོགས་ཀྱི། །རྐྱེན་མ་ངེས་པ་སྒྱུ་མའི་ཆོ་རོལ་བཞིན། །དཔེ་རི་དྭགས་ཀྱི་རྒྱལ་པོ་ཁོང་སྲིན་གྱིས། །དེའི་མངོན་རྟོགས་གཟུགས་གཞིག་དང་མཚུངས་པ་གསལ། །བར་འདི་ག་རུ་བདུད་སྲིན་བཙན་གསུམ་གྱི། །དཔེ་ཕམ་རྒྱལ་གྱི་མིག་མང་རྩེ་བ་བཞིན། །མི་ཕལ་མོ་ཆེའི་བློ་དཀྲུག་ཁྲ་བོར་འགྱུར། །དབྱངས་དང་པོ་ཡི་མིང་ཆགས་སྡེ་དང་དཔོན་པོ། །དཔེ་རྡོ་བརྐོས་ཀྱི་རི་མོ་ཅི་བཞིན་དུ། །འཕྲལ་བྱ་བྱེད་ལས་དལ་ཡང་བརྟན་ཆགས་ངོམ། །ཡུལ་ཚན་བཞི་རུ་བགོས་པའི་འོག་མ་ཟུང་། །དེའི་དང་པོ་དེ་ལྷ་མི་སོ་སོར་འབྲལ། །སྨད་ཕྱོགས་མཚམས་སུ་བལྟ་ཞིང་ཕུང་ལས་བརྩོན། །ཤར་ཙི་ན་ཡི་སྒྲ་གསར་ཡང་ཡང་གྲགས། །མཐར་པ་ཀུ་ཙི་འགའ་རེ་བརྒྱལ་ཡང་སྲིད། །ལར་ལོ་འདི་ནས་བཟུང་སྟེ་ཡུལ་འདི་ཡི། །ཆོས་བསམ་སྦྱོར་ཀུན་མ་ངེས་སྣ་ཚོགས་ངོམ། །བན་བཙུན་པ་འགས་སྡིག་སྤེལ་ལས་ཐབས་བརྩོན། །ཡང་མི་ནག་དག་རྣམ་དཀར་ལས་སྤེལ་ཞིང་། །ཚུལ་གོ་ལོག་གི་སྤྱོད་པ་སྣ་ཚོགས་བྱེད། །དཔོན་འགའ་ཞིག་ནི་རང་སྲིད་ཀྱིས་མི་ངོམས་པར། །གཞན་མངའ་ཞབས་སུ་བཙུད་འདོད་ལས་ཀྱིས་ཕུང་། །ཡུལ་བྱང་རོང་གི་ས་གནས་ཕལ་མོ་ཆེ། །ཤར་རྒྱ་སྟག་གི་སྐྱོ་གླུའི་ངར་སྐད་ལ། །ཡོངས་སུན་གྱུར་ནས་རང་བདེའི་བསྟི་གནས་འཚོལ། །ཡུལ་སོ་སོ་ཡི་བྱ་སྤྲེལ་ཝ་སྤྱང་སྡེ། །མི་ཕལ་མོ་ཆེ་འགྲོ་འཆག་ཉེས་པའི་རྒྱར། །ཚུད་ངེས་མོད་ཀྱང་ད་དུང་ལས་ངན་སྤེལ། །དེ་ལ་ལ་ཞིག་སྔོན་ལས་མཐུས་བསྐུལ་ནས། །ལས་བཟང་པོ་ལ་འཇུག་གམ་འཕྱང་མོ་ཉུག །དཔལ་མྱ་ངན་མེད་ཀྱིས་གནོད་སྦྱིན་དཔུང་། །གྲངས་མང་བསགས་བྲན་དུ་ཡོངས་བཀོལ་ནས། །ཡུལ་འཛམ་གླིང་ས་གནས་བྱེ་བ་རུ། །དུས་ནུབ་གཅིག་མཆོད་རྟེན་བྱེ་བ་གཅིག །བཞེངས་ངེས་པའི་ནང་ཚན་ཡུལ་འདིའི་སྐད། །གནས་བཀྲ་ཤིས་སྒོ་མང་ཞེས་གྲགས་པར། །དུས་ད་ལོ་འཛམ་གླིང་གནས་རྟེན་ལྷ། །ཡོངས་འདུས་ནས་འགྲོ་བའི་ཚོགས་བསགས་ཞིང་། །ཞིང་མངོན་སུམ་འཕོས་ལ་ཐེ་ཚོམ་མེད། །དོན་དེ་ཕྱིར་ཕྱག་མཆོད་བསྐོར་བར་འབུངས། །དེའི་རྟགས་སུ་སྐུ་གསུང་ཐུགས་ཀྱི་རྟེན། །རྟེན་རང་བྱུང་གཟུགས་ལས་སྣང་དག་པར་མངོན། །གཞན་མིག་སྨན་གྱི་མདོག་འཛིན་ཁྱིམ་བསྟི་བའི། །མི་སྟངས་དཔྱལ་ཀུན་བདེ་དོགས་ཚོན་རིས་གཟུགས། །གཟུགས་ངོམ་དེ་རེ་ཞིག་ཅིས་མི་བདེ། །ལྷ་ཨོ་རྒྱན་གྱི་བྱིན་ཐོབ་རྣལ་འབྱོར་པ། །བན་ཨ་བྷྱ་ཡའི་མིང་གིས་མཐོང་ཡུལ་ཚོགས། །དཔལ་ཕན་བདེ་ལ་འགོད་པའི་ཐབས་ལ་བརྩོན། །རྗེ་མི་ལ་ཡིས་བྱིན་རླབས་དམ་པ་མཆོག །མིང་ཨོ་ཊི་ཡ་ཤ་ས་ནས་སྤུད་དེས། །ཡུལ་འདི་ག་རུ་ཕན་བདེ་སྤེལ་ཡང་སྲིད། །ཡུལ་འདི་ག་དང་ཡུལ་གཞན་བརྗེ་བ་འདྲའི། །སེམས་བསམ་པ་དང་སྦྱོར་བ་ངེས་མེད་ངོམ། ཚུལ་དེས་སྐྱོན་གྱིས་སྤྱོད་པ་ཁྲ་བོར་འགྱུར། །ཨེ་མ་ཧོ་སེམས་ཅན་གྱི་ལས་དབང་གཟུགས། །མི་ཕོ་མོ་འགའ་སྡིག་ལ་ངོ་མཚར་བྱེད། །ཁོང་མཁས་པ་ཚོ་དེ་ལྟར་ག་ལ་ཡིན། །དུས་ད་ལོ་ནས་བཟུང་སྟེ་ཡུལ་འདི་ཡི། །བན་བཙུན་གཟུགས་མི་དགེར་ངོ་མཚར་བྱེད། །མི་ཁྱིམ་པ་ཕལ་རྣམ་དཀར་ལས་ལ་བརྩོན། །ཕོ་སྐྱེས་པ་འགའ་སྡིག་ལ་འགྱོད་སེམས་སྐྱེ། །དེའི་ནང་གི་ཁྱད་པར་སེམས་དཔའི་རིགས། །མིང་རིགས་ལྔ་དང་ཚེ་དང་དབང་དང་རིགས། །ཡང་དྷརྨཱ་སོགས་མཆོག་གསུམ་མཚན་འཛིན་གྱིས། །ཡུལ་འདི་ག་དང་གཞན་ལ་ཕན་འདོགས་བརྩོན། །ཡུལ་འདི་ག་ཡི་བུད་མེད་ཕལ་མོ་ཆེས། །མི་དུས་ཡོལ་གྱི་རྗེས་སུ་སྨྲེ་སྔགས་ཀྱི། །ཚིག་ངུ་ངག་གི་དབྱངས་བླངས་དེས་སྐྱོན་གྱིས། །ཁོང་ཚེ་འདས་ཕལ་མཁའ་རྒྱུ་ཡི་དྭགས་སུ། །སྐྱེ་ངེས་པ་དེ་ལས་འབྲས་བསླུ་མེད་འབྲས། །དོན་དེ་ཕྱིར་ན་བླ་དཔོན་མཁྱེན་ལྡན་གཙོའི། །བན་བཙུན་པ་དང་མི་ནག་ཕོ་མོ་ཀུན། །མི་ཁ་ལ་ཉན་ན་དེང་ཕྱིན་ནས། །ཁོང་གཤིན་པོའི་རྗེས་སུ་མྱ་ངན་སྤོངས། །དེས་ཤི་གསོན་ཀུན་ཕན་བདེའི་མངོན་རྟོགས་མཐོང་། །ཡུལ་རྨ་ལུང་གི་མི་སྡེ་ཁྲ་བོའི་ཁྱུ། །ཕྱོགས་དྲེགས་ལྡན་འགས་ཤྭ་འུད་སྐྱོན་གྱིས་འཚེ། །མཐར་ཐ་དད་ཀྱི་གོ་ས་སྙོགས་ཀྱང་སྲིད། །ཡུལ་འདི་ག་ཡི་ཁུག་པ་ཚུ་སྐྱེའི་ཚལ། །དཔལ་མཚོ་སྐྱེས་ཀྱི་བྱིན་ཐོབ་ནིཪྨ་ཀཿ གང་དེ་ཉིད་ཀྱིས་བསྟན་འགྲོར་ཕན་བདེ་སྤེལ། །སྨད་ཉིན་བྱེད་ཀྱི་ཟེར་ནུབ་མཐའ་འཁོབ་དུ། །དཔལ་པད་འབྱུང་གི་སྒྱུ་འཕྲུལ་ཟླ་དཀར་གཟུགས། །སླར་བསྟན་འགྲོ་ཡིི་མུན་པ་སེལ་ཕྱིར་གསོལ། །གང་དེ་མཐུ་ཡི་ཡུལ་དེའི་ལྷ་མིའི་སྡེའི། །ཁྱུ་ཀུ་མུ་ཏའི་ཚལ་ཆེན་རྒྱས་བཞིན་དགོད། །ལྷ་ཨོ་རྒྱན་གྱི་སྤྲུལ་པའི་ཛོ་གི་ཞིག །ཡུལ་འདི་ག་རུ་ཕེབས་ནས་ལས་ཆེན་བཞིའི། །ཚུལ་སྣ་ཚོགས་ཀྱི་བསྟན་འགྲོར་ཕན་བདེ་སྦྱོར། །རྒྱ་ནག་པོ་ཡི་ཕོ་ཉའི་ཤ་སྦྲང་མཆུས། །ཡུལ་ཕལ་མོ་ཆེ་གཡེར་ཆེན་ཤ་ཕུང་གཙེ། །རོང་ལ་ལ་དང་བྱང་གི་སྡེ་བ་འབྲེལ། །ཡང་འགའ་ཞིག་དང་དགྲ་ཟླ་རྡོ་ཆག་གཟུགས། །དུས་རིང་མིན་ནས་མངོན་ཡང་དམ་སྲིའི་འཕྲུལ། །ཡུལ་ལ་ལ་ཡི་ཁ་མཆུའི་ཆུ་འཛིན་གཟུགས། །མགོན་རྒྱལ༷་ཀུན་གྱི་བདེན་མཐུས་རེ་ཞིག་ཡལ། །ཡུལ་འདིའི་སྟོད་ཀྱི་སྡེ་གསར་མཁའ་ལྡིང་ཁྱུ། །རིགས་མི་མཐུན་ཡང་གྲུ་ནང་གཅིག་གི་མགྲོན། །སྨད་གཏན་ཆགས་ཀྱི་བླུན་རྨོངས་ཝ་རའི་ཚང་། །གཞན་བྱམས་བྲལ་གྱི་མཐའ་མིས་རྡོ་བརྡེག་འགྱུར། །བར་ཝ་སྤྲེལ་དང་འཕར་སྤྱང་འཚོགས་ལྟའི་དཔུང་། །དཔེ་སྣལ་མའི་ཐགས་བྲེག་པའི་ཟླ་རུ་འགྲོ། །ལར་ཡུལ་འདི་ནས་མགོ་བཙུག་སྙིགས་མའི་ལྟས། བཞིན་མེ་ལོངདང་འཕྲད་ལྟར་སུས་འགོག་ནུས། །དོན་དེ་ཕྱིར་ན་ཡུལ་འདིར་ཕན་བྱེད་ཆོས། །ལྷ་ཨོ་རྒྱན་གསོལ་འདེབས་ལེའུ་བདུན་དང་། །ཡང་བསམ་ལྷུན་དང་མྱུར་འགྲུབ་ལམ་སེལ་སྒྲུབས། །ཁྱད་པར་དུ་འཆི་ངེས་སྲོག་བསླུ་དང་། །ཇོ་དར་དང་ཇོ་འབུམ་སློབ་དཔོན་གྱི། །གསོལ་འདེབས་དང་སྙིང་པོ་སྔགས་ལ་འབུངས། །ཡང་འབྱུང་འགྱུར་སྒྱུ་མའི་འདུ་བྱེད་གཟུགས། །དཔེ་ཆུ་ཟླ་བཞིན་ངོམ་ལ་ལྟད་མོ་ལྟོས། །ཡུལ་སུ་ཝཪྞའི་མིང་འཛིན་སུམ་ཆ་རུ། །ཡོངས་བགོས་པ་ཡི་སྟོད་པ་འགལ་ཟླར་འབྲེལ། །སྡེ་བར་བ་དག་དཀར་ནག་མགོ་གཉིས་སྟོན། །སྨད་པ་ཡི་ལྷ་མིའི་སྡེ་ཟུང་དབྱེ། །དབྱེ་བ་དག་མཐུན་ཡང་བྱེར་ལ་རིངས། །ཡུལ་རྡོ་ལུང་དུ་གྲགས་པའི་ཆོས་སྲིད་ཟུང་། །དཔེ་བྱེའུ་ཁྱུ་ཧོར་ཁྲས་དཀྲོགས་པ་བཞིན། །ཧོར་སྡེ་བཞི་ཡི་ཐ་མ་མིང་ཐོགས་ཅན། །དཔེ་གདོང་ལྔ་ཡི་ཁོང་སྲིན་དགྲར་ལངས་བཞིན། །ཡང་སྡེ་བཞི་ཡི་དང་པོའི་གཉིས་པའི་མིང་། །ལྷ་བདུད་བཙན་གསུམ་གང་ཐོབ་རྩོད་པས་བྲེལ། །སྟོད་བཀའ་བསྟན་གྱི་འབྱུང་གནས་སྡེ་མང་མཚོ། །ལྷ་འདོད་ཁམས་ཀྱི་བདག་པོའི་རྟ་བདུན་གནོད། །མཐར་དམ་ཉམས་ཀྱི་འབྱུང་བའི་གྲལ་གཤམ་སྙོགས། །ཚུལ་དེ་མཐུ་ཡིས་སྡིག་སྲིན་མགོ་མང་གཟིང་། །ཡུལ་རྡོ་སྟོད་དུ་མཛའ་བཤེས་དགྲ་རུ་ལྡང་། །བར་ཨ༷་ཡ༷ག་སོགས་དབྱར་ཁའི་གངས་ཞུའི་ཟླ། །སྨད་དཔོན་སྡེའི་བཞིན་མེ་ཏོག་སད་ཁྱེར་མཚུངས། །ཁོངཀལྤ་དྲའི་མཚན་འཆང་དམ་པ་དེའི། །ཚུལ་དམན་པ་རུ་བསྒྱུར་ནས་བསྟན་འགྲོ་གསོ། །ཡུལ་རྡོ་སྨད་བར་གསུམ་པོ་རྫིང་དཀྲུགས་ལྟར། །མཛའ་མི་མཛའ་དང་བཏང་སྙོམས་འཆོལ་ཉོག་སྤྱོད། །ལར་ཡུལ་དེ་རུ་འདྲེ་སྲིན་ཚང་མང་འཚོལ། །མཁར་རྒྱུ་བ་ཡི་གདུག་འདྲེའི་རྟེན་ཡུལ་འཆོས། །མི་ཕལ་ཆེའི་སྙིང་དུ་བསེན་མོ་འཇུག །ལས་མཆོག་གསུམ་དང་འགལ་བའི་བྱ་བར་བརྩོན། །དཔལ་བཀའ་བརྒྱུད་ཀྱི་བསྟན་པའི་མེ་རོ་ལངས། །ཆོས་སྔ་འགྱུར་གྱི་ན་བུན་ས་བླར་ཆགས། །རྗེ་ཇོ་ནང་པའི་བསྟན་པའི་དབྱར་རྔ་སྙན། །ཡུལ་འཛི་ཀ་རུ་བདེ་སྡུག་ཅིར་ཡང་མངོན། །གནས་འཛམ་ཐང་དུ་བསོད་ནམས་དམ་ཆོས་འཕེལ། །རྡོའི༷་སྨ༷ད་པ་ཡི་རཱ་ཛ་ཚིག་གིས་བྲེལ། །སྨད་ཚ༷་ཁོ༷་ཡི་མི་རྣམས་གར་ཐབས་བསྒྱུར། །ཡུལ་རྫི༷་འགག༷་ཏུ་ལུགས་ཟུང་དཔལ་ཡོན་ངོམ། །དགྲ་ཐབ་འོག་ཏུ་གབ་ཀྱང་ལྡང་བར་དཀའ། །མ་རལ་གཅིག༷་མ༷འི་སྤྲུལ༷་པས་བསྟན་འགྲོ་སྐྱོངས། དཔལ་བཻ༷་རོ༷་ཡི༷་སྤྲུལ་པ་ཡུལ་དེར་སྨན། །ཡང༷་མཆོ༷ག་རྩེ༷་ལ་དཀར་ནག་ཁྲ་གསུམ་གཟུགས། དཔེ་སྒྱུ་མ་མཁན་མངོན་སུམ་ཆས་པ་བཞིན། །མི་མཆོག་འབྲིང་རལ་བའི་ཆོ་འཕྲུལ་སྟོན། །ཡུལ་ས༷་མ༷་རུ་ལྷ་མིན་ལྷར་བརྫུ་དང་། །མི་མིན་ཀྱང་མི་ཡི་གཟུགས་བསྒྱུར་ནས། །ལྷ་མི་ཡི་བར་དུ་དབྱེན་སྦྱོར་དང་། །མཆོག་དམན་གྱི་ཁྱུ་འདྲོག་བྱ་བས་བསླད། །ཚུལ་འདི་བཞིན་དང་འདི་ལས་གཞན་པ་འགའ། །གཟུགས་མངོན་སུམ་བཞིན་གསལ་ཡང་རེ་ཞིག་བཤོལ། །དེ་སྐད་ཅེས་རྡོ་བླས་བྲིས་པ་ཀུན་ལ་དགེ།། །།སརྦ་མངྒ་ལཾ།། །།རྡོ་རྗེ་ཕུར་པའི་དམ་ཅན་གསོལ་བསྡུས་ནི། མཆོད་གཏོར་གསེར་སྐྱེམས་ཅི་འབྱོར་བཤམས་ལ།ཨོཾ་ཨཱཿཧཱུྃ། ཕྱི་ནང་གསང་བའི་མཆོད་པ་བསྐང་རྟེན་རྫས། །དངོས་འབྱོར་ཡིད་སྤྲུལ་དཔག་མེད་སྤྲིན་ཕུང་འདིས། །ཤྭ་ན་ས་བདག་བདག་ཉིད་མ་བཞི་དང་། །མིང་པོ་གསུམ་དང་དབང་ཕྱུག་ཉི་ཤུ་བརྒྱད། །མ་བདུན་སྲིང་བཞི་དྲེགས་པ་སྡེ་དྲུག་སོགས། །རྡོ་རྗེ་ཕུར་པའི་བཀའ་གཏེར་སྲུང་མའི་ཚོགས། །གསོལ་ལོ་མཆོད་དོ་བཅོལ་པའི་ཕྲིན་ལས་མཛོད། །ཅེས་གྲངས་གསོག་དོན་དུ་འཇི༵གས་མེ༵ད་ཕྲི༵ན་ལ༵ས་འོད༵་ཟེར༵་གྱིས་སྦྱར་བའོ། །དགེའོ།། །། སྡེ་མཆོད་ཤིན་ཏུ་བསྡུས་པ་ནི། །ཨོཾ་ཨཱཿཧཱུྃ། མཆོག་གསུམ་སྐུ་གསུམ་རྩ་བ་གསུམ། །ཆོས་སྐྱོང་དམ་ཅན་ནོར་ལྷ་སོགས། །མཆོད་ཡུལ་གོང་མ་ཐམས་ཅད་ལ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །བདག་གི་འདོད་དོན་བསྒྲུབ་ཏུ་གསོལ། །ཕྱི་ནང་གསང་དང་སྤྲུལ་པ་དང་། །མཆོག་གི་སྡེ་བརྒྱད་བརྒྱད་ཚན་ལྔ། །འཁོར་དང་ཡང་འཁོར་བཅས་རྣམས་ལ། །མཆོད་པ༴ གསེར་སྐྱེམས༴ བདག་གི་འདོད་དོན༴ ས་བདག་ས་ལྷ་ཡུལ་གཞིའི་བདག །རྒྱལ་ཆེན་བཞི་དང་དཔལ་མགོན་སོགས། །འགོ་བའི་ལྷ་ལྔ་ལ་སོགས་པའི། །སྣང་སྲིད་སྡེ་བརྒྱད་འཁོར་བཅས་ལ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །བདག་གི་འདོད་དོན་སྒྲུབ་ཏུ་གསོལ། །རྡོ་གྲུབ་ཆེན་ཀུན་བཟང་གཞན་ཕན་གྱིས་སོ། །དགེའོ།། །།མཆོག་གསུམ་རྩ་བ་གསུམ་གྱི་ངོ་བོར་གྱུར་པ་བླ་མ་དམ་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཚོགས་ལ་སྐྱབས་སུ་མཆིའོ། །གསོལ་བ་འདེབས་སོ་བྱིན་གྱིས་བརླབ་པར་མཛད་དུ་གསོལ། །སྨོན་ལམ་བཏབ་པ་འདི་རྣམས་འགྲུབ་པར་མཛད་དུ་གསོལ། །མི་ངའི་སྐྱེ་བ་ནས་སྐྱེ་བ་ཐམས་ཅད་དུ་ཕ་མ་སེམས་ཅན་ཐམས་ཅད་ལ་བསམ་པ་ངན་པ་སྤུ་ཙམ་ཡང་སྐྱེ་བར་མ་གྱུར་ཅིག །བསམ་སྦྱོར་བཟང་པོ་ཆུ་རྒྱུན་བཞིན་དུ་རྒྱུན་མི་འཆད་པར་གྱུར་ཅིག །ཟ་འདོད་ཀྱི་ཚོགས་འཁོར་མ་ཡིན་པའི་རྡོ་རྗེ་ཐེག་པའི་ལམ་རྣམ་པར་དག་པའི་ཚོགས་འཁོར་ལ་ལོངས་སྤྱོད་དུས་མ་གཏོགས་འགྲོ་བ་སེམས་ཅན་ཐམས་ཅད་ཀྱི་ཤ་ཁྲག་ཟ་བ་དང་འཐུང་བ་དང་འབག་པ་ལ་སོགས་ཅུང་ཟད་ཀྱང་མི་བྱེད་པར་ཤོག་ཅིག །དམ་བཅའ་འདི་དག་དུས་ད་ལྟ་བཞིན་དུ་དྲན་པར་གྱུར་ཅིག །ལྡན་པ་དང་གྲོལ་བའི་ཡོན་ཏན་གཉིས་དང་མི་ལྡན་བཞིན་དུ་དཀོར་ཟས་ལན་ཆགས་ལ་ཏིལ་འབྲུ་ཙམ་ཡང་མི་འབག་པར་ཤོག་ཅིག །སེམས་ཅན་གཅིག་གི་དོན་དུའང་རང་གི་སྒོ་གསུམ་པོ་གཏོང་བ་ལ་ཐོགས་པ་ཅུང་ཟད་ཙམ་ཡང་མི་བྱེད་པར་ཤོག་ཅིག །ཆོས་ཉིད་འགྱུར་བ་མེད་པ་དང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པའི་སྟོབས་ཀྱིས་རང་འདོད་དང་བྲལ་བའི་སྨོན་ལམ་འདི་རྣམས་ཡོངས་སུ་འགྲུབ་པར་གྱུར་ཅིག །དཀོན་མཆོག་གསུམ་གྱི་བདེན་པས་འགྲུབ་པར་གྱུར་ཅིག །བླ་མ་དམ་པ་རྣམས་ཀྱི་བདེན་པས་འགྲུབ་པར་གྱུར་ཅིག །བདག་རྡོ་བླ་ཀུན་བཟང་གཞན་ཕན་འཆི་ཁར་བབ་དུས་སུ་སྨོན་ལམ་བཏབ་པའི་ཡི་གེ་པ་ནི་ཀློང་གསལ་གྱིས་བགྱིས་པས་འགྲོ་བ་ཡོངས་ལ་ཕན་ཐོགས་པའི་གྱུར་གྱིར་ཅིག། །།དགེའོ།། །། འཕགས་ཡུལ་རིག་འཛིན་མཆོག་བརྒྱད་ཀྱི་གསོལ་འདེབས་བྱིན་རླབས་ཆར་རྒྱུན།འཕགས་ཡུལ་རིག་འཛིན་མཆོག་བརྒྱད་ཀྱི་གསོལ་འདེབས་བྱིན་རླབས་ཆར་རྒྱུན་བཞུགས་སོ། །རྣམ་ཀུན་མཆོག་ལྡན་ཆོས་སྐུའི་མཁའ་དབྱིངས་ལས། །ཡན་ལག་བདུན་ལྡན་ལོངས་སྐུའི་ཉ་རྒྱས་ཟླ། །གདུལ་བྱའི་མཚོ་ལ་བསམ་ཡས་སྤྲུལ་སྐུའི་ཚུལ། །སྒྱུ་འཕྲུལ་དྲྭ་བར་བསྒྱུར་ལ་གསོལ་བ་འདེབས། །ཤར་ཕྱོགས་བསིལ་བ་ཚལ་གྱི་དུར་ཁྲོད་དུ། །ཡང་དག་ཐུགས་ཀྱི་གསང་མཛོད་སྒོ་ཕྱེས་ཏེ། །གྲུབ་བརྙེས་ཡིད་བཞིན་གཏེར་ལ་དབང་བསྒྱུར་བའི། །སློབ་དཔོན་ཧཱུཾ་ཀཱ་ར་ལ་གསོལ་བ་འདེབས། །ལྷོ་ཕྱོགས་སྐུ་ལ་རྫོགས་པའི་དུར་ཁྲོད་དུ། །འཇམ་དཔལ་སྐུ་ཡི་ས་བོན་ལེགས་བཏབ་པས། །རྡོ་རྗེ་བཞི་ཡི་འབྲས་བུ་ཡོངས་སྨིན་པ། །འཇམ་དཔལ་བཤེས་གཉེན་ཞབས་ལ་གསོལ་བ་འདེབས། །ནུབ་ཕྱོགས་པདྨ་བརྩེགས་པའི་དུར་ཁྲོད་དུ། །པདྨ་གསུང་གི་ཆུ་གཏེར་རབ་བརྒལ་ནས། །ཇི་ལྟ་ཇི་སྙེད་མཁྱེན་པའི་ནོར་ཐོབ་པ། །ཀླུ་སྒྲུབ་སྙིང་པོའི་ཞབས་ལ་གསོལ་བ་འདེབས། །བྱང་ཕྱོགས་ལིངྐ་བརྩེགས་པའི་དུར་ཁྲོད་དུ། །ཕུར་པ་ཕྲིན་ལས་རྡོ་རྗེའི་མཚོན་བརྡུངས་པས། །སྲིད་གསུམ་དབྱིངས་སུ་སྒྲོལ་བའི་མཐུ་ཐོབ་པ། །པྲ་ཆེན་ཧ་སྟིའི་ཞབས་ལ་གསོལ་བ་འདེབས། །ཤར་ལྷོ་ལྷུན་གྲུབ་བརྩེགས་པའི་དུར་ཁྲོད་དུ། །རྦོད་གཏོང་མ་མོའི་དགའ་མར་རྟག་རོལ་བས། །ཟག་མེད་བདེ་ཆེན་ལང་ཚོ་རབ་རྒྱས་པ། །དྷ་ན་སངྐྲྀའི་ཞབས་ལ་གསོལ༴ ལྷོ་ནུབ་གསང་ཆེན་རོལ་པའི་དུར་ཁྲོད་དུ། །ཡོན་ཏན་བདུད་རྩིའི་བཅུད་ལ་ལོངས་སྤྱད་པས། །འཕོ་མེད་འཇའ་ལུས་མཆོག་གི་སྐུར་བཞེངས་པ། །བི་མ་མི་ཏྲའི་ཞབས་ལ༴ ནུབ་བྱང་ཧེ་ཆེན་བརྡལ་བའི་དུར་ཁྲོད་དུ། །འཇིག་རྟེན་མཆོད་བསྟོད་དཔུང་ཚོགས་རབ་བརྔན་པས། །མ་རུང་བདུད་སྡེའི་གཡུལ་ངོ་ཕམ་བྱས་པའི། །རམ་བུ་གུ་ཧྱའི་ཞབས་ལ༴ བྱང་ཤར་འཇིག་རྟེན་བརྩེགས་པའི་དུར་ཁྲོད་དུ། །དྲག་སྔགས་དམོད་པའི་མེ་དཔུང་རབ་འབར་བས། །ཕས་རྒོལ་རྩི་ཤིང་བསྲེགས་པའི་མཐུ་ཐོབ་པ། །ཤིནྟཾ་གརྦྷའི་ཞབས་ལ༴ སྐུ་གསུམ་རྒྱལ་བའི་ཞིང་རྣམས་ཐམས་ཅད་དུ། །སྒྲུབ་སྡེ་བརྒྱད་ལ་མངོན་པར་བྱང་ཆུབ་ནས། །རིག་འཛིན་རྣམ་བཞིའི་གོ་འཕང་མཆོག་བརྙེས་པ། །ཨོ་རྒྱན་ཐོད་ཕྲེང་རྩལ་ལ༴ དེ་ལྟར་གསོལ་བ་བཏབ་པས་རྒྱལ་རྣམས་ཀྱི། །མཁྱེན་བརྩེ་ནུས་པའི་བྱིན་རླབས་དཔལ་ཡོན་ཀུན། །བདག་གི་ལེགས་ཐོབ་རྡོ་རྗེའི་སྐུར་སྨིན་ཏེ། །མ་ལུས་འགྲོ་བའི་དཔལ་དུ་འགྱུར་བར་ཤོག །རིག་འཛིན་མཆོག་བརྒྱད་ཀྱི་གསོལ་འདེབས་བྱིན་རླབས་ཆར་རྒྱུན་ཞེས་བྱ་བ་འདི་ཉིད་རི་བོ་དགའ་ལྡན་པའི་རབ་འབྱམས་པ་དོན་གྲུབ་རྒྱ་མཚོས་བསྐུལ་བའི་ངོར་གསང་སྔགས་ཀྱི་དཀྱིལ་འཁོར་དུ་དབང་བསྐུར་ལེགས་པར་ནོད་ནས་ཐེ་ཚོམ་གྱི་བགེགས་མ་ཞུགས་པའི་རྫོགས་ཆེན་རྣལ་འབྱོར་པ་འཇིགས་མེད་འཕྲིན་ལས་འོད་ཟེར་ཞེས་པའི་བྱ་བྲལ་བས་ཐོལ་བྱུང་དུ་ཤར་བ་ཡིད་ཆེས་ཐོབ་ནས་བྱང་ཕྱོགས་མཚོ་སྔོན་ནས་སྤེལ་བ་འབྲེལ་ཐོགས་ཐམས་ཅད་ཀྱི་རྒྱུད་ལ་བྱིན་རླབས་འཇུག་པའི་རྒྱུར་གྱུར་ཅིག། །།དགེ་ལེགས་འཕེལ།། །། མཁའ་འགྲོའི་གསོལ་འདེབས་བསྡུས་པ།མཁའ་འགྲོའི་གསོལ་འདེབས་བསྡུས་པ་བཞུགས་སོ། །སྐྱེ་མེད་དབྱིངས་ཀྱི་མཁའ་འགྲོ་ཀུན་ཏུ་བཟང་། །འགག་མེད་ལོངས་སྐུའི་ཞིང་ན་ཝཱ་རཱ་ཧཱི། །གང་འདུལ་སྤྲུལ་སྐུ་ཡེ་ཤེས་མཚོ་རྒྱལ་མར། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སྐུ་གསུམ་རྒྱལ་བའི་སྤྱི་གཟུགས་བླ་ན་མེད། །མཁའ་འགྲོ་ཡོངས་ཀྱི་མིང་པོ་ཧེ་རུ་ཀ། །མཁྱེན་བརྩེ་འོད་ཟེར་འཇིགས་མེད་གླིང་པ་ལ། །གསོལ་བ་འདེབས་སོ༴ གང་གི་བཀའ་གཏེར་བདུད་རྩིའི་རྒྱ་མཚོའི་བཅུད། །རྣམ་གསུམ་དད་པའི་ཡུར་བར་ལེགས་དྲངས་པའི། །འཇིགས་མེད་འཕྲིན་ལས་འོད་ཟེར་དཔལ་འབར་ལ། །གསོལ་བ་འདེབས་སོ༴ ཆོས་སྐུའི་མཁའ་ལ་སྙིང་རྗེའི་ཆུ་འཛིན་འཁྲིགས། །སྐལ་བཟང་འགྲོ་ལ་དབང་བཞིའི་ཆར་རྒྱུན་གྱིས། །སྐུ་བཞིའི་དཔལ་སྟེར་རྩ་བརྒྱུད་བླ་མ་ལ། །གསོལ་བ་འདེབས་སོ༴ དེ་ལྟར་གསོལ་བ་བཏབ་པའི་མཐུ་ནུས་ཀྱིས། །ཚེ་འདིའི་མི་མཐུན་རྒུད་པ་ཀུན་ཟད་ནས། །ས་ལམ་ཡོན་ཏན་ཡར་ངོའི་ཟླ་བཞིན་འཕེལ། །བདག་གཞན་དོན་གཉིས་ལྷུན་གྲུབ་འབྲས་སྨིན་ཤོག །ཅེས་པའང་སྒྲུབ་བརྩོན་ནོར་བུ་བཟང་པོ་དང་། ༧ གཅོད་སྨྱོན་གྱིས་བསྐུལ་ངོར། །འཇིགས་མེད་ཕྲིན་ལས་འོད་ཟེར་གྱིས་སྦྱར་བའོ།། །། ཡུམ་ཀའི་གསང་སྒྲུབ་སེང་གེའི་གདོང་ཅན་གྱི་གསོལ་འདེབས་བྱིན་རླབས་ཆར་འབེབ།ཡུམ་ཀའི་གསང་སྒྲུབ་སེང་གེའི་གདོང་ཅན་གྱི་གསོལ་འདེབས་བྱིན་རླབས་ཆར་འབེབ་ནི། །ཆོས་དབྱིངས་སྤྲོས་པ་བྲལ་བའི་ཞིང་ཁམས་ནས། །ཆོས་སྐུ་ཀུན་ཏུ་བཟང་མོ་ལ་གསོལ་བ་འདེབས། །སྤྲོས་བྲལ་བློ་འདས་རྟོགས་པར་བྱིན་གྱིས་རློབས། །ལྷུན་གྲུབ་འདུས་མ་བྱས་པའི་ཕོ་བྲང་ནས། །ལོངས་སྐུ་རྡོ་རྗེ་ཕག་མོ་ལ་གསོལ་བ་འདེབས། །བདེ་སྟོང་རྒྱུན་ཆད་མེད་པར་བྱིན་གྱིས་རློབས། །འགྲོ་འདུལ་ཐུགས་རྗེའི་སྤྲུལ་པའི་གནས་མཆོག་ནས། །སྤྲུལ་སྐུ་སིང་ཧ་མུ་ཁ་ལ་གསོལ་བ་འདེབས། །གཞན་དོན་རླབས་ཆེན་འགྲུབ་པར་བྱིན་གྱིས་རློབས། །དབང་ཡུལ་སྐྱེ་མཆེད་དག་པའི་ཕོ་བྲང་ནས། །རྡོ་རྗེ་ཕྲ་མེན་དྲུག་ལ་གསོལ་བ་འདེབས། །འཁྲུལ་རྟོག་ལྷ་རུ་འཆར་བར་བྱིན་གྱིས་རློབས། །རྟོག་ཚོགས་རང་སར་གྲོལ་བའི་ཕོ་བྲང་ནས། །མཁའ་འགྲོ་སུམ་ཅུ་གཉིས་ལ་གསོལ་བ་འདེབས། །ཉོན་མོངས་རང་ངོར་གྲོལ་བར་བྱིན་གྱིས་རློབས། །ཕྲིན་ལས་མུ་མཐའ་མེད་པའི་ཕོ་བྲང་ནས། །འབུམ་ཕྲག་མཁའ་འགྲོའི་ཚོགས་ལ་གསོལ་བ་འདེབས། །འགྲོ་དོན་རྒྱུན་ཆད་མེད་པར་བྱིན་གྱིས་རློབས། །དྲུག་ལྡན་གསང་ཆེན་རྡོ་རྗེའི་ཕོ་བྲང་ནས། །རིག་འཛིན་འཇིགས་མེད་གླིང་པ་ལ་གསོལ་བ་འདེབས། །ལྷ་ཚོགས་བླ་མར་ཤེས་པར་བྱིན་གྱིས་རློབས། །ལྷུན་གྲུབ་ངེས་པ་ལྔ་ལྡན་ཞིང་ཁམས་ནས། །འཇིགས་མེད་ཕྲིན་ལས་འོད་ཟེར་ལ་གསོལ་བ་འདེབས། །སྐུ་ལྔ་ཡེ་ཤེས་རྟོགས་པར་བྱིན་གྱིས་རློབས། །སྣང་བཞི་འཇའ་ལུས་རྡོ་རྗེའི་ཕོ་བྲང་ནས། །མངའ་བདག་ཡེ་ཤེས་རྒྱ་མཚོ་ལ་གསོལ་བ་འདེབས། །སྤྲོས་བྲལ་བློ་འདས་རྟོགས་པར་བྱིན་གྱིས་རློབས། །སྙིང་དབུས་མི་ཤིགས་ཐིག་ལེའི་གཞལ་ཡས་ནས། །དྲིན་ཅན་རྩ་བའི་བླ་མ་ལ་གསོལ་བ་འདེབས། །ཟུང་འཇུག་ཚེ་འདིར་རྟོགས་པར་བྱིན་གྱིས་རློབས། །བཀའ་གཏེར་དག་སྣང་ལྕགས་རི་ལེགས་སྲུང་བའི། །གཏར་བདག་ཆོས་སྲུང་རྣམས་ལ་གསོལ་བ་འདེབས། །དགྲ་བགེགས་ནུས་མཐུས་སྒྲོལ་བར་བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་ཅག་སྒྲུབ་པོའི་སྒོ་གསུམ་གནས་འགྱུར་ནས། །སིང་ཧ་མུ་ཁའི་གསང་གསུམ་རྡོ་རྗེའི་ཁམས། །མངོན་གྱུར་བསྟན་འགྲོར་ཕན་པའི་མཐུ་ཐོབ་ཤོག །དེ་ལྟར་ཡུམ་ཀའི་གསང་སྒྲུབ་ཀྱི། །གསོལ་འདེབས་བྱིན་རླབས་ཆར་འབེབས་འདི། །རིག་འཛིན་འཇིགས་མེད་གླིང་པ་ཡི། །ཞབས་པད་སྤྱི་བོར་ལེགས་བསྟེན་པ། །འཇིགས་མེད་ཕྲིན་ལས་འོད་ཟེར་གྱིས། །བྲིས་འདི་འགྲོ་ལ་སྨན་གྱུར་ཅིག། །། ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་བསྐང་བཤགས་འདོད་དགུ་ལྷུན་གྲུབ།ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་བསྐང་བཤགས་འདོད་དགུ་ལྷུན་གྲུབ་བཞུགས་སོ། །བླ་མ་དང་དཀྱིལ་འཁོར་དབྱེར་མེད་པའི་ཇོ་བོ་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་ལྷ་ཚོགས་ལ་ཕྱག་འཚལ་ལོ། །ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་བསྐང་བཤགས་བྱེད་པར་འདོད་ན། བསྐང་རྫས་གྱ་ནོམ་པར་བཤམས། འཕགས་པ་ཀུན་ཏུ་བཟང་པོའི་མཆོད་སྤྲིན་ལྟ་བུར་བསམས་ལ་ནམ་མཁའ་མཛོད་ཀྱི་སྔགས་རྒྱས་བརླབས། ཧྲཱིཿ ནུབ་ཕྱོགས་བདེ་བ་ཅན་གྱི་ཞིང་མཆོག་གི །འདྲེན་པ་འོད་དཔག་མེད་ཀྱི་ཐུགས་རྗེ་ལས། །སྤྲུལ་མཛད་འཕགས་མཆོག་སྡུག་བསྔལ་རང་གྲོལ་ལྷ། །བསྐང་བའི་གནས་འདིར་སྤྱན་འདེན་གཤེགས་སུ་གསོལ། །སྣ་ཚོགས་པདྨ་ཉི་ཟླའི་གདན་ལ་བཞུགས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཕྱི་ནང་གསང་བའི་མཆོད་ཚོགས་དཔག་མེད་འབུལ། །ཉམས་ཆག་ཉེས་ལྟུང་སྡིག་སྒྲིབ་མཐོལ་ཞིང་བཤགས། །འཁོར་འདས་དགེ་ཚོགས་ཀུན་ལ་རྗེས་ཡི་རང་། །སྡུག་བསྔལ་རང་གྲོལ་ཆོས་འཁོར་བསྐོར་བར་བསྐུལ། །རྟག་ཏུ་འགྲོ་དོན་མཛད་པར་གསོལ་བ་འདེབས། །ཚད་མེད་རྣམ་བཞིའི་དགེ་ཚོགས་འགྲོ་ལ་བསྔོ། །ཞེས་བརྗོད་ཅིང་སྐོང་བ་དངོས་ལ་འཇུག་པ་ནི། ཧྲཱིཿ འཇིག་རྟེན་ཁམས་ཀྱི་དག་བྱེད་ཆེ་ཆུང་ཆབ། །ཆུ་དང་ཐང་སྐྱེས་མེ་ཏོག་སྣ་ཚོགས་རིགས། །རང་བཞིན་ངད་ལྡན་སྤོས་དང་སྦྱར་སྤོས་ཚོགས། །མུན་པ་སེལ་བྱེད་ཉི་ཟླ་སྒྲོན་མེ་སོགས། །བཟང་པོའི་དྲི་ལྡན་གཙང་ཆབ་བསྒྱུར་བའི་དྲི། །བཟའ་བཅའ་ལྡག་གཞིབ་ལྷ་མའི་ཞལ་ཟས་རིགས། །འབུད་དཀྲོལ་སྙན་འཇེབས་རོལ་མོའི་ཚོགས་རྣམས་ཀྱིས། །སྡུག་བསྔལ་རང་གྲོལ་ལྷ་ཚོགས་ཐུགས་དམ་བསྐང་། །རིགས་བདག་འཆི་མེད་མགོན་པོའི་ཐུགས་དམ་བསྐང་། །འཁོར་གྱི་ལྷ་མོ་རྣམ་བཞིའི་ཐུགས་དམ་བསྐང་། །སྒོ་སྲུང་རྟ་མགྲིན་རིགས་བཞིའི་ཐུགས་དམ་བསྐང་། །ཐུགས་དམ་བསྐང་ངོ་ཕྱི་ནང་གསང་བ་ཡི། །དམ་ཚིག་ཉམས་ཆག་ཉེས་ལྟུང་ཡོངས་དག་ནས། །མཆོག་དང་ཐུན་མོང་དངོས་གྲུབ་ཐོབ་པ་དང་། །ཐུགས་རྗེ་ཆེན་པོའི་ཕྲིན་ལས་ཡོངས་འགྲུབ་མཛོད། །ཧྲཱིཿ མིག་ཤེས་འཇུག་ཡུལ་གཟུགས་རྣམས་ཐམས་ཅད་དང་། །སྒྲ་འཛིན་ལམ་དུ་གྲགས་པ་སྒྲ་ཡི་རིགས། །དྲི་འཛིན་ཤེས་ངོར་སྣང་བའི་སྣ་ཚོགས་དྲིས། །སྡུག་བསྔལ་རང་གྲོལ་ལྷ་ཚོགས་ཐུགས་དམ་བསྐང་། །རིགས་བདག་འཆི་མེད་མགོན་པོའི་ཐུགས་དམ་བསྐང་། །འཁོར་གྱི་ལྷ་མོ་རྣམ་བཞིའི་ཐུགས་དམ་བསྐང་། །སྒོ་སྲུང་རྟ་མགྲིན་བཞི་ཡི་ཐུགས་དམ་བསྐང་། །ཐུགས་དམ་བསྐང་ངོ་ཕྱི་ནང་གསང་བ་ཡི། །དམ་ཚིག་ཉམས་ཆག་ཉེས་ལྟུང་ཡོངས་དག་ནས། །མཆོག་དང་ཐུན་མོང་དངོས་གྲུབ་ཐོབ་པ་དང་། །ཐུགས་རྗེ་ཆེན་པོའི་ཕྲིན་ལས་ཡོངས་འགྲུབ་མཛོད། །ཧྲཱིཿ རྩ་བརྒྱད་ཡན་ལག་སྟོང་སྦྱར་སྨན་མཆོག་དང་། །རྒྱུད་དྲུག་དབྱིངས་སུ་བསྒྲལ་བའི་དམར་ཆེན་པོ། །རོ་མཆོག་བརྒྱ་དང་ལྡན་པའི་བྷ་ལིངྟ་། །བདེ་སྟོང་སྦྱོར་དང་རྟོག་ཚོགས་ཀུན་བསྒྲལ་བས། །སྡུག་བསྔལ་རང་གྲོལ་ལྷ་ཚོགས་ཐུགས་དམ་བསྐང་། །རིགས་བདག་འཆི་མེད་མགོན་པོའི་ཐུགས་དམ་བསྐང་། །འཁོར་གྱི་ལྷ་མོ་རྣམ་བཞིའི་ཐུགས་དམ་བསྐང་། །སྒོ་སྲུང་རྟ་མགྲིན་རིགས་བཞིའི་ཐུགས་དམ་བསྐང་། །ཐུགས་དམ་བསྐང་ངོ་ཕྱི་ནང་གསང་བ་ཡི། །དམ་ཚིག་ཉམས་ཆག་ཉེས་ལྟུང་ཡོངས་དག་ནས། །མཆོག་དང་ཐུན་མོང་དངོས་གྲུབ་ཐོབ་པ་དང་། །ཐུགས་རྗེ་ཆེན་པོའི་ཕྲིན་ལས་ཡོངས་འགྲུབ་མཛོད། །ཧྲཱིཿ གཞན་ཡང་མཆོད་རྫས་སྐོང་རྫས་སྒྲུབ་རྫས་སོགས། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །མཐའ་ཡས་འགྲོ་བའི་ཚོགས་བསགས་སྒྲིབ་སྦྱང་ཕྱིར། །བསྐང་བྱ་སྐོོང་བྱེད་དངོས་འཛིན་རྣམ་དག་བས། །སྡུག་བསྔལ་རང་གྲོལ་ལྷ་ཚོགས་ཐུགས་དམ་བསྐང་། །རིགས་བདག་འཆི་མེད་མགོན་པོའི་ཐུགས་དམ་བསྐང་། །འཁོར་གྱི་ལྷ་མོ་བཞི་ཡི་ཐུགས་དམ་བསྐང་། །སྒོ་སྲུང་རྟ་མགྲིན་རིགས་བཞིའི་ཐུགས་དམ་བསྐང་། །ཐུགས་དམ་བསྐང་ངོ་ཕྱི་ནང་གསང་བ་ཡི། །དམ་ཚིག་ཉམས་ཆག་ཉེས་ལྟུང་ཡོངས་དག་ནས། །མཆོག་དང་ཐུན་མོང་དངོས་གྲུབ་ཐོབ་པ་དང་། །ཐུགས་རྗེ་ཆེན་པོའི་ཕྲིན་ལས་ཡོངས་འགྲུབ་མཛོད། །ཧྲཱིཿ དེ་ལྟར་བསྐངས་ཤིང་བཤགས་པའི་མཐུ་སྟོབས་ཀྱིས། །བདག་དང་འགྲོ་བ་སེམས་ཅན་ཐམས་ཅད་ཀྱི། །ཕྱི་ནང་གསང་བའི་འགལ་རྐྱེན་བར་ཆང་བཟློག །སྔ་འགྱུར་བསྟན་ལ་འཁུ་བའི་ལོག་འདྲེན་རིགས། །རྩ་གསུམ་དམ་ཅན་རྒྱ་མཚོའི་མཐུ་སྟོབས་ཀྱིས། །ཐལ་བའི་རྡུལ་ཕྲན་བཞིན་དུ་བརླགས་ནས་ཀྱང་། །རྡོ་རྗེའི་ཐེག་པ་དར་ཞིང་རྒྱས་པར་མཛོད། །དེ་ལྟར་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་སྐོང་བཤགས་འདོད་དགུ་ལྷུན་གྲུབ་འདི་ཉིད་དད་དམ་ནོར་ལྡན་ཤེས་རབ་བསྟན་འཛིན་གྱིས་བསྐུལ་ངོར། །རྡོ་བླས་ཇི་ལྟར་སྨྲས་བཞིན་ཀུན་བཟང་འཆི་མེད་ཀྱིས་བྲིས་པའི་དགེ་བས་འགྲོ་རྣམས་ཐུགས་རྗེ་ཆེན་པོའི་གོ་འཕང་འཐོབ་པའི་རྒྱུར་གྱུར་ཅིག། །།དགེའོ།། །།དགེའོ།། །།དགེའོ།། །། ཀློང་ཆེན་སྙིང་གི་ཐིག་ལེ་ལས། འོད་གསལ་རྡོ་རྗེ་སྙིང་པོའི་རིག་འཛིན་བརྒྱུད་པའི་བསྐང་བཤགས་ཌཱཀྐིའི་ཐོལ་གླུ།ཀློང་ཆེན་སྙིང་གི་ཐིག་ལེ་ལས། འོད་གསལ་རྡོ་རྗེ་སྙིང་པོའི་རིག་འཛིན་བརྒྱུད་པའི་བསྐང་བཤགས་ཌཱཀྐིའི་ཐོལ་གླུ་བཞུགས་སོ། །ན་མོ་གུ་རུ་བྷྱཿ གཟོད་ནས་ཀ་དག་དྲི༵་མེ༵ད་ཆོས་ཀྱི་སྐུ། །འོ༵ད་གསལ་ལྷུན་གྲུབ་སྐུར་བཞེངས་ལོངས་སྤྱོད་རྫོགས། ཟུང་འཇུག་སྤྲུལ་པའི་ཟེ༵ར་གྱིས་རིགས་ཅན་གསུམ། །ཕན་བདེའི་སྣང་བ་སྦྱིན་དེས་དགེ་ལེགས་སྩོལ། །དེ་ལ་འདིར་སྐབས་ཅི་རིགས་པར་སྙིང་ཐིག་གི་རིག་འཛིན་བརྒྱུད་པ་རྣམས་ཀྱི་ཐུགས་དམ་བསྐང་བར་འདོད་པས། བསྐང་རྫས་རྣམས་ནམ་མཁའ་མཛོད་ཀྱི་སྔགས་རྒྱས་བརླབས་ལ། ཧྲཱིཿ ཀུན་བརྟགས་གཞན་དབང་འཁྲུལ་པ་ལས་འདས་པའི། །ཀུན་ཏུ་རྟོག་བྲལ་ཡོངས་གྲུབ་གཉུག་མའི་དབྱིངས། །ཀུན་ནས་རྣམ་གྲོལ་ཡོན་ཏན་རྒྱ་མཚོའི་དཔྱིད། །ཀུན་བཟང་ཆོས་ཀྱི་སྐུ་ཡི་ཐུགས་དམ་བསྐང་། །བདེ་བའི་བདག་ཉིད་སྣ་ཚོགས་གཟུགས་ཅན་དང་། །བདེ་མཆོག་འཁོར་ལོ་དབང་ཕྱུག་ཟུང་འཇུག་པའི། །བདེ་ཆེན་ཁ་སྦྱོར་ཡན་ལག་བདུན་གྱི་དངོས། །བདེ་སྟོང་རྡོ་རྗེ་སེམས་དཔའི་ཐུགས་དམ་བསྐང་། །དགའ་ལྡན་ལྷ་བརྒྱའི་ནོར་བུའི་ཅོད་པན་རྩེར། །དགའ་ཆེན་སྒྱུ་མའི་ཞབས་པད་ཉེར་བཀོད་པས། །དགའ་བཞིའི་ཡེ་ཤེས་མཚན་དཔེར་ཤར་བའི་སྐུ། །དགའ་རབ་དགྱེས་པ་རྡོ་རྗེའི༴ དཔལ་ལྡན་མཁས་པའི་ཚོགས་ཀྱིས་ཕྱག་བྱས་ཤིང་། །དཔལ་ལྡན་གྲུབ་རིག་རྒྱ་མཚོའི་འཁོར་ལོས་སྒྱུར། །དཔལ་ལྡན་སྲས་བཅས་རྒྱལ་བའི་ཡེ་ཤེས་སྐུ། །དཔལ་ལྡན་མཉྫུ་མི་ཏྲའི༴ རང་བཞིན་ཀ་དག་འོད་གསལ་ཆེན་པོའི་ངང་། །རང་གདངས་ལྷུན་གྲུབ་སྣང་བཞིའི་རྩལ་རྫོགས་པའི། །རང་བྱུང་གདོད་མའི་གནས་ལུགས་མངོན་གྱུར་པ། །རང་གྲོལ་ཤྲཱི་སིདྷིའི༴ རྣམ་བཅས་བདེ་བ་ཆེན་པོའི་བརྟུལ་ཞུགས་ཀྱིས། །རྣམ་མེད་སྟོང་ཉིད་ཕྱག་རྒྱར་མཉམ་སྦྱོར་བས། །རྣམ་པ་ཀུན་གྱི་མཆོག་ལྡན་ཡེ་ཤེས་དབྱིངས། །རྣམ་གྲོལ་ཛྙཱ་ན་སཱུ་ཏྲའི༴ འཕོ་འགྱུར་གཉིས་སུ་སྣང་བའི་ཉེར་ལེན་ཀུན། །འཕོ་བྲལ་དབུ་མའི་སྲོག་ཏུ་ཡོངས་གྲུབ་པས། །འཕོ་ཆེན་འཇའ་ལུས་རྡོ་རྗེའི་གོ་འཕང་ལས། །འཕོ་མེད་བི་མ་མི་ཏྲའི༴ འཆི་མེད་ཐོག་མའི་མགོན་པོའི་རྣམ་རོལ་ནི། །འཆི་མེད་རྟོག་པ་དངོས་གཟུགས་འཆང་བ། །འཆི་མེད་རིག་འཛིན་ཌཱཀྐིའི་ཚོགས་ཀྱི་རྗེ། །འཆི་མེད་པདྨ་ཐོད་ཕྲེང་༴ གྲུབ་པའི་སློབ་དཔོན་ཆེན་པོས་རྗེས་བཟུང་ཞིང་། །གྲུབ་གཉིས་ཡིད་བཞིན་གཏེར་ལ་དབང་འབྱོར་བའི། །གྲུབ་མཆོག་བྱེ་བའི་གཙུག་ན་མངོན་མཐོ་བ། །གྲུབ་ཆེན་རྗེ་འབངས་ཉེར་ལྔའི༴ ཀུན་ཏུ་ཟབ་ཞིའི་སྤྲོས་བྲལ་ཆོས་ཉིད་དང་། །ཀུན་སྣང་སྙིང་རྗེ་ཆེན་པོར་ཟུང་འཇུག་པའི། །ཀུན་གཟིགས་ཡེ་ཤེས་མེ་ལོང་མཆོག་གི་དངོས། །ཀུན་མཁྱེན་དྲི་མེད་འོད་ཟེར༴ རིགས་གཅིག་ལྷན་སྐྱེས་བདེ་ཆེན་ཐིག་ལེ་ལས། །རིགས་རྣམས་སྣ་ཚོགས་སྤྲོ་དང་བསྡུ་བའི་གར། །རིགས་དང་དཀྱིལ་འཁོར་རྒྱ་མཚོའི་ཁྱབ་བདག་མཆོག །རིག་འཛིན་རྩ་བརྒྱུད་བླ་མའི་ཐུགས་དམ་བསྐང་། །ཧྲཱིཿ ཐུགས་དམ་བསྐང་བའི་ཕྱི་ནང་མཆོད་པ་ནི། །ཚོགས་དྲུག་སྣང་བ་དབྱིངས་སུ་ཐིམ་པ་ལས། །གང་ཤར་འདོད་ཡོན་རྒྱན་གྱི་རོལ་མོའི་སྤྲིན། །མི་ཟད་ནམ་མཁའ་མཛོད་ཀྱིས་ཐུགས་དམ་བསྐང་། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོའི་སྒྲ། །བཀྲ་ཤིས་རྫས་རྟགས་རིན་ཆེན་སྣ་བདུན་སོགས། །སྐོང་རྫས་ཕྱི་ཡི་མཆོད་པས་ཐུགས་དམ་བསྐང་། །སྣང་སྟོང་སྒྱུ་མའི་གཟུགས་དང་ནཱ་དའི་སྒྲ། །བདེ་ཆེན་ཚུལ་ཁྲིམས་དྲི་དང་དགའ་བཞིའི་རོ། །རབ་འབར་གཏུམ་མོའི་རེག་བྱ་ཆོས་ཀྱི་དབྱིངས། །རང་བྱུང་ནང་གི་ཆོད་པས་ཐུགས་དམ༴ ཁམས་ལྔ་དབུ་མར་སྦྱོར་བའི་ཨ་མྲྀ་ཏ། །རླུང་བཅུ་དབྱིངས་སུ་བསྒྲལ་བའི་དམར་ཆེན་པོ། །ཟུང་འཇུག་བདེ་བ་ཆེན་པོའི་བྷ་ལིང་ཏ། །ལྷན་སྐྱེས་གསང་བའི་མཆོད་པས༴ ཀ་དག་འོད་གསལ་དབྱིངས་ཀྱི་གནས་ལུགས་རྟོགས། །ལྷུན་གྲུབ་རིག་པ་ཆོས་ཟད་ཆེན་པོར་སྨིན། །འཁོར་འདས་གཞི་གྲོལ་གཞོན་ནུ་བུམ་སྐུའི་ངང་། །བླ་མེད་མཆོག་གི་མཆོད་པས༴ སོ་ཐར་བྱང་སེམས་རིག་འཛིན་སྡེ་སྣོད་ཀྱི། །བཅས་དང་རང་བཞིན་ཉམས་པའི་སྡིག་ལྟུང་ཀུན། །རྩ་གསུམ་ཀུན་འདུས་བླ་མའི་དཀྱིལ་འཁོར་ཆེར། །རང་གྲོལ་གཉུག་མའི་ངང་དུ་མཐོལ་ཞིང་བཤགས། །ཧྲཱིཿ དེ་ལྟར་བསྐངས་ཤིང་བཤགས་པའི་བྱིན་རླབས་ཀྱིས། །བདག་གཞན་འགྲོ་ཀུན་དེང་ནས་བྱང་ཆུབ་བར། །བརྒྱུད་གསུམ་རིག་འཛིན་ཌཱཀྐིས་རྗེས་བཟུང་ནས། །དོན་གཉིས་བསམ་སྦྱོར་ཡིད་བཞིན་འགྲུབ་པར་ཤོག །གནས་སྐབས་བརྒྱད་གཉིས་འཇིགས་པ་ཀུན་ཞི་ཞིང་། །ཚེ་བསོད་དཔལ་འབྱོར་ཉམས་རྟོགས་ཡོན་ཏན་རྒྱས། །འཁོར་འདས་སྣང་སྲིད་དབང་དུ་འདུ་བ་དང་། །གཟུང་འཛིན་དགྲ་བགེགས་རྩད་ནས་ཆོད་པར་ཤོག །མཐར་ཐུག་ཅིར་སྣང་ལྷ་ཡི་ཕྱག་རྒྱར་དག །སྒྲ་གྲགས་བདེ་ཆེན་རྡོ་རྗེའི་དབྱིངས་སུ་རྫོགས། །རྟོག་ཚོགས་འོད་གསལ་ཆོས་ཀྱི་སྐུར་སྨིན་ནས། །རང་བཞིན་གདོད་མའི་དབྱིངས་སུ་གྲོལ་བར་ཤོག །དེ་ལྟར་འོད་གསལ་སྙིང་ཐིག་གི་རིག་འཛིན་བླ་མ་བརྒྱུད་པའི་ཚོགས་ཀྱི་ཐུགས་དམ་བསྐང་བའི་རིམ་པ་མཁའ་སྤྱོད་ཌཱཀྐའི་ཐོལ་གླུ་ཞེས་བྱ་བ་འདི་ཡང་། ཐེག་པ་མཆོག་གི་རྣལ་འབྱོར་པ་ཀུན་མཁྱེན་བླ་མ་དགྱེས་པའི་འབངས་འཇིགས་པ་མེད་པའི་སྡེས་ཕྱོགས་བྲལ་གྱི་རྒྱལ་ཁམས་ཉུལ་བའི་སྐབས། རྒྱལ་བ་གཉིས་པ་དྲི་མེད་འོད་ཟེར་གྱིས་སྡེ་གསུམ་རྫོགས་པ་ཆེན་པོའི་སེང་གེའི་སྒྲ་དབྱངས་ཀྱིས་བསིལ་ལྡན་ལྗོངས་ཀུན་ཁྱབ་པའི་གནས་གངས་རི་ཐོད་དཀར་འོད་ཟེར་སྤྲིན་གྱི་སྐྱེད་མོས་ཚལ་དུ་རྣམ་འཕྱང་ལོའི་ས་ཟླ་ཕྱི་མའི་དམར་ཕྱོགས་ཌཱཀྐི་འདུ་བའི་དུས་ཀྱི་མཆོད་པ་ཆེན་པོའི་ནུབ་མོ་སྣང་གསལ་གྱི་ངོགས་སུ་ཤར་མར་སྦྱར་བ་ཛ་ཡནྟུ།། །། བཅའ་ཁྲིམས་ཀྱི་ཡི་གེ་རྒན་ཉམས་བགྲོད་ལམ་ཐར་པའི་ཐེམ་སྐས།བཅའ་ཁྲིམས་ཀྱི་ཡི་གེ་རྒན་ཉམས་བགྲོད་ལམ་ཐར་པའི་ཐེམ་སྐས་ཞེས་བྱ་བ་བཞུགས། །ཨོཾ་སྭ་སྟི་སིདྡྷི། ཀུན་འབྱུང་འདྲེན་པའི་མུ་ཁྱུད་ཀྱིས་བཅིངས་ཤིང་། །དཀའ་ཐུབ་རིག་བྱེད་རྩིབས་སྟོང་རྣམ་བཀྲ་བ། །དབང་སྒྱུར་ཐབས་ཀྱི་འཁོར་ལོས་སྒྱུར་བ་མཆོག །ཨོ་རྒྱན་ཆོས་ཀྱི་རྒྱལ་པོས་དགེ་ལེགས་སྩོལ། །དཔག་མེད་དཔལ་ཡོན་རྒྱ་མཚོའི་བདུད་རྩིའི་བཅུད། །འཛད་མེད་ནམ་མཁའ་མཛོད་ལྟར་ཡོངས་འཁྱིལ་པའི། །གངའདུལ་འགྲོ་ལ་གྲུབ་གཉིས་ཆར་འབེབས་པ། །སྔ་འགྱུར་མཁས་གྲུབ་ཚོགས་ཀྱི་བྱིན་གྱིས་རློབས། །མཁྱེ༷ན་པའི་ཡེ་ཤེས་གཏིང་མཐའ་དཔག་དཀའ་ཞིང་། །བྱམས་ཆེན་ཐུགས་བརྩེ༷འི་དབང་སྔོན་གཏེར་མཛོད་ནས། །ལེགས་ཐོན་བྱིན་ནུས་འོད༷་ཟེ༷ར་སྟོང་འབར་གཟིས། །སྒྲུབ་བརྒྱུད་བསྟན་པའི་པད་ཚལ་བཞད་གྱུར་ཅིག །གང་གི་བཞེད་གཞུང་ཨ་ཏིའི་ལམ་མཆོག་ལ། །མཆོག་དམན་སྐལ་བས་འཇུག་ཚུལ་མཐའ་ཡས་ཀྱང་། །འདིར་ནི་སྐལ་བཟང་དད་དམ་ལྡན་རྣམས་ཀྱི། །ཉམས་ལེན་ཕྱག་བཞེས་སྤྱོད་ལམ་དགོས་ཚུལ་འཆད། །ཞེས་ཚིགས་སུ་བཅད་པ་ཅུང་ཟད་ཀྱིས་མདུན་བསུས་ཏེ། །གླེང་པར་བྱ་བ་ནི་ཞེ་ཆེན་བསྟན་གཉིས་དར་རྒྱས་གླིང་གི་སྒྲུབ་སྡེ་གསར་འཛུགས་པདྨ་འོད་གླིང་དུ་སྒྲུབ་པའི་རྒྱལ་མཚན་ཐོག་མར་འཛུགས་པའི་བྱེད་པོ་ཟབ་གསང་རྡོ་རྗེ་ཐེག་པའི་མངའ་བདག་ཆེན་པོ་ལྷོ་པ་བསྟན་འཛིན་ཆོས་ཀྱི་རྒྱལ་པོ་བཞུགས་པ་ལས་ལྷག་པའི་བཅའ་ཁྲིམས་ཀྱི་ལག་ལེན་ཁོ་བོས་འབྲི་བ་འོས་སུ་མ་གྱུར་མོད་ཀྱང་། གང་གིས་བཀའ་ཕེབས་གསེར་གྱི་ཅོད་པན་མགོར་བཅིངས་པ་ལྡོག་དུ་མ་ནུས་ནས་རང་བློར་འཚམས་པའི་བླངས་དོར་ཅུང་ཟད་འཁོད་པ་ལ་སྤྱི་སྡོམ་ནི། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པས། རྐང་པ་དང་པོའི་ཉེས་སྤྱོད་སྡོམ་པ། གཉིས་པས་དགེ་བ་ཆོས་སྡུད། གསུམ་པས་སེམས་ཅན་དོན་བྱེད་དེ། སོ་ཐར་གྱི་དང་པོ་དགེ་བསྙེན་ལའང་། འདུལ་བ་རྒྱ་མཚོའི་སྙིང་པོར། སྣ་ཅིག་སྣ་འགའ་ཕལ་ཆེར་སྤྱོད། ཡོངས་རྫོགས་སྤྱོད་དང་ཚངས་སྤྱོད་དང་། སྐྱབས་འགྲོ་ཙམ་གྱི་དགེ་བསྙེན་བཅས། ཞེས་སོགས་མང་དུ་གསུངས་ཀྱང་། ཡོངས་རྫོགས་སྡོམ་ལྡན་གྱི་སྤང་བྱ། རྩ་བཞི་ཆང་དང་ལྔའོ། །སྐྱབས་འགྲོ་ཁོ་ནའི་སྡོམ་ལྡན་གྱི། སྤང་བྱ་གསུམ་བསྒྲུབ་བྱ་གསུམ་ཆ་མཐུན་རྣམས་དང་བཅས་པའི་བླང་དོར་མ་འཛོལ་བ་སྤྱོད་དགོས་པ་གཞིར་བཅས་ལ། རབ་བྱུང་ལ་བསྙེན་པར་མ་རྫོགས་པ་བར་མ་རབ་བྱུང་དང་། །དགེ་ཚུལ་ཟུང་ལས། སྔ་མའི་སྤང་བྱ་སྐྱབས་འགྲོ་འདོར་བ། མཁན་སློབ་ལ་མ་གུས་པ། ཁྱིམ་པའི་རྟགས་ལེན་པ། རབ་བྱུང་གི་རྟགས་འདོར་བའོ། །རྗེས་མ་དགེ་ཚུལ་ལ་རྩ་བ་བཞི་ཆང་དང་ལྔའི་སྟེང་དུ། གར་ཕྲེང་བ་མལ་སྟན་ཚེ་མཐོ། དུས་མིན་ཁ་ཟས། གསེར་དངུལ་ལེན་པ་དང་བཅུའོ། །དེའི་སྟེང་དུ་བར་མའི་བཞི་བསྣན་པས་བཅུ་བཞིའོ། །རྩ་བ་དེ་ལས་གྱེས་པའི་ཆར་གཏོགས་སུམ་ཅུ་སོ་དྲུག །ཡན་ལག་བཞི་བཞི་སོ་སོོར་དབྱེ་བས་བཞི་བཅུའོ། །དགེ་སློང་ལ་ལྟུང་བ་སྡེ་ལྔའི་དང་པོ་ཕམ་པ་བཞི་ལས། མི་ཚངས་སྤྱོད་པ་ནི་ཕོ་མོ་མ་ནིང་དུད་འགྲོ་སོགས་ཀྱི་སྐྱེ་གནས་སམ་ལུས་ཀྱི་ཆ་ཤས་གང་རུང་ལ་སྤྱད་ནས་སིམ་པ་ཐོབས་པའོ། །མ་བྱིན་ལེན་པ། གཞན་གྱི་དངོས་པོ་རྒྱ་གར་ཀཪྴ་པ་ཎི་བཞི་ཆའི་ཚད། བོད་ཀྱིི་མུ་གེ་ཡོད་མེད་ཀྱིས་ནས་ཁལ་བཞི་དང་ཕྱེད་ཀྱི་ཚད་དུ་བཞག་པའོ། །སྲོག་གཅོད་ནི། མི་འམ།མངལ་གནས་མེར་མེར་པོོ་ལ་སོགས་པ་རྫས་སྔགས་སོགས་ཀྱིས་གསོད་པའོ། །རྫུན་ནི། བླ་མ་ཁོ་ནའི་སྤྱོད་ཡུལ་ཏེ། ཐོས་བསམ་སྒོམ་གསུམ། བསླབ་པ་ཡོན་ཏན་ མངོན་ཤེས་གྲུབ་རྟགས་སོགས་མེད་བཞིན་ཏུ་གཞན་ལས་ཁྱད་འཕགས་ཞིག་ཡོད་ཅེས་གཞན་མགོ་སྐོར་ཐབས་ཀྱི་ཟོལ་ཟོག་བྱེད་པ་དག་གོ །དེའི་སྟེང་དུ་དགེ་འདུན་ལྷག་མ་བཅུ་གསུམ་དང་། སྤང་ལྟུང་སུམ་ཅུ་ལྟུང་བྱེད་འབའ་ཞིག་དགུ་བཅུ་ཐམ་པ། སོར་བཤགས་བཞི་ཉེས་བྱས་བརྒྱ་དང་བཅུ་གཉིས་རྣམས་ཡོད་པ་སྔགས་སྤྱོད་ཀྱིས་ཁྱད་གསོད་མི་བྱེད་པར་སྤང་བླང་ཅི་ནུས་དགོས་པ་སྟོན་པས་བཅས་པ་ཡིན་པས་ལས་དང་པོ་པས་ངོ་བོ་ངོས་འཛིན་ཙམ་ཤེས་ཀྱང་། བསྲུང་སྡོམ་གྱི་བླང་དོར་ཅུང་ཟད་ཤེས་སླ་བར་ཕན་ནམ་སྙམ་པ་ལགས་སོ། །འོན་ཀྱང་རྙིང་མ་བར་ཁས་འཆེ་བ་ཕལ་ཆེར་གྱིས་སྡེ་སྣོད་རིན་པོ་ཆེ་གསུམ་གྱི་བསླབ་བྱ་རྣ་ལམ་དུ་སོན་མ་ཐག་ཏུ་ཞེ་ཁྲེལ་གྱི་རྒྱུ་ལས་མི་འདུག་མོད་ཀྱང་། ཁང་པའི་ཡང་ཐོག་ཏུ་འགྲོ་བ་ལ། ཐེམ་སྐས་སོགས་རིམ་བགྲོད་མ་བྱས་པར་གོམ་པ་གཅིག་གིས་ཕྱིན་པར་མི་ནུས་བཞིན། རྫོགས་ཆེན་ཞེས་པའི་ཆོས་སྒོར་ཞུགས་པ་ཁོ་ནས་གྲུབ་པའི་དབང་ཕྱུག་རྣམས་ཀྱི་བརྟུལ་ཞུགས་ལ་འགྲན་པ་བྱུང་ཚེ་བསྟན་བླ་འཚོང་མཁན་གྱི་རྫུ་བག་ཅན་དུ་ངེས་པས་ངན་པ་ལང་ཤོར་དུ་མི་གཏོང་བ་དང་། བྱང་ཆུབ་སེམས་དཔའི་བསླབ་བྱའི་སྔོན་འགྲོ་ཚད་མེད་བཞི་དང་། དངོས་གཞི་སྨོན་འཇུག་གཉིས་ཀྱི་སྔ་མའི་སྤང་བྱ་ནག་པོ་ཆོས་བཞི་བསྒྲུབ་བྱ་དཀར་པོའི་ཆོས་བཞིའི་བླང་དོར་མི་འཛོལ་བ། བདག་གཞན་མཉམ་པ། བརྗེ་བ་བདག་ལས་གཞན་གཅེས་བཞིའི་དོན་ལ་མི་གཡེལ་པ། རྗེས་མའི་བསླབ་བྱ་ཕར་ཕྱིན་དྲུག་ལས་གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་སྟེ་སྦྱིན་པ་གསུམ། ཉེས་སྤྱོད་སྡོམ་པའི་ཚུལ་ཁྲིམས། དགེ་བ་ཆོས་སྡུད། སེམས་ཅན་དོན་བྱེད་དེ་ཚུལ་ཁྲིམས་གསུམ། དཀའ་བ་དང་ལེན། ཅི་མི་སྙམ་པ། ཟབ་མོའི་དོན་ལ་མི་སྐྲག་པ་སྟེ་བཟོད་པ་གསུམ། སྦྱོར་བའི་བརྩོན་འགྲུས། གོ་ཆའི་བརྩོན་འགྲུས། ཆོག་པར་མི་འཛིན་པའི་བརྩོན་འགྲུས་དེ་གསུམ། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགེའི་བསམ་གཏན་དང་གསུམ། ཐོས་བམས་སྒོམ་གསུམ་གྱི་ཤེས་རབ་རྣམས་དང་། བསྡུ་དངོས་བཞིའི་སྒོ་ནས་འགྲོ་བའི་དོན་ལ་བརྩོན་པ་རྣམས་དངོས་བརྒྱུད་དུ་མ་ནས་བསྒྲུབ་པ་གལ་ཆེ་ཞིང་། དེ་ལས་ལྡོག་པའི་བྱང་སེམས་ཀྱི་བསླབ་བྱ་གཏོང་བ་སོགས་ཁ་ན་མ་ཐོ་བའི་ལས་མི་བྱེད་ཅིང་འཁོར་འདས་ཀྱི་ཆོས་ཐམས་ཅད་རྨི་ལམ་དང་སྒྱུ་མ་ལྟ་བུའི་ལམ་ཁྱེར་ལ་བསླབ་པོ། །གསང་སྔགས་རྡོ་རྗེའི་ཐེག་པ་ནི་སྨིན་བྱེད་དབང་གི་ཐོག་མ་བུམ་དབང་དང་འབྲེལ་བའི་བསྐྱེད་རིམ་གསང་བའི་སྙེ་མ། རྗེ་བླ་མའི་ལུགས་ཀྱི་འོག་མིན་བགྲོད་པའི་ཐེམ་སྐས་ལྟར་ཉམས་སུ་བསྟར་བ་དང་། སྤྲོས་པ་སྐྱུང་ན་ཡི་དམ་གང་ཡིན་གྱི་བྲིས་སྐུར་བག་ཆགས་གོམས་ཐབས་བསླབས་ནས་ཉེར་བསྡུ་ལྷར་ལྡང་དང་བཅས་པར་གོམས་སུ་འཇུག་པ་དགོས་ཤིང་བསྐྱེད་རིམ་གཏན་ནས་མི་བྱེད་ན་རིམ་པ་གཉིས་ཡ་བྲལ་དུ་འགྱུར་བས་གཤོག་པ་ཡ་ཅིག་མེད་པའི་མཁའ་ལྡིང་འཕུར་མི་ནུས་པ་བཞིན་བྱང་ཆུབ་ཀྱི་ས་ལ་ཉེ་བར་མི་ནུས་སོ། །འོན་ཀྱང་གང་ཟག་དབང་རབ་དང་བསྐྱེད་རྫོགས་ལ་སྔར་གོམས་ཡོད་པ་རྣམས་ནི་མ་གཏོགས་སོ། །གསང་དབང་དང་འབྲེལ་བའི་གཏུམ་མོ་ནི་སྤྱིར་གསར་རྙིང་གཉིས་གར་ཡོད་ཅིང་། བྱེ་བྲག་ཟབ་གཏེར་ཚོར་གསལ་བ་ཇི་བཞིན་དང་། ཁྱད་པར་རང་ཉིད་གང་ལ་གོམས་པའམ་གོམས་སུ་འཇུག་རྒྱུའི་ལམ་གང་ཡིན་པ་དེ་ལ་བསླབ་དགོས་ཤིང་། སྤྱིར་གནས་པ་རྩ། གཡོ་བ་རླུང་། བཀོད་པ་བྱང་ཆུབ་སེམས་ཀྱི་གནས་ཚུལ་དང་། དེ་དག་གི་སྦྱང་གཞི་ཆོས་ཉིད་འགྱུར་མེད། སྦྱང་བྱ་གློ་བུར་དྲི་མ། སྦྱོང་བྱེད་སྨིན་གྲོལ་ལམ་རིམ། སྦྱངས་འབྲས་སྐུ་ལྔའི་བདག་ཉིད་རྡོ་རྗེ་འཛིན་པའོ། །དེ་ཡང་གཞི་ལ་ཞུགས་པ། ལམ་དུ་གོམས་པ་འབྲས་བུ་མངོན་དུ་གྱུར་པ་ཆོས་ཉིད་ཡིན་ཕྱིར། ཉམས་ལེན་གང་ཡིན་ཀྱང་སྙིང་རུས་ཆེན་པོས་མཐར་འདོན་པར་མ་བྱས་ན་ཐོས་ལོ་ཤེས་ལོ་ཙམ་གྱིས་བློ་དྲེད་ཀྱི་རྒྱུ་ལས་གང་ཡང་མི་ཡོང་སྟེ། མཉམ་མེད་དྭགས་པོས། ཆོས་ཐོས་པ་འགའ་རྣ་དྲེད་དུ་གཏོང་བས་ཉེན། དོན་བསམ་པ་ཕལ་ཀུན་རྟོག་སྤེལ་བའི་རྒྱུ། སྒོམ་བཟང་པོ་ཡང་ཉམས་མྱོང་ཞེན་པས་འཆིངས། ད་བཅོས་མེད་ཀྱི་ངང་དུ་སྡོད་པར་སྤྲོ། ཞེས་གསུངས་པ་ལྟར། དེང་སྐབས་ཐོས་བསམ་ལ་འཇུག་གྲབས་བྱེད་དུས་སྒོམ་སྒྲུབ་ལ་སྨོན་པ་དང་། སྒོམ་སྒྲུབ་ལ་འབུངས་དུས་ཐོས་བསམ་གཉེར་བ་སོགས། བློ་རྩེ་གཉིས་སུ་བྱས་པས་གཅིག་ཀྱང་མེད་པ་སྐྱོན་དུ་བལྟས་ནས་སྒོམ་སྒྲུབ་ལ་སྙིང་རུས་བསྐྱེད་པ་གལ་ཆེ། འོན་ཀྱང་། མི་ལས། ལུང་རིགས་དང་འབྲེལ་བ་ཞིག་རྒྱན་དུ་ཆེ། ཞེས་དང་། དྭགས་པོས། ཆོས་ལ་ཐོས་བསམ་སྒོམ་གསུམ་སྤུག་མར་བྱེད་པ་ནི་མ་ནོར་བ་ཡིན། ཞེས་གསུངས་པ་ཡང་དྲན་ལོས་དགོས། ལར་གསང་དབང་གི་བཟླས་བརྗོད་དང་གཏུམ་མོ་སོགས་བདག་བྱིན་གྱིས་བརླབ་པའི་ལས་ལ་འཇུག་ཏུ་རུང་བར་བྱ་བའོ། །ཤེར་དབང་དང་འབྲེལ་བའི་རྣལ་འབྱོར་པ་རྩ་འབྱོང་རླུང་ཆུན། ཐིག་ལེའི་དབབ་ལྡོག་ལས་སུ་རུང་བ་དག་གིས་གཞན་ལུས་ཕྱག་རྒྱའི་སྐོར་ཉམས་སུ་ལེན་ཚུལ་གསུངས་མོད་ཀྱང་། ད་ལྟའི་དུས་འདིར་མདོ་མིན་སྔགས་མིན་གྱི་ཤན་ཤོར་བས་མཆོག་དབང་གོང་མ་གསུམ་གྱི་སྔ་མ་གཉིས་ཙམ་པོ་པ་ལས་སྒྲ་ཇི་བཞིན་པར་ཕྱག་ལེན་འདེབས་མཁན་གྱི་བླ་སློབ་སྔ་མ་ཞིག་ནས་དཀོན་པ་དང་། དེར་མ་ཟད་ཁམས་ཕྱོགས་འདིར་འདི་ཚོར་འཕྲལ་ཕུགས་གཉིས་ཀའི་དོན་འབྲས་སྔགས་ལ་རེ་བཞིན་དབང་བསྐུར་བརྒྱ་སྟོང་མང་པོ་ཞུ་ཡིན་འདུག་ཀྱང་བུམ་དབང་གི་དམ་ཚིག་བརྟན་གཡོ་ལྷའི་གསང་བ་གསུམ་གྱི་རོལ་བར་ལམ་ཁྱེར་དགོས་ཚུལ་ཙམ་ཡང་མ་གོ་བར་དབང་ཐོབ་པ་དང་སྔགས་པར་རློམ་པ་ཡ་རེ་ཆ། བརྟག་དཔྱད་ཞིབ་ཏུ་བྱས་ཚེ་སྔགས་ལ་ཡིད་མི་ཆེས་བཞིན་དུ་སྤྱོད་ཅིང་། སོ་ཐར་གྱི་རྩ་བ་བཞིའི་བསྲུང་སྡོམ་ཡང་ཅི་དགར་འདོར་བ་ལས་ཚུལ་བཞིན་སྒྲུབ་པ་ཉུང་ན་དེང་དུས་ཀྱི་ལམ་ཞུགས་པ་རྣམས་མདོ་སྔགས་གང་དུ་ངོས་འཛིན་ཤེས་དཀའ་མོད། འོན་ཀྱང་བླ་མར་མ་འགལ་ཙམ་དང་། བསྐྱེད་རྫོགས་སྒོམ་བཟླས་དགའ་བ་ཙམ་ཡང་དཀའ་བཞིན་ཆེས་དཀོན་དུས་འདིར་སྒྲུབ་པའི་རྒྱལ་མཚན་བཙུགས་པ་ངོ་མཚར་གྱི་ཡུལ་དུ་གྱུར་མོད་ཀྱང་། སྒོ་གསུམ་པོས་དལ་བག་ཡངས་སུ་བསྡད་པ་ཁོ་ནས་རི་ཁྲོད་མི་ཚད་གངས་བྲག་ནགས་ཚལ་ཅི་འདྲ་བརྟེན་ཀྱང་དོན་འབྲས་གང་ཡང་འབྱིན་མི་ནུས་པར་གཞིར་ལ། དེ་ཡང་དབང་གསུམ་པ་ཡན་གྱི་འཕྲོས་སྔོན་དུ་ཅུང་ཟད་བརྗོད་པ་དེའི་འཐུས་ལ་བཞི་པའི་ལམ་ཁྱེར་ནི། ཕྱག་རྫོགས་དབུ་གསུམ་ཞི་གཅོད་སོགས་ཀྱི་རང་གཞུང་ལྟར་སེམས་ངོ་གཏན་ལ་ཕབས་ནས་ཉམས་སུ་བླངས་དགོས་རྒྱུ་ཡིན་ནའང་། དེང་སྐབས་རང་རང་སོ་སོའི་གཞུང་ལྟར་ལྟ་སྒོམ་སྤྱོད་འབྲས་ཀྱི་ངོ་བོ་ངོས་འཛིན་ལུགས་ཙམ་ཡང་ཤན་མ་ཤོར་བ་ཞིག་དཀའ་བར་འདུག་པ་རང་ཉིད་བློ་གྲོས་ཀྱི་རྩལ་ཁ་མ་རྒྱས་པའི་མངོན་རྟོགས་གསལ་བར་བསྟན་པ་ཡིན་ནོ། །སྤྱིར་མདོ་སྔགས་གཉིས་ཀྱི་མདོ་ལུགས་ལ་ཉན་ཐོས་པས་རྣམ་རྟོག་ཕྲ་རགས་རྣམས་འགོག་ཅིང་ཉོན་མོངས་པ་དུག་ལྟར་སྤངས་པ་དང་རང་རྒྱལ་གྱི་རྟེན་འབྲེལ་ལུགས་ལྡོག །ཕར་ཕྱིན་ཐེག་པ་མན་གྱི་སྤྱི་མཐུན་དུ་བདག་མེད་རྣམ་པ་གཉིས་གཏན་ལ་དབབ་པ་སོགས་ཕྲ་ཞིབ་ཡི་གེས་འཇིགས་ཀྱང་སྐབས་འདིར་དགོས་པ་ཡང་ཆུང་མོད། འོན་ཀྱང་མདོ་ལུགས་སུ་ཞི་ལྷག་གི་འཇོག་ཚུལ་དང་སེམས་འཛིན་སོགས་མང་དུ་གསུངས་པའི་སྐྱེལ་སོ་སྤྲོས་བྲལ་སྟོང་རྐྱང་ལ་ཐུག་པ་དང་། ཕྱག་ཆེན་པ་ཇོ་བོ་རྗེ་དང་། མར་མི་ལྷན་རྒྱས་ཀྱི་རྗེས་སུ་འབྲངས་ནས་སེམས་ངོ་སྐྱོང་ཚུལ་ཕལ་ཆེར་མདོ་ལུགས་དང་མཐུན་ཞིང་རྣལ་འབྱོར་བཅུ་གཉིས་གོ་རིམ་དང་ས་བཅུ་ལམ་ལྔའི་ས་བཅད་ཀྱང་སྣང་མོད། དེ་ཡང་ཞིབ་ཏུ་དཔྱད་ན་གནས་འགྱུ་རིག་གསུམ་དུ་བསྡུས་ཏེ་གནས་དགའ་འགྱུ་སྡུག་ལྟ་བུར་རྫོགས་ཆེན་པས་མལ་གཞལ་ཚེ་སྒོམ་གྱི་མུ་གེ་ཟེར་བ་འགྱུ་བ་དགྲར་འཛིན་པ་འདྲ་མོར་འདུག་ཀྱང་། རྗེ་སྙི་སྒོམ་ཆེན་པོ་དང་། མཾ་ག་ལ། ནོར་རྒྱན་པ། བཟང་པོ་རྡོ་རྗེ་དང། ཀརྨ་པ་རང་བྱུང་རྡོ་རྗེ། རོལ་རྡོར། འབྲུག་པ་པད་དཀར་སོགས་རྫོགས་ཆེན་དང་ཤིན་ཏུ་མཐུན་པར་སྣང་ཞིང་རྗེས་འབྲང་འགའ་རེ་དང་ཁྱད་པར་སྨར་ཚང་བཀའ་བརྒྱུད་པ་རྣམས་སེམས་ཀྱི་ངོ་བོ་དང་རང་བཞིན་རྩིས་མེད་དུ་བཏང་ནས་རྩལ་གྱི་རྣམ་རྟོག་ཁོ་ན་ལ་བརྟགས་དཔྱད་བྱེད་པ་དང་། དབུ་མ་རང་རྒྱུད་པས་ཀུན་རྫོབ་ཀྱི་ཆོས་རྣམས་རྨི་ལམ་སྒྱུ་མའི་ཚུལ་དང་། དོན་དམ་མཐའ་དང་བྲལ་བའི་དབུས་སུ་འཇོག་པ། ཐལ་འགྱུར་བས་དབུས་སུ་འཛིན་པ་ཙམ་ཡང་མི་བསྒྲུབ་པ་ཞི་གཅོད་གཉིས་ཧ་ལམ་ཙམ་མཐུན་ཞིང་བཟང་ངན་གྱི་རྣམ་པར་རྟོག་པའི་ཚོགས་ཐད་གར་གཅོད་ཅིང་གཅོད་མཁན་གྱི་རིག་པ་ངར་ཆ་དང་བཅས་ཏེ་མི་ཡེངས་པའོ། །རྫོགས་ཆེན་སེམས་སྡེ་བས་འཁོར་འདས་ཀྱི་ཆོས་རྣམས་སེམས་ལས་གཞན་དུ་མེད་པར་འདོད་པ་སེམས་ཙམ་པ་དང་མཚུངས་ཞེས་ཁ་ཟེར་བ་དག་ཀྱང་ཡོད་མོད། ཀློང་སྡེ་བས་སེམས་ཀྱི་བཏགས་པས་ཆོས་རྣམས་རྣམ་པ་ཀུན་གྱི་མཆོག་ལྡན་ཀུན་ཏུ་བཟང་མོའི་ཀློང་ལས་མ་འདས་པར་འདོད་པ། མན་ངག་སྡེ་བས་ལྟ་སྒོམ་སྤྱོད་གསུམ་གྱི་མཁན་པོ་རང་རིག་ཟངས་ཐལ་དྲན་རྒྱུའི་ཡུལ་དང་དྲན་བྱེད་ཀྱི་མཁན་པོ་གཉིས་སུ་མེད་ཅིང་གཅིག་ཏུ་འཛིན་པ་ཡང་དྲི་མ་ཅན་དུ་ཤེས་དགོས་ཤིང་། དེ་ཡང་ཉམས་ལེན་གྱི་སྐབས་རང་རང་སོ་སོའི་གཞུང་ལྟར་གོ་མྱོང་རྟོགས་གསུམ་གྱིས་གཏན་ལ་ཕེབས་ངེས་དགོས་ཀྱང་། མཐར་ཐུག་གི་སྐྱེལ་པོ་ནི་སོ་སོར་དབེན་ཞིང་ཆུ་རྣམས་རྒྱ་མཚོར་རོ་གཅིག་པ་ཡིན་ནམ་སྙམ། མདོར་དྲིལ་ན་རྫོགས་ཆེན་སྡེ་གསུམ་གོང་མར་བསྡུ་དགོས་ན་དེ་ཉིད་ཉམས་ལེན་གྱི་ཚེ་ཐོག་མར་ལུས་ཤ་ཁྲག་གདོས་བཅས་ཀྱི་ཕུང་པོ། ངག་སྒྲ་ཚིག་བརྗོད་པ་ཅན་འདི་གཉིས་པོ་དང་མཚུངས་པའི་སེམས་ཞེས་པ་གཟུགས་སམ་སྒྲའི་རྣམ་པ་ཅན་ཞིག་གམ། དེ་འདྲ་མེད་པ་གང་ཡིན་བྱ་ཤོར་དུ་མ་སོང་པར་བཙལ་བཅུག་པ་དང་པོའི་ལས་ཅན་ལ་གལ་ཤིན་ཏུ་ཆེ། དེ་ལྟར་བཙལ་ཚེ་སྔར་འདས། མ་འོངས། ད་ལྟ་གསུམ་ལ་རྣམ་པར་རྟོག་པའི་རྒྱུན་འབབ་ཆུ་ལྟ་བུའི་སེམས་ཡིན་པ་ངོ་ཤེས་ཚེ་རྐུན་མ་ངོས་ཟིན་པ་ལྟར་གོ་སླ་བ་ཞིག་འོང་ངོ་། །དེ་ལྟར་ངོས་ཟིན་ཚེ་སེམས་འདི་ཐོག་མ་བྱུང་ས། བར་དུ་གནས་ས། ཐ་མ་འགྲོ་ས་བཙལ་བཅུག་པས་ཚོལ་མཁན་ཁོ་རང་མ་གཏོགས་དེ་གསུམ་གའི་ཁུངས་མ་རྙེད་དུས། དབྱིབས་དང་ཁ་དོག་ལ་ཡང་ཞིབ་མོར་བརྟགས་བཅུག་པས་སྔ་མ་ཇི་བཞིན་རྫུན་ཕུགས་ངེས་པར་རྡིབ་ཚེ། ད་འོ་ན་སྐད་ཅིག་ཙམ་ཡང་མ་ཡེངས་པར་སྒོམས་ཤིག་ཞེས་བསྒོམས་པས་སྒོམ་རྒྱུ་གང་ཡིན་ངོ་མ་འཚལ་ནས་ལ་ལ་མུན་ནེ་ཐོམ་མེ་བའི་ལུང་མ་བསྟན་དང་། ཁ་ཅིག་སྔ་མ་ལྟར་འཕྲོ་རྒོད་ཀྱི་ངང་དུ་འབྱམས་པ། ཕལ་ཆེར་བདེ་གསལ་མི་རྟོག་པའི་ཉམས་མྱོང་རྒྱུད་ལ་སྐྱེ་བ་སོགས་མ་ངེས་པ་འོང་ངོ་། །དེ་དག་ལ་གང་འཚམས་ཀྱི་བསླབ་བྱ་གནང་ནས་མ་ཡེངས་པ་ཁོ་ན་གཙིགས་བྱས་ཏེ་བཟུང་དྲན་གྱིས་རྟོད་ལ་མནན་པ་གལ་ཆེའོ། །དེ་ལྟར་དྲན་པའི་རྒྱུན་ཆད་མིན་བརྟགས་དཔྱད་ཞིབ་མོར་བྱས་ནས་ནན་དུ་བསྐྱངས་པས་ཅི་ཞིག་ན་ཞི་གནས་ཀྱི་ཉམས་ཅི་རིགས་དང་། ལྷག་མཐོང་གི་ཤེས་རབ་གོ་བས་ལྷན་པ་བཏབ་པ་ཙམ་མིན་པ་རྟོགས་ཚེ། རང་བྱུང་གི་ཡེ་ཤེས་ཟེར་ཡང་དཀའ་བར་ཟད་དོ། །ལར་ཁམས་དབུས་གཙང་གསུམ་གྱི་རི་ཁྲོད་པ་ཕལ་ཆེར་ལྟ་སྒོམ་དོར་ནས་སྒྲིགས་གྲ་ཚོའི་ལད་མོ་བྱེད་ཀྱིན་འདུག་པ་དང་། རྡོར་སྨིན་ལྷ་ལུང་དཔལ་རི་སོགས་ཀྱང་རིམ་གཉིས་ཀྱི་ཉམས་ལེན་བཤོལ་ནས་བློ་འཛིན་དང་། གར་ཐིག་དབྱངས་རོལ་ཁོ་ན་ལ་སྙིང་པོ་བྱེད་པ་དགོངས་བཞིན་དང་། ཁམས་འདིར་ཀཿདཔལ་གཉིས་ཉམས་ལེན་ལ་གལ་ཆེན་བྱེད་པ་ལས། ཞེ་རྫོགས་སྟག་དགོན་བཅས་ཀྱང་གསར་དགོན་རྣམས་དང་མཚུངས་ལ་ཁད་ཀྱི་སྤྲོས་བཅས་ཁོ་ནས་དུས་འདའ་བ་ལས་བསྐྱེད་རྫོགས་ཉམས་མྱོང་བྱེད་མཁན་ཉུང་ཞིང་། སྔོན་འགྲོའི་ཁྲིད་རྒྱས་བསྡུས་གང་མཚམས་རེ་གནང་ཡང་ལུང་མཉན་པ་ལྟ་བུ་ལས་ཐོག་མཐའ་བར་གསུམ་ལ་གོ་བ་ཅུང་ཟད་ཀྱང་མ་ཆགས་པ། ཁྱད་པར་སེམས་ཁྲིད་སྐོར་ལ་སྒོ་གསུམ་པ་གཙོ་གང་ཆེ་དྲིས་པར། ཡིད་གཙོ་ཆེ་ཟེར་ཤེས་ན། བྱུང་གནས་འགྲོ་གསུམ། དབྱིབས་ཁ་དོག་བྱ་ཤོར་ཙམ་ཞིག་ངོ་འཕྲོད་རློམ་གྱིས་ཆོག་པར་བཟུང་ནས། རྣམ་ཤེས་ཚོགས་བརྒྱད་དང་། སྣང་བ་སྣང་ཡུལ་ཙམ་ཡང་མི་བྱེད་བཞིན་རང་རང་གི་ངན་རྟོག་དང་ཕྱོགས་སྔ་ཁོ་ནས་འཐེན་འཁྱེར་ལ་བརྟེན་ནས་རྫོགས་ཆེན་པ་ཟེར་བ་ཆོས་ལུགས་གཞན་གྱི་རྗེས་སུ་འབྲང་བ་མང་དུས་འདིར། བསྟན་པའི་སྒྲོན་མེ་རིན་པོ་ཆེ་རྣམས་ཀྱི་ཞབས་པད་ནས་སྤྱིར་ཁྲིད་རིམ་ཀུན་དང་ཁྱད་པར་སེམས་ཁྲིད་འདི་གོང་སྨོས་ཀྱི་སྐྱོན་གསེབ་ཏུ་མི་ལུས་པའི་བཀའ་དྲིན་རྒྱ་གང་ཆེ་དང་། སློབ་བུ་རྣམས་ཀྱིས་ཀྱང་སྒོ་གསུམ་ཐ་མལ་བག་ཡངས་སུ་མི་ཤོར་བར་སྙིང་རུས་དཔྱིས་ཕྱིན་པ་གནང་བའི་གསོལ་བ་འདེབས་སོ། །དེ་ལྟར་རང་གི་བློས་དཔོག་ཚོད་ཀྱིས་འཕྲོས་ཅུང་ཟད་བརྗོད་དོན་རང་དང་སྐལ་མཉམ་འགའ་ལ་དྲན་བསྐུལ་གསལ་འདེབས་ཀྱི་ཚུལ་དུ་བརྗོད་པའོ། །ད་ནི་བཅའ་ཁྲིམས་དངོས་ཀྱི་དོན་ནི། སྤྱིར་ཁྱིམ་ཆུང་སྤངས་པས་ཁྱིམ་ཆེན་དགོན་གནས་ནའང་ཆགས་སྡང་རྨོངས་གསུམ་གྱིས་དུས་འདའ་བའི་སྙིགས་མའི་མར་གཤམ་འདིར་བདག་འདྲས་བཅའ་ཡིག་འབྲི་བ་འཕྱ་སྨོད་ཀྱི་རྒྱུ་ལས་མ་འདས་མོད་ཀྱང་། དེ་དང་ཅུང་ཟད་མི་འདྲ་བའི་འདུ་འཛིའི་དབེན་པའི་རི་ངོགས་གང་དེར་སྔོན་སྨོན་གྱི་འབྲས་བཟང་དུས་སུ་སྨིན་པ་ལྟ་བུའི་སྟོན་པ་རྡོ་རྗེ་སློབ་དཔོན་གཞན་འགྲན་བྲལ་བ་རྩེ་མོའི་གྲངས་ལྡན་གྱི་ཐུགས་བསྐྱེད་རྨད་དུ་བྱུང་བའི་ཕྱག་རྗེས་བྱ་བ་ལས་ཀྱི་འཁོར་ལོའི་ཕུལ་དུ་གྱུར་པ་ཀློག་པ་ཐོས་བསམ་གྱི་འཁོར་ལོའི་རོ་བཅུད་མྱང་བཞིན་སྤོང་པ་བསམ་གཏན་གྱི་འཁོར་ལོའི་རྣམ་པར་གཡེང་བ་རྒྱུན་བཅད་དེ་དྲན་ཤེས་བག་ཡོད་ལ་གནས་དགོས་པ་ནི་གཞིར་བཅས་ལ། དེ་ཡང་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་ལ་བསྔོ་བ་སྟེ་དམ་པ་གསུམ་དང་མི་འབྲལ་བ་ནི་གལ་ཤིན་ཏུ་ཆེ་ཞིང་། གོང་དུ་བཤད་པའི་སོ་ཐར་གྱི་རྩ་བ་བཞི་སོགས་བཅས་རང་རྣམས་དང་། བྱང་སེམས་ཀྱི་དཀར་ནག་ཆོས་བརྒྱད་ཀྱི་བླང་དོར་མི་འཛོལ་བ། ཐེག་ཆེན་ཁས་འཆེ་བཞིན་སེམས་ཅན་ཡོངས་དང་། ཁྱད་པར་མགོན་སྐྱབས་བྲལ་བའི་ངན་སོང་གི་འགྲོ་བ་སྐྱོབ་མཁན་རང་ཅག་རྣམས་ཡིན་དགོས་ན་ཤ་ཁྲག་གི་ལོངས་སྤྱོད་དོན་གཉེར་གྱི་དུད་འགྲོའི་རིགས་གསོད་པ་ལ་ཅི་མི་སྙམ་ན། ཡི་དྭགས་དམྱལ་བ་རྣམས་ལའང་ཕན་ཐོགས་ཆེན་པོ་ཨེ་བྱེད་དོགས། དེས་ན་སྒྲུབ་གྲའི་ཉེ་སྐོར་དུ་བཤས་བཤའ་བ། འཁོན་འཛིང་འཐབ་རྩོད། ཀུ་རེ་ཀྱལ་ཀ་བགད་མོ། ཀུ་ཅོ་སོགས་རང་གཞན་སུས་ཀྱང་མི་ཆོག་པའི་བཀའ་ཁྲིམས་དང་། ནང་དུའང་སྒྲུབ་གྲ་བ་སྤྱིར་ང་རྒྱལ་ཁེངས་སེམས་ཕྲག་དོག་འཁོན་འཛིན་སོགས་མེད་ཅིང་ཁྱད་པར་བླ་མའི་བཀའ་ལས་ཅུང་ཟད་ཀྱང་མི་འདའ་བ་སྔགས་ཀྱི་དམ་ཚིག་གི་གནད་རྣམས་ཀྱང་དེར་འདུས་པ་མཁྱེན་མོད། འོན་ཀྱང་ཤེས་བཞིན་དུ་ཁྱད་གསོད་བྱེད་པ་དང་། མི་ཤེས་སྐྱོན་གྱིས་བླང་དོར་གོ་ལོག་སྤྱོད་པ་གཉིས་ལས་སྔ་མ་སྐྱོན་ཆེ་བ་ཡང་སུན་འབྱིན་པ་གལ་ཆེ། ལར་རང་རང་གི་སྒོ་གསུམ་གྱི་སྐྱོན་གཞན་ལ་གབ་པའི་རིགས་རྣམས་སུན་འབྱིན་རང་ཉིད་ཀྱིས་བྱེད་པ་ལས་བླ་མས་གསུངས་ཀྱང་སྡང་བར་མངོན་ཞིང་ལོག་ལྟའི་རྒྱུ་རུ་འགྲོ་བ་ཡང་སྲིད་པས་རང་ཁྲིམས་རང་ལ་འཛུགས་ཐབས་ཤིག་མ་བྱས་ན། སྒྲུབ་ཁང་དུ་ཕྱིར་མི་མངོན་པར་བཟླས་བརྗོད་ཅུང་ཟད་རེའི་ཁ་ཁྲལ་དང་། རྐང་གླིང་ཌ་དྲིལ་སོགས་ཀྱི་ལག་ཁྲལ་འཇལ་བ་ལྟ་བུའི་ལོ་ཟླའི་གྲངས་བརྩི་བ་རང་མགོ་རང་གིས་བསྐོར་ནས་བསྟན་འགྲོ་ཆབས་ཅིག་ཏུ་བསླུ་བའི་ལག་ལེན་ཡིན་པས་ཀུན་གྱི་ངོས་ལྐོག་སྙོམས་པའི་དམ་ཚིག་ལ་གཅེས་སྤྲས་མཛད་པ་གལ་ཆེ་ཞིང་། དེ་ཡང་རང་རང་སོ་སོ་སྒྲུབ་གྲར་འཚང་དོན་ལ་མོན་བསམ་ཞིབ་ཏུ་ཐོངས་དང་། སྤྱིར་འདུ་འཛི་སྤངས་ཏེ་རྣམ་པར་གཡེངས་བ་རྒྱུན་གཅོད་པའི་དོན་དང་། སྒོས་བསྐྱེད་རྫོགས་ལ་བརྟན་པ་ཐོབ་ངེས་ཀྱི་ཆེད། ཉིང་དགོས་སེམས་རིག་གི་ཁྱད་པར་ཕྱེས་ནས་སེམས་ཉིད་ལས་སུ་རུང་བའི་དོན་ཡིན་ཚེ། བལྟ་བྱ་ལྟ་བྱེད། བསྒོམ་བྱ་སྒོམ་བྱེད་མེད་ངོ་སྙམ་པའི་གོ་བས་རྒྱས་འདེབས་བཞིན་དུས་གསུམ་གྱི་རྟོག་པ་ཆུ་བོའི་རྒྱུན་ལྟར་འཕྲོ་བའི་རྗེས་སུ་འབྲངས་ནས་བསྙེན་བསྒྲུབ་བཟླས་བརྗོད་ལྗགས་མ་རྡུལ་གྱི་བར་བྱས་ཀྱང་འབྲས་བུ་འབྱིན་པ་དཀའ་བས་ན། བརྟན་ཆ་ཐོབ་ངེས་མ་བྱུང་བར་བཟླས་པ་དང་། མཉམ་བཞག་བསྲེ་བ་གཅིག་འགོ་མི་ཐོན་བཞིན་གཉིས་འགོ་མི་སྦྲེལ་བར། ཐུན་གྱི་དངོས་གཞི་གནས་ལུགས་ཁོ་ན་ལ་མཉམ་པར་འཇོག་ཅིང་། ཐུན་བར་རེས་འཇོག་ཚུལ་གྱི་བཟླས་བརྗོད་ཡན་ལག་ལྟར་བྱས་ན་བོགས་སྐྱེད་ཆེ་བ་མྱོང་བས་གྲུབ་པ་ཡིན་མོད། འོན་ཀྱང་རང་སྡེའི་རྫོགས་ཆེན་གྱི་ལུགས་སྲོལ་འདི་ལ་དུས་སྔོན་ཞིག་ནས་གནས་ལུགས་ལ་དམར་ཐག་ཆོད་མིན་སུས་ཀྱང་མཉམ་རྗེས་བསྲེས་ནས་བཟླས་བརྗོད་དང་སྟབས་གཅིག་ཏུ་མི་ཡེངས་པར་རློམ་པ་བྱེད་འདུག་ཀྱང་ལྷ་ས་མ་མཐོང་པར་དཀར་ཆགས་ལ་བྱང་ཆུབ་པ་བཞིན་ནོ། །དེའི་ཕྱིར་ན་དང་པོའི་ལས་ཅན་གྱི་སྐལ་བར་དཀའ་བཞག་སླབ་སྒྲུབ་མི་བྱེད་པར་རང་གིས་རང་ལ་མི་ཁྲེལ་བ་ཞིག་མ་བྱས་ན་རྗེ་བླ་མས། བྲག་ཕུག་ཡུན་རིང་གླ་བས་བཟུང་། བྱ་ནག་རྡོ་རྗེའི་བཟླས་པར་མཁས། གསུངས་པ་བཞིན་དང་། རྗེ་མི་ལ་དང་། སྒམ་པོ་རྣམས་ཀྱིས། ལུས་ཚོང་དུས་ན་ཡོད་ཀྱང་སེམས་རི་ཁྲོད་ན་ཡོད་པ་ཞེས་དྲན་ཤེས་ཀྱི་རྒྱུན་བརྟེན་པ་གལ་ཆེན་དུ་གདམས་པ་དང་། ལུས་རི་ཁྲོད་ན་ཡོད་ཀྱང་སེམས་ཚོང་དུས་སུ་འགྲིམ་པ་ཞེས་སྨྲ་བཅད་འདག་སྦྱར་ཁོ་ན་ལ་བརྩོན་ཚུལ་བྱས་ཀྱང་ཀུན་བྱེད་རྒྱལ་པོ་འཁྲུལ་པ་ནག་འབྱམས་ཀྱི་རྗེས་སུ་ཤོར་ནས་མི་ཡེངས་བའི་གནས་ལུགས་ཀྱི་ངང་དུ་སྡོད་མི་ཐུབ་པ་ལའང་དྲན་པ་གལ་ཆེ་བར་གསུངས་བཞིན་སྒྲུབ་གྲར་གནས་ཕན་ཆད་དྲན་པ་ཁོ་ན་གཙིགས་སུ་བྱེད་པ་གལ་ཆེ་ཡང་། ལས་དང་པོ་པས་སེམས་བརྗེད་མི་ཉན་སྙམ་པ་གཟུང་འཛིན་གྱི་དྲན་པ། དེ་ལས་གོམས་པ་བརྟན་པས་རྩེ་གཅིག་ཆེན་པོ་མན་ཆོད་དུ་བདེ་གསལ་མི་རྟོག་པའི་ཉམས་མྱོང་དང་འབྲལ་མི་ཕོད་པ་ཉམས་ཞེན་གྱི་དྲན་པ། དྲན་པ་ཉིད་དྲན་རྒྱུའི་ངོ་བོར་རྫོགས་ཏེ་གཅིག་ཏུ་འདྲེས་པ་རྟོགས་པའི་དྲན་པ། ད་དུང་ཀྱང་གཅིག་ལ་གཉིས་སུ་བལྟས་དེ་དམིགས་ཡུལ་ལ་གཏོད་པ་རྟོགས་པ་ཉམས་སུ་ཤོར་བ་སོགས་ཕྲ་ཞིབ་རྣམས་བླ་མའི་ཞལ་ལས་ཤེས་དགོས་ཤིང་། དེ་དག་གི་སྐབས་སུ་བྷོ་ཊའི་ལྗོངས་འདིར་ཉམས་རྟོགས་མཐར་ཕྱིན་གྱི་གྲུབ་རྟགས་མངོན་དུ་བྱུངབ་རྣམས་དང་། ཁྱད་པར་མི་ལས་སྒམ་པོ་པར། བུ་ཕྱག་རྒྱ་ཆེན་པོ་སྒོམ་དུས་སུ། ལུས་ངག་གིས་དགེ་སྦྱོར་མ་བརྩོན་ཞིག །མི་རྟོགས་ཀྱི་ཡེ་ཤེས་ཡལ་ཉེན་ཡོད། གསུངས་པ་ལྟར། དམ་པ་རྣམས་མགྲིན་གཅིག་དབྱངས་གཅིག་པ་ལྟར་ལགས་པས། སྒོ་གསུམ་གྱི་གཙོ་བོ་སེམས་ཡིན་པ་ཤེས་ཚེ། དེ་ཉིད་ཐུལ་བར་མཛོད་དང་། བསྐྱེད་རྫོགས་བཟླས་བརྗོད་ཐམས་ཅད་ཀྱི་དོན་འབྲས་དེ་ལ་ཐུག་གདའ་འོ། དེ་ལས་གཞན་དུ་ཀུན་རྫོབ་ཀྱི་ཆོས་ཐམས་ཅད་མཐར་ཐུག་རྒྱུ་དཀའ་མོད་དེ། ཨོ་རྒྱན་ཆེན་པོས་ཚེ་གཅིག་དོན་གྱི་སངས་རྒྱས་བསྒྲུབ་པ་ལ། མདོ་རྒྱུད་མང་པོའི་མཁྱེན་རྒྱ་མི་འཚལ་གྱི། གསུངས་བཞིན། སྙིགས་མའི་དུས་ཀྱི་མི་ཚེ་ཡུན་ཐུང་འདི་ལ་ཤེས་བྱ་ནམ་མཁའི་ཕ་མཐའ་འདོམ་གྱིས་གཞལ་དཀའ་བར་ངེས་ཞིང་དེར་མ་ཟད་ཆགས་སྡང་དང་བསྲེས་པའི་ཐོས་བསམ་ཡང་ངན་འགྲོའི་རྒྱུ་ཡིན་པར་གསུངས་ན་སྒོ་གསུམ་གྲོས་མཐུན་གྱིས་བྱང་ཆུབ་གྱི་སེམས་རིན་པོ་ཆེར་བསླབ་པ་གཞིར་བཞག་ནས་དྲན་ཤེས་བག་ཡོད་ཀྱི་རྒྱུན་སྐྱོང་བ་ལྷོད་མེད་ཞིག་གལ་ཆེ། འདི་ལྟར་ཡང་ཟློས་ཀྱི་མང་དུ་འཆད་དོན་འན་བུའི་ཉམས་ལེན་དང་བསྟུན་པ་ཡིན་ཏེ། ཁོ་བོ་རོག་ཏོམ་རི་གངས་རྣམས་སུ་ཉམས་ལེན་ལ་བརྩོན་པའི་ཐོག་མར་ཞག་བརྒྱ་ཙམ་དུ་དྲན་འཛིན་ཁོ་ནས་སེམས་ཉིད་གཅུད་ལ་དྲིལ་ཚེ་དང་པོ་སྐད་ཅིག་ཙམ་ལ་ཡང་ཡེངས་པ་མང་དུ་འགྲོ་ཞིང་མ་ཡེངས་པ་མི་སྲིད་པ་ལྟར་བྱུང་དུས། རང་གིས་རང་ལ་ཁྲིམས་བཅས་ཏེ། ཡེངས་པའི་དབང་དུ་མི་འགྲོ་བའི་གཅུན་ཐབས་བྱས་པས་རིམ་བཞིན་ལྐོག་འགྱུ་ཇེ་ཉུང་དང་། ཡེངས་ཀྱང་ནག་འབྱམས་མ་ཡིན་པ་རེས་གསལ་རེས་འགྲིབ་མིག་ཁྲོལ་མས་བཀབ་པ་དང་མཚུངས་ཏེ། སྔོན་གྱི་གཏམ་རྒྱུད་དུ། བྲམ་ཟེ་ཞིག་གིས་དགེ་སེམས་སྐྱེས་དུས་རྡེལ་དཀར་དང་། སྡིག་སེམས་ལ་རྡེལ་ནག་བཞག་པ། སྔ་མ་ནག་པོ་ཁོ་ན་དང་། རིམ་གྱིས་དཀར་ནག་ཕྱེད་མ། མཐར་དཀར་པོ་ཁོ་ན་བྱུང་བཞིན་ཇ་ཞལ་ཙམ་བཏུང་ཡུན་ལ་ཡང་དྲན་པ་ནན་དུ་གཅུན་པས་སྦྲུལ་བཅངས་ན་རྐང་ལག་མངོན་ཟེར་བའི་དཔེ་བཞིན་ཅི་ཞིག་ན་ཁམས་འདུས་ལྟ་བུའི་ལུས་ལ་ན་ཚ། སེམས་ལ་སྡུག་བསྔལ་བཟོད་པར་དཀའ་བ་བྱུང་ཞིང་། དེ་ཡང་དུས་གསུམ་དུ་དགྲ་གྱོད་ན་ཤི་གོད་གསུམ་གང་བྱུང་དང་འབྱུང་འགྱུར་གྱི་རྟོག་ཚོགས་སེར་རྒོད་བབས་པ་བཞིན་བྱུང་ཞིང་ཡེངས་ལམ་དུ་ཅུང་ཟད་ཀྱང་མི་འགྲོ་བར་དབང་པོས་མངོན་སུམ་དུ་བལྟར་ཡོད་པ་ལྟ་བུའི་ལྷོངས་སྨྱོ་ལ་ཉེ་བ་བྱུང་སྐབས་ཤིན་ཏུ་འཇིགས་པའི་གཟུགས་སྒྲ་མངོན་དུ་བྱུང་བའི་རྐྱེན་གྱིས། སྐད་ཅིག་ལ་རང་རིག་གི་ངོ་བོ་དྲི་མ་མེད་པ་དང་འཕྲད་ཅིང་གཟུང་འཛིན་སྤང་བླང་རེ་དོགས་ཐམས་ཅད་སྨག་རུམ་སྟུག་པོ་གློ་བུར་དུ་དངས་པའི་དཔེར་སོང་བ་ནི་དྲན་པ་ཁོ་ན་ལ་ཉམས་མྱོང་བྱས་པའི་རྟགས་མཚན་བྱུང་ཚུལ་མ་གབ་པར་བསྟན་པ་ཡང་། ནན་ཏན་བསྒོམ་ལ་བྱས་ན་རྟགས་མཚན་མི་འོང་བ་ཞིག་མ་ཡིན་ཏེ། སྙིང་རུས་བསྐྱེད་ན་ཡུན་ཐུང་ངུས་ཀྱང་རང་ཐག་རང་གིས་ཆོད་ངེས་འོངས་རྒྱུ་འདུག་ཅེས་བསྐུལ་མ་གདབ་པ་ཡིན་མོད། འོན་ཀྱང་ཁྱོད་ཀྱི་ཉམས་རྟོགས་དེ་གང་ཡིན་སུས་ཤེས་སྙམ་ན་སྟོན་པ་མངོན་སུམ་བྱོན་ནས་ཐེ་ཚོམ་བསླངས་ཀྱང་དོགས་པ་སྤུ་ཙམ་ཡང་སྐྱེ་རྒྱུ་མེད་པའི་དཔེ་ནི། བྱིས་པ་ཞིག་ཞག་ཉུང་ཤས་ཕ་མར་ཕྲལ་བ་གློ་བུར་དུ་ལྷན་ཅིག་འཛོམས་པ་བཞིན་སོམ་ཉི་ཡོད་པར་མི་གདའོ། །དེའི་ཕྱིར་ན་ཆགས་སྡང་གིས་བསྐྱེད་པའི་རྟོག་ངན་མུ་སྦྲེལ་གྱི་ངང་ནས་ལུས་ངག་གི་དགེ་སྦྱོར་གཙོ་བོར་བྱེད་པ་རྟ་ལས་བབས་ནས་བོང་བུ་ཞོན་པ་དང་མཚུངས་ཞེས་གོང་མ་དག་གིས་གསུངས་ཤིང་། སེམས་མ་བཅོས་ན་བདེ་ཟེར་བར་གོ་བ་ཇི་བཞིན་བླངས་མ་ཤེས་ནས་སྔར་སོང་གི་རྗེས་བཅད། མ་འོངས་པའི་མདུན་བསུས་ཏེ་དྲན་པའི་སོ་བ་ཉམས་བཞིན་རྟོག་ངན་འཁྲུལ་འབྱམས་དང་ཆབས་ཅིག་བལྟས་ཡོད་དོ་སྙམས་པས་བཟླས་བརྗོད་ལ་ནན་ཏན་བསྐྱེད་ཀྱང་བློ་ངན་ལང་ཤོར་སྒོམ་དྲེད་ཀྱི་རྒྱུ་ལས་མ་འདས་པས་དྲན་པ་ཁོ་རང་སྒོམ་དུ་ཤར་བ་ལ་བློ་བྲལ་ལམ། དྲན་པ་ཡེ་ཤེས་ཀྱི་འཁོར་ལོ་ཟེར་བ་དང་འདུ་འབྲལ་མེད་པ་གནད་ཆེ། དེའི་ཚེ་ཐུན་སྡོམ་ལྷོད་ཀྱི་ཚུལ་ནི། རྗེ་རྒོད་ཚང་བ་དང་། རྐོང་པོ་རྫོགས་ཆེན་པ། སྒམ་པོའི་སྒྲུབ་སྡེ། ཡབ་རྗེ་རྣམས་ཕལ་ཆེར་མཐུན་ཞིང་། རང་རེའི་ལུགས་ཀྱི་ཐུན་སྒང་དུ་མེ་འབུད་ཆུ་ལེན་སོགས་དང་འགྲིམ་འགྲུལ་སྡོམ་པ་ཙམ་ལ་སྙིང་པོ་བྱེད་པ་འདི་ལ་དོན་འབྲས་གང་ཡོད་མ་འཚལ་ཞིང་། བརྡ་སྦྱོར་རྐང་གླིང་བྱེད་པ་ནི་གཅིག་ལས། དེ་ཡང་ཉི་མ་དྲོས་ཆེན་ལ་བབས་དུས་སྔ་ཐུན་བསྡམས་ནས་ཉིན་གུང་ལ་མ་སླེབས་ཙམ་དུ་བཀྲོལ་ཞིང་། བཟའ་བཏུང་ཐ་མལ་དུ་མི་སྤྱོད་པར་ཚོགས་འཁོར་གྱི་ལམ་ཁྱེར་དང་ལྡན་པར་བྱ། དེ་སྐབས་གྲུབ་ཐོབ་གོང་མའི་ནམ་མགུར་སོགས་ལ་ཅུང་ཟད་བལྟས་ནས་སྤྲོ་བ་བསྐྱེད། ཐུགས་དམ་ཆགས་མེད་རིགས་ཁ་ཤས་ཀྱང་བཏང་འཕྲལ་རྐང་གླིང་གི་བརྡ་སྦྱར་ནས་ཐུན་སྡོམ་ཚུལ་སྔ་ཐུན་ལྟར་བྱས་ནས་རིང་ཐུང་འཚམས་པར་ཐུན་གྲོལ་ཞིང་དགུང་ཇ་བཞེས་འཕྲལ་ཕུགས་གཏོར་གསོ་བྲན་བགྱིས་ནས་རྒྱུན་གྱི་གསོལ་ཁ་རྣམས་བཏང་ཞིང་ཐུན་མཚམས་ཀྱི་བྱ་བ་རྣམས་རྗེས་ཐོབ་ཀྱི་དྲན་པས་ཟིན་བཞིན་བྱ། ཤར་རིའི་ཉི་ཟེར་ནུབ་ཚེ་ཐུན་དཔོན་གྱིས་ཐུགས་རྗེ་ཆེན་པོས་སྒོམ་བཟླས་ཉུང་ངུ་ཞིག་བཏང་ནས་མཆོད་བསྔོ་དང་གསོན་གཤིན་གྱི་བསྔོ་བ་མཛད་བཞིན་མཐུན་གྱུར་ཚེ་དུང་ཤར་མ་རེ་འབུད་ཅིང་། སྒྲུབ་པོ་ཀུན་གྱི་བསྔོ་བའི་ཐུགས་གཏད་གནང་བ། མཇུག་ཏུ་ཟབ་མདོ་ཚར་གསུམ་མམ་གཅིག་གི་མཐར་བཟློག་པ་ལན་གསུམ་དང་དུང་བཞེས་རོལ་མཐོང་རྒྱུད་ལྟར་བཏང་རྗེས་ཏིང་ཤགས་ཀྱི་བརྡ་སྦྱོར་བྱས་ནས་དམར་གསུར་བཏང་མཐར་ཞི་གཅོད་དང་། རོ་སྙོམས་སོགས་དོན་གཅིག་པ་ལྟར་ཡོད་པས་བཟང་ངན་གཙང་རྩོག་ལྷ་འདྲེ་སོགས་གཉིས་འཛིན་གྱི་རྟོག་པ་གང་ཤར་དང་། ཁྱད་པར་དགྲ་གྱོད་མི་ཁ་རྒྱལ་པོའི་ཆད་པ་སོགས་ཐོགས་བཅས་དང་། ཉོན་མོངས་དུག་ལྔ་དུག་གསུམ་གཞིར་གནས་པ་བསམ་པའི་ལས་དང་། དེས་བསྐྱེད་པའི་བརྒྱད་ཁྲི་བཞི་སྟོང་སོགས་སེམས་པའི་ལས་ཐོགས་མེད་ཀྱི་བདུད། ཆོས་དང་བླ་མ་རང་གི་ཉམས་མྱོང་བཅས་ལ་བཟང་ངན་གྱི་རེ་དོགས་ཐེ་ཚོམ་དང་ཁེངས་དྲེགས་སྐྱེ་བ་སྙེམས་བྱེད་ཀྱི་བདུད། གནས་དང་ལོངས་སྤྱོད་ལྟ་སྒོམ་སྤྱོད་འབྲས་ལ་དགའ་སྤྲོ་སྐྱེས་ཤིང་ཞེན་པར་གྱུར་པ་དགའ་བྲོད་ཀྱི་བདུད། དེ་ལྟའི་རྟོག་ཚོགས་ལངས་དུས་ནམ་མཁར་སྤྲིན་དཔུང་གློ་བུར་དུ་འཐིབ་ཀྱང་ནམ་མཁའི་ངོ་བོ་སྟོང་པ་དང་སྤྲིན་ཕུང་སོ་སོར་མ་གྱུར་ཞིང་སྣང་ལ་རང་བཞིན་མེད་པ་ལྟར། སེམས་ཀྱི་ངོ་བོ་སྤྲོས་པ་དང་བྲལ་བཞིན་རྟོག་ཚོགས་རྒྱུན་ལྡན་དུ་སྐྱེ་ཡང་ཁྱིམ་སྟོང་དུ་རྐུན་མ་ཞུགས་པའི་དཔེའི་ཐོབ་ཤོར་ཅི་ཡང་མེད་དེ་ངོ་བོ་དང་རྩལ་ལ་བཟང་ངན་གྱི་སྤུ་རིས་མི་བྱེད་ཅིང་ཡེ་ནས་ཡོད་མ་མྱོང་པའི་མཚང་ཕུགས་ནས་རིག་པ་དང་། ཡང་ན་རྣམ་རྟོག་གང་ཤར་ཆུ་དང་རླབས་ལྟར་དབྱེར་མེད་དུ་ཤེས་པའམ། ཡང་ན་བཟང་ངན་གང་ཤར་ཡེངས་དབང་དུ་མ་ཤོར་བའི་ངང་དུ་རིག་པ་ངར་དང་བཅས་ཏེ་གཅེར་གྲོལ་གྱི་དོན་ལ་མཉམ་པར་བཞག་མཐར་རྐང་གླིང་བཏང་ནས་ཐུན་གྲོལ་འཕྲལ་རང་རང་སོ་སོའི་ཕུང་པོ་མཆོད་སྦྱིན་ཊ་དྲིལ་བཅས་གནད་འགྲོ་བྱས་ལ་ཉལ་བའི་རྣལ་འབྱོར་གྱི་ཆེད་དུ་རང་ལུས་འཇའ་ཚོན་ལྟ་བུའི་ཡི་དམ་གྱི་ལྷ་སྐུར་གསལ་ཐེབས་པར་བྱས་པའི་སྙིང་པདྨ་འདབ་བརྒྱད་ཀྱི་དབུས་སུ་བླ་མ་རྡོ་རྗེ་འཆང་དམར་པོ་ཡུམ་དང་བཅས་པ་གསལ་འཚེར་འོད་ཀྱི་རང་བཞིན་ཅན་མུན་ཁང་དུ་མར་མེ་བལྟམས་པ་ལྟ་བུས་ཁོང་པའི་ནང་ཐམས་ཅད་གསལ་ལམ་མེ་བར་སེམས་བཟུང་བ་ལ་བསླབ་ན་རྨི་ལམ་ཟིན་པར་གསུངས་པ་དང་། གཞན་དབུ་མའི་ནང་ནས་སྤྱི་བོའི་བར་ཨ་ཡིག་བརྩེགས་མར་གསལ་བ་ཡས་རིམ་ནས་སྙིང་ཁའི་བར་བསྡུས་ཏེ་མཉམ་པར་འཇོག་རྒྱུ་དང་། སྙིང་ཁར་འོད་ཀྱི་གོང་བུ་ལ་སེམས་འཛིན་པ་སོགས་གསུངས་བཞིན་གང་རུང་ངམ། མདོར་དྲིལ་ན་སེམས་ཉིད་དམར་ཐག་ཆོད་ངེས་ཞིག་རྟོགས་པར་གྱུར་ན་དམིགས་པའི་སྤྲོས་པ་མང་པོ་དང་པོའི་ལས་ཅན་ལ་དགོངས་པ་ཡང་ཤེས་ལོས་དགོས། ཅི་ལྟར་ཡང་ཐོ་རེངས་བྱ་གྲག་གི་སྐབས་ལ་བབ་ཚེ་ཐུན་དཔོན་གྱིས་འགྱུར་སྔགས་དང་ནུས་པ་སྟོབས་འབྱིན་སྔོན་འགྲོ་སོགས་བཏང་རྗེས་རྔ་བརྡུང་ཞིང་ཡི་དམ་ཞི་དྲག་གང་རུང་གི་ལས་བྱང་བསྙེན་པ་མཆོད་བསྟོད་ཉེར་བསྡུ་ལྷར་ལྡང་སོགས་བཏང་ནས་དེ་རྗེས་རྒྱུན་ཁྱེར་ཅི་ཙམ་བཏང་ཡང་རྔ་མི་རྡུང་ཞིང་ཉམས་ལེན་གྱི་ངང་ནས་གསུངས་ཞིང་ལག་རིས་མཐོང་ཚེ་ཐུན་གྲོལ་བ་དང་། མེ་བཏང་ནས་སྐབས་འདིར་བརྒྱ་རྩ་དང་། དཀར་གསུར་གཏོང་བཞིན་ཏིང་ཤགས་བརྡུངས། ཞོགས་ཇ་བཞེས་འཕྲལ་བསང་རྔ་དང་སྟབས་གཅིག་རྒྱུན་བསང་འཚམས་པ་ཞིག་བཏང་ནས་ཉི་མ་དྲོས་ཆེན་ལ་བབས་ཚེ་ཐུག་པའམ། ཇ་བཞེས་ནས་སྔོན་བཞིན་ཐུན་ལ་འཇུག་དགོས་པའོ། །དེ་ཡང་ཐུན་དངོས་གཞི་ལས་ཐུན་མཚམས་སུམ་ཆ་ཙམ་གྱིས་ཐུང་བ། བརྡ་སྤྲོད་ཀྱི་རྐང་གླིང་ཟངས་རག་ཤིང་དུང་ཅི་རིགས་ལས་མི་རྐང་མེད་ཀྱང་ཆོག་རྒྱུ་དང་། འབུད་ཚུགས་རྒོད་ཚང་ལུགས་ཀྱི་བདུན་འབུད་དང་། སྒམ་པོའི་དགུ་འབུད་དོན་ལ་གཅིག་པར་འདུག་མོད། དེ་ཡང་དང་པོ་བརྡ་སྤྲོད་ཀྱི་ཆེད་དུ་འཇམ་ལ་ཐུང་བ་ཞིག་བུས་ལ་ལྷོད་ཙམ་བྱས་ནས། འཇམ་ལ་རིང་བ་གཉིས། ཡང་འཇམ་ལ་སྔ་མ་ལས་མཐོ་ལ་རིང་བ་གཉིས། ཡང་སྔ་མ་ལས་ཀྱང་མཐོ་ལ་འགྱུར་ཁུག་ལྔ་ཙམ་ཡོད་པ་གཅིག །དེ་རྗེས་ཐུང་ལ་རྩལ་ཅུང་ཟད་དྲག་པ་གཅིག། གཤམ་དུ་རྩལ་ཤིན་ཏུ་དྲག་པ་སྔ་མ་ལས་ཐུང་བ་གཅིག་དང་བདུན་འབུད་དོ། །དོན་ནི། སྔ་མ་གཉིས་བླ་མ། བླ་མ་ཞེས་དང་། རྗེས་མ་གསུམ་པོ། མཁྱེན་མཁྱེན་མཁྱེན་ཞེས་རྗེས་འཁྱུག་དང་བཅས། གཤམ་གཉིས་ཧཱུཾ་དང་ཕཊ྄ཿཞེས་སོ། །སྒམ་པོས་ལུགས་ཀྱང་དེ་བཞིན། སྔ་མ་གསུམ་འབུད་པས། བླ་མར་འབོད་ཚུལ། རྗེས་མ་གསུམ། མཁྱེན་མཁྱེན་མཁྱེན་དང་། ཡང་རིང་བོ་འཁྱུག་བཅས་དང་བདུན། ཧཱུཾ་དང་ཕཊཿསྔར་བཞིན་ནོ། །གཅོད་ཐུན་གྱི་འབུད་ཚུགས་ཡབ་རྗེའི་ལུགས་ནི། ཨོཾ་སྙན་ལ་རིང་བ་དཀྱིལ་དུ་ལྡེམ་ཅུང་ཟད་ཡོད་པ། ཧཱུཾ་དེ་ལས་རྩལ་དྲག་པ་འགྱུར་ལྡེམ་རྟའི་མཚེར་སྐད་ལྟ་བུ། ཏྲཾ་དྲག་ལ་གཏུམ་པ་ཅུང་ཟད་ཐུང་བ། ཧྲཱིཿ རིང་ལ་འགྱུར་ལྡེམ་སྙན་ཆ་ཅན། ཨཱཿ དེ་དང་འདྲ་བ་ལ་གཤམ་འདེགས་ཙམ་གྱིས་གཅོད་པའོ། །དེ་ཡང་གཅོད་ཐུན་མ་གཏོགས་ཐུན་གཞན་ཚོ་རྐང་དུང་བཞག་འཕྲལ་ཀུན་གྱིས་རྔ་བརྡུང་ཞིང་དགོངས་འདུས་སྐྱབས་འགྲོ། ཀྱཻ་ དུས་གསུམ་སངས་རྒྱས་ཐམས་ཅད་ཟེར་བ་དང་། ཡན་ལག་བདུན་པ ཨོཾ་ཨཱཿཧཱུཾ། འདས་དང་མ་བྱོན་ད་ལྟ་དུས་གསུམ་གྱིཿ ཟེར་བ་དེ་འདོན་སྲོལ་ཀྱང་འདུག །དཔེ་ཆ་བཙལ་དཀའ་ན་ཇི་སྙེད་སུ་དག་གིས་ལོས་ཆོག །སྔར་བཤད་ལྟར་ཐུན་སྒང་རྣམས་སུ་གནས་ལུགས་སྐྱོང་བ་གལ་ཆེ་ཡང་། དེས་སྤྲོས་པ་མ་ཆོད་ན་མཚན་བཅས་ཡི་དམ་གང་རུང་གི་སྒོམ་བཟླས་དང་། མཚན་མེད་གཏུམ་མོ་དང་ལུགས་རྒྱུད་ལྟ་བ་སོགས་བྱ། དེ་ལ་རྩ་རླུང་དང་པོ་ནས་གོམས་ཆ་མེད་ན་སྤྲོས་པ་ཆེ་ཆུང་གནས་དུས་དང་བསྟུན། གོམས་ཆ་མེད་ཀྱང་དགུང་ལོ་ལྔ་བཅུ་ཙམ་ཡོལ་ནས་ལུས་ཁམས་རྒུད་པར་གསུངས་པས་ན། འཇམ་རླུང་དང་བར་རླུང་སོགས་སློབ་པ་ལས་འཁྲུལ་འཁོར་གསར་སློབ་བཤོལ་ན་ལེགས། དར་བབ་ལང་ཚོ་བདོ་བ་རྣམས་སྟོན་ཟླ་ཐ་ཆུང་ཙམ་ནས་རླུང་དང་དམིགས་རིམ་འཁྲུལ་འཁོར་བྱ་བར་བསླབས་ནས་ཞག་བརྒྱའམ། ལྔ་བཅུ། ཟླ་གཅིག་སོགས་སྐབས་བསྟུན་གྱི་ཉིན་ཐུན་གཉིས་ལ་འཁྲུལ་འཁོར་དང་བཅས། མཚན་ཐུན་གཉིས་ལ་རླུང་དང་དམིགས་པ་ཁོ་ནས་ཆོག་ཅིང་། དྲོ་ཡང་གཅེར་བུ་མི་བྱ་བ་དང་། གྲང་ཡང་སྐྱི་ཅན་དང་བེམ་ཐུལ་མི་གྱོན་པར་གོས་སྲབ་མོར་སློབ་པའི་ལུགས་སྲོལ་ཡོད། མེ་དང་ཉི་མར་ཧ་ཅང་མི་བསྲོ་བ། ཟས་བཅུད་མེད་རིགས་སྤང་ཞིང་། ཁམས་རྒྱས་པའི་ཐབས་ལ་བརྩོན་ཞིང་ཐིག་ལེ་བསྲུང་བ་གལ་ཆེ། གཞན་སྒྲུབ་གནས་སུ་དང་པོ་ནས་ཁྱི་ཆགས་མི་བཅུག་པའི་ལོ་རྒྱུས་ཤིག་ཐོས་མྱོང་ཡང་ཆགས་ཚར་ནས་ཕུད་མི་ཐུབ་པ་དང་། སྡིག་རྐྱེན་དུ་འགྱུར་བར་མནོ་བསམ་བཏང་དགོས་དེས་སྐྱབས་གནས་སུ་རེ་བས་སེམས་ཅན་ལ་གནོད་པ་ལས་ལྡོག་དགོས་རྒྱུ་སོ་ཐར་དང་། དེའི་སྟེང་དུ་ཕན་འདོགས་དགོས་རྒྱུ་བྱང་སེམས། བརྟན་གཡོ་ལྷའི་རྟེན་དང་བརྟེན་པར་ལམ་ཁྱེར་སློབ་རྒྱུའི་སྔགས་གསུམ་ག་དང་དངོས་འགལ་དུ་འགྱུར་ཕྱིར་བསམ་གཏན་ཚེར་མར་འགྱུར་མིན་ལ་དཔྱད། མོ་ཁྲིམས་ཡང་གླིང་གསེབ་དུ་བུད་མེད་ཞག་སྡོད་སྤང་པ་དང་། ཤག་དུ་མི་འཛུད་པ་སོགས་མདོ་སྔགས་གཉིས་ཀར་དངོས་འགལ་མེད་པ་ཞིག་གནང་དགོས་རྒྱུ་ལས་གོང་དུ་ཁྱི་ཁྲིམས་ཀྱི་བླང་དོར་ལྟར་ཚོད་ལས་མ་ཐལ་བ་ཞིག་འཚལ། གཞན་རོལ་མོ་འབུད་དཀྲོལ་ལ་རིང་ཐུང་མི་འཆོར་བ་དོན་ཆུང་བས་བཞག །ཐུན་སྒང་དུ་མེ་འབུད་ཆུ་ལེན་འགྲུལ་འགྲིམ་འཇུག་ལྡོག་རྔ་རོལ་སོགས་ཀྱང་སྡོམ་ཐུབ་ངེས་དང་། དུས་རྒྱུན་ཁང་སྟེང་དུ་གོས་མི་རྡེབ་པ་དང་། འབོད་བརྡ་ཆེན་པོ་མི་གཏོང་བ། ལྟད་མོ་བྱ་ར་སོགས་མིག་སྔར་མི་མཛེས་པ་དག་ཀྱང་སྤང་སྲོལ་ཡོད། ལར་ཡང་སྒྲུབ་པོ་རྣམས་རང་ཁྲིམས་རང་ལ་བཅས་ནས་ངོས་ལྐོག་གང་དུའང་རང་སྐྱོན་སྦེད་ཅིང་གཞན་སྐྱོན་འཕྱར་བའི་གཏམ་ངན་མི་སྤེལ་ཞིང་། ཁྱད་པར་ལས་སྨོན་བཟང་པོས་བསྡུས་པའི་མཆེད་གྲོགས་རྣམས་དག་སྣང་སྦྱངས་རེས་ཀྱིས་སྟོན་པ་རྡོ་རྗེ་རྒྱལ་པོ་གཙུག་ཏུ་ཁུར་ནས་དམ་ཚིག་གི་གནས་རྣམས་སྤང་བླངས་གོ་འཛོལ་དུ་མི་བཏང་བར་མགོ་འོག་ལུས་ཚུད་ཀྱི་ཆེ་ཁ་ཆུང་ཉན། རང་ངོར་ལྟོས་ནས་ངོ་ཚ་གཞན་སྔོན་དུ་ཁྲེལ་ཡོད་ཀྱིས་ལུགས་ཟུང་གང་ཡང་རང་འདོད་གྲ་སྡེབ་ཕྱོགས་འཐེན་ཟུར་འགྲོས་དཀྲུག་སེལ་དབྱེན་སྦྱོར་ཆགས་སྡང་མཐོ་འགྲན་དམའ་བརྙས་སོགས་འགལ་རྐྱེན་དུ་འགྲོ་བའི་རིགས་མི་བྱེད་ཅིང་། བྱ་མིག་གྱེན་ལྟོས་ཕྱ་ར་གྲུ་འདེགས་ཀྱི་དཔེས་གཞན་གྱིས་སྨོན་ཡུལ་དུ་འགྱུར་བ་ཞིག་གལ་ཆེ་ཞིང་། ཚེས་བཅུ་དང་དུས་མཆོད་རྣམས་སུ་སྟོན་འཁོར་གདན་འཛོམ་སྐབས་གསུང་ཆོག་རིགས་གང་བྱུང་དེས་ཆོག་མི་བྱེད་པར་དབྱངས་རོལ་སོགས་ཧ་ཅང་སྤྲོས་པས་གཡེངས་རྐྱེན་དུ་མ་ཐལ་བའི་འཁྱེར་སོ་གསུམ་གྱི་གནད་དང་མ་བྲལ་བཞིན་ཆོ་གའི་དུས་འབོལ་སར་འབོལ་མཉམ་གཙེར་སར་གཙེར་མཉམ་སོགས་ཀྱི་སྒྲིགས་ལམ་ཀུན་སྤྱོད་གང་ཡང་དད་ལྡན་དང་བ་འདྲེན་པའི་མིག་རྟེན་དུ་འགྱུར་ངེས་ཤིག་རེ་བཞིན་བསྒྲུབ་འཚལ། དེ་ལྟར་བླང་དོར་མི་འཛོལ་བའི་ངང་ནས་དགུན་ཟླ་གསུམ་དང་ཞག་པོ་བཅུར་དགུན་ཆོས་ཁྲིད་སོགས་ནན་ཏན་གནང་ནས། དཔྱིད་ཟླ་གསུམ་དབྱར་ར་སོགས་ལ་ཉིན་ཐུན་གཉིས་པོ་བཞག་ཅིང་གཅོད་ཐུན་གྱི་རྐང་གླིང་དང་། ཐོར་ཐུན་གྱི་རྔ་རྡུང་ཆབ་གཏོར་དཀར་དམར་གསུར་བསྔོ། དགོང་མོའི་བསྔོ་དུང་རྒྱས་བསྡུས་ཅི་རིགས་མ་ཆགས་ཙམ་བྱེད་པ་བཅའ་བ་ལྷོད་དུས་ཀྱི་ཕྱག་ལེན་ཡིན་ཞིང་སྟོན་ཀ་ཡང་དེ་དང་མཚུངས་སོ། །ཡང་དབྱར་བཅའ་དབྱར་འབྲིང་གི་ཡར་དཀར་ནས་ཞག་པོ་ལྔ་བཅུ་སྒྲུབ་གྲའི་ལུགས་སྲོལ་ཡིན་ཞིང་། དེའི་སྲིད་དུ་ཐུན་སྡོམ་ལྷོད་སོགས་དགུན་བཅའ་ལྟར་ཡིན་ནོ། །དབེན་རི་ལྷུན་གྲུབ་སྒང་གི་ལྗོན་ཚལ་ལ། །རྟེན་བཅས་མོན་བྱ་ཁུ་བྱུག་སྔོན་མོ་གང་། །ཡུན་རིང་བསྡད་ན་ཁ་ཏ་རོག་མོ་བཞིན། །གཞན་མིག་མི་མཛེས་རྣ་བ་གཙེར་གྱིས་དོགས། །མི་རྒས་རང་ཡུལ་བྱ་རྒས་ནགས་སྙོགས་དཔེའི། །ད་ནི་མི་སྡོད་ཀུན་བཟང་གཞན་ཕན་པ། །ཇ་ཆང་ཤ་ཁྲག་དྭངས་མའི་བཟའ་བཏུང་དང་། །སྤུ་ཤུན་དར་ཕྲུག་ན་བཟའ་ཆམས་བཞག་ནས། །ལྟོ་རྒྱབ་ཕྱིད་ཙམ་ཡོང་ངམ་མ་ཡོང་ཡང་། །དམན་ཟས་བཟའ་བཞིན་ཧྲུལ་པོའི་གོས་གྱོན་ནས། །སྐྱེ་འཆི་མེད་པའི་གནས་ལུགས་སྐྱོང་བཞིན་དུ། །ཕུང་པོའི་འདུ་བྱེད་གཏོང་ལ་རབ་ཏུ་སྤྲོ། །སྡོད་གནས་ཁང་ཁྱིམ་བཀོད་ལེགས་ཕུན་ཚོགས་དང་། །ཁྲི་མཐོ་མལ་སྒྲོམ་གཅན་ལྤགས་གོས་གདན་སོགས། །རྨི་ལམ་སྐབས་ཀྱི་ལོངས་སྤྱོད་ཇི་བཞིན་ལས། །ཆགས་ཤིང་ཞེན་པའི་འདུ་ཤེས་ག་ལ་སྐྱེ། །རྒྱལ་པོའི་མཆོད་གནས་ཕེར་ཡོངས་བསྟོད་བསྔགས་དང་། །ཆེ་དགུས་འདུད་ཅིང་སྙན་གྲགས་དཔལ་འབར་ཡང་། །ཁེངས་དྲེགས་བསྐྱུངས་ནས་དམན་ས་སྙོགས་པ་ལས། །གོ་ས་བརྟན་ཐབས་རིམ་གྲོ་ག་ལ་སྐྱེད། །ཆོས་བརྒྱད་དཔུང་གིས་རྫི་བར་མ་ནུས་ན། །གཡུལ་ལས་རྣམ་པར་རྒྱལ་བའི་ལྷ་དབང་བཞིན། །དགའ་བའི་བ་དན་འཕྱར་དང་ཆབས་ཅིག་ཏུ། །འཇིགས་མེད་རྒྱལ་བའི་རྣམ་ཐར་འཁྱོང་ངམ་སྙམ། །ཚུལ་འདི་གཏམ་གྱི་ཐ་མ་ཟློ་བ་ཡི། །ཁ་ཆེམས་ཇི་བཞིན་བྱུང་རྒྱལ་ཁོ་ན་ལས། །གོ་རིམ་སྙན་འཇེབས་ཅི་ཡང་མ་མཆིས་མོད། །འོན་ཀྱང་རྒན་ཉམས་འཆལ་གཏམ་བྲིས་པ་འདིར། །སེམས་དགེ་བ་ལ་ཉེས་པ་མེད་གསུངས་བཞིན། །ཀུན་སློང་དམན་པའི་སྐྱོན་དང་མ་འགྲོགས་པའི། །ལྷག་བསམ་རབ་དཀར་བསོད་ནམས་སྤྲིན་རུམ་ནས། །ལེགས་ཐོན་གཏམ་གྱི་བདུད་རྩིའི་ཆར་རྒྱུན་འདིས། །སྐལ་བཟང་སྒྲུབ་པོའི་ཀུན་གཞི་རབ་བརླན་འབྲས། །སྐུ་བཞི་ཡེ་ཤེས་ལྔ་ལྡན་རྡོ་རྗེ་འཆང་། །མངོན་གྱུར་འགྲོ་རྣམས་དེ་ཡི་གོ་འཕང་ལ། །འགོད་ནུས་མཁྱེན་བརྩེའི་དཔལ་ཡོན་ཀུན་ལྡན་ཤོག །ཅེས་པ་འདི་ཡང་མཆོག་་སྤྲུལ་བའི་སྐུ་ལྷོ་བ་རིན་པོ་ཆེའི་ཞལ་སྔ་ནས་ཀྱི་བཀའ་ཕེབས་གནང་ལྟར་རྡོ་རྒན་ཀུན་བཟང་གཞན་ཕན་མུ་ཏོའི་བརྡུལ་ཞུགས་ལས་བཅའ་ཁྲིམས་སོགས་ཀྱི་གོམས་ཆ་ཆེར་མེད་ཀྱང་རྒན་ཉམས་ཀྱིས་སྤྱི་བརྟོལ་བསྐྱེད་ནས་བཀའ་བཞིན་ཕུལ་བ་ཀུན་ནས་ཀུན་ཏུ་དགེ་བར་གྱུར་ཅིག། །། རྩ་སྔགས་གང་རུང་གི་མཐར།རྩ་སྔགས་གང་རུང་གི་མཐར། དཔལ་མགོན་བླ་མ་དམ་པ་རྣམས་དང་བསྟན་འགྲོ་ཡོངས་ལ་གནོད་ཅིང་འཚེ་བར་བྱེད་པའི་དགྲ་བགེགས་བྱད་མ་དམ་སྲི་འགབ་འདྲེ་ནད་བདག་རིམས་བདག་དགྲ་ཇག་ཆོམ་རྐུན་སྣ་འདྲེན་བསམ་ངན་སྦྱོར་རྩུབ་ཅན་མཐའ་རྩ་སྐྱེ་རྒྱུད་ཕྱོགས་མཐུན་དང་བཅས་པ་རྣམས་ཀྱི་བླ་ཤ་རི་མ་ཏི་འགྲིམ་འགྲིམ། ཤ་མ་རི་ཏི་ཐིམ་ཐིམ། ཤ་མ་རི་ཏི་ཁུག་ཁུག། ལང་མྱོག་ལང་ཤག་ལང་ཐུམ། ཙ་མུན་ཏྲི་བྷྱོ། ཛཿཧཱུཾ་བཾ་ཧོཿ ཏྲི་མ་ར་ཡ་ཐུམ་རིལ་རྦད་ཡཿ རུ་ལུ་རུ་ལུ། མ་མ་ནི་མུཾ་རྦད་བཛྲ་ཡཀྴ་ཏྲི་ཐུཾ་ཏྲིལ་རྦདཿ གུ་ལིང་བཛྲ་ན་ག་ར་ཙཿ ན་ག་ཕུ་ཏྲིང་ཏྲིལ་གནོད་བྱེད་ཁ་ཐིམ་ཁ་ཐིམཿ མཆུ་ཆིངས་མཆུ་ཆིངས་རྦད་སོདཿ ཅེས་ལན་གསུམ་དང་། འགུག་སྔགས་བསྡུས་པ་སེང་གདོང་ལས་བྱུང་བ་ནི། ཡ་མ་ར་ཛ་ག་ཏེ་ག་ཏེ་ཪྣྲྀ་ཏྲི་ཤ་ཏྲུན་བླ་ཤ་ཐིམ་རིལ་ཛ་ཧཱུཾ་བཾ་ཧོཿ ཞེས་ཅི་ནུས་ཀྱི་མཐར། གཅོད་འདུལ་གྱི་སྐབས་ཡིན་ན་མཆོད་དཔོན་གྱི་སྒྲོ་བ་སླ་ངའི་ནང་དུ་བྱོ་བ་དང་བླ་མས་ཐུན་གྱིས་བྲབ་པ་དང་མཉམ་དུ། རྒྱུད་ལས་གསུངས་པའི། ཨོཾ་བཛྲ་ཀི་ལི་ཀཱི་ལ་ཡ་འདྲེ་གདོན་ཏ་ཐ་ཡ་ཏ་ཐ་ཡ་ཧཱུཾ་ཕཊཿ ཧ་ས་ཡ་ར་ཧ་ཏ་ན་ཧཱུཾ་ཕཊཿ ཤི་ཀྲི་ནི་ཨ་ན་ཡ་ཧཱུཾ་ཕཊ། ཛྭ་ལ་པ་ཡ་ཛྭ་ལ་པ་ཡ་ཧཱུཾ་ཕཊཿ ཨ་ཝེ་ཤ་ཡ་ཨ་ཝེ་ཤ་ཡ་ཧཱུཾ་ཕཊཿ བི་ད་ཡ་བི་ད་ཡ་ཧཱུཾ་ཕཊཿ ཅེས་གསུངས་སོ། ཨོཾ་བཛྲ་མ་ཧཱ་ཀྲཱོ་དྷ་སོགས། ཧཱུཾ་ཧཱུཾ་ཧཱུཾ། ཅི་མང་གསུང་བའི་འོག་ཏུ་གདོན་བགེགས་ཁུག་མ་ཁུག་ལ་བལྟ་ཞེས་གསུངས་སོ།། །། གཉིས་པ་རྟེན་བསྐྱེད་པ།ཨོཾ་སྭ་བྷ་ཝ་སོགས་ནས་ ཧཾཿ སྟོང་པའི་ངང་ལས་སྐུ་རྟེན་རྣམས་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་། དྲིལ་བུ་འཛིན་པ་ཡུམ་སྙེམས་མ་དཀར་མོ་རྡོར་དྲིལ་འཛིན་པ་དང་མཉམ་པར་སྦྱོར་བ་ཞེས་ཀ་བསྐྱེད། ག་མཆོད་རྟེན་དང་། གཙུག་ལག་ཁང་སོགས་སེང་གེས་བཏགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་སྟེང་དུ་ཨོཾ་ལས་འཁོར་ལོ་ཨོཾ་གྱིས་མཚན་པ་ལས་རྣམ་སྣང་དཀར་པོ་འཁོར་ལོ་དང་དྲིལ་བུ་འཛིན་པ་ཡུམ་སྤྱན་མ་དཀར་མོ་འཁོར་ལོ་དང་དྲིལ་བུ་འཛིན་པ་དང་མཉམ་པར་སྦྱོར་བ། དེ་བཞིན་དུ། ཁ། གླེགས་བམ་རྣམས་རྨ་བྱས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་སྟེང་དུ་ཨཱཾཿལས་པདྨ་ཨཱཾཿ གིས་མཚན་པ་ལས་སྣང་བ་མཐའ་ཡས་དམར་པོ་པདྨ་དང་དྲིལ་བུ་འཛིན་པ་ཡུམ་གོས་དཀར་མོ་དམར་མོ་པདྨ་དང་དྲིལ་བུ་འཛིན་པ་དང་མཉམ་པར་སྦྱོར་བ། དེ་བཞིན་དུ། ཕྱག་མཚན་རྣམས་གླང་པོས་བཏགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་སྟེང་དུ་ཧཱུཾ༔ ལས་རྡོ་རྗེ་ཧཱུཾ་གིས་མཚན་པ་ལས་མི་བསྐྱོད་པ་སྔོན་པོ་རྡོ་རྗེ་དང་དྲིལ་བུ་འཛིན་པ་དབྱིངས་ཕྱུག་མ་སྔོན་མོ་རྡོ་རྗེ་དང་དྲིལ་བུ་འཛིན་པ་དང་མཉམ་པར་སྦྱོར་བ། ཞེས་པ་རྣམས་ཀྱི་ཚེ་གང་ཡང་མཐར། ཐམས་ཅད་ཀྱང་ཞི་ཞིང་འཛུམ་ལ་མཚན་དཔེའི་ལང་ཚོ་རབ་ཏུ་རྒྱས་པ་དར་གྱི་ན་བཟའ་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་འོད་དང་འོད་ཟེར་མཐའ་ཡས་སྤྲོ་བའི་བདག་ཉིད་ཅན་དུ་བཞུགས་པའོ། །དེ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུཾ་སྔོན་པོ་རྣམས་ཀྱིས་མཚན་པར། བསམ་མོ། བདག་དང་རྟེན་གྱི་སྙིང་གའི་ཧཱུཾ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་བསམ་གྱིས་མི་ཁྱབ་པའི་ཚོགས་ཐམས་ཅད་བཛྲ་ས་མཱ་ཡ་ཛཿ མ་ལུས་སེམས་ཅན་ཀུན་གྱི་སོགས། བཅོམ་ལྡན་བཞུགས་སུ་གསོལ། པདྨ་ཀ་མ་ལ་ཡེ་སྟྭཾ།། །། ཆད་ཐོ་དགོས་པར་བསྒྱུར་ནས།གཏོར་མ་གནམ་ལྕགས་ཐོག་གི་རྣམ་པ་ཅན། དགྲ་བགེགས་བསྒྲལ་བའི་ལས་ལ་བཞེང་བར་གྱུར། ཧཱུཾ་བྷྱོ་ཛཿ དགོངས་སུ་གསོལ་ལོ་རྩ་བ་གསུམ་གྱི་ལྷ། །གསན་དུ་གསོལ་ལོ་དམ་ཅན་དྲེག་པའི་སྡེ། །དམ་རྫས་རྒྱན་གྱི་གཏོར་མ་འདི་བཞེས་ལ། །དམ་ཉམས་དགྲ་བགེགས་ཐལ་བ་རྡུལ་དུ་རློགས། །མ་དང་མཁའ་འགྲོའི་བཀའ་རྟགས་ཕྱག་གི་རྒྱ། །གྲོལ་བའི་དུས་བབ་ཆོས་ཀྱི་ཕྲིན་ལས་ལ། །ཐོ་འཚམ་བདུད་སྡེའི་སྙིང་ཁར་རྩ་བ་གསུམ། །རབ་ཁྲོས་གཏུམ་དྲག་འབར་བའི་བྲོ་ཆེན་བརྡུང་། །དམ་པ་རྣམས་དང་དམ་པའི་སྤྱོད་ཚུལ་ལ། །ལོག་པར་འཁུ་བའི་མ་རུངས་ཚུལ་འཆོས་མཁན། །འདའ་ངེས་བདག་པོ་དུག་གི་སྐྱེས་བུ་དང་། །ཉམས་པ་བདུན་ལྡན་ཞིང་བཅུའི་དགྲ་བོ་སོགས། །བསྟན་འགྲོ་ཡོངས་ལ་གནོད་པའི་བགེགས་རིགས་ཀུན། །ཕྱོགས་བཞི་མཚམས་བརྒྱད་སྟེང་འོག་གར་གནས་ཀྱང་། །སྐད་ཅིག་རང་དབང་མེད་པར་འདིར་ཁུག་ལ། །མྱུར་དུ་སྒྲོལ་བའི་ཐུགས་དམ་དུས་ལ་བབ། །མི་མིན་མིར་བརྫུ་ལྷ་མིན་ལྷར་བརྫུ་ཞིང་། །དམ་སྲིའི་སྤྲུལ་པ་མཁས་པའི་ཚུལ་བཟུང་ནས། །བློ་དམན་ལོག་པའི་ལམ་ལ་སྒྱུར་བ་ཡི། །གསང་སྔགས་བསྟན་པའི་དགྲ་སྡེ་མྱུར་དུ་ཆོམས། །རྒྱལ་དབང་པདྨའི་བསྟན་པ་བཤིག་མཁན་པོ། །མཐོ་དམན་དྲག་ཞན་གང་གི་ཁྲོད་ནས་ཀྱང་། །ལོ་དང་ཟླ་བ་ཞག་ཏུ་མ་འགྱང་བར། །ད་ལྟ་མྱུར་དུ་སྒྲོལ་བའི་ཕྲིན་ལས་མཛོད། །ནྲྀ་ཏྲི་མ་ར་ཡ་ཧཱུཾ་ཕཊ་བྷྱོ་བཟློག་ཅིག་ཨཱཿ གཏོར་མ་དགྲ་ཕྱོགས་སུ་འཕངས། ཅེས་པ་འདི་རིག་འཛིན་དཔལ་ལྡན་བཀྲ་ཤིས་ཀྱིས་སོ། །སྒྲུབ་མཆོད་སོགས་གཏོར་བཟློག་གང་གི་སྐབས་སུ་ཆད་ཐོའི་མཇུག་ཏུ་གསུང་ན་ལེགས་པར་འགྱུར་རོ།། །།དགེའོ།། དགེའོ།། །། རིམ་དགུའི་ཐེག་པའི་དམ་སྡོམ་ཉམས་ཆག་སྐོང་བཤགས་ཀྱི་ཆོ་ག་རྣམ་གྲོལ་ལམ་བཟང་།རིམ་དགུའི་ཐེག་པའི་དམ་སྡོམ་ཉམས་ཆག་སྐོང་བཤགས་ཀྱི་ཆོ་ག་རྣམ་གྲོལ་ལམ་བཟང་ཞེས་བྱ་བཞུགས་སོ། །ན་མོ་མ་ཧཱ་གུ་རུ་བཛྲ་ས་ཏྭ་ཡེ། རིམ་དགུའི་ཐེག་པའི་དམ་སྡོམ་ཉམས་ཆག་སྐོང་བཤགས་ཀྱི་ཆོ་ག་རྣམ་གྲོལ་ལམ་བཟང་ཞེས་བྱ་བ། བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་ཐུགས་ཀྱི་བརྩེ་བས་ཉེར་དགོངས་ཚེ། དབྱིངས་ཀྱི་ཡུམ་ལྔས་མཆོག་གི་དབང་བསྐུར་ཅིང་། སེམས་དཔའ་རྣམས་ཀྱིས་ཤིས་བརྗོད་དབྱངས་སྙན་སྒྲོགས། ཁྲོ་བོའི་ཚོགས་ཀྱིས་བགེགས་དཔུང་ཡོངས་བཅོམས་ནས། སྐལ་བཟང་འགྲོ་ལ་དངོས་གྲུབ་མཆོག་སྩོལ་བའི་རིགས་བདག་བླ་མ་རྡོ་རྗེ་འཛིན་པ་དེའི། མཁྱེན་བརྩེའི་ཐུགས་ཀྱིས་བདག་ལ་དགོངས་མཛོད་ལ། །སྒྲིབ་ཚོགས་ཀུན་བྲལ་ལེགས་ཚོགས་ཡོངས་འདུ་མཛོད། །རྒྱལ་བ་ཞི་ཁྲོའི་རྟག་ཏུ་བྱིན་རློབས་ཅིང་། །མཁའ་འགྲོ་སྲུང་མས་གཡེལ་མེད་གྲོགས་མཛད་པས། །སྔགས་ཀྱི་སྒོར་ཞུགས་རྣལ་འབྱོར་སྒྲུབ་པ་པོའི། །ཉེས་བྱང་ཡོན་ཏན་གོང་ནས་གོང་འཕེལ་གཞི། །དམ་སྡོམ་ཉམས་ཆག་དག་པར་བྱེད་པ་ཡི། །ཆོ་ག་རྣམ་གྲོལ་ལམ་བཟང་ཆུ་དྭངས་ནོར། །ཐར་འདོད་རིས་བྲལ་དད་པའི་རྫིང་བུ་རུ། །འཇུག་ཚེ་ནོངས་པའི་རྙོག་མ་དབྱིངས་སུ་དེངས། །གང་ཞིག་སྔགས་ཀྱི་དམ་ཚིག་ཉམས་གྱུར་ན། །སོརབྱང་བསླབ་པ་ཉམས་ལས་འབུམ་འགྱུར་གྱིས། །ཆར་ཡང་ཕོད་མིན་སྔོན་བྱོན་མཁས་རྣམས་བཞེད། །དེ་ཕྱིར་སོར་བྱང་སྔགས་ཀྱི་སྡོམ་པ་གསུམ། །བསྲུང་བྱ་མ་ཤེས་བསྲུང་མཚམས་ལས་འདས་སྐྱོན། །རང་མཚང་འཆབ་མེད་གནོང་འགྱོད་དྲག་པོའི་བློས། །སྟོབས་བཞིའི་སྒོ་ནས་ཉམས་ཆག་བཤགས་སྦྱང་དང་། །ཕྱིར་བཅོས་རྟེན་འབྲེལ་ཟབ་མོ་འདིར་བརྩོན་འཚལ། །དེ་ལའང་སྤྱི་དོན་རྣམ་པ་གསུམ་ཡིན་ཏེ། །སྦྱོར་བ་ཤོམ་དང་སྔོན་འགྲོ་རྣམ་གཉིས་ལས། །དང་པོ་གནས་ཁང་བྱི་དོར་རྒྱན་ཆས་སྤུད། །རྟེན་གསུམ་བཀྲམ་ཞིང་རྫས་དང་ཡོ་བྱད་བསྟར། །ཞི་ཁྲོའི་དལ་བཀྲམ་རྩ་གསུམ་ཆོས་སྲུང་གི། །མཆོད་གཏོར་རྒྱན་ལྡན་དཀར་དམར་རྫས་དང་བཅས། །སྨན་གཏོར་རཀྟ་མར་མེ་བཞི་པོ་ཡང་། །སོ་སོར་བརྒྱ་རྩ་རེ་ཡིས་མཐའ་ནས་བསྐོར། །དེ་འོག་མདུན་ནས་རིམ་པས་ཉེར་སྤྱོད་ལྔ། །བརྒྱ་རྩའམ་ནི་མང་ཉུང་རིག་པས་དཔག །ཁྱད་པར་ཚོགས་ཀྱི་མཆོད་པ་གྱ་ནོམ་བཤམས། །དངོས་བཤམས་ཕྲིས་ནས་ཡིད་ཀྱིས་སྤྲུལ་རློམ་པ། །སྙིགས་མའི་བསམ་སྤྱོད་ཚོགས་བསག་བཤོལ་བའི་ལས། །པྲེ་ཏའི་རྒྱུ་འབྲས་བླུན་པོའི་ལག་ལེན་ལ། །འཇུག་པར་ལྡོག་སྟེ་རྣམ་དག་ལས་བསྒྲུབ་འཚལ། །གཉིས་པ་སྔོན་འགྲོའི་སྒྲུབ་མཆོད་སྐབས་རང་གཞུང་གསོལ་འདེབས་འཕྲོར་རོལ་མོ་མེད་འདིར་འཇུག ། ཐོག་མར་གསོལ་འདེབས་ནི།ཨོཾ་ཨཱཿཧཱུྃ། བྱིན་རླབས་བདུད་རྩིའི་སྤྲིན་འཁྲིགས་ཤིང་། །དངོས་གྲུབ་རྒྱ་མཚོའི་ཆར་འབེབས་པའི། །བླ་མ་ཀུན་ལ་གསོལ་བ་འདེབས། །ཅི་བསམ་འགྲུབ་པར་བྱིན་གྱིས་རློབས། །རང་བཞིན་གདོད་མའི་ཕོ་བྲང་དུ། །སྐུ་དང་ཡེ་ཤེས་འདུ་འབྲལ་མེད། །ཀུན་བཟང་ཡབ་ཡུམ་གསོལ་བ་འདེབས། །གཞི་ཐོག་གྲོལ་བར་བྱིན་གྱིས་རློབས། །བདེ་ཆེན་འོག་མིན་ཕོ་བྲང་དུ། །རིགས་ལྔ་བདེ་གཤེགས་རྡོ་རྗེ་འཆང་། །རྡོ་རྗེ་སེམས་དཔར་གསོལ་བ༴ ལྷུན་གྲུབ་རྟོགས་པར་བྱིན་གྱིས་རློབས། །མེ་རི་འབར་བའི་ཕོ་བྲང་དུ། །ཐབས་མཁས་ཐུགས་རྗེའི་སྤྲིན་ཚོགས་ཅན། །དགའ་རབ་རྡོ་རྗེར་གསོལ༴ རིག་འཛིན་ཐོབ་པར༴ རྩུབ་འགྱུར་ཚལ་གྱི་ཕོ་བྲང་དུ། །ཡེ་ཤེས་ལྔ་ལྡན་འགྲོ་བའི་ཡབ། །ཤྲི་རི་སེང་ཧར་གསོལ༴ གནས་ལུགས་རྟོགས་པར༴ སོ་ས་གླིང་གི་ཕོ་བྲང་དུ། །མཆོག་དང་ཐུན་མོང་དངོས་གྲུབ་བརྙེས། །པདྨ་ཐོད་ཕྲེང་གསོལ༴ སྐུ་གསུམ་འགྲུབ་པར༴ ཨོ་རྒྱན་ཡུལ་གྱི་ཕོ་བྲང་དུ། །མཁའ་འགྲོ་དཔག་མེད་འདུ་བའི་གཙོ། །ཡེ་ཤེས་མཚོ་རྒྱལ༴ བདག་རྒྱུད་གྲོལ་པར༴ རང་བྱུང་ཡེ་ཤེས་ཕོ་བྲང་དུ། །སྙིང་པོའི་དོན་རྟོགས་བྱིན་རླབས་ལྡན། །དྲི༷་མེ༷ད་འོད༷་ཟེར༷་གསོལ༴ འཇའ་ལུས་འགྲུབ༴ མཁྱེན༵་རབ་འཆི་མེད་ལམ་ཆེན་དུ། །བྱམ༵ས་བརྩེ༵འི་འོད་དཀར་འཕྲོ་བའི་ཟེར༵། །རང་བྱུང་རྡོ་རྗེར་གསོལ༴ དམ་ཚིག་དག་པར་བྱིན༴ འཇི༷གས་མེ༷ད་བསྟན་པའི་བསིལ་རིའི་རྩེར། ། རིགས་བརྒྱུད་ལྟར་ན་ཆོས་རྗེ་ཀུན་མཁྱེན་པའི་འཕྲོ་ནས། །ཆོས་སྡང་དཔལ་གྱི་ཕོ་བྲང་དུ། །ཐེག་མཆོག་ཆོས་འཁོར་ཀུན་གྱི་བདག །ཆོས་ཀྱི་གྲགས་པར་གསོལ་བ་འདེབས། །གཞན་དོན་འགྲུབ་པར་བྱིན་གྱིས་རློབས། །གྲོགས་རི་ཨོ་རྒྱན་ཡངདབེན་དུ། །བསླབ་གསུམ་ནོར་བུའི་རྒྱལ་མཚན་འཛིན། །ཉི་མ་འོད་ཟེར་གསོལ༴ དགོས་འདོད་འགྲུབ་པར༴ དཀར་པོ་ཆོས་ལུང་དགོན་པ་རུ། །རྡོ་རྗེ་སྙིང་པོའི་དངོས་གྲུབ་བརྙེས། །ཀུན་དགའ་རྒྱལ་མཚན་ལ༴ ཟབ་ལམ་མཐར་ཕྱིན༴ ཀུན་བཟང་གླིང་གི་ཕོ་བྲང་དུ། །ཟབ་དོན་རྒྱ་མཚོའི་བསྟན་པ་འཛིན། །ཆོས་དབྱིངས་གྲགས་པར༴ ཐམས་ཅད་མཁྱེན་པར་བྱིན༴ མཁྱེན་རབ་འཆི་མེད་ལམ་ཆེན་དུ། །སྐུ་གསུམ་སྙིང་པོའི་དོན་རྟོགས་ཤིང་། །མཁྱེན་བརྩེའི་རོལ་པ་དཔག་ཡས་ཀྱིས། །འགྲོ་བའི་ལམ་བཟང་སྟོན་མཛད་པ། །སྤྲུལ་སྐུ་ལེགས་ལྡན་ལ་ཕྱག་འཚལ། །ཐུགས་རྗེའི་མངའ་བདག་ཤཱཀྱའི་སྲས། །བསླབ་གསུམ་རྒྱན་གྱིས་རབ་མཛེས་ཤིང་། །ཐེག་གསུམ་སྙིང་པོའི་དོན་རྟོགས་པ། །ཤན་ཏ་དེ་བ་ལ་ཕྱག་འཚལ། །མདོ་རྒྱུད་ཤེས་བྱའི་གནས་ལ་མཁས། །བསླབ་གསུམ་རིན་ཆེན་རྒྱན་གྱིས་མཛེས། །ཨ་ཏིའི་གསང་མཛོད་འཛིན་པའི་ཕ། །ཆོས་ཀྱི་གྲགས་པ་ལ༴ གྲུབ་ཐོབ་རྗེ་ཡི་བརྒྱུད་པ་འཁྲུངས། །སྣ་ཚོགས་ཐབས་ཀྱིས་འགྲོ་བ་འདུལ། །གནས་ལྔ་རིག་པའི་པཎྜི་ཏ། །ཉི་མ་འོད་ཟེར་ལ༴ བྱང་ཆུབ་སེམས་ཀྱི་དཀྱིལ་འཁོར་དུ། །བསྐྱེད་རྫོགས་གཉིས་ལ་བརྟན་པ་ཐོབ། །སྐུ་ལྔ་ཡོངས་རྫོགས་འགྲོ་བའི་མགོན། །བྱང་སེམས་ཆེན་པོ་ལ་ཕྱག་འཚལ། །ཕྲི༷ན་ལས༷་རྩལ་རྫོགས་གདོང་ལྔ་པ། །འོད་ཟེར་དཔལ་འབར་གསོལ༴ གཞན་དོན་འགྲུབ་པར༴ སྤངས་རྟོགས་ཡེ༷་ཤེས༷་ཉི་མ་ཡིས། །གདུལ་བྱའི་པད་ཚལ་རྒྱས་མཛད་པ། །བདེ་བའི་རྡོ༷་རྗེར༷་གསོལ༴ འགྲོ་དོན་འབྱུང་པར༴ སྤྱི་གཙུག་ཉི་ཟླའི་གདན་སྟེང་དུ། །སྨིན་གྲོལ་མཆོག་གི་དངོས་གྲུབ་བརྙེས། །རྩ་བའི་བླ་མར་གསོལ༴ སྐུ་ལྔ་ལྷུན་གྲུབ་བྱིན༴ ཁྲ་མོ་བྲག་གི་ཕོ་བྲང་དུ། །ཚེ་གཅིག་སངས་རྒྱས་འགྲུབ་པའི་མཆོག །མཁའ་འགྲོ་སྙིང་ཐིག་ལ་གསོལ༴ ལྷག་མེད་འགྲུབ་པར༴ ལས་ཅན་འདུལ་བའི་ཕོ་བྲང་དུ། །མཐུ་སྟོབས་རྫུ་འཕྲུལ་ཐོགས་པ་མེད། །གཏེར་སྲུང་རྣམས་ལ༴ བར་ཆད་ཞི་བར་བྱིན༴ གར་བཞུགས་ཆོས་ཀྱི་ཕོ་བྲང་དུ། །བསླབ་གསུམ་སྒྲུབ་པའི་རྒྱལ་མཚན་འཛིན། །ཆོས་མཛད་ཡོངས་ལ་གསོལ༴ བསྟན་པ་གནས་པར༴ རང་ལུས་ལྷ་ཡི་ཕོ་བྲང་དུ། །སྟོང་གསལ་ཡེ་ནས་ལྷུན་གྱིས་གྲུབ། །ཞི་ཁྲོ་རབ་འབྱམས་ལ་གསོལ༴ འོད་གསལ་འབྱོང་བར༴ གྲགས་སྟོང་གསུང་གི་ཕོ་བྲང་དུ། །རྩ་གནས་ཡི་གེའི་འཁོར་ལོ་ཉིད། །རང་བྱུང་ཡེ་ཤེས་གསོལ༴ ཚངས་དབྱངས་ཐོབ་པར༴ སེམས་ཉིད་དོན་གྱི་ཕོ་བྲང་དུ། །ཐམས་ཅད་མ་སྐྱེས་མཉམ་པ་ཉིད། །རིག་སྟོང་ཆོས་སྐུར་གསོལ༴ རང་ཤར་རང་གྲོལ་བྱིན༴ སྣང་སྲིད་སྣོད་བཅུད་ཕོ་བྲང་དུ། །ཐམས་ཅད་ཡེ་ནས་སངས་རྒྱས་ཤིང་། །སྲིད་གསུམ་ཡོངས་ལ་གསོལ༴ མཉམ་ཉིད་རྟོགས་པར་བྱིན༴ མཐའ་གྲོལ་ཀློང་ཡངས་ཕོ་བྲང་དུ། མཐའ་བྲལ་གཉིས་མེད་ནམ་མཁའི་དོན། །ལྟ་བ་མཆོག་ལ་གསོལ༴ ཕྱོགས་ལྷུང་མེད་པར་བྱིན༴ འོད་གསལ་དོན་གྱི་ཕོ་བྲང་ནས། །གསལ་སྟོང་གཉིས་མེད་གཉུག་མའི་དོན། །སྒོམ་པ་མཆོག་ལ་གསོལ༴ གསལ་འགྲིབ་མེད་པར༴ བླང་དོར་མེད་པའི་ཕོ་བྲང་ནས། །ཐམས་ཅད་ཡེ་ཤེས་སྒྱུ་མའི་ངང་། །སྤྱོད་པ་མཆོག་ལ་གསོལ༴ གཉིས་འཛིན་ཞིག་པར༴ རེ་དོགས་མེད་པའི་ཕོ་བྲང་དུ། །རང་རིག་འོད་གསལ་འཕོ་འགྱུར་མེད། །འབྲས་བུ་མཆོག་ལ༴ ཟད་སར་འཁྱོལ་བར་བྱིན༴ དུས་གསུམ་བདེ་གཤེགས་ཐམས་ཅད་དང་། །མཆོད་འོས་རྣམས་ལ་དུས་ཀུན་དུ། །སྙིང་ནས་གུས་པས་གསོལ༴ ཕྲིན་ལས་འགྲུབ་པར༴ བྱམས་དང་སྙིང་རྗེ་འབྱོང་བ་དང་། །ངེས་འབྱུང་སྐྱོ་ཤེས་སྐྱེ་བ་དང་། །ཉིན་མཚན་ཆོས་ཀྱིས་འདའ་བ་དང་། །བློ་སྣ་ཐུང་བར་བྱིན༴ སྣང་སྲིད་བླ་མར་རྟོགས་པ་དང་། །བྱིན་རླབས་རྒྱུན་ཆད་མེད་པ་དང་། །དག་སྣང་ཕྱོགས་མེད་འཆར་བ་དང་། །མོས་གུས་སྐྱེ་བར་བྱིན༴ རྟག་ཏུ་དབེན་པར་གནས་པ་དང་། །རྣམ་གཡེང་འདུ་འཛི་མེད་པ་དང་། །དངོས་འཛིན་འཁྲུལ་བ་ཞིག་པ་དང་། །ལམ་སྣ་ཟིན་པར་བྱིན༴ ཚེ་འདི་ཆོས་ཀྱིས་འདའ་བ་དང་། །རྟག་ཏུ་བླ་མ་མཉེས་པ་དང་། །སྒྲུབ་པ་མཐའ་རུ་ཕྱིན་པ་དང་། །གཞན་དོན་འགྲུབ་པར་བྱིན༴ ལས་དང་ཉོན་མོངས་ཟད་པ་དང་། །བྱང་ཆུབ་ལམ་ལ་བརྩོན་པ་དང་། །ས་དང་ལམ་རྣམས་རྫོགས་པ་དང་། །སངས་རྒྱས་འགྲུབ་པར་བྱིན༴ ཚེ་འདིར་འོད་ལུས་འགྲུབ་པ་དང་། །བར་དོ་རང་ངོ་ཤེས་པ་དང་། །རང་བཞིན་སྤྲུལ་པར་སྐྱེ་བ་དང་། །དོན་གཉིས་འགྲུབ་པར་བྱིན་གྱིས་རློབས། །གསོལ་འདེབས་བདུད་རྩིའི་ཆར་རྒྱུན་གྱི། །དགེ་བས་སྲིད་པའི་སེམས་ཅན་རྣམས། །འཁོར་བའི་རྒྱ་མཚོ་རབ་བརྒལ་ཏེ། །ཕྱམ་གཅིག་སངས་རྒྱས་འགྲུབ་པར་ཤོག །རོལ་མོ་༼ཛ༽སྐབས་འདིར་སྡེ་བརྒྱད་གསེར་སྐྱེམས་གཏོང་བར་བྱ། །སྤྱི་དོན་གཉིས་པ་དངོས་གཞིའི་ཆོ་ག་ཡང་། །རྣམ་གྲངས་གཉིས་ཀྱི་དང་པོ་བདག་མདུན་དལ། །གཙོ་ལས་བུམ་སོགས་སྐྱབས་རྗེ་བླ་མ་ཡིས། །ལྗགས་བསྒྲིགས་གནང་བའི་དོང་སྤྲུག་གཞུང་བཞིན་ནམ། །ཡང་ན་ཀར་གླིང་ཞི་ཁྲོའི་ལས་བྱང་སོགས། །གང་རུང་ཛབ་བཟླས་བསྟོད་དང་བཀའ་སྲུང་བཅས། །གྲུབ་རྗེས་གཉིས་པ་སྐོང་བཤགས་དངོས་ལ་ཡང་། །ནང་གསེས་རྣམ་གྲངས་དགུ་རུ་དབྱེ་བ་ལས། །དང་པོ་ལྟུང་བཤགས་ཚར་གྲངས་གང་ནུས་རྗེས། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པ་རྣམས་དང་། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་བདག་ལ་དགོངས་སུ་གསོལ། བདག་ཆྒཻ་མོ་ཐོག་མར་འཁྲུལ་པ་ནས་བཟུངསྟེ། དུས་དེ་རིང་ལ་ཐུག་གི་བར་དུ་མ་རིག་པའི་གཞན་དབང་དུ་སོང་སྟེ། ཀུན་འབྱུང་གི་ཉེ་བར་ལེན་པའི་ཉོན་མོངས་པ་འདོད་ཆགསདང་། ཞེ་སྡང་དང་། གཏི་མུག་མངོན་པར་འདུ་བགྱིས་ཏེ། ལུས་ཀྱི་སྒོ་ནས་སྲོག་བཅད་པ་དང་། གསོད་སེམས་སྐྱེ་དང་བ། མ་བྱིན་པ་བླང་བ་དང་། འདོད་པའི་ལོག་པར་གཡེམ་པའི་རིགས། ངག་གི་སྒོ་ནས་རྫུན། ཕྲ་མ། ཚིག་རྩུབ་ངག་འཁྱལ། ཡིད་ཀྱི་སྒོ་ནས་བརྣབ་སེམས། གནོད་སེམས་ལོག་ལྟ་སྟེ་མི་དགེ་བ་བཅུ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་ལ་སོགས་ཏེ། མཚམས་མེད་པ་ལྔ། དེ་དང་ཉེ་བ་ལྔ་ལ་སོགས་ཏེ་མི་དགེ་བའི་ཕྱི་མོ་རྣམས་ཀྱི་སྟེང་། བཅས་པའི་ཁྲིམས་དགེ་བསྙེན་དང་། དགེ་ཚུལ་དང་། དགེ་སློང་སྟེ་སོ་སོར་ཐར་བའི་སྡོམ་པ་རིགས་བདུན་ལ་ཕམ་ལྟུང་དང་ཉེས་བྱས་བྱུང་བ་དང་། བྱང་ཆུབ་སེམས་དཔའི་སྨོན་འཇུག་གི་བསླབ་བྱ་སྤྱི་དང་། རྩ་ལྟུང་དང་སྦོམ་པོའི་རྣམ་གྲངས་ཐ་དད་པ་དང་འགལ་བ་དང་། ཁྱད་པར་དུ་རིག་པ་འཛིན་པའི་ཚུལ་ཁྲིམས་ཀྱི་བསླབ་པའི་གཞི་ལས། རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ། བླ་མ་སྨོད་པ་ལ་སོགས་པ་རྩ་བའི་ལྟུང་བ་བཅུ་བཞི་དང་། ཡན་ལག་སྦོམ་པོའི་རྣམ་གྲངས་བརྒྱད་ལས་ཕས་ཕམ་པ་དང་། ཁ་ན་མ་ཐོ་བའི་མཐུས་བཅོམ་སྟེ་གསང་སྔགས་ཀྱི་དམ་ཚིག་སྤྱི་དང་བྱེ་བྲག་པ་ཕྲ་ཞིབ་བསྲུང་དཀའ་བ་ལས་འདས་པ་ཐམས་ཅད་དང་། རང་བཞིན་དུ་ཉོན་མོངས་པའི་གཞན་དབང་གིས་སེམས་ཟིལ་གྱིས་ནོན་ནས་དཀོན་མཆོག་གསུམ་དང་། བླ་མ་ལ་བརྙས་པ་དང་། དམ་པའི་ཆོས་སྤངས་པ་དང་། མཁན་པོ་ལ་མ་གུས་པ་དང་། བྱང་ཆུབ་སེམས་དཔའ་ལ་སྐུར་བ་བཏབ་པ་དང་། ཕ་མའི་དྲིན་ལན་མ་གཞལ་བ་དང་། དཀོན་མཆོག་གི་དཀོར་འཕྲོག་པ་དང་། ཚངས་པར་མཚུངས་སྤྱོད་སུན་ཕྱུང་བ་དང་། བསམ་གཏན་སྒོམ་པའི་ཐུགས་དཀྲུགས་པ་དང་། དགེ་བ་ཅན་གྱི་ཚོགས་བཅག་པ་དང་། དད་པ་ཅན་སུན་ཕྱུངབ་དང་། རྒྱུ་འབྲས་ལ་སྐུར་བ་བཏབ་པ་དང་། སེམས་ཅན་ལ་གནོད་པའི་ལས་བྱས་པ་དང་། ཁྲེལ་དང་ངོ་ཚ་སྤངས་པ་ལ་སོགས་ཏེ་མདོར་ན་སྡིག་པ་མི་དགེ་བའི་ལས་རང་གིས་བགྱིས་པ་དང་། གཞན་ལ་བྱེད་དུ་བཅུག་པ་དང་། བྱས་པ་ལ་རྗེས་སུ་ཡི་རང་བ་ལ་སོགས་པ་དེ་དག་ཀྱང་རྟག་པའི་སེམས་དང་། མངོན་པར་ཞེན་པ་དང་། གཉེན་པོའི་སྟོབས་ཞན་པ་དང་། ཡུལ་ཁྱད་པར་ཅན་དང་གཞི་ལས་བྱུང་བ་ལ་སོགས་པས་ཁ་ན་མ་ཐོ་བ་ཆེན་པོར་གྱུར་པའི་མཚོན། མདོར་ན་མངོན་པར་མཐོ་བ་དང་། ངེས་པར་ལེགས་པའི་གོ་འཕང་ཐོབ་པ་ལ་བར་དུ་གཅོད་ཅིང་། འཁོར་བ་དང་ངན་སོང་གི་རྒྱུར་གྱུར་པ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཀུན་ཏུ་ཐོགས་མེད་ཀྱིས་གཟིགས་པ་ལྡན་པ་རྣམས་ཀྱི་སྤྱན་སྔར་ཤིན་ཏུ་གནོང་ཞིང་འགྱོད་པས་མཐོལ་ལོ་བཤགས་སོ། །སྔོན་ཆད་ནི་བཀའ་ལས་འདས་སོ། །ད་ནི་ཉེས་པ་ལ་ཉེས་པར་མཐོང་ལགས་པས་མི་འཆབ་པོ། །མི་སྦེད་དོ། མངོན་གྱུར་དུ་སྒྲོགས་པས་མི་སྦེད་དོ། །ཕྱིན་ཆད་སྲོག་ལ་བབ་ཀྱང་སྡོམ་ལགས་སོ། །མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་སྡིག་ལྡན་བདག་ལ་དགོངས་ཤིག །དེང་བདག་གིས་འགྱོད་ཚངས་དང་དུ་མ་བཞེས་ན། སྐྱབས་མེད་དོ། །མགོན་མེད་དོ། །དཔུང་གཉེན་དང་བྲལ་ལོ། །དེ་བས་ན་སེམས་ཅན་གྱི་རང་བཞིན་ལས་དང་ཉོན་མོངས་པའི་གཞན་དབང་ཅན་ལགས་པས། དེ་ལ་དགོངས་ཏེ་ཚངས་པར་སྩལ་དུ་གསོལ། །གཉིས་པ་ཐེག་དགུའི་བཤགས་པ་འདི་བཞིན་བྱ། ལྷུག། ཨོཾ་དང་པོར་བདག་དང་ཁམས་གསུམ་སེམས་ཅན་རྣམས། །ཡུལ་ལ་ཆགས་པ་སྐྱེ་བར་མི་བགྱིད་དེ། །ཕ་དང་མ་ལ་བརྟེན་ནས་གཟུགས་སུ་སྣང་། །རང་དབང་མེད་པར་འཇིག་རྟེན་གནས་འདི་མཐོང་། །མ་རིག་ཆུང་ཞིང་གཞོན་པའི་དུས་མཚམས་ན། །གཏི་མུག་དབང་གིས་དགེ་སྡིག་དོན་མ་རྟོགས། །འདོད་ཆགས་དབང་གིས་ཕ་རོལ་འཁོར་བར་འཁྱམས། །ཞེ་སྡང་དབང་གིས་སྡིག་པའི་ལས་རྣམས་བགྱིས། །ངན་སོང་གསུམ་དུ་འགྲོ་བའི་རྒྱུ་བསགས་ཏེ། །མནོ་བསམ་ཤེས་ནས་ཆོས་ལ་སྐྱབས་སུ་མཆི། །དང་བས་ཉ་སྟོང་དུས་དྲུག་སྒོར་ཞུགས་ཏེ། །ཉ་སྟོང་ཚེ་བརྒྱད་འདུལ་ཁྲིམས་མནོས་པ་ལས། །དེ་ལ་ཉམས་པའི་སྐྱོན་སེམས་མ་མཆིས་ཏེ། །ཉ་སྟོང་ཚུལ་བཞིན་སྲུང་བའི་དགེ་བསྙེན་ལ། །ཉམས་པ་བཀའ་ཡི་ཆད་པ་བྱུང་ན་བཤགས། །དེ་ནས་ཡར་ལ་བློ་སེམས་ཆེར་སྐྱེས་ནས། །སྦྱངས་པའི་ཡོན་ཏན་བཅུ་གཉིས་སྒོར་ཞུགས་ནས། །ཉན་ཐོས་སྡོམ་པ་ཚུལ་བཞིན་མནོས་པ་ལས། །རྩ་བ་བཞི་དང་ཡན་ལག་དྲུག་ལ་སོགས། །ཉེས་བརྒྱ་ལྔ་བཅུའི་ཁྲིམས་ལ་སྐྱོན་མ་མཆིས། །ཉན་ཐོས་འདུལ་ཁྲིམས་བསྲུང་པའི་དགེ་སློང་ལ། །ཉམས་པ་བཀའ་ཡི་ཆད་པ་བྱུང་ན་བཤགས། །དེ་ནས་ཡར་ལ་བློ་སེམས་ཆེར་སྐྱེས་ནས། །རྟེན་འབྲེལ་བཅུ་གཉིས་སྒྲུབ་པའི་སྒོར་ཞུགས་ཏེ། །རང་རྒྱལ་སྡོམ་པ་ཚུལ་བཞིན་མནོས་པ་ལ། །འཁོར་བ་རང་བཞིན་མེད་པར་མངོན་རྟོགས་ཤིང་། །སྣང་སྲིད་སྒྱུ་མ་ལྟ་བུར་ཤེས་པས་ན། །དེ་ལ་ཉམས་པར་བྱ་བའི་སྐྱོན་མ་མཆིས། །རང་རྒྱལ་སྡོམ་པ་བསྲུང་བའི་དགེ་སློང་ལ། །ཉམས་པ་བཀའ་ཡི་ཆད་པ་བྱུང་ན་བཤགས། །དེ་ནས་ཡར་ལ་བློ་སེམས་ཆེར་སྐྱེས་ནས། །ཐེག་ཆེན་བྱང་ཆུབ་སེམས་ཀྱི་སྒོར་ཞུགས་ཏེ། །བྱང་ཆུབ་སེམས་དཔའི་སྡོམ་པ་མནོས་པ་ལས། །སྨོན་འཇུག་ཀུན་རྫོབ་དོན་དམ་བྱང་ཆུབ་སེམས། །སྡོམ་པ་ཉི་ཤུའི་ཚུལ་ཁྲིམས་སྐྱོན་མ་མཆིས། །དེ་ལ་ཉམས་པའི་སྐྱོན་ལྟ་མ་མཆིས་པའི། །སྡོམ་བརྩོན་ཚུལ་བཞིན་བསྲུང་བའི་དགེ་སློང་ལ། །ཉམས་པ་བཀའ་ཡི་ཆད་པ་བྱུང་ན་བཤགས། །དེ་ནས་ཡར་ལ་བློ་སེམས་ཆེར་སྐྱེས་ནས། །དག་པ་རྣམ་པ་གསུམ་གྱི་སྒོར་ཞུགས་ཏེ། །ཀྲྀ་ཡའི་དམ་ཚིག་ཚུལ་བཞིན་མནོས་པ་ལས། །དཀོན་མཆོག་གསུམ་དང་རྡོ་རྗེ་སློབ་དཔོན་དང་། །རྡོ་རྗེ་སྤུན་དང་རྡོ་རྗེ་མིང་སྲིང་དང་། །དེ་བཞིན་རང་གི་སྔགས་དང་ཕྱག་རྒྱ་རྣམས། །དེ་ལས་ཉམས་པའི་སྐྱོན་ལྟ་མ་མཆིས་པའི། །ཀྲྀ་ཡའི་དམ་ཚིགས་སྲུང་བའི་རྣལ་འབྱོར་ལ། །ཉམས་པ་བཀའ་ཡི་ཆད་པ་བྱུང་༴ དེ་ནས་ཡར་ལ་བློ་སེམས་ཆེར་སྐྱེས་ནས། །ཨུ་པ་ཡ་ཡི་དམ་ཚིག་སྒོར་ཞུགས་ནས། །ཕྱག་རྒྱ་ལྔ་དང་མན་ངག་སྒྲུབ་པ་ཡི། །ལྟ་སྤྱོད་ཀྲི་ཡོག་ཚུལ་བཞིན་རྣལ་འབྱོར་ལ། །ཉམས་པ་བཀའ་ཡི་ཆད་པ༴ དེ་ནས་ཡར་ལ་བློ༴ ལྟ་སྤྱོད་རྣམ་པ་གཉིས་ཀྱི་སྒོར་ཞུགས་ནས། །ཡོ་གའི་དམ་ཚིག་ཚུལ་བཞིན་མནོས་པ་ལས། །དཀོན་མཆོག་གསུམ་དང་དེ་འཁོར་བྱང་ཆུབ་སེམས། །རྡོ་རྗེའི་བླ་མ་མཆེད་དང་ལྕམ་དྲལ་དང་། །དབང་ཐོབ་རྣལ་འབྱོར་གཞན་ལ་མི་སྨོད་ཅིང་། །རང་རྟགས་ཕྱག་རྒྱ་རྟག་ཏུ་བསྲུང་བ་དང་། །དེ་ལ་ཉམས་པའི་སྐྱོན་ལྟ༴ ཡོ་གའི་དམ་ཚིག་བསྲུང་བའི་རྣལ་འབྱོར་ལ། །ཉམས་པ་བཀའ༴ དེ་ནས་ཡར་ལ༴ ཐབས་དང་ཤེས་རབ་གཉིས་ཀྱི་སྒོར་ཞུགས་ནས། །མ་ཧཱ་ཡོ་གའི་དམ་ཚིག་མནོས་པ་ལས། །འཁོར་བ་དང་ནི་མྱ་ངན་འདས་པའི་ཆོས། །ཡབ་ལྔ་དང་ནི་ཡུམ་ལྔ་སྦྱོར་བས་ན། །རྒྱལ་བའི་དམ་ཚིག་མཆོག་ཏུ་གསུངས་པ་ལ། །དེ་ལ་ཉམས༴ མ་ཧཱ་ཡོ་ག་བསྲུང་བའི་རྣལ་འབྱོར་ལ། །ཉམས་པ་བཀའ་ཡི༴ དེ་ནས་ཡར་ལ་བློ༴ དབྱིངས་དང་ཡེ་ཤེས་གཉིས་ཀྱི་སྒོར་ཞུགས་ནས། །ཨ་ནུ་ཡོ་གའི་དམ་ཚིག་མནོས་པ་ལས། །ཕྱི་ནང་སྣང་སྲིད་དུས་གསུམ་ཐམས་ཅད་དུ། །རང་རིག་ཡེ་ཤེས་དབྱིངས་ལས་མི་གཞན་ཏེ། །རྡོ་རྗེ་དྲིལ་བུའི་ཕྱག་རྒྱ་འཆང་བྱེད་ཅིང་། །དེ་ལ་ཉམས་པའི་སྐྱོན་ལྟ༴ ཨ་ནུ་ཡོ་ག་བསྲུང་བའི་རྣལ་འབྱོར་ལ། །ཉམས་པ་བཀའ་ཡི་ཆད་པ༴ དེ་ནས་ཡར་ལ་བློ་སེམས༴ ཁྱབ་བདལ་ཆེན་པོའི་ཐེག་པའི་སྒོར་ཞུགས་ནས། །ཨ་ཏི་ཡོ་གའི་དམ་ཚིག་མནོས་པ་ལས། །མེད་པའི་དམ་ཚིག་དང་ནི་ཕྱལ་བ་དང་། །གཅིག་པུའི་དམ་ཚིག་དང་ནི་ལྷུན་གྱིས་རྫོགས། །གྲངས་དང་ཕྱོགས་ལས་འདས་པའི་དམ་ཚིག་ལ། །རྒྱལ་བ་རྣམས་ཀྱིས་དམ་ཚིག་མཆོག་ཏུ་གསུངས། །བསྲུང་མཚམས་མེད་པས་མེད་པའི་དམ་ཚིག་ལ། །གཟུང་དང་འཛིན་པ་མེད་པས་ཕྱལ་བ་ཡིན། །ཐམས་ཅད་སེམས་སུ་འདུས་པས་གཅིག་པུ་ཉིད། །ལྷག་མ་མེད་པར་རྫོགས་པས་ལྷུན་གྱིས་རྫོགས། །དེ་ལ་ཉམས༴ ཨ་ཏི་ཡོ་ག་བསྲུང་༴ ཉམས་པ་བཀའ་ཡི་ཆད་པ་བྱུང་ན་བཤགས། །སྡེ་སྣོད་རྣམ་པ་གསུམ་གྱི་བསྲུང་བྱ་ནི། །ཚུལ་ཁྲིམས་རྣམ་པར་དག་པས་འདུལ་མཐར་ཕྱིན། །རང་དབང་མངོན་དུ་གྱུར་པས་མངོན་མཐར་ཕྱིན། །ཤེས་རབ་རྣམ་དག་མདོ་སྡེ་མཐའ་རུ་ཕྱིན། །ཕྱི་ཡི་ལྷ་སྲིན་སྡེ་བརྒྱད་སྲུང་མ་རྣམས། །དམ་ཚིག་ཉམས་པར་གྱུར་ན་མཐོལ་ལོ་བཤགས། །ཀྲྀ་ཡོག་རྣམ་པ་གསུམ་གྱི་བསྲུང་བྱ་ནི། །དག་པ་རྣམ་གསུམ་ཀྲི་ཡ་མཐའ་རུ་ཕྱིན། །ལྟ་སྤྱོད་རྣམ་གཉིས་ཨུ་པ་མཐའ་རུ་ཕྱིན། །སུམ་ཅུ་ལྷ་ཡི་སྐུར་གསལ་རྣལ་འབྱོར་མཐའ། །དཔལ་མགོན་བདུན་ཅུ་ལ་སོགས་སྲུང་མ་རྣམས། །དམ་ཚིག་ཉམས་པར་གྱུར་ན་མཐོལ་ལོ་བཤགས། །ཡོ་ག་རྣམ་པ་གསུམ་གྱི་བསྲུང་བྱ་རྣམས། །རྩ་བ་ཡན་ལག་བསྲུང་བ་རྣལ་འབྱོར་ཆེ། །སྒྲུབ་པ་ཁྱད་པར་དམ་ཚིག་ཨ་ནུའི་མཐའ། །ལྷག་པའི་དམ་ཚིག་རྣམ་བཞི་རྫོགས་ཆེན་པ། །ནང་དང་གསང་བའི་ལྷ་སྲིན་སྡེ་བརྒྱད་རྣམས། །དམ་ཚིག་ཉམས་པར་གྱུར་ན་མཐོལ་ལོ་བཤགས། །མཚན་ཉིད་སྡེ་སྣོད་གསུམ་དང་ཐེག་པ་གཉིས། །ཕྱི་པ་ཐུབ་པའི་རྒྱུད་ལ་ཀྲི་ཡོག་གསུམ། །ནང་པ་ཐབས་ཀྱི་རྒྱུད་ལ་ཡོ་ག་གསུམ། །ཐེག་པ་རིམ་པ་དགུ་ཡི་དམ་ཚིག་རྣམས། །ལྟ་སྤྱོད་འབྲེལ་བར་སྤྱོད་པའི་རྣལ་འབྱོར་ལ། །མཁའ་འགྲོས་བཀའ་ཡི་ཆད་པ་ཅི་སྟེ་གཅོད། །དབང་ཕྱུག་ཐུགས་ཀྱི་སྤྲུལ་པ་ཅི་སྟེ་དགྱེས། །རྒྱུ་འབྲས་མ་སྤང་དགེ་བ་དང་དུ་བླངས། །སྡིག་པ་མ་སྤྱད་རྣམ་པར་སྨིན་ལ་འཛེམ། །བཀའ་གཞུང་མ་བོར་རྒྱུད་ལུང་མན་ངག་འབྲེལ། །ཡལ་བར་མ་དོར་གཞུང་བཞིན་དང་དུ་བླངས། །ལུས་ངག་ཡིད་གསུམ་བཏུད་ནས་གསང་སྔགས་ཆོས། །སྒོམ་བསྒྲུབ་སྤྱོད་པའི་རྣལ་འབྱོར་དབང་ཕྱུག་ལ། །དམ་ཚིག་ཉམས་ཆག་བྱུང་ན་བསྐང་གྱུར་ཅིག །རྩ་བ་ཡན་ལག་ཕམ་ལྟུང་ཉེས་བྱས་དང་། །སྦོམ་པོ་ཕྲ་མོ་ལ་སོགས་ཉེས་སྐྱོན་རྣམས། །སྐྱོན་དུ་གྱུར་པ་ཐམས་ཅད་ཚངས་པར་མཛོད། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཡེ་ཤེས་ལྷ་ལ་རྣམ་རྟོག་མི་མངའ་ཡང་། །དེ་འཁོར་བཀའ་ཡི་སྲུང་མ་དམ་ཚིག་ཅན། །ཐུགས་དང་འགལ་བར་གྱུར་ན་བཟོད་པར་གསོལ། །ཡུན་གྱི་སྒྲིབ་པ་མཆིས་ན་སྒྲིབ་པ་སྦྱོང་། །འཕྲལ་གྱི་རྐྱེན་བགེགས་མཆིས་ན་རྐྱེན་བགེགས་བཟློག །ཚངས་པ་མཆོག་གི་དངོས་གྲུབ་སྩལ་དུ་གསོལ། །གསུམ་པ་ཕྱག་འཚལ་ཆོ་གར་རྣམ་པ་གཉིས། །དང་པོ་བརྒྱུད་པའི་བླ་མར་ཕྱག་འཚལ་ཞིང་། །གཉིས་པ་ཞི་ཁྲོའི་དལ་དུ་ཕྱག་འཚལ་བའོ། །དེ་གཉིས་ཐོག་མར་ཚོགས་ཞིང་གསལ་བ་ནི། ། ༈ མདུན་བསྐྱེད་ཇི་བཞིན་རྩ་གསུམ་ཁྲའམ་ལྷ། །མདུན་མཁར་སྤྲིན་གྱི་ཕུང་པོ་གཏིབས་པའམ། །རྒྱ་མཚོར་གཟའ་སྐར་སྣང་བ་ཇི་བཞིན་དུ། །ཐོགས་བྲལ་ཡེ་ཤེས་སྤྱན་གྱིས་གཟིགས་པར་བསམ། །སྙན་པའི་དབྱངས་དང་བཅས་ཏེ་འདི་སྐད་དོ། །ཨོཾ་བཛྲ་གུ་རུ་པདྨ་སིདྡྷིུ་ཨཱཿཧཱུཾ། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཐུགས་ཡེ་ཤེས་གངས་ཅན་མཚོ་ལས་ལྷུན་གྱིས་གྲུབ་པའི་རང་བཞིན། རྒྱལ་སྲས་ཆེན་པོ་པདྨ་འབྱུང་གནས་ཀྱི་ཞབས་ཀྱི་པདྨོ་དྲི་མ་མེད་པ་ལ་དུས་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། །བཞི་ཆོད། མགོན་པོ་གདོད་ནས་རྫོགས་སངས་རྒྱས། །བདེ་ཆེན་ཡོན་ཏན་འབྱུང་བའི་མཛོད། །སངས་རྒྱས་ཀུན་གྱི་བླ་མ་མཆོག །ཀུན་བཟང་ཡབ་ཡུམ་ལ་ཕྱག་འཚལ། །རིགས་ལྔ་ཡེ་ཤེས་ལྔ་ཡི་དངོས། །རྡོ་རྗེ་འཆང་གི་ངོ་བོ་ཉིད། །ཞི་དང་ཁྲོ་ཚུལ་དཔག་མེད་སྟོན། །རྡོ་རྗེ་སེམས་དཔའ་ལ་ཕྱག་འཚལ། །རྒྱལ་བའི་ཕྲིན་ལས་དཔག་མེད་ལས། །རང་བྱུང་རིག་འཛིན་ཀུན་གྱི་གཙོ། །ལྷ་མིའི་སྟོན་པ་བླ་ན་མེད། །དགའ་རབ་རྡོ་རྗེ་ལ་ཕྱག་འཚལ། །སྤངས་དང་ཡེ་ཤེས་ཕུན་ཚོགས་ཤིང་། །སྐུ་དང་ཕྲིན་ལས་བསམ་ཡས་ཀྱིས། །འགྲོ་བའི་དོན་གཉིས་རྫོགས་མཛད་པ་། །ཤྲྀ་རི་སིང་ཧ་ལ་ཕྱག་འཚལ། །བདེ་གཤེགས་རྒྱ་མཚོའི་རྣམ་འཕྲུལ་ལས། །རང་བྱུང་གེ་སར་པདྨའི་སྟེང་། །མཚན་རྫོགས་དཔེ་བྱད་འབར་བའི་སྐུ། །པདྨ་འབྱུང་གནས་ལ་ཕྱག་འཚལ། །ངོ་བོ་ཡེ་ནས་ཀུན་ཏུ་བཟང་། །རང་བཞིན་བདེ་གཤེགས་འོད་དཔག་མེད། །ཐུགས་རྗེ་པདྨར་སྐུ་སྤྲུལ་པ། །ཤཱཀྱ་སེང་གེ་ལ་ཕྱག་འཚལ། །སྐུ་གསུམ་མཛད་པའི་ཕྲིན་ལས་ཀྱིས། །གདུལ་བྱའི་རེ་བ་རྣམ་སྐོང་ཞིང་། །མཁའ་འགྲོ་འབར་བའི་སྤྲིན་འཕྲོ་བ། །པདྨ་རྒྱལ་པོ་ལ་ཕྱག་འཚལ། །ཇི་སྙེད་ཇི་བཞིན་ཐམས་ཅད་མཁྱེན། །སྣ་ཚོགས་ཆོས་ཀྱི་རྔ་སྒྲ་ཡིས། །བདུད་དང་མུ་སྟེགས་ཚར་གཅོད་པའི། །བློ་ལྡན་མཆོག་སྲེད་ལ་ཕྱག་འཚལ། །ཀུན་མཁྱེན་ཡེ་ཤེས་གངས་རི་ལས། །རྣམ་གྲོལ་མཆོག་གི་གོ་འཕང་བརྙེས། །དཔག་མེད་འཁོར་བའི་ཚོགས་ནང་ན། །སེང་གེ་སྒྲ་སྒྲོགས་ལ༴ ཐུགས་རྗེའི་ཆར་སྤྲིན་རོལ་བ་ལས། །ཕན་བདེའི་གློག་ཕྲེང་ཆར་འབེབས་ཤིང་། །འགྲོ་བློའི་ཕུན་ཚོགས་རྒྱས་མཛད་པ། །པདྨ་སཾ་བྷ་ལ་ཕྱག་འཚལ། །མཁྱེན་བརྩེའི་འོད་སྟོང་དཀྱིལ་འཁོར་གྱིས། །གསུང་རབ་པདྨ་རྒྱས་མཛད་ཅིང་། །འགྲོ་བའི་ལམ་ཡང་དཀར་པོར་མཛད། །ཉི་མ་འོད་ཟེར་ལ༴ རྣམ་སྤྲུལ་དྲག་པོས་འདུལ་བ་དང་། །འཇིགས་རུང་གར་དགུའི་ཉམས་ལྡན་ཞིང་། །ལྷ་སྲིན་གདུག་པ་ཚར་གཅོད་པའི། །རྡོ་རྗེ་གྲོ་ལོད་ལ་ཕྱག་འཚལ། །མཁའ་འགྲོ་འབར་བའི་སྤྲིན་ཕུང་ལས། །དངོས་གྲུབ་བདུད་རྩིའི་ཆར་འབེབས་ཤིང་། །བདེ་ཆེན་རྒྱལ་བ་མཉེས་མཛད་ཡུམ། །མཁར་ཆེན་མཚོ་རྒྱལ་ལ་ཕྱག་འཚལ། །ཤེས་བྱའི་དཀྱིལ་འཁོར་རབ་རྒྱས་ཤིང་། །དམ་ཆོས་རིན་ཆེན་མཛོད་འཛིན་པའི། །ཟབ་མོའི་དགོངས་གཏེར་རྒྱས་མཛད་པ། །དྲི༷་མེ༷ད་འོ༷ད་ཟེ༷ར་ལ༴ མཁྱེན༷་བཟང་ཀུན་གསལ་ལམ་ཆེན་དུ། །བྱམ༷ས་བརྩེ༷འི་འོད་སྟོང་སྤྲོ་བའི་ཟེ༷ར། །གདུལ་བྱའི་པད་ཚལ་རྒྱས་པའི་གཉེན། །འཇི༷གས་མེ༷ད་གླིང༷་པ༷་ལ༴ ཀུན༷་བཟ༷ང་རོལ་རྩལ་བསམ་ཡས་འཕྲུལ། །གཞ༷ན་ཕ༷ན་ཕྲིན་ལས་ཉིན་བྱེད་གཟིས། །གདུལ་བྱའི་པད་ཚལ་བཞད་པའི་གཉེན། །བྱང་ཆུབ་རྡོ་རྗེ་ལ་ཕྱག་འཚལ། །བསྐལ་མང་གོང་ནས་སངས་རྒྱས་ཀྱང་། །ཐུགས་བསྐྱེད་ཡེ་ཤེས་ཉི་མ་ཡིས། །འགྲོ་བའི་མ་རིག་སངས་མཛད་པ། །བདེ་བ་རྡོ་རྗེ་ལ་ཕྱག་འཚལ། །རྒྱལ་ཀུན་གསང་བའི་མཛོད་འཛིན་ཅིང་། །འགྲོ་མགོན་སངས་རྒྱས་མི་གཟུགས་ཅན། །གུ་རུའི་སྤྲུལ་པ་ཆོས་ཀྱི་རྗེ། །དཔལ་ལྡན་བླ་མ་ལ༴ ཆོས་དབྱིངས་བདེ་ཆེན་ནམ་མཁའི་ཀློང་། །ཡེ་ཤེས་མཁའ་འགྲོའི་སྤྲིན་འཕྲོ་བ། །རྒྱལ་བ་སྲས་བཅས་ཀུན་གྱི་ཡུམ། །རྡོ་རྗེ་ཕག་མོ་ལ༴ ངང་ཉིད་ཆོས་དབྱིངས་རོལ་པ་ལས། །སྣ་ཚོགས་ཐབས་ཀྱི་རྣམ་འཕྲུལ་གྱིས། །ཕྲིན་ལས་རྣམ་བཞིའི་ལས་མཛད་པ། །དམ་ཅན་རྒྱ་མཚོ་ལ༴ གཞན་ཡང་ཕྱོགས་བཅུའི་རིག་འཛིན་དང་། །བདེ་གཤེགས་ཚོགས་དང་འཕགས་པའི་ཚོགས། །མཁའ་འགྲོ་བདེ་ཆེན་རྒྱ་མཚོ་དང་། །མཆོད་འོས་ཀུན་ལ་བདག་ཕྱག་འཚལ། །ཞིང་རྣམས་ཀུན་གྱི་རྡུལ་ཕྲན་གྱི། །གྲངས་དང་མཉམ་པའི་ལུས་སྤྲུལ་ཏེ། །ཕྱི་ནང་གསང་བའི་མཆོད་སྤྲིན་ནི། །ནམ་མཁའ་རབ་འབྱམས་ཡོངས་བཀང་སྟེ། །བླ་མེད་བླ་མའི་ཚོགས་རྣམས་དང་། །རྒྱལ་དང་རྒྱལ་སྲས་འཕགས་པའི་ཚོགས། །མཆོད་འོས་རྣས་ལ་མཆོད་པར་འབུལ། །ཐོག་མ་མེད་ནས་ལུས་དང་ངག །ཡིད་ཀྱིས་སྡིག་པའི་ལས་བགྱིས་པ། །དེ་ཀུན་རབ་ཏུ་འགྱོད་སེམས་ཀྱིས། །མཆོད་འོས་རྣམས་ཀྱི་སྤྱན་སྔར་བཤགས། །ཤེས་དང་མི་སྤང་དང་དུ་བླངས། །སྒྲུབ་དང་ཁས་བླངས་ལ་སོགས་པ། །རྩ་བ་ཡན་ལག་དམ་ཚིག་ལས། །འགལ་ཞིང་ཉམས་པ་སོ་སོར་བཤགས། །བདག་གཞན་ཀུན་གྱི་དུས་གསུམ་གྱི། །དགེ་བ་ཀུན་ལ་ཡི་རང་ཞིང་། །འགྲོ་བའི་ཁམས་ལ་མོས་པ་དང་། །བློ་ཡི་རིམ་པ་ཇི་བཞིན་དུ། །ཐེག་པ་སྣ་ཚོགས་ཐབས་ཚུལ་གྱིས། །ཆོས་ཀྱི་འཁོར་ལོ་བསྐོར་བར་བསྐུལ། །དེང་ནས་སྲིད་པ་མ་སྟོངས་བར། །མྱ་ངན་མི་འདའ་རྟག་བཞུགས་ནས། །ཐུགས་རྗེའི་རྣམ་འཕྲུལ་དཔག་ཡས་ཀྱིས། །འགྲོ་བའི་དོན་གཉིས་མཛད་པར་གསོལ། །བདག་གཞན་དུས་གསུམ་དགེ་བ་ཀུན། །མ་ལུས་བློ་ཡིས་གཅིག་བསྡུས་ནས། །སེམས་ཅན་ཀུན་གྱི་དོན་གྱི་ཕྱིར། །རྒྱལ་བའི་གོ་འཕང་ཐོབ་པར་ཤོག །དུས་གསུམ་སྲིད་པའི་སེམས་ཅན་ཀུན། །རྡོ་རྗེ་ཐེག་ལ་རབ་ཞུགས་ནས། །གཉིས་མེད་ཡེ་ཤེས་དོན་རྟོགས་ནས། །ཚེ་འདི་ཉིད་ལ་སངས་རྒྱས་ཤོག །རྣམ་སྨིན་འབྱུང་བའི་ལུས་འདི་ཡང་། །མངོན་སུམ་འོད་གསལ་བསྒོམས་པ་ཡི། །རང་མདངས་འོད་ཀྱི་ཕུང་པོ་རུ། །ཚེ་འདི་ཉིད་ལ་འགྲུབ་པར་ཤོག །ཕྱོགས་མཐར་གཏུགས་པའི་སེམས་ཅན་ཀུན།།བདེ་ཐོབ་སྡུག་བསྔལ་ཀུན་བྲལ་ཏེ། །དམ་པ་རྣམས་ལས་ཆོས་ཐོབ་ནས། །ཐར་པའི་གྲོང་དུ་ཕྱིན་པར་ཤོག །བདག་ཀྱང་དེང་ནས་དུས་ཀུན་ཏུ། །ཟབ་མོའི་ཆོས་རྣམས་འཛིན་པ་དང་། །རྒྱལ་བ་རྣམས་ཀྱིས་མ་བསྒྲལ་བའི། །འགྲོ་ཀུན་མ་ལུས་སྒྲོལ་བར་ཤོག །བདག་གི་བདེ་བའི་ཆ་ཤས་ཀྱིས། །སེམས་ཅན་རྣམས་ནི་ཉེར་འཚོ་ཞིང་། །སེམས་ཅན་སྡུག་བསྔལ་མ་ལུས་ཀུན། །བདག་ལ་སྨིན་ནས་གྲོལ་པར་ཤོག །བདག་གིས་བརྩམས་པ་ཐམས་ཅད་ཀུན། །སེམས་ཅན་དོན་ལས་མ་གཏོགས་པ། །གཞན་དུ་རྡུལ་ཙམ་མི་དམིགས་པས། །འགྲོ་བའི་དོན་གཉིས་འགྲུབ་པར་ཤོག །བར་དོའི་ཡུལ་ལ་འཇུག་པའི་ཚེ། །འོད་གསལ་རང་ངོ་ཤེས་པ་ཡིས། །གདོད་མའི་གཞི་ལ་མཐར་ཕྱིན་ནས། །སེམས་ཅན་ཀུན་དོན་འགྲུབ་པར་ཤོག །ཡེ་ཤེས་དག་པའི་རང་བཞིན་གྱིས། །སྲིད་པའི་བར་དོ་མི་མཐོང་ཞིང་། །ཕྱོགས་བཅུའི་རང་བཞིན་སྤྲུལ་པའི་ཞིང་། །བགྲོད་ནས་འགྲོ་བ་སྒྲོལ་བར་ཤོག །པདྨའི་མཚོ་ལས་བུང་བ་ལྟར། །འགྲོ་བ་ལས་འབྲེལ་ཡོངས་རྩལ་ཏེ། །དྲི་མེད་ཡེ་ཤེས་འོད་ཟེར་གྱིས། །སྐལ་ལྡན་སྣང་བ་འབྱེད་པར་ཤོག །བདག་བློའི་དགེ་ལེགས་ཕུན་ཚོགས་ཀྱིས། །འགྲོ་བའི་བསམ་པ་ཀུན་འགྲུབ་ཏེ། །སྲིད་ན་འགའ་ཡང་མི་གནས་པར། །ཕྱམ་གཅིག་སངས་རྒྱས་འགྲུབ་པར་ཤོག །བྱེ་བྲག་རྒྱལ་བ་ཞི་བའི་ལྷ་ཚོགས་ལ། །སྒོ་གསུམ་གུས་པ་ཆེན་པོས་ཕྱག་འཚལ་བ། །ཧོ་ཀློང་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་དོན་དམ་པར་ཆོས་ཀྱི་དབྱིངས། ཡུམ་གྱི་བྷ་ག་ཡངས་པའི་ཀློང་། རང་བཞིན་གྱི་དཀྱིལ་འཁོར་རྣམ་པར་དག་པ་ན་བཞུགས་པའི་བདེ་བར་གཤེགས་པ་རྒྱལ་བ་རྒྱ་མཚོ་དང་བཅས་པ་རྣམས་ལ་ཕྱག་འཚལ་ལོ། །ཨ་ལ་ལ་ཧོ། ཀུན་གཞི་གསང་བ་དག་པའི་དབྱིངས་ནས་ཡིད་རང་བྱུང་གི་ཡེ་ཤེས་རང་ཤེས་རིག་གི་རྒྱལ་པོ་ཡིད་བྱེད་པ་པོ་དུས་གསུམ་གྱི་སངས་རྒྱས་ཐམས་ཅད་ཀྱི་ཡབ། ཆགས་མེད་སྐྱོན་དང་བྲལ་བས་གདན་པདྨ་ལ་བཞུགས་པ། སངས་རྒྱས་དང་སེམས་ཅན་མཉམ་པར་མཁྱེན་པས་ཕྱག་མཉམ་པའི་ཕྱག་རྒྱ་ཅན་དཀྱིལ་འཁོར་ཐམས་ཅད་ཀྱི་མངའ་བདག །བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཨ་ལ་ལ་ཧོ། འདི་ལྟར་སྣང་བའི་ཆོས་ཐམས་ཅད་དོན་དམ་པར་ཆོས་ཀྱི་དབྱིངས་སུ་སྡུད་མ། ཆོས་ཅན་མཚན་མའི་སྐྱོན་གྱིས་མ་གོས་པས་གདན་པདྨ་ལ་བཞུགས་པ། ཀུན་ལ་ཁྱབ་པར་གནས་པས་ཕྱག་མཉམ་པའི་ཕྱག་རྒྱ་ཅན། ཆོས་བྱ་བ་མོ་དཀྱིལ་འཁོར་ཐམས་ཅད་བསྐྱེད་པའི་གཞི། ཡུམ་ཀུན་ཏུ་བཟང་མོ་ལ་ཕྱག་འཚལ་ལོ། །ཨ་ལ་ལ་ཧོ། བཞི་ཆོད། ཆོས་རྣམས་རྣམ་དག་ཡེ་ནས་ལྷུན་གྲུབ་པས། །བྱ་བ་བྱེད་དང་ཡིད་ཆོས་རྣམ་པར་དག །ནམ་མཁའི་མཐའ་བཞིན་ཀུན་ལ་སྙོམས་མཛད་པ། ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་རྣམ་པར་ཤེས་པའི་ཕུང་པོ་གནས་སུ་དག་པ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་བདག་ཉིད། མི་འཇིགས་སེང་གེའི་ཁྲི་ཅན། སྟོང་པ་ཉིད་ཀྱིས་ཡེ་ཤེས་ཀྱི་སྐྱེ་ཤི་དང་འཕོ་འགྱུར་གྱི་རྟོག་པ་མི་མངའ་བས་ཕྱག་རྒྱ་རྡོ་རྗེ་ཅན། བཅོམ་ལྡན་འདས་དཔལ་རྡོ་རྗེ་མི་བསྐྱོད་པ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་གཟུགས་ཀྱི་ཕུང་པོ་གནས་སུ་དག་པ། དེ་བཞིན་གཤེགས་པ་ཐམས་ཅད་ཀྱི་སྐུའི་བདག་ཉིད། སྟོབས་གླང་པོ་ཆེའི་ཁྲི་ཅན། མེ་ལོང་ལྟ་བུའི་ཡེ་ཤེས་ཀྱིས་ཀུན་ལ་དབང་བསྒྱུར་བས་ཕྱག་རྒྱ་འཁོར་ལོ་ཅན། བཅོམ་ལྡན་འདས་དཔལ་རྣམ་པར་སྣང་མཛད་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ཚོར་བའི་ཕུང་པོ་གནས་སུ་དག་པ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་གྱི་བདག་ཉིད། ཤུགས་འཆང་རྟ་ཡི་ཁྲི་ཅན། མཉམ་པ་ཉིད་ཀྱི་ཡེ་ཤེས་ལས་མ་གཡོས་པར་ཆེ་བའི་ཡོན་ཏན་ཐམས་ཅད་འབྱུང་བས། ཕྱག་རྒྱ་རིན་པོ་ཆེ་འབར་བ་ཅན། བཅོམ་ལྡན་འདས་དཔལ་རིན་ཆེན་འབྱུང་ལྡན་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་འདུ་ཤེས་ཀྱི་ཕུང་པོ་གནས་སུ་དག་པ། དེ་བཞིན་གཤེགས་པ་ཐམས་ཅད་ཀྱི་གསུང་གི་བདག་ཉིད། མཛེས་བྱེད་རྨ་བྱའི་ཁྲི་ཅན། སོ་སོར་རྟོགས་པའི་ཡེ་ཤེས་ཀྱིས་ཆོས་སྤྱི་དང་རང་གི་མཚན་ཉིད་གསལ་ལ་མ་ཆགས་པས་ཕྱག་རྒྱ་པདྨ་ཅན། བཅོམ་ལྡན་འདས་དཔལ་སྣང་བ་མཐའ་ཡས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་འདུ་བྱེད་ཀྱི་ཕུང་པོ་གནས་སུ་དག་པ། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་བདག་ཉིད། ཅང་བྱེད་ཤང་ཤང་ཏེའུའི་ཁྲི་ཅན། བྱ་བ་གྲུབ་པའི་ཡེ་ཤེས་ཀྱིས་ཕྲིན་ལས་མཐར་ཕྱིན་པས་ཕྱག་རྒྱ་རྡོ་རྗེ་རྒྱ་གྲམ་ཅན། བཅོམ་ལྡན་འདས་དཔལ་དོན་ཡོད་གྲུབ་པ་ལ་ཕྱག་འཚལ་ལོ། །བཞི་ཆོད། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །དོན་དམ་པར་འབྱུང་བ་ནམ་མཁའི་ངོ་བོ་གནས་སུ་དག་པ། ཡུམ་ཆེན་མོ་ཀུན་ཏུ་བཟང་མོ། དུས་གསུམ་གྱི་རྒྱལ་བ་ཐམས་ཅད་འབྱུང་བའི་གནས། ཡུམ་ཆེན་མོ་ནམ་མཁའི་དབྱིངས་ཕྱུག་མ་ལ་ཕྱག་འཚལ་ལོ། །དོན་དམ་པར་འབྱུང་བ་ས་ཡི་ངོ་བོ་གནས་སུ་དག་པ། ཡུམ་ཆེན་མོ་སངས་རྒྱས་སྤྱན་མ། དུས་གསུམ་གྱི་རྒྱལ་བ་ཐམས་ཅད་བསྐྱེད་པའི་གཞི། ཡུམ་ཆེན་མོ་རྡོ་རྗེ་དབྱིངས་ཕྱུག་མ་ལ་ཕྱག་འཚལ་ལོ། །དོན་དམ་པར་འབྱུང་བ་ཆུའི་ངོ་བོ་གནས་སུ་དག་པ། ཡུམ་ཆེན་མོ་མཱ་མ་ཀི། དུས་གསུམ་གྱི་རྒྱལ་བ་ཐམས་ཅད་ཀྱི་ཡོན་ཏན་གྱི་གཏེར་འཛིན་མ། ཡུམ་ཆེན་མོ་རིན་ཆེན་དབྱིངས་ཕྱུག་མ་ལ་ཕྱག་འཚལ་ལོ། །དོན་དམ་པར་འབྱུང་བ་མེའི་ངོ་བོ་གནས་སུ་དག་པ། ཡུམ་ཆེན་མོ་ན་བཟའ་དཀར་མོ། དུས་གསུམ་གྱི་རྒྱལ་བ་རྣམས་ཀྱི་གསུང་མཆོག་མ། ཡུམ་ཆེན་མོ་པདྨ་དབྱིངས་ཕྱུག་མ་ལ་ཕྱག་འཚལ་ལོ། །དོན་དམ་པར་འབྱུང་བ་རླུང་གི་ངོ་བོ་གནས་སུ་དག་པ། ཡུམ་ཆེན་མོ་དམ་ཚིག་སྒྲོལ་མ། འགྲོ་བ་རྣམས་འཕགས་པའི་ས་བཅུར་སྒྲོལ་མ། ཡུམ་ཆེན་མོ་ལས་ཀྱི་དབྱིངས་ཕྱུག་མ་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ཀྱི་ཡུམ་གྱུར་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་མིག་གི་རྣམ་པར་ཤེས་པ་གནས་སུ་དག་པ། །བྱང་ཆུབ་སེམས་དཔའ་ས་ཡི་སྙིང་པོ། འགྲོ་བ་རྣམས་བླ་ན་མེད་པའི་གནས་སུ་སྐྱེད་པར་བྱེད་པས། ཕྱག་རྒྱ་རིན་པོ་ཆེ་མྱུ་གུ་ཅན། ཤར་ཕྱོགས་ན་བཞུགས་པའི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་རྣ་བའི་རྣམ་པར་ཤེས་པ་གནས་སུ་དག་པ། བྱང་ཆུབ་སེམས་དཔའ་ནམ་མཁའི་སྙིང་པོ། ཉོན་མོངས་པའི་སྐྱེ་རྒྱུན་གཅོད་པས་ཕྱག་རྒྱ་རལ་གྲིི་ཅན། ལྷོ་ཕྱོགས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་སྣའི་རྣམ་པར་ཤེས་པ་གནས་སུ་དག་པ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག །ཉོན་མོངས་པའི་སྐྱོན་གྱིས་མ་གོས་པས་ཕྱག་རྒྱ་པདྨ་ཅན། །ནུབ་ཕྱོགས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལྕེ་ཡི་རྣམ་པར་ཤེས་པ་གནས་སུ་དག་པ། །བྱང་ཆུབ་སེམས་དཔའ་ཕྱག་ན་རྡོ་རྗེ། ཉོན་མོངས་པ་ཐམས་ཅད་འཇོམས་པར་བྱེད་པས་ཕྱག་རྒྱ་རྡོ་རྗེ་ཅན། བྱང་ཕྱོགས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་མིག་གི་དབང་པོ་གནས་སུ་དག་པ། བྱང་ཆུབ་སེམས་དཔའ་བྱམས་པ། ཉོན་མོངས་པའི་གདུང་བ་ལས་རྣམ་པར་རྒྱལ་བས་ཕྱག་རྒྱ་ཀླུ་ཤིང་མགོ་ལྕོག་ཅན། ཤར་ལྷོ་མཚམས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་རྣ་བའི་དབང་པོ་གནས་སུ་དག་པ། བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བ། ཉོན་མོངས་པ་ཆོས་ཉིད་དུ་མཁྱེན་པས་ཕྱག་རྒྱ་གླེགས་བམ་པོ་ཏི་ཅན། ལྷོ་ནུབ་མཚམས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་སྣ་ཡི་དབང་པོ་གནས་སུ་དག་པ། བྱང་ཆུབ་སེམས་དཔའ་ཀུན་ཏུ་བཟང་པོ། ཉོན་མོངས་པ་གནས་སུ་དག་པ་ལས་དགོས་འདོད་ཀྱི་རེ་བ་ཡིད་བཞིན་སྐོང་བས་ཕྱག་རྒྱ་རིན་པོ་ཆེའི་སྙེ་མ་ཅན། ནུབ་བྱང་མཚམས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལྕེ་ཡི་དབང་པོ་གནས་སུ་དག་པ། བྱང་ཆུབ་སེམས་དཔའ་འཇམ་དཔལ། ཉོན་མོངས་པའི་ཟུག་རྔུ་མི་མངའ་བར་ཤིན་ཏུ་མཛེས་པས་ཕྱག་རྒྱ་མེ་ཏོག་ཨུཏྤལ་ཅན། བྱང་ཤར་མཚམས་ཀྱི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །རྣམ་ཤེས་དབང་པོ་དག་པའི་སྐུ་གསུང་ཐུགས། བདེ་བར་གཤེགས་པ་རྣམས་ཀྱི་སྲས་མཆོག་སྟེ། སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་མིག་གི་ཡུལ་གཟུགས་སུ་སྣང་བ་གནས་སུ་དག་པ་བཛྲ་ལཱ་སེ་སྟེ། དེ་བཞིན་གཤེགས་པ་རྣམས་ལ་མཆོད་པས་མཉེས་པར་བྱེད་པ་ལས་མི་འགྱུར་བས་ཕྱག་རྒྱ་རྡོ་རྗེ་ཁུ་ཚུར་ཅན། རྡོ་རྗེ་སྒེག་མོ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་སྣའི་ཡུལ་དྲིར་བསྣམ་པ་གནས་སུ་དག་པ། བཛྲ་མཱ་ལེ་སྟེ་དྲིའི་མཆོད་པ་རྒྱུན་མི་ཆད་པར་བྱེད་པས་ཕྱག་རྒྱ་རིན་པོ་ཆེའི་ཕྲེང་བ་ཅན། རྡོ་རྗེ་ཕྲེང་བ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་རྣ་བའི་ཡུལ་སྒྲར་གྲགས་པ་གནས་སུ་དག་པ་བཛྲ་གཱིཪྟིི་སྟེ། སྒྲའི་མཆོད་པས་མཉེས་པར་བྱེད་པས་ཕྱག་རྒྱ་པི་ཝང་ཅན། རྡོ་རྗེ་སྒྲ་དབྱངས་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལྕེའི་ཡུལ་རོར་བྲོོ་བ་གནས་སུ་དག་པ། བཛྲ་ནིཪྟི་སྟེ། ཕྱག་རྒྱའི་མཆོད་པས་མཉེས་པར་བྱེད་པས་ཕྱག་རྒྱ་གར་བསྒྱུར་ཅན། རྡོ་རྗེ་གར་བསྒྱུར་མ་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་ཅན། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་དུས་འདས་པ་ཞེས་བྱ་བ་གནས་སུ་དག་པ། བཛྲ་པུཥྤེ་སྟེ། སྤྱན་གྱི་མཆོད་པས་མཉེས་པར་བྱེད་པ་ཕྱག་རྒྱ་མེ་ཏོག་ཅན། རྡོ་རྗེ་མེ་ཏོག་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་དུས་ད་ལྟ་བ་ཞེས་བྱ་བ་གནས་སུ་དག་པ། བཛྲ་དྷུ་པེ་སྟེ། ཤངས་ཀྱི་མཆོད་པས་མཉེས་པར་བྱེད་པས་ཕྱག་རྒྱ་བདུག་སྤོས་ཅན། རྡོ་རྗེ་སྤོས་མེ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་དུས་མ་འོངས་པ་ཞེས་བྱ་གནས་སུ་དག་པ། བཛྲ་ཨ་ལོ་ཀེ་སྟེ། སྐུའི་མཆོད་པས་མཉེས་པར་བྱེད་པས་ཕྱག་རྒྱ་མར་མེ་ཅན། རྡོ་རྗེ་མར་མེ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་དུས་ཕྱིས་འབྱུང་བར་མ་ངེས་པ་ཞེས་བྱ་བ་གནས་སུ་དག་པ། བཛྲ་གྷནྡྷེ་སྟེ། ལྗགས་བྱུག་པའི་མཆོད་པས་མཉེས་པར་བྱེད་པས་ཕྱག་རྒྱ་བྱུག་པ་ཅན། རྡོ་རྗེ་དྲི་ཆབ་མ་ལ་ཕྱག་འཚལ་ལོ། །བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལུས་ཀྱི་རེག་པ་གནས་སུ་དག་པ། ཁྲོ་བོ་ཆེན་པོ་གཤིན་རྗེའི་གཤེད་པོ་སྟེ། བྱམས་པ་ཆེན་པོས་འགྲོ་བའི་དོན་ཚར་གཅོད་པར་མཛད་པས་ཕྱག་རྒྱ་ནྲྀ་མགོ་གདེངས་པ་ཅན། ཤར་སྒོའི་བདག་པོ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལུས་ཀྱི་དབང་པོ་གནས་སུ་དག་པ། ཁྲོ་བོ་ཆེན་པོ་སྟོབས་པོ་ཆེ་སྟེ། སྙིང་རྗེ་ཆེན་པོས་འགྲོ་བའི་དོན་དུག་ལྔ་ཡེ་ཤེས་ལྔས་འཇོམས་པར་མཛད་པས་ཕྱག་རྒྱ་རྡོ་རྗེ་རྩེ་ལྔ་ཅན། ལྷོ་སྒོའི་བདག་པོ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལུས་ཀྱི་རེག་བྱ་གནས་སུ་དག་པ། ཁྲོ་བོ་ཆེན་པོ་རྟ་མགྲིན་ཏེ། དགའ་བ་ཆེན་པོས་འགྲོ་བའི་དོན་མཛད་པས་ཕྱག་རྒྱ་ཐོད་དབྱུག་སྦྲུལ་གྱིས་དཀྲིས་པ་ཅན། ནུབ་སྒོའི་བདག་པོ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ལུས་ཀྱི་རེག་ཤེས་གནས་སུ་དག་པ། ཁྲོ་བོ་ཆེན་པོ་བདུད་རྩི་འཁྱིལ་པ་སྟེ། བཏང་སྙོམས་ཆེན་པོས་འགྲོ་བའི་དོན་མཐར་ཕྱིན་པར་མཛད་པས་ཕྱག་རྒྱ་རྡོ་རྗེ་རྒྱ་གྲམ་ཅན། བྱང་སྒོའི་བདག་པོ་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། ཚད་མེད་བཞི་ལྡན་སྒོ་བཞི་ཐུབ་པར་བསྲུང་། ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་རྟག་པར་ལྟ་བ་གནས་སུ་དག་པ། བཛྲ་ཨངྐུ་ཤ་སྟེ། འཁོར་བའི་ཉོན་མོངས་པ་ཐུགས་རྗེས་འཛིན་པར་བྱེད་པས་ཕྱག་རྒྱ་ལྕགས་ཀྱུ་ཅན། རྡོ་རྗེ་ལྕགས་ཀྱུ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ཆད་པར་ལྟ་བ་གནས་སུ་དག་པ། བཛྲ་པཱ་ཤ་སྟེ། འཁོར་བའི་ཉོན་མོངས་པ་ཐུགས་རྗེས་འདྲེན་པར་བྱེད་པས་ཕྱག་རྒྱ་ཞགས་པ་ཅན། རྡོ་རྗེ་ཞགས་པ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་བདག་ཏུ་ལྟ་བ་གནས་སུ་དག་པ། བཛྲ་སྥོ་ཊ་སྟེ། འཁོར་བའི་ཉོན་མོངས་པ་ཐུགས་རྗེས་མི་འཆོར་བར་མཛད་པས་ཕྱག་རྒྱ་ལྕགས་སྒྲོག་ཅན། རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་མཚན་མར་ལྟ་བ་གནས་སུ་དག་པ། བཛྲ་གྷཎྜེ་སྟེ། འཁོར་བའི་ཉོན་མོངས་པ་ཐུགས་རྗེས་ཐལ་བར་རློག་པར་མཛད་པས་ཕྱག་རྒྱ་དྲིལ་བུ་ཅན། རྡོ་རྗེ་དྲིལ་བུ་མ་ལ་ཕྱག་འཚལ་ལོ། །རྟག་ཆད་མཐར་ཕྱིན་གསང་བ་ཡུམ་གྱི་ངང་། ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། སྒོམ་ཆེན་མོ་བཞི་ལ་ཕྱག་འཚལ་ལོ། །དོན་དམ་པར་སེམས་ཅན་གྱིས་ལྷའི་འཇིག་རྟེན་དུ་ལྟ་བ་གནས་སུ་དག་པ། ལྷ་ཡི་ཐུབ་པ་སྟེ། ཉོན་མོངས་པ་ང་རྒྱལ་གནས་སུ་དག་པར་མཛད་པས་ཕྱག་རྒྱ་པི་ཝང་ཅན། ལྷའི་བཅོམ་ལྡན་འདས་ལ་ཕྱག་འཚལ་ལོ། །དོན་དམ་པར་སེམས་ཅན་གྱིས་ལྷ་མ་ཡིན་གྱི་འཇིག་རྟེན་དུ་ལྟ་བ་གནས་སུ་དག་པ། ལྷ་མ་ཡིན་གྱི་ཐུབ་པ་སྟེ། ཉོན་མོངས་པ་ཕྲག་དོག་གནས་སུ་དག་པར་མཛད་པས་ཕྱག་རྒྱ་གོ་ཆ་ཅན། ལྷ་མ་ཡིན་གྱི་བཅོམ་ལྡན་འདས་ལ་ཕྱག་འཚལ་ལོ། །དོན་དམ་པར་སེམས་ཅན་གྱིས་མིའི་འཇིག་རྟེན་དུ་ལྟ་བ་གནས་སུ་དག་པ། མིའི་ཐུབ་པ་སྟེ། ཉོན་མོངས་པ་འདོད་ཆགས་གནས་སུ་དག་པར་མཛད་པས་ཕྱག་རྒྱ་གསེག་ཤང་པར་བུ་ཅན། མིའི་བཅོམ་ལྡན་འདས་ལ་ཕྱག་འཚལ་ལོ། །དོན་དམ་པར་སེམས་ཅན་གྱིས་བྱོལ་སོང་གི་འཇིག་རྟེན་དུ་ལྟ་བ་གནས་སུ་དག་པ་བྱོལ་སོང་གི་ཐུབ་པ་སྟེ། ཉོན་མོངས་པ་གཏི་མུག་གནས་སུ་དག་པར་མཛད་པས་ཕྱག་རྒྱ་གླེགས་བམ་པོ་ཏི་ཅན། བྱོལ་སོང་གི་བཅོམ་ལྡན་འདས་ལ་ཕྱག་འཚལ་ལོ། །དོན་དམ་པར་སེམས་ཅན་གྱིས་ཡི་དྭགས་ཀྱི་འཇིག་རྟེན་དུ་ལྟ་བ་གནས་སུ་དག་པ། ཡི་དྭགས་ཀྱི་ཐུབ་པ་སྟེ། ཉོན་མོངས་པ་སེར་སྣ་གནས་སུ་དག་པར་མཛད་པས་ཕྱག་རྒྱ་རིན་པོ་ཆེའི་སྒྲོམ་བུ་ཅན། ཡི་དྭགས་ཀྱི་བཅོམ་ལྡན་འདས་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་དམྱལ་བའི་འཇིག་རྟེན་དུ་ལྟ་བ་གནས་སུ་དག་པ། དམྱལ་བའི་ཐུབ་པ་སྟེ། ཉོན་མོངས་པ་ཞེ་སྡང་གནས་སུ་དག་པར་མཛད་པས་ཕྱག་རྒྱ་མེ་ཆུ་ཅན། དམྱལ་བའི་བཅོམ་ལྡན་འདས་ལ་ཕྱག་འཚལ་ལོ། །སྟེང་འོག་ཕྱོགས་བཞིའི་འཇིག་རྟེན་འདུལ་བའི་མགོན། །ཉོན་མོངས་དྲུག་འཇོམས་རྒྱུ་དྲུག་དག་པར་སྦྱོང་། །བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ། །ཧོ་སྒྱུ་འཕྲུལ་རང་བཞིན་གྱི་དཀྱིལ་འཁོར་ཕྱོགས་བཅུ་ན་བཞུགས་པ་ཐམས་ཅད་ལ་ཕྱག་འཚལ་ལོ། །ཨ་ལ་ལ་ཧོ། རང་བཞིན་གྱི་དཀྱིལ་འཁོར་འདི་ལྟར་སྣང་བ་ཐམས་ཅད་ལ་ཡང་ཕྱག་འཚལ་ལོ། །ཨ་ལ་ལ་ཧོ། རང་བཞིན་ལྷུན་གྱིས་གྲུབ་པའི་དཀྱིལ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་དཀྱིལ་འཁོར་བསམ་གྱིས་མི་ཁྱབ་ཅིང་། བརྗོད་ཀྱིས་མི་ལང་བའི་ལྷ་རྣམས་ལ་རྣལ་འབྱོར་པ་བདག་གིས་ལུས་རྡུལ་སྙེད་དུ་སྤྲུལ་ནས་ལུས་ངག་ཡིད་གསུམ་ཤིན་ཏུ་གནོང་འགྱོད་དང་བཅས་པས་ཕྱག་འཚལ་ལོ། །ཨ་ལ་ལ་ཧོ། གལ་ཏེ་རྣལ་འབྱོར་པ་གང་ཞིག་གི་དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣ་བར་ལན་ཅིག་ཐོས་པ་ཙམ་གྱིས་ཀྱང་དམྱལ་བ་ཆེན་པོར་མི་ལྟུང་ངོ་། །དེ་བས་ན་གུས་པས་ཕྱག་འཚལ་ལོ། །རང་བཞིན་སྒྱུ་འཕྲུལ་དཀྱིལ་འཁོར་ལ། གང་ཞིག་གུས་པས་ཕྱག་འཚལ་ན། ཉམས་ཆག་ཀུན་ཀྱང་བྱང་བར་འགྱུར། དམ་ཚིག་སྐོང་ནས་དངོས་གྲུབ་ཐོབ། ཅེས་དང་། དེ་ནས་ཁྲོ་བོའི་དལ་དུ་ཕྱག་འཚལ་བ། ཧོ་དགོངས་སུ་གསོལ། རང་རིག་པ་ཐབས་ཀྱི་རྒྱལ་པོ་ཁྲོ་བོ་ཐམས་ཅད་ཀྱི་རྗེ་བཙུན་ཆེན་པོ་སངས་རྒྱས་ཐམས་ཅད་ཀྱི་སྤྱི་དཔལ། བཅོམ་ལྡན་འདས་བླ་ན་མེད་པའི་དཔལ་ཆེན་པོ། ཆེ་མཆོག་ཧེ་རུ་ཀ་ལ་ཕྱག་འཚལ་ལོ། །རྡོ་རྗེ་ལྟ་བུའི་སྐུ་དུས་གསུམ་དུ་འགྱུར་བ་མི་མངའ་ཞིང་། ཞེ་སྡང་ཆེན་པོའི་ཐབས་ལ་མཁས་པས་དྲེགས་པ་ཕོ་མོའི་གདན་ལ་བཞུགས་པ། ཁྲོ་བོ་ཐམས་ཅད་ཀྱི་ཐུགས་ཀྱི་བདག་ཉིད། བཛྲ་ཧེ་རུ་ཀ་ལ་ཕྱག་འཚལ་ལོ། །ཆོས་ཉིད་སྟོང་པ་ཉིད་ཀྱི་དབྱིངས་ནས། སྐྱེ་བ་མེད་པའི་སྐུ་བརྙེས་པ་གཏི་མུག་ཆེན་པོའི་ཐབས་ལ་མཁས་པས་མ་ཧཱ་དེ་ཝའི་གདན་ལ་བཞུགས་པ། ཁྲོ་བོ་ཐམས་ཅད་ཀྱི་སྐུའི་བདག་ཉིད་བུདྡྷ་ཧེ་རུ་ཀ་ལ་ཕྱག་འཚལ་ལོ། །ཆོས་ཉིད་བྱང་ཆུབ་སེམས་ཀྱིས་ལོངས་སྤྱོད་རྫོགས་པའི་སྐུ་བརྙེས་པ། ང་རྒྱལ་ཆེན་པོའི་ཐབས་ལ་མཁས་པས་གཤིན་རྗེའི་གདན་ལ་བཞུགས་པ། ཁྲོ་བོ་ཐམས་ཅད་ཀྱི་ཡོན་ཏན་གྱི་བདག་ཉིད། རཏྣ་ཧེ་རུ་ཀ་ལ་ཕྱག་འཚལ་ལོ། །ཆོས་ཉིད་ཆགས་པ་མེད་པའི་དབྱིངས་ནས་བྱང་ཆུབ་སེམས་དཔའི་སྐུ་བརྙེས་པ། འདོད་ཆགས་ཆེན་པོའི་ཐབས་ལ་མཁས་པས་ཀླུའི་གདན་ལ་བཞུགས་པ། ཁྲོ་བོ་ཐམས་ཅད་ཀྱི་གསུང་གི་བདག་ཉིད། པདྨ་ཧེ་རུ་ཀ་ལ་ཕྱག་འཚལ་ལོ། །ཕྲིན་ལས་གྲུབ་པའི་དབྱིངས་ནས་སྤྲུལ་པ་མཆོག་གི་སྐུ་བརྙེས་པ་ཕྲག་དོག་ཆེན་པོའི་ཐབས་ལ་མཁས་པས་གནོད་སྦྱིན་གྱི་གདན་ལ་བཞུགས་པ། ཁྲོ་བོ་ཐམས་ཅད་ཀྱི་ཕྲིན་ལས་ཀྱི་བདག་ཉིད། ཀརྨ་ཧེ་རུ་ཀ་ལ་ཕྱག་འཚལ་ལོ། །སྦྱོར་བའི་དབྱིངས་ནས་ཕྱིན་ཅི་ལོག་གི་ལྟ་བ་འཇོམས་པའི་སྐུ་བརྙེས་པ། ག་ནའི་ཐབས་ལ་མཁས་པས་དྲང་སྲོང་གི་གདན་ལ་བཞུགས་པ། རཀྴ་ཧེ་རུ་ཀ་ལ་ཕྱག་འཚལ་ལོ། །དམ་ཚིག་གི་དབྱིངས་ནས་མྱོང་བྱེད་ཀྱི་རྟོག་པ་འཇོམས་པའི་སྐུ་བརྙེས་པ། ཉམས་པ་བསྐང་བའི་ཐབས་ལ་མཁས་པས་སྲིན་པོའི་གདན་ལ་བཞུགས་པ། ས་ནུ་ཧེ་རུ་ཀ་ལ་ཕྱག་འཚལ་ལོ། །གསང་བའི་དབྱིངས་ནས་སྐྱེ་གནས་ཀྱི་རྟོག་པ་འཇོམས་པའི་སྐུ་བརྙེས་པ མཚན་མའི་ཐབས་ལ་མཁས་པས་རླུང་ལྷའི་གདན་ལ་བཞུགས་པ། གུ་ཧྱ་ཧེ་རུ་ཀ་ལ་ཕྱག་འཚལ་ལོ། །སྒྲོལ་བའི་དབྱིངས་ནས་རེག་བྱའི་རྟོགས་པ་འཇོམས་པའི་སྐུ་བརྙེས་པ། ཏ་ནའི་ཐབས་ལ་མཁས་པས་བགེགས་ཀྱི་གདན་ལ་བཞུགས་པ། ཡཀྴ་ཧེ་རུ་ཀ་ལ་ཕྱག་འཚལ་ལོ། །བཞི་ཆོད། འཇིག་རྟེན་འདས་པའི་དུས་ན་སྔོན་བྱུང་བ། གདུག་པ་འདུལ་ཕྱིར་དུས་ལས་མི་འདའ་བའི། ཧེ་རུ་ཀ་དཔལ་རྣམས་ལ་ཕྱག་འཚལ་ལོ། །རང་བཞིན་དག་པའི་དབྱིངས་ནས་ཡུམ་ཆེན་མོའི་སྐུ་བརྙེས་པ། སྐུ་དཔལ་དུ་འབར་བས་རྔམ་པའི་ཆ་ལུགས་ཅན། །གསུང་དཔལ་དུ་འབར་བས་རྔམ་པའི་གདངས་སྐད་ཅན། །ཐུགས་དཔལ་དུ་འབར་བས་ཐུགས་རྗེ་ཆེན་པོ་སྟེ། །དཔལ་འབར་ཁྲོས་བས་རྒྱལ་མོ་ཆེ། །ཁྲོ་མོ་ཆེན་མོ་གནམ་ཞལ་དབྱིངས་ཕྱུག་མ་ལ་ཕྱག་འཚལ་ལོ། །ཆོས་ཉིད་དབྱིངས་ཀྱི་ཕྱག་རྒྱ་ལས་རྣམ་པར་ཐར་བའི་སྐུ་བརྙེས་པ། ཐབས་དང་ཤེས་རབ་འདུ་འབྲལ་མེད་པར་འཁྲིལ་བས་ཆ་ལུགས་གཙོ་མོ་དང་མཐུན་པ། བཛྲ་ཀྲོ་ཏི་ཤྭ་རི་མ་ལ་ཕྱག་འཚལ་ལོ། །མཉམ་ཉིད་བླང་དོར་མེད་པའི་དབྱིངས་ནས་རོལ་པ་ཡེ་ཤེས་ཀྱི་སྐུ་བརྙེས་པ། ཐབས་དང་ཤེས་རབ་འདུ་འབྲལ་མེད་པར་འཁྲིལ་བས་ཆ་ལུགས་གཙོ་མོ་དང་མཐུན་པ། བྷུདྷ་ཀྲོ་དྷི་ཤྭ་རི་མ་ལ་ཕྱག་འཚལ་ལོ། །བྱམས་མགོན་ཆོས་ཉིད་ཀྱི་དབྱིངས་ནས་རོལ་པ་ཡེ་ཤེས་ཀྱི་སྐུ་བརྙེས་པ། ཐབས་དང་ཤེས་རབ་འདུ་འབྲལ་མེད་པར་འཁྲིལ་བས་ཆ་ལུགས་གཙོ་མོ་དང་མཐུན་པ་རཏྣ་ཀྲོ་ཏི་ཤྭ་རི་མ་ལ་ཕྱག་འཚལ་ལོ། །ཆོས་ཉིད་པདྨའི་དབྱིངས་ནས་སྐྱོན་བྲལ་པདྨའི་སྐུ་བརྙེས་པ་ཐབས་དང་ཤེས་རབ་འདུ་འབྲལ་མེད་པར་འཁྲིལ་བས་ཆ་ལུགས་གཙོ་མོ་དང་མཐུན་པ། པདྨ་ཀྲོ་དྷི་ཤྭ་རཱི་མ་ལ་ཕྱག་འཚལ་ལོ། །ལས་རབ་རོལ་པའི་དབྱིངས་ནས། དོན་གྲུབ་མཆོག་གི་སྐུ་བརྙེས་པ། ཐབས་དང་ཤེས་རབ་འདུ་འབྲལ་མེད་པར་འཁྲིལ་བས་ཆ་ལུགས་གཙོ་མོ་དང་མཐུན་པ། ཀརྨ་ཀྲོ་དྷི་ཤྭ་རི་མ་ལ་ཕྱག་འཚལ་ལོ། །དྲོད་ལས་སྐྱེས་པ་འཇོམས་པ་ལས་སྤྲུལ་པ་སྟེ། །རཀྴ་ཀྲོ་ཏི་ཤྭ་རི་མ་ལ་ཕྱག་འཚལ་ལོ། །མངལ་ལས་སྐྱེས་པ་འཇོམས་པ་ལས་སྤྲུལ་པ་སྟེ། །ས་ནུ་ཀྲོ་ཏི་ཤྭ་རི་མ་ལ་ཕྱག་འཚལ་ལོ། །བརྫུས་ལས་སྐྱེས་པ་འཇོམས་པ་ལས་སྤྲུལ་པ་སྟེ། །གུ་ཧྱ་ཀྲོ་ཏི་ཤྭ་རི་མ་ལ་ཕྱག་འཚལ་ལོ། །སྒོ་ང་ལས་སྐྱེས་པ་འཇོམས་པ་ལས་སྤྲུལ་པ་སྟེ། །ཡཀྴ་ཀྲོ་དྷི་ཤྭ་རི་མ་ལ་ཕྱག་འཚལ་ལོ། །བཞི་ཆོད། ཁྲོ་མོ་དབྱིངས་ཕྱུག་སྐུ་ལ་འཁྲིལ་མཛད་ཅིང་། །མཁའ་འགྲོ་མི་བཟད་འབར་བའི་སྤྲིན་འཕྲོ་བ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །ཁྲོ་མོ་སྔོན་མོ་བམ་དབྱུག་འཛིན། །ཀོའུ་རི་མ་ལ་ཕྱག་འཚལ་ལོ། །ཁྲོ་མོ་སེར་མོ་མདའ་གཞུ་འཛིན། །ཙཽ་རི་མ་ལ་ཕྱག་འཚལ་ལོ། །ཁྲོ་མོ་དམར་མོ་ཆུ་སྲིན་འཛིན། །པྲ་མོ་ཧཱ་ལ༴ ཁྲོ་མོ་མཐིང་ནག་རྡོ་རྗེ་འཛིན། །བཻ་ཏཱ་ལི་ལ༴ ཁྲོ་མོ་དམར་སེར་བྱིས་རྒྱུ་འཛིན། །པུཀྐཱ་སཱི་ལ༴ ཁྲོ་མོ་ལྗང་གུ་དུང་ཁྲག་འཐུང་། །གསྨ་རི་ལ༴ ཁྲོ་མོ་ནག་མོ་བྱིས་སྙིང་ཟ། །སྨེ་ཤ་ནི་ལ༴ ཁྲོ་མོ་སེར་སྐྱ་མཆོག་ལུས་འདྲལ། །ཙཎྜ་ལི་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཡེ་ཤེས་སྐུ་མཆོག་འཇིགས་བྱེད་གྱད་ཀྱིས་བཞུགས། །ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོ། །སིང་ཧ་ཁ་རོ་བསྣོལ་སེར་སེང་། སེང་གེའི་དབུ་ལ༴ བྱཱ་ཀྲི་མནན་ལྟར་བསྣོལ་དམར་སྟག །སྟག་གི་དབུ་ལ༴ སྲི་ལ་ནག་མོ་བྱིས་ལྡག་ཝ། ཝ་ཡི་དབུ་ལ༴ ཤྭ་ན་འདྲལ་ལྟ་མཐིང་ག་སྤྱང་། སྤྱང་མོའི་དབུ་ལ༴ གྲི་ཌྷ་གྲི་དམར་རྒྱུ་འདྲེན་རྒོད། བྱ་རྒོད་དབུ་ལ༴ ཀངྐ་ཞིང་ཕྲག་སྣར་མགོ་རིང་། དུར་བྱའི་དབུ་ལ༴ ཀཱཾ་ཀ་ཁ་རོ་བན་ཀྲི་ནག། བྱ་རོག་དབུ་ལ༴ ཧུ་ལུ་མཐིང་ག་རྡོ་རྒྱུ་འུག། འུག་པའི་དབུ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། ཕྲ་མིན་ཆེན་མོ་བརྒྱད་ལ༴ སྒོ་མ་སྔོན་མོ་ལྕགས་ཀྱུ་འཛིན། རྟ་གདོང་མ་ལ༴ སྒོ་མ་སེར་མོ་ཞགས་པ་འཛིན། ཕག་གདོང་མ་ལ༴ སྒོམ་དམར་མོ་ལྕགས་སྒྲོག་འཛིན། སེང་གདོང་མ་ལ༴ སྒོ་མ་ལྗང་གུ་དྲིལ་བུ་འཛིན། སྤྱང་གདོང་མ་ལ༴ རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་སྲུང་། །སྒོ་སྐྱོང་ཁྲོ་མོ་བཞི་ལ༴ ཆོས་ཉིད་རྣམ་དག་ངང་ལས་ཅིར་ཡང་སྣང་། །སྣ་ཚོགས་ཅིར་ཡང་བསྒྱུར་བའི་སྐུ་མངའ་ཞིང་། །སྲིད་གསུམ་ཞིང་དུ་སྦྱོར་བའི་གཡང་གཞི་གསོལ། །སྟོང་ཁམས་གནས་སྤོར་ཉི་ཟེར་ཞགས་པ་འཕེན། །སྤོར་བྱེད་ཉི་ཞགས་འཕེན༴ རྣམ་རྟོག་ནད་རྣམས་རྟག་ཏུ་བསལ་བའི་ཕྱིར། །མི་འབྲལ་ཅིར་ཡང་བསྒྱུར་བའི་སྐུ་མངའ་ཞིང་། །ཉོན་མོངས་ལྔ་གཞོམ་ཐོད་ཁྲག་མདུང་ཐུང་འཕེན། །ཐུགས་རྗེ་ཐབས་མཁས་མི་རྣམས་གནས་སུ་སྤོར། །སྤོར་བྱེད་མདུངཐུང་འཕེན་ལ༴ མ་རིག་སེམས་ཅན་དབྱིངས་ལ་གཟུད་པའི་ཕྱིར། །ཆོས་ཉིད་བདེ་བའི་སྐུ་ལས་གཡོ་བ་མེད། །སྟོང་ཁམས་དབང་སྡུད་དུང་ཁྲག་ཐུགས་ཀར་བསྐྱིལ། །བརྗིད་པའི་རོལ་པས་སྟོང་ཁམས་གནས་སུ་སྤོར། །སྤོར་བྱེད་དྲིལ་འཁྲོལ་མ་ལ༴ ཐུགས་རྗེ་བྱམས་པས་ཀུན་ལ་ཁྱབ་པ་ཡི། །མདོག་བཟང་དཀར་སེར་ཞི་རྒྱས་ལྡན་པའི་སྐུ། །འདོད་ལྔ་དབང་སྡུད་དུང་ཁྲག་ཐུགས་ཀར་འཛིན། །ལྷ་རྣམས་གནས་སྤོར་རྡོ་རྗེ་ཁྱུ་ཆེན་འཛིན། །སྤོར་བྱེད་ཁྱུང་ཐོགས་མ་ལ་ཕྱག་འཚལ་ལོ། །སྡུག་བསྔལ་མི་བཟད་ཡོངས་སུ་གཞིག་པའི་ཕྱིར། །མཐིང་ནག་ཆེན་པོ་རྔམ་པའི་སྐུ་མངའ་ཞིང་། །གཡུལ་ཆེན་རབ་བཟློག་རྡོ་རྗེ་སྐར་མདའ་འཕེན། །ལྷ་མིན་གནས་སྤོར་དུང་ཁྲག་ཞལ་དུ་གསོལ། །སྤོར་བྱེད་སྐར་མདའ་འཕེན་ལ༴ ལོག་པར་ལྟ་བ་དབང་དུ་མཛད་པའི་ཕྱིར། །སྐུ་མདོག་དམར་ནག་དབང་དྲག་འཇོམས་པའི་ཞལ། །ཕྱི་ནང་སྒྲིབ་གཉིས་སྦྱངས་ནས་བདེ་བའི་ཕྱིར། །རྡོ་རྗེ་གློག་ཕྲེང་ཡི་དྭགས་གནས་སུ་སྤོར། །སྤོར་བྱེད་གློག་ཕྲེང་ཅན་ལ༴ གཏི་མུག་རྨོངས་པ་དབང་དུ་མཛད་པའི་ཕྱིར། །དཀར་ནག་ཕྱེད་མ་ཞི་དྲག་ལྡན་པའི་སྐུ། །གཏི་མུག་སྟོངས་མཛད་ཐོད་ཁྲག་ཞལ་དུ་གསོལ། །བྱོལ་སོང་གནས་སུ་སྤོར་བས་གློག་རྡེབ། །སྤོར་བྱེད་གློག་ཤ་རྡེབ་ལ༴ སྡུག་བསྔལ་བརྒྱད་དང་བཅུ་དྲུག་སྦྱང་བའི་ཕྱིར། །སྐུ་མདོག་སེར་ནག་དྲག་པོ་རྒྱས་པའི་སྐུ། །དམྱལ་བ་སྟོངས་མཛད་ཐོད་ཁྲག་ཞལ་དུ་གསོལ། །དམྱལ་བ་གནས་སྤོར་རྡོ་རྗེ་རལ་གྲི་འཛིན། །སྤོར་བྱེད་རལ་གྲི་འཛིན་ལ་ཕྱག་འཚལ་ལོ། །དབྱིངས་དང་ཡེ་ཤེས་མཉམ་སྦྱོར་རོལ་པ་ལས། །འགྲོ་དོན་མཛད་པའི་ཐུབ་པ་ཆེན་པོ་རྣམས། །ལས་ངན་ཞི་བས་འདུལ་བར་མི་འགྱུར་བས། །རྒྱུད་དྲུག་རྣམས་ལ་དབང་དྲག་རོལ་པར་མཛད། །སྤོར་བྱེད་བརྒྱད་དུ་མཚན་གསོལ་མི་བཟད་མ། །ཀུན་ཀྱང་འཇིག་ཚུལ་ཆེ་ལ་སྙིང་རྗེར་ལྡན། །སྐམ་གཤེར་སྤེལ་བའི་གདན་ལ་བརྐྱང་བསྐུམ་བཞུགས། །ཐོད་ཁྲག་མཚོན་ཆ་འཛིན་ཅིང་གཡང་གཞི་གྱོན། །རལ་བ་དབྱིངས་འབར་བཤུག་གླུས་སྟོང་ཁམས་འགེངས། །ཧ་ཧའི་གད་འདེབས་རྒྱུ་དྲུག་སེམས་ཅན་སྐྱོངས། །རྒྱུ་དྲུག་འཁོར་བའི་སེམས་ཅན་བདག་འདྲ་བ། །ལྷ་མཆོག་ཁྱེད་ཀྱི་སྤྱན་སྔར་ས་ལེ་བས། །འགྲོ་བ་རིགས་དྲུག་སེམས་ཅན་ཀུན་སྦྱངས་ནས། །ལྷ་མཆོག་ཁྱེད་ཀྱིས་དངོས་གྲུབ་སྩལ་དུ་གསོལ། །རྣལ་འབྱོར་དམར་ནག་ཏྲི་ཤུལ་འཛིན། །གཡག་མགོ་ཅན་ལ་ཕྱག་འཚལ་ལོ། །རྣལ་འབྱོར་དམར་སེར་རྩེ་ལྔ་འཛིན། །སྦྲུལ་མགོ་ཅན་ལ༴ རྣལ་འབྱོར་སེར་ནག་དབྱུག་སྡིག་འཛིན། །གཟིག་མགོ་ཅན་ལ༴ རྣལ་འབྱོར་དཀར་དམར་དུང་དམར་འཛིན། །སྲི་མོ་མགོ་ལ༴ རྣལ་འབྱོར་སེར་མོ་འཁོར་ལོ་འཛིན། །ཕ་ཝང་མགོ་ཅན༴ རྣལ་འབྱོར་དམར་སྐྱ་བམ་དབྱུག་འཛིན། །དྲེད་མགོ་ཅན་ལ༴ རྣལ་འབྱོར་དམར་སེར་རྒྱུ་ཞགས་འཛིན། །དོམ་མགོ་ཅན་ལ༴ རྣལ་འབྱོར་སྔོན་མོ་བུམ་པ་འཛིན། །ཆུ་སྲིན་མགོ་ལ༴ རྣལ་འབྱོར་སྔོ་སྐྱ་པུཎྜ་འཛིན། །སྡིགས་པའི་མགོ་ལ༴ རྣལ་འབྱོར་ནག་མོ་ཐོད་རློན་འཆང་། །ཁྲ་མགོ་ཅན་ལ༴ རྣལ་འབྱོར་དམར་ནག་རྒྱུ་ཞགས་འཛིན། །ཝ་མགོ་ཅན་ལ༴ རྣལ་འབྱོར་ནག་མོ་བམ་ཆེན་འཛིན། །སྟག་མགོ་ཅན་ལ༴ རྣལ་འབྱོར་དམར་པོ་ཁོག་ཆེན་འཛིན། །རྒོད་མགོ་ཅན་ལ༴ རྣལ་འབྱོར་དམར་ནག་རྡོར་དབྱུག་འཛིན། །རྟ་མགོ་ཅན༴ རྣལ་འབྱོར་དཀར་མ་བྷནྡྷ་འཛིན། །ཁྱུང་མགོ་ཅན༴ རྣལ་འབྱོར་དམར་སེར་བྱིས་བཾ་འཛིན། །ཁྱི་མགོ་ཅན༴ རྣལ་འབྱོར་དཀར་དམར་པདྨ་འཛིན། །པུ་ཤུད་མགོ་ལ༴ རྣལ་འབྱོར་དམར་སྐྱ་བྷནྡ་འཛིན། །ཤ་བའི་མགོ་ལ༴ རྣལ་འབྱོར་ལྗང་ནག་རྔེའུ་ཆུང་འཛིན། །སྤྱང་མགོ་ཅན༴ རྣལ་འབྱོར་དམར་སེར་མེ་སྒྲོན་འཛིན། །སྐྱིན་མགོ་ཅན༴ རྣལ་འབྱོར་ལྗང་སེར་མཆེ་བ་འཛིན། །ཕག་མགོ་ཅན༴ རྣལ་འབྱོར་ལྗང་སྔོན་དུང་ཁྲག་འཛིན། །ཁཱ་མགོ་ཅན༴ རྣལ་འབྱོར་དམར་ལྗང་བཾ་ཆེན་འཛིན། །བ་ལང་མགོ་ལ༴ རྣལ་འབྱོར་ལྗང་ནག་བདུད་རྩི་འཛིན། །སྦྲུལ་མགོ་ཅན༴ རྣལ་འབྱོར་ནག་མོའི་ལྕགས་ཀྱུ་འཛིན། །ཁུ་བྱུག་མགོ་ལ༴ རྣལ་འབྱོར་སྔོན་མོ་ཞགས་པ་འཛིན། །ར་མགོ་ཅན༴ རྣལ་འབྱོར་དམར་པོ་ལྕགས་སྒྲོག་འཛིན། །སེང་མགོ་ཅན༴ རྣལ་འབྱོར་ལྗང་ནག་དྲིལ་བུ༴ སྐྱ་ཀའི་མགོ་ལ༴ དཔལ་གྱི་འཁོར་ཚོགས་བཛྲ་ཨ་ར་ལི། །མཁའ་ལ་ཤུགས་འགྲོ་མ་ཚོགས་དབང་ཕྱུག་མ། །རྣལ་འབྱོར་ཉི་ཤུ་བརྒྱད་ལ༴ ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །རྡོ་རྗེ་གཞོན་ནུའི་སྐུ་ལ༴ འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །འཁོར་ལོ་རྒྱས་འདེབས་ཡུམ་ལ༴ འདོད་པའི་སྐྱོན་སྤངས་སྐྱེ་ལ་དབང་མཛད་པ། །ཁྲོ་ཆེན་ཧཱུཾ་ཀ་ར་ལ༴ མ་བྱིན་ལེན་སྤངས་ཡོ་བྱད་དབང་མཛད་པ། །ཁྲོ་ཆེན་རྣམ་པར་རྒྱལ་ལ༴ སྲོག་གཅོད་སྐྱོན་སྤངས་ཚེ་ལ་དབང་མཛད་པ། །ཁྲོ་ཆེན་གཤིན་རྗེའི་གཤེད་ལ༴ ཕྲ་མའི་སྐྱོན་སྤངས་ཆོས་ལ་དབང་མཛད་པ། །ཁྲོ་ཆེན་རྟ་མཆོག་དཔལ༴ ངག་རྩུབ་སྐྱོན་སྤངས་ལས་ལ་དབང་མཛད་པ། །ཁྲོ་ཆེན་བདུད་རྩི་འཁྱིལ་ལ༴ ལོག་པར་ལྟ་སྤངས་ཡེ་ཤེས་དབང་མཛད་པ། །ཁྲོ་ཆེན་དབྱུག་སྔོན་ཅན་ལ༴ རྫུན་གྱི་སྐྱོན་སྤངས་མོས་ལ་དབང་མཛད་པ། །ཁྲོ་ཆེན་མི་གཡོ་མགོན་ལ༴ ངག་འཁྱལ་སྐྱོན་སྤངས་སེམས་ལ་དབང་མཛད་པ། །ཁྲོ་ཆེན་འདོད་པའི་རྒྱལ་ལ༴ གནོད་སེམས་སྐྱོན་སྤངས་རྫུ་འཕྲུལ་དབང་མཛད་པ། །ཁྲོ་ཆེན་ཁམས་གསུམ་རྒྱལ་ལ༴ བརྣབ་སེམས་སྐྱོན་སྤངས་སྨོན་ལམ་དབང་མཛད་པ། །ཁྲོ་ཆེན་སྟོབས་པོ་ཆེ་ལ༴ ཡེ་ཤེས་ཕ་རོལ་ཕྱིན་མ་སྟེ། །སྒྲ་འབྱིན་མ་ལ༴ ཤེས་རབ་ཕ་རོལ་ཕྱིན་མ་སྟེ། །རྡོ་རྗེ་སྙེམས་ལ༴ ཚུལ་ཁྲིམས་ཕ་རོལ་ཕྱིན་མ་སྟེ། །རྡོ་རྗེ་སྡེར་ལ༴ བསམ་གཏན་ཕ་རོལ་ཕྱིན་མ་སྟེ། །དུར་ཁྲོད་མ་ལ༴ ཐབས་ཀྱི་ཕ་རོལ་ཕྱིན་མ་སྟེ། །གཏུན་ཁུང་མ་ལ༴ བརྩོན་འགྲུས་ཕ་རོལ་ཕྱིན་མ་སྟེ། །རབ་གཏུམ་མ་ལ༴ སྦྱིན་པའི་ཕ་རོལ་ཕྱིན༴ མདའ་སྙེམས་མ་ལ༴ སྨོན་ལམ་ཕ་རོལ་ཕྱིན༴ སྐྱོང་བྱེད་མ་ལ༴ སྟོབས་ཀྱི་ཕ་རོལ་ཕྱིན༴ གསོད་བྱེད་མ་ལ༴ བཟོད་པའི་ཕ་རོལ་ཕྱིན༴ སྐུལ་བྱེད་མ་ལ༴ ཕྱོགས་བཅུ་དྲེགས་པ་བསྣོལ་བའི་གདན་སྟེང་ནས། །ཡེ་ཤེས་བསྐལ་པའི་མེ་དཔུང་འབར་བའི་ཀློང་། །བདུད་འདུལ་ཡབ་ཡུམ་རྣམས་ལ༴ དམིགས་མེད་ཆོས་ཀྱི་སྐུ་ལ༴ ལོངས་སྤྱོད་རྫོགས་པའི་སྐུ་ལ༴ ཅིར་ཡང་སྤྲུལ་པའི་སྐུ་ལ༴ མི་འགྱུར་རྡོ་རྗེའི་སྐུ་ལ༴ མངོན་པར་བྱང་ཆུབ་སྐུ་ལ༴ དུས་གསུམ་རྒྱལ་བ་རྣམས་ཀྱི་བསྒྲུབ་པ་ཡི། །ཚོགས་གཉིས་རྫོགས་ནས་ཡོན་ཏན་མཐར་ཕྱིན་པ། །སྐུ་དང་ཡེ་ཤེས་ཚོགས་ལ༴ འབྱུང་བ་ལྔ་ལས་སྐུར་བཞེངས་མ། །རྟག་རྒྱལ་ལྔ་ལ༴ རང་བཞིན་དབྱིངས་ལས་གྲུབ་པ་མོ། །དབྱིངས་ཕྱུག་ལྔ་ལ༴ རྒྱུ་འབྲས་བྱང་ཆུབ་སེམས་ཀྱི་སྤྲུལ་པ་སྟེ། །མཁའ་འགྲོ་སུམ་ཅུ་གཉིས་ལ༴ ག་ཎ་པ་ཏིའི་སྤྲུལ་པ་སྟེ། ཀིང་ཀ་ར་ལ༴ ལྷ་མོ་དཔལ་མོའི་སྤྲུལ་པ་སྟེ། །ཀིང་ཀ་རི་ལ༴ འཇིག་རྟེན་ཁམས་ལ་དབང་མཛད་མ། །འཇིགས་བྱེད་དཔལ་འབར་རལ་པ་ཅན། །འདོད་པའི་རོ་ལ་ཆགས་པ་མོ། །མམོའི་ཚོགས་ལ༴ ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་། །བཀའ་བཞིན་རྗེས་སུ་བསྒྲུབ་པའི་གྲོགས་མཛད་མ། །དམ་ཅན་རྒྱ་མཚོའི་ཚོགས་ལ༴ སྟོན་པ་ཀུན་ཏུ་ཟང་པོ་ཡིས། །དེ་སྐད་ཅེས་ནི་བཀལ་སྩལ་པ། །གང་གིས་སྒྱུ་འཕྲུལ་ཁྲོ་བོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་དག་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང། །ན་རག་གནས་ཀྱང་དོང་སྤྲུག་སྟེ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། བཞི་པ་རྡོ་རྗེ་སེམས་དཔའི་སྒོམ་བཟླས་ནི༴ ཨཱཿ ལྷུག། བདག་ཉིད་ཐ་མལ་སྤྱི་བོ་རུཿ པད་དཀར་ཟླ་བའི་གདན་གྱི་སྟེང་ཿ ཧཱུཾ་ལས་བླ་མ་རྡོ་རྗེ་སེམསཿ དཀར་གསལ་ལོངས་སྤྱོད་རྫོགས་པའི་སྐུཿ རྡོ་རྗེ་དྲིལ་འཛིན་སྙེམ་མ་འཁྲིལཿ ཁྱེད་ལ་ཕྱག་འཚལ་སྡིག་པ་སྦྱོང་ཿ འགྱོད་སེམས་དྲག་པོས་མཐོལ་ལོ་བཤགསཿ ཕྱིན་ཆད་སྲོག་ལ་བབ་ཀྱང་སྡོམཿ ཁྱེད་ཐུགས་ཟླ་བ་རྒྱས་པའི་སྟེང་ཿ ཧཱུཾ་ཡིག་ཐ་མར་སྔགས་ཀྱིས་བསྐོརཿ བཟླས་པ་སྔགས་ཀྱིས་རྒྱུད་བསྐུལ་ནསཿ ཡབ་ཡུམ་བདེ་རོལ་སྦྱོར་མཚམས་ནསཿ བདུད་རྩི་བྱང་ཆུབ་སེམས་ཀྱི་སྤྲིནཿ ག་བུར་རྡུལ་ལྟར་འཛག་པ་ཡིསཿ བདག་དང་ཁམས་གསུམ་སེམས་ཅན་གྱིཿ ལས་དང་ཉོན་མོངས་སྡུག་བསྔལ་རྒྱུཿ ནད་གདོན་སྡིག་སྒྲིབ་ཉེས་ལྟུང་གྲིབཿ མ་ལུས་བྱང་བར་མཛད་དུ་གསོལཿ ཨོཾ་བཛྲ་ས་ཏྭ་ས་མ་ཡཱཿ མ་ནུ་པཱ༴ སོགས། སཏྭ་ཨཱཿ དེ་ལྟར་ཡིག་བརྒྱ་བཟླའ་དུས་དམིགས་པ་ནིཿ རྡོར་སེམས་ཐུགས་སྲོག་སྔགས་འཕྲེང་བཅས་པ་ལས། །བདེ་ཆེན་ཡེ་ཤེས་བདུད་རྩི་འོ་རྒྱུན་བཞིན། །བབས་པས་སྐུའི་དབྱིབས་བརྒྱུད་དེ་སྦྱོར་མཚམས་ནས། །ཚངས་བུག་ཏུ་ཞུགས་ནད་གདོན་སྡིག་སྒྲིབ་ཀུན། །རྣག་ཁྲག་སྲོག་ཆགས་དུད་སོལ་ཁུ་རླངས་བཞིན། །ལྷག་མེད་སྦྱངས་ཏེ་རིམ་དགུའི་ས་འོག་ཏུ། །ལས་གཤིན་ཁར་སོང་དུས་མིན་འཆི་བཟློག་བསམ། །ལྔ་པ་འགྱོད་ཚངས་བཤགས་པའི་རིམ་པ་ནི། །སྟོབས་བཞིའི་གནད་དོན་དྲན་བཞིན་འདི་སྐད་བརྗོད། །ཧོ་དགོངས་སུ་གསོལ། བཅོམ་ལྡན་འདས་དཔལ་ཀུན་ཏུ་བཟང་པོ་དང་། །རིགས་ལྔའི་བདེ་བར་གཤེགས་པ་ལ་སོགས་པ་སྒྱུ་འཕྲུལ་ཞི་ཁྲོའི་ལྷ་ཚོགས་རྣམས་ཐུགས་རྗེ་ཆེ་ལ་ཐབས་མཁས་པས་ཀུན་ལ་སྙོམས་པའི་ཡབ་ཡུམ་ལགས། །སྔར་འདས་པའི་རིག་འཛིན་གྱི་ས་ལ་བཞུགས་པ་རྣམས་ཀྱི་དགེ་བའི་བཤེས་གཉེན་ལགས་ན། བདག་ཅག་ལ་སོགས་པ་གསང་སྔགས་ཀྱི་སྒོར་ཞུགས་སོ་འཚལ་རྣམས་ཀྱི། བདེ་བར་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། དགོངས་སྤྱོད་དམ་པར་གདེང་དུ་མ་ཆུད་པའི་དབང་གིས་བཀའ་གསང་བ་ཆེན་པོ་སྤྱད་ཉེས་པར་གྱུར་ཏེ། རྩ་བ་དང་ཡན་ལག་གི་དམ་ཚིག་ལས་འགོངས་ཤིང་འདས་པར་གྱུར་པས། ལ་ལས་ནི་དེ་བཞིན་གཤེགས་པའི་བཀའ་ངོ་བོ་ཉིད་ཀྱིས་མ་བཅོས་པ་ལ། གཟུ་ལུམ་དང་རིས་གཅོད་བགྱིས། ལ་ལས་ནི་དམ་པ་སྟོན་པའི་རྡོ་རྗེ་སློབ་དཔོན་ལ་སྙིང་ནས་སྨད་པ་དང་། བཀའ་བརྐུ་བ་དང་། ཐུགས་དང་འགལ་བའི་ལས་མང་པོ་བགྱིས། ལ་ལས་ནི་དམ་ཚིག་གཅིག་པའི་རྡོ་རྗེ་སྤུན་གྲོགས་ལ། ལྟ་སྤྱོད་ལོག་པ་དང་། ངན་སེམས་དང་འཕྱ་སེམས་དང་། རྐུན་འཕྲོག་དང་། བརྡེག་བཙོག་དང་། ངན་དུ་སྨྲ་བ་ལ་སོགས་པ་སྐུའི་དམ་ཚིག་ཉམས་པའི་ལས་བགྱིས། ལ་ལས་ནི་དང་པོ་རྡོ་རྗེ་སློབ་དཔོན་གྱིས་ལུང་ཕོག་སྟེ། བཀའ་དྲིན་མནོས་པ་ལས། ཡི་དམ་ལྷ་ཡི་ཏིང་འཛིན་མ་གསལ་ཞིང་། སྒོམ་སྒྲུབ་རྔོ་མ་ཐོགས་པ་དང་། འཛབ་དང་བཟླས་བརྗོད་རྒྱུན་ཆད་པ་དང་། བསྙེན་བསྒྲུབ་ཟབ་མོ་དུས་ལས་ཡོལ་ཏེ། ལོ་ཟླ་འདས་པ་ལ་སོགས་པའི་ལས་བགྱིས། ལ་ལས་ནི་བཀའ་གསང་བ་ཟབ་མོའི་ལྟ་སྤྱོད་མངོན་དུ་ཕྱུང་ཞིང་། སྦས་པའི་གསང་བར་འོས་པ་དང་། གསང་བར་གཉེར་གཏད་པ་རྣམས་གཞན་ལ་སྤེལ་བ་ལ་སོགས་པ་སྐུ་གསུང་ཐུགས་ཀྱི་དམ་ཚིག་ཉམས་པའི་དབང་གི་ལུས་ངག་ཡིད་གསུམ་འཚིག་པའི་ལས་བགྱིས་པ་འདི་དག། ཕྱོགས་བཅུའི་སྒྱུ་འཕྲུལ་རང་བཞིན་གྱི་དཀྱིལ་འཁོར་དང་། གྲུབ་པའི་ས་ལ་བཞུགས་པའི་རིག་འཛིན་ཕོ་མོ་རྣམས་དང་ཡེ་ཤེས་དང་ལས་ལ་གྲུབ་པའི་ལེགས་ཉེས་ཀྱི་སྟངས་འཛིན་ཅིང་དམ་ཚིག་གི་རྗེས་གཅོད་པའི་དམ་ཅན་རྒྱ་མཚོ་རྣམས་ལ་མཆོད་པ་འདི་དག་ལ་བརྟེན་ནས། འགྱོད་ཚངས་སུ་གསོལ་བའི་མདོ་ནི་སྐུ་ཡི་དམ་ཚིག་ལས་འདས་པའི་དབང་གིས། འཇིག་རྟེན་འདིར་ཡང་ལུས་མཛེ་ཤུ་ལ་སོགས་པའི་སྡུག་བསྔལ་འབྱུང་ཞིང་། ཚེ་འཕོས་ཀྱང་དམྱལ་བ་ཆེན་པོའི་ཡང་གཏིང་ཐར་བའི་དུས་མེད་པའི་གནས་སུ་ལུས་གཤག་གཏུབ་ལ་སོགས་སྡུག་བསྔལ་གྱི་རྒྱུ་འདི་ལྟ་བུ་བསགས་པ་རྣམས་མཐོལ་ཞིང་བཤགས་སོ། །གསུང་གི་དམ་ཚིག་ལས་འདས་པའི་དབང་གིས། འཇིག་རྟེན་འདི་དང་ཕྱི་མའི་ངག་དིག་ལྐུག་ལ་སོགས་པ་ངག་གི་རྒྱུ་འདི་ལྟ་བུ་བསགས་པ་རྣམས་མཐོལ་ཞིང་བཤགས་སོ། །ཐུགས་ཀྱི་དམ་ཚིག་ལས་འདས་པའི་དབང་གིས། འཇིག་རྟེན་འདི་དང་ཕྱི་མའི་སེམས་སྨྱོ་འབོག་ལ་སོགས་པ་དང་། ངན་སོང་གི་རྒྱུ་བསགས་པ་རྣམས་མཐོལ་ཞིང་བཤག་སོ། །ལ་ལས་ནི་དབང་མ་ནོས་པར་རྡོ་རྗེ་སློབ་དཔོན་གྱི་ས་བཟུང་ནས། བཀའ་ཟབ་མོ་ལ་དབང་ཟོས་ཏེ་བརྫབས་པ་དང་། ལ་ལས་ནི་གབ་པའི་མན་ངག་མ་གཏོགས་པར་སྦས་པའི་གསང་བ་ལ་མངོན་པར་འཆེལ་ཏེ། གསང་སྔགས་སྤྱོད་པ་ཟབ་མོ་བབ་ཅོལ་དུ་སྤྱད་པས། ཁྲ་དང་སྤྱང་ཀི་ལྟ་བུའི་སྡིག་པའི་ལས་བགྱིས་ཏེ་དམྱལ་བ་མི་བཟད་ལས་བགྱིས་རྣམས་མཐོལ་ཞིང་བཤགས་སོ། ལ་ལས་ནི་ཡེ་ཤེས་ཀྱི་ལྷ་དང་རྡོ་རྗེ་སློབ་དཔོན་གྱི་གསང་བའི་དམ་ཚིག་ཚུལ་བཞིན་མནོས་པ་ལས། གསོག་འཇོག་གིས་བཀའ་བསླུས་ཏེ། ཚོགས་ཀྱི་སྤྱང་ཀི་དང་། ཁྲལ་གྱི་གསོག་འཇོག་དང་། གྲོགས་ཟླ་ལ་ཚོད་ཡོད་པ་དང་། རྔམ་ཆོས་ཀྱི་ཕུད་དང་འཕགས་པ་ལ་བསྔོས་པ་ལ་ཐུགས་ཐུབ་བགྱི། ལ་ལས་ནི་འཇིག་རྟེན་འདི་ཡི་སྐད་ཅིག་ཡུད་ཙམ་ལས་མ་གཏོགས་པ། འཇིག་རྟེན་ཕྱི་མ་ངོ་མ་འཚལ་ཏེ། གྲོགས་ཀྱི་ངོ་དགའ་དང་། བཙན་ཐབས་དང་དྲེགས་ཆོས་ཀྱི་ལས་བགྱིས་ཏེ། གསང་སྔགས་ཀྱི་གཞུང་མ་བསྙེགས་པ་མཐོལ་ལོ་བཤགས་སོ། །གཞན་ཡང་ཡན་ལག་གི་དམ་ཚིག་ཉི་ཤུ་རྩ་ལྔ་ལ་སྤྱད་པར་བྱ་བའི་དམ་ཚིག་ལྔ་ལས་འདས་ཏེ། ཏ་ན་ག་ན་གཉིས་དང་། མ་བྱིན་པར་ལེན་པ་དང་། རྫུན་དུ་སྨྲ་བ་དང་། ངག་འཁྱལ་བ་རྣམས་ལས་གཞུང་མ་བསྙེགས་པ་རྣམས་མཐོལ་ཞིང་བཤགས་སོ། །མི་སྤང་བའི་དམ་ཚིག་ལྔ་ལས་འདས་ཏེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་རྣམས་ལས་གཞུང་མ་བསྙེགས་པ་རྣམས་མཐོལ་ལོ་བཤགས་སོ། །ད་དུང་བླང་བའི་དམ་ཚིག་ལྔ་ལས་འདས་ཏེ། དྲི་ཆེན་དང་། དྲི་ཆུ་དང་། དམར་ཆེན་དང་། མང་ས་དང་། རྡོ་རྗེ་ཟིལ་བ་རྣམས་ལས་གཞུང་མ་བསྙེགས་པ་མཐོལ་ཞིང་བཤགས་སོ། །ཤེས་པར་བྱ་བའི་དམ་ཚིག་ལྔ་ལས་འདས་ཏེ། ཕུང་པོ་ལྔ་དང་། འབྱུང་བ་ལྔ་དང་། དབང་པོ་ལྔ་དང་། ཡུལ་ལྔ་དང་། ཁ་དོག་ལྔ་ལ་སོགས་པ་རྣམས། རིགས་ཀྱི་ཡབ་དང་། རིགས་ཀྱི་ཡུམ་དང་། སེམས་དཔའ་དང་། སེམས་མ་དང་། ཁྲོ་བོ་དང་ཁྲོ་མོ་དང་། ལྷ་དང་ལྷ་མོའི་རང་བཞིན་དུ་མ་འཚལ་བ་རྣམས་མཐོལ་ལོ་བཤགས་སོ། །བསླབ་པར་བྱ་བའི་དམ་ཚིག་ལྔ་ལས་འདས་ཏེ། དེ་བཞིན་གཤེགས་པའི་རིགས་དང་། རྡོ་རྗེའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་ལ་སོགས་ཏེ། རིགས་ལྔའི་བདེ་བར་གཤེགས་པ་རྣམས་ཀྱི་སྐུ་གསུང་ཐུགས་ཀྱི་དངོས་གྲུབ་ཐོབ་པར་བགྱིད་རྒྱུ་ལས། འབད་རྩོལ་དང་བརྩོན་འགྲུས་ཆུང་བ་མཐོལ་ལོ་བཤགས་སོ། །གཞན་ཡང་སྒྲུབ་པ་ཁྱད་པར་ཅན་གྱི་དམ་ཚིག་ཉི་ཤུ་དང་། སྤྱོད་པ་རྒྱུན་གྱི་དམ་ཚིག་བཞི་དང་། རང་བཞིན་ལྟ་བའི་དམ་ཚིག་བཞི་དང་། གལ་མདོ་ངེས་པའི་དམ་ཚིག་གསུམ་ལ་སོགས་ཏེ། ནང་བ་ཐབས་ཀྱི་རྒྱུད་ལས་བྱུང་བའི་དམ་ཚིག་རྣམས་ཀྱི་བསྲུང་མཚམས་མི་ཤེས་ཤིང་གཞུང་དང་འགལ་བ་ཅི་བགྱིས་པ་མཐོལ་ཞིང་བཤགས་སོ། །གཞན་ཡང་གསང་སྔགས་ཀྱི་རྒྱུད་ཀུན་གྱི་ལུང་ལས་འབྱུང་བའི་དམ་ཚིག་དང་། བྱང་ཆུབ་སེམས་དཔའ་སྡོམ་པ་དང་། ཉན་ཐོས་ཀྱི་འདུལ་ཁྲིམས་དང་། འཇིག་རྟེན་པའི་ཁྲིམས་དང་མནའ་ལས་འགལ་བ་ཅི་བགྱིས་པ་ཐམས་ཅད་མཐོལ་ཞིང་བཤགས་སོ། །གཞན་ཡང་བཀའ་ཟབ་མོ་ཁྱད་དུ་བསད་དེ་སྐྱེ་བོ་རང་ཐད་ཀྱི་དབང་གིས་ནོར་དང་གསོག་གི་དབང་དུ་བཏང་སྟེ། དཀོན་མཆོག་གསུམ་གྱི་སྐུ་དགྲའི་སྔགས་བཟློག་བྱས་པ་དང་། པྲ་ཏི་ཧ་ན་དུས་ཀྱི་མཆོད་པ་ཆེན་པོ་ལ་བསྔོས་པ་དང་། མ་ཧཱ་བོ་དྷི་དཀོན་མཆོག་གསུམ་གྱི་དཀོར་ལ་ཐུགས་ཐུབ་བགྱིས་ནས་སྤྱད་པ་དང་། ཁྱད་པར་དུ་ཡང་ཚོགས་མཆོད་ཆེན་པོ་ལ་བསྔོས་པ། སྒོམ་སྒྲུབ་ཟབ་མོ་ལ་བསྔོས་པ་ལ་སོགས་པ། མཆོད་པའི་ཡོ་བྱད་ཐམས་ཅད་ལ་ཚོད་ཡོད་བགྱིས་ཏེ། དངོས་སུ་སྤྱད་པ་དང་དབྲི་གཞོག་བགྱིས་ཏེ་ངན་སོང་གི་རྒྱུ་བསགས་པ་ཐམས་ཅད་མཐོལ་ཞིང་༴ གཞན་ཡང་ཡན་ལག་གི་དམ་ཚིག་སྟོང་རྩ་བརྒྱད་ལས་འདས་ཏེ། ངན་སོང་འཁོར་བའི་རྒྱུ་བསགས་པ་ཐམས་ཅད་མཐོལ་ཞིང་༴ གཞན་ཡང་གསང་སྔགས་ཀྱི་སྒོར་ཞུགས་སོ་འཚལ་གྱི་མ་རིག་པའི་དབང་གིས་དམ་ཚིག་ངོ་མ་འཚལ་ཏེ། དམ་ཚིག་ཉམས་པ་དང་། ལས་ངན་སྣ་ཚོགས་སྤྱད་པས། སྡུག་བསྔལ་སྣ་ཚོགས་ཀྱི་རྒྱུ་བསགས་པ་མཐོལ་ཞིང་༴ ཉ་སྟོང་དང་དུས་དྲུག་དང་། དུས་བཞི་ལ་སོགས་དུས་དམ་དུ་བཅས་པ་ལས་འདས་ཏེ། དུས་ལས་གཡེལ་བའི་ཉམས་ཆག་ཐམས་ཅད་མཐོལ་ཞིང་༴ གཞན་ཡང་ཆོས་སྤྱོད་བཅུའི་སྒོ་ནས། དགེ་བའི་ཕྱོགས་བགྱིད་པར་དམ་བཅས་པ་ལས་རྔོ་མ་ཐོགས་པ་དང་། སྡིག་པ་མི་དགེ་བའི་ལས་ཅི་མཆིས་པ་ཐམས་ཅད་མཐོལ་ཞིང་༴ སྒྱུ་འཕྲུལ་ཡེ་ཤེས་ཀྱི་རང་སྣང་གི་ལྷ་ལ་རྟོག་པ་མི་མངའ་ཡང་། དེའི་འཁོར་དུ་གཏོགས་པའི་ཡེ་ཤེས་དང་ལས་ལ་གྲུབ་པའི་ལེགས་ཉེས་ཀྱི་སྟངས་འཛིན་ཅིང་དམ་ཚིག་གི་རྗེས་གཅོད་པའི་བསྟན་པ་གཉེན་པོ་བསྲུངས་བ་དང་། ཆོས་སྐྱོང་བ་རྣམས་ཀྱི་ཐུགས་དང་འགལ་བ་ཅི་བགྱིས་པ་ཐམས་ཅད་མཐོལ་ཞིང་༴ གཞན་ཡང་ཕྱོགས་བཅུའི་དུས་གསུམ་གྱི་རྣལ་འབྱོར་བ་མཆེད་དང་ལྕམ་དྲལ་རྣམས་ཀྱི་ཐུགས་དང་འགལ་བའི་ལས་ཅི་བགྱིས་ཐམས་ཅད་མཐོལ་ཞིང་༴ དེ་ལྟར་མཐོལ་བཤགས་ཟབ་མོ་དང་། འགྱོད་ཚངས་དྲག་པོ་ཤིན་ཏུ་གནོང་འགྱོད་དང་བཅས་བགྱིས་པས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་སོར་ཆུད་དེ་ཉམས་ཆག་ཐམས་ཅད་བསྐང་བར་གྱུར་ཅིག །བཀའ་ལ་རས་གཅོད་བྱེད་ཅིང་། སྦས་པའི་གསང་བ་ལ་མངོན་པར་འཆེལ་བ་དང་། །ཏ་ན་བསྒྲལ་བ་གནས་སུ་མ་གཏོགས་པ་དང་། །གྷ་ན་སྦྱོར་བ་བྱིན་གྱིས་མ་བརླབས་པ་ལ་སོགས་པ་གསང་སྔགས་སྤྱད་ཉེས་པའི་དབང་གིས་ངན་སོང་གི་རྒྱུ་བསགས་པ་ཐམས་ཅད་བྱང་ཞིང་དག་པར་གྱུར་ཅིག །བསྙེན་བསྒྲུབ་ཟབ་མོ་དམ་དུ་བཅས་པ་ལས་རང་ཉམས་དང་ཚོད་ཡོད་དུ་གྱུར་ཏེ་མཆོད་པ་ལོ་ཟླར་འདས་པ་དང་། །ཉ་སྟོང་དུས་ཚོད་ལས་འདས་པ་དང་། །དགེ་བའི་ཕྱོགས་བགྱིད་པར་དམ་བཅས་པ་ལས། རྔོ་མ་ཐོགས་པ་དང་། ངན་སོང་གི་རྒྱུ་བསགས་པ་ཐམས་ཅད་བྱང་ཞིང་དག་པར་གྱུར་ཅིག །དུས་ཀྱི་མཆོད་པ་ཆེན་པོ་ལ་བསྔོས་པའི་ཡོ་བྱད་དང་། །མ་ཧཱ་བོ་དྷི་མཆོད་རྟེན་ཆེན་པོའི་ཡོ་བྱད་དང་། །སྒོམ་སྒྲུབ་ཟབ་མོའི་ཡོ་བྱད་དང་། །གཞན་ཡང་ཕུད་ལ་གཞོགས་ཤིང་། །ལྷག་ལ་འཕྲི་བ་དང་། ཁྲལ་ལ་ངན་པ་དང་། གསོག་འཇོག་གི་ལས་བགྱིས་པས་པྲེ་ཏ་ཀ་ཡི་དྭགས་ཀྱི་རྒྱུ་བསགས་པ་ཐམས་ཅད་བྱང་ཞིང་དག་པར་གྱུར་ཅིག །མ་རིག་པའི་དབང་གིས་སྤ་ལོ་དང་། ཚུལ་འཆོས་ཀྱིས་གསང་སྔགས་སྤྱད་ཉེས་པས་ལྟ་སྤྱོད་ཟབ་མོའི་གཞུང་མ་བསྲིང་བ་དང་། ཡང་དག་པ་ཡིན་ནམ་མ་ཡིན་སྙམས་ནས་སེམས་ལ་རྟོག་པ་བྱུང་བ་དང་། ཡིན་པར་ངོ་ཤེས་ཀྱང་སེམས་ལ་སེལ་ཞུགས་ཏེ། ཤེས་བཞིན་ཏུ་མ་སྤྱད་པས། ཏིཪྻ་ཀ་བྱོལ་སོང་གི་རྒྱུ་བསགས་པ་ཐམས་ཅད་བྱང་ཞིང་དག་པར་གྱུར་ཅིག །ཆོས་ཉིད་དོན་གྱི་ལྟ་བ་ནི་མ་རྟོགས། ཁ་འབྱམས་ཚིག་གི་ལྟ་བ་ལ་གདང་དུ་བྱས་ནས་དམ་ཚིག་ཉམས་པ་ཅན་དང་། དམ་འདྲེས་ཅན་དང་། དམ་མེད་པ་དང་། སྡིག་སྒྲིབ་ཅན་དང་། གསང་སྔགས་ཀྱི་སྣོད་དུ་མི་རུང་བ་རྣམས་ལ་ཆོས་བཤད་པ་དང་། བསྐང་བ་དང་། ཚོགས་འདྲེས་པ་དང་། ཚིག་ཏུ་འཇགས་ཤིང་སྤྱོད་ལམ་རྩིང་པ་དང་། སྣོད་མེད་པ་ལ་གསང་སྔགས་སྤེལ་བ་ལ་སོགས་པ་འབགས་འབོག་གི་ལས་བགྱིས་པས། ཕྱི་ནང་གི་དམ་ཅན་རྣམས་ཀྱི་ཐུགས་དང་འགལ་བས་འཇིག་རྟེན་འདི་ཡི་རྐྱེན་དུ་གྱུར་ཏེ་ཚེ་ཐུང་ཞིང་ནད་མང་བ་དང་། ཕྱི་མའི་སྒྲིབ་བར་གྱུར་པ་ཐམས་ཅད་བྱང་ཞིང་དག་པར་གྱུར་ཅིག །གཞན་ཡང་བདག་ཅག་རྣལ་འབྱོར་པ་འདིར་འཚོགས་ཤིང་འདུས་པ་རྣམས་ཀྱི་འགྱོད་ཚངས་འདི་ལ་བརྟེན་ནས་གསང་སྔགས་ཀྱི་སྒོར་ཞུགས་པ་མཐའ་དག་གི་ཉམས་ཆག་དང་། རྟོག་སྒྲིབ་ཐམས་ཅད་བྱང་ཞིང་དག་པར་གྱུར་ཅིག །དེ་ལྟ་བུའི་འགྱོད་ཚངས་རྣལ་འབྱོར་སྤྱི་ཁྲུས་འདི་དང་དེང་གི་རྒྱུ་སྦྱོར་ཏན་གྷན་གྱི་མཆོད་པ་ཟབ་མོ་འདི་ལ་བརྟེན་བྱས་ཏེ། འགྱོད་ཚངས་ཕུལ་བས་ཚངས་པ་གནང་བར་གསོལ་ཏེ། སླན་ཆད་ཀྱང་མི་བགྱིད་པར་གྱུར་ཅིག །དེ་ལྟར་ཚངས་པར་གསོལ་བའི་བདེན་པའི་བྱིན་རླབས་ཀྱིས། བདག་ཅག་འདིར་འདུས་པའི་རྣལ་འབྱོར་བ་མཆེད་ལྕམ་རྣམས་དང་། གཞན་ཡང་གསང་སྔགས་ཀྱི་སྒོར་ཞུགས་སོ་འཚལ་རྣམས་ཀྱི་སྒྲིབ་པ་བྱང་སྟེ། ཕྱག་རྒྱ་ཆེན་པོའི་རིག་འཛིན་གྱི་ས་ལ་ལྷུན་གྱིས་གྲུབ་པར་གྱུར་ཅིག །བདག་ཅག་གི་དུས་གསུམ་གྱི་རྡོ་རྗེ་སློབ་དཔོན་དང་། གཟུངས་མ་དང་། མཆེད་དང་ལྕམ་དྲལ་དང་། ཕ་མ་དང་དམ་རྫས་རྒྱུ་བསྒྲལ་ལོ་འཚལ་ལ་སོགས་པ་ཐམས་ཅད་ཀྱང་ཕྱིར་མི་ལྡོག་པའི་ས་ནོན་ཏེ་ཡེ་ཤེས་བླ་མའི་ས་ལ་ལྷུན་གྱིས་གྲུབ་པར་གྱུར་ཅིག། དེ་ལྟ་བུའི་བདེན་པས་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ནི་ཤེས་བྱའི་བག་ཆགས་ཕྲ་མོ་ཡན་ཆད། གཉེན་པོ་རྡོ་རྗེ་ལྟ་བུའི་ཡེ་ཤེས་ཆེན་པོས་སྦྱངས་ཏེ། ས་བཅུ་རིམ་གྱིས་བགྲོད་ཏེ་མཐར་ཕྱིན་ནས་བཅུ་གཅིག་ཀུན་ཏུ་འོད་ཀྱི་ས་ཐོབ་པར་གྱུར་ཅིག །རང་བྱང་ཆུབ་རྣམས་ནི་རྟེན་འབྲེལ་བཅུ་གཉིས་མཐར་ཕྱིན་པའི་འབྲས་བུ་བསེ་རུའམ་ནེ་ཙོ་ལྟ་བུ་ཐོབ་པར་གྱུར་ཅིག །ཉན་ཐོས་རྣམས་ནི་བདེན་པ་བཞི་མཐར་ཕྱིན་པའི་འབྲས་བུ་དགྲ་བཅོམ་པ་འཐོབ་པར་གྱུར་ཅིག །ཁམས་གསུམ་གྱི་སེམས་ཅན་ཐམས་ཅད་ཀྱང་ཆོས་དགེ་བ་བཅུ་ལ་སྤྱོད་པར་གྱུར་ཏེ་ལྷ་དང་མིའི་གོ་འཕང་ཐོབ་པར་གྱུར་ཅིག །ལྷ་དང་མི་རྣམས་ནི་ཆོས་སྤྱོད་བཅུའི་སྒོར་ཞུགས་ཏེ་དཀོན་མཆོག་གསུམ་གྱི་གདུང་འཛིན་ཅིང་ཐེག་པ་ཆེན་པོར་སེམས་བསྐྱེད་ནས། གསང་སྔགས་རྡོ་རྗེ་ཐེག་པ་མ་ནོར་བར་སྟོན་པའི་དགེ་བའི་བཤེས་གཉེན་ཚད་མ་དང་རྟག་ཏུ་འགྲོགས་ཤིང་། དེས་བསྟན་པའི་དོན་མ་ནོར་བར་འགྲེལ་ཞིང་རྟོགས་ནས་རིག་འཛིན་རྣམ་གསུམ་མྱུར་དུ་འགྲུབ་བར་གྱུར་ཅིག །དེ་ལྟ་བུའི་འགྱོད་ཚངས་ལ་བརྟེན་ནས། བདག་ལ་མན་ངག་གི་དོན་སྟོན་པའི་རྡོ་རྗེ་སློབ་དཔོན་དང་། དགེ་བའི་བཤེས་གཉེན་རྣམས་སྐུ་ཚེ་རིང་བ་དང་། འཁོར་དང་ལོངས་སྤྱོད་འཕེལ་བ་དང་། དགོངས་སྤྱོད་ཐམས་ཅད་ལྷུན་གྱིས་གྲུབ་ཏེ། བསྟན་པའི་སྒྲོན་མེ་མཛད་ལ་ཡུན་རིང་དུ་གནས་པར་གྱུར་ཅིག །བདག་ཅག་རྣལ་འབྱོར་པ་འདིར་འདུས་ཤིང་ཚོགས་པ་རྣམས་ནི། འཇིག་རྟེན་མཐོང་བའི་ཆོས་ཚེ་འདི་ལ། ཚེ་རིང་བ་དང་། ནད་མེད་པ་དང་། དཔལ་དང་གཟི་མདངས་དང་། འབྱོར་བ་ཕུན་སུམ་ཚོགས་པ་ལྡན་ཏེ། བསམ་པ་ཐམས་ཅད་ཡིད་བཞིན་དུ་འགྲུབ་པར་གྱུར་ཅིག །གསང་བའི་ཐེག་པ་ཆེན་པོ་འདི་ཡང་བཀའ་བཙན་ཞིང་བྱིན་ཆེ་སྟེ་དར་ཞིང་རྒྱས་པར་གྱུར་ཅིག །གསང་སྔག་ཟབ་མོ་འདི་དར་བའི་ཡུལ་ཁམས་ལ་སོགས་ཏེ། རྒྱལ་ཁམས་ཐམས་ཅད་དུ་དུས་ཀྱི་འཁྲུག་པ་ཞི་བར་གྱུར་ཅིག །མཚོན་གྱི་བསྐལ་པ་ཉམས་པར་གྱུར་ཅིག །མི་ནད་དང་ཕྱུག་ནད་ཐམས་ཅད་རྒྱུན་ཆད་པར་གྱུར་ཅིག །ཆར་ཆུ་དུས་སུ་བབས་ཏེ། ལོ་ཕྱུགས་རྟག་ཏུ་ལེགས་པ་དང་། སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན་ཏེ་བླ་ན་མེད་པའི་བྱང་ཆུབ་ཐོབ་པར་གྱུར་ཅིག །དེ་ལྟར་ནོངས་བཤགས་རྣམ་དག་སྨོན་ལམ་ལྟར། སྒོ་གསུམ་གུས་པའི་གསོལ་བ་འདི་བཞིན་གདབ། ལྷུག། ཨོཾཿ དཔལ་ལྡན་རྡོ་རྗེ་སེམས་དཔའ་ཀྱེཿ བདག་ལ་རྗེས་སུ་ཆགས་པར་མཛོདཿ སྐྱེ་རྒ་ན་དང་འཆི་བ་སོགསཿ འཇིགས་རུང་སྲིད་པའི་སྡུག་བསྔལ་ལསཿ མགོན་པོ་ཁྱེད་ཀྱིས་བདག་སྐྱོབས་ཤིགཿ སྡིག་པ་ཀུན་ལས་རྣམ་གྲོལ་ཞིང་ཿ ཡང་དག་ཡེ་ཤེས་སེམས་དཔའ་ཆེའིཿ སྐུ་གསུང་ཐུགས་སུ་བདག་སྒྲུབས་ཤིགཿ ས་མ་ཡ་སིདྡྷི་ཨ་ལ་ལ་ཧོཿ དེ་ལྟར་གསོལ་བ་བཏབ་པས་རྡོར་སེམས་ཀྱིཿ ཐུགས་ཀའི་སྔགས་ཀྱི་ཕྲེང་བ་བདུད་རྩིའི་རྒྱུནཿ ཟླ་བ་ཞུན་མ་ལྟ་བུར་བབས་པ་ཡིསཿ རང་ལུས་ཡོངས་ཁེངས་སྡིག་སྒྲིབ་ཀུན་དག་ཅིང་། རྡོར་སེམས་དགྱེས་བཞིན་དབུགས་དབྱུང་ལུངབསྟན་མོས། དེ་བཞིན་གཤེགས་པ་ཐམས་ཅད་ཀྱི་ཡང་སྙིང་ཡི་གེ་བརྒྱ་བ་ཞེས་བྱ་བ་ཉམས་ཆག་དང་རྟོག་སྒྲིབ་ཐམས་ཅད་སྦྱོང་བར་བྱེད་པ་འདི་བཟླས་པས་རྣལ་འབྱོར་པ་རྟོག་སྒྲིབ་ཅན། ཉམས་ཆག་ཅན། གསོག་འཇོག་ཅན། བག་ཆགས་ངན་པ་ཅན་ཁྱེད་རྣམས་ཀྱི་ཉམས་ཆག་ཐམས་ཅད་བསྐངས་ཏེ་ངན་སོང་གསུམ་དུ་ལྟུང་བའི་ལས་ཀྱི་སྒྲིབ་པ་ལས་ཐར་བར་འགྱུར་རོ། །ཚེ་འདི་ལ་ཡང་སངས་རྒྱས་ཐམས་ཅད་ཀྱིས་སྲས་ཀྱི་དམ་པར་དགོངས་ནས་སྲུང་ཞིང་སྐྱོབས་པར་མཛད་ལ་ཤི་འཕོས་ནས་ཀྱང་བདེ་བར་གཤེགས་པ་རྣམས་ཀྱི་སྲས་ཀྱི་ཐུ་བོ་འགྱུར་བར་གདོན་མི་ཟའོ། །ཞེས་པས་གནང་བ་བྱིན་དང་ཆབས་གཅིག་ཏུ། །རྡོར་སེམས་འོད་ཕུང་དཀར་པོའི་རྣམ་པ་རུ། །གྱུར་ནས་རང་ལ་ཐིམ་པས་རང་ཉིད་ཀྱང་། །རྡོ་རྗེ་སེམས་དཔར་གསལ་བའི་ཐུགས་ཀ་རུ། །ཟླ་སྟེང་ཧཱུཾ་མཐར་ཡིག་དྲུག་ཕྲེང་བས་བསྐོར། །དེ་ཡི་འོད་ཀྱིས་རིགས་དྲུག་འགྲོ་བའི་ཁམས། །རྡོར་སེམས་རིགས་ལྔའི་རྟེན་དང་བརྟེན་པ་ཡི། །རང་བཞིན་ཉིད་དུ་མངོན་སངས་རྒྱས་བསམ་ལ། །ཡིག་དྲུག་གང་མང་གཤམ་འདོགས་དང་བཅས་བརྗོད། །ཨོཾ་བཛྲ་ས་ཏྭ་ཧཱུཾ་ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུན་ཧཱུཾ་ཕཊཿ ཨོཾ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུན་ཧཱུཾ་ཕཊཿ ཨོཾ་མ་ཐ་མ་ཐ་སརྦ་ཏིཪྻ་ཀ་ག་ཏེ་ཧེ་ཏུན་ཧཱུཾ་ཕཊཿ དེ་མཐར་བཟོད་གསོལ་སྐྱབས་འཇུག་འདི་བཞིན་བྱ། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས། །ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་བརྗོད་དྲུག་པ་ལྟ་བའི་ཀློག་བཤགས་ནི། བཞི་ཆོད། ཨཱཿ འཁོར་འདས་བྱེད་པོ་བྱང་ཆུབ་སེམས། །གཞི་མེད་རྩ་བྲལ་རྫོགས་ཆེན་དོན། །བརྗོད་བྲལ་བློ་འདས་ཆེན་པོ་ལ། །ཉམས་དང་བཤགས་པའི་མཁན་པོ་མེད། །ཡེ་བསྲུང་ཐིག་ལེ་ཉག་གཅིག་པུ། །སྤང་བླང་ཡོངས་གྲོལ་ཕྱལ་པ་ཆེ། །རང་ཤར་ལྷུན་གྲུབ་ཆོས་ཀྱི་སྐུ། །དེ་ལྟར་རྟོགས་ན་བཤགས་པའི་རྒྱལ། །ཞེས་བརྗོད་དགོངས་པ་དབྱིངས་ལ་གཏད། འ་ཨ་ཧ་ཤ་ས་མཿ སྟོང་ཉིད་ངང་ལས་ཡི་དྲུག་བཟླས། །ཉེས་རྣམས་མ་ལུས་ཀུན་རྫོབ་ཕྱིར། །མེ་ལོང་བག་རྡུལ་ཕྱིས་བཞིན་བྱང་། །ཡིད་སྒྲིབ་དག་ཅིང་ཐུགས་དམ་བསྐང་། །ཞེས་དང་བདུན་པ་སྐོང་བཤགས་དཔང་པོ་རུ། །ཚོགས་ཞིང་སྤྱན་འདྲེན་མཆོད་གཏོར་བྱིན་བརླབ་པ། །དྲིལ་བཅས་བཞི་ཆོད། ན་མོཿ བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབཿ སེམས་ནི་རྒྱ་ཆེན་མཆོག་ཏུ་རབ་བསྐྱེད་ཅིང་ཿ འགྲོ་བ་འདི་དག་མ་ལུས་སངས་རྒྱས་རྒྱུཿ འདི་ན་སྣོད་མིན་སེམས་ཅན་གང་ཡང་མེདཿ བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷཿ དུས་ལས་མི་འདའ་ཐུགས་རྗེའི་དབང་གིས་ནཿ སེམས་ཅན་དོན་ལ་དགོངས་པའི་དཀོན་མཆོག་གསུམཿ ཡིད་ཀྱིས་སྤྲུལ་ཞིང་བཤམས་པའི་གནས་འདི་རུཿ རྒྱལ་བ་འཁོར་བཅས་མ་ལུས་གཤེགས་སུ་གསོལཿ བཛྲ་ས་མ་ཡཱ་ཛཿ པདྨ་ཀ་མ་ལ་ཡ་སྟྭཾཿ དེ་ནས་ཚོགས་འཁོར་ནང་མཆོད་ཀྱིས་བྲན་ཞིང་ཿ ཨཱོཾཿ ཀུན་བརྟགས་སྣང་བ་སྣོད་ཀྱི་གཏོར་གཞོང་དུཿ གཞན་དབང་སྲིད་པ་བཅུད་ཀྱི་གཏོར་མར་སྦྱརཿ ཡོངས་གྲུབ་ཆོས་དབྱིངས་ཀློང་ཆེན་དགོངས་པ་ཡིསཿ སྣང་སྲིད་གཞིར་བཞེངས་ཀུན་བཟང་མཆོད་པའི་སྤྲིནཿ འཕོ་མེད་ནམ་མཁའ་མཛོད་དུ་མངའ་དབང་བསྒྱུརཿ ན་མཿ སརྦ་ཏ་ཐཱ་ག་ཏ་བྷྱོ་བི་ཤྭ་སོགས། ཁཾ་སྭཱ་ཧཱཿ ཞེས་གསུམ་བརྒྱད་པ་བསྐང་བ་ཡང་གཉིས། དང་པོ་ཐེག་དགུ་སྤྱི་དང་བྱེ་བྲག་ཏུཿ སྡེ་སྣོད་གསུམ་དང་སྤྱི་རྒྱུད་སྡེ་གསུམ་སྐོང་ཿ ཨཱཿ རང་བྱུང་ལྷུན་གྲུབ་འཇའ་ཟེར་ལུས་ཀྱི་སྦུབསཿ སྒྱུ་འཕྲུལ་ཚོགས་བརྒྱད་རོལ་པ་སྲིན་པོའི་གྲོང་ཿ སྙིང་དབུས་ཟངས་མདོག་དཔལ་རིའི་ཕོ་བྲང་ནསཿ རིགས་འདུས་མ་ཧཱ་གུ་རུའི་ཐུགས་དམ་བསྐང་ཿ གཞི་དབྱིངས་སྟོངགསལ་ཀུན་ཏུ་བཟང་པོ་ཡིཿ གཞི་སྣང་ལོངས་སྐུའི་རྩལ་ལས་དགོངས་པ་འཕོསཿ བརྡ་ཚིག་བློ་ལས་འདས་པའི་དཀྱིལ་འཁོར་ནསཿ དགོངས་བརྒྱུད་དག་པ་གཉིས་ལྡན་ཐུགས་དམ་བསྐང་ཿ ངེས་པ་ལྔ་ལྡན་ལྷུན་གྲུབ་ལོངས་སྐུའི་རྩལཿ རིག་འཛིན་རིག་པའི་འཁོར་ལ་བརྡ་སྟོན་ཅིང་ཿ དགོངས་བརྡའི་དོན་རྒྱུད་ཚིག་རྫོགས་སྤྲུལ་པའི་གརཿ སྙན་བརྒྱུད་ཐོས་གྲོལ་ཆེན་པོའི་ཐུགས་དམ་བསྐང་ཿ མཚོན་བྱེད་རྟགས་ཀྱི་བརྡ་ཤོག་ཆེན་པོའི་དབང་ཿ ལས་ཅན་སྐྱེས་བུའི་སྙིང་ལ་བསྐུར་བ་ལསཿ མཚོན་བྱ་དོན་གྱི་དགོངས་པའི་གསང་མཛོད་རྡོལཿ གཏད་རྒྱ་སྨོན་ལམ་དབང་བརྒྱུད་ཐུགས་དམ་བསྐང་ཿ གདོད་ནས་ཀུན་ཏུ་བཟང་པོ་རང་རིག་ལཿ ཁྱབ་བརྡལ་དགོངས་པ་གུད་དུ་བཅད་པ་དང་ཿ སངས་རྒྱས་གཞན་དུ་བཙལ་བའི་ནོངས་པ་ཀུནཿ དག་ནས་བྱ་རྩོལ་བྲལ་བའི་ས་ལ་སྐྱོལཿ ཀ་དག་ཕྱོགས་ཡན་ཆེན་པོའི་དགོངས་པ་ལཿ བགྲང་བྱའི་ཐེག་པ་ཐ་དད་མ་གྲུབ་ཀྱང་ཿ ཀུན་རྟོགས་གདུལ་བྱའི་ཁམས་དབང་བསམ་པའི་ཕྱིརཿ ཐེག་པ་རིམ་དགུར་ཤར་བའི༴ འཁོར་བ་སྡུག་བསྔལ་ཆེན་པོར་ཤེས་པ་ཡིསཿ ཀུན་རྫོབ་བདེན་བཞིའི་ལམ་ལ་རབ་ཞུགས་ནསཿ བདག་འཛིན་འཆིང་བ་གཅོད་པ་ཉན་ཐོས་ཀྱིཿ ཚོམ་བུའི་དཀྱིལ་འཁོར་ལྔ་ཡི༴ སོ་ཐར་འདུལ་བའི་སྡེ་སྣོད་ཆེན་པོ་ཡིཿ བཅས་དང་རང་བཞིན་འགལ་བའི་ཉེས་པ་ཀུནཿ མི་འཆབ་མི་སྦེད་སྙིང་ནས་བཤགས་པར་བགྱིཿ བདག་ལ་འཕགས་པ་དགྲ་བཅོམ་བྱིན་གྱིས་རློབསཿ ལྷག་པའི་ཚུལ་ཁྲིམས་བསླབ་པས་རྒྱུད་བསྡམས་ཤིང་ཿ ཕུང་སོགས་རང་བཞིན་མེད་པར་རྟོགས་པ་དང་ཿ རྟེན་འབྲེལ་བཅུ་གཉིས་ལུགས་ལས་ལྡོག་པ་ཡིཿ རང་རྒྱལ་དཀྱིལ་འཁོར་བཞི་ཡི༴ རྣམ་དག་ཚུལ་ཁྲིམས་མི་གཡོ་ཏིང་འཛིན་གྱིཿ བསླབ་པ་མདོ་སྡེའི་བསྲུང་མཚམས་ཉམས་པ་ཀུནཿ འགྱོད་པས་བཤགས་སོ་བྱང་ཞིང་དག་པ་དང་ཿ ཚོགས་དང་བསེ་ནུའི་རང་རྒྱལ་དངོས་གྲུབ་སྩོལཿ ཆོས་ཀུན་སྒྱུ་མ་ལྟ་བུར་ཤེས་པའི་ངང་ཿ སྙིང་རྗེའི་གཞན་དོན་བསྒྲུབ་ལ་ཆེས་དཔའ་ཞིང་ཿ བདེན་གཉིས་ལམ་ཁྱེར་མངོན་པའི་སྡེ་སྣོད་ཀྱིཿ དཀྱིལ་འཁོར་ཕྱོགས་ཀྱི་གྲངས་ལྡན་ཐུགས་དམ་བསྐང་ཿ སོ་སོར་རྟོགས་པའི་ཤེས་རབ་ཏིང་ངེ་འཛིནཿ རྟག་ཆད་མུ་བཞིའི་ལམ་དུ་གོལ་བ་དང་ཿ སྙིང་རྗེའི་མྱུ་གུ་སྐམ་པའི་ནོངས་པ་ཀུནཿ དག་ནས་ཀུན་ཏུ་འོད་ཀྱི་ས་ལ་སྐྱ྄ོལཿ དག་པ་གསུམ་དང་གཙང་སྦྲ་གསུམ་སྤྱོད་ཅིང་ཿ དམ་ཡེ་ཐ་དད་རྗེ་ཁོལ་རྣམ་པར་བསྒྲུབཿ བལྟས་པས་བདེ་བ་ལམ་བྱེད་བྱ་རྒྱུད་ཀྱིཿ དཀྱིལ་འཁོར་དྲུག་གི་ལྷ་ཚོགས༴ ཀྲི་ཡའི་ཐབས་དང་ཡོ་གའི་རྣལ་འབྱོར་ལཿ ཆ་མཉམ་སྤྱོད་པས་མ་ནིང་ཐེག་པ་སྟེཿ མངོན་བྱང་ལྔ་ཡི་དཀྱིལ་འཁོར་རྒྱལ་མཆོག་བསྒྲུབཿ སྤྱོད་རྒྱུད་དཀྱིལ་འཁོར་རྒྱ་མཚོའི༴ བྱ་སྤྱོད་རྒྱུ་སྡེའི་ལྷ་སྔགས་ཏིང་འཛིན་དང་ཿ ཕྲ་རགས་དམ་ཚིག་ཉམས་པ༴ མཁའ་སྤྱོད་ལ་སོགས་གྲུབ་ཆེན་རྣམས་བརྒྱད་ཀྱིཿ ཐུན་མོང་དངོས་གྲུབ་འཛད་མེད་ཆར་དུ་སྙིལཿ ཕྱི་ནང་གསང་གསུམ་རྣམ་དག་བདེན་པ་ཡིཿ ལྷ་དང་རྣལ་འབྱོར་གཉིས་མེད་ཆེན་པོར་རྟོགསཿ ཕྱག་རྒྱ་བཞི་དང་ཟབ་གསལ་ཏིང་འཛིན་བརྙེསཿ ལིང་ཚེ་དགུ་ལྡན་ཡོ་གའི༴ བདག་དང་ལྷ་ལ་བཟང་ངན་བལྟས་པ་དང་ཿ བསྙེན་སྒྲུབ་མཆོད་པ་སྦྱིན་སྲེག་ཆགས་པ་དང་ཿ དཀྱིལ་འཁོར་སྒྲུབ་པའི་ཡན་ལག་ཉམས་པ་ཀུནཿ བཟོད་པར་བཞེས་ནས་མཆོག་གི་དངོས་གྲུབ་སྩོལཿ ཅེས་བརྗོད་དེ་མཐར་བརྗོད་མེད་དོན་བཤགས་ནིཿ ལྷུག། ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནིཿ ཟླ་རྒྱས་བཞིན་ཏུ་སྤྲོས་པ་མི་མངའ་ཡང་ཿ ཐུགས་རྗེའི་ཉི་གསལ་འོད་བཞིན་སྙོམས་མཛད་པཿ འདིར་གཤེགས་བདག་ལ་དགོངས་ཤིངབཞུགས་སུ་གསོལཿ བརྗོད་མེད་ཤེས་རབ་མི་གཡོ་ཆོས་ཀྱི་སྐུཿ བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམས་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པས། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུང་ཆེན་བདག་ཉིད་མ། །མཁའ་དབྱིངས་ཀློང་ཡངས་པདྨོར་འཁྱིལ་བ་ནི། །གཉིས་མེད་ཐིག་ལེ་ཆེན་པོར་འོད་གསལ་བ། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོམ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཐུགས་རྗེ་གདུང་འཚོབ་རྣལ་འབྱོར་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་བགྲོད་པར་བྱ་བའི་ཕྱིར། །བསྟན་པ་རྒྱ་མཚོའི་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱི་མནོས་ཤིང་གཉེར་དུ་སྨྲས་སོ་འཚལ། །ཡུན་དུ་མི་གཏོང་འདའ་བར་མི་བགྱིད་ཅིང་། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །བསྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ནི། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་ཕྲད་པར་མི་བྱ་ཞེས། །བཀའ་ལས་བྱུང་བ་དེ་ལྟར་མ་ལྕོགས་ཏེ། །གསང་སྒོ་འཆོལ་བས་དབྱེ་བསལ་དཀའ་བ་དང་། །མངོན་ཤེས་ཆུང་བའི་སྐྱོན་ཅན་མ་རྟོགས་ཏེ། །ཉམས་པ་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གི། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་པ་རྣམས། །རབ་གནོང་་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་རྗེས་བདག་ལ་དགོངས་ནས་ཀྱང་། །གཉིས་མེད་དབྱིངས་སུ་མི་འགྱུར་བདག་བཀོད་དེ། །མི་དམིགས་བཏང་སྙོམས་ངང་དུ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་གཉིས་མེད་སྤྲོས་དང་བྲལ་བ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱི་དབང་གིས་ནི། །ནོངས་པ་མཆིས་རྣམས་རབ་གནོང་བཟོད་པར་གསོལ༔ གཉིས་པ་ནང་རྒྱུད་སྡེ་གསུམ་འདི་བཞིན་ནོ། བཞི་ཆོ། བདེ་སྟོང་ཀློང་ཡངས་ཏིང་འཛིན་གསུམ་གྱི་སྦུབས། །བསྐྱེད་རིམ་སྣོད་བཅུད་དག་པ་རབ་འབྱམས་སུ། །ཡོངས་ཤར་སྒྱུ་འཕྲུལ་ཞི་ཁྲོ་བཀའ་བརྒྱད་སོགས། །ཚོམ་བུའི་དཀྱིལ་འཁོར་བཅུ་གཉིས་ཐུགས་དམ་བསྐང་། །ཤེས་བྱ་ལྔ་དང་མི་སྤང་དང་དུ་བླངས། །སྒྲུབ་དང་སྤྱད་བྱའི་དམ་ཚིག་ཉི་ཤུ་ལྔ། །གསང་བཅུ་ལ་སོགས་ཉམས་ཆག་སྡིག་སྒྲིབ་ཀུན། །བཤགས་སོ་རིག་འཛིན་རྣམ་བཞིའི་ས་ལ་སྐྱོལ། །བཀོད་པ་ལུས་ཀྱི་གཞལ་མེད་ཁང་ཆེན་ནང་། །རྩ་གསུམ་འཁོར་ལོ་ལྔ་ཡི་འཇའ་ཟེར་སྦུབས། །དབྱིངས་དང་ཡེ་ཤེས་མཉམ་སྦྱོར་རིག་པའི་རྩལ། །ཨ་ནུ་ཡོ་གའི་དཀྱིལ་འཁོར༴ རྣམ་ཤེས་ཚོགས་བརྒྱད་ཉེ་ཉོན་ཉི་ཤུ་དང་། །སེམས་བྱུང་ལྔ་བཅུ་བརྒྱད་ཁྲི་བཞི་སྟོང་གི། །རྟོག་ཚོགས་དག་ནས་དྲན་རྫོགས་ཕྱག་རྒྱའི་སྐུ། །ལྷན་སྐྱེས་བདེ་བ་ཆེན་པོའི་ས་སྐྱོལ། །ཤེས་རིག་ཟངས་ཐལ་གཉུག་པའི་གཞལ་ཡས་སུ། །ཡེ་གདངས་སྒྲོན་དྲུག་འཇའ་ཟེར་ཐིག་ལེའི་ཀློང་། །རིག་པ་བཅུད་དུ་སྨིན་པ་ཨ་ཏིའི་ལྷ། །ཞལ་ཕྱག་འཛིན་པ་དག་པའི༴ རང་གྲོལ་རིག་པ་རྡོ་རྗེ་ལུ་གུ་རྒྱུད། །བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས། །གཅུན་ཏེ་སྣང་བཞི་ཆོས་ཟད་གདོད་མའི་དབྱིངས། །ལྷུན་གྲུབ་རྫོགས་པ་ཆེན་པོའི་ས་ལ་སྐྱོལ། །མདོར་ན་རབ་འབྱམས་དཀྱིལ་འཁོར་རྒྱ་མཚོའི་ཀློང་། །ཐ་དད་རིག་པས་བཏགས་པའི་སྲིིད་ཞུའི་མགྲོན། །རྡུལ་སྙེད་མ་ཚང་མེད་པ་ཐམས་ཅད་དང་། །སྣང་བ་ཡབ་ཀྱི་རང་བཞིན་རཱ་ཧུ་ལ། །སྟོང་པ་ཡུམ་གྱི་ངོ་བོ་ཨེ་ཀ་ཙ། །ཟུང་འཇུག་ཐུགས་རྗེ་བཛྲ་སཱ་དྷུ་སོགས། །སྙིང་ཐིག་གཉན་པོའི་བཀའ་སྲུང་ཐམས་ཅད་དང་། །ཨོ་རྒྱན་རྒྱ་གར་བལ་ཡུལ་ཁ་ཆེའི་གླིང་། །འ་ཞའི་ཡུལ་དང་བྲུ་ཤ་ཟངས་གླིང་ཡུལ། །གསེར་གླིང་རྔ་ཡབ་ལང་ཀའི་གླིང་ཕྲན་དང་། །རྒྱ་ནག་འཇངས་ཡུལ་གེ་སར་དམག་གི་གླིང་། །ཙ་རི་ཏྲ་དང་ལྷོ་མོན་འབྲས་མོའི་གཤོང་། །མངའ་རིས་སྐོར་གསུམ་དབུས་གཙང་རུ་བཞི་དང་། །མདོ་ཁམས་སྒང་དྲུག་སྦས་གནས་གཉན་པོའི་ཡུལ། །ལྗོངས་ལྔ་གླིང་དྲུག་གསེར་རི་ལྷུན་པོའི་སྤོ། །སུམ་ཅུ་རྩ་གསུམ་གནས་ཡུལ་དུར་ཁྲོད་གཉན། །ཆོས་འཁོར་གཙུག་ལག་སྒྲུབ་གནས་དབེན་གནས་ཀྱི། །འཁོར་ཡུག་ལྗོན་ཤིང་བྲག་རི་མཚོ་གླིང་ལ། །གནས་པའི་དཔའ་བོ་ཌཱཀྐི་ཆོས་སྲུང་ཚོགས། །ཞལ་ནས་གསུང་དང་རྗེས་སུ་གནང་བ་དང་། །བྱིན་རླབས་ལུངབསྟན་དག་སྣང་བསྟན་བཅོས་དང་། །ཐུགས་གཏེར་དགོངས་གཏེར་ཟབ་གཏེར་རྫས་གཏེར་སོགས། །གཏེར་རིགས་བཅོ་བརྒྱད་ཆོས་ཀྱི་བཀའ་གཏད་ཅིང་། །དཀྱིལ་འཁོར་རྒྱ་མཚོའི་མུ་རན་ལ་གནས་པའི། །དམ་ཅན་ཌཱཀྐི་བསྟན་སྲུང་རྒྱ་མཚོ་ཡི། །ཐུགས་དང་འགལ་གྱུར་ནོངས་པ་ཅི་མཆིས་པ། །སྙིང་ནས་བཤགས་སོ་ཚངས་པའི་ཞལ་རས་སྟོན། །རྟག་ཆད་མཐའ་བྲལ་དབུ་མ་ཆེན་པོའི་སྦྲུབས། །འཁོར་འདས་རོ་རྐྱང་ཟུང་འཇུག་ཕྱག་རྒྱ་ཆེར། །སྦྱར་བའི་སྣང་སེམས་ཞེན་གྲོལ་རྫོགས་པ་ཆེའི། །ཏིང་འཛིན་ནམ་མཁའ་མཛོད་ཀྱི་སྒྱུ་འཕྲུལ་ལས། །གཟུང་འཛིན་ཕཊཿཀྱིས་གཏོར་བའི་རྗེས་གཞིག་ཆེར། །བློ་བྲལ་ཐུགས་ཕྲད་ཤེས་པའི་ངོ་བོ་རུ། །ཚོགས་བརྒྱད་ཀ་ནས་དག་པའི་བཀྲ་ཤིས་རྟགས། །སྣང་བ་རྒྱན་དུ་ཤར་བའི་རྒྱལ་སྲིད་བདུན། །རིག་སྟོང་རྗེན་པར་གྲོལ་བའི་འདོད་དོན་ལྔ། །རྐྱེན་ངན་ལམ་དུ་སློང་བའི་ཕྱག་རྒྱ་གར། །འབུལ་ལོ་མཆོག་ཐུན་དངོས་གྲུབ་རྒྱ་མཚོར་བསྐྱིལ། །ཀློང་ཆེན་གཞོན་ནུ་བུམ་སྐུའི་ཀཱ་པ་ལར། །དུག་གསུམ་རྣམ་རྟོག་དྲེགས་པ་བཏུལ་བའི་ཁྲག །སྐུ་གསུམ་ཡོངས་གྲོལ་ཆེན་པོའི་བཱ་ལིང་ཏ། །རེ་དོགས་ཚར་གཅོད་ཤ་ལྔ་བདུད་རྩི་ལྔ། །ཉི་ཟླའི་དྭངས་མ་རྩ་བརྒྱད་ཡན་ལག་སྟོང་། །རང་བྱུང་ལྷུན་གྲུབ་ནང་གི་དམ་རྫས་ཀུན། །འབུལ་ལོ་བརྟུལ་ཞུགས་མཐར་ཕྱིན་དངོས་གྲུབ་སྩོལ། །གདོད་མའི་སྟོང་ཆེན་ཡུམ་གྱི་བྷ་གའི་ཀློང་། །རྣམ་ཀུན་མཆོག་ལྡན་རིག་པའི་རྡོ་རྗེ་ཡིས། །རྟེན་འབྲེལ་ལུགས་ལྡོག་འཁོར་བའི་བག་ཆགས་བསྒྲལ། །བདེ་སྟོང་དགའ་བཞིའི་ཉམས་རྩལ་རྫོགས་པའི་གར། །སྦྱོར་སྒྲོལ་བརྟུལ་ཞུགས་མཐར་ཕྱིན་གསང་བའི་རྫས། །འབུལ་ལོ་གཞན་སྣང་དབང་འདུས་དངོས་གྲུབ་སྩོལ། །མཚན་མ་རྫས་དང་མཚན་མེད་ཏིང་འཛིན་གྱིས། །ལས་བཞིའི་ཕྲིན་ལས་སྒྲུབ་པའི་ཕྱག་རྒྱ་དང་། །ཤུགས་སྒྲོལ་དམོད་པའི་མཚོན་ཆ་ཁྱོད་ལ་འབུལ། །སྨོན་འཇུག་སེམས་བསྐྱེད་བྲག་ཕུག་ཞྭ་ལྟར་གྱོན། །ཆགས་མེད་འཁོར་བ་སྤངས་པའི་རྣལ་འབྱོར་ལ། །མ་ཉེས་ཁ་ཡོག་ཅལ་སྒྲོགས་ངན་སྦྱོར་གཤོམ། །སྒྲུབ་ལ་བར་གཅོད་ཐུགས་རྒྱུད་དཀྲུགས་པ་ཡི། །སྨོན་ལམ་ལོག་པའི་དགྲ་འདྲེའི་སྙིང་ཁྲག་འཐུང་། །མཐོན་མཐིང་རལ་པའི་གླེགས་བམ་མན་ཆོད་ནས། །བདོག་པའི་ཉེར་སྤྱོད་ཕྲ་མོ་ཡན་ཆོད་དུ། །མདོར་ན་རྣལ་འབྱོར་ཡིད་ལ་མཛའ་བའི་རྫས། །རྩ་གསུམ་དམ་ཅན་ཌཱཀྐིའི་བླ་རྡོར་འབུལ། །ནགས་ཁྲོད་བས་མཐའ་མཚོ་གླིང་བྲག་སྐྱིབས་སོགས། །ངེས་མེད་གནས་སུ་བྱང་ཆུབ་བསྒྲུབ་པའི་ཕྱིར། །སྟག་མོ་རི་སུལ་འགྲིམ་ལྟར་རྒྱུ་བའི་ཚེ། །རྣལ་འབྱོར་ལུས་ལ་གྲིབ་མ་བཞིན་དུ་འགྲོགས། །བརྟན་གཡོ་སྣང་སེམས་ཞེན་པས་བཅིངས་པ་ཡི། །ཕྲ་རང་རྣམ་རྟོག་གྱ་གྱུའི་སྒྱུ་འཕྲུལ་ཅན། །སྲིད་ཞི་གཉིས་མེད་ཤར་གྲོལ་དུས་མཉམ་ཀློང་། །འབུལ་ལོ་ཆོས་ཉིད་ཟད་སར་འཁྱོལ་བར་ཤོག །ཀུན་གཞིའི་ངང་ནས་ལས་རླུང་གཡོས་པའི་འཕྲུལ། །བག་ཆགས་སེམས་ཉིད་མངལ་རྒྱར་འཐུམས་པ་ལས། །བྱུང་བའི་ཤ་ཁྲག་དྲོད་དབུགས་ཕུང་པོའི་ཁམས། །འབུལ་ལོ་བདག་གིས་འཇའ་ལུས་འགྲུབ་པར་ཤོག །འདིས་མཚོན་དུས་གསུམ་བསགས་པའི་དགེ་རྩ་ཀུན། །དྲན་རིག་ཟག་པ་མེད་པའི་ཡེ་ཤེས་ཀྱིས། །འཁོར་གསུམ་ཡོངས་དག་ཆེན་པོར་རྒྱས་བཏབ་ནས། །གནས་ལུགས་རྫོགས་པ་ཆེན་པོའི་ཀློང་དུ་ཨཱཿ དེ་ལྟར་བཤགས་པའི་རྒྱལ་པོ་ཉེར་བརྒྱད་ནི། ལྷུག་ སྟོན་པ་རྡོ་རྗེ་སེམས་དཔས་གསུང་པ་ཡི། །ལུང་དང་ཏན་དྲ་མང་པོ་མདོར་བསྡུས་ཤིང་། །གསང་སྔགས་མ་ཧཱ་ཡོ་གའི་སྒོར་ཞུགས་པའི། །མི་འདའ་རྡོ་རྗེའི་དམ་ཚིག་གཏན་གྱི་གཉེར། །དམ་ལ་གནས་ཤིང་ཚུལ་བཞིན་བསྲུང་ངོ་ཞེས། །བཀའ་གསང་རྒྱུད་ལས་དེ་སྐད་འབྱུང་བཞིན་དུ། །མ་རིག་ལེ་ལོ་སྒྱིད་སྙམ་རྐྱེན་དབང་གིས། །བཀའ་ལས་འདས་ཤིང་དམ་ལས་གཡེལ་གྱུར་པ། །རང་གནོང་འགྱོད་པའི་སེམས་ཀྱིས་མཐོལ་བཤགས་ན། །མི་དམིགས་བཏང་སྙོམས་ངང་དུ་བཟོད་པར་བཞེས། །རྩ་བ་སྐུ་གསུང་ཐུགས་ཀྱི་དམ་ཚིག་ལས། །སྲི་ཞུ་དད་པའི་རྩལ་ཤུགས་ཆུང་བ་ཡིས། །རྡོ་རྗེ་སློབ་དཔོན་ཐུགས་དང་འགལ་བ་དང་། །བརྩེ་གདུང་ཁྲེལ་འཛེམ་ཆུང་བའི་རང་ཤུགས་ཀྱིས། །མཆེད་དང་ལྕམ་དྲལ་ཐུགས་དང་འགལ་བ་དང་། །སྔགས་དང་ཕྱག་རྒྱ་ལེ་ལོས་རྒྱུན་བཅད་དེ། །གསུང་གི་དམ་ལས་འདས་པར་གྱུར་པ་ཡི། །ཕྱི་གསང་བཞི་དང་བར་གསང་བརྒྱད་ལ་སོགས། །གསང་བར་འོས་དང་གསང་བར་གཉེར་གཏད་པ། །གསང་སྒོ་ཡལ་བར་བཏང་བ་ལ་སོགས་ཏེ། །རྩ་བའི་དམ་ལས་འགལ་བར་ཅི་མཆིས་པ། །རང་གནོང་འགྱོད་པའི་སེམས་ཀྱིས་མཐོལ་བཤགས་ན། །མཁའ་ལྟར་ཁྱབ་པའི་ཐུགས་རྗེས་བདག་བཟུང་ནས། །ཉམས་པའི་སྐྱོན་རྣམས་བཤགས་ན་བྱང་བ་དང་། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །མི་སྤང་པ་ཡི་དམ་ཚིག་ལྔ་པོ་ལས། །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལ་སོགས་ཉོན་མོངས་ལྔ་རྣམས་ནི། །གསང་སྔགས་བླ་ན་མེད་པའི་སྤྱོད་ཡུལ་ལས། །ཀུན་ཏུ་བཟང་པོ་རོལ་པ་ཆེ་བའི་རྒྱན། །རིགས་ལྔ་ཡེ་ཤེས་ལྔ་ཡི་རང་བཞིན་ལ། །ཡེ་ནས་ཡིན་པ་དེ་ལྟར་མ་རྟོགས་ཏེ། །ལོག་རྟོག་དབང་གིས་སྤངས་པ་བཟོད་པར་གསོལ། །དང་དུ་བླང་པའི་དམ་ཚིག་ལྔ་པོ་ལ། །མང་ས་བཤང་གཅི་ཁུ་བ་རཀྟ་རྣམས། །ཡེ་ནས་བདུད་རྩི་ལྔ་ཡི་རང་བཞིན་ལ། །དུས་གསུམ་སངས་རྒྱས་རྣམས་ཀྱིས་སྒྲུབ་པའི་རྫས། །རྒྱལ་བ་རྒྱ་མཚོ་རྣམས་ཀྱི་གཤེགས་པའི་ཤུལ། །ཡེ་ནས་རྣམ་པར་དག་པའི་རང་བཞིན་ལ། །གཙང་རྨེ་རྣམ་རྟོག་བརྟུལ་ཞུགས་ཆུངབ་ཡིས། །ཆོས་ཉིད་མཉམ་པའི་ངང་དུ་མ་རྟོགས་ཏེ། །དམ་རྫས་དང་དུ་མ་བླང་བཟོད་པར༴ སྤྱད་པར་བྱ་བའི་དམ་རྫས་ལྔ་པོ་ལ། །སྐྱེ་ཤི་མེད་པར་རྟོགས་པའི་ལྟ་བ་དང་། །གནས་དང་དུས་དང་ཏིང་འཛིན་གསལ་བ་ཡི། །ཁམས་གསུམ་མ་ལུས་གནས་ནས་བསྒྲལ་བ་དང་། །དུས་གསུམ་འདུ་འབྲལ་མེད་པའི་ལྟ་བ་དང་། །སྔགས་དང་ཕྱག་རྒྱའི་ཏིང་འཛིན་གསལ་བ་ཡི། །ཐབས་དང་ཤེས་རབ་མངོན་སྤྱོད་སྦྱོར་བ་དང་། །སེར་སྣ་འཇུར་གེགས་ཅན་གྱི་ཟས་དང་ནོར། །ཐབས་མཁས་འོད་ཟེར་ཚུལ་དུ་མ་བྱིན་བླངས། །སེམས་ཅན་དོན་དུ་འཕགས་པ་མཆོད་པ་དང་། །གསང་སྔགས་ལྟ་སྤྱོད་གཞན་གྱིས་མི་རིག་ཕྱིར། །གཏིང་དཔག་དགའ་ཕྱིར་རྫུན་དུ་སྨྲ་བ་དང་། །ཞིང་བཅུ་ཞེ་གཅོད་དྲག་ཤུལ་སྤྱོད་པའི་སྔགས། །བཀའ་དང་ལུང་ལས་དེ་ལྟར་བྱུང་བཞིན་དུ། །སྤྱད་ཅིང་ཉམས་སུ་མ་བླང་བཟོད་པར་གསོལ། །ཤེས་པར་བྱ་བའི་དམ་ཚིག་ལྔ་པོ་ལ། །ཕུང་པོ་ལྔ་དང་རྣམ་ཤེས་དབང་པོ་ལྔ། །འབྱུང་བ་ལྔ་དང་འདོད་པའི་ཡོན་ཏན་ལྔ། །ཁ་དོག་ལྔ་དང་སྨན་ལྔ་ལ་སོགས་རྣམས། །རིགས་ལྔ་ཡེ་ཤེས་ལྔ་ཡི་རང་བཞིན་དང་། །རིགས་ཀྱི་ཡུམ་ལྔར་ཤེས་པར་བྱའོ་ཞེས། །རྒྱལ་བའི་བཀའ་ལས་དེ་ལྟར་བྱུང་བཞིན་དུ། །ཤེས་རབ་ཞན་པས་དེ་ལྟར་མ་རྟོགས་ཏེ། །བཀའ་དང་གཞུང་ལས་འགལ་བ༴ བསྒྲུབ་པར་བྱ་བའི་དམ་ཚིག་ལྔ་པོ་ལས། །ཕྱི་ནང་སྣོད་བཅུད་སྣང་སྲིད་མ་ལུས་རྣམས། །ཡེ་ནས་སངས་རྒྱས་ལྔ་ཡི་རང་བཞིན་ལ། །བདག་གི་དབྱིངས་ལས་གཞན་ན་མི་བཞུགས་ཀྱང་། །གོ་རྟོགས་རིག་པའི་རྩལ་ཤུགས་ཆུང་བ་ཡིས། །རྟོག་པ་ཀློང་དུ་མ་གྱུར་བཟོད་པར་བཞེས། །ཚོགས་ཀྱི་མཆོད་པ་ལོ་ཟླར་འདས་པ་དང་། །ཚོགས་ཀྱི་ཞལ་ཟས་འབྱོར་ཚོགས་ཆུང་བ་དང་། །རྡོ་རྗེ་སློབ་དཔོན་ཐུགས་དང་འགལ་བ་དང་། །དམ་སྐོང་མཁའ་འགྲོའི་ཐུགས་དང་འགལ་བ་དང་། །བརྩེ་གདུང་ཁྲེལ་འཛེམ་ཆུང་བའི་རང་ཤུགས་ཀྱིས། །མཆེད་དང་ལྕམ་དྲལ་ཐུགས་དང་འགལ་བ་དང་། །ལུང་དང་བཀའ་ལས་འདས་པ་མཐོལ་ལོ་བཤགས། །ལྟ་བ་འཕངས་མ་ཆོད་པར་གྱུར་པ་དང་། །སྤྱོད་པ་ལ་མ་དོར་བར་གྱུར་པ་དང་། །དམ་ཚིག་ཉམས་པའི་ཆད་པ་མི་བཟོད་པས། །རྡོ་རྗེ་སྲིན་པོས་སྙིང་ཁྲག་འཐུང་བ་དང་། །ཚེ་ཐུང་ནད་མང་ནོར་ཡལ་དགྲས་འཇིགས་དང་། །མནར་མེད་དམྱལ་བ་ཤིན་ཏུ་སྐྱི་གཡའ་བར། །སྡུག་བསྔལ་མི་བཟོད་ཡུན་རིང་གནས་པ་རྣམས། །བདག་གིས་དམ་ཚིག་བཤགས་པར་བགྱིས་པ་ཡིས། །ཉམས་ཤིང་ཆག་པ་ཐམས་ཅད་སོར་ཆུད་དེ། །གོ་འཕང་ཆེན་པོའི་འབྲས་བུ་ཐོབ་པར་ཤོག །དུས་གསུམ་རྒྱལ་བས་བདག་ལ་བྱིན་གྱིས་རློབས། །དམ་སྐོང་མཁའ་འགྲོ་མང་པོས་བདག་སྲུངས་ཤིག །གཉིས་མེད་གསང་བའི་དབྱིངས་ནས་འོད་ཤར་ཏེ། །མཁའ་ལྟར་དག་ཅིང་རྣམ་རྟོག་མི་མངའ་ཡང་། །སྔོན་གྱི་ཐུགས་རྗེའི་དབང་གིས་བདག་བཟུང་སྟེ། །ཡིད་བཞིན་སྐུ་མཆོག་བདག་ལ་སྟོན་པ་དང་། །རིག་འཛིན་དངོས་གྲུབ་དབྱིངས་ནས་བདག་ལ་སྩོལ། །ལྷ་དང་ལྷན་མིན་ཕྱོགས་བཅུའི་རྣལ་འབྱོར་རྣམས། །མི་འདའ་རྡོ་རྗེ་དམ་ཚིག་གཏན་གྱི་གཉེར། །རྩ་བ་གསུམ་དང་ཡན་ལག་ཉི་ཤུ་ལྔ། །ཚོར་དང་མ་ཚོར་མ་རིག་དབང་གིས་ནི། །ཉམས་པའི་སྐྱོན་གྱིས་གོས་པར་གྱུར་ཏོ་འཚལ། །བདག་གིས་དམ་ཚིག་གདུང་བའི་བཤགས་པ་འདིས། །རྣལ་འབྱོར་དམ་ཚིག་ཉམས་པ་བསྐངས་གྱུར་ནས། །གོ་འཕང་ཆེན་པོའི་འབྲས་བུ་ཐོབ་པར་ཤོག །ཁམས་གསུམ་འཁོར་བའི་སེམས་ཅན་མ་ལུས་རྣམས། །མཉམ་ཉིད་རྡོ་རྗེའི་གྲལ་དུ་གནས་པར་ཤོག །མཁའ་འགྲོ་མ་ཡི་ཐུགས་རྗེས་བདག་བཟུང་ཞིང་། །ཉམས་པའི་སྐྱོན་རྣམས་གཏན་ནས་བྱང་བ་དང་། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཡན་བརྗོད་དགུ་པ་ཚོགས་མཆོད་རྒྱ་མཚོའི་སྤྲིན། །ཀློང་ཆེན་རབ་འབྱམས་བཟང་པོའི་བཞེད་གཞུང་བཞིན། །བཀོད་པ་ནང་གསེས་རྣམ་གྲངས་བཅོ་བརྒྱད་ལ། །དང་པོ་ལས་ཀྱི་སློབ་དཔོན་ཕྱག་འཚལ་ཞིང་། །མཎྜལ་མེ་ཏོག་ཕུལ་ནས་འདི་སྐད་ཞུ། །ཧོ་དགོངས་སུ་གསོལ་ལོ། །རང་བཞིན་རྣམ་པར་དག་པ་ཀུན་ཏུ་བཟང་པོའི་ཕོ་བྲང་ལྷ་དང་ལྷ་མོའི་སྤྲིན་ཕུང་གིས་གང་བ་འདིར། བླ་མ་རྡོ་རྗེ་སློབ་དཔོན་འཁོར་དང་བཅས་པ་རྣམས་རང་བཞིན་ལྷུན་གྱིས་གྲུབ་པའི་རྣལ་འབྱོར་ལ་གནས་པར་ཞུ་འཚལ། །ཞེས་གསོལ་གཉིས་པ་བགེགས་གཏོར་སྦྱིན་པ་ནི། རང་ཉིད་རྟ་མཆོག་རོལ་པའི་སྐུར་གསལ་ཞིང་། བཞི་ཆོད། ཧཱུཾ་ཉོན་ཅིག་བགེགས་དང་ལོག་འདྲེན་ཚོགས། །འདི་རུ་མ་འདུག་གཞན་ཏུ་དེངས། །ང་ཡི་བཀའ་ལས་འདས་གྱུར་ན། །ཐལ་བའི་རྡུལ་བཞིན་བརླག་པར་འགྱུར། །ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ཅེས་བརྗོད་ཅིང་གུ་གུལ་གྱི་དུད་པ་དང་རོལ་མོའི་སྒྲ་ཆེར་བསྒྲགས་པས་བགེགས་ཐམས་ཅད་ཕྱིའི་རྒྱ་མཚོའི་མཐར་བྱེར་ཏེ། མེ་རི་འབར་བས་མཚམས་བཅད་ནས་བསྐལ་པའི་བར་མི་ཐར་བར་བསམ་མོ། ཞེས་དང་གསུམ་པ་སྲུང་འཁོར་བསྒོམ་པ་ནི། དེ་ནས་སྐད་ཅིག་གི་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་དྲྭ་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་འཁྲིགས་པར་བསམ། ཧཱུཾ་ཡེ་ནས་མ་སྐྱེས་བློ་བྲལ་རྫོགས་པ་ཆེ། །ཁྱབ་བརྡལ་མི་དམིགས་ཆོས་སྐུདག་པ་ལ། །རྡོ་རྗེའི་དྲྭ་བ་བསྐལ་པའི་མེ་དཔུང་འབར། །རབ་འཇིགས་ཁྲོ་བོའི་དཀྱིལ་འཁོར་ཆེན་པོ་འདིར། །རྡོ་རྗེ་ཕྲ་མིན་སྒོ་སྐྱོང་ཆེན་མོ་བཞིས། །རང་བཞིན་གདོད་ནས་དག་པའི་མཚམས་ཆོད་ཅིག །ཨོཾ་སུམྦྷ་ནི་སུམྦྷ་ཧཱུཾ་གྷྲྀ་ཧྞ་སོགས་བརྗོད་བཞི་པ་སྐྱབས་ཡུལ་གསལ་གདབ་ཅིང་། སྐྱབས་སུ་འགྲོ་དང་བྱང་སེམས་བསྐྱེད་པ་ནི། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ལྔ་པ་ཚོགས་ཞིང་སྤྱན་དྲངས་བཞུགས་ཕྱག་འཚལ། ཨོཾ་སྭ་བྷ་ཝ་ཤུདྷ་སརྦ་སོགས། ཆོས་སྐུ་མ་སྐྱེས་མཉམ་པ་ཆེན་པོ་ལས། །འབྱུང་བཞི་རིམ་བརྩེགས་ཉི་ཟླ་པདྨའི་སྟེང་། །བྷྲུཾ་ལས་བདེ་གཤེགས་ཞི་བའི་གཞལ་ཡས་ཁང་། །སྒོ་བཞི་གྲུ་བཞི་རྩིག་པ་ལྔ་དང་ལྡན། །རྟ་བབས་བཞི་དང་འཁོར་ལོ་རྒྱལ་མཚན་གདུགས། །རྒྱན་རྣམས་ཡོངས་རྫོགས་མཆོད་པའི་ལྷ་མོས་མཛེས། །དེ་དབུས་བདེ་གཤེགས་རིགས་ལྔ་ཡབ་ཡུམ་དང་། །སེམས་དཔའ་སེམས་མ་སྒོ་བ་ཡབ་ཡུམ་བཞི། །ཐུབ་པ་དྲུག་རྣམས་སྣང་ལ་རང་བཞིན་མེད། །ནམ་མཁའི་འཇའ་ཚོན་མེ་ལོང་གཟུགས་བརྙན་འདྲ། །དེ་སྟེང་ཁྲོ་བོའི་ཞིང་ཁམས་སྣང་བ་ནི། །འཇིགས་གཟུགས་མི་བཟད་བསྐལ་པའི་མེ་དཔུང་འཕྲོ། །ཀུན་ཀྱང་ཡབ་ཡུམ་རྒྱན་རྣམས་རྫོགས་པ་ལ། །མཚན་དང་དཔེ་བྱད་འོད་ཟེར་ཕྱོགས་བཅུར་འཕྲོ། །ཨོཾ་བཛྲ་ས་མ་ཡ་ཛཿ ནམ་མཁའི་དཀྱིལ་ནས་ཞི་ཁྲོའི་གཞལ་མེད་ཁང་། །རང་བཞིན་ལྷུན་གྱིས་གྲུབ་པར་ཡོངས་བྱོན་ཏེ། །བདག་ལ་གཉིས་སུ་མེད་པར་ཐིམ་པར་གྱུར། །ཛཿཧཱུཾ་བཾ་ཧོ། ཕྱི་དང་ནང་ཀུན་འོག་མིན་དག་པའི་ཞིང་། །ཐམས་ཅད་རྣམ་དག་ལྷ་དང་ལྷ་མོའི་ངང་། །སྐྱེ་མེད་ལྷུན་རྫོགས་འོད་གསལ་ཆེན་པོ་ལ། །བདག་གཞན་མ་ལུས་ངང་གི་གནས་པར་གྱུར། །ཞེས་བདག་དང་སྣོད་བཅུད་ཐམས་ཅད་ལྷ་དང་ལྷ་མོར་གསལ་གདབ་པོ། །དེ་ནས་སྐད་ཅིག་གིས་མདུན་གྱི་ནམ་མཁར་བླ་མ་དང་ཞི་ཁྲོ་དཔག་ཏུ་མེད་པའི་དཀྱིལ་འཁོར་བསམ་ལ། བསོད་ནམས་ཀྱི་ཞིང་སྤྱན་འདྲེན་པ་ནི། ཧཱུཾ་ཆོས་སྐུ་མཉམ་པའི་ངང་ལས་མ་གཡོས་ཀྱང་། །གཟུགས་སྐུ་རང་སྣང་འོད་གསལ་ཐུགས་རྗེའི་ལྷ། །ཀུན་བཟང་ཡབ་ཡུམ་རིགས་ལྔ་རྡོ་རྗེ་འཆང་། །རྡོ་རྗེ་སེམས་དཔའ་དགའ་རབ་རྡོ་རྗེ་དང་། །ཤྲཱྀ་སིདྷ་པདྨ་ཐོད་ཕྲེང་རྩལ། །མཁར་ཆེན་མཚོ་རྒྱལ་རིགས་བཞིའི་མཁའ་འགྲོ་དང་། །རྡོ་རྗེ་ཕག་མོ་འཁོར་དང་བཅས་པ་དང་། །དགོངས་གཏེར་ཟབ་མོའི་སྲུང་མར་བཀའ་བསྒོས་པ། །སྲོག་སྒྲུབ་ལ་སོགས་དམ་ཅན་རྒྱ་མཚོའི་ཚོགས། །མ་ལུས་འཁོར་བཅས་གནས་འདིར་གཤེགས་སུ་གསོལ། །གཞན་ཡང་སྣང་སྲིད་འཁོར་འདས་འཇིག་རྟེན་ན། །གར་བཞུགས་སངས་རྒྱས་སེམས་ཅན་ཇི་སྙེད་པ། །བསོད་ནམས་ཞིང་ལ་དུས་འདིར་སྤྱན་འདྲེན་གྱིས། །དགྱེས་པ་ཆེན་པོས་གནས་འདིར་གཤེགས་སུ་གསོལ། །ཞེས་པས་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་སྐད་ཅིག་གིས་བྱོན་ནས། སྔར་གྱི་དམ་ཚིག་པ་དང་གཉིས་སུ་མེད་པ་ལ་གདན་འབུལ་ཞིངབཞུགས་སུ་གསོལ་བ་ནི། ཧཱུཾ་གནས་ལྔ་ཡེ་ཤེས་ལྷུན་གྲུབ་དཀྱིལ་འཁོར་དུ། །ཐབས་དང་ཤེས་རབ་པདྨ་ཉི་ཟླའི་གདན། །སེང་གེ་གླང་ཆེན་རྟ་མཆོག་རྨ་བྱ་སོགས། །མཛེས་ཤིང་ཡིད་འོང་བཤམས་པའི་གདན་སྟེང་དུ། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །མཁའ་འགྲོ་དམ་ཅན་རྒྱ་མཚོ་བཞུགས་སུ་གསོལ། །ཨོཾ་པདྨ་ཙནྡྲ་སུཪྻ་མ་དྷ་ལ་ཀ་མ་ལ་ཡེ་སྟྭཾ། ཞེས་པས་བཞུགས་པར་བསམ་ལ་ཕྱག་འཚལ་བ་ནི། ཧཱུཾ་དུས་གསུམ་བླ་མ་ཡི་དམ་མཁའ་འགྲོའི་ཚོགས། །མ་ལུས་འཁོར་དང་བཅས་པ་ཐམས་ཅད་ལ། །ནམ་མཁའི་མཐའ་དང་ཁྱབ་པར་ལུས་སྤྲུལ་ཏེ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཞེས་ཡིད་ཀྱིས་ཕྱག་བྱས་ཏེ། དྲུག་པ་བདུད་རྩི་སྨོན་གྱི་མཆོད་པ་ནི། སྟོན་པ་ཀུན་བཟང་རྒྱལ་ཚབ་རིགས་ལྔ་མཆོག །དགའ་རབ་ལ་སོགས་བརྡ་རྒྱུད་རིག་འཛིན་རྣམས། །གྲགས་ཆེན་གསལ་བའི་སྟོན་པ་བཅུ་གཉིས་ལ། །སྨན་མཆོད་འབུལ་ལོ་ཉམས་ཆག་ཀུན་དག་མཛོད། །སརྦ་པཉྩ་ཨ་མྲྀ་ཏ་ཁ་ཧི། རིགས་གསུམ་སེམས་དཔའ་ལུང་བསྟན་རྡོ་རྗེ་དང་། །ཨུ་པ་རཱ་ཛ་འབྱོར་བའི་དབང་པོ་སོགས། །རོ་ལངས་བདེ་བ་རྡོ་རྗེ་བཞད་རྩལ་ལ། །སྨན་མཆོད༴ སརྦ་པཉྩ༴ དམ་པའི་རིགས་ཅན་ལྔ་དང་རྒྱལ་པོ་ཛ། ཀུ་ཀུ་རཱ་ཛ་ཨིནྡྲ་བོ་དྷི་སོགས། །སྒེག་རྡོར་སངས་རྒྱས་གསང་བ་བི་མ་ལར། །སྨན་མཆོད༴ སརྦ༴ རྣམ་གསུམ་ཡོ་གའི་བདག་པོ་ཨོ་རྒྱན་རྗེ། །རྒྱལ་ཡུམ་མཚོ་རྒྱལ་ལོ་ཆེན་བཻ་རོའི་ཞབས། །ཀློང་ཆེན་རབ་འབྱམས་འཇིགས་མེད་གླིང་པ་རྗེར། །སྨན༴ སརྦ༴ གདོད་ནས་མངོན་བྱང་ཆུབ་ཀྱང་གདུལ་བྱའི་ངོར། །འཇམ་མགོན་རྡོ་རྗེ་བླ་མའི་རྣམ་རོལ་ཅན། །ཁམས་གསུམ་ཆོས་ཀྱི་རྒྱལ་པོ་གྲུབ་ཆེན་པར། །སྨན༴ སརྦ༴ མདོ་སྔགས་བསྟན་པའི་ཉི་མ་གདུལ་བྱའི་མཁར། ཐུགས་བསྐྱེད་ཤིང་རྟས་དྲངས་མཛད་རྗེ་བླ་མའི། ལུང་རྟོགས་མཛོད་འཛིན་བདེ་བའི་རྡོ་རྗེ་ལ། སྨན༴ སརྦ༴ བཅོམ་ལྡན་རྒྱལ་བ་བཞི་བཅུ་རྩ་གཉིས་དང་། །འབར་བ་ ཁྲག་འཐུང་ལྷ་ཚོགས་ལྔ་བཅུ་གཉིས། །རིག་འཛིན་དཔའ་བོ་མཁའ་འགྲོ་ཆོས་སྐྱོང་ཚོགས། །སྨན༴ སརྦ༴ ཞེས་དང་རྗེས་འབྲེལ་དངོས་གྲུབ་བླང་བ་ནི། ལྷུབ། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་ཀྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉན་པོས་བླངས། །ཀཱ་ཡ་སིདྷི་ཨོཾཿ ཝཀྐ་སིདྷི་ཨཱཿ ཙིཏྟ་སིདྷི་ཧཱུཾཿ ཞེས་བརྗོད་བདུན་པ་དཔལ་ཆེན་བཤགས་་པ་ནི། ལྷུག། བཅོམ་ལྡན་དཔའ་ཆེན་ཁྲོ་རྒྱལ་ཕྱག་བརྙན་ནིཿ ཐབས་མཁས་ཐུགས་རྗེ་ཡེ་ཤེས་སྤྲུལ་པ་དང་ཿ རང་རྒྱུད་རྣལ་འབྱོར་དག་པའི་གྲུབ་པ་ཅནཿ རྡོ་རྗེ་ལྕམ་དྲལ་མང་པོ་དགོངས་སུ་གསོལཿ ཀུན་ཏུ་བཟང་པོ་རྡོ་རྗེ་འཛིན་པ་ཡི། །སྙིང་ལ་གནས་པའི་དམ་ཚིག་བྱིན་རླབས་པ། །ཐེག་ཆེན་ཁྱེད་ཀྱིས་དང་དུ་བཞེས་ནས་ཀྱང་། །ཞལ་འཆེས་གང་ལགས་རྗེས་སུ་དགོངས་པར་མཛོད། །བདག་གི་མིག་ལ་སོགས་ཏེ་དབང་པོ་ལྔ། །བེམ་པོའི་རང་བཞིན་རྣམ་ཤེས་མ་སྦྱང་བས། །ཁྱེད་ཀྱི་སྐུ་གསུང་མི་ཐོས་མི་མཐོང་སྟེ། །མུན་པའི་ཚོགས་དང་འདྲ་བས་བཅིངས་མོད་ཀྱི། །འོན་ཀྱང་ཡིད་ཆེས་སེམས་འདི་རྩེ་གཅིག་གིས། །མངོན་སུམ་འདྲ་བར་རྟག་ཏུ་རྗེས་དྲན་ནས། །དུས་གསུམ་ཀུན་ནས་མ་སྒྲིབ་མཁྱེན་པ་ཡི། །རྡོ་རྗེ་ལྕམ་དྲལ་མང་པོས་བདག་ལ་དགོངས། །ཡེ་ཤེས་མངོན་ཤེས་ལྡན་ཞིང་ཐུགས་བརྩེ་བ། །མཐུ་རྩལ་རྨད་བྱུང་ཕན་པའི་དགོངས་པ་ཅན། །གཞན་གྱིས་མ་བཅོས་ཉིད་ཀྱིས་ཞལ་འཆེས་པ། །བདེན་པར་གསུངས་པས་བདག་གི་གྲོགས་མཛོད་ཅིག །གང་དག་བྱངཆུབ་སེམས་དང་ལྡན་པ་དང་། །སྐུ་གསུང་ཐུགས་ཀྱི་རྣལ་འབྱོར་སྤྱོད་པ་ལ། །ཀུན་ནས་བསྲུང་ཞིང་རེ་བ་སྐོང་ངོ་ཞེས། །ཁྱེད་ཀྱི་ཐུགས་དམ་མི་འགྱུར་དེ་ལགས་ན། །བདག་ལ་བླ་མེད་བྱང་ཆུབ་སེམས་མཆིས་ཀྱིས། །སྐུ་གསུང་རྣལ་འབྱོར་བརྩོན་པར་བགྱིད་ལགས་ན། །རྡོ་རྗེ་དམ་ཅན་མ་ལུས་རྒྱ་མཚོ་ཡིས། །ཀུན་ནས་བསྲུང་ཞིང་རེ་བ་སྐོང་དུ་གསོལ། །ཐེག་ཆེན་རྣལ་འབྱོར་སྐྱོང་བར་ཞལ་འཆེས་པའི། །དུས་དང་ཚད་མཁྱེན་མཐུ་དང་ལྡན་བཞིན་དུ། །སྐྱེས་མཆོག་ཁྱེད་ཀྱང་བཏང་སྙོམས་མཛད་ན་གོ། །དང་པོའི་དམ་བཅས་འགལ་བར་མི་འགྱུར་རམ། །གང་གི་གང་ལ་རང་གིས་དམ་བཅས་པ། །དེ་ཡིས་དེ་ཉིད་དོན་དུ་གཉེར་དགོངས་པ། །གཞན་གྱིས་བསྐུལ་ཞིང་གསོལ་གདབ་མི་འཚལ་ན། །ཉིད་ཀྱི་ཐུགས་དམ་འབྲས་བུ་མཆིས་པར་མཛོད། །བདག་གི་དམ་ཚིག་རྡོ་རྗེ་མཆོག་གསུམ་པོ། །ཁྱེད་ཀྱི་ཐུགས་དམ་མཆོག་ཀྱང་དེ་ལགས་པས། །རིགས་མི་མཐུན་ཡང་དམ་ཚིག་གིས་བསྡུས་ན། །ལྕམ་དྲལ་ཚུལ་དུ་ཉེ་ཞིང་གདུང་བར་མཛོད། །སྔོན་འདས་དུས་ན་བསྟན་པ་འཇིག་ལ་སོགས། །ཞེ་སྡང་གདུག་པའི་དགྲ་བགེགས་གང་བྱུང་ཡང་། །ཁྱེད་ཀྱི་ཐུགས་རྗེ་ལྷག་པར་དེར་ཕྱུང་ཞིང་། །དྲག་ཤུལ་ཐབས་ཀྱིས་འདུལ་བ་ཇི་བཞིན་དུ། །ད་ལྟ་དུས་ངན་བསྟན་པ་འཇིག་ལ་སོགས། །སྡིག་པའི་འབྲས་བུ་སྨིན་པ་ཁྱེད་མཁྱེན་གྱིས། །རྡོ་རྗེ་ལྕམ་དྲལ་མ་ལུས་རྒྱ་མཚོ་ཡིས། །སོ་སོའི་ཐུགས་དམ་ཆེན་པོར་དགོངས་མཛོད་ལ། །ཇི་ལྟར་འཚམས་པ་བཞིན་དུ་ཕྲིན་ལས་མཛོད། །དབང་ཕྱུག་ལ་སོགས་བྱེད་པོར་ཁས་འཆེས་ཀྱང་། །དེ་ཉིད་དངོས་པོ་ལྟ་བུར་བྱེད་མི་ནུས། །ཁྱེད་ནི་སྒྱུ་མའི་ཆོས་ལ་མངའ་བརྙེས་པས། །སྒྱུ་མའི་རང་བཞིན་ཅིར་ཡང་གྲུབ་པར་མཛོད། །མི་ནུས་མངོན་ཤེས་མཐུ་དང་མི་ལྡན་ཡང་། །དམ་ཚིག་འཆོས་ཕྱིར་ལུས་སྲོག་ཕངས་པ་མེད། །ཁྱེད་ནི་ཐོགས་མེད་མཐུ་དང་ལྡན་བཞིན་དུ། །འགྲོ་བའི་མགོན་སྐྱབས་ཅིའི་ཕྱིར་བསྐུལ་ལས་བཤོལ། །སྲིད་པ་ལས་ཀྱི་དུས་ལ་མ་བབ་ཅེས། །འགྲོ་བ་འདུལ་བའི་ཕྲིན་ལས་མི་མཛད་ཅིང་། །ཐམས་ཅད་ཀུན་ལ་ལས་ཀྱི་དབང་བཙན་ན། །ཐུགས་རྗེའི་བྱིན་རླབས་སུ་ལ་ཅི་ཞིག་བགྱི། །གང་ཞིག་ཆོས་མིན་འགལ་བར་སྤྱོད་པ་ཡང་། །འབད་པའི་འབྲས་བུ་མེད་པར་མི་འགྱུར་རམ། །ཤེས་རབ་སྙིང་རྗེའི་ཐབས་དང་མི་འགལ་བའི། །རེ་བ་བསྐང་བ་ལྟ་ཞིག་སྨོས་ཅི་འཚལ། །འདའ་ཀ་རྡོ་རྗེའི་དམ་ཚིག་མཆོག་སྲུང་བར། །གྲུབ་པ་ཁྱེད་དང་འདྲ་བ་མ་ལགས་ན། །ཆོས་སྲུང་འགྲོ་དོན་བདག་གིས་མི་རྟོགས་པས། །བྱིན་རླབས་མཆོག་དང་ལྡན་པར་མཛད་དུ་གསོལ། །དམ་ཚིག་ཉམས་པ་ལ་སོགས་ཉེས་པ་རྣམས། །ཚེ་རབས་འདི་ལ་ཉམས་སུ་མྱོང་འགྱུར་པ། །ཆོས་དབྱིངས་འགྲོ་དོན་བདག་གིས་རྟོགས་པ་རུ། །ཆོས་ལ་དབང་བསྒྱུར་ཁྱེད་ཀྱིས་བཟློག་ཏུ་གསོལ། །ཐུགས་རྗེ་བརྩེ་ལྡན་རྡོ་རྗེ་ལྕམ་དྲལ་ལ། །འདི་སྐད་བསྐུལ་ཞིང་གསོལ་ལྟ་མི་འཚལ་ན། །ཞེ་སྡང་མཐའ་ཡས་སེམས་ཀྱིས་མི་གསོལ་ཏེ། །འགྲོ་དོན་བྱང་ཆུབ་སེམས་ཀྱིས་སྨྲ་ལགས་ན། །ཐུགས་དང་འགལ་པར་གྱུར་པ་བཟོད་པར་གསོལ། །འཕགས་པའི་བཀའ་ཆད་བདག་ལ་མི་གཏོང་ཞིང་། །ཐུགས་རྗེ་ཆེན་པོས་ཚངས་པ་སྩལ་དུ་གསོལ། །ཞེས་བརྗོད་བརྒྱད་པ་ཚོགས་གཏོར་བྱིན་རླབས་ནི། ཕྱི་ནང་གསང་མཆོད་ཡང་གསང་སྨན་གཏོར་བཅས། རིམ་བཞིན་དང་པོ་ཡོ་བྱད་བསང་ཆུས་བྲན། ཨོཾ་སྭཱ་བྷཱ་ཝ༴ སོགས་ཧཾ་གིས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་གྱི་སྟེང་དུ། རཾ་ལས་མེའི་ཕུང་པོ་འབར་བའི་མཐར་ཀཾ་ལས་ཐོད་པའི་སྒྱེད་པོ་རི་རབ་དང་མཉམ་པ་གསུམ་གྱི་སྟེང་དུ། ཨ་ལས་ཚོགས་གཏོར་གྱི་སྣོད་ཐོད་པ་དུམ་བུ་གཅིག་པ། ཕྱི་དཀར་བ། ནང་དམར་བ། དཔྲལ་པ་རང་ལ་བསྟན་པའི་ནང་དུ་ཚོགས་ཀྱི་ཡོ་བྱད་རྣམས་ཤ་ལྔ་བདུད་རྩི་ལྔར་གྱུར་ཏེ། སྣོད་སྟོང་གསུམ་དང་མཉམ་པ་བསམ་གྱིས་མི་ཁྱབ་པའི་ནང་ཁེངས་པར་གྱུར་པའི་སྟེང་དུ་ཨ་ལས་ཟླ་བའི་ཁ་ཆོད་ཀྱི་དབུས་སུ། རྡོ་རྗེ་རྩེ་ལྔ་བའི་ཡུ་བ་ཨོཾ་ཨཱཿ་ཧཱུཾ་གིས་ལྟེ་བ་དང། ཨོཾ་ཧཱུཾ་ཏྲཾ་ཧྲཱིཿ ཨཱས་རྭ་རྣམས་མཚན་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། ཡཾ་ལ་ཕོག །ཡཾ་ལས་རླུང་གཡོས་མེ་སྦར་ཏེ། ཐོད་པའི་བདུད་རྩི་ཁོལ་བའི་རླངས་པ་ཡི་གེ་ལྔ་ལ་ཕོག་པས་རིགས་ལྔ་ཡབ་ཡུམ་དུ་གྱུར་ཏེ། སྙོམས་པར་ཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་རྡོ་རྗེའི་ཁོང་གསེང་ནས་མར་སོང་སྟེ་ཐོད་པའི་ནང་ཡེ་ཤེས་ཀྱི་བདུད་རྩིས་གང་། ལྟེ་བའི་ཨོཾ་ཨཱཿཧཱུཾ་ལས་འོད་འཕྲོས་པས་ཕྱོགས་བཅུའི་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་དཔག་ཏུ་མེད་པ་སྙོམས་པར་ཞུགས་པའི་བདུད་རྩིའི་རྒྱུན་ཐོད་པའི་ནང་ནས་མར་བབས་ཡེ་ཤེས་ལྔའི་བདུད་རྩིས་ཁེངས། ཟླ་བའི་ཁ་ཆོད་རྡོ་རྗེ་དང་བཅས་པ་ཡང་འོད་དུ་ཞུ་ནས་ཐོད་པའི་བདུད་རྩི་དང་གཉིས་སུ་མེད་པར་འདྲེས་པར་བསམ་མོ། གཉིས་པ་ཕྱི་མཆོད་ལའང་རྒྱས་འདོད་ན། གཞན་ནས་ཁ་སྐོང་བསྡུ་ན་འདི་བཞིན་ནོ། བླ་མ་ཡི་དམ་མཁའ་འགྲོ་ལ། །མཛེས་པའི་མེ་ཏོག་རྒྱན་གྱིས་མཆོད། །དྲི་ཞིམ་བདུག་སྤོས་ཤངས་ལ་མཆོད། །སྣང་གསལ་མར་མེ་སྤྱན་ལ་མཆོད། །ཞལ་ཟས་རོ་མཆོག་ལྗགས་ལ་མཆོད། །ཡིད་འོང་དྲི་མཆོག་ཐུགས་ཀར་མཆོད། །རོལ་མོ་སིལ་སྙན་སྙན་ལ་མཆོད། །འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་པུཥྤེ། དྷཔྤེ་ཨ་ལོ་ཀེ་གྷནྷེ་ནཻ་ཝི་དྱ་ཤཔྡ་ཨཱཿཧཱུཾ། གསུམ་པ་ནང་གི་མཆོད་པ་ནི། བླ་མ་བདེ་གཤེགས་མཁའ་འགྲོ་ལ། །དབང་པོ་རྣམ་ལྔའི་མེ་ཏོག་མཆོད། །གསུར་ཆེན་དྲི་ཡི་བདུག་སྤོས༴ ཞུན་ཆེན་སྣང་ལ་ནམས༴ རྡོ་རྗེ་དྲི་ཆུ་བྱུག་པས༴ རྡོ་རྗེ་དྲི་ཆེན་ཞལ་ཟས༴ རྐང་གླིང་ཐོད་པའི་རོལ་མོས༴ བྱང་སེམས་དཀར་དམར་བདུད་རྩིས༴ དུག་ལྔ་ཡེ་ཤེས་ལྔ་རུ༴ དུག་གསུམ་སྐུ་གསུང་ཐུགས་སུ༴ སྣང་སྲིད་ཕྱག་རྒྱ་བཞི་རུ༴ འགྲོ་བའི་དོན་དུ་བཞེས་སུ་གསོལ། སརྦ་པཉྩ་ཨམྲྀ་ཏ་ཧཱུཾ་ཧྲཱིཿཋཱཿ བཞི་བ་གསང་བའི་མཆོད་པ་ནི། བླ་མ་ཡི་དམ་མཁའ་འགྲོ་ལ། ཡབ་ཡུམ་གཉིས་མེད་མཁའ་གསང་ནས། འཁྲིལ་སྦྱོར་བྱང་ཆུབ་སེམས་ཀྱིས༴ བདེ་སྟོང་རོ་མཉམ་མཆོད་པར་བཞེས། །ཨོཾ་ཨཱཿཧཱུཾ་ཧྲཱིཿཐཱཿ ལྔ་པ་དེ་ཁོ་ན་ཉིད་མཆོད་པ་ནི། བླ་མ་ཡི་དམ་མཁའ་འགྲོ་ལ། །བདེ་གསལ་རིག་པ་ཡེ་ཤེས་ངང་། །སྣང་བ་སྣ་ཚོགས་ཐམས་ཅད་ཀུན། །བདེ་སྟོང་གསལ་སྟོང་རིག་པ་སྟོང་། །མི་རྟོགས་རང་བཞིན་སྣང་བས་སྟོང་། །ཡེ་ཤེས་ལྔ་ལྡན་ངང་དུ་བཞེས། །ཨོཾ་ཨཱཿ་ཧཱུཾ་ཧྲཱིཿཐཱ༔ དྲུག་པ་བདུད་རྩིའི་མཆོད་པ་ནི། བླ་མ་བདེ་གཤེགས་མཁའ་འགྲོའི་ཚོགས་རྣམས་ལ། །རྩ་བརྒྱད་སྟོང་སྦྱར་བདུད་རྩི་ཨམྲྀ་ཏ། དུག་ལྔ་གནས་གྱུར་ཡེ་ཤེས་སྒྲུབ་པའི་རྫས། །རོ་མཆོག་ཡོན་ཏན་ཀུན་དང་ལྡན་པས་མཆོད། །ཨོཾ་སརྦ་པཉྩ་ཨམྲྀ་ཏ་ཁཱ་ཧི། བདུན་པ་གཏོར་མའི་མཆོད་པ་ནི། བླ་མ་ཡི་དམ་མཁའ་འགྲོ་ལ། །གཏོར་མའི་མཆོད་པ་འབུལ་བ་ནི། །ཞལ་ཟས་སྣ་ཚོགས་གཏོར་ཆེན་ལ། །ཤ་ལྔ་བདུད་རྩའི་རྒྱན་དང་ལྡན། །དྲི་དང་རོ་མཆོག་ལྡན་པས་མཆོད། །ཨོཾ་གུ་རུ་དྷཱེ་ཝ་ཌཱཀྐི་ནི་ཧ་རི་ནི་ས་ར་ཙ་ཧྲཱི་ཡ་ཨེ་དམ་བྷ་ལིནྟ་གྷྲི་ན་ཁ་ཁ་ཁཱ་ཧི་ཁཱ་ཧི། ཞེས་པས་གཏོར་མ་འབུལ་བའི་རིམ་པ་ནི་གཏོར་མ་དང་པོ་བླ་མ་ཡི་དམ་ལ་ཕུལ་བས་དགྱེས་ནས་གསོལ་བར་བསམ་ཞིང་། ཨོཾ་མ་ཧཱ་གུ་རུ་དྷེ་ཝ་ཌཱཀྐི་ནི་བ་ལིངྟ་ཁ་ཁ་ཁཱ་ཧི་ཁཱ་ཧི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཉིད་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་འབུལ་ལོ། མཆོག་དང་ཐུན་མོང་གི་དངོས་གྲུབ་རྒྱ་ཆེན་པོ་བསྩལ་དུ་གསོལ། གཉིས་པ་མཁའ་འགྲོ་སྤྱི་ལ་ཕུལ་བས་དགྱེས་ནས་གསོལ་བར་བསམ་ཞིང་། ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་ཧཱ་རི་ནི་ས་ས་མ་ཡ་བ་ལིནྡ༴ ཨོཾ་བྷུདྷ་ཌཱཀྐི་ནི་བ་ལིནྟ༴ བཛྲ་ཌཱཀྐི༴ རཏྣ༴ པདྨ༴ ཀརྨ༴ ས་མ་ཡ༴ བྷི་ཤ་ཌཱཀྐི༴ ལོ་ཀ་ཌཱཀྐི༴ ཧ་རི་ནི་ས་ར་ཙ་ཧྲཱི་ཡ་ཙིཏྟ་྄ཧྲིང་ཧྲིང་ཛ་ཛ་བྷ་ལིནྟ༴ དཔལ་ལྡན་རྡོ་རྗེ་ཕག་མོ་འཁོར་མཁའ་འགྲོ་སྡེ་ལྔས་བསྐོར་བ་ཡེ་ཤེས་དང་ལས་ལ་གྲུབ་པ་ཐམས་ཅད་ལ་འབུལ་ལོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་གྲུབ་པར་མཛད་དུ་གསོལ། །གསུམ་པ་ནི་སྲུང་མ་དམ་ཅན་རྒྱ་མཚོ་སྤྱི་ལ་ཕུལ་བས་དགྱེས་པར་བསམ་ཞིང་། ཨོཾ་མ་ཧཱ་ཀ་ལ་ཤ་ས་ན་ཨམྲྀ་ཏ་བ་ལིནྜ༴ ཨོཾ་མ་མ་ཏྲག་རཀྴ་ཨེ༴ ཨོཾ་རཀྨོ་ཁྱི་ཁ་ལེ་བ༴ ཨོཾ་རཱ་ཧུ་ལ༴ ཨོཾ་མེ་རུ་ཙེ༴ ཨོཾ་བཛྲ་ས་དྷུ༴ དཔལ་ལྡན་མགོན་པོ་མ་ཧཱ་ཀ་ལ་འཁོར་དང་བཅས་པ་རྣམས་དང་། ཁྱད་པར་དུ་ཡང་དཔལ་ལྡན་སྔགས་ཀྱི་བདག་མོ། །ཤན་པ་སྲོག་སྒྲུབ་ནག་མོ། གཟའི་དགེ་བསྙེན་རཱ་ཧུ་ལ། གནོད་སྦྱིན་དམར་ནག། དམ་ཅན་རྡོ་རྗེ་ལེགས་པ་འཁོར་དང་བཅས་པ་རྣམས་དང་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་ལ་འབུལ་ལོ། །སངས་རྒྱས་ཀྱི་བསྟན་པ་བསྲུང་ཞིང་བདག་ཅག་འཁོར་དང་བཅས་པ་ཐམས་ཅད་ལ་བསྲུང་བ་དང་རེ་བ་བསྐང་དུ་གསོལ། བཞི་བ་ནི་གཏེར་བདག་རྣམས་དང་ཡུལ་ལྷ་གཞི་བདག་ལ་ཕུལ་བས་དགྱེས་པར་བསམ་ལ། ཨོཾ་ཨ་ཀ་རོ༴ ཨོཾ་ཨཱཿཧཱུཾཿཕཊཿསྭཱ་ཧཱ། འཛམ་བུའི་གླིང་དང་ཁ་བ་ཅན་ན་གནས་པའི་གཏེར་བདག་ཆེན་པོ་རྣམས་དང་ཡུལ་ལྷ་གཞི་བདག་གི་རིགས་སུ་གྱུར་པ་ལྷ་མཐུ་བོ་ཆེ་ཀླུ་མཐུ་བོ་ཆེ། བདུད༴ བཙན༴ མ་མོ་མཐུ་བོ་ཆེ་ལ་སོགས་པ་ཐམས་ཅད་ལ་འབུལ་ལོ། བཀའ་དང་བསྟན་པ་སྲུངས་ཤིག །འཁོར་དང་གང་ཟག་སྐྱོངས་ཤིག །བདག་ཅག་འཁོར་དང་བཅས་པའི་བསམ་པ་བསྒྲུབ་ཅིང་རེ་བ་བསྐང་བ་དང་། གནས་མགྲོན་གྱི་དམ་ཚིག་གཉན་པོ་བསྲུང་ཞིང་བཅོལ་བའི་ཕྲིན་ལས་ཐམས་ཅད་འགྲུབ་པར་མཛད་དུ་གསོལ། ལྔ་པ་ནི་འབྱུང་པོ་ཐམས་ཅད་ལ་ཕུལ་བས་མཉེས་པར་བསམ་ཞིང་། ཨོཾ་ཨ་ཀ༴ འཁོར་བ་དང་མྱ་ངན་ལས་འདས་པའི་འབྱུང་པོ་ཀུན་ཏུ་རྒྱུ་ཞིང་ཕན་གནོད་བྱེད་པ་ཐམས་ཅད་དང་། ཁྱད་པར་དུ་ཡང་མཁའ་འགྲོ་སུམ་ཅུ་རྩ་གཉིས་གིང་ཆེན་པོ་བཅོ་བརྒྱད་ལང་ཀའི་བདག་པོ་མགྲིན་བཅུ། ཕོ་ཉ་སུམ་བརྒྱ་དྲུག་ཅུ། མགྱོགས་མ་བཞི། འབར་མ་བརྒྱད། མ་མོ་བདུན། སྲིང་མོ་བཞི་ལ་སོགས་པ་རྣལ་འབྱོར་པའི་རེ་བ་བསྐང་བར་ཁས་བླངས་པ་རྣམས་དང་། གཞན་ཡང་ལྷ་དང་ཀླུ་དང་ཤ་ཟ་དང་གྲིབ་གནོན་ལ་སོགས་པ་འབྱུང་པོའི་ཚོགས་ཐམས་ཅད་ལ་འབུལ་ལོ། རྣལ་འབྱོར་པ་བདག་ཅག་འཁོར་དང་བཅས་པ་ཐམས་ཅད་ལ་རྐྱེན་ཕྱི་ནང་གི་བར་དུ་གཅོད་པ་ཐམས་ཅད་མི་འབྱུང་ཞིང་། ཆག་ཆེ་བ་དང་ཉམ་ང་བ་ཐམས་ཅད་བཟློག་ཏུ་གསོལ། རྣམ་དག་ཆོས་ཉིད་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་བྱུང་། །ཐབས་ཤེས་ཟླ་གསང་ཐིག་ལེ་ལས། །ཡལ་གམ་ཅན་རྣམས་འདུ་བར་མཛོད། །འདུ་མཛད་རྣམ་དག་འདི་བཞེས་ལ། །བཅོལ་པའི་ཕྲིན་ལས་གྲུབ་པར་མཛོད། །དེ་བཞིན་བཏང་མཐར་དགུ་པ་སྐོང་པ་ལའང་། རྣམ་གྲངས་ལྔ་ལས་དང་པོ་མཎྜལ་ནི། ཨོཾ་ཨཱཿ་ཧཱུཾ། ཕྱོགས་བཅུའི་འཇིག་རྟེན་སྣ་ཚོགས་ཁམས་ཅན་སེམས་ཅན་དབྱིངས་མཐའ་ཇི་སྲིད་པར། མ་ལུས་ཀུན་ཁྱབ་གཟུགས་དང་བཀོད་པ་དཔག་ཡས་རྒྱ་མཚོའི་སྙིང་པོ་ཅན། གངས་ཆེན་མཚོས་བརྒྱན་ལྷ་མིའི་མཆོད་སྤྲིན་ནམ་མཁའི་དབྱིངས་ཀུན་ཇི་ཙམ་པ། དེ་སྙེད་རྒྱལ་བ་རྒྱ་མཚོའི་ཚོགས་བཅས་མཆོད་འོས་རྣམ་ལ་གུས་པས་འབུལ། །གསེར་གྱི་ས་གཞི་རི་རྒྱལ་ལྷུན་པོས་བརྒྱན། །གླིང་བཞི་གླིང་ཕྲན་ཉི་ཟླ་གཟའ་སྐར་བཀྲམ། །ལྷ་མིའི་འདོད་ཡོན་ཕུན་ཚོགས་དང་ལྡན་པ། །གླིང་བཞི་འཇིག་རྟེན་རྒྱན་གྱུར་རྣམས་ཀྱིས་མཆོད། །རིན་ཆེན་ཆུ་མཚོ་མེ་ཏོག་གིས་བཀྲམ་རྣམ་དག་པདྨོའི་གཞལ་ཡས་ཁང་། །ཆུ་དབང་ཡིད་བཞིན་དབང་པོས་ཉེར་བརྟེན་ས་འོག་ས་སྟེང་ས་བླ་དང་། བར་སྣང་ལ་གནས་ཁང་བརྩེགས་ཡིད་འོང་རྣམ་མང་འདོད་ལྷའི་སྐྱེད་མོས་ཚལ། འོད་དང་གཟི་བརྗིད་དཔལ་དུ་འབར་བས་འགྲོ་བའི་བླ་མ་སྲས་བཅས་མཆོད། གསེར་དང་དངུལ་དང་ཤེལ་དང་ཨནྟྲི་རྙིལ། མར་གད་མུ་ས་གར་པ་བཻཌཱུཪྱ། ཡིད་བཞིན་ནོར་བུ་སྣ་ཚོགས་མཛེས་འབར་བ། བུམ་བཟང་དཔག་བསམ་ཤིང་ཆེན་རྣམས་ཀྱིས་མཆོད། ཀུ་མུ་ཏ་དང་ཨུཏྤལ་མེ་ཏོག་དྲི་ལྡན་པ། །མདངས་བཀྲ་ཡིད་འོང་ཁ་ཕྱེ་ལྷག་གེར་གསལ་གྱུར་ཅིག །ནོར་བུ་རྐང་གདུབ་ཡིད་འོང་འཁྲོལ་བས་མཛེས་བྱས་པ། །ལྷ་མིའི་བུ་མོ་བསྟོད་དབྱངས་སྒྲོགས་ལྡན་རྣམས་ཀྱིས་མཆོད། །རིན་ཆེན་བདུན་དང་བཀྲ་ཤིས་རྣམ་པ་བརྒྱད། །གཞལ་ཡས་ཁང་མཛེས་ཡུལ་འཁོར་ཉམས་དགའ་བར། །མི་དབང་དཔལ་ཏེ་ཕུན་ཚོགས་འདི་འབུལ་བས། །རྒྱལ་བའི་འབྱོར་ཚོགས་ལྷུན་གྱིས་གྲུབ་པར་ཤོག །བསམ་གཏན་ལྷ་གནས་ཤིན་ཏུ་ཉམས་དགའ་དྭངས་བའི་འོད་ཀྱི་གཞལ་ཡས་ཁང་། རྣམ་བཀྲ་གཟུགས་བཟང་ལྷ་མང་གིས་མཛེས་ཏིང་འཛིན་ཞི་བའི་སྐྱེད་མོས་ཚལ། རྩེ་གཅིག་མི་གཡོ་གཟུགས་མེད་རབ་ཞི་བསོད་ནམས་སྤྲིན་བཟང་སྙིང་པོ་ཅན། སྲིད་གསུམ་སྣོད་བཅུད་དངོས་དང་དངོས་མེད་བདེ་དགའི་རྒྱ་མཚོ་རྣམས་ཀྱིས་མཆོད། ཉན་ཐོས་རང་སངས་རྒྱས་དང་བྱང་ཆུབ་སེམས། །རྒྱལ་བའི་གཟུགས་སྤྲིན་སྙིང་པོ་ལས་ཐོན་པ། །ཕྱི་ནང་གསང་བའི་མཆོད་སྤྲིན་རྒྱ་མཚོ་ཡིས། །བླ་མ་ཡི་དམ་དཀྱིལ་འཁོར་ལྷ་ཚོགས་མཆོད། །དག་པའི་ཞིང་ཁམས་རྒྱལ་སྲས་འབྱོར་པས་ཡོངས་གང་ལྷ་མིའི་བདེ་འབྱུང་གནས། རྒྱལ་བ་རྒྱ་མཚོའི་སྤྲིན་ཕུང་དང་བཅས། ཡེ་ཤེས་ལས་གྲུབ་གཞལ་ཡས་ཁང་། ནམ་མཁའི་དབྱིངས་ཁྱབ་ལོངས་སྐུའི་དཔལ་འབྱོར་ཆོས་སྐུའི་ཞིང་གི་སྙིང་པོ་ཅན། མ་ལུས་ཡོངས་བཀང་བདེ་ཆེན་རྒྱ་མཚོར་འགྲོ་ཀུན་ཕྱམ་གཅིག་བགྲོད་པར་ཤོག །རིན་ཆེན་མཎྜལ་ཀུན་བཟང་མཆོད་པའི་སྤྲིན། །སྲིད་ཞིའི་འབྱོར་ཚོགས་དཔག་མེད་དང་ལྡན་པ། །ཕུན་ཚོགས་བསོད་ནམས་ཞིང་ལ་ཕུལ་བ་ཡིས། །འགྲོ་ཀུན་ཐར་བའི་གྲོང་དུ་ཕྱིན་པར་ཤོག །ཅེས་བརྗོད་སླར་ཡང་ཀུན་བཟང་མཆོད་སྤྲིན་ནི། བཞི་ཆོད། ཧོ་སྣང་སྲིད་ཡོངས་རྫོགས་དམ་པ་རིགས་བརྒྱའི་ལྷ། །སྣོད་བཅུད་མ་ལུས་འདོད་ཡོན་རོལ་པའི་རྒྱན། །ཀུན་བཟང་མཆོད་པའི་སྤྲིན་ཕུང་འབྱམས་ཀླས་པ། །ཆོས་ཉིད་མངོན་སུམ་དོན་གྱི་ལྷ་ལ་འབུལ། །ཉམས་སྣང་གོང་འཕེལ་ངང་དུ་བཞེས་ནས་ཀྱང་། །རིག་པ་ཚད་ཕེབས་ཀློང་དུ་ཚོགས་རྫོགས་ཤིང་། །ཆོས་ཟད་བློ་འདས་ཆེན་པོར་སངས་རྒྱས་ཏེ། །འཁོར་བ་དོང་ནས་སྤྲུག་པའི་དངོས་གྲུབ་སྩོལ། །ན་མཿསརྦ་ཏ་ཐཱ་གཱ་ཏ་བྷྱོ༴ སོགས ནམ་མཁའ་མཛོད་ཀྱི་སྔགས་རྒྱ་བརྗོད། གཉིས་པ་སྦྱོར་བ་སྨན་གྱི་སྐོང་། མཐེབ་སྤྲིན་ཉི་ཟླའི་ག་ལུས་འབུལ། ཧོ་བདེ་ཆེན་འཁོར་ལོའི་བྷནྡ་རུ། །ཧཾ་ཡིག་རང་བྱུང་བདུད་རྩིར་བསྐྱིལ། །སྲོག་འཛིན་ཡེ་ཤེས་ཐིག་ལེ་འདིས། །སྤྲུལ་སྐུའི་ལྷ་ཚོགས་ཐུགས་དམ་བསྐང་། །བསྐང་འགྱུར་དབང་དང་དངོས་གྲུབ་སྩོལ། །ལོངས་སྤྱོད་འཁོར་ལོའི་བྷནྡ་རུ། །བཟའ་བཏུང་ལྷུན་གྲུབ་བདུད་རྩིར་བསྐྱིལ། །རྩ་མདུད་རང་གྲོལ་ཐིག་ལེ་འདིས། །ལོངས་སྐུའི་ལྷ་ཚོགས་ཐུགས་དམ་བསྐང་། །བསྐང་གྱུར༴ ཆོས་ཀྱི་འཁོར་ལོའི་བྷནྡ་རུ། །དྲན་བསམ་རྣམ་རྟོག་བདུད་རྩིར་བསྐྱིལ། །དུག་གསུམ་རྣམ་གྲོལ་ཐིག་ལེ་འདིས། །ཆོས་སྐུའི་ལྷ་ཚོགས༴ བསྐང་གྱུར༴ སྤྲུལ་པའི་འཁོར་ལོའི་བྷནྡ་རུ། །དྲན་བསམ་རྣམ་རྟོག་བདུད་རྩིར་བསྐྱིལ། །དུག་གསུམ་རྣམ་གྲོལ་ཐིག་ལེ་འདིས། །ཆོས་སྐུའི་ལྷ་ཚོགས༴ བསྐང་གྱུར༴ སྤྲུལ་པའི་འཁོར་ལོའི་བྷནྡྷ་རུ། །འབར་འཛག་བཅུད་ཀྱི་བདུད་རྩིར༴ བདེ་བ་ཆེན་པོའི་ཐིག་ལེ་འདིས། །མི་འགྱུར་རྡོ་རྗེའི་ཐུགས་དམ་བསྐང་། །བསྐང་གྱུར༴ བདེ་སྐྱོང་འཁོར་ལོའི་བྷནྡྷ་རུ། །བྱང་ཆུབ་སེམས་མཆོག་བདུད་རྩིར་བསྐྱིལ། །དགའ་བཞིའི་དབྱིངས་གྲོལ་ཐིག་ལེ་འདིས། །མངོན་པར་བྱང་ཆུབ༴ བསྐངས་གྱུར༴ གསུམ་པ་སྒྲོལ་བའི་རཀྟས་སྐོང་། ཧཱུཾ་ཀློང་ལྔ་དབྱིངས་ཀྱི་ཀཱ་པ་ལར། །སྣང་སྲིད་ཡུམ་གྱི་རཀྟར་བསྐྱིལ། །ཀུན་ཏུ་བཟང་པོའི་རྫས་མཆོག་འདིས། །ཞི་ཁྲོའི་ལྷ་ཚོགས༴ བསྐང་གྱུར༴ སྟོང་ཆེན་ཡུམ་གྱི་ཀཱ་པ་ལར། །སྣང་སྲིད་བཅུད་ཀྱི་རཀྟར་བསྐྱིལ། །གཙང་རྨེ་བྲལ་བའི་རྫས་མཆོག་འདིས། །ཞི་ཁྲོའི་ལྷ་ཚོགས༴ བསྐང༴ ཨེ་དབྱིངས་ཆོས་འབྱུང་ཀཱ་པ་ལར། །ཞིང་བཅུའི་སྙིང་ཁྲག་རཀྟར་བསྐྱིལ། །འཁོར་བ་ལུགས་ལྡོག་རྫས་མཆོག་འདིས། །ཞི་ཁྲོའི༴ བསྐང༴ དབུ་མ་རྩ་ཡི་ཀཱ་པ་ལར། །དུག་གསུམ་རྣམ་དག་རཀྟ་བསྐྱིལ། །རྒྱུད་དྲུག་ཀུན་གྲོལ་རྫས་མཆོག་འདིས། །ཞི་ཁྲོའི༴ བསྐང༴ སྒྲ་གཅན་རླུང་གི་ཀ་པ་ལར། །ཙནྡྲ་ལི་ཡི་རཀྟར༴ དགའ་བཞི་བདེ་སྟོང་རྫས་མཆོག་འདིས། །ཞི་ཁྲོའི༴ བསྐངས༴ བཞི་བ་ཟུང་འཇུག་གཏོར་མའི་སྐོང་༴ ཧཱུཾ་ཧྲཱིཿ མ་བཅོས་ཀློང་ཡང་གཏོར་གཞོང་དུ། །སྣང་སྲིད་ཡོངས་གྲོལ་གཏོར་མར་བཤམས། །དངོས་འཛིན་བྲལ་བའི་དམ་རྫས་འདིས། །རང་སྣང་ཞི་ཁྲོའི༴ བསྐང༴ བདེན་མེད་སྒྱུ་མའི་གཏོར་གཞོང་༴ གཏད་མེད་ཆོས་སྐུའི་གཏོར་མར༴ ཚོགས་དྲུག་རང་ཡན་དམ་རྫས་འདིས། །རང་སྣང་ཞི་ཁྲོའི༴ བསྐང༴ ལྷུན་གྲུབ་ཕུང་པོའི་གཏོར༴ དོན་སྣོད་རང་བྱུང་གཏོར༴ ཁྱད་པར་རྨད་བྱུང་དམ་རྫས༴ རང་སྣང་༴ བསྐང༴ ལྔ་ཕུང་སྒྱུ་མའི་གཏོར༴ བདུད་རྩི་ལྔ་ཡི་གཏོར༴ རིགས་ལྔ་བཅུད་ཀྱི་དམ་རྫས༴ རང་སྣང་༴ བསྐང༴ བྷ་ག་དབྱིངས་ཀྱི་གཏོར༴ ལིང་ག་རིག་པའི་གཏོར༴ ཟུང་འཇུག་བདེ་ཆེན་དམ༴ རང་༴ བསྐང༴ ལྔ་པ་སྣང་གསལ་མར་མེའི་སྐོང་། ཨཱཿ ཀུན་གཞི་རང་བྱུང་ཀོང་བུ་རུ། །རྣམ་ཤེས་རྣམ་དག་སྡོང་བུ་བཙུགས། །ཆོས་དབྱིངས་ཡེ་ཤེས་མར་ཁུས་གཏམ། །རིག་པ་རང་གསལ་སྒྲོན་མེ་སྦར། །ཀ་དག་གཞི་ཡི་སྣང་བ་འདིས། །མི་བསྐྱོད་རིགས་མཆོག༴ བསྐངས༴ དབྱིངས་རིག་སྟོང་པའི་ཀོང་བུ་རུ། །ལྷུན་གྲུབ་གཟུགས་སྣང་སྡོང་༴ མེ་ལོང་ཡེ་ཤེས་མར༴ ཤེས་རབ་རང་བྱུང་སྒྲོན་མེ༴ ཆོས་ཉིད་མངོན་སུམ་སྣང་བ༴ རྣམ་སྣང་རིགས་མཆོག༴ བསྐང༴ ཀ་ཏི་ཤེལ་གྱི་ཀོང་༴ ཚོར་བ་རྣམ་དག་སྡོང་༴ མཉམ་ཉིད་ཡེ་ཤེས་མར༴ རྒྱངས་ཞག་འོད་གསལ་སྒྲོན༴ ཉམས་སྣང་གོང་འཕེལ་སྣང་༴ རིན་ཆེན་རིགས་མཆོག༴ བསྐང༴ འཇའ་ཟེར་ཐིག་ལེའི་ཀོང་༴ འདུ་ཤེས་རྣམ་དག་སྡོང་༴ སོར་རྟོག་ཡེ་ཤེས་མར༴ དག་པ་དབྱིངས་ཀྱི་སྒྲོན༴ རིག་པ་ཚད་ཕེབས་སྣང་བ་འདིས། སྣང་མཐའི་རིགས་མཆོག༴ བསྐང༴ གཞོན་ནུ་བུམ་སྐུའི་ཀོང་བུ༴ འདུ་བྱེད་རྣམ་དག་སྡོང་༴ བྱ་གྲུབ་ཡེ་ཤེས་མར༴ ཐིག་ལེ་སྟོང་པའི་སྒྲོན༴ བློ་བྲལ་ཆོས་ཟད་སྣང་༴ དོན་གྲུབ་རིགས་མཆོག༴ བསྐང༴ དེ་ལྟར་བསྐང་ནས་རྗེས་འབྲེལ་བཤགས་པ་ནི་ལྷུག། ཡེ་ཤེས་ལྷ་དང་མཁའ་འགྲོ་དམ་ཚིག་ཅན། །ཕྱི་ནང་སྲུང་མ་མ་ལུས་དགོངས་སུ་གསོལ། །ཡུན་རིང་དུས་ནས་བསྙེན་ཅིང་བསྒྲུབ་པའི་ལྷ། །སྲུང་མ་དམ་ཅན་མ་ལུས་དགོངས་སུ་གསོལ། །རྡོ་རྗེ་སློབ་དཔོན་མཆེད་དང་ལྕམ་དྲལ་དང་། །རིག་འཛིན་སྒྲུབ་པོ་རྣམས་ཀྱང་དགོངས༴ རྣལ་འབྱོར་དམ་ཚིག་བསྲུང་བར་ཞལ་འཆེས་པའི། །སྐུ་གསུམ་གདུང་འཚོབ་རྣམས་ཀྱང་དགོངས་སུ་གསོལ། །བཀོད་པའི་རྒྱལ་པོ་དམ་ཚིག་འབུམ་སྡེ་ལས། །ཡོ་ག་རྣམ་པ་བཞི་ཡི་དོན་ཆེད་དུ། །མཁྱེན་རབ་མཆོག་ཏུ་གྱུར་པའི་གསང་བདག་གིས། །ཉི་ཤུ་རྩ་བརྒྱད་མདོར་བསྡུས་གྲངས་བསྟན་པ། །རྟོགས་ནས་བསྲུང་ཞིང་བསྒྲུབ་པར་དམ་བཅས་པའི། །ཚུལ་ལམ་གཞུང་བཞིན་སྒྲུབ་རྔོ་མ་ཐོགས་པར། །མ་རིག་བདག་ཅག་ལུས་དང་ངག་སེམས་ཀྱི། །བག་མེད་ཚུལ་གྱིས་དམ་ལས་འགལ་གྱུར་ཏེ། །རིས་ཆོད་རང་གར་བསྲུང་མཚམས་འདས་པ་དང་། །མ་རྟོགས་མ་བསྲུང་བསྒྲུབ་པའི་རྩལ་ཆུང་བས། །རྩ་བ་ཡན་ལག་བཅས་པའི་དམ་ཚིག་ལས། །ཉམས་ཆག་འགལ་འཁྲུལ་གྱུར་པ་མཐོལ་ལོ་བཤགས། །རྡོ་རྗེ་སློབ་དཔོན་མཆེད་དང་ལྕམ་དྲལ་ལ། །ལོག་ལྟ་ངན་སེམས་སྐུ་འཕྲོག་བརྡེག་ལ་སོགས། །ངན་དུ་སྨྲ་ཞིང་གནོད་པ་དངོས་སུ་བགྱིས། །སྐུ་ཡི་དམ་ཚིག་ཉམས༴ ཡི་དམ་ལྷ་ཡི་ཏིང་འཛིན་གཡེལ་གྱུར་ཅིང་། །ཕྱག་རྒྱ་རྣམ་བཞི་གཞུང་བཞིན་མ་གསལ་ཏེ། །སྔགས་དང་བཟླས་བརྗོད་སྙིང་པོ་བར་ཆད་པས། །གསུང་གི་དམ་ཚིག་ཉམས༴ གསང་བཅུ་ལ་སོགས་མན་ངག་གཉེར་གཏད་པ། །དམ་ཚིག་ཉམས་དང་མ་འདྲེས་མེད་པ་ལ། །ཚིག་ཏུ་འཛགས་ཤིང་སྤྱོད་ལམ་རྩིང་པ་ཡིས། །ཐུགས་ཀྱི་དམ་ཚིག་ཉམས༴ སྤྱད་པར་བྱ་བའི་དམ་ཚིག་རྣམ་པ་ལྔ། །སྦྱོར་སྒྲོལ་མ་བྱིན་ལེན་དང་རྫུན་དུ་སྨྲ། །ཚིག་བརླང་ལ་སོགས་དམ་ཚིག་རྣམ་ལྔ་ནི། །གཉིས་སུ་མེད་པའི་ངང་དུ་མཉམ་སྦྱོར་ནས། །འགྲོ་བའི་དོན་དུ་གཞུང་བཞིན་སྤྱད་རྒྱུ་ལ། །བཀའ་དང་གཞུང་བཞིན་སྤྱད་པར་མ་གྱུར་ཏེ། །མ་རིག་ལོག་པར་སྤྱད་པའི་ཉེས་བྱས་ཀྱིས། །སྤྱད་པའི་དམ་ཚིག་ཉམས༴ མི་སྤང་པ་ཡི་དམ་ཚིག་རྣམ་ལྔ་ནི། །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལ་སོགས་ཉོན་མོངས་རྣམ་ལྔ་ནི། །ཡེ་ནས་རིགས་ལྔའི་རང་བཞིན་ཡིན་པའི་ཕྱིར། །རྟོགས་ནས་སྤང་དུ་མེད་པར་གནས་རྒྱུ་ལ། །དེ་བཞིན་མ་རྟོགས་ཉོན་མོངས་རང་དགར་སྤྱད། །མི་སྤངས་དམ་ཚིག༴ དང་དུ་བླངས་བའི་དམ་ཚིག་ལྔ་པོ་ནི། །དྲི་ཆེན་དྲི་ཆུ་དམར་ཆེན་ཟིལ་པ་དང་། །ཤ་ཆེན་ལ་སོགས་དམ་རྫས་རྣམ་པ་ལྔ། །གྲུབ་པ་བཞི་དང་ཡིན་པ་གསུམ་ལ་སོགས། །སོ་སོའི་རྣམ་པར་རྟོགས་པ་ཀུན་སྦྱོར་ཞིང་། །དངོས་གྲུབ་སྒྲུབ་པར་བྱེད་པའི་ཐབས་ཆེན་པོ། །འཛིན་རྟོག་མེད་པར་དང་དུ་བླང་རྒྱུ་ལ། །གཉིས་མེད་ལྟ་བས་དང་དུ་མ་བླངས་ཏེ། །གཙང་རྨེར་བལྟས་ནས་ཚུལ་བཞིན་མ་བླངས་པས། །བརྟེན་པའི་དམ་ཚིག་ཉམས་པ༴ ཤེས་པར་བྱ་བའི་དམ་ཚིག་རྣམ་ལྔ་ལ། །ཕུང་པོ་ལྔ་དང་འབྱུང་བ་ཆེན་པོ་ལྔ། །ཁ་དོག་ལྔ་དང་ཡུལ་ལྔ་དབང་པོ་ལྔ། །རྣམ་ཤེས་ལྔ་དང་རིགས་ལྔ་ཡེ་ཤེས་ལྔ། །ཡབ་ལྔ་ཡུམ་ལྔར་སྦྱོར་ཞིང་ཤེས་པ་ཡིས། །རྟོགས་པ་ཁྱད་པར་ཅན་དུ་བགྱིད་རྒྱུ་ལས། །རྨོངས་ཤིང་འཁྲུལ་བས་དེ་ལྟར་མ་རྟོགས་ཏེ། །ཉན་ཐོས་ལ་སོགས་ཐེག་པ་འོག་མ་ལས།།རྟོོགས་པ་ཁྱད་པར་ཅན་དུ་མ་གྱུར་ཏེ། །ཤེས་བྱའི་དམ་ཚིག༴ བསྒྲུབ་པར་བྱ་བའི་དམ་ཚིག་ལྔ་རྣམས་ལ། །རྡོ་རྗེའི་རིགས་དང་དེ་བཞིན་གཤེགས་པའི་རིགས། །རིན་ཆེན་རིགས་དང་དེ་བཞིན་པདྨའི་རིགས། །ལས་ཀྱི་རིགས་ལ་སོགས་ཏེ་སངས་རྒྱས་ལྔ། །འདི་ནི་བསྒྲུབ་པར་བྱ་བའི་འབྲས་བུ་སྟེ། །སྒོམ་སྒྲུབ་ཏིང་འཛིན་ལེ་ལོ་མེད་པ་ཡིས། །གྲུབ་པའི་འབྲས་བུ་ཐོབ་པར་བགྱིད་རྒྱུ་ལ། །འབད་པའི་རྩལ་ཆུང་སྒོམ་སྒྲུབ་ཡུན་ཐུང་བས། །སྒྲུབ་པའི་འབྲས་བུ་ད་དུང་མ་ཐོབ་སྟེ། །བསྒྲུབ་བྱའི་དམ་ཚིག་ཉམས༴ དེ་ལ་སོགས་ཏེ་དམ་ཚིག་ཆེན་པོ་ཡི། །གཞུང་དང་འགལ་པར་གྱུར་པ་ཉེས་བྱས་ཤིང་། །ཡེ་ཤེས་ལྷ་དང་མཁའ་འགྲོ་དམ་ཚིག་ཅན། །མ་སྲིང་རྒྱ་མཚོའི་ཐུགས་དང་ཅི་འགལ་བ། །ཤིན་ཏུ་གནོང་ཞིང་འགྱོད་པས་མཐོལ་ཞིང་༴ །རྡོ་རྗེ་སློབ་དཔོན་མཆེད་དང་ལྕམ་དྲལ་དང་། །རྣལ་འབྱོར་དོན་ཅན་ཐུགས་དང་ཅི་འགལ་བ། །དམ་ལས་འགལ་གྱུར་འགྱོད་པས་མཐོལ་ཞིང་༴ བདག་གིས་རྩེ་གཅིག་ཟོལ་ཟོག་མེད་པ་ཡི། །སྒྱུ་མེད་སེམས་ཀྱིས་བཤགས་སྦྱངས་འདི་བརྗོད་པས། །བདག་ཉིད་ཉམས་ཆག་སྒྲིབ་པ་འདིར་བྱང་ནས། །ཚེ་འདི་ཉིད་ལ་རིག་འཛིན་ས་ཐོབ་ཏེ། །བྱིན་རླབས་རྩ་འཕང་གཟི་བརྗིད་ནུས་མཐུ་དང་། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །དེ་ནས་བཤགས་རྗེས་མར་མེ་སྨོན་ལམ་ནི། བཞི་ཆོད། དྲིལ་མེད། ཐལ་སྦྱར། ཧཱུཾ་རིག་པ་བྱང་ཆུབ་སེམས་ཀྱི་དཀྱིལ་འཁོར་དུ། །རིག་གདངས་སློབ་དཔོན་གཉན་གྱིས་དབུ་བཟུང་ནས། །རིག་རྩལ་ལུ་གུ་རྒྱུད་ཀྱི་མཆེད་ལྕམ་ནས། །རིག་སྟོང་རྗེན་པའི་གཤིས་ལས་མི་འདའ་ཤོག །ནམ་ཞིག་གདོད་མའི་ལྷུམས་སུ་ཞུགས་པའི་ཚེ། །མ་རིག་འཁྲུལ་པའི་གཡང་སར་མི་བཏང་ཞིང་། །འཁོར་བ་ལུ་གུ་རྒྱུད་དུ་མི་ལྟུང་བར། །འཁོར་བ་ཀ་ནས་དག་པའི་གཞི་དབྱིངས་ཆེར། །གཞི་སྣང་གཞོན་ནུ་བུམ་སྐུར་གྲོལ་བར༴ གལ་ཏེ་གདོད་མའི་ས་ལ་མ་གྲོལ་ན། །ལྷུན་གྲུབ་ཞི་ཁྲོའི་སྣང་བ་ཤར་བའི་ཚེ། །རང་སྣང་ཡེ་ཤེས་ཆེན་པོར་ངོ་འཕྲོད་ནས། །བར་དོར་ལོངས་སྤྱོད་རྫོགས་སྐུར་གྲོལ་བར༴ ཡེ་གངས་གསལ་སྟོང་དག་པ་གཉིས་ལྡན་ཆེ། །སྟོང་གཟུགས་དངས་མ་ལྔ་ལྡན་རིགས་སྔའི་ཞིང་། །རང་སྣང་རྣམ་དག་ལོངས་སྐུའི་ཞིང་ཁམས་སུ། །དག་པ་གསུམ་གྱི་འཁོར་ལ་ཆོས་སྟོན་ཤོག །གལ་ཏེ་ལོངས་སྐུའི་ཞིང་དུ་མ་གྲོལ་ན། །རང་བཞིན་སྤྲུལ་སྐུའི་ཞིང་ཁམས་ལྔ་ཚོམ་དང་། །རིགས་འདུས་རྔ་ཡབ་དཔལ་རིའི་ཕོ་བྲང་ཆེར། །སྐད་ཅིག་ཉིད་ལ་བརྫུས་ཏེ་སྐྱེས་ནས་ཀྱང་། །རིག་འཛིན་རྣམ་བཞིའི་གྲལ་དུ་སྨིན་པར་ཤོག །ཐེག་པ་རིམ་དགུའི་ཡང་རྩེ་ཡོ་ག་གསུམ། །དེ་ལས་རྣམ་པར་འདས་པ་མན་ངག་སྡེའི། །དགོངས་ཀློང་བྱ་རྩོལ་བྲལ་བའི་གཤིས་ལུགས་སུ། །བློ་བྱས་བདེན་ཞེན་དྲི་མ་དག་པར་ཤོག །རང་རིག་གདོད་ནས་དག་པའི་ངང་མདངས་སུ། །རང་རྩལ་དམ་པ་རིགས་བརྒྱ་ཞི་ཁྲོའི་སྐུ། །སྣང་ལ་རང་བཞིན་མེད་པའི་དལ་བཀྲམ་སྟེ། །ཡེ་ཤེས་མཐོང་བ་དག་པའི་མར་མེ་འབུལ། །ཉོན་མོངས་འཁོར་བའི་ཆོས་ཀྱི་མུན་པ་སངས། །བཟང་ཞེན་ཤེས་བྱའི་སྨག་རུམ་བསལ་ནས་ཀྱང་། །བརྗོད་མེད་ལྷག་མཐོང་ཡེ་ཤེས་ཆེན་པོའི་ཀློང་། །ཉམས་རྟོགས་རིག་པའི་རྩལ་ཆེན་རྫོགས་པར་ཤོག །ཕུང་པོ་ལྔ་དག་རིགས་ལྔའི་ཞིང་དུ་གྲོལ། །འབྱུང་ལྔ་གནས་དག་རིགས་ཀྱི་ཡུམ་ལྔར་སྨིན། །རྣམ་ཤེས་དབང་དག་སེམས་དཔའ་བརྒྱད་དུ་གྲོལ། །སྣང་བཞི་ཟད་ནས་འཇའ་ལུས་འགྲུབ་པར་ཤོག །དྲན་རིག་འོད་གསལ་ཆེན་པོའི་མར་མེ་འདི། །རྒྱུན་ཆད་མེད་པར་སྦར་བའི་བསོད་ནམས་མཐུས། །ལས་རླུང་བག་ཆགས་མུན་པ་དྲུང་དུ་ཕྱུང་ནས། །ཀུན་བཟང་དགོངས་ཀློང་ཕྱམ་གཅིག་གྲོལ་པར་ཤོག །དེ་ལྟར་བཏང་མཐར་བཤགས་སྐོང་འདི་བཞིན་བརྗོད། ལྷུག། ཨོཾ་ཡེ་ཤེས་མཁའ་འགྲོ་དབང་ཕྱུག་ཁྲོ་རྒྱལ་གཙོ། །བདེ་ཆེན་གཉིས་མེད་ཡུམ་གྱི་དབྱིངས་སུ་སྦྱོར། །བདག་ཏུ་ལྟ་བའི་ང་རྒྱལ་འཇོམས་མཛདཔའི། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཏ་ནའི་གནས་མཆོག་སྒྲོལ་བ་གནས་མ་སྟོབས། །གྷ་ནའི་གནས་མཆོག་སྦྱོར་བ་བྱིན་མ་རློབས། །དཔལ་ཆེན་ཁྲོ་རྒྱལ་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །རྨད་དུ་བྱུང་བའི་མཆོད་པ་ཏན་གཉིས། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པ་ལྔ་ཡི་ཡོན་ཏན་བསམ་ཡས་ཀྱིས། །ཡེ་ཤེས་མཁའ་འགྲོའི་ཐུགས་དམ་བསྐང་གྱུར་ཅིག །དཔལ་ཆེན་ཁྲོ་རྒྱལ་ཡབ་ཡུམ་ཐུགས་རྗེ་ཡིས། །རྩེ་གཅིག་སྒྲུབ་པ་པོ་ཡི་གྲོགས་མཛོད་ལ། །བར་ཆད་བྱེད་པའི་དགྲ་བགེགས་རྡུལ་དུ་རློགས། །གྲུབ་པའི་འབྲས་བུ་དུས་འདིར་སྩལ་དུ་གསོལ། །ཧཱུཾ་རྡོ་རྗེ་མཁའ་འགྲོ་དབང་ཕྱུག་ཀཽ་རི་བརྒྱད། །སེང་ཧ་ལ་སོགས་ཡུལ་གྱི་ཕྲ་མེན་བརྒྱད། །རྟ་གདོང་ལ་སོགས་འབར་མ་ཁྲོ་མོ་བཞི། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཨོཾ་སྒོམ་སྒྲུབ་དུས་ལས་གཡེལ་པར་གྱུར་པ་ཡིས། །སྒྲུབ་པའི་རྫས་མཆོག་བདུད་རྩི་ཨམྲྀ་ཏ། །དུས་དྲུག་མཆོད་པའི་ཚུལ་དུ་མ་སྦྱར་བ། །བཟོད་པར་གསོལ་ལོ་ཚངས་པར་སྩལ་དུ་གསོལ། །བྱང་ཆུབ་སེམས་དང་མཱཾ་པ་རཀྟ་དང་། །དྲི་ཆེན་དྲི་ཆུ་གོ་ཀུ་ད་ཧ་ན། །གཉིས་མེད་སྦྱར་བའི་སྨན་མཆོག་ཨམྲྀ་ཏས། །རྡོ་རྗེ་མཁའ་འགྲོའི་ཐུགས་དམ་བསྐང་གྱུར་ཅིག །འབར་བའི་སྐུ་མཆོག་རྫོགས་པའི་དཀྱིལ་འཁོར་དུ། །བདུད་དང་སྲིན་པོ་མ་ལུས་འདུལ་བ་དང་། །རྩེ་གཅིག་སྒྲུབ་པ་པོ་ལ་ཞལ་སྟོན་ལ། །བར་གཅོད་བྱེད་པའི་དགྲ་བགེགས་རྡུལ་དུ་རློགས། །ཨོཾ་ཤ་ཟ་མཁའ་འགྲོ་དབང་ཕྱུག་ཉི་ཤུ་བརྒྱད། །སྲིད་གསུམ་རྒྱལ་མོ་དུར་ཁྲོད་བརྒྱད་ཀྱི་ཡུམ། །གཙོ་མོ་མངོན་སྤྱོད་མ་བདུན་འཁོར་དང་བཅས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །མཆོད་པ་ལོ་ཟླའི་དུས་ལས་འདས་པ་དང་། །རྫས་དང་ཕྱག་རྒྱ་དུས་འདིར་མ་རྫོགས་ཤིང་། །ཤ་ཁྲག་དམར་གྱི་དམ་ལས་གཡེལ་གྱུར་ཏེ། །ཤ་ཟ་མཁའ་འགྲོའི་ཐུགས་དང་ཅི་འགལ་བ། །བཟོད་པར་གསོལ་ལོ་ཚངས་པར་སྩལ་དུ་གསོལ། །དུར་ཁྲོད་རྫས་མཆོག་ཐལ་ཆེན་བ་སུ་ཏ། །ཤ་ཁྲག་དམར་གྱི་མཆོད་པ་རབ་སྦྱར་ཏེ། །བྷནྡྷའི་སྣོད་དུ་དམར་ཆེན་བསྐྱིལ་བ་འདིས། །ཤ་ཟ་མཁའ་འགྲོའི་ཐུགས་དམ་བསྐང་གྱུར་ཅིག །ཨོཾ་སྔོན་ཚེ་དཔལ་ཆེན་ཁྲོ་རྒྱལ་སྤྱན་སྔ་རུ། །སུས་ཀྱང་མ་བཅོས་ཉིད་ཀྱི་ཞལ་འཆེས་ཏེ། །རྩེ་གཅིག་སྒྲུབ་པ་པོ་་ཡི་གྲོགས་མཛོད་ལ། །རྣལ་འབྱོར་དབང་ཕྱུག་ཆེན་པོའི་འཁོར་སྲུངས་ཤིག །ཨོཾ་ལས་ཀྱི་མཁའ་འགྲོ་ཕྱི་ཡི་རྣལ་འབྱོར་བཞི། །བདག་ཉིད་ཆེན་མོ་ལ་སོགས་མ་མོའི་ཚོགས། །ལྷ་དང་ལྷ་མིན་ཕྱོགས་བཅུའི་མཁའ་འགྲོ་མ། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ལྟ་བ་མཐོས་པས་སྤྱོད་ལམ་རྩིང་པ་དང་། །ཉ་སྟོང་གསོ་སྦྱོང་དུས་ལས་གཡེལ་གྱུར་ཅིང་། །གཉིད་ཆགས་རྨོངས་པས་ཕྱི་མཆོད་མ་བསྐངས་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །དམ་ཚིག་ལྷག་མ་ཁ་ཆུའི་འོད་ཟེར་འཕྲོ། །ཀུན་ཏུ་བཟང་པོའི་མཆོད་སྤྲིན་ཨ་མྲྀ་ཏ། །ཤ་ཁྲག་བདུད་རྩིའི་མཆོད་པ་ཆེན་པོ་འདིས། །ལས་ཀྱི་མཁའ་འགྲོའི་ཐུགས་དམ་བསྐང་གྱུར་ཅིག །ཨོཾ་སྟོང་ཁམས་ཡོངས་སུ་འཆོལ་བར་གྱུར་མོད་ཀྱང་། །བདག་ནི་རྡོ་རྗེའི་དམ་ལས་མི་འདའ་ཞིང་། །དཔལ་ཆེན་སྒོམ་སྒྲུབ་ལས་ལ་བརྩོན་ལགས་ན། །སྐྱེས་ཆེན་ཁྱེད་ཀྱི་ཐུགས་དམ་མཉེས་གྱུར་ཅིག །དུར་ཁྲོད་ཀློང་དགུའི་མཁའ་འགྲོ་རྣམ་བཞིའི་ཚོགས། །ཁམས་གསུམ་འཁོར་བའི་སྡུག་བསྔལ་ཅི་འདྲ་བ། །བྱམས་མགོན་ཁྱེད་ཀྱི་ཐུགས་ལ་དེ་ལྟར་གསལ། །དམྱལ་ཚོགས་མེ་ལྟར་འབར་བ་ཞི་བར་མཛོད། །ཐུགས་རྗེའི་གདུང་འཚོབ་རིག་འཛིན་བདག་གིས་ནི། །དང་པོར་བྱང་ཆུབ་མཆོག་ཏུ་སེམས་བསྐྱེད་ནས། །འདའ་དཀའ་རྡོ་རྗེ་དམ་ཚིག་མཆོག་གསུམ་པོ། །རྒྱལ་བའི་བཀའ་ལས་འདའ་བར་མི་བགྱིད་ལ། །གསང་སྔགས་འཆོལ་བར་གྱུར་པས་བསལ་དཀའ་མོད། །ཉམས་དང་ཚོགས་འདྲེས་ཉམས་པ་བསྐངས་སོ་འཚལ། །བློ་སེམས་རྟུལ་བས་སྐྱོན་ཅན་མ་རྟོགས་ཏེ། །རང་གནོང་འགྱོད་པའི་སེམས་ཀྱིས་མཐོལ་བཤགས་ན། །གྲོགས་ངན་ཉམས་གྲིབ་སྐྱོན་གྱིས་མ་གོས་ཤིང་། །ཉམས་པ་རྣམས་ལ་ཆད་པ་སྒོར་བཅད་དེ། །འདི་ཕྱིའི་རྐྱེན་དང་སྒྲིབ་པར་མི་འགྱུར་བར། །ཕྲ་མེན་སྤྲུལ་ཚོགས་དབྱེ་བསལ་མཛད་དུ་གསོལ། །ཞེས་བརྗོད་བཅུ་པ་ཚོགས་མཆོད་འབུལ་ནས་སུ། བཞི་ཆོད། ཀུན་བཟང་ཡབ་ཡུམ་ཞི་ཁྲོ་རབ་འབྱམས་ཚོགས། །དུས་གསུམ་བདེ་གཤེགས་རིག་འཛིན་བླ་མ་དང་། །སློབ་དཔོན་ཆེན་པོ་པདྨ་ཡབ་ཡུམ་ལ། །བདེ་ཆེན་ཚོགས་ཀྱི་མཆོད་པ་དམ་པ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །སྐུ་གསུང་ཐུགས་ཀྱི་ཉམས་ཆག་བསྐང་གྱུར་ཅིག །རྡོ་རྗེ་ཕག་མོ་བདེ་གཤེགས་རིགས་ཀྱི་ཡུམ། །མཁའ་འགྲོ་སྡེ་ལྔ་སོ་སོའི་སྤྲིན་ཚོགས་དང་། །སྲོག་སྒྲུབ་ལ་སོགས་དམ་ཅན་རྒྱ་མཚོའི་ཚོགས། །སྔོན་ཚེ་སློབ་དཔོན་པདྨའི་སྤྱན་སྔ་རུ། །སྙིང་ཏིག་བསྟན་པ་བསྲུང་བར་ཞལ་བཞེས་པ། །འཇིག་རྟེན་ལས་གྲུབ་ཡེ་ཤེས་ཚོགས་བཅས་དང་། །རྒྱལ་ཆེན་བཞི་དང་ཕྱོགས་སྐྱོང་ལྷ་སྲིན་བརྒྱད། །ཡུལ་ལྷ་གཞི་བདག་འདིར་འདུས་མགྲོན་རྣམས་ལ། །ཞལ་ཟས་ཚོགས་ཀྱི་མཆོད་པས་ཐུགས་དམ་བསྐང་། །དགྱེས་མཛད་སྐུ་གསུང་ཐུགས་ཀྱི་དངོས་གྲུབ་སྩོལ། །མི་མཐུན་རྐྱེན་རྣམས་མ་ལུས་བཟློག་པ་དང་། །རྣལ་འབྱོར་བསམ་པ་ཡིད་བཞིན་འགྲུབ་པར་མཛོད། །ཨོཾ་ཨཱཿཧཱུཾ་གུ་རུ་དྷེ་ཝ་ཌཱཀྐི་ནི། །ཨོཾ་ཧཱུཾ་ཏྲཾ་ཧྲཱིཿ ཨ་བཾ་ལཾ་རཾ་ཡཾ་ཨེ་ཧ་རི་ནི་ས་ར་ཙ་ཧྲཱི་ཡ་ཤྲྀ་མ་ཧཱ་ཀཱ་ལི་མ་མ་རཀྨོ། ཡ་མ་ར་ཙ་དུ་ཏྲི་ཕུ་ཏྲི། ག་ན་ཙཀྲ་པཱུཙྪ་ཁ་ཁ་ཁཱ་ཧི། མ་ཧཱ་སུ་ར་ཏ་ཁཱ་ཧི། མ་ཧཱ་མཾ་ས་ཁཱ་ཧི། མཧཱ་རཀྟ༴ མ་ཧཱ་ཙིཏྟ༴ མ་ཧཱ་ཀོ་རོ་ཙ་ན༴ མ་ཧཱ་བ་པུ་ཏ༴ མ་ཧཱ་བ་ལིངྟ་སི་ཏི་ཕ་ལ་ཨཱཿཧཱུཾ་ཞེས་བརྗོད་རོལ་མོའི་སྒྲ་དང་བཅས་པས་མཆོད་དོ། དེ་ནས་བསྟོད་པ་ནི། ཧཱུཾ་ངང་ཉིད་མ་སྐྱེས་ཆོས་སྐུ་དག་པ་ལས། སྐྱེ་བའི་ཆོ་འཕྲུལ་སྣ་ཚོགས་སྟོན་མཛད་པ། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད། །ཅེས་བསྟོད་གཅུ་གཅིག་ཁྲོ་བོའི་བསྐང་བ་ལ། རྣམ་གྲངས་གཉིས་ཏེ་ཞི་སྐོང་ནི། ཨོཾ་ཡིད་ཀྱི་རྣམ་ཤེས་གནས་དག་པ། །ཀུན་ཏུ་བཟང་པོའི་ཐུགས་དམ་བསྐང་། །ཆོས་ཀྱི་ངོ་བོ་གནས་དག་པ། །ཀུན་ཏུ་བཟང་མོའི༴ ཕུང་པོ་ལྔ་པོ་གནས༴ རྒྱལ་བ་ཡབ་ལྔའི༴ འབྱུང་བ་ལྔ་པོ་གནས༴ རྒྱལ་བ་ཡུམ་ལྔའི༴ རྣམ་ཤེས་ཚོགས་བརྒྱད་གནས༴ སེམས་དཔའ་བརྒྱད་ཀྱི༴ རྣམ་ཤེས་ཡུལ་བརྒྱད༴ སེམས་མ་བརྒྱད༴ ལུས་ཀྱི་ཆོས་བཞི་གནས༴ ཁྲོ་བོ་བཞི་ཡི༴ རྟག་ཆད་མུ་བཞི་གནས༴ ཁྲོ་མོ་བཞི་ཡི༴ ཉོན་མོངས་དྲུག་པོ༴ ཐུབ་པ་དྲུག་གི་ཐུགས་དམ་བསྐང་། ཉམས་ཆག་ཐམས་ཅད་སྐོང་གྱུར་ཅིག །རྟོག་སྒྲིབ་ཐམས་ཅད་དག་གྱུར་ཅིག །བསྐང་གྱུར་དབང་དང་དངོས་གྲུབ་སྩོལ། ཞེས་བཏང་དེ་ནས་མཐར་ཞི་བཤགས་འདི་ལྟར་བྱ། ལྷུབ། ཀུན་བཟང་ཡབ་ཡུམ་གསན་ཅིང་དགོངས་སུ་གསོལ། །ཡིད་དང་ཆོས་ནི་ཡེ་ནས་མངོན་སངས་རྒྱས། །ཀུན་བཟང་ཡབ་ཡུམ་དགོངས་སྤྱོད་དེ་འདྲ་ཡང་། །དེ་ལྟར་བདག་གིས་མ་རིག་མ་རྟོགས་ཏེ། །ཀུན་བཟང་ཡབ་ཡུམ་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །རྒྱལ་བ་རིགས་ལྔ་གསན་ཅིང་༴ ཕུང་པོ་ལྔ་ནི་ཡེ་ནས་མངོན༴ རྒྱལ་བ་རིགས་ལྔའི་དགོངས་སྤྱོད༴ དེ་ལྟར་བདག་གིས༴ རྒྱལ་བ་རིགས་ལྔའི་ཐུགས༴ ཐུགས་རྗེ་ཆེ་མངའ༴ རིགས་ཀྱི་ཡུམ་རྣམས་གསན༴ འབྱུང་བ་ལྔ་ནི་ཡེ༴ རིགས་ཀྱི་ཡུམ་ལྔའི་དགོངས༴ དེ་ལྟར༴ རིགས་ཀྱི་ཡུམ་ལྔའི༴ ཐུགས་རྗེ༴ སེམས་དཔའ་བརྒྱད་རྣམས་གསན༴ རྣམ་ཤེས་བརྒྱད་ནི་ཡེ༴ སེམས་དཔའ་བརྒྱད་ཀྱི་དགོངས༴ དེ་ལྟར༴ སེམས་དཔའ་བརྒྱད་ཀྱི༴ ཐུགས་རྗེ༴ སེམས་མ་བརྒྱད་རྣམས་གསན༴ ཡུལ་བཞི་དུས་བཞི་ཡེ༴ སེམས་མ་བརྒྱད་ཀྱི་དགོངས༴ དེ་ལྟར་བདག་གིས༴ སེམས་མ་བརྒྱད་ཀྱི་ཐུགས༴ ཐུགས་རྗེ་ཆེ༴ ཐུབ་པ་དྲུག་རྣམས་གསན༴ ཉོན་མོངས་དྲུག་ནི་ཡེ་ནས༴ ཐུབ་པ་དྲུག་གི་དགོངས༴ དེ་ལྟར༴ ཐུབ་པ་དྲུག་གི༴ ཐུགས་རྗེ་ཆེ༴ སྒོ་བ་བཞི་རྣམས་གསན༴ ཚད་མེད་བཞི་ནི་ཡེ༴ སྒོ་བ་བཞི་ཡི་དགོངས༴ དེ་ལྟར༴ སྒོ་བ་བཞི་ཡི་ཐུགས༴ ཐུགས་རྗེ༴ སྒོ་མ་བཞི་རྣམས་གསན༴ རྟག་ཆད་མུ་བཞི་ཡེ༴ སྒོ་མ་བཞི་ཡི༴ དེ་ལྟར༴ སྒོ་མ་བཞི་ཡི་ཐུགས༴ ཐུགས་རྗེ༴ སྦྲེལ། ཡང་ཅིག་ཞི་བའི་བཤགས་པ་འདི་ལྟར་བརྗོད། ཨོཾ་རང་རིག་ཡེ་ཤེས་བློ་དང་མི་ལྡན་པས། །བདག་གི་ཕུང་པོ་ཁམས་དང་སྐྱེ་མཆེད་རྣམས། །ཞི་བའི་དཀྱིལ་འཁོར་ལྷ་རུ་སྦྱོར་མ་འཚལ། །སངས་རྒྱས་བཞི་བཅུ་གཉིས་ལ་བཟོད་པར་གསོལ། །རང་རིག་ཡེ༴ ཡིད་ཆོས་ཀུན་བཟང་ཡབ་ཡུམ༴ མ་རིག་རང་སེམས་བདག་ཏུ་བཟུང་པའི༴ ཀུན་བཟང་ཡབ་ཡུམ་སྐུ་ལ་བཟོད༴ རང་རིག་ཡེ༴ ཕུང་པོ་ལྔ་པོ་རིགས་ལྔར༴ མ་རིག་རང་༴ རྒྱལ་བ་རིགས་ལྔའི་སྐུ་ལ༴ རང་རིག༴ འབྱུང་བ་ལྔ་རྣམས་ཡུམ་ལྔ༴ མ་རིག༴ རིགས་ཀྱི་ཡུམ་ལྔའི༴ རང་རིག༴ ཤེས་བཞི་དབང་བཞི་སེམས་དཔར༴ མ་རིག༴ བྱང་ཆུབ་སེམས་དཔའི་ཚོགས་ལ༴ རང་རིག༴ ཡུལ་བཞི་དུས་བཞི་སེམས་མར༴ མ༴ བྱང་ཆུབ་སེམས་མའི་ཚོགས༴ རང་བཞིན༴ ཉོན་མོངས་དྲུག་པོ་ཐུབ༴ མ་རིག༴ ཐུབ་དྲུག་སྤྲུལ་པའི༴ རང་རིག༴ དྲེགས་སོགས་རྣམ་བཞི་སྒོ་བ༴ མ་རིག༴ སྒོ་སྐྱོང་ཁྲོ་བོ་བཞི་ལ༴ རང་རིག༴ རྟག་ཆད་མུ་བཞི་སྒོ་མར༴ མ་རིག༴ སྒོ་སྐྱོང་ཁྲོ་བོ་བཞི་ལ༴ རང་རིག༴ མ་རིག་དབང་གིས་འཁྲུལ་བའི་ནོངས་བགྱིས་པ། ཉོན་མོངས་ལས་ཀྱིས་ཡི་དམ་ལྷ་སྤངས་ཏེ། །སླུ་བྱེད་དབང་གིས་སློན་དཔོན་སྙིང་ནས་སྨད། །ང་རྒྱལ་དྲེགས་པས་མཆེད་དང་ལྕམ་དྲལ་དཀྲུགས། །སྲབ་ལ་འཕྱར་བས་གསང་སྔགས་གཞན་ལ་སྤེལ། །སེར་སྣའི་དབང་གིས་མཆོད་པ་དུས་ལས་འདས། །གྲོགས་ངན་སྐྱོན་གྱིས་ཆོ་གའི་གསང་བ་ཆག །བརྟུལ་ཞུགས་ཆུང་བས་བགེགས་སྲིན་ཚར་མ་ཆོད། །རྔམ་ཞིང་ཐུག་ཐུབ་ལྷག་ཕུད་ཉམས་ལ་སོགས། །ཚེ་རབས་ཐོག་མ་མེད་པའི་དུས་མཐའ་ནས། །ཚེ་འདིའི་ལུས་བཟུང་ད་ལྟ་ཡན་ཆད་དུ། །སྡིག་པ་མི་དགེའི་ལས་རྣམས་ཅི་བགྱིས་པ། །དུས་རིག་དུས་མཁྱེན་རྣམས་ལ་བཟོད་པར༴ འཕགས་པ་ལགས་པས་ཁྱེད་ཀྱིས་དང་དུ་བཞེས། །སེམས་ཅན་ལགས་པས་བདག་ནོངས་འཁྲུལ་པ་མཆིས། །སྒྱུ་མ་ལགས་པས་བཤགས་ན་གནང་བར་མཛོད། །ཐབས་ལ་མཁས་པས་ཚངས་པ་སྩལ་དུ་གསོལ། །སྦྲེལ། ཞེས་དང་སླར་ཡང་འདི་ལྟར་བཤགས། ཀུན་ཏུ་བཟང་པོ་ཐུགས་མཆོག་རིན་པོ་ཆེ། །ཁམས་གསུམ་དབང་དུ་སྡུད་པ་ཡབ་ལགས་ཤིང་། །དོན་དམ་དབྱིངས་སུ་སྡུད་པ་ཡུམ་ལགས་ཀྱི། །བདག་ལུས་སྒྱུ་མར་མ་རྟོགས་སྐུ་བསླུས་ཤིང་། །བདག་དམ་ཉམས་པའི་སེམས་ལ་འགྱོད་པ་སྐྱེས། །ཀུན་བཟང་ཡབ་ཡུམ་སྐུ་ལ་བཟོད་པར་གསོལ། །རིགས་ལྔའི་སངས་རྒྱས་ཐུགས་མཆོག་རིན་པོ་ཆེ། །ཁམས་གསུམ་དབང་དུ་སྡུད༴ དོན༴ བདག༴ ལུས༴ བདག་དམ༴ རིགས་ལྔ་ཡབ་ཡུམ་སྐུ༴ སེམས་དཔའ་སེམས་མའི་ཐུགས༴ ཁམས་གསུམ་དབང་དུ༴ དོན༴ བདག་ལུས༴ བདག་དམ༴ སེམས་དཔའ་སེམས་མའི་སྐུ༴ སྤྲུལ་སྐུ་ཐུབ་དྲུག་ཐུགས༴ བཅུད་ཀྱི་སེམས་ཅན་ཁམས་གསུམ༴ སྣོད་ཀྱི་འཇིག་རྟེན་དོན༴ བདག་ལུས༴ བདག་དམ༴ སྤྲུལ་སྐུ་ཐུབ་པ༴ སྒོ་བ་སྒོ་མའི༴ ཁམས་གསུམ་དབང་༴ དོན༴ བདག་ལུས༴ བདག་དམ༴ སྒོ་བ་སྒོམ་རྣམས་ལ་བཟོད་པར་གསོལ༴ ཞེས་བཤགས་གཉིས་པ་ཁྲོ་བོའི་སྐོང་བ་ནི། བཞི་ཆོད། ཧཱུཾ་ཀུན་གཞི་ཡིད་ཆོས་གནས་གྱུར་པ། །དཔལ་ཆེན་ཡབ་ཡུམ་ཐུགས་དམ་བསྐང་། །ཉོན་མོངས་དུག་ལྔ་གནས་གྱུར་པ། །ཁྲག་འཐུང་ཡབ་ལྔའི༴ འབྱུང་བ་ལུས་ལྔ་གནས༴ ཁྲག་འཐུང་ལྔ༴ རྣམ་བཞིའི་རྟོག་པ་གནས༴ ཧེ་རུ་ཀ་བཞིའི་ཐུགས་དམ་བསྐང་ སྐྱེས་གནས་བཞི་པོ་གནས༴ ཀྲོ་དྷི་རིགས་བཞིའི༴ རྣམ་འགྱུར་ཚོགས་བརྒྱད་གནས༴ ཁྲོ་བོ་བརྒྱད་ཀྱི༴ རྣམ་འགྱུར་ཡུལ་བརྒྱད༴ ཕྲ་མིན་བརྒྱད་ཀྱི༴ རྟག་ཆད་མཐའ་བཞི་གནས༴ སྒོམ་བཞི་ཡི༴ སྣ་ཚོགས་རྟོག་པ་གནས༴ དབང་པོ་ཉེར་བརྒྱད་ཐུགས་དམ་བསྐང་། །མི་ཤིགས་སྐུ་ཡི་ཐུགས་དམ་བསྐང་། །འགགས་མེད་གསུང་གི༴ འགྱུར་མེད་ཐུགས༴ ཡོན་ཏན་མི་ཟད༴ ཕྲིན་ལས་རྒྱན་གྱི་ཐུགས༴ ཡེ་ཤེས་འཁོར་ལོའི༴ ཉམས་ཆག་ཐམས་ཅད་སྐོང་གྱུར་ཅིག །རྟོག་སྒྲིབ་ཐམས་ཅད་དག་གྱུར༴ བསྐང་གྱུར་དབང་དང་དངོས་གྲུབ་སྩོལ། །ཞེས་དང་དེ་མཐར་ཁྲོ་བཤགས་འདི་ལྟར་རོ། །ལྷུབ། ཨོཾ་དང་པོ་རང་བཞིན་མཉམ་པའི་དཀྱིལ་འཁོར་དུ། །གཟུང་འཛིན་གཉིས་ཀྱི་བདག་དང་མ་བྲལ་བས། །གཉིས་སུ་མེད་པའི་གནས་ལུགས་དོན་མ་རྟོགས། །གཉིས་མེད་ཆོས་ཀྱི་སྐུ་ལ་བཟོད་པར་གསོལ། །དོན་དམ་མ་འགགས་གསལ་བའི་གོ་འབྱེད་པའི། །ཟླ་གསལ་དྭངས་བའི་དབྱིངས་སུ་སྐུར་བཞེངས་ལ། །བྱང་ཆུབ་ཐིག་ལེའི་འོད་ཀྱིས་ཁྱབ་མཛད་པ། །ཀུན་སྣང་དྭངས་བའི་སྐུ༴ དོན་དམ་སྐྱེ་བ་མེད་པའི་མཁའ་དབྱིངས་ལས། །འབྲས་བུ་ཡོན་ཏན་འབྱུང་བའི་སྐུར་སྣང་བ། །དབང་ཆེན་རིམ་གྱིས་བསྐྱེད་པའི་བཞུགས་གནས་བརྟེན། །དབང་ཆེན་གཞལ་ཡས་གསལ་བར་མ་གྱུར་པ། །ཕོ་བྲང་འབར་བའི་ཀློང་དུ་བཟོད་པར་གསོལ། །བདེ་ཆེན་ཉིད་ལ་ཕྱག་རྒྱའི་སྐུར་སྣང་ཞིང་། །ཡེ་ཤེས་དྲུག་གི་ཕྱག་མཚན་རང་རང་བསྣམས། །ཇི་ལྟར་གསལ་བའི་ངང་དུ་མ་གྱུར་བ། །འཇིགས་བྱེད་ཧེ་རུ་ཀ་ལ༴ གཉིས་མེད་སྐུ་ལ་འཁྲིལ་བའི་གཟུངས་མཆོག་མ། །པདྨའི་དོན་ལ་ཆགས་པའི་མཁའ་དབྱིངས་སུ། །གཉིས་མེད་བྱང་ཆུབ་སེམས་ཀྱི་འོད་སྤྲོ་བ། །ཀྲོ་དྷི་ཤྭ་རིའི་སྐུ་ལ༴ ཐུགས་ལས་སྐྱེས་པའི་ཡེ་ཤེས་ཁྲོ་མོ་རྣམས། །རྣམ་ཤེས་བརྒྱད་ཀྱི་དུར་ཁྲོད་མཁའ་འགྲོ་རྣམས། །ཀཽ་རི་ལ་སོགས་ཐུགས་དང་ཅི་འགལ་བ། །གནས་ཀྱི་མ་བརྒྱད་སྐུ་ལ༴ ཐུགས་རྗེ་ཞི་བའི་ངང་ལས་མ་གཡོས་ཀྱང་། །ལོག་རྟོག་མཚན་མར་འཛིན་པ་ཞི་བའི་ཕྱིར། །མཆེ་གཤོག་རྔམ་པ་འབར་བའི་སྐུ་སྤྲུལ་པ། །སེང་ཧ་ལ་སོགས་ཐུགས་དང་ཅི་འགལ༴ ཡུལ་གྱི་ཕྲ་མེན་བརྒྱད་ལ༴ ཕོ་བྲང་རྒྱན་དང་ལྡན་པའི་དཀྱིལ་འཁོར་དུ། །འགུགས་དང་འཆིང་དང་སྡོམ་དགྱེས་སྒོམ་བཞི། །རྟ་གདོང་ལ་སོགས་ཐུགས་དང་ཅི་འགལ་བ། །སྒོ་བཞི་ཕྱག་རྒྱ་རྣམས་ལ༴ མངོན་སྤྱོད་ལས་ལ་གྲུབ་པའི་དབང་ཕྱུག་མ། །དགེ་དང་མི་དགེ་གཉིས་ཀྱི་དབང་མཛད་པའི། །མ་ཚོགས་དབང་ཕྱུག་ཐུགས་དང་ཅི༴ མ་སྲིང་རྒྱ་མཚོ་རྣམས་ལ་བཟོད་པར༴ རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ། །ཐུགས་རྗེ་མཉམ་པའི་ངང་ལས་མ་གཡོས་ཀྱང་། །ཕྲ་མོའི་ཏིང་འཛིན་གསལ་བར་མ་གྱུར་པས། །ཡོན་ཏན་འཛིན་པ་རྣམས་ལ༴ བདག་གི་སྐྱེ་བ་ཐོག་མ་མ་མཆིས་ནས། །ད་ལྟའི་ལུས་འདི་བཟུང་བ་ཡན་ཆད་དུ། །མ་རིག་དབང་གིས་སྲིད་པའི་ཁམས་ཀུན་འཁོར། །ཇི་སྲིད་མི་ལུས་བླངས་ནས་གར་སྐྱེས་ཀྱང་། །མཚམས་མེད་ལྔ་དང་དེ་དང་ཉེ་བ་ལྔ། །སྡིག་པའི་ལས་སུ་གྱུར་པ་ཅི་མཆིས་པ། །དངོས་སུ་བགྱིས་དང་བགྱིད་དུ་བརྩལ་བ་དང་། །དེ་ལ་རྗེས་སུ་ཡི་རང་བགྱིས་པ་རྣམས། །བྱང་ཆུབ་ཐུགས་རྗེས་བདག་ལ་དགོངས་ནས་ཀྱང་། །ཚངས་པར་མཛད་ནས་དངོས་གྲུབ་སྩལ་དུ་གསོལ། །ཞེས་དང་ཡང་ཅིག་ཁྲོ་བཤགས་འདི་ཡང་བཀླག། ཧཱུཾ་བསྐལ་པ་དུས་མཐའི་མེ་ལྟར་འབར་བའི་དབུས། །དུག་ལྔ་གནས་གྱུར་ཡེ་ཤེས་ཧེ་རུ་ཀ །དབྱིངས་ཀྱི་ཡུམ་ཆེན་ཁྲོ་མོ་ལྔ་དང་སྦྱོར། །ཀཽ་རི་ལ་སོགས་ནང་གི་མཁའ་འགྲོ་བཞི། །པུཀྐ་ལ་སོགས་ཕྱི་ཡི་རྣལ་འབྱོར་མ། །སེང་ཧ་ལ་སོགས་ཟ་བྱེད་གདོང་ཅན་ཚོགས། །ཀྲི་ཏ་ལ་སོགས་མཚམས་ཀྱི་གཤོག་པ་ཅན། །འབར་བའི་བར་ཁྱམས་དབང་ཕྱུག་ཉི་ཤུ་བརྒྱད། །སྒོ་བཞི་འགུགས་འཆིང་སྡོམ་དགྱེས་སྒོ་མ་བཞི། །ཁྲག་འཐུང་ལྷ་ཚོགས་སྐུ་ཡང་མ་གསལ་ཞིང་། །སྙིང་པོ་གྲངས་ཉུང་ཕྱག་རྒྱ་གནས་མ་སོན། །ཚོགས་དང་འབྱོར་བས་གནས་སུ་མ་བསྐངས་པ། །ཁྲོ་བོའི་ལྷ་ཚོགས་རྣམས་ལ་བཟོད་པར་གསོལ། །སྦྲེལ། ཞེས་དང་སླར་ཡང་ཁྲོ་བོའི་བཤགས་པ་ནི། ཨོཾ་དང་པོ་གསང་མཆོག་སྡོམ་པ་འདི་མནོས་ནས། །འདའ་ཀ་ཁས་བླངས་དམ་ལས་གཡེལ་གྱུར་ཏེ། །ཁྲག་འཐུང་རིགས་ལྔའི་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ༴ གྷ་ནའི་སྦྱོར་མཆོག་རྟོག་འཛིན་བར་ཆད་ཀྱིས། །ཡུམ་ཆེན་ཀྲོ་ཏིའི་ཐུགས་དང་༴ ཁྲོ་མོ་དབྱིངས་ཕྱུག་ལྔ་ལ༴ རྫས་དང་ཕྱག་རྒྱ་མངོན་དུ་མ་གྱུར་ཏེ། །ཤ་ཟ་ཀཽ་རཱིའི་ཐུགས་དང་༴ གནས་ཀྱི་མ་མོ་བརྒྱད་ལ༴ ཤ་ཁྲག་མཆོད་པ་གཞུང་བཞིན་མ་ཚོགས་ཏེ། །སེང་ཧ་ཕྲ་མེན་ཐུགས་དང་༴ ཡུལ་གྱི་མཁའ་འགྲོའི་སྐུ་ལ༴ ཤར་ལྷོ་ནུབ་བྱང་སྒོ་བཞི་མ་ཕྱེད་དེ། །རྟ་གདོང་སྒོ་མའིི་ཐུགས༴ ཡེ་ཤེས་སྒོམ་བཞི་ལ༴ འདའ་དཀའ་ཁས་བླངས་འཁོར་དྲུག་མ་ཐུལ་ཏེ། །མ་བདུན་སྲིང་བཞིའི་ཐུགས་དང་ཅི་འགལ་བ། །མཁའ་འགྲོ་བཅུ་གཅིག་སྐུ་ལ༴ ལོངས་སྤྱོད་འབྱམས་ནས་ཚོགས་ཀྱི་ཕུད་ཉམས་ཏེ། །ཕུད་ཉུལ་དབང་ཕྱུག་ཐུགས༴ དབང་མོ་ཉི་ཤུ་བརྒྱད་ལ༴ གནས་ལ་མ་བརྟེན་བྱ་བྱེད་འབྱུང་འཇུག་གིས། །ཏི་རའི་གནས་ཉུལ་ཐུགས༴ གནས་ཉུལ་ཆེན་པོའི༴ སྐུ་མཉེས་ཕ་མའི་ཚུལ་དུ་མ་གྱུར་ཏེ། །རྡོ་རྗེ་སློབ་དཔོན་ཐུགས་དང་༴ རྡོ་རྗེ་རྒྱལ་པོའི་སྐུ་ལ༴ ཏིང་འཛིན་མ་སྙོམས་ཞི་ཁྲོ་མ་ཕྱེད་དེ། །རྡོ་རྗེ་རྒྱལ་ཐེབས་ཐུགས་དང་༴ སྟོན་པ་སྒྲོན་མའི་སྐུ་ལ༴ ལེ་ལོ་བྱས་པས་ཕྱག་རྒྱ་རྒྱུན་ཆད་དེ། །ཀརྨ་ལས་མཁན་ཐུགས༴ ལས་ཀྱི་སློབ་དཔོན་སྐུ༴ སྦྱོར་བའི་ཚེ་ན་ཚད་ལ་མ་ཕེབས་ཏེ། །ཤེས་རབ་སྙེམས་མའི་ཐུགས༴ གསང་ཡུམ་རིག་མའི་སྐུ༴ སྒྲོལ་བའི་ཚེ་ན་ཏིང་འཛིན་གནས་མ་སྟོབས༴ སྐྱེས་བུ་གིང་ཆེན་ཐུགས་དང་༴ སྒྲོལ་གིང་བདག་པོའི་སྐུ༴ སྤྲུལ་སྐུ་ཁྲོ་མོའི་ཐུགས་སུ་མ་གྱུར་ཏེ། །འགུགས་འདྲེན་ཕོ་ཉའི་ཐུགས༴ མགྱོགས་བྱེད་ལས་མཛད་སྐུ༔ ལེ་ལོའི་དབང་གིས་བརྩེ་གདུང་རྒྱུན་ཆད་དེ། །བྱང་ཆུབ་མཆེད་ལྕམ་ཐུགས༴ རྡོ་རྗེ་མིང་སྲིང་སྐུ༴ བྲེ་མོའི་ཕྱིར་ན་དམ་ཚིག་ཉམས་ལ་སོགས། ཕྱི་ནང་རྗེས་གཅོད་ཐུགས༴ དམ་ཚིག་བྱ་ར་བྱེད་ལ༴ ལོངས་སྤྱོད་གསོལ་ནས་ལྷག་མའི་ཕུད་ཉམས་ཏེ། །ཕྱི་འཁོར་བསྟན་མའི་ཐུགས༴ ཐུགས་རྗེ་ཆེ་མངའ་ཁྱེད་ལ༴ བཟོད་པར་མཛད་ནས་ཚངས་པའི་དངོས་གྲུབ་སྩོལ། །ཞེས་དང་བཅུ་གཉིས་དམ་ཅན་གསོལ་སྐོང་ནི། ཚོགས་རྫས་སྨན་རག་གཏོར་མ་བྲན་བྱས་ལ། བཞི་ཆོད། ཧཱུཾ་རྩ་བརྒྱད་སྟོང་སྦྱར་བདུད་རྩི་ཨ་མྲྀ་ཏ། །སྐུ་ལྔ་ཡེ་ཤེས་སྒྲུབ་རྫས་དམ་པ་ནི། །སྲུང་མ་དམ་ཅན་འཁོར་དང་བཅས་ལ་འབུལ། །ཕྲིན་ལས་མཐར་ཕྱིན་དངོས་གྲུབ་སྩལ་དུ་གསོལ། །ཨོཾ་མ་ཧཱ་པཉྩ་ཨམྲྀ་ཏ་ཧུཾ་ཧྲཱིཿ་ཐཱ། ཧཱུཾ་སྟོང་གསུམ་བྷནྡྷའི་གཞལ་ཡས་སུ། །དམ་ཉམས་བསྒྲལ་བའི་མཾ་ས་དང་། །རཀྟའི་རྒྱ་མཚོ་ཆེན་པོ་ནི། །བསད་ཁྲག་དབའ་ཀློང་འཁྲུགས་པས་མཆོད། །ཨོཾ་ཨཱཿ་ཧཱུཾ་མ་ཧཱ་རཀྟ་ལ་ཁ་རཾ་ཁཱ་ཧི། མ་ཧཱ་རཀྟ་མཾ་ས་ལ༴ མ་ཧཱ་པཱུ་ཙ་ལ༴ ཧཱུཾ་དམ་ཉམས་བསྒྲལ་བའི་དམར་ཆེན་པོ། །ཤ་རུས་རི་རབ་སྤུངས་པ་ལ། །རཀྟའི་ཞམ་ཆུ་རྒྱ་མཚོ་བསྐྱིལ། །དོན་སྙིང་ནང་རོལ་བསམ་པ་ཡི། །དམར་ཆེན་གཏོར་མའི་མཆོད་པ་འབུལ། །མངོན་སྤྱོད་ཕྲིན་ལས་རྫོགས་ཕྱིར་བཞེས། །ཨོཾ་ཨཱཿཧཱུཾ། དཔལ་ལྡན་སྔགས་ཀྱི་སྲུང་མ་འཁོར་དང་བཅས་པའི་ཞལ་དུ་བ་ལིངྟ་ཁཱ་ཧི། ཤན་པ་སྲོག་སྒྲུབ་ནག་མོ་འཁོར་དང་བཅས་པའི་ཞལ་དུ༴ གཟའི་དགེ་བསྙེན་ར་ཧུ་ལ་འཁོར་དང་བཅས་པའི་ཞལ་དུ༴ གནོད་སྦྱིན་དམར་ནག་འཁོར་དང་བཅས༴ དམ་ཅན་རྡོ་རྗེ་ལེགས་པ་འཁོར་དང་བཅས༴ སྔགས་བདག་དམ་ཅན་རྒྱ་མཚོ༴ བོད་ཁམས་སྐྱོང་བའི་བརྟན་མ་བཅུ་གཉིས༴ དགེ་བསྙེན་ཉི་ཤུ་རྩ་གཅིག། ཡུལ་ལྷ་གཞི་བདག་དང་བཅས་པའི་ཞལ་དུ་བ༴ མ་ཧཱ་མཾ་ས་མ་ཧཱ་ཀོ་རོ་ཙ་ན༴ མ་ཧཱ་རཀྟ༴ མ་ཧཱ་བ་ལིནྟ༴ ཞེས་པས་དབུལ་ལོ། སྐོང་མཆོད་ནི། ཧཱུཾ་སྨུག་ནག་འཁོར་དང་བཅས་པ་ལ། །ཤ་ཁྲག་དམར་གྱི་གཏོར་མ་དང་། །ཏིང་བུར་དམར་གྱི་རཀྟ་དང་། །བདུད་རྩི་སྨན་གྱི་མཆོད་པ་དང་། །ཞུན་ཆེན་གསུར་གྱི་དུད་པ་དང་། །ཞལ་ཟས་ཚོགས་ཀྱི་ཐུགས་དམ་བསྐང་། །བསྐངས་ནས་དངོས་གྲུབ་སྩལ་དུ་གསོལ། །ཧཱུཾ་ཤན་པ་སྲོག་སྒྲུབ་འཁོར་བཅས་ལ། །སྤོས་དང་མ་མེས་ཐུགས་དམ་བསྐང་། །ཤ་སྣ་སྙིང་སྣས༴ རྔ་ཏིང་རོལ་མས༴ དམར་ཆེན་གཏོར་མོས༴ བསྐངས་ནས་དངོས་གྲུབ༴ ཧཱུཾ་གཟའ་མཆོག་ནག་པོ་འཁོར་བཅས་ལ། །མེ་ཏོག་སྟོང་གིས༴ ཆུ་སྣ་སྟོང་༴ སྨན་སྣ་སྟོང་༴ ཤ་སྣ་སྟོང་༴ སྙིང་སྣ་སྟོང་༴ ཁྲག་སྣ་སྟོང་གིས་ཐུགས་དམ་བསྐང་། དམར་ཆེན་གཏོར་མས༴ ཚིལ་ཆེན་དུད་པས༴ གླུ་གར་རོལ་མོས༴ བསྐངས་ནས་དངོས་གྲུབ༴ ཧཱུཾ་ཤན་པ་དམར་ནག་འཁོར་བཅས་ལ། ཕྱི་མཆོད་རིན་ཆེན་སྣ་ལྔས་བསྐང་། ནང་མཆོད་བདུད་རྩི་རྣམ་ལྔས༴ གསང་མཆོད་མར་མེ་གཏོར་མས༴ ཤ་ཁྲག་འདོད་ཡོན་སྣ་ལྔས༴ སིལ་སྙན་གླུ་གར་དབྱངས་ཀྱིས༴ བསྐངས་ནས་དངོས་གྲུབ༴ ཧཱུཾ་དམ་ཅན་འཁོར་དང་བཅས་པ་ལ། དམར་ཆེན་གཏོར་མས་ཐུགས་དམ་བསྐང་། གསུར་ཆེན་དུད་པས༴ ཞུན་ཆེན་མར་མེས༴ རྐང་གླིང་རོལ་མོས༴ སྤྱན་གཟིགས་མཆོད་པས༴ ཞོལ་པོའི་གསོབ་ཀྱིས༴ ཛ་གད་ཕུད་ཀྱིས༴ བདུད་རྩི་སྨན་གྱིས༴ བསྐངས་ནས་དངོས་གྲུབ༴ ཧཱུཾ་ གཞན་ཡང་དམ་ཅན་རྒྱ་མཚོ་དང་། དགེ་བསྙེན་ཉི་ཤུ་རྩ་གཅིག་དང་། །མ་སྲིང་བརྟན་མ་བཅུ་གཉིས་དང་། །ཡུལ་ལྷ་གཞི་བདག་འཁོར་བཅས་ལ། །སྤོས་དང་མར་མེས་ཐུགས་དམ་བསྐང་། །ཤ་སྣ་སྙིང་སྣས༴ དམར་ཆེན་གཏོར་མས༴ མཾ་ས་རཀྟས༴ ཚིལ་ཆེན་དུད་པས༴ གླུ་གར་རོལ་མོས༴ བསྐངས་ནས་དངོས་གྲུབ༴ ཧཱུཾ་དམ་ཅན་མ་སྲིང་རྒྱ་མཚོལ། །དོ་ནུབ་དཔལ་གྱི་དམ་ཞིག་བསྲེ། །དོ་ནུབ་སྔ་མའི་གཏང་རག་གཏོང་། །དོ་ནུབ་ཕྱི་མའི་ཞུ་དོན་འབུལ། །དོ་ནུབ་ཉམས་ཆག་ཞིག་རལ་གསོ། །དོ་ནུབ་ཐུགས་དམ་གཉན་པོ་བསྐང་། །དོ་ནུབ་མགུ་བའི་ཟས་གཅིག་འདྲེན། །ཟས་ཀྱི་ངོ་གཅིག་ཁྱོད་ཀྱིས་མཛོད། །ཆད་པའི་གཞུང་འདི་ང་ཡིས་བསྲངས། །བཅོལ་བའི་ཕྲིན་ལས་ཁྱེད་ཀྱིས་མཛོད། །གཉིས་ཀ་ལས་ཀྱི་གཉེར་བླངས་འཚལ། །བརྩེ་གདུང་གདུང་སེམས་ཇེ་ཆེར་མཛོད། །ལྟོས་སོ་གཉེར་རོ་ཐུགས་དམ་ཅན། །གསོལ་ལོ་མཆོད་དོ་སྲུང་མའི་ཚོགས། །སོད་ཅིག་ཐུལ་ཅིག་དགྲ་དང་བགེགས། །བཅོལ་བའི་ཕྲིན་ལས་གྲུབ་པར་མཛོད། །ཧཱུཾ་ཡང་ཅིག་དཔལ་གྱི་ཐུགས་དམ་བསྐང་། །མ་སྲིང་རྒྱ་མཚོའི༴ དྲེགས་པ་ཕོ་མོའི༴ གཏེར་བདག་དམ་ཅན༴ འབོད་པའི་དམ་རྫས་ཡིན་པའི་ཕྱིར། །དར་ནག་གཡབ་དར༴ བཞུགས་པའི་དམ་རྫས༴ ཉི་ཟླ་པདྨས༴ དགྱེས་པའི་དམ་རྫས༴ དམར་ཆེན་གཏོར་མས༴ མཐུན་པའི་དམ་རྫས༴ ཤ་སྣ་སྙིང་སྣས༴ བཟའ་བའི་དམ་རྫས༴ མཱཾ་ས་ཤ་ཆེན༴ བཏུང་བའི་དམ་རྫས༴ རཀྟ་ཁྲག་སྣས༴ བགོ་བའི་དམ་རྫས༴ ཞིང་ཆེན་གཡང་གཞིས༴ རྒྱན་གྱི་དམ་རྫས༴ ཐོད་ཕྲེང་མི་མགོས༴ དྲག་པོའི་དམ་རྫས༴ ཐུན་དང་ཟོར་གྱིས༴ བསྐང་ངོ་བསྐལ་པར༴ བསྐངས་ནས་དངོས་གྲུབ་སྩལ་དུ་གསོལ། ཨོཾ་ཨཱཿཧཱུཾ་མ་ཧཱ་པཱུ་ཙ་ས་མ་ཡེ་ཧཱུཾ། དེ་མཐར་རུ་ཏྲའི་སྨྲེ་བཤགས་འདི་བཞིན་བཏང་། ལྷུབ། ཐུགས་རྗེ་ཆེན་པོ་བཅོམ་ལྡན་རྡོ་རྗེ་སེམས། །དྲི་མེད་དུང་མདོག་མཆོག་ཏུ་གཟུགས་བཟང་བ། །རྣམ་དག་འོད་གསལ་ཟླ་འོད་དཀྱིལ་ན་མཛེས། །ཇི་ལྟར་མཁའ་ལ་ཉི་མ་འབུམ་བརྡལ་བཞིན། །དཔའ་བོ་འོད་ཟེར་སྟོང་འབར་ལྷམ་མེ་བ། །སྲིད་པ་གསུམ་གྱི་ས་མཁན་སྟོན་པར་གྲགས། །ཁམས་གསུམ་འགྲོ་བ་ཀུན་གྱི་གཉེན་གཅིག་པུ། །བྱམས་མགོན་ཐུགས་རྗེའི་ལྷ་ཁྱོད་དགོངས་སུ་གསོལ། །བདག་ནི་ཐོག་མ་མེད་པའི་དུས་མཐའ་ནས། །ལམ་ལོག་ལམ་སྟོར་སྲིད་པའི་འཁོར་བར་འཁྱམས། །སྔོན་ཚེ་ལས་ལོག་སྡིག་པ་སྤྱད་པའི་ནོངས། །སྡིག་པའི་ལས་རྣམས་ཅི་བྱས་རང་གནོང་འགྱོད། །དར་ཞིང་དྲགས་པའི་ལས་དབང་དེ་བཙན་ནས། །འཁོར་བའི་སྡུག་བསྔལ་རྒྱ་མཚོར་བྱིང་གྱུར་ཏེ། །ཞེ་སྡང་འབར་བའི་མེས་ནི་རང་རྒྱུད་བསྲེགས། །གཏི་མུག་མུན་པ་འཐིབས་པའི་ཤེས་རབ་ལྡོངས། །འདོད་ཆགས་རྒྱ་མཚོའི་འགྲམ་དུ་རྣམ་ཤེས་བྱིང་། །ང་རྒྱལ་དྲེགས་པའི་རི་བོས་ངན་འགྲོར་མནན། །ཕྲ་དོག་རླུང་དམར་འཚུབས་པས་འཁོར་བར་གཡེངས། །བདག་ཏུ་ལྟ་བའི་མདུད་པ་དམ་པོས་བཅིངས། །འདོད་པ་མེ་མདག་དོང་འདྲའི་འོབས་སུ་ལྷུང་། །སྡུག་བསྔལ་དྲག་པོ་མི་བཟད་ཆར་ལྟར་འབབ། །འདི་འདྲའི་སྡུག་བསྔལ་ཤིན་ཏུ་བཟོད་དཀའ་ཞིང་། །སྡིག་པའི་ལས་དབང་དྲག་པོའི་མེ་འབར་བས། །རྣམ་ཤེས་དབང་པོའི་མྱུ་གུ་གདུང་གྱུར་ཏེ། །ཕུང་པོ་སྒྱུ་མའི་ལུས་ཀྱིས་མི་བཟོད་ན། །བྱམས་མགོན་ཐུགས་རྗེ་ཅན་གྱིས་བཟོད་ལགས་སམ། །བདག་འདྲ་བླུན་རྨོངས་ལས་དབང་སྡིག་པོ་ཆེ། །ལས་ཀྱི་དབང་གིས་འདོད་ཁམས་རུ་ཏྲར་སྐྱེས། །སྐྱེས་པས་འགྱོད་དོ་ལས་ལ་ཡི་རེ་ཆད། །ཡི་ཆད་འགྱོད་ཀྱང་ལས་ལ་བཅོས་སུ་མེད། །ལས་ཀྱི་ཤུགས་ནི་ཆུ་བོའི་རྒྱུན་དང་འདྲ། །ལས་དབང་ཆུ་ཀླུང་འཕྲལ་དུ་ག་ལ་ལྡོག །རྣམ་སྨིན་ཐམས་ཅད་རང་གི་ལས་ལས་བྱུང་། །བཀའ་ལ་ཞུགས་ཀྱང་བཀའ་བཞིན་རྔོ་མ་ཐོགས། །ལུས་ངག་ཡིད་གསུམ་སྡིག་པའི་དབང་དུ་སོང་། །ལས་ཀྱི་རླུང་དབང་དྲག་པོ་དེས་བདས་པས། །བདག་ནི་དེ་སྔོན་བསྐལ་པ་གྲངས་མེད་དུ། །འཁོར་བའི་བཙོན་ར་མུན་པར་འཁྱམས་པ་ལས། །ཉེ་གནས་ཁྱེད་ཀྱི་ཐུགས་རྗེ་བྱིན་རླབས་ཀྱིས། །ལས་དང་ཉོན་མོངས་སྒྲིབ་པའི་གནས་སྦྱངས་ནས། །མ་ལྟར་བྱམས་པའི་ཞབས་དྲུང་ད་ལྟར་འཁོད། །ཉི་ལྟར་འོད་འབར་ཟླ་ལྟར་མདངས་གསལ་བའི། །ཐུགས་རྗེའི་ཞལ་ཉིད་ལྟ་བའི་མི་ངོམས་པ། །ཐོག་མ་མེད་ནས་མ་རིག་ལིང་ཏོག་གིས། །ལྡོངས་པའི་ཆུ་བུར་མིག་ གིས་མ་མཐོང་ན། །འགྲོ་བའི་མགོན་ཁྱོད་དེ་སྔ་གང་ན་བཞུགས། །ལས་དབང་དྲག་པོ་རབ་ཏུ་མི་བཟད་པས། །ཤིན་ཏུ་སྐྲགས་ཤིང་སྐྱི་གཡའ་རབ་འཇིགས་ནས། །དུང་དུང་གདུང་བའི་སྨྲེ་སྔགས་འདི་འདོན་ཅིང་། །ཉམ་ཐག་ཕོངས་པའི་ང་རོས་འབོད་ལགས་ན། །བྱམས་མགོན་ཐུགས་རྗེས་དུས་འདིར་མ་དགོངས་ན། །ནམ་ཞིག་འཆི་འཕོས་ལུས་སེམས་འབྲལ་བའི་ཚེ། །དགེ་བཤེས་གྲོགས་དང་བྲལ་ཏེ་གཤིན་རྗེས་ཁྲིད། །དེ་ཚེ་འཇིག་རྟེན་ཉེ་དུས་མི་སྟོངས་ཏེ། །ལས་ཀྱི་དབང་གིས་བདག་ཉིད་གཅིག་པུར་འཁྱམས། །དུས་འདིར་བདག་ལ་མགོན་སྐྱབས་མ་མཆིས་ན། །གང་གིས་ཕྱི་བཤོལ་དུས་ལས་མ་བཞེས་པར། །ད་ལྟ་ཉིད་དུ་བསྟུན་ཏེ་མངོན་སྤྱོད་མཛོད། །ལས་ཀྱིས་མནར་བའི་སྐྱེ་བོ་བདག་འདྲ་བ། །ཐོག་མ་མེད་པའི་དུས་ནས་ལོག་བརྟགས་པར། །ཁམས་གསུམ་འཁོར་བའི་གནས་ལས་མ་ཐར་ཏེ། །བསྐལ་པ་གྲངས་མེད་སྐྱེ་བ་ཇི་སྙེད་དུ། །གདོས་བཅས་ལུས་བླངས་གྲངས་མེད་ཞིག་གྱུར་ཏེ། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལངས། །ཁམས་གསུམ་བགྲངས་ཤིང་སྐྱེ་ཤིའི་ཁ་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེ་ཟོས། །སྐྱེ་བ་གྲངས་མེད་ཇི་སྙེད་དེ་ཙམ་གྱི། །སྐྱེ་བ་ཚེ་གཅིག་ཁོ་ཙམ་གྱི་ལས། །བླ་མེད་བྱང་ཆུབ་དོན་དུ་རབ་སྤྱད་ན། །དེ་ཙམ་བྱས་པའི་ལས་ལ་དོན་རབ་ཡོད། །དོན་གྱི་ཡོང་ཡེ་མྱ་ངན་འདས་ཟིན་ན། །ལས་ཀྱི་དབང་བཙན་ཉོན་མོངས་སྟོབས་ཆེ་བས། །ཤ་ཁྲག་འདུས་པའི་ལུས་བླངས་འཁོར་བར་འཁྱམས། །སྡུག་བསྔལ་བཟོད་དཀའི་སྲིད་པའི་བཙོན་རར་ཆུད། །མི་བཟད་དྲག་པོ་སྡུག་བསྔལ་འདི་ལྟ་བུ། །ཉེས་བྱས་ཐམས་ཅད་རང་གི་ལས་ལས་བྱུང་། །སྡིག་པའི་ལས་རྣམས་བྱམས་མགོན་ཁྱེད་ལ་བཤགས། །ཐུགས་རྗེ་ཆེན་པོས་ལས་ངན་རྒྱུན་བཅད་དེ། །ཉོན་མོངས་ལས་ཀྱི་རླུང་འདི་བཟློག་ཏུ་གསོལ། །མ་རིག་ལོག་པའི་ལས་ཀྱི་དབང་བཙན་པས། །མི་ཤེས་མུན་པའི་ནང་དུ་གཏན་འཁྱམས་ན། །ཡེ་ཤེས་སྒྲོན་མེའི་ཟེར་གྱིས་མི་སྟོངས་སམ། །ཉེས་བྱས་ལས་ཀྱི་རྣམ་སྨིན་མི་བཟོད་ན། །ཐུགས་རྗེ་ཆེན་པོས་ཕྲིན་ལས་མི་མཛད་དམ། །ཕྱིན་ཅི་ལོག་གི་གཡང་སར་ལྟུང་ལགས་ན། །ཐུགས་རྗེའི་མྱུར་མགྱོགས་ཕྱག་གིས་མི་འཛིན་ནམ། །དུག་གསུམ་བཟོད་དཀའི་ནད་ཀྱིས་གདུང་ལགས་ན། །ཐབས་མཁས་ཐུགས་རྗེའི་སྨན་གྱིས་མི་གསོའམ། །ལས་ཀྱི་རྣམ་སྨིན་སྡུག་བསྔལ་མེ་འབར་ན། །ཐུགས་རྗེའི་བསིལ་བའི་ཆུ་རྒྱུན་མི་འབེབས་སམ། །སྡུག་བསྔལ་འཁོར་བའི་འདམ་དུ་བྱིང་གྱུར་ན། །ཐབས་མཁས་ཐུགས་རྗེའི་ལྕགས་ཀྱུས་མི་འདྲེན་ནམ། །ཁམས་གསུམ་འཁོར་བའི་གནས་སུ་སྦྱངས་སྦྱངས་ནས། །ནམ་ཞིག་རང་རིག་འབྲས་བུ་ཐོབ་པའི་ཚེ། །འཕགས་པའི་ཐུགས་རྗེ་ཅི་འཚལ་དོན་མ་མཆིས། །བདག་ཉིད་ལས་འཕྲོ་དབང་བཙན་བཞག་ན་ལྟ། །ཐུགས་རྗེ་ཆེ་ཞེས་སུ་ལ་ཅི་ཞིག་བགྱི། །དཔའ་བོ་ཁྱོད་ལ་ཐུགས་རྗེའི་སྟོབས་མངའ་ཞིང་། །སྔོན་འབྱུང་འབྲེལ་བའི་ལས་ཀྱི་འཕྲོ་བཙན་ན། །ཡལ་ཡོལ་བཏང་སྙོམས་ལེ་ལོ་མ་མཛད་པར། །སྙིང་ནས་ད་གཟིགས་ཐུགས་རྗེ་རྒྱལ་བའི་ལྷ། །ཞེས་དང་བཤགས་པ་འདིས་ཀྱང་སྙིང་ནས་བཤགས། བཞི་ཆོད། ཧཱུཾ་དུས་གསུམ་བླ་མ་ཡི་དམ་མཁའ་འགྲོའི་ཚོགས། །དཔང་གྱུར་དམ་ཅན་རྒྱ་མཚོ་དགོངས་སུ་གསོལ། །ཡེ་ཤེས་མཁའ་འགྲོ་ཡབ་ཡུམ་ཆོས་ཀྱི་སྐུ། །ཡེ་ནས་བདག་དང་དབྱེ་བ་མེད་པ་ལ། །མ་རིག་དབང་གིས་བདག་གཞན་གཉིས་སུ་སྣང་། །གཉིས་འཛིན་ཐེ་ཚོམ་ལོག་ལྟ་ཅི་བགྱིས་པ། །རང་གདངས་རིག་པའི་ཀློང་དུ་མཐོལ་ལོ་བཤགས། །བཟོད་པར་བཞེས་ནས་ཚངས་པའི་དངོས་གྲུབ་སྩོལ། །ཧཱུཾ་རྡོ་རྗེ་ཌཱཀྐི་གཙོ་འཁོར་ཡབ་ཡུམ་བཅས། །སུམ་བརྒྱ་དྲུག་ཅུ་གསན་ཅིང་དགོངས་སུ་གསོལ། །ལྟ་བ་མ་རྟོགས་ལོག་དང་རྟོགས་བརྫུས་དང་། །ཁ་ལྟ་བདུད་དབང་སོང་དང་ལོག་པར་བལྟས། །ཡིད་དཔྱོད་མཐའ་བྲལ་ཀློང་དུ་མཐོལ་ལོ་བཤགས། །ཧཱུཾ་བདེ་ཆེན་ཌཱཀྐི་ཡབ་ཡུམ་གཙོ་འཁོར་རྣམས། །ཡབ་ཡུམ་བཅུ་དྲུག་གསན་ཅིང་དགོངས་སུ༴ མཉམ་བཞག་ཏིང་འཛིན་དོན་ལས་གཡེལ་གྱུར་ཏེ། །མ་གསལ་མ་རིག་བསྐྱེད་རྫོགས་དོན་མ་བསྒོམ། །གསལ་སྟོང་བདེ་ཆེན་ངང་དུ༴ ཧཱུཾ་པདྨ་ཌཱཀྐི་ཡབ་ཡུམ་གཙོ་འཁོར་བཅས། །ཡབ་ཡུམ་དྲུག་ཅུ་རྩ་བཞི་གསན༴ དུས་ལ་མ་བབ་སྤྱོད་པ་ཆོས་དང་འགལ། །མ་རིག་དབང་གིས་ལོག་པ་ཅི་སྤྱད་པ། །དམིགས་མེད་ཤར་གྲོལ་ཀློང་དུ་མཐོལ་ལོ་བཤགས། །ཧཱུཾ་སངས་རྒྱས་ཌཱཀྐི་ཡབ་ཡུམ་གཙོ་འཁོར་བཅས། །ཡབ་ཡུམ་སུམ་ཅུ་རྩ་གཉིས་གསན༴ ཡང་དག་དོན་གྱི་གནས་ལུགས་མ་ཤེས་ཏེ། །ཐེ་ཚོམ་དབང་གིས་འབྲས་བུའི་དོན་དང་འགལ། །རེ་དོགས་མཐའ་བྲལ་ཀློང་དུ༴ ཧཱུཾ་ལས་ཀྱི་ཌཱཀྐི་ཡབ་ཡུམ་གཙོ་འཁོར་བཅས། །ཡབ་ཡུམ་ཉི་ཤུ་རྩ་བརྒྱད་གསན་ཅིང་༴ ཕྲིན་ལས་རྣམ་བཞིའི་སྲུང་དོན་མ་ཤེས་པས། །བྱ་བ་ཀུན་ལ་ལོག་པ་ཅི་བགྱིས་པ། །ཀུན་མཁྱེན་གསལ་བའི་ཀློང་༴ ཧཱུཾ་ཀཽ་རཱི་མ་བརྒྱད་སེང་ཧ་ཕྲ་མེན་བརྒྱད། །སྒོམ་མ་བཞི་དང་དབང་ཕྱུག་ཉི་ཤུ་བརྒྱད། །ལང་ཀ་བདུན་དང་མ་བདུན་སྲིང་མོ་བཞི། །གོང་ཆེན་བཅོ་བརྒྱད་ཕོ་ཉ་དྲུག་ཅུ་བཞི། །བརྟན་མ་བཅུ་གཉིས་འཇིག་རྟེན་པ་ལ་སོགས། །ཀུན་གྱི་ཐུགས་དང་འགལ་བ་ཅི་འགྱུར་པ། །ཕྱི་ནང་གསང་མཆོད་བདུད་རྩིའི་གཏོར་ཚོགས་དང་། །ལྟ་སྒོམ་སྤྱོད་པའི་ཏིང་འཛིན་ཐུགས་དམ་བསྐང་། །ཐུགས་དམ་བསྐང་ཞིང་ཉམས་ཆག་དངོས་གྲུབ་ཞུ། །བདག་ཅག་མ་རིག་ལུས་ངག་ཡིད་སེམས་ཀྱི། །བག་མེད་ཚུལ་གྱིས་དམ་ལས་འགལ་གྱུར་པ། །ཞལ་ཟས་ཚོགས་གཏོར་མཆོད་པས་སོ་སོར་བཤགས། །བདག་གིས་བཅོལ་པའི་ཕྲིན་ལས་འགྲུབ་པར་མཛོད། །ཞེས་དང་ཡི་གེ་བརྒྱ་བ་ཅི་ནུས་བརྗོད། ཨོཾ་བཛྲ་ས་ཏྭ་ས་མ༴ བཅུ་གསུམ་འགུགས་དང་བསྒྲལ་བསྟབ་རིམ་པ་ནི། བཛྲ་མ་ཧཱ་ཤྲཱི་ཧེ་རུ་ཀོ྅ཧཾ། །རང་ཉིད་རྡོ་རྗེ་ཁྲོ་བོའི་སྐུར་གྱུར། །ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། །ཆོས་ཉིད་རྣམ་པར་དག་པའི༴ ཆོས་ཅན་རྒྱུ་འབྲས་བསླུ་བ་མེད་པའི༴ ཞི་ཁྲོ་སྒྱུ་འཕྲུལ་རྣམ་པར་རོལ་པའི་ལྷ་ཚོགས་རྣམས་ཀྱི་བདེན༴ བདེན་པ་ཆེན་པོའི་མཐུས་མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ནྲྀ་ཡཾ་ཛ་ནྲྀ་བཛྲ་ཨཾ་ཀུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨཾ་ཀུ་ཤ་ཛཿ ཞེས་ལྕགས་ཀྱུའི་ཕྱག་རྒྱས་དམིགས་བྱ་དམིགས་རྟེན་ལ་དགུག། ཛཿཧཱུཾ་བཾ་ཧོ་ས་འགུགས་གཞུག་བཅིངས་ཏེ་མྱོས་པར་བྱས། བཞི་ཆོད། ཧཱུཾ་ང་ནི་ཟ་བྱེད་ཆེན་པོ་སྟེ། ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །སརྦ་དུ་ཥྚཾ་མ་ར་ཡ་ཧཱུཾ་ཕཊཿ ཅེས་གནད་ཀྱི་ངེས་པ་ཇི་ལྟ་བས་བསྒྲལ་བའི་ཤ་ཁྲག། ཨོཾ་ཨཱཿཧཱུཾ་གིས་བདུད་རྩི་སྤེལ་ལ། ཕྲིན་ལས་བསྐུལ་བ་འདི་བཞིན་བཏང་ནས་ཕུལ། ཧཱུཾ་གནས་ལྔ་ཡེ་ཤེས་གཞལ་ཡས་ནས། །རིགས་ལྔ་མཁའ་འགྲོ་དཔག་མེད་ཚོགས། །ཡེ་ཤེས་ལྔ་ལྡན་དུག་ལྔ་འཇོམས། །སྤྱན་གསུམ་སྡང་མིག་དགྲ་ལ་བལྟ། །ཞལ་ནས་ངན་སྔགས་དགྲ་ལ་སྒྲོགས། །ཤངས་ནས་ནད་ཀྱི་འཚུབ་མ་འཐོར། །གཏོར་ཚོགས་མཆོད་པ་འདི་བཞེས་ལ། །དགྲ་བགེགས་རང་བཞིན་དབྱིངས་སུ་སྒྲོལ། །བྷྱོཿ རབ་འཇིགས་དུར་ཁྲོད་ནག་མོའི་གླིང་། །རྡོ་རྗེ་ཕག་མོ་ཡབ་ཡུམ་བཞུགས། །དམ་རྫས་བདུད་རྩི་འདི་གསོལ་ལ། །རྣམ་རྟོག་དགྲ་བགེགས་དབྱིངས་སུ་སྒྲོལ། །མཁའ་དབྱིངས་བདེ་བ་ཆེན་པོ་ནས། །རིགས་ལྔའི་མཁའ་འགྲོ་དཔག་མེད་ཚོགས། །སྐུ་མདོག་ཕྱག་མཚན་སྣ་ཚོགས་ཏེ། །རྒྱན་ཆ་མང་པོ་པུ་རུ་རུ༔ སིལ་སྙན་མང་པོ་སི་ལི་ལི། །རྐང་བ་རྡོ་རྗེའི་སྒེག་འགྲོས་ཅན། །མཁའ་ལ་ཐོགས་མེད་བུན་ནུ་ནུ། །ལག་པ་གསེར་གྱི་གདུ་བུ་ཅན། །གླུ་ལེན་གར་བྱེད་ཁྱུགས་སེ་ཁྱུགས། །ཕྲིན་ལས་སྣ་ཚོགས་ལས་མཛད་མ། །གཏོར་ཚོགས་མཆོད་པ་འདི་བཞེས་ལ། །འདོད་དགུའི་ཕྲིན་ལས་ཐོགས་མེད་སྒྲུབས། །ཧཱུཾ་ཡུལ་གནས་ཉི་ཤུ་རྩ་བཞི་ནས། །དཔའ་བོ་དཔའ་མོ་ཉི་ཤུ་བཞི། །མཁའ་འགྲོ་བྱེ་བ་འཁོར་དང་བཅས། །གཙོ་མོ་མི་མངོན་དབྱིངས་ན་བཞུགས། །འཁོར་གྱི་མཁའ་འགྲོ་བྱེ་བ་འབུམ། །ལ་ལ་བུད་མེད་རྒན་མོ་ལ། །རོ་ཤུན་རྙིང་པའི་ན་བཟའ་གསོལ། །ཁྲག་དང་ཞག་གི་ཐིག་ལེས་བརྒྱན། །ལ་ལ་བུད་མེད་གཞོན་ནུ་མ། །བཅུ་དྲུག་གཟུགས་མཛེས་ལང་ཚོ་རྒྱས། །སྙན་པའི་གླུ་ལེན་ཡིད་འཕྲོག་མ། །ལ་ལ་བུད་མེད་ཐ་མལ་གཟུགས། །འཇིག་རྟེན་སྤྱོད་པ་སྣ་ཚོགས་བྱེད། །ལ་ལ་སྒྱུར་བྱེད་ཚོས་མཁན་མོ། །ལ་ལ་མྱོས་བྱེད་ཆང་བཙོ་མ། །ལ་ལ་སྦྱོར་བྱེད་སྨད་འཚོང་མ། །ལ་ལ་དག་བྱེད་ཁྲུས་མཁན་མོ། །ལ་ལ་གསོད་བྱེད་ཤན་པ་མོ། །ལ་ལ་དཀའ་ཐུབ་བྲམ་ཟེ་མོ། །ལ་ལ་འཕྲོག་བྱེད་ཆོམ་རྐུན་མོ། །དེ་ལ་སོགས་ཏེ་མཐའ་ཡས་རྣམས། །གཏོར་ཚོགས་མཆོད་པ་འདི་བཞེས་ལ། །ནད་གདོན་གནོད་པ་བཟློག་པ་དང་། །བསམ་པའི་དོན་རྣམས་འགྲུབ་པར་མཛོད། །དེ་མཐར་རྒྱུད་ལུང་མན་ངག་བཤགས་པ་ནི། ལྷུབ། ཆོས་དབྱིངས་དུས་གསུམ་སྤྲོས་པ་མེད་པ་ལ། །འཛིན་རྟོགས་མེད་པའི་རང་རིག་ཡེ་ཤེས་ཀྱི། །དབྱིངས་དང་ཡེ་ཤེས་གཉིས་སུ་མེད་པ་ལ། །ཡུལ་དང་དབང་པོ་གཉིས་སུ་མེད་པར་བཤགས། །ཡུམ་གྱི་བྷ་ག་དགྱེས་པའི་ཕོ་བྲང་དུ། །ཡབ་ཀྱི་རྡོ་རྗེ་གཉིས་མེད་བྱང་ཆུབ་སེམས། །ཐབས་དང་ཤེས་རབ་འདུ་འབྲལ་མེད་པ་ལ། །ཕྱི་ནང་སྣོད་བཅུད་གཉིས་སུ་མེད་པར་བཤགས། །ཏིང་འཛིན་རྣམ་གསུམ་བློ་ཡི་བདར་བཅད་ནས། །ཕུང་པོ་རྣམ་ཤེས་ཡུལ་དང་དབང་པོ་རྣམས། །ལྷ་དང་ལྷ་མོའི་དཀྱིལ་འཁོར་གསལ་བསྒོམས་ནས། །འགྲོ་དྲུག་སེམས་ཅན་རྒྱལ་བའི་དཀྱིལ་འཁོར་དུ། །གཉིས་སུ་མེད་པར་ལྷུན་གྱི་གྲུབ་པར་མཛོད། །རྩ་སྲོག་ཙིཏྟ་ལུས་ངག་ཡིད་གསུམ་པོ། །གུ་ཧྱ་གསང་ཆེན་སྐུ་གསུང་ཐུགས་ཀྱི་མཛོད། །རྡོ་རྗེ་ཀློང་དགུའི་དཔལ་ཆེན་ཧེ་རུ་ཀ། །ཁམས་གསུམ་ས་དགུ་གཉིས་སུ་མེད་པར་བཤགས། །ཇི་ལྟར་སྣང་བ་ལྷ་ཡི་དཀྱིལ་འཁོར་དུ། །སྙིང་པོ་བརྗོད་པའི་སྐུ་མཆོག་རྫོགས་པའི་ཚུལ། །དབྱེར་མེད་མཉམ་ཉིད་ངོ་བོ་ཉིད་ཀྱི་སྐུ། །ཐབས་ལ་མཁས་པས་གཉིས་སུ་མེད་པར་བཤགས། །ཕྱི་ནང་སྣོད་བཅུད་གཉིས་མེད་ཆོས་ཀྱི་སྐུ། །ང་དང་བདག་གི་ངོ་བོ་ཉིད་མཉམ་པས། །མཐོ་རིས་ངན་སོང་རྒྱུ་འབྲས་རྣམ་གཉིས་པོ། །གཉིས་མེད་བདེ་ཆེན་ཀློང་དུ་མཐར་ཕྱིན་ཤོག །ཇི་ལྟར་སྣང་བ་ཀུན་བཟང་བདེ་ཆེན་གནས། །ཡོད་མེད་རྟག་ཆད་མཚན་མའི་ཚིག་ལས་འདས། །འདི་ལྟར་མ་རྟོགས་བདག་ཉིད་གང་ཡིན་པ། །དེ་ཉིད་མ་སྤང་རྟོགས་པའི་ཀློང་དུ༴ དུས་གསུམ་འཕོ་འགྱུར་ཐ་ཚིག་བཏགས་པ་མེད། །རྩོལ་མེད་བསྒྲུབ་མེད་ནམ་མཁའི་ངང་དུ་གནས། །ཡོངས་ལ་ཁྱབ་པས་ཀུན་གྱིས་འདོད་དགུར་སྒྱུར། །ཕྱིན་ཅི་ལོག་རྟོགས་བྱང་ཆུབ་ལམ་དུ་བཤགས། །རྟོགས་པའི་མན་ངག་དོན་དུ་མི་ལྡན་པར། །ཚིག་གི་མཚོན་པས་བྱང་ཆུབ་མི་ཐོབ་སྟེ། །རང་སེམས་ཡེ་ནས་སངས་རྒྱས་ཡིན་ཤེས་པས། །རང་བྱུང་ཡེ་ཤེས་ཀློང་དུ་མཐར་ཕྱིན་ཤོག །ཅེས་དང་། བཅུ་བཞི་དབྱིངས་གྲོལ་ལྟ་སྐོང་ནི། བཞི་ཆོད། ཧོ་མཆོད་དུ་མེད་དེ་ལྟ་བའི་ཀློང་། །རྟག་ལྟ་ཆོས་སྐུའི་ཀློང་དུ་བསྐང་། །བསྐང་དུ་མེད་དེ་སྒོམ་པའི་ངང་། །ཆད་ལྟ་གཟུགས་སྐུའི་ཀློང་༴ སྤྱོད་དུ་མེད་དེ་ཆོས་ཉིད་གཤིས། །མ་བཅོས་རྫོགས་པ་ཆེན་པོར༴ སྦྱོར་དུ་མེད་དེ་ཟུང་འཇུག་ཀློང་། །སྡུག་བསྔལ་བདེ་བ་ཆེན་པོར༴ བསྒྲལ་དུ་མེད་དེ་མཉམ་ཉིད་དབྱིངས། །ཡེ་སྒྲོལ་ཡེ་སྦྱོར་ཆེན་པོར༴ མདོར་ན་ཉམས་ཆག་ཉེས་ལྟུང་དང་། །ཁམས་གསུམ་རྒྱུད་དྲུག་སྡུག་བསྔལ་གྱི། །རྒྱུ་དང་འབྲས་བུ་བཅས་པ་རྣམས། །ཀུན་བཟང་ཡངས་པ་ཆེན་པོའི་ཀློང་། །བྱང་ཞིང་དག་ནས་སོར་ཆུད་དེ། །བདེ་བ་ཆེན་པོའི་ཀློང་དུ་ཨཱཿ ཞེས་དང་དེ་རྗེས་ལྟ་བའི་ཀློང་བཤགས་ནི། ལྷུབ། ཆོས་ཀྱི་དབྱིངས་ཉིད་སྤྲོས་པ་མེད་པ་ལ། །གཟུང་འཛིན་གཉིས་སུ་ལྟ་བ་ཡོངས་རེ་གོལ། །དངོས་པོ་མཚན་མར་འཛིན་པ་ཉོན་རེ་མོངས། །སྤྲོས་མེད་བདེ་ཆེན་ཀློང་དུ་བཤགས་པར་བགྱི། །ཀུན་ཏུ་བཟང་པོ་བཟང་ངན་མེད་པ་ལ། །བཟང་ངན་གཉིས་སུ་ལྟ་བ་ཐང་རེ་ཆད། །གཙང་དང་རྨེ་བར་འཛིན་པ་ཉོན་རེ་མོངས། །བཟང་ངན་མེད་པའི་ཀློང་དུ༴ མཉམ་པ་ཉིད་ལ་ཆེ་ཆུང་མེད་པ་ལ། །སངས་རྒྱས་སེམས་ཅན་ལྟ་བ་ཡོངས་རེ་གོལ། །ཆེ་ཆུང་གཉིས་སུ་འཛིན་པ་ཉོན་རེ་མོངས། །མཉམ་ཉིད་བདེ་ཆེན་ཀློང་དུ༴ བྱང་ཆུབ་སེམས་ལ་སྐྱེ་འཆི་མེད་པ་ལ། །འདི་དང་ཕྱི་མར་ལྟ་བ་ཐང་རེ་ཆད། །སྐྱེ་ཤི་གཉིས་སུ་འཛིན་པ་ཉོན་རེ་མོངས། །འཆི་མེད་གཡུང་དྲུང་ཀློང་༴ ཐིག་ལེ་ཆེན་པོ་གྲྭ་ཟུར་མེད་པ་ལ། །གཟུགས་དང་རྫས་སུ་ལྟ་བ་ཐང་༴ གྲྭ་ཟུར་གཉིས་སུ་འཛིན་པ་ཉོན༴ ཀུན་ནས་ཟླུམ་པའི་ཐིག་ལེ༴ དུས་གསུམ་འགྱུར་བ་མེད་པའི་ངང་ཉིད་ལས། །ཐོག་མ་ཐ་མར་ལྟ་བ་ཡོངས་རེ༴ འཕོ་འགྱུར་གཉིས་སུ་འཛིན་པ༴ འགྱུར་བ་མེད་པའི་ཐིག་ལེ༴ རང་བྱུང་ཡེ་ཤེས་བཙལ་དུ་མེད་པ་ལ། །རྒྱུ་འབྲས་གཉིས་སུ་ལྟ་བ་ཐང་རེ༴ རྩོལ་སྒྲུབ་གཉིས་སུ་འཛིན་པ་ཉོན༴ རྩོལ་བ་མེད་པའི་རང་བྱུང་ཀློང་༴ རིག་པའི་ཡེ་ཤེས་རྟག་ཆད་མེད་པ་ལ། །རྟག་ཆད་གཉིས་སུ་ལྟ་བ་ཐང་༴ ཡོད་དང་མེད་པར་འཛིན༴ རྟག་ཆད་མེད་པའི་ཡེ་ཤེས་ཀློང་༴ ཆོས་དབྱིངས་རྣམ་དག་མཐའ་དབུས་མེད་པ་ལ། །ཕྱོགས་རིས་མཐའ་དབུས་སྤྲོ་བསྡུ་ཐང་༴ མཐའ་དབུས་གཉིས་སུ་འཛིན༴ ཆོས་དབྱིངས་རྣམ་དག་མཐའ་དབུས་མེད་པར༴ གཞལ་ཡས་ཁང་ལ་ཕྱི་ནང་མེད་པ༴ ཕྱི་དང་ནང་དུ་ལྟ་བ་ཐང་༴ ཡངས་དོག་གཉིས་སུ་འཛིན་པ༴ ཡངས་དོག་ཕྱི་ནང་མེད༴ ཡུམ་གྱི་མཁའ་དབྱིངས་མཐོ་དམན༴ སྟེང་དུ་འོག་ཏུ་ལྟ་བ་སྙིང་རེ་རྗེ། མཐོ་དམན་གཉིས་སུ་འཛིན༴ བྷ་ག་ཡངས་དོག་མེད་པའི་ཀློང་༴ ཆོས་ཀྱི་སྐུ་ལ་དབྱེ་བ་མེད་པ་ལ། །ཡུལ་དང་སེམས་སུ་ལྟ་བ་ཐང་༴ སྣོད་བཅུད་གཉིས་སུ་འཛིན་པ་ཉོན༴ གཉིས་སུ་མེད་པའི་ཡེ་ཤེས་སྐུ་རུ་བཤགས། །རིག་པ་ཡེ་ཤེས་ནང་ནས་མ་ཤར་བས། །མ་རིག་རྨོངས་པའི་བློ་འདི་སྙིང་རེ༴ གཟུགས་མེད་ཆོས་ལ་དངོས་པོ་མཚན་མར་འཛིན། །ཡེ་ཤེས་རང་བཞིན་ཀློང་དུ༴ སྐྱེ་བ་མེད་པའི་དོན་འདི་མ་རྟོགས་ན། །གང་ཟག་འཁྲུལ་པའི་བློ་འདི་ཡོངས་རེ་གོལ། །སྐྱེ་མེད་ཆོས་ལ་ང་དང་བདག་ཏུ་བཟུང་། །བདེ་ཆེན་སྐྱེ་མེད་ཀློང་༴ ཆོས་ཉིད་དོན་དེ་བློ་ལ་མ་གསལ་བས། །སྣང་སྲིད་སྒྱུ་མ་ཡིན་པར་མ་ཤེས་ཏེ། །ཟང་ཟིང་ནོར་ལ་སེམས་ཀྱི་ཆགས་པ་སྐྱེས། །ཆོས་ཉིད་སྐྱེ་མེད་ཆགས་པ་མེད་པར་བཤགས། །འཁོར་བ་རང་བཞིན་མེད་པར་མ་ཤེས་པས། །དངོས་པོ་མཚན་མའི་ཆོས་ལ་རྟག་པར་འཛིན། །མི་དགེའི་ལས་ཀྱིས་བདེ་བ་འཚོལ་བྱེད་པ། །བྱང་ཆུབ་སྐྱོན་བྲལ་ཀློང་༴ མཉམ་པའི་དོན་ཉིད་མཉམ་པར་མ་རྟོགས་པས། །གཉེན་བཤེས་འཁྲུལ་པའི་གྲོགས་ནི་རྟག་པར་འཛིན། །མི་ཤེས་སྐྱེ་བོའི་སེམས་འདི་ཡོངས་རེ་གོལ། །མཉམ་ཉིད་བདེ་ཆེན༴ ཆོས་ཉིད་བདེན་པའི་དོན་དང་མ་འཕྲད་ན། །བདེན་པའི་དོན་བོར་མི་དགེའི་ལས་ལ་བཙོན། །སྟོན་པའི་བཀའ་བོར་མི་ཆོས་གཡེང་བས་བསླུས། །ཆོས་ཉིད་བདེ་ཆེན་ཀློང་༴ རིག་པའི་ཡེ་ཤེས་རང་སར་མ་གྲོལ་བས། །རང་རིག་དོན་བོར་གཡེང་བའི་ལས་ལ་བརྩོན། །འདི་འདྲའི་དོན་མེད་སེམས་ཅན་སྙིང་རེ་རྗེ། །དབྱེ་བསྲི་མེད་པའི་ཀློང་དུ་བཤགས་པར་བགྱི། །ཡེ་ཤེས་ལྷ་ཚོགས་སྲུང་མ་དམ་ཚིག་ཅན། །དམ་ཚིག་གཞུང་བཞིན་བསྒྲུབ་པའི་རྣལ་འབྱོར་ལ། །མ་རྟོགས་ལྟ་བའི་གོལ་གྲིབ་བྱུང་བ་ན། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །དཔལ་ལྡན་རྡོ་རྗེ་སེམས་དཔའ་སོགས། །ཞེས་བརྗོད། ཨོཾ་ དཔལ་ལྡན་རྡོ་རྗེ་སེམས་དཔའ་ཀྱེཿ བདག་ལ་རྗེས་སུ་ཆགས་པར་མཛོདཿ སྐྱེ་རྒ་ན་དང་འཆི་བ་སོགསཿ འཇིགས་རུང་སྲིད་པའི་སྡུག་བསྔལ་ལསཿ མགོན་པོ་ཁྱེད་ཀྱིས་བདག་སྐྱོབས་ཤིགཿ སྡིག་པ་ཀུན་ལས་རྣམ་གྲོལ་ཞིང་ཿ ཡང་དག་ཡེ་ཤེས་སེམས་དཔའ་ཆེའིཿ སྐུ་གསུང་ཐུགས་སུ་བདག་སྒྲུབ་ཤིགཿ ས་མ་ཡ་སིདྡྷི་ཨ་ལ་ལ་ཧོཿ བླ་མ་དཔལ་ལྡན་རྡོ་རྗེ་སོགས། བཅོ་ལྔ་པ་བདག་འཇུག་བླང་པ་ནི། རྣམ་པ་ལྔ་ལས་དང་པོ་ཁྲུས་གསོལ་དང་། ཇི་ལྟར་བལྟམ་པ༴ སོགས། ཨོཾ་བཛྲ་བྷུ་མེ་ཨཱཿ ཧཱུཾ གཞི༴ མཎྜལ་ཕུལ་རྗེས་གསོལ་བ་འདི་ལྟར་གཏབ། དཔལ་ལྡན་རྡོ་རྗེ་སེམས་དཔའ་ཀྱཻ༴སོགས། ལན་གསུམ་བརྗོད་ཅིང་ཡན་ལག་བདུན་འདི་བྱ། བླ་མ་དཔལ་ལྡན་རྡོ་རྗེ་སེམས། །མཆོག་གསུམ་རྒྱལ་བ་སྲས་བཅས་ལ། །རྣམ་ཀུན་བཏུད་དེ་ཕྱག་འཚལ་ཞིང་། །ཕྱི་ནང་མཆོད་པ་རྒྱ་མཚོས་མཆོད། །སྡིག་པ་ལས་ནི་ལྡོག་བགྱི་ཞིང་། །བསོད་ནམས་ཀུན་ལ་རྗེས་ཡི་རང་། །རྟག་ཏུ་ཆོས་འཁོར་སྐོར་བ་དང་། །འགྲོ་གནས་བར་དུ་བཞུགས་སླད་དུ། །བདག་ནི་གུས་པས་གསོལ་བ་འདེབས། །བསོད་ནམས་གང་དེས་མཁའ་མཉམ་འགྲོ། །བླ་མེད་བྱང་ཆུབ་གནས་ཐོབ་ཤོག །ཨེ་མ་ཧོ་ཕྱོགས་བཅུ་དུས་བཞི་སོགས། ཅེས་དང་གཉིས་པ་ཕྱིར་བཅོས་འདི་ལྟར་ཏེ། ཐོག་མར་ཡུལ་སྔགས་ཀྱི་སྡོམ་ལྡན་གཅིག་ལ་རྒན་ན་ཕྱག་འཚལ།གཞོན་ན་གུས་འདུད་ཀྱི་སྤྱོད་ལམ་ཙམ་བྱས་ལ་ཉེས་པ་འདི་བྱུང་བ་འཆག་པ་ལ་ཐུགས་གཏད་པར་ཞུ་ཞེས་སྙན་གསན་ཕབས་ནས་དམའ་བའི་ཕྱོགས་སུ་ཙོག་པུར་ཐལ་མོ་སྦྱར་བས་འཁོད་དོ། དེ་ནས་སློབ་དཔོན་ཡིན་ན། སློབ་དཔོན་ཞེས་དང་གྲོགས་ཡིན་ན། རིག་པ་འཛིན་པའམ་བཙུན་པ་དགོངས་སུ་གསོལ། བདག་མིང་མི་བསྐྱོད་རྡོ་རྗེ་ཞེས་བགྱི་བ་ལ་ཇི་སྐད་ཡོངས་སུ་བརྗོད་པའི་ཕམ་པའི་གཞི་ལས་རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ་བླ་མ་ལ་སྨད་པ་བྱུང་སྟེ་དེ་དག་སློབ་དཔོན་ནམ། རིག་པ་འཛིན་པ་ལ་མཐོལ་ཏེ་མི་འཆབ་པོ། བཤགས་ཤིང་མཐོལ་བས་བདག་བདེ་བར་གནས་པར་འགྱུར་གྱི་མ་མཐོལ་ན་བདེ་བར་གནས་པར་མི་འགྱུར་རོ། །ཞེས་ལན་གསུམ་བརྗོད་པའི་ཡུལ་གྱིས་ཁྱོད་ཀྱིས་འདི་རྣམས་ཉེས་པར་མཐོང་ངམ་ཞེས་དྲིས་པ་ན་མཐོང་ཞེས་པ་དང་ཕྱིས་ཀྱང་སྡོམ་པར་བྱེད་དམ་ཞེས་དྲིས་པ་ན། ཆོས་བཞིན་འདུལ་བ་བཞིན་ཏུ་ལེགས་པར་སྤྱི་བོས་ནོད་པར་བགྱིའོ། །ཞེས་ལན་གསུམ་བགྱིས་ནས་ཡུལ་གྱིས། ཐབས་ཡིན་ནོ། བཤགས་པ་བྱེད་མཁན་གྱིས་ལགས་སོ། ཞེས་ལན་གཅིག་བྱའོ། རྡོ་རྗེ་འབྱུང་བ་ལས་བཤགས་པ་བྱེད་པའི་སྐབས་སུ་བདག་མིང་མི་བསྐྱོད་རྡོ་རྗེ་འདི་ཞེས་བྱ་བས། ཞེས་འབྱུང་བས་གསང་མཚན་འདོན་དགོས་པར་མངོན་ནོ། །གཞན་ཡང་རིམ་པ་གཉིས་བསྒོམ་པ་དང་བཟླས་པ་དང་གཏོར་མ་དང་། མཎྜལ་དང་རྟེན་གྱི་མདུན་དུ་བཤགས་པ་དང་སེམས་ཅན་གྱི་སྲོག་བསྐྱབ་པ་དང་བཀའ་བཀླག་པ་ཚ་ཚ་གདབ་པ་དང་སྡིག་པའི་གཟུགས་དམིགས་ཏེ་ཏིལ་མེར་བསྲེགས་པ་དང་ངན་འགྲོ་དགུག་དྲལ་ཕུང་པོ་གསུམ་པ་འདོན་པ་ལ་སོགས་པའི་སྒོ་ནས་སྡིག་ལྟུང་སྦྱང་བར་མི་བརྩོན་པརརྟག་ཏུ་བག་མེད་པར་གནས་ན། ཉེས་པ་ཆུང་ངུ་ཕྲ་མོ་ཡང་སྦྲུལ་གྱི་མཆེ་བས་བཏབ་པ་བཞིན་དུ་ལུས་ངག་སེམས་ནི་ཉམས་པར་བྱེད། ཅེས་གལ་ཏེ་བག་མེད་པར་བྱས་ན་ཉེས་པ་ཕྲ་མོ་ཡང་རྨ་ལ་ཞུགས་པའི་དུག་བཞིན་དུ་འཕེལ་བར་བྱེད་པ་གསུངས་ལ་ལྟུང་བ་བྱུང་བ་མི་འཕེལ་བར་བྱེད་པའི་ཐབས་ཀྱང་གསུངས་ཏེ། དེ་ཉིད་ལས། སངས་རྒྱས་ཀུན་གྱི་སྐུ་གཅིག་པུ། པད་དཀར་ཟླ་བའི་དབུས་གནས་ཤིང་། རྡོ་རྗེ་དྲིལ་བུ་རྒྱན་སྤྲས་པས། རྡོ་རྗེ་སེམས་དཔའ་ལ་དམིགས་ཤིང་། ཡི་གེ་བརྒྱ་བ་ཆོ་ག་བཞིན། ཉི་ཤུ་རྩ་ནི་རེ་རེ་བཟླས། ལྟུང་སོགས་བྱིན་གྱིས་བརླབས་གྱུར་ནས། འཕེལ་བ་རུ་ནི་མི་འགྱུར་ཞེས། གྲུབ་པ་མཆོག་རྣམས་ཀྱིས་བཤད་པ། ཐུན་མཚམས་སུ་ནི་སྤྱད་པར་བྱ། འབུམ་ཕྲག་དུ་ནི་བཟླས་གྱུར་ན། རྣམ་དག་པ་ཡི་བདག་ཉིད་འགྱུར། ཞེས་སོ། དེ་ལྟ་བུའི་ཕྱིར་བཅོས་མཚན་ཉིད་པའོ། །ཡང་ན་སྙིགས་དུས་ཀྱི་བསམ་སྤྱོད་དང་བསྟུན་ནས་ཕྱིར་བཅོས་ཀྱི་རྟེན་འབྱུང་མི་འགོག་ཙམ་འདོད་ན། རྟེན་གསུམ་བྱིན་ལྡན་ནམ་མདུན་དཀྱིལ་དང་། བླ་མ་སློན་དཔོན་མཆེད་ལྕམ་བཅས་མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་བླ་མ་རྡོ་རྗེ་འཆང་དངོས་ཡིན་སྙམ་པའི་དག་སྣང་དང་། རང་བྱས་ཀྱི་ཉེས་ཚོགས་ལ་བཟོད་གླགས་མེད་པར་གནོང་འགྱོད་དྲག་པོས་སྡིག་ཅན་འཆི་ཁ་མ་ལྟ་བུའི་བསམ་སྤྱོད་ཀྱིས་བློ་སྙིང་བྲང་གསུམ་སྐྱབས་ཡུལ་རྣམས་ལ་ཁ་ཞེ་མེད་པར་བཀལ་ནས་ཕྱག་འཚལ་བ་དང་ཆབས་ཅིག་ཏུ། ཨེ་མ་ཧོ། ཕྱོགས་བཅུ་དུས་བཞི་ཀུན་གྱི་བདག་ཉིད་ཆེ། །བླ་མ་རྒྱལ་བ་ཞི་ཁྲོ་ཡོངས་རྫོགས་དགོངས། །འདིར་གཤེགས་ཉི་ཟླ་པདྨའི་གདན་ལ་བཞུགས། །ཉམས་ཆག་ན་རག་སྦྱོང་ཕྱིར་ཕྱག་མཆོད་བཞེས། །ཡོན་ཏན་ཕུན་ཚོགས་བླ་མ་རྣམས་ལ་ཕྱག་འཚལ་ལོ། །དམིགས་མེད་སྤྲོས་བྲལ་ཆོས་ཀྱི་སྐུ་ལ༴ བདེ་ཆེན་ལོངས་སྤྱོད་རྫོགས་པའི་སྐུ༴ འགྲོ་མགོན་ཅིར་ཡང་སྤྲུལ་པའི་སྐུ༴ གནས་ལུགས་མི་འགྱུར་རྡོ་རྗེའི༴ ཡང་དག་མངོན་པར་བྱང་ཆུབ་སྐུ༴ ཉོན་མོངས་ཞི་མཛད་ཞི་བའི་ལྷ་ལ༴ ལོག་ལྟ་ཚར་གཅོད་ཁྲོ་བོའི་སྐུ༴ ཐབས་མགོན་ཚེ་བདག་འཇམ་དཔལ་སྐུ༴ སྐྱོན་བྲལ་སྒྲ་སྒྲོགས་པདྨ་གསུང་ལ༴ ཡང་དག་དོན་ལྡན་བཛྲ་ཐུགས༴ དུག་ལྔ་ནད་སེལ་བདུད་རྩི་སྨན་གྱི་ལྷ༴ དྲེགས་པ་འཇོམས་མཛད་ཕུར་པའི༴ འབྱུང་བ་མངའ་བདག་མ་མོའི་ཚོགས༴ ས་དང་ལམ་རྫོགས་རིག་འཛིན་ཚོགས༴ བསྟན་པ་སྲུང་མཛད་དམ་ཅན་རྣམས༴ དགྲ་བགེགས་འདུལ་མཛད་སྔགས་བདག་ཚོགས་ལ༴ གང་གིས་རྒྱལ་བ་ཞི་ཁྲོ་ཡི། དཀྱིལ་འཁོར་ལྷ་ལ་ཕྱག་འཚལ་ན། ཉམས་ཆག་ཀུན་ཀྱང་བྱང་གྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང་། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །རྡོ་རྗེ་སེམས་དཔའ་གསང་སྔགས་དངོས། །ལས་སྒྲིབ་ཉོན་སྒྲིབ་དག་བྱེད་ཅིང་། །འཁོར་བ་དོང་སྤྲུག་ཡངསྙིང་བཟླ། །ཨོཾ་བཛྲ་ས་ཏྭ་སོགས། སཏྭ་ཨཱཿ ཧོ་བདེ་གཤེགས་ཡོངས་རྫོགས་དགོངས་སུ་གསོལ། །རྒྱལ་བའི་བཀའ་དང་བླ་མའི་ལུང་། །ཇི་བཞིན་མ་སྤྱད་སློན་དཔོནསྨད། །རྡོ་རྗེ་མཆེད་དང་ལྕམ་དྲལ་ལ། །ལྟ་ལོག་ངན་སེམས་ངག་ཏུ་སྨྲས། །བརྡེག་བཙོག་གནོད་པ་དངོས་སུ་སྤྱད། །ལྷ་དང་དཀྱིལ་འཁོར་ཉམས་མ་གསལ། །འཛབ་བཟླས་མ་དག་ཟུར་ཆག་ཉམས། །གསང་བར་འོས་དང་གཉེར་གཏད་སྨྲས། །གསང་བཅུ་བསྒྲགས་ཤིང་བླ་མ་བསླུས། །རྩ་བའི་དམ་ཉམས་མཐོལ་ཞིང་བཤགས། །སྤྱད་པར་བྱ་བའི་དམ་ཚིག་ལྔ། །ཤེས་བྱ་ལྔ་དང་བསྒྲུབ་བྱ་ལྔ། །མི་སྤང་ལྔ་དང་དང་ལེན་ལྔ། །ཡན་ལག་དམ་ཉམས་མཐོལ་ཞིང་བཤགས། །ལེ་ལོ་གསོག་འཇོག་ཚོགས་སྤྱང་བྱས། །ཕུད་ལྷག་ཉམས་ཤིང་ཁ་ཚར་ཤོར། །ཚོར་དང་མ་ཚོར་རྐྱེན་དབང་གིས། །སྒོ་གསུམ་བག་མེད་དམ་ཉམས་བཤགས། །ཡིད་ཀྱི་དམ་ཉམས་ལྟ་བས་བཤགས། །དེ་ཡང་ཀུན་གཞི་བྱང་ཆུབ་སེམས། །ཡིན་པ་མེད་པའི་ལྟ་བ་རྟོགས། །མིན་པ་མེད་པའི་སྒོམ་ཉམས་ལོན། །ཡིན་མིན་མེད་པའི་སྤྱོད་པ་རྟོགས། །རེ་དོགས་མེད་པའི་བྱང་ཆུབ་སེམས། །རྩ་བ་ཡན་ལག་ཐམས་ཅད་ཀྱི། །ཆགས་ཉམས་མ་བྱུང་མ་སྐྱེས་པ། །བཤགས་བྱ་བཤགས་བྱེད་གཉིས་མེད་གྲོལ། །སྦྲེལ། ལན་གསུམ་སོགས་ཅི་ནུས་བརྗོད་མཐར། ཀུན་ནས་དང་བས་བླ་མ་ཡི། །ཞབས་ཀྱི་པདྨོ་ལ་བཏུད་དེ། །རྩ་བའི་ལྟུང་བ་བཅུ་བཞི་པ། །རྒྱུད་ལས་གསུང་ལྟར་མ་འཚལ་བས། །ཉེས་ཚོགས་སྙིང་ནས་བཤགས་བགྱིད་དོ། །གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲང་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོོར་བཤད། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བཤད། །རྡོ་རྗེ་སྤུན་ལ་ཁྲོ་བ་ནི། །ཉེས་པ་བརྗོད་པ་གསུམ་པ་ཡིན། །སེམས་ཅན་རྣམས་ལ་བྱམས་པ་སྤངས། །བཞི་པ་ཡིན་པར་རྒྱལ་བས་གསུངས། །ཆོས་ཀྱི་རྩ་བ་བྱང་ཆུབ་སེམས། །དེ་སྤོང་པ་ནི་ལྔ་པ༴ རང་ངམ་གཞན་གྱི་གྲུབ་པའི་མཐའ། །ཆོས་ལ་སྨོད་པ་དྲུག་པ༴ ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་བདུན༴ ཕུང་པོ་སངས་རྒྱས་ལྔའི་བདག་ཉིད། །དེ་ལ་བརྙས་བྱེད་བརྒྱད༴ རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ༴ གདུག་ལ་རྟག་ཏུ་བྱམས་ལྡན་པར། །བྱེད་པ་དེ་ནི་བཅུ་པར་འདོད། །མིང་སོགས་བྲལ་བའི་ཆོས་རྣམས་ལ། །དེར་རྟོག་པ་ནི་བཅུ་གཅིག་པ། །སེམས་ཅན་དད་དང་ལྡན་པ་ཡི། །སེམས་སུན་འབྱིན་པ་བཅུ་གཉིས་པ། །དམ་ཚིག་ལ་ནི་ཇི་བཞིན་རྙེད། །མི་བརྟེན་པ་ནི་བཅུ་གསུམ་པ། །ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །སྔགས་པས་འདི་དག་སྤངས་ནས་ནི། །དངོས་གྲུབ་ངེས་པར་ཐོབ་པར་འགྱུར། །གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་བཟུང་བར་འགྱུར། །དེ་ནས་སྡུག་བསྔལ་མྱོང་འགྱུར་ཞིང་། །ཐུར་དུ་བལྟས་ཏེ་དམྱལ་བར་འགྲོ། །གསུངས་པའི་ཉེས་པས་ནོན་པ་བདག །ད་ནི་གནོང་འགྱོད་ཆེར་སྐྱེས་ཏེ། །ཡེ་ཤེས་སྤྱན་ལྡན་ཁྱེད་རྣམས་ཀྱི། །སྤྱན་སྔར་མི་འཆབ་མི་སྦེད་བློས། །མཐོལ་ལོ་བཤགས་སོ་ཚངས་པར་སྩོལ། །དེ་ལྟར་མཐོལ་བཤགས་དང་བཞེས་ན། །བདག་ཉིད་བདེ་བར་གནས་འགྱུར་གྱི། །མཐོལ་ཞིང་མ་བཤགས་བདེར་མི་འགྱུར། །སྦྲེལ། ལན་གསུམ་བརྗོད་མཐར་དཔང་པོ་ཡིས། འདི་རྣམས་ཁྱོད་ཀྱི་ཉེས་རུ། །མཐོང་བམ་དྲིས་པར་མཐོང་ཞེས་བརྗོད། །ད་ཕྱིན་སྡོམ་མམ་དྲིས་པ་ལས། །ཆོས་བཞིན་འདུལ་བ་ཇི་བཞིན་དུ། །ལེགས་པར་སྤྱི་བོས་ནོད་པར་བགྱི། །ཞེས་པའི་ལན་གསུམ་བརྗོད་པའི་མཐར། །དཔང་པོས་ཐབས་ཡིན་ནོ་ཞེས་དང་། སློབ་བུས་ལགས་སོ་ལན་གདབ་པོ། དེ་རྗེས་སྦོམ་པོའི་བཤགས་པ་དང་། རྒྱུད་ལས་གསུང་བཞིན་འདིར་འགོད་ན། ཉེས་ཆོགས་ཡིད་ལ་དྲན་བྱ་ཞི། འགྱོད་སེམས་དྲག་པོས་འདི་བཞིན་བརྗོད། བླ་མའི་ཞབས་ཀྱི་པདྨོ་ལ། །ཀུན་ནས་དང་བས་ཕྱག་འཚལ་ཏེ། །སྦོམ་པོའི་ལྟུང་བ་རྣམ་པ་བརྒྱད། །རྒྱུད་དུ་གསུངས་པ་མ་འཚལ་བའི། །ཉེས་པའི་ཚོགས་ཀུན་བཤགས་པར་བགྱི། །ཤེས་རབ་སྟོབས་ཀྱིས་ལེན་པ་དང་། །དེ་ཡི་བདུད་རྩི་སྟོབས་ཀྱིས་ལེན། །སྣོད་མིན་ལ་ནི་མི་གསང་དང་། །ཚོགས་ཀྱི་ནང་དུ་རྩོད་པ་དང་། །དད་ལྡན་ལ་གཞན་ཆོས་སྟོན་དང་། །ཉན་ཐོས་ནང་དུ་ཞག་བདུན་གནས། །རྫུན་གྱི་རྣལ་འབྱོར་ང་རྒྱལ་བྱེད། །དད་པ་མེད་ལ་ཆོས་སྟོན་པ། །འདི་རྣམས་སྦོམ་པོའི་ལྟུང་བར་བཤད། །རྩ་ལྟུང་སྦོམ་པོའི་རིམ་པ་དག །ཆོ་ག་ཡིས་ནི་ཤེས་བྱ་ཞིང་། །ཉམས་པར་གྱུར་ན་བཤགས་པར་བྱ། །ཞེས་གསུངས་ཇི་བཞིན་འདིར་དྲན་ཏེ། །སྒོ་གསུམ་གནོང་འགྱོད་དང་བཅས་པས། །སྙིང་ནས་བཤགས་སོ་ཚངས་པར་སྩོལ། །བདེ་བར་གཤེགས་སྲས་བདག་དགོངས་གསོལ། །ཞེས་བརྗོད་གསུམ་པ་སྡོམ་གསུམ་གསར་བཟུང་དང་། རྙིང་པ་གསོ་སྦྱོང་དད་མོས་བློ་ཡིས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་གདན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་རྒྱན་དང་ནི། །གླུ་དང་གར་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤང་། །བླ་མེད་བྱང་ཆུབ་མྱུར་ཐོབ་ཤོག །ཅེས་པས་སོ་ཐར་དང་། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་པས་བྱང་སྡོམ་དང་། སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་མིང་རྡོར་སེམས་ཞེས་བགྱི་བས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་གྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དག་ནི་བརྟན་པོར་བཟུང་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པས་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། །དབྱུགས་མ་ཕྱུང་རྣམས་དབུགས་དབྱུང་ཞིང་། །ཡོངས་སུ་མྱ་ངན་འདས་ལ་འགོད། །ཅེས་པས་སྔགས་སྡོམ་རྒྱས་པར་བྱ་བའམ་བསྡུ་ན་འདི་འདོན། བདེ་གཤེགས་སྲས་བཅས་བདག་ལ་དགོངས། །བདག་མིང་རྡོར་སེམས་ཞེས་བགྱི་བས། །བྱང་ཆུབ་སྙིང་པོར་མཆིས་ཀྱི་བར། །སོ་སོར་ཐར་དང་བྱང་ཆུབ་སེམས། །རིག་འཛིན་ནངགི་སྡོམ་པའི་ཚོགས། །མ་ལུས་ཡོངས་སུ་བཟུང་བར་བགྱི། །ཞེས་པས། སྦྲེལ། སྡོམ་གསུམ་ཐོབ་བློ་བརྟན་པོ་ཡིས། བཞི་པ་སྙིང་ནས་དམ་བཅའ་བྱ་བ་ནི། སྙིང་གར་རྩེ་གཅིག་ཕྱག་རྒྱ་བཅངས་བྱས་ཏེ། ཨོཾ་རྣལ་འབྱོར་དབང་པོ་ཡེ་ཤེས་མཐར་ཕྱིན་པ། །འགྲོ་ལ་ཕན་མཛད་ཐུགས་རྗེས་དབང་བསྒྱུར་ཞིང་། །སྲིད་པ་གསུམ་གྱི་གཉེན་གྱུར་གཅིག་པུ་པ། །ལྷ་ཡི་ལྷ་ཁྱོད་བདག་ལ་དགོངས་སུ་གསོལ། །བདེ་བར་གཤེགས་པའི་སྤྲུལ་པ་རྒྱ་མཚོ་དང་། །རྣལ་འབྱོར་དབང་ཕྱུག་གྲུབ་པའི་ཚོགས་ཆེན་པོ། །ལྷ་དང་ལྷ་མིན་སྔགས་འཆང་དམ་ཚིག་ཅན། །ཀུན་ནས་འདུས་པ་རྣམས་ཀྱང་དགོངས་སུ་གསོལ། །བདག་ནི་རྒྱལ་སྲིད་མཐོ་རིས་ལོངས་སྤྱོད་དང་། །འདོད་པའི་ཡོན་ཏན་བདག་སྒྲུབ་མ་ལགས་ཏེ། །འགྲོ་ལ་སྙིང་བརྩེ་ཁོ་ནས་དོན་བརྩོན་པ། །འདི་ལ་ཀུན་མཁྱེན་ཁྱོད་ནི་དཔང་དུ་གསོལ། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མགོན། །འཕགས་མཆོག་སྤྱན་སྔར་ཇི་ལྟར་དམ་བཅས་པ། །སུན་པར་མི་བགྱིད་མགོན་ཁྱོད་བསླུ་མ་ལགས། །སྙིང་ནས་བདག་ནི་ཁེ་དང་གྲགས་ལ་སོགས། །གཡོ་དང་ཟང་ཟིང་སེམས་ནི་གཏན་སྤངས་ནས། །གཞན་དོན་སྒྲུབ་པ་གཅིག་པུའི་སེམས་བཞག་སྟེ། །རྣལ་འབྱོར་སྤྱོད་པ་ཆེན་པོ་བདག་གིས་སྤྱད། །ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབ་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱོད་ནི་ཡོངས་མི་སྤོང་། །རྡོ་རྗེའི་དམ་ཚིག་ཆེན་པོ་རྣམས་དང་ནི། །རྡོ་རྗེ་སློབ་དཔོན་རྡོ་རྗེ་མཆེད་ལྕམ་དང་། །གཞན་ཡང་ཐེག་པ་མཆོག་ལ་ཞུགས་པ་རྣམས། །སྲོག་གི་ཕྱིར་ཡང་མི་གཏོང་ཅི་ནུས་བསྲུང་། །འཁོར་བ་བདག་མེད་སྒྱུ་མའི་རང་བཞིན་ལ། །བདག་ནི་འཇིགས་པ་ཅི་ཡང་མ་མཆིས་ཏེ། །མ་རིག་སྐྱེ་བོ་རྣམས་ཀྱི་དོན་སླད་དུ། །ཕྱི་མཐར་ཐུག་གི་བར་དུ་གནས་པར་སྤྲོ། །གཞན་དོན་འཁོར་བ་རྣམས་སུ་སྤྱོད་པ་ན། །བྱང་ཆུབ་སྤྱོད་པ་རླབས་ཆེན་བདག་གིས་སྤྱད། །འགྲོ་དྲུག་སེམས་ཅན་རྣམས་ལ་ཕན་གདགས་ཕྱིར། །རང་དབང་དུ་ནི་སྐྱེ་བ་བླང་བར་བགྱི། །བདག་ནི་ཡོངས་སུ་བཟུང་བའི་འཇིག་རྟེན་ནམ། །མྱ་ངན་འདས་ལ་སྤྲོ་བ་མ་མཆིས་ཏེ། །གང་དང་གང་དུ་སྡུག་བསྔལ་གནས་རྣམས་སུ། །བསྐལ་པ་རྒྱ་མཚོར་གནས་ཞིང་ཕན་པར་བགྱི། །སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཇི་སྲིད་ངན་སོང་སྟོངས་པ་མ་གྱུར་པ། །དེ་སྲིད་བདག་གིས་སྐྱོ་བའི་སེམས་མི་བསྐྱེད། །ཤེས་རབ་ཐབས་ཀྱིས་འགྲོ་བའི་དོན་བགྱིད་པ། །སྙིང་རྗེའི་ལོངས་སྤྱོད་དེ་ལས་མ་མཆིས་པས། །སེམས་དམྱལ་ཡི་དྭགས་གཤིན་རྗེའི་འཇིག་རྟེན་ཡང་། །ལྷ་ཡི་དགའ་ཚལ་ལྟ་བུར་བལྟ་བར་བགྱི། །འགྲོ་ལ་ཐུགས་བརྩེ་དཔལ་གྱི་མགུལ་ནས་གསུངས། །རྣལ་འབྱོར་དམ་ཆོས་བདུད་རྩིའི་མཆོག་རྣམས་ནི། །བདག་གིས་འཇིག་རྟེན་ཐུག་པར་མ་མཆིས་པར། །ཇི་ལྟར་འཚམས་པ་བཞིན་དུ་རྒྱས་པར་བགྱི། །སྲིད་པར་ལས་དང་རྐྱེན་གྱི་དབང་གྱུར་ཏེ། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པ་མཆོག་ལ་ཞུགས་པའི་སྐྱེ་བོ་ལ། །ཚེ་རབས་རྣམས་སུ་མཐུ་རྩལ་ཅི་མཆིས་ཀྱིས། །སྐྱེས་ཆེན་རྣམས་ཀྱི་དགོངས་པ་རྟག་ཏུ་བསྐང་། །དམ་པའི་ཆོས་དང་སྒྲུབ་པའི་གེགས་གྱུར་པ། །མི་དང་མི་མིན་གདུག་པ་གང་ཡང་རུང་། །བདག་གིས་ཞི་དང་ཁྲོ་བོའི་ཕྲིན་ལས་ཀྱིས། །ཡོངས་སུ་ཞི་ཞིང་རྣམ་པར་གཞོམ་པར་བགྱི། །རྣལ་འབྱོར་བདག་གིས་ཐེག་ཆེན་བླ་མེད་དང་། །རྡོ་རྗེ་རྒྱལ་པོ་ཁྱེད་ལ་བརྟེན་ནས་ནི། །སངས་རྒྱས་ཞིང་སྦྱངས་འགྲོ་ལ་སྨན་སླད་དུ། །བྱང་ཆུབ་སྙིང་པོ་བདག་གིས་རྟོགས་པར་བགྱི། །བདག་ནི་འཕགས་མཆོག་ཕྱག་རྒྱར་མངོན་སྤྲུལ་ཏེ། །གལ་ཏེ་སྐབས་མེད་འཆི་བའི་དུས་བྱུང་ཚེ། །གསང་སྔགས་མགོན་པོ་ཡེ་ཤེས་དཀྱིལ་འཁོར་ཅན། །ཁྱེད་ཀྱི་ཞབས་ཀྱི་དྲུང་དུ་མཆི་བར་བགྱི། །སྲིད་གསུམ་སྡུག་བསྔལ་ཅི་འདྲ་ཁྱེད་ཀྱིས་མཁྱེན། །དམྱལ་སོགས་མེ་དཔུང་ཞི་བར་བགྱིད་ལ་སོགས། །སེམས་ཅན་དོན་དུ་མྱུར་དུ་བདག་མཆི་ན། །དམ་པ་རྣམས་ཀྱིས་མཐུ་ནུས་སྩལ་དུ་གསོལ། །འོག་གི་ཨོཾ་ཡེ་ཤེས་ལྔ་ལྡན་བླ་མ་རྡོ་རྗེ་འཛིན། སོགས། ཞེས་བརྗོད་ལྔ་པ་ཡེ་ཤེས་དབབ་པ་ནི། ལུས་གནད་ཆོས་བདུན་དང་ལྡན་པར་བཅའ། ངག་གནད་རླུང་ཁ་སྦྱོར་དུ་འཆིང་། དམིགས་གནད་ནི། རང་ཉིད་དཔལ་རྡོ་རྗེ་སེམས་དཔའ་ཡབ་ཡུམ་དུ་གསལ་བའི་སྙིང་གར་ཡེ་ཤེས་སེམས་དཔའ་རྡོར་སེམས་ཡབ་ཡུམ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་སྒྲ་དང་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མའི་ཚོགས་དང་བཅས་པ་ཐམས་ཅད་དཔལ་རྡོ་རྗེ་སེམས་དཔའ་ཡབ་ཡུམ་གྱི་སྐུ་ཕྱག་རྒྱ་གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབ་པ་བཞིན་དུ་སྤྱན་དྲངས་ཏེ་སྙིང་ག་ནས་སིབ་སིབ་ཐིམ་པར་མོས་ལ་ཁྱད་པར་གྱི་རྫས་དུད་བདུག། ཌ་དྲིལ་འཁྲོལ་ཞིང་རོལ་མོ་སྣ་ཚོགས་ཀྱི་སྒྲ་སྦྱར་ཏེ། ཨོཾ་བཛྲ་སཏྭ་ས་མ་ཡ༴ སོགས་ཡིག་བརྒྱའི་མཐར། ཨོཾ་ཛྙཱ་ན་ཨཱ་བེ་ཤ་ཡ་ཨ་ཨཱཿ ར་ར་ར་ར་ཙ་ལ་ཡ་ཙ་ལ་ཡ་ཧཱུཾ་ཨཱཿཧཿཛྷཻཿ ཞེས་དྲག་ཏུ་བཟླ་ཞིང་དབབ། ཕེབས་པ་ནི་ཨོཾ་ཏིཥྛ་བཛྲཿ ཞེས་བརྟན་པར་བྱའོ། བཅུ་དྲུག་པ་ནི། དངོས་གཞི་དབང་ལ་གཉིས། སྦྱོར་བ་སྡིག་སྒྲིབ་དག་པར་བྱེད་པ་དང་། དངོས་གཞི་ཡོན་ཏན་ཡར་འཕེལ་གཉིས་པོ་ལས། དང་པོ། ཐུགས་ཀ་ནས་སྤྲོས་པའི་ཁྲོ་ཚོགས་བི་ཤའི་སྔགས་ཡུངས་ཐུན་དང་བཅས་པས་བགེགས་བསྐྲད་ལ། སློབ་བུས་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་གསང་གནས་སུ་དུ། ལྟེ་བར་ཏྲི། སྙིང་གར་པྲེ་རྣམས་ཀྱི་རྣམ་པར་གནས་པའི་སོ་སོའི་སྟེང་དུ་ཡི་གེ་རཾ་ཡཾ་ཁཾ་གསལ་བར་བསམ། སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་འབྱུང་བའི་ཡི་གེ་གསུམ་བསྐུལ། ཡེ་ཤེས་ཀྱི་མེ་རླུང་ཆུར་གྱུར་པའི་གསང་གནས་ཀྱི་དུ་བསྲེག་གཏོར་སྦྱངས་བར་བསམ་ལ། རཾསྥ་ར་ཎ་ཕཊཿ ཡཾ་སྥ་ར༴ ཁཾ་སྥ་ར༴ ཅེས་སྦྱངས། སློབ་དཔོན་གྱི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་ཨོཾ་སྭ་ཨཱཾ་ཧ། གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱ་པྱཱཾ་ཏཾ་རྣམས་ཀྱིས་མཚན་པ་རྣམས་རིགས་ལྔ་ཡབ་ཡུམ་བཅུར་གྱུར་པར་བསམ་ལ། ཨོཾ་སུ་ར་ཏི་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལིས་སོར་མོ་བསྣོལ། བཛྲ་བྷནྡྷ་བཾ། ཞེས་བསྡམས་པས་རིགས་ལྔ་ཡབ་ཡུམ་མཉམ་པར་སྦྱོར་བར་བསམ་ལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ༴ ཆོས་ཉིད་རྣམ་པར་དག་པའི་བཀའ༴ ཆོས་ཅན་རྒྱུ་འབྲས་བསླུ་བ་མེད་པའི༴ ཞི་ཁྲོ་སྒྱུ་འཕྲུལ་རྣམ་པར་རོལ་བའི་ལྷ་ཚོགས་ཀྱི་བདེན༴ སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན༴ བདེན་པ་ཆེན་པོས་བྱིན་རླབས་ཀྱིས་ཉོན་མོངས་པ་ཞེ་སྡང་གི་སྒོ་ནས་བསགས་པའི་སྡིག་སྒྲིབ་ཐམས་ཅད་ན་ར་ག་ཏེ་ཤུདྡྷེ་ཙཀྵུ་པྲ་ཝེ་ཤ་ཡ་ཕཊཿ ཅེས་བརྗོད་ཅིང་ཐལ་མོ་སྤྲུགས་པས། སློབ་དཔོན་གྱི་ཐུགས་ཀ་དང་རིགས་ལྔའི་སྦྱོར་མཚམས་ནས་འོད་ཟེར་འཕྲོས་པའི་དམྱལ་བར་སྐྱེ་བའི་ས་བོན་བག་ཆགས་དང་བཅས་པ་སྦྱངས༴ བསམ་མོ། སྔོན་ལས་ལ་འགྱོད་ཅིང་བཤགས་སྡོམ་བགྱི་བསམ་པས། ཀྱེ་མ་ཀྱེ་ཧུད་རྡོ་རྗེ་འཛིན། འགྲོ་མགོན་ཐུགས་རྗེས་བདག་སྐྱོབས་ཤིག །དབང་མཆོག་རྒྱལ་པོ་སྒྲོག་ཏུ་གསོལ། །སླད་ནས་མི་འཆབ་མི་སྦེད་དོ། །ཞེས་གསོལ་བ་གདབ། གནང་བ་བྱིན་པ་ནི། བུ་འདིར་ཤོག་ཅིག་རིགས་ཀྱི་བུ། རང་གིས་ཉམས་དང་ཟླས་ཉམས་ཀྱིས། །ན་རག་གནས་སུ་ལྟུང་བ་ལས། །སྐྱོབ་ཕྱིར་དབང་མཆོག་སྦྱིན་པར་བྱ། །ཞེས་དབང་སྟེགས་སུ་དྲངས། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་དུན་ཧཱུཾ་ཕཊཿ ཅེས་བཟླ་ཞིང་ཡུངས་དཀར་གྱིས་བྲབས། ཁྲུས་བུམ་ཀྱིས་དབང་བསྐུར་ལ། ཏིལ་གྱི་གང་བུ་བཞིན་གང་བས། རྒྱལ་བའི་བུམ་པ་བཟུང་ནས་ནི། འདི་ཉིད་དུ་ནི་བླུག་མཛད་པས། །བག་ཆགས་མ་ལུས་དག་གྱུར་ཅིག །ཨོཾ་བཛྲ་སཏྭ་ས་མ་ཡ༴སོགས་ཡིག་བརྒྱའི་མཐར། ཨོཾ་ད་ཧ་ད་ཧ་སརྦ་ན་རཀྐ་ག་ཏེ་ཧེ་དུན་ཧཱུཾ་ཕཊཿ བཏགས་པས་བཀྲུས་ནས། རིགས་ཀྱི་བུ་འདིས་ཉོན་མོངས་པ་ཞེ་སྡང་གི་སྒོ་ནས་བསགས་པའི་སྡིག་སྒྲིབ་ཐམས་ཅད་ཤིནྟཾཀུ་རུ་ཡེ་སྭཱཧཱ། ཞེས་ཁྲུས་བྱའོ། དེ་ནས། སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་འབྱུང་བའི་ཡི་གེ་གསུམ་བསྐུལ། །ཡེ་ཤེས་ཀྱི་མེ་རླུང་ཆུར་གྱུར་པས་སྙིང་ཀའི་པྲེ་བསྲེག་གཏོར་སྦྱངས་བར་བསམ། རཾ་སྥ་ར་ཎ་ཕཊཿ ཡཾ༴ ཁཾ༴ ཅེས་སྦྱངས། ཨོཾ་སུ་ར་ཏི་སྟྭཾ་ཞེས་ཐལ་མོ་སྦྱར། བཛྲ་ཨཉྫ་ལིས་སོ་སོར་བསྣོལ། བཛྲ་བྷནྡྷ་བཾ། ཞེས་བསྡམས་པས་རིགས་ལྔ་ཡབ་ཡུམ་མཉམ་པར་སྦྱོར་བར་བསམ་ལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན༴ ཆོས་ཉིད་རྣམ་པར་དག་པའི༴ ཆོས་ཅན་རྒྱུ་འབྲས་བསླུ་བ་མེད་པའི༴ ཞི་ཁྲོ་སྒྲུ་འཕྲུལ་རྣམ་པར་རོལ་པའི་ལྷ་ཚོགས་རྣམས་ཀྱི༴ སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི༴ བདེན་པ་ཆེན་པོའི་བྱིན་རླབས་ཀྱིས་ཉོན་མོངས་པ་འདོད་ཆགས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་པྲེ་ཏ་ཀ་ཙཀྵུ་པྲ་ཝེ་ཤ་ཡ་ཕཊཿ ཅེས་བརྗོད་ཅིང་ཐལ་མོ་སྤྲུགས་པས། སློབ་དཔོན་གྱི་ཐུགས་ཀ་དང་རིགས་ལྔའི་སྦྱོར་མཚམས་ནས་འོད་ཟེར་འཕྲོས་པས་ཡི་དྭགས་སུ་སྐྱེ་བའི་ས་བོན་བག་ཆགས་དང་བཅས་པ་སྦྱངས་བར་བསམ་མོ་སྔོན་ལས་ལ་འགྱོད་ཅིང་བཤགས་སྡོམ་བགྱི་བསམ་པས། ཀྱེ་མ་ཀྱེ་ཧུད་རྡོ་རྗེ་འཛིན། འགྲོ་མགོན་ཐུགས་རྗེས་བདག་སྐྱོབས་ཤིག །དབང་མཆོག་རྒྱལ་པོ་བསྒྲག་ཏུ་གསོལ། །སླད་ནས་མི་འཆབ་མི་སྦེད་དོ། །ཞེས་གསོལ་བ་གདབ་པོ། གནང་བ་སྦྱིན་པ་ནི། བུ་འདིར་ཤོག་ཅིག་རིགས་ཀྱི་བུ། རང་གིས་ཉམས་དང་ཟླས་ཉམས་ཀྱིས། པྲེ་ཏའི་གནས་སུ་ལྟུང་བ་ལས། སྐྱོབ་ཕྱིར་དབང་མཆོག་སྦྱིན་པར་བྱ། ཞེས་དབང་སྟེགས་སུ་དྲངས། ཨོཾ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་དུན་ཧཱུཾ་ཕཊཿ ཅེས་བཟླ་ཞིང་ཡུངས་ཀར་གྱིས་བྲབས་ཁྲུས་བུམ་གྱིས་དབང་བསྐུར་ལ། ཏིལ་གྱི་གོང་བུ་བཞིན་གང་བའི། །རྒྱལ་བའི་བུམ་པ་བཟུང་ནས་སུ། །འདི་ཉིད་དུ་ནི་བླུག་མཛད་པས། །བག་ཆགས་མ་ལུས་དག་གྱུར་ཅིག །ཨོཾ་བཛྲ་སཏྭ༴སོགས་ཡིག་བརྒྱའི་མཐར། ཨོཾ་པ་ཙ་པ་ཙ་སརྦ་པྲེེ་ཏ་ཀ་ག་ཏེ་ཧེ་དུན༴ བཏགས་པས་བཀྲུས་ནས། རིགས་ཀྱི་བུ་འདིས་ཉོན་མོངས་པ་འདོད་ཆགས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་ཤིནྟཾ་ཀུ་རུ༴ ཞེས་བཀྲུ་འོ། སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་འབྱུང་བའི་ཡི་གེ་གསུམ་བསྐུལ། ཡེ་ཤེས་ཀྱི་མེ་རླུང་ཆུར་གྱུར་པས་ལྟེ་བའི་ཏྲཾ་བསྲེགས་གཏོར་སྦྱངས་བར་བསམ་ལ། རཾ་སྥ་ར་ཎ་ཕཊཿ ཡཾ༴ ཁཾ༴ ཅེས་སྦྱངས། ཨོཾ་སུ་ར་ཏི་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལིས་སོར་མོ་བསྣོལ། བཛྲ་བྷནྡྷ་བཾ། གྱིས་བསྡམས་པས་རིགས་ལྔ་ཡབ་ཡུམ་མཉམ་པར་སྦྱོར་བར་བསམ་ལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ༴ ཆོས་ཉིད་རྣམ་པར་དག་པའི༴ ཆོས་ཅན་རྒྱུ་འབྲས་བསླུ་བ་མེད་པའི༴ ཞི་ཁྲོ་སྒྱུ་འཕྲུལ་རྣམ་པར་རོལ་བའི༴ སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས༴ བདེན་པ་ཆེན་པོའི་བྱིན་རླབས་ཀྱིས་ཉོན་མོངས་པ་གཏི་མུག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་ཏིཪྻ་ཀ་ཙཀྵུ་པྲ་ཝེ་ཤ་ཡ་ཕཊཿ ཞེས་བརྗོད་ཅིང་ཐལ་མོ་སྤྲུགས་པས། སློབ་དཔོན་གྱི་ཐུགས་ཀ་དང་རིགས་ལྔའི་སྦྱོར་མཚམས་ནས་འོད་ཟེར་འཕྲོས་པས་དུད་འགྲོར་སྐྱེ་བའི་ས་བོན་བག་ཆགས་དང་བཅས་པ་སྦྱངས་བར་བསམ་མོ། སྔོན་ལས་ལ་འགྱོད་ཅིང་བཤགས་སྡོམ་བགྱི་བསམ་པས། ཀྱེ་མ་ཀྱེ་ཧུད་རྡོ་རྗེ་འཛིན། འགྲོ་མགོན་ཐུགས་རྗེས་བདག་སྐྱོབས་ཤིག །དབང་མཆོག་རྒྱལ་པོ་བསྒྲག་ཏུ་གསོལ། །སླད་ནས་མི་འཆབ་མི་སྦེད་དོ། །ཞེས་གསོལ་བ་གདབ། གནང་བ་སྦྱིན་པ་ནི། བུ་འདིར་ཤོག་ཅིག་རིགས་ཀྱི་བུ། །རང་གིས་ཉམས་དང་ཟླས་ཉམས་ཀྱིས། །དུད་འགྲོའི་གནས་སུ་ལྟུང་བ་ལས། །སྐྱོབ་ཕྱིར་དབང་མཆོག་སྦྱིན་པར་བྱ། །ཞེས་དབང་སྟེགས་སུ་དྲངས། ཨོཾ་མ་ཐ་མ་ཐ་སརྦ་ཏིཪྻ་ཀ་ག་ཏེ་ཧེ་དུན༴ ཅེས་བཟླ་ཞིང་ཡུངས་ཀར་གྱིས་བྲབས། ཁྲུས་བུམ་གྱིས་དབང་བསྐུར་ལ། ཏིལ་གྱི་གང་བུ་བཞིན་གང་བའི། །རྒྱལ་བའི་བུམ་པ་བཟུང་ནས་སུ། །འདི་ཉིད་དུ་ནི་བླུག་མཛད་པས། །བག་ཆགས་མ་ལུས་དག་གྱུར་ཅིག །ཨོཾ་བཛྲ་སཏྭ༴སོགས་ཡིག་བརྒྱའི་མཐར། ཨོཾ་མ་ཐ་མ་ཐ་སརྦ་ཏིཪྻ་ཀ་ག་ཏེ༴ བཏགས་པས་བཀྲུས་ནས། རིགས་ཀྱི་བུ་འདིས་ཉོན་མོངས་པ་གཏི་མུག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་ཤིནྟཾ་ཀུ་རུ་ཡེ་སྭཱཧཱ། ཞེས་ཁྲུས་བྱའོ། དེ་ནས་རྣམ་སྣང་དང་མི་འཁྲུགས་པའི་གཟུངས་ནི། ཨོཾ་ན་མོ་བྷ་ག་ཝ་ཏེ་སརྦ་དུར་ག་ཏི་ཤྭ་དྷ་ནི་རཱ་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སཾ་ཡཀྶམྦུདྡྷ་ཡ། ཏདྱཐཱ༴ ཨོཾ་ཤྭ་དྷ་ནི་ཤྭ་དྷ་ནི་སརྦ་པ་པཾ་བི་ཤྭ་དྷ་ནི་ཤུདྡྷེ་བི་ཤུདྡྷེ་སརྦ་ཀརྨ་ཨ་བ་ར་ཎ་བི་ཤུདྡྷེསྭཱ་ཧཱ། ཞེས་སོ། ན་མོ་རཏྣ་ཏྲ་ཡ་ཡ། ཨོཾ་ཀཾ་ཀ་ནི༴ སོགས། ནཉྩ་སྭཱཧཱ། ཞེས་བཟླས་མཐར། རིགས་ཀྱི་བུས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་སྐལ་བ་ངན་པ་དང་བཀྲ་མི་ཤིས་པའི་དངོས་པོ་ཐམས་ཅད་ཉེ་བར་ཞི་སྟེ་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད། དེ་དག་ནི་ངན་སོང་གནས་འདྲེན་གྱི་དབང་ཞེས་བྱ་སྟེ་བཅུད་ཁྱད་པར་ཅན་བསྒྲུབ་པའི་སྔོན་དུ་སྣོད་དག་པར་བྱེད་པ་བཞིན་ནོ། །སྐབས་འདིར་སྡིག་སྒྲིབ་སྦྱང་བའི་སྦྱིན་བསྲེག་ནི། །སྤྲོས་པ་སྐྱུང་ན་སོལ་མེར་ཤིང་ཞིབ་སྦར། །དེ་མིན་སྟེགས་བུར་དཀར་པོ་ཞི་ཐབ་བརྩིགས། །མདུན་གྱི་མེ་ཐབ་དེ་ཉིད་གདོད་མ་ནས། །ན་བཟའ་དཀར་མོའི་ངོ་བོར་ཤེས་པ་ཡི། །ཀློང་དུ་ཧཱུཾ་ཡིག་ཡོངས་སུ་གྱུར་བ་ལས། །ཟ་བྱེད་རྡོ་རྗེ་མཁའ་འགྲོ་མིག་སྨན་མདོག །ཞལ་གདངས་ལྗགས་འདྲིལ་མཆེ་གཙིགས་ཕྱག་གཉིས་ཀྱི། །ཧཱུཾ་མཛད་ཕྱག་རྒྱ་རྡོ་རྗེ་དྲིལ་བུ་འཛིན། །ཞབས་གཉིས་གཡས་བསྐུམ་གཡོན་བརྐྱང་རཏྣས་སྤྲས། །ལྗགས་སྟེང་རཾ་ཡིག་ཕྱོགས་བཅུ་དུས་གསུམ་གྱི། །རྒྱལ་ཀུན་འདུས་པའི་ལྗགས་ཀྱི་ངོ་བོར་བསམ། །མདུན་དུ་སྣོད་དེར་ཏིལ་རྫས་བཤམས་ནས་སུ། །རང་གི་སྙིང་གར་སྡིག་སྒྲིབ་ས་བོན་ནི། །བཾ་ཡིག་སོལ་བའི་མདོག་ཅན་གསལ་བ་ལས། །སྒོ་གསུམ་གྱིས་བསགས་སྡིག་སྒྲིབ་ཡོངས་འདུས་བསམ། །ལྟེ་བར་རཾ་དང་རྐང་མཐིལ་ཡཾ་གསལ་བར། །རླུང་གཡོས་མེ་སྦར་མེ་ལྕེ་གྱེན་སོང་ནས། །སྙིང་གའི་བཾ་ཡིག་རླུང་གི་སྦུར་མ་བཞིན། །བསྐྱོད་ཅིང་དེད་པ་དྲི་འཛིན་ སྐྱབས་སེམས་སྔོན་དུ་འགྲོ་བས། །བིག་ནན་ཏ་ཀྲིཏ་ཀྱི་བསངས། སྭཱ་བྷ་ཝས་སྦྱངས། སྟོང་པའི་ངང་ལས་མདུན་དུ་ཞི་བའི་ཐབ། །ཡེ་ཤེས་མེ་དབུས་ཧཱུཾ་མཚན་རྡོ་རྗེ་ལས། །ཁྲོ་རྒྱལ་ཞལ་གདངས་མཆེ་གཙིགས་སྐུ་མདོག་མཐིང་། །རྡོར་དྲིལ་བཟུང་ནས་ཐུགས་ཀར་ཕྱག་རྒྱས་བཅིང་། །ཐོད་སྐམ་དབུ་རྒྱན་ཐོད་རློན་དོ་ཤལ་ཅན། །སྟག་ཤམ་གསོལ་ཞིང་ཞབས་གཉིས་ཟླུམ་པོར་བཞུགས། །གནས་གསུམ་འབྲུ་གསུམ་འོད་ཀྱི་ཡེ་ཤེས་པ། །སྤྱན་དྲངས་བསྟིམ་ཞིང་དབང་ལྷས་དབང་བསྐུར་ནས། །དབང་རྟགས་མི་བསྐྱོད་པ་ཡིས་དབུ་བརྒྱན་གྱུར། །བཛྲ་ཊཱཀི་ས་པཱ་རི་ཝ་ར་ཨརྒྷཾ་ནས་ཤཔྟའི་བར་གྱིས་མཆོད། མི་བསྐྱོད་རྡོ་རྗེ་ཡེ་ཤེས་སྐུ། །རྡོ་རྗེ་དབྱིངས་ནས་མཁས་པ་ཆེ། །རྡོ་རྗེ་གསུམ་སོགས་དཀྱིལ་འཁོར་གསུམ། །རྡོ་རྗེ་མཁའ་འགྲོ་ལ་ཕྱག་འཚལ། །རང་གི་སྙིང་ཀར་བཾ་ཡིག་ནག་པོ་དང་། །ལྟེ་བར་རཾ་ལས་མེ་དཀྱིལ་དམར་པོ་བསམ། །རྐང་མཐིལ་གཉིས་སུ་ཡཾ་ལས་རླུང་དཀྱིལ་སྔོ། །བཾ་ཡིག་འོད་ཀྱིས་སྡིག་སྒྲིབ་ཀུན་བསྡུས་ཐིམ། རླུང་གཡོས་མེ་སྦར་བཾ་དེད་སྣ་སྒོར་ཐོན། །སྡིག་པ་ར་ཙའི་གཟུགས་གྱུར་ཏིལ་ལ་ཐིམ། །དེ་ཉིད་ཟག་མེད་བདུད་རྩིའི་རྒྱུན་གྱུར་པ། །ཞལ་དུ་ཕུལ་བས་སྡིག་སྒྲིིབ་ཐམས་ཅད་དང་། །དམ་ཚིག་ཆགས་ཉམས་དག་པར་མཛད་དུ་གསོལ། །ཨོཾ་བཛྲ་ཊ་ཀ་ཁ་ཁ་ཁཱ་ཧི་ཁཱ་ཧི། སརྦ་པ་པཾ་ཏ་ཧ་ན་བསྨི་ཀུ་རུ་ཧཱུཾ་ཧཱུཾ་ཕཊ་སྭཱ་ཧཱཿ བདག་སོགས་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་དམ་ཚིག་ཆགས་ཉམས་ཐམས་ཅད་ཤིནྟཾ་ཀུ་རུ་ཡེ་སྭཱ་ཧཱ། བརྒྱ་སྟོང་ཅི་འགྲུབ་བཟླས་མཐར། གོང་བཞིན་མཆོད་ཅིང་བསྟོད། དགེ་བ་འདི་ཡིས་བདག་སོགས་ཀྱི། །སྡིག་སྒྲིབ་ཉམས་ཆག་ཀུན་བྱང་ནས། །སྐྱབས་ཀྱི་བྱིན་རླབས་ཞུགས་པ་ཡིས། །རྡོ་རྗེ་མཁའ་འགྲོ་མྱུར་འགྲུབ་ཤོག །ཅེས་པའང་ར་གཱ་ཨཱ་གསེས་སོ། དགེའོ།། །།སརྦ་མངྒལཾ།། །། བུ་ག་ནས། །སྒོ་རྩར་སླེབས་ཚེ་སྡིག་ནག་རྭ་ཅན་གྱི། །རྣམ་པ་ཏིལ་དང་དབྱེར་མེད་ཐིམ་བསམ་ཞིང་། །ཨོཾ་ཨཱཿཧཱུཾ་འབྲུ་གསུམ་ཅི་རིགས་བརྗོད་པས་བདུད་རྩིར་བསྒྱུར། ཨོཾ་བཛྲ་ཌཱ་ཀ་ཁ་ཁ་ཁཱ་ཧི། སརྦ་ས་པཾ་ད་ཧ་ན་བྷསྨི་ཀུ་རུ་ཡེ་སྭཱ་ཧཱ། སྔགས་དེས་མཐེན་མཛུབ་སྦྱར་བས་ཏིལ་མེར་འབུལ། གྲངས་ཚད་མེད་ཀྱང་བརྒྱ་སྟོང་ཅི་རིགས་ཀྱི། རྗེས་སུ་བཤགས་པ་འདི་བཞིན་འདོན་པར་བྱ། ལྷུབ། ཨོཾ་ཡེ་ཤེས་ལྔ་ལྡན་བླ་མ་རྡོ་རྗེ་འཛིན། །རྡོ་རྗེ་རིགས་ཀྱི་ལྷ་ཚོགས་དགོངས་སུ་གསོལ། །ཁྲག་འཐུང་ཁྲོ་བོ་ཁྲོ་མོས་བྱིན་གྱིས་རློབས། །བདག་གི་ལུས་ཀྱིས་སྲོག་གཅོད་མ་བྱིན་བླངས། །མི་ཚངས་སྤྱོད་ཅིང་ཏིང་འཛིན་སྐུ་མ་གསལ། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །ཨཱཿ བདག་གི་ངག་གིས་རྫུན་དང་ཕྲ་མ་དང་། །ངག་འཁྱལ་ཚིག་རྩུབ་བཟླས་བརྗོད་གྲངས་མ་སྐྱོལ། །རྡོ་རྗེ་བཟླས་པའི་དོན་ནི་མ་རྟོགས་ཏེ། །གསུང་གི་དམ་ཚིག་ཉམས་པ༴ བཛྲ་བདག་གི་སྣོད་ལྡན་སེམས་ཅན་ཐམས་ཅད་ལ། །བརྣབ་སེམས་གནོད་སེམས་ལོག་ལྟ་སྐྱེས་པ་དང་། །ཆོས་ཉིད་ཟབ་མོའི་དོན་ནི་མ་རྟོགས་ཏེ། །ལྟ་བ་ཐུགས་ཀྱི་དམ་ཚིག་ཉམས༴ ས་སེམས་ཅན་ཐམས་ཅད་ཡེ་ནས་སངས་རྒྱས་རྒྱུ། །མ་རྟོགས་བདག་གིས་བརྔན་དང་སྐྱོན་དུ་བགྲངས། །སངས་རྒྱས་ཡོན་ཏན་མཐའ་ཡས་མ་བརྗོད་ཅིང་། །ཡོན་ཏན་དམ་ཚིག་ཉམས་པ༴ ཏྭ་སངས་རྒྱས་ཕྲིན་ལས་སྣ་ཚོགས་དཔག་མེད་ཀྱི། །སྙིང་རྗེ་ཆེན་པོས་སེམས་ཅན་དོན་མ་བྱས། །བདུད་རྩི་ལྔ་ལ་ལོངས་སྤྱོད་མ་ནུས་ཤིང་། །ཕྲིན་ལས་དམ་ཚིག་ཉམས་པ་མཐོལ་ལོ༴ ཧཱུཾ་སྐྱེ་བ་རྣམ་བཞིས་བསྡུས་པའི་སེམས་ཅན་རྣམས། །ཆོས་སྐུ་རྣམ་དག་དབྱིངས་ལས་གཟུགས་སྐུར་སྣང་། །བདེ་བ་ཆེན་པོས་ཀུན་ལ་ཁྱབ་དམིགས་ཏེ། །ཡང་དག་དོན་མ་རྟོགས་པ༴ཞེས་དང་། ཨོཾ་བཛྲ་སཏྭ༴ ཨོཾ་བདག་ལུས་གཞལ་ཡས་ཁང་དུ་གནས་པའི་ནང་། སོགས་ནས་ཡིག་བརྒྱ་ལན་གསུམ་བརྗོད་ནས་སུ། བཛྲ་མུ་ཡིས་ཡེ་ཤེས་པ་རྣམས་གཤེགས། དམ་ཚིག་པ་ཡང་མེ་དང་དབྱེར་མེད་བལྟས། དེ་ཡི་རྗེས་སུ་ཡོན་ཏན་ཡར་འཕེལ་གྱི། དབང་ལ་དང་པོ་མཎྜལ་ཕུལ་བྱས་ལ། ས་གཞི་སྤོས་ཆུས༴སོགས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོབ་པའི་དོན་གྱིས་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་ལན་གསུམ་གྱིས་གསོལ་བ་བཏབ། སློབ་དཔོན་གྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་གདན་གསུམ་ཚང་བའི་དབང་གི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་ས་མ་ཛཿས་སྤྱན་དྲངས། ཨོཾ་བཛྲ་ཨརྒྷཾ། པདྱཾ། པུཥྤེདྷུཔྤེ་ཨ་ལོ་ཀེ་གྷནྡྷེ། ནཻ་ཝི་དྱ་ཤཔྟ་པྲ་ཏིཙྪ་སྭཱཧཱ། ལི་བར་གྱིས་མཆོད། ནམ་མཁའ་གང་བའི་དབང་གི་ལྷ་ཚོགས་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པའི་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བར་མོས་ལ། ཨོཾ་སྟོང་གསལ་ཆོས་དབྱིངས་བུམ་པ་ན། བདེ་ཆེན་རྒྱལ་པོའི་དཀྱིལ་འཁོར་གནས། སྐལ་ལྡན་ཁྱོད་ལ་དབང་བསྐུར་བས། བག་ཆགས་དྲི་མ་ཀུན་དག་ཤོག །ཨོཾ་ཀ་ལ་ཤ་ཨ་བྷི་ཥིཉྩ་ཧཱུཾ། ཞེས་བུམ་པ་སྤྱི་བོར་བཞག་ཅིང་བུམ་ཆུ་བླུད་ལ། དེ་ལྟར་བུམ་པ་བཟང་པོ་ལས་བྱུང་བའི་ཡེ་ཤེས་ལྔ་ཡི་རང་བཞིན་གྱི་བདུད་རྩིའི་ཆུ་རྒྱུན་གྱིས་དབང་བསྐུར་བས། ཉོན་མོངས་པ་ལྔ་སྦྱངས། ཕུང་པོ་ལྔ་སངས་རྒྱས་ལྔར་གནས་གྱུར། ཡེ་ཤེས་ལྔ་མངོན་དུ་བྱས། དབང་རྟགས་སུ་དེ་བཞིན་གཤེགས་པ་རིགས་ལྔས་དབུ་བརྒྱན་པར་བསམ། དེ་ལྟར་བུམ་པའི་དབང་བསྐུར་པས། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། ཇི་ལྟར་སྣང་བ་ཐམས་ཅད་ལྷའི་འཁོར་ལོར་འཆར་བའི་ཡེ་ཤེས་མངོན་དུ་བྱས། འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས་པའོ། །ཞེས་དང་བུམ་དབང་དམ་ཚིག་ཉམས་བཤགས་ནི། ལྷུབ། ཨོཾ་བདག་ལུས་གཞལ་ཡས་ཁང་དུ་གནས་པའི་ནང་། །སྤྱི་མགྲིན་སྙིང་ག་ལྟེ་བ་གསང་གནས་སུ། །དུག་ལྔ་རྣམ་དག་རིགས་ལྔ་ཡབ་ཡུམ་བཅུ། །བསྐྱེད་རིམ་དབྱིངས་ཀྱི་ལམ་དུ་མ་ཤེས་བཤགས། །ལུས་སེམས་ཡེ་ནས་ཟུང་འཇུག་གནས་པ་ལ། །སྣང་ཕྱོགས་སྟོང་ཕྱོགས་ཟུང་འཇུག་མ་ཤེས་ཏེ། །མཉམ་བཞག་རྗེས་ཐོབ་ཉམས་ལེན་སྐྱོང་མ་ཤེས། །ངོ་བོ་ཉིད་གསུམ་ལྟ་བའི་ཀློང་དུ་བཤགས། །ཡེ་ནས་འཁོར་འདས་དབྱེར་མེད་ཡིན་པ་ལ། །སྣོད་བཅུད་གཞལ་ཡས་ཁང་དང་ལྷར་མ་ཤེས། །འབྱུང་བཞིའི་ཆོས་ལ་མངའ་དབང་མ་བརྙེས་པ། །གྲུབ་མཐའ་འཁོར་འདས་དབྱེར་མེད་ངང་དུ་བཤགས། །ཡེ་ནས་སྐྱེ་ཤི་མེད་པར་མ་ཤེས་པས། །མ་རྟོགས་འཆི་དུས་སྣང་བ་བསྒྱུར་བ་དང་། །འོད་ཀྱི་གོང་བུ་སྒྲ་ཡིས་འཕོ་མ་ཤེས། །འདའ་ཁ་འཆི་བྲོད་ངང་དུ་བཤགས་པར་བགྱི། །ལུས་ཀྱི་རྩ་ཡི་གཙོ་བོ་ཕལ་པ་རྣམས། །ཡེ་ནས་སྤྲུལ་སྐུར་གནས་པ་མ་ཤེས་ཏེ། །དབྱིབས་ཀྱི་ལྷ་སྐུ་རང་གསལ་བསྒོམ་མ་ཤེས། །སྤྲུལ་སྐུའི་རང་བཞིན་ལྷུན་གྲུབ་འབྲས་བུར་བཤགས། །ལུས་རྩ་བུམ་པའི་དབང་དུ་མ་ཤེས་པས། །མ་ཧཱ་ཡོ་གའི་བསྐྱེད་རིམ་བསྒོམ་མ་ནུས། །བུམ་དབང་དམ་ཚིག་ཉམས་པ༴ ཚངས་པར་གྱུར་ནས་བསྐྱེད་རིམ་དངོས་གྲུབ་སྩོལ། །ལུས་གནད་ཡི་གེ་གསང་དབང་ནི། བླ་མ་དཔལ་ལྡན་རྡོ་རྗེ་སེམས་དཔའ་ཡབ་ཡུམ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་ཀུནྡྷ་བྱང་ཆུབ་ཀྱི་སེམས་ལྷན་ཅིག་སྐྱེས་པའི་རྟེན་དུ་གྱུར་པ་ཐོད་པའི་བདུད་རྩི་དང་རོ་གཅིག་པ་ལྕེ་ཐོག་ཏུ་བཞག་པར་བསམ་ལ། ཨཱཿམཚན་ལྡན་རྡོ་རྗེའི་ཀཱ་པ་ལར། །བདེ་སྟོང་རོལ་པའི་བྱང་སེམས་གནས། །སྐལ་ལྡན་ཁྱོད་ལ་དབང་བསྐུར་བས། །བདེ་ཆེན་ཡེ་ཤེས་རྒྱས་པར་ཤོག །ཨོཾ་བྷོ་དྷི་ཙིཏྟ་མ་ཧཱ་སུ་ཁ་ཧཱུཾ། ཞེས། བདུད་རྩི་མྱོང་པས་རྩ་ཁམས་ཐམས་ཅད་བདུད་རྩིས་གང་། །དུས་གསུམ་གྱི་རྣམ་རྟོག་འགག །བདེ་བའི་ཡེ་ཤེས་བསྐྱེད་པར་བསམ། །དེ་ལྟར་གསང་བའི་དབང་བསྐུར་བས། །ངག་གི་དྲི་མ་དག །ལམ་རང་ལུས་བདེ་བ་ཆེན་པོ་བསྒོམ་པ་ལ་དབང་། སྒྱུ་མ་ཆུ་ཟླ་ལྟ་བུར་བདག་བྱིན་གྱིས་རླབས་པའི་ཡེ་ཤེས་མངོན་དུ་བྱས། །འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའོ། །ཞེས་དང་གསང་དབང་དམ་ཚིག་ཉམས་བཤགས་ནི། ལུས་གནད་ཡི་གེར་ལོངས་སྐུར་གནས་པ་ལ། །འཁོར་ལོ་རྟེན་དང་མ་རྟེན་མན་ངག་གནད། །བདེ་བ་ཉམས་སུ་ལེན་པའི་ལམ་མ་སྒོམ། །བདག་ལ་བྱིན་རླབས་ལམ་གྱི་ངང་དུ་བཤགས། །ཉོན་མོངས་དང་ནི་རྣམ་རྟོག་སྣྲེལ་ཞི་རྣམས། །གསལ་ཞིང་ཡངས་པའི་རང་བྱུང་ཡེ་ཤེས་གནས། །སྙིང་གར་རོ་རྐྱང་དབུ་མ་ཟུང་འཇུག་བདེ། །ལྟ་བ་རང་བྱུང་ཡེ་ཤེས་ཀློང་དུ་བཤགས། །སྒྲ་དབྱངས་ཡེ་ནས་སྐད་དུ་གནས་པ་ལ། །འགྲོ་བ་རིགས་དྲུག་སོ་སོའི་རང་སྐད་དུ། །གསུང་རབ་ཡན་ལག་བཅུ་གཉིས་ཡིན་མ་ཤེས། །གྲུབ་མཐའ་མ་འདྲེས་ཡོངས་རྫོགས་ངང་དུ་བཤགས། །སེམས་ཀྱི་འོད་གསལ་ཡེ་ནས་འདུ་འབྲལ་མེད། །མ་བསྒོམ་རང་ཆས་ཡིན་པར་མ་ཤེས་པས། །འཆི་དུས་རང་གསལ་འབྱུང་བར་མ་འཚལ་བ། །འདའ་ཁའི་གདམ་ངག་འོད་གསལ་ངང་དུ་བཤགས། །ལུས་གནད་ཡི་གེ་ལོངས་སྐུར་གནས་པ་ལ། །ལམ་དུ་མ་ཤེས་བདེ་བ་མ་བསྒོམ་པས། །གཏུམ་མོའི་དྲོད་ཀྱི་འབྲས་བུ་མ་ཐོབ་པ། །འབྲས་བུ་ལོངས་སྤྱོད་རྫོགས་པའི་ངང་དུ༴ གསང་བའི་དབང་གི་གདམ་ངག་ཤེས་གྱུར་ཀྱང་། །རང་གི་བདེ་བ་ལམ་དུ་མ་ལོངས་ཏེ། །གཏུམ་མོའི་དྲོད་རྟགས་ལུས་ལ་མ་ཤར་བ། །གསང་དབང་དམ་ཚིག་ཉམས་པ་མཐོལ་ལོ་བཤགས། །ལུས་ཁམས་བདུད་རྩི་ཤེས་རབ་ཡེ་ཤེས་ནི། བདེ་སྟོང་དབྱེར་མེད་མཚོན་བྱེད་མེ་ལོང་སིནྡྷུ་རའི་མཎྜལ་ཅན་སློབ་མའི་ལག་ཏུ་གཏད། ལྟེ་བའི་ཡིག་འབྲུ་ལས་སྲིན་ལག་གིས་ཐིག་ལེ་སྙིང་གར་བྱུག་ལ། གཟུགས་དང་ལང་ཚོས་རྫོགས་པའི་ཤེས་རབ་སྙེམས་མའི་ངོ་བོ་ཅན་པང་དུ་འཁོད་པར་བསམ་ལ། ཧཱུཾ་འདི་ནི་སངས་རྒྱས་ཐམས་ཅད་ཀྱི། །བླ་མེད་བྱང་ཆུབ་མཆོག་གི་ལམ། །སྐལ་ལྡན་ཁྱོད་ལ་དབང་བསྐུར་བས། །དགའ་བཞིའི་ཡེ་ཤེས་རྒྱས་པར་ཤོག །ཀརྨ་མུ་དྲ་ཛྙཱ་ན་སིདྡྷི་ཧཱུཾ། ཞེས། འདུ་ཤེས་གསུམ་ལྡན་གྱིས་རིག་མ་དང་མཉམ་པར་སྦྱར་བས་དགའ་བ་བཞིའི་རིམ་པའི་ལྷན་སྐྱེས་བདེ་བ་བརྟན་པར་བསམ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭཱ་བྷ་ཝ་ཨདྨཀོ྅་ཧཾ། ཞེས་བརྗོད་ཅིང་འཁྱུད་རྒྱ་བྱ། དེ་ལྟར་ཤེས་རབ་ཡེ་ཤེས་ཀྱི་དབང་བསྐུར་བས། ཡིད་ཀྱི་དྲི་མ་དག། ལམ་ཕོ་ཉ་བསྒོམ་པ་ལ་དབང་ཆོས་ཐམས་ཅད་ཀྱི་རང་བཞིན་བདེ་བ་ཆེན་པོར་རྟོགས་པའི་ཡེ་ཤེས་མངོན་དུ་བྱས། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་པའོ། །ཞེས་གསུངས་ཤེར་དབང་དམ་ཚིག་ཉམས་བཤགས་ནི། ལུས་ཁམས་བདུད་རྩི་རང་ལ་གནས་པ་དང་། །ཡུམ་བདག་འདོད་པའི་བྱིན་རླབས་མཉམ་པ་དང་། །སྦྱོར་བ་དངོས་གཞི་རྗེས་ཀྱི་བསྡུས་རྒྱས་རྣམས། །མ་བསྒོམ་འཁོར་ལོ་ཐབས་ཀྱི་ལམ་དུ་བཤགས། །བདེ་བ་ཡེ་ནས་རང་ལ་གནས་པ་ལ། །གོ་རིམ་གནས་དང་སྤང་བྱ་ངོ་བོ་ཡིན། །བདེ་བ་རྣམ་བཞི་ཉམས་སུ་མ་ལོན་པ། །བདེ་བཞིར་ལྟ་བ་ལྷན་སྐྱེས་ངང་དུ༴ བདེ་བ་རང་ལ་གནས་པར་མ་ཤེས་ཤིང་། །སྡུག་བསྔལ་རྐྱེན་གྱིས་བདེ་བ་བསྒོམས་བྱས་ཀྱང་། །བདེ་སྟོང་རྒྱ་ཆུང་གྲུབ་མཐའ་མ་རྟོགས་པ། །ལྷན་ཅིག་སྐྱེས་པ་བདེ་བའི་ངང་དུ༴ བདག་ཉིད་རྡོ་རྗེ་སེམས་དཔར་མ་ཤེས་པས། །འཆི་དུས་རང་ཉིད་དེར་སྣང་སྐུར་མ་གྲུབ། །འཁོར་ལོ་བཞི་ཡི་བདེ་བ་མ་འབྱོང་པ། །འདའ་ཁ་རྡོ་རྗེ་སེམས་དཔའི་ངང་དུ༴ ཡེ་ནས་བདུད་རྩི་ཐིག་ལེ་ཆེན་པོ་ནི། །ཆོས་སྐུ་དྲི་མ་མེད་པར་གནས་པ་ལ། །མ་ཤེས་མ་རྟོགས་བདུད་རྩི་མ་འབྱོང་པ། །འབྲས་བུ་ཆོས་ཀྱི་སྐུ་ཡི་ངང་༴ དྲི་ཆེན་དྲི་ཆུ་མཾ་ས་རཀྟ་ཟིལ །འབྱུང་བ་བཞི་སྟེ་ཁམས་ཀྱི་བདུད་རྩི་དགུ། །བདེ་བ་མཆོག་གི་རྣམ་རྟོག་བྲལ་བདེ་བ། །ལྷན་སྐྱེས་ཡེ་ཤེས་དབང་གི་ངང་དུ་བཤགས། །ཐབས་དང་ཤེས་རབ་གཉིས་ཀའི་དབང་། བཞི་བ་ནི། རང་བྱུང་གི་ཡེ་ཤེས་གསལ་ལ་མི་རྟོག་པ་མཚོན་བྱེད་ཤེལ་རྡོ་བསྟན་ལ། ཧོཿཐོག་མཐའ་མེད་པ་རིག་པའི་གཤིས། །གཟུང་འཛིན་གང་དུའང་མི་དམིགས་ཤིང་། །སྟོང་པའི་ཡེ་ཤེས་བདེ་བར་འཆར། །དྲི་མེད་ཤེལ་ལས་འཇའ་ཚོན་བཞིན། །ཨོཾ་དྷརྨ་དྷརྟུ་ཨ་ཏི་ཧོཿ ཞེས་པ་གསུམ་པའི་མཐར་རྟོགས་པའི་རང་བྱུང་ལྷན་ཅིག་སྐྱེས་པའི་ཡེ་ཤེས་གསལ་ལ་མི་རྟོག་པའི་ངང་མདངས་བསྐྱངས་ལ་ཅུང་ཟད་མཉམ་པར་བཞག །དེ་ལྟར་དབང་བཞི་པ་བསྐུར་བས་བག་ཆགས་ཀྱི་དྲི་མ་དག། ལམ་ཁྲེགས་ཆོད་ཐོད་རྒལ་བསྒོམ་པ་ལ་དབང་། །ཤིན་ཏུ་རྣམ་པར་དག་པ་ལྷན་ཅིག་སྐྱེས་བའི་བདེ་ཆེན་གྱི་ཡེ་ཤེས་མངོན་དུ་བྱས། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའོ། །ཞེས་དང་ཚིག་དབང་དམ་ཚིག་ཉམས་བཤགས་ནི། ཐབས་དང་ཤེས་རབ་གཉིས་ཀ་རང་གནས་ཀྱང་། །ཐབས་ཀྱི་རྒྱུད་དང་ཤེས་རབ་རྒྱུད་དག་དང་། །གཉིས་ཀའི་རྒྱུད་ལ་དག་པར་མ་སྦྱངས་པ། །རྡོ་རྗེའི་རྦ་རླབས་ལམ་གསུམ་ངང་དུ་བཤགས། །ལུས་ངག་སེམས་དང་ལུས་སེམས་གཉིས་ཀ་ལ། །ཕན་འདོགས་རང་ལ་གནས་པར་མ་ཤེས་པས། །རྒྱུ་མཐུན་རྣམ་སྨིན་སྐྱེས་བུ་བྱེད་པ་དང་། །དྲི་མ་མེད་པའི་ཡོན་ཏན་མ་ཤེས་པ། །ལྟ་བ་ཆོས་རྣམས་རྣམ་དག་ཀློང་དུ༴ ལྟ་བ་རང་གནས་ཉམས་སུ་མ་མྱོང་བས། །འཇིག་རྟེན་འདས་པའི་གྲུབ་མཐའི་རྟག་མ་ཤེས། །བདེ་སྟོང་རྒྱ་ཆེའི་གྲུབ་མཐའ་མ་རྟོགས་པ། །འཁོར་འདས་ཆོས་རྣམས་བདེ་སྟོང་གཅིག་ཏུ་བཤགས། །སྦྱངས་དང་གོམས་དང་ལས་དང་སྦྱར་དུ་མེད། །མ་རྟོགས་དབང་གིས་སྦྱངས་གོམས་ལས་མ་སྦྱར། །སྲོག་རྩོལ་རླུང་ལ་གོམས་པར་མ་གྱུར་པ། འདའ་ག་ཕྱག་རྒྱ་ཆེན་པོའི་ངང་དུ༴ ཡེ་ཤེས་ཐམས་ཅད་ངོ་བོ་ཉིད་ཀྱི་སྐུ། །མ་སྦྱང་གནས་ལུགས་དོན་དུ་མ་རྟོགས་པས། །ལམ་བསྟན་རྡོ་རྗེའི་རྦ་རླབས་ལམ་མ་བསྒོམ། །འབྲས་བུ་ངོ་བོ་ཉིད་ཀྱི་སྐུ་རུ་བཤགས། །སྲོག་དང་རྩོལ་བ་ལྔ་ཡི་བདག་ཉིད་ལ། །རྩ་བ་ཕུང་པོ་རྣམ་ཤེས་ཡན་ལག་སྟོང་། །རླུང་བཅུ་སྲོག་ཤིང་གསུམ་དུ་མ་རྟོགས་པ། །བདེ་བ་ཆེན་པོ་དབང་གི་ཀློང་དུ་བཤགས། །སྣང་སྟོང་ཟུང་འཇུག་དེ་དག་གི་མཐའ་རྟེན་དུ་ཡིག་བརྒྱའི་བཟླས་ལུང་ནི། སློབ་དཔོན་གྱི་ཐུགས་ཀ་ནས་སྔགས་ཀྱི་ཕྲེང་བ་ཐོན་སློབ་མའི་ཁར་ཞུགས་ཏེ་སྙིང་གར་ཐིམ། པར་བསམ་ལ། ཨོཾ་བཛྲ་སཏྭ༴ སོགས་ཡིག་བརྒྱ་ལན་གསུམ་བཟླས། གཙོ་བོས་ཇི་ལྟར་བཀའ༴ དེ་དག་ཐམས་ཅད་བདག༴ ཅེས་དམ་བཅའ། དེང་ནས་བརྩམ་སྟེ་བདག་བྲན་དུ༴ སོགས། བཞེས་སུ་གསོལ། ཅེས་ཅི་འབྱོར་བ་འབུལ་ལོ། །གཏང་རག་གི་མཎྜལ། ས་གཞི་སྤོས༴ སོགས་བྱའོ། དེ་རྗེས་འབྲས་བུ་ཡོངས་དག་བཤགས་པ་ནི། ཨོཾ་སྣང་སྟོང་ཟུང་འཇུག་སྤྲོས་བྲལ་ཆོས་ཀྱི་སྐུ། །ས་ཐོབ་ཡན་ཆད་ཐེག་ཆེན་ཕལ་རྣམས་ལ། །མཚན་དང་དཔེ་བྱད་སྣང་བ་ལོངས་སྐུ་དང་། །སྦྱོར་ལམ་མན་ཆད་ཀུན་ལ་སྣང་བ་ཡི། །མཛད་པ་ཐ་དད་སྟོན་པ་སྤྲུལ་པའི་སྐུ། །ཆོས་དང་གཟུགས་སྐུ་དབྱེར་མེད་རྡོ་རྗེའི་སྐུ། །ཡོན་ཏན་མ་བཙལ་ལྷུན་གྲུབ་མངོན་བྱང་སྐུ། །དེ་ལྟར་མ་རྟོགས་སྐུ་ལྔའི་ངང་དུ་བཞུགས། །དོན་གསུང་ཆོས་རྣམས་སྐྱེ་མེད་ངང་དུ་གནས། །སྐྱེ་མེད་སྨྲ་བརྗོད་ཐམས་ཅད་གཞི་རུ་གྱུར། །རྡོ་རྗེ་གྲགས་སྟོང་དབྱེར་མེད་འདུས་མ་བྱས། །མངོན་བྱང་སྒྲ་སྐད་མཐའ་དག་ཐམས་ཅད་ནི། །རང་བྱུང་ཡེ་ཤེས་ངོ་བོ་ཉིད་དུ་གསལ། །ལོངས་སྐུའི་གསུང་ནི་རང་གི་ཡུལ་རྣམས་ལ། །བརྡའ་ཡི་སྒོ་ནས་འཁོར་ལ་གོ་བརྡ་སྤྲོད། །སྤྲུལ་པའི་གསུང་ནི་ཡན་ལག་དྲུག་ཅུར་སྣང་། །གསུང་ལྔ་ཡེ་ནས་སྣང་ཚུལ་མ་རྟོགས་པ། །གསུང་ལྔ་ལྷུན་གྲུབ་ངང་དུ་མཐོལ་ལོ༴ སྟོང་ཉིད་ཡེ་ཤེས་དངོས་པོ་མེད་པར་གསལ། །མེ་ལོང་ཡེ་ཤེས་རྟོགས་པ་མེད་པར་ཤར། །མཉམ་ཉིད་ཡེ་ཤེས་བཟང་ངན་མེད་པར་གསལ། །སོར་རྟོགས་སྤྱི་དང་རང་མཚན་མ་འདྲེས་གསལ། །བྱ་གྲུབ་བདག་གཞན་དོན་ལ་རྩོལ་མེད་གསལ། །གནས་ཚུལ་མ་རྟོགས་ཐུགས་ལྔའི་ངང་དུ་བཤགས། །རང་རིག་བྱང་ཆུབ་སེམས་ཉིད་ཞིང་ཁམས་ནི། །མནན་ན་ནེམ་ལ་བཏེགས་ན་འཕར་ལ་སོགས། །རང་རིག་གཞལ་མེད་ཁང་སྣང་ཕྱི་སྣང་མེད། །རང་རིག་འོད་ཟེར་སྣང་སྟེ་བ་སྤུ་ཡི། །བུ་ག་རེ་ནས་འོད་ཟེར་དྲུག་ཅུ་འཕྲོ། །རིག་པ་རང་ཉིད་གདན་དུ་སྣང་བ་སྟེ། །འབྲས་བུའིི་ཆོས་རྣམས་ཐུགས་སུ་ཆུད་པའི་རྟགས། །རང་རིག་ཉིད་ནི་རྒྱན་དུ་སྣང་བ་སྟེ། །འཁོར་འདས་མ་སྤང་ལྷུན་གྱིས་གྲུབ་པ་ཡི། །ཡོན་ཏན་མ་རྟོགས་ཆོས་ཉིད་ངང་དུ་བཤགས། །ཉོན་མོངས་རྣམ་པར་རྟོག་པས་སེམས་ཁེངས་རྣམས། །སངས་རྒྱས་མཛད་པ་རྒྱུད་མཉམ་ཞི་བར་མཛོད། །རྨོངས་ཤིང་དབུལ་དང་ཕོངས་པའི་གང་ཟག་རྣམས། །ཤེས་བྱ་ལོངས་སྤྱོད་མཐའ་ཡས་རྒྱས་པར་མཛད། །མི་ཕན་མི་འདུལ་གྱོང་པོའི་གང་ཟག་རྣམས། །དབང་གི་ལས་ཀྱིས་བསྡུ་ཞིང་འདུལ་བར་མཛད། །ཐུགས་རྗེ་ཐབས་ཀྱིས་མི་འདུལ་གདུག་པ་རྣམས། །མངོན་སྤྱོད་དྲག་པོས་ཚར་ནི་གཅོད་པར་མཛད། །དེ་ལྟར་མ་རྟོགས་རིག་རྣམས་བདག་པོའི་ངང་། །ཕྱོགས་རིས་མེད་ཅིང་ལྷུན་གྱིས་གྲུབ་པར་མཛད། །གཅིག་དང་དུ་མའི་ངོ་བོ་ལས་གྲོལ་བ། །སྤང་ཐོབ་མེད་པར་རང་སྣང་དག་ཏུ་ཐོབ། །ལས་ཀྱི་རང་བཞིན་དངོས་བྱས་ཉེས་པ་ཟད། །གདུལ་བྱ་གཟིགས་པའི་སྐུ་གསུང་ཐུགས་ལ་བཤགས། །སྦྲེལ། ཡང་གཅིག་འབྲས་དོན་མ་རྟོགས་བཤགས་པ་ནི། རྩ་རྣམས་འགྲོས་ཐིམ་དབྱིབས་ཀྱི་ལམ་དག་པ། །ལུས་ཀྱི་སྒྲིབ་བྱང་བསྐྱེད་རིམ་སྤྲུལ་པའི་སྐུ། །ཡི་གེའི་འགྲོས་ཐིམ་སྔགས་ཀྱི་ལམ་དག་པ། །ངག་གི་སྒྲིབ་བྱང་རྫོགས་རིམ་ལོངས་སྤྱོད་སྐུ། །བདུད་རྩི་ཁམས་ཀྱི་དྭངས་མ་བཅུད་ཀྱི་ལམ། །སེམས་ཀྱི་སྒྲིབ་དག་དྭངས་མ་ཆོས་ཀྱི་སྐུ། །རླུང་གི་འགྲོས་ཐིམ་མི་ཤིགས་རྡོ་རྗེའི་རླུང་། །ལུས་ངག་ཡིད་དག་ངོ་བོ་ཉིད་ཀྱི་སྐུ། །དེ་ལྟར་གནས་པ་མ་རྟོགས་ཀློང་དུ་ནི། །སྐུ་བཞི་རླུང་ལ་ལྷུན་གྲུབ་ངང་དུ་བཞགས། །དེ་ལྟར་དབང་རྣམས་གྲུབ་རྗེས་བཅུ་བདུན་པར། བཟའ་བཏུང་ཚོགས་སུ་རོལ་དང་རྡོ་རྗེའི་གླུ། །དང་པོ་དཀྱིལ་འཁོར་བདག་པོ་དཔོན་སློབ་ལངས། །སྣ་ཚོགས་བཟའ་བཏུང་ཚུལ་བཞིན་དྲངས་པ་ནི། །ལས་ཀྱི་སློབ་མས་གུས་པས་ཕྱག་འཚལ་ཏེ། །རྣམ་ལྔ་འདོད་པའི་ཕྱག་རྒྱ་སྐོར་བྱས་ལ། །ཧོ་བླ་མ་དཔའ་བོ་ཆེན་པོ་དགོངས་སུ་གསོལ། །འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་བ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཨ་ཧོ་སུ་ཀ་ཧོ། ཞེས་ཐབས་ཤེས་གཉིས་ཀྱི་རྫས་ལག་པ་གཉིས་ཀྱིས་བཟུང་བ་བསྣོལ་ཏེ་དྲངས། ལེན་པ་པོས་ཀྱང་ཕྱག་རྒྱ་བྱ་ཞིང་མཉམ་དུ། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་སྤང། །གཟུང་དང་འཛིན་པ་དང་བྲལ་བ། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོ། ཞེས་པས་བླངས་ལ། ལག་སོར་མོ་གཡས་པ་ལྔ་ལ་དཔའ་བོ་ལྔ་དང་། མཐིལ་དུ་རྟ་མགྲིན། གཡོན་དཔའ་མོ་དང་རྡོ་རྗེ་ཕག་མོར་བསམ་སྟེ་མཁའ་འགྲོ་སྤྲོས་པས། ཕུད་ཀྱིས་བླ་མ་ཡི་དམ་མཁའ་འགྲོ་སོ་སོའི་མཚན་ནས་བརྗོད་ཅིང་གཡོན་པས་མཐེབ་སྲིན་གྱིས་མཆོད་ལ། ལག་པའི་དཔའ་བོ་ཡབ་ཡུམ་བཟའ་བཏུང་གི་མཆོད་པས་ཚིམས་པར་བསམ་ཞིང་། འཁོར་ལོ་ལྔར་མཁའ་འགྲོ་དང་། ལུས་ཕྱི་ནངདཔའ་བོ་མཁའ་འགྲོ་ཏིལ་གྱི་གང་བུ་ཁ་ཕྱེ་བ་ཙམ་དང་། ཞི་ཁྲོ་དང་བླ་མ་བརྒྱུད་པ་རྣམས་ནང་དུ་གསལ་གདབ་ལ། བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པ་རིགས་བརྒྱའི་དཀྱིལ་འཁོར་ལྷ། །འགུལ་སྤྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོར། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ནས། །ཟས་ཀྱིས་སྒྲིབ་པར་མི་འགྱུར་ཞིང་། །གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །ཅེས་བརྗོད་བཟའ་བཏུང་རོལ་པའི་མཉེས་པ་དང་། ཡ་རྐན་མ་རྐན་ལ་མཁའ་འགྲོ་ཡབ་ཡུམ་ལྔ་གསལ་བཏབ་ལ། ལྕེ་མཆོད་པའི་ལྷ་མོས་མཆོད་རྫས་ཕུལ་བས་མཉེས་པར་བསམ་ལ་དགྱེས་ཤིང་ཚིམས་པས་ལོངས་སྤྱོད་དོ། ། ༈ ཚོགས་ཁང་ལྷ་ཡི་གཞལ་ཡས་ཁང་། །འགྲོ་ཀུན་ལྷ་ཡི་དཀྱིལ་འཁོར་ཏེ། །བཟའ་བཏུང་བདེ་ཆེན་མཆོད་པའི་རྫས། །ཐམས་ཅད་ཡེ་ཤེས་ཆེན་པོའི་ངང་། །དགྱེས་ཤིང་རོལ་པས་ལོངས་སྤྱོད་པར། །བསོད་ནམས་ཕུང་པོ་དཔག་ཏུ་མེད། །ཀུན་ཏུ་བཟང་པོའི་རྣམ་འཕྲུལ་ཡིན། །ཤིན་ཏུ་གཟི་འབར་མི་བྱ་ཞིང་། །རྩོད་དང་ཀུ་ཅོ་བྱ་བ་མིན། །རྡོ་རྗེའི་གླུ་དང་བཀྲ་ཤིས་བརྗོད། །ཅེས་པས་གཉིས་པ་བསམ་པ་མྱུར་འགྲུབ་དང་། འབྲེལ་བར་ཀློང་ཆེན་རྒྱལ་པོའི་གསུང་མགུར་དང་། འཇིགས་མེད་དཔའ་བོ་པདྨ་རིག་འཛིན་ཞབས། རྩེ་མོའི་མགུར་གླུ་རིམ་བཞིན་བླང་བ་ལ། རིག་པ་གྲོལ་བྲལ་སྤྱོད་པ་བྱུང་རྒྱལ་དང་། ནོར་བུ་ཉི་མ་ཆོས་ཀྱི་གླུ་དབྱངས་ནི། ནོར་བུ་ཉི་མ་ཆོས་ཀྱི་གླུ། །འདོད་འབྱུང་དཔག་བསམ་ཡིད་བཞིན་མཁའ། །མཚན་ལྡན་བླ་མ་རིན་པོ་ཆེ། །སྤྱི་གཙུག་འཁོར་ལོའི་རྒྱན་དུ་ཆེ། །རྟ་བདུན་རྒྱས་པ་པདྨོའི་གཉེན། །དག་པའི་མཁའ་ལ་ཤར་བའི་ཚེ། །གླིང་བཞིའི་མུན་པ་སངས་བ་དང་། །མཉམ་དུ་གེ་སར་པདྨོ་རྒྱས། །རང་བྱུང་ཡེ་ཤེས་རྟོགས་པའི་རྩལ། །རང་རིག་མཁའ་ལ་ཤར་བའི་ཚེ། །མ་རིག་མུན་པ་སངས་པ་དང་། །མཉམ་དུ་གནས་ལུགས་རྟོགས་པ་རྒྱས། །འཇིག་རྟེན་སྣང་བྱེད་འགྲོ་བའི་མིག །མཚན་མོའི་བདག་པོ་ཤར་བའི་ཚེ། །འོད་དཀར་སྣང་བ་འགྱེད་པ་དང་། །མཉམ་དུ་མེ་ཏོག་ཀུན་ད་རྒྱས། །དགོངས་པ་འགྱུར་མེད་ཆོས་སྐུའི་ཀློང་། །ངང་དྭངས་འོད་གསལ་ཤར་བའི་ཚེ། །བདེ་གསལ་འོད་སྟོང་འཕྲོ་བ་དང་། །མཉམ་དུ་མི་རྟོག་ཡེ་ཤེས་རྒྱས། །བསོད་ནམས་རྒྱས་པའི་གཟི་འོད་ཀྱིས། །ཉི་ཟླའི་གཟི་འོད་འཕྲོག་པའི་ཚེ། །སྡུག་བསྔལ་སྣང་བྱེད་ནུབ་པ་དང་། །མཉམ་དུ་གཟའ་སྐར་སྣང་བ་རྒྱས། །རླུང་འཕོ་བཅུ་དྲུག་དབྱིངས་སུ་ནུབ། །ཉི་ཟླ་སྒྲ་གཅན་ཟོས་པའི་ཚེ། །གཟུང་འཛིན་རྟོག་ཚོགས་ནུབ་པ་དང་། །མཉམ་དུ་འོད་གསལ་སྣང་བ་རྒྱས། །ཡིད་བཞིན་ནོར་བུ་རིན་པོ་ཆེ། །རྒྱལ་མཚན་རྩེ་མོར་བཏགས་པའི་ཚེ། །དགོས་འདོད་གསོལ་པ་བཏབ་པ་དང་། །ཅི་འདོད་དངོས་གྲུབ་ཆར་དུ་འབབ། །སེམས་ཉིད་ཡིད་བཞིན་རིན་པོ་ཆེ། །རང་རིག་རྟོགས་པའི་རྩེར་ཕྱིན་ནས། །མ་ཡེངས་གོམས་པའི་བརྩོན་པ་དང་། །མཉམ་དུ་ཡོན་ཏན་ཆར་ཆེན་འབེབས། །སྐུ་གསུམ་ལྷུན་གྲུབ་རྒྱལ་བ་ལ། །དད་ལྡན་སྐྱེ་རྒུས་བརྟེན་པའི་ཚེ། །འདི་ཕྱིའི་དོན་གཉིས་འགྲུབ་པ་དང་། །མཉམ་དུ་ཡོན་ཏན་ཕུན་སུམ་ཚོགས། །མཚན་ལྡན་བླ་མ་དམ་པ་ལ། །བརྟེན་ནས་གསོལ་བ་བཏབ་པའི་ཚེ། །ཅི་བསམ་ཆོས་སུ་འགྲུབ་པ་དང་། །མཉམ་དུ་དངོས་གྲུབ་ཐམས་ཅད་འགྲུབ། །གླུ་དཔེ་བཞི་དོན་དང་རྣམ་པ་བརྒྱད། །བཀྲ་ཤིས་བདེ་ལེགས་འབྱུང་བ་འདི། །ཐེག་པ་མཆོག་གི་རྣལ་འབྱོར་བ། །ཀློང་ཆེན་རབ་འབྱམས་བཟང་པོས་སྦྱར། །དགེ་བས་མཐའ་ཡས་འགྲོ་བ་ཀུན། །ཐེག་པ་མཆོག་ལ་རབ་ཞུགས་ནས། །དཔལ་མགོན་བླ་མ་མཉེས་བྱེད་ཅིང་། །ཉིན་མཚན་ཆོས་ཀྱིས་འདའ་བར་ཤོག །ཨོཾ་ཨཱཿཧཱུཾ་བྱས་ནས། ཐམས་ཅད་བདེ་ཆེན་སངས་རྒྱས་ཞིང་། སྣང་བ་རྒྱ་གྲོལ་རྣལ་འབྱོར་ལེགས། ཆོས་ཟེར་བ་འདི་བྱས་ཀྱང་བཞག་ཀྱང་ཆོག །ནན་ཏན་བྱས་ན་བྱ་རུ་མེད་པ་ལགས། །ནོར་བུ་ཉི་མ་ཞེས་བྱ་བ་རྡོ་རྗེའི་གླུ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། རྣམ་གྲོལ་ཟླ་བས་བསྐུལ་བའི་དོན་དུ་སྦྱར་བ་རྫོགས་སོ། །ཞེས་དང་འཇིགས་མེད་དཔའ་བོའི་འགུར། གནས་ཆེན་དེ་ཟངས་མདོག་དཔལ་རི་ན། །རྗེ་དུས་གསུམ་ཀུན་མཁྱེན་པད་འབྱུང་བཞུགས། །འཁོར་རྗེ་འབངས་རིག་འཛིན་ཚོམ་བུ་ཡོད། །བདག་ལས་ཅན་བུ་ལ་ཐུགས་རྗེས་གཟིགས། །སྐུ་གསུམ་གྱི་སྟོན་པ་བརྒྱུད་པ་བཟང་། །རིགས་བསྡུས་ཀྱི་གུ་རུ་བསྒྲུབ་ཐག་ཉེ། །ལམ་སྙན་བརྒྱུད་ཡི་གེ་མེད་པ་ཡོད། །ཞག་བདུན་ཕྲག་གསུམ་གྱིས་ལམ་རྟགས་མཇལ། །ཨོ་རྒྱན་གྱི་ཐུགས་རྗེ་བསམ་མི་ཁྱབ། །རྫོགས་ཆེན་གྱི་ཁྱད་ཆོས་བསམ་མི་ཁྱབ། །ཆོས་བསམ་མི་ཁྱབ་པའི་སྙིང་ཐིག་གི། །བསྟན་པ་དེ་ནམ་ལངས་ཉི་ཤར་འདྲ། །ཀློང་ཆེན་ལ་དགོངས་པའི་གསང་མཛོད་ནས། །བཤད་རྒྱུད་ཀྱི་གྲུབ་མཐའ་གཏན་ལ་ཕེབས། །དོན་ཐུགས་རྒྱུད་རིག་པ་འོད་གསལ་གཟུངས། །བདག་ལས་ཅན་སྐྱེས་བུའི་སྙིང་ལ་བབས། །ཅི་ཤར་ཀུན་དག་པ་རབ་འབྱམས་ལ། །དགག་བསྒྲུབ་ཀྱི་བློ་སྒོམ་བྱ་མ་དགོས། །ང་དབྱིངས་རིག་འདྲེས་པའི་རྣལ་འབྱོར་པ། །རྐྱེན་བཟང་ངན་ཀློང་ཆེན་ངང་དུ་ཟད། །སྣང་གྲགས་ཀུན་དཔེ་ཆར་སོང་ཙ་ན། །གང་ཤར་ཀུན་ཆོས་ཉིད་བདེན་པའི་གཏམ། །ཚིག་ཐ་སྙད་སྐམ་པོར་ཞེན་མ་དགོས། །བློ་གཏད་མེད་ཀྱི་ངང་ནས་ས་ལམ་རྫོགས། །རང་རིག་ལ་སྐྱེ་འཆིའི་མིང་འདོགས་ཟད། །འཁོར་འདས་ལ་བཟང་ངན་བླང་དོར་མེད། །གཞི་གནད་ལ་ཕེབས་པའི་རྫོགས་ཆེན་འདི། །སྤྲིན་ཡེ་ཟད་ཀྱི་ནམ་མཁའ་སྟོང་པ་འདྲ། །འདིར་འདུས་ཀྱི་སྐལ་ལྡན་ཕོ་མོ་རྣམས། །འཁོར་བ་ལ་མ་ཞེན་རི་ཁྲོད་འགྲིམས། །ཁོང་སངས་རྒྱས་ཟེར་བའི་སྒྲ་བོ་ཆེ། །རང་རིག་པའི་ངང་དུ་ཁོ་བོས་མཐོང་། །དུས་ད་རེས་མཇལ་བའི་སྐལ་པ་བཟང་། །སང་ཅིས་ཀྱང་མཇལ་བའི་སྨོན་ལམ་ཞུ། །བློ་གཏད་མེད་ཀྱི་བདེན་པ་ནུས་མཐུ་ཆེ། །དོན་ལག་ཏུ་ལོངས་པར་གདོན་མི་ཟ། །གསུམ་པ་གྲུབ་དབང་རྫོགས་ཆེན་པའི་གསུང་མགུར། །ན་མོ་པདྨ་ཀ་ར་ཡེ། ཆོས་ཉིད་ཀྱི་ངོ་བོ་མངོན་གྱུར་ཞིང་། །ཡེ་ཤེས་ཀྱི་རིག་པའི་རང་རྩལ་རྫོགས། །ཀ་དག་ལ་འཕོ་འགྱུར་མི་མངའ་བའི། །འདྲེན་མཆོག་གི་པདྨ་སཾ་བྷ་མཆོད། །དུས་མཐའ་ཡི་རྣལ་འབྱོར་ཆོས་གཟུགས་ང་། །སྐྱེས་ས་དེ་མདོ་ཁམས་ཕྱོགས་སུ་བྱས། །མདོ་ཁམས་ཀྱི་སྐྱེ་འགྲོ་གཞི་བརླིང་ཡང། །འགྱུར་མེད་ཀྱི་ཆོས་ཉིད་ས་ཟིན་པའི། །བདེ་ཆེན་གྱི་གཤིས་ལ་གནས་པ་ཉུང་། །སྐྱེ་མེད་ཀྱི་ཆོས་སྐུ་ངོ་མཚར་ཆེ། །འདུག་ས་དེ་སྤུ་ལུང་ཕྱོགས་སུ་བྱས། །ཆོས་ཕྱོགས་ཀྱི་སྙན་པ་རྒྱ་ཆེ་ཡང་། །དོན་གཉིས་ཀྱི་འབྲས་བུ་ཕལ་ཆེར་ཙམ། །གནས་མེད་ཀྱི་ལོངས་སྐུ་ངོ་མཚར་ཆེ། །འགྲོ་དོན་དེ་ཡུལ་འབྲོག་འགའ་ལ་བྱས། །ཟང་ཟིང་གི་འདུ་ལོང་མང་ན་ཡང་། །ཐར་ལམ་གྱི་བྱ་བ་ཅི་ཡོད་ཨཾ། །འགག་མེད་ཀྱི་སྤྲུལ་སྐུ་ངོ་མཚར་ཆེ། །བསགས་པ་དེ་ལོངས་སྤྱོད་ནོར་ལ་བྱས། །གནས་སྐབས་ཀྱི་གཡེང་བ་ཙམ་ཞིག་ལས། །ནོར་བདུན་གྱི་ཡོན་ཏན་སོགས་པ་ཉུང་། །ཆགས་མེད་ཀྱི་བདེ་ཆེན་ངོ་མཚར་ཆེ། །འོང་པ་དེ་སྟོད་ཀྱི་ཕྱོགས་སུ་བྱས། །ཐོས་བསམ་གྱི་ཡར་ལྟ་རྒྱ་ཆེར་བྱུང་། །སྒྲུབ་པ་ཡི་ངང་ཚུལ་བླ་མ་དྲིན། །རྟེན་འབྲེལ་དེ་ལྷོ་བྲག་མཁར་ཆུར་བྱུང་། །ཡེ་ཤེས་ཀྱི་མཁའ་འགྲོས་བརྡ་ཆོས་བསྟན། །བསམ་གཏན་གྱི་བསྒོམ་ཚུལ་བཟུང་བ་ལས། །མཐར་ཐུག་གི་ལམ་སྣ་ཟིན་ཙམ་བྱུང་། །སྒྲུབ་གནས་དེ་བསམ་ཡས་མཆིམས་ཕུར་བྱས། །ཀ་དག་དང་ལྷུན་གྲུབ་རང་ངོ་མཐོང་། །གནས་ལུགས་དང་མཐུན་པའི་ཉམས་ལེན་ཤེས། །ཚིག་དོན་ལ་བསྙེགས་པ་མེད་དམ་སྙམ། །བོགས་འདོན་དེ་ཙ་རི་ཏྲ་རུ་བྱས། །རིག་པ་ཡི་ཡེ་ཤེས་སྐུ་མཐོང་ཙམ། །རྡོ་རྗེ་རྩེ་མོ་ཡི་གནད་ཤེས་པས། །སྣང་སྟོང་ལ་འགལ་བ་མེད་པར་རྟོགས། །ལུང་སྦྱང་དེ་རྐོང་ཡུལ་ཁྲ་མོར་བྱས། །འགྲོ་འདུག་གི་ཁོ་ཐག་ཆོད་ཙམ་བྱུང་། །གཉུག་མ་ཡི་གནས་ལུགས་སྐྱེ་འགག་བྲལ། །ཡུལ་སེམས་ཀྱི་བརྡའ་སྣང་ངོ་མཚར་ཆེ། །ཐོས་པ་དེ་མདོ་རྒྱུད་ཡོངས་ལ་བྱས། །བཀའ་བསྟན་གྱི་གཞུང་དང་མི་འགལ་བའི། །རྡོ་རྗེ་ཡི་ཚིག་གི་གནས་ལུགས་གོ །སེམས་ཞེས་དང་སེམས་མེད་དབྱེ་བ་རྟོགས། །ཆོས་ཅན་དང་ཆོས་ཉིད་ངོ་བོ་ཤེས། །བསམ་པ་དེ་འཁོར་འདས་གཉིས་ལ་བྱས། །དབྱེ་བ་དེ་ཟག་བཅས་ཟག་མེད་གོ །སྒོམ་པ་དེ་རྫོགས་པ་ཆེན་པོ་བསྒོམས། །འཁྲུལ་པ་ལ་ཉམས་ལེན་མི་རེ་བའི། །ཡེ་དག་གི་ཀ་དག་ཟང་མ་གོ །རྒྱུ་འབྲས་ལ་བསྲེ་སླད་མི་འོང་ཙམ། །ཉམས་མྱོང་དེ་བདེ་གསལ་གཉིས་ལ་བྱས། །སྟོང་འཛིན་གྱི་ཤེས་པ་མི་བཟུང་བའི། །བློ་བྲལ་གྱི་ཉམས་ལེན་ཟང་མ་ཤེས། །བྱང་ཆུབ་ཀྱི་གཞུང་ལམ་ཉམས་རེ་སྤྲོ། །དངོས་པོ་ལ་རྟག་པར་མི་ཞེན་ཅིང་། །སྟོང་པ་ལ་ཆད་པར་མི་འཛིན་པའི། །ཕྱོགས་ལྷུང་དང་བྲལ་བའི་ཉམས་ལེན་ཤེས། །གོལ་སྒྲིབ་ལས་འདས་འདི་ངོ་མཚར་ཆེ། །བརྟན་གཡོ་ཡི་ཆོས་རྣམས་ཐམས་ཅད་དུ། །དངོས་པོ་དང་དངོས་མེད་ལས་འདས་པ། །མཐའ་བྲལ་གྱི་དབུ་མའི་གནས་ལུགས་ཤེས། །བརྗོད་མེད་ཀྱི་ཤེས་རབ་དངས་རེ་སྤྲོ། །འཁོར་བ་འདི་མྱང་འདས་ངོ་བོར་རྟོགས། །མྱང་འདས་ཀྱི་རྩལ་ལས་འཁོར་བ་ཤར། །གཉིས་མེད་ཀྱི་རང་གྲོལ་རྫོགས་པ་ཆེ། །བདེ་ཆེན་གྱི་ཀུན་བཟང་རྫོགས་སངས་རྒྱས། །གོ་བ་འདི་ཆོས་ཉིད་སྤྱི་ཙམ་ཤེས། །བསམ་པ་ཡི་ཡིན་མིན་བྱེ་བྲག་ཕྱེད། །ཉམས་མྱོང་གི་ཆོས་ལ་བྲོད་པ་སྐྱེས། །རྟོགས་པ་ཡི་དོན་ལ་ངེས་ཤེས་ཐོབ། །མ་རྟོགས་པ་འཁོར་བའི་སེམས་ཅན་རྣམས། །འཁྲུལ་པ་ཡི་བློས་བཟུང་སྣ་ཚོགས་བྱས། །འབྲས་བུ་རུ་ཁམས་གསུམ་འཁོར་བར་འཁྱམས། །བག་ཆགས་ཀྱི་ལས་བསགས་རྒྱུན་མི་ཆད། །ལས་ངན་ཞེས་བྱ་བ་གང་ལ་ཟེར། །རྣམ་གཡེང་གི་འཁྲུལ་པ་འདི་ག་ཡིན། །བག་ཆགས་ཀྱིས་ངན་སོང་གསུམ་དུ་འཁྱམས། །ངན་སོང་གི་གནས་ནས་ཐར་དུས་མེད། །ཐར་མེད་ཅེས་བྱ་བ་འཁོར་བ་ཡིན། །བག་ཆགས་ཀྱི་འཁྲུལ་པས་འཁོར་བར་ལས། །སེམས་བྱུང་གི་རྣམ་རྟོག་འདི་ག་ཡིན། །རང་གྲོལ་དུ་ཆོས་སྐུར་ཤེས་པ་གཅེས། །ཤེས་བྱ་དེ་སྣང་སྲིད་སྤྱི་ལ་བྱས། །ངོ་བོ་ཡི་སྒོ་ནས་རྟག་མཐའ་བྲལ༴ རང་བཞིན་གྱི་ཆ་ནས་ཆད་མཐའ་མེད། །ཐུགས་རྗེ་ཡི་ཆ་ནས་ཟུང་འཇུག་ཤར། །རྟོགས་ཚུལ་གྱི་ཉམས་ལེན་འདི་ག་ཡིན། །ཤ་ཁྲག་གི་གཟུགས་ཕུང་ལྷ་སྐུས་སྦྱངས། །སྨྲ་བརྗོད་ཀྱི་འཁྲུལ་གཏམ་སྔགས་ཀྱིས་བསྒྱུར། །དྲན་རྟོག་གི་རིག་པ་ཀ་དག་ངང་། །སྒོ་གསུམ་གྱི་དཀྱིལ་འཁོར་འདི་ག་ཡིན། །བསླབ་པ་དེ་གནས་ལུགས་དོན་ལ་མཁས། །བཙུན་ཚུལ་དེ་རིག་པ་དྲི་མ་མེད། །བཟང་པོ་ཞེས་འཁོར་བ་མྱང་འདས་རྟོགས། །ཚེ་གཅིག་གི་ཐར་ལམ་འདི་ག་ཡིན། །རང་དོན་དུ་གྲོལ་གཞིའི་གནས་ལུགས་ཤེས། །གཞན་དོན་དུ་སྙིང་རྗེའི་རྩལ་ཁ་རྒྱས། །དོན་གཉིས་ཀྱི་འབྲས་བུ་ཚེ་འདིར་འགྲུབ། །གཏན་བདེ་ཡི་སོ་ནམ་འདི་ག་ཡིན། །རྐོང་ཡུལ་གྱི་རྐྱེན་ལུང་ཁྲ་མོ་རུ། །ཉམས་མྱོང་གིས་ཚིག་བཅད་ལྷུག་པར་བྲིས། །དགེ་བ་འདི་སེམས་ཅན་ཡོངས་ལ་བསྔོ། །རྣམ་མཁྱེན་གྱི་སངས་རྒྱས་ཐོབ་པར་ཤོག །སྐྱབས་རྗེ་ཐམས་ཅད་མཁྱེན་པའི་ཉམས་མགུར་བསྡུས་པ་རྡོ་རྗེའི་ཚིག་རྐང་བཞུགས། ན་མོ་གུ་རུ། མི་ཁོ་བོ་ཀུན་བཟང་གཞན་ཕན་པ། །སྲིད་བཟུང་ཙམ་སྐྱེས་ཐོབ་ཤེས་རབ་ཅན། །དེ་མ་ཡིན་ཡང་དཔེར་ན་ས་དང་རྡོ། །གསེར་ཟོལ་མེད་དུ་སྒྱུར་མཁན་བླ་མའི་ཚོགས། །དྲིན་དྲན་པས་སྙིང་ནས་འདོར་མི་ཕོད། །དེ་མ་ཕོད་ཀྱང་རང་གི་ཆེད་ཡིན་མོད། །བདག་སྔོན་ལས་ཅུངཟད་མ་དག་པས། །ཡུལ་མཐའ་འཁོབ་རྡོ་རུ་སྲིད་བཟུང་ཡང་། །ཆོས་རྣམ་དཀར་ས་བོན་དངུལ་ཆུ་དེ། །ཡུལ་ཐལ་བར་ལྷུང་ཡང་ཉེས་སྐྱོན་གྱི། །དྲིས་མ་གོས་དམ་པའི་མགོན་དང་མཇལ། །དེས་ཐར་ལམ་བསྟན་ལ་ཞུགས་ནས་སུ། །ཆོས་དགེ་བསྒྲུབ་སྡིག་སྤང་ནུས་ཚོད་བསྒྲུབས། །ཚུལ་དེས་ཀྱང་ཆོག་ཤེས་མ་སྐྱེས་ནས། །རིམ་བཞིན་དུ་སྐྱབས་མགོན་འགའ་བརྟེན་མཐར། །དཔལ་རྒྱལ་ཀུན་འདུས་ཞལ་འཇིགས་མེད་གླིང་། །བུ་བདག་གིས་བསོད་ནམས་མཐུས་ཐོབ་བཞིན། །ཞབས་སྤྱི་བོས་བླངས་ཏེ་ལེགས་བསྙེན་པས། །ཆོས་རྒྱུ་འབྲས་ལས་འདས་རྫོགས་པ་ཆེ། །ཐོབ་བཞིན་དུ་ཡལ་བར་མ་དོར་ནས། །དོན་ཉམས་སུ་བླངས་པའི་འབྲས་བུའི་གཟུགས། །སེམས་བདག་མེད་བདག་ཏུ་བཟུང་བའི་དཔེ། །དཔེ་ཐོ་ཡོར་མི་དང་ཐག་ཁྲ་སྦྲུལ། །ཡང་སྒྱུ་མ་ཞིག་དང་རྨི་ལམ་སད། །ཚུལ་དེ་ལྟར་རྟོགས་ཚེ་སྣང་བ་ཡང་། །གཞན་མེད་ལས་གཞན་དུ་བཟུང་ལས་གྲོལ། །སྐབས་དེ་ཚེ་ལྟ་སྒོམ་རྫུན་ཕུགས་རིག །དེ་རིག་ཚེ་ཀུན་རྫོབ་རྫུན་རིས་ཆོས། །ཡོངས་འཛིན་པས་བདེན་པར་བྱས་པར་རྟོགས། །ཆོས་དོན་དམ་ཟེར་བའི་རྩིས་པོ་ཆེ། །དུས་ད་ནི་རྫུན་པ་ཉིད་དུ་གོ །མདོར་བདེན་རྫུན་གཉིས་སོགས་རྟོག་ཚོགས་ཀུན། །དཔེ་སྤྲིན་དང་འཇའ་ཚོན་ཡལ་བའི་ཤུལ། །དེར་འདི་ཞེས་མཚན་མ་མི་དམིགས་ན། །ཆོས་འཁོར་འདས་གཉིས་པོ་ཅི་ལ་ཟེར། །ང་ང་རུ་འཛིན་ཐག་ཆད་པས་ན། །ཆོས་བདག་གཞན་གཉིས་སུ་སུ་ཡིས་འཛིན། །གཉིས་མེད་དུ་མཐོང་དེ་ཨེ་མ་མཚར། །འདི་འགྲོ་རྣམས་ཀུན་གྱི་རྟོགས་པར་ཤོག །དེ་ལྟའི་རྡོ་རྗེའི་མགུར་གྱི་ཕན་ཡོན་ནི། ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་སངས་རྒྱས་ཞིང་། །བདེ་ཆེན་མཁའ་སྤྱོད་གནས་སུ་འགྲོ། །ཡན་བཏང་དེ་མཐར་བཤགས་པ་འདི་བཞིན་བྱ། ཨོཾ་སྐུ་གསུང་ཐུགས་ཀྱི་སྤྲུལ་པ་རིགས་གསུམ་མགོན། །དེ་ལ་གཏད་པས་ཁམས་གསུམ་སྒྲོན་མེ་ཡིན། །རིགས་ལྔ་འཁོར་གྱི་མཁའ་འགྲོ་སྡེ་བཞི་རྣམས། །དེ་ལ་གཏད་པས་གསང་སྔགས་སྲུང་མ་ཡིན། །སྔོན་སྦྱང་གང་ཟག་ཆོས་ཀྱི་སྤྱན་ལྡན་རྣམ། །དེ་ལ་གཏད་པས་བསྟན་པ་དར་བ་ཡིན། །གསུང་པའི་རྒྱུད་ཆེན་ལུང་དང་མཐུན་པར་གཏད། །དེ་ལྟར་མ་བྱས་བཀའ་སྲུང་རྣམས་ལ་བཤགས། །སྐུ་གསུམ་གསོལ་འདེབས་ལྷོ་ནུབ་རྔ་ཡབ་སོགས། ༼ཇ༽ཞེས་བཤགས་བཅོ་བརྒྱད་པ་ལྷག་མའི་ཆོ་ག་ནི། དེ་ནས་ལྷག་མའི་གཏོར་མ་བསྡུས་ཏེ། ཚོགས་ཀྱི་སློབ་དཔོན་གྱིས་ཁ་ཕྲུ་བཏབ་ནས་བྱང་ཤར་ཕྱོགས་སུ་བཞག་ལ། ལྷག་ཞུ་ཨ་ཀ་རོ་སོགས། བྷྱོ་ལས་ཀྱི་མཁའ་འགྲོ་མི་སྲུན་པ། །འཇིག་རྟེན་མཁའ་འགྲོ་རྫུ་འཕྲུལ་ཅན། །ཤ་ཟ་མཁའ་འགྲོ་ཡང་སྤྲུལ་དང་། །གཞན་ཡང་མཁའ་འགྲོའི་ཚོགས་མང་པོ། །ལྷག་མའི་གཏོར་མ་འདི་ཁྱེར་ལ། །བགེགས་དང་བར་ཆད་ཞི་བ་དང་། །ཡིད་ལ་བསམ་ཀུན་འགྲུབ་པར་མཛོད། །ཨོཾ་སྣ་ཚོགས་ཌཱཀྐི་ནི། ཤ་ཟ་ཌཱཀྐི༴ འཇིག་རྟེན་ཌཱཀྐི༴ ཧ་རི་ནི་ས་ཁ་ཁ་ཁཱ་ཧི་ཁཱ་ཧི། ཞེས་པས་བཏང་མཐར་སྐུ་གསུང་ཐུགས་བཤགས་ནི། ལྷུབ། དུས་གསུམ་བདེ་གཤེགས་རྒྱལ་བ་འཁོར་དང་བཅས། །རྡོ་རྗེ་དམ་ཅན་མ་ལུས་དགོངས་སུ་གསོལ། །དང་པོ་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པའི་རིག་འཛིན་བྱང་ཆུབ་གོ་འཕང་དུ། །སྐུ་གསུང་ཐུགས་ཀྱི་རྡོ་རྗེ་བསྒྲུབ་པའི་ཕྱིར། །ཡི་དམ་ལྷ་དང་རྡོ་རྗེ་སློབ་དཔོན་དང་། །གསང་བའི་དམ་ཚིག་གྲངས་སུ་མནོས་པ་ལས། །དམ་བཅས་བཀའ་ལས་འདའ་བར་མི་བགྱི་སྟེ། །ལས་དང་སྐལ་བས་དམྱལ་བར་སྐྱེ་བར་འགྱུར། །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལ་སོགས་ཤོར་ནས་ནོངས་བགྱིས་པ། །རྡོ་རྗེ་སློབ་དཔོན་བསྟན་པའི་སྒྲོན་མེ་ལ། །སྙིང་ནས་སྨད་ཅིང་དམ་ཚིག་ཉམས་པ་དང་། །དམ་ཚིག་གཅིག་པའི་རྡོ་རྗེ་སྤུན་རྣམས་ལ། །ངན་སེམས་ལོག་པར་ལྟ་བ་ལ་སོགས་པ། །སྐུ་ཡི་དམ་ཚིག་ཉམས་པ་མཐོལ་ལོ༴ ཡི་དམ་ལྷ་ཡི་ཕྱག་རྒྱ་མ་གསལ་ཞིང་། །སྔགས་ཀྱི་བསྙེན་པ་གྲངས་ལས་ཆད་པ་དང་། །དུས་དྲུག་ལས་ཀྱི་མཆོད་པའི་ཁྱད་པར་དུ། །བསྙེན་སྒྲུབ་སྐོང་བའི་ཆོ་ག་བགྱིས་ཏེ། །བཀའ་ལྟར་མ་ལྕོགས་གཞུང་ལྟར་རྔོ་མ་ཐོགས། །གསུང་གི་དམ་ཚིག་ཉམས༴ རྡོ་རྗེ་སློབ་དཔོན་བྱམས་པའི་སྐུ་དྲིན་གྱིས། །སྙན་ཁུང་བརྒྱུད་པས་སེམས་ཀྱི་དཀྱིལ་དུ་བཞག །ཐུགས་ཀྱི་མན་ངག་བྱིན་པས་དམ་ཚིག་འདྲེས། །གསང་མཚམས་འདས་ནས་འཆོར་བར་སྨྲ་ལ་སོགས། །ཐུགས་ཀྱི་དམ་ཚིག༴ ཆོས་རྣམས་མཉམ་པ་ཉིད་དུ་མ་རྟོགས་ཏེ། །ཡན་ལག་དམ་ཚིག༴ ལེ་ལོ་སྙོམས་ལས་གཉིད་ཀྱི་དབང་གྱུར་ཏེ། །བསྙེན་སྒྲུབ་དམ་ཚིག༴ ལུས་ངག་ཡིད་ཀྱི་བསྲུང་བྱ་འདས་པ་ཡིས། །སྐུ་གསུང་ཐུགས་ཀྱི་དམ་ཚིག་ཉམས་པ་བཤགས། །ཞྭ་བཅས་རང་བྱུང་ལྷུན་གྲུབ་སོགས། ཞེས་བརྗོད་སྤྱི་དོན་གསུམ་པ་རྗེས་ཆོག་ལའང་། རྣམ་གྲངས་བརྒྱད་ལས་དང་པོ་ཆད་ཐོ་ནི། ཧཱུཾ་སྔོན་ཚེ་བསྐལ་པའི་དང་པོ་ལ། །སློབ་དཔོན་པདྨ་ཐོད་ཕྲེང་གིས། །དམ་ལ་བཏགས་པའི་སྲུང་མ་རྣམས། །ཆོས་ཉིད་བདེན་པའི་བཀའ་ལ་ཉོན། །གདོང་དམར་བོད་ཀྱི་རྒྱལ་ཁམས་འདིར། །ལྷ་སྲིན་སྡེ་བརྒྱད་དམ་ལ་བཏགས། །བདག་ནི་སློབ་དཔོན་དེ་ཡི་བརྒྱུད། །ཁྱོད་ནི་ལྷ་འདྲེ་གཡར་དམ་ཅན། །སྔོན་ཚེ་ཁས་བླངས་བཀའ་མ་བཅག །ད་ལྟ་རིག་འཛིན་དམ་མ་འདྲལ། །རྒྱན་གྱི་གཏོར་མ་འདི་བཞེས་ལ། །བཅོལ་བའི་ཕྲིན་ལས་གྲུབ་པར་མཛོད། །ཅེས་དང་གཉིས་པ་དམིགས་ཡུལ་དགྲ་ཡོད་ན། །དེ་ཡི་ཕྱོགས་སུ་ཟོར་འཕངས་བ་ནི། བྷྱོཿང་ནི་རྣལ་འབྱོར་དམ་ཚིག་ཅན། །དགྲ་བགེགས་སྟེང་དུ་ཟོར་ཅིག་འཕེན། །མཁའ་འགྲོ་དམ་ཅན་རྒྱ་མཚོ་དང་། །འཇིག་རྟེན་དྲེགས་བྱེད་སྡེ་བརྒྱད་ཚོགས། །ཀུན་ཀྱང་དྲག་པོའི་ཟོར་ཐོགས་ནས། །དགྲ་བགེགས་སྟེང་དུ་མ་ར་ཡ། །ཉོན་མོངས་དུག་ལྔའི་དགྲ་བགེགས་ལ། །ཡེ་ཤེས་རྣམ་ལྔའི་ཟོར་འཕངས་པས། །སྲིད་གསུམ་འཁོར་བ་མ་སྟོངས་ཏེ། །ཐམས་ཅད་བདེ་ཆེན་སངས་རྒྱས་ཤོག །ཅེས་བརྗོད་གསུམ་པ་བརྟན་མ་སྐྱོང་བ་ནི། བྷྱོཿ དཔལ་ཆེན་ཡབ་ཡུམ་བཀའ་ཉན་པ། །ཤར་ནས་གཤེགས་པའི་མཁའ་འགྲོ་བདུན། དྲུག་ནི་ཡེ་ཤེས་དབྱིངས་ན་བཞུགས། །གཅིག་ནི་ཐབས་ཀྱི་སྒོ་བ་མཛད། །རྡོ་རྗེ་རིགས་ཀྱི་མཁའ་འགྲོ་བདུན། །དམ་རྫས་གཏོར་མ་འདི་བཞེས་ལ། །ཁྱེད་ཀྱི་ཞི་བའི་ལས་མཛོད་ཅིག །བྷྱོཿ དཔལ་ཆེན་ཡབ་ཡུམ་བཀའ་ཉན་མ། །ལྷོ་ནས་གཤེགས་པའི་མཁའ་འགྲོ་བདུན། །དྲུག་ནི་ཡེ་ཤེས་དབྱིངས༴ གཅིག་ནི་ཐབས༴ རིན་ཆེན་རིགས་ཀྱི་མཁའ་འགྲོ༴ དམ་རྫས་གཏོར་མ༴ ཁྱོད་ཀྱིས་རྒྱས་པའི་ཕྲིན་ལས༴ བྷྱོཿ དཔལ་ཆེན་ཡབ་ཡུམ་བཀའ༴ ནུབ་ནས་གཤེགས་དྲུག་ནི༴ གཅིག་ནི་ཐབས༴ པདྨ་རིགས་ཀྱི༴ དམ་རྫས་གཏོར་མ༴ ཁྱོད་ཀྱིས་དབང་༴ བྷྱོཿ དཔལ་ཆེན་ཡབ་ཡུམ༴ བྱང་ནས་གཤེགས་དྲུག་ནི༴ གཅིག་ནི་ཐབས༴ ལས་ཀྱི༴ དམ་རྫས་གཏོར་མ༴ ཁྱོད་ཀྱིས་དྲག་པོའི་ལས་མཛོད་ཅིག །བྷྱོཿ དཔལ་ཆེན་ཡབ་ཡུམ་བདེ་གཤེགས་ཚོགས། །དབང་ཕྱུག་ཉེར་བརྒྱད་མཁའ་འགྲོ་སུམ་ཅུ་གཉིས། །གིང་ཆེན་བཅོ་བརྒྱད་ལང་ཀ་དུར་ཁྲོད་བདག །མ་བདུན་སྲིང་བཞི་འབར་བརྒྱད་དྲུག་ཅུ་བཞི། །བརྟན་མ་བཅུ་གཉིས་སོ་སོའི་གཡོག་པོར་བཅས། །བཤེས་གཉེན་ཀློང་རྫོགས་པདྨའི་སྤྱན་སྔ་རུ། །ཁས་བླངས་དམ་བཅས་བཀའ་ཡི་གཏོར་མ་ལོངས། །ཞི་རྒྱས་དབང་དྲག་དགུག་ཅིང་མནན་གཟིར་སོགས། །བཅོལ་བའི་ཕྲིན་ལས་མ་ལུས་གྲུབ་པར་མཛོད། །ཨེ་ཡཾ་རཾ་ཛྭ་ལ་རཾ་སོགས། ཅེས་རོལ་བའི་སྒྲས་གཏོར་མ་བཏང་ལ། ཕྱིར་ལོག་པ་དང་གཏོར་གཞུང་སྦུབ་ཅིང་། དགྲ་བགེགས་ཡོད་ན་དེའི་འགོ་ཏུ་ལིང་ག་བཅུག་ནས་བཞི་བ་བྲོ་བརྡུང་བྱ་བ་ནི། ཧཱུཾ། དམར་ནག་གྲུ་གསུམ་མེ་ཡི་དཀྱིལ་འཁོར་ནས། །འཇིགས་བྱེད་ཁྲོ་རྒྱལ་རྟ་མགྲིན་ཁྲོས་པའི་སྐུ། །གཉིས་མེད་འཁྲིལ་སྦྱོར་རྡོ་རྗེ་ཕག་མོ་ཡུམ། །མཁའ་འགྲོ་དཔའ་བོ་དམ་ཅན་རྒྱ་མཚོའི་ཚོགས། །གཉིས་འཛིན་འཁོར་བའི་བག་ཆགས་ལ། །གཉིས་མེད་རྟ་བྲོ་ཆེམས་སེ་ཆེམ། །རྟ་བྲོ་འཁོར་གཅིག་དང་པོ་ལ། །བདུད་འདུལ་འཇོམས་པ་ཆེན་པོའི་བྲོ། །ང་རྒྱལ་འཇོམས་པའི་མཁའ་འགྲོ་མ། །ཞིང་བཅུའི་ཚོགས་ལ་ད་རྡུངས་ཤིག །རྟ་བྲོ་འཁོར་གཉིས་བར་མ་ལ། །སྲིན་པོ་ཤ་ཟའི་ལོངས་སྤྱོད་བྲོ། །ཞེ་སྡང་འཇོམས་པའི་མཁའ་འགྲོ་མ། །འབྱུང་པོའི་ཚོགས་ལ་ད་རྡུངས་ཤིག །རྟ་བྲོ་འཁོར་གསུམ་ཐ་མ་ལ། །ཁམས་གསུམ་ཁྲག་ནད་ནད་ཀྱི་བྲོ། །སྡུག་བསྔལ་འཇོམས་པ་ཆེན་པོའི་བྲོ། །གཏི་མུག་འཇོམས་པའི་མཁའ་འགྲོ་མ། །འཁོར་བའི་གཅོང་ནད་སྐྲན་ལ་རྡུངས། །རྡུལ་དུ་རློགས་ཤིག་དགྲ་དང་བགེགས། །རྒྱ་མཚོའི་གཏིང་སྦ་རི་རབ་མནན། །འཁོར་བསྐྱོན་ཆུ་སྲིན་ཁ་རུ་བོར། །ཨོཾ་ཨཱཿཧཱུཾ་སྟྭཾ་བྷ་ཡ་ནན། ལྔ་བ་ནོངས་པ་བཤགས་ཤིང་བཟོད་གསོལ་ནི། མེ་ཏོག་ཐོགས་ལ། རྩ་གདངས། ཧཱུཾ་ཉེར་སྤྱོད་ལྔ་དང་སོགས། མི་སྡུག་སྲིན་པོ་ཤྭ་ལོ་ཀ་གསུམ། མ་འབྱོར་བ་དང་སོགས། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་རྩལ་པ། །དེ་ཀུན་མགོན་པོས་བཟོད་པར་མཛོད། །ཅེས་དང་རྗེས་སུ་ཡི་རང་བཤགས་པ་ནི། ལྷུབ། རྗེ་བཙུན་བླ་མ་རྣམས་ཀྱི་སྤྱན་ལམ་དུ། །ཡོ་བྱད་འབྱོར་ཚོགས་ཆུང་བ་མཐོལ་ལོ་བཤགས། །ཡིད་དམ་ལྷ་ཚོགས་རྣམས་ཀྱི་སྤྱན༴ མངོན་རྟོགས་སྤོང་ལེན་བགྱིས༴ མཁའ་འགྲོ་སྡེ་བཞི་རྣམས༴ ཁས་བླངས་དམ་བཅའ་ཉམས་པ༴ ཆོས་སྐྱོང་སྲུང་མ་རྣམས་ཀྱི་སྤྱན༴ གཏོར་མ་ལོ་ཟླར་འགྱང་༴ དུས་གསུམ་ཕ་མ་རྣམས་ཀྱི༴ དྲིན་ལན་ལན་གྱིས་མ་ལོན༴ མཆེད་དང་ལྕ་དྲལ་རྣམས་ཀྱི༴ དམ་ཚིག་བརྩེ་གདུང་ཆུང་བ༴ འགྲོ་དྲུག་སེམས་ཅན་རྣམས་ཀྱི་སྤྱན༴ སྙིང་རྗེ་ཕན་སེམས་ཆུང་བ༴ སོ་སོར་ཐར་པ་རྣམས་ཀྱི་སྡོམ་པ་དང་། །བྱང་ཆུབ་སེམས་དཔའ་རྣམས་ཀྱི་བསླབ་པ་དང་། །རིག་པ་འཛིན་པའི་སྔགས་ཀྱི་དམ་ཚིག་སོགས། །ཉམས་པ་ཐམས་ཅད་མཐོལ་བཤགས་མི་འཆབ་པོ། །མི་སྦེད་སླན་ཆད་གཅོད་ཅིངསྡོམ་པར་བགྱིད། །དུས་གསུམ་བྱས་བསགས་སྡིག་སྒྲིབ་མཐོལ་བཤགས་ནས། །ཚངས་པར་མཛད་ནས་སྐུ་གསུང་ཐུགས་ལ་སོགས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཞེས་དང་། ཨོཾ་བཛྲ་སཏྭ་ས་མ༴ སོགས། འདིར་ནི་རྟེན་དང་སོགས། ཧཱུཾ་སྣོད་བཅུད་ལྷ་དང་སོགས། སླར་ཡང་རིག་པ་སོགས། སྣང་གྲགས་རིག་པ་དཀྱིལ་འཁོར་སོགས། ཡི་གེ་བརྒྱ་བ་ལན་གསུམ་བརྗོད། དེ་ལྟར་བཤགས་ནས་དྲུག་པ་བསྔོ་སྨོན་ནི། ཡེ་ཤེས་རྣམ་དག་ལྷུན་གྱིས་གྲུབ་པའི་ལྷ། །བླ་མ་བདེ་གཤེགས་ཡེ་ཤེས་མཁའ་འགྲོ་དང་། །དུས་རྣམས་ཀུན་དུ་འདུ་འབྲལ་མེད་པ་ཡི། །བདེ་ཆེན་ས་ལ་རྟག་ཏུ་རོལ་བར་ཤོག །ཧེ་རུ་ཀ་དཔལ་གྲོང་ཁྱེར་དུ། །ཚོགས་ཀྱི་འཁོར་ལོས་མཆོད་པ་ཡིས། །བདག་དང་འགྲོ་བ་མ་ལུས་ཀུན། །དཀྱིལ་འཁོར་གཅིག་ཏུ་འགྲུབ་པར་ཤོག །བདག་གི་དགེ་བའི་རྩ་བ་འདི་ཡིས་ནི། །ཕན་བདེའི་འབྱུང་གནས་བསྟན་པ་འཕེལ་བ་དང་། །ཕྱོགས་རྣམས་བཀྲ་ཤིས་བདེ་ལེགས་ཕུན་སུམ་ཚོགས། །གནས་སྐབས་མཐར་ཐུག་བསམ་པ་འགྲུབ་པར་ཤོག །རང་བཞིན་དགེ་བའི་ཕུན་ཚོགས་སོགས། ཅེས་བརྗོད་བདུན་པ་ལྷ་ཚོགས་གཤེགས་གསོལ་ནི། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཨོཾ་བཛྲ་མུཿ ས་ཡེ་ཤེས་པ་གཤེགས་ནས། ཛཿཧཱུཾ་བཾ་ཧོཿ ས་དམ་ཚིག་གི་དཀྱིལ་འཁོར་བདག་ལ་བསྡུས་ཏེ། ཆོས་ཐམས་ཅད་རང་བཞིན་གྱིས་སྟོང་པར་མོས་པ་བྱས་ལ། དེ་ལྟར་གྲུབ་རྗེས་བརྒྱད་པ་བཀྲ་ཤིས་དོན། བཀྲ་ཤིས་ཀྱི་ལྷ་ཚོགས་ནམ་མཁར་བསམ་སྟེ། མེ་ཏོག་དང་རོལ་མོའི་སྒྲས་མགྲིན་གཅིག་ཏུ། བཀྲ་ཤིས་ཉུང་བསྡུས་བཅས་ཧཱུཾ་གདོད་མའི་མགོན་པོ་རིགས་ལྔ་སོགས། ངོ་བོ་རང་བཞིན་ཐུགས་རྗེ་མངོན་དུ་གྱུར། །ཆོས་དབྱིངས་རྣམ་དག་ཀློང་ལ་མངའ་བརྙེས་པའི། །བླ་མ་ཡི་དམ་རྣམས་ཀྱི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དཀར་མོ་ཞི་མཛད་གར་སྒྱུར་སྒེགས་པ་མོ། །མེ་ལོང་ཡེ་ཤེས་རྡོ་རྗེ་མཁའ་འགྲོ་མ། །སྐུ་ལ་དབང་བསྒྱུར་བཀྲ་ཤིས་གང་ལེགས་པ། །བཀྲ་ཤིས་དེས་ཀྱང་༴ སེར་མོ་རྒྱས་མཛད་གར་བསྒྱུར་སྒེག་པ་མོ། །མཉམ་ཉིད་ཡེ་ཤེས་རིན་ཆེན་མཁའ་འགྲོ་མ། །ཡོན་ཏན་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་༴ དམར་མོ་དབང་མཛད་གར་བསྒྱུར་སྒེག་པ་མོ། །ཀུན་རྟོག་ཡེ་ཤེས་པདྨ་མཁའ་འགྲོ་མ། །གསུང་ལ་དབང་བསྒྱུར་བཀྲ་ཤིས་གང་ལེགས་པ། །བཀྲ་ཤིས་དེས༴ ལྗང་གུ་ལས་མཛད་གར་བསྒྱུར་སྒེག་པ་མོ། །བྱ་གྲུབ་ཡེ་ཤེས་ལས་ཀྱི་མཁའ་འགྲོ་མ། །ཕྲིན་ལས་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས༴ མཐིང་གསལ་བྱང་ཆུབ་གར་བསྒྱུར་སྒེག་པ་མོ། །ཆོས་དབྱིངས་ཡེ་ཤེས་སངས་རྒྱས་མཁའ་འགྲོ་མ། །ཐུགས་ལ་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་༴ སྣ་ཚོགས་མཁའ་འགྲོ་དུར་ཁྲོད་བརྒྱད་ཀྱི་བདག །ཚོགས་ལ་དབང་བསྒྱུར་འཇིག་རྟེན་མཁའ་འགྲོ་མ། །བཀའ་སྲུང་དམ་ཅན་རྒྱ་མཚོའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་དང་རིག་འཛིན་བཀྲ་ཤིས་འདིར་ཡང་བྱ། ཧོཿ རིག་འཛིན་བརྒྱུད་པའི་བྱིན་རླབས་དང་། །དཀོན་མཆོག་གསུམ་གྱི་བདེན་པ་དང་། །གསང་སྔགས་ཟབ་མོའི་རྟེན་འབྲེལ་གྱིས། །འཇིགས་བརྒྱད་ཞི་བའི་བཀྲ་ཤིས་ཤོག །ཚེ་བསོད་རྒྱས་པའི་བཀྲ་ཤིས༴ སྣང་བ་དབང་འདུས་བཀྲ་ཤིས༴ ལོག་འདྲེན་ཚར་གཅོད་བཀྲ་ཤིས༴ སྣང་ཞེན་ལྷ་སྐུའི་ཕྱག་རྒྱར་རྫོགས། །སྒྲ་གྲགས་བདེ་ཆེན་སྔགས་སུ་དག །དྲན་རྟོག་འོད་གསལ་ཆོས་སྐུར་སྨིན། །འཇའ་ལུས་ཟང་ཐལ་བཀྲ་ཤིས་ཤོག །དེ་མཐར་ཚོགས་མཆོད་བརྩམ་པའི་དགེ་བསྔོ་ཞིང་། འདོན་རྒྱུར་སྦྱར་ཡང་ཤིན་ཏུ་ལེགས་མཐོང་བཞིན། རང་བཞིན་དགེ་བའི་ཕུན་ཚོགས་ཆུ་གཏེར་ལས། སྟོང་པའི་འདབ་སྟོང་སྙིང་རྗེ་སྙིང་པོ་ཅན། །ཀུན་དགའི་དུས་སྟོན་རྒྱ་ཆེན་འཕེལ་བྱེད་འདིས། །བསོད་ནམས་ཡེ་ཤེས་ཚོགས་ཆེན་རྫོགས་པར་ཤོག །སྐུ་བཞིའི་རྒྱ་མཚོ་བདེ་ཆེན་ཆུ་བཞིའི་གནས། །ཡེ་ཤེས་ཀླུ་དབང་འབྱོར་བའི་རང་བཞིན་ལས། །ཚོགས་མཆོག་རྒྱ་མཚོའི་སྤྲིན་གྱི་བླ་རེས་འདིས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །འདིར་སྨྲས་པ། རྒྱལ་གསུང་ཡོངས་ཀྱི་རྩེ་མོ་རྡོ་རྗེ་ཐེག །བློ་ལྡན་མཆོག་རྣམས་ངོ་མཚར་དགའ་བསྐྱེད་པ། །དེར་ཞུགས་ཀུན་གྱི་དངོས་གྲུབ་འགྲུབ་པའི་ཐབས། །བཅོམ་ལྡན་རྡོ་རྗེ་འཛིན་པའི་སྡོམ་པ་ནི། །ཐོག་མར་བླངས་ཤིང་བར་དུ་སྲུང་ཉམས་འཆོལ། །ཐ་མ་བཤགས་སྦྱངས་ཕྱིར་བཅོས་མ་འགྲུབ་ཅིང་། །བླང་དོར་བྲལ་བའི་གྲོལ་བ་ཐོབ་འདོད་པ། །དེ་ལྟའི་རིགས་ཀྱི་ཐུགས་ལ་མི་བབ་མོད། རྒྱལ་དང་དེ་སྲས་སྤྱན་སྔར་ཁས་བླངས་ནས། །ངལ་མེད་དམ་བཅའི་ཁུར་ཆེན་མི་འདོར་བར། །ཚུལ་བཞིན་སློབ་པའི་དམ་པའི་རྗེས་འཇུག་པ། །དམ་སྡོམ་དོན་གཉིས་ཡོད་ན་འདིར་འབུངས་ཤིག །སྔགས་སྡོམ་ཤིན་ཏུ་བསྲུང་དཀའི་མེ་ལྕེའི་རྩེར། །སྙིགས་དུས་མ་རབས་བསམ་སྤྱོད་སྦྲང་བུ་བཞིན། །བསྲེགས་པ་ལས་གཞན་ཐར་བར་དཀའ་མོད་ཀྱང་། །ཐབས་མང་འཕྲུལ་ལྡན་རྣམ་གྲོལ་ལམ་བཟང་འདིར། །ཞུགས་རྣམས་གསེར་དངུལ་སྣོད་གཞོམ་བཅོས་པ་བཞིན། །བྲམ་ཟེ་དུང་ཕྲེང་དཔོན་སློབ་ཟུང་སོགས་ཀྱི། །དཔག་ཡས་ཉེས་ཚོགས་དག་པའི་དཔེར་མཚོན་ནས། །བཤགས་པས་མི་དག་ཉེས་ལྟུང་མེད་པར་ངེས། །དེ་ཕྱིར་ལུས་ངག་སྒོ་ནས་ཆོ་ག་དང་། །འབྲེལ་བའི་སྤྱོད་ལམ་བཤགས་པར་འགྱུར་ངེས་དང་། །ཡིད་ཀྱི་འཁོར་འདས་ཆོས་ཀུན་བདག་མེད་དོན། །ལྷ་ལམ་རྒྱ་མཚོར་ཤར་བའི་སྣང་ཆ་བཞིན། །ཡོད་པ་མིན་ཏེ་དངོས་པོ་མཚན་མར་འདས། །མེད་པ་མིན་ཏེ་མངོན་སུམ་མཐོང་བའི་ཕྱིར། །དེ་ལྟར་ཤེས་ན་བཤགས་བྱའི་ཉེས་ལྟུང་དང་། །བཤགས་བྱེད་གཉེན་པོ་མཉམ་མེད་ངང་དུ་གྲོལ། །ཀྱཻ་མ་དེང་དུས་གསང་སྔགས་བོན་གྱེར་ལ། །གཅིག་ཏུ་བྱེད་ཅིང་དབང་བསྐུར་བརྒྱ་སྟོང་ཞུ། །བླ་མའི་ཆོས་བཙོང་དེས་རིན་སྦྱིན་བདག་གིས། །ནོར་རྫས་ཕུལ་ཡང་གཉིས་ཀ་དམ་ཉམས་རྒྱུ། །དང་པོ་དམ་སྡོམ་ཕོག་ཀྱང་ངོ་མ་འཕྲོད། །བར་དུ་བླང་དོར་མ་ཤེས་ཉེས་ལྟུང་བསགས། །ཐ་མ་བཤགས་སྦྱང་ཕྱིར་བཅོས་མ་ཐེབས་པས། །སྔགས་སྤྱོད་ཕལ་ཆེར་དམྱལ་བའི་རྒྱུ་ལས་ཅི། །དེ་ཕྱིར་རང་དབང་ཡོད་པའི་དུས་འདི་རུ། །བཤགས་སྦྱང་ཕྱིར་བཅོས་ལས་ལ་མ་བརྩོན་ན། །དམ་ཚིག་བསྲུང་བརྫུས་རང་ཉིད་ཉམ་ཉེས་བྱེད། །མི་མཁས་བྱིས་པས་བསྲུང་མཚམས་རྟོགས་ལམ་མམ། །དེ་ཕྱིར་རྣམ་གྲོལ་ལམ་བཟང་ཆུ་དྭངས་ནོར། །དད་ལྡན་སྔགས་པའི་སྒོ་གསུམ་རྫིང་བུ་རུ། །བཅུག་ཚེ་ཉེས་ལྟུང་རྙོག་མ་དྭངས་མའི་གཞིར། །གྲུབ་གཉིས་སྦྲང་རྩིའི་རྒྱལ་མཚན་འཛུམ་ཞལ་ངོམ། །ཨེ་མ་འདི་ནས་མཁས་གྲགས་དོན་གཉེར་གྱི། །བློ་ངན་ཆུ་ཁུར་སྐྱོན་དང་མ་འདྲེས་ཉིད། །རྩ་གསུམ་སྲུང་མའི་བདག་ཡིད་ནམ་མཁར་བཀོད། །དེ་ཕྱིར་ཉེས་ལྟུང་སྨག་རུམ་བསལ་བར་ངེས། །འདིར་འབད་བསོད་ནམས་སེམས་བསྐྱེད་བཞོན་པ་ཅན། །སྲིད་དང་ཉན་རང་ལམ་དུ་མི་འཕྱན་པར། །རྣམ་པ་ཐམས་ཅད་མཁྱེན་པའི་གོ་ས་རུ། །མྱུར་དུ་སླེབ་པའི་དཔལ་ཡོན་སྟོབས་ལྡན་གྱུར། །ཅེས་པ་འདི་ཡང་རང་ཉིད་ཀྱིས་སྔོན་ནས་ཡིད་ལ་བརྣག་པ་ཞིག་མ་ཡིན་ཀྱང་རེ་ཞིག་གི་ཚེ་སྐྱོ་ཤེས་ངེས་འབྱུང་ལྟ་བུས་རྐྱེན་བྱས་ནས་དྲིན་ལྡན་གྱི་དམ་པའི་མགོན་རྣམས་ཡིད་ངོར་ཤར་ནས་དད་འདུན་མོས་གསུམ་སྣང་བ་འགྱུར་ནུས་པ་ཞིག་བྱུང་ཕྲལ་གཞུང་འདི་རྩོམ་རྒྱུ་བློར་ཤར་བ་བཞིན་དྲི་མེད་བཤགས་རྒྱུད་ལས་བཤགས་པའི་གཞུང་བྱས། ཀུན་མཁྱེན་ཀློང་ཆེན་པའི་ཚོགས་མཆོད་རྒྱ་མཚོའི་སྤྲིན་ལས་ཚོགས་ཀྱི་གཞི་བཅས། ཡབ་རྗེ་ཆོས་ཀྱི་རྒྱལ་པོའི་སྐོང་བཤགས་རྡོ་རྗེའི་ཐོལ་གླུ་དང་། དོང་སྤྲུག་བཤགས་པ་དང་ཟབ་མོ་ཡངཐིག་ལས་བྱུང་བའི་མཎྜལ་སོགས་ཀྱིས་ཁ་བསྐང་། གཏེར་བདག་གླིང་བའི་རྡོར་སེམས་ནས་གོང་འོག་དགོས་རིགས་རྣམས་དང་། ཁྱད་པར་བདག་འཇུག་བཅས་བླངས་ནས་མདོར་ན་ཆོ་གའི་དངོས་གཞི་སྐོང་བཤགས་ལ་དྲིལ་ཏེ། གཞན་རྣམས་ཀྱིས་ཀྱང་ཟུར་བརྒྱན་གཤམ་གྱི་མགུར་སོགས་མེད་དུ་མི་རུང་བར་གོ་བཞིན་དཀྱུས་སུ་བྲིས་ཏེ། བྱིས་པས་མེ་ཏོག་རྩར་ལ་བརྒྱུས་ལྟའི། དམ་སྡོམ་ཉམས་ཆག་སྐོང་བཤགས་ཀྱི་ཆོ་ག་རྣམ་གྲོལ་ལམ་བཟང་ཞེས་བྱ་བ་འདི་ཉིད་ཁམས་དབུས་གཙང་གསུམ་གྱི་དམ་པ་དུ་མའི་བཀའ་དྲིན་གྱིས་འཚོ་བ། དད་པའི་འཛིན་མར་བསྐྱེད་བསྲིངས་པའི་དམ་ཚིག་གི་ལྗོན་པ་ཀུན་སློང་ངན་པའི་ཞུགས་ཀྱིས་མ་བསྲེག་པའི་ཀུ་སུ་ལུ་པ། ཀུན་བཟང་གཞན་ཕན་གྱིས་རང་ཉིད་བགྲང་བྱས་རབ་ཏུ་དུབ་ཀྱང་འདི་ཉིད་ཉམས་ལེན་ལ་ལྷག་པར་འདུན་བཞིན་བྲིས་པར་འགལ་བའི་ཚོགས་མཁྱེན་ལྡན་གཟུར་གནས་རྣམ་ལ་འཆགས་ཤིང་ཐོས་བསམ་ཆགས་སྡང་གི་རྒྱུར་གྱུར་པ་ལ་ལ་དང་། མི་ཤེས་ཤེས་བརྫུས་ཁེངས་དྲེགས་ཀྱི་ང་རོས་གཞན་རྒྱུད་དཀྲུགས་པའི་མགྲིན་བཟང་དག་ཀྱང་ཉམས་ཆག་བྱང་ནས་ཕྱིར་མི་ལྡོག་པའི་ཆོས་སྐུ་ཐོབ་པའི་རྒྱུར་གྱུར་ཅིག་ཡི་གེ་པ་ནི་ཀུན་བཟང་ཕུན་ཚོགས་སོ། དགེའོ། དགེའོ། དགེའོ།། །།སརྦ་མངྒ་ལཾ།། །། རབ་གནས་བསྡུས་པ་མེ་ཏོག་ཕྲེང་མཛེས།རབ་གནས་བསྡུས་པ་མེ་ཏོག་ཕྲེང་མཛེས་བཞུགས། །སྐུ་གསུམ་ཞིང་གི་སྟོན་མཆོག་རྒྱལ་བ་དང་། གང་གི་བསྟན་པའི་སྙིང་པོ་ལུང་རྟོགས་ཆོས། དེ་འཛིན་འཕགས་པའི་དགེ་བདུན་ཚོགས་བཅས་ལ། གུས་པས་བཏུད་ནས་རབ་གནས་བསྡུས་པ་སྤེལ། དེ་ཡང་རབ་གནས་ཤིན་ཏུ་བསྡུས་པ་ཞིག་དགོས་པ་བྱུང་ཚེ། རང་ཉིད་ལྷའི་ང་རྒྱལ་དང་ལྡན་པས། ཧཱུཾ༔ ང་ནི་དཔལ་ཆེན་ཐོད་ཕྲེང་རྩལ། །འདིར་མཆིས་གཉུག་གནས་འཕྲལ་རྒྱུའི་བགེགས། །མ་ལུས་མྱུར་དུ་ད་ལྟ་སོང་། །བཀའ་ལས་འདའ་ན་བརླག་པར་འགྱུར། །ཞེས་དང་བདེན་པའི་སྟོབས་བརྗོད་པ་ནི། ན་མོ་རིག་འཛིན་རྩ་རྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན༴ ཁྱད་པར་དུ་ཡི་དམ་རྩ་བ་གསུམ་གྱི་དཀྱིལ་འཁོར་གྱི་ལྷ་ཚོགས་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས༴ ཆོས་ཉིད་འགྱུར་བ་མེད་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་ཆེན་པོའི་མཐུ་སྟོབས་ནུས་པ་ལ་བརྟེན་ནས་དེང་འདིར་བདེ་བར་གཤེགས་པའི། སྐུ་གསུང་ཐུགས་ཀྱི་ཁ་བསྒྱུར། རྟེན་འདི་ལ་རབ་ཏུ་གནས་པ་ལ་བར་དུ་གཅོད་པར་བྱེད་པའི་གདོན་བགེགས་ལོག་པར་འདྲེན་པའི་རིགས་སུ་གྱུར་པ་ཐམས་ཅད་འདིར་མ་འདུག་པར་དམིགས་པའི་ཡུལ་གཞུན་དུ་འགྲོ་བར་གྱིས་ཤིག །གང་དག་མི་འགྲོ་བ་དེ་དག་ཐམས་ཅད་ལ་བདག་སོགས་ཁྲོ་རྒྱལ་འབར་བའི་ཚོགས་རབ་ཏུ་ཁྲོས་ནས་མགོ་བོ་ཚལ་པ་བརྒྱ། ལུས་དུམ་བུ་སྟོང་དུ་གཏོང་བར་གདོན་མི་ཟའོ། །ཧཱུཾཿ བཞིའི་སྔགས་དང་དྲག་སྔགས་བརྗོད་ནས་བསྐྲད་ཅིང་། ཨོཾ་བཛྲ་རཀྵ་རཀྵ་ཧཱུཾ། གིས་སྲུང་འཁོར་གསལ་ཞིང་། སངས་རྒྱས་ཆོས་དང་སོགས། འགྲུབ་པར་ཤོག །ཅེས་སྐྱབས་འགྲོ་ལན་གསུམ་དང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་། སོགས། ཚད་མེད་བཞི་དང་། བྱང་ཆུབ་སྙིང་པོ་མཆིས་ཀྱི་སོགས། ཚོགས་ལའང་དེ་བཞིན་སྐྱབས་གསུམ་མཆི། ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། བྱང་ཆུབ་ཐུགས་ནི། སོགས། བཞིན་དུ་བསླབ་པར་བགྱི། གསུམ་གྱི་མཐར། དེང་དུས་བདག་ཚེ་འབྲས་བུ་ཡོད། མི་ཡི་སྲིད་པ་ལེགས༴སོགས། ལྷ་དང་ལྷ་མིན་ལ་སོགས་དགའ་བར་གྱིས། ཡན་ལག་བདུན་པ་བརྗོད། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། དུས་གསུམ་གཤེགས་པ༴ སོགས། ཚང་བར་བརྗོད། བསྔོ་འོ། ཨོཾ་མ་ཧཱ་ཤུ་ནྱཻ་ཏ་སོགས། སྟོང་པའི་ངང་ལས༴ སྐུ་གཟུགས་མཆོད་རྟེན་རྣམ་སྣང་ལུང་གི་ཆོས་གླེགས་བམ་སྣང་མཐའ། རྟོགས་པའི་ཆོས་མི་བསྐྱོད་པ། རྒྱན་ཆ་རིན་པོ་ཆེ་སོགས་རིན་འབྱུང་མཚོན་ཆ་ཕྱག་མཚན་སོགས་དོན་གྲུབ་འམ། གཞན་ཡང་ཆོས་ལོངས་སྤྲུལ་གསུམ་གྱི་ཆོ་ག་དཀྱུས་བཞིན་བཏང་ནས་ལྷ་བསྐྱེད་རྟེན་གསུམ་གང་ཡིན་དང་སྦྱར་ཡང་ཆོག་པར་ངེས་ཤིང་། ཇི་ལྟར་ཡང་། རྟེན་ལྷར་གསལ་བའི་གནས་གསུམ་ཡིག་འབྲུ་གསུམ་གསལ་བ་ལས་འོད་ཟེར་འཕྲོས་པས། ཆོས་ཀྱི་དབྱིངས་ནས་ཡེ་ཤེས་པ་སྤྱན་དྲངས་བར་བསམ་ལ། མ་ལུས་སེམས་ཅན་ཀུན་གྱི་མགོན་སོགས་ནས་གཤེགས་སུ་གསོལ། བཛྲ་ས་མ་ཛ༔ པདྨ་ཀ་མ་ལ་ཡེ་སྟྭཾ། ཞེས་ལྷ་ཚོགས་མདུན་མཁར་བཞུགས་པ་ལ། ཨརྒྷཾ་སོགས་ཀྱིས་མཆོད། བསྟོད་པར་འོས་པ་ཐམས་ཅད་ལ། སོགས་ཀྱིས་བསྟོད་ནས། ཛཿཧཱུཾ༔བཾ་ཧོ། རྟེན་གྱི་ལྷ་དབྱེར་མེད་དུ་བསྟིམ་ནས། དམ་ཡེ་དབྱེར་མེད་ཀྱི་གནས་གསུམ་ཡིག་འབྲུ་གསུམ་གསལ་བ་ལས་རྒྱལ་བ་ཀུན་གྱི་གསང་བ་གསུམ་གྱི་རང་བཞིན་གསལ་བཏབ་ལ། དབང་གི་ལྷ་རིགས་ལྔ་ཡབ་ཡུམ་སོགས་གདན་གསུམ་ཚང་པའི་དཀྱིལ་འཁོར་སྤྱན་དྲངས་ཏེ། རྟེན་གྱི་ལྷ་ལ་དབང་བསྐུར་བར་བསམ་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲྀ་ཡེ་ཧཱུཾ། ཞེས་དབང་བསྐུར་བས་དག་བྱའི་དྲི་མ་དག །རྟེན་གྱི་ལྷ་གང་ཡིན་པ་དེ་རང་རང་གི་རིགས་ཀྱི་བདག་པོས་དབུ་བརྒྱན་པར་བསམ། སྤྱན་དབྱེ་བ་ནི། རྒྱལ་ཀུན་སྤྱན་ལ་སྒྲིབ་པ་མི་མངའ་ཡང་། །བདག་ཅག་བསོད་ནམས་བསགས་ཕྱིར་སྤྱན་དབྱེ་བས། །མ་རིག་འཐིབ་པོས་ལྡོང་པའི་འགྲོ་བ་ཀུན། །རང་བྱུང་ཡེ་ཤེས་ཆོས་སྐུའི་ཞལ་མཐོང་ཤོག །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤྭ་དྷ་ནི་སྭཱ་ཧཱ། ཡེ་ཤེས་ཀྱི་སྤྱན་རྣམ་པར་དག་པས་སེམས་ཅན་ཐམས་ཅད་ལ་རྒྱུན་ཆད་མེད་པར་གཟིགས་པར་གྱུར། ཞེས་བསམ་ལ། བདག་དང་རྟེན་གྱི་ལྷའི་ཐུགས་ཀའི་འོད་ཟེར་གྱིས་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ནུས་སྟོབས་མ་ལུས་དང་། མཁྱེན་བརྩེ་ནུས་གསུམ་གྱི་དཔལ་དང་ཡོན་ཏན་ཐམས་ཅད་དབྱངས་དང་གསལ་བྱེད་ཀྱི་རྣམ་པར་དྲངས་ནས་རྟེན་གྱི་ལྷ་ལ་ཐིམ་པས་ལྷ་ཡང་འོད་ཀྱི་ཕུང་པོར་གྱུར་ནས་དབྱངས་གསལ་གྱི་རྣམ་པས་རྟེན་ལ་ཐིམ་ཞིང་། སྐུ་གསུང་ཐུགས་རྟེན་རང་རང་གི་མངོན་རྟོགས་ཇི་བཞིན་དང་། གླེགས་བམ་ཡང་སོ་སོའི་གཞུང་གི་ཡི་གེའི་གཟུགས་དང་དབྱེར་མེད་དུ་ཆུ་ལ་ཆུ་བཞག་པ་ལྟར་གྱུར་ནས། མཐོང་ཐོས་དྲན་རེག་སྨིན་ཅིང་གྲོལ་བའི་ནུས་སྟོབས་དང་ལྡན་པའི་རྟེན་དུ་གྱུར། ཞེས་བསམ་ལ། དབྱངས་གསལ་ལན་ཅི་མང་བཟླས་བཞིན་རྟེན་ལ་ནས་འབྲུ་འཐོར་ཞིང་། འདིར་ནི་གཟུགས་དང་ལྷན་ཅིག་སོགས་ནས་སྩལ་དུ་གསོལ། །ཞེས་དང་། ཕྱོགས་བཅུ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་བདག་ལ་དགོངས་སུ་གསོལ། །ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། །ཁྱད་པར་དུའང་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་འདི་དག་ལ་བསྐྱེད་ཅིང་སྤྱན་དྲངས་པའི་དཀྱིལ་འཁོར་གྱི་ལྷ་ཚོགས་རྣམས་དང་། གཞན་ཡང་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའི་ཚོགས་རྣམས་རྟེན་འདི་དག་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་སྦྱིན་བདག་གི་གཙོར་གྱུར་འབྲེལ་ཐོགས་རྣམས་ཀྱི་ཚོགས་གཉིས་རྫོགས། སྒྲིབ་གཉིས་བྱང་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་རྟེན་དུ་གྱུར་ཅིག །ཅེས་རྟེན་སྙིང་ལན་ཅི་ནུས་དང་། སུ་པྲ་ཏིཥྛ་བཛྲ་ཡི་སྭཱ་ཧཱ། བཏགས་པས་ནས་འཐོར། ཡང་། ཕྱོགས་བཅུ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་བདག་ལ་དགོངས་སུ་གསོལ། །ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ། རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། །ཁྱད་པར་དུ་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་འདི་དག་ལ་བསྐྱེད་ཅིང་སྤྱན་དྲངས་པའི་དཀྱིལ་འཁོར་གྱི་ལྷ་ཚོགས་རྣམས་དང་། གཞན་ཡང་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའི་ཚོགས་རྣམས། རྟེན་འདི་དག་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་རྟེན་འདི་ཉིད་གང་དུ་གནས་པའི་ཡུལ་ཕྱོགས་འདིའི་གཙོར་བྱས་འཇིག་རྟེན་གྱི་ཁམས་ཀུན་ཏུ་ནད་ཀྱི་བསྐལ་བ་ཞི་བ། མཚོན་གྱི་བསྐལ་བ་ཉམས་པ། མུ་གེའི་བསྐལ་བ་མེད་པ། མི་ནད་དང་ཕྱུགས་ནད་ཐམས་ཅད་རྒྱུན་ཆད་ནས་ཆར་ཆུ་དུས་སུ་འབབ། ལོ་ཕྱུགས་རྟག་ཏུ་ལེགས། སེམས་ཅན་བདེ་སྐྱིད་ཕུན་སུམ་ཚོགས་པའི་དཔལ་ཡོན་ལ་ལོངས་སྤྱོད་པའི་རྟེན་དུ་གྱུར་ཅིག །རྟེན་སྙིང་ལན་ཅི་མང་དང་། སུ་པྲ་ཏིཥྛ་སོགས་ཀྱིས་མེ་ཏོག་འཐོར། ཡང་། ཕྱོགས་བཅུ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་བདག་ལ་དགོངས་སུ་གསོལ། །ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ། རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། །ཁྱད་པར་དུ་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་འདི་དག་ལ་བསྐྱེད་ཅིང་སྤྱན་དྲངས་པའི་དཀྱིལ་འཁོར་གྱི་ལྷ་ཚོགས་རྣམས་དང་། གཞན་ཡང་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའི་ཚོགས་རྣམས་རྟེན་འདི་དག་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་རྟེན་འདི་ཉིད་སུས་མཐོང་བ་དང་ཐོས་པ་དང་དྲན་པ་དང་རེག་པའི་སེམས་ཅན་གྱི་ནད་གདོན་སྡིག་སྒྲིབ་ཞི་བ་དང་། ཚེ་བསོད་དཔལ་འབྱོར་རྒྱས་པ་དང་མོས་པ་རྣམ་བཞི་དབ༷ང་དུ་འདུ་བ་དང་དགྲ་བགེགས་ལོག་འདྲེན་ཚ༷ར་གཅོད་པ་ལ་སོགས་ལས་བཞི་དང་ལས་རབ་འབྱམས་ཀྱི་ཕྲིན་ལས་ཐོགས་མེད་དུ་འགྲུབ་པའི་རྟེན་དུ་གྱུར་ཅིག །མཐར་ཐུག་རྒྱལ་བ་མགོན་པོ་འོད་དཔག་ཏུ་མེད་པའི་གོ་འཕང་ཐོབ་པའི་རྟེན་དུ་གྱུར་ཅིག །ཞེས་གོང་བཞིན་རྟེན་འབྲེལ་སྙིང་པོ། སུ་པྲ་ཏིཥྛ་གཤམ་འདོག་ཅན་ཅི་མང་བཟླ་ཞིང་། ནས་འཐོར། སངས་རྒྱས་དང་། བྱང་སེམས། སྲུང་མ་བཅས་ཀྱི་བཀྲ་ཤིས་དང་། ལས་བཞི་གང་བརྩམ་འགྲུབ་པའི་བཀྲ་ཤིས་བརྗོད་མཚམས་རྣམས་སུ། ཡེ་དྷརྨཱས་ ནས་འཐོར། བསམ་པ་ལྷུན་གྲུབ་དང་། མྱུར་འགྲུབ་གང་འཛོམས་དང་། བསྔོ་སྨོན་ཅི་ནུས་བྱའོ། །ཞེས་པ་འདི་ཡང་མཆོད་ཡོན་སྤྲོས་ཆུང་འགའ་ཞིག་ལ་ཕན་འདོགས་ཀྱི་བློས་ རྣལ་འབྱོར་པ། ཀུན་བཟང་གཞན་ཕན་གྱིས་བྲིས་པའི་ཡི་གེ་པ་ནི་མགོན་པོ་བསམ་འགྲུབ་ཀྱིས་བགྱིས་པས་བསྟན་འགྲོ་ཡོངས་ལ་དགེ་ཞིང་བཀྲ་ཤིས་པའི་རྒྱུར་གྱུར་ཅིག། དགེའོ། །དགེའོ། །དགེའོ།། །། རྒྱལ་ཀུན་ཐུགས་རྗེའི་མངའ་བདག།རྒྱལ་ཀུན་ཐུགས་རྗེའི་མངའ་བདག་ཉིད། །མཐུ་སྟོབས་ནུས་པའི་དཔལ་འབར་བ། །གསང་བདག་རྡོ་རྗེ་འཛིན་པ་དང་། །དབྱེར་མེད་འཇིགས་མེད་གླིང་བར་འདུད། །དེ་ཡང་རྣལ་འབྱོར་བ་གང་ཞིག་བསྐྱེད་རྫོགས་བསྒོམ་བཟླས་སོགས་ལ་འཇུག་པའི་སྔོན་དུ། དམ་སྲི་མནན་པ་གལ་ཆེ་སྟེ། ཅིའི་ཕྱིར་ཞེ་ན། སྔོན་གྱི་སྲིད་པ་ལ་ངེས་བར་གསང་སྔགས་ཀྱི་དཀྱིལ་འཁོར་ཆེན་པོར་དབང་བསྐུར་ཚུལ་བཞིན་ཞུས་ཀྱང་། དམ་ཚིག་ཉམས་ཆག་སྐྱོན་གྱིས་གནས་ངན་རྣམས་སུ་སྐྱེ་བ་དང་། སྔར་ཡང་སྐྱེ་བ་མང་པོར་རྣལ་འབྱོར་བར་དངོས་གྲུབ་མི་ཐོབ་པའི་གེགས་ཆེན་དུ་གྱུར་བ་ཡིན་ཕྱིར། དེ་ཉིད་མནན་པའི་ཐབས་གལ་ཆེ་སྟེ། རྒྱས་པར་སྲི་མནན་གཞན་གྱི་གཞུང་ནས་གསལ་བཞིན་པ་དང་། ལག་ལེན་དང་འཇུག་པ་བདེ་བའི་དབང་དུ་བྱས་ན་འདི་བཞིན་ཏེ། དང་པོ་རང་ཉིད་ཡི་དམ་ཞི་ཁྲོ་གང་རུང་གི་ཆོ་ག་སྔོན་ཏུ་འགྲོ་ཞིང་བསྙེན་བསྒྲུབ་གཏོར་བཅས་གྲུབ་ནས། སྐབས་སུ་བབ་ཚེ་དུག་ཤོག་ལ་དམ་སྲིའི་ལིང་ག་མི་གཟུགས་བྱ་མགོ་ཅན་རྐང་ལག་ལྕགས་སྒྲོག་གིས་བསྡམས་པ་སོགས་སྤྱི་ལྟར་བྲིས་པའི་སྙིང་གར། ཡ་མ་དཾ་སྲི་གམ་པ་རི་མ་ར་ཡ་ཛཿ ཞེས་བྲིས་ལ་རོ་ལྟེབ་བྱས་ལ་བྲུབ་ཁུང་བརྐོས་པའི་དོང་དུ་བཅུག་ལ་ཁྲག་དང་དུག་ཆུ་བྲན་ལ་བཞག་ཅིང་། གསེར་སྐྱེམས་བཏང་ཞིང་། བདག་ཉིད་ཡི་དམ་དུ་གསལ་བའི་མདུན་དུ་བྲུབ་ཁུང་དམར་ནག་འཇིགས་སུ་རུང་བ་ཁ་དོག་ཅིང་གཏིང་ཟབ་པ། གཤིན་རྗེའི་ཡུལ་དུ་ཟུག་པ། དེའི་དབུས་སུ་གནོད་བྱེད་དམ་སྲི་སྒབ་འདྲེ་ཆོས་སྲིད་ལ་བར་དུ་གཅོད་པར་བྱེད་པའི་འགོང་པོ་དངོས་གྲུབ་འཕྲོག་བྱེད་གང་ཡིན་པ་དེ་ཉིད་མདུན་གྱི་གཟུགས་བརྙན་དང་དབྱེར་མེད་དུ་གྱུར། རང་ཉིད་ཡི་དམ་ལྷའི་ཐུགས་ཀ་ནས་ཕྱག་རྒྱའི་ལྷ་མོ་བཞི་སྤྲོས་ཏེ། གནོད་བྱེད་དགྲ་བགེགས་བདུད་དང་དམ་སྲི་མ་རུངས་པའི་གདུག་པ་ཅན་རྣམས་རང་དབང་མེད་པར་བཀུག་ནས་མདུན་གྱི་ལིང་གའི་གཟུགས་བརྙན་ལ་ཐིམ་པར་གྱུར། ཞེས་བསམ་ལ་འགུགས་པ་བྱ་བ་ནི། ན་མོ་མཆོག་གསུམ་རྩ་གསུམ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་ཁྱད་པར་དུ་ཡི་དམ་བཀའ་བརྒྱད་དགོངས་འདུས་ཕུར་པ་གུ་རུ་ཞི་དྲག་མཁའ་འགྲོ་ཕག་ཁྲོས་སེང་གསུམ་ལ་སོགས་པ་རྣམས་དང་། ཆོས་སྐྱོང་མ་མགོན་ལྕམ་དྲལ་ལ་སོགས་སྲུང་མ་ཕོ་རྒྱུད་མོ་རྒྱུད། ཕོ་ཉ་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བཀའ་བདེན་པ་དང་། ཆོས་ཉིད་འགྱུར་བ་མེད་པའི་བདེན་པ་དང་། ཆོས་ཅན་བསླུ་བ་མེད་པའི་མཐུ་སྟོབས་ནུས་དཔལ་བརྟེན་ནས། རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་མཆོག་ཐུན་མོང་གཉིས་ཀྱི་དངོས་གྲུབ་བསྒྲུབ་པ་ལ་བར་དུ་གཅོད་པར་བྱེད་པའི་དགྲ་བགེགས་འབྱུང་པོ་མི་དང་མི་མ་ཡིན་པའི་སྡེ་ཚོགས། སྒབ་འདྲེ་དམ་སྲིའི་རིགས་སུ་གྱུར་པ་ཐམས་ཅད་གཟུགས་ལིང་ག་འདི་དང་གཉིས་སུ་མེད་པར་ཁུག་ཅིག །རྣ྄ྀར་ཏྲི་ཨ་ཀཪྵ་ཡ་ཛཿ ཛ་ཧཱུྃ་བཾ་ཧོཿ ཞེས་བརྗོད་ཅིང་སླར་ཡང་། ཧཱུཾ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུངས་ཤིག་རྒྱོབ་ཅིག་རྣམ་པར་ཆིངས། །རྟོགས་ཤིག་གྲོགས་དང་བྲལ་བར་གྱིས། །རིངས་པར་ཁུགས་ལ་སྨྲར་ཆུག་ཅིག །ཕོབས་ཤིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་ལ་ཉན་པར་བྱོས། །ཧཱུཾ་སྲི་ལས་དེ་ནི་འདྲེ་ཆེ་མེད། །སྲི་ལས་དེ་ནི་སྐྱེ་རིངས་མེད། །ན་བ་དེ་ནི་གཟེར་དུ་ཆེ། །གསོན་གྱི་བདུད་དུ་ཆེ། །གཤིན་གྱི་ལྕགས་སུ་ཆེ། །ཆེ་སྲི་ཆུང་གི་སྲི། །མ་སྲི་བུ་ཡི་སྲི། །གོད་སྲི་སྒོས་ཀྱི་སྲི། །རྣལ་འབྱོར་བཀའ་ལས་འདས། །སྲི་རྣམས་དེ་ནི་འདུལ་བའི་ཕྱིར། །མཚོན་ཆ་དཔག་མེད་ཚོགས་ཀྱིས་བརྒྱན། །མྱུར་དུ་ཁུགས་ཤིག་སྲུང་མའི་ཚོགས། །དམ་སྲི་མནན་པའི་དུས་ལ་བབ། །ཅེས་བརྗོད་ཅིང་ཡི་དམ་གང་ཡིན་སྔགས་དང་། དྲག་སྔགས་སོ་ལྔ་པ་ཡང་བཟླ་བཞིན། ཧཱུཾ་དམ་སྲི་བྱ་བའི་སྡིག་ཅན་ཁྱོད། །སྲི་ཅན་རྡུལ་དུ་བརླག་པའི་ཕྱིར། །རྡོ་རྗེ་རིགས་ཀྱི་ཕུར་གདབ་བྱ། །མ་མོ་རྣམས་ལ་མཆོད་པ་འབུལ། །ཕོ་ཉའི་ཚོགས་ལ་བསྟབ་པར་བྱ། །མཚོན་ཆ་རྣམས་ཀྱི་རྩེ་མོ་བརྡར། །ཡེ་ཤེས་མཚོན་རྣོན་དབལ་གྱིས་བསད། །ཡུངས་ཀར་མདའ་ཡི་འབེན་དུ་བཙུགས། །དུག་ཁྲག་ཆུ་ཡིས་སྲོག་ལ་དབབ། །ལྕགས་ཕྱེ་ཟངས་ཕྱེ་འཚུབ་མ་འཚུབས། །རཀྟ་ཁོལ་མའི་རྦ་ལ་གཡེང་། །བྱེ་མ་སྐྱེ་ཚེའི་སེར་བ་ཕོབས། །ཁྲོ་ཆུང་ཚོགས་ཀྱིས་སྲོག་རྩ་ཆོད། །ཕོ་ཉ་རོལ་བས་རྟ་བྲོ་རྡུངས། །ཞེས་པ་དང་རྡོས་འགེབས་བཞིན་འདི་སྐད་དོ། །ཧཱུཾ་བྷྱོ་དམ་སྲི་བྱ་བའི་སྡིག་ཅན་ཁྱོད། །ཆུ་སྲིན་ནག་པོའི་ཁ་རུ་བཏབ། །གྲི་ཐོགས་སྟོང་གིས་བསྐོར་ལ་བཞག །རི་རབ་ཆེན་པོའི་འོག་ཏུ་མནན། །གསེར་རི་བདུན་གྱིས་བསྐོར་ནས་བཞག །རྒྱ་མཚོ་ཆེན་པོའི་གཏིང་དུ་བསྐྱུར། །རོལ་མཚོ་བདུན་གྱིས་བསྐོར་ནས་བཞག །གནམ་ལྕགས་འཁོར་ལོའི་རྩིབས་ལ་བསྐྱོན། །མཚོན་ཆའི་ཚོགས་ཀྱིས་བསྐོར་ནས་བཞག །ཁྲོ་རྒྱལ་རྣམས་ཀྱི་ཞལ་དུ་བསྟབས། །ནག་པོ་སྟོང་གིས་བསྐོར་ལ་བཞག །བསྲེག་བྱ་མེ་ཡི་དཀྱིལ་དུ་བསྲེགས། །མེ་དཔུང་འབར་བས་བསྐོར་བ་ཡི། །དམ་སྲི་རྣམ་སྨིན་ལས་ཀྱི་བརྩོན་རར་ཚུད། །བསྐལ་བ་ཞིག་ཀྱང་ཐར་མི་འགྱུར། །ཆུ་སྲིན་གདུག་པའི་ཧོམ་ཁུང་དུ། །རིན་ཆེན་ནོར་བུ་ཆུད་པ་ལྟར། །མཐའ་ཡས་རྒྱ་མཚོ་སྐེམ་ཡང་མི་བཏང་ངོ་། །ཉི་ཟླ་ཐང་དུ་ལྷུང་ཡང་མི་བཏང་ངོ་། །རི་རབ་ཆེན་པོ་ཉིལ་ཡང་མི་བཏང་ངོ་། །རྣལ་འབྱོར་དངོས་གྲུབ་མ་ཐོབ་པར། །དམ་སྲི་ཐར་མེད་ལས་ཀྱི་བརྩོན་རར་ཚུད། །མནར་མེད་བཙོན་ཁང་ནག་པོའི་གནས་སུ་ཚུད། །ཞེས་བརྗོད་ལ་མེ་ཆུས་རྒྱས་གདབ་ཅིང་། སྟེང་དུ་རྡོ་གཡམ་ལ་རྡོ་རྗེ་རྒྱ་གྲམ་དང་རི་རབ་བྲིས་པས་མནན་ལ་གཞུང་གང་ཡིན་གྱི་བྲོ་བརྡུངས་བྱས་པས་འཐུས་སོ། །ཞེས་པའང། ཡབ་རྗེ་སྤྲུལ་བའི་སྐུའི་བཀའ་བཞིན་ཀུན་བཟང་གཞན་ཕན་གྱིས་སྤེལ་བའི་ཡི་གེ་པ་ནི་བུད་དྷ་ཕ་ལས་བགྱིས་པའི་དགེ་བས་སྒྲུབ་པ་པོའི་རྣལ་འབྱོར་རྣམས་ལ་དམ་སྲིའི་གནོད་པས་མི་ཚུགས་པའི་རྒྱུར་གྱུར་ཅིག །དགེའོ།། །།སརྦ་མངྒ་ལ།། །། |