 རྡོ་གྲུབ་ཆེན་ཀུན་བཟང་གཞན་ཕན་གྱི་གསུང་འབུམ།གླེགས་བམ། བཞི་པ༽རྡོ་གྲུབ་ཆེན་ཀུན་བཟང་གཞན་ཕན།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། མ་ཅིག་ལབ་ཀྱི་སྒྲོན་མའི་གཅོད་གཞུང་གི་ཆ་ལག་ལས་བཞི་ལྷུན་གྲུབ་ཀྱི་སྦྱིན་སྲེག་གི་ཆོ་ག༄༅། །མ་ཅིག་ལབ་ཀྱི་སྒྲོན་མའི་གཅོད་གཞུང་གི་ཆ་ལག་ལས་བཞི་ལྷུན་གྲུབ་ཀྱི་སྦྱིན་སྲེག་གི་ཆོ་ག་ཞེས་བྱ་བ་བཞུགས་པ་བི་ཛ་ཧ་རྃས། ཡུམ་ཆེན་ཀུན་ཏུ་བཟང་མོ་ཝཱ་ར་ཧི། །རིགས་ལྔ་མཁའ་འགྲོ་ཛྙཱ་ན་ས་ར་ཛ། །སྨོན་ལམ་གྲུབ་པའི་ཟློས་གར་ལབ་སྒྲོན་མརཿ །དད་གུས་མོས་པས་ལན་བརྒྱར་ཕྱག་འཚལ་ནས། །གཅོད་ཀྱི་མེ་མཆོད་ཀརྨ་ཆགས་མེད་ཀྱི། །གཞུང་བཞིན་ཚིག་ཉུང་དོན་བསྡུས་སྙིང་པོའི་བཅུད། །ལས་བཞི་ལྷུན་གྲུབ་ཡིད་བཞིན་དབང་སྔོན་མཆོག །སྐལ་བཟང་རྗེས་འཇུག་རྣམས་ཀྱི་སྤྱི་བོར་ངོམ། །དེ་ལ་ཡང་མ་ཅིག་ལབ་ཀྱི་སྒྲོན་མའི་གཅོད་གཞུང་གི་ཆ་ལག་ལས་བཞི་ལྷུན་གྲུབ་ཀྱི་སྦྱིན་བསྲེག་གི་ཆོ་ག་འདི་ལ་དོན་གསུམ་གྱིས་སྟོན་ཏེ། །སྔོན་འགྲོ་དངོས་གཞི་རྗེས་དང་གསུམ། དང་པོ་ལའང་སྦྱིན་བསྲེག་གི་དཀྱིལ་འཁོར་ནི་ས་སྟེགས་མདའ་གང་ལས་མི་ཆུང་བར། དཀར་རྩི་སོགས་ཀྱིས་མདོག་བསྒྱུར་ལ། དཀར་གཏོར་བཤམས་ཤིང་། ཕཊཿ ཅེས་བརྗོད་པས་རང་གི་སྙིང་ཁར་རྣམ་ཤེས་ཀྱི་ངོ་བོ་ཕག་མོ་མཐིང་ནག་གཅིག་གསལ་བ་དེ་དབུ་མའི་ལམ་ནས་ཚངས་བུའི་བུ་གར་ཐོན་འཕྲལ་ཁྲོས་མ་ནག་མོ་འཇིག་རྟེན་གྱི་ཁམས་གང་བ་ཙམ་དུ་གྱུར་ནས་ས་བདག་དང་ལྷ་འདྲེའི་ཚོགས་རྣམས་ཟིལ་གྱིས་གནོན་པར་གྱུར། བསྲུང་བྱ་རྣམས་ཀྱི་རྣམ་པར་ཤེས་པའི་ངོ་བོ་འོད་ཀྱི་ཐིག་ལེར་གྱུར་པ་དབུ་མའི་ལམ་ནས་བརྒྱུད་དེ་རང་གི་ཐུགས་ཀར་ཐིམ་པར་གྱུར། བདག་དང་བསྲུང་བྱ་རྣམས་ཀྱི་ཤ་ཁྲག་དང་དབྱེར་མེད་པར་དཀར་གསུམ་བདུད་རྩིའི་རྒྱ་མཚོ་ཆེན་པོར་གྱུར། ཕཊཿ མཐོ་སྲིད་རྩེ་ནས་མནར་མེད་ཡན་ཆད་ཀྱི་ལོ་དང་ཟླ་བ་ཞག་ཟ་མ་དུས་ཚོད་ལ་དབང་བྱེད་པའི་ས་བདག་ཀླུ་གཉན་གྱི་ཚོགས་མ་ལུས་པ་རྣམས་ལ། བདག་ལུས་ཞུ་བའི་བདུད་རྩིའི་རྒྱ་མཚོ་ཆེན་པོ་དང་དབྱེར་མེད་པའི་དཀར་གསུམ་ལས་གྲུབ་པའི་གཏོར་མ་འདི་བཞེས་ལ། བདག་གི་སྦྱིན་སྲེག་གི་ལས་སྒྲུབ་པ་ལ་ཀོ་ལོང་རུ་ང་ཕྲག་དོག་མ་བྱེད་པར། ས་འདི་གཡོར་ལ་ཁྱེད་རྣམས་བདེ་བའི་ས་གཞན་དུ་སྤོས་ཤིག གལ་ཏེ་མ་སྤོས་ན་ཁྱེད་ཅག་ལ་ཐབ་གཞོབ་ཀྱི་གནོད་པ་བྱུང་ན། ལེ་ལན་ལུས་གདོན་དཔྱོད་དོན་སོགས་དགྲ་བགེགས་རྣམས་ལ་ཆོད་ཅིག ༀ་སརྦ་ལོ་ཀ་པཱ་ལ་སྲི་ཐི་དི་ཝི་ས་པཱ་རི་ཝ་ར་ཨེ་དམ་བྷ་ལིང་ཏ་ཁཱ་ཧི་གཙྪཿ ཕཊཿ ཕཊཿ ཕཊཿ ཅེས་གཏོར་མ་འབུལ། དེ་ནས་ཐིག་སྐུད་ཚོན་རྣམས་མདུན་དུ་བཤམས། ཕཊཿ མདུན་གྱི་རྫས་རྣམས་ཡེ་ཤེས་མཁའ་འགྲོ་སྡེ་ལྔའི་སྐུར་གསལ་བ་ལས་འོག་མིན་ནས་དེ་འདྲ་བའི་ཡེ་ཤེས་པ་བྱོན་ནས་དབྱེར་མེད་དུ་ཐིམ་པར་གྱུར་པ་འོད་དུ་ཞུ་ནས་ཐིག་ཚོན་གྱི་རྣམ་པར་གྱུར། ༀ་ཧཱུྃ་ཏྲཾ་ཧྲཱིཿཨཱཿ ཕཊཿ ཕཊཿ ཕཊཿ དེ་ནས་ཐིག་ཆེན་མཐོང་བརྒྱུད་ལྟར་གསལ་བར་གདབ་ལ། རྒྱས་ན་སྦྱིན་བསྲེག་གི་གཞུང་ལྟར་དང་། བསྡུ་ན་ཆོས་འབྱུང་ཟུར་དྲུག་པའི་ལྟེ་བར་འདབ་བཞི་ཕྱོགས་མདོག་བྲིས་པས་ཆོག་གོ། དེའི་སྟེང་དུ་ཤིང་ནག་གང་རུང་གིས་ཆོས་འབྱུང་ཟུར་དྲུག་བརྩིགས་ལ། མེ་དར་ཡང་འཇུགས། རང་ཉིད་དཔྱོད་བར་དགྲ་ཡོད་ན་དེ་ཕྱོགས་དང་། མིན་ན་དགྲ་ཕྱོགས་སུ་ཁ་ཀྱུ་བའི་མོས་པ་དང་བཅས་ཏེ། རང་གི་གཡས་སུ་གཞི་དཀར་པོའི་སྟེང་ཁྲོས་མའི་གཏོར་མ་ཆེ་བ་གཅིག་དང་། མེ་ལྷའི་གཏོར་མ་ཆུང་བ་གཅིག་གཉིས་ཀ་ཟུར་གསུམ་ཤ་རྒྱན་ཅན། ཉེར་སྤྱོད་ལྔ་ནང་མཆོད་བཅས། གཡོན་ཕྱོགས་སུ་གཞི་ནག་པོ་ལ་སྐྱེར་ཤིང་སོགས་གང་འོས་ཀྱི་ཡམ་ཤིང་སོར་བརྒྱད་པ་བརྒྱ་རྩ། ལིང་གཟུགས་ཀྱང་དེ་མཉམ་ཤ་ཁྲག་གིས་སྦགས་པ། ཡུངས་དཀར་ནས་སྲན་མ་བཅས་བཤམས། མདུན་དུ་མར་ཁུ་དགང་གཟར་བླུགས་བཅས་དང་ཕྱོགས་བཞིར་སྣོད་གཙང་ནང་དུ་མཆོད་པ་ཆ་བཞི་དང་། དེའི་ཕྱོགས་བཞིར་ལས་བཞིའི་དབྱིབས་ཅན་གྱི་གཏོར་མ་རང་མདོག་བཞི་དང་། ཤར་དུ་ཏིལ་དང་གྲོ་སྨན་རྣམས་དང་། ལྷོར་འབྲས་སོ་བ་ཞོ་ཟན་ལ་ཟས་སྣ་ཚོགས་བཏབ་པ་རྣམས་དང་། ནུབ་ཏུ་སྲན་མ་ནས་མེ་ཏོག་སྣ་ཚོགས་པ། བྱང་དུ་ཀུ་ཤ་ཤིང་ཐོག་སྣ་ཚོགས་བུར་བ་དང་། གྲོ་མ་མངར་གསུམ་ཇ་ཕུད་རྣམས་བཤམས་ལ། རང་ཉིད་གདན་ལ་འདུག་ནས་སྔགས་ཆས་གྱོན། རྒྱས་པར་ཤོག་ལིང་ཆེ་བ་དང་ཟན་ལིང་བརྒྱ་རྩ་བརྒྱད། མིན་ཀྱང་དམིགས་རྟེན་གང་རུང་ཙམ་གྱིས་ཆོག་གོ། དང་པོ་ལིངྒར་ཁྲག་གིས་བྲན་ལ། ཕཊཿ རང་ཉིད་སྐད་ཅིག་གིས་ཁྲོས་མ་ནག་མོ་ཞལ་གཅིག་ཕྱག་གཉིས་ཀྱིས་གྲི་ཐོད་བསྣམས་ཤིང་ཁ་ཊྭཱཾ་ག་ལ་འཁྱུད་ནས་གར་བྱེད་པ། དུར་ཁྲོད་ཆས་བརྒྱད་གསོལ་ཞིང་མེ་དཔུང་འབར་བའི་ཀློང་ན་བཞུགས་པར་གྱུར། ན་མོ། གྲུབ་ཐོབ་གཅོད་ཡུལ་བརྒྱུད་པའི་བླ་མ་རྣམས་ཀྱི་བདེན་པ་དང་། མཆོག་གསུམ་རྩ་གསུམ་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ཁྱད་པར་དུ་ཡང་ཡི་དམ་ཁྲོས་མ་ལྷ་ལྔ་སོགས་དཔའ་བོ་མཁའ་འགྲོ་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བདེན་པ་དང་། ཆོས་ཉིད་འགྱུར་བ་མེད་པའི་བདེན་པ་དང་། ཆོས་ཅན་བསླུ་བ་མེད་པའི་བདེན་པ་ཆེན་པོའི་མཐུ་སྟོབས་བྱིན་རླབས་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་བདག་ཅག་དཔོན་སློབ་བསྲུང་བྱ་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་དགྲ་བགེགས་འབྱུང་པོ་ལོག་པར་འདྲེན་པའི་རིགས་སུ་གྱུར་པ་ཐམས་ཅད་གཟུགས་ལིངྒ་འདི་ལ་མྱུར་དུ་ཁུག་ཅིག །ཧ་རི་ནི་ས་གནོད་བྱེད་དགྲ་བགེགས་ཨ་ཀཪྵ་ཡ་ཛཿ བཛྲ་ཨཾ་ཀུ་ཤ་ཛཿ བཛྲ་པ་ཤ་ཧཱུྃ། བཛྲ་སྥོ་ཊ་བྃ། བཛྲ་གྷནྚེ་ཧོ། ཏྲི་ཛཿཧཱུྃ་བྃ་ཧོཿ ཕཊཿཕཊཿ འགུགས་པ་ཅི་ནུས་ལྡབ་ལ་གྲི་གུག་གམ་གྲི་བཟུང་ལ། ཧཱུྃ། ང་ནི་ཁྲོས་མ་ནག་མོ་སྟེ། །སྐུ་ཡིས་ས་གསུམ་གནས་ཀུན་ཁྱབ། །གར་དགུའི་ཉམས་ཀྱིས་ཁམས་གསུམ་དང་། །སྲིད་གསུམ་ལྷ་འདྲེ་དབང་དུ་བསྡུས། །སྲིད་རྩེ་ནས་བཟུང་མནར་མེད་ཡན། །འཇིགས་ཤིང་སྐྲགས་ལ་དཔའ་ཡང་ཞུམ། །ཕྱག་གཉིས་གྲི་གུག་ཐོད་ཁྲག་གིས། །འཇིག་རྟེན་ལྷ་འདྲེ་བསྔངས་ཤིང་བརྒྱལ། །གསུང་གི་ང་རོ་འབྲུག་ལྟར་སྒྲོགས། །བྱམས་བརྩེའི་ཐུགས་ཀྱིས་ཞེ་སྡང་གཅོད། །དམ་ཉམས་རཱུ་ཏྲ་འབྱུང་པོའི་ཚོགས། སྡུག་བསྔལ་ཕུང་པོ་ལུས་རྟེན་གཟུགས། །ཏིལ་འབྲུ་ཙམ་དུ་གཏུབ་པར་མཛོད། །མཱ་ར་ཡ་ཡི་དུས་ལ་བབ། ཨ་ཧ་རི་ནི་ས་གནོད་བྱེད་དགྲ་བགེགས་ཐམས་ཅད་ཀྱི་ལུས་ངག་ཡིད་གསུམ་མཱ་ར་ཡ་ཕཊཿ རྣམ་པར་ཤེས་པ་ཆོས་ཀྱི་དབྱིངས་སུ་ཕཊཿ ཕཊཿ ཕཊཿ ཕཊཿ ཅེས་ཤོག་ལིང་དང་ལིང་ག་ཆེ་ཆུང་གང་ཡོད་གཏུབས་ཁྲག་ཐིགས་བླུགས་སྣོད་གཅིག་ཏུ་བཞག་པ་དང་བསྲེག་རྫས་རྣམས་ལ་ནང་མཆོད་བྲན་ནས། ༀ་ཀརྨ་ཊཀྐི་ནི་ཧཱུྃ་ཕཊཿ ༀ་སྭཱ་བྷ་ཝ༴ སོགས་ནས། སྟོང་པའི་ངང་ལས་བྷནྡྷ་ལྕང་ལོ་ཅན་གྱི་ནང་དུ་དགྲ་བགེགས་བསྒྲལ་བའི་ཤ་ཁྲག་ངོ་བོ་ཡེ་ཤེས་ཀྱི་བདུད་རྩི་ཆེན་པོར་གྱུར། དེའི་ཕྱོགས་བཞིར་ལས་བཞིར་འོས་པའི་སྣོད་དཀར་སེར་དམར་ནག་བཞིའི་ནང་དུ་ལས་བཞི་སོ་སོའི་རྫས་ཡོ་བྱད་མ་ཚང་བ་མེད་པ་རང་རང་གི་ལས་འགྲུབ་པའི་ནུས་པ་དང་ལྡན་པར་གྱུར། ཕཊཿ ཕཊཿ རྡོར་དྲིལ་དང་བཅས་དགང་བླུགས་དངོས་སམ་ཕྱག་རྒྱས་རེག་ལ། ༀ་ཨཱཿཧཱུྃཿ ཋ་ཋ་ཋ་ཋ་ཋ་ཋཿ ༀ་ཨཱཿཧཱུྃ་སྭཱ་ཧཱཿ ཅེས་པས་མི་གཙང་བའི་དྲི་མ་དག་པར་བསམ། ༀ་ཤྲྀ་སྭཱ་ཧཱ། ཡམ་ཤིང་དང་། དེ་བཞིིན་དུ་ༀ་ཨཱཿསྭཱ་ཧཱཿ མར་ཁུ་དང་། ༀ་ཛིཾ་སྭཱ་ཧཱཿ ༀ་ཀུ་རུ་ཀུ་རུ་སྭཱ་ཧཱཿ འབྲུ་རྣམས་ལ་རེག་གོ། རྡོར་དྲིལ་བཅས་པ་དཔྱོད་སྟབས་ཀྱིས་ཐབ་ལ་གཡས་སྐོར་བྱ་ཞིང་། ཀྱཻ་མ་མི་མིན་ཡེ་ཤེས་མཁའ་འགྲོ་མ། མ་ཕ་རོལ་ཕྱིན་པའི་གྲུབ་ཐོབ་མ། སྐལ་ལྡན་ཡོངས་ཀྱི་རྒྱུད་གྲོལ་མ། མ་མི་མངོན་དབྱིངས་ནས་འདིར་འདིར་གཤེགས་ལ། ས་འདི་ལ་བྱིན་གྱིས་རླབས་ཏུ་གསོལ། ཨོ་རྒྱན་ཡུལ་གྱི་ཕྱོགས་བཞི་ན། རིམ་བཞིན་གཏུམ་དྲག་དུར་ཁྲོད་དང་། གད་རྒྱང་སྒྲོགས་དང་པདྨ་འཁྱིལ། ཀི་ལ་སྒྲོགས་པའི་དུར་ཁྲོད་ཡོད། །དབུས་ན་གསང་ཆེན་རབ་འཇིགས་ཏེ། །ལས་བཞི་དང་ནི་ལས་རྣམས་སྤྱི། །ཐམས་ཅད་ལྷུན་གྲུབ་ས་གཞི་ཡོད། །རང་བྱུང་མེ་ཆེན་དེ་ན་འབར། །རིགས་ལྔའི་མཁའ་འགྲོ་འདུ་བའི་གནས། །དོ་ནུབ་མེ་མཆོད་ས་གཞི་འདི། །མཁའ་འགྲོའི་གནས་ལྔར་བྱིན་གྱིས་རློབས། ས་གཞི་འདི་ལ་ཕྲག་དོག་མ་བྱེད་ཅིག །དེ་ནས་ལག་ཏུ་ཤིང་མགལ་ཆུང་ལྔའམ་གཅིག་ཁྱེར་ཏེ་འདོན་ཚིག་དང་མཚུངས་པའི་ཤིང་དུ་བསམས་ལ་གཡས་སྐོར་བྱེད་བཞིན། ཧཱུྃ་མཚམས་བཞི་དབུས་དང་ལྔ་པོ་རུ། རིགས་ལྔའི་མཁའ་འགྲོ་གཙོ་འཁོར་རྣམས། སྐུ་མདོག་དཀར་སེར་དམར་ལྗང་མཐིང་། ཙནྡན་དཀར་པོ་ཡུངས་ཤིང་སེར། ཙནྡན་དམར་པོ་སང་སྐྱེར་ཤིང་། བྱང་ཆུབ་ཤིང་དང་དཔག་བསམ་ཤིང་། །རང་རང་གནས་ནས་ཤིང་ཐུས་ལ། །ཞི་རྒྱས་དབང་དྲག་ཡེ་ཤེས་མེ། །ཐོགས་མེད་འབར་ཞིང་ལྷུན་གྲུབ་མཛོད། །བྱང་ཆུབ་ཐོབ་པའི་ལས་སྒྲུབས་ཤིག །ཅེས་དང་ཀུ་ཤའི་ཆུན་པོ་ཐོགས་ལ། ཧཱུྃ། ཀུ་ཤ་འདི་ནི་གཙང་ཞིང་དགེ། ཚངས་པ་ལྷ་རྣམས་དག་བྱེད་ཡིན། དཀོན་མཆོག་གསུམ་པོ་མཉེས་བྱེད་པ། ས་ལས་སྐྱེས་པ་འདབ་མའི་སྙིང་། བདག་གི་བགེགས་རྣམས་ཐམས་ཅད་ནི། ཞི་ཞིང་མེད་པར་མཛད་དུ་གསོལ། ༀ་བཛྲ་སརྦ༴ ཞེས་ཁ་ཁྱེར་དུ་བཀོད་དབུས་སུ་རྒྱ་གྲམ་གཅིག་བཞག དེ་ནས་མེ་ལྕེ་སྡེ་ལྔའམ་གཅིག་ཐོགས། ཧཱུྃ་ཕྱོགས་བཞི་དབུས་ལྔ་མཁའ་འགྲོའི་ཕོ་བྲང་ན། བུད་མེད་དཀར་སེར་དམར་ལྗང་མཐིང་གའི་མདོག །རང་རང་རིགས་ཀྱི་སྦུད་མཆུ་མཛེས་པར་ལྡན། །ཕྱག་ན་རྡོ་རྗེ་རིན་ཆེན་པདྨ་དང་། །རྒྱ་གྲམ་འཁོར་ལོ་མེ་འབར་ཕྱག་མཚན་བསྣམས། །ཁ་བརྒྱས་མེ་འབུད་ལག་བརྒྱས་འགལ་པ་བསྒུལ། །རིགས་ལྔའི་མཁའ་འགྲོས་ཡེ་ཤེས་ལྔ་ཡི་མེ། །ཐོགས་མེད་སྦོར་ལ་ལས་རྣམས་ལྷུན་གྲུབ་མཛོད། ཧ་རི་ནི་ས་ཨཿ ཤིནྟཾ་པུཥྚཾ་ཝ་ཤཾ་མ་ར་ཡ་ཛྙཱ་ན་ཛྭ་ལ་རཾ། མེད་དར་ལྔའམ་གཅིག་གཡུག་ཅིང་བསྐོར་བ་བྱ་ཞིང་། ཧཱུྃ་ཡེ་ཤེས་ལྔ་ཡི་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་བར། །མེ་ལྕེ་ཕྱོགས་བཞི་དབུས་ལྔར་མ་འཕྲོ་ཞིག །འཕྲོས་པར་གྱུར་ན་དེར་གནས་ལྷ་རྣམས་འཚིག །དེ་ཕྱིར་སྣ་ཚོགས་མེ་དར་འདི་ཡིས་གཡོབ། །བདག་གི་བསམ་པའི་དོན་རྣམས་འགྲུབ་པར་མཛོད། ༀ་ཨཱཿཧཱུྃཿ ཞེས་གཡབ་པོ། འདི་ལ་མེ་པྲ་བརྟགས་མི་དགོས་སོ། ༀ་ཀརྨ་ཊཀྐི་ནི་ཧཱུྃ་ཕཊཿ ༀ་སྭཱ་བྷ་ཝ༴ སོགས་ནས། སྟོང་པའི་ངང་ལས་མེ་རི་རྡོ་ར་བཅས་དང་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སུ་དྲག་པོའི་མེ་ཐབ་གྲུ་གསུམ་ནག་པོ་ཁ་ཁྱེར་ལ་རལ་གྲིས་མཚན་པ། དེའི་ནང་དུ་རྒྱས་པའི་མེ་ཐབ་སེར་པོ་གྲུ་བཞི། དེའི་ནང་དུ་ཞི་བའི་མེ་ཐབ་དཀར་པོ་ཟླུམ་པོ། དེའི་ནང་དུ་དབང་གི་མེ་ཐབ་དམར་པོ་ཟླ་གམ་དེ་དག་གི་ཁ་ཁྱེར་ལ་རིམ་བཞིན་རིན་ཆེན་རྡོ་རྗེ་པདྨ་རྣམས་ཀྱིས་མཚན་པ། དེའི་ནང་དུ་ཆོས་འབྱུང་དམར་པོ་ཟུར་དྲུག་པ། རྩ་བ་ཐུར་དུ་ཟུག་པ་ཁ་གདངས་གྱེན་དུ་བསྟན་པ་ཡངས་ཤིང་རྒྱ་ཆེ་བའི་དབུས་སུ་པདྨ་དང་ཉི་ཟླའི་གདན་ལ་རམ་དམར་ནག་ལས་མེ་ལྷ་ཨགྞེ་རཱ་ཛ་དམར་པོ་ཞལ་གཅིག་སྤྱན་གསུམ་ཨག་ཚོམ་འཕྱང་བ། ཕྱག་བཞིའི་གཡས་རིལ་བ་དང་བ་དན་གཡོན་རྩེ་གསུམ་དང་བགྲང་ཕྲེང་འཛིན་པ། ཚངས་སྐུད་དཀར་པོ་འཆང་བ་དྲང་སྲོང་གི་ཆ་བྱད་ཅན། ར་སྐྱེས་ཁམ་པའི་སྟེང་ན་ཕྱེད་སྐྱིལ་གྱིས་བཞུགས་པའི་ལྟོ་བ་ཡངས་ཤིང་། རྒྱ་ཆེ་བའི་དབུས་སུ་ཆོས་འབྱུང་ཟུར་དྲུག་པ་གདན་ཐབ་ཀྱི་དབུས་ན་སྣ་ཚོགས་པད་ཉི་རོའི་གདན་ལ་ཨ། མཐིང་ནག་དང་ཧ་རི་ནི་ས་ཡོངས་སུ་གྱུར་པ་ལས། ངོ་བོ་མ་ཅིག་ལབ་སྒྲོན་རྣམ་པ་ཁྲོས་མ་རིགས་ལྔར་གྱུར་པ་ནི། དབུས་སུ་བདུད་འདུལ་ཁྲོས་མ་ནག་མོའི་ཕྱག་གཡས་རྡོ་རྗེས་མཚན་པའི་གྲི་གུག་ཕྱར་བ་གཡོན་ཐོད་ཁྲག་དང་གྲུ་མོ་ཁ་ཊྭཱཾ་ག་ཞབས་གཡས་བསྐུམ་གཡོན་བརྐྱང་གིས་བཞུགས་པ། དེའི་ཤར་དུ་བདེ་ཆེན་དཀར་མོ། ལྷོར་རིན་ཆེན་དོན་འགྲུབ། ནུབ་ཏུ་དམར་མོ་སྒྲ་སྒྲོགས། བྱང་དུ་སྣ་ཚོགས་མཐར་ཕྱིན། བཞི་གའང་རིམ་བཞིན་ཕྱག་གཡས་པ་རྣམས་ན་འཁོར་ལོ་དང་རིན་ཆེན་པདྨ་རྒྱ་གྲམ་རྣམས་ཀྱིས་མཚན་པའི་གྲི་གུག་དང་། གཡོན་ཐོད་ཁྲག་ཐོགས་ཤིང་ཁ་ཊྭཱཾ་ག་ལ་འཁྱུད་པ། ཞབས་བརྐྱང་བསྐུམ་གཙོ་མོ་དང་ཚུལ་མཐུན་པ། ཐམས་ཅད་ཀྱང་ཞལ་གཅིག་སྤྱན་གསུམ་སྤྱི་གཙུག་རལ་བའི་རྩེ་ན་ཕག་ཞལ་རང་མདོག་དང་མཚུངས་པ་གྱེན་དུ་ངུར་བ། རུས་པའི་རྒྱན་དྲུག་དུར་ཁྲོད་ཀྱི་ཆས་བརྒྱད་གསོལ་བ། ལྷ་རྣམས་མེ་དཔུང་འབར་བའི་དབུས་ན་བཞུགས་ཤིང་ཞལ་རབ་ཏུ་གདངས་པའི་ནང་ནས་མེ་འབར་བའི་གནས་གསུམ་ཡི་གེ་གསུམ་དང་། ཁྲོས་མ་རིགས་ལྔའི་ཐུགས་ཀར་ཨ་ཧ་རི་ནི་ས་མེ་ལྷའི་ཐུགས་ཀར་རམ། དེ་རྣམས་ལས་འོད་ཟེར་འཕྲོས་པས་རང་རང་གི་གནས་ནས་ཡེ་ཤེས་པ་དང་འཇིག་རྟེན་གྱི་མེ་ལྷ་འཁོར་དང་བཅས་པ་སྤྱན་དྲངས་པར་གྱུར། བསམ་ལ། བཛྲ་ས་མ་ཡ་ཛཿ ཧཱུྃ་སྟོང་ཉིད་ཆོས་ཀྱི་དབྱིངས་ཀྱི་ཕོ་བྲང་དང་། །ཨོ་རྒྱན་ཡུལ་གྱི་ཕྱོགས་བཞིའི་དུར་ཁྲོད་ནས། །དབྱིངས་ཀྱི་མཁའ་འགྲོ་གཙོ་འཁོར་རྣམ་ལྔ་ལ། །མཁའ་འགྲོ་འབུམ་གྱིས་བསྐོར་བ་གཤེགས་སུ་གསོལ། །མཁའ་འགྲོའི་ཚོགས་རྣམས་གནས་འདིར་གཤེགས་ཙ་ན། །རིན་ཆེན་རུས་རྒྱན་དབུ་སྐྲ་ཐོར་ཚུགས་མཛེས། །རོལ་མོ་སིལ་སྙན་གླུ་ལེན་གར་སྟབས་ལྡན། །ཧཱུཾ་ཕཊ་སྒྲ་སྒྲོགས་བྱིན་རླབ་དངོས་གྲུབ་རྫོགས། །བདག་སོགས་བྱིན་གྱིས་རློབས་ཕྱིར་གཤེགས་སུ་གསོལ། ༀ། ཚུར་བྱོན་ཚུར་བྱོན་འབྱུང་བ་ཆེ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་སྒྲུབ་པ། །ཐུགས་རྗེ་སེམས་ཅན་དོན་གྱི་ཕྱིར། །འདི་ཉིད་དུ་ནི་གཤེགས་སུ་གསོལ། །ཛཿཧཱུྃ་བཾ་ཧོ། བཛྲ་ཊཀྐི་ནི་ས་མ་ཡ་ཧོ། ས་མ་ཡ་སྟྭཾ། ཏྲི་ཤ་ཡ་ཧོ། ཨེ་ཨ་ར་ལི་ཕཻཾ་ཕཻཾ། ༀ་ཌཱཀྐི་ཧཱུྃ་ཛཿ ཧཱུྃ་དབྱིངས་ཀྱི་མེ་ལྷ་མཁའ་འགྲོ་རིགས་ལྔ་དང་། །འཇིག་རྟེན་མེ་ལྷ་ཨགྣེ་རཱ་ཛ་སོགས། །ཡེ་ཤེས་འཇིག་རྟེན་མེ་ལྷའི་ཚོགས་རྣམས་ཀུན། །མེ་འབར་གདན་ལ་གཉིས་མེད་བརྟན་པར་བཞུགས། །བཛྲ་ཌཱཀྐི་ནི་ཨགྣེ་དྷེ་ཝ་ས་མ་ཡ་ཏིཥྛ་ལྷན། དབང་ལྷ་སྤྱན་དྲངས་དབང་བསྐུར་དྲི་མ་དག །ཆུ་ལྷག་ཡར་ལུད་མེ་ལྷར་རྣམ་སྣང་དང་། །མཁའ་འགྲོ་ལྔ་ལ་རིགས་ལྔས་དབུ་བརྒྱན་གྱུར། །ༀ་ཧཱུྃ་ཏྲྃ་ཧྲཱིཿཨཱཿཨ་བྷི་ཥིཉྩ་ཧཱུཾ། ཧཱུྃ་དུག་ལྔ་གནས་དག་ཡེ་ཤེས་ལྔ་ཡི་ངང་། །ཁྲོས་མ་རིགས་ལྔའི་སྐུ་ལ་ཕྱག་འཚལ་ལོ། །ཧཱུྃ་ཕྱི་མཆོད་ཉེར་སྤྱོད་བདུན་དང་རྫས་རྟགས་བརྒྱད། །འདོད་ལྔའི་ལོངས་སྤྱོད་སྦྱོར་སྒྲོལ་སྨན་རག་གཏོར། །ཕྱི་ནང་གསང་མཆོད་དཔག་མེད་ཅི་མཆིས་ཀུན། །ཡེ་ཤེས་འཇིག་རྟེན་མེ་ལྷར་འབུལ་གྱིས་བཞེས། །རབ་འབྱམས་ཕྲིན་ལས་མ་ལུས་འགྲུབ་པ་དང་། །མཆོག་དང་ཐུན་མོང་དངོས་གྲུབ་མྱུར་དུ་སྩོལ། །ཨ་ཧ་རི་ནི་ས་ཨགྣེ་དྷེ་ཝ་ཨརྒྷཾ། སོགས། ཤབྟ་གྷནྡྷེ་ར་ས་སྤཪྴེ་སརྦ་པཉྩ་རཀྟ་བ་ལིང་ཏ་མ་ཧཱ་སུ་ཁ་ས་མ་ཡ་ཧཱུྃ། མེ་ལྷ་ཁྱོད་ཉིད་མེ་འབར་བ་དང་ལྷན་ཅིག་བཞུགས་ནས་སྲེག་བླུགས་ཀྱི་རྫས་འདི་རྣམས་ཆུད་མི་ཟ་བར་ཡེ་ཤེས་མཁའ་འགྲོ་སྡེ་ལྔའི་ཞལ་དུ་འབུལ་བས་ཕྲིན་ལས་དམ་པ་ཡིད་བཞིན་དུ་འགྲུབ་པར་མཛད་དུ་གསོལ། དགང་བླུགས་ཀྱི་ཁར་ཧཱུྃ་དང་མེ་ལྷའི་ལྗགས་རཾ་ཡིག་གིས་མཚན་པས་བསྲེག་རྫས་བདུད་རྩིའི་རང་བཞིན་ཅན་གསོལ་ཞིང་ཚིམས་ནས་མཉེས་པར་གྱུར། བསམ་ཨ་ཧ་རི་ནི་ས་ཨགྣེ་དྷེ་ཝ་བྷོ་དྷི་པྲྀཀྵ་ཡེ་གཟི་བརྗིད་ཕུན་སུམ་ཚོགས་པ་སརྦ་སིདྡྷི་སྭཱཧཱ། བརྒྱ་རྩའམ་ཉེར་གཅིག་རེས་ཆོག་མར་ཁུ་ལ་དགང་བླུགས་ཡོད་དམ་མིན་ཡང་དམིགས་པས་ཕུལ་ལ། ཨ་ཧ་རི་ནི་ས་ཨགྣེ་དྷེ་ཝ་ཨགྣེ་འབྱོར་བ་ཕུན་སུམ་ཚོགས་པ་སརྦ་སིདྡྷི་སྭཱཧཱ། གོང་ལྟར་རོ། དེ་ནས་ལིང་ག་ཤ་དུམ་ཧོཾ་གཟར་རི་དང་རང་གི་ལག་པ་གཙང་མར་བཀྲུས་ཏེ་ཕུལ་ཡང་རུང་ལ་གོང་ལྟར་ཡང་ཁྲག་ཆུ་ཆང་གསུམ་གྱིས་བྲན་པ་བཞིན་ཕུལ་ལ། ལྷ་རྣམས་ཞལ་ཤིན་ཏུ་གདངས་པའི་ནང་དུ་གནོད་བྱེད་ཐམས་ཅད་རྐང་མཐིལ་སྐྱ་ལྷག་ལྷག་སོང་ནས་རྣམ་ཤེས་ཆོས་ཉིད་ཀྱི་ངང་དུ་ཐིམ་ནས་སངས་རྒྱས་པར་བསྒོམ་ལ། ཧཱུྃ་དྲང་སྲོང་ཆེན་པོ་མེ་ལྷ་ཡི། །སྔོན་གྱི་དམ་བཅས་མནའ་དོར་བ། །ལྷ་རྣམས་ཞལ་ནི་མེ་ཡིན་ཏེ། །སྦྱིན་སྲེག་དེ་ནི་མེ་ལ་གནས། །སྦྱིན་སྲེག་མཆོད་པ་འདི་བཞེས་ལ། །ལས་ཀུན་འགྲུབ་པའི་གྲོགས་མཛོད་ཅིག །ༀ་ཨགྣེ་དྷེ་ཝ་གནོད་བྱེད་གདོན་བགེགས་སརྦ་མ་ར་ཡ་ཛྭ་ལ་རཾ་ཁཱ་ཧི། ཅེས་ལིངྒ་བདུན་འབུལ། མེ་ལྷའི་ཐུགས་ལས་སྤྲུལ་པའི་མེ་ལྷ་གཅིག །བྱོན་ནས་ལྟོ་བར་བཞུགས་པའི་ལྷ་རྣམས་ལ། མཆོད་རྫས་ཕུལ་བའི་ཕྱག་ཚང་མཛད་པར་གྱུར། ༀ་བཛྲ་ཝ་ར་ཧི་ཀྲོ་ཏི་ཀ་ལི་གནོད་བྱེད་གདོན་བགེགས་སརྦ་མ་ར་ཡ་ཛྭ་ལ་རཾ་ཁཱ་ཧི། ཞེས་བརྒྱ་རྩ་འབུལ། ཞི་བ་གཙོ་ཆེ་ན་ཉེར་གཅིག་གིས་ཆོག །ༀ་བཛྲ་ཝ་ར་ཧི་ཀྲོ་ཏི་ཀ་ལི་སརྦ་ཨརྠ་སིདྡྷི་ཡེ་གནོད་བྱེད་གདོན་བགེགས་སརྦ་མ་ར་ཡ་ཧཱུྃ་ཕཊ་སྭཱཧཱ། ཡུངས་ཀར་གོང་བཞིན་འབུལ། ༀ་བཛྲ་ཝ་ར་ཧི་ཀྲོ་ཏི་ཀ་ལི་བཛྲ་མ་ཧཱ་བ་ལ་ཡེ་གནོད་བྱེད་གདོན་བགེགས་ཐམས་ཅད་ཀྱི་སྟོབས་སརྦ་མ་ར་ཡ་ཧཱུྃ་ཕཊ་སྭཱཧཱ། ཞེས་སྲན་མ་འབུལ། ༀ་བཛྲ་ཝ་ར་ཧི་ཀྲོ་ཏི་ཀ་ལི་མ་ཧཱ་བྷེ་ག་ཡེ་གནོད་བྱེད་གདོན་བགེགས་ཐམས་ཅད་ཀྱི་ཤུགས་མ་ར་ཡ་ཧཱུྃ་ཕཊཿསྭཱཧཱ། ཞེས་པས་ནས་འབུལ། དེ་ནས་གཏོར་མ་ཆེ་བ་དེར་བདུད་རྩིས་བྲན་ལ་བཟུང་བཅུག་ལ། ཨ་ལས་བྷནྡྷ་ལྕང་ལོ་ཅན་གྱི་ནང་དུ་གཏོར་མ་གདོན་བགེགས་ཀྱི་ཤ་ཁྲག་བདུད་རྩིའི་རང་བཞིན་དུ་གྱུར། ༀ་ཨཱཿཧཱུྃ་ཧ་ཧོ་ཧྲཱིཿསྭཱ་ཧཱཿ ༀ་བཛྲ་ཝ་ར་ཧི་ཀྲོ་ཏི་ཀ་ལི་ཨེ་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། སྔགས་ལན་གསུམ། བསྟོད་པ་ནི། ཧཱུཾ་དུས་གསུམ་རྒྱལ་བ་ཐམས་ཅད་བསྐྱེད་མཛད་ཅན། ལབས་ཀྱི་སྒྲོན་མ་ཁྲོས་མ་རྣལ་འབྱོར་མ། །གནས་ཡུལ་དུར་ཁྲོད་མཁའ་འགྲོའི་སྤྲུལ་གཞི་མཆོག །འབུམ་ཕྲག་མཁའ་འགྲོའི་ཚོགས་ལ་ཕྱག་འཚལ་བསྟོད། །སྐུ་གསུང་ཐུགས་ཡོན་ཕྲིན་ལས་རྣམ་རོལ་ནི། །སྐུ་གསུམ་ཞིང་གི་མཁའ་འགྲོའི་ཚོགས་རྣམས་དང་། །དབྱེར་མེད་ཕྲིན་ལས་མཛད་པ་མཁའ་དང་མཉམ། །འཁོར་འདས་ཡོང་ལ་དབང་བསྒྱུར་ཁྱོད་ལ་བསྟོད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །འབར་བ་མེ་ཡི་མཆོད་པ་འདི་བཞེས་ལ། །གནོད་བྱེད་གདོན་བགེགས་འབྱུང་པོ་ཚར་ཆོད་ཅིག །བཅོལ་པའི་ཕྲིན་ལས་ཐམས་ཅད་གྲུབ་པར་མཛོད། གཏོར་མ་ཆེ་ན་རྩེ་མེ་ནང་དུ་མཆོད། ཆུང་ན་ཐམས་ཅད་འཕངས་ལ། ཕཊཿ སྒྲ་དྲག་པོ་དང་བཅས་ཌར་དྲིལ་དཀྲོལ་ལོ། དེ་ནས་བདེ་ཆེན་དཀར་མོའི་ཞལ་ཅུང་ཟད་གདངས་པའི་ནང་དུ་ཞི་བའི་བསྲེག་རྫས་རྣམས་མཐེབ་མཛུབ་ཀྱིས་འབུལ་བཞིན། ༀ་བཛྲ་ཌཱཀྐི་ནི་སརྦ་པ་པཾ་ད་ཧ་ན་བཛྲ་ཡེ་སྡིག་པ་དང་སྒྲིབ་པ་ཐམས་ཅད་ཤིནྟཾ་ཀུ་རུ་སྭཱཧཱ། ཏིལ་ལམ་ཡུངས་ཞི་འབུལ། སྡིག་པ་སྦྱོང་ན་བརྒྱ་རྩ་བརྒྱད་དང་། གཞན་ལ་ཉེར་བདུན་ཙམ། ཧ་བཛྲ་ཌཱཀྐི་ནི་ཨེ་ཥ་དྷི་བཛྲ་ཀསྨ་རི་ནད་སརྦ་ཤིནྟཾ་ཀུ་རུ་ཡེ་སྭཱཧཱཿ ཞེས་སྨན་སྣ་ཚོགས་འབུལ། གྲོ་ལ་སྨན་བཏབ་གོང་དང་འདྲ། དེ་ནས་གཏོར་མ་ཟླུམ་པོ་འོ་མས་བྲན་པ་བཟུང་ནས། བྷྲུཾཿལས་དངུལ་གྱི་སྣོད་དུ་གཏོར་མ་དཀར་གསུམ་མངར་གསུམ་འདོད་པའི་ཡོན་ཏན་ལྔ་དང་ལྡན་པར་གྱུར། ༀ་ཨཱཿཧཱུྃ་ཧ་བཛྲ་ཌཱཀྐི་ནི་ཨེ་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧིཿ གསུམ། ཧཱུཾ་ཧཱུཾ། ཧ་ལས་བྱུང་བའི་བདེ་ཆེན་དཀར་མོ་ནི། ཞེ་སྡང་རྣམ་དག་མེ་ལོང་ཡེ་ཤེས་སྐུ། ཞི་བའི་ལས་མཛད་རྡོ་རྗེ་རྣལ་འབྱོར་མ། རྡོ་རྗེ་མཁའ་འགྲོ་འབུམ་གྱི་འཁོར་དང་བཅས། བདེ་ཆེན་དཀར་མོའི་སྐུ་ལ་ཕྱག་འཚལ་བསྟོད། དམ་རྫས་དཀར་གསུམ་བརྒྱན་པའི་གཏོར་མ་དང་། འབར་བ་མེ་ཡི་མཆོད་པ་འདི་བཞེས་ལ། སྡིག་སྒྲིབ་ནད་གདོན་འཇིགས་བརྒྱད་ཞི་བར་མཛོད། བཅོལ་བའི་ཕྲིན་ལས་ཐམས་ཅད་འགྲུབ་པར་མཛོད། ཅེས་འབུལ། ཕཊཿ སྒྲ་དལ་ཞིང་འཇམ་པར་བརྗོད་ལ་ཌ་དྲིལ་བྱའོ། དེ་ནས་བསྲེག་རྫས་སེར་མོ་དོན་འགྲུབ་ཀྱི་ཞལ་དུ་འབུལ་བའི་དམིགས་པ་གོང་ལྟར་རོ། རི་རཏྣ་ཌཱཀྐི་སརྦ་སམ་བྷ་དེ་བདེ་ལེེགས་ཕུན་སུམ་ཚོགས་པ་སརྦ་པཥྚིཾ་ཀུ་རུ་ༀཿ ཞོ་ཟན་ལ་ཟས་སྣ་ཚོགས་བཏབ་པ་བསོད་ནམས་འཕེལ་བར་འདོད་ན་སྔ་མ་བཞིན་ནོ། རི་རཏྣ་ཌཱཀྐི་ནི་བཛྲ་ཨ་ཡུ་ཥེ། ཚེ་ཕུན་སུམ་ཚོགས་པ་སརྦ་པུཥྚཾ་ཀུ་རུ་ༀཿ དུར་བ་འབུལ། ཚེ་འཕེལ་བར་འདོད་ན་འདི་མང་བར་བྱའོ། རི་རཏྣ། ཌཱཀྐི་ནི་བཛྲ་བི་ཛ་ཡེ། ནོར་དང་འབྲུ་ཕུན་སུམ་ཚོགས་པ་སརྦ་པུཥྚཾ་ཀུ་རུ་ༀཿ སོ་བ་ཕུལ། ནོར་དང་ཞིང་གི་རིམ་གྲོར་འདི་མང་བར་འབུལ་ལོ། རི་རཏྣ་ཌཱཀྐི་ནི་བཛྲ་པུཥྚ་ཡེ་བསོད་ནམས་ཕུན་སུམ་ཚོགས་པ་སརྦ་པུཥྚཾ་ཀུ་རུ་ༀཿ ཞེས་འབྲས་འབུལ། དེ་ནས་གཏོར་མ་གྲུ་བཞི་ལ་བདུད་རྩི་བྲན་ལ། བྷྲུཾཿ ལས་རིན་པོ་ཆེ་གསེར་གྱི་སྣོད་དུ་ཟས་ཕུན་སུམ་ཚོགས་པའི་གཏོར་མ་རོ་བརྒྱ་ནུས་པ་སྟོང་དང་ལྡན་པར་གྱུར། ༀ་བཛྲ་སྥ་ར་ཎ་ཁཾ། རི་རཏྣ་ཌཱཀྐི་ནི་ཨེ་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། གསུམ་ཧཱུཾ་ཧཱུཾ། རི་ལས་བྱུང་བའི་སེར་མོ་དོན་འགྲུབ་ནི། །ང་རྒྱལ་རྣམ་དག་མཉམ་ཉིད་ཡེ་ཤེས་སྐུ། །རྒྱས་པའི་ལས་མཛད་རིན་ཆེན་རྣམ་འབྱོར་མ། །རིན་ཆེན་མཁའ་འགྲོ་སེར་མོ་འབུམ་དང་བཅས། །སེར་མོ་དོན་གྲུབ་སྐུ་ལ་ཕྱག་འཚལ་བསྟོད། །དམ་རྫས་ཟས་སྣ་ཚོགས་པའི་གཏོར་མ་དང་། །འབར་བ་མེ་ཡི་མཆོད་པ་འདི་བཞེས་ལ། །ཚེ་དང་བསོད་ནམས་ལོངས་སྤྱོད་རྒྱས་པར་སྤེལ། །བཅོལ་བའི་ཕྲིན་ལས་ཐམས་ཅད་འགྲུབ་པར་མཛོད། །ཅེས་གཏོར་མའི་རྩེ་མེ་ནང་དུ་འབུལ། ལྷག་མ་དངོས་གྲུབ་ཏུ་རོལ། ཕཊཿ སྒྲ་ཆེ་ཞིང་ལྷོད་འབོལ་དང་བཅས། གོང་བཞིན་དར་མོ་སྒྲ་སྒྲོགས་ཀྱི་ཞལ་དུ་ཕུལ་བའི་གསོ་འདུན་དང་བཅས་ཏེ། ནི་པདྨ་ཌཱཀྐི་ནི་བཛྲ་མ་ཧཱ་བ་ལ་ཡེ་སྟོབས་ཕུན་སུམ་ཚོགས་པ་སརྦ་པ་ཤཾ་ཀུ་རུ་ཧོ། ཞེས་སྲན་མ་འབུལ། ནི་པདྨ་ཌཱཀྐི་ནི་མ་ཧཱ་བེ་ག་ཡེ་ཤུགས་ཕུན་སུམ་ཚོགས་པ་སརྦ་པ་ཤཾ་ཀུ་རུ་ཧོ། ནས་གྲངས་ཅི་རིགས་འབུལ། ནི་པདྨ་ཌཱཀྐི་ནི་བཛྲ་པུཥྤེ་ཁ་དོག་དང་གཟི་བརྗིད་ཕུན་སུམ་ཚོགས་པ་སརྦ་པ་ཤཾ་ཀུ་རུ་ཧོ། མེ་ཏོག་སྣ་ཚོགས་འབུལ། དེ་ནས་གཏོར་མ་ཟླ་གམ་ཆང་གིས་བྲན་ལ་བཟུང་བཅུག་ལ། བྷྲུཾ་ལས་ཟས་ཀྱི་སྣོད་དུ་ཆང་སྣ་ཚོགས་དང་ལྡན་པའི་གཏོར་མ་བདུད་རྩིའི་རང་བཞིན་དུ་གྱུར། ༀ་སརྦ་པཉྩ་ཨཱཿཧཱུྃ། ནི་པདྨ་ཌཱཀྐི་ནི་ཨེ་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཧཱུཾ་ཧཱུཾ། ནི་ལས་བྱུང་བའི་དམར་མོ་སྒྲ་སྒྲོགས་ནི། །འདོད་ཆགས་རྣམ་དག་སོར་རྟོགས་ཡེ་ཤེས་སྐུ། །དབང་གི་ལས་མཛད་པདྨ་རྣལ་འབྱོར་མ། །པདྨ་མཁའ་འགྲོ་དམར་མོ་འབུམ་དང་བཅས། །དམར་མོ་སྒྲ་སྒྲོགས་སྐུ་ལ་ཕྱག་འཚལ་བསྟོད། །དམ་རྫས་ཆང་སྣ་ཚོགས་པའི་གཏོར་མ་དང་། །འབར་བ་མེ་ཡི་མཆོད་པ་འདི་བཞེས་ལ། །ཁམས་གསུམ་སྲིད་གསུམ་སྣང་བ་དབང་དུ་བསྡུད། །བཅོལ་བའི་ཕྲིན་ལས་ཐམས་ཅད་གྲུབ་པར་མཛོད། །ཅེས་གཏོར་མ་ཕུལ་ལོ། ཕཊཿ སྒྲ་སྐད་སྙན་འགྱུར་དབྱངས་སུ་བརྗོད། ཡང་བསྲེེག་རྫས་རྣམས་སྣ་ཚོགས་མཐར་ཕྱིན་གྱི་ཞལ་དུ་དམིགས་པ་གོང་ལྟར་བྱས་ལ། ས་ཀརྨ་ཌཱཀྐི་ནི་ཤྲྀ་བ་ཡེ་རིགས་རྒྱུད་ཕུན་སུམ་ཚོགས་པ་སརྦ་སིདྡྷི་སྭཱཧཱ། ཤིང་ཏོག་སྣ་ཚོགས་འབུལ། རིགས་རྒྱུད་ལ་ནི་འདི་གཙོ་ཆེ། ས་ཀརྨ་ཌཱཀྐི་ནི་བཛྲ་མ་ལེ་པུཥྚ་ཡེ་ཤེས་རབ་ཕུན་སུམ་ཚོགས་པ། སརྦ་སིདྡྷི་སྭཱཧཱ། ཞེས་ཐུད་དམ་ཆུར་བ་གྲོ་མ་འབུལ། འདི་དྲག་པོ་གཙོ་ཆེ་ཕྱིར་དཀར་གསུམ་མེད་ཀྱང་རུང་། ས་ཀརྨ་ཌཱཀྐི་ནི་ཝསྟྲ་ཡེ། རྒྱན་དང་གོས་ཕུན་སུམ་ཚོགས་པ་སརྦ་སིདྡྷི་སྭཱཧཱ། གོས་དར་རས་སོགས་འབུལ། ས་ཀརྨ་ཌཱཀྐི་ནི་ཏ་བུ་ལ་ཡེ། བཀྲ་ཤིས་ཕུན་སུམ་ཚོགས་པ་སརྦ་སིདྡྷི་སྭཱ་ཧཱ། ཇ་ཕུད་འབུལ། ས་ཀརྨ་ཌཱཀྐི་ནི་ཨ་པྲ་ཏི་ཧ་ཏ་བཛྲ་ཡེ་སྲུང་བ་ཕུན་སུམ་ཚོགས་པ་སརྦ་སིདྡྷི་སྭཱཧཱ། ཀུ་ཤ་འབུལ་སྲུང་རིམ་ལ་འདི་མང་འཇུག་གོ། །དེ་ནས་གཏོར་མ་ཟུར་གསུམ་དེར་ཁྲག་ཆང་གིས་བྲན་ནས་བཟུང་བཅུག་ལ། ཨ་ཡིག་ལས་ཐོད་པའི་སྣོད་དུ་ཤ་སྣ་ཚོགས་ཀྱི་གཏོར་མ་བདུད་རྩིའི་རང་བཞིན་དུ་གྱུར། ༀ་མ་ཧཱ་མཾ་ས་ཨ་ཧཱུཾ། ས་ཀརྨ་ཌཱཀྐི་ནི་ཨེ་དམ་བྷ་ལིང་ཏ༴ སོགས། ཧཱུཾ་ཧཱུཾ། ས་ལས་བྱུང་བའི་སྣ་ཚོགས་མཐར་ཕྱིན་མ། །ཕྲག་དོག་རྣམ་དག་ནན་ཏན་ཡེ་ཤེས་སྐུ། །དྲག་པོའི་ལས་མཛད་ལས་ཀྱི་རྣལ་འབྱོར་མ། །ལས་ཀྱི་མཁའ་འགྲོ་འབུམ་གྱི་འཁོར་དང་བཅས། །སྣ་ཚོགས་མཐར་ཕྱིན་སྐུ་ལ་ཕྱག་འཚལ་བསྟོད། །དམ་རྫས་ཤ་སྣ་ཚང་བའི་གཏོར་མ་དང་། །འབར་བ་མེ་ཡི་མཆོད་པ་འདི་བཞེས་ལ། །དངོས་གྲུབ་ཕྲིན་ལས་སྣ་ཚོགས་མྱུར་དུ་སྒྲུབས། །བཅོལ་པའི་ཕྲིན་ལས་ཐམས་ཅད་འགྲུབ་པར་མཛོད། །ཅེས་གཏོར་མ་མེར་ཕུལ། ཕཊཿ སྒྲ་ཆེ་ཆུང་རིང་ཐུང་མང་དུ་བརྗོད། དེ་ནས་མེ་ལྷའི་གཏོར་མར་མར་ཁུས་བྲན་ལ་སྦྱིན་བདག་གིས་ཐབ་གཡོན་ངོས་སུ་བཟུང་ལ། བྷྲུཾ་ལས་རིན་པོ་ཆེའི་སྣོད་དུ་སྣ་ཚོགས་གཏོར་མ་འདོད་པའི་ཡོན་ཏན་ལྔ་དང་ལྡན་པར་གྱུར། ༀ་ཨ་ཀཱ་རོ་མུ་ཁཾ༴ སོགས་གསུམ། ༀ་ཨག་ནེ་ཡེ་དྷེ་ཝ་ཨེ་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། གསུམ། མེ་སྟེ་བསྲེག་བྱ་ཟ་བའི་ལྷ། དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། མཆོད་ཅིང་བསྟོད་དེ་ཕྱག་ཀྱང་འཚལ། འདི་མན་དེར་ཚོགས་པ་ཀུན་གྱིས་རྗེས་ཟློས་བྱེད་སྲོལ་འདུག དམ་རྫས་གཏོར་མ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྙན་པ་དང་། །ལོངས་སྤྱོད་རྒྱ་ཆེན་འཕེལ་བ་དང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོངས་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །དགེ་ལེགས་ཐམས་ཅད་འབྱུང་བ་དང་། །ཡིད་ལ་འདོད་པ་ཀུན་འ གྲུབ་ཤོག །ཚིག་རྗེས་མ་ལན་གསུམ་བརྗོད་ལ་མེ་ནང་དུ་ཕུལ། ཕཊཿ མང་དུ་བརྗོད། དེ་ནས་སྦྱིན་བདག་རྣམས་མདུན་དུ་འཁོད་ལ་མེ་ཞགས་བརྒྱབ་རྫས་མཐོང་བརྒྱུད་བཞིན་ལག་ཏུ་ཐོགས་ལ། ཁྲོས་མ་རིགས་ལྔའི་སྐུ་ལས་མེ་དཔུང་བཟོད་པར་དཀའ་བ་འཕྲོ་བར་བསྒོམས་ལ། ད་ཁྱོད་རང་རྣམས་མ་ཡེངས་པར་དམིགས་པ་འདི་བཞིན་དུ་མཛོད་ཅིག ངེད་ཅག་རྣམས་ཐ་མལ་དུ་མི་སེམས་པར་དུར་ཁྲོད་མེ་དཔུང་འབར་བའི་ཀློང་དཀྱིལ་དུ་མ་ཡུམ་ཆེན་ཁྲོས་མ་རིགས་ལྔར་གསལ་བའི་སྐུ་ལས་ཡེ་ཤེས་ཀྱི་མེ་དཔུང་། ཁ་དོག་ལྔ་ལྡན་དུས་མཐའི་མེ་བཞིན་འབར་བའི་རྩེ་མོ་ལས་ལས་བྱེད་ཀྱི་མཁའ་འགྲོ་དམེ་བ་བརྩེགས་པ་སྐུ་མདོག་དམར་ནག་ལག་ན་མེའི་མཚོན་ཆ་སྣ་ཚོགས་ཐོགས་པ་དཔག་ཏུ་མེད་པ་འཕྲོས་པས་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་བར་དུ་གཅོད་པར་བྱེད་པའི་ཕྱི་ནང་གསང་གསུམ་གྱི་གདོན་བགེགས་སྲི་ངན་འབྱུང་པོའི་ཚོགས་རྣམས་རྣམ་སྨིན་གྱི་ལུས་རྟེན་དང་བཅས་པ་བྱ་སྒྲོ་མེས་ཚིག་པའམ་མེ་ལྕེའི་ཁའི་སྦྲང་བུ་བཞིན་ཚིག་པའི་མོས་འདུན་རྩེ་གཅིག་ཏུ་གྱིས་ཤིག ཧཱུྃ། བྱང་ཕྱོགས་ལས་ཀྱི་རིགས་ཀྱི་དུར་ཁྲོད་དང་། །ནུབ་ཕྱོགས་པདྨ་རིགས་ཀྱི་དུར་ཁྲོད་དང་། །ལྷོ་ཕྱོགས་རིན་ཆེན་རིགས་ཀྱི་དུར་ཁྲོད་དང་། །ཤར་ཕྱོགས་རྡོ་རྗེ་རིགས་ཀྱི་དུར་ཁྲོད་དང་། །དབུས་ཕྱོགས་དེ་བཞིན་རིགས་ཀྱི་དུར་ཁྲོད་ཆེ། །རིགས་ལྔ་མཁའ་འགྲོའི་ཞིང་ཁམས་འཇིགས་རུང་ནས། །ཡེ་ཤེས་ལྔ་ཡི་མེ་དཔུང་འབར་བ་འདི། །ལན་ཅིག་གནོད་བྱེད་འདྲེ་གདོན་སྟེང་དུ་འཕྲོ། །མེ་ལྕེ་སྣ་ལྔའི་ཟེར་གྱིས་སྟོང་གསུམ་གང་། །ཡེ་ཤེས་མཁའ་འགྲོའི་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚ་ཚ་སྐར་ལྟར་འཁྲུགས། །མཁའ་འགྲོ་སྡེ་ལྔའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ལ། །རབ་འབྱམས་ཕྲིན་ལས་འགྲུབ་པའི་ལས་མཛོད་ཅིག །བདག་ལ་མཆོག་ཐུན་དངོས་གྲུབ་ཀུན་སྩོལ་ཅིག ས་ཀརྨ་ཌཱཀྐི་ནི། ནི་པདྨ་ཌཱཀྐི་ནི། རི་རཏྣ་ཌཱཀྐི་ནི། ཧ་བཛྲ་ཌཱཀྐི་ནི། ༀ་བཛྲ་ཝ་ར་ཧི་ཀྲོ་ཏི་ཀ་ལི་གནོད་བྱེད་ཨུ་ཙ་ཏ་ཡ་ཛྭ་ལ་རཾ། ཞེས་བརྗོད་ཅིང་། ཕཊཿ སྒྲ་དྲག་པོ་དང་བཅས་ཏེ་རླུང་ངར་མེ་གདང་དང་ལྡན་པས་མེ་ཞགས་བརྒྱབ་པོ། དེ་ནས་ཁྱིམ་གྱི་ནང་དང་དུད་འགྲོའི་ལྷས་མལ་སོགས་ལ་མེ་ཐོ་ཁ་ཤས་འཇོག་པར་བྱས་ལ་འདི་སྐད་དོ། ཧཱུྃ་དུག་ལྔ་འཇོམས་པའི་མེ་དཔུང་བཟོད་དཀའ་བ། །སྟེང་འོག་བར་གསུམ་ཀུན་དུ་ཡོངས་མཆེད་པའི། །ཁ་དོག་སྣ་ཚོགས་དཔག་མེད་ཆོ་འཕྲུལ་འབར། །ཁྲོ་བོ་སྨེ་བརྩེགས་ཧཱུྃ་དང་ཕཊཿསྒྲོགས་པས། །གནོད་བྱེད་འདྲེ་གདོན་བྱུར་གསུམ་ལྷག་མེད་གཞོམ། །གནོད་ཅིང་འཚེ་བར་བྱེད་པའི་དགྲ་འདྲེ་དཔུང་། །རྩྭ་ཕུང་མེས་བསྲེགས་ཇི་བཞིན་ཐལ་བར་རློགས། །ཨ་ཧ་རི་ནི་ས་ༀ་གྷར་ཁཾ་ཙིར་ཁཾ་བྷི་མ་ལེ་ཨུ་ཙ་མ་ཀྲོ་ཏ་ཧཱུྃ་ཕཊཿ གནོད་བྱེད་སརྦ་ཨུ་ཙ་ཏ་ཡ་ཧཱུྃ་ཕཊཿ ཞེས་མེ་ཞགས་གང་དགོས་བརྒྱབ་རྗེས། འགལ་དུམ་འབར་འཕྲོ་ཐམས་ཅད་ཐབ་ཏུ་བཅུག་ལ། དེ་ནས་ཐབ་ཀྱི་གཡས་བསྐོར་ཏེ་ཌ་དྲིལ་དང་བཅས་བྲོ་བརྡུང་འདི་བཞིན་བྱ་སྟེ། ཧཱུཾ་ཕྱོགས་བཞི་དབུས་ལྔའི་ས་གཞི་ལ། །མཁའ་འགྲོ་སྡེ་ལྔས་བྲོ་བརྡུངས་པས། །ཡེ་ཤེས་མཁའ་འགྲོས་བྲོ་དཔོན་དང་། །ལས་བྱེད་མཁའ་འགྲོས་བྲོ་གར་མཛོད། །དཔའ་བོའི་བྲོ་བརྡུང་ཁྲིགས་སེ་ཁྲིག །དཔའ་མོའི་གླུ་ལེན་ཀྱུ་རུ་རུ། །མཁའ་འགྲོའི་བརྡའ་སྐད་སངས་སེ་སང་། །དཔའ་བོའི་ཤུགས་གླུ་ཀྱུ་རུ་རུ། །བྲོ་ར་ཟུར་དྲུག་ལྷུན་གྲུབ་དང་། །ཞི་རྒྱས་དབང་དང་དྲག་པོ་ཡི། །དབྱིབས་དང་རྣམ་འགྱུར་ཚུལ་བསྐོར་བས། །མཆོག་ཐུན་ལས་བཞི་འགྲུབ་པའི་བྲོ། །ཞབས་གཉིས་བསྐུམ་ཞིང་བརྐྱང་བ་ནི། །མཐའ་གཉིས་དབང་སྡུད་ཟིལ་གནོན་བྲོ། །མཉམ་ཉིད་ངང་དུ་བརྡུངས་པས་ན། །རབ་འབྱམས་ཕྲིན་ལས་འགྲུབ་གྱུར་ཅིག །ༀ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས་ཛྙཱ་ན་སིདྡྷི་ཤིནྟཾ་པུཥྚཾ་ཝ་ཤཾ་མཱ་ར་ཡ་ཧཱུྃ་ཕཊཿ ཅེས་བྲོ་བརྡུངས་མེ་ལྷའི་ལྷག་མ་ནི། རྒྱས་པའི་གཏོར་མ་མཛོད་དུ་སྦ་བ་དང་། འཇིག་རྟེན་པའི་གཏོར་མ་ཕྱིའི་མི་ལ་མི་སྦྱིན། གཞན་རྣམས་ཚོགས་དང་ཆབས་ཅིག་བསྲེས་ཏེ་ཐམས་ཅད་ལ་སྟེར་བཞིན་བཀྲ་ཤིས་བརྗོད་པ་འདི་བཞིན་བྱའོ། ཧཱུྃ། རྩ་བརྒྱུད་བླ་མའི་དཔལ་ཡོན་ལེགས་བྱིན་པའི། །རྟག་ཏུ་ཡེ་ཤེས་ཐུགས་རྗེས་ལེགས་གཟིགས་པའི། །སེམས་ཀྱི་གནས་ལུགས་ཆོས་སྐུར་ངོ་སྤྲོད་པའི། །བྱིན་རླབས་མཆོག་གི་བཀྲ་ཤིས་དེང་འདིར་ཤོག །མ་ཅིག་ཁྲོས་མ་ནག་མོས་ལེགས་བྱིན་པའི། །གསང་སྔགས་བདུད་གཅོད་ཟབ་མོའི་ཆོ་ག་ལ། །སྒོ་གསུམ་འགལ་སྤོང་མཐུན་པ་ཀུན་འགྲུབ་པའི། །འཇིགས་མེད་དངོས་གྲུབ་མཆོག་གི་བཀྲ་ཤིས་ཤོག །ཡེ་ཤེས་མཁའ་འགྲོ་རིགས་བཞིས་ལེགས་བྱིན་པའི། །ཞི་རྒྱས་དབང་དྲག་ལས་རྣམས་མཐར་ཕྱིན་ནས། །སྐུ་ལྔ་ཡེ་ཤེས་ལྔ་ཡི་འབྲས་སྨིན་ཅིང་། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །སྣོད་ཀྱི་འཇིག་རྟེན་གཡོ་མེད་རྟག་བརྟན་ཅིང་། །བཅུད་ཀྱི་སེམས་ཅན་རྫོགས་ལྡན་དཔལ་ལ་སྤྱོད། །སྐྱེ་དགུ་ཐམས་ཅད་འཕྲལ་ཕུགས་བདེ་སྐྱིད་ལྡན། །ལུགས་ཟུང་དར་ཞིང་རྒྱས་པའི་བཀྲ་ཤིས་ཤོག །གཞན་ཡང་བཀྲ་ཤིས་ཅི་རིགས་བྱའོ། དེ་ནས་རྗེས་ཆོག་ནི། ཨ་ཧ་རི་ནི་ས་ཨགྣེ་ཡེ་ཨརྒྷཾ༴ ནས། ཤབྟ་པྲ་ཏི་ཙྪ་ཡེ་སྭཱཧཱ། གང་གྲུབ་བརྗོད། བསྲེག་རྫས་ལྷག་མ་རྣམས་མེ་ནང་དུ་བཏབ་པོ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་ལྡན་སྐུ་གསུང་ཐུགས། །འགྲོ་བ་སྐྱོབ་ལ་ཕྱག་འཚལ་བསྟོད། །འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱཀྐིའི་དབང་བསྐུར་བས། །ཤེས་རབ་མཆོག་གིས་ཉོན་མོངས་ཐམས་ཅད་བསྲེགས། །འཛིན་མཛད་མེ་ལྷ་ཉིད་ལ་རྣམ་པར་འདུད། །ༀ་མ་འབྱོར་པ་དང་ཉམས་པ་དང་། སོགས། ༀ་བཛྲ་སཏྭ་ས་མ་ཡ༴ སོགས། ༀ་ཁྱེད་ཀྱིས་སེམས་ཅན༴ སོགས། མེ་ལྷ་ཡེ་ཤེས་པ་ས་ཁྲོས་མ་ལྷ་ལྔ་ཨོ་རྒྱན་གྱི་གནས་སུ་གཤེགས། །འཇིག་རྟེན་པའི་མེ་ལྷ་ཤར་ལྷོའི་མཚམས་སུ་གཤེགས་པར་གྱུར། ཨ་ཧ་རི་ནི་ས་ཨགྣེ་བཛྲ་མུཿ དམ་ཚིག་པའི་མགྲོན་ལྔ་བདག་ཉིད་ལ་ཐིམ། མེ་ལྷ་དམ་ཚིག་པ་མེ་འབར་རང་བཞིན་དུ་གྱུར། དགེ་བ་འདི་ཡི་མྱུར་དུ་བདག ཆོས་སྐུ་ཡུམ་ཆེན་འགྲུབ༴ ཤོག རྗེས་ཀྱི་བྱ་བ་རྣམ་དག་གཞུང་བཞིན་དཔྱིས་ཕྱིན་པར་བྱའོ། ཞེས་པ་འདི་ཉིད་སྒོམ་ཆེན་ཆོས་དབྱིངས་བླ་མ་ཀརྨ་ངོར་བ་ཨོ་རྒྱན་བསྟན་འཛིན་སོགས་དད་ལྡན་འགས་བསྐུལ་དོན་རྣལ་འབྱོར་བ་ཀུན་བཟང་གཞན་ཕན་གྱིས་སྤེལ་བའི་ཡི་གེ་པ་ནི་ཀུན་བཟང་ཉི་མས་བགྱིས་པའི་དགེ་བས་རྗེས་འཇུག་རྣམས་ཆོས་སྐུ་རྒྱལ་བ་ཡུམ་ཆེན་མོའི་གོ་འཕང་ཐོབ་པའི་རྒྱུར་གྱུར་ཅིག །དགེའོ། དགེའོ། དགེའོ།། །། གཅོད་ཀྱི་དབང་སྡུད་ཟིལ་གནོན་རྡོ་རྗེའི་གད་མོ།༄༅། །གཅོད་ཀྱི་དབང་སྡུད་ཟིལ་གནོན་རྡོ་རྗེའི་གད་མོ་བཞུགས། ། ཟབ་དོན་བདུད་ཀྱི་གཅོད་ཡུལ་ལ་ཉེ་བར་མཁོ་བའི་འཁྲུལ་བའི་རྟོག་ཚོགས་དབང་དུ་སྡུད་ཅིང་། ཟིལ་གྱིས་གནོན་པའི་ཐབས་ཟབ་མོ་འདི་བཞིན་ལགས། དང་པོ་དུས་གསུམ་གྱི་རྟོག་ཚོགས་ཐད་ཀར་གཅོད་ཕྱིར། ཕཊཿ ཅེས་བརྗོད་ལ། དྲན་རིག་སོ་མ་ངར་དང་ལྡན་པའི་ངང་ནས། རང་ཉིད་སྐད་ཅིག་གིས་རྒྱ་མཚོ་ཆེན་པོ་ལ་གཟའ་སྐར་འཕྲལ་དུ་ཤར་བ་ལྟར། རང་ལུས་ཤ་ཁྲག་གདོས་བཅས་ཀྱི་ཕུང་པོ་འདི་མ་ཡིན་པར་རང་བྱུང་རིག་པའི་རང་རྩལ་ལས་རང་ལུས་ཡེ་ཤེས་ཀྱི་མཁའ་འགྲོ་མ་རྡོ་རྗེ་ཕག་མོ་སྐུ་སྟོད་གཟུགས་མེད་ཀྱི་ཁམས་སུ་འགྱིང་བ། སྙིང་ག་ནས་ལྟེ་བའི་བར་གཟུགས་ཀྱི་ཁམས་ཡོངས་སུ་ཁྱབ་པ། སྐུ་སྨད་འདོད་ཁམས་ནས་ངན་སོང་གསུམ་པོའི་གནས་དང་བཅས་པ་འཇིགས་པར་བརྫིས་ནས་གཡོ་འགུལ་ཙམ་ཡང་མི་ནུས་པ། ཆོས་ཉིད་མི་འགྱུར་བའི་རྟགས་སུ་སྐུ་མདོག་མཐིང་ག ལོངས་སྤྱོད་རྫོགས་པའི་དཔལ་དང་ཡོན་ཏན་ལྷུན་གྱིས་གྲུབ་པའི་རྒྱན་དང་ཆ་ལུགས་མ་ཚང་བ་མེད་པ། སྤྲུལ་སྐུས་གང་ལ་གང་འདུལ་གྱི་གདུལ་བྱ་ཐུགས་རྗེས་མི་གཏོང་བའི་ཕྱིར་ཡེ་ཤེས་ཀྱི་མཁའ་འགྲོ་མ་བདུད་འདུལ་ཁྲོས་མ་ནག་མོ་མཐོང་ཞིང་ཐོས་པས་གཟུགས་ཅན་དང་གཟུགས་མེད་ཀྱི་འགྲོ་ཁམས་རྒྱ་མཚོ་སྐྲགས་ཤིང་འདར་ལ་དཔའ་འཁུམས་ནས་ཅི་བྱ་གཏོལ་མེད་ལ་ཐུག་ནས་འདར་ཕྲི་ལི་ལི་བྱེད་ནུས་པའི་བདག་ཉིད་ཅན་དུ་གྱུར་པ། དེ་ཡང་ཞལ་གཅིག་བཟོད་པར་དཀའ་བའི་ཁྲོ་མོའི་བཞིན་གཟུགས་དམར་ལ་ཟླུམ་པའི་སྤྱན་གསུམ་དང་ལྡན་ཞིང་། སྤྱན་གཡོན་པར་ཤེས་རབ་ཀྱི་རང་བཞིན་ཉི་མའི་འོད་ཟེར་བསྐལ་མེ་ལྟར་འབར་ཞིང་འཕྲོ་བ། གཡས་པར་ཐབས་ཀྱི་རང་བཞིན་ཟླ་བའི་འོད་ཟེར་དཀར་ལ་འཚེར་བ་དེ་བཞིན་དུ་འཕྲོ་བ། སྤྱན་དབུས་མར་ཐབས་ཤེས་གཉིས་སུ་མེད་པའི་འོད་ཟེར་དཀར་དམར་རབ་ཏུ་འཁྲུགས་པ་འབར་ཞིང་འཕྲོ་བ། དབུ་སྐྲ་སིལ་མས་སྐུ་རྒྱབ་ཁེབས་ཤིང་ལྷག་མ་གཙུག་གི་རྒྱན་དུ་བཅིངས་པའི་རྣ་ལྟག་གཡས་སུ་ཕག་ཞལ་ནག་པོས་ངུར་སྒྲ་སྒྲོག་པ། དབུས་ཞལ་རབ་ཏུ་གདངས་པས་སྲིད་ཁམས་མ་ལུས་ཡོངས་སུ་ཟ་བར་ནུས་ཤིང་ཚེམས་དང་མཆེ་བ་གངས་རི་ལྟར་གཙིགས་ཤིང་ལྗགས་གློག་དམར་ལྟར་འཁྱུགས་པ། ཕྱག་གཡས་མི་ལྤགས་ཀྱི་གཡང་གཞི་ཁྲག་གི་ཞམ་ཆུ་འབེབ་པ་ནམ་མཁའི་དབྱིངས་སུ་འཕྱར་ཞིང་གཡུག་པ་ཙམ་གྱིས་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ། གཡོན་མི་རྐང་གི་གླིང་བུ་སེང་ལྕམ་དཀར་མོའི་ང་རོ་ལས་ཀྱང་ལྷག་པ་བསྒྲགས་པས་གཟུགས་ཅན་གཟུགས་མེད་ཀྱི་འབྱུང་པོ་མཐུ་སྟོབས་ཀྱི་རྩལ་ལ་སྙེམས་པ་ཐམས་ཅད་སྔངས་སྐྲག་འདར་གསུམ་གྱིས་ཡིད་རྩ་ཁོལ་ཞིང་སྙིང་རྩ་འཁྲུགས་པ། ཞལ་ནས་ཧཱུཾ་ཧཱུཾ་དང་ཕཊ྄ཿཕཊ྄ཿ ཕེཾ་ཕེཾ་གྱི་སྒྲ་དྲག་པོ་འབྲུག་སྟོང་དུས་ག ཅིག་ཏུ་སྒྲོག་པའི་སྒྲ་ལྟ་བུ་བསྒྲགས་པས། འཇིག་རྟེན་གྱི་ཁམས་རྣམས་གཡོ་ཞིང་འགུལ་བར་བྱེད་ནུས་པ། རུས་པའི་རྒྱན་ཕྱག་རྒྱ་ལྔ་སོགས་ཁྲོ་མོའི་ཆས་ཐམས་ཅད་ཀྱིས་ཡོངས་སུ་སྤུད་ནས་རྔམ་ཞིང་འཇིགས་པར་བྱས་པ། འཆི་བདག་གཤིན་རྗེའི་དཔུང་ཚོགས་ཡང་འདར་ཞིང་ཡ་ང་བའི་གནས་ལ་འགོད་པར་བྱེད་པ། དེ་ལྟ་བུའི་ཡེ་ཤེས་ཀྱི་མཁའ་འགྲོ་མ་ཆེན་མོ་ཁམས་གསུམ་སྲིད་པ་གསུམ་ལས་རྣམ་པར་རྒྱལ་བའི་ཐུགས་ཀ་ནས་ཚད་མེད་པ་བཞིའི་འོད་ཟེར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན་པའི་ཕོ་ཉ་སྤྲུལ་པ་ཡང་སྤྲུལ་དཔག་ཏུ་མེད་པ་འཇིག་རྟེན་གྱི་ཁམས་ཁྱབ་པ་སྤྲོས་པས། གནས་གདོན་ལུས་གདོན་གྱི་གཙོར་བྱས་ལོག་འདྲེན་འབྱུང་པོའི་ཚོགས་རྣམས་ན་བུན་འཐོར་རླུང་གིས་དེད་པའམ། ར་ལུག་སེར་བས་བདས་པ་ཇི་བཞིན་སྐད་ཅིག་ཐང་ཅིག་ཡུད་ཙམ་ལ་རང་མདུན་ལྕགས་ཁང་གྲུ་གསུམ་འབར་བའི་ནང་གི་དམིགས་རྟེན་མཚན་མ་རྫས་ཀྱི་ལིང་ག་སོགས་དང་དབྱེར་མེད་དུ་གྱུར་བར་བསམ་ཞིང་། གཡང་གཞི་རྡེབ་པ་དང་རྐང་གླིང་འབུད་ཅིང་ཕཊཿསྒྲ་དྲག་པོ་མང་དུ་སྒྲོག་པ་སོགས་བྱས་ནས་སླར་ཡང་འདི་ལྟར་རོ། ཧཱུཾ། ཡུལ་གྱི་མིང་ནི་རྒྱ་གར་ཡུལ། །གནས་ཀྱི་མཆོག་གྱུར་ཨོ་རྒྱན་གླིང་། །དྷུ་མ་ཐཱ་ལ་མཁའ་འགྲོའི་གྲོང་། །དུར་ཁྲོད་ཆེན་པོ་བརྒྱད་རྣམས་དང་། །ཡུལ་ཆེན་ཉེར་བཞི་གནས་སོ་གཉིས། །སྐུ་གསུམ་རྒྱལ་བའི་ཞིང་ཁམས་ནས། །མཁའ་འགྲོའི་གཙོ་མོ་ཝ་ར་ཧི། །ཡེ་ཤེས་འཇིག་རྟེན་མཁའ་འགྲོ་དང་། །དམ་ཚིག་ཤ་ཟ་མཁའ་འགྲོ་སོགས། །དཔའ་བོ་མཁའ་འགྲོའི་ཚོགས་དང་བཅས། །མ་ལུས་ལུས་པ་མེད་པའི་འཁོར། །གནས་འདིར་སྤྱན་འདྲེན་གཤེགས་སུ་གསོལ། །གནས་འདིར་སྤྱན་འདྲེན་གཤེགས་ནས་ཀྱང་། །ཁམས་གསུམ་དབང་དུ་བསྡུ་བ་དང་། །སྲིད་གསུམ་ཟིལ་གྱིས་གནོན་པར་མཛོད། །ཕཊ྄ཿ ཕཊ྄ཿ ཕཊ྄ཿ མ་ཞིང་ཆེན་གཡང་གཞི་ཕྱོགས་བཞི་དང་། །མཚམས་བཞི་སྟེང་འོག་གཉིས་དང་བཅུར། །འཕྱར་ཞིང་གཡུགས་པས་ཕྱོགས་བཅུ་ཡི། །ལྷ་འདྲེ་འབྱུང་པོའི་ཚོགས་རྣམས་ཀུན། །དབང་དུ་སྡུད་ཅིང་ཟིལ་གྱིས་གནོན། །ཕཊ྄ཿ ཕཊ྄ཿ ཕཊ྄ཿ སྣང་སྲིད་འཁོར་བའི་འགྲོ་བ་རྣམས། །མ་རིག་གསུམ་དང་རྐྱེན་བཞི་ཡིས། །འཁྲུལ་བའི་ས་བོན་བཏབ་པ་ཡིས། །རྣམ་རྟོག་མ་རིག་ཆེན་པོ་དེ། །འཁོར་བར་ལྟུང་བྱེད་རྒྱུ་ཡིན་པས། །དེ་ཡིས་ཕོ་གདོན་རྒྱལ་འགོང་དང་། །མོ་གདོན་བསེན་མོ་ཀླུ་གདོན་ཡང་། །ཐེའུ་རང་འགོང་པོའི་ཚོགས་རྣམས་བསྐྲུན། །དེ་སོགས་འཁོར་བའི་ལྷ་འདྲེ་ཀུན། །རང་བྱུང་རིག་པའི་རྩལ་ཆེན་གྱིས། །འཁྲུལ་པའི་རྟོག་ཚོགས་ལས་གྱུར་པའི། །ཉོན་མོངས་བརྒྱད་ཁྲི་དབང་དུ་སྡུས། །དབང་དུ་བསྡུས་ལ་ཟིལ་གྱིས་ནོན། །སླར་ཡང་ལྡང་མེད་ཀློང་དུ་སྟིམས། ཕཊ྄ཿ ཕཊ྄ཿ ཕཊ྄ཿ ཕྱི་ལྟར་སྣང་ཞིང་སྲིད་པའི་འཁྲུལ་སྣང་གིས། །ཀུན་ནས་ཀུན་ཏུ་བསྐྱེད་པའི་རྟོག་ཚོགས་དང་། །ནང་ལྟར་ང་བདག་འཛིན་པ་ལས་བྱུང་བའི། །ཕུང་པོ་ལྔ་ལ་ང་ཡིར་འཛིན་པའི་སེམས། །གསང་བ་གནས་ལུགས་དོན་ལ་རྟག་ལྟ་དང་། །ཆད་པར་ལྟ་སོགས་མཐའ་བརྒྱད་ལྟ་བ་དང་། །འཇིགས་ཚོགས་སུམ་བརྒྱ་དྲུག་ཅུ་ལས་གྱུར་པའི། །རྩ་བ་ཀུན་རྫོབ་དོན་དམ་གོ་ལྡོག་སྐྱོན། །ཉོན་མོངས་བརྒྱད་ཁྲི་བཞི་སྟོང་ནད་དང་གདོན། །ཐམས་ཅད་དབང་དུ་སྡུས་ལ་ཟིལ་གྱིས་ནོན། །མ་ཅིག་ཡུམ་ཆེན་བཀའ་ལས་འདའ་མེད་གྱུར། །མདོར་ན་ཕན་བྱེད་ལྷ་དང་གནོད་བྱེད་འདྲེ། །དཀར་ནག་དགེ་དང་མི་དགེར་འཛིན་པའི་ཆོས། །ཐམས་ཅད་སྐྱེ་འགག་མེད་པའི་སྟོང་དབྱིངས་སུ། །ཟིལ་གྱིས་མནན་ནས་སྣང་མཆེད་ཐོབ་པའི་སྤྲིན། །མཁའ་དབྱིངས་གནས་ལུགས་ངང་དུ་འུབ་ཆུབ་གྱུར། ཕཊ྄ཿ ཕཊ྄ཿ ཕཊ྄ཿ དེ་ནས་གཅོད་གཞུང་གང་རུང་ལ་འཇུག་པ་ལག་ལེན་རྣམ་དག་གོ། ཞེས་གཅོད་ཀྱི་དབང་སྡུད་ཟིལ་གནོན་རྡོ་རྗེའི་གད་མོ་འདི་ནི་རང་སློབ་འཇིགས་མེད་མཆོག་ལྡན་གྱི་ངོར་བྱ་བྲལ། རྡོ་བླས་བྲིས་པ་དགེ་ཞིང་བཀྲ་ཤིས་པར་གྱུར་ཅིག དགེའོ། དགེའོ། དགེའོ། གཅོད་གཞུང་སྤྱི་ལ་མཁོ་བའི་དབང་སྡུད་ཟིལ་གནོན་ཁྲོས་མའི་གད་རྒྱངས།གཅོད་གཞུང་སྤྱི་ལ་མཁོ་བའི་དབང་སྡུད་ཟིལ་གནོན་ཁྲོས་མའི་གད་རྒྱངས་བཞུགསཿ ན་མོ་གུ་རུ་ཌཱཀྐི་ནིཿ གཅོད་ཀྱི་དབང་སྡུད་ཟིལ་གནོན་ནིཿ ཕོ་ཚོད་ལྷ་འདྲེར་བརྙས་སེམས་དངཿ ཆོས་བརྒྱད་རེ་དོགས་མ་ཡིན་པརཿ ཚད་མེད་བཞི་ཡི་སེམས་སྟོབས་སྐྱེདཿ ཆགས་སྡང་སྣང་བ་ཐོག་བརྫིས་བྱཿ དམིགས་བྲལ་རིག་པ་ངར་བསྐྱེད་དེཿ ཕཊ྄ཿ ཅེས་བརྗོད་པས་ངར་སྐད་དབྱངསཿ སེང་ལྕམ་དཀར་མོའི་ང་རོའི་སྒྲཿ རི་དྭགས་གཞན་གྱིས་ཐོས་པ་བཞིནཿ འདར་ཞིང་ཞུམ་པའི་ངང་ཉིད་ནསཿ དཔའ་ཟིལ་ཆགས་ཏེ་བརྒྱལ་བར་བསམཿ ཕཊ྄ཿ ཡེ་གཞི་སྟོང་ཆེན་ཆོས་དབྱིངས་ནམ་མཁའ་ལཿ ཡིད་ཤེས་གྲོལ་འཁྲུལ་རླུང་འགྱུས་སྒྱུ་འཕྲུལ་གརཿ གྲོལ་གཞི་བདག་མེད་ལྷ་མོ་ལབ་སྒྲོན་མཿ རྣམ་པ་ཁྲོས་མ་དམར་མོའི་སྐུར་གྱུར་ཏེཿ ཕྱག་གཡས་མི་ལྤགས་གཡང་གཞི་མཁའ་ལ་འཕྱརཿ འཕྱར་ཞིང་ས་གསུམ་གཞི་ལ་བརྡབས་ཙམ་གྱིསཿ འཁྲུལ་གཞིའི་མངོན་རྟོགས་གཟུགས་ཅན་གཟུགས་མེད་འགྲོཿ རང་དབང་མེད་པར་བདག་གིས་དབང་དུ་བསྡུསཿ ཕཊ྄ཿ ཕཊ྄ཿ ཕཊ྄ཿ ཕྱག་གཡོན་མི་རྐང་གླིང་བུ་འབུད་པའི་སྒྲསཿ ལྷན་སྐྱེས་ཀུན་བརྟགས་མ་རིག་གཉིད་སད་ཅིངཿ འཁྲུལ་སྣང་སེམས་ཀྱི་རྟོག་ཚོགས་ཟིལ་མནན་ཏེཿ བདག་གི་བཀའ་དང་དམ་ལ་གནས་པར་གྱུརཿ ཧཱུཾ་ཧཱུཾ་ཧཱུཾཿ ཕཊ྄ཿ ཕཊ྄ཿ ཕཊ྄ཿ སྔོན་འདས་བར་དང་ཐ་མའི་དུས་དག་ཏུཿ འཁྲུལ་ངོར་སྣང་བའི་དུག་ལྔ་དུག་གསུམ་དང་ཿ ཉོན་མོངས་བརྒྱད་ཁྲི་བཞི་སྟོང་ལས་གྱུར་གདོནཿ བསྐྱེད་རྫོགས་ཟབ་མོའི་སྟོབས་ཀྱིས་དབང་དུ་བསྡུསཿ མཁྱེན་གཉིས་ཡེ་ཤེས་རྩལ་གྱིས་ཟིལ་གྱིས་གནོནཿ འཁྲུལ་སྣང་གཞན་གནོད་བསམ་ངན་རྒྱ་རལ་ཏེཿ གཞན་ཕན་བྱང་སེམས་མྱུ་གུ་ལེགས་སྨིན་ནསཿ ཐར་དང་རྣམ་མཁྱེན་གོ་སར་དབུགས་དབྱུང་མཛོདཿ ཕཊ྄ཿ ཕཊ྄ཿ ཕཊ྄ཿ དབང་སྡུད་ཟིལ་གནོན་མཁན་པོ་བདག་ཉིད་དང་ཿ དེ་ཡི་འགལ་ཟླ་ལྷ་འདྲེ་མི་གསུམ་སྡེཿ རྟེན་འབྲེལ་ཟབ་མོ་དབང་སྡུད་ཟིལ་གནོན་ཆོསཿ འཁོར་གསུམ་མི་དམིགས་དུ་མ་རོ་གཅིག་གྱུརཿ ཕཊ྄ཿ ཕཊ྄ཿ ཕཊ྄ཿ ཅེས་བརྗོད་སྤྲོས་བྲལ་ངང་དུ་མཉམ་བཞག་ནསཿ གཅོད་གཞུང་ཆེ་ཆུང་གང་ཡང་རུང་བར་འཇུགཿ དེ་ཡིས་དབང་སྡུད་ཟིལ་གནོན་དོན་ཚང་ངོ་ཿ འདི་ཉིད་དམ་ལྡན་སློབ་མ་མཆོགཿ ཀུན་བཟང་ཕུན་ཚོགས་ཀྱིས་བསྐུལ་ངོརཿ རྡོ་བླ་ཀརྨ་དབང་དྲག་གིསཿ བྲིས་དགེས་དོན་གཉིས་ལྷུན་འགྲུབ་ཤོགཿ དགེའོ། །། གཅོད་ཡུལ་མཁའ་འགྲོའི་གད་རྒྱངས་ལསཿ གདོན་འདུལ་ཁྲོས་མའི་ཞལ་ལུང་།༄༅། །གཅོད་ཡུལ་མཁའ་འགྲོའི་གད་རྒྱངས་ལསཿ གདོན་འདུལ་ཁྲོས་མའི་ཞལ་ལུང་བཞུགས་སོ། བྱང་ཆུབ་རྡོ་རྗེའི་བླ་མ་ལ། བཏུད་ནས་གཅོད་ཀྱི་ལས་ཚོགས་སུ། གདོན་འདུལ་ཁྲོས་མའི་ཞལ་ལུང་ཞེས། ཚིག་ཉུང་དོན་བསྡུས་འདི་བཞིན་སྤྲོ། དེ་ཡང་རྒྱུད་ལས། དྲག་སྤྱོད་རྩུབ་པའི་རྣལ་འབྱོར་ལས་སྣ་ཚོགས། མདོར་བསྡུས་འགུགས་བསྒྲལ་གཉིས་སུ་འདུ་ཞེས་གསུངས་པ་ལྟར། དང་པོ་ལའང་ལྔ་ལས། ཐོག་མར་བདག་ཉིད་ལྷར་གསལ་ཞིང་གཟུ་མགྲོན་འགུགས་པ་ནི། ཕཊཿ སྐྱེ་མེད་ཆོས་སྐུའི་ངང་ཉིད་ལས། །འགག་མེད་མཁའ་ལ་འཇའ་སྣང་བཞིན། །བདག་ཉིད་རྡོ་རྗེ་རྣལ་འབྱོར་མར། །གསལ་པའི་ཐུགས་ཀར་ཡེ་ཤེས་སེམས། །འཇིགས་བྱེད་ཆེན་མོ་ལས་འོད་འཕྲོས། །འཁོར་འདས་མགྲོན་རྣམས་སྤྱན་དྲངས་གྱུར། །གཉིས་པ་གཟུ་དཔང་གསོལ་བ་ནི། ཧོ། བྱང་ཆུབ་མཆོག་ཏུ་སེམས་བསྐྱེད་ནས། །མངོན་སྤྱོད་ལས་ཀྱིས་གདུལ་དཀའི་འགྲོ། །ཐར་བར་སྦྱོར་ལ་འཁོར་འདས་མགྲོན། །ཀུན་ནས་གཟུ་དཔང་རྒྱབ་རྟེན་མཛོད། །ཞི་རྒྱས་དབང་གིས་མ་ཐུལ་བའི། །ཉམས་པ་བདུན་གྱི་དགྲ་བགེགས་ལ། །ཨ་བྷི་ཙཪྱའི་ལས་སྦྱོར་ཞེས། རྒྱལ་བ་རྡོ་རྗེ་འཆང་གི་བཀའ། །དེས་ནི་བདག་ཅག་གསང་སྔགས་ཀྱི། །བསྟན་ལ་ཞུགས་པའི་དོན་འབྲས་སུ། །གདུལ་དཀའི་འགྲོ་རྣམས་སྒྲོལ་བ་ལས། །བསམ་བྱ་གཞན་ཞིག་མི་གནས་ཕྱིར། གཞི་དབྱིངས་འགྱུར་མེད་ཀུན་བཟང་མོའི། གཞི་སྣང་མཆེད་པའི་ཡེ་ཤེས་ལྔའི། དབྱིངས་ལས་དབང་བསྒྱུར་མཁའ་འགྲོའི་ཚོགས། རྒྱུད་ལྔའི་འགྲོ་སྒྲོལ་གྲོགས་ལ་བཞེངས། གསུམ་པ་དགོས་པ་ཁྱད་པར་ཅན་གྱི་རྒྱུ་མཚན་སྨོས་པ་ནི། ཧོ། དོན་ལ་ཡེ་ནས་གཉིས་མེད་ཀྱང་། །མ་རྟོགས་འཁྲུལ་པའི་ཤེས་ངོ་ལ། །སྣོད་བཅུད་བརྟན་གཡོ་སྐྱེ་འཇིགས་སོགས། །སྣང་ཞེན་ཆགས་པའི་རྟེན་དུ་གྲུབ། །དེར་བརྟེན་ལྷ་དང་འདྲེ་བགེགས་ཞེས། །མ་དག་གཞན་དབང་ལམ་སྣང་ཚོགས། །ཀུན་བརྟགས་གདོན་གྱི་ཆོ་འཕྲུལ་ཡིན། །དེ་རིང་བརྟུལ་ཞུགས་ལམ་སློང་ཕྱིར། །ཡོངས་གྲུབ་རྟོགས་པའི་འཕྲུལ་འཁོར་གྱིས། །ང་བདག་ལྷ་འདྲེ་ཨར་ལ་གཏད། །ཕཊཿ གཞི་བ་བྲུབ་ཁུང་བསྐྱེད་ཅིང་བླ་ཡི་འགུགས་པ་ལའང་རྒྱས་བསྡུས་གཉིས་ལས། སྔ་མ་ནི། ཨེ། ཀུན་བརྟགས་མ་རིག་ལས་བྱུང་གཟུང་འཛིན་དགྲ། །གཞན་དབང་སྐུ་གསུམ་ཀློང་དུ་གསོད་པའི་ཕྱིར། །ཡོངས་གྲུབ་རྣམ་ཐར་གསུམ་ལྡན་ཧོཾ་ཁུང་ནི། །རྒྱ་ཆེ་གཏིང་ཟབ་ཐར་མེད་གཤིན་རྗེའི་ཞལ། །ཐེག་རིམ་དགུ་ཡི་སྒོ་འཕར་དབྱེར་མེད་ནང་། །རང་བྱས་ལས་ཀྱི་རང་གཟུགས་དམྱལ་བའི་མེའི། །ཀློང་དུ་ཪྣྲྀ་ཏྲི་ཡོངས་གྱུར་ཉམས་བདུན་ལྡན། །བསྒྲལ་འོས་ཞིང་བཅུ་ཚང་བའི་དགྲ་དང་བགེགས། །འཆི་ལྟས་ཀུན་གྱིས་བཀྲག་མདངས་ཟད་པའི་རོ། །དབྱིངས་གནས་པྲེ་ཏ་ཀ་ཡི་བརྟུལ་ཞུགས་ཅན། །སྙིང་ནང་ཁྲག་གི་དྭངས་མའི་ཐིག་ལེའི་དབུས། །ཚེ་བསོད་ལྷག་མ་ཡོངས་འདུས་ཨཿདཀར་དང་། །རྣམ་ཤེས་ཪྣྲྀ་ཡིག་གསལ་བ་ལས་འོད་འཕྲོས། །ཐར་ལམ་གེགས་བྱེད་བསྟན་འགྲོར་འཚེ་བའི་རིགས། །ཁབ་ལེན་རྡོ་ཡིས་ལྕགས་ཀྱི་ཕྱེ་མ་བཞིན། །སྐད་ཅིག་དམིགས་པའི་རྟེན་དང་རོ་གཅིག་གྱུར། །ན་མོ། སྐྱེ་མེད་ཆོས་སྐུའི་ངོ་བོ་ཡུམ་ཆེན་མོ། །འགག་མེད་ལོངས་སྐུའི་བདག་ཉིད་བདག་མེད་མ། །ཟུག་འཇུག་རྡོ་རྗེའི་དབྱིངས་ཡུམ་ཝ་ར་ཧིའི། །རྣམ་རོལ་ཀཽ་སེང་དབང་ཕྱུག་བསྟན་མ་སོགས། །རྩ་གསུམ་ལྷ་ཡི་འཁོར་ལོ་ཌཱཀྐི་མར། །ཡོངས་ཤར་རྒྱལ་བ་རྒྱ་མཚོའི་དཔལ་ཡོན་དང་། །སྔགས་འཆང་བདག་གི་ལྷ་སྔགས་ཏིང་འཛིན་མཐུས། །བསྟན་དང་འགྲོ་ལ་འགལ་རྐྱེན་སྦྱོར་བའི་རིགས། །སྤྱི་དང་ཁྱད་པར་བསྲུང་བྱ་ལ་གནོད་པའི། །གདོན་ཚོགས་གཟུགས་བརྙན་འདི་ལ་ཁུག་ཅིག་ཛ༔ །ཞེས་དང་བསྡུ་ན། ཨེ། རྣམ་ཐར་གསུམ་གྱི་ཧོམ་ཁུང་ནང་། །ཀུན་རྫོབ་མཚན་མའི་མིང་གཟུགས་སུ། །མ་རིག་ལས་བྱུང་བདག་ལྟའི་དགྲའི། །བླ་ཡིད་དོན་དམ་བདེན་མཐུས་ཁུག །དེ་ལྟར་རྒྱས་བསྡུས་གང་ལ་ཡང་། ལྔ་པ་ཕྱག་རྒྱ་བཞིས་བདུད་བཞི་ཐོགས་མེད་འགུགས་པ་ནི་ལམ་འདིའི་ཁྱད་ཆོས་ཡིན་ཏེ། ཛཿ འགག་མེད་རྡོ་རྗེ་དབྱིངས་ཀྱི་མཁའ་འགྲོ་མས། །བྱམས་པ་ཚད་མེད་ལྟ་བའི་བརྟུལ་ཞུགས་ཀྱིས། །དགའ་བྲོད་རྟག་པར་ལྟ་བ་ལྷའི་བུའི་བདུད། །ཀློང་གྱུར་ཡེ་ཤེས་རྡོ་རྗེའི་ལྕགས་ཀྱུས་ཁུག །ཧཱུཾ། མཉམ་ཉིད་བདེ་བ་ཆེན་པོའི་མཁའ་འགྲོ་མས། །སྙིང་རྗེ་ཚད་མེད་སྒོམ་པའི་བརྟུལ་ཞུགས་ཀྱིས། །ཐོགས་མེད་ཆད་པར་ལྟ་བ་ཉོན་མོངས་བདུད། །འདའ་ཀ་ཡེ་ཤེས་རྡོ་རྗེའི་ཞགས་པས་ཆིངསཿ །བཾ་སྣ་ཚོགས་རྟོག་པ་པདྨ་མཁའ་འགྲོ་མས། །དགའ་བ་ཚད་མེད་སྤྱོད་པའི་བརྟུལ་ཞུགས་ཀྱིས། །ཐོགས་བཅས་བདུད་དུ་ལྟ་བ་ཕུང་པོའི་བདུད། །དབྱིངས་གྲོལ་ཡེ་ཤེས་རྡོ་རྗེའི་སྒྲོག་གིས་སྡོམས༔ །ཧོཿ བྱ་བ་ཡོངས་གྲུབ་ལས་ཀྱི་མཁའ་འགྲོ་མས། །བཏང་སྙོམས་ཚད་མེད་འབྲས་བུའི་བརྟུལ་ཞུགས་ཀྱིས༔ །སྙེམས་བྱེད་མཚན་མར་ལྟ་བ་འཆི་བདག་བདུད། །མཐའ་གྲོལ་ཡེ་ཤེས་རྡོ་རྗེའི་དྲིལ་བུས་སྣུན། །ཞེས་པའི་མཐར། ཛ༔ཧཱུཾ་བཾ་ཧོ་ཪྣྲྀ་ཏྲིཿཨཾ་གུ་ཤ་ཛཿ བརྒྱ་རྩ་སོགས་བཟླས། དང་པོ་ཡེ་ཤེས་དབྱིངས་བསྐུལ་ནི། ཨ། དོན་དམ་འདུས་མ་བྱས་ཀྱི་རང་གདངས་ལས། །ཀུན་རྫོབ་དགེ་བ་བཅུ་ཡི་རྣམ་འགྱུར་ཅན། །ཐབས་ཆེན་ཁྲོ་རྒྱལ་རྣམས་ཀྱི་གསང་བའི་ཡུམ། །རྡོ་རྗེ་སྒྲ་འབྱིན་སློགས་ཁྲོ་མོ་བཅུ། །མི་དགེ་དང་དུ་ལེན་པའི་སྡིག་ཅན་གདོན། །ས་བཅུའི་ཡོན་ཏན་འཐོབ་ཕྱིར་དབྱིངས་ནས་བསྐུལ། །གཉིས་པ་ཕོ་ཉ་སྒོས་བསྐུལ་ནི། ཛཿ དབྱིངས་ཀྱི་ཡེ་ཤེས་མཁའ་འགྲོའི་དམ་ཅན་མ། །ལས་མཁན་མ་མོ་བཅུ་གཉིས་འདིར་བྱོན་ལ། །དམིགས་བྱའི་སྐྱེ་མཆེད་བཅུ་གཉིས་གཞོམ་པ་དང་། །བདེན་དོན་ཡན་ལག་བཅུ་གཉིས་མངོན་གྱུར་མཛོད། །གསུམ་པ་ཐུན་དབབ་ཅིང་བསྒྲལ་བ་དངོས་ལའང་གཉིས་ལས། དང་པོ་ཤེས་རབ་སྟོང་ཉིད་ངང་དུ་གསོད་པའི་ལས་སྦྱོར་ནི། ཨཿ །གཤེད་གཞི་མཉམ་ཉིད་ཡངས་པའི་ཐང་ཆེན་པོར། །ལིང་སྣོད་ཆོས་དབྱིངས་སྒྲོམ་དུ་ཐོགས་མེད་ངང་། །སྟོང་ཉིད་ཡེ་ཤེས་རྡོ་རྗེས་བཀུག་པའི་བགེགས། །མྱོས་བྱེད་སོ་སོར་རྟོགས་པའི་དུག་ཐུན་དབབ། །སྲོག་རྩ་བྱ་བ་གྲུབ་པའི་རལ་གྲིས་གཏུབས། །མ་རིག་ཚོགས་པ་བརྒྱད་ཀྱི་གདུག་འདྲེའི་དཔུང་། །སྐྱེ་འགག་བྲལ་བ་ཟུར་གསུམ་ཕུར་བས་བསྒྲལ། །ཚེ་ཁྲུས་གཉིས་ཀྱིས་ཚོགས་གཉིས་ཡོངས་སུ་རྫོགས། །ཨ་ཨ་ཨཿ གཉིས་པ་ཐབས་མཆོག་སྙིང་རྗེའི་བདག་ཉིད་དམ་ཚིག་ཏུ་གསོད་པའི་ལས་སྦྱོར་ནི། ཕཊཿ མཚན་མ་རྫས་ཀྱི་སྲས་མཆོག་ཀི་ལཱ་ཡའི། །དབལ་རྩེ་ཧཱུཾ་དང་ཕཊ་ཀྱི་འཕྲོ་འདུ་ཡིས། །ཨ་ཡིག་བདག་ལ་དབབ་པས་ཚེ་བསོད་རྒྱས། །ཪྣྲྀཿཡིག་གནས་འགྱུར་ཡེ་ཤེས་ཕུང་པོ་ཉིད། །དཔལ་ཆེན་ཡབ་ལ་བསྟིམ་པའི་ཞུ་བདེའི་འགྲོས། །མཁའ་དབྱིངས་ཡེ་ཤེས་རྡོ་རྗེའི་སྲས་སུ་བསྐྲུན། །ཨ་ཪྣྲྀ་ཧཱུཾཿ ཕཊཿ ཕཊཿ ཕཊཿ ས་བཅད་བཞི་བ་ཞལ་བསྟབ་ནི། ཧོཿ དོན་གྱི་ཕག་མོ་རྡོ་རྗེ་བདག་མེད་མའིཿ །རྣམ་རོལ་གནས་དང་ཡུལ་གྱི་དཔའ་བོ་གིང་། །འཇིག་འདས་གཉིས་ལ་དབང་བསྒྱུར་མ་ཚོགས་ཀྱིས། །གཟུང་འཛིན་བདག་ལྟའི་དགྲ་བགེགས་ཡོངས་བསྒྲལ་ཤ། །ཆགས་ཆེན་ཁྲག་གིས་སྦགས་པའི་བཟའ་བཏུང་འདི། །གཉིས་མེད་ཡེ་ཤེས་རྩལ་གྱིས་དགྱེས་བཞེས་ལ། །སྙིང་རྗེའི་མཚོན་གྱིས་བསད་པའི་རྣམ་པར་ཤེས། །སྐྱེ་མེད་དབྱིངས་སུ་གསོ་བའི་ཕྲིན་ལས་སྒྲུབས། །སརྦ་ཌཱཀྐི་ས་མ་ཡ་མཾ་ས་རཀྟ་ཀོ་རོ་ཙ་ན་ཀེཾ་ནི་རི་ཏ་ཁ་ཧི། ལྔ་པ་སྨོན་ལམ་གྱི་རྒྱས་གདབ་པ་ནི། དེ་ལྟར་མཉམ་བཞག་རྟོགས་པས་བདག་བསྒྲལ་ནས། །རྗེས་ཐོབ་སྙིང་རྗེའི་རྩལ་གྱིས་གཞན་སྒྲོལ་བ། །རྡོ་རྗེའི་ལམ་གྱི་ཁྱད་པར་ཆོས་ཡིན་ཕྱིར། །འཚེངས་པ་ལྔའི་ཡོན་ཏན་མངོན་གྱུར་ཤོག །དེ་ལྟར་ཁྲོས་མའི་ཞལ་ལུང་གི། གདོན་འདུལ་གདུག་པ་ཚར་གཅོད་འདི། ཀླུ་སྒྲུབ་སྙིང་པོའི་ཡང་སྤྲུལ་གར། བྱང་ཆུབ་རྡོ་རྗེའི་ཞབས་པད་རྡུལ། གཙུག་ཏུ་སོན་པའི་སྔགས་ལམ་པ། ཨཱཪྱ་དྷེ་སབའི་ཡིད་ངོས་ལ། གང་ཤར་ཐོགས་མེད་ཚུལ་གྱིས་བྲིས། དེ་ཕྱིར་ཡམ་ཤུད་དམར་པོ་ཡིས། བཀའ་འདི་སྲུངས་ཤིག་ས་མ་ཡ། དགེ་བས་གདོན་ཚོགས་སངས་རྒྱས་ཤོག །ཡི་གེ་པ་ནི་བླ་མ་སངས་རྒྱས་སུ་མཐོང་བའི་སྔགས་རྒན་དྷརྨཱ་ས་རས་བགྱིས་པ་སྟེ་ཐོག་མཐའ་བར་གསུམ་དུ་དགེ་བར་གྱུར་ཅིག །བཀྲ་ཤིས་སོ།། །། གཅོད་ཡུལ་མཁན་འགྲོའི་གད་རྒྱངས་ལསཿ རིགས་དྲུག་གནས་འདྲེན་བྱང་ཆུབ་ལམ་བཟང་།༄༅། །གཅོད་ཡུལ་མཁན་འགྲོའི་གད་རྒྱངས་ལསཿ རིགས་དྲུག་གནས་འདྲེན་བྱང་ཆུབ་ལམ་བཟང་བཞུགསཿ མངོན་པར་བྱང༵་ཆུབ༵་མཆོག་གི་སྐུ། །དཔལ་ལྡན་བླ༵་མ༵ར་མགོས་བཏུད་ནས། །གདོན་འདུལ་ཁྲོས་མའི་ཞལ་ལུང་གི། །ཟུར་རྒྱན་བྱང་ཆུབ་ལམ་བཟང་ནི། །སྟོང་ཉིད་ཡེ་ཤེས་ཁྱབ་གདལ་ཀློང་། །སྙིང་རྗེའི་རང་གདངས་གསལ་ལ་དྭངས། །འགྲོ་ཀུན་ཕ་མར་ཤེས་པའི་བློས། །ཚིག་དོན་དྲན་པས་འདི་སྐད་དོ། །བསྐྱེད་པ་ནི། ཨཿ བསམ་བརྗོད་བྲལ་བའི་ངང་ཉིད་ལས། །མ་འགག་རྩལ་སྣང་ལྷག་པའི་ལྷ། །ཟག་བྲལ་བདེ་ཆེན་རྡོ་རྗེའི་སྐུ། །དམ་ཚིག་ཡེ་ཤེས་གཉིས་སུ་མེད། །སྣང་སྟོང་སྒྱུ་མའི་སྐུར་སྣང་བའི། །མིང་བྱང་བསྐྱེད་པ་ནི། མདུན་དུ་སྲིད་པ་འཕོ་འགྱུར་གྱི། །འཁྲུལ་བར་སྤྱོད་པའི་ཡིད་ཀྱི་ལུས། །བར་མ་དོ་རུ་འཕྱན་པའི་འགྲོ། །རྣམ་ཤེས་མིང་གཟུགས་དབྱེར་མེད་གྱུར། །བདེན་བརྗོད་ནི། ན་མོ། རིན་ཆེན་གསུམ་དང་རྒྱུ་འབྲས་རྟེན་འབྲེལ་དང་། །རྒྱལ་དང་དེ་སྲས་དཀྱིལ་འཁོར་འཁོར་ལོ་ཡི། །ལྷ་སྔགས་ཏིང་འཛིན་སྙིང་རྗེའི་སྟོབས་ཤུགས་ཀྱིས། །ཚེ་འདས་རྣམ་ཤེས་ཁུག་ཅིག་ཛཿཧཱུཾ་ཨཱ། །དྲན་དང་ཤེས་བཞིན་དད་པས་ཏིཥྛ་ལྷན། །བགེགས་གཏོར་ནི། གཟུང་འཛིན་ལོག་པར་རྟོག་པའི་རྐྱེན་སྣང་ལས། །ཤར་ཞིང་ཐར་བ་བྱང་ཆུབ་གེགས་བྱེད་པ། །ཀུན་བཏགས་གདོན་བགེགས་གཤེད་བྱེད་འབྱུང་པོའི་ཚོགས། །གཏོར་མས་ཚིམས་ཤིང་རང་སར་བཛྲ་མུཿ །སརྦ་བྷུ་ཏ་གཙྪ། སྲུང་འཁོར་ནི། ཡེ་ཤེས་ལྔ་ལྡན་འཇའ་འོད་གུར་ཁྱིམ་ཀློང་། །རང་ཤར་རྒྱལ་བའི་ཞིང་གི་བཀོད་པ་རུ། །བདེར་གནས་བག་ཕེབས་དགའ་མགུ་རངས་པའི་སེམས། །འདུན་པ་་རྩེ་གཅིག་ཡིད་ཀྱིས་གནས་པར་གྱུར། སྡིག་པ་སྦྱོང་བ་ནི། ཐོག་མེད་དུས་ནས་ལས་ངན་དབང་གྱུར་པའི། །སྡིག་ལྟུང་ཉེས་སྒྲིབ་ཡི་གེ་ཀཾ་ནག་པོ། །སྙིང་གར་ཤར་བ་རླུང་གིས་ཕྱིར་གཞོལ་ཏེ། །ཚངས་གྲངས་སྦྱོར་བས་རང་བཞིན་རྣམ་པར་དག །ༀ་སརྦ་པཱ་པཾ་ད་ཧ་ན་ཤིནྟཾ་ཀུ་རུ་ཡེ་སྭཱ་ཧཱ། རིགས་དྲུག་གནས་འདྲེན་ནི། བག་ཆགས་ལས་ཀྱི་རྐྱེན་སྣང་ལས་གྲུབ་པའི། །རིགས་དྲུག་སྲིད་པའི་རང་གཟུགས་གྲོང་ཁྱེར་དྲུག །ཨ་ཪྣྲྀ་སུ་ཏྲི་པྲེ་དུ་ལས་འཕྲུལ་བའི། །བག་ཆགས་རྐྱེན་སྣང་ཉམ་ངའི་གནས་སུ་ཤར། །རང་ཉིད་ལྷག་པའི་ལྷ་ཡི་གནས་དྲུག་ཏུ། །ཆོས་ཉིད་རིག་པའི་རྩལ་སྣང་ཡེ་ཤེས་དྲུག །རྒྱལ་བ་རིགས་དྲུག་ལོངས་སྐུ་མཚན་དཔེར་རྫོགས། །ཐབས་ཤེས་དབྱིངས་སྦྱོར་བདེ་སྟོང་འདུ་འབྲལ་མེད། །ཐུགས་རྗེའི་རང་རྩལ་ཐུབ་དྲུག་སྤྲུལ་པའི་སྐུ། །མར་མེ་གཅིག་ལས་གཉིས་སུ་མཆེད་པ་ལྟར། །འཕྲོས་པའི་སྐུ་ལས་བདུད་རྩིའི་སྤྲིན་ཆར་གཡོས། །འདི་ནི་ཕ་རོལ་ཕྱིན་དྲུག་དག་བྱེད་རྒྱུན། །བག་ཆགས་དྲུག་སྦྱངས་རིགས་དྲུག་འཁོར་བ་སྟོང་། །ཡེ་ཤེས་རྡོ་རྗེའི་གོ་འཕང་མངོན་གྱུར་ནས། །ཞིང་ཁམས་རྒྱ་མཚོར་དབུགས་འབྱིན་ཐོབ་པར་ཤོག །ཆོས་བཤེད་པ་ནི། ཀྱཻ་མ། ཉོན་ཅིག་སྐལ་ལྡན་ཚེ་འདས་རིགས་ཀྱི་བུ། །རང་རིག་དྲི་བྲལ་ཡེ་སངས་རྒྱས་པའི་ངང་། །མཉམ་པར་བཞག་པས་ཆོས་སྐུའི་རང་ཞལ་མཐོང་། །ཀུན་བརྟག་མ་རིག་གདོན་རྐྱེན་དབྱིངས་སུ་སྒྲོལ། །གཞན་དབང་འཁྲུལ་པའི་སྒྲིབ་གཉིས་རང་སར་དག །ཡོངས་གྲུབ་བདེ་གཤེགས་གཞོན་ནུ་བུམ་སྐུར་མཇལ། །བདེ་ཆེན་ཡེ་ཤེས་འཁོར་ལོར་དབང་བསྒྱུར་ཤོག །ཟས་གཏད་ནི། ཨེ་མ། རྟོག་ཚོགས་སྲེད་པའི་ཡུལ་སྣང་དུ། །འདོད་ཡོན་ལོངས་སྤྱོད་རྒྱན་དུ་ཤར། །ཞེན་བྲལ་སྒྱུ་མར་རོལ་པའི་མདངས། །སྣང་ངོར་ཟག་མེད་བདེ་བར་རོལ། །སརྦ་པཱུ་ཙ་ཧོ། འཕོ་བ་ནི། །ཆོས་ཅན་སྲིད་པའི་སྒྱུ་ལུས་དག་པའི་སྐུར། །ཆོས་ཉིད་ཡེ་ཤེས་བདེ་སྟོང་ལྷན་སྐྱེས་ངང་། །རང་བཞིན་རྣམ་དག་འདུས་མ་བྱས་དབྱིངས་སུ། །དབྱེར་མེད་ཐུགས་ཀྱི་ཐིག་ལེའི་ཀློང་དུ་ཨ། ཕཊཿ ཕཊཿ ཕཊཿ སྨོན་ལམ་ནི། རྣམ་དག་བསམ་པ་དག་པའི་ས་བོན་ལས། །བདེན་གཉིས་བསླུ་མེད་སྨོན་ལམ་དག་པའི་མཐུས། །མར་གྱུར་སྲིད་པའི་གནས་ལ་འཕྱན་པའི་འགྲོ། །ཐམས་ཅད་རྡོ་རྗེ་འཛིན་དབང་མངོན་འགྱུར་ཤོག །གྲུབ་པའི་དབང་ཕྱུག་ཀུན་བཟང་གཞན་ཕན་གྱི། བྱིན་བརླབས་འཕོ་བ་གྲོང་ཞུགས་ཨཪྱ་དེར། གསུང་གི་བདུད་རྩིའི་འོད་དཀར་སྙིང་ལ་སིམ། ངག་དབང་འཇིགས་མེད་ཐུགས་ཀྱི་ཀུ་མུ་ཏ། དབྱངས་ཅན་དགྱེས་པའི་ཟླ་བ་ཤར་དེས་སྤེལ། གནས་མཆོག་ཀཿཐོག་སེང་གེའི་སྤྱི་བོར་རྒྱལ། ཐོག་མཐའ་བར་དུ་དགེ་ཞིབ་ཛ་ཡནྟུ། དགེའོ། དགེའོ། དགེའོ།། །། གཅོད་ཀྱི་གཤེད་འདུལ་གདུག་པ་ཚར་གཅོད་ཀྱི་སྙིང་པོ་ཕྱོགས་ལས་རྣམ་པར་རྒྱལ་བའི་གསེར་འཁོར།༄༅། །གཅོད་ཀྱི་གཤེད་འདུལ་གདུག་པ་ཚར་གཅོད་ཀྱི་སྙིང་པོ་ཕྱོགས་ལས་རྣམ་པར་རྒྱལ་བའི་གསེར་འཁོར་ཞེས་བྱ་བ་བཞུགསཿ སྐྱེ་མེད་ཆོས་སྐུ་ཀུན་བཟང་ཡུམ་ཆེན་མོ། །འགག་མེད་ལོངས་སྐུ་ཕག་མོ་རིགས་ལྔ་ཡུམ། །གང་འདུལ་སྤྲུལ་སྐུ་མཚོ་རྒྱལ་ལབ་སྒྲོན་སོགས། །མ་རྒྱུད་མཁའ་འགྲོའི་ཡབ་གཅིག་བླ་མར་འདུད། །བདུད་བཞི་དབྱིངས་སུ་གཅོད་བྱེད་ལབ་སྒྲོན་མའི། །སྙིང་ཐིག་ཟབ་གནད་ལས་ཀྱང་ཆེས་ཟབ་དོན། །གཅོད་ཀྱི་གཤེད་འདུལ་གདུག་པ་ཚར་གཅོད་ཀྱི། །སྙིང་པོ་བྱེ་མར་ཐོན་པའི་གསེར་འདི་འོ། །དེ་ལ་གཅོད་ཀྱི་ཡར་གཞི་བཅའ་ཤོམ་སོགས། །སྤྲོས་པ་ཆེ་ཆུང་དང་བསྟུན་སོམ་ཉི་སྤངས། མར་གཞི་ནག་པོར་རི་སྣ་གསུམ་གྱི་རྡོ། །བླངས་ལ་སྒྱེད་པུའི་ཚུལ་བཙུགས་དེ་ཡི་ཁར། །ཁྲག་གིས་གྲུ་གསུམ་བྲིས་པའི་སླང་འཛུགས། །དེའི་ཁར་གྲི་གསུམ་ལྟག་པ་ཕྱིར་བསྟན་ནས། །ཧོམ་ཁུང་ཚུལ་དུ་བཞག་པའི་མཐའ་སྐོར་དུ། །འོག་གི་འདོན་ཆར་མཐུན་པའི་རྫས་རྣམས་དང་། །ཕུར་བུ་གཅིག་ཀྱང་གདན་ལ་བཙུགས་ཏེ་བཞག །དེ་ནས་ལིང་ག་བྲི་བ་ལ་རྒྱས་པར་ན་གཅོད་འདུལ་ལྟར་དང་། །བསྡུ་ན་ཤི་སྲི་ཤ་བའི་མགོ་ཅན་གྱི་སྙིང་དཀར་ནྲྀ་ཏྲི། །ཡན་ལག་བཞིར་ཛཿཧཱུཾ་བཾ་ཧོ་དང་ཞ་བཞི་བྲི། །ལིངྒའི་སྲོག་ཡིག་མཐར་གནོད་བྱེད་དུར་སྲི་དམ་སྲི་ཕོ་སྲི་མོ་སྲི་ཆུང་སྲི་གཞོན་སྲི་འགག་སྲི། མདའ་སྲི་མདུང་སྲི་སོགས་གང་ཡིན་ཁུག །མ་ར་ཡ་ཛ་ཛཿ ཞེས་སྒོས་ལིང་བྲི་ནུས་ན་དང་། མིན་ཀྱང་སྤྱི་ལིང་ལ་དེ་ལྟར་བྲིས་པས་ཆོག་གོ། ཤིན་ཏུ་བསྡུ་ན་ཤིང་བྱང་ལ་ནྲྀ་ཏྲི་ཛཿབྲིས་པ་དང་། ཟན་ལིང་ཙམ་གྱིས་རུང་ངོ་། ཅིའི་ཕྱིར་ན་གཅོད་ནི་དམིགས་པ་གཙོ་ཆེ་བས་ཕྱིར་རོ། དེ་ཡང་མཁའ་འགྲོའི་ཆོ་ག་གཞུང་བསྲངས་ལ་ཚོགས་ལྷག་ལ་མ་ཐུག་བར་བཏང་ལ། དེ་ནས། ཕཊཿ རང་ཉིད་སྐད་ཅིག་གིས་མ་ཅིག་ལབ་ཀྱི་སྒྲོན་མ་ཁྲོས་མ་དམར་མོ་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། སྤྱན་གཡས་གཡོན་ཉི་ཟླའི་འོད་ཟེར་འཕྲོ་བ། དབུས་མ་ལ་ཉི་ཟླ་སྤེལ་མའི་དཀྱིལ་འཁོར་གྱིས་སྲིད་གསུམ་གཟིགས་པ། དབུ་སྐྲ་ཕྱེད་བཅིངས་པའི་ཟར་བུ་ལ་ལྕགས་བསྲེག་གི་ཕུར་པ་རེ་རེས་བརྒྱན་པ། དུར་ཁྲོད་ཆས་ཀྱིས་བརྒྱན་ཞིང་ཞབས་གཡས་གཡོན་བསྐུམ་ཞིང་བརྐྱང་པས་རི་རབ་རྩེ་ནས་གནོན་ཞིང་། རྒྱ་མཚོ་གཏིང་ནས་དཀྲུགས་པ་སྤྱི་བོར་ཕག་ཞལ་ནག་པོའི་ངུར་སྒྲ་སྒྲོག་པས་སྡེ་བརྒྱད་བྲན་དུ་བཀོལ་བ། ཕྱག་གཡས་མི་ལྤགས་ཀྱི་གཡང་གཞི་ཕྱར་ཞིང་གཡོན་མི་རྐང་གི་གླིང་བུ་འབུད་པ། འཁོར་རང་འདྲའི་མཁའ་འགྲོ་འབུམ་གྱིས་བསྐོར་བའི་ནམ་མཁར་སངས་རྒྱས་བྱང་སེམས་བླ་མ་ཡི་དམ་མཁའ་འགྲོའི་ཚོགས་རྣམས་གཟུ་དང་དཔང་པོ་དྲང་ཤན་གྱི་ཚུལ་དུ་བཞུགས་པར་གྱུར། ཞེས་བསམས་ལ། ཀྱཻ་དགོངས་ཤིག་མཆོག་གསུམ་རྩ་གསུམ་ལྷ། །གསོན་ཅིག་བཀའ་སྲུང་དམ་ཅན་རྣམས། །ཉོན་ཅིག་ལྷ་སྲིན་དྲེགས་པ་ཅན། །ང་ནི་མ་ཉེས་དགྲ་འདྲེ་ལན། །ཐོག་མཐའ་བར་གསུམ་གང་དུ་ཡང་། །བདག་གི་སྒོ་གསུམ་མ་ཉེས་སོ། །མ་ཉེས་དཔང་དུ་ཁྱེད་རྣམས་བཞུགས། །དམ་ཉམས་དགྲ་གཤེད་སྡིག་ཅན་འདིས། །རྒྱལ་བསྟན་བཤིག་ཅིང་མཆོག་གསུམ་སྨད། །བླ་མར་བརྙས་ཤིང་སྔགས་ལ་གཤེ། །དམ་སྡོམ་ཁྱད་བསད་དགེ་བཅུ་བསྐྱུར། །མི་དགེ་བཅུ་སྤྱོད་འགྲོ་ལ་འཚེ། །ཁྱད་པར་བདག་དང་བསྲུང་བྱ་ཡི། །མི་ནོར་རྟ་ཕྱུགས་ཡོངས་ལ་འཚེ། །ཚེ་དཔལ་སྟོབས་འབྱོར་ཕུན་ཚོགས་ཕྲི། །ཐོས་བསམ་སྒོམ་ལ་བར་ཆོད་བརྩམས། །ཁྱོད་ཀྱིས་ངན་སྦྱོར་སྣ་ཚོགས་བྱས། །དེ་ཕྱིར་བསྒྲལ་བའི་ཞིང་དུ་གྱུར། །ཞིང་བཅུ་ཚང་བའི་དགྲ་གཤེད་ཁྱོད། །བསྒྲལ་བའི་ཆོ་ག་བྱེད་པ་འདི། །ངན་སོང་གནས་ནས་འདྲེན་པའི་རྟགས། །བསྒྲལ་ཆས་སྣ་ཚོགས་བཀྲམ་པ་འདི། །གང་འདུལ་ཕྲིན་ལས་འགྱེད་པའི་རྟགས། །སྣ་ཚོགས་རྫས་སྣ་བསགས་པ་འདི། །རྟེན་འབྲེལ་ཐབས་ལ་མཁས་པའི་རྟགས། །ཨེ་མ་གཤེད་པོ་སྙིང་རེ་རྗེ། །མི་དགེ་བཅུ་བོ་སྤྱད་སྤྱད་ནས། །ངན་སོང་གསུམ་དུ་ལྷུང་དོགས་ཀྱིས། །སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །བསྒྲལ་ནས་གྲོལ་བར་བྱ་བའི་ཕྱིར། །ལྷ་དང་སྲུང་མ་ཐམས་ཅད་ཀྱིས། །གསེར་སྐྱེམས་གཉན་པོ་འདི་གསོལ་ལ། །རྣལ་འབྱོར་བདག་གི་སྟོངས་གྲོགས་མཛོད། །ཅེས་བརྗོད་ལ་གཤེད་པོ་རྒྱབ་རྟེན་ཐམས་ཅད་དང་བྲལ་བར་བསམས་ལ། ཕཊ྄ཿ ཤར་མང་དུ་བྱའོ། དེ་ནས་འདུལ་ཆས་རྣམས། ཕཊ྄ཿ གཤེད་གཞི་མི་ལྤགས་ཀྱི་གཡང་གཞིས་ས་གཞི་ཁྱབ་པའི་སྟེང་དུ། གཤེད་རྡོ་མི་མགོའི་སྒྱེད་པོ་གསུམ་གྱི་ཁར། སླང་དམྱལ་བའི་ཟངས་དམར་ལྟར་ཁྲོ་ཆུ་ཁོལ་མས་གང་བ། གཤེད་སྒྲོ་མི་ལྤགས་ཀྱི་སྒྲོ་བ་རླུང་ཐུབ་པ། གཤེད་འབྲེང་རྒྱུ་མའི་ཞགས་པ་འདོམ་དགུ་བ། གཞན་ཡང་གཤེད་སྟྭར་ཁ་ཆེ། གཤེད་ཟོར་འགུག་མོ། མདའ་མདུང་གྲི་དང་རྔ་མ། ཐོ་བ་ཐུན་རྫས་ཕུར་པ་རྡུང་ཤ་ལག་པ་བཅས་མེ་འབར་ཞིང་ཚ་ཚ་འཕྲོ་བ་རེག་པ་ཙམ་གྱིས་རྡུལ་དུ་བརླག་པའི་ནུས་པ་དང་ལྡན་པར་གྱུར། ཞེས་བསམས་ལ། ཕཊ྄ཿ ལིང་ག་མི་དམིགས་པའི་ངང་ལས། གནོད་བྱེད་ཤི་འདྲེ་ཤི་སྲི་གང་ཡིན་པ་དེ་ཉིད་མྱ་ངན་གྱི་འདུག་སྟངས་ཅན། རྐང་ལག་ལྕགས་སུ་བཅུག་པ་བུ་ག་དགུ་ནས་ཁྲག་འཛག་པ། མདོག་སྔོ་ཞིང་མདངས་ཉམས་པ། གཅེར་བུ་ལྷགས་པས་གདུང་བ་བཞིན་འདར་ཕྲི་ལི་ལི་བྱེད་པ། དེའི་སྙིང་ཁའི་སྲོག་ཡིག་ལས་འོད་ཟེར་འཕྲོས་པས་ཟ་འདྲེ་ཤི་གཤེད་ཐམས་ཅད་ཤ་རུལ་ལ་སྦྲང་མ་འདུ་བ་ལྟར་ཐིམ་པར་གྱུར། ཕཊ྄ཿ ན་མོ་གྲུབ་ཐོབ་གཅོད་ཡུལ་བརྒྱུད་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། མཆོག་གསུམ་རྩ་གསུམ་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི༴ ཁྱད་པར་དུ་ཆོས་སྐུ་ཡེ་ཤེས་ཀྱི་མཁའ་འགྲོ་མ་ཡུམ་ཆེན་མོའི་ལྷ་ཚོགས་འཁོར་དང་བཅས་པ་རྣམས་ཀྱི༴ ལོངས་སྐུ་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ལྷ་ཚོགས་རྣམས་ཀྱི༴ སྤྲུལ་སྐུ་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མའི་ལྷ་ཚོགས་འཁོར་དང་བཅས་པ་རྣམས་ཀྱི༴ ཆོས་ཉིད་འགྱུར་བ་མེད་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་ཆེན་པོའི་མཐུ་སྟོབས་བྱིན་རླབས་ལ་བརྟེན་ནས། བསྟན་དང་བསྟན་འཛིན་གྱི་སྤྱི་དགྲ། རྣལ་འབྱོར་བདག་དང་བསྲུང་བྱའི་སྒོས་དགྲ། ཁྱད་པར་དུའང་བསྲུང་བྱ་རྣམས་ལ་ལན་ཆགས་དང་ཤ་འཁོན་མ་འཁོར་བའི་རིགས་སུ་གྱུར་བའི་གཤིན་པོ་རྣམས་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ཀྱིས་སྲོག་འཕྲོག་པ། གཤིན་པོའི་གནས་མི་བདེ་ཞིང་། གསོན་པོ་བཀྲ་མི་ཤིས་པར་བྱེད་པའི་ཟ་འདྲེ་ཤི་གཤེད་སྲོག་གཅོད་དབུགས་ལེན་ཚེ་ལེན་མདངས་འཕྲོག གསོན་བདུད་གཤིན་ལྕགས། ཆེ་སྲི་ཆུང་སྲི་དར་སྲི་སྒབ་འདྲེ་གནོད་པར་བྱེད་པ་ཐམས་ཅད་མཐོ་རི་བོའི་རྩེ། དམའ་རྒྱ་མཚོའི་གཏིང་། བར་གླིང་བཞི་གླིང་ཕྲན་བརྒྱད། ས་འོག་ས་སྟེང་ས་བླ་སྲིད་པ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིང་ག་མིང་བྱང་བུ་འདི་ལ་ཁུག་ཅིག བཛྲ་ཨཾ་གུ་ཤ་ཛཿ བཛྲ་པ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷནྡྷེ་ཧོ། བཛྲ་ཨ་ཝེ་ཤ་ཡ་ཨཿ ཕཊ྄ཿ ཕཊ྄ཿ ཕཊ྄ཿ ཅེས་རྐང་དུང་དང་རྡོར་དྲིལ་དྲག་ཏུ་དཀྲོལ་ལོ། འགུགས་གཞུག་ལན་གསུམ་བྱས་ལ། ལིང་ག་བྱང་བུ་རྣམས་སྒྲོ་བར་བཅུག་ལ་གཤེད་འབྲེང་གིས་སེ་ཆིངས་མདུད་པ་བྱས་ལ་གཅོད་གཡོག་པས། སྟྭ་རེ་ཕྲག་པ་གཡས་སུ་ཕྱར། འབྲེང་བ་གྲུ་མོ་གཡོན་ལ་བསྐོན། ཟོར་བ་གཡོན་དུ་ཐོགས། ལག་པས་གཤེད་སྒྲོ་བཟུང་ནས་ལངས་ཏེ་འདུག་ལ། ཕྱོགས་སོ་སོར་ཁ་ཀྱུ་བཞིན། ཧཱུཾཿ ང་ནི་ཁྲོས་མ་ནག་མོའི་སྐུ། །སྲིད་གསུམ་འདུལ་བའི་མཐུ་མོ་ཆེ། །ཕག་ཞལ་གཟུགས་མེད་ཁམས་སུ་ངུར། །སྐུ་སྟོད་གཟུགས་ཁམས་གནས་སུ་འགྱིང་། །སྐུ་སྨད་འདོད་ཁམས་གནས་སུ་རོལ། །ཞབས་ཀྱིས་ངན་སོང་གསུམ་པོ་མནན། །མི་ཤ་གཤེད་ལ་བདའ་བའི་ཕྱིར། །སྤྲུལ་པའི་ཕོ་ཉས་སྟོང་གསུམ་གང་། །སྐུ་ལས་སྤྲུལ་བའི་ཕོ་ཉ་ནི། །ལྕགས་ཀྱི་སྤྱང་ཀི་སྔོན་མོ་ལ། །དུང་གི་བུད་མེད་དཀར་མོས་བཅིབས། །ཡོན་ཏན་སྤྲུལ་པའི་ཕོ་ཉ་ནི། །ལྕགས་ཀྱི་སྤྱང་ཀི་སྔོན་མོ་ལ། །གསེར་གྱི་བུད་མེད་སེར་མོས་བཅིབས། །གསུང་ལས་སྤྲུལ་བའི་ཕོ་ཉ་ནི། །ལྕགས་ཀྱི་སྤྱང་ཀི་སྔོན་མོ་ལ། །བྱུ་རུའི་བུད་མེད་དམར་མོས་བཅིབས། །ཕྲིན་ལས་སྤྲུལ་པའི་ཕོ་ཉ་ནི། །ལྕགས་ཀྱི་སྤྱང་ཀི་སྔོན་མོ་ལ། །གཡུ་ཡི་བུད་མེད་ལྗང་མོས་བཅིབས། །ཐུགས་ལས་སྤྲུལ་བའི་ཕོ་ཉ་ནི། །ལྕགས་ཀྱི་སྤྱང་ཀི་སྔོན་མོ་ལ། །མཐིང་གི་བུད་མེད་སྔོན་མོས་བཅིབས། །སྤྲུལ་པའི་ཕོ་ཉ་མཁའ་འགྲོ་ལྔའི། །ཀླད་ན་བླ་བྱ་རང་མདོག་ལྡིང་། །རོལ་དུ་བླ་ཁྱི་རང་མདོག་ཁྲིད། །མཁའ་འགྲོ་སྡེ་ལྔ་སོ་སོ་ཡིས། །བླ་འཛིན་དྲྭ་བ་རྒྱབ་ཏུ་ཁུར། །གཤེད་སྟྭར་ཁ་ཆེ་ཕྲག་ལ་གཟར། །གཤེད་ཟོར་འགུག་མོ་ལག་ན་ཐོགས། །གཤེད་སྒྲོ་རླུང་ཐུབ་མཆན་དུ་བཅུག །གཤེད་འབྲེང་འདོམ་དགུ་གྲུ་ལ་བསྐོན། །མི་ཤ་གཤེད་ལ་བདའ་བའི་ཕྱིར། །གནོད་བྱེད་ཟ་འདྲེ་ཤི་གཤེད་འདི། །ཕྱོགས་རྣམས་ཀུན་ནས་ཁུག་ལ་ཤོག །མི་ལྤགས་གཡང་གཞིས་རྡོབས་ལ་ཤོག །གཤེད་སྟྭར་ཁ་ཆེས་རྒྱོབ་ལ་ཤོག །གཤེད་ཟོར་འགུག་མོས་ཟུངས་ལ་ཤོག །གཤེད་སྒྲོ་རླུང་ཐུབ་ནང་དུ་ཆུགས། གཤེད་འབྲིང་འདོམ་དགུས་སྡོམས་ལ་ཤོག །བླ་འཛིན་དྲྭ་བས་དྲིལ་ལ་ཤོག །སྐད་ཅིག་ཉིད་ལ་འདིར་ཁུག་ཅིག །ༀ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས། གནོད་བྱེད་ཟ་འདྲེ་ཤི་གཤེད་སྲོག་གཅོད་དབུགས་ལེན་ཤི་སྲི་གསོན་བདུད་གཤིན་ལྕགས་ཐམས་ཅད་ནྲི་ཏྲི་ཨཾ་གུ་ཤ་ཛཿཛཿ ཕཊ྄ཿ ཕཊ྄ཿ ཕཊ྄ཿ དེ་ནས་བྱང་བུ་མ་ཁུག་པ་ཡོད་ན་དང་། མེད་ཀྱང་ཟན་ལིང་སྒྲོ་བར་བཅུག་ལ་ཁྱིམ་གྱི་སྒོ་ཁྱིམ་རྣམས་ཀུན་ལ་གཤེད་སྒྲོ་རྡེབ་ཅིང་འདི་སྐད་དོ། ཧཱུཾ་ང་ནི་ཁྲོས་མ་ནག་མོའི་སྐུ། །ཁམས་གསུམ་འདི་ན་ང་དབང་ཆེ། །གཤེད་པོ་ལས་ངན་སྡིག་ཅན་ཁྱོད། །ཁྱོད་ལ་གབ་པའི་ཡུལ་མེད་ཅིང་། །ཁྱོད་ལ་སྐུང་བའི་ས་ཡང་མེད། །ཁྱོད་འབྱུང་ལྔའི་ཁམས་སུ་གབ་སྙམ་ཞིང་། ཁ་དོག་ལྔ་པོར་སྐུང་སྙམ་ན། །འབྱུང་ལྔ་ཡུམ་ཆེན་ལྔ་ཡིན་ཕྱིར། །དེ་ཡང་ང་ཡི་སྤྲུལ་པ་ཡིན། །མཁའ་འགྲོ་འབྱུང་ལྔའི་ཁམས་ལྟར་གཡོ། །རང་མདོག་མཁའ་འགྲོ་སྡེ་ལྔ་པོ། །ཁྲི་འབུམ་བྱེ་བ་ས་ཡའི་ཚོགས། །ཁྱེད་རྣམས་ཐུགས་དམ་དུས་ལ་བབ། །གཤེད་པོ་གབ་པའི་གབ་སྐུད་ཕུད། །ལྕགས་ཀྱུ་འབར་བས་སྙིང་ནས་ཟུངས། །ཞགས་པ་འབར་བས་མགུལ་ནས་ཆིངས། །ལྕགས་སྒྲོག་འབར་བས་ཡན་ལག་སྡོམས། །དྲིལ་བུ་འབར་བས་མྱོས་སུ་ཆུགས། ལས་ཀྱི་རླུང་གིས་རྒྱབ་ནས་དེད། །བསྐལ་པའི་མུན་པས་མདུན་ནས་སུས། །གཟུགས་བརྙན་ལིང་ག་འདི་ལ་ཁུག །མིང་ཡིག་བྱང་བུ་འདི་ལ་སྟིམས། །རང་དབང་མེད་པར་འདིར་ཁུག་ཅིག །ཕཊ྄ཿ ཅེས་གབ་སྐུང་ཕུད་པར་བྱའོ། ད་དུང་མ་ཁུག་པ་འདུག་གམ་མིན་ཀྱང་ཟན་ལིང་དང་ཤོག་ལིང་བཅས་སྒྲོ་བར་བཅུག་ལ། གདོང་ཆེན་བཞིའི་འགུགས་བསྒྲལ་ནི། གཤེད་སྒྲོ་དེ་གཤེད་འབྲེང་གིས་བཀྱིགས་ལ་རུས་མི་གཅིག་པ་གཉིས་ཀྱིས་ཕར་འཐེན་ཚུར་འཐེན་བྱེད་ཅིང་ཕྱོགས་བཞིར་རྡེབ་བཅུག་ཅིང་། གདོང་ཆེན་རྣམས་ཀྱིས་ཕྱོགས་སོ་སོ་ནས་གཡང་གཞི་རྡེབ་བཞིན་དེད་བྱུང་བ། ལས་བྱེད་དམར་མོ་ཞགས་པ་འཛིན་པ་གཉིས་ཀྱིས་ཞགས་པ་འཕངས་པ་སྐེ་ལ་ཐེབས་ནས། ཕར་འཐེན་ཚུར་འཐེན་བྱས་པས་སྐད་ངན་ཙིར་ཙིར་འདོན་པར་བསམས་ལ། མ་ཡུམ་ཆེན་ཐུགས་ལས་སྤྲུལ་བའི་སྲས། །མ་ཅིག་ཇོ་མོ་རྣལ་འབྱོར་མ། ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཡོངས་ཀྱི་རྒྱུད་གྲོལ་མ། །ཐུགས་དམ་བསྐུལ་ལོ་མཁའ་འགྲོའི་ཚོགས། །སངས་རྒྱས་མཁའ་འགྲོའི་དུས་ལ་བབ། །ཁྲོས་མ་ནག་མོའི་དུས་ལ༴ །དུར་ཁྲོད་བདག་མོའི་དུས་ལ༴ །མ་ཤར་ཕྱོགས་དུར་ཁྲོད་གཞལ་ཡས་ནས། །རྡོ་རྗེ་རིགས་ཀྱི་མཁའ་འགྲོ་མ། །དཀར་མོ་ཆེན་མོ་སེང་གདོང་མ། །ཕྱོགས་བཞིར་སེང་གདོང་ལས་བཞིའི་མདོག །ཤར་ཕྱོགས་མཁའ་འགྲོ་སྡེ་ལྔ་ཡང་། །ཕྱག་གཡས་ཞིང་ཆེན་གཡང་གཞི་བརྡབས། །གཡོན་པས་འགུགས་པའི་ལྕགས་ཀྱུ་བསྣམས། །ཤར་ཕྱོགས་མཁའ་འགྲོའི་དུས་ལ་བབ། །སྲོག་གཅོད་དབུགས་ལེན་འགུགས་པའི་དུས་ལ་བབ། །ཟ་འདྲེ་ཤི་གཤེད་འགུགས་པའི༴ །བཀུག་ནས་བསྒྲལ་བའི་དུས་ལ༴ །དུས་ལ་བབ་པོ་ས་མ་ཡ། ཕཊ྄ཿ ཧཱུཾ་ལྷོ་ཕྱོགས་དུར་ཁྲོད་གཞལ་ཡས་ནས། །རིན་ཆེན་རིགས་ཀྱི་མཁའ་འགྲོ་མ། །སོར་མོ་ཆེན་མོ་སྟག་གདོང་མ། །ཕྱོགས་བཞིར་སྟག་གདོང་ལས་བཞིའི་མདོག །ལྷོ་ཕྱོགས་མཁའ་འགྲོ་སྡེ་ལྔ་ཡང་། །ཕྱག་གཡས་ཞིང་ཆེན་གཡང་གཞི་བརྡབས། །གཡོན་པས་འགུགས་པའི་ལྕགས་ཀྱུ་བསྣམས། །ལྷོ་ཕྱོགས་མཁའ་འགྲོའི་དུས་ལ་བབ། །སྲོག་གཅོད་དབུགས་ལེན་འགུགས་པའི་དུས་ལ༴ །ཟ་འདྲེ་ཤི་གཤེད༴ བཀུག་ནས་བསྒྲལ་བའི༴ དུས་ལ་བབ་པོ་ས་མ་ཡ། ཕཊ྄ཿ ཧཱུཾ་ནུབ་ཕྱོགས་དུར་ཁྲོད་གཞལ་ཡས་ནས། པདྨ་རིགས་ཀྱི་མཁའ་འགྲོ་མ། །དམར་མོ་ཆེན་མོ་ཆུ་སྲིན་གདོང་། །ཕྱོགས་བཞིར་ཆུ་སྲིན་ལས་བཞིའི་མདོག །ནུབ་ཕྱོགས་མཁའ་འགྲོ་སྡེ་ལྔ་ཡང་། །ཕྱག་གཡས་ཞིང་ཆེན་གཡང་གཞི་བརྡབས། །གཡོན་པས་འགུགས་པའི་ལྕགས་ཀྱུ་བསྣམས། །ནུབ་ཕྱོགས་མཁའ་འགྲོའི་དུས་ལ་བབ། །སྲོག་གཅོད་དབུགས་ལེན་འགུགས་པའི་དུས་ལ༴ །ཟ་འདྲེ་ཤི་གཤེད་འགུགས་པའི༴ །བཀུག་ནས་བསྒྲལ་བའི་དུས༴ །དུས་ལ་བབ་པོ༴ ཕཊ྄ཿ ཧཱུཾ་བྱང་ཕྱོགས་དུར་ཁྲོད་ཆེན་པོ་ནས། །ལས་ཀྱི་རིགས་ཀྱི་མཁའ་འགྲོ་མ། །ལྗང་མོ་ཆེན་མོ་འབྲུག་གདོང་མ། །ཕྱོགས་བཞིར་འབྲུག་གདོང་ལས་བཞིའི་མདོག །བྱང་ཕྱོགས་མཁའ་འགྲོ་སྡེ་ལྔ་ཡང་། །ཕྱག་གཡས་ཞིང་ཆེན་གཡང་གཞི་བརྡབས། །གཡོན་པ་འགུགས་པའི་ལྕགས་ཀྱུ་བསྣམས། །བྱང་ཕྱོགས་མཁའ་འགྲོའི་དུས་ལ་བབ། །སྲོག་གཅོད་དབུགས་ལེན༴ །ཟ་འདྲེ་ཤི་གཤེད་འགུགས་པའི་དུས་ལ་བབ། །བཀུག་ནས་བསྒྲལ་བའི༴ །དུས་ལ་བབ་པོ༴ །ཕཊ྄ཿ ཕཊ྄ཿ །དེ་ནས་ཤིང་བྱང་ཟན ལིང་བཅས་སླ་ངར་བྱོས་ལ་བྲོས་ལམ་བཅད་པ་ནི། སྦྱིན་བདག་ཕོ་མོ་རྣམས་འདུལ་ཆས་བཟུང་ཞིང་སླ་ང་བསྐོར་བཞིན། ཧཱུཾ་ང་ནི་ཁྲོས་མ་ནག་མོའི་སྐུ། སྣང་སྲིད་ཐམས་ཅད་ང་ལས་བྱུང་། །གནོད་བྱེད་ཟ་འདྲེ་ཤི་གཤེད་ཁྱོད། །ཕྱོགས་བཞི་མཚམས་བཞི་སྟེང་འོག་སོགས། །གང་དུ་ཡང་ནི་མ་འབྲོས་ཞིག །གལ་ཏེ་འབྲོ་བར་སྙམ་ན་ཡང་། །དེར་བཞུགས་མཁའ་འགྲོའི་ལྷ་ཚོགས་རྣམས། །ཀུན་ཀྱང་ང་ཡི་ཕོ་ཉ་ཡིན། །གཤེད་པོ་ཕྱོགས་བཅུར་འབྲོ་ལམ་ཆོད། །ཧཱུཾ་ང་ནི་ཁྲོས་མ་ནག་མོ་ཡིན། །གཤེད་པོ་ལས་ངན་སྡིག་ཅན་ཁྱོད། །ཉིན་མཚན་དུས་དྲུག་ནམ་དུ་ཡང་། །འབྲོ་འདོད་བསམ་སྦྱོར་མ་སྐྱེ་ཞིག །གལ་ཏེ་སྐྱེ་བར་གྱུར་ན་ཡང་། །ཉིན་མཚན་དུས་དྲུག་ལྷ་དྲུག་གིས། །གནོད་བྱེད་གཤེད་པོ་འབྲོ་ལམ་ཆོད། །ༀ་བཛྲ་བྷ་ར་ཧི་ཀྲོ་ཏི་ཀ་ལི་ཧ་རི་ནི་ས་གནོད་བྱེད་ཟ་འདྲེ་ཤི་གཤེད་ཐམས་ཅད་བྷནྡྷ་བྷནྡྷ་ཧ་ན་ཧ་ན་ཧཱུཾ་ཕ྄ཊཿ ཕ྄ཊཿ ཕ྄ཊཿ ཅེས་འདུལ་ཆས་རྣམས་བརྒྱབ་ཏུ་བཅུག ཕཊཿ དྲག་ཏུ་བརྗོད་ཅིང་རྡ་དྲིལ་འཁྲོལ། དེ་ནས་བདེན་པའི་ཆོས་བཤད་པ་ནི། ཨེ་མ་སེམས་ཅན་སྙིང་རེ་རྗེ། །འཁོར་བའི་རྒྱ་མཚོ་གཏིང་རེ་ཟབ། །ངན་སོང་གསུམ་པོ་ཡ་རེ་དང་། །གཤེད་པོ་ལས་ངན་སྡིག་ཅན་ཁྱོད། །གཞན་གནོད་འགོག་ཕྱིར་དྲག་པོས་བཏུལ། །ངན་སོང་གཅོད་ཕྱིར་ཧོམ་ལིང་བཅའ། །དམ་ལས་འདའ་དོགས་སྔགས་རྒྱས་བཅིངས། །ལོག་ལམ་འཁྱམ་དགོས་རྩང་གིས་བསྐོར། །ཟ་འདྲེ་ཤི་གཤེད་ལས་ངན་ཁྱོད། །ལིང་གདན་པད་ཟླའི་གདན་དུ་སྒོམས། །ཚོན་སྐུད་ཡེ་ཤེས་ལྔ་རུ་སྒོམས། །གྲུ་གསུམ་གཞལ་ཡས་ཁང་པར་སྒོམས། །རྩང་དམར་དཔའ་བོ་རྣལ་འབྱོར་སྒོམ། །དྲག་སྔགས་དབུ་མའི་ཆོས་སུ་སྒོམས། །ཐུན་རྫས་ལས་སྒྲིབ་དག་བྱེད་སྒོམས། །ཕུར་གདབ་སྐུ་གསུམ་འབྲས་ཐོབ་སྒོམས། །སྔོན་གྱི་ལས་ངན་གང་བསགས་ལ། །འཕྲལ་དུ་འགྱོད་སེམས་དྲག་པོའི་བློས། །ལུས་ངག་ཡིད་གསུམ་ཡོན་དུ་ཕུལ། །བསད་བཅད་མནན་པ་མ་ཡིན་ཏེ། །མ་རིག་འཁོར་བ་རྒྱུན་བཅད་ནས། །དག་པའི་ཞིང་དུ་བསྐྱལ་བ་ཡིན། །བྱམས་པ་མགོན་པོའི་བསྟན་པ་ལ། །ཁྱོད་ནི་བྱང་ཆུབ་ཐོབ་པར་ཤོག ཕཊ྄ཿ ཕཊ྄ཿ ཕཊ྄ཿ རྨི་ལམ་དུ་སྲོག་ཆགས་བཟུང་བ་བཀྱིགས་པ་ལྕགས་སུ་བླུགས་པ་སྟོར་བ་རྙེད་པ་རྣམས་གཤེད་ཁུག་རྟགས་དང་ལྷོང་ཚད་ཡིན་ནོ། དེ་ནས་ཕུར་པ་འདེབས་པ་ནི། ༀ་ཧཱུཾ་ཏྲཾཿཧྲཱིཿཨཱཿ མུཾ་ལཾ་མུཾཿཔྱཾཿཏཾཿ བདག་ཉིད་ཁྲོས་མའི་སྐུར་གསལ་ཕྱག་སོར་བཅུ། རིགས་ལྔ་སྟངས་དཔྱལ་བཅུར་གསལ་སྦྱོར་མཚམས་ནས། བྱང་སེམས་ཡི་གེ་ཧཱུཾ་མཐིང་འོད་ཞུ་བར། །སྲས་མཆོག་རྡོ་རྗེ་ཕུར་པ་ཁྲོ་རྔམ་འཇིགས། །སྐུ་སྨད་གནམ་ལྕགས་ཕུར་པ་ཟུར་གསུམ་དབལ། །གདེངས་པས་སྲིད་གསུམ་སྒྲོལ་ནུས་མཐུ་ལྡན་གྱུར། །ༀ་བྷུདྡྷ་བཛྲ་རཏྣ་པདྨ་ཀརྨ་ཀཱི་ལ་ཡ་སརྦ་ཏ་ཐཱ་ག་ཏ་ཀཱ་ཡ་ཝཱཀྐ་ཙིཏྟ་གུརྣ་ཀརྨ་ཨ་བྷི་ཥིཉྩ་ཧཱུཾ། ཧཱུཾ་རྒྱལ་བ་སྲས་བཅས་གསང་གསུམ་ཡོན་ཏན་དང་། །ཕྲིན་ལས་བྱིན་རླབས་ནུས་སྟོབས་མ་ལུས་པ། །ཕུར་པར་ཐིམ་པས་གཟི་འོད་བཀྲག་རྒྱས་གྱུར། ཞེས་བསམས་ལ། ཧཱུཾ་ཡིག་ལས་བྱུང་ཁྲོས་མ་མཐིང་ནག་འཇིགས། གྲི་ཐོད་འཛིན་ཞིང་སྐུ་སྨད་ཕུར་དབལ་རྣོ། གནོད་བྱེད་སྡིག་ཅན་སྙིང་ལ་མཱ་ར་ཡ། །དམ་ཉམས་གཤེད་པོ་ལས་ངན་སྡིག་ཅན་གྱི། །དབང་པོ་ལྔ་ལ་བཛྲ་ཀཱི་ལ་ཡ། །ཡན་ལག་བཞི་ལ་བཛྲ་ཀཱི་ལ་ཡ། །སྲོག་ཡིག་ཏྲི་ལ་བཛྲ་ཀཱི་ལ་ཡ། །སྟོབས་ནུས་རྡུལ་དུ་བརླག་པའི་ཕྲིན་ལས་མཛོད། །ༀ་བཛྲ་ཝ་ར་ཧི་ཀྲོ་ཏི་ཀཱ་ལི་ཧ་རི་ནི་ས་བཛྲ་ཀཱི་ལི་ཀཱི་ལ་ཡ་གནོད་བྱེད་ཟ་འདྲེ་ཤི་གཤེད་མཱ་ར་ཡ་ཧཱུཾ་ཕཊ྄ཿ ཕཊ྄ཿ ཕཊ྄ཿ ཕཊ྄ཿ ཅེས་ཕུར་པ་སྲོག་ཡིག་ཏྲི་ལ་བཏབ་པས་མར་མེ་བསད་པ་ལྟར་སོང་བར་བསམས་ལ་ཁོའི་སེམས་ཉིད་ཨཱཿདཀར་པོའི་རྣམ་པས་ཕུར་པའི་ཁོང་སེང་ནས་བརྒྱུད་དེ་ཐོན་ཡུམ་ཆེན་མོའི་སྐུར་གྱུར་པར་བསྒོམ་ལ། ཕཊ྄ཿ ཕཊ྄ཿ ཕཊ྄ཿ ཡང་ཁོའི་ཚེ་བསོད་ནམས་ནྲྀཿཡིག་ལྗང་གུར་གྱུར་ནས་རང་ལ་ཐིམ་པས་བཀྲག་མདངས་རྒྱས་པར་བསྒོམ། ཕཊ྄ཿ ཕཊ྄ཿ ཕཊ྄ཿ དེ་ནས་གྲི་གུག་དང་ལྕགས་ཀྱུ་ཐོགས་ལ། །རང་ཉིད་ཁྲོས་མའི་ཐུགས་ཀ་ནས། །ལས་བྱེད་དམར་མོའི་ཕྱག་གཡས་ཀྱིས། །གྲི་གུག་གཡོན་ན་ལྕགས་ཀྱུ་འཛིན། །ལས་ངན་གཤེད་པོ་དམ་ཉམས་འདི། །ལྕགས་ཀྱུས་ཟུངས་ལ་གྲི་གུག་གིས། །ཟ་འདྲེའི་གཟུགས་ཕུང་རྡུལ་དུ་རློགས། ཤ་ཁྲག་རུས་གསུམ་སིལ་བུར་ཐོངས། །ལྷག་མེད་ཚལ་པ་དུམ་བུར་གཏུབས། །ༀ་བཛྲ་ཝ་ར་ཧི་ཀྲོ་ཏི་ཀཱ་ལི་ཧ་རི་ནི་ས་གནོད་བྱེད་ཤི་གཤེད་ཐམས་ཅད་ད་ཧ་དཧ་མཱ་ར་ཡ་ཧཱུཾ་ཕཱཊཿ ཅེས་བརྗོད་ལ་འདུལ་ཆས་རྣམས་ལིངྒའི་སྟེང་དུ་བརྒྱབ་བཅུག་ལ། ཧཱུཾ་ཐུགས་རྗེ་ཁྲོས་མའི་བཀའ་ཉན་ནི། །རིགས་བཞིའི་མཁའ་འགྲོ་བྱེ་བ་འབུམ། །དབུ་སྐྲ་ཐོར་ཚུགས་ལྡེམས་སེ་ལྡེམ། །རིན་ཆེན་རྒྱན་ཆ་སི་ལི་ལི། །རུས་པའི་རྒྱན་ཆ་ཁྲོ་ལོ་ལོ། །དར་གྱི་ཅོད་པཎ་པུ་རུ་རུ། །དུར་ཁྲོད་རྒྱན་ཆ་པུངས་སེ་པུང་། །ཕྱག་ན་མཚོན་ཆ་ཅིར་ཡང་སྤྲུལ། །དོན་ལ་སངས་རྒྱས་ཡིན་མོད་ཀྱང་། །མ་ཁྱེད་ཀྱི་ཐུགས་དམ་དུས་ལ་བབ། །གཤེད་པོ་བསྒྲལ་བའི་དུས་ལ་བབ། །ཟ་འདྲེ་འདུལ་བའི་ཕྲིན་ལས་མཛོད། །ཧཱུཾ་སྔོན་གྱི་བསྐལ་བའི་དང་པོ་ལ། །བཅོམ་ལྡན་ཁྲོས་མ་ནག་མོ་དང་། །དཔའ་བོ་རྟ་མགྲིན་སྟངས་དཔྱལ་གྱིས། །རཱུ་ཏྲ་བསྒྲལ་བའི་ཕུང་པོ་ལས། །རང་གཤེད་དྲག་པོའི་འདུལ་ཆས་བྱུང་། །རཱུ་ཏྲའི་ཕྱི་ཡི་པགས་པ་དང་། །དོན་ལྔ་སྣོད་དྲུག་དབང་པོ་ལྔ། །ཤ་ཁྲག་རུས་པ་སོ་སེན་མོ། །དེ་རྣམས་སོ་སོའི་གཉེན་པོ་རུ། །འདུལ་ཆས་རྣམ་པ་སྣ་ཚོགས་བྱུང་། །རྣམ་པ་རྫས་སུ་གྲུབ་མོད་ཀྱང་། །ལྷ་སྔགས་ཏིང་འཛིན་ནུས་མཐུ་ཡིས། །གཤེད་པོ་བརླག་ནུས་རྫས་སུ་གྱུར། །ༀ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས་གནོད་བྱེད་ཟ་འདྲེ་ཤི་སྲི་ཐམས་ཅད་ཧ་ན་ཧ་ན་པ་ཙ་པ་ཙ་དི་ན་མེ་ཀེ་ན་མཱ་ར་ཡ་ཧཱུཾ། ཕཊ྄ཿ ཕཊ྄ཿ ཕཊ྄ཿ ཅེས་སྔགས་འདོན་བཞིན་རིམ་པར་བརྒྱབ། དེ་ཡང་ཆུར་ཤི་ན་དུག་ཆུའི་དབའ་རླབས། གྲིར་ཤི་ན་རལ་གྲིའི་ཆར། མདའ་ལ་མདའ་ཆར། འགག་གྲི་ལ་དུག་ཆར། དུག་ལ་དུག་ཞགས་སོགས་རང་གཤེད་གནད་ལ་དབབ་པའི་དམིགས་པ་དང་། དེ་ལ་ཕོ་གདོན་ལ་མེ་ཐུན། མོ་གདོན་ལ་ཁྲག་ཐུན། ཀླུ་གདོན་ལ་དུག་ཐུན་དུ་དམིགས་སོ། མཐར་འདུལ་ཆས་རྣམས་ཧོམ་ཁུང་གི་གཡས་གཡོན་དུ་བཞག །སླ་ང་ལིང་རོ་བཅས་མཆོད་གཡོག་པས་བསྟབ་ཚུལ་གྱིས་བཀྱགས་ལ། ཕྱོགས་བཞི་དབུས་ལྔའི་ལྷ་ཚོགས་ལ་བསྟབས་པས་ཟ་འདྲེའི་ཤ་ཁྲག་ཧབ་ཐོབ་ཏུ་ཟོས་པར་བསམས་ལ། ཧཱུཾ་མ་ཅིག་ཁྲོས་མ་ནག་མོ་དང་། །མཁའ་འགྲོ་སྡེ་བཞི་ཞལ་ཕྱེས་ཤིག །གདོན་དུག་ལྔ་བསྒྲལ་བའི་ཕུང་པོ་འདི། །མ་ཁྲོས་མ་ལྷ་ལྔའི་ཞལ་དུ་བསྟབས། །གཟུགས་ཤ་ཁྲག་རུས་པ་མཆོད་པར་བཞེས། །སེམས་སྐྱེ་མེད་ཆོས་ཀྱི་དབྱིངས་སུ་དྲོངས། །ཡེ་ཤེས་ལྔ་ཡི་དངོས་གྲུབ་སྩོལ། །ༀ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་ཌཱཀྐི་ནི་ས་པཱ་རི་ཝ་ར་མ་ཧཱ་མཾ་ས་ལ་ཁཱ་ཧི། མ་ཧཱ་རཀྟ་ལ༴ མ་ཧཱ་ཀིཾ་ནི་རི་ཏི་ཁཱ་ཧི། ཕཊ྄ཿ ཕཊ྄ཿ ཕཊ྄ཿ ཅེས་རོལ་མོ་དང་བཅས་པས་བསྟབ་པར་བྱ་ཞིང་ཟན་ལིང་ཅུང་ཟད་དམར་གཏོར་དུ་བསྟབས། གཞན་ལིང་ག་བྱང་བུ་རྣམས་བྲུབ་ཁུང་དུ་བཅུག་ལ། ཕཊ྄ཿ གནོད་བྱེད་ཟ་འདྲེ་ཤི་གཤེད་མ་ལུས་པ། །ལྕགས་ཁང་གྲུ་གསུམ་འབར་བའི་ནང་ཚུད་ཅིང་། །གནམ་ལྕགས་ཙཀྲ་རྩིབས་བརྒྱད་ཁ་བཅད་སྟེང་། །མི་ལྤགས་གཡང་གཞི་མུན་པ་དགུ་འཐིབས་ཀྱིས། །གཡོགས་པས་ནམ་ཡང་ལྡང་ནུས་མེད་པར་གྱུར། །ཞེས་དང་། དེ་རྗེས་སླ་ང་འགེབ་སྟངས་རེར། ཕཊ྄ཿ རེ་སྦྲགས་ཏེ་ལན་དགུ་བལྡབ་པར་བྱའོ། ཧོམ་ཁུང་སྟེང་དུ་གདབ་ཕུར་འཛུགས་པ་དང་། དེ་སྟེང་མདའ་གསུམ་མཉྫིའི་ཚུལ་བཅིངས་པའི་ཁར། དམར་གཏོར་གཅིག་བཞག་དེ་ཉིད་ཁྲོས་མར་གསལ། ཕཊ྄ཿ བྲུབ་ཁུང་སྟེང་དུ་མ་ཅིག་ཁྲོས་ནག་མ། སྐུ་སྨད་ཕུར་པས་ཟ་འདྲེ་གཟིར་བར་གྱུར། ཞེས་ཕུར་པ་དང་གཏོར་མ་དབྱེར་མེད་ཁྲོས་མར་གསལ་ལོ། ནུབ་དང་པོ་ལ་དེ་ལྟར་དང་། ནུབ་གཞན་དུ་འདུལ་གཞུང་ཚར་རེ་འདོན་དགོས་ཀྱང་ཤོག་ལིང་དང་ཤིང་བྱང་རྣམས་ཧོམ་ཁུང་ནང་ཡོད་ལྟར་རང་སར་མི་སྒུལ་བར་བཞག་ཅིང་། གཤེད་ཕུད་སྐབས་ཟན་ལིང་སྒྲོ་བར་བཅུག་ཅིང་། རྡེབ་དགོས་ཀྱང་བྱང་བུ་ཡར་ཀྱུ་མར་ཀྱུ་བརྟགས་མི་དགོས། ཟན་ལིང་གཅིག་སླ་ངར་བཞག་ལ་བསྒྲལ་ནས་ཧོམ་སྟེང་གི་དམར་གཏོར་དུ་ཕུལ། སྒྲོ་བའི་ནང་གི་ཟན་ལིང་ཧོམ་ཁུང་དུ་བླུགས་ལ་ཁ་བཅད་དོ། དེ་ལྟར་ཞག་དུ་བྱེད་ལ་ཉིན་མཚན་དུས་དྲུག་ཏུ་འབད་དགོས་ཤིང་། དུས་དྲུག་ནི། ཐོ་རངས་དང་། ཉི་དྲོས། ཉིན་གུང་། དགོང་མོ། སྲོད། ནམ་གུང་དང་དྲུག་པོ་འདི་གདོན་འདུལ་བའི་དུས་ཡིན་པས་གལ་ཆེ་ཞེས་གསུངས་སོ། དེ་ནས་དམིགས་པ་གལ་ཆེན་ནི། ཕཊ྄ཿ བྲུབ་ཁུང་དུ་གནམ་ལྕགས་ཀྱི་འཁོར་ལོ་རྩིབས་སྟོང་ངར་དང་ལྡན་པ་གཡོན་དུ་དྲག་ཏུ་འཁོར་བས་ཟ་འདྲེ་ཤི་གཤེད་ཐམས་ཅད་དམར་མྱ་ལ་ལ་གཏུབས་པར་གྱུར། ཕཊ྄ཿ རང་ཉིད་ཁྲོས་མར་གྱུར། བེམ་ཤུན་སྟེང་དུ་ཤ་ཁྲག་སྤུངས་པ་གནོད་བྱེད་ཟ་འདྲེ་རྣམས་ཀྱིས་ཟོས་ཤིང་འཐུངས་པས་ལན་ཆགས་བྱང་བར་བསམ། ཡང་གཡང་གཞིའི་རྩ་བཞི་ནས་བསྡུས། ནམ་མཁར་ཕྱར་ནས་ལྕགས་བསྲེག་གི་ས་གཞིར་བརྡབས་པས་གཞོབ་ཐུལ་གྱིས་ཚིག་པར་བསྒོམ་ཁྲོ་ཆུའི་ཕ་བོང་ལའང་། དེ་ལྟར་བརྡབས་པས་སྐད་ངན་ཙིར་ཙིར་ཁས་བླངས་དམ་བཅས་སྲོག་སྙིང་ཕུལ་བར་བསམ། ཕཊ྄ཿ རང་ཉིད་ཁྲོས་མའི་ཕྱག་གཡས་གནམ་ལྕགས་ཀྱི་རྡོ་རྗེ་ཐོག་དམར་འཕྲོ་བ་གནོད་བྱེད་ཟ་འདྲེ་ལ་བརྒྱབ་པས། ཕྱག་གཡོན་གནམ་ལྕགས་ཀྱི་འཁོར་ལོ་རྩིབས་བརྒྱད་པ་གཉིས་ཤི་གཤེད་ཀྱི་སྟེང་དུ་གཡས་འཁོར་གཡོན་འཁོར་དྲག་ཏུ་བྱས་པས་གནོད་བྱེད་ཟ་འདྲེ་ཤི་གཤེད་ཐམས་ཅད་ཀྱི་ཤ་ཁྲག་རུས་གསུམ་སིལ་བུར་གཏུབ་པ་མཁའ་འགྲོ་མ་གྲངས་མེད་ཀྱིས་གསོལ་བར་གྱུར་བསམ། ཕཊ྄ཿ རང་ཉིད་ཁྲོས་མ་དམར་མོའི་གཙུག་ན་སྟག་ཞལ་ངར་སྒྲ་སྒྲོག་པའི་ཐུགས་ཀ་ནས་མཁའ་འགྲོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོགས་པ་གྲངས་མེད་འཕྲོས། གནོད་བྱེད་ཐམས་ཅད་བཀུག་ནས། ཧོམ་ཁུང་དུ་བཅུག་ནས་ཕོ་ཁ་སྦུབ་མོ་གན་རྐྱལ་དུ་བསྒྱེལ་བའི་སྙིང་གར་གནམ་ལྕགས་ཀྱི་ཙཀྲ་རྩིབས་བརྒྱད་གཡོན་དུ་དྲག་ཏུ་འཁོར་བས་ཤ་ཁྲག་རུས་གསུམ་དམར་ཉི་ལི་ལི་གཏུབ་པར་གྱུར། ཕཊ྄ཿ རང་ཉིད་ཁྲོས་མའི་ཐུགས་ཀ་ནས་འོད་ཟེར་འཕྲོས་པས་ཤར་ནས་དཀར་མོ་ལྕགས་ཀྱུ་ཐོགས་པ། ལྷོ་ནས་སེར་མོ་གྲི་གུག་ཐོགས་པ། ནུབ་ནས་དམར་མོ་སོག་ལེ་ཐོགས་པ། བྱང་ནས་སྨུག་མོ་སྟག་གདོང་གྲི་གུག་ཐོགས་པ། མཚམས་བཞིར་མཁའ་འགྲོ་སྣ་ཚོགས་མདོག་དང་། སྟེང་ནས་ནག་མོ་གསེར་གྱི་རྡོ་རྗེར་ཐོག་སེར་འབེབས་པ། འོག་ནས་སྔོན་མོ་དྲེད་གདོང་སྤྱན་གཅིག་རླུང་གི་འཁོར་ལོ་འཛིན་པ་ཐམས་ཅད་ཀྱང་རུས་པའི་རྒྱན་ཅན་འབུམ་ཕྲག་འཕྲོས་ནས་གནོད་བྱེད་རྣམས་བཀུག་ནས་ལིང་ག་ལ་བསྟིམ་མོ། བདག་དང་བསྲུང་བྱའི་རིག་པ་ཨཱཿདམར་པོ་སྤྱི་བོའི་ཕ་ཅིག་དམ་པའི་ཐུགས་ཀར་བསྲེ། རང་དང་བསྲུང་བྱའི་ལུས་གདོན་ཤ་ཁྲག་བཅས་ཧོམ་ཁུང་དུ་འཕངས་པས་ཤ་ཁྲག་གི་རྒྱ་མཚོ་རུལ་བཙོག་ཏུ་གྱུར་ནས་གནོད་བྱེད་རྣམས་མྱོས་ཤིང་འཚུབས་ནས་སྐད་ངན་ཙིར་ཙིར་ཁས་བླང་དམ་བཅའ་བྱེད་པར་བསམ། ཚར་ཚད་བྱུང་ན་དཀར་གསུམ་བདུད་རྩིའི་རྒྱ་མཚོར་གྱུར་ནས། ལོངས་སྤྱོད་བདེ་སྐྱིད་དང་ལྡན་པར་བསྒོམ། ཕཊ྄ཿ བདག་ཉིད་ཡུམ་ཆེན་མོས་གཡང་གཞི་བརྡབ་པས་ཟ་འདྲེ་ཐམས་ཅད་རང་དབང་མེད་པར་འདུས་པ་ལ། གཡང་གཞིའི་སྟེང་དུ་ཤ་ཁྲག་སྟོན་མོར་བྱིན་པས་བདག་ཡུམ་ཆེན་མོའི་གཟི་བརྗིད་མ་བཟོད་ནས་རང་དབང་མེད་པར་ཆོས་ལ་ཚུད་པར་བསམ་ཞིང་། སྡིག་པ་ཅི་ཡང་མི་བྱ་ཞིང་། ཞེས་སོགས་བརྗོད། ཕཊ྄ཿ རང་ཉིད་ཕ་དམ་པ་མཐིང་ནག་སྤྱན་གསུམ་མཆེ་བ་བཞི་གཙིགས་པ་དུར་ཁྲོད་ཆས་བརྒྱད་གསོལ་ཞིང་ཕྱག་གཡས་ཌཱ་མ་རུ་འཁྲོལ་ཞིང་གཡོན་རྐང་གླིང་འབུད་པས་ནམ་མཁའ་གང་བ། མདུན་མཁར་བཾ་རོ་གསར་རྙིང་གི་ཁྲིར་རྗེ་བཙུན་མ་དམར་མོ་གྲི་གུག་དང་ཐོད་ཁྲག་འཛིན་པ། གྲུ་མོ་གཡོན་དུ་ཟངས་ཞགས་བསྐོན་པ། གཡས་སུ་དུར་ཁྲོད་མཁའ་འགྲོ་ནག་མོ་ལྕགས་ཀྱུ་དང་། ཐོད་ཁྲག་ཐུགས་ཀར་འཛིན་པ། གཡོན་དུ་ལས་ཀྱི་མཁའ་འགྲོ་ལྗང་མོ་རལ་གྲི་དང་ཐོད་ཁྲག་ཐོགས་པ། དེ་གསུམ་ལ་འཁོར་དཔག་ཏུ་མེད་པས་བསྐོར་བ་ཕཊ྄ཿ བརྗོད་པས་འོད་ཟེར་ལྕགས་ཀྱུ་ལྟ་བུས་གནོད་བྱེད་རྣམས་བཀུག་ནས་མདུན་དུ་འཁོད་པ་ལ། དམ་པ་རྒྱ་གར་གྲངས་མེད་ཀྱིས་ཧ་སྒྲ་ཕཊ྄་སྒྲ་དི་རི་རི་བསྐོར་ནས་ཡོད་པ་ལ། སྙིང་རྗེ་ཚད་མེད་པས་ཤ་ཁྲག་གི་སྦྱིན་པ་དང་། ཡང་རང་གི་ཐུགས་ཀ་ནས་ཧཱུཾ་མཐིང་ནག་གྲངས་མེད་པ་འཕྲོས་པས་གནམ་ས་བར་སྣང་ས་རྡོ་རི་བྲག་ཐམས་ཅད་མཁའ་འགྲོ་ལྕགས་ཀྱུ་དང་བྷནྡྷ་འཛིན་པར་གྱུར་ནས། སྟོང་གསུམ་འཇིག་རྟེན་ཁམས་ཀྱི་ཚེ་བསོད་བཀྲག་མདངས་གཟི་བརྗིད་ཐམས་ཅད་དང་། འབྱུང་བའི་བཅུད་ཐམས་ཅད་བསྡུས་ནས་ཐོད་པའི་ནང་དུ་བསྟིམ་པ་བདུད་རྩིའི་རྣམ་པས་གང་ཞིང་། མཁའ་འགྲོ་མ་རྣམས་ཀྱང་གཅིག་ལ་གཅིག་ཐིམ་གྱི་མཐར་རང་ལ་ཐིམ་པས་བཀྲག་མདངས་གཟི་བརྗིད་རྒྱས་པར་བསྒོམ། ཕཊ྄ཿ རང་ཉིད་རྗེ་བཙུན་མ་དམར་མོའི་ཕྱག་གཡས་ཐུགས་རྗེའི་ལྕགས་ཀྱུའི་རྩེ་ནས་འོད་ཟེར་འཕྲོས་པས་འཇིག་རྟེན་ཁམས་ཀྱི་ལྷ་འདྲེ་མི་གསུམ་དང་། ཁྱད་པར་གཉན་སའི་ལྷ་འདྲེ་དང་གནོད་བྱེད་དགྲ་འདྲེ་རྣམས་ཀྱི་ཚེ་དཔལ་བསོད་ནམས་བཀྲག་མདངས་གཟི་བརྗིད་ཐམས་ཅད་བསྡུས་ནས། རང་དང་ཕྱག་གཡོན་ཐོད་པ་ལྕང་ལོ་ཅན་དཔྲལ་བ་རང་ལ་བསྟན་པའི་ནང་དུ་འོད་ཀྱི་ཐིག་ལེ་དཀར་དམར་མཐིང་གསུམ་གྱི་རྣམ་པས་ཡོངས་སུ་གང་བས་འཆི་མེད་ཚེ་ཡི་དངོས་གྲུབ་སོགས་མཆོག་ཐུན་མོང་གཉིས་ཀྱི་དངོས་གྲུབ་མ་ལུས་པ་མྱུར་བ་ཉིད་དུ་ཐོབ་པར་བསམ་ཞིང་། རང་ཉིད་ཀྱི་གནས་ཁང་ཡང་ཡིད་བཞིན་ནོར་བུ་དབང་གི་རྒྱལ་པོ་གྱེན་བསླང་གི་ཚུལ་དུ་ཡོད་པ་ལས་དགོས་འདོད་ཀྱི་ལོངས་སྤྱོད་ཆར་ལྟར་བབས་ནས་ཕུན་སུམ་ཚོགས་པའི་དཔལ་ཡོན་ལ་རང་དབང་བསྒྱུར་བར་བསམ་མོ། དེས་གཅོད་པ་ལོངས་སྤྱོད་འཕེལ་ཞིང་ཚེ་རིང་བར་འགྱུར་རོ། འདིར་སྨྲས་པ། འཕགས་པའི་ཡུལ་གྱི་པཎ་ཆེན་སྨོན་ལམ་གྲུབ། །བོད་འདིར་མི་མོའི་ཚུལ་བཟུང་ལབ་སྒྲོན་མའི། །གཅོད་ཡུལ་གདམས་པ་གྲངས་མེད་མཆིས་རྣམས་ཀྱི། །ཕུལ་གྱུར་དཀར་གཅོད་ཞེས་གྲགས་ཨ་རཱ་གའི། །ལུགས་བཟང་གཤེད་འདུལ་གདུག་པ་ཚར་གཅོད་ཀྱི། །སྙིང་པོ་འཛམ་བུའི་ཆུ་གཏེར་ལས་གྲུབ་པའི། །ཕྱོགས་ལས་རྣམ་རྒྱལ་འཁོར་ལོ་རིན་པོ་ཆེའི། །སྔགས་ཀྱི་འཁོར་ལོས་སྒྱུར་ལ་སྔོན་རྒྱུའི་ཆེད། །བྱང་སེམས་ཀུན་བཟང་གཞན་ཕན་གྱིས་སྤེལ་བཞིན། །ཀློང་ཆེན་འོད་གསལ་རྡོ་རྗེས་བྲིས་པའི་དགེས། །འགྲོ་རྣམས་བདེ་ཆེན་འགྱུར་མེད་ས་ཐོབ་ཤོག །།དགེའོ། དགེའོ། དགེའོ། །། གཤིན་པོའི་སྡུག་བསྔལ་སྦྱོང་བྱེད་འདུལ་དཀར་གྱི་ཆོ་ག་བདུད་རྩི་བུམ་པའི་ཆུ་རྒྱུན།༄༅། །གཤིན་པོའི་སྡུག་བསྔལ་སྦྱོང་བྱེད་འདུལ་དཀར་གྱི་ཆོ་ག་བདུད་རྩི་བུམ་པའི་ཆུ་རྒྱུན་བཞུགས། ། རྣམ་ཀུན་མཆོག་ལྡན་ཀུན་བཟང་ཡུམ་ཆེན་མོ། །སྣང་སྟོང་ལྷུན་གྲུབ་བཛྲ་ཝཱ་ར་ཧི། །རྩལ་སྣང་འགག་མེད་མཚོ་རྒྱལ་ལབ་ཀྱི་སྒྲོན། །རྩ་བའི་བླ་མར་བཟླུམ་ཏེ་སྤྱི་བོས་མཆོད། །མ་ཅིག་མཁྱེན་གཉིས་ཡེ་ཤེས་ལྷ་ལམ་དུ། །ལེགས་ཤར་ཐབས་ཤེས་ཟུང་འཇུག་ཟླ་ཉིའི་གཟིས། །སྐལ་བཟང་སྙིང་གི་ཉིན་སྒོང་བཅིལ་པ་དང་། །ཆབས་ཅིག་རིམ་གཉིས་པད་ཚལ་བཞད་དེ་རྨད། །གང་དེའི་ཐུགས་རྗེའི་རོལ་རྩལ་རྒྱ་མཚོའི་རླབས། །དུས་ལས་ཡོལ་མིན་རྟག་འབྱུང་དངོས་གྲུབ་ཆབ། །གཤིན་པོའི་སྡུག་བསྔལ་ཐ་བ་རླན་བྱེད་པའི། །བདུད་རྩི་བུམ་པའི་ཆུ་རྒྱུན་འདི་ན་འབེབས། །དེ་ཡང་ཟ་འདྲེ་དང་ཚེ་འདས་གཉིས་བག་ཆགས་ཀྱི་དབང་གིས་འབྲལ་མེད་དུ་ཡོད་པ་སོ་སོར་ཕྱེ་ཐབས་ནི། གཞི་དཀར་པོའི་ཁར་རྡུལ་ཚོན་ནམ་རྩམ་པ་མཆོད་རྟེན་བང་རིམ་བཞི་བ། བུམ་པ་ཏོག་དང་བཅས་པ་བྲིས་ལ། སྨྱུག་རྒོད་དམ་མདའ་ལ་གཤིན་པོའི་བྱང་བུ་བྲིས་པ་བཏགས་པའོ། མིན་ཀྱང་ནྲིཿཡིག་མིང་བཅས་བྲིས་པ་ལ། མེ་ལོང་དར་འཕན་བཅས་པ་དང་ཚེ་འདས་ཀྱི་ལུས་ལ་འབྱར་བའི་རྫས་གཅིག་ཀྱང་བཏགས། ཕྱེ་མར་ཇ་ཆང་སོགས་གསུར་བསྔོའི་རྫས་དང་། བླ་གླུད་ངར་མི་ཆངས་བུས་བསྐོར་བ་དང་། ཅོག་ལྡོག་ཏིང་ལོ་ཆངས་བུ་གང་རུང་སྣོད་གཅིག་ཏུ་བཤམས། རྫས་གང་རུང་ལ་པདྨ་འདབ་བརྒྱད་ཀྱི་གཟུགས་བཅས་པར་མིང་བྱང་བཙུགས། མཆོད་རྟེན་གདན་ཁྲི་འོག་མའི་སྟེང་དེར་བཞག་ལ། ཕཊ྄ཿ རང་ཉིད་སྐད་ཅིག་ཁྲོས་མ་དམར་ནག་འཇིགས། །ཞལ་གཅིག་ཕག་ཞལ་མཐིང་ག་གཙུག་ན་རྔམ། །ཕྱག་གཡས་ཐོད་རྒོད་འབར་བ་དགུ་ཕྱར་ཞིང་། །གཡོན་པ་ཐོད་ཁྲག་རྫུ་འཕྲུལ་དྲག་རྩལ་ལྡན། །སྐུ་ཡི་འོད་ཟེར་ལྕགས་ཀྱུ་ལྟ་བུ་ཡིས། །ཟ་འདྲེ་བཀུག་ནས་ལྕགས་ཁང་ལིང་གར་བསྟིམ། །ཕྱི་རོལ་མཁའ་འགྲོ་འབུམ་གྱི་གུར་ཁང་ནང་། །ཚུད་པའི་བྲོས་དབང་མེད་ཅིང་སྟོབས་ཉམས་གྱུར། །ཕཊ྄ཿ ཕྱག་གཡས་གནམ་ལྕགས་ཐོག་འཕངས་ཟ་འདྲེ་བརླགས། ཕཊ྄ཿ རང་ལུས་གསེར་གྱི་མཆོད་རྟེན་དཔལ་ཡོན་ལྡན། །བང་རིམ་བཞི་པར་རིགས་དྲུག་མཚན་ཉིད་ཚང་། །བུམ་པར་ཨཱཿཡིག་དཀར་པོ་ཡོངས་གྱུར་ལས། །རང་ཉིད་ཁྲོས་མ་དཀར་མོ་ཞི་འཛུམ་བཞད། །ཕྱག་གཡས་ཡེ་ཤེས་བུམ་པར་བདུད་རྩིའི་རྒྱུན། །བབས་པས་གཤིན་པོའི་སྡིག་སྒྲིབ་འཁྲུད་བྱེད་ཅིང་། །ཕྱག་གཡོན་བྱམས་པའི་མཆིལ་བས་ཚེ་འདས་འདྲེན། །ཕྱོགས་མདོག་མཁའ་འགྲོ་སྡེ་བཞིའི་འཁོར་གྱིས་བསྐོར། །རང་གི་དཔྲལ་བར་རྣམ་སྣང་མགྲིན་པ་རུ། །སྣང་མཐའ་ལྟེ་བར་རིན་འབྱུང་གསང་གནས་སུ། །དོན་གྲུབ་དབུ་རྒྱན་ལ་ནི་མི་བསྐྱོད་པ། །ལྔ་ག་སོ་སོའི་ཡུམ་བཅས་རྒྱན་ཆ་ལུགས། །མ་ཚང་མེད་པའི་དཔལ་ཡོན་ཕུན་ཚོགས་གྱུར། །རང་རང་ཐུགས་ཀའི་ས་བོན་འདི་ལྟ་སྟེ། །ༀ་ཨཱཿཧཱུྃ་དང་སྭཱ་ཧཱ་ལྔ་པོ་དང་། །ཡུམ་ལྔའི་ཐུགས་ཀར་ཨ་ཧ་རི་ནི་ས། །དེ་རྣམས་ལས་ནི་འོད་འཕྲོས་ཡེ་ཤེས་པ། །སྤྱན་འདྲེན་གཉིས་སུ་མེད་པར་ཐིམ་པར་གྱུར། །ཨརྒྷཾ་ནས་ཤཔྟའི་བར་བརྗོད་ལ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། སོགས༴ ཕཊ྄ཿ ཟ་འདྲེ་ཤི་གཤེད་མཆོད་རྟེན་འོག་ཏུ་མནན། །བསྲུང་བྱ་ཐམས་ཅད་མཆོད་རྟེན་བུམ་པ་རུ། །ཚུད་ནས་མཁའ་འགྲོ་སྡེ་བཞིས་བསྲུང་བར་གྱུར། ཕཊ྄ཿ རང་གི་ཕྱག་གཡོན་བྱམས་པའི་ལྕགས་ཀྱུ་ལས། །ཐུགས་རྗེ་འོད་ཟེར་གློག་ཞགས་ལྟར་འཕྲོས་པས། །ཚེ་འདས་སྐད་ཅིག་ཙམ་གྱིས་བཀུག་པར་གྱུར། །ཞེས་བསམ་ཚེ་འདས་ཉིད་ལ་ཆོས་འདི་འཆད། ཀྱེ་མ་ཉོན་ཅིག་ཚེ་འདས་རིགས་ཀྱི་བུ། །ང་ནི་ཡེ་ཤེས་མཁའ་འགྲོ་མ། །ཆོས་སྐུ་རྒྱལ་བ་ཡུམ་ཆེན་ཡིན། །རིགས་ལྔའི་སངས་རྒྱས་སྐུ་ལ་རྫོགས། །མཁའ་འགྲོ་སྡེ་བཞིའི་འཁོར་གྱིས་བསྐོར། །ཕ་རོལ་ཕྱིན་བཅུའི་དོན་དང་ལྡན། །རྒྱལ་བ་སྲས་བཅས་ཕྲིན་ལས་བདག །ཁྱོད་རང་འཇིགས་སྐྱོབ་བསུ་མ་ཡིན། །མཆོག་གསུམ་རྩ་གསུམ་བདེན་མཐུ་དང་། །སྔགས་དང་ཏིང་འཛིན་བྱིན་རླབས་ཀྱིས། །ཚེ་འདས་གནས་འདིར་མྱུར་དུ་ཁུག །ཨ་ཧ་རི་ནི་ས་ནྲཱིཿ བཛྲ་ཨ་གུ་ཤ་ཛ་ཛཿ ལྕགས་ཀྱུའི་ཕྱག་རྒྱས་འགུགས། ཕཊ྄ཿ བརྗོད་ཅིང་ཚེ་འདས་བག་ཕེབས་བསམ། ཀྱེ་མ་ཚེ་འདས་རིགས་ཀྱི་བུ། །གཟུགས་བརྙན་མིང་བྱང་མེ་ལོང་བཅས། །ཚེ་འདས་ཁྱོད་ཀྱི་སྒོ་གསུམ་རྟེན། །འཕན་དར་མདའ་སྨྱུག་གདུགས་དང་གདན། །ཚེ་འདས་ཁྱོད་ཀྱི་ཉེར་སྤྱོད་རྫས། །རྟེན་འདི་རྣམས་ལ་རྟེན་ཆོས་ལ། །དད་གུས་མོས་པས་བག་ཕེབས་ནས། །ཡེངས་མེད་ངང་ནས་ཆོས་འདིར་གསོན། །ཀྱཻ་མ་སེམས་ཅན་སྙིང་རེ་རྗེ། །འཁོར་བའི་གནས་ངན་ཡུན་རིང་ལ། །རྒྱལ་བའི་ཐུགས་རྗེ་དྲན་པར་གྱིས། །ལས་ངན་རྒྱ་མཚོ་གཏིང་ཟབ་ལ། །དད་བརྩོན་གྲུ་གཟིངས་དྲན་པར་གྱིས། །སྲིད་པའི་འཁོར་ལོ་དབང་ཆེན་ལ། །རྟེན་འབྲེལ་བསླུ་མེད་དྲན་པར་གྱིས། །ལོག་པའི་རྣམ་ཤེས་ཤུགས་དྲག་ལ། །བཀའ་དང་དམ་ཚིག་དྲན་པར༴ འཁྲུལ་བའི་བག་ཆགས་སྤངས་དཀའ་ལ། །ཆོས་ཉིད་བདེན་པ་དྲན༴ །དམྱལ་བའི་སྡུག་བསྔལ་བཟོད་དཀའ་ལ། །ཚད་མེད་གོ་ཆ་དྲན་པར༴ །རྒྱུ་དྲུག་གནས་སུ་འཁྱམས་པ་ལ། ཕ་རོལ་ཕྱིན་དྲུག་དྲན༴ །མི་དགེ་བཅུ་པོའི་སྡིག་བགྱིས་ལ། །དགེ་བ་བཅུ་བོ་དྲན༴ །ལུས་བརྗེས་ཕུང་པོ་ཉོན་མོངས་ལ། །རྒྱལ་བའི་སྐུ་མཆོག་དྲན་པར་གྱིས། །ཡུམ་ཆེན་རྒྱལ་བའི་དཀྱིལ་འཁོར་ལ། །དད་པའི་ཡིད་ཀྱིས་སྐྱབས་གསོལ་ཅིག །ཨ་ཧ་རི་ནི་ས་ས་མ་ཡ་ཏིཥྛ་ལྷནཿ ཕཊ྄ཿ ཕཊ྄ཿ ཕཊ྄ཿ ཅེས་མིང་བྱང་ལ་བསྟིམས་ནས་ཚེ་འདས་དངོས་སུ་གསལ། རིན་པོ་ཆེའི་སྣོད་དུ་གླུད་གཏོར་འདོད་ཡོན་ལྔ་ལྡན་འདི་ཉིད་བསྔོ་ཞིང་སྦྱིན་པའི་གནས་སུ་གྱུར་པ་ནི། ཚེ་འདས་འདི་ཉིད་ལ་སྔོན་གྱི་ལན་ཆགས་དང་ད་ལྟ་བླ་ཡིད་རྣམ་ཤེས་ལ་བདག་ཏུ་འཛིན་པའི་གནོད་བྱེད་ཟ་འདྲེ་ཤི་གཤེད་ཚེ་འདས་སུ་བརྫུས་ནས་གསོན་པོར་གནོད་པའི་རིགས་སུ་གྱུར་པ་རྣམས་ལ་བསྔོའོ། བསྔོས་ཤིང་སྦྱིན་པས་ལན་ཆགས་བྱང་བུ་ལོན་འཁོར་ཤ་འཁོན་དག་ནས་བྱང་ཆུབ་ཀྱི་སེམས་རིན་པོ་ཆེ་དང་ལྡན་པར་གྱུར་ཅིག ཅེས་དང་། ཨཱ་ཀ་རོ་བརྗོད་ལ། ཧཱུཾ་ང་ནི་ཡེ་ཤེས་ཁྲོས་མ་ཡིན། །ཉོན་ཅིག་ཟ་འདྲེ་ཤི་གཤེད་རྣམས། །གཤིན་གྱི་བླ་གླུད་གཏོར་མ་འདི། །ལོངས་ལ་ཚེ་ལས་འདས་པ་འདི། །བཟུང་བ་ཐོང་ལ་བཅིངས་པ་ཁྲོལ། །བསྡམས་པ་ཀློོད་ལ་མནན་པ་ཁྱོག །བུ་ལོན་ལན་ཆགས་བྱང་གྱུར་ཅིག །ཧཱུཾ་ཕྱོགས་བཞི་མཚམས་བཞི་སྟེང་འོག་ན། །གནས་པའི་དྲི་ཟ་གཤིན་རྗེ་ཀླུ། །གནོད་སྦྱིན་མེ་ལྷ་སྲིན་པོ་དང་། །རླུང་ལྷ་དབང་ལྡན་ལྷ་དང་ནི། །ས་བདག་སྡེ་བརྒྱད་ཡུལ་ལྷ་དང་། །མདོར་ན་སྣང་སྲིད་ལྷ་འདྲེ་ཀུན། །གཤིན་གྱི་བླ་གླུད་གཏོར་མ་འདི། །ལོངས་ལ་ཚེ་ལས་འདས་པ་འདི། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །བུ་ལོན་ལན་ཆགས་བྱང་གྱུར་ཅིག །ཧཱུཾ་ང་ནི་ཁྲོས་ནག་དྲག་མོ་སྟེ། །ཚེ་འདས་འདི་ལ་གནོད་བྱེད་རྣམས། །བླ་གླུད་གཏོར་མ་འདི་ཁྱེར་ལ། །སོ་སོ་རང་རང་གནས་སུ་དེངས། །གལ་ཏེ་བཀའ་ལས་འདས་གྱུར་ན། །ལས་ཀྱི་མཁའ་འགྲོས་སྙིང་ཁྲག་རྣམས། །འཐུངས་ནས་དམྱལ་བའི་སྡུག་བསྔལ་མྱོང་། །དེ་བས་མ་འདུག་གཞན་དུ་དེངས། །ༀ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་གནོད་བྱེད་གཤིན་ལྕགས་བླ་ཁྱེར་ཐམས་ཅད་ཨུ་ཙ་ཏ་ཡ་ཕཊ྄ཿ ཕཊ྄ཿ ཕཊ྄ཿ ཅེས་བརྗོད་རོལ་མོ་དང་བཅས་པས། བླ་གླུད་ཕྱིར་དོར། ཚེ་འདས་ཀྱི་མཚན་བྱང་མཆོད་རྟེན་བང་རིམ་བཞིའི། འོག་མར་བཞག་ལ་འདི་སྐད་དོ། ཧཱུཾ་བདག་ལུས་གསེར་གྱི་མཆོད་རྟེན་གྱི། །ཞབས་སུ་ཟ་འདྲེ་ཤི་གཤེད་མནན། །མཆོད་རྟེན་བང་རིམ་བཞི་པོ་ལ། །མས་རིམ་ཇི་བཞིན་འོག་མ་ལ། །རླུང་གི་འཁོར་ལོ་རྩིབས་དགུ་དང་། །དེ་སྟེང་མེ་འཁོར་རྩིབས་གསུམ་དང་། །དེའི་སྟེང་ཆུ་འཁོར་རྩིབས་གསུམ་པ། །དེའི་སྟེང་ས་འཁོར་རྩིབས་བཞི་གསལ། །འཁོར་ལོ་བཞི་པོའི་གདན་སྟེང་དུ། །ཚེ་འདས་ཞེ་སྡང་སེར་སྣ་དང་། །གཏི་མུག་འདོད་ཆགས་བཞི་པོ་ཡི། །རྒྱུ་དང་འབྲས་བུའི་ས་བོན་རྟེན། །དུ་པྲེ་དྲི་དང་ནྲྀཿཡིག་བཞི། །ནག་སེར་སྔོ་དང་ལྗང་བའི་མདངས། །དེ་དག་ཡོངས་སུ་གྱུར་པ་ལས། །ངན་སོང་གསུམ་པོ་མི་དང་བཞི། །སོ་སོའི་རིགས་ཀྱི་འཁོར་དང་བཅས། །མ་ལུས་ལུས་པ་མེད་པར་གསལ། །ཉོན་ཅིག་ཚེ་འདས་རིགས་ཀྱི་བུ། །ཉོན་མོངས་ཞེ་སྡང་སེར་སྣ་དང་། །གཏི་མུག་འདོད་ཆགས་ལས་དབང་གིས། །ངན་སོང་གསུམ་དང་མིའི་གནས་སུ། །སྐྱེ་བར་སྲིད་ཀྱང་སྐྱོབ་བྱེད་ལྷ། །མ་ཅིག་ང་ཡི་དབུ་གཙུག་དང་། །ལྟེ་བ་དཔྲལ་བ་མགྲིན་པ་རུ། །བཅོམ་ལྡན་མི་བསྐྱོད་རིན་འབྱུང་དང་། །རྣམ་སྣང་འོད་ཟེར་མཐའ་ཡས་རྣམས། །རིམ་བཞིན་སྐུ་མདོག་མཐིང་ག་དང་། །གསེར་དང་དུང་དང་པད་རག་མདོག །ས་གནོན་མཉམ་བཞག་སྐྱིལ་ཀྲུང་བཞུགས། །ཡུམ་ཆེན་མ་ཀཱི་སངས་རྒྱས་སྤྱན། །དབྱིངས་ཕྱུག་ན་བཟའ་དཀར་མོ་འཁྲིལ། །ཡབ་ཡུམ་ལོངས་སྐུའི་མཚན་དཔེས་བརྒྱན། །ཚེ་འདས་རིགས་ཀྱི་བུ་ཁྱོད་ཀྱང་། །རྒྱལ་བ་རིགས་བཞིར་ཕྱག་འཚོལ་ལ། །དད་མོས་དྲག་པོས་སྐྱབས་ཞུས་དང་། །བཅོམ་ལྡན་ཐུགས་རྗེའི་འོད་ཟེར་གྱིས། །ངན་སོང་གསུམ་དང་མི་ཡུལ་གྱི། །སྒྲིབ་ཚོགས་ཀུན་སྦྱངས་སྟོང་པར་འགྱུར། །ཧཱུཾ་བཛྲ་དྷྲིགཿ སྭཱ་རཏྣ་དྷྲིགཿ ༀ་ཛི་ན་ཛིགཿ ཨཾ་ཨ་རོ་ལྀཀཿ ཨ་ཧ་རི་ནི་ས་ཚེ་འདས་ཀྱི་ཉོན་མོངས་པ་ཞེ་སྡང་དང་སེར་སྣ་གཏི་མུག་འདོད་ཆགས་རྣམས་ཀྱི་སྡིག་སྒྲིབ་ཤུདྡྷེ་ཤུདྡྷེ་སྭཱ་ཧཱ། ཕཊ྄ཿ ཕཊ྄ཿ ཕཊ྄ཿ སྐབས་འདིར་ཟས་བསྔོ་བྱ་བ་ནི། གསུར་རྫས་གྱ་ནོམ་པར་བཤམས་ཏེ། ཕཊ྄ཿ སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཟས་གོས་ལོངས་སྤྱོད་བཟའ་བཏུང་ཕུན་སུམ་ཚོགས་པ་འཛད་པ་མེད་པའི་གཏེར་དུ་གྱུར། ཞེས་བསམས་ལ། ན་མཿ སརྦ་ཏ་ཐཱ་ག་ཏོ་བྷྱོ་བྷི་ཤྭ༴ སོགས། ཁམས་གསུམ་དག་པའི་ཞིང་། །སྲིད་གསུམ་ཐུགས་རྗེའི་མགྲོན། །མ་ལུས་ཁྱབ་པའི་ཟས། །ཆོས་ཉིད་ནུས་པའི་མཐུས་འདོད་ཡོན་མི་ཟད་པའི་གཏེར་ལ་ལོངས་སྤྱོད་པར་གྱུར་ཅིག །ཅེས་དང་། སྲིད་པ་པར་མ་དོར་ཉམ་ང་བའི་འཕྲང་ལ་སྐྱབས་དང་སྐྱོབ་པ་མེད་པ། མགོན་དང་དཔུང་གཉེན་མེད་པ། །སྔོན་གྱི་བསགས་རྒྱབ་མེད་པ། །དགེ་བའི་ར་མདའ་ཉུང་བ། །མིང་བཞི་འདུས་པའི་ཕུང་པོ། །ཚོར་བ་སྡུག་བསྔལ་གྱི་རང་བཞིན། །འཇིགས་སྐྲག་འཁྲུལ་སྣང་གིས་མནར་བ། །འཁྱག་ལྟོག་སྐོམ་གསུམ་གྱིས་གདུང་བ། །ཚེ་ཚད་ལ་ངེས་པ་མེད་པ། །བྱ་སྒྲོ་རླུང་གིས་བཏེགས་པ་བཞིན། །གར་འགྲོ་རང་དབང་དང་བྲལ་པའི། །བར་དོའི་སེམས་ཅན་ཆྒཻ་མོའི་ཐོག་དྲངས་བར་དོར་འཁྱམས་པའི་འགྲོ་བ་ཐམས་ཅད་ཀྱི་མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་མངར་བ། ལུས་ཀྱི་ཡུལ་དུ་རེག་བྱ་འཇམ་པ། ཡིད་ཀྱི་ཡུལ་དུ་བདེ་སྐྱིད་ཕུན་སུམ་ཚོགས་པའི་སྣང་བ་མཆོག་དང་འབྲལ་བ་མེད་བཞིན། བཟའ་བ་རི་རབ་བཏུང་བ་རྒྱ་མཚོ་ན་བཟའ་ལྷོ་སྤྲིན་ཙམ་ལ་ཆགས་མེད་ཞེན་མེད་ཀྱི་ངང་ནས་ལོངས་སྤྱོད་པའི་སྐལ་བ་དང་ལྡན་བཞིན་འཕགས་པ་སྤྱན་རས་གཟིགས་དང་བྱང་ཆུབ་སེམས་དཔའི་སྒྲིབ་པ་རྣམ་སེལ་མཐོང་། བར་དོ་ལ་བར་དོ་ཡིན་པར་ངོ་ཤེས་འཁྲུལ་སྣང་རྒྱས་ཐེབས། བླ་མ་དང་དཀོན་མཆོག་ཡི་དམ་དང་ལྟ་བ་རྗེས་སུ་དྲན་ནས་ལས་ངན་པའི་སྒྲིབ་པ་སྐད་ཅིག་ལ་དག་ནས་རིག་པ་ལ་རང་དབང་ཐོབ་བདེ་བ་ཅན་དང་པདྨ་བཀོད་ལ་སོགས་པའི་ཞིང་ཁམས་ཁྱད་པར་ཅན་རྣམས་བགྲོད་ནུས་པར་གྱུར་ཅིག །ཅེས་དང་། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ༴ སོགས༴ ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ཞེས་འདོད་ཡོན་བསྔོས་ལ། ཚེ་འདས་ཞེ་སྡང་སེར་སྣ་དང་། །གཏི་མུག་འདོད་ཆགས་སྒྲིབ་པ་དག །དམྱལ་བ་ཡི་དྭགས་དུད་འགྲོ་དང་། །མི་ཡི་སྡུག་བསྔལ་ཡོངས་སུ་ཞི། །བཟོད་དང་བསམ་གཏན་ཤེས་རབ་དང་། །ཚུལ་ཁྲིམས་ཕ་རོལ་ཕྱིན་རྣམས་རྫོགས། །རྣམ་ཤེས་ཚོར་བ་གཟུགས་འདུ་ཤེས། །དག་བྱེད་དབྱིག་འཛིན་ནམ་མཁའ་མས། །དངོས་འཛིན་དྲི་མ་རབ་དག་ནས། །བཅོམ་ལྡན་མི་བསྐྱོད་རིན་འབྱུང་དང་། །རྣམ་སྣང་དཔག་མེད་སྐུ་ཐོབ་ཤོག །མ་ཅིག་ཐུགས་རྗེའི་ལྕགས་ཀྱུ་ཡིས། །མཆོད་རྟེན་བང་རིམ་བཞིར་བགྲོད་ནས། །བུམ་པའི་ལྟོ་བར་དྲངས་ནས་སླར། །ངན་སོང་གསུམ་དང་མི་རྣམས་ཀྱི། །སྐྱེ་སྒོ་བཅད་པར་མཛད་དུ་གསོལ། །དེ་ནས་མཚན་བྱང་བུམ་སྨད་དང་། དབུ་རྩེའི་སྟེང་དུ་རིམ་བཞིན་སྤོས། བུམ་མཐིལ་གསེར་འཁོར་རྩིབས་བརྒྱད་དང་། །དབུ་རྩེར་རྩིབས་བརྒྱད་སྔོ་སྐྱའི་སྟེང་། །འོག་མར་སུ་ཡིག་གཉིས་དང་ནི། །སྟེང་མར་ཨ་ཡིག་དཀར་པོ་ནི། །ཕྲག་དོག་དང་ནི་ང་རྒྱལ་གྱི། །ས་བོན་ཡིག་འབྲུ་ཡོངས་གྱུར་ལས། །ལྷ་མ་ཡིན་དང་ཁམས་གསུམ་ལྷ། །མ་ལུས་མཚོར་སྣང་གཟུགས་བཞིན་གསལ། །ཉོན་ཅིག་ཚེ་འདས་རིགས་ཀྱི་བུ། །ཕྲག་དོག་དང་ནི་ང་རྒྱལ་གྱི། །དབང་གིས་གནས་རིགས་དེ་གཉིས་སུ། །སྐྱེས་ཀྱང་ཡུམ་ཆེན་གསང་གནས་དང་། །ཆོས་ཀྱི་འཁོར་ལོ་དོན་གྲུབ་དང་། །རྡོར་སེམས་གཉིས་པོ་རང་རང་གི། །ཡུམ་དང་འཁྲིལ་ཞིང་ལོངས་སྐུ་ཡི། །མཚན་དང་དཔེ་བྱད་ཡོངས་སུ་རྫོགས། །ཚེ་འདས་རིགས་ཀྱི་བུ་ཁྱོད་ཀྱང་། །རྒྱལ་བ་ཟུང་དེར་ཕྱག་འཚོལ་ལ། །རྣམ་གསུམ་དད་པས་སྐྱབས་ཞུས་དང་། །བཅོམ་ལྡན་ཐུགས་རྗེའི་འོད་ཟེར་གྱིས། །འཁོར་གནས་གཉིས་རེ་སྟོང་པར་སྦྱངས། །ཧ་པྲ་ཛྙཱ་དྷྲིག ༀ་བཛྲ་ས་ཏྭ་ཧཱུཾ། ཨ་ཧ་རི་ནི་ས་ཚེ་ལས་འདས་པའི་ཕྲག་དོག་དང་ང་རྒྱལ་གྱི་ལས་སྒྲིབ་ཤུདྡྷེ་ཤུདྡྷེ་བི་ཤུདྡྷེ་སྭཱ་ཧཱ། ཕཊ྄ཿ ཕཊ྄ཿ ཕཊ྄ཿ ཚེ་ལས་འདས་པའི་ཕྲག་དོག་དང་། །ང་རྒྱལ་གྱི་ནི་སྒྲིབ་པ་དག །འཐབ་རྩོད་ཕམ་ལྟུང་སྡུག་བསྔལ་ཞི། །བསམ་གཏན་བརྩོན་འགྲུས་ཕར་ཕྱིན་རྫོགས། །འདུ་བྱེད་དང་ནི་རླུང་གི་ཁམས། །ཡིད་ཆོས་ཁམས་ཟུང་རྣམ་དག་ནས། །དོན་གྲུབ་རྡོར་སེམས་སྐུ་ཐོབ་ཤོག །ཉི་མ་དེ་རིང་ཕྱིན་ཆད་དུ། །ལྷ་མ་ཡིན་དང་ཁམས་གསུམ་ལྷའི། །སྐྱེ་སྒོ་ཆོད་ནས་འཚང་རྒྱ་ཤོག །ཕཊ྄ཿ ཕཊ྄ཿ ཕཊ྄ཿ ཕཊ྄ཿ ཚེ་འདས་ཀྱི་སྟེང་གི་ནམ་མཁར་དུས་གསུམ་སངས་རྒྱས་འདུས་པའི་ངོ་བོ་མ་ཅིག་ལབ་སྒྲོན་མ་སྐུ་མདོག་དུང་ལྟར་དཀར་བ་ཟླ་བའི་གདན་ལ་སྐུ་གར་སྟབས་ལིང་ལིང་། ཕྱག་དྷར་དྲིལ་སིལ་སིལ་གསུང་སྙན་པའི་དབྱངས་ཀྱིས་རིགས་ཀྱི་བུ་ཡར་ཤོག །དག་པ་མཁའ་སྤྱོད་ཀྱི་ཞིང་དུ་འགྲོའོ། དགའ་འོ་སྐྱིད་དོ། གསུངས་པར་གྱུར། ཀྱཻ་མ་ཚེ་འདས་རིགས་ཀྱི་བུ། །ཁྱོད་ནི་ཚེ་ལས་འདས་པ་ཡིན། །འཇིག་རྟེན་འདི་ནས་ཕ་རོལ་སོང་། །སྣང་མིན་བར་དོའི་མཚམས་ན་ཡོད། །བསམ་པ་ཙམ་གྱིས་སྟོང་གསུམ་འཁོར། །ཐོགས་མེད་རྫུ་འཕྲུལ་སྟོབས་དང་ལྡན། །ཉི་ཟླར་གྲིབ་མ་རྐང་རྗེས་མེད། །གནས་ལ་ངེས་མེད་ཀུན་ཏུ་འཁྱམས། །གྲོགས་ནི་གཤིན་གསོན་ཅིར་ཡང་འགྲོགས། །ཟས་ནི་བསྔོས་པ་ཙམ་གྱིས་ཚིམ། །ཆུ་བྲག་རྩིག་པར་ཐོགས་པ་མེད། །བར་དོ་ཡིན་ནོ་རིགས་ཀྱི་བུ། །ཁྱོད་ཉིད་གཅིག་པུར་ཤི་བ་མིན། །ཐམས་ཅད་འཆི་བའི་ཆོས་ཅན་ལ། །མ་སྡུག་མ་བསྔལ་རིགས་ཀྱི་བུ། །སྒྲ་འོད་ཟེར་དང་རྒྱོབ་སོད་སྒྲ། །ཐམས་ཅད་རང་སྣང་འཁྲུལ་བ་ཡིན། །ལོགས་ནས་བྱུང་བ་གཅིག་ཀྱང་མེད། །མ་འཇིགས་མ་སྐྲག་རིགས་ཀྱི་བུ། །ཁྲག་འཐུང་ཁྲོ་བོ་མགོ་བརྙན་ཚོགས། །འུར་སྒྲ་ཆེམས་སྒྲ་མཚོན་ཆའི་ཆར། །ཐམས་ཅད་ཡི་དམ་བསུ་མ་ཡིན། །མ་སྔངས་མ་འབྲོ་རིགས་ཀྱི་བུ། །འཁོར་བའི་གནས་ལ་བདེ་བ་མེད། །ཡུལ་དང་ཞིང་ཁང་ནོར་རྫས་དང་། །གཉེན་དང་ཉེ་དུ་རང་གཞན་རྣམས། །སྒྱུ་མ་རྨི་ལམ་ཇི་བཞིན་དུ། །མི་རྟག་བྲལ་བའི་ཆོས་ཅན་ཡིན། །རྟག་པར་གནས་པ་གཅིག་ཀྱང་མེད། །མ་ཆགས་མ་ཞེན་རིགས་ཀྱི་བུ། །ཁྱོད་ལ་ཤ་ཁྲག་ལུས་པོ་མེད། །ཡིད་ལུས་མིང་བཞི་ཙམ་ལ་བརྟེན། །བར་དོའི་རྣམ་པར་ཤེས་པ་དེ། །འོད་ཀྱི་ཐིག་ལེ་ལྕོག་སྒོང་ཙམ། །ཡི་གེ་ཨཱཿཡིས་མཚན་པར་བསྒོམ། །མ་ཅིག་ལབ་སྒྲོན་ཐུགས་ཀ་རུ། །ཐེ་ཚོམ་མེད་པར་རྒྱངས་ཀྱིས་འཕོས། །དབྱེ་བ་མེད་པར་ཁྲིགས་སེ་འདྲེས། །མ་ཅིག་དཔག་ཆེན་མདའ་འཕང་བཞིན། །བདེ་བ་ཅན་གྱི་ཞིང་དུ་གཤེགས། །མེ་ཏོག་པདྨའི་སྦུབས་སུ་ཐིམ། །པདྨ་གྱེས་པའི་ཟེའུ་འབྲུ་ལ། །བརྫུས་ཏེ་སྤྲུལ་སྐུ་ཐོབ་པར་ཤོག །ཕཊ྄ཿ ཕཊ྄ཿ ཕཊ྄ཿ ཞེས་རྣམ་ཤེས་སྤར་རོ། རང་སེམས་ཁྲོས་མ་དང་རང་ལུས་གསེར་གྱི་མཆོད་རྟེན་གཉིས་ཀ་མི་དམིགས་པར་གྱུར། ཕཊ྄ཿ ཕཊ྄ཿ ཕཊ྄ཿ ཅེས་གཞི་མ་བསྡུའོ། དེ་ལྟར་དུས་དྲུག་སོགས་ལ་བརྩོན་པ་བསྐྱེད་དེ་ནན་ཏན་བྱས་ན་ཟ་འདྲེ་ཐུལ་རྟགས་གཅན་གཟན་འཕར་སྤྱང་དོམ་དྲེད་གླ་བ་སྲེག་པ་དུར་བྱ་གདོན་རིགས་རྣམས་བསད་མནན་བཅིངས་ས་རྒྱལ་ཁ་ཐོབ་པ་དངོས་གྲུབ་སྟེར་བ་ཁས་ལེན་བྱས་པ་སོགས་ཚར་ཚད་བྱུང་ན་མེ་མཆོད་རྒྱས་པ་ལོགས་ནས་བྱུང་བ་ལྟར་བྱ་ཞིང་། བསྡུ་ན་སྟེགས་བུ་རྡོ་ལེབ་ལ་རྡུལ་ཚོན་ནམ་ཕྱེ་བཙགས་སོལ་བའི་མེ་ཐབ་གྲུ་གསུམ་རཾཿཡིག་གིས་མཚན་པ་བྲིས། སྟེང་དུ་ཚེར་མའི་ཧོམ་གྲུ་གསུམ་བརྩིགས་ལ་མེ་སྦར་ཏེ། ཕཊ྄ཿ མདུན་དུ་གྲུ་གསུམ་དམར་ནག་མེ་འབར་བའི། །དབུས་སུ་ཡུམ་ཆེན་མཁའ་འགྲོ་སྐུ་མདོག་དམར། །ཕྱག་གཉིས་གྲི་ཐོད་ཁཱ་ཊྭཱཾ་མཆན་བཅུག་ནས། །ཞབས་གཉིས་གར་སྟབས་བཞུགས་པའི་ཕྱོགས་བཞི་རུ། །རིགས་བཞིའི་མཁའ་འགྲོ་གཙོ་མོ་ཅི་ལྟ་བུ། །གཙོ་འཁོར་ལྔ་བོའི་སྤྱི་གཙུག་ཕག་ཞལ་རྔམ། །ཉི་ཟླའི་སྤྱན་བགྲད་གནམ་སའི་ཞལ་གདངས་པའི། །ནང་ནས་བསྐལ་མེ་རབ་དུ་འབར་བའི་ཀློང་། །དམ་ཡེ་དབྱེར་མེད་འདྲེས་པའི་སྟོབས་ལྡན་གྱུར། །དེ་ཡི་སྟེང་ཕྱོགས་ནམ་མཁར་ཁྲོས་ནག་མ། །ཉི་མ་འབུམ་ལས་ལྷག་པའི་གཟི་འོད་འབར། །དེ་ལྟར་གསལ་བའི་ཐུགས་གསང་དབྱིངས་ཆེན་ནས། །ལས་བྱེད་མཁའ་འགྲོ་དཔག་མེད་གློག་ཞགས་ལྟར། །འཕྲོས་ནས་ཟ་འདྲེ་ཤི་གཤེད་གནོད་བྱེད་ཀུན། །རང་དབང་མེད་པར་བཀུག་ནས་ཡེ་ཤེས་ཀྱི། །མཁའ་འགྲོའི་ཞལ་གྱི་མེ་དཔུང་འབར་ཀློང་དུ། །མེ་ལྕེར་སྦྲང་བུ་འཕྲད་བཞིན་བསྲེགས་པར་གྱུར། །ཕཊ྄ཿ ཕཊ྄ཿ ཕཊ྄ཿ ཧཱུཾ་དུས་གསུམ་སངས་རྒྱས་བསྐྱེད་པའི་ཡུམ། །དམར་ནག་མེ་དཔུང་ཀློང་ནས་འགྱིང་། །སྤྱན་བགྲད་ཞལ་གདངས་མཆེ་བ་གཙིགས། །གྲི་གུག་ཐོད་ཁྲག་ཁ་ཊྭཱཾ་བསྣམས། །གར་སྟབས་དུར་ཁྲོད་ཆས་ཀྱིས་བརྒྱན། །རང་འདྲ་རིགས་བཞིའི་མཁའ་འགྲོས་བསྐོར། །ཕག་ཞལ་ངུར་སྒྲས་ཁམས་གསུམ་གཡོ། །ཞལ་ནས་བསྐལ་བའི་མེ་ཆེན་འབར། །གནོད་བྱེད་ཟ་འདྲེ་ཤི་གཤེད་རྣམས། །ཞལ་དུ་བསྟབ་པོ་ཛྭ་ལ་རཾ། །སྟོང་པ་ཉིད་ཀྱི་ངང་དུ་བསྲེགས། །གཏི་མུག་ལས་གྱུར་གདོན་དང་བགེགས། །སངས་རྒྱས་མཁའ་འགྲོའི་ཞལ་དུ་བསྟབ། །ཞལ་དུ་བསྟབས་སོ་ཛྭ་ལ་རམ། །ཆོས་དབྱིངས་ཡེ་ཤེས་ངང་དུ་བསྲེག །ཞེ་སྡང་ལས་གྱུར་གདོན་དང་བགེགས། །རྡོ་རྗེ་མཁའ་འགྲོའི་ཞལ་དུ་བསྟབས། །ཞལ་དུ་བསྟབ་པོ༴ མེ་ལོང་ཡེ་ཤེས་ངང་དུ་བསྲེག །ང་རྒྱལ་ལས་གྱུར་གདོན་དང༴ རིན་ཆེན་མཁའ་འགྲོའི་ཞལ་དུ༴ ཞལ་དུ་བསྟབས་སོ༴ མཉམ་ཉིད་ཡེ་ཤེས་ངང་དུ་བསྲེགས། །འདོད་ཆགས་ལས་གྱུར་གདོན་དང་བགེགས། །པདྨ་མཁའ་འགྲོའི་ཞལ་དུ་བསྟབ། །ཞལ་དུ་བསྟབ་པོ་ཛྭ་ལ་རཾ། །སོར་རྟོགག་ཡེ་ཤེས་ངང་དུ༴ ཕྲག་དོག་ལས་གྱུར་གདོན་དང་བགེགས། །ལས་ཀྱི་མཁའ་འགྲོའི་ཞལ་དུ༴ ཞལ་དུ་བསྟབ་པོ༴ བྱ་གྲུབ་ཡེ་ཤེས་ངང་དུ་བསྲེགས། །རྣམ་ཤེས་ཆོས་ཀྱི་དབྱིངས་སུ་དྲོངས། །ཕཊ྄ཿ ཕཊ྄ཿ ཕཊ྄ཿ ཅེས་ཧོཾ་ཁུང་ནང་གི་ཤིང་བྱང་ཟན་ལིང་རྩང་ཕུར་ཐམས་ཅད་བསྲེགས་པ་དང་ཆབས་གཅིག །བཾ་ཧ་རི་ནི་ས་ཛྭ་ལ་རཾ་གནོད་བྱེད་ཟ་འདྲེ་ཤི་གཤེད་ཐམས་ཅད་སརྦ་ཤ་ཏྲུཾ་མཱ་ར་ཡ་ཧཱུཾ་ཕཊ྄ཿ མནན་པ་མི་བྱེད་ན་ཤོག་ལིང་བསྲེག་གོ། མནན་པ་བྱེད་ན་ཤོག་ལིང་བཞག །ཚེ་འདས་ཀྱི་མིང་བྱང་མེར་བསྲེགས་ཤིང་། ཧཱུཾ་མ་ཡུམ་ཆེན་མཁའ་འགྲོ་སྡེ་ལྔ་ཡིས། ཡེ་ཤེས་ལྔ་ཡི་མེ་སྦར་ཞིང་། །སྣང་ཞིང་སྲིད་པའི་འཇིག་རྟེན་གྱི། །མ་དག་འཁྲུལ་སྣང་ཐམས་ཅད་བསྲེག །སྣོད་བཅུད་ཐམས་ཅད་འོད་དུ་ཞུ། །ཡུམ་ཆེན་ལྔ་ཡི་སྐུ་ལ་ཐིམ། །ལྔ་པོ་འོད་ཞུ་བཾ་ཡིག་དམར། །བཾ་ཡིག་བདག་ཉིད་ཁྲོས་མར་གྱུར། །ཁྲོས་མ་འོད་ཞུ་ནམ་མཁར་ཐིམ། །ནམ་མཁས་གར་ཁྱབ་སེམས་ཀྱིས་ཁྱབ། །སེམས་ཀྱིས་གར་ཁྱབ་ཆོས་སྐུས་ཁྱབ། །ཆོས་སྐུ་ཡུམ་ཆེན་ཕ་རོལ་ཕྱིན། །འཁོར་འདས་ཀུན་ཁྱབ་བདེ་ཆེན་ངང་། །འགྲོ་ཀུན་སངས་རྒྱས་ཐོབ་པར་ཤོག །ཕཊ྄ཿ ཕཊ྄ཿ ཕཊ྄ཿ ཅེས་དམིགས་མེད་དུ་བཞག་གོ། ཐལ་སོལ་མ་ཎིའི་རྡོ་མཁར་འོག་གམ། ལམ་རྒྱ་གྲམ་དུ་བླུགས་མནན་པ་བྱེད་ན་ལིང་ག་གཅན་ཐོད་མཛོ་རྭ་སོགས་རང་ནོར་མིན་པའི་ར་ཅོར་བཅུག་ལ། རི་སྣ་སོགས་ལྷ་འདྲེ་གཉན་པོ་གནས་སར་གྲུ་གསུམ་བརྐོས་པའི་གཏིང་དུ་བཅུག་ལ་བྲན་ནས། ཕཊ྄ཿ རང་ཉིད་སྐད་ཅིག་ཁྲོས་མ་ནག་མོ་ཡི། །སྐུར་གསལ་ཕྱག་གཡས་གྲི་ཁུག་སར་བརྒྱབ་པས། །ས་གཞི་གས་པའི་ནང་ནས་ཆུ་གཏེར་མཚོ། །རབ་འཇིགས་དུས་མཐའི་ཆུ་ཀློང་མངོན་སུམ་བཞིན། །གསལ་བའི་ནང་དུ་གནམ་ལྕགས་ཁང་སྒྲོམ་ནི། །རབ་འཇིགས་མེ་འབར་གཏིང་རུམ་འཆོར་མེད་དུ། །གནོད་བྱེད་ཟ་འདྲེ་ཤི་སྲི་ཡོངས་ཚུད་གྱུར། །ཞེས་བསམ་འགུགས་པ་རྒྱས་བསྡུས་ཅི་མང་བྱས་མཐར། ས་རིམ་དགུའི་གཡོགས་སྟེང་དུ་སྡིགས་མཛུབ་ཀྱིས་འཁོར་ལོ་རྩིབས་བརྒྱད་བྲིས་ལ་དེར་བསམས་ལ། །ཕཊ྄ཿ ཕཊ྄ཿ ཕཊ྄ཿ གནམ་ས་གནམ་ལྕགས་འཁོར་ལོ་རྩིབས་སྟོང་ཟུང་། རྒྱུན་ཆད་མེད་པར་འཁོར་བའི་བར་དག་ཏུ། །གནོད་བྱེད་རྡུལ་ཕྲན་ཇི་བཞིན་བརླག་པར་གྱུར། །ཞེས་བསམས་ལྷ་འདྲེ་འབོད་པ་འདི་བཞིན་བྱ། འོ་ཡུལ་ཕྱོགས་འདི་དང་རྒྱལ་ཁམས་སྤྱིར་གནས་པའི། །སྟོབས་རྩལ་ལྡན་པའི་ལྷ་འདྲེ་ཁྱེད་རྣམས་ལ། །གནོད་བྱེད་ཟ་འདྲེ་ཤི་གཤེད་གཏད་པ་ཡིན། །གཏད་བཞིན་ཟུངས་ཤིག་ཆིངས་ཤིག་མ་ཤོར་ཅིག །ཁྱེད་ཅག་རྣམས་ལ་མཐུ་རྩལ་ནུས་པའི་སྟོབས། །ཅི་འདུག་བལྟ་ཞིང་རེ་འོ་མ་བསླུ་ཞིག །གལ་ཏེ་ཟ་འདྲེ་ཤི་གཤེད་ཤོར་གྱུར་ན། ནམ་མཁའ་གདན་བཏིང་ས་གཞི་གདུགས་ལྟར་ཕུབ། །རི་ཆེན་རྦབ་བསྒྲིལ་རི་ཆུང་ཚོགས་ཕོར་འཕེན། །མཛེ་ཤའི་ཐང་བརྡལ་མཛེ་ཁྲག་རྒྱ་མཚོར་བསྐྱིལ། །དཀར་དམར་ཐབ་རློག་ཁྱེད་རྣམས་རྩད་ནས་གཅོད། །དེ་ཕྱིར་དེ་ལ་མ་ཐུག་བག་ཡོད་ཀྱིས། །བཅོལ་བའི་ལས་འདི་མ་གཡེལ་གདུག་འདྲེ་རྣམས། །མ་བཏང་འཆོར་མེད་ཞགས་པས་ཆིངས་ཤིག་སྡོམས། །ཕཊ྄ཿ ཕཊ྄ཿ ཕཊ྄ཿ དེ་ལྟར་རྐང་པས་བཅགས་ཤིང་བྲོ་མནན་རྒྱས་པ་བྱའོ། ཧཱུཾ་ཕྱོགས་བཞི་དབུས་དང་ལྔ་པོ་ན། །ཡེ་ཤེས་མཁའ་འགྲོ་སྡེ་ལྔ་པོ། །རྡོ་རྗེ་འཁོར་ལོ་རིན་པོ་ཆེ། །པདྨ་རྒྱ་གྲམ་གར་སྟབས་ལྡན། །གདོན་དུག་ལྔ་ཡེ་ཤེས་ལྔའི་དབྱིངས་སུ། །མནན་ནོ་འཁོར་བར་ལྡོག་མེད་མཛོད། །ༀ་ལཾ། ཨ་ལཾ་ཧཱུཾ་ལཾ་སྭཱ་ལཾ་ཧཱ་ལཾ། གནོད་བྱེད་ཐམས་ཅད་སྟཾ་བྷ་ཡ་ནན། །ཕཊ྄ཿ ཕཊ྄ཿ ཕཊ྄ཿ མནན་པའི་སྟེང་དུ་རྡོ་བརྩིགས་ཤིང་། རེ་ཚལ་བཅུག་ལ་ནན་དུ་མནན། །ཕཊ྄ཿ ཕཊ྄ཿ ཕཊ྄ཿ ལྕགས་ཁང་སྟེང་དུ་གནམ་ལྕགས་ཀྱི། །མཆོད་རྟེན་བང་རིམ་དགུ་ལྡན་པ། །མུན་པ་རབ་འཐིབ་ཆེ་ལ་བརྗིད། །སྲ་བརྟན་གཡོ་འགུལ་བྲལ་བ་ཡིས། །མནན་ནོ་ནམ་ཡང་ལྡང་མེད་གྱུར། །ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། །ཕཊ྄ཿ ཕཊ྄ཿ ཕཊ྄ཿ ཅེས་མནན་ལ་ཕྱི་མིག་མི་ལྟ་བར་འོང་ངོ་། དེ་ཡང་ཚར་ཚད་བྱུང་ན་མནན་པ་མི་དགོས་སོ། དེ་ནས་ཡོན་བདག་གི་ཁྱིམ་དུ་འོང་རྒྱུ་ཡིན་ན། གཏང་རག་གི་ཚོགས་མཆོད་བྱ། རང་ཁྱིམ་དུ་ལྡོག་རྒྱུ་ལ་ས་མཚམས་གཉན་སར་ཁལ་ཕོག་ལ་དབང་སྡུད་དཀར་དམར་འགྱེད་སོགས་བསྡུས་ཙམ་བྱས་ལ་མཐར། འོ། ས་ཆ་འདིར་གནས་ལྷ་འདྲེ་སྟོབས་ལྡན་རྣམས། །ང་ཡི་རྗེས་སུ་འགབ་འདྲེ་ཟ་འདྲེ་དང་། །ལྟོག་འགོང་དབུལ་སྲི་འབྱུང་པོ་འབྲང་སྲིད་ན། །མ་བཏང་དམ་དུ་ཟུངས་ལ་རྡུལ་དུ་རློགས། །ཁྱེད་ཚོགས་ནུས་མཐུ་ཅི་འདུག་ངས་བལྟའོ། །ཅེས་བརྗོད་ལ་ཚུར་ཅུང་ཟད་ཕྱིན་ནས་ཐོ་བརྩིགས་སར་ཚེར་ལྕག་བཙུགས་ལ། ཕཊ྄ཿ ཡེ་ཤེས་བྱ་ཁྱུང་འཇིགས་རུང་དྲག་ཤུལ་རྔམ། །ཞལ་ཕྱིར་ཕྱོགས་ནས་གནོད་བྱེད་ཟ་འདྲེ་ཡི། །རྒྱུ་ལམ་བཅད་ནས་ཝ་སྤྲེལ་སེང་གེ་ལ། །ཉེས་མི་ནུས་བཞིན་གནོད་སེམས་ཞི་བར་གྱུར། །ཞེས་བསམས་དམིགས་བྲལ་ངང་ནས་ཁྱིམ་དུ་འོང་། དེ་ལྟར་བྱས་པས་ཟ་འདྲེ་རྗེས་འབྲང་ཁོག །སྨྲས་པ། རྣམ་མང་དུར་གཅོད་འོ་མའི་རྒྱ་མཚོ་གང་། །བསྲུབས་པའི་སྙིང་པོའི་ཡང་བཅུད་འདུལ་དཀར་ནོར། །སྲིད་པའི་ཉེར་ལེན་དུཿཁས་དུབ་པའི་འགྲོར། །ཐར་བའི་སྲོག་གི་གསོས་སུ་སྦྱིན་ནོ་ཀྱེེ། །གཅོད་ཡུལ་བརྒྱུད་པའི་དགོངས་དོན་བདུད་རྩིའི་ཆུས། །ཡོངས་གཏམས་བྱང་ཆུབ་སེམས་ཀྱི་བུམ་པ་བཟང་། །འདི་ཀོ་སྦྱོང་བྱེད་ཆོ་གའི་རྣལ་འབྱོར་ཅན། །སྔགས་འཆང་དྲང་སྲོང་ཚོགས་ཀྱི་ཕྱག་ཆར་འོས། །བདུད་བཞིའི་སྤྲོས་པ་ཆོད་པས་མི་འཇི༷གས་ཤིང་། །ཐོགས་མེ༷ད་རྒྱལ་གསུང་སྨྲ་ལ་བསྙེངས་མན་པར། །འབད་མེད་ཕྲིན༷་ལ༷ས་གདུལ་བྱའི་དཔལ་འབར་བ། །ཀུན༷་བཟ༷ང་གཞན་ལ་ཕ༷ན་དེས་ལེགས་པར་སྦྱར། །བསྐུལ་ཞིང་ཡི་གེའི་བྱེད་པོ་རང་ཉིད་ཀྱི། །སློབ་བུ་ཀློང་ཆེན་འོད་གསལ་རྡོ་རྗེ་ཡིས། །བྲིས་པ་འདིས་ཀྱང་མཐའ་ཡས་འགྲོ་བ་ཀུན། །བྱང་ཆུབ་གོ་འཕང་ཐོབ་པའི་རྒྱུར་གྱུར་ཅིག །དགེའོ། །དགེའོ། །དགེའོ།། །། ཡུམ་ཆེན་ཤེར་ཕྱིན་སྟོན་པ་བཅོམ་ལྡན་འདས་་་་༄༅། །ན་མོ་གུ་རུ། ཡུམ་ཆེན་ཤེར་ཕྱིན་སྟོན་པ་བཅོམ་ལྡན་འདས། །འཇམ་དཔལ་སྨྲ་སེང་རྗེ་བཙུན་སྒྲོལ་མ་དང་། །བདེ་བའི་དངོས་གྲུབ་ཨཪྱ་དྷེ་ཝ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །དམ་པ་སངས་རྒྱས་བསོད་ནམས་བླ་མ་དང་། །ལབ་ཀྱི་སྒྲོན་མ་རྒྱལ་བ་དོན་ཀུན་གྲུབ། །ཁུ་སྒོམ་ཆོས་སེང་དོལ་བ་ཟང་ཐལ་ལ། །གསོལ་བ་འདེབས་སོ༴ །རྒྱ་ནག་གཅེར་བུ་སངས་རྒྱས་རབ་སྟོན་དང་། །རྟོགས་ལྡན་དགེ་སློང་ཞེན་མེད་རས་པ་མཆོག །སངས་རྒྱས་སྟོན་པ་མཁས་གྲུབ་ཆོས་རྗེ་ལ། །གསོལ་བ༴ བཀྲ་ཤིས་མཚན་དང་རྡོ་རྗེའི་མཚན་ཅན་དང་། །ཀུན་དགའི་མཚན་དང་ཆོས་ཀྱི་རྒྱལ་མཚན་ལ། །གསོལ་བ༴ རྒོད་ཕྲུག་རས་པ་དུར་ཁྲོད་རས་ཆེན་དང་། །སངས་རྒྱས་བློ་གྲོས་ཆོས་ཀྱི་བློ་གྲོས་དང་། །སྣ་ཚོགས་རང་གྲོལ་བསྟན་འཛིན་གྲགས་པ་ལ། །གསོལ་བ༴ མདོ་སྔགས་བསྟན་འཛིན་ཕྲིན་ལས་ལྷུན་གྲུབ་དང་། །གཏེར་བདག་གླིང་པ་ལོ་ཆེན་དྷརྨ་ཤྲཱྀ། །འགྱུར་མེད་སྐལ་བཟང་འགྱུར་མེད་བསྟན་འཕེལ་ལ། །གསོལ་བ་འདེབས་སོ༴ བསྟན་འཛིན་ཆོས་རྒྱལ་ཀུན་བཟང་གཞན་ཕན་པ། །ཡི་དམ་ལྷ་ཚོགས་མ་དང་མཁའ་འགྲོ་མ། །མ་མགོན་ལྕམ་དྲལ་ཆོས་སྲུང་དམ་ཅན་ལ། །གསོལ་བ༴ གཅོད་ཡུལ་བརྒྱུད་པའི་བླ་མའི་ཚོགས་རྣམས་ཀྱིས། །བདག་གི་སྒོ་གསུམ་བྱིན་གྱིས་བརླབས་ནས་ཀྱང་། །གསང་གསུམ་མཐུ་ནུས་ཐོབ་པར་མཛད་དུ་གསོལ། །རང་དོན་ཀུན་ཟད་གཞན་དོན་འབད་མེད་འབྱུང་། །བདུད་བཞི་ཟིལ་གནོན་ས་ལམ་མཐར་ཕྱིན་ཅིང་། །མ་ཅིག་ཡུམ་ཆེན་དགོངས་དོན་མངོན་གྱུར་ནས། །རབ་འབྱམས་ཕྲིན་ལས་འཇུག་པ་མཐའ་ཡས་ཀྱིས། །མ་ལུས་འགྲོ་ཀུན་རྣམ་མཁྱེན་སར་འགོད་ཤོག །ཅེས་པའི་ཟབ་མོ་གཅོད་ཀྱི་དགོངས་དོན་ཇི་བཞིན་བརྒྱུད་པའི་གསོལ་འདེབས་དོན་བསྡུས་འདི་རྒྱལ་ཁམས་པ། ཀུན་བཟང་གཞན་ཕན་གྱིས་བྱང་ཕྱོགས་མཚོ་སྔོན་ནས་བྲིས་སོ། །དགེའོ། དགེའོ། དགེའོ།། །། གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་བླང་ཆོག་ཏུ་བཀོད་པ་ཆུ་བོ་གཅིག་འདྲེས་བདུད་རྩིའི་རྒྱ་མཚོ།༄༅། །དམ་ཆོས་བདེ་ཆེན་ལམ་མཆོག་ཐེམ་མེད་སྐོར་ལསཿ གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་བླང་ཆོག་ཏུ་བཀོད་པ་ཆུ་བོ་གཅིག་འདྲེས་བདུད་རྩིའི་རྒྱ་མཚོ་ཞེས་བྱ་བ་བཞུགསཿ ན་མོ་པྲ་ཛྙཱ་པཱ་ར་མི་ཏ་ཡེ། མཁྱེན༷་རབ་རྒྱལ་བ་ཀུན་དང་མཉམ་ཡང་རྒྱལ་ཀུན་སྐྱབས་སུ་བརྟེན་ནས་རྒྱལ་གསུང་ཇི་བཞིན་ཉམས་བླངས་མཐུས། རྒྱལ་ཀུན་གསུང་གི་གསང་བའི་དེ་ཉིད་ཇི་བཞིན་གཟིགས་ནས་བྱམས་བརྩེ༷འི་ཐུགས་ཀྱིས་གཞན་ལ་འདོམས་མཛད་རྗེ། རྒྱལ་བ་ཀློང་ཆེན་པ་དེ་སླར་ཡང་ཟློས་པའི་གར་བསྒྱུར་རྫོགས་ཆེན་བསྟན་པའི་མུན་སེལ་འོ༷ད་སྟོང་དལ། རྒྱལ་ཀུན་ཕྲིན་ལས་ཚ་ཟེ༷ར་སྐལ་བཟང་པད་མོར་ཤར་ཚེ་གདུལ་བྱའི་རྐང་དྲུག་དགའ་བར་མཛད་དེར་འདུད། གང་གི་བཀའ་དྲིན་ཡིད་བཞིན་དབང་། །བདེ་ཆེན་འཁོར་ལོར་བཀོད་བཞིན་དུ། །ཡིད་གཉིས་བྲལ་བས་གསོལ་བཏབ་མཐུས། །ཆོས་རྣམས་ཀུན་གྱི་དེ་ཉིད་རིག །དེ་ཕྱིར་ཕྱག་རྫོགས་དབུ་མ་ཞི་གཅོད་སོགས། །ཀུན་ལ་འབྲེལ་བ་བཞག་ཅིང་མཉན་བསམ་དང་། །སྨིན་གྲོལ་ནོད་བཞིན་ཇི་ལྟར་སྦྱངས་འབྲས་ཀྱིས། །འདི་འདྲའི་ཕྱག་ལེན་འབྲི་བའི་སྤོབས་པ་ཐོབ། །དེ་སླད་སྤྲུལ་སྐུ་ལབ་སྒྲོན་མའི། །གཅོད་གཞུང་དགོས་འདོད་སྣ་ཚོགས་གཟུགས། །ཕུང་པོ་མཆོད་སྦྱིན་བདུད་རྩིའི་མཚོར། །གསལ་བར་བྱས་འདིར་བལྟ་བར་བྱོས། །དེ་ལའང་སྦྱོར་དངོས་རྗེས་གསུམ་གྱི། །དང་པོ་ཕྱི་པའི་གྲུབ་མཐའ་ལས། །ཁྱད་པར་འཕགས་ཕྱིར་སྐྱབས་འགྲོའི་ཆེད། །ཚོགས་ཞིང་སྒྲུབ་ཚུལ་འདི་བཞིན་ཏེ། །དུས་གསུམ་རྟོག་ཚོགས་གཅོད་ཕྱིར་དུ། །ཕཊ྄ཿ བརྗོད་དྲན་རིག་སོ་མའི་ངང་། ཕྱོགས་མཚམས་སྟེང་འོག་ལས་འདས་རང་སྣང་མཁར། །ཐབས་ཤེས་ཉི་ཟླ་མ་ཆགས་པདྨའི་སྟེང་། །རྣམ་ཀུན་མཆོག་ལྡན་ཆོས་སྐུ་ཡུམ་ཆེན་དང་། །དབྱེར་མེད་རྡོ་རྗེ་ཕག་མོ་ལབ་སྒྲོན་མ། །ག་བུར་རྡུལ་བརྩེགས་ལྷུན་པོ་བསིལ་ཟེར་གྱིས། །ལན་བརྒྱར་འཁྱུད་ལྟའི་ལང་ཚོའི་དཔལ་ཡོན་མཛེས། །ཕྱག་གཡས་ཌ་རུ་ས་སྙིང་ཞུན་མས་སྤུད། །གཡོན་ཕྱག་རིན་ཆེན་གཉིས་པའི་དྲིལ་བུ་འཁྲོལ། །དར་དང་རིན་ཆེན་རུས་པའི་རྒྱན་གྱིས་སྤུད། །སྐུ་གསུམ་མཚོན་ཕྱིར་འདྲེན་བྱེད་རྩེ་མོ་ཡིས། །མདུན་མཁར་རབ་གཟིགས་ཁམས་གསུམ་ཟིལ་གྱིས་གནོན། །སྐྱིལ་ཀྲུང་ཕྱེད་པའི་སྟབས་ཀྱིས་གཡོ་མེད་བཞུགས། །དབུ་སྐྱེས་ལྕང་ལོ་བདེ་ཆེན་འཁོར་ལོར་བཅིངས། །ལྷག་མ་ཐུར་གྲོལ་སྐུ་རྒྱབ་ཁེབས་པར་སྤུད། །དེ་ལྟར་གསལ་བའི་སྤྱི་བོའི་གཙུག་ནས་སུ། །མས་རིམ་ཇི་བཞིན་སྟོན་མཆོག་ལྷ་མིའི་མགོན། །གཡས་སུ་གྲུབ་པའི་ཁྱུ་མཆོག་དམ་པ་རྗེ། །གྲུབ་ཐོབ་རྒྱ་མཚོ་ལྟ་བུའི་དབུས་ན་རོལ། །གཡོན་ན་ཡེ་ཤེས་མཁའ་འགྲོ་སྡེ་ལྔ་པོ། །རང་རང་རིགས་ཀྱི་འཁོར་ཚོགས་དུ་མས་བསྐོར། །དེ་སྟེང་ཆོས་སྐུ་རྒྱལ་བ་ཡུམ་ཆེན་མོ། །དེ་སྟེང་དབྱིངས་སྣང་ལོངས་སྐུ་སྟངས་དཔྱལ་འཁོར། །མདུན་མཁར་རྗེ་བཙུན་ཨཱཪྱ་ཏཱ་རེ་མ། །གཞན་ཡང་རྩ་གསུམ་ཆོས་སྲུང་དཀར་སྐྱོང་བཅས། །མཁའ་དབྱིངས་ཆུ་འཛིན་ཕུང་པོས་ཡོངས་གང་བཞིན། །མཁྱེན་བརྩེ་ནུས་པའི་དཔལ་ཡོན་བླ་ན་མེད། །དེ་ལྟར་གསལ་བའི་འོག་ཕྱོགས་ས་སྤྱོད་དེར། །འགྲོ་བ་རིགས་དྲུག་བར་དོའི་ཡིད་ལུས་བཅས། །གཏན་པ་བྲལ་བའི་སྟོན་མོར་ཁྲོམ་ཚོགས་བཞིན། །མཆོག་དམན་མགྲོན་རྣམས་ལྷག་མེད་འདུས་པར་གྱུར། །ཞེས་པས་ཚོགས་ཞིང་མགྲོན་བཅས་སེམས་ཉིད་ཀྱི། རོལ་རྩལ་ལས་གཞན་བདག་བཟུང་སྐྱོན་བྲལ་བཞིན། རྣམ་གསུམ་དད་པའི་ལམ་གྱི་སྐྱབས་འགྲོ་ནི། མ་ཅིག་སྤྲུལ་སྐུའི་བཀའ་བཞིན་འདི་ལྟར་བྱས། །ན་མོ་གཉན་ས་འདིར་གནས་ཀྱི་ལྷ་འདྲེ་དང་། །གནས་གདོན་ལུས་གདོན་གཙོར་བྱས་པའི། །མཁའ་མཉམ་གྱི་འགྲོ་བ་སེམས་ཅན་ཀུན། །མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་ཁྱེད་ལ་སྐྱབས་སུ་མཆི། །རང་རིག་ཡེ་ཤེས་སྟོན་མཛད་པ། །བླ་མ་རྣམས་ལ༴ དངོས་གྲུབ་ངེས་པར་སྟེར་མཛད་པ། །ཡི་དམ་ལྷ་ལ་སྐྱབས་སུ༴ བར་ཆད་ཐམས་ཅད་སེལ་མཛད་པ། །མཁའ་འགྲོའི་ཚོགས་ལ༴ སྤང་རྟོགས་ཕུན་སུམ་ཚོགས་པ་ཡི། །སངས་རྒྱས་རྣམས་ལ༴ ཞི་གྱུར་འདོད་ཆགས་བྲལ་བ་ཡི། །དམ་པའི་ཆོས་ལ༴ །གང་ལ་ཕུལ་ན་དོན་ཆེ་བ། །དགེ་འདུན་རྣམས་ལ༴ གཞོན་ནུའི་ཚུལ་འཛིན་ཡོན་ཏན་ལྡན། །འཇམ་དཔལ་དབྱངས་ལ༴ སྙིང་རྗེས་ངེས་པར་རྒྱུད་གང་བ། །སྤྱན་རས་གཟིགས་ལ༴ མཐུ་སྟོབས་ཆེན་པོས་གདུག་པ་འདུལ། །རྡོ་རྗེ་འཛིན་ལ༴ ཇི་སྲིད་སྙིང་པོ་བྱང་ཆུབ་བར། །ཁྱེད་རྣམས་ལ་ནི་སྐྱབས་སུ་མཆི། །ཁྱེད་རྣམས་ལ་ནི་གསོལ་བ་འདེབས། །ཁྱེད་རྣམས་ལ་ནི་རྟེན་བཙའ་འོ། །དགེ་དེས་སེམས་ཅན་བདེ་གྱུར་ཅིག །གཉིས་པ་ཉན་རང་གཞན་དོན་མི་གཉེར་ཡང་། །བྱང་ཆུབ་སེམས་དཔས་རང་དོན་བསྒྲུབ་ན་སྐྱོན། །དེ་ཕྱིར་ཉན་རང་ལ་སོགས་དམན་ལམ་ལས། །སྐྱོབ་ཕྱིར་ཐེག་པ་ཆེན་པོའི་ལམ་མཆོག་འདིར། །ངེས་པར་སློབ་འདོད་སེམས་ཀྱི་ཚད་མེད་བཞིའི། །རྗོད་བྱེད་རྗེས་སུ་བརྗོད་བྱ་འབྲང་བཞིན་དུ། །ལམ་ལྔའི་སྙིང་པོ་སེམས་བསྐྱེད་འདི་བཞིན་བྱ། ཕཊ྄ཿ སྲིད་ཁམས་རྒྱ་མཚོ་བདེ་དང་མི་འབྲལ་ཞིང་། །དེ་ཀུན་སྡུག་བསྔལ་རྒྱུ་འབྲས་དང་བྲལ་ནས། །བདེ་ཆེན་འགྱུར་མེད་དཔལ་ལ་ལོངས་སྤྱོད་བཞིན། །ཐམས་ཅད་ཉེ་རང་ཆགས་སྡང་བྲལ་གྱུར་ཅིག །ཕཊ྄ཿ ཕཊ྄ཿ ཕཊ྄ཿ ཕཊ྄ཿ ལན་བཞི་བརྗོད་པས་ཚད་མེད་རྣམ་བཞིར་སྦྱོར། གསུམ་པ་སེམས་བསྐྱེད་དངོས་ལའང་སྨོན་འཇུག་གཉིས། དང་པོ་སྨོན་པའི་སེམས་བསྐྱེད་འདི་ལྟ་སྟེ། ཕཊ྄ཿ བདག་གིས་འགྲོ་རྣམས་མ་ཅིག་ཡུམ་ཆེན་གྱི། གོ་འཕང་མཆོག་ལ་མྱུར་དུ་འགོད་པར་བགྱི། ལན་གསུམ་ལྡབ་ཅིང་སྨོན་སེམས་མ་སྐྱེས་བར། ཕཊ྄ཿ བརྗོད་སྨོན་སེམས་སྔོན་འགྲོའི་འཇུག་པ་ནི། ཕཊ྄ཿ བདག་གིས་འགྲོ་རྣམས་མ་ཅིག་ཡུམ་ཆེན་མོའི། །གོ་འཕང་མཆོག་ལ་འགོད་ཕྱིར་བདུད་གཅོད་ལམ། །ཕར་ཕྱིན་དྲུག་གི་ཚུལ་གྱིས་ཉམས་བླངས་ནས། །སྲིད་པ་ཇི་སྲིད་འགྲོ་དོན་བྱེད་སེམས་བསྐྱེད། །དེ་ལྟར་མ་སྐྱེས་བར་དུ་ཕཊ྄ཿབརྗོད་དོ། །བཞི་པ་མཆོད་པའི་ཡན་ལག་ལ་ཡང་གཉིས། །ཕྱི་སྣོད་ནང་བཅུད་མཎྜལ་འབུལ་འདུན་དང་། །དེ་དག་ཡོ་བྱད་འདོད་ཡོན་ཅི་མཆིས་ཀུན། །ཚོགས་ཞིང་ལྷ་ལ་འབུལ་བ་རྣམ་གཉིས་སོ། །དེ་ལས་དང་པོ་དམིགས་འདོན་ཟུང་འཇུག་ངང་། ཕཊ྄ཿ ཅེས་བརྗོད་པས་རང་སེམས་ངོ་བོ་དེ། །མཁའ་འགྲོ་མར་གྱུར་རང་ལུས་བེམ་རོ་ཡི། །པགས་པ་དབང་ཆེན་གསེར་གྱི་ས་གཞིའི་སྟེང་། །མགོ་བོ་རི་རྒྱལ་ལྷུན་པོ་མཚན་ཉིད་རྫོགས། །ཡན་ལག་ཉིང་ལག་གླིང་བཞི་གླིང་ཕྲན་བཅས། །མིག་གཉིས་ཉི་ཟླའི་དཀྱིལ་འཁོར་དཔལ་ཡོན་ལྡན། །ཤ་ཁྲག་རུས་པ་སྐྲ་སེན་བ་སྤུ་བཅས། །ལྷ་མིའི་འདོད་ཡོན་ལོངས་སྤྱོད་དཔག་མེད་རྫས། །ཞིང་ཁམས་མུ་མཐའ་མེད་པར་བཀོད་པ་འདི། །གཅོད་ཡུལ་བརྒྱུད་པའི་ཆུ་འགོ་སངས་རྒྱས་དང་། །བྱང་སེམས་བླ་མ་ཡི་དམ་མཁའ་འགྲོར་བཅས། །མཆོད་འོས་ཚོགས་ཞིང་དཀྱིལ་འཁོར་ལྷ་ཚོགས་ལ། །འབུལ་ལོ་ཚོགས་གཉིས་རབ་རྫོགས་སྒྲིབ་གཉིས་བྱང་། །དམ་པ་སྐུ་གཉིས་ཐོབ་པའི་རྒྱུར་གྱུར་ཅིག །དེ་ལྟར་དམིགས་པ་མ་ཟིན་བར་དུ་ནི། ཕཊ྄ཿ ཅེས་བརྗོད་རྗེས་གནས་ལུགས་ངང་དུ་བཞག །བཞག་ཅེས་བྱ་བ་འཇོག་མཁན་བྲལ་བ་ཡིན། །གཉིས་པ་ཕྱི་ནང་གསང་བའི་མཆོད་འབུལ་ནི། །དམིགས་འདོན་ཡ་བྲལ་མ་སོང་ངང་ཉིད་ནས། ཕཊ྄ཿ རབ་འབྱམས་རྒྱ་མཚོའི་ཞིང་གི་ཕྱི་སྣོད་ཀྱི། །འཇིག་རྟེན་ཁམས་ལས་བྱུང་བའི་མཆོད་པའི་རྫས། །ལྷ་ཆེན་ཚངས་པའི་སྤྱོད་ཡུལ་ལས་གྱུར་དང་། །ཕྱི་རྒྱུད་གསུམ་ལས་གསུང་པའི་ཡོ་བྱད་ཚོགས། །བློ་ཡིས་བླངས་ཏེ་ཚོགས་ཞིང་ལྷ་ལ་འབུལ། །ཚོགས་གཉིས་རབ་རྫོགས་སྐུ་གཉིས་མངོན་གྱུར་མཛོད། །དམིགས་པ་མ་ཟིན་བར་དུ་ཕཊ྄ཿབརྗོད་དོ། །ནང་དང་གསང་བའི་མཆོད་འབུལ་འདི་བཞིན་ནོ། ཕཊ྄ཿ ནང་བཅུད་འགྲོ་བའི་ཕུང་ཁམས་སྐྱེ་མཆེད་ལས། །བྱུང་བའི་གཟུགས་སྒྲ་དྲི་རོ་རེག་བྱའི་ཆོས། །ཐབས་ཤེས་ཟུང་འཇུག་སྦྱོར་དང་གཉིས་འཛིན་བསྒྲལ། །སྣང་སྟོང་གསལ་སྟོང་གྲག་སྟོང་ལ་སོགས་པ། །དངོས་འཛིན་ཞེན་པ་བྲལ་བའི་མཆོད་པ་ཡང་། །འབུལ་བྱ་འབུལ་བྱེད་བྲལ་བའི་ངང་ནས་འབུལ། །ས་བཅུ་ལམ་ལྔའི་འབྲས་བཟང་མངོན་གྱུར་མཛོད། ཕཊ྄ཿ ལྔ་པ་ཕྱག་འཚལ་བ་ཡི་ཡན་ལག་ནི། ཕཊ྄ཿ བདག་ལུས་ཞིང་རྡུལ་མཉམ་པའི་གྲངས་སྙེད་ཀྱིས། །ཐལ་མོ་སྤྱི་མགྲིན་སྙིང་ཁའི་གནས་རྣམས་སུ། །བཞག་ནས་སྒོ་གསུམ་གུས་པའི་མོས་སྟོབས་ཀྱིས། །གཅོད་ཡུལ་བརྒྱུད་པའི་བླ་མར་ཕྱག་འཚལ་ལོ། ཕཊ྄ཿ བརྗོད་དམིགས་པ་སྔ་ཕྱིའི་མཚམས་སྦྱོར་བྱ། དྲུག་པ་བཤགས་པའི་ཡན་ལག་འདི་བཞིན་ཏེ། ཕཊ྄ཿ སྲོག་གཅོད་རྐུ་འཕྲོག་ལོག་པར་གཡེམ་པ་དང་། །རྫུན་དང་ཕྲ་མ་ཚིག་རྩུབ་ངག་འཁྱལ་བ། །བརྣབ་སེམས་གནོད་སེམས་ལོག་པར་ལྟ་བ་སོགས། །སྒོ་གསུམ་མི་དགེའི་ལས་བགྱིས་མཐོལ་ལོ་བཤགས། ཕཊ྄ཿ བརྗོད་སྡིག་ཚོགས་ཆུ་ལ་གཟུགས་བྲིས་ལྟར། འཇུག་ལྡོག་སྒྱུ་མའི་འཕྲུལ་བཞིན་རང་གྲོལ་བལྟ། བདུན་པ་དགེ་རྩར་རྗེས་སུ་ཡི་རང་བ། ཕཊ྄ཿ རྒྱལ་དང་དེ་སྲས་རྣམས་ཀྱིས་བསྟན་འགྲོའི་དོན། །དཔག་མེད་མཛད་དང་བསྟན་འཛིན་སྡེ་ཚོགས་ཀྱིས། །བསྟན་པ་འཛིན་སྐྱོང་སྤེལ་བའི་རྣམ་དཀར་དང་། །འགྲོ་ཀུན་དགེ་ཚོགས་ཀུན་ལ་རྗེས་ཡི་རང་། ཕཊ྄ཿ བརྗོད་རྟོག་པའི་འཕྲོ་འདུ་རྒྱུན་གཅོད་བྱ། བརྒྱད་པ་ཆོས་འཁོར་བསྐོར་ཞིང་བསྟན་འཛིན་རྣམས། མྱ་ངན་མི་འདར་གསོལ་བ་གདབ་པ་ནི། ཕཊ྄ཿ རྒྱལ་བ་སྲས་བཅས་ཞི་བདེར་མི་གཞོལ་བར། །འགྲོ་ལ་ཆོས་ཀྱི་འཁོར་ལོ་བསྐོར་བ་དང་། །སྲིད་མཐའི་བར་དུ་མྱ་ངན་མི་འདའ་བར། །བསྟན་འགྲོར་ཕན་བདེ་སྤེལ་ཕྱིར་བཞུགས་གསོལ་འདེབས། །དགེ་དེས་འགྲོ་རྣམས་སངས་རྒྱས་ཐོབ་གྱུར་ཅིག ཕཊ྄ཿ སྒྲ་དམིགས་པ་མ་ཟིན་བར་དུ་བརྗོད། དེ་ཚེ་ཆོས་ཅན་ཆོས་ཉིད་ཀློང་དུ་སྦ། །དེ་ལྟར་སྔོན་འགྲོའི་རིམ་པ་གྲུབ་ནས་སུ། །སྤྱི་དོན་གཉིས་པ་ལ་ཡང་གསུམ་ཡིན་ཏེ། །དང་པོ་སྙིང་ནས་གསོལ་བ་འདི་ལྟར་གདབ། ཕཊ྄ཿ གནས་རང་སྣང་བདེ་ཆེན་འཁོར་ལོའི་དབྱིངས། །རྒྱུས་མ་བསྐྱེད་རྐྱེན་གྱིས་མི་འཇིག་པའི། །དཔལ་ཡོན་ཏན་ཕུན་ཚོགས་དཀྱིལ་འཁོར་ན། །མ་ཆོས་སྐུ་རྒྱལ་བ་ཡུམ་ཆེན་མོ། །མགོན་ཤཱཀ་ཐུབ་འཇམ་དཔལ་སྨྲ་སེང་དང་། །རྗེ་བཙུན་སྒྲོལ་མ་བདེ་བའི་དངོས་གྲུབ་དང་། །ཨཱཪྱ་དྷེ་ཝ་དམ་པ་རྒྱ་གར་བ། །བདག་གསོལ་བ་འདེབས་སོ་བྱིན་གྱིས་རློབས། །ཆོས་བདག་མེད་གཉིས་ཀྱི་དོན་རྟོགས་ནས། །མ་ཡུམ་ཆེན་དགོངས་དོན་མངོན་གྱུར་མཛོད། ཕཊ྄ཿ སྐྱོ་སྟོན་ཁུ་དབོན་ཨ་མ་ལབ་ཀྱི་སྒྲོན། །རྒྱལ་བ་དོན་འགྲུབ་ཁུ་སྒོམ་ཆོས་སེང་བ། །དོལ་བ་ཟང་ཐལ་རྒྱ་ནག་གཅེར་བུ་པ། །སངས་རྒྱས་རབ་སྟོན་རྟོགས་ལྡན་དགེ་སློང་ཞབས། །བདག་གསོལ་བ༴ ཆོས་བདག་མེད༴ མ་ཡུམ་ཆེན༴ ཕཊ྄ཿ ཞེན་མེད་རས་པ་སངས་རྒྱས་སྟོན་པ་དང་། །ཆོས་ཀྱི་རྗེ་དང་བཀྲ་ཤིས་བཛྲ་མཚན། །ཀུན་དགའ་ཆོས་ཀྱི་རྒྱ་མཚོ་རྒོད་རས་པ། །དུར་ཁྲོད་རས་ཆེན་བྷུནྡྷ་ཆོས་བློ་ཟུང་། །བདག་གསོལ༴ ཆོས་བདག་མེད༴ མ་ཡུམ་ཆེན༴ ཕཊ྄ཿ སྣ་ཚོགས་རང་གྲོལ་བསྟན་འཛིན་གྲགས་པ་དང་། །མདོ་སྔགས་བསྟན་འཛིན་ཕྲིན་ལས་ལྷུན་གྲུབ་རྗེ། །འགྱུར་མེད་རྡོ་རྗེ་རིན་ཆེན་རྣམ་རྒྱལ་བ། །ཀུན་བཟང་རྣམ་རྒྱལ་བསྟན་འཛིན་ཆོས་རྒྱལ་སོགས། །བདག་གསོལ་བ༴ ཆོས་བདག་མེད༴ མ་ཡུམ་ཆེན༴ ཕཊ྄ཿ ཁྱད་པར་ཕ་བརྒྱུད་མ་བརྒྱུད་སྲས་རྒྱུད་དང་། །བཀའ་བརྒྱུད་སྒྲུབ་བརྒྱུད་དབང་བསྐུར་ལུང་ནོད་སོགས། །བྱིན་རླབས་བཀའ་བབ་རྩ་བའི་བླ་མ་རྗེ། །ཡི་དམ་དཔའ་བོ་མཁའ་འགྲོ་ཆོས་སྲུང་བཅས། །བདག་གསོལ་བ༴ ཆོས་བདག་མེད༴ མ་ཡུམ་ཆེན་དགོངས་དོན་མངོན་གྱུར་མཛོད། ཕཊ྄ཿ ཅེས་བརྗོད་ལ་ཚོགས་ཞིང་གི། དགོངས་ཀློང་མཁའ་དང་རང་སེམས་བསྲེ། བསྲེ་ཞེས་བྱ་བ་གཉིས་འཛིན་ཡིན། གཉིས་མེད་རྟོགས་ཚེ་གཅིག་ཀྱང་སྟོར། དེ་ཚེ་དབང་བསྐུར་བྱིན་རླབས་ཐོབ། གཉིས་པ་བདུད་རྩི་དབབ་པ་དང་། ཆབས་ཅིག་ནད་གདོན་སྒྲིབ་སྦྱོང་ནི། ཕཊ྄ཿ ཚོགས་ཞིང་དཀྱིལ་འཁོར་ལྷ་རྣམས་ཀྱི། །སྐུ་གསུང་ཐུགས་ཀྱི་བྱིན་རླབས་ནི། །འོད་ཀྱི་རྣམ་པས་བདུད་རྩིའི་རྒྱུན། །བདག་དང་བསྲུང་བྱའི་སྤྱི་བོ་ནས། །ཞུགས་པས་ནད་གདོན་སྡིག་སྒྲིབ་ཀུན། །ལྷག་མེད་བཀྲུས་པའི་ཁྲུས་ཁུ་ཡིས། །ས་གཞིའི་ཁམས་ཀུན་ཡོངས་གང་བཞིན། །འཆི་བདག་གཤིན་རྗེའི་ཁར་སོང་བས། །དུས་མིན་འཆི་བ་བཟློག་པར་གྱུར། །ཞེས་མོས། ཕཊ྄ཿ བརྗོད་དམིགས་འདོན་བསྦྲགས། གསུམ་པ་གཅོད་ཀྱི་དགོངས་དོན་འགྱེད་ཆེན་བཞིའི། དང་པོ་ཡེངས་མེད་ང་ནས་དཀར་འགྱེད་བྱ། ཕཊ྄ཿ རང་ལུས་གཞོན་དར་ལང་ཚོ་ཕུན་ཚོགས་ལྡན། །རང་སེམས་རྣལ་འབྱོར་དམར་མོ་གྲི་ཐོད་བསྣམས། །གཡོན་བསྐུམ་གཡས་བསྐྱང་ཞབས་གཉིས་གར་སྟབས་མཛད། །གཅེར་བུ་སྐྲ་བཀྲོལ་འོད་ལུས་ཐོགས་བྲལ་ཞིག །དབུ་མའི་ལམ་ནས་སྐར་མདའ་རྒྱུག་བཞིན་ཐོན། ཕཊ྄ཿ སེམས་བྲལ་བེམ་པོ་ཡིད་འོང་མཛེས་པ་དེ། །མགོ་བོ་ཚུར་བསྟན་རྐང་པ་ཕྱིར་བརྐྱངས་ཏེ། །རང་མདུན་དོག་སར་དུར་ཁྲོད་རོ་བཞིན་དུ། །གན་རྐྱལ་ལ་གནས་མངོན་སུམ་ཇི་བཞིན་གྱུར། ཕཊ྄ཿ རང་སེམས་ཡོ་གིའི་ཕྱག་གཡས་གྲི་གུག་གིས། །བེཾ་པོའི་སྨིན་མཚམས་ནས་བཟུང་ཐོད་པ་བྲེགས། །གཡོན་ཕྱག་གིས་བླངས་མདུན་དེར་མི་མགོ་ཡི། །སྒྱེད་པུ་རི་བོའི་དཔེར་འོས་གསུམ་གྱི་ཁར། །ཐོད་པ་བཙུགས་པས་འཇིག་རྟེན་ཁམས་གང་གྱུར། ཕཊ྄ཿ ཐོད་པ་བཀོག་པའི་བེམ་རོ་དེ་ཉིད་ཀྱང་། །གྲི་གུག་གིས་གཏུབ་ཐོད་པའི་ནང་དེར་བླུགས། །ༀ་ཨཱཿཧཱུྃ་གིས་སྦྱངས་སྤེལ་བསྒྱུར་བ་དང་། །ཚོགས་ཞིང་སྐུ་ལས་བདུད་རྩིའི་རྒྱུན་བབས་ནས། །ཐོད་པའི་བདུད་རྩིར་ཐིམ་པས་བདུད་རྩིའི་མཚོ། །དཀར་དམར་མདངས་ལྡན་དྲི་ཞིམ་རོ་མངར་བའི། །མཆོག་དམན་མགྲོན་རིགས་མཉེས་པའི་དཔལ་ལྡན་གྱུར། །ཅེས་བསམ་དེ་ལྟར་དམིགས་པ་མ་ཟིན་བར། ཕཊ྄ཿ བརྗོད་མཆོད་སྦྱིན་ལས་ལ་འཇུག་པ་ནི། ཕཊ྄ཿ རང་རིག་ལས་བྱེད་རྡོ་རྗེ་རྣལ་འབྱོར་མའི། །ཐུགས་ལས་སྤྲུལ་བའི་མཁའ་འགྲོ་གྲངས་མེད་ཀྱིས། །ཐོད་པའི་བདུད་རྩིར་བཅུས་ཤིང་ལྷ་ཚོགས་མཆོད། ཕཊ྄ཿ མས་མགྲོན་རྣམས་ལ་བདུད་རྩི་ཐོད་པ་ཡིས། །བཅུས་ཤིང་གཏོར་བས་ཆང་སྲེད་ལྡན་པའི་མིས། །ཆང་ལ་སྤྱོད་བཞིན་བཏུང་བས་མཉེས་ཚིམས་གྱུར། །ཅེས་བསམ། ཕཊ྄ཿ བརྗོད་དམིགས་པས་གཞུར་ལ་དྲངས། ཡར་མར་མཆོད་སྦྱིན་མགྲོན་ལ་འདི་ལྟར་བསྟབ། ཕཊ྄ཿ གཅོད་ཡུལ་བརྒྱུད་པའི་བླ་མ་ཡི་དམ་དང་། །མཁའ་འགྲོ་ཆོས་སྐྱོང་སྲུང་མ་སྤྱི་དང་ནི། །བྱེ་བྲག་ཕ་བརྒྱུད་མ་བརྒྱུད་སྲས་བརྒྱུད་དང་། །བཀའ་བརྒྱུད་སྒྲུབ་བརྒྱུད་དབང་བསྐུར་རྒྱུད་བཤད་དང་། །རྗེས་གནང་བྱིན་རླབས་ལུང་དང་བཀའ་གཏད་ཀྱི། །དྲིན་ཐོབ་བླ་མ་དམ་པའི་ཚོགས་རྣམས་དང་། །ཡི་དམ་ཞི་དང་ཁྲོ་བོའི་དཀྱིལ་འཁོར་ལྷ། །དུས་གསུམ་རྒྱལ་བ་སྲས་དང་སློབ་མར་བཅས། །དཔའ་བོ་མཁའ་འགྲོ་ཆོས་སྐྱོང་དམ་ཅན་སོགས། །སྲི་ཞུའི་ཡུལ་གྱུར་མཆོག་གསུམ་རྩ་གསུམ་ལྷར། །བདག་ལུས་ཞུ་བའི་ཚོགས་མཆོད་རྒྱ་མཚོའི་སྤྲིན། །འབུལ་ལོ་དགྱེས་པར་བཞེས་ལ་བདག་སོགས་འགྲོའི། །ཚོགས་གཉིས་རབ་རྫོགས་སྒྲིབ་གཉིས་ཡོངས་དག་ནས། །མཆོག་དང་ཐུན་མོང་དངོས་གྲུབ་མྱུར་ཐོབ་མཛོད། ཕཊ྄ཿ བདག་ལུས་ཞུ་བའི་བདུད་རྩི་དགོས་འབྱུང་གཏེར། །གང་ལ་གང་འདོད་དེ་ལ་དེར་མཐུན་རྫས། །ནམ་མཁའ་མཛོད་ཀྱི་ལོངས་སྤྱོད་མདུན་བསྟར་བཞིན། །དཔག་ཡས་ནམ་མཁའི་ཁམས་ཀུན་ཡོངས་གང་འདི། །ཚངས་དབང་བརྒྱ་བྱིན་ལ་སོགས་ཕྱོགས་སྐྱོང་བཅུ། །རྒྱལ་ཆེན་བཞི་དང་དཔལ་མགོན་བདུན་ཅུ་ལྔ། །མགོན་པོ་ཡོན་ཏན་མགྲོན་དུ་གྱུར་རྣམས་ལ། །འབུལ་ལོ་དགྱེས་པར་མཛོད་ལ་བདག་སོགས་འགྲོའི། །འགལ་རྐྱེན་ཀུན་ཞི་མཐུན་རྐྱེན་ཕུན་ཚོགས་ནས། །བཀྲ་ཤིས་བདེ་སྐྱིད་དཔལ་དང་མི་འབྲལ་མཛོད། ཕཊ྄ཿ ཁྱད་པར་གནས་པོ་ཆེན་པོ་ཡུལ་འདི་ཡི། །གཉུག་གནས་གཙོ་འཁོར་ཆེ་ཕྲ་ཐམས་ཅད་དང་། །སྟོང་གསུམ་གཞི་བདག་དུས་གསུམ་ཕ་མ་དང་། །ཁམས་གསུམ་སེམས་ཅན་རིགས་དྲུག་མཁའ་མཉམ་འགྲོ། །སྙིང་རྗེའི་ཡུལ་དུ་གྱུར་པ་ཐམས་ཅད་ལ། །འབུལ་ལོ་མཉེས་པར་མཛོད་ལ་བདག་སོགས་འགྲོའི། །སྒོ་གསུམ་ཉེས་པའི་ཚོགས་རྣམས་བཟོད་མཛད་ནས། །མངོན་མཐོའི་དཔལ་ཡོན་ཕུན་སུམ་ཚོགས་པ་དང་། །བུ་ལོན་ལན་ཆགས་ཤ་འཁོན་ཀུན་བྱང་ནས། །ཕན་ཚུན་བྱམས་བརྩེའི་གནས་ལ་འདུན་གྱུར་ཅིག །ཕཊ྄ཿ མཆོད་དང་སྦྱིན་པའི་ལྷགས་མར་རེ་བ་ཡི། །ཁས་ཞན་དབང་ཆུང་གཟུགས་ངན་གཟི་བརྗིད་ལོད། །དབང་པོ་མ་ཚང་འབྱུང་པོའི་ཚོགས་གྲལ་དུ། །འོང་མ་ནུས་དང་གློ་བུར་ལྷག་པའི་མགྲོན། །ཀུན་ལ་རང་རང་དབང་སྐལ་དང་མཐུན་པའི། །འདོད་དགུའི་རྫས་སུ་བསྒྱུར་ཏེ་འབུལ་བར་བགྱི། ཕཊ྄ཿ ཐམས་ཅད་བདེ་ལྡན་སྡུག་བསྔལ་ཀུན་བྲལ་ནས། །མཐར་ཐུག་སངས་རྒྱས་འགྲུབ་པའི་མཐུ་ཐོབ་མཛོད། །ཕཊ྄ཿ དེ་ལྟར་མཆོད་སྦྱིན་འཁོར་གསུམ་མི་དམིགས་ངང་། །སྣང་ལ་རང་བཞིན་མེད་པའི་དོན་ལ་སྦྱོར། །གཉིས་པ་དམར་འགྱེད་ལམ་དུ་ལོངས་པའི་ཕྱིར། །བཀའ་བརྒྱུད་བླ་མར་གསོལ་བ་གདབ་པ་ནི། །ཚོགས་ཞིང་གསལ་གདབ་ཁྱེད་ཤེས་བློ་བཀལ་ཏེ། །སྒོ་གསུམ་གུས་པས་གསོལ་བ་འདི་བཞིན་གདབ། །ཨེ་མ་ཧོ། ངོ་མཚར་རྨད་བྱུང་བདེ་ཆེན་འཁོར་ལོ་ན། །རྒྱལ་ཡུམ་ཤེར་ཕྱིན་ཤཱཀ་ཐུབ་འཇམ་པའི་དབྱངས། །འཕགས་པ་ལྷ་དང་དམ་པ་ལབ་སྒྲོན་མ། །ཁམ་བུ་ཡ་ལེ་གྲུབ་ཆེན་ཡེ་ཤེས་འབར། །གནམ་མཚོ་བ་དང་རང་བྱུང་གཡུང་སྟོན་ཞབས། །རོལ་བའི་རྡོ་རྗེ་དར་རྒྱལ་མཁའ་སྤྱོད་དབང་། །དེ་བཞིན་གཤེགས་པ་རཏྣ་བྷ་ཏྲ་དང་། །མཐོང་བ་དོན་ལྡན་ཀུན་མཁྱེན་འཇམ་དཔལ་བཟང་། །དཔལ་འབྱོར་དོན་གྲུབ་ཆོས་གྲགས་རྒྱ་མཚོ་དང་། །དབང་ཕྱུག་རྡོ་རྗེ་གར་དབང་ཆོས་ཉིད་ཞབས། །སངས་རྒྱས་མཉན་པ་འཇིགས་མེད་མི་བསྐྱོད་བཟང་། །དཀོན་མཆོག་ཡན་ལག་དབང་ཕྱུག་རྡོ་རྗེ་དང་། །ཆོས་ཀྱི་དབང་ཕྱུག་ཀུན་དགའ་རྣམ་རྒྱལ་ཞབས། །ཀརྨ་ཆགས་མེད་སྡོང་ཉ་བསམ་གཏན་པ། །གཅོད་རྒོད་མ་དང་དཀོན་མཆོག་བཀྲ་ཤིས་ཞབས། །བརྒྱུད་ཚུལ་གཞན་ལས་གཅོད་རྒོད་མ་དང་ནི། །པདྨ་ཆོས་དབྱིངས་ཀུན་བཟང་གཞན་ཕན་རྗེ། །ཁྱད་པར་བརྒྱུད་ཚུལ་ཀུན་འདུས་རིན་པོ་ཆེ། །གྲུབ་གཉིས་ཉི་མ་འགྱུར་མེད་ཆོས་ཀྱི་རྗེ། །གཅོད་ཡུལ་བརྒྱུད་པའི་བླ་མ་བྱིན་རླབས་ཅན། །གསོལ་བ་འདེབས་སོ་སྒོ་གསུམ་བྱིན་གྱིས་རློབས། །རེ་དོགས་ཆགས་སྡང་དགའ་སྡུག་གཙང་བ ཙོག་སོགས། །གཉིས་སུ་འཛིན་པའི་རྣམ་རྟོག་ཀུན་ཟད་ནས། །མ་ཅིག་ཡུམ་ཆེན་དགོངས་དོན་མངོན་གྱུར་མཛོད། །ཕཊ྄ཿ ཅེས་མང་བརྗོད་ཚོགས་ཞིང་ལྷ་རྣམས་ཀྱི། །ཐུགས་དང་རང་སེམས་དབྱེར་མེད་བསྲེ་བར་བྱ། །དམར་འགྱེད་དངོས་ཀྱི་དམིགས་པ་འདི་ལྟ་སྟེ། །ཕཊ྄ཿ རང་ལུས་ལང་ཚོའི་དཔལ་ཡོན་ཕུན་སུམ་ཚོགས། །རང་སེམས་རྣལ་འབྱོར་མར་གྱུར་ནམ་མཁར་ཐོན། །རང་ལུས་སྟོང་གསུམ་ཁྱབ་པའི་བམ་རོ་དེ། །ཆེ་ཞིང་ཚོ་ལ་མཛེས་ཤིང་ཡིད་དུ་འོང་། །དུར་ཁྲོད་རོ་བཞིན་བདག་མེད་ལིང་ངེར་འགྱེལ། །ཕཊ྄ཿ རང་རིག་རྣལ་འབྱོར་དམར་མོས་གྲི་གུག་གིས། །བེམ་པོ་བསྒྲལ་ནས་པགས་པ་བཏང་བའི་སྟེང་། །ཡན་ལག་ཉིང་ལག་ཕྱི་ཤ་ནང་རོལ་བཀྲམ། །ཤ་རི་ཁྲག་མཚོ་རུས་པའི་གྲམ་ཁྲོད་དང་། །རྐང་དང་ལྷ་བ་ཀླད་ཞག་ལྦུ་ཕྲེང་འཁྲིགས། །འཇིག་རྟེན་ཁམས་ཀུན་གང་བའི་རྫས་སུ་གྱུར། །དམིགས་པ་མ་ཟིན་བར་དུ་ཕཊ྄ཿབརྗོད་ཅིང་། །སྐད་གདངས་ང་རོས་ལྷ་འདྲེ་འདི་བཞིན་འབོད། འཻ། བགེགས་ཀྱི་གཙོ་བོ་གདོན་ཆེན་བཅོ་བརྒྱད་དང་། །བྱིས་པའི་གདོན་ཆེན་བཅོ་ལྔ་ལ་སོགས་ནས། །རྒྱལ་བསེན་གཟའ་ཀླུ་རྒྱུ་སྐར་ས་བདག་བཙན། །བདུད་གཤིན་འགོང་ཐོལ་གྲི་བོ་གྲི་མོར་བཅས། །སྲིད་པའི་རྩེ་མན་ན་རཀ་དམྱལ་བ་ཡན། །ནམ་མཁའི་ལྷ་མན་ས་འོག་ལྟོ་འཕྱེ་ཡན། །མཐོ་བ་བཻ་ཧར་རྒྱལ་པོ་མན་ཆད་དང་། །དམའ་བ་ཡུལ་འདྲེ་ས་སྲིན་ཡན་ཆད་ཀྱི། །སྣང་སྲིད་ལྷ་འདྲེ་ཐམས་ཅད་འདིར་འདུས་ཤིག །ཕཊ྄ཿ འཻ། ཁྱད་པར་གཉན་ཁྲོད་འདིར་གནས་ལྷ་འདྲེའི་རིགས། །ལྷ་བདུད་བཙན་དང་གཟའ་ཀླུ་གཉན་དང་སྲིན། །ཕོ་མོ་མ་ནིང་ཚོགས་ཀུན་འདིར་འདུས་ཤིག །ཁྱད་པར་བསྲུང་བྱ་འདི་ལ་གནོད་བྱེད་པའི། །རྒྱལ་བསེན་གྲི་བོ་གྲི་མོ་ཤི་གསོན་འདྲེ། །དུས་གསུམ་འདྲེར་གྱུར་ཟ་འདྲེ་ཤི་གཤེད་དང་། །ཁ་ཡི་དབུགས་འཕྲོག་ཁོང་པའི་སྲོག་གཅོད་པའི། །བདུད་དང་ལོག་འདྲེན་མ་ལུས་འདིར་འདུས་ཤིག །ཅེས་པ་འབོད་སྐད་དྲག་པོས་བོས་ཙམ་གྱིས། །མདུན་དེར་ཁྲོམ་ཚོགས་ཇི་བཞིན་འདུས་པར་བསམ། ཕཊ྄ཿ བརྗོད་མགྲོན་ལ་ལུས་ཚོགས་འདི་བཞིན་འབུལ། འཻ། བདག་ལུས་ཆེ་ཚོ་བཀྲག་མདངས་རབ་རྒྱས་པའི། །སྤྱི་བོའི་གཙུག་ནས་རྐང་མཐིལ་ཡན་ཆད་ཀྱི། །དབང་པོ་རྣམ་ལྔ་དོན་ལྔ་སྣོད་དྲུག་སོགས། །ཕྱི་ཤ་ནང་རོལ་ཚིལ་བུ་ལྷ་བ་དང་། །ཤ་ཁྲག་རུས་གསུམ་ཆུ་སེར་སེན་མོ་སོ། །སྐྲ་དང་ཁ་སྤུ་ཀླད་པ་ཀླད་རྒྱ་རྐང་། །ཚེ་སྲོག་བཀྲག་མདངས་སོ་རྙིལ་ཁམས་ལ་སོགས། །ལྷ་འདྲེ་ཁྱེད་རང་རྣམས་ལ་ཕངས་མེད་བློས། །སྟེར་བ་ཡིན་པས་དགའ་བའི་སེམས་ཀྱིས་ལོངས། །གསོལ་ཅིག་རོལ་ཅིག་སྣོམས་ཤིག་དགྱེས་པར་མཛོད། །སྤྱིར་སེམས་ཅན་ཡོངས་ཀྱི་དོན་དུ་འབུལ། །སྒོས་ཕ་མ་དང་བླ་མའི་གླུད་དུ་བསྔོ། །ཡང་སྒོས་ལྷ་འདྲེའི་ཚོགས་ལ་གཟེན་དུ་སྟེར། །དོན་དེ་ཕྱིར་སྐད་ཅིག་ཡུད་ཙམ་ལ། །འདི་ཟོ་ཞིག་རོལ་ཅིག་དགྱེས་པར་མཛོད། །ལུས་བྲམ་ཟེ་སྐྱེ་བདུན་ཤ་ཁྲག་ཏུ། །བྱིན་གྱིས་བརླབས་ནས་ཕུལ་བའི་མཐུ་ནུས་ཀྱིས། །ཁྱེད་རྣམས་འཁོར་བ་མཐོ་དམན་ལས་ཐར་ནས། །རྣམ་མཁྱེན་རྒྱལ་བའི་གོ་འཕང་ཐོབ་པར་མཛོད། །ཅེས་པས་མགྲོན་རྣམས་སོ་སོའི་བསམ་པ་དང་། །མཐུན་པའི་ཤ་ཁྲག་རུས་པ་ནང་རོལ་སོགས། །མགྲོན་རྣམས་ཀུན་གྱིས་ཧབ་ཐོབ་བྱས་ནས་སུ། །ཟོས་འཐུང་ཁྱེར་བས་འཕྲལ་ཚིམ་ཕན་བདེའི་རྒྱུར། །གྱུར་ནས་དགའ་བདེའི་དཔལ་ལ་ལོངས་སྤྱོད་གྱུར། །དམིགས་པ་མ་ཟིན་བར་དུ་ཕཊ྄ཿབརྗོད་དོ། །ཕཊ྄ཿ དམར་སྟོན་ལྷག་མ་ཁས་ཞན་དབང་ཆུང་བའི། །ཉམ་ཆུང་འབྱུང་པོ་རྣམས་དང་གློ་བུར་དུ། །ལྷགས་པའི་མགྲོན་རིགས་རྣམས་ལ་འདོད་དགུ་ཡི། །རྫས་སུ་བསྒྱུར་ཏེ་འབུལ་བ་འདི་བཞེས་ལ། །དགའ་མགུ་ཡི་རང་ཕན་བདེའི་བློ་སྐྱེས་ནས། །མཐར་ཐུག་ཡུམ་ཆེན་གོ་འཕང་ཐོབ་པར་ཤོག །ཚིག་རྗེས་དོན་འབྲང་། ཕཊ྄ཿ བརྗོད་རྟོག་ཚོགས་གཅོད། དེ་ལྟར་དཀར་དམར་འགྱེད་ཆེན་གཉིས་སོང་ནས། སྤྲོས་ལ་དགའ་ན་ཀརྨ་ཨ་རཱ་གའི། གཞུང་བཞིན་དཀར་འགྱེད་འ ཁྱེར་བདེ་འདི་ལྟར་རོ། ཕཊ྄ཿ རང་རིག་རང་ལུས་ནས་ཐོན་ཌཱཀྐི་དཀར། །རང་ལུས་དཀར་གསུམ་ལས་གྲུབ་བཟའ་བཏུང་རིགས། །ངོ་བོ་བདུད་རྩི་རྣམ་པ་མར་ཐུད་ཕྲུམ། །འོ་ཞོ་མངར་གསུམ་གྱིས་སྦགས་མཆོད་པའི་རྫས། །རི་ལྟར་ལྷུན་མཐོ་མཚོ་ལྟར་རྒྱ་དཔངས་ཆེ། །མཛེས་ཤིང་ཡིད་འོང་དྲི་ཞིམ་རོ་མངར་ལྡན། །འདི་ཉིད་མཆོད་ཅིང་སྦྱིན་པའི་ཡུལ་མཆོག་དམན། །མཐོ་སྟེ་མཆོག་གསུམ་རྩ་གསུམ་ཞི་དང་ཁྲོ། །དཔའ་བོ་དཔའ་མོ་ཆོས་སྐྱོང་དམ་ཅན་སྡེ། །འདས་དང་མ་འདས་ལྷ་དང་དཀར་སྐྱོང་རིགས། །མཆོད་དོ་འབུལ་ལོ་དཀར་མཆོད་བདུད་རྩི་བཞེས། །དགྱེས་པར་མཛོད་ལ་མཆོག་ཐུན་དངོས་གྲུབ་སྩོལ། །ཕཊ྄ཿ དམའ་སྟེ་དམྱལ་གནས་འོག་མ་ཡན་ཆད་ཀྱི། །རིགས་དྲུག་འགྲོ་བ་སྤྱི་དང་ཁྱད་པར་དུ། །སྡུག་བསྔལ་དུ་མས་གཟིར་བའི་ཉམ་ཐག་འགྲོ། །མ་ལུས་དཀར་འགྱེད་བདུད་རྩིའི་རྒྱ་མཚོ་འདི། །འཐུངས་ཤིག་ཚིམ་པར་རོལ་ཅིག་དགྱེས་མཛོད་ལ། །ཀུན་ཀྱང་བྱང་ཆུབ་སེམས་ཀྱི་བདུད་རྩིའི་ཆར། །མཐོང་ངམ་ཐོས་སམ་དྲན་ནམ་རེག་ཙམ་གྱིས། །སྲིད་ཁམས་འགྲོ་བའི་སྡུག་བསྔལ་ཡོངས་བྱང་ནས། །གནས་སྐབས་ཡུམ་ཆེན་གདུལ་བྱར་འགྱུར་བ་དང་། །མཐར་ཐུག་རྣམ་ཀུན་མཆོག་ལྡན་ལ་འགོད་མཛོད། །ཕཊ྄ཿ ཅེས་དམིགས་པ་མ་ཟིན་བར་དུ་བརྗོད། །དེ་དང་རྗེས་འབྲེལ་བདེ་སྡུག་གཏོང་ལེན་གྱི། །དམིགས་པ་འདི་ནི་ཤིན་ཏུ་གལ་ཆེ་བས། །ཡང་ཡང་བསྐྱར་ཞིང་ཉམས་སུ་བླང་བ་གནད། །སྟོང་ཉིད་རྒྱུ་འབྲས་ཡ་བྲལ་མ་སོང་བཞིན། །ཕཊ྄ཿ བདག་གི་དུས་གསུམ་བསགས་པའི་རྣམ་དཀར་དགེ། །ནང་འབྱུང་རླུང་གི་རྒྱུ་བ་དང་འགྲོགས་ཏེ། །ཡོངས་ཀྱི་འགྲོ་བའི་རྒྱུད་ལ་ཐིམ་གྱུར་ནས། །སྡུག་བསྔལ་ཀུན་བྲལ་བདེ་ཆེན་མཆོག་ཐོབ་གྱུར། །ཕཊ྄ཿ བརྗོད་དྲི་བཞོན་ཕྱིར་རྒྱུ་དང་འགྲོགས་ཏེ། །རང་གི་བདེ་དགེ་འགྲོ་ལ་སྦྱིན་པ་ཡང་། །འོད་དཀར་རྣམ་པས་ལྷག་མེད་ཐིམ་བསམ་ནས། །སླར་ཡང་འགྲོ་བའི་རྒྱུད་ཀྱི་མི་དགེའི་ལས། །འབྲས་བུ་ངན་སོང་གསུམ་སོགས་རིགས་དྲུག་གི། །སྡུག་བསྔལ་རྒྱུ་བཅས་ལས་རླུང་ནང་ལྡོག་དང་། །འགྲོགས་ཏེ་རང་གི་སྒོ་གསུམ་ལ་ཐིམ་པས། །འགྲོ་རྣམས་སྡུག་བསྔལ་དང་བྲལ་བདེ་ལྡན་གྱུརཿ །ཅེས་བསམས། ཕཊ྄ཿ བརྗོད་རེ་དོགས་བྲལ་བར་བཞག །ཁྱད་པར་དགོས་འདོད་ཀུན་འབྱུང་མཆོད་སྦྱིན་གྱིས། །མཆོག་དམན་མགྲོན་ལ་དྲང་སྲོང་སྟོན་མོ་བཞིན། །ཆེ་ཆུང་དྲག་ཞན་མེད་པར་སྟོབ་པ་ནི། ཕཊ྄ཿ རང་རིག་རྣལ་འབྱོར་དམར་མོ་ནམ་མཁར་འཕགས། །རང་ལུས་འཆི་མེད་ལྗོན་པས་སྟོང་གསུམ་ཁྱབ། །དེ་ཉིད་བྱང་ཆུབ་སེམས་ཀྱི་བསེར་བུ་ཡིས། །རབ་ཏུ་བསྐྱོད་པས་ལྗོན་པའི་ལོ་འབྲས་ལས། །མཆོད་ཡུལ་མཉེས་བྱེད་ལྷ་མིའི་ཡོ་བྱད་རྫས། །དཔག་མེད་ཀུན་ཏུ་བཟང་པོའི་མཆོད་རྫས་བཞིན། །སྦྱིན་ཡུལ་ཚིམ་བྱེད་ཟས་ནོར་ལོངས་སྤྱོད་གཏེར། །ནམ་མཁའ་མཛོད་ཀྱི་དཔལ་ཡོན་མངོན་གྱུར་ཆར། །སྟོང་གསུམ་འཇིག་རྟེན་ཁེངས་ནུས་ཡོངས་བབས་མཐུས། །མཆོད་ཡུལ་མཉེས་བྱས་ཚོགས་ཆེན་རྣམ་གཉིས་རྫོགས། །མཆོག་དང་ཐུན་མོང་དངོས་གྲུབ་ཡོངས་ཐོབ་ཅིང་། །སྦྱིན་ཡུལ་ཀུན་ཚིམ་ལན་ཆགས་བུ་ལོན་བྱང་། །ཁྱད་པར་གཟུགས་ཅན་གཟུགས་མེད་ལོག་སྦྱོར་རིགས། །བདག་ལུས་འདོད་ཡོན་ལྔ་ལྡན་ལོངས་སྤྱོད་དུ། །ཚིམ་པར་མཛོད་ལ་གནོད་སེམས་གདུག་རྩུབ་དང་། །སྡང་སེམས་དྲག་ཤུལ་བསམ་སྦྱོར་ཞི་བར་མཛོད། །ཅེས་བརྗོད་དོན་བསམ། ཕཊ྄ཿ ཀྱིས་སྣང་སེམས་བསྲེ། བསྲེས་ནས་འདྲེས་རྒྱུ་མེད་པར་རྡོ་རུས་གཏུག །དམར་འགྱེད་བྱེ་བྲག་དམིགས་ཀྱིས་བསལ་བ་ནི། ཕཊཿ ཅེས་བརྗོད་པས་རང་རིག་རྣལ་འབྱོར་མས། །ཕྱག་གཡས་རལ་གྲིས་རང་ལུས་གང་ན་བ། །ཁོལ་བུར་བཀོག་ནས་གནོད་བྱེད་གདོན་བགེགས་ལ། །དགའ་བཞིན་སྦྱིན་པས་གནོད་འཚེ་དང་བྲལ་གྱུར། །ཕཊ྄ཿ བརྗོད་དོན་བསམ་ན་ཡུལ་མི་འཚོལ་བཞིན། །ན་ཚ་མྱོང་མཁན་ཡོད་མེད་རྡོ་རུས་གཏུག །གཞན་ཡང་ལུས་སྤྱི་རིལ་བོར་གནོད་བྱེད་ལ། །ལྟོས་པ་མེད་བཞིན་འབུལ་ཚུལ་འདི་ལྟ་སྟེ། ཕཊ྄ཿ རང་རིག་རྣལ་འབྱོར་མར་གྱུར་ནམ་མཁར་འཕགས། །རང་ལུས་ས་གཞི་ཁྱབ་པའི་བམ་གྱུར་པར། །སྦྱིན་ཡུལ་མགྲོན་རྣམས་མི་རོར་བྱ་རྒོད་བཞིན། །གྲངས་མེད་འཚུབས་ཤིང་ཧབ་ཐོབ་ཚུལ་གྱིས་རོལ། །སྐད་ཅིག་ཙམ་གྱིས་ལྷག་མེད་ཟོས་པར་གྱུར། །དེ་དོན་བསམ་བཞིན། ཕཊ྄ཿ བརྗོད་དམིགས་མེད་བཞག །དེ་མཐར་གོང་བཞིན་བདེ་སྡུག་གཏོང་ལེན་བྱ། །གསུམ་པ་ནག་འགྱེད་སྔོན་དུ་གསོལ་འདེབས་ནི། །སླར་ཡང་མདུན་གྱི་ཚོགས་ཞིང་གསལ་བཏབ་ནས། །སྒོ་གསུམ་གུས་པས་གསོལ་བ་འདི་བཞིན་གདབ། །ཨེ་མ་ཧོ། མགོན་རྒྱལ་བ་ཐམས་ཅད་བསྐྱེད་མཛད་པ། །མ་ཡུམ་ཆེན་ཤེས་རབ་ཕ་རོལ་ཕྱིན། །དཔལ་རྣམ་འདྲེན་བཞི་པ་ཤཀྱའི་ཏོག །ཡོངས་འགྲོ་རྣམས་སྲིད་མཚོར་སྒྲོལ་མཛད་མ། །དེ་མི་མོའི་རྫུར་ཞུགས་མཚོ་རྒྱལ་ཡུམ། །མགོན་རྒྱལ་ཀུན་ཡབ་ཅིག་འཇམ་དཔལ་དབྱངས། །དཔལ་ཨཱཪྱ་དྷེ་ཝ་མུ་སྟེགས་བདུད། །ཕ་དམ་པ་རྒྱ་གར་བྷོ་ཊའི་རྒྱན། །སྔགས་རྙིང་མ་པུཎྱེ་གུ་རུའི་མཚན། །སྔོན་འདས་པའི་དུས་བྱོན་སྨོན་ལམ་གྲུབ། །སླར་བྷོ་ཊར་སྲིད་བཟུང་ལབ་སྒྲོན་མ། །དེའི་བརྒྱུད་འཛིན་ཇི་སྙེད་བྱོན་རྣམས་དང་། །ཡུམ་ཤེར་ཕྱིན་དགོངས་དོན་མངོན་གྱུར་བའི། །དཔལ་ངག་གི་དབང་པོ་ཀློང་ཆེན་པ། །གང་ཟློས་པའི་གར་བསྒྱུར་མཁྱེན་བརྩེའི་ལྷ། །དཔལ་པདྨ་བིདྱ་དྷཱ་རའི་ཞབས། །ཆོས་སྔ་འགྱུར་མངའ་བདག་གཏེར་བདག་གླིང་། །གཅུང་ལོ་ཆེན་དྷརྨ་ཤྲྀ་ཞེས། །ཆོས་ཟབ་མོ་བདུད་ཀྱི་གཅོད་ཡུལ་གྱི། །དོན་བཀའ་བབ་བྱིན་རླབས་བརྒྱུད་པའི་སྡེ། །བདག་རྣམ་གསུམ་དད་པལྔ་གསོལ་བཏབ་མཐུས། །བདུད་རྣམ་བཞི་དབྱིངས་སུ་ཆོད་པ་དང་། །དགྲ་བདག་གཉིས་ངོ་བོར་གྲོལ་ནས་སུ། །ཆོས་བདག་མེད་དགོངས་དོན་མཐར་ཕྱིན་མཛོད། །ཕཊ྄ཿ བརྗོད་བདག་མེད་དོན་ལ་མཉམ་པར་བཞག །ནག་འགྱེད་དངོས་ནི་དམིགས་འདོན་ཟུང་འཇུག་ངང་། ཕཊ྄ཿ སྐད་ཅིག་དྲན་རྫོགས་སྟོང་གསུམ་བྷནྡྷའི་སྣོད། །དེ་ནང་བདག་དང་བསྲུང་བྱ་རྣམས་གནས་པའི། །མདུན་མཁར་བཞུགས་པའི་ཚོགས་ཞིང་ལྷ་ཚོགས་ཀྱི། །སྐུ་ལས་ཟག་མེད་བདུད་རྩིའི་རྒྱུན་བབལྔ་པ། །སྤྱི་བོ་ནས་ཞུགས་ལུས་སྤྱིའི་ཕྱི་ནང་ཀུན། །རབ་ཏུ་བཀྲུས་ཤིང་བཤལ་བའི་ནད་དང་གདོན། །སྡིག་སྒྲིབ་ཉེས་ལྟུང་དྲི་མའི་ཚོགས་རྣམས་ཀུན། །དུད་ཁུ་སོལ་ཁུའི་རྣམ་པས་རྐང་མཐིལ་དང་། །བཤང་གཅིའི་ལམ་ནས་ཤྭ་འུད་རྒྱུག་བཞིན་དུ། །བྱུང་ཞིང་ཐོད་པའི་སྣོད་དུ་ཡོངས་འཁྱིལ་བ། །མདོག་ནག་དྲི་ཞིམ་རོ་མངར་རྒྱ་མཚོ་ཆེ། །ༀ་ཨཱཿཧཱུཾ་གིས་ཡེ་ཤེས་བདུད་རྩིར་བསྒྱུར། །ༀ་ཨཱཿཧཱུྃ། ཞེས་མང་དུ་བརྗོད་པའི་མཐར། ཕཊ྄ཿ བདག་དང་བསྲུང་བྱའི་ཚེ་སྲོག་སྟོབས་འབྱོར་ལ། །གནོད་ཅིང་འཚེ་བའི་དགྲ་བགེགས་ལོག་འདྲེན་རྣམས། །ནད་གདོན་སྡིག་སྒྲིབ་བཀྲུས་པའི་ཁུ་བ་འདི། །ལྷག་མེད་འཐུངས་ཤིག་སྐོམ་གདུང་ལྡན་པའི་མིས། །བཏུང་བ་མྱུར་དུ་སྤྱོད་བཞིན་འདི་བཞེས་ཤིག །འདི་ཉིད་མཐོང་ངམ་ཐོས་སམ་དྲན་ནམ་རེག །དེ་དག་སྡིག་བྲལ་དགེ་སེམས་མཆོག་ཐོབ་ནས། །མཐོང་ཐོས་དྲན་རེག་འགྲོ་ལ་སྨན་ནུས་ཤོག །དམིགས་པ་ཡང་ཡང་བསྐྱར་ཞིང་། ཕཊ྄ཿ བརྗོད་དོ། བཞི་པ་ཁྲ་བོ་འགྱེད་པའི་སྔོན་དུ་ནི། རྩ་བརྒྱུད་བླ་མར་གསོལ་བ་གདབ་པ་ཡང་། སྔོན་བཞིན་ཚོགས་ཞིང་ལྷ་ཚོགས་གསལ་བཏབ་ལ། སྒོ་གསུམ་གུས་པས་གསོལ་བ་འདི་བཞིན་གདབ། ཨེ་མ་ཧོ། ངོ་བོ་ཀ་དག་བདེ་ཆེན་འགྱུར་མེད་ཡབ། །མཆོག་ཏུ་མི་འགྱུར་ཡུམ་ཆེན་ཀུན་བཟང་མོ། །སྟངས་དཔྱལ་གཉིས་ལས་ལེགས་མཆེད་མདོ་སྔགས་སྤྱིིའི། །རྩ་བརྒྱུད་བླ་མ་རྣམས་ལ་གསོལ་བ་འདེབས། །འཁོར་ལོ་དང་པོའི་དགོངས་དོན་བདེན་བཞིའི་ཆོས། །གདུལ་བྱ་དངོས་པོར་ཞེན་རྣམས་ཁ་དྲངས་ཕྱིར། །འཁོར་ལོ་གཉིས་པ་མཚན་ཉིད་མེད་པའི་ཆོས། །གདུལ་བྱ་བདེན་འཛིན་ལ་ཞེན་དེ་ལྡོག་ཆེད། །འཁོར་ལོ་གསུམ་པ་ལེགས་པར་རྣམ་ཕྱེས་ཆོས། །སྔོན་མ་གཉིས་པོ་དོན་དམ་ལ་སྦྱོར་ཆེད། །ཡིན་པར་ངེས་ན་ཟབ་མོ་བདུད་གཅོད་ཆོས། །འཁོར་ལོ་དང་པོར་འབྲེལ་དེ་བདེན་བཞི་ཚང་། །བདེན་བཞིའི་དོན་སྤྱོད་བརྒྱུད་པར་གསོལ་བ་འདེབས། །འཁོར་ལོ་བར་པར་གཟུགས་ནས་རྣམ་མཁྱེན་བར། །ཐམས་ཅད་སྟོང་པར་གསུངས་པ་གཅོད་དང་འབྲེལ། །གང་དེའི་བརྒྱུད་འཛིན་རྣམས་ལ༴ །འཁོར་ལོ་ཐ་མ་དགེ་སྡིག་རྒྱུ་དང་འབྲས། །སྟོང་དང་མི་སྟོང་ལ་སོགས་བློས་བྱས་ཆོས། །སྤྲོས་བྲལ་ཆོས་སྐུའི་ངང་དུ་རྒྱས་འདེབས་པའི། །བརྒྱུད་ལྡན་བླ་མ་རྣམས་ལ༴ དམ་ཆོས་བདུད་ཀྱི་གཅོད་ཡུལ་ཟབ་མོ་འདི། །དབུ་མ་པར་མཐུན་མཐའ་བཞི་སྤྲོས་དང་བྲལ། །ཕྱག་ཆེན་དང་མཐུན་སྣང་བ་སེམས་སུ་འདོད། །རྫོགས་ཆེན་དང་མཐུན་ཐེག་དགུའི་དགོངས་དོན་རྫོགས། །ཆེན་པོ་རྣམ་གསུམ་བརྒྱུད་པར་གསོལ་བ་འདེབས། །དེ་ལྟར་འཁོར་ལོ་གསུམ་དང་ཆེན་པོ་གསུམ། །མ་ཅིག་ཉིད་ཀྱི་བཀའ་གཏེར་ཆེ་ཆུང་ཆབ། །ཆུ་གཏེར་ཆེན་པོར་རོ་གཅིག་འདྲེས་པ་ལྟར། །དབྱེར་མེད་འདྲེས་པ་མ་ཅིག་སྙན་བརྒྱུད་ཀྱི། །དྲིན་ཐོབ་གྲུབ་ཆེན་པདྨ་བཤེས་གཉེན་དང་། །ཐུབ་བསྟན་བསྟན་འཛིན་བླ་སློབ་རྣམ་གཉིས་སོགས། །ཟབ་མོ་གཅོད་ཡུལ་བརྒྱུད་པ་ཐམས་ཅད་ལ། །གསོལ་བ་འདེབས་སོ་གྲུབ་གཉིས་མངོན་གྱུར་མཛོད། །ཁྱད་པར་མ་ཅིག་ལབ་ཀྱི་སྒྲོན་མ་ལས། །བརྒྱུད་པའི་ཁྱད་པར་དཔལ་ལྡན་ས་སྐྱ་ནས། །བརྒྱུད་པར་གཙང་བརྒྱུད་ཅེས་སུ་གྲགས་པ་དང་། །དབེན་པ་བར་བརྒྱུད་དབུས་བརྒྱུད་དགེ་ལྡན་ལུགས། ཀཿཐོག་དབོན་པོ་ཀུན་དགའ་འབུམ་དང་ནི། །བསོད་ནམས་འབུམ་གཉིས་ལུགས་བརྒྱུད་ཁམས་ལུགས་ཞེས། །བརྒྱུད་པ་ཡོངས་འདུས་ས་བརྟོལ་འཆི་མེད་ལྗོན། །སྲིད་ལ་འཇི༵གས་པ་མེ༵ད་ཀྱང་དགེ་ལ་བརྩོན། །ཞི་ལ་མི་སྨོན་རྒྱལ་ཀུན་ཕྲི༵ན་ལ༵ས་བསྒྲུབ། །གཅོད་ཡུལ་བསྟན་པའི་འོ༵ད་ཟེ༵ར་སྟོང་ལྡན་དཔལ། །བདུད་སྡེའི་མུན་པར་འབར་དེར་གསོལ་བ་འདེབས། །དེ་ལྟར་གསོལ་བ་བཏབ་པས་མཐུ་ནུས་ཀྱིིས། །ཕྱི་རུ་གཉན་སའི་འཇིགས་སྐྲག་ཆོད་པ་དང་། །ནང་དུ་ལུས་ཀྱི་གཅེས་འཛིན་ངེས་པར་ཆོད། །གསང་བར་སེམས་ཀྱི་དགའ་སྡུག་རེ་དོགས་སོགས། །ཐམས་ཅད་ཆོད་པ་མ་ཅིག་ཁྱེད་རང་ལྟར། །བྱིན་གྱིས་རློབས་ཤིག་རྗེ་བཙུན་རྣལ་འབྱོར་མ། །ཕྱི་སྣོད་ནང་བཅུད་དགྲར་ལངས་ཐོགས་བཅས་བདུད། །སེམས་དང་སེམས་བྱུང་དགྲར་ལངས་ཐོགས་མེད་བདུད། །ས་ལམ་ཡོན་ཏན་མངོན་ཞེན་དགའ་བྲོད་བདུད། །རེ་དོགས་ཆགས་སྡང་དགའ་སྡུག་སྙེམ་བྱེད་བདུད། །བདུད་བཞི་དབྱིངས་སུ་ཞི་བར་བྱིན་གྱིས་རློབས། །ཕཊ྄ཿ ཅེས་བརྗོད་པས་བདག་མེད་དོན་ལ་བལྟ། ཁྲ་འགྱེད་དངོས་ནི་ཡེངས་མེད་འཛིན་མེད་དང་། ཕཊ྄ཿ རང་ལུས་འཇའ་ཚོན་ལྟར་གསལ་ལུས་དཀྱིལ་ནས། །རང་སེམས་རྣལ་འབྱོར་མར་གྱུར་མཁའ་ལ་འཕར། །རང་ལུས་དུར་ཁྲོད་རོ་བཞིན་མདུན་དུ་འགྱེལ། །ཕྱག་གཡས་གྲི་གུག་བམ་གྱི་ཐོད་པར་བརྒྱབ། །མདུན་ནས་བསྐོར་ཏེ་ཀ་པ་ལ་བཀོག་སྟེ། །མདུན་དུ་རང་བྱུང་ཐོད་སྒྱེད་གསུམ་གྱི་ཁར། །ཐོད་སྣོད་བཙུགས་ཏེ་རང་ལུས་དེར་བཅུག་ཅིང་། །དུམ་བུར་གཏུབ་པའི་ཤ་ཁྲག་རུས་གསུམ་སྤུངས། །ཏིང་འཛིན་རླུང་གཡོས་ཡེ་ཤེས་མེ་འབར་བས། །ཤ་ཁྲག་ཞུ་ཞིང་ཁོལ་བའི་བདུད་རྩིའི་མཚོ། །ཨཿལས་རྡུལ་དང་ཧཾཿལས་བྱང་སེམས་དཀར། །དབྱེར་མེད་འདྲེས་པའི་མྱོང་གྲོལ་འཛད་མེད་གཏེར། །རི་ལྟར་དཔངས་མཐོ་མཚོ་ལྟར་རྒྱ་ཆེ་བར། །རང་གི་ཐུགས་ལས་སྤྲུལ་བའི་མཁའ་འགྲོ་མ། །ཕྱག་གཡས་ཐོད་སྐྱོགས་བཟུང་བ་གྲངས་མེད་ཀྱིས། །བདུད་རྩི་བཅུས་ཏེ་མཆོག་དམན་མགྲོན་ཀུན་མཆོད། །ཕཊ྄ཿ བསྐལ་བཟང་འདྲེན་པ་སྟོང་རྩ་སྲས་དང་བཅས། །ཉན་ཐོས་རང་རྒྱལ་གནས་བརྟན་བཅུ་དྲུག་སོགས། །མདོ་ལུགས་བརྒྱུད་པའི་བླ་མ་ཐམས་ཅད་ལ། །བདག་ལུས་ཞུ་བའི་བདུད་རྩི་དཀར་གསུམ་མཚོར། །བསྒྱུར་ནས་འབུལ་ལོ་སོ་ཐར་བྱང་སེམས་ཀྱི། །སྡོམ་དང་བསླབ་པ་ཉམས་པ་མཐོལ་ལོ་བཤགས། །ཉན་རང་བྱང་སེམས་འབྲས་བཟང་མངོན་གྱུར་མཛོད། །ཕཊ྄ཿ བདག་ལུས་ཞུ་བའི་དམ་རྫས་བདུད་རྩིའི་མཚོ། །ཤ་ལྔ་བདུད་རྩི་ལྔ་ཡི་རང་བཞིན་རྫས། །དྲུག་ལྡན་བླ་མ་ཡི་དམ་ཞི་དང་ཁྲོ། །དཔའ་བོ་མཁའ་འགྲོ་ཆོས་སྐྱོང་དམ་ཅན་སོགས། །འབུལ་ལོ་བཞེས་ནས་རྩ་བ་ཡན་ལག་གི། །དམ་ཚིག་ཉམས་ཆགས་འགལ་འཁྲུལ་ཅི་མཆིས་ཀུན། །མཐོལ་ལོ་བཤགས་སོ་ཚངས་པར་བསྩལ་ནས་ཀྱང་། །མཆོག་དང་ཐུན་མོང་དངོས་གྲུབ་རྒྱ་ཆེན་སྩོལ། །ཕཊ྄ཿ ཁྱད་པར་མ་ཧཱ་མུ་ཏྲའི་བརྒྱུད་འཛིན་མཆོག །འཕགས་བོད་གཉིས་ཆར་བྱོན་པའི་ཚོགས་རྣམས་དང་། །བརྒྱུད་པ་ཀུན་འདུས་མར་མི་སྙི་སྒོམ་རྗེ། །ཕག་གྲུ་དུས་མཁྱེན་བརྩིས་གདོང་བ་ལ་སོགས། །དྭགས་བརྒྱུད་བསྟན་པ་འཛིན་སྐྱོང་སྤེལ་གསུམ་གྱི། །བྱེད་པོར་གྱུར་རྣམས་བདག་ལུས་བདུད་རྩིས་མཆོད། །ཕཊ྄ཿ གཞན་ཡང་འཕགས་ཡུལ་ལྟ་གྲུབ་རྣམ་བཞི་ལས། །ཐེག་དམན་བྱེ་མདོ་གཉིས་དང་ཐེག་ཆེན་པར། །སེམས་ཙམ་པ་དང་རང་རྒྱུད་ཐལ་འགྱུར་བཅས། །དེ་མཆེད་རང་སྟོང་གཞན་སྟོང་བརྒྱུད་འཛིན་མཆོག །ས་ཆེན་ཀུན་དགའ་རྒྱལ་མཚན་དཔལ་བཟང་པོ། །བུ་དོལ་རྣམ་གཉིས་རིག་རལ་སྒྲོལ་མགོན་རྗེ། །གཙང་སྨྱོན་དབུས་སྨྱོན་འབྲུག་སྨྱོན་ལ་སོགས་པའི། །བསྟན་འཛིན་སྐྱེས་བུ་ཇི་སྙེད་བྱོན་རྣམས་ལ། །བདག་ལུས་བདུད་རྩིའི་མཆོད་པ་འདི་འབུལ་བཞེས། །ཕཊ྄ཿ བྱེ་བྲག་གསང་སྔགས་སྔ་འགྱུར་ཕྱི་འགྱུར་གྱི། །བསྟན་འཛིན་སྐྱེས་བུ་རིམ་པར་བྱོན་རྣམས་དང་། །ཡང་སྒོས་ནང་རྒྱུད་སྡེ་གསུམ་ཞེས་གྲགས་པའི། །རྩ་བ་སྒྲུབ་སྡེ་ཆེན་པོ་རྣམ་བརྒྱད་དང་། །ཚོགས་ཆེན་འདུས་པ་སྒྱུ་འཕྲུལ་ཞི་དང་ཁྲོ། །རྫོགས་ཆེན་སྡེ་གསུམ་བསྟན་འཛིན་ཡིད་བཞིན་དབང་། །པདྨ་འབྱུང་གནས་པཎ་ཆེན་བི་མ་ལ། །རྗེ་འབངས་ཉེར་ལྔ་སོ་ཟུར་གནུབས་གཉགས་སོགས། །ཡོངས་ཀྱི་བསྟན་འཛིན་རོང་ཟོམ་པཎྜི་ཏ། །ཀུན་མཁྱེན་ཀློང་ཆེན་རབ་འབྱམས་རང་བྱུང་རྗེ། །གཡག་སྡེ་པཎ་ཆེན་གཡུང་སྟོན་རྡོ་རྗེ་དཔལ། །ཐང་སྟོང་རྒྱལ་པོ་མངའ་རི་པདྨ་དབང་། །གནམ་ལྕགས་མེ་འབར་པྲཛྙཱ་རསྨི་དང་། །བརྒྱུད་པ་ཀུན་འདུས་མཁྱེན་བརྩེའི་འོད་ཟེར་ཞབས། །པདྨ་རིག་འཛིན་ཀུན་བཟང་རྣམ་པར་རྒྱལ། །དམ་གཙང་བྱམས་གསུམ་ཀུན་བཟང་ཤེས་རབ་དང་། །བསྟན་པའི་མངའ་བདག་བྱང་ཆུབ་གླིང་པ་སོགས། །བཀའ་གཏེར་དག་སྣང་བསྟན་འཛིན་བརྒྱུད་པར་བཅས། །བདག་ལུས་ཞུ་བའི་བདུད་རྩིའི་རྒྱ་མཚོ་འདི། །བཞེས་ཤིག་མཆོག་ཐུན་དངོས་གྲུབ་ཆར་ལྟར་ཕོབས། །ཕཊ྄ཿ དམ་པ་སངས་རྒྱས་ནས་བརྒྱུད་ཞི་བྱེད་དང་། །མ་ཅིག་ལབ་སྒྲོན་ནས་བརྒྱུད་གཅོད་ཡུལ་སོགས། །བོད་འདིར་གང་དར་ཆོས་ཀྱི་བརྒྱུད་འཛིན་སྡེ། །གང་དག་ཇི་སྙེད་ཡོད་པ་ཐམས་ཅད་ལ། །བདག་ལུས་ཞུ་བའི་བདུད་རྩིའི་མཆོད་པ་འབུལ། །བཞེས་ནས་འཕྲལ་ཕུགས་དགའ་བདེའི་དཔལ་ལ་སྦྱོར། །ཕཊ྄ཿ དེ་ལྟར་ཆེན་པོ་གསུམ་སོགས་མདོ་རྒྱུད་ལུང་། །མན་ངག་ཆོས་རྣམས་སྲུང་བའི་ཆོས་སྐྱོང་སྤྱི། །ཁྱད་པར་སྔགས་སྲུང་ཨེ་ཀ་ཙ་ཊི་དང་། །དཔལ་མགོན་མ་ནིང་དྲང་སྲོང་རཱ་ཧུ་ལ། །སྐྱེས་མཆོག་རྡོར་ལེགས་ཚེ་རིང་མཆེད་ལྔ་སོགས། །དམ་ཅན་སྡེ་བདུན་དཔལ་མགོན་བདུན་ཅུའི་སྡེ། །ཡུལ་ལྷ་གཞི་བདག་དཀར་སྐྱོང་ཟོ་དོར་ཚོགས། །བདག་ལུས་ཞུ་བའི་འདོད་དགུའི་མཆོད་སྤྲིན་འབུལ། །བཞེས་ནས་འགལ་རྐྱེན་ཀུན་སེལ་མཐུན་རྐྱེན་སྒྲུབས། །ཕཊ྄ཿ ཁམས་གསུམ་རིགས་དྲུག་སྐྱེ་གནས་རྣམ་པ་བཞི། །ཁྱད་པར་སྡང་བའི་དགྲ་དང་གནོད་པའི་བགེགས། །བུ་ལོན་ལན་ཆགས་ཤ་འཁོན་མ་འཁོར་རིགས། །སྲིད་པ་བར་དོར་འཁྱམས་པའི་འགྲོ་བ་ཀུན། །བདག་ལུས་ཞུ་བའི་མཁོ་དགུའི་ལོངས་སྤྱོད་གཏེར། །འཕང་པ་མེད་པའི་སེམས་ཀྱིས་འབུལ་བར་བགྱི། །བཞེས་ནས་འཁོར་བ་སྡུག་བསྔལ་རྒྱ་མཚོ་ལས། །གྲོལ་ཞིང་ཐར་ནས་བདེ་ཆེན་མཆོག་ཐོབ་ཤོག །ཕཊ྄ཿ ཁྱད་པར་གསར་བྱུང་གདུག་འདྲེ་གཤིན་པོ་ལ། །འདྲེ་ཡིན་ཟེར་ཞིང་ཆོས་དང་བླ་མར་གཤེ། །ཐེ་ཚོམ་སྐྱེ་བའི་བྱེད་པོ་བསེན་མོའི་རིགས། །དེ་ཡི་རྒྱབ་རྟེན་སྔོན་རྒྱུག་གྲོགས་བྱེད་པའི། །སེར་སྐྱ་བུད་མེད་མཆོག་དམན་སུ་ཡང་རུང་། །དེ་ཀུན་བདུད་ཀྱི་དབང་གྱུར་འདྲེ་ཡི་རིགས། །དེ་དག་ཀུན་ལ་བདག་ལུས་བདུད་རྩི་སྦྱིན། །བསྔོས་བཞིན་ཐོབ་ནས་དགའ་མགུ་ཡི་རང་ཞིང་། །མཐར་ཐུག་བྱང་ཆུབ་སྙིང་པོ་མངོན་གྱུར་ཤོག །ཕཊ྄ཿ དམིགས་པ་མ་ཟིན་བར་དུ་དེ་ལྟར་བྱ། དེ་ཡིས་འགྱེད་ཆེན་རྣམ་བཞི་རྫོགས་ནས་སུ། སླར་ཡང་ཆོས་ཀྱི་སྦྱིན་པ་བྱ་བ་ནི། ཕཊ྄ཿ ན་མོ་ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་བསྟན། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དག །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཐམས་ཅད་བསྲུང་བའི་དགེ་སྦྱོང་དག །སྡུག་བསྔལ་ཀུན་ལས་དེ་གྲོལ་ལོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་ཀྱིས་ལ། །སེམས་ཅན་དོན་ནི་ཉམས་མེད་བྱོས། །ཕཊ྄ཿ བརྗོད་དམིགས་པ་མེད་པའི་དོན་ལ་བལྟ། དེ་ལྟར་དངོས་གཞིའི་ཆོས་རྣམས་ཡོངས་ཟིན་ནས། སྤྱི་དོན་གསུམ་པ་རྗེས་ཀྱི་ལས་རིམ་ལའང་། གསུམ་ལས་དང་པོ་སྒྲིབ་སྦྱོང་དམིགས་པ་ནི། ཕཊ྄ཿ ཚོགས་ཞིང་ལྷ་རྣམས་སྐུ་ལས་བདུད་རྩིའི་རྒྱུན། །བབས་ནས་བདག་དང་བསྲུང་བྱའི་སྡིག་སྒྲིབ་ཀུན། །བ་མོར་ཉི་ཟེར་ཕོག་ལྟར་དག་ནས་ཀྱང་། །ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས། །ཡིག་དྲུག་བཟླས་པའི་སྒྲ་ཡིས་འཇིག་རྟེན་ཁམས། །རྣམ་པ་དྲུག་ཏུ་གཡོས་མཐར་མ་དག་པའི། །གཟུང་འཛིན་དབྱིངས་སུ་ཡལ་ནས་རྣམ་དག་ཞིང་། །ལོངས་སུ་སྤྱོད་པའི་སྐལ་བ་ཐོབ་པར་གྱུར། །ཅེས་བསམ། ཕཊ྄ཿ བརྗོད་དམིགས་མེད་ངང་ལ་བཞག། སླར་ཡང་སྣོད་བཅུད་བདག་སོགས་འགྲོ་བ་ཀུན། །འོད་ཀྱི་ཕུང་པོར་གྱུར་ཏེ་ཚོགས་ཞིང་ལྷར། །ཐིམ་དང་ཆབས་ཅིག་དེ་ཡང་མ་ཅིག་ལ། །དེ་ཉིད་སྤྲོས་བྲལ་བདེ་ཆེན་ངང་དུ་བཞག །ཕཊ྄ཿཕཊ྄ཿ ཕཊ྄ཿཕཊ྄ཿ གཉིས་པ་བསྔོ་སྨོན་གཉིས་ནི་སྤྱི་ལྟར་རོ། གསུམ་པ་ཤིས་བརྗོད་ཉིད་ལ་འདི་ལྟ་སྟེ། སྐྱེ་མེད་རྣམ་དག་བདེ་ཆེན་ཟུང་འཇུག་ངང་། །འགག་མེད་ལྷུན་གྲུབ་འཁོར་འདས་དབྱེར་མེད་ཀློང་། །རོལ་རྩལ་མཐའ་ཡས་བསྟན་འགྲོའི་དཔལ་དུ་ཤར། །ཡུམ་ཆེན་ལབས་ཀྱི་སྒྲོན་མའི་བཀྲ་ཤིས་ཤོག །སྐུ་ཡི་གསང་བར་འབྱུང་བཞིའི་དགྲས་མི་ཚུགས། །གསུང་གི་གསང་བར་རྒོལ་ངན་མཐུས་མི་ཚུགས། །ཐུགས་ཀྱི་གསང་བར་བདུད་བཞིའི་དགྲས་མི་ཚུགས། །མ་ཅིག་གསང་གསུམ་དཔལ་ཡོན་བཀྲ་ཤིས་ཤོག །གཞི་ཡི་བཀྲ་ཤིས་སྐྱེ་མེད་དོན་རྟོགས་ཤོག །ལམ་གྱི་བཀྲ་ཤིས་གཅོད་དོན་མངོན་གྱུར་ཤོག །འབྲས་བུའི་བཀྲ་ཤིས་རེ་དོགས་ཟད་པར་ཤོག །མཐར་ཐུག་བཀྲ་ཤིས་དོན་གཉིས་ལྷུན་གྲུབ་ཤོག །འདིར་སྨྲས་པ། རྒྱལ་བས་ཆོས་འཁོར་རྣམ་པ་གསུམ་བསྐོར་བའི། །བར་པ་མཚན་ཉིད་མེད་པའི་ཆོས་འཁོར་དང་། །མཚུངས་ངེས་ཟབ་མོ་བདུད་ཀྱི་གཅོད་ཡུལ་ཞེས། །རྒྱ་བོད་གཉིས་སུ་ཉི་ཟླ་ལྟར་གྲགས་མོད། །འོན་ཀྱང་སྦྱོར་དངོས་རྗེས་གསུམ་ཚང་བ་དང་། །གཅོད་བྱ་གཅོད་བྱེད་མ་འཛོལ་དཀའ་བའི་གནས། །དེ་ལྟ་ནའང་གཙང་དབུས་ཁམས་གསུམ་གྱི། །མཁས་གྲུབ་མང་པོས་གཅོད་གཞུང་དུ་མ་ཞིག །གསལ་བར་བྱས་མོད་དེ་དག་ཐམས་ཅད་ལས། །མཆོག་གྱུར་རང་བྱུང་རྒྱལ་བ་ནས་བཟུང་སྟེ། །ཀརྨ་ཆགས་མེད་ཡན་བྱོན་མཁས་མང་གིས། །ཕྱག་བཞེས་གནང་བར་དཀར་གཅོད་ཅེས་སུ་གྲགས། །དེ་དང་ཚུལ་མཐུན་བདག་གིས་འདི་བརྩམ་དོན། །སྔོན་ལས་ལྷག་པའི་རྗོད་བྱ་བརྗོད་བྱེད་ཟུང་། །གང་ཡང་ཡོད་པ་མིན་ཀྱང་རང་ཉིད་ཀྱི། །ཉེ་གནས་ཨཱཪྱ་དྷེ་ཝས་ནན་ཏན་ངོར། །ཀུན་བཟང་གཞན་ལ་ཕན་དེས་ཕན་སེམས་བློས། །སྨྲས་འདིས་ཡོངས་ཀྱི་འགྲོ་ལ་ཕན་ནུས་ཤོག །ཅེས་གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་བླང་ཆོག་ཏུ་བཀོད་པ་ཆུ་བོ་གཅིག་འདྲེས་བདུད་རྩིའི་རྒྱ་མཚོ་ཞེས་བྱ་བ་འདི་ནི་གཙང་དབུས་ཁམས་གསུམ་དུ་དར་བའི་གཅོད་གཞུང་ཕལ་ཆེར་ལ་མཉན་བསམ་དང་གཉན་ས་དུར་ཁྲོད་སོགས་ཀྱང་རེ་ཞིག་ཉུལ་དོན་བདུད་བཞིའི་དབང་དུ་མ་གྱུར་བའི་ཟབ་མོ་གཅོད་ཀྱི་རྣལ་འབྱོར་པ་ཀརྨ་དབང་དྲག་གམ་འཛམ་གླིང་རྒྱན་མཆོག་ན་ག་རྫུ་ནའི་རྣམ་སྤྲུལ་དུ་ཁས་འཆེས་པ་དགེ་བའི་བཤེས་གཉེན་ཆེན་པོ་བློ་བཟང་བསྟན་པའི་ཉི་མ་སོགས་སྐྱེས་ཆེན་དུ་མས། དཔལ་ལག་ན་རྡོ་རྗེའི་སྤྲུལ་པར་ལུང་བསྟན་ཅིང་། བྱང་ཆུབ་རྡོ་རྗེའི་མིང་གིས་ཅོད་པན་དཔྱངས་པ་དེ་ཉིད་ཀྱིས་བྷོ་ཊར་དར་བའི་གཅོད་གཞུང་རྣམས་ཆུ་བོ་གཅིག་འདྲེས་ཀྱི་ཚུལ་དུ་རང་ཉིད་ཀྱི་སློབ་མ་དམ་ཚིག་གི་ནོར་བུ་གཅེས་སྤྲས་སུ་བྱེད་པའི་ཨ་བྷྱེ་ཀལྤ་བྷ་ཏྲ་ལ་གདམས་བཞིན་ཡི་གེ་པ་ཡང་བགྱིས་ཏེ་འཕྲལ་དུ་གྲུབ་པར་བགྱིས་པའི་དགེ་བས་གཅོད་ཡུལ་ཉམས་སུ་ལེན་པའི་སྐལ་བ་དང་ལྡན་པ་རྣམས་བདུད་བཞིའི་གཡུལ་ལས་རྒྱལ་ཞིང་སྐུ་བཞིའི་གོ་འཕང་མངོན་དུ་ཐོབ་པའི་རྒྱུར་གྱུར་ཅིག་གུ། དགེའོ། དགེའོ། དགེའོ།། །། བདུད་གཅོད་ནོར་བུའི་ཕྲེང་བ།༄༅། །བདུད་གཅོད་ནོར་བུའི་ཕྲེང་བ་བཞུགསཿ གསེར་མདོག་མཚན་དཔེས་རབ་སྤུད་ལྷ་མིའི་མགོན། །ཟློས་པའི་གར་བསྒྱུར་དཔལ་ལྡན་པདྨ་སྐྱེས། །དེ་ཉིད་མངལ་སྐྱེས་རྫུར་ཞུགས་མཁྱེན་བརྩེའི་ལྷ། །གང་ཞབས་བྱང་ཆུབ་བར་དུ་སྤྱི་བོས་བསྙེན། ༈ གང་གི་བཀའ་དྲིན་བདུད་རྩིའི་ཆབ། །སྐྲ་རྩེར་ཆགས་པའི་ཟིལ་ཐིགས་ཙམ། །ཡིད་བཞིན་ནོར་ལས་ཆེས་ལྷག་པཿ །བགོ་སྐལ་ཐོབ་པའི་རྣལ་འབྱོར་པསཿ །ཕུང་པོའི་མཆོད་སྦྱིན་ནོར་བུ་ཡིཿ །ཕྲེང་བ་སུམ་ཅུའི་གྲངས་ལྡན་གཟུགསཿ །དོན་གྱི་ཕྲེང་ཐག་ལ་བརྒྱུས་ཏེཿ །དོན་གཉེར་སློབ་བུའི་རྒྱན་དུ་སྟེརཿ །དེ་ལས་དང་པོ་སྐྱབས་འགྲོ་ནིཿ ཕཊ྄ཿ རང་སེམས་ངོ་བོ་ཀ་དག་སངས་རྒྱས་ལཿ རང་གདངས་འགག་མེད་ལུང་རྟོགས་དམ་པའི་ཆོསཿ རོལ་རྩལ་ཅིར་ཡང་འཆར་བ་དགེ་འདུན་ཏེཿ མཆོག་གསུམ་སེམས་སུ་ཤེས་པས་སྐྱབས་སུ་མཆིཿ ཕཊ྄ཿ གཉིས་པ་བྱང་ཆུབ་སེམས་བསྐྱེད་ནིཿ ཕཊ྄ཿ ཐོག་མེད་དུས་ནས་ད་ལྟའི་བརཿ འཁོར་བར་ཡང་ཡང་འཁོར་བའི་རྒྱུཿ གཟུང་འཛིན་གཉིས་ལས་གཞན་དབེན་པསཿ བདག་འཛིན་བཅིལ་བར་སེམས་མཆོག་བསྐྱེདཿ ཕཊ྄ཿ མཆོད་སྦྱིན་དངོས་ལ་འཇུག་པ་ནིཿ ཡེངས་མེད་སྒོམ་མེད་ངང་ལ་འདོནཿ ཕཊ྄ཿ ཀ་དག་གཅོད་བྱ་གཅོད་བྱེད་ལས་འདས་ཀྱང་ཿ ཁ་གཏིང་བྲལ་བའི་རིག་གདངས་འགག་མེད་རྩལཿ ག་དར་ཤེལ་གྱི་གོང་བུར་འཕོས་ལྟའི་གཟུགསཿ ང་བདག་འཛིན་བྲལ་རྡོ་རྗེ་ཕག་མོར་གྱུརཿ ཕཊ྄ཿ ཅ་རེ་དབང་པོའི་སྤྱོད་ཡུལ་ལས་འདས་སྐུཿ ཆ་ལུགས་ཁྲོ་མོའི་ཚུལ་འཛིན་གྲི་ཐོད་འཆང་ཿ ཇ་རིལ་སྐམ་རློན་ལ་སོགས་རུས་རྒྱན་སྤུདཿ ཉ་མོ་ཆབ་བྲལ་ཇི་བཞིན་རང་ལུས་བསྒྲལཿ ཕཊ྄ཿ ཏ་ཐཱ་ག་ཏ་སྙིང་སྟོབས་ཆེན་པོའི་དུསཿ ཐ་མལ་སྟག་མོ་མ་བུར་ལུས་སྦྱིན་ལྟརཿ ད་ལྟའི་ལུས་སེམས་བྲལ་བའི་ཚོགས་མཆོད་འདིཿ ན་རྒ་འཆི་བའི་འཇིགས་བྲལ་རྒྱལ་རྣམས་དང་ཿ པ་སངས་མདོག་ལྟའི་ཐུགས་ལྡན་སྐྱེས་འཕགས་ཚོགསཿ ཕ་རོལ་ཕྱིན་དྲུག་མཐར་སོན་འདས་མ་འདསཿ བ་ཚྭ་ཅན་གྱི་རྒྱ་མཚོའི་སྣོད་བཅུད་ལྟའིཿ མ་དག་ཤ་ཁྲག་བདུད་རྩིར་བསྒྱུར་ཏེ་འབུལཿ ཕཊ྄ཿ ཙ་རི་དྲ་སོགས་གནས་ཡུལ་དུར་ཁྲོད་བདགཿ ཚ་ཟེར་ཟླ་ཞུན་བསྲེས་ལྟའི་བདུད་རྩི་བཞེསཿ ཕཊ྄ཿ ཛཱ་ཡ་སྲས་བཅས་རྩ་གསུམ་རྒྱ་མཚོའི་ཚོགསཿ ཝ་ལེར་འཇའ་ཚོན་མདངས་འཛིན་བདུད་རྩི་བཞེསཿ ཕཊ྄ཿ ཞྭ་ལྟར་བཀུར་འོས་རྩ་བརྒྱུད་བླ་མ་ནསཿ ཟ་འདྲེ་ཤི་གཤེད་གྲོང་རྒྱུག་འདྲེ་མོ་ཡནཿ འ་འོལ་འདི་སྣང་ལ་ཞེན་རིགས་དྲུག་འགྲོཿ ཡ་མཚན་ཤ་ཁྲག་ཕུང་པོའི་ཚོགས་མཆོད་བཞེསཿ ཕཊ྄ཿ རྭ་ལྟར་ཁེངས་པའི་སེམས་རེངས་དྲེགས་པའི་སྡེཿ ལ་ཆུ་འཕྲང་གསུམ་ཉུལ་བྱེད་འབྱུང་པོའི་དཔུང་ཿ ཤ་ཁྲག་རུས་གསུམ་དོན་སྣོད་པགས་སོགས་བཞེསཿ ཕཊ྄ཿ ས་གསུམ་ལ་གནས་འགྲོ་རྣམས་ཚོགས་རྫོགས་ཤིང་ཿ ཧ་ལ་ལྔ་པོ་ཡེ་ཤེས་ལྔར་བསྒྱུར་ནསཿ ཨ་ཏི་ཡོ་གའི་རྒྱལ་སྲིད་དབང་བསྒྱུར་ཤོགཿ ཕཊ྄ཿ ཨ་ཡིག་སྐྱེ་མེད་རྩལ་ལས་རང་བྱུང་འཕྲུལཿ ཨ་དོན་རང་ཤར་རང་གྲོལ་ས་མ་ཏིཿ ཕཊ྄ཿ ཀུན་རྫོབ་གཟུགས་སུ་སྣང་བའི་ཡུལ་རྣམས་ཀུནཿ བཟང་ངན་རྟོག་ཚོགས་བྲལ་བའི་དབྱིངས་སུ་གཅོདཿ ཕཊ྄ཿ ཕྱི་ནང་སྒྲ་རུ་གྲགས་པའི་འཛིན་རྟོག་ཀུནཿ སྙན་དང་མི་སྙན་མཉམ་པ་ཉིད་དུ་གཅོདཿ ཕཊ྄ཿ ལྕེ་ཡིས་བཟང་ངན་རོ་ལ་མྱོང་བ་དང་ཿ སྣ་ཡིས་བཟང་ངན་དྲི་ལ་ཆགས་སྡང་གཅོདཿ ཕཊ྄ཿ ལུས་ཀྱིས་འཇམ་རྩུབ་རེག་བྱར་ཆགས་དང་སྡང་ཿ ཡིད་ཀྱི་རེ་དྭོགས་ཆགས་སྡང་དབྱིངས་སུ་གཅོདཿ ཕཊ྄ཿ གཙང་དང་གཙོག་པའི་དངོས་པོ་རྣམ་རྟོག་ཡིནཿ རྣམ་རྟོག་དབྱིངས་སུ་ཆོད་ཅིག་ལྡོག་མེད་མཛོདཿ ཕཊ྄ཿ དེ་ལྟར་བདུད་ཀྱི་གཅོད་ཡུལ་ལ་བརྟེན་ནསཿ ཕུང་པོ་མཆོད་སྦྱིན་བགྱིས་པའི་དགེ་བའི་རྒྱུནཿ སྲིད་དང་ཉན་རང་ལམ་དུ་མི་འཕྱན་པརཿ རྣམ་མཁྱེན་རྒྱ་མཚོར་རོ་གཅིག་འདྲེས་པར་ཤོགཿ ཕཊ྄ཿ ཕཊ྄ཿ དེ་ལྟར་བདུད་ཀྱི་གཅོད་ཡུལ་གྱིཿ མཆོད་སྦྱིན་ནོར་བུའི་ཕྲེང་བ་འདིཿ ཉེ་གནས་ཨཱཪྱ་དྷེ་ཝ་ཡིསཿ བསྐུལ་ངོར་༧་རྡོ་བླས་བྲིས་པ་དགེཿ ཧྲིཿ ཕུང་པོའི་མཆོད་སྦྱིན་ནོར་བུའི་འཕྲེང་ཿ འདོད་དགུ་ཆར་འབེབ་སྔོན་འགྲོ་ནིཿ ཕཊ྄ཿ མཆོག་གསུམ་རྩ་གསུམ་ངོ་བོ་ཉིདཿ ལབ་ཀྱི་སྒྲོན་མར་སྐྱབས་སུ་མཆིཿ འགྲོ་རྣམས་སྐྱེ་མེད་སར་འགོད་ཕྱིརཿ ཕུང་པོའི་མཆོད་སྦྱིན་སྟོན་མོར་འཇུགཿ ཕཊ྄ཿ མཆོད་སྦྱིན་དངོས་ནིཿ འདི་ལྟ་སྟེཿ ཕཊ྄ཿ ཀ་དག་དབྱིངས་ལས་རང་བྱུང་རིག་པའི་གཟུགསཿ ཁ་དོག་ལྔ་ལྡན་འོད་ཀྱི་ཏི་ལ་ཀཿ ག་དར་ཤེལ་འོད་མདངས་ལྔ་ཕྱིར་འཕོས་ལྟརཿ ང་བདག་འཛིན་བྲལ་རྡོ་རྗེ་ཕག་མོར་གྱུརཿ ཕཊ྄ཿ ཅ་རེ་འདྲེན་བྱེད་རྒྱ་མཚོར་མངོན་སུམ་བཞིནཿ ཆ་ལུགས་སེམས་བྲལ་བཾ་ལྟར་བདག་ལུས་ཀྱིཿ ཇ་རིལ་སྣོད་བཀོག་ཐོད་སྒྱེད་གསུམ་ཁར་བཙུགསཿ ཉ་རོ་ཇི་བཞིན་གཏུབས་ནས་ཐོད་པར་བླུགསཿ ཕཊ྄ཿ ཏ་ཐཱ་ག་ཏས་སྟག་མོར་ལུས་སྦྱིན་ལྟརཿ ཐ་མལ་ལུས་འདི་ཚོགས་སུ་བསྒྱུར་བའི་ཕྱིརཿ ད་ལྟ་ཉིད་དུ་འཁོར་འདས་མགྲོན་ལ་འགྱེདཿ ཕཊ྄ཿ ན་རག་གནས་ཡན་གཟུགས་དང་གཟུགས་མེད་མནཿ པ་ར་མི་ཏའི་མགྲོན་ལ་མྱུར་དུ་འདུསཿ ཕཊ྄ཿ ཕ་མ་ལས་གཞན་འགྲོ་བ་གཞན་མེད་པསཿ བ་མོར་བེའུ་དགའ་བཞིན་འདིར་ཤོག་ཅིག ཕཊ྄ཿ མ་ཅིག་ཡུམ་ཆེན་སྐུ་གསུམ་ལྷ་ཚོགས་དང་ཿ ཙ་ཏུར་མུ་ཁ་མན་ཆད་འཁོར་བའི་མགྲོནཿ ཚ་ཟེར་ཟླ་ཞུན་བསྲེས་ལྟའི་བདུད་རྩིའི་མཚོཿ ཛ་ལའི་རྒྱུན་བཞིན་འཛད་མེད་གཏེར་ལ་རོལཿ ཕཊ྄ཿ ཝ་ར་ཧི་དངོས་ཡུམ་ཆེན་ལབ་སྒྲོན་སོགསཿ ཞྭ་ལྟར་བཀུར་འོས་རྒྱལ་བ་སྲས་བཅས་མཆོདཿ ཟ་འདྲེ་ཤི་གཤེད་གྲོང་རྒྱུག་འདྲེ་མོ་ཡནཿ འ་ཅག་རང་གཞན་ལ་གནོད་ཤི་གསོན་འདྲེཿ ཡ་མཚན་གཏན་པ་བྲལ་བའི་སྦྱིན་གཏོང་ལོངསཿ ཕཊ྄ཿ རཱ་ཛ་རྒྱལ་ཆེན་སྐུ་ལྔ་མར་བཟུང་ནསཿ ལ་ལུང་ཀུན་རྒྱུ་ཐིའུ་རང་རྐང་གཅིག་ཡནཿ ཤ་ཁྲག་རུས་གསུམ་སྟོན་མོར་ཚིམ་པར་ཟོཿ ཕཊ྄ཿ ས་བཅུ་ལམ་ལྔར་གནས་པའི་འཕགས་ཚོགས་སྡེཿ ཧ་ལ་སྤོང་བསྒྱུར་རང་ངོར་གྲོལ་གསུམ་ཚོགསཿ ཨ་ཏི་བྱ་རྩོལ་བྲལ་བའི་སྟོན་མོར་རོལཿ ཕཊ྄ཿ ཨ་དོན་འཁོར་འདས་གཉིས་མེད་དོན་རྟོགས་ནསཿ ཨ་ཡིག་སྐྱེ་མེད་ངོ་བོར་འུབ་ཆུབ་མཛོདཿ ཕཊ྄ཿ གཅོད་བྱ་གཉིས་སུ་འཛིན་པའི་ཆོས་རྣམས་ཀུནཿ གཅོད་བྱེད་བདག་མེད་ཤེས་རབ་རལ་གྲི་ཡིསཿ བཅད་ཚེ་རྣམ་ཐར་གསུམ་ལྡན་སྟོངས་པ་ཉིདཿ མ་མཐོང་མཐོང་བའི་མཆོག་དེ་མཐོང་བར་ཤོགཿ ཕཊ྄ཿ ཕཊ྄ཿ ཕཊ྄ཿ ཕཊ྄ཿ དེ་ལྟར་ཕུང་པོའི་མཆོད་སྦྱིན་གྱིཿ མན་ངག་ཀ་མད་སུམ་ཅུའི་གཟུགསཿ རྟོག་བྲལ་རྒྱ་མཚོར་ཤར་བ་བཞིནཿ གཅོད་འདོད་རྗེས་འབྲང་རྣམ་ལ་སྦྱིནཿ དགེ་དེས་བདག་གཞན་འགྲོ་བ་རྣམསཿ ཡུམ་ཆེན་གོ་འཕང་ཐོབ་ཕྱིར་བསྔོཿ ཞེས་པའང་རྣལ་འབྱོར་ཧེ་རུ་ཀ་པ། དཔལ་ལག་ན་རྡོ་རྗེའི་དག་སྣང་དུ་ཤར་བ་ལས་ཅན་གྱི་སློབ་མ་གཞོན་ནུ་སྐལ་བ་ཅན་གྱི་ཆོས་སྐལ་དུ་བཞག་སྟེ་ཡོངས་ལ་ཕན་པའི་རྒྱུར་གྱུར་ཅིག་གུཿ དགེའོཿ དགེའོཿ དགེའོཿ ཿ ནད་སོས་པར་འདོད་པའི་རེ་བ་དང་་་་་༄༅། །ཕཊ྄ཿ ནད་སོས་པར་འདོད་པའི་རེ་བ་དང་། །མི་འཚོ་འཆི་ཡི་དོགས་པ་གཉིས། །བདག་མེད་རྟོགས་པའི་ཀློང་དུ་འདྲེས། །རེ་དོགས་ཀྱི་འདྲེ་གདོན་ཟིལ་གྱིས་གནོན། །ཕཊ྄ཿ ང་མེད་ལ་ང་རུ་འཛིན་པའི་བདུད། །ཞེ་སྡང་གི་རང་གཟུགས་རྒྱལ་འགོང་སྟེ། །འདོད་ཆགས་ཀྱི་རྩལ་སྣང་མོ་གདོན་ཚོགས། །གཏི་མུག་གི་མངོན་རྟོགས་ཀླུ་གདོན་རིགས། །སྐུ་གསུམ་གྱི་དགོངས་པས་དབང་དུ་བསྡུས། །ཕཊ྄ཿ ཕུང་ཁམས་ལ་བདག་ཏུ་འཛིན་པའི་྅྅྅྅྅྅྅྅ མཇུག་ཆད་འདུག། གཅོད་ཡུལ་མཁའ་འགྲོའི་གད་རྒྱངས་ལས་ལུས་ཚོགས་མཆོད་སྦྱིན་རྟོགས་པའི་རྒྱང་གླུ།༄༅། །གཅོད་ཡུལ་མཁའ་འགྲོའི་གད་རྒྱངས་ལས། ལུས་ཚོགས་མཆོད་སྦྱིན་རྟོགས་པའི་རྒྱང་གླུ་བཞུགས། ། ཕ་སྐུ་བཞིའི་བདག་ཉིད་བྱང་ཆུབ་གླིང་། །དུས་ད་ཆར་རང་རིག་ངང་དུ་རྫོགས། །ཉིན་དེ་ལས་ལངས་པའི་ཐོལ་བྱུང་གཏམ། །ཚིག་བྲག་ཆའི་ཟླ་བོ་འདི་ལྟར་ཐལ། །ཕཊཿ རང་རིག་དག་པ་ཆོས་སྐུའི་ཞིང་། །རང་སྣང་ལྷུན་གྲུབ་ལོངས་སྤྱོད་རྫོགས། །རང་རྩལ་འགག་མེད་སྤྲུལ་པའི་སྐུ། །སྐུ་གསུམ་ངོ་བོ་དབྱེར་མེད་ལ། །བྱང་ཆུབ་རྡོ་རྗེ་སློབ་དཔོན་ཞེས། །མཉམ་པ་ཉིད་ཀྱིས་སྐྱབས་སུ་འགྲོ། །བདག་འཛིན་འཆང་བ་ལས་འདས་པའི། །བདག་མེད་དོན་གྱི་སེམས་མཆོག་བསྐྱེད། །ཕཊ྄ཿ རང་བཞིན་བྲལ་བའི་ཆོས་ཉིད་ཀྱི། །མཁའ་ལ་སྣང་བ་འོད་ལྔའི་ཀློང་། །བརྒྱུད་གསུམ་བླ་མ་ཡི་དམ་ལྷ། །གནས་གསུམ་མཁའ་འགྲོ་རྒྱ་མཚོ་དང་། །དམ་ཅན་ཆོས་སྐྱོང་ལྷ་མ་སྲིན། །དཀར་སྐྱོང་གཞི་བདག་ལ་སོགས་པ། །སྲིད་ཞི་ཡོན་ཏན་མགྲོན་གྱི་སྡེ། །འོག་ཏུ་བགེགས་རིགས་འབྱུང་པོ་དང་། །ཁམས་གསུམ་རྒྱུ་དྲུག་ལམ་ལྔ་ཡིས། །བསྡུས་པའི་མཆོག་དམན་རིགས་དྲུག་མགྲོན། །འཁོར་འདས་ཀུན་གྱི་རྟེན་བརྟེན་པ། །རྒྱུ་རྐྱེན་ལས་འདས་སྐད་ཅིག་གིས། །མཁའ་ལ་འཇའ་ཚོན་སྣང་བའི་དཔེས། །ཡོངས་གྲུབ་དགོངས་པའི་རྩལ་དུ་ཤར། །ཕཊ྄ཿ ཕཊ྄ཿ དོན་བློ་འདས་རྟོགས་པའི་ཡིན་ལུགས་ལ། །ཡེ་གདོད་ནས་གཉིས་སྣང་མ་གྲུབ་ན། །དུས་དེ་རིང་སྐྱེ་མེད་རྡོ་རྗེ་ཡིས། །རྣལ་འབྱོར་གྱི་སྤྱོད་པ་སྐྱོང་བ་ལ། །རེ་དོགས་ཀྱི་རྟོག་པ་མེད་མོད་ཀྱང་། །ཡོངས་མ་རིག་འཁྲུལ་བའི་སེམས་ཅན་རྣམས། །དབྱིངས་སྨྲ་བསམ་བརྗོད་མེད་ལ་འགོད་ཕྱིར། །ངས་བརྟུལ་ཞུགས་ལམ་སློང་གི་གླུ་ཞིག་ལེན། །ཡོངས་མ་རིག་འཁྲུལ་བའི་སེམས་ཅན་རྣམས། །ཨེ་མ་ཧོ་ངོ་མཚར་རྨད་ཀྱི་ཆོས། །གཞི་དེ་བཞིན་ཉིད་ཀྱི་ཡུམ་ཆེན་མོའི། །བྷ་ག་ལ་སྐུ་གསུམ་གྱི་བཀོད་པ་རྫོགས། །དེ་ལོགས་ན་མ་གྲུབ་རང་གི་སེམས། །སེམས་བལྟར་མེད་ཀྱི་ཡིན་ལུགས་རྟོགས་པ་འདི། །ཕ་འཇིགས་མེད་ཀྱི་རྒྱལ་པོའི་བཀའ་དྲིན་ཡིན། །ཨ་ལ་ལ་སྐྱབས་མགོན་ཐུགས་རྗེ་ཅན། །དུས་དེ་རིང་འཁོར་གསུམ་ཡོངས་དག་པས། །བླ་མ་དང་རང་སེམས་དབྱེར་མ་ནུས། །ཡིད་ཁྱེད་ཀྱི་དད་པ་མཚན་མ་ཅན། །མཁའ་དབྱིངས་སུ་བྱེར་བའི་སྤྲིན་གྱི་དཔེ། །འདི་ཀུན་རྫོབ་མ་ཡིན་དོན་དམ་ཆོས། །དོན་དམ་ལ་ཐོབ་བཞག་གཉིས་མེད་པས། །གཞི་འབྲས་དབྱེར་མེད་ཀྱི་བླ་མ་ལ། །མཉམ་རྗེས་རོ་གཅིག་གིས་གསོལ་བ་འདེབས། །སྙེམས་རྟོག་ཆོད་པར་བྱིན་གྱིས་རློབས། །བདག་འཛིན་ཞིག་པར་བྱིན་གྱིས༴ འཁྲུལ་པ་ཟད་པར་བྱིན་གྱིས༴ གཟུང་འཛིན་གྲོལ་བར༴ གཉིས་འཛིན་སྟོང་པར་བྱིན་གྱིས༴ ཕཊ྄ཿཕཊ྄ཿ བཞི་བསྡུས་ཀྱི་ཕུང་ཁམས་ཉེར་ལེན་པའི། །རྣམ་ཤེས་ཀྱི་ཐིག་ལེ་འོད་ལྔ་མ། །ཡུམ་ཆེན་གྱི་དགོངས་ཀློང་ཡངས་པར་འཕོ། །དབྱིངས་སྟོང་པ་ཆེན་པོར་རོ་གཅིག་གྱུར། །ཕཊ྄ཿ སྐད་ཅིག་དེར་མཁའ་ལ་འཇའ་སྣང་བཞིན། །རང་སེམས་ཀྱི་ངོ་བོ་ཡོ་གི་ནི། །བདུད་བཞི་ཚར་གཅོད་ཀྱི་གྲི་གུག་དང་། །མཆོད་སྦྱིན་རྫས་སྤུངས་པའི་བྷནྡྷ་ཅན། །གཅེར་མོ་སྣང་སྲིད་ཟིལ་གནོན་མའི། །སྐུ་ཕྱག་རྒྱ་ལྔ་ལྡན་ལམ་གྱིས་གསལ། ཕཊ྄ཿ གཅོད་བྱ་དང་གཅོད་བྱེད་གཉིས་འཛིན་བློ། །སྐད་ཅིག་མར་རྟོགས་པའི་མཚོན་གྱིས་བཤིག །མཉམ་ཉིད་ཀྱི་མཆོད་སྦྱིན་འགྱེད་པའི་ཕྱིར། །རིག་རྩལ་གྱི་མགྲོན་རིགས་དབང་དུ་བསྡུས། །ཕཊ྄ཿ །ཐམས་ཅད་དག་པ་ཆོས་སྐུ་ལ། །མ་དག་སྣང་བའི་རིས་མེད་ཀྱང་། །རང་ངོར་གྲོལ་དང་མ་གྲོལ་ཁྱད། །སྦྱིན་ཡུལ་རྣམ་པ་གཉིས་སུ་གྲུབ། །དོན་དེ་ཕྱིར་སྐྱེ་མེད་རྡོ་རྗེའི་གླུ། །བདེན་གཉིས་ཟུང་འཇུག་གི་ཚུལ་དུ་བླངས། །ཕཊ྄ཿ སྟོང་ཆེན་གྱི་བྷནྷའི་སྣོད་ནང་དུ། །སྣོད་བཅུད་ཀྱི་འཁྲུལ་འཁོར་བདུད་རྩི་རུ། །ཡེ་ཤེས་ཀྱི་རྡོ་རྗེས་བྱིན་བརླབས་ནས། །སྐྱབས་སྐུ་གསུམ་གྱི་བདག་ཉིད་རྡོ་རྗེ་འཆང་། །ཕ་གྲུབ་ཐོབ་ཀྱི་རྒྱལ་པོ་བྱང་ཆུབ་གླིང་། །དམ་ལྡན་གྱི་རྡོ་རྗེ་མཆེད་ལྕམ་སོགས། །རང་སྣང་གི་ལྷ་དང་བླ་མར་འབུལ། །རེ་དོགས་ཀྱི་འཆིང་བ་མཁའ་དབྱིངས་སུ། །སྦྲུལ་བདུད་བཞིན་གྲོལ་ནས་དེ་བཞིན་ཉིད། །གཞི་བསམ་མི་ཁྱབ་པའི་དོན་རྟོགས་ཤོག །ཕཊ྄ཿ རང་བྱུང་བདེ་ཆེན་གྱི་ཀཱ་པ་ལར། །སྣང་བ་བདེན་མེད་ཀྱི་ཕུང་ཁམས་བཤམས། །དེ་བདེ་སྟོང་གི་བདུད་རྩིར་བྱིན་བརླབས་ནས། །མཆོད་སྦྱིན་གྱི་མགྲོན་ལ་རིས་མེད་འགྱེད། །དགའ་སྡུག་གི་རྟོག་པ་རང་གྲོལ་ཞིང་། །ཡུམ་ཕ་རོལ་ཕྱིན་དོན་མངོན་གྱུར་ཤོག །ཕཊ྄ཿ ཚོགས་ཆེན་གཉིས་མཉམ་སྦྱོར་མཐོང་བའི་ལམ། །དེ་སྒོམ་དང་མི་སློབ་མཐོང་བའི་ལམ། །ཡོངས་མཆོད་པའི་ཕྱག་རྒྱར་གནས་གྱུར་ནས། །མཆོག་དམན་གྱི་མགྲོན་རྣམས་ཁྱབ་པར་འབུལ། །རྒྱུད་ལྔའི་འགྲོ་བ་སྐད་ཅིག་མར། །དག་པ་གཉིས་ལྡན་གྱི་འབྲས་ཐོབ་ཤོག །ཕཊ྄ཿ རྩེ་གཅིག་ཏུ་དམིགས་པའི་བསམ་གཏན་ཟས། །སྤྲོས་བྲལ་གྱི་བདུད་རྩིར་བྱིན་བརླབས་ནས། །རོ་གཅིག་གི་བྷནྡྷའི་སྣོད་དུ་བསྐྱིལ། །དུས་དེ་རིང་སྒོམ་མེད་ཀྱི་ཚོགས་མཆོད་འདི། །ལམ་ཀུན་ཏུ་བརྟགས་པའི་མགྲོན་ལ་འགྱེད། །གཞི་ཡོངས་གྲུབ་ཀྱི་ངོ་བོ་མངོན་གྱུར་ཤོག །ཕཊ྄ཿ མངོན་སུམ་གཟུགས་སྐུ་ཡི་མཆོད་སྦྱིན་རྫས། །གོང་འཕེལ་དུ་བྱིན་གྱིས་ཡོངས་བརླབས་ནས། །བརྟུལ་ཞུགས་ཚད་ཕེབས་ཀྱི་རྣལ་འབྱོར་ངས། །ཆོས་ཟད་བློ་འདས་ཀྱི་ཡོལ་གོ་ནས། །འཁོར་འདས་ལམ་གསུམ་གྱི་མགྲོན་ལ་འགྱེད། །རེ་དོགས་ཀྱི་འཛིན་སྟངས་ཞིག་གྱུར་ཅིག །ཕཊ྄ཿ ཀ་དག་གཞི་དབྱིངས་ཀྱི་བྷནྡྷའི་ནང་། །ལྷུན་གྲུབ་རང་བྱུང་གི་བདུད་རྩི་བཤམས། །ཟུང་འཇུག་ཐུགས་རྗེའི་མཆོད་སྦྱིན་འདི། །མྱང་འདས་དང་འཁོར་བའི་མགྲོན་ལ་འགྱེད། །སྤྲོས་བཅས་ཀྱི་ཞེན་འཛིན་རང་གྲོལ་ནས། །སྤྲོས་མེད་ཀྱི་ཀློང་དུ་སངས་རྒྱས་ཤོག །ཕཊ྄ཿ དབྱིངས་བརྗོད་ཀྱི་པགས་པ་ཀུན་ཁྱབ་ཀློང་། །ང་བདག་གི་ཕུང་ཁམས་ཡོངས་བསྒྲལ་བའི། །ཤ་ཁྲག་གི་འདོད་ཡོན་དཔག་མེད་འདི། །ཚོགས་བརྒྱད་ཀྱི་གདོན་བགེགས་ལྷ་མ་སྲིན། །འཁྲུལ་རྟོག་གིས་བཅིངས་ལ་འབུལ་ལོ་བཞེས། །འཁོན་སེམས་དང་གདུག་སེམས་རང་གྲོལ་ཤོག །ཕཊ྄ཿ བློ་འདས་ཀྱི་རིན་ཆེན་སྣོད་ཡངས་པར། །བདག་ཉིད་ཀྱི་ལུས་ལས་དབང་ཤེས་ལྔ། །འཇུག་པའི་ཡུལ་དགའ་བདེའི་ལང་ཚོ་ཅན། །ལྷ་ཀུན་ཏུ་བཟང་པོའི་མཆོད་སྤྲིན་བཞིན། །ཡོངས་སྲིད་དང་ཞི་བའི་མགྲོན་ལ་འབུལ། །དགྱེས་བཞེས་མཐུས་འཁོར་བ་དོང་སྤྲུག་ཤོག །ཕཊ྄ཿ དེ་ལྟར་ཆོས་ཀྱི་དེ་ཉིད་དང་། །རྣམ་པར་མཚུངས་པའི་ཟང་ཟིང་གི། །མཆོད་སྦྱིན་རྒྱ་ཆེན་འདི་བྱས་མཐུས། །སྤྱིར་འགྲོ་དྲུག་གི་སེམས་ཅན་སངས་རྒྱས་ཤིང་། །སོ་གཉན་སའི་ལྷ་འདྲེ་ཡོངས་གྲོལ་ནས། །དོན་གཉིས་ཀྱི་འབྲས་བཟང་ལྷུན་འགྲུབ་ཤོག །ཕཊ྄ཿ ཆོས་ཉིད་ཀྱི་བདེན་དོན་རྟོགས་པའི་གླུ། །སྐྱེ་འགག་ལས་འདས་སོ་ངོ་མཚར་ཆོས། །འདི་དངོས་སྣང་སྒྱུ་མར་ཤེས་པའི་གྲོགས། །དུས་དེ་རིང་འཁོར་འདས་ལམ་གསུམ་གྱི། །རྟོག་ཚོགས་ཀུན་སྤྲོས་པ་ཉེར་ཞི་བས། །འཁོར་གསུམ་གྱི་དམིགས་པ་ཀ་ནས་དག །ཕཊ྄ཿ ཕཊ྄ཿ ཕཊ྄ཿ ཕཊ྄ཿ དེ་ལྟར་སྐྱེ་མེད་རྡོ་རྗེ་ཡི། །ཉམས་ཆོས་རྟོགས་པའི་རྒྱང་གླུ་འདི། །བཀའ་གཏེར་དག་སྣང་གང་ཡང་མིན། །མཉམ་བཞག་བླ་མའི་རྣལ་འབྱོར་ལ། །གོམས་པའི་ལམ་རྟགས་འདི་འདྲ་བྱུང་། །འདིར་ཡི་གེར་འགོད་དོན་གཞན་དབེན་ཡང་། །བུ་སློབ་བསོད་ནམས་སྙན་གྲགས་ལ། །འགྲོ་ཁར་རྫོངས་སུ་བཏབ་པའི་དགེས། །ཐམས་ཅད་ཡུམ་དོན་ལ་གནས་ཤོག །དགེའོ། །དགེའོ། །དགེའོ།། །། |