 རྡོ་གྲུབ་ཆེན་ཀུན་བཟང་གཞན་ཕན་གྱི་གསུང་འབུམ།གླེགས་བམ། ལྔ་པ༽རྡོ་གྲུབ་ཆེན་ཀུན་བཟང་གཞན་ཕན།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། རྟ་མགྲིན་པདྨ་དབང་ཆེན་གྱི་གསོལ་འདེབས་པད་རག་ཕྲེང་བ།༄༅། །རྟ་མགྲིན་པདྨ་དབང་ཆེན་གྱི་གསོལ་འདེབས་པད་རག་ཕྲེང་བ་བཞུགས། ཨེ་མ་ཧོ། མཆོག་གསུམ་རྩ་གསུམ་རྒྱལ་བ་ཀུན་འདུས་ཞལ། །རྩ་བའི་བླ་མའི་ཞབས་ལ་གསོལ་བ་འདེབས། །ཡི་དམ་པདྨ་དབང་ཆེན་ཞལ་མཐོང་ཞིང་། །དངོས་གྲུབ་རྣམ་གཉིས་ཐོབ་པར་བྱིན་གྱིས་རློབས། །ཆོས་སྐུ་སྣང་བ་མཐའ་ཡས་རིགས་ཀྱི་བདག །ཁམས་གསུམ་ཟིལ་གནོན་པདྨ་དབང་གི་ལྷ། །གང་དང་དབྱེར་མེད་སྤྲུལ་སྐུ་པདྨ་འབྱུང་། ༈ གསོལ་བ་འདེབས་སོ་དབང་ཆེན་ཞལ་མཐོང་ཞིང་། །དངོས་གྲུབ་རྣམ་གཉིས་ཐོབ་པར་བྱིན༴ སུམ་པ་དབང་ཚུལ་འབྲེ་བན་ཤེས་རབ་མཚན། །སྐྱང་པོ་གྲགས་པ་དབང་ཕྱུག་རྣམ་གསུམ་ལ། །གསོལ༴ དངོས་གྲུབ༴ གྲུབ་ཐོབ་འདར་ཕྱར་བརྩོན་འགྲུས་རྡོ་རྗེ་དང་། །ཉན་ཆེན་བསོད་ནམས་བརྟན་པ་རྣམ་གསུམ་ལ། །གསོལ༴ དངོས་གྲུབ༴ ཆོས་རྒྱལ་དཔལ་བཟང་དཔལ་ལྡན་སེང་གེ་དང་། །རིན་ཆེན་བཀྲ་ཤིས་ཡོན་ཏན་མགོན་པོར་བཅས། །གསོལ༴ དངོས་གྲུབ༴ ཆོས་དཔལ་བཟང་པོ་བྱམས་རྡོར་རྒྱལ་མཚན་དང་། །རྣམ་རྒྱལ་བཟང་པོ་རཏྣ་བྷ་དྲ་བཅས། །གསོལ༴ དངོས་གྲུབ༴ བློ་གསལ་རྒྱ་མཚོ་མཁྱེན་བརྩེའི་དབང་ཕྱུག་དང་། །བསོད་ནམས་ཆོས་འཕེལ་དབང་ཕྱུག་རབ་བརྟན་ཞབས། །གསོལ༴ དངོས་གྲུབ༴ མགོན་པོ་བསོད་ནམས་མཆོག་ལྡན་ཀུན་དགའི་མཚན། །ངག་དབང་བློ་བཟང་རྒྱ་མཚོ་སྤྱན་རས་གཟིགས། །གསོལ༴ དངོས་གྲུབ༴ འགྱུར་མེད་རྡོ་རྗེ་རིན་ཆེན་རྣམ་པར་རྒྱལ། །ངག་དབང་བཤད་སྒྲུབ་རྒྱ་མཚོ་དམ་ཆོས་བཟང་། །གསོལ༴ དངོས་གྲུབ༴ བརྒྱུད་ལྡན་བླ་མའི་སྨིན་གྲོལ་བདུད་རྩིའི་མཚོ། །རྣམ་དག་དམ་ཚིག་ཡུར་བར་ལེགས་དྲངས་རྗེ། །ཀུན་བཟང་སྙན་གྲགས་རྒྱ་མཚོའི་ཞབས་དང་ནི། །འཇིགས་མེད་ཕྲིན་ལས་འོད་ཟེར་དཔལ་འབར་ལ། །གསོལ༴ དངོས་གྲུབ༴ དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་ནི་སྐྱེ་བ་ཚེ་རབས་ཐམས་ཅད་དུ། །པདྨ་དབང་ཆེན་རྣལ་འབྱོར་བསྒོམས་པའི་མཐུས། །སྒོ་གསུམ་ཧྱ་གྷྲྀ་ཝའི་གསང་གསུམ་དང་། །དབྱེར་མེད་གྱུར་ནས་འགྲོ་ལ་ཕན་ཐོགས་ཤོག །རྣམ་དག་དབང་བཞིས་བདག་རྒྱུད་ལེགས་སྨིན་ཞིང་། །རིམ་གཉིས་ཟབ་མོའི་རྟོགས་པ་མཐར་ཕྱིན་ནས། །གནས་སྐབས་རབ་འབྱམས་ཕྲིན་ལས་མངོན་གྲུབ་ཅིང་། །ཀུན་བཟང་དགོངས་པ་མངོན་དུ་འགྱུར་བར་ཤོག །བསྐྱེད་རྫོགས་བཟླས་པས་ས་ལམ་ཡོངས་བགྲོད་ནས། །རིག་འཛིན་རྣམ་བཞིའི་གོ་འཕང་མངོན་གྱུར་བཞིན། །ས་བཅུ་ལམ་ལྔའི་སྤངས་རྟོགས་མཐར་ཕྱིན་ནས། །པདྨ་དབང་ཆེན་གོ་འཕང་མྱུར་ཐོབ་ཤོག །དེ་ཡང་རང་ཞི་དོན་གཉེར་ཙམ་མིན་པར། །རབ་འབྱམས་ཕྲིན་ལས་འཇུག་པ་མཐའ་ཡས་ཀྱིས། །ཉེ་རིང་བྲལ་བའི་སེམས་ཅན་ཐམས་ཅད་ཀུན། །བདེ་ཆེན་འགྱུར་མེད་ས་ལ་དབུགས་དབྱུང་ཤོག །དེ་ལྟར་པདྨ་དབང་ཆེན་གྱི། གསོལ་འདེབས་པད་རག་ཕྲེང་བ་འདི། རྗེས་འཇུག་དད་ལྡན་དོན་སྤེལ་ན། སྐུ་ལྔའི་འབྲས་བཟང་མངོན་གྱུར་ཅིག །དགེའོ། དགེའོ། དགེའོ།། །། ཡང་གསང་རྟ་མགྲིན་ལས་བྱང་ཁམས་གསུམ་ཟིལ་གནོན།༄༅། །ཧྲིཿ དམ་ཆོས་བདེ་ཆེན་ལམ་མཆོག་ལསཿ ཡང་གསང་རྟ་མགྲིན་ལས་བྱང་ཁམས་གསུམ་ཟིལ་གནོན་ཞེས་བྱ་བ་བཞུགས། ། ན་མོ་གུ་རུ་ཧྱ་གྷྲྀ་ཝ་ཡེཿ དམ་ཆོས་བདེ་ཆེན་ལམ་མཆོག་གིཿ ཡང་གསང་རྟ་མགྲིན་སྒྲུབ་པ་ནིཿ དབེན་པའི་གནས་སུ་མཎྜལ་སྟེང་ཿ རྡུལ་ཚོན་རས་བྲིས་ཚོམ་བུ་སོགསཿ དབང་པོར་འཚམས་པའི་རྟེན་བཀོད་ནསཿ དབང་མདོག་གཏོར་མ་གཙོ་འཁོར་དགུཿ སྣ་ཚོགས་རྒྱན་སྤྲས་སྒྲུབ་རྫས་བཅསཿ ཕྱི་ནང་མཆོད་པ་ལ་སོགས་པཿ ཕུན་སུམ་ཚོགས་པ་བསྟར་ནས་སུཿ དབང་སྡུད་སེམས་ཀྱིས་ཆོ་གར་འཇུགཿ དེ་ལ་དང་པོ་སྐྱབས་འགྲོ་ནིཿ བདག་སོགས་མཁའ་མཉམ་འགྲོ་བ་ཀུནཿ གདོད་མའི་གྲོལ་གཞི་མ་མཇལ་བརཿ མཆོག་གསུམ་རྩ་གསུམ་ཀུན་འདུས་དངོསཿ དབང་ཆེན་ལྷ་ལ་སྐྱབས་སུ་མཆིཿ ལན་གསུམ་བརྗོད་རྗེས་སེམས་བསྐྱེད་ནིཿ མ་གྱུར་འགྲོ་བ་སེམས་ཅན་ཀུནཿ བླ་མེད་སངས་རྒྱས་སར་འགོད་ཆེདཿ པདྨ་དབང་ཆེན་བསྒྲུབས་ནས་ནིཿ འགྲོ་དོན་བྱེད་པར་སེམས་བསྐྱེད་དོཿ ལན་གསུམ་བརྗོད་རྗེས་ཡན་ལག་བདུན་པ་ནིཿ ཕྱག་འཚལ་མཆོད་འབུལ་སྡིག་ཀུན་བཤགསཿ དགེ་ལ་ཡི་རང་ཆོས་འཁོར་སྐོརཿ མྱ་ངན་མི་འདའ་བཞུགས་གསོལ་འདེབསཿ དགེ་རྩ་མཁའ་མཉམ་འགྲོ་ལ་བསྔོཿ བགེགས་རིགས་བསྐྲད་པའི་ཏིང་འཛིན་དང་ཿ བཀའ་བསྒོ་བྱ་བ་འདི་བཞིན་ནོཿ ཧྲཱིཿ པད་ཉི་རཱུ་ཏྲ་བསྣོལ་སྟེང་དུཿ རང་ཉིད་དབང་ཆེན་དམར་ནག་སྐུཿ ཞལ་གཅིག་ཕྱག་གཉིས་གཡས་བེ་ཅོནཿ གཡོན་པ་སྡིགས་མཛུབ་མེ་དཔུང་འཕྲོསཿ དུར་ཁྲོད་ཆས་རྫོགས་དབུ་ཡི་གཙུགཿ རྟ་མགོ་ལྗང་ཞུར་རྟ་སྐད་འཚེརཿ ཐུགས་ལས་ཁྲོ་མཚོན་མེ་དཔུང་འཕྲོསཿ སྟོང་གསུམ་ཀུན་གང་བགེགས་བསྐྲད་གྱུརཿ ཧྲཱིཿཧཱུཾཿ དབང་དྲག་འབར་བའི་དཀྱིལ་འཁོར་ནསཿ ཁྲོ་མཚོན་མེ་དཔུང་རབ་འཕྲོས་པསཿ བགེགས་ཚོགས་ལོག་འདྲེན་འཇིགས་པར་བྱེདཿ དབང་ཆེན་མེ་མཚོན་ཁྲོ་བོའི་དམགཿ ཐོག་སེར་འཁྲིགས་ལྟའི་དྲག་ཤུལ་གྱིསཿ བགེགས་རྣམས་བརླག་པར་གདོན་མི་ཟཿ དེ་བས་ད་ལྟ་ཕྱིར་དེངས་ཤིགཿ ཧཱུཾ་བཞིའི་སྔགས་ཀྱིས་བགེགས་བསྐྲད་ནསཿ མཚམས་གཅོད་སྲུང་འཁོར་བསྒོམ་པ་ནིཿ ཧྲཱིཿཧཱུཾཿ རྡོ་རྗེས་གཏམས་པའི་ས་གཞིའི་སྟེང་ཿ རྡོ་རྗེའི་རྭ་བ་གུར་བླ་བྲེསཿ ཕྱི་རོལ་ཁྲོ་མཚོན་མེ་དཔུང་འབརཿ ལྷུན་གྲུབ་སྲུང་འཁོར་གཞོམ་བྲལ་གྱུརཿ ༀ་རཾ་ཀྲོ་དྷ་རཀྵ་བཛྲ་ཛྭ་ལ་རཾ་ཕཊཿརཾ་རཾཿ སྡིག་སྒྲིབ་ཉེས་ལྟུང་བཤགས་པ་ནིཿ ཧྲཱིཿཧཱུཾཿ བདག་གིས་བྱང་ཆུབ་སེམས་བསྐྱེད་ནསཿ རྩ་གསུམ་ལྷ་དང་སློབ་དཔོན་ལཿ འགལ་བར་མི་བགྱིད་དམ་མནོས་ཀྱང་ཿ དུག་གསུམ་དབང་གིས་ནོངས་པའི་ལསཿ སྐུ་གསུང་ཐུགས་ཡོན་ཕྲིན་ལས་ཀྱིཿ དམ་ཚིག་ཉམས་པར་གྱུར་པ་རྣམསཿ སྙིང་ནས་མཐོལ་ཞིང་བཤགས་ལགས་ནཿ བཟོད་པར་བཞེས་ནས་ཚངས་པར་སྩོལཿ རྒྱལ་ཀུན་རྣམ་རྟོག་མཐར་འདས་ཀྱང་ཿ བདག་སོགས་གཉིས་འཛིན་དབང་གྱུར་སྒྲིབཿ སྒྱུ་མ་དང་ནི་རྨི་ལམ་ཚུལཿ རང་བཞིན་མེད་པའི་དབྱིངས་སུ་བཤགསཿ ༀ་པདྨ་ཧེ་རུ་ཀ་ས་ཏྭ་ས་མ་ཡཿ སོགས་བརྗོད་དེ་རྗེས་བྱིན་འབེབས་ནིཿ ཧྲཱིཿཧཱུཾཿ འཕགས་མཆོག་མཁྱེན་བརྩེ་ནུས་པའི་དཔལཿ བདག་ལ་དབང་སྐུར་བྱིན་གྱིས་རློབསཿ སྔགས་ཀྱི་ཁྱད་སྟོན་མཐུ་རྩལ་དབྱུང་ཿ དངོས་གྲུབ་མཆོག་སྩོལ་དགྲ་བགེགས་སྒྲོལཿ ཉམས་ཆགས་སྐོངས་ལ་ཕྲིན་ལས་སྤེལཿ མཐུ་དབང་བྱིན་ལྡན་དངོས་གྲུབ་བདགཿ བཅོམ་ལྡན་དབང་ཆེན་ལྷ་ཚོགས་ཀྱིཿ གསང་གསུམ་དཔལ་ཡོན་དངོས་གྲུབ་དབྱིགཿ བདག་ལ་རྒྱ་མཚོར་ཆར་བཞིན་དུཿ དབབ་ནས་དོན་གཉིས་ལྷུན་གྲུབ་མཛོདཿ ༀ་བཛྲ་ཀྲོ་ཏ་ཧྱ་གྷྲྀ་ཝ་སརྦ་ས་མ་ཡ་ཨ་ཝེ་ཤ་ཡ་ཕེཾ་ཕེཾཿ ཕྱི་ནང་གསང་མཆོད་སྦྱང་ཞིང་སྤེལ་བ་ནི། རང་ཉིད་ལྷར་གསལ་ཐུགས་ཀ་ནསཿ ཡི་གེ་རཾ་ཡཾ་ཁཾ་འཕྲོས་པསཿ ཕྱི་ནང་གསང་བའི་མཆོད་ཚོགས་ཀྱིཿ སྐྱོན་རྣམས་བསྲེགས་གཏོར་བཀྲུས་ནས་སུཿ རྨི་ལམ་དང་ནི་སྒྱུ་མ་ལྟརཿ སོ་སོའི་དཔལ་ཡོན་ཀུན་རྫོགས་པའིཿ འདོད་ཡོན་ལོངས་སྤྱོད་དཔག་མེད་གྱུརཿ ༀ་བཛྲ་ཨརྒྷཾ་ནས་ཤཔྟའི་བར་དང་། སྨན་གཏོར་རཀྟའི་སྔགས་གསུམ་པོཿ སོ་སོར་གསུམ་རེ་བརྗོད་པས་བརླབསཿ ༀ་ཨཱཿཧཱུཾཿ སརྦ་པཉྩ་ཨ་མྲྀ་ཏ་ཧཱུཾ་ཧྲཱི་ཋཿ ༀ་ཨཱཿཧཱུཾཿ མ་ཧཱ་བཱ་ལིངྟ་ཏེ་ཛྭ་བཱ་ལིངྟ་བ་ལ་བ་ཏི་གུ་ཧྱ་ས་མ་ཡེ་ཧཱུཾ་ཧྲཱི་ཋཿ ༀ་ཨཱཿཧཱུཾཿ མ་ཧཱ་རཀྟ་ཛྭ་ལ་མཎྜལ་ཧཱུཾ་ཧྲཱིཿཋཿ ཏིང་འཛིན་རྣམ་གསུམ་རིམ་པ་ནིཿ ཧྲཱིཿཧཱུཾཿ ཆོས་ཉིད་སྤྲོས་བྲལ་མཁའ་དབྱིངས་ལསཿ ཆོས་ཅན་རྟེན་འབྱུང་ཆུ་ཟླའི་གརཿ ཐུགས་རྗེའི་རྩལ་སྣང་ཡི་གེ་ཧཱུཾཿ དེ་ལས་འབྱུང་ལྔ་རི་རབ་དང་ཿ གཞལ་ཡས་ཁང་བཅས་ས་བོན་སྤྲོསཿ ཨེ་ཡཾ་རཾ་ཁཾ་སུམ་ཀེཾ་བྷྲུཾཿ དེ་དག་ཡོངས་གྱུར་འབྱུང་ལྔའི་དལཿ དེ་དབུས་ཀེང་རུས་རི་རབ་རྩེརཿ ཐོད་པ་རཏྣའི་གཞལ་ཡས་ཁང་ཿ དེ་དབུས་ཆོས་འབྱུང་དམར་ནག་ལཿ ཐོད་པའི་རྭ་བས་བསྐོར་བ་ཡིསཿ ཕྱི་རོལ་འཁོར་ལོ་རྩིབས་བཞི་པཿ ཕྱོགས་ཀྱི་མདོག་ཅན་མགོ་རློན་གྱིཿ ཕྲེང་བས་ཟླུམ་པོར་བསྐོར་བའི་ཕྱིཿ གྲུ་བཞི་སྒོ་བཞི་ཕྱོགས་སྐྱོང་བཅུཿ རྩིག་རྨང་གཞི་བྱས་ཐོད་སྐམ་དང་ཿ རློན་པ་རྙིད་པའི་རྩིག་པ་ཡང་ཿ གནམ་ལྕགས་འབར་བའི་གཟེར་གྱིས་བསྡམསཿ དེའི་ཕྱི་ནང་ནས་རིམ་བཞིན་དུཿ རིན་ཆེན་དམར་དཀར་སེར་ལྗང་ནགཿ སྣ་ལྔས་བརྩིགས་ཤིང་ཕྱི་ནང་གིཿ རྩིག་པར་ལྷ་ཆེན་བརྒྱད་ཀྱིས་གཏམསཿ རིན་པོ་ཆེ་དང་རུས་པ་ཡིཿ ཕ་གུ་མདའ་ཡབ་པུ་ཤུས་སྤྲསཿ རྒྱུ་རློན་དྲྭ་བ་དྲ་ཕྱེད་དང་ཿ འདོད་སྣམ་དམར་པོ་ལྷ་མོས་གང་ཿ རྒྱལ་ཆེན་བཞི་དང་ཐོད་སྐམ་ལསཿ གྲུབ་པའི་ཀ་བ་བརྒྱད་ལ་ནིཿ ཐོད་རློན་ཀ་ཞུ་གདུང་མ་ཡང་ཿ ཀླུ་ཆེན་བརྒྱད་བྲེས་མེ་ཏོག་སྤྲསཿ གཟའ་བརྒྱད་པད་ཕུར་རྒྱུ་སྐར་གྱིཿ དྲལ་ཕྱམ་ལེགས་བསྟར་བདུད་རྩི་ལྔའིཿ ཞལ་བས་བྱུགས་ཤིང་དབུས་མཐོའི་རྩེརཿ པདྨ་ལ་གནས་ཙིཏྟས་བརྒྱནཿ སྒོ་བཞི་ཀ་བ་བཞི་བཞི་དང ཿ རྟ་བབས་བང་རིམ་བཞི་ལྡན་སྟེང་ཿ ཆུ་སྐྱེས་ཆོས་འཁོར་བཅུ་གསུམ་དང ཿ གདུགས་དང་རི་དྭགས་མགོ་སྙིང་ཏོགཿ ཞིང་ཆེན་རྒྱལ་མཚན་ཧསྟིའི་འཕནཿ དབང་པོའི་མེ་ཏོག་ཕྲེང་བ་སོགསཿ རྔམ་བརྗིད་འབར་བའི་རྒྱན་གྱིས་སྤུདཿ ཕྱི་རོལ་པད་ར་དུར་ཁྲོད་བརྒྱདཿ རྡོ་རྗེའི་ར་བ་བསྐལ་མེ་འབརཿ དབུས་ཀྱི་ཆོས་འབྱུང་ལྟེ་བ་རུཿ པཾཿལས་པདྨ་ཨ་ལས་ཟླཿ མཾ་ལས་ཉི་མ་བཾ་ཡིག་ལསཿ རཱུ་ཏྲ་ཕོ་མོ་བསྣོལ་སྟེང་དུཿ ཧྲཱིཿམཾ་ཡི་གེའི་འཕྲོ་འདུ་ལསཿ ༀ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ཧཱུཾ་ཡིག་གདན་ཁར་བབས་པ་ལསཿ དམར་ནག་ཧྲཱིཿདང་བཾ་སྔོན་གྱུརཿ དེ་ལས་འོད་འཕྲོས་འཕགས་ཚོགས་མཆོདཿ འགྲོ་སྒྲིབ་ཀུན་སྦྱངས་སླར་བསྡུས་དབྱིགཿ རང་ཉིད་རྟ་མགྲིན་དབང་ཆེན་རྒྱལཿ གཡས་དཀར་གཡོན་ལྗང་དབུས་དམར་ཞལཿ སྤྱི་བོར་རྟ་མགོ་ལྗང་ཞུར་འཚེརཿ རྔོག་མ་དམར་པོ་ཕུམ་ཕུམ་སེརཿ ཞུར་དཀར་ཞལ་གསུམ་སྤྱན་དགུ་ལྡནཿ རྫི་སྨིན་སྨ་ར་གསེར་མདངས་འབརཿ ཁམ་ནག་དབུ་སྐྲ་གྱེན་དུ་བརྫེསཿ ཕྱག་དྲུག་གཡས་གཡོན་དང་པོ་གཉིསཿ ཆུ་སྐྱེས་དུང་དམར་བསྣོལ་སྟབས་ཀྱིསཿ བདེ་ཆེན་ཡུམ་གྱི་མགུལ་ནས་འཁྱུདཿ གཡས་ཕྱག་བར་པས་ལྕགས་ཀྱུ་དང་ཿ དེ་འོག་བེ་ཅོན་གཡོན་གཉིས་ཀྱིསཿ ཞགས་པ་རལ་གྲི་མེ་འབར་འཛིནཿ ཞིང་གླང་པགས་པས་སྟོད་གཡོགས་ཤིང་ཿ སྟག་ཤམ་རུས་རྒྱན་སྦྲུལ་ཆུན་སྤྲསཿ ཐོད་སྐམ་རཏྣའི་རྩེ་ཕྲན་ཅནཿ དབུར་གསོལ་སྐམ་རློན་རྙིད་གསུམ་གྱིཿ ཚར་གསུམ་ཐོད་ཕྲེང་དོ་ཤལ་བྱསཿ ཁྲག་ཞག་ཐལ་བའི་ཚོམ་བུས་བྱུགསཿ ཞབས་བཞི་བརྐྱང་བསྐུམ་ཁྱུང་གཤོག་གདེངསཿ གར་དགུའི་ཉམས་ལྡན་སྟོབས་རྩལ་རྫོགསཿ ༀ་མ་ཧཱ་ཀྲོ་དྷི་ཤྭ་རི་ཧཱུཾ་ཕཊཿ ཡུམ་ཆེན་པདྨ་གར་དབང་མཐིང་ཿ ཞལ་གཅིག་ཕྱག་གཉིས་སྤྱན་གསུམ་ལྡནཿ ཞལ་བསྒྲད་མཆེ་༑༑༑༑༑ཤོག་གྲངས་གཅིག་མེད། བཞིར་ཟླ་དཀྱིལ་རེ་རེའི་སྟེང་ཿ ཛཿཧཱུཾ་བཾ་ཧོ་ཡོངས་གྱུར་ལསཿ ལྕགས་ཀྱུ་ཞགས་པ་ལྕགས་སྒྲོག་དྲིལཿ རིམ་བཞིན་དམར་སེར་མཐིང་ལྗང་གིཿ རལ་པས་མཛེས་ཤིང་ཕྱག་གཉིས་ཀྱིཿ གཡས་རྣམས་རང་རྟགས་གཡོན་པ་བཞིསཿ གློ་སྙིང་འཛིན་ཅིང་ཞབས་གཉིས་ལྡནཿ དུར་ཁྲོད་ཆས་བརྒྱད་མེ་ཀློང་བཞུགསཿ ཡེ་ཤེས་ལྷ་ལ་སྙན་གསན་དབབཿ ཧྲཱིཿ ཀ་དག་ཆོས་སྐུའི་ཀློང་ཡངས་ལསཿ སྐུ་ལྔའི་བདག་ཉིད་ལོངས་སྤྱོད་རྫོགསཿ པདྨ་དབང་ཆེན་དཀྱིལ་འཁོར་ལྷཿ སྤྲུལ་སྐུར་གར་གྱིས་བཞེངས་སུ་གསོལཿ ༀ་བཛྲ་ས་མ་ཡ་ཧཱུཾ་ཛཿ སྤྱན་འདྲེན་སྤོས་རོལ་དད་མོས་བློསཿ ཧྲཱིཿཧཱུཾཿ ཆོས་དབྱིངས་དབུ་མཐའ་བྲལ་བའི་ཞིང་ཿ དབང་ཆེན་རོལ་པའི་གཞལ་ཡས་ནསཿ པདྨ་དབང་ཆེན་ཡབ་དང་ཡུམཿ ཁྲོ་བོ་བཞི་དང་སྒོ་མ་བཞིཿ སྤྲུལ་འཁོར་དང་བཅས་མ་ལུས་པཿ གནས་འདིར་སྤྱན་འདྲེན་གཤེགས་སུ་གསོལཿ ༀ་ཧྱ་གྷྲྀ་ཝ་ས་པཱ་རི་ཝ་ར་ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་དྲི་ཤྱ་ཧོཿ ས་མ་ཡ་ཛཿ ས་མ་ཡ་སྟྭཾཿ བཞུགས་སུ་གསོལ་བ་འདི་ལྟ་སྟེཿ ཧྲཱིཿཧཱུཾཿ དབང་ཆེན་དམ་ཚིག་དཀྱིལ་འཁོར་འདིརཿ པདྨ་དབང་ཆེན་ལྷ་ཚོགས་རྣམསཿ དགྱེས་བཞིན་བརྟན་པར་བཞུགས་ནས་ཀྱང་ཿ མཆོག་ཐུན་དངོས་གྲུབ་སྩལ་དུ་གསོལཿ ཛཿཧཱུཾ་བཾ་ཧོཿ ས་མ་ཡ་ཧཱུཾཿ སྒོ་གསུམ་གུས་པས་ཕྱག་འཚལཿ ཧཱུཾ་དབྱིངས་ལས་སྤྲུལ་པའི་སྒྱུ་འཕྲུལ་གརཿ རྟ་མགྲིན་དཀྱིལ་འཁོར་ལྷ་ཚོགས་ལཿ སྒོ་གསུམ་གུས་པ་ཆེན་པོའི་བློསཿ ཞིང་རྡུལ་མཉམ་པས་ཕྱག་འཚལ་ལོཿ ཨ་ཏི་པུ་ཧོཿ པྲ་ཏི་ཛ་ཧོཿ མཆོད་པ་འབུལ་བའི་རིམ་པ་ནིཿ ཧྲཱིཿཧཱུཾཿ ཡོན་ཆབ་བདུག་སྤོས་པུཥྤ་ཀཿ སྣང་གསལ་དྲི་ཆབ་ཞལ་ཟས་སྒྲཿ རྟ་མགྲིན་དབང་གི་དཀྱིལ་འཁོར་ལཿ མཆོད་པར་འབུལ་ལོ་བཞེས་སུ་གསོལཿ ༀ་སརྦ་ཏ་ཐཱ་ག་ཏ་ཧྱ་གྷྲྀ་ཝ་ས་པཱ་རི་ཝ་ར་བཛྲ་ཨརྒྷཾ་པྲ་ཏིཙྪ་པཱུ་ཙ་མེ་ག་ས་མུ་དྲ་སྥ་ར་ཎ་ས་མ་ཡེ་ཨཿཧཱུཾཿ དེ་བཞིན་དུ། བཛྲ་དྷུཔྤེ༴ པུཥྤེ༴ ཨ་ལོ་ཀེ༴ གྷནྡྷེ༴ ནེ་ཝེ་དྱ༴ ཤཔྟ་ཧཱུཾཿ བར་བརྗོདཿ ནང་མཆོད་འདོད་ལྔའི་མཆོད་པ་ནིཿ ཧྲཱིཿཧཱུཾཿ གཟུགས་སྒྲ་དྲི་རོ་རེག་བྱ་ཆོསཿ ཚོགས་དྲུག་ལྷ་མོ་དཀར་སྔོ་སེརཿ ལྗང་མོ་ལྗང་དང་དཀར་མོའི་ཚོགསཿ ཕྱག་ན་འདོད་ཡོན་ལོངས་སྤྱོད་བསྣམསཿ རྟ་མགྲིན་དཀྱིལ་འཁོར་ལྷ་ཚོགས་ཀྱིཿ དབང་ལྔ་མཉེས་པའི་རྫས་སུ་འབུལཿ ཨ་ལ་ལ་སྟེ་དགྱེས་པར་མཛོདཿ ༀ་ཧྱ་གྷྲྀ་ཝ་ས་པཱ་རི་ཝ་ར་རུ་པཿ ཤཔྟ། གྷནྷེ། རཱ་ས། སྤཪྴེ། དྷརྨ་དྷརྟུ་པུཙྪ་ཨཿཧཱུཾཿ བདུད་རྩི་སྨན་མཆོད་འབུལ་བ་ནིཿ ཧྲཱིཿཧཱུཾཿ གདོད་ནས་རྣམ་དག་དབྱིངས་ཆེན་པོརཿ རྩ་བརྒྱད་ཡན་ལག་སྟོང་སྦྱར་སྨནཿ རིགས་ལྔ་དམ་ཚིག་ལྔ་ཡི་དངོསཿ ཡེ་ཤེས་ལྔ་རྫོགས་སྒྲུབ་པའི་རྫསཿ རྒྱུ་དྲུག་སེམས་ཅན་ཀུན་སྒྲོལ་བའིཿ དུག་ལྔ་སེལ་བའི་བདུད་རྩི་འདིཿ ཇི་སྙེད་སངས་རྒྱས་ཐམས་ཅད་དང་ཿ པདྨ་དབང་ཆེན་ལྷ་ལ་འབུལཿ བཞེས་ནས་བདག་ལ་དགྱེས་པར་མཛོདཿ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧིཿ ཀཱ་ཡ་ཝཱཀྐ་ཙིཏྟ་སིདྡྷི་ཧཱུཾཿ བྷ་ལིང་གཏོར་མའི་མཆོད་པ་ནིཿ ཧྲཱིཿཧཱུཾཿ འདོད་ཡོན་ལོངས་སྤྱོད་བཅུད་ལྡན་པའིཿ ཤ་ཁྲག་རུས་གསུམ་གཏོར་མ་ཡིསཿ དབང་ཆེན་ཡབ་ཡུམ་ཁྲོ་བོ་བཞིཿ སྒོ་མ་བཞི་དང་བཀའ་གཏེར་གྱིཿ སྲུང་མ་སྤྲུལ་འཁོར་བཅས་པ་རྣམསཿ ཐུགས་དམ་བསྐང་ངོ་མཆོག་ཐུན་གྱིཿ དངོས་གྲུབ་དམ་པ་མྱུར་དུ་སྩོལཿ མ་ཧཱ་བཱ་ལིཾ་ཏ་ཁ་རཾ་ཁཱ་ཧིཿ རཀྟའི་མཆོད་པ་འབུལ་བ་ནིཿ ཧྲཱིཿཧཱུཾཿ ཁམས་གསུམ་འཁོར་བ་ཡོངས་བསྒྲལ་བའིཿ རཀྟ་ཁྲག་གི་མཆོད་པ་འདིཿ པདྨ་དབང་ཆེན་དཀྱིལ་འཁོར་ལཿ མཆོད་པར་འབུལ་ལོ་བཞེས་སུ་གསོལཿ མ་ཧཱ་རཀྟ་ཁ་ཧིཿ བདེ་ཆེན་སྦྱོར་བའི་མཆོད་པ་ནིཿ ཧྲཱིཿཧཱུཾཿགསང་བ་ཐབས་ཤེས་རྟེན་འབྲེལ་ལསཿ པདྨ་ནོར་བུ་མཉམ་སྦྱོར་ནསཿ བཅུ་དྲུག་དགའ་བའི་བདེ་ཆེན་དབྱིགཿ བྱང་ཆུབ་སེམས་ཀྱི་མཆོད་པ་འདིཿ དབང་ཆེན་དཀྱིལ་འཁོར་ལྷ་ཚོགས་ལཿ མཆོད་པར་འབུལ་ལོ་བཞེས་སུ་གསོལཿ མ་ཧཱ་སུ་ཁ་པཱུ་ཙ་ཧོཿ གནོད་བྱེད་བསྒྲལ་བའི་མཆོད་པ་ནིཿ ཧྲཱིཿཧཱུཾཿ ཁྲོ་ལ་ཁྲོས་པའི་ཁྲོ་བོ་ཡིསཿ ཉམས་པ་བདུན་དང་ཞིང་བཅུའི་དགྲཿ སྲིད་པའི་དྲ་བའི་རྒྱ་དྲལ་ནསཿ ཉོན་མོངས་དབྱིངས་སུ་བསྒྲལ་བར་བྱའོཿ ཨ་མུ་ཀ་མཱ་ར་ཡ་ཧཱུཾ་ཕཊཿ ཧྲཱིཿཧཱུཾཿ དགྲ་བགེགས་བསྒྲལ་བའི་ཤ་ཁྲག་རུསཿ སྲོག་དབུགས་ནང་ཁྲོལ་མཆོད་པ་འདིཿ དབང་ཆེན་རྟ་མགྲིན་དཀྱིལ་འཁོར་ལཿ མཆོད་པར་འབུལ་ལོ་བཞེས་སུ་གསོལཿ ༀ་ཧྱ་གྷྲྀ་ཝ་མ་ཧཱ་མཾ་ས་རཀྟ་ཀེཾ་ནི་རི་ཏ་པཉྩ་ཨ་མྲྀ་ཏ་ཁ་རཾ་ཁཱ་ཧིཿ ཡེ་ཤེས་གླུ་ཡི་མཆོད་པ་ནིཿ ཧྲཱིཿཧཱུཾཿ དམར་ནག་གྲུ་གསུམ་དཀྱིལ་འཁོར་དབུསཿ པད་ཉི་ཟླ་བ་རཱུ་ཏྲ་དང་ཿ ཕྱོགས་བཞི་འཁོར་ལོ་རྩིབས་བཞིའི་སྟེང་ཿ གདོན་བཞིའི་གདན་ལ་ཕུང་པོ་ལྔཿ གནས་འགྱུར་རྟ་མགྲིན་གཙོ་འཁོར་ལྔཿ དུག་ལྔ་གནས་དག་ཡེ་ཤེས་ལྔའིཿ རང་བཞིན་ཉིད་དུ་ལྷུན་གྲུབ་སྐུརཿ ཁམས་ལྔ་གནས་དག་ཡུམ་ལྔས་འཁྲིལཿ ཕྱོགས་བཞི་སྒོ་འཁྱུད་ཟླ་གདན་ལཿ སྐྱེ་གནས་བཞི་དག་སྒོ་མ་བཞིཿ ཚད་མེད་རྣམ་བཞིའི་ངོ་བོ་ཉིདཿ རྣམ་བཞིའི་ཕྲིན་ལས་སྒྲུབ་མཛད་པའིཿ སྲིད་པའི་ལས་ཉོན་ཡོངས་འཇོམས་པའིཿ རྟ་མགྲིན་དཀྱིལ་འཁོར་ལྷ་ཡི་ཚོགསཿ གཙོ་འཁོར་བཅས་ལ་ཕྱག་འཚལ་ལོཿ ཕྱི་ནང་གསང་མཆོད་འདི་བཞེས་ལཿ མཆོག་ཐུན་དངོས་གྲུབ་སྩལ་དུ་གསོལཿ དཀྱིལ་འཁོར་ལྷ་ལ་བསྟོད་པ་ནིཿ ཧྲཱིཿཧཱུཾཿ ཀ་དག་དབྱིངས་ལས་མ་གཡོས་ཀྱང་ཿ ཐབས་མཆོག་དབང་ཆེན་རྟ་མཆོག་དཔལཿ ཿཤེས་རབ་གར་དབང་ཡུམ་ཆེན་མོསཿ སྤྲུལ་བསྒྱུར་མཛད་ལ་ཕྱག་འཚལ་བསྟོདཿ མ་དག་ཕུང་པོ་གནས་གྱུར་པའིཿ ཉོན་མོངས་རྣམ་དག་ཡེ་ཤེས་སྐུཿ རྣམ་བཞིའི་ཕྲིན་ལས་རྫོགས་མཛད་ལྷཿ རིགས་བཞི་ཁྲོ་བོར་ཕྱག་འཚལ་བསྟོདཿ མཐའ་བཞིར་ལྟ་བ་རྣམ་དག་ཅིང་ཿ བསྡུ་དངོས་ཚད་མེད་ངོ་བོ་ཉིདཿ དགུག་གཞུག་བཅིང་དང་དབང་མཛད་པའིཿ སྒོ་སྲུང་མ་བཞིར་ཕྱག་འཚལ་བསྟོདཿ གནག་ཅིང་རྩུབ་པས་འགྲོ་འདུལ་ཕྱིརཿ ཁྲོ་རྔམ་མི་བཟད་འཇིགས་པའི་སྐུཿ མཐུ་སྟོབས་ནུས་པའི་རྩལ་འབར་བའིཿ བཀའ་གཏེར་སྲུང་མར་བཅས་ལ་བསྟོདཿ ལུགས་འབྱུང་རྟེན་འབྲེལ་རྣམ་དག་ཅིང་ཿ བྱང་ཆུབ་ཕྱོགས་ཆོས་རང་བཞིན་ཅནཿ དོན་དམ་འགྱུར་མེད་ངོ་བོ་ཉིདཿ གཞལ་མེད་ཁང་ལ་ཕྱག་འཚལ་བསྟོདཿ ཟུང་འཇུག་ཡེ་ཤེས་རྡོ་རྗེ་ཡིཿ སྒྱུ་འཕྲུལ་དྲྭ་བའི་རོལ་རྩལ་ལསཿ གཞོམ་བྲལ་སྲུང་བའི་འཁོར་ལོར་རྫོགསཿ བསླུ་མེད་རྡོ་རྗེའི་རྫོང་ལ་བསྟོདཿ བསྙེན་པ་འཛབ་བཟླས་རིམ་པ་ནིཿ ཧྲཱིཿཧཱུཾཿ བདག་ཉིད་དཔལ་ཆེན་ཁྲོ་བོའི་རྒྱལཿ དབང་ཆེན་རྟ་མཆོག་ཐུགས་དབུས་སུཿ ཆུ་སྐྱེས་འདབ་བརྒྱད་གེ་སར་ལཿ ཧྲཱིཿཡིག་དམར་པོ་རཱ་གའི་མདོགཿ འདབ་མ་བརྒྱད་སྟེང་སྔགས་ཕྲེང་འཁོརཿ འོད་འཕྲོས་རྒྱལ་མཆོད་འགྲོ་སྒྲིབ་སྦྱངསཿ ཚུར་འདུས་རྣལ་འབྱོར་སྒོ་གསུམ་ལཿ ཐིམ་པས་སྲིད་ཞིའི་སྤྱི་དཔལ་མཆོགཿ པདྨ་དབང་གི་རྒྱལ་པོ་དང་ཿ གཉིས་སུ་མེད་པའི་དོན་ལ་བལྟཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ༀ་མ་ཧཱ་ཀྲོ་དྷི་ཤྭ་རི་ཧཱུཾ་ཕཊཿ ༀ་བཛྲ་ཤྭ་ར་ཀྲོ་དྷ་ཧཱུཾ་ཕཊཿ ༀ་རཏྣ་ཤྭ་རི་ཀྲོ་དྷ་ཧཱུཾ་ཕཊཿ ༀ་པདྨ་ཤྭ་རི་ཀྲོ་དྷ་ཧཱུཾ་ཕཊཿ ༀ་ཀརྨ་ཤྭ་རི་ཀྲོ་དྷ་ཧཱུཾ་ཕཊཿ ༀ་བཛྲ་ཨཾ་ཀུ་ཤྭ་ཛཿ ༀ་བཛྲ་པཱ་ཤ་ཧཱུཾཿ ༀ་བཛྲ་སྥོ་ཊ་བཾཿ ༀ་བཛྲ་གྷནྜེ་ཧོཿ མ་ཡེངས་ངང་ནས་བཟླས་པར་བརྩོནཿ ཡེངས་འཁྲུལ་བཟླས་པར་འབྲས་མེད་དམནཿ བསྐྱེད་རིམ་ཆུ་ཟླ་འཇའ་ཚོན་བཞིནཿ རྫོགས་རིམ་མ་ཡེངས་མི་སྒོམ་ངང་ཿ དེ་འབྲས་རང་རིག་དབང་ཆེན་དང་ཿ མཇལ་འགྱུར་འདི་ལ་ཐེ་ཚོམ་མེདཿ གཙོ་ལ་འབྲུ་འབུམ་ཐ་མ་སྟེཿ དུས་ཀྱི་དབང་གིས་བཞི་འགྱུར་སྤེལཿ ཡུམ་དང་འཁོར་སྔགས་རིམ་གྱིས་ཕྲིཿ ཡབ་འབུམ་ཡུམ་ཁྲི་རིགས་བཞི་པོཿ སོ་སོར་སྟོང་དང་སྒོ་མ་ཡང་ཿ རེ་རེ་བཞིན་དུ་བརྒྱ་ཕྲག་རེཿ དེ་ཡི་འགྲེས་ཀྱིས་མང་ཉུང་དབྱེཿ ཐུན་མཚམས་དབྱངས་གསལ་རྟེན་སྙིང་གིསཿ ལྷག་ཆད་ཁ་བསྐངས་མཆོད་པ་ཕུལཿ དེ་རྗེས་འཛབ་བསྟོད་བྱ་བ་ནིཿ ཧྲཱིཿཧཱུཾཿ ཁྲོ་མཆོག་དབང་ཆེན་རྟ་མགྲིན་རྒྱལཿ དམར་ནག་རབ་འཇིགས་གཏུམ་རྔམ་འགྱིངཿ དབུ་གསུམ་རྣམ་ཐར་སྒོ་གསུམ་ལཿ ཕྱག་དྲུག་འགྲོ་དྲུག་དུ་ཁ་གཅོདཿ ཞབས་བཞིས་འཁོར་བའི་རྒྱ་མཚོ་སྒྲོལཿ དུར་ཁྲོད་ཆས་རྫོགས་མེ་ཀློང་བཞུགསཿ ལྗང་མདོག་རྟ་དབུ་རྟ་སྐད་འཚེརཿ རྔམ་སྒྲས་དྲེགས་ཚོགས་དབང་དུ་སྡུདཿ དབང་ཆེན་རྟ་མགྲིན་སྐུ་ལ་བསྟོདཿ མཇུག་ཏུ་དངོས་གྲུབ་བླང་བ་ནིཿ ཧྲཱིཿཧཱུཾཿ ཁྲོ་རྒྱལ་དཔལ་ཆེན་རྟ་མཆོག་དཔལཿ དངོས་གྲུབ་གཏེར་མཛོད་ཡིད་བཞིན་དབང་ཿ སྒྲུབ་པོ་བདག་ལ་ཉེར་དགོངས་ནསཿ མཆོག་ཐུན་དངོས་གྲུབ་མྱུར་དུ་སྩོལཿ ༀ་པདྨ་ཏ་ཀྲིཏ་པདྨ་ཤྭ་རི་བཛྲ་རཏྣ་པདྨ་ཀརྨ་ཧྱ་གྷྲྀ་ཝ་ཛ་ཧཱུཾ་བཾ་ཧོཿ ས་པཱ་རི་ཝ་ར་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཨ་ལ་ལ་ཧོཿ ༈ ཚོགས་འཁོར་བྱིན་གྱིས་བརླབ་པ་ནིཿ རཾ་ཡཾ་ཁཾཿ གསུམཿ ཨ་ལས་བྷནྡྷའི་སྣོད་མཆོག་ཏུཿ ཚོགས་རྫས་ཤ་ལྔ་བདུད་རྩི་ལྔཿ འོད་དུ་ལྟེམས་ཀྱི་ཞུ་བ་ལསཿ མཁའ་མཉམ་མཆོད་ཚོགས་རྒྱ་མཚོར་གྱུརཿ ༀ་ཨཱཿཧཱུཾཿ ཚོགས་བསགས་ཡུལ་རྣམས་སྤྱན་འ དྲེན་པཿ ཧྲཱིཿཧཱུཾཿ སྤྲོས་བྲལ་ཆོས་སྐུའི་དབྱིངས་ཉིད་ལསཿ སྤྲུལ་པའི་ཁྲོ་བོ་པདྨ་དབང་ཿ ཚོགས་ཞིང་མགྲོན་དུ་སྤྱན་འདྲེན་ནཿ ཡབ་ཡུམ་འཁོར་བཅས་གཤེགས་སུ་གསོལཿ ༀ་ཧྱ་གྷྲྀ་ཝ་ས་པཱ་རི་ཝ་ར་བཛྲ་ས་མ་ཡ་ཛཿ པདྨ་ཀ་མ་ལ་ཡ་སྟྭཾཿ ཚོགས་ཀྱི་འཁོར་ལོའི་ཕུད་འབུལ་བཿ ཧྲཱིཿཧཱུཾཿ བླ་མེད་མཆོག་གི་ཚོགས་མཆོད་འདིཿ ཡེ་ཤེས་ལྔ་ཡི་འོད་ཟེར་འཕྲོསཿ འདོད་ཡོན་ལྔ་ཡིས་རབ་བརྒྱན་ཏེཿ དམ་ཚིག་ཇི་བཞིན་བཞེས་སུ་གསོལཿ ༀ་ཧྱ་གྷྲྀ་ཝ་ས་པཱ་རི་ཝ་ར་ཨརྒྷཾ༴ ནས། ཤཔྟའི་བར་རོཿ ཧྲཱིཿཧཱུཾཿ དབང་པོ་དྲུག་ལ་སྣང་བ་ཡིཿ གཟུགས་སྒྲ་དྲི་རོ་རེག་བྱ་ཆོསཿ རང་རང་མཚན་ཉིད་དཔལ་ཡོན་རྫོགསཿ བསམ་ཡས་ནམ་མཁའི་ཁམས་བཀང་ནསཿ དབང་ཆེན་དཀྱིལ་འཁོར་ལྷ་ལ་འབུལཿ སྣ་ཚོགས་མཆོད་པ་བཞེས་སུ་གསོལཿ ཨ་ལ་ལ་སྟེ་དགྱེས་པར་མཛོདཿ དེ་ཡང་ཐོག་མར་བསྟོད་དེ་འབུལཿ ཧྲཱིཿཧཱུཾཿ སྒེག་དཔའ་འཇིགས་རུང་སྐུ་ཡི་གརཿ རྒོད་གཤེ་དྲག་ཤུལ་གསུང་གི་གརཿ སྙིང་རྗེ་རྔམ་ཞི་ཐུགས་ཀྱི་གརཿ གསང་གསུམ་སྒྱུ་འཕྲུལ་གར་བསྒྱུར་བཿ གར་བཅས་སྒྲུབ་པོ་རྣལ་འབྱོར་པཿ དབང་ཕྱུག་ཆེན་པོ་གར་གྱི་གཙོཿ ཟླ་བ་མཾ་ས་མེ་ཏོག་དངཿ ཙནྡྷན་དྲི་སོགས་བཟང་དགུ་འབུལཿ དགའ་མའི་ཚོགས་ཀྱི་རེག་བྱ་མཆོགཿ དག་པར་སྒྱུར་ཅིག་རྣལ་འབྱོར་པཿ གསང་བའི་སྒྲུབ་རྫས་འདི་རྣམས་ལཿ ཧཱུཾ་གིས་མ་དག་དྲི་སྦྱངས་ཤིང་ཿ ཕཊཿགྱིས་དཔལ་ཡོན་ཀུན་ལྡན་གྱུརཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ས་པཱ་རི་ཝ་ར་ག་ཎ་ཙཀྲ་པུཙྪ་ཁ་རཾ་ཁཱ་ཧིཿ བར་བཤགས་གནོང་འགྱོད་བློ་ཡིས་འབུལཿ ཧྲཱིཿ ཧཱུཾཿ པདྨ་དབང་ཆེན་ལྷ་ཚོགས་དགོངསཿ བདག་ཅག་མ་རིག་དབང་གྱུར་ཏེཿ སྐུ་གསུང་ཐུགས་དང་འགལ་བའི་ལསཿ ཅི་བགྱིས་ཚོགས་ཀྱི་མཆོད་པས་བཤགསཿ ཚངས་པར་སྩལ་ནས་མཆོག་ཐུན་གྱིཿ དངོས་གྲུབ་མྱུར་དུ་སྩལ་དུ་གསོལཿ ༀ་པདྨ་ཧེ་རུ་ཀ་ས་མ་ཡ༴ མ་ནུ་པཱ་ལ༴ པདྨ་ཁྲག་འཐུང་གི་ཡིག་བརྒྱ་བརྗོདཿ དམིགས་བྱ་འགུགས་པའི་ལས་བྱ་བཿ ཨེ་ལས་ཆོས་འབྱུང་གཏིང་ཟབ་པཿ ཕཊཿ གྱིས་དྲག་པོའི་མཚན་ཉིད་རྫོགསཿ ཛྭ་ལ་རཾ་གྱིས་བསྐལ་མེ་འབརཿ ནྲྀཿདང་ཏྲི་ལས་དེ་དབུས་སུཿ ལོག་འདྲེན་དགྲ་བགེགས་མངོན་སུམ་གསལཿ རང་གི་ཐུགས་ལས་ཕྱག་རྒྱ་བཞིཿ སྤྲོས་ཏེ་འགུགས་པའི་ལས་མཛད་གྱུརཿ བདེན་སྟོབས་བརྗོད་མཐར་རྩ་སྔགས་ལཿ པྲ་ཝེ་ཤ་ཡ་ཕཊཿཨ་ཝེ་ཤ་ཡ་ཕཊཿ ལན་གསུམ་བརྗོད་མཐར་ཕོ་ཉ་འགྱེེདཿ ཧྲཱིཿཧཱུཾ་བྷྱོཿ དམ་ཚིག་ཆེན་པོའི་དུས་ལ་བབཿ སྤྲུལ་པ་ཆེན་པོའི་དུས༴ ཕྱག་བརྙན་ཆེན་པོའི༴ བྲན་དང་བཀའ་ཉན་ཕོ་ཉའི་ཚོགསཿ ཁྱེད་ཀྱི་དམ་ཚིག་དུས༴ མཐུ་རྩལ་དབྱུང་བའི་དུས༴ བྱང་ཆུབ་མཆོག་ཏུ་སེམས་བསྐྱེད་ནསཿ དུས་གསུམ་རྒྱལ་བའི་གདུང་གསོབ་པའིཿ རིག་འཛིན་བདག་ཅག་རྣམས་ལ་ནིཿ གནོད་ཅིང་གདུག་པའི་དགྲ་དང་བགེགསཿ བདུད་དང་བར་དུ་གཅོད་པ་དང་ཿ དངོས་གྲུབ་ཕྲོག་ཅིང་འཚེ་བ་རྣམསཿ དབང་ཆེན་འབར་བའི་བྱིན་རླབས་ཀྱིསཿ ཡིད་ཙམ་གྱིས་ནི་འདིར་ཁུག་ལཿ མངོན་སྤྱོད་ཚུལ་བཞིན་བསྒྲལ་བ་དང་ཿ ལུས་ངག་རྡུལ་དུ་བརླག་པར་མཛོདཿ ཟུངས་ཤིག་སྡོམས་ཤིག་རྣམ་པར་ཆིངསཿ གཏོགས་ཤིག་གྲོགས་དང་བྲལ་བར་གྱིསཿ ཕོབས་ཤིག་རྣམ་པར་གཟིར་བར་གྱིསཿ འདི་ལ་བྱང་ཆུབ་སེམས་མེད་ཀྱིསཿ གཞན་དུ་ནམ་ཡང་བཏང་མི་བྱཿ བྱང་ཆུབ་སེམས་སུ་བཏང་བར་བྱཿ ང་ཡི་དབང་དུ་སྡུས་ལ་ཤོགཿ ཡུངས་དཀར་ཕོ་ཉ་སྤྲོ་བ་ནིཿ ཧྲཱིཿཧཱུཾ་བྷྱོཿ གནོད་སྦྱིན་རྒྱལ་པོ་ཁྲོས་པའི་སྲསཿ ཡུངས་ཀར་ཡེ་ཤེས་སྤྲུལ་པའི་མདའཿ ཐུགས་རྗེའི་ཀློང་ནས་ཕར་འཕངས་པསཿ དགྲ་བགེགས་ཕུང་ཁམས་སྐྱེ་མཆེད་རྣམསཿ ཐལ་བའི་རྡུལ་ཕྲན་བཞིན་དུ་རློགསཿ རྩ་སྔགས་དང་། ཆེ་གེ་མཱ་ར་ཡ་ཧཱུཾ་ཕཊཿ ལྷ་དང་ཕྲལ་བའི་ལས་བྱ་བཿ ཧྲཱིཿཧཱུཾ་བྷྱོཿ གཉེན་པོ་ཀུན་སྒྲོལ་དམ་ཚིག་ཅནཿ འགོ་བའི་ལྷ་རྣམས་ཕྲལ་བའི་ཕྱིརཿ གུ་གུལ་སྦྱར་བའི་དུད་པ་ཡིསཿ ལྷ་ལྔ་བདུད་དུ་ཕོབས་ལ་ཤོགཿ རྩ་སྔགས་དང་། མ་ཧཱ་གུ་གུལ་པྲ་ཏ་ཡ་ཧཱུཾ་ཕཊཿ ཕུར་པ་ལྷར་བསྐྱེད་བྱིན་ནུས་དབབཿ ཧྲཱིཿཧཱུཾ་བྷྱོཿ ཕུར་པ་པདྨ་ཀཱི་ལ་ཡཿ དམར་ནག་ལྗང་བའི་ཞལ་གསུམ་རྔམཿ ཕྱག་དྲུག་དང་པོ་གཉིས་ཀྱིས་ནིཿ པདྨ་དང་ནི་བྷནྡྷ་བསྣམསཿ བར་པས་ལྕགས་ཀྱུ་ཞགས་པ་དང་ཿ ཐ་གཉིས་རི་རབ་ཕུར་པ་སྒྲིལཿ སྐུ་སྟོད་ཁྲོ་བོ་དུར་ཁྲོད་ཆསཿ སྐུ་སྨད་ཕུར་དབལ་མེ་དཔུང་འབརཿ གནས་གསུམ་ༀ་ཨཱཿཧཱུཾ་གིས་མཚནཿ ཛཿཧཱུཾ་བཾ་ཧོས་ཡེ་ཤེས་ལྷཿ སྤྱན་དྲངས་དབྱེར་མེད་རོ་གཅིག་གྱུརཿ ༀ་ཏིཔྟ་ཙཀྲ་ཧ་ན་ཧ་ན་ཧཱུཾ་ཕཊཿ བདག་དང་ཕུར་པའི་གནས་གསུམ་ལསཿ འོད་འཕྲོས་རྒྱལ་ཀུན་བྱིན་ནུས་བསྡུསཿ སྐུ་གསུང་ཐུགས་ཀྱིས་ཁམས་གསུམ་འགྲོཿ དུས་གཅིག་སྒྲོལ་བའི་སྟོབས་ལྡན་གྱུརཿ ཡུངས་ཀར་གྱིས་བྲབས་གུ་གུལ་འདུགཿ རཀྟས་བྱུགས་ཤིང་སྔགས་ནུས་བཏབཿ རྫོང་འཕྲང་སྲོག་གསུམ་གནད་ལྡན་པསཿ ཕུར་པ་ཕྱོགས་བཅུར་གདེངས་ཙམ་གྱིསཿ ཕྱོགས་ལས་རྣམ་རྒྱལ་སྟོབས་ནུས་རྫོགསཿ ཐུགས་རྗེས་འགྲོ་ལ་རྗེས་ཆགས་གྱུརཿ བདག་མདུན་ཕུར་པའི་གནས་གསུམ་ཨཿ གྲངས་མེད་འཕྲོས་པས་རྒྱལ་བ་མཆོདཿ སྤྱན་དྲངས་ཨཱཿཡིག་རྣམ་པ་རུཿ བསྟིམས་པས་གསང་གསུམ་དངོས་གྲུབ་ཐོབཿ སླར་ཡང་ཡར་མར་འཕྲོ་འདུ་ཡིསཿ རྒྱལ་མཆོད་འགྲོ་བའི་སྒྲིབ་སྦྱངས་ནསཿ སྲིད་གསུམ་ཨ་ཡིག་རྣམ་པར་ཞུཿ གཟས་པོར་ཐིམ་པས་རྣམ་ཤེས་རྟེནཿ ཨ་ཡིག་དཀར་པོར་མཆེད་པའི་འོདཿ ཚེ་དཔལ་ངོ་བོ་བདག་ལ་ཐིམཿ ཨཿཡིག་ཧཱུཾ་གྱུར་འོག་མིན་དུཿ སྤར་བ་རིགས་ལྔ་སྟངས་དཔྱལ་གྱིསཿ མཉམ་སྦྱོར་མཁར་བསྐྲུན་སྲས་སུ་གྱུརཿ སྒྲོལ་གྲི་གཤིན་རྗེར་བསྐྱེད་པ་ནིཿ སྟོང་པའི་ངང་ལས་རལ་གྲི་ནིཿ གཤིན་རྗེ་གཤེད་པོ་སྐུ་མདོག་ནགཿ ཞལ་གཅིག་ཕྱག་གཉིས་གྲི་ཐོད་འཛིནཿ དུར་ཁྲོད་ཆས་རྫོགས་མེ་ཀློང་བཞུགསཿ གནས་གསུམ་ༀ་ཨཱཿཧཱུྃ་གིས་མཚནཿ ཛཿཧཱུཾ་བཾ་ཧོས་ཡེ་ཤེས་དལཿ སྤྱན་དྲངས་གཉིས་སུ་མེད་པ་ལཿ དབུ་མར་རིགས་བདག་དབུ་རྒྱན་བལྟཿ གཤིན་རྗེ་འོད་ཞུ་རལ་གྲིར་གྱུརཿ ༀ་ཧྲཱིཿཥྚི་ཝི་ཀྲྀ་ཏ་ན་ན་ཧཱུཾ་ཕཊཿ དགྲ་བགེགས་སརྦ་མཱ་ར་ཡ་ཧཱུཾ་ཕཊཿ དབང་ཆེན་ཐོ་ཐོགས་ཐུགས་དཀྱིལ་ནསཿ ཡེ་ཤེས་མཚོན་ཆ་ལྔ་ཡི་ཆརཿ ཕབ་པས་དུག་ལྔ་ཡོངས་དག་སྟེཿ རིགས་ལྔའི་ལྷ་ཚོགས་མཉེས་པར་བྱསཿ ཧཱུཾ་ༀ་ཏྲཱཾ་ཧྲཱིཿཨ་བྷྲུཾཿ བསྒྲལ་མཐར་ཞལ་བསྟབ་བྱ་བ་ནིཿ ཧྲཱིཿཧཱུཾཿ དམར་ནག་གྲུ་གསུམ་དཀྱིལ་འཁོར་ནསཿ པདྨ་དབང་ཆེན་ཡབ་དང་ཡུམཿ ཕྱོགས་བཞི་འཁོར་ལོ་རྩིབས་བཞིའི་སྟེང་ཿ པདྨ་དབང་ཆེན་རིགས་མཆོག་བཞིཿ ཕྱོགས་བཞིའི་སྒོ་སྲུང་མ་བཞི་དང་ཿ དཀྱིལ་འཁོར་ལྷ་ཚོགས་འཁོར་དང་བཅསཿ ཞལ་གདངས་ལྗགས་འདྲིལ་མཆེ་གཙིགས་པསཿ ཞལ་དུ་ཞིང་བཅུ་ཚང་བ་ཡིཿ གཟུགས་ཅན་དགྲ་དང་གཟུགས་མེད་བགེགསཿ བསྟབ་པོ་བཞེས་ཤིག་ཁ་རཾ་ཁཱ་ཧིཿ རྡུལ་ཕྲན་ཙམ་ཡང་མེད་པར་མཛོདཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ས་པཱ་རི་ཝ་མ་ཧ་པཉྩ་ཨ་མྲྀ་ཏ་ཁ་རཾ་ཁཱ་ཧིཿ མ་ཧཱ་བཱ་ལིཾ་ཏ༴ མ་ཧཱ་མཾ་ས༴ མ་ཧཱ་རཀྟ༴ མ་ཧཱ་ཙིཏྟ༴ མ་ཧཱ་བ་སུ་ཏ༴ མ་ཧཱ་ཀེཾ་ནི་རི་ཏི༴ མ་ཧཱ་ཀོ་རོ་ཙ་ན་ལ་ཁ་རཾ་ཁཱ་ཧིཿ སྐབས་འདིར་ཚོགས་ལ་རོལ་པའི་མཐརཿ དབང་བསྐུར་སྨོན་ལམ་གདབ་པ་ནིཿ ཧོ་བདག་ཅག་དཔོན་སློབ་མཆེད་ལྕམ་རྣམསཿ མ་ཧཱ་ལམ་པ་གསོལ་བའི་མཐུསཿ རྡོ་རྗེ་སེམས་དཔའི་སྐུ་ཚེ་དང་ཿ དཔལ་ཡོན་ཕུན་ཚོགས་ལྡན་གྱུར་ཅིགཿ ཛ་གད་དཔའ་བོ་གསོལ་སྟོབས་ཀྱིསཿ འགྲོ་མང་དབང་དུ་འདུས་གྱུར་ཅིགཿ ཞལ་ཟས་བྱེ་བྲག་མང་གསོལ་མཐུསཿ དབང་ཆེན་རྟ་མགྲིན་རྫུ་འཕྲུལ་ལཿ མངའ་དབང་བརྙེས་པའི་རྒྱུར་གྱུར་ཅིགཿ ཡར་གནས་མཆོད་པའི་ལས་བྱ་བཿ བྷྲུཾཿ བི་ཤ་བི་ཤུདྡྷེ་ཛྙཱ་ན་ཙཀྲ་མཎྜལ་བྷྲུཾཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ མ་ཧཱ་ཀྲོ་ཏི་ཤྭ་རི་ཧཱུཾ་ཕཊཿ ༀ་བཛྲ་རཏྣ་པདྨ་ཀརྨ་ཤྭ་ར་ཀྲོ་དྷ་ཧཱུཾཊཿ ཛཿཧཱུཾ་བཾ་ཧོཿ ༀ་མ་ཧཱ་པདྨ་ཤྭ་ར་ས་པཱ་རི་ཝཱ་ར་མ་ཧཱ་སརྦ་པཱུཙྪ་ཧོཿ ཧྲཱིཿཧཱུཾཿ དམར་ནག་གྲུ་གསུམ་དཀྱིལ་འཁོར་ནསཿ དཔལ་ཆེན་པདྨ་ཧེ་རུ་ཀཿ ཡུམ་ཆེན་པདྨ་གར་གྱི་དབང་ཿ འཁོར་དུ་དྲེགས་པ་ཕོ་མོས་བསྐོརཿ བདེ་སྟོང་དབྱིངས་ནས་སྐུར་བཞེངས་ནསཿ དམ་རྫས་གཏོར་མ་འདི་བཞེས་ལཿ མཆོག་ཐུན་དངོས་གྲུབ་སྩོལ་བ་དང་ཿ དགྲ་བགེགས་རྡུལ་དུ་བརླག་པ་སོགསཿ བཅོལ་བའི་ཕྲིན་ལས་མྱུར་འགྲུབ་མཛོདཿ ཤར་ལྷོ་ནུབ་བྱང་འཁོར་ལོའི་སྟེང་ཿ དྲི་ཟ་གྲུལ་བུམ་ཀླུ་དབང་དང་ཿ གནོད་སྦྱིན་བསྣོལ་བའི་གདན་སྟེང་ནསཿ སྤྲུལ་པ་དབང་ཆེན་རིགས་བཞི་ནིཿ རང་རང་རིགས་ཀྱི་འཁོར་གྱིས་བསྐོརཿ སོ་སོའི་གནས་ནས་སྐུར་བཞེངས་ནསཿ དམ་རྫས་མཆོད་གཏོར་འདི་བཞེས༴ དགྲ་བགེགས༴ བཅོལ་བའི༴ ཕྱོགས་བཞི་ལས་བཞིའི་དཀྱིལ་འཁོར་ནསཿ ཕོ་ཉ་སྒོ་མ་བཞི་རྣམས་ཀྱང་ཿ ཕྱོགས་མདོག་འཁོར་གྱི་ཚོགས་དང་བཅསཿ སྒོ་བཞིའི་གནས་ནས་སྐུར་བཞེངས་ལཿ དམ་རྫས་མཆོད་གཏོར་འདི་བཞེས་ནསཿ མཆོག་ཐུན་དངོས་གྲུབ་སྩོལ་བ་དང་ཿ དགྲ་བགེགས་རྡུལ་དུ་བརླག་པ་སོགསཿ བཅོལ་བའི་ཕྲིན་ལས་མྱུར་འགྲུབ་མཛོདཿ མར་གནས་ལྷག་མ་བཏང་བ་ནི། ལྷག་མ་བདུད་རྩིར་བརླབས་ནས་སུཿ ཧྲཱིཿཧཱུཾཿ དང་པོའི་ཕུད་ལ་དཔལ་ཆེན་དབང་ཿ བར་དུ་ཚོགས་ལ་མ་སྲིང་དགྱེསཿ ཐ་མ་ལྷག་མར་བྲན་གཡོག་དགའཿ ལྷག་མ་ཁ་ཆུས་བྲན་པའི་དོནཿ རྗེ་དང་འབངས་ཀྱི་ཁྱད་པར་ཡིནཿ ཐོག་མཐའ་བར་གསུམ་རོ་གཅིག་ཏུཿ བསྲེ་བ་བཟང་ངན་བྲལ་བའི་དོནཿ མཆོད་ནས་ཕྲིན་ལས་བཅོལ་བ་ནིཿ ཞིང་བཅུའི་དགྲ་རྣམས་བསྒྲལ་བའི་ཕྱིརཿ ཧྲཱིཿཧཱུཾཿ དབང་དྲག་རོལ་པའི་དཀྱིལ་འཁོར་ནསཿ པདྨ་དབང་ཆེན་ཡབ་དང་ཡུམཿ རིགས་ལྔའི་བྱ་ཁྱུང་ཚོགས་དང་བཅསཿ རྒྱན་གྱི་གཏོར་མ་འདི་བཞེས་ལཿ བཅོལ་པའི་ཕྲིན་ལས་གྲུབ་པར་མཛོདཿ བུདྡྷ་བཛྲ་རཏྣ་པདྨ་ཀརྨ་ག་རུ་ཊ་ཨི་དམ་བཱ་ལིང་ཁཱ་ཧི་ཁ་ཧིཿ ཧྲཱིཿཧཱུཾཿ དབང་ཆེན་རྟ་མགྲིན་ཡབ་ཡུམ་ལཿ གཟའ་མཆོག་གདོང་མོ་མཆེད་བཞི་དང་ཿ མ་ཚོགས་འབུམ་གྱི་འཁོར་དང་བཅསཿ བདུད་བཙན་རྒྱལ་པོ་ལ་སོགས་ཏེཿ དྲེགས་པ་ཕོ་མོའི་དམག་གིས་བསྐོརཿ དབང་དྲག་རྔམ་པའི་བརྟུལ་ཞུགས་ཀྱིསཿ རང་རང་གནས་ནས་སྐུ་བསྐྱོད་ནསཿ རྒྱན་གྱི་གཏོར་མ་འདི་བཞེས་ལཿ བཅོལ་བའི་ཕྲིན་ལས་གྲུབ་པར་མཛོདཿ ༀ་ཀེ་ཏ་ཀེ་ཏ་རཱ་ཧུ་ལ་མ་མ་རཀྨོ་མ་ཧཱ་ཀ་ལི་ཨ་ཡ་མ་དུ་རུ་ཙ་ཤ་ན་ས་པཱ་རི་ཝ་ར་ཨི་དམ་བྷ་ལིང་ཏ་ཁཱ་ཧི་ཁ་ཧིཿ གཏོར་ལམ་བསྟན་ཅིང་སྒོ་དབྱེ་བཿ ཧྲཱིཿཧཱུཾ་བྷྱོཿ ད་ནི་གཤེགས་བཞུད་དབྱིངས་སུ་དེངསཿ རྟོག་བྲལ་དབྱིངས་སུ་མ་གཤེགས་ནཿ ཐ་མལ་བསམ་སྤྱོད་ཉམས་མི་དགའཿ འོན་ཀྱང་བཟང་ངན་རོ་སྙོམས་ནཿ མཉམ་ཉིད་དོན་ལ་དགའ་སྡུག་བྲལཿ དེ་ཕྱིར་གཤེགས་བཞུད་སྒྱུ་མའི་འཕྲུལཿ སྤྱོད་འགྲོས་སྣ་ཚོགས་ཚུལ་གྱིས་བཞུདཿ དེ་ཡང་དུག་གསུམ་བརྟེན་པའི་ཡུལཿ ཤ་ཁྲག་རུས་གསུམ་འཛིན་པའི་སེམསཿ མཁའ་ལ་སྤྲིན་དེངས་ཇི་བཞིན་གཤེགསཿ གཤེགས་བཞུད་ལམ་འཕྲང་སྲུང་བའི་ཚོགསཿ སྒོ་ཕྱེས་འཕྲང་སོལ་དགྲ་དང་བགེགསཿ བརྔན་དུ་འབུལ་བ་བཞེས་མཛོད་ལཿ འཁོར་བའི་འདྲ་འབག་གཞོམ་པ་དང་ཿ མྱང་འདས་གོ་ས་མངོན་གྱུར་མཛོདཿ གསེར་སྐྱེམས་གཟུ་དཔང་བྱ་བ་ནིཿ ཧྲཱིཿཧཱུཾཿ རྩ་གསུམ་དམ་ཅན་སྲུང་མ་དང་ཿ དབང་ཆེན་དཀྱིལ་འཁོར་ལྷ་ཚོགས་རྣམསཿ གསེར་སྐྱེམས་མཆོད་པ་འདི་བཞེས་ལཿ རྣལ་འབྱོར་བདག་གི་གཟུ་དཔང་མཛོདཿ གཞན་ཡང་ཆོས་སྲུང་དཀར་སྐྱོང་ཚོགསཿ ས་ཡི་ལྷ་མོ་ས་འཛིན་ལགཿ ལོ་ཟླ་ཞག་དུས་གཟའ་སྐར་ལྷཿ གསེར་སྐྱེམས་མཆོད་པ་འདི་བཞེས་ལཿ རྣལ་འབྱོར་བདག་གི་གཟུ་དཔང་མཛོདཿ མཆོག་གསུམ་བླ་མའི་བརྒྱུད་འཛིན་བདགཿ ཐོས་བསམ་གཞན་ཕན་ལྷག་བསམ་དང་ཿ དམ་སྡོམ་སྔགས་ལམ་དོན་གཉེར་ཡང་ཿ འགལ་སྦྱོར་བྱུང་བོ་ར་མདའ་མཛོདཿ རང་དོན་སྤངས་ནས་གཞན་ཕན་གཉེརཿ རིམ་གཉིས་ལམ་ཞུགས་བསྙེན་སྒྲུབ་བརྩོནཿ དམ་ཅན་སྲུང་མ་རྒྱུན་བརྟེན་ཀྱང་ཿ དགྲ་བགེགས་བྱུང་ངོ་ར་མདའ་མཛོདཿ ཚོགས་མཐར་བཟློག་ཅིང་ཟོར་འཕེན་པཿ ཧྲཱིཿཧཱུཾཿ འཇིགས་རུང་དྲག་པོའི་སྣོད་མཆོག་ཏུཿ གཏོར་མ་ཚོགས་ཀྱི་ལྷག་མ་བཅསཿ གནམ་ལྕགས་མཚོན་བཞིན་སྡང་བའི་དགྲརཿ འཕངས་པས་མི་འདོད་ཉེར་འཚེ་དང་ཿ ནད་གདོན་བར་ཆད་འབྱུང་པོའི་དལཿ ཞིང་བཅུའི་དགྲ་བོའི་བསམ་སྦྱོར་སོགསཿ ཟློགས་ཤིག་སྒྱུར་ཅིག་ཕྱིར་ཟློགས་ཤིགཿ དམོད་བྱད་བྱེད་པའི་སྟེང་དུ་སྒྱུརཿ ས་མ་ཡཿ བྷྱོ་བྷྱོཿ བཟློག་བཟློགཿ ཆད་ཐོ་གཏོར་མ་བཏང་བའི་ཐབས། ཧྲཱིཿཧཱུཾཿ སྔོན་ཚེ་འོག་མིན་རྣམ་དག་ཞིང་ཿ དབང་ཆེན་རོལ་པའི་གནས་མཆོག་ཏུཿ བཅོམ་ལྡན་པདྨ་ཧེ་རུ་ཀསཿ དྲེགས་པ་དབང་བསྡུས་དམ་ལ་བཏགསཿ བར་དུ་སློབ་དཔོན་པདྨ་དང་ཿ རྣམ་སྣང་ལོ་ཙ་ལ་སོགས་པའིཿ ལོ་པཎ་སྐྱེས་མཆོག་མང་པོ་ཡིསཿ ལྷ་སྲིན་དབང་བསྡུས་བྲན་དུ་བཀོལཿ ཐ་མར་གདུལ་བྱར་ཕན་གདགས་ཕྱིརཿ འདུལ་བྱེད་གཏེར་སྟོན་རྣམ་གསུམ་དང་ཿ གྲུབ་པའི་དབང་ཕྱུག་འདར་ཕྱར་གྱིསཿ དབང་ཆེན་དལ་ཞལ་ཕྱེས་པའི་ཚེཿ བཀའ་གཏེར་སྲུང་མའི་ཚོགས་བཅས་ཀྱིསཿ ཁས་བླངས་གཡར་དམ་དྲན་པར་མཛོདཿ ད་ལྟ་སྒྲུབ་པའི་གནས་མཆོག་འདིརཿ བདག་ཅག་རྣལ་འབྱོར་སྒྲུབ་པ་པོསཿ དབང་ཆེན་གསང་གསུམ་བསྒྲུབ་ལགས་ནཿ བཀའ་སྡོད་དམ་ཅན་སྲུང་མའི་ཚོགསཿ ཆད་ཐོ་ཐ་ཚིག་དྲན་གྱིས་ལཿ ཤ་ཁྲག་གཏོར་མ་བཞེས་ནས་ཀྱང་ཿ རབ་འབྱམས་ཕྲིན་ལས་ཀུན་འགྲུབ་མཛོདཿ བརྟན་མར་གཏོར་མ་འབུལ་བ་ནིཿ ཧྲཱིཿཧཱུཾ་བྷྱོཿ བཀའ་ཡི་ཚོགས་དང་བཅས་པ་ཉིདཿ ཁྲག་འཐུང་དེ་བཞིན་ནམ་མཁའི་སྐུཿ ཚུར་གཤེགས་ཚུར་གཤེགས་སྐྱོང་མའི་ཚོགསཿ འདིར་བྱོན་དམ་སྐོང་ཕྲིན་ལས་མཛོདཿ བདུད་མོ་ཆེན་མོ་རྣམ་བཞི་དང་ཿ གནོད་སྦྱིན་མོ་བཞི་སྨན་བཙུན་བཞིཿ བོད་སྐྱོང་བརྟན་མ་བཅུ་གཉིས་པོཿ འཁོར་གཡོག་སྤྲུལ་པ་ཡང་སྤྲུལ་བཅསཿ སློབ་དཔོན་ཆེན་པོ་པད་འབྱུང་དང་ཿ སློབ་མ་རླངས་ཆེན་དཔལ་སེང་གེའིཿ སྤྱན་སྔར་ཁས་བླངས་དམ་བཅས་བཞིནཿ དམ་སྲུང་ཐ་ཚིག་དྲན་མཛོད་ལཿ བོད་ཁམས་སྲུང་ཞིང་སྐྱོང་བ་དང་ཿ རྣལ་འབྱོར་བདག་གི་སྟོངས་གྲོགས་མཛོདཿ བཀའ་ཡི་གཏོར་མ་འདི་ལོངས་ལཿ ནད་རིམས་གོད་ཁ་སད་སེར་སོགསཿ མི་འདོད་འགལ་རྐྱེན་ཀུན་ཞི་ཞིང་ཿ མཐུན་རྐྱེན་ཕྲིན་ལས་ཡོངས་འགྲུབ་མཛོདཿ མ་མ་ཧྲཱིང་ཧྲིང་ཿ སརྦ་པཉྩ་རཀྟ་བྷ་ལིང་ཏ་ཁཱ་ཧིཿ གཏོར་གཞོང་སྦུབ་སྟེང་བྲོ་རྒྱས་གདབཿ ཧྲཱིཿཧཱུཾཿ དབང་དྲག་རོལ་པའི་དཀྱིལ་འཁོར་ནསཿ པདྨ་དབང་ཆེན་ཡབ་དང་ཡུམཿ རིགས་བཞིའི་ཁྲོ་བོ་སྒོ་མ་བཞིཿ བྲོ་བརྡུང་མནན་པའི་ལས་ལ་བཞེངསཿ རྔམ་པའི་སྒྲ་སྒྲོག་རྟ་སྐད་འཚེརཿ ཧཱུཾ་སྒྲ་ཕཊཿསྒྲ་འབྲུག་ལྟར་སྒྲོགཿ ཞབས་བྲོ་ཁྲིག་ཁྲིག་དགྲ་འདྲེར་བརྡུང་ཿ མ་རིག་གདོན་གྱི་མགོ་བོ་ལཿ རང་བྱུང་ཡེ་ཤེས་བྲོ་ཞིག་བརྡུང་ཿ དུག་གསུམ་འདུས་པའི་ཕུང་པོ་ལཿ སྐུ་གསུམ་ཡེ་ཤེས་བྲོ་ཞིག་བརྡུང་ཿ དུག་ལྔ་འདུས་པའི་ཕུང་པོ་ལཿ སྐུ་ལྔ་ལྷུན་གྲུབ་བྲོ་ཞིག་བརྡུང་ཿ གཟུགས་ཅན་སྡང་བྱེད་དགྲ་བོའི་མགོརཿ ཐབས་མཆོག་ཡབ་ཀྱིས་བྲོ་བརྡུང་ངོ་ཿ གཟུགས་མེད་གནོད་བྱེད་བགེགས་ཀྱི་མགོརཿ ཤེས་རབ་ཡུམ་གྱིས་བྲོ་བརྡུང་ངོ་ཿ གཡས་སུ་བྲོ་བརྡུང་ཕོ་སྲི་མནནཿ གཡོན་དུ་བྲོ་བརྡུང་མོ་སྲི་མནནཿ རྒྱབ་ཏུ་བྲོ་བརྡུང་ཆུང་སྲི་མནནཿ མདུན་དུ་བྲོ་བརྡུང་དགྲ་སྲི་དང་ཿ གོད་སྲི་མནན་པས་ཕྲིན་ལས་རྫོགསཿ བྲོ་འདི་འོག་ནས་དགྲ་མ་ལྡང་ཿ བྲོ་འདིའི་འོག་ནས་བགེགས་མ་ལྡང་ཿ བྲོ་འདིའི་འབང་ཆེན་རྔམ་པའི་བྲོཿ སངས་རྒྱས་སྟོང་གི་མཐུ་ནུས་ལྡནཿ བརྟན་པར་གྱུར་ཅིག་བྲོ་བརྡུང་པསཿ ཆོས་ཅན་ཆོས་ཉིད་ཀློང་དུ་འདྲེསཿ འཁོར་བར་ཕྱིར་ལྡོག་མེད་པར་གྱུརཿ མཱ་ར་ཡ་ནནཿ སྟྭཾ་བྷ་ཡ་ནནཿ མཆོད་ཅིང་བསྟོད་པ་བྱ་བ་ནིཿ ༀ་ཧྱ་གྷྲྀ་ཝ་ས་པཱ་རི་ཝ་ར་མ་ཧཱ་སརྦ་པཉྩ་རཀྟ་བཱ་ལིངྟ་ཁཱ་ཧིཿ ཡང་གོང་གི་སྔགས་ཤམ་དུ། ཨརྒྷཾ་ནས་ཤཔྟའི་བར་བརྗོད་ཅིང་ཿ ཧྲཱིཿཧཱུཾཿ བདེ་མཆོག་རྡོ་རྗེ་པདྨ་དབང་ཿ རྣམ་ཀུན་མཆོག་ལྡན་གར་དབང་མཿ རྟ་མཆོག་རིགས་བཞི་སྒོ་སྐྱོང་བཞིཿ དཀྱིལ་འཁོར་ལྷ་ཚོགས་རྣམས་ལ་བསྟོདཿ མ་ཤེས་འཁྲུལ་པའི་ནོངས་བཤགས་ནིཿ ཧོཿ རྟ་མགྲིན་ལྷ་ཚོགས་དགོངས་སུ་གསོལཿ བདག་ཅག་རྨོངས་པའི་སྒོ་གསུམ་གྱིསཿ ཁྱེད་རྣམས་ཐུགས་དང་འགལ་བའི་ལསཿ མཐོལ་ལོ་བཤགས་སོ་ཚངས་པར་སྩོལཿ ༀ་པདྨ་ཧེ་རུ་ཀ་ས་མ་ཡ༴ སོགས་བརྗོད་རྟག་ཆད་མཐའ་བསལ་བཿ ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཨཏྨ་ཀོ྅ཧཾཿ ཧྲཱིཿབཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ཧྱ་གྷྲྀ་ཝ་ཧྲཱིཿགབཿ པདྨོ་དྷ་ར་ཧྲཱིཿགབཿ པདྨ་དྷ་ར་ཧྲཱིཿགབཿ ཙནྡྷ་རཀྵ་ཧྲཱིཿགབཿ རུ་ལུ་རུ་ལུ་ཧཱུཾ་བྷྱོ་ཧཱུཾཿ ཉེར་བསྡུ་ལྷར་ལྡང་བྱ་བ་ནིཿ བརྟན་གཡོ་རྟེན་དང་བརྟེན་པའི་ལྷཿ རིམ་བཞིན་ལུགས་ལྡོག་ཚུལ་གྱིས་ནིཿ ཆུ་བུར་ཆུ་ལ་ཐིམ་པ་བཞིནཿ གཞོན་ནུ་བུམ་སྐུའི་ཀློང་དུ་འདྲེསཿ སླར་ཡང་མཁའ་ལ་འཇའ་ཚོན་ལྟརཿ རང་ཉིད་པདྨ་དབང་ཆེན་དུཿ གསལ་བའི་སྐུ་ལས་ཡེ་ཤེས་མེཿ རབ་འབར་གཞོམ་བྲལ་གོ་ཆར་གྱུརཿ རྩ་སྔགས་བརྗོད་ཅིང་བསྲུང་བར་བྱཿ ཿརྣམ་དག་སྨོན་ལམ་འདི་བཞིན་གདབཿ དེ་ལྟར་པདྨ་དབང་ཆེན་གྱིཿ བསྐྱེད་བཟླས་རྫོགས་རིམ་བསྒོམས་པའི་མཐུསཿ མ་རིག་གིས་ལྡོངས་མཐའ་ཡས་འགྲོཿ ཡེ་ཤེས་བླ་མའི་ས་ཐོབ་ཤོགཿ དགེ་ཞིང་བདེ་སྐྱིད་བཀྲ་ཤིས་ནིཿ རྨད་བྱུང་ཐུགས་བརྩེའི་དབའ་རླབས་ཕྲེང་ཿ དུས་ལས་ཡོལ་མེད་རྒྱ་མཚོ་ལསཿ བྱིན་རླབས་རེ་སྐོང་རིན་ཆེན་གཏེརཿ སྦྱིན་མཛད་བླ་མའི་བཀྲ་ཤིས་ཤོགཿ སྐུ་གསུང་ཐུགས་ཡོན་ཕྲིན་ལས་སྣོདཿ གྲུབ་གཉིས་བདུད་རྩིས་ལེགས་བལྟམས་ནསཿ སྒྲུབ་པོའི་སྒོ་གསུམ་བྱིན་རླབས་མགོནཿ དབང་ཆེན་ལྷ་དགུའི་བཀྲ་ཤིས་ཤོགཿ འགལ་སྦྱོར་དགྲ་འདྲེ་བྲག་རུལ་གཟུགསཿ ཕྱེར་འཐག་མཐུ་སྟོབས་རྡོ་རྗེའི་ཐོགཿ ཕྱིང་གསང་བ་ཡང་གསང་གིཿ བསྟན་སྲུང་རྒྱ་མཚོའི་བཀྲ་ཤིས་ཤོགཿ གཞན་ཡང་བཀྲ་ཤིས་ཅི་རིགས་བརྗོདཿ ཨེ་མཿ དམ་ཆོས་བདེ་ཆེན་ལམ་མཆོག་གིཿ ཡང་གསང་རྟ་མགྲིན་སྒྲུབ་པ་ཡིཿ ལས་བྱང་ཁམས་གསུམ་ཟིལ་གནོན་འདིཿ རྒྱུད་ལུང་མན་ངག་བཅུད་དྲིལ་ཞིང་ཿ རྣལ་འབྱོར་རང་གི་དག་སྣང་དང་ཿ སོ་སོ་མ་ཡིན་རོ་གཅིག་ལྟའིཿ ཡི་གེའི་གཟུགས་སུ་ཕབ་འདིའི་དགེསཿ སྙིགས་དུས་བསྐལ་པའི་རྒུད་པའི་མུནཿ དབང་ཆེན་འབར་བའི་འོད་སྟོང་གིསཿ བསལ་ནས་སྔ་འགྱུར་ཆུ་སྐྱེས་ཚལཿ ཡོངས་རྒྱས་ཕན་བདེའི་དྲི་བསུང་གིསཿ འཇིག་རྟེན་ཁམས་ཀུན་དགའ་འགྱུར་སྨོནཿ འདི་ཡང་མཁའ་འགྲོ་དཔལ་འཛིན་མསཿ རྟེན་འབྲེལ་ཟབ་མོས་མཐུན་སྦྱོར་གྱིསཿ ཁོ་བོ་ལྔ་ལམ་ནས་བཟློག་ཚེཿ མངོན་གྱུར་བདེན་འབྲས་གསལ་བ་བཞིནཿ རྣལ་འབྱོར་ཀུན་བཟང་གཞན་ཕན་གྱིཿ ཀུན་གཞིའི་སྒྲོམ་ནས་མངོན་ཕྱུང་བཞིནཿ དུང་མདོག་ཤོག་བུར་དག་པར་ཕབཿ ཡི་གེའི་གཟུགས་སུ་འདུ་བྱེད་པཿ རྟོགས་ལྡན་དྷརྨ་ཕ་ལའོཿ ཞུས་སོ།། རྟ་མགྲིན་ཁམས་གསུམ་ཟིལ་གནོན་གྱི་སྨད་ལས་ཀྱི་རིམ་པ་གནམ་ལྕགས་རྡོ་རྗེའི་སྒྱོགས་རྡོ།༄༅། །རྟ་མགྲིན་ཁམས་གསུམ་ཟིལ་གནོན་གྱི་སྨད་ལས་ཀྱི་རིམ་པ་གནམ་ལྕགས་རྡོ་རྗེའི་སྒྱོགས་རྡོ་ཞེས་བྱ་བ་བཞུགས། ། ན་མོ་མ་ཧཱ་གུ་རུ་ཧྱ་གྷྲྀ་ཝ་ཤྲྀ་ཡེ། །རབ་འབྱམས་རྒྱལ་བ་ཀུན་འདུས་པདྨ་སྐྱེས། །དྲག་སྔགས་བཀའ་བབ་རྣམ་སྣང་ལོ་ཙ་བ། །བརྒྱུད་པ་ཀུན་འདུས་མཁྱེན་བརྩེའི་འོད་ཟེར་དང་། །དབྱེར་མེད་ལམ་འདིའི་དྲིན་ཐོབ་བླ་མར་འདུད། །པདྨ་གསུང་གི་དཀྱིལ་འཁོར་ཡོངས་འདུས་ནོར། །རབ་འབྱམས་ཕྲིན་ལས་འབྱུང་གནས་རྟ་མགྲིན་དབང་། །ཁམས་གསུམ་ཟིལ་གནོན་བཟློག་པའི་ལས་རིམ་ཁྲིགས། །གནམ་ལྕགས་རྡོ་རྗེའི་སྒྱོགས་རྡོ་འདི་རུ་ངོམ། །དེ་ཕྱིར་རིག་འཛིན་གོང་མའི་ཟབ་གཏེར་གྱི། །དགོངས་དོན་འཕྱུག་མེད་རང་གི་དག་སྣང་དང་། །སྦྱོར་ཆོག་སྤེལ་ལ་རྩ་གསུམ་ལྷ་ཚོགས་དང་། །བཀའ་སྐྱོང་གཏེར་བདག་ཚོགས་ཀྱིས་གནང་བ་སྩོལ། །དེ་ཡང་འདིར་རྟ་མགྲིན་ཁམས་གསུམ་ཟིལ་གནོན་གྱི་དཀྱིལ་འཁོར་ལ་བརྟེན་ནས་རང་གཞན་གྱི་བྱད་ཕུར་རྦོད་གཏོང་སོགས་གཟུགས་ཅན་དང་གཟུགས་མེད་ཀྱིས་ཉེ་བར་འཚེ་བའི་རིགས་རྣམས་དང་ལོག་པར་སྦྱོར་བའི་རྐྱེན་དང་བར་ཆད་རྣམས་བཟློག་ཕྱིར་སྨད་ལས་སྤྱི་དང་ཁྱད་པར་དྲག་པོའི་ཟོར་ལས་ཀྱི་རིམ་པ་ལག་ཏུ་བླང་བར་འདོད་པས། དང་པོ་རྟ་མགྲིན་གང་རུང་དང་ཁྱད་པར་གཞུང་འདི་ཉིད་ཀྱི་དབང་ལུང་ལེགས་པར་ཐོབ་ཅིང་། དོམ་སྡོམ་ལ་གནས་ཤིང་བསྙེན་སྒྲུབ་སྔོན་དུ་ཐེབས་པས་གནས་དེ་ཉིད་དྲག་པོ་མངོན་སྤྱོད་དང་མཐུན་པའི་གནས་སུ་བསམ་ལ། གཞུང་འདི་ཉིད་ཀྱི་སྨད་ལས་འདོན་ཚིག་དང་མཐུན་པའི་རྫས་སྤྱོད་རྣམས་ཚང་བར་བསགས་ཤིང་། དྲག་ལས་ལ་ཤིས་པའི་གཟའ་སྐར་འཕྲོད་སྦྱོར་སོགས་དང་བསྟུན། ས་སྟེགས་སྐྱང་ནུལ་ལེགས་པར་གྲུབ་པའི་སྟེང་དུ་ཚངས་ཟུར་ཐིག་བཏབ་པའི་དབུས་དམར་ནག་གྲུ་གསུམ། དེའི་ཕྱི་རོལ་ན་ཟླ་གམ་གསུམ་དམར་པོ། དེའི་ཕྱི་རོལ་གཞི་ནག་པོར་ཐོད་ཕྲེང་དཀར་པོ། ཕྱི་རོལ་དུ་འཁོར་ལོ་རྩིབས་བཞིར་ཕྱོགས་ཚོན། རྩིབས་མཆན་ཕྱོགས་མདོག་གམ་མཛེས་ཚོན། དེའི་ཕྱི་རོལ་དུ་མུ་ཁྱུད་ཟླུམ་པོ་ཁྲག་ཁྱམས། དེའི་ཕྱི་རོལ་རྡོ་ར་མེ་རི་མ་ཏྲཱཾ་མགོ་ལྷོ་ནུབ་བསྟན་པ་འབྲི་བའམ། དེ་ལས་སྤྲོས་པ་སྐྱུང་ན་དབུས་སུ་ཆོས་འབྱུང་ཟུར་མདུན་བསྟན་གྱི་སྟེང་དུ་ཚོམ་བུ་ལྷ་གྲངས་བཀོད་པས་ཀྱང་འཐུས་སོ། ཐོག་མར་སྡེ་བརྒྱད་མཆོད་པ་བཏང་ཞིང་དཀྱིལ་འཁོར་གྱི་དབུས་སུ་རྐང་གསུམ་ཁར་སྣོད་གས་ཆག་མེད་པའི་ནང་དུ་དཔལ་གཏོར་ཟུར་གསུམ་དམར་པོ་ཟུར་མདུན་བསྟན་སུམ་གཉིས་ཡར་སྣ་བཅད་པའི་སུམ་ཆ་དང་པོ་ལ་འོག་མར་གྲུ་གསུམ་དུ་བརྐོས་པའི་ནང་ཤོག་ལིང་ངམ་ཟན་ལིང་མགོ་ཐུར་བསྟན་དུ་བཅུག་ལ་བཞག །གཏོར་མར་མེ་རི་སོགས་རྒྱན་གྱིས་བརྒྱན་པ་འཁོར་དམར་གཏོར་བརྒྱད་ཀྱིས་བསྐོར་མཐར་ཁྲག་རྐོང་ངོ་། །རྩང་དྲྭ། མཚེ་ཡུངས། རྒྱུ་ལྡིང་། ཤ་དར་སོགས་ཀྱིས་བརྒྱན་ཅིང་། ལྷ་རྟེན་ཙཀླི་གཏོར་གདུགས་སོགས་ཀྱིས་བརྗིད་ཆགས་པར་བྱའོ། །དེའི་མདུན་དུ་ལྕགས་སྣོད་ཆུང་ངུར་ཟོར་གཏོར་གྲུ་གསུམ་མེ་རི་མཚེ་ཡུངས་རྩང་གིས་བརྒྱན་པ། དེའི་ཕྱི་རོལ་དུ་གཏོར་སྣོད་བཅུར་གཏོར་མ་བཅུ་རེ་བཤམས་པ་བརྒྱ་ཚང་བས་བསྐོར། དེ་དག་གི་ཕྱི་སྐོར་གཏོར་མ་རེ་རེ་བཤམས་པས་བཅུ་ཚོ་གཅིག་བཤམས་པ། ཐམས་ཅད་ཁྲག་གིས་སྦགས་ཤིང་ཡུངས་ཀྱིས་བརྒྱན་པ། དེའི་ཕྱི་རོལ་གཡས་གཡོན་དུ་ཐོད་པ་མཚན་ངན་ཁྲག་སྣ་དང་དུག་སྣས་བཀང་བ། །ཐོད་སྣོད་ཡུངས་དཀར་གྱིས་བཀང་བ། །གཞན་ཡང་དྲག་པོའི་ཐུན་རྫས་ནི། །སྦས་པ་མིག་འབྱེད་ལས་དགྲ་བགེགས་ཐུན་གྱིས་བསད་པ་ལ། །རབས་ཆད་ནག་པོའི་ཐོད་པ་རུ། །ཡུངས་དཀར་ཡུངས་ནག་སྐེ་ཚེ་དང་། །བཙན་དུག་ར་དུག་སྤྱང་དུག་དང་། །རེ་ལྕག་རྩ་བ་དུག་བཞི་ཚང་། །མི་རྟ་ཁྱི་ཕག་སྤྱང་ཀིའི་བླུན། །མི་རུས་མེ་ཡིས་བསྲེགས་པ་དང་། །ཚེར་མའི་རིགས་གྱུར་ཚོགས་ཚད་དང་། །གཅན་གཟན་མཆེ་སྡེར་ཚོགས་ཚད་དང་། །ཞེས་བཤད་པའི་ཐུན་རྫས་རྣམས་རབས་ཆད་ཐོད་པའམ་གཡག་འོག་ཅན་གྱི་རྭ་ལྷུར་ལྡུག། སྨན་རག་གཏོར་གསུམ། །ཕྱི་ནང་གི་ཉེར་སྤྱོད་བཀའ་གཏེར་སྲུང་མ་སྤྱི་སྒེར་གྱི་གཏོར་མ་རྣམས་དང་། །གཞན་ཡང་བྲུབ་ཁུང་ལིངྒ་དང་བཅས་པ། །ཚོགས་ཀྱི་ཡོ་སྤྱད་ཆད་ཐོ་བསྟན་སྐྱོང་། ཐུན་གཏོར་བཅས་དང་གཞན་ཡང་དཀར་བགེགས་གཏོར་མ། ཡུངས་ཐུན་སྤོས་གུལ། འཐོར་ནས་ཕུར་པ་སྒྲོལ་གྲི་གཡབ་དར་རོལ་མོ་སོགས་མཁོ་ཆས་ཐམས་ཅད་ཚང་བར་བསགས། གཉིས་སུ་དངོས་གཞི། སྒྲུབ་པ་པོ་སྟན་བདེ་བ་ལ་འདུག་རྟ་མགྲིན་ཁམས་གསུམ་ཟིལ་གནོན་གྱི་གཞུང་གི་འཛབ་ལ་ཐུག་གི་བར་བཟླས་པ་ལོང་སྐབས་དང་སྦྱར་བའི་རྒྱས་བསྡུས་ཅི་རིགས་གཞུང་དང་མན་ངག་གིས་བརྒྱན་པའི་དམིགས་པས་འཕྲོ་འདུ་བྱ་ཞིང་བདག་མདུན་མེ་རི་འདབ་འབྱར་གྱི་ཚུལ་དུ་བྱའོ། དེ་ནས་བཟློག་པའི་དམིགས་པ་ནི། རང་ཉིད་དཔལ་ཆེན་གསལ་བའི་ཐུགས་ཀ་ཡིཿ ཧྲཱིཿ ལས་འོད་འཕྲོས་མདུན་བསྐྱེད་ལྷ་ཚོགས་ཀྱིཿ །ཐུགས་ཀར་ཕོག་ནས་རྒྱུད་བསྐུལ་བ་སྤུ་ཡི། །བུ་ག་ཀུན་ནས་ཁྲོ་ཆུང་ཉི་ཟེར་གྱི། །རྡུལ་ལྟར་འཕྲོས་པས་བདག་ཅག་འཁོར་བཅས་ལ། །གནོད་བྱེད་ཕ་རོལ་རྦོད་གཏོང་མཁན་པོ་དང་། །དུག་མཚོན་གཡུལ་སོགས་བསམ་སྦྱོར་ངན་བརྩོན་པའི། །གཟུགས་ཅན་དགྲ་དང་རྦད་འདྲེ་ལྷ་མ་སྲིན། །སྡེ་བརྒྱད་འབྱུང་པོ་སྤྱི་དང་བྱེ་བྲག་སོགས། །ལུས་ལ་ན་ཚ་སེམས་ལ་སྡུག་བསྔལ་གཏོང་། །བསམ་པར་བར་གཅོད་ཆག་ཆེ་ཉམ་ང་གཡོ། །མདོར་ན་འགལ་རྐྱེན་མི་མཐུན་ཕྱོགས་རྩོམ་པའི། །གཟུགས་མེད་བགེགས་རྣམས་ཐལ་བའི་རྡུལ་བཞིན་རློགས། །རྣམ་ཤེས་བླ་ཚེ་སྲོག་དབུགས་བཅས་པ་རྣམས། །དམིགས་རྟེན་གཟུགས་ཀྱི་ཉ་བོ་འདི་ཉིད་ལ། །རང་དབང་མེད་པར་བཀུག་ནས་ཐིམ་པར་གྱུར། །རྩ་སྔགས་མཇུག་ཏུ། གནོད་བྱེད་བན་བོན་སྔགས་པས་བཏང་བའི་མཐུ་བྱད་རྦད་འདྲེ་དང་སྡེ་བརྒྱད་འབྱུང་པོའི་གནོད་པ་ཐམས་ཅད་ཨ་པ་ན་ཡ་བཟློག་བྷྱོཿ ཞེས་དམིགས་གནད་བཅས་ཅི་ནུས་སུ་བཟླས་མཐར་ཡུངས་དཀར་ཡུངས་ནག་དུག་ཁྲག་ལ་ཕུས་བཏབ་སྟེ་བཟློག་གཏོར་ལ་བྲབ་ཅིང་བསྐུལ། དེ་ནས་གཏོར་ཟོར་ལ་དམིགས་ཏེ། རང་ཉིད་དབང་ཆེན་གསལ་བའི་ཐུགས་ཀ་ཡི། །ཧྲཱིཿལས་འོད་འཕྲོས་གཏོར་ཟོར་ལ་ཕོག་པས། །དབང་ཆེན་རོལ་པའི་ཁྲོ་བོ་སྐར་ལྟར་འཁྲུག །མཚོན་ཆ་སྣ་ཚོགས་བུ་ཡུག་ལྟ་བུ་རུ། །འཚུབས་ཤིང་འཕྲོས་པས་བདག་ཅག་འཁོར་བཅས་ལ། །གནོད་བྱེད་ཕ་རོལ་རྦོད་གཏོང་མཁན་པོ༴ སོགས་གོང་བཞིན་བརྗོད་རྗེས་རྩ་སྔགས་ཤམ་བུར། སརྦ་པཱ་པཾ་སརྦ་དུ་དྲི་མཱ་ར་ཡ་བཟློག་བཟློག་བྷྱོ་བྷྱོཿ ཞེས་ཅི་ནུས་བཟླས་ཏེ་སྔར་བཞིན་ཐུན་གྱིས་བྲབ། དེ་ནས་ཁྲག་ཟོར་ལ་དམིགས་ཏེ། རང་ཉིད་དབང་ཆེན་ཐུགས་ཀའི་ས་བོན་ལས། །འོད་འཕྲོས་ཁྲག་ཟོར་རྫས་ལ་ཕོག་པ་ཡིསཿ མགར་གྱི་སོ་མལ་ལྕགས་ལས་ཟེར་འཕྲོས་ལྟརཿ དྲེགས་པ་ཕོ་རྒྱུད་ཁྲོ་མོའི་ཕྱག་གཉིས་ཀྱིསཿ ཐོ་བ་ལྕགས་ཀྱུ་རབ་འཛིན་ལུས་ལ་མེཿ འབར་ཞིང་ཁ་ནས་ནད་རླངས་འཚུབས་ཤིང་འཐུལཿ གྲངས་མེད་རི་རབ་བོངས་ཚད་མེ་དཔུང་འབརཿ དེ་ལས་གནམ་ལྕགས་ཐོག་མདའ་ཆར་འབེབས་པཿ དགྲ་བགེགས་ཡུལ་ཀུན་ཁྱབ་པར་སྤྲོས་པ་ཡིསཿ གཟུགས་ཕུང་བླ་ཚེ་རྣམ་ཤེས་ཡུལ་འཁོར་དང་ཿ སྡེ་དཔུང་བཅས་པ་མིང་ཙམ་བརྡ་ཙམ་དང་ཿ ཐ་སྙད་ཙམ་དུ་མི་གྲག་བརླག་པར་གྱུརཿ ཅེས་རྩ་སྔགས་ཤམ་བུར། མ་མ་དྲག་རཀྴ་མ་རུ་རུ་ཏྲ་སྙིང་ཁ་དྲག་ཐུན་བྷྱོ་བྷྱོ་བཟློག་བཟློགཿ ཅེས་བཟླས་ཤིང་ཐུན་བྲབ། དེ་ནས་ཡུངས་ཟོར་ལ་དམིགས་ཏེ། ཐུགས་ཀའི་ཧྲཱིཿལས་འོད་འཕྲོས་ཡུངས་དཀར་ལ། ཕོག་པས་དྲེགས་པ་ཕོ་རྒྱུད་ཁྲོ་བོའི་ཚོགསཿ མཚོན་ཆ་སྣ་ཚོགས་འཛིན་ཅིང་ཉི་ཟེར་གྱིཿ རྡུལ་ཕྲན་ལྟ་བུར་སྟེང་དུ་འཕྲོས་པ་ཡིསཿ རྒྱལ་བ་རྒྱ་མཚོའི་ཚོགས་ཀྱི་ཐུགས་དམ་བསྐངསཿ འོད་འཕྲོས་ངན་སོང་གསུམ་གྱི་སྐྱེ་སྒོ་བཅདཿ དགྲ་བོའི་ཡུལ་སོགས་སྐྱོབ་པའི་ལྷ་དང་ཕྲལཿ གཟུགས་ཕུང་ལ་བརྒྱབ་དོན་སྙིང་དམར་པོ་ཕྱུང་། །ནང་ཁྲོལ་ཡན་ལག་དབང་པོ་ལྔ་པོ་དང་། །རྣམ་པར་ཤེས་པའི་འབེམ་ལ་བརྒྱབ་པ་ཡིས། །ཕྱིན་ཆད་འཁོར་བར་སྐྱེ་བའི་ལམ་བཅད་དེ། །དགྲ་བགེགས་རྗེས་ཤུལ་མེད་པར་བརླག་པར་གྱུར། །རྩ་སྔགས་ཤམ་བུར། ཤིག་ཤིག དུམ་དུམ། ཉིལ་ཉིལ་རྒྱོབ། དུམ་བུ་རུལ་རྦད། དུམ་བུ་ཉལ་རྦད། ཐུམ་རིལ་ཐུམ་རིལ། བྷྱོཿབྷྱོཿ ཐིབས་ཡ་ཐིབས་ཡ་བྷྱོ་བྷྱོཿ ཧུ་ཡ་ཧཱུ་ཡ། སྲོག་སྲོག་བྷྱོ་བྷྱོ། གོང་མ་རྣམས་ཀྱི་དམིགས་པ་དང་བཅས་རྩ་སྔགས་ཤམ་བུར། ཧྲཱིཿཧ་ཡ་གྷྲྀ་ཝ་རཀྴ་རྦད་ཐུན་སོད། པདྨཱནྟ་ཀྲྀཏ་དགྲ་བོའི་སྙིང་ལ་ཐུན། །རྦད་མ་མ་རཀྴ་དགྲ་བོའི་སྙིང་ལ་ཐུན་རྦད། དྲག་མོ་ཚལ་དུན་སྙིང་ལ་ཁས་རྦད། ཀྲོ་ཏ་རཀྴ་དགྲ་བོའི་སྙིང་ལ་རྦད། ཐུན་མ་ར་ཡ་རྦད། ཐུན་རིལ་ཧ་ན་ཧ་ན་བྷྱོཿབྷྱོཿ ཞེས་ཟོར་སོ་སོར་ཐུན་གྱིས་བྲབ། སྤུ་གྲིའི་སྔགས་རིང་མོ་ཡང་མང་དུ་བཟླས་ནས་འཛབ་བསྟོད་བྱ། ཆོས་སྐྱོང་སྤྱི་ལྟར་གྱི་གཏོར་ཆོག་དང་བསྐང་གསོ་སོགས་གང་དགོས་གཏོང་། ཚོགས་བར་པ་ཡན་གཞུང་ལྟར་བཏང་རྗེས་གོང་གི་གཏོར་ཆུང་བརྒྱ་བཅུ་པོ་རྣམས་རིམ་བཞིན་གཙོ་འཁོར་རྣམས་ལ་དབུལ་ལ། ཧྲཱིཿ དམར་ནག་གྲུ་གསུམ་དབང་གི་དཀྱིལ་འཁོར་ནས། །པདྨ་ཉི་ཟླ་བདུད་བསྣོལ་གདན་སྟེང་དུ། །རྣམ་ཤེས་གནས་གྱུར་པདྨ་ཧེ་རུ་ཀ། །ཞེ་སྡང་རྣམ་དག་ཆོས་དབྱིངས་ཡེ་ཤེས་ངང་། །ནམ་མཁའ་གནས་དག་ཡུམ་ཆེན་གར་དབང་མ། །ཡབ་ཡུམ་གཉིས་སུ་མེད་ལ་ཕྱག་འཚལ་བསྟོདཿ ཕྱི་ནང་གསང་བའི་མཆོད་པ་འདི་བཞེས་ལཿ རྨད་བྱུང་རོལ་པའི་དངོས་གྲུབ་སྩལ་དུ་གསོལ། །ཡབ་ཡུམ་ཐབས་ཤེས་གཉིས་མེད་རོལ་པ་ལས། །ཕྱོགས་བཞིའི་འཁོར་ལོར་དྲི་ཟ་གྲུལ་བུམ་དང་། །ཀླུ་དབང་གནོད་སྦྱིན་བཞི་བསྒྱེལ་གདན་སྟེང་དུ། །གཟུགས་ཚོར་འདུ་ཤེས་འདུ་བྱེད་གནས་གྱུར་པ། །རྡོ་རྗེ་རིན་ཆེན་པདྨ་ལས་དབང་ཆེན། །དུག་ལྔ་རྣམ་དག་ཡེ་ཤེས་ལྔ་ཡི་ངང་། །རྒྱུད་དྲུག་ཉོན་མོངས་དུག་རྣམས་འཇོམས་མཛད་པ། །དབང་ཆེན་རིགས་བཞིའི་སྐུ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །ཡབ་ཡུམ་ཐབས་ཤེས་གཉིས་མེད་རོལ་པ་ལས། །ཕྱོགས་བཞིར་སྒོ་ཁྱུད་ཟླ་བའི་གདན་སྟེང་དུ། །ས་ཆུ་མེ་རླུང་རྣམ་དག་སྒོ་མ་བཞི། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །ཚད་མེད་བཞི་ཡིས་ཕྲིན་ལས་རྣམ་བཞི་བསྒྲུབ། །རྒྱུ་དྲུག་ལས་ཉོན་དུག་གསུམ་ཞི་མཛད་མ། །ཕྱག་རྒྱའི་ལྷ་མོ་བཞི་ལ༴ ཕྱི་ནང༴ རྨད་བྱུང༴ ཡབ་ཡུམ་ཐབས་ཤེས་གཉིས་མེད་རོལ་པ་ལསཿ ཞིང་ཁམས་ཐམས་ཅད་དབང་དྲག་གཞལ་ཡས་ཁང་ཿ ཕུང་པོ་ཁམས་དང་སྐྱེ་མཆེད་ཡེ་ཤེས་ལྷཿ སྐུ་ལྔ་ཡེ་ཤེས་ལྔ་ཡི་རང་བཞིན་ཅནཿ ཚད་མེད་བཞི་དང་ཕྲིན་ལས་རྣམ་བཞི་ལྡནཿ ཐུགས་རྗེ་ཁྲོས་པའི་ཁྲོ་ཞལ་རྔམ་པའི་ཞལཿ ཡབ་ཡུམ་གཙོ་འཁོར་བཅུ་ལ་ཕྱག་འཚལ་ལོ། ཕྱི་ནང༴ རྨད་བྱུང༴ སངས་རྒྱས་བསྟན་པ་སྲུང་བའི་ལྕགས་རི་ཆེཿ ལྷ་ཆེན་དབང་ཕྱུག་ཡབ་ཡུམ་སྲས་འཁོར་དང་། །དཔལ་མགོན་བདུད་ཅུ་རྩ་ལྔ་སྤྲུལ་འཁོར་མོས། ཕྱི་ནང༴ རྨད༴ དབང་དྲག་དཀྱིལ་འཁོར་ཕྱི་ཡི་བཀའ་སྲུང་ནི། །སྲོག་ལ་དབང་བསྒྱུར་གིང་ཆེན་རྣམ་ལྔ་ཡང་། །ལས་སུ་སངས་རྒྱས་བསྟན་པ་སྲུང་མཛད་ཅིང་། །ཟས་སུ་དགྲ་བགེགས་ཤ་ཁྲག་ཚོགས་རྣམས་གསོལ། །དམ་ཉམས་དགྲ་བགེགས་ཐལ་བར་རློག་མཛད་པ། །དྲེགས་པ་མཐུ་རྩལ་ཅན་ལ་ཕྱག་འཚལ་ལོ། ཕྱི་ནང༴ རྨད་བྱུང༴ ཕྱོགས་བཞི་བར་སྣང་ནམ་མཁའི་དཀྱིལ་ཡངས་ནས། །དམ་ཅན་བཀའ་སྡོད་གཟའ་གདོང་ལྕམ་དྲལ་ཡང་། །ལས་སུ་སངས་རྒྱས་བསྟན་པ་སྲུང་མཛད་ཅིང་། །ཟས་སུ་དགྲ་བོའི་ལོ་ཏོག་ནར་མར་གསོལ། །དགྲ་བགེགས་ཡུལ་ཁམས་ཐལ་བར་རློག་མཛད་པ། །གཟའ་གདོང་དྲེགས་པ་ཅན་ལ་ཕྱག་འཚལ་ལོ། ཕྱི་ནང༴ རྨད་བྱུང༴ དབང་ཆེན་ཁྲག་འཐུང་དཀྱིལ་འཁོར་ལྷ་ཚོགས་དང་། །བཀའ་སྡོད་ཆོས་སྐྱོང་སྲུང་མའི་ཚོགས་རྣམས་ཀྱིས། །མཐུ་སྟོབས་ནུས་པའི་དཔུང་ཚོགས་རབ་བསྐྱེད་ནས། །བཟློག་ཅིང་བསྒྱུར་བའི་ཕྲིན་ལས་དུས་ལ་བབ། །བདག་ཅག་དཔོན་སློབ་ཡོན་མཆོད་འཁོར་བཅས་ལ། །ཕ་རོལ་བན་བོན་སྔགས་པའི་མཐུ་བྱད་དང་། །སྣང་སྲིད་ལྷ་འདྲེའི་གནོད་འཚེ་ཟ་ཁ་ཟུག །དུས་མིན་འཆི་དང་ནད་གདོན་ཀེག་ངན་སྲི། །མི་ཁ་བྲ་མཆུ་དུག་མཚོན་གཡུལ་གཤོམ་སོགས། །ཆག་ཆེ་ཉམ་ང་བར་ཆད་མ་ལུས་པ། །བྱད་མ་མཁན་དང་ལོག་འདྲེན་དགྲ་བགེགས་ཀྱི། །སྟེང་དུ་བཟློག་ཅིང་བསྒྱུར་བའི་ཕྲིན་ལས་མཛོད། །འཇིགས་བརྒྱད་ཞི་ཞིང་འབྱོར་དྲུག་འཕེལ་བ་དང་། །མོས་བཞི་དབང་སྡུད་གནོད་བྱེད་མ་ལུས་པ། །བསད་བསྐྲད་རེངས་རྨོངས་སོགས་ཀྱིས་ཚར་བཅད་ནས། །ཕྲིན་ལས་རྣམ་བཞི་མ་ལུས་སྒྲུབ་པར་མཛོད། །ཅེས་ཕྲིན་ལས་བཅོལ་ལོ། ཚོགས་ཐ་མའི་གོང་དུ་ལྷ་ཚོགས་བསྐུལ་བ་ནི། ཧཱུཾཿ མི་གནས་ཡེ་ཤེས་ཆོས་སྐུའི་ཕོ་བྲང་ནས། །ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ། །ཁྱད་པར་དབང་ཆེན་རྟ་མགྲིན་གཙོ་འཁོར་རྣམས། །ཐུགས་དམ་བསྐུལ་ལོ་འགྲོ་བའི་དོན་ལ་དགོངས། །རིག་པའི་རང་བཞིན་བདེ་གཤེགས་སྙིང་པོ་ཡང་། །མ་རིག་འཛིན་པའི་ཀུན་གཞི་ལུང་མ་བསྟན། །སྒོ་ལྔའི་ཡུལ་དང་རྟེན་ཅིང་འབྲེལ་བ་ལས། །རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས། །ལས་དང་ཉོན་མོངས་མཐུ་ཡིས་གཟིར་བའི་མཐུ། །ཕྱི་རོལ་ཡུལ་ལ་སྨིན་པའི་སྡུག་བསྔལ་དང་། །ནད་མཚོན་མུ་གེ་དགྲ་བགེགས་འབྱུང་པོའི་གདོན། །འཇིགས་པ་ཆེན་པོ་བརྒྱད་དང་བཅུ་དྲུག་ཀུན། །མངོན་སྤྱོད་དྲག་པོའི་རོལ་པས་ཚར་བཅད་ནས། །ལོག་རྟོག་དངོས་པོར་ཞེན་པའི་སེམས་ཅན་རྣམས། །རྒྱུ་འབྲས་ཐེག་པ་གཞན་གྱིས་གདུལ་དཀའ་བས། །རང་བྱུང་ཡེ་ཤེས་རྟོགས་པའི་ཕྲིན་ལས་མཛོད། །སྒྲུབ་ཐབས་སྦས་པ་མིག་འབྱེད་ཀྱི་ཞལ་ཁྲིགས་ནི། ཛཿང་དཔལ་ཁྲག་འཐུང་ཧེ་རུ་ཀ། །དབང་ཆེན་རིགས་བཞིའི་འཁོར་དང་བཅས། །འཇིག་རྟེན་ཐམས་ཅད་བསྒྲལ་བའི་ཞིང་། །བཟའ་བཏུང་ཐམས་ཅད་ཤ་ཁྲག་ཚོགས། །གཟུགས་སྣང་ཐམས་ཅད་ཁྲོ་བོའི་སྐུ། །དབང་ཆེན་ཐུགས་ཀྱི་དཀྱིལ་འཁོར་ནས། །ཁྲོ་བོ་སྣ་ཚོགས་སྟོང་གསུམ་བཀང་། །གནམ་ལྕགས་ཐོག་གི་རལ་པ་ཅན། །སྤྱན་མིག་ཉི་ཟླ་མེ་ཆུ་འབརཿ ཤངས་ནས་ནད་དང་རླུང་འཚུབ་འགྱེདཿ ཞལ་ནས་གནམ་ལྕགས་ཞུན་མ་འཐོརཿ མཚོན་ཆ་སྣ་ཚོགས་བ་སྤུ་ཅནཿ ལྕགས་ཀྱུས་འཛིན་ཅིང་ཞགས་པས་འཆིངཿ ཡིད་ལ་བརྣག་པའི་དགྲ་བགེགས་ཀྱིཿ ལུས་སྲོག་འཚོ་བའི་ལྷ་དང་ཕྲོལཿ དཔག་ཚད་ཙམ་ནས་སྡེབས་སུ་ཆུགཿ འདོམ་གང་ཙམ་ནས་མྱོས་སུ་ཆུགཿ རིངས་པར་ཁུག་ལ་མྱུར་དུ་སྒྲོལཿ རྣམ་ཤེས་དབང་པོ་རྟེན་དང་ཕྲོལཿ པགས་པ་བཤུས་ལ་ནང་ཁྲོལ་ཐོབཿ མགོ་དང་ཡན་ལག་བྲེགས་ལ་ཤོགཿ གློ་སྙིང་ཕྱུངས་ལ་ལྷུ་གཟུགས་ཕྲོལཿ ཤ་ཟོས་ཁྲག་འཐུང་རུས་པ་འཆོསཿ བདུན་རྒྱུད་རྩ་བ་ཆོད་ལ་ཤོགཿ མིང་ཡང་མེད་པར་བརླག་པར་གྱིསཿ བྱང་ཆུབ་སེམས་ནི་མ་སྐྱེས་ནཿ ཡུན་དུ་ནམ་ཡང་བཏགས་མི་བྱཿ བྱང་སེམས་སྐྱེས་ན་བཏང་བར་བྱཿ ཧྲཱིཿ རྒྱུད་ཀྱི་ལེའུ་བཅུ་གཉིས་པ་ལས་བྱུང་བ། རང་བཞིན་ཆོས་ཀྱི་སྐུ་ལས་རང་བྱུང་བཿ དམར་ནག་གྲུ་གསུམ་དབང་གི་དཀྱིལ་འཁོར་ནསཿ པདྨ་འཁྱིལ་པ་དབང་ཆེན་ཁྲོ་བོའི་སྐུཿ ཐུགས་རྗེས་ཐབས་ཀྱི་སྤྲུལ་སྐུ་བཞེས་སུ་གསོལཿ བདུད་ཕོ་བདུད་མོ་སྤྱི་ཆིངས་བསྣོལ་བའི་སྟེང་ཿ ཆགས་མེད་པདྨ་ཉི་ཟླའི་གདན་སྟེང་ནཿ དུས་གསུམ་དབང་བསྒྱུར་ཡེ་ཤེས་ལྷ་ཡི་ལྷཿ དབང་ཆེན་ཁྲག་འཐུང་ཧ་ཡ་གྷྲྀ་ཝའི་སྐུཿ སྐུ་མདོག་དམར་ནག་དབུ་གསུམ་ཕྱག་དྲུག་པཿ ཞབས་བཞི་བརྐྱང་བསྐུམ་འགྱིང་རྔམ་བརྗིད་པའི་སྐུཿ སྤྱན་གསུམ་ཞལ་བགྲད་དབང་གི་མཆེ་བ་གཙིགསཿ སྨིན་མ་སྨ་ར་ཨག་ཚོམ་མེ་ལྟར་འབརཿ དབུ་སྐྲ་ཁམ་ནག་རལ་པ་གྱེན་དུ་འཁྱིལཿ སྤྱི་གཙུག་རྟ་མགོ་ལྗང་གུ་ཟིལ་གནོན་རྔམཿ རྔོག་མ་དམར་པོ་དབང་གི་རྟ་སྐད་འཚེརཿ གཡས་དཀར་གཡོན་ལྗང་དབུས་དམར་རྔམ་སྒྲ་སྒྲོག །སྐུ་སྟོད་ཞིང་ཆེན་གཡང་གཞི་གླང་ཆེན་ཀོ་རློན་གསོལ། །སྐུ་སྨད་སྟག་གི་ཤམ་ཐབས་བདུད་དཔུང་འདུལ༑ །ཐོད་རློན་ཚར་གསུམ་ཕྲེང་བ་རྒྱན་དུ་བྱས། །སྦྲུལ་རིགས་བཞི་ཡིས་སྐུ་བརྒྱད་ཕྱག་ཞབས་སྤྲས། །དང་པོ་པདྨ་བྷནྡྷས་དབང་དུ་སྡུད། །བར་པ་ལྕགས་ཀྱུ་ཞགས་པས་དམིགས་པ་འགུགས། །ཐ་མ་བེ་ཅོན་རལ་གྲིས་དགྲ་བགེགས་སྒྲོལ། །དབང་དྲག་མེ་དཔུང་ཀློང་དཀྱིལ་རིན་ཆེན་སྤྲས། །སྐུ་ལ་དུར་ཁྲོད་ཆས་བརྒྱན་རྫོགས་པར་ལྡན། །དབང་ཆེན་གདུག་པའི་སྤྱན་རྩ་ལྡོག་པ་ཡིས། །སྣང་སྲིད་དྲེགས་པ་ཐམས་ཅད་དབང་དུ་སྡུས། །ཤངས་ནས་རླུང་ནག་འཚུབ་པའི་བསྐལ་པ་འབྱུང་། །སྣང་སྲིད་ཀུན་འདར་མཐུ་ཆེན་དྲག་རྩལ་འདུལ། །སྙན་ནས་བསྐལ་པའི་འབྲུག་སྟོང་ལྡིར་བ་ཡིས། །སྲིད་པའི་ཆེ་བཙན་ཐམས་ཅད་ཟིལ་གྱིས་གནོན། །ཚེམས་ལས་དྲག་པོའི་ཐོག་ཆེན་ཕབ་པ་ཡིས། །སྡང་དགྲ་གནོད་བགེགས་ཐལ་བ་རྡུལ་དུ་རློགས། །ཞལ་ནས་རཀྟའི་རྒྱ་མཚོ་འཁྲུག་ཅིང་འཁྱིལ། །བསྟན་པ་བཤིག་པའི་དགྲ་ལ་སྐྱིན་ཐང་ཕོབས། །ཁྲོ་རྒྱལ་དབང་གི་རྟ་སྐད་འཚེར་རེ་རེ། །ཐུགས་རྗེ་དབང་ཆེན་ཆེ་བཙན་དབང་དུ་སྡུད། །པདྨ་དབང་ཆེན་ཁྲག་འཐུང་མི་བཟད་པ། །ཁྱོད་ཀྱི་དབང་དྲག་ཕྲིན་ལས་དུས་ལ་བབ། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། ཧྲཱིཿ ཁྲོ་རྒྱལ་དབང་ཆེན་སྐུ་ཡི་གཡོན་ཕྱོགས་ན། །ཁྲོ་མོ་པདྨ་གར་གྱི་དབང་ཕྱུག་མ། །སྐུ་མདོག་མཐིང་ནག་ཞལ་གཅིག་ཕྱག་གཉིས་མ། །སྤྱན་གསུམ་ཞལ་བགྲད་དབང་གི་མཆེ་བ་གཙིགས། །དབུ་སྐྲ་རལ་པ་ནག་པོ་མུན་ལྟར་གཏིབས། །སྐུ་ལ་དུར་ཁྲོད་ཆས་བརྒྱད་ལེགས་པར་བརྒྱན། །ཕྱག་གཡས་རྡོ་རྗེ་ཐོགས་ནས་ཡབ་ལ་འཁྱུད། །ཕྱག་གཡོན་དུང་ཆེན་དམར་འཁྱིལ་གཙོ་ལ་སྟོབ། །ཁྲོ་མོ་ཀུན་གྱི་དབང་ཕྱུག་ཆེན་མོ་ཁྱོད། །རྔམ་པའི་ང་རོས་ཐམས་ཅད་ཟིལ་གྱིས་གནོན། །སྤྱན་ནས་ཁྲག་འཛག་ཞལ་ནས་མི་རོ་འབྲུལ། །སྙན་ནས་འབྲུག་སྒྲོག་ཤངས་ནས་རླུང་ནག་འཚུབསཿ ཁྱོད་ཀྱི་དབང་དྲག་ཕྲིན་ལས་དུས་ལ་བབ། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལསཿ ཐབས་ཀྱིས་སྤྲུལ་པ་དབང་ཆེན་ཁྲོ་བོའི་སྐུ། །ཤར་ཕྱོགས་འཁོར་ལོ་འབར་བའི་རྩིབས་སྟེང་ནས། །དྲི་ཟ་ཕོ་མོ་བསྣོལ་བའི་གདན་སྟེང་ན། །རྡོ་རྗེ་དབང་ཆེན་དཀར་པོ་ཁྲོ་བོའི་སྐུ། །ཞལ་གཅིག་ཕྱག་གཉིས་དུར་ཁྲོད་ཆས་བརྒྱད་རྫོགས། །སྤྱན་གསུམ་ཞལ་བགྲད་མཆེ་གཙིགས་མི་རོ་ཟ། །དབུ་སྐྲ་ཁམ་ནག་གྱེན་བསྒྲེངས་སྦྲུལ་གྱིས་བཅིངས་༑༑༑༑༑༑༑༑༑༑བར་བྱེད། །མི་དཔུང་ཀློང་ནས་འགྱི་༑༑༑༑སྟོང་གསུམ་ཁྱབ་པར་བྱེད། །ཁྱེད་ཀྱི་༑༑༑༑༑༑༑ཐབས་དང་ཤེས་རབ་རོལ་པ་ལས། ༑༑༑༑༑།གྲུལ་བུམ་ཕོ་མོ་བསྣོལ་བའི་གདན་༑༑༑༑༑༑༑ཆས་བརྒྱད་རྫོགསཿ སྤྱན་གསུམ་ཞལ་༑༑༑༑༑ཕྱག་གཡས་པདྨས་ཆེ་བཙན་དབང་དུ་༑༑༑༑༑༑གར་སྟབས་ཚུལ་དུ། །རྔམས་པའི་༑༑༑༑དབང་དྲག་ཕྲིན་ལས་དུས་ལ་བབ། །སྡ༑༑༑༑༑༑ཐུགས་ཀྱི་སྤྲུལ་པའི་དབང་ཆེན་ཁྲོ་བོའི་༑༑༑༑༑༑བའི་གདན་སྟེང་ན། །ཕྲིན་ལས་དབང་ཆེ༑༑༑༑༑གསུམ་ཞལ་བགྲད་མཆེ་གཙིགས་མི་྅྅྅ལྡེབ་༡༡པ་ཕྱེད་ཀ་ལས་མེད་ཆད་འདུག། །རལ་གྲིས་རྩ་དང་སྲོག་གཟུགས་གཅོད། །ཕྱག་གཡོན་ཁ་ཊྭཱཾ་རྩེ་གསུམ་དུག་གསུམ་སྒྲོལཿ མེ་དཔུང་ཀློང་ནས་འགྱིང་གར་སྟབས་ཚུལ་དུ། །རྔམས་པའི་ང་རོ་འབྲུག་སྟོང་ལྡི་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། །ཁྱོད་ཀྱི་དབང་དྲག་ཕྲིན་ལས་དུས་ལ་བབ། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། ཧྲཱིཿ ཤར་ཕྱོགས་དུང་གི་སྒོ་ཁྱུད་ལ། །བུད་མེད་ནག་མོ་འཇིགས་ཚུལ་ཅན། །ཁྲག་གི་རལ་བ་ཤ་ར་ར། །ཕྱག་ན་ལྕགས་ཀྱུ་དགྲ་སྙིང་འབྱིན། །རིངས་པར་ཁུག་ཅིག་ཨཾ་ཀུ་ཤ། །ལྷོ་ཕྱོགས་གསེར་གྱི་སྒོ་ཁྱུད་ལ། །སེར་མོ་ནག་མོ་འཇིགས་ཚུལ་ཅན། །གཡུ་ཡི་རལ་བ་ཤ་ར་ར། །ཕྱག་ན་ཞགས་པ་བླ་ཚེ་འགུགས། །ཆིངས་ཤིག་སྡོམས་ཤིག་པཱ་ཤ་ཧྲཱིཿ ནུབ་ཕྱོགས་ཟངས་ཀྱི་སྒོ་ཁྱུད་ལ། །བུད་མེད་དམར་མོ་འཇིགས་ཚུལ་ཅན། །མཐིང་གི་རལ་བ་ཤ་ར་ར། །ཕྱག་ན་ལྕགས་སྒྲོག་ཚེ་སྲོག་བསྟིམ། །རྟེན་ལ་སྟིམས་ཤིག་སྥོ་ཊ་བཾ། །བྱང་ཕྱོགས་གཡུ་ཡི་སྒོ་ཁྱུད་ལ། །བུད་མེད་སྔོན་མོ་འཇིགས་ཚུལ་ཅན། །གསེར་གྱི་རལ་བ་ཤ་ར་ར། ཕྱག་ན་དྲིལ་བུས་བརྒྱལ་བར་བྱེད། །མྱོས་པར་གྱིས་ཤིག་གྷཎྜེ་ཧོ། །ལྷ་ཆེན་དབང་ཕྱུག་ཆེན་པོ་ཡབ་ཡུམ་སྲས། །དཔལ་མགོན་བདུན་ཅུ་རྩ་ལྔ་སྤྲུལ་འཁོར་བཅས། །ཐུགས་དམ་བསྐུལ་ལོ་དབྱིངས་ནས་བཞེངས་མཛོད་ལ། །དམ་ཉམས་དགྲ་བགེགས་བསྒྲལ་བའི་ཕྲིན་ལས་མཛོད། །ཧྲཱིཿ བཅོམ་ལྡན་པདྨ་ཧེ་རུ་ཀའི། །དབང་ཆེན་ཐུགས་ཀྱི་སྤྲུལ་པ་ནི། །སྲོག་བདག་འོད་ཀྱི་རྒྱལ་པོ་བྱུང་། །སྐྱེས་མཆོག་འོད་ཀྱི་མི་བོ་ཆེ། །སྐུ་ལ་སེང་གེའི་སློག་པ་གསོལ། །དབུ་ལ་ཇེ་ལེ་དཀར་པོ་བཅིངས། །ནམ་མཁའ་འཇའ་ཡི་སྐ་རགས་ཅན། །ལྕགས་ཀྱི་སྡེར་མོས་དགྲ་སྙིང་འབྱིན། །གཡས་པ་རལ་གྲིས་དགྲ་སྲོག་གཅོད། །གཡོན་པ་འོད་ཀྱི་ཞགས་པ་འཕེན། །དགྲ་བོའི་ཚེ་སྲོག་དོན་སྙིང་ཕྱུངས། །དྲག་ཏུ་བསྐུལ་ལོ་དགྲ་སྲོག་ཆོད། །ཤར་གྱི་དཀར་པོ་དམ་ཚིག་ཅན། །རྟ་རུ་དཀར་པོ་ངང་རིང་ཞོན། །སྐུ་ལ་དར་དཀར་རལ་ག་གསོལ། །དབུ་ལ་དུང་གི་ཅོད་པཎ་ཅན། །ཕྱག་ན་ཤེལ་གྱི་ཟངས་གྲི་ཐོགས། །ཕྱག་གཡོན་ཞགས་པ་དགྲ་ལ་འདེབས། །ཚངས་པ་དུང་གི་ཐོར་ཚུགས་ཅན། །དགྲ་བོའི་ལྷ་ཕྲོལ་ཁོང་སྙིང་ཕྱུངས། །ལྷོ་ཡི་དགེ་བསྙེན་དམ་ཚིག་ཅན། །སྐུ་ལ་ཟ་འོག་སྔོ་ཁྲ་གསོལ། །དབུ་ལ་བསེ་མེན་འགྱིང་ཐོད་བཅིངས། །རྟ་ནི་ཁམ་པ་ལག་དཀར་ཞོན། །གཡས་ན་བསེ་ཡི་རྡོ་རྗེ་ཐོགས། །གཡོན་པས་ཙིཏྟ་དམར་པོ་ཐོགས། །གྱིང་ཆེན་རྡོ་རྗེ་གཤོག་རྒོད་རྩལཿ དགྲ་བོའི་སྙིང་ཕྱུངས་སྲོག་རྩ་ཆོདཿ ནུབ་ཀྱི་བདུད་ནག་དམ་ཚིག་ཅནཿ སྐུ་ལ་ལྕགས་ཀྱི་ཞུན་ཁྲབ་གསོལཿ དབུ་ལ་བདུད་ཞྭ་ལྡིང་ནག་གསོལཿ ཆིབས་སུ་བདུད་རྟ་ནག་པོ་བཅིབསཿ ཕྱག་གཡས་བདུད་ཀྱི་ཁྲམ་ཤིང་བསྣམསཿ ཕྱག་གཡོན་ཞགས་པ་ནག་པོ་འདེབསཿ ནག་པོ་གསོད་བྱེད་བདུད་ཀྱི་བུཿ དགྲ་བོའི་ཚེ་སྲོག་ཁྲམ་ལ་ཐོབཿ བྱང་གི་སྲོག་བདག་དམ་ཚིག་ཅནཿ སྐུ་ལ་བསེ་ཁྲབ་དམར་པོ་གསོལཿ དབུ་ལ་བསེ་རྨོག་ཟངས་རིང་གསོལཿ ཆིབས་སུ་བསེ་ཡི་ར་སྐྱེས་བཅིབསཿ ཕྱག་གཡས་ཟངས་ཀྱི་གྲི་རིང་བསྣམསཿ གཡོན་པས་ཞགས་པ་དགྲ་ལ་འདེབསཿ བསོ་ཏོ་སྲོག་གཅོད་ལག་དམར་གྱིསཿ དགྲ་བོའི་མདངས་ཕྲོགས་སྲོག་རྩ་ཆོདཿ དམ་ཉམས་མ་བཏང་ཤོར་ར་རེཿ ཧྲཱིཿ པདྨ་རྒྱལ་པོ་རྟ་ཆོག་དཔལཿ ཁྲོ་རྒྱལ་ཁྲག་འཐུང་ཧེ་རུ་ཀཿ ཐུགས་ཀྱི་སྤྲུལ་པ་མི་བཟད་པཿ སྐྱིན་ཐང་ཆུ་འཁྱགས་མངའ་བདག་ཁྱོད། །ཁྱབ་མཇུག་ཆེན་པོ་རཱ་ཧུ་ལ། །བྱིརྣ་པེ་ཏ་སྒྲ་གཅན་འཛིནཿ དྲང་སྲོང་ཆེན་པོ་ཀུན་ཏུ་རྒྱུ། །གཟའ་རྒོད་དྲག་པོ་སྐྱིན་ཐང་བདག །དུད་ཁ་མགོ་དགུ་མིག་གིས་ཁེངས། །རོ་སྨད་སྦྲུལ་གྱིས་རྒྱ་མཚོ་འཁྲུག །ཕྱག་གཡས་སྐྱིན་ཐང་འཁོར་ལོ་བསྣམས། །ཕྱག་གཡོན་ཆུ་སྲིན་ཞགས་པ་འཕེན། །དགྲ་ཡུལ་ལོ་ཏོག་རྡུལ་དུ་རློགས། ཧྲཱིཿ ཕྱོགས་བཞི་ནམ་མཁའི་དཀྱིལ་ཡངས་ནས༑ ངན་སྔགས་བདག་མོ་སྐྱིན་ཐང་ཕོབས། །ཤར་གྱི་སྟག་སྲིན་ཟོར་བ་གདོང་། །ལྷོ་ཡི་བམ་སྲིན་དྲེད་མོ་གདོང་། །ནུབ་ཀྱི་ཀོང་སྲིན་བ་ལང་གདོང་། །བྱང་གི་འབྲོག་སྲིན་ཆུ་སྲིན་གདོང་། །ངན་སྔགས་བདག་པོ་བཞི་པོ་ནི། །གཡས་པ་ཟོར་བ་གཡོན་ནད་རྐྱལ། །སྐྱིན་ཐང་ཆུ་རྒོད་མངའ་བདག་མོ། །དགྲ་བོའི་ལོ་ཏོག་སྣར་མ་ལ། །ཆུ་རྒོད་འཁྱགས་པའི་སྐྱིན་ཐང་ཕོབས། །དགྲ་ཡུལ་ཐལ་བ་རྡུལ་དུ་རློགས། །གནོད་སྦྱིན་བག་ཙེ་རིག་པའི་ལྷ་མོ་དང་། །སྒྲོལ་གྱི་སྲོག་བདག་གྲི་ཐོགས་ཤན་པ་བརྒྱད། །རོ་བཤན་ཉེར་གཅིག་བདུད་ནག་གནོད་སྦྱིན་དང་། །བཙན་དམག་ཕོ་ཉ་འཁོར་ཚོགས་རྒྱ་མཚོ་ཡིས། །རྦོད་གཏོང་ཆག་ཆེ་བར་ཆད་མ་ལུས་པ། །རང་གཤེད་རང་ལ་ཕབ་སྟེ་དགྲ་བགེགས་ཀྱི། །སྙིང་ཁྲག་ཧུབ་འཐུང་སྲོག་རྩ་དམར་པོ་ཆོད། །ཐལ་བའི་རྡུལ་དུ་རློག་པའི་ཕྲིན་ལས་མཛོད། །ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ༀ་མ་ཧཱ་ཀྲོ་དྷི་ཤྭ་རི་ཧཱུཾ་ཕཊཿ ༀ་བཛྲ་ཀྲོ་དྷ་ཀ་ཤྭ་ར་ཧཱུཾ་ཕཊཿ ༀ་རཏྣ་ཀྲོ་དྷ་ཀ་ཤྭ་ར་ཧཱུཾ་ཕཊཿ ༀ་པདྨ་ཀྲོ་དྷ་ཀ་ཤྭ་ར་ཧཱུཾ་ཕཊཿ ༀ་ཀརྨ་ཀྲོ་དྷ་ཀ་ཤྭ་ར་ཧཱུཾ་ཕཊཿ ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཡ་ཧཱུཾཿ ༀ་བཛྲ་སྥོ་ཊ་བཾ། ༀ་བཛྲ་གྷཎྜེ་ཧོ། ཀིངྐ་ར། ར་ཧུ་ལ། ར་ཧུ་ལ། རཀྨོ་པྲ་ན། ཨཪྱ་ན། ས་པཱ་རི་ཝ་རེ་ཎ། མཐུ་བྱད་རྦོད་གཏོང་སྡེ་བརྒྱད་ཀྱི་གནོད་པ། ནད་གདོན། ཆག་ཆེ། ཉམ་ང་། བར་གཅོད་ཐམས་ཅད་དགྲ་བགེགས་ཀྱི་སྟེང་དུ་བྷྱོ་བྷྱོ་བཟློག་བཟློག །གསེར་སྐྱེམས་ནི། རཾ་ཡཾ་ཁཾ། གསེར་སྐྱེམས་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུཾ། རིག་འཛིན་རྩ་བརྒྱུད་བླ་མ་དམ་པ་དང་། །བདེ་གཤེགས་ཀུན་འདུས་ཞི་ཁྲོ་རབ་འབྱམས་ལྷ། །ཁྱད་པར་ཁམས་གསུམ་ཟིལ་གནོན་ལྷ་ཚོགས་རྣམས། །གསེར་སྐྱེམས་འདི་བཞེས་རྣལ་འབྱོར་སྟོངས་གྲོགས་མཛོད། །མ་མགོན་ལྕམ་དྲལ་ཚེ་རིང་མཆེད་ལྔ་དང་། །དྲེགས་པའི་སྡེ་དཔོན་སུམ་ཅུ་ཡབ་ཡུམ་སྲས། །བཀའ་ཉན་བྲན་གཡོག་མངག་གཞུག་བཅས་པ་རྣམས། གསེར༴ སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་ཡི་ཡུལ་གཞི་གནས་ཀྱི་བདག །ལོ་ཟླ་ཞག་དུས་ཚེས་ལ་དབང་བའི་ལྷ། །གསེར་སྐྱེམས༴ མཆོག་གསུམ་ངོ་བོ་དཔལ་མགོན་བླ་མ་དང་། །རྒྱུད་སྡེ་རྒྱ་མཚོ་གནས་གསུམ་མཁའ་འགྲོ་ལྷ། །མ་མགོན་གཟའ་རྡོར་མཆེད་ལྔ་ལ། །མཆོད་གསོལ་བསྟོད་དོ་བསམ་དོན་ལྷུན་གྲུབ་སྩོལཿ གཟུ་དཔང་ནིཿ ཧཱུཾཿ ཁྱབ་བདག་གདོད་མའི་མགོན་པོ་ནས་བཟུང་སྟེཿ མངོན་པར་བྱང་ཆུབ་དཔལ་མགོན་བླ་མའི་བརཿ དགོངས་བརྡ་སྙན་བརྒྱུད་རྡོ་རྗེ་སློབ་དཔོན་དང་ཿ པདྨ་དབང་ཆེན་ལྷ་ཚོགས་གཟུ་དང་དཔང་ཿ འགྲོ་ཀུན་བདེ་གཤེགས་སྙིང་པོའི་རང་བཞིན་ལཿ དགྲ་གཉེན་ཕྱོགས་ཆའི་སྡང་ཞེན་མི་དམིགས་ཀྱང་ཿ གཟུང་འཛིན་གདོན་གྱིས་བརྫིས་པའི་ཉམས་པ་བདུནཿ བྱང་ཆུབ་སེམས་གཉིས་བསྒོམ་པའི་དགྲ་རུ་ལངསཿ དམ་ལས་ཉམས་པས་སློབ་དཔོན་མཆེད་ལ་བརྙསཿ བཀའ་ལས་ཉམས་པས་ལས་འབྲས་ཁྱད་དུ་བསདཿ དོན་ལས་ཉམས་པས་ཆོས་ལ་ཕྱོགས་རིས་བཟུང་ཿ འདོད་པས་ཉམས་པས་ཁྲེལ་མེད་འཕྲོག་བཅོམ་བྱེདཿ ལོག་པས་ཉམས་པས་སེམས་ཅན་སྡུག་ལ་སྦྱོརཿ འདི་ལ་མངོན་སྤྱོད་ཕྲིན་ལས་མི་མཛད་ནཿ མཐར་གྱི་འཆི་བ་སེམས་ཅན་ཀུན་ལ་ཡོདཿ དུས་ལ་བབ་ན་དཔག་བསམ་ཤིང་ཡང་འགྱེལཿ བསམ་སྦྱོར་ངན་པའི་འབྲས་བུ་མཐར་ཕྱིན་ནཿ ཚར་གཅོད་རྗེས་འཛིན་མཐུ་སྟོབས་རྫུན་དུ་ཟདཿ ཆོས་ཉིད་བདེན་པ་བསླུ་བ་མེད་པ་དང་ཿ སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུཿ ཨ་བྷི་ཙཪྱའི་དུས་ལ་ད་བབ་ནཿ བརྣག་པའི་ལས་ལ་བཏང་སྙོམས་མ་མཛད་ཅིགཿ དུས་གསུམ་སངས་རྒྱས་རྣམས་ནི་དབྱིངས་ནས་གཟིགསཿ བདེན་གཉིས་རྒྱུ་འབྲས་བསླུ་མེད་གཟུ་དང་དཔང་ཿ དཔལ་མགོན་ཆོས་སྐྱོང་རྣམས་ཀྱིས་མཐུ་རྩལ་སྐྱེདཿ ཉེས་ཅན་འདི་ལ་མངོན་སྤྱོད་ཕྲིན་ལས་མཛོདཿ བྲུབ་ཁུང་བསྐྱེད་པ་ནི། ཨེ་ལས་ཆོས་འབྱུང་གཏིང་ཟབ་སོགས། སྤྲོས་ཏེ་འགུགས་པའི་ལས་མཛད་གྱུརཿ ན་མོ་མཆོག་གསུམ་རྩ་གསུམ་རིག་འཛིན་བརྒྱུད་པ་དགུ་ལྡན་གྱི་བླ་མ་དམ་པ་རྣམས་ཀྱི་བཀའ་བདེན་པ་དང་། ཡི་དམ་ཆེན་པོ་རྒྱུད་སྡེ་བཞི་དྲུག་ཐེག་པ་རིམ་པ་དགུའི་དཀྱིལ་འཁོར་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པ་རྣམས་ཀྱི༴ ལྷ་ལས་ཁྱད་པར་དུ་ཡང་བཅོམ་ལྡན་འདས་པདྨ་དབང་ཆེན་ཁྲོས་པ་ཁམས་གསུམ་ཟིལ་གནོན་གྱི་ལྷ་ཚོགས་འཁོར་དང་བཅས༴ གནས་གསུམ་སྐྱོང་བའི་དཔའ་བོ་མཁའ་འགྲོ་ཆོས་སྐྱོང་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ༴ ཆོས་ཉིད་འགྱུར་བ་མེད་པའི་བདེན་པ༴ ཆོས་ཅན་རྒྱུ་འབྲས་བསླུ་བ་མེད་པའི༴ བདེན་པ་ཆེན་པོའི་མཐུ་སྟོབས་ནུས་པའི་བྱིན་རླབས་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་དུ་ཡང་རྣལ་འབྱོར་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་དམ་ཉམས་དགྲ་བོ་ཉམས་པ་བདུན་དང་བསྒྲལ་བའི་ཞིང་བཅུ་ཚང་བའི་རིགས་རྣམས་དང་། གཟུགས་མེད་འབྱུང་པོའི་ལུས་སྲོག་ཚེ་བསོད་སྟོབས་འབྱོར་ཁ་རྗེ་དབང་ཐང་ལ་བར་དུ་གཅོད་པའི་རིགས་ཐམས་ཅད་སྐད་ཅིག་ཐང་ཅིག་ཡུད་ཙམ་ལ་མཚན་མ་རྫས་ཀྱི་རྟེན་ལིང་ག་འདི་ལ་ཁུག་ཅིག རྩ་སྔགས་དང་བཅས། ནྲྀ་ཏྲི་བཛྲ་ཨ་ཀཪྵ་ཡ་ཛཿ ལན་བརྒྱའམ་ཅི་རིགས་བརྗོད་པས་བཀུག་ལ། བསྡུས་པར་འདོད་ན། ན་མོ། དཀོན་མཆོག་གསུམ་དང་རྩ་གསུམ་ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་ཡང་པདྨ་དབང་ཆེན་ཁམས་གསུམ་ཟིལ་གནོན་གྱི་ལྷ་ཚོགས་འཁོར་དང་བཅས་པ་རྣམས་ཀྱི༴ ཆོས་ཉིད་འགྱུར་བ་མེད་པའི༴ ཆོས་ཅན་རྒྱུ་འབྲས་བསླུ་བ་མེད་པའི་བདེན་པའི་མཐུ་ལ་བརྟེན་ནས་གནོད་བྱེད་དགྲ་བགེགས་ལོག་པར་འདྲེན་པ་ཐམས་ཅད་གཟུགས་ལིངྒ་འདི་ལ་མྱུར་དུ་ཁུག་ཅིག །ལན་མང་དུ་ལྡབ་མཐར་རྩ་སྔགས་སྦྱར། ཛཿཧཱུཾ་བཾ་ཧོ། པྲ་ཝེ་ཤ་ཡ་ཕཊ། ཨ་ཝེ་ཤ་ཡ་ཨ། ལན་གསུམ་བརྗོད་མཐར་ཕོ་ཉ་འགྱེད་པ་ནི། ཧྲཱིཿཧཱུཾ་བྷྱོཿ དམ་ཚིག་ཆེན་པོའི་དུས་ལ་བབ། སོགས་ནས། མ་ཧཱ་ཀོ་རོ་ཙ་ན་ལ་ཁཱ་ཧི། ཡན་གཞུང་བཞིན་གྲུབ་པར་བགྱིས་ནས། བསྐང་བ་བྱ་བ་ནི། ཧྲཱིཿབཛྲ་ཀྲོ་དྷས་བསངས། སྭ་བྷཱ་ཝས་སྦྱངས། བྷྲུཾཿལས་གནས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཆུ་གཉིས་ཉེར་སྤྱོད་འདོད་ཡོན་སྲོག་ཆགས་གོ་མཚོན་སོགས་ཕྱི་ནང་གསང་བའི་སྤྱན་གཟིགས་བསམ་གྱིས་མི་ཁྱབ་པ་རྩ་བ་གསུམ་གྱི་ལྷ་ཚོགས་སྤྱིི་དང་ཁྱད་པར་པདྨ་དབང་ཆེན་ཁམས་གསུམ་ཟིལ་གནོན་དཀྱིལ་འཁོར་གྱི་ལྷ་ཚོགས་སྲུང་མ་དམ་ཅན་རྒྱ་མཚོའི་ཚོགས་རྣམས་ཀྱི་ཐུགས་དམ་མ་ལུས་པར་སྐོང་བར་ནུས་པའི་བྱེད་ལས་ཁྱད་པར་ཅན་དང་ལྡན་པར་གྱུར། ༀ་སརྦ་བིད་སྡུ་ར་སྡུ་ར། སུ་ར་སུ་ར། ཨ་ཝརྟ་ཡ་ཨ་ཝརྟ་ཡ་ཧོ། བཛྲ་སྥ་ར་ཎ་ཁཾ་སྭཱ་ཧཱ། ཞེས་དང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས། ཧྲཱིཿ སྐྱེ་མེད་ཆོས་སྐུའི་ཀློང་ལས་ལྷུན་གྲུབ་གདངས། །ལོངས་སྐུ་ཁམས་གསུམ་ཟིལ་གནོན་དབང་ཆེན་ལྷ། །སྤྲུལ་སྐུ་སྒྱུ་འཕྲུལ་རོལ་པ་བསམ་ཡས་འགྱེད། །གང་ལ་གང་འདུལ་རྩ་གསུམ་ལྷ་ཚོགས་ཀྱི། །སྐུ་གསུང་ཐུགས་ཀྱི་དགྱེས་པ་སྐྱེད་ནུས་པའི། །ངོ་མཚར་རྨད་བྱུང་ཀུན་བཟང་མཆོད་པའི་སྤྲིན། །དངོས་སུ་བཤམས་དང་བླ་མེད་ཡིད་ཀྱིས་སྤྲུལ། །ས་གསུམ་གནས་ཀུན་ཡོངས་སུ་བཀང་བྱས་ཏེ། །དབང་ཆེན་ཁམས་གསུམ་ཟིལ་གནོན་ལྷ་ལ་འབུལ། །དུག་གསུམ་རྣམ་དག་སྨན་རཀ་གཏོར་མ་དང་། །བཟའ་བཅའ་བཏུང་བ་ལྡག་གཞིབ་ཚོགས་ཀྱི་རྫས། །ཛ་གད་གསེར་སྐྱེམས་མྱོང་གྲོལ་སྨན་ཕུད་སྦྱར། །བདེ་ཆེན་ཡེ་ཤེས་སྐྱེད་པའི་རྫས་མཆོག་འདི། །པདྨ་དབང་ཆེན་ཐུགས་དམ་བསྐང་ཕྱིར་བཤམས། །ཁྲག་གི་ཡོན་ཆབ་དབང་ལྔའི་པུཥྤེ་ཀ། །ཤ་ཆེན་དུད་སྤྲིན་ཚིལ་ཆེན་ཨ་ལོ་ཀེ། །ཁྲག་ཞག་དྲི་ཆབ་ཤ་རུས་ཞལ་ཟས་དང་། །མཆོག་ཆེན་རྐང་གླིང་ཐོད་རྔ་སིལ་སྙན་དུང་། །དབང་ཆེན་ལྷ་ཚོགས་དགྱེས་པའི་རྫས་སུ་བསྟར། །རླུང་གི་ཤུགས་ལྡན་ཅང་ཤེས་མྱུར་མགྱོགས་རྟ། །རིན་ཆེན་རྭ་རྨིག་ལྡན་པའི་གཡག་རྒོད་དང་། །རེག་འཇམ་བལ་ལྡན་ཡིད་འོང་ལུག་གི་ཁྱུ། །འདོད་འཇོའི་བ་དང་ར་སྐྱེས་སྤུ་སྡུག་མཛེས། །བྱ་རོག་རྒོད་དང་ཁྲ་གླག་མང་པོ་འཕྱོ། །སེང་སྟག་དོམ་དྲེད་ལྕེ་སྤྱང་ཁྱི་ནག་ཚོགས། །རྟ་མགྲིན་ལྷ་ཚོགས་མཉེས་པའི་རྟེན་དུ་བཀོད། །རྟག་གཏོར་རྒྱུན་གཏོར་དུས་ཀྱི་གཏོར་མ་དང་། །གླིང་བཞི་གླིང་ཕྲན་རི་རབ་ཉི་ཟླ་བཅས། །མཚོན་བྱེད་བསྐང་མདོས་རྟེན་མདོས་ངོ་མཚར་ལྡན། །སྣ་ཚོགས་དར་དང་རལ་གུ་སག་ལྷྭམ་དང་། །ཁྲབ་རྨོག་གོ་བེར་ལྕགས་ཞུབ་ལུག་རྒྱུད་གོས། །མདའ་གཞུ་མདུང་གྲི་དགྲ་སྟྭ་ཁྲམ་ཤིང་ཞགས། །ཕུར་པ་རྡོ་རྗེ་ཆུ་སྲིན་རྒྱལ་མཚན་བཅས། །དཀྱིལ་འཁོར་ལྷ་ཚོགས་མཉེས་པའི་རྫས་སུ་འབུལ། །དཔལ་གྱི་ཆས་བཅུ་དུར་ཁྲོད་ཆས་བརྒྱད་དང་། །རིན་ཆེན་རྒྱན་དང་བླ་བྲེ་འཕན་གདུགས་དར། །བླ་རྡོ་སྲོག་འཁོར་སྦ་སྨྱུགས་རྩེ་རྒྱལ་སོགས། །ཕྱི་ནང་གསང་རྟེན་མ་ཚང་མེད་པ་རྣམས། །དཀྱིལ་འཁོར་ལྷ་ཚོགས་དགྱེས་པ་བསྐྱེད་ཕྱིར་འབུལ། །དེ་ལྟར་ལེགས་བཤམས་མཆོད་རྫས་སྐོང་རྫས་དང་། །སྒྲུབ་རྫས་རྟེན་རྫས་དཔག་མེད་ཕུལ་བྱུང་འདིས། །དགུ་ལྡན་བརྒྱུད་པའི་བླ་མའི་ཐུགས་དམ་བསྐང་། །བདེ་གཤེགས་ཞི་བའི་ལྷ་ཚོགས༴ འབར་བ་ཁྲག་འཐུང་ལྔ་བཅུའི༴ སྒྲུབ་ཆེན་བཀའ་བརྒྱད་ལྷ་ཚོགས༴ དབང་ཆེན་ཁམས་གསུམ་ཟིལ་གནོན་ཐུགས་དམ་བསྐང་། ཡུམ་ཆེན་པདྨ་གར་དབང་༴ དབང་ཆེན་རིགས་བཞིའི་ལྷ་ཚོགས༴ སྒོ་སྲུང་ཁྲོ་བོ་བཞི་ཡི༴ ལྷ་ཆེན་དབང་ཕྱུག་ཆེན་པོའི༴ དཔལ་མགོན་བདུན་ཅུ་རྩ་ལྔའི༴ དམ་ཅན་དྲེགས་པ་ལྷ་ལྔའི༴ དྲང་སྲོང་གཟའ་གདོང་ལྕམ་དྲལ༴ བཀའ་སྡོད་བག་རྩེ་ལྕམ་སྲིང༴ ལས་མཁན་སྲོག་བདག་དམར་པོའི༴ གྲི་ཐོགས་ཤན་པའི་ཚོགས་ཀྱི༴ སྣང་སྲིད་ལྷ་སྲིན་སྡེ་བརྒྱད༴ འཁོར་ཚོགས་དམ་ཅན་རྒྱ་མཚོའི༴ ཐུགས་དམ་གཉན་པོ་དབྱིངས་སུ་བསྐངས་གྱུར་ནས། །སྐུ་གསུང་ཐུགས་དང་འགལ་བའི་ཉེས་ཚོགས་བཤགས། །ཞི་རྒྱས་དབང་དྲག་ཕྲིན་ལས་རྣམ་བཞི་སོགས། །རབ་འབྱམས་ཕྲིན་ལས་གང་བརྩམས་མྱུར་འགྲུབ་ཅིང་། །འཕྲལ་ཕུགས་བདེ་སྐྱིད་དཔལ་ཡོན་ཡོངས་ཚང་ཞིད། །སྲིད་འདིའི་བླ་ན་མངོན་པར་མཐོ་བ་དང་། །ངེས་པར་ལེགས་པའི་དཔལ་ལ་ལོངས་སྤྱོད་མཛོད། །ཅེས་བསྐང་བའི་ཆོ་གས་བསྐྱེད་རྫོགས་ཀྱི་ཆག་ཉམས་དག་པར་བྱས་ནས། ཚོགས་ལ་རོལ་བ་ནི། རྡོ་རྗེ་སློབ་དཔོན་གཙོ་འཁོར་རྣམས་ལ་ཚོགས་དྲངས་བའི་ཐོག་མར་མཆོད་དཔོན་གྱིས། ཧོ། བླ་མ་དཔའ་བོ་ཆེན་པོ་དགོངས་སུ་གསོལ། །འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་ཡང་། །རང་བཞིན་གཅིག་ཏུ་དགོངས་ཏེ་རོལ། ལན་དུ། བདེ་བར་གཤེགས་པ་ཆོས་ཀྱི་སྐུ། །འདོད་ཆགས་ལ་སོགས་དྲི་མ་སྤངས། །གཟུང་འཛིན་རྣམ་པར་བྲལ་བ་ཡི། །དེ་བཞིན་ཉིད་ལ་བདག་ཀྱང་འཚལ། །ཨ་ལ་ལ་ཧོ། ཞེས་པས་བླངས ། ལག་སོར་གཡས་གཡོན་རིགས་ལྔ་ཡབ་ཡུམ་དུ་མོས་ནས་རྡོ་རྗེ་དཀྱིལ་འཁོར་ལ་ནང་གི་སྦྱིན་སྲེག་ལྟར་དབུལ་བ་ནི། སློབ་དཔོན་གྱིས་བསྐུལ་ལ་ཚོགས་པ་ཐམས་ཅད་ཀྱིས། ཧོ་བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པ་རིགས་བརྒྱའི་དཀྱིལ་འཁོར་ལྷ། །འགུལ་བསྐྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོར། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ནས། །ཟས་ཀྱི་སྒྲིབ་པར་མི་འགྱུར་ཞིང་། །གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །ཅེས་ཚོགས་ལ་རོལ་རྗེས་སྨོན་ལམ་གདབ་པ་ནི། ཧོ་བདག་ཅག་སློབ་དཔོན་སོགས་རྒྱུར་གྱུར་ཅིག །དེ་ནས་བཟློག་པའི་ལས་ལ་འཇུག་པ་ནི། གཏོར་མ་རྣམས་ལ་གསོ་བྲན་གཏོར་ཆུང་ལྷ་གྲངས་ལྟར་བཤམས་པར་ཤ་དུམ་སྦྱར་ལ་དགུག་བསྒྲལ་བསྟབ་པ་སོགས་ཆབས་ཅིག་དཀྱིལ་འཁོར་གྱི་ལྷ་ཚོགས་རྣམས་བཟློག་པའི་ཕྲིན་ལས་ལ། དགོངས་བཞིན་རྐྱེན་ངན་བར་གཅོད་བྱད་ཁ་རྦོད་གཏོང་སོགས་བཟློག་པའི་བརྟུལ་ཞུགས་ཀྱི་མཛད་ཕྲིན་མངོན་དུ་ཕྱུང་བར་དམིགས་ནས་བཟློག་པ་འདི་བཞིན་གྱེར་རོ། །ཧཱུཾ། དང་པོ་རང་སེམས་འཁྲུལ་པ་ཡིས། །གཉིས་མེད་དོན་ནི་མ་རྟོགས་པས། །ལོག་རྟོག་འཁོར་བའི་བག་ཆགས་བླངས། །འབྲས་བུའི་སྨིན་བྱེད་བསྐྱེད་རྫོགས་གསལ། །རང་གཞན་གཉིས་མེད་དོན་རྟོགས་ནས། །རྣམ་རྟོག་འཁོར་བས་ཆགས་པ་རྒྱས། །ཧཱུཾ། ང་ནི་དབང་ཆེན་རྟ་མཆོག་དཔལ། །བག་ཆགས་འཁོར་བའི་དུཿཁ་རྒྱས། །གཉིས་མེད་རང་གི་ང་རྒྱལ་ཅན། །ཡ་གི་ཁྲོ་བོ་མན་ཆད་ནས། །མ་གི་བསེན་མོ་གྲོང་རྒྱུག་ཡན། །ཐམས་ཅད་མ་ལུས་ང་ལ་ཉོན། །ང་ནི་སེམས་ཅན་དོན་རེ་བྱེད། །ང་ཡིས་མདོས་གཏོར་འདི་བསྔོས་པས། །འཇམ་དཔལ་གཤིན་རྗེས་རྦོད་ཁ་བཟློག །ཡ་མནྟ་ཀྲོཏ་དགྲ་ལ་བཟློག །སེམས་ཅན་དོན་ལ་ང་མི་ཡེངས། །སྙིང་རྗེས་བསྒྲལ་བའི་ཤ་ཁྲག་གི། །ཚད་མེད་མདོས་གཏོར་འདི་བསྔོས་པས། །རྟ་མགྲིན་གསུང་གིས་རྦོད་གཏོང་བཟློག །ཧྱ་གྷྲྀ་ཝས་དགྲ་ལ་བཟློག །དྲག་པོའི་དྲག་སྔགས་གཉིས་མེད་བཟློག །ཕ་རོལ་རྒྱས་པའི་སྙིང་ཁྲག་གི །ཚད་མེད་རཀྟ་འདི་བསྔོས་པས། །ཕྱག་རྡོར་ཐུགས་ཀྱིས་རྦོད་གཏོང་བཟློག །བཛྲ་པཱ་ཎིས་དགྲ་ལ་བཟློག །ཨེ་ཡཾ་ས་མ་ཡ་སྙིང་ལ་བྷྱོ་བྷྱོ། །དགྲ་ལ་བཟློག་བཟློག །སྙིང་རྩ་ཕྱུངས་ཕྱུངས། །སྲོག་རྩ་ཆོད་ཆོད། །བྱད་མ་མཱ་ར་ཡ་བཟློག་བཟློག །ཅེས་བརྒྱ་བཟླས་སོ། དེ་ནས་ཡང་འདི་སྐད་དུ། ཧཱུཾ། དུས་གསུམ་སངས་རྒྱས་ར་མདའ་སློག །ཡི་དམ་ལྷ་ཚོགས་ར་མདའ་སློག །ཆོས་སྐྱོང་སྲུང་མ་ར་མདའ་སློག །བྱད་མའི་སྟེང་དུ་དམག་འདྲེན་གྱིས། །དམག་དཔོན་ཡེ་ཤེས་ལྷས་མཛད་དོ། །བྱད་མ་མ་ལུས་ཐལ་བར་བློགས། །བདག་ལ་བརྣག་པའི་དགྲ་བགེགས་འདི། །ཡུན་དུ་མ་འཇོག་སྲོག་རྩ་ཆོད། །བྱད་མ་ཤ་ཏྲུཾ་བྱེར་བྱེར་སོད་སོད། ཧཱུཾ། དགྲ་བོ་བསོད་ནམས་ཟད་པ་དང་། །རྣལ་འབྱོར་ཡར་ལ་འཕེལ་བ་གཉིས། །དུས་གསུམ་ལྷ་ཡིས་བྱིན་རློབས་ལ། །རྣལ་འབྱོར་ཚེ་དང་བསོད་ནམས་རྣམས། །གོང་ནས་གོང་དུ་འཕེལ་བར་མཛོད། །དགྲ་བོ་བསོད་ནམས་མེད་པར་མཛོད། ཧཱུཾ། ཉོན་ཅིག་སྣང་སྲིད་ལྷ་འདྲེའི་ཚོགས། །རྣལ་འབྱོར་ལྷ་མེད་ཟེར་ནས་བརྙས། །ལྷ་ལ་མཐུ་མེད་ཟེར་ནས་བརྙས། །བྷྱོཿ དམ་ཉམས་དགྲ་ལ་གཏོར་ཟོར་བཟློག །དམ་ཉམས་དགྲ་ལ་ཡུངས་ཟོར་བཟློག །དམ་ཉམས་དགྲ་ལ་བཙོ་ཟོར་བཟློག །དམ་ཉམས་དགྲ་ལ་གྲི་ཟོར་བཟློག །དམ་ཉམས་དགྲ་ལ་རྦབ་ཟོར་བཟློག །དམ་ཉམས་དགྲ་ལ་ཁྲག་ཟོར་བཟློག །དམ་ཉམས་དགྲ་ལ་མཚེ་ཟོར་བཟློག །དམ་ཉམས་དགྲ་ལ་ཕུར་ཟོར་བཟློག །དམ་ཉམས་དགྲ་ལ་མདའ་ཟོར་བཟློག །དམ་ཉམས་དགྲ་ལ་རྡོ་ཟོར་བཟློག །བྷྱོཿ ཤར་ཕྱོགས་མི་ནག་མཆེ་བ་ཅན། །དམ་ཉམས་དགྲ་ལ་རྦོད་ཁ་སྒྱུར། །བྷྱོཿ ལྷོ་ཕྱོགས་མི་སྔོན་མཆེ་བ་ཅན། །དམ་ཉམས༴ བྷྱོཿ ནུབ་ཕྱོགས་མི་དམར་མཆེ་བ་ཅན། །དམ་ཉམས༴ བྷྱོཿ བྱང་ཕྱོགས་མི་སེར་མཆེ་བ་ཅན། །དམ་ཉམས༴ བྷྱོཿ ཁྱེད་ལ་ཕྲིན་ལས་བཅོལ་བ་ནི། །བདག་དང་ཡོན་བདག་འཁོར་བཅས་ལ། །ཕུར་ཁ་ཟོར་ཁ་ལངས་པ་བཟློག །མདའ་ཟོར་འུར་ཟོར་འཕེན་པ་བཟློག །ཀོང་ཟོར་བྲུབ་ཁུང་བཅུག་པ༴ མི་དམར་ཞགས་པ་འཕེན་པ་དང་། །མི་ནག་གཡབ་མོ་གཡབ་པ༴ བཤན་པ་ལས་ལ་ཞུགས་པ༴ མོན་པ་རིམ་པ་བརྗེས་པ༴ སྐྱེས་པའི་མདའ་ཟོར་འཕེན་པ༴ བུད་མེད་དམོད་ཟོར་བྱེད་པ་བཟློག །བདུད་གཅོད་སྲོག་རྒུད་ལུས་ཀྱི་ན་ཚ་དང་། །བླ་ཉམས་ཚེ་ཉམས་ཐམས་ཅད་དགྲ་ལ༴ ལྷ་བསྒྲལ་སྲོག་ཞུད་ངན་པ༴ སྲོག་རྒལ་ཕུར་པ་བཏབ་པ༴ བདག་ལ་བརྣག་པའི་བསམ་ངན་དང་། །སྦྱོར་བ་ངན་པ་སྣ་ཚོགས༴ ཡིད་ལ་བརྣག་པའི་དགྲ་བོ་འདི། །སྡེར་མོ་ཅན་གྱིས་སྙིང་ནས་དྲོངས། །མཆེ་བ་ཅན་གྱིས་ཀླད་ནས་ཕུགས། །ཞགས་པ་ཅན་གྱིས་ཡན་ལག་ཁྱིགས། །ལྕགས་སྒྲོག་ཅན་གྱིས་ཡན་ལག་སྡོམས། །དྲིལ་བུ་ཅན་གྱིས་སྙིང་ནས་དྲོངས། །ཐོ་བ་ཅན་གྱིས་མགོ་ནས་རྡུངས། །ལས་ཀྱི་རླུང་གིས་རྒྱབ་ནས་དེད། །མུན་པ་ནག་པོས་མདུན་ནས་སུས། །ཡིད་ལ་བརྣག་པའི་དགྲ་བོ་འདི། །ལས་མཁན་རྣམས་ཀྱི་ཞལ་དུ་ཐོབ། །གནམ་གྱི་འཇུ་ཐག་ཆོད་ལ་ཤོག །ས་ཡི་རྟེན་ཕུར་ཐོན་ལ་ཤོག །དོན་སྙིང་ལྔ་པོ་ཕྱུངས་ལ་ཤོག །ཁ་ནས་ཁོང་ཁྲག་སྐྱུག་ཏུ་ཆུགས། །སྐྱོབ་པའི་ལྷ་དང་ཕྲོལ་ལ་ཤོག །ལྟས་ངན་བརྒྱད་ཅུ་རྩ་བཞི་ཐོངས། །ཡེ་འདྲོག་སུམ་བརྒྱ་དྲུག་ཅུ་ཐོང་། །ནད་རིགས་བཞི་བརྒྱ་རྩ་བཞི་ཐོངས། །དམ་ཉམས་ལས་ངན་སྡིག་ཅན་འདི། །ལོ་དང་ཟླ་བར་མ་འཇོག་པར། །རྟགས་དང་མཚན་མ་མྱུར་དུ་སྟོན། །བཅོལ་བའི་ལས་འདི་མ་བྱས་ན། །དུས་གསུམ་རྒྱལ་བའི་བཀའ་ཡང་བསླུས། །ཕྱི་རབས་གསང་སྔགས་སུན་ཡང་ཕྱུང་། །རིག་འཛིན་བདག་གི་རེ་བ་ཆད། །སྔོན་གྱི་ཐུགས་དམ་གཉན་པོ་ཉམས། །རྩ་བརྒྱུད་བླ་མའི་དམ་ཚིག་འགལ། །ཐུབ་པའི་བསྟན་སྲུང་མིང་ཙམ་གྱུར། །དེ་བས་དམ་ལས་མ་འདའ་བར། །མཐུན་པའི་དམ་རྫས་འདི་བཞེས་ལ། །བཅོལ་བའི་ཕྲིན་ལས་བསྒྲུབ་པར་མཛོད། །ཅེས་དང་། བྷྱོཿ སངས་རྒྱས་བསྟན་པ་གཉན་པོ་བཤིག་པ་བཟློག །དཀོན་མཆོག་གསུམ་གྱི་དབུ་འཕང་དམོད་པ་བཟློག །གཙུག་ལག་ཁང་ཆེན་དཀོར་ཁང་བཤིག་པ༴ གསང་སྔགས་རྒྱུད་ལ་བཙས་སུ་འདོགས་པ༴ དགེ་འདུན་དཀོར་ལ་རློམས་ཤིང་འཁྱེར་བ༴ འགྲོ་བ་ཀུན་ལ་གནོད་ཅིང་འཚེ་བ༴ དཀར་པོའི་ཆོས་ལ་བརྣག་ཅིང་དམོད་པ༴ བཀའ་ལས་འདའ་ཞིང་དམ་ཉམས་ཁྲིམས་ཉམས༴ བདག་ལ་གནོད་ཅིང་སེམས་པའི་བསམ་ངན༴ སྒྲུབ་ལ་བར་དུ་གཅོད་པ༴ མཚམས་ཀྱི་ཁོངས་སུ་འཇུག་པར་བྱེད་པ༴ ཚོགས་ཀྱི་ཡོ་བྱད་རྐུ་ཞིང་འཕྲོག་པ༴ ཏིང་འཛིན་དྲོད་ལ་བར་དུ་གཅོད་པ༴ དངོས་གྲུབ་བགེགས་དང་བར་ཆད་བྱེད་པ༴ དུས་ཚོད་ཕྱོགས་ངན་བདུད་གཅོད་ཐམས་ཅད༴ ཚེས་བརྒྱད་ཡུལ་གྱི་གདོང་འདྲེ་ལངས་པ༴ བཅོ་ལྔའི་བླ་ལ་རྐུ་བར་བྱེད་པ༴ ཉི་ཤུ་བཞི་ལ་སྲོག་གཅོད་རྩོམ་པ༴ ཉེར་དགུའི་གདུགས་ལ་ཚེ་ལེན་བྱེད་པ༴ ཡིད་ཀྱིས་དངངས་ནས་སྤྲུགས་པར་བྱེད་པ༴ ཏིང་འཛིན་གསལ་ཁར་སྒྲིབ་ཏུ་ཡོང་བ༴ དངོས་གྲུབ་ཡོང་ཁར་འཕྲོག་ཏུ་ཡོང་བ༴ ལྷར་བརྫུས་འབྱུང་པོ་ཁྱིམ་དུ་འཇུག་པ༴ མིར་བརྫུས་འབྱུང་པོ་སྒོ་རུ་རྒྱུ་བ༴ དགྲར་བརྫུས་འབྱུང་པོ་སྲང་བར་འཁྱམས་པ༴ གྲོང་རྒྱུ་འགོང་པོས་སྐབས་བལྟར་འཚོལ་བ༴ ཁྱི་རྐུན་ལྟར་དུ་རྒྱལ་བསེན་ཕུག་པ༴ རྣམ་རྟོག་གློ་བུར་ཕུང་འདྲེ་ལངས་པ༴ ཕ་མེས་རྒྱས་པའི་ཕུང་འདྲེ་ལངས་པ༴ བུ་ལོན་ལན་ཆགས་ཕུང་འདྲེ་ལངས་པ༴ ཤ་འཁོན་ལངས་པའི་ཕུང་འདྲེ་ལངས༴ གསང་སྔགས་ཐོག་སེར་ཐོག་ལྟར་འཕེན་པ༴ མུ་སྟེགས་རྭ་ཟོར་སྤྲིན་ལྟར་འཐིབས་པ་བཟློག །རྒྱ་ནག་གཏོར་ཟོར་སེར་ལྟར་འབེབ་པ༴ ཞང་ཞུང་བཙོ་ཟོར་མེ་ལྟར་འབར་བ༴ སུམ་པའི་གླང་ཟོར་མཚོ་ལྟར་འཁྱིལ་བ༴ ཕུར་པའི་དབལ་ཟོར་རྟ་ལྟར་རྒྱུག་པ༴ ཡུངས་ཟོར་རི་གཟར་རྦབ་ལྟར་བསྒྲིལ་བ༴ མཚེ་ཡི་ཟོར་ཁ་མདུང་ལྟར་འདྲིལ་བ༴ ཁྲག་ཟོར་དཔག་ཆེན་མདའ་ལྟར་འཕེན་པ༴ དྲག་སྔགས་ཆུ་བོའི་རྒྱུན་ལྟར་འཁྲུགས་པ༴ འབྱུང་བའི་བཞི་གཤེད་ཀིང་ཀང་གཤེད་བཞི༴ བདུད་གཅོད་རླུང་ནག་བདུན་ཟུར་དྲུག་ཁྲམ༴ ལུས་སྲོག་དབང་ཐང་རླུང་རྟ་རྒུད་པ༴ འབྲེལ་བའི་འཁོན་གཞི་གཅོ་དང་སྒྲོག་ངན༴ ཉམས་སུ་སྣང་བའི་འཆད་པ་འབེབས་པ༴ རྣམ་བཞི་འཁོར་ལ་བར་ཆད་བྱེད་པ༴ སྔ་དགྲ་ལུས་ངག་ཡིད་ལ་དར་བ༴ ཕྱི་དགྲ་སེམས་ཤིང་གནོད་སེམས་འཆང་བ༴ རྗེས་ལ་བརྐུ་ཞིང་འཕྲོག་པར་བྱེད་པ༴ ལོངས་སྤྱོད་འཁོར་ལ་གནོད་པར་བྱེད་པ༴ བརྒྱགས་ལ་བརྐུ་ཞིང་འཕྲོག་པར་བྱེད༴ དཔལ་ལ་འཇབ་ཅིང་འཚེ་བར་བྱེད་པ༴ མ་ཉེས་ཉེས་ཟེར་བརྗོད་ཅིང་མནར་བ༴ འཁོན་དང་ནང་འཁྲུག་ལེ་པོའི་འཕང་ལེན༴ ཕ་ཁུའི་རྒན་སྲི་མ་བུའི་བྱུར་སྲི༴ སྐྱེས་པའི་མདའ་སྲི་ཟ་མའི་འཕང་སྲི༴ བུ་ཚའི་ཆུང་སྲི་རྣལ་འབྱོར་དམ་སྲི༴ མཚོན་སྲིས་གཏུབ་ཅིང་མདའ་སྲིས་འབུག་པ༴ ཆུ་སྲིས་འཁྱེར་ཞིང་རྡིབ་སྲིས་འཚུབས་པ༴ ལྕེབ་སྲིས་འཕྱེད་ཅིང་གཡང་ལ་ལྷུང་བ༴ འབུང་སྲིས་ལངས་ཤིང་གནམ་སྲི་ལྟུང་བ༴ གོད་སྲི་ལངས་ཤིང་རྐུན་སྲི་དར་བ༴ ཕུགས་ན་མི་ཁ་རྟ་ལྟར་འཚེར་བ༴ མདའ་ན་མི་ཁ་རླུང་ལྟར་འཚུབས་པ༴ ཡུལ་པའི་མི་ཁ་ཁྱི་ལྟར་ཟུག་པ༴ གླུ་ལྟར་ལེན་ཞིང་སྒྲོག་པའི་མི་ཁ༴ ཕོ་ཡི་མི་ཁ་མདའ་ལྟར་འཕེན་པ༴ མོ་ཡི་མི་ཁ་བལ་ལྟར་གཡེང་བ༴ གྲོགས་པོའི་ཁ་ངན་རྦབ་ལྟར་བསྒྲིལ་བ༴ གྲོགས་མོའི་སྙིང་ངན་ཆུ་རྒྱུན་ལྟ་བུ༴ ཡས་ཀྱི་བདུད་གཡོས་མས་ཀྱི་སྲི་ལངས༴ བར་གྱི་བདུད་འཁྲུགས་ཕ་ཚན་རྒྱ་འདྲེ༴ ཕུ་ནུའི་བྱོལ་ཁ་བཞད་ཁ་རྦོད་གཏོང་༴ བྱུར་དུ་གང་ཆེ་སྐལ་དུ་གང་རིར་བཟློག །ལན་དུ་གང་ཆགས་ཤ་རུ་གཉེར་བ༴ བྱ་རུ་མི་རུང་བཀྲ་མི་ཤིས་པ༴ རྨི་ལམ་མཚན་ངན་ལྟས་ངན་བརྒྱད་སྡིག༴ མོ་ངན་མཐུ་སྡིག་མི་ཁ་བྲ་མཆུ༴ གནོད་ཅིང་འགལ་བྱེད་སྐུ་ལ་བསྔོ་བ༴ འཐབ་རྩོད་ཚིག་རྩུབ་ངན་སྨྲས་གཏོང་བ་བཟློག །ལག་ངན་མཛུབ་མོས་རྡེག་རྡུང་བྱེད་པ༴ རིང་ལ་བཤད་སྙོམས་མཐོ་ལ་འགྲན་སེམས༴ མཉམ་ལ་འགྲན་སེམས་བཟང་སྐྱོན་བརྗོད་པ༴ མགྱོགས་ལ་བང་སྙོམས་ཡ་རབས་རྒུད་པ༴ མཁས་པ་སྨོད་ཅིང་རྨོངས་པ་བསྟོད་པ༴ བླ་མ་རྡོ་རྗེ་སློབ་དཔོན་སྐུ་དགྲ༴ རྣལ་འབྱོར་སྒོས་དགྲ་སྔགས་པའི་སྤྱི་དགྲ༴ མང་པོས་འཐིབས་བརྫིབ་ཁ་དྲག་ཟས་ཟོས༴ དཔུང་པའི་ཚོགས་ཟོང་མི་དྲན་ཆས་ཆོད༴ མ་ཆགས་བུ་ལོན་འདེད་པ་ཁྱད་གསོད༴ བརླང་ཚིག་གཤགས་འདེབས་རྒྱབ་བསྟན་མནའ་ཟ༴ གཡོ་སྒྱུ་ཟོལ་ཟོག་ཕྲ་མ་འཛུད་པ༴ ངོ་ཚ་ཁྲེལ་འཛེམ་མེད་པའི་ངན་རྙོག༴ ལང་དུ་ཤོར་བའི་ཟ་འདོད་ཆུད་ཟོས༴ འདོད་གཏམ་ལྟ་བའི་ཆུང་ཚད་ཚོད་པ༴ སྐབས་འཚོལ་རྐྱེན་སྙོམས་གླེགས་བུ་རེ་བ༴ མཐོ་བའི་ལ་ལ་བརྒལ་དབང་མེད་པ༴ དམའ་བའི་ཆུ་ལ་བརྒལ་དབང་མེད་པ༴ དབང་མེད་སྡིག་རྒྱུགས་སྡིག་ལ་བྱེད་པ༴ གཉའ་གནོན་ཁ་ལ་འགུལ་དབང་མེད་པ༴ ཐུགས་ལ་ཆགས་ཤིང་བླ་ལ་ཉེ་བ༴ དགྲ་ལ་གཡག་རྒྱུགས་བྱེད་དོ་ཟེར་བ༴ ཕ་དང་མེས་པོ་རྒས་སུ་མི་སྟེར༴ བུ་དང་ཚ་བོ་འཚར་དུ་མི་སྟེར༴ ངན་པའི་སེམས་བློ་བདེ་རུ་མི་སྟེར༴ གཡོག་དང་འཁོར་རྣམས་སྐྱིད་དུ་མི་སྟེར༴ ལོངས་སྤྱོད་བསོད་ནམས་རྒྱས་སུ་མི་སྟེར༴ མནོལ་དང་མི་དམེ་རིགས་རྒྱུད་འཆོལ་བ༴ རྟ་རྟོ་ལ་རྒྱུག་ལུང་རྒྱུག་ཟེར་བ༴ ལ་དེད་ཕྲེང་དེད་ལུང་འགེགས་ཟེར་བ༴ ལ་རྒྱུག་འཕྲང་བསྐྱིལ་ཟེར་བ་ཐམས་ཅད༴ སྐབས་ལྟ་གླགས་ཚོལ་སྒོ་རུ་སྲང་ཆག༴ སྲོད་ཀྱི་འཇབ་བུ་གུང་གི་ཧུར་ཐམ༴ ཐོ་རེངས་རྒྱུ་བའི་བསམ་སྦྱོར་ངན་པ༴ ཐུབ་ཚད་འགྲན་འཚོལ་སྙགས་འཚོལ་བྱེད་པ༴ ཀུ་རེ་ཀྱལ་ཀ་དགུག་པའི་རྔན་ཆན༴ འཁོན་གྱི་བསམ་པས་འཐབ་ཁ་སྙད་འཚོལ༴ མི་ཐུབ་རྩིས་པའི་བརྙས་བཅོས་ཁྱད་གསོད༴ མི་ནད་ཕྱུགས་ནད་ཕ་རོལ་དམག་དཔུང་༴ མེ་ཆུ་དུག་མཚོན་མུ་གེ་ལྕེ་འབབ༴ གཅན་གཟན་འཇིགས་པ་སྒྲ་དང་ས་གཡོས༴ ལྷ་ཀླུའི་ཐོག་སེར་དུས་མིན་འཆི་བ༴ སྐར་མདའ་རྒྱལ་པོའི་ཆད་པས་འཇིགས་པ༴ གནམ་གྱི་བྱ་ཐན་ས་ཡི་བྱི་ཐན༴ སད་སེར་ཐན་པ་བཙའ་འབུ་ཁ་བ༴ དྲུག་ལྷག་ཤོ་རེ་མི་ཡི་ཐན་པ༴ མངལ་ཁ་རྒྱུ་ལུག་ཕྱུགས་ཀྱི་ཐན་པ༴ གནམ་ལ་དལ་བབས་ས་ལ་སྲི་ལངས༴ གདགས་ལ་བྲག་རལ་སྲིབ་ལ་ཤིང་ཆག༴ ཤ་ཕོ་རུ་འཛིངས་བྱ་རྒོད་སྡེར་འཛིངས༴ གཡག་པོ་རུ་འཛིངས་ཉ་མོ་རྔ་འཛིངས༴ སྲེག་པ་ཁྱིམ་ཞུགས་སྦྲུལ་ཆེན་ལམ་ཉལ༴ བྱི་ལ་ལམ་སྦྱོར་བྲེ་མོ་སྐད་འཚེར༴ ཕུགས་ན་ར་སྦྲིད་སྒོ་ན་ཁྱི་ངུ་ུ༴ སྲིན་བྱ་རྒོད་ཅིང་བྱ་རོག་འཕྲལ་བ༴ གླ་བའི་སྦར་འཛིངས་འུག་པའི་གད་མོ༴ རྒྱུད་ཀྱི་འཕྲུལ་འཁོར་རྫས་ཀྱི་སྦྱོར་བ༴ མུ་སྟེགས་ངན་སྔགས་རྒྱ་ནག་རྩིས་པ༴ ཉན་ཐོས་སྤར་ཁ་ས་བདག་གཏད་ཁྲམ༴ ལྷ་ཆེན་གདུག་པའི་ངན་སྔགས་སྤྲུལ་པ༴ མ་མོའི་དལ་ཡམས་གནོད་སྦྱིན་ཁྲམ་ཁ༴ འགོང་པོའི་གོད་ཁ་རྒྱལ་པོའི་སྨྱོ་འབོག༴ དམུ་ཡི་འཐིབས་ནད་བཙན་གྱི་གཟེར་ནད༴ ཀླུ་ཡི་མཛེ་ནད་བདུད་ཀྱི་ཁྲམ་ཁ༴ ཧོར་གྱི་ན་ཁ་ཡོན་གྱི་ཁྲ་མ༴ བོད་ཀྱི་སྐྱོ་མ་ནག་མོའི་མཆུ་སྡུག༴ བྲན་གཡོག་འོག་མི་དཔོན་དུ་གྱུར་པ༴ མཁར་ལ་ཏོག་ཐོགས་ཁྱིམ་པ་དགྲ་ལངས༴ ཕྱུགས་ལ་ཞགས་ཐོགས་མི་ལ་མཚོན་ཐོགས༴ ནོར་དང་འབྲུ་ལ་བྲེ་དང་ཕད་ཐོགས༴ ཟས་སྦྱོར་དུག་སོང་གཉེན་བྱས་དགྲར་ལངས༴ གཙང་ཆུ་ཤྭ་བརྒལ་སྒོ་རུ་འཁྲུག་པ༴ བགེགས་རིགས་སྟོང་ཕྲག་བརྒྱད་ཅུ་རྩ་བཞི༴ ནད་སྣ་བརྒྱད་ཅུ་རྩ་བཞིའི་སྤྲིན་འཐིབས༴ གློ་བུར་བརྒྱད་ཅུ་རྩ་བཞིའི་རླུང་གཡོས༴ ཡེ་འདྲོག་སུམ་བརྒྱ་དྲུག་ཅུ་རྩ་བཞི༴ རྐྱེན་ངན་ཉི་ཁྲི་ཆིག་སྟོང་ཐོ་དྲུག༴ གསོད་ཐབས་བརྒྱད་ཅུ་རྩ་བཞི་གློག་འཁྲུག༴ དུས་མིན་འཆི་བ་བཅོ་བརྒྱད་ཐོག་སེར༴ ངན་དགུ་སྡིག་བཅུ་འཐར་བཅད་ཐམས་ཅད༴ ཕོ་བདུད་དལ་ཁ་ཐམས་ཅད་གཡས་སུ་སྒྱུར། །མོ་བདུད་དལ་ཁ་ཐམས་ཅད་གཡོན་དུ་སྒྱུར། །སྤྱི་བདུད་དལ་ཁ་ཐམས་ཅད་མཁའ་ལ་སྒྱུར། །ཟློགས་སྒྱུར་བཅོལ་བའི་ཕྲིན་ལས་གྲུབ་པར་མཛོད། །སརྦ་པཱ་པཾ་སརྦ་དུ་ཏྲི་མཱ་ར་ཡ་བཟློག་བཟློག །བྷྱོཿ གནོད་བྱེད་རྦོད་ཟོར་སརྦ་ཨ་པ་ན་ཡ་བཟློག་བཟློག །ཅེས་བརྒྱ་ལ་སོགས་པ་བཟླས་སོ། དམོད་པ་དུག་མཚོ་ཁོལ་བ། །བདག་ལ་གནོད་བྱེད་དགྲ་བགེགས་ངན་པ་འདི། །ཁ་དྲག་ཟ་ཞིང་དཔུང་པ་འཚོགས་པ་འདི། །རྨང་པོ་མཐེབ་ཀྱིས་བརྫུས་ནས་སྣར་བ་འདི། །མཛའ་བོ་སླུ་བྱེད་རྨས་སུ་འཛུད་པ་འདི། །དམངས་ཀྱི་བདེན་པ་ཁྱད་དུ་གསོད་པ་འདི། །རྫུན་གྱི་སྙད་ཀྱིས་བུ་ལོན་འཕྲོག་པ་འདི། །མནར་སེམས་བཅངས་ནས་སྦྱོར་རྩུབ་བྱེད་པ་འདི། །བླ་མའི་སྐུ་དགྲ་སེམས་ཅན་སྤྱི་དགྲ་འདི། །དཀོན་མཆོག་གསུམ་གྱི་དབུ་འཕང་དམོད་པ་འདི། །བསྒྲལ་བའི་ཞིང་བཅུར་གྱུར་པའི་དགྲ་བོ་འདི། །གནོད་བྱེད་འགལ་བྱེད་སྡང་ཞིང་གདུག་པ་འདི། །མཛའ་བོ་རྣམས་དང་ཕྲ་མ་འཛུད་པ་འདི། །ཁྲོ་ཞིང་རྩུབ་པས་སྐུ་ལ་སྡོ་བ་འདི། །ཕ་ཡི་ཞིང་བཅུར་གྱུར་པའི་སྒོས་དགྲ་འདི། །མ་ཉེས་སྒྲོག་ངན་སྐུར་པ་འདེབས་པ་འདི། །མཛའ་བོའི་ནོར་དང་གཟུངས་མ་རྐུ་བ་འདི། །བརླང་དང་ཚིག་རྩུབ་ཁ་གསག་སྨྲ་བ་འདི། །རིང་ལ་སྙོབ་ཅིང་ཟས་གོས་འཕྲོག་པ་འདི། །མ་ཉེས་ཉེས་ཟེར་སྒྲུབ་ལ་འཚེ་བྱེད་འདི། །ངན་སྨྲས་གཏོང་ཞིང་ལག་ངན་རྡེག་པ་འདི། །ང་རྒྱལ་གཉའ་གནོན་ཐོག་རྫིས་བྱེད་པ་འདི། །གྲགས་དང་ལོངས་སྤྱོད་བསྙེན་བཀུར་འགྲན་པ་འདི། །ཕྲག་དོག་ཁ་འཇམ་ཞེ་ནས་དམོད་པ་འདི། །རྣམ་བཞི་འཁོར་ལ་བར་དུ་གཅོད་པ་འདི། །ངན་སེམས་གནོད་སྐྱེལ་བྱེད་པ་འདི་དག་ལ། །བདེན་པ་རྫུན་པ་གཉིས་ཀྱི་གཤགས་ཕྱེས་ཤིག །དམ་ཚིག་རྗེས་ཆོད་ལེགས་ཉེས་སྟངས་ཟུངས་ཤིག །སྨྲས་པ་ཐམས་ཅད་ཉོན་ཞིག་བཏང་སར་རྒྱུགས། །མ་གཡེལ་མ་གཡེལ་དམ་ཅན་རྒྱ་མཚོའི་ཚོགས། །བཅོལ་ལོ་གཏད་དོ་སྔགས་བདག་གཉན་པོ་ལ། །བསྐུལ་ལོ་རྦད་དོ་བསྐོར་ལོ་མཐུ་མ་ཆུང་། །བོས་སོ་གཡབ་པོ་སྲུང་མ་སྤྱན་མ་བརྡུལ། །དགྲ་བགེགས་དགུ་རྒྱུད་ཆོད་ཅིག་རྩལ་མ་ཞན། །དམ་ཚིག་ལྟོས་ལ་ཤྭ་རྡེའུ་དཀར་ནག་ལྟོས། །ཁྲམ་ལ་ཐོབ་ལ་བྱང་དམར་དཀྱུས་ལ་བྲིས། །ཐུགས་ནག་ཆོངས་ལ་ནད་རྐྱལ་ཁ་ཕྱེ་ཞིག །ཀླད་ནད་གཟེར་ནད་མཁྲིས་ནད་མིག་སེར་ཕོབས། །འདུས་ནད་ཞིག་པ་རླུང་ནད་གཡོ་བ་ཕོབས། །ཁྲག་ནད་ཚ་གཟེར་ཚ་ནད་ཁོལ་བ་ཕོབས། །པད་ཀན་འཁྱིལ་བ་མཁལ་ནད་སུཪྻ་ཕོབས། །མགོ་ནད་འཁོར་བ་མཛེ་ནད་སྐྲངས་འབུར་ཕོབས། །ལྷོག་པ་གག་པ་སྨན་ལྕགས་ཡོ་མོ་ཕོབས། །རྒྱུ་གཟེར་ཁྲག་འཛག་དམུ་ཆུ་སྐྱ་བབ་ཕོབས། །ཚད་པ་མགོ་ཡོར་གྲང་ནད་གཞང་འབྲུམ་ཕོབས། །སྨྱོ་ནད་སྙིང་རླུང་འབོག་ནད་སྙིང་འགས་ཕོབས། །མཛེ་ནད་གཞོགས་སྐམ་ཤུ་བ་གཡན་པ་ཕོབས། །སྦུས་རི་ཐེར་ཆད་གཡའ་རི་དུམ་བུ་ཕོབས། །གྲི་སྲི་ཡུ་དམར་མདའ་སྲི་ལྟོར་དམར་ཕོབས། །རྦབ་སྲི་བཅར་ཕོག་ཆུ་སྲི་འདར་ཤད་ཕོབས། །མཚོན་སྲི་ལྕགས་ཆེན་ལྕེབ་གྲི་འགྱེག་པ་ཕོབས། །བསྲུང་བའི་རྒྱབ་ཕྲོལ་མཆིས་པའི་ལྷ་དང་ཕྲོལ། །སྲུང་བྱེད་ལེ་གུ་འགོ་བའི་སྨན་དང་ཕྲོལ། །སྡོད་པའི་གནས་ཕྲོལ་དབང་བའི་ནོར་དང་ཕྲོལ། །རྒྱུ་བའི་ཡུལ་ཕྲོལ་མཐུན་པའི་གྲོགས་དང་ཕྲོལ། །འཚོ་བའི་ཟས་ཕྲོལ་ལུས་སྲོག་གཉིས་པོ་ཕྲོལ། །འོག་ནས་གྲང་བས་ཆུ་ལྟར་འཁྱིག་ཏུ་ཆུགས། །སྟེང་ནས་ཚ་བས་ཉི་ལྟར་སྲེག་ཏུ་ཆུགས། །བར་ནས་ཚ་གྲང་རླུང་ལྟར་འཁྲུག་ཏུ་ཆུགས། །གནམ་གྱི་འཇུ་ཐག་སྟེང་ནས་ཆོད་ལ་ཐོང་། །ས་ཡི་རྟེན་ཕུར་འོག་ནས་ཕྱུང་ལ་ཐོངས། །དྲན་རིག་ཀུན་གཞི་བར་དོར་ཆུགས་ལ་ཐོང་། །ལུས་ལ་གནམ་ལྕགས་མེ་ཆེན་སྦོར་དུ་ཆུགས། །ཁ་ནས་གྱོད་གཏམ་དགྲ་ངན་འདོན་དུ་ཆུགས། །ངུ་འབོད་སྨྲེ་སྔགས་བྲང་ལག་འཐབ་ཏུ་ཆུགས། །ལས་ཀྱི་རླུང་གིས་རྒྱབ་ནས་མྱུར་དུ་ཕུལ། །འཇིགས་པའི་མུན་ནག་ཆེན་པོས་མདུན་ནས་སུས། །ལུས་སྲོག་དབང་པོ་རྣམ་ཤེས་རྟེན་དང་ཕྲོལ། །ནོར་ལ་གོད་ཁ་སྐྱིད་ལ་རྐེད་ཆོད་ཐོངས། །ཕོ་ཡི་དཔལ་ཕྲོག་མོ་ཡི་དབང་ཐང་ཕྲོལ། །ནོར་གྱི་གཡང་ཕྲོལ་ཟས་ཀྱི་བཅུད་ཕྲོགས་ཤིག །བྱ་རུ་མི་རུང་བཀྲ་རུ་མི་ཤིས་ཐོངས། །ངར་བཞི་སྲང་གསུམ་བཞི་མདོར་འཁྱམ་དུ་ཆུགས། །ཤ་ཁྲག་ལྷུ་བཞི་ཁྱི་ཡིས་མུར་དུ་ཆུགས། །རྐང་ལག་ལམ་འཕྲང་བཞི་མདོར་འགོམ་དུ་ཆུགས། །བཀའ་ཆད་ཕོབས་ཤིག་སྙིང་ཁྲག་སྐྱུག་ཏུ་ཆུག །ཡན་ལག་ཆིངས་ཅིང་པགས་ཤུས་མགོ་བོ་ཆོད། །བརླ་བཞི་ཕྲོལ་ཅིག་དོན་སྙིང་དམར་པོ་ཕྱུངས། །རྩ་རྒྱུས་ཆོད་ལ་ཁོང་ཁྲག་ལོང་དུ་ལྷུག །ཤ་ཟོ་ཁྲག་འཐུང་རྐང་ལྡོག་ལྷ་བ་འཇིབས། །ཀླད་པ་ལྡག་ཅིང་རུས་པ་མུར་དུ་ཆུགས། །པགས་ཆེན་སོལ་ཞིག་བསྲེག་པའི་གསུར་ལ་སྣོམས། །ཕོ་རྒྱུད་མོ་རྒྱུད་རིགས་རྒྱུད་རྩད་ནས་ཆོད། །རྡོ་ཡིས་སྲན་ཕུང་གཏོར་བཞིན་ཕྱོགས་བཅུར་གཏོར། །མེ་སྟག་ཆུ་ལ་ཡར་བཞིན་ཚད་མེད་ཐོངས། །བྱ་སྒྲོ་མེ་ཡིས་བསྲེགས་བཞིན་བརླག་པར་མཛོད། །ཡོན་བདག་སྒྱུ་མ་འདི་ལ་བརྙས་མ་འདོགས། །ནུས་པ་ཕྲན་ཚེགས་ཙམ་ལ་རྩིས་མ་བྱེད། །ནམ་མཁའ་སྟོང་པ་འདི་ལ་ཚད་མ་འཛུགས། །དགྲ་བགེགས་འདི་ཡི་སྐྱེ་ཤི་ཁུངས་ཕྱུངས་ཤིག །དགྲ་དཔུང་ཐམས་ཅད་རྩད་ནས་མྱུར་དུ་ཆོད། །བདུད་དཔུང་ཐམས་ཅད་བསྒྱུར་ཞིང་རྗེས་མེད་ཐོང་། །སྡང་དགྲ་གནོད་བགེགས་འབྱུང་པོ་དམ་སྲི་རྣམས། །ཐལ་བའི་རྡུལ་ཏུ་བརླག་པའི་ཕྲིན་ལས་མཛོད། །དེ་ནས་གསེར་སྐྱེམས་གཟུ་དཔང་བྱ་བ་ནི། ཧྲཱིཿཧཱུཾཿ རྩ་གསུམ་དམ་ཅན་སྲུང་མ་དང་ཿ སོགས། །དགྲ་བགེགས་འབྱུང་པོ་ར་མདའ་བཟློག །མདུན་གྱི་གཏོར་མའི་ཡེ་ཤེས་པ་ནམ་མཁར་གཤེགས་པ་དཔང་པོའི་ཚུལ་དུ་བཞུགས་པར་གྱུར། ༀ་བཛྲ་ཀྲོ་དྷ་ཧྱ་གྲི་ཝ་ས་མ་ཡ་ཧོ། །དམ་ཚིག་གི་འཁོར་ལོ་བདག་དང་དབྱེར་མེད་དུ་གྱུར། སླར་ཡང་མཚན་མ་རྫས་ཀྱི་གཏོར་མ་དེ་ཉིད་བཅོམ་ལྡན་འདས་པདྨ་དབང་ཆེན་ཕོ་ཉ་སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱིས་མཚོན་ཆ་སྣ་ཚོགས་ཐོགས་པར་བསམ་ལ། གཏོར་ལམ་བསྟན་ཞིང་སྒོ་དབྱེ་བ། ཧྲཱིཿཧཱུཾཿ བྷྱོཿ ད་ནི་གཤེགས་བཞུད་དབྱིངས་སུ་དེངསཿ སོགས། མྱང་འདས་གོ་ས་མངོན་གྱུར་མཛོདཿ དཀར་ལམ་ཐེན་ནས་ཟོར་དང་གཏོར་མ་རྣམས་དཔག་དེ་ནས་ལྷག་མ་ཡར་མཆོད་མར་མཆོད་གཉིས་སུ་བྱ་བ་ལ། །ཡར་གནས་མཆོད་པའི་ལས་བྱ་བ། བྷྲུཾ་བི་ཤ་བི་ཤུདྡྷེ་ཛྙཱ་ན་ཙཀྲ༴ སོགས། །བཅོལ་པའི་ཕྲིན་ལས་གྲུབ་པར་མཛོདཿ མར་གནས་ལ་ལྷག་མ་བཏང་བ་ནི། །ལྷག་མར་བདུད་རྩི་བྲན་ནས་བརླབས། །ཧྲཱིཿཧཱུཾཿ དང་པོའི་ཕུད་ལ་དཔལ་ཆེན། སོགས། ཨི་དམ་བྷ་ལིང་ཏ་ཁཱ་ཧི་ཁཱ་ཧི། ཚོགས་མཐར་བཟློག་ཅིང་ཟོར་འཕེན་པ། ཧྲཱིཿཧཱུཾཿ འཇིགས་རུང་དྲག་པོའི་སྣོད༴ སོགས། བྷྱོ་བྷྱོ་བཟློག་བཟློག ལྷག་མ་ཡར་མཆོད་པ་གཏོར་ཆེན་དུ་ཕུལ། མར་མཆོད་ཟོར་སྣ་བཞག །བཀའ་སྲུང་གི་མཆོད་གཏོར་རྣམས་བསྐུལ་ཏེ་སྨན་རཀ་བྲན་ལ་ཆད་ཐོ་འདོན་ཐོག་ཁར་འབུལ། ཆད་ཐོའི་གཏོར་མ་བཏང་པའི་ཐབས། །ཧྲཱིཿཧཱུཾཿ སྔོན་ཚེ་འོག་མིན་རྣམ་དག༴ སོགས། རབ་འབྱམས་ཕྲིན་ལས་ཀུན་འགྲུབ་མཛོདཿ ཅེས་པས་ཕུལ། དེ་ནས་ཐམས་ཅད་ལངས་ཏེ་བཟློག་སྔགས་ཟོར་སྔགས་ཐུན་སྔགས་རྣམས་འདོན་ཞིང་ཐུན་གྱི་གཏོར་མ་དང་ཟོར་རྣམས་ལ་བྲབས་ཤིང་གཏོར་ཆུང་རྣམས་ཀྱང་ཁྲོ་ཆུང་དུ་བསམ། །དེ་ནས་ཕྱིར་ཐོན་སྤྲོ་ན་གཞལ་ཡས་ཁང་དུ་བསྒྲལ་ཆོག་བྱེད་འཕེལ་སར་སླེབས་པ་ན ། སྡེ་བརྒྱད་མཆོད་པ་དང་གསེར་སྐྱེམས་བཏང་། །གཏོར་ཟོར་ཐམས་ཅད་མཚོན་ཆར་ཤེས་དགོས། །དམོད་པ་དུག་མཚོ་ཁོལ་མ་བྱས་ཀྱང་ལེགས། །གཏོར་ཟོར་ལག་ཏུ་ཐོགས་ལ། དང་པོ་གཏི་མུག་ཐབས་ཀྱིས་བསྐྱེད། །དེ་ནས་ཞེ་སྡང་ཕ་ཡིས་བསྐྱེད། །དེ་ནས་དྲི་ཟ་ལྟོ་བར་འཁོར། །ཕུང་ལྔ་རྩད་ནས་གཅོད་པའི་ཕྱིར། །ལྟེ་བའི་དཀྱིལ་དུ་གཏོར་ཟོར་ཡ། །རྣམ་རྟོག་རྩད་ནས་གཅོད་པའི་ཕྱིར། །སྙིང་གི་དཀྱིལ་དུ་གཏོར་ཟོར་ཡ། །དྲན་པ་ཉམས་པར་བྱ་བའི་ཕྱིར། །ཀླད་པའི་རྒྱས་སུ་གཏོར་ཟོར་ཡ། །ལྟ་བའི་རྟེན་དང་ཕྲལ་བའི་ཕྱིར། །མིག་གི་དཀྱིལ་དུ་གཏོར༴ སྨྲ་བའི་རྟེན་དང་ཕྲལ་བའི་ཕྱིར། །མགྲིན་པའི་གནས་སུ་གཏོར༴ འདུ་བྱེད་ལས་དང་ཕྲལ་བའི་ཕྱིར། །དཔུང་མགོ་གཉིས་ལ་གཏོར༴ སྲིད་པ་རྩད་ནས་གཅོད་པའི་ཕྱིར། །གསང་བའི་གནས་སུ་གཏོར་ཟོར༴ འགྲོ་བའི་རྟེན་དང་ཕྲལ་བའི་ཕྱིར། །བརླ་འོག་གཉིས་ལ་གཏོར༴ གཏོར་མ་དུག་གི་རང་བཞིན་གྱིས། །བགེགས་རྣམས་དྲན་པ་ཉམས་པར་བྱེད། །གཏོར་མ་མེ་ཡི་རང་བཞིན་པས། །བགེགས་རྣམས་ཐམས་ཅད་ཐལ་བར་བསྲེགས། །ༀ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ཐུམ་རིལ་ཧ་ན་ཧ་ན་ཙིཏྟ་ལ་བྲེང་ཤག་རྦད། ཧྲཱིཿབྷྱཽཿ ༀ་བཛྲ་མ་ཧཱ་ཀྲོ་ཏ་པདྨ་ཀྲོ་ཏ༴ སོགས། སྤུ་གྲི་རིང་མོ་བཟླས་ཤིང་འཕངས། །ཁྲག་ཟོར་ལག་ཏུ་ཐོགས་ལ། མཚན་ངན་ཐོད་པའི་སྣོད་ངན་དུ། །དམར་ཆེན་རཀྟ་ལ་སྦྱར་བའི། །ཡུངས་དཀར་ཟོར་འཕེན་ཤ་ར་ར། །མཚེ་ཡི་ཟོར་འཕེན་སི་ལི་ལི། །ཡུངས་མོ་ཟོར་འཕེན་ཐིབས་སེ་ཐིབ། །སྦྱོར་བ་ངན་པ་གཏོང་བ་ཡི། །སྡང་བའི་དགྲ་དང་གནོད་བགེགས་འདི། །དང་པོ་ཞེ་སྡང་ཕ་ཡིས་བསྐྱེད། །བར་དུ་འདོད་ཆགས་མ་ཡི་མངལ། །ཐ་མ་དྲི་ཟ་ལྟེ་བར་འཁོར། །ལྔ་ཕུང་རྩད་ནས་གཅོད་པའི་ཕྱིར། །ཀླད་པའི་རྒྱས་སུ་ཁྲག་ཟོར་ཡ། །སྙིང་གི་དཀྱིལ་དུ་ཁྲག་ཟོར་ཡ། །སྲོག་གི་སྒོ་རུ་ཁྲག༴ སྲོག་རྩའི་སྦུབས་སུ་ཁྲག༴ གློ་བའི་བྲལ་དུ་ཁྲག༴ མཆིན་པའི་སྦུབས་སུ་ཁྲག༴ མཚེར་བའི་སྒང་ལ༴ རྒྱུ་མའི་དཀྱིལ་དུ་ཁྲག༴ མཁལ་མའི་གློ་རུ༴ ལྟ་བའི་མིག་ལ༴ སྣོམ་པའི་སྣ་ལ༴ སྨྲ་བའི་ལྕེ་ལ༴ ཉན་པའི་རྣ་བར༴ སེམས་པའི་སྙིང་ལ༴ ཚོར་བའི་ལུས་ལ༴ འོག་གི་རྟ་ལ༴ བར་གྱི་ནོར་ལ༴ ཕུགས་ཀྱི་སྲིས་ལ༴ སྒོ་ཡི་ཁྱི་ལ༴ འོག་གི་ཆུང་མར༴ མཆན་གྱི་བུ་ལ༴ ཡུལ་མཁར་ཁྱིམ་ལ༴ རྩི་སྣར་ཞིང་ལ༴ གནམ་གྱི་འཇུ་ཐག་སྟེང་ནས་ཆོད། །ས་ཡི་རྟེན་ཕུར་འོག་ནས་ཕྱུངས། །བཀའ་ཡི་ཆད་པ་མྱུར་དུ་ཕོབས། །ཧྲཱིཿཧྱ་གྷྲྀ་ཝ་རཀྴ་རྦད། །ཐུན་སོད། པདྨཱནྟ་དགྲ་བོའི་སྙིང་ལ་ཐུན་རྦད། །མ་མ་རཀྴ་དགྲ་བོའི་སྙིང་ལ་ཐུན་རྦད། །དྲག་མོ་ཚལ་དུན་སྙིང་ལ་ཁོས་རྦད། །ཀྲོ་ཏ་རཀྴ་དགྲ་བོའི་སྙིང་ལ་རྦད། །ཐུན་མ་ར་ཡ་རྦད། །ཐུམ་རིལ་ཧ་ན་ཧ་ན་བྷྱོ་བྷྱོ། །ཐུམ་རིལ་ཧ་ན་ཧ་ན་ཙིཏྟ་ལ་བྲཾ་ཤག་རྦད་ཧྲཱི་བྷྱོ་བྷྱོས་འཕངས ། ཡུངས་ཟོར་ཐོགས་ལ། བྷྱོ། གནོད་སྦྱིན་རྒྱལ་པོ་ཁྲོས་པའི་སྲས། །ཡུངས་དཀར་ཡེ་ཤེས་སྤྲུལ་པའི་མདའ། ཐུགས་རྗེའི་ཀློང་ནས་ཕར་འཕངས་པས། །དགྲ་བོའི་གཟུགས་ཕུང་འབེན་ལ་རྒྱོབ། །དཀར་ནག་སྙིང་གི་དཀྱིལ་དུ་ཕྱུངས། །ཤིག་ཤིག་དུམ་དུམ་ཉིལ་ཉིལ་རྒྱོབ། །ཁྲོ་ཆུང་གཏམས་པའི་ཡུངས་དཀར་འདི། །ཡིད་ཀྱི་ཡེ་ཤེས་སྤྲུལ་པའི་མདའ། །ཏིང་ངེ་འཛིན་གྱིས་བྱིན་གྱིས་རླབས། །ཡེངས་པ་མེད་པར་འཕངས་པ་ཡིས། །དགྲ་བོའི་ནང་ཁྲོལ་འབེན་ལ་རྒྱོབ། །དུམ་བུ་རུལ་རྦད་དུམ་བུ་ཉལ་རྦད། །ཡན་ལག་འཆིང་བའི་ཡུངས་དཀར་ནི། །ཕྱག་རྒྱ་རོལ་པའི་མདའ་རྒྱང་སྟེ། །འཕྲོ་འདུ་ཕྱིར་ཡང་འགྱུར་བའི་མདའ། །དགྲ་བོའི་ཡན་ལག་འབེན་ལ་རྒྱོབ། །ཐུམ་ཐུམ་རིལ་རིལ། །དབང་པོ་ལེན་པའི་ཡུངས་དཀར་འདི། །རིག་པའི་རྒྱལ་པོའི་ཐུགས་ཀྱི་མདའ། །རིག་པའི་དབྱིངས་ནས་འཕངས་པ་ཡིས། །དགྲ་བོའི་དབང་པོའི་མིག་ལ་རྒྱོབ། །ཐིབས་ཡ་ཐིབས་ཡ། བྷྱོ་བྷྱོ། །རྣམ་ཤེས་གཅོད་པའི་ཡུངས་དཀར་འདི། །སྔགས་ཀྱི་རྒྱལ་པོ་བྲམ་ཟེའི་མདའ། །འགུགས་འདྲེན་ཕོ་ཉའི་མདའ་རྒྱང་སྟེ། །དགྲ་བོའི་རྣམ་ཤེས་འབེན་ལ་རྒྱོབ། །ཧུ་ཡ་ཧུ་ཡ། །ཧྲོག་ཧྲོག་གིས་འཕངས་ནས་གཏོར་ཆེན་འཕེན་པ་ནི། ནག་པོ་ལྕགས་ཀྱི་སྣོད་ཡངས་པར། །དཔལ་གྱི་དམར་ཆེན་གཏོར་མ་ལ། །མཚེ་ཡུངས་རྩང་སོགས་རྒྱན་གྱིས་སྤྲས། །དམར་ཆེན་ཁྲག་འཐུང་རོལ་པའི་ཟོར། །ཐོག་མཚོན་དུག་ནད་འཚུབ་མ་འདི། །དགྲ་དང་བགེགས་ཀྱི་སྟེང་དུ་བརྡེག །བྱད་ཕུར་ཆག་ཆེ་བར་ཆད༴ གནོད་བྱེད་ཐལ་བའི་རྡུལ་དུ་རློགས། །དྲག་སྔགས་སྤུ་གྲི་རིང་མོ་དང་བཟློག་སྔགས་བརྗོད་ལ་བརྡེགས། དུལ་མོ་བརྡབ་ཅིང་དམོད་བཅོལ་ནི། ཧོ། དགོངས་སུ་གསོལ། ཧོ། དགོངས་སུ་གསོལ། ཧོ། དགོངས་སུ་གསོལ། གསུམ། མཆོག་གསུམ་རྩ་གསུམ་རྒྱལ་བ་རྒྱ་མཚོ་སྲས་དང་བཅས་པ་རྣམས་བདག་ལ་དགོངས་སུ་གསོལ། །ཁྱད་པར་དུ་ཡང་བཅོམ་ལྡན་འདས་པདྨ་དབང་གི་རྒྱལ་པོ་ཁམས་གསུམ་ཟིལ་གནོན་ཡུམ་ཆེན་པདྨ་གར་དབང་མ། །རྟ་མགྲིན་དྲག་པོ་རིགས་བཞི། །སྒོ་སྲུང་ཕྱག་རྒྱའི་ལྷ་མོ་བཞི་དང་བཅས་པ་རྣམས་བདག་ལ་དགོངས་སུ་གསོལ། །གཞན་ཡང་ལྷ་ཆེན་དབང་ཕྱུག་ཆེན་པོ། །ཡུམ་ཆེན་ཨུ་མ་དཱེ་ཝི། །སྲས་མཆོག་གཙུག་ཕུད་ཅན༑ འཁོར་དབང་གི་ལྷ་མོ་རིགས་བཞི་དང་བཅས་པ་བདག༴ གཞན་ཡང་རྟ་མགྲིན་བཀའི་སྲུང་མ་སྲོག་བདག་འོད་ཀྱི་རྒྱལ་པོ། །ཚངས་པ་དུང་གི་གཙུག་ཕུད་ཅན། །དམ་ཅན་རྡོ་རྗེ་ལེགས་པ། །བདུད་པོ་རི་ནག་སྤུངས་པ། །སྲོག་བདག་ཡམས་ཤུད་དམར་པོ། །དྲང་སྲོང་གཟའ་བདུད་ཆེན་པོ་རཱ་ཧུ་ལ། སྲིང་མོ་གདོང་མོ་མཆེད་བཞི། །ཕོ་ཉ་ལྷ་སྲིན་སྡེ་བརྒྱད། །གནོད་སྦྱིན་ཆེན་པོ་ཟངས་ཀྱི་བེག་ཙེ་ཅན། །སྲིང་མོ་སྲིད་པའི་ལྷ་མོ་གདོང་དམར་མ། །ལས་མཁན་སྲོག་བདག་དམར་པོ། །མི་དམར་པྲ་མ། །རི་ཙི་མི་དམར། །ཀྲོ་ཏི་མི་དམར། །སྲོག་བདག་ཀོ་ཤ། །ཨམ་ཀྲི་མི་དམར། །རོ་ཀྲི་མི་དམར། །ཧ་ཤང་མི་དམར་སྲོག་བདག་ཐལ་བ་སོགས་གྲི་ཐོགས་བརྒྱད་དང་། །བཤན་པ་ཉི་ཤུ་རྩ་གཅིག་གི་ཚོགས་དང་བཅས་པ་བདག་ལ་དགོངས་སུ་གསོལ། །གཞན་ཡང་ཕྱི་ནང་གསང་བ་མཆོག་དང་སྤྲུལ་པ་སྣང་སྲིད་ཀྱི་ལྷ་སྲིན་སྡེ་བརྒྱད་འཁོར་དང་བཅས་པ་ཐམས་ཅད་བདག་ལ༴ གཞན་ཡང་བཀའ་སྲུང་གཏེར་སྲུང་ཆོས་སྲུང་དམ་ཅན་རྒྱ་མཚོ་ཡུལ་ལྷ་གཞི་བདག་དཀར་སྐྱོང་གི་ཚོགས་དངས་པ་ཐམས་ཅད་བདག་ལ༴ ཁྱེད་རྣམས་ལ་ཐུགས་དམ་གཉན་པ་བཅོལ་བའི་མདོ་ནི་སྤྱིར་སངས་རྒྱས་ཀྱི་བསྟན་པ་གཉན་པོ་བཤིག་པ། །དཀོན་མཆོག་གསུམ་གྱི་དབུ་འཕང་སྨད་པ། །ཡང་དག་པའི་ལྟ་བ་ལ་གཙིགས་སུ་བྱེད་པའི་སེམས་ཅན་ཉེས་མེད་སུ་ཡང་རུང་བ་ལ་གནོད་ཅིང་འཚེ་བའི་བསམ་སྦྱོར་ངན་པས་ལོག་སྦྱོར་དང་བརྐུ་འཕྲོག་བཅོམ་བརྡུངས་གསོད་པ་སོགས་ཀྱི་ལས་བྱེད་པ་རྣམས་དང་། །ཁྱད་པར་དུ་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་ལ་བསམ་ངན་སྦྱོར་རྩུབ་ཀྱི་སྒོ་ནས་མཐོ་གནོན་དང་། །བརྙས་གཤུངས་སྐུར་འདེབས་ཁ་དཀར་སྙིང་ནག་རྐུ་འཕྲོག་བཅོམ་གསུམ་བྱེད་པ་སོགས་དང་། །མི་ལ་ལྷ་མེད་ཟེར་ཞིང་། །ལྷ་ལ་མཐུ་མེད་ཟེར་བ། །མཐུ་བུ་ལོན་བཞིན་དུ་བསྙགས་པ། །དོ་བསྡོ་ཞིང་ཕོད་འཛུགས་པ། །སྔ་དགྲ་ལག་ལ་བདར་བ། །ཕྱི་དགྲ་ཡིད་ལ་ཤོམ་པ། །ད་དགྲ་ཐད་དུ་ལངས་པ། །ཁ་དྲག་དཔའ་དཔུང་ངོམ་པ། དངོས་སུ་འདུད་ཅིང་ལྐོག་ནས་གནོད་པའི་རྐྱེན་ངན་སྦྱོར་བ་དེ་དག་རྣམས་ལ་མཆོག་གསུམ་རྩ་གསུམ་ཆོས་སྐྱོང་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་བཀའི་ཆད་པ་དྲག་པོ་ཆོད་ཅིག །ཆོས་ཉིད་ངོ་བོས་སྟོང་ཀྱང་ཆོས་ཅན་རྒྱུ་འབྲས་བསླུ་བ་མེད་པས་བཀའ་ཆད་དྲག་པོ་ཆོད་ཅིག །བསམ་ངན་སྦྱོར་རྩུབ་ཤོམ་པའི་དགྲ་བོ་གཟུགས་ལིང་གར་བཀོད་ཅིང་མིང་ཡི་གེར་བྲིས་པ་དམིགས་པའི་འབེན་དུ་བཅས་པ་གནག་ཅིང་རྩུབ་པའི་ལས་སྔོན་ནས་བྱས་ཤིང་སླར་ཡང་བྱེད་པར་འགྱུར་བའི་དགྲ་བོ། །སྡིག་པོ་ཆེ་དེ་རྣམས་ལ་ཡེ་ཤེས་ལྷས་བཀའ་ཆད་འཇིག་རྟེན་དྲེགས་པ་ཡོངས་ཀྱིས་བཀའ༴ བཅོམ་ལྡན་འདས་པདྨ་དབང་ཆེན་གྱི་རྒྱལ་པོ་ཡབ་ཡུམ་བཀའ་སྲུང་དམ་ཅན་རྒྱ་མཚོའི་འཁོར་དང་བཅས་པ་རྣམས་ཀྱིས་བཀའ་ཆད་དྲག་པོ་ལྷའི་དྲང་སྲོང་བདེན་ཚིག་གྲུབ་པ་རྣམས་ཀྱིས་དམོད་པ་བོར་བ་ལྡོག་ཏུ་མེད་པ་གནམ་ལྕགས་སྒྱོགས་རྡོ་ལྟ་བུས་དགྲ་བོ་སྡིག་ཅན་དམ་ཉམས་རྣམས་ཕུང་བར་གྱུར་ཅིག །བརླག་པར་གྱུར་ཅིག །མེ་འབར་བའི་སྟེང་དུ་ཆུ་བླུགས་པ་བཞིན་དུ་ཐོངས་ཤིག །སྒོ་ང་བྲག་ལ་བརྡབ་པ་བཞིན་དུ༴ གཞོབ་རྡོག་པས་བརྫིས་པ་བཞིན་དུ་ཐོངས༴ བྱ་སྒྲོ་མེས་ཚིག་པ་བཞིན་དུ༴ མིང་ཙམ་ལྷག་མ་ཙམ་ཡང་མ་ལུས་པར་ཐལ་བའི་རྡུལ་བཞིན་དུ་བརླག་པའི་ཕྲིན་ལས་མཛོད་ཅིག །ཁམས་གསུམ་འཁོར་བ་སྡུག་བསྔལ་གྱི་རྒྱ་མཚོའི་རྒྱུན་ཐག་ཆོད་པར་གྱུར་ཅིག །མེད་པར་གྱུར་ཅིག །སྟོང་པར་གྱུར་ཅིག །ཅེས་བརྗོད་ལ་གཏོར་ཆེན་གདབ་བོ། །མེ་ཆུའི་རྒྱས་བཏབ་ལ། ཧཱུཾ། དང་པོ་ཆོས་ཀྱི་དབྱིངས་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ །བཞི་པ་ཚད་མེད་བཞི་ཡི་རྒྱ། །ལྔ་པ་ཡེ་ཤེས་ལྔ་ཡི་རྒྱ། །དྲུག་པ་རིགས་དྲུག་སངས་རྒྱས་རྒྱ། །བདུན་པ་མ་མོ་ཀུན་གྱི་རྒྱ། །བརྒྱད་པ་རྣམ་ཐར་བརྒྱད་ཀྱི་རྒྱ། །དགུ་པ་ཐེག་པ་རིམ་དགུའི་རྒྱ། །བཅུ་པ་ཁྲོ་བོ་བཅུ་ཡི་རྒྱ། །ང་ཡི་རྒྱ་ལས་མ་འདའ་ཞིག །བཤལ་ཆུས་པྲན་ཞིང་། བརྟན་མར་གཏོར་མ་འབུལ་བ་ནི། ཧྲཱིཿཧཱུཾ་བྷྱོཿ བཀའ་ཡི་ཚོགས་དང་བཅས་པ་ཉིད། སོགས། མ་མ་ཧྲིང་ཧྲིང་། སརྦ་པཉྩ་རཀྟ་བྷ་ལིངྟ་ཁཱ་ཧི། གཏོར་གཞོང་སྦུབས་ཏེ། ན་མོ་དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་བདེན་པས་གནོད་བྱེད་དམ་སྲི་འགབ་འདྲེ་ལོག་པར་འདྲེན་པ་ཐམས་ཅད་གཏོར་གཞོང་། རི་རབ་གསལ་བའི་འོག་ཏུ་ཁུག་ཅིག །ལན་གསུམ་བྱས་བྲོ་རྒྱས་གདབ་པ་ནི། ཧྲཱིཿཧཱུཾཿ དབང་དྲག་རོལ་པའི་དཀྱིལ་འཁོར་ནསཿ སོགས། སྟྭཾ་བྷ་ཡ་ནནཿ ནང་དུ་ལོག་ནས་ཚེ་འགུགས་ནི། བཅོམ་ལྡན་མགོན་པོ་ཚེ་དཔག་མེད། །སྐུ་མདོག་མཚན་དཔེས་བརྒྱན་པའི་སྐུ། །གསུང་མཆོག་ཡན་ལག་དྲུག་ཅུའི་གསུང་། །ཐུགས་མཆོག་མི་རྟོག་པ་ཡི་ཐུགས། །མཁའ་འདྲའི་སྐུ་གསུང་ཐུགས་མངའ་བ། །ཚེ་དཔག་མེད་ལ་ཕྱག་འཚལ་བསྟོད། །རྡོ་རྗེའི་ཚེ་མཆོག་འགུགས་པའི་ལས་མཛོད་ཅིག །རྡོ་རྗེ་ཚེ་ཡི་དངོས་གྲུབ་སྩལ་དུ་གསོལ། །ༀ་པུཎྱེ་པུཎྱེ་མ་ཧཱ་པུཎྱེ་ཨ་པ་ར་མི་ཏ་ཨཱ་ཡུརྫྙཱ་ན་སམྦྷ་རོ་པ་ཙི་ཏི་སྭཱ་ཧཱ། །ༀ་བཛྲ་ཨ་ཡུ་ཥེ་ཧཱུཾ་ཨཿ ༀ་ཨཱཿཡུརྫྙཱ་ན་སིདྡྷི་ཧཱུཾ། ཧཱུཾ་འགུགས་པའི་ལྷ་མོ་ལྕགས་ཀྱུ་མ། །དཀར་མོ་མཛེས་མ་ལྕགས་ཀྱུ་བསྣམས། །དྲི་ཟའི་ལག་ནས་ཚེ་ཁུག་ལ། །མེ་ལྷའི་ལག་ནས་དཔལ་སྐྱོབས་ཤིག །སྔགས་འགྲེས། ཧཱུཾ། འཆིང་བྱེད་ལྷ་མོ་ལྕགས་ཀྱུ་མ། །སྔོན་མོ་མཛེས་མ་ཞགས་པ་བསྣམས། །གཤིན་རྗེའི་ལག་ནས་ཚེ་ཁུག་ལ། །སྲིན་པོའི་ལག་ནས་དཔལ༴ སྔགས་འགྲེལ། ཧཱུཾ། སྡོམ་བྱེད་ལྷ་མོ་ལྕགས་སྒྲོག་མ། །དམར་མོ་མཛེས་མ་ལྕགས་སྒྲོག་བསྣམས། །ཀླུ་དབང་ལག་ནས་ཚེ་ཁུག་ལ། །རླུང་ལྷའི་ལག་ནས་དཔལ༴ སྔགས་འགྲེལ། ཧཱུཾ། འབེབས་བྱེད་ལྷ་མོ་དྲིལ་བུ་མ། །ལྗང་གུ་མཛེས་མ་དྲིལ་བུ་བསྣམས། །གནོད་སྦྱིན་ལག་ནས་ཚེ་ཁུག་ལ། འབྱུང་པོའི་ལག་ནས་དཔལ༴ སྔགས་བཅས་སོང་ནས། ཧྲཱིཿ ལྷ་དང་རིག་འཛིན་ཚེ་ཡི་བདགཿ ཅེས་ཀྱང་མི་ཆོད་མི་ཤིགས་པའིཿ ཚེ་སྲོག་བླ་ཁུག་རྒྱས་ཐོབ་ལཿ འཆི་མེད་ཚེ་དབང་འདིར་སྩོལ་ཅིགཿ ཚེ་དབང་དུ་གྱུར་ཅིགཿ དབང་དངོས་གྲུབ་ཏུ་གྱུར༴ ཚེ་མི་ཤིགས་པའི་རྡོ་རྗེ། མི་འགྱུར་བའི་གཡུང་དྲུང་མི་ནུབ་པའི་རྒྱལ་མཚན་ལྟ་བུ། ཚེ་སྲོག་རྡོ་རྗེ་བྲག་རི་ལས་སྲ་ཞིང་བརྟན་པར་གྱུར་ཅིག །ཡེ་དྷརྨ་བརྗོད། ཧྲཱིཿཧཱུཾཿ ཁྲོ་རྒྱལ་དཔལ་ཆེན་རྟ་མཆོག་དཔལཿ སོགས། ཨ་ལ་ལ་ཧོཿ ཞེས་དངོས་གྲུབ་བླངས། །མཆོད་ཅིང་བསྟོད་པ་བྱ་བ་ནི། ༀ་ཧྱ་གྷྲྀ་ཝ་ས་པཱ་རི་ཝ་ར༴ སོགས། །ཤཔྟའི་བར་བརྗོད། ཧྲཱིཿཧཱུཾཿ བདེ་མཆོག་རྡོ་རྗེ་པདྨ་དབང་ཿ སོགས། ལྷ་ཚོགས་རྣམས་ལ་བསྟོད། ནས་གཞུང་བཞིན་མཐར་ཆགས་སུ་གཏོང་ངོ་། །ཞེས་པ་འདི་ཡང་རང་གི་ཉེ་གནས་དྷརྨ་ཀིརྟིས་ཡང་ཡང་བསྐུལ་བ་ལ་བརྟེན་ནས་འཇིགས་མེད་ཕྲིན་ལས་འོད་ཟེར་གྱིས་རྟ་མགྲིན་ཡང་གསང་གི་སྨད་ལས་ཀྱི་ཚིགས་དོན་རྣམས་དང་གོ་བསྟུན་ཏེ་ཆོག་བསྒྲིགས་སུ་བཀོད་པ་གནམ་ལྕགས་རྡོ་རྗེའི་སྒྱོགས་རྡོ་ཞེས་བྱ་བ་རང་ཉིད་ཀྱི་ངག་ནས་བརྗོད་བཞིན་ཡི་གེ་པ་ནི་ཀུན་བཟང་འཆི་མེད་ཀྱིས་བགྱིས་པའི་དགེ་བས་འགྲོ་རྣམས་པདྨ་དབང་ཆེན་གྱི་གོ་འཕང་ཐོབ་པའི་རྒྱུར་གྱུར་ཅིག་གུ། དགེའོ། དགེའོ། དགེའོ།། །། ཐེག་པའི་ལམ་གྱི་འཇུག་སྒོ་་་་་༄༅། །ཤོག་གྲངས་གཅིག་མེད། ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་དབང་བསྐུར་བའི་རིམ་པ་གསན་ནས་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པའི་བསམ་པ་བྱང་ཆུབ་མཆོག་ཏུ་སེམས་བསྐྱེད་དེ་གསན་པ་ནི་གལ་ཆེ་སྟེ། རིན་ཆེན་ཕྲེང་བ་ལས། །སེམས་ཅན་ཁམས་ནི་ཚད་མེད་ལ། ཕན་འདོད་དེ་ནི་དེ་དང་འདྲ། །ཞེས་གསུངས་པའི་ཕྱིར་སེམས་ཅན་གྱི་ཁམས་ཚད་མེད་པ་བཞིན་དུ་དེ་ལ་ཕན་འདོད་ཀྱི་ལྷག་བསམ་ལན་གཅིག་ཙམ་སྐྱེས་པའང་ཚད་མེད་དེ། །བཟང་པོ་སྤྱོད་པས་སྨོན་ལམ་ལས། །ནམ་མཁའི་མཐར་ཐུག་གྱུར་པ་ཅི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པ་བཞིན། །སེམས་ཅན་ཐམས་ཅད་ཐུགས་ལ་བཅགས་ཏེ་གསན་པར་མཛོད། །དེ་ཡང་ཆོས་ཉན་པའི་ཀུན་ཏུ་སྤྱོད་པ་ཡང་། སྐྱེས་རབས་ལས། རབ་ཏུ་དམའ་བའི་གདན་ལ་འདུག །དུལ་བའི་དཔལ་ནི་རབ་བསྐྱེད་དེ། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །རབ་ཏུ་བསྒྲིམས་ཏེ་ཆོས་ཉོན་ཅིག །ཅེས་དང་ཨོ་རྒྱན་ཆེན་པོས། །རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངེས་བློ་ལ་རྡོ་རྗེ་སེམས་དཔའ་སོགས། དུས་གསུམ་རྒྱལ་བ་རྣམས་ཀྱིས་བྱིན་མི་རློབ། །ཞེས་གསུངས་པའི་ཕྱིར། །སྣོད་ཀྱི་སྐྱོན་གསུམ། དྲི་མ་དྲུག །མི་འཛིན་པ་ལྔ་དང་བཅས་པ་རྣམས་སྤང་དགོས་པར་གསུངས་པ་ལས། །རྣ་བ་མི་གཏོད་ཁ་སྦུབས་ལྟ་བུའི་སྐྱོན། །ཡིད་ལ་མི་བཞག་ཞབས་རྡོལ་ལྟ་བུའི་སྐྱོན། །ཉོན་མོངས་དང་འདྲེས་དུག་ཅན་ལྟ་བུའི་སྐྱོན། །ཞེས་སྐྱོན་གསུམ་དང་། གཉིས་པ་ནི། །སློབ་དཔོན་དབྱིག་གཉེན་གྱིས། །ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བ་ཉན་པའི་དྲི་མ་ཡིན། །ཞེས་དྲི་མ་དྲུག་དང་། གསུམ་པ་ནི། ཚིག་འཛིན་ལ་དོན་མི་འཛིན་པ་དང་། །དོན་འཛིན་ལ་ཚིག་མི་འཛིན་པ་དང་། །མ་ཚང་བར་འཛིན་པ་དང་། །བརྡ་མ་འཕྲོད་པར་འཛིན་པ་དང་། །ལོག་པར་འཛིན་པ་སྟེ་མི་འཛིན་པ་ལྔའོ། །དེ་ལྟ་བུའི་སྐྱོན་རྣམས་སྤངས་ཏེ། །ཅི་ལྟར་ཉན་པའི་ཚུལ་ནི། །མདོ་སྡོང་པོ་བཀོད་པ་ལས། རིགས་ཀྱི་བུ་ཆོས་ཉན་པའི་དུས་སུ་བདག་ཉིད་ལ་ནད་པའི་འདུ་ཤེས། །ཆོས་ལ་སྨན་གྱི་འདུ་ཤེས། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་དེ་ཉན་པར་བྱའོ། །ཞེས་གསུངས་པ་དང་། དེའི་སྟེང་དུ་ཕ་རོལ་ཕྱིན་པ་དྲུག་ཚང་དགོས་པར་གདམས་པ་ཡང་ཆོས་སྤྱོད་ཐམས་ཅད་ཀྱི་མངོན་པར་རྟོགས་པའི་རྒྱུད་ལས། །མེ་ཏོག་སྟན་སོགས་རབ་འབུལ་ཞིང་། །ས་ཕྱོགས་སྤྱོད་ལམ་སྡོམ་པ་དང་། །སྲོག་ཆགས་ཀུན་ལ་འཚེ་མི་བྱེད། །བླ་མ་ལ་ནི་གསོལ་བ་འདེབས། །མ་ཡེངས་བླ་མའི་གདམས་ངག་ཉན། །རྟོག་སེལ་ཕྱིར་ན་སྐྱོན་ཚིག་འདྲི། །སྒྲོན་མ་ཡན་ལག་དྲུག་དང་ལྡན། །ཞེས་སོ། །སྤྱིར་དམ་པའི་ཆོས་ཀྱི་ཚིག་གཅིག་ཙམ་དུད་འགྲོའི་རྣ་ལམ་དུ་ཐོས་ནའང་ངན་སོང་ལས་གྲོལ་བའི་ནུས་པ་ཅན་ཡིན་པ་མདོ་རྒྱུད་རྒྱ་མཚོ་ན་གསལ་ཞིང་ཁྱད་པར་རྒྱལ་བའི་དབང་པོ་ཀློང་ཆེན་ཞབས་ཀྱིས། །ཆོས་རྔ་སྒྲོག་པའི་སྒྲ་ཐོས་སེམས་ཅན་རྣམས། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་པའི་ཕྱིར། རང་ཅག་རྣམས་ཆོས་ཕྱིར་འཇུག་པ་ལ་ཕྱོགས་ཐམས་ཅད་ནས་ཕུན་སུམ་ཚོགས་པ་དལ་འབྱོར་གྱི་མི་ལུས་རིན་པོ་ཆེ་ཚེ་གཅིག་ལུས་གཅིག་ལ་སངས་རྒྱས་བསྒྲུབ་པའི་སྐལ་བ་ཅན་འདི་ལྟ་བུ་ཐོབ་ཚེ། གཏན་གྱི་འདུན་མ་བསྒྲུབ་པའི་རྟེན་འབྲེལ་དུས་ལ་བབ་པ་ཡིན་ཏེ། སློབ་དཔོན་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་འགྲུབ་ཐོབ་པར་འགྱུར་བ་ལ། །གལ་ཏེ་འདི་ལ་ཕན་པ་མ་བསྒྲུབ་ན། ཕྱིས་ནས་ཡང་དག་འབྱོར་བར་ག་ལ་འགྱུར། །ཞེས་གསུངས་པའི་ཕྱིར། ད་ལྟ་དལ་འབྱོར་གྱི་ལུས་རྟེན་ཡིད་བཞིན་གྱི་ནོར་བུ་ལས་ལྷག་པ་འདི་ཉིད་རྙེད་ཚེ་དམ་པའི་ཆོས་ཀྱི་བདུད་རྩི་ཟབ་མོ་ལེགས་པར་བཏུང་སྟེ་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་ཐབས་དང་བརྩོན་པ་ལྷུར་ལེན་དགོས། དེ་ལེན་པ་ལ་དུས་གསུམ་གྱི་སངས་རྒྱས་རྣམས་ཐབས་མཁས་ཤིང་ཐུགས་རྗེ་ཆེ་བས་གདུལ་བྱའི་སེམས་ཅན་རྣམས་ཀྱི་འདུ་ཤེས་མ་ཟད་བར་དུ་འདུལ་བྱེད་ཀྱི་ཆོས་ཀྱི་རྣམ་གྲངས་ཀྱང་དེ་སྙེད་ཅིག་བྱུང་བ་ཡིན་ནའང་མདོར་བསྡུ་ན་ཐེག་པ་ཆེ་ཆུང་གཉིས་སུ་འདུ་བ་ཡིན་མོད་དེ་ཡང་ནང་གསེས་ཀྱི་དབང་དུ་ན། ལང་ཀར་གཤེགས་པ་ལས། ལྷ་ཡི་ཐེག་དང་ཚངས་པའི་ཐེག །དེ་བཞིན་དུ་ནི་ཉན་ཐོས་དང་། །དེ་བཞིན་གཤེགས་དང་རང་རྒྱལ་གྱི། །ཐེག་པ་མཐའ་དག་ངས་བཤད་དོ། །ཞེས་སོ། །དེ་ཡང་མངོན་མཐོའི་ཐེག་པ་གཉིས་དང་། །ངེས་ལེགས་ཀྱི་ཐེག་པ་གསུམ་དུ་གྲགས་ནའང་བགྲོད་བྱའི་དབང་གི་རྣམ་པར་གྲོལ་བའི་ཐེག་པ་ལ་རྡོ་རྗེ་ཐེག་པ་སྔ་འགྱུར་གྱི་དབང་དུ་ན། ཀུན་བྱེད་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་སྔགས་ཀྱི་ཐེག་པའོ། །ཞེས་གསུངས་པའི་ཕྱིར། བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་དང་། །བར་པ་མཚན་ཉིད་མེད་པའི་ཆོས་ཀྱི་འཁོར་ལོ་དང་། །ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་དང་གསུམ་ལ་རྒྱུ་མཚན་ཉིད་ཀྱི་ཐེག་པ་དང་། །རྒྱུད་སྡེ་བཞིའམ་དྲུག་གི་ངེས་འབྱེད་ལ་གསང་སྔགས་རྡོ་རྗེ་ཐེག་པ་ཞེས་སུ་གྲགས་པ་ཡིན་ལ། །དེ་གཉིས་ལས་རྡོ་རྗེ་ཐེག་པ་ཁྱད་པར་དུ་མའི་སྒོ་ནས་འཕགས་པ་ཡིན་ཏེ། །ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཏེ། །སྔགས་ཀྱི་ཐེག་པ་ཁྱད་པར་འཕགས། ཞེས་དང་། མདོ་སྡེ་གདམས་ངག་འབོགས་པའི་རྒྱལ་པོ་ལས་ཀྱང་། །འཇམ་དཔལ་གྱིས་སྟོན་པ་ལ་གསོལ་པ། །འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་པའི་ལན་དུ་སྟོན་པས། རྒྱུ་ལ་མོས་པ་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་བྱས་ཏེ། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་སྟོན་པར་འགྱུར། །ཞེས་གསུངས་པའི་ཕྱིར་སྔགས་ནི་འབྲས་བུ་ལམ་དུ་བྱེད་པ་སངས་རྒྱས་རང་ལ་ཡོད་པ་ངེས་དོན་མཐར་ཐུག་གི་ཐེག་པ་ཡིན་པའི་ཕྱིར་རོ། །དེ་ལྟ་བུའི་གསང་སྔགས་རྡོ་རྗེ་ཐེག་པ་ལའང་རྙིང་མ་པ་དང་། གསར་མ་པ་གཉིས་སུ་ཡོད་པ་ལས། རྙིང་མ་ནི་སྤྲུལ་པའི་ལོ་ཙཱ་བ་ཆེན་པོ་བཻ་རོ་ཙ་ན་གཙོ་བོར་གྱུར་པའི་ཀ་ཅོག་རྨ་གཉགས་སོགས་ལོ་ཙཱ་བ་བརྒྱ་རྩ་བརྒྱད་ཀྱིས་མཁན་སློབ་ཆོས་གསུམ་གྱི་ཐུགས་རྗེས་བོད་ཁམས་སྐྱོང་བའི་སྐབས་སུ་བསྒྱུར་བའི་ཆོས་རྣམས་ཀྱི་བསྐྱེད་རིམ་དང་ཆོ་ག་བཟླས་བརྗོད་རྣམ་བཞི་ཕྲིན་ལས་ཀྱི་ཆར་གཏོགས་པའི་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པའི་བྱེ་བྲག་དཔག་ཏུ་མེད་པ་ཞིག་བྱུང་བ་ལ། རིམ་པ་དང་པོ་དང་། མཆོག་དབང་གོང་མ་གསུམ་གྱི་གདམས་པ་ཉམས་ལེན་གྱི་སྐོར་དཔག་ཏུ་མེད་པ་ཇི་སྙེད་ཅིག་བྱུང་བ་རྣམས་ལ་རིམ་པ་གཉིས་པ་དང་། །དེའི་གཉིས་ཀའི་དོན་ཆོས་ཉིད་ཇི་ལྟ་བའི་ཡེ་ཤེས་གཏན་ལ་འབེབས་པའི་ཐབས་ལ་རྫོགས་པ་ཆེན་པོ་ཞེས་ཡོངས་སུ་གྲགས་པ་ཡིན་ལ། ད་ལམ་དེ་གསུམ་ཀའི་ཆར་གཏོགས་པའི་པདྨ་དབང་ཆེན་ཁམས་གསུམ་ཟིལ་གནོན་གྱི་དབང་སྐུར་བའི་སྐབས་སུ་བབ་པ་ལ། །འདི་ཉིད་ཁོ་ནའི་ལོ་རྒྱུས་ཀྱི་དབང་དུ་བྱས་ན་ཆོས་རྗེ་མཁྱེན་བརྩེས། །སྔགས་ནི་ལས་ཅན་སྤྲུལ་པའི་ངོར། །རང་བཞིན་ཉིད་དུ་འབྱུང་བའི་ཕྱིར། །ཞེས་གསུངས་པ་དང་ཚུལ་མཐུན་པར། །རྒྱལ་བའི་དབང་པོ་ཀློང་ཆེན་པས། །སྤྲུལ་སྐུ་དེ་ཡང་སྔོན་བྱུང་གིས་ད་ལྟ་མེད་དོ་ཞེས་ལོག་པར་མི་ལྟ་སྟེ། །བྱིན་གྱིས་བརླབས་པ་དག་འབྱུང་སྲིད་པའི་ཕྱིར་རོ་ཞེས་དང་། །སངས་རྒྱས་ནི་རྟག་པར་བཞུགས་ནས་འགྲོ་བའི་དོན་མཛད་པ་ཡིན་ལ། བྱིན་གྱིས་བརླབས་པའི་བཀའ་ནི། རི་དང་ཤིང་དང་པདྨ་དང་སྐྱེས་པ་དང་བུད་མེད་ཁྱེའུ་དང་བུ་མོ། བྱ་དང་རི་དྭགས་ལ་སོགས་པ་ལས་ཆོས་ཀྱི་རྣམ་གྲངས་ཀྱི་སྒྲ་བྱུང་བ་ཡང་བྱིན་རླབས་ཀྱི་བཀར་བཞག་པ་ཡོད་ན། གང་ལ་ཡིད་ཆེས་པ་དེ་ཉིད་ཡི་དམ་དུ་བཟུང་བ་འཐད་ཀྱི་གཞན་ལ་སྐུར་པ་ནམ་ཡང་གདབ་པར་མི་བྱའོ། །ཞེས་གསུངས་པ་བཞིན། སྙིགས་མའི་དུས་འདིར་བསྟན་པ་དང་འགྲོ་བ་རྣམས་ཀྱི་ངོར་གང་ལ་གང་འདུལ་གྱི་ཚུལ་དུ་བྱུང་བའི་ཆོས་རྣམས་སངས་རྒྱས་ཀྱི་བྱིན་རླབས་ལས་བྱུང་བ་ཡིན་པས་དད་པ་ཐོབ་ན་བྱིན་རླབས་ཀྱང་དེ་རྗེས་སུ་འབྲང་བར་གདོན་མི་ཟ་བས་ཡིད་ཆེས་བསྐྱེད་པ་གལ་ཤིན་ཏུ་ཆེ། དེ་ཡང་རྟ་མགྲིན་ཁམས་གསུམ་ཟིལ་གནོན་འདི་ཉིད་ཕྱོགས་གང་དུ་གཏོགས་ན། ཨོ་རྒྱན་ཆེན་པོའི་ཐུགས་སྲས་ཀྱི་གཙོ་བོ་ལོ་ཆེན་བཻ་རོ་ཙ་ན་དང་སློབ་དཔོན་ཆེན་པོའི་གསང་གསུམ་དབྱེར་མེད་ངང་ནས་རྟ་མགྲིན་པདྨ་སྐ་གཅིག་གི་ནང་ནས་ཟབ་པ་རྟ་མགྲིན་ཡང་གསང་གི་ཆོས་རྣམས་མན་ངག་བཅུད་དུ་དྲིལ་ཏེ་ཡེར་པ་སེ་བ་གདོང་དུ་གཏེར་དུ་སྦ་བར་མཛད་པ་ས་རྟགས་དུས་རྟགས་རྣམས་ཚུལ་བཞིན་དུ་འགྲིགས་པའི་སྐབས་སུ་སྤྲུལ་པའི་གཏེར་སྟོན། སུམ་པ་དབང་ཚུལ། འབྲེ་ཤེས་རབ་བླ་མ། རྐྱང་པོ་གྲགས་པ་དབང་ཕྱུག་གསུམ་གྱིས་གཏེར་ནས་བཏོན་པའི་རྟ་མགྲིན་པདྨ་དབང་ཆེན་ཡང་གསང་ཁྲོས་པ་ལྷ་དགུར་གྲགས་པའི་གཞུང་ཉིད་རྩ་བར་བཟུང་ནས་རང་གི་དག་པའི་སྣང་བར་ཇི་ལྟར་ཤར་བ་བཞིན་གཏན་ལ་ཕབ་པ་ཡིན་ལ་འདི་ཉིད་ཀྱི་སྒོ་ནས་སློབ་མ་ལ་དབང་བསྐུར་བ་ལ་ཡང་བདག་ཉིད་ཀྱིས་བགྱི་བར་འོས་པ་དང་ཁྱེད་རང་གིས་བགྱི་འོས་གཉིས་སུ་ཡོད་པ་ལས། །བདག་ཉིད་ཀྱིས་བགྱི་འོས་བདག་མདུན་བུམ་པའི་ལྷ་ཚོགས་སོ་སོ་མ་ཡིན་ཐ་མི་དད་དུ་རིག་པའི་ངོ་བོ་གཅིག་གི་གསལ་མདངས་སུ། །མེ་ལོང་གཅིག་ལ་གཟུགས་བརྙན་སྣ་ཚོགས་ཤར་བ་བཞིན་བསྒྲུབས་ནས་བསྙེན་སྒྲུབ་ལས་སྦྱོར་གྱི་གཞུང་བཞིན་བསྒྲུབས་པའི་མཐར། །ཁྱེད་རང་གི་ངོ་སྐལ་དུ་གྱུར་པའི་ལུས་དང་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་དཔལ་ཡོན་དུ་དམིགས་ནས་མཎྜལ་འབུལ་བར་མཛོད། ཞེས་བརྡ་སྦྱར་ནས་མཎྜལ་འབུལ་དུ་གཞུག་གོ། །ཞུས་སོ།། རྟ་མགྲིན་ཁམས་གསུམ་ཟིལ་གནོན་གྱི་དབང་ཆོག་སྐུ་བཞིའི་མྱུ་གུ།༄༅། །དམ་ཆོས་བདེ་ཆེན་ལམ་མཆོག་ལམཿ རྟ་མགྲིན་ཁམས་གསུམ་༼ཟིལ་གནོན༽གྱི་དབང་ཆོག་སྐུ་བཞིའི་མྱུ་གུ་བཞུགསཿ ན་མོ་ཧྱ་གྷྲྀ་ཝ་ཡེཿ སྦྱང་གཞི་བདེ་གཤེགས་སྙིང་པོའི་ཁམསཿ སྦྱང་བྱ་ཕུང་ཁམས་སྐྱེ་མཆེད་དྲིཿ སྦྱོང་བྱེད་དབང་བཞིས་ཡོངས་བཀྲུས་ནསཿ སྐུ་བཞིར་དཀྲི་མཛད་བླ་མར་འདུདཿ མཁྱེན་བརྩེ་ནུས་ལྡན་སློབ་དཔོན་གྱིསཿ པདྨ་དབང་ཆེན་དཀྱིལ་འཁོར་དུཿ སློབ་མ་གཞུག་ཅིང་རྗེས་བཟུང་ཕྱིརཿ དབང་བཞིའི་རིམ་པ་འདིར་གསལ་བྱཿ དེ་ཡང་སློབ་དཔོན་སློབ་མ་གཉིསཿ སྐྱོན་བྲལ་ཡོན་ཏན་མང་ལྡན་ཞིང་ཿ དུས་ཚེས་གཟའ་སྐར་ཕུན་ཚོགས་ཉིནཿ རྫས་དང་ཡོ་བྱད་དབང་གཞུང་གིཿ འདོན་ཚིག་ཇི་བཞིན་ཀུན་འཛོམས་ཚེཿ ས་ཆོག་བརྔན་སྦྱིན་ཆ་གསུམ་སོགསཿ སྔོན་དུ་འགྲོ་དགོས་རྣམས་བཏང་ནསཿ དལ་སྟེགས་འདུ་བྱས་རྡུལ་ཚོན་ནམཿ རས་བྲིས་ལྷ་གྲངས་ཚོམ་བུ་བཅསཿ སྤྲོས་པ་ཆེ་ཆུང་དང་བསྟུན་ཏེཿ བཞུགས་གནས་རྟེན་དང་བརྟེན་པ་ལྷཿ མཚོན་བྱེད་རྫས་ཀྱི་དལ་ཡིན་ཀྱང་ཿ མཚོན་བྱ་རང་བྱུང་ཡེ་ཤེས་ཀྱིཿ ངོ་བོ་རང་བཞིན་ཐུགས་རྗེ་གསུམཿ གདུལ་བྱའི་བློ་ངོར་སྣང་མོད་ཀྱང་ཿ དོན་ལ་སྐྱེ་འགག་གནས་གསུམ་བྲལཿ དེ་ཕྱིར་ཀུན་རྫོབ་མཚན་བཅས་ཆོསཿ སྟོང་དང་མི་སྟོང་དམིགས་བྲལ་ངང་ཿ དད་ལྡན་སློབ་མ་མདུན་ཚོགས་པརཿ ཁྲུས་བྱས་བགེགས་བསྐྲད་སྲུང་འཁོར་བསྒོམསཿ མཎྜལ་འབུལ་བཅུག་ལོ་རྒྱུས་བཤདཿ སྐས་ཐེམ་ཇི་བཞིན་མས་ཡར་བགྲོདཿ དེ་ཡང་དང་པོ་སྐྱབས་འགྲོ་ནིཿ ཐུན་མོང་ཐེག་པ་ཇི་བཞིན་དུཿ སྐྱབས་འགྲོ་འདི་བཞིན་རྗེས་ཟློས་བྱཿ སངས་རྒྱས་ཆོས་དང་ཚོགས་མཆོག་གིཿ ངོ་བོ་དཔལ་མགོན་བླ་མ་ལཿ བྱང་ཆུབ་སྙིང་པོ་མ་ཐོབ་བརཿ སྐྱབས་སུ་མཆིའོ་ཐུགས་རྗེས་ཟུངསཿ གསུམ་བརྗོད་དམན་ལམ་ལས་ལྡོག་ཕྱིརཿ བྱང་ཆུབ་མཆོག་ཏུ་སེམས་བསྐྱེད་དོནཿ རྒྱུན་བཤགས་ཡན་ལག་བདུན་པ་ནིཿ མཆོག་གསུམ་རྩ་གསུམ་ངོ་བོ་ཉིདཿ བླ་མ་པདྨ་དབང་ཆེན་ལཿ སྐྱབས་མཆི་མཆོད་འབུལ་ཉེས་ཚོགས་བཤགསཿ དགེ་ལ་ཡི་རང་ཆོས་འཁོར་སྐོརཿ བཞུགས་གསོལ་འདེབས་སོ་དགེ་བའི་ཚོགསཿ འགྲོ་ཀུན་སངས་རྒྱས་ཐོབ་ཕྱིར་བསྔོཿ རྗེས་སུ་ཟློ་བ་ལན་གསུམ་བྱཿ སེམས་བསྐྱེད་དངོས་འདི་རྗེས་ཟློས་གསུམཿ བྱེད་བཅུག་དང་པོའི་སྨོན་པ་དང་ཿ གཉིས་པས་འཇུག་པ་གསུམ་བརྗོད་ཚེཿ གཉིས་ཀ་བརྟན་པའི་དོན་དྲན་བཞིནཿ བྱང་ཆུབ་སྙིང་པོ་མཆིས་ཀྱི་བརཿ སངས་རྒྱས་རྣམས་ལ་སྐྱབས་སུ་མཆིཿ ཆོས་དང་བྱང་ཆུབ་སེམས་དཔའ་ཡིཿ ཚོགས་ལའང་དེ་བཞིན་སྐྱབས་སུ་མཆིཿ ཇི་ལྟར་སྔོན་གྱི་བདེ་གཤེགས་ཀྱིསཿ བྱང་ཆུབ་ཐུགས་ནི་བསྐྱེད་པ་དང་ཿ བྱང་ཆུབ་སེམས་དཔའི་བསླབ་པ་ལཿ དེ་དག་རིམ་བཞིན་གནས་པ་ལྟརཿ བདག་ཀྱང་འགྲོ་ལ་ཕན་དོན་དུཿ བྱང་ཆུབ་སེམས་ནི་བསྐྱེད་བགྱི་ཞིང་ཿ དེ་བཞིན་དུ་ནི་བསླབ་པའང་ཿ རིམ་པ་བཞིན་དུ་བསླབ་པར་བགྱིཿ གསུམ་མཐར་སེམས་གཟེངས་བསྟོད་པ་ནིཿ དེང་དུས་བདག་ཚེ་འབྲས་བུ་ཡོདཿ མི་ཡི་སྲིད་པ་ལེགས་པར་ཐོབཿ དེ་རིང་སངས་རྒྱས་རིགས་སུ་སྐྱེསཿ སངས་རྒྱས་སྲས་སུ་ད་གྱུར་ཏོཿ བདག་གིས་དེ་རིང་སྐྱོབ་པ་ཐམས་ཅད་ཀྱིཿ སྤྱན་སྔར་འགྲོ་བ་བདེ་གཤེགས་ཉིད་དང་ནིཿ བར་དུ་བདེ་ལ་མགྲོན་དུ་བོས་ཟིན་གྱིསཿ ལྷ་དང་ལྷ་མིན་ལ་སོགས་དགའ་བར་གྱིསཿ ཞེས་བརྗོད་དེ་ལས་འཕགས་པའི་ཆོསཿ རིགས་ལྔའི་སྡོམ་པ་གཟུང་ཆེད་དུཿ འདི་ཡི་རྗེས་ཟློས་ལན་གསུམ་མཛོདཿ བཅོམ་ལྡན་པདྨ་དབང་ཆེན་གྱིཿ དཀྱིལ་འཁོར་ལྷ་ཚོགས་དགོངས་སུ་གསོལཿ བདག་ཅག་རྣལ་འབྱོར་སྒྲུབ་པ་པོའིཿ དུས་འདི་ནས་བཟུང་བྱང་ཆུབ་བརཿ སོ་སོར་ཐར་དང་བྱང་ཆུབ་སེམསཿ རིག་འཛིན་སྔགས་ཀྱི་དམ་ཚིག་སྤྱིཿ ཁྱད་པར་རིགས་ལྔའི་དམ་ཚིག་རྣམསཿ ཚུལ་བཞིན་ཡོངས་སུ་བཟུང་བར་བགྱིཿ མ་བསྒྲལ་སྒྲོལ་དང་མ་གྲོལ་དགྲོལཿ དབུགས་མ་ཕྱིན་པ་དབུགས་དབྱུང་ཞིང་ཿ སེམས་ཅན་མྱ་ངན་འདས་ལ་འགོདཿ ཞེས་དང་ཕྱི་ལྟར་འཇུག་པའི་དོནཿ ཐལ་སྦྱར་མེ་ཏོག་དང་བཅས་ཏེཿ གསོལ་བ་འདི་བཞིན་གདབ་པར་བྱཿ པདྨ་དབང་ཆེན་ཞབས་ལ་འདུདཿ ཐར་ལམ་མཆོག་འདོད་བདག་ཉིད་ལཿ རྟ་མགྲིན་དབང་དང་དངོས་གྲུབ་རྣམསཿ མགོན་པོ་གང་ལ་སྐྱབས་གསོལ་ཞིང་ཿ ཐེག་ཆེན་དལ་དུ་གཞུག་པ་དང་ཿ མཁྱེན་རབ་ཡེ་ཤེས་མྱུར་དུ་སྩོལཿ གསུམ་བརྗོད་གདོང་གཡོགས་མེ་ཏོག་སྦྱིནཿ དྲག་སྔགས་སོ་ལྔས་བགེགས་ཚོགས་བསྐྲདཿ དེ་ནས་དྲི་བ་འདི་བཞིན་བྱཿ བུ་ཁྱོད་སུ་ཡིན་ཅི་ལ་དགའཿ ལན་དུ་འདི་ཡི་རྗེས་ཟློས་བྱཿ བདག་ནི་སྐལ་བཟང་བདེ་མཆོག་སྟེཿ བདེ་བ་ཆེ་ལ་བདག་དགའོཿ དེ་ཡི་ལན་དུ་འདི་བརྗོད་དོཿ དེ་ཡི་ཁྱོད་ལ་ཅི་ཞིག་བྱཿ ཡང་ལན་འདི་ཉིད་རྗེས་ཟློས་བྱཿ སངས་རྒྱས་མཆོག་གི་རྣལ་འབྱོར་རོཿ ཞེས་བརྗོད་དེ་མཐར་འདི་ལྟ་སྟེཿ སློབ་དཔོན་ལྷར་གསལ་ཐུགས་ཀ་ནསཿ སྤྲུལ་པའི་ལྷ་ཡིས་སློབ་མ་རྣམསཿ དལ་གྱི་ནང་དུ་ཁྲིད་པར་མོསཿ ལག་གཡས་རྡོ་རྗེར་འཇུར་བཅུག་སྟེཿ བུ་ཁྱོད་འདིར་ཤོག་ཅི་བདེ་བརཿ ལས་སྤྱོད་རིམ་པར་འགྲོ་བ་དང་ཿ སྐུ་གསུང་ཐུགས་ཀྱི་རྡོ་རྗེ་ཟུངས ཿ རྫོགས་པའི་བདེན་པ་ཡེ་ཤེས་ལཿ དམིགས་པ་མེད་པ་གནས་ཕྱིར་དུཿ སེར་སྣ་མེད་པའི་ངང་ཉིད་ཀྱིསཿ སྟོང་ཞིང་རང་སེམས་བརྟན་པོར་ཟུངསཿ པདྨ་རིགས་ཀྱི་དབང་སོགས་སྦྱིནཿ ཞེས་པས་དལ་གྱི་ནང་བཙུད་དེཿ བུ་ཞེས་ཉེ་ཚིག་གིས་བོས་ནསཿ སོ་ཐར་བྱང་སེམས་སྔགས་སྡོམ་སོགསཿ བསྲུང་བྱ་སྤྱི་དང་བྱེ་བྲག་རྣམསཿ ཤེས་པར་གྱིས་ལ་བསྲུང་བར་མཛོདཿ ཅེས་གདམས་དེ་རྗེས་ནང་འཇུག་ནིཿ རབ་ཏུ་ཕངས་ཤིང་གཅེས་པ་ཡིཿ རང་ལུས་དུས་གསུམ་ཚོགས་ཞིང་ལཿ ཞེན་མེད་སེམས་ཀྱིས་འབུལ་བ་ནིཿ བདེ་གཤེགས་དབང་ཕྱུག་སེམས་ཅན་ལཿ དགོས་པ་གསུམ་ཕྱིར་ལུས་འབུལ་ལོཿ ༀ་སརྦ་ཏཱ་ཐ་ག་ཏ་བྷུདྡྷ་ནཾཿགུ་རུ་བཛྲ་ཨ་ཙཪྱ་ཨ་ཀ་ལ་སཏྭ་པུ་ཛ་ཨུཥྛ་ན་ཡ་ཨརྨ་ནཾ་ནིཪྻ་ཏ་ཡ་མིཿ ཞེས་བརྗོད་དེ་ནས་ཡེ་ཤེས་ལྷཿ སློབ་མར་དབབ་པའི་དབང་འདི་བཞིནཿ སློབ་དཔོན་ལྷར་གསལ་གནས་གསུམ་ལསཿ འོད་འཕྲོས་སློབ་མར་ཐིམ་པ་ཡིསཿ སྒོ་གསུམ་དྲི་མའི་ཚོགས་སྦྱངས་ནསཿ བཞུ་བླུགས་གསེར་གྱི་ཞུན་ཐིགས་བཞིནཿ ཧྲཱིཿ ལས་སློབ་མ་རྟ་མགྲིན་དམརཿ ཞལ་གཅིག་ཕྱག་གཉིས་སྤྱན་གསུམ་བསྒྲདཿ ཕྱག་གཡས་ཙན་དན་བེ་ཅོན་དང་ཿ གཡོན་པས་ཐུགས་ཀར་སྡིགས་མཛུབ་མཛདཿ མཆེ་བ་བཞི་གཙིགས་སྨིན་མ་དང་ཿ སྨ་ར་ཨག་ཚོམ་མེ་ལྟར་འབརཿ དམར་སེར་རལ་པ་གྱེན་བརྫེས་གཙུགཿ རྟ་མགོ་ལྗང་ཞུར་རྔོག་མ་དམརཿ ཕུམ་ཕུམ་གསེར་མདོག་རྟ་སྐད་སྒྲཿ ཕྱོགས་བཅུར་འཚེར་ཞིང་གཡས་ཞབས་བསྐུམཿ གཡོན་བརྐྱང་དུར་ཁྲོད་ཆས་བརྒྱད་དང་ཿ རཏྣ་སྦྲུལ་ཆུན་ལ་སོགས་པསཿ སྐུ་ལ་བརྒྱན་ནས་མེ་ཀློང་བཞུགསཿ དེ་ལྟར་གསལ་བའི་གནས་གསུམ་དུཿ ཟླ་བ་པདྨ་ཉི་གདན་གསལཿ སྤྱི་བོར་ཧཾ་ལྗང་རང་འོད་འཕྲོསཿ དེ་ཉིད་འོད་ཞུ་རང་ལུས་ལཿ ཐིམ་པས་རྡོ་རྗེའི་ཞུན་ཁྲབ་ཀྱིསཿ གཟུགས་ཕུང་ཡོངས་སུ་གཡོགས་པར་གྱུརཿ ཧྲཱིཿཀཱ་ཝ་ཙི་བཛྲ་རཀྵཿ རྡོ་རྗེ་མགོར་བཞག་བསྲུང་བར་བྱཿ དེ་ནས་གསང་གསུམ་དབང་ཞུ་དོནཿ གསོལ་འདེབས་འདི་བཞིན་རྗེས་ཟློས་བྱེདཿ དཔལ་ལྡན་རྡོ་རྗེའི་སྐུ་གསུང་ཐུགསཿ རྡོ་རྗེ་མི་ཕྱེད་གསང་གསུམ་ལྡནཿ དེང་བདག་དཀྱིལ་འཁོར་གསུམ་འཛིན་པསཿ རྡོ་རྗེ་གསུམ་དུ་མཛད་དུ་གསོལཿ ལན་གསུམ་ལྡབ་རྗེས་འདོན་བསྒོམ་སྦྲགསཿ བླ་མའི་གནས་གསུམ་འབྲུ་གསུམ་ལསཿ སྐུ་གསུང་ཐུགས་ཀྱི་ལྷ་གསུམ་པོཿ དུར་ཁྲོད་ཆས་རྫོགས་གཡས་རྣམས་ཀྱིསཿ འཁོར་ལོ་པདྨ་རྡོ་རྗེ་དང་ཿ གཡོན་རྣམས་དྲིལ་འཛིན་སྒྱུ་འཕྲུལ་གརཿ འོད་ཀྱི་སྣམ་བུ་ལ་ཞོན་ནསཿ སློབ་མའི་གནས་གསུམ་གདན་གསུམ་སྟེང་ཿ དབྱེར་མེད་ངང་དུ་བཞུགས་པར་གྱུརཿ ཀཱ་ཡ་སིདྡྷི་ༀཿ ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུཾཿ དེ་ཡིས་པདྨ་དབང་ཆེན་གྱིཿ སྐུ་གསུང་ཐུགས་དང་དབྱེར་མེད་དབང་ཿ ཐོབ་པར་མཆོད་ཚོགས་ཀུན་འབུལ་བཿ ༀ་ན་མཿསརྦ་ཏ་ཐཱ་ག་ཏ་ཀཱ་ཡ་ཝཱཀྐ་ཙིཏྟ་ཨརྒྷཾ་ནས་ཤཔྟ་ཨཱཿཧཱུཾཿ ཚང་བར་བརྗོད་ནས་དམ་བསྒྲག་པཿ འདི་ནི་དམ་ཚིག་རྡོ་རྗེའི་ཆུཿ ཁྱོད་ཀྱིས་འཐུང་ཞིང་དམ་སྲུངས་དང་ཿ འབྲས་བུ་མཆོག་འགྲུབ་སོམ་ཉི་བྲལཿ གལ་ཏེ་ཉམས་ན་ན་རཀ་རྒྱུཿ དེ་བས་བླང་དོར་མ་ནོར་ཞིགཿ ༀ་བཛྲ་ཨུ་ཏ་ཀ་ཧཱུཾཿ ཞེས་བརྗོད་ལས་བུམ་ཆུ་སྦྱིན་མཐརཿ བཀའ་བསྒོ་བསླབ་བྱ་འདི་བཞིན་བྱཿ སངས་རྒྱས་ཀུན་གྱི་གསང་བ་འདིཿ དམ་ལྡན་མ་གཏོགས་སུ་ལ་ཡང་ཿ སྨྲས་ན་ཉམས་པའི་རྒྱུར་འགྲོ་བསཿ མ་སྨྲ་གསང་བ་དམ་པར་གྱིསཿ ༀ་བཛྲ་སཏྭ་ཧཱུཾཿ སྙིང་ཁར་རྡོ་རྗེ་བཞག་ནས་སླརཿ ཐེག་ཆེན་སྟོན་བྱེད་བདག་ལ་ནིཿ བརྙས་དང་སྨོད་སྐུར་མི་འདེབས་ཤིང་ཿ གསང་གསུམ་དམ་ཚིག་རྟག་གནས་བཞིནཿ མཐའ་ཡས་འགྲོ་བའི་དོན་བྱོས་ཤིགཿ ཞེས་བརྗོད་རྡོ་རྗེ་སྤྱི་བོར་བཞགཿ དེ་ནས་ཡང་ཅིག་ཡེ་ཤེས་པཿ དབབ་ཕྱིར་གསོལ་བ་འདི་བཞིན་གདབཿ ཕྱོགས་བཅུ་རྒྱལ་བ་ཐམས་ཅད་ཀྱིཿ སྐུ་གསུང་ཐུགས་ཡོན་ཕྲིན་ལས་ཀྱིཿ མངའ་བདག་པདྨ་དབང་ཆེན་ལྷཿ མྱུར་དུ་བདག་ལ་དབབ་པར་མཛོདཿ གསུམ་ལྡབ་སློབ་མའི་ཚོགས་ལངས་ནསཿ སྤྱི་བོར་ཐལ་སྦྱར་གཡང་ལུགས་བཤུཿ རྟིང་པ་བཏེགས་ཏེ་གོང་གསལ་བཞིནཿ རང་ཉིད་པདྨ་དབང་ཆེན་དུཿ གསལ་བའི་གནས་གསུམ་འབྲུ་གསུམ་ལསཿ འོད་འཕྲོས་སྐུ་གསུམ་ཞིང་ཁམས་ཀྱིཿ རྒྱལ་དང་དེ་སྲས་སེམས་དཔའི་ཚོགསཿ པདྨ་དབང་ཆེན་སྐུར་བསྒྱུར་ཏེཿ ཆེ་བ་རི་རབ་ཙམ་དང་ནིཿ ཆུང་བ་ཡུངས་འབྲུ་ལྟ་བུ་ཡིསཿ ནམ་མཁའ་བར་སྣང་ས་གཞིའི་ཁམསཿ ཡོངས་གཏམས་སྟེང་ནས་ཁ་ཆར་བཞིནཿ འོག་ནས་ན་བུན་རླུང་བསྐྱོད་དཔེསཿ རྒྱ་མཚོ་ཆེན་པོར་ཆར་བབས་ལྟརཿ དབྱེར་མེད་ཐིམ་པའི་མོས་པ་མཛོདཿ ཅེས་བརྗོད་གུ་གུལ་བདུག་པ་དང་ཿ རོལ་མོའི་སྒྲ་ཆེན་སྦིར་བཞིན་དུཿ ༀ་ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་ཏྲི་ཤྱ་ཧོཿ ས་མ་ཡ་ཛཿ ས་མ་ཡ་སྟྭཾཿ ཛཿཧཱུཾ་བཾ་ཧོཿ བཛྲ་ཛྙཱ་ན་ཨ་ཝེ་ཤ་ཡ་ཨཱཿ ཞེས་དང་ཡང་བསྐྱར་ཚུལ་གྱིས་ནིཿ རབ་འབྱམས་ཁྲོ་བོའི་ཞིང་ཁམས་ཀྱིཿ ཁྲོ་ཚོགས་སྤྱི་དང་ཁྱད་པར་དུཿ དབང་ཆེན་རྟ་མགྲིན་དཀྱིལ་འཁོར་ལྷཿ མ་ལུས་ལུས་པ་མེད་པའི་ཚོགསཿ འཐོར་རླུང་གིས་བསྐྱོད་སྐྱིན་ཐང་བཞིནཿ ཧཱུཾ་ཕཊཿའབྲུག་སྟོང་ལྡིར་འདྲ་བའིཿ སྐུ་དང་སྔགས་ཕྲེང་ཕྱག་མཚན་གྱིཿ ཆར་ཆེན་དྲག་ཏུ་བབས་ནས་སུཿ དབྱེར་མེད་རོ་གཅིག་འདྲེས་པར་མོསཿ རྩ་སྔགས་གཤམ་བཅས་དྲག་ཏུ་བཟླཿ སྤྱན་དྲངས་ཡེ་ཤེས་བརྟན་བཞུགས་བྱཿ སུ་པྲ་ཏིཥྛ་བཛྲ་ཡེཿ བརྗོད་ཅིང་རྡོ་རྗེ་རྒྱ་གྲམ་ཚུལཿ སྤྱི་བོར་བཞག་ནས་བརྟན་པར་བྱཿ དེ་ནས་སྔ་མའི་མེ་ཏོག་དེཿ ལྷ་དང་བླ་མར་འབུལ་བ་ནིཿ རིན་ཆེན་ཕྲེང་བརྒྱུས་པུཥྤ་ཀཿ ཡེ་ཤེས་སྔོན་བརྙེས་ལྷར་འབུལ་ནཿ བྱམས་བརྩེའི་ཐུགས་ཀྱིས་དགོངས་ནས་ཀྱང་ཿ གང་ཡིན་དེ་ལ་དབབ་ཏུ་གསོལཿ པུཥྤེ་པྲ་ཏིཙྪ་བཛྲ་ཧོཿ ཞེས་པས་མེ་ཏོག་ཕུལ་ནས་སླརཿ སློབ་མའི་སྤྱི་བོར་བཞག་ནས་སུཿ ཨི་མཾ་ས་ཏྭ་མ་ཧཱ་བ་ལཿ ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ༴ བརྗོདཿ ༀ་ཕྱོགས་བཅུ་དུས་གསུམ་རྒྱལ་རྣམས་ཀྱིསཿ ཁྱོད་མིག་འབྱེད་ལ་དགོངས་པར་གྱུརཿ མ་རིག་ལིང་ཏོག་བསལ་བྱས་ནསཿ པདྨ་སྤྱན་བཟང་དྲི་མེད་ཐོབཿ ༀ་པདྨ་ཙཀྵུ་པྲ་ཝེ་ཤ་ཡ་ཕཊ྄ཿ ཅེས་པས་གདོང་གཡོགས་ཕྱེས་ནས་སུཿ མེ་ཏོག་གང་བབས་ལྷ་མིང་བཏགསཿ དེ་ཡང་ཕོ་མོའི་ཁྱད་པར་གྱིསཿ པདྨ་རྒྱལ་པོ་རྩལ་དང་ནིཿ པདྨ་དབྱིངས་ཕྱུག་རྩལ་གྱིས་འགྲེསཿ བླ་མས་དབྱུག་ཏོས་ལྷ་ངོ་བསྟནཿ དད་པས་ལྟོས་ཤིག་བློ་གྲོས་ཆེཿ སྔོན་བྱོན་རྒྱལ་བ་ཐམས་ཅད་ཀྱིཿ གསང་སྔགས་དཀྱིལ་འཁོར་འདིར་ཞུགས་ཏེཿ བསྒྲུབས་ནས་མེ་ཏོག་གང་ཕོག་ལྷཿ རིགས་ཀྱི་བདག་པོ་མཆོག་ཏུ་ཟུངས ཿ རྣམ་དག་བཤད་ཅིང་དོན་ངོ་སྤྲདཿ ལྷ་དང་རྣལ་འབྱོར་ཟུང་འཇུག་ཏུཿ རྟོགས་ན་འགྲུབ་འགྱུར་ཐེ་ཚོམ་མེདཿ ལྷ་མེད་དགེ་སྒྲུབ་ཐ་མལ་རང་ཿ དད་པ་མེད་རྣམས་ཕུང་བའི་རྒྱུཿ ཞེས་དང་། ལྷ་བསྒོམ་སྔགས་བཟླས་རྗེས་གནང་ནིཿ རང་ཉིད་དབང་ཆེན་ལྷར་གསལ་བའིཿ ཐུགས་ལས་སྔགས་ཀྱི་ཕྲེང་བ་ཐོནཿ སློབ་མ་ལྷར་གསལ་ཁར་ཞུགས་ཏེཿ སྙིང་ཁར་སྔགས་ཕྲེང་འཁོར་བར་མོསཿ ཞེས་བརྗོད་སྙིང་པོ་ལན་གསུམ་དུཿ རྗེས་ཟློས་བྱེད་བཅུག་དེ་རྗེས་སུཿ གསང་འོས་གདམས་ཤིང་རྗེས་གནང་ནིཿ གསང་སྔགས་སྐྱོན་ཡོད་མ་ཡིན་ཀྱང་ཿ ཉན་རང་དང་ནི་བློ་ཆུང་ལཿ མ་གསང་དངོས་གྲུབ་ཞུད་འགྱུར་གསུངསཿ སྐལ་ལྡན་སྨན་ཡང་སྐལ་མེད་དུགཿ དེ་ཕྱིར་སྔགས་སྤྱོད་སྐལ་ལྡན་རྣམསཿ ཟུང་འཇུག་དོན་ལ་གོམས་བགྱིས་ནཿ འདོད་ཡོན་ལྔ་སྤྱོད་སྤང་བླང་སྙོམསཿ རང་སེམས་ཐེག་པར་ངེས་གྱུར་ནཿ ཉོན་མོངས་འདོད་པ་ཀུན་སྤྱད་ཀྱང་ཿ པདྨ་འདམ་གྱིས་མ་གོས་བཞིནཿ སྡོམ་གསུམ་དཔལ་ཡོན་ཕུན་ཚོགས་ལྡནཿ དེ་ཡང་ནང་ལྟར་འཇུག་པའོཿ དེ་ནས་དངོས་གཞིའི་དབང་ཞུ་དོནཿ མཎྜལ་ཕུལ་ཞིང་གསོལ་བ་བཏབཿ བཅོམ་ལྡན་རྡོ་རྗེ་འཆང་ཆེན་གྱིསཿ མཆོད་ཅིང་ཇི་ལྟར་བསྩལ་བ་ལྟརཿ བདག་ཀྱང་དྲངས་པའི་དོན་གྱི་ཕྱིརཿ འཆི་མེད་རྡོ་རྗེ་དེང་བདག་སྩོལཿ ལན་གསུམ་ལྡབ་ཅིང་དབང་བསྐུར་བཿ སློབ་མའི་སྤྱི་བོ་དཔྲལ་བ་དང་ཿ རྣ་ལྟག་གཡས་དང་ལྟག་པ་དང་ཿ རྣ་ལྟག་གཡོན་སོགས་བུམ་པས་རེགཿ ཕྱོགས་བཅུ་དུས་གསུམ་རྒྱལ་རྣམས་ཀྱིཿ སྐུ་གསུང་ཐུགས་ལས་བྱུང་བ་ཡིཿ རྡོ་རྗེ་འཁོར་ལོ་རིན་པོ་ཆེཿ པདྨ་རྒྱ་གྲམ་རིགས་ལྔའི་དབང་ཿ དེང་འདིར་ཁྱོད་ལ་སྦྱིན་པར་བྱཿ ༀ་བཛྲ་བྷུདྡྷ་རརྣ་པདྨ་ཀརྨ་ཧེ་རུ་ཀ་ཨ་བྷི་ཥིཉྩ་མཾཿ དེ་ལྟར་བུམ་ཆུ་གནས་སོ་སོརཿ བླུགས་པས་དུག་ལྔའི་དྲི་སྦྱངས་ནསཿ ཕུང་ལྔ་གནས་འགྱུར་བུམ་པའི་ཆུསཿ ལུས་གང་ཆུ་ལྷག་ཡར་ལུད་པསཿ ཡེ་ཤེས་ལྔ་ཡི་ངོ་བོ་ཉིདཿ ཁྲག་འཐུང་རིགས་ལྔས་དབུ་བརྒྱན་གྱུརཿ དེ་ནས་དཀྱིལ་འཁོར་ལྷ་རྣམས་ཀྱིཿ སྐུ་ལས་མཆེད་པའི་སྒྱུ་འཕྲུལ་གཟུགསཿ བྱུང་ནས་སློབ་མ་རྟ་མགྲིན་དུཿ གསལ་བའི་ལུས་གནས་སོ་སོ་རུཿ ཐིམ་པས་དབང་ཆེན་སྐུ་ཡི་དབང་ཿ ཡོངས་སུ་རྫོགས་པ་ཐོབ་པར་མོསཿ ཐོག་མར་བླ་མའི་དབང་བསྐུར་བཿ ཧྲཱིཿ ཕྱོགས་བཅུ་དུས་གསུམ་རྒྱལ་ཀུན་གྱིཿ གསང་གསུམ་ངོ་བོ་རྡོ་རྗེ་འཛིནཿ མཆོག་གསུམ་དངོས་གྲུབ་སྩོལ་མཛད་པཿ པདྨ་ཀཱ་རའི་དབང་བསྐུར་རོཿ ༀ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾཿ ཨ་བྷི་ཥིཉྩ་མཾཿ ཧྲཱིཿཧཱུཾཿ དམར་ནག་གྲུ་གསུམ་དཀྱིལ་འཁོར་ནསཿ རྟ་མགྲིན་པདྨ་ཧེ་རུ་ཀཿ ཡུམ་ཆེན་པདྨ་གར་དབང་མཿ ཡབ་ཡུམ་ཟུང་འཇུག་དབང་བསྐུར་རོཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ༀ་མ་ཧཱ་ཀྲོ་ཏི་ཤྭ་རི་ཧཱུཾཿ ཨ་བྷི་ཥིཉྩ་མཾཿ བླ་མ་དང་ཡི་དམ་དབང་ཆེན་ཡབ་ཡུམ་ཀྱི་དབང་བསྐུར་བས་ཐབས་ཤེས་གཉིས་སུ་མེད་པའི་དོན་ལ་དབང་འབྱོར་བར་གྱུར་ཅིགཿ ཧྲཱིཿཧཱུཾཿ ཕྱོགས་བཞི་འཁོར་ལོའི་རྩིབས་སྟེང་ནཿ རིགས་བཞིའི་དབང་ཆེན་ཕྱོགས་ཀྱི་མདོགཿ ཞལ་གཅིག་ཕྱག་གཉིས་དཔལ་ཆས་རྫོགསཿ ཞེ་སྡང་ང་རྒྱལ་འདོད་ཆགས་དང་ཿ ཕྲག་དོག་འདུལ་ཕྱིར་ཡེ་ཤེས་བཞིའིཿ དབང་མཆོག་དམ་པ་ཁྱོད་ལ་སྦྱིནཿ ༀ་བཛྲ་རརྣ་པདྨ་ཀརྨ་ཤྭ་ར་ཀྲོ་དྷ་ཧཱུཾཿ ཨ་བྷི་ཥིཉྩ་མཾཿ ཁྲག་འཐུང་དབང་ཆེན་རིགས་བཞིའི་དབང་བསྐུར་བས་ཉོན་མོངས་པ་བཞི་རྣམ་པར་དགཿ ཡེ་ཤེས་བཞི་མངོན་དུ་གྱུར་ནས་རྒྱལ་བ་རིགས་བཞིའི་གོ་འཕང་མྱུར་དུ་ཐོབ་པར་གྱུར་ཅིགཿ ཧྲཱིཿཧཱུཾཿ གཞལ་ཡས་ཕྱོགས་བཞིའི་སྒོ་བཞི་ནསཿ སྒོ་སྐྱོང་ཁྲོ་མོ་རྣམ་པ་བཞིཿ རང་རྟགས་ཕྱག་རྒྱ་བཞི་བསྣམས་པའིཿ ཚད་མེད་རྣམ་བཞིའི་དབང་བསྐུར་བསཿ ལས་བཞི་ཕྲིན་ལས་མྱུར་འགྲུབ་ཤོགཿ ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾཿ ༀ་བཛྲ་སྥོ་ཊ་བཾཿ ༀ་བཛྲ་གྷནྡྷེ་ཧོཿ ཨ་བྷི་ཥིཉྩ་མཾཿ སྒོ་མ་བཞིའི་དབང་བསྐུར་བས་རྟག་ཆད་མུ་བཞི་གནས་སུ་དག་ཚད་མེད་རྣམ་བཞི་རྒྱུད་ལ། སྐྱེས་ནས་ཕྲིན་ལས་རྣམ་པ་བཞིའི་སྒོ་ནས་སེམས་ཅན་ཐམས་ཅད་ཀྱི་དོན་ཐོགས་པ་མེད་པ་བྱེད་ནུས་པར་གྱུར་ཅིགཿ བྱུག་པའི་རྫས་གསུམ་གྱི་དབང་བསྐུར་བཿ ཆོས་སྐུ་ཐལ་ཆེན་ཚོམ་བུའི་དབང་ཿ ལོངས་སྐུ་རཀྟའི་ཐིག་ལེའི་དབང་ཿ སྤྲུལ་སྐུ་ཞག་གི་ཟོ་རིས་དབང་ཿ མཚན་མ་གསུམ་གྱི་དབང་ཐོབ་ཤོགཿ འདོགས་པའི་རྒྱན་གྱི་དབང་བསྐུར་བཿ སྐམ་རྙིད་རློན་པའི་ཐོད་པ་ཡིཿ དབུ་རྒྱན་དོ་ཤལ་སྐུ་གསུམ་མཚོནཿ དཀར་སེར་དམར་ནག་སྦྲུལ་ཆུན་བཅསཿ དེང་འདིར་ཁྱོད་ལ་དབང་བསྐུར་བསཿ སྣ་ཚོགས་འགྲོ་འདུལ་དབང་ཐོབ་ཤོགཿ བགོ་བའི་གོས་གསུམ་དབང་བསྐུར་བཿ ཞིང་ཆེན་པགས་པས་སྐེད་དཀྲིས་དང་ཿ གླང་ཆེན་གོ་རློན་སྟོད་གཡོགས་བརྗིདཿ སྟག་ལྤགས་རློན་པའི་སྨད་དཀྲིས་བཅསཿ ཉོན་མོངས་གསུམ་འཇོམས་དབང་ཐོབ་ཤོགཿ དུར་ཁྲོད་ཆས་བརྒྱད་ཀྱི་དབང་བསྐུར་བས་འཇིག་རྟེན་ཆོས་བརྒྱད་དང་མཚན་བཅས་ཀྱི་རྟོག་ཚོགས་ཐམས་ཅད་རྟོག་བྲལ་ཆོས་སྐུའི་ཀློང་དུ་སྒྲོལ་ནུས་པའི་དབང་དམ་པ་ཐོབ་པར་གྱུར་ཅིགཿ རྣམ་མང་རྒྱན་ཆའི་དབང་བསྐུར་བཿ ཐབས་ཤེས་རྡོ་རྗེའི་གཤོག་པ་དང་ཿ ཁམ་ནག་རལ་པ་མི་འགྱུར་རྟགསཿ ཡེ་ཤེས་ལྔ་ཡི་མེ་དཔུང་འབརཿ གཟུངས་དང་ཏིང་འཛིན་རིན་ཆེན་ཕྲེང་ཿ རྒྱུ་དྲུག་རྩད་གཅོད་ཕྱག་མཚན་དྲུགཿ ཁྲག་འཐུང་དཔལ་ཆས་ཡོངས་རྫོགས་ཀྱིཿ སྐལ་ལྡན་རྣམས་ལ་དབང་བསྐུར་བསཿ སྲིད་ཞིའི་དཔལ་ཡོན་ཕུན་ཚོགས་ཤོགཿ རྟ་མགྲིན་པདྨ་ཧེ་རུ་ཀའི་དཔའ་ཆས་ཡོངས་རྫོགས་ཀྱི་དབང་བསྐུར་བས་ཀུན་རྫོབ་འཁྲུལ་སྣང་གི་ཆོས་རྣམས་དོན་དམ་ཆོས་ཉིད་བདེན་པའི་རྒྱས་ཐེབས་ནས་ལྷུན་གྲུབ་འོད་གསལ་གྱི་དབྱིངས་སུ་སོར་ཆུད་པར་གྱུར་ཅིགཿ མཐུ་རྩལ་སྐྱེད་བྱེད་གཏོར་དབང་ནིཿ ལྷ་དང་བླ་མ་དབྱེར་མེད་ལཿ གསོལ་བ་འདི་ལྟར་གདབ་པར་བྱཿ པདྨ་དབང་ཆེན་རྟ་མཆོག་དཔལཿ གང་གི་གསང་གསུམ་དཔལ་ཡོན་མཛོདཿ མཆོག་ཐུན་དངོས་གྲུབ་ཡིད་བཞིན་ནོརཿ དུས་འདིར་བདག་ལ་སྩལ་དུ་གསོལཿ རྗེས་ཟློས་ལན་གསུམ་བྱས་ནས་སུཿ གཏོར་སྣོད་གཞལ་ཡས་ཁང་གི་དབུསཿ གཙོ་འཁོར་སོ་སོའི་གདན་གྱི་སྟེང་ཿ ༀ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ༀ་མ་ཧཱ་ཀྲོ་དྷི་ཤྭ་རི་ཧཱུཾ་ཕཊཿ ༀ་བཛྲ་ཤྭ་ར་ཀྲོ་དྷ་ཧཱུཾ་ཕཊཿ ༀ་རརྣ་ཤྭ་ར༴ ༀ་པདྨ་ཤྭ་ར༴ ༀ་ཀརྨ་ཤྭ་ར་ཀྲོ་དྷ་ཧཱུཾ་ཕཊཿ ༀ་བཛྲ་ཨཾ་ཀུ་ཤ་ཛཿ པཱ་ཤ༴ སྥོ་ཊ༴ གྷནྷེ་ཧོཿ ལྷ་ཚོགས་ཡོངས་རྫོགས་གསལ་བཏབ་ནསཿ སྐུ་གསུང་ཐུགས་ཀྱིས་བྱིན་གྱིས་བརླབསཿ ཡེ་ཤེས་ལྔ་ཡི་དབང་བསྐུར་བསམཿ ཛཿཧཱུཾ་བཾ་ཧོས་ཡེ་ཤེས་པཿ སྤྱན་དྲངས་ཐིམ་ཞིང་མཆོད་པ་ནིཿ ༀ་མ་ཧཱ་པདྨ་ཤྭ་ར་ཀྲོ་དྷ་ས་པཱ་རི་ཝ་ར་ཨརྒྷཾ་ནས་ཤཔྟ་ཨཱཿཧཱུཾཿདང་། སརྦ་པཉྩ་རཀྟ་བཱ་ལིངྟ་མ་ཧཱ་པུ་ཁ་སྡུ་ཙ་ཧོཿ བདག་ཉིད་ལྷར་གསལ་ཐུགས་སྲོག་ཧྲཱིཿ དེ་ལས་འོད་འཕྲོས་འོག་མིན་གྱིཿ རིགས་ལྔ་སྟངས་དཔྱལ་ཟུང་འཇུག་གིཿ སྦྱོར་མཚམས་གནས་ནས་ཡེ་ཤེས་ཀྱིཿ བདུད་རྩི་སྤྱན་དྲངས་གཏོར་མ་ལཿ བསྟིམས་པས་དངོས་གྲུབ་རྒྱ་མཚོར་མོསཿ ༀ་པདྨ་ཏ་ཀྲིཏ་པདྨ་ཤྭ་རི་བཛྲ་རརྣ་པདྨ་ཀརྨ་ཧྱ་གྷྲྀ་ཝ་ཛ་ཧཱུཾ་བཾ་ཧོཿས་པཱ་རི་ཝ་ར་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཨ་ལ་ལ་ཧོཿ གཏོར་མ་སྤྱི་བོར་བཞག་བྱས་ནསཿ ཧྲཱིཿཧཱུཾཿ དམ་ཚིག་ཐུགས་དམ་དུས་ལ་བབཿ རང་སྣང་དོན་གྱི་འོག་མིན་ནསཿ བཅོམ་ལྡན་ཆོས་སྐུ་འོད་མི་འགྱུརཿ ཆོས་སྐུ་ཞི་ལས་མ་གཡོས་ཀྱང་ཿ གདུལ་བྱའི་དོན་དུ་ཁྲོ་བོའི་སྐུརཿ ཡོངས་བཞེངས་པདྨ་དབང་གི་ལྷཿ གཙོ་འཁོར་སྤྲུལ་པ་ཡང་སྤྲུལ་བཅསཿ འདིར་བྱོན་སློབ་མའི་ཚོགས་རྣམས་ཀྱིཿ ལུས་ལ་སྐུ་ཡིས་བྱིན་གྱིས་རློབསཿ ངག་ལ་གསུང་གིས་བྱིན༴ ཡིད་ལ་ཐུགས་ཀྱིས༴ དབང་ཆེན་ཁྲོ་བོས་བྱིན༴ ཁྲོ་མོ་ཡུམ་གྱིས༴ རྟ་མགྲིན་རིགས་བཞིས༴ སྒོ་སྐྱོང་མ་བཞིས༴ སྤྲུལ་འཁོར་སྲུང་མས༴ ནད་གདོན་ཞི་བར་བྱིན༴ ཚེ་བསོད་རྒྱས་པར༴ ཅི་བསམ་འགྲུབ་པར༴ གྲུབ་གཉིས་ཐོབ་པར༴ མངོན་སངས་རྒྱ་བར་བྱིན་གྱིས་རློབསཿ ༀ་བཛྲ་ཀྲོ་ཏ་ཧྱ་གྷྲྀ་ཝ་ས་པཱ་རི་ཝ་ར་ཀཱ་ཡ་ཨ་བྷི་ཥིཉྩ་ༀཿ ཞེས་མོས་རྟ་མགྲིན་གཙོ་འཁོར་རྣམསཿ སློབ་མར་བསྟིམས་འཕྲལ་འོད་ཕུང་གིཿ རྣམ་པས་ཐུགས་ཀའི་ཡེ་ཤེས་པརཿ ཐིམ་པས་བསྐལ་པའི་མེ་ཆུས་ཀྱང་ཿ གཞོམ་གཞིག་བྲལ་བའི་ནུས་ལྡན་བསམཿ དེ་ལྟར་གཏོར་མའི་དབང་བསྐུར་བསཿ ལུས་སྒྲིབ་ཀུན་དག་བསྐྱེད་རིམ་ལམཿ སྒོམ་པར་དབང་ཞིང་སའི་ཁྱད་པརཿ ཀུན་ཏུ་འོད་དང་སྟུག་པོ་བཀོདཿ བདེ་བ་དགའ་བ་སྣང་སྟོང་རྟོགསཿ འབྲས་བུ་སྤྲུལ་སྐུའི་རྟེན་འབྲེལ་འགྲིགཿ གསང་དབང་བསྐུར་དོན་མཎྜལ་རྗེསཿ རྡོ་རྗེ་འཆང་དབང་རྒྱལ་བ་ཡིསཿ འབྲས་བུའི་འཕགས་ཚོགས་སྨིན་མཛད་ལྟརཿ བདག་ཅག་གསང་བའི་དབང་མཆོག་གིསཿ སྨིན་ཅིང་གྲོལ་བར་མཛད་དུ་གསོལཿ རྗེས་ཟློས་ལན་གསུམ་བྱེད་བཅུག་ལཿ སློབ་དཔོན་དབང་ཆེན་ཡབ་ཡུམ་དུཿ གསལ་ཞིང་སྦྱོར་བ་མཛད་པ་ཡིསཿ བྱང་སེམས་ཐིག་ལེ་དངུལ་ཆུ་བཞིནཿ སློབ་མའི་ལྕེ་ལ་དབབ་པ་ཡིསཿ བདེ་ཆེན་འགྱུར་མེད་དབང་ཐོབ་ཤོགཿ པདྨ་སུ་ཁ་བྷོ་དྷི་ཙིཏྟ་ཨ་བྷི་ཥིཉྩ་ཧཱུཾཿ དབང་ཆེན་གསང་བའི་དབང་ཐོབ་ནསཿ ངག་སྒྲིབ་དག་ཅིང་གཏུམ་མོའི་ལམཿ སྒོམ་པར་དབང་ཐོབ་མཆོག་དགའ་སྐྱེསཿ པདྨ་ཅན་ནོན་རིག་སྟོང་རྟོགསཿ འབྲས་བུ་ལོངས་སྐུའི་རྟེན་འབྲེལ་འགྲིགཿ ཤེར་དབང་དོན་དུ་མཎྜལ་ཕུལཿ རྡོ་རྗེ་འཆང་དབང་༴ སོགས་གསོལ་གསུམ་གདབཿ མཚན་ལྡན་རིག་མ་གཏད་ནས་སུཿ གཟུགས་མཛེས་ལང་ཚོ་དར་བབ་པའིཿ རིག་མ་བརྟེན་ཚུལ་རྒྱལ་བས་གསུངསཿ དེ་ཕྱིར་མ་དག་ཕུང་ཁམས་སོགསཿ ཡོངས་དག་པདྨ་གར་དབང་དུཿ མོས་བློས་མཁའ་གསང་བྱིན་རླབས་ནསཿ རང་བཞིན་ཟུང་འཇུག་བསྒུལ་བསྐྱོད་མེསཿ ཀུནྡྷ་བྱང་སེམས་ཞུ་བའི་རྒྱུནཿ བབས་པས་དགའ་བཞི་མངོན་གྱུར་བསམཿ དེ་ལྟར་གསུམ་པའི་དབང་ཐོབ་ནསཿ ཡིད་སྒྲིབ་དག་ཅིང་ཕོ་ཉའི་ལམཿ སྒོམ་པར་དབང་ཐོབ་ཁྱད་པར་དགའཿ ཡེ་ཤེས་འཁོར་ལོའི་ས་ནོན་ཅིང་ཿ བདེ་སྟོང་དོན་རྟོགས་ཆོས་སྐུ་ཡིཿ གོ་འཕང་ཐོབ་པའི་རྟེན་འབྲེལ་འགྲིགཿ བཞི་པའི་དབང་དོན་མཎྜལ་དང་ཿ གསོལ་བ་གསུམ་བཏབ་ཨ་དཪྴཿ གཏད་ཅིང་བརྡ་དོན་འདི་བཞིན་བཤདཿ མེ་ལོང་ཀ་དག་སྤྲོས་བྲལ་མཚོནཿ སྣང་ཡུལ་མ་འགག་ལྷུན་གྲུབ་རྟགསཿ སྣ་ཚོགས་འཆར་བ་ཐུགས་རྗེའི་རྩལཿ ཤར་ཡང་རང་བཞིན་མ་གྲུབ་པཿ སྟོང་པ་ལས་གཞན་རྫས་དངོས་དབེནཿ ཆུ་ཟླ་ནམ་མཁའི་འཇའ་ཚོན་བཞིནཿ སྣང་བའི་ཕྱིར་ན་མེད་པ་མིནཿ བཙལ་ཡང་རྟེན་ཅིང་འབྲེལ་འབྱུང་ཙམཿ སྣང་སྟོང་འཛིན་བྲལ་རྫོགས་པ་ཆེཿ སྒོམ་མེད་ཡེངས་མེད་ཚུལ་དུ་ཞོགཿ དེ་ལྟར་དབང་བཞི་ཐོབ་པ་ཡིསཿ སྒོ་གསུམ་ཆ་སྙོམས་སྒྲིབ་དག་ནསཿ རྫོགས་པ་ཆེན་པོ་སྒོམ་པར་དབང་ཿ ལྷན་སྐྱེས་དགའ་མྱོང་མཐའ་བྲལ་རྟོགསཿ བཅུ་དྲུག་ས་ནོན་སྐུ་བཞི་ཡིཿ རྟེན་འབྲེལ་འགྲིག་པས་སྐལ་ལྡན་གྱུརཿ དེ་ལྟར་དབང་ཆེན་རྟ་མགྲིན་གྱིཿ སྨིན་བྱེད་ཡོངས་རྫོགས་ཐོབ་པ་ཡིཿ དམ་ཚིག་ཚུལ་བཞིན་བསྲུང་སྙམ་པསཿ འདི་ཡི་རྗེས་ཟློས་ལན་གསུམ་མཛོདཿ གཙོ་བོས་ཇི་ལྟར་ལན་གསུམ་དང་ཿ དེང་ནས་བརྩམས་ཏེ་བདག་བྲན་དུཿ ཁྱེད་ལ་བདག་ནི་འབུལ་བར་བགྱིཿ ཁྱོད་ཀྱིས་སློབ་མར་བཟུང་བ་དང་ཿ ཆ་ཤིས་ཀྱང་ནི་སྤྱད་དུ་གསོལཿ རྗེས་སུ་ཡོན་འབུལ་བསྔོ་སྨོན་དང་ཿ བཀྲ་ཤིས་དགའ་སྟོན་ཚོགས་འཁོར་བསྐོརཿ དཔོན་སློབ་མཆེད་ལྕམ་དམ་མཐུན་བྱཿ དེ་ཡིས་དབང་ཆེན་དངོས་གྲུབ་འགྲུབཿ དེ་ལྟར་དབང་ཆེན་རྟ་མགྲིན་གྱིཿ དབང་ཆོག་སྐུ་བཞིའི་མྱུ་གུ་འདིཿ མ་ཧཱ་གུ་རུ་པདྨ་རྒྱལཿ ཆོས་ལོངས་སྤྲུལ་སྐུའི་ཚུལ་སྣང་ཡང་ཿ རང་སེམས་ངོ་བོ་རང་བཞིན་དང་ཿ རྩལ་སྣང་གསུམ་ལས་གཞན་དབེན་བཞིནཿ གཞོན་ནུ་བུམ་པའི་གཏེར་སྒྲོམ་ནསཿ རང་བཞིན་ལྷུན་གྲུབ་སྨིན་གྲོལ་ཆོསཿ རང་རྩལ་ཐུགས་རྗེའི་གཏེར་སྟོན་གྱིསཿ དུས་རྟགས་བསྟན་འགྲོར་ཕན་ངེས་སེམསཿ ཡང་ཡང་གསལ་བཞིན་བཏང་སྙོམས་བློཿ སྤངས་ནས་སྙིང་རྗེས་གཞན་དབང་དང་ཿ ཁྱད་པར་ཌཱཀྐི་དཔལ་འཛིན་མསཿ རྟེན་འབྲེལ་ཟབ་མོས་མཚམས་སྦྱོར་གྱིསཿ ཁོ་བོ་འཆི་བ་ལས་བཤོལ་ནསཿ ལོ་ཤས་འཚོ་བའི་རྟགས་མངོན་ཚེཿ རྒྱུད་ལུང་མན་ངག་རྒྱ་མཚོའི་བཅུདཿ སྙིང་པོར་དྲིལ་བའི་ཡིད་བཞིན་ནོརཿ སྙིགས་དུས་འགྲོ་བའི་དཔལ་དུ་གྱུརཿ དེང་དུས་ལུགས་ཟུང་ཕལ་མོ་ཆེཿ གོ་ལོག་ཁོ་ནར་སྤྱོད་པའི་ཚེཿ དབང་ཆེན་རོལ་པའི་མཐུ་སྟོབས་ཀྱིསཿ འགལ་རྐྱེན་ཞི་ཞིང་མཐུན་རྐྱེན་འགྲུབཿ དེ་ཕྱིར་འདི་ཉིད་གཅེས་པར་ཟུངས ཿ ས་མ་ཡཿ འཇིགས་མེད་ཕྲིན་ལས་འོད་ཟེར་བརྒྱསཿ རྒྱལ་བསྟན་པད་ཚལ་རྒྱས་གྱུར་སྨོནཿ དྷརྨ་བྷ་དྲས་ཡི་གེར་བྲིསཿ དགེ་བས་བསྟན་འགྲོར་ཕན་པར་ཤོགཿ དགེའོ། དགེའོ། དགེའོ། དགེའོ།། །། རྟ་མགྲིན་ཁམས་གསུམ་ཟིལ་གནོན་གྱི་སྦྱིན་སྲེག་དགོས་འདོད་ཀུན་འབྱུང་ནོར་བུའི་ཕྲེང་བ།༄༅། །དམ་ཆོས་བདེ་ཆེན་ལམ་མཆོག་ལསཿ རྟ་མགྲིན་ཁམས་གསུམ་ཟིལ་གནོན་གྱི་སྦྱིན་སྲེག་དགོས་འདོད་ཀུན་འབྱུང་ནོར་བུའི་ཕྲེང་བ་བཞུགས། ། ན་མོ་གུ་རུ་པདྨ་ཀྲོ་དྷ་ཧྱ་གྷྲྀ་ཝ་བྷེ། སྐུ་གསུམ་རྒྱལ་བ་རྒྱ་མཚོའི་ཐུགས་རྗེའི་རྩལ། །སྲིད་གསུམ་དྲེགས་པའི་དཔུང་ཚོགས་འདུལ་བྱེད་གཉེན། །ཕྱོགས་བཅུ་དུས་གསུམ་ཁྲོ་ཚོགས་ཡོངས་ཀྱི་རྗེ། །པད་འབྱུང་དབང་ཆེན་དབྱེར་མེད་ཞབས་ལ་འདུད། །མ༷ཁྱེན་པའི་ཡེ་ཤེས་གཏིང་མཐའ་དཔག་དཀའ་ཞིང་། །བྱམས་བརྩེ༷འི་རླབས་ཕྲེང་དུས་ལ༷ས་ཡོལ་མེད་གཡོ༑ ཕྲིན་ལས་འོ༷ད་ཟེ༷ར་ནམ་ཡང་ནུབ་མེད་གཟིས། །གདུལ་བྱའི་ཆུ་སྐྱེས་སྐྱོང་མཛད་བླ་མ་དྲན། །པཎ་ཆེན་བཻ་རོའི་དགོངས་ཀློང་ལྷ་ལམ་དུ། །ཐུགས་རྗེའི་ཆུ་འཛིན་འཁྲིགས་ལས་ལེགས་ཐོན་པའི། པདྨ་དབང་ཆེན་ཡང་གསང་ཁྲོས་པའི་ཆར། །སྐལ་བཟང་གདུལ་བྱའི་ཞིང་སར་བབས་འབྲས་རྨད། །ཁྱད་པར་རྣམ་འདྲེན་དམ་པ་ཉི་ཤུ་ཡི། །སྨིན་གྲོལ་བདུད་རྩིའི་བཅུད་ཆེན་མྱོང་བའི་མཐུས། །པདྨ་དབང་ཆེན་ཁམས་གསུམ་ཟིལ་གནོན་གྱི། །སྦྱོར་དངོས་རྗེས་ཀྱི་རིམ་པ་སྤེལ་ལ་དབང་། །དེ་ཕྱིར་གང་དེའི་ལས་བཞིའི་སྦྱིན་སྲེག་གཞུང་། །དགོངས་འདོད་ཀུན་འབྱུང་ནོར་བུའི་ཕྲེང་བ་འདི། །དམ་ལྡན་རྗེས་འཇུག་ཚོགས་ཀྱི་མགུལ་རྒྱན་དུ། །སྦྱིན་འདི་རྣམ་གསུམ་དད་པས་བླང་བར་བྱོས། །དེ་ལ་དེང་འདིར་པདྨ་དབང་ཆེན་གཞུང་། །ཁམས་གསུམ་ཟིལ་གནོན་ལས་བཞིའི་སྦྱིན་སྲེག་ལ། །སྦྱོར་བ་དངོས་གཞི་རྗེས་དང་གསུམ་དབྱེ་བས། །དང་པོ་གཞུང་འདིའི་དབང་ལུང་ལེགས་ཐོབ་ཅིང་། །དམ་སྲུང་བསྙེན་སྒྲུབ་ཐེམས་པའི་རྣལ་འབྱོར་པས། །གཞུང་འདིའི་ཆོ་ག་དཀྱུས་བཞིན་འཛབ་བཟླས་བསྟོད། །བཀའ་གཏེར་སྲུང་མའི་གསོལ་མཆོད་བསྐང་ཚོགས་བཅས། །གྲུབ་རྗེས་སྦྱིན་སྲེག་ལས་ལ་འཇུག་པར་བྱ། །དེ་ལས་དང་པོ་ཐབ་དང་རྫས་བཤམས་པ། །གཉིས་ལས་ཐབ་སྟེགས་དབུས་མཐོ་མཐའ་གཞོལ་བའི། སྟེང་དུ་རྩིགས་ཐབ་བྲིས་ཐབ་བྲུས་ཐབ་གསུམ། །གང་ཡང་རུང་སྟེ་བྲིས་ཐབ་མ་ཡིན་ན། །རྒྱ་ན་གྲུ་གང་དཔངས་སུ་མཐོ་གང་ལ། །ཞི་རྒྱས་དབང་དྲག་རང་རང་ཐབ་དབྱིབས་བྱ། །མདོག་ཀྱང་དཀར་སེར་དམར་པོ་ལྗང་གུར་བསྒྱུར། །དེ་ཡང་ཁ་ཁྱེར་སྟེང་དུ་ལས་བཞི་པོར། །རིམ་བཞིན་རྡོ་རྗེ་རིན་ཆེན་པདྨ་དང་། །རལ་གྲི་དང་བཅས་མུ་རན་མེ་རི་སོགས། །མཐོང་བརྒྱུད་ཇི་བཞིན་བྲི་ཞིང་ཚོན་གྱིས་བསྒྱུར། །བྲིས་ཐབ་ཡིན་ན་ལས་བཞི་གང་འོས་ཀྱི། །ཤིང་གིས་ཐབ་དབྱིབས་བརྩིག་གམ་ལྕི་བ་ཡང་། །སྲོག་ཆགས་མེད་པའི་རླན་བྲལ་གྱིས་ཀྱང་རུང་། །དེ་ཡང་རྒྱ་དཔངས་ལ་སོགས་སྤྱི་དང་མཚུངས། །གཉིས་པ་མཆོད་རྫས་དང་ནི་བསྲེག་རྫས་ཟུང་། །བཤམས་ལུགས་སྒྲུབ་པོའི་གཡས་སུ་བསྲེག་རྫས་དང་། །གཡོན་དུ་མཆོད་རྫས་མདུན་དུ་དགང་བླུགས་གཉིས། །ཁ་སྦྱར་བྱས་ཤིང་འབྲལ་མེད་སྟེགས་ལ་བཞག །གཞན་ཡང་རྡོར་དྲིལ་རླུང་གཡབ་ཉེར་མཁོའི་རྫས། །མ་ཚང་མེད་པ་མཐོང་བརྒྱུད་ཇི་བཞིན་བཤམས། དེ་ཡང་ལས་བཞི་སོ་སོར་འོས་པ་ཡི། །ཡམ་ཤིང་སྐྱོན་བྲལ་རླན་དང་ལྡན་པ་ཡང་། །ཚད་དབྱིབས་མཚན་ཉིད་མཐོང་བརྒྱུད་རྣམ་དག་བཞིན། །ཞི་རྒྱས་དབང་གསུམ་མངར་གསུམ་མར་ཁུ་དང་། །དྲག་པོར་དེ་ཡི་རྫས་ཀྱིས་བྱུག་པར་བཤད། །བསྲེག་པའི་རྫས་ནི། སྦས་པ་མིག་འབྱེད་ལས། །ཏིལ་དང་མེ་ཏོག་ཨ་མྲྀ་ཏ། །བྱི་ཐང་འབྲས་བུ་ཁུ་བྱུག་ཙ། །རུ་ཏྲ་ཤུ་དག་རྒྱ་སྤོས་དང་། །སྲི་ཡང་ཀུ་དང་ལན་ཚྭ་དང་། །པདྨ་གེ་སར་ནཱ་ག་པུཥ། །ཞིབ་བཏགས་དཀར་མངར་དྲུག་གིས་སྦྲུས། །ཙམ་བསྲེག་པའི་རིལ་བུ་བྱ། །ཞེས་གསུངས་ཇི་བཞིན་རྫས་རྣམས་ཡང་གསང་གི། །དགོས་ཆོས་ཡིན་ཕྱིར་ཞིབ་བཏགས་དཀར་གསུམ་དང་། །མངར་གསུམ་གྱིས་སྦྲུས་རིལ་བུ་སྲན་མ་ཙམ། །ལས་བཞི་སོ་སོའི་མདོག་བཞིན་ཁ་དོག་བསྒྱུར། །ཞི་བར་ཏིལ་དང་རིལ་བུ་ཆབས་ཅིག་འབུལ། །དེ་བཞིན་རྒྱས་པར་ཞོ་ཟན་དབང་ལ་ནི། །ལུག་རུ་དམར་པོ་ཁུག་ཆོས་ནས་འབྲས་ཡང་། །དམར་པོར་བསྒྱུར་ཏེ་རིལ་བུ་དང་བཅས་འབུལ། །དྲག་པོར་ཡུངས་དཀར་དུག་རྫས་ཤ་ཁྲག་དང་། །ཚོགས་བསྒྲལ་ལིང་རོ་རིལ་བུ་དང་བཅས་འབུལ། །དེ་ཡང་བྱེ་བྲག་ཡང་གསང་ཁོ་ན་ཡི། །སྤྱི་བསྡོམས་ཐབ་རྫས་བཤམས་ཚུལ་འབུལ་ལུགས་སོགས། །གཤམ་དུ་གསལ་བར་བྱས་ལ་བལྟ་བར་མཛོད། །དེ་ལ་མཆོད་རྫས་སྟེགས་བུ་ཁེབ་ལྡན་སྟེང་། །ཕྱི་མཆོད་སྣ་ལྔ་ནང་མཆོད་སྨན་རཀ་གཏོར། །དེ་དག་མཐོང་བརྒྱུད་ཇི་བཞིན་ཚང་བར་བཤམས། །གཉིས་པ་དངོས་གཞི་ལ་ཡང་རྣམ་པ་གཉིས། །འཇིག་འདས་ལྷ་གཉིས་རིམ་བཞིན་མཆོད་པ་ལ། །མཆོད་བསྲེག་རྫས་རྣམས་རཾ་ཡཾ་ཁཾ་དང་ནི། ༀ་ཨཱཿཧཱུཾ་གིས་ལན་གསུམ་བྱིན་བརླབས་ནས། ལས་ཆུས་བྲན་བཞིན་ཨ་མྲྀ་ཏས་བསངས་ནས། སྟོང་པའི་ངང་ལས་ཉི་ཟླའི་གཞོང་པ་རུ། །བསྲེག་རྫས་རོ་བརྒྱ་ལྡན་པའི་ཡེ་ཤེས་ཀྱི། ཟག་མེད་བདུད་རྩིའི་རྒྱ་མཚོ་ཆེན་པོར་གྱུར། །ཞེས་བསམ་འབྲུ་གསུམ་ལན་གསུམ་བརྗོད་པས་བརླབས། །དེ་ནས་ཐབ་ལ་ནང་མཆོད་གཏོར་བཞིན་དུ། ༀ་རཾ་ཀྲོ་དྷ་རཀྵ་བཛྲ་ཛྭ་ལ་རཾ། ཏིགྣ་བི་ཤྭ་ཛྭ་ལ་རཾ། ཕཊ་རཾ་རཾ། ཞེས་པས་སྔགས་ཀྱིས་བགེགས་བསྐྲད་ཐབ་སྦྱང་བ། སྭ་བྷཱ་ཝས་སྦྱངས། སྟོང་པའི་ངང་ལས་ཆུ་སྐྱེས་ཚ་ཟེར་སྟེང་ཿ བྷྲུཾཿཡིག་ཡོངས་གྱུར་དབང་དྲག་ཐབ་ཁུང་དམརཿ རྒྱ་དང་མཚན་ཉིད་ཕུན་སུམ་ཚོགས་པ་ཡི། །ཁ་ཁྱེར་ལ་ནི་པདྨ་བྷནྡྷ་དང་ཿ ལྕགས་ཀྱུའི་ཕྲེང་བ་མུ་རན་རྡོར་ཕྲེང་ལྡནཿ ཕྱི་ཡི་གྲྭ་བཞིར་ཟླ་ཕྱེད་རྡོ་རྗེས་མཚནཿ དྭངས་ཤིང་གསལ་ལ་འོད་དམར་འཕྲོ་བར་བསམ། །དེ་དབུས་ཉི་སྟེང་ར་སྐྱེས་ཁམ་པའི་གདན། །དེ་སྟེང་བདག་ཉིད་ཐུགས་ལས་རམ་དམར་པོ། །འཕྲོ་འདུས་དང་ནི་ཡོངས་སུ་གྱུར་པ་ལས། །དྲང་སྲོང་མེ་ལྷའི་རྒྱལ་པོ་མེ་མདོག་ལྡན། །ཞལ་གཅིག་ཕྱག་གཉིས་ཁྲོ་འཛུམ་མངོན་རྟོགས་ངོམ། །གཡས་པ་མེ་དར་གཡོན་ན་ལྕགས་ཀྱུ་བསྣམས། །རལ་བ་ཐོར་ཚུགས་ཨག་ཚོམ་རབ་མཛེས་ཤིང་། །རི་དྭགས་པགས་པའི་སྟོད་གཡོགས་ཚངས་སྐུད་ལྡན། །དེ་ལྟར་གསལ་བའི་གནས་གསུམ་འབྲུ་གསུམ་དང་། །རང་གི་ཐུགས་ཀའི་ས་བོན་ཧྲཱིཿཡིག་ལས། །འོད་འཕྲོས་འཇིག་རྟེན་ཤར་ལྷོའི་མཚམས་གནས་པའི། །མེ་ལྷའི་ཐུགས་ཀར་ཕོག་པས་ཐུགས་ཀྱི་རྒྱུད། །བསྐུལ་བས་དེ་མ་ཐག་ཏུ་འབྱོན་དགོངས་གྱུར། །ཞེས་བསམ་ལྕེ་ལྡེ་སྦར་བ་ཐབ་ཁུང་ལ། ལན་གསུམ་བསྐོར་ཞིང་སྔགས་འདིས་མེ་སྦར་ཞིང་། །ༀ་ཨགྣེ་ཡེ་སྭཱ་ཧཱ། ༀ་བཛྲ་ཛྭ་ལ་རཾ་ཧོ། ཞེས་དང་། ཧོ། མེ་ལྷའི་རྒྱལ་པོ་དྲང་སྲོང་ཆེན་པོ་ཁྱོད། །སྔོན་ཚེ་སུམ་རྩེན་གནས་སུ་སྦྱིན་སྲེག་གི། །ཆོ་གས་ལྷ་རྣམས་དགའ་བར་མཛད་པ་ལྟར། །ད་ལྟར་བདག་གིས་མཆོག་དང་ཐུན་མོང་གི། །དངོས་གྲུབ་བསྒྲུབ་ཕྱིར་མེ་ལྷ་སྤྱན་འདྲེན་ན། །འདིར་སྤྱོན་མཆོད་པའི་ཚོགས་ཀུན་བཞེས་མཛོད་ལ། །བདག་གི་ལས་བཞིའི་ཕྲིན་ལས་ཡོངས་འགྲུབ་མཛོད། །ༀ་བཛྲ་ས་མཱ་ཛཿ དེ་ནས་མེ་དར་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེའི་མཆོག །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞེས་སུ་གསོལ། །ཨ་ལ་ལ་སྟེ་དགྱེས་པར་མཛོད། །ཨགྣེ་ཡེ་དེ་ཝ་རི་ཥི་ཛ་ཛཿ ཞེས་པས་མེ་ལྷ་འཁོར་བཅས་ཤར་ལྷོ་ནས། བྱོན་ནས་དམ་ཚིག་པ་དང་དབྱེར་མེད་དུ་གྱུར། ཛཿཧཱུཾ་བཾ་ཧོཿ ཞེས་བརྗོད། སླར་ཡང་རང་གི་ཐུགས་ཀའི་ས་བོན་ལས། འོད་འཕྲོས་དབང་ལྷ་རིགས་ལྷ་སྤྱན་དྲངས་གྱུར། །ༀ་བཛྲ་ས་མཱ་ཛཿ ཞེས་དང་མདུན་མཁར་བཞུགས་པའི་ལྷ་རྣམས་ལ། །དེ་བཞིན་གཤེགས་ཀུན་འདི་ལ་དབང་བསྐུར་སྩོལ། །ཞེས་གསོལ་མོད་ལ་དབང་བསྐུར་བདུད་རྩི་ཆུས། །སྐུ་གང་དྲི་དག་ཆུ་ལྷག་ཡར་འཕྱུར་བས། རིགས་བདག་འོད་དཔག་མེད་ཀྱིས་དབུ་བརྒྱན་གྱུར། །དེ་ནས་ཀུ་ཤ་བསངས་ཤིང་སྦྱངས་བྱས་ནས། ཧཱུཾ་ལས་བྱུང་བའི་ཀུ་ཤ་སྔོ་ལྗང་ནི། །རྩ་ཡི་རྩེ་མོ་མ་ཉམས་མཚན་ཉིད་ལྡན། །ལས་བཞིའི་ཕྲིན་ལས་སྒྲུབ་པའི་ནུས་ལྡན་གྱུར། །ཞེས་བརྗོད་ཀུ་ཤ་དགྲམ་པ་འདི་ལྟར་རོ། །ཀུ་ཤ་འདི་ནི་གཙང་ཞིང་དགེ། །ས་ལས་སྐྱེས་པ་འདབ་མའི་སྙིང་། །དཀོན་མཆོག་གསུམ་གྱི་དག་བྱེད་དེ། །ཚངས་པ་ཡི་ཡང་དག་བྱེད་ཡིན། །འདིས་ནི་བདག་ལ་གེགས་མེད་ཅིང་། །ཞི་དང་བདེ་ལེགས་མཛད་དུ་གསོལ། །བཛྲ་ས་ཏྭ་ཨཿ ཞེས་བརྗོད་ཐབ་ཀྱི་ཕྱོགས་མཚམས་བརྒྱད་པོ་རུ། །སྔོན་མའི་རྩེ་མོ་རྗེས་མའི་རྩ་བ་ཡིས། །ནོན་བཞིན་གཡས་བསྐོར་ཚུལ་དུ་དགྲམ་པར་བྱ། །དེ་ནས་བྱོན་ཟན་མར་ཁུ་དགང་བླུགས་གསུམཿ གཡས་བསྐོར་བྱ་བཞིན་སྔགས་འདིས་ལན་གསུམ་འབུལཿ དེ་ཚེ་དམིགས་པ་འདི་བཞིན་བྱེད་དགོས་ཏེ། མེ་ལྷའི་ལྗགས་ཉིད་རྡོ་རྗེ་ཧཱུཾ་མཚན་རྩེར། །རཾ་ཡིག་དང་ནི་དགང་བླུགས་རྩེ་ཡོར་ཡང་། །རཾ་གསལ་མར་ཁུའི་རྒྱུན་དྲངས་མེ་ལྷ་ཡི། །ཞལ་དུ་སོང་བས་ཐུགས་རྒྱུད་མཉེས་པར་གྱུར། །ཞེས་བསམ། ༀ་ཨགྣེ་ཡེ་སྭཱ་ཧཱ། ལན་བདུན་བརྗོད་བཞིན་མར་ཁུས་དགང་གཟར་བཀང་། །དགང་བླུགས་ཁ་སྦྱར་གཡས་བསྐོར་བྱས་ལ་དབུལ། ༀ་ཨགྣེ་ཡེ་དེ་བྱ་དེ་བྱ་མ་ཧཱ་ཤྲཱི་ཧ་བྱ་ཀ་བྱ་བ་ཧ་ན་ཡ་སྭཱ་ཧཱ། ཞེས་པས་དེ་འདྲ་ལན་གཉིས་ཕུལ་བའི་མཐར། ༀ་ཨགྣ་ཡེ་ཨརྒྷཾ་པྲ་ཏིཙྪ་ཡེ་སྭཱ་ཧཱ། དེ་བཞིན་དུ། པུཥྤེ༴ དྷུ་པེ༴ ཨ་ལོ་ཀེ༴ གྷནྡྷེ༴ ནཻ་ཝི་དྱ༴ ཤཔྟ་པྲ་ཏིཙྪ་ཡེ་སྭཱ་ཧཱ། དེས་ཕྱི་མཆོད་ལྔ་པོ་ལན་བདུན་འབུལ། ༀ་ཨགྣེ་ཡེ་དེ་ཝ་རི་ཥི་མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བཱ་ལིང་ཏ་ཁ་རཾ་ཁཱ་ཧི། ཞེས་སྨན་རཀ་གཏོར་གསུམ་གོང་བཞིན་འབུལ། དེ་ནས་བསྲེག་རྫས་འབུལ་བའི་རིམ་པ་ནི། མེ་ལྷ་དྲང་སྲོང་ཆེན་པོ་འཁོར་བཅས་ལ། །དངོས་བཤམས་ཡིད་སྤྲུལ་ཞལ་ཟས་བདུད་རྩི་འདི། །དག་ཅིང་གཙང་མར་སྦྱར་ཏེ་འབུལ་ལགས་ཀྱིས། །ཡེ་ཤེས་ཐུགས་རྗེས་དགོངས་ལ་བཞེས་སུ་གསོལ། །ༀ་ཨགྣེ་ཡེ་དེ་ཝ་རི་ཥི་ཧ་བྱ་ཀ་བྱ་བ་ཧཱ་ན་ཡ་ཏི་བེ་མཆོག་དང་ཐུན་མོང་གི་དངོས་གྲུབ་མ་ལུས་པ་དང་། །ཁྱད་པར་ལྷ་དང་མིའི་དཔལ་འབྱོར་ཕུན་སུམ་ཚོགས་པ་ཐམས་ཅད་ཝཱ་ཤཾ་ཀུ་རུ་ཧོ། དེ་ནས་རིལ་བུ། མེ་ཏོག །ཡམ་ཤིང་རྣམས་སོ་སོར་བདུན་རེ་སྔགས་སྤེལ་ཚིག་དེ་ཉིད་ཀྱིས་ཕུལ། །འདི་ནི་ལས་བཞི་ཐུན་མོང་ལྟར་དབང་གི་ཕྲིན་ལས་ལ་རྫོགས་པར་བྱས་ཏེ་འབུལ་བའི་ལུགས་ཡིན་ལ་གཞན་ལས་བཞི་སོ་སོའི་ལུགས་སུ་འབུལ་ཚུལ་ནི་འདི་ཉིད་ཀྱི་གཤམ་དུ་གསལ་བ་ལ་བལྟ་བར་བྱའོ། །དེ་ནས་རོལ་མོར་བཅས་ཏེ་འདི་ལྟར་བསྟོད། ཧཱུཾ། སངས་རྒྱས་རིགས་ཀྱི་སྤྲུལ་པའི་མཆོག་གྱུར་པ། །མེ་ཡི་ལྷ་ནི་བདེ་ཆེན་སྣང་མཐའ་ཡས། །རྣམ་ཀུན་མཆོག་ལྡན་ལྷ་མོ་གོས་དཀར་མོ། །རྒྱལ་ཀུན་སོར་རྟོགས་ཡེ་ཤེས་ངོ་བོ་ཉིད། །འབྱུང་བ་མེ་ཁམས་རྣམ་དག་འགག་མེད་གསུང་། །འཁོར་བའི་སྡུག་བསྔལ་བསྲེག་པའི་དམ་བཅའི་དོན། །ནམ་ཡང་མི་འདོར་ཐུགས་དམ་གཡོ་བ་མེད། །ཉོན་མོངས་སྲེག་བྱེད་ཡེ་ཤེས་མེ་ཡི་ལྷར། །མཆོད་ཅིང་བསྟོད་དེ་ཕྱག་འཚལ་དངོས་གྲུབ་སྩོལ། །ཞེས་པ་བརྗོད་ཅིང་ཕྲིན་ལས་བཅོལ་བ་ནི། ཧོཿ མེ་ལྷའི་རྒྱལ་པོ་དྲང་སྲོང་ཁྱོད་ཉིད་ལ། །མཆོད་ཅིང་བསྟོད་ནས་ཕྲིན་ལས་བཅོལ་བའི་མདོ། །སྔོན་གྱི་ཐུགས་དམ་ཞལ་བཞེས་ཇི་བཞིན་དུ། །སྲེག་བྱེད་མེ་དཔུང་འབར་བ་འདི་ཉིད་དང་། །དབྱེར་མེད་བཞུགས་ལ་བསྲེག་རྫས་སྣ་ཚོགས་ཀུན། །པདྨ་དབང་ཆེན་ཁམས་གསུམ་ཟིལ་གནོན་གྱི། །ལྷ་ཚོགས་འཁོར་བཅས་ཞལ་དུ་སྟོབ་པར་མཛོད། །ཅེས་བརྗོད་ཐབ་ཏུ་མར་ཁུ་བླུགས་གཟར་གང་ཕུལ་ཞིང་། བཛྲ་ཛྭ་ལ་རཾ་བརྗོད་པས། མེ་ལྷ་འབར་བའི་རྣམ་པར་གྱུར་ཞེས་བསམ། ༈ གཉིས་པ་འཇིག་རྟེན་ལས་འདས་ཡེ་ཤེས་པ། པདྨ་དབང་ཆེན་ལྷ་ཚོགས་མཆོད་ཚུལ་ནི། ཐབ་ལ་ནང་མཆོད་གཏོར་བཞིན་བགེགས་བསྐྲད་སྔགས། བརྗོད་མཐར་སྭ་བྷཱ་ཝས་སྦྱངས་དམིགས་མེད་གྱུར། སླར་ཡང་སྣ་ཚོགས་ཆོས་རྣམས་མཐའ་བཞི་ཡི། །དྲི་མ་ལས་འདས་འོད་གསལ་བ་ཡི་ངང་། །ཞེས་བརྗོད་བར་འདིར་ཆོ་ག་འགྲོ་དགོས་པར། །སྤྲོ་ན་ལས་བྱང་གཞུང་བཞིན་བཏང་དགོས་ཕྱིར། ཧྲཱིཿཧཱུཾཿ ཆོས་ཉིད་སྤྲོས་བྲལ་མཁའ་དབྱིངས་ལསཿ སོགས་ནས། ཞིང་རྡུལ་མཉམ་པས་ཕྱག་འཚལ་ལོཿ ཨ་ཏི་པཱུ་ཧོཿ པྲ་ཏིཙྪ་ཧོཿ ཞེས་པ་ཡན་ཚང་བར་བྱའོ། ༈ བསྡུ་ན། བྷྲུཾ་བྷི་ཤ་བི་ཤུདྡྷེ་ཛྙཱ་ན་ཙཀྲ་མཎྜལ་བྷྲུཾ། ཧྲཱིཿབཛྲ་ཀྲོ་ཏ་ཧྱ༴ ༀ་མ་ཧཱ་ཀྲོ་དྷ༴ སོགས། ༀ་བཛྲ་གྷནྚེ་ཧོ། ༀ་ཨཱཿཧཱུཾ། བནྡྷ་ཀ་པཱ་ལ་བྷྲུཾ་བྷྲུཾ་བྷྲུཾ་བྷྲུཾ། ཧཱུཾ་བཛྲ་ཧེ་རུ་ཀ་ཨ་བྷི་ཥིཉྩ་ཧཱུཾ། ༀ་བུདྡྷ་ཧེ་རུ་ཀ༴ ས་རརྣ་ཧེ༴ ༀ་པདྨ་ཧེ་རུ༴ ཧ་ཀརྨ་ཧེ༴ ༀ་ཨེ་ཧྱ་ཧི་བྷ་ག་ཝན་མ་ཧཱ་ཀཱ་རུ་ཎི་ཀ་ཏྲི་ཤྱ་ཧོ། ས་མ་ཡ་ཛཿ ས་མ་ཡ་སྟྭཾ། ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་གཎྜེ་ཧོ། ཞེས་རང་རང་གི་ཕྱག་རྒྱ་དང་བཅས་པས་དགུག་གཞུག་བཅིངས་དབང་དུ་བྱའོ། དམ་ཚིག་དབང་གི་དཀྱིལ་འཁོར་འདིར། །ཡེ་ཤེས་དབང་ཆེན་དཀྱིལ་འཁོར་མཆོག །ཕོ་བྲང་དམ་ཚིག་དཀྱིལ་འཁོར་འདིར། །དགྱེས་ཤིང་བརྟན་པར་བཞུགས་སུ་གསོལ། །ཀཱ་ཡ་ཝཱཀྐ་ཙིརྟ་ཏིཥྛ་བཛྲ། ཡེ་ཤེས་ཀྱི་དཀྱིལ་འཁོར་དང་། དམ་ཚིག་གི་དཀྱིལ་འཁོར་གཉིས་སུ་མེད་པར་གྱུར་བར་བསམ། དེ་ལྟར་རྒྱས་བསྡུས་གང་རུང་མཐར། །སྦྱིན་སྲེག་མཆོད་འབུལ་འདི་ལྟར་བྱ། ཧཱུཾ། བདུག་སྤོས་སྣང་གསལ་ཞུགས་ཏོག་སྒྲ། །ཞལ་ཟས་དྲི་ཆབ་འདི་རྣམས་ཀྱང་། །པདྨ་དབང་ཆེན་དཀྱིལ་འཁོར་ལ། །མཆོད་པར་འབུལ་ལོ་བཞེས་སུ་གསོལ། །ཐུགས་རྗེས་དགོངས་ལ་དངོས་གྲུབ་སྩོལ། །ཧྲཱིཿབཛྲ་ཀྲོ་དྷ་ཧྱ༴ ཕཊཿ ཨརྒྷཾ་པྲ་ཏིཙྪ་ཡེ་སྭཱ་ཧཱ། དེ་བཞིན་དུ། པུཥྤེ༴ དྷུ་པེ༴ ཨ་ལོ་ཀེ༴ གྷནྡྷེ༴ ནཻ་ཝི་དྱ༴ ཤཔྟ་པྲ་ཏིཙྪ་ཡེ་སྭཱ་ཧཱ། ཞེས་ཕྱག་རྒྱ་བཅས་པས་ཉེར་གཅིག་དབུལ། དེ་བཞིན་དུ་གོང་གི་སྔགས་ཀྱི་མཇུག་ཏུ། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི་མ་ཧཱ་བཱ་ལིངྟ༴ མ་ཧཱ་རཀྟ་ཁ་རཾ་ཁཱ་ཧི། ཞེས་ཉེར་གཅིག་གིས་དབུལ། དེ་ནས་བསྲེག་རྫས་འབུལ་བའི་ཐོག་མར་བྱོན་སྐྱེམས་འབུལ་བ་ནི། དབང་ཆེན་ཞལ་གདངས་རྡོ་རྗེ་རྩེ་གསུམ་ལྗགསཿ རྩེ་མོར་ཧཱུཾ་རཾ་གྱིས་མཚན་གསལ་བ་དང་། །དགང་བླུགས་རྩེ་ཡང་རམ་མཚན་མར་ཁུའི་རྒྱུནཿ དབང་ཆེན་ལྗགས་ཉིད་འོད་ཀྱི་སྦུ་གུ་ཡིས། །དྲངས་ཤིང་གསོལ་བས་མཉེས་ཚིམ་དགྱེས་སྐོང་གྱུར། །ཧྲཱིཿབཛྲ་ཀྲོ་དྷ་ཧྱ་གྲྀ་ཝ་ཧུ་ལུ་ཧུ་ལུ་ཧཱུཾ་ཕཊཿ ཅེས་ལན་བདུན་བརྗོད་ཅིང་བླུགས་གཟར་གྱིས་དགང་གཟར་དུ་མར་ཁུ་བླུགས་ནས་དགང་བླུགས་ཁ་སྦྱར་ཏེ། ཐབ་ལ་གཡས་བསྐོར་བྱས་ནས་ཕུལ་ཞིང་། ཨུ་ཏ་ཀྲོ་ཏ་ཡ། ར་ག་ར་ག པདྨ་བྷནྡྷ་ཡ་ར་ག་ར་ག། ཛྭ་ལ་རཾ་ཁ་རཾ་ཁཱ་ཧི། བདག་དང་སེམས་ཅན་ཐམས་ཅད་ལ་མཆོག་ཐུན་མོང་གི་དངོས་གྲུབ་ལྷ་མིའི་དཔལ་འབྱོར་སྐྱེ་འགྲོ་ཐམས་ཅད་ཀྱི་ལུས་ངག་ཡིད་གསུམ་ཝཱ་ཤཾ་ཀུ་རུ་ཧོ། ཞེས་བརྗོད་ལ། སླར་ཡང་དེ་ལྟ་བུ་ཚར་གཉིས་ཕུལ་ལ། དེ་ལ་རྫས་དངོས་གཞི་ནི། རྫས་རེ་སྔགས་རེས་འབུལ་དགོས་ཤིང་འགོ་འདྲེན་ཨུ་ཏ་ཀྲོ་ཏ་སོགས་ལ་ལན་གཅིག་བརྗོད་མཐར་རྩ་སྔགས་ཁོ་ནས་ཉེར་གཅིག་རེ་ཕུལ་མཐར། བདག་དང་མཐའ་ཡས་པའི་སེམས་ཅན༴ སོགས། ཧོཿ མེ་ཏོག། ཡམ་ཤིང་། མར་ཁུ་རྣམས་སོ་སོར་རྩ་སྔགས་བདུན་རེ་ཙམ་གྱིས་ཕུལ་མཐར་འདོད་གསོལ་སྦྱར་རྗེས་ཡང་རྩ་སྔགས་རེ་དང་རིལ་བུ་རེ་སྦྲགས་ཏེ་ཕུལ་བས་གྲངས་ཚད་འཛིན་པས་ཐུན་རེ་ལ་ཅི་ཙམ་འགྲོ་བ་དབུལ་བའི་བར་སྐབས་སུ་ཡམ་ཤིང་དང་མར་ཁུ་ནི་མེའི་ཚོད་དང་སྦྱར་ཏེ་དབུལ་བ་ལས་ངེས་པ་མི་དགོས་ཤིང་། །དེ་བཞིན་དུ་ཡུམ་ལ་འབུལ་ཚུལ་ཡང་། །ཨུ་ཏ་ཀྲོ་ཏས་འགོ་དྲངས་པའི། ༀ་མ་ཧཱ་ཀྲོ་དྷི་ཤྭ་རི་ཧཱུཾ་ཕཊཿ ཨརྒྷཾ་སོགས། ཤཔྟ་པྲ་ཏིཙྪ་ཡེ་སྭཱ་ཧཱ། སརྦ་པཉྩ་རཀྟ་བྷ་ལིང་ཏ་ཁཱ་ཧིཿ བཅུ་རེ་དང་། རིལ་བུ། མེ་ཏོག ཡམ་ཤིང་དང་། མར་ཁུ་རྣམས་ཨུ་ཏ་ཀྲོའི་སྔགས་ཚར་གཅིག་གི་མཐར་ཡུམ་སྔགས་ཁོ་ནས་རྫས་ཕུལ་མཐར། །འཁོར་རྟ་མགྲིན་རིགས་བཞི་ལ་སྦྱིན་སྲེག་འབུལ་བ་ནི། གོང་ལྟར་ཨུ་ཏ་ཀྲོ་ཏས་འགོ་དྲངས་ཤིང་། ༀ་བཛྲ་ཤྭ་ར་ཀྲོ་ཏ་ཧཱུཾ་ཕཊཿ ༀ་རརྣ་ཤྭ་ར་ཀྲོ་དྷཱ་ཧཱུཾ་ཕཊཿ ༀ་པདྨ་ཤྭ་ར་ཀྲོ་དྷཱ་ཧཱུཾ་ཕཊཿ ༀ་ཀརྨ་ཤྭ་ར་ཀྲོ་དྷཱ་ཧཱུཾ་ཕཊཿ ཨརྒྷཾ་པ་དྱཾམ། སོགས། སརྦ་པཉྩ་རཀྟ་བྷ་ལིང་ཏ་ཁ་རཾ་ཁཱ་ཧིཿ བདུན་རེ་དང་། དེ་བཞིན་དུ། རིལ་བུ། ཡམ་ཤིང་། མར་ཁུ་རྣམས་ཨུ་ཏ་ཀྲ་ཏའི་སྔགས་ཚར་གཅིག་གིས་འགོ་དྲངས་པའི་རིགས་བཞིའི་སྔགས་ཀྱི་བཅུ་ཆའི་གྲངས་འབུལ། །དེ་བཞིན་དུ་སྒོ་མ་བཞི་ལ་སྦྱིན་སྲེག་འབུལ་བ་ནི། ཨུ་ཏ་ཀྲོ་ཏའི་མཇུག་ཏུ། ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾཿ ༀ་བཛྲ་སྥོ་ཊ་བཾཿ ༀ་བཛྲ་གཎྜེ་ཧོཿ ཨརྒྷཾ༴ སོགས། ཁ་རཾ་ཁཱ་ཧིའི་བར་ལན་བཞི་རེ་དང་། དེ་ནས། རིལ་བུ། མེ་ཏོག །ཡམ་ཤིང་། མར་ཁུ་རྣམས་ཨུ་ཏ་ཀྲོ་ཏས་འགོ་དྲངས་པའི་སྒོ་མ་བཞིའི་སྔགས་ཀྱིས་ལན་བཞི་རེ་དང་རྫས་ཀྱང་རིགས་འགྲེས་ཕུལ། །ལྷ་ཚོགས་རྣམས་ལ་སྨོན་ལམ་གསོལ་བ་ནི། ན་མོ། དམར་ནག་གྲུ་གསུམ་འབར་བའི་གཞལ་ཡས་སུ། །པདྨ་དབང་ཆེན་ཁམས་གསུམ་ཟིལ་གནོན་རྗེ། །ཡབ་ཡུམ་འཁོར་དང་བཅས་པ་ཐམས་ཅད་ལ། །དངོས་བཤམས་ཡིད་སྤྲུལ་སྲེག་བླུགས་ཕུལ་བའི་མཐུས། །སྐུ་གསུང་ཐུགས་རྒྱུད་མཉེས་ཤིང་ཚིམ་པའི་ཕྱིར། །དགྱེས་པར་བཞེས་ལ་བདག་སོགས་དགྲོ་ཀུན་གྱི། །དུག་གསུམ་དུག་ལྔ་ལ་སོགས་ཉོན་མོངས་པ། །བརྒྱད་ཁྲི་བཞི་སྟོང་སྒོ་ནས་བསགས་པ་ཡི། །ལས་དང་ཉོན་མོངས་བག་ཆགས་སྒྲིབ་པ་རྣམས། །བྱང་ཞིང་དག་ནས་ཚོགས་གཉིས་ཡོངས་རྫོགས་ཏེ། །པདྨ་དབང་ཆེན་ཞལ་མཇལ་གསུང་ཐོས་ཤིང་། །གནས་སྐབས་སུ་ཡང་སྡེ་བཞི་དགེ་བཅུ་ཡི། །དཔལ་དང་ཡོན་ཏན་མངོན་དུ་གྱུར་ནས་ཀྱང་། །འགྲོ་རྣམས་དགེ་ལ་འཁོད་ནུས་སྟོབས་ལྡན་མཛོད། །བསྟོད་པ་ནི། ཧྲཱིཿཧཱུཾཿ ཀ་དག་ཆོས་སྐུའི་དབྱིངས་ལས་མ་གཡོས་ཀྱང་། །དབང་ཆེན་ཁམས་གསུམ་ཟིལ་གནོན་ཡབ་ཡུམ་དང་། །རིགས་བཞིའི་ཁྲོ་བོ་སྒོ་སྲུང་ཁྲོ་མོ་བཅས། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །ཅེས་བསྟོད་སླར་ཡང་དགང་བླུགས་བདུན་གསུམ་དྲངས། །གཙོ་བོའི་སྔགས་ཀྱིས་འབུལ་བར་བྱས་རྗེས་སུ། །ཕྱི་ལྔ་ནང་གསུམ་མཆོད་པ་ལན་གསུམ་འབུལ། །དེ་ནས་བཤགས་པ་སྒོ་གསུམ་གནོང་འགྱོད་ཀྱིས། ཧོ། པདྨ་དབང་ཆེན་ལྷ་ཚོགས་དགོངས་སུ་གསོལ། །བདག་ཅག་མ་རིག་རྨོངས་པའི་སྒོ་གསུམ་གྱིས། །ཁྱེད་རྣམས་ཐུགས་དང་འགལ་བའི་བག་མེད་ལས། །མཐོལ་ལོ་བཤགས་སོ་ཚངས་པར་སྩལ་དུ་གསོལ། །ༀ་པདྨ་ཧེ་རུ་ཀ༴ སོགས། གསུམ་བརྗོད་གཤེགས་གསོལ་ཉེར་བསྡུ་ལྷར་ལྡང་ནི། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཡེ་ཤེས་པ་གཤེགས་ཤིང་དམ་ཚིག་པ་རང་ལ་བསྟིམས། ཛཿཧཱུཾ་བཾ་ཧོཿས་རང་དང་དབྱེར་མེད་གྱུར། རྗེས་སུ་མར་ཁུ་བླུགས་གཟར་གང་ཐབ་ཏུ་བླུགས་པས་མེ་གསོས་ཤིང་འབར་བར་བྱས་ནས། །སླར་ཡང་མེ་ལྷ་འབར་བའི་རྣམ་པ་དེ། །སྔོན་བཞིན་མེ་ལྷའི་སྐུ་རུ་གསལ་བ་ལ། །ཕྱི་ལྔ་ནང་གསུམ་བསྲེག་རྫས་བཞི་པོ་རྣམས། །ལན་བདུན་འབུལ་བའི་རྗེས་སུ་བསྟོད་པ་ནི། མེ་སྟེ་བསྲེག་བྱའི་དངོས་པོ་ཟ་བའི་ལྷ། །དྲང་སྲོང་ཨགྣེ་རཱ་ཛ་གདོན་གྱི་མཆོག །ཤར་ལྷོ་མེ་ལྷའི་འཁོར་ཚོགས་ཐམས་ཅད་ལ། །མཆོད་ཚོགས་ཀུན་འབུལ་བསྟོད་ཅིང་བསྔགས་པར་བགྱི། །ཞེས་བརྗོད་དགང་བླུགས་བདུན་གྱིས་གཤེགས་སྐྱེམས་ཕུལ། །དེ་ནས་བཤགས་པ་བཟོད་གསོལ་འདི་ལྟར་བྱ། །མཆོད་ཚོགས་མ་འབྱོར་པ་དང་ཉམས་པ་དང་། །གང་ཡང་བདག་ཅག་རྨོངས་པའི་བློ་ཡིས་ནི། །ཉེས་ཚོགས་བགྱིས་དང་བགྱིད་དུ་རྩལ་བ་གང་། །དེ་ཀུན་བཟོད་པར་མཛད་ཅིང་ཚངས་པར་སྩོལ། །ཡིག་བརྒྱ་ལན་གསུམ་བརྗོད། ཨགྣ་ཡེ་བཛྲ་མུཿ མེ་ལྷ་ཡེ་ཤེས་རང་བཞིན་གནས་སུ་གཤེགས། དམ་ཚིག་པ་ཛཿཧཱུཾ་བཾ་ཧོས་རང་གི་སྙིང་གར་ཐིམ་པར་བསམ་མོ། གསུམ་པ་རྗེས་ཀྱི་ཆོ་གའི་རིམ་པ་ནིཿ དེ་ལ་ཡང་དངོས་སུ་བསྟན་པའི་སྦྱིན་སྲེག་གི་གཞུང་འདི་ནི་ལས་བཞི་སྤྱི་དྲིལ་ལྟར་ལ་དབང་གི་སྦྱིན་སྲེག་གཙོ་བར་སྟོན་པ་ལགས་མོད། འོན་ཀྱང་ལས་བཞི་སོ་སོར་བྱེད་ན་གང་གཙོ་ཆེ་བ་དེའི་ཐབ་ཀྱི་མདོག་དང་དབྱིབས། མེ་ལྷའི་སྐུ་མདོག་སོགས་བསྒྱུར་ཤེས་པར་བྱ་དགོས་པ་དང་། །དེ་བཞིན་དུ་སྲེག་ལྷ་ལ་ཡང་ལས་བཞི་གང་ཡིན་གྱི་རྫས་གང་གཙོ་དེ་ཉིད་མང་བར་བྱེད་ཅིང་ལྷའི་སྐུ་མདོག་བསྒྱུར་མི་དགོས་ཤིང་འོད་ཟེར་བསྒྱུར་བ་གཞུང་རྣམ་དག་ནས་བཤད་པ་ལྟར་རོ། །དེ་ལྟར་རགས་རིམ་ཙམ་བཤད་པ་ལས་ཞིབ་ཆ་ནི་ལས་བཞིའི་གཞུང་མཐོང་བརྒྱུད་རྣམ་དག་ལྟར་བྱ་བ་ཁོ་ནའོ། །སྔགས་ཀྱི་གཤམ་འདོགས་དང་འདོད་གསོལ་ཡང་སྤྱི་ལྟར་བྱས་པས་འཐུས་ལ། མདོར་ན་སྔ་འགྱུར་གཏེར་མའི་སྦྱིན་སྲེག་གི་གཞུང་ལྟར་བྱ་བ་ལས་གཞན་མི་དགོས་སོ། །དེ་ནས་སྦྱིན་སྲེག་གི་མེ་རང་ཞིར་གཏོང་བའམ། །ཡང་ན་དྲི་བཟང་ཆུ་དང་འོ་མ་ཡིས། །གཞིལ་ཞིང་དངོས་གྲུབ་བླང་བའི་སྔགས་འདི་ཉིད། །བརྗོད་བཞིན་ཐལ་བ་རང་གི་གནས་གསུམ་བྱུགས། ༀ་པདྨ་ཀྲོ་དྷ་ཀཱ་ཡ་ཝཱཀྐ་ཙིཏྟ་སིདྡྷི་ཨ་ལ་ལ་ཧོཿ ཞེས་བརྗོད་ལས་བཞིའི་དངོས་གྲུབ་ཐོབ་པར་བསམ། དགེ་བ་འདི་ཡིས་བདག་སོགས་སེམས་ཅན་རྣམས། །པདྨ་དབང་ཆེན་གོ་འཕང་མྱུར་ཐོབ་ནས། །མཐའ་ཡས་འགྲོ་བ་གཅིག་ཀྱང་མ་ལུས་པ། །རྣམ་མཁྱེན་སངས་རྒྱས་ཐོབ་པའི་རྒྱུ་རུ་བསྔོ། །ཞེས་སོགས་བསྔོ་སྨོན་བཀྲ་ཤིས་སོགས་ཀྱིས་མཐའ་བརྒྱན་པར་བྱའོ། །ཞེས་པདྨ་དབང་ཆེན་ཁམས་གསུམ་ཟིལ་གནོན་གྱི་སྦྱིན་སྲེག་དགོས་འདོད་ཀུན་འབྱུང་ནོར་བུའི་ཕྲེང་བ་ཞེས་བྱ་བ་འདི་རང་སློབ་དྷརྨ་ཀིཏྟིས་བསྐུལ་ངོར། འཇིགས་མེད་ཕྲིན་ལས་འོད་ཟེར་གྱིས་སྨྲས་པའི་ཡི་གེ་པ་ནི་ཀུན་བཟང་འཆི་མེད་ཀྱིས་བགྱིས་པའི་དགེ་བས་འགྲོ་རྣམས་པདྨ་དབང་ཆེན་གྱི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །དགེའོ། དགེའོ། དགེའོ།། །། རཏྣའི་གཏེར་བྱོན་གུ་རུ་དྲག་པོ་སོགས་གཏེར་ཆོས་སྤྱི་ལ་སྦྱར་རུང་བའི་དྲག་པོའི་སྦྱིན་སྲེག་ཡེ་ཤེས་བསྐལ་མེ་རབ་འབར།༄༅། །རཏྣའི་གཏེར་བྱོན་གུ་རུ་དྲག་པོ་སོགས་གཏེར་ཆོས་སྤྱི་ལ་སྦྱར་རུང་བའི་དྲག་པོའི་སྦྱིན་སྲེག་ཡེ་ཤེས་བསྐལ་མེ་རབ་འབར་ཞེས་བྱ་བ་བཞུགས། ། ན་མོ་གུ་རུ་མ་ཧཱ་ཀྲོ་ཏ་ཡེ། །རྒྱལ་ཀུན་གསང་གསུམ་རང་གཟུགས་ཁྲོ་བོའི་སྐུར། །ཡོངས་བཞེངས་སྒྲུབ་སྡེ་བརྒྱད་ཀྱི་དཀྱིལ་འཁོར་ལ། །རྣམ་བཞིའི་རིག་འཛིན་མཐར་ཕྱིན་དེ་སྲིད་དུ། །འདུད་དོ་དྲག་པོའི་ཕྲིན་ལས་མྱུར་འགྲུབ་མཛོད། །གང་ཞིག་ཞིང་བཅུ་ཚང་དང་ཉམས་པ་བདུན། །གནོད་བྱེད་གདོན་བགེགས་ལོག་འདྲེན་འབྱུང་པོའི་རིགས། །བྱ་སྒྲོ་མེས་བསྲེགས་ཇི་བཞིན་ལྷག་མེད་དུ། །གཞོམ་ཕྱིར་ཡེ་ཤེས་བསྐལ་མེ་རབ་འབར་སྤྲོ། །དེ་ལ་འདིར་དྲག་པོའི་སྦྱིན་སྲེག་ཡེ་ཤེས་བསྐལ་མེ་རབ་འབར་འབྲི་བ་ལ་དོན་གསུམ་སྟེ། སྔོན་འགྲོ་དངོས་གཞི་རྗེས་སོ། དང་པོ་ནི་ས་མ་དུལ་བ་ལ་ས་ཆོག་བྱ། །ས་དུལ་བ་ཡིན་ན་སྡེ་བརྒྱད་གསེར་སྐྱེམས་སོགས་བཏང་། །དེ་ནས་སྟེགས་བུ་གྲུ་བཞི་དུག་ཁྲག་གིས་གཞིལ་བ་ལ་ཆོས་འབྱུང་སུམ་རིམ་བྲིས་པའི་ལྟེ་བར་རཾ་དང་། ལྷ་གནས་རྣམས་ཀྱི་འབྲུ་ཚོམ་གཙོ་འཁོར་གྱི་གྲལ་རིམ་ལྟར་བཀོད། ཁ་ཁྱེར་ལ་རལ་གྲི། མུ་རན་ལ་མེ་རི་བྲི། དྲག་པོ་ལ་འོས་པའི་བུད་ཤིང་གིས་ཁ་ཁྱེར་སྟེང་དུ་གྲུ་གསུམ་དུ་བརྩིགས། རོ་རས་ཞུན་གྱིས་སྦར་བའི་ཏིང་ལོ་དབུས་སུ་འཇོག་དགོས་ནའང་། སྣུམ་ནག་གི་མར་མེ་དེ་ལྷར་མོས་པ་དང་། །གཡོན་དང་གཡས་སུ་གདན་ལྗང་ངམ་ནག་པོའི་སྟེགས་ལ་གཡོན་དུ་ཚེར་མ་ཅན་གྱི་ཡམ་ཤིང་ཟུར་གསུམ་པ་སོར་བཅུ་གཉིས་པར་དུག་ཁྲག་གིས་གནོད་བྱེད་དགྲ་བགེགས་མཱ་ར་ཡ་ཕཊཿ ཅེས་པ་གང་མང་བྲིས་ཤིང་ཚིལ་ཞུན་ནམ་མར་ནག་གིས་ཉུགས་པ། ད་རྩ་བའི་རྫས་དགྲ་བགེགས་ཀྱི་ལིངྒ་མིང་རུས་ཅན། དྲག་པོའི་རྫས་ཤ་སྣ་བག་ཕྱེ་དང་བསྲེས་པའི་རིལ་བུ་དམིགས་བྱའི་ས་བོན་བཅུག་པ། གནད་ཀྱི་རྫས་ཤ་སྣ་དུག་སྣ་ཁྲག་སྣས་སྦོལ་བ། །གཟིར་བའི་རྫས་ཡུངས་དཀར་ནག་ཟངས་ལྕགས་རྡོ་ཕྱི་མར་ནག་གིས་སྦོལ་བ། ལྕགས་སམ་ཐོད་སྣོད་དུ་གྲལ་རིམ་གྱིས་བཤམས། གཡས་སུ་འཇིག་འདས་ཀྱི་དྲག་གཏོར་སྨན་རཀ་བཅས་པའི་མདུན་དུ་ཕྱི་ནང་གི་ཉེར་སྤྱོད་སྦྲགས་མར་བཤམས། །མདུན་དུ་ལས་བུམ་རྡོར་དྲིལ་དགང་བླུགས་སོགས་ཉེར་མཁོ་རྣམས་འཚོགས་པར་བྱའོ། གཉིས་པ་ནི། བདག་བསྐྱེད་བཟླས་པ་མཆོད་བསྟོད་ཉེར་བསྡུ་ལྷར་ལྡང་བཅས་སྔོན་དུ་གྲུབ་ནས་གཞུང་གང་ཡིན་གྱི་གཙོ་བོའི་ང་རྒྱལ་གྱིས་དྲག་པོར་འོས་པའི་ཆས། གདན་ལྟ་ཕྱོགས་སོགས་མ་ནོར་བའི་ངང་ནས། ལས་བུམ་བསྐྱེད་བཟླས་མཆོད་བསྟོད་བཅས་སྔོན་དུ་འགྲོ་བའི་མཆོད་བསྲེག་གི་རྫས་རྣམས་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨཱཿཡིག་ལས། །བྱུང་བའི་ཡེ་ཤེས་ཀཱ་པ་ལར། །ནྲྀ་དང་ཏྲི་ལས་དགྲ་བགེགས་ཀྱི། །ཕུང་ཁམས་སྐྱེ་མཆེད་ཤ་ཁྲག་རུས། །ཟག་མེད་བདུད་རྩིའི་ངོ་བོ་ལ། །མཆོད་རྫས་བསྲེག་རྫས་སོ་སོ་ཡི། །མཚན་ཉིད་ཡོངས་རྫོགས་རྣམ་པ་ཅན། །ནམ་མཁའི་ཁམས་ཀུན་ཁྱབ་པར་གྱུར། །ༀ་བཛྲ་ཨརྒྷཾ་ནས་ཤབྟའི་བར་མཆོད་རྫས་དང་གང་ཡིན་གྱི་རྩ་སྔགས་ལ། ནྲྀ་ཏྲི་སརྦ་མཱ་ར་ཡ་ཛ་ཛཿ བཏགས་པ་ལན་གསུམ་གྱིས་བསྲེག་རྫས་བརླབས་ནས། གདོལ་བ་ཤན་པ་དམེ་ཡུགས་ཀྱི་མེས་ཏིང་ལོ་སྦར་ཞིང་། ༀ་ཨགྣེ་ཡེ་གནོད་བྱེད་དགྲ་བགེགས་མཱ་ར་ཡ་ཛྭ་ལ་རཾ། ཞེས་རླུང་གཡབ་བཅས་མེ་སྦར་ལ། །བླུགས་གཟར་གྱིས་སྣུམ་ནག་གི་མེ་གསོས་ལ། སྔར་བཞིན་བསངས་ཤིང་སྦྱངས་ནས། སྟོང་པའི་ངང་ལས་རང་མདུན་དུ། །ཨེ་ལས་དྲག་པོའི་ཐབ་ཁུང་ནི། །དམར་ནག་ཟུར་གསུམ་མེ་འབར་ཀློང་། །སྣ་ཚོགས་མཚོན་ཆའི་ཚ་ཚ་འཕྲོ། །དེ་དབུས་པད་ཉི་ཟླ་གདན་ལ། །རཾཿཡིག་དམར་པོའི་འཕྲོ་འདུ་ལས། །མེ་ལྷ་དམར་ནག་འཕྲོ་ཚུལ་ཅན། །ཞལ་གཅིག་ཕྱག་བཞི་སྤྱན་གསུམ་པ། །མཆེ་བ་བཞི་གཙིགས་ཁྲོ་གཉེར་ལྡན། །ར་སྐྱེས་ཁམ་ནག་ཆིབས་པའོ། །ཕྱག་བཞིའི་གཡས་གཉིས་མེ་ཐབ་སྟེ། །འོག་མའི་བགྲང་ཕྲང་གཡོན་གཉིས་ཀྱི། །དང་པོའི་ལྕགས་ཀྱུ་འོག་གྷནྡྷེ། །ལྟོ་རྒྱས་ཤ་འཕྱང་ཐུགས་ལ་སྒེག །རལ་པ་ཐོར་ཚུགས་སྨ་ར་ལྗང་། །མེ་ལྷའི་འཁོར་ཚོགས་དང་བཅས་པ། །མེ་དཔུང་ཀློང་ན་བཞུགས་པར་གསལ། །བདག་ཉིད་ལྷར་གསལ་ཐུགས་ཀ་ནས། །ཕྱག་རྒྱ་བཞི་འཕྲོས་འོད་ཟེར་གྱིས། །མེ་ལྷ་འཁོར་བཅས་སྤྱན་དྲངས་གྱུར། །ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་དྲང་སྲོང་མེ་ཡི་ལྷ། །རང་གི་དམ་ཚིག་ཇི་བཞིན་དུ། །མེ་འབར་གནས་འདིར་གཤེགས་སུ་གསོལ། །ཨེ་ཧྱ་ཧི་བྷ་ག་ཝན་ཛཿཧཱུཾ་བཾ་ཧོཿ ཨགྣེ་ཛྙཱ་ན་ས་མ་ཡེ་མ་ཧཱ་ཀཱ་རུ་ཎི་ཀ་ཏིཥྛ་ཧོ། །དམ་ཚིག་པ་དང་གཉིས་སུ་མེད་པར་གྱུར། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་བསྒྲུབས་ཤིང་། །ཐུགས་རྗེས་སེམས་ཅན་དོན་མཛད་པ། །འབར་བའི་གདན་ལ་བཞུགས་སུ་གསོལ། །ༀ་ཨགྣེ་ཡེ་ས་མ་ཡ་ཏིཥྛནྟུ། ཞེས་གདན་ཕུལ། ཧཱུཾ་མེ་ལྷའི་རྒྱལ་པོ་དྲང་སྲོང་ཆེ། །ཞི་རྒྱས་དབང་དྲག་སྣ་ཚོགས་པའི། །འཕྲིན་ལས་ཀུན་གྱི་དཔའ་བོ་མཛད། །ཏིང་འཛིན་ལྷ་ལ་ཕྱག་འཚལ་ལོ། །ཨགྣེེ་ཡེ་ཨ་ལ་ལ་པྲ་ཏིཙྪ་ཧོཿ ཞེས་ཕྱག་བྱ། །ཧཱུཾ་མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་རྣམས། །དྲང་སྲོང་འཁོར་དང་བཅས་ལ་འབུལ། །བཞེས་ནས་འཕྲིན་ལས་འགྲུབ་པར་མཛོད། །ༀ་ཨགྣེ་ཡེ་ས་པཱ་རི་ཝཱ་ར་ཨརྒྷཾ་ནས་ཤཔྟ་པྲ་ཏིཙྪ་སྭཱ་ཧཱ། །ཞེས་མཆོད། ཧཱུཾ་མེ་ལྷ་དྲང་སྲོང་འཁོར་བཅས་ལ། །བདུད་རྩི་སྨན་གྱི་མཆོད་པ་འབུལ། །བྷ་ལིང་གཏོར་མའི་མཆོད༴ རཀྟ་དམར་གྱི་མཆོད༴ སརྦ་པཉྪ་བྷ་ལིངྟ་རཀྟ་ཁཱ་ཧི། །ཞེས་སྨན་གཏོར་རཀྟ་ཕུལ། ཧཱུཾ། ཚངས་དབང་འཇིག་རྟེན་མགོན་གྱི་སྲས། ཕྲིན་ལས་མངའ་བདག་མཐུ་ཆེན་མཆོག །དགོས་འདོད་རེ་སྐོང་འདོ་པོ་ཆེ། །ལས་ཀུན་སྒྲུབ་མཛད་ཁྱོད་ལ་བསྟོད། །ཞེས་བསྟོད། བྱོན་སྐྱེམས་ནི། མེ་ལྷའི་ལྗགས་རྡོ་རྗེ་རྩེ་གཅིག་པ་རཾ་དང་དགང་བླུགས་ཀྱི་རྩེར་ཧཱུཾ་མཐིང་ནག་འབར་བས་མཚན་པར་བསམ། ༀ་ཨགྣེ་ཡེ་སྭཱ་ཧཱ། ལན་བདུན་གྱིས་བཀང་བའི་གཟར་བུ་ཁ་སྦྱར་ཁྲོ་བོའི་ཁུ་ཚུར་གྱིས་བཟུང་བ་པུས་མོ་ལས་ནང་དུ་མི་འདའ་བར་གཡོན་དུ་བསྐོར་ཞིང་། ༀ་ཨགྣེ་ཡེ་དི་བྱ་དི་བྱ་བི་ཤུདྡྷེ་མ་ཧཱ་ཤྲྀ་ཧ་བྱ་ཀ་བྱ་ཝ་ཧ་ན་ཡེ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་དགྲ་བགེགས་འབྱུང་པོ་ཐམས་ཅད་མཱ་ར་ཡ་རྦད། །ཅེས་ལན་གསུམ་གྱིས་ཕུལ། ན་མོ་རིག་པའི་རྒྱལ་པོ་དྲང་སྲོང་མེ་ལྷའི་རྒྱལ་པོ་ཁྱོད་ལས་ཀྱིས་ཐམས་ཅད་བྱེད་པའི་བསྲེག་རྫས་ལྷའི་ཞལ་དུ་འབུལ་བ་དང་། །མེ་ཉིད་ཡེ་ཤེས་མེར་མཛད་ནས་བདག་གི་ཕྲིན་ལས་མ་ལུས་པ་འགྲུབ་པར་མཛད་དུ་གསོལ། ཞེས་བརྗོད། དེ་ནས་ཡམ་ཤིང་། ༀ་ཨགྣེ་ཡ་ཛྙཱ་ཡ་བདག་ཅག་འཁོར་དང་བཅས་པ༴ སོགས་གོང་གི་འདོད་གསོལ་ལྟར་མཱ་ར་ཡ་རྦད། ཅེས་པའི་བར་གྱིས་ལན་བདུན་ནས་ཉེར་གཅིག་འབུལ། མར་ཁུ་ཨགྣེ་ཡ་བདག་ཅག་འཁོར་དང་བཅས་པ༴ སོགས་སྤེལ་ཚིག་སྔ་མ་ལྟར་འབུལ། །རྫས་གཞན་རྣམས་ཧཱུཾ་མེ་ལྷ་དྲང་སྲོང་འཁོར་བཅས་ལ། །དགྲ་བགེགས་བསྒྲལ་བའི་ཤ་ཁྲག་རུས། །བསྲེག་རྫས་སོ་སོའི་རྣམ་པ་རུ། །བསྒྱུར་ཏེ་ལེགས་པར་འབུལ་ལགས་ན། །སྡང་བའི་དགྲ་དང་གནོད་བྱེད་བགེགས། །བར་ཆད་བྱེད་པ་སུ་ཡང་རུང་། །ལྷག་མ་མེད་པར་ཞལ་དུ་སྟོབས། །མིང་ཙམ་མེད་པར་གཞོམ་དུ་གསོལ། །ༀ་ཨགྣེ་ཀྲོ་དྷ་ཡེ་དགྲ་བགེགས་མ་ར་ཡ་ཛྭ་ལ་རཾ་ཧཱུཾ་ཕཊཿ ཅེས་རྩ་བའི་རྫས་རིམ་པ་བཞིན་ཉེར་གཅིག་གམ་བདུན་སོགས་སྐབས་དང་སྦྱར་ནས་འབུལ། ཧཱུཾ་མེ་ལྷའི་རྒྱལ་པོ་དྲང་སྲོང་མཆོག །བདུད་བཞི་འཇོམས་མཛད་ཕྱག་བཞི་པ། །ཕྱག་བཞི་ལས་ཀུན་འགྲུབ་པར་མཛོད། །སྔོན་ཚེ་དུས་ན་ལྷ་ཡི་ཆེད། །ད་ལྟ་རྣལ་འབྱོར་སྒྲུབ་པོའི་ཆེད། །ལས་ཀུན་མཛད་ལ་ཕྱག་འཚལ་བསྟོད། །ཅེས་བསྟོད་ལ། ཕྲིན་ལས་བཅོལ་བ་ནི། ན་མོ་རིག་པའི་རྒྱལ་པོ་དྲང་སྲོང་མེ་ལྷ་འཁོར་དང་བཅས་པས་བདག་དང་བསྲུང་བྱ་རྣམས་ལ་གནོད་ཅིང་འཚེ་བའི་དགྲ་བགེགས་ལོག་འདྲེན་ཐམས་ཅད་ཐལ་བའི་རྡུལ་ཕྲན་བཞིན་དུ་བརླག་པའི་ཕྲིན་ལས་མཛོད་ཅིག །ཅེས་འདོད་དོན་གསོལ་ལ། ༀ་ཨགྣེ་ཡེ་ཛྭ་ལ་རཾ། ཞེས་པས་མེ་ལྷ་འབར་བའི་རྣམ་པར་བསམ། །དེ་ནས་སྲེག་ལྷའི་དཀྱིལ་འཁོར་གྱི་ལྷ་ཚོགས་བསྐྱེད་པ་ནི། ༀ་སྭཱ་བྷཱ་ཝས་སྦྱངས། སྟོང་པའི་ངང་ལས་མེ་དཔུང་དམར་ནག་འབར་བའི་དབུས་སུ། །རང་ཉིད་ཡི་དམ་ལྷའི་ཐུགས་ཀ་ནས་བྷྲུཾཿབཅིག་འཕྲོས། །ཐབ་ཁུང་གི་ནང་དུ་འོད་དུ་ཞུ་བ་ལས། །དུར་ཁྲོད་འབར་བའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་གདུགས་རི་དྭགས་ཆོས་འཁོར་དང་ལྡན་པ། ཕྱི་ནང་མེད་པར་བསྐལ་པའི་མེ་དཔུང་འབར་བའི་ནང་ཆོས་འབྱུང་དམར་ནག་འབར་བའི་དབུས་སུ། ཧཱུཾ་དམར་འོད་ཀྱི་རང་བཞིན་བབསཿ སྤྲོ་བསྡུ་སྦྱོར་བས་ཁྲོ་རྒྱལ་སྐུཿ ཞེས་པས་མཚོན་གུ་དྲག་སོགས་གཞུང་གང་ཡིན་གྱི་ལས་བྱང་གི་ལྷ་བསྐྱེད་ནས་བཟུང་སྤྱན་འདྲེན་བཞུགས་གསོལ་ཕྱག་འཚལ་ཡན་གྲུབ་རྗེས། དྲག་པོའི་རྣམ་ལྔ་འབུལ་བ་ནི། ཧཱུཾ་གདུག་ཅིང་རྩུབ་པའི་དགྲ་བགེགས་རྣམས། །བསྒྲལ་བའི་ཕུང་ཁམས་སྐྱེ་མཆེད་ལས། །བྱུང་བའི་མཆོད་རྫས་བྱེ་བྲག་ནི། །ཁྲག་གི་ཡོན་ཆབ་ཆུ་གཏེར་བཞིན། །དབང་ལྔའི་མེ་ཏོག་སྐར་ལྟར་བཀྲ། །ཤ་ཆེན་བདུག་སྤོས་སྤྲིན་ཕུང་གཏིབས། །ཚིལ་ཆེན་མར་མེ་འོད་བརྒྱའི་གཟི། །ཆུ་སེར་དྲི་ཆབ་གངྒའི་རྒྱུན། །ཙིཏྟའི་བཤོས་བུ་རི་དབང་རྒྱལ། །རྐང་གླིང་རོལ་མོ་དབྱར་རྔའི་སྒྲ། །ཁྲག་འཐུང་ལྷ་གང་ཡིན་ཁ་བསྒྱུར། པདྨ་དྲག་པོ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཞེས་ནས་དགྲ་བགེགས་བསྒྲལ་དུ་གསོལ། །ཨརྒཾ་པྲ་ཏིཙྪ་སྭཱ་ཧཱ། པཏྱཾ་པྲ་ཏིཙྪ༴ པུཥྤེ༴ དྷུཔྤེ༴ ཨ་ལོ་ཀེ༴ གྷནྡྷེ༴ ནཻ་ཝིདྱི༴ ཤབྟ་པྲ་ཏིཙྪ་སྭཱ་ཧཱ། ཞེས་པས་མཆོད། སྨན་རཀ་གཏོར་མ་འབུལ་བ་ནི། ཧཱུཾ་དམ་རྫས་བདུད་རྩི་ཨ་མྲྀ་ཏས། བླ་མ། དྲག་པོའི་ལྷ་གང་ཡིན་ཁ་བསྒྱུར། ཐུགས་དམ་བསྐང་། །རཀྟ་དམར་གྱི་ཨརྒཾ་འདིས། །བླ་མ་ཁ་བསྒྱུར་དྲག་པོའི་ཐུགས་དམ་བསྐང་། །བྷ་ལིང་གཏོར་མ་འབར་བ་འདིས། །བླ་མ་ཁ་བསྒྱུར་དྲག་པོའི་ཐུགས་དམ་བསྐང་། །མ་ཧཱ་པཉྩ་རཀྟ་བྷ་ལིངྟ་ཁཱ་ཧི། ཞེས་ཕུལ། བྱོན་སྐྱེམས་ནི། དཀྱིལ་འཁོར་གྱི་ལྷ་ཚོགས་རྣམས་ཀྱི་ལྗགས་རྡོ་རྗེ་རྩེ་གཅིག་པ་རཾ་དང་དགང་བླུགས་ཀྱི་རྩེར་ཧཱུཾ་མཐིང་ནག་འབར་བས་མཚན་པར་བསམ་ལ། ༀ་ཨཱཿཧཱུཾཿཨརྩིག་ནེརྩིག༴ སོགས། ཨཱཿཧཱུཾ་ཧཱུཾ་ཕཊ྄ཿ ཅེས་གུ་དྲག་སོགས་གཞུང་གང་ཡིན་གྱི་རྩ་སྔགས་ལན་བདུན་གྱིས་དགང་གཟར་བཀང་ནས། བདག་ཅག་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་དགྲ་བགེགས་འབྱུང་པོ་ཐམས་ཅད་མཱ་ར་ཡ་རྦད། ཅེས་པས་བར་སྔ་མ་ལྟར་ལན་གསུམ་ཕུལ་ལ། །བསྲེག་རྫས་བསྒྲུབ་པའི་ཕྱིར། །གཟུ་དཔང་གསོལ་བ་ནི། གསེར་སྐྱེམས་བྱིན་གྱིས་བརླབས་ལ་གཏོར་བཞིན། ཧཱུཾ་ཁྱབ་བདག་གདོད་མའི་མགོན་པོ་ནས་བཟུང་སྟེ། མངོན་པར་བྱང་ཆུབ་དཔལ་མགོན་བླ་མའི་བར། །དགོངས་བརྡའ་སྙན་བརྒྱུད་རྡོ་རྗེ་སློབ་དཔོན་དང་། །དཔལ་ཆེན་ལྷ་གང་ཡིན་ཁ་བསྒྱུར་འདུས་པའི་ལྷ་ཚོགས་གཟུ་དང་དཔང་། །འགྲོ་ཀུན་བདེ་གཤེགས་སྙིང་པོའི་རང་བཞིན་ལ། །དགྲ་གཉེན་ཕྱོགས་ཆའི་སྡང་ཞེན་མ་དམིགས་ཀྱང་། །གཟུང་འཛིན་གདོན་གྱིས་བརླམས་པའི་ཉམས་པ་བདུན། །བྱང་ཆུབ་སེམས་གཉིས་བསྒོམ་པའི་དགྲ་རུ་ལངས། །དམ་ལས་ཉམས་པས་སློབ་དཔོན་མཆེད་ལ་བརྙས། །བཀའ་ལས་ཉམས་པས་ལས་འབྲས་ཁྱད་དུ་བསད། །དོན་ལས་ཉམས་པས་བདེན་གཉིས་ཆད་པར་བལྟ། །ལས་ཀྱིས་ཉམས་པས་ཉེས་མེད་རྣམས་ལ་འཛུགས། །མཚན་མས་ཉམས་པས་ཆོས་ལ་ཕྱོགས་རིས་བཟུང་། །འདོད་པས་ཉམས་པས་ཁྲེལ་མེད་འཕྲོག་བཅོམ་བྱེད། །ལོག་པས་ཉམས་པས་སེམས་ཅན་སྡུག་ལ་སྦྱོར། །འདི་ལ་མངོན་སྤྱོད་ཕྲིན་ལས་མི་མཛད་ན། །མཐར་གྱི་འཆི་བ་སེམས་ཅན་ཀུན་ལ་ཡོད། །དུས་ལ་བབ་ན་དཔག་བསམ་ཤིང་ཡང་འགྱེལ། །བསམ་སྦྱོར་ངན་པའི་འབྲས་བུ་མཐར་ཕྱིན་ན། །ཚར་གཅོད་རྗེས་འཛིན་མཐུ་སྟོབས་རྫུན་དུ་ཟད། །ཆོས་ཉིད་བདེན་པ་བསླུ་བ་མེད་པ་དང་། །སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུ། །ཨ་བྷི་ཙཪྱའི་དུས་ལ་ད་བབ་ན། །གནག་པའི་ལས་ལ་བཏང་སྙོམས་མ་མཛད་ཅིག །དུས་གསུམ་སངས་རྒྱས་རྣམས་ཀྱིས་དབྱིངས་ནས་གཟིགས། །བདེན་གཉིས་རྒྱུ་འབྲས་བསླུ་མེད་གཟུ་དང་དཔང་། །དཔལ་མགོན་ཆོས་སྐྱོང་རྣམས་ཀྱིས་མཐུ་རྩལ་སྐྱེད། །ཉེས་ཅན་འདི་ལ་མངོན་སྤྱོད་ཕྲིན་ལས་མཛོད། །ཅེས་གསེར་སྐྱེམས་ཕྱོགས་བཅུར་གཏོར། །སྤྱིར་ཐུགས་དམ་བསྐུལ་བ་ནི། ཧཱུཾ་མི་གནས་ཡེ་ཤེས་ཆོས་སྐུའི་ཕོ་བྲང་ནས། །ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ། །ཐུགས་དམ་བསྐུལ་ལོ་འགྲོ་བའི་དོན་ལ་དགོངས། །རིག་པའི་རང་བཞིན་བདེ་གཤེགས་སྙིང་པོ་ཡང་། །མ་རིག་འཛིན་པའི་ཀུན་གཞི་ལུང་མ་བསྟན། །སྒོ་ལྔའི་ཡུལ་དང་རྟེན་ཅིང་འབྲེལ་བ་ལས། །རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས། །ལས་དང་ཉོན་མོངས་མཐུ་ཡིས་གཟིར་བའི་མཐུས། །ཕྱི་རོལ་ཡུལ་ལ་སྨིན་པའི་སྡུག་བསྔལ་དང་། །ནད་མཚོན་མུ་གེ་དགྲ་བགེགས་འབྱུང་པོའི་གདོན། །འཇིགས་པ་ཆེན་པོ་བརྒྱད་དང་བཅུ་དྲུག་ཀུན། །མངོན་སྤྱོད་དྲག་པོའི་རོལ་པས་ཚར་བཅད་ནས། །ལོག་རྟོག་དངོས་པོར་ཞེན་པའི་སེམས་ཅན་རྣམས། །རྒྱུ་འབྲས་ཐེག་པ་གཞན་གྱིས་གདུལ་དཀའ་བས། །རང་བྱུང་ཡེ་ཤེས་རྟོགས་པའི་ཕྲིན་ལས་མཛོད། །གྲུ་གསུམ་བསྐྱེད་ཆོག་ནི། །ལིངྒ་བཤམས་པ་ལ་ཆབ་བྲན་ཏེ། ཕཊཿ ཨེ་རཾ་ཡཾ་ཁཾ་རང་གི་མདུན་དུ་དུག་གསུམ་ལས་གྲུབ་པའི་བརྩོན་ཁང་དུས་མཐའི་ཆར་སྤྲིན་ལྟར་གནག་པའི་ཕྱི་ལ་ཞེ་སྡང་བསྐལ་པའི་མེ་འབར་བ། །ཁ་དོག་ཅིང་མཐིལ་ཡངས་པ་ཟིན་ནས་ཐར་དུས་མེད་པའི་ནང་དུ། །འདོད་ཆགས་ཀྱི་ཁྲག་མཚོ་ཁོལ་བ། །གཏི་མུག་གི་མུན་པ་འཐིབས་པ། །ཕྲག་དོག་གི་རླུང་དམར་འཚུབས་པ། །སྟེང་ནས་ཐོག་དང་མཚོན་ཆའི་ཆར་པ་འབེབས་པའི་ཕྱི་རོལ་ན། །ལས་བྱེད་ཀྱི་ཕོ་ཉ་མི་སྡུག་པའི་ཚུལ་ཅན་འགུགས་སྒྲོལ་གྱི་མཚོན་ཆ་འཛིན་པ་དཔག་ཏུ་མེད་པས་དགྲ་བོ་ཆྒཻ་མོ་བླ་འཁྱམས་རང་དབང་མེད་པར་འགུགས་པར་བརྩོན་པས་ས་གཞི་གང་བའི་ནང་དུ་ནྲྀ་དང་ཏྲི་ལས་བསྐྱེད་པའི་དགྲ་བོ་དེ་ཁ་ངུ་བ། མིག་ཤི་མིག །ལག་གཡས་བྲང་བརྡུང་ཞིང་གཡོན་གྱིས་སྐྲ་འབལ་བ། །རྐང་པ་ལྕགས་སྒྲོག་ཏུ་བཅུག་པ། །བུ་ག་དགུ་ནས་རྣག་ཁྲག་འཛག་པ། །མགོན་སྐྱབས་དང་བྲལ་བ། །ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པར་གྱུར། དེ་ནས་གནད་ནས་བསྐུལ་བ་ནི། ཧཱུཾ་ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ། །ཁྲོ་བོ་རོལ་པའི་དུར་ཁྲོད་ཆེན་པོ་ནས། །ཤིན་ཏུ་མི་བཟད་རབ་འཇིགས་སྐུར་སྟོན་པ། །དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད། །ཧཱུཾ་ང་ནི་དཔལ་ཆེན་ཡོངས་རྫོགས་ལྷ། །སྐུ་གསུང་ཐུགས་ཡོན་ཕྲིན་ལས་ཀྱི། །སྲས་དང་སྤྲུལ་པ་ཡང་སྤྲུལ་དང་། །བཀའ་སྡོད་རབ་འཇིགས་ཕོ་ཉའི་ཚོགས། །ཁྱེད་ཀྱི་ཐུགས་དམ་དུས་ལ་བབ། །དགྲ་བགེགས་འགུགས་པའི་ཕྲིན་ལས་མཛོད། །སློབ་དཔོན་ལ་ནི་བརྙས་བྱེད་ཅིང་། །རྡོ་རྗེ་མཆེད་ལ་འཁུ་བྱེད་དང་། །སྐྱེ་འགྲོ་ཡོངས་ལ་གནོད་བྱེད་དང་། །དམ་ཚིག་ཉམས་པའི་བསྒྲལ་བྱ་རྣམས། །ཞིང་བཅུ་ཚང་བ་སྨོས་ཅི་དགོས། །མྱུར་དུ་འགུགས་པའི་དུས་ལ་བབ། །གནོད་པར་བྱེད་ན་ལྷ་ཡང་རུང་། །དམ་ལས་ལོག་ན་མཆེད་ཀྱང་རུང་། །མི་བྱམས་སྡང་ན་ཉེ་རིང་མེད། །སངས་རྒྱས་བསྟན་པ་བཤིག་པ་དང་། །བླ་མའི་སྐུ་ལ་བསྡོ་བ་དང་། །དཀོན་མཆོག་དབུ་འཕང་སྨད་པ་དང་། །བདག་དང་མཆེད་ལ་འཚེ་བྱེད་པ། །སྔ་དགྲ་དར་ལ་ཕྱི་དགྲ་སེམས། །ད་དགྲ་དངོས་སུ་བསྡོ་བ་རྣམས། །གཟུགས་ཅན་དགྲ་དང་གཟུགས་མེད་བགེགས། །ཐམས་ཅད་མྱུར་དུ་འདིར་ཁུག་ཅིག །ཧཱུཾ་དཀར་རྣམ་རྒྱལ་དབྱུག་སྔོན་ཅན། །གཤིན་རྗེ་གཤེད་དང་མི་གཡོ་མགོན། །རྟ་མགྲིན་གཞན་གྱིས་མི་ཐུབ་པ། །བདུད་རྩི་འཁྱིལ་དང་ཁམས་གསུམ་རྒྱལ། །སྟོབས་ཆེན་འཇིགས་བྱེད་ཁྲོ་བོ་བཅུས། །དགྲ་བགེགས་གནོད་བྱེད་མ་རུངས་པ། །ཕྱོགས་མཚམས་སྟེང་འོག་གར་ཡོད་ཀྱང་། །ཁྲོ་བཅུ་ཁྲ་ཐབས་འཁོར་བཅས་ཀྱིས། །རང་དབང་མེད་པར་འདིར་ཁུག་ཅིག །སྒོ་སྐྱོང་ཕོ་ཉ་སྤྲུལ་བཅས་ཀྱི། །ལྕགས་ཀྱུ་ཅན་གྱིས་སྙིང་ནས་ཟུངས། །ཞགས་པ་ཅན་གྱིས་མགུལ་ནས་ཆིངས། །ལྕགས་སྒྲོག་ཅན་གྱིས་དབང་པོ་སྡོམས། །དྲིལ་བུ་ཅན་གྱིས་རྣམ་ཤེས་སྒྱུར། །རྡོ་རྗེ་ཅན་གྱིས་རྒྱབ་ནས་ཕུལ། །མུན་ནག་འཇིགས་པས་སྔོན་ནས་སུས། །ལས་རླུང་དྲག་པོའི་རྟ་ལ་བསྐྱོན། །གན་ནུབ་ནག་པོ་བྲེས་ལ་ཤོག །ལྟག་པའི་བདུད་སྒོ་ཕྱེས་ལ་ཤོག །དཔྲལ་བའི་མིག་ཐོན་ཁོང་སྙིང་ཐོན། །དགྲ་བགེགས་བླ་སྲོག་ཚེ་དང་གསུམ། །རང་དབང་མེད་པར་འདིར་ཁུག་ཅིག །འདིར་འགུགས་པ་གང་མང་བྱས་མཐར། །དགྲ་བགེགས་ནྲྀ་ཏྲི་ཨཾ་ཀུ་ཤ་ཛ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷནྡྷེ་ཧོ། ནྲྀ་ཏྲི་ཛ་ཛཿ བཛྲ་ཨ་བེ་ཤ་ཡ་ཨ་ཨ། ལྷ་དབྱེ་ནི། ཧཱུཾ་དཔལ་ཆེན་ཁྲོ་བོའི་ལྷ་ཚོགས་དང་། །ཕོ་ཉ་སྤྲུལ་པ་ཡང་སྤྲུལ་བཅས། །ཕྱག་བརྙན་སྒོ་མའི་ཚོགས་རྣམས་ཀྱིས། །དགྲ་བགེགས་ལྷ་སྲུང་རྟེན་དང་ཕྲོལ། །ལྷ་གང་ཡིན་གྱི་རྩ་སྔགས་གཤམ་དུ། ཨཱ་ཡུ་ཛྙཱ་ན་ཥེ་དགྲ་བོའི་ལྷ་སྲུང་ཐམས་ཅད་ཨུ་ཙ་ཏ་ཡ་ཕཊཿ མཱ་ར་ཡ་ཕྱེས་ཕྱེས། ཧཱུཾ་ཧཱུཾ། ཕཊཿཕཊཿ དམ་ཉམས་དགྲ་བགེགས་ལས་ངན་ལ། །དུག་ཁྲག་ཐུན་གྱི་སེར་བ་ཕོབས། །ཁྲག་རིམས་ནད་ཀྱིས་སྨྱོ་རུ་ཆུགས། །སྨྱོ་འབོག་བརྒྱལ་རེངས་མྱོས་སུ་ཆུགས། །བཛྲ་ཧ་ལ་ཧ་ལ་ཧཱུཾ་ཕཊཿ ཅེས་ཐུན་གདབ། དེ་ནས་བསྒྲལ་ཕྱིར་བསྐུལ་བ་ནི། ཧཱུཾ་ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ། །ཁྲོ་བོ་རོལ་པའི་དུར་ཁྲོད་ཆེན་པོ་ནས། །ཤིན་ཏུ་མི་བཟད་རབ་འཇིགས་སྐུར་སྟོན་པ། །དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད། །ཧཱུཾ་ལྷ་གང་ཡིན་ཁ་བསྒྱུར། ང་ནི་པདྨ་ཐོད་ཕྲེང་རྩལ། །སྲས་དང་སྤྲུལ་པ་བྱེ་བ་འབུམ། །བཀའ་སྡོད་རབ་འཇིགས་ཕོ་ཉར་བཅས། །དྲག་པོ་ཁ་བསྒྱུར། ཐོད་ཕྲེང་དུས་མཆན་ལ་བབ། །གཡས་ཀྱི་ཕྱག་ན་ཕུར་པ་བསྣམས། །གཡོན་གྱི་ཕྱག་ན་ལྕགས་ཀྱུ་བསྣམས། །ལྕགས་ཀྱུས་ཟུངས་ལ་ཕུར་བུས་གཏུབས། །དགྲ་བགེགས་ལྔ་ཕུང་རྡུལ་དུ་རློགས། །རྣམ་ཤེས་ཆོས་ཀྱི་དབྱིངས་སུ་སྤོར། །ༀ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྴ་ཀཱ་ལ་རུ་པ་ཀརྨ་རཾ་རཾ་ཛྭ་ལ་རཾ་གནོད་བྱེད་དགྲ་བགེགས་སརྦ་ཤ་ཏྲུཾ་ཧུར་ཐུམ་ཛ་མཱ་ར་ཡ་ཧཱུཾ་ཕཊཿ ཅེས་པས་བསྒྲལ་ནས་ལིང་རོ་ལ་བདུད་རྩི་བྲན་ནས། ཨ་མྲྀ་ཏས་བསངས། སྭཱ་བྷཱས་སྦྱངས། བསྲེག་རྫས་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་དགྲ་བགེགས་བསྒྲལ་བ་ལས་བྱུང་བའི་ཤའི་རི་བོ་ཁྲག་གི་རྒྱ་མཚོ་རུས་པའི་གྲམ་ཁྲོད་ཆེན་པོ་བདུད་རྩིའི་རང་བཞིན་དུ་གྱུར། ༀ་ཨཱཿཧཱུཾ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས་ལ། ཧཱུཾ་ལྷ་གང་ཡིན་ཁ་བསྒྱུར། དབང་དྲག་པདྨའི་དཀྱིལ་འཁོར་རྣམས། །གནམ་ས་ལྟ་བུའི་ཞལ་གདངས་པའི། །ནང་དུ་གནོད་བྱེད་དགྲ་བགེགས་ཀྱི། །ཤ་ཁྲག་ཕུང་ཁམས་བླ་སྲོག་བཅས། །ཁ་ཆར་རྒྱ་མཚོར་ཐིམ་པ་བཞིན། །རྗེས་ཤུལ་མེད་པར་གཞོམ་པར་གྱུར། །ཞེས་བསམ་ནས་བསྟབ་བསྐུལ་ནི། །སྔགས་འཆང་རྣམས་ཞེ་སྡང་རང་རྒྱུད་པའི་བློ་ངན་དང་བྲལ་ཞིང་། །དྲག་པོའི་བརྟུལ་ཞུགས་ལ་གནས་པས། །ཧཱུཾ་འོག་མིན་ཆོས་དབྱིངས་ཕོ་བྲང་ནས། །ཀུན་བཟང་ཆོས་སྐུའི་ལྷ་ཚོགས་རྣམས། །བཞེངས་བཞུགས་མཚན་མ་དབེན་མོད་ཀྱང་། །ལྷུན་གྲུབ་ལོངས་སྐུའི་མངའ་བདག་རྣམས། །འཁོར་འདས་བྱེད་པོར་ཡེ་གནས་ཕྱིར། །མ་རྟོགས་འགྲོ་ཁམས་ལོག་སྤྱོད་དཔུང་། །སྒྱུ་མའི་འདུ་བྱེད་ཞིག་པ་བཞིན། །སྐྱེ་མེད་དབྱིངས་སུ་སྟིམས་པར་མཛོད། །ཕྱི་ལྟར་འཁྲུལ་པའི་འགྲོ་དྲུག་གཟུགས། །རང་བཞིན་སྤྲུལ་སྐུའི་དཀྱིལ་འཁོར་གྱི། །ཞལ་ཧོམ་ཡེ་ཤེས་འབར་ཀློང་དུ། །ལྷག་མ་མེད་པར་ཚིག་པར་མཛོད། །ནང་ལྟར་འཁྲུལ་ལམ་ཚོགས་བརྒྱད་སེམས། །ལྷུན་གྲུབ་ལོངས་སྐུའི་ཞལ་ཧོམ་དུ། །བྱ་སྒྲོ་མེས་བསྲེགས་ཇི་བཞིན་དུ། །མྱུར་དུ་ཚིག་པའི་ཕྲིན་ལས་མཛོད། །གསང་བ་འཁྲུལ་གཞི་མ་རིག་མུན། །ཀུན་བཟང་ཆོས་སྐུའི་ཞལ་ཧོམ་དུ། །ན་བུན་མཁའ་ལ་ཐིམ་པ་ལྟར། །ཡེ་ཤེས་འོད་བརྒྱས་བསྲེག་པར་མཛོད། །ཁྱད་པར་འཁྲུལ་ལས་ཡང་འཁྲུལ་བའི། །དགྲ་འདྲེར་བཟུང་བའི་ཡུལ་ཡུལ་ཅན། །རྟེན་འབྲེལ་བསླུ་མེད་མེ་དཔུང་གིས། །སྐད་ཅིག་ཡུད་ཀྱིས་བསྲེག་པར་མཛོད། །ཅེས་དང་། ཧཱུཾ་ཡེ་ཤེས་བསྐལ་མེ་འབར་ཀློང་དུ། །ཁྲོ་རྒྱལ་ལྷ་གང་ཡིན་ཁ་བསྒྱུར། པདྨ་ཐོད་ཕྲེང་རྩལ། །ཡབ་ཡུམ་སྲས་འཁོར་ཕོ་ཉར་བཅས། །དགྲ་བགེགས་བསྒྲལ་བའི་ཤ་ཁྲག་རུས། །དོན་སྙིང་ནང་ཁྲོལ་དབང་པོ་ལྔ། །ཕུང་ཁམས་སྐྱེ་མཆེད་བཀྲག་དང་མདངས། །བླ་ཚེ་སྲོག་དབུགས་དབང་ཐང་དང་། །ཡུལ་མཁར་ལོངས་སྤྱོད་བཅས་པ་རྣམས། །མྱུར་བར་སྐད་ཅིག་ཡུད་ཙམ་ལ། །བཞེས་ཤིག་རོལ་ཅིག་ཁ་རཾ་ཁཱ་ཧི། ལྷག་མ་རྗེས་ཤུལ་རྡུལ་ཕྲན་ཙམ། །ལུས་པ་མེད་པར་གཞོམ་དུ་གསོལ། །དེ་ནས་གཞུང་གང་ཡིན་གྱི་རྩ་སྔགས་ཤམ་བུར། །དགྲ་བགེགས་གནོད་བྱེད་ཐམས་ཅད་སརྦ་ཤ་ཏྲུཾ་ཧུར་ཐུམ་ཛཿ ནྲྀ་ཏྲི་མཱ་ར་ཡ་རྦདཿ ཡཀྴ་ཀྲོ་ཏ་རཀྴ་ཧཱུཾ་ཁ་ཁ་ཁཱ་ཧི་ཁཱ་ཧིཿ ཧ་ཧ་ཧི་ཧི་ཧཱུཾ་ཧཱུཾ་ཕཊཿཕཊཿ སྔགས་དེས་ཡམ་ཤིང་། མར་ཁུ་ནས་བསྲེག་རྫས་ཚང་མ་གཙོ་འཁོར་ཐུན་མོང་དུ་འབུལ་བའམ། །སྤྲོ་ན་སོ་སོའི་སྔགས་ཀྱིས་འགོ་དྲངས་ཏེ། །གཙོ་བོ་ལ་བརྒྱ་རྩ་འཁོར་རྣམས་ལ་ཉེར་གཅིག་སོགས་ཀྱིས་འབུལ་བར་བྱའོ། །ཡང་ཁྱིམ་དུ་འདྲེ་གདོན་ཞུགས་པ་ལྟ་བུ་ལ། ཧོམ་བསྲེགས་དང་། མེ་ཞགས་བསྐྱར་བ་ལ། དམར་གཏོར་ཤ་ཁྲག་གིས་བརྒྱན་པར་འགུགས་གཞུག་བྱས་ལ། །དགྲ་བགེགས་ཀྱི་ཤ་ཁྲག་ཏུ་དམིགས་ནས་ཕུལ་ལ་ཕྲིན་ལས་བཅོལ། །མཐར་ཧོམ་མཆོད་ལ་མཐོང་བརྒྱུད་བཞིན་དང་། །མེ་ཞགས་ལ་ཡོན་བདག་ཕོ་མོ་རྣམས་ཞྭ་ལྷམ་མི་གྱོན་པར་མདུན་དུ་ལངས་ནས་བསྒྲིགས་པ་ལ། རང་ཉིད་ལྷའི་ང་རྒྱལ་དང་ལྡན་པས། ཧོ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །ཀུན་བཟང་ཆོས་སྐུའི་ལྷ་ཚོགས་དགོངས་སུ་གསོལ། །ངེས་པ་ལྔ་ལྡན་ལོངས་སྐུའི་ཞིང་ནས། །རང་སྣང་ལོངས་སྐུའི་ལྷ་ཚོགས་དགོངས་སུ་གསོལ། །རང་བཞིན་སྤྲུལ་སྐུའི་ཞིང་ནས། ཕྱེད་སྤྲུལ་ལོངས་སྐུའི་ལྷ་ཚོགས་དགོངས་སུ་གསོལ། །འགྲོ་འདུལ་སྤྲུལ་སྐུའི་ཞིང་ནས་ཐུབ་དྲུག་སྤྲུལ་སྐུའི་ལྷ་ཚོགས་དགོངས་སུ་གསོལ། །སྟེང་ཕྱོགས་དུར་ཁྲོད་མེ་རི་འབར་བ་ནས། །སྒྲུབ་སྡེ་ཆེན་པོ་བརྒྱད་ཀྱི་དཀྱིལ་འཁོར་གྱི་ལྷ་ཚོགས་དགོངས་སུ་གསོལ་ལོ། །གཞན་ཡང་སྐུ་གསུམ་དག་པའི་ཞིང་ན་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་དམ་ཅན་རྒྱ་མཚོ་སྤྲུལ་པ་ཡང་སྤྲུལ་ཉིང་སྤྲུལ་དང་བཅས་པ་དགོངས་སུ་གསོལ་ལོ། །ཁྱད་པར་དུའང་གཞུང་གང་ཡིན་གྱི་ལྷ་ཚོགས་གཙོ་འཁོར་རྣམས་ཀྱི་མཚན་ནས་བརྗོད་རྗེས། །དགོངས་སུ་གསོལ་ལོ། །ཞེས་པའི་མཐར། རྩ་གསུམ་ཆོས་སྐྱོང་སྲུང་མའི་ཚོགས་དང་བཅས་པ་ཁྱེད་རྣམས་ལ་ཕྲིན་ལས་སུ་བཅོལ་བའི་མདོ་ནི། །བསྟན་འགྲོ་ཡོངས་ལ་གནོད་ཅིང་འཚེ་བའི་དགྲ་བགེགས་ལོག་པར་འདྲེན་པ་སྤྱི་དང་ཁྱད་པར་དུ་བདག་དང་བསྲུང་བྱ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་སྡང་བར་བྱེད་པའི་དགྲ། །གཟུགས་མེད་གནོད་བྱེད་བགེགས་རིགས་ལོག་པར་འདྲེན་པ། ཚེ་ལ་རྐུ་བར་སྲོག་ལ་འཇབ་པ། །བླ་ལ་འཁྱེར་བ་ཡིད་ལ་རློམ་པ། །མི་འདོད་པའི་སྣ་འདྲེན་ཅིང་། །འདོད་པ་ལ་བར་གཅོད་བྱེད་པ། །དབང་ཐང་རླུང་རྟ་དཔལ་འབྱོར་ཉམས་པར་བྱེད་པ། །ཁའི་དབུགས་དང་ཁོང་པའི་སྲོག་འཕྲོག་པར་འདོད་པ། །གནས་མལ་ཡོ་བྱད་ནོར་རྫས་སོགས་ཕུན་སུམ་ཚོགས་པ་ལ་བར་གཅོད་བྱེད་པ། །མི་མིན་མི་རུ་བརྫུ་བ། །ལྷ་མིན་ལྷ་རུ་བརྫུ་བ། །ལྟས་ངན་དང་ཆོ་འཕྲུལ་གཏོང་བ། །ཕ་རོལ་བན་སྔགས་བོན་པོའི་བྱད་ཕུར་རྦོད་གཏོང་མནན་བསྲེགས་འཕངས་གསུམ་སོགས་བསམ་སྦྱོར་ངན་པའི་རིགས་སུ་གྱུར་ཚད། གཞན་ཡང་ཕུ་ནུ་ཕ་ཚན་གྱི་རུས་འདྲེ། །མ་སྲིང་མོ་ཕྱོགས་ཀྱི་བྱུར་འདྲེ། །ཉེ་དུ་ཉེ་འབྲེལ་གྱི་འགོས་འདྲེ། །ཤག་རོགས་མཛའ་ཕྱོགས་ཀྱི་འབགས་འདྲེ། །ཕོ་གདོན་རྒྱལ་པོ། །མོ་གདོན་བསེན་མོ། །གནའ་འདྲེ་རྙིང་བ། །ད་འདྲེ་གསར་བ། །ཡུལ་འདྲེ་འཁྱམས་པོ། །ཟ་འདྲེ་ཤི་གཤེད། །ཕོ་སྲི། མོ་སྲི། ཆེ་སྲི། ཆུང་སྲི། རྒན་སྲི། གཞོན་སྲི། གོད་སྲི། ཕུང་སྲི། དགྲ་སྲི། གྱོད་སྲི། དབུལ་སྲི། རྒྱ་འདྲེ་འགོང་པོ། བོད་སོག་གི་ཡུལ་དུ་གསར་སྐྱེས་ཀྱི་འདྲེ་གདོན་ཡོད་དོ་ཅོག་དང་བཅས་པ་དེ་དག་ཐམས་ཅད། །བསྐལ་པའི་མེ་དཔུང་འབར་བ་ལ་འདབ་ཆགས་ཕྲ་མོས་འཕྲད་པའམ། །སྣུམ་གྱིས་བལྟམས་པའི་ལྕགས་སྣོད་བཅུད་བཅས་མེར་མཆེད་པ་ལ་ཆུའི་ཐིགས་པ་མི་ཆགས་པའམ། །མུན་པའི་སྨག་རུམ་དུ་སྤྲིན་བྲལ་གྱི་ཉི་མ་ཤར་བའམ། །མེ་མདའི་རྫས་ཀྱི་ཕུང་པོ་ལ་མེ་མཆེད་པ་བཞིན་དུ། །སྐད་ཅིག་ཐེངས་ཅིག་ཡུད་ཙམ་ཞིག་ལ་མིང་ཙམ་ལྷག་མ་རྗེས་ཤུལ་ཙམ་ཡང་མི་ལུས་པར་ཐལ་བའི་རྡུལ་ཕྲན་བཞིན་དུ་བརླག་པའི་ཕྲིན་ལས་མཛོད་ཅིག །འཁོར་བ་སྡུག་བསྔལ་གྱི་རྒྱ་མཚོ་སྐེམ་པར་མཛོད་ཅིག །ལས་ངན་འཁྲུལ་བའི་འཁོར་ལོ་འཇིག་པར་མཛོད་ཅིག །བསམ་ངན་སྦྱོར་རྩུབ་ཀྱི་ས་བོན་སྟོང་བར་མཛོད་ཅིག །མི་དགེའི་ལྗོན་པ་ཤིང་ཏཱ་ལའི་འགོ་བོ་བཅད་པ་བཞིན་དུ་ཐོངས་ཤིག །དགེ་བའི་ལོ་ཏོག་ཡར་ངོའི་ཟླ་བ་བཞིན་དུ་འཕེལ་ཞིང་རྒྱས་པར་མཛོད་ཅིག །ཅེས་དང་གཞུང་གང་ཡིན་གྱི་རྩ་སྔགས་ལས་སྔགས་སྤུ་གྲིའི་སྔགས་དང་དྲག་སྔགས་སོ་ལྔ་པ་སོགས་མ་ཡེངས་པའི་ངང་ནས་བཟླ་བཞིན། ཧོམ་བསྲེག་གམ། མེ་ཞགས་རྒྱག་ཚེ་གོང་སྨོས་ཀྱི་འདྲེ་གདོན་བགེགས་རིགས་ཐམས་ཅད་བྱ་སྒྲོ་མེས་ཚིག་པ་ལྟར་སོང་བར་བསམ་མཐར། སྟོང་ཉིད་སྙིང་རྗེ་ཟུང་འཇུག་ངང་ལ་མཉམ་པར་བཞག །འདྲེ་གདོན་གྱི་ལས་ངན་གྱི་རྒྱུན་བཅད་ནས་ཐར་བ་དང་ཐམས་ཅད་མཁྱེན་པའི་གོ་འཕང་ལ་བཞག་པའི་རྟེན་འབྲེལ་བསྒྲིག་གོ། །སླར་ཡང་རྩ་སྔགས་བདུན་གྱིས་བླུགས་གཟར་གྱི་མར་ཁུས་དགང་གཟར་དགང་བ་ལན་གསུམ་གྱིས་གཤེགས་སྐྱེམས་ཕུལ་ལ། གཞུང་གང་ཡིན་གྱི་ལས་བྱང་གི་ཕྱི་ནང་གསང་མཆོད་ནས་བཟུང་བསྟོད་པའི་མཐར་ཐུག་བར་བཏང་ལ། བཤགས་པ་ནི། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་རྩལ་བ། །དེ་ཀུན་བཟོད་པར་མཛད་དུ་གསོལ། །ཞེས་དང་། །ཡི་གེ་བརྒྱ་པས་ལྷག་ཆད་བསྐངས། །དེ་ནས་རྟེན་ཡོད་ན་ཡེ་ཤེས་པ་བསྟིམས། །མེད་ན། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཞེས་པས་ཡེ་ཤེས་པ་གཤེགས། སླར་ཡང་བླུགས་གཟར་གྱི་མར་ཁུས་མེ་གསོས་ལ། ༀ་ཛྭ་ལ་ཛྭ་ལ་ཧཱུཾ་གིས་མེ་ལྷ་སྔར་བཞིན་གསལ་བར་གྱུར་བ་ལ། མཆོད་བསྟོད་བསྲེག་རྫས་རྣམས་སྔར་བཞིན་ཕུལ་ལ༑ གཤེགས་སྐྱེམས་ཡང་བྱོན་ཟན་ལྟར་ཕུལ་ལ། གཏོར་མ། ༀ་ཨགྣེ་དེ་ཝ་རི་ཥེ་ཨི་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ་ལ། འདོད་གསོལ་ནི། ཧོ། རིག་པའི་རྒྱལ་པོ་དྲང་སྲོང་མེ་ལྷ་འཁོར་དང་བཅས་པ་ཁྱེད་རྣམས་ཀྱིས་མཆོད་སྦྱིན་གཏོར་མ་རྒྱ་ཆེན་པོ་འདི་བཞེས་ལ། །བསྟན་འགྲོ་ཡོངས་ལ་གནོད་བྱེད་ཀྱི་དགྲ་བགེགས་སྤྱི་དང་། །ཁྱད་པར་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་དགྲ་བགེགས་ལོག་པར་འདྲེན་པ་ཐམས་ཅད་ཐལ་བའི་རྡུལ་ཕྲན་བཞིན་དུ་བརླག་པའི་ཕྲིན་ལས་མཛོད་ཅིག །ཅེས་གསོལ། སླར་ཡང་གོང་བཞིན་གཏང་རག་གི་མཆོད་བསྟོད་བྱས་ལ། མ་རྙེད་ཡོངས་སུ་མ་ཚང་དང་། །གཙོ་བོ་ནུས་པ་མ་མཆིས་པས། །འདི་ནི་བྱ་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་ནོངས་པ་བཤགས་ཤིང་། གཤེགས་གསོལ་ནི། བདག་གི་དོན་དང་གཞན་གྱི་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་བྱོན་ཞིང་། །བདག་གི་དངོས་གྲུབ་ཐམས་ཅད་སྒྲུབས། །ༀ་ཨགྣེ་ཡེ་གཙྪ། ཞེས་པས། མེ་ལྷ་ཡེ་ཤེས་པ་རང་གནས་སུ་གཤེགས། །དམ་ཚིག་པ་འབར་བའི་རྣམ་པར་གྱུར། །ཞེས་མོས་ལ། དེ་ནས་བསྔོ་བ་སྨོན་ལམ་དང་བཀྲ་ཤིས་ཀྱིས་མཐའ་བརྒྱན་པར་བྱའོ། འདིར་སྨྲས་པ། སྔོན་དུས་གསང་སྔགས་ཉམས་སུ་བླངས་བའི་འབྲས། །རང་དོན་ཆོས་སྐུ་གཞན་དོན་གཟུགས་ཀྱི་སྐུ། །ཚེ་ལུས་གཅིག་གིས་འགྲུབ་པའི་ལམ་རྟགས་གཟུགས། །མངོན་སུམ་མཐོང་ལ་སྔགས་པ་ཞེས་སུ་འབོད། །དེང་དུས་ཤ་ཆང་རྙེད་འཚོལ་དོན་གཉེར་ཕྱིར། །སྔགས་ཆོས་ངག་འདོན་ཤེས་ཙམ་སྔགས་པར་རློམ། །ཀྱེ་མ་གཞན་དོན་ལྟ་ཅི་རང་དོན་ཡང་། །ལོ་ཟླའི་བསྙེན་སྒྲུབ་ཙམ་ཡང་མེད་བཞིན་དུ། །མི་ཚེ་བོན་གྱེར་ཁོ་ནས་ཆུད་གསོན་པ། །འདི་འདྲ་རྔོན་པ་རྣམས་དང་ཁྱད་པར་གང་། །ལྡན་གྲོལ་ཡོན་ཏན་སྔགས་བཟླས་ནུས་པ་སོགས། །གང་ཡང་མེད་རྣམས་དོན་འདི་ངེས་པར་གྱིས། །དེ་ལས་གཞན་དུ་ཆོས་དང་གང་ཟག་གི། །རྒྱུད་ཚོད་དཔག་ནུས་སངས་རྒྱས་ཉག་གཅིག་ལས། །གཞན་དག་ལས་ངན་ཁུར་བོ་ལྕི་བའི་རྒྱུ། །ཡིན་ཕྱིར་དགག་སྒྲུབ་གཉིས་གར་སྤྲོ་བ་མེད། །ལ་ལ་ཉམས་མྱོང་མེད་པའི་ཚིག་རྐྱང་ལ། །ཅུང་ཟད་གོམས་པས་ཁེངས་ཤིང་རྒྱགས་པ་དང་། །ཁ་ཅིག་ཐོས་བསམ་དད་དམ་སྙིང་རྗེ་སོགས། །སྤངས་ཤིང་བླུན་སྒོམ་ཁོ་ནར་ཞེན་པ་སོགས། །མང་ཞིག་མཐོང་ཞིང་ཐོས་ཡང་ཅི་ཞིག་སྨྲ། །ཁོ་བོ་རང་རྐྱོན་ངོམ་ཞིང་གཞན་རྣམས་ལ། །དག་སྣང་སྦྱངས་འདིས་སུ་དང་འཁོན་མེད་པར། །ཀུན་གྱི་མཛའ་གྲོགས་ཡུལ་དུ་གྱུར་པ་ཡིན། །ཡིན་ལུགས་འདིར་མཚུངས་རྩོམ་པའི་གཟུགས་བརྙན་ཡང་། །ཡང་ཡང་གཞན་ལ་ཕན་འདོད་ཁོ་ནས་བྲིས། །བྲིས་པའི་དགེ་བ་ཡེ་ཤེས་བསྐལ་པའི་མེ། །རབ་འབར་དགྲ་བགེགས་འབྱུང་བ་ཀུན་སྦྱངས་ཤིང་། །ཕན་བདེའི་རྫོགས་ལྡན་གསར་བ་མངོན་གྱུར་ནས། །མངོན་མཐོ་ངེས་ལེགས་དཔལ་ཡོན་ཀུན་ཐོབ་ཤོག །ཅེས་རཏྣའི་གཏེར་ཆོས་གུ་རུ་དྲག་པོ་སོགས་སྤྱི་ལ་སྦྱར་རུང་བའི་དྲག་པོའི་སྦྱིན་སྲེག་བསྡུས་པ་ཡེ་ཤེས་བསྐལ་མེ་རབ་འབར་ཞེས་བྱ་བ་འདི་ཉིད་སྔོན་བྱོན་གྱི་དམ་པ་འགའི་མན་ངག་དང་མཐུན་པར་བྱང་ཕྱོགས་ནོར་འཛིན་ཡུལ་གྲུ་སྲིད་པས་མཚོ་ཁྲི་གཤོགས་རྒྱལ་མོའི་བདག་གིར་བཟུང་བའི་སོག་པོའི་ཡུལ་ཐུགས་རྗེ་ཆེན་པོ་སྒྲུབ་གནས་སྤྲེལ་རྫོངས་བྲག་དཀར་གྱི་ཉེ་འདབ་ནས་རྫོགས་ཆེན་རྣལ་འབྱོར་པ་འཇིགས་མེད་ཕྲིན་ལས་འོད་ཟེར་དཔལ་འབར་གྱིས་སྤེལ་བའི་ཡི་གེ་པ་ནི་འཇིགས་མེད་བསྟན་འཛིན་གྱིས་བགྱིས་པའི་དགེ་བས་བསྟན་འགྲོར་འཚེ་བའི་དགྲ་བགེགས་རྣམས་གཞོམ་པའི་རྒྱུར་གྱུར་ཅིག་གུ། དགེའོ། དགེའོ། དགེའོ། ཞུས་སོ། དཀོན་མཆོག་གསུམ་གྱི་སྤྱི་དགྲ་དང་། །རྣལ་འབྱོར་སྒོས་དགྲ་ཁྱད་པར་དུ། །བསྲུང་བྱའི་ཡུལ་འདིར་གནོད་བྱེད་དགྲ། །སྡོངས་ཟླ་རྒྱབ་བརྟེན་བསམ་སྦྱོར་གནག །མི་འདོད་རྐྱེན་སྦྱོར་གཟུགས་ཅན་མི། །གཟུགས་མེད་ལྷ་འདྲེ་བྱད་ཕུར་མཁན། །ཐམས་ཅད་དྲག་པོའི་ཕྲིན་ལས་ཀྱིས། །ཐལ་བའི་རྡུལ་བཞིན་བརླག་པར་མཛོད། །གནོད་བྱེད་ཐམས་ཅད་མཱ་ར་ཡ་ཕཊ྄ཿ ཀློང་སྡེ་རྡོ་རྗེ་ཟམ་པའི་བཀའ་སྲུང་འབར་མ་སྤུན་གསུམ་གྱི་གསོལ་མཆོད་གྲུབ་གཉིས་རེ་སྐོང་ཡིད་བཞིན་ནོར་བུ།༄༅། །ཀློང་སྡེ་རྡོ་རྗེ་ཟམ་པའི་བཀའ་སྲུང་འབར་མ་སྤུན་གསུམ་གྱི་གསོལ་མཆོད་གྲུབ་གཉིས་རེ་སྐོང་ཡིད་བཞིན་ནོར་བུ་བཞུགས། ། ཐོག་མའི་མགོན་པོ་རྡོ་རྗེ་སེམས་དཔའ་ཆེཿ སེམས་དག་ལྷའི་བུ་དགའ་རབ་མཉྫུ་ཤྲཱི། །ཤྲཱྀ་སེང་བཱཻ་རོ་མི་ཕམ་མགོན་པོ་སོགས། །ཀློང་སྡེའི་བརྒྱུད་པའི་བླ་མར་ལན་བརྒྱར་འདུད། །ཁྱད་པར་སྟོན་པའི་ཞལ་སྐྱིན་ཨོ་རྒྱན་རྗེའི། །མཁྱེན་བརྩེ་ནུས་པའི་སྤྱི་གཟུགས་འཇིགས་མེད་གླིང་། །གང་གི་ཐུགས་རྗེའི་རོལ་རྩལ་བརྒྱུད་ལྡན་གྱི། །བླ་མ་དམ་པའི་ཚོགས་ལ་སྙིང་ནས་འདུད། །གནས་ཡུལ་དུར་ཁྲོད་མཁའ་འགྲོ་ཡང་མཆེད་བཞི། །ཆོས་དབྱིངས་རྣམ་ཀུན་མཆོག་ལྡན་ཝཱ་ར་ཧི། །གང་ལ་གང་འདུལ་འབར་མ་སྤུན་གསུམ་གྱི། །སྤྲུལ་པའི་ཟློས་གར་བསྒྱུར་དེ་ངོ་མཚར་གནས། །གང་དེའི་གསོལ་མཆོད་གྲུབ་གཉིས་རེ་སྐོང་ནོར། །དོན་གཉེར་གདེངས་ཅན་དགའ་བའི་གཙུག་རྒྱན་དུ། །སྦྱིན་ནོ་རབ་འབྱམས་ཕྲིན་ལས་འདོད་དགུ་ལོངས། །དེ་ཡང་འདིར་ཀློང་སྡེ་རྡོ་རྗེ་ཟམ་པའི་བཀའ་སྲུང་འབར་མ་སྤུན་གསུམ་གཡོག་མོ་བཅས་ལ་གཏོར་མ་འབུལ་བར་འདོད་ན་གཙོ་མོ་གསུམ་ལ་ཤ་ཆེན་དང་ཁྲག་ཆེན་གྱི་གཏོར་མ། །ཞུན་ཆེན་དང་སྨན་ཆེན་གྱི་གཏོར་མ་དཀར་གསུམ་མངར་གསུམ་གྱི་གཏོར་མ། གཡོག་མོ་གསུམ་ལ་ཞག་དང་ཤ་དང་། །ཁྲག་གི་གཏོར་མ་སོ་སོའི་འདོད་རྫས་ཀྱིས་བརྒྱན་དགོས་པར་བཤད་ཀྱང་། །རྫས་དང་ཡོ་བྱད་ཡོད་བཞིན་དུ་མ་བཤམས་པ་དང་། །མེད་པ་ལ་ཕུགས་གཏད་ནས་ཆོ་ག་བཤོལ་བ་སོགས་མཐའ་གཉིས་སུ་མ་ལྷུང་བའི་ཚུལ་གྱིས་ཇི་སྐད་དུ། །དམིགས་པ་རྣོན་པོ་རྣལ་འབྱོར་མཚོན་ཆ་ཡིན། །ཞེས་གསུངས་པ་བཞིན། །གཙོ་མོ་གསུམ་ལ་དམར་གཏོར་ཆེ་ཆུང་གསུམ། །གཡོག་མོ་གསུམ་ལ་དེ་ལས་ཆུང་བ་གསུམ། །སྐྱུ་གུ་གྲངས་ངེས་མེད་པས་བསྐོར་བ་དང་བཅས། རྃ་ཡྃ་ཁྃ་ལན་གསུམ་གྱིས་མ་དག་པའི་དངོས་པོ་བསྲེགས་གཏོར་བཀྲུས། ༀ་ཨཱཿཧཱུྃ་གིས་སྦྱངས་སྤེལ་བསྒྱུར་ནས་རང་རང་གི་འདོད་རྫས་ལོངས་སྤྱོད་བསམ་གྱིས་མི་ཁྱབ་པར་བལྟས་ལ། །དང་པོ་བྱིན་གྱིས་བརླབ་པ་ནི། སྟོང་པའི་ངང་ལས་ཉི་ཟླ་ཁ་སྦྱོར་གྱི་དབུས་གཞལ་ཡས་ཁང་གི་ནང་དུ་བདག་ཉིད་ཧེ་རུ་ཀ་མངོན་རྫོགས་རྒྱལ་པོ་ཞལ་གཅིག་ཕྱག་གཉིས་པ། །གཡས་ན་གསེར་གྱི་རྡོ་རྗེ་རྩེ་དགུ་པ། གཡོན་ན་ཤེལ་གྱི་དྲིལ་བུ་དཀུ་ལ་བརྟེན་པ་སྐུ་མདོག་གསེར་བཙོ་མ་ལྟ་བུ་ཡུམ་དང་འཁྲིལ་སྦྱོར་གྱི་ཚུལ་དུ་བཞུགས་པར་བསྒོམ་ལ། ཧེ་རུ་ཀའི་སྔགས་འདི་ༀ་བཛྲ་མ་ཧཱ་ཤྲི་ཧེ་རུ་ཀ། བཛྲ་ཀྲོ་ཏི་ཤྭ་རི་སྟཾ། རུ་ལུ་རུ་ལུ་ཧཱུྃ་བྷྱོ་ཧཱུྃ། བ ཟླས་མཐར། མདུན་དུ་མཁའ་འགྲོ་མ་གསུམ་པོ་བསྐྱེད་པ་ནི། རང་ཉིད་དཔལ་གྱི་ཐུགས་ཀ་ནས། །ཡི་གེ་ཛ་དྷ་དཱ་གསུམ་ལས། །མཁའ་འགྲོ་འབར་མ་སྤུན་གསུམ་ནི། །ཞལ་གཅིག་སྤྱན་གསུམ་ཤིན་ཏུ་དམར། །སྐུ་མདོག་དམར་མོ་ཕྱག་བཞི་མ། །ཞབས་གཉིས་གཡོན་བསྐུམ་གཡས་བརྐྱངས་ཤིང་། །རྩ་བའི་ཕྱག་གཉིས་མདའ་གཞུ་འཛིན། །བརྣག་པའི་དགྲ་ལ་མདའ་བྱིན་ནས། །སྙིང་ཁ་ནས་ཕུག་ཟ་བར་བསམ། །དང་པོ་གཉིས་ཀྱིས་གྲི་གུག་དང་། །ཐོད་པ་ཀླད་ཁྲག་གང་བ་འཛིན། །གནོད་པར་བྱེད་པའི་དགྲ་རྣམས་ལ། །གཡས་པའི་གྲི་གུག་གིས་བསྣུན་ཅིང་། །གཡོན་པ་ཐོད་པའི་ནང་དུ་ནི། །རྒྱུ་མ་ཀླད་ཁྲག་བཅས་པས་བཀང་། །དཀྲུགས་ཤིང་ཞལ་དུ་གསོལ་བར་གྱུར། །ཡན་ལག་ལྷུ་ཚིགས་སྦྲུལ་གྱིས་བརྒྱན། །སྟག་གི་པགས་པས་སྨད་གཡོགས་དཀྲིས། །མི་རོ་དམར་པོའི་གདན་ལ་བཞུགས། །མི་མགོ་རློན་པའི་དོ་ཤལ་ཅན། །ཁ་ནས་མེ་འབར་ཁྲག་ལ་ལྡག །རང་རང་སྟོབས་རྩལ་ལྡན་པར་མཛོད། །དེར་མདུན་གཡོག་མོ་གསུམ་བསྐྱེད་པ། །བྱ་རོག་གདོང་ཅན་ཙན་ཏི་ཀ། །ནག་མོ་ཞལ་གཅིག་ཕྱག་གཉིས་མ། །རོ་སྟེང་ཞབས་གཡས་བརྐྱངས་པས་མནན། །ཕྱག་གཉིས་དགྲ་མགོ་བཟུང་ནས་སུ། །འཐོག་ཅིང་ཟ་བའི་ལས་བྱེད་བསམ། །ཅེ་སྤྱང་གདོང་ཅན་ཤྭ་ན་མ། །སེར་མོ་ཞལ་གཅིག་ཕྱག་གཉིས་མ། །རོ་སྟེང་ཞབས་གཡས་བརྐྱངས་པས་མནན། །ཕྱག་གཉིས་བརྣག་པའི་དགྲ་བོ་དེ། །བཟུང་ནས་ལྕེའུ་ཆུང་ཁྲག་བཞིབས་གྱུར། །ཁྱི་གདོང་ཨུ་མ་དཱེ་ཝ་ནི། །ཞལ་གཅིག་ཕྱག་གཉིས་དུད་ཁའི་མདོག །ཞབས་གཉིས་གཡས་བརྐྱངས་རོ་མནན་ནས། །ཕྱག་གཉིས་བརྣག་པའི་དགྲ་བོ་དེའི། །མཚན་མ་ནས་བཟུང་འདྲད་པར་བསམ། །དེ་ནས་རུ་ལུའི་སྔགས་ཤམ་དུ། །འབར་མ་གསུམ་གྱི་འབོད་སྔགས་བཟླ། །ༀ་ཛ་ཧ་ན་ཧེ་ཛཾ་ནི་ཤྲཱི་ཧེ་རུ་ཀ་ཛ་དྷཱ་ར་ས་ན་ས་ཀ་རོ་ན་གྷྲྀ་ཧེ་ཨ་གྷ་ཛ་ཨ་གྷ་ཙ་ཨ་ཀ་ཙ་སྭཱ་ཧཱ། །ༀ་དྷ་ཧ་ན་ཧེ་ཛཾ་བི་ཤྲི་ཧེ་རུ་ཀ་ཛ་དྷ་ར་ས་ན་ས་ཀ་ར་ན་གྷྲྀ་ཧེ་ཨ་གྷ་ཛ་ཨ་གྷ་ཙ་ཨ་ཀ་ཙ་སྭཱ་ཧཱ། །ༀ་དཱ་ཧ་ན་ཧི་ཛཾ་བི་ཤྲཱི་ཧེ་རུ་ཀ་ཛ་དྷ་དཱ་ས་ན་ས་ཀ་རེ་ན་གྷྲྀ་ཧེ་ཨ་གྷ་ཛ་ཨ་གྷ་ཙ་ཨ་ཀ་ཙ་སྭཱ་ཧཱ། གཡོག་མོ་གསུམ་གྱི་འབོད་སྔགས་ནི། ༀ་ཀ་མ་ཀའི་ཀཾ་སྭཱ་ཧཱ། ༀ་ཛཾ་མུ་ཀི་ཛཾ་མུ་ཀི་ཛཾ་སྭཱ་ཧཱ། ༀ་ཤྭ་ན་མུ་ཀི་ཤཾ་ཧཱུཾ་ཛ་སྭཱ་ཧཱ། །དེ་ནས་བདག་ཉིད་ཡི་དམ་གྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཨོ་རྒྱན་གྱི་སྤྲིན་ནག་འདུས་པའི་དུར་ཁྲོད་ནས་མཁའ་འགྲོ་འབར་མ་སྤུན་གསུམ། གཡོག་མོ་གསུམ་དང་བཅས་པའི་ཐུགས་རྒྱུད་བསྐུལ་ནས། །འཁོར་དཔག་མེད་དང་བཅས་ཏེ་རང་ཉིད་དཔལ་ཆེན་པོར་གསལ་བའི་མདུན་དུ་ལྷགས་པར་གྱུར། ཞེས་བསམ་ལ། ཧཱུྃ་དད་པ་དང་ནི་དམ་ཚིག་གིས། །མཁའ་འགྲོ་དཔོན་གཡོག་སྤྱན་འདྲེན་གྱིས། །སྤྲིན་གྱི་ལྕུག་མའི་ཚུལ་གྱིས་ནི། །གནས་འདིར་སྤྱན་འདྲེན་གཤེགས་སུ་གསོལ། །ཨོ་རྒྱན་ཡུལ་གྱི་གནས་མཆོག་ནས། །སྤྲིན་ནག་འདུས་པའི་དུར་ཁྲོད་དུ། །འབར་མ་སྤུན་གསུམ་གཡོག་མོ་བཅས། །སྔོན་ཚེ་རྒྱལ་བའི་སྤྱན་སྔ་རུ། །རང་དམ་རང་ལ་བཅས་པ་བཞིན། །སྐད་ཅིག་ཙམ་གྱིས་འདིར་སྤྱོན་ལ། །དགྱེས་པའི་གདན་ལ་བཞུགས་ནས་ཀྱང་། །དངོས་བཤམས་ཡིད་སྤྲུལ་མཆོད་པའི་རྫས། །དགྲ་བོའི་ཤ་ཁྲག་རུས་གསུམ་དུ། །བྱིན་གྱིས་བརླབས་ནས་འབུལ་ལགས་ན། །ལྷག་མེད་བཞེས་ཤིག་ཁ་རཾ་ཁཱ་ཧི། །བསྟན་པ་གཉན་པོ་བསྲུང་དུ་གསོལ། །ཞེས་བརྗོད་ལ། གཏོར་འབུལ་སྔགས་ནི། ༀ་ཛ་ཧ་ན། མུ་ཁ་ཧི། པཱུ་ཙ་བྷ་ལིང་ཏ་གྷྲྀ་ཧ་ན་ཛཾ་སྭཱ་ཧཱ། ༀ་དྷ་ཧ་ན་མུ་ཁ་ཧི་པཱུ་ཙ་བྷ་ལིང་ཏ་གྷྲྀ་ཧ་ན་ཛཾ་སྭཱ་ཧཱ། ༀ་དཱ་ཧ་ན་མུ་ཁ་ཧི་པཱུ་ཙ་བྷ་ལིངྟ་གྷྲྀ་ཧ་ན་ཛཾ་སྭཱ་ཧཱ། དེ་ནས་གཡོག་མོ་གསུམ་ལ་གཏོར་མ་འབུལ་བ་ནི། ༀ་ཨུན་ཏ་བེ་ར་མ་བྷ་ལིན་ཏ་གྷུ་ཧེན་མ་མ་དཀར་རཾ་ས་ཧ་ཡ་སྭཱ་ཧཱ། ཞེས་གཏོར་མ་དགྲ་བོའི་ཤ་ཁྲག་ཏུ་དམིགས་ལ་འབུལ་མཐར་ཕྲིན་ལས་བཅོལ་བ་ནི། ཨ་ཕྱི་ཆེན་མོ་མཐུ་མོ་ཆེ། །ནད་དང་རིམས་ཀྱི་བདག་མོ་སྟེ། །དམ་ཚིག་གསང་བའི་ཚུལ་སྟོན་མ། །དབང་ཕྱུག་ཉི་ཤུ་རྩ་བརྒྱད་གཙོ་མོ་སྟེ། །བདུད་དང་སྲིན་པོ་བྲན་པོ་སྲོག་བདག་འཁོར། །བརྣག་པ་འདི་ལ་རྟགས་ཕྱུངས་ཤིག །ཅེས་ཕྲིན་བཅོལ་དང་བསྟབ་པ་ཚར་ནས། །བསྟོད་པ་ནི། ཧཱུྃ་འགྲོ་དོན་ཕྲིན་ལས་ཆགས་པ་དབང་གི་སྐུ། །སྐུ་མདོག་དམར་མོ་འབར་བ་མེ་ཡི་གདོང་། །རལ་པ་དམར་པོ་བྱི་རུའི་ལན་ཚར་ཅན། །ཕྱག་གཉིས་རྡོ་རྗེ་མདའ་གཞུ་འགེངས་པ་ནི། །ཐབས་དང་ཤེས་རབ་གཉིས་མེད་ཐུགས་རྗེ་ཡིས། །ཉོན་མོངས་དུག་ཚོགས་བསྒྲལ་ནས་དབྱིངས་སུ་སྡུད། །ལྷག་མ་གཉིས་ནི་གྲི་དང་བྷནྡྷ་བསྣམས། །འཁོར་བ་རྩད་གཅོད་སྙིང་ཁྲག་དྲོན་མོ་གསོལ། །དུས་ངན་ཐ་མའི་སེམས་ཅན་འདུལ་དཀའ་བ། །གསོད་པ་ཉི་ཚེས་འདུལ་མཛད་འབར་བའི་གདོང་ཿ སྒྲོལ་བྱེད་དཔའ་མོའི་སྐུ་ལ་ཕྱག་འཚལ་བསྟོད། །སྐུ་གསུང་ཐུགས་ལས་སྤྲུལ་པའི་ཕྲ་མེན་མ། །བྱ་རོག་དབུ་དང་སྤྱང་ཀི་ཁྱི་ཡི་དབུ། །བུད་མེད་ཆགས་པས་འདུལ་བ་དབང་ཆེ་བས། །འཁོར་བའི་རོ་དང་དུག་གསུམ་རོལ་མཛད་མ། །དགྲ་བགེགས་ཚར་གཅོད་མཛད་ལ་ཕྱག་འཚལ་བསྟོད། །ཅེས་དང་ཡི་གེ་བརྒྱ་པས་བཤགས་པ་བྱའོ། རྗེས་ཀྱི་རིམ་པ་ནི་གསོལ་མཆོད་སྤྱི་དང་མཚུངས། །ཞེས་ཀློང་སྡེ་རྡོ་རྗེ་ཟམ་པའི་བཀའ་སྲུང་གཙོ་འཁོར་རྣམས་ཀྱི་གསོལ་མཆོད་གྲུབ་གཉིས་རེ་སྐོང་ཡིད་བཞིན་ནོར་བུ་ཞེས་པ་འདི་ནི་སྒྲུབ་བརྩོན་དམ་པ་དད་དམ་ཐོས་པའི་ནོར་ལྡན་ཨ་བྷྱེ་བཱིདྱ་དྷཱ་ར་ཏིཀྞས་ནན་ཏན་ཆེན་པོའི་ངོར་༧བྱ་བྲལ་རྣལ་འབྱོར་བ་འཇིགས་མེད་ཕྲིན་ལས་འོད་ཟེར་གྱིས་འདི་ཉིད་འབྲི་རྒྱུ་ལ་བློ་ཕྱོགས་ཚེ་འབར་མ་སྤུན་གསུམ་གྱི་གཙོ་མོ་མངོན་རྟོགས་དང་མཚུངས་པ་ཞིག་གི་ཞལ་མངོན་སུམ་དུ་མཇལ་བས་རྟགས་དང་རྟེན་འབྲེལ་མངོན་སུམ་བྱུང་བཞིན་སྤེལ་བའི་ཡི་གེ་པ་ནི་བསོད་ནམས་སྙན་གྲགས་ཀྱིས་བགྱིས་པའི་དགེ་བས་སྙན་བརྒྱུད་རྡོ་རྗེ་ཟམ་པའི་སྒོ་ནས་འབྲེལ་ཐོགས་རྣམས་ཐོག་མའི་གྲོལ་གཞི་མངོན་དུ་འགྱུར་བའི་རྒྱུར་གྱུར་ཅིག་གུ།། བདག་དང་འགྲོ་བ་ནམ་མཁའི་མཐའ་་་་༄༅། །བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ༴ ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། བྱང་ཆུབ་བར༴ སོགས། བདག་དང་མཐའ་ཡས༴ སོགས། སེམས་ཅན་ཐམས་ཅད་བདེ་བ་དང་༴ སོགས། མ་ལུས་སེམས་ཅན༴ སོགས། བདག་དང་འགྲོ་ལ༴ སོགས། ས་གཞི་སྤོས་ཆུས༴ སོགས། སྟོན་པ་བླ་མེད་སངས་རྒྱས༴ སོགས། སངས་རྒྱས་ཡོན་ཏན༴ སོགས། སེམས་ཅན་ཐམས་ཅད་རྟག་པར་བླ་མ་ལ༴ སོགས། ལྟུང་བཤགས་ཚར་རྗེས། ཧཱུཾ་ཨོ་རྒྱན་ཡུལ་གྱི་ནུབ་བྱང་མཚམས། སོགས། གསོལ་འདེབས། ཀུན་བཟང་རྡོར་སེམས༴ སྨན་བླ་བདེར་གཤེགས་མཆེད་བརྒྱད་ཀྱི་གསོལ་འདེབས།༄༅། །སྨན་བླ་བདེར་གཤེགས་མཆེད་བརྒྱད་ཀྱི་གསོལ་འདེབས་བཞུགས་སོ། །ན་མོ་བྷཻ་ཥ་ཛྱེ་མ་ཧཱ་ར་ཛ་ཡེ། །བསོད་ནམས་ཡོན་ཏན་རྒྱ་མཚོའི་གཏེར་མངའ་ཞིང་། །བསམ་གྱིས་མི་ཁྱབ་ཐུགས་རྗེའི་བྱིན་རླབས་ཀྱིས། །འགྲོ་བའི་སྡུག་བསྔལ་གདུང་བ་ཞི་མཛད་པ། །བཅོམ་ལྡན་སྨན་གྱི་བླ་མར་གསོལ་བ་འདེབས། །མགོན་ཁྱོད་སློབ་པ་ལམ་ལ་གནས་པའི་ཚེ། །འགྲོ་བའི་དུག་གསུམ་ལས་གྱུར་ནད་དང་གདོན། །ཡོངས་སུ་ཞི་ནས་བདེ་བར་དབུགས་དབྱུང་ཞེས། །དམ་བཅའ་མཐར་ཕྱིན་མཆོག་ལ༴ ད་ལྟ་མི་མཇེད་ཞིང་འདིའི་ཤར་ཕྱོགས་ཀྱི། །སྟེང་གི་ནམ་མཁར་བདེ་བ་ཅན་ལྟ་བུ། །དཔལ་དང་ཡོན་ཏན་ཕུན་ཚོགས་ཞིང་ཁམས་ན། །བཞུགས་པའི་བདེར་གཤེགས་བརྒྱད་ལ༴ སྙིགས་དུས་ཚེ་ལོ་བརྒྱ་པའི་སྡུག་བསྔལ་སྨག །རྒྱལ་བ་གཞན་གྱིས་བསལ་བར་མ་ནུས་པ། །སེལ་མཛད་བཻ་ཌཱུཪྱ་ཡི་འོད་ཟེར་ཅན། །བཅོམ་ལྡན་སྨན་པའི་རྒྱལ་པོར་གསོལ༴ བསྐལ་བཟང་འདྲེན་པ་སྟོང་དང་རྩ་གཉིས་ཀྱི། །མཁྱེན་བརྩེ་ནུས་པའི་དཔལ་ཡོན་ཡོངས་བསྡོམས་མགོན། །འགྲོ་དྲུག་འཁོར་བའི་སྡུག་བསྔལ་གཞོམ་མཛད་གཉེན། །སྨན་བླ་གཙོ་འཁོར་རྣམས་ལ༴ མཚན་ལེགས་རིན་ཟླ་གསེར་བཟང་མྱ་ངན་མེད། །ཆོས་བསྒྲགས་རྒྱ་མཚོ་ཆོས་བློ་ཤཱཀྱ་ཐུབ། །ཡུམ་ཆེན་ཤེར་ཕྱིན་རིགས་གསུམ་མགོན་པོ་སོགས། །རྒྱལ་བ་སྲས་བཅས་རྣམས༴ སློབ་དཔོན་ཆེན་པོ་བོ་དྷི་ས་ཏྭ་དང་། །ཆོས་རྒྱལ་ཁྲི་སྲོང་ལྡེའུ་བཙན་ནས་བཟུང་སྟེ། །སྨན་བླའི་མདོ་སྡེ་ཉམས་སུ་བླངས་པ་ཡི། །རྩ་བརྒྱུད་བླ་མ་རྣམས་ལ༴ གཞན་ཡང་ཐོག་མཐའ་བར་གསུམ་དགེ་བའི་ཆོས། །སྨན་བླའི་མདོ་འདི་བསྲུང་ཞིང་སྤེལ་བ་དང་། །འཆད་ཉན་བྱེད་ལ་གྲོགས་བགྱིད་དམ་བཅས་པའི། །བཀའ་སྲུང་ཆོས་སྐྱོང་རྣམས་ལ༴ དེ་ལྟར་གསོལ་བ་བཏབ་པའི་མཐུ་ནུས་ཀྱིས། །ཚེ་འདིར་གནོད་པའི་ནད་གདོན་བར་ཆད་རྐྱེན། །དུས་མིན་འཆི་བ་བཅོ་བརྒྱད་ལ་སོགས་པའི། །མི་མཐུན་ཕྱོགས་རྣམས་ཞི་བར་བྱིན་གྱིས་རློབས། །ཁྱད་པར་དུག་ལྔ་དུག་གསུམ་ལས་གྱུར་པའི། །ཕོ་གདོན་མོ་གདོན་ཀླུ་གདོན་བགེགས་ཀྱི་རིགས། །བཞི་བརྒྱ་རྩ་བཞིའི་ནད་གདོན་རྐྱེན་ངན་སོགས། །འགལ་རྐྱེན་མ་ལུས་ཞི་བར༴ བཅོམ་ལྡན་སྨན་བླ་བདེར་གཤེགས་མཆེད་བརྒྱད་སོགས། །རྟེན་དང་བརྟེན་པར་བཅས་པ་མ་ལུས་པ། །བསྒོམ་བསྒྲུབ་མཆོད་ཅིང་བསྟོད་པའི་བྱིན་རླབས་ཀྱིས། །རྒྱལ་བའི་གསང་གསུམ་བྱིན་ནུས་དངོས་གྲུབ་སྩོལ། །གཟུང་བ་བརྟན་པ་སྣོད་ཀྱི་འཇིག་རྟེན་ཁམས། །བཅོམ་ལྡན་སྨན་བླའི་ཞིང་དུ་འགྱུར་བ་དང་། །འཛིན་པ་བདག་དང་ཆོས་སུ་བག་ཆགས་སྐྱོན། །སྨན་བླའི་གསང་བ་གསུམ་དུ་གྲོལ་བར་ཤོག །མདོར་ན་འཁོར་འདས་གཉིས་སུ་འཛིན་པའི་སེམས། །བཅོམ་ལྡན་སྨན་བླའི་ཐུགས་རྗེའི་འོད་ཟེར་གྱིས། །འཁྲུལ་བའི་རྟོག་ཚོགས་སྤྲིན་དེངས་མཁའ་དབྱིངས་སུ། །ཀ་དག་ལྷུན་གྲུབ་འོད་བརྒྱའི་ཞལ་མཐོང་ཤོག །དེར་ཡང་རབ་འབྱམས་འཕྲིན་ལས་འཇུག་པ་ནི། །མཐའ་ཡས་འགྲོ་ལ་མཐའ་ཡས་ཆོས་སྟོན་ཞིང་། །མཐའ་ཡས་ཞིང་ཁམས་རྒྱ་མཚོ་དཔལ་ཡོན་ཀུན། །ཡོངས་ཚང་སྨན་བླའི་གོ་སར་དབུགས་དབྱུང་ཤོག །ཅེས་སྨན་བླའི་གསོལ་འདེབས་བཻ་ཌཱུཪྱའི་ཕྲེང་བ་འདི་ཉིད་སྐལ་བ་བཟང་པོའི་མངོན་རྟོགས་ཀྱིས་སྤུད་པ་བླ་མ་མ་ཏི་བྷ་དྲ་མ་ཎིས་བསྐུལ་ངོར། ༧ རྡོ་བླས་སྨྲས་པ་ཡོངས་སུ་དགེ་བར་གྱུར་ཅིག །དགེའོ།། །། སྨན་བླའི་ཆོ་ག་དུག་གསུམ་ནད་འཇོམས།༄༅། །དམ་ཆོས་བདེ་ཆེན་ལམ་མཆོག་ལསཿ སྨན་བླའི་ཆོ་ག་དུག་གསུམ་ནད་འཇོམས་བཞུགསཿ ན་མོ་གུ་རུ་མ་ཧཱ་བྷཻ་ཥ་ཛྱེ་བྷེཿ གང་གི་མཚན་ཙམ་ཐོས་པ་ཙམ་གྱིས་ཀྱང་ཿ ངན་སོང་གསུམ་དང་ནད་གདོན་དུས་མིན་འཆིཿ མི་མཐུན་ཕྱོགས་ཀྱི་མུན་སེལ་སྨན་གྱི་བླཿ བཻ་ཌཱུཪྱ་ཡི་འོད་ལ་ཕྱག་འཚལ་ལོཿ མཁྱེན་པའི་ཡེ་ཤེས་མཁའ་ལྟར་རྒྱ་ཆེ་ཞིང་ཿ བྱམས་བརྩེའི་རང་བཞིན་འོད་ཟེར་སྟོང་ལྡན་དལཿ མཐུ་སྟོབས་ནུས་པས་སྲིད་གསུམ་སྡུག་བསྔལ་སྨགཿ སེལ་མཛད་བླ་མ་ནམ་མཁའི་ནོར་བུས་སྐྱོངསཿ མདོ་ལས་གསུངས་པའི་སྨན་བླའི་གདམས་པའི་སྐོརཿ དཔལ་ལྡན་ཨ་ཏི་ཤ་ཡིས་ལེགས་བཀྲལ་བཞིནཿ རྒྱལ་དབང་ལྔ་པས་འདོན་འགྲིགས་མཛད་པའི་གཞུང་ཿ འདི་འདྲ་ཡིད་བཞིན་ནོར་བུ་ལས་ཀྱང་འཕགསཿ གཞན་ཡང་རྙིང་མའི་གཏེར་གཞུང་མང་དག་ནཿ སྨན་བླའི་ཆོ་ག་དབང་བཅས་དུ་མ་ཞིགཿ མཆིས་མོད་དེ་ལས་ལྷག་པ་མི་དགོས་ཀྱང་ཿ རྟེན་འབྲེལ་མཐུན་སྣང་ཡང་ཡང་བྱུང་བ་བཞིནཿ སྨན་བླའི་ཆོ་ག་དུག་གསུམ་ནད་འཇོམས་ཀྱིཿ བདུད་རྩིའི་ཆུ་རྒྱུན་སྨན་མཆོག་རྒྱ་མཚོའི་བཅུདཿ འགྲོ་ཁམས་བདེ་ལ་སྦྱོར་མཛད་ལམ་གྱི་མཆོགཿ བཻ་ཌཱུཪྱ་ཡི་འོད་ཟེར་འདི་རུ་ངོམཿ དེ་ལ་ཡང་བཅོམ་ལྡན་འདས་སྨན་བླའི་ཆོ་ག་བསྒྲུབ་པར་འདོད་པ་དག་གིས་གནས་ཁང་སོགས་བྱི་དོར་ལེགས་པར་བྱས་ནས་ཕྱི་རྒྱུད་གསུམ་ལ་སོགས་པའི་དཀྱིལ་འཁོར་མཛེས་ཤིང་ཡིད་དུ་འོང་བ་བཤམས་པའི་སྟེང་དུ་མཎྜལ་གྱི་ཁར་བདེ་གཤེགས་མཆེད་བརྒྱད་མཚོན་ཕྱིར་འབྲུ་ཚོམ་བརྒྱད་དང་ཿ དེའི་གཡས་གཡོན་མདུན་གསུམ་དུ་འབྲུ་ཚོམ་གསུམཿ དེ་རྒྱབ་ཕྱོགས་བཞི་ཚོམ་བུ་བཞིར་དང་བཅས་པ་དཀར་གསུམ་གྱིས་སྦྲུས་ཏེ་བཀོད་པའི་གོང་དུ་སྨན་བླའི་སྐུ་གསུང་ཐུགས་རྟེན་ཡོད་ན་བཀྲམས་པའི་མདུན་དུ་བདེ་གཤེགས་མཆེད་བརྒྱད་ཀྱི་མཆོད་གཏོར་བརྒྱད་དང་ཿ སེམས་དཔའ་གསུམ་ལའང་དེ་བཞིན་དང་ཿ གཡོན་དུ་གནོད་སྦྱིན་སྡེ་དཔོན་བཅུ་གཉིས་ཀྱི་གཏོར་མ་དཀར་ཟླུམ་རིལ་བུ་བཅུ་གཉིས་དང་བཅསཿ གཡས་སུ་རྒྱལ་ཆེན་བཞི་ལ་དཀར་ཟླུམ་པད་འདབ་བཞི་ལྡནཿ གཙོ་འཁོར་གྱི་གཏོར་མ་ཀུན་ལ་དཀར་རྒྱན་དཀར་གསུམ་མངར་གསུམ་སོགས་ཀྱིས་གཏམས་པཿ བདེ་གཤེགས་མཆེད་བརྒྱད་ཀྱི་གཏོར་མ་ལ་སྐུ་གཟུགས་ཀྱང་ཡོད་ན་བཙུགས་པའི་མདུན་ནམ་སྐོར་བཤམས་ཀྱིས་ཀྱང་རུང་སྟེཿ ཞལ་ཟས་དང་མར་མེ་སྤོས་དང་ཡོན་ཆབ་སོགས་མང་ཉུང་རྒྱས་བསྡུས་དལ་བྲེལ་དང་འབྱོར་བར་བཤམས་པ་ནི་སྔོན་འགྲོ་སྟ་གོན་གྱི་རིམ་པའོཿ གཉིས་པ་ལ་ཡང་སྦྱོར་དངོས་རྗེས་གསུམ་ལས་དང་པོ་སྐྱབས་སུ་འགྲོ་བ་ནིཿ ན་མོཿ ཕྱོགས་བཅུ་དུས་གསུམ་རྒྱལ་བ་རྒྱ་མཚོ་ཡིཿ སྐུ་གསུང་ཐུགས་ཡོན་ཕྲིན་ལས་བདག་ཉིད་ཆེཿ སྨན་བླ་མཆེད་བརྒྱད་དཀྱིལ་འཁོར་ལྷ་ཚོགས་ལཿ བྱང་ཆུབ་སྙིང་པོའི་བར་དུ་སྐྱབས་སུ་མཆིཿ ལན་གསུམ། །གཉིས་པ་སེམས་བསྐྱེད་ནིཿ ཧོཿ མཁའ་མཉམ་ཞིང་གི་མཐའ་ཡས་འགྲོ་བའི་ཁམསཿ བཅོམ་ལྡན་སྨན་བླའི་གོ་འཕང་ལ་འགོད་ཕྱིརཿ སྨོན་དང་འཇུག་པའི་བྱང་ཆུབ་སེམས་བསྐྱེད་ནསཿ ཕྱམ་གཅིག་སངས་རྒྱས་ས་ལ་འགོད་པར་བགྱིའོཿ ལན་གསུམ། །གསུམ་པ་ཡན་ལག་བདུན་པ་ནིཿ ཧོཿ བཅོམ་ལྡན་སྨན་བླའི་དཀྱིལ་འཁོར་ལྷ་ཚོགས་ལཿ སྒོ་གསུམ་གུས་པ་ཆེན་པོས་ཕྱག་འཚལ་ཞིང་ཿ དངོས་བཤམས་ཡིད་སྤྲུལ་མཆོད་ཚོགས་དཔག་མེད་འབུལཿ དུས་གསུམ་བསགས་པའི་ཉེས་ཚོགས་མཐོལ་ལོ་བཤགསཿ འཁོར་འདས་དགེ་ཚོགས་རྒྱ་མཚོར་རྗེས་ཡི་རང་ཿ ཆོས་འཁོར་རྒྱུན་མི་འཆད་པར་འགྲོ་ལ་སྐོརཿ རྒྱལ་རྣམས་མྱ་ངན་མི་འདའ་རྟག་བཞུགས་གསོལཿ དགེ་ཚོགས་འགྲོ་རྣམས་སངས་རྒྱས་ཐོབ་ཕྱིར་བསྔོཿ ཀུན་ཀྱང་སྨན་བླའི་གོ་འཕང་མྱུར་ཐོབ་ཤོགཿ ལན་གསུམ། བཞི་པ་ཕྱི་རྒྱུད་ཀྱི་སྲུང་མ་རྣམས་ལ་དཀར་གཏོར་བསྔོ་བ་ནི་དཀར་གཏོར་རྒྱན་ལྡན་ཆབ་ཀྱིས་སྦྱངས་ལཿ ༀ་ཨཱཿཧཱུཾ། དཀར་གསུམ་མངར་གསུམ་གྱི་གཏོར་མ་བསྔོ་ཡུལ་མཉེས་བྱེད་ཀྱི་དཔལ་ཡོན་དང་ལྡན་པར་གྱུརཿ བར་བསམས་ལཿ ༀ་ཨ་ཀཱ་རོ༴ ལན་གསུམ་གྱིས་བསྔོས་མཐརཿ མཆོད་སྦྱིན་གཏོར་མ་འདི་བཞེས་ལཿ རྣལ་འབྱོར་བདག་ཅག་འཁོར་བཅས་ལཿ ནད་མེད་ཚེ་དང་དབང་ཕྱུག་དང་ཿ དཔལ་དང་གྲགས་དང་སྐལ་བ་བཟང་ཿ ལོངས་སྤྱོད་རྒྱ་ཆེན་ཀུན་ཐོབ་ཅིང་ཿ ཞི་དང་རྒྱས་ལ་སོགས་པ་ཡིཿ ལས་ཀྱི་དངོས་གྲུབ་བདག་ལ་སྩོལཿ དམ་ཚིག་ཅན་གྱིས་བདག་ལ་སྲུངསཿ དངོས་གྲུབ་ཀུན་གྱི་སྡོངས་གྲོགས་མཛོདཿ དུས་མིན་འཆི་དང་ནད་རྣམས་དང་ཿ གདོན་དང་བགེགས་རྣམས་མེད་པར་མཛོདཿ རྨི་ལམ་ངན་དང་མཚན་མ་ངན། །བྱ་བྱེད་ངན་རྣམས་མེད་པར་མཛོདཿ འཇིག་རྟེན་བདེ་ཞིང་ལོ་ལེགས་དང་ཿ འབྲུ་རྣམས་འཕེལ་ཞིང་ཆོས་འཕེལ་དང་ཿ བདེ་ལེགས་ཐམས་ཅད་འབྱུང་བ་དང་ཿ ཡིད་ལ་འདོད་པ་ཀུན་འགྲུབ་ཤོགཿ ཅེས་བརྗོད་ནས་གཏོར་མ་ཕུལ། །བགེགས་རིགས་ལན་ཆགས་མགྲོན་ལ་གཏོར་མ་བསྔོ་བ་ནི། །བགེགས་གཏོར་བཤམས་ལ་ཆབ་ཀྱིས་སྦྱངས་ལ། ༀ་ཨཱཿཧཱུཾ། །བགེགས་ཀྱི་གཏོར་མ་འདོད་པའི་ཡོན་ཏན་ལྔ་དང་ལྡན་པར་གྱུརཿ ཞེས་བསམས་ལ། ན་མཿསརྦ་ཏ་ཐཱ་ག་ཏ་བྷྱོ༴ སོགས་ལན་གསུམ་བརྗོད་མཐརཿ འདོད་ཡོན་ལྔ་ལྡན་གླུད་གཏོར་བཟང་པོ་འདིཿ འབྱུང་བ་ས་ཆུ་མེ་རླུང་བྲག་དང་ཤིང་ཿ ནམ་མཁའ་ལ་བརྟེན་ལྷ་སྲིན་འབྱུང་པོའི་ཚོགསཿ སྣང་ཞིང་སྲིད་པའི་ལྷ་འདྲེའི་ཚོགས་ལ་བསྔོཿ ཤ་ཁྲག་དྲོད་དབུགས་རྩ་རྒྱུས་པགས་པ་དང་ཿ ལུས་ངག་ཡིད་གསུམ་གླུད་དུ་འདི་ཁྱེར་ལཿ རང་རང་སོ་སོའི་གནས་སུ་འགྲོ་བར་གྱིསཿ བཀའ་ལས་འདའ་ན་རྡུལ་དུ་རླག་པར་བྱེདཿ སརྦ་བྷུ་ཏ་གཙྪཿ ༀ་སུཾ་བྷ༴ སྔགས་ཀྱིས་བསྐྲདཿ ལྔ་པ་སྲུང་བའི་འཁོར་ལོ་བསྒོམ་པ་ནིཿ ཧཱུཾ་སྟེང་འོག་ཕྱོགས་མཚམས་རྡོ་རྗེའི་ར་བ་དང་ཿ དྲྭ་བ་གུར་དང་བླ་བྲེ་མེ་དཔུང་སོགསཿ གནོད་བྱེད་བགེགས་ཀྱིས་གླགས་རྙེད་མི་འགྱུར་བའིཿ སྲུང་བའི་འཁོར་ལོ་གཞོམ་གཞིག་བྲལ་བར་གྱུརཿ ༀ་བཛྲ་རཀྵ་རཀྵ་ཧཱུཾཿ དྲུག་པ་བྱིན་འབེབས་ནིཿ ཧཱུཾ་སྐུ་གསུམ་ངོ་བོ་བཅོམ་ལྡན་སྨན་གྱི་བླཿ གཙོ་འཁོར་ཡོངས་སུ་རྫོགས་པའི་གསང་གསུམ་གྱིཿ མཁྱེན་བརྩེ་ནུས་པའི་ཐུགས་རྗེས་བྱིན་བརླབས་ཆརཿ རྟེན་དང་བརྟེན་པའི་དཀྱིལ་འཁོར་འདིར་དབབ་མཛོདཿ གུ་རུ་བཻ་ཌཱུཪྱ་བཛྲ་ས་མ་ཡ་ཨ་ཝེ་ཤ་ཡ་ཧྲཱིཾ་ཧྲཱིཾ་ཕཻཾ་ཕཻཾ་ཨཱ་ཨཿ བདུན་པ་མཆོད་རྫས་བྱིན་བརླབ་ནི། ༀ་ཨཱཿཧཱུྃ། རིན་པོ་ཆེ་ཡི་སྣོད་མཆོག་རྒྱ་ཆེན་པོརཿ མཆོད་ཡོན་ཞབས་བསིལ་མེ་ཏོག་བདུག་སྤོས་དང་ཿ སྣང་གསལ་དྲི་ཆབ་ཞལ་ཟས་རོལ་མོ་སོགསཿ རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱདཿ གཟུགས་མཛེས་སྒྲ་སྙན་དྲི་ཞིམ་རོ་མངར་ཞིང་ཿ རེག་འཇམ་དངོས་འབྱོར་ཡིད་སྤྲུལ་མཆོད་པའི་ཚོགསཿ དཔག་མེད་རབ་འབྱམས་ཞིང་ཁམས་ཡོངས་ཁྱབ་གྱུརཿ ༀ་ཨཱཿཧཱུཾ་བཛྲ་ཨརྒྷཾ༴ནས་ཤཔྟའི་བར་དང་། སརྦ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུཾཿ ཞེས་མཆོད་རྫས་རྣམས་བྱིན་གྱིས་བརླབས་སོ། གཉིས་པ་དངོས་གཞིའི་རྟེན་དང་བརྟེན་པའི་ལྷ་ཚོགས་བསྐྱེད་པ་ནི། །རང་སྣང་རྣམ་དག་བདེ་བ་ཅན་གྱི་ཞིང་ཿ ཐ་མལ་ལས་འདས་བལྟ་ན་སྡུག་པའི་གནསཿ བཻ་ཌཱུཪྱ་སྣང་བཀོད་པའི་གཞལ་ཡས་མཆོགཿ རྩིག་པ་འདོད་སྣམ་ཕ་གུ་དྲ་བ་དང་ཿ དྲྭ་ཕྱེད་མདའ་ཡབ་པུ་ཤུད་ལ་སོགས་པཿ གཞལ་ཡས་ཁང་གི་བཀོད་པ་ཡོངས་རྫོགས་པའིཿ སྒོ་བཞི་སྒོ་རྒྱན་ཕུན་ཚོགས་གཞལ་ཡས་ཀྱིཿ དབུས་དང་ཕྱོགས་བཞི་མཚམས་བརྒྱད་རིན་པོ་ཆེའིཿ ཁྲི་སྟེང་སྣ་ཚོགས་པདྨ་ཉི་ཟླའི་གདནཿ དབུས་ཀྱི་ཁྲི་ནི་རབ་ཏུ་མཐོ་ཞིང་འཕགསཿ དེ་སྟེང་ཧཱུཾ་ཡིག་བཻ་ཌཱུར་མདོག་ཅན་བསམཿ ཕྱོགས་མཚམས་བརྒྱད་དུ་ཧཱུཾ་ཡིག་གསལ་བ་ཡིཿ ས་བོན་བརྒྱད་ལས་འོད་ཟེར་ཡར་འཕྲོས་པསཿ བདེ་གཤེགས་བརྒྱད་སོགས་རྒྱལ་བའི་བྱིན་ནུས་བསྡུསཿ འོད་ཟེར་མར་འཕྲོས་འགྲོ་བའི་ལས་ཉོན་དང་ཿ སྒྲིབ་གཉིས་བག་ཆགས་ནད་སོགས་ཀུན་སྦྱངས་ནསཿ ཚུར་འདུས་ཧཱུཾ་ཡིག་སོ་སོར་ཐིམ་པ་ཡིསཿ དབུས་སུ་བཅོམ་ལྡན་བདེ་གཤེགས་སྨན་གྱི་བླཿ སྐུ་མདོག་བཻ་ཌཱུཪྱ་ལྟར་གསལ་ཞིང་དྭངསཿ ཞལ་གཅིག་ཕྱག་གཉིས་ཕྱག་གཡས་མཆོག་སྦྱིན་རྒྱསཿ ཨ་རུ་ར་དང་གཡོན་ཕྱག་མཉམ་བཞག་གིསཿ ལྷུང་བཟེད་བཏེགས་པར་སྨན་བཅུད་བདུད་རྩིས་གཏམསཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ དབུ་ལ་གཙུག་ཏོར་ཞབས་ལ་འཁོར་ལོ་དང་ཿ མཚན་བཟང་སོ་གཉིས་དཔེ་བྱད་བརྒྱད་ཅུ་སོགསཿ ཚངས་པར་སྤྱོད་པ་སྤྲུལ་སྐུའི་ཆ་ལུགས་རྫོགསཿ ཤར་གྱི་ཁྲི་སྟེང་ཧཱུཾ་ལས་བཅོམ་ལྡན་འདསཿ མཚན་ལེགས་ཡོངས་བསྒྲགས་རྒྱལ་པོ་གསེར་གྱི་མདོགཿ ཞལ་གཅིག་ཕྱག་གཉིས་གཡས་པས་སྐྱབས་སྦྱིན་དང་ཿ གཡོན་པས་ལྷུང་བཟེད་བདུད་རྩིས་བཀང་བ་བསྣམསཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ ལྷོ་ཡི་ཁྲི་སྟེང་ཧཱུཾ་ལས་བཅོམ་ལྡན་འདསཿ རིན་ཆེན་ཟླ་བ་སྒྲ་དབྱངས་རྒྱལ་པོ་ནིཿ གསེར་གྱི་མདོག་ཅན་ཕྱག་གཡས་མཆོག་སྦྱིན་དང་ཿ གཡོན་པས་ལྷུང་བཟེད་བདུད་རྩིས་བཀང་བ་བསྣམསཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ ནུབ་ཀྱི་ཁྲི་སྟེང་ཧཱུཾ་ལས་བཅོམ་ལྡན་འདསཿ གསེར་བཟང་དྲི་མེད་བཙོ་མ་གསེར་གྱི་མདོགཿ ཞལ་གཅིག་ཕྱག་གཉིས་ཆོས་སྟོན་ཕྱག་རྒྱ་ཅནཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ བྱང་གི་ཁྲི་སྟེང་ཧཱུཾ་ལས་བཅོམ་ལྡན་འདསཿ མྱ་ངན་མེད་མཆོག་སྐུ་མདོག་དཀར་དམར་མདངསཿ ཞལ་གཅིག་ཕྱག་གཉིས་མཉམ་བཞག་ཕྱག་རྒྱ་ཅནཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ ཤར་ལྷོའི་ཁྲི་སྟེང་ཧཱུཾ་ལས་བཅོམ་ལྡན་འདསཿ ཆོས་བསྒྲགས་རྒྱ་མཚོ་དཀར་ལ་དམར་མདངས་ཅནཿ ཞལ་གཅིག་ཕྱག་གཉིས་ཆོས་སྟོན་ཕྱག་རྒྱ་མཛེསཿ ཞབས་གཅིག་རྡོ་རྗེའི་སྐྱིལ་མོ་ཀྲུང་གིས་བཞུགསཿ ལྷོ་ནུབ་ཁྲི་སྟེང་ཧཱུཾ་ལས་བཅོམ་ལྡན་འདསཿ མངོན་མཁྱེན་རྒྱལ་པོ་སྐུ་མདོག་བྱུ་རུའི་མདོགཿ ཞལ་གཅིག་ཕྱག་གཉིས་གཡས་པས་མཆོག་སྦྱིན་དང་ཿ གཡོན་པས་ལྷུང་བཟེད་སྨན་བཅུད་ཀྱིས་བཀང་བསྣམསཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ ནུབ་བྱང་ཁྲི་སྟེང་ཧཱུཾ་ལས་བཅོམ་ལྡན་འདསཿ ཤཱཀ་ཐུབ་གསེར་མདོག་ཞལ་གཅིག་ཕྱག་གཉིས་པཿ ཕྱག་གཡས་ས་གནོན་གཡོན་པས་མཉམ་བཞག་རྒྱསཿ ལྷུང་བཟེད་བདུད་རྩི་སྨན་གྱིས་བཀང་བ་བསྣམསཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ བྱང་ཤར་ཁྲི་སྟེང་ཧཱུཾ་ཡིག་ཡོངས་གྱུར་ལསཿ ཡུམ་ཆེན་ཤེར་ཕྱིན་གསེར་མདོག་ཞལ་གཅིག་དང་ཿ ཕྱག་གཉིས་གཡས་པས་རྡོ་རྗེ་གཡོན་པུ་སྟིཿ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགསཿ ཡུམ་ཆེན་མ་གཏོགས་བདེ་གཤེགས་མཆེད་བརྒྱད་པོཿ སྤྲུལ་སྐུའི་ཆ་ལུགས་གཙོ་དང་མཐུན་པའོཿ གཡས་གཡོན་མདུན་གསུམ་པད་དཀར་ཟླ་གདན་རེའིཿ སྟེང་དུ་འཕགས་མཆོག་རིགས་གསུམ་མགོན་པོ་ནིཿ གཡས་སུ་འཇམ་དབྱངས་དམར་སེར་རལ་གྲི་དང་ཿ པུསྟི་འཛིན་ཅིང་ཞི་འཛུམ་མཛེས་ཚུལ་ཅནཿ མདུན་དུ་སྤྱན་རས་གཟིགས་དབང་སྐྱབས་གྲོལ་ནིཿ དུང་མདོག་ཞལ་གཅིག་ཕྱག་གཉིས་གཡས་པད་དཀརཿ གཡོན་པས་སྐྱབས་སྦྱིན་ཕྱག་རྒྱས་མི་འཇིགས་སྦྱིནཿ གཡོན་དུ་ཕྱག་ན་རྡོ་རྗེ་མཐུ་ཆེན་ཐོབཿ མཐིང་མདོག་ཕྱག་གཡས་རྡོ་རྗེ་གཡོན་སྡིགས་མཛུབཿ གསུམ་ག་བཞེངས་སྟབས་སངས་རྒྱས་འཕགས་པ་ཡིཿ རྣམ་འགྱུར་ཆ་ལུགས་འགྲོ་དོན་གཡེལ་མེད་ཚུལཿ གཞན་ཡང་ཉི་ལྟར་རྣམ་པར་སྣང་བྱེད་དང་ཿ ཟླ་ལྟར་གསལ་བྱེད་ལ་སོགས་སེམས་དཔའི་འཁོརཿ དཔག་མེད་ཁྲོམ་ཚོགས་ཇི་བཞིན་གསལ་བར་གྱུརཿ ཕྱི་རོལ་འཁོར་ཡུག་དག་ལ་མགྲོན་ཐབས་ལྷཿ ཚངས་པ་བརྒྱ་བྱིན་རྒྱལ་ཆེན་སྡེ་བཞི་སོགསཿ དཔལ་མགོན་བདུན་ཅུ་རྩ་ལྔ་འཁོར་བཅས་དང་ཿ གནོད་སྦྱིན་སྡེ་དཔོན་བཅུ་གཉིས་སོ་སོ་ཡིཿ འཁོར་གཡོག་བདུན་འབུམ་བདུན་འབུམ་དང་བཅས་གསལཿ དེ་ལྟར་གསལ་བའི་གཙོ་འཁོར་ཐམས་ཅད་ཀྱིཿ གསང་གསུམ་དཔལ་དང་ཡོན་ཏན་ཕྲིན་ལས་རྣམསཿ གཙོ་བོ་གཅིག་པོའི་ཆོ་འཕྲུལ་གཟའ་སྐར་གཟུགསཿ རྒྱ་མཚོར་ཤར་བཞིན་ཆགས་ཐོགས་བྲལ་བར་གྱུརཿ རྒྱལ་བ་སྲས་བཅས་རྣམས་ཀྱི་གནས་གསུམ་སོགསཿ ༀ་དཀར་ཨཱཿདམར་ཧཱུཾ་མཐིང་གིས་མཚན་ཞིང་ཿ འཇིག་རྟེན་པ་རྣམས་ཐུགས་ཀར་རང་རང་གིཿ མིང་ཡིག་དང་པོ་ཐིག་ལེས་བརྒྱན་པ་ལསཿ འོད་འཕྲོས་སྐུ་གསུམ་རྒྱལ་བའི་ཞིང་ཁམས་ནསཿ བདེ་གཤེགས་སྨན་བླའི་དཀྱིལ་འཁོར་ལྷ་ཚོགས་རྣམསཿ སྔོན་གྱི་ཐུགས་དམ་དམ་ཚིག་དབང་གིས་ནིཿ ཉི་ཟེར་ཆར་གྱིས་བྲན་པའི་ཚོན་རིས་བཞིནཿ སྐད་ཅིག་ཙམ་གྱིས་མདུན་མཁར་ལྷགས་པར་གྱུརཿ ཞེས་བསམ་ལཿ གཉིས་པ་སྤྱན་འདྲེན་པ་ནིཿ དད་མོས་ཀྱིས་ཤུགས་བསྐྱེད་ལ་སྤོས་རོལ་དང་བཅསཿ ན་མོཿ བདེ་གཤེགས་སྙིང་པོས་འགྲོ་བ་ཡོངས་ལ་ཁྱབཿ སེམས་ནི་རྒྱ་ཆེན་མཆོག་ཏུ་རབ་བསྐྱེད་ཅིང་ཿ འགྲོ་བ་འདི་དག་མ་ལུས་སངས་རྒྱས་རྒྱུཿ འདི་ན་སྣོད་མིན་སེམས་ཅན་གང་ཡང་མེདཿ བཞེངས་ཤིག་བཞེངས་ཤིག་སྨན་བླ་མཆེད་བརྒྱད་ཚོགསཿ དུས་ལས་མི་འདའ་ཐུགས་རྗེའི་དབང་གིས་ནཿ སེམས་ཅན་དོན་ལ་དགོངས་པའི་དཀོན་མཆོག་གསུམཿ ཡིད་ཀྱིས་སྤྲུལ་ཞིང་བཤམས་པའི་གནས་འདི་རུཿ རྒྱལ་བ་སྲས་བཅས་མ་ལུས་གཤེགས་སུ་གསོལཿ ༀ་ཨཱཿ གུ་རུ་བྷཻ་ཥ་ཛྱེ་ས་པཱ་རི་ཝ་ར་ཨེ་ཧྱ་ཧི་བཛྲ་ས་མ་ཡ་ཛཿ ཛཿཧཱུཾ་བཾ་ཧོཿ ཞེས། བརྗོད་པས་དམ་ཚིག་པ་ལ་ཡེ་ཤེས་ཀྱི་ལྷ་ཚོགས་རྣམས་རྒྱ་མཚོར་ཁ་ཆར་བབས་པ་བཞིན་དབྱེར་མེད་རོ་གཅིག་ཏུ་འདྲེས་པར་བསམ་མོཿ གསུམ་པ་བཞུགས་སུ་གསོལ་བ་ནིཿ ཧོཿ བཅོམ་ལྡན་འདིར་ནི་བྱོན་པ་ལེགསཿ བདག་ཅག་བསོད་ནམས་སྐལ་བར་ལྡནཿ བདག་གི་མཆོད་ཡོན་བཞེས་སླད་དུཿ འདི་ཉིད་དུ་ནི་བཞུགས་སུ་གསོལཿ བདག་དང་འགྲོ་ལ་ཐུགས་བརྩེའི་ཕྱིརཿ ཉིད་ཀྱི་རྫུ་འཕྲུལ་མཐུ་ཡིས་ནིཿ ཇི་སྲིད་མཆོད་པ་བདག་བགྱིད་ནཿ དེ་སྲིད་བཅོམ་ལྡན་བཞུགས་སུ་གསོལཿ ༀ་ཨཱཿགུ་རུ་བྷཻ་ཥ་ཛྱེ་ས་པ་རི་ཝ་ར་ས་མ་ཡ་ཏིཥྛནྟུཿ བཞི་པ་ཕྱག་འཚལ་བ་ནིཿ ཧོཿ བཅོམ་ལྡན་སྨན་བླའི་གཙོ་འཁོར་བཅས་རྣམས་ལཿ བསྐལ་པ་ཞིང་གི་རྡུལ་སྙེད་གྲངས་མཉམ་པའིཿ ལུས་ངག་ཡིད་གསུམ་གུས་ཤིང་མོས་བཞིན་དུཿ མཆོག་ཏུ་དད་པའི་སེམས་ཀྱིས་ཕྱག་བགྱིའོཿ ན་མོ་བྷཻ་ཥ་ཛྱེ་ས་པཱ་རི་ཝ་ར་ཨ་ཏི་པཱུ་ཧོཿ པྲ་ཏིཙྪ་ཧོཿ ལྔ་པ་མཆོད་པ་འབུལ་བ་ནིཿ ཧོཿ དངོས་སུ་བཤམས་དང་ཡིད་ཀྱིས་སྤྲུལ་པ་ཡིཿ ལྷ་དང་མི་ཡི་མཆོད་རྫས་དཔག་མེད་ཚོགསཿ རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱདཿ རབ་འབྱམས་ཞིང་གི་འདོད་ཡོན་ལོངས་སྤྱོད་ཀུནཿ བཅོམ་ལྡན་སྨན་བླའི་འཁོར་དང་བཅས་རྣམས་ལཿ སྒོ་གསུམ་གུས་པས་ལེགས་པར་འབུལ་ལགས་ནཿ བརྩེ་ཆེན་ཐུགས་རྗེས་ཉེ་བར་བཞེས་ནས་ཀྱང་ཿ བདག་སོགས་འགྲོ་བའི་ཚོགས་ཆེན་གཉིས་རྫོགས་ཤོགཿ ༀ་ཨཱཿགུ་རུ་བྷཻ་ཥ་ཛྱེ་ས་པཱ་རི་ཝ་ར་བཛྲ་ཨརྒྷཾ༴ ནས། ཤབྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾཿ ཧོཿ ལྷ་དང་མི་ཡི་ལོངས་སྤྱོད་མཆོད་པའི་རྫསཿ གཟུགས་མཛེས་སྒྲ་སྙན་དྲི་ཞིམ་རོ་མངར་དང་ཿ རེག་འཇམ་ཡིད་ལ་དགའ་བདེ་སྐྱེད་པའི་ཆོསཿ ངོ་མཚར་ཕུལ་བྱུང་ནང་གི་མཆོད་ཚོགས་ཀུནཿ བཅོམ་ལྡན་སྨན་བླའི་དཀྱིལ་འཁོར་ལྷ་ཚོགས་ལཿ ཕུལ་བས་བདེ་ཆེན་འགྱུར་མེད་དཔལ་ཐོབ་ཤོགཿ ༀ་ཨཱཿམ་ཧཱ་གུ་རུ་བྷཻ་ཥ་ཛྱེ་ས་པཱ་རི་ཝཱ་ར། རཱུ་པ་ཤབྟ་གྷནྡྷེ་ར་ས་སྤཪྴེ་པྲ་ཏིཙྪ་ཨཱཿཧཱུཾཿ དྲུག་པ་བསྟོད་པ་ནིཿ ཧཱུཾ་སྐུ་མདོག་བཻ་ཌཱུཪྱ་ཡི་རི་བོ་འདྲཿ འགྲོ་བ་སེམས་ཅན་ནད་ཀྱི་སྡུག་བསྔལ་སེལཿ སངས་རྒྱས་བྱང་སེམས་དཔག་མེད་འཁོར་གྱིས་བསྐོརཿ བཅོམ་ལྡན་སྨན་གྱི་བླ་ལ་ཕྱག་འཚལ་བསྟོདཿ མཚན་ལེགས་རིན་ཟླ་གསེར་བཟང་མྱ་ངན་མེདཿ ཆོས་བསྒྲགས་རྒྱ་མཚོ་མངོན་མཁྱེན་ཤཱཀྱ་ཐུབཿ ཡུམ་ཆེན་ཤེར་ཕྱིན་རིགས་གསུམ་མགོན་པོ་སོགསཿ བྱང་ཆུབ་སེམས་དཔའ་འཁོར་དང་བཅས་ལ་བསྟོདཿ ཚངས་དང་དབང་པོ་འཇིག་རྟེན་སྐྱོང་བའི་ལྷཿ གནོད་སྦྱིན་སྡེ་དཔོན་བཅུ་གཉིས་གཡོག་དང་བཅསཿ ལྷ་མིའི་སྨན་གྱི་རིག་འཛིན་དྲང་སྲོང་ཚོགསཿ བདེན་པ་གྲུབ་པ་རྣམས་ལ་ཕྱག་འཚལ་བསྟོདཿ བསྟོད་པར་འོས་པ་ཐམས་ཅད་ལ༴ བསྟོད་པར་བགྱིཿ བདུན་པ་བཤགས་པ་ནིཿ ཧོཿ ཐོག་མེད་དུས་ནས་ད་ལྟར་ཐུག་གི་བརཿ སྒོ་གསུམ་མི་དགེའི་ཉེས་ཚོགས་ཅི་བགྱིས་དང་ཿ ཁྱད་པར་སྨན་བླའི་བསྐྱེད་རྫོགས་བཟླས་བསྒོམ་ལཿ འགལ་འཁྲུལ་ནོངས་པ་ཅི་བགྱིས་མཐོལ་ལོ་བཤགསཿ ༀ་བཛྲ་ས་ཏྭ་ས་མ་ཡཿ སོགས་ཡི་གེ་བརྒྱ་པ་བརྗོདཿ བརྒྱད་པ་བཟླས་པ་བྱ་བ་ནིཿ བཅོམ་ལྡན་འདས་བདེ་བར་གཤེགས་པ་མཆེད་བརྒྱད་ཀྱི་ཐུགས་ཀའི་ཧཱུཾ་ལ་སྔགས་ཀྱིས་གཡས་སུ་བསྐོར་བར་བསམས་ལཿ དམིགས་པ་ཡེངས་མེད་ཀྱི་ངང་ནསཿ ཏདྱ་ཐཱཿ གྷུ་མེ་གྷུ་མེཿ ཨི་མི་ནི་མི་ཧིཿ མ་ཏི་མ་ཏིཿ སབྟ་ཏ་ཐཱ་ག་ཏཿ ས་མཱ་དྷྱ་དྷིཥྛི་ཏིཿ ཨ་ཏི་མ་ཏིཿ པཱ་ལེ་པ་པཾཿ ཤོ་དྷ་ནིཿ སརྦ་པཱ་པཾཿ ན་ཤ་ཡ་མ་མ་ཤུད་དྷེཿ བུདྡྷེ་ཏ་མེཿ ཨུ་མེ་གུ་མེཿ བུདྡྷ་ཀྵེ་དྲ་པ་རི་ཤྭ་དྷ་ནིཿ དྷ་མེ་ནི་དྷ་མེཿ མེ་རུ་མེ་རུ་མེ་རུ་ཤི་ཁ་རེཿ སརྦ་ཨ་ཀ་ལ་མྲྀ་དྷ་ཡུ་ནིཿ བ་ར་ནིཿ བུདྡྷེ་སུ་བུདྡྷེཿ བུདྡྷ་ཨ་དྷིཥྛི་ཏི་ནཿ རཀྵནྟུ་མེཿ སརྦ་དེ་བཿ ས་མེ་ཨ་ས་མེཿ ས་མ་ནྭཱོཿ ཧ་རནྟུ་མེཿ སརྦ་བུདྡྷཿ བྷོ་དྷི་ས་ཏྭཱཿ ཤ་མེ་ཤ་མེཿ པྲ་ཤ་མནྟུ་མེཿ སརྦ་ཨི་དྷྱུ་ས་ར་བཿ བྱ་དྷ་ཡཿ པཱུ་ར་ཎི་པཱུ་ར་ཎིཿ པཱུ་ར་ཡ་མེཿ སརྦ་ཨ་ཤ་ཡཿ བཻ་ཌཱུཪྱ་པྲ་ཏི་བྷ་སིཿ སརྦ་པཱ་པཾ་ཀྵ་ཡངྐ་རི་སྭཱ་ཧཱཿ དལ་ཁོམ་དང་བསྟུན་ཏེ་བཟླས་ཤིང་ཿ ༀ་ན་མོ་བྷ་ག་ཝ་ཏེ་བྷཻ་ཥ་ཛྱེཿ གུ་རུ་བཻ་ཌཱུཪྱཿ པྲ་བྷ་རཱ་ཛ་ཡཿ ཏ་ཐཱ་ག་ཏ་ཡཿ ཨརྷ་ཏེ་སམྱཀྶཾ་བུདྡྷ་ཡཿ ཏདྱ་ཐཱཿ ༀ་བྷཻ་ཥ་ཛྱེ་བྷཻ་ཥ་ཛྱེཿ མ་ཧཱ་བྷཻ་ཥ་ཛྱེ་བྷཻ་ཥ་ཛྱེཿ རཱ་ཛ་ས་མུངྒ་ཏེ་སྭཱ་ཧཱཿ སྔགས་ཐུང་ནིཿ ཏདྱ་ཐཱཿ ༀ་བྷཻ་ཥ་ཛྱེ་བྷཻ་ཥ་ཛྱེཿ མ་ཧཱ་བྷཻ་ཥ་ཛྱེ་རཱ་ཛ་ས་མུཏྒ་ཏེ་སྭཱ་ཧཱཿ ཞེས་པའོ། ཇི་ལྟར་རིགས་པ་བཟླསཿ དགུ་པ་ཡན་ལག་བདུན་པ་སྨོན་ལམ་དང་བཅས་པ་ནིཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻཌཱུཪྱའི་འོད་ཀྱི་རྒྱལ་པོ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཐུགས་རྗེ་ཀུན་ལ་སྙོམས་པའི་བཅོམ་ལྡན་འདསཿ མན་ཙམ་ཐོས་པས་ངན་འགྲོའི་སྡུག་བསྔལ་སེལཿ དུག་གསུམ་ནད་སེལ་སངས་རྒྱས་སྨན་གྱི་བླཿ བཻ་ཌཱུཪྱ་ཡི་འོད་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ སྨན་གྱི་རྒྱལ་པོར་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ མཚན་དཔེ་དཔལ་འབར་ཀུན་ཀྱང་བདག་འདྲར་གྱུརཿ བཻ་ཌཱུར་འོད་ཀྱིས་གླིང་བཞིའི་མུན་པ་སེལཿ ཤེས་རབ་ཐབས་ཀྱིས་ཡོ་བྱད་ཟད་མི་ཤེསཿ དམན་པོའི་ལམ་ངན་ཞུགས་རྣམས་ལམ་མཆོག་བགྲོདཿ སྡོམ་གསུམ་མ་ཉམས་ཚུལ་ལྡན་ངན་སོང་བྲལཿ མདོག་ངན་ནད་པ་ཡན་ལག་དབང་པོ་ཚང་ཿ ནད་ཀྱིས་གཟིར་རྣམས་ནད་མེད་ཡོ་བྱད་འཕེལཿ བུད་མེད་སྐྱེས་གཟིར་དེ་བྲལ་སྐྱེས་དབང་ལྡནཿ ལྟ་ངན་བདུད་ཞགས་ཡང་དག་ལྟ་བས་སྦྱངསཿ རྒྱལ་པོས་མནར་རྣམས་གནོད་པ་ཀུན་ལས་ཐརཿ བཀྲེས་པས་སྡིག་བྱེད་ཆོས་འབྱོར་ཁ་ཟས་མྱོང་ཿ སྒྲེན་སོགས་གོས་ཐོབ་འཕགས་ཚུལ་རྣམ་གྲོལ་ཤོགཿ ཅེས་པའི་སྨོན་ལམ་ཆེན་པོ་བཅུ་གཉིས་པོཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ མཚན་གྱི་མེ་ཏོག་རྒྱས་ཤིང་དག་པ་ལཿ དཔེ་བྱད་བཟང་པོའི་འབྲུ་ཆགས་མཛེས་པའི་སྐུཿ གང་གིས་མཐོང་ཐོས་དྲན་པའི་དཔལ་གྱུར་པཿ སྟོན་པ་མཚན་ལེགས་དཔལ་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ མཚན་ལེགས་རྒྱལ་པོར་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ ནད་གདོན་རིམས་སོགས་འཇིགས་པ་མཐའ་དག་ཞིཿ འོན་ལོང་སྨྱོ་སོགས་སྡུག་བསྔལ་ནད་རྒྱུན་ཆདཿ དམྱལ་བའི་ལས་ཟད་ལྷ་མིའི་བདེ་བ་མྱོང་ཿ དབུལ་ཕོངས་ཀུན་ཀྱང་དབྱིག་སོགས་ཡོ་བྱད་འཕེལཿ བཅིངས་དང་བརྡེགས་སོགས་ལུས་གདུང་མཐའ་དག་ཞིཿ མགོན་མེད་དུག་སྦྲུལ་སོགས་ཀྱིས་གཙེས་ལས་ཐརཿ འཐབ་རྩོད་འགྱེད་རྣམས་ཕན་ཚུན་བྱམས་སེམས་ལྡནཿ ཆུས་ཁྱེར་སྨྲེ་སྔགས་འདོན་རྣམས་དབུགས་འབྱིན་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བརྒྱདཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ རིན་ཆེན་ཟླ་དང་པདྨས་རབ་བརྒྱན་ཅིང་ཿ ཤེས་བྱ་ཀུན་ལ་མཁས་ཤིང་མཁྱེན་པ་རྒྱསཿ རྒྱ་མཚོ་ལྟ་བུར་ཟབ་པའི་གསུང་མངའ་བའིཿ སྒྲ་དབྱངས་རྒྱལ་པོ་ཁྱེད་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ རིན་ཆེན་ཟླ་བར་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ དབུལ་གཡེང་དགེ་ལས་ཉམས་རྣམས་དགེ་ཆོས་འཕེལཿ བཀྲེས་སྐོམ་ལས་ཟད་མཐོ་རིས་ཕུན་ཚོགས་རྒྱསཿ བུ་ནད་མི་མྱོང་རྟག་ཏུ་སྐྱེས་པར་གྱུརཿ བཤེས་བྲལ་མྱ་ངན་གྱིས་གདུང་མྱ་ངན་བྲལཿ མུན་པར་གདོན་གྱིས་གཙེས་རྣམས་གདོན་སོགས་ཐརཿ དམན་མོས་དགེ་མཆོག་བྲལ་རྣམས་ལུང་རྟོགས་རྒྱསཿ ཐེག་ཆེན་སྤོང་རྣམས་རྫོགས་བྱང་བསམ་སྦྱོར་ལྡནཿ འབར་བའི་སྡུག་བསྔལ་མྱོང་རྣམས་བསིལ་ཐོབ་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བརྒྱདཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ བརྫུས་ཏེ་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ འཛམ་བུའི་ཆུ་བོའི་གསེར་ལྟར་ལྷང་ངེ་བཿ ཉི་མ་སྟོང་ལས་ལྷག་པའི་གཟི་བརྗིད་འབརཿ དྲི་མེད་གསེར་གྱི་མཆོད་སྡོང་ལྟ་བུའི་སྐུཿ གསེར་བཟང་དྲི་མེད་སྣང་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ གསེར་བཟང་དྲི་མེད་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ བསད་པས་ཚེ་ཐུང་གྱུར་རྣམས་ཡུན་རིང་འཚོཿ བརྐུས་ཕྲོགས་དབུལ་པོར་སྐྱེས་རྣམས་ལོངས་སྤྱོད་འཕེལཿ གནོད་སེམས་འཐབ་ཅིང་རྩོད་རྣམས་བྱམས་པ་རྒྱསཿ ཚུལ་འཆལ་སྡོམ་གནས་སེམས་བསྐྱེད་སྒྲིབ་བྱང་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བཞིཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ མྱ་ངན་འདས་ཤིང་བདེ་བའི་མཆོག་བརྙེས་པཿ འགྲོ་བའི་སྡུག་བསྔལ་གདུང་བ་སེལ་མཛད་ཅིང་ཿ འགྲོ་དྲུག་མགོན་དང་དཔལ་དུ་གྱུར་པ་ཡིཿ མྱ་ངན་མེད་མཆོག་དཔལ་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ མྱ་ངན་མེད་མཆོག་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ མྱ་ངན་སོགས་མྱོང་སྐྱོན་བྲལ་ཚེ་རིང་བདེཿ དམྱལ་བར་མྱ་ངན་མེད་མཐོང་བདེ་བར་འབརཿ དབུལ་པོ་མདོག་ངན་ལུས་མཛེས་ལོངས་སྤྱོད་འཕེལཿ འབྱུང་པོས་མདངས་འཕྲོག་ཞི་ཞིང་བྱམས་གནས་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བཞིཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཆོས་སྒྲ་ཆེན་པོས་ཕ་རོལ་རྒོལ་བ་འཇོམསཿ རྒྱ་མཚོ་ལྟ་བུར་ཟབ་པའི་གསུང་མངའ་ཞིང་ཿ འགྲོ་བའི་དུག་གསུམ་མ་ལུས་ཞི་མཛད་པའིཿ ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ ཆོས་བསྒྲགས་རྒྱ་མཚོར་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ དད་མེད་ལོག་ལྟ་དད་ལྡན་ཡང་དག་ལྟཿ མཐའ་འཁོབ་དགེ་ཉམས་མཚན་གྱིས་བྱང་སེམས་སྐྱེསཿ དབུལ་བ་སྡིག་བྱེད་འབྱོར་ལྡན་སྡིག་དང་བྲལཿ འཐབ་ཅིང་རྩོད་རྣམས་སླར་ལོག་བྱམས་གནས་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བཞིཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཆོས་ཀྱི་བློ་གྲོས་གཏིང་དཔག་དཀའ་བའི་ཚུལཿ རྣམ་དག་ཆོས་ཀྱི་དབྱིངས་ལ་རོལ་མཛད་ཅིང་ཿ ཤེས་བྱ་མ་ལུས་མངོན་སུམ་མཁྱེན་པ་པོཿ མངོན་མཁྱེན་རྒྱལ་པོ་ཁྱེད་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ མངོན་མཁྱེན་རྒྱལ་པོར་ཕྱག་མཆོད་མཚན་བཟླས་མཐུསཿ རྒྱལ་བ་མཆོག་དེས་སྔོན་ཚེ་གཞན་དོན་དུཿ བྱ་བ་ངན་ཞེན་འབྱོར་ལྡན་དགེ་བ་འཕེལཿ མི་དགེའི་ལམ་ཞུགས་དགེ་ལམ་རྒྱུ་འབྲས་ཐོབཿ གཞན་དབང་གྱུར་རྣམས་རང་དབང་བདེ་བ་འཕེལཿ ཚེ་ཐུང་རྒྱུ་བསགས་མཚན་ཐོས་ཚེ་རིང་ཤོགཿ ཅེས་པའི་སྨོན་ལམ་ཆེན་པོ་རྣམ་པ་བཞིཿ བདག་སོགས་འགྲོ་བས་མྱུར་དུ་འགྲུབ་པར་ཤོགཿ ཤི་འཕོས་དག་པའི་ཞིང་དེར་པདྨ་ལསཿ རྫུས་སྐྱེས་ཡོན་ཏན་ཀུན་རྫོགས་བདེ་ལ་སོགསཿ རྒྱལ་བ་ཀུན་མཉེས་སྐད་ཅིག་སྐད་ཅིག་ལཿ སངས་རྒྱས་ཞིང་ཀུན་བགྲོད་པའི་མཐུ་ཐོབ་ཤོགཿ སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀ་ཐུབ་པ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཐབས་མཁས་ཐུགས་རྗེ་ཤཱཀྱའི་རིགས་འཁྲུངས་ཤིང་ཿ གཞན་གྱིས་མི་ཐུབ་བདུད་ཀྱི་དཔུང་འཇོམས་པཿ གསེར་གྱི་ལྷུན་པོ་ལྟ་བུར་བརྗིད་པའི་སྐུཿ ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ ཤཱཀྱའི་རྒྱལ་པོར་ཕྱག་འཚལ་མཆོད་པའི་མཐུསཿ རྒྱལ་བ་མཆོག་དེས་སྙིགས་དུས་འགྲོ་བའི་སླདཿ བདེ་གཤེགས་བདུན་གྱི་སྔོན་གྱི་སྨོན་ལམ་དང་ཿ ཆོ་གའི་བསམ་སྦྱོར་ཁྱད་པར་ཅན་རྣམས་གསུངསཿ བརྒྱད་ཀ་འཛོམས་ནས་བཻ་ཌཱུར་གཟུངས་ཆེན་གྱིཿ ཕན་ཡོན་གསུངས་ནས་ཚུལ་འདིར་བསྐུལ་བ་ལྟརཿ དེང་འདིར་འབད་ལས་ལེགས་ཚོགས་གང་ཐོབ་པཿ བདག་སོགས་འགྲོ་བས་འཕྲལ་དུ་ཐོབ་པར་ཤོགཿ མ་རིག་མུན་སེལ་སྒྲོན་མེའི་མཆོགཿ སྡུག་བསྔལ་ནད་སེལ་སྨན་གྱི་ཕུལཿ དམ་ཆོས་དཀོན་མཆོག་ཐམས་ཅད་ལཿ ཕྱག་འཚལ་མཆོད་ཅིང་སྐྱབས་སུ་མཆིའོཿ ལན་བདུན་བཟླསཿ འདི་མན་ཆད་གོང་ལྟར་རང་རང་གི་བསྟོད་པ་སྦྱར་བ་ནིཿ ཀུན་འབྱུང་མུན་པའི་ས་བོན་མཐར་མཛད་ཅིང་ཿ སྡུག་བསྔལ་ཟུག་རྔུའི་རྩ་བ་དྲུངས་ནས་འབྱིནཿ རྒྱལ་ཡུམ་ཤེས་རབ་ཕ་རོལ་ཕྱིན་མ་སོགསཿ ཐེག་གསུམ་དམ་པའི་ཆོས་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ དམ་པའི་ཆོས་ལ་ཕྱག་འཚལ་མཆོད་པའི་མཐུསཿ མཚན་ཐོས་ཙམ་གྱིས་སྐྱོན་ཟད་ཡོན་ཏན་འཕེལཿ ཞེས་སོགས་བདེར་གཤེགས་བཀའ་ལུང་འགྱུར་མེད་རྣམསཿ བདག་སོགས་འགྲོ་ལ་བདེན་པ་མངོན་འགྱུར་ཤོགཿ བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཆོས་ཀྱི་རྒྱལ་བུ་གཞོན་ནུ་མཁྱེན་པའི་གཏེརཿ བདག་ཅག་ཉེས་བརྒྱས་གཟིར་བའི་འགྲོ་བ་ལཿ ཟབ་ཡངས་ལམ་འདི་མངོན་དུ་འགྱུར་མཛད་པཿ རྗེ་བཙུན་འཇམ་པའི་དབྱངས་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ འཇམ་པའི་དབྱངས་ལ་ཕྱག་འཚལ་མཆོད་པའི་མཐུསཿ ཁྱེད་ཀྱི་ཡོན་ཏན་བསམ་ཡས་མདོ་སྡེ་འདིཿ ཐུབ་ལ་ནན་གྱིས་ཞུས་པའི་ཕན་ཡོན་ཀུནཿ བདག་སོགས་འགྲོ་བར་འཕྲལ་དུ་ཐོབ་བྱིན་རློབསཿ བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྐྱབས་གྲོལ་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཐབས་མཁས་ཐུགས་རྗེ་ཕུལ་དུ་བྱུང་བའི་མཐུསཿ དུས་མིན་འཆི་གསོ་རྒྱལ་སྲིད་སྤེལ་སོགས་སླདཿ མཆོད་པའི་སྦྱོར་བ་གསལ་བར་སྟོན་མཛད་པཿ འཕགས་པ་སྐྱབས་གྲོལ་མཛད་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ སྐྱབས་གྲོལ་མཛད་ལ་ཕྱག་འཚལ་མཆོད་པའི་མཐུསཿ སྨན་བླའི་མཚན་གྱིས་ཉམ་ཐག་ནད་པ་དང་ཿ དུས་མིན་འཆི་གསོ་རྒྱལ་སྲིད་རྒྱས་སོགས་རྣམསཿ བདག་སོགས་འགྲོ་བར་འཕྲལ་དུ་ཐོབ་བྱིན་རློབསཿ བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའི་ཚོགས་ཐམས་ཅད་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་བདུན་བཟླསཿ ཚངས་པ་དང་བརྒྱ་བྱིན་དང་རྒྱལ་པོ་ཆེན་པོ་བཞི་ལ་སོགས་པ་དམ་པའི་ཆོས་སྐྱོང་བ་ལྷའི་དགེ་བསྙེན་ཆེན་པོ་ཐམས་ཅད་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་གསུམ་བཟླསཿ ཡངས་པ་ཅན་དུ་བདེར་གཤེགས་བརྒྱད་འཛོམས་ནསཿ སྤྱི་སྒོས་བསྟན་པ་བསྲུང་བར་བཀའ་བསྒོས་ཤིང་ཿ རང་རང་བདེན་པའི་ངག་གིས་ཞལ་བཞེས་པཿ གསང་བདག་འཁོར་དང་བཅས་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་བསྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ གསང་བདག་མགོན་དང་ཚངས་དབང་རྒྱལ་ཆེན་སོགསཿ དམ་ཅན་སྲུང་མར་ཕྱག་འཚལ་མཆོད་པའི་མཐུསཿ མདོ་འདི་སྤྱོད་པར་ཁྱེད་རྣམས་ལེགས་བྱོན་ནསཿ བསྲུང་སྐྱོབ་རྐྱེན་སེལ་ཡོན་ཏན་ཀུན་བསྒྲུབ་ཅེསཿ དམ་བཅའ་བྲོ་བོར་ཕན་ཡོན་མང་དུ་བཤདཿ གཟུངས་བསྩལ་ཕྱག་རྡོར་སྒྲུབ་ཐབས་བསྟན་པ་ཀུནཿ བདག་སོགས་འགྲོ་བར་འཕྲལ་དུ་ཐོབ་བྱིན་རློབསཿ ལྷག་པར་གེགས་བཟློག་མཐུན་རྐྱེན་ཚང་དུ་གསོལཿ མཐུ་དཔལ་དང་ལྡན་པའི་དགེ་གཉེན་གནོད་སྦྱིན་གྱི་སྡེ་དཔོན་ཆེན་པོ་ཇི་འཇིགས་ལ་སོགས་ཏེ་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ལ་ཕྱག་འཚལ་ལོཿ མཆོད་དོ་སྐྱབས་སུ་མཆིའོཿ ལན་གསུམ་བཟླས་རྗེསཿ ཡངས་པ་ཅན་དུ་སྨན་ལྷའི་མཚན་ཐོས་པསཿ བདེན་མཐོང་མདོ་འདི་བསྲུང་བར་དམ་བཅས་པཿ བདུན་འབུམ་འཁོར་གྱིས་བསྐོར་བའི་བཅུ་གཉིས་པོཿ གནོད་སྦྱིན་སྡེ་དཔོན་རྣམས་ལ་ཕྱག་འཚལ་ལོཿ མཆོད་པ་ཀུན་འབུལ་སྡིག་པ་མཐའ་དག་བཤགསཿ དགེ་ལ་ཡི་རང་ཆོས་འཁོར་སྐོར་བར་བསྐུལཿ མྱ་ངན་མི་འདའ་བཞུགས་པར་གསོལ་བ་འདེབསཿ དགེ་རྩ་རྫོགས་བྱང་ཉིད་དུ་བསྔོ་བར་བགྱིཿ གནོད་སྦྱིན་རྣམས་ལ་ཕྱག་འཚལ་མཆོད་པའི་མཐུསཿ ཁྱེད་ཀྱིས་སྨན་ལྷའི་མཚན་ཐོས་བདེན་པ་མཐོང་ཿ མདོ་འདི་བསྲུང་བར་དམ་བཅའ་ཇི་བཞིན་མཛོདཿ ལྷག་པར་གེགས་བཟློག་མཐུན་རྐྱེན་ཚང་གྱུར་ཅིགཿ ཅེས་བརྗོདཿ སྐབས་འདིར་གཟུངས་རིང་ཐུང་རྣམས་བཟླས་རྗེས་སུཿ ཇི་སྙེད་སུ་དག་ཕྱོགས༴ སོགས། བཟང་སྤྱོད་ལས་བྱུང་བའི་ཡན་ལག་བདུན་པ་ཚང་མ་བརྗོདཿ གསུམ་པ་རྗེས་ཀྱི་རིམ་པ་ལཿ ཡན་ལག་བདུན་པ། བསྟོད་པ་ནིཿ སྙིགས་དུས་འགྲོ་ལ་དགོངས་པའི་བཅོམ་ལྡན་འདསཿ བདེ་གཤེགས་བདུན་དང་ཐུབ་དབང་དམ་པའི་ཆོསཿ འཇམ་དཔལ་སྐྱབས་གྲོལ་ཕྱག་རྡོར་འཁོར་དང་བཅསཿ གནོད་སྦྱིན་སྡེ་དཔོན་རྣམས་ལ་གུས་ཕྱག་འཚལཿ དེ་སྐད་གསོལ་ཚེ་སྒོ་གསུམ་ཉེས་སྐྱོན་གྱིཿ ནོངས་པ་ཅི་བགྱིས་གནོང་ཞིང་འགྱོད་པས་བཤགསཿ བཟོད་པར་བཞེས་ནས་རང་རང་གནས་སུ་བཞུདཿ སྤྱན་འདྲེན་ཚེ་ན་ཐུགས་རྗེས་མྱུར་བྱོན་གསོལཿ བཀྲ་ཤིས་ཀུན་གྱི་དབང་ཕྱུག་བཅོམ་ལྡན་འདསཿ བདེ་གཤེགས་བདུན་དང་ཐུབ་དབང་དམ་པའི་ཆོསཿ འཇམ་དཔལ་སྐྱབས་གྲོལ་ཕྱག་རྡོར་འཁོར་དང་བཅསཿ གནོད་སྦྱིན་སྡེ་དཔོན་རྣམས་ཀྱིས་བཀྲ་ཤིས་ཤོགཿ དེ་ལྟར་སྨན་བླའི་བདེ་གཤེགས་མཆེད་བརྒྱད་ཀྱིཿ ཆོ་ག་དུག་གསུམ་ནད་འཇོམས་བདུད་རྩིའི་རྒྱུནཿ འདི་ཉིད་སྡོང་རོགས་དགེ་རྩེའི་དགེ་སྦྱོང་མཆོགཿ མ་ཏི་བྷ་དྲས་མ་ཎི་བསྐུལ་བཞིན་དུཿ བྱང་སེམས་ཀུན་བཟང་གཞན་ཕན་ཞེས་བྱ་བསཿ དོན་ལ་བརྟེན་པ་རྒྱལ་བའི་ཕྲིན་ལས་ཕྱིརཿ མདོ་ཆོག་ཡན་ལག་བདུན་པའི་གཞུང་བཞིན་ཀྱང་ཿ སྔགས་དང་མཐུན་པར་ཉམས་ལེན་བདེ་བའི་ཕྱིརཿ བཀོད་འདི་མདོ་སྔགས་གཉིས་དང་མི་འགལ་བའིཿ གཞུང་བཟང་དག་པའི་སྣང་ངོར་ཤར་བའི་གཟུགསཿ ལྷ་དང་བླ་མས་བྱིན་རླབས་ཀྱིས་ཐོབ་ནོརཿ དད་ལྡན་རྣམས་ལ་ཕན་ངེས་བྱིན་ནུས་ལྡནཿ དེ་ཕྱིར་ལོག་ལྟའི་སྐྱོན་གྱིས་མི་སྦག་པརཿ འཕྲལ་ཕུགས་ཀུན་ཏུ་ཕན་དང་བདེ་སྟེར་ལམཿ ཡིན་ལ་ཡིན་བཞིན་དད་གུས་མོས་གསུམ་གྱིསཿ ཉམས་སུ་ལོངས་དང་འབྲས་བཟང་ཐོབ་པར་ངེསཿ དེ་ཡི་དགེ་བ་རྨད་བྱུང་ཐེག་ཆེན་ཆོསཿ སྲིད་དང་ཉན་རང་ལམ་དུ་མི་འཕྱན་པརཿ རྣམ་མཁྱེན་རྒྱ་མཚོར་རོ་གཅིག་འདྲེས་གྱུར་ནསཿ མཐའ་ཡས་འགྲོ་ལ་ཕན་པའི་རྒྱུར་གྱུར་ཤོགཿ དགེའོ། ལས་བུམ་བསྒྲུབ་པ།༄༅། །གཉིས་པ་ལས་བུམ་བསྒྲུབ་པ་ནི། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་བུམ་པ་ཚད་དང་མཚན་ཉིད་རྫོགས་པ་བཅུད་ཀྱིས་གཏམས་པའི་དབུས་སུ་པཾ་ལས་པདྨ་དང་རཾ་ལས་ཉི་མའི་གདན་ལ་ཧཱུཾ་ལས་ཁྲོ་ཆེན་བདུད་རྩི་འཁྱིལ་པ་སྐུ་མདོག་ལྗང་ནག་མི་བཟད་པའི་ཉམས་ཅན། །ཕྱག་གཡས་སྣ་ཚོགས་རྡོ་རྗེ་དང་གཡོན་སྡིགས་མཛུབ་ཞབས་གཉིས་འདོར་སྟབས་སུ་བཞུགས་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། ཨརྒྷཾ་སོགས་ཀྱིས་མཆོད། བསྟོད་པར་འོས་པ་ཐམས་ཅད༴ སོགས་ནས། མཆོག་ཏུ་དད་པས་བསྟོད་པར་བགྱི། །ཐུགས་ཀར་ཉི་དཀྱིལ་ཧཱུཾ་གིས་མཐར་སྔགས་ཕྲེང་འཁོར་བ་ལས་འོད་ཟེར་མེ་སྟག་ལྟ་བུར་འཁྲོས་པས་གདོན་བགེགས་སྡིག་སྒྲིབ་ཐམས་ཅད་བསྲེགས། བདུད་རྩིའི་རྒྱུན་བབས་པས་བུམ་པ་གང་བར་བསམ། ༀ་བཛྲ་ཨ་མྲྀ་ཏ་ཀུནྜ་ལི་ཧཱུཾ། ཅི་ནུས་བཟླས་མཐར་དུང་ཆོས་ཕུལ་ལ༑ ༀ་ཨཱཿཧཱུྃ། བུམ་ལྷ་བདེ་སྟོང་གི་ངོ་བོར་ཞུ་བས་ཁྲོ་བོའི་རྡུལ་ཕྲ་རབ་ཏུ་གྱུར་པར་བསམ་མོ། དེ་ནས་དབང་བཞིའི་བདག་འཇུག་བླངས་ནས། གཞན་དོན་དབང་བསྐུར། རབ་གནས་ལ་འཇུག་པར་བགྱིའོ། བུམ་པ་བ སྒྲུབ་པ་ནི། བདག་ལས་མདུན་བསྐྱེད་བུམ་པའི་དཀྱིལ་འཁོར་ལྷ། །མཚོ་ལ་གཟའ་སྐར་ཤར་བཞིན་གསལ་བ་ཡི། །རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་རྒྱུད་བསྐུལ། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །རྩ་སྔགས་བརྗོད་མཐར་མཆོད་ཅིང་བསྟོད། ལས་བུམ་དུ་སྐད་ཅིག་གིས་ཁྲོ་བོའི་རྒྱལ་པོ་དབང་ཆེན་རྟ་མགྲིན་དུ་གསལ་བའི་ཐུགས་ཀའི་འོད་ཟེར་འཕྲོས་འདུས་དོན་གཉིས་མཛད། །སྐུའི་ཆ་ཐམས་ཅད་ལས་བདུད་རྩིའི་རྒྱུན་བབས་པས་བདུད་རྩི་འཁྱིལ་པར་བུམ་པ་གང་བར་བསམ། ༀ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ༀ་བཛྲ་ཨམྲྀ་ཏ་ཀུནྡྷ་ལི་ཧ་ན་ཧ་ན་ཧཱུཾ་ཕཊ། བཛྲ་ཨརྒྷཾ༴ སོགས། ཧྲཱིཿ འོད་དཔག་མེད་མགོན་སྤྲུལ་སྐུ་འཆི་བ་མེད། །དྲག་པོའི་སྐུར་བཞེངས་ལྷ་སྲིན་འདུལ་བའི་གཉེན། །སྤྱན་རས་གཟིགས་དབང་ཧྲཱིཿལས་རྔམ་བརྗིད་སྐུ། །རྟ་མགྲིན་རྟ་སྐད་བཞད་ལ་ཕྱག་འཚལ་ལོ། ཡིག་བརྒྱ་ལན་གསུམ། སྐུ་གསུང་ཐུགས་ལྡན་མཉམ་ཉིད་བདུད་རྩི་འཁྱིལ། །དུག་གསུམ་བདུད་རྩིར་སྒྱུར་མཛད་སྨན་པའི་མཆོག །བདུད་རྩི་ལྟ་བུས་འགྲོ་བའི་དོན་མཛད་པའི། །ཁྲོ་རྒྱལ་བདུད་རྩི་འཁྱིལ་ལ་ཕྱག་འཚལ་ལོ། །ཡིག་བརྒྱ་ལན་གསུམ་བརྗོད། བདག་འཇུག་བླང་བ་ནི། ༀ་བཛྲ་ས་མ་ཡ་ༀ། །ཨཱཿབཛྲ་ས་མ་ཡ་ཨཱཿ །ཧཱུཾ་བཛྲ་ས་མ་ཡ་ཧཱུཾ། །སྭ་བཛྲ་ས་མ་ཡ་སྭཱ། །ཧཱ་བཛྲ་ས་མ་ཡ་ཧཱ། །ༀ་ཡེ་ཤེས་རྒྱལ་པོའི་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུཾ། །ༀ་བཛྲ་ས་མ་ཡ་སྟྭཾ། །ༀ་བཛྲ་ས་མ་ཡ་ཧོ། །ༀ་རྡོ་རྗེ་ཡེ་ཤེས་ཐོབ་བྱའི་ཕྱིར། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་འདིར་ཞུགས་ནས། །བདག་གི་སློབ་མར་འཇུག་པར་འཚལ། །མཚོ་དབུས་གེ་སར༴ སོགས། སྨན་བླའི་དུག་གསུམ་ནད་འཇོམས་ཀྱི་དབང་བཤད་པུཎྜ་རི་ཀའི་འཕྲེང་བ།༄༅། །སྨན་བླའི་དུག་གསུམ་ནད་འཇོམས་ཀྱི་དབང་བཤད་པུཎྜ་རི་ཀའི་འཕྲེང་བ་བཞུགས་སོ།། །། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། །དེའི་ཆེད་དུ་བདེ་བར་གཤེགས་པ་བརྒྱད་ཀྱི་དཀྱིལ་འཁོར་བྱིན་རླབས་རྗེས་གནང་གི་རིམ་པ་ཞུ་བར་བགྱིའོ་སྙམ་པས་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་ཏེ་ཉན་པར་འཚལ། །ཆོས་ཉན་པའི་ཀུན་ཏུ་སྤྱོད་པ་ཡང་། །སྐྱེ་རབས་ལས་རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རབ་བསྐྱེད་དེ། །དགའ་དང་ལྡན་པའི་མིག་གིས་ལྟ། །ཚིག་གི་བདུད་རྩི་འཐུང་བ་བཞིན། །རབ་ཏུ་གུས་པས་ཆོས་ཉོན་ཅིག །ཅེས་དང་། སློབ་དཔོན་ཆེན་པོས་རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངེས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་གསུངས་པ་བཞིན། སྣོད་ཀྱི་སྐྱོན་གསུམ། དྲི་མ་དྲུག །མི་འཛིན་པ་ལྔ་དང་བཅས་པ་སྤངས་ནས། །འདུ་ཤེས་བཞི་དང་བཅས་པའི་སྒོ་ནས་ཉན་དགོས་ཚུལ་ཡང་། །སྣོད་ཁ་སྦུབས་པ་ལ་བཅུད་བཟང་པོ་ཆགས་པའི་གོ་སྐབས་མེད་པ་ལྟར་སེམས་གཞན་དུ་ཡེངས་པ་དང་། །སྣོད་ཞབས་རྡོལ་དུ་བཅུད་ཅི་ཙམ་བླུགས་ཀྱང་རང་སར་ཟག་སྟེ་མི་གནས་པ་ལྟར་ཅུང་ཟད་ཉན་ཡང་ཚིག་དོན་ཡིད་ལ་མི་འཛིན་པ་དང་། སྣོད་དུག་ཅན་དུ་བཅུད་བཟང་པོ་བླུགས་ཀྱང་དུག་དང་འདྲེས་པས་བཟར་མི་རུང་བ་ལྟར་བླ་མ་དང་ཆོས་ལ་ལོག་པར་རྟོག་ཅིང་མཉམ་འགྲོགས་དང་ཐོས་པའི་ང་རྒྱལ་སོགས་ཆོས་ཉོན་མོངས་པའི་གྲོགས་སུ་སོང་བ་སྟེ་སྣོད་ཀྱི་སྐྱོན་གསུམ་དང་། །ཆོས་ཐོས་པའི་ཆ་ནས་ཁོང་ལས་ང་ལྷག་སྙམ་པའི་ང་རྒྱལ་ཆོས་འཆད་ཉན་གྱི་ནུས་པ་བདག་ལའང་ཡོད་སྙམ་པའི་མ་དད་པ། །ཕྱི་བཤོལ་དང་ལེ་ལོའི་དབང་གི་དོན་དུ་མི་གཉེར་བར་ཚོགས་དྲུག་ཐ་མལ་དུ་གོལ་ནས་རྣམ་པར་གཡེང་བ། ཉན་པའི་ཚེ་གཉིད་རྨུགས་སུ་གྱུར་པའམ། ཅི་མི་སྙམ་པའི་བསམ་གཏན་གྱི་ངང་དུ་ཡིད་སྡུད་པ། །ཆོས་ཐུན་ཡུན་རིང་བ་དང་། །མ་གོ་བས་སྐྱོ་བར་གྱུར་པ་དྲི་མ་དྲུག་དང་། །ཚིག་འཛིན་ལ་དོན་མི་འཛིན་པ། ལོག་པར་འཛིན་པ་སོགས་ཀྱི་གཉེན་པོར་མདོ་སྡེ་ལས། །དགེ་སློང་དག་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག །ཅེས་དང་། སྡོང་པོ་བཀོད་པ་ལས། རིགས་ཀྱི་བུ་བདག་ཉིད་ལ་ནད་པའི་འདུ་ཤེས། །ཆོས་ལ་སྨན་གྱི་འདུ་ཤེས། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་དེ་ཉན་པར་བྱའོ། །ཆོས་བཅུ་པའི་མདོ་ལས། །དད་པ་མེད་པའི་མི་རྣམས་ལ། །དཀར་པོ་ཆོས་ནི་མི་འབྱུང་ཞིང་། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་འཁྲུངས་མི་སྲིད། །ཞེས་དད་པ་ནི་ཆོས་སྣང་བའི་སྒོ་ཡིན་པས་གལ་ཆེའོ། །དེ་ཡང་གང་ཉན་པར་བྱ་བའི་ཆོས་ཀྱི་རྣམ་གྲངས་ཀྱང་། །རྒྱལ་བ་ཐབས་མཁས་ཤིང་ཐུགས་རྗེ་རྨད་དུ་བྱུང་བ་དེས། །གདུལ་བྱ་སེམས་ཅན་རྣམས་བློ་མ་ཟད་ཀྱི་བར་དུ། །གདུལ་བྱེད་ཆོས་ཀྱི་རྣམ་གྲངས་ཀྱང་དེ་སྙེད་ཅིག་བསྟན་པ་ཡིན་ཏེ། །ལང་ཀར་གཤེགས་པ་ལས། །ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་དང་། ཡིད་བཞིན་རྣམ་པར་བཀོད་པའི་རྒྱུད་ལས། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་རྒྱུན་ཆད་མེད། །ཅེས་གསུངས་པ་བཞིན། །ཆོས་ཀྱི་རྣམ་གྲངས་མཐའ་ཡས་པ་ཡོད་ཀྱང་། །བསྡུ་ན་རྒྱུ་འབྲས་ཀྱི་ཐེག་པ་གཉིས་སུ་འདུ་བ་ཡིན་ཏེ། །སྡོམ་འ བྱུང་ལས། མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེ་ཐེག་པའོ། །ཞེས་སོ། དེ་ལྟ་བུའི་རྒྱུ་ཡི་ཐེག་པ་ལས། །ཁྱད་པར་འཕགས་པ་འབྲས་བུ་ལམ་དུ་བྱེད་པ་རྡོ་རྗེ་ཐེག་པ་སྟེ། །དེ་ལ་ཡང་རིང་བརྒྱུད་བཀའ་མ། །ཉེ་བརྒྱུད་གཏེར་མ། ཟབ་མོ་དག་སྣང་མ་དང་གསུམ་དུ་གྲགས་པ་ལས། །འདིར་རྗོད་བྱེད་ཚིག་གི་མེ་ཏོག་ལ། །བརྗོད་བྱ་དོན་གྱི་འབྲས་བུ་གཡུར་ཟ་བའི་ཤིན་ཏུ་ཟབ་མོ་སྣང་བ་དག་པ་རབ་འབྱམས་སུ་ཤར་བ་ལས་བྱིན་རླབས་ཉེ་བརྒྱུད་ཐུགས་གཏེར་དུ་བབས་པ་ཡིན་ཏེ། ཆུ་ཀླུང་རོལ་པའི་མདོ་ལས། །ང་ཡི་བསྟན་པ་ཆོས་ཀྱི་གཞུང་། །ཐུགས་ནས་ཐུགས་ཀྱི་གཏེར་དུ་སྦ། །ཡང་ན་ས་ཡི་སྙིང་པོ་བྱ། །ཞེས་གསུངས་པ་དང་མཐུན་པར་བྱུང་བ་སྟེ། རིག་འཛིན་ཆེན་པོ་བདུད་འདུལ་རྡོ་རྗེའི་ལུང་བསྟན་བཀའ་རྒྱ་མ་ལས། །ཨོ་རྒྱན་པདྨའི་སྤྲུལ་པ་ཉིད། །བསོད་ནམས་བསྟན་པའི་མིང་འཛིན་པ། །མཁས་གྲུབ་ཤིང་མོ་གླང་ལོ་བ། །རྒྱ་བོད་ཆོས་ཀྱི་ཚོང་དུས་འགྲེམས། །སྐར་ཚོགས་ཙམ་གྱི་ལས་ཅན་འཁོར། །བྱེ་མའི་གྲངས་ཀྱི་འགྲོ་བ་འདྲེན། །ཞེས་ཤིན་ཏུ་གསལ་བར་ལུང་བསྟན་པའི་སྐྱེས་བུ་ཆེན་པོ་དེ་ཉིད་ཀྱི་མཚོན་བྱའི་དོན་གྱི་མན་ངག་སྐུ་གསུམ་རང་བྱུང་གི་སྒྲོན་མ་ནས་མཚོན་བྱེད་ཚིག་གི་སྡེབ་སྦྱོར་རྗེས་ཐོབ་སྒྱུ་མའི་རྣམ་རོལ་གྱིས་བསྒྱུར་བ་བཅོམ་ལྡན་འདས་ཀྱི་བཀའ་ཐ་མ་ངེས་པ་དོན་གྱི་སྡེ་སྣོད་དམ་ཆ་མཐུན་གྱི་སྡེ་སྣོད་དང་རྗེས་སུ་མཐུན་པ་སྨན་བླའི་ཆོ་ག་དུག་གསུམ་ནད་འཇོམས་ཞེས་བགྱི་བའི་རྗེས་སུ་གནང་བ་བྱིན་པ་ལ་སློབ་དཔོན་གྱི་བགྱི་བར་འོས་པ་རྣམས་ལེགས་པར་གྲུབ་ཟིན་ནས་སློབ་བུའི་ངོས་སྐལ་དུ་གྱུར་པ་བླ་མ་དང་སྨན་རྒྱལ་ཐ་མི་དད་པའི་དྲུང་དུ་བྱིན་རླབས་རྗེ་གནང་ཞུ་བའི་ཡོན་དུ་མཎྜལ་ཕུལ། །ཅེས་བརྗོད་འདི་འདྲའི་དུས་ཚོད་དྲན་པའི་རྒྱུར་གྱུར་ཀྱང་། །རང་ལ་དགོས་ཚེ་ཐབས་ཆག་འདུག་པ་ལ་བསམ་ནས་བྲིས་པ་དགེ་ལེགས་འཕེལ། དགེའོ།། །། དམ་ཆོས་བདེ་བ་ཆེན་པོའི་ཆ་ལག་སྨན་བླའི་ཆོ་གའི་དབང་བསྐུར་བདུད་རྩིའི་ཆུ་རྒྱུན།༄༅། །དམ་ཆོས་བདེ་བ་ཆེན་པོའི་ཆ་ལག་སྨན་བླའི་ཆོ་གའི་དབང་བསྐུར་བདུད་རྩིའི་ཆུ་རྒྱུན་བཞུགས་སོ། ། ན་མོ་བྷེ་ཥ་ཛྱེ་ཡཱ། མཚན་ཐོས་ཙམ་གྱིས་ངན་འགྲོའི་འཇིགས་པ་དང་། །གློ་བུར་གདོན་དང་བཞི་བརྒྱ་རྩ་བཞི་ལས། །འགྲོ་ཀུན་སྐྱོབ་མཛད་སྨན་བླ་མཆེད་བརྒྱད་ཀྱི། །དབང་བསྐུར་བདུད་རྩིའི་ཆུ་རྒྱུན་འདི་རུ་ངོམ། །དེ་ལ་བདེ་གཤེགས་བརྒྱད་ཀྱི་དཀྱིལ་འཁོར་དུ་དབང་བསྐུར་བར་འདོད་ན། སྦྱོར་བ་ཡོ་བྱད་གཞུང་ལྟར་དང་། རྣམ་རྒྱལ་བུམ་པ་ནི། བྷྲུཾཿལས་རིན་ཆེན་བུམ་པའི་གཞལ་ཡས་སུ། །བདེ་གཤེགས་བདུན་དང་ཐུབ་དབང་ཡུམ་ཆེན་མོ། །འཇམ་དཔལ་སྐྱབས་གྲོལ་ཕྱག་རྡོར་གནོད་སྦྱིན་བཅས། །དྭངས་པའི་མཁའ་ལ་འཇའ་ཚོན་ཇི་བཞིན་གསལཿ དེ་ལྟར་གསལ་བའི་གཙོ་འཁོར་ཐམས་ཅད་ཀྱི། །གནས་གསུམ་ཡི་གེ་གསུམ་ལས་འོད་འཕྲོས་པས། །རང་བཞིན་གནས་ནས་བསྐྱེད་པའི་ལྷ་ཚོགས་རྣམས། །འགག་མེད་མཁའ་ལ་ཆར་སྤྲིན་གཏིབས་བཞིན་བྱོན། །ན་མོ་མ་ཧཱ་བྷཻ་ཥ་ཛྱེ་ས་པཱ་རི་ཝ་ར་ཨེ་ཧྱ་ཧི་མ་ཧཱ་ཀ་རུ་ཎི་ཀ་ཏྲི་ཤ་ཡ་ཛ་ཛཿ ཛཿཧཱུཾ་བཾ་ཧོ། ཏིཥྛ་ལྷན། ཨ་ཏི་པུ་ཧོ། པྲ་ཏི་ཛ་ཧོ། ཨརྒྷཾ་པ༴ ནས། ཤཔྟ་པུ་ཛ་ཧོ། སྙིགས་དུས་འགྲོ་ལ་དགོངས་པའི་བཅོམ་ལྡན་འདས། །བདེར་གཤེགས་བདུན་དང་ཐུབ་དབང་དམ་པའི་ཆོས། །འཇམ་དཔལ་སྐྱབས་གྲོལ་ཕྱག་རྡོར་འཁོར་དང་བཅས། །གནོད་སྦྱིན་སྡེ་དཔོན་རྣམས་ལ་ཕྱག་འཚལ་བསྟོད། །ཅེས་དང་། །རང་གི་ཐུགས་ཀ་ནས་སྔགས་འཕྲེང་གཟུངས་ཐག་ལ་ཞོན་ཏེ་སོང་བས་བུམ་ནང་གི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། །འོད་ཟེར་འཕྲོས་འདུས་དོན་གཉིས་བྱས། །སྐུའི་ཆ་ཐམས་ཅད་ནས་བདུད་རྩིའི་རྒྱུན་བབས་བུམ་པ་གང་བར་བསམ་ཞིང་། །གཟུངས་རིང་ཅི་ནུས་དང་གཟུངས་ཐུང་བརྒྱ་རྩ་ལས་མི་ཉུང་བར་བཟླས་ལ་སླར་ཡང་། ན་མོ་མ་ཧཱ་བྷཻ་ཥ་ཛྱེ་ས་པ་རི་ཝ་ར་ཨརྒྷ྄ཾ༴ སོགས་ཅེས་དང་། སྙིགས་དུས་འགྲོ་ལ༴ སོགས། དུང་ཞལ་ཕུལ་བ་འོད་ཞུ་བྱའོ། །ཡི་གེ་བརྒྱ་པས་བརྟན་པར་བྱས་ནས། །མཚན་སྨོན་ལམ་དང་བཅས་གཞུང་བཞིན་གྲུབ་པར་བྱའོ། །ལས་བུམ་འཁྱིལ་པའི་སྔགས་ཀྱིས་ནུས་ལྡན་དུ་བསྒྲུབས་ཤིང་མཆོད་བསྟོད་འོད་ཞུ་དང་། །བདག་དབང་བཅས་གྲུབ་ནས་སློབ་བུ་རྣམས་མདུན་དུ་འཁོད་པ་ལ། ཧཱུྃ་སྒྲིབ་གཉིས་ལས་བྱུང་ནད་གདོན་གྲིབ། །ཉམས་ཆགས་ཉེས་ལྟུང་དྲི་མའི་ཚོགས། །ལྷ་སྔགས་ཏིང་འཛིན་རོལ་པའི་ཆུས། །བཀྲུ་བར་བགྱིའོ་དག་གྱུར་ཅིག །ༀ་བཛྲ་ཨམྲྀ་ཏ༴ སོགས། ཡི་གེ་བརྒྱ་པ་སོགས་ཀྱིས་ཁྲུས་བྱེད་བགེགས་གཏོར་བྱ། རཾ་ཡཾ་ཁཾ། བྷྲུཾ་ལས་རིན་པོ་ཆེའི་སྣོད་དུ་བགེགས་ཀྱི་གཏོར་མ་ཁ་དོག་དྲི་རོ་ཕུན་སུམ་ཚོགས་པར་གྱུར། ༀ་ཨཱཿཧཱུཾ། གསུམ། ༀ་སརྦ་བྷུ་ཏ་ཨ་ཀཪྵ་ཡ་ཛ། གསུམ་པ་བགེགས་བཀུག་ལ་གཏོར་མ་སྐོར་ཞིང་། ན་མཿསརྦ་ཏ་ཐཱ་ག་ཏ་བྷྱོ༴ ལན་གསུམ་གྱིས་ཚིམ་པར་བསྔོས་ལ། ཧཱུཾ་འདོད་ཡོན་ལྔ་ལྡན་གླུད་གཏོར་བཟང་པོ་འདི། །འབྱུང་བ་ས་ཆུ་མེ་རླུང་བྲག་དང་ཤིང་། །ནམ་མཁའ་ལ་བརྟེན་ལྷ་སྲིན་འབྱུང་པོའི་ཚོགས། །སྣང་ཞིང་སྲིད་པའི་ལྷ་འདྲེའི་ཚོགས་ལ་བསྔོ། །ཤ་ཁྲག་དྲོད་དབུགས་རྩ་རྒྱུས་པགས་པ་དང་། །ལུས་ངག་ཡིད་གསུམ་གླུད་དུ་འདི་ཁྱེར་ལ། །རང་རང་སོ་སོའི་གནས་སུ་འགྲོ་བར་གྱིས། །བཀའ་ལས་འདའ་ན་རྡུལ་དུ་བརླག་པར་བྱེད། །སརྦ་བྷུ་ཏ་གཙྪ། བདེན་སྟོབས་བདར། ༀ་སུམ་བྷ་ནི༴ སོགས་ཀྱིས་བསྐྲད། སྲུང་འཁོར་ནི། ཧཱུཾ་སྟེང་འོག་ཕྱོགས་མཚམས་རྡོ་རྗེའི་ར་བ་དང་། །དྲྭ་བ་གུར་དང་བླ་བྲེ་མེ་དཔུང་གིས། །གནོད་བྱེད་བགེགས་ཀྱིས་གླགས་རྙེད་མི་འགྱུར་བའི། །སྲུང་བའི་འཁོར་ལོ་གཞོམ་གཞིག་བྲལ་བར་གྱུར། །ༀ་བཛྲ་རཀྵ་རཀྵ་ཧཱུཾ། ཞེས་པ་བརྗོད་དེ་ནས་མེ་ཏོག་བཀྱེ་བསྡུ་དང་ལོ་རྒྱུས་འཚམས་པ་བསྒྲགས་རྗེས་མཎྜལ་ཕུལ། མིག་རས་དང་། མེ་ཏོག་གཏད། གསོལ་བ་གདབ་པ་ནི། ཀུན་མཁྱེན་ཡེ་ཤེས་ཕུང་པོ་ཅན། སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ལན་གསུམ། དེ་ནས་སྐྱབས་སུ་འགྲོ་བ་ནི། །ན་མོ་ཕྱོགས་བཅུ་དུས་གསུམ་རྒྱལ་བ༴ སོགས། སྐྱབས་སུ་མཆི། ལན་གསུམ། སེམས་བསྐྱེད་པ་ནི། ཧོཿ མཁའ་མཉམ་ཞིང་གི་མཐའ༴ སོགས། ལན་གསུམ། ཡན་ལག་བདུན་པ་ནི། ཧོ་བཅོམ་ལྡན་སྨན་ལྷའི་དཀྱིལ་འཁོར༴ སོགས། ཚིག་རྗེས་མ་ལན་གསུམ་བརྗོད། དབང་གི་སྣོད་རུང་བྱ་ཕྱིར་ཡེ་ཤེས་དབབ་པ་ནི། ལས་ཆུས་སློབ་བུ་རྣམས་བསངས་ལ། ༀ་སྭ་བྷ་ཝ༴ སོགས། སྟོང་པའི་ངང་ལས་པྃ་ལས་པདྨ་དང་ཨཱཿལས་ཟླ་བའི་དཀྱིལ་འཁོར་གྱི་སྟེང་དུ་ཁྱེད་རང་རྣམས་ཀྱི་རྣམ་པར་ཤེས་པའི་ངོ་བོ་ཧཱུཾ་ཡིག་སྔོན་པོ་འོད་ཟེར་འབར་བ་ལས་འོད་འཕྲོས། འཕགས་པ་མཆོད། སེམས་ཅན་རྣམས་ཀྱི་སྡིག་སྒྲིབ་དང་བཞི་བརྒྱ་རྩ་བཞིའི་ནད་ཐམས་ཅད་སྦྱངས། །ཚུར་འདུས་ཡོངས་སུ་གྱུར་པ་ལས་སྐད་ཅིག་གིས་བཅོམ་ལྡན་འདས་སྨན་གྱི་བླ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། །གཡས་མཆོག་སྦྱིན་གྱི་ཕྱག་རྒྱས་ཨ་རུ་ར་རྣམ་པར་རྒྱལ་བ་སྡོང་བོ་ལོ་འདབ་དང་བཅས་པ་འཛིན་ཅིང་། གཡོན་མཉམ་བཞག་གི་སྟེང་ན་ལྷུང་བཟེད་བདུད་རྩིས་གང་བ་བསྣམས་པ། །ཞབས་གཉིས་སྐྱིལ་མོ་ཀྲུང་གིས་བཞུགས་པ། མཚན་དཔེའི་གཟི་བྱིན་འབར་བ། མཆོག་གི་སྤྲུལ་སྐུའི་ཆ་ལུགས་རྫོགས་པར་གསལ་བའི་ཕྱི་རོལ་དུ་ཕྱོགས་མཚམས་ཀྱི་འདབ་བརྒྱད་ལ་བདེ་གཤེགས་བདུན་དང་ཡུམ་ཆེན་མོ་རྣམས་སྒོམ་པའི་ལྷ་ཚོགས་ཐམས་ཅད་ཀྱི་སྤྱི་བོར་ༀ་དཀར་པོ། །མགྲིན་པར་ཨཱཿདམར་པོ། །ཐུགས་ཀར་ཧཱུཾ་སྔོན་པོ་རྣམས་ཀྱིས་མཚན་པ། །དེ་ལས་འོད་ཟེར་དཔག་ཏུ་མེད་པ་འཕྲོས་སྒོམ་པ་དང་འདྲ་བའི་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ། །ཤར་ཕྱོགས་ཀྱི་བཻ་ཌཱུཪྱ་སྣང་གི་ཞིང་ཁམས་ནས་བྱོན་ཏེ་ཁྱེད་རང་རྣམས་ལ་སིབ་སིབ་ཐིམ་པའི་མོས་འདུན་རྩེ་གཅིག་ཏུ་མཛོད། །ཅེས་བརྡ་སྦྱར་ལ། ན་མོ། བདེ་གཤེགས་སྙིང་པོས་འགྲོ་བ་ཡོངས་ལ༴ སོགས་ནས། ༀ་ཨཱཿགུ་རུ་བྷཻ་ཥ་ཛྱེ་ས་པཱ་རི་ཝ་ར་ཨེ་ཧྱ་ཧི་བཛྲ་ས་མ་ཡ་ཛ་ཛཿ ཛཿཧཱུཾ་བཾ་ཧོ། བཛྲ་ཨ་བེ་ཤ་ཡ་ཨ་ཨཱཿ ཞེས་བྱིན་དབབ་པའོ། །ཏིཥྛ་བཛྲ། ཞེས་བརྟན་པར་མོས་ལ། མེ་ཏོག་དོར་བ་ནི། སངས་རྒྱས་དངོས་གྲུབ་ཐོབ་བྱའི་ཕྱིར། །འགྲོ་ལ་ཕན་པའི་གཙོ་ཆེན་གྱིས། །སྨིན་པར་དགོངས་ཏེ་བཞེས་སུ་གསོལ། པྲ་ཏིཙྪ་བཛྲ་ཧོ། ཞེས་མེ་ཏོག་ཕུལ༑ དབང་རྟགས་སྤྱི་བོར་བཅིངས་པར་མོས་ལ། པྲ་ཏི་གྷྲྀ་ཧ་ན་ཨེ་མཾ་ས་ཏྭ་མ་ཧཱ་བཱ་ལ། མེ་ཏོག་སྤྱི་བོར་བཞག་མིག་དར་བསལ་བ་ནི། ལེགས་འོངས་བུ་ཁྱོད་སྐལ་བ་བཟང་། །མ་རིག་ལིང་ཏོག་ང་ཡིས་བསལཿ དགའ་དང་འདུན་པའི་སྤྲོ་སེམས་ཀྱིས། །དཀྱིལ་འཁོར་འདིར་ལྟོས་དམ་ཚིག་སྲུངས། །ཛྙཱ་ན་ཙཀྵུ་པྲ་བེ་ཤ་ཡ་ཕཊཿ དེ་ནས་དབང་དངོས་ནི། བུམ་པའི་ནང་གི་ལྷ་ཚོགས་རྣམས་ཀྱི་སྐུ་ལས་བདུད་རྩིའི་རྒྱུན་བབས་ཁྱོད་རང་གི་སྤྱི་བོ་ནས་ཞུགས། །ལུས་ཀྱི་ནང་ཐམས་ཅད་གང་། །ལས་དང་ཉོན་མོངས་པའི་སྡིག་སྒྲིབ་ཉེས་ལྟུང་དང་དེས་བསྐྱེད་པའི་བཞི་བརྒྱ་རྩ་བཞིའི་ནད་གདོན་སྡུག་བསྔལ་དང་བཅས་པ་བྱང་ཞིང་དག་ནས་བུམ་པའི་དབང་ཐོབ་པར་སྒོམས་ཤིག །ཧཱུཾ་ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་དུ་མཾ། བུམ་ཆུ་བསྩལ། མདུན་གྱི་བཅོམ་ལྡན་འདས་འཁོར་དང་བཅས་པའི་སྐུ་ལས་སྐུ་གཉིས་པ་རེ་འཕྲོས། ཁྱེད་རང་རྣམས་ལ་ཐིམ་པས་དེ་བཞིན་གཤེགས་པ་དེ་དག་གིས་སྨོན་ལམ་དང་ཐུགས་རྗེ་བྱིན་རླབས་ཐམས་ཅད་ཅིག་ཆར་དུ་མོས་འདུན་མཛོད་ཅིག །སྐུ་ཙཀ་རྣམས་ཐོགས་ལ། ཧཱུཾ་ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། སོགས། བཻ་ཊཱུཪྱ་ཡི་འོད་དེས་དབང་བསྐུར་རོ། རྩ་སྔགས་ཉེ་སྙིང་དང་། ཀ་ཡ་ཨ་བྷི་ཥིཉྩ་ༀ། སྤྲོ་ན་གཞན་རྣམས་བརྗོད་ཀྱང་རུང་ངོ་། མདུན་བསྐྱེད་ཀྱི་ལྷ་ཚོགས་རྣམས་ཀྱི་མགྲིན་པ་ནས་གཟུངས་སྔགས་ཀྱི་ཕྲེང་བ་མཐིང་ཞུན་གྱི་མེ་ཏོག་ལྟ་བུ་དབྱངས་དང་གསལ་བྱེད་ལ་སོགས་དཔག་ཏུ་མེད་པ་འཕྲོས་ནས་བྱོན་པ་ཁྱོད་རང་རྣམས་ཀྱི་མགྲིན་པར་ཞུགས། ངག་གི་སྒྲིབ་པ་དག །ཚངས་དབྱངས་ཡན་ལག་དྲུག་ཅུའི་དབང་ཐོབ་པའི་མོས་འདུན་མཛོད་ཅིག །གང་སྐུ་བཻ་ཊཱུཪྱ་ཡི་ལྷུན་པོ་ལ། མཚན་དཔེའི་འོད་ཟེར་འབར་བའི་གཟི་བྱིན་གྱིས། འཁོར་བའི་སྡུག་བསྔལ་མཐའ་དག་ཞི་མཛད་པའི། སྨན་རྒྱལ་མཆེད་བརྒྱད་གསུང་གི་དབང་ཐོབ་ཤོག །རྩ་སྔགས་དང་། ཝཀྐ་ཨ་བྷི་ཥིཉྩ་ཨཱཿ ཞེས་ཕྲེང་བ་བྱིན་ལ། ཏདྱ་ཐཱ། གྷུ་མེ་གྷུ་མེ་ཨི་མི༴ སོགས། བཻ་ཥ་ཛྷེ་བྷེ༴ སོགས་རྗེས་ཟློས་ལན་གསུམ། སློབ་མས། བཅོམ་ལྡན་བདག་ལ་སྩལ་ལགས་ཀྱི། །བདག་ལ་འགོ་བར་མཛད་དུ་གསོལ། བླ་མས། བཅོམ་ལྡན་འདི་ལ་སྩལ་ལགས་བགྱི། །འདི་ལ་འགོ་བར་མཛད་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཞེས་བརྗོད། མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ཀ་ནས་ཧཱུཾ་ཡིག་འོད་ཟེར་འབར་བ་སྐུ་མདོག་དང་མཐུན་པར་འཕྲོས། །ཁྱེད་རང་རྣམས་ཀྱི་སྙིང་གར་ཐིམ། །ཡིད་ཀྱི་སྒྲིབ་པ་དག་ཐུགས་ཀྱི་བྱིན་རླབས་ཞུགས། །མཁྱེན་གཉིས་སངས་རྒྱས་པའི་དབང་ཐོབ་པའི་མོས་འདུན་མཛོད་ཅིག །ཧཱུཾ་གང་སྐུ་བཻ་ཌཱུཪྱ་ཡི་ལྷུན་པོ་ལ། །མཚན་དཔེ་ཡོན་ཏན་འབར་བའི་འོད་ཟེར་གྱིས། །འཁོར་བའི་སྡུག་བསྔལ་མཐའ་དག་ཞི་བྱེད་པའི། །སྨན་རྒྱལ་མཆེད་བརྒྱད་ཐུགས་ཀྱི་དབང་ཐོབ་ཤོག །རྩ་སྔགས། ཙིཏྟ་ཨ་བྷི་ཥིཉྩ་ཧཱུཾ། ཞེས་ཧཱུཾ་ཡིག་སྙིང་གར་བཞག །མདུན་བསྐྱེད་ཀྱི་ལྷ་ཚོགས་རྣམས་ཀྱི་ལྟེ་བ་ནས་འོད་ཟེར་སྣ་ཚོགས་དང་བདུད་རྩིས་གང་བའི་ལྷུང་བཟེད་དཔག་ཏུ་མེད་པ་འཕྲོས། །ཁྱེད་རང་རྣམས་ཀྱི་ལྟེ་བར་ཞུགས། །དུག་གསུམ་ཆ་མཉམ་གྱི་སྒྲིབ་པ་དག །ཡོན་ཏན་གྱི་བྱིན་རླབས་ཞུགས་པའི་མོས་འདུན་མཛོད་ཅིག །ཧཱུྃ་གང་སྐུ་བཻ་ཊཱུཪྱ་ཡི་ལྷུན་པོ་ལ། །མཚན་དཔེ་ཡོན་ཏན་འབར་བའི་འོད་ཟེར་གྱིས། །འཁོར་བའི་སྡུག་བསྔལ་མཐའ་དག་ཞི་བྱེད་པའིཿ སྨན་རྒྱལ་མཆེད་བརྒྱད་ཡོན་ཏན་དབང་ཐོབ་ཤོག །རྩ་སྔགས། གུ་ཎ་ཨ་བྷི་ཥིཉྩ་ཧཱུཾ། ཞེས་ལྷུང་བཟེད་ལྟེ་བར་བཞག །མདུན་བསྐྱེད་ཀྱི་ལྷ་ཚོགས་རྣམས་ཀྱི་གསང་གནས་སུ་ཨ་རུ་ར་རྣམ་པར་རྒྱལ་བ་ལ་སོགས་སྨན་འབྲས་འོད་ཟེར་འབར་བ་དཔག་ཏུ་མེད་པ་འཕྲོས། །ཁྱེད་རང་རྣམས་ཀྱི་གསང་གནས་སུ་ཞུགས། །ལས་དང་ཉོན་མོངས་པའི་སྡིག་སྒྲིབ་ཉེས་ལྟུང་བག་ཆགས་དང་བཅས་པ་ཐམས་ཅད་བྱང་ཞིང་དག །ཕྲིན་ལས་རྣམ་བཞི་འགྲུབ་པའི་དབང་དང་དངོས་གྲུབ་བྱིན་རླབས་ཐམས་ཅད་ཐོབ་བྱུང་སྙམ་པའི་མོས་པ་མཛོད། །ཧཱུཾ་གང་སྐུ་བཻ་ཊཱུཪྱ་ཡི་ལྷུན་པོ་ལ། །མཚན་དཔེ་ཡོན་ཏན་འབར་བའི་འོད་ཟེར་གྱིས། །འཁོར་བའི་སྡུག་བསྔལ་མཐའ་དག་ཞི་བྱེད་གཉེན། །སྨན་རྒྱལ་མཆེད་བརྒྱད་འཕྲིན་ལས་དབང་ཐོབ་ཤོག །རྩ་སྔགས། སརྦ་ཀརྨ་ཨ་བྷི་ཥིཉྩ་ཧཱུཾ། ཞེས་ཨ་རུ་ར་གསང་གནས་སུ་བཞག །གཏོར་མའི་དབང་ནི། འོ་རིགས་ཀྱི་བུ་རྣམས་མ་ཡེངས་པར་དད་པའི་ཤུགས་སྐྱེད་ལ་འདུན་པ་གཏོད་དང་། །གཏོར་མ་འདི་ཉིད་བདེ་བར་གཤེགས་པ་མཆེད་བརྒྱད་ཡུམ་ཆེན་མོ་བྱང་ཆུབ་སེམས་དཔའི་ཚོགས་ཀྱིས་བསྐོར་བའི། །སྟེང་ན་རིག་འཛིན་བརྒྱུད་པའི་བླ་མ། །བར་ན་དྲང་སྲོང་སྨན་གྱི་ལྷ་ཚོགས། །འདབས་འཁོར་ན་ཕྱོགས་སྐྱོང་གནོད་སྦྱིན་གྱི་ལྷ་ཚོགས་གྲངས་མེད་པ་བཞུགས་པ་དེ་དག་གི་སྔོན་གྱི་སྨོན་ལམ་དང་དམ་བཅའ་ཞལ་གྱིས་བཞེས་པའི་བཀའ་དྲིན་དང་ཐུགས་རྗེ་བྱིན་རླབས་ཐམས་ཅད་སྐད་ཅིག་གིས་ཐོབ་པར་བྱིན་གྱིས་རློབ་པར་མཛད་དུ་གསོལ། སྙམ་པའི་མོས་འདུན་རྩེ་གཅིག་ཏུ་གྱིས་ཤིག །ཅེས་བརྡ་སྦྱར་ལ། ཧཱུཾ་སྐུ་མདོག་བཻ་ཊཱུཪྻ་ཡི་རི་བོ་འདྲ། །འགྲོ་བ་སེམས་ཅན་ནད་ཀྱི་སྡུག་བསྔལ་སེལ། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །རྒྱལ་བ་སྲས་དང་བཅས་པའི་དབང་བསྐུར་རོ། །ཞེས་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཊཱུཪྱའི་འོད་ཀྱི་རྒྱལ་པོས་བྱིན་གྱིས་རློབས་ཤིག །དེ་བཞིན་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོས་བྱིན་གྱིས་རློབས་ཤིག །དེ་བཞིན་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་བྱིན་གྱིས་རློབས་ཤིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པའི་རྒྱལ་པོས་བྱིན་གྱིས་རློབས་ཤིག བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོས་བྱིན་གྱིས་རློབས་ཤིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ཀྱི་རྒྱལ་པོས༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོས༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་འཁོར་དང་བཅས་པས་བྱིན་གྱིས་རློབས་ཤིག ཏདྱ་ཐཱ། གྷུ་མེ་གྷུ་མེ༴ སོགས། བཻ་ཥ་ཛྱེ༴ སོགས། ཚར་གསུམ་རེ་བརྗོད། སྤྲོ་ན་རྟགས་བརྒྱད། སྣ་བདུན། རྫས་བརྒྱད་སོགས་རིམ་བཞིན་བསྐུར་ལ་ཤིས་པ་བརྗོད། འདི་ཡི་ཚིགས་ནི། བདེ་གཤེགས་མཆེད་བརྒྱད་པོ་ལ་མི་ཕྱེད་དད་པས་ཀུན་ནས་བསླངས་ཏེ་ཡི་དམ་དུ་འཛིན་པར་བགྱིའོ་སྙམ་པས་འདི་བཞིན་དུ་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། སོགས། གཏང་རག་གི་མཎྜལ་ཕུལ། སླར་ཡང་ཚིག་དོན་དྲན་པས། དེང་ནས་བརྩམས་ཏེ༴ སོགས། དགེ་བསྔོ་ནི། བསོད་ནམས་འདི་ཡིས་ཐམས་ཅད་གཟིགས་པ་ཉིད། ཐོབ་ནས༴ སོགས། ཤིས་པ་བརྗོད། དགེའོ། སརྦ་མངྒ་ལཾ།། །། སྣ་བདུན་དང་རྟགས་བརྒྱད་རྫས་བརྒྱད་བཅས།།༄༅། །སྣ་བདུན་ནི། ཧཱུཾ་རྒྱལ་སྲིད་རིན་ཆེན་སྣ་བདུན་པོ། །སྐལ་ལྡན་བུ་ལ་བྱིན་པ་ཡིསཿ འཁོར་ལོས་སྒྱུར་བའི་རྒྱལ་པོ་དང་། །མཚུངས་པའི་བསོད་ནམས་ཐོབ་པར་ཤོག །ༀ་སབྟ་ཨུ་པ་རཏྣ་ཨ་བྷི་ཥིཉྩ་ཧཱུཾ། རྟགས་བརྒྱད་ནི། ཧཱུཾ་གདུགས་དང་གསེར་ཉ་བུམ་པ་བཟང་། །པདྨ་དུང་དཀར་དཔལ་བེའུ་སོགས། །རྒྱལ་མཚན་འཁོར་ལོ་འདིས་བརྒྱན་པས། །དུས་རྣམས་ཀུན་ཏུ་ཤིས་པར་ཤོག །ཨཥྚ་མང་ག་ལམ་ཨ་བྷི་ཥིཉྩ་ཧཱུཾ། རྫས་བརྒྱད་ནི། ཧཱུཾ་སྔོན་དུས་ཤཱཀྱ་ཐུབ་པ་ཡིས། །བྱིན་གྱིས་བརླབས་པའི་རྫས་མཆོག་བརྒྱད། །སྐལ་ལྡན་བུ་ལ་བྱིན་པ་ཡིས། །བཀྲ་ཤིས་ཕུན་སུམ་ཚོགས་པར་ཤོག །ༀ་མངྒ་ལ་ཀུ་རུ་ཨ་བྷི་ཥིཉྩ་ཧཱུཾ། དེ་ནས་ཡེ་དྷརྨ༴ མཐའ་རྟེན་རྒྱལ་སྲིད་སྣ་བདུན་དང་བཀྲ་ཤིས་རྟགས་བརྒྱད་ཀྱི་དབང་།༄༅། །མཐའ་རྟེན་རྒྱལ་སྲིད་སྣ་བདུན་དང་བཀྲ་ཤིས་རྟགས་བརྒྱད་ཀྱི་དབང་ནི། རྒྱལ་བའི་སྐུ་ཡི་མཚན་དཔེ་ལས་བྱུང་བའི། །རིན་ཆེན་གདུག་དང་གསེར་ཉ་པདྨ་དུང་ཿ བུམ་པ་དཔལ་བེའུ་རྒྱལ་མཚན་འཁོར་ལོ་སྟེ། །བཀྲ་ཤིས་རྟགས་མཆོག་བརྒྱད་ཀྱི་དབང་བསྐུར་བས། །སློབ་མ་ཁྱོད་ཀྱི་ལུས་ཀྱི་གནས་བརྒྱད་དུ། །བཀྲ་ཤིས་རྟགས་བརྒྱད་རྟག་ཏུ་འཆར་བ་དང་། །ཕུན་སུམ་ཚོགས་པས་དཔལ་ལ་སྤྱོད་པར་ཤོག །ཨཱོཾ་ཨཥྚ་མངྒ་ལཾ་ཧེ་རུ་ཨ་བྷི་ཥིཉྩ་ཧཱུཾ༔ སྣ་བདུན་ནི། །ཧཱུཾ་སྐལ་ལྡན་རིགས་ཀྱི་བུ་རྣམས་ལ། །རྒྱལ་སྲིད་སྣ་བདུན་དབང་བསྐུར་བས། །བདེ་ལེགས་ཕུན་སུམ་ཚོགས་པ་དང་། །འཕགས་པའི་ནོར་བདུན་ལྡན་ནས་ཀྱང་། །གཞན་དོན་དཔག་མེད་འགྲུབ་པར་ཤོག །ༀ་ཊ་བྷི་རསྣ་ཨ་བྷི་ཥིཉྩ་མཾ། བླ་མེད་རྒྱུད་ལས་སངས་རྒྱས་ཀྱི་སྐུའི་མཚན་དཔེ་དང་མཐུན་པར་བཀྲ་ཤིས་རྟགས་བརྒྱད་ཀྱི་མཐའ་རྟེན་བྱའོ། །ཞེས་པ་བླ་མ་སངས་རྒྱས་རྡོ་རྗེས་བསྐུལ་ནས་རཱ་ག་ཨ་གསེས་ཀྱིས་འཕྲལ་དུ་སྨྲས་པ་ལྟར། །གོ་མགྱོག་བླ་མ་འཇམ་དབྱངས་ཀྱི་ཡི་གེ་བཀོད་པའོ། །དགེའོ།། །། མཚན་དོན་སྦྲགས་མ་བཟླས་་་་༄༅། །ཅེས་ཅི་ནུས་བཟླས་པའི་མཇུག་ཏུ་མཚན་དོན་སྦྲགས་མ་བཟླས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུཪྻའི་འོད་ཀྱི་རྒྱལ་པོ་ལ་ཕྱག་འཚལ་ལོ། སྐྱབས་སུ་མཆིའོ། གསོལ་བ་འདེབས། ཁ་ཐོན་ལྟར༑ སྡིག་པ་དང་སྒྲིབ་པ་ཐམས་ཅད་སྦྱོང་དུ་གསོལ། ནད་པ་ལ། ནད་གདོན་རྐྱེན་བགེགས་ཐམས་ཅད་ཞི་བར་མཛད་དུ་གསོལ། གཤིན་དོན་ལ། ངན་སོང་གི་སྡུག་བསྔལ་ཐམས་ཅད་སྦྱོང་དུ་གསོལ། ཚིག་ཁ་བསྒྱུར། ཏདྱ་ཐཱ། ༀ་བྷཻ་ཥ་ཛྱེ་བྷཻ་ཥ་ཛྱེ་མ་ཧཱ་བྷཻ་ཥ་ཛྱེ་བྷཻ་ཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། སྐྱབས་སུ་མཆི་གསོལ་བ་འདེབས། འདོད་གསོལ་གང་དགོས་ཁ་བསྒྱུར། ཏདྱ་ཐཱ། ༀ་བྷཻ་ཥ་ཛྱེ༴ སོགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །སྐྱབས་སུ་མཆི་གསོལ་བ་འདེབསཿ འདོད་གསོལ། བྷཻ་ཥ་ཛྱེ༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ༴ ནས། སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པའི་རྒྱལ་པོ་ལ༴ འདོད་གསོལ། བྷཻ་ཥ་ཛྱེ༴ བཅོམ་ལྡན་འདས་དེ་བཞིན་གཤེགས་པ༴ ནས། སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ༴ འདོད་གསོལ། བྷཻ་ཥ་ཛྱེ༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ༴ ནས། སངས་རྒྱས་ཆོས་བསྒྲགས་རྒྱ་མཚོའི་དབྱངས་ཀྱི་རྒྱལ་པོ་ལ༴ འདོད་གསོལ། སྔགས། བཅོམ་ལྡན་འདས་དེ་བཞིན་གཤེགས༴ ནས། སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ༴ འདོད་གསོལ། སྔགས། བཅོམ་ལྡན་འདས་དེ་བཞིན་གཤེགས་པ༴ ནས། སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ༴ འདོད་གསོལ། སྔགས། བྱང་ཆུབ་སེམས་དཔའ་ཉི་ལྟར་སྣང་མཛད་ཟླ་ལྟར་གསལ་བྱེད་འཇམ་དཔལ་དང་སྐྱབས་གྲོལ་ཕྱག་ན་རྡོ་རྗེ་ལ་སོགས་པ་སེམས་དཔའ་བཅུ་དྲུག་ལ་ཕྱག་འཚལ་ལོ། སྐྱབས་སུ༴ འདོད་གསོལ། སྔགས། འཕགས་པ་ཀུན་དགའ་བོ། གུ་རུ་པདྨ་འབྱུང་གནས། མཁན་པོ་བྷོ་དྷི་ས་ཏྭ། མཁས་པ་བཻ་རོ་ཙ་ན་ལ་སོགས་པའི་རིག་འཛིན་བླ་མ་རྣམས་ལ་ཕྱག་འཚལ་ལོ། སྐྱབས་སུ་མཆི། གསོལ་བ་འདེབས། བདག་ཅག་རྣམས་ཀྱི་རླུང་དང་མཁྲིས་པ་པད་ཀན་འདུ་བ་ལས་གྱུར་བའི་ནད་རིགས་བཞི་བརྒྱ་རྩ་བཞིའི་གནོད་པ་ཞི་བ་དང་། །ཕུན་སུམ་ཚོགས་པའི་དཔལ་ལ་ལོངས་སྤྱོད་ནས། །ངན་སོང་གི་སྐྱེ་སྒོ་ཆོད་དེ་སངས་རྒྱས་ཀྱི་ཞིང་རྣམ་པར་དག་པར་སྐྱེས་ནས་མྱུར་དུ་འཚང་རྒྱ་བར་བྱིན་གྱིས་རློབས་ཤིག །ཏདྱ་ཐཱ། གྷུ་མེ་གྷུ་མེ༴ ཅེས་སོགས། ཀྵ་ཡཾ་ཀཱ་རི་སྭཱ་ཧཱ། ཚངས་པ་དང་། བརྒྱ་བྱིན་དང་། རྒྱལ་པོ་ཆེན་པོ་སྡེ་བཞི། གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས། གཡོག་བདུན་འབུམ་དང་བཅས་པ་རྣམས་ཀྱིས་སྔོན་གྱི་དམ་ཚིག་ཞལ་གྱིས་བཞེས་པ་བཞིན་དུ་བདག་ཅག་རྣམས་ལ་བསྲུང་བ་དང་། སྐྱབས་པ་དང་། སྦེད་པར་མཛད་དུ་གསོལ། ཏདྱ་ཐཱ༑ གྷུ་མེ་གྷུ་མེ༴ སོགས། མཆོད་བསྟོད་ནི། ཨ་རུ་ར་སོགས་སྨན་སྣ་ཚོགས་ཀྱིས་གཏོར་མ་འབུལ། རཾ་ཡཾ་ཁཾ། ལན་གསུམ། ༀ་ཨཱཿཧཱུཾ། ལན་གསུམ། སངས་རྒྱས་སྨན་གྱི་ལྷ་ཚོགས་འཁོར་དང་བཅས་པའི་ཞལ་དུ་ཨེ་དམ་བྷ་ལིངྟ་ཁཱ་ཧི་ཁཱ་ཧི་ཨརྒྷཾ་པདྱཾ྄༴ སོགས། ཤབྟ་ཨཱཿཧཱུྃ། ཧཱུཾ་སྐུ་མདོག་བཻ་ཊཱུཪྱ་ཡི་རི་བོ༴ སོགས། ཅེས་བསྟོད་བསྔོ་བ་དང་། བཀྲ་ཤིས་ནི། སྡིག་ལྟུང་ཀུན་བཤགས་དགེ་བ་བྱང་ཆུབ༴ སོགས། གཤེགས་གསོལ་ནི། འཇིག་རྟེན་པ་རྣམས་རང་གནས༴ སོགས་ནས། ཨེ་མ་ཧོ། ཞེས་དགོངས་གཏེར་གྱི་ཟུར་རྒྱན་དུ་གནམ་ཆོས་ནས་བཏུས་ཏེ་རཱ་ག་ཨ་གསེས་བསྒྲིགས་པའོ། འདི་ཡི་ཕན་ཡོན་བསམ་ལས་འདས། བཀའ་མདོ་རྒྱུད་ཐ་དག་ནས་འདི་བས་ཕན་ཡོན་ཆེ་བ་མེད་པ་ནི། བཙུན་མ་ཡིན་ན་ཚུལ་ཁྲིམས་མི་ཉམས་ཏེ་གལ་ཏེ་ཉམས་པ་ཞིག་ཡིན་ན་དེའི་སྒྲིབ་པ་དག་ནས་མཐར་ཐུག་བདེ་ཞིང་སྐྱིད་པ་ནི་འདིའི་ཕན་ནོ།། ། |