ཀརྨ་པ་རང་བྱུང་རྡོ་རྗེའི་གསུང་འབུམ།

གླེགས་བམ་བདུན་པ། ཇ༽

ཀརྨ་པ་རང་བྱུང་རྡོ་རྗེ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དབུ་མ་ཆོས་དབྱིངས་བསྟོད་པའི་རྣམ་པར་བཤད་པ།

༄༅། །དབུ་མ་ཆོས་དབྱིངས་བསྟོད་པའི་རྣམ་པར་བཤད་པ་བཞུགས་སོ། །

༄༅། །བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སེམས་དང་སེམས་བྱུང་རྙོག་པ་རབ་ཞི་ཞིང་། །ཅི་ལྟ་ཅི་སྙེད་གཟིགས་པ་མཐར་སོན་པ། །བྱང་ཆུབ་ཡོན་ཏན་འཕྲིན་ལས་རང་བཞིན་ཅན། །དཔལ་ལྡན་ཐུབ་པའི་དབང་པོ་ལ་ཕྱག་འཚལ། །རྒྱལ་བ་ཀུན་གྱི་སྲས་ཀྱི་ཐུ་བོ་དང་། །ཡང་དག་དོན་གཟིགས་རྟེན་ཅིང་འབྲེལ་བར་འབྱུང་། །མ་ནོར་སྟོན་མཛད་འཕགས་པ་ཐུགས་རྗེ་ཅན། །ཀླུ་སྒྲུབ་སྙིང་པོའི་ཞབས་ལ་ཕྱག་འཚལ་ནས། །སྤྱོད་ཡུལ་མིན་ཡང་མོས་པ་ཆེར་སྐྱེས་ཏེ། །ཆོས་དབྱིངས་བསྟོད་པ་ཅུང་ཟད་རྣམ་པར་དབྱེ། །བདག་ཉིད་ཆེན་པོ་འཕགས་པ་ཀླུ་སྒྲུབ་མི་འཕྲོག་པའི་མཁྱེན་པ་དང་ཐུགས་རྗེ་རྨད་དུ་བྱུང་བ་མངའ་བ། ཡང་དག་པར་རྫོགས་པའི་སངས་རྒྱས་ཀྱིས་མདོ་རྒྱུད་དུ་མ་ལས་ལུང་བསྟན་པ། རྒྱལ་བའི་ཉི་མ་ནུབ་ནས་ལོ་བཞི་བརྒྱ་ན་སྐུ་བལྟམ་ཞིང་། ལོ་དྲུག་བརྒྱའི་བར་དུ་བསྟན་པ་གསལ་བར་མཛད་ནས། བདེ་བ་ཅན་དུ་གཤེགས་ཤིང་། རབ་ཏུ་དང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་བ་འདི་ཡིས་སྨོན་ལམ་ལྟར་བསྟན་པ་ཡུན་རིང་དུ་གསལ་བར་བྱ་བ་དང་། འགྲོ་བའི་མ་རིག་པའི་སྒྲིབ་པ་བསལ་ནས་ཐེག་པ་མཆོག་གི་ཚུལ་སྣང་བར་མཛད་པའི་དོན་དུ་བསྟན་བཅོས་དཔག་ཏུ་མེད་པ་མཛད་པ་རྣམས་ལས་ཁྱད་པར་དུ་མདོ་སྡེའི་དོན་འགྲེལ་པར་མཛད་པ་རྣམས་རིགས་གསུམ་དུ་མཛད་དོ། །དེ་ཡང་འཇིག་རྟེན་འཇིག་རྟེན་ལས་འདས་པའི་དོན་གྲུབ་པར་བྱེད་པ། སྤང་བྱ་དང་བླང་བྱ་ངེས་པར་འབྱེད་པ་ཐེག་པ་ཆེ་ཆུང་གི་བཏགས་པ་རྣམ་པར་བཞག་པ་དང་མི་འགལ་བར་མཛད་པ་རྣམས་ནི་གཏམ་གྱི་ཚོགས་ཀྱི་རབ་ཏུ་ཕྱེ་བ་རྣམས་སོ། །གང་ལ་བརྟེན་ནས་དབང་ཕྱུག་དང་། །སྐྱེས་བུ་དང་། གཉིས་ཀ་དང་། འདི་ནས་མ་དཔེ་ཤོག་ལྷེ་གཅིག་ཚང་གི་མི་འདུག །འདུད། ཞེས་བྱ་བ་ནི་བསྟན་བཅོས་ཀྱི་ལུས་ཀྱི་བསྡུས་པའི་དོན་བསྟན་ཏེ། གང་ལ་ལས་རང་ལ་གནས་པའི་རྒྱལ་བའི་སྙིང་པོ། མ་ཤེས་ན་དེ་ནི་མ་རིག་པ་ཞེས་བྱ་སྟེ། དེ་ལ་བརྟེན་ནས་ཡན་ལག་བཅུ་གཉིས་ཀྱི་འཁོར་ལོར་རྒྱུན་ཆད་མེད་པར་འཁོར་བས་སྲིད་པ་གསུམ་དུ་འཁོར་བ་དང་། རྒྱུ་རྐྱེན་གྱི་མཚན་ཉིད་རྨི་ལམ་དང་། སྒྱུ་མ་ལྟ་བུ་འབྱུང་བར་མ་ཤེས་པས། འདུ་བྱེད་དང་སེམས་པ་ལ་སོགས་པའི་སེམས་ལས་བྱུང་བ་ཡང་དག་པ་མ་ཡིན་པའི་ཀུན་རྟོག་ལས་གྱུར་པ་དེས་ཀྱང་རང་བཞིན་གྱིས་དག་པའི་དབྱིངས་ལ་ངའོ་ཞེས་འཛིན་ཅིང་བག་ཆགས་ཐམས་ཅད་འཇོག་པར་བྱེད་པས། དེ་ནི་རྣམ་པར་ཤེས་པ་ཐམས་ཅད་ཀྱི་རྒྱུའི་རྐྱེན་དུ་གྱུར་པས་ན་སེམས་ཞེས་བྱ་སྟེ། དེ་ཉིད་ཀྱི་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའི་ལས་བསྒྲུབ་པའི་སྲིད་པ་འཛིན་པ་ན་ལུས་ལ་སོགས་པ་གྲུབ་པས་ཕུང་པོ་དང་། ཁམས་དང་། སྐྱེ་མཆེད་ཀྱི་ཁྱད་པར་འཛིན་པའི་རྣམ་པ་ལྟར་བྱུང་བ་ནི། སེམས་དེས་བསྒྲུབ་པའམ་། དེ་དང་ལྡན་པས་ན་སེམས་ཞེས་བྱའོ། །སྒྲིབ་པ་དེ་དང་ལྡན་པ་ཀུན་ལ་རང་བཞིན་གྱིས་དག་ཅིང་དྲི་མ་མེད་པར་བཞུགས་པ་ནི། ཆོས་ཀྱི་དབྱིངས་ཏེ། སངས་རྒྱས་ནི་དེ་ཡིན་པས་ཕྱག་འཚལ་ལོ། །ཞེས་སངས་རྒྱས་དེ་ལ་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས། རྨད་དུ་བྱུང་བའི་གནས་སུ་གཟིགས་ནས་ལུས་ངག་ཡིད་གསུམ་གྱིས་ཕྱག་འཚལ་ཞིང་བཏུད་ནས། འདིའི་དོན་གསལ་བར་མཛད་པའོ། །འདི་ལྟར་བརྗོད་པར་བྱ་བའི་ཆོས་ཀྱི་དབྱིངས་མ་དག་པ་དང་། དྲི་མ་སེལ་བཞིན་པ་དང་། ཤིན་ཏུ་རྣམ་པར་དག་པའི་དོན་བརྗོད་པར་བྱེད་པའི་བསྟན་བཅོས་འདི་ཡིས་བསྡུས་པའི་དོན་ཚིགས་སུ་བཅད་པ་གཅིག་པུ་འདི་བརྗོད་པས། ཆོས་ཀྱི་དབྱིངས་ཤེས་བྱ་བ་ནི། གནས་སྐབས་གསུམ་དང་འབྲེལ་བ་གོ་བར་བྱེད་ཅིང་། གཞུང་གི་དོན་ལ་བདེ་བླག་ཏུ་འཇུག་པ་ནི་དགོས་པ་དང་། དེ་ལྟར་ཞུགས་པས། བླ་ན་མེད་པའི་སངས་རྒྱས་ཀྱི་ཡུལ་རྟོགས་ཤིང་བསྒྲུབ་པས། ཐོབ་པར་བྱེད་པ་ནི་དགོས་པ་ཡི་ཡང་དགོས་པ་ཞེས་བྱའོ། །དེ་ལྟར་བསྟན་བཅོས་ལ་འཇུག་པ་བཤད་ནས། ད་ནི་གནས་སྐབས་གསུམ་དུ་ཆོས་ཀྱི་དབྱིངས་ཅི་ལྟར་གནས་པ་སྟོན་པ་ལས། སེམས་ཅན་གྱི་གནས་སྐབས་ན་ཇི་ལྟར་གནས་པའི་ཚུལ་ནི་གཉིས་ཏེ། ངོ་བོ་མདོར་བསྟན་པ་དང་། དཔེ་དང་སྦྱར་ཏེ་རྒྱས་པར་བཤད་པའོ། །དང་པོ་ནི། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཞེས་གསུངས་ཏེ། གང་ཞིག་གང་དུ་འཁོར་བ་ནི། སེམས་ཕུང་པོ་དང་། ཁམས་དང་། སྐྱེ་མཆེད་ཀྱི་བག་ཆགས་ཐམས་ཅད་ཀྱིས་ཡོངས་སུ་བསྒོས་པས་ས་བོན་ཐམས་ཅད་པའི་ཀུན་གཞིའི་རྣམ་པར་ཤེས་པའོ། དེ་ཉིད་རྣམ་པར་མི་རྟོག་པའི་ཡེ་ཤེས་ཀྱི་རྒྱུ་མཐུན་པའི་སངས་རྒྱས་ཀྱི་ཆོས་ཀྱིས་རྣམ་པར་སྦྱངས་པ་ལས། རིམ་གྱིས་དག་པར་གྱུར་པ་དེ་ཉིད་ལ་མི་གནས་པའི་མྱ་ངན་ལས་འདས་པ་ཞེས་བྱ་སྟེ། སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡང་དེ་ཉིད་ཡིན་ནོ། །ཅི་འོ་ན་འདིར་འཁོར་བའི་རྒྱུ་དེ་དག་པས་མྱ་ངན་ལས་འདས་པའི་འབྲས་བུ་ཆོས་ཀྱི་སྐུ་ཞེས་བྱ་བའི་ཚིག་འདི་ཇི་ལྟར་རུང་། འདི་གཉིས་ལྷན་ཅིག་མི་གནས་པའི་འགལ་བ་མ་ཡིན་ནམ། གཞན་ཡང་འདིར་འཁོར་བ་དང་མྱ་ངན་ལས་འདས་པ་ཡོད་པར་ཅི་ལྟར་རུང་། ཆོས་ཐམས་ཅད་ངོ་བོ་ཉིད་མེད་པར་རིག་པའི་ཚོགས་ལས། རྣམ་གྲངས་དུ་མར་བཀག་པར་གསུང་པ་དང་འགལ་ལོ་ཞེ་ན། འདིར་བཤད་པར་བྱ་སྟེ། འདི་ལ་བསམ་གྱིས་མི་ཁྱབ་པའི་སངས་རྒྱས་ཀྱི་ཡུལ་མཐོང་བ་ལ་ཕྱི་རོལ་དུ་གྱུར་པ་ནི། བྱིས་པ་སོ་སོའི་སྐྱེ་བོ་དང་། བདག་ཏུ་ལྟ་བའི་མུ་སྟེགས་བྱེད་རྣམས་དང་། ཉན་ཐོས་དང་རང་སངས་རྒྱས་དང་། སྟོང་པ་ཉིད་ཀྱི་སེམས་རྣམ་པར་གཡེངས་བའི་བྱང་ཆུབ་སེམས་དཔའ་ལས་དང་པོ་པ་རྣམས་ཡིན་ནོ། །ཞེས་གསུངས་ཏེ། འདི་བཞི་ལ་ཆོས་ཀྱི་སྐུ་མཐོང་བ་ལ་སྒྲིབ་པ་གང་ཡིན་ཞེ་ན། བྱིས་པ་ལོག་སྲེད་ཅན་རྣམས་ཐེག་པ་ཆེན་པོའི་ཆོས་ལ་སྡང་བ་དང་། གཉིས་པ་མུ་སྟེགས་རྣམས་ནི་བདག་ཏུ་ལྟ་བ་དང་། གསུམ་པ་ཉན་ཐོས་རྣམས་ནི་འཁོར་བ་ལ་འཇིགས་པ་དང་། བཞི་པ་རང་སངས་རྒྱས་ནི་སེམས་ཅན་གྱི་དོན་ལ་རྒྱབ་ཀྱིས་ཕྱོགས་པ་རྣམ་པ་འདི་བཞི་ཡོད་པ་ནི་མི་མཐུན་པའི་ཕྱོག་ཆེན་པོ་སྟེ། རྒྱུད་བླ་མ་ལས། ཆོས་ལ་ཁོང་ཁྲོ་བདག་ལྟ་དང་། །འཁོར་བའི་སྡུག་བསྔལ་གྱིས་འཇིགས་དང་། །སེམས་ཅན་དོན་ལ་ལྟོས་མེད་པ། །འདོད་ཆེན་མུ་སྟེགས་ཉན་ཐོས་དང་། །རང་རྒྱལ་རྣམས་ཀྱི་སྒྲིབ་རྣམས་བཞི། །ཞེས་གསུངས་པ་ཡིན་ལ། དེའི་གཉེན་པོ་ཡང་དག་པའི་རྒྱུ་ཐེག་པ་ཆེན་པོའི་ཆོས་ལ་མོས་པ་དང་། ཤེས་རབ་ཀྱི་བདག་མེད་པར་རྟོགས་པ་དང་། ནམ་མཁའི་མཛོད་ལ་སོགས་པའི་ཏི ང་ངེ་འཛིན་ནི་བསྒོམ་པ་དང་། འཁོར་བ་ཇི་སྲིད་དུ་འཇུག་པའི་སྙིང་རྗེ་ཆེན་པོ་སྟེ། དག་རྒྱུ་ལྷག་པར་མོས་པ་ལས། །སོགས་པའི་ཆོས་ནི་རྣམ་བཞི་ཉིད། །ཞེས་བྱའོ། །འདི་རྣམས་ནི་ས་བོན་དང་། མ་དང་མངལ་གྱི་གནས་བདེ་བ་དང་། འཚོ་སྐྱོང་བྱེད་པའི་མ་མ་ལྟ་བུར་རྒྱུ་མཐུན་པའི་རབ་ཏུ་ཟབ་པའི་ཆོས་ཀྱི་སྐུ་བསྒྲུབ་པར་བྱེད་པ་སྟེ། མདོ་སྡེ་རྒྱན་ལས། ཆོས་ལ་མོས་པ་ས་བོན་དང་། །ཕ་རོལ་ཕྱིན་མཆོག་མ་ལས་སྐྱེས། །བསམ་གཏན་ལས་བྱུང་བདེ་བ་མངལ། །སྙིང་རྗེས་བསྐྱེད་པ་མ་མའོ། །ཞེས་གསུངས་སོ། །བྱང་ཆུབ་སེམས་དཔའ་ལས་དང་པོ་པ་ཡང་དེ་བཞིན་ཉིད་འབྲས་བུ་རྟོགས་པའི་མཚན་མས་མ་དག་པ་ས་བདུན་པ་དང་། དག་པ་ས་གསུམ་གྱི་སྐབས་སུ་སྒྲིབས་ཏེ། དེ་རྣམས་ཀྱི་གང་ལ་མཚན་མར་འཛིན་པ་དེ་སྤང་བའི་ཕྱིར། སྤང་བྱ་དང་གཉེན་པོའི་རྣམ་པར་བཞག་པ་ཤེས་པར་བྱའོ། །འདི་ཡང་བླ་མ་པ་ཚབ་ལོཙྪ་བའི་དབུ་མའི་སྙིང་པོ་བསྡུས་པ་ལས། བདེན་གཉིས་ཟུང་འབྲེལ་ཡུལ་ནི་ཤེས་བྱ་དང་། །ཡུལ་ཅན་ཚོགས་གཉིས་ཟུང་འབྲེལ་ལམ་དང་ནི། །སྐུ་གཉིས་ཟུང་འབྲེལ་འབྲས་བུའི་དབུ་མ་སྟེ། །འཕགས་དགོངས་གསལ་མཛད་ཟླ་གྲགས་གཞུང་ལ་གནས། །ཞེས་གསུངས་པ་ལྟར་ཡུལ་བདེན་པ་གཉིས་ནི་ཤེས་བྱའི་གཞིའོ། །ཤེས་པར་བྱེད་པའི་བློ་ཡང་དག་པས་འཇལ་བ་ནི་ཐ་སྙད་ལ་རག་ལས་པས། ཐ་སྙད་པའི་བདེན་པ་གཉིས་སོ། །དེ་ལ་བརྟེན་ནས་ཡང་དག་པའི་ཤེས་པ་སྐྱེས་ཏེ། དེས་སྤང་བྱ་དང་བླང་བྱ་རྟོགས་ནས་བསོད་ནམས་དང་ཡེ་ཤེས་ཀྱི་ཚོགས་མཐར་ཕྱིན་པས། འབྲས་བུ་ཆོས་ཀྱི་དབྱིངས་དྲི་མ་མེད་པའི་ཆོས་སྐུ་དང་། དེའི་རྒྱུ་མཐུན་པ་རབ་ཏུ་ཟབ་པའི་ཆོས་སྐུ་སྟེ། གཟུགས་སྐུ་གཉིས་འགྲུབ་པ་ནི། བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱི་དགོངས་པ་གཞི་ལམ་འབྲས་བུའི་དོན་ཡིན་ནོ། །དེ་ལ་ཤེས་བྱའི་བདེན་པ་གཉིས་ཀྱི་དོན་ནི་ཀུན་རྫོབ་གཉིས་སུ་སྣང་བའི་རང་ངོ་ཆུ་ཟླ་ལྟར་སྣང་བ་ནི་ཀུན་རྫོབ་ཀྱི་བདེན་པ་ཡིན་ལ། སྣང་བ་ཙམ་དེ་ཉིད་རང་བཞིན་གྱིས་སྤྲོས་པ་ཐམས་ཅད་བྲལ་བར་བཞུགས་པ་ནི་དོན་དམ་པའི་བདེན་པ་སྟེ། དེ་ཉིད་དང་གཞན་ལས་རྣམ་པར་གྲོལ་བ་ཡིན་ནོ། །དེ་ལྟར་ཡང་དབུ་མ་རྩ་བ་ལས། རྟེན་ཅིང་འབྲེལ་འབྱུང་གང་ཡིན་པ། །དེ་ནི་སྟོང་པ་ཉིད་དུ་བཤད། །དེ་ནི་རྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་རྟེན་ཅིང་འབྲེལ་བར་འབྱུང་བ་མ་ཡིན་པའི་ཆོས་རྣམས་ངོ་བོ་ཉིད་ཀྱིས་སྐྱེ་བ་མེད་ཅིང་འགག་པ་མེད་པར་གནས་པ་ཉིད་དོ། །དེའི་ཕྱིར་ཆོས་ཐམས་ཅད་ངོ་བོ་ཉིད་མེད་པ་ཞེས་བྱ་སྟེ། འཁོར་བ་དང་མྱ་ངན་ལས་འདས་པའི་ཆོས་རྣམས་སྣང་བ་ཙམ་ལས་གཞན་སྤྲོས་པའི་མཐའ་བརྒྱད་དང་བྲལ་བའི་ཕྱིར། ཚུལ་འདི་ལ་དགོངས་པ་ངེས་པར་འགྲེལ་པ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དོ། །ཞེས་གསུངས་པ་དང་། ཡེ་ཤེས་རྡོ་རྗེ་ཀུན་ལ་བཏུས་པ་ལས་ཀྱང་། ཀུན་རྫོབ་ནི་གཉིས་སུ་སྣང་བའོ། །བདེན་པ་ནི་ཆུ་ཟླ་ལྟ་བུའོ། དོན་དམ་པའི་བདེན་པ་ནི་མཚན་མ་ཐམས་ཅད་དང་བྲལ་བས་ཏེ། དེའི་གནས་ནི་སྟོང་པ་ཉིད་བཅོ་བརྒྱད་དོ། །ཞེས་གསུངས་སོ། །འདི་ནི་སོ་སོའི་སྐྱེ་བོ་རྣམས་ཀྱིས་བསམ་གྱིས་མི་ཁྱབ་པ་ཉིད་ཡིན་ཀྱང་། འདི་ལ་འཇུག་པར་བྱ་བའི་ཕྱིར། ཐ་སྙད་ལ་བརྟེན་ནས་རྟོགས་པར་བྱ་བའི་ཕྱིར། ཐ་སྙད་པའི་བདེན་གཉིས་ནི། དབུ་མ་རྩ་བ་ལས། སངས་རྒྱས་རྣམས་ཀྱི་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །གང་དག་བདེན་པ་དེ་གཉིས་ཀྱི། །རྣམ་དབྱེ་རྣམ་པར་མི་ཤེས་པས། །དེ་དག་སངས་རྒྱས་བསྟན་པ་ཡི། །ཟབ་མོའི་དེ་ཉིད་རྣམ་མི་ཤེས། །ཞེས་གསུངས་ཤིང་། དེའི་རང་འགྲེལ་ག་ལ་འཇིགས་མེད་ནས། འཇིག་རྟེན་པའི་ཀུན་རྫོབ་བདེན་པ་ཞེས་བྱ་བ་ནི། ཆོས་རྣམས་ངོ་བོ་ཉིད་ཀྱིས་སྟོང་པ་ལ་འཇིག་རྟེན་གྱི་ཕྱིན་ཅི་ལོག་མ་རྟོགས་པས་ཆོས་ཐམས་ཅད་སྐྱེ་བར་མཐོང་བ་གང་ཡིན་པས་ཏེ། དེ་ནི་དེ་དག་ཉིད་ལ་ཀུན་རྫོབ་ཏུ་བདེན་པ་ཉིད་ཡིན་པས་ཀུན་རྫོབ་ཀྱི་བདེན་པ་ཞེས་བྱའོ། །དོན་དམ་པའི་བདེན་པ་ནི། འཕགས་པ་རྣམས་ཀྱིས་ཕྱིན་ཅི་མ་ལོག་པ་ཐུགས་སུ་ཆུད་པས་ཆོས་ཐམས་ཅད་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་ཉིད་ལས། དོན་དམ་པར་བདེན་པ་ཉིད་ཡིན་པས། དོན་དམ་པའི་བདེན་པའོ་ཞེས་གསུངས་ཏེ། འདི་ནི་འཕགས་པ་བྱམས་པས་ཆོས་ཉིད་རྣམ་པར་འབྱེད་པར། གཉིས་དང་ཇི་ལྟར་མངོན་པར་བརྗོད་པ་ནི་ཡང་དག་པ་མ་ཡིན་པའི་ཀུན་ཏུ་རྟོག་པ་སྟེ། ཆོས་ཀྱི་མཚན་ཉིད་དོ། །བཟུང་བ་དང་། འཛིན་པ་དང་། བརྗོད་པར་བྱ་བ་དང་། བརྗོད་པར་བྱེད་པ་ཁྱད་པར་མེད་པ་ནི་དེ་བཞིན་ཏེ་ཆོས་ཉིད་ཀྱི་མཚན་ཉིད་དོ། །ཞེས་གསུངས་པ་དང་དོན་གཅིག་སྟེ། ཐ་སྙད་ཀྱི་མཚན་ཉིད་གཉིས་སུ་བརྗོད་ལ། ངོ་བོས་ནི་ཆོས་ཐམས་ཅད་ངོ་བོ་ཉིད་མེད་པ་ཞེས་བྱ་བ་དང་། དམ་པའི་དོན་ནི་གཅིག་པུའོ། །ཞེས་པ་ཡིན་ནོ། །སློབ་དཔོན་ཡེ་ཤེས་སྙིང་པོས་ཀྱང་། ཇི་ལྟར་སྣ་བ་འདི་ཁོ་ན། །ཀུན་རྫོབ་གཞན་ནི་གཅིག་ཤོས་ཡིན། །ཞེས་བསྟན་ཏོ། །ཐ་སྙད་ཀྱི་མཚན་ཉིད་ཐ་སྙད་ཀྱང་བཤད་ལ། དོན་དམ་པར་ཐ་དད་དུ་བྱར་མེད་པའི་དོན་ཉིད་འགལ་ལོ་སྙམ་དུ་སེམས་ན་ནི་ལོག་པར་རྟོགས་པ་ཡིན་ཏེ། འདི་ལ་ནི་བྱ་བ་ཅུང་ཟད་ཀྱང་མེད་དེ། གང་བྱས་པ་ནི་མི་རྟག་པ་ཞེས་བྱ་བ་དང་། བདག་མ་དམིགས་པས་བདག་མེད་ཅེས་བརྗོད་པ་སྟེ། བདག་བརྗོད་པ་ན་མེད་པ་དང་། འགལ་ལོ་ཞེས་བྱ་བ་བཞིན་ནོ། །གཞན་ཡང་སློབ་དཔོན་ཟླ་བ་གྲགས་པས་ཀྱང་། གཅིག་དང་དུ་མ་སྤངས་པ་ཡི། །དངོས་པོ་གང་ཡང་མི་གནས་ཏེ། །ཕན་ཚུན་སྤངས་ཏེ་གནས་ཕྱིར་རོ། །མངོན་སུམ་ལ་སོགས་འགལ་ཞེ་ན། །མ་ཡིན་མ་བརྟགས་ཉམས་དགའ་བ། དེ་ནི་བདག་གིས་བཀག་པ་མེད། །ཞེས་བཤད་དོ། །འདི་ལྟར་དོན་དམ་པར་གནས་པ་དང་། དེའི་ཚུལ་མཐོང་བས་དོན་དམ་པ་དང་། བསྒྲུབ་པས་དོན་དམ་པ་དང་། དྲི་མ་དང་བྲལ་བས་དོན་དམ་པ་ཞེས་གཞུང་འདིར་རྒྱ་ཆེར་སྟོན་ཅིང་། རིག་པ་དྲུག་ཅུ་པ་ལས་ཀྱང་། འཁོར་བ་དང་ནི་མྱ་ངན་འདས། །ཁྱད་པར་ཅུང་ཟད་ཡོད་མ་ཡིན། །ཞེས་བྱ་བ་ནི་ཡོངས་སུ་གྲུབ་པས་ཏེ། དོན་དམ་པའོ། །གང་ལ་བརྟེན་ནས་དངོས་པོ་རྣམས། །ཆུ་ཡི་ཟླ་བ་ལྟ་བུར་ནི། །ཡང་དག་མ་ཡིན་ལོག་མིན་པར། །ཤེས་པ་དེ་དག་ལྟས་མི་འཕྲོག །ཞེས་པ་ནི་མཐོང་བ་དང་བསྒྲུབ་པ་དོན་དམ་པའོ། །དངོས་པོ་གཟུགས་བརྙན་ལྟ་བུ་ནི། །ཡེ་ཤེས་མིག་གིས་མ་མཐོང་བའི། །བདག་ཉིད་ཆེན་པོ་དེ་དག་ནི། །ཡུལ་གྱི་འདམ་ལ་མི་ཆགས་སོ། །ཞེས་བྱ་བ་ནི་ཐོབ་པ་དོན་དམ་པའོ། །གཞན་ཡང་རྣམ་གྲངས་ཀྱི་དོན་དམ་པ་ཡང་། ང་ལ་བསྒྲུབ་བྱ་མེད་པས་ན། །ང་ནི་ཅི་ཡང་མི་འགོག་གོ །ཞེས་པ་དང་། འདི་རྟེན་འདི་འབྱུང་ཞེས་བྱ་བའི། །འཇིག་རྟེན་བསྒྲུབ་འདི་འགོག་མི་བྱེད། །རྟེན་འབྱུང་གང་དེ་རང་བཞིན་མེད། །ཇི་ལྟར་དེ་ཡོད་གང་དེ་ཡང་དག་ངེས། །ཞེས་སྟོང་ཉིད་བདུན་ཅུ་པ་ལས་གསུངས་པས། རིགས་པ་ལས་གྲགས་པ་དང་། འཇིག་རྟེན་ལས་གྲགས་པའི་དོན་དམ་ཡང་བསྟན་ཏེ། འདི་རྣམས་ནི་དོན་གྱི་རྣམ་གྲངས་རྣམས་བརྗོད་པ་ཡིན་ནོ། །འདི་ལྟར་དབུས་མཐའ་ལས་ཀྱང་། དོན་དང་ཐོབ་དང་བསྒྲུབ་པས་ནི། །དོན་དམ་རྣམ་པ་གསུམ་དུ་བརྗོད། །འགྱུར་མེད་ཕྱིན་ཅི་མ་ལོག་པ། །ཡོངས་སུ་གྲུབ་པ་རྣམ་པ་གཉིས། །ཅིག་གིས་འཇིག་རྟེན་གྲགས་པ་སྟེ། །གསུམ་གྱིས་རིགས་པའི་གྲགས་པའོ། །རྣམ་དག་སྤྱོད་ཡུལ་གཉིས་ཡིན་ཏེ། །གཅིག་པུ་ཁོ་ནས་བརྗོད་པ་ཡིན། །ཞེ་གསུངས་སོ། །འདི་རྣམས་ཀྱང་གཞི་ལམ་འབྲས་བུའི་གནས་སྐབས་གསུམ་ལ་ལྟོས་ཏེ་དང་པོ་གསུམ་མོ། །བདེན་པ་གཉིས་ཀྱི་རང་གི་མཚན་ཉིད་ཀྱིས་འགྱུར་བ་མེད་པ་དང་ཕྱིན་ཅི་མ་ལོག་པ་གཉིས་སོ། །འཇིག་རྟེན་པ་དང་རིགས་པའི་གྲགས་པ་ནི། ཀུན་རྫོབ་བདེན་པའི་བྱེ་བྲག་སྟེ། འདི་ལ་དགོངས་ནས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་དོན་བྱེད་དག །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་བདེན་པ་གཉིས་གསུངས་ཏེ། དོན་བྱེད་ནུས་པ་ནི་བསླུ་བ་མེད་པའི་ཤེས་པའོ། །དོན་བྱེད་མི་ནུས་པ་ནི་བསླུ་བར་བྱེད་པའོ། །འདི་ལས་ནི་བསླུ་བ་དང་མི་བསླུ་བ་ཉིད་དུ་ངེས་པས་དོན་ལ་འཇུག་པར་འགྱུར་ཏེ། དེའི་ཕྱིར་རྟག་པ་རྣམ་པར་བཞག་པ་ཡང་སྟོན་ལ། བདེན་པ་དང་མི་བདེན་པ་དང་། དངོས་པོ་དང་དངོས་པོ་མེད་པར་ཞེན་པ་ཐམས་ཅད་འགོག་པར་བྱེད་པ་ནི། དབུ་མའི་དོན་ཡིན་ནོ། །བདེན་པ་བསྟན་པའི་གོ་རིམ། རིག་པ་དྲུག་ཅུ་པ་ལས། ལས་ཀྱི་འབྲས་བུ་ཡོད་པ་དང་། །འགྲོ་བ་དག་ཀྱང་ཤིན་ཏུ་བརྗོད། །དེ་ཡི་རང་བཞིན་ཡོང་ཤེས་དང་། །རྣམ་པར་དབེན་པ་དག་ཀྱང་བསྟན། །ཞེས་གསུངས་སོ། །འདི་ལྟར་བདེན་པ་གཉིས་ཀྱི་རང་གི་ངོ་བོ་དང་རྣམ་པར་དབྱེ་བ་དང་གོ་རིམ་ཁོང་དུ་མ་ཆུད་པར་ཕྱོགས་གཅིག་ངག་ཏུ་བརྗོད་པས་རྒོལ་བ་དང་ཕྱིར་རྒོལ་བ་དག་ནི། བ་གླང་ཞེས་བྱ་བའི་སྒྲ་ལ་མི་བླུན་པོ་དག་བདག་ཏུ་བཟུང་ནས་ཁྲོ་བར་བྱེད་པ་དང་མཚུངས་པར་འགྱུར་བ་དེ་ལྟར་མ་བྱེད་ཅིག དེ་ལྟར་ཡུལ་དང་ཡུལ་ཅན་གྱི་བདེན་པ་བསྟན་པ་དེ་ཡང་ལམ་བསྒྲུབ་པ་ན་ཚོགས་གཉིས་ཏེ། བསོད་ནམས་ཀྱི་ཚོགས་ནི་ཀུན་རྫོབ་ཀྱི་བདེན་པ་ཡིན་ལ། ཡེ་ཤེས་ཀྱི་ཚོགས་ནི་དོན་དམ་པ་ལ་བརྟེན་པ་ཡིན་ནོ། །དེ་ཡང་སྦྱིན་པ་དང་ཚུལ་ཁྲིམས་ནི་བསོད་ནམས་ཀྱི་ཚོགས་དང་། ཤེས་རབ་ནི་ཡེ་ཤེས་ཀྱི་ཚོགས་ཏེ། བཟོད་པ་དང་བརྩོན་འགྲུས་བསམ་གཏན་གསུམ་གཉིས་ཀར་འགྱུར་ལ། ཤེས་རབ་ཀྱིས་བཟུང་ན་ཐམས་ཅད་ཀྱང་ཡེ་ཤེས་ཀྱི་ཚོགས་ཡིན་ནོ། །དེ་ཡང་མདོ་སྡེ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱིས། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀས་ཏེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་བཤད་དོ། །འདི་རྣམས་རྒྱས་པར་ནི་དབུ་མ་རིན་པོ་ཆེའི་ཕྲེང་བ་དང་། སློབ་དཔོན་དཔའ་བོས་ཕ་རོལ་དུ་ཕྱིན་པ་བསྡུས་པ་དང་། མདོ་སྡེ་རྒྱན་གྱི་ཕ་རོལ་དུ་ཕྱིན་པའི་སྐབས་ལས་བཤད་པ་ལྟར་ཤེས་ནས་མདོ་ལ་འཇུག་པར་བྱའོ། །དེ་ལྟར་གཞི་དང་ལམ་གྱི་བདེན་པ་ལ་བརྟེན་ནས། འབྲས་བུ་སྐུ་གཉིས་ཟུང་འབྲེལ་ནི། རྣམ་པར་མི་རྟོག་པའི་ཡེ་ཤེས་མཉམ་པར་བཞག་པའི་རང་གི་ངོ་བོས་ཡོན་ཏན་སུམ་ཅུ་རྩ་གཉིས་འཕྲིན་ལས་དང་བཅས་པ་ནི་ཆོས་སྐུ་ཡིན་ལ། དེ་ཉིད་ཀྱི་རྗེས་ལས་ཐོབ་པའི་ཡེ་ཤེས་ཀྱི་མིང་ཅན་ཇི་སྙེད་པ་མཁྱེན་པ་ཡོན་ཏན་སུམ་ཅུ་རྩ་གཉིས་འཕྲིན་ལས་དང་བཅས་པ་ནི་གཟུགས་སྐུ་ཞེས་དབུ་མའི་གཞུང་ལས་གྲགས་ཏེ། སངས་རྒྱས་རྣམས་ཀྱི་གཟུགས་སྐུ་འདི། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་ཐོབ་པའི་རྒྱུ། །ཞེས་བྱ་བ་དང་། རྒྱ་ཆེར་རྒྱུད་བླ་མ་དང་། སློབ་དཔོན་ཟླ་བ་གྲགས་པས་ཀྱང་། དབུ་མ་འཇུག་པར་བསྟན་ཏོ། །ཚུལ་འདིས་ཀུན་རྫོབ་ནི་རྫུན་པ་མི་རྟག་པ། བསླུ་བར་བྱེད་པ་སྒྱུ་མ་དང་མཚུངས་པའི་ཕྱིར། རྣམ་པར་ཤེས་པའི་ཚོགས་བརྒྱད་ཀྱིས་བསྡུས་པའི་ཁམས་གསུམ་གྱི་སེམས་ཅན་རྣམས་ཀྱི་གནས་དང་དོན་དང་ལུས་སུ་སྣང་བ་རྣམས་ཏེ། ཡང་དག་པ་མ་ཡིན་པའི་ཀུན་ཏུ་རྟོག་པ་ཙམ་མོ། །འདི་ནི་དབུས་མཐའ་ལས་ཀྱང་། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །གཅིག་ནི་རྐྱེན་གྱི་རྣམ་པར་ཤེས། །གཉིས་པ་ཉེ་བར་སྤྱོད་པ་ཅན། །ཉེ་བར་སྤྱོད་དང་ཡོངས་གཅོད་དང་། །དེ་ཡི་འཇུག་བྱེད་སེམས་ལས་བྱུང་། །ཞེས་གསུངས་སོ། རྣམ་པར་ཤེས་པ་འདི་རྣམས་ནི་ཡང་དག་པ་མ་ཡིན་པའི་ཀུན་རྟོག་ལ་བརྟེན་ནས་བྱུང་བའི་ཕྱིར། བདེན་པ་མ་ཡིན་ལ། རྟེན་ཅིང་འབྲེལ་པར་འབྱུང་ཞིང་སྣང་བའི་ཕྱིར་མེད་པ་ཡང་མ་ཡིན་པས་གཞན་དབང་ཞེས་བྱའོ། །དེ་ལ་བརྟེན་ནས་ཇི་ལྟར་བརྗོད་པའི་དོན་དང་། དེའི་འདུ་ཤེས་དང་། བག་ཆགས་དང་། དོན་ལྟར་སྣང་བ་སྨིག་སྒྱུ་ལྟ་བུ་རྣམས་འབྱུང་བ་ནི་ཀུན་བརྟགས་ཞེས་བྱ་སྟེ། མེད་པ་ལ་ཡོད་པར་བརྟགས་པའི་ཕྱིར་རོ། །འདི་ལྟར་འཁྲུལ་པའི་རྩ་བ་ནི་དྲི་མ་མེད་པའི་ཆོས་དབྱིངས་རང་གིས་རང་མ་རིག་པ་ཙམ་ལས་བདེན་པར་གྲུབ་པ་ཅུང་ཟད་ཀྱང་མེད་པའི་ཕྱིར། རིགས་པ་དྲུག་ཅུ་པ་ལས། མ་རིག་འགག་པར་གྱུར་ན་ནི། །གང་རྣམས་འགག་པར་འགྱུར་ན་ནི། །དེ་དག་མི་ཤེས་ཀུན་བརྟགས་པར། །ཅི་ཡི་ཕྱིར་ན་གསལ་མི་འགྱུར། །ཞེས་པ་དང་། བྱང་ཆུབ་སེམས་འགྲེལ་ལས་ཀྱང་། ཀུན་བརྟག་དང་ནི་གཞན་དབང་དང་། །ཡོངས་སུ་གྲུབ་པ་འདི་ཉིད་ནི། །སྟོང་ཉིད་བདག་ཉིད་གཅིག་པུ་ཡི། །ངོ་བོ་སེམས་ལ་གདགས་པ་ཡིན། །ཞེས་བྱུང་ངོ་། །འོ་ན་ཡོངས་སུ་གྲུབ་པ་ཇི་ལྟར་སེམས་ལ་བརྗོད་ཅེ་ན། ཆོས་ལ་བདག་ཉིད་མཉམ་པ་ཉིད། །སེམས་ནི་གདོད་ནས་མ་སྐྱེས་ཏེ། །སངས་རྒྱས་ཀྱིས་ནི་མདོར་བསྡུས་གསུངས། །ཞེས་པ་དང་། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེ་བོ་དེ་དོན་མེད། །དེ་མེད་པས་ན་དེ་དོན་མེད། །ཀུན་བརྟགས་དང་ནི་གཞན་དབང་དང་། །ཡོངས་སུ་གྲུབ་པ་ཉིད་ཀྱང་ནི། །དོན་ཕྱིར་ཡང་དག་མིན་རྟོག་ཕྱིར། །གཉིས་པོ་མེད་པའི་ཕྱིར་བཤད་དོ། །ཞེས་རྣལ་འབྱོར་སྤྱོད་པའི་གཞུང་ལས་ཀྱང་བསྟན་པས། གང་གི་ཚེ་སེམས་དང་སེམས་ལས་བྱུང་བའི་བཟུང་འཛིན་གྱི་རྣམ་པར་རྟོག་པ་ཐམས་ཅད་དག་ཅིང་ཞི་ན་སངས་རྒྱས་ཀྱི་ཡེ་ཤེས་ཞེས་བྱ་བ་སྣང་བར་མཛད་དོ། །བསམ་གྱིས་མི་ཁྱབ་པར་བསྟོད་པ་ལས་ཀྱང་། དེས་ན་རྟེན་ཅིང་འབྲེལ་པར་འབྱུང་། །དེ་ཉིད་སྟོང་པར་ཁྱོད་བཞེད་ལག །དམ་པའི་ཆོས་ཀྱང་དེ་ལྟ་བུ། །དེ་བཞིན་གཤེགས་ཀྱང་དེ་དང་མཚུངས། །ཆོས་དབྱིངས་དེ་ནི་དོན་དམ་དང་། །དེ་བཞིན་ཉིད་དང་རྗེས་སུ་བཞེད། །དེ་ནི་ཡང་དག་མི་བསླུ་བ། །དེ་རྟོགས་པས་ན་སངས་རྒྱས་བརྗོད། ། ཞེས་གསུངས་ཏེ། དེས་ན་འཁོར་བའི་རྒྱུད་དག་པས། མྱ་ངན་ལས་འདས་པའི་སྒྲར་བརྗོད་པ་འདི་འགལ་བ་མེད་དོ། །རིགས་པའི་ཚོགས་ལས། མཚན་མར་ཞེན་པ་འགོག་པར་མཛད་ཀྱི་སངས་རྒྱས་དང་ཆོས་ཀྱི་ཚུལ་བསྟན་པ་དང་། ཡེ་ཤེས་དང་། ཐུགས་རྗེ་ཆེན་པོ་དང་། སངས་རྒྱས་ཀྱི་འཕྲིན་ལས་རྨད་དུ་བྱུང་བ་དགག་པ་མི་མཛད་མོད་ཀྱི། སོ་སོའི་སྐྱེ་བོ་ཡེ་ཤེས་ཀྱི་མིག་མདོངས་པ་དག་གཞན་དུ་རྟོག་པར་བྱེད་དོ། །འཁོར་བའི་གནས་ལུགས་འཁོར་བ་དང་། གང་དུ་འཁོར་བ་དང་། དེ་ཉིད་རྒྱུ་དང་འབྲས་བུར་རྣམ་པར་བཞག་པ་དང་། དེ་ཡང་རང་བཞིན་གྱིས་རྣམ་པར་དག་པ་དང་། ཕན་ཚུན་རྟེན་འབྲེལ་ཆེན་པོར་བསྟན་པ་དག་པ་དང་བཅས་པ་རྣམས་ནི། འཕགས་པ་ཀླུ་སྒྲུབ་ཉིད་ཀྱིས་མཛད་པའི་རྟེན་འབྲེལ་བཤད་པ་ལས་རྒྱ་ཆེར་གསུངས་པས་འདིར་མ་བྲིས་པས་དེ་ཉིད་ལས་རྟོགས་པར་གྱིས་ཤིག འདིར་ནི་བཟུང་བ་དང་འཛིན་པའི་དྲི་མ་ཅན་གྱི་རྣམ་པར་ཤེས་པ་དག་པའི་རང་གི་ངོ་བོ་སྟོན་པའི་སྐབས་ཡིན་པས། མདོར་བསྟན་པའི་ཚིགས་སུ་བཅད་པ་འདིའི་སྤྱི་དོན་བརྗོད་པར་བྱའོ། །གཉིས་པ་རྒྱས་པར་བཤད་པ་དཔེ་དང་སྦྱར་ཏེ་བསྟན་པ་ལ་བདུན་ཏེ། དང་པོ་མར་གྱི་དཔེས་ཆོས་ཀྱི་དབྱིངས་མི་སྣང་བ་དང་། སྣང་བའི་ཚུལ་ནི་ཚིགས་སུ་བཅད་པ་གཉིས་ཏེ། ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་བ། །དེ་བཞིན་ཉོན་མོངས་དང་འདྲེས་པས། །ཆོས་ཀྱི་དབྱིངས་ཀྱང་མི་མཐོང་ངོ་། །ཞེས་སེམས་ཉིད་ཉོན་མོངས་པའི་ཆུ་དང་ལྷན་ཅིག་ཏུ་གནས་པ་ནི་འོ་མ་ལྟ་བུ་སྟེ། ཆུ་ཡིས་གོས་པ་མེད་པའི་མར་ནི་མ་དམིགས་པ་ཙམ་དུ་ཟད་ཀྱི། འོ་མ་ལ་མར་མེད་པ་ནི་མ་ཡིན་ནོ། །དེ་བཞིན་དུ་ཆོས་ཀྱི་དབྱིངས་སུ་བརྗོད་པའི་སངས་རྒྱས་ཉིད་མ་དམིགས་པ་ཙམ་དུ་ཟད་ཀྱི། སེམས་ཅན་ཐམས་ཅད་ལ་མེད་པ་ནི་མ་ཡིན་ཏེ། དེའི་ངེས་པ་ནི། ཕལ་ཆེན་ལས། གང་ལ་དེ་བཞིན་གཤེགས་པའི་ཡེ་ཤེས་མཐའ་དག་རྗེས་སུ་མ་ཞུགས་པའི་སེམས་ཅན་གྱིས་རིས་ན་འགའ་ཡང་མེད་དོ། །འོན་ཀྱང་འདུ་ཤེས་ཀྱི་འཛིན་པས་དེ་བཞིན་གཤེགས་པའི་ཡེ་ཤེས་མི་མཐོང་ངོ་། །འདུ་ཤེས་ཀྱི་འཛིན་པ་དང་བྲལ་བས་ནི་ཐམས་ཅད་མཁྱེན་པའི་ཡེ་ཤེས་རང་བྱུང་གི་ཡེ་ཤེས་ཐོགས་པ་མེད་པ་རབ་ཏུ་འབྱུང་ངོ་། །ཀྱེ་རྒྱལ་བའི་སྲས་དག་འདི་ལྟ་སྟེ། ཞེས་སྟོང་གསུམ་དར་ཡུག་ཆེན་པོའི་དཔེས་རྒྱས་པར་གསུངས་སོ། །དེའི་ཕྱིར། ཇི་ལྟར་འོ་མ་རྣམས་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམས་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཞེས་བསྲུབ་པ་ལ་སོགས་པའི་རྐྱེན་གྱིས་ཆུ་དང་མར་སོ་སོར་སྣང་བ་བཞིན་དུ། ལམ་རྣམ་པར་བསྒྲུབ་པའི་རྐྱེན་ལས་བསྒྲིབ་པ་གསལ་བས། སངས་རྒྱས་སུ་སྣང་བར་བརྗོད་ཀྱི། བདག་དང་གཞན་དང་གཉིས་ཀ་དང་། རྒྱུ་མེད་པ་ལས་བྱུང་བ་མ་ཡིན་ནོ། །རྒྱས་བཤད་གཉིས་པ་བུམ་ནང་གི་མར་མེའི་དཔེས་སེམས་ཅན་དང་། ལམ་དང་། སངས་རྒྱས་ལ་ཡེ་ཤེས་སྣང་བའི་རིམ་པ་བསྟན་པ་ནི། ཚིགས་སུ་བཅད་པ་གསུམ་ལས། དང་པོ་ནི། སེམས་ཅན་གྱི་གནས་སྐབས་ནི། ཇི་ལྟར་མར་མེ་བུམ་ནང་ན། །ཅུང་ཞིག་སྣང་བར་མི་འགྱུར་བར། །ཞེས་བྱ་བ་ནི་དཔེ་བརྗོད་པའོ། །དེ་བཞིན་ཉོན་མོངས་བུམ་ནང་ན། །ཆོས་ཀྱི་དབྱིངས་ཀྱང་མི་མཐོང་ངོ་། །ཞེས་དོན་བསྟན་ཏེ། འདི་ལ་ཁ་ཅིག་ཆོས་དབྱིངས་ཀྱི་སྒྲ་འདིས་སྟོང་པ་ཀྱང་དུ་རྟོགས་པར་སྲིད་ན། དེ་ལྟར་མ་ཡིན་ཏེ། འདིར་ཇི་ལྟ་བ་དང་། ཇི་སྙེད་པའི་ཡེ་ཤེས་གཉིས་ཀ་ལ་ཆོས་ཀྱི་དབྱིངས་སུ་དགོངས་སོ། །འདིའི་ངེས་པ་ནི་མདོར་ན་ཟག་མེད་དབྱིངས་ལ་ནི། དོན་གྱི་རབ་ཏུ་དབྱེ་བ་བཞི། །ཆོས་ཀྱི་སྐུ་ལ་སོགས་པ་ཡི། །རྣམ་གྲངས་བཞིར་ནི་རིག་པ་བྱ། །སངས་རྒྱས་ཆོས་དབྱེར་མེད་པ་དང་། །དེ་རིག་དེ་བཞིན་ཉིད་ཐོབ་དང་། །བརྫུན་མེད་བསླུ་མེད་ཆོས་ཉིད་དང་། །གདོད་ནས་རང་བཞིན་ཞི་ཉིད་དོ། །ཞེས་རྒྱུད་བླ་མ་ལས་གསུངས་ཏེ། འབྲས་བུའི་ཆ་ནས། སངས་རྒྱས་ཆོས་དང་དབྱེ་བ་མེད་པ་དང་། རྒྱུའི་ཆ་ནས་རང་བཞིན་དང་། རྒྱས་འགྱུར་གྱི་རིག་དང་། བདེན་པ་གཉིས་ཀྱི་ཆ་ནས། མི་བརྫུན་མི་བསླུ་བའི་ཚད་མ་དང་། སྤངས་པའི་ཆ་ནས་རང་བཞིན་གྱིས་ཞི་བ་དང་། གློ་བུར་གྱིས་ཞི་བ་ཞེས་བསྟན་གྱི། ངོ་བོ་ཐ་དད་པ་མ་ཡིན་ནོ། །རྒྱས་པར་ནི་འགྲིབ་པ་མེད་པ་དང་། འཕེལ་བ་མེད་པའི་མདོ་ལས་གསུངས་སོ། །ལམ་པའི་གནས་སྐབས་བསྟན་པའི་ཕྱིར། ཕྱོགས་ནི་གང་དང་གང་དུ་གནས། །བུམ་པར་བུ་ག་བཏོད་གྱུར་པའི། །དེ་དང་དེ་ཡི་ཕྱོགས་ཉིད་ནས། །འོད་ཀྱི་རང་བཞིན་འབྱུང་བར་འགྱུར། །ཞེས་གསུངས་ཏེ། ཇི་ལྟར་བུམ་པའི་ནང་གི་མར་མེ་བུ་གའི་བྱེ་བྲག་གིས་འོད་ཀྱི་སྣང་བ་ཆུང་ངུ་དང་། འབྲིང་དང་ཆེན་པོ་སྣང་བ་ལྟར། མཐོང་ལམ་མ་དག་ས་བདུན་དང་། དག་པའི་ས་ལ་རྣམ་པར་མི་རྟོག་པ་དང་། སྒྱུ་མ་ལྟ་བུའི་ཏིང་ངེ་འཛིན་གྱིས་ཡེ་ཤེས་རྣམ་པ་གཉིས་ཀྱི་འོད་ཟེར་བརྒྱ་ཕྲག་བཅུ་གཉིས་ཚད་མེད་པའི་བར་དུ། ཇེ་ཆེར་གསལ་བར་འགྱུར་ཏེ། འོག་ནས་བཤད་པ་བཞིན་ནོ་སངས་རྒྱས་ཀྱི་གནས་སྐབས་ནི། གང་ཚེ་ཏིང་འཛིན་རྡོ་རྗེ་ཡིས། །བུམ་པ་དེ་ཉིད་བཅག་གྱུར་པ། །དེ་ཚེ་དེ་ནི་ནམ་མཁའ་ཡིས། མཐར་ཐུག་བར་དུ་སྣང་བར་བྱེད། །ཞེས་གསུངས་ཏེ། གང་གི་ཚེ་ས་བཅུའི་རྒྱུན་གྱི་ཐ་མར་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་གཉིས་ཀྱི་ལྷག་མ་མ་རིག་པ་བག་ཆགས་ཀྱི་ས་ཞེས་བྱ་བ་ལས། ཟག་བཅས་ཟག་མེད་འདུ་བྱེད་པའི་ལས་དང་། ཕན་ཚུན་བརྟེན་ནས་འབྱུང་བའི་རྣམ་པར་ཤེས་པའི་བུམ་པ་བཅག་པར་གྱུར་པའི་ཚེ་སྒྲིབ་པ་གཉིས་དང་བྲལ་བའི་ཡེ་ཤེས་འཕྲིན་ལས་ཀྱི་འོད་འཕྲོ་བ་ནམ་མཁའི་མཐར་གཏུགས་པ་སྣང་བར་འགྱུར་རོ། དེ་སྐད་དུ་ཡང་། རྡོ་རྗེ་ལྟ་བུའི་ཏིང་ངེ་འཛིན། །རྟོག་པས་མི་ཤིག་ཐོབ་ནས་ནི། །གནས་གཞན་གྱུར་པ་མཐར་ཐུག་པ། །སྒྲིབ་པ་ཀུན་གྱི་དྲི་མེད་དང་། །གང་ལ་གནས་ནས་སེམས་ཅན་དོན། །ཕན་ཕྱིར་རབ་ཏུ་བསྒྲུབ་བྱེད་པ། །རྣམ་པ་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པ་ཐོབ། །ཞེས་མདོ་སྡེ་རྒྱན་ལས་ཀྱང་གསུངས་པ་ཡིན་ནོ།། །།གསུམ་པ་སྐྱེ་འགག་དང་བྲལ་ཞིང་མི་འགྱུར་བའི་དོན་ནི། དེ་ལྟར་གནས་སྐབས་གསུམ་གྱི་ཁྱད་པར་སྣང་བ་ལས། ཡོན་ཏན་ལ་སོགས་པ་རྣམས་གསར་དུ་སྐྱེ་བར་འགྱུར་རམ་སྙམ་པའི་ལོག་རྟོག་བསལ་བའི་ཕྱིར། ཆོས་ཀྱི་དབྱིངས་ནི་སྐྱེ་མ་ཡིན། །ནམ་ཡང་འགག་པར་འགྱུར་བ་མེད། །དུས་རྣམས་ཀུན་ཏུ་ཉོན་མོངས་མེད། །ཐོག་མ་བར་མཐའ་དྲི་མ་མེད། །ཞེས་གསུངས་ཏེ། ཆོས་ཀྱི་དབྱིངས་དེ་བཞིན་གཤེགས་པའི་སྙིང་པོ་ནི་གསར་དུ་སྐྱེ་བ་མ་ཡིན་ཏེ། རྒྱུ་མ་དམིགས་ཤིང་དབེན་པའི་ཕྱིར་རོ། །ནམ་ཡང་འགག་པ་མ་ཡིན་ཏེ། སྐྱེ་བ་མེད་ཅིང་རྐྱེན་དང་བྲལ་བའི་ཕྱིར་རོ། །དུས་ཐམས་ཅད་དུ་ཉོན་མོངས་པས་གོས་པ་མེད་དེ། ཉོན་མོངས་པ་ཐམས་ཅད་ཀྱི་གཉེན་པོར་གྱུར་ཅིང་རྟག་པའི་ཕྱིར་རོ། །དུས་གསུམ་ཀར་རང་བཞིན་གྱིས་དག་སྟེ། གཙང་བ་དམ་པ་ཉིད་ཡིན་པའི་ཕྱིར་རོ། །འདི་ལྟར་རྒྱུ་མཚན་བཞི་པོ་འདིས་ཆོས་ཀྱི་སྐུ་སྤྱིའི་མཚན་ཉིད་རང་བཞིན་གྱིས་དག་པ་དང་། རང་གི་མཚན་ཉིད་དྲི་མ་མེད་པས་དག་པ་ནི། གཙང་བ་དམ་པ་དང་། བདག་ཏུ་རྟོག་པ་དང་། བདག་མེད་པར་རྟོག་པ་མུ་སྟེགས་དང་ཉན་རང་གི་མཐའ་དང་བྲལ་བའི་བདག་དམ་པ་དང་། སྡུག་བསྔལ་དང་། ཀུན་འབྱུང་བ་སྐྱེ་བ་མེད་པ་ལ་དབང་འབྱོར་པ་དང་ལྡན་པའི་ཕྱིར་བདེ་བ་དམ་པ་དང་། གནས་ཐམས་ཅད་དུ་སྐྱེ་འགག་མེད་ཅིང་ངོ་བོ་ཉིད་ཀྱི་འཕྲིན་ལས་རྒྱུན་ཆད་མེད་པས་རྟག་པ་དམ་པ་ཞེས་བྱ་བའི་ཕ་རོལ་དུ་ཕྱིན་པ་བཞི་དང་ལྡན་པ་ཡིན་ཏེ། འདི་རྣམས་ཀྱང་སོ་སོ་སྐྱེ་བོའི་འདུ་ཤེས་ཕྱིན་ཅི་མ་ལོག་པ་འཁོར་བ་ཉེར་ལེན་གྱི་ཕུང་པོ་ལྔ་ལ། གཙང་བ་དང་། བདག་དང་། བདེ་བ་དང་། རྟག་པར་འཛིན་པ་བཞི་དང་། དེའི་གཉེན་པོ་མི་སྡུག་པ་དང་། བདག་མེད་པ་དང་། སྡུག་བསྔལ་བ་དང་མི་རྟག་བསྒོམ་པའི་མཚན་མ་བཞི་དང་། བརྒྱད་པོ་རྣམ་པར་རྟོག་པས་བརྟག་པ་སྐད་ཅིག་པ་མི་བདེན་པས་ན། འདི་རྣམས་ཀྱི་མཐའ་ལས་གྲོལ་བའི་ཕྱིར། བདེན་པ་བརྒྱད་རྟོགས་པས་སངས་རྒྱས་སུ་འགྲུབ་པར་དཔལ་འཕྲེང་གི་མདོར་གསུངས་ཏེ། དེའི་དོན་བསྡུས་ནས། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པའི་འབྲས། །ཞེས་པ་དང་། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། ཞེས་རྒྱུད་བླ་མར་གསུངས་སོ། །དེ་ལྟ་བུ་དེ་དཔེས་བསྒྲུབ་པར་བསྟན་པའི་ཕྱིར། བཞི་པ་སེམས་ཅན་དང་སངས་རྒྱས་ཀྱི་གནས་སྐབས་སུ་ཁྱད་པར་མེད་པར་ནོར་བུའི་དཔེས་བཤད་པ་ནི། ཚིགས་སུ་བཅད་པ་གཉིས་ལས་དཔེ་ཉིད་ནི། ཇི་ལྟར་རིན་ཆེན་བཻ་ཌཱུརྻ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་ན་གནས་གྱུར་ན། །དེ་ཡི་འོད་ནི་གསལ་མ་ཡིན། །ཞེས་གསུངས་ཏེ། བཻ་ཌཱུརྻ་ཆེན་པོ་འོད་དང་། ཁ་དོག་དང་། དགོས་འདོད་སྦྱིན་པར་བྱེད་པ་རྡོའི་ནང་ན་གནས་པ་དང་རྡོ་བ་མེད་པར་རྣམ་པར་སྦྱང་ཞིང་ཕྱིས་པ་གཉིས། ངོ་བོ་ལ་ཁྱད་པར་མེད་ཀྱང་། རྡོ་བའི་ནང་ན་གནས་པའི་ཚེ་འོད་དང་། ཡོན་ཏན་མི་སྣང་ངོ་། དཔེ་དེ་བཞིན་དུ། དེ་བཞིན་ཉོན་མོངས་ཀྱིས་སྒྲིབ་པའི། །ཆོས་དབྱིངས་དྲི་མ་མེད་པའང་། །འཁོར་བ་འོད་ནི་གསལ་མ་ཡིན། །ཞེས་གསུངས་ཏེ། སེམས་ཅན་གྱི་དུས་ན་ཉོན་མོངས་པའི་སྦུབ་བྱེ་བ་མཐའ་ཡས་པས་སྒྲིབ་པའི་ཕྱིར། ཆོས་ཀྱི་དབྱིངས་དྲི་མས་ངོ་བོ་ལ་མ་གོས་ཀྱང་མི་སྣང་ལ། ཡོན་ཏན་དང་འཕྲིན་ལས་ཀྱི་འོད་ཀྱང་མི་གསལ་ལོ། །གང་གི་ཚེ་སྦྱང་བ་མཐར་ཕྱིན་པ་ལས་སྣང་ཞིང་གསལ་བའི་ཕྱིར། མྱ་ངན་འདས་ན་འོད་གསལ་འགྱུར། །ཞེས་བྱ་སྟེ། མྱ་ངན་ལས་འདས་པ་ཆེན་པོ། སངས་རྒྱས་ཐོབ་པའི་ཚེ་ཤིན་ཏུ་དག་པར་འགྱུར་ཏེ། འདི་རྣམ་པར་མི་རྟོག་པ་ལ་འཇུག་པའི་མདོ་ལས། བྲག་གི་དབུས་སུ་གནས་པའི་ནོར་བུའི་དཔེས། ས་དང་། དངུལ་དང་། གསེར་དང་། རིན་པོ་ཆེ་སྣ་ཚོགས་པ་ལྟ་བུའི་རྡོ་བ་རྣམས་བསལ་ནས་བཻ་ཌཱུརྻ་འབྱུང་བ་ལྟར། སྤང་བྱ་དང་། གཉེན་པོ་དང་། དེ་བཞིན་ཉིད་དང་། འབྲས་བུ་རྟོག་པའི་མཚན་མ་བཞི་དག་པས་རྣམ་པར་མི་རྟོག་པའི་ཡེ་ཤེས་ཐོབ་པར་གསུངས་སོ། །དེ་བཞིན་དུ་ས་བཅུ་པ་ལས་ཁམས་སྦྱོང་བ་བཻ་ཌཱུརྻའི་དཔེས། སངས་རྒྱས་ཀྱི་སྙིང་རྗེ་ཆེན་པོ་བསྟན་པའི་མདོ་ལས་ཀྱང་གསུངས་སོ། །ལྔ་པ་ཁམས་དེའི་ངོ་བོ་གསེར་གྱི་དཔེས་བཤད་པ་ནི། ཁམས་ཡོད་པས་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་པས་ནི་ལས་བྱས་ཀྱང་། །ཉོན་མོངས་འབའ་ཞིག་སྐྱེ་བར་ཟད། །ཞེས་གསུངས་ཏེ། ཇི་ལྟར་ས་ཕྱོགས་གང་ན་གསེར་གྱི་ཁམས་ཡོད་པ་དེར་ལས་བྱས་པས་ས་ལེ་སྦྲམ་དག་མཐོང་བར་འགྱུར་གྱི། གསེར་མེད་པའི་ས་ལ་རྐོས་ཀྱང་སྡུག་བསྔལ་བ་ཉིད་དོ། །དེ་བཞིན་དུ་ཉོན་མོངས་པའི་སའི་ནང་ནས་སངས་རྒྱས་ཀྱི་སྙིང་པོ་རྣམ་པར་དག་པ་ཡོད་པས་སྣང་བར་འགྱུར་གྱི་མེད་ན་ཉོན་མོངས་པ་བསལ་ཀྱང་དོན་མེད་པར་འགྱུར་རོ། །ཞེས་བསྟན་པ་ཡིན་ནོ། །དོན་ལ་མདོ་ལས་ཀྱང་། ཇི་ལྟར་རྡོ་ཡི་ཕྱེ་མ་ལ། །ས་ལེ་སྦྲམ་ནི་མི་མཐོང་བ། །ཡོངས་སུ་སྦྱངས་པས་དེ་མཐོང་བཞིན། །འཇིག་རྟེན་ལ་ནི་དེ་བཞིན་གཤེགས། །ཞེས་གསུངས་སོ། །དྲུག་པ་འབྲས་ཤུན་གྱི་དཔེས་ཆོས་ཀྱི་སྐུ་སྣང་བའི་ཚུལ་ནི། ཚིགས་སུ་བཅད་པ་གཉིས་ཏེ། དང་པོ་དཔེ་ཉིད་ནི། ཇི་ལྟར་སྦུན་པས་གཡོག་གྱུར་པར། །སོ་བ་འབྲས་བུ་མི་འདོད་ལྟར། ཞེས་སྦུན་པ་དང་བཅས་པའི་འབྲས་ལ་འདི་ནི་འབྲས་སོ་བའོ། །ཞེས་མིང་དུ་བརྗོད་པ་ལྟར། དེ་བཞིན་ཉོན་མོངས་ཀྱིས་གཡོག་པས། །དེ་ནི་སངས་རྒྱས་ཞེས་མི་བརྟགས། །ཞེས་སེམས་ཅན་གྱི་དུས་ན་ཉོན་མོངས་པའི་སྦུབ་ན་ཆོས་ཀྱི་སྐུ་ཡོངས་སུ་རྫོགས་པར་བཞུགས་ཀྱང་སངས་རྒྱས་ཞེས་མི་བྱ་སྟེ། སེམས་ཅན་གྱི་ཁམས་ཞེས་འདོགས་སོ། །གང་གི་ཚེ། ཇི་ལྟར་སྦུན་པ་ལས་གྲོལ་བས། །འབྲས་ཉིད་སྣང་བར་འགྱུར་བ་ལྟར། །དེ་བཞིན་ཉོན་མོངས་ལས་གྲོལ་ན། །ཆོས་ཀྱི་སྐུ་ཉིད་རབ་ཏུ་གསལ། །ཞེས་གསུངས་ཏེ། ཉོན་མོངས་པ་དང་ཤེས་བྱའི་སྒྲིབ་པའི་སྦུན་པ་དང་བྲལ་བས་དག་པའི་འབྲས་བུ་ཆོས་ཀྱི་སྐུ། ཡོན་ཏན་སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་ཆོས་བཅོ་བརྒྱད་རབ་ཏུ་གསལ་བར་འགྱུར་རོ། །དེ་ལྟར་ཡང་སེམས་ཀུན་ནས་ཉོན་མོངས་པའི་ཕྱིར་སེམས་ཅན་རྣམས་ཉོན་མོངས་ལ། སེམས་རྣམ་པར་བྱང་བའི་ཕྱིར་ནི་རྣམ་པར་དག་པའོ། །ཞེས་དཔལ་འཕྲེང་གི་མདོར་གསུངས་ཞིང་། དབུས་མཐའ་ལས་ཀྱང་། གལ་ཏེ་ཉོན་མོངས་དེ་མ་གྱུར། །ལུས་ཅན་ཐམས་ཅད་གྲོལ་བར་འགྱུར། །གལ་ཏེ་རྣམ་དག་དེ་མ་གྱུར། །འབད་པ་འབྲས་བུ་མེད་པར་འགྱུར། །ཞེས་གསུངས་པས་སེམས་ཅན་གྱི་ཁམས་དང་། སངས་རྒྱས་ཀྱི་སྙིང་པོ་དང་། ཆོས་ཀྱི་དབྱིངས་ཞེས་བྱ་བ། མིང་གི་རྣམ་གྲངས་ཏེ་རྒྱས་པར་རྒྱུད་བླ་མ་ལས་རྟོགས་པར་བྱའོ། བདུན་པ་ཆུ་ཤིང་གི་དཔེས་རྒྱུ་མཐུན་པ་རབ་ཏུ་ཟབ་པའི་ཆོས་ནི། ཚིགས་སུ་བཅད་པ་གཉིས་ལས། ཐོག་མར་དཔེ་ནི། ཆུ་ཤིང་སྙིང་པོ་མེད་དོ་ཞེས། །འཇིག་རྟེན་ན་ནི་དཔེར་བྱེད་ཀྱང་། །དེ་ཡི་འབྲས་བུ་སྙིང་པོ་ཉིད། །དང་པོར་ཟ་བར་བྱེད་པ་ལྟར། །ཞེས་བསྟན་ནས། དོན་ནི་སྙིང་པོ་མེད་པའི་འཁོར་བ་ལས། །ཉོན་མོངས་གཟེབ་དང་བྲལ་གྱུར་ན། །དེ་ཡི་འབྲས་བུ་སངས་རྒྱས་ཉིད། །ལུས་ཅན་ཀུན་གྱི་བདུད་རྩིར་འགྱུར། །ཞེས་གསུངས་ཏེ། འདིས་ནི་གང་དང་བྲལ་བས་གང་ཐོབ་པའི་ཡོན་ཏན་དང་བཅས་པ་བསྟན་ཏེ། ཇི་ལྟར་ཆུ་ཤིང་སྙིང་པོ་ཕྱེ་ན་མེད་ཀྱང་། དེའི་འབྲས་བུ་དང་པོ་སྨིན་ནས་ཟ་བ་ལྟར། བརྟགས་ན་སྙིང་པོ་ཅུང་ཟད་ཀྱང་མེད་པ་ནི་འཁོར་བ་ཡིན་ལ། འཁོར་བ་དེ་ཡང་རྣམ་པར་རྟོག་པ་སྟེ། རིགས་པ་དྲུག་ཅུ་པ་ལས། མ་རིག་རྐྱེན་གྱིས་འཇིག་རྟེན་ཞེས། ཡང་དག་རྫོགས་པའི་སངས་རྒྱས་གསུངས། །དེ་ཕྱིར་འཇིག་རྟེན་འདི་དག་ཀུན། །རྣམ་པར་རྟོག་པ་ཅིས་མི་འཐད། ཞེས་བྱུང་བ་ལྟར་རྣམ་པར་རྟོག་པ་ནི་སྙིང་པོ་མེད་པ་སྒྱུ་མ་དང་། སྨིག་རྒྱུ་ལྟ་བུ་ཡིན་མོད་ཀྱི། དེ་ཉིད་གནས་ཡོངས་སུ་གྱུར་པ་ལས། སེམས་ཅན་ཐམས་ཅད་ལ་ཕན་པར་བྱེད་པའི་གཟུགས་ཀྱི་སྐུ་འབྱུང་སྟེ། དེའི་ཕྱིར་རྣམ་པར་ཤེས་པ་ཉོན་མོངས་པའི་དྲ་བས་འདྲེས་པ་འཁོར་བ་ཞེས་བྱ་ལ། ཉོན་མོངས་པ་དང་བྲལ་བས་བྱ་བ་གྲུབ་པའི་ཡེ་ཤེས་སུ་གྱུར་ཏེ། སེམས་ཅན་རྣམས་ཀྱི་བདུད་རྩིར་འགྱུར་རོ། །དེ་ལྟར་ཁམས་རང་བཞིན་གྱིས་རྣམ་པར་དག་པ་དཔེ་རྣམས་ཀྱི་བསྟན་པའི་རིམ་པ་འདི་ཡང་མར་གྱི་དཔེས་ནི་སེམས་ཅན་གྱི་དུས་ན་འོ་མ་ལ་ཆུ་དང་མར་གཅིག་ཏུ་འདྲེས་པར་སྣང་བ་ལྟར། སེམས་ཅན་ཉིད་སྣང་གིས། སངས་རྒྱས་ནི་མི་སྣང་ལ། སངས་རྒྱས་པར་གྱུར་པ་ན་དྲི་མ་དང་འདྲེས་པ་མེད་དེ། མར་ཆུ་ལ་གཏན་མི་འདྲེ་བར་སྣང་བ་བཞིན་དུ་ངོ་བོ་བསྟན་པའོ། །མར་མེའི་དཔེས་ནི་ཡོན་ཏན་གྱི་འོད་ལ་མ་དག་པ་དང་། དག་པའི་དུས་ཐམས་ཅད་དུ་ཁྱད་མེད་ཀྱང་། སྒྲིབ་གཡོག་གི་རྐྱེན་གྱིས་ཆེ་བ་དང་ཆུང་བ་ལྟར་སྣང་བ་ལ་འགལ་བ་མེད་པའི་ལྡན་པའི་ཡོན་ཏན་བསྟན་ཏོ། ནོར་བུའི་དཔེས་ནི་ཆོས་སྐུ་རང་གི་ཡོན་ཏན་སྒྲིབ་པ་ཐམས་ཅད་དང་བྲལ་བ་དང་། རྣམ་པར་རྟོག་པ་མེད་པའི་འཕྲིན་ལས་འཇུག་པའི་ཡོན་ཏན་ཅན་དུ་བསྟན་ནོ། །གསེར་གྱི་དཔེས་ནི། བྱས་པ་མ་ཡིན་པ་དང་། དགེ་བ་དང་། རྣམ་པར་དག་པའི་ཡིད་ཀྱི་རང་བཞིན་ལོངས་སྤྱོད་རྫོགས་པའི་རྒྱུ་འབྲས་སྟོན་ཏོ། འབྲས་ཤུན་གྱི་དཔེས་མ་རིག་པ་བག་ཆགས་ཀྱིས་མ་གྲོལ་གྱི་བར་ལ་བློས་མི་མཐོང་བར་བསྟན་ནོ། །ཆུ་ཤིང་གི་དཔེས་འཛིན་པ་དང་རྣམ་པར་རྟོག་པ་གནས་གྱུར་པའི་སྤྲུལ་པའི་སྐུའི་འབྲས་བུའི་དཔེ་སྟེ། མདོར་བསྡུས་པས་དབྱིངས་དང་ཡེ་ཤེས་དང་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོགས་པ་དང་། བྱ་བ་གྲུབ་པའི་ངོ་བོ། མར་དང་། འོ་མ་དང་། ནོར་བུ་དང་། གསེར་དང་། འབྲས་དང་། ཆུ་ཤིང་གི་འབྲས་བུས་བསྟན་ལ། དེ་རྣམས་སྒྲིབ་པ་ཡང་། ཆུ་འདྲེས་པ་དང་། བུམ་པས་བསྒྲིབ་པ་དང་། ཤུན་པས་གཡོག་པ་དང་། ས་དང་། སྦུན་པ་དང་། ཆུ་ཤིང་རྣམས་ནི། རིམ་པ་ལྟར། ཉོན་སྒྲིབ་དང་། ཤེས་སྒྲིབ་དང་། སེམས་དང་། ཡིད་དང་། འཛིན་པ་དང་། རྣམ་པར་རྟོག་པ་རྣམས་སུ་རྟོགས་པར་བྱའོ། །འདི་རྣམས་ལ་མདོ་དང་། བསྟན་བཅོས་ཀྱི་ལུང་མང་དུ་ཡོད་མོད་ཀྱི་མ་སྤྲོས་སོ། །གཉིས་པ་ལམ་པའི་གནས་སྐབས་བསྟན་པ་ལ་གསུམ་སྟེ། དྲི་མ་སྦྱང་བ་འཐད་པའི་ཚུལ་རིམ་པ་དང་བཅས་པ་ཅི་ལྟར་ཤེས་པར་བྱ་བ་དང་། བསྒོམ་པའི་ཚུལ་དང་། ཐོབ་པའི་རིམ་པའོ། །དང་པོ་ལ་གསུམ་ལས། ཆོས་སྐུའི་ཁམས་དེ་ཉིད་རིགས་སུ་འཐད་པའི་ཚུལ་ནི། ཚིགས་སུ་བཅད་པ་གཉིས་ཏེ། ཇི་ལྟར་མ་དག་པའི་གནས་སྐབས་བསྟན་པའི་ངོ་བོ་ལ་དྲི་མ་སེལ་བར་བྱེད་པའི་ཐ་སྙད་ལ་བརྟེན་ནས་དྲི་མ་དང་བཅས་པ་ནི་རྒྱུ་དང་། དྲི་མ་མེད་པའི་འབྲས་བུར་བསྟན་པའི་ཕྱིར། དེ་བཞིན་ས་བོན་ཐམས་ཅད་ལས། །རྒྱུ་དང་འདྲ་བའི་འབྲས་བུ་འབྱུང་། །ས་བོན་མེད་པར་འབྲས་ཡོད་པར། །ཤེས་ལྡན་གང་གིས་བསྒྲུབ་པར་ནུས། །ཞེས་བསྟན་ཏོ། །འདི་ལ་ས་བོན་ཐམས་ཅད་ཀྱི་རྒྱུ་ཐམས་ཅད། འབྲས་བུ་སོ་སོར་དམིགས་སོ། འདིར་ནི་མདོར་བསྡུས་ན། འཁོར་བའི་རྒྱུ་དང་ས་བོན་ནི་ཀུན་གཞིའི་རྣམ་པར་ཤེས་པ་སྟེ། །དེས་རྒྱུའི་རྐྱེན་དུ་བྱས་ནས་རྣམ་པར་ཤེས་པའི་ཚོགས་གཞན་བདུན་པོ་འབྲས་བུར་འགྱུར་བ་དེ་ལས་ཁམས་གསུམ་གྱི་ལས་སྡུག་བསྔལ་ཐམས་ཅད་སོ་སོར་སྨིན་ཅིང་། དེ་ཐམས་ཅད་ཀྱང་ཀུན་གཞིའི་ནུས་པ་བསྐྱེད་པར་བྱེད་པས་འབྲས་བུ་ཞེས་ཀྱང་བྱ་སྟེ། དེ་ལྟར་རྟེན་ཅིང་འབྲེལ་པར་འབྱུང་བ་ཉིད་དེ། འདི་ལ་ནི་ཐེག་བསྡུས་ལས། ངོ་བོ་ཉིད་རྣམ་པར་འབྱེད་པ་ཅན་གྱི་རྟེན་འབྲེལ་ཞེས་གསུངས་སོ། །དེ་ལ་བརྟེན་ནས་སྡུག་པ་དང་མི་སྡུག་པ་འབྱེད་པའི་རྟེན་འབྲེལ་བཅུ་གཉིས་འབྱུང་སྟེ། འདི་ཐམས་ཅད་ནི་སྒྲིབ་པའོ། །ཆོས་ཀྱི་སྐུ་ནི་དྲི་མ་མེད་པ་ལ་བརྟེན་པའི་རྒྱུ་མཐུན་པ་རབ་ཏུ་ཟབ་པའི་ཆོས་ཀྱི་སྐུའི་ཡོན་ཏན་དང་འཕྲིན་ལས་འབྱུང་སྟེ། དེས་ན་ངོ་བོ་ཉིད་ནི་མེ་ལོང་ལྟ་བུ་ནི་ཆོས་ཀྱི་སྐུ་སྟེ། སྐུ་གཉིས་ཀྱི་སྐུ་ཡོངས་སུ་རྫོགས་པར་མི་འགྱུར་བས། འདིར་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དང་། ཆོས་རྣམ་པར་དཀར་བ་ཟག་པ་མེད་པའི་རྒྱུ་མཐུན་པ་རྣམས་ནི། སངས་རྒྱས་ཀྱི་རྒྱུ་ཞེས་བྱ་སྟེ། ཆོས་དཀར་བ་རྣམས་ཀྱང་ཆོས་ཀྱི་སྐུ་ལས་བྱུང་བའོ། །འདི་ལྟར་འཁོར་བ་དང་མྱ་ངན་ལས་འདས་པ་ངོ་བོས་རྒྱུ་དང་འབྲས་བུ་སོ་སོར་ཐ་དད་པས་སྤང་གཉེན་དུ་གྱུར་པ་ཡིན་ནོ། །དེ་ལྟར་ཡང་ཐེག་བསྡུས་ལས། སངས་རྒྱས་ཀྱི་ཆོས་ཐོས་པའི་བག་ཆགས་ཀུན་གཞིའི་རྣམ་ཤེས་ལ་རྟེན་ཅིང་སྐྱེ་བ་དང་འགག་པའི་ཚུལ་བསྟན་པའི་རྗེས་ལ་འོ་ན་ཀུན་གཞིའི་རྣམ་པར་ཤེས་པ་ནི། ཉོན་མོངས་པའི་རྒྱུ་ཡིན་ན། དེའི་གཉེན་པོ་འཇིག་རྟེན་ལས་འདས་པའི་སེམས་ཀྱི་ས་བོན་གང་ལས་བྱུང་བ་བརྗོད་དགོས་སོ། །ཞེ་ན། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པའི་ཐོས་པའི་བག་ཆགས་སོན་པ་ལས་དེ་བྱུང་ངོ་། །དེའི་གཉེན་པོའི་ཐོས་པའི་བག་ཆགས་གང་ཡིན་པ་དེ་ཡང་། ཅི་ཀུན་གཞིའི་རྣམ་པར་ཤེས་པའི་ངོ་བོ་ཉིད་ཡིན་ནམ། འོན་ཏེ་མ་ཡིན། གལ་ཏེ་ཀུན་གཞིའི་རྣམ་པར་ཤེས་པའི་ངོ་བོ་ཉིད་ཡིན་ན། ཇི་ལྟར་འདིའི་གཉེན་པོའི་ས་བོན་དུ་རུང་། ཇི་སྟེ་དེའི་ངོ་བོ་ཉིད་མ་ཡིན་ན་ནི། དེས་ན་ཐོས་པའི་བག་ཆགས་ཀྱི་ས་བོན་དེའི་གནས་ཅི་ཞིག་ཡིན་པར་ལྟ་ཞེ་ན། སངས་རྒྱས་ཀྱི་བྱང་ཆུབ་ལ་རྟེན་ནས་ཐོས་པའི་བག་ཆགས་སུ་གྱུར་པ་གང་ཡིན་པ་དེ། གནས་གང་ལ་འཇུག་པ་དེ་ལྷན་ཅིག་འབྱུང་བའི་ཚུལ་གྱི་རྣམ་པར་སྨིན་པའི་རྣམ་པར་ཤེས་པ་ལ་འཇུག་པ་སྟེ། ཆུ་དང་འོ་མ་བཞིན་ནོ། དེ་ནི་ཀུན་གཞིའི་རྣམ་པར་ཤེས་པ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར་རོ། །དེ་ལ་བག་ཆགས་ཆུང་ངུ་ལ་བརྟེན་ནས་འབྲིང་དང་ཆེན་པོར་འགྱུར་བས། ཆོས་ཀྱི་སྐུའི་ས་བོན་དུ་བལྟ་སྟེ། ཀུན་གཞིའི་རྣམ་པར་ཤེས་པའི་གཉེན་པོ་ཡིན་པས་ཀུན་གཞིའི་རྣམ་པར་ཤེས་པའི་ངོ་བོ་ཉིད་མ་ཡིན་པ་དང་། འཇིག་རྟེན་པ་ཡིན་ཀྱང་འཇིག་རྟེན་ལས་འདས་པ་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པ་ཡིན་པས། འཇིག་རྟེན་ལས་འདས་པའི་སེམས་ཀྱི་ས་བོན་དུ་གྱུར་པའོ། །དེ་ནི་འཇིག་རྟེན་ལས་འདས་པའི་སེམས་མ་བྱུང་དུ་ཟིན་ཀྱང་། ཉོན་མོངས་པས་ཀུན་ནས་དཀྲིས་པའི་གཉེན་པོ་དང་། ངན་སོང་གི་འགྲོ་བའི་གཉེན་པོ་དང་། ཉེས་པར་བྱས་པ་ཐམས་ཅད་དེངས་པར་བྱེད་པའི་གཉེན་པོ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་རྣམས་དང་ཕྲད་པའི་རྗེས་སུ་མཐུན་པའོ། །བྱང་ཆུབ་སེམས་དཔའ་ལས་དང་པོ་པ་རྣམས་ཀྱི་འཇིག་རྟེན་པ་ཡིན་ཀྱང་། ཆོས་ཀྱི་སྐུར་བསྡུས་པ་དང་། ཉན་ཐོས་དང་རང་སངས་རྒྱས་རྣམས་ཀྱི་རྣམ་པར་གྲོལ་བའི་ལུས་སུ་བསྡུས་པར་ཡང་བལྟའོ། །དེ་ནི་ཀུན་གཞིའི་རྣམ་པར་ཤེས་པ་མ་ཡིན་གྱི། ཆོས་ཀྱི་སྐུ་དང་རྣམ་པར་གྲོལ་བའི་ལུས་སུ་བསྡུས་ཏེ། ཆུང་ངུ་དང་། འབྲིང་པོ་དང་། ཆེན་པོ་ཇི་ལྟ་བུར་རིམ་གྱིས་འཕེལ་བ་དང་དེ་ལྟ་བུར་རྣམ་པར་སྨིན་པའི་རྣམ་པར་ཤེས་པ་ཡང་འབྲི་ཞིང་གནས་ཀྱང་འགྱུར་རོ། གནས་པ་རྣམ་པ་ཐམས་ཅད་དུ་འགྱུར་བ་དང་། རྣམ་པར་སྨིན་པའི་རྣམ་པར་ཤེས་པ་ས་བོན་ཐམས་ཅད་པ་ཡང་། ས་བོན་མེད་པར་གྱུར་པ་དང་། རྣམ་པ་ཐམས་ཅད་དུ་སྤངས་པ་ཡིན་ནོ། །ཞེས་གསུངས་སོ། །དེས་ན་ཆོས་ཀྱི་དབྱིངས་དེ་ཉིད་ལ་རྒྱུ་དང་རྐྱེན་གྱི་ཐ་སྙད་བསྟན་པའི་ཕྱིར། ས་བོན་གྱུར་པ་ཁམས་དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །ཞེས་གསུངས་ཏེ། ཟག་པ་མེད་པའི་ཡོན་ཏན་ཐམས་ཅད་ཀྱི་རྟེན། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་སྟེ། ས་བོན་དང་ཁམས་ཀྱང་དེ་ཉིད་ཡིན་ནོ། །དེ་ལྟར་ཡང་རྒྱུད་བླ་མའི་འགྲེལ་པར། འདིར་དབྱིངས་ཀྱི་དོན་ནི་རྒྱུའི་དོན་ཏོ། །ཞེས་པ་དང་། བྱང་ཆུབ་ཀྱི་སྐབས་ནས། ཇི་ལྟར་རྒྱུ་མིན་ནམ་མཁའ་ནི། གཟུགས་མཐོང་བ་དང་སྒྲ་དང་དྲི། །རོ་དང་རེག་བྱ་ཆོས་རྣམས་ཀྱི། །ཐོས་ལ་སོགས་པའི་རྒྱུ་ཡིན་ལྟར། །དེ་བཞིན་སྐུ་གཉིས་སྒྲིབ་མེད་པའི། །སྦྱོར་བསྟན་པ་ཡི་དབང་དོན་ལ། །ཟག་པ་མེད་པའི་ཡོན་ཏན་དག །སྐྱེ་བ་ཡི་ནི་རྒྱུ་ཡིན་ནོ། །ཞེས་གསུངས་སོ། །རྒྱུ་མཚན་དེའི་ཕྱིར། སེམས་དང་། ཡིད་དང་། རྣམ་པར་ཤེས་པའི་སྒྲིབ་པ་རིམ་གྱིས་དག་པ་ལས་རང་གི་དྲི་མ་མེད་པའི་ཡོན་ཏན་སྣང་བས། བྱང་ཆུབ་ཆེན་པོ་ཐོབ་བོ་ཞེས་བསྟན་པའི་ཕྱིར། རིམ་གྱིས་སྦྱངས་པར་གྱུར་པ་ལས། །སངས་རྒྱས་གོ་འཕང་ཐོབ་པར་འགྱུར། །ཞེས་བསྟན་གྱི། ལོག་གཅིག་ནས་གསར་དུ་ཐོབ་པར་བྱ་བ་དང་། རང་གི་འདུ་ཤེས་ཀྱི་འཆིང་བ་ལས་གཞན་གྱི་སྒྲིབ་པ་སྤང་དུ་མེད་པས། འདུ་ཤེས་རང་གི་ངོ་བོ་སྨིག་སྒྱུ་ལྟར་རང་བཞིན་མེད་པ་ལ་མེད་པ་ཉིད་དུ་མངོན་གསུམ་དུ་རྟོགས་པ་དང་། རང་བཞིན་གྱིས་འོད་གསལ་བའི་ཆོས་ཀྱི་སྐུའི་གནས་ལུག་ཡོངས་སུ་གྲུབ་པ་ལ་གྲུབ་པ་ཉིད་དུ་རྟོགས་ཤིང་མངོན་དུ་གྱུར་པ་ནི། བྱིས་པ་ཐམས་ཅད་ཀྱི་བློས་གཞལ་བར་མི་ནུས་པས། ཕ་རོལ་དུ་ཕྱིན་པ་དང་། སློབ་དཔོན་གྱི་རྟེན་འབྲེལ་གྱི་གཞུང་ལས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་གསུངས་པ་ཡིན་ནོ། །དེ་ཉིད་ལ་སྒྲིབ་པ་བསལ་བའི་ཕྱིར་དཔེ་དང་དོན་གྱིས་བསྟན་པ་ནི། ཚིགས་སུ་བཅད་པ་འདི་གཉིས་ཏེ། དེ་ལས་ཀྱང་ཐོག་མར་དཔེ་ནི། དག་པའི་སེམས་འོད་མཚོན་པའི་ཕྱིར། །དྲི་མེད་ཉི་མ་ཟླ་བ་ཡང་། །ཞེས་པ་ཉི་ཟླ་ནི་རང་བཞིན་གྱིས་འོད་གསལ་ཞིང་། མུན་པ་ལ་སོགས་པའི་སྒྲིབ་པ་དང་ལྷན་ཅིག་ཏུ་མི་གནས་པ་ཡིན་ཀྱང་། མེད་བཞིན་དུ་སྣང་བའི་གློ་བུར་གྱི་སྒྲིབ་པ་བསྟན་པའི་ཕྱིར། སྤྲིན་དང་དུ་བ་ཁུག་རྣ་དང་། །དགྲ་གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡི་བསྒྲིབ་པར་འགྱུར། །ཞེས་བསྟན་ཅིང་དོན་ནི། དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་ལེ་ལོ་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབ་པར་འགྱུར། །ཞེས་གསུངས་ཏེ། རང་བཞིན་གྱིས་འོད་གསལ་བའི་སངས་རྒྱས་ཀྱི་སྙིང་པོ་ལ་ཡང་། འདོད་པའི་འདོད་ཆགས་སྲིད་པར་རླན་པར་བྱེད་པའི་སྤྲིན་ལྟ་བུ་དང་། ཞེ་སྡང་གི་མེ་ཡིས་བསྐྱེད་པའི་གནོད་སེམས་དུ་བ་ལྟ་བུ་དང་། གཏི་མུག་གི་མི་གསལ་བར་བྱེད་པའི་ཁུག་རྣ་ལྟ་བུ་ལེ་ལོ་དང་། ཡེ་ཤེས་ཀྱི་སྣང་བ་བསྒྲིབ་པ་སེམས་རྒོད་པ་ང་རྒྱལ་དང་བཅས་པ་དགྲ་གཅན་གདོང་ལྟ་བུ་དང་། ལྟ་བ་སྣ་ཚོགས་པའི་ཚུབ་མས་བསྐྱེད་པ་རྡུལ་ལྟ་བུ་ཐེ་ཚོམ་སྟེ། རྣམ་པ་ལྔ་ཡིས་རང་གི་རང་བཞིན་མི་གསལ་བར་བྱ་བའི་ཕྱིར། སེམས་ཅན་རྣམས་ཀྱི་འོད་གསལ་བ་མཐོང་བར་མ་གྱུར་ཏོ། །འདི་གསལ་བར་བྱ་བའི་ཕྱིར། ཆོས་ཐམས་ཅད་རྟེན་ཅིང་འབྲེལ་པར་འབྱུང་བའི་ཚུལ་ཐོས་པ་དང་བསམ་པ་དང་། བསྒོམ་པས་རྟོགས་པར་བྱ་བ་ཡིན་པས་འདི་མན་ཆད་ཀྱིས་སྟོན་པར་མཛད་དོ། །དེ་ནས་གསུམ་པ་སྤང་གཉེན་གྱི་ཚུལ་མདོར་བསྟན་པ་ལ་ལྔ་སྟེ། དྲི་མ་སྦྱངས་པས་རང་བཞིན་དག་པ་དང་། སྟོང་པ་ཉིད་གཉེན་པོར་བསྟན་པ་དང་། ཡེ་ཤེས་ཀྱི་མི་སྟོང་པའི་ཚུལ་དང་། སྤང་གཉེན་གྱིས་སྟོང་པའི་ཚུལ་དང་། དེ་རྒྱས་པར་བཤད་པའོ། །དང་པོ་ནི་ཚིགས་སུ་བཅད་པ་གཉིས་ལས། དཔེ་ནི། ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མ་དྲི་མ་ཅན། །ཇི་ལྟར་མེ་ཡི་ནང་བཅུག་ན། །དྲི་མ་ཚིག་གྱུར་གོས་མིན་ལྟར། །ཞེས་བྱ་བ་ནི་མེས་བཀྲུས་པའི་རས་སམ། རྡོ་རྒྱུས་ལས་བྱས་པའི་གོས་དྲི་མ་རྣམས་ཀྱིས་གོས་པ་དེ་། མེའི་ནང་དུ་བཅུག་པས་དྲི་མ་འཚིག་ཅིང་གོས་དག་ནས་སྔ་མ་ལྟར་འོད་གསལ་བར་འགྱུར་རོ། །དེ་བཞིན་དུ་དོན་ནི། དེ་བཞིན་འོད་གསལ་བ་ཡི་སེམས། །འདོད་ཆགས་ལས་སྐྱེས་དྲི་མ་ཅན། །ཡེ་ཤེས་མེ་ཡིས་དྲི་མ་བསྲེག །དེ་ཉིད་འོད་གསལ་བ་ཡིན་ནོ། །ཞེས་གསུངས་ཏེ། སངས་རྒྱས་ཀྱི་སྙིང་པོ་རང་བཞིན་གྱིས་འོད་གསལ་བའི་སེམས་ལ་ཡུལ་དང་ཡུལ་ཅན་དུ་རྟོགས་པས། ང་དང་ང་ཡི་ཞེས་བརྟག་ནས་འདུ་བྱེད་པས་བླངས་བ་དང་དོར་བའི་རྟོག་པས་གནས་ལ་ཆགས་ཤིང་ཡུལ་རྣམས་འདོད་པ་རྒྱུ་དེས་འཛིན་པ་ཅན། རྒྱུད་རྨོངས་པར་གྱུར་པ་སྟེ། དྲི་མ་ནི་དེ་ཡིན་པས། དེ་ཉིད་སྦྱང་བར་བྱ་བ་ཡང་། གང་ལ་ཆགས་དང་། གང་གིས་ཆགས་པ་དང་། ཚུལ་ཇི་ལྟར་ཆགས་པ་དང་བཅས་པ་དེ་ཉིད་ལ་བརྟགས་ཅིང་། ཤེས་རབ་ཀྱིས་དཔྱད་ན་ཐམས་ཅད་ཀྱང་དམིགས་སུ་མེད་པའི་ཕྱིར་རང་གི་ངོ་བོས་མ་སྐྱེས་པ། མ་འགག་པ། སྟོང་པ། དབེན་པ། ཞི་བ། འོད་གསལ་བར་རྟོགས་པར་འགྱུར་ཏེ། དེ་ནི་ཡེ་ཤེས་ཀྱི་མེ་ཡིན་ནོ། །རྟོགས་པའི་བློ་དེ་ཉིད་ཀྱང་ཡང་དག་པའི་རྟོགས་པ་ཡིན་ལ། དེ་ལྟར་ཡང་དག་པའི་རྟོགས་པ་ལ་སོགས་པ་འཕགས་པའི་ལམ་དུ་བཞག་མོད་ཀྱི། དེ་ཉིད་མཚན་མ་ཡང་བྲལ་བའི་ཚེ་འོད་གསལ་བའི་སངས་རྒྱས་མངོན་དུ་གྱུར་པ་སྟེ། དྲི་མ་དང་མེ་ཞི་བར་གྱུར་པ་ན། གོས་གསལ་བར་གྱུར་པ་བཞིན་ནོ། །གཞན་ཡང་དྲི་མ་ཇི་སྲིད་ཡོད་ཀྱི་བར་དུ་མེ་འབར་བ་ལྟར་སྤང་བྱའི་རྟོགས་པ་ཡོད་ཀྱི་བར་དུ་གཉེན་པོའི་རྟོག་པ་འབར་བར་གྱུར་ཏེ། གཉིས་ཀ་ཞི་བས་འོད་གསལ་བར་གྱུར་པ་ཞེས་བྱའོ། གཉིས་པ་སྟོང་པ་ཉིད་གཉེན་པོར་བསྟན་པ་ནི། དེ་ལྟར་སྤངས་བྱ་དང་། གཉེན་པོ་གཉིས་ཀ་ཞི་བར་གྱུར་ན། ཁམས་རང་བཞིན་གྱིས་འོད་གསལ་བ་ཉིད་ཀྱང་ཡོད་པར་ཇི་ལྟར་འགྱུར་ཞེ་ན། སྟོང་པ་ཉིད་ནི་སྟོན་པའི་མདོ། རྒྱལ་བས་ཇི་སྙེད་གསུངས་པ་དེ། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ཞེས་གསུངས་ཏེ། བཅོམ་ལྡན་འདས་ཀྱིས་གཟུགས་ནས་རྣམ་པ་ཐམས་ཅད་སྟོང་པ་ཉིད་དུ་མདོ་ལས་གསུངས་པ་དེ་རྣམས་ཀྱི་དགོངས་པའི་དོན་ནི། སེམས་ཅན་རྣམས་ཀྱི་ཉོན་མོངས་པ་བཟློག་པར་བྱེད་པའི་ཕྱིར་གསུངས་པ་ཡིན་ཏེ། གང་དག་རང་བཞིན་དང་། སྐྱེས་བུ་དང་། དུས་དང་། དབང་ཕྱུག་དང་། རྡུལ་ཕྲན་དང་། ཆད་པར་ལྟ་བའི་རྣམ་པ་དུ་མ་རྣམས་བཟློག་པའི་ཕྱིར། ཕུང་པོ་དང་། ཁམས་དང་། སྐྱེ་མཆེད་དང་། འཕགས་པའི་བདེན་པ་བཞི་ལ་སོགས་པ། རྒྱུ་དང་། འབྲས་བུ་དང་། འཁོར་བ་དང་། མྱ་ངན་ལས་འདས་པ་བསྟན་པ་སྟེ། རྟེན་ཅིང་འབྲེལ་པར་འབྱུང་བ་བསྟན་ནས། དེ་ཡང་འཁོར་བ་སྤང་བྱ་བརྟག གཉེན་པོའི་ཆོས་རྣམས་བླང་བྱར་བདེན་པར་རྟོག་པས། ཆོས་ལ་བདག་འཛིན་པར་གྱུར་པ་དེ་གཞོམ་པའི་ཕྱིར་ཆོས་ཐམས་ཅད་ངོ་བོ་ཉིད་མེད་པར་བསྟན་པས་བདག་མེད་གཉིས་རྟོགས་པར་འགྱུར་བས་དགོས་པ་ནི་དེ་ཡིན་ནོ། །སངས་རྒྱས་ཀྱི་སྙིང་པོ་འོད་གསལ་བའི་ཁམས་སྟོང་པ་དང་། དངོས་པོ་དང་གཉིས་ཡིན་དང་གཉིས་མ་ཡིན་ལས་རྣམ་པར་གྲོལ་བའི་ཡེ་ཤེས་དེ་ཉམས་པ་སྟེ། མེད་པར་བསྟན་པ་ནི་མ་ཡིན་ནོ། །ཚུལ་འདི་ནི་ཐེག་པ་ཆེན་པོ་ཉི་ཤུ་པ་ལས་ཀྱང་། བདག་དང་བདག་མེད་བདེན་མིན་ཏེ། །སོ་སོའི་སྐྱེ་བོས་བརྟགས་པ་ཡིན། །བདེ་དང་སྡུག་བསྔལ་ལྟོས་པ་སྟེ། །ཉོན་མོངས་རྣམས་དང་གྲོལ་དེ་བཞིན། །ཞེས་གསུངས་པ་དང་། རིགས་པ་དྲུག་ཅུ་པ་ལས་ཀྱང་། ཡོད་པས་རྣམ་པར་མི་གྲོལ་ཏེ། །མེད་པས་སྲིད་པ་འདི་ལ་མིན། །དངོས་དང་དངོས་མིན་ཡོངས་ཤེས་པས། བདག་ཉིད་ཆེན་པོ་རྣམ་པར་གྲོལ། །ཞེས་པ་ལ་སོགས་པ་མང་དུ་གསུངས་སོ། །གསུམ་པ་ཡེ་ཤེས་ཀྱིས་མི་སྟོང་པའི་ཚུལ་བསྟན་པ་ནི། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་གསུངས་ཏེ། དཔེར་ན་སའི་དཀྱིལ་ན་ཆུའི་ངོ་བོ་དེ་རླན་པ་དང་། དྭངས་པ་དང་། དྲི་མ་མེད་པར་གནས་པ་ལྟར། ཉོན་མོངས་པའི་དྲི་མ་ས་ལྟ་བུ་ཡིན་ལ། སེམས་རང་བཞིན་གྱིས་འོད་གསལ་བའི་ཡེ་ཤེས་ཀྱི་རང་བཞིན་ནི། དྲི་མ་མེད་པར་གནས་ཤིང་ཡོད་ཀྱང་མ་དམིགས་པ་ཙམ་དུ་ཟད་དོ། །རྐྱེན་དང་བྲལ་བས་ངོ་བོ་ཉིད་སྣང་བ་འབྱུང་ངོ་། །དེས་ན་དངོས་པོ་དང་དངོས་མེད་སྟོང་པར་རྟོག་པ་ས་དང་འདྲ་བ་སྤང་བར་བྱ་སྟེ། རྙོག་མ་ཞི་བར་བྱའོ། །འདི་ནི་མདོ་སྡེ་རྒྱན་ལས་ཀྱང་། ཇི་ལྟར་ཆུ་རྙོག་པ་ལས་དྭངས་པ་ནི། །དྭངས་པ་ཉིད་དེ་དེ་ལས་སྐྱེ་མིན་ཏེ། །དེ་ནི་དེ་ལས་དྲི་མ་བྲལ་བར་ཟད། །དེ་བཞིན་རང་སེམས་དག་ལ་ཚུལ་དེ་བཞིན། །སེམས་ནི་རྟག་ཏུ་རང་བཞིན་འོད་གསལ་འདོད། །དེ་ནི་གློ་བུར་ཉེས་པས་མ་རུངས་བྱས། །ཞེས་གསུངས་སོ། །བཞི་པ་སྤང་གཉེན་གྱི་སྟོང་པའི་དོན་བཤད་པ་ནི། ཚིགས་སུ་བཅད་པ་གསུམ་ལས། དང་པོ་རང་བཞིན་གྱིས་འོད་གསལ་བའི་སེམས་དེ་ཉིད་བདག་མེད་པར་བསྟན་པའི་ཕྱིར། ཆོས་དབྱིངས་གང་ཕྱིར་བདག་མ་ཡིན། །བུད་མེད་མ་ཡིན་སྐྱེས་མ་ཡིན། བཟུང་བ་ཀུན་ལས་རྣམ་གྲོལ་བ། ཅི་ལྟར་བདག་ཅེས་རྟག་པར་བྱ། །ཞེས་གསུངས་ཏེ། ཆོས་དབྱིངས་རང་བཞིན་གྱིས་འོད་གསལ་བར་ཡོད་ན། མུ་སྟེགས་པའི་བདག་དང་མཚུངས་པར་འགྱུར་རོ། །ཞེ་ན་དེ་ལྟར་མི་འགྱུར་ཏེ། འོད་གསལ་བའི་ཆོས་ཀྱི་དབྱིངས་དེ་བདག་མ་ཡིན། བུད་མེད་མ་ཡིན་སྐྱེས་པ་མ་ཡིན་ཏེ། བཟུང་བ་དང་འཛིན་པ་ཐམས་ཅད་ལས་རྣམ་པར་གྲོལ་བའི་ཕྱིར་རོ། །གང་བཟུང་འཛིན་དུ་མ་གྲུབ་པ་ལ་བདག་ཅེས་ཇི་ལྟར་དུ་བཏག་པར་བྱ་སྟེ། ཁྱད་པར་དུ་བྱ་བ་མ་གྲུབ་པའི་ཕྱིར་རོ། དེ་ལྟར་ན་སེམས་འོད་གསལ་བ་དང་ལྡན་པའི་འགྲོ་བ་འདི་རྣམས་ཇི་ལྟར་དོན་ལ་བདེན་པར་མ་གྲུབ་བཞིན་དུ། སྐྱེས་པ་དང་བུད་མེད་ལ་སོགས་པ་བཟང་འགྲོ་དང་། ངན་འགྲོ་རྣམས་ཇི་ལྟར་སྣང་ཞིང་གདགས་པར་བྱ་ཞེ་ན། ཆགས་པ་མེད་པའི་ཆོས་ཀུན་ལ། །བུད་མེད་སྐྱེས་པ་དམིགས་མ་ཡིན། །ཆོས་ཐམས་ཅད་ནི་གང་ཆགས་པ་དང་བྲལ་བ་འགོག་པ་དང་། གང་གིས་ཆགས་པ་དང་བྲལ་བ་ལམ་གྱི་བདེན་པས་བསྡུས་ཏེ། འདི་གཉིས་ཀ་ཡང་རང་གི་ངོ་བོས་དག་པ། གསལ་བ་གཉེན་པོར་གྱུར་པ་སྟེ། རྒྱུ་འདི་གསུམ་ལ་ཉོན་མོངས་པ་རང་བཞིན་གྱིས་མ་གོས་པ་དང་། སྒྲིབ་པའི་མུན་པ་འཇོམས་པ་དང་། བདག་ཏུ་འཛིན་པའི་གཉེན་པོར་གྱུར་པའི་རང་གི་མཚན་ཉིད་ཅན་ཡིན་པའི་ཕྱིར། ཆོས་ཐམས་ཅད་ནི་བདག་མེད་པ་ཉིད་ལ། སྐྱེས་པ་དང་བུད་མེད་ལ་སོགས་པ་དམིགས་པར་མེད་དོ། །དེ་ལྟ་མོད་ཀྱིས་དོན་མཐོང་བ་ལ་ཕྱི་རོལ་དུ་གྱུར་པ་བྱིས་པ་འདུ་ཤེས་ཀྱིས་འཆིང་བས་བཅིངས་པ་རྣམས་ལ་ཆགས་པ་དང་། དེ་ཡོད་ན་བྲལ་བའི་ཐ་སྙད་བསྟན་པའི་ཕྱིར་དུ། འདོད་ཆགས་ཀྱིས་གདུངས་གདུལ་བྱའི་ཕྱིར། །བུད་མེད་སྐྱེས་པ་ཞེས་རབ་བསྟན། །ཞེས་ཀུན་རྫོབ་ཀྱི་ཐ་སྙད་རྟོག་པ་ཇི་ལྟ་བར་སྟོན་པར་མཛད་དོ། །འདི་ལ་སྤང་བྱའི་མཚན་མ་ཐམས་ཅད་ཀྱི་རྩ་བ་ནི་རང་བཞིན་གྱིས་འོད་གསལ་བ། རང་བཞིན་གྱིས་བླང་དོར་དང་བྲལ་བ་དེ་ལྟར་མ་རྟོགས་པ་ནི་མ་རིག་པ་ཡིན་ཏེ། དེ་ལ་སྲིད་པའི་འདོད་ཆགས་ཐམས་ཅད་བསྐྱེད་པའི་ཕྱིར། བདག་ལ་རྟོག་ཅིང་ཆགས་པས་གཞན་དུ་རྟོག་ཅིང་ལེན་པར་གྱུར་པ་སྟེ་འདི་ནི་མདོ་ལས་ཀྱང་། བྱིས་པ་འདུ་ཤེས་ལ་མཚན་མར་འཛིན་ཅིང་ཆགས་པ་གནས་ལ་དགའ་བ། ཡུལ་འདོད་པ་ཞེས་གསུངས་ཏེ་ཡིན་ནོ། །མཚན་མ་དེ་དག་གཞོམ་པའི་ཕྱིར། །མི་རྟག་སྡུག་བསྔལ་སྟོང་པ་ཞེས། །བྱ་བ་གསུམ་པོས་སེམས་སྦྱོང་བྱེད། མཆོག་ཏུ་སེམས་ནི་སྦྱོང་བྱེད་པའི། །ཆོས་ནི་རང་བཞིན་མེད་པ་ཡིན། །ཞེས་བྱ་བ་སྨོས་ཏེ། རྒྱལ་བས་ཐེག་པ་ཐམས་ཅད་ཀྱི་གཞིར་འདུས་བྱས་ཐམས་ཅད་ནི་མི་རྟག་པའོ། །སྲིད་པར་སོང་བ་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ཐམས་ཅད་ནི་ཞི་བའོ། །ཞེས་བཀའ་རྟགས་ཀྱི་ཕྱག་རྒྱ་བཞི་པོ་འདི་ཆོས་ཀྱི་སྡོམ་དུ་གསུངས་ཏེ། དེས་ན་མི་རྟག་པ། སྡུག་བསྔལ་སྐད་ཅིག་མ། འཇིག་པ་མི་བདེན་པས་སྟོང་ལ། བདག་མེད་པར་ཞི་བས་སྤྲོས་པ་དང་བྲལ་བས་ཏེ། འདིར་སྤང་བྱ་དང་། གཉེན་པོའི་མཚན་མ་འགའ་ཡང་། ཆོས་ཀྱི་དབྱིངས་སངས་རྒྱས་ཀྱི་སྙིང་པོ་ལ་མ་དམིགས་པའི་རྒྱུ་མཚན་གྱིས་ཆོས་ཐམས་ཅད་རང་བཞིན་མེད། ངོ་བོ་ཉིད་མེད་པ། ཞེས་བརྗོད་པ་ཡིན་ནོ། །རང་བཞིན་གྱིས་དག་པའི་འོད་གསལ་བའི་ངོ་བོ་ནི་དེ་བཞིན་དུ་བཞུགས་ཏེ། འདི་ལ་དགོངས་ནས་མདོ་ལས། སངས་རྒྱས་རྣམས་འཇིག་རྟེན་དུ་བྱོན་ཡང་རུང་། མ་བྱོན་ཡང་རུང་། ཆོས་རྣམས་ཀྱི་ཆོས་ཉིད་དུ་གནས་པ་ཉིད་དོ། །ཞེས་གསུངས་སོ། །ལྔ་པ་དོན་དེ་ཉིད་རྒྱས་པར་བཤད་པ་ནི་བརྒྱད་དེ། རང་ལ་གནས་ཀྱང་མ་མཐོང་བ་དང་། སྒྲིབ་བྱེད་བསྟན་པ་དང་། ཡེ་ཤེས་རྟོགས་པའི་ཚུལ་དང་། ཀུན་བརྟགས་ཀྱི་དོན་དང་། གཞན་དབང་གི་དོན་དང་། རྟེན་ཅིང་འབྲེལ་པར་འབྱུང་བ་དང་། ཡོངས་སུ་གྲུབ་པའི་ཚུལ་དང་། དེ་རྣམས་ཀྱི་དོན་བསྡུ་བའོ། །དང་པོ་ནི། ཇི་ལྟར་སྦྲུམ་མའི་ལྟོ་ན་བུ། །ཡོད་ཀྱང་མཐོང་བ་མ་ཡིན་པ། །ཞེས་བྱ་བ་ནི་དཔེས་བསྟན་པ་ཡིན་ལ། དེ་བཞིན་དུ་དོན་ནི། དེ་བཞིན་ཉོན་མོངས་ཀྱིས་གཡོགས་པས། །ཆོས་ཀྱི་དབྱིངས་ཀྱང་མཐོང་མ་ཡིན། །ཞེས་གསུངས་ཏེ། ཚུལ་འདི་ནི་དེ་བཞིན་གཤེགས་པའི་སྙིང་པོའི་མདོ་ལས་ཀྱང་། ཇི་ལྟར་དབུལ་མོ་མགོན་མེད་པའི་ལྟོ་ན་འཁོར་ལོས་བསྒྱུར་བ་ཡོད་ཀྱང་མི་ཤེས་པ་ལྟར། རང་གི་ཉོན་མོངས་པ་དང་བཅས་པའི་སྦུབ་ན། སངས་རྒྱས་ཀྱི་སྙིང་པོ་ཡོད་ཀྱང་མ་ཤེས་ཏེ་ཉོན་མོངས་པར་གྱུར་ཏོ། །ཞེས་གསུངས་པ་ཡིན་ནོ། །དེ་ལ་སྒྲིབ་པར་བྱེད་པ་བསྟན་པ་ནི། བདག་དང་བདག་གི་རྣམ་རྟོག་དང་། །མིང་གི་འདུ་ཤེས་རྒྱུ་མཚན་གྱིས། །རྣམ་རྟོག་བཞི་པོ་འབྱུང་བ་ཡང་། །འབྱུང་དང་འབྱུང་ལས་གྱུར་པས་སོ། །ཞེས་གསུངས་ཏེ། རང་ལ་ཡོད་པ་མ་རྟོགས་པ་ཡང་སྔར་གོང་དུ་བསྟན་པ་ལྟར། སྣང་བ་དང་སྟོང་པ་དབྱེར་མེད་པའི་སེམས་རང་བཞིན་གྱིས་འོད་གསལ་བ་ལ་འགག་པ་མེད་པའི་ཡིད་གཡོ་བ་ལ་བརྟེན་ནས། རྣམ་པར་ཤེས་པ་ལ་བདག་ཏུ་རྟོགས་པ་དང་། དེའི་དབང་གིས་གཟུགས་ལ་སོགས་པ་བདག་གི་བར་རྟོག་པས། འདུ་བྱེད་ཀྱིས་འཕེན་པ་དང་། འདུ་ཤེས་ཀྱི་མཚན་མར་འཛིན་པ་དང་། ཚོར་བས་བདེ་སྡུག་ཏུ་དཔྱོད་ཅིང་གཅོད་པར་བྱེད་པ་སྟེ། མིང་གཞིའི་རྒྱུ་མཚན་མ་རྟོགས་པ་ལ་བརྟེན་ནས་མི་རྟག་པ་ལ་རྟག་གོ་སྙམ་པ་དང་། སྡུག་བསྔལ་བ་ལ་བདེ་བར་འཛིན་པ་དང་། རང་བཞིན་གྱིས་སྟོང་པ་ལ་དངོས་པོར་འཛིན་པ་དང་། བདག་མེད་པ་ལ་བདག་ཏུ་རྟོག་པའི་ཕྱིན་ཅི་ལོག་གི་རྣམ་རྟོག་བཞི་པོ་འབྱུང་བ་ཡང་རྒྱུའི་ཆ་ནས་ཀུན་འབྱུང་བ་དང་། འབྲས་བུའི་ཆ་ནས་འབྱུང་བར་འགྱུར་བ་སྟེ། རྟེན་ཅིང་འབྲེལ་པར་འབྱུང་བ་མ་རྟོགས་པ་ལས་གྱུར་པ་ཡིན་ནོ། ཡེ་ཤེས་རྟོགས་པའི་ཚུལ་ནི། ཚིགས་སུ་བཅད་པ་གཅིག་སྟེ། སངས་རྒྱས་རྣམས་ཀྱི་སྨོན་ལམ་ཡང་། །སྣང་བ་མེད་ཅིང་མཚན་ཉིད་མེད། །ཞེས་བྱ་བ་ནི་གང་དག་འཕགས་པའི་བདེན་པ་མངོན་སུམ་དུ་གཟིགས་པ་དང་། དེ་ལ་འཇུག་པ་རྣམས་ཀྱི་ལམ་དང་། འགོག་པས་བསྡུས་པ་ཡང་སྡུག་བསྔལ་དང་། ཀུན་འབྱུང་བ་སྣང་བ་མེད། རང་བཞིན་མཚན་ཉིད་ཀྱིས་ཀུན་ཏུ་བརྟགས་པ་དང་། གཞན་གྱིས་དབང་གིས་ངོ་བོ་ཉིད་མེད་པར་མཁྱེན་ནས། སེམས་ཅན་ཐམས་ཅད་ལ་རྒྱུ་མེད་པའི་ཐུགས་རྗེ་ཆེན་པོ་འཇུག་སྟེ། དེའི་ཕྱིར་སངས་རྒྱས་ཀྱིས་ཐབས་དང་སྨོན་ལམ་ཡང་འདི་ལྟར་འཇུག་སྟེ། སོ་སོར་རང་རིག་སྦྱོར་ལྡན་ཉིད། སངས་རྒྱས་རྟག་པའི་ཆོས་ཉིད་ཅན། །ཞེས་གསུངས་ཏེ། རྣམ་པར་རྟོག་པ་དང་མཚན་མ་འཛིན་པའི་འདུ་ཤེས་ཀྱི་འཆིང་བ་ལས་རྣམ་པར་གྲོལ་བ་ལས། སོ་སོ་རང་གིས་རིག་པ་ལ་སྦྱོར་བར་མཛད་པ་དང་ལྡན་པ་ཉིད་དེ། འདིར་རིག་པར་བྱ་བ་དེ་ཡང་ཆོས་ཀྱི་དབྱིངས་རང་བཞིན་གྱིས་དག་པ་ལ། དེའི་རྒྱུ་མཐུན་པ་རབ་ཏུ་ཟབ་པའི་རྣམ་པར་དཀར་བའི་ཆོས་ཀྱི་འོད་ཟེར་འཕྲོ་བས་གློ་བུར་གྱི་དྲི་མ་སེལ་བ་ཙམ་ཉིད་དུ་ཐོག་མར་མཁྱེན་ཅིང་བར་ཏུ་མངོན་དུ་གྱུར་ནས། མཐར་དྲི་མ་མེད་པར་ཡེ་ཤེས་དང་ཡོན་ཏན་འཕྲིན་ལས་དང་བཅས་པ་ལ་བཞུགས་པ་ནི། རང་བཞིན་དང་རྒྱུན་དང་རྒྱུན་ཆད་མེད་པའི་རྟག་པ་ཉིད་གསུམ་གྱི་ངོ་བོར་གྱུར་པའོ། །དེ་ལྟར་མདོ་སྡེ་རྒྱན་ལས་ཀྱང་། །སྐུ་གསུམ་དག་གི་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །སྐུ་གསུམ་དག་གི་རང་བཞིན་གྱི། །དོན་ནི་རྟེན་དང་བཅས་པར་བསྟན། །དེ་དག་རྟེན་དང་དགོངས་པ་དང་། །འཕྲིན་ལས་ཀྱིས་ནི་མཉམ་པ་ཉིད། །རང་བཞིན་གྱིས་ནི་རྒྱུན་མི་འཆད། །རྒྱུན་གྱིས་དེ་དག་རྟག་པ་ཉིད། །ཅེས་གསུངས་པ་ཡིན་ནོ། །ཀུན་བརྟགས་ཀྱི་དོན་ནི། ཇི་ལྟར་རི་བོང་མགོ་བོའི་རྭ། །བཏགས་པ་ཉིད་དེ་མེད་པ་བཞིན། །དེ་བཞིན་ཆོས་རྣམས་ཐམས་ཅད་ཀྱང་། །བཏགས་པ་ཉིད་དེ་ཡོད་མ་ཡིན། །ཞེས་འདི་ཡང་སྔར་བསྟན་པ་ལྟར། སངས་རྒྱས་རྟག་པ་གདོད་མ་ནས། །འགྱུར་བ་མེད་པ་ཉིད་ཡིན་ན། །དྲི་མ་སྤང་བྱར་བཤད་པ་དང་། །གཉེན་པོ་མི་རྟག་ལ་སོགས་ཀྱི། །དེ་སྦྱོང་བར་བྱེད་པ་བཤད་པ་འདི་རྣམས་མེད་པ་ཇི་ལྟར་རུང་། །འདི་ཡང་སངས་རྒྱས་ཀྱི་སྙིང་པོ་དང་འདྲ་བར་ཡོད་དམ་ཞེ་ན། ཇི་ལྟར་རི་བོང་གི་མགོ་ལ་རྭ་མེད་པ་ལ་རི་བོང་གི་རྭ་ཞེས་བཏགས་ཀྱང་། གཏན་མེད་པའི་རྭ་ཇི་ལྟར་འབྱུང་བར་འགྱུར་ཏེ་རིགས་པ་མ་ཡིན་ནོ། །དེ་ལྟར་མ་དག་པའི་ཀུན་གཞིའི་སེམས་དང་སེམས་ལས་བྱུང་བའི་ཆོས་ཐམས་ཅད་ཀྱང་ཡང་དག་པ་མ་ཡིན་པའི་ཀུན་རྟོག་པས་བརྟགས་པ་སྟེ། བཟུང་བ་དང་འཛིན་པ་ཇི་ལྟར་བརྟགས་པ་ནི་གཏན་ཡོད་པ་མ་ཡིན་ནོ། །མེད་པ་ལ་ཡོད་པར་རྟོག་པས་འཁྲུལ་པ་ཞེས་བྱ་སྟེ། གལ་ཏེ་ཅུང་ཟད་ཡོད་ན་འཁྲུལ་པར་མི་འགྱུར་ཏེ། དེའི་ཕྱིར་ཀུན་ཏུ་བརྟགས་པ་ནི་གཏན་མེད་པའི་མཚན་ཉིད་དུ་བརྗོད་དོ། །གཞན་དབང་གི་དོན་ནི། ཕྲ་རབ་རྡུལ་གྱི་ངོ་བོ་ཡིས། །གླང་གི་རྭ་ཡང་ཡོད་མ་ཡིན། །ཞེས་གསུངས་ཏེ། འོ་ན་བརྟགས་པའི་ཆོས་ཐམས་ཅད་མེད་ཀྱང་། །གླང་གི་རྭ་ཡོད་པར་སྣང་བ་ལྟར། ཆོས་ཐམས་ཅད་ཀྱང་ཡུལ་དང་ཡུལ་ཅན་གྱི་སྣང་བ་ལྟར་ཡོད་པ་མ་ཡིན་ནམ། རིགས་པའི་ཚོགས་ལས་ཀྱང་། སྣང་བ་ཙམ་འགོག་པར་མི་བྱེད་པའི་ཕྱིར། གཞན་དབང་གིས་ཆོས་ནི་ཡོད་པར་འགྱུར་རོ། །མེད་ན་ལམ་དང་འབྲས་བུ་ཡང་མེད་པར་ཁས་བླངས་དགོས་སོ། །ཞེ་ན་དེ་ལྟ་མ་ཡིན་ཏེ། གླང་དང་རྭ་ལྟར་སྣང་དུ་ཆུག་མོད་ཀྱང་། དངོས་པོ་ཐམས་ཅད་ཤེས་པ་དང་། བེམ་པོར་བྱས་ན་བེམ་པོའི་རྭ་ཡང་རྡུལ་ཕྲ་རབ་ལྟར་བྱས་ལ། དེ་ཡང་ཕྱོགས་ཀྱི་དབྱེ་བས་ཆ་མེད་པར་འགྱུར་ལ་བེམ་པོ་མེད་པའི་ཤེས་པ་རྭ་ལྟར་སྣང་བ་ཡང་རྭའི་དོན་དུ་ཇི་ལྟར་རུང་གཞན་ཡང་མགོ་བོར་གནས་པ་རྭ་རུ་མི་རུང་སྟེ། སྐྲ་ཡང་རྭར་འགྱུར་བའི་ཕྱིར་དང་། དབྱིབས་ཀྱང་རྭར་མི་རུང་སྟེ། ཤིང་ལ་སོགས་པ་ཡང་དེ་ལྟར་འདྲ་བར་སྣང་བའི་ཕྱིར་དང་། ཁ་དོག་དང་སྲ་བ་དག་ལ་ཡང་རྭར་མི་རུང་སྟེ། རྨིག་པ་དང་རྡོ་བ་ལ་སོགས་པ་ལ་ཡང་རྭ་འདྲ་བར་སྣང་བའི་ཕྱིར་དང་། རྣམ་པར་སྣང་བ་ལ་ཡང་རྨི་ལམ་ལྟར་མི་བདེན་པ་འགྲུབ་པའི་ཕྱིར། ཡང་དག་པར་བརྟགས་ན་གླང་གི་རྭ་ཡང་རྣམ་པ་ཐམས་ཅད་དུ་བདེན་པར་གྲུབ་པ་མེད་དོ། །དེ་ལྟར་གཞན་གྱི་དབང་གིས་མཚན་ཉིད་དབང་པོ་དང་། ཤེས་པ་དང་། ཡུལ་གསུམ་པོ་ལ་བརྟེན་ནས་སྣང་བ་ཡོད་མོད་ཀྱང་། བདེན་པར་གྲུབ་པ་མེད་དོ། །འདི་ནི་འཕགས་པ་ལྷའི་ཡེ་ཤེས་སྙིང་པོ་ཀུན་ལ་བཏུས་པ་ལས་ཀྱང། ཆ་ཤས་ཅན་ཞེས་བྱར་མེད་ཅིང་། །ཕྲ་རབ་རྡུལ་རྣམས་མེད་པ་དང་། །སོ་སོར་སྣང་བ་དམིགས་སུ་མེད། །ཉམས་སུ་མྱོང་བ་རྨི་ལམ་འདྲ། །ཞེས་བྱ་བ་ལ་སོགས་པ་མང་དུ་གསུངས་སོ། །ཚུལ་དེས་ན། ཀུན་བརྟགས་ནི་དོན་མེད་པ་དང་། གཞན་དབང་ནི་སྣང་ཡང་དེ་ཁོ་ན་ལྟར་བདེན་པ་མེད་པའི་ཕྱིར། ཆོས་ཐམས་ཅད་ལ་བདག་དང་བདག་གི་བ་མེད་པས་ངོ་བོ་ཉིད་མེད་པ་ཞེས་བཤད་དེ། འདི་ནི་གདོད་མ་ནས་དེ་ལྟར་བཞུགས་པའི་ཕྱིར། ཇི་ལྟར་སྔོན་བཞིན་ཕྱིས་དེ་བཞིན། །དེ་ལ་ཅི་ཞིག་རྟག་པར་བྱ། །ཞེས་སྔོན་མ་སྐྱེས་པ་མི་སྐྱེ་ལ་སྐྱེས་པ་ནི་སྐྱེས་ཟིན་པའི་ཕྱིར་མི་སྐྱེས་ཏེ། དེ་བཞིན་དུ་འགག་པའང་དེ་དང་མཚུངས་པའི་ཕྱིར། སྐྱེ་འགག་གནས་གསུམ་དང་བྲལ་བའི་ཆོས་ཐམས་ཅད། རང་གི་ངོ་བོས་སྣང་བ་དང་སྟོང་པ་དབྱེར་མེད་པར་བཞུགས་པ་ལ། སྐྱེ་བ་དང་འགག་པར་རྟག་པ་ནི་འགའ་ཡང་ཡོད་པ་མ་ཡིན་ནོ། །དེ་ནས་རྟེན་ཅིང་འབྲེལ་པར་འབྱུང་བར་བསྟན་པ་ནི་ཚིག་རྐང་བདུན་ཏེ། ཐོག་མར་རྟེན་ཅིང་འབྲེལ་པའི་རང་བཞིན་བསྟན་པའི་ཕྱིར། རྟེན་ནས་འབྱུང་བར་འགྱུར་བ་དང་། རྟེན་ནས་འགག་པར་འགྱུར་བས་ན། ཞེས་བསྟན་པ་ནི། ངོ་བོ་ཉིད་ཀྱིས་ཐ་སྙད་པའི་བདེན་པ་གཉིས་ཇི་ལྟར་བརྟགས་པ་དེ་ལྟར་དྲི་མ་ཡོད་ན། དེ་མ་རྟོགས་པ་གང་ཡིན་པ་ལ་དྲི་མ་ཞེས་བཏགས་སུ་རུང་བ་ལྟ་བུར་ངོ་བོས་རྟེན་ཅིང་འབྲེལ་བར་འབྱུང་བ་དང་། འདི་ཡོད་ན་འདི་བྱུང་ཞེས་སྡུག་པ་དང་མི་སྡུག་པ་འབྱེད་པའི་རྟེན་ཅིང་འབྲེལ་པར་འབྱུང་བ་གཉིས་ཀ་ཡང་མ་རིག་པའི་བག་ཆགས་ཀྱིས་ཡོད་ན་འཁོར་བ་འབྱུང་ལ། དེ་འགག་ན་འཁོར་བའི་འཁོར་ལོ་རྒྱུན་ཆད་པར་འགྱུར་བ་སྟེ། དེ་ལ་མ་རིག་པའི་བག་ཆགས་ཀྱང་རང་བཞིན་གྱིས་འོད་གསལ་བ་ལ། གསལ་བ་ཉིད་དུ་མ་རིག་པའི་རྟོག་པ་གཡོ་བ་སྐད་ཅིག་མར་སྐྱེ་བ་ལྟར་སྣང་བ་འདི་ལས་བདེན་པའི་རྩ་བ་གཞན་མེད་ཅིང་། རྟོག་པ་དེ་ཡང་བདག་དང་གཞན་དང་། གཉིས་ཀ་དང་། རྒྱུ་མེད་པ་ལས་སྐྱེས་པ་ཡང་མ་ཡིན། མ་སྐྱེས་པས་མི་འགག། མི་འགག་པས་མི་གནས་པས་ཏེ། དཔེར་ན་སོས་ཀའི་དུས་ཀྱི་སྨིག་སྒྱུ་ལ་ཆུར་རྟོག་པ། འཁྲུལ་པ་འཇུག་ཅིང་ཆུར་མཐོང་ཡོད། སྐྱེ་བ་དང་། འགག་པ་དང་། གནས་པ་མེད་དེ། གཏན་ནས་ཆུར་མ་གྲུབ་པ་བཞིན་ནོ། །མེད་ཀྱང་སྣང་བ་ཡང་དབང་པོ་དང་ཤེས་པ་འཁྲུལ་པ་དང་། ཉི་མའི་འོད་དང་། ས་རླངས་ལ་སོགས་པའི་རྟེན་ཅིང་འབྲེལ་པས་སྨིག་སྒྱུ་སྣང་ངོ་། །དེ་ལྟར་ཆོས་ཐམས་ཅད་ཀྱང་མཚུངས་ཏེ། གཅིག་ཀྱང་ཡོད་པ་མ་ཡིན་ན། །བྱིས་པས་ཇི་ལྟར་རྟོག་པར་བྱེད། །ཞེས་གསུངས་ཏེ། སྐྱེ་འགག་གནས་པ་མེད་པའི་ཆོས་རྣམས་བྱིས་པ་འཁྲུལ་པས་སྐྱེ་བ་དང་འགག་པ་དང་། གནས་པ་ཅི་ལྟ་བར་རྟོག་པར་བྱེད་དེ། འདི་ལ་ཇི་སྲིད་རྟོག་པའི་དེ་ལྟར་གཅོད་པར་བྱེད། དཔྱད་ནས་སྲེད་རྒྱུ་དེས་ལེན་པར་བྱེད་པས་ཉོན་མོངས་པར་བྱེད་པའི་ཕྱིར་མཐར་འཛིན་པར་འགྱུར་རོ། །དེས་ན་སྔར་གསུངས་པ་ལྟར་དུ། རི་བོང་བ་གླང་རྭའི་དཔེས། །ཇི་ལྟར་འདིར་གཤེགས་ཆོས་རྣམས་ཉིད། །དབུ་མ་ཉིད་དུ་སྒྲུབ་པར་བྱེད། །ཞེས་གསུངས་ཏེ། བྱིས་པ་རླབས་རྣམས་ནི་རི་བོང་ལ་རྭ་མེད་པར་ཞེན་པ་དང་། བ་གླང་ལ་རྭ་ཡོད་པར་ཞེན་པ་ལ་གནས་ནས། འདི་ནི་བདེན་གྱི། གཞན་ནི་བརྫུན་པའོ། །ཞེས་རྟོག་ཅིང་མཚན་མར་འཛིན་ཀྱང་བརྟག་ན་གཉིས་ཀ་ཡང་བདེན་པ་མེད་པར་མཚུངས་ལ། ཡོད་མེད་གཉིས་རྟོག་པ་ཙམ་དུ་སྣང་བ་ཡང་མཚུངས་ན། རྟོག་པས་མཐར་འཛིན་པ་དང་། ཞེན་པ་ནི་ཡང་དག་པ་མ་ཡིན་པའི་ཕྱིར། མཁས་པས་ཇི་ལྟར་བར་བདེ་བར་གཤེགས་པའི་བསྟན་པའི་ཆོས་དང་མཐུན་པར་སྨྲ་བ་རྣམས་ནི་མཐར་འཛིན་པ་དོར་ནས། དབུ་མ་ཉིད་དུ་བསྒྲུབ་པར་བྱེད་དེ། སྤང་གཉེན་དུ་རྟོག་པ་ཀུན་བརྟགས་དང་གཞན་དབང་དག་རྟོག་པ་ཙམ་དུ་སྣང་བ་ནི་ཡིན་ལ། བདེན་པར་མི་སྨྲ་སྟེ་རྟེན་ཅིང་འབྲེལ་པར་འབྱུང་བ་ནི་ཡིན་ལ། དེ་ཉིད་ལ་སྟོང་པ་ཉིད་དུ་བརྗོད་པར་བྱེད་དོ། །འདི་ལྟར་དབུས་མཐའ་ལས་ཀྱང་། ཐ་དད་པ་དང་གཅིག་མཐའ་དང་། །མུ་སྟེགས་ཉན་ཐོས་གཉིས་ཀ་དང་། །གང་ཟག་ཆོས་ལ་སྒྲོ་འདོགས་དང་། །སྐུར་འདེབས་མཐའ་ནི་གཉིས་གཉིས་དང་། །བཟུང་དང་འཛིན་དང་ཀུན་ཉོན་མོངས། །རྣམ་པར་བྱང་ལ་གཉིས་དང་གསུམ། །རྣམ་པར་རྟོག་པ་གཉིས་ཀྱི་མཐའ། །དེ་ནི་རྣམ་པ་བདུན་དུ་འདོད། །དངོས་ཡོད་དངོས་མེད་ཞི་བྱ་དང་། །ཞི་བྱེད་སྐྲག་བྱ་དེ་ལ་འཇིག །བཟུང་དང་འཛིན་དང་ཡང་དག་མིན། །ལོག་པ་ཉིད་དང་བྱེད་པ་མིན། །སྐྱེ་བ་མེད་དང་མཉམ་དང་དུས། །རྣམ་པར་རྟོག་པ་གཉིས་ཀྱི་མཐའ། །ཞེས་གསུངས་པ་ཡིན་ནོ། །འདི་ལྟར་མཐའ་འཛིན་པ་ཉི་ཤུ་སྤངས་ནས་དབུ་མ་ལ་འཇུག་ཏེ། རིགས་པ་ནི་རྩ་བའི་ཤེས་རབ་ལས་རྒྱ་ཆེར་གསུངས་སོ། །དཔལ་ས་ར་ཧ་པས་ཀྱང་། མྱ་ངན་འདས་པ་བསྒོམ་བྱེད་པ། དེ་དག་འགགས་ཀྱང་དོན་དམ་ནི། །གཅིག་ཤོས་གྲུབ་པར་མི་འགྱུར་རོ། །ཞེས་གསུངས་སོ། །ད་ནི་ཡོངས་སུ་གྲུབ་པའི་ཚུལ་བསྟན་པ་ནི། ཚིགས་སུ་བཅད་པ་གཉིས་ལས། ཐོག་མར་དཔེ་བསྟན་པ་ནི། ཇི་ལྟ་ཉི་མ་སྐར་མའི་གཟུགས། །དྭངས་པའི་སྣོད་ཀྱི་ཆུ་ནང་དུ། །གཟུགས་ཅན་མཐོང་བར་གྱུར་པ་ལྟར། །ཞེས་བྱ་བ་ནི་སྣང་ལ་རང་བཞིན་མེད་པ་སྟོང་པ་ཉིད་ཀྱི་དཔེ་མཐར་མ་ལྷུང་བ་ཉིད་བརྗོད་ནས། མཚན་ཉིད་བརྗོད་པའང་དེ་དང་འདྲ་ཞེས་བསྟན་ཏེ། རང་གི་ངོ་བོས་ཀུན་རྫོབ་གཉིས་སུ་སྣང་བ། འཁྲུལ་པ་ཡིན་ཀྱང་གཉིས་སུ་སྣང་ལ་ཆུ་ཟླ་ལྟར་སྣང་བ་ནི་བདེན་པ་ཞེས་བྱ་སྟེ། འཕགས་པ་མཆོག་རྣམས་ཀྱིས་ཕྱིན་ཅི་མ་ལོག་པའི་བདེན་པ་གཟིགས་པའི་ཕྱིར་རོ། །ཏིང་ངེ་འཛིན་རྒྱལ་པོའི་མདོ་ལས་ཀྱང་། རྒྱལ་བས་གང་དག་མྱང་ངན་འདས་པ་ཀུན། །ཐམས་ཅད་ཆུ་ཟླ་ལྟ་བུར་གཟིགས་པས་ནི། །ཞེས་པ་ལ་སོགས་པ་རྒྱ་ཆེར་གསུངས་སོ། །རིགས་པ་དྲུག་ཅུ་པ་ལས་ཀྱང་། སྲིད་པ་སྨིག་སྒྱུ་སྒྱུ་འདྲ་ལ། །བློ་ཡིས་མཐོང་བར་གྱུར་པས་ནི། །སྔོན་གྱི་མཐའ་ཡི་ཕྱི་མའི་མཐར། །ལྟ་བས་གཡོགས་སུ་འཕྲོག་མི་འགྱུར། །གང་དག་གི་ནི་འདུས་བྱས་རྣམས། སྐྱེ་དང་འགག་པར་རྟོག་བྱེད་པ། །དེ་དག་རྟེན་འབྱུང་འཁོར་ལོ་ཡིས། །འགྲོ་བ་ཤིན་ཏུ་མི་ཤེས་སོ། །དེ་དང་དེ་རྟེན་གང་བྱུང་བ། །རང་གི་ངོ་བོས་དེ་མ་སྐྱེས། །དེ་ནི་སྐྱེས་ཞེས་ཇི་ལྟར་བརྗོད། །རྒྱུ་ཟད་པ་ཡི་སྐྱེ་བ་ནི། །ཟད་ཞེས་མངོན་པར་བརྗོད་པ་སྟེ། །རང་བཞིན་གྱིས་ནི་གང་མ་ཟད། །དེ་ནི་ཟད་ཅེས་ཇི་ལྟར་བརྗོད། །དེ་ལྟར་གང་ཡང་སྐྱེ་བ་མེད། །གང་ཡང་འགག་པར་མི་འགྱུར་རོ། །ཞེས་ཆོས་ཐམས་ཅད་སྒྱུ་མ་ལྟ་བུ་ལ། ཐ་སྙད་ཙམ་དུ་བརྗོད་པ་ལས། དོན་དུ་སྐྱེ་བ་མེད་ཅིང་འགག་པ་མེད་པས་སངས་རྒྱས་ཀྱི་ཆོས་དཀར་པོ་ཆོས་ཀྱི་སྐུའི་རྒྱུ་མཐུན་པ་ནི། སོ་སོའི་སྐྱེ་བོ་རྣམས་དང་འདྲེས་པ་ལྟར་སྣང་ཡང་། དོན་ནི་མ་འདྲེས་པར་དགེ་བར་བཞུགས་ཏེ། དེས་ན། ཐོག་མ་བར་དང་མཐར་དགེ་བ། །བསླུ་བ་མེད་ཅིང་བརྟག་པ་ཡི། །གང་ཞིག་དེ་ལྟར་བདག་མེད་ལ། །དེ་ལྟར་བདག་དང་བདག་གིར་བརྟགས། །ཞེས་གསུངས་ཏེ། ཐོག་མ་ནས་དགེ་བ་ལ། བར་དུ་དེའི་རང་བཞིན་ཤེས་ཤིང་སྒྲིབ་པ་འཇོམས་པའི་གཉེན་པོ་ལྟར་སྣང་བས་ན་བར་དུ་དགེ་བ་དང་། མཐར་གནས་ཡོངས་སུ་གྱུར་པའི་མིང་ཅན་ཡེ་ཤེས་འཕྲིན་ལས་དང་བཅས་པ་འཁོར་བ་མ་སྟོངས་ཀྱི་བར་དུ་འཇུག་པས་མཐར་དགེ་བ་སྟེ། དོན་འདི་ནི་མི་བསླུ་བའི་མཚན་གྱིས་ཚད་མར་གྱུར་ལ། འགྱུར་བ་མེད་པའི་ཕྱིར་བརྟན་པའོ། །རྟོག་པའི་དྲ་བས་སྒྲོ་གདགས་སུ་མི་རུང་བས་བདག་མེད་པ་སྟེ། དེའི་ཕྱིར་བདག་གི་བར་སྒྲོས་གདགས་པར་བྱ་བ་མ་ཡིན། རྟོག་པས་བརྟགས་པར་བྱ་བ་མ་ཡིན་ནོ། །དེ་ལྟར་འགྱུར་བ་མེད་ཅིང་ཕྱིན་ཅི་མ་ལོག་པའི་དོན་གྱིས་ཡོངས་སུ་གྲུབ་པར་བསྟན་པ་ཡིན་ནོ། །དེ་རྣམས་ཀྱི་དོན་བསྡུས་པ་ནི། ཚིགས་སུ་བཅད་པ་གཉིས་ལས། དང་པོས་ནི་དཔེ་དང་། ཕྱི་མ་ནི་བརྗོད་པ་སྟེ། ཇི་ལྟར་སོས་ཀའི་དུས་སུ་ཆུ། དྲོའོ་ཞེས་ནི་བརྗོད་པར་བྱ། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲ་བས་གཡོག་པ་ན། །སེམས་ཞེས་བྱ་བར་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་གསུངས་ཏེ། སངས་རྒྱས་དང་སེམས་ཅན་དང་། འཁོར་བ་དང་མྱ་ངན་ལས་འདས་པ་དང་། སེམས་དང་ཡེ་ཤེས་དང་། ཆོས་དང་ཆོས་ཉིད་དང་། ཀུན་རྫོབ་དང་དོན་དམ་པ་ཞེས་བརྗོད་པ་རྣམས་ནི། མིང་གི་རྣམ་གྲངས་སུ་རིག་པར་བྱའོ། །དོན་འདི་ནི། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གི་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་བ་མིན། །ཞེས་རྒྱུད་བླ་མར་གསུང་པའི་འགྲེལ་པ་ལས་ཀྱང་། འདིས་ནི་སྒྲོས་འདོགས་པ་དང་བསྐུར་པ་འདེབས་པའི་མཐའ་དང་བྲལ་བའི་ཕྱིར། ཕྱིན་ཅི་མ་ལོག་པའི་སྟོང་པ་ཉིད་ཀྱི་མཚན་ཉིད་བསྟན་ཏོ། །དེ་ལ་གང་དག་སྟོང་པ་ཉིད་ཀྱི་ཚུལ་འདི་ལས་སེམས་ཕྱིན་ཅི་ལོག་ཏུ་རྣམ་པར་གཡེངས་ཤིང་རྣམ་པར་འཕྲོ་བ་ལ་མཉམ་པར་མི་འཇོག་ཅིང་རྩེ་གཅིག་ཏུ་མི་འགྱུར་པ་དེས་ན། སྟོང་པ་ཉིད་ལ་སེམས་རྣམ་པར་གཡེངས་པ་ཞེས་བརྗོད་དོ། །དོན་དམ་པ་སྟོང་པ་ཉིད་ཀྱི་ཡེ་ཤེས་མེད་པ་ནི་རྣམ་པར་རྟོག་པ་མེད་པའི་དབྱིངས་ཤིང་མངོན་དུ་བྱ་བར་མི་ནུས་སོ། །འདི་ལ་དགོངས་ནས་གསུངས་པ་ནི། དེ་བཞིན་གཤེགས་པའི་སྙིང་པོའི་ཡེ་ཤེས་ནི། དེ་བཞིན་གཤེགས་པ་རྣམས་ཀྱི་སྟོང་པ་ཉིད་ཀྱི་ཡེ་ཤེས་ཡིན་ལ། དེ་བཞིན་གཤེགས་པའི་སྙིང་པོ་ཡང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་སྔར་མ་མཐོང་མ་རྟོགས་པའོ། །ཞེས་གསུངས་སོ། །དེས་ན་ཆུ་ལ་དྲོ་བ་དང་གྲང་བའི་ཐ་སྙད་སོ་སོར་བརྟགས་པ་ཙམ་དུ་རྣམ་པར་རྟོག་པས་དཀྲུགས་པས་སེམས་ཅན་དང་། རྟོག་པ་དང་བྲལ་བའི་སེམས་རང་བཞིན་གྱིས་འོད་གསལ་བ་ལ། སངས་རྒྱས་ཞེས་བརྗོད་པར་བྱ་སྟེ། དེ་ལྟར་དྲི་མ་དང་བཅས་པའི་ཆོས་ཀྱི་དབྱིངས་ལ་ངོ་བོ་ལ་སྒྲིབ་པས་མ་གོས་ཀྱང་སྦྱོང་བ་མི་འགལ་བའི་ཚུལ་བཤད་ནས། །དེ་ནས་སྤྱི་དོན་གཉིས་པ་ཚོགས་སྦྱོར་བ་ལ་སོགས་པ་ནས་བཟུང་སྟེ། བསྒོམ་པའི་ཚུལ་བསྟན་པ་ལ་གཉིས་ཏེ། ཉམས་སུ་བླང་བའི་ཚུལ་དང་། རྐྱེན་དཀོན་མཆོག་སྣང་བའི་ཚུལ་བཤད་པའོ། །དང་པོ་ལ་བདུན་ལས། སྒོ་ལྔ་ལ་བརྟེན་ནས་ཅི་ལྟར་བསྒོམ་པ་ནི། །ཚིགས་སུ་བཅད་པ་ལྔ་ལས། དང་པོ་ནི་མིག་དང་གཟུགས་ལ་བརྟེན་ནས་རྟོགས་པར་བྱ་བ་བསྟན་པ་ནི། མིག་དང་གཟུགས་ལ་བརྟེན་ནས་ནི། །དྲི་མ་མེད་པའི་སྣང་བ་འབྱུང་། །སྐྱེ་མེད་འགག་པ་མེད་ཉིད་ལས། །ཆོས་ཀྱི་དབྱིངས་ནི་རབ་ཏུ་ཤེས། །ཞེས་བྱ་བ་ནི། སྐྱེས་བུ་དེ་གང་དག་སྔར་བསྟན་པའི་ཆོས་དབྱིངས་རང་བཞིན་གྱིས་འོད་གསལ་བ་ཐེག་པ་བླ་ན་མེད་པ་བསྟན་པ། དེ་བཞིན་གཤེགས་པ་ལ་དད་ནས་རྟོགས་པར་བྱས་ནས། བསྒོམ་པ་ལ་གཞོལ་བ་ན། ཁམས་གསུམ་གྱིས་སྤང་བྱ་དང་། དེའི་གཉེན་པོ་འཇིག་རྟེན་པའི་ལམ་མཚན་མ་དང་བཅས་པས། བསམ་གཏན་བཞི་དང་། གཟུགས་མེད་པ་དང་། བྱམས་པ་ལ་སོགས་པ་ཚད་མེད་པ་བཞི་དང་བཅས་པ་སྤོང་ལེན་དུ་བྱ་བ་རྣམས་ཐེག་པ་ཐུན་མོང་ལྟར་ལེགས་པར་སྦྱངས་པ་སྔོན་དུ་སོང་ནས། ཆོས་ཀྱི་དབྱིངས་ཀྱི་མཚན་ཉིད་ཤེས་རབ་ཀྱི་ཕ་རོལ་དུ་ཕྱིན་པ་དང་། ཕྱག་རྒྱ་ཆེན་པོའི་སྒྲས་བརྗོད་པ་དེ་བཞིན་ཉིད་ལ་དམིགས་པའི་བསམ་གཏན་ལྷག་མཐོང་གི་ངོ་བོ་མངོན་སུམ་དུ་བྱེད་པར་འགྱུར་བའི་ཚུལ་འདི་མཉམ་པར་བཞག་པའི་དུས་ན། བསམ་གཏན་དང་འདྲེས་པ་རྟོག་པ་ཐམས་ཅད་བསྡུས་པའི་ཚུལ་དུ་བསྒོམ་ཞིང་། དེ་ལས་ལངས་ནས་རྗེས་ཀྱི་ཤེས་པའི་དུས་ནི། བརྟག་ཅིང་དཔྱད་ནས་དྲན་པ་དང་ལྡན་པས་བསྒོམ་པར་བྱའོ། །དེ་ལ་ཐོག་མར་མིག་གི་དབང་པོ་ཟར་མའི་མེ་ཏོག་ལྟ་བུ་གཟུགས་ཅན་དྭང་བས་བདག་རྐྱེན་བྱས། སེམས་ཁ་དོག་དང་དབྱིབས་ཀྱི་རྣམ་པར་སྣང་བ་ཕྱི་རོལ་ལྟར་སྣང་བས་དམིགས་པའི་རྐྱེན་བྱས། སེམས་ལ་གནས་པའི་ཡིད་གཡོ་བ་སྐད་ཅིག་མས་དེ་མ་ཐག་པའི་རྐྱེན་གྱི་ས་ནས་མིག་གི་རྣམ་པར་ཤེས་པ་སྐྱེ་བར་སྣང་ངོ་། །དེ་ལས་དྲི་མ་མེད་པའི་སྣང་བ་འབྱུང་སྟེ། རྟོག་པ་དང་བྲལ་ཞིང་མ་འཁྲུལ་བའི་མངོན་སུམ་འབྱུང་ངོ་། །དྲི་མ་ནི་འཁྲུལ་པ་སྟེ། ཤེས་པ་ལ་བརྗོད་པ་དང་། འདྲེས་པར་རུང་བ་སྣང་བ་ཞེས་བྱའོ། །གང་ཟག་སྣང་ལ་སྒྲོ་བཏགས་པའི་རྟོག་པ་མ་ཞུགས་པ་ནི། རང་གི་ངོ་བོས་སྣང་བ་ཡང་ཡིན། སྟོང་པ་ཡང་ཡིན། དེ་ལ་ནི་རང་གི་ངོ་བོས་སྐྱེ་བ་མེད་ཅིང་འགག་པ་མེད་པ་རྣམ་པར་རིག་པ་ཙམ་སྟེ། འདི་ནི་མིག་གི་དབང་པོའི་མངོན་སུམ་ཚད་མ་ཞེས་ཀྱང་བྱ་སྟེ། མངོན་སུམ་ཡང་ཡིན་ལ། ཚད་མ་ཡང་ཡིན་པའི་ཕྱིར་རོ། །སོ་སོ་སྐྱེ་བོ་ཡིས་དོན་འདི་སྣང་ཡང་མི་ཤེས་པའི་ཕྱིར། དེ་མ་ཐག་ཏུ་ཡིད་ཀྱིས་སྒྲོ་འདོགས་པར་བྱེད་ཅིང་། འདི་ནི་ཀ་བའོ། ། བུམ་པའོ། །དཀར་རོ། ནག་གོ །ཞེས་བྱ་བ་ལ་སོགས་པའི་དབྱིབས་དང་། ཁ་དོག་དང་། ཕྱི་དང་ནང་དུ་རྟོག་པར་བྱེད། ཞེན་པར་བྱེད། རྒྱུ་དེས་ལེན་པར་བྱེད་པས་སྐྱེ་བ་དང་། འགག་པར་བྱེད་ཅིང་། དེ་ལ་བརྟེན་ནས་རྒྱུའི་ཐ་སྙད་དང་། འབྲས་བུའི་ཐ་སྙད་དང་། དུས་གསུམ་གྱི་ཐ་སྙད་ལ་སོགས་པ་ཐོག་མ་མེད་པའི་ཀུན་ནས་ལྡང་བས་བསྐྱེད་པ་སློང་ཞིང་ཕྱི་མའི་རྟེན་དུ་གྱུར་པ་སྨིག་སྒྱུ་ལྟ་བུ་ལ་སོགས་པར་བྱེད་པས་འཁྲུལ་པར་བྱེད་དོ། །གང་དག་ཤེས་རབ་ཀྱི་མིག་དང་ལྡན་པ་འཕགས་པ་རྣམས་ནི་མ་འཁྲུལ་བ་ཉིད་དུ་གཟིགས་ཤིང་རྟོག་པའི་དྲ་བ་མི་སློང་བའི་ཕྱིར། རྣལ་འབྱོར་པའི་དབང་པོའི་མངོན་གསུམ་དུ་འགྱུར་རོ། འཕགས་པ་མ་ཡིན་ཀྱང་དེའི་རྗེས་སུ་འབྲེང་བ་རྣམས་ནི། ཕྱི་རོལ་ལྟར་སྣང་བ་དམིགས་པའི་རྣམ་རིག་མ་འཁྲུལ་བ་ནི་ཚད་མ་ཡིན་ཏེ། རྣལ་འབྱོར་མངོན་སུམ་དང་འདྲ་བའི་ཕྱིར་རོ། །དོན་དང་འདྲ་བ་དེ་ཉིད་དེའི་ཚད་མ་སྟེ། དེའི་དབང་གིས་དོན་རྟོགས་པར་རབ་ཏུ་གྲུབ་པའི་ཕྱིར་རོ། །ཞེས་བཞེད་པ་ཡིན་ནོ། །འདི་ལ་དོན་ནི་རང་གསལ་བའི་ཤེས་པའི་ཆ་སྟེ། ཕྱི་ལྟར་སྣང་བ་ཙམ་ལས་གཞན་པའི་ཕྱི་རོལ་གྱི་དོན་རྡུལ་ཕྲ་རབ་ལ་སོགས་པར་བདེན་པ་མེད་པས། རང་གསལ་བར་སྣང་བ་ལ་སྐྱེ་འགག་མེད་པར་རྟོགས་ཤིང་ཆོས་ཀྱི་དབྱིངས་ཉིད་དུ་ངེས་པར་འགྱུར་རོ། །འདི་ལྟར་གཟུགས་ཀྱི་དེ་བཞིན་ཉིད་ཤེས་ནས་ཆོས་ཐམས་ཅད་ཀྱི་མདོ་དང་རྒྱས་པར་ཤེས་པར་འགྱུར་རོ། །ཞེས་མདོ་ལས་གསུངས་པའི་དོན་ཡིན་ནོ། །དེ་ལྟར་སྒྲ་ཡང་བསྟན་པའི་ཕྱིར། །སྒྲ་དང་རྣ་བ་ལ་བརྟེན་ནས། །རྣམ་པར་དག་པའི་ཤེས་པ་གསུམ། །མཚན་ཉིད་མེད་པའི་ཆོས་ཀྱི་དབྱིངས། །རྟེན་དང་བཅས་པ་ཐོས་པར་འགྱུར། །ཞེས་གསུངས་པ་ནི། རྣ་བའི་དབང་པོ་གྲོ་གའི་མཛེར་བུ་ལྟ་བུ་གཟུགས་ཅན་དང་བས་བདག་རྐྱེན་བྱས་ནས། ཟིན་པ་དང་མ་ཟིན་པ་གཉིས་ཀ་ལྟར་སྣང་བའི་སྒྲ་ཡིས་དམིགས་རྐྱེན་བྱས་ཤིང་དེ་མ་ཐག་པའི་ཡིད་དང་གསུམ་ལས་རྣམ་པར་ཤེས་པ་དག་པ་རྟོག་པ་དང་བྲལ་ཞིང་མ་འཁྲུལ་པ་སྐྱེས་ཏེ། དེ་ཡང་རང་གི་ངོ་བོས་མཚན་ཉིད་མེད་པ། སྐྱེ་འགག་གནས་གསུམ་དང་བྲལ་བའི་ཆོས་ཀྱི་དབྱིངས་ཉིད་དུ་རྟོགས་པར་བྱའོ། སྒྲ་ལ་མཚན་མར་འཛིན་པ་དང་བཅས་པ་ནི་འཁྲུལ་པ་རྟོག་པ་དང་བཅས་པའི་ཤེས་པས་ཐོས་པར་འགྱུར་ཏེ། འདི་ནི་དྲི་མ་དང་བཅས་པའོ། །དེ་ལྟར་དྲི་ལ་བརྟེན་པ་ཡང་། །སྣ་དང་དྲི་ལ་བརྟེན་ནས་སྣོམ། །དེ་ནི་གཟུགས་སུ་མེད་པའི་དཔེ། །དེ་བཞིན་སྣ་ཡི་རྣམ་ཤེས་ཀྱིས། །ཆོས་ཀྱི་དབྱིངས་སུ་རྟོག་པར་བྱེད། །ཞེས་གསུངས་ཏེ། སྣའི་དབང་པོ་ཟངས་ཁབ་གཤིབ་པ་ལྟ་བུ། གཟུགས་ཅན་དང་བས་བདག་རྐྱེན་བྱས་ཤིང་། ལྷན་ཅིག་སྐྱེས་པ་དང་གྱུར་པ་ལས་བྱུང་བའི་དྲི་ཡིས་དམིགས་རྐྱེན་བྱས་ནས། དེ་མ་ཐག་པ་དང་བཅས་པ་ལས་སྣའི་རྣམ་པར་ཤེས་པ་རྟོག་པ་དང་བྲལ་བའི་མ་འཁྲུལ་པ་སྐྱེ་སྟེ། དེ་ཡང་རང་གི་ངོ་བོས་གཟུགས་རང་བཞིན་མེད་པ་བསྟན་པའི་དཔེ། དེ་ལྟར་སྐྱེ་བ་མེད་ཅིང་འགག་པ་མེད་པར་ཆོས་ཀྱི་དབྱིངས་སུ་རྟོགས་པར་བྱེད་དོ། །དེ་བཞིན་དུ་རོ་ཡང་བསྟན་པ་ནི། ལྕེ་ཡི་རང་བཞིན་སྟོང་པ་ཉིད། །རོ་ཡི་ཁམས་ཀྱང་དབེན་པ་སྟེ། །ཆོས་ཀྱི་དབྱིངས་ཀྱི་ངོ་བོ་ཡིས། །རྣམ་པར་ཤེས་པ་གནས་མེད་པའོ། །ཞེས་གསུངས་ཏེ། ལྕེའི་དབང་པོ་ཟླ་བ་ཕྱེད་པ་ལྟ་བུ་གཟུགས་ཅན་དང་བས་བདག་རྐྱེན་བྱས། དམིགས་པའི་རྐྱེན་མངར་སྐྱུར་ལ་སོགས་པའི་རོ་དྲུག་གིས་བྱས་ཏེ། དེ་མ་ཐག་པས་བསྐྱེད་ནས། ལྕེའི་རྣམ་པར་ཤེས་པ་དག་པ་སྐྱེས་ཏེ། དེ་ཡང་རང་བཞིན་གྱིས་སྟོང་པ་དང་། དབེན་པ་དང་། ཆོས་ཀྱི་དབྱིངས་ཀྱི་ངོ་བོ་སྟེ། རྣམ་པར་ཤེས་པ་སྐྱེ་འགག་གནས་གསུམ་དང་བྲལ་བར་རྟོགས་པར་བྱའོ། །དེ་ལྟར་རེག་བྱ་ཡང་བསྟན་པའི་ཕྱིར། དག་པའི་ལུས་ཀྱི་ངོ་བོ་ནི། །རེག་བྱའི་རྐྱེན་གྱིས་མཚན་ཉིད་དག །རྐྱེན་དག་ལས་ནི་གྲོལ་གྱུར་པ། །ཆོས་ཀྱི་དབྱིངས་ཞེས་བརྗོད་པར་བྱ། །ཞེས་གསུངས་ཏེ། ལུས་ཀྱི་དབང་པོ་བྱ་རེག་འཇམ་གྱི་ལྤགས་པ་ལྟ་བུ་གཟུགས་ཅན་དང་བས་བདག་རྐྱེན་བྱས་ནས། འཇམ་རྩུབ་གྲང་དྲོ་ལ་སོགས་པའི་རེག་བྱ་དམིགས་པའི་རྐྱེན་གྱིས་ཏེ། དེ་མ་ཐག་པ་དང་གསུམ་ལས་ལུས་ཀྱི་རྣམ་པར་ཤེས་པ་སྐྱེ་སྟེ། དེ་ཡང་ངོ་བོས་རྒྱུ་དང་། རྐྱེན་གྱིས་རང་བཞིན་ལས་རྣམ་པར་གྲོལ་བ། སྣང་བ་དང་སྟོང་པ་དབྱེ་བ་མེད་པའི་ཆོས་ཀྱི་དབྱིངས་ཀྱི་དོན་དུ་བརྗོད་པར་བྱའོ། །དེ་ལྟར་སྒོ་ལྔའི་རྐྱེན་གསུམ་པོ་ཡང་རྒྱུའི་རྐྱེན་སེམས་ཉིད་ཡིན་མོད་ཀྱི། སྔར་བསྟན་པ་ལྟར་རྣམ་པར་ཤེས་པས་ཀྱང་། སེམས་ཀྱི་རྒྱུའི་རྐྱེན་དུ་གྱུར་པས་ཕན་ཚུན་དུ་མདུང་ཁྱིམ་ལྟར་རྟེན་ཅིང་འབྲེལ་པའི་ནུས་པས། ཡུལ་དང་། དབང་པོ་དང་། ཡིད་དེ་མ་ཐག་པ་རྣམས་ཀྱང་རྒྱུ་དང་རྐྱེན་ལྟར་དུ་སྣང་མོད་ཀྱི། དོན་དམ་པ་འདི་ལ་སུས་ཀྱང་སྐྱེ་བ་དང་འགག་པ་མེད་དེ། དཔེར་ན་སྒྱུ་མའི་སྐྱེས་བུ་དུ་མ་ལ་ལ་ནི་སྐྱེ། ལ་ལ་ནི་འཆི། ལ་ལ་ནི་འགྲོ། ལ་ལ་ནི་འོང་བ་བྱེད་པ་སྣང་ཡང་། དེ་ལྟར་བདེན་པའི་སྐྱེ་འགག་དང་འགྲོ་འོང་མེད། སྐྱེས་བུ་ཉིད་ལ་གྲུབ་པའི་ཕྱིར་རོ། །དེ་ལ་སྔགས་ལ་སོགས་པའི་རྒྱུ་གཞན་བཞིན་དུ་རང་བཞིན་གྱིས་མ་རྟོགས་པའི་རྟོག་པ་ཙམ་གྱི་རྐྱེན་སྣང་མོད་ཀྱི། དེའི་འོད་གསལ་བའི་ངོ་བོ་སྐྱེ་འགག་མེད་པར་ཤེས་ཤིང་རྟོགས་པས་ཡང་དག་པར་འགྱུར་བའི་ཕྱིར་ཐམས་ཅད་ཀྱང་ཆོས་ཀྱི་དབྱིངས་སུ་འགྱུར་རོ། །ད་ནི་དེ་ཐམས་ཅད་དང་འབྲེལ་བར་བྱེད་པའི་མཚན་ཉིད་ཆོས་ལ་བརྟེན་ནས་བསྒོམ་པ་བསྟན་པ་ནི། ཡིད་གཙོར་གྱུར་པའི་ཆོས་རྣམས་ལ། །རྟོག་དང་བརྟག་པ་རྣམས་སྤང་ནས། །ཆོས་རྣམས་རང་བཞིན་མེད་པ་ཉིད། །ཆོས་ཀྱི་དབྱིངས་སུ་བསྒོམ་པར་བྱ། །ཞེས་གསུངས་ཏེ། དེ་ལ་ཡིད་ནི་རྣམ་པ་གཉིས་ཏེ། ཀུན་གཞི་ལ་གནས་པ་དེ་ལ་བརྟེན་ནས་འབྱུང་བ་དང་། ཁ་ནང་དུ་བལྟས་ནས་བདག་ཏུ་རྟོག་པ་ཉོན་མོངས་པ་ཅན་གྱི་ཡིད་དོ། །དེ་ལ་འདི་ནི་སྔ་མ་རྣམ་པར་ཤེས་པ་སྐྱེ་བ་དང་། འགག་པའི་གནས་སུ་གྱུར་པ་འདི་ནི་ཡིད་ཀྱི་དབང་པོ་སྟེ། བདག་པོའི་རྐྱེན་ཡིན་ནོ། །དམིགས་པའི་རྐྱེན་ནི་ཆོས་ཏེ། འདུས་བྱས་དང་འདུས་མ་བྱས་གཉིས་ལས། འདུས་བྱས་ནི་བསྡུས་པ་ལས་གྱུར་པ་དང་། མངོན་པར་སྐབས་ཡོད་པ་དང་། ཡང་དག་པར་བླང་བ་བརྡའ་ལས་བྱུང་བ་དང་། ཀུན་བརྟགས་པ་དང་། དབང་འབྱོར་བ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་རྣམས་ཏེ་བརྒྱད་པོའོ། །འདུས་མ་བྱས་ནི། ཆོས་དགེ་བ་དང་། མི་དགེ་བ་དང་། ལུང་དུ་མ་བསྟན་པའི་དེ་བཞིན་ཉིད་དང་། ནམ་མཁའ་དང་། འགོག་པའི་སྙོམ་འཇུག་དང་། འདུ་ཤེས་མེད་པའི་སྙོམ་འཇུག་དང་། སོ་སོར་བརྟག་པ་མ་ཡིན་པའི་སྙོམ་འཇུག་སྟེ། བརྒྱད་དང་། བཞི་དང་གསུམ་དུའང་འདུ་བ་རྣམས་སོ། །དེ་མ་ཐག་པ་ནི། ཡིད་དང་ཆོས་སྔ་མ་འགག་ནས། ཕྱི་མ་འབྱུང་བ། དེ་མ་ཐག་སྟེ། དེ་ལྟར་རྐྱེན་གསུམ་ལས་ཡིད་ཀྱི་རྣམ་པར་ཤེས་པ་སྐྱེ་སྟེ། འོན་ཀྱང་དྲུག་པ་ཡིད་ཀྱི་རྣམ་པར་ཤེས་པ་ཞེས་བྱ་བ། ཚོགས་དྲུག་གི་ཡ་བོར་གྱུར་པ་ཉིད་ནི། འདུ་ཤེས་ནུབ་པ་དང་། འགོག་པའི་སྙོམ་འཇུག་ལ་གནས་པའི་དུས་དང་། འདུ་ཤེས་མེད་པའི་སྙོམ་འཇུག་ལ་ཞུགས་ཟིན་པ་དང་། སེམས་མེད་པའི་གནས་སྐབས་དང་། གཉིད་ཐུག་པོ་དང་། བརྒྱལ་བའི་གནས་སྐབས་ན་མི་འབྱུང་སྟེ། སུམ་ཅུ་པ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུ་འདུ་ཤེས་མེད་པ་དང་། །སྙོམ་པར་འཇུག་པ་རྣམ་གཉིས་དང་། །སེམས་མེད་གཉིད་དང་བརྒྱལ་མ་གཏོག །ཞེས་གསུངས་སོ། །དེས་ན་དྲུག་པ་ཡིད་ཀྱི་རྐྱེན་གསུམ་ལས་སྐྱེའོ། །གང་གིས་འགོག་པ་ལ་སྙོམ་པར་ཞུགས་པ་ན། རྣམ་པར་ཤེས་པ་སྐྱེ་བ་འགག་པའི་རྟེན་དང་། གནས་གྱུར་པའི་ཡིད་ཀུན་གཞི་ལ་གནས་པ་ཡོད་དོ། །དེས་ན། དྲུག་པོ་འགག་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་བྱ་བ་བཤད་པ་དང་། ཉོན་མོངས་མེད་པས་དྲི་མ་མེད་པའི་ཡིད་ཅེས་བྱ་བ་དང་། བྱེད་པ་པོ་མེད་པ་རང་བཞིན་འཛིན་པས་ན། ཡིད་ཀྱིས་ཁམས་དང་། རྣམ་པར་ཤེས་པའི་སྒོ་བྱེད་པས་ན་ཡིད་ཀྱི་སྐྱེ་མཆེད་ཅེས་བཤད་པར་བྱའོ། །ཉོན་མོངས་ཅན་གྱི་ཡིད་ནི། གང་གིས་ཡིད་ནི་མ་རྟོགས་པས་ཐོག་མ་མེད་པ་ནས་རྒྱུད་པས། མ་རིག་པ་དང་། ང་རུ་འཛིན་པ་ནས་བདག་ཏུ་རྟོག་པ། བདག་ལ་ཆགས་པ། སྲེད་པར་བྱེད་པའི་རང་བཞིན་ཏེ། བསྒྲིབ་ལ་ལུང་དུ་མ་བསྟན་པ་འདི་ཡིན་པས་ཀུན་བརྟགས་དང་ཉོན་མོངས་ཐམས་ཅད་ཀྱི་རྩ་བ་སྟེ། དེའི་ཕྱིར་ཡང་དག་པ་མ་ཡིན་པའི་ཀུན་རྟོག་ཅེས་ཀྱང་བཤད་དོ། །འདི་ལས་ཉོན་མོངས་པ་བསྒོམ་པས་སྤང་བ་འབྱུང་ངོ་། །འདིའི་རྐྱེན་གྱིས་ཚོགས་དྲུག་ཀྱང་དྲི་མ་ཅན་དུ་བྱས་པས་མཐོང་བས་སྤང་བར་བྱ་བའི་ཉོན་མོངས་ཀྱང་འབྱུང་བར་འགྱུར་རོ། །རྒྱུ་མཚན་འདིས་ཡིད་ལ་ཆ་གསུམ་སྟེ། དྲི་མའི་ཆ་ཉོན་ཡིད་ཀྱིས་བསྐྱེད་པ་དང་། ཡུལ་ཆོས་ལ་བྱེ་བྲག་ཏུ་དམིགས་པ་དྲུག་པ་ཡིད་ཀྱི་རྣམ་ཤེས་དང་། རྣམ་ཤེས་ཐམས་ཅད་སྐྱེ་བ་དང་། འགག་པའི་གནས་སུ་གྱུར་པ་སྐད་ཅིག་མ་དེ་མ་ཐག་པའོ། །དེ་ལ་དང་པོ་ཀུན་བརྟགས་ཏེ་གཏན་ནས་མེད་པའོ། །གཉིས་པ་ནི་སྒོ་ལྔ་དང་མཚུངས་ཏེ་སྣང་ཡང་རང་བཞིན་གྱིས་སྟོང་པའོ། །གསུམ་པ་ནི་སྤང་བྱ་དང་། གཉེན་པོའི་ཤེས་པ་གཡོ་བའི་ཆ་ཙམ་སྟེ། ངོ་བོ་ལ་རྟོག་པ་མེད་པའི་རྟེན་ཅིང་འབྲེལ་པར་འབྱུང་བ་ཉིད་པས། ཡིད་ནི་ཆོས་ཐམས་ཅད་ཀྱི་གཙོ་བོ་ཡང་ཡིན་པས་ན། འདི་ལྟར་རྟོགས་ནས། མཚན་མས་རྟོག་པ་དང་། བརྟག་པར་བྱ་བ་ཕྱི་དང་ནང་དུ་རྟོག་པ་ཐམས་ཅད་རྣམ་པར་སྤངས་ལ་ཡིད་རང་བཞིན་གྱིས་མེད་པའི་ཕྱིར། ཆོས་འདུས་བྱས་དང་། འདུས་མ་བྱས་དཀར་བ་དང་། ནག་པའི་ཆོས་ཐམས་ཅད་རང་བཞིན་མེད་པའི་ཆོས་ཀྱི་དབྱིངས་སུ་རྟོགས་པར་བྱའོ། མོས་ནས་བསྒོམ་པར་བྱའོ། །མངོན་སུམ་དུ་སྟེ་འདི་ནི་རྣམ་པར་མི་རྟོག་པའི་ཡེ་ཤེས་སྣང་བའི་ཏིང་ངེ་འཛིན་ནོ། །འདི་ནི་ཤེས་རབ་ཀྱི་ཕ་རོལ་དུ་ཕྱིན་པའོ། །དེ་ལྟར་ཡང་། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ །ཞེས་བསྡུད་པ་ལས་གསུང་ཤིང་། རྒྱས་པར་རྣམ་པར་མི་རྟོག་པ་ལས་གསུངས་སོ། །འདི་ཡིད་ལ་བྱ་བའི་ཚུལ་བསྡུས་ནས། ཆོས་དང་ཆོས་ཉིད་རྣམ་པར་འབྱེད་པ་ལས་ཀྱང་། ཡང་དག་པ་མ་ཡིན་པའི་ཀུན་ཏུ་རྟོག་པ་ས་བོན་ཐམས་ཅད་པ་མེད་པ་གཉིས་སྣང་བའི་རྒྱུ་དེ་ལ་བརྟེན་པའི་རྒྱུད་གཞན་དེ་བཞིན་ཉིད་མ་ཤེས་པ་ལས་ཡིན་ཏེ། དེའི་ཕྱིར་རྒྱུ་དང་བཅས་པའི་འབྲས་བུ་ནི། སྣང་དུ་ཟིན་ཀྱང་ཡོད་པ་མ་ཡིན་ནོ། །འདི་སྣང་བ་ལས་ཆོས་ཉིད་མི་སྣང་ཞིང་། འདི་མི་སྣང་བ་ལས་ནི་ཆོས་ཉིད་སྣང་བ་ཡིན་ནོ། །ཞེས་དེ་ལྟར་ཡིད་ལ་བྱེད་པའི་བྱང་ཆུབ་སེམས་དཔའ་ནི་རྣམ་པར་མི་རྟོག་པའི་ཡེ་ཤེས་ལ་འཇུག་པ་ཡིན་ནོ། །ཞེས་འཕགས་པ་བྱམས་པས་གསུངས་སོ། །རང་གསལ་སྟོང་དུ་རྟོགས་པའི་ཚུལ་ནི་ཚིགས་སུ་བཅད་པ་གཉིས་ཏེ། །མཐོང་དང་ཐོས་དང་བསྣམ་པ་དང་། །མྱང་དང་རེག་པར་གྱུར་པ་དང་། །ཆོས་རྣམས་དེ་ལྟར་རྣལ་འབྱོར་པས། །ཤེས་ནས་མཚན་ཉིད་རྫོགས་པ་ཡིན། །ཞེས་གསུང་པ་ནི། ཡུལ་དྲུག་པོ་དང་རྣམ་པར་ཤེས་པ་སྔར་བསྟན་པ་ལྟར་རང་གི་ངོ་བོས་རྟེན་ཅིང་འབྲེལ་པར་འབྱུང་བ་སྣང་བ་ཙམ་སྐྱེ་འགག་དང་བྲལ་བར་རྟོགས་པའི་ཚེ། རྣལ་འབྱོར་མངོན་སུམ་རྟོག་པ་དང་བྲལ་ཞིང་མ་འཁྲུལ་པའི་མཚན་ཉིད་རྫོགས་པ་ཡིན་ནོ། །དེ་བཞིན་དུ། མིག་དང་རྣ་བ་སྣ་དག་དང་། །ལྕེ་དང་ལུས་དང་དེ་བཞིན་ཡིད། །སྐྱེ་མཆེད་དྲུག་པོ་རྣམ་དག་པ། །འདི་ཉིད་དེ་ཉིད་མཚན་ཉིད་དོ། །ཞེས་གསུངས་ཏེ། ནང་གི་སྐྱེ་མཆེད་དེ་དྲུག་ཀྱང་རང་གི་ངོ་བོས་སྣང་ལ་རང་བཞིན་མེད་པར་རྣམ་པར་དག་པའི་མཚན་ཉིད་འདི་ཉིད་དོ། །འདི་ལྟར་དཔལ་ས་ར་ཧ་ཡིས་ཀྱང་། མདུན་དང་རྒྱབ་དང་ཕྱོགས་བཅུ་རུ། །གང་དག་མཐོང་བ་དེ་དེ་ཉིད། །ཞེས་གསུངས་སོ། །དེ་ནས་འཁོར་འདས་ཀྱི་ངོ་བོ་སེམས་རྟོགས་མ་རྟོགས་སུ་བསྟན་པ་ནི། ཚིགས་སུ་བཅད་པ་གཉིས་ཏེ། སེམས་ཉིད་རྣམ་པ་གཉིས་སུ་མཐོང་། །ཅི་ལྟར་འཇིག་རྟེན་འཇིག་རྟེན་འདས། །ཞེས་མདོར་བསྟན་པ་སྟེ། སེམས་ལ་ཕུང་པོ་ཁམས་དང་སྐྱེ་མཆེད་ཀྱི་བག་ཆགས་ཀྱིས་བསྒོས་པས་ན། འཁོར་བ་འཇིག་རྟེན་པ་ཡིན་ལ། བག་ཆགས་ཀྱི་དྲི་མ་དག་ན་མྱ་ངན་ལས་འདས་པ་སྟེ། འདི་རྒྱས་པར་བཤད་པ་ནི། བདག་ཏུ་འཛིན་པས་འཁོར་བ་སྟེ། །སོ་སོར་རིག་ན་དེ་ཉིད་དེ། འདོད་ཆགས་ཟད་པས་མྱ་ངན་འདས། །ཞེ་སྡང་གཏི་མུག་ཟད་པ་དང་། །དེ་དག་འགག་པས་སངས་རྒྱས་ཉིད། །ལུས་ཅན་ཀུན་གྱི་སྐྱབས་ཉིད་དོ། །ཞེས་གསུངས་ཏེ། གང་དག་སེམས་ལ་བདག་ཏུ་འཛིན་པ་ཡོད་ན། ཡུལ་དྲུག་ཏུ་གཞན་དུ་འཛིན་པ་འབྱུང་ཞིང་། དེའི་དབང་གིས་ལས་དང་ཉོན་མོངས་པ་ཀུན་བསྐྱེད་པས་འཁོར་བའི་འཁོར་ལོ་སྒྱུ་མ་ལྟ་བུར་སྣང་ངོ་། །རྒྱུ་དེས་ན་རྣམ་པར་ཤེས་པའི་ཚོགས་དྲུག་གི་འདོད་ཆགས་དང་། ཞེ་སྡང་། གཏི་མུག་དག་པས་མཐོང་བའི་ལམ་མངོན་དུ་འཐོབ་ཅིང་། དག་པའི་ཡིད་དང་ཀུན་གཞི་ལ་སྒྲིབ་པའི་ཉོན་མོངས་པ་ཅན་གྱི་ཡིད་ཟད་པ་ན། བཟོད་པ་ཆེན་པོ་འཐོབ་ལ། ཀུན་གཞི་ཉིད་སྤང་ཤིང་དག་པ་ན། ཐམས་ཅད་མཁྱེན་པའི་སངས་རྒྱས་སུ་འགྱུར་ཏེ། ལུས་ཅན་ཐམས་ཅད་ཀྱི་སྐྱབས་དམ་པར་གྱུར་རོ། །འདི་ལྟར་མདོ་སྡེ་རྒྱན་ལས་ཀྱང་། །སེམས་ནི་གཉིས་སུ་སྣང་བས་སྟེ། །ཆགས་ལ་སོགས་པ་སྣང་བ་དང་། །དད་ལ་སོགས་པར་སྣང་བར་འདོད། །ཉོན་མོངས་དགེ་ཆོས་ཡོད་མ་ཡིན། །སེམས་ནི་སྣ་ཚོགས་སྣང་བ་དང་། །རྣམ་པ་སྣ་ཚོགས་ཅན་དུ་འཇུག །དེ་ལ་སྣང་དེ་ཡོད་དང་མེད། །དེ་ཕྱིར་ཆོས་ཀྱིས་མ་ཡིན་ནོ། །ཞེས་གསུངས་སོ། །གཟུགས་ཀྱི་སྐུའི་དོན་བཤད་པ་ནི། །ཤེས་དང་མི་ཤེས་པ་དག་ལས། །ལུས་འདི་ཉིད་ནི་ཐམས་ཅད་དེ། །རང་གི་རྣམ་པར་རྟོག་པས་བཅིངས། །བདག་ཉིད་ཤེས་ན་གྲོལ་བར་འགྱུར། །ཞེས་གསུངས་ཏེ། དེ་ལྟར་ན་སེམས་ཀྱི་དྲི་མ་དག་པས་སངས་རྒྱས་སུ་འགྱུར་བར་རིགས་ཀྱི་ཐེག་པ་ཐུན་མོང་ལས། ལུས་ནི་ཕ་མ་ལ་སོགས་པའི་རྐྱེན་ལས་བྱུང་བ་མི་གཙང་བ་འཇིགས་པ་སྟེ། དེས་ན་སྤང་བྱ་ཉིད་ཡིན་པས་གཟུགས་ཀྱི་ཕུང་པོ་ལ་ནི་རང་གི་ངོ་བོས་དག་པ་མེད་དོ། །སྙམ་པའི་འཁྲུལ་པ་བསལ་བའི་ཕྱིར། གནས་ཡོངས་སུ་གྱུར་པའི་སངས་རྒྱས་ཀྱི་གཟུགས་ཀྱི་སྐུ་ཡང་། ཤེས་པ་དང་མི་ཤེས་པའི་ཁྱད་པར་ཙམ་གྱི་དྲི་མ་དང་བཅས་པ་དང་། དྲི་མ་མེད་པའི་ལུས་ཞེས་བྱ་བ་གཉིས་སུ་བརྗོད་ཀྱི། ལུས་འདི་ཉིད་ལ་གཟུགས་སྐུའི་ཡོན་ཏན་ཐམས་ཅད་ཀྱང་ཡོད་དོ། །ཤུན་པ་དང་བཅས་པའི་བཻ་ཌཱུརྻ་བཞིན་རང་གི་རྣམ་ཤེས་འཆིང་བས་བཅིངས་ཏེ་ཡོན་ཏན་མཐོང་ངོ་། །བདག་ཉིད་ཀྱི་འཆིང་བ་དང་བྲལ་བར་ཤེས་ན་རྣམ་པར་གྲོལ་བའི་གཟུགས་ཀྱི་སྐུར་འགྱུར་རོ། །འདི་ནི་རྒྱས་པར་ཐེག་བསྡུས་ལས། གནས་ཡོངས་སུ་གྱུར་པ་རྣམས་ཀྱི་ནང་ནས་ཀྱང་། གཟུགས་ཀྱི་ཕུང་པོ་གནས་གྱུར་པའི་ཕྱིར། མཚན་དང་དཔེ་བྱད་དང་ཞིང་རྣམ་པར་དག་པ་ལ་དབང་འབྱོར་པར་འགྱུར་རོ། །ཞེས་གསུངས་སོ། །བྱང་ཆུབ་ཀྱི་དོན་བཤད་པ་ནི། བྱང་ཆུབ་ཉེ་མིན་རིང་བ་མིན། །འགྲོ་མིན་འོང་བ་མ་ཡིན་ཞིང་། །ཉོན་མོངས་གཟེབ་གྱུར་འདི་ཉིད་ལ། མཐོང་བ་དང་ནི་མ་མཐོང་ཡིན། །ཞེས་གསུངས་ཏེ། ལུས་དང་སེམས་གཉིས་ཀྱི་དྲི་མ་རྣམ་པར་དག་པས་བྱང་ཆུབ་ཐོབ་བོ་ཞེས་ཐ་སྙད་དུ་བཏགས་ཀྱང་། བྱང་ཆུབ་ནི་ཉེ་བ་མ་ཡིན་ཏེ། རྟོག་པའི་ཉོན་མོངས་པའི་འཆིང་བས་བསྒྲིབ་པ་ནི་ཐག་རིང་སྟེ་སྣང་མུན་བཞིན་ནོ། །བྱང་ཆུབ་རིང་བ་ཡང་མ་ཡིན་ཏེ། ལུས་སེམས་ཀྱི་དག་པའི་ངོ་བོ་ཡིན་པའི་ཕྱིར་རོ། །དེས་ན་ཁྱད་པར་ཉོན་མོངས་པའི་དྲ་བ་ཉིད་ལ་མཐོང་བ་དང་མ་མཐོང་བའི་ཁྱད་པར་ཙམ་དུ་ཟད་དོ། །དེའི་ཕྱིར་འཁོར་འདས་ཐམས་ཅད་རྟེན་ཅིང་འབྲེལ་བར་འབྱུང་བ་ཙམ་སྟེ། སྐྱེ་བ་མེད་ཅིང་འགག་པ་མེད་པ་སྤྲོས་པ་ཐམས་ཅད་དང་བྲལ་བའོ། །དེ་ལྟར་སྟོང་ཉིད་བདུན་ཅུ་པ་ལས་ཀྱང་། དངོས་པོ་ཐམས་ཅད་རང་བཞིན་གྱིས། །སྟོང་པ་ཡིན་པས་དངོས་རྣམས་ཀྱི། །རྟེན་འབྱུང་འདི་ནི་དེ་བཞིན་གཤེགས། །མཚུངས་པ་མེད་པ་ཉེ་བར་བསྟན། །ཞེས་གསུངས་སོ། །མདོའི་དོན་བསྟན་པ་ནི། ཤེས་རབ་མར་མེ་ལ་གནས་ནས། །མཆོག་ཏུ་ཞི་བར་གྱུར་པ་ཡིས། །བདག་ལ་བརྟག་པས་གནས་བྱ་ཞེས། །མདོ་སྡེའི་ཚོགས་ལས་གསུང་པ་ལགས། །ཞེས་གསུངས་ཏེ། འདི་ལྟར་ཡང་དག་པའི་ལྟ་བ་བདེན་པ་གཉིས་ཀྱི་ཚུལ་རིག་ཅིང་ཞི་གནས་དང་ལྷག་མཐོང་གི་རྒྱུ་ཚོགས་རྣམ་པར་དག་པ་སྡོམ་པའི་སྟོབས་ལས་རྟོགས་པའི་ཤེས་རབ་ནི་། ཤེས་རབ་ཀྱི་མར་མེ་སྟེ། དེ་ནས་མཆོག་ཏུ་ཞི་བའི་སངས་རྒྱས་ཀྱི་ངོ་བོར་འགྱུར་བ་ནི། བདག་རང་བཞིན་གྱིས་དག་པ་ལ་རྟག་པར་གནས་པར་བྱའོ། །ཞེས་བཅོམ་ལྡན་འདས་ཀྱིས་མདོ་ཐམས་ཅད་དུ་གསུང་པ་ཡིན་ནོ། །འདི་ལྟར་རྣམ་པར་མི་རྟོག་པའི་ཡེ་ཤེས་ལ་གནས་ནས། ཡེ་ཤེས་ཀྱི་སྣང་བ་རྒྱ་ཆེར་སྐྱེ་ཞིང་མངོན་དུ་གྱུར་པའི་ཚུལ་སྟོན་པར་བྱེད་པས་དེ་བརྗོད་པར་བྱའོ། །རྐྱེན་དཀོན་མཆོག་ཇི་ལྟར་སྣང་བའི་ཚུལ་བཤད་པ་ལ་ལྔ་སྟེ། མདོར་བསྟན་པ་དང་། སངས་རྒྱས་མི་མཐོང་བའི་ཚུལ་དང་། མཐོང་བའི་ཚུལ་དང་། བསམ་གྱི་མི་ཁྱབ་པའི་འཕྲིན་ལས། བྱང་ཆུབ་ཉེ་རིང་མེད་པའི་དོན་བཤད་པའོ། །དང་པོ་ནི། སྟོབས་ཅུའི་སྟོབས་ཀྱིས་བྱིས་པ་རྣམས། བྱིན་རླབས་ཟླ་བ་ཚེས་པ་བཞིན། །ཉོན་མོངས་ཅན་གྱི་སེམས་ཅན་གྱིས། །དེ་བཞིན་གཤེགས་པ་མི་མཐོང་ངོ་། །ཞེས་བྱ་བ་ནི་གནས་དང་གནས་མ་ཡིན་པ་མཁྱེན་པ་དང་། ལས་ཀྱི་རྣམ་པར་སྨིན་པ་མཁྱེན་པ་དང་། ཁམས་སྣ་ཚོགས་པ་མཁྱེན་པ་དང་། མོས་པ་མཁྱེན་པ་དང་། ཉོན་མོངས་པ་དང་རྣམ་པར་བྱང་བ་མཁྱེན་པ་དང་། དབང་པོ་མཆོག་དང་མཆོག་མ་ཡིན་པ་མཁྱེན་པ་དང་། སྔོན་གྱི་གནས་དང་། ལྷའི་མིག་དང་། ཟག་པ་ཟད་པ་མཁྱེན་པ་དང་། ཀུན་ཏུ་འགྲོ་བའི་ལམ་མཁྱེན་པ་སྟེ། འདི་ལྟར་སྟོབས་བཅུའི་སྟོབས་ཀྱིས་བྱིན་གྱི་རླབས་པས་ཐོག་མར་ཟླ་བ་ཚེས་པ་ཙམ་དུ་ཡུལ་དང་ཡུལ་ཅན་ལྟར་སྣང་བའི་དེ་བཞིན་གཤེགས་པ་མཐོང་བར་འགྱུར་གྱི། གང་དག་རང་གི་སེམས་ལ་ཉོན་མོངས་པས་བསྒྲིབ་ན། ཐ་ན་དེ་བཞིན་གཤེགས་པའི་གཟུགས་བརྙན་སྙམ་པ་ཡང་མི་མཐོང་ངོ་། །དེ་ལྟར་ཡང་། ཇི་ལྟར་ཆུའི་སྣོད་ཆགས་ན། །ཟླ་བའི་གཟུགས་ཀྱང་མི་སྣང་བ། །དེ་བཞིན་སེམས་ཅན་དམན་པ་ལ། །སངས་རྒྱས་གཟུགས་ཀྱང་མི་སྣང་ངོ་། །ཞེས་བྱམས་པའི་ཞལ་སྔ་ནས་ཀྱང་གསུངས་སོ། །སངས་རྒྱས་མི་མཐོང་བའི་ཚུལ་ནི། ཚིགས་སུ་བཅད་པ་གཉིས་ལས། སངས་རྒྱས་དུས་ཐམས་ཅད་དུ་དྲང་དང་བྲལ་བ་མེད་ཀྱང་། སྒྲིབ་པའི་འཆིང་བས་མི་མཐོང་བའི་དཔེ་ནི། ཇི་ལྟར་ཡིད་དྭགས་རྣམས་ཀྱིས་ནི། །རྒྱ་མཚོ་སྐམ་པར་མཐོང་བ་ལྟར། །ཞེས་བྱ་བ་གང་དག་ཡི་དྭགས་སུ་སྐྱེས་པ་ན། སྐོམ་པས་གདུངས་ཏེ་སྔར་མིར་སྐྱེས་པ་ན་རྒྱ་མཚོའི་ཆུ་ཟད་པ་མེད་པ་ཡོད་ཤེས་པས་དེར་ཕྱིན་པ་ན་སྒྲིབ་པས་རྒྱ་མཚོ་སྐམ་པར་མཐོང་གི་རྒྱ་མཚོ་ནི་གར་ཡང་མ་སོང་ངོ་། །དེ་བཞིན་དུ་དེ་བཞིན་མི་ཤེས་པས་བསྒྲིབས་པས། སངས་རྒྱས་རྣམས་ནི་མེད་པར་བརྟག་ཞེས་གསུངས་ཏེ། རང་གི་རྒྱུད་ལ་དད་པ་ལ་སོགས་པའི་སྟོབས་ཀྱི་བྱིན་རླབས་མེད་ཅིང་མི་ཤེས་པའི་ཉོན་མོངས་ཀྱི་ཤེས་རྒྱུད་ཚིག་ནས་དེ་བཞིན་གཤེགས་པ་མེད་པར་རྟོགས་ཀྱི། དུས་ཐམས་ཅད་དུ་འབྲལ་བ་མེད་དོ། །དེ་ལྟར་གནས་སྐབས་ལ་ལར་མཐོང་བ་རིགས་སོ་ཞེ་ན། མཐོང་ཡང་ཅི་ཞིག་བྱ་སྟེ། མ་མཐོང་བ་ཉིད་དུ་མཚུངས་སོ། །ཞེས་བསྟན་པའི་ཕྱིར། དམན་དང་བསོད་ནམས་དམན་པ་ལ། །བཅོམ་ལྡན་འདས་ཀྱིས་ཅི་བགྱིར་མཆིས། །ཅི་ལྟར་དམུས་ལོང་ལག་པ་རུ། །རིན་ཆེན་མཆོག་ནི་བཞག་པ་འདྲ། །ཞེས་གསུངས་ཏེ། གང་དག་དམན་པ་ནི་བླུན་པ་ངན་འགྲོ་རྣམས་དང་། བདེ་འགྲོ་ཡིན་ཀྱང་བསོད་ནམས་དམན་པ་ཀླ་ཀློ་དང་། དམུས་ལོང་དག་། ལྟ་བ་ལོག་པ་ཅན་ལ་སོགས་པ་རྣམས་ལ། བཅོམ་ལྡན་འདས་མཐོང་ཡང་ཅི་ཞིག་བྱ་སྟེ། སླར་ལོག་སྲེད་ཅན་དུ་གྱུར་ཞིང་མ་དད་པས་ལས་ངན་པའི་རྐྱེན་དུ་གྱུར་བ་སྲིད་ལ། དེ་ལྟ་མ་ཡིན་ཀྱང་། དམུས་ལོང་གི་ལག་ཏུ་བཻ་ཌཱུརྻ་བཞག་པ་ལྟ་བུ། ཅི་ཡང་མི་ཕན་སྤོང་བར་བྱེད་པར་འགྱུར་རོ། །སངས་རྒྱས་མཐོང་བའི་ཚུལ་བཤད་པ་ལ་ཡང་ཚིགས་སུ་བཅད་པ་བཞི་ལས། འདི་ཡང་ཇི་ལྟར་སྣང་བ་དང་། མཛད་པ་དང་། དོན་གང་ཡིན་པ་དང་། མཐར་ཐུག་པའི་ཚུལ་བཞི་ཡིས་ཡེ་ཤེས་རྟོགས་པར་བྱ་སྟེ། དང་པོ་ནི། སེམས་ཅན་བསོད་ནམས་བྱས་པ་ལས། །འོད་ཀྱི་རང་བཞིན་དཔལ་ལྡན་པའི། །སུམ་ཅུ་རྩ་གཉིས་མཚན་འབར་བ། །སངས་རྒྱས་དེ་ཡི་མདུན་ན་གནས། །ཞེས་གསུངས་ཏེ། གང་དག་སེམས་ཅན་རང་གི་རྒྱུད་ལ་དད་པ་ལ་སོགས་པའི་ཆོས་ལྔ་དང་ལྡན་ཅིང་བསོད་ནམས་ཀྱི་ཚོགས་ལས། །འོད་ཀྱི་རང་བཞིན་དཔལ་དང་ལྡན་པའི་སྐུ། །མཚན་དཔེས་བརྒྱན་པ་མངོན་པར་འགྱུར་རོ། །དེ་ལ་མཚན་ནི། ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཕྱག་དང་ཞབས་སོར་དྲ་བས་འབྲེལ་བ་དང་། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆག །འདིའི་སྐུ་ནི་བདུན་དག་མཐོ་བ་དང་། །སོར་མོ་རིང་དང་རྟིང་ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ན་ཡ་འདྲ་ཕྱག་རིང་མཛེས། །འདོམ་གྱི་སྦ་བ་སྦུབས་སུ་ནུབ་པའི་མཆོག །ལྤགས་པ་གསེར་མདོག་ལྤགས་པ་སྲབ་པ་དང་། །སྤུ་ནི་རེ་རེ་ནས་གཡས་ལེགས་འཁྲུངས་དང་། །ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདིའི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པ་རོ་མཆོག་སྣང་། །སྐུ་ནི་ནྱ་གྲོ་ཏ་ལྟར་ཆུ་ཞེང་གབ། །གཙུག་ཏོར་ལྟར་ལྡན་ལྗགས་རིང་མཛེས་པ་དང་། །ཚང་དབྱངས་འགྲམ་པ་སེང་གེའི་འདྲ་དང་ཚེམ། །ཤིན་ཏུ་དཀར་དང་ཚད་མཉམ་ཐག་བཟང་དང་། །གྲངས་ནི་བཞི་བཅུ་ཐམ་པ་ཚང་བ་དང་། །སྤྱན་ནི་མཐོ་འཐིང་སྤྱན་རྫི་བ་མཆོག་གི །འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་ཕ་རོལ་དུ་ཕྱིན་པ་ལས་གསུངས་པ་དེ་ལྟ་བུ་སྣང་བར་འགྱུར་རོ། །དེ་སྣང་བས་ཅི་མཛད་ཅེ་ན། མགོན་པོ་དེའི་གཟུགས་ཀྱི་སྐུས། །བསྐལ་པ་མང་པོར་བཞུགས་ནས་ཀྱང་། །གདུལ་བྱ་རྣམས་ནི་གདུལ་བའི་ཕྱིར། །དབྱིངས་ནི་ཐ་དད་གྱུར་མ་ལགས། །ཞེས་གསུངས་ཏེ། །གང་དག་ཡུན་རིང་བ་དང་ཐུང་བ་རྒྱུད་ཇི་ལྟར་སྨིན་པར་འགྱུར་བ་དེ་ལྟར་བཞུགས་ནས་གདུལ་བར་སྣང་སྟེ། རང་གི་རྣམ་པར་དཀར་བའི་ཡེ་ཤེས་ཡུལ་དུ་སྣང་བ་ལ་གཉིས་སུ་འཛིན་པའི་ཆ་ཅུང་ཟད་ཡོད་པས་དེ་ལྟར་སྣང་མོད་ཀྱི། དོན་ལ་ཆོས་ཀྱི་དབྱིངས་དང་ཡེ་ཤེས་ཐ་དད་དུ་གྱུར་པ་ནི་མ་ཡིན་ནོ། །དེའི་ཕྱིར་དོན་གང་ཡིན་བསྟན་པ་ནི། །སེམས་ཀྱི་ཡུལ་ནི་ངེས་རྟོགས་ནས། །དེར་ནི་ཤེས་པས་འཇུག་པར་འགྱུར། །སོ་སོར་རང་རིག་རྣམ་དག་ན། །ས་རྣམས་དེའི་བདག་ཉིད་གནས། །ཞེས་གསུངས་ཏེ། སངས་རྒྱས་ཀྱི་སྐུ་མཐོང་ཞིང་ཐེག་པ་ཆེན་པོའི་ཆོས་རྣམས་ཐོས་ལ། ཚུལ་ཁྲིམས་ཀྱི་དྲི་སྣོམ་ཞིང་ཆོས་ཀྱི་དགའ་བའི་རོ་མྱོང་ནས། ཏིང་ངེ་འཛིན་གྱི་རེག་བྱ་རེག་ཏེ། ཞིབ་མོར་དཔྱོད་པའི་ཤེས་རབ་ཀྱིས་ཆོས་ཐམས་ཅད་ལ་རྟོག་པའི་སྒོ་དྲུག་པ་ནི། སེམས་ཀྱི་ཡུལ་སྟེ་ཡེ་ཤེས་བྱ་བ་ཡིན་པས། དེར་ཤེས་འཇུག་པར་འགྱུར་བ་ཡིན་ཅིང་། སོ་སོ་རང་རིག་པ་རྣམ་པར་དག་པ་འདི་ལ་ཇི་ལྟར་གོང་ནས་གོང་དུ་ཞུགས་ཅིང་གནས་པས་ས་ལམ་ཐམས་ཅད་ལ་རྣམ་པར་དག་པ་བཞུགས་པ་ནས་གནས་པའི་ཐ་སྙད་དུ་བརྗོད་དོ། །མཐར་ཐུག་པའི་ཚུལ་ནི། དབང་ཕྱུག་ཆེན་པོའི་གནས་མཆོག་དང་། །འོག་མིན་ཉིད་དེ་རྣམ་མཛེས་པ། །ཤེས་པ་གསུམ་པོ་གཅིག་ཉིད་དུ། །འདྲེ་བར་འགྱུར་བ་བདག་སྨྲའོ། །ཞེས་གསུངས་ཏེ། གང་གི་རང་རིག་པའི་ཡེ་ཤེས་ཆོས་ཀྱི་དབྱིངས་རྣམ་པར་དག་པ་མཐར་སོན་པའི་ཚེ། གཟུགས་ཀྱི་སྐུའི་ཡེ་ཤེས་དང་། དབང་ཕྱུག་ཆེན་པོ་བྱང་ཆུབ་སེམས་དཔའི་གནས་གཟུགས་ཁམས་ཀྱི་འོག་མིན་དུ་ལོངས་སྤྱོད་རྫོགས་པ་སྣང་བར་བཤད་པ་དང་། ཆོས་ཀྱི་དབྱིངས་ཀྱི་འོག་མིན་ཆེན་པོར་སངས་རྒྱས་ཕལ་པོའི་མདོ་ལས་གསུངས་པ་རྣམས་ཐ་དད་པ་ལྟར་བཤད་མོད་ཀྱིས་ཀྱང་། ཡང་དག་པར་ན་དེ་ལྟར་ཕྱི་རོལ་གྱི་དོན་དུ་ནི་ཡོད་པ་མ་ཡིན་གྱི། རང་གི་སེམས་ཀྱི་སྙིང་པོའི་དྲི་མ་དག་པ་དང་། མ་དག་པའི་ཆ་ལས་ཡེ་ཤེས་ཡུལ་ལྟར་སྣང་བ་དང་། ཡུལ་ཅན་ལྟར་སྣང་བའི་ཆ་སྣང་བ་ཙམ་སྟེ། མཐར་ཐུག་གི་དོན་དུ་ནི་ཤེས་པ་གསུམ་གཅིག་ཏུ་འདྲེས་པས་སངས་རྒྱས་ཐམས་ཅད་མཉམ་པ་ཉིད་གསུམ་གྱིས་མཉམ་པ་ཡིན་པས། རྣལ་འབྱོར་ཅན་གྱི་ཤེས་པ་ལ་སྣང་བ་ཡང་རང་ལས་གཞན་དུ་མེད་པར། བདག་ཉིད་ཆེན་པོ་འཕགས་པ་ཀླུ་སྒྲུབ་བདག་སྨྲའོ། །དེ་ལ་ཤེས་པ་གསུམ་ནི། དངོས་པོ་ལ་འཇུག་པའི་ཤེས་པ་དང་། ཀུན་གཞི་ལ་གནས་པའི་ཡིད་དང་། ཀུན་གཞིའི་རྣམ་པར་ཤེས་པ་སྟེ། ཇི་ལྟ་བུ་ཞིག་འདྲེ་ཞེ་ན། མོས་པས་སྤྱོད་པའི་ས་ལ་འཇུག་པའི་རྣམ་པར་ཤེས་པ་སྦྱོང་བས་སྤྲུལ་པའི་སྐུ་སྟོན་ཏོ། །ལྷག་པའི་བསམ་པ་དག་པའི་ས་ལ་ཞུགས་ནས་ས་བདུན་གྱི་བར་ལ་ཀུན་གཞི་ལ་གནས་པའི་ཡིད་སྦྱོང་བས་ལོངས་སྤྱོད་རྫོགས་པའི་སྐུ་སྣང་ངོ་། །དག་པ་ས་གསུམ་ལ་ཀུན་གཞིའི་རྣམ་པར་ཤེས་པ་དག་པས་ཆོས་ཀྱི་སྐུ་སྣང་སྟེ། ཇི་ལྟར་སྣང་བ་བཞིན་འཐོབ་པར་གྱུར། ཐོབ་པས་དབང་འབྱོར་པ་ལ་དེའི་བདག་ཉིད་དུ་ཉེ་བར་སོན་པའི་ཐ་སྙད་དུ་བརྗོད་པ་ཡིན་པས། སངས་རྒྱས་ཀྱི་སྐུ་དང་ཡེ་ཤེས་ཀྱི་འཕྲིན་ལས་ཕྱི་ན་ཡོད་པ་ལྟར་སྣང་བ་ཡང་ཡིན་ལ། ཕྱི་རོལ་དུ་བདེན་པ་མེད་པ་ཡང་ཡིན་ནོ། །དེའི་ཕྱིར་རང་གི་ཆོས་ཀྱི་སྐུའི་འོད་ཟེར་དང་འཕྲིན་ལས་ཡིན་པར་ཤེས་པར་བྱའོ། །འདི་ལྟར་ཡེ་ཤེས་སྣང་བའི་རྒྱན་གྱི་མདོར་གསུངས་པ་དང་། རྒྱུད་བླ་མ་ལས་ཀྱང་། དེ་བཞིན་དད་སོགས་དྲི་མེད་ཅན། །རང་སེམས་དད་སོགས་གོམ་པ་ལས། །སྣང་བའི་རྫོགས་པའི་སངས་རྒྱས་ནི། །འཆག་པ་དང་ནི་བཞེངས་པ་དང་། །བཞུགས་པ་དང་ནི་གཟིམ་པ་དང་། །ཞི་བའི་ཆོས་ནི་གསུངས་པ་དང་། །མི་གསུང་མཉམ་པར་བཞག་གྱུར་པ། །ཆོ་འཕྲུལ་རྣམ་པ་སྣ་ཚོགས་དག །མཛད་པ་གཟིམ་གདངས་ཆེན་པོ་ཅན། །སེམས་ཅན་རྣམས་ཀྱི་མཐོང་བར་འགྱུར། །དེ་མཐོང་བས་ཀྱང་འདོད་ལྡན་པ། །བྱང་ཆུབ་ཕྱིར་ནི་རབ་སྦྱོར་ཏེ། །དེ་རྒྱུ་ཡང་དག་བླང་ནས་ནི། །འདོད་པའི་གོ་འཕང་འཐོབ་པར་བྱེད། །སྣང་བ་དེ་ནི་ཤིན་ཏུ་ཡང་། །རྟོག་མེད་གཡོ་བ་མེད་པ་ཉིད། །དེ་ལྟ་མོད་ཀྱིས་འཇིག་རྟེན་ན། །དོན་ཆེན་པོས་ནི་ཉེ་བར་གནས། །འདི་ནི་རང་སེམས་སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །དེ་ལྟ་ན་ཡང་གཟུགས་མཐོང་སྟེ། །དེ་དག་ལ་ནི་དོན་ཡོད་འགྱུར། །རིམ་གྱིས་དོན་མཐོང་ལ་བརྟེན་ནས། །ཐེག་པ་འདི་ལ་གནས་པ་དག །ནང་གི་དམ་པའི་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་གསུངས་པ་དང་། དོན་མཐུན་པ་ཡིན་ནོ། །བསམ་གྱིས་མི་ཁྱབ་པའི་འཕྲིན་ལས་བཤད་པ་ནི། ཚིགས་སུ་བཅད་པ་གསུམ་སྟེ། ཐོག་མར་ཐམས་ཅད་མཁྱེན་པའི་དོན་བསྟན་པའི་ཕྱིར། བྱིས་པའི་ནང་ན་ཡོངས་མཁྱེན་དང་། །འཕགས་པའི་ནང་ན་སྣ་ཚོགས་ཉིད། །ཞེས་བྱ་བ་ནི་མ་རྟོག་པའི་སེམས་ཅན་གྱི་དོན་དུ་ཐམས་ཅད་ཤེས་པར་སྟོན་ཅིང་འདུལ་བ་དང་། འཕགས་པའི་ནང་དུ་དཔག་ཏུ་མེད་པའི་ཏིང་ངེ་འཛིན་གྱི་རྣམ་པར་རོལ་པ་སྟོན་པ་ཡང་། སེམས་དག་པ་དབང་འབྱོར་པའི་མཐུའོ། །གཞན་ཡང་། དབང་ཕྱུག་ཆེན་པོ་ཚེ་དཔག་མེད། །བསྐལ་པའི་ཚེ་ཡི་རྒྱུ་གང་ཡིན། ཞེས་པ་ནི། འོག་མིན་དབང་ཕྱུག་ཆེན་པོ་དང་། འོག་མིན་པ་རྣམས་ཀྱི་ཚེ་ནི། བསྐལ་པ་ཆེན་པོ་ཁྲི་དྲུག་སྟོང་ཡིན་མོད་ཀྱིས། དེའི་རྒྱུ་གང་ཡིན་པ་ཡང་སྟོན་ཅིང་དེ་བས་ཀྱང་ཚད་མེད་པ་འདིའི་བསྐལ་པ་ལ་ཉིན་ཞག་ཏུ་བགྲང་བ་དང་། དེའི་བསྐལ་པ་ཡང་ཉིན་ཞག་ཏུ་བགྲང་བ་དེ་ལྟར་བསྒྲེས་པ་དེ་བཅུ་གསུམ་ལྷག་པར་ཕལ་པོ་ཆེའི་མདོ་ལས་བྱུང་བའི་ཚུལ་ཡང་སྟོན་པའི་དབང་འབྱོར་པས་ཡེ་ཤེས་འབྱུང་སྟེ། །ཕྱི་རོལ་སེམས་ཅན་ཁམས་ཀྱི་ཡང་། །དཔག་ཏུ་མེད་པའི་བསྐལ་པར་ནི། །ཚེ་ཡང་གང་གིས་བསྲུང་བ་ནི། །སྲོག་ཆགས་རྣམས་ཀྱི་སྲོག་གནས་པའི། །རྒྱུ་ཡང་མི་ཟད་པ་དེ་ཉིད། །ཞེས་གསུངས་ཏེ། ཕྱི་རོལ་གྱི་སེམས་ཅན་གྱི་ཁམས་ཐམས་ཅད་ཀྱི་ཡང་རང་གི་ཡེ་ཤེས་མ་རྟོགས་པའི་ཆ་ལས་དཔག་ཏུ་མེད་པའི་བ སྐལ་པ་བརྗོད་དུ་མེད་པར་ཐོག་མ་དང་། ཐ་མ་མི་མངོན་པའི་བར་དུ་རྟེན་ཅིང་འབྲེལ་པར་འབྱུང་བའི་ཚུལ་བསམ་གྱིས་མི་ཁྱབ་པའི་ཚེའི་རྒྱུན་གང་གིས་བསྲུང་བར་འགྱུར་ཞིང་སྲོག་ཆགས་རྣམས་ཀྱི་སྲོག་ནི། ཨ་ཀྵ་ར་ཞེས་བྱ་བ་སྐྱེ་བ་མེད་ཅིང་འགག་པ་མེད་པའི་ཚུལ་ལ་བརྟེན་ནས་འབྱུང་བའི་ཕྱིར། སྲོག་གནས་པའི་ཚུལ་ཡང་། མི་ཟད་པའི་དོན་དེ་ཉིད་ཡིན་པས་ན། རྟེན་འབྲེལ་རྟོགས་པས་འཁོར་བའི་རང་བཞིན་མྱ་ངན་ལས་འདས་པར་དབྱེ་བ་མེད་པར་རྟོགས་པར་བྱའོ། །དེའི་ཕྱིར། གང་གིས་འབྲས་བུ་མི་བཟད་གང་། །སྣང་བ་མེད་པའི་བྱེ་བྲག་གིས། །ཤེས་རབ་དོན་དུ་རབ་ཏུ་འཇུག ཞེས་སྨོས་ཏེ། འཁོར་འདས་གཉིས་སུ་མེད་པ་རྟོགས་པའི་རྒྱུ་ལས། དེའི་འབྲས་བུ་ཟད་མི་ཤེས་པས་འཁོར་བའི་མུ་དང་མཚུངས་པར་འདོད་པས། སྔར་བསྟན་པའི་བཟུང་བ་དང་འཛིན་པ་གཉིས་སུ་མེད་པའི་བྱེ་བྲག་གིས་མཐོང་བའི་ལམ་མངོན་སུམ་དུ་བྱེད་པའི་ཤེས་རབ་ཀྱི་དོན་དུ་བློ་གྲོས་དང་ལྡན་པ་རྣམས་འཇུག་པར་བྱའོ། །འདི་ལྟར་སེམས་ཅན་གྱི་ཁམས་འཁོར་བ་ཟད་པ་མེད་པ་དང་སངས་རྒྱས་ཀྱི་ཡེ་ཤེས་ཟད་པ་མེད་པ་སྐྱེ་བ་མེད་པ་འགག་པ་མེད་པ་འདི་མངོན་སུམ་དུ་གྱུར་པ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པ་ཉིད་བསྟན་ཏོ། །རིགས་པ་དྲུག་ཅུ་པ་ལས་ཀྱང་། སྲིད་པ་གང་གིས་ཤེས་པ་དེ། །མྱ་ངན་འདས་ཞེས་བརྗོད་པར་བྱ། །སྲིད་པ་དང་ནི་མྱ་ངན་འདས། །ཅུང་ཟད་ཡོད་པ་མ་ཡིན་ནོ། །ཞེས་གསུང་སོ། །དེ་ལྟར་རྟོགས་པས་བྱང་ཆུབ་ཉེ་རིང་མེད་པའི་ཚུལ་ནི། བྱང་ཆུབ་རིང་བར་མི་བསམ་ཞིང་། །ཉེ་བར་ཡང་ནི་བསམ་མི་བྱ། །ཡུལ་དྲུག་སྣང་བ་མེད་པར་ནི། ། ཡང་དག་ཇི་བཞིན་རིག་གྱུར་པའོ། །ཞེས་གསུངས་ཏེ། །བླ་ན་མེད་པའི་བྱང་ཆུབ་ནི་འཁོར་བའི་རང་བཞིན་རྟོགས་པ་ཡིན་པས་རིང་བར་མི་བསམ་མོ། །གཟུང་འཛིན་ཅན་ལ་བྱང་ཆུབ་པ་གཏན་མེད་པའི་ཕྱིར་ཉེ་བར་མི་བསམ་མོ། །དོན་དུ་ཡུལ་དྲུག་གི་མཚན་མ་སྣང་བ་མེད་ན་མེད་དོ། །འཛིན་པའི་རྣམ་པར་ཤེས་པ་དྲུག་སྣང་བ་མེད་ན་སྐྱེ་འགག་མེད་པས་བདུན་པ་ཡིད་མེད་དོ། །དེ་རྣམས་མེད་ན་དེ་རྣམས་ཀྱིས་བསྐྱེད་པའི་ཀུན་གཞིའི་རྣམ་པར་ཤེས་པ་སྐྱེ་བ་མེད་པས་སེམས་མེད་དོ། །དེ་ལྟར་ཡང་དག་པར་རིག་ཅིང་རྟོགས་ནས་མངོན་སུམ་དུ་རྟོགས་པ་ནི་སངས་རྒྱས་ཏེ། །དེ་ལྟར་འཇིག་རྟེན་ལས་འདས་པར་བསྟོད་པ་ལས་ཀྱང་། ཤེས་པ་མེད་པར་ཤེས་བྱ་མིན། །དེ་མེད་རྣམ་པར་ཤེས་པ་མིན། །དེ་ཕྱིར་ཤེས་དང་ཤེས་བྱ་དག །རང་དངོས་མེད་ཅེས་ཁྱོད་ཀྱིས་གསུང་། །ཞེས་པ་སློབ་དཔོན་ཉིད་ཀྱིས་བསྒོམ་རིམ་ལས་ཀྱང་། སེམས་ཙམ་ལ་ནི་བརྟེན་གནས་སུ། །ཕྱི་རོལ་དོན་ནི་མི་རྟོག་གོ །དེ་བཞིན་ཉིད་ལ་དམིགས་ནས་ནི། །སེམས་ཙམ་ལས་ནི་འདའ་བར་བྱ། །སེམས་ཙམ་ལས་ནི་འདས་ནས་སུ། །སྣང་བ་མེད་ལས་འདའ་བར་བྱ། །རྣལ་འབྱོར་སྣང་བ་མེད་གནས་པའི། །དེ་ཡིས་ཐེག་ཆེན་མི་མཐོང་ངོ་། །ཞེས་གསུངས་པ་དང་། སློབ་དཔོན་ཟླ་བ་གྲགས་པས། ཤེས་བྱའི་བུད་ཤིང་སྐམ་པོ་བསྲེག་པའི་མེ། །ཞི་དེའི་ཚུལ་གྱིས་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་དེ་སྐུའི་མངོན་སུམ་མཛད། །ཞེས་བྱ་བ་དང་། མདོ་སྡེ་རྒྱན་ལས་ཀྱང་། སེམས་ལས་གཞན་མེད་པས་ནི་བློས་རིག་ནས། །དེ་ནས་སེམས་ཀྱང་མེད་པ་རྟོགས། །བློ་དང་ལྡན་པས་གཉིས་པོ་མེད་རིགས་ནས། །དེ་མི་ལྡན་པ་ཆོས་ཀྱི་དབྱིངས་ལ་གནས། །ཞེས་གསུངས་པ་ཐམས་ཅད་དོན་གཅིག་སྟེ། རྣམ་པར་ཤེས་པའི་ཚོགས་བརྒྱད་པོ་དག་ཅིང་སྤང་བའི་ཚེ་སངས་རྒྱས་ཀྱི་ཡེ་ཤེས་ཀྱི་མངོན་སུམ་དུ་སྣང་ངོ་། །ཞེས་བྱ་བ་ཡིན་གྱི། ཡེ་ཤེས་ཀྱི་སྐུ་འཕྲིན་ལས་དང་བཅས་པ་ཡང་མེད་དོ་ཞེས་པ་ཡང་མ་ཡིན་ནོ། །དེ་ལྟར་བསྒོམ་པའི་ཚུལ་རྐྱེན་དཀོན་མཆོག་སྣང་ཚུལ་དང་བཅས་པ་བཤད་ཟིན་ཏོ། །ད་ནི་དེ་ལྟར་གོམས་པ་ལས་ལམ་མངོན་དུ་བྱས་ཤིང་ཐོབ་པའི་ཚུལ་འབྱུང་བས་དེ་བཤད་པར་བྱའོ། །དེ་ལ་ལྔ་སྟེ། བླང་དོར་གྱི་ཚུལ་ཤེས་པར་བྱ་བ་དང་། །འཁོར་བའི་གཉེན་པོ་དང་། ཞི་བའི་གཉེན་པོ་དང་། ཁམས་རྒྱས་པར་བྱ་བའི་ཆོས་དང་། ཚུལ་ཇི་ལྟར་རྒྱས་པའི་རིམ་པའོ། །དང་པོ་ནི། ཇི་ལྟར་འོ་མ་དང་འདྲེས་ཆུ། །སྣོད་གཅིག་ལ་ནི་གནས་པ་ལས། །ངང་པས་འོ་མ་འཐུང་བྱེད་ཅིང་། །ཆུ་ནི་མ་ཡིན་དེ་བཞིན་གནས། །དེ་བཞིན་ཉོན་མོངས་ཀྱིས་གཡོག་ནས། །ཡེ་ཤེས་ལུས་འདི་གཅིག་གནས་ཀྱང་། །རྣལ་འབྱོར་པ་ཡིས་ཡེ་ཤེས་ལེན། །མི་ཤེས་པ་ཡིས་འདོར་བར་བྱེད། །ཞེས་གསུངས་སྟེ། དཔེར་ན་ངང་པས་ཆུ་ལ་འོ་མ་འབྱེད་ཅིང་འཐུང་བ་ལྟར། རང་གི་སེམས་དང་ལུས་ཉོན་མོངས་པའི་དྲ་བས་གཡོག་པ་འདི་ལ་སངས་རྒྱས་ཀྱི་ཡེ་ཤེས་ཇི་ལྟ་བ་དང་། ཇི་སྙེད་པ་གནས་ཀྱང་དྲི་མས་མི་གསལ་ཞིང་འདྲེས་པ་ལྟར་སྣང་སྟེ། དེ་ལ་ཡང་དག་པའི་རྐྱེན་རང་གི་རྣམ་པར་རིག་པ་དྲི་མ་མེད་པའི་སངས་རྒྱས་རྣམས་ཀྱི་ཐུགས་རྗེའི་རྒྱུ་མཐུན་པ། སྤང་བྱ་དང་བླང་བྱ་རྣམ་པར་འབྱེད་པའི་ཆོས་ཐོས་པ་ལ་བརྟེན་ནས། རྣལ་འབྱོར་པས་ཡེ་ཤེས་ལེན་ཅིང་མི་ཤེས་པའི་དྲི་མ་འདོར་བར་བྱེད་པ་འབྱུང་སྟེ། འདི་ནི་བླང་བ་དང་དོར་བའི་ཚུལ་སྣང་བ་ཡིན། འདི་ནི་ཚོགས་ཀྱི་ལམ་ཞེས་བྱ་སྟེ། བསོད་ནམས་ཀྱི་ཚོགས་ལ་བརྟེན་ནས་ཡེ་ཤེས་ཀྱི་ཚོགས་རྟོགས་ཤིང་ལེན་པའི་ཕྱིར་རོ།། །།གཉིས་པ་འཁོར་བའི་གཉེན་པོ་བསྟན་པ་ནི། བདག་དང་བདག་གི་ཞེས་འཛིན་པས། །ཇི་སྲིད་ཕྱི་རོལ་རྣམ་རྟགས་པས། །བདག་མེད་རྣམ་པ་གཉིས་མཐོང་ནས། །སྲིད་པའི་ས་བོན་འགག་པར་འགྱུར། །ཞེས་གསུངས་ཏེ། སེམས་ཅན་རྣམས་བདག་ཏུ་འཛིན་པ་དང་གང་ཟག་བདེན་པར་རྟོགས་པ་ན་འཁྲུལ་པའི་ཕྱིར་གང་ཟག་ལ་བདག་མེད་པ་དང་། འདུས་བྱས་ཀྱི་ཆོས་ཡུལ་དུ་སྣང་བ་རྣམས་ལ་བདག་གི་ཡིན་ནོ་ཞེས་ཕྱི་རོལ་དུ་རྟོག་པས་བརྟགས་ནས་ཆོས་ཐམས་ཅད་སྐྱེ་བ་དང་འགག་པར་ཞེན་པ་གཞོམ་པའི་ཕྱིར་ཆོས་ཐམས་ཅད་བདག་མེད་པར་བསྟན་ཏེ། འདི་གཉིས་ཇི་ལྟ་བར་རྟོགས་པས་ཁམས་གསུམ་གྱི་སྲིད་པའི་ས་བོན་འགག་ཅིང་། འཇིག་རྟེན་ལས་འདས་པ་རྟོགས་པར་འགྱུར་རོ། །དེའི་ཕྱིར་བདག་མེད་རྟོགས་པའི་ཡུམ་འདི་ནི་འཕགས་པ་བཞི་ཀ་བསྐྱེད་པར་བྱེད་པ་ཡིན་ཏེ། ཉན་ཐོས་རྣམས་ནི་གང་ཟག་གི་བདག་མེད་རྟོགས་པའོ། །རང་སངས་རྒྱས་རྣམས་ནི་ཆོས་ཀྱི་བཟུང་དོན་ལ་བདག་མེད་པར་རྟོགས་པའོ། །བྱང་ཆུབ་སེམས་དཔའ་རྣམས་ནི་འཛིན་རྟོག་དང་བཅས་པ་དག་ནས་བདག་མེད་རྟོགས་པ་སྟེ། དེས་ན་ཕ་རོལ་དུ་ཕྱིན་པ་ལས་ཀྱང་། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་ཉན་པར་བྱ་ཞེས་པ་ནས། རང་སངས་རྒྱས་ཀྱི་ས་ཞེས་པ་དང་། བྱང་ཆུབ་སེམས་དཔའི་ས་དང་། རྣམ་པ་ཐམས་ཅད་མཁྱེན་པ་ཉིད་སློབ་པར་འདོད་པས་ཀྱང་། ཞེས་པའི་བར་དུ་རྒྱ་ཆེར་གསུངས་པས། ཆོས་ཐམས་ཅད་ངོ་བོ་ཉིད་མེད་པར་ཁོང་དུ་ཆུད་པར་བྱ་སྟེ། རིགས་པའི་ཚོགས་ལས་རྒྱ་ཆེར་གསུངས་པ་ལྟར་ཁོང་དུ་ཆུད་པར་བྱའོ། །དེའི་འོག་ཏུ་ཞི་བ་མཐར་འགྲོ་བ་སྤང་བའི་ཕྱིར། སངས་རྒྱས་ཀྱི་ཚུལ་དང་སྙིང་རྗེ་ཆེན་པོས་ཡེ་ཤེས་ཀྱི་སྐུ་བསྒྲུབ་པའི་དོན་དུ་ཐེག་པ་བླ་ན་མེད་པ་སྟོན་ཏེ། ཆོས་ཀྱི་དབྱིངས་རྟོགས་པ་མཛད་པ་ཡིན་ནོ། །དེ་ནས་གསུམ་པ་ཞི་བའི་གཉེན་པོ་བསྟན་པ་ནི། གང་ཕྱིར་སངས་རྒྱས་མྱ་ངན་འདས། །གཙང་བ་རྟག་པ་དགེ་བ་བཞི། །གང་ཕྱིར་གཉིས་ནི་བྱིས་པས་བརྟགས། །དེ་ཡིས་གཉིས་དེ་རྣལ་འབྱོར་གནས། །ཞེས་གསུངས་ཏེ། །བདག་མེད་གཉིས་རྟོགས་པའི་འཕགས་པ་རྣམས་ཀྱང་། །མ་རིག་པའི་བག་ཆགས་ཀྱི་ས་དང་། ཟག་པ་མེད་པའི་ལས་དང་། ཡིད་ཀྱི་རང་བཞིན་གྱི་ལུས་དང་། བསམ་གྱིས་མི་ཁྱབ་པའི་འཆི་འཕོ་བ་ཡོད་པས། ཆོས་ཀྱི་དབྱིངས་སུ་ཅུང་ཟད་མ་སོན་པའི་ཕྱིར། ཆོས་ཀྱི་སྐུ་ནི་གཙང་བ་དམ་པ་དང་། བདག་དམ་པ་དང་། བདེ་བ་དམ་པ་དང་། རྟག་པ་དམ་པའི་ཕ་རོལ་དུ་ཕྱིན་པ་བཞིས་རབ་ཏུ་ཕྱེ་བའི་མྱ་ངན་ལས་འདས་པ་ཡིན་པས་འདི་ལ་ལྟོས་ནས། མི་རྟག་སྟོང་པ་སྡུག་བསྔལ་བདག་མེད་ཀྱང་ཕྱིན་ཅི་ལོག་གི་རྟོག་པར་གསུང་པས་ཆོས་ཀྱི་སྐུའི་དོན་ནི་ཟབ་པར་གནས་སོ། །དེ་ཡང་གང་གི་ཕྱིར་ཞེ་ན། འཁོར་བ་དང་མྱ་ངན་ལས་འདས་པ་གཉིས་ཀྱི་བྱིས་པས་བརྟགས་པ་སྟེ། སངས་རྒྱས་ནི་འཁོར་འདས་གཉིས་སུ་མེད་པའི་རང་བཞིན་ཡིན་པས། དེའི་རྣལ་འབྱོར་ལ་གནས་པར་ཤེས་པར་བྱའོ། །འདི་ཡང་རྒྱས་པར་འདི་སྐད་དུ། དེ་ལ་དགྲ་བཅོམ་དང་། རང་སངས་རྒྱས་དང་། དབང་ཐོབ་པའི་བྱང་ཆུབ་སེམས་དཔའ་རྣམས་ནི། མ་རིག་པ་བག་ཆགས་ཀྱི་ས་མ་སྤངས་པས་ཉོན་མོངས་པའི་དྲི་ང་བའི་བག་ཆགས་དང་ལྡན་པའི་ཕྱིར། གཙང་བའི་རབ་ཀྱི་མཐར་ཕྱིན་པ་མི་ཐོབ་བོ། །དེ་ལ་བརྟེན་ནས་མཚན་མའི་སྤྲོས་པ་ཀུན་ཏུ་སྤྱོད་པ་ཕྲ་མོ་དང་ལྡན་པའི་ཕྱིར། བདག་གི་ཕ་རོལ་དུ་ཕྱིན་པ་འདུས་མ་བྱས་མི་འཐོབ་བོ། རྒྱུ་དང་རྐྱེན་དེས་ཀུན་ནས་བླངས་པ་ཟག་པ་མེད་པའི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་འབྱུང་བའི་ཕྱིར་དེ་འགག་པའི་ཤིན་ཏུ་བདེ་བའི་ཕ་རོལ་ཏུ་ཕྱིན་པ་མི་འཐོབ་བོ། །ཇི་སྲིད་དུ་དེ་རྣམས་འགག་པའི་དེ་བཞིན་གཤེགས་པའི་ཁམས་མངོན་དུ་མ་བྱས་པ་དེ་སྲིད་དུ། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་དང་། མི་འབྲལ་བའི་ཕྱིར་འགྱུར་བ་མེད་པའི་རྟག་པའི་ཕ་རོལ་ཏུ་ཕྱིན་པ་མི་འཐོབ་བོ། །ཞེས་དཔལ་འཕྲེང་གི་མདོ་ལས་བྱུང་བ། སློབ་དཔོན་ཆེན་པོ་འཕགས་པ་ཐོགས་མེད་ཀྱིས་གསུངས་སོ། །གཞན་ཡང་དངོས་པོའི་མཚན་མར་འཛིན་པའི་གཉེན་པོར་སྟོང་པ་ཉིད་བསྟན་པ་ནི་ཤིན་ཏུ་ཟབ་ཏེ། དེ་ལ་རང་རིག་དང་། གཞན་རིག་དང་སྐུ་དང་ཡེ་ཤེས་ཀྱང་བདག་དང་། གཞན་དང་། གཉིས་ཀ་དང་། རྒྱུ་མེད་ལ་སོགས་པར་བློས་སྒྲོ་བརྟགས་ནས་བདེན་པར་ཞེན་པས་སྨྲས་ནས་འཁྲུལ་པ་ཉིད་ཡིན་པའི་ཕྱིར། རྣམ་པར་ཐམས་ཅད་དུ་དགག་པར་བྱ་བ་ཡིན་ནོ། དེ་ལྟར་བསྟན་པ་ལ་བརྟེན་ནས། །སྟོང་པ་ཉིད་ཁོ་ན་ལ་མཆོག་ཏུ་བཟུང་ནས། སོ་སོའི་སྐྱེ་བོ་རྣམས་རྟེན་ཅིང་འབྲེལ་པར་འབྱུང་བ་མདོར་ན་བརླག་པར་འགྱུར་ཏེ། དབུ་མ་རྩ་བ་ལས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་ལྡན་ཕུང་བར་འགྱུར། །དཔེར་ན་སྦྲུལ་ལ་བཟུང་ཉེས་དང་། །རིག་སྔགས་བསྒྲུབ་པ་ལོག་པ་བཞིན། །ཞེས་པ་དང་། རིག་པ་དྲུག་ཅུ་པ་ལས་ཀྱང་། རྣམ་པར་དབེན་དོན་མི་ཤེས་པར། །ཐོས་པ་ཙམ་ལ་འཇུག་བྱེད་ཅིང་། གང་དག་བསོད་ནམས་མི་བྱེད་པའི། །སྐྱེས་བུ་ཐ་ཤལ་དེ་དག་བརླག །ཅེས་གསུངས་སོ། །གཞན་ཡང་འཕགས་པ་ཡིན་ཡང་ཞི་བའི་དབྱིངས་ལ་གཅིག་ཏུ་དགའ་བ་ཉན་རང་རྣམས་ཀྱང་། ཐེག་ཆེན་ལ་ཞུགས་པ་དང་། འཁོར་བས་དུབ་པ་ངལ་བསོ་བའི་ཕྱིར་པདྨ་དཀར་པོར་བསྟན་པ་དང་། བྱང་ཆུབ་སེམས་དཔའ་མཐོང་ལམ་པ་དང་། ས་དྲུག་པ་དང་། ས་བརྒྱད་པ་ལ་ཡང་ཞི་བར་མི་ལྟུང་བར་བྱ་བའི་ཕྱིར། སངས་རྒྱས་བཅོམ་ལྡན་རྣམས་ཀྱིས་སྐད་ཅིག་གཅིག་ལ་བསྐུལ་བའི་དོན་ཡང་སྙིང་པོའི་ཡེ་ཤེས་མངོན་སུམ་བྱ་བ་དོན་ཡིན་ཏེ། རྒྱུ་དེས་ན། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་བ་རྣམས་ཀྱིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་གསུངས་པ་ལ་སོགས་པའི་དོན་རྒྱ་ཆེར་ཡོད་ཀྱིས་འཕྲོས་པ་ཆོག་གོ །མདོར་བསྡུས་ན། ཆོས་ཀྱི་དབྱིངས་ནི་སྟོང་པ་ཁོ་ནའོ། །སྙམ་དུ་མི་བྱའོ། །དེ་ནས་བཞི་པ་ཁམས་རྣམས་གནས་ཁྱད་པར་དག་པ་དེ་རྒྱས་པར་བྱ་བ་བསྟན་པ་ནི་གསུམ་སྟེ། ཁམས་རྒྱས་བྱེད་ཀྱི་ཆོས་ངོས་བཟུང་བ་དང་། དེ་ལས་བྱང་ཆུབ་འགྲུབ་པ་དང་། རྒྱལ་བས་བསྲུང་བར་འགྱུར་བའོ། །དང་པོ་ཚིགས་སུ་བཅད་པ་གསུམ་ལས། འདི་རྣམས་ཀྱང་ཕ་རོལ་ཏུ་ཕྱིན་པ་བཅུའི་རང་གི་ངོ་བོས་དག་པ་དང་། ཐོབ་པའི་ཁམས་ཀྱི་ངོ་བོ་རྒྱས་པར་བྱེད་པ་བསྟན་ཏེ། དེ་ཡང་ནོར་བུ་ཤུན་པ་གསལ་བས་ཡོན་ཏན་རྒྱས་པ་ལྟ་བུ་ནི་དག་པ་ཞེས་བྱའོ། །རྟེན་ཅིང་འབྲེལ་པར་འབྱུང་བའི་ཚུལ་གྱིས། ཤིང་འབྲས་ལས་ལྗོན་པའམ། ས་བོན་ལས་ལོ་ཐོག་ལྟར་འབྱུང་བ་ནི་ཐོབ་པ་ཞེས་ཐ་སྙད་བྱས་ཏེ། འདི་གཉིས་དབྱེར་མེད་པ་ནི་ཡེ་ཤེས་ཀྱི་སྐུ་ཞེས་ཀྱང་བྱ། ཆོས་སྐུ་ཉིད་ཡིན་ནོ། །དེས་ན། དཀའ་སྤྱད་སྣ་ཚོགས་སྦྱིན་པ་དང་། ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་འདུན་པ་དང་ལྡན་པ་སྟེ། ཟང་ཟིང་གི་སྦྱིན་པ་དང་། སྐྱབས་ཀྱི་སྦྱིན་པ་དང་། ཆོས་ཀྱི་སྦྱིན་པ་རྣམས་ཆགས་པ་མེད་པའི་ཚུལ་དང་། བྱང་ཆུབ་སེམས་དཔའི་བྱེད་པའོ། །ཚུལ་ཁྲིམས་སེམས་ཅན་དོན་བསྡུད་དང་། །ཞེས་བྱ་བ་ནི་བྱང་ཆུབ་སེམས་དཔའ་རྣམས་ཀྱི་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་རང་ཉིད་སྲིད་པའི་བདེ་བ་འདོད་པ་མ་ཡིན་པའོ། །སེམས་ཅན་ཕན་བྱེད་བཟོད་པ་སྟེ། །གསུམ་པོ་འདི་ནི་ཁམས་རྒྱས་འགྱུར། །ཞེས་པ་ནི་གང་དག་གནོད་པར་བྱེད་པ་ལ་ཇི་མི་སྙམ་པ་དང་། དགེ་བའི་ཕྱོགས་ཀྱི་སྡུག་བསྔལ་དང་དུ་ལེན་པ་ལ་བཟོད་པ་དང་། ཆོས་སྟོང་པ་ཉིད་ལ་མི་སྐྲག་པ་ངེས་པར་སེམས་པའི་བཟོད་པ་སྟེ། སྔ་མ་གཉིས་ཀྱི་གྲོགས་བྱེད་པ་སྟེ། དེ་ལྟར་གསུམ་པོ་འདི་ནི་བསོད་ནམས་ཀྱི་ཚོགས་སྦྱིན་པ་དང་ཚུལ་ཁྲིམས་ལས་བྱུང་བ་ཞེས་བྱ་སྟེ། གཟུགས་སྐུའི་ཁམས་རྒྱས་པར་བྱེད་པའི་ཆོས་སོ། །ཆོས་རྣམས་ཀུན་གྱི་བརྩོན་འགྲུས་དང་། །བསམ་གཏན་སེམས་ལ་འཇུག་པ་དང་། །རྟག་ཏུ་ཤེས་རབ་བརྟེན་པ་སྟེ། །འདི་ཡང་བྱང་ཆུབ་རྒྱས་བྱེད་ཡིན། །ཞེས་གསུངས་ཏེ། གོ་ཆ་དང་། འཇུག་པ་དང་། ངེས་པར་འབྱུང་བའི་བརྩོན་འགྲུས་ཀྱིས་ཡོན་ཏན་ཀུན་འབྱིན་པར་བྱེད་པ་དང་། བསམ་གཏན་ནི་འཇིག་རྟེན་དང་འཇིག་རྟེན་ལས་འདས་པའི་ཏིང་ངེ་འཛིན་ཐོབ་པར་བྱེད་པ་རྣམས་གནས་ཁྱད་པར་ཅན་དང་། འབྲེལ་པ་གཟུགས་མེད་པ་ཡང་མལ་འཇུག་པ་དང་། ཤེས་རབ་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས། རབ་ཏུ་རྣམ་པར་འབྱེད་པ་དང་། མྱ་ངན་ལས་འདས་པ་དང་། འཁོར་བ་ཐམས་ཅད་ལ་ཆགས་པ་མེད་པ་དང་། རྣམ་པར་མི་རྟོག་པའི་ཡེ་ཤེས་འཇུག་པའི་ཤེས་རབ་སྟེ། འདི་ནི་བསྒོམ་པ་ལས་བྱུང་བའི་བསོད་ནམས་ཁྱད་པར་ཅན་དང་། ཡེ་ཤེས་ཀྱི་ཚོགས་ཏེ། སྐུ་གཉིས་ཀའི་ཁམས་རྒྱས་པར་བྱེད་པ་ཡིན་ནོ། །དེ་ལ་ཕ་རོལ་ཏུ་ཕྱིན་པ་དྲུག་པོ་འདི་རྣམས་ནི། གང་ཚེ་ཤེས་རབ་ཀྱིས་ཟིན་པ་ཐམས་ཅད་ཡེ་ཤེས་ཀྱི་ཚོགས་སུ་འགྱུར་ལ། ངོ་བོ་ནི་སྦྱིན་པ་དང་ཚུལ་ཁྲིམས་གཉིས་ནི་བསོད་ནམས་ཀྱི་ཚོགས་སོ། །ཤེས་རབ་ནི་ཡེ་ཤེས་ཀྱི་ཚོགས་སོ། །བཟོད་པ་བརྩོན་འགྲུས་བསམ་གཏན་གསུམ་གཉིས་ཀ་ཡིན་ནོ། །སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀ་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་མདོ་སྡེ་རྒྱན་ལས་གསུངས་སོ། །ཐབས་དང་བཅས་པའི་ཤེས་རབ་དང་། །སྨོན་ལམ་རྣམ་པར་སྦྱངས་པ་དང་། །སྟོབས་ལ་ངེས་གནས་ཡེ་ཤེས་སྟེ། །ཁམས་རྒྱས་བྱེད་པའི་ཆོས་བཞིའོ། །ཞེས་གསུངས་པ་ནི། །ཐབས་མཁས་པ་ནི་བསྔོ་བ་དང་། མོས་པ་དང་། ཡིད་རང་དང་ལྡན་པས་ཤེས་རབ་ཀྱིས་མྱུར་བ་དང་། རྒྱ་ཆེར་བྱེད་པའོ། །སྨོན་ལམ་ནི་ཟད་མི་ཤེས་པར་སྤེལ་བ་དང་། སྐྱེ་བའི་ཐབས་མཁས་པ་བསྒྲུབ་པའི་ཕྱིར་ངག་དང་འབྲེལ་བའོ། །སྟོབས་ནི་སོ་སོར་རྟོགས་པ་དང་བསྒོམ་པའི་སྟོབས་ཀྱིས་རྣམ་པར་རྒྱས་པར་བྱེད་པའོ། །ཡེ་ཤེས་ནི་ཇི་ལྟ་བ་དང་ཇི་སྙེད་པས་རང་གཞན་གྱི་དོན་བསྒྲུབ་པའི་ཕྱིར་འདི་བཞི་ནི་ཁམས་རྣམ་པར་དག་པ་རྒྱས་པར་བྱེད་པའོ། །འདི་རྣམས་ཚོགས་དང་སྦྱོར་བའི་ལམ་དུ་ནི། གོ་ཆ་དང་འཇུག་པའི་བསྒྲུབ་པས་རྗེས་སུ་མཐུན་པར་སྤྱོད་དོ། །ས་ལ་ཞུགས་ནས་ནི་ཡང་དག་པར་སྤྱོད་པ་སྟེ་མ་དག་པའི་ས་བདུན་ལ་དམིགས་པ་དང་བཅས་པའོ། གསུམ་པ་ལ་ནི་དམིགས་པ་མེད་པ་སྟེ། སངས་རྒྱས་ཀྱི་ས་ལ་ནི་ལྷུན་གྱིས་གྲུབ་པར་བརྗོད་དོ། །འདི་རྣམས་ཀྱི་ལས་ནི། སྦྱིན་པས་ནི་སེམས་ཅན་ཐམས་ཅད་རྗེས་སུ་འཛིན་ཏོ། །ཚུལ་ཁྲིམས་ཀྱིས་གནོད་པ་ཐམས་ཅད་མེད་པར་བྱེད་དོ། །བཟོད་པས་ནི་ཐམས་ཅད་བཟོད་ལ། བརྩོན་འགྲུས་ཀྱིས་ཡོན་ཏན་འཕེལ་བར་བྱེད་ལ། བསམ་གཏན་གྱིས་རྫུ་འཕྲུལ་ལ་སོགས་པས་འཇུག་པར་བྱེད་དོ། །ཤེས་རབ་ཀྱིས་ཐམས་ཅད་ཀྱིས་རྒྱུད་གྲོལ་བར་བྱེད་ལ། ཐབས་ཀྱིས་མི་ཟད་པར་བྱེད་ཅིང་། སྨོན་ལམ་གྱིས་སངས་རྒྱས་མཉེས་པ་ལ་རྟག་ཏུ་འཇུག་པར་བྱེད་ལ། སྟོབས་ཀྱིས་མི་མཐུན་པ་ལས་རྒྱལ་བར་འགྱུར་ཅིང་། ཡེ་ཤེས་སེམས་ཅན་ཡོངས་སུ་སྨིན་པར་བྱེད་པ་སྟེ། དབུས་དང་མཐའ་རྣམ་པར་འབྱེད་པ་ལས། ལས་ནི་རྗེས་སུ་འཛིན་བྱེད་དང་། །གནོད་མི་བྱེད་དང་དེ་ལ་བཟོད། །ཡོན་ཏན་འཕེལ་དང་འཇུག་ནུས་དང་། །རྣམ་པར་གྲོལ་བར་བྱེད་པ་དང་། མི་ཟད་པ་དང་རྟག་འཇུག་དང་། །ངེས་པར་ལོངས་སྤྱོད་སྨིན་པར་བྱེད། །ཅེས་གསུངས་སོ། །འདིར་ངོ་བོ་དང་། དབྱེ་བ་དང་། ལས་བསྡུས་པས་བསྟན་ཏེ། རྒྱས་པར་ནི། རིན་ཆེན་ཕྲེང་བ་དང་། མདོ་ཀུན་ལས་བཏུས་པ་དང་། སློབ་དཔོན་དཔའ་བོས་ཕ་རོལ་ཏུ་ཕྱིན་པ་བསྡུས་པ་དང་། མདོ་སྡེ་རྒྱན་གྱི་ཕ་རོལ་དུ་ཕྱིན་པའི་སྐབས་ལས་གསུངས་པ་རྣམས་རྟོགས་པར་བྱའོ། །མདོར་ན་བྱང་ཆུབ་སེམས་དཔའ་ཐམས་ཅད་ཀྱི་བསྒྲུབ་པ་ཐམས་ཅད་འདིར་འདུས་པས་ཁམས་རྒྱས་པར་བྱེད་པའི་ཆོས་ཞེས་བཤད་དོ། །དེ་ལ་བྱང་ཆུབ་འགྲུབ་པའི་ཚུལ་བཤད་པ་ནི། ཚིགས་སུ་བཅད་པ་བཞི་ལས། དང་པོས་ནི། བྱང་ཆུབ་ཀྱི་སེམས་ཆོས་ཀྱི་སྐུའི་རྒྱུར་བསྟན་ཏེ། བྱང་ཆུབ་སེམས་ཕྱག་མི་བྱ་ཞིང་། །སྨྲ་བ་ངན་པས་སྨྲ་བས་ཏེ། །བྱང་ཆུབ་སེམས་དཔའ་མ་བྱུང་བར། །ཆོས་ཀྱི་སྐུ་ནི་འབྱུང་མ་ཡིན། །ཞེས་བྱང་ཆུབ་ནི་སངས་རྒྱས་ཏེ། དེ་ལ་འདོད་པ་དང་འདུན་པས་མང་དུ་བྱུང་བའི་སྤྱོད་པ་འགྲུབ་པ་ནི་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་ཏེ། སེམས་བསྐྱེད་པས་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཞེས་མངོན་རྟོགས་རྒྱན་ལས་གསུང་ཤིང་། དེ་ལ་བརྟེན་ནས་དོན་དམ་པ་སོ་སོར་རང་གིས་རིག་པར་བྱ་བ་སྟོང་པ་དང་སྙིང་རྗེ་དབྱེར་མེད་པ་རྟོགས་པར་བྱེད་པ་འདི་ལ་འཇུག་པ་ནི་བྱང་ཆུབ་སེམས་དཔའ་སྟེ། སུ་དག་འདི་ལ་མི་གུས་ཤིང་ཕྱག་མི་བྱེད་པ་ནི་ངན་པར་སྨྲ་བ་སྟེ། སངས་རྒྱས་ཀྱི་བྱང་ཆུབ་སྤོང་བར་བྱེད་པའོ། །དེའི་ཕྱིར་ན། བྱང་ཆུབ་སེམས་དཔའ་མ་བྱུང་ན། །ཆོས་ཀྱི་སྐུའི་སངས་རྒྱས་མི་འབྱུང་སྟེ། །རྒྱུ་མེད་པར་འབྲས་བུ་མི་འབྱུང་བའི་ཕྱིར་རོ། །རིགས་པ་འདི་ལ་ཁ་ཅིག་སྨོན་འཇུག་རྟོག་པ་ཡིན་པས་གསར་དུ་བསྐྱེད་པ་ཡིན་པས། སངས་རྒྱས་ཀྱི་ཡེ་ཤེས་ཀྱང་སྔར་མེད་པའི་གསར་དུ་ཐོབ་བོ་སྙམ་དུ་རྟོག་ན་མི་རུང་བས་བཤད་པ། སྨོན་པ་ནི་སངས་རྒྱས་འདོད་པ་ཉིད་དོ། །འཇུག་པ་ནི་དེ་འདོད་ནས་རྒྱུ་ལ་འཇུག་པའོ། །རྒྱུ་གཉིས་ཏེ། རྒྱུ་དང་རྐྱེན་ཉིད་ཀྱི་རྒྱུའོ། །དེ་ལ་རྒྱུ་ཉིད་ནི། རང་བཞིན་གྱིས་འོད་གསལ་བའི་སེམས་ཉིད་དེ་ཁམས་ཞེས་བྱའོ། །རྐྱེན་གྱི་རྒྱུ་ནི་དེ་ཉིད་ཀྱི་འོད་ཟེར་ཞེས་ཀྱང་བྱ། སྒྲིབ་པ་དང་བྲལ་བའི་སངས་རྒྱས་ཀྱི་ཐུགས་རྗེའི་འཕྲིན་ལས་ཀྱང་བྱ་སྟེ། དད་ཅིང་མོས་ནས་བསྒྲུབ་པར་བྱ་བའི་ཕ་རོལ་དུ་ཕྱིན་པ་ངེས་པར་རྟོགས་པ་དང་། རེག་པ་དང་རྗེས་སུ་དྲན་པའི་བདག་ཉིད་རྣམས་ཏེ། འདི་གཉིས་ཀ་ཡང་གཅིག་མེད་ན་གཅིག་རྟོགས་པ་དང་། མངོན་དུ་བྱེད་པ་མི་འཐད་པས། བདེན་པ་གཉིས་ཀྱི་རང་གི་ངོ་བོ་ཡིན་ནོ། །དེ་སྐད་དུ་ཡང་། སེམས་དེ་རང་བཞིན་འོད་གསལ་བས་ན་ཉོན་མོངས་ངོ་བོ་མེད་གཟིགས་པ། །གང་དག་འགྲོ་ཀུན་བདག་མེད་མཐའ་བཞི་ཡང་དག་རྟོགས་ནས་ཐམས་ཅད་ལ། །རྫོགས་པའི་སངས་རྒྱས་རྗེས་ཞུགས་གཟིགས་པ་སྒྲིབ་པ་མེད་པའི་བློ་མངའ་བ། སེམས་ཅན་རྣམ་དག་ཡེ་ཤེས་ཡུལ་ཅན་མཐའ་ཡས་གཟིགས་མངའ་དེ་ལ་འདུད། །ཞེས་གསུངས་པའི་དོན་ཤེས་པར་བྱའོ། །དེས་ན་གཉིས་པ་འདིས་དཔེ་བསྒྲུབ་པ་སྟོན་ཏེ། །བུར་ཤིང་ས་བོན་ལ་སོགས་གང་། །ཁ་ར་སྤྱད་པར་འདོད་པ་དེས། །བུར་ཤིང་ས་བོན་མེད་པར་ནི། །ཁ་ར་འབྱུང་བར་འགྱུར་མ་ཡིན། བུར་ཤིང་ས་བོན་གང་བསྲུང་ན། །ཉེ་བར་གནས་ཤིང་བསྒྲུབ་པ་ལས། །བུ་རམ་ཁ་ར་སོགས་རྣམས་ནི། །དེ་ལས་འབྱུང་བར་འགྱུར་བ་ལྟར། །ཞེས་བསྟན་ནས། དོན་ནི་བྱང་ཆུབ་ཀྱི་སེམས་བུར་ཤིང་ལྟ་བུ་བསྲུང་ན། ཡོན་ཏན་གྱི་འབྲས་བུ་ཐམས་ཅད་འབྱིན་པར་བསྟན་པ། བྱང་ཆུབ་སེམས་ནི་རབ་བསྲུང་ན། །ཉེ་བར་གནས་ཤིང་བསྒྲུབ་པ་ལས། །དགྲ་བཅོམ་རྐྱེན་རྟོགས་སངས་རྒྱས་རྣམས། །དེ་ལས་སྐྱེ་ཞིང་འབྱུང་བར་འགྱུར། །ཞེས་གསུངས་ཏེ། འདི་ལྟར་བྱང་ཆུབ་ཀྱི་སེམས་དང་བྱང་ཆུབ་སེམས་དཔའ་ལ་བརྟེན་ནས། ཉོན་མོངས་པ་དང་སྐྱེ་བ་ཟད་པས་ན་དགྲ་བཅོམ་པ་དང་། རྐྱེན་གྱིས་བྱང་ཆུབ་རྟོག་ནས་རང་ཉིད་གྲོལ་བས་རང་སངས་རྒྱས་དང་། མཐར་ཐུག་པ་རྟོགས་པས་ན་རྣམ་པ་ཐམས་ཅད་མཁྱེན་པའི་སངས་རྒྱས་ཏེ། ཐམས་ཅད་ཀྱང་བྱང་ཆུབ་སེམས་ཀྱི་སེམས་ལས་བྱུང་བའོ། །འདི་ལྟར་སློབ་དཔོན་ཟླ་བ་གྲགས་པས་ཀྱང་། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །རྒྱལ་སྲས་རྣམས་ནི་གཉིས་མེད་ཤེས་རབ་དང་། །སྙིང་རྗེ་དང་ནི་བྱང་ཆུབ་སེམས་ལས་བྱུང་། །ཞེས་དབུ་མ་པ་ལ་འཇུག་པར་གསུང་པ་ཡིན་ནོ། །གཞན་ཡང་འདི་ལ་ཁ་ཅིག་ཉན་རང་ཡང་དེ་ལྟར་བྱང་ཆུབ་ཀྱི་སེམས་ལས་བྱུང་བ་ཡིན་ན། བྱང་ཆུབ་སེམས་དཔའ་དང་མི་འདྲ་བའི་རྒྱུ་མཚན་ཅི་ཡིན་སྙམ་དུ་སེམས་ན་བཤད་པར་བྱ་སྟེ། རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རཏལ་པོས་རྟོགས་དཀར་བཞེད། །ཞེས་པའི་འགྲེལ་པར་དབང་པོ་དམན་པས་དགྲ་བཅོམ་པ་དང་། འབྲིང་པོས་རང་སངས་རྒྱས་དང་། རྣོན་པོས་སངས་རྒྱས་འཐོབ་བོ་ཞེས་ཤུགས་ཀྱིས་བསྟན་པ་ཡིན་ནོ། །ཞེས་སློབ་དཔོན་སེང་གེ་བཟང་པོས་བསྟན་ཅིང་། དེ་ལ་ཉན་རང་དང་བྱང་ཆུབ་སེམས་དཔའ་ལ་ཁྱད་པར་ལྔ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ནི། རྣམ་པར་མི་རྟོག་པ་དང་། ཉི་ཚེ་བ་མ་ཡིན་པ་དང་། མི་གནས་པ་དང་། གཞན་དུ་བ་ཉིད་དང་། བླ་ན་མེད་པ་ཉིད་དེ་ཁྱད་པར་རྣམ་པ་ལྔའོ། །ཞེས་གསུངས་ཏེ། འདི་ཉན་རང་གི་ཡེ་ཤེས་ནི་འཁོར་བ་སྤང་བྱ་དང་། ཞི་བ་བླང་བྱར་རྟོག་པ་དང་། བདེན་པ་བཞི་ལ་དམིགས་པས་ཉི་ཚེ་བ་དང་། མྱ་ངན་ལས་འདས་པ་དང་། ཕུང་པོ་ལྷག་མེད་དུ་རྒྱུན་ཆད་པ་དང་། བླ་ན་ཡང་སངས་རྒྱས་ཡོད་པ་ཡིན་ནོ། །སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་ཀྱང་དེ་རྣམས་རྟོགས་པའི་ཆ་ནས་འདྲ་མོད་ཀྱི། ཁྱད་པར་དུ་འཁོར་འདས་མཉམ་པས་རྣམ་པར་མི་རྟོག་པ་དང་། ཤེས་བྱ་ཐམས་ཅད་མཁྱེན་པས་ཉི་ཚེ་བ་མ་ཡིན་པ་དང་། སྲིད་ཞི་གཉིས་ཀ་མི་གནས་པ་དང་། སངས་རྒྱས་ནས་སྐུ་ཡེ་ཤེས་འཕྲིན་ལས་འཁོར་བ་ཇི་སྙེད་མི་ཟད་པས་རྟག་པ་དང་། དེ་ལ་གོང་ན་སུ་ཡང་མེད་པས་བླ་ན་མེད་པའོ། །འདི་ནི་ཆོས་དང་ཆོས་ཉིད་རྣམ་པར་འབྱེད་པ་ལས་གསུངས་སོ། །དེའི་ཁྱད་པར་དང་སེམས་ཅན་གྱི་དོན། བྱེད་པའི་ངེས་པ་ཡང་། མདོ་ལས། ཁྱེའུ་མི་གཙང་བའི་དོང་དུ་ལྷུང་བའི་དཔེ་དང་སྦྱར་ནས། བློ་གྲོས་རྒྱ་མཚོ་དེ་ལྟར་ན་དཔེའི་དོན་ནི། མི་གཙང་བའི་དོང་ཞེས་བྱ་བ་ནི། ཁམས་གསུམ་པའི་ཚིག་བླ་དྭགས་སོ། །བུ་གཅིག་པ་ཞེས་བྱ་བ་ནི། སེམས་ཅན་རྣམས་ཀྱི་ཚིགས་ཏེ། བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་བུ་གཅིག་པ་ལྟར་སེམས་པའི་ཕྱིར་རོ། །མ་དང་གཉེན་ཞེས་བྱ་བ་ནི། གང་དག་འཁོར་བའི་སྡུག་བསྔལ་མཐོང་ནས་མྱ་ངན་དང་སྨྲེ་སྔགས་འདོན་ཀྱང་སེམས་ཅན་རྣམས་དེ་ལས་འདོན་པའི་སྦྱོར་བའི་ནུས་པ་མེད་པ་ནི་ཉན་རང་གི་ཐེག་པར་ཞུགས་པ་རྣམས་ཀྱི་ཚིག་གོ །ཚོང་དཔོན་ནམ། ཁྱིམ་བདག་ཞེས་བྱ་བ་ནི། གང་ཞིག་གཙང་བ་དྲི་མ་དང་བྲལ་བ་ལ། དྲི་མ་མེད་པའི་སེམས་དང་ལྡན་པ། འདུས་མ་བྱས་ཀྱི་ཆོས་མངོན་གསུམ་དུ་རྟོགས་པ། སེམས་ཅན་ཡོངས་སུ་སྨིན་པར་བྱ་བའི་ཕྱིར། བསམ་བཞིན་དུ་ཁམས་གསུམ་པར་འཚམས་སྦྱོར་བར་བྱེད་པ་བྱང་ཆུབ་སེམས་དཔའི་ཚིག་བླ་དྭགས་སོ། །བློ་གྲོས་རྒྱ་མཚོའི་འཚམས་སྦྱོར་བ་ཐམས་ཅད་ལས་ཤིན་ཏུ་གྲོལ་ཡང་སྲིད་པར་སྐྱེ་བ་ལེན་པ་འདི་ནི། བྱང་ཆུབ་སེམས་དཔའི་སྙིང་རྗེ་ཆེན་པོ་སྟེ། ཐབས་ལ་མཁས་པ་དང་ཤེས་རབ་ཀྱིས་ཡོངས་སུ་ཟིན་པས་ཀུན་ནས་ཉོན་མོངས་པ་དག་གིས་མི་གནོད་ལ། ཉོན་མོངས་པའི་འཆིང་བ་ཐམས་ཅད་ལས་དགྲོལ་བའི་ཕྱིར། སེམས་ཅན་རྣམས་ལ་ཆོས་ཀྱང་སྟོན་པའོ། ཞེས་བློ་གྲོས་རྒྱ་མཚོའི་མདོར་གསུངས་ཏེ། རྒྱུ་དེས་ན་རྒྱལ་བས་བསྲུང་བར་འགྱུར་བ་བསྟན་པ་ནི། ཇི་ལྟར་ས་ལུའི་ས་བོན་ཚོགས། །ཞིང་པས་བསྲུང་བར་བྱེད་པ་ལྟར། །དེ་བཞིན་ཐེག་མཆོག་མོས་རྣམས་ལའང་། །འདྲེན་པ་རྣམས་ཀྱིས་བསྲུང་བར་མཛད། །ཞེས་གསུངས་ཏེ། དཔེར་ན་འབྲས་ས་ལུའི་ས་བོན་ཞིང་ལ་བཏབ་ནས་ལེགས་པར་བསྲུངས་པ་ལས་འབྲས་བུ་འབྱུང་བ་བཞིན། ཐེག་པ་མཆོག་ལ་མོས་པ་ནི་ས་བོན་ཡིན་པས་དེ་དང་ལྡན་པ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྲུང་བར་མཛད་པ་ཡིན་ནོ། །དེའི་ཚུལ་རྒྱས་པར་ཕ་རོལ་དུ་ཕྱིན་པ་ལས་གསུངས་སོ། །དེ་ལྟར་ཁམས་རྒྱས་པར་བྱ་བའི་ཆོས་བསྟན་པ་ལས་བྱུང་བ་ཚུལ་ཇི་ལྟར་རྒྱས་པའི་རིམ་པ་ནི་བཞི་སྟེ། མོས་པས་སྤྱོད་པས་མཐོང་ཚུལ་དང་། ས་ལ་ཞུགས་པ་ཁོང་དུ་རྒྱས་པའི་དཔེ་དང་། མཐར་ཐུག་པའི་དཔེ་མདོར་བསྟན་དང་། རྒྱས་བཤད་དོ། །དང་པོ་ནི། ཇི་ལྟར་མར་ངོའི་བཅུ་བཞི་ལ། །ཟླ་བ་ཅུང་ཟད་མཐོང་བ་ལྟར། །དེ་བཞིན་ཐེག་མཆོག་མོས་རྣམས་ལའང་། །སངས་རྒྱས་སྐུ་ནི་ཅུང་ཞིག་མཐོང་། ཞེས་གསུངས་པས། ཇི་ལྟར་མར་ངོའི་ཉི་ཤུ་དགུའི་ཟླ་བ་སྣང་བ་ཙམ་འགྲིབ་པ་དང་བཅས་པ་སྣང་བའི་དཔེས། ལས་དང་པོ་པའི་མོས་པའི་ས་རྣམས་ཀྱི། སངས་རྒྱས་ཀྱི་སྐུ་ཕྱི་རོལ་དུ་མཐོང་བ་དང་། ཡང་མི་སྣང་སྟེ། མྱ་ངན་ལས་འདས་པར་སྣང་བ་ལ་སོགས་པ་ནི། རང་གི་དད་པ་ལ་སོགས་པའི་རྒྱུས་ཅུང་ཟད་སྣང་ཡང་། རྟོག་པའི་སྒྲིབ་པས་རང་གི་ཁམས་ཀྱི་ཡེ་ཤེས་ཀྱི་སྣང་བ་རྟོག་པར་མ་གྱུར་པའི་ཕྱིར་དེ་ལྟར་སྣང་ངོ་། །ས་ལ་ཞུགས་ནས་རྒྱས་པའི་དཔེ་ནི། ཇི་ལྟར་ཚེས་པའི་ཟླ་བ་ལ། །སྐད་ཅིག་སྐད་ཅིག་རྒྱས་པར་མཐོང་། །དེ་བཞིན་ས་ལ་ཞུགས་རྣམས་ཀྱང་། །རིམ་གྱི་རིམ་གྱིས་འཕེལ་བར་མཐོང་། ཞེས་གསུངས་ཏེ། གང་གི་ཚེ་ས་དང་པོ་ལ་རང་གི་རྣམ་པར་རྟོག་པའི་ཡེ་ཤེས་སྣང་བའི་ཏིང་ངེ་འཛིན་ཆོས་ཀྱི་སྐུ་སྣང་བ་ཐོབ་པའི་ཕྱིར། དེའི་མཐུས་རྗེས་ལས་ཐོབ་པའི་ཡེ་ཤེས་ཀྱི་ཕྱི་རོལ་དུ་ཡང་། དེ་བཞིན་གཤེགས་པ་བརྒྱ་མཐོང་བ་དང་། ཆོས་གསུང་པ་ཡང་ཐོས་ཤིང་འཛིན་པ་ལ་སོགས་པ་སྣང་བར་འགྱུར་རོ། དེ་བཞིན་ས་གཉིས་པ་ལ་སྟོང་ཕྲག་བརྒྱ་དང་། ས་གསུམ་པ་ལ་འབུམ་ཕྲག་བརྒྱད་དང་། ལྔ་པ་ལ་ཁྲག་ཁྲིག་ཕྲག་བརྒྱ་དང་། དྲུག་པ་ལ་དེ་ཉིད་སྟོང་དུ་བསྒྱུར་བ་དང་། ས་བདུན་པ་ལ་ཁྲག་ཁྲིག་འབུམ་དུ་བསྒྱུར་བ་དང་། ས་བརྒྱད་པ་ལ་སྟོང་གསུམ་ཕྲག་བརྒྱ་སྟོང་གི་རྡུལ་ཕྲ་རབ་ཀྱི་གྲངས་དང་། དགུ་པ་ལ་དེ་ཉིད་གྲངས་མེད་པ་བརྒྱ་སྟོང་གི་གྲངས་དང་། བཅུ་པ་ལ་དེ་ཉིད་གྲངས་མེད་པ་བརྗོད་དུ་མེད་པ་སྣང་བར་གསུངས་སོ། །མཐར་ཐུག་པའི་དཔེ་བསྟན་པ་ནི། ཇི་ལྟར་ཡར་ངོའི་བཅོ་ལྔ་ལ། །ཟླ་བ་རྫོགས་པར་འགྱུར་བ་ལྟར། །དེ་བཞིན་ས་ཡི་མཐར་ཐུག་ན། །ཆོས་ཀྱི་སྐུ་ཡང་རྫོགས་ཅིང་གསལ། །ཞེས་གསུངས་ཏེ། ཇི་ལྟར་ཟླ་བ་གང་བ་རང་གི་དཀྱིལ་འཁོར་རྫོགས་ཤིང་འོད་ཟེར་འགྱེད་པ་ལྟར། གང་གིས་ཚེ་ས་བཅུའི་མཐར་ཐུག་པར་ཆོས་ཀྱི་སྐུ་དྲི་མ་མེད་པ་རྫོགས་ཤིང་ནམ་མཁའི་མཐས་གཏུགས་པའི་བཟོ་དང་སྐྱེ་བ་དང་བྱང་ཆུབ་ཆེན་པོ་སྟོན་པའི་རྒྱལ་བའི་དཀྱིལ་འཁོར་ཐམས་ཅད་དང་། མཉམ་པར་འདྲེས་ནས་སངས་རྒྱས་ཐམས་ཅད་དང་མཉམ་པ་ཉིད་གསུམ་གྱིས་མཉམ་པར་འགྱུར་རོ། །ད་ནི་རྒྱས་པར་བཤད་པ་ལ་བཅུ་གཅིག་སྟེ། མོས་པས་སྤྱོད་པའི་ས་དང་། རབ་ཏུ་དགའ་བ་དང་། དྲི་མ་མེད་པ་དང་། འོད་བྱེད་པ་དང་། འོད་འཕྲོ་བ་དང་། སྦྱང་དཀའ་བ་དང་། མངོན་དུ་གྱུར་པ་དང་། རིང་དུ་སོང་བ་དང་། མི་གཡོ་བ་དང་། ལེགས་པའི་བློ་གྲོས་དང་། ཆོས་ཀྱི་སྤྲིན་བཤད་པའོ། །དང་པོ་ནི། སངས་རྒྱས་ཆོས་དང་དགེ་འདུན་ལ། །རྟག་ཏུ་མོས་པ་བརྟན་པོ་ཡིས། །སེམས་དེ་ཡང་དག་བསྐྱེད་བྱས་ན། །ཕྱིར་མི་ལྡོག་པ་ཡང་ཡང་འབྱུང་། །ཞེས་གསུང་པ་ནི། ཇི་ལྟར་རྒྱུད་བླ་མ་ལས་གསུང་པ་བཞིན། བླ་ན་མེད་པའི་དཀོན་མཆོག་གསུམ་ལ་སྐྱབས་སུ་སོང་ཞིང་། འདི་ནས་བྱང་ཆུབ་ཀྱི་བར་དུ་ལྡོག་པ་མེད་པའི་མོས་པ་བརྟན་པོས། སྨོན་པ་དང་འཇུག་པའི་བདག་ཉིད་ཅན་གྱི་སེམས་བསྐྱེད་ནས་ཡང་དག་པར་ཕ་རོལ་དུ་ཕྱིན་པ་རྣམས་ཀྱི་གོ་ཆ་དང་འཇུག་པ་བསྒྲུབ་པར་བྱས་པས། ཚོགས་དང་སྦྱོར་བའི་ལམ་གྱི་ཕྱིར་མི་ལྡོག་ཐོབ་པར་འགྱུར་ཞིང་། མཐོང་བའི་ལམ་གྱི་ཕྱིར་མི་ལྡོག་པའི་ཉེ་བའི་རྟགས་འབྱུང་བར་འགྱུར་ཏེ། འདི་རྣམས་ནི་དྲན་པ་ཉེ་བར་བཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་ལྔ་དང་། སྟོབས་ལྔའི་གནས་སྐབས་ཡིན་ནོ། །དེ་ནས་ས་དང་པོ་རབ་ཏུ་དགའ་བར་འཇུག་པ་བསྟན་པ་ནི། ནག་པོའི་གཞི་ནི་ཡོངས་སྤང་ནས། །དཀར་པོའི་གཞི་ནི་རབ་བཟུང་བས། །དེ་ཚེ་དེ་ནི་རབ་རྟོགས་པས། །དགའ་བ་ཞེས་ནི་རབ་ཏུ་བརྗོད། །ཞེས་གསུངས་ཏེ། ནག་པོའི་རང་བཞིན་ནི་རྩ་བའི་ཉོན་མོངས་པ་དྲུག་སྟེ། དེ་ལ་ལྟ་བ་ལ་རྣམ་པ་ལྔར་འགྱུར་བས་བཅུ་པོ་མཐོང་བས་སྤང་བར་བྱ་བ་འཕགས་པའི་བདེན་པ་རྟོགས་པས་སྤང་བ་ཡིན་ལ། དཀར་པོའི་གཞི་ནི་ངེས་པར་རྟོགས་པ་ཞེས་བྱ་བ་ཐེག་པ་ཆེན་པོའི་མདོ་སྡེ་ལ་བརྟེན་པ། ཚུལ་བཞིན་དུ་ཡིད་ལ་བྱེད་པའི་ཞི་ལྷག་གི་རྒྱུ་སྟེ། དེ་བཟུང་བས་དེའི་ཚེ་ངེས་པར་རྟོག་པ་ནི་མཐོང་བའི་ལམ་གྱི་མངོན་གྱི་ཚུལ་དུ་དེ་བཞིན་ཉིད་ཐོབ་ཅིང་། ཉམས་སུ་མྱོང་བ་སྟེ། འདི་རྟོགས་ནས་སེམས་ཅན་གྱི་དོན་གྲུབ་པའི་དགའ་བ་ཁྱད་པར་ཅན་འཇིག་རྟེན་ལས་འདས་པ་ཐོབ་པའི་ཕྱིར། ས་དང་པོ་རབ་ཏུ་དགའ་བ་ཞེས་བྱའོ། །དེ་ཡང་མདོ་སྡེ་རྒྱན་ལས། བྱང་ཆུབ་ལ་ནི་ཉེ་བ་དང་། །སེམས་ཅན་དོན་གྲུབ་མཐོང་བ་དང་། རབ་ཏུ་དགའ་བ་སྐྱེ་འགྱུར་བས། །དེ་ཕྱིར་རབ་དགའི་ས་ཞེས་བརྗོད། །ཞེས་གསུངས་པའི་དོན་རབ་དགའི་དོན་ཡིན་ལ། སློབ་དཔོན་ཉིད་ཀྱིས་འདིའི་དོན་རྒྱས་པར་བཤད་པ་ནི། མིང་དོན་དང་། ངོ་བོ་དང་། ཡོན་ཏན། ཕ་རོལ་དུ་ཕྱིན་པ་གང་གིས་བསྡུས་པ་དང་། གཟུགས་ཀྱི་སྐུ་སྨིན་པའི་འབྲས་བུ་རྣམས་ནི། དེ་ལ་དང་པོ་རབ་ཏུ་དགའ་བ། བྱང་ཆུབ་སེམས་དཔའ་དགའ་བྱེད་ཅིང་། །ཀུན་ཏུ་སྦྱོར་བ་གསུམ་སྤངས་ཤིང་། །དེ་བཞིན་གཤེགས་པའི་རིགས་སྐྱེས་ཕྱིར། །དེའི་རྣམ་པར་སྨིན་པ་ནི། །སྦྱིན་པའི་ཕ་རོལ་ཕྱིན་མཆོག་འགྱུར། །འཇིག་རྟེན་ཁམས་ནི་བརྒྱ་གཡོ་ཞིང་། །འཛམ་གླིང་དབང་ཕྱུག་ཆེན་པོར་འགྱུར། །ཞེས་གསུངས་སོ། དེ་ནས་ས་གཉིས་པ་དྲི་མ་མེད་པ་བཤད་པ་ནི། འདོད་ཆགས་ལ་སོགས་སྣ་ཚོགས་པའི། དྲི་མས་རྟག་ཏུ་དྲི་མ་ཅན། །དྲི་མ་མེད་པར་གང་དག་པ། །དྲི་མ་མེད་ཅེས་བརྗོད་པ་ཡིན། །ཞེས་གསུངས་ཏེ། ཉོན་མོངས་པ་འདོད་ཆགས་ལ་སོགས་པ་འཆལ་པའི་ཚུལ་ཁྲིམས་ཀྱི་དྲི་མ་མེད་པར་འགྱུར་བ་སྟེ། འཆལ་ཚུལ་རྩོལ་བའི་དྲི་བྲལ་བས། །དྲི་མ་མེད་པའི་ས་ཞེས་བརྗོད། །ཞེས་པ་དང་། གཉིས་པ་དྲི་མ་མེད་ཅེས་བྱ། ལུས་དང་ངག་དང་སེམས་ཀྱི་ལས། །བཅུ་ཆར་དྲི་མ་མེད་པའི་ཕྱིར། །དེ་ཡི་རྣམ་པར་སྨིན་པ་ནི། །ཚུལ་ཁྲིམས་ཕ་རོལ་ཕྱིན་མཆོག་འགྱུར། །དཔལ་ལྡན་རིན་ཆེན་བདུན་གྱི་བདག །འགྲོ་ཕན་འཁོར་ལོས་བསྒྱུར་བར་འགྱུར། །ཞེས་འབྱུང་ངོ་། །ས་གསུམ་པ་འོད་བྱེད་པ་བཤད་པ་ནི། ཉོན་མོངས་དྲི་མ་རབ་འགག་ནས། །དྲི་མེད་ཡེ་ཤེས་རབ་གསལ་བར། །ཚད་མེད་པ་ཡི་མུན་པ་དང་། །སེལ་བར་བྱེད་པས་འོད་བྱེད་པའོ། །ཞེས་གསུངས་ཏེ། ས་འདི་ལ་བསྒོམ་པས་སྤང་བར་བྱ་བའི་ཉོན་མོངས་པའི་དྲི་མའང་ཕལ་ཆེར་འགག་ནས་ཡོངས་སུ་འཛིན་པ་མེད་པའི་ཡེ་ཤེས་ཀྱི་འོད་ཀྱིས་སེམས་ཅན་དཔག་ཏུ་མེད་པའི་བློའི་མུན་པ་སེལ་བར་བྱེད་པས། ཆོས་ཀྱི་སྣང་བ་རྒྱ་ཆེན་པོར་འགྱུར་བའོ། །དེ་ཡང་ཆོས་ཀྱི་སྣང་བ་ཆེན་པོ་ནི། བྱེད་པའི་ཕྱིར་ན་འོད་བྱེད་པའོ། །ཞེས་པ་དང་། ས་གསུམ་པ་ནི་འོད་བྱེད་པའོ། །ཡེ་ཤེས་ཞི་བའི་དབང་འབྱུང་ཕྱིར། །བསམ་གཏན་མངོན་ཤེས་བསྐྱེད་པ་དང་། །འདོད་ཆགས་ཞེ་སྡང་ཡོངས་ཟད་ཕྱིར། །དེའི་རྣམ་པར་སྨིན་པས་ན། །བཟོད་པ་བརྩོན་འགྲུས་ལྷག་པར་སྤྱོད། །ལྷ་ཡི་དབང་ཆེན་མཁས་པ་སྟེ། །འདོད་པའི་འདོད་ཆགས་བཟློག་པ་ཡིན། །ཞེས་སོ། །ས་བཞི་པ་འོད་འཕྲོ་བ་བཤད་པ་ནི། རྟག་ཏུ་དགའ་བའི་འོད་ཀྱིས་གསལ། །འདུ་འཛི་རྣམ་པར་སྤངས་པ་ཡི། ཡེ་ཤེས་འོད་ཀྱིས་རབ་བསྐོར་བས། །ས་དེ་འོད་འཕྲོ་ཅན་དུ་འདོད། །ཞེས་གསུངས་པ་ནི། བྱང་ཆུབ་ཀྱི་ཕྱོགས་དང་མཐུན་པའི་ཆོས་ཀྱིས། བཟུང་བ་དང་འཛིན་པའི་སེམས་ཀྱི་རྣམ་གཡེང་གི་འདུ་འཛི་རིང་དུ་བྱས་པས་ཐ་དད་མེད་པར་རྟོགས་པའི་ཡེ་ཤེས་ཀྱི་འོད་འཕྲོ་བའི་རྒྱུ་མཚན་ཅན་ནོ། །དེ་ཡང་། འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་བསྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་བསྲེག་པས་འོད་འཕྲོ་ཅན། ཞེས་པ་དང་། བཞི་པ་འོད་འཕྲོ་ཅན་ཞེས་པ། ཡང་དག་ཡེ་ཤེས་འབྱུང་བའི་ཕྱིར། །བྱང་ཆུབ་ཕྱོགས་མཐུན་མ་ལུས་པ། །ཁྱད་པར་དུ་ནི་བསྒོམ་པའི་ལམ། །དེ་ཡི་རྣམ་པར་སྨིན་པ་ནི། །མཐའ་བྲལ་ལྷ་ཡི་བདག་པོར་འགྱུར། །འཇིག་ཚོགས་ལྟ་བར་རབ་འབྱུང་བ། །ཀུན་ནས་འཇོམས་བྱེད་མཁས་པ་ཡིན། །ཞེས་གསུངས་སོ། །ས་ལྔ་པ་སྦྱང་དཀའ་བ་ནི། རིགས་དང་སྒྱུ་རྩལ་བཟོ་གནས་དང་། །བསམ་གཏན་རྣམ་པ་སྣ་ཚོགས་ཉིད། །ཉོན་མོངས་ཤིན་ཏུ་སྦྱང་དཀའ་ལས། །རྣམ་པར་རྒྱལ་བས་སྦྱང་དཀའ་གསུངས། །ཞེས་གསུངས་ཏེ། སེམས་ཅན་རྣམས་སྨིན་པར་བྱ་བའི་ཐབས་བཟོའི་གནས་ལ་སོགས་པ་ཐམས་ཅད་ཀྱི་བྱ་བ་བྱེད་པ་དང་། ཞི་བའི་བསམ་གཏན་འགོག་པ་ལ་སོགས་པ་མི་མཐུན་པའི་དུས་གཅིག་ཆར་གྲུབ་པར་འགྱུར་བ་འདི་ཡང་སྦྱང་དཀའ་བ་ཡིན་ཀྱང་། གྲུབ་པའི་ཕྱིར་སྦྱང་དཀའ་བ་ཞེས་བྱའོ། །དེ་ལྟར་ཡང་། སེམས་ཅན་རྣམས་ཡོངས་སྨིན་བྱ་དང་། རང་གི་སེམས་ནི་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱངས་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཞེས་པ་དང་། ལྔ་པ་ཤིན་ཏུ་སྦྱང་དཀའ་བ། བདུད་ཀྱིས་ཤིན་ཏུ་ཐུབ་དཀའ་ཕྱིར། །འཕགས་པའི་བདེན་སོགས་ཕྲ་མོའི་དོན། །ཤེས་ལ་མཁས་པ་འབྱུང་བ་ཉིད། །དེ་ཡི་རྣམ་པར་སྨིན་པ་ནི། །དགའ་ལྡན་གནས་པའི་ལྷ་རྒྱལ་འགྱུར། །མུ་སྟེགས་བྱེད་པ་ཐམས་ཅད་ཀྱི། །ཉོན་མོངས་ལ་གནས་བཟློག་བྱེད་པའོ། །ཞེས་གསུངས་སོ། །ས་དྲུག་པ་མངོན་དུ་གྱུར་པ་ནི། བྱང་ཆུབ་རྣམ་པ་གསུམ་པོ་དང་། །ཕུན་གསུམ་ཚོགས་ཀུན་བསྡུ་བ་དང་། །སྐྱེ་དང་འཇིགས་པ་ཟབ་པ་ལས། །ས་དེ་མངོན་དུ་གྱུར་པར་འདོད། ཞེས་གསུངས་ཏེ། ཉན་རང་དང་བྱང་ཆུབ་སེམས་དཔའི་བྱང་ཆུབ་གསུམ་པོས་མཉམ་པ་ཉིད་དུ་ཤེས་རབ་ཀྱིས་རྟོགས་པས་སྲིད་དང་ཞི་བ་ཁྱད་མེད་དུ་མངོན་དུ་གྱུར་ནས། སྐྱེ་བ་དང་འགག་པ་རབ་ཏུ་ཟབ་པ་རྟོགས་པ་སྟེ། ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བརྗོད། །ཞེས་པ་དང་། དྲུག་པ་མངོན་ཕྱོགས་ཞེས་བྱ་སྟེ། སངས་རྒྱས་ཆོས་ལ་མངོན་ཕྱོགས་ཕྱིར། །ཞི་གནས་ལྷག་མཐོང་སྒོམ་པ་ཡིས། །འགོག་པ་ཐོབ་པར་རྒྱས་པའི་ཕྱིར། །དེ་ཡི་རྣམ་པར་སྨིན་པ་ནི། །ལྷ་ཡི་རྒྱལ་པོ་རབ་འཕྲུལ་འགྱུར། །ཉན་ཐོས་རྣམས་ཀྱིས་མི་འཕྲོག་པས། །ལྷག་པའི་ང་རྒྱལ་ཅན་ཞི་བྱེད། ཞེས་གསུངས་སོ། །ས་བདུན་པ་རིང་དུ་སོང་བ་ནི། འཁོར་ལོའི་བཀོད་པས་རྣམ་ཀུན་ཏུ། །འོད་ཀྱི་དྲ་བས་རྩེ་བ་དང་། །འཁོར་བའི་མཚོ་ཡི་འདམ་བརྒལ་བས། །དེ་ལ་རིང་དུ་སོང་ཞེས་བྱ། །ཞེས་གསུངས་པས། གང་གིས་འདི་ལ་སངས་རྒྱས་ཀྱི་གསང་བའི་གནས་ལ་ཞུགས་པའི་རྟགས་སུ་འཁོར་ལོའི་བཀོད་པ་སྟེ། སངས་རྒྱས་ཀྱི་དཀྱིལ་འཁོར་དང་འདྲ་བའི་འོད་ཀྱི་དྲ་བས་རྩེ་ཞིང་སྐད་ཅིག་ལ་འགོག་པ་ལ་ཡང་སྙོམས་པར་འཇུག་པས་མཉམ་པ་ཉིད་རྟོགས་ནས་རིང་དུ་སོང་བའི་ཕྱིར་ན་འདམ་ལས་བརྒལ་བ་ཡིན་ནོ། །དེ་ཡང་། བསྒྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །ཞེས་དང་། བདུན་པ་རིང་དུ་སོང་བ་དང་། །གྲངས་ནི་རིང་དུ་སོང་ལྡན་ཞིང་། །གང་ཕྱིར་སྐད་ཅིག་སྐད་ཅིག་ལ། །དེ་ནི་འགོག་པར་སྙོམས་པར་འཇུག །དེ་ཡི་རྣམ་པར་སྨིན་པ་ནི། །དབང་བསྒྱུར་ལྷ་ཡི་བདག་པོར་འགྱུར། །འཕགས་པའི་བདེན་རྟོགས་ཤེས་པ་ཡིས། །སློབ་དཔོན་ཁྱུ་མཆོག་ཆེན་པོར་འགྱུར། །ཞེས་བཤད་པ་ནི་ཐབས་མཁས་པའི་ཕ་རོལ་དུ་ཕྱིན་པའི་དོན་དུ་གསུངས་སོ། །ས་བརྒྱད་པ་མི་གཡོ་བ་བཤད་པ་ནི། །སངས་རྒྱས་ཀྱིས་ངེས་འདི་བཟུང་ཞིང་། །ཡེ་ཤེས་རྒྱ་མཚོར་ཞུགས་པ་དང་། །འབད་མེད་ལྷུན་གྱིས་གྲུབ་གྱུར་པས། །བདུད་ཀྱི་འཁོར་གྱིས་མི་གཡོ་བའོ། །ཞེས་གསུངས་ཏེ། གང་གི་ཚེ་ས་བརྒྱད་པ་ཐོབ་པ་ན་ཡིད་དང་འཛིན་པ་དང་རྣམ་པར་རྟོག་པ་གནས་པར་གྱུར་པའི་ཕྱིར། སངས་རྒྱས་ཀྱི་ངེས་པ་བཟུང་བ་ནི། གསང་ཆེན་ཐབས་ལ་མཁས་པའི་མདོ་ལས། འདི་ཐོབ་ནས་འདོད་ན་ཞག་བདུན་གྱིས་བླ་ན་མེད་པའི་བྱང་ཆུབ་ཆེན་པོ་ཐོབ་པ་སྟོན་པར་གསུངས་པས། འདིར་སངས་རྒྱས་ཀྱི་གསང་བ་ལ་ཞུགས་པའི་ཕྱིར། ཡེ་ཤེས་རྒྱ་མཚོར་གནས་པར་གྱུར་པ་སྟེ། ལྷུན་གྱིས་གྲུབ་པའི་འཕྲིན་ལས་ལ། བདུད་ཐམས་ཅད་ཀྱིས་མི་བསྒུལ་བ་སྨོན་ལམ་གྱི་ཕ་རོལ་དུ་ཕྱིན་པ་ཐོབ་པའོ། དེ་ཡང་། འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད་། །ཞེས་འདུ་ཤེས་གཉིས་ནི། ཤེས་བྱ་ལ་རྟོག་པའི་འདུ་ཤེས་དང་། དེ་བཞིན་ཉིད་ལ་རྟོག་པའི་འདུ་ཤེས་ཏེ། གཉིས་ཀ་དག་པའི་ཕྱིར་རོ། །དེ་བཞིན་བརྒྱད་པ་གཞོན་ནུའི་ས། མི་རྟག་སོགས་ཀྱིས་མི་གཡོའི་ཕྱིར། །མི་གཡོ་དེ་བཞིན་ལུས་དང་ནི། །ངག་སེམས་སྤྱོད་ཡུལ་བསམ་མི་ཁྱབ། །དེ་ཡི་རྣམ་པར་སྨིན་པ་ནི། །སྟོང་གི་བདག་པོའི་ཚངས་པར་འགྱུར། །སེམས་ཅན་བསམ་པ་དྲིས་པ་ལས། དགྲ་བཅོམ་སོགས་ཀྱིས་འཕྲོག་པ་མེད། །ཞེས་ཀྱང་བཤད་དོ། །ས་དགུ་པ་ལེགས་པའི་བློ་གྲོས་བཤད་པ་ནི། སོ་སོ་ཡང་དག་རིག་ཀུན་ལ། །ཆོས་སྟོན་པའི་འབྲེལ་པའི་གཏམ། །རྣལ་འབྱོར་པ་དེ་མཐར་སོན་པས། །ས་དེ་ལེགས་པའི་བློ་གྲོས་འདོད། །ཞེས་གསུངས་ཏེ། ས་འདི་ལ་ཆོས་ཐམས་ཅད་ཀྱི་དབང་ཕྱུག་སོ་སོ་ཡང་དག་པར་རིག་པ་ཀུན་མཐར་སོན་པ་སྟོན་པ་ནི། འབད་པ་མེད་པ་སྟོན་པའི་ཕྱིར། སངས་རྒྱས་ཐམས་ཅད་ཀྱི་གསུང་གི་རང་བཞིན་མཉམ་པ་ཉིད་མཐར་ཕྱིན་པ་སྟེ། སྟོབས་ཀྱི་ཕ་རོལ་དུ་ཕྱིན་པ་ཡིན་ནོ། །དེ་ཡང་། སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་འདོད། །ཞེས་བྱ་བ་དང་། ས་དགུ་པ་ནི་ལེགས་པ་ཡི། །བློ་གྲོས་ཞེས་བྱ་རྒྱལ་ཚབ་བཞིན། །གང་ཕྱིར་སོ་སོ་ཡང་དག་རིག །ཐོབ་པ་འདི་ལ་བློ་གྲོས་བཟང་། །དེ་ཡི་རྣམ་པར་སྨིན་པས་ན། །སྟོང་གཉིས་བདག་པོའི་ཚངས་པར་འགྱུར། །ཞེས་འབྱུང་ངོ་། །ས་བཅུ་པ་ཆོས་ཀྱི་སྤྲིན་བཤད་པ་ནི། ཡེ་ཤེས་རང་བཞིན་འདི་ཡི་སྐུ། །དྲི་མེད་ནམ་མཁའ་དང་མཉམ་པ། །སངས་རྒྱས་རྣམས་ཀྱི་འཛིན་པ་ལས། །ཆོས་ཀྱི་སྤྲིན་གྱིས་ཀུན་ཏུ་འབྱུང་། །ཞེས་འབྱུང་ངོ་། །འདི་ནི་ཡེ་ཤེས་མཐར་སོན་པའི་སངས་རྒྱས་ཐམས་ཅད། སྐུ་མཉམ་པའི་འཕྲིན་ལས་མཛད་པ་བཅུ་གཉིས་རྒྱུན་ཆད་མེད་པ་སློབ་མ་དུལ་བའི་ཚོགས་མཐའ་ཡས་པ་མངའ་བར་འགྱུར་བ་སྟེ། ཇི་ལྟ་བ་དང་ཇི་སྙེད་པ་ནམ་མཁའ་དང་མཉམ་པར་གྱུར་པའོ། །དེའི་ཕྱིར་ཡེ་ཤེས་ཀྱི་ཕ་རོལ་དུ་ཕྱིན་པ་ཞེས་བྱའོ། །དེའང་སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ནི་ཆོས་ཀྱི་སྤྲིན། །ཞེས་པ་དང་། །བཅུ་པ་ཆོས་ཀྱི་སྤྲིན་ཡིན་ཏེ། དམ་པའི་ཆོས་ཀྱི་ཆར་འབེབས་ཕྱིར། །བྱང་ཆུབ་སེམས་དཔའ་སངས་རྒྱས་ཀྱི། །འོད་ཟེར་དབང་གིས་དབང་བསྐུར་ཕྱིར། །དེ་ཡི་རྣམ་པར་སྨིན་པས་ནི། །གནས་གཙང་ལྷ་ཡི་བདག་པོར་འགྱུར། །བསམ་ཡས་ཡེ་ཤེས་ཡུལ་གྱི་བདག །དབང་ཕྱུག་ཆེན་པོ་མཆོག་ཡིན་ནོ། །ཞེས་གསུངས་ཏེ། ལུང་སྔ་མ་རྣམས་ནི་མདོ་སྡེ་རྒྱན་ལས་གསུངས་ཤིང་། ཕྱི་མ་རྣམས་ནི་རིན་ཆེན་པོའི་ཕྲེང་བ་ལས་བྱུང་བ་ཡིན་ནོ། །ས་བཅུ་པ་འདི་ཡང་རང་གི་ངོ་བོ་བསྡུས་ཏེ་བསྟན་པ་འདི་རྣམས་ལ་སྒྲིབ་པར་བྱེད་པ་ནི། ཆོས་ཀྱི་དབྱིངས་ཀུན་ཏུ་འགྲོ་བའི་དོན་ལ་སོགས་པ་རྣམ་པ་བཅུ་ལ། ཉོན་མོངས་པ་ཅན་མ་ཡིན་པའི་མི་ཤེས་པ་གང་ཡིན་པ་ནི། བྱང་ཆུབ་སེམས་དཔའི་ས་བཅུ་ལ་གོ་རིམ་བཞིན་དུ་བསྒྲིབ་ཏེ། དེའི་མི་མཐུན་པའི་ཕྱོགས་སུ་གྱུར་པའི་ཕྱིར་རོ། །དེའང་། ཀུན་ཏུ་འགྲོ་དོན་མཆོག་གི་དོན། རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུ་རྣམས་ཐ་དད་མེད་པ་དང་། ཉོན་མོངས་རྣམ་དག་མིན་དོན་དང་། །ཐ་དད་མེད་པའི་དོན་ཉིད་དང་། །འབྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་གནས། །ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། ས་བཅུའི་མི་མཐུན་ཕྱོགས་རྣམས་བཅུ། །གཉེན་པོ་དག་ནི་ས་ཡིན་ནོ། །ཞེས་དབུས་མཐའ་ལས་གསུངས་པ་ནི་ཤེས་བྱའི་སྒྲིབ་པ་སྟེ། འདི་སྤྱོད་པ་ལ་ཡོངས་སུ་སྦྱོར་བ་རྣམས་ནི་ཕ་རོལ་དུ་ཕྱིན་པར་རྒྱ་ཆེར་བསྟན་ཏོ། མདོར་བསྡུས་ན་འདོད་པའི་ཁམས་བསྒྲུབ་པར་བྱེད་པའི་འདོད་ཆགས་དང་། ཞེ་སྡང་དང་། གཏི་མུག་གིས་ཀུན་ནས་ལྡང་བ་དྲག་པོ་ནི། མི་སྡུག་པ་ལ་སོགས་པའི་གཉེན་པོས་སྤང་བར་བྱ་བ་ཡིན་ནོ། །དུག་གསུམ་བག་ལ་ཉལ་གཟུགས་དང་གཟུགས་མེད་པ་བསྒྲུབ་པ་ནི་འཇིག་རྟེན་ལས་འདས་པའི་ལམ་གྱི་སྤང་བར་བྱའོ། །ཉན་རང་གི་རྒྱུད་ལ་ཡོད་པའི་མ་རིག་པའི་བག་ཆགས་ཀྱི་ས་དང་། མཐོང་བས་སྤང་བ་དང་། བསྒོམ་པས་སྤང་བ་དང་། མ་དག་པའི་ས་བདུན་དང་། དག་པའི་ས་གསུམ་གྱི་སྤང་བྱ། ཉོན་མོངས་པ་དང་། ཤེས་བྱ་དང་། སྙོམས་འཇུག་གི་སྒྲིབ་པར་བསྡུས་ནས་ཀྱང་གསུངས་ཏེ། སྤང་བྱ་དང་། གཉེན་པོ་དང་། དེ་བཞིན་ཉིད་དང་། འབྲས་བུའི་མཚན་མ་བཞིའི་རིམ་པས་གཉེན་པོར་བསྟན་ཏོ། །དེ་ལ་རྣམ་པར་མི་རྟོག་པའི་ཡེ་ཤེས་ནི། ཆོས་ཀྱི་སྐུ་རྒྱས་པའི་ཐ་སྙད་དེ་དང་སྒྱུ་མ་ལྟ་བུའི་ཡེ་ཤེས་ནི་གཟུགས་སྐུ་རྒྱས་པའི་ཐ་སྙད་དུ་གསུངས་ཏེ། རང་གི་ངོ་བོས་རྟེན་ཅིང་འབྲེལ་པར་འབྱུང་བ་དབྱེར་མེད་དུ་བརྗོད་དོ། །གཟུགས་ཀྱི་སྐུ་རྣམས་ལ་རྒྱལ་པོ་རྣམས་ཀྱི་ལུས་དང་མཚུངས་པར་བསྟན་པ་ཡང་། གཟུགས་ཀྱི་ཁྱད་པར་ཁམས་གསུམ་དུ་སྣང་བའི་ཆ་ལ་དགོངས་ནས་བསྟན་པར་རྟོགས་ཏེ། སྟོབས་ལྔ་ནི་དེ་ལྟར་མ་ཡིན་ནོ། །དེ་ཡང་ཚན་པོ་ཆེ་དྲི་མ་མེད་པའི་གཟི་བརྗིད་ཀྱིས་ཞུས་པ་དང་། འཕགས་པ་རྡོ་འཕངས་ལས་ཀྱང་། བྱང་ཆུབ་སེམས་དཔའ་དང་། སངས་རྒྱས་རྣམས་ཀྱི་ཤེས་རབ་དང་། ཡེ་ཤེས་དང་། བསྒོམ་པའི་ཏིང་ངེ་འཛིན་དང་། ཚོགས་བསགས་པའི་བསོད་ནམས་དང་། ལུས་དག་པའི་སྟོབས་ཏེ་བཞི་གསུངས་པ་ལས། ལུས་ཀྱི་སྟོབས་ཀྱང་། གླང་ཕལ་པ་དང་། སྐྱེ་བོ་དང་། དཀར་པོ་དང་། པད་མ་དང་། ཀུ་མུ་ཏ་དང་། བལ་གླང་དང་། སྤོས་གླང་དང་། རི་འབིགས་བྱེད་ཀྱི་གླང་དང་། མཚོན་ཆའི་སྡེར་མོ་ཅན་དང་། སེང་གེ་ཕལ་པ་དང་། ཆེན་པོ་དང་། ས་བླའི་ལྷའི་བུ་དང་། ཕྲེང་ཐོགས་དང་། གཞོང་ཐོགས་དང་། རྟག་མྱོས་དང་། པི་ཝང་ཅན་དང་། ལུས་ངན་དང་། སུམ་ཅུ་རྩ་གསུམ་དང་། དེ་རྣམས་བཅུ་འགྱུར་དང་། བདུན་འགྱུར་དང་། དེ་ཐམས་ཅད་བརྒྱ་བྱིན་གཅིག་དང་། ཡང་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷའི་བུ་རྣམས་བདུན་འགྱུར་དང་། དེ་ཐམས་ཅད་བདུད་ཀྱི་ལྷ་གཅིག་དང་མཉམ་པ་དང་། དེ་ཐམས་ཅད་སྲེད་མེད་ཀྱི་བུ་ཕྱེད་པ་གཅིག་དང་། དེ་གཉིས་ལ་བུ་ཆེན་པོ་གཅིག་དང་། དེ་བཅུ་དགྲ་བཅོམ་པ་སྲིད་པ་ཐ་མ་པ་དང་། དེ་བརྒྱ་སྟོང་གིས་རང་སངས་རྒྱས་བསེ་རུ་ལྟ་བུ་གཅིག་དང་། བྱང་ཆུབ་སེམས་དཔའ་མཐོང་ལམ་ཐོབ་ནས་བསྐལ་པ་བརྒྱ་ལོན་པ་གཅིག་ལ། རང་སངས་རྒྱས་བཅུའི་སྟོབ་དང་། དེ་བཞིན་དུ་བསྐལ་པ་སྟོང་དང་། ཁྲི་དང་། འབུམ་དང་། ས་ཡ་དང་། བྱེ་བ་དང་། བྱེ་བ་བརྒྱ་དང་། སྟོང་དང་། ཁྲི་དང་། འབུམ་དང་། གྲངས་མེད་པ་དང་། ས་བརྒྱད་པ་དང་། དགུ་པ་དང་། བཅུ་པ་དང་། སྲིད་པ་ཐ་མ་དང་བཅས་པའི་འགྱུར་དཔག་ཏུ་མེད་པ་གསུངས་སོ། །དེ་བཞིན་བསོད་ནམས་ཀྱང་། འཇིག་རྟེན་མ་ལུས་ཀུན་བསོད་ནམས། །འཇིག་རྟེན་གཞན་དུ་དཔག་མེད་གང་། །དེ་བཅུར་བསྒྲེས་པར་གྱུར་པ་ཡིས། །བ་སྤུའི་བུ་ག་གཅིག་འགྲུབ་སྟེ། །ཞེས་བྱ་བ་ལ་སོགས་པ་རྒྱས་པར་གསུངས་ཏེ། །འདིར་ཡི་གེས་འཇིགས་པའི་ཕྱིར་མ་བཤད་དོ། །ས་བཅུ་བསྟན་པའི་མདོ་ལ་སོགས་པའི་རྣམས་སུ་བལྟ་བར་བྱའོ། །བཞི་པ་དྲི་མ་ཐམས་ཅད་དང་བྲལ་བའི་ཆོས་ཀྱི་སྐུ་ལ་བསྟོད་པ་ལ་བཞི་སྟེ། གནས་གྱུར་པའི་ཆོས་སྐུ་རང་གི་ངོ་བོ་དང་། བསམ་གྱིས་མི་ཁྱབ་པ་དང་། རྟོགས་པའི་ཡོན་ཏན་དང་། འཕྲིན་ལས་བཤད་པའོ། །དང་པོ་ནི། སངས་རྒྱས་རྣམས་ཀྱི་ཆོས་ཀྱི་གནས། །སྤྱོད་པའི་འབྲས་བུ་ཡོངས་འཛིན་པ། །གནས་ནི་ཡོངས་སུ་གྱུར་པ་དེ། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་གསུང་སྟེ། གང་གི་ཚེ་ས་བཅུ་པོ་མཐར་ཕྱིན་ནས། རྡོ་རྗེ་ལྟ་བུའི་ཏིང་ངེ་འཛིན་གྱིས་ཀུན་གཞིའི་རྣམ་པར་ཤེས་པ་མ་རིག་པའི་བག་ཆགས་ཀྱིས་བཅོམ་པར་གྱུར་པ་ན། འོད་ཟེར་ཆེན་པོའི་དབང་བསྐུར་ཐོབ་ཅིང་སངས་རྒྱས་འགྱུར་ཏེ། དེ་ཡང་ཆོས་ཐམས་ཅད་ཀྱི་རང་གི་ངོ་བོ་མཐར་ཐུག་པའི་གནས་སྐབས་པ་དུ་མར་སྤྱད་པ་སྤྱོད་པ་དཔག་ཏུ་མེད་པས། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་སྨིག་སྒྱུ་དང་འདྲ་བ་སྦྱངས་ནས། རང་བཞིན་གྱིས་འོད་གསལ་བའི་ཡོངས་སུ་གྲུབ་པའི་ངོ་བོ་ཡོངས་སུ་འཛིན་པ་དེ་ནི་གནས་ཡོངས་སུ་གྱུར་པ་ཞེས་གསུངས་པ་ནི། ཆོས་ཀྱི་སྐུ་ཞེས་བརྗོད་པ་ཡིན་ནོ། །དོན་འདི་རྒྱས་པར་ཐེག་བསྡུས་ལས་གསུང་པ་སྟེ། །ཇི་ལྟར་ཆོས་ཀྱི་སྐུ་འདི་འཐོབ་ཅེ་ན། །ཐེག་པ་ཆེན་པོའི་ཆོས་འདྲེས་པ་ལ་དམིགས་པ་རྣམ་པར་མི་རྟོག་པ་དང་། དེའི་རྗེས་ལ་ཐོབ་པའི་ཡེ་ཤེས་རྣམ་ལྔ་ལེགས་པར་བསྒོམ་པས་ཐམས་ཅད་དུ་ཚོགས་ལེགས་པར་བསགས་པ་དང་། སྒྲིབ་པ་སྲབ་མོ་བཤིག་པར་དཀའ་བ་བཤིག་པའི་ཕྱིར། རྡོ་རྗེ་ལྟ་བུའི་ཏིང་ངེ་འཛིན་དེའི་འཇུག་ཐོགས་སུ་སྒྲིབ་པ་ཐམས་ཅད་དང་བྲལ་བའི་ཕྱིར། དེའི་གནས་གྱུར་པས་ཐོབ་བོ། །ཡང་དབང་འབྱོར་པའི་དུས། ཆོས་ཀྱི་སྐུའི་དབང་འབྱོར་ཐོབ་ཅེ་ན། མདོར་བསྡུས་ན་རྣམ་པ་ལྔས་ཐོབ་སྟེ། གཟུགས་ཀྱི་ཕུང་པོར་གྱུར་པའི་ཕྱིར། །ཞིང་དང་། ལུས་དང་། མཚན་དང་། དཔེ་བྱད་བཟང་པོ་དང་། དབྱངས་མཐའ་ཡས་པ་དང་། སྤྱི་གཙུག་ལྟར་མིང་མངོན་པ་ལ་དབང་འབྱོར་པ་དང་། ཚོར་བའི་ཕུང་པོ་གནས་གྱུར་པའི་ཕྱིར། ཁ་ན་མ་ཐོ་བ་མེད་པ་རྒྱ་ཆེ་བའི་བདེ་བར་གནས་པ་ལ་དབང་འབྱོར་པ་དང་། འདུ་ཤེས་ཀྱི་ཕུང་པོ་གནས་གྱུར་པའི་ཕྱིར། མིང་གི་ཚོགས་དང་། ཚིག་གི་ཚོགས་དང་། ཡི་གེའི་ཚོགས་ཐམས་ཅད་ལ་དབང་འབྱོར་པ་དང་། འདུ་བྱེད་ཀྱི་ཕུང་པོ་གནས་གྱུར་པའི་ཕྱིར་སྤྲུལ་པ་དང་། བསྒྱུར་བ་དང་། འཁོར་བསྡུ་བ་དང་། དཀར་པོའི་ཆོས་བསྡུ་བ་ལ་དབང་འབྱོར་པ་དང་། རྣམ་པར་ཤེས་པའི་ཕུང་པོ་གནས་གྱུར་པའི་ཕྱིར། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོགས་པ་དང་། བྱ་བ་གྲུབ་པ་ལ་དབང་འབྱོར་པས་ཐོབ་བོ། །ཆོས་ཀྱི་སྐུ་ནི་གནས་པ་དུ་མ་ཞིག་གིས་གནས་པར་རིག་པར་བྱ། ཞེ་ན། མདོར་བསྡུས་ན་གསུམ་གྱིས་གནས་ཏེ། སངས་རྒྱས་ཀྱི་གནས་པ་སྣ་ཚོགས་ཀྱི་གནས་ནི། འདིར་ཚིགས་སུ་བཅད་པ། གང་ཕྱིར་སངས་རྒྱས་རང་གི་དབྱིངས་རྙེད་ནས། །རྣམ་པ་ལྔ་ཡི་བདག་ཉིད་དགྱེས་རྙེད་ལ། །དེ་མ་ཐོབ་པས་དགའ་དང་བྲལ་གྱུར་པ། །དེ་ཕྱིར་དེ་འདོད་པས་ནི་དེ་ཐོབ་བྱོས། །མཐུ་དང་བྱ་བ་གྲུབ་དང་ཆོས་རོ་དང་། །དོན་དང་ཡོན་ཏན་འབྱོར་པ་དཔག་མེད་དང་། །རྟག་ཏུ་མི་བཟད་གཟིགས་པ་སངས་རྒྱས་རྣམས། །དགྱེས་མཆོག་ཁ་ན་མ་ཐོ་མེད་པས་བརྙེས། ལོངས་སྤྱོད་རྫོགས་པའི་སྐུ་སྣ་ཚོགས་ཀྱིས་གནས་པ་ནི། བྱང་ཆུབ་སེམས་དཔའ་ཡོངས་སུ་སྨིན་པར་མཛད་པའི་ཕྱིར་རོ། །སྤྲུལ་པའི་སྐུ་སྣ་ཚོགས་ཀྱིས་གནས་པ་ནི་ཕལ་ཆེར་ཉན་ཐོས་རྣམས་ཡོངས་སུ་སྨིན་པར་མཛད་པའི་ཕྱིར་རོ། སངས་རྒྱས་ཀྱི་ཆོས་དུ་ཞིག་གིས་ཆོས་ཀྱི་སྐུ་བསྡུས་པར་རིག་པར་བྱ་ཞེ་ན། མདོར་བསྡུས་ན་རྣམ་པ་དྲུག་གིས་བསྡུས་ཏེ། སངས་རྒྱས་ཆོས་ཀྱི་རྣམ་པར་དག་པས་ནི། ཀུན་གཞིའི་རྣམ་པར་ཤེས་པ་གནས་གྱུར་ནས། །ཆོས་ཀྱི་སྐུ་ཐོབ་པའི་ཕྱིར་རོ། །རྣམ་པར་སྨིན་པས་ནི། །དབང་པོ་གཟུགས་ཅན་གནས་གྱུར་ནས། རྣམ་པར་སྨིན་པའི་ཡེ་ཤེས་ཐོབ་པའི་ཕྱིར་རོ། །གནས་པས་ནི་འདོད་པ་ལ་སྤྱོད་པ་ལ་སོགས་པ་གནས་གྱུར་ནས། ཡེ་ཤེས་ཚད་མེད་པས་གནས་པ་ཐོབ་པའི་ཕྱིར་རོ། །དབང་འབྱོར་པས་ནི་ཡོངས་སུ་འཛིན་པའི་ལས་སྣ་ཚོགས་གནས་འགྱུར་ནས། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པའི་མངོན་པར་ཤེས་པའི་ཡེ་ཤེས་ལ་དབང་འབྱོར་པ་ཐོབ་པའི་ཕྱིར་རོ། །ཐ་སྙད་པས་ནི་མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པའི་ཐ་སྙད་བརྗོད་པར་གྱུར་ནས། སེམས་ཅན་ཐམས་ཅད་ཀྱི་སེམས་ཚིམ་པར་བྱེད་པའི་བསྟན་པ་མཁྱེན་པ་ལ་དབང་འབྱོར་པ་ཐོབ་པའི་ཕྱིར་རོ། །སེལ་བས་ནི་གནོད་པ་དང་། ཉེས་པ་ཐམས་ཅད་སེལ་བར་གྱུར་ནས། སེམས་ཅན་ཐམས་ཅད་ཀྱི་གནོད་པ་ཐམས་ཅད་སེལ་བ་མཁྱེན་པའི་ཡེ་ཤེས་བརྙེས་པའི་ཕྱིར་ཏེ། སངས་རྒྱས་ཀྱི་ཆོས་འདི་དྲུག་གིས་ཆོས་ཀྱི་སྐུ་བསྡུས་པར་རིག་པར་བྱའོ། །ཞེས་གསུངས་པ་ཡིན་ནོ། །གཉིས་པ་བསམ་གྱིས་མི་ཁྱབ་པ་ནི། ཚིགས་སུ་བཅད་པ་གཉིས་ལས། བག་ཆགས་ལས་གྲོལ་བསམ་མི་ཁྱབ། །ཅེས་བྱ་བ་ནི། འཁོར་བའི་རྩ་བ་བག་ཆགས་ཡིན་པས། །དེ་ལས་གྲོལ་བ་ནི་བསམ་པར་བྱ་བ་གྲོལ་བའི་ཕྱིར། བསམ་གྱིས་མི་ཁྱབ་པ་ཞེས་བསྟན་ནས། རྒྱས་པར་བཤད་པའི་ཕྱིར། འཁོར་བའི་བག་ཆགས་བསམ་དུ་ཡོད། །ཁྱོད་ནི་ཀུན་ཏུ་བསམ་མི་ཁྱབ། །གང་གི་ཁྱོད་ནི་ཤེས་པར་ནུས། །ངག་གི་སྤྱོད་ཡུལ་ཀུན་ལས་འདས། །དབང་པོ་ཀུན་གྱི་སྤྱོད་ཡུལ་མིན། །ཞེས་གསུངས་སོ། །འཁོར་བ་ནི་ཉེ་བར་ལེན་པའི་ཕུང་པོ་ལྔ་སྟེ། དེའི་བག་ཆགས་ནི་བསམ་པས་གཞལ་ན། རྒྱུ་དང་རྐྱེན་གྱི་མཚན་ཉིད་ཅན་རྟེན་ཅིང་འབྲེལ་བར་འབྱུང་བ་སྟེ། འདི་ནི། སོ་སོའི་སྐྱེ་བོ་བློ་དང་ལྡན་པས་ཀྱང་། །བརྟག་ཅིང་བསམ་དུ་ཡོད་མོད་ཀྱིས། །སངས་རྒྱས་ཡེ་ཤེས་ཁྱོད་ནི་ཀུན་ཏུ་སྟེ། །ཐོག་མར་དྲི་བཅས། བར་དུ་དྲི་མ་སེལ་བཞིན་པ་དང་། མཐར་དྲི་མ་བྲལ་ཡང་། འདུས་མ་བྱས་པ་གསར་དུ་སྐྱེ་བ་མ་ཡིན་པ། འདུ་བྱེད་པ་མ་ཡིན་པ། དྲི་མས་གཏན་མ་ཡིན་པ། ནུས་པ་དང་ཐུགས་རྗེ་མཐའ་མེད་པ་འདི་ནི་བསམ་གྱིས་མི་ཁྱབ་བོ། །དེས་ན་གང་གིས་ཁྱོད་ནི་ཤེས་པར་ནུས་ཏེ། ཤེས་བྱ་དང་ཤེས་བྱེད་མཉམ་པར་འདྲེས་པའི་ཕྱིར་རོ། །ཤེས་བྱ་དང་ཤེས་བྱེད་ཐ་དད་པ་མེད་ན་མིང་དང་། ཚིག་དང་། ཡེ་ཤེས་མི་འབྱུང་བའི་ཕྱིར་ངག་གི་སྤྱོད་ཡུལ་ལས་འདས་པ་ཡིན་ནོ། །གང་སེམས་དང་། གང་གི་སྤྱོད་ཡུལ་མ་ཡིན་པ་ནི། ལུས་ཀྱི་ཆ་མ་ཡིན་པས། མིག་ལ་སོགས་པའི་དབང་པོ་དང་། ཡིད་ཀྱི་དབང་པོའི་བར་གྱི་སྤྱོད་ཡུལ་མ་ཡིན་ཏེ། སྟོང་པའི་ཕྱིར་རོ། །འདི་ལྟར་རྒྱུད་བླ་མར་ཡང་། ཕྲ་ཕྱིར་ཐོས་པའི་ཡུལ་མིན་ཕྱིར། །དོན་དམ་ཕྱིར་ནི་བསམ་པའི་མིན། །ཆོས་ཉིད་ཟབ་མོ་འཇིག་རྟེན་པའི། །བསྒོམ་པ་ལ་སོགས་ཡུལ་མ་ཡིན། །གང་ཕྱིར་གཟུགས་ལ་དམུས་ལོང་བཞིན། །བྱིས་པས་དེ་སྔོན་མཐོང་མ་མྱོང་། །ཞེས་འབྱུང་བ་ཡིན་ནོ། དེ་ལྟར་ན་གཏན་ནས་རྟོགས་བྱ་མ་ཡིན་ནམ་ཞེ་ན། ཡིད་ཀྱི་ཤེས་པས་རྟོགས་བྱ་བ། །ཞེས་གསུངས་པ་ནི། ཡིད་ཀྱི་དྲི་མ་དག་ཅིང་དྲི་མ་མེད་པའི་ཡིད་དུ་གྱུར་པས་སོ་སོ་རང་གིས་རིག་ཅིང་རྟོགས་པར་བྱ་བ་སྟེ། སྔར་ཇི་སྐད་དུ་བསྟན་པ་བཞིན་ནོ། །དེས་ན་བརྗོད་དུ་མེད་པ་ལ་གང་གིས་ཀྱང་བརྗོད་པ་དང་བསམ་དུ་མེད་པ་ལ་བསམ་པ་ཐམས་ཅད་མཁྱེན་པ་དང་། བྱེད་པ་མེད་པ་ལ་འཁོར་འདས་ཐམས་ཅད་བྱེད་པ་སྟེ། གང་ཡང་རུང་ལ་ཕྱག་འཚལ་བསྟོད། །ཞེས་གསུངས་པ་ཡིན་ནོ། །དེ་བཞིན་དུ། བཙས་པའི་ཁྱིམ་གནས་བུ་ཆུང་གི །ཉི་མའི་གཟུགས་བཞིན་འཕགས་པས་ཀྱང་། ཞེས་བྱ་བ་དང་། དཔལ་ས་ར་ཧ་པས་ཀྱང་། ཡིད་ཀྱི་དྲི་མ་དག་ན་ལྷན་ཅིག་སྐྱེས་པ་སྟེ། །དེ་ཚེ་མི་མཐུན་ཕྱོགས་ཀྱིས་འཇུག་པ་མེད། །ཅེས་གསུངས་སོ། །དེ་ལྟར་རྟོགས་པ་མཐར་ཐུག་པའི་ཡོན་ཏན་བཤད་པ་ནི་བཞི་ལས། སེམས་དག་པའི་ཚུལ་དང་། ཡེ་ཤེས་ཀྱི་ལུས་རྫོགས་པ་དང་། དག་པའི་ཡོན་ཏན་དང་། ཐོབ་པའི་ཡོན་ཏན་ནོ། །དང་པོ་ནི། རིམ་གྱིས་འཇུག་པའི་ལུས་ཉིད་ཀྱི། །སངས་རྒྱས་སྲས་པོ་གྲགས་ཆེན་རྣམས། །ཆོས་ཀྱི་སྤྲིན་གྱི་ཡེ་ཤེས་ཀྱི། །ཆོས་ཉིད་སྟོང་པ་མཐོང་གྱུར་ན། །གང་ཚེ་སེམས་ནི་རབ་བཀྲུས་པ། །འཁོར་བའི་གཟེབ་ལས་འདས་གྱུར་ནས། །ཞེས་གསུངས་པ་ནི། བྱང་ཆུབ་སེམས་དཔའ་ས་བཅུ་པོ་ལ་ལེགས་པར་རིམ་གྱིས་ཞུགས་ཤིང་ཐོབ་པས་དབང་བསྐུར་བའི་སངས་རྒྱས་ཀྱི་ས་ཐོབ་པ་དེའི་ཚེ། ནམ་མཁའི་མཐའ་ཀླས་པ་སངས་རྒྱས་ཐམས་ཅད་ཀྱིས་བསྔགས་པ་ན། གྲགས་པ་ཆེན་པོ་སྟེ། དེ་ཡང་ཆོས་དཀར་པོའི་འཕྲིན་ལས་ནམ་མཁའ་དང་མཉམ་པའི་ཐུགས་རྗེའི་སྤྲིན་ལས། བྱང་ཆུབ་ཆེན་པོ་ལ་སོགས་པའི་འཕྲིན་ལས་ཀྱི་ཆར་འབད་པ་མེད་པར་འབྱུང་བར་གྱུར་ཅིང་། རྣམ་པར་མི་རྟོག་པའི་ཡེ་ཤེས་སྤང་བྱ་དང་། གཉེན་པོ་དང་། དེ་བཞིན་ཉིད་དང་། འབྲས་བུ་རྟོགས་པའི་མཚན་མ་སྟེ། བཞི་པོས་སྟོང་པར་གྱུར་མ་ཐག་ཏུ། གང་གི་ཚེ་མ་རིག་པའི་བག་ཆགས་ཀྱི་སའི་རྟེན་གྱི་སེམས་ཀུན་གཞིའི་རྣམ་པར་ཤེས་པ་དག་ཅིང་གྲུབ་པ་སྟེ། འགག་པས་སྤང་བྱ་ཐམས་ཅད་དང་བྲལ་བར་གྱུར་ཏེ། དེ་ནི་སངས་རྒྱས་བཅོམ་ལྡན་འདས་རྣམས་ཀྱི་ཞི་བ་ཞེས་བྱའོ། །དེ་ལྟར་སེམས་འགག་པས་ཡེ་ཤེས་ཀྱི་ལུས་རྫོགས་པའི་ཚུལ་ནི། པདྨ་ཆེན་པོའི་རང་བཞིན་གྱིས། བསྟན་ལ་དེ་ནི་རབ་གནས་འགྱུར། །འདབ་མའི་རིན་ཆེན་དུ་མའི་འོད། །འདོད་པར་བྱེད་པའི་ཟེའུ་འབྲུ་ཅན། །པདྨ་བྱེ་བ་དུ་མ་ཡིས། རྣམ་པ་ཀུན་ཏུ་ཡོངས་སུ་བསྐོར། ཞེས་གསུངས་ཏེ། གང་ཚེ་སེམས་འགག་པས་འཁོར་བའི་གཟེབ་ལས་གྲོལ་བར་གྱུར་པ་དེ་ནས་ཡེ་ཤེས་སྐུ་དེ་བཞུགས་པའི་གདན་ཡང་འདི་ལྟ་སྟེ། སངས་རྒྱས་ཀྱི་སྨོན་ལམ་ཚད་མེད་པ་ལས་གྲུབ་པ། བྱང་ཆུབ་ཀྱི་སྙིང་པོའི་ནོར་བུ་དྲི་མ་མེད་པའི་སྙིང་པོ་ཅན། དབང་གི་རྒྱལ་པོ་དང་། བསམ་འཕེལ་དང་། བརྒྱ་བྱིན་ཐོགས་དང་། བཻ་ཌཱུརྻ་དང་། ཐོན་ཁ་ཆེན་པོ་དང་། པདྨ་ར་ག་དང་། སྐར་མདོག་དང་། ཆུ་དང་། ས་དང་། སྤུག་དང་། རྡོའི་སྙིང་པོ་དང་། འཛམ་བུའི་ཆུ་བོའི་གསེར་ལྟ་བུ་ལ་སོགས་པ་ཚད་མེད་པ་བསམ་གྱིས་མི་ཁྱབ་པ། འཇིག་རྟེན་ཐམས་ཅད་ལས་འདས་པ། ནམ་མཁའི་མཐས་གཏུག་པ་རྒྱས་པར་འགེངས་པའི་འོད་ཅན། རྒྱན་ཐམས་ཅད་ཀྱིས་སྤྲས་པ། མདོར་བསྡུས་ན་དེའི་བསྔགས་པ་དང་བཀོད་པ་ནི་ཁ་བྱེ་བ་ཁྲག་ཁྲིག་བརྒྱ་སྟོང་གིས་བསྐལ་པ་གང་གའི་ཀླུང་གི་བྱེ་མ་སྙེད་དུ་བརྗོད་ཀྱང་མཐའ་ཐུག་པར་མི་འགྱུར་བ་དེ་ལྟ་བུའི་པདྨ་བྱེ་བ་དུ་མ་ཡིས། རྣམ་པ་ཀུན་ཏུ་ཡོངས་སུ་བསྐོར་བ་ལ་ཞུགས་པར་འགྱུར་ཏེ། རྒྱས་པར་ནི་ཕལ་པོ་ཆེ་ལས་གསུངས་པ་ལྟ་བུ་ཡིན་ནོ། །དེའི་སྐུའི་བཀོད་པ་ནི། རྒྱལ་བའི་སྲས་ཀུན་ཏུ་བཟང་པོས་ནི་བྱང་ཆུབ་ཀྱི་ཤིང་དྲུང་དུ་གཟིགས་པའི་བཀོད་པ་ལྟ་བུ་སྟེ། འདིར་བརྗོད་ཀྱིས་མི་ལང་ངོ་། །ད་ནི་དེ་ལྟ་བུའི་དག་པའི་ཡོན་ཏན་བསྟན་པ་ནི། སྟོབས་བཅུ་པོ་ཡིས་ཡོངས་སུ་གང་། །མི་འཇིགས་པ་ཡིས་ཡང་དག་ངོམས། །བསམ་མི་ཁྱབ་པའི་སངས་རྒྱས་ཆོས། །སྤྲོས་མེད་རྣམས་ལ་ཉམས་མི་མངའ། །ཞེས་གསུངས་ཏེ། འདི་ནི་ཆོས་ཀྱི་སྐུའི་ཡོན་ཏན་སུམ་ཅུ་རྩ་གཉིས་ཏེ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་ཆོས་བཅོ་བརྒྱད་བསྟན་ཏེ། འདི་རྣམས་འཕགས་པ་ཆེན་པོ་བྱམས་པས་རྒྱུད་བླ་མར་བསྡུས་པའི་ཚུལ་འདིར་བརྗོད་པ། གནས་དང་གནས་མིན་ལས་རྣམས་ཀྱི། །རྣམ་སྨིན་དང་ནི་དབང་པོ་དང་། །ཁམས་རྣམས་དང་ནི་མོས་པ་དང་། །ཀུན་འགྲོའི་ལམ་ནི་བསམ་གཏན་སོགས། །ཉོན་མོངས་དྲི་མ་མེད་པ་དང་། །གནས་ནི་རྗེས་སུ་དྲན་པ་དང་། །ལྷ་ཡི་མིག་དང་ཞི་བ་ནི། །མཁྱེན་པའི་སྟོབས་ནི་རྣམ་པ་བཅུ། །ཞེས་སྟོབས་བཅུའོ། ཆོས་ཀུན་རྫོགས་པར་བྱང་ཆུབ་དང་། །གེགས་ནི་འགོག་པར་མཛད་པ་དང་། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་བྱ་བ་ནི་མི་འཇིགས་པ་སྟེ། ལྷ་དང་། བདུད་དང་། དགེ་སྦྱོང་དང་། བྲམ་ཟེ་གཞན་གྱི་འདི་མ་ཡིན་ཞེས་བརྒལ་དུ་མེད་པའི་ཕྱིར་མི་འཇིགས་པའོ། །འཁྲུལ་དང་ཅ་ཅོ་མི་མངའ་དང་། །སྟོན་པའི་དྲན་པ་ཉམས་མི་མངའ། །མཉམ་པར་མ་བཞག་ཐུགས་མི་མངའ། །འདུ་ཤེས་སྣ་ཚོགས་ཀྱང་མི་མངའ། །མ་བརྟགས་བཏང་སྙོམས་མི་མངའ་སྟེ། །འདུན་པ་བརྩོན་འགྲུས་དྲན་པ་དང་། །ཤེས་རབ་ཏིང་འཛིན་རྣམ་གྲོལ་གྱི། །ཡེ་ཤེས་གཟིགས་པ་ཉམས་མི་མངའ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་ཡེ་ཤེས་སྒྲིབ་པ་མེད། །དེ་ལྟར་བཅོ་བརྒྱད་འདི་དང་གཞན། །སྟོན་པའི་མ་འདྲེས་ཡོན་ཏན་ཡིན། །ཞེས་པ་ནི་གཞན་དང་རྡུལ་ཕྲ་རབ་ཙམ་ཡང་འདྲེས་པ་མེད་པའི་མཆོག་ཏུ་བརྗོད་པ་ཡིན་ནོ། །འདི་རྣམས་རྒྱས་པར་ནི། སངས་རྒྱས་ཀྱི་སྙིང་རྗེ་ཆེན་པོ་བསྟན་པའི་མདོར་གསུངས་པས་ལྟ་བར་བྱའོ། །ཐོབ་པའི་ཡོན་ཏན་ནི། ལེགས་པར་སྤྱད་པའི་ལས་ཀུན་གྱིས། །བསོད་ནམས་ཡེ་ཤེས་རབ་རྫོགས་པའི། །ཟླ་བ་ཉ་ལ་སྐར་མ་ཡིས། །འཁོར་དུ་རྣམ་པ་ཀུན་གྱིས་བསྐོར། །ཞེས་པ་གསུངས་ཏེ། ལེགས་པར་སྤྱད་པ་ནི་རྣམ་པར་དཀར་བའི་ལས་བསོད་ནམས་དང་ཡེ་ཤེས་ཀྱི་ཚོགས་རབ་ཏུ་བསགས་པའི་ཕྱིར་སྣང་ལ་མཚན་བཟང་པོ་སུམ་ཅུ་རྩ་གཉིས་ཏེ། རྣམས་གྲངས་ནི་སྔར་བསྟན་ཟིན་པ་རྣམས་ཡིན་ལ། འདིར་སློབ་དཔོན་ཉིད་ཀྱི་རྒྱུ་དང་སྦྱར་ཏེ། རིན་པོ་ཆེའི་ཕྲེང་བར་གསུངས་པ་ནི། མཆོད་རྟེན་མཆོད་བྱས་འཕགས་པ་དང་། །རྒན་རབ་རྣམས་ནི་ལེགས་བཀུར་བས། །དཔལ་ལྡན་ཕྱག་ཞབས་འཁོར་ལོ་ཡིས། །མཚན་པའི་འཁོར་ལོས་བསྒྱུར་བར་འགྱུར། །རྒྱལ་པོ་ཆོས་ལ་རྟག་པར་ནི། །ཡང་དག་བླངས་པ་བརྟན་པར་མཛོད། །དེས་ནི་ཤིན་ཏུ་ཞབས་གནས་པས། །བྱང་ཆུབ་སེམས་དཔའ་འགྱུར་བ་ལགས། །སྦྱིན་དང་སྙན་པའི་ཚིག་དང་ནི། །ཕན་དང་དོན་གཅིག་སྤྱོད་པ་ཡིས། །དཔལ་ལྡན་ཕྱག་སོར་དྲ་བ་ཡིས། །འབྲེལ་པའི་ཕྱག་རིང་ཅན་དུ་འགྱུར། །བཟའ་བ་དང་ནི་བཏུང་བའི་མཆོག །རབ་ཏུ་མང་པོ་བྱིན་པ་ཡིས། །དཔལ་ལྡན་ཕྱག་དང་ཞབས་མཉེན་ཅིང་། །སྐུ་ཆེ་བདུན་ཡང་མཐོ་བར་འགྱུར། །འཚེ་མེད་བསད་པ་ཐར་བྱས་པས། །སྐུ་མཛེས་དྲང་ཞིང་ཆེ་བ་དང་། །ཚེམ་རིང་སོར་མོ་རིང་བ་དང་། །རྟིང་པ་ཡངས་པ་དག་ཏུ་འགྱུར། །ཡང་དག་བླངས་པའི་ཆོས་ཀྱི་རྣམས། །སྤེལ་བས་དཔལ་ལྡན་མདོག་བཟང་ཞིང་། །ཞབས་ཀྱི་ལོང་བུ་མིང་དོན་དང་། །བ་སྤུ་གྱེན་དུ་ཕྱོགས་མཚན་འགྱུར། །རིགས་དང་བཟོ་ལ་སོགས་པའི་ལས། གུས་པས་ལེན་དང་གུས་སྦྱིན་པས། །ཨེ་ན་ཡ་ཡི་བྱིན་པ་དང་། །ཡིད་རྣོ་ཤེས་རབ་ཆེན་པོར་འགྱུར། །རང་གི་ནོར་དག་བླངས་གྱུར་ན། །མྱུར་དུ་བཏང་བའི་བརཏལ་ཤུགས་ཀྱིས། །ཕྱག་ལེགས་བདེ་བ་འཇིག་རྟེན་གྱི། །རྣམ་པར་འདྲེན་པ་ཉིད་དུ་འགྱུར། །བཤེས་གཉེན་ཕན་ཚུན་འབྱེད་པ་དག །ཡང་དག་བསྡུམ་པར་བྱས་པ་ཡིས། །དཔལ་ལྡན་སྡོམ་གྱི་སྦ་བ་ནི། །སྦུབས་སུ་ནུབ་པའི་རྣམ་པར་འགྱུར། །ཁང་བཟང་དང་ནི་གདིང་བ་དག །བདེ་ཞིང་བཟང་བ་དག་སྦྱིན་པས། །གསེར་ནི་བཙོ་མ་དྲི་མེད་པ། །ཤིན་ཏུ་འཇམ་པའི་མདོག་འདྲར་འགྱུར། །བླ་ན་མེད་པའི་དབང་བྱིན་ཅིང་། །རིགས་པས་བླ་མའི་རྗེས་བཟུང་བས། །དཔལ་ལྡན་བ་སྤུ་ཉག་རེ་དང་། །ཞལ་ནི་མཛོད་སྤུས་བརྒྱན་པར་འགྱུར། །སྙན་ཞིང་དག་པར་སྨྲ་བ་དང་། །ལེགས་པར་སྨྲས་དང་མཐུན་བྱས་པས། །དཔུང་མགོ་ཤིན་ཏུ་ཟླུམ་བྱས་དང་། །རོ་སྟོད་སེང་གེ་འདྲ་བར་འགྱུར། །ནད་པ་རྣམས་ལ་རིམ་འགྲོ་དང་། །གསོས་པས་ཐལ་གོང་རྒྱས་པ་དང་། །བདག་ཉིད་རྣལ་དུ་གནས་པ་དང་། །རོ་བྲོ་བ་ཡི་མཆོག་ཏུ་འགྱུར། །ཆོས་དང་མཐུན་པའི་བྱ་བ་ལ། །ཐོག་དྲངས་པས་ནི་དབུ་གཙུག་ཏོར། །ལེགས་གནས་ནྱ་གྲོ་ཏ་ལྟ་བུར། ཆུ་ཞེང་གབ་པ་དག་ཏུ་འགྱུར། །ཚིག་ནི་བདེན་པར་འཇམ་པོ་དག །ཡུན་རིང་དུས་སུ་བརྗོད་པ་ཡིས། །མི་ཡི་དབང་པོ་ལྗགས་ཡངས་དང་། །ཚངས་པ་ཡི་ནི་དབྱངས་ལྡན་འགྱུར། །བདེན་པའི་ཚིག་ནི་མཁྱེན་བཀྱེས་ནས། །སེང་གེའི་འགྲམ་འདྲ་ཐུབ་དཀར་འགྱུར། །ལེགས་པར་གུས་དང་བཀུར་སྟི་དང་། །ཇི་ལྟར་རིགས་པ་རྗེས་འཇུག་པས། །ཚེམས་ནི་ཤིན་ཏུ་དཀར་བ་དང་། །མདོག་ལྡན་མཉམ་པའི་ཚེམས་སུ་འགྱུར། །བདེན་དང་ཕྲ་མ་མེད་པ་ཡིས། །ཚིག་ནི་ཡུན་རིང་སྒོམ་པ་ཡིས། །དཔལ་ལྡན་ཚེམས་ནི་བཞི་བཅུ་ཐེམ། མཉམ་པར་ཐག་ཀྱང་བཟང་བར་འགྱུར། །ཆགས་དང་སྡང་དང་རྨོངས་མེད་ཅིང་། །བྱམས་པས་སེམས་ཅན་བལྟས་པ་ཡིས། །སྤྱན་ནི་བཀྲག་ཅན་མཐོན་མཐིང་ལ། །རྫི་མ་བ་ཡི་ལྟ་བུར་འགྱུར། །དེ་ལྟར་མངོན་ན་རྒྱུ་བཅས་པའི། །སུམ་ཅུ་རྩ་གཉིས་དེ་དག་ནི། །སྐྱེས་བུ་ཆེན་པོ་སེང་གེ་ཡི། །མཚན་རྣམས་ལགས་པས་མཁྱེན་པར་མཛོད། །ཞེས་གསུངས་པ་ནི། འདིར་དངོས་ཀྱི་རྒྱུ་སེམས་ཀྱི་ཆ་དག་པའི་ཆ་ལུགས་ལྟར། སྣང་བ་ལ་རྐྱེན་གྱི་རྒྱུ་དེ་རྣམས་ཀྱིས་དག་པ་གོང་ནས་གོང་དུ་འཕགས་པར་གསུངས་ཏེ། དེ་ཡང་བཤད་པ། རང་སངས་རྒྱས་ཀུན་ལས་བྱུང་དང་། །སློབ་དང་མི་སློབ་ལས་བྱུང་དང་། །འཇིག་རྟེན་མ་ལུས་བསོད་ནམས་ཀུན། །འཇིག་རྟེན་བཞིན་དུ་དཔག་མེད་གང་། །དེ་བཅུར་བསྒྲེས་པར་གྱུར་པ་ཡིས། །བ་སྤུའི་བུ་ག་གཅིག་འགྲུབ་སྟེ། །བ་སྤུའི་བུ་ག་ཐམས་ཅད་ཀྱི། །བརྒྱ་འགྱུར་དཔེ་བྱད་བཟང་པོ་གཅིག །དཔེ་བྱད་ཀུན་ཀྱང་བརྒྱར་བསྒྱུར་བས། །མཚན་ནི་སུམ་ཅུའི་གཅིག་གི་རྒྱུའོ། །དེ་ཀུན་སྟོང་བསྒྱུར་མཛོད་སྤུའོ། །དེ་འདྲ་སྟོང་ཕྲག་བརྒྱ་བསྡོམ་པས། །སྐྱོབ་པའི་གཙུག་ཏོར་བསྐྱེད་པར་བྱེད། །ཅེས་གཟུགས་སྐུའི་ཡོན་ཏན་རྒྱ་ཆེར་བསྟན་པ་རྟོགས་པར་བྱའོ། །འདིར་ཟླ་བ་ཉ་བ་ལ་སྐར་མས་བསྐོར་བ་ཞེས་བརྗོད་པ་ནི། །འདི་ལྟ་བུ་སྣང་བའི་ཚུལ་ཏེ། རྒྱུད་བླ་མ་ལས་ཀྱང་། ཇི་ལྟར་སྤྲིན་མེད་སྟོན་ཁའི་ཟླ་བའི་གཟུགས། །སྟོན་ཁའི་ཟླ་བའི་ཆུ་སྔོན་མཚོར་ནི་མཐོང་བ་ལྟར། །དེ་བཞིན་རྒྱལ་སྲས་ཚོགས་ཀྱི་ཁྱབ་བདག་གཟུགས། །རྫོགས་སངས་དཀྱིལ་འཁོར་ནང་དུ་མཐོང་བར་འགྱུར། །ཞེས་འབྱུང་ངོ་རྒྱས་པར་ནི་ཁྱེའུ་རིན་ཆེན་གྱིས་ཞུས་པའི་མདོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་རྒྱ་མཚོའི་མདོ་ལས་གསུངས་སོ། །འཕྲིན་ལས་བཤད་པ་ནི་རྣམ་པ་ལྔ་སྟེ། འཕྲིན་ལས་ཀྱི་གཙོ་བོ་རྒྱལ་བའི་སྲས་དབང་བསྐུར་བར་བརྩོལ་བ་དང་། །འཁོར་བ་ན་འཕྲིན་ལས་མཛད་ཚུལ་དང་། ཞི་བ་རྣམས་བསྐུལ་བ་དང་། མྱ་ངན་ལས་འདས་པའི་དོན་དང་། འབད་པ་མེད་པའི་ཕྲིན་ལས་ཀྱི་དོན་བསྟན་པའོ། །དང་པོ་ནི། སངས་རྒྱས་ཕྱག་གི་ཉི་མ་དེར། །དྲི་མེད་རིན་ཆེན་འབར་འགྱུར་ཏེ། །སྲས་ཀྱི་ཐུ་བོར་དབང་བསྐུར་བས། དབང་བསྐུར་བ་ནི་ཀུན་ཏུ་རྩོལ། །ཞེས་གསུངས་ཏེ། མངོན་པར་རྫོགས་པར་སངས་རྒྱས་པར་གྱུར་པ་དེ་ལ་མཛད་པ་དང་འཕྲིན་ལས་དཔག་ཏུ་མེད་མོད་ཀྱང་། གཙོ་བོ་ནི་འདི་ཡིན་ཏེ། ཆོས་ཀྱི་སྐུ་ལས་མ་གཡོས་པར་ལོངས་སྤྱོད་རྫོགས་པའི་སྐུ་སྟོན་ཏོ། །དེ་ལས་སྐྱེ་བའི་སྤྲུལ་པ་དགའ་ལྡན་གྱི་གནས་སུ་དམ་པ་ཏོག་དཀར་པོ་ལྟ་བུ་སྟོན་ཏོ། །དེས་བྱང་ཆུབ་སེམས་དཔའི་སྤྲུལ་པ་གང་གིས་གླིང་བཞི་པའི་འཇིག་རྟེན་བྱེ་བ་ཕྲག་བརྒྱར་དུས་གཅིག་མཛད་པ་བཅུ་གཉིས་ཀྱི་ཚུལ་གྱིས་དཔག་ཏུ་མེད་པའི་དོན་མཛད་མོད་ཀྱིས་ཀྱང་། གཙོ་བོར་བྱང་ཆུབ་སེམས་དཔའ་བྱམས་པ་སྲས་ཀྱི་ཐུ་བོར་དབང་བསྐུར་བ་ལྟ་བུ་དང་། ཕལ་པོ་ཆེ་ལས། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱི་བོར་ཕྱག་བཞག་སྟེ། དབང་བསྐུར་བར་བསྟན་པ་ལྟ་བུ་དང་། སངས་རྒྱས་ཀྱི་ཕྱག་གི་ཡེ་ཤེས་ཀྱི་ཉི་མར་བསྒྲིབ་པ་ཐམས་ཅད་བྲལ་བའི་རིན་པོ་ཆེ་འབར་བས་རྒྱལ་བའི་སྲས་རྒྱ་མཚོ་དབང་བསྐུར་བ་རྒྱུན་ཆད་མེད་པར་རྩོལ་བར་མཛད་དོ། དེ་ལྟར་ཡང་། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོའི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདའ་བར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ཡིན་ནོ། །གཉིས་པ་འཁོར་བའི་སེམས་ཅན་གྱི་དོན་མཛད་པའི་ཚུལ་ནི། །རྣལ་འབྱོར་ཆེན་པོ་དེར་གནས་ནས། །རྨོངས་པས་དམན་པའི་སེམས་ཅན་རྣམས། །སྡུག་བསྔལ་གྱིས་གཡེངས་འཇིགས་པ་ལ། །ལྷ་ཡི་སྤྱན་གྱིས་གཟིགས་གྱུར་ནས། །དེ་ཡི་སྐུ་ལས་འོད་ཟེར་རྣམས། །འབད་པ་མེད་པར་འབྱུང་བར་འགྱུར། །རྨོངས་པའི་མུན་པ་ཞུགས་པ་དེའི། །སྒོ་རྣམས་འབྱེད་པར་མཛད་པ་ཡིན། །ཞེས་གསུངས་ཏེ། ཞི་གནས་ལྷག་མཐོང་མཐར་སོན་པས་ན་རྣལ་འབྱོར་ཆེན་པོ་སྟེ། དེ་ལ་གནས་པའི་སངས་རྒྱས་དེ་ནི། རྨོངས་པ་ནི་རང་གི་སངས་རྒྱས་ཀྱི་སྙིང་པོ་མི་ཤེས་པ་དམན་པ་ནི་ངན་སོང་རྣམས་ཏེ། སྡུག་བསྔལ་གྱིས་གཡེངས་པ་འཇིགས་སུ་རུང་བ་རྣམས་སྒྲིབ་པ་མེད་པའི་སངས་རྒྱས་ཀྱི་ལྷའི་སྤྱན་གྱིས་གཟིགས་པར་གྱུར་ནས། མཆོག་གི་སྤྲུལ་པ་ཆེན་པོ་དེའི་སྐུ་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་བྱུང་བར་གྱུར་ནས། རྨོངས་པའི་མུན་པར་ཞུགས་པ་རྣམས་ཀྱི་ཐར་པའི་ལམ་གྱི་སྒོ་ཕྱེ་ནས། ཞི་བའི་ལམ་དུ་འགྲོ་བར་མཛད་དོ། འདི་ཡང་རྒྱས་པར་འོད་ཟེར་བྱེ་བ་ཁྲག་ཁྲིག་བརྒྱ་འགྲུབ་པ་བསྟན་པའི་མདོ་བཞིན་ཤེས་པར་བྱའོ། །གསུམ་པ་ཞི་བ་རྣམས་བསྐུལ་བའི་འཕྲིན་ལས་བསྟན་པ་ནི། ལྷག་བཅས་མྱ་ངན་འདས་པ་རྣམས། །ལྷག་མེད་མྱ་ངན་འདས་པར་འདོད། །ཅེས་གསུངས་ཏེ། འདིར་ལྷག་བཅས་ལྷག་མེད་ཉན་ཐོས་ཀྱི་འདོད་པ་དེ་མ་ཡིན་ཏེ། འདི་ལ་ལྷག་བཅས་ནི། ཉན་རང་གི་དགྲ་བཅོམ་པ་དང་། རང་བྱང་ཆུབ་ཐོབ་པ་སྟེ། ཇི་ལྟར་ན་དེ་ལྷག་མ་ཅན་ཡིན་ཞེ་ན། ས་བོན་ཐམས་ཅད་པའི་ཀུན་གཞིའི་རྣམ་པར་ཤེས་པ་མ་སྤངས་པའི་ཕྱིར་ན་ལྷག་མ་དེ་ཉིད་ཡོད་དོ། །འདི་ཁམས་གསུམ་དུ་སྐྱེ་བའི་ས་བོན་ཅན་དུ་ཉོན་མོངས་པ་ཤེས་རབ་ཀྱིས་བཅད་པས་ཟག་པ་མེད་པའི་དབྱིངས་ན་ཞི་བའི་ཏིང་ངེ་འཛིན་གྱིས་ཡིད་ཀྱི་རང་བཞིན་གྱི་ལུས་ཡོད་པས་ལྷག་བཅས་ཀྱང་ཡིན་ལ། མྱ་ངན་ལས་འདས་པ་ཡང་ཡིན་ནོ། །དེ་ཡང་བྱང་ཆུབ་སེམས་འགྲེལ་ལས། སྲིད་པའི་ལམ་ལ་སྐྱོ་རྣམས་ལ། །ངལ་བསོའི་དོན་དུ་ཐེག་པ་ཆེར། །འབྱུང་བའི་ཡེ་ཤེས་གཉིས་པོ་ཡང་། །གསུངས་པ་ཡིན་ཏེ་དོན་དམ་མིན། །ཇི་སྲིད་སངས་རྒྱས་ཀྱིས་མ་བསྐུལ། །དེ་སྲིད་ཡེ་ཤེས་ལུས་དངོས་ཅན། །ཏིང་འཛིན་མྱོས་པས་བརྒྱལ་གྱུར་པ། །ཉན་ཐོས་དེ་དག་གནས་པར་འགྱུར། །བསྐུལ་ན་སྣ་ཚོགས་གཟིགས་ཀྱིས་ནི། །སེམས་ཅན་དོན་ལ་ཆགས་གྱུར་ཅིང་། །བསོད་ནམས་ཡེ་ཤེས་ཚོགས་བསགས་ནས། །སངས་རྒྱས་བྱང་ཆུབ་ཐོབ་པར་འགྱུར། ཞེས་བསྟན་ནས། འོ་ན་སྲིད་པའི་སྐྱེ་བའི་ས་བོན་སྤྱད་པ་དེ་ཡང་སྲིད་པར་ལུས་ཇི་ལྟར་སྐྱེ་ཞེ་ན། རྒྱུ་ས་བོན་ཐམས་ཅད་པའི་བག་ཆགས་ཀྱི་རྟེན་དང་། རྐྱེན་སངས་རྒྱས་ཀྱི་འོད་ཟེར་གཉིས་ཀྱིས་རུང་སྟེ། གཉིས་ཀྱིས་བག་ཆགས་ཡོད་པའི་ཕྱིར། བག་ཆགས་ས་བོན་བརྗོད་པ་ཡིན། ས་བོན་དེ་དངོས་ཚོགས་པས་ནི། །སྲིད་པའི་མྱུ་གུ་བསྐྱེད་པར་བྱེད། ཅེས་གསུངས་སོ། །རྒྱུད་བླ་མ་ལས་ཀྱང་། མི་རྟག་སྡུག་བསྔལ་བདག་མེད་དང་། །ཞི་བའི་སྒྲ་ཡི་ཐབས་མཁྱེན་ནས། །མྱ་ངན་འདས་ལ་རབ་འཇུག་མཛད། །ཞི་བའི་ལམ་ལ་རབ་ཞུགས་པའི། །མྱ་ངན་འདས་ཐོབ་འདུ་ཤེས་ཅན། །དེ་དག་སྔར་འཛིན་ལས་བཟློག་སྟེ། །དམ་ཆོས་པདྨ་དཀར་ལ་སོགས། །ཆོས་ཀྱི་དེ་ཉིད་ཡོངས་བཟུང་སྟེ། །ཐབས་དང་ཤེས་རབ་ཡོངས་བཟུང་ནས། །བྱང་ཆུབ་མཆོག་ཏུ་ལུང་སྟོན་ཏོ། །ཟབ་དང་མཐུ་ནི་སྣ་ཚོགས་དང་། །བྱིས་པའི་དོན་མཐུན་ཉེར་འདྲེན་པས། །འདི་དག་གྲངས་བཞིན་ཟབ་པ་དང་། །རྒྱ་ཆེའི་བདག་ཉིད་ཡིན་ཞེས་བྱ། །ཞེས་གསུངས་པས། འདི་ལྷག་མེད་ཀྱི་མྱ་ངན་ལ་འདས་པ་སངས་རྒྱས་ཏེ། འདི་ལ་འགོད་པས་ནི་འཕྲིན་ལས་སོ། །ཞི་བ་མྱང་འདས་དོན་བཤད་པ་ནི། འདི་ནི་མྱ་ངན་འདས་པ་ཉིད། །དྲི་མ་མེད་པ་སེམས་གྱུར་པ། །སེམས་ཅན་ཀུན་གྱི་དངོས་མེད་པའི། །ངོ་བོ་དེ་ཡང་དེ་སྤྱོད་ཡུལ། །དེ་མཐོང་བྱང་ཆུབ་སེམས་དབང་པོ། ཤིན་ཏུ་དྲི་མེད་ཆོས་ཀྱི་སྐུ། །ཞེས་གསུངས་ཏེ། འདིར་སངས་རྒྱས་བཅོམ་ལྡན་འདས་རྣམས་ཀྱི་མྱ་ངན་ལས་འདས་པ་ཞེས་གསུངས་པ་དེ་ཉིད་འདི་ལྟར་རིག་པར་བྱ་སྟེ། དྲི་མ་མེད་པའི་སེམས་ཞེས་བྱ་བ་ཉོན་མོངས་པའི་སྦུབས་བྱེ་བ་མཐའ་ཡས་པས་དཀྲིས་པ་འདི། སྔར་བསྟན་པ་ལྟར་གནས་ཡོངས་སུ་གྱུར་པའི་ངོ་བོ་སེམས་ཅན་ཐམས་ཅད་ལ་གནས་ཀྱང་། སེམས་ཅན་ཀུན་གྱི་བསམ་པ་དང་། གཞལ་བར་བྱ་བའི་དངོས་པོ་བསམ་གྱིས་མི་ཁྱབ་པ་འདི་ནི། ཆུ་ཟླ་ལྟ་བུའི་ངོ་བོ་སྟེ། །བློ་མཆོག་དེའི་སྤྱོད་ཡིན་པས། །དེ་མཐོང་ནས་མཐར་ཐུག་པའི་ཚེ་ཤིན་ཏུ་དྲི་མ་མེད་པའི་སྐུ་ཐོབ་པ་ཞེས་བྱའོ། །དེ་སྐད་དུ་ཡང་། སེམས་ནི་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་པ་མེད། །ཅེས་གསུངས་ཏེ། འདི་ནི་དྲི་མ་མེད་པ་ལ་སེམས་ཀྱི་མིང་གིས་བསྟན་པ་ཡིན་ནོ། །སེམས་དང་ཡིད་དང་རྣམ་པར་ཤེས་པ་ཞེས་བྱ་བའི་སྒྲས་བརྗོད་པ་ནི་རྣམ་པ་ཐམས་ཅད་དུ་དྲི་མ་མེད་པས་དེ་མེད་པར་གྱུར་ན། སངས་རྒྱས་ཞེས་བྱའོ། །འབད་པ་མེད་པའི་འཕྲིན་ལས་ཀྱི་དོན་བསྟན་པ་ནི། དྲི་མ་མེད་པའི་ཆོས་སྐུ་ལས། །ཡེ་ཤེས་རྒྱ་མཚོར་གནས་གྱུར་ནས། །སྣ་ཚོགས་ནོར་བུ་ཇི་བཞིན་དུ། །དེ་ལས་སེམས་ཅན་དོན་རྣམས་མཛད། །ཞེས་གསུངས་ཏེ། དྲི་མ་མེད་པའི་ཆོས་ཀྱི་སྐུ་ལས་གནས་གྱུར་པ་དེ་ནི་ཅི་ཡང་མེད་པ་གྱུར་པ་མ་ཡིན་གྱི། ཡེ་ཤེས་ཀྱི་རྒྱ་མཚོར་རྟོག་པའི་ཚོགས་རྒྱ་མཚོར་རྣམས་གནས་གྱུར་པ་སྟེ། རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་མཐར་སོན་པའོ། །དེ་ཡང་རྣམ་པ་ཀུན་ཞེས་བྱ་བ་ཡང་། སྦྱིན་པ་ལ་སོགས་པ་སྔར་བསྟན་པའི་ཁམས་རྒྱས་པར་བྱེད་པའི་ཆོས་ཐམས་ཅད་དོ། །དེའི་མཆོག་གིས་གོང་ན་མེད་པའི་མཐར་སོན་པའོ། །སྟོང་པ་ཉིད་ནི་རང་གི་ངོ་བོས་དག་པ་ཉིད་དུ་སོན་པས་དབྱེ་བ་མེད་པའི་ཕྱིར་ཏེ། འདི་ཡང་རྒྱས་པར་ནི་རྒྱུད་བླ་མར་རི་མོ་མཁན་ཕྱོགས་རེ་ཤེས་པ་ཐམས་ཅད་མ་འཚོགས་ན་རི་མོ་ཐམས་ཅད་རྫོགས་པར་མི་འགྱུར་བའི་དཔེས་བརྗོད་ནས། དེ་རྣམས་དྲི་མེད་གང་དག་ཡིན། སྦྱིན་དང་ཚུལ་ཁྲིམས་བཟོད་ལ་སོགས། །རྣམ་པ་ཀུན་གྱི་མཆོག་ལྡན་པ། །སྟོང་པ་ཉིད་ནི་གཟུགས་སུ་བརྗོད། །ཤེས་རབ་ཡེ་ཤེས་རྣམ་གྲོལ་རྣམས། །གསལ་དང་འཕྲོ་དང་དག་ཕྱིར་དང་། །ཐ་དད་མེད་ཕྱིར་འོད་དང་ཟེར། ཉི་མའི་དཀྱིལ་འཁོར་ཉིད་དང་མཚུངས། །དེས་ན་སངས་རྒྱས་མ་ཐོབ་པར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་ལྟ་བར་མི་ནུས་བཞིན། །ཞེས་མཐར་ཐུག་པ་ནའང་། སངས་རྒྱས་ཀྱི་རྒྱུད་ལ་མངའ་བ་རྣམ་པར་མི་རྟོག་པའི་ཤེས་རབ་ནི། ཤེས་བྱའི་དེ་ཁོ་ན་ཉིད་དམ་པའི་མུན་པ་སེལ་བར་ཉེ་བར་གནས་པའི་ཕྱིར། འོད་གསལ་བ་དང་ཆོས་མཚུངས་ལ། དེའི་རྗེས་ལས་ཐོབ་པའི་ཤེས་བྱའི་དངོས་པོ་མ་ལུས་པ་རྣམ་པ་ཐམས་ཅད་ལ་འཇུག་པས་ན། འོད་ཟེར་གྱི་དྲ་བ་འཕྲོ་བ་དང་ཆོས་མཚུངས་སོ། །དེ་གཉིས་ཀའི་རྟེན་སེམས་ཀྱི་རང་བཞིན་རྣམ་པར་གྲོལ་བ་ནི། ཤིན་ཏུ་དྲི་མ་མེད་ཅིང་འོད་གསལ་བ་ཉིད་ཀྱིས་ཉི་མའི་དཀྱིལ་འཁོར་རྣམ་པར་དག་པ་དང་ཆོས་མཚུངས་སོ། །གསུམ་པ་ཡང་ཆོས་དབྱིངས་དང་དབྱེ་བ་མེད་པའི་རང་བཞིན་ཉིད་ཀྱིས་གསུམ་པོ་དེ་རྣམ་པར་དབྱེ་བ་མེད་པ་དང་ཆོས་མཚུངས་པས་ན་གཅིག་མ་རྟོགས་ཀྱང་རྣམ་པར་གྲོལ་བ་མི་རིགས་པས། འོད་ཟེར་སྤངས་ནས་ཉི་མ་མི་མཐོང་བའི་དཔེས་བསྟན་ཏོ། དེ་ལྟར་ཡེ་ཤེས་རྒྱ་མཚོའི་འཕྲིན་ལས་མཛད་པའི་ཚུལ་ཡང་། འབད་རྩོལ་མེད་ཅིང་ལྷུན་གྱིས་གྲུབ་པར་འཇུག་པ་ན། མཆོག་གི་སྤྲུལ་པ་ཆེན་པོ་སྟོན་པར་མཛད་པ་ནི། བཻ་ཌཱུརྻ་ལ་ཤར་བའི་བརྒྱ་བྱིན་གཟུགས་བརྙན་ལྟ་བུ་དང་། །གསུང་གི་ལྷའི་རྔ་བོ་ཆེ་ལྟ་བུ་དང་། སྲིད་པ་ཐམས་ཅད་དུ་མཁྱེན་པ་དང་བརྩེ་བས་ཁྱབ་པ་སྤྲིན་ལྟ་བུ་དང་། ལོངས་སྤྱོད་རྫོགས་པའི་སྐུ་ལས་སྤྲུལ་པའི་སྐུ་སྤྲོ་བ་ཚངས་པའི་དཔེ་དང་། ཡེ་ཤེས་འཕྲོས་ནས་སྣང་བར་མཛད་ཀྱང་དྲི་མས་མ་གོས་པ་ཉི་མའི་དཔེ་དང་། ཐུགས་རྟོག་པ་མི་མངའ་བར་སེམས་ཅན་གྱི་རེ་བ་སྐོང་བའི་འཕྲིན་ལས་འབྱུང་བས་ཡིད་བཞིན་གྱི་ནོར་བུ་ལྟ་བུ་དང་། གསུང་ཉིད་དུ་མི་མཛད་ཀྱང་སོ་སོའི་རྣམ་རིག་དང་མཐུན་པ་བྲག་ཆའི་དཔེ་དང་། སྐུ་ཐམས་ཅད་དུ་ཁྱབ་ཅིང་རྟག་ལ་ཐོགས་པ་དང་བྲལ་བས་ནམ་མཁའ་ལྟ་བུ་དང་། སེམས་ཅན་ཐམས་ཅད་ཀྱི་རྣམ་པར་དཀར་བ་བསྐྱེད་པའི་རྟེན་མཛད་པས་ས་ལྟ་བུ་སྟེ། རྣམ་པ་དགུས་ཡེ་ཤེས་སྣང་བ་རྒྱན་གྱི་མདོ་ལས་རྒྱས་པར་གསུང་པའི་དོན་བསྡུས་ཏེ། བསྟན་ནས་ཀྱང་། གང་ཞིག་བརྒྱ་བྱིན་རྔ་དང་སྤྲིན་བཞིན་དང་། །ཚངས་ཉི་ཡིད་བཞིན་ནོར་རྒྱལ་རིན་ཆེན་དང་། །སྒྲ་བརྙན་ནམ་མཁའ་ས་བཞིན་སྲིད་པའི་བར། །འབད་མེད་གཞན་དོན་བྱེད་དེ་རྣལ་འབྱོར་རིག །རིན་ཆེན་ལྷ་དབང་སྣང་བཞིན་སྟོན་པ་དེ། ལེགས་པར་འདོམས་མཛད་ལྷ་ཡི་རྔ་དང་མཚུངས། །ཁྱབ་བདག་མཁྱེན་དང་བརྩེ་བའི་སྤྲིན་ཚོགས་ནི། །མཐའ་ཡས་འགྲོ་བ་སྲིད་རྩེའི་བར་དུ་ཁྱབ། །ཚངས་བཞིན་ཟག་མེད་གནས་ལ་མ་བསྐྱོད་པར། །སྤྲུལ་པ་རྣམ་པ་དུ་མ་རབ་ཏུ་སྟོན། །ཉི་བཞིན་ཡེ་ཤེས་སྣང་བ་རབ་འཕྲོ་གང་། །རྣམ་དག་དྲི་མེད་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུང་དེ་བྲག་ཆ་བཞིན་དུ་ཡི་གེ་མེད། །སྐུ་ནི་ནམ་མཁའ་བཞིན་དུ་ཁྱབ་དང་གཟུགས་མེད་རྟག་པ་ཉིད། །ས་བཞིན་འགྲོ་བའི་དཀར་པོ་ཀུན་གྱི་སྨན་རྣམས་མ་ལུས་པའི། །རྣམ་པ་ཀུན་གྱི་གཞིར་གྱུར་པ་ནི་སངས་རྒྱས་ས་ཡིན་ནོ། །ཞེས་བྱམས་པས་བསྡུས་ཏེ་གསུངས་སོ། །འདི་ལ་བློ་གྲོས་དམན་པ་གང་དག སློབ་དཔོན་ཟླ་བ་གྲགས་པས་ཡེ་ཤེས་འདི་རྣམས་མི་འདོད་དོ་སྙམ་ན། དེ་ལྟ་མ་ཡིན་ནོ། དབུ་མ་འཇུག་པ་ལས། སེམས་འགག་པ་དེ་སྐུའི་མངོན་གསུམ་མཛད། དེ་གང་ཞེ་ན། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་ཆོས་ཀྱི་སྐུ་ཤིན་ཏུ་དྲི་མ་མེད་པ་གསལ་བ་དང་། རྣམ་པར་མི་རྟོག་པ་དང་། རྟག་པ་དང་། སྣང་བ་བཞིས་བསྟན་ནས་དེའི་རྒྱུ་མཐུན་པ་ཟབ་པའི་ཆོས་སྐུ་ཞེས་བྱ་བའི་གཟུགས་ཡང་། །ཐུབ་དབང་དུས་གཅིག་ཁོ་ནར་དེ་རྒྱུ་མཐུན། །གཟུགས་སྐུ་སྐད་ཅིག་རང་གི་སྐྱེ་གནས་སྐབས། །སྔར་འགག་གསལ་དང་མ་འཆོལ་འབྱུང་ཚུལ་ནི། མ་ལུས་ཀྱིས་བཀྲ་མཐའ་དག་སྟོན་པར་མཛད། ཅེས་བྱ་བ་ནས། ཇི་སྲིད་འཇིག་རྟེན་མ་ལུས་མཆོག་ཏུ་ཞི་བ་མ་ཐོབ་དང་། ཇི་སྲིད་ནམ་མཁའི་ཁམས་རྣམས་ཐོབ་པར་མ་གྱུར་དེ་སྲིད་དུ། །ཤེས་རབ་ཡུམ་དང་སྙིང་རྗེའི་མ་མས་བསྐྱེད་ཅིང་འཛིན་བྱེད་པས། །རྒྱལ་བ་ཁྱོད་ལ་རབ་ཏུ་ཞི་བར་གྱུར་པ་གང་ལ་མངའ། །ཞེས་བྱ་བའི་བར་དུ་རྒྱ་ཆེར་བསྟན་ཏོ། །མདོར་ན་འདི་རྣམས་ཇི་ལྟ་བར། སློབ་དཔོན་ཆེན་པོ་ཨརྻ་དེ་བ་དང་། དཔའ་བོ་དང་། འབུ་ཏ་པ་ལི་དང་། བྷྱ་ཀ་ར་དང་། ཡེ་ཤེས་སྙིང་པོ་ལ་སོགས་པ་ཐམས་ཅད་ཀྱི་བཞེད་པ་མཐུན་པ་རྒྱ་ཆེར་བསྟན་དུ་ཡོད་ཀྱང་། །ཡི་གེ་མངས་ཀྱིས་དོགས་པའི་ཕྱིར་མ་བཀོད་དོ། འདི་ལ་འཕགས་པ་ཐོགས་མེད་ཀྱང་མཐུན་པར་གསུངས་སོ། །གཞན་སེམས་ཙམ་པ་ལ་ཡང་རྣམ་པར་རིག་པ་སངས་རྒྱས་ཀྱི་ཡེ་ཤེས་བདེན་པར་འདོད་པ་ཡོད་པ་ལ། སློབ་དཔོན་འཕགས་པས། ལུས་མེད་ན་ནི་རྣམ་པར་ཤེས། ཡོད་མ་ཡིན་ཞེས་ཡོངས་རྟོགས་ནས། །དེ་ནི་སོ་སོ་རང་རིག་ཉིད། །ཇི་འདྲ་ཞེས་ནི་བརྗོད་པར་གྱིས། །ཞེས་བྱ་བ་ལ་སོགས་པའི་དགག་པ་མཛད་པ་དང་། གནས་སྐབས་ཀྱིས་བརྗོད་པ་མི་འདྲ་བ་དག་ཡོད་ཀྱིས། དོན་གྱིས་གནས་ལུགས་ལ་ཐ་དད་པ་མེད་དོ། །དེ་བཞིན་དུ་ཐེག་པ་ཐམས་ཅད་ཀྱི་ཡང་དག་པའི་ལྟ་བ་དང་། །རྟོགས་ཤིང་ཐོབ་པར་བྱ་བ་གཅིག་ཏུ་བཤད་ཅིང་ཤེས་པར་བྱ་སྟེ། །ཏིང་ངེ་འཛིན་རྒྱལ་པོའི་མདོ་ལས་ཀྱང་། སངས་རྒྱས་ཡེ་ཤེས་བསམ་མི་ཁྱབ། །འཛིན་པ་ལས་ནི་གང་གནས་པ། །དེ་ལ་ཡེ་ཤེས་ཡོད་མི་འགྱུར། །གང་དག་སྒྲ་ཡིས་བསྟན་པ་ཡིས། །ཆོས་རྣམས་མང་པོ་བསམ་མི་ཁྱབ། །སྒྲ་དེ་ལ་ཡང་གང་ཆགས་པ། །དགོངས་པས་བཤད་པ་མི་ཤེས་སོ། །ཅི་ལས་དགོངས་ཏེ་བཤད་པ་ཡི། །དགོངས་པ་དག་ནི་མི་ཤེས་པ། །ཆོས་ཉིད་ལ་ནི་མ་བསླབ་པར། །ཆོས་མ་ཡིན་པ་ཆོས་སུ་འཆད། །འཇིག་རྟེན་ཁམས་ནི་སྟོང་དག་ཏུ། །ངས་ནི་མེད་དོ་གང་བཤད་པ། །ཚིག་འབྲུ་ཐ་དད་དོན་གཅིག་སྟེ། །ཐམས་ཅད་བརྗོད་པར་ནུས་མ་ཡིན། །ཚིག་གཅིག་རྣམ་པར་བསྒོམ་ན་ནི། དེ་དག་ཐམས་ཅད་བསྒོམ་པར་འགྱུར། །སངས་རྒྱས་ཇི་སྙེད་ཐམས་ཅད་གྱིས། །ཆོས་རྣམས་མང་པོ་གང་བཤད་པ། །ཆོས་རྣམས་ཐམས་ཅད་སྟོང་པ་ཉིད། །མི་གང་དོན་ལ་མཁས་པ་དང་། །ཚིག་འདི་བསླབ་པར་གྱུར་པ་ལ། སངས་རྒྱས་ཆོས་རྣམས་དཀོན་པ་ཡིན། །ཆོས་ཀུན་སངས་རྒྱས་ཆོས་ཡིན་ཏེ། །ཆོས་ཉིད་ལ་ཡང་གང་བསླབ་པ། །ཆོས་ཉིད་རབ་ཏུ་ཤེས་པ་ནི། །ཆོས་ཉིད་དང་ཡང་འགལ་མི་བྱེད། །ཅེས་གསུངས་སོ། །མདོར་བསྡུས་ན་རང་གི་ལུས་སེམས་མ་རིག་པའི་དྲ་བས་གཡོགས་པ་འདི་ལ་བརྟགས་ལ། རྒྱལ་བའི་དགོངས་པ་བདེན་པ་གཉིས་ཀྱི་གནས་ལུགས་ཤེས་པར་བྱ། ཚོགས་གཉིས་ཟུང་འབྲེལ་དུ་བསླབ་པར་བྱ། སྐུ་གཉིས་དབྱེར་མེད་ཀྱི་འབྲས་བུ་ཐོབ་པར་བྱའོ། །ཆོས་ཀྱི་དབྱིངས་སུ་བསྟོད་པ་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ། །ཞེས་འགྱུར་བྱེད་པས་བསྣན་པ་སྟེ། ལྷག་མ་མེད་པར་བསྟན་པའོ། །ཆོས་ཀྱི་དབྱིངས་སངས་རྒྱས་ཀྱི་སྙིང་པོ་རྨད་དུ་བྱུང་བ་ལ་བསྟོད་པ་བདག་ཉིད་ཆེན་པོ་འཕགས་པ་ཀླུ་གྲུབ་ཀྱིས་མཛད་པའི་རྣམ་པ་རྒྱ་ཆེར་བཤད་པ། སྙིགས་མའི་དུས་སུ་བྱང་ཕྱོགས་གངས་ཅན་གྱི་རྒྱུད་དུ་བྱུང་བ་རང་བྱུང་རྡོ་རྗེས་མོས་པའི་མཐུ་ལ་བརྟེན་ནས་ཅི་ནུས་ཀྱིས་ཕྱེས་པའོ། །རྒྱལ་བའི་བསྟན་པ་ཟབ་ཅིང་རྒྱ་ཆེ་བ། །འཇམ་པའི་དབྱངས་དང་མ་ཕམ་རྒྱལ་བའི་སྲས། །ནམ་མཁའི་ཁྱོན་དང་མཉམ་པར་འཛིན་པར་མཛད། །འཛམ་བུའི་གླིང་འདིར་མཁས་གྲུབ་དཔག་མེད་ཀྱང་། །ཀུན་གྱི་མཆོག་ཏུ་རྒྱལ་བས་ལུང་བསྟན་པ། །འཕགས་པ་ཀླུ་གྲུབ་ཐོགས་མེད་རྣམ་གཉིས་ཀྱི། །རྗེས་འབྲང་འཛམ་གླིང་རྒྱན་མཆོག་བསྟན་པའི་གཉེན། །མདོ་དང་ཆོས་མངོན་འདུལ་བ་འགྲོ་བའི་དཔལ། །ལུང་རིགས་འོད་ཀྱིས་རྟོག་གེའི་མུན་པ་སེལ། །ཐུགས་རྗེ་ཆ་ཤས་གངས་ཅན་རྒྱུད་དུ་ཤར། །སྐྱེ་བོ་བློ་ལྡན་སྒྲུབ་ཅིང་སེམས་དཔར་བྱེད། །ཐོས་པའི་བྱིས་པ་རྣམས་ཀྱང་ཅ་ཅོ་འབྱིན། །རྒྱལ་བའི་སྙིང་པོ་དྲི་མེད་སྙིང་པོ་ལས། །བསྟོད་འདི་ས་བཅུའི་དབང་ཕྱུག་ཀུན་གྱིས་མཁྱེན། །ལྔ་རིགས་ལྷ་དང་ཉན་རང་རྣམས་ཀྱིས་ཀྱང་། །དད་པའང་དཀའ་ན་ཤེས་པ་སྨོས་ཅི་དགོས། །རང་བྱུང་མིང་ཅན་བླུན་པོ་བདག་འདྲ་ཡི། །སྤྱོད་ཡུལ་མིན་ཀྱང་མོས་པ་ཆེར་སྐྱེས་ནས། །རྒྱ་ཆེའི་མདོ་དང་བསྟན་བཅོས་ཅི་བཞིན་བཤད། །དགེ་བས་འགྲོ་ཀུན་ཐུབ་དབང་ལྟར་གྱུར་ཅིག། །།

ཐེག་པ་ཆེན་པོ་རྒྱུད་བླ་མའི་བསྟན་བཅོས་ཀྱིས་འགྲེལ་པ་གསལ་བ་ཉི་མའི་སྙིང་པོ།

འགྲེལ་པའི་མཆོད་བརྗོད་དང་གླེང་གཞི།

༄༅། །ཐེག་པ་ཆེན་པོ་རྒྱུད་བླ་མའི་བསྟན་བཅོས་ཀྱིས་འགྲེལ་པ་གསལ་བ་ཉི་མའི་སྙིང་པོ་ཞེས་བྱ་བ་བཞུགས་སོ། །

༄༅། །བླ་མ་དང་དཀོན་མཆོག་གསུམ་ལ་ཕྱག་འཚལ་ལོ། །མཁྱེན་པའི་ཉི་མ་མ་རིག་མུན་པའི་གཡུལ་ལས་རྒྱལ། །སྙིང་རྗེའི་ཟླ་བ་ཉོན་མོངས་ཚ་བའི་གདུང་བ་འཕྲོག །ཡོན་ཏན་གཟའ་སྐར་ཆོས་དབྱིངས་ནམ་མཁའི་ཕ་མཐའ་འདྲེན། །སྟོན་པ་མཚུངས་མེད་རྫོགས་སངས་རྒྱས་ལ་གུས་ཕྱག་འཚལ། །དག་པའི་ས་ལམ་རིམ་པ་བསྒྲོད་ཟིན་ཀྱང་། །ད་དུང་ས་བཅུ་མགོན་པོའི་ཚུལ་བཟུང་ནས། །སངས་རྒྱས་ཤཱཀྱ་ཐུབ་པའི་བསྟན་པ་འཛིན། །དགའ་ལྡན་གནས་བཞུགས་མི་ཕམ་མགོན་ལ་འདུད། སྤྲོས་བྲལ་དོན་དམ་ཟབ་མོའི་གནས་ལུགས་རྟོགས། །རབ་དགའི་སར་གནས་རྒྱལ་བའི་སྲས་ཀྱི་གཙོ། །ཕྱི་ནང་རྟོག་གེའི་ཚོགས་རྣམས་ཟིལ་གྱི་མནན། །འཕགས་མཆོག་ཀླུ་སྒྲུབ་སྙིང་པོ་ལ་ཕྱག་འཚལ། །རྒྱལ་བས་ལུང་བསྟན་དྲང་ངེས་རྣམ་པར་འབྱེད། །ས་གསུམ་འོད་བྱེད་ལ་གནས་མཁས་པའི་མཆོག །རྒྱལ་བ་བྱམས་པའི་ཐུགས་སྲས་འགྲན་ཟླ་བྲལ། །འཕགས་པ་ཐོགས་མེད་དེ་ལ་ཕྱག་འཚལ་ལོ། །ཀླུ་གྲུབ་ཐོགས་མེད་གཉིས་ཀྱི་དགོངས་པའི་གནད། །མི་འགལ་གཅིག་ཏུ་དྲིལ་ནས་རྒྱལ་བ་དང་། རྒྱལ་ཚབ་བྱམས་པའི་དགོངས་པ་འགྲེལ་མཛད་པ། །ཆོས་རྗེ་རང་བྱུང་རྡོ་རྗེ་ལ་ཕྱག་འཚལ། །གངས་རིའི་ཁྲོད་འདིར་ངེས་དོན་བསྟན་པ་ནི། །སྣུམ་ཟད་མར་མེ་བཞིན་དུ་གྱུར་པའི་ཚེ། །ལུང་རིག་མན་ངག་མར་གྱི་ཉིང་ཁུ་ཡི། །གསོལ་མཛད་ཆོས་གྲགས་རྒྱ་མཚོའི་ཞབས་ལ་འདུད། །སྐྱེས་ཆེན་དེ་ཡི་བཀའ་དྲིན་ལ་བརྟེན་ནས། །རྒྱལ་བའི་གསུང་རབ་ཟབ་མོའི་གནད་རྣམས་ལ། །ཐོས་བསམ་བསྒོམ་པའི་བློ་མིག་ལེགས་བྱེ་ནས། །གསལ་བར་མཐོང་ཕྱིར་བསྟན་བཅོས་འདི་བརྩམ་མོ། །ཚུ་རོལ་མཐོང་བའི་སྐྱེ་བོ་བློ་ཆུང་ཕལ་ཆེར་གྲུབ་མཐའ་ཕལ་པ་ལ་ཆགས་ནས། །ཐེག་མཆོག་ལམ་བཟང་གསལ་བར་སྟོན་པའི་འཕགས་པའི་གསུང་རྒྱུན་ཟབ་མོ་མི་ཉན་ཅིང་། །ཅུང་ཟད་ཉན་ཀྱང་དགོངས་དོན་ཟབ་དོན་ཟབ་མོ་དཔག་པར་མ་ནུས་འདི་ནི་དྲང་དོན་ཡིན་ཞེས་སྤང་། །དེ་དག་ཕྱོགས་ལྟུང་དབང་གི་སྙིང་པོ་དོན་གྱི་ལམ་བཟང་མཆོག་ལ་བཀྲི་བར་མི་ནུས་མོད། །རང་གི་ཡིད་ལ་གསལ་བར་དྲན་ཕྱིར་གཞུང་འགྲེལ་བརྩམ་པར་བྱེད་ལ་སྤྲོ་བ་བསྐྱེད། །དེ་ཡང་འདིར་གང་འཆད་པར་བྱ་བའི་ཆོས་ནི། རྗེ་བཙུན་བྱམས་པ་མགོན་པོས་མཛད་པའི་བྱམས་ཆོས་སྡེ་ལྔ་ལས། ངེས་དོན་མཐར་ཐུག་པ་སྙིང་པོའི་དོན་སྟོན་པ་ཐེག་པ་ཆེན་པོ་རྒྱུད་བླ་མའི་བསྟན་བཅོས་ཡིན་ནོ། །དེ་ཡང་རྒྱ་གར་ཡུལ་དབུས་སུ། ཆོས་མངོན་པ་ལ་དགྲ་ལན་གསུམ་བྱུང་ནས་བསྟན་པ་ནུབ་ཏུ་ཉེ་བའི་ཚེ། དགེ་སློང་མ་གསལ་བའི་ཚུལ་ཁྲིམས་ཀྱིས་རྒྱལ་རིགས་དང་བསྡོང་བའི་སྲས་འཕགས་པ་ཐོགས་མེད་དང་། བྲམ་ཟེའི་རིགས་དང་བསྡོང་བའི་སྲས་སློབ་དཔོན་དབྱིག་གཉེན། དཔོན་སློབ་དེ་གཉིས་ཀྱིས་ཐེག་པ་གོང་འོག་གི་མངོན་པའི་ཆོས་རྣམས་དར་རྒྱས་སུ་མཛད་པ་ཡིན་ནོ། །དེ་སློབ་དཔོན་ཐོགས་མེད་ཀྱིས། རྒྱ་གར་ལྷོ་ཕྱོགས་ཀྱི་རྒྱུད་རི་བོ་བྱ་རྐང་གིས་བྲག་ཕུག་ཏུ་ལོ་བཅུ་གཉིས་བསྒྲུབ་པ་མཛད་པས། རྗེ་བཙུན་བྱམས་པ་དང་དངོས་སུ་མཇལ་ནས། བྱམས་པའི་རྫུ་འཕྲུལ་ལ་བརྟེན་ནས་དགའ་ལྡན་ལྷའི་ཡུལ་དུ་བྱོན། མི་ལོ་ལྔ་བཅུར་བྱམས་པ་ལས་ཆོས་གསན། བྱམས་ཆོས་སྡེ་ལྔ་ཐུགས་ལ་བཟུང་ནས་སླར་འཛམ་བུའི་གླིང་དུ་བྱོན། སློབ་དཔོན་དབྱིག་གཉེན་ལ་སོགས་སློབ་མ་རྣམས་ལ་རྒྱ་ཆེར་བཤད། ས་སྡེ་པའི་དངོས་གཞི། རྣམ་རིག་གཏན་ལ་དབབ་པ་བསྡུ་བ། གཞི་བསྡུ་བ། རྣམ་པར་བཤད་པའི་སྒོ་བསྡུ་བ། རྣམ་གྲངས་བསྡུ་བ་སྟེ་ས་སྡེ་ལྔའོ། །སྡོམས་ཐེག་བསྡུས་དང་བསླབ་བསྡུས་གཉིས་རྣམ་པ་གཉིས་ལ་སོགས་པ་བསྟན་བཅོས་མང་པོ་བརྩམས། ཐེག་པ་ཆེན་པོའི་བསྟན་པ་ནམ་ལངས་བ་ལས་ཉི་མ་ཤར་བ་ལྟ་བུ་མཛད། སློབ་དཔོན་དབྱིག་གཉེན་ཀྱིས་ཐེག་ཆེན་སྟོན་པའི་བསྟན་ཆོས་པྲ་ཀ་སུམ་ཅུ་པ་སོགས་རང་རྒྱུད་དུ་བརྩམ་དང་ལྔ། སྤྱོད་པ་རྒྱ་ཆེན་སོགས་གཞན་རྒྱུད་དུ་བརྩམ་པ་གསུམ་མོ། །མཆན། ར་ཎ་སྡེ་བརྒྱད་མཛད། དེའི་སློབ་མ་བཀའ་ཆེན་བཞི་ལ་མཁས་པ་རང་དང་མཉམ་པ་བཞི་བྱུང་བ་ནི། འདུལ་བ་རང་དང་མཉམ་པ་ཡོན་ཏན་འོད། མངོན་པ་རང་དང་མཉམ་པ་ཁ་ཆེ་བློ་བརྟེན། ཕར་ཕྱིན་རང་དང་མཉམ་པ་འཕགས་པ་གྲོལ་སྡེ། ཚད་མ་རང་དང་མཉམ་པ་ཕྱོགས་ཀྱི་གླང་པོ་རྣམས་ཀྱིས། བཀའ་ཆེན་བཞིའི་དགོངས་འགྲེལ་བསྟན་བཅོས་མང་པོ་བརྩམ་ཞིང་། སློབ་མ་རྣམས་ལ་རྒྱ་ཆེར་བཤད་པས། དིང་སང་གི་བར་དུ་དར་ཞིང་རྒྱས་པ་ཡིན་ནོ། །མངོན་རྟོགས་རྒྱན་ལ་སོགས་པ་བྱམས་ཆོས་གཞན་རྣམས་ལ་སློབ་དཔོན་དབྱིག་གཉེན་ཀྱིས་འགྲེལ་པ་མཛད། རྒྱུད་བླ་མ་འདི་ཐེག་པ་ཐུན་མོང་གི་སྤྱོད་ཡུལ་དུ་མ་གྱུར་ཞིང་། ཤིན་ཏུ་ཟབ་པར་དགོངས་ནས། ཐོགས་མེད་རང་ཉིད་ཀྱིས་འགྲེལ་པ་མཛད། འགྲེལ་པ་དེ་ཉན་ཐོས་སྡེ་པ་ལ་སོགས་གྲུབ་མཐའ་སྨྲ་བ་ཕལ་ཆེར་གྱིས་བློར་མི་ཤོང་བར་དགོངས་ནས། རེ་ཤིག་མཆོད་རྟེན་གཅིག་གི་ནང་དུ་གཏེར་ལ་སྦས་སོ། །དུས་ཕྱི་མངའ་བདག་མཻ་ཊི་པས། མཆོད་རྟེན་དེ་ལ་བསྐོར་བ་མཛད་པས། གས་པའི་སེར་ག་གཅིག་ནས་འོད་ཟེར་བྱུང་བ་གཟིགས། དེར་ཅི་ཡོད་དགོངས་ནས་བལྟས་པས། རྒྱུད་བླ་མ་ཐོགས་འགྲེལ་དང་བཅས་པའི་དཔེ་ཆ་ཐོན། བསྟན་བཅོས་དེ་རི་ཁྲོད་དབང་ཕྱུག་གིས་བཞེད་པ། སྙིང་པོ་དོན་གྱིས་རབ་རྣམས་དང་། དགོངས་པ་མཐུན་པར་གཟིགས་ནས་ཤིན་ཏུ་དད་པར་གྱུར། དེའི་ལུང་གསན་པར་བཞེད་ནས། རྒྱལ་ཚབ་མི་ཕམ་པ་ལ་གསོལ་བ་གདབས་པས། སྤྲིན་གྱིས་མཐོང་ནས་རྗེ་བཙུན་བྱམས་པ་ཤེལ་ཀྱིས་མཆོད་རྟེན་དབུ་རྒྱན་དུ་བྱས་པ་གཅིག་བྱོན་ནས། རྒྱུད་བླ་མའི་ལུང་གནང་། དེ་ནས་རྗེ་མཻ་ཊི་པས་སློབ་མ་རྣམས་ལ་རྒྱུད་བླ་མ་ཐོགས་འབྲེལ་དང་བཅས་པ་རྒྱ་ཆེར་བཤད། མཻ་ཊི་པའི་སློབ་མ་པཎྜྻི་ཏ་དགའ་བའི་གྲགས་པས་ཐོགས་འགྲེལ་ཀྱི་དཔེ་ཁྱེར་ནས། རྒྱ་གར་ཁ་ཆེའི་ཡུལ། གྲོང་ཁྱེར་དཔེ་མེད་དུ་ཕྱིན་ནས་མཁས་པ་ཆེན་པོ་སད་ཛཱ་ན་ལ་བཤད། དེས་བོད་ཀྱིས་ལོ་རྩྭ་བ་རྔོག་བློ་ལྡན་ཤེས་རབ་དང་། བཙན་ཁ་འོ་ཆེ་གཉིས་ལ་བཤད། དེ་གཉིས་ཀྱིས་བོད་སྐད་དུ་བསྒྱུར་ནས་དར་བར་མཛད་པ་ལགས་སོ། །དེ་ནས་རིམ་པ་བཞིན་བརྒྱུད་དེ། གསང་ཕུའི་ཆོས་རྗེ་འཇམ་དབྱངས་ཤཱཀྱ་གཞོན་ནུ་ལ། ཆོས་རྗེ་རིན་པོ་ཆེ་རང་བྱུང་རྡོ་རྗེས་གསན་ནས་རྒྱུད་བླ་མ་ཐོགས་འགྲེལ་དང་བཅས་པ་ལ་བསྡུས་དོན་གྱི་འགྲེལ་པ་མཛད། ཀརྨ་པ་དཀོན་མཆོག་གཞོན་ནུ་ལ་སོགས་སློབ་མ་རྣམས་ལ་རྒྱ་ཆེར་བཤད་ནས། ཤིན་ཏུ་དར་བར་མཛད། ཀུན་མཁྱེན་ཇོ་ནང་བ་ལ་ཡང་གཞན་སྟོང་གི་དགོངས་པ་བཤད་པས། དང་པོ་ངེས་ཤེས་མ་སྐྱེས་ཀྱང་། ཕྱིས་སྦྱོར་བ་ཡན་ལག་དྲུག་པ་ལ་ཐམས་ཅད་མཛད་པས་ཉམས་རྟོགས་ཐུན་མོང་མ་ཡིན་པ་འཁྲུངས། འཁོར་ལོ་ཐ་མའི་མདོ་རྣམས་དང་། རྒྱུད་བླ་མ་ཐོགས་འགྲེལ་དང་བཅས་པ་སོགས་ངེས་དོན་གྱིས་བསྟན་བཅོས་རྣམས་ལ་གཟིགས་རྟོགས་མཛད་པས། ཆོས་རྗེ་རང་བྱུང་བའི་བཞེད་པ་དང་མཐུན་པར་ངེས་ཤེས་སྐྱེས་ནས། གཞན་སྟོང་གི་གྲུབ་མཐའ་བཟུང་བ་ཡིན་ནོ། །ཆོས་རྗེ་རང་བྱུང་བ་ནས། དྲུང་འཛམ་གླིང་བ་ལ་སོགས་པ་གོང་མ་རྣམས་ལ་རིམ་པ་བཞིན་དུ་བརྒྱུད་ནས། ཆོས་རྗེ་རིན་པོ་ཆེ་ཆོས་གྲགས་རྒྱ་མཚོ་ལ་བདག་གིས་ཞུས་པ་ཡིན་ནོ།། ༈ །།

ད་ནི་གཞུང་དོན་རང་བྱུང་རྡོ་རྗེའི་བསྡུས་དོན་སོར་བཞག་ནས་བཤད་པར་བྱ་སྟེ། ཐེག་པ་ཆེན་པོ་རྒྱུད་བླ་མ་འདི་ལ་གཉིས། ལོ་རྩྭ་བས་བཀོད་པའི་མཚན་ཕྱག་དང་། བསྟན་བཅོས་དངོས་སོ། །

དང་པོ་ནི། རྒྱ་གར་སྐད་དུ། མ་ཧཱ་ཡ་ན་ཨུད་ཏ་ར་ཏན་ཏྲ་ཤ་ཏྲ། བོད་སྐད་དུ། ཐེག་པ་ཆེན་པོ་རྒྱུད་བླ་མའི་བསྟན་བཅོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ཡང་རྒྱ་གར་ན་སྐད་རིགས་ཆེན་པོ་བཞི་ཡོད་པ་ལས། ལེགས་པར་སྦྱར་བ་སཾ་ཊི་ཏའི་སྐད་དུ། བསྟན་བཅོས་འདི་ཡི་མིང་ལ། མཧཱ་ཡ་ན་ཨུད་ཏ་ར། ཞེས་སོགས་སྟེ། དེ་ལ་མཧཱ་ནི་ཆེན་པོ། ཡ་ན་ནི་ཐེག་པ། ཨུད་ཏ་ར་ནི་བླ་མ། ཏན་ཏྲ་ནི་རྒྱུད། ཤ་ཏྲ་ནི་བསྟན་བཅོས་སོ། །བསྟན་བཅོས་དངོས་ལ་གསུམ། ལུས་རྣམ་བཞག་དང་། རྡོ་རྗེའི་གནས་བདུན་རྒྱས་བཤད་དང་། ཡོངས་སུ་རྫོགས་པའི་བྱ་བའོ། །དང་པོ་ལ་གསུམ། ལུས་དངོས་བསྟན་པ་དང་། རང་གིས་མཚན་ཉིད་བསྟན་པ་དང་། གོ་རིམ་བརྗོད་པའོ། །དང་པོ་ལུས་དངོས་བསྟན་པ་ནི། སངས་རྒྱས་ཆོས་ཚོགས་ཁམས་དང་བྱང་ཆུབ་དང་། །ཡོན་ཏན་སངས་རྒྱས་འཕྲིན་ལས་ཐ་མ་སྟེ། བསྟན་བཅོས་ཀུན་ཀྱི་ལུས་ནི་མདོར་བསྡུས་ན། རྡོ་རྗེ་ཡི་ནི་གནས་བདུན་འདི་དག་གོ །ཞེས་བྱ་བ་གསུང་སྟེ། སངས་རྒྱས་ཀྱི་དོན་དང་། ཆོས་ཀྱི་དོན་དང་། ཚོགས་དགེ་འདུན་ཀྱི་དོན་དང་། ཁམས་རིགས་ཀྱི་དོན་དང་། བྱང་ཆུབ་སྐུ་གསུམ་ཀྱི་དོན་དང་། བྱང་ཆུབ་ཐོབ་པའི་ཡོན་ཏན་ཀྱི་དོན་དང་། རྒྱལ་བའི་འཕྲིན་ལས་ཀྱི་དོན་སྟེ། རྡོ་རྗེའི་གནས་བདུན་པོ་འདི་ནི་བསྟན་བཅོས་འདི་ཡི་ལུས་མདོར་བསྡུས་སོ། །དེ་ཡང་རྟོགས་པར་བྱ་བའི་དོན་བདུན་ནི་རྡོ་རྗེ་སྟེ་དེ་དང་འདྲ་བའི་ཕྱིར་ཏེ། ཐོས་པ་དང་བསམ་པ་ལས་བྱུང་བའི་ཤེས་པས་ཕིགས་པར་དཀའ་བའི་ཕྱིར་ན། བརྗོད་དུ་མེད་པའི་རང་བཞིན་སོ་སོ་རང་གི་རིག་པར་བྱ་བའི་དོན་ནོ། །དོན་དེ་བརྗོད་པའི་མིང་ཚིག་ཡི་གེ་གང་ཡིན་པ་དེ་དག་ནི་གནས་ཞེས་བརྗོད་དོ། །དེ་ཡི་རྟེན་དུ་གྱུར་པའི་ཕྱིར་རོ། །གཉིས་པ་རང་གི་མཚན་ཉིད་བསྟན་པ་ནི། འདི་དག་རང་མཚན་ཉིད་ཀྱི་རྗེས་འབྲེལ་བ། གོ་རིམ་ཅི་བཞིན་གཟུང་ཀྱི་རྒྱལ་པོའི་མདོར། གླིང་གཞི་ལས་ནི་གནས་གསུམ་རིག་བྱ་སྟེ། བཞི་ནི་བློ་ལྡན་རྒྱལ་ཆོས་དབྱེ་བ་ལས། ཞེས་བྱ་བ་གསུང་སྟེ། དེ་ཡང་གཟུང་ཀྱི་དབང་ཕྱུག་རྒྱལ་པོས་ཞུས་པའི་མདོ་ཡི་གླིང་གཞིའི་ལེའུ་ལས། སངས་རྒྱས་དང་ཆོས་དང་དགེ་འདུན་ཏེ། རྡོ་རྗེའི་གནས་གསུམ་བསྟན་པ་ཡིན་ནོ། །དེའི་འོག་ཏུ་ཁམས་བདེ་གཤེགས་སྙིང་པོ་དང་། དེ་སྒྲིབ་བྲལ་དུ་གྱུར་པའི་བྱང་ཆུབ་དང་། བྱང་ཆུབ་ཀྱི་ཡོན་ཏན་དང་། ཡོན་ཏན་དེ་དག་དང་ལྡན་པའི་སངས་རྒྱས་ཀྱི་འཕྲིན་ལས་དང་། རྡོ་རྗེའི་གནས་ལྷག་མ་བཞི་ནི། བློ་ལྡན་བྱང་ཆུབ་སེམས་པའི་ཆོས་དང་། རྒྱལ་བ་སངས་རྒྱས་བཅོམ་ལྡན་འདས་ཀྱིས་ཆོས་ཀྱི་ཁྱད་པར་བསྟན་པ་ལས་ཤེས་པར་བྱའོ། །མདོ་དེ་ལས་ཅི་སྐད་དུ། བཅོམ་ལྡན་འདས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་པ་ཞེས་བྱ་ནི་སངས་རྒྱས་དཀོན་མཆོག་གི་དོན་ཏོ། །ཆོས་ཀྱི་འཁོར་ལོ་ལེགས་པར་བསྐོར་བ་ཞེས་པ་ནི་ཆོས་དཀོན་མཆོག་གི་དོན་བསྟན་ཏོ། །སློབ་མའི་ཚོགས་ཞི་ཞིང་དུལ་བ་མཐའ་ཡས་པ་མངའ་བ་ཞེས་གསུངས་པ་ནི་དགེ་འདུན་དཀོན་མཆོག་གི་དོན་བསྟན་ཏོ། །དེའི་རྗེས་ཐོག་ཏུ་དག་པའི་ཡོན་ཏན་ཀྱི་ཡོངས་སུ་སྦྱོང་བ་རྣམ་པ་དྲུག་ཅུ་བསྟན་པས་སངས་རྒྱས་ཀྱི་ཁམས་གསལ་བར་མཛད་དོ། །དེའི་རྗེས་ཐོག་ཏུ་བྱང་ཆུབ་སེམས་པའི་སྙིང་རྗེ་ཆེན་པོ་རྣམ་པ་བཅུ་དྲུག་བསྟན་པས། སངས་རྒྱས་ཀྱི་བྱང་ཆུབ་གསལ་བར་མཛད་དོ། །དེ་བསྟན་པའི་རྗེས་ལ་དེ་བཞིན་གཤེགས་པའི་འཕྲིན་ལས་བླ་ན་མེད་པར་བསྟན་པས། སངས་རྒྱས་ཀྱི་འཕྲིན་ལས་རྣམ་པ་སུམ་ཅུ་རྩ་གཉིས་གསལ་བར་མཛད་དོ། །དེ་ནི་མདོ་སྡེ་གཅིག་ལ་ཅི་ལྟར་འབྱུང་བའི་ཚུལ་ཡིན་ལ། གཞན་མདོ་སྡེ་དུ་མ་ལས་འབྱུང་བ་ནི། དཀོན་མཆོག་བརྩེགས་པའི་མདོ། ལྷག་པའི་བསམ་པ་བརྟེན་པའི་ལེའུ་ལས། རྡོ་རྗེའི་གནས་དང་པོ་གསུམ་བསྟན་ཏེ། མདོ་དེ་ལས་ཅི་སྐད་དུ། ཀུན་དགའ་བོ་དེ་བཞིན་གཤེགས་པ་ནི་བསྟན་དུ་མེད་པ་སྟེ། མིག་གི་ལྟ་བར་མི་ནུས་སོ། །ཀུན་དགའ་བོ་ཆོས་ནི་བརྗོད་དུ་མེད་པ་སྟེ། དེ་ནི་རྣ་བས་ཉན་པར་མི་ནུས་སོ། །ཀུན་དགའ་བོ་དགེ་བདུན་འདུས་མ་བྱས་པ་སྟེ། དེ་ནི་ལུས་དང་སེམས་ཀྱི་བསྙེན་བཀུར་བྱ་བར་མི་ནུས་སོ། །ཞེས་གསུངས་སོ། །རྡོ་རྗེའི་གནས་བཞི་པ་ཁམས་བདེ་གཤེགས་སྙིང་པོ་ནི། འགྲིབ་པ་མེད་པ་དང་འཕེལ་བ་མེད་པ་ཉིད་བསྟན་པའི་མདོ་ཡི་རྗེས་སུ་འབྲངས་ནས་རྟོགས་པར་བྱ་སྟེ། ཅི་སྐད་དུ་མདོ་དེ་ལས། ཤ་རིའི་བུ་དོན་དམ་པ་ཞེས་བྱ་བ་ནི། སེམས་ཅན་གྱི་ཁམས་ཀྱི་ཚིག་བླ་དྭགས་སོ། །སེམས་ཅན་གྱི་ཁམས་ཞེས་བྱ་བ་འདི་ནི། དེ་བཞིན་གཤེགས་པའི་སྙིང་པོ་ཚིག་བླ་དྭགས་སོ། །དེ་བཞིན་གཤེགས་པའི་སྙིང་པོ་ཞེས་བྱ་བ་འདི་ནི། ཆོས་ཀྱིས་སྐུའི་ཚིག་བླ་དྭགས་སོ། །ཅེས་གསུངས་སོ། །རྡོ་རྗེའི་གནས་ལྔ་པ་ཡང་མདོ་དེ་ཉིད་ལས་ཤེས་པར་བྱ་སྟེ། བཅོམ་ལྡན་འདས་མྱ་ངན་ལས་འདས་པའི་དབྱིངས་ཞེས་བགྱི་བ་འདི་ནི་དེ་བཞིན་གཤེགས་པའི་ཆོས་ཀྱིས་སྐུའི་ཚིག་བླ་དྭགས་སོ། །ཞེས་སོ། །རྡོ་རྗེ་གནས་དྲུག་པ་ཡང་མདོ་དེ་ལས་ཤེས་པར་བྱ་སྟེ། ཅི་སྐད་དུ། ཤཱ་རི་བུ་དེ་བཞིན་གཤེགས་པས་བསྟན་པའི། ཆོས་ཀྱི་སྐུ་གང་ཡིན་པ་དེ་ནི། འདི་ལྟ་སྟེ། གང་གཱའི་ཀླུང་གི་བྱེ་མ་ལས་འདས་པའི་དེ་བཞིན་གཤེགས་པའི་ཆོས་གང་དག་དང་། རྣམ་པ་དབྱེ་བ་མེད་པའི་ཆོས་དང་ལྡན་པ་མ་བྲལ་བའི་ཡེ་ཤེས་ཀྱི་ཡོན་ཏན་ཅན་ནོ། །ཞེས་གསུངས་སོ། །རྡོ་རྗེའི་གནས་བདུན་པ་ནི། ཡེ་ཤེས་བསམ་གྱིས་མི་ཁྱབ་པའི་ཡུལ་ལས་འཇུག་པ་བསྟན་པའི་རྗེས་སུ་འབྲང་ནས་རྟོགས་པར་བྱའོ། །ཞེས་གསུངས་སོ། །གསུམ་པ་གོ་རིམ་བརྗོད་པ་ནི། སངས་རྒྱས་ལས་ཆོས་ཆོས་ལས་འཕགས་པའི་ཚོགས། ཚོགས་ལས་སྙིང་པོ་ཡེ་ཤེས་ཁམས་ཐོབ་མཐར། ཡེ་ཤེས་དེ་ཐོབ་བྱང་ཆུབ་མཆོག་ཐོབ་སོགས། སེམས་ཅན་ཀུན་དོན་བྱེད་ཆོས་རྣམས་དང་ལྡན། །ཞེས་བྱ་བ་གསུང་སྟེ། དེ་ཡང་སངས་རྒྱས་ཀྱིས་ཆོས་གསུངས། དེ་ལ་བརྟེན་ནས་ཆོས་ཉམས་སུ་ལེན་པའི་དགེ་འདུན་ཚོགས་པ་འབྱུང་། དེ་དག་ལས་བདེ་བར་གཤེགས་པའི་སྙིང་པོ་ཀུན་གཞི་ཡེ་ཤེས་སེམས་ཅན་ཀྱི་ཁམས་རྟོགས་ཤིང་ཐོབ་པ་འབྱུང་། ཡེ་ཤེས་དེ་རྟོགས་ཤིང་སྒྲིབ་པ་གསུམ་བྱང་བས་བྱང་ཆུབ་འཐོབ། བྱང་ཆུབ་དེ་ལ་སྟོབས་བཅུ་ལ་སོགས་པ་ཡོན་ཏན་རྣམས་མངོན་ཏུ་འགྱུར། དེ་ལ་བརྟེན་ནས་སེམས་ཅན་ཐམས་ཅད་ཀྱི་དོན་འབད་མེད་ལྷུན་གྲུབ་དུ་བྱུང་བའོ། །

དཀོན་མཆོག་གསུམ་བཤད་པ།

གཉིས་པ་རྡོ་རྗེའི་གནས་བདུན་རྒྱས་བཤད་ལ་བཞི། རྟོགས་བྱའི་གཞི་དང་། རྟོགས་པའི་བྱང་ཆུབ་དང་། ཡན་ལག་ཡོན་ཏན་དང་། བྱེད་པའི་རྐྱེན་འཕྲིན་ལས་སོ། །དང་པོ་ལ་གཉིས། རྟོགས་བྱའི་འབྲས་བུ་དཀོན་མཆོག་དང་། རྒྱུ་ཁམས་སོ། །དང་པོ་ལ་བཞི་སྟེ། སངས་རྒྱས་དང་། ཆོས་དང་། དགེ་བདུན་དང་། སྐྱབས་གསུམ་ཀྱིས་རྣམ་དབྱེ་བསྟན་པའོ། །དང་པོ་སངས་རྒྱས་ལ། མདོར་བསྟན། རྒྱས་བཤད། དོན་བསྡུ་གསུམ། དང་པོ་མདོར་བསྟན་ནི། གང་ཞིག་ཐོག་མ་དབུས་མཐའ་མེད་ཞི་སངས་རྒྱས་ཉིད་རང་རྣམ་སངས་རྒྱས། །སངས་རྒྱས་ནས་ནི་མ་རྟོགས་རྟོགས་ཕྱིར་འཇིགས་མེད་རྟག་པའི་ལམ་སྟོན་པ། །མཁྱེན་བརྩེའི་རལ་གྲི་རྡོ་རྗེ་མཆོག་བསྣམས་སྡུག་བསྔལ་མྱུ་གུ་གཅོད་མཛད་ཅིང་། །སྣ་ཚོགས་ལྟ་ཐེབས་ཀྱིས་བསྐོར་ཐེ་ཚོམ་རྩིག་པ་འཇིག་འཛད་དེ་ལ་འདུད། །ཞེས་པའོ། །གཉིས་པ་རྒྱས་བཤད་ལ་ཡོན་ཏན་བརྒྱད་དང་ལྡན་པར་བསྟན་པ་དང་། དེའི་བསྒྲུབ་བྱེད་བརྗོད་པའོ། །དང་པོ་ནི། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་ཀྱིས་རྟོག་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པ་སངས་རྒྱས་ཉིད། །འདིས་ནི་མདོར་བསྡུ་ན་ཡོན་ཏན་བརྒྱད་དང་ལྡན་པའི་སངས་རྒྱས་ཉིད་བརྗོད་དོ། །ཡོན་ཏན་བརྒྱད་གང་ཞེ་ན། འདུས་མ་བྱས་པ་ཉིད་དང་། ལྷུན་གྱིས་གྲུབ་པ་དང་། གཞན་རྐྱེན་གྱི་མངོན་པར་རྟོགས་པ་མ་ཡིན་པ་དང་། ཡེ་ཤེས་དང་། ཐུགས་རྗེ་དང་། ནུས་པ་དང་། རང་གི་དོན་ཕུན་སུམ་ཚོགས་པ་དང་། གཞན་དོན་ཕུན་སུམ་ཚོགས་པའོ། །གཉིས་པ་དེའི་བསྒྲུབ་བྱེད་བརྗོད་པ་ནི། ཐོག་མ་དབུས་མཐའ་མེད་པ་ཡི། །རང་བཞིན་ཡིན་ཕྱིར་འདུས་མ་བྱས། །ཞི་བ་ཆོས་ཀྱིས་སྐུ་ཅན་ཕྱིར། །ལྷུན་གྱིས་གྲུབ་ཅེས་བྱ་བར་བརྗོད། །སོ་སོ་རང་གིས་རྟོགས་བྱའི་ཕྱིར། །གཞན་ཀྱིས་རྐྱེན་གྱི་རྟོགས་མིན་པ། །དེ་ལྟར་རྣམ་གསུམ་རྟོགས་ཕྱིར་མཁྱེན། །ལམ་སྟོན་ཕྱིར་ན་ཐུགས་བརྩེ་བ། །ནུས་པ་ཡེ་ཤེས་ཐུགས་རྗེ་ཡིས། །སྡུག་བསྔལ་ཉོན་མོངས་སྤངས་ཕྱིར་རོ། །ཞེས་བྱ་བ་གསུང་སྟེ། དེ་ལ་སངས་རྒྱས་ཉིད་ནི་འདུས་མ་བྱས་པ་སྟེ། ཐོག་མ་སྐྱེ་བ་མེད་པ་དང་། དབུས་སུ་གནས་པ་མེད་པ་དང་། ཐ་མ་འཇིག་པ་མེད་པའི་རང་བཞིན་ཡིན་པའི་ཕྱིར་ལྷུན་གྱིས་གྲུབ་པ་ཡིན་ཏེ། འབད་རྩོལ་གྱིས་རྣམ་པར་རྟོགས་པ་དང་། སྤྲོས་པ་ཐམས་ཅད་ཉེ་བར་ཞི་བ་ཡང་། སངས་རྒྱས་ཀྱི་ཆོས་ཀུན་དང་ལྡན་པའི་སྐུ་ཡིན་པའི་ཕྱིར་རོ། །གཞན་གྱི་སྒྲ་ལ་སོགས་པའི་རྐྱེན་གྱིས་རྟོགས་པ་མིན་ཏེ། སོ་སོ་རང་རིག་པའི་ཡེ་ཤེས་ཀྱིས་རང་བྱུང་དུ་རྟོགས་པ་ཡིན་པའི་ཕྱིར་རོ། །ཡེ་ཤེས་དང་ལྡན་པ་ཡིན་ཏེ། དེ་ལྟ་བུའི་འདུས་མ་བྱས་པ་ལ་སོགས་པ་རྣམ་པ་གསུམ་རྟོགས་པའི་ཕྱིར། ཐུགས་རྗེ་དང་ལྡན་པ་ཡིན་ཏེ། དེ་ལྟ་བུ་རྟོགས་པར་བྱེད་པའི་ལམ་གཞན་ལ་སྟོན་པའི་ཕྱིར་རོ། །ནུས་པ་ཕུན་སུམ་ཚོགས་པ་དང་ལྡན་པ་ཡིན་ཏེ། ཡེ་ཤེས་དང་ཐུགས་རྗེ་དེ་ལྟ་བུ་ལ་བརྟེན་ནས་གདུལ་བྱ་རྣམས་ཀྱི་སྡུག་བསྔལ་དང་ཉོན་མོངས་མཐའ་དག་སྤང་བར་མཛད་པའི་ཕྱིར་རོ། །གསུམ་པ་དོན་བསྡུ་ནི། དང་པོ་གསུམ་གྱིས་རང་དོན་ཏེ། ཕྱི་མ་གསུམ་གྱི་གཞན་དོན་ཡིན། །ཞེས་བྱ་བ་གསུང་སྟེ། སངས་རྒྱས་ནི་དོན་གཉིས་ཕུན་སུམ་ཚོགས་པ་སྟེ། རང་དོན་ཕུན་སུམ་ཚོགས་པ་དང་། གཞན་དོན་ཕུན་སུམ་ཚོགས་པའོ། །རང་དོན་ཕུན་སུམ་ཚོགས་པ་ནི་འདུས་མ་བྱས་པ་དང་། ཡོན་ཏན་ལྷུན་གྱིས་གྲུབ་པ་དང་། རང་རིག་རང་བྱུང་དུ་རྟོགས་པའོ། །གཞན་དོན་ཕུན་སུམ་ཚོགས་པ་ནི། གཞན་དོན་བསྒྲུབ་པའི་མཁྱེན་བརྩེ་ནུས་པ་གསུམ་དང་ལྡན་པའོ། །གཉིས་པ་ཆོས་ལ་མདོར་བསྟན། རྒྱས་བཤད་གཉིས། དང་པོ་མདོར་བསྟན་ནི། གང་ཞིག་ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུ་ཡང་། བརྟག་པར་མི་ནུས་ངེས་ཚིག་དང་བྲལ་སོ་སོ་རང་གིས་རིག་ཞི་བ། དྲི་མེད་ཡེ་ཤེས་འོད་ཟེར་སྣང་ལྡན་དམིགས་པ་ཀུན་ལ་ཆགས་པ་དང་། སྟོང་དང་རབ་རིམ་རྣམ་པར་འཛོམས་མཛད་དམ་ཆོས་ཉི་མ་དེ་ལ་འདུད། ཞེས་བྱ་བ་གསུང་སྟེ། རྟོགས་སྤྱོད་ཡུལ་དུ་བྱས་ནས་བློས་བརྟག་པའི་ཡོད་པ་དང་། མེད་པ་དང་། ཡོད་མེད་གཉིས་ཀ་དང་། དེ་གཉིས་ཀ་མ་ཡིན་པ་སྟེ། མུ་བཞི་གང་དུ་ཡང་མ་དམིགས་ཏེ། མིང་ཚིག་ཡི་གེས་བརྗོད་དུ་མེད་པའི་ཕྱིར་ཏེ། འཕགས་པ་རྣམས་ཀྱིས་སོ་སོ་རང་གིས་རིག་པ་བྱ་བ་ཡིན་པའི་ཕྱིར་རོ། །དེ་ཡང་སྤྲོས་པ་ཐམས་ཅད་ཉེ་བར་ཞི་བ། ཅི་ལྟ་ཅི་སྙེད་མཁྱེན་པའི་ཡེ་ཤེས་དང་ལྡན་པ། དམིགས་པའི་ཡུལ་ཐམས་ཅད་ལ། ཆགས་པ་དང་། སྡང་བ་དང་། འཁྲུལ་པའི་གཏི་མུག་མཐའ་དག་སེལ་བར་བྱེད་པ་ཉི་མ་ལྟ་བུའོ། །གཉིས་པ་རྒྱས་བཤད་ནི། བསམ་མེད་གཉིས་མེད་རྟོག་མེད་པ། དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བ། བདེན་གཉིས་མཚན་ཉིད་ཅན་དེ་ཆོས། །ཞེས་བྱ་བ་ཡོན་ཏན་བརྒྱད་དང་ལྡན་པ་སྟེ། བསམ་དུ་མེད་པ་དང་། གཉིས་སུ་མེད་པ་དང་། རྣམ་པར་རྟོག་པ་མེད་པ་དང་། དག་པ་དང་། མངོན་པར་གསལ་བར་བྱེད་པ་དང་། གཉེན་པོའི་ཕྱོགས་ཉིད་དང་། འདོད་ཆགས་དང་བྲལ་བ་དང་། འདོད་ཆགས་དང་བྲལ་བའི་རྒྱུའོ། །ཆགས་བྲལ་ཉིད་ནི་འགོག་པ་དང་། ལམ་གྱིས་བདེན་པ་དག་གིས་བསྡུས། །གོ་རིམ་ཅི་བཞིན་དེ་དག་ཀྱང་། །ཡོན་ཏན་གསུམ་གསུམ་གྱིས་རིགས་བྱ། །ཞེས་བྱ་བ་གསུང་སྟེ། གང་འདོད་ཆགས་དང་བྲལ་བ་འགོག་པའི་བདེན་པ་དང་། གང་གི་འདོད་ཆགས་དང་བྲལ་བའི་རྒྱུ་ལམ་གྱིས་བདེན་པ་སྟེ། དེ་གཉིས་ནི་ཆོས་དཀོན་མཆོག་ཡིན་ནོ། །དེ་ལ་འགོག་པའི་བདེན་པ་ནི། ཡོན་ཏན་གསུམ་དང་ལྡན་པ་སྟེ། བསམ་དུ་མེད་པ་དང་། གཉིས་སུ་མེད་པ་དང་། རྣམ་པར་རྟོག་པ་མེད་པའོ། །ལམ་ཀྱིས་བདེན་པ འང་ཡོན་ཏན་གསུམ་དང་ལྡན་པ་སྟེ། དག་པ་དང་། གསལ་བ་དང་། གཉེན་པོའི་ཕྱོགས་ཉིད་དོ། །དེ་དག་གི་རྒྱུ་མཚན་རྒྱས་པར་བཤད་པ་ནི། བརྟགས་མིན་ཕྱིར་དང་བརྗོད་མིན་ཕྱིར། །འཕགས་པས་མཁྱེན་ཕྱིར་བསམ་མེད་ཉིད། །ཞི་ཉིད་གཉིས་མེད་རྟོག་མེད་དེ། །དག་སོགས་གསུམ་ནི་ཉི་བཞིན་ནོ། །འགོག་པའི་བདེན་པ་ཆོས་ཀྱིས་སྐུ་དེ་ནི། བསམ་དུ་མེད་པ་སྟེ། རྣམ་རྟོགས་གིས་བརྟག་བྱ་མིན་པའི་ཕྱིར་དང་། སྒྲ་ཚིགས་གིས་བརྗོད་དུ་མེད་པའི་ཕྱིར་དང་། འཕགས་པ་འབའ་ཞིག་གིས་མཁྱེན་པར་བྱ་བ་ཡིན་པའི་ཕྱིར་རོ། །ཞི་བ་ཆོས་ཀྱི་སྐུ་དེ་ལས་དང་ཉོན་མོངས་པ་གཉིས་བྱེད་པ་དང་། ཚུལ་བཞིན་མ་ཡིན་པའི་རྣམ་པར་རྟོག་པ་མེད་པ་ཉིད་དེ་དག་སོགས་གསུམ་པོ་དེ་ནི་ཉི་མ་དང་ཆོས་མཚུངས་སོ། །དེ་ཡང་ཅི་སྐད་དུ། ཐོགས་འགྲེལ་ལས། དེ་ལ་གཉིས་ནི་ལས་དང་ཉོན་མོངས་པ་ལ་བརྗོད་ལ། རྣམ་པར་རྟོག་པ་ནི་ལས་དང་ཉོན་མོངས་པ་ཀུན་འབྱུང་བའི་རྒྱུ་ཚུལ་བཞིན་མ་ཡིན་པ་ཡིད་ལ་བྱེད་པ་ལ་བརྗོད་དོ། །དེ་རང་བཞིན་ཀྱིས་འགག་པར་སོ་སོར་རིག་པའི་ཕྱིར་རྣམ་པར་རྟོག་པ་དང་། ལས་གཉིས་ཀུན་ཏུ་སྤྱོད་པ་མེད་པའི་ཚུལ་ཀྱིས་སྡུག་བསྔལ་གཏན་འབྱུང་བ་མེད་པ་གང་ཡིན་པ་འདི་ནི་སྡུག་བསྔལ་འགོག་པའི་བདེན་པ་ཞེས་བྱའོ། །ཆོས་འགའ་ཞིག་ཞིག་པའི་ཕྱིར་ནི། སྡུག་བསྔལ་འགོག་པའི་བདེན་པར་མ་བསྟན་ཏེ། ཞེས་གསུངས་སོ། །སྡུག་བསྔལ་འགོག་པའི་མིང་ཅན་དེ་བཞིན་གཤེགས་པའི་ཆོས་ཀྱི་སྐུ་ཐོབ་པའི་རྒྱུ་རྣམ་པར་མི་རྟོག་པའི་ཡེ་ཤེས་མཐོང་བ་དང་། སྒོམ་པའི་ལམ་ནི་ཆོས་མཐུན་པ་རྣམ་པ་གསུམ་ཀྱིས་ཉི་མ་དང་འདྲ་བར་རིགས་པར་བྱ་སྟེ། དཀྱིལ་འཁོར་རྣམ་པར་དག་པ་དང་ཆོས་མཐུན་པ་ནི། ཉེ་བའི་ཉོན་མོངས་པ་དྲི་མ་ཐམས་ཅད་དང་བྲལ་བའི་ཕྱིར་རོ། །གཟུགས་གསལ་བར་བྱེད་པ་དང་ཆོས་མཐུན་པ་ནི། ཤེས་བྱ་ཐམས་ཅད་ཀྱིས་རྣམ་པ་ཐམས་ཅད་སྣང་བར་བྱེད་པའི་ཕྱིར་རོ། །མུན་པའི་གཉེན་པོར་ཆོས་མཐུན་པ་ནི་དེ་ཁོ་ན་ཉིད་མཐོང་བའི་གེགས་ཀྱིས་རྣམ་པ་ཐམས་ཅད་ཀྱི་གཉེན་པོར་འགྱུར་བའི་ཕྱིར་རོ། །གསུམ་པ་དགེ་འདུན་ལ་མདོར་བསྟན་རྒྱས་བཤད་གཉིས། དང་པོ་མདོར་བསྟན་ནི། སེམས་དེ་རང་བཞིན་འོད་གསལ་བས་ན་ཉོན་མོངས་ངོ་བོ་མེད་གཟིགས་པས། །གང་དག་འགྲོ་ཀུན་བདག་མེད་མཐའ་ཞི་ཡང་དག་རྟོགས་ནས་ཐམས་ཅད་ལས། །རྫོགས་པའི་སངས་རྒྱས་རྗེས་ཞུགས་གཟིགས་པ་སྒྲིབ་པ་མེད་པའི་བློ་མངའ་བ། །སེམས་ཅན་རྣམ་དག་མཐའ་ཡས་ཡུལ་ཅན་ཡེ་ཤེས་གཟིགས་མངའ་དེ་ལ་འདུད། །གཉིས་པ་རྒྱས་བཤད་ནི། ཇི་ལྟ་ཇི་སྙེད་ནང་གིས་ནི། །ཡེ་ཤེས་གཟིག་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །དེ་ཡང་དགེ་འདུན་དཀོན་མཆོག་ནི། རིག་གྲོལ་ཀྱི་ཡོན་ཏན་གཉིས་དང་ལྡན་པའོ། །དེ་ལ་དབྱེ་ན། ཉན་ཐོས་འཕགས་པ་དང་། རང་རྒྱལ་འཕགས་པ་དང་། ཐེག་ཆེན་འཕགས་པ་གསུམ། ཉན་ཐོས་ལ་དབྱེ་ན། སྐྱེས་བུ་ཟུང་བཞིའམ། གང་ཟག་ཡ་བརྒྱད། སྐྱེས་བུ་ཟུང་བཞི་ནི། རྒྱུན་ཞུགས་ཞུགས་པ་དང་རྒྱུན་ཞུགས་འབྲས་གནས་གཉིས། ཕྱིར་འོང་ཞུགས་པ་དང་ཕྱིར་འོང་འབྲས་གནས་གཉིས། ཕྱིར་མི་འོང་ཞུགས་པ་དང་ཕྱིར་མི་འོང་འབྲས་གནས་གཉིས། དགྲ་བཅོམ་ཞུགས་པ་དང་དགྲ་བཅོམ་འབྲས་གནས་གཉིས་ཏེ། ཟུང་བཞི་དེ་དག་སོ་སོར་བསྒྲང་བས་གང་ཟག་ཡ་བརྒྱད་དོ། །རང་རྒྱལ་ལ་དབྱེ་ན། བསེ་རུ་ལྟ་བུ་དང་། ཚོགས་ན་སྤྱོད་པ་གཉིས། ཚོགས་སྤྱོད་ལ་དབྱེ་ན། ཚོགས་སྤྱོད་ཆུང་ངུ་དང་། ཚོགས་སྤྱོད་ཆེན་པོ་གཉིས་རྣམས་ཡོད་དོ། །ཐེག་ཆེན་འཕགས་པ་ལ་དབྱེ་ན། བྱང་སེམས་འཕགས་པ་དང་། སངས་རྒྱས་འཕགས་པ་གཉིས། བྱང་སེམས་འཕགས་པ་ལ་དབྱེ་ན། ས་དང་པོ་བ་དང་། ས་གཉིས་བ་ལ་སོགས། ས་བཅུ་པ་རྣམས་སོ། །ཐེག་པ་གསུམ་གྱི་ཚོགས་ལམ་བ་དང་སྦྱོར་ལམ་པ་རྣམས་ནི་སོ་སོའི་སྐྱེ་བོ་ཡིན་པས། འཕགས་པའི་དགེ་འདུན་དུ་མི་བསྒྲང་ངོ། །དེ་ལ་རིག་པའི་ཡོན་ཏན་ནི། བདེན་པ་མཐོང་བའོ། །གྲོལ་བའི་ཡོན་ཏན་ནི་བསྒྲིབ་པ་ལས་གྲོལ་བའོ། །འདིར་ཐེག་པ་ཆེན་པོའི་དགེ་འདུན་ཀྱི་དབང་དུ་བྱས་ནས། རིག་པའི་ཡོན་ཏན་ལ་ཆོས་ཉིད་ཇི་ལྟར་གཟིགས་པ་དང་། ཆོས་ཅན་ཇི་སྙེད་པ་གཟིགས་པ་སྟེ། དེ་གཉིས་ཀ་ཡང་རང་གི་སོ་སོ་རང་རིག་པའི་ཡེ་ཤེས་ལ་བཞག་གོ །དེ་ལ་ཆོས་ཉིད་ཇི་ལྟ་བ་གཟིགས་བའི་དབང་དུ་བྱས་ནས་བཤད་པ། འགྲོ་བ་ཞི་བའི་ཆོས་ཉིད་དུ། །རྟོགས་ཕྱིར་ཇི་ལྟར་ཉིད་དེ་ཡང་། རང་བཞིན་གྱིས་ནི་ཡང་དག་ཕྱིར། ཉོན་མོངས་གདོད་ནས་ཟད་ཕྱིར་རོ། །ཞེས་བྱ་བ་གསུངས་ཏེ། སེམས་ཀྱི་ཆོས་ཉིད་གདོད་མ་ནས་ཞི་བ། རང་བཞིན་གྱི་ཡོངས་སུ་དག་པ། བདེ་གཤེགས་སྙིང་པོ་ཡོད་པ་དང་། འཁྲུལ་སྣང་གློ་བུར་གྱིས་ཉོན་མོངས་པ་རྣམས་ནི། རྨི་ལམ་དང་སྒྱུ་མ་བཞིན་གདོད་མ་ནས་མེད་པར་གཟིགས་པའོ། །ཆོས་ཅན་ཇི་སྙེད་མཁྱེན་བའི་དབང་དུ་བྱས་ནས་བཤད་པ། ཤེས་བྱ་མཐར་ཐུག་རྟོགས་པའི་བློས། ཐམས་ཅད་མཁྱེན་པའི་ཆོས་ཉིད་ནི། སེམས་ཅན་ཐམས་ཅད་ལ་ཡོད་པ། མཐོང་ཕྱིར་ཇི་སྙེད་ཡོད་པ་ཉིད། ཞེས་བྱ་བ་གསུངས་ཏེ། ཤེས་བྱ་མུ་དང་མཐའ་མེད་པ་རྟོགས་ཤིང་། དེ་ཡང་ཐམས་ཅད་མཁྱེན་པའི་ཆོས་ཉིད། བདེ་གཤེགས་སྙིང་པོ། སེམས་ཅན་ཐམས་ཅད་ལ་ཡོད་པར་གཟིགས་པའོ། །རྟོགས་པ་དེ་ཡང་བྱང་ཆུབ་སེམས་དཔའི་ས་དང་པོ་ཉིད་ལ་སྐྱེ་སྟེ། ཆོས་ཀྱི་དབྱིངས་ཀུན་ཏུ་འགྲོ་བའི་དོན་དུ་རྟོགས་པའི་ཕྱིར་རོ། །ཐེག་ཆེན་འཕགས་པ་རྣམས་ཀྱི་རྟོགས་པ་དེ་ནི། ཉན་ཐོས་དང་རང་སངས་རྒྱས་རྣམས་ཀྱི་ཉེ་ཚེ་བའི་ཡེ་ཤེས་ཀྱིས། མཐོང་བ་ལ་ལྟོས་ནས། ཁྱད་པར་དུ་འཕགས་པའི་ཡིན་ཏེ། ཉོན་མོངས་པའི་བསྒྲིབས་པས་ཆགས་པ་མེད་པའི་ཕྱིར་དང་། ཤེས་བྱའི་བསྒྲིབས་པས་ཐོགས་པ་མེད་པའི་ཕྱིར་རོ། །འཕགས་པ་ཕྱིར་མི་ལྡོག་པ། ས་དང་པོ་ཡན་ཆད་ལ་གནས་པ་རྣམས་ནི། ཡེ་ཤེས་གཟིགས་པ་དེ་ལྟ་བུ་དང་ལྡན་པས་ན། སངས་རྒྱས་ཀྱི་ཡེ་ཤེས་བླ་ན་མེད་པ་དང་ཉེ་བའི་ཕྱིར། ལུས་ཅན་ཀུན་གྱིས་སྐྱབས་ཡིན་ནོ། །དེ་ལ་དགོངས་ནས་འདིར། ཡེ་ཤེས་གཟིགས་པ་དག་པ་ན། །སངས་རྒྱས་ཡེ་ཤེས་བླ་མེད་ཕྱིར། །འཕགས་པ་ཕྱིར་མི་ལྡོག་པ་ནི། །ལུས་ཅན་ཀུན་གྱི་སྐྱབས་ཡིན་ནོ། །ཞེས་བཤད་དོ། །བཞི་པ་སྐྱབས་གསུམ་ཀྱི་རྣམ་དབྱེ་བསྟན་པ་ལ། སྐྱབས་གསུམ་དུ་བཞག་པའི་རྒྱུ་མཚན། ཆོས་དང་དགེ་འདུན་གཉིས། མཐར་ཐུག་གི་སྐྱབས་མ་ཡིན་པར་བསྟན་པ། མཐར་ཐུག་གི་སྐྱབས་དངོས་བསྟན་པ། དཀོན་མཆོག་གི་སྒྲ་དོན་བཤད་པའོ། །དེ་ལ་དང་པོ་ནི། སྟོན་པའི་བསྟན་པ་སློབ་དོན་དུ། །ཐེག་གསུམ་པ་དང་བྱེད་གསུམ་པ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། ཞེས་བྱ་བ་གསུང་སྟེ། སྟོན་པའི་ཡོན་ཏན་བསྟན་པའི་དོན་དུ་སངས་རྒྱས་ཀྱི་ངོ་བོ་ཉིད་དོན་དུ་གཉེར་བར་ཞུགས་པ་བྱང་ཆུབ་སེམས་དཔའི་ཐེག་པའི་གང་ཟག་དང་། སངས་རྒྱས་ལ་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་དབང་དུ་བྱས་ནས། སངས་རྒྱས་ནི་སྐྱབས་ཡིན་ཏེ། རྐང་གཉིས་རྣམས་ཀྱི་མཆོག་ཡིན་པའི་ཕྱིར་རོ། །ཞེས་བསྟན་ཅིང་རྣམ་པར་བཞག་གོ །སྟོན་པའི་བསྟན་པ་ཡོན་ཏན་བསྟན་པའི་དོན་དུ་རང་ཉིད་རྟེན་འབྲེལ་ཀྱི་ཆོས་ཟབ་མོ་རྗེས་སུ་རྟོགས་པའི་ཕྱིར་ཞུགས་པ། རང་སངས་རྒྱས་ཀྱི་ཐེག་པའི་གང་ཟག་དང་ཆོས་ལ་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་དབང་དུ་བྱས་ནས། ཆོས་ནི་སྐྱབས་ཡིན་ཏེ། འདོད་ཆགས་དང་བྲལ་བ་རྣམས་ཀྱི་མཆོག་ཡིན་པའི་ཕྱིར་རོ། །ཞེས་བསྟན་ཅིང་རྣམ་པར་བཞག་གོ །སྟོན་པའི་བསྟན་པ་ལ་ལེགས་པར་ཞུགས་པའི་སློབ་མའི། །ཡོན་ཏན་བསྟན་པའི་དོན་དུ་གཞན་ལས་ཐོས་པའི་སྒྲ་རྗེས་སུ་རྟོགས་པའི་ཕྱིར། ཞུགས་པའི་ཉན་ཐོས་ཀྱི་ཐེག་པའི་གང་ཟག་དང་། དགེ་འདུན་ལ་མཆོག་ཏུ་བྱ་བ་བྱེད་པ་མོས་པ་རྣམས་ཀྱི་དབང་དུ་བྱས་ནས། དགེ་འདུན་ནི་སྐྱབས་ཡིན་ཏེ། ཚོགས་རྣམས་ཀྱི་མཆོག་ཡིན་པའི་ཕྱིར་རོ། །ཞེས་བསྟན་ཅིང་རྣམ་པར་བཞག་གོ །གཉིས་པ་ཆོས་དང་དགེ་འདུན་གཉིས་མཐར་ཐུག་གི་སྐྱབས་མ་ཡིན་པར་བསྟན་པ་ནི། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིག་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་ཀྱི་སྐྱབས་མཆོག་མ་ཡིན་ནོ། །ཞེས་བྱ་བ་གསུང་སྟེ། དེ་ཡང་བསྟན་པ་ལུང་གིས་ཆོས་དང་། བསྒྲུབ་པ་རྟོགས་པའི་ཆོས་གཉིས་ལ། ལུང་ནི་མདོ་མདོ་སྡེ་དབྱངས་སྙད་ལུང་ལ་སོགས་པ་གསུང་རབ་ཡན་ལག་བཅུ་གཉིས་ལ་སོགས་པའོ། །མཆན། ལ་སོགས་པ་མིང་དང་ཚིག་དང་ཡི་གེའི་ཚོགས་ཀྱིས་བསྡུས་པའོ། །དེ་དག་ཀྱང་ལམ་མངོན་པར་རྟོགས་པའི་མཐར་ཐུག་པའི་ཚེ། གཟིངས་ལྟ་བུར་སྤང་བར་བྱ་བ་ཡིན་ནོ། །རྟོགས་པའི་ཆོས་ནི། རྒྱུ་ལམ་ཀྱིས་བདེན་པ་དང་། འབྲས་བུ་འགོག་པའི་བདེན་པ་གཉིས། དེ་ལ་ལམ་ནི་འདུས་བྱས་ཀྱི་མཚན་ཉིད་དུ་རྟོགས་ལ། འདུས་བྱས་གང་ཡིན་པ་དེ་ནི་མི་བདེན་པ། མི་རྟག་པ། རྫུན་པ་བསླུ་བའི་ཆོས་ཅན་ཡིན་པའི་ཕྱིར། རྟེན་གྱི་སྐྱབས་གནས་མ་ཡིན་ནོ། །འགོག་པའང་། ཉན་ཐོས་ཀྱི་ཚུལ་གྱི་མར་མེའི་རྒྱུན་ཆད་པ་བཞིན་དུ་ཉོན་མོངས་པ་དང་སྡུག་བསྔལ་མེད་པ་ཙམ་ཀྱིས་རབ་ཏུ་ཕྱེ་ལ། མེད་པ་ནི་སྐྱབས་སམ། སྐྱབས་མ་ཡིན་པར་འོས་པ་མ་ཡིན་ནོ། །ཐེག་པ་གསུམ་ཀྱི་དགེ་འདུན་རྣམས་ཀྱང་། རྟག་ཏུ་འཁོར་བའི་འཇིགས་པ་དང་བཅས་པའི་ཕྱིར་རྟེན་གྱིས་སྐྱབས་མ་ཡིན་ནོ། །འཁོར་བ་སྤངས་པའི་དགྲ་བཅོམ་པ་རྣམས་ཀྱང་། ཉོན་མོངས་པའི་བག་ཆགས་མ་སྤངས་པའི་ཕྱིར། ལས་ཀྱི་འདུ་བྱེད་ཐམས་ཅད་ལ་མི་བཟད་པར་འཇིགས་པའི་འདུ་ཤེས་ཉེ་བར་གནས་པར་འགྱུར་ཏེ། དཔེར་ན་རལ་གྲི་གདེང་བའི། གཤེད་མའི་སྐྱེས་བུ་ལ་བྱ་བ་བཞིན་ཏེ། དེ་ན་དེ་དག་ཀྱང་གཏན་དུ་བདེ་བའི་ངེས་པར་འབྱུང་བ། ཐོབ་པ་མ་ཡིན་ནོ། །དེ་དག་ཀྱང་། འཇིག་པ་མེད་པ་ཁྱུ་མཆོག་གི་གནས་ཐོབ་པར་བྱ་བའི་ཕྱིར། ཞུགས་པར་འགྱུར་བ་ཡིན་ཏེ། །འདི་ལྟ་སྟེ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལའོ། །དེའི་ཕྱིར་དེ་ཡང་ཡང་དག་པའི་སྐྱབས་ཚོལ་བ་ཡིན་པའི་ཕྱིར་གཏན་གྱི་སྐྱབས་མ་ཡིན་ནོ། །གསུམ་པ་མཐར་ཐུག་གི་སྐྱབས་དངོས་བསྟན་པ་ནི། དམ་པའི་དོན་དུ་འགྲོ་བ་ཡི། སྐྱབས་ནི་སངས་རྒྱས་ཉག་གཅིག་ཡིན། ཐུབ་པ་ཆོས་ཀྱི་སྐུ་ཅན་ཕྱིར། ཚོགས་ཀྱང་དེའི་མཐར་ཐུག་ཡིན། ཞེས་བྱ་བ་གསུང་སྟེ། །དོན་དམ་པའི་སྐྱབས་ནི་སངས་རྒྱས་ཉག་གཅིག་ཡིན་ཏེ། སྐྱེ་འགག་མེད་པའི་ཐུབ་པ་འགོག་ལམ་བདེན་པ་གཉིས་ཀྱི་མཚན་ཉིད། འདོད་ཆགས་དང་བྲལ་བའི་ཆོས་ཀྱི་སྐུ་ཅན་ཡིན་པའི་ཕྱིར་དང་། ཐེག་པ་གསུམ་གྱི་ཆོས་ཀྱི་སྐུ་རྣམ་པར་དག་པའི་མཐར་ཐུག་པ་ཐོབ་པས་མཐར་ཕྱིན་པས་འགྱུར་བའི་ཕྱིར་ན། སྐྱོབ་པ་མེད་ཅིང་སྐྱབས་མེད་པའི་འཇིག་རྟེན་ན། ཕྱི་མི་མཐའ་ཡི་མུ་དང་མཉམ་པར་མི་ཟད་པའི་སྐྱབས་རྟག་པའི་སྐྱབས། གཡུང་དྲུང་གི་སྐྱབས། དོན་དམ་པའི་སྐྱབས་ནི་སངས་རྒྱས་གཅིག་པུ་ཉིད་དོ། །བཞི་པ་དཀོན་མཆོག་གི་སྒྲ་དོན་བཤད་པ་ནི། འབྱུང་བ་དཀོན་ཕྱིར་དྲི་མེད་ཕྱིར། མཐུ་ལྡན་ཕྱིར་དང་འཇིག་རྟེན་གྱིས། རྒྱན་གྱུར་ཕྱིར་དང་མཆོག་ཉིད་ཕྱིར། འགྱུར་བ་མེད་ཕྱིར་དཀོན་མཆོག་ཉིད། ཞེས་བྱ་བ་གསུངས་སྟེ། དཀོན་མཆོག་གསུམ་པོ་འདི་རིན་པོ་ཆེ་དང་འདྲ་བ་བརྗོད་དེ། དེའང་འབྱུང་བ་དཀོན་པ་ནི། བསྐལ་པ་མང་པོར་ཡང་དགེ་བའི་རྩ་བ་མ་བསག་པ་རྣམས་དེ་དག་དང་འཕྲད་བ་མི་འཐོབ་པའི་ཕྱིར་རོ། །དྲི་མ་མེད་པ་ནི། རྣམ་པ་ཐམས་ཅད་དུ་འདོད་ཆགས་ལ་སོགས་པའི་དྲི་མ་དང་བྲལ་བའི་ཕྱིར་རོ། །མཐུ་དང་ལྡན་པ་ནི། མངོན་པར་ཤེས་པ་དྲུག་ལ་སོགས་པ་ཡོན་ཏན་གྱིས་མཐུ་བསམ་གྱིས་མི་ཁྱབ་པ་དང་ལྡན་པའི་ཕྱིར་རོ། །འཇིག་རྟེན་གྱིས་རྒྱན་དུ་གྱུར་པ་ནི། འགྲོ་བ་ཐམས་ཅད་ཀྱིས་བསམ་པ་དགེ་བའི་རྒྱུ་ཡིན་པའི་ཕྱིར་རོ། །ཡིད་བཞིན་གྱིས་ནོར་བུ་རིན་པོ་ཆེ་ནི་རིན་པོ་ཆེ་བཅོས་མ་ཐམས་ཅད་ལས་མཆོག་ཡིན་པ་བཞིན། དཀོན་མཆོག་གསུམ་ཡང་། རྐང་གཉིས་དམ་པ་རྣམས་ཀྱི་མཆོག་དང་། འདོད་ཆགས་དང་བྲལ་བ་རྣམས་ཀྱི་མཆོག་དང་། ཚོགས་རྣམས་ཀྱི་མཆོག་ཡིན་པའི་ཕྱིར་རོ། །གཞན་དུ་མི་འགྱུར་བ་ནི། བསྟོད་སྨད་ལ་སོགས་པའི་རྐྱེན་གྱི་རྣམ་པར་མི་འགྱུར་བ་སྟེ་འདུས་མ་བྱས་པའི་རང་བཞིན་ཡིན་པའི་ཕྱིར་རོ། །དེ་ལྟར་རྟོགས་བྱའི་འབྲས་བུ་དཀོན་མཆོག་བཤད་ནས།། ༈ །།

ལེའུ་དང་པོ། རྟོགས་བྱ་ཁམས་བསྟན་པ།

གཉིས་པ་རྟོགས་བྱའི་རྒྱུ་ཁམས་བདེ་བར་གཤེགས་པའི་སྙིང་པོ་བཤད་པ་ལ། ཁམས་རྒྱུ་རྐྱེན་བཅས་སྤྱིར་བསྟན་པ་དང་། བྱེ་བྲག་ཏུ་ཁམས་དངོས་ཀྱི་ངོ་བོ་བཤད་པ་གཉིས། དང་པོ་ལ། ཐམས་ཅད་མཁྱེན་པའི་ཡུལ་དུ་བསྟན་པ་དང་། དེ་བསམ་གྱིས་མི་ཁྱབ་པའི་ཚུལ་རྒྱས་པར་བཤད་པ་གཉིས། དང་པོ་ནི། དྲི་བཅས་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛད། གང་ལས་དཀོན་མཆོག་དགེ་བ་གཉིས་འབྱུང་བ། དོན་དམ་གཟིགས་པ་རྣམས་ཀྱི་ཡུལ་ཉིད་དོ། །ཞེས་བྱ་བ་གསུང་སྟེ། །དྲི་མ་དང་བཅས་པ་སེམས་ཅན་གྱི་དེ་བཞིན་ཉིད་དང་། དྲི་མ་མེད་པ། སངས་རྒྱས་ཀྱི་དེ་བཞིན་ཉིད་དང་སངས་རྒྱས་དེའི་ཡོན་ཏན་དང་། སངས་རྒྱས་ཀྱི་མཛད་པ་འཕྲིན་ལས་ཏེ་རྒྱུ་རྐྱེན་བཞི་པོ་དེ་ལ་བརྟེན་ནས་དཀོན་མཆོག་གསུམ་འབྱུང་བ་ཡིན་ནོ། །རྒྱུ་རྐྱེན་བཞི་པོ་དེ་ནི། དོན་དམ་གཟིགས་པ་སངས་རྒྱས་འབའ་ཞིག་གི་སྤྱོད་ཡུལ་ཡིན་གྱིས། སོ་སོ་སྐྱེ་བོ་རྣམས་ཀྱི་བསམ་པའི་ཡུལ་ལས་འདས་པའི་བསམ་གྱིས་མི་ཁྱབ་པའོ། །གཉིས་པ་དཀོན་མཆོག་གསུམ་འབྱུང་བའི་རྒྱུའམ་རིགས་རྣམ་པ་བཞི་པོ་དེ་བསམ་གྱིས་མི་ཁྱབ་བའི་རྒྱུ་མཚན་བཤད་པ་ནི། དཀོན་མཆོག་གསུམ་པོ་འདིའི་རིགས། །ཐམས་ཅད་གཟིགས་པ་རྣམས་ཀྱི་ཡུལ། །དེ་ཡང་རྣམ་བཞི་གོ་རིམ་བཞིན། །རྒྱུ་བཞི་ཡིན་ནི་བསམ་མི་ཁྱབ། ཞེས་བྱ་བ་གསུང་སྟེ། །དེ་ལ་དྲི་མ་དང་བཅས་པའི་དེ་བཞིན་ཉིད་ནི། ཉོན་མོངས་པའི་སྦུབ་ལས་མ་གྲོལ་བའི་ཁམས་ལ། དེ་བཞིན་གཤེགས་པའི་སྙིང་པོ་ཞེས་བརྗོད་པ་གང་ཡིན་པའོ། །དྲི་མ་མེད་པའི་དེ་བཞིན་ཉིད་ནི། དེ་ཉིད་སངས་རྒྱས་ཀྱི་སར་སྒྲིབ་བྲལ་དུ་གནས་ཡོངས་སུ་གྱུར་པའི་མཚན་ཉིད། །དེ་བཞིན་གཤེགས་པའི་ཆོས་ཀྱིས་སྐུ་ཞེས་བརྗོད་པ་གང་ཡིན་པའོ། །དྲི་མ་མེད་པའི་སངས་རྒྱས་ཀྱི་ཡོན་ཏན་ཆོས་སྐུ་དེ་སྒྲིབ་པ་དང་བྲལ་བས། ཆོས་སྐུ་དེ་ཉིད་ལ་ཡོད་པ། སྟོབས་བཅུ་ལ་སོགས་པ་སངས་རྒྱས་ཀྱི་ཆོས་རྣམས་མངོན་དུ་གྱུར་པའོ། །རྒྱལ་བའི་མཛད་པ་ནི་སྟོབས་བཅུའི་འཕྲིན་ལས་བཅུ་ལ་སོགས་པ་སངས་རྒྱས་ཀྱིས་ཆོས་དེ་དག་རང་རང་གི་འཕྲིན་ལས་ཏེ། རྒྱུན་འཆད་པ་མེད་པ། བྱང་ཆུབ་སེམས་དཔའ་ལུང་བསྟན་པའི་གཏམ་རྒྱུན་མི་འཆད་པའོ། །གནས་བཞི་པོ་འདི་དག་ནི་བསམ་གྱིས་མི་ཁྱབ་པའི་གནས་བཞིས་འཁྱུད་པའི་ཕྱིར་རྟོགས་པར་དཀའ་བ་སྟེ། བཞི་གང་ཞེ་ན། འདི་ལྟ་སྟེ། དག་དང་ཉོན་མོངས་དང་ལྡན་ཕྱིར། །ཀུན་ནས་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོག་ཕྱིར། ཞེས་བྱ་བ་གསུང་སྟེ། དེ་ལ་དྲི་མ་དང་བཅས་པའི་དེ་བཞིན་ཉིད་ནི། རང་བཞིན་རྣམ་པར་དག་པའང་ཡིན་ལ། ཀུན་ནས་ཉོན་མོངས་པའི་དྲི་མ་དང་བཅས་པ་ཡང་ཡིན་པའི་ཕྱིར། གནས་འདི་བསམ་གྱིས་མི་ཁྱབ་པའོ། །དྲི་མ་མེད་པའི་དེ་བཞིན་ཉིད་ནི། སྔར་ནས་དྲི་མས་ཀུན་ཏུ་ཉོན་མོངས་པར་ཡང་མ་གྱུར་ལ། ཕྱིས་རྣམ་པར་དག་པར་འགྱུར་བའི་ཕྱིར། གནས་འདི་བསམ་གྱིས་མི་ཁྱབ་པའོ། །སྟོབས་སོགས་སངས་རྒྱས་ཀྱི་ཡོན་ཏན་རྣམས་སོ་སོའི་སྐྱེ་བོ་ཡི་གནས་སྐབས་ནའང་། ཆོས་ཉིད་དེ་བཞིན་ཉིད་དང་དབྱེར་མེད་པ། འཁོར་འདས་སྔ་ཕྱི་ཁྱད་མེད་པར་ཡོད་པའི་ཕྱིར། གནས་འདི་བསམ་གྱིས་མི་ཁྱབ་པའོ། །རྒྱལ་བའི་མཛད་པ་ནི་དུས་ཐམས་ཅད་དུ་ལྷུན་གྱིས་གྲུབ་ཅིང་རྣམ་པར་མི་རྟོག་པར་གདུལ་བྱ་རྣམས་ཀྱིས་བསམ་པ་དང་འཇུག་པའི་ཕྱིར། གནས་འདི་བསམ་གྱིས་མི་ཁྱབ་པའོ། །བྱེ་བྲག་ཏུ་ཁམས་ཀྱི་ངོ་བོ་བཤད་པ་ལ་བཞི་སྟེ། ཁམས་ཀྱི་དོན་མདོར་བསྟན་པ་དང་། དགོངས་དོན་རྒྱས་པར་བཤད་པ་དང་། ངོ་བོ་མི་འགྱུར་ཡང་དྲི་མ་སྦྱོངས་བ་དཔེས་བསྟན་པ་དང་། ཁམས་བསྟན་པའི་དགོས་པའོ། །དང་པོ་ལ། རྡོ་རྗེའི་གནས་བཞིའི་བསྡུས་དོན་དང་སེམས་ཅན་ཐམས་ཅད་ལ་བདེ་གཤེགས་སྙིང་པོ་ཡོད་པའི་གཏན་ཚིག་བཀོད་པ་གཉིས། དང་པོ་ནི། རྟོགས་བྱ་རྟོགས་པ་དེ་ཡི་ནི། །ཡན་ལག་རྟོགས་པར་བྱེད་ཕྱིར་ཏེ། གོ་རིམ་ཅི་བཞིན་གནས་གཅིག་ནི། །དག་རྒྱུ་གསུམ་ནི་རྐྱེན་ཡིན་ནོ། །ཞེས་བྱ་བ་གསུང་སྟེ། །རྟོགས་བྱ་བདེ་གཤེགས་སྙིང་པོ་དང་། རྟོགས་པ་བྱང་ཆུབ་དང་། རྟོགས་པའི་ཡན་ལག་སངས་རྒྱས་ཀྱི་ཡོན་ཏན་དང་། རྟོགས་པར་བྱེད་པའི་ཐབས་འཕྲིན་ལས་ཏེ། རྣམ་པ་བཞི་ལས། གནས་དང་པོ་བདེ་གཤེགས་སྙིང་པོ་ནི་དག་པར་བྱ་རྒྱུ་ཡིན་ལ། གནས་ཕྱི་མ་གསུམ་ནི། དག་པར་བྱེད་པའི་རྐྱེན་ཡིན་ནོ། །གཉིས་པ་ནི། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་བྱ་བ་གསུང་སྟེ། སེམས་ཅན་ཐམས་ཅད་ལ་རྫོགས་སངས་རྒྱས་ཀྱི་ཆོས་སྐུ་འཕྲོ་བ་སྟེ། སེམས་ཉིད་མ་བཅོས་པ་བསྒོམ་པས་ཆོས་སྐུ་མངོན་དུ་འགྱུར་བའི་ཕྱིར་དང་། སེམས་ཅན་གྱི་དེ་བཞིན་ཉིད་དང་། སངས་རྒྱས་ཀྱི་དེ་བཞིན་ཉིད་ལ་དབྱེར་མེད་པའི་ཕྱིར་དང་། སེམས་ཅན་ཐམས་ཅད་ཟག་མེད་སེམས་ཀྱི་ས་བོན་རིགས་ཡོད་པའི་ཕྱིར། དེ་དག་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་ནོ། །དགོངས་དོན་རྒྱས་བཤད་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ངོ་བོ་རྒྱུ་འབྲས་ལས་ལྡན་འཇུག་པ་དང་། གནས་སྐབས་དེ་བཞིན་ཀུན་ཏུ་འགྲོ་བའི་དོན། །རྟག་ཏུ་མི་འགྱུར་ཡོན་ཏན་དབྱེར་མེད་ནི། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། ཞེས་བྱ་བ་གསུང་སྟེ། དོན་རྣམ་པ་བཅུ་ལ་དགོངས་ནས། དེ་ཁོ་ན་ཡེ་ཤེས་དམ་པའི་ཡུལ། དེ་བཞིན་གཤེགས་པའི་ཁམས་རྣམ་པར་དག་པར་བཞག་པར་རིག་པར་བྱའོ། །དོན་རྣམ་པ་བཅུ་གང་ཞེ་ན། འདི་ལྟ་སྟེ། ངོ་བོའི་དོན་དང་། རྒྱུ་ཡི་དོན་དང་། འབྲས་བུའི་དོན་དང་། ལས་ཀྱི་དོན་དང་། ལྡན་པའི་དོན་དང་། འཇུག་པའི་དོན་དང་། གནས་སྐབས་ཀྱིས་རབ་དུ་དབྱེ་བའི་དོན་དང་། ཀུན་ཏུ་འགྲོ་བའི་དོན་དང་། མི་འགྱུར་བའི་དོན་དང་། དབྱེ་བ་མེད་པའི་དོན་ཏོ། །རྒྱས་བཤད་ལ་བརྒྱད། ངོ་བོ་དང་རྒྱུའི་རྒྱས་བཤད། འབྲས་བུ་དང་ལས་ཀྱི་རྒྱས་བཤད། ལྡན་པ་བཤད། འཇུག་པ་བཤད། གནས་སྐབས་བཤད། ཀུན་ཏུ་འགྲོ་བ་བཤད། མི་འགྱུར་བ་བཤད། དབྱེ་བ་མེད་པའི་ཡོན་ཏན་གྱི་དོན་བཤད་པའོ། །དང་པོ་ལ་གཉིས། སྤྱིར་བསྟན་པ་དང་སོ་སོར་བཤད་པའོ། །དང་པོ་ནི། རིན་ཆེན་ནམ་མཁའ་ཆུ་དག་བཞིན། རྟག་ཏུ་རང་བཞིན་ཉོན་མོངས་མེད། །ཆོས་མོས་ལྷག་པའི་ཤེས་རབ་དང་། །ཏིང་འཛིན་སྙིང་རྗེ་ལས་བྱུང་བ། །མཐུ་དང་གཞན་དུ་མི་འགྱུར་དང་། །རླན་པའི་ངོ་བོ་རང་བཞིན་ཕྱིར། །འདི་དག་ཡིད་ནི་ནོར་བུ་མཁའ། །ཆུ་ཡི་ཡོན་ཏན་ཆོས་མཐུན་ཉིད། །ཞེས་བྱ་བ་གསུང་སྟེ། །དེ་བཞིན་གཤེགས་པའི་ཁམས་ནི་ཡིད་བཞིན་གྱི་ནོར་བུ་དང་། ནམ་མཁའ་དང་། ཆུ་རྣམ་པར་དག་པའི་ཡོན་ཏན་དང་། ཆོས་མཐུན་པ་ཉིད་དུ་རིགས་པར་བྱའོ། །དེ་ཡང་ཡིད་བཞིན་གྱི་ནོར་བུ་དང་ཆོས་མཐུན་པ་སྟེ། དེ་རྟོགས་ཤིང་བསྒོམ་པས་བསམ་པའི་དོན་འགྲུབ་པ་སོགས་ནུས་མཐུ་ཕུན་སུམ་ཚོགས་པ་དང་ལྡན་པའི་ཕྱིར། རང་གི་ངོ་བོ་ནམ་མཁའ་དང་ཆོས་མཐུན་ཏེ། རྐྱེན་གྱི་གཞན་དུ་མི་འགྱུར་བའི་ཕྱིར་རོ། །ཆུ་བོ་དང་ཆོས་མཐུན་ཏེ་སེམས་ཅན་ལ་སྙིང་བརྩེ་བའི་རླན་དང་ལྡན་པའི་ཕྱིར་རོ། །དེ་དག་སྤྱིའི་མཚན་ཉིད་ཀྱི་དབང་དུ་བྱས་ན། རྟག་ཏུ་རང་བཞིན་ཉོན་མོངས་པའི་དྲི་མ་མེད་པའི་ཕྱིར་ཡིད་བཞིན་གྱི་ནོར་བུ་དང་། ནམ་མཁའ་དང་། ཆུ་དྲི་མ་མེད་པ་དང་ཆོས་མཐུན་པར་རིག་པར་བྱའོ། །སོ་སོར་བཤད་པ་ལ། སྤང་བྱ་བཞི་ལྡན་གྱི་སེམས་ཅན་བསྟན། སྲིད་ཞིའི་གཉེན་པོ་བཞི་དང་སྦྱར་བ། དེ་རྒྱལ་བའི་སྲས་སུ་འགྱུར་ཚུལ་ལོ། །དང་པོ་ནི། ཆོས་ལ་ཁོང་ཁྲོ་བདག་ལྟ་དང་། །འཁོར་བའི་སྡུག་བསྔལ་གྱིས་འཇིགས་དང་། །སེམས་ཅན་དོན་ལ་ལྟོས་མེད་ཉིད། །འདོད་ཆེན་མུ་སྟེགས་ཉན་ཐོས་དང་། །རང་བྱུང་རྣམས་ཀྱི་སྒྲིབ་རྣམས་བཞི། །ཞེས་བ་བྱ་བ་གསུང་སྟེ། མདོར་བསྡུ་ན། སེམས་ཅན་ཀྱི་ཚོགས་ན། སེམས་ཅན་ཀྱིས་རྣམ་པ་འདི་གསུམ་ཡོད་དེ། སྲིད་པ་འདོད་པ་དང་། སྲིད་པ་དང་བྲལ་བར་འདོད་པ་དང་། དེ་གཉིས་ཀ་མངོན་པར་མི་འདོད་པའོ། །དེ་ལ་སྲིད་པ་འདོད་པ་ནི་རྣམ་པ་གསུམ་སུ་རིག་པར་བྱ་སྟེ། ཐར་པའི་ལམ་དང་། ཞི་འདྲེས་པ་ཡོངས་སུ་མྱ་ངན་ལས་མི་འདའ་བའི་རིགས་ཅན་གྱི་སེམས་ཅན་འཁོར་བ་ཉིད་འདོད་ཀྱིས། མྱ་ངན་ལས་འདས་བའི་མི་འདོད་པ་གང་ཡིན་པ་དང་། ཆོས་འདི་པ་ནང་པ་སངས་རྒྱས་པ་ལ་གཏོག་ཀྱང་ཉན་ཐོས་སེན་དྷ་པ་ལྟ་བུ་ཐེག་པ་ཆེན་པོའི་ཆོས་ལ་སྡང་བ་དག་གོ །དེ་ལ་སྲིད་པ་དང་བྲལ་བར་འདོད་པ་ནི་རྣམ་པ་གཉིས་ཏེ། ཐབས་མ་ཡིན་པ་ལ་ཞུགས་པ་དང་། ཐབས་ལ་ཞུགས་པའོ། །དེ་ལ་ཐབས་མ་ཡིན་པ་ལ་ཞུགས་པ་ཡང་རྣམ་པ་གསུམ་སྟེ། འདི་ལས་ཕྱི་རོལ་དུ་གྱུར་པ་ཙ་ར་ཀ་དང་། ཀུན་ཏུ་རྒྱུ་དང་། གཅེར་བུ་པ་ལ་སོགས་པ་རྣམས་པ་དུ་མའི་མུ་སྟེགས་པ་མང་པོ་དང་། དེ་དག་དང་མཐུན་པར་སྤྱོད་པ་ཆོས་འདི་པ་ཉིད་ལ་དད་པ་ཡོད་ཀྱང་ངེས་པར་བཟུང་བས་འཛིན་པ་སྟེ། དེ་དག་ཀྱང་གང་ཞེ་ན། དོན་དམ་པ་ལ་མི་མོས་པ་གང་ཟག་ཏུ་ལྟ་བ་དང་། མངོན་པའི་ང་རྒྱལ་ཅན་སྟོང་པ་ཉིད་དུ་བློས་བྱས་མཚན་འཛིན་གྱི་ལྟ་བའོ། །ཐབས་ལ་ཞུགས་པའང་རྣམ་པ་གཉིས། ཉན་ཐོས་ཀྱི་ཐེག་པ་དང་། མཐུན་པར་ཞུགས་པ་དང་། རང་སངས་རྒྱས་ཀྱི་ཐེག་པ་དང་མཐུན་པར་ཞུགས་པའོ། །དེ་གཉིས་ཀ་མངོན་པར་མི་འདོད་པ་ནི་ཐེག་པ་ཆེན་པོ་ལ་ཡང་དག་པར་གནས་པ་མཆོག་ཏུ་དབང་པོ་རྣོན་པོའི་སེམས་ཅན་ཏེ། གང་དག་འདོད་ཆེན་པ་བཞིན་དུ་འཁོར་བ་ཡང་མི་འདོད་ཅིང་། མུ་སྟེགས་པ་ལ་སོགས་པ་ལྟར་ཐབས་མ་ཡིན་པ་ལ་ཞུགས་པ་ཡང་མ་ཡིན་ལ། ཉན་ཐོས་དང་རང་སངས་རྒྱས་ལྟར་ཐབས་ཉེ་ཚེ་བ་ལ་ཞུགས་པའང་མ་ཡིན་ཏེ། འོན་ཀྱང་འཁོར་བ་དང་མྱ་ངན་ལ་འདས་པ་མཉམ་པ་ཉིད་རྟོགས་པའི་ལམ་དུ་ཞུགས་པ་མི་གནས་པའི་མྱ་ངན་ལས་འདས་པ་ལ་བརྟེན་པའི་བསམ་པ་ཅན། ཉོན་མོངས་པ་མེད་པའི་འཁོར་ལ་བརྟེན་པའི་སྦྱོར་བ་ཅན། སྙིང་རྗེ་དང་ལྷག་པའི་བསམ་པ་བརྟན་པས་རབ་ཏུ་གནས་པ་རྩ་བ་ཡོངས་སུ་དག་པར་གྱུར་པ་ཡིན་ནོ། །དེ་ལ་སེམས་ཅན་གང་དག་སྲིད་པ་འདོད་པ་འདོད་ཆེན་པ་དང་དེར་ངེས་པར་ལྷུང་བའི་ཆོས་འདི་པ་ཉིད་དེ། དེ་གཉིས་ནི་ལོག་པ་ཉིད་དུ་ངེས་པའི་སེམས་ཅན་གྱིས་ཕུང་པོ་ཞེས་བྱའོ། །གང་དག་སྲིད་པ་དང་བྲལ་འདོད་ཀྱང་ཐབས་མ་ཡིན་པ་ལ་ཞུགས་པ་དེ་དག་ནི་མ་ངེས་པའི་སེམས་ཅན་ཀྱི་ཕུང་པོ་ཞེས་བྱའོ། །གང་དག་སྲིད་པ་དང་བྲལ་བ་འདོད་པ་ཐབས་ལ་ཞུགས་པ་དང་། དེ་གཉིས་ཀ་མངོན་པར་མི་འདོད་པ་མཉམ་པ་ཉིད་ཐོབ་པའི་ལམ་དུ་ཞུགས་པ་དེ་དག་ནི་ཡང་དག་པ་ཉིད་དུ་ངེས་པའི་སེམས་ཅན་གྱི་ཕུང་པོ་ཞེས་བྱའོ། །དེ་རྣམས་ལས་གཞན། འདོད་ཆེན་པ་དང་། མུ་སྟེགས་པ་དང་། ཉན་ཐོས་པ་དང་། རང་སངས་རྒྱས་ཏེ། དེ་དག་ལ་ནི་དེ་བཞིན་གཤེགས་པའི་ཁམས་མི་རྟོགས་པ་དང་། མངོན་སུམ་དུ་བྱེད་པར་མི་འགྱུར་བའི་སྒྲིབ་པ་འདི་བཞི་ཡོད་དེ། འདི་ལྟ་སྟེ། བདག་རྟག་པ་གཅིག་པུ་རང་དབང་ཅན་དུ་ལྟ་བ་དང་། འཁོར་བའི་སྡུག་བསྔལ་འཇིག་ནས་སེམས་ཅན་ཀྱི་དོན་དུ་སྲིད་པར་སྐྱེ་བ་མི་ལེན་པ་དང་། སེམས་ཅན་ཀྱི་དོན་ལ་ལྟོས་པ་མེད་པར་རྒྱབ་ཀྱིས་ཕྱོགས་པའོ། །དེ་དག་ཀྱང་འདོད་ཆེན་པ་དང་། མུ་སྟེགས་པ་དང་། ཉན་ཐོས་དང་། རང་རྒྱལ་རྣམས་ལ་གོ་རིམ་བཞིན་དུ་ཡོད་པའི་སྒྲིབ་པ་བཞིའོ། །གཉིས་པ་སྲིད་ཞིའི་གཉེན་པོ་དང་སྦྱར་བ་ནི། དག་རྒྱུ་ལྷག་པར་མོས་པ་ལ་སོགས་པའི་ཆོས་ནི་རྣམ་བཞི་ཉིད། ཞེས་བྱ་བ་སྟེ། སྒྲིབ་པ་དང་པོའི་གཉེན་པོ་ནི། ཐེག་པ་ཆེན་པོའི་ཆོས་ལ་མོས་པ་སྒོམ་པའོ། །གཉིས་པའི་གཉེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པའོ། །གསུམ་པའི་གཉེན་པོ་ནི་ནམ་མཁའི་མཛོད་ལ་སོགས་པའི་ཏིང་ངེ་འཛིན་ནི་བསྒོམ་པའོ། །བཞི་པའི་གཉེན་པོ་ནི་སྙིང་རྗེ་ཆེན་པོ་བསྒོམ་པའོ། །གསུམ་པ་སྟེ། རྒྱལ་བའི་སྲས་སུ་འགྱུར་ཚུལ་ནི། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་བསམ་གཏན་གྱི། བདེ་བའི་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་བྱ་བ་གསུང་སྟེ། དེའང་ཐེག་པ་ཆེན་པོ་ལ་མོས་པ་ནི། མངལ་གྱི་ས་བོན་དང་མཚུངས་སོ། །བདག་མེད་རྟོགས་པའི་ཤེས་རབ་ནི་བསྐྱེད་པར་བྱེད་པའི་མ་དང་མཚུངས་སོ། །བསམ་གཏན་གྱི་བདེ་བ་ནི་མ་ཡི་མངལ་དང་མཚུངས་སོ། །སྙིང་རྗེ་ཆེན་པོ་ནི་ནར་སོན་པར་བྱེད་པའི་མ་མ་དང་མཚུངས་སོ། །གཉིས་པ་འབྲས་བུ་དང་ལས་ཀྱི་རྒྱས་བཤད་ལ། སྤྱིར་བསྟན་པ་དང་བྱེ་བྲག་དུ་བཤད་པ་གཉིས། དེ་ལ་དང་པོ་ནི། གཙང་བདག་བདེ་དང་རྟག་ཉིད་ཀྱིས། །ཡོན་ཏན་ཕ་རོལ་ཕྱིན་པ་འབྲས། །སྡུག་བསྔལ་ཡིད་འབྱུང་ཞི་ཐོབ་པར། །འདུན་དང་སྨོན་པའི་ལས་ཅན་ནོ། །ཞེས་བྱ་བ་གསུང་སྟེ། དེ་ཡང་གཙང་བ་དམ་པ་དང་། བདག་དམ་པ་དང་། བདེ་བ་དམ་པ་དང་། རྟག་པ་དམ་པའི་ཡོན་ཏན་ཀྱིས་ཕ་རོལ་ཏུ་ཕྱིན་པ་བཞི་ནི། སྒྲིབ་པ་སྦྱོང་ནས་དག་པའི་འབྲས་བུའོ། །བདེ་བར་གཤེགས་པའི་རིགས་སམ་ཁམས་ཡོད་པའི་བྱེད་ལས་ནི། འཁོར་བའི་སྡུག་བསྔལ་གྱིས་སུན་ནས་ཡིད་དབྱུང་བ་དང་། ཞི་བ་མྱ་ངན་ལ་འདས་པ་ཐོབ་པར་འདོད་པའི་འདུན་པ་དང་། དེ་ཐོབ་པར་སྨོན་པའོ། །བྱེ་བྲག་ཏུ་བཤད་པ་ལ། འབྲས་བུ་བཤད་པ་དང་ལས་བཤད་པའོ། །དང་པོ་འབྲས་བུ་ལ། མཚན་ཉིད་བཞི་ལྡན་བསྟན་པ་དང་། དེ་རྒྱུ་གཉིས་ཀྱིས་བཤད་པ་དང་། མཐའ་གཉིས་སྤངས་ཚུལ་ལོ། །དེ་ལ་དང་པོ་ནི། འདི་དག་འབྲས་ནི་མདོར་བསྡུས་ན། །ཆོས་ཀྱི་སྐུ་ལ་ཕྱིན་ཅི་ལོག རྣམ་པ་བཞི་ལས་བཟློག་པ་ཡི། །གཉེན་པོས་རབ་ཏུ་ཕྱེ་བ་ཉིད། །ཞེས་བྱ་བ་གསུང་སྟེ། མོས་པ་ལ་སོགས་པ་དེ་བཞིན་གཤེགས་པའི་ཁམས་རྣམ་པར་དག་པའི་རྒྱུར་བཤད་པའི་ཆོས་བཞི་པོ་གང་ཡིན་པ་དེ་དག་གི་འབྲས་བུ་ནི་མདོར་བསྡུ་ན། གོ་རིམ་ཅི་ལྟ་བ་བཞིན་དུ་ཕྱིན་ཅི་ལོག་རྣམ་པ་བཞི་ལས་བཟློག་པའི་གཉེན་པོར་དེ་བཞིན་གཤེགས་པའི་ཆོས་ཀྱི་སྐུ་ལ་ཡོན་ཏན་གྱི་ཕ་རོལ་ཏུ་ཕྱིན་པ་རྣམ་པ་བཞིར་ལྟའོ། །དེ་ལ་འདིར་ཕྱིན་ཅི་ལོག་བཞི་ནི། ཆོས་ཀྱི་སྐུ་གཙང་བ་ལ། མི་གཙང་བར་ལྟ་བ་དང་། བདག་དམ་པ་ལ་བདག་མེད་པར་ལྟ་བ་དང་། བདེ་བ་ལ་སྡུག་བསྔལ་བར་ལྟ་བ་དང་། རྟག་པ་ལ་མི་རྟག་པར་བལྟ་བའོ། །དེ་བཞི་ལས་བཟློག་པའི་གཉེན་པོ་ཕྱིན་ཅི་མ་ལོག་པ་བཞི་ནི། ཆོས་ཀྱིས་སྐུ་རྟག་པར་འདུ་ཤེས་པ་དང་། བདེ་བར་འདུ་ཤེས་པ་དང་། བདག་དུ་འདུ་ཤེས་པ་དང་། གཙང་བར་འདུ་ཤེས་པ་རྣམས་ཡིན་ནོ། །དེའི་ཕྱིར་དེ་བཞིན་གཤེགས་པའི་ཆོས་ཀྱི་སྐུ་གཙང་བདག་བདེ་དང་རྟག་པའི་ཕ་རོལ་ཏུ་ཕྱིན་པ་མངོན་སུམ་དུ་མཐོང་བ་གང་ཡིན་པ་དེ་ནི་གོང་དུ་བཤད་པའི་ཆོས་པ་ལ་སོགས་པ་དག་རྒྱུ་བཞིའི་འབྲས་བུ་ཡིན་པ་རིགས་པར་བྱའོ། །གང་དག་འཁྲུལ་སྣང་གློ་བུར་བའི་འཁོར་བ་ལ་གཙང་བདག བདེ་དང་རྟག་པར་ལྟ་བ་ནི་ཕྱིན་ཅི་ལོག་ཏུ་ཤེས་པར་བྱའོ། །གཉིས་པ་དེ་རྒྱུ་གཉིས་ཀྱི་བཤད་པ་ནི། འདི་ནི་རང་བཞིན་དག་ཕྱིར་དང་། །བག་ཆགས་སྤང་ཕྱིར་གཙང་བ་ཡིན། བདག་དང་བདག་མེད་སྤྲོས་པ་དག །ཉེ་བར་ཞི་བ་དམ་པའི་བདག །ཡིད་ཀྱིས་རང་བཞིན་ཕུང་པོ་དང་། །དེ་རྒྱུ་ལོག་ཕྱིར་བདེ་བ་ཉིད། འཁོར་བ་དང་ནི་མྱ་ངན་འདས། མཉམ་པ་ཉིད་དུ་རྟོགས་ཕྱིར་རྟག །ཞེས་བྱ་གསུང་སྟེ། མདོར་བསྡུ་ན་རྒྱུ་གཉིས་ཀྱིས་ནི། དེ་བཞིན་གཤེགས་པའི་ཆོས་ཀྱི་སྐུ་གཙང་བའི་ཕ་རོལ་དུ་ཕྱིན་པར་རིག་པར་བྱ་སྟེ། སྤྱིའི་མཚན་ཉིད་རང་བཞིན་ཀྱི་ཡོངས་སུ་དག་པ་དང་། ཁྱད་པར་གྱིས་མཚན་ཉིད་དྲི་མ་མེད་པས་ཡོངས་སུ་དག་པས་སོ། །རྒྱུ་རྣམ་པ་གཉིས་ཀྱིས་བདག་གིས་ཕ་རོལ་ཕྱིན་པར་རིགས་པར་བྱའོ་སྟེ། མུ་སྟེགས་ཀྱི་མཐའ་དང་བྲལ་བས་བདག་གི་སྤྲོས་པ་དང་བྲལ་བའི་ཕྱིར་དང་། ཉན་ཐོས་ཀྱིས་མཐའ་སྤང་བས་བདག་མེད་པའི་སྤྲོས་པ་དང་བྲལ་བའི་ཕྱིར་རོ། །རྒྱུ་རྣམ་པ་གཉིས་ཀྱི་བདེ་བའི་ཕ་རོལ་ཏུ་ཕྱིན་པར་རིག་པར་བྱ་སྟེ། སྡུག་བསྔལ་ཀུན་འབྱུང་བའི་རྣམ་པ་ཐམས་ཅད་སྤང་པས་བག་ཆགས་གི་འཚམས་སྦྱོར་བ་སྤང་བའི་ཕྱིར་དང་། སྡུག་བསྔལ་འགོག་པའི་རྣམ་པ་ཐམས་ཅད་མངོན་དུ་བྱས་པས་ཡིད་ཀྱིས་རང་བཞིན་གྱི་ལུས་འགག་པ་མངོན་དུ་བྱས་པའི་ཕྱིར་རོ། །རྒྱུ་གཉིས་ཀྱི་རྟག་པའི་ཕ་རོལ་ཕྱིན་པར་རིག་པར་བྱ་སྟེ། འཁོར་བ་མི་རྟག་པ་མི་དབྲི་བས་ཆད་པའི་མཐར་མ་ལྷུང་བའི་ཕྱིར་དང་། མྱ་ངན་ལས་འདས་པ་རྟག་པ་མི་སྣོན་པས་རྟག་པའི་མཐར་མ་ལྷུང་བའི་ཕྱིར་རོ། །གསུམ་པ་མཐའ་གཉིས་སྤང་ཚུལ་ནི། བདག་སྲེད་མ་ལུས་ཤེས་རབ་ཀྱིས་བཅད་དེ། སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བསྟན་ནས། །འཕགས་པ་འཁོར་བའི་མྱ་ངན་འདས་མི་འགྱུར། །ཞེས་བྱ་བ་གསུང་སྟེ། ཐེག་ཆེན་འཕགས་པ་རྣམས་ནི། བདག་ཏུ་འཛིན་པའི་བདག་སྲེད་མ་ལུས་པ་བདག་མེད་རྟོགས་པའི་ཤེས་རབ་ཀྱིས་བཅད་པའི་ཕྱིར། སྲིད་པ་གསུམ་དུ་ལས་དང་ཉོན་མོངས་པའི་དབང་གིས་འཁོར་བར་མི་འགྱུར་ལ། སེམས་ཅན་ཐམས་ཅད་ལ་ཕན་པ་འདོད་པའི་སྲེད་པ་དང་ལྡན་པའི་ཕྱིར། ཞི་བ་མྱ་ངན་ལ་འདས་པ་ཕྱོགས་གཅིག་པར་ཡང་མི་འགྱུར་བའོ། །གཉིས་པ་བྱེད་ལས་བསྟན་པ་ནི། གལ་ཏེ་སངས་རྒྱས་ཁམས་མེད་ན། །སྡུག་ལའང་སྐྱོ་བར་མི་འགྱུར་ཞིང་། །མྱ་ངན་འདས་ལ་འདོད་པ་དང་། །དོན་གཉེར་སྨོན་པ་མེད་པར་འགྱུར། །ཞེས་བྱ་བ་གསུང་སྟེ། སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཐེག་པ་ཆེན་པོའི་རིགས་མེད་ན་འཁོར་བའི་སྡུག་བསྔལ་མཐོང་ཡང་སྐྱོ་བ་མི་འགྱུར་བ་དང་། མྱ་ངན་ལ་འདས་པའི་ཕན་ཡོན་མཐོང་ཡང་། དེ་ལ་དོན་དུ་གཉེར་བ་དང་སྨོན་པའི་བློ་མི་སྐྱེ་བར་འགྱུར་རོ། །དེའི་ཕྱིར་ལོག་པ་ཉིད་དུ་ངེས་པའི་སེམས་ཅན་རྣམས་ལའང་འཁོར་བ་ལ་སྐྱོ་བ་དང་། ཐར་པ་ལ་འདོད་པ་སྐྱེ་བ་ནི་ཁམས་བདེ་གཤེགས་སྙིང་པོས་བྱེད་ལས་སུ་རིག་པར་བྱའོ། །དེའི་ཕྱིར་སྲིད་དང་མྱ་ངན་འདས་ལ་དེ། །སྡུག་བདེ་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་ཕྱིར་དེ། །རིགས་མེད་དག་ལ་མེད་ཕྱིར་རོ། །ཞེས་བྱ་བ་གསུང་སྟེ། འདི་སྐད་དུ་ལོག་སྲེད་ཅན་ཡོངས་སུ་མྱ་ངན་ལས་མི་འདའ་བའི་ཆོས་ཅན་ཞེས་གསུང་པ་གང་ཡིན་པ་དེ་ནི། ཐེག་པ་ཆེན་པོའི་ཆོས་ལ་སྡང་བ་ལོག་སྲེད་ཅན་ཉིད་ཀྱི་རྒྱུ་ཡིན་པའི་ཕྱིར། ཐེག་པ་ཆེན་པོའི་ཆོས་ལ་སྡང་བ་བཟློག་པའི་དོན་དུ། དུས་གཞན་ལས་དགོངས་ནས་གསུང་པ་ཡིན་ནོ། །སེམས་ཅན་ཐམས་ཅད་ལ་རང་བཞིན་ཀྱི་རྣམ་པར་དག་པའི་རིགས་ཡོད་པའི་ཕྱིར། འགལ་ཡང་གཏན་རྣམ་པར་དག་པར་མི་འགྱུར་བ་ནི་འོས་པ་མ་ཡིན་ནོ། །གསུམ་པ་ལྡན་པ་ལ། མདོར་བསྟན་པ་དང་། རྒྱས་པར་བཤད་པ་གཉིས། དང་པོ་མདོར་བསྟན་པ་ནི། རྒྱ་མཚོ་ཆེ་བཞིན་དཔག་མེད་པ། །ཡོན་ཏན་རིན་ཆེན་མི་ཟད་གནས། །དབྱེར་མེད་ཡོན་ཏན་ལྡན་པ་ཡི། །ངོ་བོ་ཉིད་ཕྱིར་མར་མེ་བཞིན། །ཞེས་པའོ། །གཉིས་པ་རྒྱས་བཤད་ནི། ཆོས་སྐུ་རྒྱལ་བའི་ཡེ་ཤེས་དང་། །ཐུགས་རྗེས་ཁམས་ནི་བསྡུས་པའི་ཕྱིར། །སྣོད་དང་རིན་ཆེན་ཆུ་ཡི་འདི། །རྒྱ་མཚོ་དང་ནི་མཚུངས་པར་བསྟན། །དྲི་མེད་གནས་ལ་མངོན་ཤེས་དང་། །ཡེ་ཤེས་དྲི་མེད་དེ་ཉིད་དང་། །རྣམ་དབྱེར་མེད་ཕྱིར་མར་མེ་ཡི། །སྣང་དང་དྲོད་མདོག་ཆོས་མཚུངས་ཅན། །ཞེས་བྱ་བ་གསུང་སྟེ། དེ་ཡང་ལྡན་པ་ཞེས་བྱ་བའི་དོན་ལ། ཁམས་བདེ་བར་གཤེགས་པའི་སྙིང་པོ་རྒྱུ་དང་ལྡན་པའི་དབང་དུ་བྱས་པ་དང་། འབྲས་བུ་དང་ལྡན་པའི་དབང་དུ་བྱས་པ་གཉིས། དང་པོ་རྒྱུ་དང་ལྡན་པ་ནི། རྒྱ་མཚོ་ཆེ་བཞིན་ཞེས་སོགས་ཚིག་རྐང་གཉིས་ཀྱི་མདོར་བསྟན་ནས། ཆོས་སྐུ་རྒྱལ་བའི་ཡེ་ཤེས་དང་། ཞེས་སོགས་ཚིག་རྐང་བཞིའི་རྒྱས་པར་བཤད་པ་སྟེ། གོ་རིམ་ཅི་ལྟ་བར་གནས་གསུམ་པོ་རྣམས་རྒྱ་མཚོའི་ཆེན་པོ་དང་ཆོས་མཐུན་པ་རྣམ་པ་གསུམ་གྱིས་ནི། དེ་བཞིན་གཤེགས་པའི་ཁམས་རྒྱུ་དང་ལྡན་པའི་དབང་དུ་བྱས་ཏེ་ལྡན་པའི་དོན་དུ་རིག་པར་བྱའོ། །གནས་གསུམ་པོ་གང་ཞེ་ན། འདི་ལྟ་སྟེ། ཆོས་ཀྱི་སྐུ་རྣམ་པར་དག་པའི་རྒྱུ་དང་། སངས་རྒྱས་ཀྱི་ཡེ་ཤེས་ཡང་དག་པར་འགྲུབ་པའི་རྒྱུ་དང་། དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་པའི་རྒྱུའོ། །དེ་ལ་ཆོས་ཀྱི་སྐུ་རྣམ་པར་དག་པའི་རྒྱུ་ནི་ཐེག་པ་ཆེན་པོ་ལ་མོས་པ་སྒོམ་པར་བལྟའོ། །སངས་རྒྱས་ཀྱི་ཡེ་ཤེས་ཐོབ་པའི་རྒྱུ་ནི་ཤེས་རབ་དང་། ཏིང་ངེ་འཛིན་གྱི་སྒོ་སྒོམ་པའོ། །དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་པའི་རྒྱུ་ནི། བྱང་ཆུབ་སེམས་དཔའི་སྙིང་རྗེ་སྒོམ་པའོ། །དེ་ལ་ཐེག་པ་ཆེན་པོའི་ཆོས་ལ་མོས་པ་སྒོམ་པ་ནི། སྣོད་དང་ཆོས་མཐུན་པ་སྟེ། དཔག་ཏུ་མེད་པ། ཟད་མི་ཤེས་པའི་ཤེས་རབ་དང་ཏིང་ངེ་འཛིན་གྱི་རིན་པོ་ཆེ་དང་ཐུགས་རྗེའི་ཆུ་རྣམས་དེར་འདུ་བའི་ཕྱིར་རོ། །ཤེས་རབ་དང་ཏིང་ངེ་འཛིན་གྱི་སྒོ་བསྒོམ་པ་ནི། རིན་པོ་ཆེ་དང་ཆོས་མཐུན་པ་སྟེ། དེ་ནི་རྣམ་པར་རྟོགས་པ་མེད་པའི་ཕྱིར་རོ། །མཐུ་བསམ་གྱིས་མི་ཁྱབ་པའི་ཡོན་ཏན་དང་ལྡན་པའི་ཕྱིར་རོ། །བྱང་ཆུབ་སེམས་དཔའི་སྙིང་རྗེ་སྒོམ་པ་ནི། ཆུ་དང་ཆོས་མཐུན་པ་སྟེ། དེ་ནི་འགྲོ་བ་ཐམས་ཅད་ལ་མཆོག་ཏུ་བརླན་པའི་རང་བཞིན་གྱིས་རོ་གཅིག་པ་དང་ལྡན་པའི་ཕྱིར་རོ། །ཆོས་གསུམ་པོ་དེ་དག་རྒྱུ་གསུམ་པོ་དེ་དང་། འབྲེལ་བ་དང་ལྡན་པ་ནི་ལྡན་པ་ཞེས་བརྗོད་དོ། །གཉིས་པ་འབྲས་བུ་དང་ལྡན་པ་ནི། དབྱེར་མེད་ཡོན་ཏན་དང་ལྡན་པའི། །ངོ་བོ་ཉིད་ཕྱིར་མར་མེ་བཞིན། །ཞེས་མདོར་བསྟན་ནས། དྲི་མེད་གནས་ལ་མངོན་ཤེས་དང་། །ཞེས་སོགས་རྒྱས་པ་བཤད་པ་སྟེ། གོ་རིམ་ཅི་ལྟ་བར་གནས་གསུམ་པོ་རྣམས་ཀྱི་མར་མེ་དང་ཆོས་མཐུན་པ་རྣམ་པ་གསུམ་གྱིས་ནི། དེ་བཞིན་གཤེགས་པའི་ཁམས་འབྲས་བུ་དང་ལྡན་པའི་དབང་དུ་བྱས་ཏེ། ལྡན་པའི་དོན་དུ་རིགས་པར་བྱའོ། །གནས་གསུམ་གང་ཞེ་ན། འདི་ལྟ་སྟེ། མངོན་པར་ཤེས་པ་དང་། ཟག་པ་ཟད་པའི་ཡེ་ཤེས་དང་། ཟག་པ་ཟད་པའོ། །དེ་ལ་མངོན་པར་ཤེས་པ་ལྔ་ནི་སྣང་བ་དང་ཆོས་མཚུངས་པ་སྟེ། དེ་དག་ནི་དོན་ཉམས་སུ་མྱོང་བའི་མི་མཐུན་པའི་ཕྱོགས་ཀྱི་མུན་པ་འཇོམས་པ་ཉིད་དུ་ཉེ་བར་གནས་པའི་མཚན་ཉིད་ཀྱི་ཕྱིར་རོ། །ཟག་པ་ཟད་པའི་ཡེ་ཤེས་ནི་གྲོལ་བ་དང་ཆོས་མཐུན་པ་སྟེ། དེ་ནི་ལས་དང་ཉོན་མོངས་པའི་བུད་ཤིང་མ་ལུས་པར་བསྲེག་པ་ཉེ་བར་གནས་པའི་མཚན་ཉིད་ཀྱི་ཕྱིར་རོ། །གནས་ཡོངས་སུ་གྱུར་པ་ཟག་པ་ཟད་པ་ནི། མདོག་དང་ཆོས་མཐུན་པ་སྟེ། དེ་ནི་ཤིན་ཏུ་དྲི་མ་མེད་པའི་རྣམ་པར་དག་པ་འོད་གསལ་བའི་མཚན་ཉིད་ཀྱི་ཕྱིར་རོ། །དེ་ལ་དྲི་མ་མེད་པ་ནི་ཉོན་མོངས་པའི་སྒྲིབ་པ་སྤངས་པའི་ཕྱིར་རོ། །རྣམ་པར་དག་པ་ནི་ཤེས་བྱའི་སྒྲིབ་པ་སྤངས་པའི་ཕྱིར་རོ། །འོད་གསལ་བ་ནི་དེ་གཉིས་ཀ་གློ་བུར་པ་ཉིད་ཀྱི་རང་བཞིན་ཏེ། དེ་སྤངས་པའི་ཕྱིར་རོ། །ཡང་དག་པར་ཕྱིན་ཅི་མ་ལོག་པའི་སྤྲོས་པ་མེད་པ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱིས་སྟེ། བག་ཆགས་དང་བཅས་པའི་ཉོན་མོངས་པ་དང་། ཤེས་བྱའི་སྒྲིབ་པ་བཅོམ་པའི་ཕྱིར་རོ། །ལྔ་པ་གནས་སྐབས་ལ། མདོར་བསྟན་དང་། རྒྱས་བཤད་གཉིས། དེ་ལ་དང་པོ་མདོར་བསྟན་ནི། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། དེ་བཞིན་གཤེགས་པ་ཞེས་བརྗོད་དོ། །ཞེས་བྱ་བ་གསུང་སྟེ། ཉོན་སྒྲིབ་མ་དག་པའི་སེམས་ཅན་གྱི་གནས་སྐབས་དང་། ཉོན་སྒྲིབ་དག་ལ། ཤེས་སྒྲིབ་མ་དག་པ། བྱང་ཆུབ་སེམས་དཔའི་གནས་སྐབས་དང་། སྒྲིབ་གཉིས་བག་ཆགས་དང་བཅས་པ་སྤངས་པ། ཤིན་ཏུ་རྣམ་དག་དེ་བཞིན་གཤེགས་པའི་གནས་སྐབས་སོ། །གཉིས་པ་རྒྱས་བཤད་ནི། ངོ་བོ་ཉིད་ལ་སོགས་པའི་དོན། །འདི་དྲུག་གིས་ནི་བསྡུས་པ་ཡི། །ཁམས་ནི་གནས་སྐབས་གསུམ་དག་ཏུ། །མིང་གསུམ་གྱིས་ནི་བསྟན་པ་ཉིད། །ཞེས་བྱ་བ་གསུང་སྟེ། ངོ་བོ་ཉིད་དང་། རྒྱུ་དང་། འབྲས་བུ་དང་། བྱེད་ལས་དང་། ཡོན་ཏན་ལྡན་པ་དང་། བློའི་འཇུག་ཚུལ་ཏེ་དོན་དྲུག་གི་སྒོ་ནས་བཤད་པའི་ཟག་པ་མེད་པའི་ཁམས་དེ་ནི། གནས་སྐབས་གསུམ་དུ་མིང་གསུམ་ཀྱི་བསྟན་ཏེ། མ་དག་པའི་གནས་སྐབས་སུ་སེམས་ཅན་གྱི་ཁམས་དང་། དག་ལ་མ་དག་པའི་གནས་སྐབས་སུ་བྱང་ཆུབ་སེམས་དཔའི་ཁམས་དང་། ཤིན་ཏུ་རྣམ་དག་གི་གནས་སྐབས་སུ་དེ་བཞིན་གཤེགས་པའི་ཁམས་ཞེས་བརྗོད་དོ། །དྲུག་པ་ཀུན་ཏུ་འགྲོ་བ་ལ། ངོ་བོ་དང་། རྣམ་དབྱེ་གཉིས། དང་པོ་ངོ་བོ་ནི། ཅི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་ཏུ་རྗེས་སོང་ལྟར། །སེམས་ཀྱི་རང་བཞིན་དྲི་མེད་དབྱིངས། དེ་བཞིན་ཤིན་ཏུ་འགྲོ་བ་ཉིད། ཞེས་བྱ་བ་གསུང་སྟེ། ཅི་ལྟར་ནམ་མཁའ་ནི། གསེར་དང་། ཟངས་དང་། ས་སོགས་པ་སྣོད་བཟང་ངན་འབྲིང་གསུམ་ཀུན་ཏུ་རྗེས་སུ་སོང་བ་ལྟར། སེམས་ཀྱི་རང་བཞིན་དྲི་མ་མེད་པའི་དབྱིངས་འདི་ཡང་། གང་ཟག་མཆོག་དམན་འབྲིང་གསུམ་ཀུན་ལ་ཁྱབ་པ་ཉིད་དོ། །གཉིས་པ་རྣམ་དབྱེ་ནི། དེ་སྤྱིའི་མཚན་ཉིད་ཉེས་པ་དང་། ཡོན་ཏན་མཐར་ཐུག་ཁྱབ་པ་སྟེ། གཟུགས་ཀྱིས་རྣམ་པ་དམན་པ་དང་། །བར་མ་མཆོག་ལ་ནམ་མཁའ་བཞིན། ཞེས་བྱ་བ་གསུང་སྟེ། སོ་སོའི་སྐྱེ་བོ་དང་། འཕགས་པ་དང་། ཡང་དག་པར་རྫོགས་པའི་སངས་རྒྱས་རྣམས་ཀྱིས་སེམས་ཀྱི་རང་བཞིན་རྣམ་པར་མི་རྟོག་པ་གང་ཡིན་པ་དེ་ནི། སྤྱིའི་མཚན་ཉིད་ཡིན་པའི་ཕྱིར། ཉེས་པ་དང་། ཡོན་ཏན་དང་། ཡོན་ཏན་རྣམ་པར་དག་པ་མཐར་ཐུག་པའི་གནས་སྐབས་གསུམ་ཀར་ཡང་རྗེས་སུ་སོང་ལ། རྗེས་སུ་འཇུག་པ། མཚུངས་པ། དུས་ཐམས་ཅད་དུ་ཁྱད་པར་མེད་པར་གྱུར་པ་སྟེ། གོ་རིམ་ཅི་ལྟ་བ་བཞིན་ས་དང་ཟངས་དང་གསེར་གྱི་སྣོད་དང་ནམ་མཁའ་བཞིན་ནོ། །དེ་ཉིད་ཀྱི་ཕྱིར་གནས་སྐབས་བསྟན་པའི་དེ་མ་ཐག་ཏུ། ཤཱ་རིའི་བུ་དེའི་ཕྱིར་ན། སེམས་ཅན་གྱི་ཁམས་གཞན་ལ་ཆོས་ཀྱི་སྐུ་ཡང་གཞན་པ་ནི་མ་ཡིན་ཏེ། སེམས་ཅན་ཁམས་ཉིད་ཆོས་ཀྱི་སྐུ། །ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ། །འདི་ནི་དོན་གྱི་གཉིས་སུ་མེད་དེ། ཡི་གེ་ཙམ་ཐ་དད་པ་ཡིན་ནོ། །བདུན་པ་མི་འགྱུར་བའི་དོན་ལ། མདོར་བསྟན་པ་དང་། རྒྱས་པར་བཤད་པ་གཉིས། མདོར་བསྟན་ནི། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་ཉིད་ལྡན་ཕྱིར། །ཅི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་བྱ་བ་གསུང་སྟེ། ཆགས་སོགས་ཉེས་པ་རྣམས་ནི་བློ་བུར་བ་རྨི་ལམ་དང་སྒྱུ་མ་ལྟ་བུ་ཡིན་ཞིང་། སྟོབས་སོགས་ཡོན་ཏན་རྣམས་ནི། གདོད་མ་ནས་སེམས་ཀྱི་རང་བཞིན་ཉིད་དུ་ལྡན་པས། སེམས་ཉིད་ཀྱི་དབྱིངས་ནི། ཅི་ལྟར་སྔར་བཞིན་ཕྱིས་ཀྱང་དེ་བཞིན་དུ་འགྱུར་བ་མེད་པ་ཉིད་དོ། །རྒྱས་བཤད་ལ། མ་དག་པའི་གནས་སྐབས་དང་། མ་དག་ལ་དག་པའི་གནས་སྐབས་དང་། ཤིན་ཏུ་རྣམ་དག་གི་གནས་སྐབས་སུ་མི་འགྱུར་བའི་ཚུལ་གསུམ་མོ། །དང་པོ་མ་དག་པའི་གནས་སྐབས་ལ་བཞི། དྲི་མས་མ་གོས་པ་དང་། སྐྱེ་འཇིག་སྣང་བ་དང་། འཇིག་པས་མི་གནོད་པ་དང་། རྟེན་ཅིང་འབྱུང་བ་རྒྱས་བཤད་དོ། །དང་པོ་དྲི་མས་མ་གོས་པ་ནི། ཅི་ལྟར་ནམ་མཁའ་ཀུན་སོང་ལ། །ཕྲ་ཕྱིར་ཉེ་བར་གོས་པ་མེད། །དེ་བཞིན་སེམས་ཅན་ཐམས་ཅད་ལ། །གནས་འདི་ཉེ་བར་ཡིན་པའི་ཕྱིར་རོ། །དེ་ལྟར་ཟག་པ་མེད་པའི་མངོན་པར་ཤེས་པ་དང་། ཡེ་ཤེས་དང་སྤངས་པས་བསྡུས་པའི་མི་སློབ་པའི་རྒྱུད་ཀྱི་ཆོས་བདུན་པོ་འདི་དག་ཟག་པ་མེད་པའི་དབྱིངས་ན། ཕན་ཚུན་རྣམ་པར་དབྱེ་བ་མེད་པ་ཉིད་སོ་སོ་མ་ཡིན་པ། ཆོས་ཀྱི་དབྱིངས་མཉམ་པ་ཉིད་ཀྱི་ལྡན་པ་ནི་ལྡན་པ་ཞེས་བྱའོ། །བཞི་པ་འཇུག་པ་ལ། དོན་དངོས་དང་། དེའི་རྒྱུ་མཚན་བཤད་པ་གཉིས། དེ་ལ་དང་པོ་དོན་དངོས་ནི། སོ་སོ་སྐྱེས་འཕགས་རྫོགས་སངས་ཀྱིས། །དེ་བཞིན་ཉིད་དབྱེ་འཇུག་པ་ལས། །དེ་ཉིད་གཟིགས་པས་སེམས་ཅན་ལ། །རྒྱལ་བའི་སྙིང་པོ་འདི་བསྟན་ཏོ། །ཞེས་བྱ་བ་གསུང་སྟེ། དེ་ལ་སོ་སོའི་སྐྱེ་བོ་ནི། ཐེག་པ་གསུམ་གྱི་ལམ་ལ་མ་ཞུགས་པ་ནས་བཟུང་སྟེ། ཚོགས་ལམ་པ་དང་སྦྱོར་ལམ་པ་ཕྱིན་ཆད་རྣམས་སོ། །འཕགས་པ་ནི། མཐོང་ལམ་པ་དང་། སྒོམ་ལམ་པ་ལ་སོགས་པ་རྣམས་སོ། །རྫོགས་པའི་སངས་རྒྱས་ནི་ས་བཅུ་ལ། གནས་ནས་སྒྲིབ་གཉིས་བག་ཆགས་དང་བཅས་པ་སྤངས་ཞིང་ཐམས་ཅད་མཁྱེན་པའི་ཡེ་ཤེས་མངོན་དུ་གྱུར་པའོ། །གསུམ་པོ་དེ་དག་རྒྱལ་བའི་སྙིང་པོ་དེ་བཞིན་ཉིད་ལ་འཇུག་ཚུལ་གྱི་དབྱེ་བ་རྣམ་པ་གསུམ་དེ་ཉིད་གཟིགས་པས་གདུལ་བྱ་སེམས་ཅན་རྣམས་ལ་བསྟན་པའོ། །གཉིས་པ་རྒྱུ་མཚན་བཤད་པ་ནི། སོ་སོའི་སྐྱོ་བོ་ཕྱིན་ཅི་ལོག །བདེན་པ་མཐོང་བ་བཟློག་པ་སྟེ། །དེ་བཞིན་གཤེགས་པ་ཅི་ལྟ་བཞིན། །ཕྱིན་ཅི་མ་ལོག་སྤྲོས་མེད་ཉིད། །ཞེས་བྱ་བ་གསུང་སྟེ། དེ་བཞིན་ཉིད་ལ་འཇུག་ཚུལ་གསུམ་གང་ཞེ་ན། འདི་ལྟ་སྟེ། ཕྱིན་ཅི་ལོག་པ་དང་། ཕྱིན་ཅི་མ་ལོག་པ་དང་། ཡང་དག་པར་ཕྱིན་ཅི་མ་ལོག་པར་སྤྲོས་པ་མེད་པ་སྟེ། གོ་རིམ་བཞིན་ནོ། །དེ་ལ་ཕྱིན་ཅི་ལོག་ནི་བྱིས་པ་རྣམས་ཀྱི་སྟེ། འདུ་ཤེས་དང་། སེམས་དང་། ལྟ་བ་ཕྱིན་ཅི་ལོག་པའི་ཕྱིར་རོ། །བཟློག་པ་ཕྱིན་ཅི་མ་ལོག་པ་ནི། །འཕགས་པ་རྣམས་ཀྱི་གོས་པ་མེད། །ཞེས་པའོ། །གཉིས་པ་སྐྱེ་འཇིག་སྣང་བ་ནི། ཅི་ལྟ་འཇིག་རྟེན་ཐམས་ཅད་དུ། །ནམ་མཁའ་ལ་ནི་སྐྱེ་ཞིང་འཇིགས། །དེ་བཞིན་འདུས་མ་བྱས་དབྱིངས་ལ། །དབང་པོ་རྣམས་ནི་སྐྱེ་ཞིང་འཇིག །ཞེས་པའོ། །གསུམ་པ་འཇིགས་པས་མི་གནོད་པ་ནི། ཅི་ལྟར་ནམ་མཁའ་མེ་རྣམས་ཀྱི། །སྔོན་ཆད་ནམ་ཡང་འཚིག་པ་མེད། །དེ་བཞིན་འདི་ནི་འཆི་བ་དང་། །ན་དང་རྒ་བའི་མེས་མི་འཚིག །ཞེས་པ་ལ། མེ་ནི་དུས་མཐའ་བསྐལ་པ་འཇིག་པའི་མེ་དང་། མནར་མེད་དམྱལ་བའི་མེ་དང་། ཐ་མལ་པ་བུད་ཤིང་ལས་བྱུང་བའི་མེ་གསུམ་མོ། །སེམས་ཀྱི་དབྱིངས་འདི་ནི། རྒས་པ་དང་། ན་བ་དང་། འཆི་བ་གསུམ་གྱིས་མི་འཇིག་ཤིང་འགྱུར་བ་མེད་པའོ། །བཞི་པ་རྟེན་ཅིང་འབྲེལ་བར་འབྱུང་བ་རྒྱས་བཤད་ལ། །དེས་བསྟན་པ་དང་། དོན་བསྟན་པ་དང་། དཔེ་དོན་སྦྱར་ཏེ་བཤད་པ་དང་། སྐྱེ་བའི་ཚུལ་བསྟན་པ་དང་། ངོ་བོ་སྐྱེ་འགག་མེད་པ་བཤད་པ་དང་། དེ་ལ་དྲི་མས་དག་པ་བཤད་པ་དང་། སྐྱེ་འཇིག་བྲལ་བའི་ཚུལ་བསྡུ་བ་དང་བདུན། དང་པོ་དཔེ་བསྟན་པ་ནི། ས་ནི་ཆུ་ལ་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །སའི་ཁམས་ལ་གནས་མ་ཡིན། །ཞེས་པའོ། །གཉིས་པ་དོན་བསྟན་པ་ནི། དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །ཐམས་ཅད་ལ་ཡང་གནས་པ་མེད། །ཞེས་པའོ། །གསུམ་པ་དཔེ་དོན་སྦྱར་ཏེ་བཤད་པ་ནི། ས་དང་འདྲ་བར་ཕུང་པོ་དང་། །སྐྱེ་མཆེད་ཁམས་རྣམས་ཤེས་པར་བྱ། །ཆུ་ཁམས་དང་འདྲ་ལུས་ཅན་གྱི། །ལས་དང་ཉོན་མོངས་ཤེས་བྱ་སྟེ། །ཚུལ་བཞིན་མ་ཡིན་ཡིད་བྱེད་ནི། །རླུང་གི་ཁམས་དང་འདྲ་བར་ལྟ། །རང་བཞིན་ནམ་མཁའི་ཁམས་བཞིན་དུ།། དེ་གཞིའི་ཅན་མིན་གནས་པ་མེད། །ཞེས་པའོ། །བཞི་པ་སྐྱེ་བའི་ཚུལ་བསྟན་པ་ནི། ཚུལ་བཞིན་མ་ཡིན་ཡིད་བྱེད་ནི། །སེམས་ཀྱིས་རང་བཞིན་ལ་གནས་ཏེ། །ཚུལ་བཞིན་མ་ཡིན་ཡིད་བྱེད་ཀྱིས། ལས་དང་ཉོན་མོངས་རབ་ཏུ་བསྐྱེད། །ལས་དང་ཉོན་མོངས་ཆུ་ལས་ནི། །ཕུང་པོ་སྐྱེ་མཆེད་ཁམས་རྣམས་འབྱུང་། དེ་འཇིག་པ་དང་ཆགས་ལ་ལྟར། །སྐྱེ་དང་འཇིག་པར་འགྱུར་བ་ཡིན། །ཞེས་པའོ། །ལྔ་པ་ངོ་བོ་སྐྱེ་དགག་མེད་པ་བཤད་པ་ནི། སེམས་ཀྱི་རང་བཞིན་ནམ་མཁའ་ཡི། ཁམས་ལྟར་རྒྱུ་མེད་རྐྱེན་མེད་དེ། ཚོགས་པ་མེད་ཅིང་སྐྱེ་བ་དང་། །འཇིག་དང་གནས་པ་ཡོད་མ་ཡིན། །ཞེས་པའོ། །དྲུག་པ་དེ་ལ་དྲི་མས་མ་གོས་པ་བཤད་པ་ནི། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །བློ་བུར་དྲི་མས་དེ་ཉོན་མོངས་མི་འགྱུར། །བདུན་པ་སྐྱེ་འཇིགས་དང་བྲལ་བའི་ཚུལ་བསྡུ་བ་ནི། ལས་དང་ཉོན་མོངས་ཆུ་ཚོགས་ཀྱིས། །འདི་ནི་མངོན་པར་འགྲུབ་མིན་ཏེ། །འཆི་དང་ན་དང་རྒ་བའི་མེ། །མི་བཟད་པས་ཀྱང་འཚིག་མི་འགྱུར། །དུས་མཐའ་དམྱལ་བ་ཐ་མལ་པའི། །མེ་གསུམ་འཆི་དང་ན་བ་དང་། །རྒ་བའི་མེ་གསུམ་རིམ་བཞིན་དུ། །དེ་དང་འདྲ་བར་ཤེས་པར་བྱ། །ཞེས་བྱ་བ་གསུང་སྟེ། །སེམས་ཉིད་ཀྱི་ངོ་བོ་རང་བཞིན་གྱི་འོད་གསལ་བ་འདི་ནི། ལས་དང་ཉོན་མོངས་ཆུའི་ཚོགས་ལྟ་བུ་རྣམས་ཀྱི་འགྲུབ་པ་མ་ཡིན་ཏེ། དང་པོ་རྒྱུའི་མ་སྐྱེད་པའོ། །འཆི་བ་དང་། ན་བ་དང་། རྒས་པའི་མེ་མི་ཟད་པ་རྣམས་ཀྱིས་ཀྱང་མི་འཚིག་སྟེ། ཐ་མ་རྐྱེན་གྱིས་མི་འཇིག་པའོ། །འཆི་བ་དང་ན་བ་དང་། རྒ་བ་རྣམས་ནི་གོ་རིམ་བཞིན་དུ་རྒྱུ་གསུམ་གྱི་མེ་གསུམ་དང་འདྲ་བར་རིག་པར་བྱ་སྟེ། སྐྱེ་མཆེད་དྲུག་བདག་གིས་མེད་པར་བྱེད་པ་དང་། སྡུག་བསྔལ་སྣ་ཚོགས་མྱོང་བར་བྱེད་པ་དང་། འདུ་བྱེད་ཡོངས་སུ་སྨིན་པར་བྱེད་པའི་ཕྱིར་རོ། །དེ་བཞིན་གཤེགས་པའི་ཁམས་མ་དག་པའི་གནས་སྐབས་ན་ཡང་། །འཆི་བ་དང་། ན་བ་དང་། རྒ་བའི་མེ་གསུམ་པོ་འདི་དག་གི་མི་འགྱུར་བ་ཉིད་ལས་བརྩམ་སྟེ། འདི་སྐད་ཅེས་བཅོམ་ལྡན་འདས་འཆི་བ་ཞེས་བགྱི་བ་དང་། སྐྱེ་བ་བྱ་བ་འདི་ནི་འཇིག་རྟེན་གྱི་ཐ་སྙད་དོ། །བཅོམ་ལྡན་འདས་འཆི་བ་ཞེས་བགྱི་བ་འདི་ནི་དབང་པོ་འགག་པའོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་སྐྱེ་བའམ། རྒ་བའམ། འཆི་བའམ། འཆི་འཕོ་བ། མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི། འདུས་བྱས་ཀྱི་ཡུལ་ལས་འདས་པ་སྟེ། རྟག་པ། བརྟན་པ། ཞི་བ། གཡུང་དྲུང་ངོ་ཞེས་གསུངས་སོ། །གཉིས་པ། མ་དག་ལ་དག་པ་བྱང་ཆུབ་སེམས་དཔའི་གནས་སྐབས་ལ་བཞི། བླང་དོར་རྟོགས་པའི་ཚུལ་དང་། ཉོན་མོངས་ཀྱི་སྐྱེ་འཆི་མེད་པའི་དོན་དང་། རྟོགས་པས་རོལ་པ་སྟོན་པ་དང་། དེ་ལས་འཕྲོས་པའི་དོན་བཤད་པའོ། །དང་པོ་བླང་དོར་རྟོགས་པའི་ཚུལ་ནི། སྐྱེ་འཆི་ན་དང་རྒ་བ་ལས་གྲོལ་བ། །འདི་ཡི་རང་བཞིན་དེ་བཞིན་ཉིད་རྟོགས་ཏེ། སྐྱེ་སོགས་འཕོངས་དང་བྲལ་ཡང་དེའི་རྒྱུ། །བློ་ལྡན་འགྲོ་ལ་སྙིང་རྗེ་སྐྱེ་ཕྱིར་བརྟེན། །ཞེས་པའོ། །གཉིས་པ། ཉོན་མོངས་པའི་དབང་གི་སྐྱེ་འཆི་མེད་པའི་དོན་ནི། འཕགས་པས་འཆི་དང་ན་བ་དང་། རྒ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གི་སྐྱེ། དེ་ལ་དེ་མེད་ཕྱིར་དེ་མེད། །ཞེས་བྱ་བ་གསུང་སྟེ། མ་དག་པའི་གནས་སྐབས་ཀྱི། འཆི་བ་དང་། ན་བ་དང་། རྒ་བའི་མེ་འདི་བུད་ཤིང་ལྟ་བུའི་ཉེ་བར་ལེན་བ་ནི། ཚུལ་བཞིན་མ་དག་ཡིན་པའི་ཡིད་ལ་བྱེད་པ་དང་། ལས་དང་ཉོན་མོངས་པ་སྔོན་དུ་འགྲོ་བ་ཅན་གྱི་སྐྱེ་བ་ཡིན་ཏེ། དག་མ་དག་གཉིས་ལྡན། དག་པའི་ས་ལ་གནས་པའི་བྱང་ཆུབ་སེམས་དཔའ་ཡིད་ཀྱིས་རང་བཞིན་གྱི་ལུས་ཐོབ་པ་རྣམས་ལ། ལས་ཉོན་གྱིས་དབང་གི་སྐྱེ་རྒ་ན་འཆི་མེད་དེ། བྱང་ཆུབ་སེམས་དཔའ་དེ་ལ་ཟག་བཅས་ཀྱིས་ལས་དང་། ཉོན་མོངས་པ་དེ་མེད་པའི་ཕྱིར་ལས་ཉོན་གྱི་སྐྱེ་རྒ་ན་འཆི་དེ་མེད་པ་ཉིད་དོ། །དེ་ལྟ་མོད་ཀྱི་སྙིང་རྗེ་ཆེན་པོའི་རྒྱུ་ལ་བརྟེན་ནས་འགྲོ་བ་སེམས་ཅན་རྣམས་ལ་གང་ལ་གང་འདུལ་གྱི་སྐྱེ་རྒ་ན་འཆི་སོགས་སུ་སྟོན་པ་ཡིན་ནོ། །གསུམ་པ་རྟོག་པས་རོལ་པ་སྟོན་པ་ནི། ཅི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། །སྙིང་རྗེའི་བདག་ཉིད་སྐྱེ་བ་དང་། །འཆི་དང་ན་དང་རྒ་བར་སྟོན། །ཞེས་བྱ་བ་གསུང་སྟེ། བྱང་ཆུབ་སེམས་དཔའ་རྣམས་ནི་དགེ་བའི་རྩ་བའི་ཀུན་ཏུ་སྦྱོར་བ་ཅན་ཏེ། བསམ་བཞིན་དུ་སྐྱེ་བ་ལ་དབང་བ་ཉིད་ལ་བརྟེན་ནས་སྙིང་རྗེའི་ཁམས་གསུམ་དུ་ཡང་དག་པར་སྦྱོར། སྐྱེ་བ་ཡང་ཉེ་བར་སྟོན་ལ། རྒ་བ་དང་། ན་བ་དང་། འཆི་བ་ཡང་ཉེ་བར་སྟོན་ཏོ། །དེ་དག་ལ་སྐྱེ་རྒ་ལ་སོགས་པ་རང་མཚན་པ་ནི་མེད་དོ། །ཟག་པ་མེད་པའི་ཁམས་བདེ་བར་གཤེགས་པའི་སྙིང་པོ་དེ་ཉིད་འབྱུང་བ་མེད་པ་ཡང་དག་པ་ཅི་ལྟ་བ་བཞིན་མཐོང་བའི་ཕྱིར་རོ། །བཞི་པ་དེ་ལས་འཕྲོས་པའི་དོན་ལ། རྨད་དུ་བྱུང་བ་དང་། གཞན་དོན་ལ་ཞུགས་པ་གཉིས་ཀྱི་ས་དང་པོ་བཤད། འཇིག་རྟེན་དུ་སྤྱོད་པ་དང་། དཔེ་དོན་སྦྱར་བ་གཉིས་ཀྱི་ས་དྲུག་པ་བཤད་མཉམ་རྗེས་འདྲེས་པས་ས་བརྒྱད་པ་བཤད། འབད་པ་དང་བྲལ་བ་དང་། སོ་སོ་ཡང་དག་པར་རིག་པ་ཐོབ་པ་གཉིས་ཀྱི་ས་དགུ་པ་བཤད་གཞན་དོན་ཚད་མེད་པ་དང་། མཐར་ཐུག་པའི་ཡོན་ཏན་དང་། སངས་རྒྱས་དང་ཁྱད་པར་འབྱེད་ཚུལ་གསུམ་གྱི་ས་བཅུ་པ་བཤད་པའོ། །དེ་ལ་དང་པོ་རྨད་དུ་བྱུང་བ་ནི། རྒྱལ་སྲས་འགྱུར་མེད་ཆོས་ཉིད་ནི། །རྟོགས་ནས་མ་རིག་མདོང་རྣམས་ཀྱི། སྐྱེ་བ་ལ་སོགས་དག་དུ་ནི། །མཐོང་བ་གང་ཡིན་དེ་རྨད་དོ། །ཞེས་བྱ་བ་གསུང་སྟེ། དེ་ལ་བྱང་ཆུབ་སེམས་དཔའ་ནི་བཞི་སྟེ། སེམས་དང་པོ་བསྐྱེད་པ་དང་། སྤྱོད་པ་ལ་ཞུགས་པ་དང་། ཕྱིར་མི་ལྡོག་པ་དང་། སྐྱེ་བ་གཅིག་གི་ཐོག་པའོ། །དེ་ཡང་སེམས་དང་པོ་བསྐྱེད་པ་ནི། དོན་དམ་བྱང་ཆུབ་ཀྱི་སེམས་ལ་དགོངས་ཏེ། ས་དང་པོ་རབ་ཏུ་དགའ་བ་ལ་ཐོག་མ་མེད་པའི་དུས་ནས། སྔོན་མ་མཐོང་བའི་འཇིག་རྟེན་ལས་འདས་པའི་ཆོས་ཉིད་མཐོང་བའི་ཕྱིར། སེམས་དང་པོ་བསྐྱེད་པའི་བྱང་ཆུབ་སེམས་དཔའོ། །གཉིས་པ་གཞན་དོན་ལ་ཞུགས་ཚུལ་ནི། འཕགས་པའི་སྤྱོད་ཡུལ་ཐོབ་པ་གང་། །བྱིས་པའི་སྤྱོད་ཡུལ་དུ་སྟོན་ཏེ། །དེ་ཉིད་ཕྱིར་ན་འགྲོ་བའི་ཡི། །གཉེན་གྱི་ཐབས་དང་སྙིང་རྗེའི་མཆོག །ཞེས་པའོ། །གསུམ་པ་འཇིག་རྟེན་དུ་སྤྱོད་པ་ནི། དེ་ཡང་སྤྱོད་པ་ལ་ཞུགས་པ་ནི། ས་གཉིས་པ་དྲི་མ་མེད་པའི་ས་ནས་བཟུང་སྟེ། རིང་དུ་སོང་བའི་བར་གྱི་ས་ལ་ཉོན་མོངས་པས་མ་གོས་པའི་སྤྱད་པ་ལ་སྤྱོད་པའི་ཕྱིར། དེ་སྐད་ཅེས་བྱའོ། །དེ་ལ་དགོངས་ནས། དེ་ནི་འཇིག་རྟེན་ཐམས་ཅད་ལས། །འདས་ཀྱང་འཇིག་རྟེན་ལས་མ་གཡོས། །འཇིག་རྟེན་དོན་དུ་འཇིག་རྟེན་ན། །འཇིག་རྟེན་དྲི་མས་མ་གོས་སྤྱོད། །ཞེས་གསུང་པའོ། །བཞི་པ་དཔེ་དོན་སྦྱར་བ་ནི། ཅི་ལྟར་པདྨ་ཆུ་ནང་དུ། །སྐྱེས་ཀྱང་ཆུའི་གོས་པ་མེད། །དེ་བཞིན་འདི་ནི་འཇིག་རྟེན་དུ། །སྐྱེས་ཀྱང་འཇིག་རྟེན་ཆོས་མི་གོས། །ཞེས་པའོ། །ལྔ་པ་མཉམ་རྗེས་འདྲེས་པ་ནི། བྱ་བ་བསྒྲུབ་ལ་རྟག་ཏུ་བློ། །མེ་བཞིན་དུ་ནི་འབར་བ་དང་ཞི་བའི་བསམ་གཏམ་སྙོམས་འཇུག་ལ། །རྟག་ཏུ་སྙོམས་པར་ཞུགས་པ་ཡིན། །ཞེས་བྱ་བ་གསུང་སྟེ། ས་བརྒྱད་པ་མི་གཡོ་བ་ལ་རྒྱུན་མི་འཆད་པར་བྱང་ཆུབ་ཆེན་པོ་ཐོབ་པའི་སྦྱོར་བ་ཏིང་ངེ་འཛིན་ལ་ལེགས་པར་གནས་པའི་ཕྱིར། མི་ལྡོག་པའི་བྱང་ཆུབ་སེམས་དཔའི་ཡོན་ཏན་རྣམ་པར་དག་པའི་མཚན་ཉིད་བསྟན་ཏེ། ཐབས་སྣ་ཚོགས་ཀྱི་གཞན་དོན་བསྒྲུབ་པའི་བརྩོན་འགྲུས་མེ་བཞིན་དུ་འབར་བ་དང་། ཉོན་མོངས་པ་ཉེ་བར་ཞི་བའི་བསམ་གཏན་རྣམ་པར་དག་པ་ལ། མཉམ་པར་བཞག་པ་གཉིས་མི་འགལ་བས། མཉམ་རྗེས་འདྲེས་པའོ། །དྲུག་པ་འབད་པ་དང་བྲལ་བ་ནི། སྔོན་གྱི་འཕེན་པའི་དབང་དང་ནི། །རྣམ་རྟོག་ཐམས་ཅད་བྲལ་བའི་ཕྱིར། །དེ་ནི་ལུས་ཅན་སྨིན་པ་ཡི། །དོན་དུ་འབད་པ་བྱེད་མ་ཡིན། །ཞེས་བྱ་བ་གསུང་སྟེ། ས་དགུ་པ་ལེགས་པའི་བློ་གྲོས་ལ་གནས་པ་ནི། རྣམ་རྟོག་ཐམས་ཅད་དང་བྲལ་ཡང་། །སྔོན་གྱི་འཕེན་པའི་དབང་གི་གདུལ་བྱ་རྣམས་འབད་མེད་དུ་སྨིན་པ་བྱེད་པའོ། །བདུན་པ་སོ་སོ་ཡང་དག་པར་རིག་པ་ཐོབ་པ་ནི། བསམ་གཏན་དང་གཟུགས་སྐུ་དག་ནི། །སྤྱོད་དང་སྤྱོད་ལམ་ཀྱིས་ཀྱང་རུང་། གང་གི་ཅི་ལྟར་གང་གིས་འདུལ། །དེས་དེ་དེ་ལྟ་ཉིད་དུ་ཤེས། ཞེས་བྱ་བ་གསུང་སྟེ། དེ་ལ་བསྟན་པ་ནི། གང་ལ་གང་འདུལ་གྱི་ཆོས་བསྟན་པའོ། །གཟུགས་སྐུ་ནི། གང་ལ་གང་འདུལ་གྱི་སྐུ་བསྟན་པའོ། །སྤྱོད་པ་ནི་གདུལ་བྱ་ཆགས་ཆེན་ལ། འདོད་ཆགས་གི་སྤྱོད་པ་སྟོན་པ་སོགས་སོ། །སྤྱོད་ལམ་ནི། སྤྱོད་ལམ་རྣམ་བཞི་གང་གིས་ཀྱང་འགྲོ་དོན་འབྱུང་བའོ། །བརྒྱད་པ་གཞན་དོན་ཚད་མེད་པ་ནི། དེ་ལྟར་ནམ་མཁའ་མཐའ་ཀླས་ཀྱིས། །འགྲོ་བ་རྟག་ཏུ་ལྷུན་གྲུབ་པར། །ཐོག་མེད་བློ་ལྡན་དེ་ཡིས་ནི། །སེམས་ཅན་དོན་ནི་ཡང་དག་འཇུག །ཞེས་པ་ནི་གཞན་དོན་ཚད་མེད་པའི་ཚུལ་ལོ། །དགུ་པ་མཐར་ཐུག་པའི་ཡོན་ཏན་ནི། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་དང་། །སེམས་ཅན་གང་དག་སྒྲོལ་བ་ལ། །འཇིག་རྟེན་འདི་ན་མཉམ་པ་ཉིད། །ཞེས་པའོ། །བཅུ་པ་སངས་རྒྱས་དང་ཁྱད་པར་འབྱེད་ཚུལ་ནི། དེ་ལྟ་མོད་ཀྱིས་ས་རྡུལ་དང་། །རྒྱ་མཚོ་བ་ལང་རྨིག་རྗེས་ཀྱི། ཁྱད་པར་གང་ཡིན་སངས་རྒྱས་དང་། །བྱང་ཆུབ་སེམས་དཔའི་ཁྱད་དེ་ཉིད། །ཞེས་བྱ་བ་གསུང་སྟེ། ས་བཅུ་ལ་གནས་པའི་བྱང་ཆུབ་སེམས་དཔའ་དེ། རྗེས་ཐོབ་གཞན་དོན་བྱེད་ཚུལ་སངས་རྒྱས་དང་འདྲ་ཡང་། མཉམ་བཞག་སྟོབས་སོགས་ཀྱི་ཡོན་ཏན་བྱེ་བ་ཕྲག་དྲུག་བཅུ་རྩ་བཞི་དང་མི་ལྡན་པས། ས་ཆེན་པོ་དང་རྡུལ་ཕྲན་ནམ། རྒྱ་མཚོ་ཆེན་པོ་དང་། བ་གླང་རྨིག་རྗེས་ཀྱི་ཆུ་གཉིས་ཀྱི་ཁྱད་པར་དང་འདྲ་བར་བཤད་དོ། །གསུམ་པ་ཤིན་ཏུ་དག་པའི་གནས་སྐབས་ལ་དྲུག །རྣམ་པར་དག་པའི་གཏན་ཚིག་བསྟན། སྐྱེ་འཆི་ན་རྒས་མེད་པའི་དམ་བཅའ། དེའི་རྟག་བརྗོད་དེ་རྒྱས་པར་བཤད། དེའི་དོན་བསྡུ། སྒྲུབ་བྱེད་རྒྱས་པར་བརྗོད་པའོ། །དེ་ལ་དང་པོ་རྣམ་པར་དག་པའི་གཏན་ཚིགས་བསྟན་པ་ནི། གཞན་འགྱུར་མིན་བདག་མི་ཟད་ཆོས་ལྡན་ཕྱིར། །འགྲོ་སྐྱབས་ཕྱི་མའི་མཐའ་ཡི་མུར་ཐུག་ཕྱིར། །དེ་ནི་རྟག་ཏུ་གཉིས་མེད་མི་རྟོག་ཕྱིར། །འཇིག་མེད་ཆོས་ཀྱང་མ་བྱས་རང་བཞིན་ཕྱིར། །ཞེས་པའོ། །དེའི་དོན་རྒྱས་པར་བཤད་པ་ལ། གཉིས་པ་སྐྱེ་རྒ་ན་འཆི་མེད་པའི་དམ་བཅའ་ནི། སྐྱེ་བ་མེད་ཅིང་འཆི་བ་མེད། །གནོད་མེད་རྒ་བ་མེད་པ་སྟེ། །ཞེས་པའོ། །གསུམ་པ་དེའི་རྟག་བརྗོད་པ་ནི། དེ་ནི་རྟགས་དང་བརྟེན་ཕྱིར་དང་། །ཞི་བའི་ཕྱིར་དང་གཡུང་དྲུང་ཕྱིར། །ཞེས་པའོ། །བཞི་པ་དེ་རྒྱས་པར་བཤད་པ་ནི། དེ་ནི་ཡིད་ཀྱི་རང་བཞིན་གྱི། །ལུས་ཀྱི་སྐྱེ་མེད་རྟག་པའི་ཕྱིར། །བསམ་གྱིས་མི་ཁྱབ་བསྒྱུར་བ་ཡི། །འཆི་འཕོ་བརྟན་ཕྱིར་དེ་མི་འཆི། །བག་ཆགས་ཕྲ་མོའི་ནད་རྣམས་ཀྱིས། །གནོད་མེད་ཞི་བ་ཉིད་ཀྱི་ཕྱིར། །ཟག་མེད་མངོན་པར་འདུ་བྱེད་ཀྱི། །གཡུ་དྲུང་ཕྱིར་ན་རྒ་བ་མེད། །ཞེས་བྱ་བ་གསུངས་ཏེ། སངས་རྒྱས་ཀྱི་ས་ལ་གནས་པའི་ཁམས་རང་བཞིན་གྱི་འོད་གསལ་བ་གློ་བུར་དྲི་མ་མཐའ་དག་དང་བྲལ་བ་དེ་ནི་ཡིད་ཀྱི་རང་བཞིན་གྱི་ལུས་སུ་སྐྱེ་བ་མ་ཡིན་ཏེ་རྟག་པའི་ཕྱིར་རོ། །བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བ་མ་ཡིན་ཏེ་བརྟེན་པའི་ཕྱིར་རོ། །མ་རིག་པའི་བག་ཆགས་ཕྲ་མོའི་ནད་ཀྱི་གནོད་པ་མ་ཡིན་ཏེ་ཞི་བའི་ཕྱིར་རོ། །ཟག་པ་མེད་པའི་ལས་ཀྱི་འབྲས་བུ་ཡོངས་སུ་སྨིན་པའི་རྒ་བ་ཡང་མ་ཡིན་ཏེ། རྐྱེན་གཞན་གྱི་གཡོ་བ་མེད་པ་གཡུང་དྲུང་གིས་ཚེ་ཐོབ་པའི་ཕྱིར་རོ། །ལྔ་པ་དེའི་དོན་བསྡུ་བ་ནི། དེ་ལ་ཚིག་གཉིས་དེ་བཞིན་གཉིས། གཉིས་དང་གཉིས་ཀྱི་གོ་རིམ་བཞིན། འདུས་མ་བྱས་ཀྱི་དབྱིངས་ལ་ནི། རྟག་པ་ལ་སོགས་དོན་ཤེས་བྱ། ཞེས་བྱ་བ་ནི་གོང་དུ་བཤད་པ་དེ་ཉིད་དོ། །དྲུག་པ་སྒྲུབ་བྱེད་རྒྱས་པར་བརྗོད་པ་ནི། མི་ཟད་ཡོན་ཏན་དང་ལྡན་ཕྱིར། གཞན་འགྱུར་མིན་བདག་རྟག་པའི་དོན། མཐའ་ཡི་མུ་དང་མཚུངས་པའི་ཕྱིར། །སྐྱབས་ཀྱི་བདག་ཉིད་བརྟེན་པའི་དོན། །རྣམ་པར་མི་རྟོག་རང་བཞིན་ཕྱིར། །གཉིས་མེད་ཆོས་ཉིད་ཞི་བའི་དོན། །མ་བཅོས་ཡོན་ཏན་ཉིད་ཕྱིར་ན། །འཇིག་མེད་དོན་ནི་གཡུང་དྲུང་ཉིད། །ཞེས་བྱ་བ་གསུངས་ཏེ། མར་མེ་ཤི་བ་བཞིན་ཕུང་པོ་ལྷག་མེད་དུ་འདའ་བ་ཡང་མ་ཡིན་ཏེ། ཟད་པ་མེད་པའི་ཡོན་ཏན་དང་ལྡན་པའི་ཕྱིར་རོ། །སྐྱེ་བ་གཞན་བླང་ནས་གཞན་དུ་འགྱུར་བ་ཡང་མ་ཡིན་ཏེ། དེ་ནི་རྟག་པའི་དོན་ནོ། །ཅི་སྲིད་མཐའ་དང་མུ་མེད་པར་ཡང་འཇིག་པ་ཐམས་ཅད་དང་བྲལ་བའི་ཕྱིར་བརྟེན་པ་ཡིན་ནོ། །གཉིས་འཛིན་གྱི་རྣམ་པར་རྟོག་པ་ཐམས་ཅད་སྤངས་པའི་ཕྱིར་ཉེ་བར་ཞི་བ་ཡིན་ནོ། །རྒྱུ་རྐྱེན་གྱིས་གསར་དུ་བཅོས་པ་མ་ཡིན་པའི་ཡོན་ཏན་གདོད་མ་ནས་ལྷུན་གྱིས་གྲུབ་པ་དེ་མངོན་དུ་གྱུར་པའི་ཕྱིར། འཇིག་པ་མེད་པའི་གཡུང་དྲུང་ཞེས་བྱའོ། །བརྒྱད་པ་ཡོན་ཏན་དབྱེར་མེད་བཤད་པ་ལ་ཟག་མེད་ཀྱི་མིང་གི་རྣམ་གྲངས་བཞི་དང་། དོན་གྱིས་རྣམ་གྲངས་བཞི་བསྟན། གཉིས་མེད་ཀྱི་ཡོན་ཏན་བཤད། ཐར་པའི་དོན་བསྟན། རྣམ་ཀུན་མཆོག་ལྡན་གྱི་སྟོང་ཉིད་བསྟན། སངས་རྒྱས་ཉིད་མྱ་ངན་ལས་འདས་པ་དང་གཅིག་པར་བསྟན་པའོ། །དེ་ལ་དང་པོ་ཟག་མེད་ཀྱི་རྣམ་གྲངས་བཞི་ནི། གང་ཕྱིར་དེ་ནི་ཆོས་སྐུ་དེ་བཞིན་གཤེགས། །དེ་ནི་འཕགས་པའི་བདེན་པ་དོན་དམ་མྱ་ངན་འདས། དེ་ཕྱིར་ཉི་དང་ཟེར་བཞིན་ཡོན་ཏན་དབྱེར་མེད་པས། །སངས་རྒྱས་ཉིད་ལས་མ་གཏོགས་མྱ་ངན་འདས་པ་མེད་ཞེས་བྱ་བ་གསུངས་སྟེ། དེ་ཡང་སངས་རྒྱས་ཀྱི་ཁམས་དེ་ནི་ཆོས་སྐུ་ཡང་ཡིན། དེ་བཞིན་གཤེགས་པ་ཡང་ཡིན། འཕགས་པའི་བདེན་པ་ཡང་ཡིན། དོན་དམ་པ་ཡང་ཡིན། མྱ་ངན་ལ་འདས་པ་ཡང་ཡིན་དེའི་ཕྱིར་བཟོད་མ་ནས་ཞི་བ། མྱ་ངན་ལས་འདས་པ་ཉི་མ་ལྟ་བུ། དེ་ལས་གཞན་དུ་སངས་རྒྱས་འོད་ཟེར་ལྟ་བུ་ཡོད་པ་མ་ཡིན་ནོ། །གཉིས་པ་དོན་གྱི་རྣམ་གྲངས་བཞི་བསྟན་པ་ནི། མདོར་ན་ཟག་མེད་དབྱིངས་ལ་ནི། །དོན་གྱིས་རབ་ཏུ་དབྱེ་བ་བཞིས། །ཆོས་ཀྱི་སྐུ་ལ་སོགས་པ་ཡི། །རྣམ་གྲངས་བཞིར་ནི་རིག་པར་བྱ། །སངས་རྒྱས་ཆོས་དབྱེར་མེད་པ་དང་། །དེ་རིགས་དེ་བཞིན་ཐོབ་པ་དང་། །བརྫུན་མེད་བསླུ་མེད་ཆོས་ཉིད་དང་། །གདོད་ནས་རང་བཞིན་ཞི་ཉིད་དོ། །ཞེས་བྱ་བ་གསུང་སྟེ། ཁམས་བདེ་བར་གཤེགས་པའི་སྙིང་པོ་དེ་ལ་ཆོས་སྐུ་ཟེར་བའི་རྒྱུ་མཚན་ནི། སངས་རྒྱས་ཀྱི་ཆོས་བགྲངས་ལས་འདས་པ་རྣམས་དང་དབྱེར་མེད་དུ་ཡོད་པ་སྟེ། རིན་པོ་ཆེ་གསེར་དང་དབྱེར་མེད་དུ་ཡོད་པའི་སངས་རྒྱས་ཀྱི་སྐུ་ལ་གསེར་སྐུ་ཅེས་བརྗོད་པ་བཞིན་ནོ། །དེ་བཞིན་གཤེགས་པ་ཅེས་བྱ་བ་ནི། ཆོས་སྐུ་སངས་རྒྱས་ཀྱི་རིགས་དེ་ཅི་ལྟ་བ་བཞིན་རྟོགས་ཤིང་ཐོབ་པའི་དོན་ནོ། །རྣམས་ཀྱིས་ཇི་ལྟར་མཐོང་བ་བཞིན་དུ་བདེན་པ་མི་བརྫུན་པ། མི་བསླུ་བའི་ཆོས་ཉིད་ཡིན་པའོ། །མྱ་ངན་ལ་འདས་པ་ཡིན་པའི་ཕྱིར་དོན་ནི། འཁྲུལ་སྣང་གློ་བུར་གྱི་དྲི་མ་རྣམས་གདོད་མ་ནས་མ་གྲུབ་པ་སྤྲིན་དང་རྨི་ལམ་ལྟ་བུ་ཡིན་པའི་ཕྱིར་རོ། །དེ་སྐད་དུ་ཡང་འཕེལ་བ་དང་འགྲིབ་པ་མེད་པར་བསྟན་པའི་མདོ་ལས། དེ་བཞིན་གཤེགས་པའི་སྙིང་པོ་ནི་རྣམ་པར་དབྱེར་མེད་པ། བྲལ་མི་ཤེས་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་ལས་འདས་པས་མི་སྟོང་པའོ་ཞེས་གསུངས་སོ། །སངས་རྒྱས་ཀྱི་རིགས་ནི་ཐོག་མ་མེད་པས་བརྒྱུད་དེ་འོང་ལ། ཆོས་ཉིད་ཀྱིས་ཐོབ་པ་སྐྱེ་མཆེད་དྲུག་གི་ཁྱད་པར་དེ་ཡིན་ནོ། །ཞེས་གསུངས་པ་ལྟ་བུའོ། །གསུམ་པ་གཉིས་མེད་ཀྱི་ཡོན་ཏན་བཤད་པ་ནི། རྣམ་ཀུན་མངོན་པར་བྱང་ཆུབ་དང་། །དྲི་མ་བག་ཆགས་བཅས་སྤངས་པ། །སངས་རྒྱས་མྱ་ངན་འདས་པ་ནི། །དམ་པའི་དོན་དུ་གཉིས་མེད་ཉིད། །ཞེས་པའོ། །བཞི་པ་ཐར་པའི་དོན་བསྟན་པ་ནི། གཞན་དང་གཞན་ལ་མཁས་པ་དག །གང་ཞིག་ཡན་ལག་གང་ཤེས་པ། །དེས་གཞན་ངེས་འཛིན་མེད་པར་གྱུར། །རྣམ་པ་ཐམས་ཅད་གྲངས་མེད་པ། །བསམ་མེད་དྲི་མེད་ཡོན་ཏན་དང་། །དབྱེར་མེད་མཚན་ཉིད་ཐར་པ་སྟེ། །ཐར་པ་གང་དེ་དེ་བཞིན་གཤེགས །ཞེས་པའོ། །ལྔ་པ་རྣམ་ཀུན་མཆོག་ལྡན་གྱི་སྟོང་ཉིད་བསྟན་པ་ནི། ཇི་ལྟར་རི་མོའི་འབྲི་བྱེད་པ། །གཞན་དང་གཞན་ལ་མཁས་པ་དག །གང་ཞིག་ཡན་ལག་གང་ཤེས་པ། དེས་གཞན་ངེས་འཛིན་མེད་པར་གྱུར། །དེ་ནས་འདི་ལ་ཁྱེད་ཀུན་གྱིས། །ང་ཡི་གཟུགས་ནི་གྱིས་ཤིག་ཅེས། །མངའ་བདག་རྒྱལ་པོས་དེ་དག་ལ། །བཀའ་ཡི་རས་འདི་བྱིན་པ་དང་། །དེ་ནས་དེ་ནི་ཐོས་གྱུར་ཏེ། །རི་མོའི་ལས་ལ་རབ་སྦྱོར་རོ། །དེ་ལ་མངོན་པར་སྦྱོར་རྣམས་ལས། །གཅིག་གཅིག་ཡུལ་གཞན་སོང་གྱུར་ན། །དེ་ནི་ཡུལ་གཞན་སོང་བས་ན། །དེ་མ་ཚང་ཕྱིར་རི་མོ་དེ། །ཡན་ལག་ཐམས་ཅད་ཡོངས་རྫོགས་པར། མི་འགྱུར་བཞིན་ཞེས་དཔེར་བྱས་སོ། །དེ་རྣམས་འབྲི་བྱེད་གང་དག་ཡིན། །སྦྱིན་དང་ཚུལ་ཁྲིམས་བཟོད་ལ་སོགས། །རྣམ་པ་ཀུན་གྱི་མཆོག་ལྡན་པ། །སྟོང་པ་ཉིད་ནི་གཟུགས་སུ་བརྗོད། །ཞེས་བྱ་བ་གསུངས་ཏེ། དེ་ལ་རྣམ་ཀུན་མཆོག་ལྡན་ཞེས་བྱ་བ་ནི། སྦྱིན་པ་ལ་སོགས་པ་འདི་དག་རེ་རེ་ལའང་སངས་རྒྱས་ཀྱི་སྤྱོད་ཡུལ་མཐའ་ཡས་པ་རྣམ་པའི་རབ་ཏུ་དབྱེ་བ་ཐ་དད་པའི་ཕྱིར། ཚད་མེད་པར་རིག་པར་བྱ་སྟེ་གྲངས་དང་མཐུ་བསམ་གྱིས་མི་ཁྱབ་པ་ཉིད་དོ། །དེ་ནི་རྣམ་པ་ཀུན་ཞེས་པའི་དོན་ནོ། །སེར་སྣ་ལ་སོགས་པ་མི་མཐུན་པའི་ཕྱོགས་ཀྱི་བག་ཆགས་བསལ་བའི་ཕྱིར་ན་རྣམ་པར་དག་པ་མཆོག་ཉིད་དོ། །དེ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་ཏིང་ངེ་འཛིན་གྱི་སྒོ་བསྒོམ་པས། མི་སྐྱེ་བའི་ཆོས་ཉིད་ཐོབ་པའི་ཕྱིར། བྱང་ཆུབ་སེམས་དཔའི་ས་མི་གཡོ་བ་ལ་རྣམ་པར་མི་རྟོག་པ་སྐྱོན་མེད་པ་རྒྱུན་མི་ཆད་པ། རང་གི་ངང་གིས་འཇུག་པའི་ལམ་ཐོབ་པ་ལ་བརྟེན་ནས། ཟག་པ་མེད་པའི་དབྱིངས་ལ་དེ་བཞིན་གཤེགས་པ་རྣམས་ཀྱི་ཡོན་ཏན་ཐམས་ཅད་ཡང་དག་པར་འགྲུབ་བོ། །བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་ཏིང་ངེ་འཛིན་དང་། གཟུངས་ཀྱི་སྒོ་རྒྱ་མཚོ་གྲངས་མེད་པ་དག་གིས། ཚད་མེད་པའི་སངས་རྒྱས་ཀྱི་ཆོས་ཡོངས་སུ་འཛིན་པའི་ཤེས་པ་ལ་བརྟེན་པས་ན། ཡོན་ཏན་ཚད་མེད་པ་ཉིད་ཡང་དག་པར་གྲུབ་བོ། །བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་ལྐོག་ཏུ་མ་འགྱུར་པའི་ཤེས་པ་ལ་བརྟེན་པས་ན། ཡོན་ཏན་བསམ་གྱིས་མི་ཁྱབ་པ་ཉིད་མངོན་པར་འགྲུབ་བོ། །དེའི་རྗེས་ཐོགས་སུ་སངས་རྒྱས་ཀྱི་ས་ཐོབ་པའི་ཕྱིར། བག་ཆགས་དང་བཅས་པའི་ཉོན་མོངས་པ་དང་། ཤེས་བྱའི་སྒྲིབ་པ་མཐའ་དག་ལས་གྲོལ་བའི་ཤེས་པ་ལ་བརྟེན་པས་ན། རྣམ་པར་དག་པ་མཆོག་གིས་ཡོན་ཏན་ཉིད་ཡང་དག་པར་འགྲུབ་བོ། །གང་གི་ཕྱིར་སའི་ཡེ་ཤེས་རྟེན་བཞི་པོ་འདི་དག་ལ་དགྲ་བཅོམ་པ་དང་རང་སངས་རྒྱས་རྣམས་མཐོང་བ་མེད་པ་དེའི་ཕྱིར། དེ་དག་ཡོན་ཏན་རྣམ་པ་བཞི་འགྲུབ་པ་དང་དབྱེར་མེད་པའི་མཚན་ཉིད་མྱ་ངན་ལས་འདས་པའི་ཕྱིར་དབྱིངས་ལས་རིང་དུ་གྱུར་པ་ཡིན་ནོ་ཞེས་བྱའོ། །དྲུག་པ་སངས་རྒྱས་ཉིད་མྱ་ངན་ལས་འདས་པ་དང་གཅིག་པ་བསྟན་པ་ནི། ཤེས་རབ་ཡེ་ཤེས་རྣམ་གྲོལ་རྣམས། །གསལ་དང་འཕྲོ་དང་དག་ཕྱིར་དང་། །ཐ་དད་མེད་ཕྱིར་འོད་དང་ཟེར། །ཉི་མའི་དཀྱིལ་འཁོར་དག་དང་མཚུངས། །དེས་ན་སངས་རྒྱས་མ་ཐོབ་པར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་བལྟ་བར་མི་ནུས་བཞིན། །ཞེས་བྱ་བ་གསུངས་ཏེ། ཤེས་རབ་གང་དང་ཡེ་ཤེས་གང་དང་རྣམ་པར་གྲོལ་བ་གང་གིས་ཡོན་ཏན་རྣམ་པ་བཞི་འགྲུབ་པ་དང་། དབྱེར་མེད་པའི་མཚན་ཉིད་མྱ་ངན་ལས་འདས་པའི་དབྱིངས་དེ་མཚོན་པར་བྱེད་པ་དེ་དག་ནི། གོ་རིམ་ཇི་ལྟ་བ་གསུམ་དང་རྣམ་པ་གཅིག་གིས་ཉི་མ་དང་ཆོས་མཐུན་པ་རྣམ་པ་བཞི་བསྟན་ཏེ། དེ་ལ་སངས་རྒྱས་ཀྱི་རྒྱུད་ལ་མངའ་བའི་འཇིག་རྟེན་ལས་འདས་པ་རྣམ་པར་མི་རྟོག་པའི་ཤེས་རབ་ནི་ཤེས་བྱའི་དེ་ཁོ་ན་ཉིད་ལ་རྨོངས་པའི་མུན་པ་སེལ་བ་ཉེ་བར་གནས་པའི་ཕྱིར་འོད་གསལ་བ་དང་ཆོས་མཚུངས་སོ། །དེའི་རྗེས་ལས་ཐོབ་པ་ཤེས་བྱ་ཐམས་ཅད་ཀྱི་ཡེ་ཤེས་ནི། ཤེས་བྱའི་དངོས་པོ་མ་ལུས་པའི་རྣམ་པ་ཐམས་ཅད་ལ་འཇུག་པས་ན། འོད་ཟེར་གྱི་དྲ་བ་འཕྲོ་བ་དང་ཆོས་མཚུངས་སོ། །དེ་གཉིས་ཀའི་རྟེན་སེམས་ཀྱི་རང་བཞིན་རྣམ་པར་གྲོལ་བ་ནི། ཤིན་ཏུ་དྲི་མ་མེད་ཅིང་འོད་གསལ་བ་ཉིད་ཀྱིས་ཉི་མའི་དཀྱིལ་འཁོར་རྣམ་པར་དག་པ་དང་ཆོས་མཚུངས་སོ། །གསུམ་ཀ་ཡང་ཆོས་ཀྱི་དབྱིངས་དང་དབྱེ་བ་མེད་པའི་རང་བཞིན་ཉིད་ཀྱི་གསུམ་པོ་དེ་རྣམ་པར་དབྱེ་བ་མེད་པ་དང་ཆོས་མཚུངས་སོ། །གང་གིས་ཕྱིར་ཐོག་མ་མེད་པ་ནས་ཉེ་བར་གནས་པའི་རང་བཞིན་དགེ་བའི་ཆོས་དང་ལྡན་པའི་ཁམས་ལ་དེ་བཞིན་གཤེགས་པ་རྣམས་ཀྱིས་ཡོན་ཏན་རྣམ་པར་དབྱེ་བ་མེད་པའི་ཆོས་ཉིད་ཡིན་པ་དེའི་ཕྱིར། ཆགས་པ་མེད་པ་དང་ཐོགས་པ་མེད་པའི་ཡེ་ཤེས་ཀྱི་གཟིགས་པ་མངའ་བའི་དེ་བཞིན་གཤེགས་པ་མ་ཐོབ་པར་སྒྲིབ་པ་ཐམས་ཅད་ལས་རྣམ་པར་གྲོལ་བའི་མཚན་ཉིད་མྱ་ངན་ལས་འདས་པའི་དབྱིངས་རྟོགས་པ་མངོན་དུ་བྱེད་པར་མི་འཐད་དེ། འོད་དང་འོད་ཟེར་མ་མཐོང་བར་ཉི་མའི་དཀྱིལ་འཁོར་མི་མཐོང་བ་བཞིན་ནོ། །ངོ་བོ་མི་འགྱུར་ཡང་དྲི་མ་སྦྱོང་བ་དཔེས་བསྟན་པ་ལ་ལྔ་སྟེ། གོང་འོག་གི་མཚམས་སྦྱོར་དང་། དཔེ་དགུའི་དྲི་མ་དང་བཅས་པའི་རྒྱལ་བའི་སྙིང་པོ་བསྟན་པ་དང་། དྲི་མ་སྦྱོང་བའི་ཚུལ་དང་ཅི་ལྟར་རྟོགས་པའི་རིམ་པ་དང་། སྙིང་པོ་ཉིད་བསྟན་པའོ། །དང་པོ་གོང་འོག་གི་མཚམས་སྦྱོར་ནི། དེ་ལྟར་རྒྱལ་བའི་སྙིང་པོ་ཡི། །རྣམ་གཞག་རྣམ་པ་བཅུ་ཞེས་བརྗོད། །ཉོན་མོངས་སྦུབས་ན་གནས་པ་དེ། །དཔེ་དག་གིས་ནི་ཤེས་པར་བྱ། །ཞེས་བྱ་བ་གསུངས་ཏེ། དེ་ལྟར་ཕྱི་མའི་མཐའི་མུ་དང་མཚུངས་པ། རྟག་པའི་ཆོས་ཉིད་རིག་པར་བྱ་བ་ཉིད་ཀྱི་དབང་དུ་བྱས་ནས། དོན་རྣམ་པ་བཅུས་དེ་བཞིན་གཤེགས་པའི་སྙིང་པོ་འདི་རྣམ་པར་གཞག་པ་བཤད་པ་ཡིན་ནོ། །ཐོག་མ་མེད་པའི་དུས་ནས་ཉེ་བར་གནས་པ་མ་འབྲེལ་པའི་རང་བཞིན་གྱི་ཉོན་མོངས་པའི་སྦུགས་ཉིད་དང་། ཐོག་མ་མེད་པ་ནས་ཉེ་བར་གནས་པ་འབྲེལ་པའི་རང་བཞིན་དག་པའི་ཆོས་ཉིད་ཀྱི་དབང་དུ་བྱས་ནས། དཔེ་དགུའི་དེ་བཞིན་གཤེགས་པའི་སྙིང་པོ་ཉོན་མོངས་པའི་སྦུབས་བྱེ་བ་མཐའ་ཡས་པས་བཏུམ་པ་ནི་མདོ་ཅི་ལྟ་བ་བཞིན་དུ་རྟོགས་པར་བྱའོ། །གཉིས་པ་དྲི་བཅས་སྙིང་པོ་བཤད་པ་ལ། དཔེ་དོན་སྤེལ་བ་དང་། སོ་སོར་བརྗོད་པ་གཉིས་ཀྱིས་མདོར་བསྟན་པ་དང་། དེ་རྒྱས་པར་བཤད་པ་དང་། དོན་བསྡུ་བའོ། །དང་པོ་དཔེ་དོན་སྤེལ་བ་ནི། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཤུན་དང་། །གོས་རུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ནང་རིན་ཆེན་གཟུགས་ཡོད་ཅི་ལྟ་བར། གློ་བུར་ཉོན་མོངས་དྲི་མས་སྒྲིབ་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་པའོ། །གཉིས་པ་སོ་སོར་བརྗོད་པ་ནི། དྲི་མ་པདྨ་སྲོག་ཆགས་སྦུན་བ་མི་གཙང་ས་འབྲས་གོས་རུལ་དང་། །སྡུག་བསྔལ་འབར་བས་མངོན་པར་གདུངས་བའི་བུད་མེད་ས་ཡི་ཁམས་དང་མཚུངས། སངས་རྒྱས་སྦྲང་རྩི་སྙིང་པོ་གསེར་དང་གཏེར་དང་ནྱ་གྲོ་རིན་ཆེན་སྐུ། །གླིང་བདག་མཆོག་དང་རིན་ཆེན་གཟུགས་དང་དྲི་མེད་ཁམས་མཆོག་མཚུངས་པ་ཉིད། །ཅེས་པའོ། །གཉིས་པ་དཔེ་དགུ་རྒྱས་བཤད་ལ། པདྨ་དང་སངས་རྒྱས་ཀྱི་དཔེ་དོན། དེ་བཞིན་དུ་བུང་བ་དང་སྦྲང་རྩི། སྦུན་པ་དང་འབྲས། མི་གཙང་བ་དང་གསེར། ས་དང་གཏེར། ཤུན་པ་དང་མྱུ་གུ་གོས་རུལ་དང་སྐུ། མི་མོ་དང་འཁོར་བསྒྱུར། ས་འདམས་དང་གསེར་གྱི་སྐུ་སྟེ་ཐམས་ཅད་དཔེ་དང་དོན་དང་བྱེད་ལས་གསུམ་གསུམ་མདོར་བསྟན་རྒྱས་བཤད་དུ་ཡོད་དོ། །དེ་ལ་དང་པོ་པདྨའི་སྦུབས་ན་སངས་རྒྱས་ཀྱི་སྐུ་ཡོད་པ་བཞིན། ཉོན་མོངས་པ་འདོད་ཆགས་བག་ལ་ཉལ་གྱིས་སྦུབས་ན། སྙིང་པོ་རྟོགས་པ་ཆོས་སྐུ་ཡོད་པ་བསྟན་པ་ལ། མདོར་བསྟན་པ་དང་རྒྱས་པར་བཤད་པ་གཉིས། དང་པོ་ལ་མདོར་ནི། ཇི་ལྟར་མདོག་ངན་པདྨའི་ཁང་གནས་པ། མཚན་སྟོང་གི་འབར་དེ་བཞིན་གཤེགས་པ་ནི། །དྲི་མེད་ལྷ་ཡི་མིག་ལྡན་མིས་མཐོང་ནས། ཆུ་སྐྱེས་འདབ་མའི་སྦུབས་ནས་འབྱིན་བྱེད་པ། །དེ་བཞིན་བདེ་གཤེགས་མནར་མེད་གནས་རྣམས་ལ། སངས་རྒྱས་སྤྱན་གྱིས་རང་ཆོས་ཉིད་གཟིགས་ཏེ། སྒྲིབ་མེད་ཕྱི་མཐའི་མུར་གནས་སྙིང་རྗེ་ཡི། །བདག་ཅག་སྒྲིབ་པ་ལས་ནི་གྲོལ་བར་བྱེད། །ཅེས་པའོ། །གཉིས་པ་རྒྱས་པར་བཤད་པ་ནི། ཇི་ལྟར་མི་སྡུག་པདྨ་ཟུམ་ལ་བདེ་བར་གཤེགས་པ་ནི། །དེའི་ཁང་གནས་ལྷ་མིག་དག་པས་མཐོང་ན་འདབས་མ་གཅོད་བྱེད་ལྟར། །ཆགས་སྡང་སོགས་དྲི་སྦུགས་བསྒྲིབས་རྫོགས་སངས་སྙིང་པོ་འགྲོ་གཟིགས་ཏེ། །ཐུགས་རྗེ་ཐུབ་པས་དེ་བཞིན་སྒྲིབ་པ་དེ་ནི་འཇོམས་པར་མཛད། །ཞེས་པའོ། །གཉིས་པ་སྦྲང་མའི་ཚང་དུ་སྦྲང་རྩི་ཡོད་པ་བཞིན། །ཉོན་མོངས་པ་ཞེ་སྡང་བག་ལ་ཉལ་གྱི་སྦུགས་ན། བསྟན་པ་ཆོས་སྐུ་ངེས་དོན་ཟབ་མོ་ཡོད་པར་བསྟན་པ་ལ། མདོར་བསྟན་པ་དང་རྒྱས་པར་བཤད་པ་གཉིས། དང་པོ་མདོར་བསྟན་ནི། ཇི་ལྟར་སྲོག་ཆགས་ཚོགས་བསྐོར་སྦྲང་རྩི་ནི། །སྐྱེས་བུ་མཁས་པ་དེ་དོན་གཉེར་བ་ཡི། །མཐོང་ནས་ཐབས་ཀྱིས་དེ་དང་སྲོག་ཆགས་ཚོགས། །ཀུན་ནས་བྲལ་བར་རབ་ཏུ་བྱེད་པ་བཞིན། །དྲང་སྲོང་ཆེན་པོ་ཀུན་མཁྱེན་སྤྱན་གྱིས་ནི། རིགས་ཁམས་སྦྲང་རྩི་དང་འདྲ་འདི་གཟིགས་ནས། །དེ་ཡི་སྒྲིབ་པ་སྦྲང་མ་དང་འདྲ་ལ། །གཏན་ནས་རབ་ཏུ་སྤོང་བ་མཛད་པ་ཡིན། །ཞེས་པའོ། །གཉིས་པ་རྒྱས་བཤད་ནི། ཇི་ལྟར་སྦྲང་རྩི་སྲོག་ཆགས་བྱེ་བ་ཁྲག་ཁྲིག་སྟོང་བསྒྲིབས་སྦྲང་རྩི་དོན་གཉེར་མིས། །སྦྲང་མ་དེ་དག་བསལ་ཏེ་ཇི་ལྟར་འདོད་པ་བཞིན་དུ་སྦྲང་རྩིའི་བྱ་བྱེད་པ། །དེ་བཞིན་ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཉོན་མོངས་སྦྲང་མ་དང་འདྲ་དེ་འཇོམས་པ་ལ་མཁས་པའི་རྒྱལ་བ་སྐྱེས་བུ་བཞིན། །ཞེས་པའོ། །གསུམ་པ་སྦུན་པའི་སྦུབས་ན་འབྲས་ལ་སོགས་པའི་སྙིང་པོ་ཡོད་པ་བཞིན། ཉོན་མོངས་པ་གཏི་མུག་བག་ལ་ཉལ་གྱི་སྦུབས་ན། བསྟན་པ་ཆོས་སྐུ་དྲང་དོན་སྣ་ཚོགས་པ་ཡོད་པར་བསྟན་པ་ལ། མདོར་བསྟན་པ་དང་རྒྱས་པར་བཤད་པ་གཉིས། དང་པོ་མདོར་བསྟན་ནི། ཇི་ལྟར་སྦུན་ལྡན་འབྲུ་ཡི་སྙིང་པོ་ནི། །མི་རྣམས་ཀྱིས་ནི་ལོངས་སྤྱོད་མི་འགྱུར་བས། །ཟས་སོགས་དོན་དུ་གཉེར་བ་གང་ཡིན་པ། །དེ་དག་གིས་ནི་སྦུན་ནས་དེ་འབྱིན་ལྟར། །དེ་བཞིན་སེམས་ཅན་ལ་ཡོད་ཉོན་མོངས་ཀྱི། །དྲི་མ་དང་འདྲེས་རྒྱལ་བའང་ཇི་སྲིད་དུ། །ཉོན་མོངས་དྲི་མ་འདྲེས་ལས་མ་གྲོལ་བ། །དེ་སྲིད་རྒྱལ་མཛད་སྲིད་གསུམ་དུ་མི་འབྱེད། །ཞེས་པའོ། །གཉིས་པ་རྒྱས་བཤད་ནི། ཇི་ལྟར་ས་ལུ་བྲ་བོ་ནས་བྲུའི་སྙིང་པོ་སྦུན་ལས་མ་བྱུང་གྲ་མ་ཅན། །ལེགས་པར་མ་བསྒྲུབས་མི་རྣམས་ཀྱིས་ནི་སྤྱད་བྱ་བཟའ་བ་ཞིམ་པོར་མི་འགྱུར་ལྟར། །དེ་བཞིན་སེམས་ཅན་ལ་ཡོད་ཆོས་ཀྱི་དབང་ཕྱུག་ཉོན་མོངས་སྦུབ་ལས་མ་གྲོལ་བས། །ཉོན་མོངས་འབྲུ་བས་ཉེན་པའི་འགྲོ་ལ་ཆོས་ཀྱིས་དགའ་བའི་རོ་སྟེར་འགྱུར་བ་མིན། །ཞེས་པའོ། །བཞི་པ་མི་གཙང་བའི་ནང་ན་གསེར་ཡོད་པ་བཞིན། ཉོན་མོངས་པ་ཀུན་ལྡང་དྲག་པོའི་སྦུབས་ན། སྙིང་པོ་དེ་བཞིན་ཉིད་ཡོད་པར་བསྟན་པ་སྟེ། དེ་ལའང་མདོར་བསྟན་པ་དང་རྒྱས་པར་བཤད་པ་གཉིས། དང་པོ་མདོར་བསྟན་ནི། ཇི་ལྟར་རབ་ཏུ་རྒྱུ་ཚེ་མི་ཡི་གསེར། །ལྗན་ལྗིན་རུལ་པའི་གནས་སུ་ལྷུང་གྱུར་ལ། །མི་འཇིགས་ཆོས་ཅན་དེ་ནི་དེར་དེ་བཞིན། །ལོ་བརྒྱ་མང་པོ་དག་ཏུ་གནས་པ་སྟེ། །ལྷ་མིག་རྣམ་དག་དང་ལྡན་ལྷ་ཡིས་དེར། །མཐོང་ནས་འདི་ན་མི་ལ་ཡོད་པའི་གསེར། །རིན་ཆེན་མཆོག་འདི་སྦྱོངས་ཏེ་རིན་ཆེན་གྱི། །བསྒྲུབ་པར་བྱ་བ་གྱིས་ཞེས་སྨྲ་བ་ལྟར། །དེ་བཞིན་ཐུབ་པས་མི་གཙང་དང་འདྲ་བའི། །ཉོན་མོངས་འདམ་བྱིང་སེམས་ཅན་ཡོན་ཏན་ནི། གཟིགས་ནས་ཉོན་མོངས་འདམ་དེ་དག་བྱའི་ཕྱིར། སྐྱེ་དགུ་རྣམས་ལ་དམ་ཆོས་ཆུ་ཆར་འབེབས། །ཞེས་པའོ། །གཉིས་པ་རྒྱས་བཤད་ནི། ཇི་ལྟར་ལྗན་ལྗིན་རུལ་པའི་ནང་དུ་ལྷུང་བའི་གསེར་ནི་ལྷ་ཡིས་མཐོང་གྱུར་ནས། །ཀུན་ཏུ་དག་པར་བྱ་ཕྱིར་མཆོག་ཏུ་མཛེས་པ་མི་ལ་ནན་གྱིས་སྟོན་པ་ལྟར། དེ་བཞིན་རྒྱལ་བས་ཉོན་མོངས་མི་གཙང་ཆེན་པོར་ལྷུང་འགྱུར་རྫོགས་སངས་རིན་པོ་ཆེ། སེམས་ཅན་རྣམས་ལ་གཟིགས་ནས་དེ་དག་བྱ་ཕྱིར་ལུས་ཅན་རྣམས་ལ་ཆོས་བསྟན་ཏོ། །ཞེས་པའོ། །ལྔ་པ་ནི་སའི་འོག་ནས་རིན་པོ་ཆེའི་གཏེར་ཡོད་པ་བཞིན། མ་རིག་བག་ཆགས་ཀྱི་ས་ཡི་སྦུབ་ན། སྙིང་པོ་རང་བཞིན་གནས་རིགས་ཡོད་པར་བསྟན་པ་སྟེ། དེ་ལའང་གཉིས། མདོར་བསྟན་པ་དང་རྒྱས་པར་བཤད་པའོ། །དང་པོ་མདོར་བསྟན་ནི། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ཏེ། །མི་དེས་དེ་མ་ཤེས་ཤིང་གཏེར་དེས་འང་། །དེ་ལ་ང་འདིར་ཡོད་ཅེས་མི་སྨྲ་ལྟར། དེ་བཞིན་ཡིད་ཀྱི་ནང་ཆུད་རིན་ཆེན་གཏེར། དྲི་མེད་བཞག་དང་བསལ་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་ཏུ་སྐྱེ་དགུའི་འདི་མྱོང་ངོ། ཞེས་པའོ། །གཉིས་པ་རྒྱས་བཤད་ནི། ཇི་ལྟར་དབུལ་པོའི་ཁྱིམ་ནང་དུ་ནི་རིན་ཆེན་གཏེར་ཆུད་གྱུར་པ་མི་ལ་ནི། །རིན་ཆེན་སྟེར་བདག་ཡོད་ཅེས་བརྗོད་པར་མི་བྱེད་དེ་ནི་མི་ཡིས་ཤེས་མིན་ལྟར། །དེ་བཞིན་ཆོས་གཏེར་ཡིད་ཀྱི་ཁྱིམ་གནས་སེམས་ཅན་དག་ནི་དབུལ་པོ་ལྟ་བུ་སྟེ། །དེ་དག་རྣམས་ཀྱིས་དེ་ཐོབ་བྱ་ཕྱིར་འཇིག་རྟེན་དུ་ནི་དྲང་སྲོང་ཡང་དག་བལྟམས། །ཞེས་པའོ། །དྲུག་པ་ཤུན་པའི་ནང་དུ་ལྗོན་ཤིང་གི་མྱུ་གུ་ཡོད་པ་བཞིན། ཉོན་མོངས་པ་མཐོང་སྤང་གིས་སྦུབས་ན། རྒྱས་གྱུར་གྱིས་རིགས་ཡོད་པ་བསྟན་པ་ལ། མདོར་བསྟན་པ་དང་རྒྱས་པར་བཤད་པ་གཉིས། དང་པོ་མདོར་བསྟན་པ་ནི། ཇི་ལྟར་ཨ་མྲ་ལ་སོགས་ཤིང་འབྲས་ལ། །ཡོད་པའི་ས་བོན་མྱུ་གུ་འཇིག་མེད་ཆོས། །ས་རྨོས་ཆུ་སོགས་ལྡན་ལས་ལྗོན་ཤིང་གི །རྒྱལ་པོའི་དངོས་པོར་རིམ་གྱིས་འགྲུབ་པ་ལྟར། སེམས་ཅན་རྣམས་ཀྱི་མ་རིག་སོགས་འབྲས་ཀྱིས། པག་སྦུབས་ནང་ཆུད་ཆོས་ཁམས་དགེ་བ་ཡང་། །དེ་བཞིན་དགེ་བ་དེ་དེ་ལ་བརྟེན་ནས། རིམ་གྱིས་ཐུབ་པའི་རྒྱལ་པོའི་དངོས་པོར་འགྱུར། །ཞེས་པའོ། །གཉིས་པ་རྒྱས་བཤད་ནི། ཆུ་དང་ཉི་མའི་འོད་དང་རླུང་དང་ས་དུས་ནམ་མཁའི་རྐྱེན་རྣམས་ཀྱིས། །ཏ་ལ་དང་ནི་ཨ་མྲའི་འབྲས་སྦུབས་གསེབ་ནས་ཤིང་སྐྱེ་ཇི་ལྟ་བར། །སེམས་ཅན་ཉོན་མོངས་འབྲས་ལྤགས་ནང་ཆུད་རྫོགས་སངས་ས་བོན་མྱུ་གུ་ཡང་། །དེ་བཞིན་དགེ་རྐྱེན་དེ་དང་དེ་ཡི་ཆོས་མཐོང་འཕེལ་བར་འགྱུར་བ་ཡིན། །ཞེས་པའོ། །བདུན་པ་གོས་རུལ་ནང་དུ་རིན་པོ་ཆེའི་སྐུ་ཡོད་པ་བཞིན། ཉོན་མོངས་པ་བསྒོམ་སྤང་གིས་སྦུབས་ན། སྙིང་པོ་ངོ་བོ་ཉིད་སྐུ་ཡོད་པར་བསྟན་པ་ལ། མདོར་བསྟན་དང་རྒྱས་བཤད་གཉིས། དང་པོ་མདོར་བསྟན་ནི། ཇི་ལྟར་རིན་ཆེན་ལས་བྱས་རྒྱལ་བའི་གཟུགས། །གོས་རུལ་དྲི་ངན་གྱིས་ནི་བཏུམ་གྱུར་པ། །ལམ་གནས་ལྷ་ཡིས་མཐོང་ནས་གྲོལ་བྱའི་ཕྱིར། །ལམ་གནས་དོན་དེ་མི་ལ་སྨྲ་བ་ལྟར། །དེ་བཞིན་ཐོག་མེད་རྣམ་པ་སྣ་ཚོགས་ཀྱིས། ཉོན་མོངས་ཀྱིས་བཏུམས་བདེ་གཤེགས་དངོས་པོ་ཉིད། །དུད་འགྲོ་ལ་ཡང་གཟིགས་ནས་དེ་བཞིན་ཏེ། །ཐར་བར་བྱ་བའི་དོན་དུ་ཐབས་སྟོན་མཛད། །ཞེས་པའོ། །གཉིས་པ་རྒྱས་བཤད་ནི། ཇི་ལྟར་རིན་ཆེན་རང་བཞིན་དེ་བཞིན་གཤེགས་སྐུ་དྲི་ངན་གོས་བཏུམ་པ། །ལམ་གནས་ལྷ་ཡི་མིག་གིས་མཐོང་ནས་ཐར་ཕྱིར་མི་ལ་སྟོན་པ་ལྟར། །དེ་བཞིན་ཉོན་མོངས་གོས་རུལ་གྱིས་བཏུམས་འཁོར་བའི་ལམ་ལ་གནས་པ་ཁམས། །དུད་འགྲོ་ལ་ཡང་གཟིགས་ནས་ཐར་པ་བྱ་ཕྱིར་རྒྱལ་བས་ཆོས་སྟོན་ཏོ། །ཞེས་པའོ། །བརྒྱད་པ་བུད་མེད་ཀྱི་ལྟོ་ན་སྟོང་འཁོར་ལོས་བསྒྱུར་བའི་རྒྱལ་པོ་ཡོད་པ་བཞིན། མ་དག་ས་བདུན་ལ་བརྟེན་པའི་དྲི་མའི་སྦུབས་ན། ཡོངས་སུ་རྫོགས་པའི་སྐུ་ཡོད་པར་བསྟན་པ་ལ། མདོར་བསྟན་རྒྱས་བཤད་གཉིས། དང་པོ་མདོར་བསྟན་ནི། ཇི་ལྟར་མི་མོ་གཟུགས་ངན་མགོན་མེད་འགའ། །མགོན་མེད་འདུག་གནས་སུ་ནི་འདུག་འགྱུར་ལ། །མངལ་གྱི་རྒྱལ་པོའི་དཔལ་ནི་འཛིན་བྱེད་པས། །རང་ལྟོ་ན་ཡོད་མི་བདག་མི་ཤེས་ལྟར། །སྲིད་པར་སྐྱེ་བ་མགོན་མེད་ཁྱིམ་བཞིན་ཏེ། །མ་དག་སེམས་ཅན་མངལ་ལྡན་བུད་མེད་བཞིན། །དེ་ལ་གང་ཞིག་ཡོད་པས་མགོན་བཅས་པ། །དྲི་མེད་ཁམས་ནི་དེ་ཡི་མངལ་གནས་བཞིན། །ཞེས་པའོ། །གཉིས་པ་རྒྱས་བཤད་ནི། ཇི་ལྟར་བུད་མེད་ལུས་ལ་དྲི་བཅས་གོས་གྱོན་མི་སྡུག་གཟུགས་ལྡན་པ། །ས་བདག་མངལ་ན་གནས་ཀྱང་མགོན་མེད་ཁང་པར་སྡུག་བསྔལ་མཆོག་མྱོང་ལྟར། །དེ་བཞིན་བདག་རང་ནང་གནས་མགོན་ཡོད་གྱུར་ཀྱང་མགོན་མེད་བློ་ལྡན་པ། འགྲོ་བ་ཉོན་མོངས་དབང་གིས་ཡིད་མ་ཞི་བ་སྡུག་བསྔལ་གཞི་ལ་གནས། །ཞེས་པའོ། །དགུ་པ་ས་འདམ་གྱི་ནང་ན་གསེར་ཞུན་མའི་སྐུ་ཡོད་པ་བཞིན། དག་པ་ས་གསུམ་ལ་བརྟེན་པའི་དྲི་མའི་སྦུབ་ན། སྙིང་པོ་སྤྲུལ་པའི་སྐུ་ཡོད་པར་བསྟན་པ་ལ། མདོར་བསྟན་དང་རྒྱས་བཤད་གཉིས། དང་པོ་མདོར་བསྟན་ནི། ཇི་ལྟར་ནང་གིས་གསེར་ཞུན་གཟུགས་རྒྱས་པ། །ཞི་བ་ཕྱི་རོལ་ས་ཡི་རང་བཞིན་ཅན། མཐོང་ནས་དེ་ཤེས་པ་དག་ནང་གིས་གསེར། །སྦྱོང་ཕྱིར་ཕྱི་རོལ་སྒྲིབ་པ་སེལ་བྱེད་ལྟར། །རང་བཞིན་འོད་གསལ་དྲི་མ་རྣམས་ཀྱང་ནི། གློ་བུར་བར་ནི་རྣམ་པར་གཟིགས་གྱུར་ནས། །རིན་ཆེན་འབྱུང་གནས་ལྟ་བུའི་འགྲོ་བ་རྣམས། །སྒྲིབ་པ་དག་ལས་སྦྱོང་མཛད་བྱང་ཆུབ་མཆོག །ཞེས་པའོ། །གཉིས་པ་རྒྱས་བཤད་ནི། ཇི་ལྟར་དྲི་མ་གསེར་འབར་ལས་བྱས་ས་ཡི་ནང་དུ་ཆུད་གྱུར་གཟུགས། །ཞི་དེ་རང་བཞིན་མཁས་པས་རིག་ནས་ས་དག་སེལ་བར་བྱེད་པ་ལྟར། །དེ་བཞིན་ཀུན་མཁྱེན་དག་པའི་གསེར་འདྲ་ཞི་བའི་ཡིད་ནི་མཁྱེན་གྱུར་ནས། ཆོས་འཆད་ཚུལ་གྱིས་བརྟེག་སྤྱད་བསྒྲུབ་པས་སྒྲིབ་པ་དག་ནི་སེལ་བར་མཛད། །ཞེས་པའོ། །གསུམ་པ་དཔེ་དགུའི་དོན་བསྡུ་བ་ནི། པདྨ་སྲོག་ཆགས་བུང་བ་དང་། །སྦུན་པ་དང་ནི་མི་གཙང་ས། །འབྲས་ཤུན་གོས་རུལ་བུད་མེད་ཀྱི། མངལ་དང་ས་ཡི་སྦུབས་ན་ཡང་། །སངས་རྒྱས་སྦྲང་རྩི་སྙིང་པོ་བཞིན། །གསེར་བཞིན་གཏེར་བཞིན་ལྗོན་པ་བཞིན། །རིན་ཆེན་སྐུ་དང་འཁོར་ལོ་ཡིས། །བསྒྱུར་བ་བཞིན་དང་གསེར་གཟུགས་བཞིན། །ཞེས་པའོ། །གསུམ་པ་དྲི་མ་སྦྱོང་ཚུལ་ལ་ལྔ་སྟེ། སྤྱིར་བསྟན་པ་དང་། སོ་སོར་བཤད་པ་དང་། དོན་བསྡུ་བ་དང་། གང་ཟག་གང་གི་རྒྱུད་ལ་ཡོད་པ་དང་། དྲི་མ་དགུ་དཔེ་དོན་སྦྱར་ནས་བཤད་པའོ། །དེ་ལ་དང་པོ་སྤྱིར་བསྟན་པ་ནི། སེམས་ཅན་ཁམས་ཀྱིས་ཉོན་མོངས་སྦུབས། །མ་འབྲེལ་ཐོག་མ་མེད་པ་ནས། །སེམས་གྱི་རིན་ཆེན་དྲི་མེད་ནི། །ཐོག་མ་མེད་པ་ཡིན་པར་བརྗོད། །ཞེས་བྱ་བ་གསུངས་ཏེ། སེམས་ཅན་གྱིས་རྒྱུད་ལ་ཡོད་པའི་ཉོན་མོངས་པ་རྣམས་དང་། ཁམས་བདེ་བར་གཤེགས་པའི་སྙིང་པོ་ནི་བདག་ཉིད་གཅིག་པ་དང་དེ་བྱུང་གི་འབྲེལ་པ་གང་ཡང་མེད་དེ། གློ་བུར་གྱི་དྲི་མ་རྣམས་ནི་མེད་བཞིན་དུ་སྣང་བ་སྤྲིན་དང་རྨི་ལམ་ལྟ་བུ་ཡིན་ཞིང་། ཁམས་བདེ་བར་གཤེགས་པའི་སྙིང་པོ་ནི་རྟག་པ། བརྟེན་པ་ཞི་བ། གཡུང་དྲུང་གི་བདག་ཉིད་དུ་གདོད་མ་ནས་གནས་པའི་ཕྱིར་རོ། །གཉིས་པ་སོ་སོར་བཤད་པ་ལ། བག་ལ་ཉལ་གསུམ། ཀུན་ལྡང་དྲག་པོ་དང་བཞི། མ་རིག་བག་ཆགས་དང་ལྔ། ཐེག་པ་ཐུན་མོང་བའི་མཐོང་སྤང་བ། བསྒོམ་སྤང་གཉིས་དང་བདུན། མ་དག་ས་བདུན་གྱི་དྲི་མ་དང་བརྒྱད། དག་པ་ས་གསུམ་གྱི་དྲི་མ། རྡོ་རྗེ་ལྟ་བུའི་ཏིང་ངེ་འཛིན་གྱིས་གཞོམ་བྱ་དང་དགུ་སྟེ། དེ་དག་ཀྱང་། ཆགས་དང་སྡང་དང་རྨོངས་དང་དེའི། །ཀུན་ལྡང་དྲག་དང་བག་ཆགས་དང་། །མཐོང་བསྒོམ་ལམ་སྤང་མ་དག་དང་། །དག་པའི་ས་ལ་བརྟེན་པ་ཡི། །དྲི་མ་རྣམ་དགུ་པདྨ་ཡི། །སྦུབས་སོགས་དཔེ་ནི་རབ་བསྟན་ཏེ། །ཉེ་བའི་ཉོན་མོངས་སྦུབས་ཀྱིས་ནི། དབྱེ་བ་བྱེ་བ་མཐའ་ལས་འདས། །ཞེས་བྱ་བ་གསུངས་ཏེ། མདོར་བསྡུ་ན་ཉོན་མོངས་པ་དགུ་པོ་འདི་དག་དེ་བཞིན་གཤེགས་པའི་ཁམས་རང་བཞིན་གྱི་རྣམ་པར་དག་པ་ལ་སྒྲིབ་བྱེད་དུ་སངས་རྒྱས་ཀྱི་གཟུགས་ལ་སྒྲིབ་བྱེད་པདྨའི་སྦུབས་ལ་སོགས་པ་ལྟར་གློ་བུར་ཉིད་དུ་ཡོད་དོ། །དགུ་གང་ཞེ་ན། འདི་ལྟ་སྟེ། འདོད་ཆགས་བག་ལ་ཉལ་གྱི་མཚན་ཉིད་ཀྱིས་ཉོན་མོངས་པ་དང་། ཞེ་སྡང་བག་ལ་ཉལ་ཀྱིས་མཚན་ཉིད་ཀྱིས་ཉོན་མོངས་པ་དང་། གཏི་མུག་བག་ལ་ཉལ་གྱི་མཚན་ཉིད་ཀྱིས་ཉོན་མོངས་པ་དང་། འདོད་ཆགས་དང་། ཞེ་སྡང་དང་། གཏི་མུག་དྲག་པོ་ཀུན་ནས་ལྡང་བའི་མཚན་ཉིད་དང་། མ་རིག་པའི་བག་ཆགས་ཀྱི་སས་བསྡུས་པ་དང་། མཐོང་བས་སྤང་བར་བྱ་བ་དང་། བསྒོམ་བས་སྤང་བར་བྱ་བ་དང་། མ་དག་པའི་ས་ལ་བརྟེན་པ་དང་། དག་པའི་ས་ལ་བརྟེན་པའོ། །དེ་ལ་འཇིག་རྟེན་པའི་འདོད་ཆགས་དང་བྲལ་བའི་རྒྱུད་ལ་ཡོད་པའི་ཉོན་མོངས་པ་མི་གཡོ་བའི་འདུ་བྱེད་ལ་སོགས་པའི་རྒྱུ་གཟུགས་དང་། གཟུགས་མེད་པའི་ཁམས་སྒྲུབ་པར་བྱེད་པ། འཇིག་རྟེན་ལས་འདས་པའི་ཡེ་ཤེས་ཀྱིས་གཞོམ་པར་བྱ་བ་གང་ཡིན་བ་དེ་དག་ནི་འདོད་ཆགས་དང་། ཞེ་སྡང་དང་། གཏི་མུག་བག་ལ་ཉལ་གྱི་མཚན་ཉིད་ཅེས་བྱའོ། །འདོད་ཆགས་ལ་སོགས་པ་ལ་སྤྱོད་པའི་སེམས་ཅན་གྱི་རྒྱུད་ལ་ཡོད་ལ། བསོད་ནམས་དང་བསོད་ནམས་མ་ཡིན་པའི་འདུ་བྱེད་ལ་སོགས་པའི་རྒྱུ་འདོད་པའི་ཁམས་འབའ་ཞིག་བསྒྲུབ་པར་བྱེད་པ། མི་སྡུག་པ་བསྒོམ་པའི་ཤེས་པས་གཞོམ་པར་བྱ་བ་གང་ཡིན་པ་དེ་དག་ནི། འདོད་ཆགས་དང་། །ཞེ་སྡང་དང་། གཏི་མུག་དྲག་པོ་ཀུན་ནས་ལྡང་བའི་མཚན་ཉིད་ཅེས་བྱའོ། །དགྲ་བཅོམ་པའི་རྒྱུད་ལ་ཡོད་པ་ཟག་པ་མེད་པའི་ལས་འགྲུབ་པའི་རྒྱུ་དྲི་མ་མེད་པའི་ཡིད་ཀྱི་ལུས་བསྒྲུབ་པར་བྱེད་པ། དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་བར་བྱ་བ་གང་ཡིན་བ་དེ་དག་ནི། མ་རིག་པའི་བག་ཆགས་ཀྱི་སས་བསྡུས་པ་ཞེས་བྱའོ། །སློབ་པ་ནི་རྣམ་པ་གཉིས་ཏེ། སོ་སོའི་སྐྱེ་བོ་དང་འཕགས་པའོ། །དེ་ལ་སོ་སོའི་སྐྱེ་བོ་སློབ་པའི་རྒྱུད་ལ་ཡོད་ལ། དང་པོ་འཇིག་རྟེན་ལས་འདས་པའི་ཆོས་མཐོང་བའི་ཤེས་པས་གཞོམ་པར་བྱ་བ་གང་ཡིན་བ་དེ་དག་ནི། མཐོང་བས་སྤང་བར་བྱ་བ་ཅེས་བྱའོ། །འཕགས་པའི་གང་ཟག་སློབ་པའི་རྒྱུད་ལ་ཡོད་པ་ཇི་ལྟར་མཐོང་བའི་འཇིག་རྟེན་ལས་འདས་པའི་ཆོས་བསྒོམ་པའི་ཤེས་པས་གཞོམ་པར་བྱ་བ་གང་ཡིན་པ་དེ་དག་ནི་བསྒོམ་པས་སྤང་བར་བྱ་བ་ཅེས་བྱའོ། །མ་དག་ས་བདུན་ལ་གནས་པའི་བྱང་ཆུབ་སེམས་དཔའ་རྣམས་ཀྱི་རྒྱུད་ལ་ཡོད་པའི་ས་བརྒྱད་པ་ལ་སོགས་པ་དག་པ་ས་གསུམ་བསྒོམ་བའི་ཤེས་པས་གཞོམ་པར་བྱ་བ་གང་ཡིན་པ་དེ་དག་ནི། མ་དག་པའི་ས་ལ་བརྟེན་པ་ཅེས་བྱའོ། །མཐར་ཐུག་པའི་བྱང་ཆུབ་སེམས་དཔའི་རྒྱུད་ལ་ཡོད་པ་བརྒྱད་པ་ལ་སོགས་པ་ས་གསུམ་བསྒོམ་པའི་ཤེས་པ་མི་མཐུན་པའི་ཕྱོགས། རྡོ་རྗེ་ལྟ་བུའི་ཏིང་ངེ་འཛིན་གྱི་ཡེ་ཤེས་ཀྱིས་གཞོམ་པར་བྱ་བ་གང་ཡིན་པ་དེ་དག་ནི། དག་པའི་ས་ལ་བརྟེན་པ་ཅེས་བྱའོ། །གསུམ་པ་དོན་བསྡུ་བ་ནི། ཆགས་སོགས་ཉོན་མོངས་དགུ་པོ་འདི། །མདོར་བསྡུས་ན་ནི་གོ་རིམ་བཞིན། པདྨའི་སྦུབས་ལ་སོགས་པ་ཡི། །དཔེ་དགུ་དག་གིས་ཡང་དག་བསྟན། །ཞེས་པའོ། །བཞི་པ་གང་ཟག་གང་གི་རྒྱུད་ལ་ཡོད་པ་ནི། དྲི་འདི་དག་གིས་བྱིས་རྣམས་དང་། །དགྲ་བཅོམ་སློབ་དང་བློ་ལྡན་རྣམས། །རིམ་བཞིན་བཞི་དང་གཅིག་དང་ནི། །གཉིས་དང་གཉིས་ཀྱིས་མ་དག་ཉིད། །ཞེས་བྱ་བ་གསུངས་ཏེ། བྱིས་པ་སོ་སོ་སྐྱེ་བོ་རྣམས་ནི་འདུག་གསུམ་བག་ལ་ཉལ་གསུམ་དང་། དེ་དག་གི་ཀུན་ལྡང་དྲག་པོ་དང་། བཞི་ཡོད་པས་མ་དག་པ་ཉིད་དོ། །ཉན་རང་དགྲ་བཅོམ་པ་རྣམས་ཀྱང་མ་རིག་བག་ཆགས་ཀྱི་ས་དང་བཅས་པས་མ་དག་པ་ཉིད་དོ། །སློབ་ལམ་པ་རྣམས་ཀྱང་མཐོང་སྤང་དང་བསྒོམ་སྤང་གཉིས་དང་བཅས་པས་མ་དག་པ་ཉིད་དོ། །བློ་ལྡན་བྱང་ཆུབ་སེམས་དཔའ་རྣམས་ཀྱང་མ་དག་ས་བདུན་ལ་བརྟེན་པའི་སྒྲིབ་པ་དང་། དག་པ་ས་གསུམ་ལ་བརྟེན་པའི་སྒྲིབ་པ་དང་བཅས་པས་མ་དག་པ་ཉིད་དོ། །ལྔ་པ་དྲི་མ་དགུ་དཔེ་དོན་སྦྱར་ནས་བཤད་པ་ནི། ཇི་ལྟར་པདྨ་འདམ་སྐྱེས་དེ། །མདུན་དུ་གྱུར་ན་ཡིད་དགའ་དང་། །ཕྱི་ནས་དགའ་བ་མེད་འགྱུར་བ། །འདོད་ཆགས་དགའ་བ་དེ་བཞིན་ནོ། །ཇི་ལྟར་སྲོག་ཆགས་སྦྲང་མ་ནི། ཤིན་ཏུ་འཁྲུགས་ཏེ་མདུང་བརྡེག་ལྟར། །དེ་བཞིན་ཞེ་སྡང་སྐྱེ་བ་ན། །སྙིང་ལ་སྡུག་བསྔལ་བསྐྱེད་པར་བྱ། །ཇི་ལྟར་འབྲས་སོགས་སྙིང་པོ་ནི། །ཕ་རོལ་སྦུན་པས་སྒྲིབ་པ་ལྟར། །དེ་བཞིན་སྙིང་པོའི་དོན་མཐོང་བ། མ་རིག་སྒོ་ངའི་སྦུབས་ཀྱིས་སྒྲིབས། །ཇི་ལྟར་མི་གཙང་མི་མཐུན་པ། དེ་བཞིན་ཆགས་དང་བཅས་རྣམས་ཀྱིས། །འདོད་པ་བསྟེན་པའི་རྒྱུ་ཡིན་ཕྱིར། །ཀུན་ནས་ལྡང་བ་མི་གཙང་འདྲ། །ཇི་ལྟར་ནོར་ནི་སྒྲིབ་པས་ན། །མི་ཤེས་གཏེར་མི་ཐོབ་པ་ལྟར། །དེ་བཞིན་སྐྱེ་ལ་རང་བྱུང་ཉིད། །མ་རིག་བག་ཆགས་ས་ཡིས་བསྒྲིབས། །ཇི་ལྟར་མྱུག་སོགས་རིམ་སྐྱེས་པས། །ས་བོན་ཤུན་པ་གཅོད་པ་ལྟར། །དེ་བཞིན་དེ་ཉིད་མཐོང་བ་ཡིས། །མཐོང་སྤང་རྣམས་ནི་ལྡོག་པར་འགྱུར། །འཕགས་པའི་ལམ་དང་འབྲེལ་པ་ལས། །འཇིག་ཚོགས་སྙིང་པོ་བཅོམ་རྣམས་ཀྱིས། བསྒོམ་ལམ་ཡེ་ཤེས་སྤང་བྱ་རྣམས། །གོས་རུལ་དག་དང་མཚུངས་པར་བསྟན། །ས་བདུན་ལ་བརྟེན་དྲི་མ་ནི། །མངལ་སྦུབས་དྲི་མ་དག་དང་མཚུངས། །མངལ་སྦུབས་བྲལ་འདྲ་མི་རྟོག་པའི། །ཡེ་ཤེས་རྣམ་པར་སྨིན་པ་བཞིན། །ས་གསུམ་རྗེས་འབྲེལ་དྲི་མ་རྣམས། །ས་འདམ་གོས་བཞིན་ཤེས་བྱ་སྟེ། །བདག་ཉིད་ཆེན་པོ་རྡོ་རྗེ་ལྟའི། ཏིང་ངེ་འཛིན་གྱི་གཞོམ་བྱ་མིན། དེ་ལྟར་ཆགས་སོགས་དྲི་མ་དགུ། །པདྨ་ལ་སོགས་དག་དང་མཚུངས། །ཞེས་པའོ། །བཞི་པ་ཇི་ལྟར་རྟོགས་པའི་རིམ་པ་ལ་བཞི། རྟོགས་རྒྱུ་མདོར་བསྟན། དེ་ཉིད་རྒྱས་པར་བཤད། དད་པས་རྟོགས་པར་བསྟན། མ་རྟོགས་པའི་གང་ཟག་བསྟན་པའོ། །དང་པོ་རྟོགས་རྒྱུ་མདོར་བསྟན་པ་ནི། རང་བཞིན་གསུམ་གྱི་བསྡུས་ཕྱིར་ཁམས། །སངས་རྒྱས་སོགས་དང་ཆོས་མཚུངས་སོ། །འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་བྱ་བ་གསུངས་ཏེ། སངས་རྒྱས་ཀྱི་གཟུགས་དང་། སྦྲང་རྩི་དང་། འབྲས་བུའི་སྙིང་པོའི་དཔེ་གསུམ་གྱིས་ནི་ཁམས་དེ་ཆོས་ཀྱི་སྐུའི་རང་བཞིན་དུ་ཤེས་པར་བྱའོ། །གསེར་གྱི་དཔེ་གཅིག་གིས་ནི་དེ་བཞིན་ཉིད་གྱི་རང་བཞིན་དུའོ། །གཏེར་དང་ཤིང་དང་རིན་པོ་ཆེའི་སྐུ་དང་། འཁོར་ལོས་བསྒྱུར་བ་དང་། གསེར་གྱི་གཟུགས་ཀྱི་དཔེ་ལྔས་ནི། སངས་རྒྱས་ཀྱི་སྐུ་གསུམ་བསྐྱེད་པའི་རིགས་ཀྱི་རང་བཞིན་དུའོ། །གཉིས་པ་དེ་ཉིད་རྒྱས་པར་བཤད་པ་ལ། ཆོས་སྐུ་རྣམ་གཉིས་དང་། དེ་བཞིན་ཉིད་དང་། བསྐྱེད་བྱེད་གཉིས་དང་། བསྐྱེད་བྱ་གསུམ་བཤད་པའོ། །དེ་ལ་དང་པོ་ཆོས་སྐུ་རྣམ་གཉིས་བཤད་པ་ལ། ཆོས་སྐུ་རྣམ་གཉིས་དངོས་དང་། དེ་དཔེ་དོན་སྦྱོར་བའོ། །དང་པོ་ནི། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་བྱ་བ་གསུང་སྟེ། སངས་རྒྱས་ཀྱི་ཆོས་ཀྱི་སྐུ་ནི་རྣམ་པ་གཉིས་སུ་རྟོགས་པར་བྱའོ། །དེ་དག་ཀྱང་གང་ཞེ་ན། རྟོག་པ་ཆོས་སྐུ་དང་། བསྟན་པ་ཆོས་སྐུའོ། །རྟོག་པ་ཆོས་སྐུ་ནི། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་རྣམ་པར་མི་རྟོག་པའི་སྤྱོད་ཡུལ་ལོ། །དེ་ཡང་དེ་བཞིན་གཤེགས་པ་རྣམས་ཀྱིས་སོ་སོ་རང་གི་རིག་པར་བྱ་བའི་ཆོས་ཀྱི་དབང་དུ་བྱས་ཏེ་རྟོག་པར་བྱའོ། །དེ་ཐོབ་པའི་རྒྱུ་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རྒྱུ་མཐུན་པ་ནི། གདུལ་བྱ་ཇི་ལྟ་བར་སེམས་ཅན་གཞན་ལ་རྣམ་པར་རིག་པར་འགྱུར་རོ། །དེ་ཡང་བསྟན་པའི་ཆོས་ཀྱི་དབང་དུ་བྱས་པར་རིག་པར་བྱའོ། །བསྟན་པ་ཆོས་སྐུ་ཡང་རྣམ་པར་གཉིས་ཏེ། ཕྲ་བ་དང་རྒྱ་ཆེ་བའི་ཆོས་རྣམ་པར་འཇོག་པའི་ཚུལ་གྱིས་དབྱེ་བ་ལས་ཏེ། འདི་ལྟ་སྟེ། དོན་དམ་པའི་བདེན་པའི་དབང་དུ་བྱས་ནས། བྱང་ཆུབ་སེམས་དཔའི་སྡེ་སྣོད་ཟབ་མོའི་ཆོས་ཀྱི་ཚུལ་སྟོན་པ་དང་། ཀུན་རྫོབ་ཀྱི་བདེན་པའི་དབང་དུ་བྱས་ཏེ། མདོ་དང་། དབྱངས་ཀྱི་སྙན་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་ལ་སོགས་པ་རྣམ་པ་དུ་མར་སྣ་ཚོགས་པའི་ཆོས་རྣམ་པར་འཇོག་པའི་ཚུལ་བསྟན་པའོ། །གཉིས་པ་དཔེ་དོན་སྦྱར་བ་ནི། འཇིག་རྟེན་འདས་ཕྱིར་འཇིག་རྟེན་ན། །འདི་ལ་དཔེ་ནི་མི་དམིགས་པས། །དེ་བཞིན་གཤེགས་པ་ཉིད་དང་ཁམས། །འདྲ་བ་ཉིད་དུ་བསྟན་པ་ཡིན། །ཕྲ་མོ་ཟབ་མོའི་ཚུལ་བསྟན་ནི། །སྦྲང་རྩིའི་རོ་གཅིག་པ་བཞིན་ཏེ། །རྣམ་པ་སྣ་ཚོགས་ཚུལ་བསྟན་ནི། །སྣ་ཚོགས་སྦུན་སྙིང་བཞིན་ཤེས་བྱ། །ཞེས་བྱ་བ་གསུངས་སྟེ། དེ་ལྟར་སངས་རྒྱས་ཀྱི་གཟུགས་དང་། སྦྲང་རྩི་དང་སྙིང་པོའི་དཔེ་འདི་གསུམ་གྱིས་ནི། དེ་བཞིན་གཤེགས་པའི་ཆོས་ཀྱི་སྐུས་ལུས་པ་མེད་པའི་སེམས་ཅན་གྱི་ཁམས་ཁྱབ་པའི་དོན་གྱི་དབང་དུ་བྱས་ནས། སེམས་ཅན་འདི་དག་དེ་བཞིན་གཤེགས་པའི་སྙིང་པོ་ཅན་ཡིན་ནོ་ཞེས་བསྟན་ཏོ། །གང་ཞིག་དེ་བཞིན་གཤེགས་པའི་ཆོས་ཀྱི་སྐུ་ལས་ཕྱི་རོལ་དུ་གྱུར་པའི་སེམས་ཅན་དེ་ནི་འགའ་ཡང་སེམས་ཅན་གྱི་ཁམས་ན་མེད་དེ། ནམ་མཁའི་ཁམས་ལས་ཕྱི་རོལ་ཏུ་གྱུར་པའི་གཟུགས་མེད་པ་བཞིན་ནོ། །གཉིས་པ་དེ་བཞིན་ཉིད་བསྟན་པ་ནི། རང་བཞིན་འགྱུར་བ་མེད་པ་དང་། །དགེ་དང་རྣམ་པར་དག་པའི་ཕྱིར། །དེ་བཞིན་ཉིད་འདི་གསེར་གྱི་ནི། གཟུག་དང་མཚུངས་པར་བརྗོད་པ་ཡིན། ཞེས་བྱ་བ་གསུངས་ཏེ། སེམས་གང་ཡིན་པ་དེ་ཉོན་མོངས་པ་དང་སྡུག་བསྔལ་མཐའ་ཡས་པ་དང་རྗེས་སུ་འབྲེལ་ཀྱང་། རང་བཞིན་གྱི་འོད་གསལ་བ་ཉིད་ཀྱིས་རྣམ་པར་མི་འགྱུར་བ་བརྟན་པ་དེ་གསེར་བཟང་པོ་བཞིན་དུ་གཞན་དུ་མི་འགྱུར་བའི་དོན་གྱི་དེ་བཞིན་ཉིད་ཅེས་བརྗོད་དོ། །དེ་ཡང་ལོག་པ་ཉིད་དུ་ངེས་པའི་རྒྱུ་ཅན་གྱིས་སེམས་ཅན་ཐམས་ཅད་ལ་ཡང་རང་བཞིན་ཁྱད་པར་མེད་དུ་ཟིན་ཀྱང་། གློ་བུར་གྱི་ཉོན་མོངས་པ་མཐའ་དག་རྣམ་པར་དག་པ་ལས་གྱུར་པ་དེ་བཞིན་གཤེགས་པ་ཅེས་བྱ་བའི་གྲངས་སུ་འགྲོ་སྟེ། དེས་ན་འདིར་གསེར་གྱི་དཔེ་གཅིག་གིས་དེ་བཞིན་ཉིད་ལ་དབྱེར་མེད་པའི་དོན་གྱི་དབང་དུ་བྱས་ནས། དེ་བཞིན་གཤེགས་པའི་དེ་བཞིན་ཉིད་སེམས་ཅན་དེ་དག་གིས་སྙིང་པོ་ཡིན་ནོ་ཞེས་བསྟན་པ་ཡིན་ནོ། །གསུམ་པ་བསྐྱེད་བྱེད་གཉིས་ནི། གཏེར་དང་འབྲས་བུའི་ཤིང་བཞིན་དུ། །རིགས་ནི་རྣམ་གཉིས་ཤེས་བྱ་སྟེ། ཐོགས་མེད་རང་བཞིན་གནས་པ་དང་། ཡང་དག་བླངས་པ་མཆོག་ཉིད་དོ། །ཞེས་པའོ། །བཞི་པ་བསྐྱེད་བྱ་གསུམ་བཤད་པ་ནི། རིགས་འདི་གཉིས་ལས་སངས་རྒྱས་ཀྱིས། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ལ་ནི་ཕྱི་མ་གཉིས། །ངོ་བོ་ཉིད་སྐུ་མཛེས་པ་ནི། །རིན་ཆེན་སྐུ་འདྲར་ཤེས་བྱ་སྟེ། །རང་བཞིན་གྱིས་ནི་བྱས་མིན་དང་། །ཡོན་ཏན་རིན་ཆེན་གཏེར་ཡིན་ཕྱིར། །ཆོས་ཆེན་རྒྱལ་སྲིད་ཆེ་ལྡན་ཕྱིར། རྫོགས་ལོངས་འཁོར་ལོས་བསྒྱུར་བཞིན་ནོ། །གཟུགས་བརྙན་གྱི་ནི་རང་བཞིན་ཕྱིར། སྤྲུལ་པ་གསེར་གྱིས་གཟུགས་ལྟ་བུ། །ཞེས་པའོ། །དེ་ལྟར་གཏེར་དང་ལྗོན་ཤིང་དང་། རིན་པོ་ཆེའི་སྐུ་དང་། འཁོར་ལོས་བསྒྱུར་བ་དང་། གསེར་གྱིས་གཟུགས་ཏེ། དཔེ་ལྷག་མ་ལྔ་འདི་དག་གིས་ནི་སངས་རྒྱས་ཀྱི་སྐུ་རྣམ་པ་གསུམ་བསྐྱེད་པའི་རིགས་ཡོད་པའི་དབང་དུ་བྱས་ཏེ། །དེ་བཞིན་གཤེགས་པའི་ཁམས་སེམས་ཅན་འདི་དག་ཐམས་ཅད་ཀྱི་སྙིང་པོ་བསྟན་པ་ཡིན་ནོ། །དེ་བཞིན་གཤེགས་པ་ཉིད་ནི་སངས་རྒྱས་ཀྱི་སྐུ་རྣམ་པ་གསུམ་གྱིས་རབ་ཏུ་ཕྱེ་བ་ཡིན་ཏེ། དེས་ན་དེ་བཞིན་གཤེགས་པའི་ཁམས་ནི་ཐོབ་པའི་རྒྱུ་ཡིན་པས་ཁམས་ཀྱི་དོན་ནི་འདིར་རྒྱུའི་དོན་ཏོ། །གང་གི་ཕྱིར་དེ་ལ་ཡང་སེམས་ཅན་ཐམས་ཅད་ལ་དེ་བཞིན་གཤེགས་པའི་ཁམས་གྲུབ་པའི་སྙིང་པོ་གྱུར་པ་ཡོད་མོད་ཀྱི། སེམས་ཅན་དེ་དག་གིས་ཤེས་པ་མ་ཡིན་ནོ། །གསུམ་པ་དད་པས་རྟོག་པར་བསྟན་པ་ནི། རང་བྱུང་རྣམས་ཀྱིས་དོན་དམ་དེ། །དད་པ་ཉིད་ཀྱི་རྟོགས་བྱ་ཡིན། །ཞེས་པའོ། །བཞི་པ་མི་རྟོགས་པའི་གང་ཟག་ནི། ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་བྱ་བ་གསུངས་ཏེ། མདོར་བསྡུ་ན་གང་ཟག་བཞི་པོ་འདི་དག་དེ་བཞིན་གཤེགས་པའི་སྙིང་པོ་ཅན་མཐོང་བ་ལ་མིག་དང་མི་ལྡན་པར་རྣམ་པར་བཞག་པ་ཡིན་ཏེ། བཞི་གང་ཞེ་ན། འདི་ལྟ་སྟེ་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའོ། །ལྔ་པ་སྙིང་པོ་ཉིད་བསྟན་པར་ལ་གཉིས། ངོ་བོ་བསྟན་པ་དང་། སྟོང་མི་སྟོང་གིས་ཚུལ་བསྟན་པའོ། །དེ་ལ་དང་པོ་ངོ་བོ་བསྟན་པ་ནི། འདི་ལ་གསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་བྱ་བ་གསུངས་ཏེ། དེ་ལ་བདེ་གཤེགས་སྙིང་པོའི་ངོ་བོ་གང་ཡིན་པ་ངོས་འཛིན་པ་ལ། བོད་འདིར་འདོད་ཚུལ་མི་འདྲ་བ་འགའ་བྱུང་སྟེ། བླ་མ་དགའ་ལྡན་པ་རྣམས་ནི་སེམས་བདེན་པ་སྟོང་པའི་སྟོང་ཉིད་མེད་དགག་ནི་བདེ་གཤེགས་སྙིང་པོ་ཡིན་ནོ་ཞེས་ཟེར། བླ་མ་ས་སྐྱ་པ་རྣམས་ནི་སེམས་གསལ་བ་དང་སྟོང་པ་ཟུང་དུ་འཇུག་པ་བདེ་གཤེགས་སྙིང་པོ་བཞེད། ཆོས་རྗེ་རིན་པོ་ཆེ་རང་བྱུང་རྡོ་རྗེའི་གསུངས་ལས་ནི། ཐ་མལ་ཤེས་པ་འདི་ཉིད་ལ། །ཆོས་དབྱིངས་རྒྱལ་བའི་སྙིང་པོ་ཟེར། །བཟང་དུ་འཕགས་པས་བཏང་བ་མེད། །ངན་དུ་སེམས་ཅན་གྱིས་མ་བསླད། །ཐ་སྙད་མང་པོ་བརྗོད་གྱུར་ཀྱང་། །བརྗོད་པ་འདི་ཡི་དོན་མི་རྟོག །ཞེས་གསུངས་སོ། །གང་གིས་ཕྱིར་རང་བཞིན་གྱི་ཡོངས་སུ་དག་པ། དེ་བཞིན་གཤེགས་པའི་ཁམས་འདི་ལས་བསལ་བར་བྱས་བ་ཀུན་ནས་ཉོན་མོངས་པ་ནི་འགའ་ཡང་མེད་དེ། གློ་བུར་བའི་དྲི་མ་དང་བྲལ་བ་ནི་འདིའི་རང་བཞིན་ཡིན་པའི་ཕྱིར་རོ། །འདི་ལ་རྣམ་པར་བྱང་བའི་ཆོས་བཞག་པར་བྱ་བ་ཅུང་ཟད་ཙམ་ཀྱང་ཡོད་པ་མ་ཡིན་ཏེ། རྣམ་པར་དབྱེ་བ་མེད་པའི་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་རྣམས་ནི་འདིའི་ཆོས་ཉིད་དང་རང་བཞིན་ཡིན་པའི་ཕྱིར་རོ། །གཉིས་པ་སྟོང་མི་སྟོང་གིས་ཚུལ་བསྟན་པ་ནི། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་བྱ་བ་གསུངས་ཏེ། དེ་བཞིན་གཤེགས་པའི་སྙིང་པོ་འདི་ནི་རྣམ་པར་དབྱེ་བ་ཡོད་པ། བྲལ་ཤེས་པ་ཉོན་མོངས་པའི་སྦུབས་ཐམས་ཅད་ཀྱིས་ནི་སྟོང་བ་ཡིན་ལ། རྣམ་པར་དབྱེར་བ་མེད་པ་བྲལ་མི་ཤེས་པ་བསམ་གྱིས་མི་ཁྱབ་པའི་སངས་རྒྱས་ཀྱིས་ཆོས་གང་གཱའི་ཀླུང་གི་བྱེ་མ་ལས་འདས་པའི་མི་སྟོང་ངོ། །བཞི་པ་ཁམས་བསྟན་པའི་དགོས་པ་བཤད་པ་ལ་གཉིས། དྲིས་ལན་གྱི་མདོར་བསྟན་པ་དང་། དེ་རྒྱས་པར་བཤད་པའོ། །དང་པོ་དྲིས་ལན་གྱིས་མདོར་བསྟན་པ་ནི། སྤྲིན་དང་རྨི་ལམ་སྒྱུ་བཞིན་དེ་དང་དེར། །ཤེས་བྱ་ཐམས་ཅད་རྣམ་ཀུན་སྟོང་པར་ཞེས། །གསུངས་ནས་ཡང་འདིར་རྒྱལ་རྣམས་སེམས་ཅན་ལ། སངས་རྒྱས་སྙིང་པོ་ཡོད་ཅེས་ཅི་སྟེ་གསུངས། །སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། ཡོད་པ་དེ་དག་དེ་སྤང་དོན་དུ་གསུངས། །ཞེས་པའོ། །གཉིས་པ་རྒྱས་བཤད་ལ་གསུམ། བཀའ་བར་པར་ཇི་ལྟར་བསྟན་པའི་ཚུལ། ཐ་མར་ཁམས་བསྟན་པའི་རྒྱུ་མཚན། དེ་རྒྱས་བཤད་དོ། །དེ་ལ་དང་པོ་བཀའ་བར་པར་ཇི་ལྟར་བསྟན་པའི་ཚུལ་ནི། ཡང་དག་མཐའ་ནི་འདུས་བྱས་ཀྱིས། །རྣམ་པ་ཐམས་ཅད་དབེན་པ་སྟེ། །ཉོན་མོངས་ལས་དང་རྣམ་སྨིན་དོན། །སྤྲིན་ལ་སོགས་པ་བཞིན་དུ་བརྗོད། །ཉོན་མོངས་སྤྲིན་འདྲ་བྱ་བ་ཡི། །ལས་ནི་རྨི་ལམ་ལོངས་སྤྱོད་བཞིན། །ཉོན་མོངས་ལས་ཀྱིས་རྣམ་པར་སྨིན། །ཕུང་པོ་སྒྱུ་མ་སྤྲུལ་པ་བཞིན། །སྔར་ནི་དེ་ལྟར་རྣམ་བཞག་ནས། །ཞེས་པའོ། །གཉིས་པ་ཐ་མར་ཁམས་བསྟན་པའི་རྒྱུ་མཚན་ནི། སླར་ཡང་བླ་མའི་རྒྱུད་འདིར་ནི། ཉེས་པ་ལྔ་དག་སྤང་བའི་ཕྱིར། །ཁམས་ཡོད་ཉིད་ཅེས་བསྟན་པ་ཡིན། །ཞེས་པའོ། །གསུམ་པ་རྒྱས་བཤད་ལ་དྲུག །ཞུམ་པའི་སྐྱོན། བདག་གཞན་མཉམ་པར་མ་ཤེས་པའི་སྐྱོན། ཁམས་མ་ཤེས་ནས་ལོག་པར་འཛིན་པའི་སྐྱོན། སྤངས་གཉེན་ལ་བསྐུར་བའི་སྐྱོན། མཉམ་པ་ཉིད་མི་རྟོགས་པའི་སྐྱོན། སྐྱོན་ལྔ་བྲལ་བའི་ཡོན་ཏན་ནོ། །དེ་ལ་དང་པོ་ཞུམ་པའི་སྐྱོན་ནི། འདི་ལྟར་དེ་ནི་མ་ཐོས་པས། །བདག་ལ་བརྙས་པའི་ཉེས་པ་ཡིས། །སེམས་ནི་ཞུམ་པ་འགའ་ཞིག་ལ། །བྱང་ཆུབ་སེམས་ནི་སྐྱེ་མི་འགྱུར། །ཞེས་པའོ། །གཉིས་པ་བདག་གཞན་མཉམ་པར་མ་ཤེས་པའི་སྐྱོན་ནི། གང་ལ་བྱང་ཆུབ་སེམས་སྐྱེས་པས། །བདག་ནི་མཆོག་ཅེས་རློམ་པ་ན། །བྱང་ཆུབ་སེམས་མ་སྐྱེས་ལ་དམན་པའི་འདུ་ཤེས་རབ་ཏུ་འཇུག །ཅེས་པའོ། །གསུམ་པ་ཁམས་མ་ཤེས་ནས་ལོག་པར་འཛིན་པའི་སྐྱོན་ནི། དེ་ལྟར་སེམས་དཔའ་དེ་ལ་ནི། །ཡང་དག་ཤེས་པ་མི་སྐྱེ་བ། །དེས་ན་ཡང་དག་མི་འཛིན་ཅིང་། །ཡང་དག་དོན་ནི་རིགས་མི་འགྱུར། །ཞེས་པའོ། །བཞི་པ་སྤངས་གཉེན་ལ་སྐུར་བའི་སྐྱོན་ནི། བཅོས་མ་གློ་བུར་བ་ཉིད་ཕྱིར། །སེམས་ཅན་སྐྱོན་དེ་ཡང་དག་མིན། །ཡང་དག་ཉེས་དེ་བདག་མེད་པ། །ཡོན་ཏན་རང་བཞིན་དག་པ་ཡིན། །ཞེས་པའོ། །ལྔ་པ་མཉམ་པ་ཉིད་མི་རྟོགས་པའི་སྐྱོན་ནི། ཡང་དག་མིན་པའི་ཉེས་འཛིན་ཅིང་། །ཡང་དག་ཡོན་ཏན་སྐུར་འདེབས་པས། བློ་ལྡན་བདག་དང་སེམས་ཅན་ནི། །མཚུངས་མཐོང་བྱམས་པ་འཐོབ་མི་འགྱུར། །ཞེས་པའོ། །དྲུག་པ་སྐྱོན་ལྔ་བྲལ་བའི་ཡོན་ཏན་ནི། འདི་ལྟར་དེ་ནི་ཐོས་པ་ལས། །སྤྲོ་དང་སྟོན་པ་བཞིན་གུས་དང་། །ཤེས་རབ་ཡེ་ཤེས་བྱམས་ཆེན་སྐྱེ། །ཆོས་ལྔ་སྐྱེས་ཕྱིར་དེ་ལས་ནི། ཁ་ན་མ་ཐོ་མེད་མཚུངས་ལྟ། །སྐྱོན་མེད་ཡོན་ཏན་ལྡན་པ་དང་། །བདག་དང་སེམས་ཅན་མཚུངས་བྱམས་ལ། །སངས་རྒྱས་ཉིད་ནི་མྱུར་དུ་འཐོབ། །ཞེས་བྱ་བ་ལ། བླ་མ་ས་སྐྱ་པཎ་ཆེན་ལ་སོགས་པ་མཁས་པ་འགའ་ཞིག་ན་རེ། སེམས་ཅན་ལ་བདེ་གཤེགས་སྙིང་པོ་ཡོད་པར་གསུངས་པ་ནི། ངེས་དོན་སྒྲ་ཅི་བཞིན་པ་མ་ཡིན། དྲང་དོན་དགོངས་པ་ཅན་ཡིན། དེའི་དགོངས་གཞི་གང་ཡིན་ན་སྟོང་པ་ཉིད་ཡིན། དགོས་པ་ནི། བདག་ཉིད་ལ་བརྙས་པ་སོགས་སྐྱོན་ལྔ་སྤངས་པའི་ཕྱིར་ཡིན། དངོས་ལ་གནོད་བྱེད་ནི། དེ་ལྟ་བུའི་བདེ་གཤེགས་སྙིང་པོ་སེམས་ཅན་གྱི་རྒྱུད་ལ་ཡོད་པར་འདོད་ན། མུ་སྟེགས་པ་དག་བདག་རྟག་པ་གཅིག་པུ་རང་དབང་ཅན་ཡོད་པར་འདོད་པ་དང་མཚུངས་པར་འགྱུར་རོ་ཞེས་ཟེར་རོ། །དེ་ནི་མི་མཚུངས་སྟེ། མུ་སྟེགས་པ་ནི་བདག་ཏུ་འཛིན་པའི་སྤྲོས་པ་ཅན་ཡིན་འདིར་བདེ་གཤེགས་སྙིང་པོ་ནི། གཞུང་འདི་ཉིད་ལས། བདག་དང་བདག་མེད་སྤྲོས་པ་དག །ཉེ་བར་ཞི་བར་དམ་པའི་བདག །ཞེས་གསུང་པ་ལྟར། མུ་སྟེགས་བཞིན་བདག་ཏུ་ཡང་མི་འཛིན། ཉན་ཐོས་བཞིན་བདག་མེད་དུ་ཡང་མི་འཛིན་པས། དེ་དག་གིས་བཏགས་པའི་སྤྲོས་པ་དང་བྲལ་བར་ཐོགས་འགྲེལ་ལས་གསུངས་སོ། །སེམས་ཅན་ལ་བདེ་གཤེགས་སྙིང་པོ་ཡོད་པ་མི་འདོད་ན། །འདི་ལྟར་དེ་ནི་མ་ཐོས་པས། །བདག་ལ་བརྙས་པའི་ཉེས་པ་ཡིས། །སེམས་ནི་ཞུམ་པ་འགའ་ཞིག་ལ། །བྱང་ཆུབ་སེམས་ནི་སྐྱེ་མི་འགྱུར། །ཞེས་སོགས་གསུངས་པའི་སྐྱོན་ལྔ་སོ་ན་གནས་པར་འགྱུར་རོ། །ཡང་བླ་མ་དགའ་ལྡན་བ་དག་ན་རེ། བཀའ་བར་པ་ལས་རྨི་ལམ་དང་སྒྱུ་མ་བཞིན་ཆོས་ཐམས་ཅད་སྟོང་པར་བཤད་ནས། སླར་ཡང་རྒྱུད་བླ་མ་འདིར་བདེ་གཤེགས་སྙིང་པོ་ཡོད་པར་བཤད་པ་ནི་བཟློས་པའི་སྐྱོན་དུ་འགྱུར་ཏེ། སེམས་སྟོང་པ་ཉིད་བདེ་གཤེགས་སྙིང་པོ་ཡིན་པའི་ཕྱིར་སྙམ་ན་དེ་ལྟ་མོད་ཀྱི་སེམས་ཞུམ་པ་ལ་སོགས་པ་ཉེས་པ་ལྔ་སྤངས་པའི་ཕྱིར། སེམས་ཅན་ཐམས་ཅད་ལ་བདེ་གཤེགས་སྙིང་པོ་ཡོད་ཅེས་གསུངས་པ་ཡིན་ནོ། །ཞེས་པའི་བཤད་པ་མཛད་དོ། །སེམས་ཅན་གྱི་རྒྱུད་ལ་སེམས་བདེན་པས་སྟོང་བའི་སྟོང་ཉིད་དེ་སྟོབས་སོགས་ཡོན་ཏན་རྣམས་དང་དབྱེར་མེད་དུ་ཡོད་པ་ནི་མི་བཞེད་དོ། །ཡང་བདེ་གཤེགས་སྙིང་པོ་ནི་སེམས་བདེན་པས་སྟོང་པའི་སྟོང་ཉིད་མེད་དགག་རྐྱང་པ་ཡིན་ནོ་ཞེས་ཟེར་མོད། དེ་ལ་ཡོན་ཏན་གྱི་རྣམ་པ་ཅི་ཡང་མེད་པས། བདེ་གཤེགས་སྙིང་པོ་ཆོས་སྐུ་དང་དོན་གཅིག་པར་བཤད་པ་དང་འགལ་ཏེ། ཆོས་སྐུའི་དོན་ལ། །སངས་རྒྱས་ཆོས་དབྱེར་མེད་པ་དང་། །ཞེས་གསུང་པའི་ཕྱིར་རོ། །འོ་ན་བདེ་གཤེགས་སྙིང་པོ་གང་ལ་ཟེར་ན། །སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་གསུངས་པ་ལྟ་བུ་འདི་ཉིད་ཡིན་ནོ། །ཐེག་པ་ཆེན་པོ་རྒྱུད་བླ་མའི་བསྟན་བཅོས་དཀོན་མཆོག་གིས་རིགས་རྣམ་པར་དབྱེ་བ་ལས། དེ་བཞིན་གཤེགས་པའི་སྙིང་པོའི་སྐབས་ཏེ་ཚིགས་སུ་བཅད་པ་དང་པོའི་དོན་གྱིས་བསྡུས་པའི་བཤད་པ་རྫོགས་སོ།། ༈ །།

ལེའུ་གཉིས་པ། རྟོགས་པ་བྱང་ཆུབ་བསྟན་པ།

སྤྱི་དོན་གཉིས་པ་རྟོགས་པ་བྱང་ཆུབ་བསྟན་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ལ་གཉིས། ངོ་བོ་བསྟན་པ་དང་། སྡོམ་གྱིས་ཚིགས་བཅད་དོ། །དང་པོ་ངོ་བོ་བསྟན་པ་ནི། དག་ཐོབ་བྲལ་བ་རང་བཞིན་དོན། །དེ་རྟེན་ཟབ་དང་རྒྱ་ཆེ་དང་། །བདག་ཉིད་ཆེན་པོ་དེ་ཡང་ནི། །ཇི་སྲིད་དུས་དང་ཇི་ལྟ་ཉིད། །ཅེས་བྱ་བ་གསུངས་ཏེ། ཚིགས་སུ་བཅད་པ་འདིས་ནི། གོ་རིམ་ཅི་ལྟ་བ་བཞིན་དུ་དོན་བརྒྱད་པོ་འདི་དག་བསྟན་ཏེ། འདི་ལྟ་སྟེ། ངོ་བོའི་དོན་དང་། རྒྱུའི་དོན་དང་། འབྲས་བུ་དོན་དང་། ལས་ཀྱི་དོན་དང་། ལྡན་པའི་དོན་དང་། འཇུག་པའི་དོན་དང་། རྟག་པའི་དོན་དང་། བསམ་གྱིས་མི་ཁྱབ་པའི་དོན་ཉིད། དེ་ལ་ཁམས་གང་ཞིག་ཉོན་མོངས་པའི་སྦུབས་ལས་མ་གྲོལ་བ། དེ་བཞིན་གཤེགས་པའི་སྙིང་པོ་ཞེས་བརྗོད་པ་དེ་རྣམ་པར་དག་པ་ནི། གནས་ཡོངས་སུ་གྱུར་པའི་བྱང་ཆུབ་ཀྱི་ངོ་བོ་ཉིད་དུ་རིག་པར་བྱའོ། །གཉིས་པ་སྡོམ་གྱི་ཚིག་བཅད་ནི། ངོ་བོ་རྒྱུ་དང་འབྲས་བུ་དང་། ལས་དང་ལྡན་དང་འཇུག་པ་དང་། དེ་རྟག་བསམ་མི་ཁྱབ་ཉིད་ཀྱིས། །སངས་རྒྱས་ས་ནི་རྣམ་པར་བསྡུས། ཞེས་པའོ། །གཉིས་པ་རྒྱས་བཤད་ལ་བདུན་ཏེ། །ངོ་བོ་དང་རྒྱུ་བཤད་འབྲས་བུ་དང་། ལྡན་པ་དང་། འཇུག་པ་དང་། རྟག་པ་དང་། བསམ་གྱིས་མི་ཁྱབ་པ་རྒྱས་པར་བཤད་པའོ། །དང་པོ་ལ་གཉིས། ངོ་བོ་དང་རྒྱུ་མདོར་བསྟན་པ་དང་། དེ་རྒྱས་བཤད་དོ། །དང་པོ་མདོར་བསྟན་ནི། རང་བཞིན་འོད་གསལ་ཞེས་བརྗོད་གང་ཡིན་ཉི་དང་མཁའ་བཞི་གློ་བུར་གྱིས་ཉོན་མོངས་ཤེས་བྱའི་སྤྲིན་ཚོགས་སྟུག་པོའི་སྒྲིབ་པ་ཡིས་ནི་བསྒྲིབས་གྱུར་པ། དྲི་མེད་སངས་རྒྱས་ཡོན་ཏན་ཀུན་ལྡན་རྟག་བརྟན་གཡུང་དྲུང་སངས་རྒྱས་ཉིད། །དེ་ནི་ཆོས་ལ་མི་རྟོག་རྣམ་འབྱེད་ཡེ་ཤེས་དག་ལ་བརྟེན་ནས་ཐོབ། །ཞེས་པའོ། །གཉིས་པ་རྒྱས་བཤད་ལ་བཞི། ངོ་བོ་ཉིད་དང་། ཡོན་ཏན་ལྡན་ཚུལ་དང་། སྒྲིབ་པའི་དོན་དང་། བྲལ་བའི་རྒྱུའོ། །དེ་ལ་དང་པོ་ངོ་བོ་ཉིད་ནི། སངས་རྒྱས་ཉིད་ནི་དབྱེར་མེད་པ། །དག་པའི་ཆོས་ཀྱིས་རབ་ཕྱེ་བ། །ཉི་མཁའ་བཞིན་ཏེ་ཡེ་ཤེས་དང་། །སྤངས་པ་གཉིས་ཀྱི་མཚན་ཉིད་དོ། །ཞེས་པའོ། །གཉིས་པ་ཡོན་ཏན་ལྡན་ཚུལ་ནི། འོད་གསལ་བྱས་མིན་དབྱེར་མེད་པར། །འཇུག་ཅན་གང་གཱའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཀྱིས། །ཆོས་རྣམས་ཀུན་དང་ལྡན་པ་ཉིད། །ཞེས་པའོ། །གསུམ་པ་སྒྲིབ་པའི་དོན་ནི། རང་བཞིན་གྱིས་ནི་མ་གྲུབ་དང་། །ཁྱབ་དང་གློ་བུར་བ་ཉིད་ཀྱིས། ཉོན་མོངས་ཤེས་བྱའི་སྒྲིབ་པ་དེ། །སྤྲིན་དང་འདྲ་བར་བརྗོད་པ་ཡིན། །ཞེས་པའོ། །བཞི་པ་བྲལ་བའི་རྒྱུ་ནི། སྒྲིབ་པ་གཉིས་དང་བྲལ་བ་ཡི། །རྒྱུ་ནི་ཡེ་ཤེས་གཉིས་ཡིན་ཏེ། །མི་རྟོག་པ་དང་དེ་ཡི་ནི། །རྗེས་ཐོབ་དེ་ནི་ཡེ་ཤེས་འདོད། །ཞེས་པའོ། །གཉིས་པ་འབྲས་བུ་ལ་གཉིས་ཏེ། མདོར་བསྟན་དང་། རྒྱས་བཤད་དོ། །དེ་ལ་དང་པོ་མདོར་བསྟན་ནི། དྲི་མེད་ཆུ་ལྡན་རིམ་རྒྱས་པདྨ་ཁེང་པའི་མཚོ་བཞིན་དང་། །སྒྲ་གཅན་ཁ་ནས་ཐར་པའི་ཟླ་བ་ཉ་བ་ལྟ་བུ་དང་། །སྤྲིན་ཚོགས་ཉོན་མོངས་དག་ལས་གྲོལ་བའི་ཉི་མ་ལྟ་བུར་ནི། །དྲི་མེད་ཡོན་ཏན་ལྡན་ཕྱིར་འོད་ཟེར་སྣང་ལྡན་དེ་ཉིད་དོ། །ཐུབ་པའི་ཁྱུ་མཆོག་སྦྲང་རྩིའི་སྙིང་པོ་དང་། །རིན་ཆེན་གསེར་དང་གཏེར་དང་ལྗོན་པ་བཞིན། །དྲི་མེད་རིན་ཆེན་བདེ་གཤེགས་སྐུ་དང་ནི། ས་བདག་གསེར་གྱི་གཟུགས་འདྲ་རྒྱལ་བ་ཉིད། ཅེས་པའོ། །གཉིས་པ་རྒྱས་བཤད་ལ་གསུམ། མཉམ་བཞག་དང་རྗེས་ཐོབ་ཀྱི་འབྲས་བུ། དུས་གསུམ་དག་པའི་འབྲས་བུ། དེ་དཔེ་དོན་དགུ་དང་སྦྱར་བའོ། །དེ་ལ་དང་པོ་མཉམ་གཞག་དང་རྗེ་ཐོབ་ཀྱི་འབྲས་བུ་ནི། ཆུ་མཚོ་སོགས་བཞིན་འདོད་ཆགས་སོགས། །གློ་བུར་ཉོན་མོངས་དག་པ་ནི། །མདོར་ན་མི་རྟོག་ཡེ་ཤེས་ཀྱིས། །འབྲས་བུ་ཡིན་པར་རབ་ཏུ་བརྗོད། །རྣམ་པ་ཀུན་གྱི་མཆོག་ལྡན་པ། །སངས་རྒྱས་སྐུ་ནི་ངེས་ཐོབ་པ། །དེ་ནི་རྗེས་ལ་ཐོབ་པ་ཡིན། ཡེ་ཤེས་འབྲས་བུ་ཡིན་པར་བྱ། ཞེས་པའོ། །གཉིས་པ་དུག་གསུམ་དག་པའི་འབྲས་བུ་ནི། འདོད་ཆགས་རྡུལ་ནི་སྤངས་ཕྱིར་དང་། །གདུལ་བ་བྱ་བའི་པདྨ་ལ། །བསམ་གཏན་ཆུ་ནི་འབབ་ཕྱིར་ཏེ། །ཆུ་དག་རྫིང་དང་མཚུངས་པ་ཡིན། །ཞེ་སྡང་སྒྲ་གཅན་ལས་གྲོལ་བས། །སྙིང་རྗེ་བྱམས་ཆེན་འོད་ཟེར་གྱིས། །འགྲོ་བ་ཁྱབ་པའི་ཕྱིར་ན་དེ། །དྲི་མེད་ཟླ་བ་ཉ་བ་བཞིན། །གཏི་མུག་སྤྲིན་ལས་རྣམ་གྲོལ་བས། །འགྲོ་བ་ཡེ་ཤེས་འོད་ཟེར་གྱིས། །མུན་པ་སེལ་ཕྱིར་སངས་རྒྱས་ཉིད། །དེ་ནི་དྲི་མེད་ཉི་མ་བཞིན། །ཞེས་པའོ། །གསུམ་པ་དེ་དཔེ་དོན་དགུ་དང་སྦྱར་བ་ནི། མི་མཉམ་མཉམ་པའི་ཆོས་ཕྱིར་དང་། །དམ་ཆོས་རོ་ནི་སྦྱིན་མཛད་དང་། །ཤུན་པ་དང་ནི་བྲལ་ཕྱིར་དེ། །བདེ་གཤེགས་སྦྲང་རྩིའི་སྙིང་པོ་བཞིན། །དག་ཕྱིར་ཡོན་ཏན་རྫས་ཀྱིས་ནི། །དབུལ་བ་སེལ་བར་བྱེད་ཕྱིར་དང་། །རྣམ་གྲོལ་འབྲས་བུ་སྦྱིན་བྱེད་ཕྱིར། །གསེར་དང་གཏེར་དང་ལྗོན་པ་བཞིན། །རིན་ཆེན་ཆོས་ཀྱི་སྐུ་ཕྱིར་དང་། །རྐང་གཉིས་བདག་པོ་མཆོག་ཕྱིར་དང་། །རིན་ཆེན་གཟུགས་ཀྱི་རྣམ་པའི་ཕྱིར། དེ་ནི་རིན་ཆེན་རྒྱལ་གསེར་བཞིན། །ཞེས་བྱ་བ་གསུངས་ཏེ། གནས་ཡོངས་སུ་གྱུར་པའི་ངོ་བོ་འཇིག་རྟེན་ལས་འདས་པ་རྣམ་པར་མི་རྟོག་པ་དང་། དེའི་རྗེས་ལས་ཐོབ་པའི་ཡེ་ཤེས་ཀྱི་རྒྱུ་ཅན། བྲལ་བའི་མིང་ཅན་གྱིས་འབྲས་བུ་གང་ཡིན་པ་དེའི་ལས་ནི་རང་དང་གཞན་གྱི་དོན་ཕུན་སུམ་ཚོགས་པར་བརྗོད་དོ། །དེ་ལ་རང་དང་གཞན་དོན་ཕུན་སུམ་ཚོགས་པ་གང་ཞེ་ན། གང་ཞིག་བག་ཆགས་དང་བཅས་པའི་ཉོན་མོངས་པ་དང་། ཤེས་བྱའི་སྒྲིབ་པ་ལས་ཐར་བའི་ཕྱིར། སྒྲིབ་པ་མེད་པའི་ཆོས་ཀྱི་སྐུ་ཐོབ་པ་འདི་ནི་རང་གི་དོན་ཕུན་སུམ་ཚོགས་པར་བརྗོད་ལ། གང་ཞིག་དེའི་སྟེང་དུ་འཇིག་རྟེན་ཅི་སྲིད་པར་ལྷུན་གྱིས་གྲུབ་པས་སྐུ་གཉིས་ཀྱིས་ཀུན་ཏུ་སྟོན་པ་དང་། བསྟན་པ་ལ་དབང་འབྱོར་པ་གཉིས་ཀྱིས་འཇུག་པ་འདི་ནི་གཞན་གྱི་དོན་ཕུན་སུམ་ཚོགས་པར་བརྗོད་དོ། །གསུམ་པ་ལས་བཤད་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཟག་པ་མེད་ཁྱབ་འཇིགས་མེད་ཆོས་ཅན་ཏེ། བརྟན་ཞི་རྟག་པ་འཕོ་བ་མེད་པའི་གནས། །དེ་བཞིན་གཤེགས་པ་མཁའ་བཞིན་དམ་པ་ཡི། དབང་པོ་དྲུག་དོན་ཉམས་སུ་མྱོང་བའི་རྒྱུ། །འབྱུང་མེད་གཟུགས་དོན་ལྟ་དང་གཏམ་བཟང་ནི། །གཙང་མ་ཉན་དང་བདེ་གཤེགས་ཚུལ་ཁྲིམས་ཀྱིས། །དྲི་གཙང་སྣོམ་དང་འཕགས་ཆེན་དམ་ཆོས་རོ། །མྱོང་དང་ཏིང་འཛིན་རེག་བདེ་ཉམས་མྱོང་དང་། །རང་གི་ངོ་བོ་ཉིད་ཀྱིས་ཟབ་པའི་ཚུལ། །རྟོག་པའི་རྒྱུར་འགྱུར་ཞིབ་མོར་བསམ་པ་ན། །དོན་དམ་བདེ་མཛད་དེ་བཞིན་གཤེགས་པ་ནི། །ནམ་མཁའ་བཞིན་དུ་རྒྱུ་མཚན་རྣམས་དང་བྲལ། །ཞེས་པའོ། །གཉིས་པ་རྒྱས་པར་བཤད་པ་ལ། ངོ་བོ་ཉིད་སྐུ་དང་འབྲེལ་པའི་ལས་དང་། གཟུགས་སྐུ་གཉིས་དང་འབྲེལ་བའི་ལས་སོ། །དེ་ལ་དང་པོ་ངོ་བོ་ཉིད་སྐུ་དང་འབྲེལ་བའི་ལས་ནི། མདོར་ན་ཡེ་ཤེས་གཉིས་པོ་ཡིས། །ལས་སུ་འདི་ནི་ཤེས་བྱ་སྟེ། །གྲོལ་བའི་སྐུ་ནི་རྫོགས་པ་དང་། །ཆོས་ཀྱི་སྐུ་ནི་སྦྱོང་བའོ། །རྣམ་གྲོལ་ཆོས་ཀྱི་སྐུ་དག་ནི།་རྣམ་གཉིས་རྣམ་གཅིག་ཤེས་བྱ་སྟེ། །ཟག་པ་མེད་ཕྱིར་ཁྱབ་པའི་ཕྱིར། །འདུས་མ་བྱས་པའི་གནས་ཉིད་ཕྱིར། །ཉོན་མོངས་རྣམས་ནི་བག་ཆགས་དང་། །བཅས་པ་འགག་ཕྱིར་ཟག་མེད་དེ། །ཆགས་མེད་ཐོགས་པ་མེད་པའི་ཕྱིར། །ཡེ་ཤེས་ཁྱབ་པ་ཉིད་དུ་བརྗོད། །གཏན་དུ་འཇིག་པ་མེད་པ་ཡི། །རང་བཞིན་ཡིན་ཕྱིར་འདུས་མ་བྱས། །འཇིགས་མེད་ཉིད་ནི་བརྟན་པ་སྟེ། །བརྟན་སོགས་རྣམས་ཀྱིས་དེ་བཤད་དོ། །འཇིགས་པ་རྣམ་བཞིར་ཤེས་བྱ་སྟེ། །བརྟན་སོགས་དག་ལ་བཟློགས་ཕྱིར་རོ། །མྱགས་དང་རྣམ་འགྱུར་ཆད་པ་དང་། །བསམ་མི་ཁྱབ་སྒྱུ་འཕོ་བ་སྟེ། །དེ་མེད་ཕྱིར་ན་བརྟན་ཞི་དང་། །རྟག་དང་འཕོ་མེད་ཤེས་པར་བྱ། །ཞེས་པའོ། །གཉིས་པ་གཟུགས་སྐུ་གཉིས་དང་འབྲེལ་པའི་ལས་ནི། དྲི་མེད་ཤེས་དེ་དཀར་པོ་ཡིས། །ཆོས་ཀྱི་རྟེན་ཡིན་ཕྱིར་ན་གནས། །ཇི་ལྟར་རྒྱུ་མིན་ནམ་མཁའ་ནི། །གཟུགས་མཐོང་བ་དང་སྒྲ་དང་དྲི། །རོ་དང་རེག་དང་ཆོས་རྣམས་ནི། །ཐོས་ལ་སོགས་པའི་རྒྱུ་ཡིན་ལྟར། །དེ་བཞིན་སྐུ་གཉིས་སྒྲིབ་མེད་པའི། །སྦྱོར་བས་བརྟན་པའི་དབང་དོན་ལ། །ཟག་པ་མེད་པའི་ཡོན་ཏན་དག །སྐྱེ་བ་ཡི་ནི་རྒྱུ་ཡིན་ནོ། །ཞེས་པའོ། །བཞི་པ་ལྡན་པ་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དེ་ལ་དང་པོ་མདོར་བསྟན་པ་ནི། བསམ་མེད་རྟག་བརྟན་ཞི་བ་གཡུང་དྲུང་ཉིད། །རབ་ཏུ་ཞི་ཁྱབ་རྟོག་བྲལ་ནམ་མཁའ་བཞིན། །ཆགས་མེད་ཀུན་ཏུ་ཐོགས་མེད་རྩུབ་རིག་སྤངས། །བལྟ་བཟུང་མེད་དགེ་སངས་རྒྱས་དྲི་མ་མེད། །ཞེས་པའོ། །གཉིས་པ་རྒྱས་བཤད་ལ། དོན་གཉིས་དབྱེར་མེད་དུ་ལྡན་པ་བསྟན། དེ་བསམ་གྱིས་མི་ཁྱབ་པར་བཤད། རྟག་བརྟན་ཞི་བ་གཡུང་དྲུང་གི་དོན་བསྟན། ཆོས་སྐུ་ཁྱད་ཆོས་རྒྱས་པར་བཤད་པའོ། །དེ་ལ་དང་པོ་དོན་གཉིས་དབྱེར་མེད་དུ་ལྡན་པ་བསྟན་པ་ནི། རྣམ་གྲོལ་ཆོས་ཀྱི་སྐུ་དག་གིས། །རང་དང་གཞན་གྱིས་དོན་བསྟན་ཏེ། རང་གཞན་དོན་བརྟེན་དེ་ལ་ནི། བསམ་མི་ཁྱབ་སོགས་ཡོན་ཏན་ལྡན། །ཞེས་བྱའོ། །གཉིས་པ་དེ་བསམ་གྱིས་མི་ཁྱབ་པར་བཤད་པ་ནི། ཐམས་ཅད་མཁྱེན་པའི་ཡེ་ཤེས་ཡུལ། །སངས་རྒྱས་ཤེས་གསུམ་ཡུལ་མིན་ཕྱིར། །ཡེ་ཤེས་ཡུལ་ཅན་རྣམས་ཀྱིས་ནི། །བསམ་གྱིས་མི་ཁྱབ་པར་རྟོག་པར་བྱ། །ཕྲ་ཕྱིར་ཐོས་པའི་ཡུལ་མིན་ཏེ། །དོན་དམ་ཡིན་ཕྱིར་བསམ་བྱ་མིན། །ཆོས་ཉིད་ཟབ་ཕྱིར་འཇིག་རྟེན་པའི། །བསྒོམ་པ་ལ་སོགས་ཡུལ་མ་ཡིན། །གང་ཕྱིར་གཟུགས་ལ་དམུས་ལོང་བཞིན། །བྱིས་པས་དེ་སྔོན་མཐོང་མ་མྱོང་། །བཙས་པའི་ཁྱིམ་ནང་བུ་ཆུང་གིས། །ཉི་མའི་གཟུགས་བཞིན་འཕགས་པས་ཀྱང་། །ཞེས་པའོ། །གསུམ་པ་རྟག་བརྟན་ཞི་བ་གཡུང་དྲུང་གི་དོན་བསྟན་པ་ནི། སྐྱེ་དང་བྲལ་ཕྱིར་རྟག་པ་སྟེ། །འགག་པ་མེད་ཕྱིར་བསྟན་པ་ཡིན། །གཉིས་མེད་ཕྱིར་དེ་ཞི་བ་སྟེ། །གཡུང་དྲུང་ཆོས་ཉིད་གནས་ཕྱིར་རོ། །ཞེས་པའོ། །བཞི་པ་ཆོས་སྐུའི་ཁྱད་ཆོས་རྒྱས་པ་བཤད་པ་ནི། རབ་ཞི་འགོག་པའི་བདེན་པའི་ཕྱིར། །ཐམས་ཅད་རྟོགས་ཕྱིར་ཁྱབ་པ་ཉིད། །གནས་པ་མེད་ཕྱིར་རྟོག་མེད་དེ། །ཉོན་མོངས་སྤངས་ཕྱིར་ཆགས་པ་མེད། །ཤེས་བྱའི་སྒྲིབ་ཀུན་དག་པའི་ཕྱིར། །ཐམས་ཅད་དུ་ནི་ཐོག་པ་མེད། །གཉིས་མེད་ལས་སུ་རུང་བའི་ཕྱིར། །རྩུབ་པའི་རེག་དང་བྲལ་བ་ཡིན། །དེ་གཟུགས་མེད་ཕྱིར་བལྟར་མེད་དེ། །མཚན་མ་མེད་ཕྱིར་བཟུང་དུ་མེད། །དགེ་བ་རང་བཞིན་དག་པའི་ཕྱིར། །དྲི་མེད་དྲི་མ་སྤངས་ཕྱིར་རོ། །ཞེས་པའོ། །ལྔ་པ་འཇུག་པ་བཤད་པ་ལ། མདོར་བསྟན་དང་། རྒྱས་བཤད་གཉིས། དང་པོ་མདོར་བསྟན་ལ། ངོ་བོ་གང་རྟོག་པ་དང་། ཆོས་སྐུ་དང་། ལོངས་སྐུ་དང་། སྤྲུལ་སྐུ་རྒྱུན་མི་འཆད་པའོ། །དེ་ལ་དང་པོ་ངོ་བོ་གང་རྟོག་པ་ནི། ཐོག་མ་དབུས་མཐའ་མེད་ཅིང་རྣམ་དབྱེར་མེད། །གཉིས་མེད་གསུམ་བྲལ་དྲི་མེད་རྣམ་རྟོག་མེད། །ཆོས་དབྱིངས་རང་བཞིན་གང་ཡིན་དེ་རྟོག་པ། །མཉམ་པར་བཞག་པའི་རྣལ་འབྱོར་པ་ཡི་མཐོང་། །གཉིས་པ་ཆོས་སྐུ་ནི། གཞལ་མེད་གང་གིས་བྱེ་མ་ལས་འདས་པ། །བསམ་མེད་མཉམ་མེད་ཡོན་ཏན་རྣམས་དང་ལྡན། །དེ་བཞིན་གཤེགས་པའི་དྲི་མེད་དབྱིངས་དེ་ནི། །བག་ཆགས་བཅས་པའི་ཉེས་པ་རྣམས་སྤངས་པའོ། །གསུམ་པ་ལོངས་སྐུ་ནི། སྣ་ཚོགས་དམ་ཆོས་འོད་ཟེར་མངའ་བའི་སྐུས། །འགྲོ་བའི་རྣམ་གྲོལ་དོན་གྲུབ་ལ་བརྩོན་པ། །མཛད་པ་ཡིད་བཞིན་ནོར་བུའི་རྒྱལ་བཞིན་ཏེ། །སྣ་ཚོགས་དངོས་དང་དེ་ཡི་རང་བཞིན་མིན། །ཞེས་པའོ། །བཞི་པ་སྤྲུལ་སྐུ་རྒྱུན་མི་འཆད་པ་ནི། འཇིག་རྟེན་ཞི་བའི་ལམ་ལ་འཇུག་པ་དང་། །རབ་ཏུ་སྨིན་དང་ལུང་སྟོན་རྒྱུ་ཡིས་གཟུགས། །གང་ཡིན་དེ་ཡང་འདིར་ནི་རྟག་གནས་ཏེ། །ནམ་མཁའི་ཁམས་སུ་གཟུགས་ཀྱི་ཁམས་བཞིན་ནོ། །ཞེས་པའོ། །གཉིས་པ་རྒྱས་པར་བཤད་པ་ལ། དབྱེ་བའི་གཞི་དང་། དེ་ལ་སྐུ་གསུམ་དུ་དབྱེ་བ་དང་། མཚན་ཉིད་ལྔ་དང་ཡོན་ཏན་ལྔ་ལྡན་གྱི་ངོ་བོ་ཉིད་སྐུ་བཤད། རང་བཞིན་ཐུགས་རྗེ་ལྷུན་གྲུབ་སོགས་ཡོན་ཏན་ལྔ་ལྡན་གྱི་ལོངས་སྐུ་བཤད། མཛད་པ་བཅུ་གཉིས་ཀྱི་སྒོ་ནས་སྤྲུལ་སྐུ་བཤད། ཁྱད་པར་གསུངས་པའི་འཕྲིན་ལས་གོ་རིམ་དང་བཅས་པ་བཤད། ཟབ་པ་དང་རྒྱ་ཆེ་བའི་དོན་དང་། བརྟེན་དང་རྟེན་པ་བསྟན་པའོ། །དེ་ལ་དང་པོ་དབྱེ་བའི་གཞི་ནི། །རང་འབྱུང་རྣམས་ཀྱིས་ཐམས་ཅད་མཁྱེན། །སངས་རྒྱས་ཉིད་ཅེས་གང་བརྗོད་པ། །མཆོག་ཏུ་མྱ་ངན་འདས་བསམ་མེད། །དགྲ་བཅོམ་སོ་སོའི་བདག་འགྱུར་བ། །ཞེས་པའོ། །གཉིས་པ་དེ་ལ་སྐུ་གསུམ་དུ་དབྱེ་བ་ནི། དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོའི་ཡོན་ཏན་གྱིས། །ཆོས་ཀྱི་རབ་ཕྱེ་རང་བཞིན་ལ། །སོགས་པའི་སྐུ་གསུམ་དག་གིས་འཇུག །ཞེས་པའོ། །གསུམ་པ་མཚན་ཉིད་ལྔ་དང་ཡོན་ཏན་ལྔ་ལྡན་གྱི་ངོ་བོ་ཉིད་སྐུ་བཤད་པ་ནི། དེ་ལ་སངས་རྒྱས་རྣམས་ཀྱི་ནི། །ངོ་བོ་ཉིད་སྐུ་མཚན་ཉིད་ལྔ། །མདོར་ན་ཡོན་ཏན་ལྔ་དང་ནི། །ལྡན་པ་ཉིད་དུ་རིག་པར་བྱ། །འདུས་མ་བྱས་ཤིང་རྣམ་དབྱེར་མེད། །མཐའ་གཉིས་དག་ནི་རྣམ་པར་སྤངས། །ཉོན་མོངས་ཤེས་བྱའི་སྙོམས་འཇུག་གིས། །སྒྲིབ་གསུམ་ལས་ནི་ངེས་གྲོལ་ཏེ། །དྲི་མེད་རྣམ་པར་རྟོག་མེད་དང་། རྣམ་འབྱོར་རྣམས་ཀྱི་ཡུལ་ཡིན་ཕྱིར། །ཆོས་དབྱིངས་ངོ་བོ་ཉིད་ཀྱི་ནི། ཟབ་པའི་ཕྱིར་ན་འོད་གསལ་བ། །གཞལ་མེད་གྲངས་མེད་བསམ་མེད་པ། །མཉམ་མེད་དག་པའི་མཐར་ཐུག་པའི། །ཡོན་ཏན་རྣམས་དང་ཡང་དག་པར། །ངོ་བོ་ཉིད་ཀྱི་སྐུ་ལྡན་ཏེ། །རྒྱ་ཆེའི་ཕྱིར་དང་གྲངས་མེད་ཕྱིར། རྟོག་གེའི་ཡུལ་ནི་མིན་ཕྱིར་དང་། །འབའ་ཞིག་བག་ཆགས་བཅས་སྤངས་ཕྱིར། །གཞལ་མེད་ལ་སོགས་གོ་རིམ་བཞིན། །ཞེས་པའོ། །བཞི་པ་རང་བཞིན་ཐུགས་རྗེ་ལྷུན་གྲུབ་སོགས་ཡོན་ཏན་ལྔ་ལྡན་གྱི་ལོངས་སྐུ་བཤད་པ་ནི། སྣ་ཚོགས་ཆོས་ལ་རྫོགས་ལོངས་སྤྱོད། །རང་བཞིན་ཆོས་ནི་སྣང་ཕྱིར་དང་། །ཐུགས་རྗེ་དག་པའི་རྒྱུ་མཐུན་པ། །འགྲོ་དོན་རྒྱུན་མི་འཆད་ཕྱིར་དང་། །རྣམ་པར་རྟོག་མེད་ལྷུན་གྲུབ་པར། །འདོད་པ་ཇི་བཞིན་ཡོངས་སྐོང་ཕྱིར། །ཡིད་བཞིན་ནོར་མཐུའི་རྫུ་འཕྲུལ་གྱིས། །རྫོགས་པར་ལོངས་སྤྱོད་རྣམ་པར་གནས། །བརྗོད་སྟོན་མཛད་རྒྱུན་མི་འཆད་དང་། །མངོན་པར་འདུ་བྱེད་མེད་པ་དང་། །དེ་ཡི་ངོ་བོ་མི་སྟོན་ལ། །འདིར་ནི་སྣ་ཚོགས་རྣམ་ལྔར་བརྗོད། །ཇི་ལྟར་ཚོན་ནི་སྣ་ཚོགས་ཀྱིས། །ནོར་བུ་དེ་དངོས་མིན་སྣང་ལྟར། །དེ་བཞིན་འགྲོ་རྐྱེན་སྣ་ཚོགས་པས། །ཁྱབ་བདག་དེ་དངོས་མིན་པ་སྣང་། །ཞེས་པའོ། །ལྔ་པ་མཛད་པ་བཅུ་གཉིས་ཀྱི་སྒོ་ནས་སྤྲུལ་སྐུ་བཤད་པ་ནི། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་ནས་ནི་འཕོ་བ་དང་། །ལྷུམས་སུ་འཇུག་དང་བལྟམ་པ་དང་། །བཟོ་ཡི་གནས་ལ་མཁས་པ་དང་། །བཙུན་མོ་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཅི་སྲིད་གནས་པར་སྟོན། །ཞེས་པའོ། །དྲུག་པ་ཁྱད་པར་གསུང་གི་འཕྲིན་ལས་གོ་རིམ་དང་བཅས་པ་བཤད་པ་ནི། མི་རྟག་སྡུག་བསྔལ་བདག་མེད་དང་། །ཞི་བའི་སྒྲ་ཡིས་ཐབས་མཁྱེན་པས། །སེམས་ཅན་སྲིད་གསུམ་སྐྱོ་བསྐྱེད་ནས། མྱ་ངན་འདས་ལ་རབ་འཇུག་མཛད། ཞི་བའི་ལམ་ལ་རབ་ཞུགས་པ། །མྱ་ངན་འདས་ཐོབ་འདུ་ཤེས་ཅན། །དམ་ཆོས་པདྨ་དཀར་ལ་སོགས། །ཆོས་ཀྱི་དེ་ཉིད་བསྟན་པ་ཡིས། །དེ་དག་སྔར་འཛིན་ལས་བཟློག་སྟེ། །ཐབས་དང་ཤེས་རབ་ཡོངས་བཟུང་བས། །ཐེག་པ་མཆོག་ལ་སྦྱིན་མཛད་དེ། །བྱང་ཆུབ་མཆོག་ཏུ་ལུང་སྟོན་ཏོ། །ཞེས་པའོ། །བདུན་པ་ཟབ་པ་དང་རྒྱ་ཆེ་བའི་དོན་ནི། ཟབ་དང་མཐུན་ནི་སྣ་ཚོགས་དང་། །བྱིས་པའི་དོན་མཐུན་རབ་འདྲེན་ཕྱིར། །འདི་དག་གྲངས་བཞིན་ཟབ་པ་དང་། །རྒྱ་ཆེའི་བདག་ཉིད་ཆེས་ཤེས་བྱ། །འདི་ནི་དང་པོའི་ཆོས་སྐུ་སྟེ། །ཕྱི་མ་དག་ནི་གཟུགས་ཀྱི་སྐུ། །ཞེས་པའོ། །བརྒྱད་པ་བརྟེན་དང་རྟེན་པར་བསྟན་པ་ནི། ནམ་མཁའ་ལ་ནི་གཟུགས་གནས་བཞིན། །དང་པོ་ལ་ནི་ཐ་མ་གནས། །ཞེས་པའོ། །དྲུག་པ་རྟག་པའི་དོན་བཤད་པ་ལ། མདོར་བསྟན་པ་དང་། གཟུགས་སྐུ་རྟག་པའི་རྒྱུ་མཚན་བདུན་དང་ཆོས་སྐུ་རྟག་པའི་རྒྱུ་མཚན་གསུམ་གྱིས་རྒྱས་བཤད་དང་། དོན་བསྡུ་བའོ། །དང་པོ་མདོར་བསྟན་པ་ནི། རྒྱུ་མཐའ་ཡས་དང་སེམས་ཅན་ཟད་མེད་དང་། །བརྩེ་དང་འཕྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟགས། ཞེས་པའོ། །གཉིས་པ་གཟུགས་སྐུ་རྟག་པའི་རྒྱུ་མཚན་བདུན་ནི། ལུས་དང་སྲོག་དང་ལོངས་སྤྱོད་རྣམས། །བཏང་ནས་དམ་ཆོས་འཛིན་ཕྱིར་དང་། །སེམས་ཅན་ཀུན་ལ་ཕན་པའི་ཕྱིར། །དང་པོ་དམ་བཅས་མཐར་ཕྱིན་ཕྱིར། །སངས་རྒྱས་ཉིད་ནི་གཙང་བ་དང་། །དག་པའི་ཐུགས་རྗེ་རབ་འཇུག་ཕྱིར། །རྫུ་འཕྲུལ་རྐང་པ་སྟོན་པ་ནི། །དེ་ཡིས་གནས་པར་སྤྱོད་པའི་ཕྱིར། །མཁྱེན་པས་འཁོར་དང་མྱ་ངན་འདས། །གཉིས་སུ་འཛིན་ལས་གྲོལ་བའི་ཕྱིར། །རྟག་ཏུ་བསམ་ཡས་ཏིང་འཛིན་གྱིས། །བདེ་བ་ཕུན་སུམ་ཚོགས་ལྡན་ཕྱིར། །འཇིག་རྟེན་ན་ནི་སྤྱོད་པ་ན། །འཇིག་རྟེན་ཆོས་ཀྱིས་གོས་མེད་ཕྱིར། །ཞེས་པའོ། །གསུམ་པ་ཆོས་སྐུ་རྟག་པའི་རྒྱུ་མཚན་གྱི་རྒྱས་བཤད་ནི། འཆི་མེད་ཞི་བའི་གནས་ཐོབ་པ། །འཆི་བདུད་རྒྱུ་བ་མེད་པའི་ཕྱིར། །འདུས་མ་བྱས་པའི་རང་བཞིན་གྱིས། །ཐུབ་པ་གདོད་ནས་རབ་ཞིའི་ཕྱིར། །རྟག་པ་སྐྱབས་མེད་རྣམས་ཀྱིས་ནི། །སྐྱབས་ལ་སོགས་པ་འཐད་ཕྱིར་རོ། །ཞེས་པའོ། །བཞི་པ་དོན་བསྡུ་བ་ནི། དང་པོ་ཡི་ནི་རྒྱུ་བདུན་གྱིས། །གཟུགས་ཀྱི་སྐུ་ནི་རྟག་ཉིད་དེ། ཕྱི་མ་གསུམ་གྱིས་སྟོན་པ་ནི། །ཆོས་ཀྱི་སྐུ་ཡི་རྟག་པ་ཉིད། །ཅེས་པའོ། །བདུན་པ་བསམ་གྱིས་མི་ཁྱབ་པ་བཤད་པ་ལ་བཞི་སྟེ། བསམ་གྱིས་མི་ཁྱབ་པའི་དོན་བརྗོད་པ་དང་། གཏན་ཚིག་བརྒྱད་རིམ་པར་བཤད་པ་དང་། རྒྱུ་དྲུག་གིས་དོན་བསྡུ་བ་དང་། དེ་རྟོག་པར་དཀའ་བའོ། །དེ་ལ་དང་པོ་བསམ་གྱིས་མི་ཁྱབ་པའི་དོན་བརྗོད་པ་ནི། ངག་ཡུལ་མིན་ཕྱིར་དོན་དམ་གྱིས་བསྡུས་ཕྱིར། །རྟོག་གནས་མིན་ཕྱིར་དཔེ་ལས་འདས་པའི་ཕྱིར། །བླ་ན་མེད་ཕྱིར་སྲིད་ཞིའི་མ་བསྡུས་ཕྱིར། །རྒྱལ་ཡུམ་འཕགས་རྣམས་ཀྱིས་ཀྱང་བསམ་མི་ཁྱབ། །ཅེས་པའོ། །གཉིས་པ་གཏན་ཚིག་བརྒྱད་རིམ་པར་བཤད་པ་ནི། བསམ་མེད་བརྗོད་དུ་མེད་ཕྱིར་ཏེ། །བརྗོད་མེད་དོན་དམ་ཡིན་ཕྱིར་རོ། །དོན་དམ་རྟག་བྱ་མིན་ཕྱིར་དེ། །བརྟག་མིན་རྗེས་དཔག་བྱ་མིན་ཕྱིར། །དཔག་མིན་བླ་ན་མེད་པའི་ཕྱིར། །བླ་ན་མེད་པ་མ་བསྡུས་ཕྱིར། །མ་བསྡུས་གནས་པ་མེད་ཕྱིར་ཏེ། །ཡོན་ཏན་སྐྱོན་རྟོག་མེད་ཕྱིར་རོ། །ཞེས་པའོ། །གསུམ་པ་རྒྱུ་དྲུག་གིས་དོན་བསྡུ་བ་ནི། རྒྱུ་ལྔ་དག་གིས་འཕྲ་བའི་ཕྱིར། །ཆོས་སྐུ་བསམ་གྱིས་མི་ཁྱབ་སྟེ། །དྲུག་པས་དེ་ཡིས་དངོས་མིན་ཕྱིར། །གཟུགས་སྐུ་བསམ་གྱིས་མི་ཁྱབ་བོ། །ཅེས་པའོ། །བཞི་པ་རྟོག་པར་དཀའ་བ་ནི། བླ་མེད་ཡེ་ཤེས་ཐུགས་རྗེ་ཆེ་སོགས་ཡོན་ཏན་གྱིས། །ཡོན་ཏན་ཕ་རོལ་སོན་པའི་རྒྱལ་བ་བསམ་མི་ཁྱབ། །དེས་ན་རང་བྱུང་རྣམས་ཀྱི་ཐ་མའི་ཚུལ་འདི་ནི། དྲང་སོང་ཆེན་པོ་དབང་ཐོབ་རྣམས་ཀྱིས་ཀྱང་རིགས་མིན། །རྟོག་པའི་བྱང་ཆུབ་བསྟན་པའི་ལེའུ་སྟེ་གཉིས་པའོ།། ༈ །།

ལེའུ་གསུམ་པ། བྱེད་པ་ཡོན་ཏན་བསྟན་པ།

དེའི་ཡན་ལག་ཡོན་ཏན་བསྟན་པ་ལ་གསུམ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ལ་གསུམ། དོན་དམ་ཀུན་རྫོབ་དང་། དག་ཐོབ་གཉིས་དང་། སྡོམ་གྱིས་ཚིག་བསྟན་པའོ། །དང་པོ་དོན་དམ་ཀུན་རྫོབ་ནི། རང་དོན་གཞན་དོན་དོན་དམ་སྐུ་དང་ནི། དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་པའོ། །གཉིས་པ་དག་ཐོབ་གཉིས་ནི། བདག་ཉིད་ཀྱི་ནི་འབྱོར་པའི་གནས། །དམ་པའི་ཆོས་ཀྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་པའོ། །གསུམ་པ་སྡོམ་གྱིས་ཚིགས་བསྟན་པ་ནི། སྟོབས་ཉིད་མ་རིག་སྒྲིབ་ལ་རྡོ་རྗེ་བཞིན། །མི་འཇིག་ཉིད་ནི་འཁོར་དུ་སེང་གེ་བཞིན། །དེ་བཞིན་གཤེགས་པའི་མ་འདྲེས་མཁའ་བཞིན་ཏེ། །ཐུབ་པའི་བསྟན་པ་རྣམས་གཉིས་ཆུ་ཟླ་བཞིན། །ཞེས་པའོ། །གཉིས་པ་རྒྱས་བཤད་ལ་དྲུག་སྟེ། བསྟན་བཤད་དཔེ་དང་སྦྱར་བ་གསུམ་གྱིས་སྟོབས་བཅུ་བཤད་པ་དང་། བསྟན་བཤད་དཔེ་དང་སྦྱར་བ་གསུམ་གྱིས་མི་འཇིགས་པ་བཞི་དང་། བསྟན་བཤད་དཔེ་དང་སྦྱར་བ་གསུམ་གྱིས་མ་འདྲེས་པའི་ཆོས་བཅོ་བརྒྱད་དང་། །བཤད་པ་དཔེ་དང་སྦྱར་བ་གཉིས་ཀྱིས་མཚན་བཟང་བཤད་པ་དང་། དེ་མདོ་དང་སྦྱར་བ་དང་། དཔེ་དོན་སྦྱར་བ་རྒྱས་བཤད་དོ། །དེ་ལ་དང་པོ་བསྟན་བཤད་དཔེ་དང་སྦྱར་བ་གསུམ་གྱིས་སྟོབས་བཅུ་བཤད་པ་ལ། སྟོབས་བཅུ་བསྟན་པ་དང་། བཤད་པ་དང་། དཔེ་དང་སྦྱར་བའོ། །དང་པོ་སྟོབས་བཅུ་བསྟན་པ་ནི། གནས་དང་གནས་མིན་ལས་རྣམས་ཀྱིས། །རྣམ་སྨིན་དང་ནི་དབང་པོ་དང་། །ཁམས་རྣམས་དང་ནི་མོས་པ་དང་། །ཀུན་འགྲོའི་ལམ་དང་བསམ་བསྟན་སོགས། །ཉོན་མོངས་དྲི་མ་མེད་པ་དང་། །གནས་ནི་རྗེས་སུ་དྲན་པ་དང་། །ལྷ་ཡི་མིག་དང་ཞི་བ་དག །མཁྱེན་པའི་སྟོབས་ནི་རྣམ་པ་བཅུ། །ཅེས་པའོ། །དེ་ལ་གནས་དང་གནས་མ་ཡིན་པ་མཁྱེན་པའི་སྟོབས་ནི། སྦྱིན་པའི་རྒྱུ་ལས། འབྲས་བུ་ལོངས་སྤྱོད་འབྱུང་བ་ནི་གནས་ཡིན། ཚུལ་ཁྲིམས་བསྲུང་བའི་རྒྱུ་ལས། འབྲས་བུ་བདེ་འགྲོ་མཐོ་རིས་སུ་སྐྱེ་བ་ནི་གནས་ཡིན། རྒྱུ་དེ་ལས་ངན་འགྲོར་སྐྱེ་བ་ནི་གནས་མ་ཡིན་པ་སོགས་མངོན་སུམ་དུ་མཁྱེན་པའོ། །སྟོབས་བཅུ་ཕྱི་མ་རྣམས་ཀྱང་དེ་བཞིན་དུ་རིག་པར་བྱའོ། །གཉིས་པ་བཤད་པ་ནི། གནས་དང་གནས་མིན་རྣམ་སྨིན་ཁམས་དང་འགྲོ་བ་མོས་པ་སྣ་ཚོགས་དང་། །ཉོན་མོངས་རྣམ་བྱང་དབང་པོའི་ཚོགས་དང་སྔོན་གནས་རྗེས་སུ་དྲན་པ་དང་། །ལྷ་ཡི་མིག་དང་ཟག་པ་ཟད་ཚུལ་ཞེས་པའོ། །གསུམ་པ་དཔེ་དང་སྦྱར་བ་ནི། མི་ཤེས་གོ་ཆ་རྩིགས་བརྟན་དང་། །ཤིང་རྣམས་འབིགས་དང་གཞིག་དང་གཅོད་ཕྱིར་སྟོབས་གང་ཡིན་པ་རྡོ་རྗེ་བཞིན། ཞེས་པའོ། །གཉིས་པ་བསྟན་བཤད་དཔེ་དང་སྦྱར་བ་གསུམ་གྱི་མི་འཇིག་པ་བཞི་ལ། མི་འཇིགས་པ་བཞི་བསྟན་པ་དང་། བཤད་པ་དང་། དཔེ་དང་སྦྱར་བའོ། །དང་པོ་མི་འཇིགས་པ་བཞི་བསྟན་པ་ནི། ཆོས་ཀུན་རྫོགས་པར་ནུབ་པ་དང་། གེགས་ནི་འགོག་པར་བྱེད་པ་དང་། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་པའོ། །གཉིས་པ་བཤད་པ་ནི། བདག་གཞན་ཤེས་བྱའི་དངོས་པོ་རྣམ་ཀུན་ཤེས་བྱ་ཤེས་མཛད་ཕྱིར། །སྤངས་དངོས་སྤོངས་དང་སྤངས་མཛད་ཕྱིར་དང་བསྟེན་བྱ་བསྟེན་པའི་ཕྱིར། །ཐོབ་བྱ་བླ་མེད་ཤིན་ཏུ་དྲི་མེད་ཐོབ་དང་ཐོབ་མཛད་ཕྱིར། །རང་གཞན་དོན་བདེན་གསུངས་ཕྱིར་དྲང་སོང་གང་དུ་འང་ཐོག་པ་མེད། །ཞེས་པའོ། །གསུམ་པ་དཔེ་དང་སྦྱར་བ་ནི། རི་དྭགས་དབང་པོ་ཇི་ལྟར་ནགས་མཐར་རྟག་འཇིགས་མེད། །རི་དྭགས་རྣམས་ལ་སྐྲག་པ་མེད་པར་རྒྱུ་བ་ལྟར། དེ་བཞིན་ཚོགས་ན་ཐུབ་པའི་དབང་པོ་སེང་གེ་ཡང་། །ལེགས་གནས་ལྟོས་མེད་བརྟེན་པའི་རྩལ་དང་ལྡན་པར་གནས། །ཞེས་པའོ། །གསུམ་པ་བསྟན་བཤད་དཔེ་དང་སྦྱར་བ་གསུམ་གྱིས་མ་འདྲེས་པའི་ཆོས་བཅོ་བརྒྱད་བཤད་པ་ལ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་བསྟན་པ་དང་། བཤད་པ་དང་། དཔེ་དང་སྦྱར་བའོ། །དང་པོ་བསྟན་པ་ནི། འཁྲུལ་དང་ཅ་ཅོ་མི་མངའ་སྟེ། །སྟོན་ལ་དྲན་པ་ཉམས་མི་མངའ། །མཉམ་པར་མ་བཞག་ཐུག་མི་མངའ། །འདུ་ཤེས་སྣ་ཚོགས་ཀྱང་མི་མངའ། །མ་བརྟག་བཏང་སྙོམས་མི་མངའ་སྟེ། །འདུན་པ་བརྩོན་གྲུས་དྲན་པ་དང་། །ཤེས་རབ་རྣམ་གྲོལ་རྣམ་གྲོལ་གྱིས། །ཡེ་ཤེས་གཟིག་པ་ཉམས་མི་མངའ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་ཡེ་ཤེས་སྒྲིབ་པ་མེད། །དེ་ལྟར་བཅོ་བརྒྱད་འདི་དང་གཞན། །སྟོན་པའི་མ་འདྲེས་ཡོན་ཏན་མིན། །ཞེས་པའོ། །གཉིས་པ་བཤད་པ་ནི། འཁྲུལ་དང་ཅ་ཅོ་བསྙེལ་དང་ཐུགས་ཡོ་ཐ་དད་ཀྱིས་ནི་འདུ་ཤེས་དང་། ངང་གིས་བཏང་སྙོམས་དྲང་སྲོང་ལ་མེད་འདུན་པ་དང་ནི་བརྩོན་འགྲུས་དང་། དྲན་དང་རྣམ་དག་དྲི་མེད་ཤེས་རབ་རྟག་ཏུ་རྣམ་པར་གྲོལ་བ་དང་། །ཤེས་བྱའི་དོན་ཀུན་གཟིགས་པ་རྣམ་གྲོལ་ཡེ་ཤེས་ལས་ནི་ཉམས་མི་མངའ། །གང་གི་ལས་གསུམ་ཐམས་ཅད་ཡེ་ཤེས་སྔོན་དུ་འགྲོ་ཡི་རྗེས་སུ་འཇུག་པ་དང་། །དུས་གསུམ་རྟག་ཏུ་ཐོགས་མེད་ངེས་པར་མཁྱེན་པ་རྒྱ་ཆེན་འཇུག་པ་སྟེ། །འགྲོ་བར་འཇིགས་མེད་དམ་ཆོས་འཁོར་ལོ་ཆེན་པོ་རབ་སྐོར་བ། །ཐུགས་རྗེ་ཆེན་པོ་དང་ལྡན་རྒྱལ་བ་ཉིད་དེ་སངས་རྒྱས་རྣམས་ཀྱི་བརྙེས། ཞེས་པའོ། །གསུམ་པ་དཔེ་དོན་སྦྱར་བ་ནི། ས་སོགས་ལ་ཡོད་ཆོས་ཉིད་གང་ཡིན་ཆོས་ཉིད་དེ་ནི་ནམ་མཁའི་མིན། །ནམ་མཁའི་མཚན་ཉིད་སྒྲིབ་མེད་ལ་སོགས་མཚན་ཉིད་གང་དེ་གཟུགས་ལ་མེད། །ས་ཆུ་མེ་རླུང་ནམ་མཁའ་མཚུངས་པ་འཇིག་རྟེན་ན་ནི་ཐུན་མོང་ཏེ། །མ་འདྲེས་ཉིད་ནི་སྡུག་བསྔལ་ཙམ་ཡང་འཇིག་རྟེན་དག་ན་ཐུན་མོང་མིན། །ཞེས་བྱ་བ་གསུངས་སྟེ། དེ་ཡང་སྐུའི་སྤྱོད་ལམ་ལ་འཁྲུལ་པ་མི་མངའ། །གསུངས་ལ་ཅ་ཅོ་མི་མངའ། །ཐུགས་ལ་འཁྲུལ་པ་མི་མངའ་བ་སོགས་བཅོ་བརྒྱད་པོ་འདི་རྣམས་སངས་རྒྱས་བཅོམ་ལྡན་འདས་ཁོ་ནའི་ཁྱད་ཆོས་ཡིན་གྱིས། །ཉན་ཐོས་དང་། རང་སངས་རྒྱས་སོགས་གང་ལ་ཡང་མེད་པས་དེ་དག་དང་མ་འདྲེས་པའི་ཆོས་ཞེས་བྱའོ། །བཞི་པ་དཔེ་དང་སྦྱར་བ་གཉིས་ཀྱིས་མཚན་བཟང་བཤད་པ་ལ། མཚན་བཟང་བཤད་པ་དང་། དཔེ་དང་སྦྱར་བའོ། །དང་པོ་མཚན་བཟང་བཤད་པ་ནི། ལེགས་གནས་འཁོར་ལོས་མཚན་པ་དང་། །ཡངས་དང་ཞབས་ལོང་མི་མངོན་དང་། སོར་མོ་རིང་དང་ཕྱག་ཞབས་ནི། །དྲ་བ་ཡིས་ནི་འབྲེལ་པ་དང་། ལྤགས་འཇམས་གཞོན་ཤ་ཅན་ལེགས་ཉིད། །སྐུ་ནི་བདུན་དག་མཐོ་བ་དང་། །བྱིན་པ་ཨེ་ན་ཡ་འདྲ་གསང་། །གླང་པོ་བཞིན་དུ་སྦུབས་སུ་ནུབ། །རོ་སྟོད་སེང་གེ་དང་འདྲ་བ། །ཐལ་གོང་བར་མེད་རྒྱས་པ་དང་། །དཔུས་མགོ་ལེགས་ཟླུམ་ཕྱག་འཇམ་ལ། །ཟླུམ་ཞིང་མཐོན་དམན་མེད་པ་དང་། །ཕྱག་རིང་ཡོངས་སུ་དག་པ་ཡི། །འོད་ཀྱི་དཀྱིལ་འཁོར་དང་ལྡན་དང་། །མགྲིན་པ་དྲི་མེད་དུང་འདྲ་དང་། །འགྲམ་པ་རི་དྭགས་རྒྱལ་པོ་འདྲ། །ཚེམས་ནི་བཞི་བཅུ་མཉམ་པ་དང་། དཀར་དང་ཚེམས་ཐག་བཟང་བ་དང་། །རྣམ་དག་ཚེམས་མཉམ་ཉིད་དང་ནི། །མཆེ་བ་རབ་མཆོག་དཀར་བ་ཉིད། །ལྗགས་རིང་མཐའ་མེད་བསམ་མེད་པ། །རོ་བྲོ་བ་ཡི་མཆོག་ཉིད་དང་། །རང་བྱུང་ཀ་ལ་པིང་ཀ་ཡིས། །སྒྲ་དང་ཚངས་པའི་དབྱངས་ཉིད་དང་། །སྤྱན་བཟང་ཨུཏྤལ་ཁྱུ་མཆོག་རྫི་འདྲ་དང་། །ཞལ་མཛེས་དྲི་མེད་མཛོད་སྤུ་དཀར་ལྡན་པ། །གཙུག་གཏོར་དབུ་ལྡན་དག་ཅིང་སྲབ་པ་དང་། ལྤགས་པ་གསེར་གྱི་མདོག་འདྲ་སེམས་ཅན་མཆོག །བ་སྤུ་ལེགས་ཕྲ་འཇམ་ཞིང་རེ་རེ་ནས། །སྐུ་ཡི་གྱེན་དུ་གཡས་ཕྱོགས་འཁྱིལ་པ་དང་། །དབུ་སྐྲ་དྲི་མེད་རིན་ཆེན་མཐོན་ཐིང་བཞིན། །ནྱ་གྲོ་རྫོགས་པའི་ལྗོན་ཤིང་དཀྱིལ་འཁོར་འདྲ། །ཀུན་ཏུ་བཟང་པོ་དཔེ་མེད་དྲང་སྲོང་ཆེ། །སྲེད་མེད་བུ་ཡི་སྟོབས་མངའ་མཁྲེགས་པའི་སྐུ། །བསམ་མི་ཁྱབ་འབར་སུམ་ཅུ་རྩ་གཉིས་པོ། །འདི་དག་སྟོན་པས་མི་དབང་མཚན་དུ་གསུངས། །ཞེས་པའོ། །གཉིས་པ་དཔེ་དང་སྦྱར་བ་ནི། ཇི་ལྟར་སྤྲིན་མེད་མཁའ་ལ་ཟླ་བའི་གཟུགས། །སྟོན་ཀའི་ཆུ་སྔོན་མཚོར་ནི་མཐོང་བ་ལྟར། །དེ་བཞིན་རྒྱལ་སྲས་ཚོགས་ཀྱི་ཁྱབ་བདག་གཟུགས། །རྫོགས་སངས་དཀྱིལ་འཁོར་ནང་དུ་མཐོང་བར་འགྱུར། །ཞེས་པའོ། །ལྔ་པ་མདོ་དང་སྦྱར་བ་ནི། ཡོན་ཏན་དྲུག་ཅུ་རྩ་བཞི་སོགས། འདི་དག་སོ་སོར་རྒྱུར་བཅས་ཏེ། །གོ་རིམ་ཅི་བཞིན་རིན་ཆེན་གྱིས། །མདོ་ཡི་རྗེས་འབྲངས་ཤེས་པར་བྱ། །ཅེས་པའོ། །དྲུག་པ་དཔེ་དོན་སྦྱར་བ་རྒྱས་བཤད་ལ་ལྔ། ཡོན་ཏན་སྤྱིའི་དཔེ་དོན་སྦྱར་བཤད་དང་། བྱེ་བྲག་ཏུ་སྟོབས་བཅུའི་སྦྱར་བཤད། མི་འཇིགས་པ་བཞིའི་སྦྱར་བཤད་དང་། དཔེ་འགོད་པའི་དོན་དང་། མ་འདྲེས་པའི་སྦྱར་བཤད་དོ། །དེ་ལ་དང་པོ་ཡོན་ཏན་སྤྱིའི་དཔེ་དོན་སྦྱར་བཤད་ནི། མི་ཕྱེད་པ་དང་མི་ཞན་དང་། །མཚུངས་པ་མེད་དང་གཡོ་མེད་ཕྱིར། །རྡོ་རྗེ་སེང་གེ་མཁའ་དག་པ། །ཆུ་ཡི་ཟླ་བ་དཔེས་བསྟན་ཏོ། །ཅེས་པའོ། །གཉིས་པ་བྱེ་བྲག་ཏུ་སྟོབས་བཅུའི་སྦྱར་བཤད་ནི། སྟོབས་སོགས་རྣམས་ལས་སྟོབས་དྲུག་དང་། །གསུམ་དང་གཅིག་གིས་རིམ་པ་བཞིན། །ཤེས་བྱ་སྙོམས་པར་འཇུག་པ་དང་། །བག་ཆགས་བཅས་པ་ཀུན་བསལ་བས། །གོ་ཆ་རྩིག་པ་ཤིང་བཞིན་དུ། ཕུག་དང་བཞིག་དང་བཅད་ཕྱིར་རོ། །བརླིང་དང་སྙིང་བརྟན་མི་ཕྱེད་པས། །དྲང་སྲོང་སྟོབས་ནི་རྡོ་རྗེ་འདྲ། །གང་ཕྱིར་བརླིང་བ་སྙིང་པོའི་ཕྱིར། །གང་ཕྱིར་བརྟན་པ་མི་ཕྱེད་ཕྱིར། གང་ཕྱིར་སྙིང་པོ་བསྟན་པའི་ཕྱིར། །མི་ཕྱེད་ཕྱིར་ན་རྡོ་རྗེ་བཞིན། །ཞེས་བྱ་བ་གསུངས་ཏེ། དེ་ལ་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་པའི་སྟོབས་བཅུ་ནི། མི་མཐུན་པའི་ཕྱོགས་ཀྱི་གཞིག་ཅིང་འགོག་པར་མི་ནུས་པས། རྡོ་རྗེ་ཕ་ལམ་དང་འདྲ་བ་ཉིད་དོ། །དེ་ཡང་འགྱུར་བ་མེད་པས་བརླིང་བ་སྟེ། སྙིང་པོ་གདོད་མ་ནས་གནས་པ་དེ་ཉིད་མངོན་དུ་གྱུར་པའི་ཕྱིར། །དེ་ནི་རྐྱེན་གཞན་གྱི་མི་ཕྱེད་པའི་ཕྱིར་བརྟེན་པ་ཉིད་དོ། །འདིར་མི་མཐུན་པའི་ཕྱོགས་ནི་རྣམ་པ་གསུམ་སྟེ། ཤེས་བྱའི་བསྒྲིབ་པ་གོ་ཆ་ལྟ་བུ་དང་། སྙོམས་འཇུག་གིས་སྒྲིབ་པ་རྩིག་པ་ལྟ་བུ་དང་། ཉོན་མོངས་པའི་སྒྲིབ་པ་ལྗོན་ཤིང་ལྟ་བུ་དང་གསུམ་མོ། །དེ་ལ་སྟོབས་དང་པོ་དྲུག་གིས་ཤེས་བྱའི་སྒྲིབ་པ་གོ་ཆ་ལྟ་བུ་ཕུག་ཅིང་སྟོབས་བདུན་པ་སོགས་གསུམ་གྱིས་ནི། སྙོམས་འཇུག་གི་སྒྲིབ་པ་རྩིག་པ་ལྟ་བུ་བཤིག་ལ། སྟོབས་བཅུ་པ་ནི། ཉོན་མོངས་པའི་སྒྲིབ་པ་ལྗོན་ཤིང་ལྟ་བུ་རྩད་ནས་བཅད་པའི་ཕྱིར་རོ། །གསུམ་པ་མི་འཇིག་པ་བཞིའི་སྦྱར་བཤད་ནི། འཇིགས་མེད་ཕྱིར་དང་ལྟོས་མེད་ཕྱིར། བརྟེན་ཕྱིར་རྩོལ་ནི་ཕུན་ཚོགས་པས། །ཐུབ་པ་སེང་གེ་སེང་གེ་བཞིན། །འཁོར་གྱི་ཚོགས་སུ་འཇིགས་མི་མངའ། ཀུན་མངོན་མཁྱེན་པས་གང་ལས་ཀྱང་། འཇིགས་མེད་པར་ནི་རྣམ་པར་གནས། །དག་པའི་སེམས་ཅན་དང་ཡང་བདག །མི་མཉམ་གཟིགས་ཕྱིར་ལྟོས་པ་མེད། །ཐུགས་ནི་ཆོས་རྣམས་ཐམས་ཅད་ལ། །རྩེ་ཅིག་ཕྱིར་ན་བརྟན་པ་ཉིད། །མཆོག་ཏུ་མ་རིག་བག་ཆགས་ཀྱིས། །ས་ལ་རྒལ་གཟིགས་རྩལ་ལྡན་ནོ། །ཞེས་བྱ་བ་གསུངས་སྟེ། སངས་རྒྱས་བཅོམ་ལྡན་འདས་རྣམས་ནི་མི་འཇིགས་པ་བཞི་དང་ལྡན་པ་སྟེ། འཁོར་གྱིས་ནང་དུ་ཆོས་གསུངས་པའི་ཚེ་བདག་ནི་ཐམས་ཅད་མཁྱེན་པའི་ཡེ་ཤེས་བརྙེས་པས་འདས་མ་འོངས་ད་ལྟར་དུས་གསུམ་གྱི་ཆོས་ཐམས་ཅད་མངོན་སུམ་དུ་མཐོང་ངོ་ཞེས་གསུངས་པ་ལ། ཁྱེད་ཀྱི་འདི་ལྟ་བུ་མི་ཤེས་སམ་ཞེས་རྒོལ་བའི་འཇིགས་པ་མེད་པ་དང་། བདག་ནི་ཆགས་སོགས་ཉོན་མོངས་པ་ཐམས་ཅད་བག་ཆགས་དང་བཅས་པ་སྤངས་པ་ཡིན་ནོ་ཞེས་གསུངས་པ་ལ། འདི་ལྟ་བུ་གཅིག་མ་སྤངས་སོ་ཞེས་རྒོལ་བའི་འཇིགས་པ་མེད་པ་དང་། ལམ་འདི་ཉམས་སུ་བླངས་པས་ཁམས་གསུམ་འཁོར་བ་ལས་གྲོལ་ནས་ཐར་པ་ཐོབ་པ་ཡིན་ནོ་ཞེས་གསུངས་པ་ལ། ལམ་འདིས་འཁོར་བ་ལ་ངེས་པར་འབྱིན་མི་ནུས་ཞེས་རྒོལ་བའི་འཇིགས་པ་མེད་པ་དང་། འདི་ནི་འཆིང་བ་ཐམས་ཅད་ལས་གྲོལ་བའི་རྟེན་དུ་ཐར་པ་ཐོབ་པ་ཡིན་ནོ་ཞེས་གསུངས་པ་ལ། ད་དུང་གྲོལ་བ་མིན་ཞེས་ཆོས་མཐུན་གྱི་རྒོལ་བའི་འཇིགས་པ་མེད་པས་འཁོར་གྱིས་ནང་དུ་སེང་གེའི་སྒྲ་སྒྲོག་པའོ། །བཞི་པ་དཔེ་འགོད་པའི་དོན་ནི། འཇིག་རྟེན་ཉན་ཐོས་མཐའ་གཅིག་ཏུ། །སྤྱོད་དང་བློ་ལྡན་རང་བྱུང་རྣམས། །གོང་ནས་གོང་དུ་བློ་དག་ནི། །ཕྲ་ཕྱིར་དཔེས་ནི་རྣམ་པ་ལྔ། ཞེས་པའོ། །ལྔ་པ་མ་འདྲེས་པའི་སྦྱར་བཤད་ནི། འཇིག་རྟེན་ཀུན་གྱི་ཉེར་འཚོའི་ཕྱིར། །ས་ཆུ་མེ་རླུང་རྣམས་དང་མཚུངས། །འཇིག་རྟེན་འཇིག་རྟེན་འདས་པ་ཡིས། །མཚན་ཉིད་ལས་འདས་ནམ་མཁའ་བཞིན། །ཞེས་པའོ། །གསུམ་པ་དོན་བསྡུ་བ་གསུམ། ཆོས་སྐུའི་ཡོན་ཏན་སོ་གཉིས་བསྡུ་བ་དང་། གཟུགས་སྐུའི་ཡོན་ཏན་སོ་གཉིས་བསྡུ་བ་དང་། དེའི་དོན་མཐོང་བའི་ཚུལ་ལོ། །དེ་ལ་དང་པོ་ཆོས་སྐུའི་ཡོན་ཏན་སོ་གཉིས་བསྡུ་བ་ནི། དེ་དག་ཡོན་ཏན་སུམ་ཅུ་ནི། །གཉིས་ནི་ཆོས་སྐུས་རབ་ཕྱེ་སྟེ། །ནོར་བུ་རིན་ཆེན་འོད་མདོག་དང་། །དབྱིབས་བཞིན་དབྱེ་བ་མེད་ཕྱིར་རོ། །ཞེས་པའོ། །གཉིས་པ་གཟུགས་སྐུའི་ཡོན་ཏན་སོ་གཉིས་བསྡུ་བ་ནི། མཐོང་ན་ཚིམ་བྱེད་ཡོན་ཏན་གང་། །སུམ་ཅུ་རྩ་གཉིས་ཤེས་བྱ་བ། །སྤྲུལ་པ་ཆོས་ལ་རྫོགས་པར་ནི། །ལོངས་སྤྱོད་རྫོགས་སྐུ་གཉིས་ལ་བརྟེན། །ཞེས་པའོ། །གསུམ་པ་དེའི་དོན་མཐོང་བའི་ཚུལ་ནི། དག་ལས་རིང་དང་ཉེ་རྣམས་ལ། །འཇིག་རྟེན་རྒྱལ་བའི་དཀྱིལ་འཁོར་དུ། །ཆུ་དང་ནམ་མཁའི་ཟླ་གཟུགས་བཞིན། །དེ་ལ་མཐོང་བ་རྣམ་པ་གཉིས། ཞེས་བྱ་བ་གསུངས་ཏེ། བདེ་བར་གཤེགས་པའི་སྙིང་པོ་རྣམ་པར་དག་པ་ཆོས་སྐུ་དྲི་མ་མེད་པ་རྟོགས་པ་ལ་རིང་བ། སོ་སོ་སྐྱེ་བོ་རྣམས་ཀྱི་འཇིག་རྟེན་དུ་རྒྱལ་བའི་སྐུ་མཚན་དང་དཔེ་བྱད་ཀྱི་བརྒྱན་པ་མཐོང་བ་ནི་སངས་རྒྱས་སྤྲུལ་པའི་སྐུ་སྟེ་ཆུ་ནང་དུ་ཟླ་བའི་གཟུགས་མཐོང་བ་ལྟ་བུའོ། །སྙིང་པོ་ཆོས་སྐུ་དྲི་མ་དང་བྲལ་བ་རྣམ་པར་དག་པ་མཐོང་བ་ལས་ཉེ་བ། ས་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་རྒྱལ་བའི་དཀྱིལ་འཁོར་དུ་མཐོང་བའི་སྐུ་དེ་ནི་ལོངས་སྤྱོད་རྫོགས་པ་ཅེས་བྱ་བ་སྟེ། ནམ་མཁའ་མཐོང་བའི་ཟླ་གཟུགས་ལྟ་བུའོ། །ཡོན་ཏན་དྲུག་ཅུ་རྩ་བཞི་བསྟན་པ་སྟེ་ལེའུ་གསུམ་པའོ།། ༈ །།

ལེའུ་བཞི་པ། ཕྲིན་ལས་བསྟན་པ།

རྟོག་པར་བྱེད་པའི་རྐྱེན་འཕྲིན་ལས་འཇུག་པའི་ཚུལ་ལ་གསུམ་མདོར་བསྟན། རྒྱས་པར་བཤད། དཔེ་དང་སྦྱར་ཏེ་ཤིན་ཏུ་རྒྱས་པར་བཤད་པའོ། །དང་པོ་ལ་གཉིས། འཕྲིན་ལས་ལྷུན་གྱིས་གྲུབ་པ་དང་། སྤང་གཉེན་ཕུལ་དུ་བྱུང་བའོ། །དེ་ལ་དང་པོ་འཕྲིན་ལས་ལྷུན་གྲུབ་པ་ནི། གདུལ་བྱའི་ཁམས་དང་གདུལ་བྱའི་ཐབས་དང་ནི། གདུལ་བྱའི་ཁམས་ཀྱི་གདུལ་བྱའི་བྱ་བ་དང་། དེ་ཡི་ཡུལ་དང་དུས་སུ་གཤེགས་པ་ལ། ཁྱབ་བདག་རྟག་ཏུ་ལྷུན་གྱི་གྲུབ་པར་འཇུག །ཅེས་པའོ། །གཉིས་པ་སྤང་གཉེན་ཕུལ་དུ་བྱུང་བ་ནི། ཡོན་ཏན་རིན་ཆེན་མཆོག་ཚོགས་དང་ལྡན་ཡེ་ཤེས་ཆུ་མཚོ་བསོད་ནམས་ཡེ་ཤེས་ཉི་འོད་ཅན། །ཐེག་པ་མ་ལུས་ངེས་པར་བསྒྲུབ་ཏེ་མཐའ་དང་དབུས་མེད་རྒྱ་ཆེན་ནམ་མཁའ་ལྟར་ཁྱབ་པ། སངས་རྒྱས་ཉིད་ནི་ཡོན་ཏན་དྲི་མ་མེད་གཏེར་སེམས་ཅན་ཀུན་ལ་ཁྱད་མེད་རྣམས་གཟིགས་ནས། །ཉོན་མོངས་ཤེས་བྱའི་སྤྲིན་གྱིས་དྲ་བ་སངས་རྒྱས་རྣམས་ཀྱིས་ཐུགས་རྗེའི་རླུང་གིས་རྣམ་པར་གཏོར། །ཞེས་པའོ། །གཉིས་པ་རྒྱས་པར་བཤད་པ་ལ་གཉིས་ཏེ། རྣམ་པར་མི་རྟོག་པ་དང་། ཡུལ་དུ་མི་འགལ་བར་འཇུག་པ་གཉིས་ཀྱི་བསྟན་པ ། དེ་བཤད་པའོ། །དེ་ལ་དང་པོ་རྣམ་པར་མི་རྟོག་པ་དང་ཡུལ་དུ་མི་འགལ་བར་འཇུག་པ་གཉིས་ཀྱི་བསྟན་པ་ནི། གང་གིས་གང་གིས་འདུལ་བ་ཡིས། །བྱ་གང་གང་དུ་གང་གི་ཚེ། །དེ་ཡི་རྣམ་རྟོག་སྐྱེ་མིན་ཕྱིར། །ཐུབ་པ་རྟག་ཏུ་ལྷུན་གྱིས་གྲུབ། །གདུལ་བྱའི་ཁམས་ནི་གང་ཞིག་གིས། །གདུལ་བྱའི་ཐབས་མང་གང་གང་གིས། །གདུལ་བྱའི་གང་ལ་གང་དུ་ནི། །གང་ཚེ་ཡུལ་དང་དུས་དེ་དག །ཅེས་པའོ། །གཉིས་པ་དེ་བཤད་པ་ལྔ། བསྟན་པ་དང་། བཤད་པ་དང་དཔེ་དང་། དེ་སྦྱར་བཤད་དང་། རྒྱུ་གསུམ་གྱི་རྒྱུན་མི་འཆད་པའོ། །དེ་ལ་དང་པོ་བསྟན་པ་ནི། ངེས་འབྱིན་དེ་ཡི་རྟོན་པ་དང་། །དེ་འབྲས་དེ་ཡི་ཡོངས་འཛིན་དང་། །དེ་སྒྲིབ་དེ་གཅོད་རྐྱེན་ལ་ནི། །རྣམ་པར་རྟོག་པ་མེད་ཕྱིར་རོ། །ཞེས་པའོ། །གཉིས་པ་བཤད་པ་ནི། ངེས་པར་འབྱིན་པ་ས་བཅུ་སྟེ། །ཚོགས་གཉིས་དག་ནི་དེ་ཡི་རྒྱུ། །དེ་འབྲས་བྱང་ཆུབ་མཆོག་ཡིན་ཏེ། །བྱང་ཆུབ་སེམས་ཅན་ཡོངས་སུ་འཛིན། །དེ་སྒྲིབ་ཡས་མཐའ་ཉོན་མོངས་དང་། །ཉེ་བའི་ཉོན་མོངས་བག་ཆགས་དང་། །དུས་ཀུན་ཏུ་ནི་དེ་འཇོམས་པའི། །རྐྱེན་ནི་ཐུགས་རྗེ་ཆེན་པོ་ཡིན། །ཞེས་བྱ་བ་གསུང་སྟེ། འདིའི་བརྗོད་བྱ་གནས་དྲུག་ནི་ངེས་པར་འབྱིན་པ་དང་། རྒྱུ་དང་། འབྲས་བུ་དང་། སེམས་ཅན་ཡོངས་སུ་འཛིན་པ་དང་། དེའི་སྒྲིབ་པ་དང་། སྒྲིབ་པ་འཇོམས་པའི་རྐྱེན་རྣམས་སོ། །གསུམ་པ་དཔེ་ནི། གནས་དྲུག་པོ་ནི་འདི་དག་རྣམས། །གོ་རིམ་ཇི་བཞིན་རྒྱ་མཚོ་དང་། །ཉི་མ་དང་ནི་ནམ་མཁའ་གཏེར། སྤྲིན་དང་རླུང་བཞིན་ཤེས་པར་བྱ། །ཅེས་པའོ། །བཞི་པ་དེ་སྦྱར་བཤད་ནི། ཤེས་ཆུ་ཡོན་ཏན་རིན་ཆེན་དང་། །ལྡན་ཕྱིར་ས་རྣམས་རྒྱ་མཚོ་བཞིན། །སེམས་ཅན་ཐམས་ཅད་ཉེར་འཚོའི་ཕྱིར། །ཚོགས་གཉིས་དག་ནི་ཉི་མ་བཞིན། །རྒྱ་ཆེན་མཐའ་དང་དབུས་མེད་ཕྱིར། །བྱང་ཆུབ་ནམ་མཁའི་ཁམས་བཞིན་ནོ། །ཡང་དག་རྫོགས་སངས་ཆོས་ཉིད་ཕྱིར། །སེམས་ཅན་ཁམས་ནི་གཏེར་དང་འདྲ། །གློ་བུར་ཁྱབ་དང་མ་གྲུབ་ཕྱིར། །དེ་ཡི་ཉོན་མོངས་སྤྲིན་ཚོགས་བཞིན། །དེ་གཏོར་བ་ནི་ཉེར་གནས་ཕྱིར། །ཐུགས་རྗེ་མི་ཟད་རླུང་དང་འདྲ། །ཅེས་བྱ་བ་གསུངས་ཏེ། དེ་ལ་ས་བཅུ་ནི། རྗེ་བཙུན་བྱམས་པས་མཛད་པའི་དབུས་མཐའ་རྣམ་འབྱེད་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་པ་དང་། །ཉོན་མོངས་རྣམ་དག་མིན་དོན་དང་། །ཐ་དད་མེད་པའི་དོན་ཉིད་དང་། །བྲི་མེད་འཕེལ་བ་མེད་དོན་དང་། དབང་ནི་རྣལ་པ་བཞི་ཡི་གནས། །ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུ་མི་མཐུན་ཕྱོགས་རྣམས་ཀྱིས། །གཉེན་པོ་དག་ནི་ས་ཡིན་ནོ། །ཞེས་གསུངས་ཤིང་། དབྱིག་གཉེན་གྱི་དེའི་འགྲེལ་པ་ལས། འདི་ལྟ་སྟེ། ས་དང་པོ་ལ་ནི་ཆོས་ཀྱི་དབྱིངས་ཀུན་ཏུ་འགྲོ་བའི་དོན་དུ་རྟོག་སྟེ། དེས་བདག་དང་གཞན་མཉམ་པ་ཉིད་རབ་ཏུ་ཐོབ་བོ། །གཉིས་པ་ལ་ནི་མཆོག་གི་དོན་དུ་རྟོགས་ཏེ། དེས་འདི་སྙམ་དུ་སེམས་ཏེ། དེ་ལྟ་བས་ན་བསྒྲུབ་ཏུ་མཚུངས་པ་ལ་བདག་གི་ཐམས་ཅད་དུ་ཡོངས་སུ་སྤྱད་པ་མངོན་པར་བསྒྲུབ་པ་ཉིད་ལ་བརྩོན་པར་བྱའོ་སྙམ་མོ། །གསུམ་པ་ནི་དེའི་རྒྱུ་མཐུན་པ་དོན་གྱིས་མཆོག་ཏུ་རྟོགས་ཏེ། དེས་ཆོས་ཀྱི་དབྱིངས་ཀྱི་རྒྱུ་མཐུན་པ་ཐོབ་པ་མཆོག་ཏུ་རིགས་ནས། དེའི་ཕྱིར་མེའི་འོབས་སྟོང་གསུམ་གྱི་སྟོང་ཆེན་པོའི་ཚད་ཙམ་དུ་ཡང་བདག་ཉིད་མཆོང་ངོ། བཞི་པ་ནི་ཡོངས་སུ་འཛིན་པ་མེད་པའི་དོན་དུ་རྟོག་སྟེ། འདི་ལྟར་ཆོས་ལ་སྲིད་པ་ཡང་ལྡོག་གོ །ལྔ་པ་ལ་ནི་རྒྱུད་ཐ་དད་མེད་པའི་དོན་དུ་རྟོག་སྟེ། སེམས་དང་བསམ་པ་རྣམ་པར་དག་པ་མཉམ་པ་ཉིད་བཅུ་རྟོགས་སོ། །དྲུག་པ་ནི་ཀུན་ནས་ཉོན་མོངས་པ་དང་རྣམ་པར་དག་པ་མ་ཡིན་པའི་དོན་དུ་རྟོག་སྟེ། རྟེན་ཅིང་འབྲེལ་བར་འབྱུང་བ་ལ། གང་ཀུན་ནས་ཉོན་མོངས་པར་འགྱུར་པའམ། རྣམ་པར་དག་པར་གྱུར་པའི་ཆོས་དེ་གང་ཡང་མེད་པར་རབ་ཏུ་རྟོག་པའི་ཕྱིར་རོ། །བདུན་པ་ལ་ནི་ཐ་དད་པ་མེད་པའི་དོན་དུ་རྟོག་སྟེ། མཚན་མ་མེད་པས་མདོ་ལ་སོགས་པའི་ཆོས་ཀྱིས་མཚན་མ་ཐ་དད་པ་མི་འབྱུང་བའི་ཕྱིར་རོ། །བརྒྱད་པ་ལ་ནི་བྲི་བ་མེད་ཅིང་འཕེལ་བ་མེད་པའི་དོན་དུ་རྟོག་སྟེ། མི་སྐྱེ་བའི་ཆོས་ལ་བཟོད་པ་ཐོབ་པས། ཀུན་ནས་ཉོན་མོངས་པའམ། རྣམ་པར་བྱང་བ་ན་ཡང་བྲི་བའམ་འཕེལ་བར་མི་མཐོང་བའི་ཕྱིར་རོ། །དབང་རྣམ་པ་བཞི་སྟེ། རྣམ་པར་མི་རྟོག་པ་ལ་དབང་བ་དང་། ཞིང་ཡོངས་སུ་དག་པ་ལ་དབང་བ་དང་། ཡེ་ཤེས་ལ་དབང་བ་དང་། ལས་ལ་དབང་བའོ། །དེ་ལ་ས་བརྒྱད་པ་ཉིད་ལ་ཆོས་ཀྱི་དབྱིངས་དབང་དང་པོ་དང་། གཉིས་པའི་གནས་ཉིད་དུ་རབ་ཏུ་རྟོགས་སོ། །དགུ་པ་ལ་ནི་ཡེ་ཤེས་ལ་དབང་བའི་གནས་ཉིད་དུ་རྟོག་སྟེ། སོ་སོ་ཡང་དག་པར་རིག་པ་ཐོབ་པའི་ཕྱིར་རོ། །བཅུ་པ་ལ་ནི་ལས་ལ་དབང་བའི་ས་ཉིད་དུ་རྟོག་སྟེ། ཇི་ལྟར་བཞད་པ་བཞིན་དུ་སྤྲུལ་པ་རྣམས་ཀྱིས་སེམས་ཅན་གྱི་དོན་མཛད་པའི་ཕྱིར་རོ། །ཞེས་གསུངས་པ་ལྟར་རོ། །དེ་ཡང་ས་ཐོབ་པའི་འཕགས་པ་རྣམས་ནི། ཆོས་དབྱིངས་མངོན་སུམ་དུ་མཐོང་བའི་ངང་ལ་མ་གཡོས་པར་ཀུན་ཏུ་འགྲོ་བའི་དོན་ལ་རྟོག་པ་ལ་སོགས་པ་འབྱུང་བས་དེ་དག་འགལ་བར་སེམས་པ་ནི། ངེས་དོན་མ་རྟོག་པ་རྣམས་ཀྱི་ཁ་སྐད་ཡིན་ནོ། །ས་བཅུ་པོ་དེ་དག་ནི། རྒྱ་མཚོ་དང་མཚུངས་ཏེ་ཡེ་ཤེས་ཆུ་བོ་ལྟ་བུ་དང་། ཡོན་ཏན་བརྒྱ་ཕྲག་བཅུ་གཉིས་ལ་སོགས་པ་ནོར་བུ་རིན་པོ་ཆེ་ལྟ་བུ་དུ་མ་དང་ལྡན་པའི་ཕྱིར་རོ། །རྒྱུ་བསོད་ནམས་དང་ཡེ་ཤེས་ཀྱི་ཚོགས་གཉིས་ནི་ཉི་མ་དང་མཚུངས་ཏེ། ཕན་པ་དང་བདེ་བའི་མཐའ་ཡས་པའི་སྒོ་ནས་སེམས་ཅན་ཐམས་ཅད་ཉེ་བར་འཚོ་བའི་གཞི་ཡིན་པའི་ཕྱིར་རོ། །འབྲས་བུ་སྐུ་གསུམ་གྱི་བདག་ཉིད་བྱང་ཆུབ་ཆེན་པོ་ནི་ནམ་མཁའ་དང་མཚུངས་ཏེ། ཆོས་ཀྱི་དབྱིངས་དང་མཉམ་པས་རྒྱ་ཆེ་བ་དང་མཐའ་དང་དབུས་མེད་པའི་ཕྱིར་རོ། །སེམས་ཅན་རྣམས་ཀྱི་ཁམས་བདེ་བར་གཤེགས་པའི་སྙིང་པོ་ནི་རིན་པོ་ཆེའི་གཏེར་དང་མཚུངས་ཏེ། སངས་རྒྱས་ཀྱི་ཆོས་གང་གཱའི་བྱེ་མ་སྙེད་རྣམས་དང་ཆོས་ཉིད་དང་ལྡན་པའི་ཕྱིར་རོ། །ཁམས་བདེ་གཤེགས་སྙིང་པོ་དེ་སྒྲིབ་པར་བྱེད་པའི་ཉོན་མོངས་པ་དང་། ཉེ་བའི་ཉོན་མོངས་པ་རྣམས་ནི་སྤྲིན་དང་མཚུངས་ཏེ། ཡང་ནས་ཡང་དུ་གློ་བུར་དུ་འབྱུང་བའི་ཕྱིར་དང་། མ་རིག་པ་དང་ལྡན་པའི་ཤེས་རྒྱུད་ལ་ཁྱབ་པའི་ཕྱིར་དང་། དོན་ལ་གྲུབ་པ་མེད་པ་སྒྱུ་མ་དང་། རྨི་ལམ་ལྟ་བུ་ཡིན་པའི་ཕྱིར་རོ། །སངས་རྒྱས་བཅོམ་ལྡན་འདས་ཀྱིས་དམིགས་པ་མེད་པའི་ཐུགས་རྗེ་ཆེན་པོ་ནི་རླུང་ཤུགས་དྲག་པོ་དང་མཚུངས་ཏེ། ཉོན་མོངས་པ་དང་། ཉེ་བའི་ཉོན་མོངས་པ་སྤྲིན་ཚོགས་སྟུག་པོ་ལྟ་བུ་གཏོར་ཞིང་འཇོམས་པའི་ཕྱིར་རོ། །ལྔ་པ་རྒྱུ་མཚན་གསུམ་གྱིས་རྒྱུན་མི་འཆད་པ་ནི། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་རྒྱུན་མི་འཆད། །ཅེས་བྱ་བ་གསུངས་ཏེ། སངས་རྒྱས་བཅོམ་ལྡན་འདས་རྣམས་ཀྱིས་མཛད་པ་འཕྲིན་ལས་རྒྱུན་མི་འཆད་པ་མི་སྲིད་དེ། སེམས་ཅན་ཐམས་ཅད་ཉོན་མོངས་པ་མ་རིག་པའི་དབང་གིས་ཐོག་མ་མེད་པའི་དུས་ནས། ཁམས་གསུམ་དུ་འཁོར་ཞིང་། རིགས་དྲུག་གི་ཁ་བརྒྱུད། སྡུག་བསྔལ་སྣ་ཚོགས་ལ་ལོངས་སྤྱོད་པ་དག་གཟིགས་ཤིང་། ཐེག་པ་ཆེན་པོའི་རིགས་ཀྱིས་ནུས་པ་རྒྱས། བཟོད་བརླགས་མེད་པའི་སྙིང་རྗེ་ཆེན་པོ་སྐྱེས། འཇིག་རྟེན་མཐའ་དག་ལ། ཕན་བདེ་བསྒྲུབ་པའི་སྙིང་སྟོབས་ཆེན་པོ་དང་ལྡན་པས། བསམ་པ་བྱང་ཆུབ་མཆོག་ཏུ་སེམས་བསྐྱེད། སེམས་ཅན་གཅིག་ཀྱང་མ་ལུས་པ་ཐམས་ཅད་འཁོར་བ་ནས་འདྲེན་པའི་གོ་ཆ་བགོས། དེའི་ཆེད་དུ་མཁྱེན་བརྩེ་ནུས་མཐུན་བསམ་གྱིས་མི་ཁྱབ་པ་དང་ལྡན་པའི་སངས་རྒྱས། བསྒྲུབ་ནས་དེ་གྲུབ་པ་ཡིན་པ་དང་། བདག་དང་སེམས་ཅན་ཐམས་ཅད་དེ་བཞིན་གཤེགས་པའི་ཆོས་ཉིད་ཅན་དུ་མཚུངས་པར་གཟིགས་པ་དང་། སེམས་ཅན་ཐམས་ཅད་སྒྲོལ་བའི་མཛད་པ་ད་དུང་ཡོངས་སུ་མ་རྫོགས་པའི་ཕྱིར། འཁོར་བ་ཇི་སྲིད་མ་སྟོང་གི་བར་དུ་མཛད་པ་འཕྲིན་ལས་རྒྱུན་མི་འཆད་པ་ཉིད་དོ། །དེ་ལ་འདིར་འཁོར་བ་ལ་མཐའ་ཡོད་དམ་མེད་ཟེར་བ་ལ། འཁོར་བ་ཐོག་མའི་མཐའ་ནི་ཕྱི་རོལ་མུ་སྟེགས་ལ་ལ་དག་ཡོད་པར་འདོད། ནང་པ་སངས་རྒྱས་པ་ལ་ཉན་ཐོས་སྡེ་པ་དང་། ཐེག་ཆེན་པ་གང་གི་ལུགས་ལ་ཡང་འཁོར་བ་ལ་ཐོག་མའི་མཐའ་མེད་པར་འདོད། ཕྱི་མའི་མཐའ་ལ་འཁོར་བ་སྤྱི་མཐའ་མེད་དེ་འཁོར་བ་སྟོང་པའི་དུས་མེད་པའི་ཕྱིར། སྒོས་མཐའ་ཡོད་དེ་སེམས་ཅན་རེ་རེའི་ཐར་པ་ཐོབ་པ་ནི་དེའི་འཁོར་བའི་མཐའ་ནི་དེར་ཟད་པའི་ཕྱིར་རོ། །ལ་ལ་ན་རེ་སེམས་ཅན་གང་ཡང་སངས་མི་རྒྱས་པ་རྟེན་དུ་འཁོར་བར་གནས་པ་གཅིག་ཀྱང་མི་སྲིད་པའི་ཕྱིར། སེམས་ཅན་ཐམས་ཅད་སངས་རྒྱས་པར་འགྱུར་བ་ཡིན་ལ་འཁོར་བ་སྤྱིའི་མཐའ་ཡང་ཡོད་པ་ཉིད་དོ་ཅེས་ཟེར་རོ། །གསུམ་པ་དཔེ་དང་སྦྱར་ཏེ་ཤིན་ཏུ་རྒྱས་པར་བཤད་པ་ལ་གཉིས། དཔེ་དོན་མདོར་བསྟན་པ་དང་། དེ་ཉིད་རྒྱས་བཤད་དོ། །དེ་ལ་དང་པོ་དཔེ་མདོར་བསྟན་པ་ནི། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་བཞིན། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་པའོ། །གཉིས་པ་དེ་ཉིད་རྒྱས་བཤད་ལ། དཔེ་དགུ་དང་སྦྱར་བཤད། དེའི་དོན་བསྡུ་བ། ཆོས་མི་མཐུན་སྤངས་པའི་སྒོ་ནས་བསྟན་པའོ། །དང་པོ་དཔེ་དགུ་དང་སྦྱར་བཤད་ལ་བདུན། སྐུ་དང་། གསུང་དང་། དེས་ཁྱབ་པ་དང་། སྤྲུལ་པ་སྤྲོ་བ་དང་། ཡེ་ཤེས་འཇུག་ཚུལ་དང་། སྐུ་གསུང་ཐུགས་ཀྱི་གསང་བ་དང་། ཐུགས་རྗེ་ཆེན་པོ་འཇུག་ཚུལ་ལོ། །དང་པོ་སྐུ་ལ་བཞི། སྣང་ཚུལ་བྱེད་ལས། དེ་གཞན་དོན་དུ་འགྱུར་ཚུལ། གསུམ་གྱི་དཔེས་བསྟན་པའོ། །སྣང་ཚུལ། དོན་དུ་འགྱུར་བ། མི་རྟོག་ཀྱང་དོན་བཤད་པ་གསུམ་གྱི་དོན་བཤད། དཔེ་དོན་རྒྱས་བཤད་དང་། སྣང་ཚུལ་གྱིས་རྒྱུ་མཚན་བསྟན་པའོ། །དེ་ལ་དང་པོ་སྣང་ཚུལ་ནི། ཇི་ལྟར་བཻ་ཌཱུའི་དག་པ་ཡིས། །རང་བཞིན་ས་སྟེང་འདི་གྱུར་ཏེ། །དག་ཕྱིར་ལྷ་ཡི་དབང་པོ་དེ། །ལྷ་ཡི་བུ་མོའི་ཚོགས་དང་བཅས། །རྣམ་པར་རྒྱལ་བའི་ཁང་བཟང་དང་། །ལྷ་གནས་དེ་ལས་གཞན་དག་དང་། དེ་ཡི་གཞལ་ཡས་སྣ་ཚོགས་དང་། །ལྷ་རྫས་རྣམ་མང་དེར་མཐོང་ངོ། །ཞེས་པའོ། །གཉིས་པ་བྱེད་ལས་ནི། དེ་ནས་སྐྱེས་པ་བུད་མེད་ཚོགས། །ས་ཡི་སྟེང་ན་གནས་པ་རྣམས། །སྣང་བ་དེ་ནི་མཐོང་འགྱུར་ཏེ། །ངེད་ཀྱང་རིང་པོར་མི་ཐོགས་པར། །ལྷ་དབང་འདི་འདྲར་གྱུར་ཅིག་ཅེས། །དེ་འདྲའི་སྨོན་ལམ་འདེབས་བྱེད་ཅིང་། །དེ་ཐོབ་དོན་དུ་དགེ་བ་ནི། །ཡང་དག་བླངས་ཏེ་གནས་པར་འགྱུར། །ཞེས་པའོ། །གསུམ་པ་དོན་དུ་འགྱུར་བ་ནི། དེ་དག་དགེ་བའི་ལས་དེས་ནི། །འདི་སྣང་ཙམ་ཞེས་དེ་ལྟ་བུར། །ཤེས་པ་མེད་ཀྱང་ས་སྟེང་ནས། །འཕོས་ཏེ་ལྷར་ནི་སྐྱེ་བར་འགྱུར། །སྣང་བ་དེ་ནི་ཤིན་ཏུ་ཡང་། །རྟོག་པ་མེད་ཅིང་གཡོ་བ་མེད། །དེ་ལྟ་མོད་ཀྱི་ས་སྟེང་ན། དོན་ཆེན་གྱིས་ནི་ཉེ་བར་གནས། ཞེས་པའོ། །གཉིས་པ་དོན་ལ་སྣང་ཚུལ་ནི། དེ་བཞིན་དད་སོགས་དྲི་མེད་ཅན། །དད་སོགས་ཡོན་ཏན་བསྒོམ་པ་ཡིས། །རང་སེམས་ལ་སྣང་རྫོགས་སངས་རྒྱས། །མཚན་དང་དཔེ་བྱད་དང་ལྡན་པ། །ཆགས་པ་དང་ནི་བཞེངས་པ་དང་། །བཞུགས་པ་དང་ནི་གཟིམས་པ་དང་། །སྤྱོད་ལམ་སྣ་ཚོགས་མཛད་པ་ཅན། །ཞི་བའི་ཆོས་ཀྱིས་གསུངས་པ་དང་། །མི་གསུངས་མཉམ་པར་བཞག་གྱུར་པ། །ཆོ་འཕྲུལ་རྣམ་པ་སྣ་ཚོགས་དག །མཛད་པ་གཟི་མདངས་ཆེན་པོ་ཅན། །སེམས་ཅན་རྣམས་ཀྱིས་མཐོང་བར་འགྱུར། །ཞེས་པའོ། །དེ་གཞན་དོན་དུ་འགྱུར་བ་ནི། །དེ་མཐོང་ནས་ཀྱང་སྟོད་ལྡན་པ། །སངས་རྒྱས་ཉིད་ཕྱིར་རབ་སྦྱོར་ཏེ། །དེ་རྒྱུ་ཡང་དག་བླང་གནས་ནི། །འདོད་པའི་གོ་འཕང་ཐོབ་པར་བྱེད། །མི་རྟོག་ཀྱང་དོན་བྱེད་པ་ནི། །སྣང་བ་དེ་ནི་ཤིན་ཏུ་ཡང་། །རྟོགས་མེད་ཡང་བ་མེད་པ་ཉིད། །དེ་ལྟར་ན་ཡང་འཇིག་རྟེན་ནང་། །དོན་ཆེན་པོ་ནི་ཉེ་བར་གནས། འདི་ནི་རང་སེམས་སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །དེ་ལྟ་ན་ཡང་གཟུགས་མཐོང་སྟེ། །དེ་དག་ལ་ནི་དོན་ཡོད་འགྱུར། །རིམ་གྱིས་དེ་མཐོང་ལ་བརྟེན་ནས། །ཐེག་པ་འདི་ལ་གནས་པ་རྣམས། ནང་གི་དམ་པའི་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། ཞེས་པའོ། །གསུམ་པ་འདི་དོན་རྒྱས་བཤད་ནི། ཇི་ལྟར་ས་ཀུན་ཉམས་ངའི་གནས་གཞན་དང་བྲལ་དྲི་མེད་བཻ་ཌུརྻ། །གསལ་མཛེས་ནོར་བུའི་ཡོན་ཏན་དྲི་བྲལ་དཔལ་ལྡན་སྟེང་ནི་མཉམ་གྱུར་ཏེ། །དག་ཕྱིར་དེ་ནི་ལྷ་བདག་གནས་སོགས་ལྷ་དབང་ལྷ་ཡི་གཟུགས་ཤར་ཏེ། རིམ་གྱིས་ས་ཡི་ཡོན་ཏན་བྲལ་ཕྱིར་དེ་ནི་སླར་ཡང་མི་སྣང་འགྱུར། །དེ་དངོས་ཐོབ་ཕྱིར་བསྙེན་གནས་བརཏལ་བཞུགས་ངེས་པར་སྦྱིན་སོགས་ལ་ཕྱོགས་པ། །བུད་མེད་སྐྱེས་ཚོགས་སྨོན་པའི་སེམས་ཀྱིས་མེ་ཏོག་ལ་སོགས་འཐོར་བ་ལྟར། དག་པའི་བཻཌུརྻ་འདྲ་སེམས་ལ་སྣང་བའི་ཐུབ་དབང་ཐོབ་བྱའི་ཕྱིར། རང་དགའ་སེམས་ལྡན་རྒྱལ་བའི་སྲས་རྣམས་དེ་བཞིན་སེམས་རབ་བསྐྱེད་བར་བྱེད། ཅེས་པའོ། །བཞི་པ་སྣང་ཚུལ་གྱི་རྒྱུ་མཚན་ནི། ཇི་ལྟར་བཻ་ཌུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོས་སྐུ་ཡི་གཟུག་བརྙན་འཆར། །འགྲོ་བར་གཟུགས་བརྙན་འཆར་ནུབ་རྙོགས་མེད་དང་། །རྙོག་པའི་རང་སེམས་རབ་འཇུག་དབང་གིས་འཇུག །ཇི་ལྟར་འཇིག་རྟེན་དག་ན་གཟུགས་སྣང་ལྟར། དེ་བཞིན་ཡོད་དང་ཞིག་ཅེས་དེ་མི་ལྟ། ཞེས་པའོ། །གཉིས་པ་གསུང་ལ་དྲུག །དཔེ་འགོད་པ་དང་། དོན་བསྟན་པ་དང་། དཔེ་དོན་གྱིས་བྱེད་ལས་མདོར་བསྟན་དང་། རྒྱས་བཤད་དང་། ཁྱད་པར་བརྗོད་པ་དང་། གསུང་གི་འཇུག་ཚུལ་མི་འགལ་བར་བསྟན་པའོ། །དང་པོ་དཔེ་འགོད་པ་ནི། ཇི་ལྟར་ལྷ་ནང་ལྷ་རྣམས་ཀྱིས། །སྔོན་གྱི་དཀར་པོའི་མཐུ་ཡིས་ནི། །འབད་དང་གནས་དང་ཡིད་གཟུགས་དང་། །རྣམ་པར་རྟོག་པ་མེད་བཞིན་དུ། །མི་རྟག་སྡུག་བསྔལ་བདག་མེད་དང་། །ཞི་བའི་སྒྲ་ཡིས་བག་མེད་པའི། །ལྷ་རྣམས་ཐམས་ཅད་ཡང་ནས་ཡང་། །ཆོས་ཀྱི་རྔ་བོའི་བསྐུལ་བྱེད་ལྟར། །ཞེས་པའོ། །གཉིས་པ་དོན་བསྟན་པ་ནི། དེ་བཞིན་ཁྱབ་བདག་འབད་སོགས་དང་། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གིས་ཁྱབ་མཛད་དེ། །སྐལ་ལྡན་རྣམས་ལ་ཆོས་སྟོན་ཏོ། །ཇི་ལྟར་ལྷ་ནང་ལྷ་རྣམས་ཀྱིས། །རྔ་སྒྲ་རང་གིས་ལས་ལས་བྱུང་། །དེ་བཞིན་འཇིག་རྟེན་ཐུབ་པས་ཆོས། གསུངས་པ་རང་གི་ལས་ལས་བྱུང་། །ཞེས་པའོ། །གསུམ་པ་དཔེ་དོན་གྱི་བྱེད་ལས་མདོར་བསྟན་པ་ནི། འབད་གནས་ལུས་དང་སེམས་བྲལ་བའི། །སྒྲ་དེ་ཇི་ལྟར་ཞི་བསྒྲུབ་ལྟར། །དེ་བཞིན་འབད་སོགས་དང་བྲལ་བ་ཡི། །ཆོས་འདི་ཞི་བ་བསྒྲུབ་པར་བྱེད། །ཅེས་པའོ། །བཞི་པ་རྒྱས་བཤད་ནི། ཇི་ལྟར་ལྷ་ཡི་གྲོང་ན་རྔ་སྒྲའི་རྒྱུན་བྱུང་མི་འཇིགས་སྦྱིན་པ་ནི། ཉོན་མོངས་གཡུལ་དུ་འཇུག་ཚེ་ལྷ་མིན་དཔུང་རྒྱལ་རྩེད་མོ་སེལ་བ་བཞིན། །དེ་བཞིན་འཇིག་རྟེན་དག་ན་བསམ་གཏན་གཟུགས་མེད་ལ་སོགས་རྒྱུས་བྱུང་བ། སེམས་ཅན་ཉོན་མོངས་སྡུག་བསྔལ་རབ་འཇོམས་ཞི་བ་བླ་མེད་ལམ་ཚུལ་བརྗོད། །ཅེས་པའོ། །ལྔ་པ་ཁྱད་པར་བརྗོད་པ་ནི། གང་ཕྱིར་སྐྱེས་ཀུན་ས་ཉིད་དང་། །ཕན་བདེ་ཚུལ་ཁྲིམས་གསུམ་ལྡན་པ། །དེ་ཕྱིར་ཐུབ་དབྱངས་ལྷ་རྫས་ཀྱི། །སིལ་སྙན་རྣམས་ནི་ཁྱད་པར་འཕགས། །ལྷར་ནི་ལྷ་ཡི་སྒྲ་ཆེན་པོ། །སར་གནས་རྣམས་ཀྱིས་རྣར་མི་འགྲོ། །སངས་རྒྱས་རྔ་སྒྲ་འཁོར་བ་ཡི། །ས་འོག་འཇིག་རྟེན་དག་ཏུ་འགྲོ། །ལྷར་ནི་ལྷ་ཡིས་སིལ་སྙན་བྱེ་བ་མང་། །འདོད་མེ་མངོན་པར་འཕེལ་བའི་དོན་དུ་སྒྲོགས། ཐུགས་རྗེའི་བདག་ཉིད་རྣམས་ཀྱི་དབྱངས་གཅིག་ཀྱང་། །སྡུག་བསྔལ་མེ་རབ་ཞི་བའི་དོན་དུ་འཇུག །ལྷར་ནི་མཛེས་ཤིང་ཡིད་འོངས་སིལ་སྙན་སྒྲ། །སེམས་ཀྱི་དགོད་པ་འཕེལ་བར་བྱེད་པའི་རྒྱུ། །ཐུགས་རྗེའི་བདག་ཉིད་དེ་བཞིན་གཤེགས་པའི་གསུངས། །ཏིང་འཛིན་སེམས་གཏོད་བསམ་པ་སྐུལ་བྱེད་ཉིད། །མདོར་ན་མ་ལུས་འཇིག་རྟེན་ཁམས་རྣམས་སུའང་། །ལྷ་དང་ས་ཡི་བདེ་བའི་རྒྱུ་གང་ཡིན། །དེ་ནི་མ་ལུས་འཇིག་རྟེན་ཁྱབ་སྣང་བ། དབྱངས་ཉིད་ལ་ནི་རབ་ཏུ་བརྟེན་པར་བརྗོད། །ཅེས་པའོ། །དྲུག་པ་གསུང་གི་འཇུག་ཚུལ་མི་འགལ་བར་བསྟན་པ་ནི། ཇི་ལྟར་རྣ་བ་དང་བྲལ་བས། །ཕྲ་མོའི་སྒྲ་ནི་མི་མྱོང་ཤིང་། །ཐམས་ཅད་ལྷ་ཡི་རྣ་བར་ཡང་། །རྣ་ལམ་དུ་ནི་མི་འགྲོ་བཞིན། །དེ་བཞིན་ཆོས་ཕྲ་མཆོག་ཏུ་ནི། ཞིབ་མོས་ཡེ་ཤེས་སྤྱོད་ཡུལ་དང་། །ཉོན་མོངས་མེད་ཡིད་འགའ་ཞིག་གིས། །རྣ་བའི་ལམ་དུ་འགྱུར་བ་ཡིན། །ཞེས་པའོ། །གསུམ་པ་གསུང་གི་དཔེ་ཁྱབ་པ་ལ་ལྔ། སྤྲིན་གྱི་དཔེ་བསྟན་པ་དང་། དོན་བརྗོད་པ་དང་། སྣོད་ཀྱི་འགྱུར་ཚུལ་དང་། འབད་མེད་དུ་འཇུག་པ་དང་། སྡུག་བསྔལ་སེལ་བའོ། །དེ་ལ་དང་པོ་སྤྲིན་གྱི་དཔེ་བསྟན་པ་ནི། ཇི་ལྟར་དབྱར་གྱི་དུས་ན་སྤྲིན། །ལོ་ཏོག་ཕུན་སུམ་ཚོགས་པའི་རྒྱུ། །ཆུ་ཡི་ཕུང་པོ་འབད་མེད་པར། །ས་ལ་རྒྱུན་དུ་འབབས་པ་ལྟར། །ཞེས་པའོ། །གཉིས་པ་དོན་བརྗོད་པ་ནི། དེ་བཞིན་ཐུགས་རྗེའི་སྤྲིན་ལས་ནི། །རྒྱལ་བའི་དམ་ཆོས་ཆུ་ཡི་ཆར། །འགྲོ་བའི་དགེ་བའི་ལོ་ཏོག་རྒྱུ། རྣམ་པར་རྟོག་པ་མེད་པར་འབེབས། །ཇི་ལྟར་འཇིག་རྟེན་དགེ་བའི་ལམ་འཇུག་ན། །རླུང་སྐྱེས་ཆུ་ཆར་སྤྲིན་གྱི་འབེབས་པ་ལྟར། །དེ་བཞིན་རྩེ་རླུང་འགྲོ་དགེ་མངོན་འཕེལ་ཕྱིར། །སངས་རྒྱས་སྤྲིན་ལས་དམ་ཆོས་ཆར་པ་འབེབས། །སྲིད་ལ་མཁྱེན་དང་བརྩེ་ཆེན་འགྱུར་བ་དང་། །མི་འགྱུར་མ་གོས་ནམ་མཁའི་དཀྱིལ་གནས་པ། །ཏིང་འཛིན་གཟུངས་ཆུ་དྲི་མེད་སྙིང་པོ་ཅན། །ཐུབ་དབང་སྤྲིན་ནི་དགེ་བའི་ལོ་ཏོག་རྒྱུ། །ཅེས་པའོ། །གསུམ་པ་སྣོད་ཀྱི་འགྱུར་ཚུལ་ནི། ཇི་ལྟར་བསིལ་དང་ཞིམ་དང་འཇམ་པ་དང་། །ཡང་བའི་ཆུ་ནི་སྤྲིན་དེ་ལ་འཐོན་པ། །ས་ལ་བ་ཚྭ་ལ་སོགས་གནས་འབྲེལ་བས། །ཤིན་ཏུ་མང་པོའི་རོར་ནི་འགྱུར་བ་བཞིན། །དེ་བཞིན་འཕགས་པའི་ཡན་ལག་བརྒྱད་བཅུའི་ཆར། །རབ་ཡང་བརྩེ་སྤྲིན་སྙིང་པོ་ལས་འཐོན་པ། །འགྲོ་བའི་རྒྱུ་ཀྱི་གནས་ཀྱིས་དབྱེ་བ་ལས། །རྣམ་པ་མང་པོའི་རོ་དང་ལྡན་བར་འགྱུར། །ལྟོས་པ་མེད་པར་འཇུག་པས་ནི། །ཐེག་པ་མཆོག་ལ་དང་པོ་དང་། །བར་མ་དང་ནི་སྡང་བ་ཡིས། །ཕུང་པོ་གསུམ་ནི་མི་དག་དང་། །རྨ་བྱ་དང་ནི་ཡི་དྭགས་འདྲ། །དཔྱིད་མཐའ་སྤྲིན་མེད་པ་ན་མི་དང་མཁའ་མི་རྒྱུ་བའི་བྱ་དག་དང་། དབྱར་ཚེ་ས་ལ་ཆར་བབ་པ་ན་ཡི་དྭགས་དག་ནི་སྡུག་པ་ལྟར། །སྙིང་པོའི་སྤྲིན་ཚོགས་དག་གིས་ཆོས་ཆུ་བྱུང་དང་མ་བྱུང་བ་ལས་ཀྱང་། །ཆོས་འདོད་པ་དང་ཆོས་ལ་སྡང་བ་འཇིག་རྟེན་ན་ནི་དཔེ་དེ་ཉིད། །ཅེས་པའོ། །བཞི་པ་འབད་མེད་དུ་འཇུག་པ་ནི་ཐེགས་པ་རབ་འབེབས་རྡོ་ཚན་དང་ནི་རྡོ་རྗེའི་མེ་ནི་འབེབས་པ་ན། །སྲོག་ཆགས་འཕྲ་དང་རི་སུལ་སོང་བ་དག་ལ་ཇི་ལྟར་སྤྲིན་ལྟོས་མེད། །འཕྲ་དང་རྒྱ་ཆེན་ཐིགས་ཐབས་ཚུལ་གྱི་མཁྱེན་པ་དང་ནི་བརྩེ་བའི་སྤྲིན། །ཉོན་མོངས་དག་རྒྱུར་བདག་ལྟའི་བག་ཆགས་དག་ལ་རྣམ་པ་ཀུན་ལྟོས་མེད། །ཅེས་པའོ། །ལྔ་པ་སྡུག་བསྔལ་སེལ་བ་ལ་གསུམ། སྡུག་བསྔལ་བ་དང་། འགྱུར་བ་རྟོག་པ་དང་། བདེན་བཞིའི་ཚུལ་མཐོང་བའོ། །དང་པོ་སྡུག་བསྔལ་སེལ་བ་ནི། འཁོར་བའི་སྐྱེ་འཆི་ཐོག་མཐའ་མེད་དེར་འགྲོ་བའི་ལམ་ནི་རྣམ་པར་ལྔ། མི་གཙང་བ་ལ་དྲི་ཞིམ་མེད་པ་བཞིན། །འགྲོ་ལྔ་དག་ན་བདེ་བ་མེད། །དེ་སྡུག་རྟག་ཏུ་མེ་མཚོན་ཁ་བ་རྒྱ་ཚྭ་ལ་སོགས་རེག་སྐྱེས་བཞིན། །ཐུགས་རྗེའི་སྤྲིན་ལས་དམ་ཆོས་ཆར་ཆེན་དེ་རབ་ཞི་བྱེད་རབ་ཏུ་འབེབས། །ཞེས་པའོ། །གཉིས་པ་འགྱུར་བ་རྟོག་པ་ནི། ལྷ་ལ་འཆི་འཕོ་མི་ལ་ཡངས་ཚོལ་སྡུག་བསྔལ་ཞེས་བྱར་རྟོག་པའི་ཕྱིར། ཤེས་རབ་ལྡན་པ་ལྷ་མིའི་བྱང་ཆུབ་མཆོག་ལ་མངོན་པར་འདོད་མེད་དེ། །ཤེས་རབ་དང་ནི་དེ་བཞིན་གཤེགས་པའི་གསུང་རབ་དད་པའི་རྗེས་འབྲངས་ལས། །འདི་ནི་སྡུག་བསྔལ་འདི་རྒྱུ་འདི་ནི་འགོག་ཅེས་ཤེས་པས་མཐོང་ཕྱིར་རོ། །གསུམ་པ་བདེན་བཞིའི་ཚུལ་མཐོང་བ་ནི། ནད་ནི་ཤེས་བྱ་ནད་ཀྱི་རྒྱུ་ནི་སྤངས་བྱ་ལ། །བདེར་གནས་ཐོབ་བྱ་སྨན་ནི་བསྟན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤངས་བྱ་རེག་པར་བྱ་ཞིང་བསྟན་པར་བྱ། །ཅེས་པའོ། །བཞི་པ་སྤྲུལ་པ་སྤྲོ་བ་ལ་བཞི། དཔེ་དོན་མདོར་བསྟན་པ་དང་། དེ་བཤད་པ་དང་། མཐོང་བའི་རྒྱུ་བསྟན་པ་དང་། སྤྲུལ་སྐུའི་མཛད་པ་བཅུ་གཉིས་བཤད་པའོ། །དེ་ལ་དང་པོ་དཔེ་དོན་མདོར་བསྟན་ནི། ཇི་ལྟར་ཚངས་པ་ཚངས་པ་ཡི། གནས་ནས་འཕོ་བ་མེད་བཞིན་དུ། །ལྷ་ཡི་གནས་ནི་ཐམས་ཅད་དུ། །སྣང་བ་འབད་མེད་སྟོན་པ་ལྟར། །དེ་བཞིན་ཐུབ་པ་ཆོས་སྐུ་ལས། །བསྐྱོད་པ་མེད་པར་ཁམས་ཀུན་ཏུ། །སྐལ་ལྡན་རྣམས་ལ་འབད་མེད་པར། །སྤྲུལ་པ་དག་གིས་སྟོན་པར་མཛད། །ཅེས་པའོ། །གཉིས་པ་དེ་བཤད་པ་ནི། ཇི་ལྟར་ཚངས་རྟག་གཞལ་ཡས་ཁང་ལས་མི་གཡོ་འདོད་ཁམས་བཞུགས་པ་སྟེ། །ལྷ་རྣམས་ཀྱིས་མཐོང་དེ་མཐོང་དེ་ཡང་ཡུལ་ལ་དགའ་བ་སྤོངས་བྱེད་ལྟར། །དེ་བཞིན་བདེ་གཤེགས་ཆོས་ཀྱི་སྐུ་ལ་མི་བསྐྱོད་འཇིག་རྟེན་ཀུན་ཏུ་སྟེ། །སྐལ་ལྡན་གྱིས་མཐོང་དེ་ཡིས་མཐོང་དེ་རྟག་ཏུ་དྲི་མ་ཀུན་སེལ་བྱེད། །ཅེས་པའོ། །གསུམ་པ་མཐོང་བའི་རྒྱུ་བསྟན་པ་ནི། སྔོན་གྱིས་རང་ཉིད་སྨོན་ལམ་དང་། །ལྷ་རྣམས་ཀྱིས་ནི་དགེ་བའི་མཐུས། །ཇི་ལྟར་ཚངས་པས་འབད་མེད་སྣང་། །རང་བྱུང་སྤྲུལ་སྐུ་དེ་བཞིན་ནོ། །ཞེས་པའོ། །བཞི་པ་སྤྲུལ་སྐུའི་མཛད་པ་བཅུ་གཉིས་བཤད་པ་ནི། འཕོ་དང་ལྷུམས་འཇུག་བལྟམས་དང་ཡབ་ཀྱི་ཁབས་གཤེགས་དང་། །དགྱེས་རོལ་བ་དང་དབེན་པར་སྤྱོད་དང་བདུད་བཅོམ་དང་། བྱང་ཆུབ་ཆེ་བརྙེས་ཞི་བའི་གྲོང་ཁྱེར་ལམ་སྟོན་དག །བསྟན་ནས་ཐུབ་པ་བསྐལ་མེད་མིག་གི་ལམ་མི་འགྱུར། ཞེས་པའོ། །ལྔ་པ་ཡེ་ཤེས་འཇུག་ཚུལ་ལ་དྲུག །མདོར་བསྟན་པ་དང་། འཇུག་པའི་བྱ་བ་དང་། ཡེ་ཤེས་སྤྲོ་བའི་ཚུལ་དང་། དུ་མར་འཇུག་ཚུལ་བསྟན་པ་དང་། འཇུག་པའི་རིམ་པ་བཤད་པ་དང་། ཁྱད་པར་འཕགས་པའི་ཚུལ་ལོ། །དེ་ལ་དང་པོ་མདོར་བསྟན་པ་ནི། ཇི་ལྟར་ཉི་མས་གདུང་བས་དུས་ཅིག་ཚེ་ཉིད་ལ། །པད་སོགས་རྒྱས་དང་ཀུ་མུད་ཏ་ནི་རབ་ཟུམ་བ། ཆུ་སྐྱེས་བྱེ་དང་ཟུམ་པའི་ཡོན་ཏན་སྐྱོན་དག་ལ། །ཉི་མ་རྟོག་མེད་འདིར་ནི་འཕགས་པའི་ཉི་དེ་བཞིན། །ཞེས་པའོ། །གཉིས་པ་འཇུག་པའི་བྱ་བ་ནི། ཇི་ལྟར་ཉི་མ་རྟོག་མེད་པར། །རང་འོད་གཅིག་ཆར་སྤྲོས་པ་ཡིས། །པདྨ་རྒྱས་པར་བྱེད་པ་དང་། གཞན་དག་སྨིན་པར་བྱེད་པ་ལྟར། །དེ་བཞིན་དེ་བཞིན་གཤེགས་པ་ཡི། །ཉི་མའི་དམ་ཆོས་འོད་ཟེར་དག །འདུལ་བྱའི་སྐྱེ་བོ་པད་མ་ལ། །རྣམ་པར་རྟོག་པ་མེད་པར་འཇུག །ཅེས་པའོ། །གསུམ་པ། ཡེ་ཤེས་སྤྲོ་བའི་ཚུལ་ནི། ཆོས་དང་གཟུགས་ཀྱི་སྐུ་དག་གིས། །བྱང་ཆུབ་སྙིང་པོའི་མཁའ་ཤར་བ། །ཀུན་མཁྱེན་ཉི་མ་འགྲོ་བར་ནི། །ཡེ་ཤེས་འོད་ཟེར་སྤྲོ་བར་མཛད། །ཅེས་པའོ། །བཞི་པ་དུ་མར་འཇུག་ཚུལ་བསྟན་པ་ནི། གང་ཕྱིར་གདུལ་བྱ་དག་པ་ཡིས། །ཆུ་ཡི་སྣོད་ནི་ཐམས་ཅད་ལ། །བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་གཅིག་ཅར་འཆར། །ཞེས་པའོ། །ལྔ་པ་འཇུག་པའི་རིམ་པ་བཤད་པ་ནི། རྟག་ཏུ་ཐམས་ཅད་ལ་ཁྱབ་པ། །ཆོས་དབྱིངས་ནམ་མཁའི་དཀྱིལ་དུ་ནི། །སངས་རྒྱས་ཉི་མའི་གདུལ་བྱ་ཡིས། །རི་ལ་ཇི་ལྟར་འོས་པར་འབབ། །ཇི་ལྟར་རྒྱ་ཆེན་འོད་ཟེར་སྟོང་ལྡན་ཉི་ཤར་འདིར། །འཇིག་རྟེན་ཀུན་ཏུ་སྣང་བར་བྱས་ནས་རིམ་གྱིས་ནི། །མཆོག་དང་བར་མ་དམན་པའི་རི་ལ་འབབ་དེ་བཞིན། །རྒྱལ་བའི་ཉི་མ་སེམས་ཅན་ཚོགས་ལ་རིམ་གྱི་འབབས། །ཞེས་པའོ། །དྲུག་པ་ཁྱད་པར་འཕགས་པའི་ཚུལ་ནི། ཞིང་ཀུན་ནམ་མཁའི་མཐའ་སྤྲོ་ཉི་མ་ལ་མེད་ལ། །མི་ཤེས་མུན་བཀབ་ཤེས་བྱའི་དོན་སྟོན་པ་ཡང་མིན། །ཐུགས་རྗེའི་བདག་ཉིད་སྣ་ཚོགས་མདོག་བཀྱེའི་འོད་ཚོགས་ཀྱིས། །གསལ་བ་དང་ནི་འགྲོ་ལ་ཤེས་བྱའི་དོན་སྟོན་མཛད། །སངས་རྒྱས་གྲོང་དུ་གཤེགས་ཚེ་མིག་དང་མི་ལྡན་པ་ཡི་སྐྱེ་བོ་རྣམས། །མཐོང་ཞིང་དོན་མེད་ཚོགས་བྲལ་དོན་དེ་མཐོང་བ་ལས་ནི་མྱོང་བ་དང་། །གཏི་མུག་གིས་མདོངས་སྲིད་པའི་མཚོར་ལྷུང་ལྟ་བའི་མུན་པས་སྒྲིབ་པ་རྣམས། །སངས་རྒྱས་ཉི་མའི་འོད་ཀྱིས་བློ་སྣང་མ་མཐོང་བ་ཡི་གནས་མཐོང་འགྱུར། །ཞེས་པའོ། །དྲུག་པ་སྐུ་གསུང་ཐུགས་ཀྱི་གསང་བ་ལ་གསུམ། མདོར་བསྟན། རྒྱས་པར་བཤད། རྙེད་པར་དཀའ་བའི་ཚུལ་གྱིས་ཐུགས་དགོས་འདོད་འབྱུང་བ་དང་། དཔེ་དོན་གསུང་གིས་གསང་བ་བསམ་གྱིས་མི་ཁྱབ་པ་དང་། དཔེ་དོན་སྐུའི་གསང་བ་བསམ་གྱིས་མི་ཁྱབ་པའོ། །དེ་ལ་དང་པོ་ཐུགས་ཀྱི་གསང་བ་བསྟན་པ་ནི། ཇི་ལྟར་ཡིད་བཞིན་ནོར་བུ་ནི། །རྟོག་པ་མེད་ཀྱང་གཅིག་ཆར་དུ། །སྤྱོད་ཡུལ་གནས་པ་རྣམས་ཀྱིས་ནི། །བསམ་ཀུན་སོ་སོའི་རྫོགས་བྱེད་ལྟར། །དེ་བཞིན་སངས་རྒྱས་ཡིད་བཞིན་ལ། །བརྟེན་ནས་བསམ་པ་ཐ་དད་རྣམས། །སྣ་ཚོགས་ཆོས་ནི་ཐོས་འགྱུར་ཡང་། །དེ་ནི་དེ་ལ་རྣམ་མི་རྟོག །ཅེས་པའོ། །བཤད་པ་ནི། ཇི་ལྟར་ནོར་བུ་རིན་ཆེན་རྟོག་མེད་འདོད་པའི་ནོར། །འབད་པ་མེད་པར་གཞན་པ་དག་ལ་རབ་སྟེར་ལྟར། །དེ་བཞིན་ཐུབ་པ་འབད་མེད་ཇི་ལྟར་འོས་པར་ནི། གཞན་གྱི་དོན་དུ་སྲིད་པ་ཇི་སྲིད་རྟག་ཏུ་བཞུགས། ཞེས་པའོ། །རྙེད་པར་དཀའ་བ་ནི། གང་ཕྱིར་རྒྱ་མཚོ་ས་འོག་གནས་དེ་ལ་འདོད་པས། །ཇི་ལྟར་ནོར་བུ་བཟང་པོ་འགྲོ་འདིར་རབ་ཏུ་དཀའ། །དེ་བཞིན་འགྲོ་བ་ཀུན་ཏུ་སྐལ་ངན་ཉོན་མོངས་ཟིན། །ཡིད་འདིར་བདེ་གཤེགས་མཐོང་བ་རྙེད་དཀའ་ཤེས་པར་བྱ །ཅེས་པའོ། །གཉིས་པ་གསུང་གི་གསང་བའི་དཔེ་ནི། ཇི་ལྟར་སྒྲ་བརྙན་གྱིས་ནི་སྒྲ། །གཞན་གྱི་རྣམ་རིག་ལས་བྱུང་བ། །རྣམ་རྟོག་མེད་ཅིང་བཟོ་མེད་པ། །ཕྱི་དང་ནང་དང་མི་གནས་ལྟར། །ཞེས་པའོ། །དོན་ནི། དེ་བཞིན་དེ་བཞིན་གཤེགས་པའི་གསུངས། །གཞན་གྱི་རྣམ་རིག་ལས་བྱུང་བ། །རྣམ་ཐར་རྟོག་མེད་བཟོ་མེད་ཅིང་། །ཕྱི་དང་ནང་དང་གནས་མ་ཡིན། །ཞེས་པའོ། །གསུམ་པ་སྐུའི་གསང་བའི་དཔེ་ནི། ཅུང་ཟད་མེད་ཅིང་སྣང་བ་མེད། །དམིགས་པ་མེད་ཅིང་རྟེན་མེད་པ། །མིག་གིས་ལམ་ལས་རབ་འདས་པ། །གཟུགས་མེད་བསྟན་དུ་མེད་པ་ཡི། །མཁའ་དང་ཇི་ལྟར་མཐོ་དང་དམའ། །མཐོང་ཡང་དེ་ནི་དེ་ལྟར་མིན། །ཞེས་པའོ། །དོན་ནི། དེ་བཞིན་ཐམས་ཅད་སངས་རྒྱས་ལ། །མཐོང་ཡང་དེ་ནི་དེ་ལྟ་མིན། །ཞེས་པའོ། །བདུན་པ་ཐུགས་རྗེ་ཆེན་པོ་འཇུག་ཚུལ་ལ་གཉིས་ཏེ། དཔེ་དང་། དོན་ནོ། །དང་པོ་དཔེ་ནི། ཇི་ལྟར་ས་ལས་སྐྱེས་པ་ཀུན། །རྟོག་མེད་ས་ལ་བརྟེན་ནས་ནི། །འཕེལ་དང་བརྟེན་དང་ཡང་འགྱུར་ལྟར། །ཞེས་པའོ། །གཉིས་པ་དོན་ནི། དེ་བཞིན་རྫོགས་པའི་སངས་རྒྱས་ས། །རྣམ་རྟོག་མེད་པ་ལ་བརྟེན་ནས། །འགྲོ་བའི་དགེ་བའི་རྩ་བ་ནི། །མ་ལུས་པ་ནི་འཕེལ་བར་འགྱུར། །ཞེས་པའོ། །དོན་བསྡུ་བ་ལ། འབད་པ་མེད་པའི་དོན། དགོས་པ་བསྟན་པ་དོན་བསྡུ་དངོས། དོན་བསྡུ་དང་པོ་གཏན་ཚིག་དགོད་པ། སྐབས་དོན་བརྗོད་པ། དཔེ་དགུ་བསྟན་པ། དཔེ་དགུ་བཤད་པའོ། །དེ་ལ་དང་པོ་འབད་པ་མེད་པའི་དོན་ནི། འབད་རྩོལ་མེད་པར་བྱ་བ་འགའ། །བྱེད་པ་མཐོང་མེད་དེ་བས་ན། །གདུལ་བྱའི་ཐེ་ཚོམ་བཅད་པའི་ཕྱིར། །དཔེ་རྣམས་དགུ་ནི་བསྟན་པ་ཡིན། །ཞེས་པའོ། །གཉིས་པ་དགོས་པ་བསྟན་པ་ནི། གང་དུ་དཔེ་དགུ་འདི་དག་ནི། །རྒྱས་པར་རབ་ཏུ་བསྟན་གྱུར་པ། །མདོ་སྡེ་ཡི་ནི་མིང་ཉིད་ཀྱིས། །དེ་ཡིས་དགོས་པ་བསྟན་པ་ཉིད། །ཐོས་པ་ལས་བྱུང་ཤེས་པ་ཡི། སྣང་བ་རྒྱ་ཆེན་འདིས་བརྒྱན་པའི། བློ་ལྡན་མྱུར་དུ་སངས་རྒྱས་ཀྱིས། སྤྱོད་ཡུལ་ཀུན་ལ་འཇུག་པར་འགྱུར། ཞེས་པའོ། །གསུམ་པ་དོན་བསྡུ་དངོས་ནི། དེ་དོན་བཻ་ཌཱུར་བརྒྱ་བྱིན་གྱིས། གཟུགས་བརྙན་ལ་སོགས་དཔེ་དག་ནི། །རྣམ་པ་དགུ་བརྗོད་དེ་ལ་ནི། །དེ་ཡི་བསྡུས་དོན་ངེས་པར་བཟུང་། །སྟོན་དང་གསུངས་དང་ཁྱབ་པ་དང་། །སྤྲུལ་དང་ཡེ་ཤེས་སྤྲོ་བ་དང་། །ཐུགས་གསུང་སྐུ་ཡི་གསང་བ་དང་། །ཐུགས་རྗེའི་བདག་ཉིད་ཐོབ་པ་ཉིད། །ཅེས་པའོ། །བཞི་པ་གཏན་ཚིགས་དགོད་པ་ནི། འབད་རྩོལ་རྒྱུད་ཀུན་རབ་ཞི་བ། རྣམ་པར་རྟོག་པ་མེད་པའི་ཐུགས། དྲི་མེད་བཻ་ཌཱུར་བརྒྱ་བྱིན་གྱི། །གཟུགས་བརྙན་ཤར་བ་ལ་སོགས་བཞིན། །ལོངས་སྤྱོད་ཞི་བ་དམ་བཅའ་སྟེ། །རྟོག་མེད་ཐུགས་ནི་གཏན་ཚིགས་སོ། །རང་བཞིན་དོན་ནི་གྲུབ་དོན་དུ། །དཔེ་ནི་བརྒྱ་བྱིན་གཟུགས་སོགས་བཞིན། །ཞེས་པའོ། །ལྔ་པ་སྐབས་དོན་བརྗོད་པ་ནི། འདིར་ནི་སྐབས་དོན་འདི་ཡིན་ཏེ། །སྟོན་པ་ལ་སོགས་རྣམ་དགུ་ནི། །སྟོན་པ་སྐྱེ་འཆི་དང་བྲལ་བ། །འབད་པ་མེད་པར་རབ་འཇུག་པའི། །ཞེས་པའོ། །དྲུག་པ་དཔེ་དགུ་བསྟན་པ་ནི། གང་ཞིག་བརྒྱ་བྱིན་རྔ་དང་སྤྲིན་བཞིན་དང་། །ཚངས་ཉི་རིན་ཆེན་ཡིད་བཞིན་ནོར་རྒྱལ་བཞིན། །སྒྲ་བརྙན་ནམ་མཁའ་ས་བཞིན་སྲིད་པའི་བར། །འབད་མེད་གཞན་དོན་བྱེད་དེ་རྣལ་འབྱོར་རིགས། །ཞེས་པའོ། །བདུན་པ་དཔེ་དགུ་བཤད་པ་ནི། རིན་ཆེན་ལྷ་དབང་སྣང་བཞིན་སྟོན་པ་སྟེ། །ལེགས་པར་འདམ་མཛད་ལྷ་ཡི་རྔ་དང་འདྲ། །ཁྱབ་བདག་མཁྱེན་དང་བརྩེ་ཆེན་སྤྲིན་ཚོགས་ནི། །མཐའ་ཡས་འགྲོ་བ་སྲིད་རྩེའི་བར་དུ་ཁྱབ། །ཚངས་བཞིན་ཟག་མེད་གནས་ལས་མ་བསྐྱོད་པར། །སྤྲུལ་པ་རྣམ་པ་དུ་མར་རབ་ཏུ་སྟོན། །ཉི་བཞིན་ཡེ་ཤེས་སྣང་བ་རབ་སྤྲོ་གང་། །རྣམ་དག་རིན་ཆེན་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུངས་དེ་བྲག་ཆ་བཞིན་དུ་ཡི་གེ་མེད། །སྐུ་ནི་ནམ་མཁའ་ལྟ་བུ་ཁྱབ་དང་གཟུགས་མེད་རྟག་པ་ཉིད། །ས་བཞིན་འགྲོ་བའི་དཀར་པོའི་ཆོས་ཀྱི་སྨན་རྣམས་མ་ལུས་པའི། །རྣམ་པ་ཀུན་ཏུ་གཞི་གྱུར་པ་ནི་སངས་རྒྱས་ས་ཡིན་ནོ། །ཞེས་པའོ། །ཆོས་མི་མཐུན་སྤངས་པའི་སྒོ་ནས་བཤད་པ་ལ། སྐྱེ་འགག་སྣང་ཚུལ། ཆོས་མི་མཐུན་གྱི་དཔེར་བརྗོད། ཐུགས་རྗེ་ལས་འབྲས་བུ་འབྱུང་བའི་དོན་བསྟན་པའོ། །དེ་ལ་དང་པོ་སྐྱེ་འགག་སྣང་ཚུལ་ནི། དགེ་བ་བཻ་ཌཱུརྻ་འདྲ་ཡི། །སེམས་ལ་སངས་རྒྱས་མཐོང་བའི་རྒྱུ། །དེ་དག་པ་ནི་མི་བཟློག་པའི། །དད་པའི་དབང་པོ་བལྟས་པ་ཉིད། །དགེ་བ་སྐྱེ་དང་འཇིག་པས་ན། །སངས་རྒྱས་གཟུགས་ནི་སྐྱེ་དང་འཇིག །བརྒྱ་བྱིན་བཞིན་དུ་ཐུབ་པ་ཡི། །ཆོས་ཀྱི་སྐུ་ཡིས་སྐྱེ་འཇིག་མེད། །དེ་བཞིན་དུ་ནི་འབད་མེད་པར། །སྐྱེ་མེད་འགག་མེད་ཆོས་སྐུ་ལས། །སྲིད་པ་ཇི་སྲིད་གནས་བར་དུ། །སྟོན་པ་ལ་སོགས་མཛད་པ་འཇུག །ཅེས་པའོ། །གཉིས་པ་ཆོས་མི་མཐུན་གྱི་དཔེ་བརྗོད་པ་ནི། དཔེ་འདི་རྣམས་ཀྱིས་བསྡུས་པ་ཡིས། དོན་ནི་འདི་ཡིན་རིམ་པ་ཡང་། །སྔ་མ་ཕྱི་མས་ཆོས་མི་མཐུན། །སྤངས་པའི་སྒོ་ནས་བརྗོད་པ་ཡིན། །སངས་རྒྱས་གཟུགས་བརྙན་ལྟ་བུ་སྟེ། །དབྱངས་དང་མི་ལྡན་དེ་འདྲ་མིན། །ལྷ་ཡི་རྔ་བཞིན་ཐམས་ཅད་དུ། །དོན་མེད་མིན་པ་དེ་འདྲ་མིན། །སྤྲིན་ཆེན་དང་མཚུངས་དོན་མེད་པའི། །ས་བོན་སྤོང་མིན་དེ་འདྲ་མིན། །ཚངས་ཆེན་བཞིན་ཏེ་གཏན་དུ་ནི། །སྨིན་པར་བྱེད་མིན་དེ་འདྲ་མིན། །ཉི་མའི་གཟུགས་བཞིན་གཏན་དུ་ནི། །མུན་པ་འཇོམས་མིན་དེ་འདྲ་མིན། །ཡིད་བཞིན་ནོར་འདྲ་འབྱུང་བ་ནི། །རྙེད་པར་མི་དཀའ་དེ་འདྲ་མིན། །སྒྲ་བརྙན་བཞིན་ཏེ་རྐྱེན་ལས་ནི། །འབྱུང་བ་དེ་དང་འདྲ་བ་མིན། ནམ་མཁའ་དང་འདྲ་དགེ་བ་ཡིས། །གཞི་མིན་དེ་དང་འདྲ་བ་མིན། །འཇིག་རྟེན་འཇིག་རྟེན་ལས་འདས་པ། །འགྲོ་བའི་ཕུན་ཚོགས་མ་ལུས་པ། །དེ་གནས་པ་ཡི་རྟེན་ཡིན་ཕྱིར། །ས་ཡི་དཀྱིལ་འཁོར་དག་དང་འདྲ། །ཅེས་པའོ། །གསུམ་པ་ཐུགས་རྗེ་ལས་འབྲས་བུ་འབྱུང་བའི་དོན་བསྟན་པ་ནི། སངས་རྒྱས་བྱང་ཆུབ་ལ་བརྟེན་ནས། །འཇིག་རྟེན་འདས་པའི་ལམ་འབྱུང་ཕྱིར། །དག་པའི་ལམ་ལས་བསམ་གཏན་དང་། །ཚད་མེད་པ་དང་གཟུགས་མེད་འབྱུང་། །འཕྲིན་ལས་ཀྱི་ལེའུ་བཞི་པའོ།། ༈ །།

ལེའུ་ལྔ་པ། ཕན་ཡོན་བསྟན་པ།

གསུམ་པ་བསྟན་ཆོས་ཡོངས་སུ་རྫོགས་པའི་བྱ་བ་ལ་གསུམ་སྟེ། ཕན་ཡོན་དང་། ཇི་ལྟར་མཛད་པ་དང་། བསྔོ་བ་དོན་བསྡུ་དང་བཅས་པའོ། །དང་པོ་ལ། བསམ་གྱིས་མི་ཁྱབ་པའི་དོན་བརྗོད། ཡོན་ཏན་མདོར་བསྟན། སྦྱིན་པ་ལས་ཁྱད་པར་འཕགས་པ། ཚུལ་ཁྲིམས་ལས་ཁྱད་པར་འཕགས་པ། བསམ་གཏན་ལས་ཁྱད་པར་འཕགས་པ། དེའི་རྒྱུ་མཚན་བརྗོད། ཕན་ཡོན་ཤིན་ཏུ་རྒྱས་བཤད་དོ། །དེ་ལ་དང་པོ་བསམ་གྱིས་མི་ཁྱབ་པའི་དོན་བརྗོད་པ་ནི། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཆོས་དང་སངས་རྒྱས་འཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། འདི་ནི་འདྲེན་པ་རྣམས་ཀྱི་སྤྱོད་ཡུལ་ཡིན། །ཞེས་པའོ། །གཉིས་པ་ཡོན་ཏན་མདོར་བསྟན་ནི། བློ་ལྡན་རྒྱལ་བའི་ཡུམ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། བསམ་མེད་ཡོན་ཏན་ཚོགས་ལ་མངོན་དགའ་བས། །སེམས་ཅན་ཀུན་གྱིས་བསོད་ནམས་ཟིལ་གྱིས་གནོན། །ཞེས་པའོ། །གསུམ་པ་སྦྱིན་པ་ལས་ཁྱད་པར་འཕགས་པ་ནི། གང་ཞིག་བྱང་ཆུབ་དོན་དུ་གཉེར་བས་གསེར་ཞིང་ནོར་བུ་སྤྲས་པ་ནི། །སངས་རྒྱས་ཞིང་རྡུལ་མཉམ་པ་ཉིན་རེ་ཆོས་རྒྱལ་རྣམས་ལ་རྟག་འབུལ་ལ། །གཞན་གང་འདི་ལས་ཚིགས་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། སྦྱིན་པ་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །ཞེས་པའོ། །བཞི་པ་ཚུལ་ཁྲིམས་ལས་ཁྱད་པར་འཕག་པ་ནི། བློ་ལྡན་གང་ཞིག་བླ་མེད་བྱང་ཆུབ་འདོད་པས་བསྐལ་པ་དུ་མར་ཡང་། །ལུས་ངག་ཡིད་ཀྱིས་འབད་པ་མེད་པ་ཚུལ་ཁྲིམས་དྲི་མེད་བསྲུང་བྱེད་ལ། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། །ཚུལ་ཁྲིམས་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །ཞེས་པའོ། །ལྔ་པ་བསམ་གཏན་ལས་ཁྱད་པར་འཕགས་པ་ནི། གང་ཞིག་འདི་ན་སྲིད་པ་གསུམ་གྱི་ཉོན་མོངས་མེ་འཇིལ་བསམ་གཏན་ནི། །ལྷ་དང་ཚངས་གནས་མཐར་སོན་རྫོགས་པའི་བྱང་ཆུབ་འཕོ་མེད་ཐབས་བསྒོམ་ལ། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། །བསམ་གཏན་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །ཞེས་པའོ། །དྲུག་པ་དེའི་རྒྱུ་མཚན་བརྗོད་པ་ནི། གང་ཕྱིར་སྦྱིན་བས་ལོངས་སྤྱོད་དག་ནི་སྒྲུབ་བྱེད་ཅིང་། ཁྲིམས་ཀྱིས་མཐོ་རིས་བསྒོམ་པས་ཉོན་མོངས་སྤོངས་བྱེད་ལ། ཤེས་རབ་ཉོན་མོངས་ཤེས་བྱ་ཀུན་སྤོངས་དེ་ཡི་ཕྱིར། འདི་མཆོག་ཉིད་དེ་དེ་ཡི་རྒྱུ་ནི་འདི་ཐོས་ཡིན། ཞེས་པའོ། །བདུན་པ་ཕན་ཡོན་ཤིན་ཏུ་རྒྱས་བཤད་ལ་ལྔ། བྱང་ཆུབ་མྱུར་དུ་འཐོབ་པ། བྱང་ཆུབ་སེམས་ཀྱི་རྟེན་དུ་གྱུར་བ། ཚོགས་གཉིས་རྫོགས་པ། ཞར་ལ་ཚོགས་གཉིས་ཀྱི་ངེས་པ་བསྟན་པ། སྒྲིབ་པ་གཉིས་སྤོང་པའོ། །དེ་ལ་དང་པོ་བྱང་ཆུབ་མྱུར་དུ་འཐོབ་པ་ནི། གནས་དང་དེ་ཡི་གྱུར་པ་དང་། །དེ་ཡི་ཡོན་ཏན་དོན་གྲུབ་སྟེ། །རྒྱལ་བ་ཡིས་ནི་མཁྱེན་པའི་ཡུལ། །རྣམ་བཞི་ཇི་སྐད་བརྗོད་འདི་ལ། །བློ་ལྡན་ཡོད་དང་ནུས་ཉིད་དང་། །ཡོན་ཏན་ལྡན་པས་མོས་པ་ན། །མྱུར་དུ་དེ་བཞིན་གཤེགས་པ་ཡིས། །གོ་འཕང་འཐོབ་པའི་སྐལ་ལྡན་འགྱུར། །ཞེས་བྱ་བ་གསུངས་ཏེ། དེ་ལ་གནས་ནི་བདེ་བར་གཤེགས་པའི་སྙིང་པོ་སྟེ་ལེའུ་དང་པོར་བསྟན་པའོ། །དེའི་གྱུར་པ་ནི། དེ་སྒྲིབ་བྲལ་དུ་གྱུར་པའི་བྱང་ཆུབ་སྟེ་ལེའུ་གཉིས་པར་བསྟན་ཏོ། དེའི་ཡོན་ཏན་ནི། བྱང་ཆུབ་ཀྱི་ཡོན་ཏན་དྲུག་ཅུ་རྩ་བཞི་ལ་སོགས་པ་སྟེ་ལེའུ་གསུམ་པར་བསྟན་ཏོ། དེའི་དོན་བསྡུ་བ་ནི། རྒྱལ་བའི་འཕྲིན་ལས་ཏེ་ལེའུ་བཞི་པར་བསྟན་ཏོ། །བློ་ལྡན་བྱང་ཆུབ་སེམས་དཔའ་གང་ཞིག་སེམས་ཅན་ཐམས་ཅད་ལ་བདེ་གཤེགས་སྙིང་པོ་ཡོད་པར་དད་པས་མོས་པ་དང་། དེ་སྒྲིབ་བྲལ་དུ་གྱུར་པའི་བྱང་ཆུབ་ཐོབ་ནུས་པར་མོས་པ་དང་། དེ་ཐོབ་པའི་ཡོན་ཏན་དྲུག་ཅུ་རྩ་བཞི་སོགས་དང་ལྡན་པ་དང་། འཕྲིན་ལས་ལྷུན་གྱིས་གྲུབ་པའི་ཚུལ་ལ། དད་པས་མོས་པ་ལ་བརྟེན་ནས་མྱུར་དུ་བྱང་ཆུབ་ཐོབ་བ་ཡིན་ནོ། །གཉིས་པ་བྱང་ཆུབ་སེམས་ཀྱི་རྟེན་དུ་འགྱུར་བ་ནི། བསམ་མི་ཁྱབ་པའི་ཡུལ་འདི་ནི། །ཡོད་དང་བདག་འདྲས་ཐོབ་ནུས་དང་། །ཐོབ་པ་འདི་འདྲའི་ཡོན་ཏན་དང་། །ལྡན་ཞེས་དད་པས་མོས་པའི་ཕྱིར། །འདུན་བརྩོན་དྲན་པ་བསམ་གཏན་དང་། །ཤེས་རབ་ལ་སོགས་ཡོན་ཏན་སྣོད། །བྱང་ཆུབ་སེམས་ནི་དེ་དག་ལ། །རྟག་ཏུ་ཉེ་བར་གནས་པར་འགྱུར། །ཞེས་པའོ། །གསུམ་པ་བྱང་ཆུབ་སེམས་ཀྱི་རྟེན་དུ་འགྱུར་བ་ནི། དེ་ནི་རྟག་ཏུ་ཉེར་གནས་པས། །རྒྱལ་བའི་སྲས་པོ་ཕྱིར་མི་ལྡོག །ཅེས་པའོ། །བཞི་པ་ཚོགས་གཉིས་རྫོགས་པ་ནི། བསོད་ནམས་ཕ་རོལ་ཕྱིན་རྫོགས་དང་། །ཡོངས་སུ་དག་པ་ཉིད་དུ་འགྱུར། བསོད་ནམས་ཕ་རོལ་ཕྱིན་པ་ལྔ། །དེ་ལ་རྣམ་གསུམ་རྟོག་མེད་པས། །དེ་རྫོགས་ཡོངས་སུ་དག་པ་ནི། །དེ་ཡི་མི་མཐུན་ཕྱོགས་སྤངས་ཕྱིར། །སྦྱིན་བྱུང་བསོད་ནམས་སྦྱིན་པ་སྟེ། །ཚུལ་ཁྲིམས་ལས་བྱུང་ཚུལ་ཁྲིམས་ཡིན། །བཟོད་དང་བསམ་གཏན་གཉིས་དག་ནི། །བསྒོམ་བྱུང་བརྩོན་གྲུས་ཀུན་ཏུ་འགྲོ། །ཅེས་པའོ། །ལྔ་པ་ཞར་ལ་ཚོགས་གཉིས་ཀྱི་ངེས་པ་བསྟན་པ་ནི། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །ཤེས་རབ་ལས་གཞན་འདི་དག་ནི། སྤོངས་རྒྱུ་གཞན་མེད་དེ་ཡི་ཕྱིར། །ཤེས་རབ་མཆོག་ཡིན་དེ་གཞི་ནི། །ཐོས་པ་དེ་ཕྱིར་ཐོས་པ་མཆོག །ཅེས་པའོ། །གཉིས་པ་ཇི་ལྟར་མཛད་པ་ལ། གང་ལ་བརྟེན་ནས་མཛད་པ་དང་། །རྒྱལ་བའི་བཀའ་ངོས་བཟུང་བ་དང་། དེ་དང་མཐུན་པ་ཐམས་ཅད་བླང་བྱར་བསྟན་པ་དང་། རྒྱལ་བའི་བཀའ་མཆོག་ཡིན་པས་དེ་དང་མི་འགལ་བར་བྱ་བ་དང་། འགལ་བའི་ཉེས་པ་བསྟན་པའོ། །དེ་ལ་དང་པོ་གང་ལ་བརྟེན་ནས་མཛད་པ་ནི། དེ་ལྟར་ཡིད་ཆེས་ལུང་དང་རིགས་པ་ལ། བརྟེན་ནས་བདག་ཉིད་འབའ་ཞིག་དག་ཕྱིར་དང་། །གང་དག་མོས་དགེ་ཕུན་སུམ་ཚོགས་ལྡན་བློ། །དེ་དག་རྗེས་སུ་བཟུང་ཕྱིར་འདི་བཤད་དོ། །ཇི་ལྟར་སྒྲོན་གློག་ནོར་བུ་ཉི་ཟླ་ལ། །བརྟེན་ནས་མིག་དང་ལྡན་པས་བལྟ་བ་བཞིན། །དེ་བཞིན་དོན་ཆེན་ཆོས་སྤོབས་འོད་མཛད་པ། །ཐུབ་ལ་བརྟེན་ནས་འདི་ནི་རབ་ཏུ་བཤད། །ཅེས་པའོ། །གཉིས་པ་རྒྱལ་བའི་བཀའ་ངོས་བཟུང་བ་ནི། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། །ཁམས་སུ་ཀུན་ནས་ཉོན་མོངས་སྤོངས་བྱེད་གསུངས། །ཞི་བའི་ཕན་ཡོན་སྟོན་པར་མཛད་པ་གང་། །དེ་ནི་དྲང་སྲོང་གསུངས་ཡིན་བཟློག་པ་གཞན། །ཞེས་པའོ། །གསུམ་པ་དེ་དང་མཐུན་པར་ཐམས་ཅད་བླང་བྱར་བསྟན་པ་ནི། གང་ཞིག་རྒྱལ་བའི་སྟོན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་པའོ། །བཞི་པ་རྒྱལ་བའི་བཀའ་མཆོག་ཡིན་པས་དེ་དང་མི་འགལ་བར་བྱ་བ་ནི། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་གཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་པའོ། །ལྔ་པ་འགལ་བའི་ཉེས་པ་བསྟན་པ་ལ་གསུམ། ཆོས་སྤོང་གི་རྒྱུ་ངོས་བཟུང་བ་དང་། ཟབ་མོའི་ཆོས་མི་སྤོང་བའི་ངེས་པ་དང་། ཆོས་སྤོངས་མཚམས་མེད་པ་བས་ལྗི་བར་བསྟན་པའོ། །དེ་ལ་དང་པོ་ཆོས་སྤོང་གི་རྒྱུ་ངོས་བཟུང་བ་ནི། །ཉོན་མོངས་རྨོངས་བདག་རྣམས་ཀྱི་འཕགས་ལ་སྐུར་པ་དང་། །དེས་གསུངས་ཆོས་ལ་བརྙས་གང་དེ་ཀུན་ཞེན་ལྟས་བྱས། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱངས། །གོས་གཙང་ཚོན་གྱིས་རྣམ་བསྒྱུར་སྣུམ་གྱིས་གོས་པ་མིན། བློ་དམན་ཕྱིར་དང་དཀར་པོའི་ཆོས་བྲལ་ལོག་པའི་ང་རྒྱལ་ལ་བརྟེན་ཕྱིར། །དམ་ཆོས་འཕོངས་པས་སྒྲིབས་པའི་བདག་ཕྱིར་དྲང་དོན་དེ་ཉིད་ངེས་འཛིན་ཕྱིར། །རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟན་ཕྱིར་དང་། །ཆོས་འཛིན་བསྲིངས་ཕྱིར་མོས་པ་དམན་ཕྱིར་དགྲ་བོ་རྣམས་ཀྱིས་ཆོས་སྤོངས་བྱེད། །ཅེས་པའོ། །གཉིས་པ་ཟབ་མོའི་ཆོས་མི་སྤོང་བའི་ངེས་པ་ནི། ཇི་ལྟར་ཟབ་མོའི་ཆོས་ཉམས་དེ་བཞིན་མཁས་པ་རྣམས་ཀྱི་མེ་དང་ནི། །མི་བཟད་སྦྲུལ་གདུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། །མི་སྦྲུལ་དགྲ་དང་རྡོ་རྗེ་མེས་ནི་སྲོག་དང་བྲལ་བ་ཙམ་བྱེད་དེ། །དེ་ལས་མནར་མེད་རྣམས་ཀྱི་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། ཞེས་པའོ། །གསུམ་པ་ཆོས་སྤོང་མཚམས་མེད་པ་བས་ལྗི་བར་བསྟན་པ་ནི། གང་ཞིག་ཡང་ཡང་སྡིག་གྲོགས་བསྟན་པས་སངས་རྒྱས་ངན་སེམས་ལྡན་གྱུར་དང་། ཕ་མ་དགྲ་བཅོམ་གསོད་པ་བྱ་བ་མིན་བྱེད་མཆོག་ཚོགས་འབྱེད་པ་ཡིས། །དེ་ཡང་ཆོས་ཉིད་ངེས་པར་བསམ་པས་མྱུར་དུ་དེ་ལས་ཐར་འགྱུར་གྱིས། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་གང་ལ་ཡོད། །ཅེས་པའོ། །གསུམ་པ་བསྔོ་བ་དོན་བསྡུ་དང་བཅས་པ་ལ་གཉིས། བསྔོ་བ་སྨོན་ལམ་དང་། བསྟན་བཤད་ཀྱིས་དོན་བསྡུ་བའོ། །དེ་ལ་དང་པོ་བསྔོ་བ་སྨོན་ལམ་ནི། དཀོན་མཆོག་རྣམ་པར་བྱང་ཁམས་དྲི་མེད་བྱང་ཆུབ་ཡོན་ཏན་འཕྲིན་ལས་ཏེ། །དོན་གནས་རྣམ་བདུན་ཚུལ་བཞིན་བཤད་ལས་བདག་གིས་དགེ་བ་གང་ཐོབ་པ། །དེས་ནི་འགྲོ་འདི་མཐའ་ཡས་འོད་མངའ་དྲང་སྲོང་ཚེ་དཔག་མེད་མཐོང་ཞིང་། །མཐོང་ནས་ཀྱང་ནི་ཆོས་མིག་དྲི་མེད་སྐྱེས་ཏེ་བྱང་ཆུབ་མཆོག་ཐོབ་ཤོག །ཅེས་པའོ། །གཉིས་པ་བསྟན་བཤད་ཀྱི་དོན་བསྡུ་བ་ནི། གང་ལ་རྒྱུ་མཚན་གང་ཕྱིར་ནི། ཇི་ལྟར་བུ་ནི་གང་བཤད་དང་། །རྒྱུ་མཐུན་པ་ནི་གང་ཡིན་ཏེ། །གཉིས་ཀྱི་བདག་ཉིད་དག་པ་ཡིས། །ཐབས་དང་གཅིག་གིས་ཉམས་པའི་རྒྱུ། །གཉིས་ཀྱི་འབྲས་བུ་བསྟན་པ་ཡིན། །འཁོར་གྱིས་དཀྱིལ་འཁོར་བཟོད་པ་དང་། །བྱང་ཆུབ་ཐོབ་པ་ཆོས་བརྗོད་པའི། །མདོར་ན་འབྲས་བུ་རྣམ་གཉིས་ནི། །ཐ་མ་ཡིས་ནི་བསྟན་པ་ཡིན། ཞེས་པའོ། །ཕན་ཡོན་གྱིས་ལེའུ་སྟེ་ལྔ་པའོ།། ༈ །།

བཤད་པ་ཡོངས་སུ་རྫོགས་པའི་བྱ་བ།

འདི་ནི་བྱམས་པ་བདག་ཉིད་ཆེན་པོའི་བསྟན་བཅོས་ལྔ་གའི་རྗེས་སུ་མཛད་པར་ངེས་སོ། །ཐེག་མཆོག་བླ་ན་མེད་པ་གསལ་སྟོན་པ། །བསྟན་བཅོས་འདི་ནི་བླ་མེད་སངས་རྒྱས་སྐུ། །མངོན་སུམ་སྟོན་ཕྱིར་རྒྱས་སྲས་ཀུན་གྱིས་བརྟེན། །དེ་ཕྱིར་འདི་ལ་བདག་ཀྱང་དུས་ཀུན་ཏུ། །རང་ལ་གནས་པའི་རྒྱལ་བའི་ཡེ་ཤེས་དེ། །གསལ་སྟོན་འདི་ལ་སྔ་རབ་བྱོན་པ་ཡིས། བློ་ལྡན་ཤེས་རབ་ཕྱ་གཙང་དན་བག་སོགས། །རྣམ་དབྱེ་མཛད་པ་ཐེག་པ་སྤྱི་དང་མཐུན། །འདིར་ནི་བླ་ན་མེད་པ་སངས་རྒྱས་པར། །གོ་ཕྱིར་བསྡུས་དོན་ཅུང་ཟད་མི་མཐུན་པ། །ཡོད་ཀྱང་རྒྱལ་བའི་མདོ་ཉིད་དཔང་བྱས་ནས། །བླ་ན་མེད་པའི་རྒྱན་གྱུར་བསྡུས་དོན་བཀོད། །དགེ་བས་ནམ་མཁའི་མཐའ་ཁྱབ་སེམས་ཅན་རྣམས། །རྡོ་རྗེའི་གནས་བདུན་སྒྲིབ་མེད་མངོན་གྱུར་ནས། །ཡེ་ཤེས་རང་བྱུང་ཤེས་རབ་རྡོ་རྗེ་ཡི། །སྒྲིབ་གསུམ་བཅོམ་ནས་བྱམས་མགོན་ལྟར་གྱུར་ཅིག ཐེག་པ་བླ་ན་མེད་པ་སྟོན་པའི་རྒྱུད་བླ་མའི་བསྡུས་དོན་གྱི་བཤད་པ། སེམས་དཔའ་རང་བྱུང་རྡོ་རྗེས་སྦྱར་བའོ། །འཕགས་པ་མགོན་པོ་བྱམས་པས་མཛད་པ་ཐེག་པ་ཆེན་པོ་རྒྱུད་བླ་མའི་བསྟན་བཅོས། སློབ་དཔོན་ཐོགས་མེད་ཀྱིས་མཛད་པའི་འགྲེལ་པ་དང་བཅས་པ་ནི། དཔལ་གྲོང་ཁྱེར་དཔེ་མེད་ཀྱི་མཁས་པ་ཆེན་པོ་བྲམ་ཟེ་རིན་ཆེན་རྡོ་རྗེའི་དབོན་པོ་པཎ་ཊི་ཏ་མཁས་པ་ཆེན་པོ་སད་ཛ་ན་དང་། ལོ་ཙྪ་བ་ཤཱཀྱའི་དགེ་སློང་བློ་ལྡན་ཤེས་རབ་ཀྱིས་གྲོང་ཁྱེར་དཔེ་མེད་དེ་ཉིད་དུ་བསྒྱུར་བའོ། །ཡན་ལག་རྫོགས་པའི་སངས་རྒྱས་བཅོམ་ལྡན་འདས། །རྒྱལ་བ་ཤཱཀྱ་ཐུབ་པ་དེ་ཉིད་ཀྱིས། ཆོས་བསྐོར་རིམ་པ་གསུམ་དུ་བསྐོར་བ་ལས། །འཁོར་ལོ་གསུམ་པ་ངེས་དོན་མདོ་རྣམས་ཀྱིས། །དགོངས་འགྲེལ་མི་ཕམ་མགོན་པོས་མཛད་པའི་གཞུང་། །ཐེག་པ་ཆེན་པོ་བླ་མའི་རྒྱུད་འདི་ལ། །ས་གསུམ་འོད་བྱེད་ལ་གནས་རྒྱལ་བའི་སྲས། །སློབ་དཔོན་ཐོགས་མེད་ཉིད་ཀྱི་འགྲེལ་པ་མཛད། །སྙིང་པོས་དོན་མཐོང་སྐལ་བ་མི་ལྡན་པའི། །གདུལ་བྱ་ཕལ་ཆེར་དེ་ལ་མི་མོས་ཤིང་། །སྣ་ཚོགས་ཐབས་ཀྱིས་འགོག་པར་བྱེད་པ་མཐོང་། །མ་བྱོན་སངས་རྒྱས་དྲུག་པ་སེང་གེའི་མཚན། །ཀརྨ་པར་གྲགས་རང་བྱུང་རྡོ་རྗེ་ཡིས། དེ་ཡི་དགོངས་དོན་རྒྱ་ཆེར་བཤད་པ་མཛད། །ཚུལ་དེ་མཐོང་ནས་བདག་ཀྱང་སྤོབས་པ་སྐྱེས། །འཛམ་གླིང་ཡངས་པའི་རྒྱལ་ཁམས་ཐམས་ཅད་དུ། །དར་ཞིང་རྒྱས་ལ་ཡུན་རིང་གནས་གྱུར་ཅིག །ཅེས་པ་འདི། སའི་སྟེང་ན་འགྲན་ཟླ་ཐམས་ཅད་དང་བྲལ་བ་ཀརྨ་པ་ཆོས་གྲགས་རྒྱ་མཚོའི་བཀའ་དྲིན་ལ་བརྟེན་ནས། རང་དང་གཞན་གྱི་གྲུབ་པའི་མཐའ་རྒྱ་མཚོའི་ལྟ་བུ་སྨྲ་བ་ལ་མི་འཇིགས་པའི་སྤོབས་པ་ཐོབ་པ་ཡུལ་བྱང་ཕྱོགས་ཀྱི་རྒྱུད་དུ་བྱུང་བ། བླ་མ་བཀྲ་ཤིས་འོད་ཟེར་ཞེས་བྱ་བས་རྩ་བའི་བསྒྱུར་བྱེད་ཅེས་པ་གཞུང་དང་། རང་བྱུང་རྡོ་རྗེས་མཛད་པའི་བསྡུས་དོན་སྦྱར་ནས་དཀའ་བའི་གནས་རྣམས་ལ་འགྲེལ་པའང་ཅུང་ཟད་ཙམ་རེ་མཛད་པའོ། །ས་མོ་ཕག་གི་ལོ་སྟོན་ཟླ་དང་པོའི་ཡར་ངོའི་ཚེས་གྲངས་བཟང་པོ་ལ་ལ་རྩ་རྡོ་རྗེའི་གདན་དུ་སྦྱར་བའི་ཡི་གེ་པ་ནི་འོད་ཟེར་བཟང་པོའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །བསྟན་བཅོས་འདི་དཔལ་ཡེ་ཤེས་ཀྱི་མགོན་པོ་བེར་ནག་པོ་ཅན་དང་། དཔལ་ལྷ་མོ་དང་། དམ་ཅན་རྡོ་རྗེ་ལེགས་པ་ལ་སོགས་པ་ཆོས་སྐྱོང་བའི་བསྲུང་མ་རྣམས་ལ་བཅོལ་ཞིང་གཏད་པས་ཕྱི་མའི་མུ་མཐར་ཐུག་གི་བར་དུ་མི་ཉམས་པར་བསྲུངས་ཤིག །མཾ་གྷ་ལ་བྷ་ཝནྟུ། ཤུབྷཾ། ཐེག་པ་ཆེན་པོ་རྒྱུད་བླ་མའི་བསྟན་བཅོས་འདི། མཚུངས་མེད་སྤྲུལ་སྐུ་ཆེན་པོ་འཛམ་གླིང་མཁས་པའི་གཙུག་རྒྱན་ཆེན་པོ་བཀྲ་ཤིས་འོད་ཟེར་བས་མཛད་པའོ། །འདི་ལྟར་བསྒྲུབ་པའི་དགེ་ཚོགས་རྒྱ་མཚོའི་མཐུས། །བདག་གཞན་མཁའ་མཉམ་འགྲོ་བ་མ་ལུས་ཀུན། །དགའ་ལྡན་གནས་སྐྱེ་མི་ཕམ་ཞལ་མཐོང་ཞིང་། །ཐེག་མཆོག་ཆོས་སྤྱོད་བླ་མེད་སངས་རྒྱས་ཤོག །དགེའོ།། །།

རླུང་སེམས་གནད་ཀྱི་ལྡེ་མིག །

༄༅། །རླུང་སེམས་གནད་ཀྱི་ལྡེ་མིག །

༄༅། །ཨོཾ་སརྦ་སྭ་སྟི་སིདྡྷི་ཧཱུཾ། མིང་ཡོངས་སུ་གྲགས་པ་ཀརྨ་པའི། རླུང་སེམས་ཀྱི་གདམས་ངག་གནད་ཀྱི་ལྡེ་མིག་འདི་ལ་རྩ་བའི་ཆིངས་རྣམ་པ་གསུམ་ནི། ངན་རྟོག་ཡིད་ལ་བྱེད་པས་གཟུང་ན། དེ་རྩ་ནང་དུ་འཕེལ་བས། སྡུག་བསྔལ་འབྱུང་། བཟང་རྟོག་ཡིད་ལ་བྱེད་དུས་རླུང་བཟུང་ན་ཡོན་ཏན་སྐྱེ་ལ། ཡིད་བྱེད་ཡིད་སྨོན་སྣ་ཚོགས་དང་བྲལ་བས་རླུང་གནད་དུ་ཚུད་ན་སྐད་ཅིག་གིས་ཕྱག་རྒྱ་ཆེན་པོའི་རྟོགས་པ་འཆར་ཞིང་། མྱུར་དུ་མངོན་པར་རྫོགས་པར་སངས་རྒྱའོ། །དེ་ལ་རྒྱས་པར་བཤད་ན་བསམ་གྱིས་མི་ཁྱབ་ཀྱང་། རགས་པ་ཙམ་ཕྱེ་ན། ངན་རྟོག་ལ་ཉོན་མོངས་པ་དུག་ལྔ་དང་། བདུད་བཞིའི་རྒྱུ་ཚུལ་ཤེས་དགོས་ཏེ། ཞེ་སྡང་སྐྱེས་དུས་རླུང་འབུད་མ་ཤེས་ན་ཕོ་གདོན་གྱིས་གནོད། ནད་གཟེར་ལྟ་བུ་དང་། བུ་སློབ་འཁྲུག་པ་དང་། མི་དུམ་པ་སྣ་ཚོགས་འབྱུང་། དེ་བཞིན་དུ་འདོད་ཆགས་ཕྱིར་འབུད་མ་ཤེས་ན། མོ་གདོན་གྱི་གནོད། ནད་གྲང་པ་འཇུག །སྡོམ་པ་མི་ཐུབ། འཁོར་སྡོམ་ཤོར་དང་ཁྲིམས་རྐུན་འོང་། གཏི་མུག་ཕྱིར་འབུད་མ་ཤེས་ན། ས་གདོན་གནོད། བད་ཀན་དང་མཛེ་ནད་ཡོང་། འཁོར་མཛེ་ནད་ཅན་འོང་། ང་རྒྱལ་ཕྱིར་འབུད་མ་ཤེས་ན། རྒྱལ་འགོང་གནོད། བསྙོས་འབོག་ཡོང་། སྡོམ་པ་མི་ཐུབ། རང་དང་འཁོར་ངན་པར་ལྟུང་། ཕྲག་དོག་ཕྱིར་འབུད་མ་ཤེས་ན། སྦོད་གཏོང་གནོད། བྱད་ཀ་དང་ནད་ཡམས་འོང་། འཁོར་གཞན་གྱི་དབང་དུ་འགྲོ། བདུད་བཞིའི་གནས་ཚུལ་ནི། ལྷའི་བུའི་བདུད་རྩ་མིག་ལ་གནས། ནམ་ལངས་ཁར་རྒྱུ། རྒྱལ་འགོང་དང་བསྡོངས། རྟགས་ཤེས་པ་ཡངས་མཐོས་བ་དང་འགྲོ་སྙིང་འདོད་པ་འོང་། གཉེན་པོ་རླུང་ཕྱིར་འབུད། རྩ་མིག་ཏུ་བླ་མ་བསྒོམ། ཕུང་པོའི་བདུད་ཕ་རུས་ལ་གནས། ཉི་མ་ཕྱེད་ལ་རྒྱུ། ས་བདག་དང་བསྡོང་རྟགས་ཤེས་པ་ཉོག །ཁམས་ཉོག་པོ་འོང་། གཉེན་པོ་རླུང་ཕྱིར་འབུད། སྤྱི་བོར་བླ་མ་བསྒོམ། ཉོན་མོངས་པའི་བདུད་ཁུ་ཁྲག་ལ་གནས། དུས་དགོངས་ཁ་རྒྱུ། མོ་གདོན་དང་བསྡོང་། རྟགས་སྙིང་མི་དགའ་བ་འོང་། གཉེན་པོ་རླུང་ཕྱིར་འབུད་། ལྟེ་བར་བླ་མ་བསྒོམ་འཆི་བདག་གི་བདུད་རླུང་ལ་གནས། དུས་ནམ་ཕྱེད་ལ་རྒྱུ། རྦད་འདྲེ་དང་བསྡོང་། རྟགས་བྲེད་དངས་དང་སྙིང་ཕུགས་འོང་། གཉེན་པོ་རླུང་ཕྱིར་འབུད། སྙིང་ཁར་བླ་མ་བསྒོམ། ནད་གདོན་གེགས་སེལ་ཐམས་ཅད་འདིས་འགྲེའོ། །བཟང་རྟོག་བྱེ་བྲག་ལ་མོས་གུས། སྙིང་རྗེ། ཞེན་ལོག །བསྐྱེད་རྫོགས། བདེ་གསལ་མི་རྟོག་པ་ལ་སོགས་སྐྱེས་དུས་རླུང་ཕྱིར་བུས་ན། དེའི་ནུས་པ་ཉམས་ཤིང་དངོས་གྲུབ་ཡལ་བས་དེའི་དུས་སུ་རླུང་སེམས་ནང་དུ་བསྡུད་དགོས་སོ། །དེ་ཡང་མོས་གུས་སྐྱེས་དུས་རླུང་ཕྱིར་བུས་ན། བླ་མས་ཐུགས་ལ་མི་འདོགས། སྙིང་རྗེ་སྐྱེས་དུས་ཕྱིར་བུས་ན་སེམས་ཅན་གྱི་དོན་མི་འགྲུབ། ཞེན་ལོག་སྐྱེས་དུས་ཕྱིར་བུས་ན་ཟས་ནོར་མི་འདུ། བསྐྱེད་རིམས་བསྒོམ་དུས་ཕྱིར་བུས་ན་ཡིད་དམ་མི་འགྲུབ། སྔགས་བཟློ་དུས་ཕྱིར་བུས་ན་ནུས་པ་མི་འབྱུང་། བདེ་གསལ་མི་རྟོག་པ་སྐྱེས་དུས་ཕྱིར་བུས་ན་ཏིང་ངེ་འཛིན་མི་སྐྱེ། དགེ་བའི་དུས་རླུང་ནང་དུ་བསྡུས་ན་དབང་བསྐུར་གསུམ་དང་། བསྲེ་བ་བསྐོར་གསུམ་ལྟ་བུར་ཉམས་སུ་ལེན་དགོས་པ་ཡིན། སྣང་སྲིད་འཁོར་འདས་ཀྱི་བདེ་སྡུག་ཐམས་ཅད་རླུང་སེམས་ཀྱི་རྟེན་འབྲེལ་ཡིན། དེ་ལ་སོགས་པ་རླུང་སེམས་ཀྱི་རྟེན་འབྲེལ་བསམ་གྱིས་མི་ཁྱབ་པ་རྣམས་ཉམས་སུ་ལེན་ཤེས་པར་བྱའོ། །ཡིད་ལ་བྱེད་པ་ཐམས་ཅད་དང་བྲལ་བ་དང་། རླུང་སེམས་ཕྱག་རྒྱ་ཆེན་པོ་དང་འབྲེལ་པ་མཆོག་གི་གཏུམ་མོ་ཡིན་པས། གནད་བཞི་ཆོས་ཉིད་ཀྱི་འཁོར་ལོ་རྒྱུན་ཆད་མེད་པར་བསྒོམ་མོ། །མདོར་ན་རླུང་སེམས་ངན་པ་ཐམས་ཅད་ཕྱིར་བུས། བཟང་པོ་ཐམས་ཅད་ནང་དུ་བསྡུའོ། །ཐམས་ཅད་དབྱེར་མེད་རོ་གཅིག་དུ་མཉམ་པར་བཞག་གོ །ཆོས་རྗེ་རིན་པོ་ཆེ་ཀརྨ་པའི་རླུང་སེམས་གནད་ཀྱི་གདམས་པ་ཟབ་མོ་ལགས་སོ།། །།

རྣམ་ཤེས་དང་ཡེ་ཤེས་འབྱེད་པའི་བསྟན་བཅོས།

༄༅། །རྣམ་ཤེས་དང་ཡེ་ཤེས་འབྱེད་པའི་བསྟན་བཅོས་བཞུགས་སོ། །

༄༅། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཐོས་དང་བསམ་ལ་རབ་བརྟེན་ནས། །བསྒོམ་པའི་ཚུལ་ལ་སྦྱོར་བའི་ཕྱིར། །བདག་ཉིད་དབེན་པར་འདུག་པ་ན། །ཚུལ་འདི་སྣང་བ་བརྗོད་པར་བྱ། །ཁམས་གསུམ་སེམས་ཅན་ཐམས་ཅད་ནི། །བདག་དང་གཞན་དང་གཉིས་ཀ་དང་། །རྒྱུ་མེད་ལས་ནི་བྱུང་བར་རྟོགས། །བྱེད་པོ་ཕྱྭ་དང་དབང་ཕྱུག་དང་། །ཚངས་དང་ཁྱབ་འཇུག་ཕྱི་རོལ་རྡུལ། །ཕག་ན་མོ་ཡི་རྫས་བདེན་པས། །བདག་དང་འཇིག་རྟེན་བསྐྱེད་ཅེས་སྨྲ། །ཐམས་ཅད་མཁྱེན་པ་ཉག་གཅིག་ནི། །ཁམས་གསུམ་འདི་དག་སེམས་ཙམ་སྟེ། །བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །ཆོས་རྣམས་རྟེན་ཅིང་འབྲེལ་འབྱུང་སྟེ། །དེ་ཉིད་རང་གི་ངོ་བོས་སྟོང་། །གཅིག་དང་ཐ་དད་རྣམ་བྲལ་བ། །རྫུན་དང་བདེན་པ་རྣམ་སྤངས་ཤིང་། །སྒྱུ་མ་ཆུ་ཟླ་ལ་སོགས་ལྟར། །མཁྱེན་ནས་སེམས་ཅན་རྣམས་ལ་གསུངས། །དེ་ལྟར་འཁྲུལ་དང་མ་འཁྲུལ་པའི། །རྩ་བ་གང་ནས་བྱུང་ཡིན་ཞེས། །མེ་ལོང་ལས་ནི་རང་གཟུགས་དང་། །དུ་བ་ལས་ནི་མེ་བཞིན་དུ། །རྟེན་ཅིང་འབྲེལ་འབྱུང་ཆོས་བསྟན་ནས། །རྟོག་པ་འདིར་ནི་གསལ་བརྗོད་བྱ། །སྒོ་ལྔའི་རྣམ་པར་ཤེས་པ་ནི། །གཟུགས་སྒྲ་དྲི་རོ་རེག་བྱ་ལ། །བླང་དོར་བྱས་པས་ཉོན་མོངས་བསྐྱེད། །ཡུལ་འདི་དག་ནི་གང་ཡིན་ཞེས། །ཤེས་རབ་ལྡན་པས་ལེགས་བརྟགས་ན། །རྣམ་རིག་ཤེས་པ་ལས་གཞན་པའི། །རྡུལ་སོགས་ཕྱི་རོལ་གྲུབ་པ་མེད། །གང་ཚེ་ཡུལ་གྱི་རྫས་འདི་དག །ཤེས་ལས་གཞན་ན་བདག་གཅིག་མིན། །བསྟན་མེད་ཐོགས་པ་མེད་པ་ཡི། །རིག་ལས་བེམ་པོའི་རྫས་མི་སྐྱེ། །དེ་ཕྱིར་དེ་བྱུང་འབྲེལ་པ་མེད། །དེ་འདོད་ཤེས་ལས་ཡུལ་རྣམས་ནི། །སྣང་བར་མི་རིག་འབྲེལ་མེད་ཕྱིར། །དེ་ཕྱིར་ཅི་ལྟར་སྣང་བ་འདི། །ཤེས་ལས་གཞན་པའི་ཡུལ་མེད་དེ། །དེ་བྱུང་རང་རིག་ཉམས་མྱོང་བཞིན། །ཆ་མེད་རྡུལ་དང་ཕྱ་ལེ་བ། །སྣང་བ་སེམས་ཏེ་དེ་ཡི་དོན། །ཕྱི་རོལ་གཞན་དུ་གྲུབ་མེད་ཕྱིར། །ཚངས་སོགས་བྱེད་པོ་མིན་པར་རྟོགས། །ཡིད་དང་ཆོས་ཀྱི་འབྲེལ་པ་ཡང་། །རྨི་ལམ་ཉམས་སུ་མྱོང་བ་བཞིན། །དེ་ཉིད་དེ་ལ་དམིགས་པ་ལ། །ཞེན་པར་ཟད་ཀྱི་དངོས་བདེན་མེད། །དེ་ལྟར་ཚོགས་དྲུག་ཤེས་པ་འདི། །དོན་དང་སེམས་ཅན་སྣང་བ་དང་། །བདག་འཛིན་དང་ནི་རྣམ་རིག་དང་། །སྣང་བའི་རྣམ་པ་གང་བྱུང་བ། །འདི་ཅི་གཞན་གྱིས་བྱས་མིན་ན། །བདག་གིས་བྱེད་པ་འགྱུར་མ་ཡིན། །གཉིས་ཀྱིས་མ་བསྐྱེད་གཉིས་མེད་མིན། །དེ་ཕྱིར་རྒྱལ་བས་གསུངས་པ་ལྟར། །འཁོར་འདས་ཐམས་ཅད་སེམས་ཙམ་སྟེ། །འདི་ཡི་རྒྱུ་རྐྱེན་རྟེན་འབྲེལ་ནི། །ཚོགས་དྲུག་ཡིད་དང་ཀུན་གཞི་ཞེས། །གསུངས་ཏེ་ཚོགས་དྲུག་ཤེས་པ་ནི། །དམིགས་རྐྱེན་ལ་ལྟོས་དེ་དག་ཀྱང་། །གཟུགས་སོགས་ཡུལ་ནི་དྲུག་པོ་ཡིན། །བདག་རྐྱེན་དབང་པོ་དྲུག་པོ་སྟེ། །དེ་ཡང་གཟུགས་ཅན་དྭང་པའོ། །གཉི་ག་སེམས་ལས་བྱུང་བ་ཡིན། །ཡུལ་དང་དབང་པོར་རབ་སྣང་བ། །ཐོག་མེད་ཁམས་ལ་བརྟེན་པ་ཡིན། །དོན་མཐོང་རྣམ་པར་ཤེས་ཡིན་ཀྱང་། །ཁྱད་པར་སེམས་བྱུང་འདུ་བྱེད་ནི། །ཡིད་ཀྱི་རྣམ་ཤེས་ལ་བརྟེན་ཏེ། །དེ་མ་ཐག་དང་ཉོན་ཡིད་གཉིས། །དྲུག་པོ་སྐྱེ་དང་འགག་པ་ཡི། །རྐྱེན་ཕྱིར་དེ་མ་ཐག་པ་ཡིན། །ཚོགས་དྲུག་སྐད་ཅིག་སྐྱེ་འགག་གི །གྲངས་བཞིན་དེ་དང་འབྲེལ་བ་ཡིན། །རྣལ་འབྱོར་ལྡན་པའི་ཡིད་དང་ནི། །རྒྱལ་བའི་བཀའ་ལས་འདི་ཤེས་འགྱུར། །འདི་ཡི་ཆ་ཤས་སེམས་ཉིད་ལ། །ངར་སེམས་ང་རྒྱལ་འཛིན་པ་དང་། །ང་ལ་ཆགས་ཤིང་མ་རིག་བཅས། །འཇིག་ཚོགས་ཐམས་ཅད་བསྐྱེད་པའི་ཕྱིར། །ཉོན་མོངས་ཅན་གྱི་ཡིད་ཅེས་བྱ། །དྲུག་པོ་འགག་མ་ཐག་ཡིད་ནི། །རྣམ་ཤེས་སྐྱེ་བའི་གནས་ཡིན་ཏེ། །ཉོན་ཡིད་ཉོན་མོངས་གནས་སུ་འགྱུར། །བསྐྱེད་དང་སྒྲིབ་པའི་ནུས་པར་ལྡན། །དེ་ཕྱིར་ཡིད་དེ་རྣམ་པ་གཉིས། །ཁྱད་པར་བློ་གྲོས་ལྡན་རྣམས་ལ། །ཀུན་གཞིའི་རྣམ་པར་ཤེས་གསུངས་ཏེ། །འདི་ནི་རྟེན་དང་གནས་དང་ནི། །ལེན་པའི་རྣམ་པར་ཤེས་ཀྱང་གསུངས། །ཚོགས་བདུན་གྱིས་བསྐྱེད་ལས་རྣམས་ཀུན། །མ་འདྲེས་ལུང་དུ་མ་བསྟན་པར། །བསགས་པས་རྣམ་པར་སྨིན་ཅེས་བྱ། །ཆར་ཆུ་རྒྱ་མཚོ་ཇི་བཞིན་ནོ། །ཐམས་ཅད་བསྐྱེད་པར་བྱེད་པས་ན། །ས་བོན་ཀུན་ལྡང་ཀུན་གཞི་སྟེ། །རྒྱུ་ཡི་རྐྱེན་ཞེས་བརྗོད་པ་ཡི། །ཚོགས་བདུན་ལོག་ན་དེ་ལྡོག་ཕྱིར། །རྐྱེན་གྱི་རྣམ་ཤེས་ཞེས་ཀྱང་བྱ། །ཕྱི་དང་ནང་གི་བདག་ཉིད་ན། །ཀུན་གཞིའི་རྣམ་ཤེས་འདི་ཉིད་ནི། །སྤང་བྱ་ཀུན་གྱི་རྩ་བ་སྟེ། །རྡོ་རྗེ་ལྟ་བུའི་ཏིང་འཛིན་གྱིས། །བཅོམ་པར་བྱ་བར་གསུངས་པ་ཡིན། །གང་ཚེ་སྒྲིབ་བཅས་ཀུན་གཞི་ལོག །དེ་ཚེ་མེ་ལོང་ཡེ་ཤེས་ཏེ། །ཡེ་ཤེས་ཀུན་སྣང་ང་ཡིར་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་རྟོགས་ཤིང་དེར་ཕྱོགས་མིན། །ཡེ་ཤེས་ཀུན་གྱི་རྒྱུ་མཚན་ཕྱིར། །ཆོས་ཀྱི་སྐུ་ཞེས་བརྗོད་པ་ཡིན། །ཉོན་མོངས་ཅན་གྱི་ཡིད་དེ་ནི། །དཔའ་བར་འགྲོ་བས་རབ་བཅོམ་ནས། །མཐོང་བསྒོམ་ཉོན་མོངས་རབ་སྤངས་ནས། །ཉོན་མོངས་མེད་ཅིང་སྲིད་ཞི་མེད། །མཉམ་ཉིད་ཡེ་ཤེས་ཞེས་སུ་བརྗོད། །དེ་མ་ཐག་པའི་ཡིད་དེ་ནི། །དྲུག་པོ་འཛིན་པས་འཛིན་པ་སྟེ། །རྣམ་པར་རྟོག་བྱེད་རྣམ་རྟོག་ཡིན། །དེ་ན་ཡང་དག་ཤེས་རབ་དང་། །སྒྱུ་མ་ལྟ་བུའི་ཏིང་འཛིན་གྱིས། །བཅོམ་པས་བཟོད་པ་ཆེ་ཐོབ་ཚེ། །དོན་བཅས་འཛིན་པ་གནས་གྱུར་པས། །ཞིང་ནི་དག་པ་སྟོན་པ་དང་། །དུས་རྣམས་ཀུན་ཏུ་ཡེ་ཤེས་དང་། །ལས་རྣམས་ཀུན་ཏུ་ཐོགས་མེད་པའི། །རྣམ་རྟོག་གནས་ཡོངས་གྱུར་པ་ནི། །སོ་སོར་རྟོག་པའི་ཡེ་ཤེས་ཏེ། །དེ་ལྟར་ཡེ་ཤེས་གཉིས་པོ་འདི། །བསྒོམ་པ་དག་པས་སྲིད་ཞི་ལ། །མི་གནས་ཞི་དང་བྱམས་པ་དང་། །ཐུགས་རྗེར་ལྡན་ཞིང་འཁོར་རྣམས་ལ། །སྣ་ཚོགས་སྐུ་དང་གསུང་སྟོན་མཛད། །ཆོས་ཆེན་དབྱིངས་ཀྱི་དཀྱིལ་འཁོར་འབྱུང་། །ཏིང་འཛིན་གཟུངས་རྣམ་ཀུན་གྱི་གཏེར། །ལོངས་སྤྱོད་རྫོགས་སྐུ་ཞེས་སུ་བརྗོད། །སྒོ་ལྔ་ཡིད་ཀྱི་ཆ་གཅིག་ནི། །ཡང་དག་ཀུན་རྟོག་ལས་སྐྱེས་པ། །བདེན་བཞིའི་ཚུལ་གྱི་རྣམ་པ་ཅན། །ཤེས་བཟོད་ལ་སོགས་བཅུ་དྲུག་གིས། །དོན་མཐོང་བདེན་པར་རྟོགས་པ་ལས། །དབང་པོ་ལྔ་རྣམས་གནས་གྱུར་ནི། །དོན་ཀུན་འཇུག་དང་ཐམས་ཅད་ཀྱི། །ཡོན་ཏན་བརྒྱ་ཕྲག་བཅུ་གཉིས་ལ། །དབང་འབྱོར་དེ་ཉིད་མཐར་ཕྱིན་པས། །བྱ་བ་གྲུབ་པའི་ཡེ་ཤེས་ཏེ། །ཁམས་རྣམས་ཀུན་ཏུ་སྣ་ཚོགས་པའི། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་བསྒྲུབ་པའོ། །འདི་ནི་སྤྲུལ་པའི་སྐུ་ཆེན་པོ། །སེམས་ཡིད་རྣམ་ཤེས་གནས་གྱུར་པའི། །སྐུ་གསུམ་མཛད་པར་བཅས་པ་རྣམས། །ཆོས་དབྱིངས་སྤྲོས་བྲལ་དཀྱིལ་འཁོར་དུ། །རྫོགས་པ་འཁོར་འདས་ཐོག་མེད་ཀུན། །གཅིག་དང་ཐ་དད་བྲལ་བ་རུ། །བཞུགས་པ་ངོ་བོ་ཉིད་སྐུར་བཞེད། །རྒྱལ་བས་གཞུང་གཞན་ཁ་ཅིག་ཏུ། །འདི་ལ་ཆོས་ཀྱི་སྐུ་ཞེས་བསྟན། །དེ་ཚེ་མེ་ལོང་ཡེ་ཤེས་སྐུ། །གཞན་ནི་གཟུགས་སྐུ་གཉིས་ཞེས་བརྗོད། །ཡེ་ཤེས་ལྔ་དང་སྐུ་བཞི་ཡི། །རང་བཞིན་མངོན་གྱུར་སངས་རྒྱས་ཏེ། །སེམས་ཡིད་རྣམ་པར་ཤེས་པ་ཡི། །དྲི་མར་ལྡན་གང་ཀུན་གཞི་ཡིན། །དྲི་མེད་རྒྱལ་བའི་སྙིང་པོར་བརྗོད། །མ་དག་ཀུན་རྟོག་འཇོམས་བྱེད་པ། །དག་པའི་ཀུན་རྟོག་ལས་སྐྱེས་པའི། །འཕགས་པའི་ཤེས་རབ་དབང་པོ་ནི། །འཛིན་པ་ལམ་གྱི་བདེན་པར་གསུངས། །དོན་དམ་ཚུལ་འདི་མ་རྟོགས་པས། །རྨོངས་རྣམས་འཁོར་བའི་རྒྱ་མཚོར་འཁྱམས། །ཐེག་ཆེན་གྲུ་འདི་མ་རྟོགས་པས། །གང་གིས་ཕ་རོལ་ཕྱིན་པར་འགྱུར། །ཀུན་གྱིས་འདི་དོན་རྟོགས་པར་ཤོག །རྣམ་ཤེས་ཡེ་ཤེས་འབྱེད་པའི་བསྟན་བཅོས། ཕག་ལོ་ཟླ་བ་བཅུ་པའི་ཚེས་གཅིག་ལ་རང་བྱུང་རྡོ་རྗེས་བདེ་ཆེན་སྟེང་གི་རི་ཁྲོད་དུ་སྦྱར་བའོ།། །།

དེ་བཞིན་གཤེགས་པའི་སྙིང་པོ་བསྟན་པ།

༄༅། །དེ་བཞིན་གཤེགས་པའི་སྙིང་པོ་བསྟན་པ་ཞེས་བྱ་བའི་བསྟན་བཅོས་བཞུགས་སོ། །

༄༅། །དེ་བཞིན་གཤེགས་པའི་སྙིང་པོ་བསྟན་པ་ཞེས་བྱ་བའི་བསྟན་བཅོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་བསྒྲིབས་ཕྱིར་མི་མཐོང་སྟེ། །དཔེར་ན་གསེར་གྱི་གཟུགས་ནི་སྒྲིབ་པ་བཞིན། །ཞེས་གསུངས་སོ། །ཐོག་མ་མེད་པའི་དུས་ཀྱི་ཁམས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང་། །མྱ་ངན་འདས་པའང་ཐོབ་པ་ཡིན། །སེམས་ཅན་རྣམས་ནི་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། །དེ་ཉིད་བསལ་ན་སངས་རྒྱས་སོ། །ཞེས་རྒྱུད་ལུང་ངོ་། །དེ་ལ་ཐོག་མེད་ཅེས་བྱ་བ། །དེ་བས་སྔོན་ན་མེད་པ་ཉིད། །དུས་ནི་སྐད་ཅིག་དེ་ཉིད་དེ། །གཞན་ནས་བརྒྱུད་དེ་འོངས་པ་མིན། །ཁམས་ནི་བྱེད་པོ་མེད་ཀྱང་ནི། །རང་མཚན་འཛིན་པས་དེ་སྐད་བརྗོད། །ཆོས་ནི་འཁོར་དང་མྱ་ངན་འདས། །གཉིས་སུ་སྣང་ལ་བཤད་པ་སྟེ། །མ་རིག་བག་ཆགས་ས་ཞེས་བྱ། །ཡང་དག་རྟོག་དང་ཡང་དག་མིན། །འདུ་བྱེད་གཡོ་བ་བསྐྱེད་རྒྱུ་ཡིན། །རྒྱུ་ཡི་རྐྱེན་ཏེ་ཀུན་གཞིར་བཤད། །གནས་ནི་རྒྱལ་བའི་སྙིང་པོ་སྟེ། །ཡང་དག་མ་ཡིན་ཀུན་རྟོག་ནི། །སེམས་ཀྱི་དག་པ་ལ་རབ་གནས། །དག་པ་དེ་ཉིད་ད་ལྟར་ཡོད། །ཡོད་ཀྱང་མ་རིག་ཀུན་རྟོག་གིས། །མི་མཐོང་ཕྱིར་ན་འཁོར་བ་ཡིན། །དེ་ཉིད་བསལ་ན་མྱ་ངན་འདས། །དེ་ལ་ཐ་མའི་ཐ་སྙད་བྱས། །ཐོག་མཐའ་ཀུན་རྟོག་ཉིད་ལ་བརྟེན། །འདུ་བྱེད་རླུང་དང་འདྲ་བ་ཡིས། །ལས་དང་ཉོན་མོངས་བསྒྲུབ་པ་སྟེ། །དེ་ཡིས་ཕུང་པོ་ཁམས་སྐྱེ་མཆེད། །གཉིས་སྣང་ཆོས་ཀུན་སྟོན་པ་ཡིན། །དེ་ལ་བླང་དོར་བྱེད་མཁན་འཁྲུལ། །རང་སྣང་དོར་བས་གང་ཏུ་འགག །རང་སྣང་བླངས་པས་ཅི་ཞིག་འབྱུང་། །གཉིས་འཛིན་རྫུན་པ་མ་ཡིན་ནམ། །དེ་ཤེས་གཉེན་པོར་གསུངས་མོད་ཀྱང་། །གཉིས་མེད་རྟོགས་དེ་བདེན་པ་མིན། །རྟོག་མེད་རྟོགས་པར་འགྱུར་བའི་ཕྱིར། །གཟུགས་སོགས་ཆ་ཕྱེས་སྟོང་རྟོགས་པ། །ཁྱོད་རང་འཁྲུལ་པ་མ་ཡིན་ནམ། །འོན་ཀྱང་བདེན་ཞེན་བཀག་ཕྱིར་གསུངས། །ཐམས་ཅད་བདེན་མིན་རྫུན་མིན་ཏེ། །ཆུ་ཟླ་བཞིན་དུ་མཁས་རྣམས་འདོད། །ཐ་མལ་ཤེས་པ་དེ་ཉིད་ལ། །ཆོས་དབྱིངས་རྒྱལ་བའི་སྙིང་པོ་ཟེར། །བཟང་དུ་འཕགས་པས་བཏང་བ་མེད། །ངན་དུ་སེམས་ཅན་གྱིས་མ་བཏང་། །ཐ་སྙད་དུ་མ་བརྗོད་མོད་ཀྱང་། །བརྗོད་པས་དེ་ཡི་དོན་མི་ཤེས། །དེ་ཉིད་མ་འགགས་རོལ་པ་ལ། །ཡོན་ཏན་དྲུག་ཅུ་རྩ་བཞི་པོ། །རག་པ་ཡིན་ཏེ་རེ་རེ་ལའང་། །བྱེ་བ་ཕྲག་རེར་གསུངས་པ་ཡིན། །གནས་དང་གནས་མིན་ལས་ཤེས་དང་། །རྣམ་སྨིན་ཁམས་དང་དབང་པོ་དང་། །མོས་པ་མཁྱེན་དང་ཀུན་འགྲོ་བའི། །ལམ་དང་བསམ་གཏན་ལྷ་ཡི་མིག །གནས་རྗེས་དྲན་དང་ཞི་བ་ནི། །སྟོབས་བཅུའོ་དེ་བརྟེན་མི་འཇིགས་བཞི། །ཆོས་ཀུན་བྱང་ཆུབ་གནས་སྟོན་དང་། །ལམ་དང་འགོག་སྟོན་རྩོད་མེད་ཉིད། །རྒྱུ་དེས་མ་འཁྲུལ་ཅ་ཅོ་མེད། །དྲན་པ་མ་ཉམས་རྟག་མཉམ་བཞག །འདུ་ཤེས་སྣ་ཚོགས་མི་མངའ་དང་། །མ་བརྟགས་བཏང་སྙོམས་མེད་པ་དང་། །འདུན་པ་བརྩོན་འགྲུས་དྲན་པ་དང་། །ཏིང་འཛིན་ཤེས་རབ་རྣམ་གྲོལ་གྱི། །ཡེ་ཤེས་མཐོང་བ་མི་ཉམས་པ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་སྒྲིབ་མེད་བཅོ་བརྒྱད་དེ། །སོ་གཉིས་ལྡན་པ་ཆོས་སྐུ་ཡིན། །ད་ལྟ་དེ་ལ་འགལ་བར་བྱེད། །ཡིན་ལ་ཡིན་བཞིན་མ་ངེས་པས། །མེད་ལ་ཡོད་རྟོག་ཀུན་བརྟགས་བྱས། །དེས་བསྐྱེད་རྟོགས་དེ་གཞན་དབང་ཡིན། །ཡོངས་སུ་གྲུབ་པ་མ་ཤེས་པས། །རང་གི་བྱས་པས་གཟིངས་པ་སྟེ། །ཀྱེ་མ་ཆོས་སྐུའི་ཡོན་ཏན་འདི། །བདེན་པའི་རྟོག་ལ་བདེན་ཤེས་ཡིན། །ད་ལྟ་ནུས་པ་ཆུང་བ་དེ། །བདེན་ཤེས་བོར་ནས་མི་བདེན་བཟོས། །དེ་ལ་རྗེས་འབྲང་གཡོས་པས་ལན། །དེ་ནི་ཡིན་ལ་ཡིན་བཞིན་དུ། །ཤེས་གྱིས་དེ་ལ་ནུས་པ་ཐོབ། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གི་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །དེ་ལ་གཟུགས་སྐུ་གཉིས་རང་བཞིན། །སུམ་ཅུ་རྩ་གཉིས་མཚན་དཔེ་བྱད། །ཐོབ་པའི་ཡོན་ཏན་རང་ལུས་ཏེ། །ལུས་དེ་བདག་དང་ཕྱྭ་དབང་ཕྱུག །ཚངས་དང་ཕྱི་རོལ་བདེན་པའི་རྡུལ། །ཕག་ན་མོ་ཡིས་བྱས་པ་མིན། །སྒོ་ལྔ་གཟུང་དང་འཛིན་པ་ཡི། །རྣམ་འགྱུར་མ་དག་དེ་སྦྱངས་པས། །དེ་ཚེ་ཐོབ་པར་ཐ་སྙད་བྱས། །དེ་བས་རྩ་རླུང་ཐིག་ལེ་རྣམས། །དག་པ་དག་པའི་གཟུགས་སྐུ་སྟེ། །མ་སྦྱང་མ་དག་གཟུགས་སྐུའོ། །དཔེར་ན་ཤུན་བཅས་བཻཌཱུརྻ། །དེ་ལ་ཡོན་ཏན་མི་སྣང་དང་། །རེ་བ་བ་ཚྭའི་ཆུས་སྦྱོང་དང་། །སྐྱུར་པོ་ལྭ་བས་སྦྱོང་བ་དང་། །ཆུ་གཙང་ཀཱ་ཤི་ཀས་སྦྱོང་ནས། །དག་དེ་ནོར་བུ་དགོས་འདོད་འབྱུང་། །དེ་བཞིན་སེམས་ཀྱི་བཻཌཱུརྻ། །ཉོན་མོངས་ཤེས་བྱ་སྙོམས་འཇུག་གི །ཤུན་པ་གསུམ་པོ་སྦྱང་བའི་ཕྱིར། །ཚོགས་སྦྱོར་མ་དག་ས་བདུན་དང་། །དག་པའི་ས་གསུམ་ལ་རབ་སྦྱོང་། །ཡང་དག་མ་ཡིན་ཀུན་རྟོག་དེ། །དག་པའི་ཀུན་རྟོག་དང་སྤྲད་པས། །ཤིང་གཉིས་ཚིག་བཞིན་ཀུན་རྟོག་བྲལ། །སྤངས་གཉེན་དེ་བཞིན་ཉིད་རྟོགས་དང་། །འབྲས་བུའི་མཚན་འཛིན་བཞི་བྲལ་བ། །དེ་ཚེ་ནམ་མཁའི་སྐུ་ཅན་ལ། །མཚན་གྱི་མེ་ཏོག་རྒྱས་པར་འགྱུར། །མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པའི་གནས་སྐབས་གསུམ། །བརྗོད་ཀྱང་སངས་རྒྱས་གསར་སྐྱེས་མིན། །ཅི་ལྟར་སྔ་བཞིན་ཕྱིས་དེ་བཞིན། །མི་འགྱུར་སངས་རྒྱས་སྙིང་པོ་ཡིན། །འགྱུར་བ་དྲི་བྲལ་དེ་ལ་བརྗོད། །གང་དག་ལྟ་ངན་ཞུགས་པ་རྣམས། །སངས་རྒྱས་ཡོན་ཏན་རྒྱུ་མེད་དང་། །ཡང་ན་རང་མིན་ཕྱི་རོལ་གྱིས། །རྒྱུ་རྐྱེན་གྱིས་བསྐྱེད་རྟོགས་པ་ནི། །ཕྱི་རོལ་རྟག་ཆད་ཁྱད་ཅི་ཡོད། །འདུ་བྱེད་སྐད་གཅིག་སྐྱེ་འགག་སྣང་། །མ་དག་འདུ་བྱེད་དག་དང་མཚུངས། །གལ་ཏེ་དེ་ལྟ་མ་ཡིན་ན། །གཟུགས་སྐུའི་ཕྲིན་ལས་རྒྱུན་ཆད་འགྱུར། །འོན་ཀྱང་འདུ་བྱེད་མིང་མི་བརྗོད། །སོ་སོར་རྟོགས་པའི་ཡེ་ཤེས་ཀྱི། །འབྱུང་བ་ཆེ་སོགས་རང་བཞིན་གང་། །འཛིན་བཅས་ངོ་བོ་ནུས་ལྡན་སྟོན། །འཁྲུལ་དང་མ་འཁྲུལ་གཉིས་པོ་ཡང་། །སྣང་བར་ཁྱད་པར་ཅི་ཡང་མེད། །གཉིས་འཛིན་ཡོད་མེད་ཁྱད་པར་ཡིན། །གལ་ཏེ་དེ་ལྟ་མ་ཡིན་ན། །རྒྱལ་བའི་ཕྲིན་ལས་ཅི་ལྟར་འཇུག །ཡིད་བཞིན་ནོར་སོགས་དཔེ་བརྗོད་པ། །རྟོག་པ་མེད་པའི་ནུས་སྟོན་པར། །བཤད་ཀྱིས་གཞན་རྒྱུད་ཁོ་ན་མིན། །ཡིན་ན་གཞན་རྒྱུད་ཡེ་ཤེས་འགྱུར། །འདོད་ན་ཡེ་ཤེས་འཁྲུལ་པར་འགྱུར། །གལ་ཏེ་རང་སྣང་འཛིན་ཡིན་ཞེས། །འདོད་ན་མེ་ལོང་སྣང་བ་ཡང་། །འཛིན་པའི་རྣམ་རྟོག་ཅན་དུ་འགྱུར། །སེམས་ཅན་འཁྲུལ་པ་ཅི་སྙེད་པ། །ཡེ་ཤེས་ཡུལ་དུ་སྣང་གྱུར་ཀྱང་། །ཡེ་ཤེས་འཁྲུལ་པས་གོས་པ་མིན། །དཔེར་ན་མཁའ་ལ་འབྱུང་ཆེན་རྣམས། །སྐྱེ་འགག་སྣང་ཡང་ནམ་མཁའ་ལ། །གོས་མིན་སྐྱེ་དང་འགག་པ་མེད། །རྒྱལ་བའི་ཡེ་ཤེས་སེམས་ཅན་ལ། །ཞུགས་ཀྱང་དེ་བཞིན་གོས་པ་མེད། །འདི་ལ་འཁྲུལ་པའི་མིང་མི་བརྗོད། །བྱ་བ་གྲུབ་པ་ཞེས་སུ་བརྗོད། །སྒྲིབ་གསུམ་དག་པར་གནས་པའི་ཡིད། །མཉམ་པ་ཉིད་དེ་ཞི་བའང་ཡིན། །བྱམས་དང་ཐུགས་རྗེ་ཆེ་ལྡན་པས། །ལོངས་སྤྱོད་རྫོགས་སོགས་དེ་ལ་སྣང་། །ལ་ལ་སངས་རྒྱས་ཐོབ་པའི་ཚེ། །ཐེག་དམན་མཚུངས་གྱུར་དགག་ཕྱིར་བརྗོད། །ཡེ་ཤེས་རྟག་པ་གསུམ་ཡིན་ཏེ། །རང་བཞིན་རྟག་པ་ཆོས་ཀྱི་སྐུ། །རྒྱུན་གྱིས་རྟག་པ་ལོངས་སྤྱོད་རྫོགས། །རྒྱུན་མི་འཆད་པ་སྤྲུལ་སྐུ་ཡིན། །དེ་ལ་མི་རྟག་གསུམ་ཡོད་དེ། །བློ་བྱས་སྟོང་པ་རྟག་པ་མིན། །གཡོ་བའི་རྟོག་ཡིད་རྟག་པ་མིན། །ཚོགས་དྲུག་འདུས་བྱས་རྟག་པ་མིན། །འོན་ཀྱང་དེ་ལ་རྟག་གསུམ་ཡོད། །མི་རྟག་གསུམ་པོ་དྲི་མ་སྟེ། །རྟག་པ་གསུམ་པོ་ཡེ་ཤེས་ཡིན། །མུ་སྟེགས་བདག་དང་མཚུངས་མིན་ཏེ། །ཡིད་ཀྱིས་བཏགས་དང་མ་བཏགས་ཕྱིར། །ཉན་རང་ཞི་དང་མཚུངས་མིན་ཏེ། །གཟུགས་སྐུའི་ཡོན་ཏན་ཀུན་སྟོན་ཕྱིར། །སེམས་ཅན་ལུས་དང་མཚུངས་མིན་ཏེ། །ཟག་བཅས་རྐྱེན་གྱིས་མ་བསྐྱེད་ཕྱིར། །ཕྱིར་ལ་ལྡོག་པར་མི་འགྱུར་ཏེ། །ཡིན་ལ་ཡིན་བཞིན་མངོན་གྱུར་ཕྱིར། །དྲི་མ་ལྡང་བ་གཏན་མེད་དེ། །ཐ་དད་ཀུན་རྟོག་བྲལ་བའི་ཕྱིར། །དེ་ཕྱིར་སེམས་ཉིད་སངས་རྒྱས་འདི། །ད་ལྟར་ཡོད་ཀྱང་མ་ཤེས་སོ། །གང་ཚེ་རྟོགས་པ་དེ་ཡི་ཚེ། ཇི་ལྟར་ལྕགས་ལ་ཚ་བ་དང་། །མིག་ལ་རབ་རིབ་ཞི་བ་ལྟར། །སངས་རྒྱས་སེམས་དང་ཡེ་ཤེས་ལ། །ཡོད་དང་མེད་པར་མི་བརྗོད་དོ། །དམ་པའི་དོན་དུ་སྐྱེ་མེད་ཕྱིར། །དེ་ཉིད་དུ་ནི་གྲོལ་བའང་མེད། །མཁའ་བཞིན་སངས་རྒྱས་དེ་བཞིན་ཏེ། །སེམས་ཅན་དང་ནི་མཚན་ཉིད་གཅིག །ཚུ་རོལ་ཕ་རོལ་སྐྱེ་མེད་པས། །རང་བཞིན་མྱ་ངན་འདས་པའང་མེད། །དེ་ཕྱིར་འདུས་བྱས་མངོན་པར་སྟོང་། །ཀུན་མཁྱེན་ཡེ་ཤེས་སྤྱོད་ཡུལ་ཡིན། །ཕྲ་ཕྱིར་ཐོས་པའི་ཡུལ་མིན་ལ། །དོན་དམ་ཕྱིར་ན་བསམ་པའི་མིན། །ཆོས་ཉིད་ཟབ་ཕྱིར་འཇིག་རྟེན་པའི། །བསྒོམ་པ་ལ་སོགས་ཡུལ་མ་ཡིན། །རང་རིག་ཡེ་ཤེས་སྤྱོད་ཡུལ་ཏེ། །རང་བྱུང་དད་པས་དོན་དམ་སྐྱེད། །ཀྱེ་མ་ཚུལ་འདི་མ་རྟོགས་པས། །བྱིས་པ་འཁོར་བའི་རྒྱ་མཚོར་འཁྱམས། །ཐུབ་པ་ཆེན་པོ་འཇམ་དཔལ་དབྱངས། །བྱམས་པ་སྤྱན་རས་གཟིགས་དབང་གི །མཐུ་ཡིས་རང་བྱུང་རྡོ་རྗེས་བྲིས། །འགྲོ་ཀུན་སངས་རྒྱས་སྙིང་པོ་འདི། །མཐར་ཕྱིན་མ་ནོར་ཤེས་པར་ཤོག །སངས་རྒྱས་ཀྱི་སྙིང་པོ་གཏན་ལ་དབབ་པ་རྡོ་རྗེ་ཐེག་པའི་སྙིང་པོ་རྫོགས་སོ།། །།ཤུ་བྷཾ།

དེ་བཞིན་གཤེགས་པའི་སྙིང་པོ་བསྟན་པའི་ས་བཅད།

༄༅། །དེ་བཞིན་གཤེགས་པའི་སྙིང་པོ་བསྟན་པའི་ས་བཅད་བཞུགས་སོ། །

༄༅། །ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །དེ་བཞིན་གཤེགས་པའི་སྙིང་པོ་བསྟན་པ་འདི་ལ་ལྔ་སྟེ། མཚན་བསྟན་པ། ཕྱག་འཚལ་བ་དང་། ལུང་གི་མདོར་བསྟན་པ་དང་། རྒྱས་པར་བཤད་པ་དང་། རྙེད་ཚུལ་གྱིས་མཇུག་བསྡུ་བའོ། །གསུམ་པ་ལ་གཉིས་སྟེ། མངོན་པའི་མདོ་ལས་བྱུང་བ་དང་། ཧེ་བཛྭ་ལས་བྱུང་བའོ། །རྒྱས་བཤད་ལ་ལྔ་སྟེ། བཤད་པ་དངོས་དང་། ཡང་དག་པ་མ་ཡིན་པ་དང་ཡང་དག་གི་ཀུན་རྟོག་བཤད་པ་དང་། སངས་རྒྱས་ཀྱི་སྙིང་པོ་ཉིད་བཤད་པ་དང་། བརྒལ་ལན་གྱིས་གཏན་ལ་དབབ་པ་དང་། ལུང་གིས་ངོ་བོ་ཉིད་བཤད་པ་ལ་ངེས་པ་བསྐྱེད་པའོ། །དང་པོ་ལ་དྲུག །ཐོག་མེད་ཀྱི་དུས་ཀྱི་ཚུལ། ཁམས་ཀྱི་དོན་དང་དེ་ལ་གནས་པའི་ཆོས་དང་། གནས་ཉིད་དང་། དེ་ལྟར་ཡོད་པའི་ཚུལ་དང་། ཐ་མའི་དོན་བཤད་པའོ། །གཉིས་པ་ལ་གསུམ་སྟེ། ཡང་དག་པ་མ་ཡིན་པའི་ཀུན་རྟོག་ལ་རྟེན་ནས་འཁོར་བའི་ཚུལ་དང་། འཁྲུལ་པའི་རྩ་བ་བླང་དོར་གྱིས་བྱུང་བ་དང་། གཉེན་པོའི་རྟོག་པའི་དོན་ནོ། །གསུམ་པ་སངས་རྒྱས་ཀྱི་སྙིང་པོ་ཉིད་བཤད་པ་ལ་གསུམ། རང་གི་ངོ་བོ་བསྟན་པ་དང་། ཡོན་ཏན་བཤད་པ་དང་། དེའི་དཔེས་དོན་བཤད་པ་དང་སྦྱར་བའོ། །གཉིས་པ་ལ་གཉིས་ཏེ། དེའི་མདོར་བསྟན་དང་། རྒྱས་བཤད་དོ། །དེ་ལ་གཉིས་ཏེ། སྟོབས་བཅུ་དང་། མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་ད་ལྟར་ཡོད་ཀྱང་མི་སྣང་བའི་ཚུལ། རྟོགས་པར་བྱ་བའི་ཚུལ་ལུང་དང་བཅས་པ་དང་། ལྔ་ཡིས་ཆོས་སྐུའི་ཡོན་ཏན་དང་། ངོ་བོ་དང་། དེ་ལ་ལུས་ལ་གནས་པའི་བཤད་པ་དང་། དག་མ་དག་གི་ཚུལ་གསུམ་གྱི་གཟུགས་སྐུའི་ཡོན་ཏན་བཤད་པའོ། །དེའི་སྦྱར་བཤད་ལ་བཞི་སྟེ། དཔེ་དངོས་དང་། དོན་དང་སྦྱར་བ་དང་། ཀུན་རྟོག་གཉིས་ཀྱིས་བཅོམ་པའི་ཚུལ་གོ་རིམ་དང་བཅས་པ་དང་། མི་འགྱུར་ཡང་ཐོབ་པའི་ཚུལ་ལུང་དང་བཅས་པའོ། །བཞི་པ་བརྒལ་ལན་གྱིས་གཏན་ལ་དབབ་པ་ལ་བདུན་ཏེ། རྒྱུ་མེད་པ་དང་། རྒྱུ་ཕྱི་རོལ་དུ་མི་འཐད་པའི་མདོར་བསྟན་དང་། ཡིད་དག་པ་དང་མ་དག་པའི་ངེས་པ་བསྟན་པ། སྒོ་ལྔའི་ཡུལ་ཡུལ་ཅན་གྱི་སྣང་ཚུལ། ཁྱད་པར་གཏན་ཚིགས་དང་གསུམ་གྱིས་བྱ་བ་གྲུབ་པའི་ཡེ་ཤེས་ཀྱི་ངོ་བོ་དང་། དཔེ་བཤད་པའི་དོན་དགོས་པ། གཞན་རྒྱུད་ཁོ་ནར་འདོད་པའི་སྐྱོན་བརྗོད་པ། སྣང་བ་ལ་འཁྲུལ་པས་མ་ཁྱབ་པའི་དཔེ་བཀོད་ནས་མ་ངེས་པ་བརྗོད་པ། ཇི་སྙེད་པའི་ཡེ་ཤེས་འཁྲུལ་པ་མ་ཡིན་པའི་དོན་བཤད་པ། ཕྲིན་ལས་དང་འབྲེལ་བའི་དོན་དང་ལྔས་བྱ་བ་གྲུབ་པའི་ཕྲིན་ལས་བཤད་པ་དང་། མཉམ་པ་ཉིད་ཀྱི་ཡེ་ཤེས་དོན་བརྗོད་པ་དང་། རྟག་པའི་ཚུལ་གསུམ་གྱི་དོན། མི་རྟག་པ་གསུམ་གྱི་དོན། དེ་ཡེ་ཤེས་དང་དྲི་མར་བཤད་པ་དང་གསུམ་གྱིས་སྐུ་གསུམ་རྟག་པའི་ཚུལ་བཤད་པ་དང་། མ་ངེས་པ་སྤང་བའོ། །དེ་ལ་དྲུག་སྟེ། མུ་སྟེགས་ཀྱི་བདག་དང་མི་མཐུན་པའི་དོན་དང་། ཉན་རང་གི་ཞི་བ་དང་མི་མཚུངས་པའི་དོན་དང་། སེམས་ཅན་དང་མི་མཚུངས་པའི་དོན་དང་། ཕྱིར་མི་ལྡོག་པའི་དོན་དང་། དྲི་མ་གཏན་མི་ལྡང་བའི་དོན་དང་། དོན་བསྡུ་བའོ། །ལྔ་པ། ལུང་གི་ངོ་བོ་ཉིད་བཤད་པ་ལ་ངེས་པ་བསྐྱེད་པ་ལ་བཞི་སྟེ། མདོ་སྡེ་རྒྱན་གྱི་ལུང་དང་། འཕགས་པ་ཀླུ་སྒྲུབ་ཀྱི་ཐེག་པ་ཆེན་པོ་ཉི་ཤུ་པའི་ལུང་དང་། རྒྱུད་བླ་མའི་ལུང་དང་། མདོ་རྒྱུད་ལས་གསུངས་པ་དོན་བསྡུས་བའོ། །སྙེད་ཚུལ་གྱིས་འཇུག་བསྡུ་བ་ལ་གཉིས་སྟེ། སངས་རྒྱས་ཀྱི་སྙིང་པོ་ཤེས་རབ་དང་། བྱམས་སྙིང་རྗེ་ལས་སྙེད་པའི་ཚུལ་དང་། སྨོན་ལམ་མོ། །སངས་རྒྱས་ཀྱི་སྙིང་པོ་གཏན་ལ་དབབ་པའི་བསྡུས་དོན་རང་བྱུང་རྡོ་རྗེ་ཡིས་བྲིས་པའོ། །དེ་བཞིན་གཤེགས་པའི་སྙིང་པོ་དྲི་མ་མེད་པ་སེམས་ཅན་ཐམས་ཅད་ཀྱིས་རྟོགས་པར་གྱུར་ཅིག །

དེ་བཞིན་གཤེགས་པའི་སྙིང་པོ་གཏན་ལ་དབབ་པ་ཞེས་བྱ་བའི་བསྟན་བཅོས།

༄༅། །དེ་བཞིན་གཤེགས་པའི་སྙིང་པོ་གཏན་ལ་དབབ་པ་ཞེས་བྱ་བའི་བསྟན་བཅོས་བཞུགས་སོ། །

༄༅། །འདི་ནི་དོན་ལས་མཚན་དུ་བཏགས་སོ། །དེ་བཞིན་གཤེགས་པའི་སྙིང་པོ་གཏན་ལ་དབབ་པ་ཞེས་འདི་ནི་དྲང་སྲོང་གི་བཀའ་བཞིན་སྤྱི་བོར་ལོང་ཞིག་བྱ་བའི་བསྟན་བཅོས་དོན་ལྡན་སྒྲུབ་པ་ལྷུར་ལེན། སྡུག་བསྔལ་འབྱིན་པའི་གདུལ་བྱའི་བློ་ཕྱིན་ཅི་མ་ལོག་པར་འཆོས། སྡུག་བསྔལ་མཐའ་དག་ལས་སྐྱོབ། མདོ་སྡེ་དང་མཐུན་པར་སངས་རྒྱས་དང་བྱང་ཆུབ་སེམས་དཔའི་ཐམས་ཅད་ལ་ཕྱག་འཚལ་ལོ། །ལུང་གི་མདོར་བསྟན་ལ་ཐོག་མ་གཤིས་ཀ་མེད་གྱུར་ཀྱང་རང་ངོ་ཤེས་པའི་ཚེ་ཐ་མ་དང་ལྡན་པ། རང་བཞིན་གྱིས་རྣམ་པར་དག་པའི་རྟག་གནས་སྐབས་ཐམས་ཅད་དུ་ངོ་བོ་མི་འགྱུར་བས་་ཆོས་ཅན་ནི། །ཐོག་མེད་སྦུབས་ཀྱི་དྲི་མ་ལྷན་ཅིག་སྐྱེས་པའི་མ་རིག་པའི་བསྒྲིབས་ཕྱིར་མི་མཐོང་སྟེ། དཔེར་ན་གསེར་གྱི་གཟུགས་སངས་རྒྱས་ཀྱི་སྐུ་ནི་ས་འཇིམ་གྱིས་བསྒྲིབས་པ་མི་མཐོང་བ་བཞིན། ཐོག་མ་མེད་པའི་དུས་ཀྱི། སངས་རྒྱས་ཀྱི་རྒྱུའི་ཁམས་ནི། ཆོས་ཀུན་ཉོན་དང་རྣམ་བྱང་། རྣམ་ཀུན་གྱི་གནས་ཡིན་ཏེ། སྤྱི་མིང་དུ་ཀུན་གཞི་ཞེས་བྱ་བ། ཡེ་ཤེས་རྣམ་ཤེས་འདྲེས་མ་སྟེ། ཡང་འབྱེད་འཕྲུལ་ལྡེ་ལས། ས་ཆུ་འདྲེས་པ་རྙོག་མའི་དཔེས་གསུངས། དེ་ཡོད་པས་ན་འགྲོ་ཀུན་དང་། །མྱ་ངན་འདས་པའང་ཐོབ་པ་ཡིན། ཧེ་བཛྭ་ལས། སེམས་ཅན་རྣམས་ནི་སངས་རྒྱས་ཉིད། འོན་ཀྱང་རང་གིས་རང་མ་རིག་པའི་གློ་བུར་དྲི་མས་བསྒྲིབས། དེ་ཉིད་བསལ་ན་སངས་རྒྱས་སོ། །མངོན་པའི་ལུང་དོན་བཤད་པ་དེ་ལ་ཐོག་མེད་ཅེས་བྱ་བ། དེ་ཁམས་ཡི་སྔོན་ན་དེ་ལས་མ་བྱུང་བའི་སངས་རྒྱས་སེམས་ཅན་གང་ཡང་མེད་པ་ཉིད། །འཁྲུལ་བའི་དུས་ནི་ཡིད་སྐད་ཅིག་འགྱུ་བ་ཆུ་རླབས་ལྟ་བུ་དེ་ཉིད་དེ། གནས་གཞན་ནས་ཞིག་བརྒྱུད་དེ་འོངས་པ་མིན། དེ་སྔ་མའི་འཁྲུལ་པ་ཁ་བརྒྱུད་ནས་བྱུང་བའོ། །ཁམས་ཀྱི་དོན་ནི་ཁམས་སངས་རྒྱས་ཀྱི་སྙིང་པོ་དེ་ལ་ཡོན་ཏན་སྔར་མེད་གསར་དུ་བྱེད་པོ་མེད་ཀྱང་ནི། །རང་མཚན་ཡོན་ཏན་མི་འགྱུར་བར་འཛིན་པས་དེ་སྐད་བརྗོད། དེ་རྒྱུའི་དོན་ནོ། །ཆོས་ནི་འཁོར་དང་མྱ་ངན་འདས། །གཉིས་སུ་སྣང་བ་ལ་བཤད་པ་སྟེ། །དེ་གཉིས་ཀྱི་བག་ཆགས་ཚོགས་པ་དེ་ལ་མ་རིག་བག་ཆགས་ས་ཞེས་བྱ། །དེ་ནི་ཡང་དག་རྟོག་པའི་ཡིད་གཡོ་བ་དང་ཡང་དག་མིན། རྟོག་པའི་ཡིད་གཡོ་བ་གཉིས་འདུ་བྱེད་ཅིང་གཡོ་བ་དེས་འཁོར་འདས་སོ་སོར་བསྐྱེད་རྒྱུ་གཉིས་ཀྱི་ཡང་རྒྱུ་ཡིན་པས། རྒྱུ་ཡི་རྐྱེན་དེ་ཀུན་གཞིར་བཤད། འཁོར་འདས་ཐམས་ཅད་ཀྱི་གནས་ནི་རྒྱལ་བའི་སྙིང་པོ་སྟེ། ཡང་དག་མ་ཡིན་ཀུན་རྟོག་ནི། དང་དེས་བསྐྱེད་པའི་ལས་ཉོན་སྡུག་བསྔལ་ཐམས་ཅད་ཀྱང་། སེམས་ཀྱི་རང་བཞིན་རྣམ་པར་དག་པ་ལ་རབ་ཏུ་བརྟེན་ཅིང་གནས་ཀྱང་དེ་ལ་མ་གོས་དག་པ་དེ་ཉིད་སེམས་རང་བཞིན། སྐུ་གསུམ་གྱི་རང་བཞིན་དུ་བཞུགས་ནས་་ད་ལྟར་ཡོད། །ཡོད་ཀྱང་མ་རིག་པའི་ཀུན་རྟོག་གིས་བསྒྲིབས་ནས། མ་མཐོང་ཕྱིར་ན་འཁོར་བ་ཡིན། །དེ་ཉིད་གཟོད་ནས་མ་གྲུབ་པར་ཤེས་ཏེ་བསལ་ན་མྱ་ངན་འདས། དྲི་མ་མ་བྲལ་བའི་འཁོར་བའི་དེ་ལ་ཐ་མའི་ཐ་སྙད་བྱས། །དུས་ཀྱི་ཐོག་མཐའ་ཀུན་རྟོག་གི་སྒྲོ་བཏགས་པ་ཉིད་ལ་བརྟེན། །སེམས་ཉིད་རང་གིས་རང་མ་རིག་ནས་སེམས་ལ་ང་བདག་ཏུ་འཛིན་པའི་ཉོན་ཡིད་འདུ་བྱེད་རླུང་དང་འདྲ་བ་ལངས་པ་ཡིས། །ལས་དང་ཉོན་མོངས་ཆུ་ལྟ་བུ་བསྒྲུབས་པ་སྟེ། །དེ་ཡི་ཕུང་པོ་ཁམས་སྐྱེ་མཆེད་ས་ལྟ་བུ་སྒྲུབས་བདེན་པར་མེད་བཞིན་གཉིས་སྣང་ཆོས་ཀུན་སྟོན་པ་ཡིན། །གཉིས་སྣང་ཀུན་བརྟགས་དེ་ལ་བླང་དོར་བྱེད་མཁན་འཁྲུལ་ཏེ། སྣང་བར་ཡེ་ཤེས་ཡིན་པས་རང་སྣང་དོར་བས་གང་དུ་འགག །སྟེ་དོར་བྱ་མེད། རང་སྣང་བླངས་ན་ཅི་ཞིག་འབྱུང་སྟེ་བླང་བྱར་མེད། དེ་བས་རང་སྣང་ལ་བླང་དོར་གཉིས་འཛིན་བརྫུན་པ་མ་ཡིན་ནམ། གཟུང་འཛིན་གཉིས་མེད་པར་དེ་ཤེས་པ་དེ་ཡོད་འཛིན་གྱི་གཉེན་པོར་གསུང་མོད་ཀྱང་། གཟུང་འཛིན་གཉིས་མེད་སྙམ་པའི་རྟོག་པ་དེ་ཡང་བདེན་པ་ཡང་ཡིན་རེ་རྟོག་པ་ཡིན་པས་སོ། །རྨི་ལམ་དུ་བུ་ཤི་རྒྱུ་མེད་ཀྱང་ཤི་བ་རྨིས་ནས་བུ་མེད་བསམ་པ་ལྟར་རྟོག་མེད་རྟོག་པར་གྱུར་པའི་ཕྱིར། སེམས་སྣང་གཟུགས་སོགས་གཅིག་དུར་ཕྱི་ཆ་ཕྱེད་ནས་ནམ་མཁའ་ལྟར་སྟོང་རྟོག་པ། ཁྱོད་རང་འཁྲུལ་པ་མ་ཡིན་ནམ། ལུང་ལས་གསུངས་པ་ནི། ཧེ་བཛྭ་ལས། བདེན་མིན་བརྫུན་མིན་དེ་བཞིན་དུ། འོན་ཀྱང་བདེན་ཞེན་དགག་ཕྱིར་གསུངས། སངས་རྒྱས་ཀྱི་སྙིང་པོ་རང་གི་ངོ་བོ་བསྟན་པ་ནི། ཐམས་ཅད་ཐམས་ཅད་ཆུ་ཡི་ཟླ་བ་ལྟར་འདོད་པས་རྣལ་འབྱོར་མས་ཤེས་གྱིས་བདེན་མིན་བརྫུན་མིན་ཏེ། ཆུ་ཟླ་བཞིན་དུ་གཉིས་མེད་མཁས་རྣམས་འདོད། ཅིར་ཡང་མི་རྟོག་པའི་མ་བཅོས་ཐ་མལ་ཤེས་པ་སོ་སོ་རེ་བ་དེ་ཉིད་ལ། ཆོས་དབྱིངས་རྒྱལ་བའི་སྙིང་པོ་ཡེ་ཤེས་ཟེར། ངོ་བོ་ལ་འགྱུར་བ་མེད་པས་སྔར་ལས་བཟང་དུ་སངས་རྒྱས་སོགས་འཕགས་པས་བཏང་བ་མེད། ངན་དུ་སེམས་ཅན་གྱིས་མ་བཏང་ཅི་ལྟར་སྔར་བཞིན་ཕྱིན་དེ་བཞིན། ཐ་སྙད་དུ་དོན་འདི་ནི་ས་བཅུའི་བྱང་སེམས་ཀྱིས་ཀྱང་བསམ་གྱིས་མི་ཁྱབ་པས་སངས་མ་རྒྱས་བར་ཚིག་དང་མ་བརྗོད་མོད་ཀྱང་། བརྗོད་པས་དེ་ཡི་དོན་མི་ཤེས། དོན་ཡོངས་རྫོགས་མི་ཤེས་ཀྱང་སྟན་པའི་དགོས་པ་ནི་སངས་རྒྱས་མི་ཐོབ་སྐམ་དུ་སེམས་ཞུམ་པ་དང་སེམས་ཅན་ལ་བརྙས་པ་དང་དྲི་མ་བདེན་པར་འཛིན་པ་དང་ཡོན་ཏན་མེད་འཛིན་རང་ལྷག་སྙམ་པའི་ང་རྒྱལ་དང་སྟེ་སྐྱོན་ལྔ་སྤོང་བའི་ཕྱིར་རོ། །སྣང་གསལ་རིག་བདེ་དེ་ཡི་མ་འགགས་རོལ་པ་ལས། སངས་རྒྱས་ཀྱི་ཡོན་ཏན་དྲུག་ཅུ་རྩ་བཞི་པོ། རགས་པ་ཡིན་ཏེ་ཞེས་རྒྱས་ཕྱེ་ན་དེ་རེ་རེ་ཡང་། བྱེ་བ་ཕྲག་རེར་འམ་གྲངས་མེད། གསུངས་པ་ཡིན། གྲངས་བསྟན་པ་ནི་གྲངས་ལ་དགའ་བ་གཞུག་པའི་ཆེད་དོ། །དགེ་བ་ཐར་པའི་གནས་མི་དགེ་བ་གནས་དང་མིན་ཤེས་མཁྱེན་པའི་སྟོབས་ཅིག་པ་དང་། ལས་ཀྱི་རྣམ་སྨིན་མཁྱེན་སྟོབས་རྣམ་སྨིན་འཇིག་རྟེན་ཁམས་དང་གཉིས་སྣ་ཚོགས་མཁྱེན་སྟོབས་གསུམ་དབང་པོ་མཆོག་དང་མཆོག་མིན་མཁྱེན་སྟོབས་བཞི་དང་། སྣ་ཚོགས་མཁྱེན་སྟོབས་ལྔ། ཐེག་གསུམ་ཐམས་ཅད་དུ་འགྲོ་བའི་མཁྱེན་སྟོབས་དྲུག མོས་པ་མཁྱེན་དང་ཀུན་འགྲོ་གསུམ་ཐམས་ཅད་བའི། །ལམ་དང་ཀུན་ཉོན་དང་རྣམ་བྱང་གི་བསམ་གཏན་མཁྱེན་སྟོབས་བདུན་ལྷ་ཡི་འཆི་འཕོ་དང་སྐྱེ་བ་མཁྱེན་པའི་སྟོབས་བརྒྱད་མིག་སྔོན་གྱི་གནས་རྗེས་དྲན་དང་ཟག་པ་ཞི་བ་མཁྱེན་པའི་སྟོབས་བཅུ་ནི། སྟོབས་བཅུ་པོ་དེ་ལ་བརྟེན་ནས་མི་འཇིག་པ་བཞི། འཁོར་དབུས་སུ་ང་ནི་ཆོས་ཀུན་བྱང་ཆུབ་གེགས་མོ་ཞེས་དམ་བཅའ་གཅིག་ཉོན་མོང་ཐར་པའི་གཉིས་སྟོན་དང་། ཐེག་གསུམ་གསུམ་ལམ་དང་འགོག་ཟག་པ་བཞི་སྟོན་དེ་མ་ཆོས་མཐུན་གྱི་རྩོད་མེད་ཉིད། བག་ཚ་མེད་པའི་རྒྱུ་དེས་མ་སྐུ་མཆོད་རྒྱུག་སོགས་འཁྲུལ་བ་གསུངས་ཅ་ཅོ་མེད། ཐུགས་ལ་རྗེད་ངད་སོགས་དྲན་པ་མ་ཉམས་སྤྱོད་ལམ་རྟག་ཏུ་མཉམ་གཞག །འཁོར་འདས་ཐ་དད་འདུ་ཤེས་སྣ་ཚོགས་མི་མངའ་དང་། འདུལ་འོས་མི་འོས་མ་བརྟགས་བཏང་སྙོམས་མེད་པ་སྤྱོད་པ་དྲུག་དང་། ཆོས་སྟོན་པའི་གདུལ་བྱའི་དོན་ལ་འདུན་པ་བརྩོན་འགྲུས་བསམ་མི་དགོས་པར་དྲན་པ་དང་། ཆོས་ཉིད་ཀྱི་ཏིང་འཛིན་ཡེ་ཤེས་དཔག་མེད་ཤེས་རབ་ཟག་པ་ས་བོན་དང་བཅས་ལས་རྣམ་གྲོལ་གྱི། རྟོག་པ་དྲུག་གོ་ཡེ་ཤེས་མཐོང་བ་ཉམས་མི་མངའ། སྐུ་གསུང་ཐུགས་ཀྱི་ཕྲིན་ལས་ལས་རྣམས་ཡེ་ཤེས་སྔོན་འགྲོ་ཞིང་རྗེས་སུ་འཇུག་པ་ཕྲིན་ལས་གསུམ་དང་། འདས་མ་འོངས་ད་ལྟའི་དུས་ལ་ཆགས་ཐོགས་སྒྲིབ་ཉོན་སྒྲིབ་ཤེས་སྒྲིབ་མེད་ཡེ་ཤེས་མ་འདྲེས་པ་གསུམ་དང་བཅོ་བརྒྱད་དེ། སོ་གཉིས་ལྡན་པ་ཆོས་སྐུ་ཡིན། ད་ལྟ་དེ་ལ་འགལ་བར་བྱེད། ཡིན་ལ་ཡིན་བཞིན་མ་ངེས་པས། མེད་ཕྱི་དོན་པ་ལ་ཡོད་རྟོག་གི་ཀུན་བརྟག་བྱས། ཡུལ་དེས་བསྐྱེད་པའི་འཇིག་རྟེན་པའི་རྣམ་རྟོག་དེ་གཞན་དབང་ཡིན། གཟུང་འཛིན་རྟེན་དེས་འགྱུར་མེད་དང་ཕྱིན་ཅི་མ་ལོག་པའི་ཡོངས་སུ་གྲུབ་པ་མ་ཤེས་པས། བྱིས་པ་རང་ནི་འདམ་གཡོས་པས། བྱིས་པ་རང་ཉིད་བྱིང་བ་ལྟར། རང་གིས་བྱས་པས་གཟིངས་པ་སྟེ། ཀྱེ་མ་ཆོས་སྐུའི་ཡོན་ཏན་འདི་འགྱུར་མེད་ཡོངས་གྲུབ་ཇི་ལྟ་བར་ཡོད་པར་བདེན་པའི་ཤེས་པ་དེ་ཡང་བདེན་ཤེས་ཡིན་པས་ཕྱིན་ཅི་མ་ལོག་པའི་ཡོངས་གྲུབ་ཡིན་ནོ། །ད་ལྟ་ཡོན་ཏན་ཡོད་ཀྱང་ནུས་པ་ཆུང་བ་དེ། ཡོན་ཏན་ཡོད་པ་བདེན་ཤེས་བོར་ནས་མི་བདེན་པའི་གཟུང་འཛིན་བཟོས། དེ་ལ་རྗེས་འབྲང་ནས་འཁྲུལ་རྟོག་ཆུ་རླབས་ལྟར་གཡོས་པས་ལན། ད་ནི་སེམས་ཉིད་སངས་རྒྱས་ཡིན་ལ་ཡིན་བཞིན་དུ། ཤེས་པར་གྱིས་ལ་དེ་ལ་གསོས་ནུས་པ་ཐོན་ལ་རྟོགས་པར་གྱིས་དང་དེས་ཆོག་གོ །ཅི་སྟེ་ན་སེམས་ཉིད་དེ་ལ་རང་གི་འདུ་ཤེས་འཁྲུལ་པ་ལས་འདི་ལ་བསལ་བྱ་ཅི་ཡང་མེད། ཡོན་ཏན་སྔར་མེད་གསར་དུ་བཞག་པར་བྱ་བ་ཅུང་ཟད་མེད། ཡང་དག་པའི་སེམས་ཉིད་རང་ལ་རང་གིས་ཡང་དག་ལྟ། ཡང་དག་མཐོང་ན་རྣམ་པར་གྲོལ་དེ་བཞིན་གཤེགས་པའོ། །སེམས་ཉིད་དང་རྣམ་དབྱེར་བཅས་པའི་མཚན་ཉིད་ཅན། གློ་བུར་དྲི་མ་དག་གིས་ཁམས་ལ་མ་གོས་པས་སྟོང་གི །སེམས་ཉིད་དང་རྣམ་དབྱེར་མེད་པའི་མཚན་ཉིད་ཅན། བླ་མེད་པའི་སངས་རྒྱས་ཀྱི་ཆོས་ཀྱིས་ཁམས་དེ་སྟོང་པ་མིན། དེ་ལ་གཟུགས་སྐུ་ལོངས་སྤྲུལ་གཉིས་རང་བཞིན། སུམ་ཅུ་རྩ་གཉིས་མཚན་དཔེ་བྱད། ཐོབ་པར་བྱེད་པའི་ཡོན་ཏན་རང་ལུས་རྩ་རླུང་ཐིག་ལེ་ཏེ། ལུས་དེ་ཕྱ་དང་དབང་ཕྱུག་དང་། ཚངས་དང་ཕྱི་རོལ་ཐེག་དམན་ཉམས་བདེན་པའི་རྡུལ། ཕྱི་དོན་གྱི་རྣམ་པ་གཏོད་མཁན་ཕག་ན་མོ་བདེན་པ་ཡིས་བྱས་པ་མིན་གྱི་སེམས་ལུས་ལྟར་སྣང་བ་ཡིན། །སྒོ་ལྔ་གཟུང་དང་འཛིན་པ་ཡི། རྣམ་འགྱུར་མ་དག་དེས་སྦྱངས་པས། གཟུགས་རྡོ་རྗེ་སོགས་དེ་ཚེ་ཐོབ་གཟུགས་ཕུང་གནས་གྱུར་པར་ཐ་སྙད་བྱས། རེ་ས་དང་པོ་ཐོབ་པས་ཀྱང་དབང་ལྔ་གནས་འགྱུར་བས་དབང་པོ་རེ་རེ་ཀྱང་ཡུལ་ལྔ་ལྔ་ལ་འཇུག་དེ་བས་སྦྱང་བཞི་རྩ་རླུང་ཐིག་ལེ་རྣམས། དྲི་མ་དག་སྦྱང་བྱས་པ་དག་པའི་གཟུགས་སྐུ་སྟེ། སྦྱང་བྱ་མངལ་གྱི་ཁྲུ་མ་ཆོས་གོས་ཉིད། མ་སྦྱངས་མ་དག་གཟུགས་སྐུའོ་ཅེས་སོགས། དཔེར་ན་སྙིང་པོ་ནི་ཤུན་བཅས་བཻ་ཌཱུརྻ། །དག་དང་ཉོན་མོངས་དང་ལྡན་ཕྱིར་དོ་ཀུན་ནས་ཉོན་མོངས་མེད་དག་ཕྱིར། རྣམ་པར་དབྱེ་བ་མེད་ཆོས་ཕྱིར། ལྷུན་གྲུབ་རྣམ་པར་མི་རྟོགས་ཕྱིར། ཀུན་པ་དང་བཅས་ཀྱང་མ་འདྲེས་པ། གང་ནས་ཀྱང་མ་བྱུང་བའི་ཤུན་པ་དག་པར་བྱས་པ་ལྟར། ནོར་བུ་མ་ཐུན་པ་ཡོད་མེད་ཁྱད་མེད་པ་ལྟར་ནོར་བུ་ལ་རྟོག་པ་མེད་པ་ལྟར། དེ་ལ་ཡོན་ཏན་མི་སྣང་སྟེ། ཡོན་ཏན་དབྱུང་ཕྱིར་དང་པོ་རེ་བ་བ་ཚྭའི་ཙུབ་མོས་་ཆུས་སྦྱངས་དང་། བར་དུ་སྐྱུར་པོ་བལ་གྱི་ལ་བས་སྦྱངས་པ་དང་། །མཐའ་མར་ཆུ་གཙང་ཀ་ཤི་ཀས་ལི་རས་སྲབ་མོས་སྦྱངས་ན། ཤུན་པ་དག་སྟེ་ནོར་བུས་དགོས་འདོད་འབྱུང་། དེ་བཞིན་སེམས་ཀྱི་བཻ་ཌཱུརྻ། སེར་སྣ་སོགས་ཉོན་མོངས་ཤེས་བྱ་འཁོར་གསུམ་དུ་རྟོག་པ་སྙོམས་བྱིང་རྒོད་འཇུག་གི །ཤུན་པ་གསུམ་པོ་སྦྱང་བའི་ཕྱིར། ལམ་བཞི་གསུམ་བཅུ་གཉིས་ལམ་ངེས་འབྱེད་བཞི་ཚོགས་སྦྱོར་མ་དག་ས་བདུན་དང་། དག་པའི་ས་གསུམ་མཚན་འཛིན་བཞི་ལ་རབ་སྦྱངས། བདག་འཛིན་རྟག་འཛིན་སོགས་ཡང་དག་མ་ཡིན་ཀུན་རྟོག་དེ་སྤང་བྱའི་རྟོག་པ། མི་རྟག་བདག་མེད་སོགས་དག་པའི་ཀུན་རྟོག་དང་གཉེན་པོའི་རྟོག་པ་སྤྲད་པས། ཤིང་གཉིས་བསྲུབ་པས་གཉིས་ཀ་ཚིག་བཞིན་ཀུན་རྟོག་གཉེན་པོ་སྤང་བྱ་ལ་སྟོན་པའི་ཕྱིར་སྤང་བྱ་ཟད་པ་དང་གཉེན་པོའི་རྟོགས་པ་ཡང་སྤང་གཉེན་གྱི་རྟོགས་པ་ནི་རྨི་ལམ་གྱི་ཆུ་རྨི་ལམ་ཡིན་པར་ཤེས་བཞིན་དུ་བརྒལ་བའི་རྩོལ་བ་བྱེད་པ་ལྟར་བྲལ། མཚན་འཛིན་བཞི་ནི་སྤང་གཉེན་གཉིས་དང་དེ་བཞིན་ཉིད་རྟོག་དང་། འབྲས་བུའི་མཚན་འཛིན་བཞི་བྲལ་བ། འབྲས་བུའི་མཚན་མ་ཡང་བྲལ་བ་དེ་བཞིན་ཉིད་དམིགས་ཀྱི་སེལ། དེ་ནི་རྣམ་པར་མི་རྟོག་པའི་ཡེ་ཤེས་སྐྱེ་བ་དང་སྲིད་ཞི་མཉམ་འཛིན་པ་ཙམ་མོ། །ས་བརྒྱད་པ་ཐོབ་མ་ཐག །ཡིད་འཛིན་རྟོག་པ་བྲལ་བས་འབྲས་བུའི་མཚན་མ་ཙམ་འབྱུང་སྟེ་དེ་ནི་སངས་རྒྱས་གང་གཱའི་བྱེ་སྙེད་ཀྱི་ཞལ་བསྟན་ནས་མི་རྟོག་པ་ལས་བསླང་སྟེ། སངས་རྒྱས་ཀྱི་ཞིང་དང་ཐབ་ཀྱི་སྙིང་པོ་སྦྱང་བ་ལ་འཇུག་པ་ནི་འབྲས་བུའི་མཚན་མའོ། །དེ་ཚེ་སྤྲོས་བྲལ་ནམ་མཁའི་སྐུ་ཅན་ལ། མཁྱེན་བརྩེ་ནུས་པའི་འོད་ཟེར་མཚན་གྱི་མེ་ཏོག་གཟུགས་སྐུ་གཉིས་ཀྱི་འགྲོ་དོན་རྒྱས་པར་འགྱུར། མ་དག་མ་དག་དག་པ་དང་། ཤིན་ཏུ་རྣམ་དག་གོ་རིམ་བཞིན། སེམས་ཅན་བྱང་ཆུབ་སེམས་དཔའ་དང་། དེ་བཞིན་་གཤེགས་པའི་གནས་སྐབས་གསུམ། བརྗོད་ཀྱང་སངས་རྒྱས་སྔར་མེད་གསར་སྐྱེས་མིན། ཇི་ལྟར་སྔར་ཡོད་པ་བཞིན་ཕྱིས་ཀྱང་དེ་བཞིན། ངོ་བོ་མི་འགྱུར་སངས་རྒྱས་སྙིང་པོ་ཡིན། དེ་ཕྱིར་གནས་འགྱུར་བ་དྲི་མ་བྲལ་ཙམ་དེ་ལ་བརྗོད། །གསུང་རབ་གོ་ཉེས་ཀྱིས་གང་དག་ལྟ་ངན་སེམས་ལ་ཞུགས་པ་རྣམས། ཆོས་ཉིད་སྟོང་ཉིད་ལས་སངས་རྒྱས་ཡོན་ཏན་འབྱུང་བར་འདོད་པ་ནི་རྒྱུ་གཅེར་བུ་པ་མེད་ལས་སྐྱེ་བར་འདོད་པ་དང་ཁྱད་མེད། ཁ་ཅིག་སེམས་ཉིད་ལ་སངས་རྒྱས་ཀྱི་ཡོན་ཏན་སྔར་མེད་པ་ཡང་ན་རང་མིན་ཕྱི་རོལ་གྱི་ཐོས་བསམ་སྒོམ་གསུམ་སོགས་ཀྱི་རྒྱུ་རྐྱེན་གྱིས་བསྐྱེད་པར་རྟོག་པ་ནི། ཕྱི་རོལ་དབང་ཕྱུག་དངོས་པོ་ཐམས་ཅད་དེས་བསྐྱེད་འདོད་པ་དང་། རྟག་ཆད་འདོད་པར་ཁྱད་ཅི་ཡོད། །སོར་རྟོག་ཡེ་ཤེས་ཀྱིས་འཇིག་རྟེན་ཀུན་ལ་ལན་དྲུག་ཏུ་གཟིགས་ཤིང་སེམས་ཅན་རྣམས་ཀྱི་སེམས་རྒྱུད་སོ་སོར་ཅིག་ཅར་མཁྱེན་པའི་འདུ་བྱེད་སྐད་ཅིག་སྐྱེ་འགག་ལྟར་སྣང་། མ་དག་དྲུག་ཡིད་རྣམ་རྟོག་གཡོ་བའི་འདུ་བྱེད་དག་དང་མཚུངས། གལ་ཏེ་དེ་ལྟར་མ་ཡིན་པར་རྒྱལ་བའི་ཡེ་ཤེས་ཀྱི་གདུལ་བྱ་མི་མཁྱེན་མི་གཟིགས་ན་གཟུགས་སྐུའི་ཕྲིན་ལས་རྒྱུན་ཆད་འགྱུར། བས་མི་རིགས་སོ། །འོན་ཀྱང་དེ་ལ་འདུ་བྱེད་མིང་མི་བརྗོད། སོ་སོར་རྟོག་པའི་ཡེ་ཤེས་ཀྱི་མིང་དུ་བརྗོད། རྒྱུ་འབྱུང་བ་ཆེ་ལས་གཟུགས་སྒྲ་དྲི་རོ་རེག་སོགས་རང་བཞིན་གང་། མིག་སོགས་འཛིན་བཅས་ཀྱི་དྲི་མ་དག་པའི་ཚེ་རང་རང་གི་ངོ་བོ་སྔར་ལས་ཀྱང་ནུས་ལྡན་དུ་གྱུར་པས་ཞིང་དག་པ་ཅི་ལྟར་འདོད་བཞིན་ལོངས་སྤྱོད་ཀུན་སྟོན། ཏེ་སྒྱུ་མའི་ལྟད་མོ་བ་དང་སྒྱུ་མ་མཁན་གཉིས་ཀ་ལ་རྟ་གླང་སྣང་བ་ལྟ་བུའོ། །འཁྲུལ་དང་མ་འཁྲུལ་གཉིས་པོ་ཡང་། སྣང་བའི་ཙམ་གྱི་ཆ་ནས་ཁྱད་པར་ཅི་ཡང་མེད། འཁྲུལ་པས་ནི་གཟུང་འཛིན་གཉིས་ཐ་དད་དུ་ཡོད་ཅིང་བདེན་གྲུབ་ཏུ་འཛིན་པ་ཡོད་ཅིང་མ་འཁྲུལ་བ་དེ་ལ་དེ་མེད་པའི་ཁྱད་པར་ཡིན་རིགས་པ་དྲུག་ཅུ་པ་ལས་དངོས་པོ་གཟུགས་བརྙན་ལྟ་བུ་ནི། ཡེ་ཤེས་མིན་གི་རབ་མཐོང་བ་ཞེས་དང་རིན་ཆེན་རྒྱལ་པོ་ལས་རྒྱལ་བ་གང་དག་མྱ་ངན་འདས་པ་ཀུན་ཐམས་ཅད་ཆུ་ཟླ་ལྟ་བུར་གཟིགས་པ་ན་ཞེས་གསུངས་སོ། །གལ་ཏེ་དེ་ལྟར་མ་ཡིན་ན། རྒྱལ་བའི་ཕྲིན་ལས་ཇི་ཡུལ་གང་ལ་ཚུལ་ལྟར་འཇུག །ཡིད་བཞིན་ནོར་དང་དཔག་བསམ་ཤིང་། སོགས་དཔེ་བརྗོད་པ། ནི་སངས་རྒྱས་ལ་ཡེ་ཤེས་མེད་པའི་དཔེ་མིན། ཡེ་ཤེས་ལ་མཚན་མའི་རྟོག་པ་མེད་པའི་ནུས་གཞན་དོན་ལྷུན་གྲུབ་ཏུ་སྟོན་པ་ལ། བཤད་ཀྱིས་གཟུགས་སྐུ་གཉིས་སོགས་ཕྲིན་ལས་གཞན་རྒྱུད་གདུལ་བྱའི་དག་སྣང་ཁོ་ན་མིན་གྱི་ཐུགས་རྗེས་དག་སྣང་གཉིས་ཀ་ཚོགས་དགོས། སངས་རྒྱས་ལ་ཡེ་ཤེས་མེད་ཅིང་གཟུགས་སྐུ་གཉིས་གཞན་རྒྱུད་གདུལ་བྱའི་དག་སྣང་ཁོ་ན་ཡིན་ན་གཞན་རྒྱུད་ཡེ་ཤེས་ཡིན་པར་འགྱུར། ཏེ་ཡེ་ཤེས་དེ་གཞན་རྒྱུད་ཡིན་པའི་ཕྱིར། འདོད་ན་ཡེ་ཤེས་འཁྲུལ་པར་འགྱུར། ཏེ་གདུལ་བྱའི་རྒྱུད་འཁྲུལ་པ་དེ་ཡེ་ཤེས་ཡིན་པའི་ཕྱིར། གལ་ཏེ་སངས་རྒྱས་ལ་ཡེ་ཤེས་ཡོད་ཅིང་དེ་ལ་སེམས་ཅན་འཁྲུལ་པ་སྣང་ན་རང་སྣང་རང་གི་འཛིན་པ་ཡིན་པས་ཡེ་ཤེས་འཛིན་རྟོག་ཅན་དུ་འགྱུར་རོ་ཞེས། འདོད་ན་མེ་ལོང་སྣང་བ་ཡང་། ནང་དུ་གཟུགས་བརྙན་མེ་ལོང་ཡང་འཛིན་པའི་རྣམ་རྟོག་ཅན་དུ་འགྱུར། བར་མཚུངས་སེམས་ཅན་འཁྲུལ་པ་ཇི་སྙེད་པ། རྒྱལ་བའི་ཡེ་ཤེས་ཡུལ་དུ་སྣང་གྱུར་ཀྱང་། ཡེ་ཤེས་འཁྲུལ་པས་དགོས་པ་མེད། དཔེར་ན་མཁའ་ལ་ཁྱུང་ཆེན་བཞི་པོ་རྣམས། སྐྱེ་འགག་སྣང་ཡང་ནམ་མཁའ་ལ། གོས་མེད་ཅིང་ནམ་མཁའ་ལ་སྐྱེ་དང་འགག་པ་མེད། མ་དག་པའི་ཚེ་ནའང་སྒོ་ལྔའི་ཤེས་པ་ཡུལ་ལ་འབད་མེད་འཇུག་པ་ལྟར་དེ་དྲི་བྲལ་རྒྱལ་བའི་བྱ་སྒྲུབ་ཡེ་ཤེས་ཀྱང་འབད་མེད་དུ་སེམས་ཅན་ཀུན་ལ། འཇུག་ཀྱང་མཁའ་ལ་འབྱུང་བ་དེ་བཞིན་གོས་པ་མེད། མངོན་སུམ་རྟོག་བྲལ་འདི་ལ་འཁྲུལ་པའི་མིང་མི་བརྗོད། བྱ་བ་སྒྲུབ་པ་ཞེས་སུ་བརྗོད། སྒྲིབ་གསུམ་དག་པར་གྱུར་པ་ན་ཀུན་གཞི་ལ་གནས་པའི་ཉོན་ཡིད་ང་བདག་ཏུ་འཛིན་པ། བདག་གཞན་མཉམ་པ་ཉིད་དེ་ཞི་བའང་ཀྱི་ཡེ་ཤེས་སུ་ཡིན་ཀྱང་། ཞི་མཐར་མི་གནས་པའི་བྱམས་པ་ཆེན་པོ་དང་སྙིང་རྗེ་ཆེར་ལྡན་པས་མཛད་པ་མོས་པ་ཅི་ལྟ་བར། ལོངས་སྤྱོད་རྫོགས་སོགས་དེ་ལ་སྣང་། ལ་ལ་སངས་རྒྱས་ཐོབ་པའི་ཚེ། ཡར་མེ་ཤི་བ་ལྟར་ཤེས་རྒྱུན་ཆད་ནས་ཞི་བར་འདོད་ན་ཐེག་དམན་དང་མཚུངས་འགྱུར་བས་དེ་དགག་ཕྱིར་བརྗོད། ཡེ་ཤེས་རྟག་པ་གསུམ་ཡིན་ཏེ། ཆོས་སྐུ་རང་བཞིན་རྟག་པ་ཆོས་ཀྱི་དབྱིངས་འགྱུར་བ་མེད་པའོ། །ལོངས་སྐུ་རྒྱུན་གྱི་རྟག་པ་ལོངས་སྤྱོད་རྫོགས་ངེས་པ་ལྔ་ལྡན་པས་སོ། །སྤྲུལ་སྐུ་རྒྱུན་མི་འཆད་པ་རྟག་པ་སྤྲུལ་པའི་སྐུ། འཁོར་བ་མ་སྟོང་བར་འབྱུང་བས་སོ། །དེ་ལ་མི་རྟག་གསུམ་ཡོད་དེ། །ཕྱིས་བློ་སྟོང་པར་ཡི་བྱས་པའི་སྟོང་པ་རྟག་པ་མིན་དེ་ཉི་ཚེ་བ་ཡིན་པས་སོ། །ཉོན་ཡིད་དང་དེས་བསྐྱེད་པའི་གཡོ་བའི་རྟོག་ཡིད་རྟག་པ་མིན། དེ་འཁྲུལ་པ་ཡིན་པས་སོ། །ཚོགས་དྲུག་གི་ཤེས་པ་རྐྱེན་བཞིས་འདུས་བྱས་པའི་ཕྱིར་རྟག་པ་མིན། །འོན་ཀྱང་དེའི་སྦུབས་ལ་རྟག་གསུམ་ཡོད། །སེམས་ཅན་གྱི་ཚེ་བྲི་མ་ཡེ་ཤེས་འདྲེས་པས་སོ། །མི་རྟག་གསུམ་པོ་དྲི་མ་སྟེ། །རྟག་པ་གསུམ་པོ་ཡེ་ཤེས་ཡིན། འགྱུར་མེད་ཀྱི་སྙིང་པོ་འདི་མུ་སྟེགས་བདག་རྟག་འདོད་པར་འདོད་པ་དང་ཀླུ་སྒྲུབ་ཀྱིས་ཆོས་དབྱིངས་གང་ཕྱིར་བདག་མ་ཡིན་མཚུངས་མིན་ཏེ། །མུ་སྟེགས་པས་ཡིད་ཀྱིས་བཏགས་དང་འདི་གཟུང་འཛིན་གྱི་ཡུལ་མིན་པས་ཡིད་ཀྱིས་སྐྱེས་པ་མ་ཡིན་བུད་མེད་མིན་མ་བཏཊ་ཕྱིར། གཟུག་དང་འཛིན་པ་རྣམ་གྲོལ་བ་ཅི་ལྟར་བདག་གཅེས་རྟོག་པར་བྱ་ཞེས་གསུངས་སོ། །ཉན་རང་ཞི་དང་མཚུངས་མིན་ཏེ། །སྙིང་རྗེ་ཆེན་པོས་གཟུགས་སྐུའི་ཡོན་ཏན་ཀུན་སྟོན་ཕྱིར། །སེམས་ཅན་ལུས་ཕུང་ཁམས་དང་མཚུངས་མིན་ཏེ། །ཟག་བཅས་ལས་ཉོན་རྐྱེན་གྱི་མ་བསྐྱེད་ཕྱིར་དེར་མ་ཟད་ཟག་མེད་ལས་ཀྱིས་བསམ་མི་ཁྱབ་ཀྱི་སྐྱེ་བ་དང་འཆི་འཕོ་ཡང་མེད། ཕྱིར་ལ་ལྡོག་པར་མི་འགྱུར་ཏེ། །གནས་ལུགས་ཡིན་ལ་ཡིན་པར་མངོན་གྱུར་ཕྱིར། །དྲི་མ་ལྡང་བ་གཏན་མེད་དེ། །ཐ་དད་ཀུན་རྟོག་མ་རིག་པ་སྤངས་པས་གཟུང་འཛིན་བདེན་པར་བྲལ་བའི་ཕྱིར། ཀྱི་ཡོན་ཏན་ཐམས་ཅད་རང་ཆས་གནས་སྐབས་གསུམ་དུ་འགྱུར་བ་མེད་པ་དེ་ཕྱིར་སེམས་ཉིད་སངས་རྒྱས་འདི། དེ་ལྟར་ཡོད་ཀྱང་མ་དག་པའི་ཚེ་མ་ཤེས་སོ། །གང་ཚེ་རྟོགས་པ་དེ་ཡི་ཚེ། །ཇི་ལྟར་ལྕགས་ལ་ཚང་བ་མེད་པ་དང་། མིག་ལ་རབ་རིབ་ཞི་བ་ལྟར། ནི་མེད་པ་ཡིན་ལ་ཞི་བའི་མཚན་ཉིད་ལྕགས་མིག་ལ་ཡོད་པས་མེད་པར་ཡང་མི་བརྗོད་པ་སངས་རྒྱས་རྣམས་ཀྱིས་ལ་འདོད་ཆགས་སེམས་དང་ཡེ་ཤེས་ལ། མ་རིག་པ་ཡོད་ཞི་བ་ནི་པར་མི་བརྗོད་དེ་དེ་གཉིས་མེད་པའི་ཕྱིར་དང་མེད་པར་མི་བརྗོད་དོ། །དེ་སེམས་དང་ཡེ་ཤེས་ནི་དེ་གཉིས་ལས་གྲོལ་བའི་ཕྱིར་སངས་རྒྱས་ཀྱི་སྙིང་པོ་དམ་པའི་དོན་དུ་སྐྱེ་མེད་ཕྱིར། །མངོན་དུ་གྱུར་པའི་ཚེ་སྔར་མེད་གསར་དུ་དེ་ཉིད་དུ་ནི་གྲོལ་བའང་མྱ་ངན་ལས་འདས་པ་མེད། །མཁའ་འགྱུར་བ་མེད་པ་བཞིན་སངས་རྒྱས་དེ་བཞིན་ཏེ། །སེམས་ཅན་དང་སངས་རྒྱས་གཉིས་ནི་མཚན་ཉིད་གཅིག་པས་ངོ་བོ་གཅིག་ཚུ་རོལ་འཁོར་བ་ཕ་རོལ་མྱང་འདས་གཉིས་སུ་འཛིན་པ་སྐྱེ་བ་མེད་པས། རང་བཞིན་ལས་གསར་དུ་མྱ་ངན་འདས་པའང་མེད། དེ་ཕྱིར་སྐྱེ་འགག་གཟུང་འཛིན་སོགས་འདུས་བྱས་ཀྱིས་མངོན་པོར་སྟོང་། །ཡོངས་སུ་རྫོགས་པ་ནི་ཀུན་ཀྱང་ཡེ་ཤེས་ཁོ་ནའི་སྤྱོད་ཡུལ་ཡིན་གྱི་གཞན་བསམ་གྱིས་མི་ཁྱབ་སྟེ། ཕྲ་ཕྱིར་ཐོས་པའི་ཤེས་རབ་ཀྱི་ཡུལ་མིན་ལ། དོན་དམ་ཕྱིར་ན་རྟོག་དཔྱོད་གྱི་བསམ་པས་ཤེས་རབ་མིན། །ཆོས་ཉིད་ཟབ་ཕྱིར་འཇིག་རྟེན་པའི། སྒོམ་པ་ཤེས་རབ་ལ་སོགས་ཡུལ་མ་ཡིན། རང་བྱུང་སངས་རྒྱས་ཀྱི་སོ་སོ་རང་རིག་ཡེ་ཤེས་སྤྱོད་ཡུལ་སྟེ། །རང་བྱུང་རྣམ་ཀྱི་དོན་དམ་ནི། རང་བྱུང་དད་པ་ཉིད་ཀྱིས་རྟོག་བྱ་ཡིན་པས་ཡོན་ཏན་བསྐྱེད། ཀྱེ་མ་རང་ལ་ཡོད་པའི་ཚུལ་འདི་མ་རྟོགས་པས། །བྱིས་བློ་ཤེད་མ་བྱེ་བའི་བྱིས་པ་རྣམས་འཁོར་བའི་རྒྱ་མཚོར་འཁྱམས། ཕྱིའི་རྐྱེན་ཐུབ་པ་ཆེན་པོ་འི་བཀའ་དང་དེའི་དགོངས་འགྲེལ་འཇམ་པའི་དབྱངས། བྱམས་པ་སྤྱན་རས་གཟིགས་དབང་གི །མཛད་པའི་བསྟན་བཅོས་སོགས་བསྟན་བཅོས་འབུམ་ཕྲག་དུ་མ་གཟིགས་པའི་རྒྱུ་ནི་ནང་གི་སངས་རྒྱས་ཀྱི་སྙིང་པོ་ཤེས་རབ་བྱམས་པ་སྙིང་རྗེ་ཆེན་པོ་རྣམས་རྒྱས་ཤིང་འཕེལ་བའི་མཐུ་ཡིས་རང་བྱུང་རྡོ་རྗེས་བྲིས། འགྲོ་ཀུན་སངས་རྒྱས་སྙིང་པོ་འདི། །མཐར་ཕྱིན་མ་ནོར་ཤེས་པར་ཤོག །སངས་རྒྱས་ཀྱི་སྙིང་་པོ་གཏན་ལ་དབབ་པ་རྡོ་རྗེ་ཐེག་པའི་སྙིང་པོ་རྫོགས་སོ། །རྡོ་རྗེ་ནི་འགྱུར་བ་མེད་པའི་སངས་རྒྱས་ཡིན་ལ་དེའི་ལམ་དུ་འགྲོ་བ་ནི་ཐེག་པ་སྟེ་རྒྱལ་སྲས་རྣམས་དེར་ཕྱིན་པར་བྱེད་པའམ་ཡང་ན་མི་ཤིགས་པའི་སངས་རྒྱས་ཀྱི་སྙིང་པོ་ནི་འཁོར་འདས་ཐམས་ཅད་དེ་ལས་མི་གཡོ་བའི་གཞི་ཡིན་པས་རྡོ་རྗེ་ཐེག་པའོ། །རྒྱུད་བླ་མ་ལས། འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིག་ཀྱང་སྟེ། །ཞེས་གསུངས་པས་ཆོས་སྐུ་འབྲས་བུ་རིགས་རྒྱུ་ངོ་བོ་འགྱུར་བ་མེད་པ་དེ་ཉིད་དོ། །

ཟབ་མོ་ནང་གི་དོན་ཞེས་བྱ་བའི་གཞུང་།

༄༅། །ཟབ་མོ་ནང་གི་དོན་ཞེས་བྱ་བའི་གཞུང་བཞུགས་སོ། །

༄༅། །དཔལ་རྡོ་རྗེ་འཆང་ལ་ཕྱག་འཚལ་ལོ། །ཐམས་ཅད་མཁྱེན་ཅིང་ཐམས་ཅད་གཟིགས། །ཕྱི་ནང་གཞན་གསུམ་དེ་ཉིད་སྟོན། །གནས་སྐབས་བཞི་ཡི་འཁྲུལ་པ་སེལ། །དཔལ་ལྡན་བླ་མ་ལ་ཕྱག་འཚལ། །ལྷན་སྐྱེས་གཅིག་དངོས་གཉིས་ཀྱི་བདག །སྐུ་གསུམ་རྩ་རླུང་ཐིག་ལེ་ཅན། །གནས་སྐབས་བཞི་པོ་སྐུ་བཞི་ཉིད། །སྐུ་ལྔའི་བདག་ཉིད་ལ་ཕྱག་འཚལ། །དངོས་གཅིག་ཆོས་ཀུན་རང་བཞིན་ཅན། །དབུ་མའི་རང་བཞིན་བདེ་གཅིག་ཉིད། །གང་མཐར་སྐྱེས་པའི་རང་བཞིན་ཅན། །ལྷ་མོ་དེ་ལ་ཕྱག་འཚལ་ལོ། །རྒྱུད་རྣམས་ཀུན་དུ་གསང་བ་གང་། །རྒྱལ་བས་བླ་ན་མེད་པར་ཕྱེ། །མཐའ་དྲུག་གིས་བཅིངས་ནང་གི་དོན། །ཕྱི་ནང་ཉན་ཐོས་སྤྱོད་ཡུལ་མིན། །ཕ་རོལ་ཕྱིན་པར་རབ་གསང་བ། །ལུས་སེམས་ནང་གི་བདག་ཉིད་བཤད། །དྲི་མེད་རྒྱལ་བའི་སྙིང་པོ་ནི། །མ་དག་མ་དག་དག་པ་དང་། །ཤིན་དུ་རྣམ་དག་གོ་རིམ་བཞིན། །སེམས་ཅན་ལམ་ལ་གནས་པ་དང་། །དེ་བཞིན་གཤེགས་རྣམས་རིམ་པ་བཞིན། །གསུངས་ཕྱིར་དེ་དོན་རྟོགས་པར་བྱ། །ཐོག་མར་རྒྱུ་རྐྱེན་བསྟན་པ་དང་། །མངལ་སྐྱེས་ལུས་ནི་འགྲུབ་པའི་ཚུལ། །དེ་ཉིད་རྩ་ཡི་རྣམ་བཤད་དང་། །རླུང་ནི་གནས་དང་རྒྱུ་བའི་ཚུལ། །ཐིག་ལེ་ཇི་ལྟར་རྒྱུ་བ་དང་། །རྣམ་ཤེས་ལ་སོགས་འབྲེལ་བའི་དོན། །དེ་དག་སྣོད་ལ་སྦྱར་བ་དང་། །བསྐྱེད་པའི་ལྷ་རྣམས་གང་ཡིན་དང་། །ཆོས་ཀྱི་སྦྱང་གཞིར་བསྟན་པ་དང་། །ལམ་གྱི་རིམ་པར་བསྟན་པ་དང་། །དེ་རྣམས་འཇིག་ཅིང་བསྡུད་པའི་ཚུལ། །རྒྱལ་བས་བསྟན་པ་བཞིན་བཤད་བྱ། །རྒྱུ་ནི་སེམས་ཉིད་ཐོག་མེད་ལ། །རྒྱ་ཆད་ཕྱོགས་ལྷུང་མ་མཆིས་ཀྱང་། །དེ་ཉིད་མ་འགགས་རོལ་པ་ལས། །ངོ་བོ་སྟོང་ལ་རང་བཞིན་གསལ། །རྣམ་པ་འགག་མེད་ཅིར་ཡང་འཆར། །དེ་ཉིད་རང་གིས་རང་མ་རིག །འདུ་བྱེད་ཡིད་ཀྱིས་གཡོ་བ་ནི། །ཆུ་རླབས་ལྟ་བུར་གཡོས་པ་ལས། །དོན་དང་འཛིན་པ་གཉིས་སྣང་བས། །རང་གིས་རང་ལ་གཏོད་ཅིང་གཟུང་། །ཡིད་དེ་ཕྱིར་འགྱུས་སྣང་ཆ་ལས། །ཡུལ་ལ་དོན་བཟུང་རྣམ་ཤེས་བྱུང་། །བླང་དོར་བྱེད་ལས་ཚོར་བ་སྐྱེ། །དེ་ལ་མཚན་འཛིན་འདུ་ཤེས་ཏེ། །འདུས་བྱས་ཡུལ་སྣང་གཞན་དུ་བརྟགས། །ཞེན་པས་གཟུགས་ཀྱི་ཕུང་པོ་གྲུབ། །ཁམས་ལྔ་རྣམ་པར་ཤེས་དང་དྲུག །རྒྱུ་ཞེས་རྟོག་པས་ཐ་སྙད་བྱས། །དེ་ཡི་བག་ཆགས་ཀུན་གཞི་ལ། །བསགས་པས་རྒྱུ་ཡི་རྐྱེན་ཞེས་བྱ། །བདག་རྐྱེན་བར་དུ་སྣང་བ་ཡི། །མིག་ལ་སོགས་པའི་དབང་པོ་ཡིན། །དམིགས་པའི་རྐྱེན་ནི་གཟུགས་ལ་སོགས་། །ཡུལ་དུ་སྣང་བའི་རིག་བྱ་སྟེ། །དེ་མ་ཐག་པའི་རྐྱེན་ཞེས་པ། །གང་གང་འགགས་པ་དེ་མ་ཐག །ཡིན་ཏེ་དྲུག་པའི་ཡིད་དང་བཅས། །དེ་ལྟར་རྒྱུ་རྐྱེན་རྟེན་འབྲེལ་ལས། །འཁོར་འདས་ཆོས་ཀུན་སྣང་བར་གྱུར། །སྲེད་ལེན་མཚམས་སྦྱར་སྲིད་པ་གྲུབ། །གཟུགས་མེད་གཟུགས་ཁམས་འདོད་པའི་ཁམས། །རིམ་བཞིན་ཡུལ་ལ་མཚན་འཛིན་པ། །ཆུང་དང་འབྲིང་དང་ཆེན་པོ་ཡིན། །ཐམས་ཅད་བླང་དོར་རྟོག་པ་ཡིས། །དགེ་དང་མི་དགེ་ལུང་མ་བསྟན། །རྣམ་གསུམ་འདུ་བྱེད་རྐྱེན་ལས་ནི། །བདེ་སྡུག་སྙོམས་འཇུག་བཅས་པ་ཡི། །འབྲས་བུ་སྐྱེ་བ་ཉོན་མོངས་ཅན། །སེམས་ཉིད་མ་དག་གནས་སྐབས་ཡིན། །དྲི་མ་དེ་ཉིད་གློ་བུར་བར། །ཤེས་ནས་ཐབས་དང་བཅས་སྦྱོང་བ། །ལམ་པ་ཞེས་བྱར་རྒྱལ་བས་གསུངས། །དྲི་མེད་དག་པས་སངས་རྒྱས་ཏེ། །དེ་ཕྱིར་འགྲོ་ཀུན་སངས་རྒྱས་ཉིད། །ཟབ་མོ་ནང་གི་དོན་རྣམ་པར་བཤད་པ་ལས། །མདོར་བསྟན་པ་དང་རྒྱུ་རྐྱེན་སྤྱིར་བསྟན་པ་སྟེ་དང་པོའོ།། ༈ །།ལུས་ནི་འགྲུབ་པའི་ཚུལ་བཤད་པ། །ཀུན་གཞི་སྲོག་རླུང་དང་བཅས་པ། །ཁམས་གསུམ་སྐྱེ་བར་སྦྱོར་བ་ན། །འདུ་བྱེད་བཅས་པའི་རྣམ་ཤེས་ཀྱིས། །ནམ་མཁའ་མཐའ་ཡས་ལ་སོགས་བཞི། །ཡུལ་དུ་བྱས་ནས་དེར་སྐྱེ་བ། །གཟུགས་མེད་ཅེས་བྱ་ཡིད་ལུས་སོ། །བསམ་གཏན་བཞིར་བརྟེན་གང་སྐྱེ་བ། །གཟུགས་ཁམས་ཡིན་ཏེ་འདོད་སྲེད་ནི། །རགས་པ་བཅོམ་པ་བརྫུས་སྐྱེས་སོ། །ནམ་མཁའ་རླུང་མེ་ཆུ་དང་ས། །འབྱུང་ཆུང་རྣམ་པར་ཕྱེ་བ་ཡིས། །གནས་གཞན་ཉི་ཤུར་གང་སྐྱེས་པ། །དེ་ཡི་འཛག་པ་གོ་རིམ་བཞིན། །ཁམས་གཅིག་ནས་ནི་ལྔ་ཡི་བར། །ལྡན་པས་མ་རིག་སྐྱེ་དང་བཅས། །དྲན་པ་ཉེར་བཞག་ཏུ་བསྟན་ཏོ། །འདོད་ཁམས་རིགས་དྲུག་ཐམས་ཅད་ཀྱང་། །ཁམས་དྲུག་དང་ལྡན་ཕྲ་དང་རགས། །སྐྱེ་གནས་བཞི་ལྡན་གཞན་དག་རྣམས། །ངན་སོང་གསུམ་ནི་མི་ཁོམ་གནས། །ལྷ་དང་ལྷ་མིན་སྒྲ་མི་སྙན། །འབྲས་བུ་སྤྱོད་པས་རྒྱུ་དམན་ཏེ། །གླིང་གསུམ་སྐྱེས་པའི་ཁམས་དྲུག་ལྡན། །མཆོག་ཡིན་འཛམ་གླིང་ལེགས་སྐྱེས་པ། །ལས་ཀྱི་ས་པར་རབ་ཏུ་གྲགས། །ཡུལ་འདིར་སྐྱེ་བ་འགྲུབ་ཚུལ་ནི། །དང་པོར་རྫུས་སྐྱེས་གཟུགས་ཁམས་བཞིན། །དེ་ནས་རིམ་གྱིས་སྲེད་དབང་གིས། །དྲི་དང་རོ་ལ་ཆགས་པ་ལས། །ཡུལ་དུ་སྣང་བའི་རྣམ་ཤེས་ལ། །བླང་དོར་བྱས་པས་ལུས་ཁམས་ནི། །རགས་སྣང་ཕོ་མོ་སྣང་མུན་དང་། །བདེ་སྡུག་འདོད་སྲེད་བརྟས་པར་གྱུར། །དེ་ནས་མངལ་སྐྱེས་གྲུབ་པ་ན། །ལུས་འདི་ལ་ནི་ཁམས་ཀྱི་ཚོགས། །མ་ལུས་རོ་དྲུག་བཟའ་བཏུང་ལས། །འབྱུང་བཞི་འགྲུབ་པའི་རྐྱེན་བྱེད་དོ། །རོ་དྲུག་འབྱུང་བ་ལྔ་ལས་ཏེ། །མཁའ་དང་བདེ་བ་ཡེ་ཤེས་ཀྱི། །སྦྱོར་བས་བརྟན་པར་འགྲུབ་པ་ཡིན། །པད་མར་ཆུད་པའི་ས་བོན་ནི། །འཛིན་པས་ས་ཁམས་རང་བཞིན་ཏེ། །ཆུས་བསྐྱེད་མེ་ཡིས་སྨིན་པར་བྱེད། །རླུང་གིས་འཕེལ་བྱེད་ནམ་མཁའ་ཡིས། །གོ་སྐབས་འབྱེད་པར་བྱེད་པ་ཡིན། །དེ་ཉིད་སྐྱེ་བར་བྱེད་པ་ཡང་། །བོ་ལ་ཀཀྐོ་ལ་སྦྱོར་བས། །རེག་པ་སྲ་བ་བག་ཆགས་ཉིད། །ས་ནི་དེ་ལས་སྐྱེ་བར་འགྱུར། །བྱང་སེམས་ཁུ་བའི་རང་བཞིན་ལས། །ཆུ་ཡི་ཁམས་ནི་འབྱུང་བ་སྟེ། །བསྐྱོད་པ་ལས་ནི་དྲོད་སྐྱེ་སྟེ། །གཡོ་བ་རླུང་དུ་རབ་ཏུ་གྲགས། །བདེ་བ་ནམ་མཁའ་ཉིད་ཀྱི་ཁམས། །ལྔ་པོས་རྣམ་པར་ཤེས་པ་བསྐོར། །རྒྱུ་ནི་བར་དོའི་རྣམ་ཤེས་ཏེ། །བག་ཆགས་ཉོན་མོངས་ཅན་གྱི་ཡིད། །རླུང་གི་ངོ་བོས་གཟུགས་གཞན་མཐོང་། །དོན་ནི་ངེས་པར་མི་ཤེས་ཤིང་། །རླུང་ཙམ་གཅིག་པུ་རྨོངས་འདུ་བྱེད། །ཀུན་གཞིའི་རྣམ་ཤེས་བཀུག་ནས་ནི། །མངལ་འཇུག་བག་ཆགས་རྣམ་པར་སྤྱོད། །བག་ཆགས་ཉིད་ཀྱིས་རྣམ་ཤེས་གཟུང་། །དེ་ཚེ་ཁུ་ཁྲག་ཞུ་ཐིག་ལས། །འདྲེས་པ་རུ་ནི་གྱུར་པ་དང་། །ཀུན་གཞི་རྣམ་ཤེས་རྒྱུར་བཅས་པ། །ཇི་ལྟར་ཆང་རོས་མྱོས་པ་བཞིན། །ཉོན་མོངས་ཅན་ཡིད་སྲོག་རླུང་ཉིད། །སྐད་ཅིག་ལ་ཡང་ཡང་དག་འགྲོ། །ནུར་ནུར་མེར་མེར་ལྟར་ལྟར་པོ། །གོར་གོར་པོ་སྟེ་བདུན་ཕྲག་བཞི། །ལས་རླུང་གིས་དཀྲུགས་སྡུད་པར་བྱེད། །མཁྲང་འགྱུར་ཞག་ནི་དང་པོ་ནས། །རང་སོར་ཕྱེད་དང་བཅུ་གསུམ་གྱི། །ཚད་ལྡན་དབུ་མ་སྲོག་རླུང་བཅས། །བསྐྱེད་ནས་སྙིང་དང་ལྟེ་བ་ཡི། །འཁོར་ལོ་རླུང་བཅུའི་རྟེན་ཆགས་ནས་། །ཉ་ཡི་རྣམ་པ་ལྟ་བུར་འགྱུར། །ལྟེ་བར་མ་ཡི་རྩར་འབྲེལ་བས། །རླུང་ཁྲག་རྒྱས་པར་བྱེད་པར་འགྱུར། །དེ་ནས་ཟླ་བ་གཉིས་པ་ནས། །ཞག་རེ་རྩ་ནི་ཉིས་བརྒྱ་ཆགས། །སྲོག་ལས་ཐུར་སེལ་འཕྲོས་ནས་ནི། །རུས་སྦལ་རྣམ་པ་ལྟ་བུར་བྱེད། །ཟླ་བ་གསུམ་པར་གྱེན་རྒྱུ་ཡི། །རླུང་གིས་སྟོད་རྣམས་སྒྲུབ་པར་བྱེད། །བཞི་པར་ཁྱབ་བྱེད་རླུང་གིས་ནི། །ཡན་ལག་རྩ་རྣམས་སྣང་བར་བྱེད། །ལྔ་པར་མཉམ་གནས་རླུང་འཕྲོས་ནས། །ནང་གི་གནས་གཞན་སྒྲུབ་པར་བྱེད། །ཕག་རྒོད་སེང་གེའི་གནས་སྐབས་ཡིན། །མཉམ་གནས་ཁྱབ་བྱེད་གཉིས་སྟོབས་རྫོགས། །ལུས་ནི་འགུལ་དང་འདར་བར་གྱུར། །དེ་དུས་རུས་ཚིགས་དུམ་བུ་ནི། །སུམ་བརྒྱ་དྲུག་ཅུ་ཆགས་པར་འགྱུར། །དེ་ལྟར་ཕུང་པོ་ལྔ་རྫོགས་ནས། །ཟླ་བ་དྲུག་པར་ཕྱིན་པ་ན། །ཀླུ་ཡི་རླུང་གི་སྟོབས་བསྐྱེད་ནས། །ས་ཁམས་ཆ་ལས་མིག་གཉིས་བསྐྱེད། །དེ་ལས་བདུན་པར་རུས་སྦལ་རླུང་། །སྤྲོས་ནས་ཆུ་ཁམས་སྣ་བུག་དོད། །བརྒྱད་པར་མེ་ཁམས་སྣ་བུག་བྱེད། །དེ་ཚེ་རྩངས་པའི་རླུང་སྤྲོའོ། །དགུ་པར་ལྷ་སྦྱིན་རླུང་འབྱུང་སྟེ། །རོ་ཅན་ལྕེ་ནི་བསྐྱེད་པར་བྱེད། །བཅུ་པར་ནོར་ལས་རྒྱལ་གྱི་རླུང་། །བསྐྱེད་ནས་རླུང་བཅུའི་ནུས་པ་རྫོགས། །དེ་ལྟར་ཁམས་དང་སྐྱེ་མཆེད་རྫོགས། །ཟླ་རེ་དྲུག་སྟོང་རྩ་ཆགས་པས། །མངལ་དུ་སྟོང་ཕྲག་ལྔ་བཅུ་བཞི། །སྐྱེས་ནས་ཟླ་བ་གསུམ་པ་ན། །སྟོང་ཕྲག་བདུན་ཅུ་རྩ་གཉིས་རྫོགས། །དགུ་པ་ནས་ནི་མི་གཙང་ཟ། །དེ་ནས་སྙིགས་མའི་ཁམས་འབྱུང་ངོ་། །བཀྲེས་བསྐོམ་རླུང་གི་ཚོར་བ་ཡིས། །སྡུག་བསྔལ་དྲག་པོ་མྱོང་བར་འགྱུར། །དེ་ཚེ་འབྱིན་པའི་རླུང་གིས་ནི། །བསྒྱུར་ནས་སྐྱེ་བར་བྱེད་པ་ཡིན། །མི་ཡི་སེང་གེའི་གནས་སྐབས་སོ། །དེ་ལྟར་ཕུང་པོ་ཁམས་སྐྱེ་མཆེད། །རྩ་རླུང་ཐིག་ལེ་ལས་གྲུབ་པ། །དྲི་མར་བཅས་པའི་སེམས་ཉིད་ལས། །བྱུང་སྟེ་དྲི་བཅས་སྤྲུལ་སྐུར་གསུངས། །ཟབ་མོ་ནང་གི་དོན་རྒྱས་པར་བཤད་པ་ལས། །མངལ་དུ་ལུས་གྲུབ་པའི་ཚུལ་ཏེ་གཉིས་པའོ།། ༈ །།དེ་ནས་རྩ་རྣམས་གནས་ཚུལ་བཤད། །དབུ་མ་རོ་རྐྱང་གཙོ་མོ་དང་། །འཁོར་ལོ་ནད་བསྐྱེད་རྩར་བཅས་དང་། །སྟོང་ཕྲག་བདུན་ཅུ་རྩ་གཉིས་དང་། །དེ་བས་ཕྲ་བ་བཤད་པར་བྱ། །ཐོག་མར་ལུས་བསྐྱེད་གཞིར་གྱུར་པ། །དབུ་མ་སྲོག་རླུང་བཅས་པ་སྟེ། །འཁོར་ལོ་དྲུག་གི་དབུས་ན་ནི། །བར་ཐག་རང་སོར་བཅུ་གཉིས་དང་། །ཕྱེད་བཅས་གསང་བ་སྤྱི་གཙུག་བར། །ཡར་སྣ་ཧཾ་གྱི་རང་བཞིན་གྱི། །དཀར་ཆའི་དངས་མས་བཀག་པའི་ཚུལ། །ལྟེ་བར་མ་ལས་ཐོབ་པ་ཡི། །དམར་ཆ་ཁྲག་སྟེ་ཨ་ཐུང་བརྗོད། །དེ་གཉིས་བར་ན་ཀུན་གཞིའི་རྟེན། །སྲོག་རླུང་གནས་ཏེ་ནམ་མཁའ་འདྲ། །ལྟེ་འོག་མན་ཆད་དུང་ཅན་ཞེས། །དཀར་ཆ་འབབ་པར་བྱེད་པ་ཡིན། །འདི་ནི་སྡོམ་པ་འབྱུང་བ་ནས། །སྙིང་ཁའི་ཆུ་སྐྱེས་དབུས་སོན་པ། །ཆུ་ཤིང་མེ་ཏོག་ལྟར་སྟོང་པ། །ཧཾ་ནི་འཕྱང་ཞིང་འོག་དུ་ལྟ། །མར་སྣ་མར་མེ་ལྟ་བུས་བརྒྱན། །དེ་འོག་བྱང་སེམས་མཉམ་འབབ་པ། །ཨ་བ་དྷུ་ཏིར་ཤེས་བྱ་སྟེ། །ལྷན་ཅིག་སྐྱེས་སྟེར་བྱེད་པའོ། །མདོར་ན་ལུས་ཅན་སྲོག་རྩ་ཡིན། །གཡས་གཡོན་རོ་རྐྱང་གཉིས་པོ་ནི། །ལྟེ་བ་ནས་གྱེས་མཁལ་མར་འབྲེལ། །དེ་ནས་སྙིང་གར་ཅུང་ཟད་འདུས། །མཆན་འོག་བརྒྱུད་ནས་མགྲིན་པར་ཏེ། །རྩེ་ཆུང་ནས་ནི་སྤྱི་བོར་འབྲེལ། །སྣ་བུག་གཉིས་སུ་ཡར་སྣ་འབྱུང་། །འོག་ཏུ་གསུམ་འདུས་ནས་གྱེས་ཏེ། །ཁྲག་དང་དྲི་ཆེན་འབྱིན་སྡོམ་གྱི། །ལས་ནི་གཡས་པ་རོ་མས་བྱེད། །གཡོན་ནས་རྐྱང་མ་དྲི་ཆུ་ཡིས། །འབྱིན་སྡོམ་བྱེད་པར་བཤད་པ་ཡིན། །ལྟེ་སྟེང་ཡན་ཆད་རླུང་རྒྱུ་སྟེ། །ལྟེ་བར་རྩ་ནི་དྲུག་ཅུ་བཞི། །ཕྱི་ནང་རླུང་ཀུན་གསོ་བསྐྱེད་བྱེད། །འདི་ནི་དང་པོའི་སངས་རྒྱས་ལས། །དེ་ནི་ཐུར་དུ་རྩེ་གསུམ་སྟེ། །དེ་བཞིན་གྱེན་དུའང་རྩེ་གསུམ་མོ། །སྒྲ་ཅན་རྩེ་མོ་དབུས་ན་གནས། །ཉི་མའི་རྩེ་མོ་གཡས་པའོ། །ཟླ་བའི་རྩེ་མོ་གཡོན་པའོ། །ཆུ་དང་མེ་དང་ནམ་མཁའ་རྒྱུ། །གཡས་གཡོན་དབུ་མའི་མར་སྣ་ནས། །གཤང་བ་གཅི་བ་ཁུ་བ་རྒྱུ། །ལྕགས་སྒྲོགས་བཅིངས་པ་ལྟ་བུའི་རྩ། །སྲོག་དང་ཐུར་སེལ་ལམ་གསུམ་ཉིད། །འདི་ལས་གྱེས་པའི་རྩ་ཆེན་པོ། །ཉི་ཤུ་བཞི་སྟེ་སྙིང་ཁ་ཡི། །ཡན་ལག་རླུང་ནི་བརྟེན་པའི་རྩ། །ལྔ་དང་གཙོ་མོ་གསུམ་བཅས་པས། །སུམ་ཅུ་གཉིས་ཏེ་རྩ་བ་ཡི། །རླུང་བརྟེན་རྩ་བཅས་སུམ་ཅུ་བདུན། །འདི་ཡི་གཡོན་པའི་ཆར་སྐྱེས་པ། །མི་ཕྱེད་མ་ནི་འཚོགས་མར་གནས། །ཕྲ་གཟུགས་མ་ནི་སྤྱི་གཙུག་འབྲེལ། །བརྩེ་བ་མ་ནི་རྣ་གཡས་ཏེ། །གཡོན་པ་མ་ནི་ལྟག་རྩའོ། །ཐུང་ངུ་ཞེས་བྱ་རྣ་བ་གཡོན། །རུས་སྦལ་སྐྱེས་མ་སྨིན་དབུས་ཏེ། །མིག་གི་ཕྱི་རོལ་སྒོམ་པ་མོ། །དབང་མ་ཕྲག་པ་གཉིས་ཀྱི་རྩ། །སྐྱོན་མ་མཆན་ཁུང་རྩ་ཡིན་ཏེ། །འཇུག་མ་ཞེས་བྱ་ནུ་མའི་རྩ། །མ་མོ་ལྟེ་བའི་རྩ་ཡིན་ཏེ། །སྣ་རྩེར་ཟུགས་པ་མཚན་མོའོ། །ཁ་ལ་གནས་པའི་བསིལ་སྦྱིན་མ། །མགྲིན་དབུས་ཚ་བ་མ་གནས་སོ། །རྐྱང་མ་དེ་དག་ཀུན་བརྟེན་པའོ། །འདི་རྣམས་ཤེས་རབ་རང་བཞིན་ནོ། །རོ་མ་ལ་བརྟེན་ཐབས་ཀྱི་ཆ། །གཞོལ་མ་བྲང་གི་གཞུང་དུ་གནས། །རངས་མ་ལྒངས་པར་འབྲེལ་བ་སྟེ། །ཤིན་ཏུ་གཟུགས་ཅན་མཚན་མར་གནས། །སྤྱི་མ་འོག་སྒོར་འབྲེལ་བ་སྟེ། །རྒྱུ་སྦྱིན་བརླ་ཡི་རྩ་ཆེན་ཡིན། །སྦྱོར་བྲལ་མ་ནི་བྱིན་པར་གནས། །སྡུ་གུ་རྐང་པའི་སོར་མོར་འབྲེལ། །འགྲུབ་མ་བོལ་གོང་རྩ་ཡིན་ཏེ། །འཚེད་མ་རྐང་མཐེབ་སྤུ་འཁྱིལ་རྩ། །ཡིད་བཟངས་པུས་མོའི་གཉན་གོང་གནས། །དེ་ལྟར་ལུས་ཀྱི་གནས་སུ་འདོད། །གསུམ་སྐོར་འདོད་མ་ཁྱིམ་མ་དང་། །གཏུམ་མོ་ཞེས་བྱ་རྩ་བཞི་ནི། །མིག་དང་རྣ་བ་སྣ་དང་ལྕེར། །སྙིང་དབུས་ནས་འབྲེལ་རླུང་རྒྱུའི་རྩ། །བདུད་བྲལ་ལྕེ་ཆུང་དབུས་སུ་ཟུག །འདིར་ནི་ལུས་ཀྱི་སྙིང་དབུས་སུ། །རྩ་ལྔ་པོ་ནི་ཡང་དག་གནས། །སྲོག་ནི་ཨ་བ་དྷུ་ཏཱི་སྟེ། །གཞན་ནི་རྩ་བའི་རླུང་རྒྱུའི་གནས། །དེ་ནས་འཁོར་ལོ་བཞི་དང་དྲུག །བཅོ་བརྒྱད་སོགས་ལ་དབྱེ་བ་ནི། །ལྟེ་བ་སྤྲུལ་པའི་འཁོར་ལོ་ནི། །དབུ་མ་ལས་གྱེས་རྩ་བཞི་ལ། །འཕོ་བ་བཅུ་གཉིས་རིམ་པ་ཡིས། །ལྔ་ཚན་དུ་གྱེས་དྲུག་བཅུ་སྟེ། །གཡས་དང་གཡོན་པའི་འཕོ་བ་བརྟེན། །བཞི་པོ་དབུ་མའི་འཕོ་བ་ཡིན། །མིང་ནི་རྡོ་རྗེ་ཕྲེང་བ་ལས། །ཡང་དག་ཤུགས་དང་ཤིན་དུ་ཤུགས། །ཤིན་དུ་བཟང་དང་བཟང་པོར་འགྲོ། །སྟོབས་ཆེན་དང་ནི་མི་བཟད་ཆེ། །མཛེས་ཆེན་མདུན་དུ་སྐྱེས་པ་ཆེ། །རྒྱགས་པའི་རྟགས་དང་རྒྱགས་པའི་ཆ། །རྒྱགས་པའི་ཆུ་དང་རྒྱགས་སྨྱོ་བྱེད། །བརྒྱགས་དང་བརྒྱགས་པའི་རྒྱུ་མཐུན་དང་། །བརྒྱགས་པའི་རླན་དང་རྒྱགས་པ་འཆང་། །རྩུབ་དང་ཁ་ཆུ་གླང་པོ་དང་། །དབུགས་མི་བདེ་དང་གཡའ་ཁ་འགྲོ། །འདབ་ཆགས་ཡན་ལག་ཁྲ་ཡི་གདོང་། །ཟ་ཕོད་མི་བཟད་སྒྲ་སྒྲོགས་དང་། །དྲི་ལྡན་བརྡེགས་དང་བརཏལ་བ་དང་། །དབྱངས་དང་དབྱངས་སྐྱེས་དང་ནི་སྤྲིན། །ཆུ་བ་མཐོ་དང་རྒྱ་ལྟར་སྔོ། །ཡུད་ཙམ་གཙོ་བོ་ཡུད་ཙམ་སྐྱེས། །རྒྱབ་ཏུ་ཁ་བལྟས་དབྱུག་པ་དང་། །དབྱུག་སྙོམས་དང་ནི་རྙིང་པ་དང་། །ཚིགས་ཀྱི་ལྷ་དང་ཚིགས་ཀྱི་ཚིགས། །ཚིགས་ཀྱི་ཚད་དང་བརཏལ་བ་དང་། །ཚིགས་ཀྱི་གནས་དང་ཚིགས་ཀྱི་གདོང་། །ཚིགས་འོད་ཚིགས་ཀྱི་ལུ་གུ་བརྒྱུད། །དུལ་བྱེད་དུལ་འགྲོ་གཟི་བརྗིད་དང་། །དྲི་མེད་དུལ་བའི་སྙེམས་མ་དང་། །ཆུན་ཕྱང་ལྟོ་དང་ཆགས་པ་ཆགས། །ཆུན་འཕྱང་ཆུན་འཕྱང་ཕྱེད་སྦྲང་བུ། །ཕྲུ་གུ་ཕྲུ་གུ་སྟེར་འགྲོ་བ། །ལོ་མ་ལོ་མའི་མགྲིན་པ་དང་། །རབ་མཆོག་མ་དང་རབ་གསལ་སྟེ། །དེ་ལྟར་དྲུག་ཅུ་རྩ་བཞིའོ། །སྙིང་གའི་འཁོར་ལོའི་རྩ་བརྒྱད་མིང་། །རིན་ཆེན་ཅོད་པན་པདྨ་ཆེ། །རྡོ་རྗེ་ཆེན་པོ་སྟོབས་པོ་ཆེ། །མགོན་པོ་ཆེ་དང་སྒྲ་ཆེ་དང་། །ཉེར་དགའ་ཆེན་པོ་མྱོས་པ་ཆེ། །འདི་རྣམས་འཁོར་ལོས་ལུས་ཀུན་ཁྱབ། །མགྲིན་པར་རྩ་འདབ་བཅུ་དྲུག་ནི། །ལོངས་སྤྱོད་ལོངས་སྤྱོད་སྟེར་དང་གསང་། །ཉི་འགྲོ་གསལ་དང་སྐལ་བ་དང་། །སྒོམ་པ་དང་ནི་ཐལ་བའི་གདོང་། །བཟའ་སྟེར་ཟ་དང་བཀྲེས་པ་དང་། །བཅུད་ལེན་རོས་ནི་བཀུར་བ་དང་། །རོ་འཇིག་པ་དང་རོ་དང་ནི། །ཁྲུང་ཁྲུང་ལོངས་སྤྱོད་འཁོར་ལོར་གནས། །སྤྱི་བོ་བདེ་ཆེན་འཁོར་ལོ་ན། །རིམ་རིག་དང་ནི་འདོད་པ་ཅན། །འདོད་ཅན་མ་དང་སྲོག་གི་ལུས། །ཟླ་ཐུང་ཟླ་སྟེར་མཛེས་པ་ནི། །འདོད་ཅན་མི་སྨྲ་ཀུ་ཤ་དང་། །ཤི་བ་སྤོང་དང་དག་པ་དང་། །མེ་དང་མེ་རོ་ནེ་ཙོ་དང་། །གང་བ་ཉི་དང་རོ་ལྡན་དང་། །ཀོས་རིང་ཆང་སྟེར་བདུད་རྩི་དང་། །དུང་ཅན་དང་ནི་དུང་སྣ་དང་། །དུང་གི་མིག་དང་དུང་གི་རྣ། །བརྒྱགས་དང་དབང་རྒྱགས་སྐམ་པ་དང་། །བརྒྱགས་པས་བརྒྱལ་དང་ངོ་མཚར་བརྒྱགས། །སྙོམས་པ་དང་ནི་ཚིགས་ཀྱི་རྟེན། །སུམ་ཅུ་སོ་གཉིས་ཞེས་ནི་བཤད། །དེ་ལྟར་བརྒྱ་དང་ཉི་ཤུ་ནི། །གཙོ་བོ་ཞེས་ནི་བཤད་པ་ཡིན། །གཙུག་ཏོར་རླུང་དང་མགྲིན་པ་མེ། །གནས་པའི་རྩ་ནི་དགུ་ཡོད་དེ། །སྨིན་མའི་དབུས་ནས་རླུང་འཁོར་ལོ། །བྱེ་བ་འཁྱིལ་པ་མི་ཟད་པ། །མིང་བཟང་བརྟན་དང་མཚན་ཉིད་ཅན། །འཛིན་པ་རྟོག་མེད་གང་བ་ནི། །རྩ་གསུམ་མེ་དང་ཡང་དག་ལྡན། །དུས་ཀྱི་འཁོར་ལོར་གང་གསུངས་པ། །འདི་བདུན་གསང་བའི་གནས་སུ་སྟེ། །སྤྱི་བོ་དང་མཚུངས་གསང་འཁོར་ལོ། །སུམ་ཅུ་རྩ་གཉིས་འདབ་མ་ཡིན། །དེ་དག་དབུས་ན་གནས་པ་ནི། །སྟོང་པ་དྲུག་གི་རྩ་ཡིན་ནོ། །འདི་རྣམས་གསུང་གྱི་སྒོ་ཞེས་བྱ། །ལག་པ་གཡས་པའི་ཚིགས་གསུམ་ལ། །རླུང་གི་ཁམས་ཀྱིས་བསྐྱེད་པ་ཡི། །རྩ་ནི་སུམ་ཅུ་སུམ་ཅུ་གནས། །སོར་མོའི་ཚིགས་ནི་རེ་རེ་ལ། །རྩ་ནི་དྲུག་དྲུག་ཏུ་འགྱུར་ཏེ། །གྲངས་ནི་གོང་དང་མཚུངས་པའོ། །དེ་བཞིན་ལག་གཡོན་མེ་ཡི་ཁམས། །རྐང་པ་གཡས་པ་ཆུ་ཁམས་ཏེ། །གཡོན་པ་ས་ཁམས་སྔ་མ་བཞིན། །དེ་ལྟར་འཁོར་ལོ་བཅུ་གཉིས་ལ། །རྩ་ནི་སུམ་བརྒྱ་དྲུག་ཅུའོ། །སོར་ཚིགས་རྩ་གྲངས་དེ་དང་མཉམ། །ནད་ནི་བསྐྱེད་པར་བྱེད་པའི་རྩ། །གཙུག་ཏོར་རྩ་བཞི་དཔྲལ་བ་ཡི། །བཅུ་དྲུག་བད་ཀན་བསྐྱེད་པར་བྱེད། །མགྲིན་པ་རྩ་ནི་སུམ་ཅུ་གཉིས། །སྙིང་ཁའི་བརྒྱད་རྣམས་མཁྲིས་པ་བསྐྱེད། །ལྟེ་བའི་དྲུག་ཅུ་རྩ་བཞི་དང་། །གསང་བའི་ཕྱི་རོལ་བཅུ་དྲུག་གིས། །རླུང་གི་ཁམས་འཁྲུགས་གསང་བ་ཡི། །ནད་རིམ་བཅུ་དྲུག་འདུས་པ་བསྐྱེད། །དེ་ལྟར་བརྒྱ་དང་ལྔ་བཅུ་དྲུག །འདི་རྣམས་འཁོར་ལོའི་ཕྱི་རིམ་སྟེ། །གཞན་དག་འཁོར་ལོ་ཉིད་དུ་འདོད། །སྟོང་ཕྲག་བདུན་ཅུ་རྩ་གཉིས་ཀྱི། །རྣམ་དབྱེ་རྡོ་རྗེ་ཕྲེང་བ་ལས། །སྟོང་ཕྲག་ཉི་ཤུ་རྩ་བཞི་ནི། །ཟླ་བ་འབབ་པ་རྐྱང་མའི་རིགས། །སྟོང་ཕྲག་ཉི་ཤུ་རྩ་བཞི་ནི། །ཉི་མ་འབབ་པ་རོ་མའི་རིགས། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་དབུ་མའི་རིགས་སུ་བརྗོད། །དེ་ཡང་ལུས་ལ་གནས་པ་ན། །རྩ་ནི་ཉི་ཤུ་རྩ་བཞི་པོ། །མི་ཕྱེད་མ་ནས་ཡིད་བཟངས་བར། །ཐིམ་དང་ལོངས་སྤྱོད་བདག་པོ་ཡི། །དབྱེ་བས་གསུམ་སྟེ་བདུན་ཅུ་གཉིས། །རེ་རེའང་འཁོར་ནི་སྟོང་སྟོང་ངོ་། །དཔེར་ན་སྡོང་པོ་གཅིག་ལས་ནི། །ཡལ་ག་ལོ་འདབ་གྱེས་པ་བཞིན། །དེ་ལས་ཕྲ་བའི་རྩ་རྣམས་ནི། །བྱེ་བ་ཕྲག་ནི་ཕྱེད་དང་བཞི། །བ་སྤུ་བསྐྱེད་པར་བྱེད་པ་ཡིན། །འདི་རྣམས་ཁམས་ཀྱི་རིམ་པ་ནི། །ལྟེ་བ་ས་སྟེ་སྙིང་ཁ་རླུང་། །མགྲིན་པ་མེ་ལ་སྤྱི་བོ་ཆུ། །གཙུག་ཏོར་ནམ་མཁའ་གསང་བ་ནི། །ཡེ་ཤེས་བདེ་བའི་རིགས་སུ་གསུངས། །དེ་བཞིན་བ་སྤུའི་མཐར་ཐུག་པར། །ཁམས་དྲུག་གིས་ནི་རིམ་པར་བསྐྱེད། །གཡས་གཡོན་དབུ་མའི་དབྱེ་བ་ལས། །སྐུ་གསུང་ཐུགས་ཀྱི་རིགས་གསུམ་ཡིན། །དེ་ལྟར་རྩ་ཡི་མཚན་ཉིད་ཤེས། །ལུས་ཀྱི་གནས་ལུགས་རྟོགས་པར་འགྱུར། །ཟབ་མོ་ནང་གི་དོན་རྣམ་པར་བཤད་པ་ལས། །ལུས་ཀྱི་རྩ་རྒྱས་པར་བསྟན་པ་སྟེ་གསུམ་པའོ།། ༈ །།དེ་ནས་རླུང་གི་ངོ་བོ་དང་། །གནས་དང་བྱེད་ལས་རྒྱུ་བའི་ཚུལ། །སྟོབས་དང་སྟོབས་མེད་རིམ་པ་དང་། །འཇུག་ས་གཟུང་ཐབས་སྐྱོན་ཡོན་རྣམས། །རིམ་པ་བཞིན་དུ་འདིར་བཤད་བྱ། །རླུང་ནི་ངག་དང་དུས་སྦྱོར་ཏེ། །ཡི་གེ་ཐམས་ཅད་འདི་ལས་སྐྱེས། །ཐོག་མར་རྣམ་ཤེས་ལ་བརྟེན་པ། །སྲོག་རླུང་ཨ་ཡི་རྣམ་པ་ཅན། །ནམ་མཁའི་ཁམས་ཀྱི་རང་བཞིན་ཡིན། །ཐུར་སེལ་ས་ཁམས་ལྀ་ཡིག་སྟེ། །གྱེན་རྒྱུ་མེ་ཁམས་རྀ་ཡིན་ནོ། །མེ་མཉམ་རླུང་ཁམས་ཨི་ཞེས་བརྗོད། །ཁྱབ་བྱེད་ཆུ་སྟེ་ཨུ་རུ་འགྱུར། །དེ་ནས་ཡན་ལག་རླུང་ལྔ་ནི། །ཀླུ་ནི་སས་བསྐྱེད་ནམ་མཁའ་ཨཱ། །རུལ་སྦལ་རླུང་སྟེ་ཨེ་རུ་བཤད། །རྩངས་པ་མེ་སྟེ་ཨཱ་ཉིད་ཡིན། །ལྷ་སྦྱིན་ཆུ་ཁམས་ཨོ་རུ་འགྱུར། །ཨཱལ་ནི་ས་ཁམས་ནོར་ལས་རྒྱལ། །ཐོག་མར་ཟླ་བ་རེ་རེ་ལ། །རིམ་བསྐྱེད་ད་ལྟར་ལས་ཀུན་བྱེད། །སྡུད་པ་ལོ་ནི་བཅུ་བཅུར་བཤད། །འདི་ནི་ཡེ་ཤེས་རྡོ་རྗེ་ལས། །སེམས་ཉིད་འོད་གསལ་ཡེ་ཤེས་རླུང་། །ཀུན་གཞི་མཁའ་སྟེ་ཉོན་ཡིད་བཅས། །འདུ་བྱེད་རླུང་སྟེ་ཚོར་བ་མེ། །འདུ་ཤེས་ཆུ་ལ་གཟུགས་ནི་ས། །རིམ་པས་བསྐྱེད་བྱ་སྐྱེད་བྱེད་གསུངས། །ད་ལྟར་ལུས་གནས་ལས་བྱེད་པ། །སྤྱིར་ནི་ལུས་རྣམས་ཀུན་ཁྱབ་ཀྱང་། །རྩ་བ་དབུ་མ་སྲོག་རླུང་ནི། །དབུས་གནས་ཀུན་གཞི་བརྟེན་པར་བྱེད། །ནམ་མཁའི་མགོན་པོ་ཞེས་བྱ་བ། །འཆི་བའི་ཚེ་ནི་ཡང་དག་རྒྱུ། །ད་ལྟར་བདག་འཛིན་དྲན་པ་སྐྱེད། །ལོག་ན་བརྒྱལ་སྨྱོ་འཆི་བར་བྱེད། །ལས་དང་ཡེ་ཤེས་འདྲེས་པར་གནས། །ཁ་དོག་ནམ་མཁའ་ལྟ་བུར་བཤད། །ཐུར་སེལ་འོག་ཏུ་གསུམ་འདུས་ནས། །འོག་འགྲོ་དྭངས་སྙིགས་འབྱིན་སྡོམ་བྱེད། །དུང་ཅན་ནང་གནས་བདེ་བའི་ཁམས། །ལོག་ན་སྨད་ཀྱི་ནད་བསྐྱེད་བྱེད། །མེ་མཉམ་མདུན་ཕྱོགས་རྩ་ལས་བྱུང་། །ཕོ་བར་ཟུག་སྟེ་དངས་སྙིགས་འབྱེད། །ལུས་ཀུན་དུ་ཁྱེར་ལོག་གྱུར་ན། །སྤོ་འཁྲོག་འཁྲུ་དང་མ་རུངས་བྱེད། །གྱེན་རྒྱུ་མེ་འཚམས་རྩ་ལས་བྱུང་། །མགྲིན་པའི་གནས་སུ་ལས་ཀུན་བྱེད། །ལུས་ངག་གླུ་གར་སོགས་རྣམས་ཡིན། །ལོག་ན་སྟོད་ནད་ཕལ་ཆེར་བྱེད། །ཁྱབ་བྱེད་གཡས་ཕྱོགས་རོ་མ་དང་། །འབྲེལ་ནས་ལུས་ཚིགས་ཀུན་ལ་གནས། །ལུས་ཀྱི་སྟོབས་བྱེད་དེ་ལོག་པས། །ཡན་ལག་ཞ་རེངས་ནད་ཀུན་བྱེད། །བདེན་བྲལ་རྒྱབ་ཕྱོགས་རླུང་མཚམས་དང་། །གཡོན་ཕྱོགས་དབང་ལྡན་རིམ་པ་ལྟར། །ཀླུ་སོགས་ཡན་ལག་རླུང་ལྔ་སྟེ། །ཀླུ་ཡི་གཟུགས་འཛིན་ལུས་སྒེག་བྱེད། །རུས་སྦལ་སྒྲ་འཛིན་རྐང་ལག་བསྐྱོད། །རྩངས་པ་དྲི་འཛིན་འཁྲོ་འཁྲུག་བྱེད། །ལྷ་སྦྱིན་རོ་འཛིན་གླལ་བ་བྱེད། །ནོར་རྒྱལ་རིག་འཛིན་ལུས་འདི་ལ། །ཤི་ནས་མ་འཐོར་བར་དུ་གནས། །ད་ལྟ་ཐུན་བརྒྱད་རང་བཞིན་ཏེ། །འདི་རྣམས་གཙོ་བོར་བསྟན་པ་ཡིན། །རྒྱུ་ཚུལ་ཕྱི་ནང་གཉིས་ཡིན་ཏེ། །སྲོག་རླུང་སྒྲ་ཅན་རང་བཞིན་ནི། །དབུ་མར་རྒྱལ་པོ་ལྟ་བུར་གནས། །ཇི་ལྟར་སྙིང་ཁའི་འཁོར་ལོ་ལྟར། །འཁོར་ལོ་གཞན་ཡང་དེ་བཞིན་ཏེ། །སྤྱི་བོའི་འཁོར་ལོ་སུམ་ཅུ་གཉིས། །ཟླ་བའི་རྐང་པ་དང་མཚུངས་པའི། །རླུང་རྒྱུ་དེ་ཕྱིར་བཅུ་དྲུག་བཤད། །གཉིས་ནི་སྟོང་པའི་རང་བཞིན་ཏེ། །གཞན་དག་བཅུ་བཞི་རིམ་པ་ལྟར། །ལྔ་པ་གསུམ་དང་བཞི་པ་གཅིག །གསུམ་གཉིས་གཅིག་ནི་རིམ་བཞིན་རྒྱུ། །ཕྱི་མའི་རྩ་བདུན་རིམ་པ་བཟློག །དེ་དག་ཡོན་ཏན་རིམ་པ་ཡིས། །དབྱུག་གུ་ཉེར་བརྒྱད་སྟོང་པ་བཞི། །སྤྱིར་ནི་ཞག་གཅིག་སུམ་ཅུ་གཉིས། །ཡུད་ཙམ་བདག་ཉིད་ཡིན་པར་བརྗོད། །མགྲིན་པར་རྩ་ནི་བཅུ་དྲུག་པོ། །ཐབས་ཤེས་དབྱེ་བས་སུམ་ཅུ་གཉིས། །དེ་ལ་བཞིར་ནི་སྟོང་པ་རྒྱུ། །གཞན་དག་ཕྱོགས་བཞིར་བདུན་བདུན་དུ། །རྒྱུ་སྐར་ལོངས་སྤྱོད་དང་མཚུངས་རྒྱུ། །གཞན་ནས་འཕོ་བ་བཅུ་དྲུག་བཤད། །ལྟེ་བར་རྩ་ནི་དྲུག་ཅུ་བཞི། །ཁྱིམ་གྱི་དབྱེ་བས་ཕྱེ་བས་ན། །ལྔ་ཚན་བཅུ་གཉིས་དྲུག་ཅུ་སྟེ། །དབྱུག་གུ་དྲུག་ཅུའི་བདག་ཉིད་དོ། །བཞི་ནི་སྟོང་པ་དབུ་མར་རྒྱུ། །ཀུན་ཀྱང་མདུན་ཕྱོགས་ཐམས་ཅད་རླུང་། །གཡས་མེ་གཡོན་ཆུ་རྒྱབ་ཕྱོགས་ས། །འཚམས་དང་བཅས་པ་རགས་པ་ཡིན། །དེ་བཞིན་ཚིགས་ཆེན་བཅུ་གཉིས་ཀྱི། །འཁོར་ལོ་རྒྱུ་བ་སུམ་ཅུ་སྟེ། །ཀུན་ལས་སུམ་བརྒྱ་དྲུག་ཅུའི་སྲོག །ཉིང་ལག་དེ་དང་མཚུངས་པ་ཡིན། །དེ་ནས་སྟོང་ཕྲག་ཉི་ཤུ་བཞིར། །འགྲོ་བ་དབུ་མའི་བདག་ཉིད་གསུངས། །དཀར་དམར་གྱིས་ཕྱེ་དེ་དང་མཉམ། །སྟོང་ཕྲག་བདུན་ཅུ་རྩ་གཉིས་སུ། །ཉི་ཁྲི་གཅིག་སྟོང་དྲུག་བརྒྱའི་རླུང་། །དེ་ལྟར་ནང་ན་རྒྱུ་བར་འགྱུར། །གང་ཚེ་ལུག་ཕྱོགས་རྩ་གཅིག་ཏུ། །རླུང་འགགས་དེ་ཚེ་ཕྱོགས་ཀུན་འདྲ། །འདི་ལ་དབྱེ་བ་དཔག་མེད་ཀྱང་། །ཕྱི་རོལ་རྩིས་དང་མཚུངས་པ་ཡིན། །དེ་ནས་ཕྱི་རོལ་རྒྱུ་བ་བཤད། །བ་སྤུ་དབང་པོའི་སྒོ་ཀུན་ནས། །རྒྱུ་ཡང་ཁྱད་པར་འཇུག་པའི་སྒོ། །རྩ་ཆེན་གཉིས་བརྒྱུད་སྣ་བུག་ཏུ། །གཡས་པ་ཉི་མ་དུག་གི་རླུང་། །གཡོན་པ་ཟླ་བ་བདུད་རྩི་སྟེ། །ཐབས་དང་ཤེས་རབ་རང་བཞིན་ནོ། །ཞག་རེ་བཞིན་དུ་དེ་ཡི་རླུང་། །ཁྲི་དང་བཞི་བརྒྱ་དྲུག་ཅུ་གཉིས། །ཕྱེད་བཅས་ཉི་ཟླའི་རླུང་དུ་བརྗོད། །དེ་གཉིས་དབུས་ནས་རྒྱུ་བའི་རླུང་། །དྲུག་བརྒྱ་བདུན་ཅུ་རྩ་ལྔ་ནི། །སྒྲ་གཅན་མཁའ་དང་ཡེ་ཤེས་ཀྱི། །རླུང་སྟེ་གཉིས་སུ་མེད་པ་ཐུགས། །དེ་ལ་ངོ་བོའི་དབྱེ་བ་ཡིས། །ས་སོགས་ལྔ་ཡི་བདག་ཉིད་དོ། །སྐྱེ་དུས་མ་དང་འབྲེལ་པའི་རླུང་། །ཆད་ཅིང་དེ་ནས་སྣར་རྒྱུ་བས། །ཀ་རྐཊ་ཡི་ཁྱིམ་དུ་བཤད། །ད་ནི་དུས་སྦྱོར་བཤད་པར་བྱ། །རྩ་བ་ཡན་ལག་བཅས་པའི་རླུང་། །ལུས་ཀུན་འཁོར་ལོ་རིམ་བརྒྱུད་དེ། །ལྟེ་བར་སྲོག་གི་ནུས་པ་བསྐྱེད། །མཉམ་དང་མི་མཉམ་ཁྱིམ་བཅུ་གཉིས། །རེ་མོས་གཡས་དང་གཡོན་འབྱུང་བས། །ཉི་མ་ལྷོར་བགྲོད་དང་པོ་ལ། །སྣ་བུག་གཡས་ནས་འབྱུང་བའི་རླུང་། །ས་ཆུ་མེ་རླུང་མཁའ་རིམ་བཞིན། །སུམ་བརྒྱ་དྲུག་ཅུ་དྲུག་ཅུ་སྟེ། །ཀུན་ལ་སྟོང་དང་བརྒྱད་བརྒྱའོ། །དེ་འོག་གཡོན་ནས་ཟླ་བའི་རླུང་། །ནམ་མཁའ་རླུང་མེ་ཆུ་ས་ཡིས། །རིམ་པར་གྲངས་ནི་གོང་དང་མཚུངས། །དེ་ལྟར་འཕོ་བ་བཅུ་གཉིས་ལ། །ཉི་ཁྲི་གཅིག་སྟོང་དྲུག་བརྒྱ་སྟེ། །དེ་ལ་ཡེ་ཤེས་རླུང་བཤད་པ། །དྲུག་བརྒྱ་བདུན་ཅུ་རྩ་ལྔ་ཡིན། །འཕོ་བ་ལྔ་བཅུ་དྲུག་བཞི་ཆ། །དབྱུག་གུ་བཅུ་གཅིག་བཞི་ཆ་སྟེ། །མདོར་ན་དབུགས་གཅིག་སོ་གཉིས་ཆ། །གསགས་པས་དེ་ལྟར་གྱུར་པ་ཡིན། །དེ་ཡང་ཕྱེད་ནི་ཕྱིར་རྒྱུ་ལ། །ཕྱེད་ནི་དབུ་མར་རྒྱུ་བས་འཕེལ། །འདི་ནི་གཟའ་ཀུན་རྐང་པ་སྟེ། །ཕྱིར་འགྲོ་འཕེལ་བས་འཆི་ལྟས་ཡིན། །ནང་དུ་ཟིན་ན་འཆི་མེད་འགྲུབ། །ལོ་བརྒྱའི་རྒྱུ་བ་བསྡོམས་པས་ན། །ལོ་གསུམ་ཟླ་བ་ཕྱེད་དང་གཉིས། །ཞག་སོགས་ཤོལ་དང་འཕེལ་འགྲིབ་རྣམས། །འདི་དོན་རྟོགས་པས་མ་ནོར་འཆར། །རྒྱུ་རིམ་ཁ་དོག་སྟོབས་ཡོན་ཏན། །དང་པོ་སྣ་ཡི་ཀ་བ་ནི། །བྱང་སྟེ་གཉིས་ཀའི་ཆུ་ཡིན་ལ། །ཕྱི་རོལ་གཉིས་ནི་མེ་རུ་འདོད། །སྟེང་གཉིས་རླུང་སྟེ་འོག་གཉིས་ས། །དབུས་ནི་ནམ་མཁའ་ཡེ་ཤེས་ཡིན། །ཁ་དོག་ས་ཆུ་མེ་རླུང་མཁའ། །སེར་དཀར་དམར་ནག་སྔོ་བར་འདོད། །འདི་དག་སྟོབས་ནི་གཡས་པ་རྣམས། །སྤེན་ཕུར་བཀྲ་ཤིས་ཉི་མ་མེ། །ས་སོགས་རིམ་པས་གཡོན་པ་རྣམས། །སྒྲ་གཅན་ཟླ་བ་གཟའ་ལྷག་དང་། །པ་སངས་མཇུག་རིང་མཁའ་རིམ་བཞིན། །ཕུང་པོ་ཁམས་སོགས་དེ་མཐུན་ཕྱིར། །ནམ་མཁས་གསད་གསོའི་ལས་ཀུན་འགྲུབ། །རླུང་གིས་སྐྲད་དང་གསད་པ་སྟེ། །དབང་དང་དགུག་པ་མེ་ཡིས་བྱེད། །ཆུས་ནི་ཞི་དང་རྒྱས་པའོ། །རེངས་དང་རྨོངས་པ་ས་ཡི་ལས། །ཡེ་ཤེས་ལས་ནི་ཐམས་ཅད་པ། །ཐུན་མཚམས་མཉམ་དུ་རྒྱུ་དུས་སོ། །ཕྱི་རོལ་ས་ནི་སོར་བཅུ་གཉིས། །ཆུ་མེ་རླུང་མཁའ་བཅུ་དྲུག་བར། །ཡོན་ཏན་དབང་གིས་རིམ་བཞིན་རིང་། །རྟེན་འབྲེལ་རྩིས་དང་དབྱངས་སྦྱར་བ། །ཁོ་བོས་རྩིས་ཀུན་བསྡུས་པར་བཤད། །འདི་ནི་རྡོ་རྗེ་ཕྲེང་བ་ལས། །སྣ་ཡི་བུ་ག་ལས་བྱུང་ཞིང་། །རླུང་ལྔ་སྟེང་དུ་ཡང་དག་རྒྱུ། །གཡོན་པ་གཡས་དང་གཉིས་ཀ་དང་། །དལ་བར་རྒྱུ་བ་རྣམ་པ་བཞི། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་པོ་བཟང་པོ་འདི། །པད་མའི་མགོན་པོ་རྒྱུ་བའོ། །གཡོན་པ་ནས་ནི་འབྱུང་པའི་ཁམས། །རླུང་གི་དཀྱིལ་འཁོར་དང་འདྲེས་པ། །ལྗང་སེར་དག་དུ་སྣང་བ་སྟེ། །ལས་ཀྱི་མགོན་པོ་རྒྱུ་བའོ། །གཉིས་ཀ་ནས་ནི་འབྱུང་བའི་ཁམས། །གསེར་མདོག་དབང་ཆེན་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུ་ཡི་དཀྱིལ་འཁོར་ཏེ། །རྡོ་རྗེའི་མགོན་པོ་རྒྱུ་བའོ། །ཁམས་ཀུན་ལས་ནི་ཡང་དག་འབྱུང་། །རྟེན་དང་བརྟེན་པས་བཟུང་བ་ནི། །རྣམ་པར་སྣང་མཛད་རང་བཞིན་ཏེ། །འཆི་བའི་མཐར་ནི་འབྱུང་བར་འགྱུར། །དཀྱིལ་འཁོར་བཞི་པོ་དེ་དག་ནི། །མཉམ་པར་བཞག་པས་རྟག་ཏུ་ཟློས། །ཞེས་གསུངས་དོན་ནི་བཟླས་པ་ཡི། །དག་པ་བསྟན་ཏེ་གོང་མ་དང་། །འགལ་བའི་ཐེ་ཚོམ་བསྐྱེད་མི་བྱ། །དེ་ལྟར་རླུང་ནི་སྣ་རྩེར་ནི། །ཁ་དོག་ལྔ་པར་རྣམ་པར་བསྒོམ། །སྔགས་བཟླས་པ་ཡི་གྲངས་ཀྱིས་ནི། །ཉིན་མཚན་རྟག་ཏུ་ཟློས་ཞེས་བཤད། །འཇུག་སྒོ་སྟེང་ནས་སྣ་བུག་གཉིས། །ཁ་དང་འོག་དུ་ལམ་གསུམ་དང་། །ལུས་ཀུན་ཡིན་ཏེ་རྣམ་པ་བཞི། །གཟུང་ཐབས་དབྱུང་རྔུབ་གནས་ལྡོག་དང་། །དག་པ་བགྲང་ཞིང་བརྩི་བ་སྟེ། །མི་རྟོག་རྒྱ་ཡན་བཅིང་པ་ནི། །ཞི་གནས་བསྐྱེད་པར་གསུངས་པ་ཡིན། །ཁ་དོག་དབྱིབས་ལ་རྣམ་པར་སྦྱངས། །མངོན་ཤེས་ཟད་པར་འབྱུང་པའི་རྒྱུ། །བུམ་ཅན་སྟེང་འོག་བར་གསུམ་དང་། །རྣམ་གྲོལ་བཅས་པ་ལས་ཀུན་བྱེད། །ཕན་ཡོན་རྣམ་པ་བརྒྱད་ཡིན་ཏེ། །ཉི་ཟླ་སྒྲ་གཅན་གཙོ་བོ་གསུམ། །དུག་གསུམ་རྣམ་རྟོག་འཇོམས་པ་དང་། །རྡོ་རྗེ་རྣམ་གསུམ་ཐོབ་བྱེད་ཡིན། །དེ་ནི་ཉི་མའི་ཡོན་ཏན་གསུངས། །གཟུགས་སྒྲ་དྲི་རོ་རེག་བྱ་ཡི། །ཡུལ་ལྔ་དབང་བྱེད་ཟླ་བའི་རླུང་། །དེ་ནི་གཟུང་འཛིན་དག་བྱེད་ལ། །བརྟན་དང་སྣུམ་དང་གསལ་དང་མགྱོགས། །དག་ཅིང་ཤེས་རབ་ཆེ་ལྡན་པ། །ས་སོགས་ལུས་ལ་ཡོན་ཏན་བཤད། །མདོར་ན་རླུང་ནི་རྟོག་པ་སྟེ། །གཡོ་དང་ཕྲ་དང་གཞན་སྐྱོད་བྱེད། །སེམས་ཉིད་གསལ་ལ་མི་རྟོག་པ། །ངོ་བོ་ཡེ་ཤེས་རླུང་ཆེན་པོ། །གཉེན་པོ་ཡེ་ཤེས་རླུང་ཆེན་ནི། །ཡང་དག་རྟོག་པའི་འདུ་བྱེད་བཤད། །ཀུན་གཞི་ལ་གནས་ཉོན་ཡིད་ནི། །གཏི་མུག་བསྐྱེད་པའི་རླུང་དུ་བཤད། །འདུ་བྱེད་ཡེ་ཤེས་སྣང་ཆ་ལ། །གཞན་རྟོག་ཆགས་པའི་རླུང་ཞེས་བྱ། །རྣམ་ཤེས་བླང་དོར་དཔྱོད་པའི་རླུང་། །ཞེ་སྡང་རླུང་སྟེ་དེས་བསྐྱེད་ནས། །ཁམས་གསུམ་རླུང་གིས་འདུ་བྱེད་ཅེས། །གསུངས་པས་སྐྱོན་དང་ཡོན་ཏན་ཀུན། །རླུང་བརྟེན་དེ་ལྟར་རྟོགས་བྱས་ནས། །རླུང་གི་སྦྱོར་ཤེས་ཕ་རོལ་འགྲོ། །རླུང་གིས་འཁོར་བར་འཁོར་བྱེད་ལ། །དེ་གཅོད་བྱེད་པའང་འགྲུབ་པར་འགྱུར། །ཕྱི་ནང་རླུང་མིང་བྱེད་ལས་ཀུན། །རྒྱལ་བས་མདོ་རྒྱུད་ལས་གསུངས་པ། །འདིར་ནི་བསྡུས་ཏེ་བསྟན་པ་ཡིན། །ཟབ་མོ་ནང་གི་དོན་རྣམ་པར་བཤད་པ་ལས། །རླུང་གི་རྒྱུ་ཚུལ་བསྟན་པ་སྟེ་བཞི་པའོ།། ༈ །།དེ་ནས་རྩ་དང་རླུང་བསྟན་ནས། །ཐིག་ལེ་གནས་དང་རྒྱུ་ཚུལ་ནི། །རྩ་བ་སྤྲོས་བྲལ་ཐིག་ལེ་དང་། །འཁྲུལ་པ་མ་རིག་ཐིག་ལེ་དང་། །དེ་ཡི་གཉེན་པོ་ཐིག་ལེ་གསུམ། །དང་པོ་རང་སེམས་ལྷན་ཅིག་སྐྱེས། །ངོ་བོ་སྟོང་པ་སྤྲོས་བྲལ་ཏེ། །རང་བཞིན་གསལ་བ་ལོངས་སྤྱོད་རྫོགས། །འགག་མེད་ཐུགས་རྗེ་ཅིར་ཡང་འགྲུབ། །དེ་གསུམ་རྟགས་ནི་ད་ལྟ་ཡང་། །ཐམས་ཅད་སྟོང་པར་སྣང་བ་དང་། །དབྱིངས་རིག་རྟགས་བཅུ་འཆར་བ་དང་། །ཡུལ་སྣང་ནུས་པ་འབྱིན་པ་སྟེ། །གསུམ་པོ་སླུ་མེད་ཡུལ་རྟགས་ཏེ། །ཡུལ་ཅན་དེར་འབྲེལ་ཤེས་པའོ། །དེ་ནི་རྟོགས་བྲལ་མ་འཁྲུལ་བ། །རྩ་བ་སྤྲོས་བྲལ་ཐིག་ལེ་ཡིན། །རྒྱས་པར་མདོ་རྒྱུད་ཀུན་ནས་གསུངས། །འཁྲུལ་པ་མ་རིག་ཐིག་ལེ་ནི། །མ་རིག་འདུ་བྱེད་རྣམ་ཤེས་ལས། །ཀུན་བརྟགས་མིང་གཞི་ལས་བསྒྱུར་བ། །བརྟགས་པ་སྔགས་ཀྱི་ཐིག་ལེ་དང་། །གཞན་དབང་ཡིད་ཀྱི་ནུས་པ་ལ། །རླུང་གི་ཐིག་ལེ་ཞེས་སུ་བཤད། །ཡུལ་སྣང་གཟུགས་ཀྱི་ཕུང་པོ་ལ། །ཁམས་ལྔ་རྫས་ཀྱི་ཐིག་ལེ་ཞེས། །རྒྱལ་བས་རྣལ་འབྱོར་རྒྱུད་དུ་གསུངས། །དེ་ལ་རྫས་ཀྱི་ཐིག་ལེ་ལ། །ཕྱི་ནང་གཉིས་ཏེ་ནང་གི་དོན། །དང་པོ་སྐྱེ་བར་སྦྱོར་བའི་ཚེ། །བར་དོ་ཤེས་པའི་ངོ་བོ་དེ། །ཕ་མའི་རྐྱེན་ལས་ཞེན་པ་ཡིས། །ཁམས་འགྱུར་གོང་དུ་བསྟན་པ་བཞིན། །ད་ལྟ་གནས་ཚེ་དངས་སྙིགས་གཉིས། །རླུང་སེམས་དངས་མ་སྔར་བསྟན་ལ། །ཐིག་ལེའི་དངས་མ་དཀར་དམར་གཉིས། །དཀར་ཆ་དབུ་མའི་ཡར་སྣ་ན། །ཧཾ་གི་རང་བཞིན་ཡུངས་དཀར་ཙམ། །དཀར་ལ་སྣུམ་པ་ཤེལ་དང་མཚུངས། །ཕ་ལས་ཐོབ་པ་ཀུན་གྱི་མཆོག །དམར་ཆ་རྩ་གསུམ་འདུས་པ་ན། །དམར་གསལ་རྒོད་མའི་མེ་འདྲ་བ། །ཨ་ཐུང་ཕག་མོའི་རང་བཞིན་ཏེ། །དཔྱིད་དང་ཐིག་ལེ་ཞེས་ཀྱང་བཤད། །དེ་གཉིས་ཀུན་གཞི་སྲོག་རླུང་རྟེན། །བྱང་ཆུབ་སྙིང་པོའི་ངོ་བོ་ཞེས། །སྡོམ་འབྱུང་རྡོ་རྗེ་མཁའ་འགྲོར་གསུངས། །དེ་བསྟེན་སྙིགས་ཀྱང་དངས་སྙིགས་གཉིས། །དམར་ཆ་མེས་སྐྱེད་གྱེན་འགྲོ་ལ། །དཀར་པོ་སྤྱི་བོ་ནས་འོག་འགྲོ། །དང་པོ་སྦྱིན་སྲེག་རྒྱུས་བསྐྱེད་པ། །ཕྱི་རོལ་ཟས་ཀྱི་དངོས་པོ་རྣམས། །བསྲེགས་རྫས་ལག་པ་དགང་བླུགས་ཏེ། །ཁར་ནི་ཕུང་པོའི་ལྷ་ལ་མཆོད། །ཕོ་བར་ལས་བྱེད་ལྷ་གསུམ་སྟེ། །མེ་མཉམ་རླུང་དང་བད་ཀན་ནི། །མྱགས་བྱེད་མཁྲིས་པ་འཇུ་བྱེད་གསུམ། །བསྲེགས་བཞུ་སྦྱངས་ནས་དེ་ཡི་དྭངས། །མཆིན་པར་རྩ་ཆེན་དག་ལ་བརྒྱུད། །ཁྲག་ཆེན་གྱུར་ནས་རྩ་ཀུན་འགྲོ། །ཁྲག་གིས་ཤ་བསྐྱེད་དེ་ལས་ཚིལ། །རུས་པ་རྐང་དང་ཁུ་བ་སྟེ། །ལུས་ཟུངས་དངས་མ་བདུན་ཞེས་བྱ། །ཕོ་བའི་སྙིགས་ལས་སྐ་སླ་གཉིས། །སྐ་བ་རྒྱུ་མར་བརྒྱུད་ནས་འགྲོ། །སླ་བ་རྒྱུ་སྒྲོགས་ནས་སོང་ནས། །ལྒང་པ་ནས་ནི་འབབ་པར་བྱེད། །ཁྲག་སྙིགས་མཆིན་ལས་མཁྲིས་པ་ནི། །བསྐྱེད་ནས་དེ་སྙིགས་འོག་དུ་འགྲོ། །མཁྲིས་པའི་སྙིགས་ཆུའི་ཀུ་ཡ་དང་། །དྲི་ཆེན་དྲི་དང་སེར་པོ་བྱེད། །ཤ་ཡི་སྙིགས་མ་ལྤགས་དྲི་མ། །ཚིལ་སྙིགས་རྨེན་བུར་འགྱུར་བ་སྟེ། །རུས་སྙིགས་སོ་དང་སེན་མོ་ཡིན། །རྐང་སྙིགས་སྦུབས་ཀྱི་མཆིལ་སྣབས་བཤད། །ཁུ་བའི་སྙིགས་མ་འོག་དུ་འབབ། །དངས་མ་སྟོབས་དང་ཁ་དོག་བྱེད། །དེ་ནི་སྤྱི་ཙམ་བཤད་པ་ཡིན། །རྒྱས་བཤད་ཁམས་ནི་སུམ་ཅུ་དྲུག །བཞི་ནི་མིག་སོགས་ཤེས་པ་དང་། །འབྲེལ་པ་མཆོད་པ་བཞི་ཞེས་བྱ། །བདུད་བྲལ་ནས་བྱུང་ཁམས་དེ་ནི། །སྟེང་འགྲོ་ལྕེ་ཆུང་དབུས་སུ་ཟག །རྒྱུ་དེས་ནག་ཕྱོགས་དང་མཐུན་བཤད། །འདི་ཡང་རེག་བྱའི་ཕྱོགས་གཅིག་འཛིན། །རྩ་བའི་རླུང་ལྔ་དང་འབྲེལ་བ། །སྔར་བཤད་འདིར་ཡང་དབུ་མའི་ཆ། །སྟེང་དུ་རླུང་གསུམ་འོག་ཕྱོགས་སུ། །དྲི་ཆུ་ཁུ་བ་རྣམ་གསུམ་བརྟེན། །ཁྱད་པར་མར་སྣ་དུང་ཅན་མ། །བཅོ་ལྔ་ཆ་ཡི་ཐིག་ལེ་ནི། །གང་བ་བདེ་བ་སྐྱེ་བའི་རྩ། །རོ་མས་ཁྲག་གི་ཁམས་འཛིན་པས། །སྐྱེས་པ་བུད་མེད་ཁྱད་པར་བྱེད། །དབང་མཆོག་བསྐྱེད་པར་བྱེད་པའོ། །འདི་ནི་ཁ་སྦྱོར་ཐིག་ལེ་ལས། །ཕྱོགས་བཞི་འདབ་མའི་རྩ་གནས་པ། །འབྱུང་བ་ཆེ་རྣམས་མར་མེའི་དངོས། །ཚམས་རྩར་བདུད་རྩི་ལྔ་འབབ་གནས། །དེར་བརྟེན་མཆོད་པ་བཞི་ཞེས་བཤད། །འདི་ནི་ལུས་ཀྱི་སྙིང་དབུས་སུ། །རྩ་ལྔ་པོ་ནི་ཡང་དག་གནས། །སྐུ་གསུང་ཐུགས་ཀྱི་བྱེ་བྲག་གིས། །ཉི་ཤུ་རྩ་བཞི་ཉེ་བར་བརྗོད། །གནས་སོགས་བྱེ་བྲག་ལ་བརྟེན་ནས། །གནས་གནས་སུ་ནི་ཉེ་བར་བརྗོད། །དེ་ནས་དེ་རྣམས་ལས་བྱུང་བ། །ཁམས་ནི་ཉི་ཤུ་རྩ་བཞི་པོ། །སྔར་བཤད་རྩ་དང་བཅས་པ་ནི། །མི་བྱེད་པུ་ལླི་ར་ཡིན་ཏེ། །སོ་དང་སེན་མོ་འབབ་པར་བརྗོད། །པྲ་མོ་ཛཱ་ལན་དྷ་ར་སྟེ། །དེ་བཞིན་སྐྲ་དང་བ་སྤུ་འབབ། །རྩེ་བ་མ་ནི་ཨཽ་ཊྭན་ཏེ། །རྣ་གཡས་བརྟེན་ཏེ་པགས་པ་འབབ། །གཡོན་པ་མ་ནི་ཨརྦུ་ཏ། །རྒྱབ་སོགས་ཤ་རྣམས་འབབ་པའོ། །དཀར་ཆ་རྟག་ཏུ་གནས་པས་གནས། །གཽ་ཏ་ཝ་རཱི་ཐུང་ངུ་མ། །རྒྱུས་པ་བསྐྱེད་པའི་ཁམས་རྣམས་འབབ། །རཱ་མེ་ཤཱ་ར་རུས་སྦལ་སྐྱེས། །རུས་པའི་ཕྲེང་བ་འབབ་པ་ཡིན། །དེ་ཝི་ཀོ་ཊི་སྒོམ་པ་མོ། །མཆིན་པའི་ཤ་ཀུན་བསྐྱེད་པ་ཡིན། །དབང་བསྐུར་མཱ་ལཱ་ཝ་ཞེས་བྱ། །སྙིང་གི་ཤ་བསྐྱེད་བྱེད་པ་སྟེ། །རྟག་ཏུ་ཉེ་བའི་གནས་ཞེས་བརྗོད། །སྐྱོན་མ་ཞེས་བྱ་ཀཱཾ་རུ་སྟེ། །མིག་འབྲས་ཤ་རྣམས་འབབ་པ་ཡིན། །མཇུག་མ་ཨོ་ཊི་ཡ་ཡིན་ཏེ། །ནུ་མཚམས་ནས་བརྒྱུད་མཁྲིས་པ་བསྐྱེད། །མ་མོ་ཏྲི་ཤ་ཀུ་ན་སྟེ། །གློ་བ་བསྐྱེད་པར་བྱེད་པའོ། །མཚན་མོ་ཞེས་བྱ་ཀོ་ཤ་ལ། །རྒྱུ་མའི་ཕྲེང་བ་འབབ་པར་བྱེད། །ལོངས་སྤྱོད་ཞིང་དང་ཉེ་ཞིང་བརྗོད། །བསིལ་སྦྱིན་ཀ་ལིངྐ་ཡིན་ཏེ། །སྟ་ཟུར་ནས་འབྲེལ་གྲོད་པ་བསྐྱེད། །ཚ་བ་མ་ནི་ལམ་པཱ་ཀ། །ལྟོ་བ་གཉེ་མ་བསྐྱེད་པ་ཡིན། །གཞོལ་མ་ཀཱཉྩྨིར་བཤད་པ་སྟེ། །བཤང་བ་འབབ་པའི་བདག་རྐྱེན་བྱེད། །རངས་མ་ཧི་མཱ་ལ་ཡ་སྟེ། །མཚམས་དབུས་འགེབས་པའི་རྒྱུངས་པ་འབབ། །དངས་སྙིགས་འདྲེས་པར་གནས་པས་ན། །ཚནྡོ་ཉེ་བའི་ཙྪནྡོར་བཤད། །པྲེ་ཏ་པུ་ར་གཟུགས་ཅན་མ། །རྟག་ཏུ་རྣག་ནི་འབབ་པ་ཡིན། །གྲྀ་ཧ་དེ་བ་ཐུན་མོང་མ། །བད་ཀན་འབབ་པར་བྱེད་པའོ། །རྒྱུ་སྦྱིན་སཽརཥྚ་ཧླ་སྟེ། །ཁྲག་གི་ནུས་པ་བསྐྱེད་པར་བྱེད། །སྭརྑ་དྭཱི་པ་སྦྱོར་བྲལ་མ། །རྟག་ཏུ་རྔུལ་ནི་འབབ་པར་བྱེད། །དངས་སྙིགས་འདུ་དང་ཉེ་འདུར་གསུངས། །སྡུ་གུ་ཞེས་བྱ་ན་ག་ར། །ཚིལ་ནི་འབབ་པར་བྱེད་པ་ཡིན། །འགྲུབ་མ་ཞེས་བྱ་སིན་དྷུར་བརྗོད། །མཆི་མ་བསྐྱེད་པར་བྱེད་པ་ཡིན། །མ་རུ་ཞེས་བྱ་འཚེད་མ་སྟེ། །ལུད་པ་མཆིལ་མ་བསྐྱེད་ཅིང་འབབ། །ཀུ་ལུ་ཏ་ནི་ཡིད་བཟང་སྟེ། །རྟག་ཏུ་སྣ་ཆུ་འབབ་པ་ཡིན། །བདེ་མེད་དུར་ཁྲོད་དེ་ཉེ་བའོ། །དེ་ལྟར་ཁམས་ནི་ཉི་ཤུ་བཞི། །ཐིམ་པ་སྙིགས་མར་གྱུར་པ་སྟེ། །ལོངས་སྤྱོད་དངས་མ་ཀར་ཆ་ཡིན། །བདག་པོ་རྩ་བ་རླུང་ཁྲག་འདྲེས། །རེ་རེའང་སྟོང་ཕྲག་གསུམ་གསུམ་སྟེ། །རླུང་དང་དཀར་དམར་གསུམ་བདག་ཉིད། །བ་སྤུའི་མཐར་ཐུག་ཀུན་དུ་ཁྱབ། །ཁྱད་པར་དངས་མ་ཟླ་བ་ནི། །སྤྱི་བོ་ནས་ནི་བཅུ་དྲུག་རྩ། །ཁམས་བཞི་ལྡན་པ་མགྲིན་པར་འབབ། །བཅུ་དྲུག་ཕྱེད་ཕྱེད་ཐིག་ལེ་ཅན། །མེ་ལ་གཅིག་ཏུ་འབབ་པས་ན། །དུང་ཅན་མཐར་ནི་འཛག་པར་བྱེད། །ལུས་ཅན་ཀུན་གྱི་སྙིང་དགའ་བས། །ཆགས་བསྐྱེད་རྨོངས་བྱས་སྡང་སེམས་སྐྱེ། །འཁོར་བར་བསྐྱེད་བྱེད་གཞིར་གྱུར་ཏོ། །རྒྱལ་བས་གསུངས་པའི་ཐབས་ལྡན་པས། །འཛག་བྲལ་དངུལ་ཅུ་ལྟ་བུར་ནི། །ཕྱག་རྒྱ་གསུམ་གྱི་མེས་བཅིངས་ན། །རྒྱལ་མཚན་རྩ་བཞི་དག་པ་རུ། །འགག་པས་བདེན་མཐོང་དོན་ལ་སྦྱོར། །རྗེས་དྲན་བཅུ་དྲུག་དང་ལྡན་པས། །བརྟེན་བྱས་གྱེན་ལ་འགྲོ་བ་ཡིན། །ས་ནི་བཅུ་གཉིས་རིམ་པ་ལྟར། །ཐོབ་བྱེད་དགའ་བ་བཅུ་དྲུག་ནི། །མཐར་སོན་རྟེན་འབྲེལ་བཅུ་གཉིས་དག །ལུས་ཀུན་མཚན་དཔེའི་མེ་ཏོག་རྒྱས། །སྐད་ཅིག་མངོན་པར་བྱང་ཆུབ་ཞེས། །བཅོམ་ལྡན་དེ་ཉིད་གཟིགས་པས་གསུངས། །སྙིགས་མ་ཕལ་ཆེར་ནད་བསྐྱེད་པ། །ཀླད་པ་དཀར་ཆ་བད་ཀན་ཏེ། །སྟེང་དུ་གནས་ཀྱང་ས་ཆུ་ཡི། །རང་བཞིན་ཐུར་ལ་འབྱུང་བ་སྟེ། །ལྟེ་བ་གསང་བ་རླུང་རང་བཞིན། །འོག་ཏུ་གནས་ཀྱང་གྱེན་ལ་འགྲོ། །འཁྲིས་ཁྲག་མཆིན་བརྟེན་བར་གནས་ཀྱང་། །རླུང་ལྡན་མེ་བཞིན་གྱེན་དུ་འབར། །བད་ལྡན་ཆུ་བཞིན་འོག་ཏུ་འགྲོ། །བད་ཀན་གཏི་མུག་ལྡན་པ་སྟེ། །མཁྲིས་པ་ཞེ་སྡང་ལྷན་ཅིག་ཉིད། །རླུང་དང་ཆགས་ལྡན་ཀུན་གྱི་གྲོགས། །ཆུ་མེ་རླུང་གསུམ་ནད་ཡིན་ཏེ། །ལུས་ལ་ནད་བྱེད་སེམས་ལ་ཡང་། །བདེ་དང་རྟོག་དཔྱོད་རྟོག་པ་གཡོ། །གསུམ་གྱིས་བསམ་གཏན་སྐྱོན་ཡིན་ལ། །དེ་ཡི་རྒྱུ་ཡིས་འཇིག་རྟེན་འཇིག །མཁའ་དང་ས་ནི་དེ་གཉིས་ཀྱི། །བརྟེན་བྱེད་སྐྱོན་ནི་མེད་པ་ཡིན། །དེ་ཕྱིར་མཁས་པས་དེ་གཉིས་ཀྱི། །གནད་ཤེས་གསུམ་པོའི་སྐྱོན་གཞོམ་བྱ། །དེ་ལྟར་རྫས་སྔགས་རླུང་གསུམ་གྱི། །ཐིག་ལེ་མ་རིག་དང་འབྲེལ་བས། །འཁོར་བ་བསྐྱེད་པར་གསུངས་པ་སྟེ། །ཐབས་ཀྱིས་ཟིན་པས་གཉེན་པོར་བཤད། །སྒོམ་པར་བྱེད་པའི་རྒྱུ་མཚན་ཡང་། །བཅོམ་ལྡན་རྡོ་རྗེ་སེམས་དཔའ་ཡིས། །ཡུན་རིངས་ཆགས་ཆེན་དབང་སོང་བས། །སྲིད་པ་གསུམ་དུ་སྐྱེས་པ་རྣམས། །དེ་དག་གྲོལ་བའི་དོན་དུ་ནི། །རྫས་ཀྱི་ཐིག་ལེ་གསུངས་པ་ཡིན། །ཞེ་སྡང་ཆེན་པོའི་དབང་སོང་བས། །མི་གང་མི་སྲུན་པ་ཡི་ལུས། །དེ་རྣམས་མྱུར་དུ་གྲོལ་དོན་དུ། །སྔགས་ཀྱི་ཐིག་ལེ་གསུངས་པ་ཡིན། །གཏི་མུག་ཆེན་པོས་ཀུན་ནས་འཁྲུལ། །སྲིད་སྐྱོབ་དངོས་གྲུབ་འབྲས་བུ་བརྒྱད། །ཐོབ་ཕྱིར་ཡེ་ཤེས་འབྲས་བུ་ནི། །རླུང་གི་ཐིག་ལེ་གསུངས་པ་ཡིན། །དེ་ལྟར་རྩ་རླུང་ཐིག་ལེ་གསུམ། །རྟེན་ཅིང་འབྲེལ་བར་སྣང་བ་ནི། །རྟེན་གྱུར་རྡོ་རྗེའི་ལུས་ཞེས་གསུངས། །ཟབ་མོ་ནང་གི་དོན་གསལ་བར་བྱེད་པ་ལས་ཐིག་ལེ་གསུམ་བསྟན་པ་སྟེ་ལྔ་པའོ།། ༈ །།དེ་ནས་རྣམ་ཤེས་སོགས་འབྲེལ་བ། །མདོར་བསྡུས་རགས་པ་བཤད་པར་བྱ། །ཐོག་མར་བསྐྱེད་ཚུལ་གོང་དུ་བཤད། །གནས་དུས་གནས་སྐབས་བཞི་ཡིན་ཏེ། །གཉིད་དང་རྨི་ལམ་སྙོམ་འཇུག་དང་། །ཐ་མལ་དུས་དང་རྣམ་པ་བཞི། །མ་དག་སྐུ་བཞིའི་གནས་སྐབས་ཡིན། །དབྱེ་བ་རྣམ་པ་མང་བཤད་ཀྱང་། །གཉིད་དུས་ཀུན་གཞི་གཙོ་བོ་སྟེ། །སྙིང་ཁ་ཆོས་ཀྱི་འཁོར་ལོར་གནས། །ཚོགས་དྲུག་མི་གསལ་གཅིག་དུ་བསྡུས། །དག་ན་འོད་གསལ་འབྲས་བུ་ནི། །མེ་ལོང་ལྟ་བུ་ཞེས་ཀྱང་བྱ། །ཆོས་སྐུ་སྤྲོས་བྲལ་ངོ་བོ་ཉིད། །བག་ཆགས་བརྟེན་ཀྱང་མི་གསལ་ཞིང་། །འདུ་བྱེད་གཡོ་བའི་རྐྱེན་ཡོད་ཕྱིར། །མ་རིག་དྲི་མ་ཅན་ཞེས་བྱ། །གང་ཟག་ཆོས་ལ་བདག་མེད་པ། །ཅིག་དང་ཕྱེད་དང་གཉིས་དང་གཉིས། །རིམ་པར་གཉེན་པོའི་ཤེས་པ་སྟེ། །དེས་སྦྱངས་ཐེག་གསུམ་སོ་སོ་ཡི། །རྒྱུན་མཐའ་རྡོ་རྗེ་ལྟ་བུ་ཡིས། །དྲི་བཅོམ་དག་པ་གསུམ་ཐོབ་གསུངས། །དེ་ཕྱིར་གསལ་ལ་མི་རྟོག་པའི། །ཉིན་མཚན་གཉིས་ཀྱི་འོད་གསལ་སྒོམ། །རྣམ་ཀུན་མཆོག་ལྡན་སྟོང་པ་ཉིད། །ཕྱག་རྒྱ་ཆེ་ལ་རོལ་པར་བྱ། །གཉིས་པ་རྨི་ལམ་ཤེས་པ་ནི། །བག་ཆགས་ཉོན་མོངས་ཅན་གྱི་ཡིད། །སྲོག་རླུང་འདུ་བྱེད་བཅས་ཏེ་ལངས། །རྩ་གནས་བརྒྱུད་དེ་གཟུང་དང་འཛིན། །གཉིས་སྣང་འཁྲུལ་པར་བྱེད་པ་ཡིན། །དག་ན་ལོངས་སྤྱོད་རྫོགས་པ་སྟེ། །གསལ་ལ་མ་འདྲེས་སྟོང་པར་གནས། །མ་དག་འཁྲུལ་པའི་སྣང་བ་ཡང་། །སྟེང་སོང་སྤྱི་བོར་ལྷ་ཡུལ་དང་། །མཁའ་སྣང་མཐོར་ཕྱིན་གྱེན་དུ་འགྲོ། །གཟུགས་སྒྲ་ལ་སོགས་མ་འདྲེས་འཆར། །འོག་འགྲོ་དམྱལ་སོགས་སྣང་བ་དང་། །ཐུར་འགྲོ་བྲག་རོང་ཐིབས་པོ་དང་། །མུན་ཁུང་སོགས་འཆར་སྣང་བ་འབྱུང་། །བར་དུ་གླིང་བཞི་ས་སྟེང་སྟེ། །མདུན་གཡས་རྒྱབ་དང་གཡོན་ཕྱོགས་སུ། །ཤར་ལྷོ་ནུབ་བྱང་སྣང་བ་འབྱུང་། །རྩ་གནས་ཡངས་ལ་ཡངས་པར་སྣང་། །དོག་ལ་དོག་སྣང་དེ་བཞིན་དུ། །ཁམས་ཀྱི་རྐྱེན་གྱིས་ཡུལ་དེར་ཡང་། །རླུང་ལ་རྫས་དང་གོས་སྔོ་ནག །བྱ་ནག་འཕུར་དང་རྟ་ཞོན་དང་། །ནོར་བུ་སྔོ་དང་རིག་པ་དངས། །ཡང་ན་མི་བརྟན་དུ་མ་འཆར། །འཁྲིས་ཁྲག་གནས་སོང་མེ་དང་ནི། །གོས་དམར་ས་དང་གསེར་སྣང་དང་། །བཙུན་པ་དེ་བཞིན་སྣ་ཚོགས་སྣང་། །བད་ཀན་དཀར་ཆའི་གནས་རེག་ན། །ཆུ་དང་ཁ་བ་མུ་ཏིག་དང་། །གོས་དཀར་བུད་མེད་གླང་པོ་དང་། །དངུལ་སོགས་དུ་མ་སྣང་བ་སྟེ། །ཇི་ལྟར་རྩ་རླུང་ཁམས་ཀྱི་རིམ། །བག་ཆགས་ལ་བརྟེན་སྣང་བ་ནི། །རྒྱལ་བས་འཇམ་དཔལ་རྩ་རྒྱུད་གསུངས། །དེ་ཕྱིར་རྣལ་འབྱོར་བསྒོམ་པ་ན། །གང་གང་རྩ་ཁམས་བག་ཆགས་རྣམས། །དག་དང་མ་དག་འདིས་ཤེས་ཤིང་། །བར་དོ་ཕྱི་མའི་འཕོ་བ་ཡི། །སྣང་བའི་ཚོད་འཛིན་བྱེད་པ་ཡིན། །དེ་ཕྱིར་ཡེ་ཤེས་ཕྱག་རྒྱ་བཅིང་། །དེ་སོགས་རྒྱུ་འབྲས་དུ་མ་རྣམས། །འདིར་ནི་རྒྱས་པར་མ་བསྟན་ཏོ། །འཁྲུལ་པའི་རྨི་ལམ་འཁོར་བ་སྟེ། །མ་འཁྲུལ་རྨི་ལམ་གཉེན་པོ་ཡིན། །དེ་ཕྱིར་རྒྱལ་སྲས་ས་བཅུ་ལ། །རྨི་ལམ་བསྟན་པ་མདོ་ལས་གསུངས། །དེ་རྒྱུ་ཟག་མེད་ཁམས་བཟུང་ཕྱིར། །བཅོམ་ལྡན་རྨི་ལམ་བྲལ་བ་སྟེ། །ཟག་མེད་འདུ་བྱེད་རྐྱེན་བྲལ་ཕྱིར། །སྙོམས་འཇུག་ཆགས་བཅས་དེ་ཚེ་ནི། །དགའ་བཞི་གོ་རིམ་རྣམ་ཤེས་ལྡན། །འདོད་སྲེད་དང་པོ་སྤྱི་བོ་སྟེ། །གཉིས་པ་མགྲིན་པར་གསུམ་པ་ན། །ལྟེ་བར་རྣམ་ཤེས་འདུས་པ་ཡིས། །མེ་དང་ཟླ་བ་གཉིས་འདྲེས་ཚེ། །དུང་ཅན་ནང་དུ་ལྷན་སྐྱེས་མྱོང་། །དེ་ནི་སྐད་ཅིག་ཤེས་པ་སྟེ། །ཚོགས་བརྒྱད་མ་འགགས་སོ་སོར་གསལ། །བདེ་ལ་མི་རྟོག་ཉོན་མོངས་མིན། །དེ་ཕྱིར་ཡེ་ཤེས་སྐུ་ཞེས་བརྗོད། །དག་ན་ཐམས་ཅད་དེ་ཉིད་ཕྱིར། །འགག་མེད་འཛག་བྲལ་སྟོང་དང་ལྡན། །ཀུན་འགྲོ་ཀུན་བདག་གནད་དུ་བསྣུན། །མ་དག་འཁྲུལ་པ་སེམས་ཅན་རྣམས། །སྐད་ཅིག་བདེ་ཆེན་མི་ཤེས་པས། །རང་ལ་གནས་པ་གཞན་དུ་བཟུང་། །བདེ་ཉམས་དུག་གསུམ་བསྐྱེད་བྱེད་ཅིང་། །མི་འདོད་བཞིན་དུ་འཁོར་བར་རྒྱུ། །དང་པོ་དགའ་ལྡན་འདོད་ཆགས་ཡིན། །བར་མ་མ་རྟོགས་གཏི་མུག་སྟེ། །རྗེས་ལ་ཆགས་བྲལ་ཞེ་སྡང་སེམས། །བདེ་འདོད་རང་ཆགས་སེར་སྣ་དང་། །ཕྲག་དོག་ཀུན་བསྐྱེད་མི་དགེ་སྤྱོད། །དེ་ཡིས་ངན་འགྲོ་ཀུན་བསྐྱེད་བྱེད། །དེ་ལས་ཅུང་ཟད་ལོག་བྱས་ནས། །རང་གཞན་ཕན་འདོད་སེར་སྣ་དང་། །ཕྲག་དོག་ཆགས་པ་དོར་བྱས་ནས། །སྦྱིན་དང་ལྡན་ཞིང་ཁྲོ་བ་དོར། །ཚུལ་ལྡན་བདེ་འདོད་མཐོ་རིས་སྟེ། །འདོད་སྲེད་བཅད་ནས་བསམ་གཏན་གྱི། །བདེ་ཚོལ་གཟུགས་དང་གཟུགས་མེད་ལེན། །དེ་ཡང་སྔར་ལྟར་རོ་མྱོང་ནས། །ཆགས་ལྡན་དུག་གསུམ་དབང་གིས་འཁོར། །སེམས་སུ་ཤེས་ནས་ཁམས་གསུམ་གྱི། །ཆགས་སོགས་མཐོང་སྒོམ་གྱིས་བཅོམ་ནས། །མྱ་ངན་འདའ་སྲེད་དེ་ཐོབ་པ། །དེར་གནས་ཉན་རང་ཞེས་བརྗོད་དོ། །སྲིད་དང་ཞི་བ་གཉིས་ཀ་ལ། །སྲེད་སྤངས་འཛག་མེད་དབང་ཐོབ་པ། །རྡོ་རྗེ་ཐེག་པར་གསུངས་པ་ཡིན། །དགའ་བཞིའི་ངོ་བོ་གོ་རིམ་དང་། །དབྱེ་བ་འཛག་སྐྱོན་བཅིང་ཐབས་དང་། །ཕན་ཡོན་རྣམ་པར་དག་པ་དང་། །རྒྱུ་འབྲས་ལུགས་འབྱུང་ལུགས་བཟློག་ཀུན། །རྒྱལ་བས་བླ་མེད་རྒྱུད་དུ་གསུངས། །དེ་ཕྱིར་ལས་ཀྱི་ཕྱག་རྒྱ་བཅིང་། །འདིར་ནི་རྒྱས་པར་མ་བྲིས་སོ། །ཐ་མལ་དུས་ཀྱི་ཤེས་པ་ནི། །ཀུན་གཞི་ཉོན་ཡིད་འདུ་བྱེད་ཀྱིས། །སྔར་བཤད་རྐྱེན་བཞི་ཉེར་སྦྱོར་བས། །མིག་སོགས་རྣམ་ཤེས་དྲུག་པོ་རྣམས། །དབང་པོ་དྲུག་དང་འབྲེལ་བྱས་ཏེ། །གཟུགས་སོགས་ཡུལ་དྲུག་རྣམས་སུ་སྣང་། །བདེ་སྡུག་བཏང་སྙོམས་ཚོར་བ་གསུམ། །ཆགས་དང་ཞེ་སྡང་གཏི་མུག་བསྐྱེད། །དེ་མ་ཐག་པའི་ཡིད་ཀྱིས་ཁྱེར། །ཀུན་གཞིའི་སྟེང་བཞག་ཡང་འདུ་བྱེད། །འདི་ཉིད་དག་པར་ཡེ་ཤེས་གསུམ། །ཡིད་ནི་མི་གཡོ་མཉམ་ཉིད་དེ། །ཀུན་རྟོག་དག་པ་སོ་སོར་རྟོག །སྒོ་ལྔའི་ཡུལ་རྣམས་བྱ་བ་གྲུབ། །སྒྲིབ་པ་མཐོང་སྤངས་བསྒོམ་སྤངས་ཏེ། །གཉེན་པོ་མོས་དང་བདག་མེད་དང་། །ཏིང་འཛིན་སྙིང་རྗེ་རྣམ་པ་བཞི། །དེས་སྦྱངས་སྤྲུལ་སྐུས་འགྲོ་དོན་མཛད། །ཡིད་དང་རྨི་ལམ་གཅིག་པའི་ཕྱིར། །ལོངས་སྐུར་བརྗོད་དེ་འབྲས་བུ་ཡིན། །རྒྱས་པར་ཆོས་རྣམས་ཐམས་ཅད་དུ། །གསུངས་ཕྱིར་འདིར་ནི་བསྡུས་པ་ཡིན། །དེ་ཕྱིར་ཆོས་ཀྱི་ཕྱག་རྒྱ་བཅིང་། །གནས་སྐབས་བཞི་དང་འཁྲུལ་པ་དང་། །མ་འཁྲུལ་ཡེ་ཤེས་ལམ་རིམ་དང་། །ཕྱག་རྒྱ་བཞི་དང་སྐུ་བཞི་སྟེ། །འབྲེལ་བའི་རྟེན་དང་བརྟེན་པ་ཡིན། །ཟབ་མོ་ནང་གི་དོན་རྣམ་པར་བཤད་པ་ལས་རྣམ་ཤེས་དང་ཡེ་ཤེས་གཞི་ལམ་འབྲས་བུའི་འབྲེལ་བ་བསྟན་པ་སྟེ་དྲུག་པའོ།། ༈ །།དེ་ནས་ཇི་ལྟར་ནང་གི་ལུས། །ཕྱི་རོལ་ཇི་བཞིན་གནས་པ་ནི། །ཁམས་གསུམ་ནང་གི་བདག་ཉིད་དེ། །སྤྱི་བོ་ནས་ནི་སོར་བཞི་པོ། །གཟུགས་མེད་གནས་ཏེ་དེ་འོག་ཏུ། །སོར་ནི་བཅུ་དྲུག་གཟུགས་ཁམས་ཉིད། །དེ་འོག་འདོད་ལྷ་མིར་བཅས་པ། །ལྟེ་བ་ནས་ནི་རྐང་མཐིལ་བར། །ལྷ་མིན་ཀླུ་དང་ཡི་དྭགས་དང་། །དམྱལ་བ་བརྒྱད་ཀྱི་གནས་རིམ་གསུངས། །རྐང་ལག་ཚིགས་གསུམ་རིམ་པ་ལྟར། །རླུང་མེ་ཆུ་ཡི་དཀྱིལ་འཁོར་ཡིན། །བྲང་ནི་ས་སྟེ་སྒལ་ཚིགས་ནི། །རི་རབ་དེ་བཞིན་རི་བདུན་ནི། །བརླ་དང་རྗེ་ངར་དེ་འོག་རུས། །དཔུང་པ་ལག་ངར་ལག་པ་དང་། །སེན་མོའི་བར་དུ་རིམ་པ་ལྟར། །སྔོན་པོ་མན་དྷ་ར་མཚན་མོ། །ནོར་བུར་བྱེད་དང་བྲེ་བོ་དང་། །ཁ་བ་ཅན་དང་རྡོ་རྗེའི་རི། །གླིང་དྲུག་ནང་ན་བད་ཀན་དང་། །རྒྱུ་མ་ཚིལ་སྙིང་མཆིན་པ་ཤ། །ཟླ་བ་དཀར་པོ་ཀུ་ཤ་དང་། །མིའམ་ཅི་དང་ཁྲུང་ཁྲུང་གླིང་། །དྲག་པོའི་གླིང་རྣམས་རིམ་པ་སྟེ། །རྐང་ལག་དུམ་བུ་བཅུ་གཉིས་ནི། །འཛམ་བུ་གླིང་སོགས་གླིང་ཕྲན་བཅས། །སྲ་བ་རླན་དང་དྲོད་དང་དབུགས། །ཁམས་བཞི་བུ་ག་ནམ་མཁའ་ཡིན། །ཁུ་བ་ཞག་དང་ཀླད་པ་དང་། །བད་ཀན་འོ་མ་མཆིལ་མ་རྔུལ། །དྲི་ཆུ་ནང་གི་རྒྱ་མཚོ་བདུན། །སྦྲང་རྩི་མར་ཞོ་འོ་མ་ཆུ། །ཆང་དང་བ་ཚའི་རང་བཞིན་ནོ། །དབང་པོ་གཟའ་དགུའི་རང་བཞིན་ཏེ། །སོ་ནི་རྒྱུ་སྐར་རྩ་ཆུ་འོ། །རྒྱུ་མ་སྤྲིན་དང་ནང་གི་རླུང་། །སྙིང་ཁའི་སྒྲ་ནི་ཐོག་ཡིན་ཏེ། །ལྟོ་བའི་སྒྲ་ནི་འབྲུག་དུ་གསུངས། །སྙིང་ཁ་མགྲིན་པ་ལྟེ་བ་ན། །གློག་དང་ཉི་དྲོད་སྲེག་བྱེད་མེ། །གཞན་ཡང་ལྤགས་པ་དྲོད་དང་སྤུ། །མེ་དང་རླུང་གི་རང་བཞིན་ནོ། །ལུས་སྐྱེས་སྲིན་བུ་སྐྱེ་གནས་བཞི། །ཆར་ནི་ལྕེ་ཆུང་བདུད་རྩི་སྟེ། །ཐུན་ནས་སྐད་ཅིག་བར་གྱི་ནི། །དུས་སྦྱོར་ཐམས་ཅད་སྔར་བསྟན་པའི། །རྩ་རླུང་ཐིག་ལེ་སེམས་བཅས་སོ། །སྲོག་རླུང་དཀར་དམར་སྦྱོར་བ་ན། །ཟླ་ཉི་འཛིན་པར་སྣང་བ་དང་། །དེ་སོགས་རྣམ་བཤད་དུ་མ་རྣམས། །ཕྱི་ནང་གཞན་གསུམ་ཡེ་ཤེས་སུ། །སྦྱོར་ཕྱིར་དཔག་ཏུ་མེད་པ་གསུངས། །དེ་སོགས་རྟེན་འབྲེལ་རྟོགས་པ་ན། །ཐབས་དང་ཤེས་རབ་སྦྱོར་ཤེས་པས། །སྣ་ཚོགས་ཡོན་ཏན་འགྱུར་ཕྱིར་རོ། །འདིར་ནི་མདོར་བསྡུས་ཅུང་ཟད་བརྗོད། །ཟབ་མོ་ནང་གི་དོན་རྣམ་པར་བཤད་པ་ལས། སྣོད་ལ་སྦྱར་བ་བསྟན་པ་སྟེ་བདུན་པའོ།། ༈ །།དེ་ནས་སེམས་ཅན་ཀུན་རྟོག་ལ། །ཀུན་བརྟགས་ལྷ་རྣམས་བསྒོམ་པའི་དོན། །སེམས་འཛིན་ཕྱི་ནང་དོན་ཤེས་དང་། །དབང་འབྱོར་གཞན་དོན་གཟུགས་སྟོན་ཕྱིར། །དཔའ་བོ་གཅིག་ནས་མཐའ་ཡས་པར། །གསུངས་པའི་ངེས་པ་འདི་ལྟ་སྟེ། །དབུ་མ་ཀུན་གཞི་ཡང་དག་དོན། །ཡེ་ཤེས་རླུང་དང་ཐིག་ལེ་ནི། །དཔའ་བོ་གཅིག་པ་ཧེ་རུ་ཀའོ། །སྐུ་གཉིས་ཐབས་དང་ཤེས་རབ་དང་། །སྟེང་འོག་དཀར་དམར་བདེན་གཉིས་དང་། །དེ་སོགས་ཡབ་ཡུམ་གཉིས་པའོ། །ལུས་ངག་ཡིད་དང་ཐིག་ལེ་རླུང་། །སྟེང་འོག་བར་གསུམ་ཡི་གེ་གསུམ། །རླུང་གསུམ་སོགས་ཕྱིར་ལྷ་གསུམ་ཏེ། །ཁམས་བཞི་སོགས་ལྡན་ཁྱབ་བྱ་བཞི། །ཡེ་ཤེས་ལྔ་དང་ཕུང་པོ་ལྔ། །འཁོར་ལོ་རླུང་དང་ཁྱབ་བྱེད་བཅས། །ལྷ་ལྔ་བསྟན་ཏེ་དུ་མར་གསུངས། །ནམ་མཁའ་ཡེ་ཤེས་རྣམ་ཤེས་དྲུག །ལྷ་དྲུག་ཉོན་ཡིད་དང་བཅས་བདུན། །ཚོགས་བརྒྱད་སོགས་ཕྱིར་བརྒྱད་པ་དང་། །སྙིང་ཁའི་རྩ་རླུང་ས་བཅུ་སྟོབས། །དེ་སོགས་དགུ་དང་བཅུ་པ་དང་། །ཕུང་པོ་ཁམས་བཅུ་དབང་པོ་ཡུལ། །དྲུག་དྲུག་དེ་བཞིན་ལས་བྱེད་པ། །དབང་དྲུག་དང་བཅས་དཀྱིལ་འཁོར་ནི། །ལྷ་ལྔ་དགུ་དང་བཅུ་གསུམ་དང་། །ཉེར་ལྔ་སོ་གཉིས་སོ་བཞི་པ། །སོ་བདུན་རིགས་བརྒྱ་དུ་མའི་བར། །རྩ་རླུང་ཐིག་ལེ་འཁོར་ལོའི་གྲངས། །རྣམ་རྟོག་གྲངས་བཞིན་བསྟན་པ་སྟེ། །ཞལ་དང་ཕྱག་མཚན་དེ་དང་མཚུངས། །ལུས་ལ་དཀྱིལ་འཁོར་བཤད་པ་ནི། །ཕྱི་རོལ་ཇི་བཞིན་ས་དང་ཐིག །དབྱིབས་དང་བཅས་པ་བསྡུས་པ་ནི། །ཁོ་བོས་དཀྱིལ་འཁོར་སྣང་བར་བཤད། །ཕན་ཚུན་ཐབས་དང་ཤེས་རབ་དང་། །གཡས་གཡོན་ལུས་སེམས་དཀར་དམར་དང་། །རྟེན་དང་བརྟེན་པ་མ་ལུས་པ། །ཐབས་དང་ཤེས་རབ་རང་བཞིན་གསུངས། །ཤེས་རབ་གཙོར་བསྟན་ཤེས་རབ་རྒྱུད། །ཐབས་གཙོར་བསྟན་པ་ཕ་རྒྱུད་དེ། །ཀུན་ཀྱང་གཉིས་མེད་རང་བཞིན་ཡིན། །མིག་ནི་ཐབས་ཏེ་གཟུགས་ཤེས་རབ། །གཟུགས་ནི་ཐབས་གྱུར་མིག་ཤེས་རབ། །རོ་མ་ཐབས་ཏེ་རླུང་ཤེས་རབ། །རྐྱང་མ་ཤེས་རབ་རླུང་ནི་ཐབས། །སྐྱེས་བུ་ཐབས་ཏེ་སེམས་ཤེས་རབ། །བུད་མེད་ཤེས་རབ་སེམས་ནི་ཐབས། །དབུས་ནི་ཤེས་རབ་ཕྱོགས་ནི་ཐབས། །དོན་དམ་ཐབས་ཏེ་ཀུན་རྫོབ་ནི། །ཤེས་རབ་དེ་བཞིན་བཟློག་པ་ཡིན། །དེ་སོགས་དཔག་མེད་ཤེས་པར་བྱ། །ཁ་དོག་ཡོན་ཏན་རིམ་པ་རྣམས། །རླུང་དུ་ཇི་སྟར་བསྟན་བཞིན་གསུངས། །དབྱིབས་སྐུ་རླུང་དང་བརྗོད་པ་སྔགས། །ཡིད་ནི་ཐིག་ལེ་རྫོགས་རིམ་བརྗོད། །སྐྱེ་བ་བསྐྱེད་རིམ་བསྟན་པ་སྟེ། །འཆི་བ་རྫོགས་རིམས་ཉིད་ཡིན་ནོ། །ཀུན་རྟགས་བསྐྱེད་རིམ་ཞེས་བྱ་སྟེ། །གཞན་དབང་འབྲེལ་བ་རྫོགས་རིམ་བཤད། །ཀུན་རྫོབ་བདེན་པ་བསྐྱེད་རིམ་སྟེ། །དོན་དམ་བདེན་པ་རྫོགས་རིམ་བཤད། །བདེན་གཉིས་ཐབས་རྣམས་བསྐྱེད་རིམ་སྟེ། །དབྱེར་མེད་ཤེས་རབ་རྫོགས་རིམ་གསུངས་། །དེ་ལ་སོགས་པ་ཐམས་ཅད་ཀྱང་། །ཕྱི་དང་ནང་དང་གཞན་གྱི་རིམ། །ཡེ་ཤེས་གཅིག་ཏུ་སྦྱོར་བ་ནི། །རྩ་བ་མདོར་བསྡུས་བརྗོད་པ་ཡིན། །ཇི་ལྟར་ཨེ་ཝཾ་བཤད་པ་བཞིན། །ཤེས་བྱ་འཛིན་མེད་ངང་དུ་སྤྱད། །ཟབ་མོ་ནང་གི་དོན་རྒྱས་པར་བཤད་པ་ལས་ཀུན་བརྟགས་ཀྱི་ལྷ་འབྱུང་བའི་ཚུལ་བསྟན་པ་སྟེ་བརྒྱད་པའོ།། ༈ །།དེ་ནས་ཆོས་རྣམས་ཐམས་ཅད་ཀྱི། །སྦྱང་གཞི་སྦྱོང་བྱེད་གསུངས་པ་ཡི། །ངེས་པ་འདིར་ནི་བསྟན་པར་བྱ། །སེམས་ཅན་ཁམས་ནི་སངས་རྒྱས་ཀྱི། །སྙིང་པོ་དྲི་མེད་བདེན་གཉིས་ལྡན། །འདི་ནི་ཡེ་ཤེས་རྡོ་རྗེ་རུ། །ཀུན་རྫོབ་གཟུང་འཛིན་སྣང་བ་སྟེ། །བདེན་པ་ཆུ་ཟླ་ལྟ་བུའོ། །དོན་དམ་སྟོང་ཉིད་བཅོ་བརྒྱད་དེ། །བདེན་པ་གཉིས་མེད་ཡེ་ཤེས་བརྗོད། །དེ་རྟོགས་བྱེད་པའི་རྟོགས་པས་བསྐྱེད། །གཉེན་པོ་སྦྱོང་བྱེད་ཡིན་པར་བཤད། །སྦྱང་གཞིའི་གྲངས་བཞིན་ཆོས་ཀུན་བསྟན། །ཚངས་སོགས་གྲུབ་མཐའ་ཐམས་ཅད་ཀྱང་། །རྣམ་རྟོག་གིས་བྱས་ཤེས་བྱ་ཡིན། །རྒྱུ་རྐྱེན་ལྡན་དང་མེད་འཛིན་སོགས། །སྣ་ཚོགས་ལྟ་བ་ལུས་སེམས་ཀྱི། །གཟུང་འཛིན་ལ་བརྟེན་འབྱུང་བར་གསུངས། །ཕྱི་རོལ་རྡུལ་ཕྲན་ཕག་ན་མོ། །ཀུན་གཞི་ཡིད་བཅས་ཡུལ་སྣང་གི །ནུས་པ་མ་རྟོག་དབང་གིས་ཏེ། །འོན་ཀྱང་བདག་སོགས་བྱེད་པ་པོ། །དགག་ཕྱིར་རྒྱལ་བས་གསུངས་པ་ཡོད། །བདག་དང་གང་ཟག་བཏགས་པར་བརྗོད། །བདེན་པའི་རྫས་གྲུབ་རྡུལ་ཙམ་མེད། །ཡོད་ན་འབད་མེད་ཐར་པའམ། །ཐར་མེད་སྐྱོན་འགྱུར་ཞེས་སུ་བསྟན། །དེ་སོགས་སེམས་ལ་སྣང་བ་ཡི། །སྤང་གཉེན་མཁས་རྣམས་ཀྱིས་གསུངས་བཞིན། །འདིར་ནི་ཡུལ་སྣང་ལུས་འདི་ལ། །རྩ་རླུང་ཐིག་ལེ་ངེས་པ་ཡིས། །སྤང་གཉེན་དེ་བཞིན་གཤེགས་པས་གསུངས། །ཁྱད་པར་རྡོ་རྗེའི་ལུས་ལྡན་པའི། །སྐྱེས་བུ་ལོ་བརྒྱའི་རླུང་ཇི་སྙེད། །བསྡོམས་ན་བྱེ་བ་བདུན་ཅུ་བདུན། །ས་ཡ་བདུན་དང་འབུམ་ཕྲག་དྲུག །ཡོད་པས་སྦྱང་གཞི་དེ་སྦྱོང་བའི། །ཆོས་སྒོ་དེ་དང་མཉམ་པ་ཡིན། །བརྒྱད་ཁྲི་བཞི་སྟོང་རགས་རིམས་གྲངས། །དེ་ལ་ཡེ་ཤེས་རླུང་ཇི་སྙེད། །རྒྱུ་བ་མྱང་འདས་ལམ་ལྡན་པ། །གཉེན་པོའི་མཆོག་སྟེ་བླ་མེད་རྒྱུད། །དེ་ཕྱིར་ལོ་བརྒྱའི་ཡེ་ཤེས་རླུང་། །བསྡོམས་པས་ལོ་གསུམ་ཕྱོགས་གསུམ་གྱི། །ལོ་གསུམ་ཞག་ནི་སྟོང་བརྒྱད་ཅུ། །ལོ་གསུམ་སྐུ་གསུང་ཐུགས་དབྱེ་བས། །སྐུ་གསུང་ཐུགས་ཀྱི་རྒྱུད་གསུམ་སྟེ། །བགྲོད་པ་རིགས་དྲུག་རྒྱུད་དུ་བཤད། །ཟླ་བའི་དབྱེ་བའི་རིགས་རྣམས་ནི། །སུམ་ཅུ་སོ་དྲུག་རྒྱུད་དུ་བཤད། །གཡས་གཡོན་ཐབས་དང་ཤེས་རབ་ཀྱི། །དབྱེ་བས་ཐབས་དང་ཤེས་རབ་རྒྱུད། །རྩ་རྒྱུད་བདུན་ཅུ་རྩ་གཉིས་ཡོད། །འདི་ནི་མཁའ་འགྲོ་རྒྱ་མཚོ་རུ། །ཕྱག་གྲངས་དག་པར་གསུངས་པ་ཡིན། །ཨ་སོགས་དབྱངས་ནི་སུམ་ཅུ་དྲུག །ཀ་སོགས་གསལ་བྱེད་དེ་དང་མཉམ། །རྗོད་བྱེད་ཡི་གེའི་གཙོ་བོར་གསུངས། །རེ་རེའང་རྒྱུད་ཕྲན་སུམ་ཅུ་སྟེ། །སྟོང་དང་བརྒྱད་བརྒྱ་ཡིན་པར་བཤད། །ཉི་ཁྲི་གཅིག་སྟོང་དྲུག་བརྒྱ་ཡི། །རྒྱུད་ཀྱི་ཡན་ལག་ལྡན་པ་སྟེ། །ཐིག་ལེ་ཚེག་དྲག་གྲི་གུག་གི །དབྱེ་བས་ཐུང་རིང་ཤིན་དུ་རིང་། །གསལ་བྱེད་སུམ་ཅུ་དབྱངས་དྲུག་བསྒྱུར། །སུམ་བརྒྱ་དྲུག་ཅུ་རྩ་བའི་དབྱངས། །ཉིན་མཚན་དབྱངས་ཀྱང་དྲུག་ཅུ་སྟེ། །དེ་ཕྱིར་དབུགས་གྲངས་ཞག་གཅིག་དང་། །ལོ་གཅིག་ཆུ་ཚོད་དབྱངས་མཐུན་ཕྱིར། །གསལ་བྱེད་དེ་དང་མཚུངས་པ་ཡིན། །ཞིབ་ཏུ་དབྱངས་འཆར་ནང་དུ་ལྟོས། །བླ་ན་མེད་པའི་རྒྱུད་ཀྱི་ཚོགས། །རྣམ་དབྱེ་བསྡུས་པར་བསྟན་པ་ཡིན། །དེ་ནི་ཐབས་ཤེས་གཉིས་མེད་རྒྱུད། །དེ་དག་གཙོ་བོ་ཅུང་ཟད་བརྗོད། །ལོ་གསུམ་ཞག་ལ་བདུན་གྱིས་བགོས། །བརྒྱ་དང་ལྔ་བཅུ་རྩ་བཞི་སྟེ། །དུས་འཁོར་ཉུང་ངུའི་ལྷ་གྲངས་ཏེ། །ལྷག་གཉིས་ཐབས་ཤེས་བདག་ཉིད་གསུངས། །ཟླ་བའི་ཆ་ནི་བཅོ་ལྔ་སྟེ། །དེས་ཕྱེ་བདུན་ཅུ་རྩ་གཉིས་ཏེ། །བདག་པོ་འཁྲིག་བཅས་རྣལ་འབྱོར་མའི། །ངེས་བརྗོད་རྒྱུད་ཀྱི་ལྷ་རུ་བཤད། །བསྡུས་ན་དཔའ་མོ་སུམ་ཅུ་བདུན། །ཐབས་གཅིག་དང་བཅས་ལུས་ལ་གནས། །ཟླ་ཕྱེད་གསུམ་གྱི་ཞག་དེ་དག །ཁྱད་པར་ཐབས་ཀྱི་རྒྱུད་ཡིན་པས། །དུས་སྦྱོར་རྒྱུ་བ་བཅུ་གཉིས་ཀྱིས། །དབྱེ་བས་ལྔ་བརྒྱ་བཞི་བཅུ་ཡིན། །དེ་ལ་སྒྱུ་འཕྲུལ་དྲ་བ་ནི། །རྣམ་གསུམ་ཞེ་དགུའི་དཀྱིལ་འཁོར་དང་། །ཞེ་ལྔ་ཞེ་གསུམ་ཟུང་རྣམས་སོ། །ཉིས་བརྒྱ་བདུན་ཅུ་རྩ་བཞི་ཡིན། །དཔལ་ལྡན་འདུས་པ་རྣམ་དྲུག་སྟེ། །དགུ་དང་བཅུ་གསུམ་བཅུ་དགུ་དང་། །ཉེར་ལྔ་སོ་གཉིས་སོ་བཞི་སྟེ། །ཐབས་དང་ཤེས་རབ་དབྱེ་བ་ཡིས། །ཉིས་བརྒྱ་དྲུག་ཅུ་རྩ་བཞིའོ། །ཐབས་ཤེས་དང་བཅས་གྲངས་རྣམས་སོ། །ཐོད་པ་རྡོ་རྗེ་བདུད་རྩི་དང་། །དགྱེས་རྡོར་སོགས་རྣམས་མ་རྒྱུད་ཀྱི། །སྡོམ་པའི་ནང་དུ་འདུས་པར་གསུངས། །གཤིན་རྗེ་གཤེད་སོགས་གསང་བར་བསྡུ། །ངག་དབང་དུས་ཀྱི་འཁོར་ལོ་སོགས། །དཔལ་ལྡན་རྒྱུ་སྐར་དཀྱིལ་འཁོར་ཅན། །རྣལ་འབྱོར་རྒྱུད་ཀུན་ཀྱང་འདུས་ཏེ། །བྱ་སྤྱོད་དེ་ཡི་ཡན་ལག་ཡིན། །དེ་ནི་ཡེ་ཤེས་རླུང་བཤད་དོ། །རྩ་ཡང་དེ་བཞིན་གསུངས་པ་ནི། །སྙིང་ག་སྲོག་ནི་དུས་འཁོར་ལོ། །རོ་རྐྱང་ཞབས་ཀྱི་རང་བཞིན་ཏེ། །སྙིང་གར་སངས་རྒྱས་ལྷ་མོ་བརྒྱད། །ཡེ་ཤེས་སྣ་ཚོགས་ཡུམ་དུ་བརྗོད། །བུམ་པ་བཤང་གཅི་ཤ་དང་རྐང་། །ཁུ་ཁྲག་ཡིན་ཏེ་གཙུག་ཏོར་ནི། །ནོར་བུ་གཎྜྻི་ཤིང་དང་དུང། །ཕུང་པོ་ཁམས་རྣམས་སངས་རྒྱས་ཡུམ། །མིག་སོགས་དྲུག་དང་ཡུལ་རྣམས་ནི། །བྱང་ཆུབ་སེམས་དཔའ་ལྷ་མོར་བཅས། །རྐང་སོགས་ལས་དབང་ཁྲོ་བོ་བཅུ། །ལྟེ་བའི་རྩ་རྣམས་འཇིགས་མ་སོགས། །གསུང་གི་དཀྱིལ་འཁོར་རང་བཞིན་ཡིན། །ཚིགས་ཆེན་བཅུ་གཉིས་རྩའི་འཁོར་ལོ། །སྐུ་ཡི་དཀྱིལ་འཁོར་གནས་པ་ཡིན། །སོར་ཚིགས་ཀླུ་དང་གཏུམ་མོ་སྟེ། །བ་སྤུ་འབྱུང་པོའི་རང་བཞིན་ནོ། །འདོད་དང་མི་འདོད་རྟོག་པ་ཀུན། །མཆོད་པའི་ལྷ་མོ་དང་བཅས་པ། །རྩ་ཁམས་ཐབས་དང་ཤེས་རབ་ཀྱི། །དབྱེ་བས་སྟོང་དང་བརྒྱ་བཅུའོ། །དཔལ་ལྡན་འཁོར་ལོ་སྡོམ་པ་ནི། །རྩ་གསུམ་བདུད་བྲལ་བཅས་པ་དང་། །སྙིང་གར་ཡུམ་བཞི་མཆོད་པ་བཞི། །རྩ་ཆེན་ཉེར་བཞི་རྣལ་འབྱོར་མ། །རབ་གཏུམ་སོགས་ཡིན་དེ་ན་ཁམས། །ཐོད་པའི་དུམ་སོགས་དཔའ་བོར་གསུངས། །ཁྭ་གདོང་ལ་སོགས་ཁྲོ་བཅུར་མཚུངས། །ཐིམ་དང་ལོངས་སྤྱོད་བདག་པོའི་ཕྱིར། །ལྷ་ནི་བདུན་ཅུ་གཉིས་རང་བཞིན། །འཁོར་ལོའི་འདབ་མ་རྒྱ་ཉི་ཤུ། །ལྷ་རུ་རྡོ་རྗེ་མཁའ་འགྲོར་གསུངས། །དཔལ་ལྡན་འདུས་པ་བཤད་བྱ་བ། །ཕུང་པོ་སངས་རྒྱས་ལྔ་ཡིན་ཏེ། །ཁམས་བཞི་རེག་བཅས་ལྷ་མོ་ལྔ། །མིག་གཉིས་ས་ཡི་སྙིང་པོ་སྟེ། །རྣ་བ་ཕྱག་ན་རྡོ་རྗེའོ། །སྣ་ནི་ནམ་མཁའི་སྙིང་པོ་སྟེ། །ལྕེ་ལ་བཞུགས་པ་འཇིག་རྟེན་དབང་། །ཡིད་ནི་འཇམ་དཔལ་ཁམས་རྣམས་ལ། །སྒྲིབ་སེལ་ཡིན་ཏེ་ལུས་ལ་ནི། །ཀུན་ཏུ་བཟང་པོ་ཉིད་ཞེས་བྱ། །རྩ་རྒྱུས་བྱམས་པ་ཉིད་ཡིན་ནོ། །ཡན་ལག་ཚིགས་དང་ཁ་གསང་བ། །ཁྲོ་བོ་བཅུ་ཡི་རང་བཞིན་ཏེ། །ལྟེ་བར་ལས་ཀྱི་རིགས་སྐྱེས་པ། །མཁྱེན་དང་གཏུམ་སོགས་ལྷ་མོ་ནི། །དྲུག་ཅུ་རྩ་བཞི་གསུངས་པ་ཡིན། །རྡོ་རྗེ་དབྱིངས་སོགས་སྙིང་གར་དགུ། །རྡོ་རྗེའི་རིགས་སུ་གསུངས་པ་སྟེ། །པད་མའི་སྒྲོན་མ་སོགས་བཅུ་དྲུག །མགྲིན་པར་པད་མའི་རང་བཞིན་ལ། །སྤྱི་བོར་རབ་ཏུ་སད་ལ་སོགས། །འཁོར་ལོ་རིགས་ལྡན་སུམ་ཅུ་གཉིས། །རྒྱས་པར་རྡོ་རྗེ་ཕྲེང་བར་གསུངས། །དེ་སོགས་དཀྱིལ་འཁོར་དུ་མ་རྣམས། །རྐྱང་པ་ཕྱོགས་རེ་ཆ་ལྡན་པ། །གསུངས་པ་ཐམས་ཅད་འདིར་འདུས་སྟེ། །དཔེར་ན་དགྱེས་རྡོར་ལྷ་དགུ་ནི། །སྙིང་གའི་འཁོར་ལོ་རྐྱང་ཡིན་བཞིན། །ཐམས་ཅད་ལུས་ཀྱི་རྩ་རླུང་ཡིན། །མདོར་ན་རྩ་ནི་སྐུ་ཡིན་ཏེ། །རླུང་ནི་སྔགས་དང་ཡི་གེའོ། །ཐིག་ལེ་ཕྲ་མོའི་རྫོགས་རིམ་མོ། །དེ་བཞིན་སྦྱིན་སྲེག་ལས་རྣམས་ཀུན། །ནང་གི་སྦྱང་གཞི་སྦྱོང་བྱེད་ཡིན། །འདིར་ནི་ཕྱོགས་ཙམ་བརྗོད་པའོ། །དེ་བཞིན་ས་དང་ལམ་དང་གཟུངས། །ཏིང་འཛིན་རབ་འབྱམས་ལྷ་དང་སྔགས། །ལུས་སེམས་ནང་གི་དབྱེ་བ་ལ། །བརྟེན་ནས་ཐམས་ཅད་གཟིགས་པས་གསུངས། །ཟབ་མོ་ནང་གི་དོན་སྣང་བར་བྱེད་པ་ལས། །ཆོས་ཀྱི་སྦྱང་གཞི་དང་སྦྱོང་བྱེད་བསྟན་པ་སྟེ་དགུ་པའོ།། ༈ །།དེ་ལྟར་རྩ་རླུང་ཐིག་ལེ་གསུམ། །སེམས་ཀྱི་ཆ་ལས་སྣང་བ་སྟེ། །དེ་ཕྱིར་འདི་དོན་གནད་འཆིང་བ། །ལམ་རིམ་ཀུན་ལས་ཁྱད་པར་འཕགས། །གང་ཟག་བདག་མེད་ཞི་བ་ཙམ། །མྱུར་བ་སྲིད་པ་ལན་གསུམ་སྟེ། །རྒྱུན་ཞུགས་འགོར་ན་ལན་བདུན་ཡིན། །དེ་ནི་རང་དོན་ཞི་བ་ཙམ། །རང་རྒྱལ་བསྐལ་པ་ཉི་ཤུ་ནས། །བསེ་རུ་བསྐལ་པ་བརྒྱ་ཡིས་འགྲུབ། །སེམས་ཅན་ཐམས་ཅད་ཕན་བྱེད་པ། །བྱང་ཆུབ་སེམས་དཔའ་གྲངས་མེད་གསུམ། །འདིར་ནི་ཐབས་ཀྱི་ཁྱད་པར་གྱིས། །ཕ་རོལ་ཕྱིན་པའི་ལམ་དེ་ལས། །བྱ་སྤྱོད་ཚུལ་གྱི་ཐབས་མཁས་ཙམ། །ལྡན་ཡང་མི་ཚེ་དྲུག་ཅུ་སྟེ། །རྣལ་འབྱོར་མི་ཚེ་བཅུ་དྲུག་ཡིན། །བླ་ན་མེད་པ་ཚེ་གཅིག་གིས། །བརྩོན་ལྡན་ངེས་པར་འགྲུབ་པར་འགྱུར། །དང་པོར་དབང་ཐོབ་བསྐྱེད་རྫོགས་ནི། །ལེགས་ཤེས་མོས་སྒྲུབ་ཚོགས་ལམ་སྟེ། །རྩ་རླུང་ཐིག་ལེའི་གནད་ཤེས་ནས། །ཀུན་བཟང་སྤྱོད་གནས་དྲོད་ཐོབ་ནས། །སྦྱོར་ལམ་ཉིད་ལ་གནས་པ་ཡིན། །དེ་ཚེ་བརཏལ་ཞུགས་སྤྱོད་པ་ཡིས། །སྦྱོར་ལམ་བགྲོད་ནས་མཐོང་བར་སྦྱོར། །འདི་ནི་སོ་སོར་སྡུད་པ་དང་། །བསམ་གཏན་བཞི་ལྡན་ལམ་ཡིན་ཏེ། །རྩ་ནི་སྦྱང་བ་ཞེས་ཀྱང་བཤད། །བསམ་གཏན་ཡན་ལག་རྫོགས་པ་ཡིས། །མངོན་པར་ཤེས་པ་ལྔ་ཐོབ་གསུངས། །སྐུ་ཡི་དཀྱིལ་འཁོར་དུ་ཞུགས་པའོ། །དེ་ནས་སྲོག་རྩོལ་སྦྱོར་ལྡན་པས། །མཐོང་ལམ་ལ་ནི་སྦྱོར་བར་བྱེད། །རྟག་ཏུ་འཛིན་པའི་སྟོབས་ཀྱིས་ནི། །རྡོ་རྗེ་སེམས་དཔར་ཡང་དག་འཇུག །རླུང་གི་རྣལ་འབྱོར་ཞེས་བྱའོ། །སྤྲོས་མེད་ཤིན་དུ་སྤྲོས་མེད་ཀྱིས། །རྗེས་དྲན་ཡན་ལག་སྦྱང་བྱས་ནས། །ཏིང་འཛིན་ཡེ་ཤེས་སྦྱོར་བ་ནི། །ཕྱོགས་ལས་རྣམ་རྒྱལ་གྱིས་འགྲུབ་སྟེ། །གཞན་དོན་ཚོགས་ཀྱི་སྤྱོད་དང་བཅས། །དང་པོ་བརྒྱ་ཕྲག་བཅོ་བརྒྱད་ཀྱི། །རླུང་དང་རྟོག་པ་ལྷན་ཅིག་དག །དེ་ནི་འཇིག་རྟེན་པ་ཡི་ལམ། །གཉིས་པ་ཐིག་ལེ་ལྷན་ཅིག་ཏུ། །གསང་བར་འགག་པ་མཐོང་བའི་ལམ། །དེ་ཡིས་མ་རིག་སྐྱེ་ཤི་འགག །གསུམ་པར་དེ་ཉིད་དག་པ་སྟེ། །ལྟེ་བར་དེ་བཞིན་བཞི་དང་ལྔ། །དྲུག་དང་བདུན་པ་སྙིང་ག་སྟེ། །བརྒྱད་དང་དགུ་པ་མགྲིན་པ་ལ། །བཅུ་དང་བཅུ་གཅིག་སྤྱི་བོར་བཤད། །དེ་ནས་གཙུག་ཏོར་རླུང་འགག་པས། །དེ་ཚེ་སངས་རྒྱས་ཐོབ་པར་གསུངས། །རྟེན་འབྲེལ་བཅུ་གཉིས་འགག་པ་དང་། །མས་བརྟན་དགའ་བ་བཅུ་དྲུག་ཡིན། །སྟོང་དང་སྙིང་རྗེ་དབྱེར་མེད་འགྲུབ། །ལོ་གསུམ་ཟླ་ཕྱེད་གསུམ་དག་པས། །ཡེ་ཤེས་སྐུ་ཉིད་འགྲུབ་པ་ཡིན། །རྩ་རླུང་ཐིག་ལེ་རྣམ་གསུམ་གྱིས། །སྦྱོར་དྲུག་མཐར་ཕྱིན་འབྲས་བུ་ཡིན། །དབྱེ་བ་དཔག་མེད་འདིར་མ་བརྗོད། །ཡེ་ཤེས་རིམ་པ་ཐམས་ཅད་ཀྱང་། །སྔ་མའི་སྦྱང་གཞི་དང་མཚུངས་ཐོབ། །ཟབ་མོ་ནང་གི་དོན་སྣང་བར་བྱེད་པ་བཤད་པ་ལས། །ལམ་རིམ་དང་སྦྱར་བ་སྟེ་བཅུ་པའོ།། ༈ །།དེ་ནས་རྩ་རླུང་ཐིག་ལེ་རྣམས། །སྡུད་པའི་རིམ་པ་གསལ་བཤད་བྱ། །ཡེ་ཤེས་རྣལ་འབྱོར་གྲུབ་པ་ནི། །ངེས་མེད་སེམས་ལ་དབང་ཐོབ་ཕྱིར། །ཐ་མལ་རྡོ་རྗེའི་ལུས་འདི་ལ། །སྐྱེས་ནས་ལོ་གཅིག་བར་དུ་ནི། །ཐམས་ཅད་བསྐྱེད་པར་བྱེད་པ་སྟེ། །དེ་ནས་ཞག་རེ་རྩ་གཉིས་གཉིས། །ནུས་པ་སྐམ་པར་བཤད་པ་ཡིན། །ལོ་བརྒྱ་སྟོང་ཕྲག་བདུན་ཅུ་གཉིས། །སྡུད་པ་རགས་པའི་རིམ་པའོ། །ཞིབ་པར་ལོ་ནི་དགུ་བཅུ་དྲུག །ཟླ་བ་ཕྱེད་དང་བཅུ་གཅིག་བར། །ཕྲ་བའི་རྩ་ཀུན་སྡུད་པ་སྟེ། །དྲུག་ཁྲི་དགུ་སྟོང་བདུན་བརྒྱ་དང་། །ལྔ་བཅུ་སྡུད་གྱུར་ཉིན་རེ་གཉིས། །དེ་འོག་ལོ་གསུམ་ཕྱོགས་གསུམ་ལ། །ཉིས་སྟོང་ཉིས་བརྒྱ་ལྔ་བཅུ་དག ཚིགས་ཆེན་གསུམ་བརྒྱ་དྲུག་བཅུའི་རྩ། །ཞག་ནི་གསུམ་གསུམ་རེ་རེ་སྐམ། །སོར་ཚིགས་རྩ་ཡང་དེ་དང་མཉམ། །ལྟེ་བའི་དྲུག་ཅུ་རྩ་ཁྱིམ་ནི། །རླུང་གི་ནུས་དང་མཚུངས་པར་སྡུད། །སྤྱི་བོ་ཞག་ནི་བཅོ་ལྔ་སྟེ། །མགྲིན་པར་ཟླ་གཅིག་གསང་རྩ་མཚུངས། །སྙིང་གའི་ཞག་བརྒྱད་ནང་དུ་འདོར། །དེ་ལྟར་འཁོར་ལོར་བརྒྱ་དྲུག་ཅུ། །གཙུག་ཏོར་རྩ་བཞི་དང་བཅས་ཡིན། །རྩ་ནི་ཉི་ཤུ་རྩ་བཞི་པོ། །རྩ་ཆེན་དྲུག་ཅུ་དྲུག་ཅུ་ནི། །ལྟེ་བ་དང་མཚུངས་ལོ་གསུམ་སྡུད། །ཐིམ་དང་ལོངས་སྤྱོད་བདག་པོ་ཡི། །རྩ་བ་བདུན་ཅུ་རྩ་གཉིས་པོ། །ཕྱོགས་གསུམ་ནང་དུ་སྡུད་པ་ཡིན། །དེ་ལྟར་འཁོར་ལོ་རྩ་ཆེན་རྣམས། །བསྐམས་ཏེ་རླུང་རྣམས་མི་རྒྱུ་བ། །དེ་ནས་ཞག་གཅིག་ནས་འཕོའོ། །རླུང་གི་སྡུད་རིམས་བསྟན་པ་ནི། །རླུང་བཅུ་ཟླ་བཅུ་ནས་རྫོགས་ཏེ། །སྐྱེས་ནས་དུས་སུ་འཆི་བ་གང་། །ལོ་ནི་བཅུ་བཅུ་རིམ་པ་ལྟར། །ནོར་རྒྱལ་ལྷ་སྦྱིན་རྩངས་རུས་སྦལ། །ཀླུ་དང་ཁྱབ་བྱེད་མཉམ་གནས་དང་། །གྱེན་རྒྱུ་ཐུར་སེལ་སྲོག་རླུང་གི །སྟོབས་རྣམས་གཅིག་ལ་གཅིག་ཐིམ་པར། །འགྱུར་ཞེས་རྡོ་རྗེ་ཕྲེང་བར་གསུངས། །རྒྱས་པར་དུས་ཀྱི་འཁོར་ལོ་ལས། །སྐྱེས་བུ་ཚེ་ལོ་བརྒྱ་པ་གང་། །སྐྱེས་ནས་ལོ་གཅིག་རླུང་རྣམས་ཀྱི། །དུས་སྦྱོར་གྲངས་ཀུན་མཉམ་པར་རྒྱུ། །དེ་ནས་བགྲོད་པ་གསུམ་པ་ལ། །མཁའ་རུ་རླུང་གཅིག་རྒྱུ་བ་འཕེལ། །བགྲོད་པ་བཞི་པར་འཕེལ་འགྲིབ་མེད། །ལོ་གཉིས་པ་ལ་ས་རླུང་དུ་། །གཡས་པར་རླུང་གཉིས་འཕེལ་བ་ཡིན། །དེ་ལྟར་རེ་མོས་རེ་རེ་འཕེལ། །ཕྱོགས་གསུམ་མ་ཚང་ལོ་བདུན་ན། །ཆུ་སྲང་གཅིག་འགྱུར་དེ་ནས་ནི། །གཡོན་དང་གཡས་སུ་རིམ་པ་བཞིན། །ལོ་རེ་ཆུ་སྲང་རེ་རེ་འཕེལ། །དྲུག་ཅུ་རྩ་བདུན་ལོན་ནས་ནི། །ཆུ་ཚོད་གཅིག་གྱུར་གཡོན་ནས་རྒྱུ། །དེ་ནས་བགྲོད་པ་རེ་རེ་བཞིན། །ལོ་ནི་སུམ་ཅུར་དབྱུག་གུ་འཕེལ། །གཡོན་དང་གཡས་པ་རིམ་པ་བཞིན། །མཁའ་དང་ས་རླུང་གནས་དེར་འབྱུང་། །དགུ་བཅུ་གོ་དྲུག་ཟླ་བ་ནི། །བཅུ་གཅིག་ལོན་ནས་གཡོན་དུ་ནི། །ནམ་མཁའི་རང་བཞིན་ཞག་གཅིག་རྒྱུ། །དེ་ནས་ལོ་གསུམ་ཕྱོགས་གསུམ་ན། །འཕོ་བར་འགྱུར་བ་ལོ་བརྒྱ་ཡིན། །ད་ནི་ལོ་གསུམ་ཕྱོགས་གསུམ་གྱི། །དབུ་མའི་འཆི་ལྟས་ངེས་པ་ནི། །ཟླ་བ་སོ་བདུན་ཕྱེད་བཅས་ལ། །ཞག་གི་འཕེལ་བ་སོ་གསུམ་སྟེ། །སོ་བཞི་ཕྱེད་བཅས་ཞག་གྲངས་ལ། །རེ་རེ་འཕེལ་འགྱུར་སུམ་ཅུའི་བར། །ལྟེ་བའི་ཁྱིམ་གྱི་རྩ་དྲུག་ཅུ། །གཡོན་དུ་མཁའ་ནས་རིམ་པ་ལྟར། །གསུམ་གསུམ་གྱིས་ནི་རྩ་དྲུག་དྲུག །སྐམས་ཤིང་མི་མཉམ་རྒྱུ་བ་འཕེལ། དེ་བཞིན་གཡས་ནས་མཉམ་པ་རུ། །གཉིས་བཞི་ལ་སོགས་ས་རླུང་ནས། །བསྡུད་རིམ་འགག་ཅིང་ཁྱིམ་དྲུག་སྟོངས། །དེ་རྗེས་ཟླ་བ་གསུམ་པོ་ལ། །གཡོན་ནས་སོ་གཅིག་སྙིང་སྟོབས་ཟད། །གཡས་ནས་སོ་གཉིས་རྡུལ་ཟད་བྱེད། །རྩ་བའི་རྩ་ཆེན་དྲུག་དྲུག་འགག །དེས་རྗེས་སོ་གསུམ་རླུང་ཀུན་ཟད། །མུན་པ་ཆེན་པོ་ཟད་བྱེད་རླུང་། །ཞག་ཅིག་རྒྱུ་ཞིང་འཕོ་བར་བྱེད། །སོ་གཉིས་ཕྱེད་བཅས་ཀྱིས་བགོས་པས། །དབུ་མའི་འཆི་ལྟས་ངེས་པ་ཡིན། །དེ་ནས་དུས་མིན་ཉི་མ་ཡི། །འཆི་ལྟས་ངེས་པ་འདི་ལྟ་སྟེ། །གཡས་སུ་ཞག་གཅིག་རྒྱུ་བ་ནི། །ལོ་གསུམ་ཕྱོགས་གསུམ་ན་འཆིའོ། །ལྔ་རྒྱུ་ལོ་གསུམ་ཚེ་ཡིན་ཏེ། །བཅུ་རྒྱུ་ལོ་གཉིས་ཚེ་ཡིན་ནོ། །བཅོ་ལྔ་རྒྱུ་ན་ལོ་གཅིག་ཚེ། །ཉི་ཤུ་རྒྱུ་ན་ཟླ་དྲུག་འཚོ། །ཉེར་ལྔ་རྒྱུ་ན་ཟླ་བ་གསུམ། །དེ་རྣམས་ལྔ་ཚན་འཕེལ་བ་སྟེ། །ཁྱིམ་ལྔ་སྟོངས་པར་འགྱུར་བ་ཡིན། །དེ་ནས་རེ་རེས་ཁྱིམ་རེ་འདོར། །ཉེར་དྲུག་རྒྱུ་བས་ཟླ་གཉིས་ཚེ། །ཉེར་བདུན་རྒྱུ་བས་ཟླ་གཅིག་ཐུབ། །ཁྱིམ་བདུན་འདས་ནས་རྒྱས་པ་སྟེ། །དེ་ནས་སུས་ཀྱང་བཟློག་མི་ནུས། །ཞག་ནི་སོ་གསུམ་ན་འཆི་བ། །བཅོ་ལྔ་བཅུ་དང་ལྔ་དང་གསུམ། །ཁྱིམ་བཞི་འདོར་བྱེད་བཅུ་གཅིག་སྟོངས། །ཉི་མའི་སྟོབས་ཟད་དེ་འོག་ཏུ། །ཟླ་བ་ཟད་པར་བྱེད་པའི་རླུང་། །གཡོན་ནས་ཞག་གཉིས་རྒྱུ་བར་བྱེད། །ཁྱིམ་ནི་བཅུ་གཉིས་པ་ཡང་སྟོངས། །དེ་ནས་དབུ་མར་ཞག་གཅིག་རྒྱུ། །རྣམ་ཤེས་ཕ་རོལ་འགྲོ་བར་བྱེད། །གཡོན་གྱི་ཟླ་བའི་རྟགས་བཤད་པ། །གཡོན་ནས་ཞག་གཅིག་རྒྱུ་བ་ནི། །ལོ་གསུམ་ཕྱོགས་གསུམ་ནང་འཕོའི་རྟགས། །དེ་ནས་ཟླ་བ་དྲུག་པ་ལ། །ཞག་རེ་འཕེལ་བས་ཞག་གསུམ་རྒྱུ། །དེ་ནས་ཟླ་བ་སུམ་ཅུའི་ཚེ། །ལྟེ་བའི་ཁྱིམ་གཅིག་སྟོངས་པ་ཡིན། །དེ་ནས་ཟླ་བ་རེ་རེ་བཞིན། །འཆི་ལྟས་ཞག་ནི་རེ་རེ་འཕེལ། །ཟླ་བ་གསུམ་གྱིས་ཁྱིམ་རེ་འདོར། །གཡོན་རླུང་ཞག་གྲངས་འཕེལ་བ་བཞིན། །འཚོ་བའི་ཟླ་བ་འབྲི་བ་ཡིན། །གང་ཚེ་ཞག་ནི་སོ་གསུམ་རྒྱུ། །ངེས་པར་ཞག་ནི་གསུམ་ན་འཆི། །ཁྱིམ་ནི་བཅུ་གཅིག་སྟོངས་པ་ཡིན། །དེ་ནས་ཞག་གཉིས་ཉི་མའི་ཁམས། །ཟད་པར་བྱེད་པས་གཡས་ནས་རྒྱུ། །དེ་འོག་དབུ་མར་ཞག་གཅིག་ནས། །རྣམ་ཤེས་གཞན་དུ་འཕོ་བ་ཡིན། །དེ་ལྟར་ཉི་ཟླའི་རྟགས་འབྱུང་བ། །ལྟེ་བའི་མཉམ་པ་ལུག་སོགས་ཀྱི། །ཁྱིམ་ནས་ཐོག་མར་རླུང་རྒྱུ་བ། །ཟླ་བའི་འཆི་ལྟས་གཙོ་བོ་སྟེ། །གླང་སོགས་མཉམ་པའི་ཁྱིམ་རྣམས་ལ། །རླུང་འབྱུང་ཉི་མ་གཙོ་བོ་ཡིན། །སྔ་མ་ལོ་བརྒྱ་ཐུབ་པ་ནས། །སྐྱེས་ནས་ཞག་གཅིག་ཐུབ་པའི་བར། །རྩ་ཀུན་རྒྱུ་དང་དབུ་མ་རྐྱང་། །རྒྱུ་བའི་རིམ་པར་གསུངས་པ་ཡིན། །གང་ཚེ་དུག་དང་མཚོན་དང་ནད། །དྲག་པོས་རྩ་རྣམས་གཅིག་ཆང་འགག །རྒྱུ་དེས་བློ་བུར་འཆི་བར་གསུངས། །ཇི་ལྟར་ལྟེ་བ་འགག་པ་བཞིན། །ཐུན་དང་རྒྱུ་སྐར་ཟླ་རྐང་གི །རིམ་པས་འཁོར་ལོ་གཞན་ཡང་མཚུངས། །འཁོར་ལོ་ལྔ་དང་ཚིགས་ཀུན་ལ། །དབྱུག་གུ་བཅུ་གཉིས་བཅུ་གཉིས་ནི། །ཞག་དྲུག་བརྒྱུས་ནས་ཟད་པ་ཡིན། །རླུང་གི་འཆི་ལྟས་བསྟན་པའོ། །དེ་ནས་ཐིག་ལེ་འགག་པ་ནི། །ལོ་གཅིག་ནང་གི་ཁམས་འཕེལ་ནས། །རླུང་གི་ནུས་པ་ཕྱིར་ཤོར་བས། །དཀར་ནག་རྩ་འགྲིབ་སྔ་མ་བཞིན། །དེ་ནས་ལོ་ནི་བཅུ་དྲུག་བར། །ཐིག་ལེ་འཕེལ་ཏེ་དེ་ནས་ནི། །དཀར་བ་འགྲིབ་ཅིང་འདོར་བ་བྱེད། །དེ་ནས་ཁྲག་ནི་འཕེལ་བ་ཡིན། །སོ་གཉིས་ནས་ནི་དེ་ཡང་འདོར། །རླུང་དང་མེ་དང་ཆུ་སའི་སྟོབས། །བཅུ་དྲུག་རེ་ནས་འགྲིབ་པ་སྟེ། །རགས་པར་དགུ་བཅུ་གོ་བདུན་པ། །སྟོབས་ཀུན་དོར་ནས་ལོ་གསུམ་ན། །འཆི་བའི་ངེས་པ་ཤེས་པར་བྱ། །ལྟེ་བའི་རྩ་གཅིག་ཆད་པ་དང་། །གཡས་གཡོན་ཞག་གཅིག་དུས་སྦྱོར་མཉམ། །གཅི་བ་འགྱུར་བ་ཟླ་དྲུག་སྟེ། །རྣ་བའི་སྒྲ་དོར་ཞག་དྲུག་སྟེ། །ལྕེ་ཡི་རོ་དོར་ཞག་ལྔ་ཡིན། །མིག་དབུས་རི་མོ་ཞག་བཞིའི་ཚེ། །སྣ་ཞོམ་དྲི་དོར་ཞག་གསུམ་མོ། །རེག་བྱ་དོར་བ་ཞག་གཉིས་ཡིན། །ཆོས་ཁམས་ཁུ་བ་ཉམས་པ་ནི། །ཞག་གཅིག་ནས་ནི་ཕ་རོལ་འགྲོ། །དཀར་ཆ་འོག་ཏུ་ལྟུང་བ་སྟེ། །དམར་ཆ་གྱེན་དུ་འགྲོ་བ་ཡིན། །རླུང་རྣམས་སྣ་སྒོ་ནས་འགྲོ་སྟེ། །དེ་ནས་རྣམ་ཤེས་ཀུན་གཞི་ནི། །ཚངས་བུག་ནས་ནི་གཟུགས་མེད་དེ། །ཐིག་ལེ་ལས་ནི་ལྷ་མོ་ཆེ། །ལྟེ་བ་ལས་ནི་འདོད་ཁམས་ལྷ། །མིག་ལས་འདོད་པའི་མི་དབང་པོ། །སྣ་ལས་གནོད་སྦྱིན་གནས་སུ་སྐྱེ། །རྣ་བ་ལས་ནི་གྲུབ་པའི་ལྷ། །སྲིད་པའི་སྒོ་ལས་ཡི་དྭགས་བཤད། །ཆུ་ཡི་ལམ་ནས་དུད་འགྲོར་འགྱུར། །འོག་སྒོ་ལས་ནི་དམྱལ་བ་བརྒྱད། །དེ་ནས་བར་དོ་འབྱུང་བ་ཡིན། །སྣང་མཆེད་ཐོབ་གསུམ་ཐིམ་པ་ནི། །སྐུ་གསུམ་རང་བཞིན་ཉིད་མ་ཤེས། །འོད་གསལ་སྣང་དང་མུན་པ་ཡི། །སྟོང་དང་སྟོང་པ་ཆེན་པོ་རྣམས། །མ་རྟོགས་འཁོར་བའི་འཁོར་ལོར་འཁྱམ། །དེ་ཉིད་སྦྱངས་པ་ཡེ་ཤེས་ཏེ། །རྣམ་པར་དག་པས་མྱ་ངན་འདའ། །ཟབ་མོ་ནང་གི་དོན་སྣང་བར་བྱེད་པ་ལས། །རྩ་རླུང་ཐིག་ལེ་སྡུད་པའི་ཚུལ་བསྟན་པ་སྟེ་བཅུ་གཅིག་པའོ།། ༈ །།རྒྱལ་བས་རྒྱུད་རྣམས་ཐམས་ཅད་དུ། །ཕྱི་རོལ་ཐུན་མོང་སྣང་བ་དང་། །ནང་དུ་རྩ་རླུང་ཐིག་ལེ་དང་། །གཞན་དུ་ཀུན་བརྟགས་ལྷ་དང་སྔགས། །དྲི་མ་དང་བཅས་རྟོགས་པ་དང་། །དྲི་མེད་ཡེ་ཤེས་རྣམ་པ་གཉིས། །ཐམས་ཅད་དོན་དམ་ཀུན་རྫོབ་དང་། །སྤྲོས་དང་སྤྲོས་མེད་གསུངས་པ་ལ། །ཕྱི་རོལ་བྱེད་པོ་གཞན་མེད་པ། །རྟེན་ཅིང་འབྲེལ་སྣང་རང་སྣང་སྟེ། །རྟོག་པས་ལྡན་མིན་འདུ་བྱེད་ཀྱི། །སྣོད་བཅུད་ཕྲ་རགས་མིང་ཚིག་དང་། །ཡི་གེ་ཕྱོགས་དུས་ལ་སོགས་པ། །གསུངས་པ་ཕྱི་རོལ་མངོན་པ་སྟེ། །ཇི་ལྟར་ཕྱི་བཞིན་ནང་ན་གནས། །རྩ་དང་ལུས་དབྱིབས་འཇིག་རྟེན་ལ། །རླུང་གིས་དག་དུས་ཡི་གེ་བསྐྱེད། །ཐིག་ལེ་གཟའ་དང་རྒྱུ་སྐར་དང་། །ཆུ་བོ་མེ་སོགས་ངེས་པ་བསྟན། །ཇི་ལྟར་མིག་བཙུམས་གཟུགས་མི་མཐོང་། །ཕྱེ་བས་སྣང་བར་འགྱུར་བ་དང་། །བཙིར་ན་ཟླ་བ་གཉིས་མཐོང་ལྟར། །རྟེན་གྱི་གནད་འཆིང་མ་ཤེས་པས། །དབང་བྱེད་ཡེ་ཤེས་མཐོང་བ་མིན། །རྟེན་བཅིངས་ལམ་གྱི་ཡེ་ཤེས་མཐོང་། །ཕྱི་རོལ་མེད་ཀྱང་གཞན་སྣང་ལ། །ཀུན་བརྟགས་ལྷ་དང་དཀྱིལ་འཁོར་སྟོན། །དེ་ཕྱིར་ནང་དོན་མངོན་པ་ཡིན། །གཞན་བཤད་ལྷ་དང་དཀྱིལ་འཁོར་ཡང་། །ས་དང་ལམ་དང་ཕ་རོལ་ཕྱིན། །གཟུངས་དང་སྔགས་བཅས་བྱང་ཆུབ་ཕྱོགས། །ཟད་པར་ཟིལ་གནོན་ལ་སོགས་པ། །བསྒྲུབ་ཕྱིར་ཟབ་དང་རྒྱ་ཆེའི་ཕྱིར། །མདོ་དང་ཕ་རོལ་ཕྱིན་པར་བརྗོད། །ཕྱི་རོལ་ལུས་ངག་བསྲུང་སྡོམ་དང་། །རང་བཞིན་བཅས་ལྡན་འདུལ་བ་ནི། །ནང་དུ་རང་དང་གཞན་དོན་ལ། །མ་རྨོངས་ཐབས་མཁས་ཁྱད་པར་གྱིས། །ཉོན་མོངས་ཡེ་ཤེས་བསྒྱུར་བྱེད་པ། །དེ་ཕྱིར་ནང་གི་འདུལ་བར་གསུངས། །འདུལ་མངོན་མདོ་སྡེ་ཕྱིར་ཤེས་པས། །ཉན་རང་འབྲས་བུ་ཐོབ་བྱེད་དེ། །ཟབ་མོའི་མདོ་འདུལ་མངོན་པ་རྣམས། །སྤྱོད་བྱེད་བྱང་ཆུབ་སེམས་དཔར་འགྱུར། །ཐབས་མཁས་ནང་དོན་རྒྱས་པར་ཤེས། །སངས་རྒྱས་སྙིང་པོའི་ཚུལ་རྟོགས་ནས། །འབྲས་བུ་རྟོགས་པ་ལམ་བྱེད་པ། །བླ་མེད་སངས་རྒྱས་མྱུར་ཐོབ་བྱེད། །ཐམས་ཅད་ཡེ་ཤེས་རང་བཞིན་ཏེ། །དེ་སྒྲིབ་འཁྲུལ་རྟོག་གཟུང་འཛིན་གྱི། །ཤེས་པ་གློ་བུར་བར་སྐྱེས་ནས། །འདུ་བྱེད་མངོན་པར་འདུ་བྱས་ནས། །ཡོད་པ་མ་མཐོང་མེད་པ་མཐོང་། །རྣམ་རྟོག་འདམ་དུ་བྱིང་གྱུར་པས། །བྱིས་པ་འཁོར་བའི་ནང་དུ་བྱིང་། །ཕྱི་ནང་གཞན་གསུམ་ཡེ་ཤེས་སུ། །རྟོགས་པས་སངས་རྒྱས་རང་བཞིན་ཏེ། །ཀུན་རྫོབ་གཉིས་སུ་སྣང་བ་རྣམས། །ཆུ་ཟླ་ལྟ་བུར་དོན་དུ་གཟིགས། །དོན་དམ་སྟོང་ཉིད་བཅོ་བརྒྱད་པོ། །དབྱེར་མེད་གཅིག་ཏུ་བདེ་གཟིགས་པས། །ཉོན་མོངས་ཤེས་བྱ་སྙོམས་འཇུག་གི །སྒྲིབ་གསུམ་དང་བྲལ་རང་རིག་ཉིད། །ཇི་ལྟ་ཇི་སྙེད་ཡེ་ཤེས་གསུངས། །དེ་བས་རྡོ་རྗེའི་ཐེག་པ་རུ། །གསུངས་པའི་གནས་ལུགས་རྟོགས་བྱའི་ཕྱིར། །འདིར་ནི་ཕྱོགས་ཙམ་བསྡུས་པ་ཡིན། །རྒྱས་པར་བསྟན་པ་དཔག་མེད་ཀྱང་། །རྒྱལ་སྲས་རྣམས་ཀྱིས་བསྟན་པ་ཡི། །རྒྱུད་འགྲེལ་རྣམས་ལ་བལྟ་བར་གྱིས། །དེ་རྣམས་ཀུན་ལ་འཇུག་པའི་སྒོ། །ཟབ་མོ་ནང་གི་དོན་བཤད་པ། །འདི་ནི་རང་བཟོ་མ་ཡིན་ཏེ། །ཐམས་ཅད་མཁྱེན་པ་བཅོམ་ལྡན་འདས་། །རྒྱལ་བས་གསུངས་པ་ཁོ་ན་བྲིས། །གསང་བའི་བདག་པོ་མཁས་རྣམས་ཀྱི། །རྣམ་འགྲེལ་མཐུ་ལ་རབ་རྟེན་ནས། །རྡོ་རྗེ་ཐེག་པའི་ནང་གི་དོན། །ཕྱིན་ཅི་མ་ལོག་རྙེད་པ་ཡིན། །རྒྱལ་བ་ནམ་མཁའི་སྐུ་ཅན་ཡེ་ཤེས་ཉི་མའི་དཀྱིལ་འཁོར་ལས། །ཕྱོགས་བཅུའི་འཇིག་རྟེན་ཀུན་དུ་གཟུགས་སྐུ་འཁོར་བ་ཇི་སྲིད་སྟོན། །ལྷ་ཡི་རྔ་སྒྲ་ལྟ་བུའི་གསུང་ནི་འདུ་མི་མཛད་པར་ཡང་། །ནམ་མཁའི་ཁམས་མཉམ་འབད་མེད་འགྲོ་བ་ཀུན་གྱིས་ཐོས་པ་མཛད། །ཐུགས་ནི་ཡིད་བཞིན་ནོར་ལྟར་འབད་མེད་ཡེ་ཤེས་ལྷན་ཅིག་ཏུ། །སྤྲོས་པ་མི་མངའ་སྤྲོས་ལྡན་རྣམས་ལ་ཡིད་བཞིན་རེ་བ་སྐོང་། །སེམས་ཅན་ཉོན་མོངས་ལྷན་ཅིག་འཇུག་ཀྱང་ཁྱོད་ལ་གོས་པ་མེད། །དེ་ཕྱིར་རང་བྱུང་རྒྱལ་བ་ཁྱོད་ལ་བདག་ནི་གུས་པས་ཕྱག་འཚལ་ལོ། །ཟབ་མོ་ནང་དོན་བཤད་པ་ལ། །དགེ་བའི་མཐུ་ཡང་ཅི་ཡོད་པས། །ནམ་མཁའ་མཉམ་པའི་འགྲོ་བ་ཀུན། །ཡེ་ཤེས་སྐུ་ཉིད་ཐོབ་པར་ཤོག །ཅུང་ཟད་འགལ་བར་གྱུར་སྲིད་ན། །མཁའ་འགྲོའི་ཚོགས་ཀྱི་བཟོད་པར་མཛོད།། །།ཟབ་མོ་ནང་གི་དོན་གསལ་བར་བྱེད་པའི་རྣམ་པར་བཤད་པ་རྒྱུད་ཐམས་ཅད་ཀྱི་སྙིང་པོ་ཕྱུང་པ་དུམ་བུ་བཅུ་གཅིག་པ། རང་བྱུང་རྡོ་རྗེའི་མིང་ཅན་གྱིས་བླ་ན་མེད་པའི་རྒྱུད་འགྲེལ་ཇི་ལྟ་བར་ནང་གི་དོན་ཤེས་པར་འདོད་པ་རྣམས་ཀྱི་དོན་དུ་བསྟན་པ་རྫོགས་སོ།། །།མཁས་པར་རློམ་པ་དང་བསྒོམས་ནས་ཉམས་མྱོང་དང་། མངོན་ཤེས་ཤར་བ་འདོད་པ་ཀུན་གྱིས་ཀྱང་། ཕྱོགས་རེ་ལས་མ་གོ་བར་འདུག་པས་འདིར་བསྡུས་ཏེ་བསྟན་པ་ཡིན་ནོ། །དབེན་གནས་བདེ་ཆེན་སྟེང་དུ་ཁྱི་ལོ་ཟླ་བ་བདུན་པ་ལ་མཛད་པའོ།། །།

གསང་སྔགས་ཟབ་མོ་ནང་དོན་གྱི་འགྲེལ་པ།

འགྲེལ་པའི་མཆོད་བརྗོད་དང་བསྟན་བཅོས་ཀྱི་ལུས་རྣམ་པར་བཞག་པ།

༄༅། །གསང་སྔགས་ཟབ་མོ་ནང་དོན་གྱི་འགྲེལ་པ་བཞུགས་སོ། །

༄༅། །བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཅོམ་ལྡན་འདས་དཔལ་རྡོ་རྗེ་འཆང་ཆེན་པོས་བློ་གྲོས་མཆོག་དུ་གྱུར་པ་རྣམས་ལ་བླ་ན་མེད་པའི་བྱང་ཆུབ་ཆེན་པོ་མྱུར་དུ་ཐོབ་པར་བྱ་བའི་ཕྱིར། རྡོ་རྗེའི་ཐེག་པ་བླ་ན་མེད་པ་གསུངས་པ་ལས། །དེ་ཡི་ཟབ་མོའི་ནང་གི་དོན་ཉེ་བར་བསྡུས་ཏེ་བསྟེན་པ་བཤད་པར་བྱའོ། །བསྟན་ཆོས་འཆད་པར་བྱེད་པ་དག་ནི་ཐོག་མར་དགོས་པའི་དོན་བརྗོད་པར་བྱ་བ་ཡིན་པས་དེ་བརྗོད་པ། སྤྲོ་བ་དང་ནི་རྩོམ་པ་ཆེན་པོས་རྡོ་རྗེའི་ཐེག་ལ་འཇུག་འདོད་གང་། ལུས་དང་ལོངས་སྤྱོད་ལྟོས་པ་མེད་པར་བླ་མ་ལ་དབུལ་ཟབ་མོའི་དབང་རྣམས་བླང་བར་བྱ། །དེའི་འོག་དུ་རྒྱུད་དང་གདམ་ངག་མཉན་ཅིང་བསམས་ཏེ་བསྒོམས་པས་ངེས་པར་འཇུག་པར་བྱ། །རྒྱུད་ཀུན་སྣ་ཚོགས་ཚིག་དང་དོན་ལྡན་དགོངས་པའི་སྐད་རྣམས་དུ་མར་ལྡན། །ཕྱི་ནང་གཞན་དང་ཡེ་ཤེས་རྒྱ་ཆེན་རྣམ་པ་མང་ལྡན་ཕལ་གྱིས་བསྡུ་བར་ནུས་མིན་པ། །བསྡུས་པ་གང་དེ་མཐོང་བར་གྱུར་ན་མུན་ཁུང་གནས་པའི་ནོར་བུའི་སྒྲོམ་ལ་སྣང་བ་ཡི། །སྒྲོན་མེ་དང་ནི་ལྡེ་མིག་ལག་དུ་ཕྱིན་པས་ངེས་པར་དོན་ལ་འཇུག་པར་འགྱུར་བ་བཞིན། །བློ་ལྡན་ངེས་པར་བདག་ལ་མོས་དང་ཐེ་ཚོམ་ལྡན་ལའང་ཕན་པར་འགྱུར་སྙམ་གཞུང་འདི་བསྡུས། དེ་ལྟ་བུ་སྡུད་པར་བྱེད་པ་ཡང་བདག་ལྟ་བུའི་ཡུལ་མ་ཡིན་མོད་ཀྱང་གསང་བ་བའི་བདག་པོ་བྱང་ཆུབ་སེམས་དཔའ་རྣམས་དང་། མཁས་ཤིང་གྲུབ་པ་རྣམས་ཀྱི་རྣམ་པར་འགྲེལ་པ་དུ་མ་དང་བླ་མ་དམ་པ་ལས་འོངས་པ་ཡང་དག་པའི་བསྟན་བཅོས་འབུམ་ཕྲག་དུ་མ་མཐོང་བའི་ཕྱིར་དང་། ནང་གི་དོན་ཅུང་ཟད་ངེས་པའི་ཕྱིར་བརྩམས་པ་ལ་སྐྱོན་མེད་དོ། །གཞན་ཡང་ཁ་གཅིག་ཕ་རྒྱུད་མ་རྒྱུད་དག་ལ་ལ་ལ་ནས་རྩའི་གནས་ལུགས་བསྡུས་པ་དང་། རྒྱས་པར་བཤད་པ་དང་། རླུང་དང་ཐིག་ལེའི་དགོངས་པ་དག་འདྲེས་པ་དང་། ཕྱི་འཇིག་རྟེན་གྱི་ཁམས་དང་། ནང་ལུས་དང་། གཞན་དཀྱིལ་འཁོར་གྱི་འཁོར་ལོ་བསྒོམ་པ་དང་། ཡེ་ཤེས་ཀྱི་གནས་ལུགས་དང་རྒྱས་གདབ་པ་དང་བཅས་པ་རྣམ་གྲངས་རེ་རེར་བསྟན་པ་དང་། གཉིས་དང་གསུམ་དང་། ཡོངས་སུ་རྫོགས་པ་ལ་སོགས་པ་གསུངས་པ་རྣམས་ཁོང་དུ་མ་ཆུད་པར། རྒྱུད་རྣམས་དང་དེ་ལ་བརྟེན་པའི་མན་ངག་རྣམས་ནི་དོན་མི་ཅིག་གོ་སྙམ་པ་དང་། ཏིང་ངེ་འཛིན་དང་ཤེས་རབ་ཀྱི་མཐུས་ཕྱོགས་རེ་མཐོང་བ་དག་ཀྱང་འདི་ནི་བདེན་གྱི་གཞན་ནི་གཏི་མུག་གོ་ཞེས་རྟོག་ཅིང་སྒྲོགས་པ་ནི་ཐམས་ཅད་མཁྱེན་པའི་ལམ་ལས་རིང་བའི་ཕྱིར་རྡོ་རྗེའི་ཐེག་པ་ཟབ་པ་དཔག་ཏུ་མེད་པའི་མིང་དང་དོན་ལྡན་པ་མི་ཤེས་པས་ལོག་པར་འགྱུར་བ་དག་ལ་བརྩེ་བ་དང་། བདག་ཉིད་ཀྱང་རྒྱུད་རྣམ་པར་སྦྱང་བའི་ཕྱིར་བསྟན་བཅོས་འདི་བྱས་སོ། །ཁ་ཅིག་འདི་དོན་ཤེས་ན་དོན་དང་ལྡན། །མོས་དང་བསམ་མི་ཁྱབ་དྲན་ཐར་པའི་རྒྱུ། །མཁའ་ལྡིང་རྗེས་སུ་བྱ་བྲན་རྩོལ་བ་བཞིན། །མཁས་གྲུབ་རྗེས་སུ་བདག་ཀྱང་རྩོལ་བར་བྱེད། དེ་ལྟར་དགོས་པ་བཤད་ནས་གཉིས་པ་བསྡུས་པའི་དོན་ནི་གསུམ་སྟེ། མཆོད་པར་བརྗོད་ཅིང་བཤད་པར་དམ་བཅའ་བ་དང་། གཞུང་གི་དོན་དང་། འཇུག་བསྡུ་བ་བསྔོ་བ་དང་བཅས་པའོ། །དང་པོ་ལ་བླ་མ་དང་། རྣམ་པ་དང་བཅས་པའི་སྐུ་དང་། བདེ་བ་ཆེན་པོ་ལ་ཕྱག་འཚལ་བ་དང་། བཤད་པར་དམ་བཅའ་བའོ། །གཞུང་གི་དོན་ལ་བཅུ་གཉིས་སྟེ། ལུས་རྣམ་པར་བཞག་པ་དང་། །རྒྱུ་རྐྱེན་སྤྱིར་བསྟན་པ་དང་། །བྱེ་བྲག་ཏུ་ལུས་འགྲུབ་པའི་བསྐྱེད་རིམས་དང་། རྩ་བཤད་པ་དང་། རླུང་བཤད་པ་དང་། ཐིག་ལེ་བཤད་པ་དང་། གནས་སྐབས་བཞིའི་རྣམ་པར་ཤེས་པ་དང་འབྲེལ་བའི་ཚུལ་དང་། ཕྱི་སྣོད་ཀྱི་དོན་ནང་དུ་སྦྱར་བའི་དོན་དང་། བསྐྱེད་རིམས་ཀྱི་ཚུལ་ལ་སྦྱར་བ་དང་། ཆོས་རྣམས་ཀྱི་སྦྱང་གཞིར་བསྟན་པ་དང་། ལམ་གྱི་རིམ་པ་དང་། ལུས་འཇིག་ཅིང་སྡུད་པའི་ཚུལ་བཤད་པའོ། །དེ་ལྟར་བརྗོད་པར་བྱེད་པའི་བསྟན་བཅོས་འདིས་ནང་གི་དོན་ཤིན་ཏུ་ཟབ་པ་དག་སྟོན་པར་བྱེད་པའི་ངག་དེ་ལ་བརྟེན་ནས་དོན་རྟོགས་པར་བྱེད་པ་ནི། ངག་དང་ངག་ཅན་གྱི་འབྲེལ་བའོ། །གཞིའི་དོན་ཚུལ་བཞིན་དུ་ཤེས་པ་ལ་བརྟེན་ནས་དེ་ཡི་གནད་འཆིང་བ་ནི་ལམ་གྱི་རིམ་པ་ཡིན་ལ། དེས་གནས་སྐབས་ཀྱི་འཁྲུལ་པ་རྣམ་པར་སྦྱངས་ནས་དྲི་མ་མེད་པའི་སངས་རྒྱས་ཀྱི་སྙིང་པོའི་ཡོན་ཏན་སྣང་བས་འབྲས་བུ་འཐོབ་པར་བྱེད་པ་ནི་རང་བཞིན་གྱི་འབྲེལ་བ་སྟེ་འདི་ནི་གཞི་ལམ་འབྲས་བུའི་རྒྱུད་ཐམས་ཅད་ཀྱི་དོན་གྱི་འབྲེལ་ལོ། །དེ་ཡང་གསང་བ་འདུས་པའི་རྒྱུད་ཕྱི་མ་ལས། རྒྱུད་ཅེས་བྱ་བ་འབྲེལ་པའི་དོན། །འབྲེལ་བ་ལ་ཡང་རྣམ་གསུམ་སྟེ། །གཞི་དང་རང་བཞིན་འབྲས་བུ་དང་། །མི་འཕྲོགས་པ་ཡིས་ཕྱེ་བ་ཉིད། །གཞི་དང་རང་བཞིན་རྒྱུ་ཡིན་ཏེ། །དེ་བཞིན་མི་འཕྲོག་འབྲས་བུའོ། །གཞི་ནི་ཐབས་ཞེས་བྱ་བ་སྟེ། །གསུམ་གྱིས་རྒྱུད་ཀྱི་དོན་བསྡུས་སོ། །ཞེས་གསུངས་པས་འདི་ཉིད་བཤད་པར་བྱ་སྟེ། འདི་ལ་བོད་དུ་བྱོན་པའི་སྔ་རབས་པ་ཁ་ཅིག །གཞི་ནི་བྱང་ཆུབ་ཀྱི་སེམས་གཉེན་པོའི་རྣམ་པར་སྐྱེས་པ་ཡིན་ཞེས་བཞེད་པ་དང་། ལ་ལ་ནི་དབང་བཞིའོ་ཞེས་པ་བཞེད་པ་དང་། གཞན་ཡང་གཞི་ལུས་ཡིན་ནོ་ཞེས་གསུང་མོད་ཀྱི་ལུང་དང་མི་མཐུན་པ་དང་། གང་ཡང་གཉེན་པོའི་རྣམ་པར་སྐྱེས་ན་ལམ་དུ་འགྱུར་བ་དང་། དབང་ཡང་ལམ་གྱི་གཞི་ཡིན་ལ་དེ་ལ་ཡང་གཞི་གཞན་དགོས་པའི་ཕྱིར་དང་། ལུས་ནི་ཕུང་པོ་ལྔ་ཡི་ཡ་གྱལ་ཡིན་པའི་ཕྱིར་ཐམས་ཅད་ཀྱི་གཞིར་མི་འཐད་དོ། །འདིར་ནི་གཞི་དངོས་པོའི་གནས་ལུགས་ལུས་སེམས་གཉིས་སོ། །དེ་ལ་དྲི་མས་མི་འཕྲོགས་པའི་སངས་རྒྱས་ཀྱི་སྙིང་པོ་ཉིད་འབྲས་བུའོ། །གང་གཞི་དེ་ལ་མ་སྨིན་པ་སྨིན་པར་བྱེད་པ་དབང་དང་། སྨིན་པ་གྲོལ་བར་བྱེད་པའི་བསྐྱེད་རྫོགས་ཀྱི་གནད་བཅིངས་པས་ལམ་གྱི་རིམ་པར་འགྱུར་རོ། །འདི་ཡི་དོན་ནི་འོག་ནས་སྟོན་ཅིང་དགག་བསྒྲུབ་དང་ལུང་མང་པོ་རྣམས་ནི་ཡི་གེ་མང་བར་འགྱུར་བས་འཕྲོས་པ་བཞག་པར་བྱའོ། །རེ་ཞིག་བསྟན་བཅོས་འདི་ཉིད་ཀྱི་འབྲེལ་ནི། དང་པོར་རྒྱུ་རྐྱེན་སྤྱིའི་གནས་ལུགས་མ་གོ་ན་ཕྱི་རོལ་པ་དང་མཚུངས་པར་འགྱུར་དུ་དོགས་པས་རྒྱུ་རྐྱེན་སྤྱིར་བསྟན་ཏོ། དེ་ནས་བྱེ་བྲག་ཏུ་ལུས་འགྲུབ་པས་བསྐྱེད་པའི་རིམ་པ་རྟོགས་པར་བྱ་བའི་ཕྱིར་བསྟན་ཏོ། དེ་ཇི་ལྟར་གནས་པ་ལ་རྩ་ཤེས་དགོས་པ་དང་། རྩ་དེ་ཡང་རླུང་གིས་བསྒྲུབས་ཤིང་རྒྱུ་བའི་ཕྱིར་དང་། དེར་དྭངས་སྙིགས་ཀྱི་ཐིག་ལེ་གནས་ཤིང་བརྟེན་པའི་དོན་དང་། དེ་ལྟར་རྩ་རླུང་ཐིག་ལེ་རྫོགས་པས། གཉིད་དང་རྨི་ལམ་ཐ་མལ་གྱི་དུས་དང་ཆགས་པའི་གནས་སྐབས་བཞི་ཡི་འཁྲུལ་པ་བསྐྱེད་པས་དེ་དག་གི་རྣམ་པར་ཤེས་པ་དང་འབྲེལ་བའི་ཚུལ་དང་། དེ་ལ་ཕྱི་གཞན་དུ་མ་གྲུབ་པར་བསྟན་པའི་ཕྱིར་སྦྱར་བཤད་དང་། ཀུན་བཏགས་པ་ལ་དབང་འབྱོར་བར་བྱ་བའི་ཕྱིར་བསྐྱེད་རིམས་བསྟན་པའི་ངེས་པ་ལ་སྦྱར་བ་དང་། དེར་མ་ཟད་ཀྱི་སྤང་གཉེན་གྱི་ཆོས་ཐམས་ཅད་ཀྱི་སྦྱང་གཞི་དང་སྦྱོང་བྱེད་བསྟན་པའི་རྒྱུ་མཚན་གོ་བར་བྱ་བ་དང་། ཐེག་པ་ཐམས་ཅད་ཀྱི་ལམ་རིམ་བསྒྲོད་ཚུལ་དང་བཅས་པ་དང་། འཆི་བ་དང་རྫོགས་པའི་རིམ་པ་བསྡུད་པའི་ཚུལ་སྦྱར་བ་རྟོགས་པས་དག་པ་དང་མ་དག་པའི་ཉིང་འཚམས་སྦྱོར་བ་རྟོགས་པར་བྱ་བ་དང་། དེ་ཐམས་ཅད་ཀྱི་དོན་བསྡུས་ཏེ་བསྟན་ཅིང་རིག་པ་འཛིན་པའི་སྡེ་སྣོད་གྱི་རྒྱུ་མཚན་རྟོགས་པར་བྱ་བ་ནི་འདི་ཡི་གོ་རིམས་ཡིན་ནོ། །དེ་ལྟར་བརྗོད་པར་བྱ་བ་དང་བརྗོད་པར་བྱེད་པ་དང་འབྲེལ་བ་དང་དགོས་པ་དང་དགོས་པའི་དགོས་པ་རྟོགས་པར་བྱའོ། །ད་ནི་རྩོམ་པ་མཐར་ཕྱིན་པར་བྱ་བའི་ཕྱིར་མཆོད་པར་བརྗོད་པ་ཚིགས་སུ་བཅད་པ་གསུམ་ལས་དང་པོ། བླ་མ་དང་སངས་རྒྱས་དབྱེར་མེད་པ་ལ་ཕྱག་འཚལ་བ་ནི། དཔལ་ལྡན་བླ་མ་ལ་ཕྱག་འཚལ་ལོ། །ཞེས་གང་ལ་ཕྱག་བྱ་བའི་ཁྱད་པར་གྱི་གཞི་བརྗོད་ནས། ཁྱད་པར་དུ་བྱེད་པའི་ཆོས་ཡོན་ཏན་འདི་རྣམས་དང་ལྡན་པར་སྟོན་པ་ནི། ཐམས་ཅད་མཁྱེན་པ་ལ་སོགས་པ་སྟེ། དེ་ཡང་ཐམས་ཅད་མཁྱེན་པ་ནི་ཤེས་བྱ་ཐམས་ཅད་མཁྱེན་པའོ། །ཐམས་ཅད་གཟིགས་པ་ནི་ཚིག་ཟློས་པ་མ་ཡིན་གྱི། མཚན་ཉིད་སྒྲིབ་པ་མེད་པར་མངོན་སུམ་དུ་རྟོགས་པའི་ཕྱིར་ཡིན་ནོ། །མཁྱེན་པའི་སྒྲ་ཙམ་ནི་གཞན་གྱི་སྒྲ་ལ་རྟེན་ནས་རྟོགས་པ་ཡང་ཡོད་པས་ན་འདི་བརྗོད་དོ། །དེ་ལྟར་རྟོགས་ཀྱང་མི་སྟོན་པའི་རང་སངས་རྒྱས་དག་ཀྱང་ཡོད་པས་བདག་ཅག་གི་བླ་མ་ནི་དེ་ལྟ་མ་ཡིན་ཏེ་དེས་ན། ཕྱི་ནང་གཞན་གསུམ་དེ་ཉིད་སྟོན། ཞེས་བྱ་སྟེ་ཕྱི་འཇིག་རྟེན་གྱི་ཁམས་དང་། ནང་རྡོ་རྗེའི་ལུས་དང་། གཞན་དབང་བསྐུར་བ་དང་བསྐྱེད་པའི་རིམ་པ་དང་། དེ་ཁོ་ན་ཉིད་ཕྱག་རྒྱ་ཆེན་པོ་སྣང་བ་དང་སྟོང་པ་དབྱེར་མེད་པ་བདེན་པ་གཉིས་ཀྱི་དོན་མ་ནོར་པར་སྟོན་པར་མཛད་ཅིང་། བསྟན་ནས་ཀྱང་དེའི་བྱེད་ལས་གནས་སྐབས་བཞིའི་འཁྲུལ་པ་སེལ་བ་སྟེ། གཉིད་དང་རྨི་ལམ་དང་སྙོམས་འཇུག་དང་ཐ་མལ་གྱི་སྣང་བས་རྒྱུད་དཀྲུགས་པ་བསལ་ནས། སྐུ་བཞིའི་འབྲས་བུ་མངོན་དུ་སྟོན་པ་ནི། ལྷ་དང་བཅས་པའི་འཇིག་རྟེན་ཐམས་ཅད་ཀྱི་དཔལ་ཡིན་པའི་ཕྱིར། དཔལ་ལྡན་བླ་མ་ལ་ཕྱག་འཚལ་བ་ཡིན་ནོ། །གཉིས་པ་ནི་བླ་མ་དེ་ཉིད་རྣམ་པ་དང་བཅས་པའི་སངས་རྒྱས་ཀྱི་ངོ་བོར་བསྟན་པའི་ཕྱིར་ཚིགས་སུ་བཅད་པ་གཉིས་པ་ནི། ལྷན་ཅིག་སྐྱེས་པ་གཅིག་གི་དངོས་ནི། སེམས་ཅན་ཐམས་ཅད་ལ་དབྱེ་བ་མེད་པར་དྲི་མ་དང་བཅས་ཏེ་གནས་པ་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡོན་ཏན་འཕྲིན་ལས་དང་བཅས་པ་ཡིན་ལ། གཉིས་ཀྱི་བདག་ནི་ཐབས་དང་ཤེས་རབ་དང་ཀུན་རྫོབ་དང་དོན་དམ་པའི་རང་བཞིན་འབྲས་བུ་ཆོས་ཀྱི་དབྱིངས་ཤིན་ཏུ་དྲི་མ་མེད་པ་དང་དེ་ཡི་རྒྱུ་མཐུན་པ་རབ་ཏུ་ཟབ་པའི་སྐུ་གཉིས་སོ། །སྐུ་གསུམ་རྩ་རླུང་ཐིག་ལེ་ཅན། ཞེས་པ་ནི་དོན་དམ་པ་བདེ་བ་ཆེན་པོ་ཆོས་ཀྱི་དབྱིངས་ནི་ཆོས་ཀྱི་སྐུ་ཡིན་ལ། ཀུན་རྫོབ་ཀྱི་བདེན་པ་ལ་བརྟེན་པའི་རྒྱུ་མཐུན་པ་རབ་ཏུ་ཟབ་པའི་སྐུ་དེ་ལ་རྨི་ལམ་དག་པ་དང་ཀུན་གཞི་ལ་བརྟེན་པའི་ཡིད་སྲོག་གི་རླུང་དང་བཅས་པ་གནས་གྱུར་པ་ལོངས་སྤྱོད་རྫོགས་པའི་སྐུ་དང་། ཐ་མལ་གྱི་སྣང་བ་དངོས་པོ་ལ་འཇུག་པའི་རྣམ་པར་ཤེས་པ་དག་པས་སྤྲུལ་པའི་སྐུ་འབྱུང་སྟེ། འདི་ཡང་རྩ་ནི་སྐུ་རླུང་གསུང་ཐིག་ལེ་ཐུགས་རྡོ་རྗེ་སྟེ་འདི་གསུམ་རྣམ་པར་སྦྱངས་པས་ཐོབ་པར་གསུངས་པའི་ཕྱིར་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་གསུངས་སོ། །གནས་སྐབས་བཞི་པོ་སྐུ་བཞི་ཉིད་ཅེས་བྱ་བ་ནི། དྲི་མ་མེད་པའི་འོད་དུ་གསུངས་པ་ལྟར། གཉིད་འཐུག་པོ་ཤིན་དུ་ལོག་པ་སེམས་མེད་པའི་གནས་སྐབས་ནི་ཆོས་ཀྱི་སྐུའོ། །རྨི་ལམ་གྱི་གནས་སྐབས་སྲོག་གི་རླུང་གིས་བསྐྱེད་པ་ཡོད་པ་དང་མེད་པ་ལྟ་བུ་ནི་ལོངས་སྤྱོད་རྫོགས་པའི་སྐུའོ། །སད་པའི་གནས་སྐབས་ཀྱི་སྣང་བ་དང་བཅས་པ་ནི་སྤྲུལ་པའི་སྐུའོ། །ཆགས་པའི་གནས་སྐབས་བཟློག་པར་དཀའ་བའི་དྲི་མས་རྨོངས་པར་གྱུར་པ་ནི་ཡེ་ཤེས་ཀྱི་སྐུ་སྟེ། སེམས་ཅན་རྣམས་ཀྱི་སྒྲིབ་པ་དང་བཅས་པའོ། །སངས་རྒྱས་རྣམས་ཀྱི་ནི་སྒྲིབ་པ་མེད་པའོ་ཞེས་གསུངས་པ་རྒྱུ་དང་འབྲས་བུའི་གནས་སྐབས་ཀྱི་སྐུ་བཞིའི་དབྱེ་བ་གསུངས་པའོ། །སྐུ་ལྔའི་བདག་ཉིད་ལ་ཕྱག་འཚལ། ཞེས་བྱ་བ་ནི་དེ་ཉིད་ལ་རྣམ་པའི་དབྱེ་བས་ཡེ་ཤེས་ལྔ་དང་སྐུ་ལྔར་ཡང་གསུངས་ཏེ། གཟུགས་ཀྱི་ཕུང་པོ་ཆོས་ཀྱི་དབྱིངས་ཀྱི་ཡེ་ཤེས་རྣམ་པར་སྣང་མཛད་དང་། །རྣམ་པར་ཤེས་པའི་ཕུང་པོ་མེ་ལོང་ལྟ་བུའི་ཡེ་ཤེས་མི་བསྐྱོད་པའམ་རྡོ་རྗེ་སེམས་དཔའ་དང་། ཚོར་བའི་ཕུང་པོ་མཉམ་པ་ཉིད་ཀྱི་ཡེ་ཤེས་རིན་ཆེན་འབྱུང་ལྡན་དང་། འདུ་ཤེས་ཀྱི་ཕུང་པོ་སོ་སོར་རྟོག་པའི་ཡེ་ཤེས་འོད་དཔག་ཏུ་མེད་པ་དང་། འདུ་བྱེད་ཀྱི་ཕུང་པོ་བྱ་བ་གྲུབ་པའི་ཡེ་ཤེས་དོན་ཡོད་གྲུབ་པ་སྟེ་དེ་ལྟར་སྐུ་ལྔ་དང་ཡེ་ཤེས་ལྔ་དང་ཕུང་པོ་ལྔ་པོ་ཐམས་ཅད་ཀྱང་བདེ་བ་ཆེན་པོ་གཅིག་པུ་ཡི་རྣམ་པར་དབྱེ་བ་སྟེ། ཧེ་བཛྭ་ལས། །རིགས་ནི་ལྔ་པོ་དེ་ཉིད་ལས། །སྟོང་ཕྲག་དུ་མ་སྐྱེས་པ་ཉིད། །དེ་ཕྱིར་འདི་དག་རང་བཞིན་གཅིག །བདེ་ཆེན་མཆོག་དུ་ཕན་པ་ཉིད། ཞེས་བྱ་བ་ལ་སོགས་པ་དང་། ཀུན་ཏུ་སྤྱོད་པ་ལས། གང་ཡང་དྲུག་པའི་སངས་རྒྱས་ཞེས་བྱ་བ། གཅིག་པུའི་ཉམས་ནི་དུ་མས་གར་མཛད་དོ། །ཞེས་པ་ལ་སོགས་པ་རྒྱུད་ཐམས་ཅད་དུ་རྒྱ་ཆེར་གསུངས་པས་བདེ་བ་ཆེན་པོའི་རྣམ་པ་ཐམས་ཅད་ལ་ཕྱག་འཚལ་བའོ། །ཚིགས་སུ་བཅད་པ་གསུམ་པ་ནི་དེ་ཡང་། བདེ་བ་ཆེན་པོ་སངས་རྒྱས་ཐམས་ཅད་བསྐྱེད་པའི་ཡུམ་ལྷ་མོ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་བ་སྟེ། དངོས་གཅིག་ཆོས་ཀུན་རང་བཞིན་ཅན། །ཞེས་བྱ་བ་ནི་རྡོ་རྗེ་གུར་ལས། །ཤེས་རབ་ཕ་རོལ་ཕྱིན་པའི་ཐབས། །དེ་ཉིད་རྣལ་འབྱོར་མར་བརྗོད་དེ། །གང་ཕྱིར་དེ་ཉིད་ལ་འཇུག་པས། །ཕྱག་རྒྱ་ཆེན་པོར་རབ་ཏུ་སྦྱོར། །ཞེས་གསུངས་ཏེ་དེ་ལྟ་བུའི་དངོས་པོ་གཅིག་པོ་ནི་ཆོས་ཐམས་ཅད་ཀྱི་རང་བཞིན་ཡིན་ནོ། །ཆོས་ཐམས་ཅད་ཅེས་བྱ་བ་ཡང་རྟེན་ཅིང་འབྲེལ་བར་འབྱུང་པ་ལ་བྱ་སྟེ། དེ་ཡང་རང་བཞིན་སྟོང་པ་ཉིད་དོ། །དེ་སྐད་དུ་འཕགས་པ་ཀླུ་གྲུབ་ཀྱི་ཞལ་སྔ་ནས། རྟེན་ཅིང་འབྲེལ་འབྱུང་མ་གཏོགས་པའི། ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་ཤིང་ཕ་རོལ་ཏུ་ཕྱིན་པ་ལས་ཀྱང་། ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བ་སྟེ། དེ་ཡང་མ་སྐྱེས་པ་མ་འགགས་པ་སྟོང་པ་དབེན་པ་ཞི་བའོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་ཡང་སྔགས་ཀྱི་ཐེག་པ་ལ་མིང་གི་རྣམས་གྲངས། དབུ་མའི་རང་བཞིན་བདེ་ཆེན་ཉིད་ཞེས་བྱ་སྟེ་མཐའ་ཐམས་ཅད་དང་བྲལ་བས་དབུ་མ་སྟེ། རྩ་དབུ་མ་དང་། ཡེ་ཤེས་ཀྱི་རླུང་དང་། བདེ་བ་ཆེན་པོའི་ཐིག་ལེ་དང་། ཡུལ་དང་ཡུལ་ཅན་དབྱེར་མེད་པ་གཞོན་ནུ་མ་ལ་པྲ་ཕབ་པ་ལྟ་བུ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཅེས་གསུངས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་མ་སངས་རྒྱས་ཐམས་ཅད་བསྐྱེད་པ་ཡིན་ནོ། །དེ་ཡང་རྟོགས་པར་བྱ་བའི་དབང་དུ་བྱས་ནས། །གང་མཐར་སྐྱེས་པའི་རང་བཞིན་ཅན། ཞེས་སྨོས་ཏེ་གང་མཐར་ཞེས་སྒྲ་གཅིག་གིས་དོན་མང་པོ་འཛིན་པས་འདིར་བརྗོད་པ། གང་བསྒོམ་པའི་ལམ་མཐར་ཐུག་པ་དེ་ཡི་ཚེ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྤང་བྱ་ཉོན་མོངས་པ་དང་ཤེས་བྱ་དང་སྙོམས་འཇུག་གི་སྒྲིབ་པ་གསུམ་རྣམ་པར་བཅོམ་པ་དེའི་ཚེ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཀྱི་ཡེ་ཤེས་མཚན་མ་ཐམས་ཅད་བྲལ་བ་འཐོབ་བོ། །འདི་ནི་རྒྱུད་བླ་མ་ལས་རྒྱ་ཆེར་གསུངས་སོ། །དེ་ཡང་ལམ་པའི་སྐབས་སུ་ས་བརྒྱད་པར་རྣམ་པར་མི་རྟོག་པའི་ཡེ་ཤེས་སྐྱེའོ། །དེ་ཡི་རྒྱུ་མཐུན་པ་ས་དང་པོ་ལ་མཐོང་བས་སྤང་བར་བྱ་བ་སྤངས་པའི་མཐར་རྣམ་པར་མི་རྟོག་པའི་ཡེ་ཤེས་སྣང་བའི་ཏིང་ངེ་འཛིན་སྐྱེ་བར་འགྱུར་ཏེ་དོན་ནི་དེ་ལྟ་བུ་ཡིན་ནོ། །འོ་ན་བླ་ན་མེད་པའི་རྒྱུད་ལས། །མཆོག་མཐའ་དགའ་བྲལ་དང་པོར་ནི། །མུན་པ་ལ་ནི་མར་མེ་ལྟར། །དེ་བཞིན་བུས་ཀྱང་ཡིད་ཆེས་ཀྱིས། །ཞེས་གསུངས་པ་འདི་ཅི་ལྟ་བུ་ཞེ་ན། །རང་བྱུང་རྣམས་ཀྱི་དོན་དམ་དེ། དད་པ་ཉིད་ཀྱིས་རྟོགས་བྱ་ཡིན། ཞེས་རྒྱུད་བླ་མ་ལས་གསུངས་ཏེ་སངས་རྒྱས་ཉིད་ཐམས་ཅད་དུ་དཔང་དུ་བྱས་ཏེ། དབང་གི་སྟོབས་ཀྱིས་སམ། བསྒོམས་པའི་སྟོབས་ཀྱིས་སྐྱེས་ཀྱང་རུང་སྟེ། རྩ་རླུང་བྱང་ཆུབ་ཀྱི་སེམས་རྣམ་པར་དག་པ་མཆོག་ཏུ་དགའ་བའི་མ་མཐའ། དགའ་བྲལ་གྱི་ཡ་མཐར་སྐྱེས་པའི་བདེ་བ་དང་སྟོང་པ་གཉིས་སུ་མེད་པ་ཆགས་པ་དང་གཏི་མུག་དང་ཞེ་སྡང་གི་སེམས་བྲལ་བ་ཆུ་ཟླ་ལྟར་བདེན་པ་དང་བརྫུན་པ་བྲལ་བ་འཛག་པ་མེད་པའི་བདེ་བ་མཆོག་ཏུ་མི་འགྱུར་བའི་སྐད་ཅིག་གིས་རླུང་བརྒྱ་ཕྲག་བཅོ་བརྒྱད་འགགས་པའི་སྐད་ཅིག་ལ་ས་དང་པོར་སྦྱོར་བ་ནི་བྱང་ཆུབ་སེམས་དཔའི་འགྲེལ་པ་བསྐོར་གསུམ་ནས་རྒྱ་ཆེར་གསུངས་ཏེ། དེ་དང་གཞི་མཐུན་པ་ནི་ལུས་ཅན་ཐམས་ཅད་ལ་སྐྱེ་ཡང་སྒྲིབ་པས་བསྒྲིབས་པའི་ཕྱིར་འཁོར་བའི་རྩ་བར་གྱུར་ཏོ། །དེ་ནི་ལྷ་མོ་སྟེ་སྣ་ཚོགས་ཡུམ་དང་རྡོ་རྗེ་ཕག་མོ་དང་བདག་མེད་མ་ཞེས་བྱ་བ་ལ་སོགས་པའི་མིང་དུ་ཡང་གསུངས་པས་འདིར་ཡང་། ལྷ་མོ་དེ་ལ་ཕྱག་འཚལ་ལོ། །ཞེས་སྨོས་པ་ཡིན་ནོ། །གཉིས་པ་བཤད་པར་དམ་བཅའ་པ་ནི། ཚིག་རྐང་དྲུག་ལས། དེ་ལྟར་མཆོད་པར་བརྗོད་ནས་བཤད་པར་བྱ་བ་ནི་ནང་དོན་གྱི་བསྟན་བཅོས་འདི་སྟོན་པར་བྱེད་དོ། །དེ་ཡང་ཚུལ་ཇི་ལྟ་བུ་ཞེ་ན། རྒྱུད་རྣམས་ཀུན་ཏུ་གསང་བ་གང་། ཞེས་བྱ་བ་བྱ་བ་དང་སྤྱོད་པ་དང་རྣལ་འབྱོར་གྱི་རྒྱུད་ཕལ་དུ་གསང་བ་ནི་ཡང་དག་པའི་རྩ་རླུང་བྱང་ཆུབ་ཀྱི་སེམས་ཀྱི་གནད་ཐབས་མཁས་པའི་ཁྱད་པར་བླ་ན་མེད་པའི་དམ་ཚིག་ཆེན་པོ་དགོངས་པ་དང་ལྡན་པ་རྣམས་དང་གསུམ་པ་དང་བཞི་པའི་དབང་གི་དོན་དང་དུ་བ་ལ་སོགས་པའི་རྟགས་དང་རྟགས་ཅན་འབྲེལ་པའི་ལམ་དང་འབྲས་བུ་རྣམས་ཀུན་ཏུ་གསང་བ་གང་ཡིན་པའོ། །རྒྱལ་བས་བླ་ན་མེད་པར་ཕྱེ་བ་ནི་དེ་ལྟ་བུའི་དོན་རྣམས་བླ་ན་མེད་པའི་རྒྱུད་དུ་མཚོན་པའི་ཚིག་གསུངས་སོ། །དེ་ཡང་རྡོ་རྗེའི་ཚིག་ཤིན་ཏུ་བརླིང་བར་གནས་པ་སྟེ། མཐའ་དྲུག་གིས་བཅིངས་ནང་གི་དོན། ཞེས་པ་ནི་མཐའ་དྲུག་དང་ལྡན་པ་དགོངས་པ་ཅན་དུས་དང་དོན་དང་བསམ་པ་ལ་བརྟེན་ནས་གསུངས་པ། །སྐད་ཅིག་གཅིག་གིས་རྫོགས་སངས་རྒྱས། ཞེས་བྱང་ཆུབ་པའི་དུས་བརྗོད་པ་ལྟ་བུ་དང་། སངས་རྒྱས་ཀུན་ལས་ཕྲོགས་ནས་ནི། །ལྷ་མཆོག་ལས་སྐྱེས་བུ་མོ་སྤྱོད། །ཅེས་སྒྱུ་མ་ཆེན་མོ་ལས་གསུངས་པ་དང་། །ཁྱོད་ཀྱིས་སྲོག་ཆགས་གསད་པར་བྱ། ཞེས་ཧེ་བཛྭ་ལ་སོགས་པར་གང་གསུངས་པ་བསྒྱུར་བ་ལྡེམ་པོར་དགོངས་པ་དང་མཐུན་པ་དང་། དགོངས་པ་ཅན་མ་ཡིན་པ། །ཁྱོད་ཀྱིས་སྲོག་ཆགས་གསད་མི་བྱ། །བརྫུན་གྱི་ཚིག་ཀྱང་སྨྲ་མི་བྱ། །ཞེས་པ་ལ་སོགས་པ་རྒྱ་ཆེར་རྒྱུད་རྣམས་སུ་གསུངས་པ་དང་། དྲང་བའི་དོན་རྡུལ་ཚོན་གྱི་དཀྱིལ་འཁོར་དང་མཆོད་པ་དང་བརྡའ་དང་ལག་པའི་ཕྱག་རྒྱ་དང་ཕྱིའི་སྦྱིན་བསྲེག་དང་བསྐྱེད་རིམས་དང་ལས་ཚོགས་བསྒྲུབ་པ་ལ་སོགས་པ་ནང་གི་ཚུལ་ལ་འཇུག་པའི་ཐབས་གསུངས་པ་རྣམས་དང་། ངེས་པའི་དོན་རྩ་རླུང་བྱང་ཆུབ་ཀྱི་སེམས་བཅིང་བ་དང་། རང་བཞིན་གྱིས་འོད་གསལ་བའི་སེམས་ཀྱི་གནས་ལུགས་ཀུན་གཞི་དང་དེ་བཞིན་གཤེགས་པའི་སྙིང་པོ་དང་ཕྱག་རྒྱ་ཆེན་པོ་མཆོག་དུ་མི་འགྱུར་བ་སྟོན་པའི་གཞུང་རྣམས་དང་། སྒྲ་ཅི་བཞིན་མ་ཡིན་པ་ཀོ་ཏ་ཁྱ་ཞེས་བྱ་བ་ལ་སོགས་པ་འཇིག་རྟེན་པའི་བསྟན་བཅོས་ལ་མེད་པ་དང་། སྒྲ་ཅི་བཞིན་པ་དོན་དང་མིང་སྔར་བརྗོད་པ་འཇིག་རྟེན་གྱི་བསྟན་བཅོས་ལས་གྲགས་པ་རྣམས་ཏེ། རྒྱས་པར་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་དང་། བླ་མའི་ཡོན་ཏན་ཡོངས་སུ་བཟུང་བའི་རྒྱུད་ལས་གསུངས་པ་ལྟ་བུས་རྒྱུད་ཀྱི་ཚིག་ཐམས་ཅད་འདྲེས་པར་གནས་པ་རྣམས་ལས། ཁྱད་པར་དུ་ནང་གི་དོན་ཤིན་ཏུ་ཡང་དཔག་པར་དཀའ་སྟེ་རྒྱུ་ངེས་ན་འདིར་རྟོགས་པར་འདོད་པ་དག་ལ་སྟོན་པར་བྱེད་དོ། །ཕྱི་ནང་ཉན་ཐོས་སྤྱོད་ཡུལ་མིན། །ཕ་རོལ་ཕྱིན་པར་རབ་གསང་བ། །ཞེས་བྱ་བ་ཕྱི་རོལ་པའི་ཉན་ཐོས་ཀུན་དུ་རྒྱུ་དང་ཙ་ར་ཀ་ལ་སོགས་པ་རྣམས་དང་། ནང་གི་ཉན་ཐོས་བྱེ་བྲག་ཏུ་སྨྲ་བ་ལ་སོགས་པ་བདག་དང་གང་ཟག་ཏུ་བདེན་པར་རྟོག་པ་སེམས་ཀྱི་གནས་ལུགས་ལ་རྨོངས་པ་དག་དང་། ཆོས་འདི་པ་ཕ་རོལ་དུ་ཕྱིན་པ་ལ་ཕྱོགས་རེ་ཞུགས་པ་རྣམས་ཀྱིས་ཀྱང་རྟོགས་པར་དཀའ་བས་རང་གསང་དུ་གནས་ཏེ། དཔལ་འཕྲེང་གི་མདོ་ལས། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ལས་ཕྱི་རོལ་ཏུ་གྱུར་པ། བྱིས་པ་སོ་སོའི་སྐྱེ་བོ་དང་ཉན་ཐོས་དང་རང་སངས་རྒྱས་དང་ལས་དང་པོ་པ་སྟོང་པ་ཉིད་ཀྱིས་སེམས་རྣམ་པར་གཡེངས་པའི་བྱང་ཆུབ་སེམས་དཔའ་རྣམས་ལགས་སོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་ལྟར་དུ་རྟོགས་དཀའ་བ་དེ་ཡང་རྡོ་རྗེའི་ལུས་དེ་བཞིན་གཤེགས་པའི་སྙིང་པོ་ལས་སྣང་བ་རྒྱུ་མཐུན་པ་རབ་ཏུ་ཟབ་པའི་གཟུགས་ཀྱི་སྐུ་མཚན་དང་དཔེ་བྱད་ཐམས་ཅད་དང་ལྡན་པ་དྲི་མ་མེད་པ་ཉིད་དྲི་མ་དང་བཅས་པའི་ལུས་ལ་གནས་པར་གསུངས་པ་དང་། སེམས་དྲི་མ་དང་བཅས་པ་ཉོན་མོངས་པའི་སྦུབས་དུ་མས་བསྐྲིས་པ་འདི། སངས་རྒྱས་ཀྱི་སྙིང་པོ་གནས་དང་གནས་མ་ཡིན་པ་མཁྱེན་པ་ལ་སོགས་པའི་སྟོབས་དང་མི་འཇིགས་པ་དང་མ་འདྲེས་པའི་ཆོས་རྣམས་ཀྱི་ཡོན་ཏན་དང་ལྡན་པར་བཞུགས་སོ་ཞེས་བྱ་བ་ནང་གི་དོན་ཤིན་ཏུ་ལྐོག་ཏུ་གྱུར་པ་དག་མངོན་དུ་བསྟན་པ་རྡོ་རྗེའི་གནས་རྣམས་འདིར་སྟོན་པར་འདོད་ནས། ལུས་སེམས་ནང་གི་བདག་ཉིད་བཤད་ཅེས་སྨོས་པ་ཡིན་ནོ། །བར་སྐབས་ཀྱི་ཚིགས་སུ་བཅད་པ་ནི། ཤིན་ཏུ་རྟོགས་པར་དཀའ་བ་ནི། །གསུངས་ལ་དགོས་པ་མེད་དོ་ཞེས། །བརྗོད་པའི་དོགས་པ་སེལ་བའི་ཕྱིར། །བླ་མའི་རྒྱུད་ལས་རྒྱས་པར་གསུངས། །རྒྱལ་སྲས་ཀྱིས་ཀྱང་བཤད་དཀའ་བ། །ཁྱོད་ཀྱིས་བརྗོད་པར་མི་ནུས་ཞེས། །རྟོག་པའི་དོགས་པ་སྔར་བསལ་བས། །རྒྱལ་བའི་བཀའ་བཞིན་བསྟེན་པའི་རིགས། །ད་ནི་ཐོག་མར་བསྟན་བཅོས་ཀྱི་ལུས་རྣམ་པར་བཞག་པ་ལ་གཉིས་ཏེ། དགོས་པ་དང་བཅས་པའི་ངོ་བོ་རྣམ་པར་བཞག་པ་དང་། དུམ་བུ་བཅུ་གཅིག་གི་ངེས་པ་བརྗོད་པའོ། །དང་པོ་ནི། དྲི་མེད་རྒྱལ་བའི་སྙིང་པོ་ནི། །མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་ལམ་ལ་གནས་པ་དང་། །དེ་བཞིན་གཤེགས་རྣམས་རིམ་པ་བཞིན། །གསུངས་ཕྱིར་དེ་དོན་རྟོགས་པར་བྱ། །ཞེས་བྱ་བ་སྨོས་ཏེ་འདི་ནི་མཆོག་ཏུ་རྟོགས་པར་དཀའ་བའི་རྡོ་རྗེ་ཐེག་པའི་བརྗོད་བྱ་སྟེ་བསམ་གྱིས་མི་ཁྱབ་པའི་གནས་བཞིས་འཁྱུད་པ་སངས་རྒྱས་ཀྱི་བྱང་ཆུབ་ལ་བརྟེན་པ་ཡིན་ནོ། །དེ་ལ་རྡོ་རྗེ་ནི་འགྱུར་བ་མེད་པ་སངས་རྒྱས་ཡིན་ལ། དེ་ཡི་ལམ་དུ་འགྲོ་བ་ནི་ཐེག་པ་སྟེ་རྒྱལ་བའི་སྲས་རྣམས་དེར་ཕྱིན་པར་བྱེད་པའམ། ཡང་ན་མི་ཤིགས་པའི་སངས་རྒྱས་ཀྱི་སྙིང་པོ་ནི་འཁོར་འདས་ཐམས་ཅད་དེ་ལས་མི་གཡོ་བའི་གཞི་ཡིན་པས་རྡོ་རྗེ་ཐེག་པའོ། །གནས་འདི་ལ་དྲི་མ་ཐམས་ཅད་ཀྱིས་གོས་པ་མེད་པས་ན་དྲི་མ་མེད་པའོ། །དེ་ཉིད་སངས་རྒྱས་ཐམས་ཅད་ཀྱི་ངོ་བོ་ཡིན་པས་སངས་རྒྱས་ཀྱི་སྙིང་པོ་ཞེས་བྱའོ། །དེ་ལ་གནས་སྐབས་རྣམ་པ་གསུམ་དུ་འགྱུར་ཏེ་མ་དག་པ་དང་བཅས་པ་སེམས་ཅན་གྱི་གནས་སྐབས་དང་། མ་དག་པ་དང་དག་པ་གཉིས་ཀ་ལྡན་པ་བྱང་ཆུབ་སེམས་དཔའ་ལམ་པའི་གནས་སྐབས་དང་། ཤིན་ཏུ་རྣམ་པར་དག་པ་དེ་བཞིན་གཤེགས་པའི་གནས་སྐབས་ཏེ། དེ་ལྟར་རྣམ་པ་གསུམ་པོ་འདི་ལ་མིང་གི་ཐ་སྙད་ཀྱི་རྣམ་གྲངས་སུ། གཞི་དང་ལམ་དང་འབྲས་བུ་དང་། གཞི་རྒྱུད་དང་ཐབས་རྒྱུད་དང་འབྲས་བུའི་རྒྱུད་གསུམ་དང་། གཞི་དངོས་པོའི་གནས་ལུགས་དང་ལམ་གྱི་རིམ་པ་དང་འབྲས་བུ་སྐྱེ་བའི་རིམ་པ་ཞེས་བྱ་བ་ལ་སོགས་པ་སྔོན་གྱི་མཁས་གྲུབ་རྣམས་ཀྱིས་གསུངས་སོ། །འདི་ལ་བསམ་གྱིས་མི་ཁྱབ་པའི་ཚུལ་གང་ཞེ་ན། སངས་རྒྱས་ཀྱི་སྙིང་པོ་ལ་དྲི་མས་གོས་པ་མེད་ཀྱང་། ཉོན་མོངས་པ་དང་ཤེས་བྱའི་དྲི་མ་མཐའ་དག་མ་སྤངས་ཀྱི་བར་ལ་སངས་རྒྱས་སུ་མི་འགྱུར་བ་ཁམས་ཀྱི་དོན་དང་། དྲི་མ་དེ་ཉིད་ཐོག་མ་མེད་པའི་དུས་ནས་འབྲེལ་ཀྱང་གློ་བུར་བ་ཡིན་པས་དྲི་མ་དེ་རྫས་བདེན་པར་གྲུབ་པ་མེད་པ་བྱང་ཆུབ་ཀྱི་དོན་དང་། ད་ལྟ་དྲི་མ་དང་བཅས་པའི་སེམས་ཅན་ཐམས་ཅད་ལ་སངས་རྒྱས་གྱི་ཡོན་ཏན་དྲུག་ཅུ་རྩ་བཞི་རྫོགས་པར་ཡོད་ཀྱང་ཆོས་ཀྱི་དབྱིངས་ཤིན་ཏུ་དྲི་མ་མེད་པའི་རྒྱུ་མཐུན་པ་དཀར་པོའི་ཆོས་ཀྱི་རྐྱེན་གྱིས་མ་བསྐྱེད་ན་ནུས་པ་མི་འབྱིན་པ་ཡོན་ཏན་གྱི་དོན་དང་། སེམས་ཅན་དང་སངས་རྒྱས་ཐམས་ཅད་ལ་གཅིག་པ་ཉིད་དང་ཐ་དད་པ་ཉིད་དུ་འཕྲིན་ལས་འཇུག་པ་ལ་དབྱེ་བ་མེད་པས་བརྗོད་པ་ཐམས་ཅད་དང་བྲལ་ཀྱང་བརྗོད་པ་ཐམས་ཅད་ཀྱི་གཞིར་གྱུར་པ་ནི་བསམ་གྱིས་མི་ཁྱབ་སྟེ་མདོར་བསྡུས་ན། དག་དང་ཉོན་མོངས་དང་ལྡན་ཕྱིར། །ཀུན་ནས་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོག་ཕྱིར། །ཞེས་རྒྱུད་བླ་མར་གསུངས་པ་ཡིན་ནོ། །ཚུལ་འདི་ཉན་ཐོས་དང་རང་སངས་རྒྱས་དང་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་རྟོགས་དཀའ་བར་གསུངས་ཀྱང་རེ་ཞིག་དཔེས་བསྟན་པར་བྱ་སྟེ། ནོར་བུ་རིན་པོ་ཆེ་བཻ་ཌུརྻ་ཆེན་པོ་ཤུན་པ་དང་བཅས་པའི་ཚེ་ཤུན་པ་དང་བཅས་ཀྱང་ནང་དུ་ནོར་བུ་ལ་ཤུན་པ་འདྲེས་པ་མེད་པ་ལྟར་སེམས་ཅན་གྱི་དུས་ན་སངས་རྒྱས་ཀྱི་སྙིང་པོ་དྲི་མ་རྣམས་ཀྱིས་བསྒྲིབས་ཀྱང་མ་འདྲེས་པས་ན་དག་ལ་ཉོན་མོངས་དང་ལྡན་པ་ཡིན་ནོ། །ཡང་ཐོག་མ་ནས་ཤུན་པ་དང་བཅས་པའི་ནོར་བུ་ཡིན་ཀྱང་ཤུན་པ་དེ་ནི་ནོར་བུ་ལས་བྱུང་པ་ཡང་མ་ཡིན་ནོར་བུ་ལས་གཞན་ནས་ཀྱང་བྱུང་པ་མ་ཡིན་ཏེ་གང་ནས་ཀྱང་མ་བྱུང་པའི་ཤུན་པ་དེ་རྣམ་པར་དག་པར་བྱས་པས་དག་པ་ལྟར་སེམས་སངས་རྒྱས་ཀྱི་སྙིང་པོའི་སྒྲིབ་པ་དག་པའི་སངས་རྒྱས་ཀྱང་དེ་ཁོ་ན་བཞིན་དུ་ཡིན་ནོ། །ཡང་ནོར་བུའི་ཡོན་ཏན་དེ་རྣམས་དང་པོ་དང་ཐ་མ་ཁྱད་མེད་ཀྱང་། སྔ་མ་ལ་ནི་ཡོན་ཏན་མི་སྣང་ལ་ཕྱི་མ་དྲི་མ་མེད་པ་དེ་རྒྱལ་མཚན་གྱི་རྩེར་བཏགས་ཏེ་གསོལ་བ་བཏབ་ན་ཡོན་ཏན་འབྱིན་པ་བཞིན་དུ་སངས་རྒྱས་ཀྱི་ཡོན་ཏན་ཐམས་ཅད་ད་ལྟ་ཡོད་ཀྱང་སྐྱོན་མེད་པའི་རྣམ་པར་དཀར་བས་མ་བསྐྱེད་ན་ནུས་པ་མི་འབྱིན་པས་ཡོན་ཏན་རྣམ་པར་དབྱེ་བ་མེད་པའི་ཆོས་ཉིད་ཡིན་ནོ། །དེ་ལྟ་བུའི་ནོར་བུ་ང་ནི་ཤུན་པ་ཅན་ནོ་ང་ནི་ཤུན་པ་མེད་པའོ་གསོལ་བ་འདེབས་པ་ལ་ཡོན་ཏན་སྦྱིན་ནོ་མི་སྦྱིན་ནོ་ཞེས་རྣམ་པར་མི་རྟོག་ཅིང་ལྷུན་གྱིས་གྲུབ་པ་བཞིན་འཕྲིན་ལས་འཇུག་སྟེ། དེས་ན་སངས་རྒྱས་ཀྱི་སྙིང་པོ་ཡང་ལྷུན་གྱིས་གྲུབ་ཅིང་རྣམ་པར་མི་རྟོག་སྟེ། ཚུལ་དེ་ལྟར་རྟོགས་པར་བྱའོ། །རྒྱུ་མཚན་འདི་མ་རྟོགས་པར་ད་ལྟར་འབྲས་བུ་ཡོད་པར་འཆད་པ་དང་ཉོན་མོངས་པ་སྤང་དུ་མེད་པ་དང་། གཉེན་པོའི་ཡེ་ཤེས་གསར་པ་བསྐྱེད་དུ་མེད་པ་དང་། རང་བཞིན་གྱིས་དག་པ་མེད་དགག་འབའ་ཞིག་གི་ཕྱོགས་སུ་འཆད་པ་ནི་རྡོ་རྗེའི་ཐེག་པ་ལས་རིང་ངོ་། །དེ་བས་ན་བསམ་གྱིས་མི་ཁྱབ་པའི་གནས་འདི་ནི་དོན་དམ་དང་ཀུན་རྫོབ་དང་སངས་རྒྱས་དང་སེམས་ཅན་དང་སྣང་བ་དང་སྟོང་པ་ལ་སོགས་པ་རྟེན་ཅིང་འབྲེལ་བར་འབྱུང་བའི་རང་གི་ངོ་བོ་ཉིད་གནས་སྐབས་གསུམ་གྱིས་བསྡུས་པར་རིག་པར་བྱའོ། །འདི་ཡི་ངོ་བོ་ནི། །ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་བསྒྲིབས་ཕྱིར་མི་མཐོང་སྟེ། །དཔེར་ན་གསེར་གྱི་གཟུགས་ནི་བསྒྲིབས་པ་བཞིན། །ཞེས་གང་གསུངས་པ་སྟེ། རྒྱས་པར་ནི་ཁོ་བོས་སངས་རྒྱས་ཀྱི་སྙིང་པོ་གཏན་ལ་དབབ་པའི་བསྟན་བཅོས་སུ་བཤད་ཟིན་ཏོ།། །།

དུམ་བུ་བཅུ་གཅིག་གི་ངེས་པ་བསྟན་པ་ནི། ཚིགས་སུ་བཅད་པ་གསུམ་སྟེ། ཐོག་མར་སྤྱི་ཡི་རྒྱུ་རྐྱེན་དང་། ལུས་གྲུབ་ཚུལ་དང་། རྩ་དང་རླུང་དང་། ཐིག་ལེ་དང་། རྣམ་པར་ཤེས་པ་དང་འབྲེལ་བ་དང་། ཕྱི་སྣོད་དང་། ལྷ་ལ་སྦྱར་བ་དང་། ཆོས་ཐམས་ཅད་ཀྱི་སྦྱང་གཞི་དང་སྦྱར་བ་དང་། ལམ་གྱི་རིམ་པ་དང་། འཇིག་ཅིང་སྡུད་པའི་ཚུལ་རྣམས་དུམ་བུ་བཅུ་གཅིག་རིམ་པས་སྟོན་པར་བྱེད་དོ་ཞེས་མདོར་བསྟན་པ་སྟེ་གོ་རིམ་འབྲེལ་ཚུལ་ནི་སྔར་བཤད་པ་ཡིན་ནོ།། །

ལེའུ་དང་པོ། རྒྱུ་རྐྱེན་སྤྱིར་བསྟན་པའི་དུམ་བུ།

ད་ནི་བསྟན་བཅོས་རྒྱས་པར་བཤད་པ་ལ་དུམ་བུ་བཅུ་གཅིག་ལས། དང་པོ་རྒྱུ་རྐྱེན་སྤྱིར་བསྟན་པ་ལ་བཞི་སྟེ། སེམས་དག་པ་དང་མ་དག་པའི་ངོ་བོ་བཤད་པ་དང་། ཅི་ལྟར་འཁྲུལ་པའི་ཚུལ་དང་། རྒྱུ་རྐྱེན་གྱི་དབྱེ་བ་དང་། གནས་སྐབས་གསུམ་གྱི་དབྱེ་བའོ། །དང་པོ་ལ་ཡང་། ངོ་བོ་དང་། རྣམ་པ་གཉིས་ལས་ངོ་བོ་ནི། རྒྱུ་ནི་སེམས་ཉིད་ཐོག་མེད་ལ། །རྒྱ་ཆད་ཕྱོགས་ལྷུང་མ་མཆིས་ཀྱང་། །ཞེས་བྱ་བ་སྨོས་པ་ནི། ཐེག་པ་ཐམས་ཅད་ཀྱི་སྤྱི་སྐད་ལ་སེམས་ཉིད་ཅེས་གསུངས་ཀྱང་། དག་པ་དང་བཅས་པ་དང་། མ་དག་པ་གཉིས་སུ་ཤེས་པར་བྱ་སྟེ། དག་པ་ལ་སེམས་སུ་བསྟན་པ་ནི་རྒྱུད་བླ་མ་ལས། །ས་ནི་ཆུ་ལ་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །སའི་ཁམས་ལ་གནས་པ་མེད། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རབ་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །གང་ལ་ཡང་ནི་གནས་པ་མེད། ཞེས་གསུངས་ཏེ་འདི་ནི་སངས་རྒྱས་ཀྱི་སྙིང་པོ་ལ་སེམས་སུ་བརྗོད་ཅིང་འཁོར་འདས་ཐམས་ཅད་ཀྱི་གཞིའི་དོན་ཡིན་ནོ། །མདོ་ཧ་ལས་ཀྱང་། སེམས་ཉིད་གཅིག་པུ་ཀུན་གྱི་ས་བོན་སྟེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་པ་དང་ཕ་རོལ་ཏུ་ཕྱིན་པ་ལས་ཀྱང་། །སེམས་ནི་སེམས་མ་མཆིས་པ་སྟེ་སེམས་ཀྱི་རང་བཞིན་ནི་འོད་གསལ་བའོ། །ཞེས་བྱ་བ་ལ་སོགས་པ་རྒྱུད་དང་བསྟན་བཅོས་རྣམས་ལས་ཀྱང་མང་དུ་གསུངས་པ་ནི་དག་པ་དང་བཅས་པ་བརྗོད་པ་ཡིན་ནོ། །མ་དག་པ་ལ་སེམས་སུ་བརྗོད་པ་ནི་ཀུན་གཞིའི་རྣམ་པར་ཤེས་པ་ཞེས་གསུངས་པ་གང་ཡིན་པ་སྟེ། མངོན་པ་ཀུན་ལས་བཏུས་པ་ནས། སེམས་ཕུང་པོ་ཁམས་དང་སྐྱེ་མཆེད་ཀྱི་བག་ཆགས་ཐམས་ཅད་ཀྱིས་བསྒོས་པ་ས་བོན་ཐམས་ཅད་པའི་ཀུན་གཞི་ཡི་རྣམ་པར་ཤེས་པ་ཞེས་གསུངས་ཏེ། འདི་ནི་ཡང་དག་པ་མ་ཡིན་པའི་ཀུན་ཏུ་རྟོག་པས་འཁྱུད་པ་ཁམས་གསུམ་གྱིས་སེམས་དང་སེམས་ལས་བྱུང་བས་བསྡུས་པ་སྒྲིབ་པ་ཐམས་ཅད་ཀྱི་རྩ་བ་སངས་རྒྱས་ཀྱི་ཡེ་ཤེས་ཀྱིས་གཞོམ་པར་བྱ་བ་ཡིན་ནོ། །དེ་ལ་དགོངས་ནས་ལང་ཀར་གཤེགས་པ་ལས་ཀྱེ་རྒྱལ་བའི་སྲས་དག་ཁམས་གསུམ་པ་འདི་ནི་སེམས་ཙམ་མོ་ཞེས་པ་དང་། །ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་དབུས་མཐའ་ལས་ཀྱང་གསུངས་ཏེ་དེ་བས་ན། རེ་ཞིག་ཀུན་གཞི་ཉིད་བཤད་པར་བྱའོ། །འདི་ནི་སློབ་དཔོན་དབྱིག་གཉེན་གྱི་སུམ་ཅུ་པའི་རབ་ཏུ་བྱེད་པ་ལས། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །རྟག་ཏུ་རེག་དང་ཡིད་བྱེད་དང་། །ཚོར་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་བསྒྲིབས་ལུང་མ་བསྟན། །དེ་ནི་རྒྱུན་འབབ་ཆུ་བོ་བཞིན། །དགྲ་བཅོམ་ཉིད་ན་དེ་ལྡོག་གོ། །ཞེས་བྱ་བ་གསུངས་ཏེ། འདི་ཡང་ཀུན་གཞི་ཞེས་བྱ་བ་ལ་རྣམ་པར་ཤེས་པའི་སྒྲ་མ་སྨོས་ན་དེ་བཞིན་ཉིད་ལ་ཡང་ཀུན་གཞིས་བརྗོད་དུ་རུང་བའི་ཕྱིར་རྣམ་པར་ཤེས་པ་སྨོས་སོ། །རྣམ་པར་ཤེས་པ་ནི་དོན་མཐོང་བ་ལ་བརྗོད་ན་འདི་དོན་དུ་ཅི་ལྟར་བཞག་ཅེ་ན། རྣམ་པར་སྨིན་པ་དང་ས་བོན་གྱི་དོན་དུ་རྣམ་པར་ཤེས་པའི་ཚོགས་གཞན་བདུན་པོ་ལས་ཕན་ཚུན་རྒྱུ་དང་རྐྱེན་གྱི་དངོས་པོར་གྱུར་བའི་ཕྱིར་ན་རྣམ་པར་ཤེས་པ་ཞེས་བྱའོ། །ཐམས་ཅད་དེར་བསགས་པའི་ཕྱིར་རྣམ་པར་སྨིན་པ་སྟེ་ཆར་ཆུ་ལས་རྒྱ་མཚོ་བཞིན་ནོ། །རྐྱེན་ཉེ་བར་གནས་པ་ཐམས་ཅད་བསྐྱེད་པའི་རྒྱུར་གྱུར་པའི་ཆ་ནས་ས་བོན་ཐམས་ཅད་པའོ། །ཀུན་ཏུ་འགྲོ་བའི་རེག་པ་དང་ཡིད་ལ་བྱེད་པ་དང་ཚོར་བ་དང་འདུ་ཤེས་དང་སེམས་པ་དང་ལྔ་པོས་དུས་ཐམས་ཅད་དུ་བསྐོར་བས་སེམས་བྱུང་རྣམས་ཀྱང་རྣམ་པར་ཤེས་པའི་ཁྱད་པར་དུ་འགྱུར་བ་སྟེ། ཀུན་གཞི་ཉིད་ནི་ཚོར་བ་བཏང་སྙོམས་པ། ངོ་བོ་མ་བསྒྲིབས་ལ་ལུང་དུ་མ་བསྟན་པ་སྟེ་མེ་ལོང་གི་གསལ་བ་བཞིན་ནོ། །རྒྱུན་འབབ་པའི་ཆུ་བོ་བཞིན་དུ་ཡུལ་དང་ཡུལ་ཅན་དང་དབང་པོའི་ས་བོན་ཐམས་ཅད་རྒྱུན་འཆད་པ་མེད་པར་འབབ་པ་ཡིན་ནོ། །དགྲ་བཅོམ་ཉིད་ན་དེ་ལྡོག་གོ་ཅེས་པ་ནི། སངས་རྒྱས་པ་ལ་དགོངས་པ་སྟེ་ཉན་ཐོས་ཀྱི་དགྲ་བཅོམ་པ་ལ་ནི་ཀུན་གཞི་ཡོད་པ་ཉིད་དོ། །འོན་ཀྱང་གང་ཟག་གི་བདག་ཏུ་འཛིན་པའི་ཉོན་མོངས་ཀྱི་རྟེན་ལོག་པ་ལ་ཡང་ཆ་ཅིག་ལོག་པར་བཤད་དུ་རུང་ངོ་། །འདི་ཡི་ཤིན་ཏུ་རྒྱས་པར་བཤད་པ་ནི་ཐེག་བསྡུས་ལས་བཅོམ་ལྡན་འདས་ཀྱིས་གསུངས་པའི་ཆོས་མངོན་པའི་མདོའི་གཞུང་ཆོས་ཀུན་ས་བོན་ཐམས་ཅད་པའི། རྣམ་པར་ཤེས་པ་ཀུན་གཞི་སྟེ། །དེ་བས་ཀུན་གཞིའི་རྣམ་ཤེས་དེ། །དམ་པ་དག་ལ་ངས་བཤད་དོ། །ཞེས་གསུངས་ཏེ། དེ་ལ་ཅིའི་ཕྱིར་ཀུན་གཞིའི་རྣམ་པར་ཤེས་པ་ཞེས་བྱ་ཞེ་ན། སྐྱེ་བ་ཅན་ཀུན་ནས་ཉོན་མོངས་པའི་ཆོས་ཐམས་ཅད་འབྲས་བུའི་དངོས་པོར་དེར་སྦྱོར་བའམ། དེ་ཡང་དེ་དག་ཏུ་རྒྱུ་ཡི་དངོས་པོར་སྦྱོར་བའི་ཕྱིར་ཀུན་གཞིའི་རྣམ་པར་ཤེས་པའོ། །ཡང་ན་སེམས་ཅན་དག་དེ་ཡི་བདག་ཉིད་དུ་སྦྱོར་བས་ཀུན་གཞིའི་རྣམ་པར་ཤེས་པའོ། །དེ་ནི་ལེན་པའི་རྣམ་ཤེས་ཞེས་ཀྱང་བྱ་སྟེ་དགོངས་འགྲེལ་ལས། །ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོ་བཞིན་དུ་འབབ། །བདག་ཏུ་རྟོག་པར་གྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། ཅེས་གསུངས་པ་ལྟ་བུ་སྟེ། དེ་ནི་དབང་པོ་གཟུགས་ཅན་ཐམས་ཅད་ཀྱི་རྒྱུ་ཡིན་པ་དང་། ལུས་ཐམས་ཅད་ཉེ་བར་ལེན་པའི་གནས་སུ་གྱུར་པའི་ཕྱིར་ཏེ། འདི་ལྟར་ཚེ་ཇི་སྲིད་པར་རྗེས་སུ་འཇུག་གི་བར་དུ་དེ་དབང་པོ་གཟུགས་ཅན་ལྔ་པོ་དག་མ་ཞིག་པར་ཉེ་བར་བཟུང་བ་དང་། ལུས་ཉིང་འཚམས་སྦྱོར་བ་སྦྲེལ་བ་ན་ཡང་དེ་དག་མངོན་པར་འགྲུབ་པ་ཉེ་བར་འཛིན་པའི་ཕྱིར་ལུས་བཟུང་བ་ཡིན་ཏེ་དེ་ལྟ་བས་ན་ལེན་པའི་རྣམ་པར་ཤེས་པ་ཞེས་བྱའོ། །ཞེས་པ་དང་། ཡང་མཚན་ཉིད་རྣམ་པར་བཞག་པ་ནི་གསུམ་སྟེ། ཀུན་གཞིའི་རྣམ་པར་ཤེས་པ་རང་གི་མཚན་ཉིད་ནི། གང་ཀུན་ནས་ཉོན་མོངས་པའི་ཆོས་ཐམས་ཅད་ཀྱི་བག་ཆགས་ལ་བརྟེན་ནས་ས་བོན་ཡོངས་སུ་འཛིན་པ་དང་ལྡན་པས་དེ་སྐྱེ་བའི་རྒྱུ་མཚན་ཉིད་དོ། །དེ་ལ་རྒྱུ་ཉིད་ཀྱི་མཚན་ཉིད་ནི། དེ་ལྟར་ཀུན་གཞིའི་རྣམ་པར་ཤེས་པ་ས་བོན་ཐམས་ཅད་པ་དེ་ཀུན་ནས་ཉོན་མོངས་པའི་ཆོས་དེ་དག་ཉིད་ཀྱི་རྒྱུ་ཉིད་དུས་ཐམས་ཅད་དུ་ཉེ་བར་ལེན་པ་ཡིན་ནོ། །དེ་ལ་འབྲས་བུའི་མཚན་ཉིད་དུ་རྣམ་པར་བཞག་པ་ནི། གང་ཀུན་གཞིའི་རྣམ་པར་ཤེས་པ་ཀུན་ནས་ཉོན་མོངས་པའི་ཆོས་དེ་དག་ཉིད་ཀྱི་ཐོག་མ་མེད་པའི་དུས་ཀྱི་བག་ཆགས་ལ་བརྟེན་ནས་བྱུང་བའོ། །ཞེས་པ་དང་། བག་ཆགས་དེ་ཡང་དཀར་བ་དང་གནག་པའི་ཆོས་དེ་དག་དང་ལྷན་ཅིག་དུ་འབྱུང་ཞིང་འགགས་ཀྱང་སེམས་ནི་དེའི་རྒྱུན་ཉིད་དུ་འབྱུང་ཞིང་དེ་ལས་ཀྱང་ཀུན་ནས་ཉོན་མོངས་པའི་ཆོས་དེ་རྣམས་ཀྱི་རྒྱུ་ཀུན་གཞིའི་རྣམ་ཤེས་ཡིན་པ་ལྟར། ཀུན་ནས་ཉོན་མོངས་པའི་ཆོས་རྣམས་ཀྱང་ཀུན་གཞིའི་རྣམ་པར་ཤེས་པའི་རྒྱུའི་རྐྱེན་དུ་རྣམ་པར་བཞག་སྟེ། རྒྱུའི་རྐྱེན་གཞན་མི་དམིགས་པའི་ཕྱིར་རོ། །སྣ་ཚོགས་པའི་བག་ཆགས་སྣ་ཚོགས་སུ་མ་དམིགས་པར་གནས་ཀྱང་ཕྱིས་ལས་སོ་སོར་བསྐྱེད་པ་ན་ཐ་དད་དུ་སྣང་བ་ནི་ཚི་གུའི་རྐྱེན་དང་ལྡན་པའི་རས་ཚོན་གྱིས་བསྒྱུར་བས་སྣ་ཚོགས་སུ་འགྱུར་བ་བཞིན་ཏེ། འདི་ནི་མཆོག་ཏུ་ཟབ་པའི་ངོ་བོ་ཉིད་རྣམ་པར་འབྱེད་པ་ཅན་གྱི་རྟེན་ཅིང་འབྲེལ་བར་འབྱུང་བའོ། །འཇུག་པའི་རྣམ་པར་ཤེས་པ་གཞན་དང་ཀུན་གཞིའི་རྣམ་པར་ཤེས་པ་ཕན་ཚུན་རྒྱུ་དང་རྐྱེན་གྱི་མཚན་ཉིད་དུ་བལྟའོ། །དེ་ཡང་གཅིག་ནི་རྐྱེན་གྱི་རྣམ་པར་ཤེས། གཉིས་པ་ཉེ་བར་དཔྱོད་པ་ཅན། །ཉེ་བར་དཔྱོད་དང་ཡོངས་གཅོད་དང་། །དེ་ཡི་འཇུག་བྱེད་སེམས་ལས་བྱུང་། །ཞེས་དབུས་མཐའ་ལས་བྱུང་བ་བཞིན་དུ་ཡིན་ནོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །རྒྱུ་མཚན་འདིས་ནི་ཀུན་གཞི་ནི་སེམས་ཅན་གྱི་གནས་ཁྱད་པར་ཅན་དུ་བརྗོད་ལ། མྱ་ངན་ལས་འདས་པ་ཆེན་པོའི་ཡེ་ཤེས་ཀྱི་རྒྱུ་ནི་མ་ཡིན་པར་བརྗོད་དོ། །འོ་ན་ཁ་ཅིག །ཀུན་གཞི་ཀུན་གྱི་གཞི་ཡིན་ཀྱང་། །རྣམ་པར་བྱང་བའི་རྒྱུ་མ་ཡིན། ཞེས་བྱ་བ་ལ་རྣམ་བྱང་གི་རྒྱུ་ཉིད་དུ་སྟོན་པ་ཡང་ཡོད་པས་འདི་ཇི་ལྟར་ཡིན་ཅེ་ན། ཀུན་གཞི་དེ་དག་པ་ལ་རྣམ་པར་བྱང་བ་ཉིད་ཀྱི་ཐ་སྙད་དུ་བརྗོད་པར་བྱེད་ན་རུང་གི་ཀུན་གཞིའི་རྣམ་པར་ཤེས་པ་མྱ་ངན་ལས་འདས་པའི་སངས་རྒྱས་ཀྱི་ཡེ་ཤེས་ཀྱི་རྒྱུར་བཤད་ན་མི་རུང་བ་ཉིད་ཡིན་ནོ། །འོ་ན་དཀར་པོའི་ཆོས་སངས་རྒྱས་ཀྱི་བྱང་ཆུབ་དང་དབྱེ་བ་མེད་པ་ཡང་དག་པའི་ལྟ་བ་ལ་བརྟེན་པའི་རྟོགས་པ་ཡང་ཀུན་གཞིའི་སྟེང་དུ་འཇོག་པ་མ་ཡིན་ནམ། རྣམ་པར་བྱང་བའི་ཆོས་དེ་དག་ཅི་ལྟར་བསྐྱེད་ཅེ་ན། འདི་ནི་སྔར་བརྗོད་པའི་སེམས་ཀྱི་དག་པའི་ཆོས་ཀྱི་སྐུ་དེ་བཞིན་གཤེགས་པའི་སྙིང་པོ་ལ་བརྟེན་པ་སྟེ། རྒྱུད་བླ་མ་ལས། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་ཉིད་ཡིན་ནོ། །རིགས་དེ་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་བྱ་བ་གསུངས་ཤིང་རྒྱས་པར་ནི་ཐེག་བསྡུས་ལས། ས་བོན་ཐམས་ཅད་པ་རྣམ་པར་སྨིན་པའི་རྣམ་པར་ཤེས་པ་ནི་ཀུན་ནས་ཉོན་མོངས་པའི་རྒྱུ་ཡིན་ན། དེ་ཡི་གཉེན་པོ་འཇིག་རྟེན་ལས་འདས་པའི་སེམས་ཀྱི་ས་བོན་ཇི་ལྟར་རུང་། འཇིག་རྟེན་ལས་འདས་པའི་སེམས་ནི་མ་འདྲེས་པས་དེ་ཡི་བག་ཆགས་མེད་པ་ཉིད་དོ། །བག་ཆགས་དེ་མེད་ན་ས་བོན་གང་ལས་བྱུང་བ་བརྗོད་དགོས་སོ་ཞེ་ན། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པ་ཐོས་པའི་བག་ཆགས་སོན་པ་ལས་དེ་བྱུང་ངོ་། །ཐོས་པའི་བག་ཆགས་གང་ཡིན་པ་དེ་ཡང་། ཅི་ཀུན་གཞིའི་རྣམ་པར་ཤེས་པའི་ངོ་བོ་ཉིད་ཡིན་ནམ་འོན་ཏེ་མ་ཡིན། གལ་ཏེ་ཀུན་གཞིའི་རྣམ་པར་ཤེས་པའི་ངོ་བོ་ཡིན་ན་ནི་ཇི་ལྟར་དེའི་གཉེན་པོའི་ས་བོན་དུ་རུང་། ཅི་སྟེ་དེའི་ངོ་བོ་ཉིད་མ་ཡིན་ན་ནི་ཐོས་པའི་བག་ཆགས་དེ་ཡི་ས་བོན་གྱི་གནས་གང་ཞིག་ཡིན་པར་བལྟ་ཞེ་ན། སངས་རྒྱས་ཀྱི་བྱང་ཆུབ་ལ་བརྟེན་ནས་ཐོས་པའི་བག་ཆགས་སུ་གྱུར་པ་དེ། གནས་གང་ལ་འཇུག་པ་དེ་ལྷན་ཅིག་འབྱུང་པའི་ཚུལ་གྱིས་རྣམ་པར་སྨིན་པའི་རྣམ་པར་ཤེས་པ་ལ་ཆུ་དང་འོ་མ་བཞིན་དུ་འཇུག་ཀྱང་། དེ་ནི་ཀུན་གཞིའི་རྣམ་པར་ཤེས་པ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར་རོ། །དེ་ཡང་བག་ཆགས་ཆུང་ངུ་ལས་འབྲིང་དང་དེ་ལས་ཆེན་པོར་འགྱུར་ཏེ་ཐོས་བསམ་བསྒོམ་པ་ལན་མང་དུ་བྱས་པ་དང་ལྡན་པའི་ཕྱིར་རོ། །དེ་ནི་ཆོས་ཀྱི་སྐུའི་ས་བོན་དུ་བལྟ་སྟེ། ཀུན་གཞིའི་རྣམ་ཤེས་ཀྱི་གཉེན་པོ་ཡིན་པས་ཀུན་གཞིའི་ཡི་རྣམ་ཤེས་ཀྱི་ངོ་བོ་མ་ཡིན་པ་དང་། འཇིག་རྟེན་པ་ཡིན་ཡང་འཇིག་རྟེན་ལས་འདས་པའི་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པ་ཡིན་པས་འཇིག་རྟེན་ལས་འདས་པའི་སེམས་ཀྱི་ས་བོན་དུ་གྱུར་བའོ། །དེ་ནི་འཇིག་རྟེན་ལས་འདས་པའི་སེམས་མ་བྱུང་དུ་ཟིན་ཀྱང་། ཉོན་མོངས་པའི་ཀུན་ནས་བཀྲིས་པ་དང་། ངན་འགྲོ་དང་ཉེས་པ་ཐམས་ཅད་དེངས་བར་བྱེད་པའི་གཉེན་པོ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་དང་ཕྲད་པའི་རྗེས་སུ་མཐུན་པའོ། །བྱང་ཆུབ་སེམས་དཔའ་ལས་དང་པོ་བ་རྣམས་ཀྱི་འཇིག་རྟེན་པ་ཡིན་ཡང་། ཆོས་ཀྱི་སྐུར་བསྡུས་པ་དང་། ཉན་ཐོས་དང་རང་སངས་རྒྱས་རྣམས་ཀྱི་རྣམ་པར་གྲོལ་བའི་ལུས་སུ་བསྡུས་པར་ཡང་བལྟའོ། །དེ་ནི་ཀུན་གཞིའི་རྣམ་པར་ཤེས་པ་མ་ཡིན་གྱི། ཆོས་ཀྱི་སྐུ་དང་རྣམ་པར་གྲོལ་བའི་ལུས་ཀྱིས་བསྡུས་པས། ཆུང་འབྲིང་ཆེན་པོར་རིམ་གྱིས་འཕེལ་བ་ལྟར། རྣམ་པར་སྨིན་པའི་ཤེས་པ་འབྲི་ཞིང་གནས་རྣམ་པ་ཐམས་ཅད་དུ་གྱུར་པ་དང་། ས་བོན་ཐམས་ཅད་པ་ཡང་མེད་པར་འགྱུར་ཏེ་རྣམ་པ་ཐམས་ཅད་དུ་སྤངས་པ་ཡིན་ནོ། །ཞེས་བྱ་བ་ལ་སོགས་པ་གསུངས་སོ། །ཡང་རྒྱས་འགྱུར་གྱི་རིགས་དེ་གསར་དུ་བྱུང་བ་སྙམ་དུ་ཁ་ཅིག་སེམས་ན། དེ་ལྟ་མ་ཡིན་ཏེ་རང་བཞིན་དུ་གནས་པའི་རིགས་ཆོས་ཀྱི་དབྱིངས་དེ་ལ། ཀུན་གཞིའི་རྣམ་ཤེས་ལ་སོགས་པ་བརྒྱད་རྣམ་པར་བཞག་པ་དེ་ནི་ཡང་དག་པ་མ་ཡིན་པའི་ཀུན་ཏུ་རྟོག་པས་བཞག་ཅིང་ཕྱེ་བ་དེ་ལྟར། ཚོགས་བརྒྱད་པོ་དེ་རྣམས་ཀྱི་དྲི་མ་མེད་པའི་རང་གི་ངོ་བོ་ཡེ་ཤེས་བཞི་ཡི་རང་བཞིན་དུ་ཡོད་དེ། དེ་ཡང་ཡང་དག་པའི་ཀུན་ཏུ་རྟོག་པ་སངས་རྒྱས་ཀྱི་བྱང་ཆུབ་ལ་བརྟེན་པའི་དཀར་པོའི་ཆོས་ཀྱིས། སྔར་གྱི་དྲི་མ་དེ་བཅོམ་པ་ལས་ཚོགས་བརྒྱད་ཀྱི་འཁྲུལ་པ་མེད་པས་གནས་གྱུར་པའི་ཡེ་ཤེས་ཀྱི་མིང་ཐོབ་སྟེ། རྒྱུ་མཚན་དེས་ན། ཆུ་ཁམས་གསེར་དང་ནམ་མཁའ་ལྟར། །དག་པ་བཞིན་དུ་རྣམ་དག་འདོད། །ཅེས་དབུས་མཐར་གསུངས་པ་ལྟར་དྲི་མ་མེད་པ་ནི་ཡེ་ཤེས་ཡིན་ལ་དྲི་མ་དང་བཅས་པ་ནི་རྣམ་པར་ཤེས་པ་ཡིན་པར་བལྟའོ། །མཚན་ཡང་དག་པར་བརྗོད་པ་ལས་ཀྱང་། །རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །ཞེས་གསུངས་སོ། །རྒྱས་པར་ནི་ཁོ་བོས་རྣམ་པར་ཤེས་པ་དང་ཡེ་ཤེས་བརྟག་པའི་བསྟན་བཅོས་སུ་བཤད་ཅིང་། འོག་ནས་རྣམ་པར་ཤེས་པ་དང་འབྲེལ་བ་བསྟན་པའི་སྐབས་ནས་ཀྱང་སྟོན་པར་བྱེད་དོ། །དེ་ལྟར་དག་པ་དང་མ་དག་པའི་སེམས་བཤད་ནས། ཐོག་མེད་ལ་ཞེས་བྱ་བ་ནི་དུས་ཀྱི་ཐོག་མ་དང་ཐ་མ་ནི་རྟོག་པས་སྒྲོས་བཏགས་པ་ཡིན་པས་འདིར་ནི་དྲི་མ་མེད་པ་དང་དྲི་མ་དང་བཅས་པའི་རང་གི་ངོ་བོ་ནི་རྟེན་ཅིང་འབྲེལ་བར་འབྱུང་བ་དེ་ཉིད་དང་གཞན་ལས་རྣམ་པར་གྲོལ་བ་སྟེ་དེ་ལས་ཐོག་མ་གཞན་མེད་པའི་ཕྱིར་ཐོག་མ་མེད་པའི་དུས་ཞེས་བྱ་སྟེ། རང་གི་ངོ་བོ་དེ་གང་གིས་རིག་པ་དང་རྟོགས་པའི་སྐད་ཅིག་ལ་ནི་རྣམ་པར་གྲོལ་བར་འགྱུར་ལ། དེ་མ་རིག་པས་སེམས་འཁྲུལ་པའི་ཐོག་མ་མ་རིག་པ་ཞེས་བྱའོ། །དེའི་ཕྱིར་ཆོས་མངོན་པའི་མདོ་ལས། །ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང་། །མྱ་ངན་འདས་ལའང་ཐོབ་པ་ཡིན། །ཅེས་གང་གསུངས་པ་དང་། དགོངས་པ་ངེས་པར་འགྲེལ་བའི་མདོ་ལས་ཀྱང་། །འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། ཞེས་གསུངས་པ་ཡིན་ནོ། །གང་སྐད་ཅིག་མ་དེ་མ་རྟོགས་པ་རྒྱུན་འབྲེལ་བ་འདས་པའི་དུས་དཔག་ཏུ་མེད་པར་ཡང་ཞུགས་ཤིང་བྱུང་བའི་ཕྱིར་ཡང་ཐོག་མ་མེད་པ་ཞེས་སྒྲས་བརྗོད་དུ་རུང་གིས། ཐོག་མ་ནས་སེམས་དྲི་མ་དང་བཅས་པ་རྟག་པ་ཉིད་དུ་ཡོད་པའམ་མེད་པ་ལ་སྐྱེ་བར་རྟོག་ན་ནི། འཇིག་ཚོགས་སུ་ལྟ་བའི་རྣམ་གྲངས་ཡིན་ལ། དྲི་མ་རྟག་པར་འབྲེལ་ན་སྤང་དུ་མི་རུང་བ་ཉིད་དང་། སེམས་རྒྱུ་མེད་ལས་སྐྱེ་བར་འགྱུར་བའི་སྐྱོན་ཡོད་པས་རིགས་པ་དང་ཡང་འགལ་ལོ། །དེ་ལྟ་བུའི་སེམས་ནི་སངས་རྒྱས་དང་སེམས་ཅན་ཐམས་ཅད་ལ་གཅིག་པ་དང་ཐ་དད་པ་ཉིད་དུ་བརྗོད་དུ་མེད་པའི་ཕྱིར་རྒྱ་མ་ཆད་པའོ། །རྟག་པ་དང་ཆད་པ་ལ་སོགས་པའི་ཕྱོགས་སུ་མ་ལྷུང་བས་ན་ཕྱོགས་ལྷུང་མ་མཆིས་པ་ཉིད་ཡིན་པས་སེམས་ཀྱི་ངོ་བོ་ཉིད་བསྟན་པ་ཡིན་ནོ། །སེམས་ཀྱི་རྣམ་པ་ནི། དེ་ཉིད་མ་འགགས་རོལ་པ་ལས། །ངོ་བོ་སྟོང་དང་རང་བཞིན་གསལ། །རྣམ་པ་འགག་མེད་ཅི་ཡང་འཆར། །ཞེས་བྱ་བ་སྨོས་ཏེ། སེམས་དེ་ཉིད་རྣམ་པར་རིག་པ་སྐད་ཅིག་གི་རང་ངོ་མ་འགགས་པའི་རྣམ་པར་རོལ་པའི་ཆ་ལས། རང་བཞིན་སྟོང་པ་ཉིད་དུ་གནས་པ་དང་། རང་བཞིན་གྱིས་གསལ་བར་གནས་པ་ནི་ཐམས་ཅད་ཀྱི་གཞིར་གྱུར་པ་དང་། དེ་ལས་སེམས་བྱུང་གི་ཚོགས་དང་རྣམ་པ་ཤེས་པའི་ཚོགས་བདུན་གྱི་རང་རང་གི་རྣམ་པ་འགག་པ་མེད་པར་སྐད་ཅིག་དུ་འཆར་བའི་ཕྱིར། མ་དག་པའི་གནས་སྐབས་ན་སེམས་དང་། ཡིད་དང་རྣམ་པར་ཤེས་པ་ཞེས་བྱ་བར་གསུངས་པ་དང་། དག་པ་ན་སྐུ་གསུམ་དང་ཡེ་ཤེས་ཀྱི་མིང་གིས་བརྗོད་པ་ཡིན་ནོ། །དེ་ཡང་འཕགས་པ་ཀླུ་གྲུབ་ཀྱི་ཞལ་སྔ་ནས་ཀྱང་། །ཉོན་མོངས་དྲ་བས་གཡོགས་པ་ན། །སེམས་ཞེས་བརྗོད་པར་བྱ་བ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་ཆོས་ཀྱི་དབྱིངས་སུ་བསྟོད་པ་ལས་གསུངས་སོ། །གཉིས་པ་ཇི་ལྟར་འཁྲུལ་པའི་ཚུལ་བཤད་པ་ནི། ཀུན་གཞི་དང་དེ་ལ་བརྟེན་པའི་ཡིད་ཉོན་མོངས་པ་ཅན་དང་བཅས་པ་དང་། ཚོགས་དྲུག་དང་ཕུང་པོ་ལྔའི་རིམ་པ་བསྟན་པའོ། །དང་པོ་ནི། །དེ་ཉིད་རང་གིས་རང་མ་རིག །འདུ་བྱེད་ཡིད་ཀྱི་གཡོ་བ་ནི། །ཆུ་རླབས་ལྟ་བུར་གཡོས་པ་ལས། །ཞེས་བྱ་བ་སྟེ། སེམས་དེ་ཉིད་རང་གིས་རང་མ་རིག་པ་ཡང་གང་མ་རིག་པ་དང་གང་གིས་མ་རིག་པ་དང་ཚུལ་ཇི་ལྟར་མ་རིག་པ་སྟེ། དང་པོ་ནི་རང་བཞིན་གྱིས་དག་པའི་རང་གི་ངོ་བོ་མ་རིག་ལ། གང་གིས་ཞེ་ན་རང་ངོ་ལ་ཡུལ་དང་ཡུལ་ཅན་ལྟར་སྣང་བའི་འགག་པ་མེད་པའི་རྩལ་གྱིས་མ་རིག་པའོ། །ཚུལ་ཇི་ལྟར་དུ་མ་རིག་ཞེ་ན་འདུ་བྱེད་ཡིད་ཀྱི་གཡོ་བ་ལས་རྒྱུ་རྐྱེན་ལྟར་སྣང་བ་དང་དེ་ལ་བརྟེན་ནས་ཉོན་མོངས་པ་ཅན་དུ་བྱེད་པས་མ་རིག་པ་བསྐྱེད་དེ་ཡང་དག་པ་མ་ཡིན་པའི་ཀུན་ཏུ་རྟོག་པས་འཁོར་བའི་གཞི་དང་རྐྱེན་དུ་གྱུར་ཏོ། །དེ་ཡང་ཀུན་གཞི་དང་ཕན་ཚུན་རྒྱུ་དང་རྐྱེན་གྱི་རྣམ་པར་གྱུར་པའི་ཕྱིར་ཆུ་དང་རླབས་ལྟར་དུ་རྒྱུན་མི་འཆད་པར་གཡོ་ཞིང་འདུ་བྱེད་པས་མ་རིག་པའོ། །འདི་ནི་ཡིད་ཅེས་བཤད་དེ་འདི་ཡང་སུམ་ཅུ་པ་ལས། །དེ་ལ་གནས་ཏེ་རབ་འབྱུང་ཞིང་། །དེ་ལ་དམིགས་པས་ཡིད་ཅེས་བྱ། །རྣམ་ཤེས་ངར་སེམས་བདག་ཉིད་ཅན། །བསྒྲིབས་ལ་ལུང་དུ་མ་བསྟན་པ། །ཉོན་མོངས་བཞི་དང་རྟག་དུ་འགྲོགས། །ཞེས་གསུངས་ཏེ་འདི་ནི་དེ་ལ་གནས་པ་ནི། །ཀུན་གཞི་དེ་ལ་གནས་ཏེ་རབ་ཏུ་འབྱུང་ཞིང་། རྣམ་པར་ཤེས་པའི་ཚོགས་གཞན་དྲུག་པོ་དག་གི་སྐྱེ་བ་དང་འགག་པ་ན་ནུས་པ་ཀུན་གཞི་ལ་འཇོག་པར་བྱེད་པས་ཡིད་ཀྱི་རྣམ་པར་ཤེས་པ་ཞེས་བྱའོ། །འདི་ཡི་རང་གི་ངོ་བོ་ནི་དཔལ་ཆོས་ཀྱི་གྲགས་པས། རང་གི་ཡུལ་གྱི་དེ་མ་ཐག་པ་ཡུལ་ལྷན་ཅིག་བྱེད་པ་ཅན་དབང་པོའི་ཤེས་པ་མཚུངས་པ་དེ་མ་ཐག་པའི་རྐྱེན་གྱིས་བསྐྱེད་པའི་ཡིད་ཀྱི་རྣམ་པར་ཤེས་པ་དང་ཞེས་ཚད་མར་གསུངས་སོ། །གཉིས་པ་དེ་ལ་དམིགས་པའི་ཡིད་ཅེས་བྱ་བ་ཀུན་གཞི་ལ་ངར་སེམས་པའི་བདག་ཉིད་ཅན་ཉོན་མོངས་པ་ཅན་གྱི་ཡིད་ཅེས་བྱ་སྟེ་འདི་ཡང་ཡིད་དེ་ཉིད་ཀུན་གཞི་ལ་བདག་དུ་རྟོག་པར་བྱེད་པ་ཉོན་མོངས་པ་བཞི་པོས་དུས་རྟག་ཏུ་བསྒོས་པའི་ཕྱིར་དེ་ནི་རྣམ་པར་ཤེས་པ་ཉོན་མོངས་པའི་གནས་ཡིན་པས་འདི་ལ་ནི་ཚད་མ་མེད་ཅིང་ཚད་མ་མ་ཡིན་པའི་བློ་ཐམས་ཅད་སྐྱེ་བར་བྱེད་པ་ཡིན་ནོ། །འདི་གཉིས་ཀ་གཅིག་ནི་རྣམ་པར་ཤེས་པ་རང་གི་ངོ་བོ་བརྗོད་ཅིང་གཅིག་ནི་དེ་ལ་བརྟེན་ནས་འཁྲུལ་པར་བྱེད་པ་དང་ལྡན་པའི་ཆ་ནས་བརྗོད་དེ་ཐག་པ་དང་དེ་ལ་སྦྲུལ་དུ་འཛིན་པ་བཞིན་དུ་བརྗོད་དོ། །འདི་ལ་གཞན་དག་དེ་མ་ཐག་པ་དྲུག་པ་ཡིད་ཀྱི་ཆར་འཆད་པ་དང་། ཁ་ཅིག་དོན་ལ་མེད་པར་འཆད་པ་དག་ཡོད་ཀྱང་དེ་དག་ནི་ཉན་ཐོས་པའི་ཚོགས་དྲུག་ལས་མེད་པར་འདོད་པའི་རྣམ་བཞག་ལ་ཞེན་ནས་ཐེག་པ་ཆེན་པོའི་ཚོགས་བརྒྱད་ཀྱི་རྣམ་པར་བཞག་པ་མ་རྟོགས་པ་ཡིན་ནོ། །འདི་ཡི་རྒྱས་པར་ཐེག་བསྡུས་ལས་དེ་ལ་ཡིད་ནི་རྣམ་པ་གཉིས་སྟེ་དེ་མ་ཐག་པའི་རྐྱེན་བྱེད་པས་གནས་སུ་གྱུར་པའི་ཕྱིར། རྣམ་པར་ཤེས་པ་འགགས་མ་ཐག་པའི་ཡིད་ཅེས་བྱ་བ་རྣམ་པར་ཤེས་པ་སྐྱེ་བའི་གནས་དང་། གཉིས་པ་ཉོན་མོངས་པ་ཅན་གྱི་ཡིད་ཉོན་མོངས་པ་བཞི་པོ་འཇིག་ཚོགས་ལ་ལྟ་བ་དང་། ངའོ་སྙམ་པའི་ང་རྒྱལ་དང་། བདག་ལ་ཆགས་པ་དང་། མ་རིག་པ་དང་རྟག་ཏུ་མཚུངས་པར་ལྡན་པ་སྟེ། དེ་ནི་རྣམ་པར་ཤེས་པ་ཀུན་ནས་ཉོན་མོངས་པའི་གནས་སོ། །རྣམ་པར་ཤེས་པ་ནི་གང་གནས་གཅིག་པོས་ནི་བསྐྱེད་ལ་གཉིས་པས་ནི་ཉོན་མོངས་པ་ཅན་དུ་བྱས་ཏེ། ཡུལ་ལ་རྣམ་པར་རིག་པའི་ཕྱིར་རྣམ་པར་ཤེས་པའོ། །དེ་མ་ཐག་པ་དང་ངར་སེམས་པའི་ཕྱིར་ཡིད་ནི་རྣམ་པ་གཉིས་སོ། །ཞེས་གསུངས་ཏེ་ཉོན་མོངས་པ་ཅན་ནི་ལྡན་པའི་ཚིག་སྟེ་རྒྱུ་མཚན་འདིས་ན་ཁམས་གསུམ་དུ་འཁོར་བའི་འཁྲུལ་པ་ཐམས་ཅད་ཀྱི་རྩ་བ་ནི་འདི་ཡིན་ནོ། །དེའི་ཕྱིར་ཁམས་གསུམ་ལས་འདས་པའི་འགོག་པའི་སྙོམས་པར་འཇུག་པ་ན་འདི་མེད་པ་དང་། དགྲ་བཅོམ་པ་དང་། འཇིག་རྟེན་ལས་འདས་པའི་བྱང་ཆུབ་སེམས་དཔའི་ལམ་གྱི་མཉམ་པར་བཞག་པ་ན་མེད་དོ། །ཚེ་རིང་པོའི་འདུ་ཤེས་མེད་པར་སྐྱེ་བའི་རྒྱུ་འདུ་ཤེས་མེད་པའི་སྙོམས་འཇུག་ན་ནི། ཉོན་མོངས་པ་ཅན་གྱི་ཡིད་ཡོད་པས་ཁྱད་པར་ཤེས་པར་འགྱུར་རོ། །གཞན་ཡང་རྣམ་པར་ཤེས་པ་སྐྱེ་བ་དང་འགག་པ་དེ་མ་ཐག་པ་ཀུན་གཞི་ལ་གནས་པ་དེ་དྲུག་པ་ཡིད་ཀྱི་ཆ་ཤས་སུ་བྱས་ན་གང་གི་ཚེ་འགོག་པའི་སྙོམས་འཇུག་ནུས་པ་དེའི་ཚེ་ཀུན་གཞི་དང་ཚོགས་དྲུག་མ་གཏོགས་པ་མེད་པར་འགྱུར་བས་ཚོགས་བདུན་དུ་འགྱུར་ཏེ། ཉོན་ཡིད་མེད་པའི་ཕྱིར་རོ། །དེ་ལྟ་ན་བཅོམ་ལྡན་འདས་ཀྱིས་གསུངས་པའི་དྲི་མེད་པའི་ཡིད་ཚོགས་དགུ་པར་བཞག་དགོས་ན་དེ་ཡང་མི་འཐད་དོ། །འོ་ན་དེ་མ་ཐག་པར་བཤད་པའི་བདུན་པ་ཡིད་ཀྱི་རྣམ་པར་ཤེས་པ་དེ་གང་གིས་ཉོན་ཡིད་དུ་འཇོག་ལ། གང་གིས་དྲི་མ་མེད་པར་འཇོག་ཅེ་ན། ཉོན་མོངས་པ་བཞིས་འཁྱུད་ན་ཉོན་མོངས་པ་ཅན་དུ་འགྱུར་ལ། སངས་རྒྱས་ཀྱི་བྱང་ཆུབ་ལ་བརྟེན་པའི་དཀར་པོའི་ཆོས་ཀྱིས་འཁྱུད་པར་གྱུར་པ་ན་དྲི་མ་མེད་པའི་ཡིད་དུ་བརྗོད་པ་ལེགས་སོ། །དེ་གཉིས་ཀྱང་ཇི་སྲིད་རྣམ་པར་དག་པའི་གནས་ཡོངས་སུ་མ་གྱུར་གྱི་བར་ལ་ལྷན་ཅིག་འདྲེས་ཤིང་འབྱུང་བར་གསུངས་སོ། །དེ་ཡང་ཐེག་བསྡུས་ལས་ཉོན་མོངས་པ་ཅན་གྱི་ཡིད་ཡོད་པར་ཅིས་མངོན་ཞེ་ན། དེ་མེད་དུ་ཟིན་ན་མ་རིག་པ་དང་མ་འདྲེས་པའི་སྐྱོན་དང་། ལྔ་པོ་དག་དང་འདྲ་བ་མེད་པའི་སྐྱོན་དུ་ཡང་འགྱུར་ཏེ། འདི་ལྟར་རྣམ་པར་ཤེས་པ་ལྔ་པོ་དག་གི་ལྷན་ཅིག་འབྱུང་པའི་གནས་ནི་མིག་ལ་སོགས་པའོ། །ངེས་ཚིག་མེད་པའི་སྐྱོན་དང་། འདུ་ཤེས་མེད་པ་དང་འགོག་པའི་སྙོམས་འཇུག་བྱེ་བྲག་མེད་པའི་སྐྱོན་དུ་ཡང་འགྱུར་ཏེ། འདི་ལྟར་འདུ་ཤེས་མེད་པའི་སྙོམས་པར་འཇུག་པ་ནི་ཉོན་མོངས་པ་ཅན་གྱི་ཡིད་ཀྱིས་རབ་ཏུ་ཕྱེ་བ་ཡིན་གྱི། འགོག་པའི་སྙོམས་པར་འཇུག་པ་ནི་མ་ཡིན་ཏེ་གཞན་དུ་ན་འདི་གཉིས་བྱེ་བྲག་མེད་པ་ཉིད་དུ་འགྱུར་རོ། །གལ་ཏེ་འདུ་ཤེས་མེད་པ་དེ་ན་ངར་འཛིན་པ་དང་ངའོ་སྙམ་པའི་ང་རྒྱལ་མེད་ན། འདུ་ཤེས་མེད་པར་སྐྱེ་བ་ཐོག་ཐག་ཏུ་ཉོན་མོངས་པ་ཅན་མ་ཡིན་པའི་སྐྱོན་དུ་ཡང་འགྱུར་རོ། །དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་རྣམས་ལ་ཡང་ངར་འཛིན་པ་དུས་ཐམས་ཅད་དུ་ཀུན་ཏུ་འབྱུང་བར་ཡང་དམིགས་པ་ཡི་ཡང་ཕྱིར་རོ། །གཞན་དུ་ན་ནི་མི་དགེ་བའི་སེམས་ཁོ་ན་དེ་དག་དང་མཚུངས་པར་ལྡན་པས་ངའོ་སྙམ་པའི་ཉོན་མོངས་པ་ཀུན་ཏུ་འབྱུང་བའི་དགེ་བ་དང་ལུང་དུ་མ་བསྟན་པ་དག་ལ་ནི་མ་ཡིན་ནོ། །དེའི་ཕྱིར་ལྷན་ཅིག་འབྱུང་བར་ཀུན་ཏུ་འབྱུང་བ་དང་ལྷན་ཅིག་མཚུངས་པར་ལྡན་པར་ཀུན་ཏུ་འབྱུང་བས་སྐྱོན་འདི་དག་ཏུ་མི་འགྱུར་རོ། །ཡིད་ནི་ཉོན་མོངས་པ་ཅན་ཡིན་པའི་ཕྱིར་སྒྲིབས་ལ་ལུང་དུ་མ་བསྟན་པ་ཡིན་སྟེ། སྒྲིབ་པའི་ཉོན་མོངས་པ་བཞི་དང་རྟག་ཏུ་མཚུངས་པར་ལྡན་ནོ་ཞེས་པ་ལ་སོགས་པ་རྒྱ་ཆེར་གསུངས་སོ། །གཞན་ཡང་ཁམས་བཅོ་བརྒྱད་དུ་འཆད་པ་ན་ཡིད་དང་ཆོས་དང་ཡིད་ཀྱིས་རྣམ་པར་ཤེས་པའི་ཁམས་རྣམ་པར་འཇོག་པ་ན་དྲུག་པ་ཡིད་ཀྱི་རྣམ་པར་ཤེས་པའི་ཁམས་སུ་བརྗོད་པ་ནི་བྱེ་བྲག་ཡིན་ལ། བདུན་པ་བསྟན་པ་ནི་དྲུག་པོ་ཐམས་ཅད་ཀྱི་འགགས་མ་ཐག་པར་བརྗོད་དེ། ཕུང་པོ་ལྔའི་རབ་ཏུ་བྱེད་པ་ལས། རྣམ་པར་ཤེས་པའི་ཁམས་དྲུག་པོ་དེ་དག་ནི་མིག་ལ་སོགས་པ་དག་ལ་བརྟེན་ཏེ། གཟུགས་ལ་སོགས་པ་དམིགས་པ་རྣམ་པར་རིག་པའོ། །ཡིད་ཀྱི་ཁམས་ནི་དེ་དག་ཉིད་འགགས་མ་ཐག་པ་སྟེ། རྣམ་པར་ཤེས་པ་དྲུག་གི་གནས་བསྟན་པའི་ཕྱིར། དེ་ལྟར་ཁམས་བཅོ་བརྒྱད་དུ་རྣམ་པར་བཞག་གོ །ཞེས་གསུངས་སོ། །ཚོགས་དྲུག་དང་ཕུང་པོ་ལྔའི་རིམ་པ་བསྟན་པ་ནི། ཚིགས་སུ་བཅད་པ་གཉིས་ཏེ་ཐོག་མར་རྣམ་པར་ཤེས་པ་དྲུག་པོ་བཤད་པར་བྱ་སྟེ་སུམ་ཅུ་པ་ལས། །གསུམ་པས་ཡུལ་རྣམས་དྲུག་པོ་ལ། །དམིགས་པ་གང་ཡིན་དེ་དག་སྟེ། །ཞེས་པ་སེམས་ནི་ཀུན་གཞིའོ་ཡིད་ནི་སྔར་བཤད་པ་གཉིས་པོའོ། །གསུམ་པ་རྣམ་པར་ཤེས་པའི་ཚོགས་དྲུག་ནི། ཡུལ་གཟུགས་སྒྲ་དྲི་རོ་རེག་བྱ་ཆོས་དང་དྲུག་པོ་ལ། དམིགས་པ་གང་ཡིན་པ་དེ་རྣམས་ཡིན་ནོ། །ཞེས་བྱ་བ་ནི་ལྷག་མ་འདི་རྣམས་དང་མཚུངས་པར་ལྡན་པ་བརྗོད་དེ། དགེ་དང་མི་དགེ་གཉིས་ཀ་མིན། །ཀུན་ཏུ་འགྲོ་དང་བྱེ་བྲག་ངེས། །སེམས་ལས་བྱུང་བ་དགེ་བ་དང་། །དེ་བཞིན་ཉོན་མོངས་ཉེ་ཉོན་མོངས། །ཚོར་བ་གསུམ་དང་དེ་མཚུངས་ལྡན། །ཞེས་སེམས་བྱུང་ལྔ་བཅུ་རྩ་གཅིག་དང་མཚུངས་པར་ལྡན་པར་གསུངས་སོ། །ད་ནི་གཞུང་ཉིད་བསྟན་པར་བྱ་སྟེ་སྔར་བཤད་པའི་སེམས་དང་ཡིད་ཆུ་རླབས་ལྟར་གཡོ་བ་ལ་ཇི་ལྟར་འབྱུང་ཞེ་ན། དོན་དང་འཛིན་པ་གཉིས་སྣང་བས། །རང་གིས་རང་ལ་གཏད་ཅིང་གཟུང་། ཞེས་བྱ་བ་དོན་ནི་ཡུལ་དྲུག་གོ །འཛིན་པ་ནི་རྣམ་པར་ཤེས་པ་དྲུག་སྟེ་དོན་ལ་ཐ་དད་དུ་བདེན་པ་མེད་ཀྱང་གཉིས་སུ་སྣང་བ་སྐྱེ་བར་འགྱུར་ཏེ། ཡུལ་དང་དབང་པོ་དང་རྣམ་པར་ཤེས་པ་གསུམ་ཚོགས་པའི་རྟེན་ཅིང་འབྲེལ་བས་སྣང་བ་སྐྱེའོ། །དེ་ལས་སྣང་བ་མཆེད་པར་འགྱུར་བས་ན། རྟོག་པའི་ཡིད་དང་འབྲེལ་བར་འགྱུར་ཏེ་དོན་མཐོང་བར་བྱེད་པས་སྣང་བ་ཐོབ་པ་ཞེས་བྱ་སྟེ། དེས་ན་ཡིད་དེ་ཕྱིར་འགྱུས་སྣང་ཆ་ལས། །ཡུལ་ལ་དོན་བཟུང་རྣམ་ཤེས་བྱུང་། །ཞེས་བསྟན་པ་ཡིན་ནོ། །འདི་ལ་ཡང་ཆོས་ཐམས་ཅད་སེམས་སུ་མི་ཤེས་པ་དག་རྣམ་པར་ཤེས་པ་རང་སེམས་ཡིན་ཡང་ཡུལ་ཕྱི་རོལ་གྱི་དོན་ནི་རྡུལ་ཕྲན་ནམ་ཕག་ན་མོས་བསྐྱེད་པར་རྟོག་པ་ཡོད་པས་དེ་མ་ཡིན་ནོ་ཞེས་བསྟན་པའི་ཕྱིར་རང་གིས་རང་ལ་གཏད་ཅིང་བཟུང་བའི་ཚུལ་བསྟན་པར་བྱ་སྟེ། འདི་ནི་ཀུན་གཞིའི་ངོ་བོ་ས་བོན་ཐམས་ཅད་པ་ལ་ཡུལ་དང་དབང་པོ་དང་རྣམ་པར་ཤེས་པའི་ས་བོན་རྒྱུན་ཆད་པ་མེད་པ་རྒྱུ་དང་འབྲས་བུའི་ནུས་པ་ཕན་ཚུན་རྟེན་ཅིང་འབྲེལ་བར་འབྱུང་བའི་མཐུ་བསམ་གྱིས་མི་ཁྱབ་སྟེ། རྣལ་འབྱོར་གྱི་རྒྱུད་རྡོ་རྗེ་རྩེ་མོ་ལས། །ས་བོན་ཀུན་ལྡང་ཀུན་གཞི་ནི། །ཕྱི་དང་ནང་གི་བདག་ཉིད་འདོད། །ཞེས་གསུངས་པ་ཡིན་ནོ། །འདི་ལ་རིགས་པ་ནི་ཕྱོགས་ཀྱི་གླང་པོའི་ཞལ་སྔ་ནས། །ནང་གི་ཤེས་བྱའི་ངོ་བོ་ནི། ཕྱི་རོལ་ལྟར་སྣང་གང་ཡིན་དེ། །དོན་ཡིན་རྣམ་ཤེས་ངོ་བོའི་ཕྱིར། །དེའི་རྐྱེན་ཉིད་ཀྱང་ཡིན་ཕྱིར་རོ། །ཕྱི་རོལ་གྱི་དོན་མེད་བཞིན་དུ་ཡང་ཕྱི་རོལ་ལྟ་བུར་སྣང་བ་ནང་ན་ཡོད་པ་ཁོ་ན་དམིགས་པའི་རྐྱེན་ཡིན་ནོ། །ནང་གི་རྣམ་པར་ཤེས་པ་ནི་དོན་དུ་སྣང་བ་དང་དེ་ལས་སྐྱེས་པ་ཡིན་པས་ཆོས་ཉིད་གཉིས་དང་ལྡན་པའི་ཕྱིར་ནང་ན་ཡོད་པ་ཁོ་ན་དམིགས་པའི་རྐྱེན་ཡིན་ནོ་ཞེས་པ་དང་། ཡང་ལྷན་ཅིག་སྐྱེས་པ་ཡིན་ཀྱང་རྐྱེན་དུ་འཐད་པ་དང་། །ནུས་པ་འཇོག་པས་རིམས་ཀྱིས་ཀྱང་མི་འགལ་བ་དང་། ནུས་པ་ལ་དབང་པོ་ཡང་ཡིན་པ་མི་འགལ་བར་བསྟན་པའི་ཕྱིར། །གཅིག་ཆའང་མི་འཁྲུལ་ཕྱིར་ན་རྐྱེན། །ནུས་པ་འཇོག་ཕྱིར་རིམས་ཀྱིས་ཡིན། །ལྷན་ཅིག་བྱེད་དབང་ནུས་པ་ཡིས། །ངོ་བོ་གང་ཡིན་དབང་པོའང་ཡིན། །ཞེས་བྱ་བ་ལ་སོགས་པ་དམིགས་པ་བརྟག་པར་གསུངས་པ་ཡིན་ནོ། །དེ་ལྟར་ངོ་བོ་ཉིད་རྣམ་པར་འབྱེད་པ་ཅན་གྱི་རྟེན་འབྲེལ་ལ་བརྟེན་ནས། སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་བཅུ་གཉིས་འབྱུང་སྟེ། དེའི་ཕྱིར་མ་རིག་པའི་རྐྱེན་གྱིས་འདུ་བྱེད་ལ་དེའི་རྐྱེན་གྱིས་ཡུལ་དྲུག་ལ་དོན་དུ་མཐོང་བའི་རྣམ་པར་ཤེས་པ་འབྱུང་ངོ་། །དེ་ལ་བླང་བྱ་དང་དོར་བྱ་མ་ཡིན་པ་ལ་ཡུལ་གཞན་དུ་རྟོག་པས་བླང་བྱར་རྟོག་པ་ཚོར་བ་བདེ་བ་དང་། དོར་བྱར་རྟོག་པས་སྡུག་བསྔལ་དང་། བར་མ་བཏང་སྙོམས་ཀྱི་ཚོར་བ་སྐྱེ་ལ། དེ་ཡི་དབང་གིས་ཡུལ་ལ་མཚན་མར་འཛིན་པས་འདུ་ཤེས་སུ་འགྱུར་རོ། །མཚན་མར་བཟུང་བས་ཡུལ་གཞན་དུ་རྟོག་པའི་བག་ཆགས་བརྟན་པར་བྱས་པས་གཟུགས་ཀྱི་ངོ་བོ་དབྱིབས་དང་ཁ་དོག་ལ་སོགས་པར་ཞེན་ནས་གཟུགས་ཀྱི་ཕུང་པོ་འགྲུབ་པར་འགྱུར་ཏེ། དེ་རྣམས་ཀྱང་སེམས་མ་དག་པའི་རྒྱུ་ལས་རྐྱེན་དུ་སྣང་བ་དུ་མ་འདུས་པའི་རྟེན་འབྲེལ་ལས་སྣང་བའི་ཕྱིར་ཕུང་པོ་ཞེས་བྱ་སྟེ་འབྲུའི་ཕུང་པོ་བཞིན་ནོ། །དེའི་ཕྱིར། བླང་དོར་བྱེད་པས་ཚོར་བ་སྐྱེ། །དེ་ལ་མཚན་འཛིན་འདུ་ཤེས་ཏེ། །འདུས་བྱས་ཡུལ་སྣང་གཞན་དུ་བརྟགས། །ཞེན་པས་གཟུགས་ཀྱི་ཕུང་པོ་གྲུབ། །ཅེས་སྨོས་པ་ཡིན་ནོ། །འདི་ནི་སེམས་ཀུན་གཞིའི་རྣམ་པར་ཤེས་པ་ལ་སྔར་བསྟན་པ་ལྟར་ནུས་པ་བསམ་གྱིས་མི་ཁྱབ་པའི་ཕྱིར་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་རྣམ་པར་དབྱེ་བ་དུ་མར་བརྗོད་དེ། དུ་མ་འདུས་པའི་དོན་དང་། རང་གི་ངོ་བོ་བྱེད་པོ་མེད་ལ་མཚན་ཉིད་འཛིན་པའི་དོན་དང་། ཤེས་པའི་སྐྱེ་སྒོ་བྱེད་ལ་བྱེད་པོ་གཞན་མེད་པའི་དོན་གྱིས་གཅིག་པུ་དང་ཟ་བ་པོ་དང་བྱེད་པ་པོར་རྟོག་པའི་ལྟ་བ་ངན་པ་སྤང་བའི་དོན་དུ་རྣམ་པར་བཞག་པར་རིག་པར་བྱའོ། །རྒྱས་པར་ནི་ཕུང་པོ་ལྔའི་རབ་ཏུ་བྱེད་པར་གསུངས་པས་འདིར་མ་སྤྲོས་པ་ཡིན་ནོ། འདི་ལྟར་འཁོར་བའི་ཆོས་ཐམས་ཅད་འཁྲུལ་པ་ཉིད་དུ་བསྟན་པ་འདི་ལ་མདོར་བསྡུས་ན་བདེན་པ་གཉིས་ཀྱི་རང་ངོ་མ་རྟོགས་པས་འཁྲུལ་པ་ཞེས་བྱ་སྟེ། རྨི་ལམ་དང་སྒྱུ་མ་མ་རྟོགས་པས་འཁྲུལ་པ་བཞིན་ནོ། །འདི་ནི་བྱང་ཆུབ་སེམས་འགྲེལ་ལས། །མ་རིག་ནས་བརྩམས་རྒ་ཤིའི་བར། །མཐར་ཐུག་ཡན་ལག་བཅུ་གཉིས་ཀྱི། བརྟེན་ནས་བྱུང་བའི་བྱ་བ་ནི། །ཁོ་བོས་རྨི་ལམ་སྒྱུ་འདྲར་འདོད། །ཡན་ལག་བཅུ་གཉིས་འཁོར་ལོ་འདི། །སྲིད་པའི་ལམ་དུ་འཁོར་བ་སྟེ། །དེ་ལམ་གཞན་པའི་སེམས་ཅན་གང་། །ལས་འབྲས་སྤྱད་པར་འདོད་པ་མེད། །ཞེས་འཕགས་པ་ཀླུ་གྲུབ་ཀྱིས་གསུངས་པ་ལྟར་མདོ་དང་རྒྱུད་དང་བསྟན་བཅོས་དུ་མ་ལས་གསུངས་སོ། །དེ་ལྟར་འཁྲུལ་པའི་ཚུལ་བཤད་ནས།། །།

གསུམ་པ་རྒྱུ་རྐྱེན་གྱི་དབྱེ་བ་ནི་གཉིས་ཏེ་རྒྱུ་དྲུག་དང་། རྐྱེན་བཞིར་བསྟན་པའོ། །དང་པོ་ནི། །ཁམས་ལྔ་རྣམ་པར་ཤེས་དང་དྲུག །རྒྱུ་ཞེས་རྟོག་པས་ཐ་སྙད་བྱས། །ཞེས་པ་ནི་ཐེག་པ་སྤྱིའི་སྐད་ལ་ས་ཆུ་མེ་རླུང་ནམ་མཁའི་ཁམས་ལྔ་དང་། རྣམ་པར་ཤེས་པའི་ཁམས་ཏེ་དྲུག་པོ་རྣམས་ནི་ཕྱི་ནང་ཐམས་ཅད་ཀྱི་རྒྱུ་ཞེས་ཐ་སྙད་དུ་བཏགས་སོ། །དེ་དག་གི་མཚན་ཉིད་ཀྱང་སྲ་ཞིང་བརྟན་པ་དང་། རླན་ཞིང་གཤེར་བ་དང་། ཚ་ཞིང་སྲེག་པ་དང་། ཡང་ཞིང་གཡོ་བ་དང་། སྟོང་ཞིང་གོ་འབྱེད་པ་ནི་རིམ་པ་ལྟར་ཁམས་ལྔ་ཡིན་ལ་རྣམ་པར་ཤེས་པ་ནི་སྔར་བརྗོད་ཟིན་ཏོ། །

གཉིས་པ་རྐྱེན་ལ་བཞི་ལས། དང་པོ་རྒྱུའི་རྐྱེན་ནི། །དེའི་བག་ཆགས་ཀུན་གཞི་ལ། །བསགས་པས་རྒྱུའི་རྐྱེན་ཅེས་བྱ། །ཞེས་པ་ནི་སྔར་བསྟན་པའི་ས་བོན་ཐམས་ཅད་པ་འདི་ནི་རྒྱུའི་རྐྱེན་ཅེས་བྱ་སྟེ། དེ་མེད་ན་སེམས་ཅན་གྱི་རྒྱུ་གཞན་མ་དམིགས་པའི་ཕྱིར་རོ། །དེ་དཔེ་དང་བཅས་ཏེ་ཐེག་བསྡུས་ལས་ཀུན་གཞིའི་རྣམ་པར་ཤེས་པ་དེ་སྒྱུ་མ་དང་སྨིག་སྒྱུ་དང་རྨི་ལམ་དང་རབ་རིབ་ལྟ་བུའི་ཕྱིར། དེ་མེད་དུ་ཟིན་ན་ཡང་དག་པ་མ་ཡིན་པའི་ཀུན་རྟོག་པའི་ས་བོན་དུ་དེ་ཕྱིན་ཅི་ལོག་གི་རྒྱུ་ཉིད་དུ་མི་རུང་པས། ཡོད་དགོས་སོ་ཞེས་མང་དུ་གསུངས་སོ། །བདག་རྐྱེན་ནི། བདག་རྐྱེན་བར་དུ་སྣང་བ་ཡི། །མིག་ལ་སོགས་པ་དབང་ཤེས་ཡིན། །ཞེས་སྨོས་ཏེ། རྣམ་པར་ཤེས་པ་དྲུག་གི་བདག་པོའི་རྐྱེན་ནི་བར་དུ་སྣང་བའི་དབང་པོ་ལྔ་དང་རྣམ་པར་ཤེས་པའི་དབང་པོར་བརྗོད་དེ། འདི་ཡང་མིག་གི་དབང་པོ་ཟར་མའི་མེ་ཏོག་ལྟ་བུ་གཟུགས་ཅན་དང་བ་དང་། རྣ་བའི་དབང་པོ་གྲོ་གའི་འཛེར་བུ་ལྟ་བུ། སྣའི་དབང་པོ་ཟངས་ཁབ་གཤིབས་པ་ལྟ་བུ། ལྕེའི་དབང་པོ་ཟླ་བ་གམ་པ་ལྟ་བུ། ལུས་ཀྱི་དབང་པོ་བྱ་རེག་འཇམ་གྱི་པགས་པ་ལྟ་བུ་སྟེ་ཐམས་ཅད་ཀྱང་གཟུགས་ཅན་དང་བའོ་ཞེས་གསུངས་ཏེ། ཅིའི་ཕྱིར་གཟུགས་ཅན་ཞེ་ན་འབྱུང་བ་བཞིའི་རྒྱུ་ལས་བྱུང་པ་དང་། དང་བ་ནི་རྣམ་པར་ཤེས་པ་དང་འབྲེལ་བས་གསལ་བ་ལ་བརྗོད་དོ། །འདི་ཡང་ནང་གི་ས་བོན་ནམ་ནུས་པར་འབྲེལ་བ་བརྟག་པར་གསུངས་ཤིང་། ཐེག་བསྡུས་སུ་ནི་ཀུན་གཞིའི་བཟུང་བའི་ཆ་དབང་པོ་ལྔར་སྣང་བ་ལ་བཞེད་དེ་ཐམས་ཅད་ཀྱང་འགལ་པ་མེད་དོ། །ཡིད་ཀྱི་དབང་པོ་ནི་དེ་མ་ཐག་པ་ཀུན་གཞི་ལས་སྐྱེ་བ་དང་འགག་པ་ཉིད་དང་། དྲུག་པོ་འགགས་མ་ཐག་པ་ཡིད་ཀྱི་ཁམས་སུ་བཤད་པ་དང་། ཀུན་གཞིའི་ནུས་པའི་བྱེ་བྲག་ལ་སོགས་པར་བཤད་ཀྱང་། དོན་ནི་ཡིད་ཀྱི་རྣམ་པར་ཤེས་པ་སྐྱེ་བའི་སྒོ་བྱེད་པའི་ནུས་པ་ཉིད་ཡིད་ཀྱི་སྐྱེ་མཆེད་དུ་རིགས་ཏེ། ཆོས་འདུས་བྱས་དང་འདུས་མ་བྱས་ཀྱི་སྐྱེ་མཆེད་དང་དེ་གཉིས་ཡུལ་དང་ཡུལ་ཅན་དུ་རྟེན་ཅིང་འབྲེལ་བ་ཡིན་པའི་ཕྱིར་རོ། །དམིགས་པའི་རྐྱེན་བསྟན་པ་ནི། །དམིགས་པའི་རྐྱེན་ནི་གཟུགས་ལ་སོགས། །ཡུལ་དུ་སྣང་བའི་རིག་བྱ་སྟེ། །ཞེས་བྱ་བ་སྟེ། གཟུགས་སྒྲ་དྲི་རོ་རེག་བྱ་ལྔ་དང་ཆོས་འདུས་བྱས་དང་འདུས་མ་བྱས་རྣམས་སོ། །དེ་ཡང་གཟུགས་ནི་འབྱུང་བ་ཆེན་པོ་བཞི་འམ་བཞི་དག་རྒྱུར་བྱས་པ་མིག་གི་སྤྱོད་ཡུལ་གྱི་དོན་གང་ཡིན་པ་དང་། ཁ་དོག་དང་དབྱིབས་དང་རྣམ་པར་རིག་པའོ། །སྒྲ་ནི་རྣ་བའི་ཡུལ་ཏེ་ཟིན་པ་དང་མ་ཟིན་པ་དང་གཉིས་ཀ་སྟེ་འབྱུང་བ་ལས་བྱུང་བའོ། །དྲི་ནི་སྣའི་ཡུལ་ཏེ་དྲི་ཞིམ་པ་དང་དྲི་ང་བ་དང་དེ་ལས་གཞན་པའོ། །རོ་ནི་ལྕེའི་ཡུལ་ཏེ་རོ་དྲུག་གོ། །རེག་བྱ་ནི་ཕྱོགས་གཅིག་ལུས་ཀྱི་ཡུལ་ཏེ། འཇམ་རྩུབ་དང་ཡང་ལྕི་དང་གྲང་དྲོ་དང་བཀྲེས་སྐོམ་མོ། །ཆོས་ནི་འདུས་བྱས་བསྡུས་པ་ལས་གྱུར་བ་དང་། མངོན་པར་སྐབས་ཡོད་པ་དང་། བརྡ་ལས་བྱུང་བ་ཡང་དག་པར་བླངས་པ་དང་། དབང་འབྱོར་བ་དང་། ཀུན་བརྟགས་པ་དང་། ཚོར་བ་དང་འདུ་ཤེས་དང་འདུ་བྱེད་རྣམས་སོ། །འདུས་མ་བྱས་ནི། འགོག་པ་གཉིས་དང་ནམ་མཁའ་དང་། དེ་བཞིན་ཉིད་དེ་རྣམ་གྲངས་ཕྱེ་ན་བརྒྱད་དུ་བཤད་པ་རྣམས་ཡིན་ནོ། མདོར་བསྡུས་ན་རྣམ་པར་རིག་པར་བྱ་བ་ཡིན་ནོ། །དེ་མ་ཐག་པའི་རྐྱེན་ནི། དེ་མ་ཐག་པའི་རྐྱེན་ཅེས་པ། །གང་གང་འགགས་པ་དེ་མ་ཐག །ཡིན་ཏེ་ཞེས་བྱ་བ་སྟེ། འདི་ལ་བྱེ་བྲག་ཏུ་སྨྲ་བ་དག་ནི། ཚོགས་དྲུག་པོ་སོ་སོ་འགགས་པ་ཉིད་ཕྱི་མའི་དེ་མ་ཐག་པར་འདོད་ཀྱང་། འགགས་པ་རྒྱུ་ཉིད་དུ་མི་རུང་བའི་རིགས་པས་འདིར་ནི་དགོངས་པ་ངེས་པར་འགྲེལ་པ་ལས་གསུངས་པ་ལྟར་ཚོགས་དྲུག་པོ་འགགས་པ་ན་ཡིད་ཀྱི་ཁམས་དང་གཅིག་དུ་བཤད་པའི་རྣམ་པར་ཤེས་པས་ཀུན་གཞི་ལ་འགྱེད་ཞིང་ཡང་དེ་མ་ཐག་ཏུ་ས་བོན་ཐམས་ཅད་པ་ལས་ཆུ་ལས་རླབས་ཀྱི་རྐྱེན་བཞིན་དུ་ཀུན་གཞི་ལ་གནས་པའི་ཡིད་གཡོ་ཞིང་འབྱུང་བས་དེ་མ་ཐག་པའི་ཡིད་སྔར་བཤད་པ་ལྟར་འབྱུང་སྟེ་ཚོགས་དྲུག་གི་རྐྱེན་གཅིག་འབྱུང་ན་དེ་མ་ཐག་པ་ཡང་གཅིག་འབྱུང་གི་གཉིས་པ་མི་འབྱུང་ངོ་། །མང་པོ་འབྱུང་པའི་རྐྱེན་ཉེ་བར་གནས་ན་དེ་སྙེད་གཅིག་འབྱུང་བར་འགྱུར་རོ། །དེའི་ཕྱིར་གང་གང་འགགས་པ་ནི་ཚོགས་དྲུག་པོའི་སྔ་མ་འགགས་པའི་ཚེ། དེ་མ་ཐག་ཏུ་ཡང་ཕྱི་མའི་རྐྱེན་ཉེ་བར་སྦྱོར་བས་དེ་མ་ཐག་པ་ཡིན་ནོ། །དེས་ན་གང་གང་སྐྱེ་བ་དེ་མ་ཐག་ཅེས་བཤད་ཀྱང་འགལ་བ་མེད་དོ། །རྒྱུ་མཚན་ནི། ལྔ་རྣམས་རྩ་བའི་རྣམ་ཤེས་ལས། །ཇི་ལྟར་འབྱུང་བར་འགྱུར་བ་ནི། །རྣམ་ཤེས་ལྷན་ཅིག་འམ་མ་ཡིན། །ཞེས་སུམ་ཅུ་པར་གསུངས་པ་ལྟར། རྩ་བའི་རྣམ་ཤེས་ནི་ཀུན་གཞི་ཡིན་ལ་རྣམ་ཤེས་ལྔ་པོ་ཇི་ལྟར་འབྱུང་བར་འགྱུར་བ་བཞིན་རྐྱེན་གསུམ་དང་ལྷན་ཅིག་ཏུ་འབྱུང་བའམ། ཡང་ན་རྣམ་པར་ཤེས་པ་ཉིད་བདག་པོའི་རྐྱེན་དུ་དགོངས་པས་དེ་མ་ཐག་པས་བསྐྱེད་ནས་དབང་པོ་དང་ཡུལ་དང་རྣམ་ཤེས་གསུམ་བསྐྱེད་དོ་སྙམ་དུ་མཛད་པས་ལྷན་ཅིག་མ་ཡིན་པར་སྨོས་པའོ། །དྲུག་པ་ཡིད་ཀྱི་རྣམ་ཤེས་ཇི་ལྟར་འབྱུང་བ་ནི་ཡང་དེ་ཉིད་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུ་འདུ་ཤེས་མེད་པ་དང་། །སྙོམས་པར་འཇུག་པ་རྣམ་གཉིས་དང་། །སེམས་མེད་གཉིད་དང་བརྒྱལ་མ་གཏོགས། །ཞེས་གསུངས་ཏེ་གནས་སྐབས་ལྔ་པོ་དེ་ན་དྲུག་པ་ཡིད་རེ་ཞིག་ཀུན་གཞི་ལ་བསྡུས་པས་ཆོས་ལ་གཏད་པའི་རྣམ་པ་མི་གསལ་བའི་ཕྱིར་དེ་དག་གི་སྐབས་སུ་མི་འབྱུང་བར་བཤད་པ་ཡིན་ནོ། །གཞན་གནས་སྐབས་ཐམས་ཅད་དུ་འབྱུང་བར་བཞེད་པ་ཡིན་ནོ། །འདིར་དྲུག་པའི་ཡིད་དང་བཅས་ཞེས་བྱ་བ་ནི་དྲུག་པ་ཡིད་དེ་ལ་ཡང་དེ་མ་ཐག་པའི་ཡིད་ཡོད་པས་དེ་མ་ཐག་པ་ཀུན་གཞི་ལ་གནས་པའི་ཡིད་ཀྱི་བྱེ་བྲག་ཏུ་འདོད་པ་ཡིན་ནོ། །གཞན་དག་དེ་མ་ཐག་པ་དྲུག་པ་ཡིད་ཀྱི་བྱེ་བྲག་ཏུ་འདོད་པ་ཡོད་པས་ཚིག་འདི་རྣམ་པར་ཤེས་པ་དྲུག་པོ་མཚུངས་པར་དེ་མ་ཐག་པ་འབྱུང་བར་སྟོན་པ་ཡིན་ནོ། །རྣམ་པར་ཤེས་པ་དྲུག་པོ་རྣམས་འབྲས་བུར་བརྗོད་པ་ན་རྐྱེན་གསུམ་ལས་སྐྱེས་པར་འཐད་དོ། །རྣལ་འབྱོར་སྤྱོད་པ་པའི་གཞུང་གིས་རྐྱེན་བཞི་ནི་སེམས་ཀྱིས་བསྐྱེད་པའི་རྒྱུ་རྐྱེན་ཐམས་ཅད་ལ་བརྗོད་པ་ཡིན་ནོ། །དོན་དམ་པར་ན་རྐྱེན་རྟེན་ཅིང་འབྲེལ་བར་འབྱུང་བ་ཉིད་དུ་འཐད་ཀྱིས་འདི་ཐམས་ཅད་རྟོག་པའི་བྱེ་བྲག་ལ་བརྗོད་པར་ཟད་དོ། །ལུང་གི་སྤྲོས་པ་དང་རིགས་པ་མང་དུ་ཡོད་མོད་ཀྱི་སྤྲོས་པ་ཆོག་གོ །དེ་ལྟར་རྒྱུ་རྐྱེན་གྱི་དབྱེ་བ་བཤད་ནས། བཞི་ལ་གནས་སྐབས་གསུམ་གྱི་དབྱེ་བ་ལ་གསུམ་ཏེ། མ་དག་པ་དང་། གཉིས་ལྡན་དང་རྣམ་པར་དག་པའོ། །དང་པོ་ནི་ཚིགས་སུ་བཅད་པ་གསུམ་སྟེ། དང་པོ་སྤྱིར་བསྟན་པ་ནི། དེ་ལྟར་རྒྱུ་རྐྱེན་རྟེན་འབྲེལ་ལས། འཁོར་འདས་ཆོས་ཀུན་སྣང་བར་འགྱུར། ཞེས་སྨོས་ཏེ་རྒྱུ་རྐྱེན་ལ་བརྟེན་ནས་འཁོར་བར་རྟེན་ཅིང་འབྲེལ་བར་འབྱུང་བ་ལུགས་འབྱུང་དང་། དེ་རྟོགས་ཤིང་ལུགས་ལས་བཟློག་པར་རྟོགས་པས་མྱ་ངན་ལས་འདས་པ་འབྱུང་བ་སྟེ། དེ་ལས་རྒྱས་པར་བརྗོད་ན། མ་རིག་པས་འདུ་བྱེད་དང་། རྐྱེན་དེས་རྣམ་པར་ཤེས་པ་དང་། མིང་དང་གཟུགས་དང་། རེག་པ་དང་ཚོར་བ་སྔར་བསྟན་པ་ལྟར་འབྱུང་སྟེ་དེའི་ཕྱིར། །སྲེད་ལེན་འཚམས་སྦྱར་སྲིད་པ་གྲུབ། སྲིད་པ་དེ་ཡང་རྣམ་པ་གསུམ་ཡིན་པའི་ཕྱིར། །གཟུགས་མེད་གཟུགས་ཁམས་འདོད་པའི་ཁམས། །རིམ་བཞིན་ཡུལ་ལ་མཚན་འཛིན་པ། །ཆུང་དང་འབྲིང་དང་ཆེན་པོ་ཡིན། །ཞེས་བྱ་སྟེ། །གཟུགས་མེད་པ་བཞི་ནི་འདོད་པ་དང་གཟུགས་ཀྱི་སྣང་བ་དང་ཐོགས་པ་བཀག་པའི་ཕྱིར་ཡུལ་ལ་མཚན་མར་འཛིན་པ་ཆུང་ངུ་དང་། འདོད་པའི་འདོད་ཆགས་དང་བྲལ་ལ་བསམ་གཏན་བཞིའི་མཐུས་སྐྱེས་པའི་ཕྱིར་གཟུགས་ཁམས་ནི་འབྲིང་དང་། རྟོག་པ་ཐམས་ཅད་དང་ལྡན་པས་འདོད་པའི་ཁམས་ཏེ་དེ་ནི་མཚན་མར་འཛིན་པ་ཆེན་པོ་དང་ལྡན་པ་ཡིན་ནོ། །ཐམས་ཅད་ཀྱང་རང་གི་སེམས་ཀྱི་གནས་ལུགས་མ་རྟོགས་པས་བླང་བ་དང་དོར་བའི་ཚུལ་བཞིན་མ་ཡིན་པའི་རྟོག་པས་བསྐྱེད་ནས་དགེ་མི་དགེ་ལུང་དུ་མ་བསྟན་པ་དང་གསུམ་གྱིས་འདུ་བྱས་པས་དེའི་ཕྱིར། །ཐམས་ཅད་བླང་དོར་རྟོག་པ་ཡིས། །དགེ་དང་མི་དགེ་ལུང་མ་བསྟན། །རྣམ་གསུམ་འདུ་བྱེད་རྐྱེན་ལས་ནི། །ཞེས་རྒྱུའི་ཁྱད་པར་བརྗོད་ནས་དེའི་འབྲས་བུ་ཇི་ལྟ་བུ་ཞེ་ན། །བདེ་སྡུག་སྙོམས་འཇུག་བཅས་པ་ཡི། །འབྲས་བུ་བསྐྱེད་པ་ཉོན་མོངས་ཅན། །ཞེས་སྨོས་ཏེ་དགེ་བ་བཅུའི་མཐུ་ཆུང་འབྲིང་ཆེན་པོས་བདེ་བའི་འབྲས་བུ་ཆུང་འབྲིང་ཆེན་པོ་བསྐྱེད་པ་ནི་འདོད་པའི་ཁམས་ཀྱི་བདེ་འགྲོ་དང་། མི་དགེ་བས་བསྐྱེད་པའི་སྡུག་བསྔལ་ཅན་ནི་ངན་སོང་གསུམ་དང་། སྙོམས་པར་འཇུག་པ་བསམ་བརྟན་བཞི་དང་གཟུགས་མེད་པ་བཞི་ཤེས་རབ་དང་བྲལ་བས་བསྐྱེད་པ་ནི་གཟུགས་དང་གཟུགས་མེད་པ་སྟེ། ཐམས་ཅད་ཀྱང་ཉོན་མོངས་པ་ཅན་གྱི་ཡིད་དང་མ་བྲལ་བ་ཡིན་ནོ། །དེས་ན་སེམས་ཉིད་མ་དག་གནས་སྐབས་ཡིན། །ཞེས་དྲི་མ་དང་བཅས་པ་བརྗོད་པའོ།། །།

གཉིས་པ་དག་མ་དག་གཉིས་ཀའི་གནས་སྐབས་ནི། དྲི་མ་དེ་ཉིད་གློ་བུར་བར། །ཤེས་ནས་ཐབས་དང་བཅས་སྦྱོང་བ། །ལམ་པ་ཞེས་བྱར་རྒྱལ་བས་གསུངས། །ཞེས་པ་སྟེ། སྔར་བསྟན་པ་ལྟར་སྒྲིབ་པ་གློ་བུར་བར་ཤེས་ནས་བྱང་ཆུབ་ཀྱི་ཕྱོགས་ལ་བརྟེན་པ་དང་། བསྐྱེད་རྫོགས་ཀྱི་ཐབས་ཀྱི་ཁྱད་པར་གྱིས་སྒྲིབ་པ་དེ་སྦྱོང་བ་ལ་ཞུགས་པ་ཚོགས་ཀྱི་ལམ་ནས་ས་བཅུ་རྒྱུན་མཐའི་བར་དུ་མ་དག་པ་དང་དག་པ་གཉིས་གའི་གནས་སྐབས་ལམ་པར་བརྗོད་པ་ཡིན་ནོ། །དྲི་མ་མེད་པ་ནི། །དྲི་མེད་དག་པ་སངས་རྒྱས་ཏེ། །དེ་ཕྱིར་འགྲོ་ཀུན་སངས་རྒྱས་ཉིད། །ཅེས་པ་སྟེ་ཉོན་མོངས་པ་དང་ཤེས་བྱ་དང་སྙོམས་འཇུག་གི་དྲི་མ་ཐམས་ཅད་དང་བྲལ་བ་ནི་སངས་རྒྱས་ཉིད་དེ། སེམས་ཅན་ཐམས་ཅད་ཀྱི་སེམས་དེ་ཉིད་དང་མ་བྲལ་བས་སངས་རྒྱས་སུ་གསུངས་སོ། །ཧེ་བཛྭ་ལས་ཀྱང་། །སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། དེ་ཉིད་བསལ་ན་སངས་རྒྱས་སོ། །ཞེས་པ་དང་། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །འདི་ན་སྣོད་མིན་སེམས་ཅན་གང་ཡང་མེད། །ཅེས་གསུངས་པའི་དོན་བསྟན་པ་ཡིན་ནོ། །གཉིས་པ་ལུས་འགྲུབ་པའི་ཚུལ་བཤད་པ་ལ་གསུམ་སྟེ་མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི་ལུས་ནི་འགྲུབ་པའི་ཚུལ་བཤད་པ། ཀུན་གཞི་སྲོག་རླུང་དང་བཅས་པ། ཁམས་གསུམ་སྐྱེ་བར་སྦྱོར་བ་ན། ཞེས་བྱ་བ་ནི་རྡོ་རྗེ་ཐེག་པའི་གཞུང་ཐམས་ཅད་ནས་གཞི་ལུས་དང་སེམས་གཉིས་སུ་གསུངས་ཀྱང་། སེམས་སྔར་བསྟན་པ་ལ་ཁྱད་པར་དུ་སྔགས་ཀྱི་ཐེག་པར་ཐབས་ཀྱི་ཁྱད་པར་བསྟན་དགོས་པས་བརྟེན་པ་སེམས་བཅིང་བ་ལ་རྟེན་ལུས་བཅིང་བ་གནད་ཆེ་བའི་ཕྱིར་ལུས་ཀྱི་གནས་ལུགས་བསྟན་པས།

ལེའུ་གཉིས་པ། མངལ་དུ་ལུས་འགྲུབ་པའི་ཚུལ་བསྟན་པའི་དུམ་བུ།

དེས་ན་ལུས་གྲུབ་པའི་ཚུལ་ལ་ཕྱིར་ལུས་འདི་སེམས་ཀྱི་ཆ་ལས་གྲུབ་པ་ཡིན་ཀྱང་ཇི་ལྟར་གྲུབ་པ་ཤེས་དགོས་པས། ཁམས་གསུམ་གྱི་སྐྱེ་བར་སྦྱོར་བ་ན། ཀུན་གཞི་ལུང་དུ་མ་བསྟན་པ་དེ་ཁྲིད་པར་བྱེད་པ་ནི་ཡིད་གཡོ་བ་དང་བཅས་པ་ཡིན་པས། དེ་ལ་སྔགས་ཀྱི་སྐད་དུ་སྲོག་གི་རླུང་ཞེས་བྱ་སྟེ། སྲོག་འཛིན་ལ་ཡང་ཞིང་གཡོ་བའི་མཚན་ཉིད་འཛིན་པའི་ཕྱིར་རོ། །རྒྱས་པར་བཤད་པ་ལ་གཉིས་ཏེ། ཁམས་གསུམ་གྱི་སྐྱེ་བའི་ཚུལ་སྤྱིར་བསྟན་པ་དང་། བྱེ་བྲག་ཏུ་མིའི་ལུས་ལེན་པའི་ཚུལ་རྒྱས་བཤད་དོ། །དང་པོ་ནི་གཟུགས་མེད་པ་དང་། གཟུགས་དང་འདོད་པའི་ཁམས་གསུམ་ལས་གཟུགས་མེད་ནི། འདུ་བྱེད་བཅས་པའི་རྣམ་ཤེས་ཀྱིས། །ནམ་མཁའ་མཐའ་ཡས་ལ་སོགས་བཞི། །ཡུལ་དུ་བྱས་ནས་དེར་སྐྱེ་བ། །གཟུགས་མེད་ཞེས་བྱ་ཡིད་ལུས་སོ། །ཞེས་སྨོས་ཏེ་གཟུགས་མེད་པར་འཚམས་སྦྱོར་བ་ན་ཡང་འདུ་བྱེད་ནི་ལས་བསྒྲུབ་པ་དང་འཕེན་པར་བྱེད་པའི་ལས་ཡིན་པས་དེ་དང་བཅས་པའི་རྣམ་པར་ཤེས་པས་ནམ་མཁའ་མཐའ་ཡས་དང་། རྣམ་ཤེས་མཐའ་ཡས་དང་། ཅི་ཡང་མེད་པ་དང་། འདུ་ཤེས་མེད་འདུ་ཤེས་མེད་མིན་གྱི་ཏིང་ངེ་འཛིན་ལ་ཡུལ་དུ་བྱས་ནས། དེ་རྫོགས་པར་བྱེད་ཅིང་ཐོབ་པ་ན་ཡང་རྣམ་པར་ཤེས་པ་དེ་ཉིད་ཀྱི་ང་རྒྱལ་ཙམ་སྟེ་སེམས་བག་ཆགས་དང་བཅས་པའི་ལུས་ཡོད་པ་ཉིད་ཡིན་ནོ། །འོ་ན་ཅིའི་ཕྱིར་གཟུགས་མེད་ཅེས་བྱ་ཞེ་ན། ཐེག་པ་ཐུན་མོང་བ་ནས་བཤད་པའི་རྡུལ་ཕྲ་རབ་འདུས་པ་དང་སྣང་བའི་གཟུགས་མེད་པའི་ཕྱིར་ཏེ་དེར་སྐྱེས་པའི་འཕགས་པ་མ་ཡིན་པ་རྣམས་ནི་ཉོན་ཡིད་དང་བཅས་པའི་ཡིད་ཀྱི་ལུས་ཡིན་ནོ། །ནམ་ཏིང་ངེ་འཛིན་དེ་ལས་ཁམས་གཞན་དུ་འཕོ་བ་ན་རྣམ་པར་རྟོག་པ་གཞན་འབྱུང་བས་འཆི་བའི་ཐ་སྙད་དུ་བརྗོད་དེ། དེ་ནི་གཟུགས་མེད་པའི་རྒ་ཤི་བཤད་པའོ། །གཟུགས་ཀྱི་ཁམས་ནི་ཚིགས་སུ་བཅད་པ་ཕྱེད་དང་གསུམ་ལས་ངོ་བོ་བསྟན་པའི་ཕྱིར། །བསམ་གཏན་བཞིར་བརྟེན་གང་སྐྱེ་བ། །གཟུགས་ཁམས་ཡིན་ཏེ་འདོད་སྲེད་ནི། །རགས་པ་བཅོམ་པས་བརྫུས་སྐྱེས་སོ། །ཞེས་སྨོས་ཏེ་སྔར་བཞིན་དུ་ཀུན་གཞི་སྲོག་རླུང་དང་བཅས་པས་འདྲེན་པར་བྱེད་ཅིང་འཕེན་པར་བྱེད་པ་ནི་བསམ་གཏན་བཞིའི་ཏིང་ངེ་འཛིན་གྱི་ཉེར་བསྡོགས་ལ་བརྟེན་ནས། དང་པོས་ནི་ཚངས་རིས་དང་འདུན་ན་འདོན་དང་ཚངས་ཆེན་དུ་སྐྱེ་ལ། གཉིས་པས་ནི་འོད་ཆུང་དང་ཚད་མེད་འོད་དང་འོད་གསལ་དུ་སྐྱེ་ཞིང་། གསུམ་པས་ནི། དགེ་ཆུང་ཚད་མེད་དགེ་དགེ་རྒྱས་སུ་སྐྱེ་ལ། གཞི་པས་ནི་སྤྲིན་མེད་བསོད་ནམས་སྐྱེས་འབྲས་བུ་ཆེར་སྐྱེ་བའོ། །དེ་ཉིད་ཤེས་རབ་དང་འབྲེལ་བས་གཙང་མའི་གནས་གཞན་རྣམས་སུ་འགྲོ་བས་དེ་རྣམས་ནི་གཟུགས་ཀྱི་ཁམས་ཡིན་ཏེ་འདོད་པའི་ཁམས་ལས་གྱེན་དུ་བསྐྱོད་པའི་ཕྱིར་འདོད་སྲེད་རགས་པ་མངོན་དུ་རྒྱུ་བ་བཅོམ་པའི་ཕྱིར་བརྫུས་ཏེ་སྐྱེ་བ་ཀུན་རྫོགས་པའི་ལུས་གོས་དང་བཅས་པའོ། །ཡིད་ཞི་གནས་ཀྱིས་འཁྱུད་པའི་ཕྱིར་ཉོན་མོངས་པ་ཅན་གྱི་ཡིད་ཅུང་ཟད་མི་གསལ་བ་ཡིན་ནོ། །འདུ་ཤེས་མེད་པའི་ལྷ་ཚེ་རིང་པོ་ནི། འབྲས་བུ་ཆེ་ན་གནས་པས་གནས་གཞན་ལོགས་སུ་མི་བགྲང་ངོ་། །དེ་ནི་འདུ་ཤེས་མེད་པའི་སྙོམས་འཇུག་འཇིག་རྟེན་པའི་བསམ་གཏན་གསུམ་པ་ལས་འདུ་ཤེས་དང་ཚོར་བ་འགོག་པ་ལ་མྱ་ངན་ལས་འདས་པར་འཛིན་པའི་དབང་གིས་གྱུར་བར་གསུངས་སོ། །དེ་ལྟར་གཟུགས་དང་གཟུགས་མེད་པ་ན་སྐྱེ་བ་རྣམས་རྟེན་འབྱུང་བ་ལྔའི་ཁམས་གང་གི་དབང་གིས་སྐྱེ་ཞེ་ན། ཐམས་ཅད་ལ་སེམས་ཀྱི་ཟག་པ་ཉོན་མོངས་དང་ལུས་ཀྱི་ཟག་པ་ཡང་ཡོད་པས་དེའི་ཕྱིར་ནམ་མཁའ་ཞེས་བྱ་བ་ལ་སོགས་པ་སྨོས་ཏེ། འདི་ནི་མཆོག་ཏུ་མི་འགྱུར་བའི་མདོར་བསྡུས་ནས། ཐིག་ལེ་འཛག་པས་ཁམས་གསུམ་དུ་སྐྱེ་བའི་རྒྱུར་འགྱུར་ན་གཟུགས་ཀྱི་ཁམས་ན་ཕོ་དང་མོའི་དབང་པོ་མེད་ཅིང་། གཟུགས་མེད་པ་ན་ནི་ལུས་ཀྱང་མེད་པ་སྟེ་དེ་མི་རིགས་སོ་ཞེ་ན། དེ་རྣམས་ན་ཟག་པ་ཡོད་དེ། གཟུགས་མེད་བཞི་ནི། ཟད་པར་ནམ་མཁའི་རླུང་དང་མེ་དང་ཆུ་དང་སའི་འཛག་པ་བཞིའོ། །འོག་མིན་པ་བཞི་ནི་ཟད་པར་རླུང་གི་རླུང་དང་མེ་དང་ཆུ་དང་ས་བཞིའོ། །དེ་བཞིན་དུ་ཟད་པར་མེའི་རླུང་དང་། མེ་དང་ཆུ་དང་ས་དང་། ཟད་པར་ཆུ་ཡི་རླུང་དང་མེ་དང་ཆུ་དང་ས་དང་། ཟད་པར་སའི་རླུང་དང་མེ་དང་ཆུ་དང་ས་སྟེ་འབྲས་བུ་ཆེ་ནས་ཚངས་རིས་ཀྱི་བར་དུ་སྟེ། གཟུགས་ཁམས་བཅུ་དྲུག་དང་གཟུགས་མེད་པ་བཞི་སྟེ་གནས་གཞན་ཉི་ཤུ་རྣམས་སུ་ནམ་མཁའ་དང་རླུང་མེ་ཆུ་དང་སའི་འབྱུང་ཆུང་རྣམ་པར་དབྱེ་བས་དེ་དག་གི་འཛག་པར་ཤེས་པར་བྱའོ་ཞེས་གསུངས་སོ། །དེ་ཐམས་ཅད་ཀྱང་སྔར་སྨོས་པ་རྒྱུ་རྐྱེན་དང་བཅས་པས་རྒ་ཤི་དང་བཅས་པའི་ཕྱིར། ལྡན་པ་མ་རིག་སྐྱེད་དང་བཅས། དྲན་པ་ཉེར་བཞག་ཏུ་བསྟན་ཏོ། །ཞེས་བྱ་སྟེ་དྲན་པ་ཉེ་བར་བཞག་པའི་བསྟན་བཅོས་བསྡུས་པར་དེར་སྐྱེ་བའི་ཚུལ་ཞིབ་དུ་བཤད་པ་ནི་མདོ་དང་སྦྱར་བ་ཡིན་ནོ། །འདོད་པའི་ཁམས་སུ་ནི་ཁམས་ཐམས་ཅད་རྫོགས་པར་ལྡན་པའི་ཕྱིར། འདོད་ཁམས་རིགས་དྲུག་ཐམས་ཅད་ཀྱང་། ཞེས་པ་ནས་གཞན་ཚིགས་བཅད་གཉིས་ཏེ། དེ་ཡང་འདོད་པ་དང་ལྡན་པའི་ཕྱིར་འདོད་ཁམས་ཞེས་བྱ་སྟེ། དེ་ཡང་འདོད་པའི་ལྷ་རིགས་དྲུག་དང་། མི་དང་ལྷ་མ་ཡིན་དང་། དུད་འགྲོ་དང་ཡི་དྭགས་དང་དམྱལ་བ་སྟེ་འགྲོ་བ་རིགས་དྲུག་པོ་ཐམས་ཅད་ཀྱང་། ས་ཆུ་མེ་རླུང་ནམ་མཁའ་དང་། ཡེ་ཤེས་ཀྱི་ཁམས་ཁུ་བ་ལྟུང་བ་ཡོད་པས། ཁམས་དྲུག་ལྡན་དུ་བཤད་དེ། ཕྲ་བ་སྲིན་བུ་ཆུང་ངུ་དང་རགས་པ་ལྷ་ལ་སོགས་པ་ཐམས་ཅད་ཀྱང་། སྐྱེ་གནས་བཞི་དང་ལྡན་པ་སྟེ། བརྫུས་ཏེ་སྐྱེ་བ་དང་མངལ་དང་སྒོ་ང་དང་དྲོད་གཤེར་ལས་སྐྱེ་བ་བཞི་དང་ལྡན་པ་ཡིན་ནོ། །དེ་རྣམས་ཁམས་དྲུག་ལྡན་ཡིན་ཀྱང་བྱེ་བྲག་དུ་འཛམ་བུའི་གླིང་ཏུ་སྐྱེས་པའི་མི་རྣམས་ལ་ཁམས་བྱང་ཆུབ་ཀྱི་སེམས་ཀྱི་ཡོན་ཏན་སྐྱེ་བ་དང་གླིང་གསུམ་གྱི་མི་མ་གཏོགས་པ་གཞན་ལ་སོ་སོར་ཐར་པ་མི་སྐྱེ་བར་གསུངས་པའི་ངེས་པ་བསྟན་པའི་ཕྱིར། གཞན་དག་རྣམས། །ངན་སོང་གསུམ་ནི་མི་ཁོམ་གནས། །ལྷ་དང་ལྷ་མིན་སྒྲ་མི་སྙན། འབྲས་བུ་སྤྱོད་པས་རྒྱུ་དམན་ཏེ། །ཞེས་སྨོས་པ། ངན་སོང་གསུམ་ན་དགེ་བའི་སེམས་བསྐྱེད་པ་དཀོན་པ་དང་མི་དགེ་བའི་འབྲས་བུ་སྟོབས་ཅན་ལ་སྤྱོད་པ་ཡིན་ལ། ལྷ་དང་ལྷ་མ་ཡིན་དང་། བྱང་གི་གླིང་སྒྲ་མི་སྙན་གྱི་མི་རྣམས་ནི་བསོད་ནམས་ཀྱི་འབྲས་བུ་ལ་སྤྱོད་པས་གཉེན་པོ་བསྐྱེད་པའི་རྒྱུ་དམན་པའི་ཕྱིར། སངས་རྒྱས་དེར་མཛད་པ་བཅུ་གཉིས་ཀྱིས་སངས་རྒྱ་བར་མི་སྟོན་པ་དང་རྡོ་རྗེའི་ཐེག་པའི་སྐལ་བ་དམན་པར་གསུངས་སོ། །དེས་ན་གླིང་གསུམ་སྐྱེས་པའི་ཁམས་དྲུག་ལྡན། མཆོག་ཡིན་ཞེས་བྱ་བ་རྡོ་རྗེ་ཐེག་པ་དང་སོ་སོར་ཐར་པ་སྤྱོད་པའི་སྐལ་བ་མཆོག་ཡིན་ནོ། །ཁྱད་པར་དུ་ཡང་། འཛམ་གླིང་ལེགས་སྐྱེས་པ། ལས་ཀྱི་ས་པར་རབ་ཏུ་གྲགས། ཞེས་བསྟན་ཏེ་འདིར་སྐྱེས་པའི་མི་རྣམས་ནི་བྱང་ཆུབ་ཆེན་པོ་ཐོབ་པ་དང་། བདེ་འགྲོ་དང་ངན་འགྲོ་རྣམས་སུ་འགྲོ་བའི་ལས་ཐམས་ཅད་སྟོབས་དང་ལྡན་པའི་ཕྱིར་སངས་རྒྱས་རྣམས་འབྱོན་ཏོ། །འདིར་བཤད་པའི་ཚིགས་བཅད་ནི་བདེ་མཆོག་སྡོམ་འབྱུང་གི་རྒྱུད་ལས་བྱུང་ངོ་། །ལུང་དུ་མ་ཡོད་ཀྱང་མ་དྲངས་སོ། །དེ་ལྟར་ཁམས་གསུམ་གྱི་སྐྱེ་བའི་ཚུལ་སྤྱིར་བསྟན་ནས། བྱེ་བྲག་དུ་ལུས་གྲུབ་པའི་ཚུལ་རྒྱས་པར་བཤད་པ་ལ་གཉིས་ཏེ། སྐལ་པ་དང་པོའི་ཚུལ་དང་། མངལ་ནས་སྐྱེས་པའི་ཚུལ་ལོ། །དང་པོ་ནི་ཚིགས་སུ་བཅད་པ་གཉིས་ཏེ། དང་པོར་འཇིག་རྟེན་འདི་ཐུན་མོང་བ་ལྟ་བུའི་རྣམ་རིག་ལ་ཚངས་པ་ཆེན་པོ་དང་མཐུན་པར་སྐལ་ཆུང་གཅིག་ཆགས་ནས། དེའི་འོག་དུ་བཅུད་ཆགས་པའི་ཚེ་མི་རྣམས་འདིར་བྱུང་བ་ནི། ཡུལ་འདིར་སྐྱེ་བ་གྲུབ་ཚུལ་ནི། །དང་པོ་བརྫུས་སྐྱེས་གཟུགས་ཁམས་བཞིན། ཞེས་པ་གཟུགས་ཁམས་གྱི་འོད་གསལ་གྱི་ལྷ་ལྟ་བུ་འོད་དང་ལུས་དང་ཚེ་དཔག་དུ་མེད་པ་དགའ་བའི་ཟས་དང་ལྡན་ཞིང་སྟོབས་རྫོགས་པའི་ཕྱིར་རྫོགས་ལྡན་ཞེས་བྱའོ། །དེ་ནས་རིམ་གྱིས་སྲེད་དབང་གིས། །དྲི་དང་རོ་ལ་ཆགས་པ་ལས། །ཡུལ་དུ་སྣང་བའི་རྣམ་ཤེས་ལ། །བླང་དོར་བྱས་པས། ཞེས་བྱ་བ་ནི། གསུམ་ལྡན་དང་གཉིས་ལྡན་དང་རྩོད་ལྡན་འབྱུང་པའི་ཚུལ་ཏེ། མདོ་ལས་དེའི་ཚེ་ས་ཆེན་པོ་ལས་ས་མོ་ཞག་དྲི་དང་རོ་ཕུན་སུམ་ཚོགས་པ་ཡོད་པ་བྱུང་སྟེ་སེམས་ཅན་དེ་རྣམས་དྲི་སྣོམ་ཞིང་སོར་མོའི་རྩེ་མོས་མྱང་བར་བྱེད་དོ། །ཇི་ལྟ་ཇི་ལྟར་མྱངས་པ་ལྟར་སྲེད་དོ། །དེའི་རྒྱུས་ལུས་ལྕི་བར་གྱུར་ཏེ་འོད་ཉམས་སོ། །འཇིག་རྟེན་དུ་མུན་པ་བྱུང་པ་དང་ཉི་མ་དང་ཟླ་བ་འོད་གསལ་བ་འཆར་བ་དང་ནུབ་པ་དག་བྱུང་ངོ་། །དེའི་འོག་དུ་ཤི་བའི་རོ་དག་བྱུང་པས་ཚེ་ནུབ་པར་གྱུར་ཏོ། །ལུས་ཀྱི་ཁམས་རྟས་པས་ཟག་པ་དང་ཕོ་དང་མོའི་དབང་པོ་ཡང་བྱུང་སྟེ། སེམས་ཅན་ང་ནི་ཚེ་རིང་བ་དང་ཁ་དོག་བཟང་བ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་རྩོད་པ་དང་། འདོད་པའི་སེམས་དང་། སྡུག་བསྔལ་བ་བྱུང་སྟེ་ས་ཞག་སའི་འོག་དུ་ནུབ་པར་གྱུར་ཏོ། །དེའི་འོག་ཏུ་མྱུ་གུའི་ཚལ་དང་། དེའི་འོག་དུ་འབྲས་ས་ལུ་མ་བཏབ་པར་སྐྱེ་བ་དང་བཅས་པ་ཡང་རིམ་གྱིས་ནུབ་པས་ང་ཡིར་བྱ་བ་དང་། དེ་ལ་གཞན་དག་གིས་བླངས་པས་རྩོད་པ་དང་བཅས་པ་བྱུང་བར་གསུངས་ཏེ་དེས་ན། ལུས་ཁམས་ནི། རགས་སྣང་ཕོ་མོ་སྣང་མུན་དང་། །བདེ་སྡུག་འདོད་སྲེད་རྟས་པར་གྱུར། །ཞེས་སྨོས་པ་ཡིན་ནོ། །དེ་ནས་མངལ་ནས་སྐྱེ་བ་གྲུབ་པའི་ཚུལ་ནི་གསུམ་ཏེ། ཁམས་དྲུག་གི་རྒྱུ་རྐྱེན་ལ་བརྟེན་ནས་འབྱུང་བའི་རིམ་པ་དང་བཅས་པ་དང་། མངལ་དུ་ཇི་ལྟར་འཇུག་པའི་ཚུལ་དང་། སྐྱེ་བའི་རིམ་པ་བསྟན་པའོ། །དང་པོ་ནི་ཚིག་རྐང་བདུན་ཏེ། དེ་ནས་གང་གི་ཚེ་མངལ་ནས་སྐྱེ་བ་འགྲུབ་པར་གྱུར་བ་དེའི་ཚེ། རང་གི་སེམས་ཀྱི་སྣང་བ་ཡིན་ཀྱང་། གཞན་དུ་རྟོག་པའི་བག་ཆགས་ལ་བརྟེན་ནས་ཕ་མའི་རྐྱེན་ཉེ་བར་སྦྱོར་བ་དང་ཐུན་མོང་བ་ལྟ་བུར་སྣང་བའི་ཚུལ་བཤད་དགོས་པས། །ལུས་འདི་ལ་ནི་ཁམས་ཀྱི་ཚོགས། །མ་ལུས་རོ་དྲུག་བཟའ་བཏུང་ལས། །བྱུང་ཞིང་འགྲུབ་པའི་རྐྱེན་བྱེད་དོ། །ཞེས་སྨོས་ཏེ་ལུས་ཀྱི་ཁམས་རུས་པ་ལ་སོགས་པ་སུམ་ཅུ་སོ་དྲུག་པོ་ཐམས་ཅད་བཟའ་བཏུང་གི་རྐྱེན་གྱིས་བསྐྱེད་ཅིང་བྱུང་བས་ནང་གི་སྲ་བ་དང་རླན་པ་དང་དྲོ་བ་དང་ཡང་བའི་འབྱུང་བཞི་རྟས་ཤིང་གྲུབ་པར་བྱེད་པར་སྣང་སྟེ་རྐྱེན་བྱེད་པ་དེ་ཡང་རོ་དྲུག་སྟེ། སྐྱུར་བ་དང་སྐ་བ་གཉིས་ནི་ཡེ་ཤེས་དང་ནམ་མཁའི་ཁམས་སོ། །ཁ་བ་ནི་རླུང་ཚ་བ་ནི་མེ། མངར་བ་ནི་ཆུ་ལན་ཚྭ་བ་ནི་སའི་ཁམས་ཏེ། ནམ་མཁའ་དང་བདེ་བའི་ཡེ་ཤེས་ཀྱི་སྦྱོར་བས་ཐམས་ཅད་ཀྱང་བསྐྱེད་པའི་ཕྱིར་ན། །རོ་དྲུག་འབྱུང་བ་ལྔ་ལས་ཏེ། །མཁའ་དང་བདེ་བའི་ཡེ་ཤེས་ཀྱིས། །སྦྱོར་བས་བརྟན་པར་འགྲུབ་པ་ཡིན། ཞེས་བཤད་པ་ཡིན་ནོ། །དེ་ཡང་ཇི་ལྟ་བུར་འགྲུབ་པའི་རང་བཞིན་ཤེས་དགོས་པས། ཚིག་ལྔ་སྟེ། །པད་མར་ཆུད་པའི་ས་བོན་ནི། ཞེས་པ་མངལ་དུ་དཀར་དམར་གྱི་དྭངས་མ་ལ་བར་དོའི་རྣམ་པར་ཤེས་པས་བདག་དུ་བཟུང་ཞིང་འདྲེས་པ་ལ་བརྗོད་དེ་ཕ་མའི་ཁམས་རྐྱང་ནི་མ་ཡིན་ནོ། །དེ་ལ་ཁམས་བཞིའམ་ལྔར་ཇི་ལྟར་ངེས་ཞེ་ན། །འཛིན་པས་ས་ཁམས་རང་བཞིན་སྟེ། །ཆུས་བསྐྱེད་མེ་ཡིས་སྨིན་པར་བྱེད། །རླུང་གིས་འཕེལ་བྱེད་ནམ་མཁའ་ཡིས། །གོ་སྐབས་འབྱེད་པར་བྱེད་པ་ཡིན། །ཞེས་སྨོས་པ། རྣམ་པར་ཤེས་པ་འཛིན་པ་དང་། བརླན་པ་དང་། ལུས་སྨིན་པ་དང་། ཆེར་རྒྱས་ཤིང་འཕེལ་བ་དང་ནང་གི་གོ་སྐབས་སོ་སོར་འབྱེད་པ་ལས་འབྲས་བུའི་གཟུགས་རྣམས་ཀྱང་སྣང་བར་བྱེད་པར་གསུངས་པའི་ཕྱིར་བཤད་དོ། །འདི་རྣམས་རྒྱས་པར་དུས་ཀྱི་འཁོར་ལོའི་ནང་གི་ལེའུ་ལས། ལུས་འདི་ལ་ནི་ཁམས་གྱི་ཚོགས་རྣམས་མ་ལུས་རོ་དྲུག་རྣམས་ཀྱི་བཟའ་བཏུང་ལས་ནི་འབྱུང་བར་འགྱུར། ཞེས་བྱ་བ་ལ་སོགས་པ་རྣམས་གསུངས་པ་བསྡུས་པ་ཡིན་ནོ། །ཁམས་འདི་རྣམས་འབྱུང་པའི་རྟེན་འབྲེལ་གྱི་རིམ་པ་ཤེས་པར་བྱ་བ་ནི། ཚིགས་སུ་བཅད་པ་ཕྱེད་དང་གསུམ་སྟེ་དེ་ཉིད་བསྐྱེད་པར་བྱེད་པ་ཡང་། དཔལ་དགྱེས་པའི་རྡོ་རྗེ་ལས་གསུངས་པའི་ལུང་འདི་ཉིད་དེ། བྷོ་ལ་ཀ་ཀོ་ལ་སྦྱོར་བ་ནི། ཕ་མ་གཉིས་ཀྱིས་ཉམས་སུ་མྱོང་བ་ན་བར་མ་དོའི་དྲི་ཟ་ཉེ་བར་འོངས་པས་རེག་པའི་བག་ཆགས་སྲ་བ་ཉིད་མྱོང་བས་སའི་ཁམས་སྐྱེ་བར་བྱེད་པར་འགྱུར་ལ། བྱང་ཆུབ་ཀྱི་སེམས་ཕ་མའི་ཁུ་བའི་རང་བཞིན། ལས་འདི་ནི་ང་ཡིའོ་སྙམ་དུ་འཛིན་པས་ཆུའི་ཁམས་འབྱུང་པའི་རྐྱེན་ཏོ། བསྐྱོད་པ་ལ་དྲོ་བའི་མེའི་ཁམས་སྐྱེ་སྟེ་དེ་ཡང་ཁྲག་གི་རང་བཞིན་དུ་འགྱུར་རོ། །གཡོ་བ་རླུང་དུ་རབ་ཏུ་གྲགས་པ་ནི་དེ་ལྟར་ཡང་བ་དང་རྐྱེན་གཡོ་བ་ཐམས་ཅད་རླུང་གི་རང་བཞིན་ཡིན་པ་དང་། བདེ་བ་ནི་ནམ་མཁའི་ཁམས་ཏེ་གོ་འབྱེད་པ་དང་ལྡན་པ་ཉིད་ཡིན་པས། ཁམས་ལྔ་པོས་རྣམ་པར་ཤེས་པ་བསྐོར་སྟེ། དེ་ལྟར་རྟེན་ཅིང་འབྲེལ་བར་འབྱུང་བའི་མ་རིག་པའི་རྐྱེན་གྱིས་འདུ་བྱེད་པ་ཡིན་ནོ། །འདི་ཡི་རྒྱས་བཤད་སྦྱང་གཞི་དང་དེ་ལྷ་གང་ཡིན་པ་དང་རང་བཞིན་དང་སྦྱར་བ་ཡང་དེ་ཉིད་ལས། བྷོ་ལ་ཀ་ཀོ་ལ་སྦྱོར་བས། །རེག་པ་སྲ་བ་བག་ཆགས་ཉིད། །སྲ་བ་གཏི་མུག་ཆོས་ཀྱི་ཕྱིར། །གཏི་མུག་རྣམ་པར་སྣང་མཛད་བརྗོད། །གང་ཕྱིར་བྱང་སེམས་གཤེར་བ་ཉིད། །གཤེར་བ་ཆུའི་རང་བཞིན་ཉིད། །ཆུ་ནི་མི་བསྐྱོད་གཟུགས་ཀྱི་ཕྱིར། །ཞེ་སྡང་འདྲེན་པ་མི་བསྐྱོད་པ། གཉིས་ཀྱིས་བསྐྱོད་པའི་སྦྱོར་བ་ལས། །དྲོད་ནི་རྟག་ཏུ་འབྱུང་འགྱུར་ཏེ། །འདོད་ཆགས་དཔག་མེད་རྡོ་རྗེ་ཡིན། །འདོད་ཆགས་དྲོད་ལས་འབྱུང་འགྱུར་གང་། །པད་མར་གང་ཞིག་སེམས་རྒྱུ་བ། །དེ་ནི་རླུང་གི་རང་བཞིན་ཅན། །ཕྲག་དོག་དོན་ཡོད་གྲུབ་པ་ཡིན། །དོན་ཡོད་རླུང་ལས་བྱུང་བ་ཉིད། །བདེ་བའི་འདོད་ཆགས་ཁྲག་ཏུ་འགྱུར། །དགའ་བ་ནམ་མཁའི་མཚན་ཉིད་དེ། །ནམ་མཁའ་སེར་སྣ་རྡོ་རྗེར་བརྗོད། །སེར་སྣ་ནམ་མཁའ་ལས་བྱུང་ཉིད། །སེམས་ནི་ཆེན་པོ་ཅིག་ཉིད་ལ། །ལྔའི་གཟུགས་ཀྱིས་རྣམ་པར་མཚོན། །ཞེས་གསུངས་པ་ཡིན་ནོ། །མངལ་དུ་ཇི་ལྟར་འཇུག་པའི་ཚུལ་ནི། །རྒྱུ་ནི་བར་དོའི་རྣམ་ཤེས་ཏེ། ཞེས་པ་ནས་ཚིགས་སུ་བཅད་པ་གསུམ་ཏེ། འདི་ཡང་གསང་བ་འདུས་པའི་བཤད་རྒྱུད་རྡོ་རྗེ་འཕྲེང་བ་ལས་གསུངས་པའི་ལུང་ཡིན་པའི་ཕྱིར་བརྗོད་དོ། །ཡང་ཁ་ཅིག་མངལ་དུ་ཚུལ་ཇི་ལྟར་འཇུག་པ་མི་ཤེས་པས། །བག་ཆགས་ཉོན་མོངས་ཅན་གྱི་ཡིད། །རླུང་གི་ངོ་བོས་གཟུགས་གཞན་མཐོང་། །ཞེས་བྱུང་བ་སྔར་བསྟན་པའི་ཉོན་མོངས་པ་ཅན་གྱི་ཡིད་དེ་ཉིད་བག་ཆགས་དང་བཅས་པ་སྟེ། རླུང་གི་ངོ་བོ་ནི་གཡོ་བ་དང་བཅས་པ་ཡིན་ལ་དེས་གཟུགས་གཞན་རྨི་ལམ་གྱི་སྣང་བ་བཞིན་གང་དུ་སྐྱེ་བ་སྦྱོར་བའི་ཕ་མ་མཐོང་སྟེ། དེའི་ཚེ་རྒྱུ་དང་རྐྱེན་གྱི་ཁྱད་པར་གྱི་དོན་ནི་མི་ཤེས་ཀྱི་གཏི་མུག་གིས་རྒྱུད་རྨོངས་ནས་སེམས་དེར་འཇུག་པའི་ཕྱིར། །དོན་ནི་ངེས་པར་མི་ཤེས་ཤིང་། །རླུང་ཙམ་གཅིག་པུ་རྨོངས་འདུ་བྱེད། །ཀུན་གཞིའི་རྣམ་ཤེས་བཀུག་ནས་ནི། ཞེས་གསུངས་པ་ཡིན་ནོ། །བཀུག་ནས་ཇི་ལྟར་འགྱུར་ཞེ་ན། །མངལ་དུ་བག་ཆགས་རྣམ་པར་སྤྱོད། །བག་ཆགས་ཉིད་ཀྱིས་རྣམ་ཤེས་བཟུང་བ་སྟེ། དེ་ཡང་མངལ་སྐྱེས་ཕལ་ཆེར་ནི་མངལ་དུ་འཇུག་པ་ལ་ཕྱོགས་པ་ན་ཆར་རླུང་ལ་སོགས་པའི་རྐྱེན་གྱིས་བདས་ནས་སྐྱབས་བཙལ་བའི་སྣང་བ་འབྱུང་སྟེ་ཉིང་འཚམས་སྦྱོར་རོ། །གཞན་ཡང་བར་མ་དོའི་དྲི་ཟས་ཕ་མའི་ཁུ་བ་བྱུང་བ་ལ་འདི་ནི་ང་ཡིའོ་སྙམ་དུ་སེམས་པར་འགྱུར་རོ་གང་ཕོར་སྐྱེ་བ་ནི་ཕ་ལ་སྡང་ཞིང་མ་ལ་ཆགས་ལ་མོར་སྐྱེ་ན་ནི་ཕ་ལ་ཆགས་ཤིང་མ་ལ་སྡང་བའི་ཤེས་པས་ཉིང་འཚམས་སྦྱོར་ཏེ་མངལ་དུ་འཇུག་གོ་ཞེས་མདོ་ལས་གསུངས་པ་བཞིན་བག་ཆགས་ཀྱིས་ཀུན་གཞི་འདྲེན་ཞིང་བཟུང་ནས་མངལ་དུ་འཇུག་པར་འགྱུར་རོ། །ཞུགས་ཟིན་ནས་ཇི་ལྟར་འགྱུར་ཞེ་ན། །དེ་ཚེ་ཁུ་ཁྲག་ཞུ་ཐིགས་ལ། །འདྲེས་པ་རུ་ནི་གྱུར་པ་དང་། །ཀུན་གཞིའི་རྣམ་ཤེས་རྒྱུར་བཅས་པ། །ཅི་ལྟར་ཆང་རོས་མྱོས་པ་བཞིན། །ཞེས་སྨོས་ཏེ། དཀར་དམར་གྱི་དབུས་སུ་ཀུན་གཞི་ཉིད་མ་གཏོགས་པ་ཡིད་དང་རྣམ་པར་ཤེས་པ་མི་གསལ་བར་འགྱུར་ཏེ་ཆང་གིས་ར་རོ་བ་བཞིན་ནོ། །འདི་ནི་གསང་བ་འདུས་པར་དང་པོའི་མགོན་པོ་ཞེས་བྱ་བར་གསུངས་ལ། རྒྱུའི་རྡོ་རྗེ་འཆང་ཟླ་བ་དང་ཉི་མ་ས་བོན་གྱི་རང་བཞིན་དུ་རྒྱུད་ཐམས་ཅད་ལས་གསུངས་སོ། །འདིར་འཕྲོས་པ་ནི། མངལ་དུ་འཇུག་པ་ལ་རིགས་བཞི་གསུངས་ཏེ། མི་དྲན་མི་ཤེས་བཞིན་དུ་འཇུག་ཅིང་གནས་ལ་སྐྱེ་བ་ནི་སེམས་ཅན་ཐ་མལ་བ་རྣམས་སོ། །དྲན་ཅིང་ཤེས་པས་མངལ་དུ་འཇུག་ལ། མི་དྲན་མི་ཤེས་པར་གནས་ཤིང་སྐྱེ་བ་ནི་འཁོར་ལོས་བསྒྱུར་བ་དང་རྒྱུན་དུ་ཞུགས་པ་དག་གོ །དྲན་ཅིང་ཤེས་པར་འཇུག་ཅིང་སྐྱེ་ལ། མི་དྲན་མི་ཤེས་པར་གནས་པ་ནི་བྱང་ཆུབ་སེམས་དཔའ་ལས་དང་པོ་པ་དང་རང་སངས་རྒྱས་དག་གོ །ཐམས་ཅད་དུ་དྲན་བཞིན་ཤེས་བཞིན་དུ་མངལ་དུ་འཇུག་གནས་སྐྱེ་བ་ནི་བྱང་ཆུབ་སེམས་དཔའ་དག་པའི་ས་པ་རྣམས་ཡིན་ནོ། །ཞེས་མདོ་ལས་བྱུང་ངོ་། །གཞན་ཡང་དཀར་ཆ་དང་དམར་ཆ་ཀུན་གཞིའི་རྣམ་པར་ཤེས་པ་དང་གཅིག་དུ་འདྲེས་པ་དང་། ལུས་རྫོགས་པ་ནི། རྡོ་རྗེ་རྣམ་པ་བཞི་དང་ཆོ་ག་ཡན་ལག་གསུམ་དང་མངོན་པར་བྱང་ཆུབ་པ་ལྔའི་རིམ་པར། །ཟླ་བ་མེ་ལོང་ཡེ་ཤེས་ལྡན། བདུན་གྱི་བདུན་པ་མཉམ་ཉིད་ལྡན། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་ཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། །མཁས་པས་ཆོ་གར་གསུངས་པ་ཡི། །རྣམ་པ་ལྔ་པོ་བསྒོམ་པ་ཉིད། ཅེས་ཧེ་བཛྭ་ལས་གསུངས་པ་ལྟར་དཔལ་དུས་ཀྱི་འཁོར་ལོའི་བསྒྲུབ་པའི་ཐབས་ཀྱི་ལེའུ་ལས་རྒྱ་ཆེར་གསུངས་སོ། །གསུམ་པ་ཇི་ལྟར་སྐྱེ་བའི་རིམ་པ་བསྟན་པ་ལ་གསུམ་སྟེ། སྲོག་ཆེན་པོའི་རླུང་ཇི་ལྟར་འབྱུང་བ་དང་། ཟླ་བ་བཅུར་ཇི་ལྟར་འཕེལ་བའི་རིམ་པ་རྒྱས་བཤད་དང་། རྩ་རླུང་ཐིག་ལེ་རྫོགས་ཤིང་སྐྱེ་བའི་ཚུལ་ལོ། །དང་པོ་ནི། །ཉོན་མོངས་ཅན་ཡིད་སྲོག་རླུང་ཉིད། །སྐད་ཅིག་ཉིད་ལ་ཡང་དག་འགྲོ། །ཞེས་བྱ་བ་ནི། གང་གི་ཚེ་མངལ་དུ་ཞུགས་པ་དེའི་ཚེ་ཡང་ཉོན་མོངས་པ་ཅན་གྱི་ཡིད་ཀྱིས་དེ་མ་ཐག་ཏུ་དཀར་དམར་གཉིས་ཀྱི་དྭངས་མ་ལས་སྲོག་གི་རླུང་བསྐྱེད་ཅིང་འདུ་བྱེད་པར་འགྱུར་ཏེ་ལས་ཀྱི་རླུང་སྐད་ཅིག་སྐད་ཅིག་ལ་བསྐྱེད་པར་བྱེད་པས་འོ་མ་ལ་ཞོར་འགྱུར་བ་ལྟར་ནུར་ནུར་པོ་དེ་ཉིད་འདྲེས་པ་སྡུད་པར་བྱེད་རྟས་པར་བྱེད་མི་འདྲུལ་བར་བྱེད་ཅིང་བསྐྱེད་དེ་གནས་སྐབས་གཞན་དུ་བྱེད་པས་འདི་ནི་གསང་བ་འདུས་པར་དང་པོའི་མགོན་པོ་དེ་ཉིད་ཞེ་སྡང་རྡོ་རྗེ་ཞལ་གསུམ་པར་གྱུར་ཏེ་ཞེས་གསུངས་པའི་དོན་དང་ཀུན་གཞིའི་རྣམ་པར་ཤེས་པ་ལ་ཡིད་འདུ་བྱེད་པ་ལངས་པའི་དོན་ཡིན་ནོ། །གཉིས་པ་འཕེལ་བའི་རིམ་པ་ལ། ཚིགས་སུ་བཅད་པ་ཕྱེད་དང་བཅུ་སྟེ། དེ་ཡང་ཟླ་བའི་རིམ་པས་བརྗོད་པར་བྱའོ། །ནུར་ནུར་མེར་མེར་ལྟར་ལྟར་པོ། །གོར་གོར་པོ་སྟེ་བདུན་ཕྲག་བཞི། །ལས་རླུང་གིས་དཀྲུགས་སྡུད་པར་བྱེད། །ཅེས་བྱ་བ་ནི། མངལ་དུ་ཞག་བདུན་ཕྲག་དང་པོ་ནི་སྲོག་གི་རླུང་ངོ་། །གཉིས་པ་ལ་ཀུན་ནས་སྡུད་པ་ཞེས་བྱ་བའི་རླུང་འབྱུང་ངོ་། །གསུམ་པར་མཛོད་ཀ་ཞེས་བྱ་བ་དང་། བཞི་པར་རབ་ཏུ་འབྱེད་པ་དང་། ལྔ་པར་ཡང་དག་པར་སྡུད་པ་ཞེས་བྱ་བའི་རླུང་འབྱུང་སྟེ་ཁུ་ཁྲག་གི་རྡུལ་ཕྲ་རབ་ཐམས་ཅད་གཏོར་ཞིང་སྡུད་པར་བྱེད་དོ་ཞེས་གསུངས་སོ། །མཁྲང་འགྱུར་གྱི་ཞག་དང་པོ་ལ་སེམས་ཅན་དེ་ཉིད་ཀྱི་སོར་ཕྱེད་དང་བཅུ་གསུམ་གྱི་ཚད་ཀྱི་སྲོག་རྩ་ཆགས་པར་འགྱུར་ཏེ། རྩེ་མོ་གཅིག་ནི་མ་ཡི་རྩ་དང་འབྲེལ་ཏོ། །དེའི་ཕྱིར། མཁྲང་འགྱུར་ཞག་ནི་དང་པོ་ནས། །རང་སོར་ཕྱེད་དང་བཅུ་གསུམ་གྱི། །ཚད་ལྡན་དབུ་མ་སྲོག་རླུང་བཅས། །ཞེས་བསྟན་ཏོ། །དེ་ནས་ཟླ་བ་གཉིས་པར་སླེབ་ནས་ཞག་རེ་ལ་རྩ་གཉིས་བརྒྱ་རེ་ཆགས་པར་འགྱུར་བས་དེ་ཐམས་ཅད་ཀྱི་ཞག་དང་པོ་ལ་དབུ་མ་སྲོག་གི་རླུང་དང་བཅས་པ་དེ་ལས། །བསྐྱེད་ནས་སྙིང་དང་ལྟེ་བ་ཡི། འཁོར་ལོ་རླུང་བཅུའི་རྟེན་ཆགས་ནས། །ཞེས་བྱ་བ་དྲི་མ་མེད་པའི་འོད་ལས། ཟླ་བ་གཅིག་གི་བར་དུ་ཁྲག་དང་ས་བོན་ལས་བསྐྱེད་པ་བདུད་རྩི་ལྔའི་རོར་འགྱུར་རོ། །ཟླ་བ་གཅིག་ནས་སྔོན་དུ་བྱང་ཆུབ་ཀྱི་སེམས་ཐམས་ཅད་ཀྱི་མྱུ་གུར་གྱུར་པའི་སྙིང་གི་དབུས་ཀྱི་གནས་སུ་རྩ་བཅུ་སྲོག་རླུང་ལ་སོགས་པའི་གཞིར་གྱུར་པ་ཤིན་ཏུ་ཕྲ་བ་སྐྲའི་ཚད་ཙམ་མོ། །ལྟེ་བར་བརྒྱད་པ་བརྒྱད་དེ་དྲུག་བཅུ་རྩ་བཞིའི་དབུགས་རྒྱུ་བར་འགྱུར་བ་ཤིན་དུ་ཕྲ་བའོ་ཞེས་གསུངས་སོ། །འདི་ནི་སེམས་ཀྱི་རྡོ་རྗེ་འཆང་ལ་ལུས་འགྲུབ་པ་ན་ཁྱབ་འཇུག་ཏུ་གསུངས་པས་དེའི་གནས་སྐབས་བཅུའི་དང་པོ་ཉ་ལྟ་བུ་ཞེས་གསུངས་ཏེ་འཕེལ་བར་བྱེད་པ་ནི་མའི་རོ་མའི་རྩ་དང་འབྲེལ་པས་ལྟེ་བ་ནས་རླུང་དང་ཁྲག་གི་ནུས་པས་བསྐྱེད་པའི་ཕྱིར། ཉའི་རྣམ་པ་ལྟ་བུར་འགྱུར། །ལྟེ་བར་མའི་རྩར་འབྲེལ་བས། །རླུང་ཁྲག་རྒྱས་པར་བྱེད་པར་འགྱུར། །ཞེས་བརྗོད་པ་ཡིན་ནོ། །དེ་ནས་ཟླ་བ་གཉིས་པ་ནས། །ཞག་རེ་རྩ་ནི་ཉིས་བརྒྱ་ཆགས། །ཞེས་བྱ་བ་སྔར་བསྟན་པའི་དང་པོའི་རྩ་མ་གཏོགས་པ་དེ་ཕྱིན་ཆད་རྩ་འཕེལ་བའི་དུས་ཟླ་བ་བཅུ་གཉིས་སོ། །དེ་ནས་སྲོག་གི་རླུང་ལས་ཡེ་ཤེས་དང་སའི་རང་བཞིན་འོག་ཏུ་འཕྲོ་བའི་ཕྱིར། །སྲོག་ལས་ཐུར་སེལ་འཕྲོས་ནས་ནི། །ཞེས་བསྟན་ཏེ་གསང་བའི་འཁོར་ལོའི་རྩ་རྣམས་གྲུབ་པ་ཡིན་ནོ་འདི་ཡང་དྲི་མ་མེད་པའི་འོད་ལས། རྒྱུད་ལས་མ་གསུངས་ཀྱང་ཁྱིམ་བཅུ་གཉིས་ཀྱི་དབང་གིས་རྩ་དྲུག་ཅུ་རྩ་བཞི་བཞིར་གྱུར་པའི་རྩ་བཅུ་གཉིས་སུ་འགྱུར་ཏེ་དེ་བཞིན་དུ་ཤིན་ཏུ་ཕྲ་བའོ། །དེ་ལྟར་ལྟེ་བའི་ཐམས་ཅད་ཀྱིས་ལག་པ་དང་རྐང་པ་གདོང་གི་གནས་མེད་པའི་ཕྱིར་སྟེང་དང་འོག་དུ་སྦྲུལ་གྱི་རྣམ་པ་སྟེ་རྐང་ལག་དང་ཁའི་གནས་རྣམས་སུའོ། །སྦྲུལ་གྱི་རྣམ་པ་ནུབ་ནས་ཟླ་བ་གསུམ་པ་ལ་གདོང་པ་དང་རྐང་ལག་གི་གནས་སུ་འབུར་པོ་ལྔར་འགྱུར་རོ། །ཞེས་གསུངས་ཏེ་འཁོར་ལོ་དྲུག་དང་ཡན་ལག་གི་འཁོར་ལོའི་རྩ་བ་རྣམས་སུ་ངེས་སོ། །ཐུར་སེལ་དང་གྱེན་རྒྱུ་གཉིས་པོས་ལུས་སྟོད་སྨད་འགྲུབ་པར་བྱེད་པའི་ཕྱིར། རུ་སྦལ་རྣམ་པ་ལྟ་བུར་བྱེད། །ཟླ་བ་གསུམ་པར་གྱེན་རྒྱུ་ཡི། །རླུང་གིས་སྟོད་རྣམས་བསྒྲུབ་པར་བྱེད། །ཅེས་རྒྱུད་རྡོ་རྗེ་ཕྲེང་བའི་གཞུང་འདིར་དྲངས་པ་ཡིན་ཀྱང་གོ་རིམ་ནི་དུས་འཁོར་དུ་གསུངས་པ་བཞིན་དུ་ཡིན་ཏེ། རླུང་གསུམ་པོས་སྦྲུལ་ལྟ་བུ་རྫོགས་པ་ཡིན་གྱི་རུས་སྦལ་གྱི་གནས་སྐབས་དེའི་འོག་ཏུ་འབྱུང་བར་ངེས་སོ་དེའི་ཕྱིར། །བཞི་པར་ཁྱབ་བྱེད་རླུང་གིས་ནི། ཡན་ལག་རྩ་རྣམས་སྣང་བར་བྱེད། །ཞེས་པ་འདི་དང་སྦྱར་བར་བྱའོ། །འདི་ཡང་རྐང་ལག་དང་མགྲིན་པ་མཉམ་པར་གྱུར་པས་རུས་སྦལ་ལོ། །གཞན་ལག་པ་དང་རྐང་པ་དང་གདོང་གི་ཕྱོགས་གྱི་རྩ་ཕྲ་མོ་རྣམས་དང་། རྐང་ལག་གི་ཚིགས་དྲུག་དང་འགོ་དང་མགྲིན་པར་ལྷན་ཅིག་སྐྱེས་པ་དང་ལོངས་སྤྱོད་རྫོགས་པའི་རྩ་ཤིན་ཏུ་ཕྲ་བ་རྣམས་ཟླ་བ་བཞི་པ་རྫོགས་ནས་འགྱུར་ཏེ་རུས་སྦལ་གྱི་གནས་སྐབས་སོ། །ཟླ་བ་ལྔ་པར་ཕག་པའི་དངོས་པོར་ཤ་དང་རུས་པ་བསྟེན་ཏོ། །རུས་པའི་ཚིགས་སུམ་བརྒྱ་དྲུག་བཅུའོ་ཞེས་གསུངས་སོ། །འདིར་ཡང་། །ལྔ་པར་མཉམ་གནས་རླུང་འཕྲོས་ནས། ནང་གི་གནས་གཞན་བསྒྲུབ་པར་བྱེད། །ཅེས་ནང་གི་ཤ་དང་རུས་པའི་གཞིར་གྱུར་པ་བསྒྲུབ་པའི་དོན་ཡིན་ནོ། །འདི་དང་ཟླ་བ་དྲུག་པའི་སྐབས་ནས་ཚོར་བའི་སྡུག་བསྔལ་ཤེས་པའི་ཕྱིར། །ཕག་རྒོད་སེང་གེའི་གནས་སྐབས་ཡིན། །མཉམ་གནས་ཁྱབ་བྱེད་གཉིས་སྟོབས་རྫོགས། །ལུས་ནི་འགུལ་དང་འདར་བར་འགྱུར། །དེ་དུས་རུས་ཚིགས་དུམ་བུ་ནི། །སུམ་བརྒྱ་དྲུག་ཅུ་ཆགས་པར་གྱུར། །ཞེས་བསྟན་པ་ཡིན་ནོ། །དེ་ལྟར་ཕུང་པོ་ལྔ་རྫོགས་ནས། །ཞེས་པ་ནི་རྣམ་པར་ཤེས་པ་དང་འདུ་བྱེད་དང་གཉིས་ནི་ཟླ་བ་གསུམ་ཕན་ཆད་དོ། །བཞི་པ་དང་ལྔ་པར་འདུ་ཤེས་དང་ཚོར་བ་དང་དེ་ནས་གཟུགས་ཀྱི་ཕུང་པོ་ཟླ་བ་དྲུག་པར་འགྲོ་བ་ན་རྫོགས་པས་ཕུང་པོ་ལྔ་དང་ཁམས་ལྔའི་ལྷ་རྫོགས་པའི་དོན་ཡིན་ལ་རྩ་བའི་རླུང་ལྔའི་སྟོབས་བསྐྱེད་པས་གྲུབ་པ་ཡིན་ནོ། །དེ་ནས་ཡན་ལག་གི་རླུང་དང་དབང་པོ་རྣམས་འབྱུང་བའི་ཁམས་ཀྱི་ཆ་རྣམ་པར་བསྐྱེད་པ་བསྟན་བའི་ཕྱིར། ཟླ་བ་དྲུག་པར་ཕྱིན་པ་ན། །ཀླུ་ཡི་རླུང་གི་སྟོབས་བསྐྱེད་ནས། །ས་ཁམས་ཆ་ལས་མིག་གཉིས་བསྐྱེད། །དེ་ལས་བདུན་པར་རུས་སྦལ་རླུང་། །སྤྲོས་ནས་ཆུ་ཁམས་རྣ་བུག་དོད། །བརྒྱད་པར་མེ་ཁམས་སྣ་བུག་བྱེད། །དེ་ཚེ་རྩངས་པའི་རླུང་སྤྲོའོ། །དགུ་པར་ལྷ་སྦྱིན་རླུང་འབྱུང་སྟེ། །རོ་ཅན་ལྕེ་ནི་བསྐྱེད་པར་བྱེད། །བཅུ་པར་ནོར་ལས་རྒྱལ་གྱི་རླུང་། །བསྐྱེད་ནས་རླུང་བཅུའི་ནུས་པ་རྫོགས། །ཞེས་སྨོས་པ་ནི། ཀླུའི་རླུང་དེ་ནི་ཡེ་ཤེས་ཀྱི་ཆ་ཡིན་པས་མིག་གཉིས་གཏི་མུག་རྡོ་རྗེ་སའི་ཁམས་སུ་བསྟན་པ་ཡིན་ནོ། །རུས་སྦལ་གྱི་རླུང་གི་རླུང་ཡིན་པས་རྣ་བའི་བུག་པ་ཆུའི་ཁམས་ཞེ་སྡང་རྡོ་རྗེའི་རང་བཞིན་ནོ། །རྩངས་པ་ནི་མེའི་རླུང་ཡིན་པས་རླུང་གི་ཁམས་སྣ་བུག་སེར་སྣ་རྡོ་རྗེའི་ངོ་བོ་ཉིད་ཡིན་ནོ། །ལྷ་སྦྱིན་ནི་ཆུའི་ཁམས་ཏེ་ལྕེ་མེའི་རང་བཞིན་བསྐྱེད་པས་འདོད་ཆགས་རྡོ་རྗེའི་ངོ་བོའོ། །ནོར་ལས་རྒྱལ་ནི་སའི་རང་བཞིན་ཡིན་པས་ལུས་ཀྱི་དབང་པོའི་རེག་བྱ་རླུང་གི་ཁམས་བསྐྱེད་དེ་ཕྲག་དོག་རྡོ་རྗེའི་ངོ་བོ་ཡིན་ནོ། །འདི་རྣམས་ཀྱི་ཡུལ་འཛིན་པ་ཡང་། །མིག་གིས་ཆུ་ལས་སྐྱེས་པའི་གཟུགས་འཛིན་ཏོ། །རྣ་བས་ནམ་མཁའ་ལས་སྐྱེས་པའི་སྒྲ་འཛིན་ཏོ། །སྣས་ས་ལས་སྐྱེས་པའི་དྲི་འཛིན་ཏོ། །ལྕེས་མེ་ལས་སྐྱེས་པའི་རོ་འཛིན་ཏོ། །ལུས་ཀྱིས་རླུང་ལས་སྐྱེས་པའི་རེག་བྱ་འཛིན་ཏེ་ལུས་དང་བསམ་པའི་ཐབས་དང་ཤེས་རབ་ཡིན་ནོ། །དེའི་ཕྱིར་རླུང་ལྔ་དང་དབང་པོ་ལྔ་དང་ཡུལ་ལྔ་པོའི་ཁམས་གང་ཡིན་པ་རྟེན་ཅིང་འབྲེལ་བ་རྟོགས་པར་འགྱུར་རོ། །རླུང་བཅུ་པོ་ཟླ་བ་རེ་རེར་ནུས་པ་འཕེལ་བ་ལ་བསྐྱེད་པའི་མིང་དུ་བཤད་པ་འདིས། ནུས་པ་སྡུད་པ་ཡང་བཟློག་ནས་སྐྱེས་བུ་ཚེ་ལོ་བརྒྱའི་དབང་དུ་བྱས་ཏེ་ལོ་བཅུ་བཅུར། རྡོ་རྗེ་འཕྲེང་བའི་རྒྱུད་ལས་བྱུང་བ་འོག་ནས་སྟོན་ཏོ། །དོན་སྣོད་དང་རྩ་ཁམས་གྲུབ་ཚུལ་འོག་ན་ཡོད་པས་འདིར་རགས་པ་བསྟན་པ་ཡིན་ནོ། །དེ་ལྟར་འཕེལ་བ་བཤད་ནས། ད་ནི་རྩ་རླུང་ཐིག་ལེ་རྫོགས་ཤིང་སྐྱེ་བའི་ཚུལ་ནི། །དེ་ལྟར་ཁམས་དང་སྐྱེ་མཆེད་རྫོགས། །ཞེས་པ་ལ་སོགས་པའི་ཚིགས་སུ་བཅད་པ་གསུམ་ཏེ། ཞག་རེ་ལ་རྩ་གཉིས་བརྒྱ་རེ་ཆགས་པ་བསྡོམས་པས་ཟླ་རེ་ལ་རྩ་དྲུག་སྟོང་དུ་འགྱུར་ཏེ་མངལ་དུ་ཟླ་དགུ་འཕེལ་བའི་དབང་དུ་བྱས་པས། སྟོང་ཕྲག་ལྔ་བཅུ་རྩ་བཞི་ཡིན་ལ། སྐྱེས་ནས་ཀྱང་ཟླ་བ་གསུམ་གྱི་བར་ཆགས་ཏེ་དེ་ལྟར་ཟླ་བ་བཅུ་གཉིས་ལ་རྩ་སྟོང་ཕྲག་བདུན་ཅུ་དོན་གཉིས་སུ་བཤད་པ་ནི་རགས་པའི་རིམ་པའོ། །ཟླ་བ་བརྒྱད་ཀྱི་བར་དུ་ལྕེ་མ་བསྐྱེད་པས་མ་ཡི་རྩས་བསྐྱེད་ཅིང་དགུ་པ་ནས་ནི་མི་གཙང་བ་ཟ་སྟེ་བཀྲེས་སྐོམ་གྱི་ཚོར་བས་སྡུག་བསྔལ་ལོ། །དེ་ནས་ནང་གི་སྙིགས་མ་དྲི་ཆུ་ལ་སོགས་པ་ཡང་འབྱུང་ངོ་། །འདི་ཕན་ཆད་དུ་ནི་སྣང་བ་གཞན་འབྱུང་གི་དེ་ནས་མི་སྡུག་པ་དང་སྡུག་བསྔལ་བའི་འདུ་ཤེས་འབྱུང་བས་སྐྱེ་བར་འདོད་པ་སྟེ། དེ་ཡི་ཚེ་འབྱིན་པའི་རླུང་གིས་བསྒྱུར་ཏེ་སྐྱེ་བར་འགྱུར་རོ། །འདི་ལས་ཞིབ་ཏུ་བདུན་ཕྲག་གསུམ་བཅུ་སོ་བརྒྱད་དུ་རླུང་འབྱུང་བ་དང་འགྲུབ་པར་བྱེད་པའི་རིམ་པ་ཡང་། །བདུན་ཕྲག་ལྔ་ནི་གོང་དུ་བསྟན་ཏོ། བདུན་ཕྲག་དྲུག་པར་ཡན་ལག་གི་རྩ་བའི་རྩ་བསྒྲུབ་པར་བྱེད་པའི་རླུང་ནི་ཟས་རླུང་ངོ་། །བདུན་པར་འཁྱིལ་པ་དང་། ཉིང་ལག་གི་རྩ་བྱེད་པ་ནི་བརྒྱད་པར་བཟློག་ཅིང་བསྒྱུར་བ་ཞེས་བྱའོ། །དགུ་པ་དབང་པོའི་སྒོ་བསྒྲུབ་པའི་རླུང་ནི་རྣམ་འབྱེད་དོ། །བདུན་ཕྲག་བཅུ་པར་ནི་ཀུན་ནས་སྒོ་དང་སྲ་བ་ཞེས་བྱ་བ་གཉིས་འབྱུང་ངོ་། །བཅུ་གཅིག་པར་བུ་ག་འབིགས་པར་བྱེད་པ་རྡོ་རྗེའི་རླུང་ངོ་། །བཅུ་གཉིས་པར་ཡོན་པོའི་སྒོའོ། །བཅུ་གསུམ་པར་བཀྲེས་སྐོམ་རླུང་ཞེས་བྱའོ། །བཅུ་བཞི་པར་སྐུད་པའི་སྒོ་ཞེས་བྱ་བས་རྩ་རྒྱུས་འཕེལ་བར་བྱེད་དོ། །བཅོ་ལྔ་པར་པད་མ་དང་། བཅུ་དྲུག་པར་བདུད་རྩི་དང་། བཅུ་བདུན་པར་འབྲི་གཏོང་དང་། བཅོ་བརྒྱད་པར་བརྟན་འགྱུར་དང་། བཅུ་དགུ་པར་ཤིན་ཏུ་སྲ་བ་དང་དེ་ནི་རུས་པ་བྱེད་པའི་རླུང་ངོ་། །ཉི་ཤུ་བར་ཤ་བསྐྱེད་པའི་རླུང་ངོ་། །ཉེར་ཅིག་པར་ཀུན་ཏུ་རྒྱལ་བའི་རླུང་གིས་ཁྲག་བསྐྱེད་དོ། །ཉེར་གཉིས་པར་ཡོངས་འཛིན་གྱི་རླུང་གིས་པགས་པ་བསྐྱེད་དོ། །ཉེར་གསུམ་པར་སྤྲིན་འཛིན་གྱིས་མདོག་བཟང་ངན་བསྒྲུབ་བོ། །ཉེར་བཞི་པར་རླུང་གྲོང་ཁྱེར་འཛིན་གྱི་དང་བར་བྱེད་དོ། །ཉེར་ལྔ་པར་སྔོན་གྲུབ་གྱི་རླུང་གིས་སྐྲ་དང་སྤུའི་རྩ་བ་བསྐྱེད་དོ། །ཉེར་དྲུག་པར་སྨན་ཡོན་ཆེན་པོའི་རླུང་གིས་དབང་པོ་སྦྱོང་ངོ་། །དེ་ནས་ཉེར་དགུའི་བར་གསུམ་ནི་ཕྱིན་ཅི་ལོག་དང་མེ་ཏོག་ཕྲེང་དང་ལྕགས་ཀྱི་སྒོ་ཞེས་བྱ་སྟེ་པགས་པ་དང་སེན་མོ་བྱེད་དོ། །དེ་ཕྱིན་ཆད་ནི་འཕེལ་བར་བྱེད་པ་དང་། སྐྱེ་བར་བྱེད་པ་ནི་ལས་རླུང་ཐོགས་པའི་རྐྱེན་ཅེས་བྱ་བ་སྟེ། སྐྱེས་ནས་ཞག་བདུན་ན་སྲིན་བུའི་རིགས་བརྒྱད་ཁྲི་ཡང་འགྲུབ་པར་གསུངས་ཏེ་འདི་ལྟར་རྒྱས་པར་དགའ་བོ་ལ་བཅོམ་ལྡན་འདས་ཀྱིས་གསུངས་པ་ཡིན་ནོ། །སྨན་གྱི་བསྟན་བཅོས་རྣམས་ལས་ཀྱང་བྱུང་མོད་ཀྱི་མ་སྨོས་སོ། །གང་གི་ཚེ་མངལ་དུ་རྫོགས་པ་དེ་ནི་མི་ཡི་སེང་གེའི་གནས་སྐབས་ཡིན་ནོ། །འདིར་མངལ་ན་གནས་པའི་སྡུག་བསྔལ་ནི་བུམ་པའི་ནང་དུ་བཙོས་པ་དང་འདྲ་ལ། སྐྱེ་བའི་ཚེ་འཁྲུལ་འཁོར་གྱིས་བཙིར་བ་བཞིན་ནོ། །ཐང་ལ་ལྷུང་པ་ན་ལྤགས་པ་བཤུས་པ་བཞིན་ནོ། །ཟས་སུ་བཤང་བ་ཟ་བ་ནི་ཕག་པ་བཞིན་ནོ། །ཞེས་མང་དུ་གསུངས་སོ། །དེ་ལྟར་རྒྱས་པར་བཤད་ནས། འཇུག་བསྡུ་བ་ནི། དེ་ལྟར་ཕུང་པོ་ཁམས་སྐྱེ་མཆེད། །རྩ་རླུང་ཐིག་ལེ་ལས་གྲུབ་པ། །དྲི་མར་བཅས་པའི་སེམས་ཉིད་ལས། །བྱུང་སྟེ་དྲི་བཅས་སྤྲུལ་སྐུར་གསུངས། །ཞེས་བྱ་བ་སྟེ་འདིར་སྔགས་ཀྱི་ཐེག་པ་ནས་སྐྱེ་བ་སངས་རྒྱས་སྤྲུལ་པའི་སྐུར་གསུང་པའི་དོན་ཕུང་པོ་ཁམས་སྐྱེ་མཆེད་རིམ་གྱིས་རྫོགས་པའི་ཚེ་མཆོག་གི་སྤྲུལ་པ་དྲི་མ་དང་བཅས་པའི་སངས་རྒྱས་ཀྱི་གཟུགས་ཀྱི་སྐུ་ཡིན་ནོ། །དྲི་མ་མེད་པར་སྦྱངས་པ་ན་བྷ་ག་ནི་ཆོས་ཀྱི་དབྱིངས་ཡིན་ལ། ཟླ་བ་བཅུ་ནི་ས་བཅུ་རང་བཞིན་གྱིས་རྟོགས་པར་རྫོགས་པ་ནི་ཡེ་ཤེས། མ་ནི་མཁན་པོ། ཁྲུ་མ་ནི་ཆོས་གོས། ངག་གི་སྔགས་ནི་ཨ་ཧྃ། དེའི་ལུས་སྦྱོང་བ་ལ་སོགས་པ་ནི་དབང་བསྐུར་བར་བྱེད་པ་འོད་ཟེར་ཆེན་པོའི་ཚུལ། དེ་ནས་གནས་སྐབས་བཞི་རྫོགས་པ་ནི་སྐུ་བཞིའི་སངས་རྒྱས་སུ་བཞུགས་ཀྱང་མ་རྟོགས་པས་འཁོར་བའི་ལུས་སུ་གྱུར་ཏོ་ཞེས་ཧེ་བཛྭ་ལས། མངལ་གྱི་ཁྲུ་མ་ཆོས་གོས་ཉིད། །དེ་བཞིན་མ་ནི་མཁན་པོ་སྟེ། །མགོ་བོར་ཐལ་མོ་སྦྱར་བ་ཕྱག །འགྲོ་བའི་བྱ་བ་ཁྲིམས་ཀྱི་གནས། །སྔགས་ཀྱི་བཟླས་པ་ཨ་དང་ཧྃ། །སྐྱེ་གནས་འཁོར་ལོའི་རྣམ་པ་ཨ། །བདེ་ཆེན་གྱི་ནི་རྣམ་པ་ཧྃ། །གཅེར་བུ་སྐྲ་དང་ཁ་སྤུ་བྲེགས། །སྔགས་དོན་སྐྱེས་པའི་དགེ་སློང་ཉིད། །འདི་དག་རྐྱེན་གྱིས་སེམས་ཅན་རྣམས། །སངས་རྒྱས་ཉིད་དུ་ཐེ་ཚོམ་མེད། །ཟླ་བ་བཅུ་ཡང་ས་རྣམས་ཉིད། །སེམས་ཅན་ས་བཅུའི་དབང་ཕྱུག་གོ །ཞེས་པ་དང་། རྡོ་རྗེ་ཕྲེང་བར་ཡང་། བྷ་ག་ཕྱག་རྒྱ་ཆེན་པོར་བརྗོད། །ཅེས་བྱ་བ་ལ་སོགས་པ་འདི་ཡི་རྒྱས་པར་བཤད་པ་དང་། སྦྱང་གཞི་ལ་སྦྱོང་བྱེད་འབྲས་བུའི་རིམ་པ་དུས་ཀྱི་འཁོར་ལོའི་དབང་གི་ལེའུ་འགྲེལ་པ་དང་བཅས་པས་རྒྱས་པར་གསུངས་སོ། །འདི་ལྟར་སེམས་དྲི་མ་དང་བཅས་པའི་གཟུགས་སྐུ་བཤད་པས། དྲི་མ་མེད་ཙམ་ན་མཆོག་གི་སྤྲུལ་པ་འཕྲོ་བར་གོ་བར་འགྱུར་ཏེ། དེས་ན་རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་དུ་བདེ་གཤེགས་སྙིང་པོ་ཅན། །ཞེས་བཤད་པའི་དོན་དང་ཡང་མཐུན་པར་འགྱུར་རོ། །དེ་ལྟར་ལུས་འགྲུབ་པའི་རིམས་པ་བསྟན་ཟིན་ཏོ།། །།

ལེའུ་གསུམ་པ། ལུས་ཀྱི་རྩ་རྒྱས་པར་བསྟན་པའི་དུམ་བུ།

གསུམ་པ། ལུས་དེ་ཡང་རྩ་ཇི་ལྟ་བུ་དང་ལྡན་པ་མ་ཤེས་ན་རླུང་དང་ཐིག་ལེའི་གནས་མི་ཤེས་པས་ཐབས་དང་ཤེས་རབ་ཀྱི་རྒྱུད་རྣམས་སུ་གསུངས་པའི་རྩ་རྣམས་བཤད་པར་བྱའོ། །འདི་ལ་ཡང་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི། དེ་ནས་རྩ་རྣམས་གནས་ཚུལ་བཤད། །དབུ་མ་རོ་རྐྱང་གཙོ་མོ་དང་། །འཁོར་ལོ་ནད་བསྐྱེད་རྩར་བཅས་དང་། །སྟོང་ཕྲག་བདུན་ཅུ་རྩ་གཉིས་དང་། །དེ་ལས་ཕྲ་བའང་བཤད་པར་བྱ། །ཞེས་སྨོས་པ་ཡིན་ནོ། །རྒྱས་པར་བཤད་པ་ལ་དྲུག དབུ་མ་དང་། རོ་རྐྱང་གཉིས་དང་། རྩའི་གཙོ་མོ་ཉི་ཤུ་རྩ་བཞི་དང་སུམ་བཅུ་སོ་བདུན་གྱི་ངེས་པ་དང་། འཁོར་ལོ་བཞི་དང་དྲུག་དང་བཅོ་བརྒྱད་ཀྱི་རྒྱས་བཤད་དང་། ནད་བསྐྱེད་པ་དང་སྟོང་ཕྲག་བདུན་བཅུ་རྩ་གཉིས་ཀྱི་རྒྱས་བཤད་དང་། ཕྲ་མོ་དང་ཁམས་གང་གིས་བསྐྱེད་པ་བསྟན་པའོ། །དང་པོ་ནི་ངོ་བོ་བཤད་ཅིང་ལུང་དང་སྦྱར་བ་གཉིས་ལས། ཚིག་བཅད་ཕྱེད་དང་དྲུག་སྟེ། ཐོག་མ་ལུས་བསྐྱེད་པའི་གཞིར་གྱུར་པ་དབུ་མ་སྟེ་འདི་ལ་ཡང་གཞན་དག་བསྒོམ་པའི་དབུ་མ་དང་། གནས་པའི་དབུ་མ་གཉིས་ལ་གནས་པ་ནི་ཤི་བའི་ཚེ་ཡལ་ནས་འགྲོ་བར་འདོད་པ་དང་གཞུངས་པར་འདོད་པ་དང་གཞུངས་པའི་དབུས་ན་རྟ་རྔ་ཙམ་ཡོད་པར་འདོད་པ་དང་དོན་ལ་མེད་པར་འདོད་པ་ཡོད་ཀྱང་འདིར་ནི་རྒྱུད་འགྲེལ་དཔང་པོར་བྱས་ནས་བཤད་དེ། སྔར་ལུས་འགྲུབ་པའི་སྐབས་སུ་བཤད་པའི་སྲོག་རླུང་གི་རྟེན་རྩ་དབུ་མ་སྟེ། འཁོར་ལོ་དྲུག་པོའི་བར་བར་དུ་རང་སོར་ཕྱེད་དང་བཅུ་གསུམ་རེ་ཡོད་དེ་གསང་བ་ནས་སྤྱི་ག ཙུག་གི་བར་ལ་འབྲེལ་བ་ཡར་སྣ་ནི་ཧྃ་གི་རང་བཞིན་གྱི་དཀར་ཆ་ཕ་ལས་ཐོབ་པའི་ཐིག་ལེ་ཡུངས་དཀར་ཙམ་གྱིས་བཀག་ལ། ལྟེ་བའི་འོག་ན་མ་ལས་ཐོབ་པའི་ཐིག་ལེ་དམར་ཆ་ཁྲག་གི་རང་བཞིན་སྟེ། ཨ་ཐུང་དུ་བརྗོད་པ་ཡིན་ནོ། །འདི་ཡི་བར་ནི་ད་ལྟ་གནས་པའི་དུས་ན་ཀུན་གཞིའི་རྣམ་པར་ཤེས་པའི་རྟེན་སྲོག་ཆེན་པོའི་རླུང་གིས་གང་ནས་གནས་པ་སྟོང་སང་ངེ་བ་སྟེ་ནམ་མཁའ་དང་འདྲ་བར་ཡོད་པས་དུས་ཀྱི་འཁོར་ལོ་ནས་འདི་ལ་སྟེང་སྒྲ་གཅན་འོག་དུས་ཀྱི་མེ་ཞེས་འགོ་འཇུག་ཏུ་བཤད་པ་དང་ལུས་ཀྱི་བར་གྱི་སྲོག་རླུང་དུ་གསུངས་ཏེ། དོན་ལ་རླུང་ཐམས་ཅད་ཀྱི་རྩ་བ་དེར་བརྟེན་པས་ལུས་ཅན་གནས་པར་བྱེད་པའོ། །འོ་ན་ཧེ་བཛྭ་ལས། ཤེས་རབ་ཟླ་བ་འབབ་བཤད་པ། །དེ་ནི་ཀུན་དྷར་མ་རབ་གྲགས། །ཞེས་དཀར་ཆ་འབབ་པར་བཤད་པ་ཇི་ལྟར་ཡིན་ཞེ་ན། །ལྟེ་འོག་མན་ཆད་དུང་ཅན་ཞེས། །དཀར་ཆ་འབབ་བར་བྱེད་པ་ཡིན། །ཞེས་བསྟན་ཏེ་རྩ་གཞན་ཐམས་ཅད་ཀྱི་དྭངས་མ་རྩ་གསུམ་འདུས་མདོ་ནས་གཅིག་ཏུ་དུང་ཅན་མའི་མར་སྣ་རུ་འདུས་ཏེ་འབབ་པས་བདེ་བ་བསྐྱེད་པར་བྱེད་པའོ། །འདི་ནི་སྡོམ་འབྱུང་དང་ཁ་སྦྱོར་ཐིག་ལེ་དང་ནག་པོ་པའི་རྫོགས་རིམས་རྣམས་ནས་ལུང་འདི་གསུངས་ཏེ། སྙིང་ཁའི་ཆུས་སྐྱེས་དབུས་སོན་པ་ནི་དང་པོ་བསྐྱེད་པའི་ཚེ་སྙིང་གི་དབུས་སུ་ཟུག་པའོ། །དེ་ཡང་ཡར་མར་དུ་གྱེས་པ་ཡིན་ནོ། །ཆུ་ཤིང་སྙི་མའི་མེ་ཏོག་ལྟར་སྟོང་བ་ནི་ཁུ་ཁྲག་མི་རྒྱུ་བའོ། །འཕྱང་ཞིང་ཁ་ནི་འོག་ཏུ་བལྟས་ཞེས་བྱ་བ་ནི་ཧཾ་དཀར་ཆ་དེ་འཕྱང་བ་ནི་ཡར་སྣ་ནས་ཁ་འོག་ཏུ་ལྟ་ཞིང་། ཏིལ་གྱི་མར་མེ་ལྟར་གསལ་བ་ཞེས་འགྱུར་ཁ་ཅིག་ལ་ཡོད་པ་འདིར་མར་སྣ་མར་མེ་ལྟ་བུས་བརྒྱན་པ་སྟེ་ཁྲག་གི་ཨ་ཐུང་གིས་བཀག་པའོ། །དེ་འོག་བྱང་ཆུབ་ཀྱི་སེམས་མཉམ་པར་འབབ་པ་སྟེ། འདི་ལ། །ཨ་བ་དྷཱུ་ཏིར་ཤེས་བྱ་སྟེ། །ལྷན་ཅིག་སྐྱེས་སྟེར་བྱེད་པའོ། །ཞེས་ལྷན་ཅིག་སྐྱེས་པའི་དགའ་བ་སྟེར་བ་སྟེ་མདོར་ན་ལུས་ཅན་སྲོག་རྩ་ཡིན་པས་འདི་གོ་བར་བྱའོ། །གསང་སྔགས་རྙིང་མའི་གཞུང་ལས་སྙིང་ཁ་ན་དྭངས་མ་ལྔ་འདུས་ཀྱི་ཡེ་ཤེས་གསུངས་པ་ཡང་འདི་ཁོ་ན་སྟེ། ཤའི་དྭངས་མ་ནི་རྩ་དབུ་མའོ། །ཁྲག་གི་དྭངས་མ་ཨ་ཐུང་ཡིན་ལ་རུས་པའི་དངས་མ་ནི་ཧྃ་ཡིན་ནོ། །རླུང་གི་དྭངས་མ་ནི་སྲོག་རླུང་ངོ་། །དྭངས་མའི་དངས་མ་ནི་ཀུན་གཞིའི་རྣམ་པར་ཤེས་པ་ལ་བརྗོད་པ་འཐད་ཀྱི། འདོད་པ་ལ་ལ་ན་སྙིང་ཁ་ན་དྭངས་མ་ལྔ་འདུས་སྲན་མ་ཙམ་འདོད་པ་དེ་ནི་མ་ཡིན་ཏེ་གྲངས་ཅན་པ་ཡང་བདག་སྲན་མ་ཙམ་ཡོད་ཅེས་འདོད་པ་སངས་རྒྱས་ཀྱིས་བཀག་པའི་ཕྱིར་རོ། །འོ་ན་གཞུང་ཁ་ཅིག་ནས་སྐྱེ་བདུན་བསྒྲུབ་པའི་སྐབས་ན། དེའི་སྙིང་ཁའི་རོ་ཙ་ན་ཞེས་བྱུང་བ་གང་ཡིན་སྙམ་དུ་རྟོག་ན་དྭངས་མ་གཉིས་སྙིང་ཁར་ཚོགས་པ་དེ་རོ་བཅུད་ཆེན་པོ་ཡིན་པས་དེ་ལས་བརྗོད་པ་ཡིན་ནོ། །འདི་ལ་མིང་གི་རྣམ་གྲངས་ནི་ཨ་བ་དྷུ་ཏི་དང་། སུ་སུ་མ་མ་དང་། ཀུན་དྷར་མ་དང་། ཕྲ་མོའི་གཟུགས་དང་། མར་སྣ་ལ་དུང་ཅན་མ་དང་། ཡར་སྣ་ལ་སྒྲ་ཅན་གྱི་རྩ་དང་། སྲོག་རྩ་དང་། ནང་གི་ཤིང་གཅིག་དང་། སྲོག་ཤིང་སྐུད་པ་དང་། ལམ་པོ་ཆེ་དང་རྩ་དབུ་མ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཉིས་པ་རོ་རྐྱང་དང་བཅས་པ་བཤད་པ་ནི། བཤད་པ་དངོས་དང་ལུང་བཤད་པ་གཉིས་ལས། དང་པོ་ནི་ཚིག་བཅད་ཕྱེད་དང་བདུན་སྟེ། །གཡས་གཡོན་རོ་རྐྱང་གཉིས་པོ་ནི། དང་པོ་ལྟེ་བ་ནས་རྩ་གསུམ་འདུས་མདོ་ནས་གྱེས་ནས་མཁལ་མའི་རྩ་ཆེན་པོ་འབྲེལ་སྟེ་སྙིང་ཁའི་རྩ་གཡས་ནི་ཁྱབ་བྱེད་རྒྱུ་བའི་སར་འབྲེལ་གཡོན་ལྷ་སྦྱིན་གྱི་རྩ་ལ་འབྲེལ་བས་མཆན་འོག་གི་རྩ་ཆེན་པོ་སྙིང་རྩ་དངུལ་འདུ་ཞེས་བྱ་བ་ཡིན་ལ་ཡང་མགྲིན་པའི་གནས་སུ་འདུས་ནས་རྩེ་ཆུང་ངུ་རུ་གྱུར་ཏེ་རྣ་བའི་འོག་ནས་ཕུག་ནས་ལྗོན་ཤིང་གི་རྩ་ཞེས་གླད་པ་ལ་སོང་སྟེ་ཚངས་བུག་གི་རྩ་ལ་འབྲེལ་ཅིང་དབང་པོའི་སྒོ་ཐམས་ཅད་དུ་ཡང་འབྲེལ་ཏོ། །བྱེ་བྲག་དུ་སྣ་བུག་གཉིས་སུ་ཡར་སྣ་འབྱུང་ཞེས་བརྗོད་དོ། །འོག་ཏུ་ནི། རྩ་གསུམ་འདུས་ས་ནས་གྱེས་ཏེ། ཁྲག་དང་དྲི་ཆེན་གྱི་འབྱིན་སྡོམ་གྱི་ལས་ནི་གཡས་པ་རོ་མས་བྱེད་ལ། གཡོན་ནས་རྐྱང་མས་དྲི་ཆུའི་འབྱིན་སྡོམ་བྱེད་པར་ཧེ་བཛྭ་ལས་བཤད་དེ། རྐྱང་མ་མི་བསྐྱོད་འབབ་པ་སྟེ། །རོ་མ་དེ་བཞིན་ཁྲག་འབབ་ཅིང་། །ཤེས་རབ་ཟླ་བ་འབབ་བཤད་པ། །དེ་ནི་ཀུན་དྷར་མ་རབ་གྲགས། །ཞེས་གསུངས་པས་ཡང་ཁ་གཅིག་གིས་མ་རྟོག་དོགས་ནས་རྡོ་རྗེ་སྙིང་པོས་སྟེང་དུ་ནི་རླུང་གསུམ་འབབ་པར་རྒྱས་པར་གསུངས་སོ། །ཁྱད་པར་དུ་ལྟེ་བའི་གནས་དེར་རོ་རྐྱང་ལས་རྩ་བཞི་གྱེས་དེ་ལ་གསུམ་གསུམ་དུ་སྟེ་བཅུ་གཉིས་དེ་ལ་ལྔ་ལྔར་གྱེས་པས་དྲུག་ཅུ་སྟེ་དྲུག་ཅུ་རྩ་བཞིའམ་བདུན་ཅུ་རྩ་གཉིས་སུ་གསུངས་པ་རླུང་ཐམས་ཅད་ཕྱིར་ལུས་ཐམས་ཅད་དུ་གསོ་བསྐྱེད་བྱེད་ལ་ནང་དུ་དབུ་མ་ལ་སྲོག་རླུང་གསོ་བསྐྱེད་བྱེད་པ་ཡིན་ནོ། །འདི་ནི་དང་པོའི་སངས་རྒྱས་ཀྱི་རྒྱུད་ལས་བྱུང་པའི་ལུང་བཤད་པ་ནི། །དེ་ནི་ཐུར་དུ་རྩེ་གསུམ་སྟེ། དེ་བཞིན་གྱེན་དུའང་རྩེ་གསུམ་མོ། །གྱེན་ནས་ཅི་རྒྱུ་ཞེ་ན། སྒྲ་གཅན་རྩེ་མོ་དབུས་ན་གནས། །ཉི་མའི་རྩེ་མོ་གཡས་པའོ། །ཟླ་བའི་རྩེ་མོ་གཡོན་པའོ། །ཆུ་དང་མེ་དང་ནམ་མཁའ་རྒྱུ། །ཞེས་རྐྱང་མ་ཆུའི་རང་བཞིན་ཟླ་བའི་རླུང་དག་རོ་མ་མེའི་རང་བཞིན་ཉི་མའི་རླུང་དང་དབུ་མ་ནམ་མཁའི་རང་བཞིན་སྲོག་གི་རླུང་རྒྱུ་ཞིང་འོག་ནས་རྩེ་མོ་གསུམ་ནི། །གཡས་གཡོན་དབུ་མའི་མར་སྣ་ནས། བཤང་བ་གཅི་བ་ཁུ་བ་རྒྱུ་ཞེས་དེ་རྣམས་ཀྱི་ལས་བྱེད་ལ་གསུམ་པོ་འདུས་ཤིང་གྱེས་པ་ལྟ་བུར་ལུས་ལ་ཡོད་པས། །ལྕགས་སྒྲོག་བཅིངས་པ་ལྟ་བུའི་རྩ། སྲིད་དང་ཐུར་སེལ་ལམ་གསུམ་ཉིད། །ཅེས་གསུངས་པ་འདིར་བརྗོད་པ་ཡིན་ནོ། །དེ་ལྟར་རོ་རྐྱང་བཤད་ནས། གསུམ་པ་རྩའི་གཙོ་བོ་ཉི་ཤུ་རྩ་བཞི་དང་སོ་བདུན་གྱི་རྒྱས་པར་བཤད་པ་ནི་གསུམ་སྟེ། སྤྱིར་བསྟན་པ་དང་། ཉི་ཤུ་རྩ་བཞི་པོ་ངོས་བཟུང་བ་དང་། སྦས་བའི་རྩ་ལྔ་བཤད་པའོ། །དང་པོ་ནི། འདི་ལས་གྱེས་པའི་རྩ་ཆེན་པོ། །ཉི་ཤུ་བཞི་སྟེ་སྙིང་ཁ་ཡི། །ཡན་ལག་རླུང་ནི་བརྟེན་པའི་རྩ། །ལྔ་དང་གཙོ་བོ་གསུམ་བཅས་པ། །སུམ་ཅུ་གཉིས་ཏེ་རྩ་བ་ཡི། །རླུང་རྟེན་རྩར་བཅས་སུམ་ཅུ་དྲུག །ཅེས་བྱ་བ་དབུ་མ་དང་རོ་རྐྱང་ལ་གྱེས་པའི་རྩ་ཉི་ཤུ་རྩ་བཞི་ནི་ཕྱི་ཡི་ཡུལ་ཉི་ཤུ་རྩ་བཞི་དག་པ་འོག་ནས་སྟོན་པ་རྣམས་ཐུགས་གསུང་སྐུའི་འཁོར་ལོའི་རྣལ་འབྱོར་མ་ཉི་ཤུ་རྩ་བཞི་ཡི་རང་བཞིན་ནོ། །ཡན་ལག་གི་རླུང་ལྔ་བརྟེན་པའི་རྩ་ལྔ་དང་གཙོ་བོ་གསུམ་དང་བཅས་པས་སུམ་ཅུ་སོ་གཉིས་ནི་ལྷ་མོ་བཅོ་ལྔ་ཡར་ངོ་དང་མར་ངོ་དག་པ་བཅུ་དྲུག་པའི་དཀར་ཆ་ནི་དུང་ཅན་ཏེ་དྷཱུ་ཏི་ནག་ཆ་ནི་བདུད་བྲལ་ཏེ་ལྕེའུ་ཆུང་ངུ་ཟུག་པ་ཧེ་བཛྭ་ལས་གསུངས་པ་ཡིན་ནོ། རྩ་བའི་རླུང་བརྟེན་པ་རྩ་ལྔ་ལ་དབུ་མ་ལ་ཆ་གཉིས་སུ་བྱས་ནས་གསུམ་འདུས་མན་ཆད་དུང་ཅན་མ་ནི་ཡེ་ཤེས་ཀྱི་ཁམས་ཐུར་སེལ་གྱི་གནས་ཡན་ཆད་སྲོག་གི་རླུང་གི་གནས་ཡིན་ནོ། །གཞན་གསུམ་ནི་སྙིང་ཁའི་ཤར་ཕྱོགས་ལུས་ཀྱི་མདུན་དུ་མེ་མཉམ་གྱི་རླུང་བརྟེན་པའི་རྩ་སྣར་མ་ཞེས་བྱ་བ་དང་། གྱེན་རྒྱུའི་གནས་མེ་མཚམས་སུ་གླང་པོ་ཆེའི་རྩའོ། །ཁྱབ་བྱེད་གཡས་ཀྱི་ཕྱོགས་སུ་འབབ་པའི་གནས་སེར་སྐྱ་སྟེ་རོ་མའི་བྱེ་བྲག་གོ། །རྩ་བ་དང་ཡན་ལག་གི་རྩ་བཅུ་པོ་ལ་མིང་ནི་དུས་འཁོར་ལས་སེར་སྐྱ་ཕྲ་མོ་ལུག་ལ་སོགས་པ་ལམ་གསུམ་གྱུར་པ་རྣམས་དང་སྣར་མ་དང་ནི་གླང་ཆེན་ལྕེ། རྒྱལ་ནི་དྲུག་པ་ཡིན་ལ་རྒྱལ་བ་འགྲོ་དང་བརྒྱད་པ་ལམ་བུ་ཥ་སྟེ་དགུ་པ་ཀུ་ཧེའོ། །བཅུ་པའི་གྲངས་ནི་དུང་ཅན་མ་གང་མིའི་བདག་པོ་བདེ་བའི་མཐར་ནི་བྱང་སེམས་ས་བོན་འཛག །ཞེས་གསུངས་པ་ཡིན་ནོ། །གསང་འདུས་སུ་བཤད་པ་ནི་འོག་གི་སྙིང་ཁའི་འཁོར་ལོའི་མིང་ན་ཡོད་དོ། །དེ་ལྟར་རྩ་སུམ་ཅུ་སོ་བདུན་ནི་རིགས་དང་ལྷ་དང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་སོ་བདུན་དུ་རྒྱུད་ཐམས་ཅད་ལ་སྦྱར་སྟེ་སྟོན་ཏོ། །ཁ་ཅིག་ཏུ་ཕྱོགས་འགའ་ཡར་བ་སྟོན་ཏོ། །རྩ་ཉི་ཤུ་རྩ་བཞི་པོ་ངོས་བཟུང་བ་ནི། འདིའི་གཡོན་པའི་ཆར་སྐྱེས་པ་ཞེས་པ་ནས་ཚིགས་སུ་བཅད་པ་བདུན་རྐང་པ་གཅིག་དང་བཅས་པ་སྟེ། འདི་ལ་ན་རོ་པའི་འགྲེལ་ཆེན་དུ་རོ་རྐྱང་ལས་གྱེས་པ་བཅོ་ལྔ་བཅོ་ལྔ་སྦྱར་བཤད་གསུངས་ཀྱང་འདིར་བདེ་མཆོག་གི་རྒྱུད་རྣམས་དང་སཾ་བྷུ་ཊི་དཔང་པོར་བྱས་ཏེ། ལུས་ཀྱི་སྟོད་ན་གནས་པའི་རྩ་བོ་ཆེ་བཅུ་བཞི་རྐྱང་མས་བསྐྱེད་པ་དང་། སྨད་ཀྱི་རྩ་ཆེན་པོ་བཅུ་རོ་མས་བསྐྱེད་པའི་ཆར་བཤད་པ་ཡིན་ནོ། །རྩ་བཅུ་ནི་དབུ་མས་བསྐྱེད་པར་ལེགས་ཏེ་དེ་ལྟར་སུམ་ཅུ་སོ་བཞི་པོ་རྩ་གསུམ་གྱིས་སྡེ་ཚན་དུ་བཅད་པ་གསང་བ་འདུས་པའི་བཤད་པའི་རྒྱུད་རྡོ་རྗེ་ཕྲེང་བར་བྱུང་ངོ་། །འགའ་ཞིག་འཁོར་ལོར་སྦྱོར་བ་ནི་མི་འཐད་པར་སེམས་སོ། །རྩ་དེ་དག་ལུས་ཀྱི་གནས་གང་ན་ཡོད་པ་ནི། མི་ཕྱེད་མ་ནི་འཚོགས་མ་ལ་གནས་པའི་རྩའོ། །འཕྲ་གཟུགས་མ་ནི་ཚངས་པའི་བུ་གར་འབྲེལ་པའི་རྩའོ། །རྩེ་བ་མ་ནི་རྣ་བ་གཡས་པའི་རྩའོ། །གཡོན་པ་མ་ནི་ལྟག་པའི་རྩའོ། །ཐུང་ངུ་མ་ནི་རྣ་བ་གཡོན་པའི་རྩའོ། །རུས་སྦལ་སྐྱེས་མ་ནི་སྨིན་མའི་དབུས་སུ་གནས་པའི་རྩའོ། །བསྒོམ་པ་མོ་ནི་མིག་གི་ཕྱིར་རོལ་གྱི་རྩའོ། །དབང་མ་ནི་འཕྲག་པའི་རྩ་གཉིས་སོ། །སྐྱོན་མ་ནི་མཆན་ཁུང་གི་རྩ་ཆེན་གཉིས་སོ། །འཇུག་མ་ཞེས་བྱ་བ་ནི་ནུ་མའི་རྩ་གཉིས་སོ། །མ་མོ་ནི་ལྟེ་བར་གནས་པའི་རྩའོ། །མཚན་མོ་ནི་སྣ་རྩེར་ཟུག་པའི་རྩའོ། །བསིལ་སྦྱིན་མ་ནི་ཁའི་མཐའ་མ་ལ་བསྐོར་ནས་ཡོད་པའི་རྩའོ། །ཚ་བ་མ་ནི་མགྲིན་པའི་དབུས་སུ་གནས་པའི་རྩའོ། །དེ་ལྟར་བཅུ་བཞི་པོ་རྐྱང་མ་ལ་བརྟེན་པ་ཤེས་རབ་ཀྱི་རང་བཞིན་ཟླ་བ་ཡར་ངོའི་ཆ་དག་པ་ཡིན་ནོ། །དེ་ནས་རོ་མ་ལ་བརྟེན་པའི་ཐབས་ཀྱི་རང་བཞིན་མར་ངོའི་ཆ་དག་པའི་རྩ་རྣམས་ནི། གཞོལ་མ་ནི་བྲང་གི་གཞུང་དུ་གནས་པའི་རྩའོ། །རངས་མ་ནི་ལྒང་པར་འབྲེལ་པའི་རྩའོ། །ཤིན་ཏུ་གཟུགས་ཅན་མ་ནི་མཚན་མར་གནས་པའི་རྩའོ། །ཕྱི་མ་ནི་འོག་སྒོར་འབྲེལ་པའི་རྩའོ། །རྒྱུ་སྦྱིན་མ་ནི་བརླའི་རྩ་ཆེན་གཉིས་སོ། །སྦྱོར་བྲལ་མ་ནི་བྱིན་པར་གནས་པའི་རྩ་གཉིས་སོ། །སྡུ་གུ་མ་ནི་རྐང་པའི་སོར་མོ་རྣམས་ལ་གནས་པའི་རྩའོ། །གྲུབ་མ་ནི་རྐང་པའི་བོལ་གཉིས་ལ་གནས་པའི་རྩའོ། །འཚེད་མ་ནི་རྐང་འཐེབ་སྤུ་འཁྱིལ་ལ་གནས་པའི་རྩའོ། །ཡིད་བཟང་མ་ནི་པུས་མོའི་གཉན་གོང་གཉིས་ལ་གནས་པའི་རྩའོ། །དེ་ལྟར་རྩ་ཉི་ཤུ་རྩ་བཞི་པོ་འདི་རྣམས་དགྱེས་པའི་རྡོ་རྗེ་ལས་གསུངས་པའི་མིང་གི་རྣམ་གྲངས་སོ། །བདེ་མཆོག་ཏུ་ནི་ཕྱི་རོལ་གྱི་གནས་ཉིད་ཀྱི་མིང་གིས་བརྗོད་དོ། །དེ་བཞིན་དུ་རྒྱུད་གཞན་ནས་ཀྱང་མིང་གི་རྣམ་གྲངས་གསུངས་པ་ཡོད་དེ་འདིར་མ་སྨོས་སོ། །དེ་ནས་སྦས་པའི་རྩ་ལྔ་བཤད་པ་ནི། ཚིགས་སུ་བཅད་པ་གཉིས་དང་རྐང་པ་གཅིག་སྟེ། གསུམ་སྐོར་མ་ནི་མིག་གི་དབུས་སུ་འབྲེལ་ཅིང་། གཟུགས་འཛིན་པའི་བདག་རྐྱེན་བྱེད་དོ། །འདོད་མས་རྣ་བར་སྒྲ་འཛིན་ཏོ། །ཁྱིམ་མས་སྣར་དྲི་འཛིན་ལ། གཏུམ་མོས་ལྕེའི་དབུས་སུ་རོ་འཛིན་པའི་བདག་རྐྱེན་བྱེད་དེ། འདིར་རྣམས་ནི་སྔར་སྨོས་པའི་ཡན་ལག་གི་རླུང་རྒྱུ་བའི་གནས་སོ། །བདུད་བྲལ་མ་ནི་ལྕེའུ་ཆུང་གི་དབུས་སུ་ཟུག་ཅིང་། གྱེན་དུ་ཁམས་འབབ་པའི་བྱ་བ་བྱེད་ལ་རེག་བྱའི་ཕྱོགས་གཅིག་ཀྱང་འཛིན་པས་ནོར་ལས་རྒྱལ་གྱི་རླུང་བརྟེན་པར་བྱེད་པ་ཡང་ཡིན་ནོ། །འདི་རྣམས་སྙིང་གི་དབུས་སུ་འབྲེལ་ཞིང་། དེ་ལས་གཞན་ཡང་། །འདིར་ནི་ལུས་ཀྱི་སྙིང་དབུས་སུ། །རྩ་ལྔ་པོ་ནི་ཡང་དག་གནས། །སྲོག་ནི་ཨ་ཝ་དྷུ་ཏི་སྟེ། །གཞན་ནི་རྩ་བའི་རླུང་རྒྱུའི་གནས། །ཞེས་བྱ་བའི་དོན་ནི་གོང་དུ་བསྟན་ཟིན་ཏོ། །བཞི་པ་འཁོར་ལོའི་རྩ་རྣམས་ཀྱི་མིང་རྒྱས་པར་བཤད་པ་ལ་བདུན་སྟེ། མདོར་བསྟན་པ་དང་། ལྟེ་བ་དང་། སྙིང་ཁ་དང་། མགྲིན་པ་དང་། སྤྱི་བོ་དང་། འཁོར་ལོ་དྲུག་གི་ངེས་པ་དང་། ཡན་ལག་གི་འཁོར་ལོ་བཅུ་གཉིས་རྒྱས་པར་བཤད་པའོ། །དང་པོ་ནི། དེ་ནས་འཁོར་ལོ་བཞི་དང་དྲུག །བཅོ་བརྒྱད་ལ་སོགས་དབྱེ་བ་ནི། །ཞེས་སྨོས་ཏེ། འཁོར་ལོ་འདི་རྣམས་ཀྱང་གཞན་དག་རྩ་བརྒྱད་བརྒྱད་ལས་ཀྱོག་གི་བྱེ་བྲག་གིས་འདབ་མའི་གྲངས་སུ་འདོད་ཀྱང་། འདིར་ནི་གྲངས་ཇི་ལྟར་བཤད་པ་བཞིན་དུ་རྩ་རེ་རེ་ཡིན་པར་འདོད་དེ། བྱང་ཆུབ་སེམས་དཔའི་འགྲེལ་པ་གསུམ་ཀ་ལ་དེ་ལྟར་རྒྱ་ཆེར་བསྟན་པའི་ཕྱིར། ལྟེ་བ་ན་རྩ་དྲུག་བཅུ་རྩ་བཞི། དུས་སྦྱོར་གྱི་རླུང་གི་གནད་བཅིངས་ན་སད་པའི་དུས་སྤྲུལ་པའི་སྐུའི་དགོངས་པར་འཆར་བར་བྱེད་པ་དང་། སྙིང་ཁ་ན་བརྒྱད་ཐུན་ཆེན་པོ་བརྒྱད་དག་པ་གནད་བཅིངས་ན་འོད་གསལ་ཆོས་ཀྱི་སྐུར་འཆར་ཞིང་གཉིད་འཐུག་པོ་དག་པར་བྱེད་པ་དང་། མགྲིན་པ་ན་བཅུ་དྲུག་འཕོ་བའི་རང་བཞིན་དག་པར་བྱེད་པ་གནད་བཅིངས་ན་རྨི་ལམ་གྱི་འཁྲུལ་པ་དག་ནས་ལོངས་སྤྱོད་རྫོགས་པའི་སྐུར་འཆར་བར་བྱེད་པ་དང་། སྤྱི་བོ་ན་སུམ་ཅུ་སོ་གཉིས་ཆུ་ཚོད་ཀྱི་རང་བཞིན་ཐིག་ལེའི་གནད་བཅིངས་ན། ཆགས་པའི་འཁྲུལ་པ་དག་པར་བྱེད་པ་ཡེ་ཤེས་ཀྱི་སྐུའི་ངོ་བོ་སྟེ། འདི་ནི་གསང་བ་འདུས་པ་དང་དགྱེས་རྡོར་བདེ་མཆོག་རྣམས་སུ་གསུངས་པ་ཡིན་ནོ། །དུས་ཀྱི་འཁོར་ལོ་ནས་ནི། མགྲིན་པ་ནས་སུམ་ཅུ་སོ་གཉིས། རྒྱུ་སྐར་གྱི་རང་བཞིན་དང་། སྤྱི་བོ་ན་བཅུ་དྲུག་ཟླ་བའི་རྐང་པ་རྒྱུ་ཚུལ་དང་བཅས་པ་ཡོད་དེ། འོག་ནས་རླུང་གི་སྐབས་སུ་འཆད་དོ། །འཁོར་ལོའི་སྒྲར་བརྗོད་པའི་དོན་ནི། དབྱིབས་ཀྱང་འཁོར་ལོ་ལྟ་བུ་ཡིན་པ་དང་། གནད་བཅིངས་ན། གནས་སྐབས་བཞིའི་འཁྲུལ་པ་གཅོད་པའི་དོན་གྱིས་འཁོར་ལོར་བཤད་དོ། །དེ་ནས་ལྟེ་བའི་འཁོར་ལོའི་རྒྱས་བཤད་ནི། ཚིགས་སུ་བཅད་པ་དགུ་འཚམས་སྦྱོར་དང་བཅས་པ་སྟེ། རྩའི་མིང་འདི་དག་ཐམས་ཅད་ནི། རྒྱུད་རྡོ་རྗེ་འཕྲེང་བའི་གཞུང་གི་ཚིག་ཡིན་ནོ། །ལྟེ་བ་སྤྲུལ་པའི་འཁོར་ལོ་ནི་ལུས་བསྐྱེད་ཅིང་སྤྲུལ་པའི་ཕྱིར་ཏེ། དང་པོ་དབུ་མ་དང་རོ་རྐྱང་ལས་གྱེས་པའི་རྩ་བཞི་སྟོང་པ་ཡེ་ཤེས་ཀྱི་ཁམས་ཡིན་ལ། དེ་ལས་འཕོ་བ་བཅུ་གཉིས་ཀྱི་རིམ་པ་ཡིས། རེ་རེ་ལ་རྩ་ལྔ་ཚན་བཅུ་གཉིས་སུ་གྱེས་པས་དྲུག་ཅུ་ཐམ་པ་ཡོད་དེ། གཡས་རོ་མ་དང་གཡོན་རྐྱང་མའི་འཕོ་བ་དྲུག་ཅུ་པོ་བརྟེན་ལ་སྟོང་པ་བཞི་པོ་དབུ་མའི་འཕོ་བ་ཡིན་ནོ། །ཡང་དག་ཤུགས་དང་ཤིན་དུ་ཤུགས། །ཤིན་དུ་བཟང་དང་བཟང་པོར་འགྲོ། །ཞེས་སྨོས་པའི་རྩ་བཞི་པོ་རོ་རྐྱང་ལས་དབུ་མར་འཇུག་པའི་རྩའི་མིང་ངོ་། །ཡང་དག་པའི་སྟོབས་དང་ལྡན་པ་དང་སྲོག་འཛིན་པས་བཟང་པོར་བྱེད་པའི་དོན་ཏོ། །གཞན་སྟོབས་ཆེན་ལ་སོགས་པའི་རྩ་ལྔ་ནི་ལུག་གི་འཕོ་བ། དེ་བཞིན་དུ་བརྒྱགས་པའི་ཆ་ལ་སོགས་པ་ལྔ་ནི་གླང་གི་འཕོ་བ། བརྒྱགས་པའི་བརླན་ལ་སོགས་པ་ལྔ་ནི་འཁྲིག་པའི་འཕོ་བ་དབུགས་མི་བདེ་བ་ལ་སོགས་པ་ལྔ་ནི་ཀར་ཀ་ཏའི་འཕོ་བ། མི་བཟད་པ་ལ་སོགས་པ་ལྔ་ནི་སེང་གེའི་འཕོ་བ། དབྱངས་ལ་སོགས་པ་ལྔ་ནི་བུ་མོའི་འཕོ་བ། ཡུད་ཙམ་གཙོ་བོ་ལ་སོགས་པ་ལྔ་ནི་སྲང་གི་འཕོ་བ། རྙིང་པ་ལ་སོགས་པ་ལྔ་ནི་སྡིག་པའི་འཕོ་བ། ཚིགས་ཀྱི་གནས་ལ་སོགས་པ་ལྔ་ནི་གཞུའི་འཕོ་བ། དུལ་འགྲོ་ལ་སོགས་པ་ལྔ་ནི་ཆུ་སྲིན་གྱི་འཕོ་བ། ཆགས་པ་ལ་སོགས་པ་ལྔ་ནི་བུམ་པའི་འཕོ་བ། འགྲོ་བ་ལ་སོགས་པ་ལྔ་ནི་ཉའི་འཕོ་བའམ། ཡང་ན་སྟོབས་ཆེན་ནས་རྒྱལ་ལྟར་སྔོའི་བར་དུ་སུམ་ཅུ་ལུག་ལ་སོགས་པ་མཉམ་པའི་ཁྱིམ་དྲུག་དང་། ཡུད་ཙམ་ནས་རབ་གསལ་གྱི་བར་སུམ་ཅུ། གླང་ལ་སོགས་པ་མི་མཉམ་པའི་ཁྱིམ་དྲུག་ཏུ་རིག་པར་བྱའོ། །རྩ་འདི་རྣམས་ཀྱི་མིང་འདོགས་པའི་རྒྱུ་མཚན་བཤད་ན་ཉན་མོད་ཀྱི་ལོ་ཙཱ་ཕས་འགྱུར་བྱེད་པའི་དུས་ན་སྒྲ་མི་འདྲ་བ་མང་དུ་ཡོད་པ་དང་། ཕལ་ཆེར་བྱེད་ལས་ལ་བཏགས་པས་ཞིབ་ཏུ་མ་བཤད་དོ། །སྙིང་ཁའི་འཁོར་ལོ་བཤད་པ་ནི། ཚིག་བཅད་ཕྱེད་དང་གཉིས་ཏེ། དུས་ཀྱི་འཁོར་ལོ་ལས་གསུངས་པའི་སྣར་མ་དང་། གླང་ཆེན་ལྕེ་དང་། སེར་སྐྱ་དང་། རྒྱལ་དང་། རྒྱལ་བ་དང་། ལམ་བུ་ཤ་དང་། ཀུ་ཧཱེ་དང་། ཕྲ་མོ་དང་བརྒྱད་པོ་རྣམས་ཀྱི་མིང་རྡོ་རྗེ་འཕྲེང་བའི་རྒྱུད་ལས་རིན་ཆེན་ཅོད་པན་ལ་སོགས་པ་བརྒྱད་པོ་འདིའི་མིང་གིས་བསྟན་ཏེ་འཁོར་ལོ་འདིའི་རྩ་ནས་ལུས་ཐམས་ཅད་ཀུན་ཏུ་ཁྱབ་པར་འབྲེལ་ཏོ། །མིང་འདོགས་པའི་དོན་ཡང་། རིན་པོ་ཆེ་དང་། པད་མ་དང་། རྡོ་རྗེ་དང་། ལས་ཀྱི་རིགས་དང་། དེ་དག་གི་དབང་བྱེད་པའི་དོན་གྱིས་ཐབས་དང་ཤེས་རབ་ཀྱི་ཆ་དང་། མགོན་པོ་ཆེ་བ་ནི་གཟུགས་འཛིན་པའི་དོན་དང་། སྒྲ་ཆེན་ནི་སྒྲ་འཛིན་པའི་དོན་དང་། ཉེར་དགའ་ཆེན་པོ་ནི་དྲི་འཛིན་པའི་དོན་དང་། མྱོས་པ་ཆེན་པོ་ནི་རོ་འཛིན་པའི་དོན་ཡིན་སྙམ་མོ། །མགྲིན་པའི་འཁོར་ལོ་བཤད་པ་ནི། ཚིག་བཅད་གཉིས་ཏེ། འདིར་ལོངས་སྤྱོད་ཅེས་བྱ་བ་ལ་སོགས་པ་བཅུ་དྲུག་པོ་འདི། ཟས་ཀྱི་རོ་དྲུག་ཉམས་སུ་མྱོང་བའི་ཆ་ནས་མིང་གི་རྣམ་གྲངས་འདི་རྣམས་བསྟན་ལ། དུས་ཀྱི་འཁོར་ལོ་ལས་སུམ་ཅུ་རྩ་གཉིས་སུ་གསུངས་པ་ནི། རླུང་དང་བྱང་ཆུབ་ཀྱི་སེམས་རྒྱུ་སྐར་ཉི་ཤུ་རྩ་བརྒྱད་གྱི་གྲངས་ཀྱིས་རྒྱུ་བ་དང་། བཞི་ནི་དབུ་མའི་ཆ་ལ་སྟོང་པའི་རྩ་ཞེས་གསུངས་སོ། །སྤྱི་བོའི་འཁོར་ལོ་བཤད་པ་ནི། །སྤྱི་བོ་བདེ་ཆེན་འཁོར་ལོ་ན། ཞེས་པ་ནས་ཚིག་བཅད་བཞི་སྟེ། འདི་དག་ཀྱང་ཁམས་བྱང་ཆུབ་ཀྱི་སེམས་ཀྱི་བྱེད་ལས་ཀྱིས་བརྗོད་འདུག་པའི་ཕྱིར། རིམ་རིགས་ནས་ནེ་ཙོའི་བར་བཅོ་ལྔ་ནི་ཟླ་བ་འཕེལ་བའི་ཆ་ཡིན་ལ། གང་བ་ནི་བཅུ་དྲུག་པ་དབུ་མའི་ཆའོ། །ཉི་ལྡན་ནས་སྙེམས་པའི་བར། ཕྱི་རོལ་གྱི་རྩ་ནག་པོའི་ཆ་བཅོ་ལྔ་སྟེ། ཚིགས་ཀྱི་རྟེན་ནི་བཅུ་དྲུག་པའི་ཆ་ཡིན་པས་སུམ་ཅུ་རྩ་གཉིས་སུ་བཤད་པའི་ངེས་པ་ཡིན་ལ། དུས་ཀྱི་འཁོར་ལོ་ལས་ཟླ་བའི་རྐང་པ་འཕེལ་བ་བདུན་དང་འགྲིབ་པ་བདུན་ཏེ་བཅུ་བཞིའི་རྣམ་པར་དག་པ་དང་། འཚམས་གཉིས་དང་གཅས་བས་བཅུ་དྲུག་ཏུ་གསུངས་སོ། །དེ་ལྟར་རྩ་བརྒྱ་ཉི་ཤུ་ནི། འཁོར་ལོ་བཞི་ལ་བཤད་པ་རྩ་རྣམས་ཀྱི་གཙོ་བོ་ཞེས་བཤད་པའོ། །འཁོར་ལོ་དྲུག་གི་ངེས་པ་བསྟན་པ་ནི། རྡོ་རྗེ་འཕྲེང་བ་ལས་གསུངས་པ་དང་། རྒྱུད་ཕན་ཚུན་གྱི་དགོངས་པ་བཤད་པ་གཉིས་ལས། དང་པོ་ནི། གཙུག་གཏོར་རླུང་དང་མགྲིན་པ་མེ། །གནས་པའི་རྩ་ནི་དགུ་ཡོད་དེ། །ཞེས་བྱ་བ་ལ། སངས་རྒྱས་རྣམས་ཀྱི་གཙུག་ཏོར་བསྐྱེད་པར་བྱེད་པའི་རང་བཞིན། སྨིན་འཚམས་དང་གཙུག་ཏོར་གྱི་འཁོར་ལོའི་སྒྲས་གསུངས་པས། སྨིན་མའི་དབུས་ན་རླུང་རྣམ་པར་དག་པའི་རྩ་ལྔ་དང་། གཙུག་ཏོར་གྱི་མགྲིན་པ་མེའི་ཁམས་འཛིན་པར་བྱེད་པའི་རྩ་གསུམ་ཡོད་དོ་ཞེས་གསུངས་པ་ལས། རླུང་གི་འཁོར་ལོའི་རྩ་དེ་དག་ཀྱང་གང་ཞེ་ན། །བྱེ་བ་འཁྱིལ་པ་མི་བཟད་པ། །མིང་བཟངས་བརྟན་དང་མཚན་ཉིད་ཅན། །ཞེས་བྱ་བ་དྲུག་ཡིན་ནོ། །གཞན་གསུམ་ནི། འཛིན་པ་རྟོག་མེད་གང་བ་ནི། །རྩ་གསུམ་མེ་དང་ལྡན་པའོ་ཞེས་སོ། །རྒྱུད་གཞན་གྱི་དགོངས་པ་བཤད་པ་ནི། །དུས་ཀྱི་འཁོར་ལོར་གང་གསུངས་པ། །འདི་བདུན་གསང་བའི་གནས་སུ་སྟེ། །སྤྱི་བོ་དང་མཚུངས་གསང་འཁོར་ལོ། །སུམ་ཅུ་རྩ་གཉིས་འདོད་པ་ཡིན། །ཞེས་སྨོས་ཏེ། དུས་འཁོར་ལས་གསང་བའི་ནོར་བུ་ལ་རྩ་བཞི་དང་། སྨིན་འཚམས་ཀྱི་གཙུག་ཏོར་གྱི་རྩ་བཞི་མཐུན་པར་གསུངས་ཤིང་། དེའི་རྩ་བ་ན་གཏུམ་མོའི་མེ་བསྐྱེད་པར་བྱེད་པའི་དབུ་མའི་མར་སྣ། བཤང་གཅི་ཁུ་བ་འཕེན་འཛིན་བྱེད་པའི་རྩ་གསུམ་དང་བདུན་པོ་འདི། གསང་གནས་ན་ཡོད་པར་གསུངས་ལ། འདི་རྣམས་ཀྱི་རྩ་བ་ནས་ལུས་ཀྱི་ཕྱི་རིམ་དང་འབྲེལ་པའི་རྩ་སུམ་ཅུ་སོ་གཉིས་སྤྱི་བོའི་འཁོར་ལོ་དང་གྲངས་མཚུངས་པར་ཡོད་པར་བཤད་དོ། །དེས་ན་གོང་མའི་རྩ་བདུན་པོ་དང་། སྨིན་མ་ནས་གསང་བའི་བར་དུ་སྲོག་གི་རླུང་འཛིན་པ་དང་། ཁུ་བ་འབབ་པའི་རྩ། དབུ་མ་ལ་ཆ་གཉིས་སུ་བཤད་ན། རྩ་དགུ་པོ་འདི་ལོགས་སུ་འཁོར་ལོ་ལ་མི་གཏོགས་པར་བྱུང་པས། རྒྱུད་ཀྱི་དགོངས་པ་འདི་གཉིས་མཐུན་པར་འགྱུར་ལ། ཡང་ན་རྒྱུད་ཐམས་ཅད་དགོངས་པ་ཅན་ཡིན་པར་བྱང་ཆུབ་སེམས་དཔའི་འགྲེལ་པ་ལས་བཤད་པའི་ཕྱིར། སྨིན་མའི་དབུས་མན་ཆད་དུ་འཁོར་ལོ་དྲུག་ལ་རྩ་བའི་རླུང་གི་རྟེན། སྨིན་དབུས་བྱེ་བ་དང་། སྤྱི་བོར་འཁྱིལ་པ་དང་། མགྲིན་པར་མི་བཟད་པ་དང་། སྙིང་ཁར་མིང་བཟངས་དང་། ལྟེ་བར་བརྟན་པ་དང་། གསང་བར་མཚན་ཉིད་ཅན་དང་། དྲུག་པོ་ནི་འཁོར་ལོའི་དབུས་རྣམས་སུ་འགྱུར་ཏེ། དུས་ཀྱི་འཁོར་ལོ་ལས་སྟོང་པ་དྲུག་གི་རྩ་ཞེས་གསུངས་པ་དང་། འཁོར་ལོ་རྣམས་ནི་སྲོག་ལ་སོགས་པའི་ཡུལ་ཡིན་པའི་ཕྱིར་གསུང་གི་དཀྱིལ་འཁོར་གྱི་སྒོ་བཞིར་ཡང་བཤད་པས། དེ་དག་དབུས་ནས་གནས་པ་ནི། །སྟོང་པ་དྲུག་གི་རྩ་ཡིན་ནོ། །འདི་རྣམས་གསུང་གི་སྒོ་ཞེས་བྱ། །ཞེས་བསྟན་པ་ཡིན་ནོ། །རྒྱས་པར་ནི་དྲི་མ་མེད་པའི་འོད་ལས། འདིར་ལུས་ལ་རིགས་གསུམ་གྱི་རྩ་གསུམ་ནི། ལུས་དང་ངག་དང་སེམས་ཀྱི་ཐིག་ལེ་འཛིན་པའི་རྩ་གསུམ་སྟེ། ལྟེ་བ་དང་གསང་བའི་རྡོ་རྗེའི་ནོར་བུའོ། །དེ་བཞིན་དུ་རིགས་དྲུག་གི་རྩ་ནི་ལ་ལ་ན་དང་ར་ས་ན་དང་ཨ་བ་དྷུ་ཏི་དང་གཤང་བ་དང་གཅི་བ་དང་ཁུ་བ་འབབ་ཅེས་སོ། །དེ་བཞིན་དུ་རིགས་སུམ་བ་སོ་དྲུག་གི་གཙུག་ཏོར་ལ་སོགས་པ་འཁོར་ལོ་དྲུག་གི་རྩ་དྲུག་རྣམས་ལ་སྒྲ་འཛིན་པ་གཉིས་དང་། རེག་བྱ་འཛིན་པ་གཉིས་དང་། གཟུགས་འཛིན་པ་གཉིས་དང་། དྲི་འཛིན་པ་གཉིས་དང་། རོ་འཛིན་པ་གཉིས་པོ་འདི་དག་སྟེ་རྩ་བཅུའོ། །ལྟེ་བའི་དཀྱིལ་འཁོར་གྱི་དབུས་སུ་དཀྱིལ་འཁོར་གཞན་རྣམས་འཕོ་བ་བཅུ་གཉིས་ཀྱི་རྩ་རྣམས་དང་ཐུན་བརྒྱད་ཀྱི་རྩ་རྣམས་སོ། །དེ་ལྟར་སུམ་ཅུ་རྩ་དྲུག་པོ་ཐམས་ཅད་ཀྱི་རིགས་ཀྱི་གཙོ་བོར་འགྱུར་ཏེ་དྲུག་རོའི་གཟུགས་ཅན་མ། དྲུག་ཁམས་ཀྱི་གཟུགས་ཅན་མ། དྲུག་དབང་པོའི་གཟུགས་ཅན་མ། དྲུག་ཡུལ་གྱི་གཟུགས་ཅན་མ། དྲུག་ལས་ཀྱི་དབང་པོའི་གཟུགས་ཅན་མ་དྲུག་ལས་ཀྱི་དབང་པོའི་ཡུལ་གྱི་གཟུགས་ཅན་མའོ། །དེ་བཞིན་དུ་དྲུག་གཟུགས་ལ་འཇུག་པའོ། །དྲུག་ཚོར་བ་ལ་འཇུག་པའོ། །དྲུག་འདུ་ཤེས་ལ་འཇུག་པའོ། །དྲུག་འདུ་བྱེད་ལ་འཇུག་པའོ། །དྲུག་རྣམ་པར་ཤེས་པ་ལ་འཇུག་པའོ། །དྲུག་ཡེ་ཤེས་ལ་འཇུག་པ་སྟེ་རིགས་སུམ་ཅུ་རྩ་དྲུག་དུ་འཇུག་པའོ། །རྩ་རྣམས་ཀྱི་རྟེན་དང་བརྟེན་པའི་འབྲེལ་བ་བདུན་ཅུ་རྩ་གཉིས་སུ་ཤེས་པར་བྱའོ། །དེ་ལྟར་གསུངས་པའི་དུས་ཀྱི་འཁོར་ལོའི་རྩ་ནི། གཙུག་ཏོར་གྱི་རྩ་བཞི་ཐུན་ཚོད་བཞིའི་རང་བཞིན་ནོ། །སྤྱི་བོར་ནི་མི་བདག་ཅེས་པ་ཚེས་བཅུ་དྲུག་ལ་འཇུག་པའོ། །མགྲིན་པའི་འཁོར་ལོ་ལ་རྒྱུ་སྐར་ཉི་ཤུ་རྩ་བརྒྱད་དང་དབྱུ་གུ་བཞིས་འཇུག་པས་སུམ་ཅུ་རྩ་གཉིས་སོ། །སྙིང་ཁར་སྣར་མ་ལ་སོགས་པའི་རྩ་བརྒྱད་དེ་གཟའ་བརྒྱད་རྒྱུའོ། །ལྟེ་བའི་ཁྱིམ་གྱི་འཁོར་ལོར་དྲུག་ཅུ་རྩ་བཞིའི་དཀྱིལ་འཁོར་དྲུག་ཅུ་རྒྱུ་བ་དང་སྟོང་པ་བཞི་རྒྱུ་བས་དབྱུག་གུ་དྲུག་ཅུ་རྩ་བཞིའོ། །གསང་བའི་དབུས་རྩ་སུམ་ཅུ་རྩ་གཉིས་ནི་ཁུ་བ་ལ་སོགས་པའི་ཁམས་སུམ་ཅུ་རྩ་གཉིས་འཇུག་པ་རྣམས་སོ་ཞེས་གསུངས་སོ། །ཡན་ལག་གི་འཁོར་ལོ་བཅུ་གཉིས་རྒྱས་པར་བཤད་པ་ནི། །ལག་པ་གཡས་པའི་ཚིག་གིས་གསུམ་ལ། ཞེས་པ་ནས། ཚིགས་བཅད་གསུམ་སྟེ། ལག་པ་གཡས་པ་ལ་རླུང་གི་ཁམས་དང་། གཡོན་པ་ལ་མེའི་ཁམས་དང་། རྐང་པ་གཡས་པ་ལ་ཆུའི་ཁམས་དང་། གཡོན་པ་ལ་སའི་ཁམས་སྟེ། དེ་དག་གི་ཚིགས་ཆེན་བཅུ་གཉིས་ལ་རྩ་སུམ་ཅུ་སུམ་ཅུ་གནས་པས་ཐམས་ཅད་ལ་སུམ་བརྒྱ་དྲུག་བཅུའོ། །ཉིང་ལག་སོར་མོའི་ཚིགས་རྣམས་ལ་ཡང་རྩ་དྲུག་དྲུག་ཡོད་པས་གྲངས་གོང་མ་དང་མཉམ་སྟེ། ཟླ་བ་བཅུ་གཉིས་ཀྱི་ཞག་གྲངས་དང་མཐུན་པའི་དབྱངས་དང་གསལ་བྱེད་ཀྱི་རང་བཞིན་རླུང་དང་བྱང་ཆུབ་ཀྱི་སེམས་ཀྱི་གནས་ཡིན་ནོ། །ད་ནི་ནད་བསྐྱེད་པ་དང་། སྟོང་ཕྲག་བདུན་ཅུ་རྩ་གཉིས་ཀྱི་རྒྱས་བཤད་ལ། དང་པོ་ནད་བསྐྱེད་པའི་ཚུལ་གྱིས་རྩ་བཤད་པ་ནི། ཚིགས་སུ་བཅད་པ་གསུམ་སྟེ། འདི་ཡང་གཙུག་ཏོར་གྱི་རྩ་བཞི་སྤྱི་བོའི་བཅུ་དྲུག་དང་ཉི་ཤུས་བད་ཀན་གྱི་ནད་བསྐྱེད་པ་དང་། མགྲིན་པ་ན་སུམ་ཅུ་སོ་གཉིས་སྙིང་ཁ་ན་བརྒྱད་དེ་བཞི་བཅུས་མཁྲིས་པ་བསྐྱེད་པ་དང་། ལྟེ་བ་ན་དྲུག་ཅུ་རྩ་བཞི་གསང་བའི་ཕྱི་རོལ་ནས་བཅུ་དྲུག་དང་རྩ་བརྒྱད་ཅུ་ནས་རླུང་གི་ནད་བསྐྱེད་པ་དང་། གསང་བའི་ནང་རིམ་ནས་བཅུ་དྲུག་གིས་འདུས་པའི་ནད་བསྐྱེད་པས་དེ་ལྟར་རྩ་བརྒྱ་ལྔ་བཅུ་རྩ་དྲུག་པོ་འདི་རྣམས་འཁོར་ལོའི་གཙོ་བོ་རྣམས་ཀྱི་ཕྱི་རོལ་ནས་ཁམས་རྒྱུ་བ་དག་ཡིན་པར་ངེས་སོ། །གཞན་དག་ནི་འཁོར་ལོའི་དངོས་གཞི་ཡིན་ནོ་ཞེས་འདོད་དོ། །སྟོང་ཕྲག་བདུན་ཅུ་རྩ་གཉིས་ཀྱི་ངེས་པ་བཤད་པ་ནི། ཚིགས་སུ་བཅད་པ་བཞི་སྟེ། རྒྱུད་རྡོ་རྗེ་འཕྲེང་བ་ལས་གསུངས་པའི་རིམ་པ་འདིས། སྟོང་ཕྲག་ཉི་ཤུ་རྩ་བཞི་ཟླ་བའི་རླུང་དང་ཁམས་དཀར་ཆ་འབབ་པས་རྐྱང་མའི་རིགས་སོ། །སྟོང་ཕྲག་ཉི་ཤུ་རྩ་བཞི་ནི་ཉི་མའི་རླུང་དང་ཁྲག་འབབ་པས་རོ་མའི་རིགས་སོ། །སྟོང་ཕྲག་ཉི་ཤུ་རྩ་བཞི་ནི་རླུང་ཁོ་ན་རྒྱུ་བས་སྒྲ་གཅན་གྱི་རང་བཞིན་དབུ་མའི་རིགས་སུ་བརྗོད་དོ། །དེ་ལྟར་རིགས་གསུམ་གྱི་བདག་ཉིད་དུ་ཕྱེ་བ་རྣམས་ཀྱང་། སྔར་བཤད་པའི་རྩ་ཉི་ཤུ་རྩ་བཞི་པོ་མི་ཕྱེད་མ་ནས་བཟུང་ནས་ཡིད་བཟངས་མའི་བར་གྱི་རྣམ་དབྱེ་ཡིན་ཏེ། ཐིམ་པ་ཞེས་བྱ་བ་ལུས་ཀྱི་གནས་སུ་ལས་བྱས་ཟིན་པ་དང་ལོངས་སྤྱོད་པ་ནི་བྱེད་བཞིན་པ་དང་། བདག་པོ་ནི་བསྐྱེད་པར་བྱེད་པ་སྟེ། དེ་ལྟར་རྣམ་པ་གསུམ་མམ་ཐིམ་པ་རླུང་ལོངས་སྤྱོད་པ་དཀར་ཆ། བདག་པོ་ཁྲག་གི་རང་བཞིན་ཡིན་པས་ཀྱང་། རྩ་གསུམ་གསུམ་དུ་འགྱུར་ཏེ། བདུན་ཅུ་རྩ་གཉིས་སོ། །དེ་རེ་རེ་ལ་རྩ་བྲན་གྱི་འཁོར་སྟོང་སྟོང་ཡོང་པས་སྟོང་ཕྲག་བདུན་ཅུ་རྩ་གཉིས་སྟེ། སྡོང་པོ་ལྟ་བུའོ། །དེ་ལས་གཞན་པའི་རྩ་ཕྲ་མོ་དང་ཁམས་གང་གིས་བསྐྱེད་པ་བསྟན་པ་ནི། ཚིགས་སུ་བཅད་པ་གསུམ་སྟེ། འདི་ལ་ཡང་རྩ་སྟོང་ཕྲག་བདུན་ཅུ་རྩ་གཉིས་ནི་རྣལ་འབྱོར་མའི་རྒྱུད་བདུན་ཅུ་དོན་གཉིས་ཀྱི་རིགས། རྩ་ཉི་ཤུ་རྩ་བཞི་པོ་རྣམ་ལས་གྱེས་པ་ཡིན་གྱིས་དེ་ལས་གཞན་པའི་རྩ་ཡོད་པར་མངོན་སྟེ། རྩ་ཉི་ཤུ་རྩ་བཞི་པོ་ལས་གཞན་རྩ་བའི་རྩ་ཆེན་པོ་བཅུ་གཉིས་སྔར་བསྟན་པ་དེ་རྣམས་འདིའི་ཡན་ལག་ཡིན་ནོ་ཞེས་བྱར་མི་རུང་པའི་ཕྱིར་དང་། བཅོམ་ལྡན་འདས་ཀྱིས་དགའ་བོ་ལ་བསྟན་པའི་མདོ་ནས་གསུངས་པའི་དོན་བསྡུས་པ། དེར་གནས་ལུས་ཀྱི་ཕྱོགས་བཞི་ལ། རྩ་ལྔ་ཡན་ལག་བཞི་བཅུ་སྟེ། །རེ་རེ་ཡང་ཡལ་ག་བརྒྱ་བརྒྱའོ། །ཀུན་ལ་རྩ་ནི་བརྒྱད་ཁྲི་གནས། །དེར་གནས་སྲིན་བུ་བརྒྱད་ཁྲི་དང་། །མི་གཙང་རྫས་ནི་དུ་མས་གང་། །ཞེས་པའི་དོན་འདི་རྒྱས་པར་གསུངས་སོ། །གཞན་ཡང་དུས་ཀྱི་འཁོར་ལོ་ལས། པགས་པར་སོན་པའི་རྩ་ཕྲ་མོ་བྱེ་བ་ཕྲག་ཕྱེད་དང་བཞིས་བ་སྤུ་བསྐྱེད་པར་བྱེད་པར་གསུངས་སོ། །འདི་རྣམ་ཀྱི་ཁམས་གང་ཡིན་པ་བསྟན་པའི་རིམ་པ་ནི། ལྟེ་བ་ནི་སའི་ཁམས། སྙིང་ཁ་ནི་རླུང་། མགྲིན་པ་མེ། སྤྱི་བོ་ཆུ། གཙུག་ཏོར་ནི་ནམ་མཁའ། གསང་བ་ནི་ཡེ་ཤེས་བདེ་བའི་རིགས་སུ་གསུངས་ཏེ། འདི་ནི་ཁྱབ་པར་བྱ་བ་ལ་ཁྱབ་པར་བྱེད་པས་བསྡུས་པ་ཡིན་ནོ། གཞན་ཡང་། ལྟེ་བ་དང་གསང་བ་གཉིས་ཐབས་དང་ཤེས་རབ་ཏུ་བྱེད་པའི་སྐབས་སུ་ནི། གསང་བ་ཡེ་ཤེས་ཀྱི་ཁམས་སའི་རང་བཞིན་དུ་བྱེད་པ་ན། ལྟེ་བ་རླུང་དུ་འགྱུར་ལ། ལྟེ་བའི་འཁོར་ལོ་སའི་ཁམས་སུ་བྱེད་པ་ན། སུམ་མདོ་རླུང་དུ་བྱས་པ་ལ་འགལ་པ་མེད་དོ། །ཡང་སྤྱི་བོ་རླུང་གི་ཁམས་སུ་བྱས་ན། གཙུག་ཏོར་ཡེ་ཤེས་ཀྱི་ཁམས་སུ་འགྱུར་བས། མགྲིན་པ་དང་སྙིང་ཁ་ཐབས་དང་ཤེས་རབ་ཏུ་བྱ་དགོས་པས། སྙིང་ཁ་ཆུའི་ཁམས་སུ་བྱས་ལ། མགྲིན་པ་ནི་མེའི་ཁམས་ཡིན་ན། །རྒྱུ་མཚན་འདིས་ཁྱབ་བྱ་ཁྱབ་བྱེད་གཉིས་དང་། འཁོར་ལོ་བཞི་ལ་ཐབས་ཤེས་རབ་ཆ་གཉིས་དང་། འཁོར་ལོ་དྲུག་ལ་ཕ་དང་མའི་རིགས་སུ་བཤད་པས་ཐབས་དང་ཤེས་རབ་ཆ་གསུམ་དུ་གསུངས་པ་སྟེ། མདོར་བསྡུས་ན་ནམ་མཁའ་དང་ཡེ་ཤེས་ཤེས་རབ་ཏུ་བྱས་པ་ན་འབྱུང་བ་བཞི་ག་ཐབས་སུ་འགྱུར་ཞིང་། ནང་ཚན་དུ། ས་རླུང་ཐབས་དང་ཤེས་རབ། མེ་ཆུ་ཐབས་དང་ཤེས་རབ་ཡིན་པས། ཕན་ཚུན་དགྲ་དང་གྲོགས་སུ་འགྱུར་རོ། །རིམ་པ་འདིས་བ་སྤུའི་མཐར་ཐུག་བར་ཁམས་དྲུག་དང་ལྔ་དང་བཞི་དང་གསུམ་དང་གཉིས་ཀྱི་བདག་ཉིད་དུ་བསྟན་པ་ཡིན་ནོ། །དེ་ལྟར་ཡང་དུས་གྱི་འཁོར་ལོ་ལས། ལྷ་དང་མི་རྣམས་ཀྱི་ནི་གཙུག་ཏོར་སྟོང་པའི་ཁམས་སུ་འགྱུར་ལ་གསང་བར་ཡང་ནི་ཡེ་ཤེས་ཁམས། སྙིང་ཁའི་པདྨ་རླུང་གི་ཁམས་ཏེ་གསང་བར་མེ་ནི་ངེས་པར་མགྲིན་པའི་འཁོར་ལོར་འབར་བའོ། །ཆུ་ནི་སྨིན་མའི་དབུས་ཀྱི་པད་མའི་ནོར་ལས་ནོར་གྱི་འདབ་མའི་ལྟེ་བའི་འཁོར་ལོ་སར་འགྱུར་རོ། །རྐང་པ་ལག་པའི་ཚིགས་འཚམས་དྲུག་དང་ས་དང་ཆུ་དང་བྱིན་ཟ་དང་ནི་རླུང་རྣམས་གྲངས་གསུམ་གྱིས། །རྐང་པ་ལག་པ་རྣམས་སུ་ས་ལ་སོགས་པ་ཁམས་ལྔ་རྣམས་ནི་ཡོན་ཏན་གསུམ་གྱི་དབང་གིས་འགྱུར། །སོར་མོ་རྣམས་ཀྱི་རྒན་པོ་ལ་སོགས་གསུམ་གྱིས་བསྒྱུར་བའི་བཅུ་ནི་ཚིགས་ཀྱི་གཟུགས་རྣམས་མ་ལུས་པ། །དེ་དག་སེན་མོའི་མཐར་ཐུག་པར་སྟེ་སླར་ཡང་སོ་ན་དེ་ཉིད་རྣམས་ཀྱིས་རབ་ཏུ་ཕྱེ་བ་ཉིད། །གཞན་ཡང་གང་ཞིག་མཆོག་གི་ལུས་ལ་བ་སྤུའི་མཐར་ཐུག་གྱུར་པ་དེ་དང་དེ་ནི་དེ་ལྟར་ཁམས། ཞེས་བྱ་བ་ལ་སོགས་པ་གསུངས་སོ། །གཞན་ཡང་རྒྱུད་རྣམས་ཀྱི་ལུང་མང་དུ་ཡོད་མོད་ཀྱི་སྤྲོས་པ་ཆོག་གོ །ད་ནི་དེ་དག་གི་འཇུག་བསྡུ་བ་བསྟན་པ་ནི། །དེ་ལྟར་རྩ་ཡི་མཚན་ཉིད་ཤེས། ལུས་ཀྱི་གནས་ལུགས་ཤེས་པར་འགྱུར། །ཞེས་སྨོས་ཏེ་ལུས་ནི་རིལ་པོ་གཅིག་མ་ཡིན་པར་ཁམས་ཐམས་ཅད་ཀྱི་རང་བཞིན་དུ་སྣང་ཡང་ཅིག་པུ་དང་རྟག་པ་དང་བདག་ལ་སོགས་པའི་བདེན་པའི་དངོས་པོས་སྟོང་པ། རྩ་ཐམས་ཅད་ཀྱི་རྣམ་པར་སྣང་བ་འདི་ཡང་། ཉོན་མོངས་པའི་དྲ་བ་ལས་རྣམ་པར་གྲོལ་པའི་ཚེ་ཆུ་ཟླ་ལྟ་བུའི་ཀུན་རྫོབ་ཀྱི་བདེན་པའི་གཟུགས་ཀྱི་སྐུ་རྐྱེན་གཞན་གྱིས་གཞོམ་དུ་མེད་པ་རྡོ་རྗེའི་རང་བཞིན་དུ་འགྱུར་ཏེ། སངས་རྒྱས་རྗེས་སུ་དྲན་པའི་ཏིང་ངེ་འཛིན་རྒྱ་མཚོའི་མདོ་ནས། དེ་བཞིན་གཤེགས་པའི་གཟུགས་ཀྱི་སྐུའི་བ་སྤུའི་ཁུང་བུ་ཐམས་ཅད་ཀྱང་རིན་པོ་ཆེ་ཟུར་དྲུག་པའི་རྣམ་པ་ཁ་དོག་དྲུག་དང་ལྡན་པའི་འོད་ཀྱི་རང་བཞིན་གཏན་པ་མེད་པའི་མཆོད་སྦྱིན་དུ་མས་བསྒྲུབས་པའི་ནུས་པ་དང་ལྡན་པར་གྲུབ་བོ་ཞེས་གསུངས་པའི་དོན་ཁོང་དུ་ཆུད་པར་བྱའོ།། །།

ལེའུ་བཞི་པ། རླུང་གི་རྒྱུ་ཚུལ་བསྟན་པའི་དུམ་བུ།

བཞི་པ་རླུང་བསྟན་པ་ལ་གསུམ་སྟེ། སྤྱིར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོའི་ཚིག་ལྔ་ནི་སྤྱི་དོན་ཡིན་ཏེ། རྩ་བསྟན་པ་དེ་ནས་རླུང་གི་ངོ་བོའི་ཡི་གེ་གནས་ས་དང་བཅས་པ་དང་། བྱེད་ལས་དང་། རྒྱུ་བའི་ཚུལ་དང་། སྟོབས་དང་། སྟོབས་མ་ཡིན་པའི་རིམ་པ་དང་འཇུག་ས་དང་བཟུང་ཐབས་དང་སྐྱོན་དང་ཡོན་ཏན་རྣམས་རླུང་ཇི་སྙེད་པ་ཐམས་ཅད་འདུས་པ་ཡིན་པས་འདིར་བཤད་པར་བྱའོ། །ཞེས་སྨོས་པ་ཡིན་ནོ། །རྒྱས་པར་བཤད་པ་ལ་ལྔ་སྟེ། བསྐྱེད་བྱ་བསྐྱེད་བྱེད་ཀྱི་ངོ་བོ་དང་། གནས་བྱེད་ལས་དང་བཅས་པ་དང་། ཕྱི་ནང་དུ་རྒྱུ་བའི་རིམ་པ་བྱེད་ལས་དང་བཅས་པ་དང་། འཇུག་སྒོ་ཕན་ཡོན་དང་བཅས་པ་དང་། འཁོར་འདས་ཐམས་ཅད་རླུང་གི་རང་བཞིན་དུ་བཤད་པའོ། །དང་པོ་ལ། ཚིགས་སུ་བཅད་པ་དྲུག་སྟེ། དེ་རྣམས་ཀྱི་མདོར་བསྟན་པ་ནི། རླུང་ནི་ངག་དང་དུས་སྦྱོར་སྟེ། ཡི་གེ་ཐམས་ཅད་འདི་ལས་སྐྱེས། ཞེས་བྱ་བ་ལུས་ཅན་རྣམས་ཀྱི་ངག་དུ་བརྗོད་པ་དང་། དབུགས་དང་ཡུད་ཙམ་ལ་སོགས་པའི་དུས་སྦྱོར་དང་། སྲོག་ཆེན་པོའི་ཡི་གེ་ལ་བརྟེན་ནས་སྒྲར་བརྗོད་པ་ཐམས་ཅད་འདི་ལ་བརྟེན་ནས་འབྱུང་སྟེ། །མཚན་ཡང་དག་པར་བརྗོད་པ་ལས། །ཨ་ནི་ཡིག་འབྲུ་ཀུན་གྱི་མཆོག །ཁོང་ནས་འབྱུང་བ་སྐྱེ་བ་མེད། །ཚིག་དུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཞེས་གསུངས་པ་ཡིན་ནོ། །དེ་ནས་རྒྱས་པར་བཤད་པ་ནི། ཐོག་མར་ཀུན་གཞིའི་རྣམ་པར་ཤེས་པ་ལ་བརྟེན་ནས། དེ་ལ་གནས་པའི་ཡིད་འདུ་བྱེད་པའི་ཕྱིར། སྲོག་རླུང་ཨ་ཡི་རྣམ་པ་ཅན་འགྲུབ་བོ། །འདི་ནི་ནམ་མཁའི་ཁམས་ཀྱི་རང་བཞིན་ཡིན་ནོ། །དེ་ལས་གཉིས་པ། ཐུར་སེལ་གྱི་རླུང་ནི་སའི་ཁམས་དང་ལྀའི་ཡི་གེའོ། །གྱེན་དུ་རྒྱུ་བ་ནི་མེའི་ཁམས་དང་རྀའི་ཡི་གེའོ། །མེ་མཉམ་ནི་རླུང་གི་ཁམས་དང་ཨིའི་ཡི་གེ་ཞེས་བརྗོད་དོ། །ཁྱབ་བྱེད་ཀྱི་རླུང་ནི་ཆུའི་ཁམས་དང་ཨུའི་ཡི་གེར་འགྱུར་རོ། །རིམ་པ་འདི་ནི་དུས་ཀྱི་འཁོར་ལོ་ལས་ཐུར་སེལ་ཞེས་བྱ། རྣམ་པ་གསུམ་ནི་ཡེ་ཤེས་ཁམས་སུ་འགྱུར་ལ་སྲོག་རླུང་ཡང་ནི་སྟོང་པའོ། །རླུང་ནི་ནང་དུ་མཉམ་གནས་ཡིན་ལ་སླར་ཡང་མེ་ནི་གྱེན་རྒྱུ་ཁྱབ་བྱེད་ཉིད་ནི་ཆུ་ཡིན་ནོ། །ཞེས་གསུངས་པའི་དོན་ཡིན་ནོ། །ཡང་དགོངས་པ་གཞན་ལས་གྱེན་རྒྱུ་ཆུའི་ཁམས་དང་། མེ་མཉམ་ནི་མེའི་ཁམས་དང་། ཁྱབ་བྱེད་ནི་རླུང་གི་ཁམས་སུ་འཆད་དེ་དེ་ནི། ཁ་ནས་རྒྱུ་བའི་རླུང་ཆུ་ཡིན་པ་དང་། ཕོ་བར་ཁ་ཟས་སྲེག་པའི་དོན་དང་། ལུས་ཐམས་ཅད་དུ་ཁྱབ་པའི་བྱེད་ལས་ཙམ་གྱི་དགོངས་པ་ཡིན་ནོ། །དེ་ནས་ཡན་ལག་གི་རླུང་ལྔ་ནི། ཀླུའི་རླུང་ནི་སའི་ཁམས་ཀྱིས་བསྐྱེད་པས་ཡེ་ཤེས་ཀྱི་རང་བཞིན་ཡིན་པའི་ཕྱིར། ནམ་མཁའི་ཡི་གེ་ཨཱ་རིང་པོའོ། །རུས་སྦལ་ནི་རླུང་གི་ཁམས་ཏེ་ཨིའི་ཡི་གེར་བཤད་དོ། །རྩངས་པ་ནི་མེའི་ཁམས་ཏེ་ཡི་གེ་ཨར་ཡིན་ནོ། །ལྷ་སྦྱིན་ནི་ཆུའི་ཁམས་ཏེ་ཡི་གེ་ཨོ་རུ་འགྱུར་རོ། །ནོར་ལས་རྒྱལ་གྱི་རླུང་ནི་སའི་ཁམས་ཏེ་ཨལ་གྱི་ཡི་གེ་ཡིན་ནོ། །འདི་རྣམས་ཀྱང་། ཀླུ་ནི་ས་ཡིན་དེ་ནས་རུས་སྦལ་དང་ནི་རྩངས་པའི་རླུང་དང་ལྷ་སྦྱིན་དང་ནི་ནོར་ལས་རྒྱལ། །བཞི་པོ་རྣམས་ནི་རླུང་དང་མེ་དང་ཆུ་དང་ས་རྣམས་ལས་ནི་རིམས་ཀྱིས་འབྱུང་བར་འགྱུར། ཞེས་གསུངས་སོ། །རླུང་བཅུ་པོ་འདི་ཐོག་མར་ཟླ་བ་རེ་རེ་ལ་རིམས་ཀྱིས་ནུས་པའི་སྟོབས་བསྐྱེད་ནས་སོ་སོའི་བྱེད་ལས་ནི་དུས་ཐམས་ཅད་དུ་བྱེད་ལ། ནུས་པ་སྡུད་པ་ནི། སྐྱེས་བུ་ཚེ་ལོ་བརྒྱ་པ་ལ་ལོ་བཅུ་བཅུར་བཤད་དོ། །འདི་ལ་བརྟེན་ནས་ཕུང་པོ་རྣམ་པ་ལྔ་དང་རླུང་སྦྱར་བ་ནི། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་སེམས་ཉིད་རང་བཞིན་གྱིས་འོད་གསལ་བ་ནི། ཡེ་ཤེས་ཀྱི་རླུང་ཡིན་ལ། དེ་ལ་མུན་པའི་སྣང་བ་ཞེས་བྱ་བ་ཀུན་གཞི་ཉོན་མོངས་པ་ཅན་གྱི་ཡིད་དང་བཅས་པ་ནི། ནམ་མཁའི་རླུང་དང་། འདུ་བྱེད་ནི་གཡོ་བའི་མཚན་ཉིད་ཡིན་པས་རླུང་གི་རླུང་དང་། ཚོར་བ་ནི་རྒྱུད་སྲེག་པའི་མཚན་ཉིད་ཡིན་པས་མེའི་རླུང་དང་། འདུ་ཤེས་ནི་ཡུལ་ལ་མཚན་མར་འཛིན་ཅིང་སྡུད་པ་ཡིན་པས་ཆུའི་རླུང་དང་། གཟུགས་ནི་སྲ་བ་ལ་སོགས་པའི་མཚན་ཉིད་ཡིན་པས་སའི་རླུང་སྟེ། རིམ་པས་སྣང་བ་ལས་མུན་པ། མུན་པའི་སྣང་བ་ལས་མཆེད་པ། དེ་ལས་ཉེ་བར་ཐོབ་པ་འབྱུང་བས་བསྐྱེད་བྱ་བསྐྱེད་བྱེད་དུ་གསུངས་སོ། །དུས་འཁོར་ལས་གཟུགས་ནི་ས་ལས་གྲུབ་ཅིང་སྲིད་པ་གསུམ་གྱི་གནས་སུ་ཆུ་ལས་ཀྱང་ནི་འདུ་ཤེས་འགྲུབ་པར་འགྱུར། །མེ་ལས་ངེས་པར་ཚོར་བ་ཡང་སྟེ་རླུང་རྣམས་ལས་ཀྱང་འདུ་བྱེད་ཕུང་པོ་ཉིད་དུ་འགྱུར་བ་ཡིན། །རྣམ་ཤེས་དང་ནི་ཡེ་ཤེས་འདྲེས་པ་ནམ་མཁའ་རྡོ་རྗེར་བཅས་པས་འདིར་ནི་ལུས་ལས་གྲུབ་པ་ཉིད། ཞེས་གསུངས་སོ། །གཉིས་པ་གནས་བྱེད་ལས་དང་བཅས་པ་བཤད་པ་ནི། ད་ལྟར་ལུས་གནས་ལས་བྱེད་པ། ཞེས་བྱ་བ་ནས་ཚིགས་སུ་བཅད་པ་དགུ་སྟེ། འདི་ལ་ཡང་ཐོག་མར་སྲོག་འཛིན་པའི་རླུང་གི་རྒྱས་བཤད་ནི། སྤྱིར་ལུས་རྣམས་ཀུན་ལ་ཁྱབ་ཀྱང་བྱེ་བྲག་ཏུ་བྱེད་ལས་གང་བྱེད་པ་ཡིན་ཞེ་ན། རྩ་བ་དབུ་མ་སྲོག་རླུང་ནི། །དབུས་གནས་ཀུན་གཞི་བརྟེན་པར་བྱེད། །ཞེས་པ་ནི་ཉོན་མོངས་པ་ཅན་གྱི་ཡིད་སྲོག་གི་རླུང་དེ་ཀུན་གཞིའི་རྣམ་པར་ཤེས་པ་དང་ཕན་ཚུན་རྒྱུ་རྐྱེན་དུ་རྣམ་པར་བཞག་པ་སྔར་བཤད་པ་ལྟར་ཡིན་གྱི་ཀུན་གཞི་ཚུར་བརྟེན་ཞེས་པ་ནི་མ་ཡིན་ནོ། །འདི་ནི་གསང་བ་འདུས་པའི་རྒྱུད་ལས། །ནམ་མཁའི་མགོན་པོ་ཞེས་བྱ་བ། །འཆི་བའི་ཚེ་ན་ཡང་དག་རྒྱུ། །ཞེས་གསུངས་ཏེ། ད་ལྟར་ཡང་ཆ་ཤས་དུས་སྦྱོར་གྱི་རླུང་ལ་ཡང་འབྱུང་མོད་ཀྱི། ཁོ་རང་གཙོ་བོ་ནི། དུས་འཁོར་ལས་གསུངས་པ་ལྟར་འཆི་བའི་ཚེ་ཞག་གཅིག་ཏུ་མུན་པ་ཆེན་པོའི་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་སྟེ། དེ་ནས་རྣམ་པར་ཤེས་པ་གཞན་དུ་འཕོ་ཞེས་གསུངས་པ་འདི་ཡིན་ནོ། །མཚོ་བའི་གནས་སྐབས་ན་ནི། །ད་ལྟར་བདག་འཛིན་དྲན་པ་བསྐྱེད། །ཞེས་པ་སྟེ། འདི་མེད་ན་བདག་ཏུ་འཛིན་པ་དང་། རྣམ་པར་རྟོག་པ་ཐམས་ཅད་མི་འབྱུང་མོད་ཀྱང་འདི་ཡོད་པའི་དབང་གིས་སྐྱེའོ། །གལ་ཏེ་གནས་གཞན་དུ་ལོག་ན་ནི་བརྒྱལ་བ་དང་སྨྱོ་བ་དང་འཆི་བ་བསྐྱེད་པར་བྱེད་དོ། །འདི་དང་ལྷན་ཅིག་ཏུ་ཡེ་ཤེས་ཀྱི་རླུང་གསལ་ལ་མི་རྟོག་པ་པྲ་རྣམས་ཀྱི་རང་བཞིན་ལྟ་བུ་དང་འདྲེས་ནས་ཡོད་ཅིང་། ཁ་དོག་མེད་པའི་ཁ་དོག་ཅན་ཡིན་པས། །ལས་དང་ཡེ་ཤེས་འདྲེས་པར་གནས། །ཁ་དོག་ནམ་མཁའ་ལྟ་བུར་བཤད། །ཞེས་སོ། །ཐུར་སེལ་གྱི་རླུང་ནི། འོག་གི་རྩ་གསུམ་འདུས་མདོ་མན་ཆད་དུ་གནས་ཏེ། དེའི་བྱེད་ལས་ནི། དྲི་ཆེན་དང་དྲི་ཆུ་དང་ཁུ་བའི་ཁམས་འབྱིན་སྡོམ་བྱེད་པའི་ཕྱིར། ལོག་ན་ནི་སྨད་ཀྱི་ནད་ཐམས་ཅད་བསྐྱེད་པར་བྱེད་དོ་ཞེས་ཚིག་བཅད་གཅིག་གིས་བསྟན་ཏོ། གྱེན་རྒྱུ་ནི། ལུས་ཀྱི་མདུན་ཕྱོགས་ཀྱི་རྩ་ནས་མགྲིན་པའི་གནས་སུ་ངག་གི་ལས་རྣམས་བྱེད་དེ། ལོག་ན་ནི་རོ་སྟོད་ཀྱི་ནད་བསྐྱེད་དོ་ཞེས་ཚིགས་བཅད་གཅིག་གིས་བསྟན་ཏོ། །མེ་མཉམ་ནི། ཕོ་བར་ཟུག་ནས་ཁ་ཟས་ཀྱི་དྭངས་སྙིགས་འབྱེད་ཅིང་ལོག་ན་ཕོ་བའི་ནད་བསྐྱེད་ཅེས་ཚིགས་བཅད་གཅིག་གོ །ཁྱབ་བྱེད་ནི། གཡས་རོ་མ་དང་འབྲེལ་ནས་ལུས་ཀྱི་ཚིགས་ཐམས་ཅད་དུ་ཁྱབ་པར་བྱེད་པས། ལོག་ན་ཞ་རེངས་ལ་སོགས་པའི་ནད་བསྐྱེད་དོ་ཞེས་ཚིགས་བཅད་གཅིག་གོ །ཡན་ལག་གི་རླུང་རྣམས་ནི་བདེན་བྲལ་རྒྱབ་ཕྱོགས་རླུང་འཚམས་དང་། གཡོན་ཕྱོགས་དབང་ལྡན་རིམ་པ་ལྟར། ཀླུ་སོགས་ཡན་ལག་རླུང་ལྔ་སྟེ། །ཞེས་སྨོས་པ་ནི་དྲི་མ་མེད་པའི་འོད་ལས་སྲོག་སྟེང་དུ་རྒྱུ་སྟེ་ཐུར་སེལ་ལྟེ་བའི་འོག་ཏུ་རྒྱུའོ། །མཉམ་པ་ཤར་གྱི་འདབ་མ་ལ་སྣར་མའི་རྩ་ལ་ལྷག་པའི་ལྷའོ། །གྱེན་རྒྱུ་མེའི་འདབ་མ་ལ་གླང་པོ་ཆེའི་ལྕེའི་རྩའོ། །ཁྱབ་བྱེད་ལྷོའི་འདབ་མ་ལ་སེར་སྐྱའི་རྩའོ། །ཀླུ་བདེན་བྲལ་གྱི་འདབ་མ་ལ་རྒྱལ་གྱི་རྩའོ། །རུས་སྦལ་ཆུའི་འདབ་མ་ལ་རྒྱལ་བའི་རྩའོ། །རྩངས་པ་རླུང་གི་འདབ་མ་ལ་ཀུན་ཏུ་འཕྱང་པའི་རྩའོ། །ལྷ་སྦྱིན་བྱང་གི་འདབ་མ་ལ་ཨི་ཌའི་རྩའོ། །ནོར་རྒྱལ་དབང་ལྡན་གྱི་འདབ་མ་ལ་ཚུལ་འཆོས་པའི་རྩའོ། །ཞེས་གསུངས་སོ། །དེ་དག་གི་བྱེད་ལས་ནི་ཡུལ་ལྔ་འཛིན་པ་དང་སྒེག་པ་ལ་སོགས་པ་རྣམས་གཞུང་དུ་བཤད་པ་ཁོ་ན་ཡིན་ལ། ནོར་ལས་རྒྱལ་གྱི་བྱེད་ལས་ཀྱི་ཕྱོགས་ཅིག་ཤི་ནས་མ་འཐོར་བར་ལ་གནས་ཞེས་པའི་དོན་དུས་ཀྱི་འཁོར་ལོ་ལས་ཤི་བའི་ལུས་ལས་མི་གཏོང་ཞེས་པ་དང་། འགྱུར་ལ་ལ་ན་ཞག་གཅིག་གི་བར་ཞེས་བྱུང་སྟེ། དོན་ལ་ལུས་ཀྱི་སྲ་བའི་ཁམས་ཀྱི་རྡུལ་ཕྲ་རབ་མ་འཐོར་གྱི་བར་ལ་ཡོད་པར་རིགས་ཏེ། ཁམས་གཅིག་ལ་ཡང་ཁམས་ལྔ་ལྡན་དུ་བཤད་པའི་དོན་ཏོ། ད་ལྟ་རླུང་གི་ཐུན་ཆེན་པོ་བརྒྱད་ཀྱི་རང་བཞིན་ནོ། །འདི་རྣམས་ལའང་ལུང་མང་དུ་གསུངས་མོད་ཀྱི་ཡི་གེས་འཇིགས་པའི་ཕྱིར་མ་བྲིས་སོ། །གསུམ་པ་ཕྱི་ནང་དུ་རྒྱུ་བའི་རིམ་པ་བྱེད་ལས་དང་བཅས་པ་བཤད་པ་ལ་བཞི་སྟེ། ནང་དུ་རྒྱུ་བ་དང་། ཕྱིར་རྒྱུ་ཚུལ་དང་། ཇི་ལྟར་རྒྱུ་བའི་རིམ་པ་ཁ་དོག་དང་སྟོབས་དང་ཡོན་ཏན་བཤད་པ་དང་། རྒྱུད་ཕན་ཚུན་གྱི་དགོངས་པ་མི་འགལ་བར་བསྟན་པའོ། །དང་པོ་ནི། །རྒྱུ་ཚུལ་ཕྱི་ནང་གཉིས་ཡིན་ཏེ། །ཞེས་པ་ནས་ཚིགས་སུ་བཅད་པ་བཅུ་གཅིག་སྟེ། འདི་ལ་ཡང་། སྙིང་ཁ་དང་། སྤྱི་བོ་དང་། མགྲིན་པ་དང་། ལྟེ་བ་དང་། སྤྱིའི་ཁམས་དང་། ཚིགས་ཀྱི་འཁོར་ལོ་དང་། རྩ་ཐམས་ཅད་ཀྱི་རྒྱུ་ལུགས་དང་། འགག་པའི་ངེས་པ་རྣམས་རིམ་པ་བཞིན་དུ་འཆད་དོ། །དང་པོ་ནི། །སྲོག་རླུང་སྒྲ་གཅན་རང་བཞིན་ནི། །དབུ་མར་རྒྱལ་པོ་ལྟ་བུར་གནས། །ཞེས་བྱ་བ་ནི། མངལ་དུ་ཉེ་བར་སྦྱོར་བ་ནས་འཆི་བ་ལ་ཐུག་གི་བར་དུ་གནས་ཤིང་གཞན་ཐམས་ཅད་ཀྱི་རྟེན་བྱེད་པའི་ཕྱིར་རོ། །ཇི་ལྟར་སྙིང་ཁའི་འཁོར་ལོ་ལྟར། །འཁོར་ལོ་གཞན་ཡང་དེ་བཞིན་ཏེ། །ཞེས་བྱ་བ་ནི། སྙིང་ཁར་གསུངས་པའི་རྩ་བ་དང་ཡན་ལག་གི་རླུང་འབྱུང་བ་བཞིའི་དབྱེ་བས། བརྒྱད་དུ་བཤད་པ་དེ་བཞིན་དུ་འཁོར་ལོ་གཞན་ཐམས་ཅད་ལ་ཡང་། སྡེ་ཚན་བརྒྱད་ཀྱི་རང་བཞིན་དུ་རྒྱུའོ། །དེས་ན་འཁོར་ལོ་དྲུག་ལ་རླུང་སྡེ་ཚན་དྲུག་ཅུ་ཐམ་པའོ། །དེ་ལས་བྱེ་བྲག་ཏུ་རྩའི་མང་ཉུང་དང་ཕྱི་ནང་གི་སྦྱོར་བས་མང་ཉུང་དུ་བཤད་པ་ཡིན་ནོ། །དེ་ནས་སྤྱི་བོའི་འཁོར་ལོ་བཤད་པ་ནི། །སྤྱི་བོའི་འཁོར་ལོ་སུམ་ཅུ་གཉིས། ཟླ་བའི་རྐང་པ་དང་མཚུངས་པའི། རླུང་རྒྱུ་དེ་ཕྱིར་བཅུ་དྲུག་བཤད། །ཅེས་སྨོས་ཏེ། ལུས་ལ་གནས་པའི་དུས་ན་ཕྱིའི་རྩ་བཅུ་དྲུག་ཡོད་པ་ནི་ཁྲག་གཙོ་བོར་རྒྱུ་ལ། ནང་གི་རྩ་བཅུ་དྲུག་ནི། ཟླ་བའི་རྐང་པ་དང་མཚུངས་པའི་རླུང་དང་བྱང་ཆུབ་ཀྱི་སེམས་རྒྱུ་བས་དེའི་ཕྱིར་བཅུ་དྲུག་ཏུ་དུས་འཁོར་ལས་བཤད་དོ། །དེ་ལ་ཡང་དབུ་མ་ལ་འཇུག་པས་གཉིས་ནི་སྟོང་པའི་རང་བཞིན་ཡིན་ལ། ཟླ་བའི་རྐང་པ་ཡང་འཕེལ་བ་དང་ཟད་པ་བཅུ་བཞི་ཡོད་པས། གཞན་དག་བཅུ་བཞི་རིམ་པ་ལྟར་རྩ་རྣམས་ལ་རྒྱུ་སྟེ། དེ་ཡང་གང་ཞེ་ན། རྩ་དང་པོ་གསུམ་ལ་གཟུགས་སྒྲ་དྲི་རོ་རེག་བྱའི་ཡོན་ཏན་ལྔ་དང་ལྡན་པའི་རླུང་རྒྱུའོ། །རྩ་བཞི་པ་ལ་ཡོན་ཏན་གཅིག་བྲི་བས་ཡོན་ཏན་བཞི་ལྡན་པ་རྒྱུའོ། །ལྔ་པ་ལ་ཡོན་ཏན་གསུམ་དང་ལྡན་པ་རྒྱུའོ། །དྲུག་པ་ལ་ཡོན་ཏན་གཉིས་དང་ལྡན་པ་རྒྱུའོ། །བདུན་པ་ལ་ཡོན་ཏན་གཅིག་དང་ལྡན་པ་རྒྱུའོ། །ཕྱི་མའི་རྩ་བདུན་རིམ་པས་བཟློག་པ་ནི། རྩ་བརྒྱད་པ་ལ་ཡོན་ཏན་གང་ཡང་མེད་པས་སྟོངས་པའི་ཕྱིར། ལྟག་ཁུང་གི་རྩ་ཡིན་ལ། དགུ་པ་ནས་ཡོན་ཏན་གཅིག་དང་། བཅུ་པ་གཉིས་དང་བཅུ་གཅིག་པ་གསུམ་དང་། བཅུ་གཉིས་པ་ལ་བཞི་དང་། བཅོ་ལྔའི་བར་གསུམ་ལ་ཡོན་ཏན་ལྔ་པ་དང་། དཔྲལ་བའི་ཐིག་ལེར་སྲོག་ཡོངས་སུ་གང་བའི་ཡེ་ཤེས་ཀྱི་རང་བཞིན་ཡིན་པས་རྩའི་ནང་དུ་རླུང་རྒྱུ་རིམ་གྱིས་ཡོན་ཏན་བསྟན་པ་ཡིན་ལ། དོན་ལ་ཞག་གཅིག་ལ་དབྱུག་གུ་ཉི་ཤུ་རྩ་བརྒྱད་དང་། ནམ་མཁའ་ཡེ་ཤེས་ཀྱི་སྟོང་པ་གཉིས་སམ་བཞི་སྟེ། སྤྱིར་ན་དེ་དག་བསྡོམས་པས། ཆུ་ཚོད་སུམ་ཅུ་རྩ་གཉིས་དང་། ཡུད་ཙམ་སུམ་ཅུའི་བདག་ཉིད་ཀྱི་དག་པར་རྒྱུད་ཕན་ཚུན་ནས་བརྗོད་དོ། །མགྲིན་པ་རུ་རླུང་རྒྱུ་ཚུལ་ནི། མགྲིན་པར་རྩ་ནི་བཅུ་དྲུག་གོ །ཐབས་ཤེས་དབྱེ་བས་སུམ་ཅུ་གཉིས། །ཞེས་པ་ནི་རྒྱུ་ས་རྩ་ཡིན་ལ། ཇི་ལྟར་རྒྱུ་ཞེ་ན། དེ་ལ་བཞིར་ནི་སྟོང་པ་རྒྱུ་བ་སྟེ་དབུ་མའི་རིགས་སོ། །ལྷག་མ་ཉི་ཤུ་རྩ་བརྒྱད་པོ་ལ། གཞན་དག་ཕྱོགས་བཞིར་བདུན་བདུན་དུ། རྒྱུ་སྐར་ལོངས་སྤྱོད་དང་མཚུངས་རྒྱུ། །ཞེས་སྨོས་ཏེ། ཉི་ཤུ་རྩ་བརྒྱད་དང་། སྟོང་པ་ཡེ་ཤེས་ཀྱི་ཆར་བཅས་པའི་ཡུད་ཙམ་དང་དབྱུག་གུའི་བདག་ཉིད་ཀྱི་རླུང་རྒྱུའོ། །རྡོ་རྗེ་ཕྲེང་བ་དང་། བདེ་མཆོག་གི་རྒྱུད་རྣམས་སུ་མགྲིན་པ་ན་འཕོ་བ་བཅུ་དྲུག་གི་རྣམ་དག་ཏུ་གསུངས་པ་ནི། གོང་མའི་གཉིས་གཉིས་དྲིལ་བ་ཡིན་པས་འགལ་བ་མེད་དོ། །ལྟེ་བའི་ནང་གི་རྩ་ལ་རླུང་རྒྱུ་བའི་ཚུལ་ནི། ལྟེ་བའི་རྩ་ནི་དྲུག་ཅུ་བཞི། །ཁྱིམ་གྱི་དབྱེ་བས་ཕྱེ་བས་ན། །ཞེས་པ་ནི་སྔར་བཤད་པའི་རྩ་རྣམས་ཡིན་ལ། དེའི་ནང་དུ་ལྔ་ཚན་བཅུ་གཉིས་ལ་དྲུག་ཅུ་སྟེ། །དབྱུ་དགུ་དྲུག་ཅུའི་བདག་ཉིད་དོ། །དེ་ལ་གཡས་གཡོན་གྱི་ཆ། །ལུག་དང་གླང་གི་རྩ་ལྔ་ལྔར། །ས་ཆུ་མེ་རླུང་ནམ་མཁའ་དང་། ནམ་མཁའ་རླུང་མེ་ཆུ་སའི་སྡུད་པ་དང་བསྐྱེད་པའི་རིམ་པས་དྲུག་ཅུའི་བདག་ཉིད་དོ། །བཞི་ནི་སྟོང་པ་ཞེས་པ་ཡེ་ཤེས་ཀྱི་ཆ་དབུ་མ་ལ་རྒྱུའོ། །སྤྱིའི་ཁམས་བཤད་པ་ནི། །ཀུན་ཀྱང་མདུན་ཕྱོགས་ཐམས་ཅད་རླུང་། །གཡས་མེ་གཡོན་ཆུ་རྒྱབ་ཕྱོགས་ས། །ཞེས་བྱ་བ་ནི་འཁོར་ལོ་རྣམས་ཀྱི་རགས་པའི་སྡེ་ཚན་ཡིན་པས། སྤྱིར་ཡང་ཁམས་དེ་ཡིན་ལ། བྱེ་བྲག་གི་རྩ་བྲན་ལྔ་པོ་ལ་ཡང་། ནམ་མཁའ་ནི་དབུས་ཀྱི་ཆ་ཡིན་ལ། གཞན་རྣམས་ལ་ཕྱོགས་ཀྱི་དབྱེ་བས་དེ་སྐད་དུ་གསུངས་སོ། །ཚིགས་ཀྱི་འཁོར་ལོ་ལ་ནི། དེ་བཞིན་དུ་ཚིགས་ཆེན་བཅུ་གཉིས་ཀྱི་འཁོར་ལོ་རེ་རེ་ལ་རྩ་སུམ་ཅུའི་ནང་དུ་རླུང་རྒྱུ་བས་སུམ་ཅུ་སྟེ། ཀུན་ལ་སུམ་བརྒྱ་དྲུག་ཅུའི་སྲོག་ནི་རླུང་དེ་དག་ཐམས་ཅད་ཀྱི་གྲངས་སོ། །ཉིང་ལག་སོར་མོའི་རྩ་རྣམས་ཀྱང་དེ་དང་མཚུངས་པ་ཡིན་ཏེ་སུམ་བརྒྱ་དྲུག་ཅུ་ཡིན་ནོ། །འདི་རྣམས་ཐམས་ཅད་ཀྱི་ངེས་པ་དུས་ཀྱི་འཁོར་ལོར། གཟའ་རྣམས་སྙིང་ཁའི་པད་མའི་འདབ་མར་དབྱུག་གུ་དྲུག་ཅུ་རྣམས་ནི་གསལ་བར་ལྟེ་བའི་པད་མར་རོ། །སྨིན་མའི་དབུས་སུ་རྒྱལ་པོ་ངེས་པར་ཉིན་ཞག་རྐང་པ་བཅུ་བཞི་སྐར་མ་ལོངས་སྤྱོད་འཁོར་ལོར་ཡང་། །ལྟེ་བའི་པད་མར་སླར་ཡང་སྐར་མ་རྣམས་ཀྱི་དབྱུག་གུ་རྣམས་ནི་རྣལ་འབྱོར་པ་ཡིས་རིག་པར་བྱ། །དབྱུག་གུ་ཆུ་སྲང་རྣམས་ནི་རྐང་པ་ལག་པ་ལ་སོགས་གསལ་བར་ལུས་ཀྱི་ཚིགས་རྣམས་མ་ལུས་པ། །ལྟེ་བའི་པད་མ་ཉི་མའི་འདབ་མར་མཆོག་གི་ཆ་ནི་འཁོར་ཞིང་རིམས་ཀྱིས་ཀྱང་ནི་འཕོ་བར་བྱེད། །ཞེས་གསུངས་པ་ཡིན་ནོ། །རྩ་ཐམས་ཅད་ཀྱི་རྒྱུ་ལུགས་བཤད་པ་ནི། དེ་ནས་སྟོང་ཕྲག་ཉི་ཤུ་བཞིར། །འགྲོ་བས་དབུ་མའི་བདག་ཉིད་གསུངས། །ཞེས་སྨོས་ཏེ། འདི་ནི་གསང་བ་འདུས་པའི་རྒྱུད་འགྲེལ་གྱི་དགོངས་པ་འབྱུང་བ་ལྔའི་རླུང་ཁོ་ན་རྒྱུ་བར་བྱེད་པའི་རྩ་ཉི་ཁྲི་བཞི་སྟོང་པོ་འདི་ནི་དབུ་མར་ནམ་མཁའ་དང་སྒྲ་གཅན་གྱི་བདག་ཉིད་ཐུགས་ཀྱི་རྡོ་རྗེའི་ངོ་བོའོ། །དཀར་དམར་གྱིས་ཕྱེ་དེ་དང་མཉམ་པ་ནི། ཁྲག་འབབ་པའི་གསུང་རྡོ་རྗེའི་ངོ་བོ་ཉི་ཁྲི་བཞི་སྟོང་དང་སྐུ་རྡོ་རྗེའི་ངོ་བོ་དཀར་ཆ་འབབ་པ་ཉི་ཁྲི་བཞི་སྟོང་སྟེ་དེ་ཐམས་ཅད་དུ་ཡང་རླུང་གིས་ལས་བྱེད་པའི་ཕྱིར་བདུན་ཁྲི་ཉིས་སྟོང་དུ་ཞག་གཅིག་ལ་རླུང་ཉི་ཁྲི་ཆིག་སྟོང་དྲུག་བརྒྱ་ཕྱི་རོལ་གཅིག་གི་དུས་སྦྱོར་དང་མཚུངས་པར་རྒྱུ་ཞིང་། དབུགས་དབྱུང་རྔུབ་གཅིག་ཀྱང་བ་སྤུའི་མཐར་ཐུག་པར་འགྲོ་ཞིང་རྒྱུ་བས་ན། །སྟོང་ཕྲག་བདུན་ཅུ་རྩ་གཉིས་སུ། །ཉི་ཁྲི་གཅིག་སྟོང་དྲུག་བརྒྱའི་རླུང་། །དེ་ལྟར་ནང་ན་རྒྱུ་བར་འགྱུར། །ཞེས་སྨོས་པ་ཡིན་ནོ། །ཞར་ལ་རླུང་དེ་དག་འགག་པའི་དུས་ཀྱི་ངེས་པ་བསྟན་པའི་ཕྱིར། །གང་ཚེ་ལུག་སོགས་རྩ་གཅིག་དུ། །རླུང་འགགས་དེ་ཚེ་ཕྱོགས་ཀུན་འདྲ། ཞེས་བྱ་བ་ནི་གང་གི་ཚེ་ལུས་ཅན་རྣམས་ཀྱི་དུས་སུ་འཆི་བའི་ལྟས་ནི། ལྟེ་བའི་ལུག་ལ་སོགས་པའི་རྩ་གཅིག་འགགས་པར་གྱུར་པ་དེའི་ཚེ་རྩ་ཆེན་པོ་ཉི་ཤུ་རྩ་བཞི་རྩ་བྲན་དང་རྣམས་སུ་ཡང་ཆ་ཤས་དེ་ཁོ་ན་བཞིན་དུ་འགག་པར་འགྱུར་ལ། གཞན་ནི་འོག་ནས་སྡུད་པའི་རིམ་པར་རྒྱས་པར་འཆད་དོ། །འདི་ལ་དབྱེ་བ་དཔག་མེད་ཀྱང་། །ཕྱི་རོལ་རྩིས་དང་མཚུངས་པ་ཡིན། །ཞེས་བྱ་བ་ནི། ཕྱི་རུ་ལོ་གཅིག་ནང་དུ་ཞག་ཅིག་དང་། ཕྱིའི་ཟླ་བ་བཅུ་གཉིས་ནང་དུ་རླུང་གི་འཕོ་བ་བཅུ་གཉིས་དང་། འཕོ་བ་རེ་རེ་ལ་དཀྱིལ་འཁོར་ལྔ་ལྔ་ཡོད་པས་དཀྱིལ་འཁོར་དྲུག་ཅུ་དང་། དཀྱིལ་འཁོར་དྲུག་བཅུ་ནི་དབྱུ་གུ་དྲུག་བཅུ་དང་། ཕྱིའི་ལོ་གཅིག་གི་ཆུ་ཚོད་ཉི་ཁྲི་གཅིག་སྟོང་དྲུག་བརྒྱ་ནི་ནང་དུ་རླུང་ཉི་ཁྲི་གཅིག་སྟོང་དྲུག་བརྒྱ་དང་། དེ་ལ་ཡེ་ཤེས་ཀྱི་རླུང་དྲུག་བརྒྱ་བདུན་བཅུ་རྩ་ལྔ་ཡོད་པ་ནི། ཕྱི་རོལ་གྱི་ལོ་གཅིག་ལ། ཞག་བཅུ་གཅིག་བཞི་ཆ་ལྷག་པར་སྣང་བ་དང་། དེ་ལྟ་བུའི་སྦྱར་བཤད་མང་དུ་ཡོད་དེ། ཞིབ་ཏུ་ཁོ་བོས་རྩིས་ཐམས་ཅད་བསྡུས་པའི་རྟོག་པར་བཤད་ཟིན་པས་དེར་བལྟ་བར་བྱའོ། །ད་ནི་ཕྱི་རོལ་དུ་རྒྱུ་བའི་ཚུལ་བཤད་པ་ནི། སྤྱིར་བསྟན་པ་དང་དུས་སྦྱོར་རྒྱས་བཤད་དང་། དབུ་མའི་ཆ་བཤད་པ་དང་གསུམ་ལས། དང་པོ་ནི་ཚིག་བཅད་གསུམ་དང་། རྐང་པ་གསུམ་སྟེ། དེ་ནས་ཕྱི་རོལ་རྒྱུ་བ་བཤད། །བ་སྤུ་དབང་པོའི་སྒོ་ཀུན་ནས། །རྒྱུ་ཡང་ཁྱད་པར་འཇུག་པའི་སྒོ། །ཞེས་པ་སྔར་བསྟན་པ་ལྟར་ཐམས་ཅད་དུ་རྒྱུ་ཡང་། བྱེ་བྲག་ཏུ་རླུང་ཐམས་ཅད་ཀྱི་འཇུག་སྒོ་ཆེན་པོ་ཡིན་པས། ལྟེ་བའི་དཀྱིལ་འཁོར་ནས་སྣར་རྒྱུ་བའི་ཚུལ་ནི། རོ་རྐྱང་གི་རྩ་ཆེན་གཉིས་བརྒྱུད་ནས་སྣ་བུག་དུ་འབྱུང་སྟེ། གཡས་པ་ཉི་མ་དུག་གི་རླུང་ནི། གཡས་པ་ཉི་མ་ཐབས་ཀྱི་ཆ་ཡིན་ཀྱང་། ངོ་བོ་གསུང་རྡོ་རྗེའོ། །གཡོན་པ་ཟླ་བ་བདུད་རྩི་ཤེས་རབ་ཀྱི་རང་བཞིན་སྟེ། ངོ་བོ་སྐུ་རྡོ་རྗེའོ། །དེ་གཉིས་རེ་རེ་ལ་རླུང་ཁྲི་དང་བཞི་བརྒྱ་དྲུག་བཅུ་རྩ་ཕྱེད་དང་གསུམ་པ་ཚན་པ་རེ་རེ་ནི་གཡས་གཡོན་གྱི་སྣང་བུག་རེ་རེ་ནས་འབྱུང་བའི་ཕྱིར་ལས་རླུང་ཐམས་ཅད་ལ་ཉི་ཁྲི་དགུ་བརྒྱ་ཉི་ཤུ་རྩ་ལྔའོ། །དེ་གཉིས་དབུས་ན་རྒྱུ་བའི་རླུང་དྲུག་བརྒྱ་བདུན་བཅུ་རྩ་ལྔ་ཡོད་དེ། དེ་ནི་ཕྱི་རོལ་དུ་སྒྲ་གཅན་དང་། གོ་འབྱེད་པའི་ཕྱིར་ནམ་མཁའ་དང་། དབུ་མ་ལ་འཇུག་པའི་དོན་གྱིས་ཡེ་ཤེས་ཀྱི་རླུང་སྟེ། ཐབས་ཤེས་རབ་གཉིས་སུ་མེད་པ་ཐུགས་རྡོ་རྗེའི་རང་བཞིན། གཡས་པ་ནི་གསུང་གི་རྡོ་རྗེ། གཡོན་པ་ནི་སྐུའི་རྡོ་རྗེའི་རང་བཞིན་ཡིན་ནོ། །དེ་ལ་ངོ་བོའི་དབྱེ་བ་ཡིས་འོག་ནས་སྟོན་པ་ལྟར་ས་ལ་སོགས་པ་ལྔའི་བདག་ཉིད་དོ། །འདི་ལ་ཡང་དང་པོ་རྒྱུ་བའི་ཐོག་མ་གང་ཡིན་པ་ཤེས་དགོས་པས། སྐྱེས་དུས་མ་དང་འབྲེལ་པའི་རླུང་། །ཆད་ཅིང་དེ་ནས་སྣར་རྒྱུ་བས། །ཀར་ཀ་ཏའི་ཁྱིམ་དུ་བཤད། །ཞེས་སྨོས་ཏེ། འདི་ནི་སྤྱན་རས་གཟིགས་ཀྱིས། དེ་ཡང་འདིར་ཇི་ལྟར་ཀར་ཀ་ཏའི་དུས་སྦྱོར་གྱིས་དབང་གིས་ཕྱི་རོལ་དུ་ཉི་མ་སྐྱེ་བའི་ཁྱིམ་གང་ལ་སྐྱེས་པའི་ཉི་མ་ཀར་ཀ་ཏཱ་ཡིན་པ་དེ་བཞིན་དུ་སེམས་ཅན་སྐྱེས་པ་ཐམས་ཅད་གང་དུ་སྐྱེ་བའི་དུས་དེར་ཡང་རླུང་རྒྱུ་བར་འགྱུར་བའི་ཁྱིམ་དེ་ཡང་ཀར་ཀ་ཏ་ཁྱིམ་གྱི་མིང་ཅན་དུ་རིག་པར་བྱའོ། །སྲོག་སྐྱེ་བ་ཞེས་པ་ཡང་ཀར་ཀ་ཏའི་དུས་སྦྱོར་གྱི་རིགས་པས་སོ། །ཞེས་གསུངས་པའི་དོན་ཡིན་ནོ། །དུས་སྦྱོར་རྒྱས་པར་བཤད་པ་ནི། ད་ནི་དུས་སྦྱོར་བཤད་པར་བྱ་ཞེས་པ་ལ་སོགས་པ་ཚིགས་སུ་བཅད་པ་བཞི་སྟེ། དེ་ཡང་སྣར་འབྱུང་པའི་རླུང་ནི། ལྟེ་བ་ནས་ཇི་ལྟར་དུ་འབྱུང་ཞེ་ན། སྔར་གོང་དུ་བསྟན་པའི། །རྩ་བ་ཡན་ལག་བཅས་པའི་རླུང་། །ལུས་ཀུན་འཁོར་ལོ་རིམ་བརྒྱུད་དེ། །ལྟེ་བར་སྲོག་གི་ནུས་པ་བསྐྱེད། །ཞེས་སྨོས་ཏེ། སྙིང་ཁའི་ཐུན་བརྒྱད་དང་། མགྲིན་པའི་རྒྱུ་སྐར་གྱི་རླུང་དང་། སྤྱི་བོའི་ཟླ་བའི་རླུང་དང་། ཡུལ་ཉི་ཤུ་རྩ་བཞིའི་རླུང་དང་། ཚིགས་ཆེན་གྱི་འཁོར་ལོའི་རླུང་ཐམས་ཅད་ལྟེ་བའི་ཁྱིམ་བཅུ་གཉིས་གྱི་གནས་སུ་བརྒྱུད་ཅིང་སྲོག་གི་ནུས་པ་བསྐྱེད་དེ། དེ་ནས་སྣར་རྒྱུ་བར་འགྱུར་རོ། །དེའི་ཕྱིར་གླང་ལ་སོགས་པའི་མཉམ་པ་དྲུག་དང་། ལུག་ལ་སོགས་པའི་མི་མཉམ་པ་དྲུག་གི་ཁྱིམ་བཅུ་གཉིས་སུ་རེ་མོས་ཀྱིས་གཡས་དང་གཡོན་ནས་འབྱུང་བས་འཕོ་བ་བཅུ་གཉིས་སུ་འགྱུར་རོ། །དེ་ཉིད་ཀྱི་རིམ་པ་རྒྱས་པར་བཤད་པའི་དོན་དུ། ཉི་མ་ལྷོར་བསྒྲོད་དང་པོ་ལ་ཞེས་སྨོས་པ་ནི། ཉི་མ་ཀར་ཀ་ཏའི་ཁྱིམ་དུ་སྐྱེས་ནས་ལྷོར་བསྒྲོད་པའི་ཟླ་བ་དྲུག་ལ་ཉི་མ་འབྲི་བ་དང་། ཟླ་བ་ནི་སྟོབས་དང་ལྡན་པས་འཕེལ་བར་བཤད་ལ་ཆུ་སྲིན་ལ་སོགས་པའི་ཉི་མ་བྱང་དུ་བསྒྲོད་པ་ཟླ་བ་དྲུག་ལ་ཟླ་བའི་ནུས་པ་འབྲི་བ་དང་ཉི་མའི་ནུས་པ་འཕེལ་བས། འདིར་གཡས་ནས་རྒྱུ་བའི་དུས་སྦྱོར་དྲུག་ནི། ཉི་མའི་སྟོབས་དང་ལྡན་པ་ཐབས་ཀྱི་རླུང་ཡིན་ཀྱང་། ཕྱིར་རྒྱུ་བས་ནུས་པ་ཟད་པའི་ཕྱིར་ཀར་ཀ་ཏ་གཡས་པ་ནས་རྒྱུ་བར་བཤད་དོ། །ཆུ་སྲིན་ནི་གཡོན་པ་ནས་རྒྱུ་བར་བརྗོད་དོ། །དྲི་མ་མེད་པའི་འོད་ལས་དེ་བཞིན་དུ་ཟླ་བ་དྲུག་ལ་ཟླ་བ་དབང་ལྡན་དུ་འགྱུར་ཏེ། བྱང་དུ་ལུག་དང་འཁྲིག་པ་དང་སེང་གེ་དང་སྲང་དང་གཞུ་དང་བུམ་པའི་ཁྱིམ་ལ་གཡོན་གྱི་རྩའི་ཟླ་བ་ཁུ་བའི་ཁམས་བདག་པོའོ། །ལྷོ་རུ་གླང་དང་ཀར་ཀ་ཏ་དང་བུ་མོ་དང་སྡིག་པ་དང་ཆུ་སྲིན་དང་ཉའི་ཁྱིམ་དུ་ཉི་མ་རྡུལ་གྱི་ཁམས་བདག་པོར་འགྱུར་རོ། །ཞེས་གསུངས་པས། འདིར་སྣ་བུག་གཡས་པ་ནས་འབྱུང་བ་ཐོག་མར་བཤད་ལ། འཆི་རྟགས་ཀྱི་སྐབས་ནས། སྐྱེ་བའི་དུས་སུ་གཡས་ནས་དང་པོ་རྒྱུ་ན་གཡས་ནས་འཆི་རྟགས་འཕེལ་བ་དང་། གཡོན་ནས་དང་པོ་རྒྱུ་ན་གཡོན་ནས་འཆི་རྟགས་འཕེལ་བ་ཡང་གསུངས་སོ། །དེ་ལྟར་གསུངས་པའི་གཡས་གཡོན་འཕོ་བ་རྣམས་ཀྱི་གྲངས་ནི། སྣ་བུག་གཡས་ནས་འབྱུང་བའི་རླུང་ལ། ཐོག་མར་སའི་རླུང་སུམ་བརྒྱ་དྲུག་བཅུ་དེ་བཞིན་དུ་ཆུ་དང་མེ་དང་རླུང་དང་། ནམ་མཁའ་རིམ་པ་བཞིན་དུ་འབྱུང་བ་སྡུད་པའི་རིམ་པས་རྒྱུ་བའི་ཕྱིར་སུམ་བརྒྱ་དྲུག་བཅུ་དྲུག་བཅུ་སྟེ། ཀུན་ལ་སྟོང་དང་བརྒྱད་བརྒྱའོ། །དེའི་འོག་དུ་གཡོན་པ་ཟླ་བའི་རླུང་རྒྱུ་བའི་རིམ་པ་ནི། ཡང་ཐོག་མར་ནམ་མཁའི་རླུང་སུམ་བརྒྱ་དྲུག་བཅུ་འབྱུང་ལ། དེ་བཞིན་དུ་རླུང་མེ་ཆུ་དང་སའི་རིམ་པས་གྲངས་གོང་དང་མཚུངས་པར་རྒྱུ་བས། དེ་ལྟར་འཕོ་བ་བཅུ་གཉིས་ལ། ཉི་ཁྲི་གཅིག་སྟོང་དྲུག་བརྒྱ་སྟེ། ཞེས་སྨོས་པ་ཡིན་ནོ། །དེ་ལ་དབུ་མའི་ཆ་བཤད་པ་ནི། ཚིགས་སུ་བཅད་པ་གསུམ་དང་ཚིག་རྐང་གསུམ་སྟེ། དེ་ལ་ཡེ་ཤེས་རླུང་བཤད་པ། །དྲུག་བརྒྱ་བདུན་བཅུ་རྩ་ལྔ་ཡིན། །ཞེས་བྱ་བ་ནི། ཞག་གཅིག་གི་རླུང་ཉི་ཁྲི་གཅིག་སྟོང་དྲུག་བརྒྱའི་ནང་ནས་ཡེ་ཤེས་ཀྱི་རླུང་དྲུག་བརྒྱ་བདུན་བཅུ་རྩ་ལྔའོ། །དེ་ལ་འཕོ་བ་རེ་རེའི་ནང་ནས་དུ་ཡོད་ཅེ་ན། ལྔ་བཅུ་རྩ་དྲུག་དང་བཞི་ཆའོ། །སའི་འབྱུང་ཆུང་ལ་སོགས་པའི་དབྱུ་གུ་དྲུག་བཅུ་པོ་རེ་རེས་བཅུ་གཅིག་བཞི་ཆ་ཐོབ་སྟེ། དེའི་ངེས་པ་དབུགས་གཅིག་ལ་ཡང་ཆ་ཤས་ཡོད་པས། །མདོར་ན་དབུགས་གཅིག་སོ་གཉིས་ཆ། །བསགས་པས་དེ་ལྟར་གྱུར་པ་ཡིན། །དེ་ཡང་ཕྱེད་ནི་ཕྱིར་རྒྱུ་ལ། །ཕྱེད་ནི་དབུ་མར་རྒྱུ་བས་འཕེལ། །ཞེས་སྨོས་པ་ཡིན་ནོ། །འདི་ནི་གཟའ་ཀུན་རྐང་པ་སྟེ། །ཞེས་པ་ནི། ཕྱི་རུ་ཉི་ཟླ་དང་གཟའ་ལྔ་དང་དུ་བ་འཇུག་རིངས་ལ་སོགས་པ་རྣམས་ཀྱི་རྩིས་དག་པར་བྱེད་པའི་རྐང་པ་ཡང་འདིས་བྱེད་ཅིང་། ནང་དུ་སྣ་བུག་གཉིས་ཀྱི་རླུང་དང་། དབང་པོའི་སྒོ་ལྔ་དང་། སྤྱི་གཙུག་དང་། ཐུར་དུ་སེལ་བ་ལ་སོགས་པའི་རླུང་ཐམས་ཅད་དབུ་མའི་ཆ་ཤས་འདི་ལས་འབྱུང་པའི་དོན་ཡིན་ནོ། །འདི་ཕྱིར་འགྲོ་བ་འཕེལ་བ་ལས་འོག་ནས་སྟོན་པའི་དབུ་མའི་འཆི་ལྟས་འབྱུང་ལ། རྣལ་འབྱོར་གྱི་སྟོབས་ཀྱིས་ནང་དུ་ཟིན་ན་རྡོ་རྗེའི་ལུས་འགྲུབ་པའི་རྒྱུ་ཡིན་པས། ཕྱིར་འགྲོ་འཕེལ་བས་འཆི་ལྟས་ཡིན། །ནང་དུ་འཕེལ་བས་འཆི་མེད་འགྲུབ། །ཞེས་སྨོས་སོ། །འདིའི་རླུང་རིམ་པས་བསགས་ན། སྐྱེས་བུ་ཚེ་ལོ་བརྒྱ་པའི་ཡེ་ཤེས་ཀྱི་རླུང་ལོ་གསུམ་དང་ཟླ་བ་ཕྱེད་དང་གཉིས་འབྱུང་བའི་ཕྱིར། ལོ་བརྒྱའི་ལས་རླུང་གི་ཚོགས་ཇི་སྙེད་པ་ཡེ་ཤེས་ཀྱི་རླུང་དུ་གྱུར་ན་སངས་རྒྱས་ཐོབ་པའི་ཕྱིར། དེ་ལ་དགོངས་ནས། ལོ་གསུམ་ཕྱོགས་གསུམ་གྱིས་རྡོ་རྗེ་འཆང་འགྲུབ་པར་འགྱུར་བ་དང་། ཤེས་བྱ་ཐམས་ཅད་རྟོགས་པར་འགྱུར་བའི་ཕྱིར། ལོ་བརྒྱའི་རྒྱུ་བ་བསྡོམས་པས་ན། །ལོ་གསུམ་ཟླ་བ་ཕྱེད་དང་གཉིས། ཞག་སོགས་ཤོལ་དང་འཕེལ་འགྲིབ་རྣམས། །འདི་དོན་རྟོགས་པས་མ་ནོར་འཆར། །ཞེས་སྨོས་པ་ཡིན་ནོ། །ཇི་ལྟར་རྒྱུ་བའི་རིམ་པ་ཁ་དོག་དང་སྟོབས་དང་ཡོན་ཏན་བཤད་པ་ལ། སྣའི་ཕྱོགས་གང་དུ་འབྱུང་བ་དང་། ཁ་དོག་དང་། གཟའ་རྣམས་ལ་སྦྱར་བ་དང་། ལས་གང་འགྲུབ་པ་དང་། ཕྱིར་འགྲོ་བའི་རིང་ཐུང་དང་ལྔས་སྟོན་པ་ལ། །རྒྱུ་རིམས་ཁ་དོག་སྟོབས་ཡོན་ཏན། །ཞེས་བྱ་བ་ནས་ཚིག་བཅད་དྲུག་པོ་འདི་རྣམས་ཤིན་ཏུ་གོ་བདེ་མོད་ཀྱིས་ཀྱང་། ཅུང་ཟད་བཤད་ན། སྣའི་ཀ་བའི་ཕྱོགས་སུ་བདབས་ཏེ་རྒྱུ་བ་ནི་གཉིས་ཀའི་ཆུའི་རླུང་ཡིན་ལ། ཕྱི་རོལ་གཉིས་ནི་མེ་རླུང་ཡིན་ནོ། །སྟེང་གི་ཕྱོགས་གཉིས་ནི་རླུང་གི་རླུང་ཡིན་ལ། འོག་གི་མཆུ་ལ་བརྟེན་པ་གཉིས་ནི་སའི་རླུང་ཡིན་ནོ། །དེ་རྣམས་ཀྱི་དབུས་ནས་རྒྱུ་བ་ནི་ནམ་མཁའ་དང་ཡེ་ཤེས་ཀྱི་ཁམས་སོ། །ཁ་དོག་གི་རིམ་པ་ཡང་། ས་རླུང་སེར་པོ། ཆུ་རླུང་དཀར་པོ། མེ་རླུང་དམར་པོ་རླུང་གི་རླུང་ནག་པོ་ནམ་མཁའ་ནི་སྔོན་པོར་འདོད་དོ། །ཡང་ན་སྣ་ཚོགས་པ་ཞེས་བྱ་བ་ལྗང་ཁུའི་ཁ་དོག་གོ །གཟའ་རྣམས་ལ་སྦྱར་བ་ནི། །འདི་དག་སྟོབས་ནི་གཡས་པ་རྣམས། །སྤེན་ཕུར་བཀྲ་ཤིས་ཉི་མ་མེ། །ས་སོགས་རིམ་པས། ཞེས་པ་དབྱངས་རིང་པོ་དང་དྲག་པོའི་གཟའ་རྣམས་ཏེ། ས་རླུང་ནི་སྤེན་པ་དང་ལཱྀ་ཡིག་གོ །ཆུ་རླུང་ལ་ཕུར་བུ་དང་ཨཱུའོ། །མེ་རླུང་ལ་མིག་དམར་དང་རཱྀའོ། །རླུང་གི་རླུང་ལ་ཉི་མ་དང་ཨཱིའོ། །ནམ་མཁའི་རླུང་ལ་དུས་མེ་དང་ཨཱའོ། །གཡོན་པ་རྣམས། །སྒྲ་གཅན་ཟླ་བ་གཟའ་ལག་དང་། །པ་སངས་འཇུག་རིང་མཁའ་རིམ་བཞིན། ཞེས་པ་ནི་ཡི་གེ་ཐུང་ངུ་རྣམས་དང་ཞི་བའི་གཟའ་རྣམས་ཏེ། ནམ་མཁའི་རླུང་ལ་སྒྲ་གཅན་དང་ཨའོ། །རླུང་གི་རླུང་ལ་ཟླ་བ་དང་ཨཱིའོ། །མེ་རླུང་ལ་གཟའ་ལག་དང་རཱྀའོ། །ཆུ་རླུང་ལ་པ་སངས་དང་ཨུའོ། །ས་རླུང་ལ་འཇུག་རིངས་དང་ལྀའོ། །དེ་ལྟར་གཟའ་དང་སྦྱར་བའི་རིམ་པ་ནི། ཕྱིའི་དུས་སྦྱོར་ཇི་ལྟ་བ་བཞིན་དུ་ནང་དུ་འཆར་བ་ཡིན་ནོ། །ལས་གང་འགྲུབ་པ་ནི། ཕུང་པོ་ཁམས་སོགས་དེ་མཐུན་ཕྱིར། ཞེས་པ་ནི། ཕུང་པོ་དང་། ཁམས་དང་སྐྱེ་མཆེད་དང་། ཕྱི་རོལ་གྱི་ཤེས་བྱའི་དངོས་པོ་ཐམས་ཅད་རང་རང་གི་ནུས་པ་བསམ་གྱིས་མི་ཁྱབ་པའི་ཕྱིར། ནམ་མཁས་ནི་བསད་གསོ་ལ་སོགས་པ་ལས་ཐམས་ཅད་འགྲུབ་ལ། རླུང་གིས་བསྐྲད་པ་དང་བསད་པ་མེས་དབང་དང་དགུག་པ། ཆུས་ཞི་བ་དང་རྒྱས་པ། སས་རེངས་པ་དང་རྨོངས་པའི་ལས་འགྲུབ་ལ། ཡེ་ཤེས་ལས་ནི་ཐམས་ཅད་པ། ཞེས་པའི་དོན་ནི། དུས་འཁོར་ལས་བསད་པ་མ་གཏོགས་པའི་ལས་ཐམས་ཅད་ཡེ་ཤེས་ཀྱིས་འགྲུབ་བོ་ཞེས་གསུངས་པས། ཡེ་ཤེས་རྒྱུ་བའི་དུས་གང་ཞེ་ན། རླུང་མཉམ་དུ་རྒྱུ་བའི་དུས་སུ་བཤད་དོ། །ཕྱིར་འགྲོ་བའི་རིང་ཐུང་ནི། སྣ་རྩེའི་ཕྱི་རོལ་ནས་ས་རླུང་ནི་སོར་བཅུ་གཉིས་སུ་རྒྱུའོ། །ཆུ་སོར་བཅུ་གསུམ། མེ་བཅུ་བཞི། རླུང་བཅོ་ལྔ། ནམ་མཁའ་བཅུ་དྲུག་གི་བར་དུ་འགྲོ་སྟེ། དེའི་རྒྱུ་མཚན་ནི་འབྱུང་བའི་ལྕི་ཡང་གི་ཡོན་ཏན་གྱི་དབང་གི་རིམ་པས་རིང་བ་དང་ཐུང་བ་ཡིན་པར་དུས་ཀྱི་འཁོར་ལོ་ལས་གསུངས་སོ། །གསང་འདུས་ཀྱི་གདམས་པ་ཁ་ཅིག་ལས་ནི། འཁོར་ལོ་བཞི་ལས་རླུང་བཞི་འབྱུང་བ། སྤྱི་བོ་ནས་རླུང་གི་རླུང་འབྱུང་བས་སོར་ཉི་ཤུ་དང་། མགྲིན་པ་ནས་མེ་རླུང་འབྱུང་བས་སོར་བཅོ་བརྒྱད་དང་། སྙིང་ཁ་ནས་ཆུ་རླུང་འབྱུང་པས་སོར་བཅུ་དྲུག་དང་། ལྟེ་བ་ནས་ས་རླུང་འབྱུང་པས་སོར་བཅུ་གཉིས་སུ་བཞེད་པ་ཡང་སྣང་ངོ་། །རྟེན་འབྲེལ་རྩིས་དང་དབྱངས་སྦྱར་པ། །ཁོ་བོས་རྩིས་ཀུན་བསྡུས་པར་བཤད། །ཅེས་པ་ནི་ནང་དུ་རང་ལ་རྟེན་འབྲེལ་འཆར་བ་དང་། ཕྱི་རུ་གཞན་ལ་ལུང་སྟོན་པར་བྱེད་པ་བསྡུས་པ་ནི། །གཡོན་ནས་རྒྱུ་བ་མྱུར་འགྲུབ་ཅིང་། །གཡས་ཕྱོགས་མི་འགྲུབ་ངན་པ་སྟེ། །དབུ་མར་བཏང་སྙོམས་ལས་རྣམས་འགྱང་། །གཞན་ཡང་གཡས་ཀྱི་དུས་སྦྱོར་དུ། །རྒྱུ་དུས་གཡུལ་འགྱེད་གང་འདྲི་བ། །དུས་མེས་འཆི་བར་སྟོན་པ་སྟེ། །རླུང་དུ་ཉི་མས་ཡན་ལག་ཉམས། །མེར་ནི་མིག་དམར་གྱིས་སྣང་འགྱུར། །ཆུར་ནི་ཆུར་བུ་ཉེན་ཆེའོ། །སར་ནི་སྤེན་པ་འཆར་བ་ཡིས། །གཡུལ་དུ་ཡུན་རིངས་རྩོད་པར་འགྱུར། །ནད་པ་རྣམས་ལ་གོ་རིམ་བཞིན། །འཆི་དང་ཉོན་མོངས་རྨ་དོད་དང་། །བཅོས་འཚོ་ནད་ཡུན་རིང་བར་འགྱུར། །ཡུལ་གྱི་ལྟད་མོ་བག་མ་དང་། །ཞི་དང་རྒྱས་པའི་ལས་རྣམས་ཀུན། །འདི་དག་བཟང་བ་མ་ཡིན་ཏེ། །འབྲས་བུ་སྣ་ཚོགས་སྔ་མ་བཞིན། །གང་གིས་གཡོན་པའི་དཀྱིལ་འཁོར་དུ། །གཡོན་ངོས་སྒྲ་གཅན་འཆར་ཚེ་འདྲི། །དགྲ་རྣམས་ཕར་ལ་འཇོམས་པར་འགྱུར། ཟླ་བ་རླུང་སྟེ་དགྲ་བོ་ཡི། ཡན་ལག་འགའ་ཞིག་ཉམས་བྱེད་འགྱུར། །མེ་ལ་གཟའ་ལག་དགྲ་བོ་སྨས། །པ་སངས་ཆུ་སྟེ་ནོར་ཐོབ་འགྱུར། །ས་ཡི་དཀྱིལ་འཁོར་འཇུག་རིངས་འཆར། །དགྲ་རྣམས་རང་གི་དབང་དུ་འགྱུར། །ནད་པ་རྣམས་ནི་འཚོ་བ་དང་། །དགའ་སྟོན་འཇིག་རྟེན་བྱ་བ་ཡི། །ཞི་དང་རྒྱས་ཀུན་མྱུར་འགྲུབ་བྱེད། །སྒྲ་གཅན་མ་གཏོགས་གཞན་རྣམས་དག །དྲག་པོའི་ལས་ལ་སྟོབས་ལྡན་མིན། །གཞན་ཡང་རང་ཉིད་མཉམ་བཞག་དུས། །དུས་མིན་ཕྱིན་ཅི་ལོག་འཕོ་ན། །གཡོན་གྱི་ཕྱོགས་རྣམས་སྔར་ལྟར་བཟང་། །ནོར་དང་ཟས་དང་ལོངས་སྤྱོད་འཐོབ། །གཡས་ཕྱོགས་དུས་མིན་འཕོ་བ་ངན། །ནད་དང་ནོར་ཉམས་འཇིགས་སྐྲག་དང་། །གཏམ་ངན་ཐོས་པར་འགྱུར་བའི་རྟགས། །ཇི་ལྟར་ཡུན་རིང་ཕྱིན་ལོག་རྒྱུ། །འཆི་བའི་ལྟས་སུ་སྟོན་པར་བྱེད། །དེ་སོགས་དཔག་དུ་མེད་པ་ཡིན། །གང་གི་ཕྱིར་དུས་མ་ཡིན་པར་འཆི་བའི་ལྟས་བྱུང་ན། བཟློག་པའི་ཆོ་ག་ཡང་བཤད་པར་བྱ་སྟེ། །ཐོག་མར་ལུས་ཀྱི་ངལ་དུབ་བསལ། །རྩ་དག་པ་ཡི་སྦྱོར་བ་སྒོམ། །རྐང་པ་དཀྱིལ་དཀྲུང་ལུས་བསྲངས་ནས། ལག་གཉིས་མཆན་ཁུང་འཕར་རྩ་བསྡམ། །སྟེང་འོག་བར་གསུམ་མཉམ་བཅིངས་ནས། །ལུས་ཀུན་རླུང་གིས་དགང་བར་བྱ། །ཞག་བདུན་གྱིས་ནི་འཆི་བ་འཕྲོག །ཞེས་བྱ་བ་འདི་ནི་ཁོ་བོས་རྒྱུད་འགྲེལ་རྣམས་ལས་བསྡུས་པ་ཡིན་ནོ། །རྒྱུད་ཕན་ཚུན་གྱི་དགོངས་པ་མི་འགལ་བར་བསྟན་པ་ནི། རླུང་གི་རྒྱུ་ཚུལ་འདི་ནི་རྡོ་རྗེ་འཕྲེང་བ་ལས་གསུངས་པའི་ཚིགས་སུ་བཅད་པ་བརྒྱད། འཚམས་སྦྱོར་གྱི་ཚིགས་བཅད་དང་བཅས་པ་སྟེ། འདི་ལ་འཕགས་སྐོར་པ་རྣམས་ཀྱི་འབྲུ་གནོན་དུ་མ་ཡོད་མོད་ཀྱི། འདིར་མི་འགལ་བར་བཤད་པར་བྱ་སྟེ། སྣའི་བུ་ག་ལས་བྱུང་ཞིང་། རླུང་ལྔ་སྟེང་དུ་ཡང་དག་རྒྱུ། ཞེས་བྱ་བ་ནི་ས་ཆུ་མེ་རླུང་ནམ་མཁའི་དཀྱིལ་འཁོར་ལྔའོ། །དཀྱིལ་འཁོར་ལྔ་པོ་དེ། རྣལ་འབྱོར་པས་རྡོ་རྗེའི་བཟླས་པ་བྱེད་པའི་དུས་ན་རླུང་གི་ཕྲ་མོའི་བཟླས་པ་རྣམས་བཞི་བྱའོ། །དེ་ཡང་གཡོན་པ་གཡས་དང་གཉིས་ག་དང་། དལ་བར་རྒྱུ་བ་རྣམ་པ་བཞི། །ཞེས་བྱ་བ་ནི་མདོར་བསྟན་ནོ། །དེ་ལས་བཞི་པོ་རྒྱས་པར་བཤད་པ་ནི། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་པོ་བཟང་པོ་འདི། པད་མའི་མགོན་པོ་རྒྱུ་བའོ། །ཞེས་བྱ་བ་རང་ཉིད་ཀྱི་སྣ་གཡས་པ་ནས་བྱུང་པ་མེའི་ཁམས་ཀྱི་དཀྱིལ་འཁོར་རྣམ་པ་ལྔ་པོ་འདི་ནི། ཉི་མའི་ཁམས་ཀྱི་རང་བཞིན་ཁ་དོག་དམར་པོ་དབང་དང་དགུག་པ་དང་། ལས་ཐམས་ཅད་འགྲུབ་པར་བྱེད་པའི་བཟང་པོ་འདི། པད་མའི་མགོན་པོ་འོད་དཔག་དུ་མེད་པའི་རིགས་པད་མ་མཐར་བྱེད་ལ་སོགས་པའི་ཏིང་ངེ་འཛིན་གྱིས་སམ་ཡང་ན་གསུང་གི་རྡོ་རྗེའི་རང་བཞིན་རྒྱུ་བ་ཡིན་པས། ཡི་གེ་ཨ་ཡི་བཟླས་པ་དང་ལྷན་ཅིག་བསྒྲུབ་བོ། །ཡང་གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་དང་འདྲེས་པ། །ལྗང་སེར་དག་དུ་སྣང་བ་སྟེ། །ལས་ཀྱི་མགོན་པོ་རྒྱུ་བའོ། །ཞེས་བྱ་བ་སྣ་གཡོན་པ་ནས་འབྱུང་བ་ཤེས་རབ་ཀྱི་ཁམས་ཀྱི་རང་བཞིན་ཟླ་བའི་རླུང་ཡིན་ཀྱང་། མཐུན་པའི་ལས་ཐམས་ཅད་བསྒྲུབ་པའི་ཕྱིར་རླུང་གི་དཀྱིལ་འཁོར་དང་འདྲེས་པ་དཀྱིལ་འཁོར་ལྔའི་རིམ་པ། ཁ་དོག་ལྗང་སེར་དུ་སྣང་བ་སྟེ་ཞི་བ་ལ་སོགས་པའི་ལས་བསྒྲུབ་པར་བྱེད་པ་སྐུ་རྡོ་རྗེ་དང་བཅོམ་ལྡན་འདས་དོན་ཡོད་རྡོ་རྗེ་འདྲེས་པའི་རང་བཞིན་གྱི་རྒྱས་བཏབ་པའི་ལྷ་དང་། ཡི་གེ་ཨོཾ་དང་ལྷན་ཅིག་རྡོ་རྗེའི་བཟླས་པ་བྱའོ། །གཉིས་ཀ་ནས་ནི་འབྱུང་བའི་ཁམས། །གསེར་མདོག་དབང་ཆེན་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །ཞེས་བྱ་བ་ནི་སྣ་གཉིས་ཀ་དང་སྟེང་དང་འོག་གི་ཆ་གཉིས་ཀ་ནས་འབྱུང་བའི་ཁམས་སའི་དཀྱིལ་འཁོར་གྱི་རང་བཞིན། ཁ་དོག་སེར་པོ་ལྟེ་བའི་དཀྱིལ་འཁོར་ནས་ཐུར་དུ་ཡེ་ཤེས་ཀྱི་ཁམས་དཀར་དམར་ལྷན་ཅིག་པའི་རིན་པོ་ཆེའི་མགོན་པོ་རྒྱུ་བ། གོང་བུའི་གཟུགས་ཀྱིས་འོག་གི་སྣ་རྩེར་བཅིངས་ཏེ། རྡོ་རྗེའི་བཟླས་པ་བྱས་ན་ཐིག་ལེའི་རྣལ་འབྱོར་འགྲུབ་པའོ། །དེ་ནས་གཞན་ཡང་དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུའི་དཀྱིལ་འཁོར་སྟེ། །རྡོ་རྗེའི་མགོན་པོ་རྒྱུ་བའོ། །ཞེས་བྱ་བ་ནི་ཡེ་ཤེས་ཀྱི་རང་བཞིན་དལ་ཞིང་ཕྱོགས་གཅིག་དུ་རྒྱུ་བ་མེད་པ་ཡེ་ཤེས་ཀྱི་ཁམས་དག་པའི་ཤེལ་ལྟར་སྣང་བ་དྲི་མ་མེད་ཅིང་འོད་གསལ་བ་འདི་ནི་ཆུའི་དཀྱིལ་འཁོར་སྟེ། རྡོ་རྗེའི་མགོན་པོ་ཐུགས་ཀྱི་རྡོ་རྗེ་རྒྱུ་བ་ཡིན་པས་དབུ་མ་རུ་རྣམ་པར་མི་རྟོག་པའི་ཏིང་ངེ་འཛིན་དང་ལྷན་ཅིག་ཡི་གེ་ཧཱུྃ་གི་རྣམ་པའི་རྡོ་རྗེའི་བཟླས་པ་བསྒྲུབས་ན་འོད་གསལ་བ་འཐོབ་པོ། །དེ་ལྟར་སྐུ་དང་གསུང་དང་ཐུགས་དང་ཡེ་ཤེས་རྡོ་རྗེའི་བཟླས་པ་བཞི་ནི་དབྱུང་བ་དང་རྔུབ་པ་དང་། གནས་པ་དང་བདེ་བ་ཆེན་པོ་རོ་མཉམ་པར་བྱ་བའི་རིམ་པ་སྟེ། །སྐུའི་རྡོ་རྗེ་འཛིན་ཚངས་པ། །གསུང་གི་རྡོ་རྗེ་དབང་ཕྱུག་ཆེ། །ཐུགས་ཀྱི་རྡོ་རྗེ་ཁྱབ་འཇུག་ཉིད། །རྩ་བའི་རྒྱུད་དུ་ངེས་གསུངས་པ། །རྡོ་རྗེ་སེམས་དཔར་བདག་ཉིད་སྦྱོར། །ཞེས་བྱ་བའི་ལས་བསྒྲུབ་པའི་བསྒྲུབ་ཐབས་འཕགས་པ་ཀླུ་གྲུབ་ཉིད་ཀྱིས་འགྲེལ་པ་མཐའ་དྲུག་ཆེན་པོ་ལས་གསུངས་པ་དང་། ཡང་འཁོར་ལོ་བཞིའི་དབུས་སུ་མགྲིན་པར་པད་མའི་མགོན་པོ། སྤྱི་བོར་ལས་ཀྱི་མགོན་པོ། སྙིང་ཁར་རྡོ་རྗེའི་མགོན་པོ། ལྟེ་བར་རིན་པོ་ཆེའི་མགོན་པོའི་རང་བཞིན་གྱི་རྡོ་རྗེའི་བཟླས་པ་བསྒོམ་པར་གསུངས་པས། འོག་ནས་འབྱུང་བའི་ཚིགས་བཅད། །དེ་ལྟར་རླུང་གི་སྣ་རྩེ་ནི། །ཁ་དོག་ལྔ་པར་རྣམ་པར་བསྒོམ། །སྔགས་བཟླས་བ་ཡི་གྲངས་ཀྱིས་ནི། །མཉམ་བཞག་ཉིན་མཚན་རྟག་ཏུ་ཟློས། །ཞེས་བཤད་པ་ལ་འགལ་བ་མེད་དོ། །སྔོན་གྱི་ཡིག་སྒྲོས་ལ་གོང་མའི་རྒྱུ་བ་བཞི་པོ་དང་ལྔ་པ་ནི། ཁམས་ཀུན་ལས་ནི་ཡང་དག་འབྱུང་། །རྟེན་དང་བརྟེན་པས་བཟུང་བས་ན། །རྣམ་པར་སྣང་མཛད་རང་བཞིན་ཏེ། །འཆི་བའི་མཐར་ནི་འབྱུང་བར་འགྱུར། ཞེས་བྱ་བ་འདི་སྦྱོར་མོད་ཀྱི་དེ་ལྟར་ན་དཀྱིལ་འཁོར་ལྔ་ཞེས་འབྱུང་བར་རིགས་པ་ལ། གོང་མ་འདི་རྣམས་བཟླས་པ་ཡིན་པའི་ཕྱིར། དཀྱིལ་འཁོར་བཞི་པོ་འདི་དག་ནི། །མཉམ་པར་བཞག་པས་རྟག་ཏུ་ཟློས། །ཞེས་གསུངས་པས་འདི་ནི་རྡོ་རྗེའི་བཟླས་པའི་རིམ་པར་བཤད་པ་ལེགས་སོ། །གོང་མའི་འབྲུ་གནོན་ཡང་ས་ལ་སོགས་པའི་ཁམས་ཀུན་ལས་བྱུང་བ། རྟེན་ལུས་དང་། བརྟེན་པ་སེམས་སམ། ཡང་ན་རྟེན་འོད་གསལ་བ་ལ་བརྟེན་པའི་ཀུན་གཞིའི་རྣམ་པར་ཤེས་པས་བཟུང་བ་ནི། ལུས་ཡིན་པས་དེ་ནི་མུན་པ་ཆེན་པོའི་རླུང་རྣམ་པར་སྣང་མཛད་ཀྱི་རང་བཞིན་སྟེ། འཆི་བའི་མཐར་འབྱུང་བར་འགྱུར་བས། གསུང་གི་དཀྱིལ་འཁོར་བཞི་པོ་འདི་དག་ནི་རྣལ་འབྱོར་པས་བཟླས་པས་འཆི་བ་མེད་པའི་རྡོ་རྗེའི་ལུས་འགྲུབ་པར་འགྱུར། ཞེས་བྱ་བའི་དོན་ཡིན་ནོ། །དགོངས་པ་མཐའ་དག་གི་འཕྲོས་པ་ཡོད་མོད་ཀྱི་ཆོག་གོ །བློ་ཆུང་ངུ་རྣམས་ཀྱིས་འཕགས་པ་ཡབ་སྲས་དང་། བྱང་ཆུབ་སེམས་དཔའི་འགྲེལ་པ་རྣམས་དོན་མི་གཅིག་གོ་སྙམ་དུ་སེམས་པར་མི་བྱའོ། །བཞི་པ་འཇུག་སྒོ་ཕན་ཡོན་དང་བཅས་པ་ལ། འཇུག་སྒོ་དང་། བཟུང་ཐབས། ཕན་ཡོན་དང་རྣམ་པ་གསུམ་ལས། དང་པོ་ནི། འཇུག་སྒོ་སྟེང་ནས་སྣ་བུག་གཉིས། །ཁ་དང་འོག་དུ་ལམ་གསུམ་དང་། །ལུས་ཀུན་ཡིན་ཏེ་རྣམ་པ་བཞི། །ཞེས་བྱ་བ་ནི། བླ་མ་དམ་པ་རྣམས་ཀྱི་མན་ངག་ལས་གསུངས་ཏེ། མེ་རླུང་དང་རླུང་གི་རླུང་སྣ་བུག་ནས་འཇུག་གོ །ཆུའི་རླུང་ཁ་ནས་སོ། །ས་རླུང་ནི་འོག་གི་ལམ་གསུམ་ནས་སོ། །མ་ནིང་གི་རླུང་ནི་ལུས་ཐམས་ཅད་ནས་སོ། །དེ་ལྟར་བླ་མ་མར་པའི་ཞལ་སྔ་ནས་ཀྱང་། །ཕྱི་སྒོ་གཉིས་པོ་སྟེང་ནས་སྡོམ། །ནང་གི་སྒོ་གཉིས་འོག་ནས་སྡོམ། །མཆོད་ཁང་སྒོ་ནི་དབུས་ན་དམ། །ཞེས་གསུངས་སོ། །བཟུང་ཐབས་ཀྱང་རྣམ་པ་བཞི་ལས། །བསྒྲང་ཞིང་རྩི་བ་ལ་བསླབ་པ་ནི། བཟུང་ཐབས་དབྱུང་རྔུབ་གནས་ལྡོག་དང་། །དག་པ་བགྲང་ཞིང་བརྩི་བ་སྟེ། །ཞེས་བྱ་བའི་དོན་ནི། དེ་ལ་རྣམ་རྟོག་ཤས་ཆེ་བས་རླུང་བགྲང་ཞིང་བརྩི་བ་ནི། ལུས་གནད་བཅས་ལ། སེམས་རྣལ་དུ་བཞག་སྟེ། དབུགས་དབྱུང་བ་དང་བརྔུབ་པ་ལ་སེམས་འཛིན་པ་སྟེ། ཆུ་ཚོད་ལ་སོགས་པའི་བར་དུའོ། །རྗེས་སུ་འགྲོ་བ་ནི། དེའི་འོག་ཏུ་རླུང་འདི་ལུས་ཐམས་ཅད་ལ་འཇུག་གམ། ཕྱོགས་འགའ་ཞིག་ཏུ་འཇུག་ཅེས་ལུས་ཐམས་ཅད་ཀྱིས་མཐར་ཐུག་པར་འགྲོ་བ་དང་། བཟློག་པ་ལ་དམིགས་པའོ། །དེའི་འོག་ཏུ་འཇོག་པ་ནི། ཐམས་ཅད་དུ་ཁྱབ་པ་ལ་རྣམ་པར་མི་རྟོག་པ་ལ་སེམས་འཛིན་པའོ། །དེ་ནས་རླུང་ལ་དམིགས་པའི་བློ་བསྒྱུར་ཏེ། འཇིག་རྟེན་དང་འཇིག་རྟེན་ལས་འདས་པའི་གཉེན་པོའི་ཆོས་རྣམས་ལས་འགྲོ་བ་དང་འོང་བ་དང་ཞི་གནས་ལ་སྔར་ལྟར་ཞུགས་པས། རང་བཞིན་གྱིས་སྣང་བ་དང་སྟོང་པ། དབྱེར་མེད་པའི་དོན་དམ་པ་ལ་འཇུག་པས་རྣམ་པར་དག་པ་ཞེས་བརྗོད་དོ། །འདི་ནི་མདོ་སྡེ་དང་རྒྱུད་སྡེ་གཉིས་ཀ་ལས་བསྟན་ཏོ། །སའི་སྙིང་པོ་འཁོར་ལོ་བཅུ་པའི་མདོ་ལས་ཀྱང་། །ཚུལ་འདི་རྒྱས་པར་གསུངས་པའི་རྗེས་སུ། །ཇི་ལྟར་ཞེ་ན་རབ་ཏུ་གདུལ་དཀའི་སེམས། །ཞེས་བརྗོད་པ་དེ་ནི། རླུང་ལས་གུད་དུ་མ་དམིགས་པའི་ཕྱིར་ཏེ། དེ་བས་ན་སེམས་ཞེས་བྱ་བ། རླུང་དུ་བརྗོད་དོ། །ཞེས་གསུངས་སོ། །གཉིས་པ་ནི། །མི་རྟོག་རྒྱ་ཡན་བཅིངས་པ་ཡིས། །ཞི་གནས་བསྐྱེད་པར་གསུངས་པ་ཡིན། །ཞེས་སྨོས་ཏེ། སོ་སོར་བསྡུད་པ་ལ་སོགས་པ་ཡིན་ནོ། །གསུམ་པ་ནི། །ཁ་དོག་དབྱིབས་ལ་རྣམ་པར་སྦྱང་། །མངོན་ཤེས་ཟད་པར་འབྱུང་བའི་རྒྱུ། །ཞེས་སྨོས་ཏེ། སྔར་བསྟན་པའི་རླུང་སོ་སོའི་ཁ་དོག་ལ་སེམས་བཞག་པ་བརྟན་པས་གསལ་སྣང་བྱུང་བ་དེའི་ཚེ། དེ་ཉིད་ཀྱི་རྣམ་པ་གང་འགྲུབ་པར་འདོད་པ་ཕྱི་དང་ནང་དུ་དམིགས་ནས། སེམས་བརྟན་པར་གྱུར་པས་ཟད་པར་འགྲུབ་ལ། སྙིང་ཁར་དྲི་མ་མེད་པའི་ཀུན་གཞིའི་རྣམ་ཤེས་ཟླ་བའི་དཀྱིལ་འཁོར་ལྟར་དམིགས་ཏེ། གཞན་གྱི་རྣམ་ཤེས་དང་བསྲེས་ཏེ་བསྒོམས་པས། མངོན་པར་ཤེས་པ་ལྔ་འཆར་རོ། །ཚུལ་འདི་ནི་རྒྱས་པར། །རྡོ་རྗེ་སློབ་དཔོན་ཀུན་དགའ་སྙིང་པོ་དང་། མཁས་པ་བསྐལ་ལྡན་གྲགས་པའི་གསང་བ་འདུས་པའི་འགྲེལ་པ་ཆེན་པོ་རྣམས་ནས་བྱུང་ངོ་། །བཞི་པ་ནི། །བུམ་ཅན་སྟེང་འོག་བར་གསུམ་དང་། །རྣམ་གྲོལ་བཅས་པས་ལས་ཀུན་བྱེད། །ཞེས་སྨོས་པའི་བུམ་པ་ཅན་ནི། དུས་ཀྱི་འཁོར་ལོ་ལས། སྟོང་པ་དུ་བ་ལ་སོགས་ལམ་ནི་བླ་མའི་དབང་གིས་གཟུགས་རྙན་རབ་ཏུ་སྒོམ་པར་བྱ། དེ་ལ་རྩ་ཡི་འཁོར་ལོ་རྣམས་སུ་སྲོག་དང་ཐུར་དུ་སེལ་པའི་རླུང་དག་བསྡམ་པར་ཡང་ནི་བྱ། ཕྱི་ནས་ཟླ་བ་དགག་པ་དང་ནི་གཟའ་ཉིད་དང་ནི་བྱ་ཞིང་བྱང་ཆུབ་སེམས་ཀྱི་རྣལ་འབྱོར་པ། དེ་ནས་གང་ཞིག་ཅུང་ཟད་འདོད་པ་ཉི་མ་ཅུང་ཟད་ཀྱིས་ནི་སྐྱེ་བ་འདི་ལ་ཐོབ་པར་འགྱུར། །ཉི་མ་ཟླ་བ་མཉམ་དང་མི་མཉམ་གྱུར་པ་དགག་ཅིང་དབུས་མར་མེ་ནི་ཞུ་བར་གྱུར་པ་དང་། སྲོག་དང་ཐུར་དུ་སེལ་བ་གཉིས་ཀྱིས་ཀྱང་ནི་ཉི་མ་དང་པོར་སོན་པའི་དུས་མིན་འཆི་བ་བསླུ། ཞེས་གསུངས་པ་དང་། སེང་གེ་རྣམ་གྲོལ་ནི། སྒྱུ་མ་ཆེན་མོ་ལས་ཡོན་ཏན་དང་བཅས་པ་གསུངས་སོ། །ཕན་ཡོན་བསྟན་པ་ནི། ཕན་ཡོན་རྣམ་པ་བརྒྱད་ཡིན་ཏེ། ཞེས་བྱ་བ་འོག་ནས་སྟོན་པའི་མདོར་བསྟན་ཡིན་ལ་གཞན་ཚིགས་སུ་བཅད་པ་གཉིས་ཀྱི་དོན་ནི། སྟེང་གི་ཉི་ཟླ་སྒྲ་གཅན་གྱི་རླུང་གསུམ་ངོ་བོ་ཉི་མ་ཡིན་ཡང་འོག་ཏུ་ཡོན་ཏན་འབྱུང་སྟེ། རྡུལ་མུན་པ་སྙིང་སྟོབས་གསུམ་སྟེ་དུག་གསུམ་གྱི་རྣམ་རྟོག་འཇོམས་ལ་རྡོ་རྗེ་གསུམ་ཐོབ་པར་བྱེད་པས་ཉི་མའི་ཡོན་ཏན་གསུམ་འོག་ཏུ་གསུངས་ལ། ཐུར་སེལ་ཟླ་བའི་རང་བཞིན་ཡིན་ཀྱང་དེའི་ཡོན་ཏན་སྟེང་དུ་གཟུགས་སྒྲ་དྲི་རོ་རེག་བྱའི་ཡུལ་ལྔ་ལ་དབང་བྱེད་པས། ཟླ་བའི་རང་བཞིན་སྟེང་དུ་བཤད་དེ། མདོར་བསྡུས་ན། དེ་དག་གི་རང་བཞིན་གཟུང་འཛིན་བརྒྱད་པོ་འཇོམས་པས་མཐར་ཐུག་གི་ཡོན་ཏན་དུ་གསུངས་ལ། གནས་སྐབས་སུ་རླུང་ཟིན་པས། སའི་ཡོན་ཏན་ལུས་བརྟན། ཆུས་སྣུམ་པ་དང་། མེས་མདངས་གསལ་བ་དང་། རླུང་གིས་མགྱོགས་པ་དང་། ནམ་མཁའི་ཡོན་ཏན་དག་ཅིང་ཤེས་རབ་ཆེ་བ་ལ་སོགས་པ་འབྱུང་ཞེས། བླ་མ་ཏེ་པུ་པས་གསུངས་སོ། །ལྔ་པ་འཁོར་འདས་ཐམས་ཅད་རླུང་གི་རང་བཞིན་དུ་བཤད་པ་ནི། ཚིགས་སུ་བཅད་པ་ཕྱེད་དང་ལྔ་སྟེ། དེ་ལྟར་གསུངས་པའི་རླུང་ཇི་སྙེད་པ་ཐམས་ཅད་ཀྱང་། རྣམ་པར་རྟོག་པ་དང་། རླུང་གཉིས་དབྱེ་བ་མེད་པར་གསུངས་ཏེ། མཚན་ཉིད་རྣམ་པ་གསུམ་དང་འབྲེལ་བའི་ཕྱིར་རོ། །དེ་ཡང་གང་ཞེ་ན། །མདོར་ན་རླུང་ནི་རྟོག་པ་སྟེ། །གཡོ་དང་ཕྲ་དང་གཞན་བསྐྱོད་བྱེད། །ཅེས་སྨོས་སོ། །རླུང་འདི་ཐམས་ཅད་ཀྱི་གཞི་ཇི་ལྟ་བུ་ཞེ་ན། །སེམས་ཉིད་གསལ་ལ་མི་རྟོག་པ་སྟེ། །དེ་ལ་རླུང་གི་མིང་གིས་བརྗོད་པ་ནི། ངོ་བོ་ཡེ་ཤེས་རླུང་ཆེན་པོ་ཞེས་བྱའོ། །དེ་ལྟར་ན་གཉེན་པོ་རྒྱུ་འཐུན་པའི་ཡང་དག་པའི་རྟོག་པ་རྣམས་ལ་ཡང་རླུང་གི་མིང་ཡོད་དམ་ཞེ་ན། །གཉེན་པོ་ཡེ་ཤེས་རླུང་ཆེན་ནི། །ཡང་དག་རྟོག་པའི་འདུ་བྱེད་བཤད། །ཅེས་སོ། །འོ་ན་ཁམས་གསུམ་པའི་སེམས་དང་སེམས་ལས་བྱུང་བ་རྣམས་ལ། ཇི་ལྟ་བུའི་རླུང་ཡིན་ཞེ་ན། དུག་གསུམ་དང་འབྲེལ་བའི་རླུང་དུ་བསྟན་ཏེ། །ཀུན་གཞི་ལ་གནས་ཉོན་ཡིད་ནི། །གཏི་མུག་བསྐྱེད་པའི་རླུང་དུ་བཤད། །ཞེས་པ་སྔར་བསྟན་པ་ལྟར་ང་མེད་པ་ལ་ངར་འཛིན་པ་ལ་སོགས་པའི་གཏི་མུག་བསྐྱེད་པའི་ཕྱིར་རོ། །འདུ་བྱེད་ཡེ་ཤེས་སྣང་ཆ་ལ། །གཞན་རྟོག་ཆགས་པའི་རླུང་ཞེས་བྱ། །ཞེས་པ་ནི། རྣམ་པར་རྟོག་པ་འདུ་བྱེད་པ་ལ་སེམས་ཀྱི་རང་ཡུལ་ཡེ་ཤེས་ཀྱི་སྣང་ཆ། འོད་ལྔའི་རྣམ་པ་སྣང་བ་ལ་གཞན་དུ་རྟོག་ཅིང་། སྲེད་ལེན་གྱི་ཆགས་པ་བསྐྱེད་པས་དགའ་བའི་འདོད་ཆགས་ཀུན་ཏུ་གཡོ་བའི་ཕྱིར་རོ། །རྣམ་ཤེས་བླང་དོར་དཔྱོད་པའི་རླུང་ནི་རྣམ་པར་ཤེས་པའི་ཚོགས་དྲུག་པོ། མ་རྟོགས་ཤིང་བླང་བ་དང་དོར་བ་ལ་བརྟེན་ནས་ཞེ་སྡང་བསྐྱེད་པའི་རླུང་སྟེ། དེ་ལྟར་རྣམ་པར་ཤེས་པ་བརྒྱད་ཀྱི་འདུ་བྱེད་པ་ཐམས་ཅད་རླུང་ཡིན་པས། ཁམས་གསུམ་རླུང་གི་འདུ་བྱེད་ཅེས། བཅོམ་ལྡན་འདས་ཀྱིས་གསུངས་པས། སྐྱོན་དང་ཡོན་ཏན་ཐམས་ཅད་རླུང་ལ་བརྟེན་པར་རྟོགས་པར་བྱས་ནས། ཡང་དག་པའི་ལམ་གྱི་རིམ་པའི་གནད་བཅིང་པར་བྱ་སྟེ། དེས་ན་རྡོ་རྗེ་འཕྲེང་བ་ལས། རླུང་གི་སྦྱོར་ཤེས་ཕ་རོལ་འགྲོ། །རླུང་གིས་འཁོར་བར་འཁོར་བྱེད་ལ། དེ་གཅོད་བྱེད་པའང་འགྲུབ་པར་འགྱུར། །ཞེས་གསུངས་པ་འདིར་སྨོས་པ་ཡིན་ནོ། །དེ་ལྟར་རྒྱས་པར་བཤད་ནས། འཇུག་བསྡུ་བ་ནི། ཕྱི་ནང་རླུང་མིང་བྱེད་ལས་ཀུན། །རྒྱལ་བས་མདོ་རྒྱུད་ལས་གསུངས་པ། འདིར་ནི་བསྡུས་ཏེ་བསྟན་པ་ཡིན། །ཞེས་བྱ་བ་ནི་སྔར་ལུས་འགྲུབ་པའི་སྐབས་དང་། དུམ་བུ་འདིར། མདོ་རྒྱུད་རྣམས་ནས་གསུངས་པ་ཐམས་ཅད་བསྡུས་ཏེ་བསྟན་པ་ཡིན་ནོ།། །།

ལེའུ་ལྔ་པ། ཐིག་ལེ་གསུམ་བསྟན་པའི་དུམ་བུ།

ད་ནི་ལྔ་པ་རྩ་དེ་དག་ཏུ་ཐིག་ལེ་ཇི་ལྟར་རྒྱུ་བའི་རིམ་པ་བཤད་པར་བྱ་སྟེ། འདི་ལ་ཡང་། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བ་དང་གསུམ་ལས། དང་པོ་ནི། །དེ་ནས་རྩ་དང་རླུང་བརྟེན་ནས། །ཐིག་ལེ་གནས་དང་རྒྱུ་ཚུལ་ནི། །རྩ་བ་སྤྲོས་བྲལ་ཐིག་ལེ་དང་། །འཁྲུལ་པ་མ་རིག་ཐིག་ལེ་དང་། །དེ་ཡི་གཉེན་པོ་ཐིག་ལེ་གསུམ། །ཞེས་པ་བཅོམ་ལྡན་འདས་ཀྱིས་གསང་བ་འདུས་པའི་བཤད་རྒྱུད་དུ་གསུངས་ཏེ། འདི་ནི་དཔལ་ས་ར་ཧ་པའི་ཞལ་སྔ་ནས་ཀྱང་། ཐིག་ལེ་གསུམ་དང་ཡིད་དྲན་པ་དང་དྲན་པ་མེད། ཞེས་བྱུང་བས་འཁོར་འདས་ཐམས་ཅད་ཐིག་ལེའི་གནས་ལུགས་སུ་ཡང་གསུངས་སོ། །རྒྱས་པར་བཤད་པ་ལ་ལྔ་སྟེ། རྩ་བ་སྤྲོས་བྲལ་གྱི་ཐིག་ལེ་དང་། འཁྲུལ་པ་མ་རིག་གི་ཐིག་ལེ་མདོར་བསྟན་པ་དང་། རྫས་ཀྱི་ཐིག་ལེ་རྒྱས་པར་བཤད་པ་དང་། །གཉེན་པོའི་ཐིག་ལེ་འཆིང་བའི་རིམ་པ་དང་། ཞར་ལ་སྐྱོན་བསལ་བ་བསྟན་པའོ། །དང་པོ་ལ་ཚིགས་བཅད་གསུམ་དང་རྐང་པ་གཅིག་སྟེ། དེ་ཡང་སྤྲོས་བྲལ་གྱི་ཐིག་ལེ་ནི་རང་གི་སེམས་ལྷན་ཅིག་སྐྱེས་པའི་ཡེ་ཤེས་ལ་བརྗོད་དེ། ངོ་བོ་སྟོང་། རང་བཞིན་གསལ། འགག་པ་མེད་པ་གསུམ་པོ་སྤྲོས་པ་དང་བྲལ་བའི་ཆོས་ཀྱི་སྐུ་དང་། གསལ་བ་ལོངས་སྤྱོད་རྫོགས་པའི་སྐུ་དང་། ཐུགས་རྗེ་ཅིར་ཡང་གྲུབ་པ་སྤྲུལ་པའི་སྐུ་སྟེ་སྐུ་གསུམ་གྱི་རང་བཞིན་སྔར་རྒྱས་པར་བཤད་པ་ཡིན་ནོ། །དེ་ལྟ་བུའི་དོན་དེ་ཡོད་པའི་རྟགས་ད་ལྟར་སྣང་བ་ཇི་ལྟ་བུ་ཞེ་ན། ཐམས་ཅད་སྟོང་པར་སྣང་བ་ནི། དངོས་པོ་ཐམས་ཅད་ཀྱི་རང་བཞིན་སྟོང་པ་ཉིད་ལས་མ་འདས་པའི་དོན་ཡིན་པས་ད་ལྟ་ཡང་ཐམས་ཅད་སྟོང་པར་སྣང་བ་ཡིན་ནོ། །ལོངས་སྤྱོད་རྫོགས་པའི་རྟགས་ནི། མིག་གི་ཡུལ་དུ་དབྱིངས་རིག་གི་རྟགས་བཅུ་འཆར་བ་དང་། སྤྲུལ་སྐུའི་རྟགས་སུ། ཚོགས་དྲུག་གི་ཡུལ་སྣང་གི་ནུས་པ་སོ་སོར་འབྱིན་པ་སྟེ། གསུམ་པོ་ནི་བསླུ་བ་མེད་པའི་རྟགས་ད་ལྟར་ཡུལ་ལ་སྣང་བ་སྟེ། ཡུལ་ཅན་གྱི་ཡེ་ཤེས་ནི་དེ་དང་འབྲེལ་བའི་རྣམ་པར་ཤེས་པའི་རང་གི་ངོ་བོ་ཡིན་པས། དེ་ནི་རྟོག་བྲལ་མ་འཁྲུལ་བ་རྩ་བ་སྤྲོས་བྲལ་ཐིག་ལེ་ཡིན། ཞེས་སྨོས་ཏེ། དེ་ལ་རྣམ་པར་རྟོག་པ་དང་བྲལ་བའི་རྣལ་འབྱོར་མངོན་སུམ་གང་ཞེ་ན། །ཡིད་གཙོར་གྱུར་པའི་ཆོས་རྣམས་ལ། །རྟོག་དང་བརྟག་པ་རྣམས་སྤངས་ནས། །ཆོས་རྣམས་རང་བཞིན་མེད་པ་ཉིད། །ཆོས་ཀྱི་དབྱིངས་སུ་བསྒོམ་པར་བྱ། །མཐོང་དང་ཐོས་དང་བསྣམས་པ་དང་། །མྱངས་དང་རེག་པར་གྱུར་པ་དང་། །ཆོས་རྣམས་དེ་ལྟར་རྣལ་འབྱོར་པས། །ཤེས་ནས་མཚན་ཉིད་རྫོགས་པ་ཡིན། །མིག་དང་རྣ་བ་སྣ་དག་དང་། །ལྕེ་དང་ལུས་དང་དེ་བཞིན་ཡིད། །སྐྱེ་མཆེད་དྲུག་པོ་རྣམ་དག་པ། །འདི་ཉིད་དེ་ཉིད་མཚན་ཉིད་དོ། །སེམས་ཉིད་རྣམ་པ་གཉིས་སུ་མཐོང་། །ཇི་ལྟར་འཇིག་རྟེན་འཇིག་རྟེན་འདས། །བདག་ཏུ་འཛིན་ལས་འཁོར་བ་སྟེ། །སོ་སོར་རིག་ན་དེ་ཉིད་དེ། །འདོད་ཆགས་ཟད་པས་མྱ་ངན་འདས། །ཞེ་སྡང་གཏི་མུག་ཟད་པ་དང་། །དེ་དག་འགགས་པས་སངས་རྒྱས་ཉིད། །ལུས་ཅན་ཀུན་གྱི་སྐྱབས་ཉིད་དོ། །ཞེས་བདག་ཉིད་ཆེན་པོ་ཀླུ་གྲུབ་ཀྱིས་ཆོས་ཀྱི་དབྱིངས་སུ་བསྟོད་པ་ལས་གསུངས་སོ། །འདི་ཉིད་བསྒོམ་པར་བྱེད་པའི་ཚུལ་ཡང་སློབ་དཔོན་དཔའ་བོ་རྡོ་རྗེས་ཕྱག་རྒྱ་བཞི་རིམ་པ་ལས། །མངོན་སུམ་རྟོག་བྲལ་རྒྱུན་བསྲིངས་ནས། །བསྒོམས་སོ་ཞེས་ནི་ཐ་སྙད་འདོགས། །ཞེས་པ་དང་། དཔལ་ས་ར་ཧ་པས་ཀྱང་། །མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །ཞེས་བྱ་བ་ལ་སོགས་པ་མང་དུ་གསུངས་སོ། །ཐིག་ལེའི་སྒྲ་དོན་ཡང་ལི་ཀ་ནའི་བདེ་བ་ཆེན་པོའི་སྙིང་པོའི་དོན་སྟེ་ཐིག་ལེའི་དོན་ནི་སྣང་བ་དུ་མ་བདལ་བ་ཡིན་ནོ་ཞེས་བྷི་མ་ལས་གསུངས་སོ། །རྒྱས་པར་ནི་མདོ་རྒྱུད་ཀུན་ལས་གསུངས་སོ། །གཉིས་པ་འཁྲུལ་པ་མ་རིག་གི་ཐིག་ལེ་མདོར་བསྟན་པ་ལ། ཚིགས་བཅད་གཉིས་རྐང་པ་དང་བཅས་པ་སྟེ། དེ་ལ་འཁྲུལ་པ་མ་རིག་ཐིག་ལེ་ནི། ཀུན་བརྟགས་དང་གཞན་དབང་ལས་དབྱེ་བ་བྱ་སྟེ། སྔགས་ཀྱི་ཐིག་ལེ་དང་། རླུང་གི་ཐིག་ལེ་དང་། ཁམས་ལྔ་རྫས་ཀྱི་ཐིག་ལེ་ཞེས་རྒྱལ་བས་རྣལ་འབྱོར་ཆེན་པོའི་རྒྱུད་རྡོ་རྗེ་འཕྲེང་བར་གསུངས་སྟེ། དེ་ཡང་མ་རིག་པ་དང་འདུ་བྱེད་དང་རྣམ་པར་ཤེས་པ་ལས་ཀུན་ཏུ་བརྟགས་པའི་ཚོར་བ་དང་འདུ་ཤེས་དང་འདུ་བྱེད་ལས་གྱུར་པའི་མིང་དང་དོན་དུ་འཛིན་པའི་གཉེན་པོར་ལྷ་དང་བཟླས་པའི་སྔགས་དང་། རྣམ་པར་རྟོག་པ་སྦྱོང་བའི་ཚུལ་རྣམས་ཀུན་བརྟགས་སྔགས་ཀྱི་ཐིག་ལེ་ཡིན་ལ། དམིགས་རྐྱེན་བདག་རྐྱེན་དེ་མ་ཐག་པའི་རྐྱེན་གསུམ་གཡོ་བ་ནི་རླུང་གིས་བྱེད་པས་དེ་འཆིང་བ་ལ་རླུང་གི་ཐིག་ལེ་ཞེས་བཤད་དོ། །ཡུལ་སྣང་གཟུགས་ཀྱི་ཕུང་པོ་ལས་བྱུང་བ་རྣམས་འོག་ནས་སྟོན་པ་རྣམས་སོ། །གསུམ་པ་རྫས་ཀྱི་ཐིག་ལེ་བཤད་པ་ལ་ལྔ་སྟེ། བར་དོའི་རྐྱེན་ཉེ་བར་སྦྱོར་བ་དང་། དྭངས་མ་གཉིས་དང་། སྙིགས་མ་ཇི་ལྟར་འབྱུང་བའི་ཚུལ་དང་། ཁམས་སུམ་བཅུ་སོ་དྲུག་གི་རྒྱས་བཤད་དང་། དཀར་ཆའི་འཕོ་བའི་རིམ་པའོ། །དང་པོ་ནི། ཚིག་བཅད་ཕྱེད་དང་གཉིས་ཏེ། དེ་ལ་རྫས་ཀྱི་ཐིག་ལེ་ཕྱི་ནང་གཉིས་ལས། ནང་གི་དང་པོ་ཕ་མའི་རྐྱེན་ཉེ་བར་སྦྱོར་པའི་ཚུལ་རྒྱས་པར་གོང་དུ་བཤད་པ་བཞིན་ནོ། །དྭངས་མ་གཉིས་བསྟན་པ་ནི། ཚིག་བཅད་ཕྱེད་དང་བཞི་སྟེ། ད་ལྟ་གནས་ཚེ་དྭངས་སྙིགས་གཉིས་ཀྱི་རླུང་སེམས་དྭངས་མ་སྔར་བསྟན་ཟིན་ལ། རྫས་ཀྱི་ཐིག་ལེ་ལ་དྭངས་མ་ནི་དཀར་དམར་གཉིས་སྟེ། དཀར་ཆ་དབུ་མའི་ཡར་སྣ་ན། ཧཾ་གི་རང་བཞིན་ཉུངས་དཀར་ཙམ། །དཀར་ལ་སྣུམ་བ་ཤེལ་དང་མཚུངས། །ཕ་ལས་འཐོབ་པ་ཀུན་གྱི་མཆོག །ཞེས་པ་ནི། གནས་པ་དང་། རྣམ་པ་གང་ཡིན་པ་དང་། ཆེ་ཆུང་དང་། ཁ་དོག་དཔེ་དང་བཅས་པ་དང་། གང་ལས་བྱུང་བ་རྣམས་རིམ་པས་བསྟན་པ་ཡིན་ནོ། །དམར་ཆ་རྩ་གསུམ་འདུས་པ་ན། །དམར་གསལ་རྒོད་མའི་མེ་འདྲ་བ། །ཨ་ཐུང་ཞེས་བྱ་བ་མ་ལས་ཐོབ་པའི་ཐིག་ལེ་རྒོད་མའི་མེ་ཞེས་བྱ་བ་ནི། རྟག་གདོང་གི་མེ་སྟེ་རབ་ཏུ་ཚ་ཞིང་དམར་བའི་དོན་ཡིན་ནོ། །འདི་ལ་ཐིག་ལེ་ནི་དཔལ་ཧེ་རུ་ཀ་དང་། དམར་ཆ་ནི་རྡོ་རྗེ་ཕག་མོའི་རང་བཞིན་དུ་དཔྱིད་དང་ཐིག་ལེ་ཞེས་ཀྱང་གསུངས་ཏེ། འདི་གཉིས་ནི་ཀུན་གཞི་དང་སྲོག་གི་རླུང་བརྟེན་པ་ཕྱི་རོལ་གྱི་གནས་ཉེ་བར་མཚོན་ན་བྱང་ཆུབ་ཀྱི་སྙིང་པོ་རྡོ་རྗེའི་གདན་ཡིན་ནོ་ཞེས་སྡོམ་འབྱུང་ལས། །སྤྱི་བོ་བདེ་ཆེན་འཁོར་ལོ་སྟེ། །པད་མ་འདབ་མ་བཞི་པ་ནི། །ཕྲ་བ་བྱང་ཆུབ་སེམས་ཀྱི་གནས། །ཐམས་ཅད་བརྟེན་པའི་གཟུགས་ཡིན་པས། །བྱང་ཆུབ་སྙིང་པོའི་ངོ་བོ་ཉིད། །ཞེས་པ་དང་ཧེ་བཛྭ་ལས་ཀྱང་། །ཁུ་བའི་རྣམ་པ་བཅོམ་ལྡན་ཡིན། །དེ་ཡི་བདེ་བ་འདོད་མར་བརྗོད། །ཞེས་པ་དང་། །ལྟེ་བའི་དཀྱིལ་འཁོར་ཉིད་དུ་གནས། །ཕག་མོའི་ཐིག་ལེའི་རང་བཞིན་ཏེ། །རྒོད་མའི་མེ་འདྲའི་ངོ་བོ་ཉིད། །ཞེས་པ་དང་། །ཚངས་པའི་གནས་སུ་ཡང་དག་གནས། །གཞོམ་མེད་ཧཾ་གི་རྣམ་པ་ཅན། །བ་མོ་ལྟ་བུར་འཛག་པ་སྟེ། །དཔྱིད་ཅེས་བྱ་བར་ཡང་དག་བཤད། ཞེས་བྱ་བ་ལ་སོགས་པ་རྒྱུད་རྣམས་ལས་མང་དུ་གསུངས་སོ། །སྙིགས་མ་ཇི་ལྟར་འབྱུང་བའི་ཚུལ་ནི། དེ་བརྟེན་སྙིགས་ཀྱང་དྭངས་སྙིགས་གཉིས། ཞེས་པ་ནས་ཚིགས་སུ་བཅད་པ་བདུན་སྟེ། དེ་ལ་དམར་ཆ་ཁྲག་གི་རང་བཞིན་ནི་ཨ་ཐུང་གི་མེས་བསྐྱེད་ནས་གྱེན་དུ་འགྲོ་ལ། ཐིག་ལེ་དཀར་པོ་ཧཾ་ལ། བརྟེན་ནས་སྤྱི་བོ་ནས་འོག་ཏུ་འགྲོ་བས་དེའི་ཚུལ་རྒྱས་པར་བསྟན་པའི་ཕྱིར། ནང་ན་སྦྱིན་སྲེག་བྱེད་པའི་རྒྱུས་བསྐྱེད་པ་སྟེ། དེ་ཡང་ཇི་ལྟར་ན་ཕྱི་རོལ་གྱི་བཟའ་བཏུང་གི་དངོས་པོ་རྣམས་ནི་སྲེག་རྫས། རོ་བརྐྱང་གིས་བསྐྱེད་པའི་ལག་པ་གཉིས་ནི་དགང་གཟར་དང་བླུག་གཟར་ཁ་ནི་ཧོམ་ཁུང་། དེས་ཕུང་པོ་ཁམས་དང་སྐྱེ་མཆེད་ཀྱི་ལྷ་རྣམས་གསོ་བར་བྱེད་པ་སྟེ། མེ་ལྷ་ཞལ་གསུམ་པའི་རང་བཞིན་ཕོ་བ་ན་རླུང་མེ་མཉམ་དང་། བད་ཀན་མྱགས་བྱེད་དང་། མཁྲིས་པ་མདོག་འགྱུར་གསུམ་གྱིས་བསྲེགས་བཞུས་སྦྱངས་ནས་དྭངས་མ་ནི་འཆིན་པ་རུ་རྩ་ཆེན་པོ་བཞི་ལས་བརྒྱུད་དེ་ཁྲག་དུ་འགྲོའོ། །སྙིགས་མ་ནི་དྲི་ཆུའོ། །ཁྲག་གི་དྭངས་མ་ནི་ཤ། སྙིགས་མ་ནི་མཁྲིས་པར་འགྲོ་བས། འཁྲིས་པ་དེའི་ཡང་སྙིགས་ནི། དྲི་ཆུའི་ཀུ་ཡ་དང་དྲི་ཆེན་གྱི་དྲི་དང་སེར་པོར་བྱེད་དོ། །ཤའི་དྭངས་མ་ནི་ཚིལ་སྙིགས་མ་ནི་ལྤགས་པ་དང་དྲི་མའོ། །ཚིལ་གྱི་དྭངས་མ་ནི་རུས་པ། སྙིགས་མ་ནི་རྨེན་བུའོ། །རུས་པའི་དྭངས་མ་ནི་རྐང་། སྙིགས་མ་ནི་སོ་སེན་མོ། རྐང་གི་དྭངས་མ་ནི་ཁུ་བ་སྙིགས་མ་ནི་སྦུབས་ཀྱི་དྲི་མའོ། །ཁུ་བའི་དྭངས་མ་ནི་སྟོབས་དང་ཁ་དོག་སྙིགས་མ་ནི་འཛག་པའི་ཕྱིར་རྒྱུད་རྣམས་ནས་ནང་གི་སྐྱེ་བ་བདུན་པ་ཞེས་བཤད་ཅིང་། རིམ་པ་འདི་ནི་སློབ་དཔོན་དཔའ་བོས། །ལུས་ཟུངས་དྭངས་མ་ཁྲག་དང་ཤ། །ཚིལ་དང་རུས་རྐང་ཁུ་བ་སྟེ། གནོད་བྱ་བདུན་ཡིན་དྲི་མ་གཅིན། །གཤང་བ་རྡུལ་ལ་སོགས་པའང་ཡིན། ཞེས་གསུངས་སོ། །ཁམས་སུམ་བཅུ་སོ་དྲུག་གི་རྒྱས་བཤད་ནི། །དྭངས་མ་བཅུ་ཇི་ལྟར་རྒྱུ་བ་དང་། །སྙིགས་མ་ཉི་ཤུ་རྩ་བཞི་རྒྱས་བཤད་དང་། གཉིས་ལས། དང་པོ་ནི། རྒྱས་བཤད་ཁམས་ནི་སུམ་བཅུ་དྲུག །ཅེས་པ་ནས་ཚིགས་སུ་བཅད་པ་དྲུག་སྟེ། འདི་དག་ཀྱང་སྔར་རྩའི་སྐབས་སུ་རྒྱས་པར་བཤད་ཟིན་པས་འདིར་ནི་ཁམས་ངོས་བཟུང་བ་ཙམ་བཤད་དེ། སྙིང་ཁའི་རྩ་བརྒྱད་ཀྱི་ཡན་ལག་གི་རྩ་མིག་དང་རྣ་བ་སྣ་ལྕེར་འབྲེལ་བའི་ཡུལ་འཛིན་པའི་བདག་རྐྱེན་བྱེད་པ་དང་། བདུད་བྲལ་ནི་ལྕེའུ་ཆུང་གི་དབུས་སུ་ཁུ་བ་འབབ་པས་ནག་ཕྱོགས་དང་མཐུན་པར་བཤད་ཅིང་། རེག་བྱའི་ཕྱོགས་གཅིག་འཛིན་པ་དང་རྩ་བའི་རླུང་ལྔའི་བྱེད་ལས་སྔར་བསྟན་ལ། ཁྱད་པར་དུ་དབུ་མའི་ཆ་ལས་ཡར་སྟེང་དུ་རླུང་གསུམ་འབབ་ཅིང་། ཐུར་དུ་ཐིག་ལེ་དང་དྲི་ཆུའི་ཁམས་གསུམ་གྱི་བྱ་བ་བྱེད་པ་དང་བཅས་པ་དྭངས་མའི་ཁམས་བཅུ་གཉིས་སོ། །འདིའི་ངེས་པའི་ལུང་ནི་ཁ་སྦྱོར་ཐིག་ལེ་ལས། །ཕྱོགས་བཞི་འདབ་མའི་རྩར་གནས་པ། །འབྱུང་བ་ཆེ་རྣམས་མར་མེའི་དངོས། །འཚམས་རྩར་བདུད་རྩི་ལྔ་འབབ་པ། །དེ་བརྟེན་མཆོད་པ་བཞི་ཞེས་བཤད། །འདིར་ནི་ལུས་ཀྱི་སྙིང་དབུས་སུ། རྩ་ལྔ་པོ་ནི་ཡང་དག་གནས། །ཞེས་བྱ་བ་འདིར་སྨོས་ཏེ། འདིར་ཕྱོགས་བཞིར་བཤད་པའི་མར་མེའི་དངོས་པོ་ནི། ཡན་ལག་གི་རྩ་མཁའ་འགྲོ་མ་བཞིའི་ངོ་བོ་ཡིན་ལ། བདུད་རྩི་ལྔ་འབབ་པའི་འཚམས་རྩར་བརྗོད་པ་ནི། རྩ་བའི་རླུང་དང་བྱང་ཆུབ་ཀྱི་སེམས་འབབ་པ་རྣམས་ཡིན་ཏེ། རྣལ་འབྱོར་མའི་རྒྱུད་ལས། འཚམས་ཀྱི་རྩ་བུམ་པའི་ངོ་བོ་དེ་བཞིན་གཤེགས་པར་བཤད་པའི་ཕྱིར་རོ། །བྱེ་བྲག་ཏུ་སྙིང་ཁའི་ལྔ་སྨོས་པ་ནི། གསུམ་བསྐོར་མ་དང་། འདོད་མ་དང་། ཁྱིམ་མ་དང་གཏུམ་མོ་དང་། བདུད་བྲལ་མ་དང་ལྔ་པོ་ཡིན་ནོ། །དེ་ལྟར་དྭངས་མ་བཅུ་གཉིས་རྒྱུ་བའི་ཚུལ་བཤད་ནས། ད་ནི་སྙིགས་མ་ཉི་ཤུ་རྩ་བཞི་པོ་ཇི་ལྟར་འབབ་པའི་ཚུལ་བཤད་པ་ལ། །སྐུ་གསུང་ཐུགས་ཀྱི་བྱེ་བྲག་གིས། །ཞེས་པ་ནས་ཚིགས་སུ་བཅད་པ་ཕྱེད་དང་བཅུ་དྲུག་གིས་བསྟན་ཏེ། འདི་རྣམས་ནི་སམྦུ་ཊ་ནས་བྱུང་པའི་ལུང་ཇི་ལྟ་བ་ཡིན་པས་མཁའ་སྤྱོད་དང་། ས་སྤྱོད་དང་། ས་འོག་སྤྱོད་ཀྱི་སྐུ་གསུང་ཐུགས་ཀྱི་བྱེ་བྲག་གིས་གནས་ཉི་ཤུ་རྩ་བཞིར་བརྗོད་དེ། ཐིག་ལེ་རྒྱུན་དུ་གནས་པ་ལ་སོགས་པའི་བྱེ་བྲག་ལ་བརྟེན་ནས། ཕྱིའི་གནས་དང་ནང་གི་གནས་སུ་ཉེ་བར་བརྗོད་དེ། འདི་རྣམས་ཀྱང་ཕྱི་རོལ་གྱི་ཡུལ་དང་རྩ་དང་དེའི་ནང་ནས་འབབ་པའི་ཁམས་དང་གནས་ལ་སོགས་པའི་ས་བཅུའི་སྦྱར་བཤད་རྣམས་ཏེ། མི་ཕྱེད་མ་ནི་མགོ་བོ་ལ་གནས་ཤིང་སེན་མོ་དང་སོ་རྣམས་བསྐྱེད་དོ། །ཕྲ་གཟུགས་མ་ནི་སྤྱི་གཙུག་ཏུ་གནས་ཤིང་སྐྲ་དང་སྤུ་རྣམས་བསྐྱེད་དོ། །རྩེ་བ་མ་ནི་རྣ་བ་གཡས་པར་གནས་ཤིང་ལྤགས་པ་དང་དྲི་མ་རྣམས་བསྐྱེད་དོ། །གཡོན་པ་མ་ནི་ལྟག་པར་གནས་ཤིང་ཚང་རའི་ཤ་རྣམས་བསྐྱེད་དོ། །ཕྱི་རོལ་དུ་མཁའ་འགྲོ་མ་རྣམས་རྒྱུན་དུ་གནས་པ་དང་། ནང་དུ་དཀར་ཆ་རྒྱུན་དུ་གནས་པའི་ཕྱིར་གནས་ཞེས་བརྗོད་དོ། །ཐུང་ངུ་མ་ནི་རྣ་བ་གཡོན་པར་གནས་ཤིང་རྒྱུས་པ་བསྐྱེད་དོ། །རུས་སྦལ་མ་ནི་སྨིན་ཕྲག་ཏུ་གནས་ཤིང་རུས་པ་བསྐྱེད་དོ། །བསྒོམ་པ་མ་ནི་མཆིན་པ་ལ་གནས་ཤིང་མིག་གཉིས་བསྐྱེད་དོ། །དབང་བསྐུར་མ་ནི་དཔུང་པའི་རྩ་བ་དང་འབྲེལ་ཅིང་སྙིང་དང་ཕྲག་པ་བསྐྱེད་དོ། །ཕྱི་རོལ་དུ་མཁའ་འགྲོ་མ་རྣམས་རེས་འགའ་གནས་པ་དང་། ནང་དུ་དཀར་ཆ་དང་ཉེ་བའི་གནས་སོ། །སྐྱོན་མ་ནི་མཆན་འོག་གཉིས་ནས་འབྲེལ་ཞིང་། མཆིན་པ་ནས་མིག་འབྲས་ཀྱི་ཤ་བསྐྱེད་དོ། །འཇུག་མ་ནི་ནུ་མ་གཉིས་ལ་གནས་ཤིང་ལོང་ཀ་དང་མཁྲིས་པ་བསྐྱེད་དོ། །ཕྱི་རུ་མཁའ་འགྲོ་མ་རྣམས་དང་། ནང་དུ་ཁམས་ལོངས་སྤྱོད་པའི་ཞིང་ངོ་། །མ་མོ་ནི་ལྟེ་བར་གནས་ཤིང་གློ་བ་བསྐྱེད་པར་བྱེད་དོ། །མཚན་མོ་ནི་རྒྱུ་མ་དང་སྣ་རྩེར་འབྲེལ་ཞིང་ལྟོ་བ་བསྐྱེད་པར་བྱེད་དོ། །གོང་མ་དང་ཉེ་བའི་ཞིང་ངོ་། །བསིལ་སྦྱིན་མ་ནི་འགྲམ་པ་དང་རྩིབས་ལོགས་སུ་འབྲེལ་ཞིང་གྲོད་པ་བསྐྱེད་དོ། །ཚ་བ་མའམ་དྲོད་མ་ནི་མགྲིན་པ་ནས་ལྟེ་བར་གནས་ཤིང་གཉེ་མ་བསྐྱེད་དོ། །ཕྱིར་མཁའ་འགྲོ་མ་དང་ནང་དུ་དྭངས་སྙིགས་འདྲེས་པས་ཚན་དྷོ་ཧའོ། །རྐྱང་མ་སྟེ་དེ་དག་ནི་རྩ་གཡོན་པ་རྐྱང་མ་ལས་གྱེས་ཤིང་གཡོན་གྱི་ཆ་ལ་གནས་པ་ཤེས་རབ་ཀྱི་ཆའོ། །རོ་མ་ལ་བརྟེན་པ་ཐབས་ཀྱི་ཆ་རྣམས་ནི། གཞོལ་མ་ནི་སྙིང་ཁ་ནས་གཤང་ལམ་དུ་འབྲེལ་ནས་གཤང་བ་བསྐྱེད་དོ། །རངས་མ་ནི་འཚོགས་མ་དང་ལྒང་པར་འབྲེལ་ཞིང་། འཚོགས་མའི་ཤ་དང་རྒྱུངས་པ་བསྐྱེད་དོ། །ཉེ་བའི་ཚན་དྷོ་ཧའོ། །ཤིན་དུ་གཟུགས་ཅན་མ་ནི་མཚན་མ་ལ་གནས་ཤིང་རྣག་བསྐྱེད་དོ། །སྤྱི་མ་ནི་གཤང་ལམ་དུ་གནས་ཤིང་བད་ཀན་སྐྱེད་དོ། །ཕྱིར་མཁའ་འགྲོ་མ་རྣམས་ཚོགས་ཀྱི་འཁོར་ལོ་ལ་འདུ་བ་དང་ནང་དུ་དང་སྙིགས་འདུ་བས་འདུ་བའོ། །རྒྱུ་སྦྱིན་མ་ནི་བརླ་ཟུང་ལ་གནས་ཤིང་ཁྲག་བསྐྱེད་དོ། །སྦྱོར་བྲལ་མ་ནི་བྱིན་པ་ལ་གནས་ཞིང་རྔུལ་བསྐྱེད་དོ། །ཉེ་བའི་འདུ་བའོ། །སྡུ་གུ་མ་ནི་སོར་མོ་ལ་གནས་ཤིང་ཚིལ་བསྐྱེད་དོ། །གྲུབ་མ་ནི་རྐང་པའི་རྒྱབ་བམ་བོལ་ལ་གནས་ཤིང་འཆི་མ་བསྐྱེད་དོ། །ཕྱི་རུ་ཁམས་འདོར་བ་དང་ནང་དུ་བདེ་བ་མེད་པའི་ཕྱིར་དུར་ཁྲོད་དོ། །འཚོད་མ་ནི་མཐེ་བོང་ལ་གནས་ནས་ལུད་པ་དང་འཆིལ་མ་བསྐྱེད་དོ། །ཡིད་བཟངས་མ་ནི་པུས་མོ་ལ་གནས་ཤིང་སྣབས་བསྐྱེད་དོ། །ཉེ་བའི་དུར་ཁྲོད་དོ། །ཞེས་གསུངས་པ་འདི་རྣམས་སློབ་དཔོན་ཆེན་པོ་གསེར་གླིང་པའི་དགྱེས་རྡོར་གྱི་འགྲེལ་པར་གསུངས་པ་དང་། རྩ་ལ་ཡུལ་ཉི་ཤུ་རྩ་བཞི་པོའི་མིང་རྐྱང་པ་སྦྱར་བ་ནི། །སྤྱི་བོ་པུ་ལླ་རི་ཡིན་ཏེ། །སོ་དང་སེན་མོ་འབབ་པར་བརྗོད། །ཞེས་བྱ་བ་ལ་སོགས་པ། འཁོར་ལོ་སྡོམ་པའི་རྒྱུད་ལས་བྱུང་བ་ནག་པོ་པས་ཀྱང་མངོན་རྟོགས་དང་དཔྱིད་དང་ཐིག་ལེར་རྒྱས་པར་བཤད་པ་རྣམས་འདིར་སམ་བྷུ་ཊིའི་རྒྱུད་ནས་ཕྱོགས་གཅིག་ཏུ་གསུངས་པ་ཤེས་པར་བྱའོ། །དཀར་ཆའི་འཕོ་བ་དང་བཅས་པ་རྒྱས་པར་བཤད་པ་ནི། ཚིགས་སུ་བཅད་པ་བཞི་སྟེ། དང་པོ་ཁམས་ཉི་ཤུ་རྩ་བཞི་ལས་རྩ་སྟོང་ཕྲག་བདུན་བཅུ་རྩ་གཉིས་རྣམས་སུ་འགྲོ་བའི་ཚུལ་ཡང་། ཕྱག་ན་རྡོ་རྗེའི་འགྲེལ་པར་ཐིམ་པ་དང་ལོངས་སྤྱོད་པ་དང་བདག་པོ་ཞེས་གསུངས་པའི་རིམ་པས་ཐིམ་པ་ནི་བྱ་བ་ཡོངས་སུ་རྫོགས་ནས་ཁམས་ཀྱི་སྙིགས་མར་གྱུར་བ་སྟེ། འབྲས་བུའོ། །ལོངས་སྤྱོད་པ་ཁམས་དེ་དག་གི་དྭངས་མ་དང་དཀར་ཆ་ཡིན་ཏེ་དངོས་གཞིའོ། །དེ་དག་བསྐྱེད་པར་བྱེད་པའི་བདག་པོ་ནི་རྩ་བར་རླུང་ཁྲག་འདྲེས་པ་རེ་རེའང་སྟོང་ཕྲག་གསུམ་གསུམ་སྟེ། རླུང་དང་དཀར་དམར་གསུམ་གྱི་བདག་ཉིད་བྱེ་བ་ཕྲག་ཕྱེད་དང་བཞིའི་བ་སྤུའི་མཐར་ཐུག་པར་ཁྱབ་ཅིང་ཀུན་དུ་བསྐྱེད་དོ། །དེ་ལས་ཀྱང་ཁྱད་པར་དུ་ཐིག་ལེའི་འཕོ་བ་ནི། ཁྱད་པར་དྭངས་མ་ཟླ་བ་ནི། །སྤྱི་བོ་ནས་ནི་བཅུ་དྲུག་རྩ། །ཁམས་བཞི་ལྡན་པ་མགྲིན་པར་འབབ། །ཞེས་སྨོས་ཏེ། སྤྱི་བོ་ནས་ས་ཆུ་མེ་རླུང་གི་ཁམས་འབྱུང་ཆུང་གི་རྣམ་པར་དབྱེ་བས་བཅུ་དྲུག་གི་རང་བཞིན་གྱི་ཐིག་ལེ་མགྲིན་པའི་གནས་སུ་འབབ་པོ། དེའི་ཕྱེད་བརྒྱད་ནི་སྙིང་ཁའི་འཚམས་སུའོ། །དེའི་ཕྱེད་བཞི་ནི་ལྟེ་བའི་འཚམས་ཀྱི་ཕྱོགས་སུ་འབབ་བོ། །དེ་རྣམས་རྩ་གསུམ་འདུས་མདོར་གཅིག་དུ་གྱུར་པ་ནི་ཐིག་ལེ་ཅན་སྟེ། དམར་ཆའི་རང་བཞིན་ཨ་ཐུང་ངུའི་མེ་ལ་གཅིག་ཏུ་འབབ་པས་ན། དུང་ཅན་མའི་ནང་དུ་ཟླ་བ་ཡོངས་སུ་རྫོགས་པ་བཅུ་དྲུག་པའི་ཆར་འགྱུར་ཏེ། ཧེ་བཛྭ་ལས་ཀྱང་། བཅོ་ལྔ་ཆ་ཡི་བདག་ཉིད་ཕྱིར། །ཟླ་བ་བྱང་ཆུབ་སེམས་སུ་འགྱུར། །བདེ་བ་ཆེན་པོ་ཨ་ལིའི་གཟུགས། །རྣལ་འབྱོར་མ་རྣམས་དེ་ཡི་ཆ། །ཞེས་གསུངས་སོ། །འདི་ལ་བརྟེན་ནས། ལུས་ཀྱི་ཕྱི་རོལ་གྱི་ཚིགས་ཐམས་ཅད་དུ་ཡང་ཚེས་ཀྱི་བདག་ཉིད་ཀྱི་ཁམས་ཀྱི་འཕོ་བ་གསུངས་ཏེ་དུས་ཀྱི་འཁོར་ལོ་ལས་འདིར་ནི་སོར་མོ་རྣམས་ནས་ཚིགས་ཀྱི་རིམ་པས་གཙུག་གཏོར་བར་དུ་འགྲོ་སྟེ་ཚེས་ཀྱི་དབང་གིས་ཉའི་མཐར་ཡང་རང་གི་སེམས། ཨ་ནི་གཙུག་གཏོར་ནས་ནི་ནག་པོའི་ཕྱོགས་སུ་འདིར་ནི་རྐང་པའི་སོར་མོ་རྣམས་སུ་འགྲོ་བར་འགྱུར། ཞེས་གསུངས་ཏེ། ཡར་ངོའི་ཚེས་གཅིག་ལ་རྐང་པ་གཡོན་པའི་སོར་མོའི་ཚིགས་དང་པོ་ལ་ཨའོ། །ཚེས་དང་ཚིགས་གཉིས་པ་ལ་ཨིའོ། །གསུམ་པ་ལ་རྀའོ། །བཞི་པ་ལ་ལོང་བུ་རུ་ཨུའོ། །ལྔ་པར་པུས་མོ་ལ་ལྀའོ། །དྲུག་པར་བརླའི་འཚམས་སུ་ཨའོ། །བདུན་པ་ལ་ལག་པ་གཡོན་པའི་སོར་ཚིགས་དང་པོ་ལ་ཨེའོ། །བརྒྱད་པ་ལ་སོར་ཚིགས་གཉིས་པར་ཨར་རོ། །དགུ་པ་ལ་ཚིགས་གསུམ་པར་ཨོའོ། །བཅུ་པ་ལ་ལག་པའི་འཁྲིག་མར་ཨའོ། །བཅུ་གཅིག་པ་ལ་གྲུ་མོར་ཧའོ། །བཅུ་གཉིས་པ་ལ་དཔུང་བར་ཡའོ། །བཅུ་གསུམ་པ་ལ་མགྲིན་པར་རའོ། །བཅུ་བཞི་པ་ལ་འཚོགས་མར་ཝའོ། །བཅོ་ལྔ་པ་ལ་སྤྱི་བོར་ལའོ། །བཅུ་དྲུག་པ་ཨྃ་གི་རང་བཞིན་ཚངས་བུག་ཏུ་འགྲོ་སྟེ། དེ་བཞིན་དུ་གཞོགས་གཡས་པ་ལ་མར་ངོའི་ཚེས་ཀྱི་རིམ་པས་འཕོ་བར་འགྱུར་རོ། །རིམ་པ་གཞན་ཡང་སྡོམ་འབྱུང་དུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཱཻ། ཨོ་ཨཱཽ། ཨྃ་གི་ཡི་གེའི་རིམ་པས། །ཡར་ངོའི་ཡི་ནི་ཚེས་གཅིག་ལ། །རྐང་པའི་སོར་མོར་ཡི་གེ་ཨ། །ཞེས་བྱ་བ་ལ་སོགས་པ་གསུངས་སོ། །སྨན་གྱི་བསྟན་བཅོས་ལས་ཀྱང་ཀུན་ཏུ་འཁྱམ་པའི་བརླ་གནས་ཀྱི་རྩ་ཞེས་བྱ་སྟེ། འདི་ཡོད་པའི་གནས་སུ་གཏར་སྲེག་ལ་སོགས་པ་མི་བྱ་བར་བཤད་དོ། །འདི་ནི་སེམས་ཅན་རྣམས་ལ་ཁམས་འཛག་པར་བྱེད་པས་དུག་གསུམ་གྱི་ཉོན་མོངས་པ་བསྐྱེད་དེ། །ལུས་ཅན་ཀུན་གྱི་སྙིང་དགའ་བས། །ཆགས་བསྐྱེད་རྨོངས་བྱས་སྡང་སེམས་སྐྱེ། །འཁོར་བ་བསྐྱེད་བྱེད་གཞིར་གྱུར་ཏོ། ཞེས་པའི་དོན་གོང་དུ་རྒྱས་པར་བཤད་ཟིན་ཏོ། །བཞི་པ་གཉེན་པོའི་ཐིག་ལེ་འཆིང་བའི་རིམ་པ་བཤད་པ་ནི། གང་གིས་འཆིང་བ་དང་། འཆིང་བའི་རིམ་པ་དང་། འབྲས་བུ་བསྟན་པ་གསུམ་ལས། དང་པོ་ནི། །རྒྱལ་བས་གསུངས་པའི་ཐབས་ལྡན་བས། །འཛག་བྲལ་དངུལ་ཆུ་ལྟ་བུར་ནི། །ཕྱག་རྒྱ་གསུམ་གྱི་མེས་བཅིངས་ན། ཞེས་སྨོས་ཏེ་བཅོམ་ལྡན་འདས་ཀྱིས་བླ་ན་མེད་པའི་རྒྱུད་ཐམས་ཅད་དུ་གསུངས་པ། འཛག་པ་དང་བྲལ་བ་ལས་ལྷན་ཅིག་སྐྱེས་པའི་ཡེ་ཤེས་འཐོབ་པར་བསྟན་ཏེ་ཧེ་བཛྭ་ལས། གཅིག་དང་དུ་མར་བྲལ་པ་ཡི། །སྐད་ཅིག་གཅིག་ལ་མཆོག་དགའ་བ། །ངག་གི་ལམ་འདས་སྤྱོད་ཡུལ་ཏེ། །འདི་ནི་བྱིན་བརླབས་རིམ་པའི་ཕྱིར། །ཀུན་མཁྱེན་ཡེ་ཤེས་དེ་ལྟ་བུ། ཞེས་དཔེ་དང་དོན་རྣམ་པར་སྦྱར་ནས་གསུངས་ཏེ། དེ་འཆིང་བའི་ཕྱག་རྒྱ་གསུམ་པོ་ཡང་དུས་ཀྱི་འཁོར་ལོ་ལས། ཕྱག་རྒྱ་དེ་ནི་རྣམ་པ་གསུམ་སྟེ་ལས་དང་བརྟགས་པ་བཟང་མོའོ། །ཞེས་པ་དང་། འགྲེལ་པར་ལས་ཀྱི་ཕྱག་རྒྱ་ནི་སྔགས་སྒྲུབས་པའི་སྟོབས་ཀྱིས་གྲུབ་པ་སྔགས་སྐྱེས་སམ་ཞིང་ལས་སྐྱེས་པའམ་རིགས་ལས་སྐྱེས་པ་སྟེ། ནུ་མ་དང་སྐྲ་དང་ལྡན་པའོ། །ཀུན་བརྟགས་པ་ཡེ་ཤེས་ཀྱི་ཕྱག་རྒྱ་ནི། ཡིད་ཀྱིས་བརྟགས་པའི་རྣམ་པ་བསྒོམས་པ་ལས་བྱུང་བའོ། །ཕྱག་རྒྱ་བཟང་མོ་ནི་གཞོན་ནུ་མ་ལ་པྲ་ཕབ་པ་ལྟ་བུ་རྣམ་པ་ཀུན་གྱི་མཆོག་དང་ལྡན་པ་ཡིད་ཀྱིས་བརྟགས་པ་ཐམས་ཅད་དང་བྲལ་བའོ་ཞེས་གསུངས་སོ། །དངུལ་ཆུ་འཆིང་བ་བཞིན་ཞེས་བྱ་བ་ནི་དངུལ་ཆུ་མེ་དང་ཕྲད་ན་སྐད་ཅིག་ཀྱང་ནི་མི་སྡོད་འབྲོས་པ་བཞིན། །དེ་བཞིན་སྐྱེ་གནས་རེག་པ་ལས་ནི་རྟག་ཏུ་ཁུ་བ་འཕོ་བ་ཡིན། །སྨན་དང་སྣུམ་ལ་སོགས་པའི་སྟོབས་ཀྱིས་གཡོ་བ་ཡང་ནི་འཆིང་བ་ལྟར། །དེ་བཞིན་ཕྱག་རྒྱའི་སྟོབས་ཀྱིས་ཁུ་བའི་བློ་ནི་སྦྱོང་བའོ། །ཞེས་བྱ་བ་ལ་སོགས་པ་མང་དུ་གསུངས་སོ། །འཆིང་བའི་རིམ་པ་ནི། རྒྱལ་མཚན་རྩ་བཞི་དག་པ་རུ། །འགགས་པས་བདེན་མཐོང་དོན་ལ་སྦྱོར། །རྗེས་དྲན་བཅུ་དྲུག་དང་ལྡན་པས། །བརྟན་བྱས་གྱེན་ལ་འགྲོ་བ་ཡིན། །ཞེས་བྱ་བ་སྨོས་ཏེ་ཐོག་མར་སོ་སོར་སྡུད་པ་དང་བསམ་གཏན་དང་སྲོག་རྩོལ་ལེགས་པར་སྦྱངས་ནས། འཛིན་པའི་སྐབས་སུ་ཁམས་བྱང་ཆུབ་ཀྱི་སེམས་སྐ་བ་དང་སླ་བ་འཛག་པ་རྒྱལ་མཚན་ཏེ་གསང་བའི་རྩ་བཞི་རུ་འགག་ཅིང་དེ་ཉིད་ཀྱིས་བདེན་པ་མཐོང་བ་ལ་སྦྱོར་ཞིང་། དེ་ནས་རྗེས་སུ་དྲན་པ་བསྒོམ་པའི་ལམ་ཐོབ་པར་འགྱུར་ཏེ། དེ་ཡང་སྤྱན་རས་གཟིགས་ཀྱིས། དེ་ནས་གཟུགས་མཐོང་བར་བྱས་ལ་ཉི་མ་སོ་སོའི་དུས་སུ་སྲོག་གི་རླུང་བཀག་པ་ཞེས་པ་བུམ་པ་ཅན་ཇི་སྲིད་རྣམ་པར་འཁོར་བ་དང་ལྡན་པ་རང་གི་ལུས་སུ་ཡོངས་སུ་སོན་པས་འོད་ཟེར་གྱི་འཁོར་ལོ་མཐོང་བ་སྔོན་དུ་གསུངས་པའི་གཟུགས་བརྙན་ནང་གི་བདག་ཉིད་ཅན། ཟླ་བ་དྲུག་གིས་རེག་པ་དམན་པ་དབང་པོ་གཉིས་ཀྱིས་གཉིས་མཁྱུད་པ་སྤངས་པ། ཉམས་པའི་བདེ་བ་དོར་བ། མི་གཡོ་བའི་བདེ་བའི་ལམ་སེམས་སྟོང་པ་ཉིད་དུ་བསམས་ལ། གལ་ཏེ་ལས་དང་པོ་པ་ཚངས་པར་སྤྱོད་པ་རྣམས། དེ་ནས་སྐད་ཅིག་མ་ཅིག་གིས་མངོན་པར་རྫོགས་པར་བྱང་ཆུབ་པའི་མཚན་ཉིད་སྐད་ཅིག་གིས་ཆགས་པ་དང་ཆགས་བྲལ་གྱི་མཐའ་ཆགས་པའི་དང་པོའི་སྐད་ཅིག་ཞེས་བྱའོ། །ཆགས་པ་ཞེས་པ་ནི་དཀར་པོའི་ཕྱོགས་དེའི་མཐར་སོན་པ་བཅུ་དྲུག་པའི་ཆའི་སྐད་ཅིག་གོ། །ཆགས་བྲལ་ནི་ནག་པོའི་ཕྱོགས་དེའི་ཕྱོགས་ནི་ནག་པོའི་ཕྱོགས་སུ་སོན་པ་མངོན་པར་བྱང་ཆུབ་པའི་དུས་ཀྱི་མཚན་ཉིད་དེ། དེ་དེ་ཉིད་ཀྱི་སྐད་ཅིག་དང་། དབུགས་ཀྱི་གྲངས་ཀྱིས་འཕེལ་བ་རླུང་བརྒྱ་ཕྲག་བཅོ་བརྒྱད་ཀྱི་གྲངས་ཞེས་པས་སོ། །གསང་བའི་རྡོ་རྗེ་ནོར་བུའི་རྩེ་མོར་འཕེལ་ཏེ་བརྒྱ་ཕྲག་སུམ་བཅུ་རྩ་དྲུག་གི་སྐད་ཅིག་གི་སྲོག་གི་གྲངས་བཀག་ནས་གསང་བའི་པད་མར་ཐོབ་ཞེས་ཏེ་དེས་ནི་ས་གཉིས་སུ་འགྱུར་རོ། །དེ་བཞིན་དུ་ལྟེ་བ་དང་། སྙིང་ཁ་དང་། ལྐོག་མ་དང་། དཔྲལ་བ་རྣམས་སུ་བཞི་དང་། དྲུག་དང་། བརྒྱད་དང་། བཅུའི་ས་རྣམས་སུ་འགྱུར་རོ། །སྤྱི་གཙུག་ཏུ་གཉིས་ཀྱིས་རླུང་ཐམས་ཅད་འགག་པར་འགྱུར་རོ་ཞེས་རྒྱ་ཆེར་གསུངས་པས། །ས་ནི་བཅུ་གཉིས་རིམ་པ་ལྟར། །འཐོབ་བྱེད་ཅེས་སྨོས་སོ། །དགའ་བ་བཅུ་དྲུག་ནི། །མཐར་སོན་རྟེན་འབྲེལ་བཅུ་གཉིས་དག །ཅེས་པ་ནི་སྐུ་གསུང་ཐུགས་ཡེ་ཤེས་ལ་དགའ་བ་བཞིས་ཕྱེ་བས་བཅུ་དྲུག་ལ་རིམ་པས་མས་བརྟན་པས་རྣམ་པར་དག་པར་བསྟན་ཏེ། འདིར་གང་གིས་གཡོ་བའི་ཆགས་པའི་ཉམས་པ་དེ་མཆོག་ཏུ་མི་འགྱུར་བར་འགྱུར་ཏེ། མཆོག་ཏུ་མི་འགྱུར་བ་ཆགས་པ་ཆེན་པོ་ལ་ཆགས་པ་བྲལ་བའམ། ཉམས་པའི་ཆགས་པ་བྲལ་བའི་མིང་ནི་ཞེ་སྡང་ངོ་། །ཞེ་སྡང་ཟད་པས་ཞེ་སྡང་ཆེན་པོར་འགྱུར་ཏེ། ཞེ་སྡང་ཆེན་པོ་བརྒྱལ་བའི་མིང་ངོ་། །གཏི་མུག་ཉམས་པས་གཏི་མུག་ཟད་པའི་གཏི་མུག་ལས་ཀྱང་གཏི་མུག་ཆེན་པོར་འགྱུར་སྟེ་ཆགས་པ་ཆེན་པོས་ཞེ་སྡང་ཆེན་པོ་དང་གཏི་མུག་ཆེན་པོས་ཆགས་པ་དང་ཞེ་སྡང་དང་གཏི་མུག་གི་བདག་ཉིད་ཅན་གྱི་མ་རིག་པ་ཉམས་པའོ། །མ་རིག་པ་ཉམས་པས་མ་རིག་པ་ཆེན་པོར་འགྱུར་སྟེ་དེ་ལྟར་མ་རིག་པ་འགགས་པས་འདུ་བྱེད་ནས་རྒ་ཤིའི་བར་དུ་འགག་པའོ་ཞེས་གསུངས་སོ། །དེའི་མཐར་ཐུག་གི་འབྲས་བུ་ནི། ལུས་ཀུན་མཚན་དཔེའི་མེ་ཏོག་རྒྱས། །སྐད་ཅིག་མངོན་པར་བྱང་ཆུབ་ཅེས། །བཅོམ་ལྡན་དེ་ཉིད་གཟིགས་པས་གསུངས། ཞེས་སྨོས་ཏེ་སྐུ་གསུམ་མཐར་ཐུག་པའི་འབྲས་བུ་འཐོབ་པའོ། །ལྔ་པ་ཞར་ལ་སྐྱོན་བསལ་བ་བསྟན་པ་ལ། སྙིགས་མ་ཕལ་ཆེར་ནད་བསྐྱེད་པ། ཞེས་བྱ་བ་ནས་ཚིགས་སུ་བཅད་པ་ལྔ་སྟེ། དེ་ལ་བད་ཀན་ནི་གླད་པ་ལ་བརྟེན་ནས་སྟེང་དུ་གནས་ཀྱང་ངོ་བོ་ས་ཆུའི་རང་བཞིན་ཡིན་པས་ཐུར་ལ་འགྲོ་བ་དང་། རླུང་ནི་ལྟེ་བ་དང་གསང་གནས་ལ་བརྟེན་ནས་འོག་ཏུ་གནས་ཀྱང་སྟེང་དུ་འགྲོ་བ་དང་། མཁྲིས་པ་ནི་ཁྲག་དང་མཆིན་པ་ལ་བརྟེན་ནས་བར་ན་གནས་ཀྱང་རླུང་དང་བསྡོངས་ན་གྱེན་དུ་འགྲོ་ཞིང་བད་ཀན་དང་བསྡོངས་ནས་འོག་ཏུ་འགྲོ་བས། ལུས་ལ་གནོད་པར་བྱེད་དེ། དེ་དག་ཀྱང་རྩ་བ་ནི་བད་ཀན་གཏི་མུག་གིས་བསྐྱེད་ཅིང་མཁྲིས་པ་ཞེ་སྡང་གིས་བསྐྱེད་པ་རླུང་འདོད་ཆགས་ཀྱིས་བསྐྱེད་དེ། དེ་སྐད་དུའང་། །དེ་ལ་འདོད་ཆགས་ཞེ་སྡང་གཏི་མུག་གསུམ། རླུང་མཁྲིས་བད་ཀན་རིམ་པས་བསྐྱེད་པའི་རྒྱུ། །ཞེས་བརྒྱད་པ་ལས་བཤད་དོ། །དེས་ན་ཆུ་མེ་རླུང་གསུམ་ནད་ཡིན་སྟེ། ལུས་ལ་ནད་བྱེད་པ་དེ་ཡང་སེམས་ཀྱི་ཆོ་འཕྲུལ་ལས་བྱུང་བའི་ཕྱིར་བསམ་གཏན་གྱི་སྐྱོན་རྟོག་དཔྱོད་མེ་ལྟ་བུ་དང་། དགའ་བདེ་ཆུ་ལྟ་བུ་དང་། རྣམ་རྟོག་གཡོ་བ་རླུང་ལྟ་བུ་དང་གསུམ་པོ་དེའི་རྒྱུ་མཚན་ལ་བརྟེན་ནས་གཟུགས་ཀྱི་ཁམས་མན་ཆད་ཀྱི་འཇིག་རྟེན་གྱི་ཁམས་འཇིག་པར་ཡང་བྱེད་དོ། །དེ་ཡང་མཛོད་ལས། དེའི་སྐྱོན་དང་ཆོས་མཐུན་ཕྱིར། །བཞི་པ་ན་མེད་མི་གཡོའི་ཕྱིར། །མི་རྟག་དེ་ཡི་གཞལ་མེད་ཁང་། །སེམས་ཅན་བཅས་ཏེ་འབྱུང་འཇིག་ཕྱིར། །བསམ་གཏན་གཉིས་སོགས་གསུམ་པོ་ནི། །མེ་ཡིས་བདུན་ནོ་ཆུ་ཡིས་གཅིག །དེ་ལྟར་ཆུ་བདུན་ཐལ་ནས་ཀྱང་། འཇུག་ཏུ་རླུང་གིས་འཇིག་པ་ཡིན། །ཞེས་གསུངས་སོ། །དེའི་ཕྱིར་ནམ་མཁའ་དང་ཡེ་ཤེས་ཀྱི་ཁམས་གཉིས་ཀྱིས་འདུ་བ་འཁྲུགས་པ་འདི་རྣམས་ཀྱི་སྐྱོན་བསལ་བའི་ཐབས་གེགས་སེལ་ལས་བྱུང་བ་བཞིན་དུ། མཁའ་དང་ས་ནི་དེ་གཉིས་ཀྱི། །རྟེན་བྱེད་སྐྱོན་ནི་མེད་པ་ཡིན། །དེ་ཕྱིར་མཁས་པས་དེ་གཉིས་ཀྱི། །གནད་ཤེས་གསུམ་པོའི་སྐྱོན་གཞོམ་བྱ། །ཞེས་སྨོས་སོ། །འདི་ལ་ཡང་ནང་དུ་སའི་ཁམས་ནི་ཕུར་སེལ་གྱི་རླུང་ཡིན་ལ། ནམ་མཁའ་ནི་ཕྱིར་དབྱུང་བ་ཡིན་པས་དུས་ཀྱི་འཁོར་ལོ་ནས། དབྱུང་བ་ཡིས་ནི་མཁྲིས་པའི་གཤེད་ཡིན་སྲོག་དང་རྩོལ་པ་ཡིས་ནི་བད་ཀན་ལ། རླུང་ནད་མ་ལུས་པ་ལ་ཐུར་དུ་སེལ་བ་བསྡམས་པ་ཡིས་ནི་སེལ་བར་འགྱུར། །ཞེས་གསུངས་སོ། །ད་ནི་འཇུག་བསྡུ་བ་ནི། དེ་ལྟར་རྫས་སྔགས་རླུང་གསུམ་གྱི་ཞེས་བྱ་བ་ནས་ཚིགས་སུ་བཅད་པ་ལྔ་སྟེ། དེ་ལྟར་ཐིག་ལེ་གསུམ་པོ་མ་རིག་པ་དང་འབྲེལ་བས་འཁོར་བ་བསྐྱེད་པའི་གཞིར་གསུངས་ལ། འཆིང་བྱེད་ཀྱི་ཐབས་ཀྱིས་ཟིན་པས་འཇོམས་པའི་གཉེན་པོ་རུ་བཤད་དེ། ཧེ་བཛྭ་ལས། སྐྱེ་བོ་མི་ཟད་པ་ཡི་ལས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་ལས་གྲོལ་བར་འགྱུར། །ཆགས་པས་འཇིག་རྟེན་འཆིང་འགྱུར་ལ། །འདོད་ཆགས་ཉིད་ཀྱིས་རྣམ་གྲོལ་འགྱུར། བཟློག་པའི་བསྒོམ་པ་འདི་ཉིད་ནི། །སངས་རྒྱས་མུ་སྟེགས་ཀྱིས་མི་ཤེས། །ཞེས་གསུངས་སོ། །གསུམ་པོ་རྣམ་པར་རྟོག་པའི་སྦྱང་གཞི་སྦྱོང་བྱེད་དང་སྦྱར་ནས་ཇི་ལྟར་བསྒོམ་པར་བྱེད་པའི་རྒྱུ་མཚན་ཡང་། །བཤད་པའི་རྒྱུད་རྡོ་རྗེ་འཕྲེང་བ་ལས། །བཅོམ་ལྡན་རྡོ་རྗེ་སེམས་དཔའ་ཡིས། །ལ་སོགས་པའི་ལུང་འདི་གསུངས་ཏེ། འདོད་ཆགས་ཆེན་པོའི་དབང་དུ་སོང་བས་སྲིད་པ་གསུམ་དུ་སྐྱེ་བ་རྣམས་དེ་ལས་རྒྱུད་རྣམ་པར་གྲོལ་བའི་དོན་དུ་ཁམས་བྱང་ཆུབ་ཀྱི་སེམས་དཀར་དམར་རྫས་ཀྱི་ཐིག་ལེ་བསྒོམ་པར་གསུངས་པ་ཡིན་ནོ། །ཞེ་སྡང་ཆེན་པོའི་དབང་དུ་སོང་ནས་མི་གང་ཞིག་མི་སྲུན་པའི་ལུས་ཅན་དེ་རྣམས་མྱུར་དུ་གྲོལ་བར་བྱ་བའི་དོན་དུ་ཀུན་བརྟགས་པའི་རིམ་པ་དང་འབྲེལ་པའི་སྔགས་ཀྱི་ཐིག་ལེ་རྣམས་གསུངས་པ་ཡིན་ནོ། །མི་གང་ཞིག་གཏི་མུག་ཆེན་པོས་རྒྱུད་ཀུན་ནས་འཁྲུལ་པར་གྱུར་པ་རྣམས་ལ་སྲིད་པའི་སྡུག་བསྔལ་ལས་བསྐྱོབ་པ་དང་། མི་སྣང་བ་དང་མཁའ་སྤྱོད་ལ་སོགས་པའི་དངོས་གྲུབ་ཀྱི་འབྲས་བུ་བརྒྱད་ཐོབ་པར་བྱ་བའི་ཕྱིར་དང་། རང་གི་དབང་པོའི་མངོན་སུམ་དུ་ཡེ་ཤེས་ཀྱི་འབྲས་བུ་སྣང་བར་བྱ་བ་ནི་རླུང་གི་ཐིག་ལེ་བསྒོམ་པར་གསུངས་པ་ཡིན་ནོ། །དེའི་ཕྱིར་འདི་དག་ནི་ཐབས་མཁས་པའི་ཁྱད་པར་བསམ་གྱིས་མི་ཁྱབ་པར་རིག་པར་བྱའོ། །དེ་ལྟར་དུམ་བུ་གསུམ་དུ་གསུངས་པའི་རྩ་དང་རླུང་དང་ཐིག་ལེ་རྣམས་སེམས་ཀྱི་སྣང་བ་ལས་ཤར་བའི་རྟེན་ཅིང་འབྲེལ་བར་འབྱུང་བ། ཀུན་རྫོབ་བྱང་ཆུབ་ཀྱི་སེམས་ལས་གྲུབ་ཅིང་སྣང་བ་སྟེ། ལྷན་ཅིག་སྐྱེས་པའི་ཡེ་ཤེས་ཀྱི་རྟེན་དུ་གྱུར་པས་རྡོ་རྗེའི་ལུས་ཀྱི་གནས་ལུགས་སུ་གསུངས་སོ། །ཧེ་བཛྭ་ལས། བཙུན་མོའི་བྷ་ག་བདེ་ཆེན་དུ། །སྟོན་པ་སུམ་བཅུ་སོ་གཉིས་མཚན། །གཙོ་བོ་དཔེ་བྱད་བརྒྱད་བཅུར་ལྡན། །ཁུ་བ་ཞེས་བྱའི་རྣམ་པར་གནས། །དེ་མེད་ན་ནི་བདེ་མེད་འགྱུར། །བདེ་བ་མེད་ན་དེ་མེད་འགྱུར། །ནུས་པ་མེད་ཕྱིར་ལྟོས་དང་བཅས། །ལྷ་ཡི་རྣལ་འབྱོར་ལས་བདེ་བ། །དེ་ཉིད་སངས་རྒྱས་དངོས་པོ་མིན། །དེ་ཉིད་དངོས་མེད་ཚུལ་ཡང་མིན། །ཞལ་ཕྱག་རྣམ་པའི་གཟུགས་ཅན་ཉིད། །མཆོག་ཏུ་མི་འགྱུར་བདེ་བའི་གཟུགས། །དེ་ཕྱིར་འགྲོ་ཀུན་ལྷན་ཅིག་སྐྱེས། །ཞེས་གསུངས་པ་རྟོགས་པར་བྱའོ།། །།

ལེའུ་དྲུག་པ། རྣམ་ཤེས་དང་ཡེ་ཤེས་གཞི་ལམ་འབྲས་བུའི་འབྲེལ་བ་བསྟན་པའི་དུམ་བུ།

ད་ནི་དུམ་བུ་དྲུག་པ་གནས་སྐབས་བཞིའི་རྣམ་པར་ཤེས་པ་དང་ཡེ་ཤེས་འབྲེལ་བའི་ཚུལ་བཤད་པ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི། དེ་ནས་རྣམ་ཤེས་སོགས་འབྲེལ་བ། མདོར་བསྡུས་རགས་པ་བཤད་པར་བྱ། ཞེས་པ་ནི། རྣམ་པར་ཤེས་པའི་ཚོགས་བརྒྱད་པོ་དང་ཡེ་ཤེས་རྣམ་པ་ལྔ་དང་། ཕྱག་རྒྱ་བཞི་དང་སྐུ་བཞི་དང་བཅས་པ་རྣམས་ཀྱིས་མ་བསྡུས་པ་མེད་མོད་ཀྱི་འདིར་རགས་པའི་རིམ་པ་འཆད་དོ་ཞེས་སོ། །རྒྱས་པར་བཤད་པ་ལ་ལྔ་སྟེ་སྤྱིར་བསྟན་པ་དང་། གཉིད་འཐུག་པོའི་གནས་སྐབས་དང་། རྨི་ལམ་གྱི་གནས་སྐབས་དང་། ཆགས་པའི་གནས་སྐབས་དང་། ཐ་མལ་གྱི་གནས་སྐབས་རྒྱས་པར་བཤད་པའོ། །དང་པོ་ནི་ཚིག་ལྔ་སྟེ་ཐོག་མར་ལུས་བསྐྱེད་པའི་ཚུལ་ནི་གོང་དུ་བཤད་དོ། །གནས་དུས་གནས་སྐབས་བཞི་ཡིན་ཏེ། །གཉིད་དང་རྨི་ལམ་སྙོམས་འཇུག་དང་། །ཐ་མལ་དུས་དང་རྣམ་པ་བཞི། །མ་དག་སྐུ་བཞིའི་གནས་སྐབས་ཡིན། །ཞེས་འོག་ནས་འཆད་པར་འགྱུར་རོ་ཞེས་བསྟན་ཏོ། །འདི་མན་ཆད་རེ་རེ་ལ་ཡང་། མ་དག་པའི་གནས་སྐབས་ཀྱི་གཞི་དང་། ཡེ་ཤེས་གང་ཡིན་པ་དང་སྐུ་གང་ཡིན་པ་དང་དྲི་མ་ཇི་ལྟར་སྦྱོང་བའི་རིམ་པ་སྦྱོང་བྱེད་ཀྱི་ཐབས་ཀྱི་ཁྱད་པར་གང་ཡིན་པ་དང་བཅས་པ་རྒྱས་པར་སྟོན་ཏོ། །གཉིས་པ་གཉིད་འཐུག་པོའི་གནས་སྐབས་རྒྱས་པར་བཤད་པ་ནི། ཚིགས་སུ་བཅད་པ་ལྔ་སྟེ། དབྱེ་བ་རྣམས་པ་མང་བཤད་ཀྱང་། ཞེས་པ་ནི་རྒྱུད་འགྲེལ་རྣམས་ལས་གཞི་ལམ་འབྲས་བུའི་དབྱེ་བ་མང་དུ་གསུངས་ཀྱང་། དང་པོའི་སངས་རྒྱས་ལས། སད་དང་རྨི་ལམ་གཉིད་སྟུག་དང་། །བཞི་པ་དབང་པོ་གཉིས་སྐྱེས་བདེ། །ཡེ་ཤེས་ཐུགས་གསུང་སྐུ་ཡི་མིན། །གནས་བཞི་རྣམས་སུ་མི་གནས་ཏེ། །ཞེས་གསུངས་པའི་ཕྱིར། འདིར་ཐོག་མར་གཉིད་འཐུག་པོའི་གནས་སྐབས་ནི་རྣམ་པར་ཤེས་པ་ཚོགས་བརྒྱད་ཀྱི་ནང་ནས་ཀུན་གཞི་གཙོ་བོ་ཡིན་ཅིང་། གནས་ནི་སྙིང་ཁ་ཆོས་ཀྱི་འཁོར་ལོར་གནས་ལ། ངོ་བོ་ནི་རྣམ་པར་ཤེས་པའི་ཚོགས་དྲུག་མི་གསལ་བར་གཅིག་ཏུ་བསྡུས་པ་སྟེ། འདི་ནི་སེམས་ཅན་གྱི་གནས་སྐབས་སོ། །དེ་ཉིད་ཀྱི་འཁྲུལ་པ་དག་ན། འོད་གསལ་བའི་འབྲས་བུ་དངོས་སུ་བྱེད་པར་འགྱུར་ཏེ། ཡེ་ཤེས་རྣམས་ཀྱི་ནང་ནས་མེ་ལོང་ལྟ་བུའི་ཡེ་ཤེས་ཀྱང་ཡིན་ལ། ལ་ལ་ནས་ཆོས་སྐུ་སྤྲོས་བྲལ་གྱི་ངོ་བོ་ཉིད་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཡིན་ནོ་ཞེས་ཀྱང་འདོད་པའི་ཕྱིར་གོང་མ་ལ་ཀྱང་གི་སྒྲ་སྨོས་པ་ཡིན་ནོ། །འདི་ལ་ཆགས་པའི་གནས་སྐབས་མེ་ལོང་ལྟ་བུའི་ཡེ་ཤེས་སུ་སྦྱོར་ན་འདི་ཆོས་ཀྱི་དབྱིངས་ཀྱི་ཡེ་ཤེས་སུ་འཐད་ཀྱི། ཆགས་པའི་གནས་སྐབས་ཡེ་ཤེས་ཐམས་ཅད་ཡོངས་སུ་རྫོགས་པར་བཤད་ན་ནི་མེ་ལོང་ལྟ་བུའི་ཡེ་ཤེས་གཉིད་ཀྱི་གནས་སྐབས་སུ་འཐད་དོ། །གཉིད་འཐུག་པོའི་གནས་སྐབས་ན་ཡེ་ཤེས་བསྒྲིབ་པའི་སྐྱོན་ཇི་ལྟ་བུ་ཡོད་ཞེ་ན། བག་ཆགས་བརྟེན་ཀྱང་མི་གསལ་ཞིང་། །འདུ་བྱེད་གཡོ་བའི་རྐྱེན་ཡོད་ཕྱིར། །མ་རིག་དྲི་མ་ཅན་ཞེས་བྱ། །ཞེས་སྨོས་པ་སྔར་ཀུན་གཞིའི་སྐབས་སུ་བཤད་པ་ཇི་ལྟ་བ་བཞིན་ནོ། འོ་ན་ཀུན་གཞིའི་རྣམ་པར་ཤེས་པ་དེ་ཉིད་སྤང་བྱར་འདུག་པས་གཉེན་པོ་ཇི་ལྟ་བུ་ཅིག་གིས་སྦྱང་ཞེ་ན། འདི་ཐེག་པ་གསུམ་སོ་སོའི་འབྲས་བུ་ཐོབ་པའི་གནས་སྐབས་དང་། སྦྱར་ནས་བཤད་པ། གང་ཟག་ཆོས་ལ་བདག་མེད་པ། གཅིག་དང་ཕྱེད་དང་གཉིས་དང་གཉིས། །རིམ་པས་གཉེན་པོའི་ཤེས་པ་སྟེ། དེ་སྦྱངས། །ཞེས་བྱ་བ་ནི་ཉན་ཐོས་ཀྱི་ཐེག་པའི་རྟེན་གྱི་གང་ཟག་ནི། ཕུང་པོ་ལྔ་ལ་བདག་ཏུ་འཛིན་པ་སེམས་ཅན་རྣམས་ཀྱི་ཕྱིན་ཅི་ལོག་གི་རྟོག་པ་བཞི་གཉེན་པོ་མི་རྟག་པ་སྟོང་པ་སྡུག་བསྔལ་བ་བདག་མེད་ལ་སོགས་པས་ཉོན་མོངས་པ་མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བ་རྣམས་ཉན་ཐོས་ཀྱི་ལམ་བསྒོམས་པས་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱེད་པས་ན། གཉེན་པོའི་རྒྱུན་ཐ་མ་དེ་ལ་ཡང་རྡོ་རྗེ་ལྟ་བུའི་མིང་གིས་འདོགས་ཤིང་། དེ་བས་ལྷག་པ་རང་སངས་རྒྱས་ཀྱི་ཆོས་ལ་བདག་མེད་པའི་ཆ་ཤས་མཐོང་བས་ཆོས་ཀྱི་བདག་གི་བཟུང་བའི་དོན་རང་བཞིན་མེད་པར་རྟོགས་ཀྱང་འཛིན་པའི་ལྷག་མ་ཀུན་གཞིའི་རྣམ་པར་ཤེས་པའི་ཆ་མ་སྤངས་པ་ཡོད་པས་བདག་མེད་ཕྱེད་དང་གཉིས་མཐོང་བ་སྟེ། དེ་ལྟ་བུའི་ལམ་བསྒོམ་པ་སྔོན་དུ་བྱས་ནས་འབྲས་བུ་རང་སངས་རྒྱས་མངོན་སུམ་དུ་བྱེད་པ་ན་ཡང་གཉེན་པོའི་ཐ་མ་རྡོ་རྗེ་ལྟ་བུའི་ཏིང་ངེ་འཛིན་གྱི་མིང་ཐོབ་པ་ཡིན་ནོ། །དེས་གཉིས་པས་ཆེས་རྨད་དུ་བྱུང་བ་བྱང་ཆུབ་སེམས་དཔས་བདག་མེད་པ་རྣམ་པ་གཉིས་མངོན་སུམ་དུ་བྱས་པས། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་རྣམ་པར་སྦྱངས་ནས་རྣམ་པ་ཐམས་ཅད་མཁྱེན་པ་ཉིད་མངོན་སུམ་དུ་བྱེད་པ་ན་ངེས་པར་ཏིང་ངེ་འཛིན་འདི་ཐོབ་པ་ཡིན་ཏེ། རྡོ་རྗེ་ལྟ་བུའི་ཏིང་ངེ་འཛིན། །རྟོག་པས་མི་ཤིགས་ཐོབ་ནས་ནི། །གནས་གཞན་གྱུར་པ་མཐར་ཐུག་པ། །སྒྲིབ་པ་ཀུན་གྱི་དྲི་མེད་དང་། །གང་ལ་གནས་ནས་སེམས་ཅན་དོན། །ཕན་ཕྱིར་རབ་ཏུ་བསྒྲུབ་བྱེད་པ། །རྣམ་པ་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པ་འཐོབ། །ཞེས་མདོ་སྡེ་རྒྱན་ལས་གསུངས་པས་འདིར་ནི། ཐེག་གསུམ་སོ་སོའི། །རྒྱུན་མཐའ་རྡོ་རྗེ་ལྟ་བུ་ཡིས། །དྲི་བཅོམ་དག་པ་གསུམ་ཐོབ་གསུངས། །ཞེས་བྱ་བ་སྨོས་སོ། །འོ་ན་ཐེག་པ་གསུམ་ཀའི་འབྲས་བུ་མངོན་སུམ་དུ་བྱེད་པ་ན་རྡོ་རྗེ་ལྟ་བུའི་ཏིང་ངེ་འཛིན་ཡོད་པའི་ཕྱིར་ཀུན་གཞིའི་རྣམ་པར་ཤེས་པ་ཐམས་ཅད་ཀྱིས་སྤངས་སམ་ཞེ་ན་མ་ཡིན་ཏེ། ཐེག་བསྡུས་ལས་ཉན་ཐོས་དང་རང་སངས་རྒྱས་རྣམས་ནི་ཀུན་གཞིའི་རྣམ་པར་ཤེས་པ་མཐོང་བ་མེད་པར་ཡང་རང་གི་མྱ་ངན་ལས་འདས་པ་ཡོངས་སུ་བསྒྲུབ་པས་ཀུན་གཞིའི་རྣམ་པར་ཤེས་པ་དེ་དག་གི་གཞུང་དུ་མ་བསྟན་ཏོ། བྱང་ཆུབ་སེམས་དཔའ་རྣམས་ནི་ཤེས་བྱ་ཐམས་ཅད་ལ་མཐོང་བ་འཇུག་པ་ཡིན་པས་ཀུན་གཞིའི་རྣམ་པར་ཤེས་པ་ཤེས་བྱའི་གནས་ཀྱི་གཞིར་བསྟན་ཏོ་ཞེས་བྱ་བ་དང་ཡང་འཕགས་པ་ཀླུ་གྲུབ་ཀྱི་ཞལ་སྔ་ནས། སྲིད་པའི་ལམ་ལ་སྐྱོ་རྣམས་ལ། །ངལ་བསོའི་དོན་དུ་ཐེག་པ་ཆེར། །འབྱུང་བའི་ཡེ་ཤེས་གཉིས་པོ་ཡང་། །གསུངས་པ་ཡིན་ཏེ་དོན་དམ་མིན། །ཇི་སྲིད་སངས་རྒྱས་ཀྱིས་མ་བསྐུལ། །དེ་སྲིད་ཡེ་ཤེས་ལུས་དངོས་ཅན། །ཏིང་འཛིན་མྱོས་ནས་རྒྱལ་གྱུར་པས། །ཉན་ཐོས་དེ་དག་གནས་པར་འགྱུར། བསྐུལ་ན་སྣ་ཚོགས་གཟུགས་ཀྱི་ནི། །སེམས་ཅན་དོན་ལ་ཆགས་གྱུར་ཅིང་། །བསོད་ནམས་ཡེ་ཤེས་ཚོགས་བསགས་ནས། །བྱང་ཆུབ་དམ་པ་འཐོབ་པར་འགྱུར། །ཞེས་བྱ་བ་འདིའི་དོན་རྒྱུད་བླ་མ་དང་དཔལ་འཕྲེང་གི་མདོ་དང་། ལང་ཀར་གཤེགས་པ་དང་། པད་མ་དཀར་པོ་ལ་སོགས་པ་རྣམས་ནས་རྒྱ་ཆེར་གསུངས་སོ། །སྔགས་ཀྱི་ཐེག་པ་འདིར་ཀུན་གཞིའི་རྣམ་པར་ཤེས་པ་ཡེ་ཤེས་སུ་བསྒྱུར་བའི་ཐབས་ཇི་ལྟ་བུ་གསུངས་ཞེ་ན། དེ་ཕྱིར་གསལ་ལ་མི་རྟོག་པའི། །ཉིན་མཚན་གཉིས་ཀྱི་འོད་གསལ་བསྒོམ། །རྣམ་ཀུན་མཆོག་ལྡན་སྟོང་པ་ཉིད། ཕྱག་རྒྱ་ཆེ་ལ་རོལ་བར་བྱ། །ཞེས་སྨོས་ཏེ། འདི་ནི་སྤྱན་རས་གཟིགས་དབང་ཕྱུག་གིས་མཆོག་ཏུ་མི་འགྱུར་བ་གྲུབ་པའི་མདོར་བསྡུས་དང་། འཕགས་པ་ཀླུ་སྒྲུབ་གྱི་རིམ་པ་ལྔ་ལས་འོད་གསལ་བའི་རིམ་པ་དང་། གཞན་ཡང་མཁས་གྲུབ་རྣམས་ཀྱིས་ཕྱག་རྒྱ་ཆེན་པོ་བསྒོམ་པའི་རིམ་པར་རྒྱ་ཆེར་བསྟན་ཏོ། །རྣམ་ཀུན་མཆོག་ལྡན་ཞེས་བྱ་བའི་དོན་ནི། སྦྱིན་དང་ཚུལ་ཁྲིམས་བཟོད་ལ་སོགས། །རྣམ་པ་ཀུན་གྱི་མཆོག་ལྡན་པ། །སྟོང་པ་ཉིད་ནི་གཟུགས་སུ་བརྗོད། །ཤེས་རབ་ཡེ་ཤེས་རྣམ་གྲོལ་རྣམས། །གསལ་དང་འཕྲོ་དང་དག་ཕྱིར་དང་། །ཐ་དད་མེད་ཕྱིར་འོད་དང་ཟེར། །ཉི་མའི་དཀྱིལ་འཁོར་ཉིད་དང་མཚུངས། །དེས་ན་སངས་རྒྱས་མ་ཐོབ་པར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མར་ལྟ་བར་མི་ནུས་བཞིན། །ཞེས་རྒྱུད་བླ་མར་གསུངས་པའི་དོན་སྤྱན་རས་གཟིགས་ཀྱི་གསུངས་པ་ཡོད་མོད་ཀྱི་འདིར་མ་བྲིས་སོ། །ཕྱག་རྒྱ་ཆེན་པོའི་རིམ་པས་བསྟན་ཟིན་ཏོ། །གསུམ་པ་རྨི་ལམ་གྱི་གནས་སྐབས་རྒྱས་པར་བཤད་པ་ལ། དག་པ་དང་མ་དག་པའི་ངོ་བོ་དང་། རྨི་ལམ་གྱི་སྣང་བ་རྒྱས་པར་བཤད་པ་དང་། གནད་འཆིང་བ་འབྲས་བུ་དང་བཅས་པ་གསུམ་གྱིས་བསྟན་ཏེ། དང་པོ་ནི། གཉིས་པ་རྨི་ལམ་ཤེས་པ་ནི། །བག་ཆགས་ཉོན་མོངས་ཅན་གྱི་ཡིད། །སྲོག་རླུང་འདུ་བྱེད་བཅས་ཏེ་ལངས། །རྩ་གནས་བརྒྱུད་དེ་བཟུང་དང་འཛིན། །གཉིས་སྣང་འཁྲུལ་པར་བྱེད་པ་ཡིན། །ཞེས་སྨོས་ཏེ། འདི་ནི་ཀུན་གཞིའི་རྣམ་པར་ཤེས་པའི་སྟེང་ནས་དྲུག་པ་ཡིད་ཀྱི་རྣམ་པར་ཤེས་པ་བག་ཆགས་དང་བཅས་ནས་ཉོན་མོངས་པ་ཅན་གྱི་ཡིད་སྲོག་གི་རླུང་གིས་བསྐྱེད་ནས། ཡིད་ཀྱི་འདུ་བྱེད་ལངས་པ་ནི་རྨི་ལམ་གྱི་ངོ་བོ་ཡིན་ལ། རྩ་གནས་བརྒྱུད་ནས་བཟུང་འཛིན་གྱི་སྣང་བ་བསྐྱེད་པ་ནི་འོག་ནས་རྒྱས་པར་འཆད་པ་བཞིན་ནོ། །དེ་ལྟར་ཀུན་གཞི་ལ་གནས་པའི་ཡིད་དང་དྲུག་པ་ཡིད་ཀྱི་ཆ་ཤས་ཡིན་པས་འོག་ནས་སྟོན་པ་བཞིན་དུ་མཉམ་པ་ཉིད་དང་སོ་སོར་རྟོག་པའི་ཡེ་ཤེས་ཀྱི་རང་བཞིན་ཡང་ཡིན་ལ་སྐུ་བཞི་ལས་ལོངས་སྤྱོད་རྫོགས་པའི་སྐུ་སྟེ། དེའི་ཕྱིར། །དག་ན་ལོངས་སྤྱོད་རྫོགས་པ་སྟེ། །གསལ་ལ་མ་འདྲེས་སྟོང་པར་གནས། །ཞེས་སྨོས་པ་སྟེ། འདི་ལ་རྨི་ལམ་གྱི་གནས་སྐབས་ནི་ཡུལ་དང་དབང་པོ་དང་ཤེས་པ་ཐམས་ཅད་གསལ་ལ་མ་འདྲེས་པ་དང་། ཡིད་ལས་གཞན་དུ་རྡུལ་ཕྲ་རབ་འདུས་པའི་ཡུལ་ལ་སོགས་པ་ནི་མེད་པས་སྣང་བ་དང་སྟོང་པ་དབྱེར་མེད་པའི་རང་གི་ངོ་བོ་ཡིན་ནོ། །རྨི་ལམ་གྱི་སྣང་བ་རྒྱས་པར་བཤད་པ་ལ་ཚིགས་སུ་བཅད་པ་བདུན་སྟེ། འདི་དག་ཀྱང་བཅོམ་ལྡན་འདས་ཀྱིས་འཇམ་དཔལ་རྩ་བའི་རྒྱུད་ལས། རྒྱས་པར་གསུངས་པའི་ཚུལ་བསྡུས་པ་ཡིན་པས། རྨི་ལམ་དེར་མ་དག་པ་དང་འཁྲུལ་པའི་སྣང་བ་ཇི་ལྟར་འབྱུང་བར་འགྱུར་ཞེ་ན། ཐོག་མར་སྙིང་ཁར་ཀུན་གཞིའི་སྟེང་དུ་ཚོགས་དྲུག་པོ་ཐམས་ཅད་སྡུད་དོ། །དེ་ནས་ཡིད་སྲོག་གི་རླུང་དང་ལྷན་ཅིག་ལངས་ནས་ལུས་ཀྱི་སྟེང་གི་ཕྱོགས་སྤྱི་བོར་སོང་ན་ལྷའི་ཡུལ་རྣམས་ཀྱི་སྣང་བ་དང་། ནམ་མཁའ་ལ་ཕྱིན་པ་དང་། རི་མཐོན་པོ་ལ་སོགས་པ་ལ་གྱེན་དུ་འགྲོ་བ་དང་། མིག་གི་རྩ་ལ་སོང་བས་གཟུགས་ཀྱི་རྣམ་པ་ཤིན་ཏུ་གསལ་བར་མཐོང་བ་དང་། དེ་བཞིན་དུ་སྒྲ་དང་དྲི་དང་རོ་ལ་སོགས་པ་མ་འདྲེས་པར་འཆར་རོ། །གང་གི་ཚེ་ཡིད་སྲོག་གི་རླུང་དང་ལྷན་ཅིག་སྙིང་ཁའི་འོག་གི་ཕྱོགས་སུ་གསང་བ་ལ་སོགས་པར་འགྲོ་བས་དམྱལ་བ་དང་ཡི་དྭགས་དང་དུད་འགྲོ་ལ་སོགས་པའི་སྣང་བ་དང་། ཐུར་དུ་བྲག་རོང་དང་ནགས་འཐིབས་པོ་ལ་སོགས་པ་ལ་འགྲོ་བ་དང་། མུན་ཁུང་དང་དངོས་པོ་ཐམས་ཅད་མི་གསལ་བའི་རྣམ་པར་འཆར་བར་འགྱུར་རོ། །ལུས་ཀྱི་བར་གྱི་རྩ་རྣམས་སུ་ཡིད་སྲོག་གི་རླུང་དང་ལྷན་ཅིག་ཏུ་འགྲོ་བས། དེའི་ཚེ་གླིང་བཞི་ལ་སོགས་པ་ས་སྟེང་གི་སྣང་བ་འཆར་རོ། །དེ་ཡང་མདུན་གྱི་རྩ་གནས་ལ་སོང་བའི་ཚེ་ཤར་ཕྱོགས་ཀྱི་སྣང་བ་འབྱུང་ངོ་། །གཡས་ཀྱི་རྩ་ལ་སོང་ན་ལྷོའོ། །རྒྱབ་ཀྱི་རྩ་ལ་ནུབ་བོ། །གཡོན་གྱི་རྩ་ལ་སོང་ན་བྱང་ཕྱོགས་ཀྱི་སྣང་བ་འབྱུང་སྟེ། རྩ་གནས་ཡངས་པ་ལ་ཡུལ་ཡངས་པ་དང་། རྩ་གནས་དོག་པ་ལ་ཡུལ་ཤིན་ཏུ་དོག་པ་ལ་སོགས་པའི་སྣང་བ་འཆར་སྟེ། དེའི་ཕྱིར་སྲོག་གཡས་པར་རྒྱུ་བའི་འཆི་ལྟས་བྱུང་བའི་ཚེ་རྨི་ལམ་དུ་ཡང་ལྷོ་ཕྱོགས་སུ་ཡང་ནས་ཡང་དུ་ཕྱིན་པ་རྨི་བས་ལྷོར་འགྲོ་བ་འཆི་ལྟས་སུ་བཤད་པའི་དོན་ནི་དེ་ཡིན་པར་གོའོ། །རྨི་ལམ་དེར་དངོས་པོ་ཇི་ལྟ་བུ་སྣང་བའི་རྐྱེན་ཡང་། སྲོད་ལ་བད་ཀན་ཤས་ཆེ་སྟེ། །ནམ་ཕྱེད་དུས་སུ་མཁྲིས་པར་བརྗོད། །ཐོ་རངས་རླུང་གི་དུས་ཉིད་དེ། །དེ་ཚེ་ཁམས་ཀྱི་རང་བཞིན་གྱི། །རྨི་ལམ་ཡུལ་དུ་སྣང་བར་འགྱུར། །ཞེས་བྱ་བ་ལ་སོགས་པ་རྒྱུད་ནས་མང་དུ་གསུངས་པའི་ཕྱིར། །ཁམས་ཀྱི་རྐྱེན་གྱིས་ཡུལ་དེར་ཡང་། །ཞེས་འདིར་སྨོས་ནས་རླུང་གི་རྨི་ལམ་གྱི་སྡེ་ཚན་ནི་འདི་ཡིན་ཏེ། ས་ཕྱོགས་ནེའུ་སིང་ལ་སོགས་པ་རྫས་ཐམས་ཅད་སྔོན་པོ་དང་། གོས་སྔོན་པོ་དང་། ནག་པོ་དང་། བྱ་ནག་དང་། ནམ་མཁར་འཕུར་བ་དང་། རྟ་ཞོན་པ་དང་། ནོར་བུ་སྔོན་པོ་དང་རིག་པ་དྭངས་པ་དང་རྨི་ལམ་གྱི་དངོས་པོ་རྣམས་མི་བརྟན་ཞིང་འགྱུར་བ་ཡང་ཡུད་དུ་སྣང་བ་ལ་སོགས་པ་ཡིན་ནོ། །མཁྲིས་པའི་ཁམས་ཀྱི་རྨི་ལམ་གྱི་སྡེ་ཚན་ནི་མེ་འབར་བ་དང་། གོས་དམར་པོ་དང་སེར་པོ་དང་ས་གཞི་དམར་པོ་དང་། གསེར་དང་། བཙུན་པ་ལ་སོགས་པ་གོས་སེར་ཅན་སྣང་བ་དང་། སེམས་ཅན་དང་རྫས་ལ་སོགས་པ་ཐམས་ཅད་ཀྱང་སེར་པོ་ཤས་ཆེ་བ་དང་དལ་ཞིང་བརྟན་པ་དང་རིག་པ་ཡང་སྐྲག་པ་ལ་སོགས་པ་དང་འབྲེལ་བ་རྣམས་སྣང་བ་ཡིན་ནོ། །བད་ཀན་གྱི་ཁམས་ཀྱི་རྨི་ལམ་གྱི་སྡེ་ཚན་ནི། ཆུ་དང་། ཁ་བ་དང་། ས་ཕྱོགས་དཀར་པོ་དང་། གོས་དཀར་པོ་དང་བུད་མེད་དང་གླང་པོ་ཆེ་དང་དངུལ་དང་མུ་ཏིག་ལ་སོགས་པའི་ནོར་བུ་དཀར་པོ་དང་། རེག་པའི་བདེ་བ་དང་བརྟན་པ་ལ་སོགས་པ་དུ་མ་སྣང་སྟེ། །ཇི་ལྟར་ཁམས་ཀྱི་རིམ་པ་བཞིན་དུ་རྨི་ལམ་གྱི་སྣང་བ་དཔག་ཏུ་མེད་པ་འབྱུང་བར་བཤད་པས། ཇི་ལྟར་རྩ་རླུང་ཁམས་ཀྱི་རིམ། བག་ཆགས་ལ་བརྟེན་སྣང་བ་ནི། །རྒྱལ་བས་འཇམ་དཔལ་རྩ་རྒྱུད་གསུངས། །ཞེས་དོན་བསྡུས་པ་ཡིན་ནོ། །དེའི་ཕྱིར་རྣལ་འབྱོར་པས་བསྒོམ་པའི་གནད་བཅིང་བ་འབྲས་བུ་དང་བཅས་པ་བཤད་པ་ནི། ཚིགས་སུ་བཅད་པ་ཕྱེད་དང་བཞི་སྟེ། ད་ལྟར་རྩ་རླུང་བྱང་ཆུབ་ཀྱི་སེམས་ཉམས་སུ་ལེན་པ་ན། །གང་གང་རྩ་ཁམས་བག་ཆགས་རྣམས། །དག་དང་མ་དག་འདིས་ཤེས་ཤིང་། གཞན་ཡང་རྨི་ལམ་གྱི་སྣང་བ་འདི་དང་བར་མ་དོའི་ཤེས་པ་ཅུང་ཟད་མཚུངས་པའི་ཕྱིར་དང་བཅོམ་ལྡན་འདས་ཀྱིས་འཕོ་བའི་སྐབས་ན་རྣམ་པར་ཤེས་པ་འགྲོ་བའི་ལམ་སོ་སོར་གསུངས་པ་རྣམས་གང་དུ་འགྲོ་བ་ད་ལྟར་རྨི་ལམ་གྱིས་ཚོད་འཛིན་ཅིང་ཤེས་པའི་ཕྱིར། བར་དོ་ཕྱི་མ་འཕོ་བ་ཡིས། །སྣང་བའི་ཚོད་འཛིན་བྱེད་པ་ཡིན། །ཞེས་སྨོས་པ་ཡིན་ནོ། །རྨི་ལམ་དེ་ཐབས་མཁས་པའི་ཡན་ལག་གིས་ཡོན་ཏན་དུ་ཇི་ལྟར་བསྒྱུར་བར་བྱེད་ཅེ་ན། རང་གི་སེམས་ཀྱི་སྣང་བ་ཡིད་ཀྱི་ཡུལ་ཆོས་འདུས་བྱས་ལ་དབང་ཐོབ་བར་བྱ་དགོས་པས། དེ་ཕྱིར་ཡེ་ཤེས་ཕྱག་རྒྱ་བཅིང་བ་སྟེ། འདིར་ཡེ་ཤེས་ནི་ཀུན་བརྟགས་པའི་གཞལ་ཡས་ཀྱི་ཁང་པ་དང་ལྷ་དང་ལྷ་མོ་དང་སངས་རྒྱས་ཀྱི་ཞིང་དང་ཟད་པར་དང་། རྫུ་འཕྲུལ་གྱི་ཡུལ་ཀུན་བརྟགས་པ་དང་དབང་འབྱོར་པའི་གཟུགས་ཐམས་ཅད་རྨི་ལམ་བཟུང་བ་དང་སྦྱང་བ་དང་བསྒྱུར་བའི་ཁྱད་པར་གྱིས་བདེ་བླག་ཏུ་གྲུབ་པར་བྱ་སྟེ། སྒྱུ་ལུས་དང་ཟུང་འཇུག་གི་རིམ་པ་འཕགས་པ་ཀླུ་སྒྲུབ་ལ་སོགས་པ་རྣམས་ཀྱིས་གསུངས་པ་བཞིན་དུ་བསྒོམ་པར་བྱའོ། །དེ་ལྟར་རྨི་ལམ་གྱི་རྒྱུ་དང་རྐྱེན་དང་གནས་སྐབས་དང་མཐར་ཐུག་གི་འབྲས་བུ་རྒྱ་ཆེར་བཤད་པ་དུ་མ་ཡོད་མོད་ཀྱི་འདིར་ནི་རྒྱས་པར་མ་བསྟན་ནོ། །འོ་ན་རྨི་ལམ་ཐམས་ཅད་ནི་བག་ཆགས་གཉིས་འཁྲུལ་ཡིན་ནོ་ཞེས་འཇིག་རྟེན་ན་གྲགས་ན། རྨི་ལམ་ལ་མ་འཁྲུལ་པ་གཉེན་པོའི་ཆར་གྱུར་པ་ཡོད་དམ་ཞེ་ན། །འཁྲུལ་པ་རྨི་ལམ་འཁོར་བ་སྟེ། །མ་འཁྲུལ་རྨི་ལམ་གཉེན་པོ་ཡིན། །ཞེས་སྨོས་ཏེ། འདིར་འགྱོད་པ་དང་གཉིད་དང་རྟོག་དཔྱོད་ནི་དགེ་བ་དང་མི་དགེ་བ་དང་ངེས་པ་དང་མ་ངེས་པ་ཐམས་ཅད་དུ་འབྱུང་བས། མ་འཁྲུལ་བ་དང་འདྲེས་པའི་རྨི་ལམ་ཤིན་ཏུ་ཡང་ཡོད་དེ། བྱང་ཆུབ་སེམས་དཔའ་ས་དང་པོ་ནས་ས་བཅུ་པའི་བར་ལ་རྨི་ལམ་གྱི་ལྟས་ཀྱི་ཁྱད་པར་བརྒྱ་རྩ་བརྒྱད་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྡོ་རྗེ་རབ་འཇོམས་ལས་གསུངས་པས། དེ་ཕྱིར་རྒྱལ་སྲས་ས་བཅུ་ལ། རྨི་ལམ་བསྟན་པ་མདོ་ལས་གསུངས། །ཞེས་སྨོས་སོ། །འོ་ན་སྔར་རྨི་ལམ་ནི་རླུང་མཁྲིས་བད་ཀན་གྱི་ཆས་བསྐྱེད་ཅིང་དེ་དག་ནི་ཉོན་མོངས་པ་རྣམས་ཀྱིས་བསྐྱེད་ཅེས་གྲགས་ན། བྱང་ཆུབ་སེམས་དཔའ་ཉོན་མོངས་པ་ཐམས་ཅད་དང་བྲལ་བའི་ཟག་བཅས་ཀྱི་ཕུང་པོ་མེད་པ་དག་ལ་རྨི་ལམ་འབྱུང་བར་མི་རིགས་སོ་སྙམ་ན། འདི་ལ་ནི་རྟེན་གཞན་ཡོད་དེ་དེ་ཡང་གང་ཞེ་ན། །དེ་རྒྱུ་ཟག་མེད་ཁམས་བཟུང་ཕྱིར། །ཞེས་སྨོས་ཏེ། བྱང་ཆུབ་སེམས་དཔའ། ས་དང་པོ་ལ་གནས་ནས་ཁམས་གསུམ་གྱི་ཉོན་མོངས་པའི་ཟག་པ་དང་བཅས་པའི་ལུས་སྤངས་ཀྱང་ཟག་པ་མེད་པའི་ལས་ཀྱིས་བསྐྱེད་པའི་ཕུང་པོ་དང་ཁམས་དང་སྐྱེ་མཆེད་འཛིན་པས། ཕུང་པོ་དང་འབྲེལ་བའི་གནས་སྐབས་རྣམ་པ་བཞི་འཛིན་པས་ཟག་པ་མེད་པའི་རྨི་ལམ་ཀྱང་ཡོད་དོ། །ཚུལ་འདི་ནི། དེ་ནི་འཇིག་རྟེན་ཐམས་ཅད་ལས། །འདས་ཀྱང་འཇིག་རྟེན་ལས་མ་གཡོས། །ཇི་ལྟར་པད་མ་ཆུ་ནང་ན། །སྐྱེས་ཀྱང་ཆུ་ཡིས་གོས་པ་མེད། །དེ་བཞིན་འདི་ནི་འཇིག་རྟེན་དུ། །སྐྱེས་ཀྱང་འཇིག་རྟེན་ཆོས་མ་གོས། ཞེས་རྒྱུད་བླ་མ་ལས་གསུངས་པ་དང་། རྒྱས་པར་ནི་མཆོག་ཏུ་མི་འགྱུར་བ་གྲུབ་པ་ལས་གསུངས་སོ། །ཆོས་ཀྱི་ཕྱག་རྒྱའི་བྱེ་བྲག་ཡེ་ཤེས་ཀྱི་ཕྱག་རྒྱ་བཤད་ཟིན་ཏོ། །བཞི་པ་ཆགས་པའི་གནས་སྐབས་བཤད་པ་ལ། དག་མ་དག་གི་ངོ་བོ། འཁོར་བར་བསྐྱེད་པའི་ཚུལ། མྱ་ངན་ལས་འདས་པར་འགྲོ་བའི་གོ་རིམ། གནད་བཅིང་བ་དངོས་བཤད་པ་དང་བཞི་ལས། དང་པོ་ནི། ཚིགས་སུ་བཅད་པ་ཕྱེད་དང་བཞི་སྟེ། སེམས་ཅན་རྣམས་ཀྱི་སྙོམས་འཇུག་གི་ཆགས་པའི་དུས་ན་རྣམ་པར་ཤེས་པ་དེའི་ཚེ། ཇི་ལྟར་གནས་ཞེ་ན། དགའ་བ་བཞིའི་གོ་རིམ་ཇི་ལྟ་བ་བཞིན་དུ་རྣམ་པར་ཤེས་པ་ཡང་ལྡན་སྟེ། འདོད་སྲེད་ཀྱི་དང་པོ་ནི་སྤྱི་བོའི་འཁོར་ལོར་གནས་སོ། །གཉིས་པ་དགའ་བའི་ཚེ་ནི་མགྲིན་པར་རོ། །གསུམ་པ་མཆོག་ཏུ་དགའ་བའི་དུས་ན། ལྟེ་བར་རྣམ་པར་ཤེས་པ་འདུས་པ་ཡིས། མེ་དང་ཟླ་བ་གཉིས་འདྲེས་ཚེ། དུང་ཅན་ནང་དུ་ལྷན་སྐྱེས་མྱོང་བ་ནི་ལྷན་ཅིག་སྐྱེས་པའི་དགའ་བ་སྟེ། རང་གི་དབུ་མའི་མར་སྣར་གཏུམ་མོའི་མེ་དང་ཁམས་བྱང་ཆུབ་ཀྱི་སེམས་དཀར་ཆ་གཉིས་འདྲེས་པ་ལ་བརྗོད་ཀྱི། ཕྱི་རོལ་དུ་འདྲེས་པ་ནི་མ་ཡིན་ནོ། །ལྷན་ཅིག་སྐྱེས་པའི་དགའ་བ་དེ་ཡུན་དང་ངོ་བོ་ཇི་ལྟ་བུ་ཡིན་ཞེ་ན། དེ་ནི་སྐད་ཅིག་ཤེས་པ་སྟེ། །ཚོགས་བརྒྱད་མ་འགགས་སོ་སོར་གསལ། བདེ་ལ་མི་རྟོག་ཉོན་མོངས་མིན། །ཞེས་སྨོས་ཏེ། འདི་ནི་སྐད་ཅིག་མའི་ཤེས་པ་བདེ་གསལ་མི་རྟོག་པ་འདྲེས་པའི་རང་ངོ་ཉོན་མོངས་པའི་དྲི་མ་མེད་པ་ཡིན་ཀྱང་ལུས་ཅན་རྣམས་ཀྱིས་དེ་མི་ཤེས་ལ་དེ་འགགས་པའི་རྗེས་སུ་དགའ་བྲལ་གྱི་དགའ་བ་འཆར་སྟེ། ལྷན་ཅིག་སྐྱེས་པ་མ་བཏོགས་པའི་དགའ་བ་གསུམ་པོ་ནི་རྣམ་པར་རྟོག་པའི་ཆའོ། །ཧེ་བཛྭ་ལས། དགའ་བས་དགའ་བ་ཙམ་ཉིད་དེ། །མཆོག་ཏུ་དགའ་བ་དེ་བས་ལྷག །དགའ་བྲལ་དགའ་བས་ཆགས་བྲལ་ཡིན། ལྷག་མ་ལྷན་ཅིག་སྐྱེས་དགའ་ཉིད། །ཞེས་གསུངས་པས་དེ་ཕྱིར་ཡེ་ཤེས་སྐུ་ཞེས་བརྗོད་དེ་ཚོགས་བརྒྱད་ཀྱི་རང་ངོར་རྫོགས་པའི་ཕྱིར་རོ། །གང་གི་ཚེ་གཉེན་པོས་རྣམ་པར་སྦྱངས་ནས་སྒྲིབ་པ་ཐམས་ཅད་རྣམ་པར་དག་ན་ཐམས་ཅད་ལྷན་ཅིག་སྐྱེས་པའི་བདེ་བར་དེ་ཉིད་ཡིན་པའི་ཕྱིར་འགག་པ་མེད་པ་ནི་ཚོགས་དྲུག་གི་རང་ངོ་གསལ་བ་སྤྲུལ་པའི་སྐུའི་རང་བཞིན་དང་། འཛག་བྲལ་ནི་ཉོན་མོངས་པའི་ཟག་པ་ཐམས་ཅད་དང་བྲལ་བས་བདེ་བ་ཆེན་པོ་ལོངས་སྤྱོད་རྫོགས་པའི་སྐུ་དང་། སྟོང་པ་དང་ལྡན་པ་ནི་རང་བཞིན་ཀྱི་སྐུ་སྟེ། དེས་ན་གནས་སྐབས་ཐམས་ཅད་དུ་འགྲོ་བའི་བདག་ཉིད་ཀྱི་ལྷན་ཅིག་སྐྱེས་པ་བསྒོམ་པར་བྱ་བ་ཡིན་པས། །ཀུན་འགྲོ་ཀུན་བདག་གནད་དུ་བསྣུན། །ཞེས་བསྟན་པ་ཡིན་ནོ། །འཁོར་བར་བསྐྱེད་པར་བྱེད་པའི་ཚུལ་ལ་ཚིགས་བཅད་གཉིས་དང་རྐང་པ་གསུམ་སྟེ། གང་གིས་མ་རྟོགས་ཞེ་ན། མ་དག་འཁྲུལ་པའི་སེམས་ཅན་རྣམས་སོ། །གང་མ་རྟོགས་པ་ནི། སྐད་ཅིག་བདེ་ཆེན་མི་ཤེས་པས། །ཞེས་པ་སྟེ། སྔར་བསྟན་པ་དེ་ཉིད་མི་ཤེས་པའོ། །ཚུལ་ཇི་ལྟར་དུ་མི་ཤེས་པ་ནི། རང་ལ་གནས་པ་གཞན་དུ་བཟུང་། །བདེ་ཉམས་དུག་གསུམ་བསྐྱེད་བྱེད་ཅིང་། །མི་འདོད་བཞིན་དུ་འཁོར་བའི་རྒྱུ། །ཞེས་སྨོས་ཏེ། ལྷན་ཅིག་སྐྱེས་པའི་ཡེ་ཤེས་སོ་སོ་རང་གིས་རིག་པར་བྱ་བ་ཡིན་པ་ལ་གཞན་དུ་ཡུལ་ལ་ཀུན་ཏུ་རྟོག་པ་དང་། ཁམས་བྱང་ཆུབ་ཀྱི་སེམས་ཉམས་པར་གྱུར་པས་ཉོན་མོངས་པ་ཐམས་ཅད་བསྐྱེད་པའི་རྒྱུར་གྱུར་སྟེ། དུས་ཀྱི་འཁོར་ལོ་ལས། དེ་ལྟར་རྣམ་པ་བཞིའི་སེམས་དང་རྣམ་གསུམ་བཅོམ་ལྡན་འདས་ནི་སྲོག་ཆགས་རྣམས་ཀྱི་ཐིག་ལེའི་ནང་དུའོ། །མཉམ་པའི་འབྲས་བུ་བདེ་བ་སྟེར་བ་ཁྱབ་བྱེད་རྣལ་འབྱོར་དབང་ཕྱུག་གིས་ནི་ཐར་པའི་རྒྱུར་བསྲུང་བྱ། ཐིག་ལེ་ཤོར་ན་སུ་ཞིག་གྲོལ་ལས་རྣལ་འབྱོར་མཆོག་གི་བདེ་བ་བྲལ་ཞིང་སྐྱེ་བའི་ས་བོན་ནོ། །དེ་ཕྱིར་འཁོར་བའི་བདེ་བ་སྐད་ཅིག་མ་ནི་དཀའ་ཐུབ་པ་ཡིས་རྣམ་པ་ཀུན་ཏུ་སྤང་པར་བྱ། ཞེས་གསུངས་པ་ཡིན་ནོ། །ཉོན་མོངས་པའི་རྣམ་པར་རྟོག་པ་ཐམས་ཅད་ཀྱང་ཇི་ལྟར་སྐྱེ་ཞེ་ན། །དང་པོ་དགའ་ལྡན་འདོད་ཆགས་ཡིན། །བར་མ་མ་རྟོགས་གཏི་མུག་སྟེ། རྗེས་ལ་ཆགས་བྲལ་ཞེ་སྡང་སེམས། །བདེ་འདོད་རང་ཆགས་སེར་སྣ་དང་། །ཕྲག་དོག་ཀུན་བསྐྱེད་མི་དགེ་སྤྱོད། །དེ་ཡིས་ངན་འགྲོ་ཀུན་བསྐྱེད་བྱེད། ཞེས་བྱ་བ་སྨོས་ཏེ། འདི་ཡང་བྱང་ཆུབ་སེམས་དཔའི་འགྲེལ་པ་ལས་ཇི་ལྟར་གསུངས་པའི་རིམ་པ་འདིར་བཤད་པ་ཡིན་ཏེ། གཞུང་ཇི་ལྟ་བ་བཞིན་ནོ། །མྱ་ངན་ལས་འདས་པར་འགྲོ་བའི་གོ་རིམ་ནི་ཚིགས་བཅད་བཞི་སྟེ། སྔར་བསྟན་པའི་མ་རིག་པའི་ཚུལ་དེ་ལས་ཅུང་ཟད་བཟློག་པར་བྱས་ནས་རང་དང་གཞན་ལ་ཕན་པར་འདོད་པའི་སེམས་བསྐྱེད་དེ་སེར་སྣ་དང་ཕྲག་དོག་དང་ཆགས་པ་དང་ཁོང་ཁྲོ་བའི་སྐྱོན་རྣམས་དོར་བར་བྱས་ལ། ཟང་ཟིང་གི་སྦྱིན་པ་དང་རང་གི་རྒྱུད་བསྲུང་བའི་ཚུལ་ཁྲིམས་ལ་བརྟེན་ནས་བདེ་བ་འདོད་པས་འདོད་པའི་ཁམས་ཀྱི་ལྷ་དང་མིའི་གོ་འཕང་ཐོབ་ཅིང་། འདོད་སྲེད་བཅད་ནས་བསམ་གཏན་གྱི། །བདེ་ཚོལ་གཟུགས་དང་གཟུགས་མེད་ལེན། །ཞེས་པའི་ཚུལ་ནི་སྔར་སྐྱེ་བའི་ཉིང་འཚམས་སྦྱར་བའི་སྐབས་སུ་བཤད་པ་བཞིན་ནོ། །དེ་ཡང་སྔར་ལྟར་རོ་མྱོང་ན་ཞེས་བྱ་བའི་དོན་ནི། ཇི་ལྟར་བདོད་པའི་བདེ་བ་ལ་ཞེན་པ་བཞིན་དུ། བསམ་གཏན་གྱི་བདེ་བ་ལའང་འདོད་པས་ཆགས་ཤིང་རོ་མྱོང་བར་བྱེད་ན་ཆགས་པ་དང་ལྡན་པས་དེ་ལས་ཉོན་མོངས་པ་གཞན་སྐྱེ་བའི་ཕྱིར་དུག་གསུམ་གྱི་དབང་གིས་ཁམས་གསུམ་དུ་འཁོར་བར་འགྱུར་རོ། །དེ་ལྟར་ཁམས་གསུམ་གྱི་འཛག་པ་བཅད་ནས་ཁམས་གསུམ་པོ་སེམས་ལས་བྱུང་བར་ཤེས་ཤིང་ཉོན་མོངས་པ་སྤངས་ཀྱང་མྱ་ངན་ལས་འདས་པ་ཉིད་ལ་ཕྱོགས་གཅིག་ཏུ་སྲེད་ན་ཐེག་པ་དམན་པར་འགྱུར་བས། སེམས་སུ་ཤེས་ནས་ཁམས་གསུམ་གྱི། །ཆགས་སོགས་མཐོང་བསྒོམ་གྱིས་བཅོམ་ནས། །མྱ་ངན་འདས་སྲེད་དེ་ཐོབ་པ། །དེར་གནས་ཉན་རང་ཞེས་བརྗོད་དོ། །ཞེས་སྨོས་ཏེ། སྤངས་རྟོགས་ཀྱི་ཚུལ་ནི་སྔར་བཤད་པ་ཡིན་ནོ། །ཉན་རང་གི་ཞི་བ་ལ་མངོན་པར་དགའ་བ་ཡང་སྤངས་ནས་སྲིད་ཞི་མཉམ་ཉིད་ཀྱི་སྦྱོར་བས་མཐའ་གཉིས་ལས་ངེས་པར་འབྱུང་བ་ནི་བྱང་ཆུབ་སེམས་དཔའི་ལམ་སྟེ། །སྲིད་དང་ཞི་བ་གཉིས་ཀ་ལ། །སྲེད་སྤངས་འཛག་མེད་དབང་ཐོབ་པ། །རྡོ་རྗེ་ཐེག་པར་གསུངས་པ་ཡིན། །ཞེས་བསྟན་སྟེ། དེ་ལ་འཛག་པ་ཞེས་བྱའི་དོན་ཡང་། རྟེན་ལུས་ཀྱི་འཛག་སྒོ་བཞི་ནི་སྟེང་དང་འོག་དང་བ་སྤུའི་བུ་ག་དང་དབང་པོ་གཞན་ཡུལ་ལ་ཟག་པའོ། །སེམས་ཀྱི་ཟག་པ་བཞི་ནི། འདོད་པ་དང་། སྲིད་པ་དང་། མ་རིག་པ་དང་ལྟ་བའི་ཟག་པ་རྣམ་པ་བཞི་སྤངས་པས་འབྲས་བུ་མཐར་ཕྱིན་པར་འགྱུར་རོ། །གནད་བཅིང་བ་དངོས་ནི་ཚིག་རྐང་བདུན་ཏེ་དེ་ལ་དགའ་བ་བཞིའི་ངོ་བོ་ནི། ཧེ་བཛྭ་ལས། རེ་ཞིག་བཙུན་མོ་ཤེས་རབ་ཡིན། །སྐྱེས་བུ་ཐབས་སུ་བརྗོད་པར་བྱ། །ཀུན་རྫོབ་དོན་དམ་དབྱེ་བ་ཡིས། །ཕྱི་ནས་དེ་ཉིད་རྣམ་པ་གཉིས། །དེའི་ཁུ་བའམ་བདེ་བ་ཉིད། །སྐྱེས་བུ་ཇི་བཞིན་ཤེས་རབ་ལས། དེའི་ཁུ་བའམ་བདེ་བ་ཉིད། །དེ་ཉིད་ཕྱིར་ན་དགའ་བ་ནི། །བཞི་ཡིས་རབ་ཏུ་ཕྱེ་བ་ཉིད། །སྐྱེ་མེད་རིམ་པའི་ཕྱོགས་ལས་ནི། །དེ་ལྟར་ལྷན་ཅིག་སྐྱེ་རྣམ་བཞི། །ཞེས་གསུངས་པ་ཡིན་ནོ། །དགའ་བ་བཞིའི་གོ་རིམ་ནི། ཧེ་བཛྭ་ལས། དང་པོར་དགའ་བ་ཙམ་ཉིད་དེ། གཉིས་པའི་གྲངས་ལས་མཆོག་དགའ་ཉིད། གསུམ་པ་ལ་ནི་དགའ་བྲལ་བཤད། །བཞི་པ་ལྷན་ཅིག་སྐྱེས་པར་བརྗོད། །ཞེས་གསུངས་སོ། །དེའི་རྣམ་པར་དབྱེ་བ་ནི་དགའ་བ་བཞི་ལ་སྐུ་དང་གསུང་དང་ཐུགས་དང་ཡེ་ཤེས་ཀྱི་དབྱེ་བས་བཅུ་དྲུག་དུ་འགྱུར་ཏེ། །དུས་ཀྱི་འཁོར་ལོ་ལས་རྒྱས་པར་གསུངས་སོ། །འཛག་པའི་སྐྱོན་ནི་སྔར་བཤད་དོ། །བཅིང་བའི་ཐབས་ནི་དུས་ཀྱི་འཁོར་ལོ་ནས། དངུལ་ཆུའི་དགྲ་ནི་མེ་ཉིད་ཡིན་ལ་མེ་དང་རྣམ་པར་བྲལ་ན་ནམ་ཡང་དངུལ་ཆུ་འཆིང་བ་མིན། མ་བཅིངས་པ་ལས་གསེར་མི་བྱེད་ལ་གསེང་དང་བྲལ་བས་གསེར་འགྱུར་མཁན་ལ་ལོངས་སྤྱོད་མེད་པ་ཉིད། དེ་བཞིན་བུད་མེད་ལ་སྦྱོར་དམན་པས་རྣལ་འབྱོར་པའི་སེམས་ནི་རྟག་ཏུ་འཆིང་བར་མི་འགྱུར་རོ། །མ་བཅིངས་པ་ལས་ལུས་ནི་འབིགས་པ་མིན་ལ་འདིར་ནི་ལུས་ཕུག་པ་ཡིས་མཆོག་གི་བདེ་བ་སྟེར། ཞེས་གསུངས་པ་ཡིན་ནོ། །འདི་ལ་ཡང་དབབ་པ་དང་། བཟུང་བ་དང་བཟློག་པ་དང་ཐམས་ཅད་དུ་ཁྱབ་པ་ལ་སོགས་པའི་མན་ངག་གིས་བརྒྱན་པའོ། །ཕན་ཡོན་དང་རྣམ་པར་དག་པ་དང་རྒྱུ་འབྲས་ལུགས་འབྱུང་ལུགས་བཟློག་རྣམས་ནི་སྔར་ཐིག་ལེའི་སྐབས་སུ་བཤད་ཟིན་ཏོ། །དེས་ན་ངོ་བོ་དམ་ཚིག་གི་ནང་གི་ཕྱག་རྒྱ་ལས་སུ་རུང་བར་བྱ་བའི་ཕྱིར། དེ་ཕྱིར་ལས་ཀྱི་ཕྱག་རྒྱ་བཅིང་། །ཞེས་བསྟན་སྟེ། ཕན་ཡོན་དང་བཅས་པ་ནི། རྒྱལ་བའི་ལྷན་སྐྱེས་བདེ་བ་འཕེལ་བའི་དོན་གྱི་རྒྱུར་ནི་ཐོག་མར་ལས་ཀྱི་ཕྱག་རྒྱ་བརྟེན་པར་བྱ། དེ་ལས་ཉི་མའི་གཟུགས་ཅན་བདེ་བ་ལུས་ལ་རྐང་པ་གཙུག་ཏོར་དང་ནི་ཡན་ལག་ཐམས་ཅད་འགེངས། གློག་གི་དབྱུག་པ་དང་མཚུངས་འགྱུར་བ་མེད་པའི་བདེ་བ་བསྐྱེད་ཅིང་ཡན་ལག་མཚན་གྱིས་རབ་ཏུ་རྫོགས། རྣམ་གསུམ་བཅོམ་ལྡན་འདས་ཀྱི་སྐུར་ནི་རྡོ་རྗེ་སྣང་བར་བྱེད་ཅིང་དེ་ནས་ཆོས་ཀྱི་དབྱིངས་སུ་འགྱུར། ཕྱག་རྒྱ་བཞི་པོ་འདི་རྣམས་འགྱུར་མེད་བདེ་བའི་འབྲས་བུ་སྟེར་བ་རྣལ་འབྱོར་པ་ཡིས་བསྒོམ་པར་བྱ། ཞེས་དུས་ཀྱི་འཁོར་ལོ་ལས་གསུངས་པ་ལ་སོགས་པའི་རིམ་པ་རྣམས་འདིར་རྒྱས་པར་མ་བསྟན་ཏོ། །ལས་ཀྱི་ཕྱག་རྒྱའི་རིམ་པ་བཤད་ཟིན་ཏོ། །ལྔ་པ་ཐ་མལ་གྱི་གནས་སྐབས་རྒྱས་བཤད་ལ། ངོ་བོ་དང་། དག་པ། སྤང་གཉེན་འབྲས་བུ་དང་བཅས་པ་གསུམ་ལས། དང་པོ་ནི་ཚིགས་བཅད་ཕྱེད་དང་གསུམ་སྟེ། སད་པའི་གནས་སྐབས་ཀྱི་ཐ་མལ་གྱི་དུས་ཀྱི་ཤེས་པ་ནི། གང་ལས་བྱུང་ཞེ་ན། །ཀུན་གཞི་ཉོན་ཡིད་འདུ་བྱེད་ཀྱིས། །སྔར་བཤད་རྐྱེན་བཞི་ཉེར་སྦྱོར་བས། །ཞེས་སྨོས་པ་ནི། གོང་དུ་བཤད་པའི་རྒྱུའི་རྐྱེན་དང་བདག་པོ་དང་དེ་མ་ཐག་པ་དང་དམིགས་པའི་རྐྱེན་བཞིས་མིག་ལ་སོགས་པའི་རྣམ་ཤེས་དྲུག་པོ་རྣམས་དབང་པོ་དྲུག་དང་འབྲེལ་བར་བྱས་ཏེ་གཟུགས་ལ་སོགས་པའི་ཡུལ་དྲུག་པོ་རྣམས་ཕྱི་རོལ་དུ་སྣང་བ་རང་གི་སེམས་ཡིན་པར་མ་ཤེས་པས་བདེ་སྡུག་བཏང་སྙོམས་ཀྱི་ཚོར་བ་རྣམ་པ་གསུམ་པོ་ལ་བདེ་བ་ལ་ཆགས་པ་དང་། སྡུག་བསྔལ་ལ་ཞེ་སྡང་བ་དང་། བཏང་སྙོམས་མ་རྟོགས་པས་གཏི་མུག་བསྐྱེད་དེ། དེ་མ་ཐག་པའི་ཡིད་ཀྱིས་ཁྱེར་ནས་ཀུན་གཞིའི་སྟེང་དུ་བཞག་ཅིང་། ཡང་འདུ་བྱེད་པས་ཉོན་མོངས་པ་དང་འཁོར་བའི་སྡུག་བསྔལ་གྱི་འཁོར་ལོར་གྱུར་སྟེ། དེ་ཡང་ཐོག་མ་ཀ་དག་འཁྲུལ་མེད་ལ། །ངེས་པ་མེད་པའི་ལྷུན་གྲུབ་ལ། །འཁྲུལ་པའི་ཡེ་ཤེས་སྦག་སྦོག་དེ། །མ་རིག་པ་ནི་གསུམ་དག་པ། །ཤེས་པ་གསལ་གསལ་རིག་རིག་དེ། །ཡུད་ཙམ་ཕྱིར་འགྱུས་སྣང་ཆ་ལས། །ཡུལ་ལ་བདག་ཏུ་བཟུང་བའི་བློས། རྐྱེན་བཞིའི་དམིགས་པ་མ་དག་པས། །ཡུལ་དྲུག་སོ་སོའི་སྣང་བ་ཤར། །ཉོན་མོངས་དྲུག་གིས་བདག་ཏུ་བཅིངས། །དེར་རྟས་ཡུལ་ལ་བདག་བཟུང་པའོ། །དེ་ནས་རིམ་གྱིས་སྣོད་བཅུད་ཀྱི། །སྣང་བ་དུ་མའི་གཟུགས་འདུས་པའོ། །འདི་ཉིད་མི་ཤེས་བྱིས་པ་རྣམས། །ཟོ་ཆུན་བཞིན་དུ་རྒྱུད་མར་གནས། །སོ་སོའི་ལུས་དང་ཚད་ལེན་པའོ། །ཞེས་མཁས་པ་ཆེན་པོ་བྷི་མ་ལས་རྫོགས་པ་ཆེན་པོའི་རྒྱུད་ཀྱི་དོན་བསྡུས་པའི་སྐབས་སུ་གསུངས་སོ། །དེ་ལྟར་ཐ་མལ་གྱི་གནས་སྐབས་ཀྱི་ངོ་བོ་བཤད་ནས། ད་ནི་དག་པ་ནི། འདི་ཉིད་དག་པ་ཡེ་ཤེས་གསུམ། །ཡིད་ནི་མི་གཡོ་མཉམ་ཉིད་དེ། །ཀུན་རྟོགས་དག་པ་སོ་སོར་རྟོག །སྒོ་ལྔ་ཡུལ་རྣམས་བྱ་བ་གྲུབ། །ཞེས་སྨོས་ཏེ། འདི་ལྟར་གསུམ་པོ་འདི་དང་སྔར་བསྟན་པའི་མེ་ལོང་ལྟ་བུ་དང་ཆོས་ཀྱི་དབྱིངས་ལ་སོགས་པ་ཡེ་ཤེས་ལྔ་པོ་འདི་གནས་སྐབས་བཞིའི་འཁྲུལ་པ་དག་པ་ལས་འབྱུང་བ་ཇི་ལྟར་ཡིན་ཞེ་ན། གསང་བ་འདུས་པ་ལ་སོགས་པ་སྔགས་ཀྱི་གཞུང་རྣམས་སུ་གསུངས་ཤིང་། ཐེག་པ་ཆེན་པོ་བསྡུས་པ་ལས་ཀྱང་། ཕུང་པོ་ལྔའི་གནས་འགྱུར་གསུངས་ཏེ། ཡང་དབང་འབྱོར་བ་དུས་ཆོས་ཀྱི་སྐུ་ལ་དབང་འབྱོར་བ་ཐོབ་ཅེ་ན། མདོར་བསྡུས་ན་རྣམ་པ་ལྔས་འཐོབ་སྟེ། གཟུགས་ཀྱི་ཕུང་པོ་གྱུར་བའི་ཕྱིར། ཞིང་དང་ལུས་དང་མཚན་དང་དཔེ་བྱད་བཟང་པོ་དང་། དབྱངས་མཐའ་ཡས་པ་དང་། སྤྱི་གཙུག་ལྟར་མི་མཐོང་པ་ལ་དབང་འབྱོར་བ་དང་། ཚོར་བའི་ཕུང་པོ་གྱུར་བའི་ཕྱིར་ཁ་ན་མ་ཐོ་བ་མེད་ཅིང་ཚད་མེད་པ་རྒྱ་ཆེ་བའི་བདེ་བར་གནས་པ་ལ་དབང་འབྱོར་བའི་དང་། འདུ་ཤེས་ཀྱི་ཕུང་པོ་གྱུར་པའི་ཕྱིར་མིང་གི་ཚོགས་དང་ཚིག་གི་ཚོགས་དང་ཡི་གེའི་ཚོགས་ཐམས་ཅད་ཀྱིས་བསྟན་པ་ལ་དབང་འབྱོར་པ་དང་། འདུ་བྱེད་ཀྱི་ཕུང་པོ་གྱུར་པའི་ཕྱིར་སྤྲུལ་པ་དང་བསྒྱུར་བ་དང་འཁོར་བསྡུ་བ་དང་། དཀར་པོའི་ཆོས་བསྡུ་བ་ལ་དབང་འབྱོར་བ་དང་། རྣམ་པར་ཤེས་པའི་ཕུང་པོ་གནས་གྱུར་པའི་ཕྱིར་མེ་ལོང་ལྟ་བུ་དང་མཉམ་པ་ཉིད་དང་སོ་སོར་རྟོག་པ་དང་བྱ་བ་གྲུབ་པའི་ཡེ་ཤེས་ལ་དབང་འབྱོར་བས་དབང་འབྱོར་བ་ཐོབ་པའོ། །ཞེས་གསུངས་སོ། །དེ་ཡང་ཀུན་གཞི་གནས་གྱུར་པ་ནི་མི་ལོང་ལྟ་བུ་དང་། ཀུན་གཞི་ལ་གནས་པའི་ཡིད་གནས་གྱུར་པས་མཉམ་པ་ཉིད་དང་། དྲུག་པ་ཡིད་གནས་གྱུར་པས་སོ་སོར་རྟོག་པ་དང་། དངོས་པོ་ལ་འཇུག་པ་གནས་གྱུར་པས་བྱ་བ་གྲུབ་པ་དང་། ཡེ་ཤེས་དེ་དག་གི་རང་ངོ་ཤིན་ཏུ་རྣམ་པར་དག་པའི་རང་བཞིན་དུ་བཞུགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། འདི་རྣམས་ཀྱི་ངོ་བོ་ནི་མདོ་སྡེ་རྒྱན་ལས། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་ལ། །རྟག་ཏུ་དེ་ལ་མངོན་ཕྱོགས་མིན། །ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་དེ། །ཞེས་བྱ་བ། གཡོ་བ་མེད་པ་དང་ང་ཡི་བ་མེད་པ་དང་། རྒྱ་ཡོངས་སུ་མ་ཆད་པ་དང་དུས་རྟག་ཏུ་ལྡན་པ་དང་། ཤེས་བྱ་ཐམས་ཅད་ལ་མ་རྨོངས་ཀྱང་དེ་ལ་ཕྱོགས་པ་མ་ཡིན་པ་དང་། ཡེ་ཤེས་ཐམས་ཅད་ཀྱི་རྒྱུའི་མཚན་ཉིད་ཀྱི་ཕྱིར་ལོངས་སྤྱོད་རྫོགས་པའི་སངས་རྒྱས་ཀྱི་ཡང་དེ་རྒྱུའི་རྐྱེན་དུ་རྣམ་པར་བཞག་སྟེ། དེའི་ངེས་ཚིག་ཏུ། ཡེ་ཤེས་ཐམས་ཅད་ཀྱི་གཟུགས་བརྙན་དེ་ལས་འབྱུང་བའི་ཕྱིར། སངས་རྒྱས་ཀྱི་སྐུ་གསུམ་ལས་འདི་ནི་ཆོས་ཀྱི་སྐུ་ཡིན་ནོ། །དེ་ཡང་ཐེག་བསྡུས་ལས་སངས་རྒྱས་ཀྱི་ཆོས་རྣམ་པར་དག་པ་ནི་ཀུན་གཞིའི་རྣམ་པར་ཤེས་པ་གྱུར་ནས་ཆོས་ཀྱི་སྐུ་ཐོབ་པའི་ཕྱིར་རོ་ཞེས་པ་དང་། གསེར་འོད་ལས་ཀྱང་། ཀུན་གཞིའི་རྣམ་པར་ཤེས་པ་སྤངས་པས་ཆོས་ཀྱི་སྐུ་སྟོན་ཏོ། །དེ་ལ་གནས་པའི་ཡིད་དག་པས་ལོངས་སྤྱོད་རྫོགས་པའི་སྐུ་སྟོན་ཏོ། །དངོས་པོ་ལ་འཇུག་པའི་རྣམ་ཤེས་དག་པས་སྤྲུལ་པའི་སྐུ་སྟོན་ཏོ། །ཞེས་གསུངས་པ་དང་འཕགས་པ་སངས་རྒྱས་ཀྱི་སའི་འགྲེལ་པ་ལས་ཀྱང་བཤད་དོ། །དཔལ་མཁའ་འགྲོ་རྒྱ་མཚོའི་རྒྱུད་ལས་ཀྱང་། ཀུན་གཞི་མེ་ལོང་ཡེ་ཤེས་ཏེ། །དེ་ནི་ཆོས་ཀྱི་སྐུ་ཡིན་ནོ། །ཞེས་པ་ལ་སོགས་པ་རྒྱས་པར་གསུངས་སོ། །འདི་ལ་ཁ་ཅིག་ལོངས་སྤྱོད་རྫོགས་པའི་སངས་རྒྱས་སུ་འདོད་པ་ཡོད་དེ། དེ་ནི་སློབ་དཔོན་དབྱིག་གཉེན་གྱི་འགྲེལ་པ་ལས། ལོངས་སྤྱོད་རྫོགས་པའི་སངས་རྒྱས་ཀྱང་དེ་ཡིན་ལ། ཞེས་གསུངས་པའི་དགོངས་པ་མ་ལོན་པ་སྟེ། ཀྱང་གི་སྒྲ་སྦྱོར་བ་ནི་ལོངས་སྤྱོད་རྫོགས་པའི་སངས་རྒྱས་ཀྱི་རྒྱུའི་རྐྱེན་དུ་ཆོས་སྐུ་མེ་ལོང་ལྟ་བུ་སྦྱོར་བའི་ཚིག་སྟེ་རྣམ་པར་ཤེས་པའི་ཚོགས་བདུན་གྱི་རྒྱུའི་རྐྱེན་དུ་ཀུན་གཞི་སྦྱོར་བ་བཞིན་ནོ། །གལ་ཏེ་དེ་ལྟ་མ་ཡིན་ན། ལུང་རིག་ཀྱི་སྐྱོན་དུ་མ་ཡོད་མོད་ཀྱི་འཕྲོས་པ་ཆོག་གོ །བསྒོམ་པ་དག་པས་སེམས་ཅན་ལ། །མཉམ་པ་ཉིད་ཀྱི་ཡེ་ཤེས་འདོད། །མི་གནས་ཞི་བར་ཞུགས་པ་ཡང་། །མཉམ་ཉིད་ཡེ་ཤེས་ཡིན་པར་འདོད། །དུས་རྣམས་ཀུན་ཏུ་བྱམས་པ་དང་། །ཐུགས་རྗེ་ཆེན་པོ་དག་དང་ལྡན། སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། །ཞེས་རྣམ་པར་མི་རྟོག་པའི་ཏིང་ངེ་འཛིན་བསྒོམ་པ་དག་པ་དང་། གང་གི་ཡང་ཕྱོགས་སུ་མ་ལྷུང་བ་དང་། སྲིད་ཞི་གཉིས་ལ་མི་གནས་པའི་ཞི་བ་དང་། ཐུགས་རྗེ་ཆེན་པོ་འཇུག་པ་དང་། སེམས་ཅན་ལ་མོས་པ་བཞིན་དུ་མཚན་དང་དཔེ་བྱད་སྟོན་པས་མཉམ་པ་ཉིད་ཀྱི་ཡེ་ཤེས་འདི་ནི་ཀུན་གཞི་ལ་གནས་པའི་ཡིད་གནས་གྱུར་པ་སྟེ། འདི་དང་དྲུག་པ་ཡིད་ཀྱི་ཆ་གཅིག་གནས་གྱུར་པ་ལོངས་སྤྱོད་རྫོགས་པའི་སྐུའོ། །སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ཡང་། །འབྱོར་བ་ཐམས་ཅད་སྟོན་མཛད་ཅིང་། །ཐེ་ཚོམ་ཐམས་ཅད་གཅོད་པ་ཡི། །ཆོས་ཆེན་ཆར་ནི་རབ་ཏུ་འབེབས། །ཞེས་ཏིང་ངེ་འཛིན་དང་གཟུངས་རྣམས་ཀྱི་གཏེར་ལྟ་བུ་དང་གསུང་ཆོས་ཀྱི། དུང་འབྱུང་བའི་ཕྱིར་དྲུག་པ་ཡིད་ཀྱི་རྣམ་པར་ཤེས་པ་གནས་གྱུར་པ་ལོངས་སྤྱོད་རྫོགས་པའི་སྐུ་ཡིན་ཡང་དོན་དང་བཅས་པའི་འཛིན་པ་གནས་གྱུར་པས་ཞིང་ལ་སོགས་པ་སྟོན་པ་དང་། རྣམ་རྟོག་གཞན་དུ་གྱུར་པས་དུས་ཐམས་ཅད་དུ་ཡེ་ཤེས་དང་ལས་ལ་ཐོགས་པ་མེད་པ་འདི་གཉིས་ཀྱི་ཆ་རེ་སྤྲུལ་པའི་སྐུ་ཡིན་ནོ། །བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་དུ་སྣ་ཚོགས་ཤིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་གྱི་དོན་གྲུབ་པའོ། །སངས་རྒྱས་སྤྲུལ་པ་དེ་རྟག་ཏུ། །མཛད་པ་གྲུབ་པའི་བྱེ་བྲག་དང་། །གྲངས་དང་ཞིང་གིས་རྣམ་ཀུན་ཏུ། །བསམ་མི་ཁྱབ་པར་ཤེས་པར་བྱ། །ཞེས་འཇིག་རྟེན་གྱི་ཁམས་ཐམས་ཅད་དུ་སྣ་ཚོགས་པས་འཇུག་པས་སྒོ་ལྔ་དང་ཡིད་ཀྱི་ཆ་གཅིག་གམ་དངོས་པོ་ལ་འཇུག་པའི་རྣམ་པར་ཤེས་པ་གནས་གྱུར་པ་བྱ་བ་གྲུབ་པ་སྟེ་སྤྲུལ་པའི་སྐུ་ཡིན་ནོ། །དེ་ལྟར་ཡེ་ཤེས་བཞི་པོའི་དོན་ནི་ཡེ་ཤེས་ཐམས་ཅད་འཛིན་པ་དང་སེམས་མཉམ་པ་ཉིད་ཀྱི་ཕྱིར་དང་ཆོས་སྟོན་པ་དང་བྱ་བ་གྲུབ་པའི་ཕྱིར་ཏེ། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང་། །བྱ་བ་གྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང་། ཞེས་བྱུང་ངོ་། །ལྔ་པ་ཆོས་ཀྱི་དབྱིངས་ཀྱི་ཡེ་ཤེས་ཇི་ལྟ་བུ་ཞེ་ན། རིགས་དང་དོན་ཐ་དད་པ་མེད་པ་དང་། འཁོར་འདས་ཐམས་ཅད་རྫོགས་པ་དང་། ཐོག་མ་དང་ཐ་མ་མེད་པ་དང་། གཅིག་པ་དང་ཐ་དད་པ་མ་ཡིན་པ་དང་། རྣམ་པ་དེ་དག་གིས་སྤྲོས་པའི་མཚན་མ་ཐམས་ཅད་དང་བྲལ་བའི་ངོ་བོ་ཡིན་པའི་ཕྱིར། ཐ་དད་རིགས་དོན་མེད་ཕྱིར་དང་། །རྫོགས་དང་ཐོག་མ་མེད་ཕྱིར་དང་། །སངས་རྒྱས་གཅིག་མིན་དྲི་མེད་གནས། །ཐ་དད་མིན་ཕྱིར་མང་པོའང་མིན། །ཞེས་བྱ་བས་བསྟན་པར་མངོན་ནོ། །ཕུང་པོ་ལྔ་ལ་ཡེ་ཤེས་སྦྱར་བ་ཡོད་མོད་ཀྱི་འོག་ནས་འཆད་དོ། །སྤང་གཉེན་འབྲས་བུ་དང་བཅས་པ་ནི། ཚིག་བཅད་གཉིས་དང་རྐང་པ་གཅིག་སྟེ། ཡིད་སྒོ་ལྔ་དང་བཅས་པས་ཡེ་ཤེས་ལ་སྒྲིབ་པ་ནི་ཉོན་མོངས་པ་མཐོང་སྤངས་བསྒོམ་སྤངས་རྣམས་སོ། །ཚོགས་བརྒྱད་ཀའི་སྒྲིབ་པ་ཉོན་མོངས་པ་དང་ཤེས་བྱའི་སྒྲིབ་པ་སྟེ། གཉེན་པོ་ནི་ཐེག་པ་ཆེན་པོའི་ཆོས་ལ་མོས་པ་རབ་ཏུ་བསྒོམ་པ་དང་། ཆོས་དང་གང་ཟག་ལ་བདག་མེད་པ་དང་། ནམ་མཁའི་མཛོད་ལ་སོགས་པའི་ཏིང་ངེ་འཛིན་དང་། ཐམས་ཅད་ལ་འཇུག་པའི་སྙིང་རྗེ་ཆེན་པོ་སྟེ་རྒྱུད་བླ་མ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་བསམ་གཏན་གྱི། །བདེ་བ་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་གསུངས་པ་ཡིན་ནོ། །གོང་གི་ཡེ་ཤེས་ཀྱི་སྐབས་སུ་བཤད་པ་བཞིན། །དེས་སྦྱངས་སྤྲུལ་སྐུས་འགྲོ་དོན་མཛད། །ཡིད་དང་རྨི་ལམ་གཅིག་པའི་ཕྱིར། །ལོངས་སྐུར་བརྗོད་དེ་འབྲས་བུ་ཡིན། །རྒྱས་པར་ཆོས་རྣམས་ཐམས་ཅད་དུ། །གསུངས་ཕྱིར་འདིར་ནི་བསྡུས་པ་ཡིན། །ཞེས་སྨོས་པ་ཡིན་ནོ། །དེ་ཕྱིར་ཆོས་ཀྱི་ཕྱག་རྒྱ་བཅིང་བ་ནི་དཔའ་བོ་རྡོ་རྗེའི་ཞལ་ནས་གཟུགས་ལ་སོགས་པའི་དངོས་པོ་རྣམས་ལ་དང་པོར་དགའ་བའོ། །དེ་ལ་རྟོག་པ་ནི་མཆོག་དགའ་བའོ། །ཡིད་སྐྱོ་ན་དགའ་བྲལ་དུ་འགྱུར་རོ། །དེའི་ཕྱིར་གསལ་ལ་མི་རྟོག་པའི་ཤེས་པས་ལྷན་ཅིག་སྐྱེས་པ་བསྒོམ་སྟེ། གང་གང་ལ་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་པ་མིག་གི་གཟུགས་དག་གམ། །གནས་པ་རྣ་བའི་སྒྲ་དག་གམ། །གནས་བ་སྣའི་དྲི་དག་གམ། གནས་པ་ལྕེའི་རོ་དག་གམ། །གནས་པ་ལུས་ཀྱི་རེག་དག་གམ། །གནས་པ་ཡིད་ཀྱི་ཆོས་རྣམས་ལ། །བདེ་ཆེན་ཤེས་ན་བསྒོམ་པའི་མཆོག །ཞེས་གསུངས་སོ། །འཇུག་བསྡུ་བ་ནི། ཚིགས་བཅད་གཅིག་སྟེ། དེ་ལྟར་གནས་སྐབས་རྣམ་པ་བཞིའི་འཁྲུལ་པ་དང་། མ་འཁྲུལ་པའི་ཡེ་ཤེས་ལམ་གྱི་རིམ་པ་དང་བཅས་པ་དང་། ཕྱག་རྒྱ་བཞི་དང་སྐུ་བཞི་སྟེ། གཞི་དང་ལམ་དང་འབྲས་བུའི་རྟེན་ཅིང་འབྲེལ་བར་འབྱུང་བ་བསྡུས་ཏེ་བསྟན་པ་ཡིན་ནོ།། །།

ལེའུ་བདུན་པ། སྣོད་ལ་སྦྱར་བ་བསྟན་པའི་དུམ་བུ།

ད་ནི་དུམ་བུ་བདུན་པ་སྣོད་ལ་སྦྱར་བ་བསྟན་པ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི། དེ་ནས་ཇི་ལྟར་ནང་གི་ལུས། །ཕྱི་རོལ་ཇི་བཞིན་གནས་པ་ནི། །ཁམས་གསུམ་ནང་གི་བདག་ཉིད་དེ། །ཞེས་བྱ་བ་ནི། ནང་ལུས་དང་ཕྱིའི་འཇིག་རྟེན་གྱི་ཁམས་མ་ལུས་པ་ཐམས་ཅད་རང་གི་སེམས་ཀྱི་སྣང་བ་ལས་ཤར་བ་ཡིན་ཀྱང་། སེམས་ཅན་རྣམས་ཀྱི་ཀུན་བརྟགས་པའི་དབང་གིས་ཐ་དད་པ་དུ་མར་སྣང་སྟེ། ཕྱི་རོལ་པ་དག་ནི་ཚངས་པ་དང་ཁྱབ་འཇུག་དང་དབང་ཕྱུག་ལ་སོགས་པ་རྣམས་ཀྱིས་བསྒྲུབས་པར་རྟོག །རང་གི་སྡེ་པ་ཉན་ཐོས་པ་རྣམས་ཀྱང་རྡུལ་ཕྲ་རབ་དོན་ད མ་པར་བདེན་པར་གྲུབ་པ་ལས་བྱུང་བར་རྟོག་སྟེ་དེ་དག་མ་ཡིན་པ་ནི་སྔོན་གྱི་སློབ་དཔོན་འཕགས་པ་ཀླུ་སྒྲུབ་ལ་སོགས་པ་རྣམས་ཀྱིས་བསྟན་བཅོས་རྣམས་སུ་བཀག་ཟིན་ཏོ། འདིར་དོན་དམ་པར་ཕྱི་རོལ་དུ་འཇིག་རྟེན་གྱི་ཁམས་གྲུབ་པ་མེད་དེ། །ཕུག་ཁྲུ་ལྔ་པའི་ནང་དུ་འདོད་ཆགས་དང་བྲལ་བའི་དེ་བཞིན་གཤེགས་པ་འཁོར་དང་བཅས་པ་དང་འཁོར་ལོ་བསྒྱུར་བའི་རྒྱལ་པོ་དཔུང་གི་ཚོགས་དང་བཅས་པ་འོངས་ཀྱང་ཕུག་ཆེ་བར་ཡང་མི་སྣང་དེ་དག་གི་སྤྱོད་ཡུལ་དོག་པར་ཡང་མི་སྣང་། ཞེས་གསུངས་པ་དང་། མདོ་རྣམས་ལས་ཀྱང་། འཇིག་རྟེན་གྱི་ཁམས་འདིའི་མཐོང་ཚུལ་ཐ་དད་པ་དག་གསུངས་སྟེ། མོའུ་འགལ་གྱི་བུས་གདགས་པར་གསུངས་པ་དང་། རྟ་མགྲིན་གནམ་ས་བཀོད་པའི་མདོ་ལས་གསུངས་པ་དང་དུས་ཀྱི་འཁོར་ལོར་གསུངས་པ་ལ་སོགས་པ་རྣམས་འགལ་བ་སྙམ་དུ་སེམས་པར་མི་བྱ་སྟེ། དེ་ལ་འདིར། ཕྱི་རོལ་དུ་གནས་པའི་རི་དང་གླིང་དང་རྒྱ་མཚོ་ལ་སོགས་པ་དོན་གཞན་དུ་གྲུབ་པ་མེད་དེ་རྣལ་འབྱོར་པའི་ལུས་ལ་ཡང་སྲིད་པ་གསུམ་དང་འཇིག་རྟེན་གྱི་ཁམས་ཐམས་ཅད་བདགས་པར་ནུས་སོ། །ཞེས་བསྟན་པའི་ཕྱིར་དང་། ལུས་ལ་འཇིག་རྟེན་གྱི་ཁམས་ཐམས་ཅད་སྤྲོ་བ་དང་བསྡུ་བ་ལ་དབང་འབྱོར་བར་བྱ་བའི་དོན་དུ་ཡང་། ཕྱིའི་འཇིག་རྟེན་དང་ནང་ལུས་དང་གཞན་དཀྱིལ་འཁོར་གྱི་འཁོར་ལོ་རྣམས་གཅིག་པ་ཉིད་དུ་སྟོན་པ་ཡིན་ནོ། །རྒྱས་པར་བཤད་པ་ལ་དགུ་སྟེ། གནས་གཞན་བསྟན་པ་དང་། འབྱུང་བ་རིམས་བརྩེགས་དང་། རི་རྣམས་དང་། གླིང་བདུན་དང་། ནང་གི་འབྱུང་བ་ལྔ་དང་། རྒྱ་མཚོ་བདུན་དང་། གཟའ་ལ་སོགས་པ་རྣམས་དང་། མེ་གསུམ་དང་། སྐྱེ་གནས་དང་དུས་སྦྱོར་ལ་སོགས་པའོ། །དང་པོ་ནི་ཚིགས་བཅད་གཅིག་དང་རྐང་པ་གསུམ་སྟེ། ལུས་ལ་ཁྲུ་བཞི་པར་བྱས་ལ། སོར་ཉི་ཤུ་རྩ་བཞི་ཁྲུ་རེ་སྟེ། ལྟེ་བ་ཡན་ཆད་ཀྱི་ཁྲུ་དོ་ལ་ནི་མི་དང་ལྷ་རྣམས་སོ། །དེ་མན་ཆད་ནི་ལྷ་མ་ཡིན་དང་ཀླུ་དང་ཡི་དྭགས་དང་དམྱལ་བ་རྣམས་ཡིན་པས། སྤྱི་བོ་ནས་སོར་བཞི་ནི་གཟུགས་མེད་པའི་ཁམས་སོ། །དེའི་འོག་ཏུ་སོར་བཅུ་དྲུག་ནི་གཟུགས་ཁམས་བཅུ་དྲུག་གོ །དེའི་འོག་དུ་འདོད་པའི་ལྷ་དྲུག་དང་། མི་རྣམས་ནི་ལྟེ་བའི་བར་རོ། །ལྟེ་བ་ནས་སུམ་མདོའི་བར་སའི་དཀྱིལ་འཁོར་སྟེ་ལྷ་མ་ཡིན་དང་ཀླུ་དང་ཡི་དྭགས་དང་དམྱལ་བ་གཅིག་གོ །བརླ་ཆུའི་དཀྱིལ་འཁོར་སྟེ་དམྱལ་བ་གཉིས་སོ། །རྗེ་ངར་ནི་མེ་སྟེ་དམྱལ་བ་གཉིས་སོ། །དེ་མན་ཆད་ནི་རླུང་གི་དཀྱིལ་འཁོར་སྟེ་དམྱལ་བ་གཉིས་དང་། །རྐང་མཐིལ་དུ་བརྒྱད་པ་རྡོ་རྗེའི་དམྱལ་བའི་གནས་རྣམས་རིམ་པ་བཞིན་དུ་གསུངས་པ་ཡིན་ནོ། །འབྱུང་བ་རིམས་རྩེགས་ནི། རྐང་ལག་ཚིགས་གསུམ་རིམ་པ་ལྟར། །རླུང་མེ་ཆུའི་དཀྱིལ་འཁོར་ཡིན། །བྲང་ནི་ས་སྟེ་ཞེས་བྱ་བ་གོང་དུ་སྨོས་པའི་རིམ་པས་ལྟེ་བ་མན་ཆད་སའི་དཀྱིལ་འཁོར་རམ། ཡང་ན་བྲང་གྲུ་བཞི་ས་ཞེས་ཀྱང་རྒྱུད་འགྲེལ་རྣམས་ལས་གསུངས་སོ། །རི་རྣམས་བསྟན་པ་ནི། སྒལ་ཚིགས་ནི་ཞེས་པ་དང་། བཅས་པའི་ཚིགས་བཅད་གཉིས་སྟེ། སྒལ་ཚིག་གི་རུས་པ་རྣམས་ནི་རིའི་རྒྱལ་པོ་རི་རབ་བོ། །ཕྱི་རོལ་གྱི་འཁོར་ཡུག་གི་རི་ཆེན་པོ་བདུན་ནི་བརླའི་རུས་པ་ནི་མདོག་སྔོན་གྱི་རིའོ། །རྗེ་ངར་གྱི་རུས་པ་ནི་མན་དྷ་རའོ། །བོལ་གོང་གི་རུས་པ་ནི་མཚན་མོའི་རིའོ། །དཔུང་པའི་རུས་པ་ནི་ནོར་བུ་བྱེད་པའོ། །ལག་ངར་གྱི་རུས་པ་ནི་བྲེའོ་ཡི་རིའོ། །ལག་མགོའི་རུས་པ་ནི་ཁ་བ་ཅན་ནོ། །སེན་མོ་རྣམས་ནི་རྡོ་རྗེའི་རི་སྟེ་འཁོར་ཡུག་གི་རི་ཡིན་ནོ། གླིང་རྣམས་ནི་ཚིག་རྐང་བདུན་སྟེ། གླིང་འདི་རྣམས་ནང་གི་འཁོར་ཡུག་རྣམས་ཀྱི་རྩར་རིམ་པ་བཞིན་དུ་གནས་ཏེ། དེ་དག་ལུས་ལ་ནི་བད་ཀན་གྱི་ཁམས་ནི་ཟླ་བའི་གླིང་ངོ་། །རྒྱུ་མ་ནི་དཀར་པོའི་གླིང་ངོ་། །ཚིལ་ནི་ཀུ་ཤའི་གླིང་ངོ་། །སྙིང་ནི་མིའམ་ཅིའི་གླིང་ངོ་། །མཆིན་པ་ནི་ཁྲུང་ཁྲུང་གི་གླིང་ངོ་། །ཤ་ནི་དྲག་པོའི་གླིང་སྟེ་དེ་དག་ནི་ནང་གི་གླིང་དྲུག་གོ །རྐང་ལག་དུམ་བུ་བཅུ་གཉིས་ནི། འཛམ་བུའི་གླིང་སོགས་གླིང་ཕྲན་བཅས། ཞེས་པ་ནི། ལག་པ་གཡས་པའི་དུམ་བུ་གསུམ་ནི་ལུས་འཕགས་ཀྱི་གླིང་ངོ་། །དེ་བཞིན་དུ་གཡོན་པའི་དུམ་བུ་གསུམ་ནི་འཛམ་བུའི་གླིང་ངོ་། །རྐང་པ་གཡོན་པ་ནི་བ་གླང་སྤྱོད། རྐང་པ་གཡས་པ་ནི་སྒྲ་མི་སྙན་སྟེ་གླིང་དུམ་བུ་བཅུ་གཉིས་སོ། །ནང་གི་འབྱུང་བའི་ཁམས་ལྔ་ནི། ཇི་ལྟར་ཕྱིའི་འབྱུང་བའི་རིམ་པ་བཞིན་དུ། སྲ་བ་བརླན་དང་དྲོད་དང་དབུགས། །ཁམས་བཞི་བུ་ག་ནམ་མཁའ་ཡིན། །ཞེས་པ་སྔར་བསྟན་པ་བཞིན་དུ་ཡིན་ནོ། །རྒྱ་མཚོ་བདུན་བཤད་པ་ནི་ཚིག་རྐང་ལྔ་སྟེ། སྦྲང་རྩིའི་རྒྱ་མཚོ་ནི་ཁུ་བའོ། །མར་གྱི་རྒྱ་མཚོ་ནི་ཞག་གོ །ཞོའི་རྒྱ་མཚོ་ནི་མགོའི་ཀླད་པའོ། །འོ་མའི་རྒྱ་མཚོ་ནི་བུད་མེད་རྣམས་ཀྱི་འོ་མ། སྐྱེས་པ་རྣམས་ཀྱི་བད་ཀན་གྱི་ཁམས་སོ། །ཆུའི་རྒྱ་མཚོ་ནི་མཆིལ་མའོ། །ཆང་གི་རྒྱ་མཚོ་ནི་རྔུལ་ལོ། །བ་ཚའི་རྒྱ་མཚོ་ནི་གཅིན་ནོ། །གཟའ་ལ་སོགས་པ་བཤད་པ་ནི། ཚིག་རྐང་ལྔ་སྟེ། དབང་པོ་གཟའ་དགུའི་རང་བཞིན་སྟེ་ཞེས་པ་ནི། སྣ་བུག་གཉིས་ནི་རླུང་གི་གཟའ་ཉི་ཟླའོ། །མིག་གཉིས་ནི་མེའི་གཟའ་མིག་དམར་དང་ཕུར་བུའོ། །ཁ་དང་དྲི་ཆུའི་སྒོ་གཉིས་ནི་ཆུའི་གཟའ་པ་བ་སངས་དང་གཟའ་ལག་གོ །དྲི་ཆེན་དང་སྤྱི་གཙུག་གི་བུ་ག་གཉིས་ནི་སའི་གཟའ་སྤེན་པ་དང་འཇུག་རིངས་སོ། །རྣ་བ་གཉིས་ནི་ནམ་མཁའི་གཟའ་སྒྲ་གཅན་དང་དུས་མེའོ། །གཞན་ཡང་སྙིང་ཁའི་རྩ་བཅུ་ཡང་གཟའི་རང་བཞིན་དུ་བཤད་དོ། །སོ་ནི་རྒྱུ་སྐར་ཉི་ཤུ་རྩ་བརྒྱད་དོ། །ཕྱིའི་ཆུ་བོ་རྣམས་ནི་ནང་དུ་རྩ་རྣམས་ཐམས་ཅད་དུ་ཁམས་འབབ་པའོ། །རྒྱུ་མ་ནི་སྤྲིན་གྱི་རང་བཞིན་སྟེ་རོ་འཛག་པའི་ཕྱིར་རོ། །ཕྱིའི་རླུང་གི་དཀྱིལ་འཁོར་ནི་ནང་དུ་ལུས་ལ་གནས་པ་རྣམས་སོ། །སྙིང་ཁ་ལས་བྱུང་པའི་སྒྲ་ནི་ཐོག་གི་རང་བཞིན་ནོ། །ལྟོ་བའི་སྒྲ་ནི་འབྲུག་གི་སྒྲའོ། །མེ་གསུམ་བཤད་པ་ནི། །སྙིང་ཁ་མགྲིན་པ་ལྟེ་བ་ན། །གློག་དང་ཉི་དྲོད་བསྲེག་བྱེད་མེ། །ཞེས་པ་ནི་སྙིང་ཁར་ནི་གློག་གི་མེ་སྟེ་ཞེ་སྡང་བསྐྱེད་པའོ། །མགྲིན་པར་ནི་ཉི་མའི་མེ་སྟེ་བྱ་བ་བྱེད་པའི་མེའོ། །ལྟེ་བར་ཤ་ཟའི་མེ་སྟེ་ཟས་སྲེག་པར་བྱེད་པའི་དོན་ཡིན་ནོ། །སྐྱེ་གནས་དང་དུས་སྦྱོར་ལ་སོགས་པ་བསྟན་པ་ལ་ཚིགས་བཅད་གསུམ་སྟེ། གཞན་ལུས་ཀྱི་པགས་པ་དང་དྲོད་དང་བ་སྤུ་ཐམས་ཅད་མེ་དང་རླུང་གི་རང་བཞིན་ནོ། །ལུས་སྐྱེས་སྲིན་བུ་སྐྱེ་གནས་བཞི་ནི་ཕྱི་རོལ་གྱི་སའི་སྐྱེ་གནས་རྣམས་ནི་ནང་དུ་བ་སྤུའི་སྲིན་བུ་རྣམས་སོ། །ཕྱི་རུ་རླུང་གི་སྐྱེ་གནས་ཀྱི་ཁམས་སྒོང་སྐྱེས་ནི་ནང་དུ་ཤིག་གོ །ཕྱི་རུ་ཆུའི་ཁམས་དྲོད་གཤེར་ལས་སྐྱེས་པ་སྟེ་ནང་དུ་ལུས་ཀྱི་སྲིན་བུ་རྣམས་སོ། །ཕྱི་རུ་མའི་ཁམས་མངལ་སྐྱེས་ཏེ་ནང་དུ་ནི་ཁུ་བའོ། །ནམ་མཁའི་ཁམས་བརྫུས་ཏེ་སྐྱེ་བ་རྣམས་ནང་གི་གཟུགས་གཞན་སྲོག་ཆགས་ཕྲ་མོ་རྣམས་སོ། །དེ་ལྟར་སྐྱེ་གནས་བཞིར་གསུངས་སོ། །ཕྱི་རོལ་གྱི་བདུད་རྩིའི་ཆར་ནི་ནང་དུ་ལྕེའུ་ཆུང་གི་བདུད་རྩིའི་ཁམས་སོ། །ཐུན་ནས་སྐད་ཅིག་བར་གྱི་ནི། །དུས་སྦྱོར་ཐམས་ཅད་སྔར་བསྟན་པའི། །རྩ་རླུང་ཐིག་ལེ་སེམས་བཅས་སོ། །ཞེས་བྱ་བ་ནི་སྔར་རྩ་རླུང་གི་སྐབས་སུ་བསྟན་ཟིན་ཏོ། །སྲོག་རླུང་དཀར་དམར་སྦྱོར་བ་ན། །ཟླ་ཉི་འཛིན་པར་སྣང་བ་དང་། །ཞེས་བྱ་བ་ནི། ནང་དུ་སྲོག་གི་རླུང་དཀར་དམར་ལ་རེག་པ་དང་། དུས་སྦྱོར་གྱི་འཚམས་ཀྱི་མཐའ་དུས་གསུམ་ཟླ་བ་དྲུག་ན་གཟའ་འཛིན་པ་བྱུང་བ་ནང་གི་དུས་སྦྱོར་དབུ་མར་རྒྱུ་བ་ཡིན་པར་གསུངས་སོ། །དེ་སོགས་རྣམས་བཤད་དུ་མ་རྣམས་ཞེས་བྱ་བ་ནི། ཕྱིའི་དངོས་པོ་ཇི་སྙེད་པ་རྣམས་ནང་གི་རྩ་རླུང་ཐིག་ལེ་དཀྱིལ་འཁོར་གྱི་འཁོར་ལོ་ལ་སྦྱར་བ་དང་། དེ་ཐམས་ཅད་ཡེ་ཤེས་སུ་སྦྱོར་བའི་ཕྱིར་དཔག་ཏུ་མེད་པ་གསུངས་པ་རྣམས་འདིར་མདོར་བསྡུས་པ་སྟེ་དུས་འཁོར་ལས། ས་ཡིས་སྲ་ལ་ཆུ་ཡིས་གཤེར་ཞིང་མེ་ཡིས་དྲོ་བར་འགྱུར་ཏེ་རླུང་གིས་ཀྱང་ནི་ཡང་པ་ཉིད། བུ་ག་སྟོང་པར་བསྟན་པ་རུས་པ་ཉིད་དང་ལྷའི་རི་མཆོག་འདིར་ནི་ཆར་པ་བདུད་རྩིར་འགྱུར། ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །འཇུག་བསྡུ་བ་ནི་ཚིགས་བཅད་གཅིག་སྟེ། དེ་སོགས་རྟེན་འབྲེལ་རྟོགས་པ་ན། ཞེས་པ་ནི་ཕྱི་ནང་གི་རྟེན་འབྲེལ་ལོ། །ཐབས་དང་ཤེས་རབ་སྦྱོར་ཤེས་པ་ནི་དོན་དམ་ཀུན་རྫོབ་དང་ལུས་དང་བསམ་པ་ལ་སོགས་པའི་གནས་ལུགས་ཤེས་པས་གནས་སྐབས་དང་མཐར་ཐུག་གི་སྣ་ཚོགས་པའི་ཡོན་ཏན་ཐོབ་པར་འགྱུར་བའི་ཕྱིར། ཕྱི་འཇིག་རྟེན་གྱི་ཁམས་དང་ནང་ལུས་ལ་སྦྱར་བ་རྣམས་འདིར་ནི་མདོར་བསྡུས་ཏེ་ཅུང་ཟད་བརྗོད་པ་ཡིན་ནོ། དེ་ལྟར་ཕྱི་དང་ནང་གཉིས་སུ་མེད་པ་སྦྱོར་བ་བསྟན་པས། དེ་ཉིད་ལྷ་དང་དཀྱིལ་འཁོར་ལ་སོགས་པ་རྣམས་ཀྱི་དོན་དུ་ཡང་རྟོགས་པར་འགྱུར་རོ།། །།

ལེའུ་བརྒྱད་པ། ཀུན་བརྟགས་ཀྱི་ལྷ་འབྱུང་བའི་ཚུལ་བསྟན་པའི་དུམ་བུ།

བརྒྱད་པ་ཀུན་བརྟགས་ཀྱི་ལྷ་དང་དཀྱིལ་འཁོར་གྱི་འཁོར་ལོ་འབྱུང་བའི་རྒྱུ་མཚན་བཤད་པ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ལ་ཚིགས་སུ་བཅད་པ་ཕྱེད་དང་གཉིས་ཏེ། ཕྱི་འཇིག་རྟེན་གྱི་ཁམས་ནང་དུ་སྦྱར་བ་བསྟན་པ་དེ་ནས་སེམས་ཅན་གྱི་ཀུན་རྟོག་ལ་བདེན་པ་མེད་བཞིན་དུ་ཀུན་བརྟགས་ཀྱི་ལྷ་རྣམས་བསྒོམ་པ་ཇི་ལྟ་བུ་ཞེ་ན། དགོས་པ་རྣམ་པ་གསུམ་པོ་འདིའི་ཕྱིར་ཏེ། ལས་དང་པོ་པ་རྣམས་ཀྱི་སེམས་འཛིན་པའི་དོན་དང་། ཤེས་བྱ་ཤིན་ཏུ་ཕྲ་བ་རྣམས་ལ་ཕྱི་དང་ནང་ལྷ་དང་དཀྱིལ་འཁོར་དུ་སྦྱོར་ཤེས་པའི་དོན་དང་། འབྲས་བུ་གྲུབ་པའི་གནས་སྐབས་ན་དབང་འབྱོར་བའི་གཟུགས་ཀྱིས་གཞན་དོན་དུ་གཟུགས་ཀྱི་སྐུ་དུ་མ་སྤྲོ་བའི་ཕྱིར་དཔའ་བོ་གཅིག་ནས་མཐའ་ཡས་པའི་བར་གྱི་དཀྱིལ་འཁོར་གྱི་འཁོར་ལོར་གསུངས་པའི་ངེས་པ་འདི་ལྟ་སྟེ། ཞེས་འོག་མ་རྣམས་ཀྱི་རྒྱུ་མཚན་རྟོགས་པར་བྱེད་པའོ། །རིམ་པ་འདི་ནི་དཔལ་དྲིལ་བུ་པའི་ཞལ་སྔ་ནས་ཀྱང་། བཅོས་མ་གཉིས་ཀྱི་དངོས་པོ་གང་། །དེ་ནི་གདུལ་བྱའི་དབང་ལས་འདོད། །མཁས་པའི་སྒྲུབ་བྱ་དེ་མིན་ཏེ། །ཡང་དག་དོན་མཐོང་གྲོལ་བའི་ཕྱིར། །འཁོར་ལོ་གསུམ་གྱིས་དཀྱིལ་འཁོར་གྲུབ། །དཀྱིལ་འཁོར་ལྷ་རྣམས་གྲུབ་པའོ། །ཅི་ནས་མ་གྲུབ་ཡང་གྲུབ་མིན། །ཞེས་གསུངས་པ་ཡིན་ནོ། །རྒྱས་པར་བཤད་པ་ལ་བཞི་སྟེ། ལྷའི་གྲངས་ཀྱི་ངེས་པ་དང་། དཀྱིལ་འཁོར་གྱི་ངེས་པ་དང་། ཐབས་དང་ཤེས་རབ་ཀྱི་རང་བཞིན་དང་། བསྐྱེད་རྫོགས་ཀྱི་ངེས་པའོ། །དང་པོ་ལ་ཚིགས་སུ་བཅད་པ་དྲུག་དང་རྐང་པ་གསུམ་སྟེ། འདི་ཡང་དུས་ཀྱི་འཁོར་ལོའི་དབུ་མ་ལས་ལྷ་ཐམས་ཅད་འབྱུང་བའི་རིམ་པ་ཇི་ལྟ་བ་བཞིན་དུ་བཤད་པ་ཡིན་ཏེ། དབུ་མ་དང་ཀུན་གཞིའི་རྣམ་པར་ཤེས་པ་དང་། ཡང་དག་པའི་དོན་དང་། ཡེ་ཤེས་ཀྱི་རླུང་དང་ཐིག་ལེ་ནི་ཐམས་ཅད་ཀྱི་གཞིར་གྱུར་པ་གཅིག་ལ་ཡང་ཐམས་ཅད་འདུས་པ་ཡིན་པའི་ཕྱིར་ན་དཔའ་བོ་གཅིག་པ་ཧེ་རུ་ཀའི་ངེས་པ་སྟེ། ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་དཔལ་འཁོར་ལོ་སྡོམ་པའི་རྒྱུད་དུ་གསུངས་པ་དང་། །རྡོ་རྗེ་སེང་གེའི་གདན་བཞུགས་དང་། །རྡོ་རྗེ་སེམས་དཔའ་བདེ་བ་ཆེ། །རྡོ་རྗེ་འཇིགས་བྱེད་དབང་ཕྱུག་དང་། །དང་པོའི་སངས་རྒྱས་སོགས་མིང་དང་། །ཧེ་རུ་ཀ་དང་དུས་འཁོར་ལོ། །ཞེས་བྱ་བ་ལ་སོགས་དང་པོའི་སངས་རྒྱས་ཀྱི་རྒྱུད་དུ་གསུངས་པ་རྣམས་དེ་བཞིན་གཤེགས་པའི་སྙིང་པོ་གཅིག་པོའི་མིང་ངོ་། །དེ་བཞིན་དུ་ལྷ་གཉིས་སུ་བསྟན་པའི་དོན་ནི། སྐུ་གཉིས་ཐབས་དང་ཤེས་རབ་དང་། །སྟེང་འོག་དཀར་དམར་བདེན་གཉིས་དང་། །དེ་སོགས་ཡབ་ཡུམ་གཉིས་པའོ། །ཞེས་པ་ནི་དེ་ལྟར་ཡུལ་དང་ཡུལ་ཅན་གྱི་རྣམ་པར་དབྱེ་བ་དང་། རྟེན་དང་བརྟེན་པ་ཡང་ཡིན་ཏེ། མདོར་བསྡུས་ན་བདེན་པ་གཉིས་ཀྱི་རང་བཞིན་མཚོན་པའི་ཕྱིར་རོ། །དེ་བཞིན་དུ་ལྷ་གཙོ་འཁོར་གསུམ་པ་བསྒོམ་པར་བྱེད་པའི་ངེས་པ་ཡང་ལུས་ངག་ཡིད་གསུམ་ལ་སྐུ་གསུང་ཐུགས་རྡོ་རྗེ་རྣམ་པ་གསུམ་དང་། སྔར་བསྟན་པའི་ཐིག་ལེ་གསུམ་དང་རྩ་དང་སྟེང་འོག་བར་གསུམ་དང་། ཨཱོཾ་ཨ་ཧཱུྃ་གི་ཡི་གེ་གསུམ་དང་རླུང་གསུམ་ལ་སོགས་པས་ཀྱང་ཐམས་ཅད་བསྡུས་པའི་ཕྱིར། །རྩ་གསུམ་རླུང་གསུམ་སེམས་གསུམ་དང་། །སྣང་བ་གསུམ་གྱི་བདག་ཉིད་ཕྱིར། །ལྷ་གསུམ་ཡིག་གསུམ་ཞལ་གསུམ་སྟེ། །ཞེས་བྱ་བ་ལ་སོགས་པ་རྣལ་འབྱོར་གྱི་རྒྱུད་ནས་རྒྱས་པར་གསུངས་སོ། །དེ་བཞིན་དུ་གཙོ་འཁོར་བཞི་བསྒོམ་པའི་ངེས་པ་ཡང་། །ཁམས་བཞི་སོགས་ལྡན་ཁྱབ་བྱ་བཞི། ཞེས་པ་ཡེ་ཤེས་སྤྱིར་བཏང་ནས་ས་ཆུ་མེ་རླུང་ཡེ་ཤེས་ཀྱིས་ཁྱབ་པར་བྱ་བ་བཞི་དང་རྡོ་རྗེ་བཞིའི་རིམ་པ་སྟེ། ཧེ་བཛྭ་ལས་ཐམས་ཅད་བཞི་བཞིར་གསུངས་པ་ཡིན་ནོ། །དེ་བཞིན་དུ་ལྷ་ལྔ་བསྒོམ་པའི་ངེས་པ་ཡང་། སྔར་བསྟན་པའི་ཡེ་ཤེས་ལྔ་དང་ཕུང་པོ་ལྔ། །འཁོར་ལོ་ལྔ་དང་རླུང་ལྔ་དང་། ཁམས་བཞི་ཁྱབ་པར་བྱེད་པ་ནམ་མཁའ་དང་བཅས་པ་ལྔའི་དོན་ཡིན་ནོ། དུ་མར་གསུངས་པ་ནི་རྒྱུད་ཐམས་ཅད་ནས་བསྟན་པའོ། །དེ་བཞིན་དུ་ལྷ་དྲུག་གི་ངེས་པ་ཡང་ནམ་མཁའ་དང་ཡེ་ཤེས་ཀྱི་ཁམས་གཉིས་སུ་དབྱེ་བའམ། རྣམ་པར་ཤེས་པའི་ཚོགས་དྲུག་དང་འཁོར་ལོ་དྲུག་གི་དབྱེ་བས་ལྷ་དྲུག་གི་དཀྱིལ་འཁོར་འཁོར་ལོ་བསྒྱུར་བ་ལྟ་བུ་གསུངས་སོ། །དེ་བཞིན་དུ་ལྷ་བདུན་གྱི་ངེས་པ་ཡང་ཉོན་ཡིད་དང་བཅས་པའི་ཚོགས་བདུན་སྦྱང་བའི་ཕྱིར་ཡི་གེ་བདུན་པ་ལྟ་བུ་གསུངས་སོ། །དེ་ཉིད་ལ་ལྷ་བརྒྱད་པའི་ངེས་པ་ཡང་ཡོད་དེ་རྣམ་པར་ཤེས་པའི་ཚོགས་བརྒྱད་སྦྱོང་པའི་ཕྱིར་དང་། དྲུག་པ་ཡིད་ཀྱི་སྤྲུལ་པ་སྟེ། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པའོ། །ཞེས་གསུངས་པ་ལྟ་བུའོ། །དེ་བཞིན་དུ་ལྷ་དགུ་པ་དང་བཅུ་པ་ཡང་ཧེ་བཛྭ་དང་། །ཡང་དག་གི་དཀྱིལ་འཁོར་ལྟ་བུ་རྣམས་ཏེ། །སྙིང་ཁའི་རྩ་རླུང་ས་བཅུ་སྟོབས། །དེ་སོགས་དགུ་དང་བཅུ་པ་དང་། །ཞེས་ངེས་པ་སྨོས་ཏེ། རྣམ་པར་ཤེས་པ་བརྒྱད་དང་དེའི་ཡུལ་དང་ཡུལ་ཅན་གྱི་ཡེ་ཤེས་ཀྱང་ཡིན་ནོ། །དེ་ལ་སོགས་པའི་དཀྱིལ་འཁོར་དུ་མའི་སྦྱང་གཞི་ཡོད་དེ། །ཕུང་པོ་ཁམས་བཅུ་དབང་པོ་ཡུལ། །ཞེས་པ་ཕུང་པོ་ལྔ་དང་ཁམས་ལྔ་དང་དབང་པོ་ལྔ་དང་བཅས་པས་ལྷ་བཅོ་ལྔ་བདག་མེད་མའི་དཀྱིལ་འཁོར་ལྟ་བུ་དང་གཞན་ཡང་། དེ་ལས་ཕུང་པོ་དྲུག་དང་ཁམས་དྲུག་དང་དབང་པོ་དྲུག་དང་བཅུ་གཉིས་དང་བཅོ་བརྒྱད་དང་ཉི་ཤུ་རྩ་བཞི་དང་། ཡེ་ཤེས་ཀྱི་ཁམས་དང་ཕུང་པོ་གཅིག་ཏུ་བྱས་པའི་དབྱེ་བས་དུ་མར་འགྱུར་རོ། །དྲུག་དྲུག་དེ་བཞིན་ལས་བྱེད་པ། །དབང་དྲུག་དང་བཅས་དཀྱིལ་འཁོར་ནི། །ཞེས་བྱ་བ། ཁམས་དྲུག་ལ་དྲུག་དྲུག་སུམ་བཅུ་སོ་དྲུག་གི་དཀྱིལ་འཁོར་དང་། ལྔ་ལྔ་ཉི་ཤུ་རྩ་ལྔའི་དཀྱིལ་འཁོར་ཡང་འབྱུང་ངོ་། །ལས་ཀྱི་དབང་པོ་དྲུག་ནི་ལག་པ་དང་རྐང་པ་དང་ངག་དང་དྲི་ཆུའི་སྒོ་གཉིས་དང་དབང་པོ་མཆོག་སྟེ་དྲུག་དང་དེ་དག་གི་ལས་ཀྱང་འགྲོ་བ་དང་ལེན་པ་དང་སྨྲ་བ་དང་གཤང་བ་དང་ཆུ་འཛག་པ་དང་ཁུ་བ་འཛག་པ་སྟེ། དེ་དག་གི་དབྱེ་བས་དུ་མར་འགྱུར་ཏེ། ལྷ་ལྔ་དགུ་དང་བཅུ་གསུམ་དང་། །ཉེར་ལྔ་སོ་གཉིས་སོ་བཞི་པ། །སོ་བདུན་རིགས་བརྒྱ་དུ་མའི་བར། ཞེས་སྨོས་ཏེ་རྒྱུད་སྡེ་ཆེན་པོ་བཞིའི་ལྷ་ཚོགས་ཇི་སྙེད་པ་ཐམས་ཅད་ཀྱང་རྩ་བ་འདི་རྣམས་སུ་འདུས་སོ། །དེ་ལ་རིགས་ཉི་ཤུ་རྩ་ལྔ་ལས་ཐབས་དང་ཤེས་རབ་ཀྱི་དབྱེ་བས་ལྔ་བཅུ་དང་། ལུས་དང་བསམ་པའི་དབྱེ་བས་བརྒྱ་སྟེ། རིགས་གསུམ་པ་དང་རིགས་ལྔ་དང་། རང་བཞིན་གཅིག་དང་རིགས་བརྒྱའོ། །ཞེས་དང་པོའི་སངས་རྒྱས་ཀྱི་རྒྱུད་དུ་གསུངས་སོ། །དེའི་ཡན་ལག་རྣམ་པར་དབྱེ་བ་སྔར་བསྟན་པའི་རྩ་རླུང་ཐིག་ལེ་འཁོར་ལོའི་གྲངས་ཀྱི་ལྷ་ཡང་། དུས་ཀྱི་འཁོར་ལོ་ལས་སྟོང་དྲུག་བརྒྱ་ཉི་ཤུའི་དཀྱིལ་འཁོར་གྱི་འཁོར་ལོ་དང་། དཔལ་མཁའ་འགྲོ་རྒྱ་མཚོ་ནས་དུར་ཁྲོད་ཀྱི་ལྷ་དང་བཅས་པའི་ཉིས་སྟོང་བརྒྱད་བཅུ་རྩ་བརྒྱད་ལན་བཅུ་གཉིས་སུ་རྣམ་པར་འཁོར་བ་ལ་སོགས་པ་རྣམས་ཀྱང་གསུངས་ཏེ་མདོར་བསྡུས་ན། རྣམ་རྟོག་གྲངས་བཞིན་བསྟན་པ་སྟེ། །ཞལ་དང་ཕྱག་མཚན་དེ་དང་མཚུངས། ཞེས་སྨོས་པ་ཡིན་ཏེ་སྦྱང་གཞིའི་གྲངས་ཇི་སྙེད་པ་དེ་སྙེད་དུ་འགྱུར་རོ། །དེ་ལྟར་ཡང་ཧེ་བཛྭ་ལས། རིགས་གཅིག་ལས་ནི་དེ་བཞིན་གཤེགས་པའི་ཚོགས། རིགས་ཀྱི་ཚོགས་ལས་རིགས་ནི་རྣམ་པ་བརྒྱ། །དེ་རྣམས་རིགས་ལ་འབུམ་ཕྲག་རིགས་ཆེན་དང་། བྱེ་བའི་རིགས་ལས་གྲངས་ནི་མེད་པར་འགྱུར། །དེ་ལ་གྲངས་མེད་རིགས་ལས་རིག་ཅན་རྣམས། །མཆོག་དུ་དགའ་བའི་རིགས་ལས་བྱུང་བའོ། །ཞེས་གསུངས་སོ། །དཀྱིལ་འཁོར་གྱི་ངེས་པ་ནི། ལུས་ལ་དཀྱིལ་འཁོར་བཤད་པ་ནི། །ཕྱི་རོལ་ཇི་བཞིན་ས་དང་ཐིག །དབྱིབས་དང་བཅས་པ་བསྡུས་པ་ནི། །ཁོ་བོས་དཀྱིལ་འཁོར་སྣང་བར་བཤད། །ཞེས་སྨོས་ཏེ། དེ་ཡང་དཀྱིལ་འཁོར་སྣང་བར་ནི། །རྐང་པའི་ཞབས་སུ་མཚོན་ཆེན་རླུང་། །གཞུའི་དབྱིབས་སུ་རྣམ་པར་གནས། ཞེས་བྱ་བ་ལ་སོགས་པ་འབྱུང་བ་རིམ་བརྩེགས་ངེས་བརྗོད་ལས་གསུངས་པ་དང་། ཐིག་ཀྱང་དེ་ཉིད་ལས། སིན་དྷུ་རྡོ་རྗེའི་ཐིག་ཟླུམ་པོ། ཞེས་བྱ་བ་ལ་སོགས་པ་གསུངས་སོ། །གཞན་ཡང་དུས་ཀྱི་འཁོར་ལོ་ལས། ཀ་བ་རྡོ་རྗེ་ཕྲེང་བ་སའི་འཁོར་ཡུག་རྩིག་པ་ཉིད་ནི་ངེས་པར་རུས་པ་རྣམས་ཀྱིས་བྱ། །ཤ་དང་ཁྲག་དང་ཆུ་དང་གཤང་བ་རྣམས་ཀྱིས་ལྷ་དང་གཤིན་རྗེ་ནོར་སྦྱིན་ནུབ་ཀྱི་ཚོན་དབྱེ་བ། །མཁྲིས་པ་བད་ཀན་དག་གིས་ཉི་མ་རི་བོང་ཅན་ལ་དེ་བཞིན་ཆུ་རྒྱུས་རྣམས་ཀྱིས་ཆུས་སྐྱེས་སོ། །རི་མོ་ལྔའི་རྩིག་པ་ས་དང་ཆུ་དང་མེ་དང་རླུང་དང་ནམ་མཁའ་ལས་སྐྱེས་རྣམས་ཀྱིས་སོ། །མངའ་བདག་ཆུ་སྐྱེས་དུས་ཀྱི་རྩ་ལ་རླུང་དང་མེའི་འཁོར་ཡུག་ལ་སོགས་ལྤགས་པ་ལ་སོགས་པས། །ཉི་མའི་སྒོ་ནི་བུག་པ་རྣམས་ཀྱིས་ནོར་བུའི་རང་བཞིན་གྱིས་སྤྲས་དེ་བཞིན་སོའི་ཕྲེང་བས་སོ། །དུར་ཁྲོད་འཁོར་ལོ་བརྒྱད་པོ་རླུང་གི་འཁོར་ཡུག་སོན་པ་རྣམས་ནི་སོར་མོ་རྣམས་ཀྱི་སེན་མོ་ཡིས། །དཀྱིལ་འཁོར་མཐར་ནི་ཕྱོགས་དང་འཚམས་སུ་སོན་པའི་མེ་འོད་ངེས་པར་བ་སྤུ་རྣམས་ཀྱིས་སོ། །དེ་ལྟར་ངེས་པར་སྐུའི་རྡོ་རྗེ་མཆོག་གི་ཡོན་ཏན་སྣ་ཚོགས་ཅན་གྱི་དཀྱིལ་འཁོར་རྣམ་པར་གསུངས། ཞེས་གསུངས་སོ། །ཐབས་དང་ཤེས་རབ་ཀྱི་རང་བཞིན་བཤད་པ་ནི། ཚིགས་སུ་བཅད་པ་བཞི་དང་རྐང་པ་གསུམ་སྟེ། གོང་དུ་གསུངས་པའི་ལྷ་དང་དཀྱིལ་འཁོར་གྱི་བྱེ་བྲག་དེ་དག་ཐམས་ཅད་ཐབས་དང་ཤེས་རབ་ཀྱི་རང་བཞིན་དུ་གནས་པས། ཐབས་དང་ཤེས་རབ་ཀྱི་ངོ་བོ་ནི་རྣམ་པ་ལྔ་སྟེ། ཕན་ཚུན་ཐབས་དང་ཤེས་རབ་ནི་ཕ་རི་ལ་བརྟེན་པའི་ཚུ་རི་ཞེས་རྣམ་པར་བཞག་པ་ལྟ་བུ་ཡིན་ནོ། །གཡས་གཡོན་ཐབས་དང་ཤེས་རབ་ནི་གང་གི་ཚེ་གཡས་ཕྱོགས་ཐབས་སུ་བརྗོད་པ་ན། དེའི་ཚེ་གཡོན་པ་ཤེས་རབ་ཏུ་བརྗོད་པར་འགྱུར་ཏེ། རྟེན་འབྲེལ་དུ་གནས་པའི་ཕྱིར་རོ། །ལུས་སེམས་ཐབས་དང་ཤེས་རབ་ནི་ལུས་ཐབས་སུ་གྱུར་པ་ན་སེམས་ཤེས་རབ་ཏུ་འགྱུར་ཏེ་གཅིག་ལ་གཅིག་བརྟེན་ནས་སེམས་པ་སྐྱེ་བའི་ཕྱིར་རོ། །དཀར་དམར་ཐབས་དང་ཤེས་རབ་ནི། ཐབས་ཀྱིས་ལུས་ལས་བྱུང་པའི་དཀར་ཆ་ནི་ཤེས་རབ་བོ། །ཤེས་རབ་ཀྱི་ལུས་ལས་བྱུང་པའི་དམར་ཆ་ནི་ཐབས་སོ། །རྟེན་དང་བརྟེན་པའི་ཐབས་དང་ཤེས་རབ་ནི་འཇིག་རྟེན་གྱི་ཁམས་ཐབས་སུ་བཤད་ན། དེའི་ཚེ་བརྟེན་པ་སེམས་ཅན་ནི་ཤེས་རབ་ཏུ་འགྱུར་རོ། །དེ་ལྟར་ལྔ་པོ་འདི་རྣམས་ཕན་ཚུན་གོ་རིམ་བཟློག་ན་བཅུར་འགྱུར་རོ། །རིམ་པ་འདི་ལ་བརྟེན་ནས་རྒྱས་གདབ་ཐམས་ཅད་ཀྱང་ཤེས་པར་འགྱུར་ཏེ། དུས་ཀྱི་འཁོར་ལོ་ལས་ཤར་ནུབ་དང་ལྷོ་བྱང་གི་ལྷ་རྣམས་ཕན་ཚུན་འཁྱུད་པ་ཐབས་དང་ཤེས་རབ་ཏུ་གསུངས་པ་ནི་རིགས་གཞན་གྱི་རྒྱས་གདབ་པ་ཞེས་བྱའོ། །གཡས་གཡོན་ནས་རྩ་རླུང་གི་རིམ་པ་ཡིན་པ་དང་། ལུས་སེམས་ཀྱི་རྒྱས་གདབ་པ་ནི་མ་ལོག་པའི་རྒྱས་གདབ་ཅེས་བྱ་སྟེ། རིམ་པ་འདི་གཉིས་ནི་དགྱེས་རྡོར་ལས། སེམས་ལུས་དང་ལྡན་ན་གནས་པ་དང་ལུས་སེམས་དང་ལྡན་ན་མཛེས་པའི་ཕྱིར་སྐུ་ལ་ཐུགས་ཀྱི་རྒྱས་གདབ་དང་། སེམས་ལ་སྐུའི་རྒྱས་གདབ་དང་། འདོད་ཆགས་འོད་དཔག་ཏུ་མེད་པ་ལ་སེར་སྣ་རིན་ཆེན་འབྱུང་ལྡན་གྱི་རྒྱས་གདབ་དང་ཕྲག་དོག་དོན་ཡོད་གྲུབ་པ་ལ་འདོད་ཆགས་འོད་དཔག་ཏུ་མེད་པའི་རྒྱས་གདབ་ཏུ་གསུངས་ཤིང་། དཀར་དམར་དང་ཟླ་ཉི་ལ་སོགས་པ་བདེ་བ་ལ་སྟོང་པ་ལ་བདེ་བའི་རྒྱས་གདབ་ནམ་མཁའ་དང་ཡེ་ཤེས་ཀྱི་རང་བཞིན་ཏེ། རྟེན་དང་བརྟེན་པ་ཡང་དེ་ཉིད་དོ། །རྒྱུད་ཕན་ཚུན་གྱི་ལུང་མང་པོ་ཡོད་མོད་ཀྱི་མ་བྲིས་སོ། །ད་ནི་དེ་ལས་འཕྲོས་པ་ཤེས་རབ་གཙོ་བོར་བསྟན་པ་ཤེས་རབ་ཀྱི་རྒྱུད་དང་། ཐབས་གཙོ་བོར་བསྟན་པ་ཕ་རྒྱུད་ཡིན་ནོ་ཞེས་འཆད་དེ། འདི་ཡང་ཐབས་དང་ཤེས་རབ་གཙོ་བོར་གང་བསྟན་པའི་སྒྲས་སྨོས་ཏེ། དོན་ལ་ནི་ཀུན་ཀྱང་ཐབས་དང་ཤེས་རབ་གཉིས་སུ་མེད་པའི་རང་བཞིན་ཡིན་ཏེ། ཧེ་བཛྭ་ལས། །ཐབས་དང་ཤེས་རབ་བདག་ཉིད་རྒྱུད། །ཞེས་པ་དང་། གསང་བ་འདུས་པ་ལས། །རྣལ་འབྱོར་ཐབས་ཀྱི་ཚུལ་མིན་ཞིང་། །ཤེས་རབ་གཅིག་བུ་ཉིད་ཀྱང་མིན། །ཐབས་དང་ཤེས་རབ་སྙོམས་འཇུག་པ། །རྣལ་འབྱོར་དེ་བཞིན་གཤེགས་པས་གསུངས། །ཞེས་པ་དང་། གཞན་ཡང་། གང་ཕྱིར་ཐབས་ནི་འབྱུང་བ་ཉིད། །འཇིག་པ་ཤེས་རབ་སྲིད་མཐར་བྱེད། །ཞེས་བྱ་བ་ལ་སོགས་པ་མང་དུ་གསུངས་པ་དང་། གཞན་རྒྱ་ཆེར་དཔལ་དུས་ཀྱི་འཁོར་ལོ་ལས་བྱུང་པའི་དོན་མིག་ཐབས་སུ་གྱུར་པ་ན་གཟུགས་ཤེས་རབ་བོ། །གཟུགས་ཐབས་སུ་གྱུར་པ་ན་མིག་ཤེས་རབ་བོ། །དེ་བཞིན་དུ་སྒྲ་དང་དྲི་དང་རོ་དང་རེག་བྱ་དང་ཆོས་དང་། དེ་དག་གི་རྣམ་པར་ཤེས་པ་རྣམས་ཀྱང་ཕན་ཚུན་ཐབས་དང་ཤེས་རབ་ཏུ་གསུངས་སོ། །དེ་བཞིན་དུ་འཕགས་པ་ཀླུ་སྒྲུབ་ཀྱིས་ཀྱང་། མིག་བྱང་ཆུབ་སེམས་དཔའ་སའི་སྙིང་པོ་ལ་སོགས་པར་གསུངས་ནས། །གཟུགས་ལ་སོགས་པ་སྦྱོར་བ་བསྒོམ། །ཞེས་གཟུགས་རྡོ་རྗེ་ལ་སོགས་པ་ཤེས་རབ་ཏུ་གསུངས་པ་ཡིན་ནོ། །གཞན་ཡང་རྩ་རོ་མ་ཐབས་ནང་ནས་བྱུང་བའི་རླུང་ཤེས་རབ་བོ། །རྐྱང་མ་ཤེས་རབ་ལ་ནང་ནས་འབྱུང་བའི་རླུང་ཐབས་སོ། །སྐྱེས་བུ་ཐབས་ཏེ་སེམས་ཤེས་རབ། །བུད་མེད་ཤེས་རབ་སེམས་ནི་ཐབས། །དབུས་ནི་ཤེས་རབ་ཕྱོགས་ནི་ཐབས། །ཞེས་པ་སྔར་བཤད་པ་བཞིན་དུ་ཡིན་ནོ། དོན་དམ་ཐབས་སྟེ་ཀུན་རྫོབ་ནི། ཤེས་རབ། ཞེས་པ། སྟོང་པ་ཉིད་ནི་དོན་དམ་པ་ཤེས་རབ་ཏུ་གསུངས་པ་ལ་ཐབས་སུ་བརྗོད་པ་ནི། གང་གིས་རྟེན་ཅིང་འབྲེལ་འབྱུང་བ། ཐུབ་པས་ཡང་དག་དོན་དུ་གཟིགས། །དེ་ཡིས་འགྲོ་བར་སྟོང་པར་མཁྱེན། །ཞེས་ཀླུ་སྒྲུབ་ཀྱིས་གསུངས་པ་དང་། ཆོས་ཐམས་ཅད་སྟོང་པ་ཉིད་ཀྱི་རང་བཞིན་ལ་བརྟེན་ནས་རྣམ་པར་གྲོལ་བ་ཐོབ་པ་འདི་ནི། དེ་བཞིན་གཤེགས་པའི་སྙིང་པོ་ལ་འཇུག་པའི་ཐབས་ལགས་སོ་ཞེས་དཔལ་འཕྲེང་གི་མདོ་ལས་གསུངས་པ་དང་སྦྱར་བ་ཡིན་ནོ། །བཟློག་པའང་ཡིན་ཞེས་པ་ནི། སྔར་བསྟན་པའི་ཐབས་དང་ཤེས་རབ་ཐམས་ཅད་ཀྱང་ཕན་ཚུན་བཟློག་པ་ཡིན་ལ། ཁྱད་པར་དུ་ཀུན་རྫོབ་ཀྱི་བདེན་པ་ཐམས་ཅད་ཐབས་ཀྱི་རང་བཞིན་ཡིན་ཅིང་དེའི་རང་ངོ་སྟོང་པ་ཉིད་ནི་ཤེས་རབ་ཏུ་བཤད་པ་ཡིན་ནོ། །དེ་སོགས་དཔག་མེད་ཤེས་པར་བྱ་བ་ནི། ཕྱི་དང་ནང་དང་གཞན་ཐམས་ཅད་ལ་སྦྱར་བ་ཤེས་པར་བྱའོ། །གཞན་ཡང་ཁ་དོག་དང་ཡོན་ཏན་ལ་སོགས་པའི་ཐབས་དང་ཤེས་རབ་རྣམས་ནི་གོང་དུ་རླུང་གི་སྐབས་སུ་ཇི་སྐད་བསྟན་པ་བཞིན་ནོ། །བསྐྱེད་རྫོགས་ཀྱི་ངེས་པ་བཤད་པ་ནི། ཚིགས་སུ་བཅད་པ་ཕྱེད་དང་གསུམ་སྟེ། །དབྱིབས་སྐུ་རླུང་དང་བརྗོད་པ་སྔགས། །ཡིད་ནི་ཐིག་ལེ་རྫོགས་རིམས་བརྗོད། །ཞེས་པ་ནི། བསྐྱེད་པའི་རིམ་པའི་མིང་གིས་བརྗོད་ན་ཟབ་མོའི་བསྐྱེད་པའི་རིམ་པ་ཞེས་ཀྱང་བྱ། རྫོགས་པའི་རིམ་པར་བརྗོད་པའི་དོན་ནི་སྤྱན་རས་གཟིགས་དབང་ཕྱུག་གིས། འདིར་ཇི་ལྟར་མངལ་གྱི་ལུས་རྫོགས་པ་དེ་ལྟར་ལྷ་རྫོགས་པ་དཀྱིལ་འཁོར་རྒྱལ་མཆོག་སྟེ་བསྙེན་པའི་ཡན་ལག་གོ །ཇི་ལྟར་ངག་རྫོགས་པ་དེ་ལྟར་ལས་རྒྱལ་མཆོག་སྟེ་ཉེ་བའི་བསྒྲུབ་པའོ། །ཇི་ལྟར་བྱང་ཆུབ་སེམས་ཀྱི་ཐིག་ལེ་རྫོགས་པ་དེ་ལྟར་ཐིག་ལེའི་རྣལ་འབྱོར་སྟེ་བསྒྲུབ་པའོ། །ཇི་ལྟར་ཁུ་བ་འཛག་པའི་བདེ་བ་བསྐྱེད་པ་དེ་ལྟར་ཕྲ་མོའི་རྣལ་འབྱོར་སྟེ་བསྒྲུབ་པ་ཆེན་པོའོ། །དེ་བཞིན་དུ་ཡན་ལག་བཞིའི་བསྒྲུབ་པའི་ཐབས་ནང་གི་ལེའུར་གསུངས་ཏེ་ཡང་དག་པར་རྒྱས་པར་བསྟན་པའོ་ཞེས་གསུངས་པའི་དོན་ནོ། །དེ་བཞིན་དུ་རྒྱུད་ཐམས་ཅད་ལས། སྐྱེ་བ་བསྐྱེད་རིམས་བསྟན་པ་སྟེ། །འཆི་བ་རྫོགས་རིམས་ཉིད་ཡིན་ནོ། །ཞེས་སྦྱང་གཞི་དང་སྦྱར་བ་གསུངས་སོ། །ཀུན་བརྟགས་བསྐྱེད་རིམས་ཤེས་བྱ་སྟེ། ཞེས་པ་རྟོག་པས་སྒྲོས་བཏགས་པའི་དབྱིབས་བསྒོམ་པ་རྣམས་སོ། །གཞན་དབང་འབྲེལ་བ་རྫོགས་རིམས་བཤད། །ཅེས་པ་རྣམ་པ་དང་བཅས་པ་རྣམས་བསྡུས་ནས་གོང་བུ་དང་ནཱ་ད་ལ་སོགས་པའི་རྣམ་པར་ཤེས་པ་ཙམ་ལ་སེམས་འཛིན་པ་ནི་གཞན་དབང་གིས་ངོ་བོ་ཉིད་ཡིན་ནོ། །མཐར་ཐུག་པའི་གནས་ལུགས་ཀྱི་བསྐྱེད་རྫོགས་ཆེན་པོ་ནི་སྣང་བ་ལ་འཛིན་པ་ཐམས་ཅད་དང་བྲལ་བའི་ཀུན་རྫོབ་བདེན་པ་བསྐྱེད་རིམས་ཏེ་དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་འགྲུབ་པའི་ཕྱིར་རོ། །སྤྲོས་པའི་མཚན་མ་ཐམས་ཅད་དང་བྲལ་བའི་རྫོགས་པའི་རིམ་པ་ནི་དོན་དམ་བདེན་པ་སྟེ་ཐམས་ཅད་དེ་ལ་རྫོགས་པའི་ཕྱིར་རོ། །དོན་འདི་ཡང་། ང་ཡིས་སྔར་ནི་བཤད་པ་ཡི། །བདེན་པ་གཉིས་ལ་བརྟེན་པ་ཀུན། །རྣལ་འབྱོར་པ་ཡིས་དངོས་ཀུན་གྱི། །བསྒོམ་པ་མངོན་པར་དགའ་བར་བརྗོད། །སྤྲོས་པ་ཀུན་ལ་དམིགས་ནས་ནི། །སྤྲོས་པ་སྤྲོས་པ་མེད་པར་སྤྱོད། །རྒྱུད་རྣམས་ཀུན་ཏུ་གསང་བ་གང་། །མྱ་ངན་འདས་པ་དེ་ལ་བསྟན། །རྒྱུད་འདི་ཡི་ནི་རྣལ་འབྱོར་པས། །བདེན་པ་གཉིས་ནི་ཡང་དག་བརྟེན། །ཞེས་ཀུན་ཏུ་སྤྱོད་པའི་རྒྱུད་ལས་གསུངས་པའི་དོན་ཡིན་ནོ། །གཞན་ཡང་བདེན་པ་གཉིས་ལ་འཇུག་པའི་ཐབས་རྣམས་བསྐྱེད་པའི་རིམ་པ་སྟེ། ཡེ་ཤེས་ཀྱི་ཡོན་ཏན་ཐམས་ཅད་རིམ་པས་བསྐྱེད་པའི་ཕྱིར་རོ། །དབྱེ་བ་མེད་པའི་ཤེས་རབ་སངས་རྒྱས་ཀྱི་སྙིང་པོ་ཉིད་རྫོགས་པའི་རིམ་པར་གསུངས་ཏེ། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པའི་དོན་ཡིན་ནོ། །འཇུག་བསྡུ་བ་ནི། ཚིག་རྐང་དྲུག་སྟེ། དེ་ལ་སོགས་པ་ཐམས་ཅད་ཀྱང་ཕྱི་དང་ནང་དང་གཞན་གྱི་རིམ་པས་མཐར་ཐུག་པའི་འབྲས་བུ་ཡེ་ཤེས་གཅིག་ཏུ་སྦྱོར་བ་ནི། རྡོ་རྗེ་ཐེག་པའི་རྩ་བ་མདོར་བསྡུས་བརྗོད་པ་ཡིན་ནོ། །ཇི་ལྟར་ཨེ་ཝྃ་བཤད་པ་བཞིན་ཞེས་པ་ནི་ཆོས་ཐམས་ཅད་ཨེ་ཝྃ་ཐབས་དང་ཤེས་རབ་ཀྱི་གནས་ལུགས་སུ་བསྡུས་ནས་གསུངས་ཏེ། ཧེ་བཛྭ་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝྃ་རྣམ་པར་རབ་ཏུ་གནས། །ཞེས་པ་ལ་སོགས་པ་རྒྱས་པར་གསུངས་པའོ། །མདོར་ན་བདེན་པ་གཉིས་ཀྱིས་བསྡུས་པའི་ཤེས་བྱ་ཐམས་ཅད་འཛིན་པ་མེད་པའི་ངང་ནས་སྦྱང་བར་བྱའོ། །ཀུན་བརྟགས་ཀྱི་ལྷ་དང་དཀྱིལ་འཁོར་ལ་སོགས་པ་བསྟན་ཟིན་ཏོ།། །།

ལེའུ་དགུ་པ། ཆོས་ཐམས་ཅད་ཀྱི་སྦྱང་གཞི་དང་སྦྱོང་བྱེད་སྦྱར་ནས་བསྟན་པའི་དུམ་བུ།

དེ་ནས་དགུ་པ་ཆོས་ཐམས་ཅད་ཀྱི་སྦྱང་གཞི་སྦྱོང་བྱེད་བསྟན་པ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི། དེ་ནས་ཆོས་རྣམས་ཐམས་ཅད་ཀྱི། །སྦྱང་གཞི་སྦྱོང་བྱེད་གསུངས་པ་ཡི། །ངེས་པ་འདིར་ནི་བསྟན་པར་བྱ། །ཞེས་བྱ་བ་ནི། འཁོར་འདས་ཀྱི་ཆོས་ཐམས་ཅད་སེམས་དག་པ་དང་མ་དག་པའི་ཆོ་འཕྲུལ་ལས་སྣང་བའི་ཚུལ་སྔར་བསྟན་པ་བཞིན་དང་། ཀུན་བརྟགས་ཀྱི་ལྷ་བསྒོམ་པའི་སྐབས་སུ་བཤད་པ་བཞིན་སྦྱང་གཞི་ཐམས་ཅད་ལ་སྦྱོང་བྱེད་ཀྱི་གཉེན་པོ་ལྷའི་དཀྱིལ་འཁོར་ལ་སོགས་པ་བསྟན་པའི་ངེས་པ་བཤད་པར་བྱའོ། །རྒྱས་པར་བཤད་པ་ལ་དྲུག་སྟེ། ཡང་དག་པའི་བདེན་པ་གཉིས་བཤད་པ་དང་། དེའི་ཚུལ་མ་རྟོགས་པས་འཁྲུལ་པའི་ལོག་པར་རྟོག་པ་སྤང་བ་དང་། སྤང་གཉེན་གྱི་རྩ་བ་དང་། བྱེ་བྲག་ཏུ་རྒྱུད་སྡེའི་གཉེན་པོའི་ངེས་པ་མདོར་བསྟན་དང་། རྒྱས་བཤད་དང་། དེ་ཉིད་རྒྱུད་ཀྱི་ལྷ་ཐམས་ཅད་ལ་སྦྱར་བའོ། །དང་པོ་ནི་ཚིགས་བཅད་ཕྱེད་དང་གསུམ་སྟེ། རྡོ་རྗེའི་ཐེག་པ་ཆེན་པོ་ལས་ཡང་དག་པའི་འབྲས་བུ་ཡེ་ཤེས་དང་། དེ་ཉིད་དང་རྗེས་སུ་མཐུན་པའི་གཉེན་པོའི་ཤེས་པ་བསྐྱེད་པ་ཡང་དག་པའི་ལྟ་བ་འབྱུང་བའི་རྒྱུ་སངས་རྒྱས་ཀྱི་ཆོས་རྣམ་པར་དཀར་བ་དག་ནི་དབྱེ་བ་མེད་པའི་ཕྱིར། འབྲས་བུ་ལམ་དུ་བྱེད་པ་ཞེས་སྨོས་སོ། །དོན་དམ་པར་ན་རྒྱུ་དང་འབྲས་བུ་དང་ལམ་དུ་ཉེ་བར་འདོགས་པ་དང་སེམས་པ་དང་རྟོག་པ་དག་གི་རྣམ་པར་རྟོག་པས། སྒྲོས་བཏགས་པ་ཙམ་སྟེ། དོན་ལ་ཡོད་པ་མ་ཡིན་ནོ། །དོན་དམ་པར་གང་ཞིག་ཡོད་ན་རྟོག་པའི་དྲ་བ་ཐམས་ཅད་ལས་འདས་པའི་སེམས་རང་བཞིན་གྱིས་དག་པའི་སེམས་ཅན་གྱི་ཁམས་སངས་རྒྱས་ཀྱི་སྙིང་པོ་དག་ནི་ཡོད་པས་དེའི་ཚུལ་བརྗོད་པ། །སེམས་ཅན་ཁམས་ནི་སངས་རྒྱས་ཀྱི། །སྙིང་པོ་དྲི་མེད་བདེན་གཉིས་ལྡན། །ཞེས་སྨོས་སོ། །དེ་ལ་སངས་རྒྱས་ཀྱི་སྙིང་པོ་ནི་སྔར་སྨོས་པའི་ཚོགས་བརྒྱད་ཀྱི་འཁྲུལ་པའི་དྲི་མ་མེད་པ་ཁོ་ན་ཡིན་མོད་ཀྱི་འོན་ཀྱང་བདེན་པ་གཉིས་ཀྱི་དོན་མངོན་སུམ་དུ་མ་བྱས་པ་དག་རྟེན་ཅིང་འབྲེལ་བར་འབྱུང་བའི་ཚུལ་ལ་རྨོངས་ནས་ལྟ་བ་ཐ་དད་འཛིན་པས་འཁོར་བར་གྱུར་ཏོ། །དེ་ཡང་འཕགས་པ་ཀླུ་སྒྲུབ་ཀྱི་ཞལ་སྔ་ནས། སྒྱུ་མ་ཇི་ལྟ་ཇི་ལྟ་བར། །དེ་བཞིན་སེམས་ཅན་ཡུལ་ལ་སྤྱོད། །འགྲོ་བ་སྒྱུ་མའི་རང་བཞིན་ཡིན། དེ་བཞིན་དུ་ནི་བརྟེན་ནས་བྱུང་། །ཇི་ལྟར་རི་མོ་མཁན་གྱིས་གཟུགས། །གནོད་སྦྱིན་འཇིགས་པ་བྲིས་པ་ཡིས། །དེ་ཡིས་བདག་ཉིད་སྐྲག་པ་ལྟར། །མི་མཁས་འཁོར་བར་དེ་བཞིན་ནོ། །ཇི་ལྟར་རང་གིས་འདམ་གཡོས་པས། །བྱིས་པ་འགའ་ཞིག་བྱིང་པ་ལྟར། །དེ་བཞིན་རྟོག་པའི་འདམ་བྱིང་བས། །སེམས་ཅན་རྣམས་ནི་འབྱུང་མི་ནུས། །དངོས་མེད་དངོས་པོར་ལྟ་བ་ཡིས། །སྡུག་བསྔལ་ཚོར་བ་ཉམས་སུ་མྱོང་། །ཡུལ་དང་ཤེས་པ་དེ་དག་ཏུ། །རྣམ་པར་རྟོག་པའི་དུག་གིས་བཅིངས། ཞེས་ཐེག་པ་ཆེན་པོ་ཉི་ཤུ་པ་ལས་གསུངས་པ་བཞིན་དུ་འཁྲུལ་པར་གྱུར་པ་ཡིན་ནོ། །དེ་ལ་ལྟོས་ནས་སངས་རྒྱས་ཐོབ་བོ་ཞེས་ཀུན་རྫོབ་ཀྱི་བདེན་པ་ལ་སྨྲ་བར་འགྱུར་ཏེ། དེ་ཡང་ཇི་ལྟར་ཞེ་ན། །དེ་དག་སྙིང་པོ་མེད་མཐོང་བས། །ཤེས་རབ་སྙིང་རྗེའི་ཡིད་ཀྱིས་ནི། །སེམས་ཅན་རྣམས་ལ་ཕན་པའི་ཕྱིར། །རྫོགས་སངས་རྒྱས་ལ་སྦྱར་བར་བྱ། །དེས་ཀྱང་ཚོགས་བསགས་ཀུན་རྫོབ་ཏུ། །བླ་ན་མེད་པའི་བྱང་ཆུབ་འཐོབ། །རྟོག་པའི་འཆིང་བ་རྣམས་ལས་གྲོལ། །ཞེས་གསུངས་པ་ཡིན་ནོ། །འོ་ན་སེམས་ཅན་དང་སངས་རྒྱས་སུ་བཏགས་པ་དང་སྣང་བ་དག་ནི་ཀུན་རྫོབ་ཀྱི་བདེན་པ་ཡིན་ན་དོན་དམ་པའི་བདེན་པ་ཉིད་ནི་ཇི་ལྟ་བུ་ཞེ་ན། གསང་བ་འདུས་པ་ལས། དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་སྤངས་པ། །ཆོས་བདག་མེད་པས་མཉམ་ཉིད་པས། །རང་སེམས་གདོད་ནས་མ་སྐྱེས་པས། སྟོང་པ་ཉིད་གྱི་རང་བཞིན་ནོ། །ཞེས་བྱ་བ་འདི་བསྟན་པར་བཞེད་ནས། །སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །ཞེས་བྱང་ཆུབ་སེམས་འགྲེལ་ལས་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་གསུངས་པ་སྟེ། དེ་ལྟར་བདེན་པ་གཉིས་པོ་ཡང་ཡེ་ཤེས་རྡོ་རྗེ་ཀུན་ལས་བཏུས་པ་ལས་གསུངས་པའི་ལུང་འདིར་བསྡུས་པ། ཀུན་རྫོབ་བཟུང་འཛིན་སྣང་བ་སྟེ། བདེན་པ་ཆུ་ཟླ་ལྟ་བུའོ། །དོན་དམ་སྟོང་ཉིད་བཅོ་བརྒྱད་དེ། །བདེན་པ་གཉིས་མེད་ཡེ་ཤེས་བརྗོད། །ཞེས་སྨོས་ཏེ། ཀུན་རྫོབ་ནི་ཐམས་ཅད་མི་བདེན་པ་ཞེས་བྱ་བའི་སྒྲ་ཡིན་པས་བཟུང་བ་དང་འཛིན་པ་གཉིས་སུ་ཀུན་བརྟགས་པ་ནི་རྣམ་པ་ཐམས་ཅད་དུ་མེད་པ་དག་ཡིན་ཏེ། འཕགས་པ་བྱམས་པའི་ཞལ་སྔ་ནས་ཀྱང་། །དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེའོ་དེ་དོན་མེད། །དེ་མེད་པས་ན་དེ་ཡང་མེད། ཞེས་ཀུན་བརྟགས་པའི་བཟུང་བ་དང་འཛིན་པ་ཐམས་ཅད་རྣམ་པ་ཐམས་ཅད་དུ་མེད་པ་ཉིད་དུ་གསུངས་སོ། །འོ་ན་བདེན་པ་ཇི་ལྟར་བཞག་ཅེ་ན། མེད་བཞིན་དུ་སྣང་བ་ཙམ་དེ་ནི་ཀུན་རྫོབ་ཀྱི་བདེན་པ་ཞེས་བྱ་སྟེ། བསླུ་བ་མེད་པའི་རང་གི་ངོ་བོ་ཉིད་ཡིན་པའི་ཕྱིར་རོ། །འོ་ན་དེ་ཉིད་དོན་དམ་པའི་བདེན་པ་མ་ཡིན་ནམ། གང་བསླུ་བ་མེད་པ་དེ་ནི་དོན་བྱེད་ནུས་པ་ཚད་མ་ཉིད་དང་འབྲེལ་བ་ཡིན་པས། །དོན་བྱེད་ནུས་པ་གང་ཡིན་པ། །དེ་ནི་དོན་དམ་ཉིད་དུ་བརྗོད། །ཅེས་རིགས་པའི་གཞུང་ལས་བྱུང་བ་མ་ཡིན་ནམ། ཞེ་ན། འདི་ཡང་རྣམ་གྲངས་ཀྱིས་དོན་དམ་པར་བཞག་པ་ཡོད་མོད་ཀྱི་ཆོས་ཉིད་ཀྱི་རིགས་པའི་རྗེས་སུ་འབྲེལ་བ་དག་ནི། སྟོང་པ་ཉིད་ཆེན་པོ་བཅོ་བརྒྱད་ཀྱི་རྣམ་པར་བཤད་པའི་རང་བཞིན་སྟོང་པ་ཉིད་སྔར་སྨོས་པ་དེ་ཉིད་དོན་དམ་པའི་བདེན་པ་ཡིན་ནོ། །དེ་ཡང་སློབ་དཔོན་ཡེ་ཤེས་སྙིང་པོས། ཇི་ལྟར་སྣང་བ་འདི་ཁོ་ན། ཀུན་རྫོབ་གཞན་ནི་གཅིག་ཤོས་ཡིན། ཞེས་བྱ་བ་དང་། ཀུན་རྫོབ་དེ་ལ་ཡང་ཀུན་རྫོབ་ཉིད་དང་བདེན་པ་གཉིས་སུ་དབྱེ་བར་འདོད་ནས། །སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་གསུངས་པའི་ཕྱིར་དེ་ལྟར་བཤད་པའི་བདེན་པ་གཉིས་པོ་འདི་ཡང་ཆོས་རྣམས་དང་ཆོས་ཉིད་ཇི་ལྟ་བ་བཞིན་དུ་དེ་ཉིད་དང་གཞན་ལས་རྣམ་པར་གྲོལ་བ་ཡིན་པས། གཅིག་པ་དང་ཐ་དད་པ་གང་དུ་ཡང་བརྗོད་དུ་མེད་དོ། །ཚུལ་འདི་ནི་སངས་རྒྱས་བཅོམ་ལྡན་འདས་རྣམས་ཀྱིས་རྟོགས་ཤིང་བསྟན་པའི་ཆོས་ཐམས་ཅད་ཀྱི་དོན་ཀྱང་ཡིན་ཏེ། དབུ་མ་རྩ་བའི་འགྲེལ་པ་ག་ལས་འཇིགས་མེད་ལས། སངས་རྒྱས་རྣམས་ཀྱི་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །གང་དག་བདེན་པ་དེ་གཉིས་ཀྱི། །རྣམ་དབྱེ་རྣམ་པར་མི་ཤེས་པ། དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་མི་ཤེས། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་ནི་བདེན་པ་གཉིས་པོ་འདི་དག་ལ་བརྟེན་ནས་འབྱུང་སྟེ། འཇིག་རྟེན་པའི་ཀུན་རྫོབ་ཀྱི་བདེན་པ་ཞེས་བྱ་བ་ནི་ཆོས་རྣམས་ཀྱི་ངོ་བོ་ཉིད་སྟོང་པ་དག་ལ་འཇིག་རྟེན་གྱི་ཕྱིན་ཅི་ལོག་མ་རྟོགས་པས་ཆོས་ཐམས་ཅད་སྐྱེ་བར་མཐོང་བ་གང་ཡིན་པ་སྟེ། དེ་ནི་དེ་དག་ཉིད་ལ་ཀུན་རྫོབ་ཏུ་བདེན་པ་ཉིད་ཡིན་པས་ཀུན་རྫོབ་ཀྱི་བདེན་པའོ། །དོན་དམ་པའི་བདེན་པ་ནི་འཕགས་པ་རྣམས་ཀྱིས་ཕྱིན་ཅི་ལོག་ཐུགས་སུ་ཆུད་པས་ཆོས་ཐམས་ཅད་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་པའི་བདེན་པའོ། །དེ་ལ་གང་དག་ཀུན་རྫོབ་ཀྱི་བདེན་པ་དང་དོན་དམ་པའི་བདེན་པ་དེ་གཉིས་ཀྱི་རྣམ་པར་དབྱེ་བ་དེ་ལྟར་མི་ཤེས་པ་དེ་དག་ནི་སངས་རྒྱས་ཀྱི་བསྟན་པ་ཟབ་མོའི་དེ་ཉིད་རྣམ་པར་མི་ཤེས་པ་ཡིན་ནོ། །དེ་ལ་འདི་སྙམ་དུ་སྨྲ་བར་འདོད་པའི་དོན་ནི་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་དོན་དམ་པའི་བདེན་པ་དེ་ཉིད་ཡིན་ན། །ཐ་སྙད་ཀྱི་བདེན་པ་གཉིས་པ་འདི་ཅི་དགོས་སྙམ་ན། དེ་ལ་བཤད་པར་བྱ་སྟེ། ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ལ་མ་བརྟེན་པར། མྱ་ངན་འདས་པ་ཐོབ་མི་འགྱུར། གང་གི་ཕྱིར་ཐ་སྙད་ལ་མ་རྟེན་པར་དོན་དམ་པ་བསྟན་པར་མི་ནུས་པ་དང་། གང་གི་ཕྱིར་དོན་དམ་པ་ལ་མ་བརྟེན་པར་མྱ་ངན་ལས་འདས་པ་འཐོབ་པར་མི་འགྱུར་བ་དེའི་ཕྱིར་བདེན་པ་གཉིས་ཀ་གདགས་དགོས་སོ་ཞེས་གསུངས་པས་ཚུལ་འདི་ལྟ་བུ་ལ་བརྟེན་ནས་ཡང་དག་པའི་རྟོག་པ་དང་ལྟ་བ་འབྱུང་བས། དེར་རྟོག་བྱེད་པའི་རྟོག་པས་བསྐྱེད། གཉེན་པོའི་སྦྱོང་བྱེད་ཡིན་པར་བཤད། ཅེས་སྨོས་པ་ཡིན་ནོ། །དེ་ལྟར་བདེན་པ་གཉིས་ཀྱི་དོན་སངས་རྒྱས་ཀྱི་སྙིང་པོ་རུ་འཆད་པ་འདི་སྔགས་ཀྱི་གཞུང་རྣམས་དང་རྣལ་འབྱོར་སྤྱོད་པའི་གཞུང་རྣམས་ལ་འཐད་ཀྱིས། དབུ་མའི་གཞུང་ལས་ཆོས་ཐམས་ཅད་ངོ་བོ་ཉིད་མེད་པར་སྟོན་པའི་ཕྱིར་དེ་བཞིན་གཤེགས་པའི་སྙིང་པོ་དང་ཁམས་ཡོད་པར་བསྟན་པ་མེད་དོ་སྙམ་དུ་རྟོག་པའི་དབུ་མ་པ་དག་གི་ཚིག་གི་རྗེས་སུ་འཁྲུལ་པར་མི་བྱ་སྟེ། ཆོས་ཀྱི་དབྱིངས་སུ་བསྟོད་པ་ལས། དེ་བཞིན་ས་བོན་ཐམས་ཅད་ལས། །རྒྱུ་དང་འདྲ་བའི་འབྲས་བུ་འབྱུང་། །ས་བོན་མེད་པར་འབྲས་ཡོད་པར། །ཤེས་ལྡན་གང་གིས་བསྒྲུབ་པར་ནུས། །ས་བོན་གྱུར་པ་ཁམས་དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །རིམས་ཀྱིས་སྦྱངས་པར་གྱུར་པ་ལས། །སངས་རྒྱས་གོ་འཕང་ཐོབ་པར་འགྱུར། །དྲི་མེད་ཉི་མ་ཟླ་བ་ཡང་། །སྤྲིན་དང་དུ་བ་ཁུག་རྣ་དང་། །སྒྲ་གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡིས་བསྒྲིབས་པར་གྱུར། །དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་ལེ་ལོ་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབས་པར་གྱུར། །ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མས་དྲི་མ་ཅན། །ཇི་ལྟར་མེའི་ནང་བཅུག་ན། །དྲི་མ་ཚིག་འགྱུར་གོས་མིན་ལྟར། །དེ་བཞིན་འོད་གསལ་བ་ཡི་སེམས། །འདོད་ཆགས་ལས་སྐྱེས་དྲི་མ་ཅན། ཡེ་ཤེས་མེ་ཡིས་དྲི་མ་སྲེག །དེ་ཉིད་འོད་གསལ་བ་ཡིན་ནོ། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་དེ། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ཞེས་བྱ་བ་ལ་སོགས་པ་རྒྱས་པར་གསུངས་ཤིང་འདིའི་མིང་གི་རྣམ་གྲངས་ནི། རྒྱུད་བླ་མ་ལས། སེམས་ཀྱི་རྣམ་པར་དག་པའི་ཁམས། །འདིའི་རང་བཞིན་ཆོས་སྐུ་དང་། དེ་བཞིན་ཉིད་དང་རིགས་ཀྱང་སྟེ། །ཞེས་བྱ་བ་ལ་སོགས་པ་ཤིན་ཏུ་རྒྱས་པར་གསུངས་ཤིང་། དཔེ་དགུས་ཉོན་མོངས་པ་ཇི་སྙེད་པ་མདོར་བསྡུས་པས་དྲུག་བཅུ་རྩ་བཞི་རྣམ་པར་སྦྱངས་པ་ལས་དྲི་མ་མེད་པའི་སངས་རྒྱས་ཀྱི་ཡོན་ཏན་དྲུག་བཅུ་རྩ་བཞི་སྣང་བར་བྱེད་པ་སྦྱང་གཞི་དང་སྦྱོང་བྱེད་ཀྱིས་ཡོངས་སུ་སྦྱོང་བ་འཐད་པ་དང་བཅས་པ་གསུངས་པའི་དོན་གྱིས་ན་འདིར་ཡང་། སྦྱང་གཞིའི་གྲངས་བཞིན་ཆོས་ཀུན་བསྟན། ཞེས་སྨོས་པ་ཡིན་ནོ། །དེ་ལྟར་སྔགས་ཀྱི་ཚུལ་གྱིས་ཡང་དག་པའི་ལྟ་བ་ཞེས་བྱ་བ་ཟུང་འཇུག་མཐའ་བྲལ་ཆེན་པོའི་བདེན་པ་གཉིས་ཀྱི་ཚུལ་བཤད་ནས། །ད་ནི་དེའི་ཚུལ་མ་རྟོགས་པ་རྣམས་ཀྱི་ཞེ་འདོད་སྤང་བར་བསྟན་པ་ལ་ཡང་། ཕྱི་རོལ་པ་དང་། ཐེག་པ་དམན་པའི་གྲུབ་མཐའ་གཉིས་ལས། དང་པོ་ནི། ཚིག་རྐང་ལྔ་ལས། །ཚངས་སོགས་གྲུབ་མཐའ་ཐམས་ཅད་ཀྱང་། །རྣམ་རྟོག་གིས་བྱས་ཤེས་བྱ་ཡིན། །ཞེས་པ་ནི། ཚངས་པ་དང་། ཁྱབ་འཇུག་དང་། དབང་ཕྱུག་དང་། ལྷའི་བླ་མ་ཕུར་བུ་དང་། ར་མ་ན་དང་། གྲངས་ཅན་གཅེར་བུ་པ་རྣམས་ཀྱིས་རྣམ་པར་རྟོག་པས་བརྟགས་པའི་གྲུབ་པའི་མཐའ་རྣམས་ཏེ། །འདི་ཡང་དཔལ་དུས་ཀྱི་འཁོར་ལོ་ལས། །གང་གི་རིག་བྱེད་རང་བྱུང་དང་ནི་སྐྱེ་བོ་རྣམས་ཀྱི་སྐྱེ་གནས་ཁ་ལག་རྐང་པ་ལ་སོགས་དང་། །རྟའི་མཆོད་སྦྱིན་ལས་གཞན་ཆོས་ནི་གཞན་ན་ཡོད་མིན་ཞེས་བྱ་དེ་ནི་ཚངས་པས་བསྟན་པ་ཡིན། །བྱེད་པོའི་བདག་དང་ལས་དང་དུས་དང་རང་བཞིན་དང་ནི་ཡོན་ཏན་སྟོང་ཉིད་ཉམས་པའི་ཆོས་ཅན་དང་། །བྱེད་པ་པོ་དང་རྒྱུ་དང་འབྲས་བུ་རྣམས་ནི་འདིར་ནི་གསལ་བར་ཁྱབ་འཇུག་གིས་ནི་བསྟན་པའོ། །ལམ་ནི་དྲུག་དང་དེ་ཉིད་ལྔ་དང་མ་ལུས་མཆོག་གི་གོ་འཕང་དང་ནི་གཞན་ཡང་སྔགས་ཀྱི་ལུས། །རིག་པ་བདག་དང་ཡང་དག་ཞི་བ་ཉིད་དང་རྣམ་གསུམ་ལམ་དུ་འགྲོ་དང་སྦྱོར་དང་སྟོང་པའི་དངོས། །ཐིག་ལེས་ཕྱེ་བ་ཞི་བ་ཉིད་དང་ཚིགས་འཚམས་བཅུ་གཉིས་དབྱེ་བས་མ་ལུས་ལུས་སུ་སོན་པ་ནི། །གང་དུ་འདི་དག་ཐམས་ཅད་ངེས་པར་གང་ལ་བསྟན་པར་འགྱུར་བ་དེ་ནི་ཞི་བས་བསྟན་པ་ཡིན། །དབང་ཕྱུག་དང་ནི་ལས་ཀྱི་རྣམ་སྨིན་མེད་ལ་ཡོན་ཏན་ཡུལ་ནི་འབྱུང་བའི་ཚོགས་ལ་ལོངས་སྤྱོད་དོ། །དེ་མེད་པས་ན་འབྲས་བུ་མེད་པ་རྣམས་ནི་གསལ་བར་ལྷའི་བླ་མས་བསྟན་པར་རིག་པར་བྱ། །སྟག་གཟིག་རྣམས་ནི་ལོངས་སྤྱོད་དོན་དུ་རྒྱུ་བཅས་རྒྱུ་བ་མེད་པ་མ་ལུས་བྱེད་པ་པོ་ཡིས་བསྐྱེད། མི་རྣམས་མཐོ་རིས་པ་ཡང་ངེས་པར་དགའ་བ་ཡིས་ནི་འགྱུར་ཏེ་ར་མ་ན་ཡིས་བསྟན་པ་ཡིན། །དུས་གསུམ་པོ་དང་རྫས་དྲུག་དང་ནི་གནས་ཀྱི་རྣམ་བཞག་དགུ་དང་སྲོག་ནི་ཅུང་ཟད་ལུས་དྲུག་ལ། །སྐུ་ལྔ་གཞན་ཡོད་པ་དང་བརཏལ་ཞུགས་དུལ་བར་འགྲོ་བ་ཡེ་ཤེས་སྤྱོད་ལམ་རྣམས་ཀྱིས་དབྱེ་བ་དང་། །སྲོག་ནི་ལུས་ཀྱི་ཚད་ཙམ་སྲིད་པ་དཔག་ཏུ་མེད་པ་རྣམས་སུ་རྟག་པ་ཡིས་ནི་ཐར་པ་ལ། །གང་དུ་ཐར་པའི་ཚད་ནི་སྟེང་དུ་སྨོས་པ་རྣམས་ནི་རྒྱལ་བ་ཡིས་ནི་ཡང་དག་བསྟན་པ་ཡིན། །ཞེས་མུ་སྟེགས་པ་རྣམས་ཀྱི་སོ་སོའི་རང་གཞུང་གྲུབ་པའི་མཐའ་རྣམས་གསུངས་ནས། འདི་རྣམས་ཐམས་ཅད་ལོག་པར་ལྟ་བ་ཡིན་པས་དགག་པའི་ཚུལ་ནི། གཞུང་འདི་ཉིད་ཀྱི་རྗེས་སུ་ཡང་རྒྱས་པར་གསུངས་ལ། དབུ་མ་དང་ཚད་མའི་བསྟན་བཅོས་རྣམས་སུ་ཡང་དང་ཡང་དུ་གསུངས་ཤིང་། འདིར་ཡི་གེ་མངས་བར་འགྱུར་བའི་ཕྱིར་མ་བཀོད་དོ། །དེས་ན་རྒྱུ་དང་རྐྱེན་ལྡན་པ་དང་འདུ་བའི་འབྲེལ་བ་འདོད་པའི་གྲངས་ཅན་པ་རྣམས་དང་། མེད་འཛིན་སོགས་ཞེས་པ་ནི་ཆད་པར་ལྟ་བ་རྒྱང་འཕེན་པ་སྟེ། མུ་སྟེགས་པ་ཐམས་ཅད་འདི་གཉིས་སུ་འདུས་ཤིང་ལྟ་བ་སྣ་ཚོགས་པ་ཐམས་ཅད་ཀྱང་ལུས་སེམས་ཀྱི་བཟུང་འཛིན་ལ་བརྟེན་ནས་བྱུང་བར་བཅོམ་ལྡན་འདས་ཀྱིས་ཚངས་པ་དྲ་བའི་མདོ་ལས་གསུངས་ཏེ། དེ་ལྟ་བུའི་ལྟ་བ་ངན་པ་དག་ལ་འཆོལ་བའི་སེམས་ཅན་རྣམས་མངོན་སུམ་དང་རྗེས་སུ་དཔག་པའི་རིགས་པ་དག་གིས་བཟློག་ནས་ཡང་དག་པའི་ལམ་དུ་དྲང་བར་བྱ་བ་བྱང་ཆུབ་སེམས་དཔའ་རྣམས་ཀྱི་བྱ་བ་ཡིན་ནོ། །ཐེག་པ་དམན་པའི་གྲུབ་མཐའ་ནི། ཚིགས་བཅད་གཉིས་དང་རྐང་པ་གསུམ་སྟེ། དང་པོ་ཕྱི་རོལ་གྱི་ཡུལ་ལ་འཁྲུལ་པའི་ཆ་ནི། ཕྱི་རོལ་རྡུལ་ཕྲན་ཕག་ན་མོ། །ཀུན་གཞི་ཡིད་བཅས་ཡུལ་སྣང་གི །ནུས་པ་མ་རྟོགས་དབང་གིས་ཏེ། །ཞེས་བྱ་བ་ནི། རང་གི་སྡེ་པ་ཉན་ཐོས་མདོ་སྡེ་པ་དང་བྱེ་བྲག་ཏུ་སྨྲ་བ་རྣམས་ཕྱི་རོལ་གྱི་དོན་སེམས་ལས་གཞན་པའི་རྡུལ་ཕྲ་རབ་ཆ་དང་བཅས་པ་དང་ཆ་མེད་པ་བསྐོར་བ་བར་བཅས་དང་བར་མེད་ལ་སོགས་ཕྱི་རོལ་གྱི་དོན་མངོན་སུམ་པ་དང་། ཕག་ན་མོ་ལ་སོགས་པ་འདོད་པ་དེ་དག་ཀྱང་། ཀུན་གཞི་ཡིད་དང་བཅས་པའི་ནུས་པ་ཕུལ་དུ་སྣང་བའི་ཆ་མ་རྟོགས་པས་དོན་གཞན་དུ་རྟོག་པའི་འཁྲུལ་པ་བྱུང་བ་ཡིན་གྱི་རྣམ་པར་ཤེས་པ་ལས་ཐ་དད་པ་ནི་གཞན་དུ་བདེན་པ་མེད་དོ། །འོན་ཀྱང་བདག་དང་བྱེད་པ་པོ་ལ་སོགས་པ་ཡོད་པར་རྟོག་པའི་གཉེན་པོ་རྡུལ་ཕྲ་རབ་ལ་སོགས་པ་ཁམས་ཀྱི་རང་བཞིན་གསུངས་པས། འོན་ཀྱང་བདག་སོགས་བྱེད་པ་པོ། །དགག་ཕྱིར་རྒྱལ་བས་གསུངས་པ་ཡོད། །ཞེས་སྨོས་སོ། །དེ་ཡང་བྱང་ཆུབ་སེམས་འགྲེལ་ལས། གཟུང་དང་འཛིན་པའི་ངོ་བོ་ཡིས། རྣམ་ཤེས་ལས་ནི་ཐ་དད་པར། །ཕྱི་རོལ་དོན་ནི་འགའ་ཡང་མེད། །དེ་ཕྱིར་དངོས་པོའི་ངོ་བོར་ནི། །ཕྱི་དོན་རྣམ་པ་ཀུན་ཏུ་མེད། །རྣམ་ཤེས་སོ་སོར་སྣང་བ་འདི། །གཟུགས་ཀྱི་རྣམ་པར་སྣང་བར་འགྱུར། །ཇི་ལྟར་སྐྱེ་བོ་སེམས་རྨོངས་པས། སྒྱུ་མ་སྨིག་རྒྱུ་དྲི་ཟ་ཡི། །གྲོང་ཁྱེར་ལ་སོགས་མཐོང་བ་ལྟར། །དེ་བཞིན་གཟུགས་སོགས་སྣང་བ་ཡིན། །བདག་ཏུ་འཛིན་པ་བཟློག་པའི་ཕྱིར། །ཕུང་པོ་ཁམས་སོགས་བསྟན་པ་ཡིན། །ཞེས་གསུངས་པ་ཡིན་ནོ། །བདག་དང་གང་ཟག་བཏགས་པར་བརྗོད། །བདེན་པའི་རྫས་གྲུབ་རྡུལ་ཙམ་མེད། །ཅེས་པ་རང་གི་སྡེ་པ་ཉན་ཐོས་འགའ་ཞིག་གང་ཟག་གི་བདག་ལ་སོགས་པ་ཡོད་པར་སྨྲ་བ་དེ་དག་ཀྱང་མིང་གིས་བཏགས་པ་ཙམ་དུ་ཡིན་གྱི་བདེན་པའི་གང་ཟག་གི་རྫས་གྲུབ་པ་ཡོད་ན། རྫས་དེ་འཁོར་བ་ཉིད་ཡིན་ན་ནི་མྱ་ངན་ལས་འདས་པ་མི་འཐད་པ་དང་། རྫས་དེ་མྱ་ངན་ལས་འདས་པ་ཡིན་ན་ནི་འབད་པ་མེད་པར་ཐར་པར་རིགས་པའི་སྐྱོན་ཡོད་པས། །བདེན་པའི་རྫས་གྲུབ་རྡུལ་ཙམ་མེད། །ཡོད་ན་འབད་མེད་ཐར་པའམ། །ཐར་མེད་སྐྱོན་འགྱུར་ཞེས་སུ་བསྟན། །ཞེས་སྨོས་སོ། །འདི་ནི་རྒྱས་པར་མདོ་སྡེ་རྒྱན་ལས། །གང་ཟག་བཏགས་པར་ཡོད་ཉིད་དུ། །བརྗོད་བྱ་རྫས་སུ་མ་ཡིན་ནོ། །ཞེས་བྱ་བ་ལ་སོགས་པ་རྒྱས་པར་གསུངས་པའི་དོན་ཡིན་ནོ། །དེ་སོགས་སེམས་ལ་སྣང་བ་ཡི། །སྤང་གཉེན་མཁས་རྣམས་ཀྱིས་གསུངས་བཞིན། །ཞེས་བྱ་བ། སེམས་ལ་སྣང་བའི་རྒྱུ་འབྲས་རྣམས་སྔར་གོང་དུ་བརྗོད་པ་དང་། ཡང་ཐམས་ཅད་སེམས་སུ་ཤེས་པས་ལྟ་བ་ངན་པ་རྣམས་སྤོང་ལ་སེམས་སུ་འཛིན་པ་ཡང་སྤངས་པས་ཡང་དག་པའི་དོན་མཐོང་བར་འགྱུར་སྟེ། བྱང་ཆུབ་སེམས་འགྲེལ་ལས། སེམས་ཙམ་པོ་ལ་གནས་ནས་ནི། །སྐལ་ཆེན་རྣམས་ཀྱིས་དེ་ཡང་སྤངས། །རྣམ་པར་ཤེས་པར་སྨྲ་བ་ལ། །སྣ་ཚོགས་འདི་ནི་སེམས་སུ་གྲུབ། །རྣམ་ཤེས་རང་བཞིན་གང་ཞེ་ན། །ད་ནི་དེ་ཉིད་བཤད་བྱ་སྟེ། །འདི་དག་ཐམས་ཅད་སེམས་ཙམ་ཞེས། །ཐུབ་པས་བསྟན་པར་གང་མཛད་དེ། །བྱིས་པ་རྣམས་ཀྱི་སྐྲག་པ་ནི། །སྤང་བའི་ཕྱིར་ཡིན་དེ་ཉིད་མིན། །ཀུན་བརྟགས་དང་ནི་གཞན་དབང་དང་། །ཡོངས་སུ་གྲུབ་པ་ཉིད་འདི་ནི། སྟོང་ཉིད་བདག་ཉིད་གཅིག་པུ་ཡི། ངོ་བོ་སེམས་ལ་བཏགས་པ་ཡིན། །ཐེག་ཆེན་དགའ་བའི་བདག་ཉིད་ལ། །ཆོས་ལ་བདག་མེད་མཉམ་པ་ཉིད། །སེམས་ནི་གདོད་ནས་མ་སྐྱེས་ཏེ། །སངས་རྒྱས་ཀྱིས་ནི་མདོར་བསྡུས་གསུངས། །ཞེས་གསུངས་པ་དང་། མདོ་སྡེ་རྒྱན་ལས་ཀྱང་། སེམས་ལས་གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པ་གཉིས་པོ་མེད་རིག་ནས། །དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་གསུངས་སོ། །དེ་བཞིན་དུ་རྣམ་པར་རིག་པ་བདེན་པ་སྤང་པ་ལ་སོགས་པ་རྣམས་ཀྱང་རྒྱ་ཆེར་གསུངས་པས་ཐེག་པ་ཆེན་པོ་དང་ཐམས་ཅད་ལ་འཇུག་པའི་ཚུལ་བདེན་པ་གཉིས་ཀྱི་གནས་ལུགས་རྟོགས་པར་བྱའོ། །གསུམ་པ་སྤང་གཉེན་གྱི་རྩ་བ་བསྟན་པ་ནི་ཚིགས་སུ་བཅད་པ་ཕྱེད་དང་གསུམ་སྟེ་རྣལ་འབྱོར་བླ་ན་མེད་པའི་རྒྱུད་འདིར་སེམས་ཀུན་གཞིའི་རྣམ་པར་ཤེས་པ་ཡང་ལུས་ལ་བརྟེན་ནས་རྟེན་ཅིང་འབྲེལ་བར་འབྱུང་བ་ཡིན་པས། རྩ་རླུང་ཐིག་ལེའི་ངེས་པས་སྦྱང་གཞི་དང་སྦྱོང་བྱེད་ཀྱི་སྤང་གཉེན་དེ་བཞིན་གཤེགས་པས་གསུངས་པ་འཕགས་པ་ཀླུ་སྒྲུབ་གྱི་ཞལ་སྔ་ནས་ཀྱང་། ཇི་ལྟར་རྒྱ་མཚོ་ལ་ནི་ཤིང་། །སེམས་ནི་མེད་ཀྱང་གཡོ་བར་འགྱུར། །དེ་བཞིན་ཀུན་གཞིའི་རྣམ་ཤེས་ནི། །ལུས་བརྟེན་ནས་ནི་གཡོ་བ་ཡིན། །ལུས་མེད་ན་ནི་རྣམ་པར་ཤེས། །ཡོད་པ་མིན་ཞེས་ཡོངས་རྟོགས་ན། །དེ་ནི་སོ་སོ་རང་རིག་ཉིད། །ཅི་འདྲ་ཞེས་བྱ་བརྗོད་པར་གྱིས། །སོ་སོ་རང་རིག་ཉིད་བརྗོད་པས། །དེ་ནི་དངོས་པོ་ཉིད་དུ་འདོད། །འདི་དེ་ཡིན་ཞེས་བརྗོད་པར་ནི། །ནུས་མིན་ཞེས་ཀྱང་བརྗོད་པ་ཡིན། །རང་ལ་ངེས་བཞིན་གཞན་དག་ལ། །ངེས་པ་བསྐྱེད་པར་བྱ་བའི་ཕྱིར། །རྟག་ཏུ་འཁྲུལ་པ་མེད་པར་ནི། མཁས་རྣམས་རབ་ཏུ་འཇུག་པ་ཡིན། ཞེས་གསུངས་པ་ལྟར་དུ། །ཁྱད་པར་རྡོ་རྗེའི་ལུས་ལྡན་པའི། །སྐྱེས་བུ་ལོ་བརྒྱའི་རླུང་ཇི་སྙེད། ཞེས་སྨོས་པ་འཛམ་བུའི་གླིང་དུ་སྐྱེས་པའི་ཁམས་དྲུག་དང་ལྡན་པའི་སྐྱེས་བུ་ལ་གནས་སྐབས་བཞིའི་ཚེ་མཐར་ཐུག་པ་ནི་ལོ་བརྒྱ་གསུངས་ལ་དེ་ཡང་ཕྱི་རོལ་གྱི་ཉིན་ཞག་བསྒྲང་པའི་ལོས་འཇོག་པ་མ་ཡིན་གྱི་དབུགས་ཉི་ཁྲི་གཅིག་སྟོང་དྲུག་བརྒྱ་ལ་ཞག་གཅིག་ཏུ་བྱས་པས་དེའི་ལོ་རྣམ་པར་བཞག་སྟེ། དེའི་ཕྱིར་ཤིན་ཏུ་ཕྲ་བ་ལུས་ལས་སྐྱེས་པའི་སྲིན་བུ་རྣམས་ནི་མིའི་ཞག་གཅིག་ལ་ལོ་བརྒྱ་རྫོགས་ཤིང་ཆེ་བ་འོག་མིན་གྱི་ལྷ་ཡི་དབུགས་འབྱུང་རྔུབ་གང་ཡིན་པ་མི་རྣམས་ཀྱི་ལོ་གཅིག་སྟེ་མི་ལོ་ཉི་ཁྲི་གཅིག་སྟོང་དྲུག་བརྒྱ་ལ་ཞག་གཅིག་བྱས་པའི་དེས་བསྒྲེས་པའི་རང་ལོ་བརྒྱ་ནི་ཚེ་ཚད་དེ་ཤག་ཏིའི་ཚེ་ཞེས་བཤད་དོ། །ཤག་ཏིའི་ལོ་ལ་འབར་དུ་ཞེས་བྱ་བ་གཟུགས་མེད་པ་གོང་མའི་དབུགས་གཅིག་སྟེ་འདི་ཡང་རང་ལོ་བརྒྱའི་མཐར་ཐུག་པ་སྟོན་པས་ཁམས་གསུམ་པ་ཐམས་ཅད་ཚེ་ལོ་བརྒྱ་པར་འཆད་དོ། །དུས་མ་ཡིན་པར་འཆི་བ་ནི་ལས་ཀྱི་དབང་གིས་ཏེ་ཚེ་མ་རྫོགས་པར་འཆི་བར་འདོད་པས་རྒྱུ་མཚན་དེས་ན་སེམས་ཅན་རྣམས་ཀྱི་རང་རང་གི་ལོ་བརྒྱའི་ཚེ་གཅིག་ལ་ཁམས་ཀྱི་རླུང་ཇི་སྙེད་ཡོད་པ་སྦྱང་གཞི་ཡིན་པས་དེ་ལ་གྲངས་སུ་ཡོད་ཅེ་ན་བསྡོམས་ན་བྱེ་བ་བདུན་བཅུ་བདུན། ས་ཡ་བདུན་དང་འབུམ་ཕྲག་དྲུག་ཡོད་པས་སྦྱང་གཞི་དེ་སྦྱོང་བའི། ཞེས་སྨོས་ཏེ་དེ་ལ་གཉེན་པོ་ཡེ་ཤེས་ཀྱི་རླུང་སྔར་བསྟན་པ་ལྟར་དབུགས་རེ་རེ་ལ་ཡང་ཆ་ཤས་ཡོད་པའི་ཕྱིར་དེ་དང་རྗེས་སུ་མཐུན་པར་སྦྱང་གཞིའི་དབུགས་གྲངས་ཇི་སྙེད་པ་རྣམས་ནི་རྣམ་པར་རྟོག་པའི་གྲངས་ཡིན་ཏེ་རྣམ་པར་རྟོག་པ་དེ་སྤྱོད་པའི་གཉེན་པོ་རྣམ་པར་དཀར་བའི་ཆོས་ཀྱི་སྒོའི་གྲངས་ཀྱང་དེ་སྙེད་དུ་འགྱུར་བས་ཆོས་ཀྱི་སྒོ་ཡང་བྱེ་བ་བདུན་བཅུ་རྩ་བདུན་དང་། ས་ཡ་ཕྲག་བདུན་དང་། འབུམ་ཕྲག་དྲུག་གོ །དེ་དག་ལས་རགས་རིམས་བསྡུས་པས་བརྒྱད་ཁྲི་བཞི་སྟོང་ཞེས་གྲགས་སྟེ་དེའི་ཕྱིར་ན་ཆོས་སྒོ་དེ་དང་མཉམ་པ་ཡིན། བརྒྱད་ཁྲི་བཞི་སྟོང་རགས་རིམས་གྲངས། ཞེས་སྨོས་པ་ནི་སྤང་གཉེན་གྱི་རྩ་བ་རྣམས་བསྟན་པའོ། །ད་ནི་བྱེ་བྲག་ཏུ་གཉེན་པོ་རྒྱུད་སྡེའི་ངེས་པ་མདོར་བསྟན་པ་ལ་ཚིགས་སུ་བཅད་པ་བཞི་སྟེ་སྔར་བསྟན་པའི་ལོ་བརྒྱའི་ལས་རླུང་ཐམས་ཅད་ལས་བྱེ་བྲག་ཏུ་དེ་ལ་ཡེ་ཤེས་རླུང་ཇི་སྙེད། རྒྱུ་བ་མྱ་འདས་ལམ་ལྡན་པ། །གཉེན་པོ་མཆོག་སྟེ་བླ་མེད་རྒྱུད། ཞེས་སྨོས་ཏེ་ལོ་བརྒྱའི་ནང་ནས་ཡེ་ཤེས་ཀྱི་རླུང་ཞག་རེ་ལ་དྲུག་བརྒྱ་བདུན་བཅུ་རྩ་ལྔ་རེ་རྒྱུ་བ་དེ་རྣམས་ཐམས་ཅད་བསྡོམས་པས་ས་ཡ་ཉི་ཤུ་རྩ་བཞི་དང་འབུམ་ཕྲག་གསུམ་ཡོད་དེ་དེ་ཐམས་ཅད་ནི་རྡོ་རྗེའི་ཐེག་པའི་རྒྱུད་ཀྱི་ཡན་ལག་གི་གྲངས་སུ་བརྗོད་ཅིང་དེ་རྣམས་སྡེ་ཚན་དུ་བསྡུས་ན་དེ་ཕྱིར་ལོ་བརྒྱའི་ཡེ་ཤེས་རླུང་བསྡོམས་པས་ལོ་གསུམ་ཕྱོགས་གསུམ་གྱི། ཞེས་པ་ནི་ཞག་སྟོང་དང་བརྒྱ་ཉི་ཤུ་རྩ་ལྔ་སྟེ། དེ་ལས་ཀྱང་བྱེ་བྲག་དུ་ལོ་གསུམ་གྱི་ཞག་ནི་སྟོང་བརྒྱ་བཅུའོ། །དེ་ལ་རྒྱུད་ཐམས་ཅད་ཀྱི་རྩ་བ་རྣམ་པ་གསུམ་དུ་འགྱུར་ཏེ་དེའི་ཕྱིར་ལོ་གསུམ་སྐུ་གསུང་ཐུགས་དབྱེ་བས། སྐུ་གསུང་ཐུགས་ཀྱི་རྒྱུད་གསུམ་སྟེ། ཞེས་སྨོས་སོ། །དེ་འདྲ་རེ་རེ་ལའང་ཐབས་ཀྱི་རྒྱུད་དང་ཤེས་རབ་ཀྱི་རྒྱུད་ཀྱི་ཆ་གཉིས་གཉིས་ཡོད་པས་གཡས་གཡོན་གྱི་རྒྱུ་བ་གཉིས་གཉིས་སུ་ཕྱེ་ན་བསྒྲོད་པས་རིགས་དྲུག་གི་རྒྱུད་དུ་བཤད་དེ་རྡོ་རྗེ་སེམས་དཔའ་དང་འོད་དཔག་ཏུ་མེད་པ་དང་རིན་ཆེན་འབྱུང་ལྡན་དང་དོན་ཡོད་གྲུབ་པ་དང་རྣམ་པར་སྣང་མཛད་དང་མི་བསྐྱོད་པའི་རིགས་ཀྱི་རྣམ་པར་དབྱེ་བས་སོ། །དེ་ལ་ཟླ་བའི་རིམས་པས་དབྱེ་ན་སྐུའི་རྒྱུད་བཅུ་གཉིས་དང་གསུང་གི་རྒྱུད་བཅུ་གཉིས་དང་ཐུགས་ཀྱི་རྒྱུད་བཅུ་གཉིས་སྟེ་དེས་ན་ཟླ་བའི་དབྱེ་བས་རིགས་རྣམས་ནི། སུམ་བཅུ་སོ་དྲུག་རྒྱུད་དུ་བཤད། །ཅེས་སྨོས་པ་ཡིན་ནོ། རྒྱུད་སུམ་བཅུ་སོ་དྲུག་པོ་དེ་ལ་ཡང་གཡས་པ་དང་གཡོན་པ་ནས་འབྱུང་བའི་ཐབས་དང་ཤེས་རབ་ཀྱི་རིམ་པས་ཕྱེ་ན་རྩ་བའི་རྒྱུད་ཀྱི་གྲངས་སུ་འགྱུར་སྟེ། །གཡས་གཡོན་ཐབས་དང་ཤེས་རབ་ཀྱི། །དབྱེ་བས་ཐབས་དང་ཤེས་རབ་རྒྱུད། །རྩ་རྒྱུད་བདུན་བཅུ་རྩ་གཉིས་ཡོད། །འདི་ནི་མཁའ་འགྲོ་རྒྱ་མཚོ་རུ། ཕྱག་གྲངས་དག་པར་གསུངས་པ་ཡིན། །ཞེས་བྱ་བའི་དོན་སྟེ་གསང་བ་པའི་བདག་པོ་བྱང་ཆུབ་སེམས་དཔས་རྩ་བའི་རྒྱུད་བདུན་བཅུ་རྩ་གཉིས་པོ་འདིར་རྣལ་འབྱོར་དང་རྣལ་འབྱོར་མའི་རྒྱུད་ཐམས་ཅད་བསྡུས་ཤིང་དཔལ་མཁའ་འགྲོ་རྒྱ་མཚོའི་རྒྱུད་ཆེན་པོ་ལས་བཅོམ་ལྡན་འདས་ཕྱག་བདུན་བཅུ་དོན་གཉིས་པའི་རྣམ་པར་དག་པ་གསུངས་ཏེ། ནང་གི་རྩ་བདུན་བཅུ་དོན་གཉིས་དང་། ལྟེ་བའི་རྩ་དབུ་མའི་འཕོ་བ་དང་བཅས་པའི་རླུང་བདུན་བཅུ་དོན་གཉིས་འདོད་པ་དང་མི་འདོད་པའི་རྣམ་པར་རྟོག་པ་བདུན་བཅུ་དོན་གཉིས་དང་དེ་ཐམས་ཅད་ཀྱི་གཉེན་པོའི་ཡེ་ཤེས་ཀྱི་གྲངས་སུ་གསུངས་སོ། །རྒྱས་པར་བཤད་པ་ནི་ཚིགས་སུ་བཅད་པ་ཕྱེད་དང་ལྔ་སྟེ་ཐོག་མར་དབྱངས་དང་གསལ་བྱེད་གྱི་ངེས་པ་ཨ་སོགས་དབྱངས་ནི་སུམ་བཅུ་དྲུག །ཀ་སོགས་དབྱེ་བ་དེ་དང་མཉམ། །ཞེས་པ་ཨ་ཨི་རྀ་ཨུ་ལྀ་རྩ་བ་ལྔའོ། །ཨ་ཨེ་ཨར་ཨོ་ཨལ་ཡོན་ཏན་ལྔའོ། །ཧ་ཡ་ར་ཝ་ལ། ཡ་ན་དྷེ་ཤ་སྟེ་རྐྱེན་ལས་གྱུར་པ་ལྔའོ། །དེ་ལྟར་ཐུང་ངུ་བཅོ་ལྔ་རིང་པོ་བཅོ་ལྔ་སྟེ་སུམ་བཅུ་དྲུག་པོ་ནི་རྩ་བའི་དབྱངས་ཏེ་གྲི་གུག་དང་དབྱུག་པ་ཐིག་ལེ་ཚེག་དྲག་ཐོང་གཤོལ་གྱི་རྣམ་པ་ལྟ་བུ་ལྔ་དང་ཨཱོཾ་དང་དྲུག་གོ། །གསལ་བྱེད་ནི། ཀ་ཁ་ག་གྷ་ང་། ཙ་ཚ་ཛ་ཛྙྱ་ཉ། ཊ་ཐ་ཌ་ཌྷྜྷ་ཎ། ཏ་ཐ་ད་དྷ་ན། པ་ཕ་བ་བྷ་མ། སྭ་སྭ་ཤ་ཥ་ཀྭ་སྟེ་སུམ་བཅུ་དང་ཧ་ཡ་ར་ཝ་ལ་ཀྵ་དྲུག་པོ་བསྣན་ན་སུམ་བཅུ་སོ་དྲུག་སྟེ་འདི་རྣམས་བརྗོད་བྱེད་ཡི་གེའི་གཙོ་བོར་གསུངས་ལ་རེ་རེ་ཡང་རྒྱུད་ཕྲན་སུམ་བཅུ་སྟེ། ཞེས་པ་དེ་ལྟར་ཀ་རྡོ་རྗེའི་རྒྱུད་ལྟ་བུ་ལ་དབྱངས་སུམ་བཅུས་བསྒྱུར་བས་ཀ་ཀི་ཀྲི་ཀུ་ཀླྀ་ཞེས་པ་ལྟ་བུ་རིང་ཐུང་སུམ་བཅུར་འགྱུར་བས་དབྱངས་དང་གསལ་བྱེད་ལྷན་ཅིག་པ་དགུ་བརྒྱ་སོ་སོར་ཕྱེ་ན་སྟོང་བརྒྱད་བརྒྱ་ཡིན་པས་ན། སྟོང་དང་བརྒྱད་བརྒྱ་ཡིན་པར་བཤད་ཅེས་སྨོས་པ་ཡིན་ནོ། །དེ་ནི་དུས་སྦྱོར་གཅིག་གི་རླུང་གི་གྲངས་དང་མཉམ་པས་དུས་སྦྱོར་བཅུ་གཉིས་ལ་ཡོད་པའི་ཡི་གེའི་གྲངས་དང་རྒྱུད་ཀྱི་ཡན་ལག་མཉམ་པས་ན། ཉི་ཁྲི་གཅིག་སྟོང་དྲུག་བརྒྱ་ཡི། །རྒྱུད་ཀྱི་ཡན་ལག་ལྡན་པ་སྟེ། །ཞེས་བསྟན་པ་ཡིན་ནོ། །འདི་ནི་ཞག་གཅིག་གི་རླུང་གི་གྲངས་ལ་འབྱུང་བ་དང་ལོ་གཅིག་གི་ཆུ་ཚོད་ལ་འབྱུང་བའི་དབྱངས་དང་གསལ་བྱེད་ཀྱང་ཡིན་ནོ། །དེ་ལ་ཡང་སྐུ་གསུང་ཐུགས་ཀྱི་རང་བཞིན་ཐིག་ལེ་ཚེག་དྲག་གྲི་གུག་གསུམ་གྱི་རང་བཞིན་གྱི་རིང་ཐུང་གསུམ་དུ་འགྲོ་བར་ལོ་གསུམ་གྱི་ཡི་གེ་སྔར་བསྟན་པའི་རྒྱུད་ཀྱི་གྲངས་སུ་འགྱུར་རོ། །གཞན་ཡང་ཞག་གྲངས་ལ་སྦྱར་བ་ནི་གསལ་བྱེད་སུམ་བཅུ་དབྱངས་དྲུག་བསྒྱུར། །སུམ་བརྒྱ་དྲུག་བཅུ་རྩ་བའི་དབྱངས། །ཞེས་པ་ཀ་སྡེ་ལྔ་པོ་ལ་དབྱངས་དྲུག་གིས་བསྒྱུར་བས་སུམ་བཅུ་སྟེ་དེ་བཞིན་དུ་ཙ་ཊ་ཏ་པ་སྭའི་སྡེ་ཚན་རྣམས་ལ་བསྒྱུར་བས་ལོ་གཅིག་གི་ཞག་ལ་འཆར་བའི་དབྱངས་རྣམས་ཏེ་སྔར་སྨོས་པའི་ཉིན་མཚན་དབྱངས་ཀྱང་དྲུག་བཅུ་སྟེ། རྒྱུ་མཚན་དེས་ན་དེ་ཕྱིར་དབུགས་གྲངས་ཞག་གཅིག་དང་། ལོ་གཅིག་ཆུ་ཚོད་དབྱངས་མཐུན་ཕྱིར། །གསལ་བྱེད་དེ་དང་མཚུངས་པ་ཡིན། །ཞེས་སྨོས་ཏེ་སྔར་བསྟན་པ་ལ་དབྱེ་བ་བྱས་པ་ཡིན་ནོ། །ཞིབ་ཏུ་དབྱངས་འཆར་ནང་དུ་ལྟོས་ཞེས་པ་ནི་དུས་ཀྱི་འཁོར་ལོའི་ནང་ནས་འབྱུང་བ་དང་ཁོ་བོས་ཀྱང་རྩིས་བསྡུས་པར་བྱས་པས་དེར་ལྟོས་གཅིག་པའོ། །དེ་ལྟར་བླ་ན་མེད་པའི་རྒྱུད་ཀྱི་ཚོགས་རྣམ་དབྱེ་བསྡུས་པར་བསྟན་པ་ཡིན་ཏེ་རྒྱ་ཆེར་ནི་དཔག་ཏུ་མེད་པའི་ཕྱིར་རོ། །དེ་ཉིད་རྒྱུད་ཐམས་ཅད་ཀྱི་ལྷ་དང་སྦྱར་བ་ནི་ཡེ་ཤེས་ཀྱི་རླུང་ལ་སྦྱར་བ་དང་རྩ་ཁམས་ལ་སྦྱར་བ་གཉིས་ལས་དང་པོ་ལ་ཡང་དུས་འཁོར་དང་སྡོམས་པ་ཆེ་ཆུང་དང་སྒྱུ་འཕྲུལ་དྲ་བ་དང་གསང་བ་འདུས་པ་དང་རྒྱུད་གཞན་ལ་སྦྱར་བ་དང་རྣམ་པ་ལྔ་ལས། དང་པོ་ནི་ཚིགས་སུ་བཅད་པ་ཕྱེད་དང་གཉིས་སྟེ། སྔར་གསུངས་པའི་རྒྱུད་ཐམས་ཅད་ཀྱི་ནང་ནས་མཆོག་ཏུ་གྱུར་པ་རྣམས་ཀྱི་ལྷ་གྲངས་ཡེ་ཤེས་ཀྱི་རླུང་ལ་སྦྱར་ནས་བསྟན་པའི་ཕྱིར། ཐབས་དང་ཤེས་རབ་གཉིས་མེད་རྒྱུད། །དེ་དག་གཙོ་བོ་ཅུང་ཟད་བརྗོད། །ཞེས་འཚམས་སྦྱར་ནས་ལོ་གསུམ་ཟླ་ཕྱེད་གསུམ་གྱི་ལོ་གསུམ་གྱི་ཆ་ལ་དུས་ཀྱི་འཁོར་ལོ་དང་རྣལ་འབྱོར་མའི་རྒྱུད་དང་ཟླ་བ་ཕྱེད་དང་གཉིས་པོའི་ཞག་ལ་ཕ་རྒྱུད་ཀྱི་ལྷ་རྣམས་སྟོན་པས་དེའི་ཕྱིར་ལོ་གསུམ་ཞག་ལ་བདུན་གྱིས་བགོས་པས་བརྒྱ་དང་ལྔ་བཅུང་བཞིར་འགྲོ་སྟེ་དུས་འཁོར་ཉུང་ངུའི་ལྷ་གྲངས་ཏེ་ཐུགས་ཀྱི་དཀྱིལ་འཁོར་གྱི་ལྷ་བརྒྱ་ལྔ་བཅུ་ང་བཞི་ཡིན་ནོ། བགོས་པས་ཐོབ་པའི་ཤུལ་དུ་ལྷག་མ་གཉིས་ལུས་པ་ནི་ཐབས་དང་ཤེས་རབ་ཀྱི་རྒྱུད་དུ་གསུངས་སོ། །འཁོར་ལོ་སྡོམ་པ་ཆེ་ཆུང་ནི། ལོ་གསུམ་གྱི་ཞག་ལ་ཟླ་བའི་ཆ་བཅོ་ལྔའི་རྣམ་དག་གིས་འབྱུང་སྟེ། དེས་ན་ཟླ་བ་ཆ་ནི་བཅོ་ལྔ་སྟེ། དེས་ཕྱེ་བདུན་བཅུ་རྩ་གཉིས་སྟེ། །བདག་པོ་འཁྲིགས་བཅས་རྣལ་འབྱོར་མའི། །ངེས་བརྗོད་རྒྱུད་ཀྱི་ལྷ་རུ་བཤད། །བསྡུས་ན་དཔའ་མོ་སུམ་བཅུ་བདུན། །ཐབས་གཅིག་དང་བཅས་ལུས་ལ་གནས། ཞེས་སྨོས་པ་ཡེ་ཤེས་ཀྱི་རླུང་ལོ་གསུམ་པོ་ལ་བཅོ་ལྔས་བགོས་པས་བདུན་བཅུ་དོན་གཉིས་སུ་འགྱུར་བ་བདག་པོ་འཁྲིག་པ་དང་ལྷན་ཅིག་པའི་དཀྱིལ་འཁོར་གྱི་ལྷ་མོ་བདུན་བཅུ་རྩ་གཉིས་སུ་འགྱུར་ཏེ། དེ་ནི་བདེ་མཆོག་ངེས་པར་བརྗོད་པ་འབུམ་པའི་ལྷ་ཡིན་ལ། རྩ་རྒྱུད་བསྡུས་པའི་དཔའ་མོ་སུམ་བཅུ་སོ་བདུན་ཐབས་དང་བཅས་པ་ཡིན་ནོ། །ཐབས་རྣམས་གཅིག་ཏུ་འཆད་པའི་རྒྱུ་མཚན་ཡང་ཀུན་སྤྱོད་ལས། ཐོད་པའི་དུམ་སོགས་འཁོར་ལོ་གནས། །ཉི་ཤུ་རྩ་བཞི་གཉིས་མེད་པས། །སེམས་ཅན་འཁོར་བ་ལས་སྒྲོལ་ཕྱིར། །དཔའ་བོ་ཉིད་དུ་བརྗོད་པ་ཡིན། །ཞེས་གསུངས་སོ། །ཐབས་ཀྱི་རྒྱུད་ཀྱི་ལྷ་ཡེ་ཤེས་ཀྱི་རླུང་ལས་ཇི་ལྟར་འགྲུབ་པ་ལས་སྒྱུ་འཕྲུལ་དྲ་བ་བཤད་པ་ནི་ཚིགས་བཅད་གཉིས་སྟེ་ཟླ་བ་ཕྱེད་པ་གསུམ་གྱི་ཞག་དེ་དག་ནི་ཁྱད་པར་དུ་ཐབས་ཀྱི་ལྷ་ཡིན་པས། དུས་སྦྱོར་རྒྱུ་བ་གཅིག་གཉིས་ཀྱིས་ཞག་བཞི་བཅུ་ཞེ་ལྔ་པོ་དེ་བསྒྱུར་ན་སྤྱིར་གྲངས་ལྔ་བརྒྱ་བཞི་བཅུ་འབྱུང་སྟེ་དེ་ལ་སྒྱུ་འཕྲུལ་དྲ་བ་རྣམ་པ་གསུམ་ནི་ལྷ་བཞི་བཅུ་ཞེ་དགུའི་དཀྱིལ་འཁོར་དང་། ཞེ་ལྔ་དང་། ཞེ་གསུམ་གྱི་དཀྱིལ་འཁོར་རྣམས་གྲངས་སུ་བྱས་པས་ཉིས་བརྒྱ་བདུན་བཅུ་རྩ་བཞི་ཡིན་ནོ། གསང་བ་འདུས་པའི་ལྷ་རྣམས་བཤད་པ་ནི་ཚིགས་སུ་བཅད་པ་ཕྱེད་དང་གཉིས་ཏེ། དཔལ་ལྡན་འདུས་པའི་དཀྱིལ་འཁོར་གྱི་རྣམ་གྲངས་དྲུག་སྟེ་དབུས་ཀྱི་ལྷ་དགུའི་དཀྱིལ་འཁོར་དང་ལྷ་བཅུ་གསུམ་པ་དང་ལྷ་བཅུ་དགུའི་དཀྱིལ་འཁོར་དང་ལྷ་ཉི་ཤུ་རྩ་ལྔའི་དཀྱིལ་འཁོར་དང་། ལྷ་སུམ་བཅུ་སོ་གཉིས་མ་དང་སུམ་བཅུ་སོ་བཞིའི་དཀྱིལ་འཁོར་རྣམས་འབྱུང་སྟེ། །ཐབས་དང་ཤེས་རབ་དབྱེ་བ་ཡིས། །ཉིས་བརྒྱ་དྲུག་བཅུ་རྩ་བཞིའོ། །དེ་ལྟར་སྒྱུ་འཕྲུལ་དྲ་བ་དང་གསང་བ་འདུས་པའི་ཡང་དཀྱིལ་འཁོར་གྱི་རྣམ་གྲངས་ཐམས་ཅད་བསྡུས་པ་ཡིན་ཏེ། ཐབས་ཀྱི་ཡེ་ཤེས་ཀྱི་རླུང་དང་རྣལ་འབྱོར་མ་རྒྱུད་རྣམས་ཤེས་རབ་ཀྱི་ཡེ་ཤེས་ཀྱི་རླུང་ཡིན་པས། ཐབས་ཤེས་རབ་དང་བཅས་རྣམ་གྲངས་སོ། །ཞེས་བསྟན་པ་ཡིན་ནོ། །རྒྱུད་གཞན་ལ་སྦྱར་བ་ནི་ཚིག་བཅད་གཉིས་དང་རྐང་པ་གཅིག་སྟེ། དེ་ལ་རྒྱུད་གཞན་རྡོ་རྗེ་ཐོད་པ་དང་རྡོ་རྗེ་བདུད་རྩིའི་དཀྱིལ་འཁོར་དང་དགྱེས་པའི་རྡོ་རྗེ་ལ་སོགས་པ་མ་རྒྱུད་ཀྱི་དཀྱིལ་འཁོར་དེ་རྣམས་འཁོར་ལོ་སྡོམ་པའི་རང་བཞིན་ལོ་གསུམ་གྱི་ཡེ་ཤེས་ཀྱི་རླུང་གི་ནང་དུ་འདུས་པར་གསུངས་ཤིང་གཤིན་རྗེ་གཤེད་ཀྱི་དཀྱིལ་འཁོར་རྣམས་དང་རྟ་མགྲིན་ལ་སོགས་པ་ཁྲོ་བོའི་དཀྱིལ་འཁོར་རྣམས་ཀྱང་གསང་བ་འདུས་པར་བསྡུ་ལ་ཆོས་དབྱིངས་ངག་དབང་གི་དཀྱིལ་འཁོར་དང་དུས་ཀྱི་འཁོར་ལོའི་དཀྱིལ་འཁོར་ནི་དཔལ་ལྡན་རྒྱུ་སྐར་གྱི་དཀྱིལ་འཁོར་ཅན་ཡིན་པས་དེ་ལྟར་ཕ་རྒྱུད་དང་མ་རྒྱུད་ཀྱི་དཀྱིལ་འཁོར་དེ་དག་གི་ཡན་ལག་ཏུ་རྡོ་རྗེ་དབྱིངས་ཀྱི་དཀྱིལ་འཁོར་ལ་སོགས་པ་རྣལ་འབྱོར་གྱི་རྒྱུད་ཐམས་ཅད་ཀྱང་འདུ་སྟེ། བྱ་བ་དང་སྤྱོད་པའི་རྒྱུད་རྣམས་ཀྱི་ལྷ་རྣམས་དེའི་ཡང་ཡན་ལག་ཏུ་འགྱུར་བ་ཡིན་པས་ཐམས་ཅད་ཀྱང་ཡེ་ཤེས་ཀྱི་རླུང་གི་རྣམ་གྲངས་ལས་འཕྲོས་པའི་ཆར་བྱང་ཆུབ་སེམས་དཔའི་འགྲེལ་པར་གསུངས་སོ། །དེས་ནི་ཡེ་ཤེས་ཀྱི་རླུང་ལ་ལྷ་ཐམས་ཅད་སྦྱར་བ་བཤད་ཟིན་ཏོ། །རྩ་ཁམས་ལ་སྦྱར་བ་ཡང་སྔ་མའི་རིམ་པས་འཆད་པ་ལས་དུས་ཀྱི་འཁོར་ལོའི་སྦྱར་བཤད་ནི་ཚིགས་སུ་བཅད་པ་ཕྱེད་དང་དྲུག་སྟེ་ཇི་ལྟར་ཡེ་ཤེས་ཀྱི་རླུང་གི་རྣམ་པར་དབྱེ་བ་ལྟར་རྩ་ཡང་དེ་བཞིན་དུ་གསུངས་པ་ནི། སྙིང་གར་སྲོག་གི་རྩ་ཨ་བ་དྷུ་ཏི་དང་རླུང་ནི་དུས་ཀྱི་འཁོར་ལོའོ། །རོ་རྐྱང་གཉིས་ནི་ཞབས་ཀྱི་རང་བཞིན་སྟེ། འཁོར་ལོའི་དབུས་ཀྱི་རིགས་དྲུག་ནི་སངས་རྒྱས་དྲུག་དང་དེའི་སྙིང་གའི་རྩར་དུ་བ་མ་ལ་སོགས་པའི་ལྷ་མོ་རྣམས་དང་། ཡེ་ཤེས་ཀྱི་སྣང་བ་ནི་ཕྱག་རྒྱ་ཆེན་མོ་ཡིན་པས། །སྙིང་ཁར་སངས་རྒྱས་ལྷ་མོ་བརྒྱད། །ཡེ་ཤེས་སྣ་ཚོགས་ཡུམ་དུ་བཤད། །ཅེས་སྡེབ་སྦྱོར་གྱི་དབང་གིས་སྨོས་སོ། །བུམ་པ་བརྒྱད་ནི་ནང་དུ་གཤང་གཅི་ཤ་དང་རྐང་ཁུ་ཁྲག་རྣམས་ཡིན་ཏེ་གཙུག་ཏོར་གྱི་རྩ་བཞི་ནི་ནོར་བུ་གྷཎྜྻི་དཔག་བསམ་ཤིང་དང་དུང་གི་རང་བཞིན་ནོ། །ངོ་བོའི་དབྱེ་བས་ཕུང་པོ་དྲུག་དང་ཁམས་དྲུག་ནི་སངས་རྒྱས་ཡུམ་དང་བཅས་པ་རྣམས་སོ། །མིག་ལ་སོགས་པ་དྲུག་དང་གཟུགས་ལ་སོགས་པའི་ཡུལ་དྲུག་ནི། བྱང་ཆུབ་སེམས་དཔའ་ལྷ་མོར་བཅས་པའོ། །རྐང་པ་ལ་སོགས་པ་ལས་ཀྱི་དབང་པོ་རྣམས་དང་དེའི་ལས་དང་བཅས་པ་རྣམས་ནི་ཁྲོ་བོ་བཅུའོ། །ལྟེ་བའི་རྩ་བདུན་བཅུ་དོན་གཉིས་པོ་ནི་འཇིགས་མ་ལ་སོགས་པའི་རྣལ་འབྱོར་མ་བདུན་བཅུ་དོན་གཉིས་གསུང་གི་དཀྱིལ་འཁོར་གྱི་རང་བཞིན་ནོ། །ཚིགས་ཆེན་བཅུ་གཉིས་ཀྱི་རྩའི་འཁོར་ལོ་རྩ་སུམ་བརྒྱ་དྲུག་བཅུ་ནི་སྐུའི་དཀྱིལ་འཁོར་གྱི་ལྷ་རྣམས་ཀྱི་རང་བཞིན་དུ་གནས་སོ། །སོར་ཚིགས་ཀྱི་རྩ་རྣམས་ནི་ཀླུ་རྣམས་དང་གཏུམ་མོ་རྣམས་སོ། །བྱེ་བ་ཕྲག་ཕྱེད་དང་བཞིའི་བ་སྤུ་རྣམས་ནི་འབྱུང་པོའི་རང་བཞིན་ནོ། །འདོད་པའི་རྟོག་པ་སུམ་བཅུ་སོ་དྲུག་མི་འདོད་པའི་རྟོག་པ་སུམ་བཅུ་སོ་དྲུག་ཀུན་གསུང་དང་སྐུའི་དཀྱིལ་འཁོར་གྱི་མཆོད་པའི་ལྷ་མོ་རྣམས་ཡིན་པས་གཟུགས་རྡོ་རྗེ་མ་ལ་སོགས་པ་མཆོད་པའི་ལྷ་མོ་རྣམས་དང་བཅས་པ་དཀྱིལ་འཁོར་གྱི་འཁོར་ལོ་ཐམས་ཅད་ཀྱི་རྩ་ཁམས་ཐབས་དང་ཤེས་རབ་ཀྱི་རང་བཞིན་ཕན་ཚུན་རྒྱས་གདབ་དང་བཅས་པས་དབྱེ་བས་སྟོང་བརྒྱད་བཅུའི་དཀྱིལ་འཁོར་དུ་འགྱུར་རོ། །དཔལ་འཁོར་ལོ་སྡོམ་པ་བཤད་པ་ནི། དཔལ་ལྡན་འཁོར་ལོ་སྡོམ་པ་ནི་ཞེས་པ་ནས་ཚིགས་བཅད་ཕྱེད་དང་གསུམ་སྟེ། རྩ་གསུམ་བདུད་བྲལ་དང་བཅས་པ་ནི་གཙོ་བོ་ཡབ་ཡུམ་དང་སྔར་བསྟན་པ་བཞིན་སྙིང་གར་ཡུམ་བཞི་མཆོད་པ་བཞི་ཡིན་ལ་རྩ་ཆེན་ཉེར་བཞི་ནི་རྣལ་འབྱོར་མ་རབ་ཏུ་གཏུམ་མོ་ལ་སོགས་པ་ཡིན་ཅིང་དེའི་ནང་ནས་འབབ་པའི་ཁམས་ཉི་ཤུ་རྩ་བཞི་ནི་ཐོད་པའི་དུམ་བུ་ལ་སོགས་པའི་དཔའ་བོར་གསུངས་སོ། །དབང་པོའི་སྒོ་རྣམས་ནི་ཁ་གདོང་མ་ལ་སོགས་པ་ཁྲོ་བོ་བཅུའི་རང་བཞིན་རྣམས་ཏེ་སྡོམ་པ་ཆུང་བའི་ལྷ་གྲངས་ཡིན་ནོ། །རྩ་ཉི་ཤུ་རྩ་བཞི་པོ་ལ་ཐིམ་པ་དང་ལོངས་སྤྱོད་པ་དང་བདག་པོའི་ཕྱིར་རྩ་བདུན་བཅུ་རྩ་གཉིས་ནི་ལྷ་བདུན་བཅུ་རྩ་གཉིས་ཀྱི་རང་བཞིན་ཡིན་ནོ། །དེ་བས་ཆེས་ཤིན་ཏུ་རྒྱས་པར་ནི་འཁོར་ལོའི་རྩ་འདབ་བརྒྱ་ཉི་ཤུ་རུ་རིགས་བསྡུས་པའི་དཀྱིལ་འཁོར་ངེས་པར་བརྗོད་པ་རྒྱུད་བླ་མ་དང་རྡོ་རྗེ་མཁའ་འགྲོ་ལ་སོགས་པའི་རྒྱུད་དུ་གསུངས་སོ་དེ་དག་གི་ལྷའི་གྲངས་ལ་སོགས་པ་རྣམས་ནི་ཤིན་ཏུ་མང་བའི་ཕྱིར་འདིར་མ་བྲིས་སོ། །དཔལ་གསང་བ་འདུས་པ་བཤད་པ་ནི། །དཔལ་ལྡན་འདུས་པ་བཤད་པར་བྱ། །ཞེས་པ་ནས་ཚིགས་སུ་བཅད་པ་ཕྱེད་དང་དྲུག་སྟེ། དེ་ཡང་འཁོར་ལོ་ལྔ་དང་ཕུང་པོ་ལྔ་ནི་སངས་རྒྱས་ལྔ་ཡིན་ཏེ། ས་ལ་སོགས་པའི་ཁམས་བཞི་པོ་དང་རེག་བྱ་དང་བཅས་པས་ཡུམ་ལྷ་མོ་ལྔའོ། །མིག་གཉིས་སའི་སྙིང་པོའོ། །རྣ་བ་ཕྱག་ན་རྡོ་རྗེའོ། །སྣ་ནི་ནམ་མཁའི་སྙིང་པོ་སྟེ་ལྕེ་ལ་བཞུགས་པ་འཇིག་རྟེན་དབང་ཕྱུག་སྤྱན་རས་གཟིགས་སོ། །དེ་དག་གི་རོ་མཉམ་ཡང་གཟུགས་རྡོ་རྗེ་མ་སྒྲ་རྡོ་རྗེ་མ་དྲི་རྡོ་རྗེ་མ་རོ་རྡོ་རྗེ་མའོ། །ཡིད་ཀྱི་ཁམས་ནི་འཇམ་དཔལ་ལོ། །ཆོས་ཀྱི་ཁམས་ཀྱི་རང་བཞིན་ནི་སྒྲིབ་པ་ཐམས་ཅད་རྣམ་པར་སེལ་བའོ། །ལུས་ཀྱི་ཁམས་ལ་ཀུན་ཏུ་བཟང་པོ་རྩ་རྒྱུད་ཐམས་ཅད་ཀྱི་ཁམས་ནི་བྱམས་པ་ཉིད་ཡིན་ནོ། །དེ་དག་གི་རོ་མཉམ་ཡང་ཉེ་བའི་གཟུགས་རྡོ་རྗེ་ཞེས་བྱ་བ་ལ་སོགས་པ་བཞི་ཡིན་ནོ། །ཞེས་གཉིས་སུ་མེད་པ་རྣམ་པར་རྒྱལ་བའི་རྒྱུད་ལས་བྱུང་ངོ་། །ཡན་ལག་གི་ཚིགས་བརྒྱད་དང་། ཁ་དང་གསང་བ་ནི་ཁྲོ་བོ་བཅུའི་རང་བཞིན་ཏེ། ལྷ་སུམ་བཅུ་སོ་བཞིའི་དཀྱིལ་འཁོར་གྱི་རང་བཞིན་ནོ། །དེ་ལས་འཁོར་ལོའི་རྩ་ཐམས་ཅད་ལ། རིགས་བསྡུས་པ་ཡང་ལྟེ་བ་སའི་དཀྱིལ་འཁོར་དུ་དེའི་འཁོར་ལས་ཀྱི་རིགས་ལས་སྐྱེས་པ་མཁྱེན་པ་དང་གཏུམ་མོ་ལ་སོགས་པའི་ལྷ་མོའི་དཀྱིལ་འཁོར་དྲུག་བཅུ་རྩ་བཞི་གསུངས་པ་ཡིན་ནོ། །སྙིང་ག་ཆུའི་ཁམས་སུ་རྡོ་རྗེའི་དབྱིངས་ལ་སོགས་པའི་ལྷ་མོ་དགུ་རྡོ་རྗེའི་རིགས་སུ་གསུངས་སོ། །མགྲིན་པ་མེའི་ཁམས་སུ་པད་མའི་སྒྲོན་མ་ལ་སོགས་པ་ལྷ་མོ་བཅུ་དྲུག་པད་མའི་རིགས་ཀྱི་རང་བཞིན་དུ་གསུངས་ཤིང་སྤྱི་བོ་རླུང་གི་ཁམས་སུ་རབ་ཏུ་སད་མ་ལ་སོགས་པ་འཁོར་ལོའི་རིགས་ལྡན་སུམ་བཅུ་རྩ་གཉིས་ཐམས་ཅད་ཀྱང་ཞལ་གསུམ་ཕྱག་དྲུག་པའི་རྣམ་པར་རྡོ་རྗེ་འཕྲེང་བ་ལས་གསུངས་ཏེ་ཐམས་ཅད་རྩ་དང་ཁམས་ཀྱི་རང་བཞིན་ཡིན་ནོ། །དཀྱིལ་འཁོར་གཞན་ལ་སྦྱར་བ་ནི། དེ་སོགས་དཀྱིལ་འཁོར་དུ་མ་རྣམས། །རྐྱང་པ་ཕྱོགས་རེ་ཆ་ལྡན་པ། །གསུངས་པ་ཐམས་ཅད་འདིར་འདུས་ཏེ། །དཔེར་ན་དགྱེས་རྡོར་ལྷ་དགུ་ནི། །སྙིང་གའི་འཁོར་ལོ་རྐྱང་ཡིན་བཞིན། །ཐམས་ཅད་ལུས་ཀྱི་རྩ་རླུང་ཡིན། ཞེས་བྱ་བའི་དོན་སྔར་དཔའ་བོ་གཅིག་པ་ནས་མཐའ་ཡས་པའི་བར་དུ་སྦྱར་བ་བཞིན་དང་ཡང་འཇམ་དཔལ་དང་གཤིན་རྗེ་གཤེད་ལ་སོགས་པ་སྐུའི་དཀྱིལ་འཁོར་ཐམས་ཅད་སྤྱི་བོ་ནས་འབྱུང་བ་དང་འགྲིན་པ་ནས་འོད་དཔག་དུ་མེད་པ་དང་རྟ་མཆོག་ལ་སོགས་པ་གསུང་གི་དཀྱིལ་འཁོར་འབྱུང་བ་དང་། སྙིང་ག་ནས་མི་བསྐྱོད་པ་དང་ཡང་དག་ལ་སོགས་པ་ཐུགས་ཀྱི་དཀྱིལ་འཁོར་རྣམས་འབྱུང་བ་དང་ལྟེ་བ་ནས་རིན་ཆེན་འབྱུང་ལྡན་དང་བདུད་རྩིའི་རིགས་ཀྱི་དཀྱིལ་འཁོར་རྣམས་འབྱུང་བ་དང་གསང་གནས་ནས་དོན་ཡོད་གྲུབ་པ་དང་འཕྲིན་ལས་ཕུར་བུའི་དཀྱིལ་འཁོར་རྣམས་འབྱུང་བ་དང་ཡན་ལག་ཉིང་ལག་དང་སྒལ་ཚིགས་རྣམས་ནས་མ་མོའི་དཀྱིལ་འཁོར་རྣམས་འབྱུང་བ་དང་དེའི་ཡན་ལག་ཏུ་འཇིག་རྟེན་པ་དང་དྲག་སྔགས་ལ་སོགས་པ་ཐམས་ཅད་ཀྱང་ལུས་ཀྱི་རྩ་རླུང་བྱང་ཆུབ་ཀྱི་སེམས་ཀྱི་ཡན་ལག་ཏུ་རྒྱུད་དང་གདམ་ངག་རྣམས་ནས་མང་དུ་གསུངས་སོ། །འདི་རྣམས་ཀྱི་ལུང་དུ་མ་ཡོད་མོད་ཀྱི་སྤྲོས་པ་མངས་བར་འགྱུར་བའི་ཕྱིར་མ་བཤད་དོ། །འཇུག་བསྡུ་བ་ནི་ཚིགས་སུ་བཅད་པ་ཕྱེད་དང་གསུམ་སྟེ་མདོར་བསྡུས་ན་སྔར་གོང་དུ་གསུངས་པའི་རྩ་ཐམས་ཅད་ནི་སྐུའི་རང་བཞིན་སྟེ་བསྐྱེད་རིམས་ཡིན་ནོ། །རླུང་རྣམས་ནི་སྔགས་དང་ཡི་གེའི་རང་བཞིན་ཡིན་ཏེ་བཟླས་པའོ། །ཐིག་ལེ་ཐམས་ཅད་ནི་ཕྲ་མོའི་རྫོགས་པའི་རིམ་པའོ། །དེ་བཞིན་སྦྱིན་སྲེག་ལས་རྣམས་ཀུན། ནང་གི་སྦྱང་ཞི་སྦྱོང་བྱེད་ཡིན། །ཞེས་པ་ནི་སྔར་གོང་དུ་སྨོས་པ་བཞིན་དུ་ཡིན་པས་འདིར་ལས་རྒྱལ་པོ་མཆོག་བསྟན་པའི་ཕྱིར་ཕྱོགས་ཙམ་བརྗོད་པ་ཡིན་ནོ། །དེ་བཞིན་དུ་ཕ་རོལ་ཏུ་ཕྱིན་པ་ནས་གསུངས་པའི་ཡེ་ཤེས་ཐམས་ཅད་ཀྱང་ཆོས་ཀྱི་དབྱིངས་ངག་གི་དབང་ཕྱུག་གི་དཀྱིལ་འཁོར་དུ་ས་བཅུ་གཉིས་དང་ཕ་རོལ་ཏུ་ཕྱིན་པ་བཅུ་གཉིས་དང་གཟུངས་བཅུ་གཉིས་དང་ཏིང་ངེ་འཛིན་ལ་སོགས་པ་ལམ་དང་འབྲས་བུ་རབ་འབྱམས་ཐམས་ཅད་ལྷ་དང་སྔགས་ཀྱི་རིམ་པར་ལུས་སེམས་ནང་གི་དབྱེ་བ་ལ་བརྟེན་ནས་ཐམས་ཅད་ཀྱི་དོན་གཟིགས་པས་སངས་རྒྱས་ཀྱིས་གསུངས་སོ། །དེ་ལྟར་ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་རྫོགས་པའི་སངས་རྒྱས་ཐམས་ཅད་ཀྱི་གསང་བ་བྱིས་པ་རྣམས་དང་ཉན་ཐོས་དང་རང་སངས་རྒྱས་རྣམས་ཀྱིས་རྟོགས་པར་དཀའ་བ་གསུངས་པའོ།། །།

ལེའུ་བཅུ་པ། ལམ་གྱི་རིམ་པ་དང་སྦྱར་བའི་དུམ་བུ།

དེ་ལྟར་རྩ་རླུང་བྱང་ཆུབ་ཀྱི་སེམས་དང་གནས་སྐབས་བཞི་དང་ཕྱིའི་འཇིག་རྟེན་གྱི་ཁམས་ཀྱི་སྣང་བ་ནང་དུ་སྦྱར་བ་དང་བཅས་པ་ནི་ཤེས་པར་བྱ་བའི་གཞི་ཡིན་ཅིང་དེ་ལ་ཀུན་བརྟགས་པའི་ལྷ་རྣམས་བསྒོམ་པའི་དོན་དང་ཆོས་ཐམས་ཅད་ལྷན་ཅིག་སྐྱེས་པའི་རང་བཞིན་བདེན་པ་གཉིས་ཀྱི་གནས་ལུགས་དོན་དམ་པ་ཆོས་ཉིད་ཀྱི་སྐུ་དང་རྩ་རླུང་ཐིག་ལེ་རྣམ་པར་རྟོགས་པ་དང་བཞི་ཡེ་ཤེས་སུ་དག་པའི་ཆོས་ཐམས་ཅད་ཀྱི་ཚུལ་སྦྱར་བཤད་ཀྱིས་ནི་འཆིང་བར་བྱེད་པའི་ཐབས་བརྗོད་ནས། དེ་ལ་བརྟེན་པའི་ལམ་ཇི་ལྟར་བསྒྲོད་པའི་རིམ་པ་བཤད་པ་ལས་བཅུ་པ་ལམ་གྱི་རིམ་པ་སྦྱར་བཤད་བསྟན་དགོས་པས་འདི་ལ་གསུམ་སྟེ་མདོར་བསྟན་པ་དང་རྒྱས་པར་བཤད་པ་དང་འཇུག་བསྡུ་བའོ། །དང་པོ་ནི། དེ་ལྟར་རྩ་རླུང་ཐིག་ལེ་གསུམ། །སེམས་ཀྱི་ཆ་ལས་སྣང་བ་སྟེ། དེ་ཕྱིར་འདི་དོན་གནད་འཆིང་བ། །ལམ་རིམ་ཀུན་ལས་ཁྱད་པར་འཕགས། །ཞེས་བྱ་བ་སྨོས་ཏེ་སྤྱིར་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་། དེ་ཉིད་ལ་ཐབས་ཆེན་པོ་ཡིས་ཟིན་པ་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་སྟེ། དེ་ལ་གསང་སྔགས་རྡོ་རྗེའི་ཐེག་པ་འདི་ནི་རྟེན་འདོད་པའི་ཁམས་རྩ་རླུང་བྱང་ཆུབ་སེམས་ཀྱིས་བསྡུས་པའི་ལུས་འདི་ཐབས་མཁས་པས་ལྕགས་ལས་གསེར་དུ་བསྒྱུར་བ་ལྟར་གནད་འཆིང་བར་བྱེད་པ་འདི་ནི་ལམ་གྱི་རིམ་པ་ཐམས་ཅད་ལས་ཁྱད་པར་དུ་འཕགས་ཏེ། སྙིགས་མ་ཡི་ནི་དུས་འདི་རུ། །མི་འགྲུབ་སྙམ་དུ་ཁྱོད་སེམས་ན། །ཕྱག་རྒྱའི་དཀྱིལ་འཁོར་བཟླས་པ་ཡིས། །སངས་རྒྱས་གྲངས་མེད་ཉིད་གཞན་དུ། །བཀྲེས་དང་སྐོམ་པས་ཉམས་པས་ན། །བདེ་བར་འགྲུབ་པར་མི་འགྱུར་རོ། །འབད་དེ་འདོད་བྱ་དམིགས་ན་ནི། །དེ་ཉིད་ཀྱིས་བདག་རྣལ་འབྱོར་པ། །ཇི་ལྟར་ཧེ་རུ་ཀའི་ཡེ་ཤེས། །ཅི་འདོད་པར་ནི་ཡོངས་སུ་འཐོབ། །རིང་ནས་ཐོས་དང་མིག་གཉིས་ཀྱིས། །རྣལ་འབྱོར་པ་ཡིས་མོད་ལ་མཐོང་། ཞེས་བྱ་བ་དང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཀྱང་། སྔོན་དུ་འཚམས་མེད་པ་བྱེད་པ་དག་ཀྱང་སྐྱེ་བ་འདི་ཉིད་ལ་བདེ་བ་ཆེན་པོའི་འབྲས་བུ་སྟེར་བ་ཞེས་བྱ་བ་ལ་སོགས་པ་རྒྱ་ཆེར་གསུངས་པས་ཐབས་མཁས་པའི་ལམ་འདི་ནི་རྨད་དུ་བྱུང་པ་ཡིན་ནོ། །རྒྱས་པར་བཤད་པ་ལ་གཉིས་སྟེ་ཐུན་མོང་གི་ལམ་དང་ཐུན་མོང་མ་ཡིན་པའི་ལམ་མོ། །དང་པོ་ལ་ཉན་ཐོས་ཀྱི་ལམ་དང་རང་སངས་རྒྱས་ཀྱི་ལམ་དང་ཕ་རོལ་ཏུ་ཕྱིན་པའི་ལམ་དང་གསུམ་ལས། དང་པོ་ནི་ཚིགས་སུ་བཅད་པ་གཅིག་སྟེ་དེ་ཡང་འཕགས་པའི་བདེན་པ་བཞི་ལ་བརྟེན་ནས་སྡུག་བསྔལ་དང་ཀུན་འབྱུང་སྤངས་ཤིང་ལམ་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་སོ་བདུན་ལ་བརྟེན་ནས། འགོག་པ་མངོན་སུམ་དུ་བྱེད་པ་འཕགས་པ་ཉན་ཐོས་ཡིན་པས་དེའི་ངོ་བོ་ནི་གང་ཟག་བདག་མེད་ཞི་བ་ཙམ་སྟེ་དེ་དུས་ཇི་ལྟ་བུས་ཐོབ་ཞེ་ན་མྱུར་བ་སྲིད་པ་ལན་གསུམ་སྟེ་ཞེས་བྱ་བ་ནི་མི་ཚེ་གཅིག་གིས་ཚོགས་སྦྱོར་བསྒྲོད་ནས་རྒྱུན་དུ་ཞུགས་པའི་འབྲས་བུ་འཐོབ་པ་དང་དེའི་ཕྱི་མ་ལ་ལན་གཅིག་ཕྱིར་འོང་བ་དང་ཕྱིར་འོང་པ་དག་གི་འབྲས་བུ་ཐོབ་ནས་གསུམ་པ་ལ་དགྲ་བཅོམ་པ་ཉིད་མངོན་སུམ་དུ་བྱེད་པ་དང་ཤིན་ཏུ་མྱུར་བ་ནི་ཚེ་གཅིག་ནས་ཀྱང་རྒྱུན་ཞུགས་ནས་དགྲ་བཅོམ་པའི་བར་དུ་མངོན་སུམ་དུ་བྱེད་ལ་ཤིན་ཏུ་འགོར་ན་ཡང་ལྷ་དང་མིའི་སྐྱེ་བ་ལན་བདུན་གྱིས་དགྲ་བཅོམ་པ་མངོན་སུམ་དུ་བྱེད་དེ་དེ་ནི་ཤིན་ཏུ་འགོར་ཡང་སྲིད་པ་ལན་བདུན་པའོ་ཞེས་མདོ་ལས་གསུངས་པས་རྒྱུན་ཞུགས་འགོར་ཀྱང་ལན་བདུན་ཡིན་ཞེས་སྨོས་སོ། །དེས་ནི་རང་ཉིད་ཁམས་གསུམ་པའི་སྡུག་བསྔལ་ཐམས་ཅད་ཞི་བ་ཉོན་མོངས་པ་ལས་རྣམ་པར་གྲོལ་བའི་ལུས་ཐོབ་པའི་ཕྱིར་རང་དོན་ཞི་བ་ཙམ་མངོན་སུམ་དུ་བྱས་པ་ཡིན་ནོ། །རང་སངས་རྒྱས་ཀྱི་ལམ་བཤད་པ་ནི། རང་རྒྱལ་སྐལ་པ་ཉི་ཤུ་ནས། །བསེ་རུ་སྐལ་པ་བརྒྱ་ཡིས་འགྲུབ། །ཞེས་སྨོས་ཏེ་གང་ཟག་དབང་པོ་འབྲིང་པོ་དག་ནི་རང་ཉིད་སངས་རྒྱས་ཀྱི་འབྲས་བུ་ཐོབ་པར་བྱས་ལ་ཞར་ལ་སྐལ་པ་འགའ་ཡར་དུ་སེམས་ཅན་གྱི་དོན་བྱ་སྟེ་དེའི་འོག་ཏུ་ཞི་བ་མངོན་སུམ་དུ་བྱའོ་སྙམ་དུ་སེམས་བསྐྱེད་ནས་སྔ་མ་ཉན་ཐོས་ཀྱི་ལམ་དེའི་སྟེང་དུ་ཆོས་ཀྱི་གཟུང་དོན་དུ་སྣང་བ་སེམས་ཀྱི་ཆོས་འཕྲུལ་དུ་ཤེས་ཤིང་རྣམ་པར་སྦྱངས་ནས་ནམ་མཁའི་མཛོད་ལ་སོགས་པའི་ཏིང་ངེ་འཛིན་ཐོབ་པར་བྱེད་དེ། དེའི་ཆ་གཅིག་བྱང་ཆུབ་སེམས་དཔའ་དང་མཐུན་པར་སྦྱངས་པས་ཐ་མ་སློབ་དཔོན་མི་དགོས་པར་རང་བྱང་ཆུབ་ཀྱི་འབྲས་བུ་མངོན་སུམ་དུ་བྱེད་དེ་དེ་ཡང་ཚོགས་ན་སྤྱོད་པ་ཆུང་ངུ་ནི་སྐལ་པ་ཉི་ཤུ་ཙམ་དང་ཚོགས་སྤྱོད་ཆེན་པོ་སྐལ་པ་ལྔ་བཅུ་ཙམ་དང་བསེ་རུ་ལྟ་བུའི་རང་སངས་རྒྱས་ནི་བསྐལ་པ་བརྒྱས་འགྲུབ་སྟེ་དེ་ནི་རང་སངས་རྒྱས་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན་ནོ། །དེ་སྐད་དུ་ཡང་། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་བྱང་ཆུབ་སེམས་དཔའ་བྱམས་པས་གསུངས་པ་དང་། བསེ་རུ་སྐལ་པ་བརྒྱ་ཡི་རྒྱུས། །ཞེས་མཛོད་ལས་ཀྱང་བྱུང་ངོ་། །དེ་ནི་རང་སངས་རྒྱས་ཀྱི་རྣམ་པར་གྲོལ་བ་ཐོབ་པའི་ཚུལ་ལོ། །ཕ་རོལ་ཏུ་ཕྱིན་པ་དང་མཐུན་པའི་ལམ་བཤད་པ་ནི། སེམས་ཅན་ཐམས་ཅད་ཕན་བྱེད་པ། །བྱང་ཆུབ་སེམས་དཔའ་གྲངས་མེད་གསུམ། །ཞེས་སྨོས་ཏེ་ཐོག་མར་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་བསྐྱེད་ནས་སྲིད་ཞི་གཉིས་ཀྱི་མཐའ་དང་བྲལ་བར་ལམ་ཐམས་ཅད་ལ་མཁས་པར་བྱེད་པ་དང་། སྐྱོ་བ་མེད་པའི་ཚུལ་གྱིས་བསྐལ་པ་གྲངས་མེད་པར་སྤྱོད་ཅིང་ས་དང་པོ་མངོན་སུམ་དུ་བྱས་ནས། དོན་དམ་པའི་སེམས་བསྐྱེད་པ་ལ་ཞུགས་ཏེ་འཁོར་བ་ཇི་སྲིད་དུ་འཇུག་པའི་སྙིང་རྗེ་ཆེན་པོ་དང་ལྷན་ཅིག་ཇི་ལྟ་བ་དང་ཇི་སྙེད་པའི་ཡེ་ཤེས་མངོན་སུམ་དུ་ཐོབ་པར་བྱ་བ་དང་། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་སྤོང་བས་བསྐལ་པ་གྲངས་མེད་པར་མི་སྐྱོ་བར་སྤྱོད་པས་ས་བདུན་པ་ཐོབ་ཅིང་། དེའི་འོག་ཏུ་གཟུངས་དང་ཏིང་ངེ་འཛིན་དང་སོ་སོ་ཡང་དག་པར་རིག་པ་ཡེ་ཤེས་ཀྱི་རྣམ་པར་རོལ་པ་སེམས་ཅན་ཐམས་ཅད་སྨིན་པར་བྱེད་པ་བྱང་ཆུབ་ཀྱི་སྙིང་པོའི་རྒྱན་ཡང་བསྐལ་པ་གྲངས་མེད་པར་སྦྱོང་བར་བྱེད་དོ་ཞེས་གསུངས་པས་འདི་ལྟ་བུའི་རྣམ་པར་གྲོལ་བ་ནི། གྲངས་མེད་གསུམ་གྱིས་འཐོབ་པར་ཐེག་པ་ཐུན་མོང་དུ་བསྟན་ཏོ། །དེ་ཡང་འདུལ་བ་ལུང་ལས། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པའོ། །ཞེས་མང་དུ་གསུངས་ཏེ་དོན་དམ་པར་སེམས་ཅན་རྣམས་ཀྱི་དོན་དུ་བརྩེ་བས་གྲངས་མེད་པར་བཞུགས་པར་ཟད་ཀྱི་རང་གི་དོན་འགྲུབ་པ་ལ་དེ་ལྟ་མ་ཡིན་ནོ། །དེ་ཡང་ཕ་རོལ་ཏུ་ཕྱིན་པ་ལས། གྲངས་མེད་ལ་སོགས་བསྟན་པ་རྣམས། །དམ་པའི་དོན་དུ་བཟོད་མ་ཡིན། །ཀུན་རྫོབ་དུ་ནི་ཐུགས་བརྩེ་བའི། །རྒྱུ་མཐུན་དེ་དག་ཐུབ་པ་བཞེད། །ཞེས་གསུངས་པ་ཡིན་ནོ། །དེ་ལྟར་ཐུན་མོང་གི་ལམ་བཤད་ནས། གཉིས་པ་ཐུན་མོང་མ་ཡིན་པའི་ལམ་ནི་གཉིས་སྟེ། རྒྱུད་སྡེ་བཞིའི་དུས་ཀྱི་ཁྱད་པར་བསྟན་པ་དང་། ལམ་དངོས་སོ། །དང་པོ་ནི་ཚིག་རྐང་བདུན་སྟེ། དེ་ཡང་ལམ་གྱི་དངོས་གཞི་ནི་ཕ་རོལ་ཏུ་ཕྱིན་པ་ཉིད་དང་མཚུངས་ལ། ཐབས་མཁས་པའི་མཐུ་བསམ་གྱིས་མི་ཁྱབ་པས་སངས་རྒྱས་ཀྱི་ཡེ་ཤེས་མངོན་སུམ་དུ་བྱེད་པ་མྱུར་བར་གསུངས་ཏེ། སི་ཏི་ཀ་ར་ལས། དོན་ག ཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོས་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་བྱུང་བས། འདིར་ནི་ཐབས་ཀྱི་ཁྱད་པར་གྱིས། །ཕ་རོལ་ཕྱིན་པའི་ལམ་དེ་ལ། །བྱ་སྤྱོད་ཚུལ་གྱིས་ཐབས་མཁས་ཙམ། །ལྡན་ཀྱང་མི་ཚེ་དྲུག་བཅུ་སྟེ། །ཞེས་སྨོས་པ། བྱ་བ་དང་སྤྱོད་པའི་རྒྱུད་ནས་གསུངས་པའི་སྐུ་གསུང་ཐུགས་ཀྱི་རིགས་གསུམ་གྱི་ལྷ་དང་གསང་སྔགས་དང་རིགས་སྔགས་དང་གཟུངས་སྔགས་ཀྱིས་རང་གི་དོན་དང་གཞན་གྱི་དོན་ཡོངས་སུ་སྒྲུབ་པར་བྱེད་པའི་ཐབས་མཁས་པས་ཟིན་ན་མི་ཚེ་དྲུག་བཅུ་ནི། སྐྱེས་བུ་ཚེ་ལོ་བརྒྱ་པའི་ལོ་དྲུག་སྟོང་སྟེ་དེ་ཙམ་གྱིས་རྡོ་རྗེ་འཛིན་པའི་ས་འཐོབ་བོ་ཞེས་གསུངས་པའི་དོན་ཡིན་ནོ། །དེ་བས་ཀྱང་རྣལ་འབྱོར་གྱི་རྒྱུད་ལས་གསུངས་པའི་ཕྱག་རྒྱ་དང་ཏིང་ངེ་འཛིན་དང་ཐབས་མཁས་པས་ཟིན་ན་མྱུར་བ་ཉིད་དུ་ལོངས་སྤྱོད་རྫོགས་པའི་འབྲས་བུ་འཐོབ་པ་སྟེ། ལོ་སྟོང་དྲུག་བརྒྱས་མ་ཆགས་པད་མ་ཅན་དུ་གནས་པར་འགྱུར་ཞེས་ལུང་ལས་གསུངས་པའི་ཕྱིར། །རྣལ་འབྱོར་མི་ཚེ་བཅུ་དྲུག་ཡིན། །ཞེས་བསྟན་ཏོ། རྡོ་རྗེའི་ཐེག་པ་བླ་ན་མེད་པ་ཉིད་ཀྱི་ཐབས་མཁས་པས་ཟིན་ན་སྐྱེས་བུ་ཚེ་ལོ་བརྒྱ་པའི་རྩ་རླུང་བྱང་ཆུབ་ཀྱི་སེམས་ཐམས་ཅད་ཡེ་ཤེས་ཀྱི་གནས་ལུགས་སུ་དག་པས། །བླ་ན་མེད་པ་ཚེ་གཅིག་གིས། །བརྩོན་ལྡན་ངེས་པར་འགྲུབ་པར་འགྱུར། །ཞེས་བྱས་སྟེ། འདི་ནི་ངེས་པ་ཁོ་ནའོ། །སྔགས་ལ་ཞུགས་པ་འགའ་ཞིག་ཕ་རོལ་ཏུ་ཕྱིན་པ་དང་ལམ་མི་མཐུན་ནོ་སྙམ་ན་དེ་ནི་ལོག་པར་རྟོག་པ་སྟེ། གཞི་ཤེས་པ་ཉིད་དང་། ལམ་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། ལམ་གྱི་རྣམ་པར་ཤེས་པ་ཉིད་མེད་པར་འདིར་སངས་རྒྱས་སུ་མི་འགྱུར་ཏེ། རྣམ་པ་ཐམས་ཅད་མཁྱེན་པ་མེད་པས་སོ་ཞེས་བྱ་བ་ལ་སོགས་པ་བྱང་ཆུབ་སེམས་དཔའི་འགྲེལ་པ་རྣམས་དང་སྔོན་གྱི་མཁས་གྲུབ་རྣམས་ཀྱིས་འགྲེལ་པ་ཆེན་པོ་རྣམས་སུ་གསུངས་སོ། །གང་ཕ་རོལ་ཏུ་ཕྱིན་པར་གསུངས་པའི་ཡོན་ཏན་དེ་དག་ཐོབ་པ་མེད་པར་སེམས་རྣམ་པར་གྲོལ་པའི་ཞི་བ་ཐོབ་ནས་རང་ལ་ཡོན་ཏན་མེད་ཀྱང་གཞན་ལ་སྣང་བར་འགྱུར་རོ་ཞེས་སྟོན་པ་ནི་ཕྱིན་ཅི་ལོག་སྟེ། བདག་ཉིད་ལ་བཟའ་བ་མེད་པར་གཞན་དག་ལ་བཟའ་བ་དཔག་ཏུ་མེད་པའི་ཆར་འབབ་པར་འགྱུར་རོ་ཞེས་བྱ་བ་དང་མཚུངས་སོ། །དོན་མེད་པའི་སྤྲོས་པ་མང་པོ་ཡོད་མོད་ཀྱི་ཆོག་གོ །ལམ་དངོས་ལ་ལྔ་སྟེ། ཚོགས་ལམ་དང་སྦྱོར་ལམ་དང་། མཐོང་ལམ་དང་། བསྒོམ་ལམ་དང་། མཐར་ཕྱིན་པའི་ལམ་མོ། །དང་པོ་ནི། །དང་པོར་དབང་ཐོབ་བསྐྱེད་རྫོགས་ནི། །ལེགས་ཤེས་མོས་བསྒྲུབ་ཚོགས་ལམ་སྟེ། །ཞེས་བྱ་བ་ཡང་དག་པའི་བཤེས་གཉེན་མཚན་ཉིད་དང་ལྡན་པ་དང་མཇལ་ནས། དོན་གོ་བར་བྱེད་པའི་ཆོ་ག་ཕྱིན་ཅི་མ་ལོག་པ་ཐོབ་ཅིང་། བསྐྱེད་རྫོགས་ལེགས་པར་ཤེས་ནས་ཀུན་རྫོབ་དང་དོན་དམ་པ་དང་རྟེན་དང་བརྟེན་པའི་བྱང་ཆུབ་ཏུ་སེམས་བསྐྱེད་པ་བྱས་ཤིང་། རིག་པ་འཛིན་པའི་སྡོམ་པ་ལ་གནས་པར་བྱས་ནས་མོས་པ་ཚུལ་བཞིན་དུ་བསྒྲུབ་པ་ལ་ཞུགས་པ་དམ་ཚིག་གི་རྣམ་པར་བཤད་པ་ལས་ཇི་སྐད་བསྟན་པ་བཞིན་དུ་སློབ་པ་ནི་ངེས་པར་ཚོགས་ལམ་ཆེན་པོ་ཡིན་ཏེ། སྤྱན་རས་གཟིགས་ཀྱི་ཞལ་སྔ་ནས། རྡོ་རྗེ་ཆོས་འབྱུང་གི་ཁང་པར་ཞུགས་ཤིང་བདུད་རྣམས་འཇུག་པའི་སྒོར་བྱམས་པ་ལ་སོགས་པའི་སྒོ་གླེགས་བཅུག་ནས་དེར་ཕྱག་རྒྱ་ཆེན་པོ་མཆོག་ཏུ་མི་འགྱུར་བ་བསྒྲུབ་པར་བྱེད་ན་ངེས་པར་སྔོན་དུ་འཚམས་མེད་པ་བྱས་པ་ཡང་སྐྱེ་བ་འདི་ཉིད་ལ་སངས་རྒྱས་ཉིད་ཀྱི་འབྲས་བུ་སྟེར་བར་འགྱུར་གྱི། གཞན་དུ་ན་སྔགས་ཀྱི་ཐེག་པར་ཞུགས་ཤིང་ལས་ངན་པ་བྱེད་པས་ནི་མ་ཡིན་ནོ་ཞེས་གསུངས་པ་དང་། ཀུན་ཏུ་སྤྱོད་པའི་རྒྱུད་ལས། དད་པ་ཡང་དག་བསྐྱེད་པ་དང་། །རྣལ་འབྱོར་བརྩོན་ལ་གནས་པ་ནི། །བསྐལ་པ་བྱེ་བ་སྟོང་ཕྲག་ཏུ། །ང་ཡི་ཡེ་ཤེས་ཀྱིས་བསྐུལ་ཡིན། །ཞེས་སྔོན་དཔག་ཏུ་མེད་པར་སྦྱངས་པར་གསུངས་ཏེ། འདི་ནི་མདོར་གསུངས་པའི་ཚོགས་ལམ་ཆེན་པོའི་མཚན་ཉིད་ཀྱང་འདི་ལ་ཡོད་དེ། །སྐལ་པ་དཔག་མེད་ངེས་འབྱུང་ཞིང་། །མོས་པ་རྣམ་པར་འཕེལ་བྱེད་པ། །ཇི་ལྟར་ཆུ་ཡི་རྒྱ་མཚོ་བཞིན། །དགེ་ཆོས་རྣམས་ཀྱིས་ཡང་དག་རྫོགས། །དེ་བཞིན་དུ་ནི་ཚོགས་བསགས་པའི། །རྒྱལ་སྲས་བཟོད་ནས་དག་པ་པོ། །ལེགས་པར་ཤེས་ཤིང་སེམས་དགེ་བས། །བསྒོམ་པ་ལ་ནི་རབ་ཏུ་སྦྱོར། །དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམ་ངག་རྒྱ་ཆེན་སྙེད་པར་འགྱུར། །ཞེས་མདོ་སྡེ་རྒྱན་ལས་གསུངས་པའི་མཚན་ཉིད་འདི་ལ་ཡོད་དེ། ཞི་ལྷག་གི་གདམ་ངག་ཕྱིན་ཅི་མ་ལོག་པ་ཐོབ་པའི་ཕྱིར་དང་། སྟོན་པར་བྱེད་མཁན་དེ་སྤྲུལ་སྐུའི་སངས་རྒྱས་ཡིན་པའི་ཕྱིར་དང་། བསྒྲུབ་པ་ལ་རྩེ་གཅིག་ཏུ་ཞུགས་པས་ཆོས་ཀྱི་རྒྱུན་གྱི་ཏིང་ངེ་འཛིན་འབྱུང་བའི་ཕྱིར་རོ། །འདི་ལ་གཞན་དག་མཚན་དཔེ་ཡོད་མེད་ལ་སོགས་པའི་ཁྱད་པར་ལ་སོགས་པ་འཆད་པ་ཡོད་ཀྱང་དེ་མི་རིགས་པའི་དགག་བསྒྲུབ་དུ་མ་ཡོད་དེ་མ་སྨོས་སོ། །གཉིས་པ་སྦྱོར་བའི་ལམ་ནི་ཚིགས་བཅད་གཉིས་དང་རྐང་པ་གསུམ་སྟེ་དེ་ཡང་ཁྱད་པར་དུ་རྫོགས་པའི་རིམ་པ་ལ་འཇུག་པར་བྱེད་པ་ནས་ས་འཚམས་ཡིན་ཏེ། །རྩ་རླུང་ཐིག་ལེའི་གནད་ཤེས་ནས། །ཀུན་བཟང་སྤྱོད་གནས་དྲོད་ཐོབ་ནས། །སྦྱོར་ལམ་ཉིད་ལ་གནས་པ་ཡིན། །ཞེས་སྨོས་ཏེ་ཀུན་ཏུ་བཟང་པོའི་སྤྱོད་པ་ནི་རྫོགས་པའི་རིམ་པའི་ཉམས་མྱོང་རྒྱུན་མ་ཆད་པར་སྐྱོང་བ་ལ་བརྗོད་ལ། དྲོད་ཀྱི་རྟགས་ཀྱང་དུ་བ་ལ་སོགས་པ་མཚོན་པའི་བདེ་གསལ་མི་རྟོག་པའི་ཉམས་མྱོང་ཐོབ་པ་དང་། དེས་སྤང་བྱ་ཇི་ལྟར་སྤངས་པའི་ཚུལ་ཧེ་བཛྭ་ལས། །འཇིགས་སྨྱོ་དེ་བཞིན་སྡུག་བསྔལ་དང་། །མྱ་ངན་གདུང་བའི་འཚེ་བ་དང་། །ཞེས་དེ་རྣམས་ཀྱིས་མི་གནོད་པའི་དྲོད་ཆུང་ངུ་དང་། འདོད་ཆགས་ཞེ་སྡང་གཏི་མུག་ཆེས། །བསྒྲུབ་པ་པོ་ཉིད་ཉོན་མི་མོངས། །ཞེས་རྐྱེན་ཆེན་པོས་བསྐྱེད་པའི་ཉོན་མོངས་ཀྱིས་མི་གནོད་པའི་དྲོད་འབྲིང་པོ་དང་། ཕན་དང་གནོད་པའི་འབྲས་འབྱུང་བ། །ཞེས་ཏིང་ངེ་འཛིན་གྱི་འབྲས་བུ་མངོན་ཤེས་དང་རྫུ་འཕྲུལ་གྱི་ཆ་གྲུབ་ན་དྲོད་ཆེན་པོའི་རྟགས་སུ་བཤད་དེ། ཕ་རོལ་ཏུ་ཕྱིན་པའི་དྲོད་རྩེ་མོ་བཟོད་པའི་དོན་ཡིན་པས་འདིའི་སྐྱོང་ལུགས་སྤྲོས་བཅས་སྤྲོས་མེད་གཉིས་སུ་གསུངས་ཏེ། །སྤྲོས་བཅས་ནི་དེ་ཚེ་བརཏལ་ཤུགས་སྤྱོད་པ་ཡིས། །སྦྱོར་ལམ་བགྲོད་ནས་མཐོང་བར་སྦྱོར། །ཞེས་བྱ་བ་རྒྱུད་རྣམས་ལས། ཅུང་ཟད་དྲོད་ནི་ཐོབ་པ་ནས། གལ་ཏེ་སྤྱོད་པ་བྱེད་འདོད་ན། །འདིས་ནི་འགྲུབ་འགྱུར་འདོད་ཡོད་ན། །དེས་ནི་སྤྱོད་པ་སྤྱད་པ་ཉིད། །ཞེས་བརཏལ་ཤུགས་སྤྱོད་པར་འདོད་ན་བྱ་མི་འདོད་ན་ནང་གི་སྤྱོད་པས་འགྲུབ་བོ་ཞེས་རྒྱུད་རྣམས་ལས་གསུངས་སོ། །ནང་གི་སྤྱོད་པ་དེ་ཡང་གང་ཞེ་ན། །ལས་ཀྱི་ཕྱག་རྒྱ་རྣམ་པར་སྤངས། །ཡེ་ཤེས་ཕྱག་རྒྱ་རྣམ་བརྟགས་དོར། །ཕྱག་རྒྱ་ཆེན་མོ་ལས་བྱུང་བ། །ཞེས་གསུངས་པའི་ཕྱིར། །འདི་ནི་སོ་སོར་སྡུད་པ་དང་། །བསམ་གཏན་བཞི་ལྡན་ལམ་ཡིན་ཏེ། །རྩ་ནི་སྦྱངས་པ་ཞེས་ཀྱང་བཤད། །ཞེས་སྨོས་པ་འཇིག་རྟེན་གྱི་ཀུན་ཏུ་རྟོག་པ་ཐམས་ཅད་སྤངས་ནས་སོ་སོར་སྡུད་པ་དང་བསམ་གཏན་བསྒོམས་པས་རྒྱུའི་སྤྱན་ལྔ་དང་། མངོན་པར་ཤེས་པ་དྲུག་ཐོབ་སྟེ། སྐུའི་དཀྱིལ་འཁོར་ཞེས་བྱ་བ་ལུས་ཀྱི་རྩ་ཐམས་ཅད་དག་པར་འགྱུར་བས་འབྲས་བུ་མངོན་དུ་བྱེད་པ་ཉིད་དེ། དེས་ན་བསམ་གཏན་ཡན་ལག་རྫོགས་པ་ཡིས། །མངོན་པར་ཤེས་པ་ལྔ་ཐོབ་གསུངས། །སྐུའི་དཀྱིལ་འཁོར་དུ་ཞུགས་པའོ། །ཞེས་སྨོས་པ་ཡིན་ནོ། །འདི་ནི་ཕ་རོལ་དུ་ཕྱིན་པའི་ལམ་མདོ་སྡེ་རྒྱན་ནས་ཀྱང་། །བསམ་གཏན་ལ་ཐོབ་མངོན་པར་ཤེས། །ཞེས་བྱ་བ་ལ་སོགས་པ་དང་། །ཆོས་རྣམས་སྣང་བ་ཐམས་ཅད་དུ། །ཡོངས་སུ་ཆད་པ་མེད་རྟོགས་འགྱུར། །ཡང་དག་པ་ཡི་རྒྱུ་མཚན་ནི། །མ་བརྟགས་པ་དག་ཡོངས་སུ་མཐོང་། །དེ་བཞིན་ཆོས་སྐུ་རབ་རྫོགས་དང་། །རྣམ་པར་དག་པར་བྱ་བའི་ཕྱིར། །བློ་དང་ལྡན་པ་རྣམ་ཀུན་ཏུ། །ཀུན་ཏུ་རྒྱུ་ཡོངས་འཛིན་པར་བྱེད། །དེ་ནས་དེ་འདྲར་གྱུར་པ་ཡི། །བྱང་ཆུབ་སེམས་དཔའ་མཉམ་བཞག་པས། །ཡིད་ཀྱིས་བརྗོད་པ་མ་གཏོགས་པ། །དོན་ཀུན་རབ་ཏུ་མི་མཐོང་ངོ། །ཆོས་ཀྱི་སྣང་བ་འཕེལ་བྱའི་ཕྱིར། །བརྩོན་འགྲུས་བརྟན་པ་ཀུན་ཏུ་བརྩོམ། །ཆོས་ཀྱི་སྣང་བ་འཕེལ་ནས་ནི། །སེམས་ཙམ་ལ་ནི་གནས་པར་འགྱུར། །དེ་ནས་དོན་དུ་སྣང་བ་ཀུན། །སེམས་སུ་རབ་ཏུ་མཐོང་བར་འགྱུར། །དེ་ཚེ་དེ་ཡི་བཟུང་བ་ཡི། །རྣམ་པར་གཡེང་བ་དེས་སྤོངས་འགྱུར། །ཞེས་བྱ་བ་རྣམས་ནི་དྲོད་དང་རྩེ་མོ་དང་བཟོད་པའི་གནས་སྐབས་རྣམས་སོ། །དེ་ནས་དེ་ལ་འཛིན་པ་ཡི། རྣམ་པར་གཡེང་བ་འབའ་ཞིག་ལུས། །དེ་ཚེ་བར་ཆོད་མེད་པ་ཡི། །ཏིང་ངེ་འཛིན་ལ་མྱུར་ཏུ་རེག །འདི་ལྟར་དེ་ཡི་འཇུག་ཐོགས་སུ། །འཛིན་པའི་རྣམ་པར་གཡེང་བའང་སྤོང་། །འདི་དག་གོ་རིམ་བཞིན་དུ་ནི། །དྲོ་བར་གྱུར་སོགས་ཡིན་ཞེས་བྱ། །ཞེས་གསུངས་པ་དང་། དུས་ཀྱི་འཁོར་ལོའི་རྩ་རྒྱུད་ལས། །སོ་སོར་སྡུད་པ་སྙོམས་ཞུགས་པས། །སྔགས་རྣམས་ཐམས་ཅད་བྱིན་གྱིས་བརློབ། །བསམ་གཏན་ཡན་ལག་ལྔ་བརྟན་པས། །མངོན་ཤེས་ལྔ་ཐོབ་མི་བདག་ཀྱེ། །ཞེས་པ་ལ་སོགས་པ་གསུངས་པ་རྣམས་དོན་གཅིག་གོ །མདོར་བསྡུས་ན། བསམ་གཏན་དང་སྲོག་རྩོལ་གྱི་ཡན་ལག་གིས་ངེས་པར་མཐོང་བའི་ལམ་ལ་སྦྱོར་བའི་ལམ་མོ། །གསུམ་པ་མཐོང་ལམ་ནི་ཚིག་རྐང་ལྔ་སྟེ། །དེ་ནས་སྲོག་རྩོལ་སྦྱོར་ལྡན་པས། །མཐོང་ལམ་ལ་ནི་སྦྱོར་བར་བྱེད། །ཅེས་པ་སྦྱོར་བའི་ལམ་ཉིད་དུ་རླུང་དག་པར་བྱ་བའི་ཕྱིར་སྲོག་རྩོལ་ལ་སྦྱངས་པས་གསུང་གི་དཀྱིལ་འཁོར་གྱི་སྒོ་ཞེས་བྱ་བ་འཁོར་ལོ་རྣམས་ལ་རླུང་རྣམས་ཀྱི་འགྲོ་འོང་ཤིན་ཏུ་སྦྱངས་པས། ཞག་གཅིག་གི་དུས་སྦྱོར་བཅུ་གཉིས་འགོག་པར་ནུས་པ་དེའི་ཚེ། བྱང་ཆུབ་ཀྱི་སེམས་ཀྱི་ཐིག་ལེ་དེ་སྙེད་དུ། དུང་ཅན་གྱི་མར་སྣར་འཆིང་བར་ནུས་པས་རྣམ་པར་རྟོག་པ་བརྒྱ་ཕྲག་བཅོ་བརྒྱད་དག་ཅིང་། འཇིག་རྟེན་གྱི་ཁམས་བཅུའི་མཐར་ཐུག་པ་མངོན་པར་ཤེས་པ་དང་རྫུ་འཕྲུལ་ལ་དབང་ཐོབ་པས་ངེས་པར་མཐོང་བའི་ལམ་ཐོབ་པ་ཡིན་ཏེ། །དེ་ནས་རྩ་བའི་རྒྱུད་ཀྱི་ལུང་། རྟག་ཏུ་འཛིན་པའི་སྟོབས་ཀྱི་ནི། །རྡོ་རྗེ་སེམས་དཔར་ཡང་དག་འགྲུབ། །ཞེས་བྱ་བ་འདི་སྨོས་ཏེ་འདི་ནི་རླུང་གི་རྣལ་འབྱོར་རོ། །སྲོག་རྩོལ་གྱི་འབྲས་བུ་མཐར་ཐུག་པ་ཡིན་ཅིང་རྣམ་པར་མི་རྟོག་པའི་ཡེ་ཤེས་ཐོབ་པ་ཡིན་ཏེ། དུས་ཀྱི་འཁོར་ལོའི་རྒྱུད་ལས། ཤེས་རབ་ཡེ་ཤེས་སྐད་ཅིག་དེ་ལས་བདེ་བ་སྟེར་བ་གལ་ཏེ་ཐིག་ལེའི་ཕྲེང་བ་མི་འཕོ་བས། །དེ་ལས་འཛག་པ་མེད་པའི་ལྷན་སྐྱེས་སྐད་ཅིག་མ་ཡིས་འདིར་ནི་ཆོས་ཀྱི་དབྱིངས་ནི་སྟེར་བར་འགྱུར། །རོ་ཡི་འགྲོ་བས་སོན་པ་ཐམས་ཅད་སྲོག་གིས་ཀུན་ནས་བགྲངས་ནས་ཉོན་མོངས་བདུད་ནི་ངེས་པར་འཇོམས། །རྫུ་འཕྲུལ་དང་ནི་ཐམས་ཅད་མཁྱེན་པའི་ས་དང་སྲིད་གསུམ་རྣལ་འབྱོར་པ་ཡིས་ཚེ་འདི་ལ། །ཞེས་གསུངས་སོ། །འདི་ནི་མདོ་སྡེའི་རྒྱན་ལས། དེ་ནས་དེ་ནི་འཇིག་རྟེན་ལས། །འདས་པའི་ཡེ་ཤེས་བླ་ན་མེད། །འཛིན་པ་གཉིས་དང་བྲལ་བ་ཐོབ། །དེ་འདིའི་གནས་ཡོངས་གྱུར་པ་སྟེ། །ས་ནི་དང་པོ་ཡིན་པར་འདོད། །ཞེས་གསུངས་པ་དང་ཁྱད་པར་མེད་དོ། །བཞི་པ་བསྒོམ་པའི་ལམ་ནི། ངོ་བོ་དང་མཐོང་བསྒོམ་གྱི་རླུང་འགགས་ལུགས་གཉིས་ལས། དང་པོ་ནི་ཚིག་རྐང་ལྔ་སྟེ། །སྤྲོས་མེད་ཤིན་ཏུ་སྤྲོས་མེད་ཀྱི། །ཞེས་པ་རྣམ་པར་མི་རྟོག་པའི་ཡེ་ཤེས་ཐོབ་པའི་སྤྱོད་པ་ནི་སྤྲོས་པ་མེད་པ་ཡིན་པས། རྗེས་ཐོབ་ཀྱི་སྤྱོད་པ་སྒྱུ་མ་ལྟ་བུ་དང་། མཉམ་པར་བཞག་པས་ཤིན་ཏུ་སྤྲོས་མེད་ཀྱི་ཚུལ་གྱིས། རྗེས་དྲན་ཡན་ལག་སྦྱང་བྱས་ནས། །ཞེས་པ་ནི་རྣམ་པར་མི་རྟོག་པའི་ཏིང་ངེ་འཛིན་ཐོབ་པའི་རྗེས་ལ་དྲན་པ་ནི་ཤེས་རབ་ཀྱི་ཆགས་པ་རྗེས་སུ་དྲན་པ་ཞེས་གསུངས་ཏེ། བདེ་བ་དང་སྙིང་རྗེ་གནད་གཅིག་པས་སེམས་ཅན་ཐམས་ཅད་གྱི་དོན་དུ་སངས་རྒྱས་དང་ཆོས་དང་དགེ་འདུན་དང་ལྷ་དང་གཏོང་བ་དང་ཚུལ་ཁྲིམས་དང་རྣམ་པ་དྲུག་གམ་ཕ་རོལ་ཏུ་ཕྱིན་པ་བཅུ་དང་མཐུན་པའི་རྗེས་དྲན། བྷ་གར་ལིང་ག་རབ་བཞག་ནས། །སངས་རྒྱས་རྗེས་སུ་དྲན་པ་བསྒོམ། །ཞེས་བྱ་བ་ལ་སོགས་པ་གསང་བ་འདུས་པ་ལས་གསུངས་པ་ལྟར་སྦྱངས་པས་རྣམ་པར་དག་པའི་ཏིང་ངེ་འཛིན་རིམ་གྱིས་འཐོབ་པར་འགྱུར་ཏེ། ཏིང་ངེ་འཛིན་དང་ཡེ་ཤེས་ཀྱི་སྦྱོར་བ་ལ་བརྟེན་པའི་ལམ་འདི་ནི་རྒྱུད་གཞན་ནས་ཕྱོགས་ལས་རྣམ་རྒྱལ་གྱི་སྤྱོད་པ་ཞེས་གསུངས་ཏེ། བདུད་དང་ཐེག་པ་དམན་པ་ལ་སོགས་པ་རྣམས་ཀྱིས་མི་འཕྲོག་པས་རྣམ་པར་རྒྱལ་བ་འགྲུབ་སྟེ། གཞན་གྱི་དོན་ཕུན་སུམ་ཚོགས་པ་དང་འབྲེལ་བས་ན་ཚོགས་ཀྱི་སྤྱོད་པ་ཆེན་པོ་ཞེས་ཀྱང་བཤད་པ་འདི་ནི་བསྒོམ་པའི་ལམ་ཡིན་ནོ། །དེ་ཡང་། ཆུ་སྲིན་ལ་སོགས་ཁྱིམ་རྣམས་སུ། །མ་རིག་ལ་སོགས་འགགས་པ་ཡིས། །སྤྱན་ལྔ་མངོན་ཤེས་དྲུག་འབྱུང་སྟེ། །ས་ནི་བཅུ་གཉིས་འཐོབ་པར་འགྱུར། །ཞེས་གསུངས་པ་དང་དུས་ཀྱི་འཁོར་ལོ་ལས། །རྣམ་པ་ཐམས་ཅད་ཟད་པ་མེད་པའི་མཆོག་གི་བདེ་བ་གཞོམ་དུ་མེད་པའི་ཡེ་ཤེས་སྐུར་འགྲོའོ། །ཡེ་ཤེས་ལས་ནི་རྫུ་འཕྲུལ་དང་ནི་གྲུབ་པར་མིའི་བདག་པོ་སྐྱེས་བུ་ཚེ་འདི་ཉིད་ལ་འགྲོ། །ཞེས་གསུངས་པ་དང་ཕ་རོལ་ཏུ་ཕྱིན་པ་ལས་ཀྱང་། དེ་ནས་སེང་གེ་རྣམས་བསྒྱིངས་པའི། །ཏིང་ངེ་འཛིན་ལ་སྙོམས་ཞུགས་ནས། །རྟེན་ཅིང་འབྲེལ་འབྱུང་ལུགས་མཐུན་དང་། །ལུགས་མི་མཐུན་ལ་རྟོག་པར་བྱེད། །འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོངས་ནས། །འདོད་པ་རྟོགས་པའི་རྣམ་པར་ཤེས། །མཉམ་བཞག་མིན་པའི་འཚམས་བཟུང་ནས། །ཐོད་རྒལ་དུ་ནི་སྙོམས་འཇུག་པ། །གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་བརྒལ་ནས། །འགོག་པའི་བར་དུ་མི་འདྲར་འགྲོ། ཞེས་སེང་གེ་རྣམ་པར་བསྒྱིངས་པའི་ཏིང་ངེ་འཛིན་དང་ཐོད་རྒལ་གྱི་སྙོམས་འཇུག་སྦྱོང་བ་གསུངས་པ་དང་ཡང་གནད་གཅིག་གོ །མཐོང་བསྒོམ་གྱི་རླུང་འགག་པའི་ཚུལ་ནི་ཚིགས་སུ་བཅད་པ་ཕྱེད་དང་གསུམ་སྟེ། དང་པོ་བརྒྱ་ཕྲག་བཅོ་བརྒྱད་ཀྱི། །རླུང་དང་རྣམ་རྟོག་ལྷན་ཅིག་དག །དེ་ནི་འཇིག་རྟེན་པ་ཡི་ལམ། །ཞེས་སྨོས་ཏེ་དེ་ནི་སྔར་བཤད་པའི་ཚོགས་སྦྱོར་གཉིས་ཀྱི་གནས་སྐབས་སོ། །གཉིས་པ་ཐིག་ལེ་ལྷན་ཅིག་ཏུ། གསང་བར་འགགས་པ་མཐོང་བའི་ལམ། །ཞེས་པ་སྲོག་རྩོལ་དང་འཛིན་པས་མི་གཡོ་བའི་སྐད་ཅིག་མ་ཐོབ་པ་སྟེ། རྒྱུད་འགྲེལ་ལས་འདི་གཉིས་གསང་བའི་འཁོར་ལོར་འགགས་པའི་དག་པར་གསུངས་ཀྱང་། དེ་ཡི་མ་རིག་པ་དང་ཟག་པ་དང་བཅས་པའི་སྐྱེ་འཆི་འགགས་པས་བསྒོམ་པའི་ལམ་གྱི་རླུང་དང་ལྷན་ཅིག་པའི་རྣམ་རྟོག་དག་པས་ན། །གསུམ་པར་དེ་ཉིད་དག་པ་སྟེ། །ལྟེ་བར་དེ་བཞིན་བཞི་དང་ལྔ། །དྲུག་དང་བདུན་པ་སྙིང་ག་སྟེ། །བརྒྱད་དང་དགུ་པ་མགྲིན་པ་ལ། །བཅུ་དང་བཅུ་གཅིག་སྤྱི་བོར་བཤད། །ཅེས་སྨོས་པ་ནི། ས་དང་པོའི་ཡོངས་སུ་སྦྱོང་བ་སྦྱངས་ནས་གཉིས་པར་འཕར་བའི་རིམ་པ་ལྟར། འདིར་ཡང་རླུང་བརྒྱ་ཕྲག་བཅོ་བརྒྱད་པ་རེ་རེ་ཡེ་ཤེས་ཀྱི་རླུང་དུ་འགགས་པས་རིམ་པ་འདི་བསྟན་ཏེ། རྒྱུད་འགྲེལ་ལས་ནི་འཁོར་ལོ་དྲུག་ལ་གཉིས་གཉིས་རྣམ་དག་ཏུ་གསུངས་སོ། །ལྔ་པ་མཐར་ཕྱིན་པའི་ལམ་ནི་ཚིགས་བཅད་གཉིས་དང་རྐང་པ་གཅིག་སྟེ། །དེ་ནས་གཙུག་གཏོར་རླུང་འགགས་པས། །དེ་ཚེ་སངས་རྒྱས་ཐོབ་པར་གསུངས། །ཞེས་པ་ས་བཅུའི་རྒྱུན་མཐའ་མ་ན་སངས་རྒྱས་ཀྱི་ས་ཞེས་བྱ་བ་འོད་ཟེར་ཆེན་པོའི་དབང་བསྐུར་བ་ཞེས་ཀྱང་བྱ། རྡོ་རྗེ་སློབ་དཔོན་བདག་པོའི་དབང་མཐར་ཕྱིན་པ་གྲུབ་པས་འཇིག་རྟེན་དང་འཇིག་རྟེན་ལས་འདས་པའི་དབང་བཅུ་གཅིག་མཐར་ཕྱིན་པའི་འབྲས་བུ་སྟེ། །རྣམ་བཅུ་དབང་ལྡན་ཆེ་བ་པོ། །ཞེས་བྱ་བ་ལ་སོགས་པ་དུས་ཀྱི་འཁོར་ལོ་ལས་རྒྱ་ཆེར་གསུངས་ཏེ། །རྟེན་འབྲེལ་བཅུ་གཉིས་འགགས་ཤིང་དག་པ་དང་། མས་བརྟན་པའི་དགའ་བ་བཅུ་དྲུག་དང་སྟོང་པ་ཉིད་བཅུ་དྲུག་དང་སྙིང་རྗེ་བཅུ་དྲུག་མཐར་ཕྱིན་པ་སྟེ། འདི་རྣམས་ཀྱང་ཕུང་པོ་ལྔ་དང་ཕྱི་སྟོང་པ་ལ་སོགས་པ་ལྔ་དང་སེམས་ཅན་ལ་དམིགས་པའི་སྙིང་རྗེ་ལྔ་དང་། ཆེན་པོ་སྟོང་པ་ཉིད་ལ་སོགས་པ་ལྔ་དང་ཁམས་ལྔ་དང་ཆོས་ལ་དམིགས་པའི་སྙིང་རྗེ་ལྔ་དང་། དོར་བ་མེད་པ་ལ་སོགས་པའི་སྟོང་པ་ཉིད་ལྔ་དང་སྐྱེ་མཆེད་ལྔ་དང་དམིགས་པ་མེད་པའི་སྙིང་རྗེ་ལྔ་དང་། བཅུ་དྲུག་པ་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་ཡེ་ཤེས་ཀྱི་ཁམས་དང་སངས་རྒྱས་ཀྱི་སྙིང་རྗེ་ཆེན་པོ་སྟེ། ལོ་གསུམ་དང་ཟླ་བ་ཕྱེད་གསུམ་དག་པའི་ཡེ་ཤེས་ཀྱི་རང་བཞིན་མཐར་ཕྱིན་པའོ། །ཡེ་ཤེས་སྐུ་ཉིད་འགྲུབ་པ་ཉིད། །ཡེ་ཤེས་རིམ་པ་ཐམས་ཅད་ཀྱང་། །སྔ་མའི་སྦྱང་གཞི་དང་མཚུངས་འཐོབ། །ཅེས་པ་མཆོག་ཏུ་མི་འགྱུར་བ་གྲུབ་པ་ལས་འདི་ལྟར་གསུངས་ཏེ། །སྟོང་པའི་དངོས་པོ་དངོས་འདི་ལ། །བརྟགས་པའི་གཟུགས་ནི་སྤངས་པ་སྟེ། །གཞོན་ནུ་མ་ཡི་མེ་ལོང་དུ། །གཟུགས་བརྙན་བཞིན་དུ་མཐོང་བ་ཉིད། །ཞེས་པ་བེམ་པོ་མིན་པའི་འཇིག་རྟེན་ལས་འདས་པ་བདེན་པའོ། །གཟུགས་ཀྱི་ཕུང་པོ་མེ་ལོང་ལྟ་བུའི་ཡེ་ཤེས་སོ། །དངོས་པོ་ཐམས་ཅད་མཉམ་པར་འགྱུར། །གཅིག་གི་རང་བཞིན་གཡོ་མེད་གནས། །གཡོ་མེད་ཡེ་ཤེས་ཡང་དག་འབྱུང་། །ཆ་མིན་པ་དང་རྟག་མིན་པ། །ཞེས་ཚོར་བའི་ཕུང་པོ་མཉམ་པ་ཉིད་ཀྱི་ཡེ་ཤེས་སོ། །ཐམས་ཅད་འདུ་ཤེས་བདག་ཉིད་མཆོག །ཨའི་ཡི་གེའི་རིགས་ལས་བྱུང་། །གཡོ་མེད་ཆེན་པོའི་གོ་འཕང་རྙེད། །ཤེས་པ་མེད་ཅིང་ཤེས་བྱའང་མེད། །ཞེས་འདུ་ཤེས་ཀྱི་ཕུང་པོ་སོ་སོར་ཀུན་ཏུ་རྟོག་པའི་ཡེ་ཤེས་སོ། །སྐྱེ་བ་མེད་པའི་ཆོས་རྣམས་ལ། །འདུ་བྱེད་སྤངས་པ་རྣམས་ལ་ཡང་། །བྱང་ཆུབ་མེད་ཅིང་སངས་རྒྱས་མེད། །སེམས་ཅན་མེད་ཅིང་སྲོག་ཀྱང་མེད། །ཞེས་འདུ་བྱེད་ཀྱི་ཕུང་པོ་བྱ་བ་ནན་ཏན་གྱི་ཡེ་ཤེས་སོ། །རྣམ་པར་ཤེས་པའི་ཆོས་ལས་འདས། །ཡེ་ཤེས་དག་པ་དྲི་མ་མེད། །རང་བཞིན་འོད་གསལ་བ་ཡི་ཆོས། །ཆོས་ཀྱི་དབྱིངས་སུ་སོན་པར་སོན། །ཞེས་རྣམ་པར་ཤེས་པའི་ཕུང་པོ་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་སོ། །ཞེས་གསུངས་པ་དང་། སྔར་གནས་སྐབས་བཞིའི་སྐབས་སུ་ཇི་ལྟར་བརྗོད་པ་ལྟ་བུའི་ཡེ་ཤེས་ཡོངས་སུ་རྫོགས་པ་མཐར་ཕྱིན་པའོ། །འཇུག་བསྡུ་བ་ནི། རྩ་རླུང་ཐིག་ལེ་རྣམ་གསུམ་གྱི། །སྦྱོར་དྲུག་མཐར་ཕྱིན་འབྲས་བུ་ཡིན། །དབྱེ་བ་དཔག་མེད་འདིར་མ་བརྗོད། །ཞེས་བྱ་བ་སྟེ་སྔར་བསྟན་པའི་རྩ་རླུང་ཐིག་ལེ་ཐམས་ཅད་སྦྱོར་བ་ཡན་ལག་དྲུག་ཏུ་འདུས་ཤིང་དེའི་འབྲས་བུ་རྣམ་པར་དག་པ་སངས་རྒྱས་ཉིད་ཡིན་པས་འདི་ཡང་སྤྱན་རས་གཟིགས་དབང་ཕྱུག་གི་ཞལ་སྔ་ནས་གསུངས་པ་ལྟར་བསྡུས་པ་ཡིན་ནོ། །དེ་ཡང་དྲི་མ་མེད་པའི་འོད་ལས། མཚན་མ་ཡང་དག་པ་རྣམ་པ་གསུམ་སྟེ་དང་པོའི་མཚན་མ་དང་བར་པའི་མཚན་མ་དང་ཐ་མའི་མཚན་མའོ། །དང་པོའི་མཚན་མ་དུ་བ་ལ་སོགས་པའི་ལམ་སྟེ་ཡན་ལག་དྲུག་གི་སྦྱོར་བས་གཟུགས་ཡོངས་སུ་རྫོགས་པས་མི་འགྱུར་བའི་སྐད་ཅིག་མ་ཐོབ་པའོ། །བར་མའི་མཚན་མ་ནི་མཆོག་ཏུ་མི་འགྱུར་བའི་སྐད་གཅིག་ལ་བརྒྱ་ཕྲག་བཅོ་བརྒྱད་ཀྱི་ས་དང་པོ་ཐོབ་པའོ། །མངོན་པར་ཤེས་པ་ལྔས་མ་ཐོབ་པའི་དོན་ཡང་དག་པར་མཐོང་བ་འཇིག་རྟེན་གྱི་དངོས་གྲུབ་ཐོབ་པ་ཞེས་བྱའོ། །ཐ་མའི་མཚན་མ་ནི་སངས་རྒྱས་རྡོ་རྗེ་འཆང་ཉིད་སྟོང་ཕྲག་ཉི་ཤུ་རྩ་གཅིག་དང་དྲུག་བརྒྱ་ལྷག་པའི་མཆོག་ཏུ་མི་འགྱུར་བའི་སྐད་ཅིག་གིས་ས་བཅུ་གཉིས་ཐོབ་པ་ནི་ཕྱག་རྒྱ་ཆེན་པོའི་དངོས་གྲུབ་ཞེས་བྱའོ། །ཞེས་གསུངས་སོ། །འདི་དག་གི་དབྱེ་བ་དཔག་དུ་མེད་པ་ཡོད་ཀྱང་འདིར་མ་བརྗོད་དེ་ལམ་གྱི་རིམ་པ་མདོར་བསྡུས་པའོ།། །།

ལེའུ་བཅུ་གཅིག་པ། རྩ་རླུང་ཐིག་ལེ་བསྡུས་པའི་ཚུལ་བསྟན་པའི་དུམ་བུ།

ད་ནི་བཅུ་གཅིག་པ་རྩ་རླུང་ཐིག་ལེ་བསྡུད་པའི་ཚུལ་བཤད་པར་བྱའོ། །དེ་ལ་ཡང་གསུམ་སྟེ་མདོར་བསྟན་པ་དང་། རྒྱས་པར་བཤད་པ་དང་འཇུག་བསྡུ་བའོ། །དང་པོ་ནི། དེ་ནས་རྩ་རླུང་ཐིག་ལེ་རྣམས། །བསྡུད་པའི་རིམ་པ་བཤད་པར་བྱ། །ཞེས་པ་ནི་སྔར་གསུངས་པ་རྣམས་ཀྱིས་རང་བཞིན་གྱིས་རྫོགས་པའི་རིམ་པ་དང་ཆོས་མཐུན་པའི་སྡུད་པ་གོ་བར་འགྱུར་མོད་ཀྱང་། ལུས་ཅན་རྣམས་འཆི་བའི་ལྟས་ཀྱི་རིམ་པ་ལུས་རྫོགས་པ་ཉིད་ནས་འཇིག་པའི་རིམ་པ་སྐྱེ་བ་དང་འཇིག་པའི་མི་རྟག་པ་སྒྱུ་མ་ལྟ་བུ་ཁོང་དུ་ཆུད་པར་བྱ་བའི་ཕྱིར་རྒྱུད་ཐམས་ཅད་ལས་གསུངས་པ་འདིར་གསལ་བར་བཤད་པར་བྱའོ། །དེ་ཡང་འཆི་བ་ནི་ཁམས་གསུམ་པའི་གནས་སུ་ལུས་རིགས་མཐུན་པ་དེ་འདོར་བར་བྱེད་དེ། །ངོ་བོ་ནི་ཚེ་དང་སྲོག་གི་རླུང་དང་དྲོད་འགག་པར་བྱེད་པ་སྟེ་ཕུང་པོ་རྙིང་པ་འདོར་བ་ལ་འཆི་བ་ཞེས་ཐ་སྙད་དུ་འདོགས་སོ། །དེ་ཡང་ཡེ་ཤེས་རྣལ་འབྱོར་གྲུབ་པ་ནི། ངེས་མེད་ཞེས་པ་བསམས་བཞིན་དུ་སྲིད་པར་སྐྱེ་བ་ལེན་པའི་ཡེ་ཤེས་ཀྱི་མཐུ་ཐོགས་པ་མེད་པ་དང་། བསམ་གཏན་དང་ཏིང་ངེ་འཛིན་གྱི་སྟོབས་དང་རྫས་བསྒྲུབས་པའི་སྟོབས་ཀྱིས་ཀྱང་ཚེ་རིང་བར་འགྱུར་ཞིང་ཇི་ལྟར་འདོད་པ་བཞིན་དུ་འགྲུབ་པ་ནི་སེམས་ལ་དབང་ཐོབ་པའི་ཕྱིར་འབྱུང་སྟེ་དེ་ལྟ་བུ་ནི་བསམ་གྱིས་མི་ཁྱབ་བོ། །འདིར་ནི་ཁམས་དྲུག་དང་ལྡན་པ་ཕལ་པ་རྣམས་ཀྱི་ངེས་པའོ། །རྒྱས་པར་བཤད་པ་ལ་བཞི་སྟེ་རྩ་སྡུད་པའི་རིམ་པ་དང་རླུང་གི་འཆི་ལྟས་དང་། ཐིག་ལེ་འགག་པའི་རིམ་པ་དང་ཞར་ལ་གང་དུ་འཕོ་བའི་ངེས་པ་བཤད་པའོ། །དང་པོ་ལ་རྩ་ཕལ་པ་སྡུད་པའི་ཚུལ་དང་། འཁོར་ལོ་བཅོ་བརྒྱད་སྡུད་པའི་རིམ་པ་དང་། རྩ་ཉི་ཤུ་རྩ་བཞི་པོ་སྡུད་པའི་ཚུལ་གསུམ་ལས། དང་པོ་ལ་ཚིགས་སུ་བཅད་པ་གསུམ་སྟེ། དེ་ཡང་ཐ་མལ་པའི་རྡོ་རྗེའི་ལུས་འདི་ལ་སྐྱེས་ནས་ལོ་གཅིག་གི་བར་དུ་ནི་རྩ་ཁམས་ཐམས་ཅད་བསྐྱེད་པར་བྱེད་པ་སྟེ། དེ་ལྟར་རྫོགས་ཟིན་ནས་སྐྱེས་བུ་རང་ལོ་བརྒྱའི་དུས་སུ་འཆི་བ་དག་ནི་ལོ་གཅིག་རྫོགས་པའི་ཕྱིར་དེ་ཉིན་ནས་ཞག་རེ་ལ་ཐབས་དང་ཤེས་རབ་ཀྱི་རྩ་གཉིས་གཉིས་ཀྱི་ནུས་པ་སྐམ་པར་བཤད་པས། ལོ་བརྒྱ་ལ་རྩ་སྟོང་ཕྲག་བདུན་བཅུ་རྩ་གཉིས་སྡུད་པར་འགྱུར་བ་རགས་པའི་རིམ་པ་བརྗོད་པའོ། །དེ་ཉིད་ལ་དུས་ཀྱི་འཁོར་ལོར་གསུངས་པའི་རིམ་པས་ཞིབ་པར་བརྩིས་ན། ལོ་དགུ་བཅུ་གོ་དྲུག་དང་ཟླ་བ་ཕྱེད་དང་བཅུ་གཅིག་གི་བར་ལ་ཕྲ་བའི་རྩ་ཀུན་སྡུད་པ་སྟེ། དེ་ལ་གྲངས་ནི་དྲུག་ཁྲི་དགུ་སྟོང་བདུན་བརྒྱ་ལྔ་བཅུ་ཡོད་པས་དེ་ཡང་སྔར་བཞིན་དུ་སྡུད་པར་འགྱུར་བའི་རྩ་གཉིས་གཉིས་ཡིན་ནོ། །འཁོར་ལོ་བཅོ་བརྒྱད་སྡུད་པར་འགྱུར་བའི་རིམ་པ་ནི་ཚིགས་བཅད་གསུམ་སྟེ། སྔ་མའི་རྩ་ཕྲ་བ་རྣམས་བསྡུས་ཟིན་ནས་དེའི་འོག་ཏུ་ལོ་གསུམ་ཕྱོགས་གསུམ་ལ་རྩ་ཆེན་པོ་ཉིས་སྟོང་ཉིས་བརྒྱ་ལྔ་བཅུ་ཡོད་པ་ལས་ཚིགས་ཆེན་བཅུ་གཉིས་ཀྱི་འཁོར་ལོའི་རྩ་སུམ་བརྒྱ་དྲུག་བཅུ་ནི་ཞག་གསུམ་གསུམ་བཞིན་དུ་རེ་རེ་སྐམ་པར་འགྱུར་ལ་སོར་མོའི་ཚིགས་ཀྱི་རྩ་སུམ་བརྒྱ་དྲུག་བཅུ་ཡང་དེ་བཞིན་དུ་ཉི་མ་གསུམ་གསུམ་ལ་རེ་རེ་སྐམ་པར་འགྱུར་རོ། །ལྟེ་བའི་ཁྱིམ་བཅུ་གཉིས་པའི་རྩ་དྲུག་བཅུ་རླུང་གི་ནུས་པ་དང་མཚུངས་པར་ལོ་གསུམ་གྱི་ནང་དུ་སྡུད་དོ། །སྤྱི་བོའི་ཟླ་རྐང་གི་རྩ་བཅུ་བཞི་པོ་ཞག་བཅོ་ལྔའི་ནང་དུ་སྡུད་དོ། །མགྲིན་པའི་རྩ་སུམ་བཅུ་ལས་རྒྱུ་སྐར་གྱི་རང་བཞིན་ཉི་ཤུ་རྩ་བརྒྱད་པོ་ཟླ་བ་གཅིག་གི་ནང་དུ་སྡུད་དེ། གསང་བའི་རྩ་དང་ཡང་མཚུངས་པས་ལོགས་སུ་མི་བགྲང་ངོ་། །སྙིང་ཁའི་རྩ་བརྒྱད་པོ་ཞག་བརྒྱད་ཀྱི་ནང་དུ་འདོར་རོ། །དེ་ལྟར་འཁོར་ལོ་བཞིའི་རྩ་བརྒྱ་དྲུག་བཅུ་བཙུག་ཏོར་གྱི་རྩ་བཞི་དང་བཅས་པ་རྣམས་ཀྱི་དབུ་མའི་ཆ་མ་གཏོགས་པ་རྣམས་འདོར་བའི་ཚུལ་ཡིན་ནོ། །རྩ་ཉི་ཤུ་རྩ་བཞི་པོ་སྡུད་པའི་ཚུལ་ལ་ཚིགས་སུ་བཅད་པ་གཉིས་དང་རྐང་བ་གཅིག་སྟེ། དུས་ཀྱི་འཁོར་ལོ་ལས་ཞིབ་ཏུ་མ་གསུངས་ཀྱང་རྒྱུད་ཕན་ཚུན་གྱི་ངེས་པས་རྩ་ཉི་ཤུ་རྩ་བཞི་པོ་རེ་རེ་ལ་ཡང་རྩ་ཆེན་དྲུག་བཅུ་དྲུག་བཅུ་ཡོད་དེ། །ལྟེ་བ་དང་མཚུངས་པར་ལོ་གསུམ་ཕྱོགས་གསུམ་ནང་དུ་སྡུད་དགོས་པས་ཐིམ་པ་དང་ལོངས་སྤྱོད་པ་དང་བདག་པོའི་རྩ་བདུན་བཅུ་རྩ་གཉིས་པོ་མ་གཏོགས་པ་རྣམས་ལོ་གསུམ་ལ་སྡུད་ལ། བདུན་བཅུ་རྩ་གཉིས་པའི་དཀར་དམར་གྱི་ཆ་བཞི་བཅུ་ཞེ་བརྒྱད་པོ་ཕྱོགས་གསུམ་གྱི་ནང་དུ་སྡུད་པ་ཡིན་ཏེ། རིམ་པ་འདི་མེད་ན་ལོ་གསུམ་ཕྱོགས་གསུམ་ལ་ཉིས་སྟོང་ཉིས་བརྒྱ་ལྔ་བཅུ་སྐམ་པའི་ངེས་པ་མི་ཤེས་སོ། །དེ་ལྟར་འཁོར་ལོའི་རྩ་ཆེན་རྣམས་སྐམས་ཏེ་རླུང་དང་བྱང་ཆུབ་ཀྱི་སེམས་རྣམས་མི་རྒྱུ་བ་དེ་ནས་ཞག་གཅིག་ན་འཕོ་བ་ཡིན་ཏེ། དེའི་ཚེ་དབུ་མ་ཉིད་ཀྱི་རྩ་ཆེན་པོ་སུམ་བཅུ་སོ་དྲུག་ཞག་གཅིག་ལ་འདོར་བར་ངེས་སོ། །འདི་ཡང་ཞིབ་ཏུ་བརྗོད་ན་འཁོར་ལོ་བཞིའི་རྩ་སྤྱི་བོ་ནས་བཅུ་བཞི་མགྲིན་པ་ནས་ཉི་ཤུ་རྩ་བརྒྱད་སྙིང་ག་ན་བརྒྱད་ལྟེ་བ་ན་དྲུག་བཅུ་གསང་བ་ནས་རོ་རྐྱང་གི་སྣ་མོ་གཉིས་དང་གཙུག་གཏོར་གྱི་གཉིས་ཏེ་སྤྱིར་བརྒྱ་དང་བཅུ་བཞི་ཡན་ལག་དང་ཉིང་ལག་གི་རྩ་བདུན་བརྒྱ་ཉི་ཤུ་ཡུལ་ཉི་ཤུ་རྩ་བཞིའི་རྩའི་འཁོར་ལོ་རྣམས་ལ་དབུ་མ་རེ་རེ་མ་བཏོགས་པ་རྣམས་ལ་སྟོང་བཞི་བརྒྱ་བཅུ་དྲུག་སྟེ་དེ་རྣམས་ཐམས་ཅད་དྲིལ་བས་ཐབས་ཤེས་རབ་དཀར་དམར་གྱིས་ཕྱེ་བའི་རྩ་ཉིས་སྟོང་ཉིས་བརྒྱ་ལྔ་བཅུ་འོང་སྟེ་ལོ་གསུམ་ཕྱོགས་གསུམ་གྱི་ཞག་སྟོང་བརྒྱ་ཉི་ཤུ་རྩ་ལྔ་ལ་ཉིན་རེ་གཉིས་གཉིས་སྐམ་ལ། མུན་པ་ཆེན་པོའི་རླུང་རྒྱུ་བའི་ཞག་གཅིག་གི་དུས་སུ་སྤྱི་བོའི་དབུ་མའི་འཕོ་བའི་རྩ་གཉིས་དང་མགྲིན་པའི་གཉིས་དང་སྙིང་གའི་སྟེང་འོག་གི་ཆ་གཉིས་དང་ལྟེ་བའི་དབུ་མའི་རྩ་བཞི་དང་གསང་བའི་དུང་ཅན་གྱི་རྩ་གཅིག་དང་སྟེང་གི་གཙུག་གཏོར་གྱི་རང་བཞིན་ཚངས་བུག་གི་རྩ་དང་། དེ་ལྟར་འཁོར་ལོའི་དབུ་མའི་འཕོ་བའི་རྩ་བཅུ་གཅིག་གཉིས་མི་ཕྱེད་མ་ལ་སོགས་པའི་ཡུལ་ཉི་ཤུ་རྩ་བཞིའི་རྩའི་གཙོ་མོ་ཉི་ཤུ་རྩ་བཞི་སྟེ། སུམ་བཅུ་སོ་དྲུག་པོ་འདི་ནི་དབུ་མའི་རང་བཞིན་ཞག་གཅིག་ལ་སྐམ་པ་རྣམས་ཀྱི་རྒྱས་བཤད་ཡིན་ནོ། །འདིའི་ངེས་པ་ཞག་ཕྱེད་ན་འཆི་བར་འགྱུར་བ་རྣམས་ཀྱི་ཡང་བོལ་གོང་དང་ཡན་ལག་གི་རླུང་གི་རྩ་རྣམས་མ་བསྡུས་པར་མཐོང་བའི་ཕྱིར་དང་། ཡང་ཡན་ལག་གི་དབུ་མའི་རླུང་རྩ་ལ་མཚོན་ལ་སོགས་པ་གནོད་པར་གྱུར་ན་ཡུད་ཙམ་ལ་འཆི་བའི་ཕྱིར་རོ། །འདི་དག་གི་ངེས་པ་ཡང་དུས་ཀྱི་འཁོར་ལོ་ལས། །ཟླ་བ་ཕྱེད་ཕྱེད་ན་ཡང་རྩ་ནི་དགུ་ལ་ཀླུ་ཡིས་བསྒྱུར་བ་ལྟེ་བའི་འཁོར་ལོ་འཆད་པར་བྱེད། །བྱེད་པ་དང་ནི་བྱ་བ་ཞེས་བྱའི་འཁོར་ལོའི་ཚིགས་ཀྱི་རྩ་རྣམས་རེ་རེ་མེའི་ཉི་མས་འདོར། །མགྲིན་པར་ཡང་ནི་རྒྱུ་སྐར་རྩ་རྣམས་ཟླ་བའི་ནང་དུ་ཉིན་དང་ཉིན་ལ་རིམས་ཀྱིས་འདོར་བར་འགྱུར། །ཐིག་ལེ་གནས་པར་ཟླ་བའི་རྐང་པར་ཟླ་བ་ཕྱེད་ནང་དུ་འདོར་ལ་གཟའ་རྩ་སྙིང་གར་གནས་པ་ཡང་། །ཞེས་བྱ་བ་ལ་སོགས་པ་རྒྱུད་འགྲེལ་རྣམས་ནས་རྒྱས་པར་གསུངས་སོ། །གཉིས་པ་རླུང་གི་འཆི་ལྟས་ལ་ལྔ་སྟེ། སྤྱིར་རླུང་བཅུ་སྡུད་པའི་རིམ་པ་དང་། དབུ་མའི་དུས་དང་དུས་མ་ཡིན་པར་འཆི་བའི་ལྟས་དང་། གཡས་པ་ཉི་མའི་འཆི་ལྟས་དང་། གཡོན་པ་ཟླ་བའི་འཆི་ལྟས་དང་། དེ་དག་གི་ངེས་པ་བསྟན་པའོ། །དང་པོ་ལ་རླུང་གི་སྡུད་རིམས་བསྟན་པ་ནི་ཞེས་པ་ནས་ཚིགས་བཅད་གཉིས་སྟེ། རྩ་བ་དང་ཡན་ལག་གི་རླུང་རྣམས་ཟླ་བཅུར་རིམས་ཀྱིས་རྫོགས་ཏེ། སྐྱེས་ནས་དུས་སུ་འཆི་བ་གང་ཡིན་པ་དེ་ནི་ལོ་བཅུ་བཅུ་རིམ་པ་ལྟར་དུ་དང་པོར་ནོར་རྒྱལ་གྱི་སྟོབས་ལོ་བཅུ་ན་ལྷ་སྦྱིན་གྱི་སྟོབས་དང་གཅིག་ཏུ་འགྱུར་རོ། །ཉི་ཤུ་པ་ལ་རྩངས་པའི་རླུང་གི་སྟོབས་དང་གཅིག་ཏུ་འགྲོའོ། །སུམ་བཅུ་པ་ལ་རུས་སྦལ་གྱི་སྟོབས་དང་གཅིག་དུའོ། །བཞི་བཅུ་པ་ལ་ཀླུའི་རླུང་དང་གཅིག་དུའོ། །ལྔ་བཅུ་པ་ལ་ཁྱབ་བྱེད་ཀྱི་རླུང་དང་གཅིག་དུའོ། །དེ་ནས་ཀླུ་དང་ཁྱབ་བྱེད་ཀྱི་རླུང་གཉིས་མཚུངས་པར་སྤྱོད་པས་དྲུག་བཅུའི་བར་དུ་སྟོབས་བྱེད་ཅིང་། བདུན་བཅུའི་བར་དུ་མཉམ་གནས་དང་ལྷན་ཅིག་གོ །བརྒྱད་བཅུའི་བར་དུ་གྱེན་རྒྱུའི་ནུས་པ་དང་ལྷན་ཅིག་གོ །དགུ་བཅུའི་བར་དུ་ཐུར་སེལ་གྱི་སྟོབས་དང་ལྷན་ཅིག་གོ །དེ་ཕན་ཆད་ནས་སྲོག་གི་རླུང་ལ་ཐམས་ཅད་ཀྱི་ནུས་པ་བསྡུས་ཏེ་སྟོབས་རྣམས་གཅིག་ལ་གཅིག་ཐིམ་པར་འགྱུར་རོ། །ཞེས་རྡོ་རྗེ་ཕྲེང་བའི་རྒྱུད་དུ་གསུངས་སོ། །གཉིས་པ་དབུ་མའི་དུས་དང་དུས་མ་ཡིན་པར་འཆི་བའི་ལྟས་ལ། འཕེལ་བའི་རིམ་པ་དང་ལོ་གསུམ་ཕྱོགས་གསུམ་གྱི་འཆི་ལྟས་དངོས་དང་གཉིས་ལས། །དང་པོ་ནི་རྒྱས་པར་དུས་ཀྱི་འཁོར་ལོ་ནས། །ཞེས་པ་ནས་ཚིགས་བཅད་དྲུག་སྟེ། སྐྱེས་བུ་ཚེ་ལོ་བརྒྱ་པ་གང་ཡིན་པ་དེ་ལ་སྐྱེས་ནས་ལོ་གཅིག་གི་བར་དུ་རླུང་རྣམས་གྱི་དུས་སྦྱོར་གྱི་གྲངས་ཀུན་མཉམ་པར་རྒྱུ་སྟེ་ཆད་ལྷག་མེད་དོ། །དེ་ནས་བསྒྲོད་པ་གསུམ་པ་ལ་ནམ་མཁའི་རླུང་གི་འཚམས་སུ་རླུང་ཅིག་རྒྱུ་བ་འཕེལ་ལ། བསྒྲོད་པ་བཞི་པའི་ཟླ་བ་དྲུག་ལ་འཕེལ་འགྲིབ་མེད་དོ། །ལོ་གཉིས་པ་ལ་ས་རླུང་དུ་སྣ་གཡས་པར་རླུང་གཉིས་ཀྱི་རྒྱུ་བ་འཕེལ་ལོ། །ལོ་གསུམ་པ་ལ་སྣ་གཡོན་དུ་ནམ་མཁའི་རླུང་དུ་དབུགས་གསུམ་མོ། །ལོ་བཞི་པ་ལ་སྣ་གཡས་སུ་སའི་རླུང་དུ་དབུགས་བཞིའོ། །ལོ་ལྔ་པ་ལ་སྣ་གཡོན་དུ་ནམ་མཁའི་རླུང་དུ་དབུགས་ལྔའོ། །ལོ་དྲུག་པ་ལ་ཟླ་བ་ཕྱེད་དང་གཉིས་ཀྱིས་མཆོག་པའི་འཚམས་སུ་སྣ་གཡས་སུ་ས་རླུང་ལ་དབུགས་དྲུག་འཕེལ་པས། །དེ་ལྟར་རེ་མོས་རེ་རེ་འཕེལ། །ཕྱོགས་གསུམ་མ་ཚང་ལོ་བདུན་ན། །ཆུ་སྲང་གཅིག་འགྱུར། །ཞེས་སྨོས་པ་ཡིན་ནོ། །གཡོན་དང་གཡས་སུ་རིམ་པ་བཞིན། །ལོ་རེ་ཆུ་སྲང་རེ་རེ་འཕེལ། །ཞེས་པ་ལོ་བརྒྱད་པ་ལ་སྣ་གཡོན་པའི་མཁའ་རླུང་དུ་ཆུ་སྲང་གཉིས་འཕེལ་ལོ། །ལོ་དགུ་པ་ལ་སྣ་གཡས་སུ་ས་རླུང་དུ་ཆུ་སྲང་གསུམ་འཕེལ་སྟེ། དེ་ལྟར་རེ་མོས་ཀྱིས་དྲུག་བཅུའི་བར་དུ་འཕེལ་བས། །དྲུག་བཅུ་རྩ་བདུན་ལོན་ནས་ནི། །ཆུ་ཚོད་གཅིག་དུ་འགྱུར་ཏེ་སྣ་གཡོན་པའི་མཁའ་རླུང་དུ་རྒྱུ་བར་འགྱུར་ཏོ། །དེ་ཕྱིན་ཅད་ཟླ་བ་དྲུག་ནས་སྣ་གཡས་པར་ས་རླུང་དུ་ཆུ་ཚོད་གཉིས་འཕེལ་ལོ། །ཟླ་བ་གཞན་དྲུག་ལ་སྣ་གཡོན་ནས་ནམ་མཁའི་རླུང་དུ་ཆུ་ཚོད་གསུམ་དུ་འགྱུར་ཏེ། དེ་ལྟར་ལོ་སུམ་བཅུའི་བར་དུ་འཕེལ་བས། དེ་ནས་བསྒྲོད་པ་རེ་རེ་བཞིན། །ལོ་ནི་སུམ་བཅུ་དབྱུག་གུ་འཕེལ། །གཡོན་དང་གཡས་དང་རིམ་པ་བཞིན། །མཁའ་དང་ས་རླུང་གནས་དེར་འབྱུང་། །ཞེས་སྨོས་པ་ཡིན་ནོ། །དེ་ལྟར་ལོ་དགུ་བཅུ་གོ་དྲུག་དང་ཟླ་བ་བཅུ་གཅིག་ལོན་ནས་སྣ་གཡོན་དུ་ནམ་མཁའི་རླུང་གི་རང་བཞིན་ཞག་གཅིག་ཏུ་རྒྱུའོ། །དེ་ལྟར་རྒྱུ་བ་འཕེལ་ནས། དེ་ནས་ལོ་གསུམ་ཕྱོགས་གསུམ་ན་སྲིད་པ་གཞན་དུ་འཕོ་བར་འགྱུར་བས་ན་ལོ་བརྒྱ་ཐམ་པ་ཡིན་ནོ། །ལོ་གསུམ་ཕྱོགས་གསུམ་གྱི་འཆི་ལྟས་དངོས་ནི་ཚིགས་སུ་བཅད་པ་ཕྱེད་དང་དྲུག་སྟེ། ད་ནི་ལོ་གསུམ་ཕྱོགས་གསུམ་གྱི། །དབུ་མའི་འཆི་ལྟས་ངེས་པ་ནི། །ཞེས་འཚམ་སྦྱར་ནས་དངོས་ནི། ཟླ་བ་སོ་བདུན་ཕྱེད་བཅས་ལ། །ཞག་གི་འཕེལ་བ་སོ་གསུམ་སྟེ། །ཞེས་བྱ་བ་ནི་ལོ་གསུམ་ཕྱོགས་གསུམ་གྱི་ཟླ་བ་སུམ་བཅུ་སོ་ཕྱེད་དང་བརྒྱད་ཡོད་པ་ལ། འཆི་ལྟས་དངོས་ཞག་སུམ་བཅུ་སོ་གསུམ་འཕེལ་བ་ཡིན་པས། དེ་ལ་ཇི་ལྟར་འཕེལ་བའི་ཚུལ་ནི། །སོ་བཞི་ཕྱེད་བཅས་ཞག་གྲངས་ལ། །རེ་རེ་འཕེལ་འགྱུར་སུམ་བཅུའི་བར། ཞེས་སྨོས་སྟེ་ཟླ་བ་སུམ་བཅུ་སོ་ཕྱེད་དང་ལྔའི་བར་དུ་འཆི་ལྟས་ཞག་སུམ་ཅུ་འཕེལ་བ་ཡིན་པས་ཞག་སུམ་བཅུ་སོ་ཕྱེད་དང་ལྔ་ལྔ་ལ་སྣ་གཡས་གཡོན་ནས་འཆི་ལྟས་ཞག་རེ་རེ་འཕེལ་ཞིང་རྒྱུ་བར་འགྱུར་རོ། །ཞག་གསུམ་གསུམ་འཕེལ་ཙམ་ན། ལྟེ་བའི་ཁྱིམ་བཅུ་གཉིས་ཀྱི་རྩ་དྲུག་བཅུར་བསྐྱེད་སྡུད་ཀྱི་རིམ་པས་ནམ་མཁའ་དང་ས་ནས་འབྱུང་བའི་རླུང་གི་རྩ་དྲུག་དྲུག་གི་ནུས་པ་སྡུད་དོ། །དེ་རྒྱས་པར་བཤད་པ་ནི། །ལྟེ་བའི་ཁྱིམ་གྱི་རྩ་དྲུག་བཅུ། །གཡོན་དུ་མཁའ་ནས་རིམ་པ་ལྟར། །གསུམ་གསུམ་གྱིས་ནི་རྩ་དྲུག་དྲུག །སྐམས་ཤིང་མི་མཉམ་རྒྱུ་བ་འཕེལ། །དེ་བཞིན་གཡས་ནས་མཉམ་པ་རུ། །གཉིས་བཞི་ལ་སོགས་ས་རླུང་ནས། །སྡུད་རིམས་འགག་ཅིང་ཁྱིམ་དྲུག་སྟོངས། །ཞེས་བྱ་བ་ལྟེ་བར་དབུ་མ་ལས་རྩ་བཞིར་གྱེས་སྟེ་དེ་ལ་བཅུ་གཉིས་སུ་གྱེས་ཤིང་དེ་ལས་ལྔ་ལྔར་གྱུར་པའི་གཡོན་གྱི་ཕྱོགས་ན་ལུག་འཁྲིག་པ་སེང་གེ་སྲང་གཞུ་བུམ་པ་དྲུག་ལ་རྩ་སུམ་བཅུ་ནས། ནམ་མཁའ་རླུང་མེ་ཆུ་དང་སའི་རིམ་པས་སྡུད་ཅིང་། གཡས་ནས་གླང་ཀར་ཀ་ཏ་བུ་མོ་སྡིག་པ་ཆུ་སྲིན་ཉའི་ཁྱིམ་གྱི་ས་ཆུ་མེ་རླུང་ནམ་མཁའ་མཉམ་པའི་ཞག་གིས་སྡུད་པས། འཆི་ལྟས་ཞག་གཅིག་སྣ་གཡོན་དུ་ནམ་མཁའི་རླུང་རྒྱུའོ་དེའི་འོག་ཏུ། ཞག་སོ་གསུམ་ཕྱེད་བཅས་རླུང་ཚུལ་བཞིན་དུ་རྒྱུ་ཞིང་། ཡང་སྣ་གཡས་ནས་ས་རླུང་དུ་ཞག་གཉིས་རྒྱུའོ། །ཡང་ཞག་སོ་ཕྱེད་དང་གསུམ་ན་སྣ་གཡོན་དུ་ནམ་མཁར་ཞག་གསུམ་རྒྱུའོ། །དེ་བཞིན་དུ་རེ་མོས་ཀྱིས་ཞག་རེ་འཕེལ་སྟེ། ཞག་སོ་གཅིག་ཕྱེད་བཅས་ན་སྣ་གཡས་སུ་ས་རླུང་ཞག་བཞིའོ། །ཡང་ཞག་སུམ་བཅུ་དང་ཕྱེད་ན་གཡོན་དུ་མཁའ་རླུང་ཞག་ལྔ་རྒྱུ་སྟེ། ཁྱིམ་དྲུག་གི་མཁའ་རླུང་གི་ནུས་པ་ཟད་དེ་རྩ་དྲུག་སྟོངས་སོ། །དེ་ནས་ཞག་ཉི་ཤུ་རྩ་དགུ་ཕྱེད་བཅས་ན་གཡས་སུ་ཞག་དྲུག་རྒྱུས་ནས་གཡས་ཀྱི་ཁྱིམ་དྲུག་གི་ས་རླུང་སྟོངས་སྟེ་རྩ་དྲུག་སྐམས་སོ། །ཡང་ཞག་ཉི་ཤུ་རྩ་བརྒྱད་ཕྱེད་བཅས་ན། གཡོན་ནས་རླུང་གི་རླུང་ཞག་བདུན་རྒྱུའོ། །ཡང་ཞག་ཉི་ཤུ་རྩ་བདུན་ཕྱེད་བཅས་ན་གཡས་སུ་ཆུ་རླུང་ཞག་བརྒྱད་རྒྱུའོ། །དེ་ནས་ཞག་ཉི་ཤུ་རྩ་ཕྱེད་དང་བདུན་ན་གཡོན་དུ་རླུང་གི་རླུང་ཞག་དགུའོ། །ཡང་ཞག་ཉི་ཤུ་རྩ་ཕྱེད་དྲུག་ན་གཡས་སུ་ཆུ་རླུང་ཞག་བཅུའོ། །ཡང་ཞག་ཉི་ཤུ་རྩ་ཕྱེད་ལྔ་ན་གཡོན་དུ་རླུང་གི་རླུང་ཞག་བཅུ་གཅིག་རྒྱུ་སྟེ། ཁྱིམ་དྲུག་གི་རླུང་གི་རླུང་ཟད་ནས་རྩ་དྲུག་སྟོངས་སོ། །ཡང་ཞག་ཉི་ཤུ་རྩ་ཕྱེད་བཞི་ན། གཡས་སུ་ཆུ་རླུང་ཞག་བཅུ་གཉིས་རྒྱུས་ནས་གཡས་ཀྱི་ཁྱིམ་དྲུག་གི་ཆུ་རླུང་ཟད་ནས་རྩ་དྲུག་སྟོངས་སོ། །དེ་ནས་ཞག་ཉི་ཤུ་རྩ་ཕྱེད་དང་གསུམ་ནས་གཡོན་དུ་ཞག་བཅུ་གསུམ་མེ་རླུང་རྒྱུའོ། །ཡང་ཞག་ཉི་ཤུ་རྩ་ཕྱེད་དང་གཉིས་ན་གཡས་ནས་ཞག་བཅུ་བཞི་མེ་རླུང་རྒྱུའོ། །ཡང་ཞག་ཉི་ཤུ་ཕྱེད་དང་བཅས་པ་ན་གཡོན་ནས་མེ་རླུང་ཞག་བཅོ་ལྔའོ། །གཡས་ནས་ཞག་བཅུ་དགུ་ཕྱེད་དང་བཅས་པའི་འོག་ཏུ་མེ་རླུང་ཞག་བཅུ་དྲུག་གོ། །གཡོན་ནས་ཞག་ཕྱེད་དང་བཅུ་དགུའི་འོག་ཏུ་མེ་རླུང་ཞག་བཅུ་བདུན་སྟེ་གཡོན་པའི་ཁྱིམ་དྲུག་གི་མེ་ཟད་ནས་རྩ་དྲུག་སྟོངས་སོ། །ཡང་གཡས་ནས་ཞག་ཕྱེད་དང་བཅོ་བརྒྱད་ན་མེ་རླུང་ཞག་བཅོ་བརྒྱད་རྒྱུ་བས་གཡས་ཀྱི་ཁྱིམ་དྲུག་གི་མེ་ཟད་ནས་རྩ་དྲུག་སྟོངས་སོ། །ཡང་ཞག་ཕྱེད་དང་བཅུ་བདུན་ན་གཡོན་ནས་ཞག་བཅུ་དགུ་ཆུ་རླུང་རྒྱུའོ། །ཡང་ཞག་ཕྱེད་དང་བཅུ་དྲུག་ན་སྣ་གཡས་ནས་རླུང་གི་རླུང་ཞག་ཉི་ཤུའོ། །ཡང་ཞག་ཕྱེད་དང་བཅོ་ལྔ་ན་གཡོན་ནས་ཆུ་རླུང་ཞག་ཉེར་གཅིག་རྒྱུའོ། །ཡང་ཞག་ཕྱེད་དང་བཅུ་བཞི་ན་གཡས་ནས་རླུང་གི་རླུང་ཞག་ཉེར་གཉིས་སོ། །ཡང་ཞག་ཕྱེད་དང་བཅུ་གསུམ་ནི་གཡོན་ནས་ཆུ་རླུང་ཞག་ཉེར་གསུམ་རྒྱུས་ནས་ཆུ་རླུང་གི་ཁམས་ཟད་ནས་རྩ་དྲུག་སྟོངས་སོ། །ཡང་ཞག་ཕྱེད་དང་བཅུ་གཉིས་ན་གཡས་ནས་རླུང་གི་རླུང་ཞག་ཉེར་བཞི་བརྒྱུས་ནས་རླུང་གི་ཁམས་ཟད་ཅིང་རྩ་དྲུག་སྟོངས་སོ། །ཡང་ཞག་ཕྱེད་དང་བཅུ་གཅིག་ན་གཡོན་ནས་ས་རླུང་ཞག་ཉེར་ལྔ་རྒྱུའོ། །ཡང་ཞག་ཕྱེད་དང་བཅུ་ན་གཡས་སུ་མཁའ་རླུང་ཞག་ཉེར་དྲུག་རྒྱུའོ། །ཡང་ཞག་ཕྱེད་དང་དགུ་ན་གཡོན་དུ་ས་རླུང་ཞག་ཉེར་བདུན་རྒྱུའོ། །ཡང་ཞག་ཕྱེད་བརྒྱད་ན་གཡས་སུ་མཁའ་རླུང་ཞག་ཉེར་བརྒྱད་རྒྱུའོ། །ཡང་ཞག་ཕྱེད་དང་བདུན་ན་གཡོན་དུ་ས་རླུང་ཞག་ཉེར་དགུ་རྒྱུ་སྟེ། གཡོན་གྱི་རླུང་ལྔ་ཟད་པས་རྩ་དྲུག་ན་གཡོན་གྱི་ཁྱིམ་དྲུག་གི་རྩ་སུམ་བཅུར་རླུང་མི་རྒྱུའོ། །ཡང་ཞག་ཕྱེད་དང་དྲུག་ན་གཡས་སུ་མཁའ་རླུང་ཞག་སུམ་བཅུ་རྒྱུ་སྟེ་དེ་ནས་འཚོ་བའི་ཞག་ཕྱེད་དང་ལྔ་རྒྱུ་ཞིང་རྩ་དྲུག་སྟོངས་ནས་གཡས་ཀྱི་ཁྱིམ་དྲུག་གི་རྩ་སུམ་བཅུར་རླུང་མི་རྒྱུ་བས་ལྟེ་བའི་ཕྱི་རྩ་དྲུག་བཅུ་སྐམ་མོ། །དེ་ལྟར་འཆི་ལྟས་ཟླ་བ་གཅིག་འཕེལ་བས་ཟླ་བ་སུམ་བཅུ་སོ་ཕྱེད་དང་ལྔ་འདས་ནས། །དེ་རྗེས་ཟླ་བ་གསུམ་པོ་ལ། །གཡོན་ནས་སོ་གཅིག་སྙིང་སྟོབས་ཟད། །གཡས་ནས་སོ་གཉིས་རྡུལ་ཟད་བྱེད། །རྩ་བའི་རྩ་ཆེན་དྲུག་དྲུག་འགག །དེ་རྗེས་སོ་གསུམ་རླུང་ཀུན་ཟད། །མུན་པ་ཆེན་པོ་ཟད་བྱེད་རླུང་། །ཞག་གཅིག་རྒྱུ་ཞིང་འཕོ་བར་བྱེད། །ཞེས་བྱ་བ་ནི་ཟླ་བ་གསུམ་དང་ཞག་བདུན་གྱི་བར་གྱི་ལྷག་མ་རྣམས་བསྡུས་པ་སྟེ། གཡོན་ནས་ཞག་སོ་གཅིག་རྒྱུ་བས་བད་ཀན་གྱི་ཁམས་དང་ཟླ་བའི་རླུང་ཐམས་ཅད་ཟད་དེ་ཟླ་བའི་འཕོ་བ་མཐར་ཐུག་ཅིང་ཁྱིམ་དྲུག་གི་རྩ་བ་དྲུག་ཀྱང་སྟོངས་སོ། །ཡང་གཡས་སུ་འཕོས་ནས་ཞག་སོ་གཉིས་རྒྱུ་བས་མཁྲིས་པའི་ཁམས་ཟད་པར་བྱེད་ཅིང་གཡས་ཀྱི་ཁྱིམས་དྲུག་གི་རྩ་བ་ཡང་སྐམས་པས་ལྟེ་བའི་རྩ་དོན་གཉིས་པོ་ཐམས་ཅད་འགག་པས་ཉི་མའི་མཐར་ཐུག་གོ །དེ་ནས་ཞག་སོ་གསུམ་དུ་མུན་པ་དང་རླུང་གི་ཁམས་ཟད་པར་བྱེད་པ་རྒྱུ་སྟེ་སྤྱི་བོའི་རྩ་བཅུ་བཞི་དང་། མགྲིན་པའི་ཉེར་བརྒྱད་དང་། སྙིང་ཁའི་བརྒྱད་དང་། གསང་བའི་རྩ་རྣམས་སྐམ་ཞིང་། དེ་ནས་ཕུང་པོ་དང་ཁམས་དང་སྐྱེ་མཆེད་སྦྱོར་བ་མེད་པས། ཞག་གཅིག་མུན་པ་ཆེན་པོའི་རླུང་རྒྱུ་བས་ཡེ་ཤེས་ཀྱི་རླུང་ཟད་ནས་དབུ་མའི་ཡན་ལག་གི་རྩ་ཀུན་བསྡུས་ཏེ་ཐིག་ལེ་འདོར་ཞིང་རྣམ་པར་ཤེས་པ་འཕོ་བར་འགྱུར་རོ། །དོན་འདི་ལ་སྤྱན་རས་གཟིགས་ཀྱི་ཞལ་སྔ་ནས། སུམ་བཅུ་རྩ་སུམ་དུ་རྒྱུ་བའི་ཉི་མ་དང་། ཡང་སུམ་བཅུ་རྩ་གསུམ་དུ་འཕོ་བའི་ཉི་མས་ཞེས་གཉིས་ཀའི་ཁྱིམ་བསྡུས་པས་ཉི་མ་སྟོང་བརྒྱ་ཉི་ཤུ་རྩ་གཉིས་གྱི་ཉི་མར་འགྱུར་ཏེ་ལོ་གསུམ་དང་ཟླ་བ་ཕྱེད་པ་གསུམ་ལ་ཉི་མ་གསུམ་མ་ཚང་པའི་དཀྱིལ་འཁོར་ལྔ་དང་སྙིང་སྟོབས་དང་རྡུལ་དང་མུན་པའི་རྩའི་དབྱེ་བས་སྲོག་གི་རླུང་གནས་ཡོངས་སུ་གཏོང་ཞེས་གསུང་པ། འཆི་ལྟས་རྒྱུ་བའི་བར་ནས་གཡས་སུ་ཞག་ཉིས་བརྒྱ་བདུན་བཅུ་དོན་ཕྱེད་དང་བརྒྱད། གཡོན་ན་ཞག་ཉིས་བརྒྱ་དགུ་བཅུ་གོ་ཕྱེད་དང་གསུམ། འཆི་ལྟས་འཕེལ་བ་ལ་གཡས་ཀྱི་ཞག་ཉིས་བརྒྱ་བདུན་བཅུ། གཡོན་གྱི་ཞག་ཉིས་བརྒྱ་ལྔ་བཅུ་རྩ་ལྔ། དབུས་ཀྱི་ཞག་སུམ་བཅུ་རྣམས་བསྡོམས་པས་ལོ་གསུམ་ཕྱོགས་གསུམ་གྱི་ཞག་ཏུ་དགོངས་པའོ། །ད་རུང་གཡས་གཡོན་གྱི་འཕེལ་བའི་ལྷག་ཞག་གསུམ་དབུ་མའི་ཞག་གསུམ་སྔ་མའི་གསུམ་དང་དགུ་ཡོད་པ་ནི། མངལ་གྱི་ཟླ་བ་དགུའི་དབྱུག་གུ་བསྡུས་པས་ཞག་དགུར་འགྱུར་བར་གསུངས་པའི་ཕྱིར་ལྷག་པ་ཡིན་ལ། ཞག་གཅིག་པོ་ནི་མངལ་གྱི་དང་པོའི་ཟླ་བ་གཅིག་གི་སྲོག་ཟད་པའི་ཕྱིར་ཡིན་ཏེ། འགྲེལ་པ་ནས་དེ་ནས་གཞན་ཡང་མངལ་དུ་ཞུགས་པའི་ཟླ་བ་དང་ཉིན་ཞག་གི་ཚོགས་གསུམ་བཅུའི་འཚོ་བའི་མཚན་མའོ་ཞེས་བྱུང་བ་ཡིན་ནོ། །སོ་གཉིས་ཕྱེད་བཅས་ཀྱིས་བགོས་པས། །དབུ་མའི་འཆི་ལྟས་ངེས་པ་ཡིན། །ཞེས་བྱ་བ་ནི་འདིར་ཞག་འཕེལ་བའི་རགས་པར་བརྩིས་པས་ཞག་སུམ་བཅུ་སོ་བཞི་ལོ་གསུམ་ཕྱོགས་གསུམ་ལ་འཕེལ་བ་བསྟན་ཏེ། ཞིབ་པ་ནི་ཞག་གཅིག་ཆུ་ཚོད་གཅིག་ཆུ་སྲང་ལྔ་དབུགས་གཅིག་ཡིན་སྟེ། ཐ་མའི་མུན་པ་ཟད་བྱེད་ལ་དབུགས་ཕྱེད་ལས་མེད་པས་ལུང་ལས་གསུངས་པ་འོག་ན་ཡོད་པ་བཞིན་ནོ། །མུན་པ་ཆེན་པོ་ཞག་གཅིག་པོ་ཡང་དབུགས་ཉི་ཁྲི་གཅིག་སྟོང་དྲུག་བརྒྱ་རྒྱུ་བ་སྟེ། དེའི་ཚེ་དབུ་མའི་རྩ་ཆེན་པོ་སུམ་བཅུ་སོ་དྲུག་དོར་ཞིང་ཀུན་གཞིའི་རྣམ་པར་ཤེས་པ་སྲོག་གི་རླུང་དང་ལྷན་ཅིག་ཕ་རོལ་ཏུ་འགྲོ་སྟེ། དབུ་མའི་སྒྲ་གཅན་གྱི་འཆི་ལྟས་ཡོངས་སུ་རྫོགས་པར་བསྟན་པ་ཡིན་ནོ། །འདིའི་ངེས་པ་ནི་དཔལ་དུས་ཀྱི་འཁོར་ལོའི་རྒྱུད་ལས། །དུས་ཀྱི་ལོ་ནི་ཇི་སྲིད་གཅིག་ནས་ཉིན་ཞག་ཚུལ་གྱིས་རྒྱུ་བ་ཡིས་ནི་འཕེལ་ཞིང་འཕོ་བར་བྱེད། །ཟླ་བ་ཉི་མའི་ལམ་ཞེས་བྱ་བ་མི་མཉམ་མཉམ་པ་ནས་ནི་ཉིན་ཞག་རེ་རེ་རིམ་གྱིས་འཕེལ། །སླར་ཡང་འཕོ་བའི་རིམ་པས་མཉམ་དང་མི་མཉམ་ཉི་མས་རྩི་བས་ནི་བཅུ་གཉིས་རྣམས་སུ་བྱེད་པར་འགྱུར། །ཇི་སྲིད་ཟླ་བ་ཕྱེད་དང་གཉིས་སུ་བཅུ་ལ་གསུམ་གྱིས་བསྒྱུར་པ་དང་ནི་འཚོ་བའི་ཉིན་ཞག་གསུམ། །དབུགས་དང་ཆུ་སྲང་རྣམས་དང་དབྱུག་གུར་རིམ་གྱིས་ཉིན་དང་མཚན་དུ་འཕེལ་བ་དེ་དག་རྣམས་ཀྱིས་སོ། །ལོ་བདུན་དུ་ཡང་བསྒྲོད་པའི་ཡན་ལག་གིས་ཏེ་བསྒྲོད་པའི་དབང་གིས་དྲུག་བཅུའི་ལོ་རྣམས་ཀྱང་། །ལོ་ནི་སུམ་བཅུ་ཟླ་བ་གསུམ་གྱིས་ཉིན་མཚན་འགྱུར་བ་དུས་ཀྱི་ལོ་དང་ཟླ་བ་ཕྱེད་པ་གསུམ། །ཞེས་གསུངས་པ་འདི་རྣམས་ཤིན་ཏུ་རྒྱས་པར་བཤད་པ་ཡིན་ནོ། །གཡས་གཡོན་དང་དབུ་མའི་འཆི་ལྟས་ལོ་གསུམ་ཕྱོགས་གསུམ་ལས་སོ་སོར་བགོས་ན་ཇི་ལྟ་བུ་ཞེ་ན། ཞག་སུམ་བཅུ་སོ་བཞི། ཆུ་ཚོད་སུམ་བཅུ་སོ་དྲུག་ཆུ་སྲང་ལྔ་བཅུ་ང་ལྔ་དབུགས་གཅིག་གི་སུམ་བཅུ་པོ་ཕྱེད་དང་གསུམ་གྱི་ཆ་བཅུ་རྣམས་ནི་དབུ་མ་སྒྲ་གཅན་གྱི་འཆི་ལྟས་ཀྱི་སྐལ་པ་ཡིན་ལ། གཡས་གཡོན་གྱི་ཉི་ཟླའི་རླུང་གཉིས་པོ་ལ་ཞག་ལྔ་བརྒྱ་བཞི་བཅུ་རྩ་ལྔ་ཆུ་ཚོད་བཅུ་གཅིག་ཆུ་སྲང་སོ་གཉིས་དབུགས་གཅིག་དབུགས་ཀྱི་བཞི་གསུམ་ཆ་དང་བཅས་པ་རེ་རེ་ཡོད་པ་ནི་ཉི་ཟླའི་འཆི་ལྟས་དངོས་གཞི་ཡིན་པས་རྒྱུད་ལས། ཉི་མའི་ཚོགས་ལ་ཕྱེད་བཅས་སུམ་བཅུ་རྩ་གཉིས་རྣམས་ཀྱིས་བགོས་པ་དུས་ཀྱི་འཁོར་ལོ་རྒྱུ་བ་ཡིན། ཞེས་གསུངས་པའི་འགྲེལ་པར། འདི་ལོ་གསུམ་དང་ཟླ་བ་ཕྱེད་པ་གསུམ་གྱི་ཞག་སྟོང་བརྒྱ་ཉི་ཤུ་རྩ་ལྔ་ལ་སུམ་བཅུ་རྩ་ཕྱེད་དང་གསུམ་གྱི་ཆས་རྙེད་པ་ནི། ཉི་མ་སུམ་བཅུ་རྩ་བཞི་དང་དབྱུ་གུ་སུམ་བཅུ་རྩ་ལྔ་དང་དབུགས་ཕྱེད་དང་གསུམ་སྟེ་འདི་རྣམས་ལས་ཉི་མ་གཅིག་ལྟེ་བར་རོ། །ལྷག་མ་གཡོན་དང་གཡས་སུ་འཆི་ལྟས་རིག་པར་བྱ་སྟེ་ཉི་མ་སོ་སོར་ལ་དབྱུ་གུ་ལྷག་པར་འགྱུར་ཏེ་ཐ་མར་རྩ་གཡས་སུ་རྒྱུའོ། །དུས་སུ་འཆི་བའི་ངེས་པའོ། །ཞེས་སྤྱན་རས་གཟིགས་དབང་ཕྱུག་གིས་གསུངས་སོ། །དེ་ལས་བགོ་བཤའ་ཞིབ་ཏུ་བྱས་པ་དག་ནི་སློབ་དཔོན་ཀུན་དགའ་ཡིས་མཛད་པའི་དུས་འཁོར་འགྲེལ་པ་ན་ཡོད་དོ། །གསུམ་པ་གཡས་པ་ཉི་མའི་འཆི་ལྟས་ལ། མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་ནི། དེ་ནས་དུས་མིན་ཉི་མ་ཡི། །འཆི་ལྟས་ངེས་པ་འདི་ལྟ་སྟེ། །ཞེས་པ་སྐྱེས་བུ་ཚེ་ལོ་བརྒྱ་པའི་དུས་སུ་འཆི་བ་ནི། སྔར་བསྟན་ལ་སྔོན་གྱི་ལས་ཀྱིས་དུས་མ་ཡིན་པར་འཆི་བ་འབྱུང་བས་དེ་ལ་ཡང་ཉི་མའི་ཁམས་གཡས་པ་མྱུར་ཏུ་ཟད་པའི་འཆི་ལྟས་འབྱུང་བའི་ཚུལ་འདིར་རྒྱས་པར་འཆད་པའོ། །རྒྱས་པར་བཤད་པ་ལ་ཚིགས་སུ་བཅད་པ་ལྔ་དང་རྐང་པ་གསུམ་སྟེ། དེ་ཡང་སྣ་གཡས་སུ་ཞག་གཅིག་རྒྱུ་བ་ནི་ལོ་གསུམ་ཕྱོགས་གསུམ་ན་ངེས་པར་འཆི་བའི་ལྟས་ཡིན་པས་འཚམས་གྱི་ངེས་བཟུང་ངོ་། །དེ་ནས་ཁྱིམ་བཅུ་གཉིས་པའི་རྩ་གཡས་ཕྱོགས་ནས་བཟུང་ནས་གླང་ལ་སོགས་པ་མཐུན་པའི་དུས་སྦྱོར་ནས་བཟུང་ནས་ཁྱིམ་བཅུ་གཉིས་རིམ་པ་ལྟར་དུ་འདོར་ཞིང་ལྟེ་བའི་ཁྱིམ་བཅུ་གཉིས་པོའི་རྩ་དྲུག་བཅུ་པོ་འགག་པར་འགྱུར་ཏེ། དེ་ལ་གང་གི་ཚེ་སྣ་གཡས་སུ་ཞག་ལྔ་རྒྱུ་བ་དེའི་ཚེ་གླང་གི་ཁྱིམ་གྱི་རྩ་ལྔ་འགགས་པའི་རྟགས་ཏེ་ལོ་གསུམ་གྱི་ཚེ་ལུས་པ་ཡིན་ནོ། དེ་ནས་ལོ་གཅིག་གི་བར་དུ་རིམས་ཀྱིས་འཕེལ་ནས། སྣ་གཡས་སུ་རླུང་ཞག་བཅུ་རྒྱུ་བའི་ཚེ་ཁྱིམ་གཉིས་པའི་རྩ་ལྔ་དོར་ནས་ལྷག་མ་ལོ་གཉིས་ཀྱི་ཚེ་ཡིན་ནོ། །ཡང་ལོ་གཅིག་གི་བར་དུ་ལྔ་འཕེལ་ནས་སྣ་གཡས་ནས་ཞག་བཅོ་ལྔ་རྒྱུ་བ་ན་ཁྱིམ་གསུམ་པའི་རྩ་ལྔ་འགགས་ནས་ལོ་གཅིག་གི་ཚེ་ལུས་སོ། །དེ་ནས་ཟླ་བ་རེར་ཞག་རེ་འཕེལ་ནས་ཟླ་བ་དྲུག་ན་སྣ་གཡས་ནས་ཞག་ཉི་ཤུ་རྒྱུ་ན་ཁྱིམ་བཞི་པའི་རྩ་ལྔ་འགགས་ནས་ཟླ་བ་དྲུག་གི་ཚེའོ། །དེ་ནས་ཟླ་བ་གསུམ་ལ་ཞག་ལྔ་འཕེལ་ནས་སྣ་གཡས་ནས་ཞག་ཉེར་ལྔ་རྒྱུ་ན་ཁྱིམ་ལྔ་པའི་རྩ་ལྔ་འགགས་ནས་ཚེའི་ལྷག་མ་ཟླ་བ་གསུམ་ལུས་ཏེ། དེ་རྣམས་ལྔ་ཚན་འཕེལ་བ་སྟེ། །ཁྱིམ་ལྔ་སྟོངས་པར་གྱུར་པ་ཡིན། །ཞེས་སྨོས་སོ། །དེ་ནས་ཞག་རེ་རེ་འཕེལ་བས་ལྟེ་བའི་ཁྱིམ་རེ་རེ་འདོར་བར་འགྱུར་ཏེ། སྣ་གཡོན་ནས་ཞག་བཞི་གཡས་པ་ནས་ཉེར་དྲུག་རྒྱུ་བས་ཁྱིམ་དྲུག་པའི་རྩ་ལྔ་སྟོངས་ནས་ཚེའི་ལྷག་མ་ཟླ་བ་གཉིས་སོ། །དེ་ནས་ཡང་སྣ་གཡོན་ནས་ཞག་གསུམ་གཡས་པ་ནས་ཉེར་བདུན་རྒྱུ་བས་ཁྱིམ་བདུན་པའི་རྩ་ལྔ་སྐམས་ནས་ཚེའི་ལྷག་མ་ཟླ་བ་གཅིག་ཐུབ་སྟེ། འདི་ཚུན་ཆད་དུ་རྣལ་འབྱོར་གྱི་སྟོབས་ཀྱིས་འཆི་བ་བསླུ་བར་ནུས་པས། ཁྱིམ་བདུན་འདས་ནས་རྒྱས་པ་སྟེ། །དེ་ནས་སུས་ཀྱང་བཟློག་མི་ནུས། །ཞེས་སྨོས་སོ། །འདི་ནས་ཞག་སུམ་བཅུ་སོ་གསུམ་ན་འཆི་བ་ཡིན་པས་ཚེའི་ལྷག་མ་ཟླ་བ་གཅིག་པོ་དེའི་ཞག་བཅོ་ལྔ་ལ་ཁྱིམ་བརྒྱད་པའི་རྩ་ལྔ་སྐམ་མོ། །དེ་ནས་ཞག་བཅུ་རུ་ཁྱིམ་དགུ་པའི་རྩ་ལྔ་སྐམ་མོ། །དེ་ནས་ཞག་ལྔ་ལ་ཁྱིམ་བཅུ་པའི་རྩ་ལྔ་སྐམ་མོ། །དེ་ནས་ཞག་གསུམ་ལ་ཁྱིམ་བཅུ་གཅིག་པའི་རྩ་ལྔ་སྐམ་སྟེ། དེ་ལྟར་ཞག་སུམ་བཅུ་སོ་གསུམ་དུ་སྣ་གཡས་ནས་རྒྱུ་བས་ཁྱིམ་བཞི་འདོར་བར་བྱེད་ཅིང་སྤྱིར་ཁྱིམ་བཅུ་གཅིག་སྟོངས་ནས་ཉི་མའི་སྟོབས་ཟད་པར་གྱུར་ཏེ་དེའི་འོག་ཏུ། ཟླ་བ་ཟད་པར་བྱེད་པའི་རླུང་སྣ་གཡོན་ནས་ཞག་གཉིས་རྒྱུ་བར་བྱེད་དེ། །ཁྱིམ་བཅུ་གཉིས་པ་ལུག་གི་ཁྱིམ་གྱི་རྩ་ལྔ་ཡང་སྟོངས་ནས་ལྟེ་བའི་རྩ་ཐམས་ཅད་དུ་རླུང་མི་རྒྱུ་བས་གོང་དུ་བཤད་པ་སྟར། དེ་ནས་དབུ་མར་ཞག་གཅིག་བརྒྱུས་ནས་རྣམ་པར་ཤེས་པ་ཕ་རོལ་ཏུ་འགྲོ་བར་བྱེད་དེ། འདི་ཡང་དུས་ཀྱི་འཁོར་ལོར་ལྔ་ལས་ལྔ་ཡིས་འཕེལ་བས་ཉི་ཤུ་རྩ་ལྔའི་ཉིན་ཞག་རྣམས་ཀྱི་ཚུལ་གྱིས་རྒྱུ་ཞིང་འཕོ་བར་འགྱུར། དེ་ནས་རེ་རེས་ལྷག་པ་བཅུ་ལ་གསུམ་གྱིས་བསྒྱུར་བ་དང་ནི་ཇི་སྲིད་གསུམ་གྱིས་ལྷག་པ་རྣམས། །གང་དུ་རྒྱས་པའི་དུས་ལ་ལོ་ནི་གསུམ་མིག་ཟླ་བ་དྲུག་གསུམ་ཟུང་དང་ཟླ་བས་མ་ལུས་པར་དེ་རྣམས་ཟླ་བ་ལྷག་མ་ཉིན་ཞག་རྣམས་ནི་ཚེས་ཕྱོགས་མདའ་དང་ཡོན་ཏན་གཉིས་གཅིག་འཚོ་བར་འགྱུར། །མཆོག་གི་ཆ་ནི་རང་གནས་ཁྱིམ་གྱི་འཁོར་ལོ་འདོར་ཞིང་འབྲི་བའི་ལྷག་མ་དག་ནི་མཉམ། །ལོ་དང་ཟླ་བ་ཉི་མ་ཡང་ནི་གསུམ་མིག་ཟླ་བ་དང་ནི་དྲུག་དང་གསུམ་ཟུང་ཟླ་བ་ཡིས། །རྒྱས་པ་ལས་ནི་འབྲི་བ་དང་མཉམ་ཚེས་ཕྱོགས་མདའ་དང་ཡོན་ཏན་དང་ནི་ཟེ་འབྲུ་ལ་ཞུགས་པ། །ཉི་མ་སུམ་བཅུ་རྩ་དྲུག་རྣམས་ཀྱི་མཐར་ནི་ཉི་མའི་འཆི་ལྟས་སྦྱོར་བ་ཡིས་ནི་འཆི་བར་འགྱུར། །ཞེས་གསུངས་པ་ཡིན་ནོ། །བཞི་པ་གཡོན་པ་ཟླ་བའི་འཆི་ལྟས་བཤད་པ་ནི། མདོར་བསྟན་དང་། རྒྱས་བཤད་གཉིས་ལས་དང་པོ་ནི། གཡོན་གྱི་ཟླ་བའི་རྟགས་བཤད་པ། །ཞེས་པ་སྟེ་སྐྱེས་བུ་འགའ་ཞིག་ལ་དུས་མ་ཡིན་པར་འཆི་བའི་རྟགས་སྣ་གཡོན་པ་ཟླ་བའི་རླུང་འབྱུང་བ་ཡང་ཡོད་པས་དེ་སྟོན་ཏོ། རྒྱས་པར་བཤད་པ་ནི་ཚིགས་བཅད་ཕྱེད་དང་ལྔ་སྟེ། དང་པོ་ལུག་ལ་སོགས་པའི་མི་མཐུན་པའི་དུས་སྦྱོར་ལ་སྣའི་བུ་ག་གཡོན་པ་ནས་སྲོག་རྒྱུ་བ་ཡོད་པས་སྣ་གཡོན་ནས་ཞག་གཅིག་རྒྱུ་བ་ནི་ལོ་གསུམ་ཕྱོགས་གསུམ་ན་འཕོ་བར་འགྱུར་བའི་རྟགས་སོ། །དེ་ནས་ཟླ་བ་གསུམ་གསུམ་ན་འཆི་རྟགས་ཞག་རེ་རེ་འཕེལ་ཏེ་ཟླ་བ་དྲུག་འདས་ནས་སྣ་གཡོན་དུ་ཞག་གསུམ་རྒྱུ་བས། དེ་ནས་ཟླ་བ་སུམ་བཅུའི་ཚེ་ལུས་ཏེ་ལྟེ་བའི་ལུག་གི་ཁྱིམ་གྱི་རྩ་ལྔ་སྟོངས་པ་ཡིན་ནོ། །དེ་ནས་ཟླ་བ་རེ་རེ་བཞིན། །འཆི་ལྟས་ཞག་ནི་རེ་རེ་འཕེལ། །ཟླ་བ་གསུམ་གྱིས་ཁྱིམ་རེ་འདོར། །གཡོན་རླུང་ཞག་གྲངས་འཕེལ་བ་བཞིན། །འཚོ་བའི་ཟླ་བ་འབྲི་བ་ཡིན། །ཞེས་བྱ་བ་ཟླ་བ་རེ་རེ་བཞིན་དུ་གཡོན་དུ་འཆི་ལྟས་ཀྱི་ཞག་རེ་རེ་འཕེལ་བས། ཞག་དྲུག་རྒྱུ་ཙམ་ན་ཁྱིམ་གཉིས་པའི་རྩ་ལྔ་སྐམ་མོ། །ཚེའི་ལྷག་མ་ཟླ་བ་ཉེར་བདུན་ནོ། །གཡོན་ནས་ཉི་མ་དགུ་རྒྱུ་བ་ན་ཁྱིམ་གསུམ་པའི་རྩ་ལྔ་སྟོངས་ཏེ་ཚེ་ཟླ་བ་ཉེར་བཞིའོ། །ཉི་མ་བཅུ་གཉིས་རྒྱུ་བ་ན་ཁྱིམ་བཞི་པའི་རྩ་ལྔ་སྟོངས་ཏེ། ཚེ་ཟླ་བ་ཉེར་གཅིག་གོ །ཉི་མ་བཅོ་ལྔ་རྒྱུ་བ་ན་ཁྱིམ་ལྔ་པ་འདོར་ཞིང་། ཚེ་ཟླ་བ་བཅོ་བརྒྱད་དོ། །སྣ་གཡོན་ནས་ཉི་མ་བཅོ་བརྒྱད་རྒྱུ་བ་ན་ཁྱིམ་དྲུག་པའི་རྩ་ལྔ་འདོར་ཞིང་ཚེ་ཟླ་བ་བཅོ་ལྔའོ། །ཉི་མ་ཉེར་གཅིག་གཡོན་ནས་རྒྱུ་བ་ན་ཁྱིམ་བདུན་པའི་རྩ་ལྔ་འདོར་ཞིང་ཚེ་ཟླ་བ་བཅུ་གཉིས་སོ། །གཡོན་ནས་ཞག་ཉེར་བཞི་རྒྱུ་བ་ན་ཁྱིམ་བརྒྱད་པའི་རྩ་ལྔ་འདོར་ཞིང་ཚེ་ཟླ་བ་དགུའོ། །གཡོན་ནས་ཞག་ཉེར་བདུན་རྒྱུ་བ་ན་ཁྱིམ་དགུ་པའི་རྩ་ལྔ་འདོར་ཞིང་ཚེ་ཟླ་བ་དྲུག་གོ །གཡོན་ནས་ཟླ་གཅིག་རྒྱུ་བ་ན་ཁྱིམ་བཅུ་པའི་རྩ་ལྔ་འདོར་ཞིག་ཚེའི་ལྷག་མ་ཟླ་བ་གསུམ་མོ། །དེ་ནས་ཟླ་བ་གསུམ་ལ་ཁྱིམ་བཅུ་གཅིག་པའི་རྩ་ལྔ་དོར་ནས་འཆི་ལྟས་སྣ་གཡོན་ནས་ཞག་སུམ་བཅུ་སོ་གསུམ་རྒྱུ་སྟེ་དེས་ཟླ་བའི་ནུས་པ་ཐམས་ཅད་ཟད་ནས་ངེས་པར་ཞག་གསུམ་ན་འཆི་བར་འགྱུར་ཏེ། དེ་ནས་ཞག་གཉིས་ཉི་མའི་ཁམས་ཟད་པར་བྱེད་པ་སྣ་གཡས་པ་ནས་རྒྱུ་བས་ཁྱིམ་བཅུ་གཉིས་པའི་རྩ་ལྔ་ཡང་སྟོངས་པར་བྱས་ནས་དེའི་འོག་ཏུ་ཞག་གཅིག་ཏུ་མུན་པ་ཆེན་པོའི་རླུང་བརྒྱུས་ནས་རྣམ་པར་ཤེས་པ་གཞན་དུ་འཕོའོ། །འདི་ཡང་དུས་ཀྱི་འཁོར་ལོར། གལ་ཏེ་སྲོག་ནི་ཉིན་དང་མཚན་ལ་རྩ་ནི་གཅིག་ནས་རྒྱུ་ན་དུས་ཀྱི་ལོར་ནི་འཆི་བར་འགྱུར། གལ་ཏེ་མི་རྣམས་ལ་ནི་རྒྱུན་མ་ཆད་པར་ཟླ་བ་ཕྱེད་དུ་རྒྱུ་ན་ཕྱེད་དང་གཉིས་འཚོའོ། །རྒྱུན་མ་ཆད་པར་ཟླ་བ་གཅིག་ཏུ་རྒྱུ་ན་མིའི་བདག་པོ་འཚོ་བ་ཡང་ནི་ཟླ་བ་གསུམ། དེ་ལྟར་རྣལ་འབྱོར་རང་གི་ལུས་ལ་དུས་ཀྱི་འཁོར་ལོ་ཟླ་བར་རྒྱུ་བས་འཆི་བར་ཤེས་པར་བྱའོ་ཞེས་གསུངས་སོ། །ལྔ་པ་དེ་དག་གི་ངེས་པ་བསྟན་པ་འི་ཚིགས་བཅད་ལྔ་སྟེ། དེ་ལྟར་གཡས་གཡོན་གྱི་ཉི་མ་དང་ཟླ་བའི་འཆི་ལྟས་སོ་སོར་འབྱུང་བའི་རྒྱུན་མཚན་ལྟེ་བའི་མཉམ་པའི་ཁྱིམ་ལུག་ལ་སོགས་པར་མི་མཐུན་པའི་དུས་སྦྱོར་ལ་ཁྱིམ་དེ་ནས་ཐོག་མར་རླུང་རྒྱུན་ཟླ་བའི་འཆི་རྟགས་གཙོ་བོར་འགྱུར་ཏེ། གཞན་མཐུན་པ་མ་ཡིན་པའི་དུས་སྦྱོར་དུ་གླང་ལ་སོགས་པ་མི་མཉམ་པའི་ཁྱིམ་རྣམས་ལས་ཐོག་མར་རླུང་རྒྱུ་བ་བྱུང་ན་ཉི་མའི་འཆི་རྟགས་གཙོ་བོར་གྱུར་པ་ཡིན་ནོ། །ཞེས་རྒྱུད་འགྲེལ་ལས་གསུངས་པ་ཡིན་ནོ། །གཞན་ཡང་སྔ་མ་ལོ་བརྒྱ་ཐུབ་པ་ནས། སྐྱེས་ནས་ཞག་གཅིག་ཐུབ་པའི་བར། །རྩ་ཀུན་རྒྱུ་དང་དབུ་མ་རྐྱང་། །རྒྱུ་བའི་རིམ་པར་གསུངས་པ་ཡིན། །ཞེས་པའི་དོན་དབང་ཕྱུག་གི་གཞུང་ལ་སོགས་པའི་འཆི་རྟགས་ཀྱི་རླུང་རྣམས་ལ་གཡས་ནས་དབྱུ་གུ་ལྔ་རྒྱུ་བ་ལོ་བརྒྱ་ནས་འཆི་ལ། ཞག་གཅིག་རྒྱུ་ན་ལོ་བཅུའི་ཚེ་ལ་སོགས་པ་ཡོད་དོ་ཞེས་བྱ་བ་དེ་དག་མི་འཐད་དོ་ཞེས་དགག་པའི་ཕྱིར་གསུངས་པ་ཡིན་ཏེ། འདིར་སྐྱེས་ནས་ཞག་གཅིག་ན་འཆི་བ་ནི་རྩ་གཞན་ཐམས་ཅད་དུ་མི་རྒྱུ་ཞིང་དབུ་མ་ཉིད་ནས་འབྱུང་བ་དང་། ལོ་གསུམ་ན་འཆི་བ་ནི་རྩ་ཉིས་སྟོང་ཉིས་བརྒྱ་ལྔ་བཅུ་པོ་མ་གཏོགས་པར་རླུང་མི་རྒྱུ་བ་དང་ལོ་བརྒྱ་ཐུབ་པ་ནི་རྩ་ཐམས་ཅད་དུ་རླུང་རྒྱུ་བས་གོང་གི་དུས་དང་དུས་མ་ཡིན་པའི་འཆི་རྟགས་འདི་དག་འཐད་ཅིང་ངེས་པ་ཡིན་པར་གསུངས་སོ། །གཞན་ཡང་རླུང་གི་འཆི་རྟགས་མེད་ཀྱང་གཞན་དུ་བསགས་པའི་ལས་ཀྱི་མཐུས་འཆི་བ་ན་རྩ་རླུང་ཇི་ལྟར་འགག་ཞེ་ན། གང་ཚེ་དུག་དང་མཚོན་དང་ནད། །དྲག་པོས་རྩ་རྣམས་གཅིག་ཆར་འགག །རྒྱུ་དེས་གློ་བུར་འཆི་བར་གསུངས། །ཞེས་སྨོས་སོ། །སྔར་བཤད་པའི་ཇི་ལྟར་ལྟེ་བ་འགགས་པ་བཞིན་དུ་འབྱུང་བ་ལྔ་དང་ཉི་ཟླ་སྒྲ་གཅན་གྱི་ཁམས་ཀྱི་ཡོན་ཏན་བརྒྱད་པོ་སྙིང་གར་ཐུན་བརྒྱད་ཀྱི་རིམ་པ་དང་། མགྲིན་པར་རྒྱུ་སྐར་དང་སྤྱི་བོར་ཟླ་རྐང་གི་རིམ་པ་རྣམས་ཀྱང་འདོར་སྟེ་ཞག་གྲངས་ནི་རྩའི་སྐབས་སུ་བཤད་པ་བཞིན་ནོ། །དེའི་རིམ་པས་འཁོར་ལོ་གཞན་དག་ཀྱང་མཚུངས་ཤིང་འཁོར་ལོ་ལྔ་དང་ཚིགས་ཀྱི་འཁོར་ལོ་སུམ་བཅུ་པོ་ཀུན་ལ་ཡང་ས་ཆུ་མེ་རླུང་ནམ་མཁའི་རླུང་རེ་རེ་ལ་དབྱུ་གུ་བཅུ་གཉིས་བཅུ་གཉིས་བསྐྱེད་སྡུད་ཀྱི་རིམ་པ་ཡོད་པས་དེ་ལྟར་དཀྱིལ་འཁོར་དྲུག་བཅུ་པོ་ཞག་དྲུག་བརྒྱུས་ནས་ཟད་པར་འགྱུར་བ་ཡིན་ནོ། །རླུང་གི་འཆི་ལྟས་ངེས་པ་དང་བཅས་པ་བསྟན་པའོ། །ད་ནི་གསུམ་པ་ཐིག་ལེ་འགག་པའི་རིམ་པ་ལ་གཉིས་སྟེ། ལོ་དགུ་བཅུ་གོ་བདུན་གྱིས་སྟོབས་འདོར་བ་དང་། ལོ་གསུམ་གྱི་འཆི་རྟགས་དངོས་སོ། །དང་པོ་ནི་ཚིགས་སུ་བཅད་པ་ཕྱེད་དང་བཞི་སྟེ། གོང་དུ་རྩ་དང་རླུང་འགག་པའི་རིམ་པ་བཤད་ནས་ཐིག་ལེ་འགག་པའི་ཚུལ་ནི། ལོ་གཅིག་ནང་དུ་རྩ་རླུང་བྱང་ཆུབ་ཀྱི་སེམས་ཀྱི་ཁམས་ཐམས་ཅད་འཕེལ་ནས་དེ་ནས་རླུང་གི་ནུས་པ་ཕྱིར་ཤོར་བས་ཉི་མ་རེ་རེ་ལ་དཀར་ནག་གི་རྩ་གཉིས་གཉིས་འགྲིབ་པ་སྔར་བསྟན་པ་བཞིན་དུ་ཡིན་ལ། དེ་ནས་སྐྱེས་པ་རྣམས་ཀྱི་ལོ་བཅུ་དྲུག་གི་བར་དང་བུད་མེད་རྣམས་ཀྱི་ལོ་བཅུ་གཉིས་ཀྱི་བར་དུ་ཐིག་ལེ་འཕེལ་ཏེ་ཡེ་ཤེས་ཀྱི་ཁམས་རྒྱས་པ་ཡིན་ནོ། །དེ་ནས་ཡང་དཀར་བའི་ཆ་འགྲིབ་ཅིང་འདོར་བར་བྱེད་ལ། དེ་ནས་ཁྲག་གི་ཁམས་ལོ་བཅུ་དྲུག་ཏུ་འཕེལ་བ་ཡིན་ཏེ། སོ་གཉིས་ནས་ཁྲག་གི་ཁམས་དེ་ཡང་འདོར་བར་འགྱུར་རོ། །དེ་བཞིན་དུ་རླུང་གི་ཁམས་ཀྱི་སྟོབས་འདོར་བ་ལོ་བཅུ་དྲུག་དང་། མེའི་ཁམས་ཀྱི་སྟོབས་འདོར་བ་ལོ་བཅུ་དྲུག་དང་ཆུའི་ཁམས་ཀྱི་སྟོབས་འདོར་བ་ལོ་བཅུ་དྲུག་དང་། སའི་ཁམས་ཀྱི་སྟོབས་འདོར་བ་ལོ་བཅུ་དྲུག་སྟེ། དེ་ལྟར་འགྲིབས་པས་རགས་པར་རྩིས་པའི་ལོ་དགུ་བཅུ་གོ་བདུན་ནས་སྟོབས་ཀུན་དོར་ནས། དེ་ནས་ལོ་གསུམ་ན་འཆི་བ་ནི་དུས་སུ་འཆི་བའི་ངེས་པར་ཤེས་པར་བྱའོ། །འདི་དག་ཀྱང་དབུགས་སྲངས་ཀྱི་ལོ་ལ་འཇོག་གིས་ཕྱི་རོལ་གྱི་ནི་མ་ཡིན་ནོ། །ལོ་གསུམ་གྱི་འཆི་ལྟས་དངོས་ལ་ཚིགས་བཅད་གསུམ་དང་རྐང་པ་གཅིག་སྟེ། དེ་ཡང་ངེས་པར་འཆི་བ་ལ་ཐུག་པའི་རྟགས་ནི། ལྟེ་བའི་དཀྱིལ་འཁོར་དྲུག་བཅུ་པོའི་རྩ་གཅིག་གི་འགྱུ་བ་ཆད་པ་དང་གཡས་གཡོན་གང་རུང་གི་ཞག་གཅིག་གི་དུས་སྦྱོར་ཉམས་པ་གཉིས་དུས་མཉམ་མོ། །དྲི་ཆུ་ངེས་པར་འགྱུར་ན་ཟླ་བ་དྲུག་ན་འཆི་སྟེ། རྐྱེན་གཞན་མེད་པར་རྣ་བའི་རླུང་སྒྲ་དོར་ན་ཞག་དྲུག་གོ །ལྕེ་ཡིས་ཁ་ཟས་ཀྱི་རོ་འཛིན་པ་དོར་ན་ཞག་ལྔའོ། །མིག་གི་དབུས་སུ་ཚངས་པའི་རི་མོ་སྔར་མེད་པ་བྱུང་ན་ཞག་བཞིའོ། །སྣ་ཞོམ་ཞིང་དྲི་འཛིན་པ་དོར་ན་ཞག་གསུམ་མོ། །ལུས་ཀྱི་རེག་བྱ་དོར་ན་ཞག་གཉིས་སོ། །ཆོས་ཀྱི་ཁམས་ཁུ་བ་སྟེང་འོག་ཏུ་ཉམས་ན་ཞག་གཅིག་ནས་ཕ་རོལ་ཏུ་འགྲོ་བ་སྟེ། དེ་ཡང་དཀར་ཆ་འོག་ཏུ་ལྟུང་བས་དམར་ཆ་གྱེན་ལ་འགྲོ་བ་ཡིན། ཞེས་པ་ལུས་ཅན་རྣམས་ནི་འཆི་བ་ན། །བདུད་རྩི་ཟླ་བ་ཐུར་དུ་འགྲོ། །སྒྲ་གཅན་ཉི་མ་སྟེང་དུ་འགྲོ། །རྣམ་ཤེས་སྲིད་པའི་མཚན་ཉིད་སྦྱོར། ཞེས་གསུངས་པའི་རིམ་པས་རླུང་རྣམས་ནི་སྣའི་སྒོ་ནས་འགྲོ་སྟེ་ཕུང་པོ་དང་ཁམས་དང་སྐྱེ་མཆེད་ཐམས་ཅད་ཀུན་གཞིའི་རྣམ་པར་ཤེས་པའི་སྟེང་དུ་བསྡུས་ནས་གཞིའི་འོད་གསལ་བ་ཆོས་ཀྱི་སྐུའི་རང་བཞིན་ཉམས་སུ་མྱོང་སྟེ་སྲིད་པ་གཞན་དུ་ཉེ་བར་འཕོ་བར་འགྱུར་རོ། །དེ་རྣམས་ཀྱིས་རྩ་རླུང་བྱང་ཆུབ་ཀྱི་སེམས་འགག་པའི་རིམ་པ་བསྟན་ཟིན་ཏོ།། །།

བཤད་པ་ཡོངས་སུ་རྫོགས་པའི་བྱ་བ།

ད་ནི་བཞི་པ་ཞར་ལ་གང་དུ་འཕོ་བ་བཤད་པ་ནི་ཚིགས་སུ་བཅད་པ་ཕྱེད་དང་གསུམ་སྟེ། འདི་ཡང་ས་པུཾ་ཊ་དང་སྡོམ་འབྱུང་ལ་སོགས་པ་རྣམས་ནས་གསུངས་པའི་ལུང་བསྡུས་པ་ཡིན་པས། །དེ་ནས་ཀུན་གཞིའི་རྣམ་ཤེས་ནི། །ཚངས་བུག་ནས་ནི་གཟུགས་མེད་དེ། །ཞེས་པ་གཞན་དུ་འགྲོ་ས་ཡོད་པ་མ་ཡིན་ཀྱང་གནས་དེ་ཉིད་དུ་གཟུགས་མེད་པའི་ཏིང་ངེ་འཛིན་དུ་ཉེ་བར་བསྡུས་ཏེ་གནས་སོ། །ཐེག་ལེ་ལས་ནི་ལྷ་མོ་ཆེ། །ཞེས་པ་ནི་སྨིན་འཚམས་ཀྱི་དབྱིངས་རྣམ་པར་དག་པའི་སྒྲོན་མའི་ཐིག་ལེའི་དབུས་སུ་རྣམ་པར་ཤེས་པ་འཕོས་པས་གཟུགས་ཀྱི་ཁམས་བཅུ་དྲུག་ཏུ་སྐྱེའོ། །ལྟེ་བ་ལས་ནི་འདོང་ཁམས་ལྷ། །ཞེས་པ་འདོད་ལྷ་རིགས་དྲུག་གང་རུང་དུ་སྐྱེའོ། །མིག་ལས་འདོད་པའི་མིའི་དབང་པོ། །ཞེས་བྱ་བ་འདོད་ཁམས་ཀྱི་དབང་ཕྱུག་རྒྱལ་པོ་རྣམས་སུ་འགྱུར་རོ། །སྣ་ལས་གནོད་སྦྱིན་རྣམས་སུ་སྟེ། །ཞེས་པ་ལུས་ངན་གྱི་གནས་ལྕང་ལོ་ཅན་དུ་འགྲོའོ། །རྣ་བ་ལས་ནི་གྲུབ་པའི་ལྷ་སྟེ་སུམ་བཅུ་རྩ་གསུམ་གྱི་རིག་པ་འཛིན་པ་རྣམས་ཀྱི་ལྷའི་ནང་དུའོ། །གཞན་ཡང་དགོངས་པ་ཁ་ཅིག་ལ་ལྟེ་བ་ནས་ལྷ་མ་ཡིན་དུ་འགྲོ་ཞེས་ཀྱང་གྲགས་སོ། །དེ་རྣམས་ནི་བདེ་འགྲོར་འཕོ་བའི་ལམ་ཡིན་ཏེ་ངན་འགྲོའི་ལམ་ནི་སྲིད་པའི་སྒོ་ཞེས་པ་ཁུ་བ་འབབ་པའི་སྒོ་ལས་ཡི་དྭགས་སུ་འགྲོ་བར་བཤད་དོ། །ཆུའི་ལམ་ནས་འཕོས་ན་དུད་འགྲོར་འགྱུར་རོ། །འོག་སྒོ་ལས་ནི་དམྱལ་བ་བརྒྱད་དེ། །ཡང་སོས་ནས་མནར་མེད་པའི་བར་གྱི་དམྱལ་བ་རྣམས་སོ། །དེ་ནས་བར་དོ་འབྱུང་བ་ཡིན་ཏེ། དེའི་ཚུལ་ཡང་སྡོམ་འབྱུང་ལས། ཐོག་མེད་དུས་ཀྱི་ཉོན་མོངས་ཀྱི། །བག་ཆགས་རབ་ཏུ་བསགས་བྱས་པས། །དེ་ཕྱིར་སྔོན་བྱས་ལས་ཀྱི་ནི། །སྐྱེ་དང་འཆི་བ་ཡང་དག་འབྱུང་། །ཚོགས་པ་མ་རྙེད་དེ་སྲིད་དུ། །ཞག་བདུན་བར་དོའི་སྲིད་པར་གནས། །སྲིད་པ་བར་དོའི་སེམས་ཅན་ནི། །འགྲོན་པོ་བགྲོད་པ་ཇི་བཞིན་དུ། །འདི་ལྟར་ལས་ཀྱི་ཞགས་པ་ཡིས། །འགྲོ་བ་དྲུག་ཏུ་རབ་ཏུ་སྐྱེ། །ཞེས་བྱ་བ་གསུངས་ཏེ་བར་དོའི་ཚུལ་འདི་ནི་ཁོ་བོས་དྲན་པ་ཉེ་བར་བཞག་པ་དང་ཆོས་དྲུག་གི་བར་དོའི་སྐབས་སུ་ཞིབ་ཏུ་བཤད་ཡོད་པས་འདིར་མ་སྤྲོས་སོ། །འཇུག་བསྡུ་བ་ནི་ཚིགས་སུ་བཅད་པ་གཉིས་ཏེ། དེ་ལྟར་འཆི་བ་དང་སྐྱེ་བའི་རིམ་པ་ཇི་སྙེད་པའི་འཚམས་སྦྱོར་བར་བྱེད་པའི་བར་དོ་དང་བཅས་པ་ཤེས་པ་དང་མ་ཤེས་པའི་ཚུལ་གྱིས་བཅིངས་པ་དང་གྲོལ་བ་བསྟན་པར་འདོད་ནས། །དེ་ནས་བར་དོ་འབྱུང་བ་ཡིན། །སྣང་མཆེད་ཐོབ་གསུམ་ཐིམ་པ་ནི། །ཞེས་བྱ་བ་སྔར་བསྟན་པའི་ལུས་ཀྱི་རྩ་རླུང་བྱང་ཆུབ་ཀྱི་སེམས་སྡུད་རིམས་དེ་ཇི་ལྟ་བ་བཞིན་དུ་བརྟེན་པའི་རྣམ་པར་ཤེས་པའི་ཚོགས་དྲུག་ཀྱང་སྡུད་པས་གཟུགས་སྒྲ་དྲི་རོ་རེག་བྱ་ཆོས་རྣམས་ཐིམ་པ་ནི་སྣང་བ་ཐིམ་པ་ཞེས་བྱ་སྟེ་སྤྲུལ་པའི་སྐུ་བསྡུས་པའོ། །ཡིད་དང་རྣམ་པར་རྟོག་པ་ཐིམ་པ་ནི་མཆེད་པ་ཐིམ་པ་ཞེས་བྱ་སྟེ་སྐྱེ་བའི་རྣམ་པར་ཤེས་པ་ཐིམ་པས་ལོངས་སྤྱོད་རྫོགས་པ་སྡུད་པའོ། །ཀུན་གཞིའི་རྣམ་པར་ཤེས་པ་འོད་གསལ་བའི་རང་བཞིན་དུ་སྦྱོར་བ་ན་ཐོབ་པ་ཐིམ་པ་ཞེས་བྱ་སྟེ་ཀུན་གཞི་ཐིམ་ནས་འོད་གསལ་བ་ཐོབ་པའི་ཕྱིར་རོ། །དེ་ལྟར་ཡིན་ཀྱང་མ་ཤེས་པའི་ཕྱིར། །སྐུ་གསུམ་རང་བཞིན་ཉིད་མ་ཤེས། །འོད་གསལ་སྣང་དང་མུན་པ་ཡི། །ཞེས་བྱ་བ་འོད་གསལ་བའི་རང་བཞིན་སངས་རྒྱས་ཀྱི་སྙིང་པོ་དེ་ནི ་སྣང་བ་ཞེས་བྱའོ། །དེ་ལ་སྒྲིབ་པའི་མ་རིག་པ་བག་ཆགས་དེ་ནི་མུན་པ་ཞེས་བྱའོ། །སྟོང་པ་ནི་ཚོགས་དྲུག་ཡུལ་དང་བཅས་པ་བདེན་པ་མེད་པའི་ཕྱིར་དང་སྟོང་པ་ཆེན་པོ་ནི་དེའི་རྩ་བ་ཀུན་གཞི་ལ་གནས་པའི་ཡིད་ཀྱི་འདུ་བྱེད་བདེན་པ་མེད་པའི་ཕྱིར་དང་། རྣམས་ཞེས་བྱ་བ་ཤིན་ཏུ་སྟོང་པ་ཆེན་པོ་ཀུན་གཞི་ཉིད་མི་བདེན་པ་མིག་ཡོར་དང་མཚུངས་པའི་ཕྱིར་དང་། དེ་ལྟར་ངོ་བོ་ཉིད་རྣམ་པར་འབྱེད་པ་ཅན་གྱི་རྟེན་ཅིང་འབྲེལ་བར་འབྱུང་བ་མ་རྟོགས་པར་འཁོར་བའི་འཁོར་ལོར་འཁྱམས་ལ། །དེ་ཉིད་སྦྱངས་པས་ཡེ་ཤེས་ཏེ། །རྣམ་པར་དག་ན་མྱ་ངན་འདས། །ཞེས་བྱ་བ་ནི་སྔར་རྒྱས་པར་བསྟན་པ་ཡིན་ནོ། །འདི་ཡན་ཆོད་ཀྱིས་གཞི་དང་ལམ་དང་འབྲས་བུའི་སྦྱང་གཞི་དང་སྦྱོང་བྱེད་ཀྱི་ཚུལ་མ་ལུས་པ་ཐམས་ཅད་རྒྱུད་སྡེ་རྣམས་ལས་ཇི་ལྟར་གསུངས་པའི་དོན་བསྡུས་ཏེ་རྣམ་པར་ཕྱེ་བ་ཡིན་ནོ། །ད་ནི་དེ་ཐམས་ཅད་ཀྱི་དོན་བསྡུས་ཏེ་བསྟན་ཅིང་རིག་པ་འཛིན་པའི་སྡེ་སྣོད་ཀྱི་རྒྱུ་མཚན་རྟོགས་པར་བྱ་བ་དང་། བསྔོ་བ་སྨོན་ལམ་དང་བཅས་པ་ལ་དྲུག་སྟེ། སྤྱིའི་དོན་བསྡུ་བ་དང་། སྡེ་སྣོད་གསུམ་སོ་སོ་དང་སྦྱར་བ་དང་། བྱེ་བྲག་ཏུ་སྔགས་ཀྱི་ཚུལ་ཤེས་པའི་དགོས་པ་དང་། འབྲས་བུའི་རང་བཞིན་བསྡུ་བ་དང་། འདི་གང་ལས་རྙེད་པ་དང་། བཅོམ་ལྡན་འདས་ཀྱི་འཕྲིན་ལས་ལ་གུས་པས་བསྟོད་ཅིང་བསྔོ་བ་སྨོན་ལམ་དང་བཅས་པའོ། །དང་པོ་ནི་ཚིགས་སུ་བཅད་པ་གཉིས་སྟེ། གོང་དུ་གསུངས་པའི་རིམ་པ་འདི་རྣམས་རྒྱལ་བ་ཐམས་ཅད་མཁྱེན་པས་བྱ་སྤྱོད་རྣལ་འབྱོར་བླ་ན་མེད་པའི་རྒྱུད་ཐམས་ཅད་དུ་ཕྱི་རོལ་དུ་ཐུན་མོང་བ་ལྟ་བུའི་རྣམ་པར་རིག་བྱེད་ལ་སྣང་བའི་འཇིག་རྟེན་གྱི་ཁམས་དང་། ནང་དུ་རྡོ་རྗེའི་ལུས་ཀྱི་རྩ་རླུང་ཐིག་ལེ་དང་གཞན་དུ་ཀུན་བརྟགས་པའི་དཀྱིལ་འཁོར་གྱི་འཁོར་ལོའི་ལྷ་དང་སྔགས་ལ་སོགས་པ་གསུངས་པ་ཐམས་ཅད་ཉོན་མོངས་པ་དང་ཤེས་བྱའི་དྲི་མ་དང་བཅས་པའི་རྟོག་པས་ཇི་སྲིད་དུ་སྦགས་ཀྱི་བར་ལ་སྦྱང་གཞི་དང་དྲི་མ་མེད་པ་ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་རྣམ་པ་གཉིས་སུ་གྱུར་བས་འབྲས་བུ་མཐར་ཐུག་པར་གསུངས་ཏེ། ཐམས་ཅད་ཀྱང་དོན་དམ་དང་ཀུན་རྫོབ་ཀྱི་བདེན་པ་ལ་བརྟེན་པ་མིང་ཚིག་ཡི་གེ་ལ་སོགས་པའི་སྤྲོས་པ་དུ་མས་བརྒྱན་པ་དང་བཟུང་འཛིན་གྱི་མཚན་མ་ཐམས་ཅད་མེད་པའི་སྤྲོས་བྲལ་གྱི་གནས་ལུགས་གསུངས་པ་རྣམས་ལ་སེམས་ཅན་གྱི་རྟོག་པ་ཐ་དད་པས་མིང་གི་རྣམ་གྲངས་དུ་མས་གསུངས་ཏེ། དེ་ཡང་མདོ་སྡེ་རྒྱན་ལས། སངས་རྒྱས་རྣམས་ཀྱིས་སེམས་ཅན་ལ། །ཕན་གདགས་ཕྱིར་ན་མཚན་གཞི་དང་། །མཚན་ཉིད་དང་ནི་མཚོན་པ་དག །རབ་ཏུ་དབྱེ་བས་ཡང་དག་བཤད། །ཅེས་གསུངས་སོ། །དེའི་ཕྱིར་སྡེ་སྣོད་གསུམ་སོ་སོ་དང་སྦྱར་ནས་བཤད་པ་ལ་གསུམ་སྟེ། དང་པོ་མངོན་པ་ལ་ཡང་ཕྱི་ནང་གཉིས་སྟེ། ཕྱིའི་མངོན་པ་ནི་ཚིགས་སུ་བཅད་པ་ཕྱེད་དང་གཉིས་སྟེ། དེ་ཡང་སེམས་ཅན་ལྟ་བ་ཐ་དད་པར་ལྷུང་བ་དག་དྲང་པའི་ཕྱིར་ཕྱི་རོལ་གྱི་བྱེད་པ་པོ་གཞན་ན་མེད་པར་བསྟན་པ་དང་རྟེན་ཅིང་འབྲེལ་བར་འབྱུང་བའི་སྣང་བ་ལུས་དང་སེམས་དང་ཕྱི་རོལ་གྱི་ཁམས་ལ་སོགས་པའི་སྣང་བ་སེམས་དང་སེམས་ལས་བྱུང་བའི་ཆོས་སྤང་བྱ་དང་གཉེན་པོའི་རྣམ་པར་བཞག་པ་དང་དེའི་ཡན་ལག་དུ། རྟོག་པས་ལྡན་མིན་འདུ་བྱེད་ཀྱི། །སྣོད་བཅུད་ཕྲ་རགས་མིང་ཚིག་དང་། །ཡི་གེ་ཕྱོགས་དུས་ལ་སོགས་པ། །གསུངས་པ་ཕྱི་རོལ་མངོན་པ་སྟེ། ཇི་ལྟར་ཀུན་ལས་བཏུས་དང་མཛོད་ལ་སོགས་པ་གསུངས་པ་བཞིན་དུ་ཡིན་ནོ། །ནང་གི་མངོན་པའི་ཚུལ་བཤད་པ་ལ་ཚིགས་སུ་བཅད་པ་ཕྱེད་དང་བཞི་སྟེ། དེ་ཡང་ཇི་ལྟར་ཕྱི་རོལ་ན་ཡོད་པ་བཞིན་དུ་ནང་དང་སྦྱར་ནས་བཤད་པ་ནི། ཇི་ལྟར་ཕྱི་བཞིན་ནང་ན་གནས། །རྩ་དང་ལུས་དབྱིབས་འཇིག་རྟེན་ལ། །རླུང་གིས་དག་དུས་ཡི་གེ་བསྐྱེད། །ཐིག་ལེས་གཟའ་དང་རྒྱུ་སྐར་དང་། །ཆུ་བོ་མེ་སོགས་ངེས་པ་བསྟན། །ཞེས་སྨོས་པ་རྣམས་ནི་སྔར་ནང་ལ་སྦྱར་བའི་སྐབས་སུ་བཤད་པ་ལྟར་ཤེས་པར་བྱ་བ་དང་། གཞན་ཡང་ཐབས་མཁས་པའི་ཁྱད་པར་བསྟན་པ་ནི་ཇི་ལྟར་འཇིག་རྟེན་ན་མིག་གཙུམ་ན་གཟུགས་མི་མཐོང་པ་མངོན་སུམ་དུ་གྲུབ་ལ། མིག་ཕྱེ་བས་ནི་ཟླ་བ་ལ་སོགས་པ་གཟུགས་ཀྱི་རྣམ་པ་སྣང་བར་འགྱུར་བ་དང་མིག་བཙིར་ན་ཟླ་བ་གཉིས་སུ་སྣང་བའི་དཔེ་དེ་བཞིན་དུ་ཡང་དག་པའི་ལམ་དུ་འཇུག་པར་འདོད་པའི་སེམས་ཅན་རྣམས་ཀྱང་ཕྱི་རོལ་གྱི་མངོན་པར་གསུངས་པའི་སྤང་གཉེན་གྱི་ཚུལ་རྐྱང་པ་ཤེས་ཀྱང་། རྟེན་རྩ་རླུང་བྱང་ཆུབ་ཀྱི་སེམས་ཀྱི་གནད་འཆིང་བ་མ་ཤེས་པས་སྲིད་ཞི་དབྱེར་མེད་ལ་དབང་བྱེད་པའི་ཡེ་ཤེས་མཐོང་བ་མ་ཡིན་ལ། རྟེན་རྩ་རླུང་བྱང་ཆུབ་ཀྱི་སེམས་ཀྱི་གནད་ཤེས་ཤིང་བཅིངས་ན་རྟགས་བཅུ་དང་བདེ་གསལ་མི་རྟོག་པའི་ཡོན་ཏན་སྣང་སྟོང་དབྱེར་མེད་ཀྱི་ལམ་གྱི་ཡེ་ཤེས་མངོན་སུམ་དུ་མཐོང་བར་འགྱུར་ཏེ་དེ་ནི་མིག་བཙུམ་པ་དང་ཕྱེ་བའི་ཁྱད་པར་ལྟ་བུ་ཡིན་ནོ། །གཞན་ཡང་སྔགས་ལས་གསུངས་པའི་བསྐྱེད་རིམ་ཡན་ལག་དང་བཅས་པའི་དོན་ཡང་སེམས་ལས་དོན་གཞན་པ་ཕྱི་རོལ་ན་གྲུབ་པ་མེད་ཀྱང་གཞན་སྣང་ལ་དབང་འབྱོར་བའི་སྤྲུལ་པ་དུ་མ་སྤྲོ་བར་ནུས་པའི་ཕྱིར་ཀུན་བརྟགས་ཀྱི་ལྷ་དང་དཀྱིལ་འཁོར་བསྟན་པའི་རྒྱུ་མཚན་ཡང་དེ་ཡིན་ལ། འདི་ནི་མིག་བཙིར་བས་ཟླ་བ་གཉིས་སུ་སྣང་བ་ལྟ་བུ་སྟེ་བདེན་པ་མེད་བཞིན་དུ་མཚུངས་པར་སྣང་བ་ཡིན་ནོ། །དེའི་ཕྱིར་སྔགས་ཀྱི་གཞུང་ཐམས་ཅད་ནི་ནང་གི་དོན་གྱི་མངོན་པ་ཡིན་པར་བསྟན་ཏོ། །ཇི་ལྟར་མདོ་སྡེ་ཡིན་པའི་ཚུལ་བཤད་པ་ནི་ཚིགས་བཅད་ཕྱེད་དང་གཉིས་ཏེ། ཇི་ལྟར་བཅོམ་ལྡན་འདས་ཀྱིས་མདོ་སྡེ་ལས་གསུངས་པ་ལྟར། འདིར་ཡང་གཞན་དུ་བཤད་པའི་ལྷ་དང་དཀྱིལ་འཁོར་ལ་སོགས་པ་ཡང་ནང་གི་གནས་ལ་སོགས་པའི་ས་བཅུ་དང་ལམ་ལྔ་དང་ཕ་རོལ་ཏུ་ཕྱིན་པ་བཅུ་དང་། གཟུངས་སྔགས་དང་གསང་སྔགས་དང་རིགས་སྔགས་དང་ལྷ་དང་ལམ་གྱི་རིམ་པར་གསུངས་པའི་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་སོ་བདུན་དང་། བསྐྱེད་རྫོགས་ཀྱི་ཡན་ལག་ལ་ཟད་པར་དང་ཟིལ་གྱིས་གནོན་པ་ལ་སོགས་པ་རང་དང་གཞན་གྱི་དོན་གྲུབ་པའི་ཏིང་ངེ་འཛིན་དང་འབྲེལ་བའི་ཕྱིར་ཟབ་པ་དང་རྒྱ་ཆེ་བ་དུ་མ་སྟོན་པར་བྱེད་པའི་རྒྱུ་མཚན་དེའི་ཕྱིར་ན་སྔགས་ཀྱི་ཐེག་པ་འདི་ནི་ནང་གི་མདོ་སྡེ་དང་ཕ་རོལ་ཏུ་ཕྱིན་པར་བརྗོད་དོ། །སྔགས་ཀྱི་ཐེག་པ་ཇི་ལྟར་འདུལ་བའི་དོན་ཡིན་པ་བཤད་པ་ནི་ཚིགས་བཅད་ཕྱེད་དང་གཉིས་སྟེ། དེ་ཡང་ཇི་སྐད་དུ་བཅོམ་ལྡན་འདས་ཀྱིས་འདུལ་བའི་མདོ་ལས་གསུངས་པ་བཞིན་ཕྱི་རོལ་གྱི་ལུས་ངག་གི་སྲུང་སྡོམ་དང་། རང་བཞིན་དང་བཅས་པའི་ཁ་ན་མ་ཐོ་བ་སྤོང་བའི་ཚུལ་ཁྲིམས་དང་ལྡན་ཅིང་རང་གི་ཞི་བ་མངོན་སུམ་བྱེད་པའི་འདུལ་བ་ནི་ཕྱིའི་འདུལ་བ་ཡིན་ལ། ནང་དུ་རང་དང་གཞན་གྱི་དོན་ལ་མ་རྨོངས་པར་ཀུན་རྫོབ་དོན་དམ་དང་རྟེན་དང་བརྟེན་པའི་བྱང་ཆུབ་ཀྱི་སེམས་བསྐྱེད་ནས་སྡོམ་པའི་ཚུལ་ཁྲིམས་ཐབས་མཁས་པའི་ཁྱད་པར་དང་བཅས་པས་ཉོན་མོངས་པའི་ཚོགས་ཇི་སྙེད་པ་ཐམས་ཅད་ཡེ་ཤེས་སུ་སྒྱུར་བར་བྱེད་པ་དང་། ཉོན་མོངས་པའི་ཁ་ན་མ་ཐོ་བ་སེལ་བར་བྱེད་ཅིང་། འཁོར་བའི་ཉེས་པ་ནས་སེམས་ཅན་ཐམས་ཅད་སློང་བར་བྱེད་པའི་ཕྱིར་སྔགས་ཀྱི་ཐེག་པ་འདི་ནི་ནང་གི་འདུལ་བར་གསུངས་སོ། །དེ་ལྟར་སྡེ་སྣོད་གསུམ་ཐམས་ཅད་དང་མཐུན་པའི་ཕྱིར་ན་རིག་པ་འཛིན་པའི་སྡེ་སྣོད་ཞེས་བྱའོ། །བྱེ་བྲག་ཏུ་སྔགས་ཀྱི་ཚུལ་ཤེས་པའི་དགོས་པ་ལ་ཚིགས་སུ་བཅད་པ་གཉིས་ཏེ། འདུལ་དང་མདོ་སྡེ་ཕྱིར་ཤེས་པས། །ཉན་རང་འབྲས་བུ་ཐོབ་བྱེད་དེ། །ཞེས་བྱ་བ་ནི་ཐེག་པ་འོག་མའི་ཚུལ་ཤེས་པའི་དགོས་པའོ། །དེ་བས་ཀྱང་ཆེས་རྨད་དུ་བྱུང་བའི་ཟབ་པ་དང་རྒྱ་ཆེ་བའི་ཚུལ་དང་ལྡན་པ་ཐེག་པ་ཆེན་པོའི་སྡེ་སྣོད་རྣམས་ནི་ལོགས་སུ་བཤད་པས་དེ་རྣམས་ཤེས་ཤིང་བསྒྲུབས་པའི་དགོས་པ་བསྟན་པར་འདོད་ནས། །ཟབ་མོའི་མདོ་འདུལ་མངོན་པ་རྣམས། །སྤྱོད་བྱེད་བྱང་ཆུབ་སེམས་དཔར་འགྱུར། །ཞེས་སྨོས་སོ། །དེའི་སྟེང་དུ་ཡང་ཐབས་མཁས་པའི་ཁྱད་པར་གཞུང་འདི་ནས་ཇི་སྐད་དུ་གསུངས་པ་ལྟ་བུའི་ནང་དོན་རྒྱས་པར་ཤེས་ཤིང་སངས་རྒྱས་ཀྱི་སྙིང་པོའི་ཚུལ་རྟོགས་ནས་འབྲས་བུ་རྟོགས་པ་ལམ་དུ་བྱེད་པ་ནི་བླ་ན་མེད་པའི་སངས་རྒྱས་མྱུར་དུ་ཐོབ་པར་བྱེད་པའི་དགོས་པ་དང་ལྡན་པས་དེའི་ཕྱིར་རྡོ་རྗེའི་ཐེག་པའི་སྔགས་ཀྱི་ཚུལ་རྒྱུད་ཐམས་ཅད་ལས་གསུངས་པ་གོ་བར་བྱ་བའི་དོན་དུ་ཟབ་མོའི་དོན་ཉེ་བར་མཚོན་པའི་མིང་དང་ཚིག་གི་རྣམ་གྲངས་རྣམས་འདིར་བསྡུས་ཏེ་བསྟན་པ་ཡིན་ནོ། །འབྲས་བུའི་ཚུལ་ཡོངས་སུ་བསྡུ་བ་བསྟན་པ་ནི་ཚིགས་སུ་བཅད་པ་བཞི་སྟེ། ཐོག་མར་ལྷན་ཅིག་སྐྱེས་པའི་ཡེ་ཤེས་རང་གི་ངོ་བོ་བསྟན་པའི་ཕྱིར། །ཐམས་ཅད་ཡེ་ཤེས་རང་བཞིན་ཏེ། །ཞེས་པ་སྔར་གོང་དུ་རྒྱས་པར་བཤད་པ་བཞིན་དབང་པོའི་མངོན་སུམ་དང་། ཡིད་ཀྱི་མངོན་སུམ་དང་། རང་རིག་མངོན་སུམ་རྣམས་ཡང་དག་པའི་རྣལ་འབྱོར་གྱིས་ཟིན་པའི་དུས་ན་ཐམས་ཅད་ཀྱང་རྣལ་འབྱོར་མངོན་སུམ་ལྷན་ཅིག་སྐྱེས་པའི་ཡེ་ཤེས་ཀྱི་རང་ངོ་ཡིན་ལ་དེའི་ཚེ་ཤེས་པར་བྱ་བ་དང་ཤེས་པར་བྱེད་པའི་རྣམ་པ་ཇི་སྙེད་པ་ཐམས་ཅད་ཡང་དག་པའི་ལྟ་བས་ཟིན་པས་རྒྱུ་འབྲས་སོ་སོར་རྟོག་པའི་ཡེ་ཤེས་དང་། རང་གི་ངོ་བོས་སྟོང་པའི་ཡེ་ཤེས་དང་དེ་ལ་དབང་ཐོབ་པས་དེའི་མཐུ་སྟོན་པར་བྱེད་པའི་བྱ་བ་གྲུབ་པ་དང་། ཐམས་ཅད་ཀྱང་མཉམ་པ་ཉིད་དུ་གནས་པས་མཉམ་པ་ཉིད་དང་དེ་བཞིན་ཉིད་ལས་གཡོས་པ་མེད་པའི་ཚུལ་འདི་ཐམས་ཅད་ལ་བཞུགས་པའི་ཕྱིར། རྫུན་མེད་བསླུ་མེད་ཆོས་ཉིད་དང་། །རྣམ་ཀུན་མངོན་པར་བྱང་ཆུབ་དང་། །དྲི་མ་བག་ཆགས་བཅས་སྤངས་པ། །སངས་རྒྱས་མྱ་ངན་འདས་པ་ནི། །དམ་པའི་དོན་དུ་གཉིས་མེད་ཉིད། །ཞེས་པའི་དོན་དང་མཐུན་པར་ཐམས་ཅད་ཡེ་ཤེས་ཀྱི་རང་བཞིན་ཡིན་ནོ། །འོ་ན་ཡེ་ཤེས་དེའི་སྒྲིབ་པ་གང་ནས་བྱུང་ཞེ་ན། དེ་སྒྲིབ་འཁྲུལ་རྟོག་བཟུང་འཛིན་གྱི། །ཤེས་པ་བློ་བུར་བར་སྐྱེས་ནས། །ཞེས་པ་སྔར་ཉོན་མོངས་པ་ཅན་གྱི་ཡིད་གང་ནས་བྱུང་བ་བསྟན་པ་ལྟར་ཐམས་ཅད་ཀྱི་རྩ་བ་ང་དང་བདག་ཏུ་ལྟ་བ་ལས་བྱུང་སྟེ་དཔལ་ཆོས་ཀྱི་གྲགས་པས། །བདག་ཡོད་ན་ནི་གཞན་དུ་ཤེས། བདག་གཞན་ཆ་ལས་འཛིན་དང་སྡང་། །འདི་དག་དང་ནི་ཀུན་འབྲེལ་བས། །ཉེས་པ་ཐམས་ཅད་འབྱུང་བར་གྱུར། །ཞེས་གསུངས་པ་བཞིན་དུ་འདུ་བྱེད་ཀྱིས་མངོན་པར་འདུ་བྱས་ནས་ཡང་དག་པའི་གནས་ལུགས་ཇི་ལྟར་བཞིན་དུ་མ་མཐོང་ཞིང་དེ་མ་ཡིན་པ་ལ་དེར་འཛིན་པས་འཁྲུལ་པར་གྱུར་ཏེ། སྨིག་སྒྱུ་ལ་ཆུར་འཁྲུལ་པ་བཞིན་དུ་གྱུར་པས་དེའི་ཕྱིར་ན། །ཡོད་པ་མ་མཐོང་མེད་པ་མཐོང་། །རྣམ་རྟོག་འདམ་དུ་བྱིང་གྱུར་བས། །བྱིས་པ་འཁོར་བའི་ནང་དུ་བྱིང་། །ཞེས་སྨོས་པ་ཡིན་ནོ། །རྒྱུ་མཚན་དེའི་ཕྱིར་བཟུང་འཛིན་གྱི་འཁྲུལ་པ་རྣམས་བྲལ་ན། ཕྱི་ནང་གཞན་གསུམ་ཡེ་ཤེས་སུ། སྔར་བསྟན་པ་ལྟར་རྟོགས་པས་སངས་རྒྱས་རང་བཞིན་ཏེ། དེ་ཡང་སྔར་བདེན་པ་གཉིས་ཀྱི་སྐབས་སུ་ཇི་སྐད་བཤད་པ་བཞིན་དུ། །ཀུན་རྫོབ་གཉིས་སུ་སྣང་བ་རྣམས། །ཆུ་ཟླ་ལྟ་བུར་དོན་དུ་གཟིགས། །དོན་དམ་སྟོང་ཉིད་བཅོ་བརྒྱད་པོ། །དབྱེར་མེད་གཅིག་དུ་བདེན་གཟིགས་པས། །ཞེས་བསྟན་ཏོ་དེ་ལྟར་རྟོགས་པའི་རྒྱུ་མཚན་གྱིས། ཉོན་མོངས་ཤེས་བྱ་སྙོམས་འཇུག་གི །སྒྲིབ་གསུམ་དང་བྲལ། ཞེས་བྱ་བ་སྨོས་ཏེ་འདིའི་ངོ་བོ་ཡང་རྒྱུད་བླ་མ་ལས། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཞེས་གསུངས་པས་དེ་ལྟ་བུའི་སྙོམས་འཇུག་གི་སྒྲིབ་པ་དག་ནས་བདེན་པ་གཉིས་ཀྱི་གནས་ལུགས་ཇི་ལྟ་བ་བཞིན་དུ་སོ་སོ་རང་གིས་རིག་པ་དེ་ཉིད་ཇི་ལྟ་བ་དང་ཇི་སྙེད་པའི་ཡེ་ཤེས་སུ་གསུངས་ཏེ། དེ་ཡང་རྒྱུད་བླ་མ་ལས། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་ལྡན་པ་ཉིད། །འགྲོ་བ་ཞི་བའི་ཆོས་ཉིད་དུ། །གཟིགས་ཕྱིར་ཇི་ལྟ་ཉིད་དེ་ཡང་། །རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཤེས་བྱ་མཐར་ཐུག་རྟོགས་པའི་བློས། །ཐམས་ཅད་མཁྱེན་པའི་ཆོས་ཉིད་ནི། །སེམས་ཅན་ཐམས་ཅད་ལ་ཡོད་པ། །མཐོང་ཕྱིར་ཇི་སྙེད་ཡོད་པ་ཉིད། །དེ་ལྟར་རྟོགས་པ་གང་ཡིན་དེ། །སོ་སོ་རང་ཤེས་མཐོང་བའི་ཕྱིར། །དྲི་མེད་དབྱིངས་ལ་ཆགས་མེད་དང་། །ཐོགས་མེད་ཕྱིར་ཏེ་དག་པ་ཉིད། །ཞེས་གསུངས་ཏེ། འདི་ལྟར་རྟོགས་ན་སྔགས་ཀྱི་འབྲས་བུ་མཐར་ཐུག་པ་ཉིད་རྟོགས་པར་འགྱུར་བ་ཡིན་ནོ། །བསྟན་ཆོས་འདི་གང་ལས་རྙེད་པ་ནི་ཚིགས་སུ་བཅད་པ་བཞི་སྟེ། གོང་དུ་བསྟན་པའི་རྒྱུ་མཚན་དེས་ན། རྡོ་རྗེའི་ཐེག་པ་འདིར། གསུངས་པའི་གནས་ལུགས་རྟོགས་བྱའི་ཕྱིར། །འདིར་ནི་ཕྱོགས་ཙམ་བསྡུས་པ་ཡིན། །ཞེས་བྱ་བ་ནི་དཔག་དུ་མེད་པའི་རྡོ་རྗེ་ཐེག་པའི་ཚིག་དོན་རྣམས་ལ་འདིར་གལ་ཆེ་བ་དག་བསྡུས་པ་ཡིན་ནོ། །བློ་རྒྱ་ཆེ་བ་དག་གིས་ཕྱི་ནང་གཞན་གསུམ་གྱི་ཤེས་བྱའི་དཀྱིལ་འཁོར་རྣམས་ལ་འཇུག་པར་བྱ་བ་ནི་རྒྱས་པར་བསྟན་པ་དཔག་མེད་ཀྱང་། རྒྱལ་སྲས་རྣམས་ཀྱི་བསྟན་པ་ཡི། རྒྱུད་འགྲེལ་རྣམས་ལ་ལྟ་བར་གྱིས། །ཞེས་སྨོས་ནས་དེ་དག་ལ་ལྟ་བར་བྱེད་པ་ལ་ཡང་གཞུང་འདི་ལྟ་བུ་དགོས་པས་དེ་རྣམས་ཀུན་ལ་འཇུག་པའི་སྒོ་ནི་འདི་ཡིན་ནོ། །འོ་ན་འདི་ཁྱོད་རང་གིས་དྲན་པ་བྲིས་སམ་ཞེ་ན། དེ་ལྟ་མ་ཡིན་ཏེ་ཐམས་ཅད་མཁྱེན་པས་གསུངས་པའི་བླ་ན་མེད་པའི་རྒྱུད་ཀྱི་དོན་ཁོ་ན་བསྡུས་པ་ཡིན་ཏེ། དེས་ན། ཟབ་མོ་ནང་གི་དོན་བཤད་པ། འདི་ནི་རང་བཟོ་མ་ཡིན་ཏེ། ཐམས་ཅད་མཁྱེན་པ་བཅོམ་ལྡན་འདས། །རྒྱལ་བས་གསུངས་པ་ཁོ་ན་བྲིས། །ཞེས་སྨོས་སོ་འོ་ན་རྒྱལ་བས་གསུངས་པའི་རྒྱུད་རྣམས་མཐའ་དྲུག་ལ་སོགས་པའི་དབུས་སུ་ཆུད་པ་ཤིན་ཏུ་གོ་དཀའ་བ་མ་ཡིན་ནམ་ཞེ་ན། དེ་ལྟ་ཡིན་མོད་ཀྱིས་ཀྱང་། །གསང་བའི་བདག་པོ་མཁས་རྣམས་ཀྱི། །རྣམ་འགྲེལ་མཐུ་ལ་རབ་བརྟེན་ནས། །རྡོ་རྗེ་ཐེག་པའི་ནང་གི་དོན། །ཕྱིན་ཅི་མ་ལོག་རྙེད་པ་ཡིན། །ཞེས་བྱ་བ་སྨོས་ཏེ། གསང་བ་པའི་བདག་པོ་ཆེན་པོ་སྡུད་པར་བྱེད་པའི་བྱང་ཆུབ་སེམས་དཔའ་དང་། འཇམ་པའི་དབྱངས་དང་། སྤྱན་རས་གཟིགས་དབང་ཕྱུག་ལ་སོགས་པ་རྣམས་ཀྱི་རྒྱུད་ཀྱི་འགྲེལ་པ་དང་། སློབ་དཔོན་ཆེན་པོ་འཕགས་པ་ཀླུ་གྲུབ་ཡབ་སྲས་རྣམས་དང་། དཔལ་ས་ར་ཧ་པ་དང་། མཚོ་སྐྱེས་རྡོ་རྗེ་ལ་སོགས་པ་རྣལ་འབྱོར་གྱི་དབང་ཕྱུག་ཆེན་པོ་བརྒྱད་དང་། མཁས་པ་ཆེན་པོ་ཤན་ཏི་པ་དང་དུས་འཁོར་ཞབས་དང་དཔལ་ཏཻ་ལོ་པ་ཆེན་པོ་དང་ནཱ་རོ་དང་མཻ་ཏྲི་ལ་སོགས་པ་ཕྱིས་བྱོན་པའི་མཁས་ལ་གྲུབ་པ་ཐོབ་པ་ཆེན་པོ་རྣམས་དང་ཡང་དག་པར་རྡོ་རྗེ་ཐེག་པའི་དེ་ཁོ་ན་ཉིད་གཟིགས་པའི་བླ་མ་དམ་པ་ཉིད་རྣམས་ཀྱི་རྣམ་འགྲེལ་གྱི་མཐུ་ལ་རྟེན་ནས་བློ་གྲོས་ཀྱི་མིག་གིས་མཐོང་ཞིང་རྙེད་པ་ཡིན་ཏེ། རང་བཟོར་བཤད་པ་མ་ཡིན་ནོ། །བཅོམ་ལྡན་འདས་ཀྱི་འཕྲིན་ལས་ལ་གུས་པས་བསྟོད་ཅིང་བསྔོ་བ་སྨོན་ལམ་དང་བཅས་པ་ལ་གསུམ་སྟེ། བསྟོད་པ་དང་། བསྔོ་བ་དང་། བཟོད་པར་གསོལ་བའོ། །དང་པོ་ནི། རྒྱལ་བ་ནམ་མཁའི་སྐུ་ཅན་ཡེ་ཤེས་ཉི་མའི་དཀྱིལ་འཁོར་ལས། །ཕྱོགས་བཅུའི་འཇིག་རྟེན་ཀུན་ཏུ་གཟུགས་སྐུ་འཁོར་བ་ཇི་སྲིད་སྟོན། །ལྷ་ཡི་རྔ་སྒྲ་ལྟ་བུའི་གསུང་ནི་འདུ་མི་མཛད་པར་ཡང་། །ནམ་མཁའི་ཁམས་མཉམ་འབད་མེད་འགྲོ་བ་ཀུན་གྱིས་ཐོབ་པར་མཛད། །ཐུགས་ནི་ཡིད་བཞིན་ནོར་ལྟར་འབད་མེད་ཡེ་ཤེས་ལྷན་ཅིག་ཏུ། །སྤྲོས་པ་མི་མངའ་སྤྲོས་ལྡན་རྣམས་ལ་ཡིད་བཞིན་རེ་བ་སྐོང་། །སེམས་ཅན་ཉོན་མོངས་ལྷན་ཅིག་འཇུག་ཀྱང་ཁྱོད་ལ་གོས་པ་མེད། །དེ་ཕྱིར་རང་བྱུང་རྒྱལ་བ་ཁྱོད་ལ་བདག་ནི་གུས་པས་ཕྱག་འཚལ་ལོ། །ཞེས་བྱ་བ་སྟེ་གང་གིས་རྡོ་རྗེའི་ཐེག་པ་བླ་ན་མེད་པ་བསྒྲུབས་ཤིང་མཐར་སོན་པར་བྱས་པའི་དེ་བཞིན་གཤེགས་པ་དེ་ནི་མི་མཐུན་པའི་ཕྱོགས་ལས་རྣམ་པར་རྒྱལ་བ་སྟེ་སྒྲིབ་པ་ཐམས་ཅད་ལས་གྲོལ་བའོ། །དེའི་སྐུ་དེ་ནི་ནམ་མཁའི་སྐུ་ཅན་སྟེ་འདུས་མ་བྱས་ཤིང་ལྷུན་གྱིས་གྲུབ་པའི་རང་གི་ངོ་བོ་སེམས་ཀུན་གཞིའི་རྣམ་པར་ཤེས་པ་འགགས་ཤིང་དག་པས་སྐྱེ་བ་མེད་ཅིང་འགག་པ་མེད་པ་ཞི་བ་ཆེན་པོ་མཐར་སོན་པ་སྟེ། ཤེས་བྱའི་བུད་ཤིང་སྐམ་པོ་བསྲེགས་པའི་མེ། །ཞི་དེའི་ཚུལ་གྱིས་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བའང་མེད་ཅིང་འགག་པའང་མེད། །སེམས་འགགས་པ་དེ་སྐུ་ཡི་མངོན་སུམ་མཛད། །ཞེས་ཟླ་བ་གྲགས་པས་གསུངས་པ་ལྟ་བུ་ཡིན་ཏེ། སྦྱང་གཞི་སེམས་ཀུན་གཞིའི་རྣམ་པར་ཤེས་པ་འགགས་པས་གཉེན་པོའི་མིང་ཅན་དེ་བཞིན་གཤེགས་པའི་ཡེ་ཤེས་ཀྱི་སྐུ་མངོན་སུམ་དུ་མཛད་པ་སྟེ། དེའི་ཕྱིར་ཆོས་དབྱིངས་ཤིན་ཏུ་དྲི་མ་མེད་པ་ནི་ནམ་མཁའི་སྐུ་ཅན་ནོ། །དེའི་རྒྱུ་མཐུན་པ་རབ་ཏུ་ཟབ་པས་བསྒྲུབས་པའི་ཆོས་ཀྱི་སྐུ་ནི་ཡེ་ཤེས་བཞི་པོ་ཡིན་པའི་ཕྱིར་ཡེ་ཤེས་ཀྱི་སྐུ་དེ་ནི་དུས་ཀྱི་འཁོར་ལོ་ལས་ཉི་མའི་སྐུ་ཡང་ཡིན་པས། ཡེ་ཤེས་ཉི་མའི་དཀྱིལ་འཁོར་ལས་ཞེས་སྨོས་ཏེ་དཔེ་སྦྱར་བ་ཡང་བསྟན་པ་ཡིན་ནོ། །དེ་ལྟ་བུའི་ཡེ་ཤེས་ཀྱི་འཕྲིན་ལས་བསྟན་པ་ནི་ཕྱོགས་བཅུའི་འཇིག་རྟེན་གྱི་ཁམས་ནམ་མཁས་མཐས་ཀླས་པ་ཀུན་ཏུ་གཟུགས་ཀྱི་སྐུ་ཇི་སྙེད་པ་སྟོན་པར་མཛད་དེ། འཁོར་བའི་སེམས་ཅན་རྣམས་ཇི་སྲིད་མ་སྟོང་གྱི་བར་དུ་རྒྱུན་མི་འཆད་པར་སྟོན་ཏེ་སྐུའི་གསང་བའོ། །དེ་བཞིན་དུ་གསུང་ཡང་ལྷའི་རྔ་བོ་ཆེའི་སྒྲ་ལྟ་བུར་སེམས་ཅན་རྣམས་ཉོན་མོངས་པ་དང་སྡུག་བསྔལ་གྱི་གནས་ལས་སྐྱོབ་ཅིང་། འཇིག་རྟེན་དང་འཇིག་རྟེན་ལས་འདས་པའི་དགའ་བདེ་འཕེལ་བར་བྱེད་པའི་གསུང་ཆོས་ཀྱི་དུང་ནི་ངག་གི་རྩོལ་བའི་འདུ་མཛད་པ་མེད་པར་ཡང་ནམ་མཁའི་ཁམས་དང་མཉམ་པར་འབད་པ་མེད་པར་འགྲོ་བ་ཇི་སྙེད་པ་ཀུན་གྱིས་ཐོས་པར་མཛད་པ་ནི་གསུང་གི་གསང་བའོ། །སངས་རྒྱས་བཅོམ་ལྡན་འདས་དེའི་ཐུགས་ནི་ཡིད་བཞིན་གྱི་ནོར་བུ་རིན་པོ་ཆེ་དྲི་མ་ཐམས་ཅད་དང་བྲལ་བ་ལྟར་འབད་རྩོལ་གང་ཡང་མེད་པར་སོ་སོར་རྟོག་པ་དང་བྱ་བ་གྲུབ་པ་དང་ལྷན་ཅིག་ཏུ་སྤྲོས་པའི་མཚན་མ་ཅུང་ཟད་ཀྱང་མི་མངའ་བཞིན་དུ་སྤྲོས་པ་དང་ལྡན་པའི་རྒྱལ་བའི་སྲས་དང་ཉན་ཐོས་དང་རང་སངས་རྒྱས་དང་སོ་སོའི་སྐྱེ་བོ་རྣམས་ལ་སོ་སོའི་ཡིད་བཞིན་དུ་རེ་བ་ཐམས་ཅད་སྐོང་བར་མཛད་པ་འདི་ནི་ཐུགས་ཀྱི་གསང་བའོ། །དེ་ལྟ་བུའི་སྐུ་གསུངས་ཐུགས་གྱི་འཕྲིན་ལས་ཀྱི་ཁྱད་པར་སེམས་ཅན་གྱི་ཁམས་ཇི་སྙེད་པའི་ཉོན་མོངས་པ་ཐམས་ཅད་དང་ལྷན་ཅིག་ཏུ་འཇུག་ཅིང་མཁྱེན་ཡང་། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཁྱོད་གྱི་སྐུ་གསུང་ཐུགས་ཡེ་ཤེས་ལ་ཉེས་པའི་ཚོགས་ཀྱིས་ཅུང་ཟད་ཀྱང་གོས་པ་མེད་པར་བཞུགས་ཏེ། ཉི་མའི་འོད་ཟེར་ནི་རིན་པོ་ཆེའི་རི་དང་ས་གཞི་དང་ནགས་ཚལ་དང་མི་གཙང་པའི་ལྗན་ལྗིན་གྱི་ཁྲོད་རྣམས་སུ་ཞུགས་ཤིང་སྣང་བར་བྱེད་སྐེམས་པར་བྱེད་བསྲེག་པར་བྱེད་ཀྱང་དེ་དག་གིས་གོས་པ་མེད་པ་བཞིན་ནོ། །ཚུལ་འདི་ནི་མཚན་ཡང་དག་པར་བརྗོད་པ་ལས། ནམ་མཁའི་ལམ་ལ་རབ་གནས་པ། །ཡིད་བཞིན་ནོར་བུ་ཆེན་པོ་འཆང་། །དཔག་བསམ་ཤིང་ཆེན་རྒྱས་པ་སྟེ། །བུམ་པ་བཟང་པོ་ཆེ་བའི་མཆོག །བྱེད་པ་སེམས་ཅན་ཀུན་དོན་བྱེད། །ཞེས་གསུངས་པ་དང་། རྒྱུད་བླ་མ་ལས་ཀྱང་། ངོ་བོ་ཉིད་སྐུ་མཚན་ཉིད་ལྔ། །མདོར་ན་ཡོན་ཏན་ལྔ་དང་ནི། །ལྡན་པ་ཉིད་དུ་ཤེས་པར་བྱ། །འདུས་མ་བྱས་ཤིང་རྣམ་དབྱེ་མེད། །མཐའ་གཉིས་དག་ནི་རྣམ་པར་སྤངས། །ཉོན་མོངས་ཤེས་བྱ་སྙོམས་འཇུག་གི། །སྒྲིབ་གསུམ་ལས་ནི་ངེས་གྲོལ་དང་། །དྲི་མེད་རྣམ་པར་རྟོག་མེད་དེ། །རྣལ་འབྱོར་རྣམས་ཀྱི་ཡུལ་ཡིན་ཕྱིར། །ཡེ་ཤེས་ཁྱབ་པ་ཉིད་ཀྱི་ཕྱིར། །རྟག་པའི་ཕྱིར་ན་འོད་གསལ་བ། །ཞེས་བྱ་བ་ལ་སོགས་པས་ཡེ་ཤེས་ཀྱི་སྐུ་རྒྱས་པར་བསྟན་པ་དང་། འཕྲིན་ལས་ཀྱང་། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་དང་། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་བྱ་བ་ལ་སོགས་པས་རྒྱ་ཆེར་གསུངས་སོ། །དེ་བཞིན་དུ་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང་། །སངས་རྒྱས་རྣམས་ཀྱི་ཆོས་ཀྱི་གནས། །སྤྱོད་པའི་འབྲས་བུར་ཡོངས་སུ་འཛིན། །གནས་ནི་ཡོངས་སུ་གྱུར་བ་དེ། །ཆོས་ཀྱི་སྐུ་ཞེས་བརྗོད་པ་ཡིན། །བག་ཆགས་ལས་གྲོལ་བསམ་མི་ཁྱབ། །འཁོར་བའི་བག་ཆགས་བསམ་དུ་ཡོད། །ཁྱོད་ནི་ཀུན་ཏུ་བསམ་མི་ཁྱབ། །གང་གིས་ཁྱོད་ནི་ཤེས་པར་ནུས། །ངག་གིས་སྤྱོད་ཡུལ་ཀུན་ལས་འདས། །དབང་པོ་ཀུན་གྱིས་སྤྱོད་ཡུལ་མིན། །ཡིད་ཀྱི་ཤེས་པས་རྟོགས་བྱ་བ། །གང་ཡང་རུང་ལ་ཕྱག་འཚལ་བསྟོད། །འདི་ནི་མྱ་ངན་འདས་པ་ཉིད། །དྲི་མ་མེད་པར་སེམས་གྱུར་པའི། །སེམས་ཅན་ཀུན་གྱི་དངོས་མེད་པ། །ངོ་བོ་དེ་ཡང་དེའི་སྤྱོད་ཡུལ། །དེ་མཐོང་བྱང་ཆུབ་སེམས་དབང་པོ། །ཤིན་ཏུ་དྲི་མེད་ཆོས་ཀྱི་སྐུ། །དྲི་མ་མེད་པའི་ཆོས་སྐུ་ལ། །ཡེ་ཤེས་རྒྱ་མཚོ་གནས་གྱུར་ནས། །སྣ་ཚོགས་ནོར་བུ་ཇི་བཞིན་དུ། །དེ་ལས་སེམས་ཅན་དོན་རྣམས་མཛད། །ཞེས་བྱ་བ་ལ་སོགས་པ་མང་དུ་གསུངས་པ་དང་། སློབ་དཔོན་ཟླ་བ་གྲགས་པའི་ཞལ་སྔ་ནས་ཀྱང་། །ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཐུབ་དབང་དུས་གཅིག་ཁོ་ནར་དེའི་རྒྱུ་མཐུན། །གཟུགས་སྐུ་གཅིག་ལ་རང་གི་ཡོན་ཏན་སྐབས། །སྔར་འགགས་གསལ་དང་དམ་ཆོས་བྱུང་ཚུལ་ནི། །མ་ལུས་ཀྱིས་བཀྲ་མཐའ་དག་སྟོན་པར་མཛད། ཞེས་བྱ་བ་ནས། །ཇི་སྲིད་འཇིག་རྟེན་མ་ལུས་མཆོག་དུ་ཞི་བ་མ་ཐོབ་དང་། །ཇི་སྲིད་ནམ་མཁའི་ཁམས་རྣམས་ཐོབ་པར་མ་གྱུར་དེ་སྲིད་དུ། །ཤེས་རབ་ཡུམ་དང་སྙིང་རྗེའི་མ་མས་བསྐྱེད་ཅིང་འཛིན་བྱེད་པས། །རྒྱལ་བ་ཁྱེད་ལ་རབ་ཏུ་ཞི་བར་འགྱུར་བ་ག་ལ་མངའ། ཞེས་བྱ་བ་ལ་སོགས་པས་རྒྱས་པར་གསུངས་ཏེ། །ལུང་འདི་རྣམས་སྨོས་པའི་དོན་ནི་སྔགས་ཀྱི་ཚུལ་དང་སློབ་དཔོན་འཕགས་པ་ཐོགས་མེད་དང་བདག་ཉིད་ཆེན་པོ་འཕགས་པ་ཀླུ་སྒྲུབ་དང་། ཟླ་བ་གྲགས་པ་ལ་སོགས་པ་རྣམས་ཀྱིས་སངས་རྒྱས་ཀྱི་འབྲས་བུ་རྣམ་པར་བཞག་པ་མི་མཐུན་ནོ་སྙམ་པའི་སྐྱེ་བོ་རྣམས་ཀྱི་ལོག་རྟོག་བསལ་བའི་དོན་དུ་སྨོས་པར་ཟད་ཀྱི་བདག་ལ་ཐེ་ཚོམ་འགའ་ཡང་མེད་དོ། །དེའི་ཕྱིར་རང་གི་སེམས་ཆོས་སྐུ་ལ་དག་པ་དང་མ་དག་པའི་ཚུལ་གྱི་གསང་འདི་མཐོང་བའི་ཕྱིར། །དེ་བཞིན་དང་སོགས་དྲི་མེད་ཅན། །རང་སེམས་དང་སོགས་གོམས་པ་ལ། །སྣང་བའི་རྫོགས་པའི་སངས་རྒྱས་ནི། །འཆག་པ་དང་ནི་བཞེངས་པ་དང་། །བཞུགས་པ་དང་ནི་གཟིམས་པ་དང་། །སྤྱོད་ལམ་སྣ་ཚོགས་མཛེས་པ་ཅན། །ཞི་བའི་ཆོས་ནི་གསུང་པ་དང་། །མི་གསུང་མཉམ་པར་བཞུགས་གྱུར་པ། །ཆོ་འཕྲུལ་རྣམ་པ་སྣ་ཚོགས་དང་། །མཛད་པ་གཟི་མདངས་ཆེན་པོ་ཅན། །སེམས་ཅན་རྣམས་ཀྱིས་མཐོང་བར་འགྱུར། །དེ་མཐོང་ནས་ཀྱང་འདོད་ལྡན་པས། །བྱང་ཆུབ་ཕྱིར་ནི་རབ་སྦྱོར་སྟེ། །དེ་རྒྱུ་ཡང་དག་བླངས་ནས་ནི། །འདོད་པའི་གོ་འཕང་ཐོབ་པར་བྱེད། །སྣང་བ་དེ་ནི་ཤིན་ཏུ་ཡང་། །རྟོག་མེད་གཡོ་བ་མེད་པ་ཉིད། །དེ་ལྟ་མོད་ཀྱི་འཇིག་རྟེན་ན། །དོན་ཆེན་བློ་ནི་ཉེར་བར་གནས། །འདི་ནི་རང་སེམས་སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །དེ་ལྟ་ན་ཡང་གཟུགས་མཐོང་དེ། །དེ་དག་ལ་ནི་དོན་ཡོད་འགྱུར། །རིམས་ཀྱིས་དེ་མཐོང་ལ་བརྟེན་ནས། །ཐེག་པ་འདི་ལ་གནས་པ་དག །ནང་གི་དམ་པའི་ཆོས་སྐུ་ནི། །ཡེ་ཤེས་མིག་གིས་མཐོང་པར་འགྱུར། །ཞེས་རྒྱུད་བླ་མ་ནས་གསུངས་པ་ལྟ་བུ་འདི་ལ་ངེས་ཤེས་སྐྱེས་པས་དེ་ཕྱིར་རང་བྱུང་རྒྱལ་བ་ཁྱོད་ལ་བདག་ནི་གུས་པས་ཕྱག་འཚལ་ལོ་ཞེས་སྨོས་པ་ཡིན་ནོ། །དེ་ལྟར་བསྟན་བཅོས་བརྩམས་པ་འདི་དག་བསྔོ་བ་ནི། ཟབ་མོའི་ནང་དོན་བཤད་པ་ལ། །དགེ་བ་མཐུ་ཡང་ཅི་ཡོད་པས། །ནམ་མཁའ་མཉམ་པའི་འགྲོ་བ་ཀུན། །ཡེ་ཤེས་སྐུ་ཉིད་ཐོབ་པར་ཤོག །ཞེས་བྱ་བ་སྟེ། རྒྱུད་ཐམས་ཅད་ཀྱི་ཟབ་མོའི་དོན་བསམ་གྱིས་མི་ཁྱབ་པའི་གནད་འདི་ལྟར་སྨོས་པ་ནི་ཡེ་ཤེས་ཀྱི་ཚོགས་ཀྱི་རྒྱུ་རྨད་དུ་བྱུང་བ་ཡིན་པའི་ཕྱིར་ན་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་ཡེ་ཤེས་ཀྱི་སྐུ་ཐོབ་པར་གྱུར་ཅིག་ཅེས་བསྔོས་པ་ཡིན་ནོ། །དེ་ལྟར་བསྟན་པར་གྱུར་པ་ལ་རྒྱུད་འགྲེལ་རྣམས་ཀྱི་དོན་ཇི་ལྟ་བར་ཕྱོགས་འཛིན་གྱི་བློ་སྤངས་ནས་རྣམ་པར་བཤད་མོད་ཀྱང་། ཚིག་གཅིག་ཙམ་དོན་དང་རྗེས་སུ་མི་མཐུན་པར་བརྗོད་ན་ཡང་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་མ་གུས་པར་འགྱུར་བའི་ཕྱིར། །ཅུང་ཟད་འགལ་བར་འགྱུར་སྲིད་ན། །མཁའ་འགྲོའི་ཚོགས་ཀྱིས་བཟོད་པར་མཛོད། །ཅེས་བཟོད་པར་གསོལ་ཞིང་དེ་ལ་ཡང་མཁའ་འགྲོའི་སྒྲ་སྨོས་པ་ནི་གསང་སྔགས་ཀྱི་བརྗོད་པའི་སྒྲ་གོ་བདེ་བའི་ཚིག་དུ་བཅོས་པ་དག་ཉེས་པར་གྱུར་ན་མི་རུང་སྟེ་ཧེ་བཛྭ་ལས། ཀྱེ་ཡི་རྡོ་རྗེའི་དབང་བསྐུར་གང་། །གསང་བའི་སྐད་གྱིས་མི་སྨྲ་ན། །དེ་ནི་དམ་ཚིག་ཉམས་པར་ནི། །འགྱུར་བ་འདི་ལ་ཐེ་ཚོམ་མེད། །ཞེས་གསུངས་པས་དམ་ཚིག་གི་ཉེས་པ་ཕྲ་ཞིང་ཕྲ་བ་དག་གིས་ཀྱང་མ་གོས་པར་བྱ་བའི་ཕྱིར་དེ་སྐད་བརྗོད་ཀྱི། མ་གོ་མ་རྟོགས་བཞིན་དུ་མཁས་པར་འདོད་པའི་ང་རྒྱལ་དང་རློམ་པས་བརྗོད་པའི་ཚིག་ཡོད་ནས་བཟོད་པར་གསོལ་བ་མ་ཡིན་ནོ། །ཚུལ་འདི་ལྟར་གཞུང་འདི་ལྟ་བ་དང་སེམས་པ་དང་འཆད་པར་བྱེད་པ་དག་གིས་ཀྱང་། ཉེས་པའི་ཚོགས་རྣམས་ཀྱིས་མ་གོས་པར་བྱའོ། །དེ་ལྟར་རྡོ་རྗེའི་ཐེག་པ་གསང་སྔགས་ཀྱི་ནང་དོན་ཟབ་མོ་གསལ་བར་བྱེད་པའི་རྣམ་པར་བཤད་པ་རྒྱུད་ཐམས་ཅད་ཀྱི་སྙིང་པོ་ཕྱུང་བ། དུམ་བུ་བཅུ་གཅིག་པ། རང་བྱུང་རྡོ་རྗེའི་མིང་ཅན་གྱིས་བླ་ན་མེད་པའི་རྒྱུད་འགྲེལ་ཇི་ལྟ་བར་ནང་གི་དོན་ཤེས་པར་འདོད་པ་རྣམས་ཀྱི་དོན་དུ་བསྟན་པའི་རྣམ་པར་བཤད་པ་བརྗོད་ཟིན་ནས། །ད་ནི་འགྲེལ་པ་ཉིད་གྱི་དོན་བསྡུ་བ་བརྗོད་པར་བྱ་སྟེ། དེ་ལྟར་ཟབ་མོ་གསང་སྔགས་ཀྱི་དོན་བཤད་པ་འདི། ཡང་དག་པའི་ལྟ་བ་བདེན་པ་གཉིས་དབྱེར་མེད་པ་ལ་རྩ་རླུང་བྱང་ཆུབ་ཀྱི་སེམས་འཆིང་བར་བྱེད་པ་ཐབས་ཀྱི་བསྒོམ་པས་བརྒྱན་པ་རང་གཞན་གྱི་དོན་འགྲུབ་པར་བྱེད་པའི་སྤྱོད་པ་ཅན། སངས་རྒྱས་ཀྱི་སྙིང་པོའི་འབྲས་བུ་མངོན་སུམ་དུ་སྣང་བར་བྱེད་པའི་ཚུལ་ལ་བརྟེན་ནས་བཤད་པ་ཡིན་པས་སྔ་རབས་ཀྱིས་ཕྱོགས་རེ་བསྒོམ་པས་རྟོགས་པ་དང་། ཚིག་ལ་དཀའ་བས་སྦྱངས་ཤིང་གཞུང་ཐ་དད་པ་མཁྱེན་པ་རྣམས་ཀྱིས། ངའི་དེ་དང་མ་མཐུན་ནོ་ཞེས་སྤོང་བར་མི་མཛད་པར་བྱང་ཆུབ་སེམས་དཔའ་དང་མཁས་གྲུབ་རྣམས་ཀྱི་གཞུང་འགྲེལ་རྣམས་དང་། ཐེག་པ་ཆེན་པོ་སྟོན་པའི་མདོ་རྒྱུད་མཐའ་དག་ལ་གཟིགས་ལ། དེ་ནས་མ་བཤད་པ་དང་རྣམ་པ་ཐམས་ཅད་ནས་འགལ་བར་འདུག་ན་དོར་བར་མཛོད་ཅིག །རྒྱལ་བ་རྣམས་ཀྱིས་རྒྱལ་བའི་སྙིང་པོ་མངོན་སུམ་སྟོན་པར་བྱེད་པ་གང་། །ཕྱི་ནང་གཞན་གསུམ་རང་གི་ངོ་བོ་ཡེ་ཤེས་རང་བཞིན་རྟོགས་བྱའི་ཕྱིར། །བྱ་སྤྱོད་རྣལ་འབྱོར་བླ་ན་མེད་པའི་རྒྱུད་ཀུན་སྣ་ཚོགས་ཐབས་ལྡན་པ། །རྡོ་རྗེའི་ཐེག་པས་འདུལ་བའི་འགྲོ་ལ་དུ་མ་བསྟན་པར་མཛད་པ་གང་། །རྒྱུད་ཀུན་ཕྱི་མ་དཔལ་ལྡན་དུས་ཀྱི་འཁོར་ལོ་ཞེས་གྲགས་འཇིག་རྟེན་དུ། །ལྷ་དང་མི་དང་ལྷ་མིན་ཚོགས་རྣམས་དབང་བསྐུར་བསྟན་པར་མཛད་པ་གང་། །འཇམ་པའི་དབྱངས་དང་པད་མ་དཀར་འཛིན་ཐུགས་རྗེའི་ཆུ་ཀླུང་ལས་འཐོན་པ། །ཉོན་མོངས་གདུང་སེལ་དག་པའི་བློ་གྲོས་པད་ཚལ་རྒྱས་པར་བྱེད་པ་གང་། །རིང་ཞིག་ལོན་ནས་གངས་ཅན་ཡུལ་དུ་མཁས་གྲུབ་རྣམས་ཀྱིས་རྩོལ་བའི་མཐུས། །བབ་པ་གང་དེ་ཀླུ་སྒྲུབ་མཚོ་སྐྱེས་ལ་སོགས་མཁས་གྲུབ་རྣམས་ཀྱིས་བཤད་པའི་ཆུ་རྒྱུན་དུ། །དབྱེར་མེད་འདྲེས་པས་འགྲོ་ལ་ཕན་བྱེད་རང་གཞན་དོན་གཉིས་བསྒྲུབ་བྱའི་ཕྱིར། །དོན་གཉེར་རྣམས་ལ་གསལ་བར་སྤྲོས་ཏེ་དིང་སང་དུས་འདིར་བྱུང་བ་ཡིན། །དེ་ལྟར་ཟབ་མོའི་ནང་དོན་ལེགས་བཤད་པས། །རྒྱལ་བའི་སྙིང་པོ་མངོན་སུམ་ངེས་པར་འགྱུར། །དལ་འབྱོར་ཐོས་པའི་ཀླུ་དབང་ལུས་རྫོགས་པས། །གཞུང་མང་ཤེས་ལྡོག་སྦྲུལ་མགོའི་གདེངས་ཀ་ཅན། །ཐ་དད་སྨྲ་བའི་ཕུ་སྒྲ་སྒྲོགས་པ་དག །རྒྱལ་བའི་གཞུང་བཤད་ལུས་སྟོད་མཛེས་གྱུར་ཀྱང་། །ལྟ་བ་སྣ་ཚོགས་ལུས་སྨད་མཛེས་པ་མིན། །འདིར་ནི་རྒྱལ་སྲས་རྣམས་ཀྱིས་གང་མཛད་པའི། །རྡོ་རྗེ་ཐེག་པའི་ཁང་བཟང་ཉམས་དགའ་བར། །སྣ་ཚོགས་རྒྱུད་ཀྱི་རིན་ཆེན་གྱིས་གང་ཞིང་། །དབང་བྱེད་རྒྱལ་བའི་སྙིང་པོའི་ལྷ་དབང་ནི། །ཤེས་བྱའི་གནས་ལུགས་རྟོགས་པའི་བརྒྱན་གྱིས་མཛེས། །ངག་ཚིག་དྲི་མ་མེད་པའི་འོད་ཟེར་འཕྲོ། །ལྷ་བཅས་འགྲོ་ལ་དགོས་འདོད་ཀུན་རྩོལ་བ། །གསང་བའི་བདག་པོས་གསུངས་པ་བཞིན་དུ་བཤད། །དེ་ཕྱིར་བློ་གྲོས་མིག་དང་ལྡན་རྣམས་ཀྱིས། །ཕྱོགས་འཛིན་ཞེན་པའི་ལྟ་བ་ཀུན་སྤོངས་ལ། བདེན་གཉིས་དབྱེར་མེད་འཕགས་པས་གང་གསུངས་པ། །ཐབས་ཤེས་དབྱེར་མེད་ནོར་བུ་སྤྱི་བོས་ལོང་། །རང་གཞན་དགོས་འདོད་འབྱུང་བའི་རྒྱུ་རུ་འགྱུར། །དགེ་བ་འདི་ཡིས་སེམས་ཅན་ཐམས་ཅད་ཀྱིས། །ཟབ་མོའི་གནས་ལུགས་མངོན་དུ་རྟོགས་པ་དང་། །རང་ལ་གནས་པའི་སྙིང་པོའི་ཡེ་ཤེས་དེ། །མྱུར་ཏུ་སྒྲིབ་བྲལ་མངོན་སུམ་སྣང་བར་ཤོག། །།གསང་སྔགས་རྡོ་རྗེ་ཐེག་པའི་དོན་ཕྱིན་ཅི་མ་ལོག་པར་སྟོན་པར་བྱེད་པ་གསང་སྔགས་ནང་དོན་གྱི་འགྲེལ་པ་འདི་ནི་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་དུ་མས་ཉེ་བར་བརྒྱན་པ། བཤེས་གཉེན་ཆེན་པོ་ཤཱཀྱ་མགོན་པོས་ཁྱད་པར་དུ་བསྐུལ་ཞིང་། གཞན་ཡང་དགེ་བའི་བཤེས་གཉེན་རི་ཁྲོད་དབང་ཕྱུག་རྣམས་ཀྱིས་བསྐུལ་བའི་ཕྱིར། རྩོད་པ་དང་ལྡན་པའི་དུས་སུ་བྱུང་བའི་ཐེག་པ་ཆེན་པོའི་ཆོས་ལ་མོས་པ་ལམ་དུ་བྱེད་པ། སྔགས་འཆང་རང་བྱུང་རྡོ་རྗེ་ཞེས་བྱ་བས། གླང་ལོ་ཟླ་བ་གཉིས་པ་ལ། ཨུ་རྒྱན་གྱི་མཁན་པོ་པད་མ་འབྱུང་གནས་གྱི་བསྒྲུབ་གནས་ཆེན་པོར་སྦྱར་བ་ཡོངས་སུ་རྫོགས་སོ།། །།