ཀརྨ་པ་རང་བྱུང་རྡོ་རྗེའི་གསུང་འབུམ།

གླེགས་བམ་དགུ་པ། ཏ༽

ཀརྨ་པ་རང་བྱུང་རྡོ་རྗེ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

རྣལ་འབྱོར་གསུམ་གྱི་སྙིང་པོ་གསལ་བ་ཞེས་བྱ་བའི་འགྲེལ་པ།

༄༅། །རྣལ་འབྱོར་གསུམ་གྱི་སྙིང་པོ་གསལ་བ་ཞེས་བྱ་བའི་འགྲེལ་པ་བཞུགས་སོ། །

༄༅། །བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྟོང་ཉིད་སྙིང་རྗེ་དབྱེར་མེད་པ། །མཆོག་དུ་མི་འགྱུར་ཞི་བའི་སྐུ། ཕྱག་རྒྱ་སྒྱུ་མའི་རང་བཞིན་ཅན། །དང་པོའི་སངས་རྒྱས་ཕྱག་འཚལ་ལོ། །ཡེ་ཤེས་མྱ་ངན་འདས་བརྙེས་ཀྱང་། །ཐུགས་རྗེས་འཁོར་བར་མཛད་སྟོན་པ། །རྒྱལ་སྲས་བླ་མ་བརྒྱུད་པ་ལ། །རྟག་ཏུ་ཕྱག་འཚལ་ཅི་ནུས་མཆོད། །རྒྱ་ཆེན་རྡོ་རྗེ་ཐེག་པ་ལས། །ཟབ་ལམ་མཐར་ཐུག་རྣལ་འབྱོར་གསུམ། །འཇམ་པའི་དབྱངས་ཀྱིས་ལེགས་བསྡུས་པ། །དེ་འདིར་ཅུང་ཟད་བཤད་པར་འདོད། །རྡོ་རྗེའི་ཐེག་པ་ཆེན་པོ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ་གསལ་བར་མཛད་པ་འདི་ནི་ཡང་དག་པར་རྫོགས་པའི་སངས་རྒྱས་ཀྱིས་ཞིང་ཁམས་འདིར་མཛད་པ་བཅུ་གཉིས་ཀྱི་ཚུལ་གྱིས་མངོན་པར་བྱང་ཆུབ་པ་བསྟན་པར་མཛད་དེ། །འཕོ་བ་དང་ལྷུམས་སུ་འཇུག་པ་དང་བལྟམ་པ་དང་བཟོའི་གནས་རོལ་རྩེད་དང་བཅས་པ་ལོ་ཉི་ཤུ་རྩ་དགུར་བསྟན་ནས་ཁབ་ནས་མངོན་པར་བྱུང་ཞིང་དཀའ་བ་ལོ་དྲུག་སྤྱད་ནས། །སོ་ལྔ་པའི་མཐར་དཔྱིད་ཟླ་འབྲིང་པོའི་ཉ་ལ་བདུད་བཏུལ་ཞིང་བྱང་ཆུབ་པར་བསྟན་ནས། །དེ་ཕྱིན་ཆད་ཐེག་པ་གསུམ་གྱིས་སྨིན་པའི་ཕྱིར་སྡེ་སྣོད་གསུམ་བསྟན་ཅིང་། །ཐམས་ཅད་ཀྱི་རྗེས་ལ་ཡང་དཔྱིད་ཟླ་འབྲིང་པོའི་ཉ་ལ་ཤྲི་དྷ་ན་ཀ་ཊ་རུ་གསང་བའི་བདག་པོ་ལ་སོགས་པ་དང་། །ལྷ་དང་ལྷ་མ་ཡིན་ལ་སོགས་པ་རྣམས་ལ་དབང་བསྐུར་ཅིང་ལུང་བསྟན་ནས། །ཟླ་བ་བཟང་པོ་བདག་ཉིད་ཆེན་པོས་རྩ་བའི་རྒྱུད་བསྡུ་བ་དང་། །འགྲེལ་པ་ཆེན་པོ་སྟོང་ཕྲག་དྲུག་ཅུ་པ་ཤམྦྷ་ལའི་ཡུལ་དུ་སྣང་བར་མཛད་ཅིང་། །གཞན་ཡང་རྡོ་རྗེ་ཐེག་པ་མཐའ་དག་བསྡུས་ཤིང་བསྟན་ཏེ། །བྱང་ཆུབ་སེམས་དཔའ་ལྷ་དབང་ལ་སོགས་པ་དྲུག་གིས་ལོ་དྲུག་བརྒྱར་བསྟན་པར་མཛད་ནས། །འཇམ་དཔལ་གྱི་སྤྲུལ་པའི་སྐུ་གྲགས་པ་མིའི་དབང་པོས་བསྡུས་པའི་རྒྱུད་བསྟན་པར་མཛད་དེ། །ཉི་མའི་ཤིང་རྟ་ལ་སོགས་པ་བྱེ་བ་ཕྲག་ཕྱེད་དང་བཞི་སྨིན་པ་དང་གྲོལ་བར་མཛད་ཅིང་། །ཁྱད་པར་དུ་རྣལ་འབྱོར་གསུམ་གྱི་སྙིང་པོ་འདི་ཡང་འཇིག་རྟེན་ལས་འདས་པའི་ཕྱག་རྒྱ་ཆེན་པོའི་ལམ་ཉེ་བར་བསྡུས་ཏེ་བསྟན་པར་མཛད་དོ། །འདི་ལ་གཉིས་སྟེ། །ལོ་ཙ་བས་སྨོས་པའི་མཚན་དང་། །གཞུང་དངོས་སོ། །དང་པོ་ནི་རྒྱ་གར་སྐད་དུ། །ཏྲི་ཛོ་ཀི་ཧྲི་དྷ་བྷྱ་ཀ་ར་ནཱ་མ། །བོད་སྐད་དུ། །རྣལ་འབྱོར་གྱི་སྙིང་པོ་གསལ་བ་ཞེས་བྱ་བ། །འཇམ་པའི་དབྱངས་ལ་ཕྱག་འཚལ་ལོ། །ཞེས་རྣལ་འབྱོར་ནི་ཞི་གནས་དང་ལྷག་མཐོང་མངོན་དུ་བྱེད་པའི་ཐབས་སྐུ་གསུང་ཐུགས་རྡོ་རྗེ་རྣམ་པ་གསུམ་སྙིང་པོ་ནི་ཡེ་ཤེས་རྡོ་རྗེར་བསྒྲུབ་པའི་གདམས་པ་ངེས་པའི་དོན་མཆོག་བསྒྲུབ་པ་ལོགས་སུ་གསལ་བར་མཛད་པས་ན་དེ་སྐད་བརྗོད་དོ། །ཕྱག་འཚལ་བ་ནི་མཛད་པ་པོ་དེ་ཉིད་ལ་གུས་པ་བསྐྱེད་པའི་ཕྱིར་སྨོས་སོ། །གཞུང་གི་དོན་ནི་བཞི་སྟེ། །མཆོད་པར་བརྗོད་ཅིང་བཤད་པར་དམ་བཅའ་བ་དང་། །ཉམས་སུ་བླང་བྱའི་སྤྱི་དོན་བརྗོད་པ་དང་། །ཉམས་སུ་བླང་བྱ་ཉིད་རྒྱས་པར་བཤད་པ་དང་། །བསྔོ་བ་ཕན་ཡོན་དང་བཅས་པའོ། །དང་པོ་ནི། །ཨོཾ་གྱིས་སྣང་བ་ལམ་དུ་ངེས། །རྡོ་རྗེ་སེམས་དཔའ་ཕྱག་འཚལ་ནས། །སྦྱང་པ་རབ་ཏུ་གྱུར་པའི་ལམ། །ཕྱག་རྒྱ་ཆེན་པོའི་བསྒྲུབ་ཐབས་བཤད། །ཞེས་གསུངས་ཏེ། །འདི་ལ་ཡང་ཕྱག་འཚལ་བ་པོ་གྲགས་པ་མིའི་དབང་པོས་བཅོམ་ལྡན་འདས་རྡོ་རྗེ་སེམས་དཔལ་ལ་ཕྱག་མཛད་པ་སྟེ། །རྡོ་རྗེ་སེམས་དཔའ་དེ་ཡང་ཅི་འདྲ་བ་ཞིག་ན། །ཨོཾ་གྱིས་ཞེས་བྱ་བ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཅིག་ཏུ་གྱུར་པ་སྟེ། །དེ་ཡང་ས་བོན་ཨོཾ་ཡེ་ཤེས་ཀྱི་སྣང་བ་ནི་རྟགས་བཅུ་སྟེ། །དེ་ལམ་དུ་བྱེད་པ་སྐུ་རྡོ་རྗེའི་སྙེན་པ་ཡིན་ལ། །འདིའི་ཐུགས་ལ་ཨཿནི་གསུང་སྣང་བ་མཆེད་པ་སྟེ་རླུང་བཅུ་བརྟན་པར་བྱེད་པ་གསུང་རྡོ་རྗེ་ཉེ་བའི་སྙེན་པའོ། །ཧཱུྃ་ནི་ཐུགས་རྡོ་རྗེ་ཡེ་ཤེས་ཀྱི་སྣང་བ་ཐོབ་པ་སྟེ་རྗེས་ཀྱི་སེམས་དག་པ་བསྒྲུབ་པ་སྟེ། ཡི་གེ་གསུམ་དང་སྣང་བ་གསུམ་གྱིས་ཡེ་ཤེས་རྡོ་རྗེ་ཧཾ་ཡིག་རྣམ་པ་བཅུ་རྡོ་རྗེའི་སྐུ་འགྲུབ་པར་བྱེད་པས་ན། །རྡོ་རྗེ་སེམས་དཔའ་སྟེ། །ཡེ་ཤེས་ཀྱི་རྩ་འགྱུར་མེད་དང་། རླུང་འཕོ་མེད་དང་། །ཐིག་ལེ་འཛག་མེད་ནི་རྡོ་རྗེ་ཡིན་ལ། །དེ་ལྟར་སྣང་མཆེད་ཐོབ་གསུམ་གྱི་ཡེ་ཤེས་མངོན་སུམ་དུ་བྱེད་པ་ན། དེའི་མི་མཐུན་པའི་ཕྱོགས་སྒྲིབ་པ་གསུམ་བཅོམ་པས་སྟོང་པ་དང་ཤིན་དུ་སྟོང་པ་དང་སྟོང་པ་ཆེན་པོ་ཞེས་བྱ་བ། །མ་རིག་པའི་མུན་པ་ལས་བྱུང་བའི་སྣང་མཆེད་ཐོག་གསུམ་ཞེས་བྱ་བའི་ཚོགས་དྲུག་གི་གཟུང་འཛིན་ཐོབ་པ་དེ་ནུབ་པས་རྣལ་འབྱོར་དང་པོ་དང་། །རྟོག་པ་དང་ཉོན་ཡིད་མཆེད་པ་ནུབ་པ་རྣལ་འབྱོར་གཉིས་པ་དང་། །སེམས་ཀུན་གཞིའི་རྣམ་ཤེས་འཁྲུལ་པའི་སྣང་བ་འགགས་པས་ཉོན་མོངས་པ་དང་ཤེས་བྱ་དང་སྙོམས་འཇུག་ལམ་གྱི་སྒྲིབ་པ་དག་པ་ནི་རྡོ་རྗེ་སེམས་དཔའ་བདེ་བ་ཆེན་པོ་ཡེ་ཤེས་ཀྱི་སྐུ་སྟེ། །འདི་ཡི་ངེས་པ་ཡང་རྩ་བའི་རྒྱུད་ལས། ཨེ་ཡི་དབུས་སུ་བཾ་ཡིག་ནི། སངས་རྒྱས་ཀུན་གྱི་བདེ་བ་ཆེ། །མཁའ་ལ་རྡོ་རྗེ་སེམས་དཔའ་ནི། །སྐུ་ནི་ཟླ་བ་ཐིག་ལེ་ཞུ། །གསུང་ནི་ཚིག་དྲག་ཉི་མ་རྡུལ། །ཐུགས་ནི་རྣམ་ཤེས་ཨ་སྒྲ་ཅན། སྐུ་གསུང་ཐུགས་ཀྱི་སྦྱོར་བ་ཉིད། །ཅེས་པ་དང་། །ཤིན་དུ་རྒྱས་པར་ཡེ་ཤེས་རྡོ་རྗེ་ཀུན་ལས་བཏུས་པར་གསུངས་པ་འདིར་མ་བཤད་དོ། །དོན་འདི་རྣམས་འོག་ནས་ཀྱང་སྟོན་པར་འགྱུར་བས་མཆོད་པར་བརྗོད་པའོ། །བཤད་པ་དམ་བཅའ་བ་ཡང་དེ་ལྟ་བུ་བསྒྲུབ་པའི་ཕྱག་རྒྱ་ཆེན་པོའི་བསྒྲུབ་ཐབས་བཤད་པ་སྟེ། འདི་ནི་སྦྱངས་པ་རབ་ཏུ་གྱུར་པའི་ལམ་ཡིན་ནོ། །ཕ་རོལ་དུ་ཕྱིན་པར་གསུངས་པ་དང་། །ཀུན་བརྟགས་པའི་བསྐྱེད་རྫོགས་རྣམས་ནི་ལམ་འབྲིང་པོའོ། །ཉན་རང་གི་ལམ་ནི་ཆུང་རྒྱུ་ཡིན་ནོ་ཞེས་ཤུགས་ལ་བསྟན་པ་ཡིན་པས་རྡོ་རྗེ་ཐེག་པའི་ལམ་ཐམས་ཅད་ཀྱི་མཆོག་རྣལ་འབྱོར་གསུམ་སྦྱོར་བ་ཡན་ལག་དྲུག་དུ་བསྟན་པ་འདི་ཡིན་པར་ཁོང་དུ་ཆུད་པར་བྱའོ། །གཉིས་པ་ཉམས་སུ་བླང་བའི་སྤྱི་དོན་ནི་གསུམ་སྟེ། །གང་ལ་བསྟན་པའི་གང་ཟག་རྒྱུད་སྨིན་པ་དང་། །བསྒོམ་པའི་ངེས་པ་དང་། ཡན་ལག་དྲུག་མདོར་བསྟན་པའོ། །དང་པོ་ནི་ཚིག་རྐང་གསུམ་སྟེ། །དེ་ཡང་དབང་གིས་སྨིན་པ་དང་། །དམ་ཚིག་ལྡན་པ་སྟེ་བསྲུང་བ་དང་། །ཕྱག་རྒྱ་ཆེན་པོའི་ལམ་དུ་ངེས་པར་གཞོལ་བ་དེ་ལ་རྣལ་འབྱོར་གསུམ་བསྟན་པར་བྱ་སྟེ། །གཞན་འཇིག་རྟེན་གྱི་དངོས་གྲུབ་ཕྲན་ཚེག་དང་། །ལུས་ལོངས་སྤྱོད་དང་འཕོ་བདེ་འདོད་པ་ལ་ནི་མཆོག་གི་ལམ་འདི་ནམ་དུ་ཡང་བསྟན་པ་མ་ཡིན་ཏེ། །བསྐྱེད་པའི་རིམ་པ་ཀུན་བརྟགས་པ་ལ་སོགས་པ་དང་བསོད་ནམས་བསྒྲུབ་པའི་ཐབས་རྣམས་སྦྱིན་པར་བྱའོ། །འདི་ཡང་རྒྱས་པར་བཤད་པ་སྤྱིར་ན་བྱང་ཆུབ་ཀྱི་ལམ་ཐེག་པ་ཆེ་ཆུང་ཐམས་ཅད་བསླབ་པ་གསུམ་གྱིས་འཇུག་དགོས་ཏེ། །ཚུལ་ཁྲིམས་ཀྱི་བསླབ་པ་གཞི་བརྟེན་ལྟ་བུ་ཡིན་ཅིང་། །དེ་ལ་བརྟེན་ནས་ཏིང་ངེ་འཛིན་གྱི་བསླབ་པ་སེམས་རྩེ་ཅིག་ཏུ་གནས་པ་དང་། །དེས་ཤེས་རབ་ལ་ཞུགས་ནས་ཆོས་རབ་དུ་རྣམ་པར་འབྱེད་པ་ཤེས་རབ་ཀྱི་བསླབ་པ་མངོན་སུམ་དུ་བྱས་ནས་འབྲས་བུ་འགྲུབ་པའི་ཕྱིར་རོ། །དེས་ན་སྔགས་ཀྱི་ཐེག་པ་འདིར་ཡང་མ་སྨིན་པ་སྨིན་པར་བྱེད་པ་ནི་དབང་སྟེ་དེ་ཉིད་ཚུལ་ཁྲིམས་ཀྱི་བསླབ་པའོ། །འཇིག་རྟེན་དང་འཇིག་རྟེན་ལས་འདས་པའི་ལམ་བསྒྲུབ་པའི་སྐྱེད་རྫོགས་ཀྱི་ཏིང་ངེ་འཛིན་རྣམས་ནི་ཏིང་ངེ་འཛིན་གྱི་བསླབ་པ་ཡིན་ལ། །དེ་ཉིད་ཕྱི་ནང་གཞན་གསུམ་ཡེ་ཤེས་སུ་སྦྱོར་བའི་ཐབས་གནས་ཡོངས་སུ་གྱུར་པ་སྟོན་པ་ནི་ཤེས་རབ་ཀྱི་བསླབ་པ་ཡིན་པས་ཐོག་མ་དབང་བསྐུར་ཐོབ་པ་གལ་ཆེའོ། །འདི་ལ་ཡང་དབང་བསྐུར་བ་པོ་རྡོ་རྗེ་སློབ་དཔོན་ཀྱང་རྩ་བའི་རྒྱུད་ལས་གསུངས་པ། །དང་པོ་སློབ་དཔོན་དམ་ཚིག་ཅན། །རྡོ་རྗེའི་ཐེག་པ་ལ་གནས་ཤིང་། །དེ་ཉིད་བསྒོམ་ཞིང་འདོད་པ་ཆུང་། །ཆགས་སོགས་དྲི་བྲལ་བཟོད་བརྩོན་འགྲུས། །ལམ་ཞུགས་སློབ་མ་ལམ་སྟེར་བྱེད །དམྱལ་བའི་འཇིགས་འཇོམས་ཚངས་པར་སྤྱོད། །བདུད་འཇོམས་རྡོ་རྗེ་དབྱུག་པ་དེ། །ས་སྟེངས་རྡོ་རྗེ་འཛིན་པར་གྲགས། །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་ཤེས་པ། དཀྱིལ་འཁོར་བྲི་བའི་ལས་ལ་མཁས། །སྔགས་ནས་བཤད་པའི་སྤྱོད་པ་ཤེས། །རབ་དུ་ཞི་ཞིང་དབང་པོ་དུལ། །དེ་ལྟར་ཡོན་ཏན་ཀུན་ལྡན་པའི། །བླ་མ་སློབ་མས་བསྟེན་པར་བྱ། །ཞེས་བྱ་བ་ལ་སོགས་པ་རྒྱས་པར་བླ་མའི་ཡོན་ཏན་ཡོངས་སུ་བཟུང་བ་ལས་གསུངས་པ་རྣམས་སོ། །སློབ་མ་ཡང་ཟབ་དང་རྒྱ་ཆེའི་སེམས་དཔའ་བླ་མའི་ངེས་པ་ལ་དགའ་གཏོང་དང་ཚུལ་ཁྲིམས་ཡོན་ཏན་ཅན་ཤེས་པ། །ཐར་པ་དོན་གཉེར་རྒྱུད་ལ་གུས་དང་སེམས་མི་གཡོ་དང་དེ་ཉིད་ཐོབ་པ་ཤིན་དུ་སྦེད་པ་དང་། །གདུག་པ་ཅན་གྱི་གྲོགས་པོ་སྤངས་པའི་སློབ་མ་དེ་ཉིད་ཤིན་དུ་མཁས་པའི་བླ་མས་བཟུང་བར་བྱ། །ཤེས་རབ་དབང་བསྐུར་ལ་སོགས་ཕྱིར་དང་གཞན་ཞེས་བྱ་དང་ཡང་ནི་བར་མ་བསོད་ནམས་དོན་དུའོ་ཞེས་གསུངས་ཏེ་ཤེས་རབ་ཡེ་ཤེས་བསྟན་པ་དང་། འབྲིང་གཞན་འཇིག་རྟེན་གྱི་དངོས་གྲུབ་བསྒྲུབ་པ་དང་། བསོད་ནམས་ཀྱི་ཚོགས་ཀྱི་རྒྱུར་བསྟན་པ་ནི། བྱིས་པ་འཇུག་པའི་དབང་དང་། །དབང་གཞན་གསུམ་དང་། །ཕྱག་རྒྱ་ཆེན་པོའི་དོན་དུ་རུང་བ་གསུམ་ཡིན་པས་ཞིབ་དུ་བརྟག་པར་བྱའོ། །དབང་དངོས་གོ་བར་བྱ་བ་ནི། ངོ་བོ་དང་། མཚན་ཉིད་དང་། སྒྲ་དོན་དང་། གྲངས་ངེས་དང་། གོ་རིམ་དང་། དགོས་པ་དང་། ཆོ་ག་དང་བདུན་གྱིས་ངེས་པར་བྱ་སྟེ། །ངོ་བོ་ནི་རྒྱུད་སྨིན་པར་བྱེད་པ་སྟེ། དབང་མདོར་བསྟན་ལས། །དང་པོའི་དབང་བདུན་གང་ཡིན་པ། །བྱིས་པ་རྣམས་ནི་གཞུག་ཕྱིར་རོ། །རྣམ་གསུམ་འཇིག་རྟེན་ཀུན་རྫོབ་པ། །བཞི་པ་ཡང་ནི་དོན་དམ་ཉིད། །ཞེས་གསུངས་སོ། །མཚན་ཉིད་ནི་དྲི་མ་སེལ་བྱེད་ལམ་གྱི་གཞི་ཁྱད་བར་ཅན་ནོ། །སྒྲ་དོན་ནི་ཧེ་བཛྲ་ལས། གཏོར་དང་བླུགས་པ་ཞེས་བྱ་འདིས། །དེས་ན་དབང་ཞེས་བརྗོད་པར་བྱ། །ཞེས་པས། ཤིཉྩྨ་ནཱ་ཅེས་པ་གཏོར་བ་སྟེ་སྒྲིབ་པ་འཐོར་བ་བྱེད་པ་ནི་དག་བྱེད་དང་། ཤྲེ་ཀ་ཏྭ་ཅེས་པ་བླུག་པ་སྟེ་ནུས་པ་འཇོག་པའི་རྒྱུའི་ཕྱིར་ཡིན་ནོ། །དབང་མདོར་བསྟན་ལས་ཀྱང་། དབང་བསྐུར་བདུན་ནོ་མིའི་བདག །ལུས་ངག་ཡིད་ནི་ཡང་དག་སྦྱོང་། །དབང་བསྐུར་བ་ནི་གཉིས་གཉིས་སོ། །རྗེས་གནང་ཡེ་ཤེས་དག་བྱེད་འགྱུར། །མངོན་པར་དབང་བསྐུར་རིམ་གསུམ་གྱིས། །ལུས་ངག་ཡིད་ནི་དག་བྱེད་ཅིང་། །བཞི་པ་ཡེ་ཤེས་དག་བྱེད་པ། །ལུས་ངག་ཡིད་ཀྱང་དག་བྱེད་པའོ། །ཞེས་གསུངས་སོ། །གྲངས་ངེས་པ་ནི་བསྡུས་ན་བཞི་དང་། དབྱེ་ན་བཅུ་གཉིས་ཏེ། བུམ་པ་གསང་བ་ཤེས་རབ་དང་། །བཞི་པ་ཡང་དེ་དེ་བཞིན་ནོ། ཞེས་པ་དང་། །ཆུ་དང་ཅོད་པན་དར་དཔྱངས་དང་། །རྡོ་རྗེ་དྲིལ་བུ་བརཏལ་ཞུགས་ཆེ། །མིང་དང་རྗེས་གནང་ཡང་དག་ལྡན། །བྱིས་པ་འཇུག་པའི་དབང་བདུན་ནོ། །བུམ་པ་གསང་བ་ཤེས་རབ་དབང་། །བཞི་པ་རྡོ་རྗེ་སློབ་དཔོན་དབང་། །དེ་ལྟར་དབང་ནི་བཅུ་གཉིས་སོ། །ཞེས་བྱ་སྟེ། དག་བྱ་བཅུ་གཉིས་ཡོད་པ་ལས། སྐྱེས་ནས་མས་བྱིས་པའི་ལུས་བཀྲུ་བ་དང་། གཙུག་ཕུད་འཇོག་པ་དང་། རྣ་བ་འབུགས་ཤིང་རྒྱན་འདོགས་པ་དང་། ལུས་ཀྱི་སྤྱོད་པ་དང་། སྨྲ་བ་སློབ་པ་དང་། །མིང་འདོགས་པ་དང་། རང་གི་རིགས་དང་ཡོ་བྱད་ལ་དབང་སྟོན་པ་རྣམས་བྱིས་པའི་གནས་སྐབས་ཡིན་ལ། ལོ་བཅུ་དྲུག་གིས་ཐིག་ལེ་རྫོགས་པ་ཁྱིམ་ཐབས་ལེན་པ་དང་། འཁྱུད་པ་དང་། འཛག་བདེ་རྣམས་སྦྱོང་བ་ནི་འཇིག་རྟེན་པའི་དབང་བཅུའོ། །བཅུ་གཅིག་པ་དང་བཅུ་གཉིས་པ་ནི་འཇིག་རྟེན་པའི་དཔེ་ལས་ལས་འདས་པའོ། །འདི་རྣམས་ཀྱང་རྒྱས་པར་འགྲེལ་པ་གསུམ་ཀར་གསུངས་སོ། །རྒྱུ་མཚན་དེས་ན་དག་བྱ་བཅུ་གཉིས་ལ་ཐོབ་བྱ་བཅུ་གཉིས་སྟེ། དེའི་གོ་རིམས་ཀྱང་དང་པོ་མངལ་དུ་ལུས་གྲུབ་པའི་ཐོག་མ་ཁམས་ལྔ་གྲུབ་ལ། དེ་ནས་ཕུང་པོ་ལྔ་དང་། དེ་ནས་སྐྱེ་མཆེད་ལྔ་དང་། དེ་ནས་ལས་དབང་ལྔ་དང་། སྨྲ་བ་དང་། །འཛག་བདེ་དང་གནས་སྐབས་བཞི་རྫོགས་པའི་རིམ་པ་ནི་དག་བྱའི་ངེས་པའོ། །དག་བྱེད་དབང་བདུན་ནི། རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐུར་ལ། །གོང་མ་གསུམ་ནི་ལུས་དང་བྷ་གའི་དཀྱིལ་འཁོར་དང་། བཞི་པ་དང་རྡོ་རྗེ་སློབ་དཔོན་གྱི་དབང་ནི་སེམས་སྣང་སྲིད་ཀྱི་དཀྱིལ་འཁོར་ལ་བརྟེན་ནས་བསྐུར་ཞིང་། ཐོབ་པ་ནི་ས་བཅུ་གཉིས་མངོན་དུ་བྱེད་པའི་ཕྱིར་རོ། །དགོས་པ་ཡང་དེ་ཉིད་ཀྱིས་བསྟན་ཏེ་དྲི་མ་མེད་པར་རང་ལ་ཡོད་པར་རྟོགས་པ་ནི་དགོས་པ་ཡིན་ལ། དེ་ལ་བརྟེན་ནས་ལམ་མངོན་དུ་བྱས་པས་འབྲས་བུ་གྲུབ་པ་ནི། དགོས་པའི་དགོས་པའོ། །འདི་རྣམས་ཀྱི་ངེས་པ་ཡང་། ཆུ་ཡིས་ཁམས་ནི་ཀུན་ནས་སྦྱོང་། །ཅོད་པན་ཕུང་པོ་རྣམས་སྦྱོང་བའོ། །དར་དཔྱངས་ཕ་རོལ་ཕྱིན་དག་པ། །རྡོ་རྗེ་དྲིལ་བུ་མི་འགྱུར་ཆེ། །སངས་རྒྱས་གསུང་ནི་རྒྱུན་མི་འཆད། །ཉི་ཟླ་གཅིག་ཉིད་སྦྱོང་བྱེད་པའོ། རྡོ་རྗེ་བརཏལ་ཤུགས་མི་འགྱུར་བ། །ཡུལ་དང་དབང་པོ་ཀུན་སྦྱོང་ཡིན། །མིང་ནི་བྱམས་སོགས་ལེགས་སྦྱོང་བ། །རྗེས་གནང་སངས་རྒྱས་ཉིད་སྦྱོང་བྱེད། །དེ་ལྟར་དབང་ནི་བདུན་པོ་འདི། །དཀྱིལ་འཁོར་བྲིས་ནས་སྦྱིན་པར་བྱ། །ཤེས་རབ་ཡན་ལག་ནུ་མར་ནི། །རེག་པས་བྱང་ཆུབ་སེམས་འཕོ་བདེ། །གང་ཕྱིར་བྱིས་པས་བདེ་ཐོབ་པ། །དཀའ་འཛིན་གྱིས་ནི་དེ་དབང་བསྐུར། །གསང་བ་ཡུན་རིང་མཉེས་ལས་སྐྱེས། །བྱང་ཆུབ་སེམས་འཕོ་བདེ་བ་སྟེ། །གང་ཕྱིར་གསང་ལས་བདེ་ཐོབ་པ། །དར་མ་དེ་ལ་གསང་དབང་བསྐུར། །ཡུན་རིང་གསང་བ་མཉེས་ལས་སྐྱེ། །རྡོ་རྗེ་རྩེ་མོར་འཛག་ལས་བདེ། །གང་ཕྱིར་རྒན་པོ་འཛག་གྱུར་པས། །ཤེས་རབ་ཡེ་ཤེས་དབང་བསྐུར་བས་གསུངས་པ་ནི་དབང་བཅུ་ཡིན་ལ། གོང་མ་ཆེན་པོ་ནི། ཕྱག་རྒྱ་ཆེན་པོའི་རྗེས་ཆགས་ལས། །སྐྱེས་པ་གང་གནས་བདེ་བ་ནི། །ཡེ་ཤེས་ཆེན་པོའི་དབང་བསྐུར་བའོ། །ཞེས་གསུངས་པ་དང་། དབང་བདུན་རྣམས་ཀྱིས་དབང་བསྐུར་བ་ནི་དགེ་བའི་དབང་གིས་ས་བདུན་རྣམས་ཀྱི་དབང་ཕྱུག་དུ་འགྱུར་རོ། །སླར་ཡང་ཕྱིར་མི་ལྡོག་པ་ལ་སོགས་པར་བུམ་པར་གསང་བའི་དབང་བསྐུར་བས་ནི་ངེས་པར་འཇུག་པར་འགྱུར། ཤེས་རབ་ཡེ་ཤེས་དབང་བསྐུར་བས་ནི་སྲིད་པའི་འཇིགས་པ་འཇོམས་པའི་འཇམ་པའི་དབྱངས་ཉིད་ཞེས་བྱའོ། །ཞེས་གསུངས་སོ། །རྒྱ་ཆེར་འགྲེལ་བ་གསུམ་ནས་གསུངས་ཀྱང་མ་སྤྲོས་སོ། །ཆོ་ག་ནི་རྒྱས་པར་གཞན་དུ་ཡང་བསྟན་ལ་ཁོ་བོས་བྱས་པ་ལས་རྟོགས་པར་བྱའོ། །དེ་ལྟར་དབང་བསྐུར་བའི་ཚེ། བརཏལ་ཞུགས་ཉི་ཤུ་རྩ་ལྔ་བྱིན་པ་ནི་དགེ་བསྙེན་ཡིན་ལ། རིགས་ལྔའི་དམ་ཚིག་དང་སྡོམ་པ་ནི་དགེ་ཚུལ་དང་། དབང་བདུན་བསྐུར་ནས་རྒྱུད་ལྟ་བ་དང་ཉན་པ་བཏུབ་ཅིང་འཕྲིན་ལས་འཕྲན་ཚེགས་བསྒྲུབ་དུ་རུང་བ་ཡིན་ནོ། །གོང་མ་གསུམ་དང་མཆོག་གི་དམ་ཚིག་ལྔ་བྱིན་པ་ནི་དགེ་སློང་སྟེ། །ལས་ཐམས་ཅད་བསྒྲུབ་པ་དང་སྤྱོད་པ་ལ་དབང་བ་ཡིན་ལ། ངེས་པར་བཞི་པ་ནི། རྣལ་འབྱོར་གསུམ་གྱི་གདམས་པ་བྱིན་པ་ཡིན་པས་དབང་གཞན་སྔོན་དུ་མ་ཐོབ་པར་བྱིན་དུ་མི་རུང་ངོ་། །རྡོ་རྗེ་སློབ་དཔོན་དུ་དབང་བསྐུར་བ་མ་ཐོབ་པས་གཞན་ལ་བསྟན་པར་བྱ་བ་མ་ཡིན་པ་ནི་ངེས་པ་ཡིན་ནོ། །འདི་ལྟར་མ་ཐོབ་པར་གཞན་ལ་སྟེར་བ་ནི་དམ་ཚིག་ཉམས་པར་བཤད་དོ། །འོ་ན་དེ་ལྟ་བུ་ལོངས་སྤྱོད་མེད་པས་མི་འགྲུབ་བོ་ཞེ་ན། །ཡང་དག་པའི་དོན་ལ་འཇུག་ཅིང་ཚུལ་བཞིན་དུ་བསྒྲུབ་པ་ལ་ནི་དབང་རྣམས་ཚིག་གིས་སྦྱིན་ཞིང་། ཐབས་ལྡན་གྱི་ཕྱག་རྒྱ་ལ་སོགས་པ་བསྟན་པར་བྱའོ། །ཞེས་གསུངས་ཏེ། ལོངས་སྤྱོད་ཡོད་པ་ལ་མ་མོའི་མཆོད་པ་ལ་སོགས་པ་མེད་པར་བསྟན་དུ་མི་རུང་ངོ་། །དེ་ཡང་ལོངས་སྤྱོད་མེད་པའི་ཨ་བ་དྷུ་ཏི་བཞིན་དབང་བསྐུར་རྒྱལ་བའི་བདག་པོའི་ཚིག་གིས་སྦྱིན་པར་བྱ། དེ་བཞིན་དུ་བ་ལ་སོགས་ལམ་དང་མ་ལུས་ཡོན་ཏན་རྩའི་སྦྱོར་བར་བཅས་པ་དང་། བསྟན་པའི་དོན་ལག་པའི་ཕྱག་རྒྱ་རང་གི་སེམས་ཀྱི་དབང་དུ་སོན་པ་ཀུན་སྙོམས་རྣམ་པར་གྲོལ། གཞན་དུ་མ་མོའི་མཆོད་པ་དམན་ལ་རྒྱལ་བ་མཆོག་སྙིང་པོ་འདི་ནི་སྦྱིན་པར་བྱ་བ་མིན། །ཞེས་གསུངས་སོ། །དེ་ལྟར་དབང་བསྐུར་བ་ཐོབ་ནས་རྩ་བ་དང་ཡན་ལག་གི་དམ་ཚིག་མིག་གི་འབྲས་བུ་ལྟར་བསྲུང་ཞིང་ངེས་པར་བླ་ན་མེད་པའི་བྱང་ཆུབ་ཐོབ་པར་འདོད་པས་མི་མཐུན་པའི་ཕྱོགས་ཐམས་ཅད་སྤངས་ལ་བརྩོན་པར་བྱ་སྟེ། །དེ་ཡང་གང་ཞེ་ན། །ཐེ་ཚོམ་འགྱོད་པ་གཉིད་དང་རྒོད་པ་ལེ་ལོ་རྣམས་ཀྱི་ཆོམ་རྐུན་གྱིས། །གཉེན་འདུན་ཚོགས་སུ་རབ་ཞུགས་ལམ་བཟང་རིན་པོ་ཆེ་ནི་བཅོམ་ནས་འཕྲོག་བྱེད་དེ། །སྲོག་གཅོད་པ་དང་བརྫུན་དང་མ་བྱིན་ལེན་དང་གཞན་གྱི་བུད་མེད་ཚིག་རྩུབ་དབྱེན། །ངག་འཁྱལ་བའི་ཚིག་དང་བརྣབ་སེམས་གནོད་སེམས་ལོག་པར་ལྟ་བའི་ཆོམ་རྐུན་ནི། །སྡིག་ཆེན་ཉེ་བའི་སྡིག་དང་གསོད་དང་འཁུ་དང་དབང་པོ་ཡུལ་ལ་མངོན་པར་ཆགས་པ་ཡི། །ལྔ་པ་ལྔ་པོ་ཆོམ་རྐུན་འདི་རྣམས་ཀྱིས་ནི་རིན་ཆེན་རྟག་ཏུ་འཕྲོག་བྱེད་དོ། །ཤིན་དུ་བཟའ་དང་བཏུང་བ་ལོངས་སྤྱོད་དུ་མ་སྣ་ཚོགས་ཆོམ་རྐུན་རྣམས་ཀྱིས་ནི། །དེའི་ལུས་བརྒྱལ་བག་མེད་པར་བྱས་བརྩོན་འགྲུས་ལྡན་ཡང་འཕྲོག་པར་བྱེད་པ་ཉིད། །རང་ཉིད་ཀྱིས་ནི་མ་བརྟགས་པར་ནི་གཅིག་ཤོས་ནོར་ནི་སྟོན་པར་བྱེད་འདོད་པ། །དཀོན་པ་ཆེན་པོར་གྱུར་པའི་རིན་ཆེན་དེ་ནི་ཕྱི་རོལ་གཏང་བར་བྱ་བ་མིན། ཞེས་སྤྱན་རས་གཟིགས་ཀྱིས་གསུངས་པས་ཉེ་བའི་ཉོན་མོངས་པ་རྣམས་དང་། མི་དགེ་བ་བཅུ་དང་། འཚམས་མེད་པ་ལྔ་དང་། དེ་དང་ཉེ་བ་ལྔ་དང་། དབང་པོ་ལྔ་ཡུལ་ལྔ་ལ་ཆགས་པ་ལ་སོགས་པ་དང་། ལུས་དང་ལོངས་སྤྱོད་དང་ཁེ་དང་གྲགས་པ་དང་རང་གིས་མི་བསྒོམ་པར་སྟོན་པ་ལ་སོགས་པ་ཐམས་ཅད་དོར་ལ་ཉམས་སུ་བླང་བར་བྱའོ། །གཞན་ཡང་མཆོག་ཏུ་མི་འགྱུར་བར་གསུངས་པ། མི་གཡོ་བ་བསྒྲུབ་པ་ལ་དགའ་བའི་རྣལ་འབྱོར་པ་དེས། བླ་མ་དམ་པའི་གདམ་ངག་ཐོབ་ནས་གདུག་པ་ཅན་དང་འབྲེལ་པ་སྤངས་ལ་དུ་བ་ལ་སོགས་པའི་ལམ་དང་དབུ་མ་སྦྱང་བར་བྱས་ལ། སེམས་ཅན་ཐམས་ཅད་ལ་བརྩེ་བ་ཆེན་པོ་བསྐྱེད་ནས་ཚད་མེད་པ་བཞི་ལ་གནས་པར་བྱ་སྟེ། བུ་དང་བུ་མོ་དང་ལུས་དང་འདུག་གནས་དང་ལྷ་ཁང་དང་བླ་མའི་རྫས་ལ་ལོངས་སྤྱོད་པ་སྤོངས་ལ། །ཀུན་བརྟགས་པའི་དཀྱིལ་འཁོར་བསྒོམ་པ་དང་འཇིག་རྟེན་པའི་དངོས་གྲུབ་འདོད་པ་དང་། རྡུལ་ཕྲན་ལ་སོགས་པར་རྟོག་པས་སྒྲོས་བཏགས་ནས་བཀག་པའི་སྟོང་པར་བལྟ་བའི་ཆད་པར་ལྟ་བ་རིང་དུ་བྱས་ནས། འཛག་པའི་བདེ་བ་ལ་མ་ལྟོས་པར་ཐམས་ཅད་མཁྱེན་པའི་གོ་འཕང་ལ་འཇུག་པར་འདོད་པས། རང་གི་སེམས་སྣང་བ་མེ་ལོང་གི་གཟུགས་བརྙན་ལྟ་བུ་སྐྱེ་བ་མེད་པའི་མཆོག་ལ་ལྟ་བ་ནང་གི་བདེ་བ་ཆེན་པོ་རང་རིག་པའི་བྱང་ཆུབ་སེམས་བརྟན་པར་བྱའོ། །ཞེས་པ་ལ་སོགས་པ་རྒྱས་པར་གསུངས་པ་བཞིན་ངེས་པར་བསྒྲུབ་པར་བྱའོ། །བསྒོམ་པའི་ངེས་པ་བསྟན་པ་ནི། ཚིགས་བཅད་གཅིག་སྟེ། བྱིན་གྱིས་རླབས་ལ་རྟོགས་པ་བསྒོམ་པ་ནི། །བླ་མའི་བྱིན་རླབས་ངེས་པར་ཐོབ་ཅིང་ཚུལ་བཞིན་དུ་ཤེས་པས་བསྒོམས་སྟེ། གཞན་དུ་ན་གེགས་ཀྱིས་ཉོན་མོངས་པར་འགྱུར་བའི་ཕྱིར་རོ། །རང་བཞིན་རྣལ་འབྱོར་གསུམ་དུ་ངེས་པ་ནི། རྒྱུ་འབྲས་གསུམ་དུ་ངེས་སྟེ། རྒྱུ་སོ་སོར་སྡུད་ལས་འབྲས་བུ་བསམ་གཏན་འབྱུང་སྟེ། ལུས་དང་རྩ་དག་པར་བྱེད་པའོ། །རྒྱུ་སྲོག་རྩོལ་གྱིས་འབྲས་བུ་འཛིན་པ་འགྲུབ་སྟེ། ངག་དང་རླུང་དག་པར་བྱེད་པའོ། །རྒྱུ་རྗེས་དྲན་གྱིས་འབྲས་བུ་ཏིང་ངེ་འཛིན་གྲུབ་པ་སྟེ་ཐིག་ལེ་དང་ཡིད་དག་པར་བྱེད་པས། །ཡེ་ཤེས་རྡོ་རྗེ་འགྲུབ་པར་བྱེད་པའི་ཕྱིར་རོ། །དེའི་གོ་རིམས་ཀྱི་ས་འཚམས་ཀྱང་གསུམ་ཏེ། དང་པོ་སྦྱོར་ལམ་དང་། གཉིས་པ་མཐོང་ལམ་དང་། གསུམ་པ་བསྒོམས་ལམ་རྫོགས་པར་འགྱུར་ཏེ། །དྲི་མ་མེད་པའི་འོད་ལས། འདིར་མཚན་མ་ཡང་། རྣམ་པ་གསུམ་སྟེ། དང་པོ་དང་བར་མ་དང་ཐ་མའོ། །དང་པོ་ནི་དུ་བ་ལ་སོགས་པའི་ལམ་སྟེ་ཡན་ལག་དྲུག་གི་སྦྱོར་བས་གཟུགས་ཡོངས་སུ་རྫོགས་པས་མི་འགྱུར་བའི་སྐད་གཅིག་ཐོབ་པའོ། །བར་པའི་མཚན་མ་ནི་མཆོག་ཏུ་མི་འགྱུར་བའི་སྐད་ཅིག་གཅིག་ལ་བརྒྱ་ཕྲག་བཅོ་བརྒྱད་ཀྱིས་ས་དང་པོ་ཐོབ་པའོ། །མངོན་པར་ཤེས་པ་ལྔ་མ་ཐོབ་པའི་དོན་ཡང་དག་པར་མཐོང་བ་ནི་འཇིག་རྟེན་གྱི་དངོས་གྲུབ་ཐོབ་པ་ཞེས་བྱའོ། །ཐ་མའི་མཚན་མ་ནི་ཉི་ཁྲི་གཅིག་སྟོང་དྲུག་བརྒྱ་མི་འགྱུར་བའི་སྐད་ཅིག་གིས་ས་བཅུ་གཉིས་ཐོབ་པས་སངས་རྒྱས་རྡོ་རྗེ་འཆང་ཉིད་གྲུབ་པ་ནི་ཕྱག་རྒྱ་ཆེན་པོའི་དངོས་གྲུབ་ཞེས་བྱའོ། །ཞེས་གསུངས་སོ། །དེ་ལྟར་བསྒོམ་པའི་ཐབས་འདིར་གསུངས་པ་ནི། ཏིང་ངེ་འཛིན་གྱི་བསླབ་པ་ཡིན་ལ། འདི་རྣམས་ཀྱི་གཞི་ལམ་འབྲས་བུའི་ཚུལ་ཕྱི་དང་ནང་ལུས་ཀྱི་གནས་ལུགས་སྐྱེ་འཆི་དང་བཅས་པ་དང་། གཞན་བསྐྱེད་རྫོགས་དང་། །དེ་ཡེ་ཤེས་སུ་སྦྱོར་བ་རྣམས་ཤེས་པ་ནི་ཤེས་རབ་ཀྱི་བསླབ་པ་ཡིན་པས་ན། འཆི་བའི་རྟགས་ཉིད་ཤེས་བྱས་ལ། །སྲོག་ནི་ཐིག་ལེར་རབ་དུ་ཞུགས། ཞེས་གསུངས་ཏེ། འཇིག་རྟེན་གྱི་ཁམས་དང་ལུས་བསྐྱེད་པ་རྣམ་པ་བཅུ་ཧ་ཀྵ་མ་ལ་བ་ར་ཡ་ཐབས་ཚེག་དྲག་ཐིག་ལེ་ན་ད་རྣམས་ནི་སྲོག་ཆེན་པོའོ། །དེ་འཇིགས་པ་དང་འཆི་བ་ནི་སྡུད་པ་སྟེ། དེའི་རྟགས་ཀྱང་དུ་བ་ལ་སོགས་པ་བཅུ་ཡིན་པས་འདིར་ཡེ་ཤེས་ཀྱི་རྟགས་ཀྱང་དེས་མཚོན་པ་སྟེ། རྣམ་པ་བཅུ་པོ་དོན་བཅུའི་དོན། །སྔགས་ཀྱི་སྐྱེ་གནས་ཡི་གེ་མེད། །རྣམ་བཅུ་དབང་ལྡན་ཆེ་བ་པོ། །ལྷ་ལ་ལྷ་མོ་བཅུ་ཞེས་བྱ། །རྩ་བཅུ་རླུང་བཅུ་ཐིག་ལེ་བཅུ། །ས་བཅུ་གཟུངས་བཅུ་ཕར་ཕྱིན་བཅུ། །ཐུབ་དབང་སྟོབས་བཅུ་ཁྱབ་པའི་བདག །ཀུན་གྱི་དོན་ནི་མ་ལུས་བྱེད། དུས་ནི་ཀུན་རྫོབ་མཚན་ཉིད་ཅན། །ཤེས་བྱའི་རྣམ་པ་འགྲོ་འཁོར་ལོ། །དཔལ་ནི་སྟོང་དང་གཉིས་མེད་བདག །འདི་ནི་དཔའ་ལྡན་དུས་འཁོར་གྱིས། །ཀུན་དུ་རྡོ་རྗེའི་རྣལ་འབྱོར་རོ། །བདེན་པ་གཉིས་སུ་གནས་པའོ། ཞེས་བྱ་བ་ཤེས་བྱ་རྣམས་ཡེ་ཤེས་ཀྱི་ལེའུ་ལས་ཆོས་ཡང་དག་པར་བསྡུ་བ་གཅིག་ནས་སུམ་ཅུ་སོ་བདུན་གྱི་བར་གྱི་ཡང་གཉེན་ལམ་འབྲས་བུ་དང་བཅས་པ་གསུང་བ་རྟོགས་པར་བྱའོ། །དེ་ལྟ་བུའི་སྲོག་སྟེ་མི་འགྱུར་བའི་དོན་དམ་པ་ཨ ཀྵ་ར་ནི་སྔགས་ཀྱི་གཞུང་དུ་ཐེག་ལེ་ཞེས་བརྗོད་དོ། །དེ་ཡང་རྣམ་པ་གསུམ་དུ་ཁམས་ལྔ་རྫས་ཀྱི་ཐིག་ལེ་དང་། ཀུན་བཏགས་སྔགས་ཀྱི་ཐིག་ལེ་དང་། དོན་དམ་ཡེ་ཤེས་ཀྱི་ཐིག་ལེ་ཞེས་གསང་བ་འདུས་པའི་རྒྱུད་རྡོ་རྗེ་འཕྲེང་བར་གསུངས་པ་དེར་བཞུགས་པའོ། །འདི་རྣམས་ཀྱང་དབུ་མ་ལས་གཟའ་ལ་སོགས་པའི་འཇིག་རྟེན་གྱི་ཁམས་འབྱུང་བ་དང་། དེ་བཞིན་དུ་སྔགས་ཐམས་ཅད་དང་། ལྷ་ཐམས་ཅད་དང་རྒྱུད་ཐམས་ཅད་དང་ཡེ་ཤེས་ཐམས་ཅད་འབྱུང་བར་གསུངས་པ་རྣམས་ཤེས་པར་བྱ་བ་ནི། རྡོ་རྗེའི་ཐེག་པ་འདིར་གཞི་དང་ལམ་དང་ལམ་གྱི་རྣམ་པ་དང་རྣམ་པ་ཐམས་ཅད་མཁྱེན་པ་ཉིད་ཅེས་བྱ་བ་རྟོགས་པར་བྱའོ། །ཡང་སངས་རྒྱས་ཉིད་ནི་ཐམས་ཅད་ཤེས་པ་ཉིད་དང་ལམ་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། ལམ་གྱི་རྣམ་པ་ཤེས་པ་ཉིད་ལས། སྟོབས་བཅུ་དང་མི་འཇིགས་པ་བཞི་ལ་སོགས་པའི་ཡོན་ཏན་ཕུན་སུམ་ཚོགས་པ་རྣམས་སྟེར་བ་ནི་སངས་རྒྱས་ཉིད་ཀྱི་འབྲས་བུ་སྟེར་བ་ཞེས་བྱའོ། །ཞེས་གསུངས་སོ། །རྒྱས་པར་དཔལ་དུས་ཀྱི་འཁོར་ལོའི་རྒྱུད་འགྲེལ་དང་ཕ་རོལ་དུ་ཕྱིན་པའི་གཞུང་དུ་རྟོགས་པར་བྱའོ། །འདིར་མདོ་ཙམ་བརྗོད་པ་ནི། ལུས་ལ་སྲོག་ཆེན་དབུ་མ་དང་། །གཞན་དུ་དཔལ་ལྡན་ཧེ་རུ་ཀ། །ཕྱིར་རུ་སྒྲ་གཅན་མུན་པ་བྲལ། །ཡེ་ཤེས་སྣང་སྟོང་དབྱེར་མེད་ཀྱི། །དབུ་མ་དག་པར་བྱས་ནས་ནི། །རྡོ་རྗེ་འཆང་ཉིད་འགྲུབ་འགྱུར་ཏེ། །ལུས་ལ་གནས་པའི་རྩ་དྲུག་ལ། །ཡན་ལག་རྩ་ཆེན་ཉི་ཤུ་བརྒྱད། །ཐིམ་དང་ལོངས་སྤྱོད་བདག་པོའི་ཕྱིར། །བརྒྱ་བཅུ་རྩ་བཞིར་འགྱུར་བ་སྟེ། །རེ་རེའི་འཁོར་ནི་སྟོང་སྟོང་ཡོད། །བརྒྱད་ཁྲི་བཞི་སྟོང་ཞེས་བྱ་སྟེ། །ཡེ་ཤེས་ཁམས་ལྡན་སྟོང་ཉིས་བརྒྱ། ཁུ་ཁྲག་རླུང་བརྟེན་རྩ་རྣམས་ནི། །སྟོང་ཕྲག་ཉི་ཤུ་རྩ་བཞི་བཞི། །སྐྱེས་བུའི་ལོ་བརྒྱའི་རླུང་ཅི་སྙེད། །བྱེ་བ་བདུན་ཅུ་དོན་བདུན་དང་། །ས་ཡ་བདུན་དང་འབུམ་ཕྲག་དྲུག དེ་ལ་ཡེ་ཤེས་རླུང་རྒྱུ་བ། །བྱེ་བ་གཉིས་དང་ས་ཡ་བཞི། །འབུམ་ཕྲག་གསུམ་ནི་རྒྱུ་བའོ། །གཡས་གཡོན་རེ་རེར་ལས་ཀྱི་རླུང་། །བྱེ་བ་སོ་བདུན་ས་ཡ་དྲུག །དྲུག་འབུམ་ལྔ་ཁྲི་འབྱུང་བ་སྟེ། །ཐིག་ལེ་སུམ་ཅུ་སོ་དྲུག་སྟེ། འདི་རྣམས་འདོད་དང་མི་འདོད་པའི། །རྣམ་རྟོག་བདུན་ཅུ་རྩ་གཉིས་ཀྱིས། །སྦྱང་གཞི་ལུས་དང་སེམས་ཞེས་བྱ། །སྦྱོང་བྱེད་ཀྱིས་སྦྱངས་དག་པའི་ཚེ། །རླུང་གིས་གྲངས་བཞིན་ཆོས་བསྒོའི་མིང་། །རྩ་བཞིན་ཆོས་ཀྱི་ཕུང་པོར་བརྗོད། །ཏིང་འཛིན་གཟུངས་ཀྱང་དེ་སྙེད་དོ། ལྷ་དང་སྔགས་ཀྱང་དེ་བཞིན་ནོ། །གཞི་ཡི་གནས་ལུགས་བསྡུས་པ་ཡིན། །དེ་ནི་ཡན་ལག་དྲུག་གིས་བཅིངས། །ལོ་གསུམ་ཕྱོགས་གསུམ་དག་བྱེད་པ། ལམ་ལྔའི་རིམ་པས་བསྟན་པ་སྟེ། །སྦྱིན་སོགས་དྲུག་དྲུག་སུམ་ཅུ་དྲུག །གོ་ཆ་འཇུག་པའི་ཁྱད་པར་དང་། །མཐོང་དང་བསྒོམ་པའི་ལམ་དག་ལ། རྫས་དང་བཏགས་པའི་རྟེན་ཅན་གྱི། །མཚན་འཛིན་སུམ་ཅུ་སོ་དྲུག་བཅོམ། །རྣམ་པ་སངས་རྒྱས་ཀུན་རིག་མཆོག རྣམ་པ་ཉི་ཤུ་བྱང་ཆུབ་པ། །དེ་ཉིད་རྣམ་པ་བཅུ་དྲུག་རིག །དག་པ་རྣམ་པ་བཅུ་གཉིས་འཆང་། །ཤེས་པ་བརྒྱད་ནི་རྟོགས་པ་པོ། །བདེན་པ་བཞི་ཡི་དེ་ཉིད་རིག །སྐད་ཅིག་གཅིག་གིས་རྫོགས་སངས་རྒྱས། འབྲས་བུ་མཐར་ཕྱིན་བླ་ན་མེད། །ཞེས་བྱ་བ་འདི་ནི་གཞི་ལམ་འབྲས་བུ་བསྡུ་བའི་བར་སྐབས་ཀྱི་ཚིགས་སུ་བཅད་པའོ།། །།དེ་ལྟར་བསྒོམ་པའི་ངེས་པ་བཤད་ནས། ཡན་ལག་མདོར་བསྟན་པ་དངོས་ནི། སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །རྣལ་འབྱོར་ཡན་ལག་དྲུག་ཞེས་བྱ། །ཞེས་གསུངས་ཏེ། འདིར་ཡང་ཐུན་མོང་གི་བསྙེན་བསྒྲུབ་བཞི་དང་། ཁྱད་པར་གྱི་ཡན་ལག་དྲུག་སྟེ། དེ་ཡང་བསྐྱེད་རྫོགས་ཐུན་མོང་དུ་གསུངས་པས། །དྲང་དོན་དུ་ནི་བདུད་རྩིའི་རིལ་བུ་བཟའ་བ་དང་། ལྷ་བསྒོམ་པ་དང་། ཐིག་ལེ་དང་ཕྲ་མོའི་རྣལ་འབྱོར་བསྒོམ་པ་ནི་བསྙེན་བསྒྲུབ་བཞི་ཡིན་པས། རྡོ་རྗེ་བཞི་བསྐྱེད་རིམས་དང་མཐུན་པར་བསོད་ནམས་ཀྱི་ཚོགས་ཀྱི་རྒྱུ་ལས་སྟོང་ཉིད་བྱང་ཆུབ་ཞེས་བསྡུ་བ་ནི་བར་དོ་སྦྱོང་བའོ། དེ་ལ་ངེས་པར་ཟླ་བའི་ཐིག་ལེ་བསྡུ་བ་མངལ་གྱི་གནས་སྐབས་སོ། །དེ་ལ་གཟུགས་བརྙན་རྫོགས་པ་ནི་ལུས་རྫོགས་པ་དང་སྐྱེ་མཆེད་རྣམས་ཀྱི་ནུས་པ་རྫོགས་པ་ནི་ལོ་བཅུ་དྲུག་གི་ཐིག་ལེ་རྫོགས་པའི་བར་རྣམས་དག་པར་བྱེད་པས་ཀུན་རྟགས་བསྐྱེད་རིམས་ཀྱང་རྫོགས་པར་བསྒོམ་པའོ། །རྫོགས་རིམས་ལ་ནི་ཆུང་དང་འབྲིང་དང་ཆེན་པོའི་དབྱེ་བ་སྟེ། སྟོང་པའི་བྱང་ཆུབ་ནི་མཚན་མོའི་རྣལ་འབྱོར་རོ། །ཟླ་བའི་ཐིག་ལེའི་རྟགས་བཅུ་དང་། གཟུགས་བརྙན་རྫོགས་པ་ནི་སངས་རྒྱས་ཀྱི་སྐུ་སྣང་བ་དང་བསམ་གཏན་གྱིས་བསྙེན་པའོ། །སྲོག་རྩོལ་གྱི་རླུང་གིས་ཉེ་བའི་བསྙེན་པའོ། །འཛིན་པ་ཐིག་ལེ་འཛིན་ཅིང་རྗེས་དྲན་གྱི་རྒྱུར་གྱུར་པས་བསྒྲུབ་པའོ། །དེས་ས་བཅུ་གཉིས་ཐོབ་པར་བྱེད་པའི་ཏིང་ངེ་འཛིན་འབྱུང་བས་བསྒྲུབ་པ་ཆེན་པོ་སྟེ། རྒྱུད་ལས། བསྙེན་པ་བདུད་རྩི་ལྔ་དང་ཆུ་གཏེར་རྡོ་རྗེ་དང་ནི་སྔགས་བཟླས་པ་ལ་སོགས་པ་ཡིས། སོ་སོར་བསྡུད་པ་ལ་སོགས་པར་འགྱུར་རྡོ་རྗེ་པད་མ་ལས་སྐྱེས་བདུད་རྩི་ཡིས་ནི་ཉེ་བར་བསྒྲུབས། །དགའ་བ་ལ་སོགས་རྣམས་ཀྱིས་རྡོ་རྗེ་གསུམ་པོ་ཆུ་སྐྱེས་རོ་མཉམ་གྱུར་པ་བསྒོམས་པས་འགྲུབ་པར་འགྱུར། །ཤེས་རབ་མ་དང་ཕྲད་པས་འཕོ་བ་མེད་པར་འགྱུར་པ་བསྒྲུབ་པ་ཆེན་པོ་ཕྲ་མོའི་སྦྱོར་བ་ལས། ཞེས་པ་དང་། དང་པོར་སྟོང་པ་བྱང་ཆུབ་དང་ནི་ངེས་པར་དེ་ནས་བསྡུ་བ་ཡང་ནི་ཟླ་བའི་ཐིག་ལེའོ། །གཟུགས་བརྙན་རྫོགས་པར་གྱུར་པ་དེ་ལས་ཀྱང་ནི་རབ་མཆོག་རོའི་རིགས་ཀྱི་ཡི་གེ་དགོད་པ་ཉིད། འདི་དག་ཐུན་མོང་བསྙེན་པ་ཆུ་གཏེར་རིགས་ཀྱི་རྡོ་རྗེ་རྣམས་ཀྱིས་བསྒྲུབ་པ་ཡང་ནི་དབུ་མའོ། །འདིར་ཐབས་རྣམ་བཞིར་འགྱུར་ལ་མི་བརྟན་པ་དང་བརྟན་པ་དག་ལ་དེ་བཞིན་བསྒྲུབ་པའི་ཡན་ལག་ཉིད། །ཞེས་གསུངས་སོ། །ཁྱད་པར་གྱི་ཡན་ལག་དྲུག་འདིར་འབྱུང་བ་བཞིན་ཆུང་ངུ་ནི་རྣལ་འབྱོར་དང་པོ། འབྲིང་ནི་བར་པ། ཆེན་པོ་ནི་ཐ་མ་སྟེ། ཞིབ་དུ་ཕྱེ་ན་རེ་རེ་ལ་ཡང་དྲུག་དྲུག་ཏེ། །དུས་ཞབས་ཀྱིས། །ཀུན་ལ་དྲུག་དྲུག་ཤེས་པར་བྱ། །ཞེས་གསུངས་སོ། དེ་ཡང་སོར་སྡུད་ཀྱི་དྲུག་ནི། མི་རྟོག་པར་བསྡུ་བ་སོ་སོར་སྡུད་ཡིན་ལ། དེས་སེམས་གནས་པའི་དགའ་བདེ་འབྱུང་བ་བསམ་གཏན། རླུང་རང་འགགས་པ་སྲོག་རྩོལ། ཐིག་ལེ་དང་སེམས་འཛིན་པས་འཛིན་པ། བདེ་བ་རྒྱས་པས་རྗེས་དྲན། སངས་རྒྱས་ཀྱི་སྐུ་མི་འགྱུར་བར་མཐོང་བ་ཏིང་ངེ་འཛིན། བསམ་གཏན་གྱི་ནི་ཡན་ལག་ལྔ་ལྡན་དུ་བསྒོམ་པ་དང་། དེས་རྩེ་ཅིག་པ་ཐོབ་པ་དང་། མི་གཡོ་བས་རླུང་འཛིན་པ་དང་འདྲ་བ་དང་། དེས་མི་གཡོ་བ་ཉིད་དང་། དགའ་བདེ་འབར་བ་དང་། འབྲས་བུའི་བསམ་གཏན་དུ་གྱུར་པས་མངོན་ཤེས་ཐོབ་པ་དང་དྲུག་གོ །སྲོག་རྩོལ་ནི། འབྱུང་འཇུག་གནས་གསུམ་གྱིས་སེམས་འཛིན་པ་དང་། དེ་བརྟན་པ་དང་། སྟེང་འོག་རོ་མཉམ་པ་དང་། དབུ་མར་འགག་པ་དང་། འཛིན་སྟངས་ལྔས་རྩ་ཐམས་ཅད་འདུལ་བ་དང་། །གང་གི་འཕོ་བ་གསལ་བའི་ཏིང་ངེ་འཛིན་དང་དྲུག་གོ །འཛིན་པ་ལ་དེ་ཉིད་ཀྱི་འབྲས་བུ་དྲུག་རྣམས་སོ། །རྗེས་དྲན་ལ། ལྷ་རྗེས་དྲན་ལ་སོགས་དྲུག་བསྡུ་བ་དང་། མངོན་ཤེས་དྲུག་གི་བསམ་གཏན་དང་། སངས་རྒྱས་ཀྱི་སྤྲིན་སྤྲོ་བསྡུ་བ་དང་། འཛག་མེད་རང་བཞིན་ཐོབ་པ་དང་། ཕྱག་རྒྱ་གསུམ་རྗེས་སུ་དྲན་པ་དང་། འབད་པ་མེད་པའི་ཏིང་འཛིན་ནོ། །དེའི་འབྲས་བུ་དྲུག་འགྲུབ་པ་ཡེ་ཤེས་ཀྱི་ཏིང་ངེ་འཛིན་ཉིད་པས་རྒྱ་ཆེའོ། །འདི་རྣམས་ནི་སྤྱི་དོན་མདོ་ཙམ་མོ།། །།གསུམ་པ་ཉམས་སུ་བླང་བྱ་ཉིད་བཤད་པ་ནི་དྲུག་ལས། འདི་ལ་ཡང་སྤྱིར་གྲངས་ངེས་པ་དང་། གོ་རིམས་དང་། ས་འཚམས་དང་། བསྒོམ་པའི་ཚུལ་དང་། སོ་སོའི་མཚན་ཉིད་དང་། རྣམ་དབྱེ་དང་། སྒྲ་དོན་དང་། རྟགས་དང་ངེས་པ་དང་། །འབྲས་བུ་རྣམས་ཀྱིས་བཤད་པ་ལས། དང་པོ་གསུམ་ནི་རྒྱུ་འབྲས་ཚར་གསུམ་གྱིས་སྦྱོར་བ་ཡན་ལག་དྲུག་དུ་གྲངས་ངེས་པ་ཡིན་ཏེ། །ལུས་ཀྱི་རྩ་དག་པ་སྐུ་དང་། ངག་དང་རླུང་དག་པ་གསུང་དང་། སེམས་དང་ཐིག་ལེ་དག་པ་ཐུགས་ཏེ། སྦྱང་གཞི་སྦྱོང་བྱེད་ཐམས་ཅད་བསྡུས་པ་དེ་ལས་མེད་པའི་ཕྱིར་རོ། །གོ་རིམ་ངེས་པ་ཡང་རྩ་མ་དག་ན་རླུང་མི་འགགས། རླུང་མ་དག་ན་ཐིག་ལེ་མི་འཆིང་། ཐིག་ལེ་འཛག་མེད་དུ་མ་བཅིངས་ན་ཡེ་ཤེས་དག་པར་མི་འགྱུར་བའི་ཕྱིར་དང་། ཡང་བསམ་གཏན་མ་ཐོབ་པར་རླུང་གཡོ་བ་མི་འགག་ཅིང་། རླུང་འགག་པའི་འཛིན་པ་མ་གྲུབ་ན་ལུས་སེམས་ཀྱི་འཛག་སྒོ་རྣམས་མི་འགག་ལ། དེ་མ་འགགས་པར་སྲིད་ཞི་མཉམ་པར་སྤྱོད་པའི་ཡེ་ཤེས་མི་འགྲུབ་པས་ན་རྣལ་འབྱོར་གསུམ་གྱི་གོ་རིམ་ངེས་པ་ཡིན་སྟེ། དང་པོ་གཉིས་ནི་ཚོགས་ལམ་དང་སྦྱོར་ལམ་གྱི་དྲོད་རྩེའི་བར་རོ། །བར་པ་གཉིས་ཀྱིས་ནི་བཟོད་པ་ཆོས་མཆོག་མཐོང་བའི་ལམ་མོ། །ཐ་མ་གཉིས་ཀྱིས་ནི་བསྒོམ་ལམ་དང་མཐར་ཕྱིན་པའི་ལམ་མོ། །ས་འཚམས་ཀྱང་དེ་ཉིད་ཀྱིས་ཤེས་པར་འགྱུར་རོ། །བསྒོམ་པའི་ཚུལ་ལ་སོགས་པ་སོ་སོའི་སྐབས་སུ་སྟོན་པས་ཐོག་མར་སོ་སོར་སྡུད་པ་ལ་ཚིགས་སུ་བཅད་པ་ཕྱེད་དང་བརྒྱད་དེ། འདི་ལ་ཡང་ཉིན་མཚན་གྱི་རྣལ་འབྱོར་གཉིས་ལས་གནས་དང་། གང་ཟག་དང་། ལུས་གནད་དང་། ལྟ་སྟངས་ཀྱིས་སྟེང་འོག་བཅིངས་པ་རྣམས་ནི་བསྒོམ་པའི་ཚུལ་ཏེ། གནས་ནི་ཤིན་དུ་དབེན་ཞིང་ཉམས་དགའ་བ་བསམ་གཏན་གྱི་མི་མཐུན་པའི་ཕྱོགས་མི་དང་མི་མ་ཡིན་པ་རྣམས་ཀྱི་རྐྱེན་དང་། །སྒྲ་ཅ་ཅོ་མེད་པའི་སར་མུན་ཁང་ཚད་དང་ལྡན་པར་བསྒོམས་ཏེ། མཚན་མོ་གསེང་མེད་ཁྱིམ་དུ་ནི། ཞེས་སྨོས་སོ། །གང་ཟག་ནི། ཤིན་དུ་མཉམ་གཞག་བསྒྲུབ་པ་པོ་སྟེ་ལྔར་བསྟན་པ་ལྟར་རྣམ་པར་རྟོག་པའི་སྤྲོས་པ་ཐམས་ཅད་དོར་ནས་སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་དུ་མི་འགྱུར་བ་བསྒྲུབ་པར་འདོད་པའི་གང་ཟག་གོ །ལུས་ཀྱི་གནད་ནི་བྱེད་པ་ལྔ་དང་ལྡན་པ་སྟེ། རྐང་པ་རྡོ་རྗེ་དཀྱིལ་དཀྲུང་དང་། ལག་པ་རྡོ་རྗེ་ཁུ་ཚུར་རམ་རྡོ་རྗེ་བསྡམས་པ་དང་། །སྒལ་ཚིག་བསྲང་བ་དང་། དཔུང་པ་རྒོད་གཤོག་ལྟར་བརྐྱང་བ་དང་། མགྲིན་པ་ལྕགས་ཀྱུ་ལྟར་དགུག་པའོ། །བཅིང་བ་གཉིས་ནི། སྟེང་དུ་དབང་པོའི་སྒོ་བཞི་གྱེན་དུ་བཅིང་བ་དང་། འོག་རྩའི་ལམ་གསུམ་བཅིང་བ་སྟེ། འདི་དག་ཀྱང་ཁྲིད་ཡིག་ལས་བྱུང་བ་བཞིན་དུ་བླ་མའི་ཞལ་ལས་ཤེས་པར་བྱ་བ་སྟེ། རྡོ་རྗེ་འཆང་ཆེན་པོའི་རྒྱུད་པ་བར་མ་ཆད་པ་ལས་རྟོགས་པར་བྱའོ། །འདི་དག་གི་ངེས་པ་ནི་འགྲེལ་ཆེན་ལས། དང་པོར་སོ་སོར་སྡུད་པ་ནི་བུག་པ་མེད་པའི་ཁྱིམ་ནག་པོར་ཞུགས་སྟེ་ཅི་ཡང་བསམ་པར་མི་བྱའོ། །ཞེས་པ་དང་། །རྒྱུད་ལས། བསྙེན་པ་ཐོག་མའི་སྦྱོར་བ་ནམ་མཁར་རྣམ་པ་བཅུ་པོ་ཁྲོ་བོ་འཁོར་ལོ་ཅན་གྱི་ལྟ་སྟངས་ཀྱིས། ཞེས་གསུངས་པ་གཙུག་ཏོར་འཁོར་ལོས་བསྒྱུར་བའི་ལྟ་སྟངས་ཀྱིས་མིག་རྣ་བ་སྣ་ལྕེའི་རྩ་བཅིངས་པས་རྟགས་བཅུ་འཆར་བ་བྱེད་དོ། དུས་ནི་འགྲེལ་པར། གཡས་པར་ས་ལ་སོགས་པ་སྡུད་པའི་རླུང་རྒྱུ་བའི་དུས་སུ་བསྒོམ་པར་བྱའོ། །གསུངས་སོ། །སོ་སོར་སྡུད་པའི་མཚན་ཉིད་ནི། རྒྱུད་ལས། སོ་སོར་སྡུད་པ་ལུས་ལ་ཡུལ་དང་ཡུལ་ཅན་རྣམ་པ་བཅུ་པོ་རྣམས་ནི་འཇུག་པ་མེད་པའོ། །ཞེས་གསུངས་པས་ཡུལ་གཟུགས་སྒྲ་དྲི་རོ་རེག་བྱ་ལྔ་པོ་ལ་ཡུལ་ཅན་གྱི་རྣམ་པར་ཤེས་པ་ལྔ་པོ་འཇུག་པ་ལ་བརྟེན་ནས་དངོས་པོ་ལ་མཚན་མར་འཛིན་པའི་རྣམ་པར་རྟོག་པ་སྐྱེས་ཏེ། དེས་འཁོར་བའི་ཀུན་བརྟགས་ཐམས་ཅད་བསྐྱེད་པར་བྱེད་པས། འདི་ཐ་དད་དུ་འཇུག་པ་མེད་པར་རྣམ་པར་མི་རྟོག་པར་འཇོག་པའོ། །འདི་ནི་ཆོས་ཀྱི་དབྱིངས་ཀྱི་བསྟོད་པ་ལས་ཀྱང་། ཡིད་གཙོར་གྱུར་པའི་ཆོས་རྣམས་ལ། རྟོག་དང་བརྟག་པ་རྣམས་སྤང་ནས། ཆོས་རྣམས་རང་བཞིན་མེད་པ་ཉིད། །ཆོས་ཀྱི་དབྱིངས་སུ་བསྒོམ་པར་བྱ། །ཞེས་གསུངས་སོ། རྣམ་དབྱེ་ནི། སོ་སོར་སྡུད་པ་རྣམ་པ་བཅུ་ནི། ཡུལ་དང་ཡུལ་ཅན་གྱི་དབྱེ་བས་སམ། འོག་ནས་འབྱུང་བ་རྟགས་བཅུ་པོས་ཕྱེ་བ་ཏེ། དབྱེ་བའི་གཞི་ནི། སྙིང་ཁ་ནས་སྲོག་ཆེན་པོ་ལ་སོགས་པའི་རྩ་བཅུ་ལས་རླུང་བཅུ་རྒྱུ་བ་ལྷ་མོ་བཅུའི་རང་བཞིན་མིག་གི་དབུས་སུ་ཟུག་པའི་རྩའི་དངས་མ་ལས་རྟགས་བཅུར་འཆར་ཏེ་རང་གི་ཡེ་ཤེས་སྣང་བ་ཙམ་མོ། །སྒྲ་དོན་ནི་པར་ཏེ་ཧར་ཞེས་པ་སོ་སོར་ཡུལ་ལྔ་ལ་འཇུག་པ་མི་རྟོག་པར་སྡུད་པའམ་སོ་སོའི་གཟུང་འཛིན་གཅོད་པའམ་མཚན་མར་འཛིན་པ་སྤོང་བའི་དོན་གྱིས་སོ་སོར་སྡུད། སོ་སོར་གཅོད་སོ་སོར་སྤོང་ཅེས་སྔོན་གྱི་དམ་པ་རྣམས་ཀྱིས་མཛད་དོ། །རྟགས་དང་ངེས་པ་ནི། ཡོད་དང་མེད་པ་ལས་འདས་པ། །ཞེས་བྱ་བའི་ཡེ་ཤེས་ཀྱི་སྣང་བ་ནི་ཡོད་པའི་དངོས་པོའམ་མེད་པའི་དངོས་མེད་སྣང་བ་མ་ཡིན་ཏེ། གཉིས་ཀ་ལས་འདས་པའི་སྣང་བའོ། །དེ་ཉིད་ཀྱང་དུ་བ་སྨིག་རྒྱུ་སྲིན་མེ་ཁྱེར། །མར་མེ་སེམས་ཀྱིས་ནམ་མཁར་མཐོང་། །ཞེས་བྱ་བ་ས་ཆུ་མེ་རླུང་གི་མཚན་མར་འཛིན་པའི་རླུང་དག་པའི་རྟགས་ཏེ་བཞི་དང་། ནམ་མཁའི་རླུང་དག་པའི་རྟགས་མཁའ་སྣང་འབྱུང་སྟེ། གུར་ལས། །དུ་བ་ལྟ་བུ་དང་པོ་སྟེ། །སྨིག་རྒྱུ་ལྟ་བུར་གཉིས་པའོ། །མེ་ཁྱེར་ལྟ་བུ་གསུམ་པ་སྟེ། །མར་མེ་ལྟར་འབར་བཞི་པ་ཡིན། །རྟགས་སུ་སྣང་བ་ལྔ་པ་ནི། །སྤྲིན་མེད་ནམ་མཁའ་ལྟ་བུའོ། །ཞེས་གསུངས་སོ། །དེ་ཉིད་དཔེས་མཚོན་པ་ནི། །གཞོན་ནུ་མ་ཁམས་མ་ཉམས་པ་ལ་སྔགས་ཀྱིས་བྱིན་གྱིས་བརླབས་པས་རྐུན་པོ་ལ་སོགས་པ་མེ་ལོང་གི་ནང་མངོན་སུམ་ལྟར་སྣང་བ་བཞིན་མིག་གིས་མངོན་སུམ་དུ་ཡེ་ཤེས་ཀྱི་རྟགས་སེམས་གནས་པའི་མཐུས་མཐོང་སྟེ། གཞོན་ནུ་མའི་པྲ་ལས་ནི། །ལྐོག་ཏུ་གྱུར་པའི་རྐུན་མ་མཐོང་། །ཉི་ཚེ་བའི་མིག་གིས་ནི། །བསྒྲུབ་པ་པོའི་སེམས་གནས་མཐོང་། །ཞེས་གསུངས་སོ། །དེ་བཞིན་དུ་ཉིན་མོའི་རྣལ་འབྱོར་ནི། །ཆུ་འཛིན་དང་ནི་བྲལ་བ་ཡི། །ནམ་མཁའ་དངས་པར་གྱུར་པ་ལ། །སྔ་དྲོ་ཉི་མ་རྒྱབ་ཕྱོགས་ཏེ། །ཕྱི་དྲོ་ཡང་ནི་དེ་བཞིན་ནོ། །ཞེས་ཇི་ལྟར་བསྒོམ་པའི་ཚུལ་བཤད་ནས། །ཉིན་ཕྱེད་མིག་ལ་གནོད་ཕྱིར་སྤངས། །ཞེས་པ་ནི་ཉི་མའི་འོད་ཟེར་སྤངས་ཏེ་བསྒོམ་པའོ། །འདི་ཡང་འགྲེལ་བར། སྤྲིན་མེད་པའི་ནམ་མཁའ་དངས་པ་ལ་ཉི་མ་ལ་རྒྱབ་བསྟན་ཏེ་བསྒོམ་པར་བྱའོ། གཞན་དུ་ན་ཉི་མའི་འོད་ཟེར་གྱིས་མིག་རབ་རིབ་དུ་འགྱུར་རོ། །ཞེས་གསུངས་སོ། །རྟགས་ཀྱི་རིམ་པ་ཡང་། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །སྟེ་འབར་བ་དང་། འོད་ཆེན་རྣམ་པར་སྣང་བར་བྱེད། །ཅེས་པ་སྟེ་ཉི་མ་ལྟ་བུ་དང་། ཡེ་ཤེས་སྐར་མ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །སྟེ་ཟླ་བ་དང་སྐར་མའི་རྣམ་པ་ལྟ་བུ་དང་། གཟི་བརྗིད་ཆེན་པོ་འོད་གསལ་བ། །སྟེ་འཇའ་ཚོན་ལྟ་བུ་དང་། སྔགས་མཆོག་སྔགས་བདག་རིགས་སྔགས་རྒྱལ། །སྟེ་རྡོ་རྗེ་སྒྲ་ཅན་ཐིག་ལེ་ནག་པོའི་འཕྲེང་བ་དང་། གསང་སྔགས་རྒྱལ་པོ་དོན་ཆེན་བྱེད། །ནི་སྐུ་སྣང་བ་རྣམ་པ་སྣ་ཚོགས་པ་སྟེ། ངེས་པ་ཅན་དུ་མཚན་མོའི་རྟགས་བཞི་ཉིན་མོའི་རྟགས་དྲུག་སྟེ་བཅུ་དང་། །ངེས་པ་མེད་པ་དུ་མ་གསུངས་པ་རྣམས་སྣང་བར་འགྱུར་རོ། །ཐམས་ཅད་ཀྱི་མཐར་ཨ་བ་དྷུ་ཏེའི་དུས་ཀྱི་རྩའི་རང་བཞིན་ཐིག་ལེའི་དབུས་སུ་སྣང་བར་འགྱུར་ཏེ། ཇི་སྲིད་ཐིག་ལེའི་ནང་དུ་ནི་རི་མོ་ནག་པོ་སྐྲའི་ཚད་ཙམ་པ་འོད་གསལ་བར་ཉིན་མོ་དང་མཚན་མོ་མེད་པར་སྣང་བ་ལ་བརྟེན་ནས་མུན་པ་དང་རི་ཁང་ཁྱིམ་ལ་སོགས་པས་ཀྱང་སྒྲིབ་པར་མེད་པར་སྣང་བར་འགྱུར་ཏེ། །ཇི་སྲིད་ཐིག་ལེའི་ནང་དུ་ནི། །རི་མོ་ནག་པོ་སྐྲའི་ཚད། །དེ་མཐོང་འོད་གསལ་གོ་འཕང་ནི། །རྣལ་འབྱོར་པ་ཡིས་མཐོང་བར་འགྱུར། །ཞེས་སོ། །འདི་རྣམས་ཀྱང་ངེས་པ་ནི། ཤེས་རབ་ཀྱི་ཕ་རོལ་དུ་ཕྱིན་པ་ལས་ཀྱང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་ནི་ནམ་མཁའ་ལ་རྣལ་འབྱོར་དུ་བྱེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་ནི་བླ་གབ་མེད་པ་ལ་རྣལ་འབྱོར་དུ་བྱེད་པའོ། །ཞེས་ཉིན་མོ་དང་མཚན་མོའི་རྣལ་འབྱོར་དུ་གསུངས་ཤིང་། མཚན་ཉིད་དང་སྒྲ་དོན་ལས་བརྩམས་ནས། འདུས་པ་ཕྱི་མར། དབང་པོ་ལྔ་པོ་རྣམས་ཀྱི་ཡང་། །རང་གི་འཇུག་གནས་ཐམས་ཅད་དུ། །འདོད་པས་སོ་སོར་སྤོང་བས་ན། སོ་སོར་སྡུད་པའོ་ཞེས་བྱའོ། །ཞེས་སོ། རྟགས་ཀྱི་མཐོང་ཚུལ་ཡང་། དབང་མདོར་བསྟན་ནས། ཇི་ལྟར་མེ་ལོང་པྲ་ལས་ནི། །དངོས་མེད་ལས་སྐྱེས་བུ་མོས་མཐོང་། །མཁའ་ལ་དེ་བཞིན་རྣལ་འབྱོར་པས། །འདས་དང་མ་འོངས་ཆོས་དེ་བཞིན། །དངོས་པོ་དེ་ཡིས་དངོས་ཡོད་མིན། །དངོས་པོ་སྟོང་པའི་དོན་ཡོད་ཕྱིར། །དངོས་པོ་མེད་པའི་དོན་ཡོད་པ། །རྨི་ལམ་སྒྱུ་མ་མིག་འཕྲུལ་མཚུངས། །ཞེས་གསུངས་སོ། །འདི་ལྟ་བུ་ནི་དབང་བཞི་པའི་དོན་བླ་མའི་ཞལ་ལས་བྱུང་བ་ས་བོན་དང་བཅས་པའི་རྒྱུ་མཚན། རྒྱུད་ལས། གང་ཞིག་འཇིག་རྟེན་ལས་འདས་པའི་དབང་ནི་རྒྱལ་བ་མཆོག་གི་བདག་པོའི་ཕྱག་རྒྱ་བཟང་མོའི་རྗེས་འབྲེལ་བ། །སེམས་ཀྱི་སྣང་བ་ཙམ་སྟེ་རང་གི་ཡིད་ལས་སྐྱེས་པ་མེ་ལོང་གཟུགས་བརྙན་ལྟ་བུ་ནི། །མ་ལུས་རྒྱལ་བའི་སྲས་དང་སངས་རྒྱས་རྣམས་ཀྱིས་བསྟེན་པ་རྣལ་འབྱོར་དབང་ཕྱུག་གིས་ནི་བསྟེན་པར་བྱ། །དེ་ལས་ཡེ་ཤེས་འོད་ཟེར་ལ་ལངས་ནས་ཡུལ་དང་བཅས་པའི་བདུད་ཀྱི་ཚོགས་རྣམས་མ་ལུས་སྲེག་པར་འགྱུར། །རྣལ་འབྱོར་པ་ཡི་ལོ་ཡི་སྦྱོར་བས་འདོད་ཆགས་ལ་སོགས་མཉམ་པའི་བདེ་བ་སྟེར་བར་འགྱུར། །ཤེས་རབ་ཡེ་ཤེས་ཀྱང་ནི་སེམས་ཉིད་རྣམ་པ་བཅུར་ནི་གྱུར་པ་དེའི་སྣང་བ་ཙམ་ཉིད་དོ། །གང་ཞིག་དབང་བསྐུར་འདིར་གཞུག་པས་ནི་དྲི་མེད་རི་བོང་ཅན་འདྲའི་མེ་ལོང་གཟུགས་བརྙན་ལྟ་བུ་ངེས། །དེ་ལས་མྱ་ངན་འདས་བདེ་འཕོ་བ་མེད་དང་ལྷན་ཅིག་སྐྱེས་དང་འགྱུར་མེད་ངེས་པར་ཞི་བའོ། །གང་ཞིག་འདིར་ནི་སངས་རྒྱས་ཞལ་ཏེ་ཐུགས་དང་ཞལ་དུ་སོན་པས་གནས་པའི་དཔལ་ལྡན་བླ་མ་དེ། །ཞེས་གསུངས་སོ། །ལྟ་སྟངས་ཇི་ལྟར་བྱ་བ་དང་། རྟགས་འཆར་བའི་གོ་རིམས་ཀྱང་གསུངས་པ། ནམ་མཁར་ཞེན་པ་མེད་པའི་སེམས་དང་མིག་ནི་འཛུམས་པ་མིན་པས་རྡོ་རྗེ་ལམ་དུ་ཞུགས་པ་ཉིད། སྟོང་པ་ལས་ནི་དུ་བ་སྨིག་རྒྱུ་སྲིན་བུ་མེ་ཁྱེར་ཉིད་དང་མར་མེ་དང་། འབར་བ་དང་ནི་ཟླ་བ་ཉི་མ་རྡོ་རྗེ་མཆོག་གི་ཆ་དང་ཐིག་ལེ་མཆོག་ནི་མཐོང་བར་འགྱུར། །དེའི་དབུས་སུ་སངས་རྒྱས་གཟུགས་བརྙན་ཡུལ་དང་རྣམ་པར་བྲལ་བ་ལོངས་སྤྱོད་རྫོགས་སྐུ་དུ་མའོ། །ཞེས་གསུངས་ཏེ། རྡོ་རྗེའི་ལམ་དུ་ཞུགས་པ་ནི། མཚན་མར་འཛིན་པ་ཐམས་ཅད་འཇོམས་པའི་རྣམ་པར་མི་རྟོག་པའི་སེམས་ཡིན་པས་ནམ་མཁར་ཞེན་པ་མེད་པ་ཞེས་བསྒྱུར་བ་ལེགས་སོ། །འགྱུར་ཁ་གཅིག་ལ། ཆགས་པ་ཞེས་བསྒྱུར་ཏེ་དེ་ནི་གཟུགས་བརྙན་ལ་སེམས་འཛིན་པ་ཞེས་བྱ་བའི་དོན་ཡིན་ནོ། །ཉིན་མོའི་རྣལ་འབྱོར་བསྒོམ་པའི་ཚུལ་དང་རྟགས་བཅུ་རྫོགས་པའི་མཐར་རྟགས་བཅུ་གཅིག་པ་འབྱུང་བ་དང་བཅས་པ་རང་གི་སེམས་སྣང་བ་ཡིན་ཞིང་གཞན་དུ་གྲུབ་པ་མེད་པར་བསྟན་པ་ཡང་། ཆུ་འཛིན་རྣམ་པར་བྲལ་བའི་ནམ་མཁར་འགྱུར་མེད་ལྟ་སྟངས་ཀྱིས་ནི་རྣལ་འབྱོར་པ་ཡིས་བལྟ་བར་བྱ། ངེས་པར་རེ་ག་ནག་པོ་གསལ་ཞིང་དྲི་མ་མེད་པ་དུས་ཀྱི་རྩ་ནི་མཐོང་གི་བར་དུའོ། །དེར་ནི་ཐམས་ཅད་མཁྱེན་པའི་གཟུགས་བརྙན་ཆུ་ནང་ཉི་མ་ལྟ་བུ་རྙོག་མེད་ཁ་དོག་སྣ་ཚོགས་པ། །རྣམ་པ་ཀུན་ཏུ་རང་གི་སེམས་ཏེ་ཡུལ་དང་རྣམ་པར་བྲལ་བའི་འདི་དག་གཞན་གྱི་སེམས་མ་ཡིན། །ཞེས་གསུངས་སོ། །དེ་ལྟར་སོ་སོར་སྡུད་པ་བསྒོམ་པ་ལ་བརྟེན་ནས་མཐའ་གཉིས་དང་བྲལ་བའི་འདི་དག་གཞན་གྱི་སེམས་མ་ཡིན། །ཞེས་གསུངས་སོ། །དེ་ལྟར་སོ་སོར་སྡུད་པ་བསྒོམ་པ་ལ་བརྟེན་ནས་མཐའ་གཉིས་དང་བྲལ་བའི་རྣམ་ཀུན་མཆོག་ལྡན་གྱི་སྟོང་པ་ཉིད་འདི་ནི་དབུ་མ་དག་པར་བྱེད་པའི་ལམ་སྟེ། འདིར་ལྟ་སྟངས་ལ་སོགས་པའི་ལུས་གནད་བཅིངས་པས་ཡན་ལག་གི་རྩ་ཆིངས། དེས་མཆོག་གི་རྩ་བཅིངས་པ་ནི་ལུས་ཀྱི་དབུ་མ་དག་བྱེད་དོ། །སེམས་ཀྱི་དབུ་མ་ནི། སྤྲོས་པའི་མཚན་མ་ཐམས་ཅད་བྲལ་བས། རྟོག་པ་ཐམས་ཅད་དང་བྲལ་ཞིང་མ་འཁྲུལ་པའི་ཤེས་བྱའི་དོན་སྣང་བ་མ་འགགས་པ་ནི། སྟོང་པ་ཉིད་ཟུང་འཇུག་ཆེན་པོ་ཞེས་བྱ་སྟེ། སྒྲོ་འདོག་པ་དང་སྐུར་པའི་མཐའ་གཉིས་དང་བྲལ་བ་སྟེ། རྒྱུད་བླ་མ་ལས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་ཏེ། དོན་ཅི་ལྟར་སྣང་བ་ལས་གཞན་གྱིས་བསྣན་དུ་མེད་པའི་ཕྱིར། གཟུང་བ་དང་འཛིན་པ་དང་བརྗོད་པར་བྱ་བ་དང་བརྗོད་པར་བྱེད་པ་ལ་བརྟེན་པའི་རྣམ་པར་རྟོག་པ་མེད་པ་ལས་གཞན་བསལ་བར་བྱ་བ་ཅུང་ཟད་ཀྱང་མེད་པའོ། །དེ་བཞིན་དུ་དབུ་མཐའ་ལས་ཀྱང་། སྟོང་པ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བཤད། །ཞེས་པ་དང་། འཕགས་པ་ལྷའི་ཞལ་སྔ་ནས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མ་ཡིན། མཐའ་བཞི་ལས་ནི་རྣམ་གྲོལ་བ། །དེ་ནི་དབུ་མ་ལ་མཁས་པ། །ཞེས་བྱ་བ་ལ་སོགས་པ་མདོ་རྒྱུད་བསྟན་བཅོས་རྣམས་ལས་རྒྱ་ཆེར་དཔག་ཏུ་མེད་པ་གསུངས་པ་རྣམས་མདོར་བསྡུས་པས་སྒྲ་དོན་འཛིན་པའི་རྟོག་པས་མ་བསླད་ཅིང་། རྣམ་པར་མི་རྟོག་པའི་ཏིང་ངེ་འཛིན་གྱིས་མི་གཡོ་བར་གནས་པ་ལས་གཟུགས་ལ་སོགས་པའི་ཡུལ་ཐམས་ཅད་འགག་པ་མེད་པར་སྣང་བ་འདི་ནི་ཕྱག་རྒྱ་ཆེན་མོ་དང་། ཤེས་རབ་ཀྱི་ཕ་རོལ་ཏུ་ཕྱིན་མ་དང་། རང་རིག་རང་གསལ་དང་། ཚད་མའི་བདེན་པའང་ཡིན་ནོ། །འདི་ལྟ་བུའི་ཉམས་སུ་ལེན་པའི་རྣལ་འབྱོར་ལ་ཞུགས་པས་ཚོགས་ལམ་ཆེན་པོར་འགྱུར་ཏེ། ཕྱི་ནང་གཞན་གསུམ་ལ་འཇུག་པའི་ལུས་དྲན་པ་ཉེ་བར་གཞག་པ་དང་། ཡུལ་དྲུག་སྟོང་པ་ཉིད་དུ་སྣང་བས་བདེ་བ་ཆེན་པོར་འགྱུར་བའི་ཚོར་བ་དང་། སྣང་སྟོང་དབྱེར་མེད་ཀྱི་སེམས་དང་། བླང་དོར་དང་བྲལ་བས་སྒྱུ་མ་ལྟ་བུའི་ཆོས་ཏེ་དྲན་པ་ཉེ་བར་བཞག་པ་བཞི་པ་དང་། དེ་ལྟར་རྟོགས་པ་མི་དགེ་བ་སྐྱེས་པ་སྤོང་ཞིང་མ་སྐྱེས་པ་མི་བསྐྱེད་པ་དང་། ཟག་པ་མེད་པའི་རྒྱུ་མཐུན་པའི་དགེ་བ་བསྐྱེད་ཅིང་སྐྱེས་པ་རྣམས་བརྟན་པར་བྱེད་པས་སྤོང་བ་བཞི་དང་།བྱང་ཆུབ་ཆེན་པོ་ལ་འདུན་པ་ལས་སུ་རུང་བ་ཉིད་དང་། ལུས་ངག་གི་སྤྱོད་པ་ལས་སུ་རུང་བ་དང་། རྒྱུན་ཆད་པ་མེད་པའི་བརྩོན་འགྲུས་དང་། སེམས་ལས་སུ་རུང་བ་ཉིད་ཐོབ་པས་མྱུར་དུ་ཞི་གནས་དང་ལྷག་མཐོང་མངོན་སུམ་དུ་བྱེད་པའི་རྫུ་འཕྲུལ་གྱི་རྐང་པ་བདེ་བླག་དུ་འགྲུབ་སྟེ། འདིའི་སྐབས་ན། ཐམས་ཅད་ལ་ཆགས་པ་མེད་པར་གཏོང་བ་ནི་སྦྱིན་པ། སེམས་ལ་མི་དགེ་བའི་རྟོག་པ་གཏན་མི་བསྐྱེད་ཅིང་འཛག་བདེ་མི་འདོད་པའི་ཚུལ་ཁྲིམས། ལམ་བསྒྲུབ་པ་ལ་གནོད་པ་གང་གིས་ཀྱང་མི་འཕྲོགས་ཤིང་སྣང་སྟོང་དབྱེར་མེད་ཀྱི་དོན་ལ་མི་སྐྲག་པའི་བཟོད་པ། བསམ་གཏན་ལ་མྱུར་དུ་འཇུག་པའི་བརྩོན་འགྲུས། གཡོ་བ་མེད་པའི་བསམ་གཏན། ཕྱི་ནང་གཞན་གསུམ་ཡེ་ཤེས་སུ་སྦྱོར་བའི་ཤེས་རབ་རྣམས་འབྱུང་སྟེ། དང་པོ་བླ་མས་བསྟན་ཅིང་ཤེས་ནས་མཚན་ཉིད་རབ་ཏུ་རིག་པ་ཡིད་ལ་བྱེད་དོ། །རྣམ་གཡེང་ཐམས་ཅད་དང་བྲལ་བ་བྱང་ཆུབ་ཆེན་པོ་ཐོབ་པར་འདོད་པའི་མོས་པ་ལམ་དུ་བྱེད་པས་ཡིད་ལ་འཇུག་ཅིང་། ཉོན་མོངས་པ་དང་མཚན་མར་འཛིན་པའི་རྟོག་པ་རབ་ཏུ་དབེན་པའི་ཡིད་ལ་ཤེས་པ་རབ་ཏུ་རྫོགས་པར་འགྱུར་རོ། །དེ་ལྟར་བསྒོམས་པ་ལས་སོ་སོར་སྡུད་པ་གྲུབ་པའི་འབྲས་བུ་ནི་སོ་སོར་སྡུད་ལ་སྙོམས་འཇུག་པས། སྔགས་རྣམས་ཐམས་ཅད་བྱིན་གྱིས་རློབ། །ཞེས་གསུངས་སྟེ། སྔགས་ནི་མནྟྲའི་སྒྲ་ལས་མ་ན་ཡིད། ཏྲ་ཡང་སྐྱོབ་པ་སྟེ། བདེ་སྟོང་གི་རྟོག་པ་ཆེན་པོས་བྱིན་གྱིས་བརླབས་ནས། སྡུག་བསྔལ་དང་བཏང་སྙོམས་ཀྱི་རྣམ་རྟོག་ཐམས་ཅད་ཞི་བ་དང་། སེམས་ལས་སུ་རུང་ཞིང་མངོན་སུམ་པའི་ལྷ་མཐོང་བས་ཞི་བ་ལ་སོགས་པ་ཏིང་ངེ་འཛིན་གཏད་པ་ཙམ་གྱིས་འགྲུབ་སྟེ། རྒྱུད་ལས། སོ་སོར་སྡུད་པས་རྣལ་འབྱོར་པ་ལ་ཡུལ་དང་བྲལ་ཞིང་སྔགས་རྣམས་ཐམས་ཅད་བྱིན་གྱིས་རློབ། །ཞེས་གསུངས་སོ། །འོ་ན་འདིར་ཧཱུྃ་ཕཊ་ལ་སོགས་པ་ངག་དུ་མ་བརྗོད་པར་ནུས་པ་ཅིའི་ཕྱིར་འགྲུབ་ཞེ་ན། འདིར་ནི་སྟོང་པ་ཉིད་ཀྱི་གཟུགས་བརྙན་གྱི་ལྷ་མངོན་སུམ་དུ་བརྟན་པས་མྱུར་དུ་འགྲུབ་པ་ཡིན་ལ། ཀུན་བརྟགས་ཀྱི་བསྐྱེད་རིམས་བསྒོམ་པ་ནི། ཤེ་བའི་ལུས་ལ་རྗེས་སུ་སེམས་པར་བྱེད་པ་བཞིན་དུ་དུས་ཡུན་རིང་མོ་ཞིག་གིས་ཀྱང་འགྲུབ་པར་དཀའ་སྟེ། འོན་ཀྱང་བྱིས་པ་ལས་དང་པོ་པ་རྣམས་དྲང་བར་བྱ་བའི་ཕྱིར། ཐང་ཁ་ལ་སོགས་པ་ལ་བརྟེན་ནས་བསྒོམ་པར་ཡང་གསུངས་སོ། །དེ་ཡང་། གང་ཞིག་འདིར་ནི་ལྷ་ལ་དམིགས་པ་མངོན་སུམ་དང་ནི་རྗེས་སུ་དཔག་པ་གཉིས་སུ་འགྱུར། །མངོན་སུམ་ཡང་ནི་དེ་ཉིད་སྦྱོར་བས་ནམ་མཁའི་སྐར་མ་བཞིན་དུ་ལོངས་སྤྱོད་རྫོགས་སྐུ་དུ་མའོ། །མངོན་སུམ་མིན་པ་རྗེས་སུ་དཔག་པ་ཤི་བའི་ལུས་བཞིན་དོན་དེ་ཉིད་ལ་ནི་བརྟགས་པ་སྟེ། །རྣལ་འབྱོར་པས་ནི་རི་མོ་ལ་སོགས་བསྟན་པ་ཡོངས་སུ་མ་སྨིན་བློ་ཅན་བསྒོམ་པའི་དོན་དུའོ། །གཟུགས་སམ་དཀྱིལ་འཁོར་རམ་ནི་བྲིས་སྐུ་ཐོག་མར་ཡང་ནི་དེ་ཉིད་མིན་པ་བསྒོམ་པར་བྱ་བའོ། །ནམ་མཁའ་ལ་ནི་དེ་ཉིད་སྦྱོར་བས་རང་གི་སེམས་ཉིད་མ་ལུས་ལུས་པ་མེད་པ་མཐོང་བཞིན་པ། །ལོ་ཕྱེད་དམ་ནི་ལོ་ཅིག་པའམ་བླ་མའི་ངེས་པའི་དབང་གིས་ཇི་སྲིད་འདི་ལྟར་བརྟན་འགྱུར་བར། །དེ་ནས་ཕྱག་རྒྱ་མ་ལ་ཞུགས་པས་ཉི་མ་ཅུང་ཟད་ཙམ་གྱིས་འགྱུར་བ་མེད་པ་ཉིད་དུ་འགྱུར། །ཞེས་གསུངས་སོ། །སོ་སོར་སྡུད་པའི་རིམ་པའོ། །ད་ནི་གཉིས་པ་བསམ་གཏན་བཤད་པ་ནི། ཚིགས་སུ་བཅད་པ་གཅིག་སྟེ། ཐོག་མར་བསྒོམ་པའི་ཚུལ་ནི། སོ་སོར་སྡུད་པའི་རྟགས་རྣམས་ལེགས་པར་རྫོགས་པས་ནས། བསམ་གཏན་ནི་སོ་སོར་སྡུད་ཀྱིས་མཐོང་བའི་སྟོང་གཟུགས་དེ་ཉིད་ལ་སེམས་འཇུག་པ་ཤེས་རབ་དང་། །སྟོང་གཟུགས་ཀྱི་ངོ་བོ་འཛིན་པ་རྟོག་པ་དང་། ཁྱད་པར་འཛིན་པ་དཔྱོད་པ་དང་། གཟུགས་བརྙན་ལ་ཆགས་པ་དགའ་བ་དང་། བདེ་བ་མི་གཡོ་བ་ནི་སེམས་གཅིག་དུ་འདྲེས་པ་སྟེ་ཡན་ལག་ལྔའོ། །ཞེས་སྔོན་གྱི་རྣམས་བཞེད་དོ། །འདིར་བཤད་པ་ནི། ཇི་ལྟར་སྟོང་པ་ཉིད་ཀྱི་གཟུགས་བརྙན་བདག་དང་གཞན་དང་གཉིས་ཀ་དང་རྒྱུ་མེད་ལས་སྐྱེས་པ་ཡང་མ་ཡིན་ལ། ས་ཆུ་མེ་རླུང་གི་དངོས་པོ་དང་དངོས་པོ་མེད་པ་ཡང་མ་ཡིན་ལ། རྣམ་པར་མི་རྟོག་པའི་སེམས་ལ་ཁ་དོག་མེད་ཀྱང་ཁ་དོག་སྣ་ཚོགས་ཀྱང་སྣང་ཞིང་། ཉོན་མོངས་པའི་སེམས་དང་རྣམ་པར་རྟོག་པས་མཐོང་བ་ཡང་མེད་ལ། བདུད་ཀྱིས་བསྟན་པ་ཡང་མ་ཡིན་ཞིང་རྣམ་པ་ཐམས་ཅད་དུ་རྣལ་འབྱོར་པའི་མངོན་སུམ་རྟོག་པ་དང་བྲལ་ཞིང་མ་འཁྲུལ་བ་འདིར་སྣང་བ་བཞིན་དུ་ཕྱི་འཇིག་རྟེན་གྱི་ཁམས་དང་། ནང་ལུས་ལ་སོགས་པ་ཐམས་ཅད་ཀྱང་འདི་ལྟ་བུའོ་ཞེས་པ་ནི་ཤེས་རབ་སྟེ། སྡུད་པ་ལས། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །བདེ་གཤེགས་བྱང་ཆུབ་ཐ་དད་ཆོས་དང་བྲལ་གྱུར་པ། །འདི་ནི་བྱང་ཆུབ་སེམས་དཔའ་གང་ཞིག་ཐོབ་འདོད་པ། །ཐབས་དང་ལྡན་པ་ཤེས་རབ་ཕ་རོལ་ཕྱིན་ལས་སྦྱོར། །འདྲེན་པའི་ཤེས་རབ་མེད་ན་ཐོབ་པར་འགྱུར་མ་ཡིན། །ཞེས་གསུངས་པ་འདི་དང་སྟན་པར་བསྒོམ་པ་ནི་དེ་བཞིན་ཉིད་ལ་དམིགས་པའི་བསམ་གཏན་དུ་འགྱུར་རོ། །དེ་ཡང་རྒྱུད་ལས། །སྲ་བ་མིན་པར་སའི་རྣམ་པ་དང་ནི་གཤེར་པ་མེད་པ་ཆུའི་ལུས་ཏེ་ཆུ་མ་ཡིན། །མེ་མ་ཡིན་པ་མེའི་རྣམ་པ་གང་ཞིག་གཡོ་བ་མེད་པ་རླུང་གི་ལུས་ཏེ་རླུང་མ་ཡིན། །མཐོང་བའི་སྟོང་པའི་རྣམ་པ་དང་ནི་ཁ་དོག་མེད་ཅིང་དཀར་པོ་ལྗང་ཁུ་ཁ་དོག་སྣ་ཚོགས་ཆེན་པོ་རྣམས། ཀུན་གྱི་གཡོ་བ་རྣམ་པར་ཡང་ནི་རང་གི་སེམས་ཀྱི་རྙོག་པ་ཉོན་མོངས་བདུད་ཀྱི་མཐུ་ཡིས་མཐོང་བ་མིན། །ཞེས་གསུངས་པ་འདི་ལ་ཡང་། ཁ་ཅིག་སྟོང་གཟུགས་འདི་ཁོ་ན་སྣང་སྟོང་དབྱེར་མེད་ཤེས་རབ་ཀྱི་ཕ་རོལ་དུ་ཕྱིན་པ་ཡིན་གྱི་ཕྱི་རོལ་གྱི་དངོས་པོ་རྣམས་ནི་སྣང་སྟོང་དབྱེར་མེད་མ་ཡིན་ཏེ། བེམ་པོ་ཡིན་པའི་ཕྱིར་རོ། །ཞེས་སྨྲ་བ་ཡོད་མོད་ཀྱི། དེ་ནི་ཉན་ཐོས་བྱེ་བྲག་དུ་སྨྲ་བའི་གྲུབ་མཐའ་ཡིན་ཏེ། ཐེག་པ་ཆེན་པོའི་རྣམ་གཞག་མ་གོ་བར་ཟད་དོ། གཟུགས་ལ་སོགས་པ་ལ་དངོས་པོར་འཛིན་པའི་བློ་སྐྱེ་བ་ནི་འཁྲུལ་པར་ཟད་དེ་སྒྱུ་མའི་གཟུགས་ལ་མཚན་མར་འཛིན་པ་བཞིན་ནོ། །དེ་ཡང་། བྱིས་པས་བདེན་པར་འདུ་ཤེས་པ། །གཟུགས་བརྙན་ལ་ནི་ཆགས་པ་བཞིན། དེ་ལྟར་འཇིག་རྟེན་རྨོངས་པའི་ཕྱིར། །ཡུལ་གྱི་གཟེབ་ལ་ཐོགས་པར་འགྱུར། །དངོས་པོ་གཟུགས་བརྙན་ལྟ་བུར་ནི། །ཡེ་ཤེས་མིག་གིས་རབ་མཐོང་བའི། །བདག་ཉིད་ཆེན་པོ་དེ་དག་ནི། །ཡུལ་གྱིས་དམ་ལ་མི་ཆགས་སོ། །ཞེས་འཕགས་པ་ཀླུ་གྲུབ་ཀྱིས་གསུངས་ཤིང་། འདི་ལས་འཕྲོས་ནས་འབྱུང་བ་ཆེན་པོ་ལ་སོགས་པའི་དངོས་པོ་སེམས་ཀྱི་གསལ་སྣང་ལ་གཞན་ལྟར་དུ་སྣང་བ་བརྟན་པར་གྱུར་པ་ནི་ཡང་དག་མ་ཡིན་པའི་ཀུན་ཏུ་རྟོག་པ་ས་བོན་ཐམས་ཅད་པ་ཞེས་བྱ་བའི་ཀུན་གཞིའི་རྣམ་པར་ཤེས་པར་འགྱུར་ཏེ། མེད་བཞིན་དུ་གཉིས་སུ་སྣང་བའི་རྒྱུ་དེ་ལས་བརྟེན་པའི་རྒྱུད་གཞན་དུ་གྱུར་པ་ཡིད་ཀྱི་རྣམ་པར་རྟོག་པ་ལངས་པས་རང་རིག་དང་གཞན་རིག་སྣང་སྟོང་དབྱེར་མེད་ཡིན་པར་མ་ཤེས་སྟེ། ཐ་དད་དུ་འཛིན་པའི་བག་ཆགས་རབ་ཏུ་བརྟན་པ་ལས་བྱུང་ངོ་། །དེས་ཡང་རྡོ་རྗེ་རྩེ་མོ་ལས། །འབྱུང་བ་ཆེ་སོགས་གང་ལས་བྱུང་། །འགོག་པ་ཅི་ཞིག་གང་གིས་བྱེད། །མ་རིག་ཉོན་མོངས་ལ་སོགས་ལས། །འབྱུང་བ་ཆེ་སོགས་ཡང་དག་འབྱུང་། །ས་བོན་ཀུན་ལྡན་ཀུན་གཞི་ནི། །ཕྱི་དང་ནང་གི་བདག་ཉིད་འདོད། །གནས་ནི་ཡོངས་སུ་གྱུར་པ་དང་། ཀུན་གཞིའི་རྣམ་ཤེས་མི་འབྱུང་ཞིང་། །རྟོག་པ་ཐམས་ཅད་དང་བྲལ་བས། །ཕུང་པོ་ཁམས་སོགས་འགག་པ་ཡིན། །ཞེས་པ་དང་། དཔལ་ས་ར་ཧ་པས་ཀྱང་། རྟོག་པས་དཀྲུག་པས་རྣམ་རྟོག་གཟུགས་མེད་ལས། །ཤིན་དུ་སྲ་ཞིང་མཁྲེགས་པ་ཉིད་དུ་གྱུར། །ཞེས་གསུངས་པས། འདི་ལ་ཡང་ཟུང་འཇུག་གི་གནད་མ་གོ་བ་འགའ་ཞིག་འབྱུང་བ་ཆེན་པོ་ལ་སོགས་པ་ཐམས་ཅད་རྟོག་པ་ལ་བྱུང་ཞིང་དེ་འགོག་གོ་ཞེས་བཤད་པས་མཐར་ཐུག་དུ་གྱུར་པ་ལ་ཡེ་ཤེས་མེད་པར་འདོད་པའི་འཁྲུལ་པ་འབྱུང་སྟེ། །དེ་ལྟ་བུའི་གང་ཟག་ནི་གསོར་མི་རུང་བར་བསྟན་པ་ཏེ་གང་དག་གི་རྣམ་པར་ཐར་པའི་སྒོ་ལས་སྟོང་པ་ཉིད་དུ་ལྟ་བ་དེ་དག་ནི་སྟོང་པ་ཉིད་ཀྱིས་སེམས་རྣམ་པར་གཡེངས་པ་ཞེས་བྱ་སྟེ། དེ་བཞིན་གཤེགས་པའི་སྙིང་པོ་ལས་ཕྱི་རོལ་དུ་གྱུར་པར་རྒྱུད་བླ་མ་ལས་རྒྱས་པར་གསུངས་སོ། །རྒྱུད་ལས་ཀྱང་། སངས་རྒྱས་རྣམས་ཀྱི་མཛད་པ་དེ་དག་སྤངས་སྟེ་མཉམ་པའི་བདེ་བ་བྲལ་བའི་སྟོང་པ་གཞན་ཞིག་བསྒོམས། །དེ་ཡིས་སངས་རྒྱས་ཉིད་ནི་རིང་ཞིང་ལྷན་སྐྱེས་བདེ་བ་ཡང་སྐལ་པ་བྱེ་བ་དུ་མས་མིན། །ཞེས་གསུངས་སོ། །དེ་བས་ན་དངོས་པོ་དང་དངོས་པོ་མེད་པར་འཛིན་པ་གཉིས་ཀ་སྤངས་ཏེ་དངོས་པོ་རྣམས་ཆུའི་ཟླ་བ་ལྟ་བུར་མངོན་སུམ་བྱས་ལ་གནས་ཡོངས་སུ་གྱུར་པའི་ཡེ་ཤེས་བསྒྲུབ་པར་བྱའོ། །དེ་སྐད་དུ། །གང་ལ་བརྟེན་ནས་དངོས་པོ་རྣམས། ཆུ་ཡི་ཟླ་བ་ལྟ་བུར་ནི། །ཡང་དག་མ་ཡིན་ལོག་མིན་པར། །འདོད་པ་དེ་དག་ལྟས་མི་འཕྲོགས། །ཞེས་རིགས་པ་དྲུག་ཅུ་པ་ལས་གསུངས་པ་དང་། ཧེ་བཛྲ་ལས་ཀྱང་། རང་བཞིན་གདོད་ནས་མ་སྐྱེས་པ། །བདེན་མིན་བརྫུན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། འདོད་པས་རྣལ་འབྱོར་མས་ཤེས་ཀྱིས། །ཞེས་གསུངས་སོ། །གཞན་ཡང་ལུང་དཔག་དུ་མེད་དེ་སྤྲོས་པས་ཆོག་གོ །དེ་ལྟར་ཤེས་རབ་དང་ལྡན་པས་བསམ་གཏན་བསྒོམ་པ་འདི་ནི། དེ་བཞིན་གཤེགས་པ་རྣམས་ཀྱི་དགེ་བའི་བསམ་གཏན་གྱི་རྒྱུ་དེ་བཞིན་ཉིད་ལ་དམིགས་པ་གསལ་སྣང་ཆུང་ངུའི་བསམ་གཏན་ཡིན་ནོ། །འདི་ལས་གཞན་ཁམས་གསུམ་པའི་སྤངས་གཉེན་བདེན་པ་བཞི་ལ་དམིགས་པའི་ཤེས་རབ་ཙམ་ལ་བརྟེན་ནས་ཞི་རགས་ཀྱི་རྣམ་པ་བསྒོམ་པར་བྱེད་པའི་བསམ་གཏན་ནི། དོན་རབ་ཏུ་འབྱེད་པའི་བསམ་གཏན་ཞེས་བྱ་སྟེ་ཐེག་པ་གསུམ་གའི་ལམ་ཐུན་མོང་དུ་བསྒོམ་པའོ། །ཤེས་རབ་ཀྱིས་མ་ཟིན་པར་རྣམ་པར་རྟོག་པས་རེ་ཤིག་སེམས་ཞི་བ་ཙམ་དུ་འདོད་དེ་བསམ་གཏན་བསྒོམ་པར་བྱེད་པ་རྣམས་ནི། བྱིས་པས་ཉེ་བར་དཔྱོད་པའི་བསམ་གཏན་ཞེས་བྱ་སྟེ་གནས་སྐབས་བདེ་ཡང་ཁམས་གསུམ་ལས་མི་ཐར་བ་ཉིད་དོ། །བསམ་གཏན་འདི་རྣམས་གང་བསྒོམས་ཀྱང་རྟགས་རྣམས་ནི་འབྱུང་བར་བཤད་དེ། །ལང་ཀར་གཤེགས་པ་ལས། བྱིས་པ་ཉེར་སྤྱོད་བསམ་གཏན་དང་། །དོན་རབ་འབྱེད་པའི་བསམ་གཏན་དང་། །དེ་བཞིན་ཉིད་དམིགས་བསམ་གཏན་དང་། །དེ་བཞིན་གཤེགས་པའི་དགེ་བསམ་གཏན། །རྣལ་འབྱོར་ཅན་གྱིས་བརྩོན་བྱས་ནས། །ཉི་མ་ཟླ་བའི་གཟུགས་འདྲ་དང་། །འོད་དང་པད་མ་ལྟ་བུ་དང་། །རི་མོ་ནམ་མཁའ་མེ་འདྲ་མཐོང་། །མཚན་མ་སྣ་ཚོགས་འདི་དག་ནི། མུ་སྟེགས་ཅན་ལམ་འཁྲིད་པར་བྱེད། །ཉན་ཐོས་དག་དང་རང་རྒྱལ་གྱི། །སྤྱོད་ལམ་དུ་ཡང་ལྷུང་བར་བྱེད། །འདི་དག་ཐམས་ཅད་ཟད་པ་ན། མཚན་མ་མེད་པར་ནམ་གྱུར་པ། །དེ་དུས་སངས་རྒྱས་ལྷ་ཡི་ཕྱག །ཞིང་རྣམས་ཀུན་ནས་ཕྱུང་ནས་ནི། དེ་ཡི་མགོ་ལ་མྱུག་མཛད་དེ། །ཡང་དག་རྗེས་སུ་འགྲོ་བའི་ལྟས། །ཞེས་གསུངས་སོ། །བསམ་གཏན་དང་ཤེས་རབ་འདི་རྣམས་ཀྱི་དབྱེ་བ་རྒྱས་པར་ནི་པཎ་ཊི་ཏ་ཀ་མ་ལ་ཤི་ལས་བསྒོམ་པའི་རིམ་པར་གསུངས་ཏེ། དེ་བཞིན་དུ་རྒྱས་གདབ་པ་རྣམས་དཔའ་བོ་རྡོ་རྗེའི་ཕྱག་རྒྱ་བཞི་རིམ་དང་། དཔལ་ན་རོ་པའི་ལྟ་བ་མདོར་བསྡུས་ལས་ཀྱང་གསུངས་སོ། །ད་ནི་བསམ་གཏན་དངོས་བསྟན་པར་བྱ་སྟེ། རྟོག་པ་དང་དཔྱད་པ་ནི་གཉེན་པོའི་ཡན་ལག སྟོང་གཟུགས་ལ་རྟོག་པ་དང་། །དེ་ཤེས་བྱ་རྣམས་ལ་སྦྱར་ནས་དཔྱོད་པའོ། །དགའ་བ་བདེ་བ་དང་གཉིས་ནི་ཕན་ཡོན་གྱི་ཡན་ལག་སྟེ་ལུས་ལ་བདེ་བ་དང་སེམས་ལ་དགའ་བ་སྐྱེའོ། །རྩེ་ཅིག་པའི་སེམས་ནི་ངོ་བོའི་ཡན་ལག་སྟེ། རྒྱུད་གཅིག་ཏུ་བྱེད་པ་དང་ཏིང་ངེ་འཛིན་དུ་བྱེད་པའོ། །དེ་ལྟར་རྒྱུའི་བསམ་གཏན་དང་པོ་ཡན་ལག་ལྔ་ལྡན་དུ་ཡུལ་ཆོས་ལ་བརྟེན་ནས་སྐྱེས་པ་ཞེས་བྱའོ། །འདི་ལ་བརྟེན་ནས་ཡུལ་ཅན་འབྲས་བུའི་བསམ་གཏན་དུ་འགྱུར་ཏེ། རྟོག་དཔྱོད་ནུབ་པ་དང་། དགའ་མི་དགའ་ནུབ་པ་དང་། བདེ་སྡུག་ནུབ་པ་དང་། དབུགས་དབྱུང་རྔུབ་དང་བྲལ་བ་སེམས་ཀྱི་རྒྱུད་གཅིག་དུ་གྱུར་པའི་བཏང་སྙོམས་དང་དྲན་པ་ཡོངས་སུ་དག་པའི་བསམ་གཏན་ནི་འདིར་མི་གཡོ་བའི་སྒྲས་བསྟན་ཏེ། དེ་ནི་བསམ་གཏན་བཞི་པ་ཡིན་ནོ། །གཉིས་པ་དང་གསུམ་པ་ནི་ཤུགས་ཀྱིས་བསྟན་ཏེ། རྟོག་དཔྱོད་ནུབ་པའི་རྒྱུད་གཅིག་པ་ནི་གཉིས་པ་དང་། །དགའ་བདེ་ནུབ་པའི་བསམ་གཏན་གསུམ་པའི་རང་བཞིན་གྱིས་འབྱུང་བའི་ཕྱིར་རོ། །མཚན་ཡང་དག་པར་བརྗོད་པ་ལས་ཀྱང་། བསམ་གཏན་བཞི་པའི་རྩེ་མོ་ཅན། །བསམ་གཏན་ཡན་ལག་ཀུན་ཤེས་ཤིང་། །ཏིང་འཛིན་རིག་དང་རྒྱུད་རིག་པ། །ཏིང་འཛིན་ལུས་ཅན་སྐུ་ཡི་མཆོག །ཞེས་གསུང་སྟེ། བཞི་པའི་རྩེ་མོ་ནི་མི་གཡོ་བའོ། །ཡན་ལག་ཀུན་རེག་པ་ནི་ཡན་ལག་ཉི་ཤུ་རྩ་གསུམ་ཀྱང་། འབྲས་བུ་དང་རྒྱུའི་སྒོ་ནས་འདིར་བཅུར་འགྱུར་རོ། །དེ་ཡང་ལྔར་འདུས་སོ། །ཏིང་ངེ་འཛིན་རིག་པ་ནི་ངེས་པར་སེམས་འཛིན་པ་དང་རྣམ་པར་མི་རྟོག་པ་དང་སྒྱུ་མ་ལྟ་བུའི་ཏིང་ངེ་འཛིན་གྱི་རྒྱུར་གྱུར་རོ། །འདིའི་ལུས་ལ་བརྟེན་ནས་དེ་བཞིན་གཤེགས་པ་རྣམས་ཀྱི་སྤྲུལ་པ་འགྲུབ་པར་བྱེད་པས། ཏིང་འཛིན་ལུས་ཅན་སྐུའི་མཆོག་གོ །རྒྱུད་ལས་ཀྱང་། ཤེས་རབ་རྟོག་པ་དཔྱོད་པ་དགའ་བ་བདེ་བ་མི་གཡོ་བ་དང་བསམ་གཏན་ཀྱང་ནི་རྩེ་གཅིག་སེམས། །ཞེས་གསུངས་པ་བསྒོམ་པའི་ཚུལ་དང་བསམ་གཏན་གྱི་མཚན་ཉིད་བཤད་ན། རྣམ་པར་དབྱེ་བ་ནི་འགྲེལ་པར་དེ་བཞིན་དུ་གཟུང་བ་དང་འཛིན་པའི་དབྱེ་བས་བསམ་གཏན་ནི་རྣམ་པ་བཅུའོ། །ཞེས་གསུངས་སོ། སྒྲ་དོན་ནི། ཏ་ཏ་ཛྷྱ་ཞེས་པ་བསམ་པ་གཏན་པའམ་ས་མ་ཏི་སྟེ་ཡིད་འཛིན་པར་བྱེད་པའི་དོན་ཡིན་ནོ། རྟགས་ངེས་པ་ནི། རྒྱུའི་སྤྱན་རྣམ་པ་ལྔ་ཐོབ་པར་འགྱུར་ཏེ། ཤའི་སྤྱན་དང་། ལྷའི་སྤྱན་དང་ཤེས་རབ་ཀྱི་སྤྱན་དང་། ཡེ་ཤེས་ཀྱི་སྤྱན་དང་། སངས་རྒྱས་ཀྱི་སྤྱན་ལྔ་པོ་ནི་གཞི་གྲུབ་ཅིང་། སྤྱན་དང་པོ་ནི་འཐོབ་པར་གྱུར་རོ། །འབྲས་བུ་གྲུབ་པའི་ཚུལ་ནི། བསམ་གཏན་ཡན་ལག་ལྔ་བསྟན་པས། །མངོན་ཤེས་ལྔ་ཐོབ་མི་བདག་ཀྱེ། ཞེས་པས་མངོན་པར་ཤེས་པ་ལྔ་ནི། མིག་གི་མངོན་པར་ཤེས་པ་དང་། རྣ་བའི་མངོན་ཤེས་དང་། སེམས་དང་སྤྱོད་པ་ཤེས་པ་དང་། སྔོན་གྱི་གནས་དང་ཕྱི་མའི་སྐྱེ་བ་དྲན་པ་དང་། རྫུ་འཕྲུལ་ཤེས་པ་སྟེ། འདི་རྣམས་ཅི་རིགས་པ་ཐོབ་པར་འགྱུར་བའོ། །རྒྱུད་ལས་མིའི་བདག་པོ་རྣམ་པར་དག་པའི་བསམ་གཏན་སྦྱོར་བས་ཀྱང་ནི་མངོན་ཤེས་ལྔ་རྣམས་འཐོབ་པར་འགྱུར་ཞེས་གསུངས་སོ། ད་ནི་དེ་ལ་འཕྲོས་པ་བཤད་པར་བྱ་སྟེ། འདི་ལ་རྩ་དག་པའི་བསམ་གཏན་གྱིས་རྣམ་པར་མི་རྟོག་པའི་ཡེ་ཤེས་ཀྱི་མེའི་སྔ་ལྟས་ཀྱི་དྲོད་དང་ཟག་མེད་ཀྱི་དགེ་བ་དང་རྗེས་སུ་མཐུན་པའི་དགེ་བའི་རྩ་བ་གཡོ་བའི་རྩེ་མོ་འགྲུབ་པས། འདིར་མངོན་པར་ཤེས་པ་ལྔ་འབྱུང་བར་བཤད་པ་ཡིན་ཏེ། མདོ་སྡེ་རྒྱན་ལས། བསམ་གཏན་ལ་བརྟེན་མངོན་པར་ཤེས། །མངོན་པར་བསྒྲུབ་པའི་སྒོ་ནས་དེ། །སངས་རྒྱས་དཔག་དུ་མེད་པ་ལ། །མཆོད་པའི་ཕྱིར་དང་མཉན་པའི་ཕྱིར། །འཇིག་རྟེན་ཁམས་ནི་རྣམས་སུ་འགྲོ། །ཞེས་གསུངས་པ་ཡིན་ནོ། །རྒྱུད་ལས་གསུངས་པའི་དགོངས་པས་འདི་ཡི་སྐབས་སུ་བསམ་གཏན་དང་པོ་ཡན་ལག་ལྔ་ལྡན་ཐོབ་ནས་སྲོག་རྩོལ་སྦྱོངས་པས་བསམ་གཏན་ཐམས་ཅད་ཐོབ་ཅིང་། སྤྱན་གཉིས་པ་ལྷའི་སྤྱན་ཡང་གནས་སྐབས་དེར་ཐོབ་ལ། མངོན་ཤེས་ལྔ་ཡང་དེ་མན་ཆད་ཀྱིས་རྫོགས་པར་གསལ་བར་སྣང་ངོ་། །ཐེག་པ་ཐུན་མོང་གི་ལུགས་ཀྱིས་ནི། བདེན་བཞི་ལ་དམིགས་པའི་ཤེས་རབ་ཡོད་ཅིང་བསམ་གཏན་དང་པོ་ཐོབ་ན་རྒྱུན་དུ་ཞུགས་པ་ཞེས་བྱ་བ་མཐོང་ལམ་དུ་འགྱུར་མོད་ཀྱི་མངོན་ཤེས་ལྔ་ནི་མི་འཐོབ་བོ། །ཤེས་རབ་མེད་པའི་བསམ་གཏན་དང་གཟུགས་མེད་ཐམས་ཅད་གྲུབ་ཀྱང་མངོན་ཤེས་ལྔ་ཅི་རིག་པ་ཡོད་མོད་ཀྱི། འཁོར་བ་ནས་ཅུང་ཟད་ཀྱང་མ་འཕགས་སོ། །དབང་པོ་བརཏལ་པོའི་དགྲ་བཅོམ་པ་ལ་ཡང་མངོན་པར་ཤེས་པ་མེད་པ་འབྱུང་བར་བཤད་དོ། འདིར་ཐེག་པ་བླ་ན་མེད་པ་ནི་དེ་དག་དང་མི་མཚུངས་སྟེ། ཐབས་མཁས་པ་དང་དབང་པོ་རྣོན་པོའི་ཁྱད་པར་གྱི་ལམ་བསྒྲུབ་ཚུལ་ལ་བརྟེན་ནས་སྲོག་རྩོལ་མན་ཆད་ཀྱིས་སྦྱོར་བའི་ལམ་རྫོགས་ཤིང་མངོན་ཤེས་ལྔ་ཐོབ་པ་དང་། འཛིན་པ་ལ་ཞུགས་པས། ཟག་པ་ཟད་པའི་མངོན་ཤེས་དང་དྲུག་ཀ་ཐོབ་པར་བཞེད་པར་སྣང་ངོ་། །འདི་དག་ཁྱད་པར་དུ་བསྒྲུབ་པའི་རྣམས་གནས་ཀྱི་དམིགས་པ་ཡང་གསུངས་སྟེ། དང་པོ་མངོན་པར་ཤེས་པ་ལྔ་ཐོབ་པར་བྱ་བའི་ཕྱིར། རྣམ་པར་མི་རྟོག་པར་སྙིང་ཁའི་སྟོང་པ་ཉིད་ཀྱིས་གཟུགས་བརྙན་རབ་དུ་གསལ་བ་ལ་སེམས་རབ་དུ་བརྟན་ནས། ཡིད་ཀྱིས་ཕྱི་རོལ་གྱི་ཡུལ་གང་གིས་སེམས་ཤེས་པར་འདོད་པ་དེ་ཉིད་དང་། རང་གི་སྟོང་པ་ཉིད་ཀྱི་གཟུགས་བརྙན་དབྱེར་མེད་དུ་ནམ་མཁའ་ལྟར་བྱས་ལ་སྤངས་པའི་འདུ་ཤེས་དང་ཁྱབ་པའི་འདུ་ཤེས་ཀྱིས་ཟད་པར་ནམ་མཁའ་འགྲུབ་སྟེ། མཁའ་ལ་སྤྱོད་པར་འགྱུར་རོ། །དེ་བཞིན་དུ་ཟད་པར་ས་དང་། ཆུ་དང་། མེ་དང་། རླུང་དང་། སྤྲོ་བ་དང་བསྡུ་བ་རྣམས་ཀྱང་དེ་ཉིད་ཀྱིས་མཚུངས་སོ། །འདི་ནི་རྫུ་འཕྲུལ་གྱི་མངོན་པར་ཤེས་པའོ། །དེ་བཞིན་དུ་གཞན་གྱི་ཡིད་རང་གི་སྟོང་པ་ཉིད་ཀྱི་གཟུགས་བརྙན་ལ་བསྡུས་ནས་བསྒོམས་ན་གཞན་གྱི་སེམས་ཤེས་སོ། །དེ་བཞིན་དུ་འདས་མ་འོངས་ལ་དམིགས་པས་སྐྱེ་བ་དྲན་པར་འགྱུར་རོ། །མིག་དང་རྣ་བའི་མངོན་པར་ཤེས་པ་ནི་འོག་ནས་བྱེ་བྲག་ཏུ་སྟོན་ཏོ། །འདི་རྣམས་རྒྱུད་ལས། དེ་བཞིན་རྡོ་རྗེ་བསྒོམས་པའི་མཐུ་ཡིས་ཡིད་ཀྱི་ཡུལ་དང་བཅས་པས་མཁའ་ལ་རབ་ཏུ་སྤྱོད་པར་འགྱུར། མངོན་ཤེས་ལྔའི་རང་བཞིན་ཅན་དུ་འགྱུར་ཞིང་སླར་ཡང་རྣལ་འབྱོར་པའི་འདི་ནི་སྣ་ཚོགས་ཡུམ། ཞེས་གསུངས་སོ། །བྱེ་བྲག་ཏུ་མིག་གི་དབང་པོ་ལ་མངོན་པར་ཤེས་པ་སྣང་བའི་ཚུལ་ནི། ནམ་མཁའི་གཟུགས་བརྙན་གྱི་དབུས་སུ་མེ་ལོང་ལ་ཕྱི་རོལ་གྱི་ཡུལ་འཆར་བ་ལྟར། འདོད་པ་དང་གཟུགས་དང་གཟུགས་མེད་པ་རྣམས་སྣང་བར་འགྱུར་ཏེ། རྒྱུད་ལས། ཕྱག་རྒྱ་སྒྱུ་མའི་རྗེས་སུ་མཐུན་པའི་ཡིད་ཀྱང་ནམ་མཁའ་ལ་ནི་མེ་ལོང་ནང་གི་གཟུགས་བཞིན་དུ། འཇིག་རྟེན་གསུམ་པོ་སྣང་བར་བྱེད་ཅིང་གློག་གི་མེ་དང་འདྲ་བའི་འོད་ཟེར་དུ་མ་འཕྲོ་བར་འགྱུར། །ཞེས་གསུངས་སོ། །རྣ་བའི་མངོན་ཤེས་བསྒྲུབ་པ་ཡང་། རྒྱུད་ལས། རབ་མཆོག་མི་རྣམས་སྙིང་ཁའི་ཕྱོགས་སུ་གྱུར་པའི་སྒྲ་ནི་གང་ཞིག་རྣ་བའི་བུ་གར་ཐོས་འགྱུར་ལ། །མིའི་སེམས་དག་དེར་ནི་རོ་མཉམ་འགྲོ་བར་འགྱུར་ལ་གཅིག་དུ་གྱུར་པར་ཡང་ནི་སྦྱར་བ་བྱ། །གང་དུ་འཇིག་རྟེན་ཐམས་ཅད་སྨྲ་བའི་སྒྲ་དང་སྲིད་པ་ལས་བྱུང་དེ་དང་དེ་ཉིད་ཐོས་པར་འགྱུར། །རྣམ་པར་ཤེས་པས་ཀྱང་ནི་རིང་དུ་ཐོས་པ་ཉིད་དུ་ཁྱབ་བདག་རྣལ་འབྱོར་པ་ཡིས་བསྒོམ་པར་བྱ། །ཞེས་གསུངས་སྟེ། འདི་ལ་བརྟེན་ནས་ཞི་བ་དང་རྒྱས་པ་དང་། དབང་དང་དགུག་པ་དང་བསད་པ་དང་། བསྐྲད་པ་དང་། རྨོངས་པ་དང་། རེངས་པ་དང་། ཕུར་བུས་གདབ་པ་དང་དུག་གཞོམ་པ་དང་བཅས་པའི་ལས་བསྒྲུབ་པ་རྣམས་བསམ་གཏན་གྱིས་བདེ་བླག་ཏུ་བསྒྲུབ་པའི་རིམ་པ་རྒྱུད་འགྲེལ་ལས་མང་དུ་གསུངས་ཀྱང་འདིར་མ་བྲིས་སོ། །སྐུ་རྡོ་རྗེ་བསྙེན་པའི་ཡན་ལག་ཡིད་ཀྱི་རྣམ་པར་རྟོག་པ་ཐམས་ཅད་དང་བྲལ་བས་སྟོང་པ་ཉིད་ཀྱི་གཟུགས་བརྙན་གྱི་ཕྱག་རྒྱ་ཆེན་མོས་སེམས་འཆིང་བར་བྱེད་པ་རྣལ་འབྱོར་དང་པོ་རྫོགས་སོ།། །།ཨ་འཕྲེང་ཀ་འཕྲེང་འདུས་པ་ཅན། །རླུང་གི་དེ་ཉིད་ལ་ཕྱག་འཚལ། །སྟེང་འོག་སྲོག་རྩོལ་རང་བཞིན་ལས། །འཛིན་པའི་འབྲས་འབྱུང་བཤད་པར་བྱ། འཇམ་པའི་དབྱངས་ཀྱི་གསུང་གི་རྡོ་རྗེ་རྣལ་འབྱོར་བར་པའི་རྒྱུ་སྲོག་རྩོལ་གསུངས་པ་ནི་ཚིག་རྐང་བདུན་ལས། ཐོག་མར་སྒོམ་པར་བྱ་བའི་ངོ་བོ་བསྟན་པ་ནི། བར་མ་དབུགས་དབྱུང་མཆོག་ཡིན་ཏེ། ཞེས་དབུགས་རྔུབ་པ་ནི་བར་མ་སྟེ་ལུས་གནས་པའི་རྒྱུར་གྱུར་བ་ཡིན་ལ། དབྱུང་བ་ནི་ཐ་མ་འཆི་བའི་རྐྱེན་དུ་འ གྱུར་ལ་མཆོག་ནི་དབུ་མ་ལ་གནས་པ་ཡིན་ཏེ། དེ་དག་ཀྱང་ཨཱོཾ་ཨཱཿཧཱུྃ་གི་རང་བཞིན་ཐིག་ལེ་དང་ཚིག་དྲག་དང་ན་དའི་རང་བཞིན་གཡས་པ་ཉི་མའི་རླུང་དང་གཡོན་པ་ཟླ་བའི་རླུང་དང་དབུ་མ་སྒྲ་གཅན་ནོ། །དེ་གང་ནས་རྒྱུ་བ་བཤད་པ་ནི། གཤང་ལྕི་དང་ནི་ཟླ་ཉི་ཡི། རྩ་བ་དང་ནི་ཡན་ལག་ལྡན། ས་སྟེ་སྔར་སྐུ་རྡོ་རྗེའི་སྐབས་ནས་སྐུའི་དཀྱིལ་འཁོར་གྱི་སྒོ་བཞི་ནི། མིག་རྣ་བ་སྣ་ལྕེར་རྒྱུ་བ་དག་པས་འཇུག་པར་གསུངས་པ་བཞིན་དུ། འདིར་ཡང་གསུང་གི་དཀྱིལ་འཁོར་གྱི་སྒོ་ནི་འོག་ཏུ་གཤང་བ་དང་ལྕི་བ་འབབ་པའི་རྩ་གཉིས་དང་། སྟེང་དུ་ཟླ་བ་རླུང་འབབ་པ་རྐྱང་མ་དང་། ཉི་མའི་རླུང་འབབ་པ་རོ་མ་སྟེ་སྣ་གཡས་གཡོན་སྟེ་རྩ་བཞི་དང་། དེའི་ཡན་ལག་ལྟེ་བའི་དཀྱིལ་འཁོར་དུ་ལུག་དང་གླང་ལ་སོགས་པའི་མཉམ་པ་དང་མི་མཉམ་པ་ལ་སོགས་དུས་སྦྱོར་དྲུག་དྲུག་གིས་འཕོ་བ་འབྱུང་བའི་རྩ་དྲུག་ཅུ་དང་། སྟོང་པ་དང་ཡེ་ཤེས་ཀྱི་རླུང་རྒྱུ་བའི་རྩ་བཞི་དང་ལྡན་པ་ནི་དཀྱིལ་འཁོར་དྲུག་ཅུ་དང་། དེ་བཞིན་དུ་སྙིང་ཁར་ཐུན་བརྒྱད་རྒྱུ་བ་དང་། མགྲིན་པར་རྒྱུ་སྐར་ཉི་ཤུ་རྩ་བརྒྱད་ཀྱི་རླུང་རྒྱུ་བ་དང་སྟོང་པ་གཉིས་དང་། སྤྱི་བོར་ཟླ་བའི་རྐང་པ་བཅུ་བཞི་སྟོང་པ་ཡེ་ཤེས་གཉིས་དང་བཅུ་དྲུག འདི་ལ་ལུས་ཐམས་ཅད་དུ་ཚིགས་ཀྱི་འཁོར་ལོ་བཅུ་གཉིས་སོར་ཚིགས་ཀྱི་འཁོར་ལོ་དྲུག་ཅུ། གནས་ཉི་ཤུ་རྩ་བཞི། དེ་ལས་སྟོང་ཕྲག་བདུན་ཅུ་རྩ་གཉིས་སུ་ནང་དུ་རྒྱུ་བའི་ཚུལ་རྣམ་ཞིབ་ཏུ་གསང་སྔགས་ནང་དོན་དུ་བཤད་པ་ཡིན་ནོ། འདི་རྣམས་དབྱངས་དང་གསལ་བྱེད་གང་ཡིན་པ་དང་དཀྱིལ་འཁོར་གྱི་ལྷ་དང་སྦྱར་བ་རྣམས་ནི་དཔལ་དུས་ཀྱི་འཁོར་ལོའི་འགྲེལ་པ་དྲི་མ་མེད་པའི་འོད་ན་ཡོད་མོད་ཀྱི་འདིར་ནི་མ་བྲིས་སོ། །རྩ་བའི་རྒྱུད་ལས། དེ་ནི་ཐུར་དུ་རྩེ་གསུམ་སྟེ། །དེ་བཞིན་གྱེན་དུའང་རྩེ་གསུམ་མོ། །སྒྲ་གཅན་རྩེ་མོ་དབུས་ན་གནས། །ཉི་མའི་རྩེ་མོ་གཡས་པ་སྟེ། །ཟླ་བའི་རྩེ་མོ་གཡོན་པའོ། །ཆུ་དང་མེ་དང་ནམ་མཁའ་རྒྱུ། །གཡས་གཡོན་ནས་དབུ་མའི་མར་སྣ་ནས། །གཤང་བ་ལྕི་བ་ཁུ་བ་རྒྱུ། །ཞེས་གསུངས་པ། ཁུ་བ་དང་ནམ་མཁའ་འབབ་པ་གཉིས་ནི་ཐུགས་ཀྱི་དཀྱིལ་འཁོར་གྱི་སྒོ་རྗེས་དྲན་གྱི་སྐབས་ནས་འབྱུང་པས་འདིར་རྩ་བཞི་བྱེ་བྲག་ཏུ་སྨོས་པ་ཡིན་ནོ། །དབང་མདོར་བསྟན་ལས་ཀྱང་། ཉི་མ་ཟླ་བའི་རྩ་འགགས་ན། །དྲི་ཆེན་དྲི་ཆུའི་རྩ་འགག་གོ །ཞེས་གསུངས་པས་སོ། །རྩ་དེ་ནས་འབྱུང་བའི་རླུང་རང་གི་ངོ་བོ་ནི། ཡེ་ཤེས་ལྔའི་རང་བཞིན་དབུགས། །དབྱུང་བ་ལྔའི་ངོ་བོ་ཉིད། །སངས་རྒྱས་ལྔ་ཡིས་བྱིན་གྱིས་བརླབས། །ཞེས་གསུངས་པས། ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་སའི་ཁམས་ཀྱི་རླུང་ཁ་དོག་སེར་པོ། དཔལ་རྣམ་པར་སྣང་མཛད་ཀྱིས་བྱིན་གྱིས་བརླབས་པ་ཨིའི་ཡི་གེ་ཏའི་སྡེ་ཚན་དང་བཅས་པ་དག་པ་དང་། སོ་སོར་རྟོག་པའི་ཡེ་ཤེས་ཀྱི་རང་བཞིན་འབྱུང་བ་ཆུའི་རླུང་ཁ་དོག་དཀར་པོ་འོད་དཔག་ཏུ་མེད་པས་བྱིན་གྱིས་བརླབས་པ་ཡི་གེ་ཨུ་དང་པ་སྡེ་རྣམ་པར་དག་པ་དང་། མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་འབྱུང་བ་མེའི་རླུང་ཁ་དོག་དམར་པོ་རིན་ཆེན་འབྱུང་ལྡན་གྱིས་བྱིན་གྱིས་བརླབས་པ་ཡི་གེ་རི་དང་ཊ་སྡེ་རྣམ་པར་དག་པ་དང་། བྱ་བ་གྲུབ་པའི་ཡེ་ཤེས་ཀྱི་རང་བཞིན་གྱི་ནམ་མཁའི་རླུང་ཁ་དོག་སྔོན་པོ་དོན་ཡོད་གྲུབ་པས་བྱིན་གྱིས་བརླབས་པ་ཡི་གེ་ཨི་དང་ཙའི་སྡེ་ཚན་རྣམ་པར་དག་པ་དང་། མེ་ལོང་ལྟ་བུའི་ཡེ་ཤེས་ཀྱི་རང་བཞིན་ནམ་མཁའི་རླུང་ཁ་དོག་སྔོན་པོ་མི་བསྐྱོད་པས་བྱིན་གྱིས་བརླབས་པ་ཡི་གེ་ཨ་དང་ཀའི་སྡེ་རྣམ་པར་དག་པ་སྟེ། །འདི་ལྟར་རླུང་ལྔ་པོ་གཡས་ནས་ས་ཆུ་མེ་རླུང་ནམ་མཁའི་སྡུད་པའི་རིམ་པས་རྒྱུ་བ་དང་། གཡོན་ནས་ནམ་མཁའ་རླུང་མེ་ཆུ་ས་སྐྱེ་བའི་རིམ་པས་རྒྱུ་སྟེ། དཀྱིལ་འཁོར་བཅུ་ཐམ་པའོ། དེ་ལྟར་གཡས་དང་གཡོན་པར་ལུག་ལ་སོགས་པའི་ཁྱིམ་དྲུག་དང་གླང་ལ་སོགས་པའི་ཁྱིམ་དྲུག་གིས་ཞག་ཅིག་ལ་འཕོ་བ་བཅུ་གཉིས་ཏེ། དབུགས་སྟོང་བརྒྱད་བརྒྱ་རེ་རྒྱུ་ཞིང་དཀྱིལ་འཁོར་རེ་རེ་ལ་ནི་སུམ་བརྒྱ་དྲུག་ཅུའོ། །འདི་རྣམས་ཀྱི་བར་ནས་ཡེ་ཤེས་ཀྱི་རླུང་དཀྱིལ་འཁོར་རེ་ལ་བཅུ་གཅིག་བཞི་ཆ། འཕོ་བ་རེ་ལ་ང་དྲུག་བཞི་ཆ་སྟེ་ཞག་ཅིག་ལ་དྲུག་བརྒྱ་བདུན་ཅུ་རྩ་ལྔ་རྒྱུ་བས་ཡེ་ཤེས་ལྔ་འདུས་པའི་ངོ་བོ་ཁ་དོག་ལྗང་ཁུ་རྡོ་རྗེ་སེམས་དཔས་བྱིན་གྱིས་བརླབས་པ་ཡི་གེ་ཨཾ་དང་སའི་སྡེ་ཚན་ཀྵ་དང་བཅས་པ་རྒྱུ་བ་ལ་སྲོག་རྩོལ་ཞེས་བཤད་དོ། །སྟེང་འོག་གི་དབྱེ་བས་འོག་ཏུ་སྲོག་ཟླ་བའི་རང་བཞིན་ཉི་མའི་ཡོན་ཏན་གསུམ་གྱི་རྒྱུ་ལ་སྟེང་དུ་རྩོལ་བ་ཉི་མའི་རླུང་ཟླ་བའི་ཡོན་ཏན་ལྔ་ཡིས་རྒྱུ་སྟེ། དེ་བཞིན་དུ་དབྱུང་རྔུབ་སྲོག་རྩོལ་དང་གཡས་གཡོན་སྲོག་རྩོལ་ཐབས་དང་ཤེས་རབ་ཆ་གསུམ་གསུམ་དུ་འགྱུར་རོ། །འདི་རྣམས་ཀྱང་རྩ་བ་དང་ཡན་ལག་གི་རླུང་བཅུའི་དབྱེ་བས་ནི་ནང་དུ་རྒྱུ་བར་འགྱུར་རོ། །འདིར་སྨྲས་པ། སྲོག་རླུང་ཟླར་བཅས་སྲོག་འཛིན་བྱེད། །ཐུར་སེལ་བཟའ་བཏུང་ཐུར་དུ་འབྱིན། །མཉམ་གནས་ལུས་ཟུངས་ཟས་འཇུ་བྱེད། །གྱེན་རྒྱུས་བསྐྱོད་དང་སྐད་རྣམས་སྒྲུབ། །ཁྱབ་བྱེད་ཚིགས་དང་ལུས་ཀུན་ཁྱབ། །ཀླུ་ཡི་སྒེག་དང་གཟུགས་འཛིན་བྱེད། །རུ་སྦལ་དྲི་འཛིན་བརྐྱང་བསྐུམ་བྱེད། །རྩངས་རླུང་འཁྲོ་འཁྲུག་སྒྲ་འཛིན་བྱེད། །ལྷ་སྦྱིན་རོ་འཛིན་གླལ་བར་བྱེད། །ནོར་རྒྱས་རེག་དང་ལུས་ཁམས་འཛིན། །དབུ་མའི་སྟེང་ཕྱོགས་སྲོག་ཆེན་པོ། །འཆི་བའི་ཚེ་ན་ཞག་གཅིག་རྒྱུ། །འོག་ཕྱོགས་དུང་ཅན་བྱང་སེམས་འཛག །ལྷག་མ་བརྒྱད་པོ་འཁོར་ལོ་རྣམས། ཕྱོགས་འཚམས་དབྱེ་བས་བརྒྱད་བརྒྱད་འདོད། །དབྱུག་གུ་བཅུ་གཉིས་བཅུ་གཉིས་སྟེ། །ནང་རྒྱུའི་དཀྱིལ་འཁོར་དྲུག་ཅུ་ཡིན། །ཚིགས་ལ་སུམ་བརྒྱ་དྲུག་བཅུའི་ཆར། །དཀྱིལ་འཁོར་ལྔས་ཕྱེ་སྟོང་བརྒྱད་བརྒྱ། །བཅུ་གཉིས་དབྱེ་བས་རླུང་རྒྱུའོ། །ཐུན་དང་ཟླ་རྐང་རྒྱུ་སྐར་རྣམས། །སྔོན་དུ་ཇི་སྐད་བསྟན་པ་བཞིན། གཡས་གཡོན་ཚིགས་དང་རླུང་རྣམས་ཀྱི། །འཕོ་བ་སྡེ་ཚན་དྲུག་པོ་ལ། དབྱངས་དྲུག་གིས་བསྒྱུར་བརྒྱ་བརྒྱད་བཅུར། །རིམ་དང་རིམ་མིན་དབྱེ་བ་ཡིས། །གཡོན་ཀུན་ཐུང་ལ་གཡས་རྣམས་རིང་། དབྱངས་དང་གསལ་བྱེད་རྒྱུ་བ་སྟེ། །སུམ་བརྒྱ་དྲུག་ཅུ་པོ་འདི་རྣམས། །རགས་པའི་རྒྱུ་རིམས་བརྗོད་པའོ། །རྟེན་འབྲེལ་ལྷ་སྔགས་འདི་ལས་བྱུང་། །རླུང་དང་ཡི་གེ་དབྱེར་མེད་པའོ། །ཞེས་བྱ་བ་ནི་རླུང་དང་དབྱངས་དང་གསལ་བྱེད་ཀྱི་སྤྱི་དོན་བསྡུས་པའི་བར་སྐབས་ཀྱི་ཚིགས་བཅད་དོ། །ཇི་ལྟར་བསྒོམ་པའི་ཚུལ་ནི་ལུས་ཀྱི་གནད་སྔར་བསྟན་པ་བཞིན་ཡིན་ཀྱང་དེ་བས་ཅུང་ཟད་ལྷོད་པར་བྱའོ། །ལྟ་སྟངས་ནི་རྣལ་འབྱོར་བར་པ་གཉིས་ཀ་ལ་བདུད་རྩི་འཁྱིལ་པའི་ལྟ་སྟངས་ཐད་ཀར་བ ལྟ་བར་བྱ་སྟེ། རྒྱུད་ལས། བགེགས་མཐར་བྱེད་པའི་ལྟ་སྟངས་བདུད་རྩི་ལམ་དུ་སོན་པས་ཀྱང་ནི་ངེས་པར་སྒྲུབ་པ་ཡན་ལག་ལ་དྲུག །ཞེས་པ་དང་། འདུས་པ་ཕྱི་མ་ལས་ཀྱང་། སྒྲུབ་པ་ལ་ནི་ལྷ་ཡི་གཟུགས། །ཞེས་གསུངས་སོ། །འདི་ཡི་སྔོན་འགྲོ་ནི་རྡོ་རྗེའི་བཟླས་པ་གསུམ་ཁྲིད་ཡིག་ལྟར་ཟེར་བཞིན་བྱ་སྟེ། དེའི་ངེས་པ་ཡང་རྒྱུད་ལས། ཟླ་བའི་ཉི་མ་ཨ་སོགས་ཀ་སོགས་རྣམ་གསུམ་འགྲོ་བ་རྟོགས་པ་སྐུའི་རྡོ་རྗེ་སོགས་བཟླས་པ། །ཞེས་པ་དང་། ཧེ་བཛྲ་ལས་ཀྱང་། རང་གི་གཡས་དང་ལག་གཞན་གྱི། །ཐེ་བོང་དང་ནི་སྲིན་ལག་གིས། དེ་ནི་རྣལ་འབྱོར་པ་ཡིས་བཙིར། །དེ་ལ་ཡེ་ཤེས་སྐྱེ་བར་འགྱུར། །ཞེས་གསུངས་པ་རྣམས་ངེས་པར་བྱའོ། །སྲོག་རྩོལ་དངོས་གཞི་ཇི་ལྟར་བསྒོམ་པ་ནི། རྒྱུད་ལས། །ཁ་བཙུམས་ནས་ནི་སྣའི་བུག་པ་གཉིས་ནས་ཀྱང་ནི་ཕྱི་རོལ་རླུང་རྣམས་མ་ལུས་པ་དང་ནི། སྲོག་གི་དབུགས་ཀྱི་དྲངས་ནས་གློག་གིས་མེ་དང་འདྲ་བར་ཐུར་སེལ་ཀྱང་ནི་གཞུག་པར་བྱ། དུས་ཀྱི་སྦྱོར་བ་གོམས་པར་བྱས་པ་ལས་ནི་ཟླ་བ་ཉི་མ་མེ་རྣམས་དབུ་མར་རོ་མཉམ་འགྱུར། །ཁ་ཟས་ལ་སོགས་བཀྲེས་དང་སྐོམ་པ་ལུས་ལ་འཇོམས་པ་དང་ནི་མི་འཆི་བ་ཡང་སྟེར་བར་གྱུར། །ཞེས་གསུངས་སྟེ། བུམ་པ་ཅན་གྱི་སྦྱོར་བའོ། །སྲོག་རྩོལ་གྱི་མཚན་ཉིད་ནི། གཡས་གཡོན་གྱི་ལམ་གཉིས་པོ་བསྒགས་ནས་དབུ་མའི་ལམ་དུ་འཇུག་པ་སྟེ། རྒྱུད་ལས། སྲོག་དང་རྩོལ་བ་ལམ་ནི་གཉིས་པོ་སྤངས་པར་གྱུར་ནས་ཀྱང་ནི་དབུ་མར་སྲོག་དག་ཞུགས་པའོ། ཞེས་གསུངས་སོ། རྣམ་པར་དབྱེ་བ་ནི། གསང་བ་ལ་སོགས་པའི་འཁོར་ལོ་ལྔར་བུམ་པ་ཅན་གྱི་སྦྱོར་བ་ལྔའམ་སྲོག་གཞུག་པ་དང་དབྱུང་པའི་བྱེད་པས་རྣམ་པ་བཅུར་ཡང་འགྱུར་རོ། །དེ་ཡང་འགྲེལ་བར་འདུ་བྱེད་ཀྱི་ཕུང་པོ་གཡས་དང་གཡོན་གྱི་དཀྱིལ་འཁོར་བཅུ་པོ་གཅིག་དུ་གྱུར་བའོ། ཞེས་སོ། །སྲོག་རྩོལ་ཇི་ཙམ་བྱ་བའི་ངེས་པ་ནི། ཇི་སྲིད་དུ་མགོ་བོ་ན་བར་མ་གྱུར་གྱི་བར་དུ་བྱ་ཡིས་དེ་ལས་ལྷག་པར་མི་རུང་སྟེ། ཡང་ཕབ་ལ་དབྱུང་བ་བྱས་ནས་བསམ་གཏན་ལ་གནས་པར་བྱའོ། །དེ་བས་ལྷག་ན་འཆི་བའི་འཇིགས་པ་འབྱུང་བར་འགྱུར་བས་མི་བྱའོ། །དེ་ཡང་རྒྱུད་ལས། སྲོག་དང་རྩོལ་བ་ཀུན་ནས་མཉམ་པའི་བདེ་བ་སྟེར་བ་མགོ་བོའི་བར་དུ་ཤེས་པར་འགྱུར་བ་ཡིན། དེ་ལས་ལྷག་ན་འཆི་བའི་འཇིགས་པ་བྱེད་པ་ཕུང་པོ་ངེས་པར་འཇིག་པའི་རྒྱུ་དེ་མི་ཤིས་པ། །གཙུག་ཏོར་ཕུག་ནས་མཆོག་ཏུ་བདེ་བའི་གོ་འཕང་སྦྱར་བར་བྱ་བའི་གནས་སུ་ངེས་པར་འགྱུར། རྣལ་འབྱོར་པ་ནི་ཕུང་པོ་བོར་ནས་བདེ་བར་འཇུག་ལ་འོན་ཀྱང་འཇིག་རྟེན་དུ་ནི་གྲགས་པ་ན། །ཞེས་གསུངས་སོ། །སྒྲ་དོན་ནི་པཱ་ན་ཨཱ་ཡ་ཊ་ཞེས་པ་ཚེ་དང་སྲོག་གི་རྟེན་དུ་གྱུར་པ་འབྱུང་འཇུག་གི་རྩོལ་བ་ཅན་ཡིན་པའི་ཕྱིར་ན་སྲོག་རྩོལ་ཞེས་བརྗོད་དོ། འདིའི་རྟགས་ངེས་པ་ནི། དུས་སྦྱོར་བཅུ་གཉིས་ཀྱི་གཅིག་ནས་དྲུག་ཙམ་བར་དུ་འགོག་པར་ནུས་ཤིང་སྟོང་གཟུགས་ལ་འཁྱུད་པའི་བདེ་བས་རབ་ཏུ་གང་ཡང་ཁམས་འཛག་པ་མེད་པར་འཆིང་ནུས་པ་སྟེ། རྒྱུད་ལས། དབུ་མར་སྲོག་རྣམས་ཞུགས་པ་ལས་ནི་ཡུལ་དང་རྣམ་པར་བྲལ་བའི་སྣ་ཚོགས་ཡུམ་ལ་འཁྱུད་པ་ཅན། །པད་མར་ཞུགས་པའི་རང་གི་རྡོ་རྗེ་དེ་བཞིན་འཕྲོ་བ་ཟླ་བ་ཉི་མ་དབུ་མར་ཞུགས་པ་ཡི། །བདེ་བས་ས་བོན་མི་ལྟུང་བདེ་བས་དགའ་བར་གྱུར་པ་འདི་དག་རྣལ་འབྱོར་རྣམས་ཀྱི་རྣལ་འབྱོར་རོ། །ཕྱག་རྒྱ་གྲུབ་པའི་དོན་དུ་ཁྱབ་བདག་དཔལ་ལྡན་མཆོག་ཏུ་གསང་བ་ལས་ཀྱང་གསང་བར་གྱུར་པའོ། །ཞེས་གསུངས་སོ། །སྲོག་རྩོལ་བསྒོམས་པའི་འབྲས་བུ་ནི། གཡས་གཡོན་གྱི་དུས་ཀྱི་སྦྱོར་བ་དག་པས་ཚ་གྲང་ལ་སོགས་པའི་སྐྱོན་ཐམས་ཅད་ཀྱིས་མི་རྫི་ཞིང་། ཉིན་མཚན་མེད་པའི་གསལ་སྣང་ཆེན་པོས་མངོན་པར་ཤེས་པ་བརྟན་པ་དང་། འཇིག་རྟེན་གྱི་ཁམས་གཞན་ན་གཞུགས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་བསྔགས་པ་མཛད་པར་འགྱུར་ཏེ། རྒྱུད་ལས། སྲོག་དང་རྩོལ་བས་དག་པར་འགྱུར་ཞིང་ཟླ་བ་ཉི་མ་རྣམ་པར་བྲལ་ལ་བྱང་ཆུབ་སེམས་དཔས་མཆོད། །ཞེས་གསུངས་སོ། །ད་ནི་འདི་ལ་འཕྲོས་པའི་ཡན་ལག་བཤད་པར་བྱ་སྟེ། སྲོག་རྩོལ་གྱི་སྐབས་འདིར་སངས་རྒྱས་ཀྱི་ཡེ་ཤེས་ཀྱི་ཚུལ་གྱི་གནས་ལུགས་ཇི་ལྟར་ཡིན་པ་རྟོགས་ནས་ངེས་པར་བསྒྲུབ་པའི་དད་པ་དང་། རྗེད་ངས་མེད་པའི་དྲན་པ་དང་། དུས་ཐམས་ཅད་དུ་ལྷོད་པ་མེད་པའི་བརྩོན་འགྲུས་དང་། བསམ་གཏན་གྱི་ཏིང་ངེ་འཛིན་དང་། སྣང་སྟོང་དབྱེར་མེད་ཀྱི་ཤེས་རབ་ངེས་པར་འཛིན་པའི་དབང་པོ་ལྔ་ཐོབ་པས་དྲོད་དང་རྩེ་མོར་གྱུར་པ་རྫོགས་ཤིང་དེའི་འོག་ཏུ་རྣམ་པ་ཀུན་ལྡན་གྱི་སྟོང་པ་ཉིད་རྟོགས་པའི་ནུས་པས་རྣམ་པ་ཀུན་མཆོག་ལྡན་གྱི་སྟོང་པ་ལ་མི་སྐྲག་པའི་བཟོད་པ་དང་། ཕྱི་རོལ་གྱི་དོན་ཐམས་ཅད་སྟོང་པ་ཉིད་ཀྱི་གཟུགས་སུ། མཐོང་བས་རང་གི་ཡེ་ཤེས་ཀྱི་སྣང་བ་ལས་གཞན་པའི་ཕྱི་རོལ་གྱི་དོན་མེད་པར་མངོན་སུམ་དུ་རྟོགས་ཤིང་། རང་གི་རིག་པ་བདེ་གསལ་མི་རྟོག་པར་ཉམས་སུ་མྱོང་བའི་མཚན་མ་འབའ་ཞིག་ལུས་པའི་ཕྱིར། འཇིག་རྟེན་གྱི་ཆོས་ཀྱི་མཆོག་ལ་སྦྱོར་བར་འགྱུར་རོ། །དེའི་ཚེ་དབང་པོ་ལྔ་ཡང་བདུད་དང་ཐེག་པ་དམན་པས་མི་འཕྲོགས་པའི་ཕྱིར་སྟོབས་སུ་འགྱུར་རོ། །འདི་རྣམས་ཀྱི་ངེས་པ་མདོ་སྡེ་རྒྱན་ལས་ཀྱང་། དེ་ནས་དེ་འདྲར་གྱུར་པ་ཡིས། །བྱང་ཆུབ་སེམས་དཔའ་མཉམ་གཞག་པས། །ཡིད་ཀྱིས་བརྗོད་པ་མ་གཏོགས་པའི། །དོན་ཀུན་རབ་དུ་མི་མཐོང་ངོ་། །ཆོས་ཀྱི་སྣང་བ་འཕེལ་བྱའི་ཕྱིར། །བརྩོན་འགྲུས་བརྟན་པ་ཀུན་དུ་རྩོམ། །ཆོས་ཀྱི་སྣང་བ་འཕེལ་ནས་ནི། །སེམས་ཙམ་ལ་ནི་རབ་ཏུ་གནས། །ཞེས་པ་དྲོད་དང་རྩེད་མོའི་གནས་སྐབས་དང་། དེ་ནས་དོན་དུ་སྣང་བ་ཀུན། །སེམས་སུ་རབ་ཏུ་མཐོང་པར་འགྱུར། །དེ་ཚེ་དེ་ལ་བཟུང་བ་ཡི། རྣམ་པར་གཡེང་བ་དེ་སྤོང་གྱུར། །དེ་ནས་དེ་ལ་འཛིན་པ་ཡི། །རྣམ་པར་གཡེལ་བ་འབའ་ཞིག་ལུས། །དེ་ཚེ་བར་ཆད་མེད་པ་ཡི། །ཏིང་ངེ་འཛིན་ལ་མྱུར་དུ་རེག །ཞེས་བཟོད་པ་དང་ཆོས་མཆོག་གི་གནས་སྐབས་གསུངས་པ་དང་ཁྱད་པར་མེད་དོ། །འདི་ཡི་འོག་ཏུ་འཛིན་པ་གྲུབ་ནས་མཐོང་པའི་ལམ་དུ་གསུངས་པ་ཡིན་ནོ། སྲོག་རྩོལ་སྒྲུབ་པའི་སྐབས་སུ་སྲོག་རླུང་སྟེང་དུ་འགྲོ་བའི་ཉེས་པ་བསལ་བའི་ཐབས་ཀྱང་། ཇི་ལྟར་སྲོག་གི་རླུང་གིས་གནོད་པ་བྱེད་པའི་ཚུལ་དང་། རང་ལུས་གཞན་ལུས་ཀྱི་གནད་ཀྱིས་བྱང་ཆུབ་ཀྱི་སེམས་མི་འཛག་པའི་གནད་བཅིང་པ་མེད་ན་འབྲས་བུ་མི་འཐོབ་པར་གསུངས་ཏེ། སྲོག་དང་རྩོལ་བ་བྱས་པ་ལས་ནི་ཇི་སྲིད་སྙིང་ཁ་མགོ་བོ་དེ་བཞིན་མེ་ཡིས་གནོད་འགྱུར་ཞིང་། །དེ་ལས་གོང་དུ་རང་གི་པད་མ་བརྒྱལ་བར་འགྱུར་རམ་སྟོབས་ཀྱིས་མནན་པར་འགྱུར་བ་མ་ཡིན་ནམ། །གཙུག་ཏོར་ནས་ནི་འགས་ཤིང་འཆི་བར་འགྱུར་ཏེ་ཕུང་པོ་དང་ནི་ཁམས་རྣམས་རྣམ་པར་སྤོངས་བར་འགྱུར། །ཕྱག་རྒྱ་ལ་ཞུགས་ཉམས་པའི་སྐྱེས་བུ་ལ་ནི་ཚེ་འདི་ཉིད་ལ་བདེ་བའི་འབྲས་བུ་སྟེར་བ་མིན། །ཞེས་སོ། །ཡང་དུས་སྦྱོར་གྱི་ཟླ་བ་དྲུག་གི་རླུང་འགག་པར་ནུས་པས། ཕྱག་རྒྱ་དང་སྦྱོར་བ་ལས་མཛེའི་ནད་འཇོམས་པར་འགྱུར་བ་དང་། དེ་བཞིན་འགྱུར་དུ་འགོག་པས་རྒས་པ་སེལ་བ་དང་། དེ་ལས་ལྷག་པར་འགོག་ནུས་ན་མཐོང་བའི་ལམ་དུ་འཇུག་པར་བསྟན་པ་ནི། རྒྱུད་ལས། ཟླ་བ་དྲུག་གིས་མཆོག་གི་ལུས་ལ་མཛེ་ནད་དཀར་པོ་འཇོམས་སྟེ་བསྔགས་པ་དེ་ལས་གཞན་པ་ཅི། །ཤེས་རབ་མ་དང་ཕྲད་ནས་རང་གི་བྱང་སེམས་བཟུང་ཞིང་རྟག་ཏུ་སྲོག་གི་རླུང་ནི་འགག་པ་ལས། །རྒན་པོ་ལ་ནི་བདུན་ཅུ་པ་དང་སྐྲ་དཀར་གཉེར་མ་དང་བཅས་ལོ་གཉིས་རྫོགས་པར་ངེས་པར་འཇོམས། དེ་ལས་གོང་མ་ལམ་ལ་ཞུགས་པ་ནས་ནི་ཉི་མ་ཅུང་ཟད་ཙམ་གྱིས་ཕྱག་རྒྱ་འགྲུབ་པར་འགྱུར། །ཞེས་གསུངས་སོ། །ཡང་སྲོག་རྩོལ་སྒོམས་པས་རླུང་དང་བད་ཀན་དང་འདུས་པའི་ནད་ཀྱི་གེགས་སེལ་བའི་རླུང་སྦྱོར་ནི། །རླུང་ནད་མ་ལུས་པ་ལ་ཐུར་དུ་སེལ་བ་བསྡམས་པ་ཡིས་ནི་མཆོག་གི་ལུས་ལ་ཤིས་པར་འགྱུར། །སྲོག་དང་རྩོལ་བ་དག་ནི་བད་ཀན་ལ་སྟེ་སླར་ཡང་ཕྱུང་པ་ཡིས་ནི་འཁྲིས་པའི་ཉེས་པ་ལ། །སྟེང་དང་འོག་ཏུ་ཡང་དག་བསྡམ་པས་འདུས་པ་དང་ནི་རིམས་ནད་ཅན་ལ་བདེ་བ་བྱེད་པར་འགྱུར། ཞེས་པ་དང་། སྟེང་གི་ཉེས་པ་བྱུང་ན་འོག་གིས་སེལ་བ་དང་། འོག་གི་ཉེས་པ་བྱུང་ན་སྟེང་གི་སྦྱོར་བས་སེལ་བ་ཡང་། དེ་ཉིད་ལས། ལྟེ་བའི་སྟེང་དུ་སྲོག་གི་རླུང་གིས་མ་ལུས་ནད་རྣམས་འཇོམས་ཤིང་ལྟེ་བའི་རྩ་བར་ཡང་ནི་གཞན། །གནས་གསུམ་ལམ་དུ་སོན་པའི་ཐུར་དུ་སེལ་བའི་རླུང་ནི་བསྡམས་ཤིང་སྟེང་དུ་ཡང་ནི་སྲོག་ཉིད་དོ། །ཞེས་གསུངས་ཤིང་། གཞན་ཡང་། གཡས་གཡོན་གྱི་རླུང་ཡོན་པོ་བསྲང་བ་དང་། རླུང་གི་འཆི་ལྟས་བཟློག་པའི་ཐབས་ནི། རྒྱུད་ལས། དབུགས་བསྡམས་ནས་ནི་གཡས་དང་གཡོན་གྱི་མཆན་ཁུང་དང་ནི་ནུ་མ་ཡང་ནི་སྟོབས་དང་བཅས་པས་བཙིར། གཡས་དང་གཡོན་གྱི་རྩར་ནི་རབ་ཏུ་རྒྱུ་བ་སྤོང་ཞིང་གཡོན་གྱི་མཆན་ཁུང་གིས་ནི་གཡས་པར་རོ། །ཟླ་བ་ཕྱེད་ཀྱིས་འཆི་བ་སྟེར་བའི་འཆི་ལྟས་རྣལ་འབྱོར་དང་ལྡན་རྣལ་འབྱོར་པ་ཡིས་འཇོམས། ཞེས་གསུངས་སོ། །གཞན་ཡང་གེགས་སེལ་བར་བྱེད་པའི་རིམ་པ་རྒྱུད་འགྲེལ་ལས་མང་དུ་གསུངས་མོད་ཀྱི། ཡི་གེ་མངས་ཀྱིས་དོགས་པའི་ཕྱིར་མ་བྲིས་སོ། རྣལ་འབྱོར་ཉམས་སུ་ལེན་པའི་ཚེ་བསམ་གཏན་གྱི་དགའ་བའི་ཟས་མྱུར་དུ་འགྲུབ་པར་བྱ་བའི་ཕྱིར་བཀྲེས་སྐོམ་སེལ་བའི་རླུང་སྦྱོར་དང་། འཛིན་སྟངས་དེ་ཉིད་ལ་དམིགས་པ་དང་བཅས་ན་དུག་ཐམས་ཅད་སེལ་བ་གསུངས་པ་ནི། །དཀྱིལ་ཀྲུང་བཅིངས་ལ་སོ་རྣམས་ཕན་ཚུན་རེག་པ་མིན་པ་ཙམ་དུ་ཁ་ནི་གདངས་པར་འགྱུར་བ་དང་། །ཕྱི་རོལ་རླུང་དག་དྲངས་ཏེ་དེ་ནས་བདུད་རྩི་དང་ནི་ལྷན་ཅིག་ལྟེ་བའི་དབུས་ན་གཞུག་པར་བྱ། །མཆོག་གི་ལུས་ལ་རབ་ཏུ་གདུངས་དང་བཀྲེས་དང་སྐོམ་པ་འཇོམས་ལ་ཡང་དག་བཀག་ན་དུག་ཀྱང་ངོ་། །དཔྲལ་བར་ཐིག་ལེ་དཀར་པོ་དབྱངས་ཀྱིས་ཡོངས་སུ་སྐོར་བ་བདུད་རྩི་འཛག་བཞིན་པ་ཡིས་སམ། ཞེས་སོ། །སྲོག་རྩོལ་གྱི་སྦྱོར་བ་ཚད་དང་ལྡན་པར་འཛིན་མ་ཤེས་པ་ལ་བརྟེན་ནས་འཕོ་བར་འགྱུར་ཞིང་། ཡང་ལམ་མངོན་དུ་མ་བྱས་པར་འཆི་བའི་དུས་ལ་ཐུག་ན་འཕོ་བར་བྱ་བ་ཡིན་པས། དེ་གཉིས་ཀྱི་ངེས་པ་རྟོགས་པར་བྱ་བའི་ཕྱིར་འཕོ་བའི་རླུང་སྦྱོར་གསུངས་པ། ནུས་པ་གང་ཞིག་ལྟེ་དབུས་གནས་ནས་བཅུ་གཉིས་མཐའ་དང་ཆ་ཡིས་མཐར་ཐུག་གཞན་གྱི་གནས་སུ་འགྲོ། །དེ་ནི་ལྟེ་བར་ཡང་དག་བཀག་པས་གློག་གི་མེ་དང་མཚུངས་པའི་དབྱུག་པའི་གཟུགས་ཅན་ལངས་པ་ན། །འཁོར་ལོ་དང་ནི་འཁོར་ལོའི་བར་དུ་དབུས་མའི་རྩ་ནས་མཉེན་ལ་འཁྱོག་པའི་ཚུལ་གྱིས་བསྐྱེད་པ་དང་། །ཇི་སྲིད་གཙུག་ཏོར་བུག་པར་རེག་པ་དང་ནི་སྟོབས་ཀྱི་ཁབ་དང་འདྲ་བས་ཕྱི་རོལ་ལྤགས་པ་ལ། །དེ་ཡིས་དུས་སུ་ཐུར་དུ་སེལ་བ་མཆོག་ཏུ་སྟོབས་བསྐྱེད་པ་ཡིས་སྟེང་གི་ལམ་དུ་བསྐྱལ་བྱ་ཞིང་། །རླུང་ནི་ཟུང་ཅིག་བཀག་པས་གཙུག་ཏོར་ཕུག་པར་གྱུར་ན་གྲོང་ཁྱེར་གཞན་དུ་ཡང་ནི་འགྲོ་བར་འགྱུར། ཞེས་པས། ནུས་པ་ནི་སྲོག་གི་རླུང་སྟེ་ཞག་ཅིག་ལ་ཉི་ཁྲི་གཅིག་སྟོང་དྲུག་བརྒྱ་ལྟེ་བའི་དབུས་ནས་ཕྱིར་འབྱུང་བ་གཡས་གཡོན་གྱི་སྣ་བུག་ནས་བསྡུད་པ་དང་བསྐྱེད་པའི་རིམ་པས་རླུང་སོར་བཅུ་གཉིས་ཀྱི་མཐའི་བར་དང་། ནམ་མཁའི་རླུང་གི་ཆའི་སྟེ་སོར་བཅུ་དྲུག་གི་མཐར་ཐུག་པར་འགྲོ་བ་རྣམས། སྲོག་བུམ་པ་ཅན་གྱིས་ལྟེ་བར་བཀག་པས་གློག་གི་མེ་དང་མཚུངས་པའི་གཏུམ་མོ་དབང་ཕྱུག་པའི་གཟུགས་ཀྱིས་ལངས་ནས། འཁོར་ལོ་དང་ནི་འཁོར་ལོའི་བར་དུ་དབུས་མའི་རྩའི་ནང་ནས་གྱེན་ལ་གཉེན་ལ་འཁྱོག་པའི་ཚུལ་གྱིས་བསྐྱོད་པ་སྟེ། ལྟེ་བ་ནས་སྙིང་ཁ་དང་མགྲིན་པ་དང་དཔྲལ་བ་དང་ཇི་སྲིད་གཙུག་ཏོར་གྱི་བར་དུ་འགྲོ་སྟེ། དེར་ཕྱིན་ནས་ཚངས་བུག་ལ་རེག་པའི་སྟོབས་ཀྱིས་ཕྱི་རོལ་གྱི་ལྤགས་པ་ཁབ་ཀྱི་རྩེ་མོས་ཕུག་པ་བཞིན་འགྲོའོ། །དེའི་དུས་སུ་རྣལ་འབྱོར་པས་སྟེང་རླུང་གི་རྩོལ་བ་མཆོག་ཏུ་སྟོབས་བསྐྱེད་པས་ཐུར་སེལ་གྱི་རླུང་སྟེང་གི་ལམ་དུ་བསྐྱལ་ཞིང་། གཡས་གཡོན་གྱི་རླུང་ཟུང་གཅིག་དབུས་སུ་བཟུང་ནས་ཕྱིར་རྒྱུ་བ་བཀག་པས་སེམས་གཙུག་ཏོར་ཕུག་ནས་ལུས་ཀྱི་གྲོང་ཁྱེར་ལས་གཞན་དུ་འགྲོའོ། །འདི་ནི་འཕོ་བའི་སྦྱོར་བ་ཡང་དག་པའོ། །འདི་ལྟར་བསམ་གཏན་དང་གཟུགས་མེད་པ་དང་སྔར་བསྟན་པ་བཞིན་ཕ་རོལ་དུ་ཕྱིན་པ་དྲུག་དང་ལམ་ཐམས་ཅད་ཀྱི་གནས་སྐབས་ཤེས་པ་དང་། ཚད་མེད་པ་བཞིས་ཟིན་པ་དང་། དམིགས་པ་མེད་པའི་ཏིང་ངེ་འཛིན་དང་། འཁོར་གསུམ་དུ་མི་དམིགས་ཤིང་ཆེད་དུ་བྱ་བ་རྣམས་སྒྲུབ་པ་དང་མངོན་པར་ཤེས་པ་དྲུག་ལ་མཁས་པ་དང་། རྣམ་པ་ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བར་འཇུག་པ་ནི། ཐེག་པ་ཆེན་པོ་བླ་ན་མེད་པ་ལ་འཇུག་པའི་སྒྲུབ་པ་ཡང་དག་པ་ཡིན་ནོ། །དེ་ཡང་མངོན་རྟོགས་རྒྱན་ལས། བསམ་གཏན་གཟུགས་མེད་སྦྱིན་སོགས་དང་། །ལམ་དང་བྱམས་ལ་སོགས་པ་དང་། དམིགས་པ་མེད་དང་ལྡན་པ་དང་། །འཁོར་གསུམ་རྣམ་པར་དག་པ་དང་། །ཆེད་དུ་བྱ་དང་མངོན་ཤེས་དྲུག །རྣམ་ཀུན་མཁྱེན་པའི་ཚུལ་ལ་ནི། །འཇུག་པའི་སྒྲུབ་པ་ཐེག་ཆེན་ལ། །འཛེག་པ་ཡིན་པར་ཤེས་པར་བྱ། །ཞེས་གསུངས་པའི་དོན་རྣམས་འདི་ཡན་ཆད་ཀྱི་གདམ་ངག་རྣམས་ལ་ཚང་བའི་ཕྱིར། ལུང་དེ་ཡང་འདིར་བྲིས་སོ། དེ་ལྟར་སྲོག་རྩོལ་སྒོམས་པའི་འབྲས་བུ་འཛིན་པ་འགྲུབ་པས་བཤད་པ་ནི། རྟག་ཏུ་འཛིན་པའི་སྟོབས་ཀྱིས་ནི། རྡོ་རྗེ་སེམས་དཔར་ཡང་དག་འཇུག །ཞེས་གསུངས་པས། འཛིན་པ་བསྒོམ་པའི་ཚུལ་ནི། སྔ་མ་སྲོག་རྩོལ་དུ་ཇི་ལྟར་བསྟན་པ་བཞིན་དུ་བུམ་པ་ཅན་གྱི་སྦྱོར་བས་གསང་གནས་ནས་གཙུག་ཏོར་གྱི་བར་དུ་བྱང་ཆུབ་ཀྱི་སེམས་འཛིན་པ་སྟེ། འདིའི་ངོ་བོ་ནི། རླུང་དག་རབ་ཏུ་བསྡམས་པར་གྱུར་པས་གློག་གི་མེ་འདྲའི་རྩེ་མོས་སྤྱི་བོར་ཟླ་བར་བྱེད། །གང་དང་གང་དུ་ཐིག་ལེ་ཞུ་བ་འདི་ལས་མགྲིན་པ་སྙིང་ཁར་སོན་པ་དང་ལྟེ་བ་གསང་བར་དགག ཐིག་ལེ་ཟླ་བ་འཛག་པ་གང་དག་རྡོ་རྗེ་ནོར་བུར་སོན་པ་རྒྱལ་མཚན་རྩེ་མོར་ཡང་ནི་དགག །ཤེས་རབ་ཡེ་ཤེས་སྐད་ཅིག་དེ་ལས་བདེ་བ་སྟེར་བ་གལ་ཏེ་ཐེག་ལེའི་ཕྲེང་བ་མི་འཕོ་བས། །དེ་ལས་འཛག་པ་མེད་པའི་ལྷན་སྐྱེས་སྐད་ཅིག་མ་ཡིས་འདིར་ནི་ཆོས་ཀྱི་དབྱིངས་ནི་སྟེར་བར་འགྱུར། །ཞེས་པས་འགྲེལ་པར་སྔོན་དུ་གཟུགས་བརྙན་མཐོང་བ་དེས་སྲོག་གི་རླུང་རྣམ་པ་བཅུ་རབ་ཏུ་བསྡམས་པས་ལྟེ་བའི་དཀྱིལ་འཁོར་དུ་གློག་གི་མེ་འདྲ་འབར་བའི་རྩེ་མོས་སྤྱི་བོར་སྟེ་དཔྲལ་བ་ན་གནས་པའི་ཟླ་བ་བྱང་སེམས་ཞུ་བར་བྱེད་ལ་དེ་ལྟར་དཔྲལ་བ་ལ་སོགས་པ་གནས་གང་དང་གང་དུ་ཐེག་ལེ་ཞུ་བ་དེ་ལས་མགྲིན་སྙིང་ལྟེ་གསང་དུ་འཛག་པས་སྲོག་སྩོལ་གྱི་སྟོབས་ཀྱིས་མི་འཕོ་བར་དགག་སྟེ། དེ་ཡང་གསང་བར་སྐུའི་ཐིག་ལེ་ནས་ལྟེ་སྙིང་མགྲིན་པར་རིམ་པ་བཞིན་གསུང་ཐུགས་ཡེ་ཤེས་ཀྱི་ཐིག་ལེ་འགག་གོ །ཡང་ལས་རྒྱའི་སྟོབས་ཀྱིས་ཐིག་ལེ་བཞུ་བརཏལ་བྱས་ཡས་སླ་བར་གྱུར་པ་འཛག་པ་གང་དག་རྡོ་རྗེ་ནོར་བུར་སོན་པའི་རྒྱལ་མཚན་རྩེ་མོ་ནི་རྟགས་ཀྱི་ཁ་སྟེ། དེར་ཡང་སྲོག་རྩོལ་གྱི་སྟོབས་ཀྱིས་ཡང་དག་པའམ་རབ་ཏུ་བཀག་པས་ཐེག་ལེའི་འཕྲེང་བ་མི་འཕོ་བའི་སྐད་ཅིག་དེ་ལས་བདེ་བ་ཆེན་པོ་སྟེར་བའི་ཕྱིར་འཛག་པ་མེད་པའི་ཡེ་ཤེས་སུ་འགྲུབ་པར་གསུངས་ཤིང་། ཆོས་ཀྱི་དབྱིངས་སྟེར་བ་སྟེ་མཐོང་བའི་ལམ་མངོན་སུམ་དུ་བྱེད་པས་དང་པོ་ཆོས་ཀྱི་དབྱིངས་ཀུན་དུ་འགྲོ་བ་ལ་གནས་པར་འགྱུར་བའོ། འཛིན་པའི་མཚན་ཉིད་ནི་སྣ་གཡས་གཡོན་གྱི་རླུང་གི་འཕོ་བ་ཉམས་ནས་ཐིག་ལེར་སྲོག་ཞུགས་པས་བྱང་ཆུབ་ཀྱི་སེམས་འཛིན་པ་བརྟན་པར་འགྲུབ་པ་སྟེ། གཉིས་ནས་འགྲོ་བ་ཉམས་ནས་ཐིག་ལེར་སྲོག་ཞུགས་པ་ན་འཛིན་པ་ཡང་ནི་སེམས་ནི་རྩེ་ཅིག་པ། །ཞེས་གསུངས་སོ། །རྣམ་པར་དབྱེ་བ་ནི། འཛིན་པ་རྣམ་པ་བཅུ་སྟེ་ཐབས་དང་ཤེས་རབ་ཀྱི་རང་བཞིན་གྱི་ཐེག་ལེའི་བཅུད་འཛིན་པར་བྱེད་པའི་རླུང་གྲུབ་པ་སྟེ། འགྲེལ་པར། ཚོར་བའི་ཕུང་པོ་སྲོག་རྩོལ་འཛིན་པ་ལྟེ་བ་དང་སྙིང་ཁ་མགྲིན་པ་དང་དཔྲལ་བ་དང་གཙུག་ཏོར་གྱི་པད་མར་འགྲོ་བ་དང་འོང་པ་རྣམ་པ་བཅུ་ཞེས་སོ། །འཛིན་པའི་སྒྲ་དོན་ནི། དྷ་ར་ན་སྟེ། བྱང་ཆུབ་ཀྱི་སེམས་འཛག་མེད་དུ་འཛིན་པ་ཞེས་བྱ་སྟེ། རྟེན་ལུས་ཀྱི་བྱང་ཆུབ་ཀྱི་སེམས་དང་། བརྟེན་པ་སེམས་ཀྱི་བྱང་ཆུབ་ཀྱི་ཟུང་དུ་ཞུགས་ནས་ཞི་གནས་དང་ལྷག་མཐོང་ཟུང་དུ་འཇུག་པ་སྟེ། རྩ་བའི་རྒྱུད་ལས། སྟོང་པ་ལས་བྱུང་གཟུགས་ནི་རྒྱུད། །འབྲས་བུ་མི་འགྱུར་ལས་སྐྱེས་བདེ། །འབྲས་བུས་རྒྱུ་ལ་རྒྱས་བཏབ་ཅིང་། །རྒྱུ་ཡིས་འབྲས་བུ་རྒྱས་བཏབ་བོ། །སྟོང་ཉིད་གཟུགས་འཛིན་རྒྱུ་ཡིན་ཏེ། །འབྲས་བུ་སྙིང་རྗེ་མི་འགྱུར་འཛིན། སྟོང་དང་སྙིང་རྗེ་དབྱེར་མེད་པ། །བྱང་ཆུབ་སེམས་སུ་དེ་བརྗོད་དོ། །ཞེས་སོ། །རྟགས་ངེས་པ་ཡང་། སྲོག་རྩོལ་གྱི་སྐབས་ནས་སྐ་བ་མི་འཛག་ཅིང་། འཛིན་པས་སླ་བ་མི་འཛག་པ་གྲུབ་པ་དེ་ཉིད་ཡིན་ནོ། །འདི་ལས་འཕྲོས་ནས་འཛག་པའི་དོན་བཤད་པ། བརྟེན་ལུས་ཀྱི་འཛག་སྒོ་བཞི་དང་། རྟེན་པ་སེམས་ཀྱི་འཛག་སྒོ་བཞི་སྟེ། ལུས་ལ་འདོད་པའི་ཁམས་ན་ཁམས་དྲུག་དང་ལྡན་པའི་འཛག་པ་དང་། གཟུགས་ཀྱི་ཁམས་བཅུ་དྲུག་ན་ཟད་པར་བཞིའི་འབྱུང་ཆུང་གི་འཛག་པ་དང་། གཟུགས་མེད་པ་ན་ཟད་པར་ནམ་མཁའི་འབྱུང་ཆུང་གི་འཛག་པ་བཞི་དང་། དེ་ཐམས་ཅད་ཀྱི་རྩ་བ་རེག་པའི་ཡན་ལག་སྟེ་བཞི་ཡིན་ཀྱང་བྱེ་བྲག་ཏུ་མིའི་ལུས་ལ་ནི་འོག་དང་སྟེང་དུ་དུང་ཅན་དང་ལྕེའུ་ཆུང་དུ་འབབ་པ་དང་དབང་པོའི་སྒོ་བཞི་དང་ལུས་ཀྱི་བ་སྤུའི་མཐར་ཐུག་པར་འཛག་པ་བཞིའོ། །སེམས་ཀྱི་འཛག་པ་ནི། མ་རིག་པ་དང་། ལྟ་བ་དང་། འདོད་པ་དང་། སྲིད་པའི་ཟག་པ་སྟེ་བཞིའོ། ཟག་པ་བརྒྱད་པོ་འདི་དག་ཐམས་ཅད་དང་བྲལ་བ་ནི་མཐར་ཐུག་པའི་སངས་རྒྱས་ལ་ཡོད་ཅིང་། བྱང་ཆུབ་སེམས་དཔའ་རྣམས་ལ་ནི་མཐོང་པའི་ལམ་ནས་མ་རིག་པ་དང་ལྟ་བའི་ཟག་པ་སྤོང་ཞིང་འདོད་པ་དང་སྲིད་པའི་ཟག་པ་ནི་ཆེད་དུ་གཉེར་ནས་མི་སྤོང་སྟེ། ཐབས་མཁས་པས་འཛིན་པ་འཁོར་བར་དོན་མཛད་པ་ལ་འཁོར་བའི་ཕྱིར་རོ། །དགྲ་བཅོམ་པ་དང་། རང་སངས་རྒྱས་རྣམས་ནི་འདོད་པ་དང་སྲིད་པའི་ཟག་པ་ཆེད་དུ་གཉེར་ནས་སྤོང་བས་འཁོར་བར་མི་སྐྱེ་མོད་ཀྱི། མ་རིག་པ་དང་ལྟ་བའི་ཟག་པ་ཀུན་སྤོང་པ་ནི་མ་ཡིན་སྟེ། བདག་མེད་པར་ལྟ་བ་དང་མ་རིག་པའི་བག་ཆགས་ཀྱི་ས་མ་སྤངས་པའི་ཕྱིར་རོ། །ཚུལ་འདི་ནི་རྒྱས་པར། གཙུག་ན་རིན་པོ་ཆེས་ཞུས་པའི་མདོ་ལས་བྱུང་ཞིང་། ལང་ཀར་གཤེགས་པ་ལས་ཀྱང་། དེ་བཞིན་ཉན་ཐོས་རྨོངས་པ་ཡང་། །ཟག་པ་མེད་པའི་དབྱིངས་ན་འཁོད། །མཐར་ཐུག་གྱུར་པ་དེ་ལ་མེད། །ཕྱིར་ཡང་ལྡོག་པར་འགྱུར་མ་ཡིན། །ཞེས་གསུངས་པ་ཡང་དོན་འདི་ལ་དགོངས་པ་སྟེ། སྲིད་པར་སྐྱེ་བའི་ཟག་པ་ནི་ཤེས་རབ་བདེན་བཞི་ལ་དམིགས་པས་སྤོང་ཞིང་འཁོར་བར་མི་སྐྱེ་ཞིང་། ཤེས་བྱའི་སྒྲིབ་པ་ནི་མ་སྤངས་པས་མཐར་ཐུག་པའི་ལམ་དུ་མི་འགྲོའོ། །བྱང་ཆུབ་སེམས་དཔའ་རྣམས་ཀྱིས་མཐོང་བའི་ལམ་འདིར་ཟག་པ་བཞི་པོ་སྤོང་བའི་ཐབས་མཁས་པ་མངོན་སུམ་དུ་ཐོབ་ཅིང་རེག་པ་ཡིན་ནོ། །དེའི་ཕྱིར་མདོ་སྡེའི་རྒྱན་ལས། དེ་ནས་དེ་ནི་འཇིག་རྟེན་ལས། །འདས་པའི་ཡེ་ཤེས་བླ་ན་མེད། །རྣམ་པར་མི་རྟོག་དྲི་མ་མེད། །འཛིན་པ་གཉིས་དང་བྲལ་བ་ཐོབ། །དེ་འདི་གནས་ཡོངས་འགྱུར་པ་སྟེ། །ས་ནི་དང་པོ་ཡིན་པར་འདོད། ཞེས་གསུངས་སྟེ། འདི་ལ་ཡང་སྔགས་ཀྱི་ཐེག་པ་འདིར་མོས་པས་སྤྱོད་པའི་སའི་མཐར་ཐུག་པ་ས་དང་པོ་ལ་ངེས་པར་འཇུག་པའི་རྒྱུ་བར་ཆད་མེད་པ་དང་བྲལ་བ་ཐོབ་པ་ནི་ས་དང་པོའི་མིང་ཅན་འཛིན་པ་གྲུབ་པ་ཞེས་འདོད་ལ། དེའི་ཡོན་ཏན་རྣམ་པར་དག་པ་རྗེས་དྲན་གྱི་བཞིར་གྱུར་པ་ནི། ས་གཉིས་པ་ཡི་མིང་གིས་འདོགས་ཤིང་སྟོན་པར་འགྱུར་རོ། །འཛིན་པ་གྲུབ་པའི་འབྲས་བུ་བཤད་པ་ནི། འཛིན་པ་གྲུབ་པའི་སྟོབས་ཀྱིས་ཀྱང་ནི་བདུད་དང་ཉོན་མོངས་འཇོམས་ཤིང་སྟོབས་བཅུ་ལ་ནི་འཇུག་པར་གྱུར། ཞེས་རྒྱུད་ལས་གསུངས་པས། བདུད་བཞི་དང་ཉོན་མོངས་པ་འདོད་ཆགས་ཁོང་ཁྲོ་དང་། མ་རིག་པ་དང་། བདག་ལྟ་དང་། འཇིག་ཚོགས་སུ་ལྟ་བ་དང་། མཐར་འཛིན་པར་ལྟ་བ་དང་། ཚུལ་ཁྲིམས་དང་རཏལ་ཞུགས་མཆོག་དུ་འཛིན་པར་ལྟ་བ་དང་། ཕུང་པོ་ལ་གང་ཟག་ཏུ་ལྟ་བ་དང་། ཐེ་ཚོམ་རྣམས་འཇོམས་ཤིང་སངས་རྒྱས་ཀྱི་ཡེ་ཤེས་ཕུལ་དུ་བྱུང་བའི་རྒྱུ་གནས་དང་གནས་མ་ཡིན་པ་མཁྱེན་པ་ལ་སོགས་པའི་སྟོབས་བཅུ་ལ་འཇུག་པར་འགྱུར་རོ། །འདི་ལས་འཕྲོས་པ་འགའ་ཞིག་དང་བཅས་པ་ནི་འོག་ནས་སྟོན་པར་འགྱུར་རོ། །རྣལ་འབྱོར་བར་པ་གསུང་གི་རྡོ་རྗེའི་རིམ་པ་རྫོགས་སོ།། །།བཅུ་དྲུག་ཕྱེད་ཕྱེད་ཐིག་ལེ་ཅན། །གཏུམ་མོ་དུས་མེའི་རང་བཞིན་ཅན། །འཛག་མེད་དེ་ལ་ཕྱག་འཚལ་ནས། །རྗེས་དྲན་ཏིང་འཛིན་སྦྱོར་བ་བཤད། །དེ་བཞིན་གཤེགས་པ་རྣམས་དང་རྒྱལ་བའི་སྲས་ཐམས་ཅད་ཀྱིས་ཡོངས་སུ་བསྟེན་པ་འཇིག་རྟེན་ཐམས་ཅད་ལས་ཡང་དག་པར་འདས་པའི་ལམ་ཐོབ་ཀྱང་། ཐུགས་རྗེ་ཆེན་པོ་འཁོར་བ་ན་ཉམས་ཐག་པ་ཐམས་ཅད་རྗེས་སུ་དྲན་ནས། སེམས་ཅན་ཐམས་ཅད་ཀྱི་ཉོན་མོངས་པ་སེལ་བའི་ཡེ་ཤེས་ཀྱི་མཐུ་ཐོབ་པར་བྱ་བའི་ཕྱིར་རང་གི་དམ་ཚིག་གི །ཕྱག་རྒྱ་གསུམ་གྱིས་རབ་ཏུ་བཅིངས་ཏེ། འཁོར་བ་ཉིད་མྱ་ངན་ལས་འདས་པ་སྒྲུབ་པའི་ལམ་མངོན་དུ་མཛད་པའི་བྱང་ཆུབ་སེམས་དཔའ་རྣམས་ནི་རྨད་དུ་བྱུང་བ་ཡིན་ཏེ། འཇིག་རྟེན་བྱང་ཆུབ་རང་སངས་རྒྱས་པ་ཡི། དགྲ་བཅོམ་རྣམས་ལའང་བྱམས་པ་དེ་མེད་ན། །དེ་ལས་གཞན་པ་སྨོས་ཀྱང་ཅི་དགོས་པ། །ཇི་ལྟར་འཇིག་རྟེན་འདས་པ་མ་ཡིན་འགྱུར། །ཞེས་མདོ་སྡེའི་རྒྱན་ལས་བསྔགས་པའི་ལམ་ཁྱད་པར་ཅན་དེ་ཉིད་གསལ་བར་བསྟན་པ་ནི་རྗེས་སུ་དྲན་པ་ཡིན་པས་འདིའི་བསྒོམ་པའི་ཚུལ་བཤད་པ་ནི། ཚིགས་སུ་བཅད་པ་ཕྱེད་དང་ལྔ་སྟེ། ཐོག་མར་བཅིང་བར་བྱ་བའི་དམ་ཚིག་ཕྱག་རྒྱ་ནི། ལྟེ་བར་གཏུམ་མོ་འབར་བ་ཡི། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡོངས་བསྲེགས་ནས། །ཧཾ་བསྲེགས་པ་ལས་ཟླ་རྒྱུན་འབབ། །ཞེས་གསུངས་ཏེ། དེ་ལྟར་ལུས་ལ་གནས་པའི་དབུ་མའི་སྒོ་རྩ་གསུམ་འདུས་པར་གཏུམ་མོ་ཧྃ་ཡི་རྣམ་པ་དུས་ཀྱི་མེའི་རང་བཞིན། སྟོང་པ་ཉིད་ཀྱི་གཟུགས་བརྙན་དང་སྲོག་རྩོལ་གྱི་སྟོབས་ཀྱིས་འབར་བར་འགྱུར་ཏོ། །དེས་ཕུང་པོ་ལྔའི་སངས་རྒྱས་དང་ལུས་ཀྱི་ཁམས་ལྔ་ཡུམ་གྱི་རང་བཞིན་དང་། སོགས་པ་དང་ནི་དབང་པོ་ལྔ་སྟེ། དེ་རྣམས་ཐམས་ཅད་ཀྱི་བཟུང་བ་དང་འཛིན་པའི་རང་བཞིན་ཐ་དད་དུ་སྣང་བ་བསྲེགས་ཏེ་གཉིས་སུ་མེད་པའི་བདེ་བ་ཆེན་པོ་གཅིག་ཏུ་གྱུར་ནས། སྤྱི་བོའི་ཧྃ་བྱང་ཆུབ་ཀྱི་སེམས་ཀྱི་ངོ་བོ་སྒྲ་གཅན་གྱི་རང་བཞིན་བསྲེགས་པའི་ནུས་པས། ཟླ་བའི་རྐང་པ་བཅུ་བཞིའི་རྩ་ལ་གནས་པའི་བྱང་ཆུབ་ཀྱི་སེམས་ཀྱི་རྒྱུན། སྤྱི་བོ་ནས་མགྲིན་པ་དང་སྙིང་ཁ་དང་ལྟེ་བར་རིམ་གྱིས་ཞུ་ཞིང་བབས་ཏེ་དུང་ཅན་མའི་དབུས་སུ་གཅིག་ཏུ་གྱུར་པ་ལུས་ཅན་ཐམས་ཅད་ལ་བདེ་བ་བསྐྱེད་པར་བྱེད་པ་སྟེ། འདིར་རྣལ་འབྱོར་གྱི་སྟོབས་ཀྱིས་སྐྱེས་པའི་བདེ་བ་ནི་ལྷ་དང་མིའི་བྱང་ཆུབ་ཀྱི་སེམས་ཀྱི་བདེ་བ་འཛག་པ་དང་བཅས་པ་བཅུ་དྲུག་འགྱུར་བས་ཀྱང་ལྷག་པར་འབར་བར་འགྱུར་ཏེ། དཔལ་བདེ་མཆོག་རྩ་བའི་རྒྱུད་ལས། ལྷ་དང་མིའི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །འདི་ལྟ་བུ་ནི་བྱེད་པ་ཡིན། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་ཤིང་། དེ་བཞིན་དུ་ཁམས་གསུམ་པའི་སེམས་ཅན་འདོད་ཆགས་ལ་སོགས་པས་ཉོན་མོངས་པ་ཅན་གྱི་བདེ་བ་ཐམས་ཅད་ཀྱིས་ཉོན་མོངས་པ་མེད་པའི་བདེ་བའི་བཅུ་དྲུག་ཆར་ཡང་མི་ཕོད་དེ། ཧེ་བཛྲ་ལས། འདོད་ཆགས་ཞེ་སྡང་ཕྲག་དོག་དང་། །དེ་བཞིན་ང་རྒྱལ་གཏི་མུག་ཉིད། །དེ་ཀུན་བདེ་བས་བདེ་ཆེན་གྱི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་སོ། །འཆིང་བར་བྱེད་བའི་ཕྱག་རྒྱ་རྣམ་པ་གསུམ་ནི། དམ་ཚིག་སེམས་དཔའི་སྤྱོད་ཡུལ་ཅན། ཞེས་གསུངས་ཏེ། ཁམས་གསུམ་པོ་དག་པར་བྱ་བའི་ཕྱིར་ལས་ཀྱི་ཕྱག་རྒྱ་དང་། བརྟགས་པའི་ཡེ་ཤེས་ཀྱི་ཕྱག་རྒྱ་དང་། སྟོང་པ་ཉིད་ཀྱི་གཟུགས་བརྙན་གྱི་ཕྱག་རྒྱ་ཆེན་མོ་སྟེ། སྐུ་དང་གསུང་དང་ཐུགས་ཀྱི་དམ་ཚིག་གསུམ་དང་། རྒྱས་གདབས་ཀྱི་ཡི་གེ་ཨོཾ་ཨཱཿཧཱུྃ་གི་རང་བཞིན་དུ་ཡང་འགྱུར་ཏེ། རྒྱུད་ལས། ཕྱག་རྒྱ་གསུམ་དང་ཡི་གེ་གསུམ་ནི་གསུམ་དུ་འགྲོ་བའི་དབང་གིས་ལས་དང་བརྟགས་པ་བཟང་མོའོ། །ཞེས་གསུངས་སོ། དེ་ལྟར་བཅིང་བྱ་དམ་ཚིག་གི་ཕྱག་རྒྱ་ལ་འཆིང་བྱེད་ཕྱག་རྒྱ་གསུམ་གྱིས་ཕན་ཚུན་དུ་རྒྱས་བཏབ་སྟེ་བཅིང་པས་ཁམས་གསུམ་གྱི་སྤང་བྱ་རྣམས་རིམ་གྱིས་དག་པར་བྱས་ནས་མཐར་ཐུག་པར་གྱུར་པ་དང་ཡེ་ཤེས་ཀྱི་འོད་ཟེར་གྱིས་སྲིད་གསུམ་ཐམས་ཅད་ཀྱི་དོན་བྱེད་པ་འགྲུབ་པར་འགྱུར་ཏེ། རྒྱུད་ལས། གཏུམ་མོའི་ལྟེ་བའི་འཁོར་ལོ་དགུ་ལ་ཀླུ་ཡིས་བརྒྱུར་བ་ཙར་ཙི་ཀ་ལ་སོགས་པ་ལྷག་པའི་ལྷར། །ཡེ་ཤེས་སྙིང་པོ་ཧོ་ཡིག་གློག་གི་མེ་འོད་འདྲ་བའི་ཡེ་ཤེས་མེ་ནི་རྣམ་པར་ལངས། །ལྟེ་བར་རྣམ་པར་སྣང་མཛད་ལ་སོགས་བསྲེགས། །ཤིང་མིའི་བདག་པོ་སྤྱན་མ་མིག་ལ་སོགས་པ་ཡང་། །ཐམས་ཅད་བསྲེགས་པའི་མགོ་བོའི་ཟླ་བ་བཟང་པོ་ཐིག་ལེའི་གཟུགས་ཅན་འཛག་པ་གང་དེ་རྡོ་རྗེ་ཅན། །ཤེས་རབ་མ་ཡི་ཆོས་འབྱུང་གནས་ལ་སླར་ཡང་ཐིག་ལེ་ལས་ནི་མ་ལུས་ངེས་པར་སྤྲོ་བར་བྱ། །སྣ་ཚོགས་པ་ཡི་རྒྱན་ལྡན་མེ་ལོང་སོན་པ་ལྟ་བུར་ཡེ་ཤེས་འཁོར་ལོ་རྣམ་ནི་རང་བྱུང་པ། འདོད་པ་དང་ནི་གཟུགས་དང་གཟུགས་མེད་སྲིད་པ་རྣམ་པ་གསུམ་པོ་ཡང་ནི་རིམ་གྱིས་དག་པར་བྱ། །ཕྱིས་ནི་ཡེ་ཤེས་འོད་ཟེར་རྣམས་ཀྱིས་སྲིད་གསུམ་མ་ལུས་པ་རྣམས་དུས་གཅིག་ཏུ་ཡང་དགུག་པར་བྱ། །ཞེས་གསུངས་པ་ནི་རྗེས་སུ་དྲན་པ་མ་ལུས་པ་བསྡུས་པ་སྟེ། ཤིན་དུ་རྒྱས་པ་ནི་འགྲེལ་པ་ལས་གསུངས་སོ། །འདི་ཉིད་བསྒོམ་པའི་ལུས་གནད་ནི། སེམས་དཔའི་དཀྱིལ་ཀྲུང་དང་ལྡན་པས་ལྟ་སྟངས་ནི་དེ་བཞིན་གཤེགས་པ་ལྟར་ཞི་བས་བྱང་ཆུབ་ཀྱི་སེམས་ཀྱི་རང་བཞིན་དུ་ལྟ་བ་སྟེ། རྒྱུད་ལས། ཤེས་རབ་མ་སྐྱེད་ཟླ་བའི་ཐིག་ལེ་ཡང་ནི་རྡོ་རྗེ་ནོར་བུ་མི་འགྱུར་རྣམ་གསུམ་བསྒྲུབ་པར་བྱ། །ཉམས་མེད་བདེ་བ་གཅིག་དུ་ཞི་བ་ལྷན་སྐྱེས་ཡེ་ཤེས་སྦྱོར་བ་འདིར་ནི་བསྒྲུབ་པ་ཆེན་པོའོ། །ཞེས་གསུངས་སོ། །གསང་བ་འདུས་པ་ལས་ཀྱང་། སྒྲུབ་པ་ཆེན་པོའི་དུས་སུ་ནི། །གཙོ་བོ་སངས་རྒྱས་མངའ་བདག་སྐུ། །ཞེས་གསུངས་སོ། །འཛིན་པ་ལ་འཇུག་པའི་དུས་ནི་འགྱུར་བ་མེད་པའི་རྡོ་རྗེ་སྒྲ་གཅན་གྱི་ཐིག་ལེའི་དབུས་སུ་སངས་རྒྱས་ཀྱི་སྐུ་གཞན་དུ་མི་འགྱུར་བའི་ངེས་པ་དང་ལྡན་པ་མཐོང་ནས་སྒོམ་པར་བྱའོ། །ཚུལ་ཅི་ལྟར་བསྒོམ་པ་ནི། སྐུ་བསྒོམ་ནས་ནི་ཉིན་རེ་བཞིན། དུས་སུ་སྲོག་གི་རླུང་རྣམས་ནི། །རྣལ་འབྱོར་ཐར་པ་འདོད་པ་ཡིས། །བུམ་པའི་སྦྱོར་བས་དགག་པར་བྱ། །ཞེས་བསྟན་ཏེ། སྔར་འཛིན་པར་གསུངས་པ་ལྟ་བུར་བུམ་པའི་སྦྱོར་བས་བྱང་ཆུབ་ཀྱི་སེམས་དག་པར་བྱའོ། །ཕྱག་རྒྱ་གསུམ་གྱི་བཅིངས་ལུགས་ནི་འོག་ནས་སྟོན་ཏེ། མཚན་ཉིད་ནི། སྔར་བསྟན་པ་ལྟར་གཏུམ་མོ་མཐོང་ནས་རྗེས་དྲན་ལ་སྦྱོར་བ་སྟེ། ངེས་པར་ལུས་ལ་གཏུམ་མོ་མཐོང་བར་གྱུར་པ་དང་ནི་ནམ་མཁའ་ལ་ཡང་རྗེས་སུ་དྲན་པར་འགྱུར། ཞེས་གསུངས་སོ། །རྣམ་དབྱེ་ནི། གཡུང་མོར་རྗེས་སུ་དྲན་པ་པད་མ་འཛིན་ཏེ། འགྲེལ་པར། དེ་ཡང་རྗེས་སུ་དྲན་པའི་གཡུང་མོ་ནི་རྩ་དབུ་མའི་འདོད་པ་བཅུའི་དབྱེ་བའི་གནས་སྐབས་ཞེས་གསུངས་ཏེ། འདི་དག་ཀྱང་གནས་སྐབས་བཞིའི་དབྱེ་བས་རྒྱས་པར་ནི་འོག་ཏུ་འཆད་དོ། །སྒྲ་དོན་ནི། ཨཱ་ནུ་སྨྲི་ཏི་ཞེས་པས་མཉམ་པར་བཞག་པའི་རྗེས་ལས་ཤེས་རབ་ཀྱིས་ཆགས་པ་རྗེས་སུ་དྲན་པ་ཞེས་བྱ་སྟེ། ཁམས་གསུམ་པའི་མཚན་མ་རྣམ་པར་རྟོག་པ་སྤངས་ནས་བསམ་གཏན་གྱི་བདེ་བ་དང་ལྡན་བཞིན་དུ་འདོད་པའི་ཁམས་སུ་སྦྱོར་བར་བྱེད་པ་སྟེ། མདོ་སྡེའི་རྒྱན་ལས། བསམ་ཏན་རབ་བདེས་གནས་ནས་ནི། །དེ་ཡི་འོག་ཏུ་འདོད་པར་སྐྱེ། །དེ་ནས་བྱང་ཆུབ་ཕྱོགས་མཐུན་རྣམས། །འཁོར་བ་དག་ཏུ་ཡོངས་སུ་བསྔོ། །ཞེས་གསུངས་པ་དང་མཐུན་པ་ཡིན་ནོ། །རྟགས་ངེས་པ་ནི། ཇི་སྲིད་དུ་ནི་འཁོར་བཞིན་མ། །རང་གི་ལུས་ལ་ཡོངས་སྐོར་པའི། འོད་ཟེར་འཁོར་ལོ་མཐོང་འགྱུར་ཏེ། །མངོན་སུམ་སྐུ་ལ་རང་གི་ཡིན། །ཞེས་བསྟན་ཏེ། རང་གི་ལུས་སྟོང་པ་ཉིད་ཀྱི་གཟུགས་བརྙན་གྱི་འོད་ཀྱི་འཁོར་ལོ་བ་སྤུའི་བུ་ག་རེ་རེ་ནས་ཀྱང་དག་པའི་སྐུ་རབ་དུ་འཕྲོ་བས་བསྐོར་བ་ངེས་པར་མཐོང་བར་འགྱུར་ཏེ། དེ་ནས་ཟླ་བ་དྲུག་གི་ལས་ཀྱི་ཕྱག་རྒྱ་ལ་སོགས་པའི་བཅིངས་པ་ཐམས་ཅད་མི་དགོས་པར་བདེ་བ་དང་སྟོང་པ་རོ་མཉམ་པར་འགྲུབ་པར་འགྱུར་ཏེ། དེས་ནི་ཟླ་དྲུག་རེག་ཡངས་བདེ། །ཆུ་ཉི་ལྟ་བུར་རབ་སྣང་བ། །དྲི་མ་མེད་པ་སྣ་ཚོགས་མདོག །ཞེས་བསྟན་ཅིང་། འདི་རྣམས་ཀྱི་ངེས་པ་ཡང་རྒྱུད་ལས། གཟུགས་བརྙན་མཐོང་བར་རབ་ཏུ་བྱས་ནས་ཉི་མ་སོ་སོའི་དུས་སུ་སྲོག་གི་རླུང་ནི་དགག་པར་བྱ། ཇི་སྲིད་འོད་ཀྱི་འཁོར་ལོ་འཁོར་བས་རང་གི་ལུས་ལ་ཡོངས་སུ་བསྐོར་བ་ངེས་པར་མཐོང་བ་ནས། །ཟླ་བ་དྲུག་གིས་རེག་པ་དམན་ཞིང་མཉམ་པའི་བདེ་བར་དཀའ་ཐུབ་པའི་ལམ་གྱིས་སེམས་ལས་འགྱུར། །ཞེས་གསུངས་སོ། །འབྲས་བུ་ནི། རྣམ་པ་ཀུན་དུ་རང་གི་སེམས། །རང་གི་སེམས་ཉིད་བདེ་བ་ཉིད། །ཞེས་བསྟན་ཏེ། རང་གི་སེམས་དང་ལུས་ཡེ་ཤེས་ཀྱི་གཟུགས་བརྙན་བདེ་བ་ཆེན་པོར་གྲུབ་པ་ཞེས་བྱའོ། །འདི་ནི་རྡོ་རྗེ་ཐེག་པའི་ས་གཉིས་པའི་མིང་ཅན། ཕ་རོལ་ཏུ་ཕྱིན་པར་གསུངས་པའི་རབ་ཏུ་དགའ་བའི་ས་ངེས་པར་ཐོབ་པ་ཡིན་ཏེ། རྒྱུད་ལས། རྗེས་སུ་དྲན་པ་དག་པར་གྱུར་ན་ཡེ་ཤེས་གཟུགས་བརྙན་ལས་ཀྱང་དྲི་མེད་འོད་ཀྱི་དཀྱིལ་འཁོར་རོ། ཞེས་གསུངས་སོ། །དེ་ལྟར་རྗེས་སུ་དྲན་པའི་སྤྱི་དོན་བཤད་ཟིན་ནས། ད་ནི་དེའི་ཡན་ལག་བསྟན་པར་བྱ་སྟེ། འདི་ལ་བརྒྱད་ལས། རྗེས་དྲན་གྱི་གཞི་ཐིག་ལེ་ཡིན་པའི་རྒྱས་བཤད། འཆིང་བྱེད་གསུམ་ལས་ཕྱག་རྒྱ་ཆེན་མོ་དང་། ཡེ་ཤེས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱས་འཆིང་ཚུལ་རྒྱས་བཤད། འཆིང་དགོས་པའི་རྒྱུ་མཚན། རྣམ་པར་དབྱེ་བ། དེ་ཐོད་རྒལ་གྱི་ཏིང་ངེ་འཛིན་ཡིན་པའི་ཚུལ། ཐེག་པ་དམན་པས་མི་ཤེས་པའི་རྒྱུ་མཚན་ནོ། དང་པོ་ནི་དཔལ་ཕྱག་ན་རྡོ་རྗེས་འཛིན་པའི་མཐར་ཙན་དྷ་ལིའི་སྦྱོར་བ་བསྒོམ་པ་འདི་ནི་ངེས་པའོ། །ཞེས་པ་དང་། སློབ་དཔོན་དུས་ཞབས་ཀྱིས་ཀྱང་། དབུ་མའི་རྩ་ལ་གཏུམ་མོ་ནི། །འབར་བར་རྣལ་འབྱོར་པ་ཡིས་མཐོང་། དེ་ཡང་བསམ་སོགས་གནས་སྐབས་ཀྱི། །དབྱེ་བས་རྣམ་པ་བཅུར་འགྱུར་རོ། །ཞེས་སོ། །ཧེ་བཛྲ་ལས་ཀྱང་། ཁུ་བའི་རྣམ་པ་བཅོམ་ལྡན་ཡིན། །དེ་ཡི་བདེ་བ་འདོད་མར་བརྗོད། །གཅིག་དང་དུ་མ་བྲལ་བ་ཡི། །སྐད་ཅིག་གཅིག་ལ་མཆོག་དགའ་བ། །རང་གི་རིག་པའི་ཡེ་ཤེས་འདི། །ངག་གི་ལམ་འདས་སྤྱོད་ཡུལ་ཏེ། །འདི་ནི་བྱིན་བརླབས་རིམ་པའི་ཕྱིར། །ཀུན་མཁྱེན་ཡེ་ཤེས་དེ་ལྟ་བུ། །ཞེས་དཀར་ཆག་རྣམ་པར་དག་པ་དང་། དེ་འཆིང་མཁན་རང་གི་དམ་ཚིག་གི་ཕྱག་རྒྱ་ཡང་། ལྟེ་བའི་དཀྱིལ་འཁོར་ཉིད་དུ་གནས། །དང་པོའི་དབྱངས་ཡིག་རང་བཞིན་ཏེ། རྫོགས་པའི་རིམ་པའི་རྣལ་འབྱོར་ལས། །དེ་ཉིད་བཅོམ་ལྡན་ཤེས་རབ་མ། ཤིན་ཏུ་རིང་མིན་ཐུང་བ་མིན། །གྲུ་བཞི་མ་ཡིན་ཟླུམ་པོ་མིན། དྲི་དང་རོ་སོགས་མྱ་ངན་འདས། །ལྷན་ཅིག་སྐྱེས་དགའ་བྱེད་པ་ཅན། །དེ་ལས་བྱུང་པའི་རྣལ་འབྱོར་པས། །དེ་ཡི་བདེ་བ་ལོངས་སྤྱད་ནས། །དེ་དང་ལྷན་ཅིག་དངོས་གྲུབ་འགྱུར། །ཕྱག་རྒྱ་ཆེན་པོའི་བདེ་བ་སྟེར། །ཞེས་གསུངས་སོ། །དཔལ་འཁོར་ལོ་སྡོམ་པ་ལས་ཀྱང་། ལྟེ་བའི་འཁོར་ལོ་ཉིད་གནས་པ། །རྒོད་མའི་མེ་འདྲའི་ངོ་བོ་ནི། །ཕག་མོའི་ཐིག་ལེར་འདོད་པ་ཡིན། ལས་ཀྱི་རླུང་གིས་སྤུར་བ་ཡིན། །གཞོམ་མེད་ཧཾ་གི་རྣམ་པ་ཅན། །བ་མོ་ལྟ་བུར་འཛག་པ་སྟེ། །ལུས་ཅན་རྣམས་ཀྱི་སྙིང་དགའ་བ། །འདི་ནི་ཧེ་རུ་ཀ་དཔལ་སྟེ། །སྙོམས་པར་འཇུག་པར་ཡང་དག་གནས། །དཔྱིད་དང་ཐིག་ལེ་ཞེས་སུ་གྲགས། །ཞེས་གསུངས་སོ། །དེ་བཞིན་དུ་རྒྱུད་ཐམས་ཅད་ཀྱི་ལུང་དཔག་དུ་མེད་པ་ཡོད་མོད་ཀྱི་ཡི་གེ་མངས་ཀྱིས་དོགས་པའི་ཕྱིར་མ་བྲིས་སོ། །འདི་གཉིས་བཅིང་བ་གནད་ཆེ་བའི་ཕྱིར། འཆིང་བར་བྱེད་པ་གསུམ་གྱིས་བཅིངས་ནས་སྒོམ་དགོས་པས་འདིར་ཡང་གང་ཟག་ལ་རག་ལས་ཏེ། སྔོན་དུ་སྦྱངས་པ་ཅན་གྱི་གང་ཟག་རབ་ཀྱིས་ནི་སོ་སོར་སྡུད་པའི་ཕྱག་རྒྱ་ཆེན་མོ་ཉིད་ཀྱིས་བཅིངས་པ་ཙམ་གྱིས་ཆོག་ལ། འབྲིང་པོ་ནི་བསམ་གཏན་གྱི་ཡན་ལག་ལ་བརྟེན་ནས། ཀུན་བརྟགས་པའི་ཡེ་ཤེས་ཀྱི་ཕྱག་རྒྱས་བཅིངས་དགོས་ཤིང་། །ཐ་མས་ནི་ལས་ཀྱི་ཕྱག་རྒྱས་འཆིང་དགོས་ཏེ། དུས་ཞབས་ཀྱི་ཞལ་སྔ་ནས། རབ་ཀྱིས་དང་པོ་རྟོགས་པ་ཡིན། འབྲིང་གིས་སྲོག་རྩོལ་ལ་སོགས་པས། ཐ་མས་དྲུག་པོ་རིམ་བཞིན་བསྒོམ། །ཞེས་གསུངས་སོ། །དེའི་ཕྱིར་ཕྱག་རྒྱ་ཆེན་མོས་འཆིང་བ་རྩ་བའི་རྒྱུད་དུ་གསུངས་པ་ནི། སོ་སོར་སྡུད་པ་ཕྱག་རྒྱ་ཆེ། །ནམ་མཁའ་སྟོང་པའི་མཚན་ཉིད་དུ། །སྣ་རྩེ་དེ་ཡི་ཕྱོགས་སུ་ཡང་། །གང་དུ་ཡིད་ནི་རབ་གཏད་པས། །མཚན་མའི་མཐར་ནི་རི་མོ་གང་། །རྒྱུ་དང་མི་རྒྱུའི་གཟུགས་བརྙན་ནོ། །དེ་ནས་བསམ་གཏན་སོགས་རྣལ་འབྱོར། །མ་ལུས་པ་ནི་བསྒོམ་པར་བྱ། །ཞེས་པ་དང་། བསྡུས་པའི་རྒྱུད་ཉིད་དུ། ཕྱག་རྒྱ་སྒྱུ་མའི་རྗེས་སུ་མཐུན་པའི་ཡིད་ཀྱང་ནམ་མཁའ་ལ་ནི་མེ་ལོང་ནང་གི་གཟུགས་བཞིན་དུ། །འཇིག་རྟེན་གསུམ་པོ་སྣང་བར་འགྱུར་ཞིང་གློག་གི་མེ་དང་འདྲ་བ་འོད་ཟེར་དུ་མ་འཕྲོ་བར་འགྱུར། །ཕྱི་དང་ལུས་དག་ཐ་མི་དད་ཅིང་ཡུལ་དང་རྣམ་པར་བྲལ་བ་སྣང་བ་ཙམ་ཞིག་ནམ་མཁར་གནས། །སེམས་དང་སེམས་ལས་བྱུང་བའི་རང་བཞིན་འཁྱུད་པར་བྱེད་ལ་འགྲོ་བའི་རང་བཞིན་དུ་མར་དེར་ཅིག་གོ །འདིར་ནི་རྙོག་པའི་སེམས་དང་བཅས་པ་ལས་ཀྱི་ཕྱག་རྒྱ་དང་ནི་བརྟགས་པའི་ཡེ་ཤེས་ཕྱག་རྒྱ་སྤངས། །ཡང་དག་རྫོགས་པའི་བྱང་ཆུབ་དོན་དུ་རྒྱལ་བ་མཆོག་རྣམས་བསྐྱེད་པའི་ཕྱག་རྒྱ་བཟང་མོ་བསྒོམ་པར་བྱ། །ཞེས་གསུངས་པས། སྒྱུ་མ་ལྟ་བུའི་རྗེས་སུ་མཐུན་པ་གཟུགས་བརྙན་ལྟ་བུའི་སྣང་བ་ལ་བརྟེན་ནས་སྒོམས་པས་བསམ་གཏན་རྫོགས་པ་དང་འཇིག་རྟེན་གསུམ་པོ་ཐམས་ཅད་དེ་ལྟར་སྣང་བར་འགྱུར་ཞིང་། ཕྱི་འཇིག་རྟེན་གྱི་ཁམས་དང་ནང་གི་ལུས་སྟོང་པ་ཉིད་ཀྱི་གཟུགས་བརྙན་དང་ཐ་མི་དད་པར་དོན་དང་དོན་གྱི་ཁྱད་པར་མཐོང་པའི་སེམས་དང་སེམས་ལས་བྱུང་བ་དང་བཅས་པའི་འགྲོ་བའི་རང་བཞིན་སྣང་སྟོང་དབྱེར་མེད་འདི་ལྟར་གཅིག་པའི་ཕྱིར། སྣང་བ་དང་སྟོང་པ་དབྱེ་བ་མེད་པ་འདི་ནི་ཕྱག་རྒྱ་ཆེན་པོ་སྟེ་ཡུལ་དང་ཡུལ་ཅན་གཉིས་སུ་འཛིན་པའི་སེམས་ནི་རྙོག་མ་ཅན་ཏེ་དྲི་མ་ཡིན་པས་ཕྱི་ལས་ཀྱི་ཕྱག་རྒྱ་དང་གཞན་ཀུན་བརྟགས་ཡེ་ཤེས་ཀྱི་ཕྱག་རྒྱའི་མཚན་མར་འཛིན་པ་སྤངས་ནས་ཕྱག་རྒྱ་ཆེན་པོ་འདི་བསྒོམས་པས་འདོད་པ་དང་གཟུགས་ཀྱི་ཁམས་ཀྱི་ཉོན་མོངས་པ་ཐམས་ཅད་གཞོམ་པའི་དོན་དུ་བསྒོམ་པར་བྱའོ། །དེས་ན་འདི་ཡི་རང་གི་མཚན་ཉིད་གསུངས་པ། གོས་མེད་འགྱུར་མེད་ནམ་མཁའ་དང་མཚུངས་མུན་པ་འཇོམས་ཤིང་ཁྱབ་བྱེད་རྣལ་འབྱོར་པ་ཡིས་རྟོགས་བྱ་བ། །ཕུང་པོ་ལ་གནས་ཡེ་ཤེས་འོད་ཟེར་སྲིད་པའི་རྙོག་པ་འཇོམས་པ་དུས་ཀྱི་འཁོར་ལོ་རྗེས་སུ་མཐུན་པའོ། །ཞེས་གསུངས་ཏེ། སྒྲིབ་པས་གོས་པ་མེད་པ་མི་འགྱུར་བ་ནམ་མཁའ་དང་མཚུངས་པ་གཏི་མུག་གི་མུན་པ་འཇོམས་ཤིང་དངོས་པོ་ཐམས་ཅད་ལ་ཁྱབ་པར་བྱེད་པ་ཞི་ལྷག་གི་རྣལ་འབྱོར་གྱིས་རྟོགས་པར་བྱ་བ་ཡེ་ཤེས་ཀྱི་ཕུང་པོའི་འོད་ཟེར་སྲིད་པ་གསུམ་གྱི་འཁྲུལ་པ་འཇོམས་པའི་དུས་ཀྱི་འཁོར་ལོ། འབྲས་བུའི་རྗེས་སུ་མཐུན་པ་འདི་ནི་ཕྱག་རྒྱ་ཆེན་མོས་ཏེ། འདིས་ས་ལམ་དང་འབྲས་བུ་ཐོབ་པར་བྱེད་པའི་ཐབས་ཏེ་འདི་ཡི་ངེས་པ་ཡང་རྒྱུད་ལས། སྟོང་པ་ལས་འོང་གང་གིས་བདེ་བའི་སྐད་ཅིག་དེས་ནི་སྟོབས་བཅུ་པ་ཡི་ས་ལ་འགྲོ་བར་འགྱུར། །བདེ་ལས་བདེ་བའི་རྗེས་སུ་ཆགས་པ་འདིར་ནི་ལྷན་སྐྱེས་སྐད་ཅིག་ལས་ནི་གཞན་གྱིས་རྗེས་ཆགས་མིན། །ཕུང་པོ་གང་ཞིག་དེ་ཡིས་བསྐྱེད་ལ་སླར་ཡང་བསྐྱེད་པ་པོ་ནི་དེ་ཡི་བདེ་བའི་སྐད་ཅིག་འདི། །དག་པ་ལས་ནི་ཆོས་ལ་དེ་ལས་གཞན་པ་སླར་ཡང་དེ་ལས་གཞན་ཏེ་དག་པའོ། །ཞེས་གསུངས་ཤིང་། མཆོག་ཏུ་མི་འགྱུར་བ་འགྲུབ་པར་རྩ་བའི་རྒྱུད་ཀྱི་ལུང་དང་བཅས་པ་གསུངས་པ། ལས་ཀྱི་ཕྱག་རྒྱ་ཡོངས་སྤངས་ལ། །ཡེ་ཤེས་ཕྱག་རྒྱ་རྣམས་བརྟགས་དོར། །མཆོག་ཏུ་མི་འགྱུར་རྣལ་འབྱོར་པས། །ཕྱག་རྒྱ་ཆེན་པོ་བསྒོམ་པར་བྱ། །ཞེས་བཅོམ་ལྡན་འདས་ཀྱི་ཚིག་གིས་ལས་ཀྱི་ཕྱག་རྒྱའི་བདེ་བ་ལ་ཀུན་ཏུ་བཟང་པོ་མཆོག་ཏུ་མི་འགྱུར་བའི་བདེ་བར་མི་འགྱུར་རོ། །དེ་བཞིན་དུ་དཀྱིལ་འཁོར་གྱི་འཁོར་ལོ་རྣམ་པར་བརྟགས་ནས་བསྒོམ་པའི་ཤེས་རབ་ཀྱི་བདེ་བ་ནི། ཀུན་ཏུ་བཟང་པོ་མཆོག་ཏུ་མི་འགྱུར་བའི་བདེ་བར་མི་འགྱུར་ཏེ། རྣམ་རྟོག་མ་སྤངས་པའི་བླ་མ་དམ་པ་མ་ཡིན་པའི་གདམས་པ་དེ་དག་གིས་ཕྱག་རྒྱ་ཆེན་པོའི་ཡེ་ཤེས་ཉམས་པ་ཕྱུགས་ཉིད་དུ་བྱེད་པ་ལས་སངས་རྒྱས་ཉིད་མེད་དེ་ཕྱག་རྒྱ་ཆེན་པོའི་ཡེ་ཤེས་མེད་པས་སོ། །ཕྱག་རྒྱ་ཆེན་པོའི་ཡེ་ཤེས་མ་རྟོགས་པས་རྣལ་འབྱོར་པ་རྣམས་བླ་མ་དམ་པ་མ་ཡིན་པའི་ལམ་སྤངས་པ་རབ་དུ་བརྗོད་པར་ནུས་པ་ནི་མ་ཡིན་ནོ། །ལམ་ཡང་། བཞི་པ་དེ་ཡང་དེ་བཞིན་ནོ། །དེ་ལྟར་དབང་བཞི་པ་མ་རྟོགས་པར་དབང་ཐམས་ཅད་དོན་མེད་པར་གསལ། ཞེས་སོ། །དེས་ན་འདིར་སྨྲས་པ། ཕྱག་རྒྱ་ཆེན་མོ་ཞེས་བྱ་བ། སྟོང་ཉིད་གཟུགས་འཛིན་རྒྱུ་ཡིན་ནོ། །རྒྱུ་མཐུན་བདེ་བ་སྐྱེད་པར་བྱེད། །འབྲས་བུ་མི་འགྱུར་ཡེ་ཤེས་བདེ། །བླ་མའི་བྱིན་བརླབས་རིམ་པ་ཡིས། །སྒོ་ལྔའི་གཟུང་འཛིན་བཅད་པ་གང་། །སོ་སོར་སྤོང་བར་གྱུར་པ་སྟེ། །མཐའ་གཉིས་སྤངས་པའི་ཤེས་རབ་ཀྱིས། །རྟོག་དཔྱོད་དགའ་བདེ་རྩེ་ཅིག་པར། །མི་གཡོ་གྱུར་པ་བསམ་གཏན་ནོ། །ནམ་མཁར་རྣམ་ཤེས་ཅི་ཡང་མེད། །འདུ་ཤེས་ཡོད་མིན་མེད་མིན་གྱི། །གཟུགས་མེད་ང་རྒྱལ་ཏིང་འཛིན་ནི། །ཡེ་ཤེས་སྣང་བས་འཇོམས་པར་བྱེད། །གཡོ་མེད་བསམ་གཏན་མངོན་ཤེས་ལྔའི། །གཟུགས་སྣང་རགས་པའི་མཚན་མ་ནི། །སྐྱེ་འགག་མེད་ཅིང་རབ་ཞི་བའི། །ཤེས་རབ་ཀྱིས་ནི་བཅད་པའི་ཕྱིར། །བསམ་གཏན་བཞི་ཡི་སྐྱོན་རྣམས་བཅོམ། །ལུས་དང་ལོངས་སྤྱོད་འཕོ་བདེ་ལ། །ཆགས་མེད་སྔོན་དུ་སོང་བ་ཡིས། །འདོད་ཁམས་སྐྱོན་རྣམས་བཅོམ་པའི་ཕྱིར། །སྲིད་གསུམ་ཡོངས་གྱུར་ཐམས་ཅད་ནི། །གཟུང་དང་འཛིན་པ་རྣམ་པར་སྤངས། །ཤེས་རབ་ཕ་རོལ་ཕྱིན་མ་ནི། །སངས་རྒྱས་ཐམས་ཅད་བསྐྱེད་པའི་ཡུམ། །རྒྱལ་བས་མདོ་རྒྱུད་ལས་གསུངས་པ། །རྟོགས་པས་འདིར་ནི་བསྡུས་པ་ཡིན། །ཞེས་བྱ་བ་ནི་ཕྱག་རྒྱ་ཆེན་མོ་བཅིང་བའི་བར་སྐབས་ཀྱི་ཚིགས་སུ་བཅད་པའོ། །ད་ནི་ཡེ་ཤེས་ཀྱི་ཕྱག་རྒྱ་བཅིང་པའི་བཤད་པ་ནི། སྲོག་རྩོལ་གྱི་སྦྱོར་བ་ལ་བརྟེན་ནས་གཏུམ་མོ་འབར་བའི་ནུས་པས་བྱང་ཆུབ་ཀྱི་སེམས་ཞུ་བ་དུང་ཅན་དུ་དགག་ཅིང་རྒྱུ་མཐུན་པ་བརྟན་པར་བྱ་བའི་ཕྱིར་སྣ་ཚོགས་ཡུམ་ལ་སོགས་པའི་བརྟགས་པ་བསྒོམ་པའི་སྦྱོར་བས་བརྟན་པར་བྱེད་དེ། རྩ་བའི་རྒྱུད་ལས། ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་མ་མིག་ལ་སོགས་པ་ཡང་། །བསྲེགས་པས་ཧཾ་ལས་རི་བོང་འཛག །ས་བོན་ཆོས་ཅན་བདུད་རྩི་ནི། །ཐིག་ལེའི་གཟུགས་ཀྱིས་འཛག་པ་སྟེ། །བཅུ་དྲུག་ཕྱེད་ཕྱེད་ཐིག་ལེ་འཆང་། །ཐིག་ལེའི་རྣལ་འབྱོར་ཞེས་ནི་བཤད། །ཆ་མེད་དྲངས་ལས་འདས་པ་ནི། །བསམ་གཏན་བཞི་པའི་རྩེ་མོ་འཆང་། །རྒྱུ་མཐུན་ལ་སོགས་སྟེང་དུ་སོང་། །ཕྲ་མོའི་རྣལ་འབྱོར་ཞེས་སུ་བརྗོད། །དུང་ཅན་མ་ཡི་ཕྱག་རྒྱ་ཆེ། །འདི་ནི་གཏུམ་མོར་རབ་དུ་བརྗོད། །ལྟེ་བའི་སྟེང་དུ་གཡུང་མོ་ནི། ཀུན་དྷར་མ་ཡི་སྣ་རྩེ་རུ། །འོད་ཟེར་ལྔ་ཡི་རང་བཞིན་དབུགས། །དཀྱིལ་འཁོར་ལྔ་ནི་འབབ་པ་ཡི། །སྣ་ཡི་རྩེ་མོར་ཉུངས་དཀར་ཞེས། །སྲོག་རྩོལ་རྒྱུ་བ་རུ་ནི་དྲན། །སྲིད་པ་གསུམ་པོ་ཡོངས་ཤེས་པས། །ཁམས་གསུམ་དག་ནི་མ་ལུས་པའི། །སྲོག་ནི་བཀག་པ་དེ་ཡིས་ཀྱང་། །རྒྱུ་དང་མི་རྒྱུ་ཉུངས་དཀར་མའོ། །ཞེས་སོ། །འདིས་འཛག་མེད་དུ་གྱུར་ན་ཡོན་ཏན་ནི། བསྡུས་པའི་རྒྱུད་ལས་གང་གི་དབུགས་རྣམས་བཅོམ་ནས་རྒྱལ་བའི་ལུས་སུ་ཞུགས་པར་གྱུར་པ་དེ་ཉིད་དུས་ཀྱི་འཁོར་ལོའོ། །དབུགས་རྣམས་ཆད་པའི་མཐར་ནི་གསུམ་དུ་འགྲོ་བ་འདིའི་རྣམ་པ་དྲུག་པ་ཡོད་པ་མ་ཡིན་ནོ། །ཀུན་ནས་ཐིག་ལེ་བསྡམས་པས་ཁྱབ་བདག་མཆོག་གི་བདེ་བ་འཕེལ་བ་དཔག་དུ་མེད་པའི་དུས་སུའོ། །འཁོར་བའི་བདེ་བ་སྤངས་ཏེ་བླ་མ་མཆོག་གི་ཞལ་ནས་རྣལ་འབྱོར་པས་ནི་བསྒོམ་པར་བྱ། །ཞེས་གསུངས་སོ། །མཆོག་ཏུ་མི་འགྱུར་བར་གྲུབ་པར་ཡང་། དེ་བཞིན་དུ་མི་རྟག་པ་བསྒོམ་པར་བྱས་པའི་དབང་གིས་བྱང་ཆུབ་ཀྱི་སེམས་གནས་སྐབས་གཞན་དུ་འགྱུར་ཏེ། ཆུང་ངུ་དང་། བར་མ་དང་། མཆོག་དང་། ཤིན་ཏུ་མཆོག་གི་དབྱེ་བའི་དུགས་དང་དགོད་པའི་སྦྱོར་བས་འཆིང་བྱེད་བྱང་ཆུབ་ཀྱི་སེམས་འཆིང་པའོ། །དེ་ལ་མི་རྟག་པའི་གཟུགས་བརྙན་བསྒོམས་པའི་སྟོབས་དང་། ས་ལ་སོགས་པའི་དངོས་སུ་ཟད་པར་བྱེད་པ་དང་ཤེས་རབ་ལ་ཆགས་པ་བྲལ་བ་ཞེས་ཇི་ལྟར་དུགས་དང་དགོད་པའི་སྦྱོར་བས་ཀྱང་། ལྕགས་ཀྱིས་དངུལ་ཆུའི་གཟའ་བ་ཟོ ས་པས་དུས་གཞན་གྱི་དབང་གིས་གནས་སྐབས་གཞན་དུ་སྟོབས་འགྱུར་ཏེ། དེ་བཞིན་དུ་མི་རྟག་པའི་སྐྱེས་བུ་བསྒོམ་པ་དང་། ས་ལ་སོགས་པ་ཡི་ཟད་པར་བསྒོམས་པས་བེམ་པོའི་ཕུང་པོ་དང་། ཁམས་དང་སྐྱེ་མཆེད་ཀྱི་གནས་སྐབས་གཞན་དུ་འགྱུར་ཏེ། གནས་སྐབས་གཞན་གྱི་མིང་གི་ས་ཐོབ་པའོ། །ཞེས་གསུངས་ཤིང་། དེ་བཞིན་དུ་དཔལ་རྡོ་རྗེ་མཁའ་འགྲོ་རྒྱ་མཚོའི་རྒྱུད་ལས་ཀྱང་། སྒྱུ་མ་ལྟ་བུའི་དངོས་དག་ནི། །ལོངས་སྤྱོད་ཁྱད་འཕགས་སྐྱེ་འགྱུར་བ། །བདེ་བ་ཡོངས་སུ་གྱུར་བཞིན་པས། །འབྲས་བུ་ཁྱད་འཕགས་ཐོབ་འགྱུར་བ། །ཅི་ཡི་ཕྱིར་ནས་འདོད་མི་བྱ། །བརྟན་གཡོའི་དངོས་པོ་ཡོད་མིན་ཏེ། །འོན་ཀྱང་སྣང་ཙམ་མཚན་ཉིད་དེ། །བསྒོམ་པས་ཁྱད་པར་ཅན་འགའ་ཞིག །གོམས་པའི་སྟོབས་ཀྱི་རྫོགས་པས་ན། །ཡིད་འོང་བདེ་བའི་འབྲས་བུ་ནི། །བླ་མེད་གསང་བ་བློ་ཡི་མཐུ། །འབྲས་བུ་དོན་གཉེར་རྒྱུ་བསྒྲུབས་ན། །དེར་ནི་ལྷ་མོ་སུ་ཞིག་འགོག །དེ་བས་འབད་པ་ཐམས་ཅད་ཀྱིས། །ཀུན་ཏུ་འགྲོ་བ་མཆོད་པར་བྱ། །དཀའ་ཐུབ་སྡོམ་པ་མི་ཟད་པས། །ལུས་ནི་སྐམས་ཤིང་སྡུག་བསྔལ་འགྱུར། །སྡུག་བསྔལ་གྱིས་ནི་སེམས་གཡེངས་ཤིང་། །གཡེངས་པས་དངོས་གྲུབ་གཞན་དུ་འགྱུར། །ལུས་དང་སེམས་ནི་བརྟན་འགྱུར་ན། །བདེ་བ་ཐམས་ཅད་བརྟན་པར་འགྱུར། །སྡུག་བསྔལ་གྱིས་ནི་གཡོ་འགྱུར་བས། །ཤིན་དུ་འགོག་པར་འགྲོ་བར་འགྱུར། དེས་ན་ལུས་དང་ངག་སེམས་རྣམས། །བརྟན་པར་བྱས་ན་བྱང་ཆུབ་འཐོབ། །ཞེས་གསུངས་སྟེ། བདེན་པས་སྟོང་བའི་སྣང་བ་ཙམ་ལ་སེམས་རབ་ཏུ་བརྟན་པའི་བདེ་བ་ཆེན་པོའི་རྒྱུན་གྱིས་བར་ཆད་མེད་ཅིང་འབྲས་བུ་འགྲུབ་པའི་ངེས་པ་རང་བཞིན་གྱི་གཏན་ཚིགས་ཀྱིས་གསུངས་པ་ཡིན་ནོ། །ཧེ་བཛྲ་ལས་ཀྱང་། ལྷ་ཡི་རྣལ་འབྱོར་ལས་བདེ་བ། སངས་རྒྱས་དེ་ཉིད་དངོས་པོའང་མིན། །དེ་ཉིད་དངོས་མེད་ཚུལ་ཡང་མིན། །ཞལ་ཕྱག་རྣམ་པའི་གཟུགས་ཅན་ཉིད། །མཆོག་ཏུ་བདེ་བས་གཟུགས་མེད་པ། །དེ་ཕྱིར་འགྲོ་ཀུན་ལྷན་ཅིག་སྐྱེས། །རྣམ་དག་རྣམ་པའི་སེམས་ཀྱིས་ནི། །རང་བཞིན་མྱ་ངན་འདས་པ་ཉིད། །ཞེས་གསུངས་སོ། དེ་བཞིན་དུ་རྒྱུད་ཐམས་ཅད་ལས་རྒྱ་ཆེར་གསུངས་པ་ཡིད་ལས་སྐྱེས་པའི་བསྒོམ་པ་ཀུན་བརྟགས་ཡེ་ཤེས་ཀྱི་ཕྱག་རྒྱས་བྱང་ཆུབ་ཀྱི་སེམས་འཆིང་བའི་སྦྱོར་བས་འཛག་པ་མེད་པའི་ཐབས་སུ་གསུངས་སོ། །འདིར་སྨྲས་པ། ཇི་སྲིད་འདྲེས་པའི་རྣམ་རྟོག་གིས། དོན་གསལ་སྣང་བ་ཡོད་མ་ཡིན། །དེ་ཕྱིར་རྟོག་པས་བསླད་པ་ཡིན། །རྣམ་རྟོག་བསྒོམ་པ་དོན་མེད་དོ། །བློ་ཡི་གསལ་སྣང་མངོན་སུམ་བཞིན། །གསལ་ལ་རྟོག་པས་མ་འདྲེས་གང་། གོམས་ལས་ཁྱད་པར་གྱུར་པའི་ཕྱིར། །དེ་ཡི་ཉམས་མྱོང་རང་རིག་པ། །ལྷ་མོའི་གསལ་སྣང་བདེ་མྱོང་རྒྱུ། །ཡེ་ཤེས་ཕྱག་རྒྱ་ཞེས་བརྗོད་དོ། །རྟོག་མེད་མངོན་སུམ་ལམ་འདི་ལ། །རྗེས་དཔག་འཁྲུལ་པ་མི་འཇུག་སྟེ། །བློ་ཡི་ཉམས་མྱོང་བྱ་གཞན་མེད། དེ་ཡིས་མྱོང་བ་གཞན་ཡོད་མིན། །གཟུང་དང་འཛིན་པ་མེད་པའི་ཕྱིར། །དེ་ནི་དེ་ལྟར་རང་རིག་གསལ། །རྨོངས་རྣམས་ཚུལ་འ དི་མ་རྟོགས་པས། །དོན་མྱོང་ཤེས་དང་དོན་མེད་པའི། །འཁྲུལ་རྟོག་བསྲེས་ནས་འཛིན་པ་གང་། །ཡང་དག་ཤེས་ལས་ཤིན་ཏུ་རིང་། །ཞེས་བྱ་བ་ནི་ཡེ་ཤེས་ཀྱི་ཕྱག་རྒྱ་གསལ་ལ་རྟོག་པ་མེད་པ་དང་། རྟོག་པ་དང་བཅས་པ་རྣམ་པར་དབྱེ་བའི་བར་སྐབས་ཀྱི་ཚིགས་སུ་བཅད་པའོ། །ད་ནི་ལས་ཀྱི་ཕྱག་རྒྱ་ཡིས་ཇི་ལྟར་འཆིང་པ་བཤད་པར་བྱ་སྟེ། འདི་ལ་ཡང་གསུམ་ལས། ངེས་པ་དང་། བདག་བྱིན་གྱིས་བརླབ་པའི་རིམ་པ་ཐབས་ལྡན་དང་། དཀྱིལ་འཁོར་ཚོགས་ཀྱི་བསྒྲུབ་པ་གཞན་ལུས་ལ་བརྟེན་པའོ། དང་པོ་ནི་ཕྱག་རྒྱ་ཆེན་མོས་བཅིང་པ་ཐུབ་ན་འདི་ལྟར་སྒྲུབ་དགོས་པར་རྒྱུད་ལས། གལ་ཏེ་སོ་སོར་སྡུད་པ་ལ་སོགས་རྣམས་ཀྱིས་སྔགས་པ་ངེས་པར་འདོད་པའི་དངོས་གྲུབ་མ་གྱུར་ན། །མི་ཤིགས་པ་ལ་གོམས་ནས་སྟོབས་ཀྱི་ཆུ་སྐྱེས་ནོར་བུར་སོན་པའི་ཐིག་ལེ་དགག་པ་སྒྲུབ། །ཞེས་གསུངས་སོ། །གཉིས་པ་ནི། ཧེ་བཛྲ་ལས། བྷོ་ལའི་བདེ་བ་ཕྱག་རྒྱ་ཆེ། །རྡོ་རྗེ་སྐྱེ་མཆེད་ཐམས་ཅད་ཉིད། །འདི་ནི་གསང་བའི་སྙོམས་འཇུག་པས། །ཕྱི་རོལ་གཉིས་གཉིས་བསྟན་པ་མེད། །ཞེས་པ་དང་། བསྡུས་པའི་རྒྱུད་ལས་ཀྱང་། དབུ་མར་འཇུག་པ་གཡས་དང་གཡོན་ནས་རྒྱུ་བའི་ཉི་མ་ཟླ་བར་བཅས་པ་བསྡམ་པར་བྱ། །སེམས་ནི་ཕྱག་རྒྱར་རབ་ཏུ་ཞུགས་པས་མཆོག་གི་བདེ་བར་སོན་པ་དང་ནི་རྡོ་རྗེ་བསླང་པ་དང་། །པད་མར་རྡོ་རྗེའི་སྒྲའམ་རང་གི་ལག་པས་པད་མས་བཅིང་པ་ཡང་ནི་བདེ་བའི་དོན་དུའོ། །ས་བོན་མ་ལྷུང་བདེ་བར་བཅས་པས་འཆིང་བའི་འཇིགས་པ་འཇོམས་པ་འདི་ནི་དཔལ་ལྡན་བླ་མའི་ཞལ། །ཞེས་པ་དང་། མཚན་ཡང་དག་པར་བརྗོད་པ་ལས། རྡོ་རྗེ་འབེབས་པ་འབེབས་པ་ཆེ། །མིག་བརྒྱ་པ་སྟེ་རྡོ་རྗེའི་མིག །ལུས་ནི་རྡོ་རྗེའི་བ་སྤུ་ཅན། །རྡོ་རྗེའི་སྤུས་ནི་ཅིག་པུའི་ལུས། །སེན་མོ་སྐྱེས་པ་རྡོ་རྗེའི་རྩེ། །རྡོ་རྗེ་སྙིང་པོ་ལྤགས་པ་འཁྲེགས། །རྡོ་རྗེའི་ཕྲེང་ཐོགས་དཔལ་དང་ལྡན། །རྡོ་རྗེའི་རྒྱན་གྱིས་བརྒྱན་པ་སྟེ། །གད་རྒྱངས་ཧ་ཧ་ངེས་པར་སྒྲོགས། །ཡི་གེ་དྲུག་པ་རྡོ་རྗེའི་སྒྲ། །ཞེས་བཅིང་པའི་རིམ་པ་དང་བཅས་པ་གསུངས་ཏེ། དགུག་པ་དང་། བཞུག་པ་དང་བཅིང་པ་དང་བརྟན་པར་བྱ་བ་རྡོ་རྗེ་འཆང་ཆེན་པོ་ལས་རིམ་པར་བརྒྱུད་པའི་གདམས་ངག་བླ་མའི་ཞལ་ལས་ཤེས་པར་བྱའོ། །གསུམ་པ་དཀྱིལ་འཁོར་ཚོགས་སྒྲུབ་པ་ལ་བཞི་སྟེ། ཕྱག་རྒྱའི་མཚན་ཉིད་དང་། རིགས་ཀྱི་རྒྱས་གདབ་དང་མི་ལྡན་ན་དངོས་གྲུབ་མི་འབྱུང་བའི་དོན་དང་། བསྟེན་པའི་ཚུལ་དང་། ཤིན་དུ་གསང་བར་བསྟན་པའོ། །དང་པོ་ནི་རྒྱུད་ཐམས་ཅད་ལས། དཔག་དུ་མེད་པ་གསུངས་ཀྱང་། མདོར་བསྡུས་ནས་འདི་ཉིད་དུ། ཐོག་མར་བུད་མེད་གསང་བའི་ཕྱག་རྒྱར་འགྱུར་ལ། །དཔལ་ལྡན་སྐྱེས་པ་དམ་ཚིག་ཕྱག་རྒྱ་བཟང་མོའོ། །རོལ་པའི་ཆ་ཡིས་ལས་ཀྱི་ཕྱག་རྒྱར་འགྱུར་ལ་དབང་པོ་གཉིས་མཉམ་བདེ་བ་ཆོས་ཀྱི་ཕྱག་རྒྱའོ། །ཞེས་ཕྱག་རྒྱའི་དབྱེ་བ་སྤྱིར་གསུངས་ནས། བྱེ་བྲག་དུ་ཕོ་ཉ་མོ་ལྔ་ནི། ཕོ་ཉ་མོ་ནི་རིགས་ནི་རྣམ་པ་ལྔ་ལས་ལུས་དང་པད་མར་གཏོགས་པའི་དྲི་ནི་རྣམ་པ་ལྔ། གླ་རྩི་པད་མ་ལྕི་བ་རྣམས་དང་རང་བཞིན་ཡོན་ཏན་དབང་གིས་ཤ་དང་རྣག་གི་དྲི་རྣམས་སོ། དཔལ་ལྡན་བཟང་མོ་པད་མ་ཅན་དང་དུང་ཅན་མ་དང་སྣ་ཚོགས་མ་དང་གླང་ཆེན་མ་རྣམས་སོ། །དཔལ་ལྡན་སྒྲོལ་མ་གོས་དཀར་མ་དང་རིགས་ཀྱི་དབང་གིས་མ་མ་ཀི་དང་སྤྱན་མ་རྣམས་སུ་འགྱུར། །ཞེས་རིགས་ལྔའི་དབྱེ་བས་མིང་དང་དྲིའི་ཁྱད་པར་མདོར་བསྟན་པའོ། །དེ་བཞིན་དུ་ཐབས་ཀྱི་རིགས་ལྔ་ཡང་གསུངས་པ། རྣལ་འབྱོར་པ་ནི་སེང་གེ་རི་དྭགས་རྟ་དང་གླང་དང་གླང་པོ་ཆེ་རྣམས་རིགས་ཀྱི་དབྱེ་བས་འགྱུར། །མི་སྐྱོད་པ་དང་དོན་ཡོད་གྲུབ་པ་དྲི་མེད་ནོར་བུའི་ཕྱག་དང་པད་མའི་ཕྱག་ཅན་འཁོར་ལོ་ཅན། །ཞེས་མདོར་བསྟན་པ་ཙམ་གསུངས་ཏེ། མཚན་ཉིད་རྒྱས་པར་བཤད་པ་དང་རིགས་སུམ་ཅུ་སོ་དྲུག་གི་དབྱེ་བ་ལ་སོགས་པ་དང་བསྟེན་དུ་རུང་པ་དང་མི་རུང་པའི་རྣམ་པར་དབྱེ་བ་དང་བྱང་ཆུབ་ཀྱི་སེམས་བསྒྲུབས་པ་དང་། ལོའི་གྲངས་ཀྱིས་ཡོན་ཏན་ཀྱི་རིགས་རྣམ་པར་དབྱེ་བ་དང་ལས་དང་པོ་པ་དང་། དབང་བསྐུར་བ་དང་རྗེས་སུ་དྲན་པའི་གནས་སྐབས་སུ་བསྒོམ་པའི་དབྱེ་བ་རྣམས་རྒྱུད་འགྲེལ་ལས་ཤིན་དུ་རྒྱས་པར་གསུངས་ཤིང་། དེ་བཞིན་དུ་སྤྱན་རས་གཟིགས་ཀྱིས་དཔལ་དོན་དམ་བསྙེན་པ་ལས་གསུངས་པ་རྣམས་འདིར་མ་བྲིས་པས་ཤེས་པར་འདོད་པ་རྣམས་དེ་དག་དུ་ལྟོས་ཤིག དེ་ལྟར་ཤེས་པ་ལས་རིགས་ཀྱི་རྒྱས་གདབ་དང་མི་ལྡན་ན་དངོས་གྲུབ་མི་འབྱུང་ཞིང་སྐྱོན་སྣ་ཚོགས་འབྱུང་ངོ་ཞེས། ཧེ་བཛྲ་ལས། རིགས་འཆོལ་བསྒོམ་པའི་སྦྱོར་བ་ལས། །དངོས་གྲུབ་མེད་ཅིང་བསྒྲུབ་པ་པོའང་མེད། །ཞེས་གསུངས་པས། ལུས་སེམས་ཀྱིས་ཕན་ཚུན་རྒྱས་གདབ་དང་། རྒྱུ་འབྲས་ཀྱི་རྒྱས་གདབ་དང་། ནམ་མཁའ་ཡེ་ཤེས་ཀྱི་རྒྱས་གདབ་དང་། །དྲུག་གིས་ཕྱི་དང་ནང་དང་གཞན་ཐམས་ཅད་ལ་རྒྱས་བཏབ་པ་དངོས་གྲུབ་དུ་འགྱུར་ཏེ། མིང་དང་སྔགས་ཀྱི་རང་བཞིན་ཡང་དེ་ལྟར་རོ། དེ་ཡང་འགྲེལ་ཆེན་ལས། གཞན་གྱི་རིགས་ལ་འཁྱུད་པ་བྱ་བ་གྲུབ་པར་བརྗོད་ཀྱི་རང་གི་རིགས་ལ་བྱེད་པ་འགལ་བའི་ཕྱིར་རོ། །ཞེས་པ་ལ་སོགས་པ་རྒྱས་པར་གསུངས་སོ། །ཇི་ལྟར་བསྟེན་པའི་ཚུལ་ཡང་། རྩ་རྒྱུད་ལས། བཅུ་དྲུག་ལོ་ལོན་རིགས་ལྡན་མ། །གཟུགས་དང་ལང་ཚོས་བརྒྱན་པ་ནི། །དང་པོར་ཡང་དག་སྦྱང་བྱས་ནས། །དབང་བསྐུར་ནས་ནི་སྒྲུབ་པ་ཙམ། །སྐུ་གསུང་ཐུགས་དང་ཡེ་ཤེས་ནི། །དཔྲལ་བ་ལ་སོགས་རྣམས་ལ་དགོད། །སྭཱཧཱ་གསང་བ་གཙུག་ཏོར་དུའོ། །དེ་ནས་པད་མ་རྣམ་པར་སྦྱང་། །ཨ་ཡིས་པད་མ་འདབ་བརྒྱད་ལ། །ཧཱུྃ་ཡིག་གིས་ནི་རྡོ་རྗེ་བཅས། །དེ་ལྟར་རྡོ་རྗེ་པད་མ་ནི། ཤེས་རབ་ལ་ནི་དབབ་ཕྱིར་རོ། །ཧཱུྃ་ལས་རང་གི་རྡོ་རྗེ་ནི། །རྩེ་མོ་ལྔ་པ་རྣམ་པར་བསྒོམ། །དེ་དབུས་པད་མ་འདབ་བརྒྱད་པ། །ཡི་གེ་ཨ་ལས་བྱུང་པ་བསྒོམ། །དེ་ལྟར་པད་མ་རྡོ་རྗེར་བཅས། །བྱས་པ་པད་མར་རབ་དུ་གཞུག དེ་ནས་རྣལ་འབྱོར་ཧཱུྃ་ཕཊ་བྱ། །རྡོ་རྗེ་འཛིན་པའི་ང་རྒྱལ་གཟུང་། །བྷ་གར་ལིང་ག་རབ་བཞག་ནས། །བྱང་ཆུབ་སེམས་ནི་དོར་མི་བྱ། །ཁམས་གསུམ་མ་ལུས་པ་རྣམས་ནི། །སངས་རྒྱས་སྐུར་ནི་བསྒོམ་པར་བྱ། །ཞེས་གསུངས་པ་བཞིན་དུའོ། །དེ་བཞིན་དུ་རྒྱུད་ཐམས་ཅད་དུ་གསུངས་མོད་ཀྱི་འདིར་མ་བྲིས་སོ། །ཤིན་དུ་གསང་བའི་ཚུལ་ནི། དཔལ་འཁོར་ལོ་སྡོམ་པ་ལས། ལས་ཀྱི་ཕྱག་རྒྱ་ཉམས་དགའ་བ། །དེ་ནི་བྱིས་པའི་སྐྱེ་བོ་དང་། ལྷན་ཅིག་སྨྲ་ཞིང་སྒྲུབ་མི་བྱ། བྱས་ན་དམ་ཚིག་ཉམས་པར་འགྱུར། །ཞེས་གསུངས་ཤིང་། དམ་ཚིག་ཉམས་ན་སྐྱོན་ཅིར་གྱུར་ཞེ་ན། ཧེ་བཛྲ་ལས། མ་གསངས་སྦྲུལ་དང་ཆོམ་རྐུན་དང་། །ས་སྤྱོད་མེ་ཡི་སྡུག་བསྔལ་བསྐྱེད། ཞེས་པ་ལ་སོགས་པ་རྒྱུད་གཞན་རྣམས་ནས་ཀྱང་གསུངས་པས་གོ་བར་བྱའོ། །ད་ནི་དེ་ལྟར་ཕྱག་རྒྱ་གསུམ་གྱིས་འཆིང་དགོས་པའི་རྒྱུ་མཚན་བཤད་པ། མཆོག་དུ་མི་འགྱུར་བའི་དབང་བཞི་པ་དང་། ཤེས་རབ་ཀྱི་ཡེ་ཤེས་རྟོགས་པ་ལས། སངས་རྒྱས་སུ་འགྱུར་བའི་ཕྱིར་ཕྱག་རྒྱ་ཆེན་པོར་གསུངས་ཏེ། དྲི་མ་མེད་པའི་འོད་ལས། མཆོག་དུ་མི་འགྱུར་བཞི་པ་དང་། དེ་བཞིན་ཤེས་རབ་ཡེ་ཤེས་གང་། །སངས་རྒྱས་དེ་ཡང་དེ་བཞིན་འདིར། །ཕྱག་རྒྱ་ཆེན་པོར་རྒྱལ་བས་གསུངས། །ཞེས་གསུངས་ཤིང་། འདི་ཡང་ནང་དམ་ཚིག་གི་ཕྱག་རྒྱ་ཉི་མ་དང་ཟླ་བ་གཉིས་པོ་ཐོག་མར་དུས་ཀྱི་མེའི་ར་ཧུས་བཟུང་ནས་གཡོ་བ་མེད་པ་མ་ཐོབ་ཀྱི་བར་དུ་ཡང་དག་པའི་ལམ་དུ་མི་འགྱུར་ཏེ། འཁོར་བའི་བདེ་བ་འཛག་པ་དང་བཅས་པ་ནི་སྡུག་བསྔལ་ཐམས་ཅད་ཀྱི་རྒྱུ་ཡིན་ལ། ཉན་རང་ལྟ་བུའི་མྱ་ངན་ལས་འདས་པ་བསྒྲུབས་ཀྱང་། ཏིང་ངེ་འཛིན་གྱིས་ཁམས་གསུམ་དུ་ལུས་སྐྱེ་བ་བཀག་པའི་གཉིད་འཐུག་པོ་དང་འདྲ་སྟེ། དེས་ཀྱང་སྲིད་ཞི་གཉིས་ལས་མི་གནས་པའི་སངས་རྒྱས་ཀྱི་བདེ་བ་མི་འཐོབ་བོ། །དེའི་ངེས་པ་གསུངས་པ། དཔྱིད་ཀྱི་དུས་སུ་འཕྲད་པའི་མྱུ་གུ་ནི། །ལྷུང་གྱུར་ཨ་སྨྲའི་འབྲས་བུ་ཅི་ཕྱིར་འབྱུང་། །ཤེས་རབ་གསུངས་པས་གང་གི་ཁུ་བ་འཛག །འདིར་ནི་དེ་ཡི་བདེ་བ་གང་གིས་འཕེལ། །གང་གིས་འཛག་པ་མེད་པ་མ་ཐོབ་པ། །དེ་འཛག་བདེ་བ་འདོད་པ་སྡུག་བསྔལ་ཡིན། །འཁོར་བའི་བདེ་བ་མི་རྟག་པ། །འདོད་པ་མ་ཐོབ་རྨོངས་ཆེན་པོ། །མཁས་པས་མཐར་ཕྱིར་སྤང་བྱང་ལ། །ཡང་དག་རྒྱལ་བའི་དེ་བསྟེན་ནོ། །ཞེས་གསུངས་སོ། །ཡང་ཉན་ཐོས་ཀྱི་ཐེག་པར་ཞུགས་པ་རྣམས། འདོད་པའི་འདོད་ཆགས་དང་བྲལ་བའི་ཕྱིར་འཛག་མེད་ཡིན་ནོ་སྙམ་ན་མ་ཡིན་ཏེ། གསུངས་པ། རི་དྭགས་རྒྱལ་པོ་རི་དྭགས་ཟས་ཟ་བ། །ལོ་གཅིག་ནང་དུ་གལ་ཏེ་འཁྲིག་པ་སྤྱོད། །གསེག་མ་ཕྲ་མོ་ཟས་སུ་ཟ་བ་ཡི། །ཕུག་རོན་རྟག་ཏུ་འདོད་པ་སྤྱོད་པ་སྟེ། །གཉིས་ཀ་ལ་ཡང་མཆོག་གི་བདེ་བ་མེད། །རེས་འགའ་རྟག་ཏུ་ཁུ་འཛག་གང་ཇི་བཞིན། །དེ་བཞིན་འདོད་ལྡན་དང་ནི་དཀའ་ཐུབ་པ། །སད་དང་རྨི་ལམ་ན་ནི་འཛག་པའི་ཕྱིར། །གཉིས་ཀ་ལ་ཡང་མཆོག་གི་བདེ་བ་མེད། །ཞེས་གསུངས་སོ། །དེ་བཞིན་དུ་རྒྱུད་ལས། དེ་ལྟར་རྣམ་པ་བཞིའི་སེམས་དང་རྣམ་གསུམ་བཅོམ་ལྡན་འདས་ནི་སྲོག་ཆགས་རྣམས་ཀྱི་ཐིག་ལེའི་ནང་དུའོ། །མཉམ་པའི་བདེ་བའི་འབྲས་བུ་སྟེར་བ་ཁྱབ་བྱེད་རྣལ་འབྱོར་དབང་ཕྱུག་གིས་ནི་ཐར་པའི་རྒྱུར་སྲུང་བྱ། ཐིག་ལེ་ཤོར་ན་སུ་ཞིག་གྲོལ་བ་རྣལ་འབྱོར་མཆོག་གི་བདེ་བ་བྲལ་ཞིང་སྐྱེ་བའི་ས་བོན་ནོ། །ཞེས་གསུངས་སོ། །དེ་ལྟར་ན་ལས་ཀྱི་ཕྱག་རྒྱ་ལ་སོགས་པའི་འཆིང་བ་མི་འཐད་དོ་ཞེ་ན། སྲོག་རྩོལ་ལ་སོགས་པའི་ཐབས་ཀྱིས་ཡང་དག་པར་བཅིངས་པས་འཛག་པའི་ཆགས་པ་དང་བྲལ་ནས་ཆགས་པ་མེད་པའི་བདེ་བ་འགྲུབ་པའི་རྒྱུ་མཚན་གསུངས་པ། ཇི་ལྟར་རྡོ་སོགས་སྐུད་པ་ལས་བྱས་གོས། །དེ་ཉིད་མེས་བསྲེགས་དག་པར་འགྱུར་བ་ལྟར། །དེ་བཞིན་སྐྱེས་བུའི་ཤེས་རབ་ཡེ་ཤེས་མེས། །དེ་ཉིད་ཀྱིས་ནི་དག་པར་འགྱུར་བ་ཡིན། །ཞེས་གསུངས་པ་དང་། དེ་བཞིན་དུ་རྒྱུད་ལས། དངུལ་ཆུའི་དགྲ་ནི་མེ་ཉིད་ཡིན་ལ་མེ་དང་རྣམ་པར་བྲལ་ན་ནམ་ཡང་དངུལ་ཆུ་འཆིང་བ་ཡིན། མ་བཅིངས་པ་ལས་གསེར་མི་ཕྱེད་ལ་གསེར་དང་བྲལ་བས་གསེར་འགྱུར་མཁན་ལ་ལོངས་སྤྱོད་མེད་པ་ཉིད། དེ་བཞིན་བུད་མེད་ལ་ཞུགས་དམན་པས་རྣལ་འབྱོར་པ་ཡིས་སེམས་ནི་རྟག་ཏུ་འཆིང་བར་མི་འགྱུར་རོ། །མ་བཅིངས་པ་ལས་ལུས་ནི་འབིགས་པ་མིན་ལ་འདིར་ནི་ལུས་ཕུག་པ་ལས་ལྷན་སྐྱེས་བདེ་བ་སྟེར། ཞེས་གསུངས་ཏེ། ཇི་ལྟར་དངུལ་ཆུའི་དགྲ་མེ་ཡིན་ཀྱང་། དང་པོར་མེའི་དུགས་ཀྱིས་རྫས་དང་འདྲེས་པར་བྱེད་པ་དང་། བར་དུ་དངུལ་ཆུ་བཀྲམ་པའི་སྦྱོར་བས་སྣུམ་དང་མེ་ལྷན་ཅིག་པས་ལྕགས་རྣམས་ཟ་བར་བྱེད་པ་དང་། ཐ་མར་མེ་དྲག་པོས་བསྐོར་བས་ཐམས་ཅད་འཇུ་ཞིང་གསེར་དུ་བྱེད་པ་བཞིན། ཕྱག་རྒྱ་གསུམ་གྱིས་འཆིང་པ་ཡང་དེ་དང་འདྲ་སྟེ། ཁམས་གསུམ་པའི་དང་ཕུང་པོ་ཁམས་དང་སྐྱེ་མཆེད་རྣམས་ཕྱག་རྒྱ་ཆེན་མོ་ཡིས་བཅིངས་པས་རོ་མཉམ་པར་བྱེད་དེ། ཆོས་ཀྱི་སྐུ་གྲུབ་པའི་རྒྱུ་མཐུན་པའོ །ཡེ་ཤེས་ཀྱི་ཕྱག་རྒྱ་ནི་བར་པ་སྟེ། ལོངས་སྐུ་འགྲུབ་པའི་རྒྱུ་མཐུན་པའོ། །གསུམ་པ་ལས་ཀྱི་ཕྱག་རྒྱ་ནི་མེ་དྲག་པོ་དང་མཚུངས་ཏེ་འདོད་པའི་ཁམས་ཀྱི་ཁམས་དྲུག་ལྡན་གྱི་ལུས་མཆོག་གི་སྤྲུལ་པ་སྐུའི་སྐྱེས་བུ་ཆེན་པོ་འཁོར་བ་ཇི་སྲིད་དུ་འཇུག་པའི་ལུས་འགྲུབ་པར་བྱེད་པ་འདི་ལ་དགོངས་ནས་འགྲེལ་པར། དངུལ་ཆུ་དང་བྱང་ཆུབ་ཀྱི་སེམས་ཀྱི་ནུས་པ་བརྟག་པར་དཀའོ་ཞེས་རྒྱ་ཆེར་གསུངས་སོ། དེས་ན་ཕྱག་རྒྱ་བཞིའི་ངེས་པ་ནི་རྒྱུད་ལས། རྒྱལ་བའི་ལྷན་སྐྱེས་བདེ་བ་འཕེལ་བའི་དོན་གྱི་རྒྱུར་ནི་ཐོག་མར་ལས་ཀྱི་ཕྱག་རྒྱ་བསྟེན་པར་བྱ། དེ་ལས་ཉི་མའི་གཟུགས་ཅན་བདེ་བ་ལུས་ལ་རྐང་པ་གཙུག་ཏོར་དང་ནི་ཡན་ལག་ཐམས་ཅད་འགེངས། །གློག་གི་དབྱུག་པ་དང་མཚུངས་འགྱུར་བ་མེད་པའི་བདེ་བ་སྐྱེད་ཅིང་ཡན་ལག་མཚན་ནི་རབ་ཏུ་རྫོགས། །རྣམ་གསུམ་བཅོམ་ལྡན་འདས་ཀྱི་སྐུར་ནི་རྡོ་རྗེ་སྣང་བ་བྱེད་ཅིང་དེ་ནས་ཆོས་ཀྱི་དབྱིངས་སུ་འགྱུར། ཕྱག་རྒྱ་བཞི་པོ་འདི་རྣམས་འགྱུར་མེད་བདེ་བའི་འབྲས་བུ་སྟེར་བ་རྣལ་འབྱོར་པ་ཡིས་སྒོམ་པར་བྱ། །ཞེས་གསུངས་ཏེ། དེ་ལྟར་འགྱུར་བ་མེད་པའི་ལྷན་ཅིག་སྐྱེས་པ་ཕྱག་རྒྱ་གསུམ་གྱིས་སྟེར་བར་གསུངས་པ་ལ་ཐེག་པ་ཐུན་མོང་གི་ལམ་ལ་མངོན་པར་དགའ་པ་གང་དག བདེ་བའི་ལམ་ནི་ཆགས་པ་ཡིན་པས་རྣམ་པར་གྲོལ་བར་མི་འགྱུར་རོ་སྙམ་པའི་ཐེ་ཚོམ་དགག་པའི་ཕྱིར་གསུངས་པ། འདོད་ཆགས་གང་གིས་སེམས་ཅན་རྣམས་ནི་འཆིང་བར་འགྱུར་ལ་སྐྱོབ་པ་རྣམས་ནི་དེ་ཡིས་གྲོལ་བར་འགྱུར། །སེམས་ཅན་རྣམས་ནི་གང་ཞིག་ཉི་མ་སོ་སོའི་དུས་སུ་སྲུང་བར་བྱེད་ལ་སྐྱོབ་པས་དེ་དག་སྟེར། །རང་གི་སྙིང་ལ་སོན་པའི་བདེ་བ་སེམས་ཅན་རྣམས་ཀྱིས་གཏོང་བར་བྱེད་ལ་རྒྱལ་བས་སྲུང་བར་མཛད། །དེས་ན་རྒྱལ་བ་མཆོག་གི་སྤྱོད་པ་དེ་དག་ལྷ་དང་ཀླུ་དང་ལྷ་མ་ཡིན་ལ་བྱ་དཀར་འགྱུར། །ཞེས་པས། འདིར་སངས་རྒྱས་ཉིད་ཀྱི་ལམ་ནི་འཇིག་རྟེན་ཐམས་ཅད་ཀྱིས་དཔག་པར་མི་ནུས་པ་ཉིད་དོ། །གཞན་ཡང་ཐེག་པ་ཐུན་མོང་གི་སྤྱོད་པ་ལ་མངོན་པར་ཞེན་པ་རྣམས་ཀྱིས་ཚུལ་ཁྲིམས་ཀྱི་བརཏལ་ཤུགས་དང་འགལ་བར་འགྱུར་རོ་སྙམ་དུ་སེམས་ན། འཛག་པ་མེད་པར་བསྒྲུབ་པར་བྱེད་པ་ནི་ཉམས་པར་མི་འགྱུར་ཞིང་ཚངས་པར་སྤྱོད་པ་རྣམ་པར་དག་པ་ཡིན་ནོ་ཞེས་བསྟན་པའི་ཕྱིར་གསུངས་པ། རབ་མཆོག་རྒྱལ་བའི་བདག་པོའི་སྔགས་ཀྱི་མཐུ་ཡིས་གང་ཞིག་རང་ལ་བྱིན་གྱིས་རློབས་པར་བྱེད་པ་ན། །བརཏལ་ཞུགས་ངེས་པར་གནས་པའི་མིའི་ཚངས་པར་སྤྱོད་པ་སུ་ཞིག་དགེ་སློང་དེ་དག་ཉམས་པར་འགྱུར། །དེ་ཡི་བསོད་ནམས་ཡེ་ཤེས་རྫོགས་ནས་མཆོག་དུ་བདེ་བའི་གནས་སུ་སྐྱེ་བ་དེ་ཉིད་ལ་ནི་འགྲོ། །ཉན་ཐོས་རྨོངས་པ་གང་ཞིག་སློབ་དཔོན་ལ་ནི་སྨོད་པར་བྱེད་ཅིང་གསལ་བར་ཡང་ནི་རྒྱལ་བ་ལ། །དེ་ཡི་མནར་མེད་པར་ནི་མྱུར་དུ་འགྲོ་ལ་མཆོག་དུ་འཇིགས་པར་བྱེད་པའི་བགེགས་ཀྱི་མགོན་པོ་གསོད། ཞེས་སོ། །གཞན་ཡང་རྒྱུད་ཐམས་ཅད་ལས་མང་དུ་གསུངས་ཀྱང་འདིར་མ་སྤྲོས་སོ། །ད་ནི་རྗེས་སུ་དྲན་པའི་དབྱེ་བ་བཤད་པར་བྱ་སྟེ། ངོ་བོའི་སྒོ་ནས་ཀུན་རྫོབ་དང་དོན་དམ་པའི་ཚུལ་གཉིས་རྗེས་སུ་དྲན་པར་འདུས་ཤིང་། རྣམ་པའི་དབྱེ་བས་སངས་རྒྱས་དང་། ཆོས་དང་། དགེ་འདུན་དང་། ལྷ་དང་། གཏོང་བ་དང་། ཚུལ་ཁྲིམས་རྗེས་སུ་དྲན་པ་རྣམ་པ་དྲུག་དུ་འདུ་ལ་ས་ལམ་ཡོངས་སུ་རྫོགས་པ་ལ་ལྟོས་ནས་ཕ་རོལ་དུ་ཕྱིན་པ་བཅུའི་རྗེས་དྲན་དང་བཅས་ན་བཅུ་དྲུག་དུ་འགྱུར་རོ། །དེ་ལ་དང་པོ་གཉིས་ནི། འོད་གསལ་བའི་རང་བཞིན་དང་སྒྱུ་མ་ལྟ་བུ་ཞེས་བྱ་སྟེ། བདེ་སྟོང་དབྱེ་བ་མེད་པའི་འཛིན་པ་རབ་ཏུ་བརྟན་ནས་དེ་ལས་ཁམས་གསུམ་པོའི་རྟོག་པ་ཐམས་ཅད་ལ་རང་དབང་ཐོབ་པར་བྱ་བའི་ཕྱིར་སྒྱུ་མ་ལྟ་བུ་སྤྲོ་བ་དང་བསྡུ་བ་བསྒོམས་པས། བསྒོམ་པའི་ལམ་གྱི་ཡེ་ཤེས་ཀྱི་ཏིང་ངེ་འཛིན་མྱུར་དུ་རྫོགས་པར་འགྱུར་བ་སྟེ། གསང་བ་འདུས་པའི་རྒྱུད་ཕྱིར་མར། བརྟན་གྱུར་རྡོ་རྗེའི་ལམ་ནས་ནི། །ནམ་མཁའི་ཁམས་སུ་སྤྲོ་བར་བྱ། །རྗེས་དྲན་གང་ཞིག་རྣམ་སྒོམ་པ། །དེ་དང་འདྲ་བར་སྤྲོ་བར་བྱ། །རྗེས་སུ་དྲན་པ་ཞེས་བཤད་དེ། །སོ་སོར་སྣང་བ་དེ་ལས་སྐྱེ། །ཐབས་དང་ཤེས་རབ་སྙོམས་འཇུག་པས། །དངོས་པོ་ཐམས་ཅད་མདོར་བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམས། །ཡུད་ཀྱི་ཡེ་ཤེས་རྫོགས་བྱེད་པ། །ཏིང་ངེ་འཛིན་གྱིས་བརྟགས་པ་ཡིན། །ཞེས་གསུངས་སོ། །དེ་བཞིན་དུ་སྒྱུ་འཕྲུལ་དྲ་བ་ལས་ཀྱང་། རིམ་གྱིས་གཟུགས་ནི་རྫོགས་བྱས་ཏེ། །རྣལ་འབྱོར་སངས་རྒྱས་རྣམས་ཀྱིས་བསྔགས། །སྔགས་ཀྱིས་བྱིན་བརླབས་ང་རྒྱལ་བསྐྱེད། །རྣལ་འབྱོར་བྱིན་བརླབས་ཡིན་པར་གསུངས། བྱང་ཆུབ་སེམས་ནི་དག་པ་དང་། །གསང་སྔགས་ས་བོན་སྐྱེ་བ་ཆེ། །ཕྱག་རྒྱའི་གཟུགས་སུ་བརྟགས་པ་ཡིས། །དེ་ནི་བརྟགས་པར་བརྗོད་པ་སྟེ། །རྣལ་འབྱོར་ཆོག་ག་ཡིན་པར་གསུངས། །བསྡུ་དང་སྤྲོ་བར་བྱས་པ ལས། རྣམ་པའི་མཆོག་ཀུན་ལྡན་པ་དག །སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །ཞེས་གསུངས་པ་དང་། རྣམ་པར་སྣང་མཛད་མངོན་པར་བྱང་ཆུབ་པ་ལས་ཀྱང་། །ལྷའི་རྣལ་འབྱོར་རྣམ་པ་གཉིས་སྟོན་ཏེ། གསང་བའི་བདག་པོ་ལྷ་ཡི་གཟུགས་ཀྱང་རྣམ་པ་གཉིས་ཏེ། ཡོངས་སུ་དག་པ་དང་ཡོངས་སུ་མ་དག་པའོ། །དེ་ལ་ཡོངས་སུ་དག་པ་ནི་རྟོག་པའི་ངོ་བོ་སྟེ། མཚན་མ་ཐམས་ཅད་དང་བྲལ་བའོ། །ཡོངས་སུ་མ་དག་པ་ནི་མཚན་མ་དང་བཅས་པའི་གཟུགས་ཏེ། །ཁ་དོག་དང་དབྱིབས་སོ། །དེ་ལ་ལྷའི་གཟུགས་རྣམ་པ་གཉིས་ཀྱིས་བྱ་བ་གཉིས་འགྲུབ་པར་འགྱུར་ཏེ། མཚན་མ་དང་བཅས་པས་ནི་མཚན་མ་དང་བཅས་པའོ། །མཚན་མ་མེད་པས་ནི་མཚན་མ་དང་བཅས་པའི་དངོས་གྲུབ་ཀྱང་འབྱུང་བར་འགྱུར། ཞེས་གསུངས་ཤིང་། དཔལ་མཁའ་འགྲོ་རྒྱ་མཚོ་ལས་ཀྱང་། ལྷ་ཡི་རྣམ་པའི་རྣལ་འབྱོར་བདག །སྐད་ཅིག་མངོན་སུམ་བྱེད་པའོ། །འདུགས་མ་ལ་སོགས་རྣལ་འབྱོར་གྱིས། །རྣམ་པར་བྱས་པའི་དབྱིབས་སུ་འགྱུར། །སྟོང་ཉིད་རང་བཞིན་གཟུགས་རྣལ་འབྱོར། །རང་བྱིན་བརླབས་པའི་མཚན་ཉིད་དོ། །བདག་བྱིན་བརླབས་དང་བྲལ་རྣལ་འབྱོར། །སྦུན་སྐོགས་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བྱང་ཆུབ་བླ་ན་མེད་པ་འཐོབ། །ཞེས་གསུངས་སོ། །དེ་ལྟར་མཉམ་རྗེས་གཉིས་ཀྱི་ངོ་བོ་བསྟན་ནས་རྗེས་སུ་དྲན་པ་དྲུག་གི་ངོ་བོ་ནི། དྲན་པ་མེད་ཅིང་ཡིད་ལ་བྱར་མེད་པ་ནི་སངས་རྒྱས་རྗེས་སུ་དྲན་པའོ། །ཞེས་བྱ་བ་ལ་སོགས་པ་ནི་སྟོང་ཕྲག་ཉི་ཤུ་ལྔ་པ་ལས་གསུངས་པ་བཞིན་ཁོ་ན་ཡིན་ཏེ། རྒྱུད་ལས་ཀྱང་། བྷ་གར་ལིང་ག་རབ་བཞག་ནས། །སངས་རྒྱས་རྗེས་སུ་དྲན་པ་བསྒོམ། །སངས་རྒྱས་སྤྲིན་ནི་རྣམ་པར་སྤྲོའོ། །ཞེས་བྱུང་སྟེ། བྷ་ག་ནི་ནང་གི་འཁོར་ལོ་དྲུག་གི་དབུས་དང་། མཚན་མར་འཛིན་པ་བཅོམ་པའི་ཆོས་ཀྱི་དབྱིངས་ཏེ་ལིང་ག་ནི་ཕྱག་རྒྱ་གསུམ་གྱིས་བཅིངས་པའི་འཛག་པ་མེད་པའི་བདེ་བའི་བྱང་ཆུབ་ཀྱི་སེམས་མི་འགྱུར་བའོ། །དེ་ཉིད་ཀྱིས་ཁམས་གསུམ་པའི་མཚན་མ་ཐམས་ཅད་དང་བྲལ་ཞིང་སངས་རྒྱས་ཀྱི་ཡེ་ཤེས་ལ་འཇུག་པས་རྣམ་པར་མི་རྟོག་པའོ། །དེ་ཉིད་ཀྱི་རྗེས་ཐོབ་ལས་མཚན་དང་དཔེ་བྱད་ཀྱི་རྒྱུ་རྩ་རླུང་ཐིག་ལེ་དག་པར་བྱ་བའི་ཕྱིར་སངས་རྒྱས་ཀྱི་སྤྲིན་སྤྲོ་བ་སྟེ། རྗེས་ཐོབ་ཀྱི་ཆོས་རྒྱུ་མ་ལྟ་བུར་སྦྱོངས་པའོ། །འདི་ནི་སངས་རྒྱས་རྗེས་སུ་དྲན་པའོ། །དེ་བཞིན་དུ་སྤངས་བྱ་དང་གཉེན་པོས་བསྡུས་པའི་མིང་ཚིག་ཡི་གེ་ཐམས་ཅད་གྲགས་སྟོང་དུ་སྦྱོངས་པ་ནི་ཆོས་རྗེས་དྲན་ནོ། །གང་ཟག་བརྒྱད་སྤོངས་བར་བྱེད་པ་ལ་འཇུག་པ་ནི་དགེ་འདུན་རྗེས་དྲན་ནོ། །ལྷན་ཅིག་སྐྱེས་པའི་ལྷ་དེ་ཉིད་ཀྱིས་གཟུགས་དང་གཟུགས་མེད་པའི་ལྷ་ཐམས་ཅད་སྦྱོང་བར་བྱེད་པ་ལྷ་རྗེས་དྲན་ནོ། །ཚད་མེད་པ་བཞི་ཡིས་སེམས་ཀྱིས་སྙིང་རྗེ་ཆེན་པོ་སྦྱོང་བ་ནི་གཏོང་བ་རྗེས་དྲན། འཛག་པ་ཐམས་ཅད་དང་བྲལ་བར་སྒྲུབ་པ་ནི་ཚུལ་ཁྲིམས་རྗེས་དྲན་དུ་གསུངས་སོ། །ཕ་རོལ་ཏུ་ཕྱིན་པ་བཅུའི་རྗེས་དྲན་ནི། ཕྱི་ནང་གི་ལོངས་སྤྱོད་ཐམས་ཅད་ལ་ཆགས་པ་དང་བྲལ་བ་ནི་སྦྱིན་པ་དང་། ཁམས་འཛག་པ་མེད་པ་ནི་ཚུལ་ཁྲིམས་དང་། སྒྲ་ཐམས་ཅད་ལ་མཚན་འཛིན་ཐིམ་པས་ནི་བཟོད་པ་དང་། རླུང་འགག་པའི་བརྩོན་འགྲུས་དང་། ལྷན་སྐྱེས་ཀྱི་བསམ་གཏན་དང་། བདེ་བ་ཆེན་པོར་ཚུད་པའི་ཤེས་རབ་དང་། སེམས་ཅན་གྱི་དོན་གྱི་ཐབས་མཁས་པ་དང་། མྱུར་དུ་འགྲུབ་པའི་སྨོན་ལམ་དང་། རྫུ་འཕྲུལ་ལ་སོགས་པའི་སྟོབས་དང་། མཉམ་པ་ཉིད་དུ་སངས་རྒྱས་རྣམས་དང་མཚུངས་པར་ལོངས་སྤྱོད་པའི་གྲགས་པའི་ཡེ་ཤེས་ཏེ། ས་བཅུ་པོ་རྣམས་ལ་རིམ་པས་རྗེས་སུ་དྲན་པའི་སྦྱོར་བས་ཉོན་མོངས་པ་ཅན་མ་ཡིན་པའི་སྒྲིབ་པ་བཅུ་སྤངས་ནས་ཏིང་ངེ་འཛིན་རྣམ་པར་དག་པ་འཐོབ་པར་འགྱུར་ཏེ། རྒྱུད་ལས། ནོར་རྣམས་སྤངས་པ་སྦྱིན་པ་ཡིན་ལ་བུད་མེད་ལ་ཞུགས་ལྟུང་བ་མེད་པའི་སེམས་ནི་ཚུལ་ཁྲིམས་སོ། །སྒྲ་ལ་སོགས་པ་ཐམས་ཅད་ཐིམ་པ་བཟོད་པ་ཡིན་ལ་གཉིས་ནས་འགྲོ་བའི་རླུང་དག་ཉམས་པ་བརྩོན་འགྲུས་སོ། བསམ་གཏན་དང་ནི་ཤེས་རབ་སེམས་ནི་ལྷན་སྐྱེས་བདེ་བར་ཚུད་པའི་ཀུན་དུ་འགྲོ་བའི་སྐད་ཅིག་གོ །དེ་ལ་སེམས་ཅན་དོན་དུ་རྫུ་འཕྲུལ་དང་ནི་ལོངས་སྤྱོད་འབྱུང་ཞིང་གྲགས་པ་ཐོབ་པ་གཞན་རྣམ་བཞི། །ཞེས་གསུངས་སོ། །འདི་རྣམས་ཐོད་རྒལ་གྱི་ཏིང་ངེ་འཛིན་པའི་ཚུལ་ནི། ཐོག་མར་འཛིན་པའི་སྐབས་ནས་འདིར་བཤད་པའི་ཕ་རོལ་དུ་ཕྱིན་པ་རྣམས་ཕན་ཚུན་བསྡུས་པ་ཐོབ་པས་ཁམས་གསུམ་པའི་མཚན་མའི་རྣམ་པར་རྟོག་པ་བཟུང་བར་བྱ་བ་དང་། དོར་བར་བྱ་བ་སྐྱེས་བུ་རྫས་དང་བརྟགས་པར་ཡོད་པའི་རྟེན་ཅན་གྱི་འཛིན་པ་དང་གཟུང་བ་ལ་དགུ་ཚན་བཞི་ཡོད་པ་ལ་རྣམ་པར་རྟོག་པ་བརྒྱ་རྩ་བརྒྱད་དུ་འགྱུར་བ་དང་ཉོན་མོངས་པ་སྤངས་ནས། འཐོབ་པ་ནི་ཕ་རོལ་དུ་ཕྱིན་པར་གསུངས་པ་བཞིན་དུ་ཡིན་ཏེ། སྦྱིན་པ་ལ་སོགས་རེ་རེར་ནི། །དེ་དག་ཕན་ཚུན་བསྡུས་པ་གང་། །སྐད་ཅིག་ཅིག་པའི་བཟོད་པ་ཡིས། །བསྡུས་པ་གང་དེ་མཐོང་བའི་ལམ། །ཞེས་གསུངས་པའི་དོན་ཐོབ་ནས་ཉོན་མོངས་པ་དང་ཤེས་བྱའི་སྒྲིབ་པ་ལ་འཇིགས་པ་མེད་པར་མྱུར་དུ་སེལ་བའི་ཕྱིར། དེ་ནས་སེང་གེ་རྣམ་བསྒྱིངས་པའི། །ཏིང་ངེ་འཛིན་ལ་སྙོམས་ཞུགས་ནས། །ཞེས་པ་རྗེས་སུ་དྲན་པ་བཞིའི་ཏིང་ངེ་འཛིན་ནི་སྔར་བསྟན་པ་བཞིན་དུ་ཐོབ་པའོ། །དེ་བརྟེན་པ་ཕྱི་ནང་གི་རྟེན་ཅིང་འབྲེལ་བར་འབྱུང་པ་ལ་མངོན་སུམ་དུ་འཇུག་སྟེ། ཕྱིའི་རྟེན་འབྲེལ་ནི། དང་པོ་བརྒྱད་དང་དགུ་ཉོན་མོངས། །གཉིས་དང་བཅུ་པ་ལས་ཡིན་ཏེ། །ལྷག་མ་བདུན་ནི་སྡུག་བསྔལ་ཡིན། །ཞེས་པ་ལ་སོགས་པ་འཕགས་པ་ན་ག་རྫུ་ན་ཡིས་ཇི་ལྟར་གསུངས་པ་བཞིན་དུ་མ་རིག་པ་གཏི་མུག་དང་། སྲེད་པ་འདོད་ཆགས་དང་། ལེན་པ་ལས་ཞེ་སྡང་སྐྱེ་སྟེ། དེ་ནས་མ་རིག་པ་ལ་བརྟེན་ནས་འདུ་བྱེད་པ་རྒྱུའི་ལས་དང་། སྲེད་ལེན་ལ་བརྟེན་ནས་ཁམས་གསུམ་པ་སྲིད་པ་འབྲས་བུའི་ལས་འགྲུབ་པ་སྟེ། དེས་གཞན་བདུན་པོའི་སྡུག་བསྔལ་སྐྱེ་བས་དེའི་རྒྱུ་ཡོད་ན་འབྲས་བུ་འགྲུབ་བོ་ཞེས་པ་དང་། རྒྱུ་བཀག་པས་འབྲས་བུ་མི་འགྲུབ་བོ་ཞེས་བྱ་བར་རྟོགས་པའོ། །འདིར་ནང་གི་རྟེན་འབྲེལ་ནི། མཆོག་དུ་མི་འགྱུར་བ་འགྲུབ་པར་གསུངས་པ། འཛག་པ་ལས་གཡོ་བའི་ཆགས་པ་དང་། བྲལ་བའི་ཞེ་སྡང་དང་། བརྒྱལ་བའི་རྨོངས་པ་སྟེ་སེམས་ཅན་རྣམས་ཐོག་མ་མེད་པ་ནས་མ་རིག་པ་ནམ་མཁའི་མེ་ཏོག་གི་འཕྲེང་བ་བཞིན་ཉོན་མོངས་ཏེ། མ་རིག་པ་ལས་འདུ་བྱེད། འདུ་བྱེད་ཀྱི་ལས་ལས་རྣམ་པར་ཤེས་པ་སྡུག་བསྔལ་ཏེ། དང་པོའི་ཆུང་ངུ་ཙམ་ལུས་དང་ངག་དང་སེམས་ཀྱི་དབྱེ་བས་སོ། །དེ་བཞིན་དུ། མིང་གཟུགས་ཀྱི་ཉོན་མོངས་ལས་སྐྱེ་མཆེད་དྲུག་གི་ལས་དང་། དེ་ལས་རེག་པ་ནི་སྡུག་བསྔལ་ཏེ་གཉིས་པའོ། །ཚོར་བའི་ཉོན་མོངས་ལས་སྲེད་པའི་ལས་དེ། ཉེ་བར་ལེན་པའི་སྡུག་བསྔལ་ནི་གསུམ་པའོ། །སྲིད་པའི་ཉོན་མོངས་ལས། སྐྱེ་བའི་ལས་ཏེ། རྒ་ཤིའི་སྡུག་བསྔལ་འབྱུང་བ་ནི་བཞི་པའོ། །མངལ་དུ་གྲུབ་པའི་དང་པོ་བཟླ་བ་ཆུ་སྲིན་ལ་མ་རིག་པ་ནས་བཟུང་ནས་ཟླ་བ་བཅུ་གཅིག་པར་སྐྱེ་བ་དང་། བཅུ་གཉིས་པར་རྒ་ཤིའི་བར་དུ་གྱུར་པ་ནི་གཡོ་བའི་བག་ཆགས་ལ་བརྟེན་ནས་བྱུང་ངོ་། །འདིར་མཆོག་དུ་མི་འགྱུར་བར་གྲུབ་པས་འཛག་པ་དང་བྲལ་བའི་བདེ་བ་ཐོབ་པའི་ཕྱིར་མི་ཆགས་སོ། །མི་ཆགས་པས་ཞེ་མི་སྡང་ངོ་། །དེ་མི་རྟོག་པ་གཏི་མུག་མེད་དེ། འདོད་ཆགས་དང་ཞེ་སྡང་དང་གཏི་མུག་ཆེན་པོའི་མིང་དུ་འགྱུར་བས། མ་རིག་པ་འགགས་པས། རྒ་ཤི་འགག་པའི་རྡོ་རྗེའི་ལུས་འཐོབ་བོ། །ཞེས་གསུངས་ཏེ། དུས་སྦྱོར་བཅུ་གཉིས་ཀྱི་དང་པོར་འདིར་རླུང་བརྒྱ་ཕྲག་བཅོ་བརྒྱད་དག་པས་རྣམ་རྟོག་གི་མཚན་མར་འཛིན་པ་གཡོ་བ་བརྒྱ་ཕྲག་བཅོ་བརྒྱད་དག་ཅིང་ཆུ་སྲིན་གྱི་ཁྱིམ་དང་། མ་རིག་པ་འགགས་པ་ཞེས་བྱའོ། །ལྷག་མ་བཅུ་གཅིག་པོ་བསྒོམས་པའི་ལམ་ལ་འགག་གོ །དེས་ན། རྟེན་ཅིང་འབྲེལ་འབྱུང་ལུགས་མཐུན་དང་ལུགས་མི་མཐུན་ལ་རྟོག་པར་བྱེད། ཞེས་གསུངས་སོ། །དེ་ལ་བརྟེན་ནས། སྔར་བཤད་པའི་རྗེས་དྲན་བྱེད་པ་རྣམས་སྒོམ་པའི་ལམ་ཡིན་པས་ཐོད་རྒལ་གྱི་སྙོམས་འཇུག་ནི། བསམ་གཏན་དང་གཟུགས་མེད་རྣལ་འབྱོར་དང་པོ་དང་བར་པས་ལས་སུ་རུང་བར་བྱས་ནས་འཛིན་པ་ལ་བསྒྲལ་བས་འགོག་པའི་ཏིང་ངེ་འཛིན་ནི་ཐོབ་པ་ཡིན་ཏེ། འདི་ནི་ཕར་རིམ་པས་སོང་པའོ། །ཡེ་ཤེས་ཀྱི་རྟགས་བཅུས་གཟུགས་མེད་ཀྱི་སྐྱོན་བཀག་ལ་སྲོག་རྩོལ་དག་པས་བསམ་གཏན་གྱི་སྐྱོན་བཀག་སྟེ། བདེ་སྟོང་དབྱེར་མེད་ཀྱི་འཛིན་པས་འགོག་པའི་སྐྱོན་བཀག་ནས་ཤེས་རབ་ཀྱི་ཆགས་པ་རྗེས་སུ་དྲན་པས་སྲིད་པ་ཉིད་མྱ་ངན་ལས་འདས་པ་བསྒྲུབ་པའི་ཕྱིར། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོང་ནས། །འདོད་པར་རྟོག་པར་རྣམ་པར་ཤེས། །མཉམ་བཞག་མིན་པའི་འཚམས་བཟུང་སྟེ། །ཞེས་གསུངས་སོ། །དེ་ནས་འདོད་པའི་ཁམས་ཀྱི་ཤེས་རབ་ཀྱི་ཆགས་པ་དང་། བསམ་གཏན་དང་འགོག་པ་རྣམ་པ་གཉིས་དུས་ཅིག་བསྒོམ་པ་དང་གསུམ་དུས་ཅིག་ཏུ་བསྒོམ་པ་དང་། མཐར་ཐུག་པས་ཐམས་ཅད་ཕྱོགས་ཅིག་དུ་བསྒོམ་པར་བྱེད་པ་ཡང་འགྲུབ་སྟེ། ཐོད་རྒལ་དུ་ནི་སྙོམས་འཇུག་པ། གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་རྒལ་ནས། འགོག་པའི་བར་དུ་མི་འདྲར་འགྲོ། །ཞེས་གསུངས་པ་ཡིན་ནོ། །འདི་ལྟ་བུའི་ཟུང་འཇུག་གི་བསྒོམ་པ་ཆེན་པོའི་ལམ་ཐོབ་པས་བསྒོམ་ལམ་གྱི་སྒྲིབ་པའི་རྣམ་པར་རྟོག་པ་དགུ་ཚན་བཞི་ལས་ཁམས་གསུམ་པས་ཕྱེ་བའི་སྒྲིབ་པ་བརྒྱ་རྩ་བརྒྱད་ཤེས་སྤོངས་བ་ནི་ཇི་སྐད་དུ་ཕ་རོལ་དུ་ཕྱིན་པའི་རྩེ་མོའི་སྐབས་ནས་གསུངས་པ་བཞིན་ནོ། །ད་ནི་ཐེག་པ་དམན་པ་མི་ཤེས་པའི་རྒྱུ་མཚན་ནི། དཔལ་འཁོར་ལོ་སྡོམ་པ་ལས། ལོག་པའི་ཤེས་པའི་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་བ། །དེ་ཀུན་གྱིས་ཀྱང་སངས་རྒྱས་ཀྱི། །སྤྱོད་ཡུལ་གསང་ཆེན་མི་ཤེས་སོ། །ཞེས་དང་། ཧེ་བཛྲ་ལས་ཀྱང་། བཟློག་པའི་བསྒོམ་པ་འདི་དག་ནི། །སངས་རྒྱས་མུ་སྟེགས་ཀྱིས་མི་ཤེས། །ཞེས་གསུངས་ཤིང་། རྒྱུད་ལས་ཀྱང་། འདོད་ཆགས་བྲལ་བ་དང་ནི་ཐུབ་པ་དྲག་པོ་ལྷ་དང་མི་རྣམས་ཀྱིས་ཀྱང་ཤེས་པ་མིན། ཞེས་གསུངས་སོ། རྗེས་སུ་དྲན་པའི་ཡན་ལག་བཤད་པའོ། །ད་ནི་རྗེས་སུ་དྲན་པའི་འབྲས་བུ་ཏིང་ངེ་འཛིན་བསྟན་པ་ནི་ཚིགས་སུ་བཅད་པ་བཞི་སྟེ། འདི་ལས་ཡང་། སྤྱན་ལྔ་དང་མངོན་པར་ཤེས་པ་དྲུག་འབྱུང་པའི་ཚུལ་དང་། ས་བཅུ་གཉིས་ཐོབ་པ་དང་སྐད་ཅིག་མའི་སྦྱོར་བ་དང་མཐར་ཐུག་པའི་ས་དང་ཡེ་ཤེས་ཀྱི་འཕྲིན་ལས་བཤད་པ་དང་ལྔ་ལས། དང་པོ་ནི། ཏིང་འཛིན་བདེ་ཆེན་རྣལ་འབྱོར་པས། །སྤྱན་ལྔ་མངོན་ཤེས་དྲུག་འབྱུང་སྟེ། །ཞེས་གསུངས་པ། སྟེང་འོག་གི་རྩ་དྲུག་འགག་པ་ལས་མངོན་ཤེས་དྲུག་འབྱུང་ཚུལ་ལ། འདིར་སེམས་ཅན་རྣམས་ཀྱི་ཁུ་བ་དང་རྡུལ་ཐབས་ཤེས་རབ་ལ་སྐུ་གསུང་ཐུགས་ཀྱི་དབྱེ་བས་སྟེང་འོག་གི་ལམ་དྲུག་དུ་འགྱུར་ཏེ། དབང་མདོར་བསྟན་ལས། ཐབས་ཀྱི་སྐུ་ནི་ཟླ་བ་སྟེ། །ཤེས་རབ་གསུང་ནི་ཉིན་བྱེད་དོ། །ཤེས་རབ་སྐུ་ནི་དྲི་ཆེན་རྩ། །དྲི་ཆུ་འབབ་པ་གཙོ་བོའི་གསུང་། །སྟེང་དང་འོག་གི་རྩ་གཉིས་ནི། །ས་བོན་འབབ་དང་མུན་ཅན་མ། །ཐབས་ཀྱི་ཐུགས་ནི་མུན་པ་ཅན། །ས་བོན་འབབ་པ་ཤེས་རབ་ཀྱི། །སྐུ་གསུངས་ཐུགས་ཀྱི་སྦྱོར་བ་ཡིས། །སྟེང་འོག་རིགས་དྲུག་འདི་ཡིན་ཏེ། །ཐབས་དང་ཤེས་རབ་ལུས་དངོས་ཀྱི། །ལུས་ཅན་རྣམས་ལ་ཡང་དག་གནས། །ཞེས་སོ། །དེ་ལ་མངའ་བདག་སྐུའི་མཐུ་ཡིས་ཞེས་པ་ཐབས་ཀྱི་རྩ་གཡོན་པ་འགགས་པས་ལྷའི་སྤྱན་དུ་འགྱུར་རོ། །གསུང་སྟེ་དྲི་ཆུའི་རྩ་འགག་པ་ལྷའི་རྣ་བ་དང་། ཐུགས་ཨ་བ་དྷུ་ཏི་འགགས་ན་གཞན་གྱི་སྙིང་ལ་གནས་པའི་སེམས་ཤེས་སོ། །ཤེས་རབ་ཀྱི་སྐུ་སྟེ་དྲི་ཆེན་གྱི་རྩ་འགགས་ན་སྔོན་གྱི་སྐྱེ་བ་རྗེས་སུ་དྲན་ནོ། །ཤེས་རབ་ཀྱི་གསུང་རྩ་གཡོན་པ་འགགས་ན་ཀུན་དུ་འགྲོ་བའི་རྫུ་འཕྲུལ་འཐོབ་བོ། ཤེས་རབ་ཡེ་ཤེས་ཀྱི་རང་བཞིན་དུང་ཅན་མ་འགག་ན་ཟག་མེད་མཆོག་དུ་མི་འགྱུར་བའི་བདེ་བ་གཞོམ་དུ་མེད་པ་འཐོབ་བོ། །དེ་ཡང་རྒྱུད་ལས། མངའ་བདག་སྐུ་ཡི་མཐུ་ཡིས་རྣལ་འབྱོར་པ་ཡིས་མཆོག་གི་ལུས་ལ་སྤྱན་དུ་འགྱུར་བ་དང་། །དེ་ཡི་གསུང་གི་མཐུ་ལས་རྣ་བ་དང་ནི་ཐུགས་ཀྱིས་གཞན་གྱི་སྙིང་ལ་གནས་པ་ཤེས་པར་འགྱུར། །ཤེས་རབ་སྐུ་ཡི་ཐབས་ལས་རྣམ་གསུམ་བཅོམ་ལྡན་འདས་ཀྱི་སྔོན་གྱི་སྐྱེ་བ་རྗེས་སུ་དྲན་པར་འགྱུར། །ཤེས་རབ་གསུང་གི་མཐུ་ལས་ནམ་མཁའ་དང་མཉམ། རྣམ་པ་ཀུན་དུ་འགྲོ་བ་ཡི་ནི་རྫུ་འཕྲུལ་འགྱུར། །ཤེས་རབ་ཡེ་ཤེས་རང་བཞིན་ལས་ནི་གང་ཞིག་མཉམ་པའི་བདེ་བ་རྣམས་ཀུན་གཞོམ་དུ་མེད་པའོ། །མིག་གིས་སྲིད་པ་རྣམ་པ་གསུམ་གྱིས་མི་མཐོང་པ་ཡང་མཐོང་པ་ལྷ་ཡི་སྤྱན་གྱི་མཐུ་ལས་སོ། །ལྷ་ཡི་སྙན་གྱི་མཐུ་ལས་སྙིང་ཁ་དང་ནི་ཁ་ཡི་སྲོག་ཆགས་རྣམས་ཀྱི་སྨྲ་བ་ཐོས་པར་འགྱུར། །དེ་ལྟར་རེག་ལ་སོགས་པ་ཐམས་ཅད་མི་ཡི་བདག་པོ་སྐུ་གསུང་ཐུགས་ཀྱི་སྦྱོར་བ་ལས་འགྱུར་རོ། ཞེས་གསུངས་སོ། །གཉིས་པ་ས་བཅུ་གཉིས་འཐོབ་པའི་ཚུལ་ནི། ཆུ་སྲིན་ལ་སོགས་ཁྱིམ་རྣམས་སུ། །མ་རིག་ལ་སོགས་ལུགས་བཟློག་པས། །ས་ནི་བཅུ་གཉིས་འཐོབ་པར་འགྱུར། །ཞེས་གསུངས་པས། འདི་ལ་ཡང་མདོ་སྡེ་ལས་གསུངས་པ་དང་། ནང་གི་སྦྱོར་བ་གཉིས་ལས། དང་པོ་ནི་མོས་པས་སྤྱོད་པའི་ས་ཆོས་མཆོག་ཐོབ་པ་མན་ཆོད་སྔར་བཤད་ཟིན་ལ། ས་རབ་དུ་དགའ་བའི་མཐོང་བའི་ལམ་དུ་འཇུག་པ་ཡང་། རྗེས་དྲན་གྱི་གཞིར་བསྟན་པ་བཞིན་དུ་ཆོས་རབ་ཏུ་རྣམ་པར་འབྱེད་པ་རང་བཞིན་གྱི་ཡན་ལག་དང་། །ཤེས་བྱ་རྟོགས་པའི་དྲན་པ་ཡང་དག་བྱང་ཆུབ་ཀྱི་ཡན་ལག་ནི་གནས་དང་། མྱུར་དུ་སངས་རྒྱས་པར་བྱེད་པའི་བརྩོན་འགྲུས་ནི་ངེས་པར་འབྱུང་བའི་ཡན་ལག་དང་། བསམ་གཏན་ལ་བརྟེན་པའི་ཏིང་ངེ་འཛིན་དང་། ཤིན་དུ་སྦྱངས་པ་དང་། ཇི་ལྟར་འདོད་པ་བཞིན་དུ་གནས་པའི་བཏང་སྙོམས་དང་གསུམ་ནི་ཉོན་མོངས་པ་མེད་པའི་ཡན་ལག་དང་། ཆོས་ཀྱི་སྣང་བ་འཕེལ་བའི་དགའ་བ་ནི་ཕན་ཡོན་གྱི་ཡན་ལག་སྟེ། འདི་ཐམས་ཅད་དང་ལྡན་པ་དུས་ཅིག་ལ་མཐོང་ཞིང་། འདི་དང་ལྡན་པ་འཕགས་པའི་ལམ་ཡན་ལག་བརྒྱད་པོ་རང་བཞིན་གྱིས་འབྱུང་བར་འགྱུར་ཏེ། ས་བཅུ་པོ་ལ་ཕ་རོལ་དུ་ཕྱིན་པ་བཅུ་རྫོགས་ཤིང་ཡོངས་སུ་སྦྱོང་བ་རྣམས་སྦྱངས་ནས་བརྒྱ་ཕྲག་བཅུ་གཉིས་ལ་སོགས་པའི་ཡོན་ཏན་རྫོགས་ནས་དབང་བསྐུར་བའི་ས་ལ་སྦྱོར་བ་འཐོབ་པར་འགྱུར་ཏེ། རྒྱས་པར་ས་བཅུ་པའི་མདོ་ལས་བྱུང་བ་བཞིན་ནོ། །མཆོག་དུ་མི་འགྱུར་བ་གྲུབ་པར་ཡང་བསྡུས་ཏེ་གསུངས་པ། རྣལ་འབྱོར་པ་སེམས་དང་པོར་བསྐྱེད་པ་དང་། ཕྱིར་མི་ལྡོག་པ་དང་དབང་བསྐུར་བའི་ས་ཐོབ་པས་བྱང་ཆུབ་སེམས་དཔར་འགྱུར་ཏེ། ཚེ་ལ་དབང་བ་དང་། ལས་ལ་དབང་བ་དང་། མོས་པ་དང་། ཡོ་བྱད་དང་། སྨོན་ལམ་དང་། རྫུ་འཕྲུལ་དང་། ཆོས་དང་སེམས་དང་། སྐྱེ་བ་དང་ཡེ་ཤེས་ལ་དབང་བ་ཞེས་བྱའོ། །དེ་བཞིན་དུ་ས་བཅུ་ནི་རབ་དུ་དགའ་བ་དང་། དྲི་མ་མེད་པ་དང་། འོད་བྱེད་པ་དང་། འོད་ཟེར་འཕྲོ་བ་དང་། སྦྱང་དཀའ་བ་དང་། མངོན་དུ་གྱུར་པ་དང་། རིང་དུ་སོང་པ་དང་། མི་གཡོ་བ་དང་། ལེགས་པའི་བློ་གྲོས་དང་། ཆོས་ཀྱི་སྤྲིན་ཞེས་བྱའོ། །དེ་བཞིན་དུ་ཕ་རོལ་དུ་ཕྱིན་པ་བཅུ་ཡོངས་སུ་རྫོགས་པ་ནི། སྦྱིན་པ་དང་། ཚུལ་ཁྲིམས་དང་། བཟོད པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་སྨོན་ལམ་དང་། སྟོབས་དང་ཡེ་ཤེས་ཀྱི་ཕ་རོལ་དུ་ཕྱིན་པ་ཞེས་བྱའོ། །དེ་ལྟ་བུའི་རྣལ་འབྱོར་པ་བྱང་ཆུབ་སེམས་དཔར་འགྱུར་ཏེ། མཚན་ཡང་དག་པར་བརྗོད་པ་ལས། ཕ་རོལ་ཕྱིན་པ་བཅུའི་ཚུལ། མགོན་པོ་ས་བཅུའི་དབང་ཕྱུག་སྟེ། །ས་བཅུ་ལ་ནི་གནས་པ་པོ། །ཤེས་བཅུ་རྣམ་དག་བདག་ཉིད་ཅན། །ཞེས་རྣལ་འབྱོར་པ་སེམས་རྣམ་པར་དག་པ་བྱང་ཆུབ་སེམས་དཔར་གསུངས་སོ། །ཞེས་འབྱུང་ངོ་། །འདིར་ས་བཅུ་གཉིས་སུ་བྱས་པའི་དང་པོ་ནི་མོས་པ་སྤྱོད་པའི་ས་དང་། ས་བཅུ་གཉིས་པ་ནི་དབང་བསྐུར་བའི་སའོ། །ཕར་ཕྱིན་བཅུ་གཉིས་ཀྱི་དང་པོ་ནི། རིན་པོ་ཆེ་པད་མའི་ཕ་རོལ་དུ་ཕྱིན་པ་དང་། ཐ་མ་ནི་རྡོ་རྗེ་ལས་ཀྱི་ཕ་རོལ་དུ་ཕྱིན་པའོ། །དབང་ཡང་། དེ་བཞིན་ཉིད་ལ་དབང་བ་དང་། སངས་རྒྱས་ཀྱི་བྱང་ཆུབ་ལ་དབང་པས་བཅུ་གཉིས་སོ། །དེ་བཞིན་དུ་གཟུངས་བཅུ་གཉིས་ཀྱང་ཐོབ་པར་ཆོས་དབྱིངས་ངག་དབང་དུ་གསུངས་སོ། །འདི་རྣམས་ཀྱི་སྐབས་སུ་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། ནང་གཟུགས་ཅན་དང་། གཟུགས་ཅན་མ་ཡིན་པས་ཕྱི་རོལ་གྱི་གཟུགས་ལ་ལྟ་བ་གཉིས་དང་། སྡུག་པའི་རྣམ་པར་ཐར་པ་ལུས་ཀྱིས་མངོན་སུམ་དུ་བྱེད་པ་དང་། གཟུགས་མེད་པའི་སྙོམས་འཇུག་བཞི་དང་། འགོག་པ་སྟེ། རྣམ་ཐར་བརྒྱད་དང་། འཇིག་རྟེན་ལས་འདས་པའི་བསམ་གཏན་བཞི་དང་། གཟུགས་མེད་བཞི་དང་འགོག་པའི་སྙོམས་འཇུག་སྟེ་དགུ་དང་། བར་ཆད་མེད་པའི་ལམ་གྱི་རྣམ་པ་བདེན་པ་བཞིས་བསྡུས་པའི་ཉོན་མོངས་མི་ལྡན་པ་བཞི་དང་། སྔར་གསུངས་པའི་ཕ་རོལ་དུ་ཕྱིན་པ་བཅུ་ནི། ལམ་ཤེས་པ་ཉིད་ཀྱི་ལམ་གྱི་རྟེན་ཅན་གྱི་རྣམ་པ་ཡིན་པས་ཐམས་ཅད་རྫོགས་པར་འགྱུར་རོ། །དེ་བཞིན་དུ་སྟོབས་བཅུ་དང་། མི་འཇིགས་པ་བཞི་དང་མ་འདྲེས་པ་བཅོ་བརྒྱད་དང་། དེ་བཞིན་ཉིད་དང་། ཆོས་ཐམས་ཅད་ལ་དབང་བསྒྱུར་བ་དང་། རྫོགས་པར་བྱང་ཆུབ་རྣམས་མཐར་ཐུག་པའི་ས་ལ་རྫོགས་པར་འགྱུར་རོ། འདིར་ནང་གི་ཚུལ་ནི། འཁོར་ལོ་དྲུག་ལ་སྦྱོར་བ་དང་ཡང་དག་པར་འགྲུབ་པ་ཞེས་བྱ་བ་གཉིས་གཉིས་ཀྱི་ཕྱེ་བས་དབུ་མའི་ཆ་བཅུ་གཉིས་དང་། དེར་རླུང་བརྒྱ་ཕྲག་བཅོ་བརྒྱད་པ་ཚན་པ་བཅུ་གཉིས་འགག་ཅིང་། ཡེ་ཤེས་ཀྱི་ཐིག་ལེ་ཐབས་དང་ཤེས་རབ་ཆ་ཤས་བཅུ་གཉིས་དག་པས་གནས་ལ་སོགས་པའི་མིང་གིས་སྟོན་ཏེ། དང་པོ་འགག་པར་བྱེད་པའི་གཞི་རྩ་དབུ་མ་ཡང་། རྒྱུད་ལས། མི་ཤིགས་ཐིག་ལེའི་ཆ་དང་ཡེ་ཤེས་རྣམ་གསུམ་བདུད་རྩིའི་གོ་འཕང་སོན་པ་ལྕགས་སྒྲོག་བཅིངས་འདྲའི་རྩ། །སྲོག་དང་ཐུར་སེལ་ལམ་གསུམ་རང་གི་རྡོ་རྗེ་པད་མར་རྡོ་རྗེ་ཉིད་དང་ཆུ་སྐྱེས་ལྡན་པ་ན། །སྲོག་བདག་ཡུལ་དང་ཡུལ་ཅན་དང་ནི་ཕྱི་རོལ་མཐོན་དང་འཇུག་པའི་རླུང་རྣམས་ཡང་དག་གཞུག་པར་བྱ། །དུ་བ་ལ་སོགས་མཚན་མ་འཛིན་པ་དང་ནི་གང་ཞིག་ཡང་ནི་འདི་དག་ཐམས་ཅད་གསང་བའོ། །ཞེས་གསུངས་ཏེ། མི་ཤིགས་པ་ནི་སྙིང་ཁའི་སེམས་ཀྱི་རང་བཞིན་ནོ། །ཐིག་ལེ་ནི་དཔྲལ་བའི་སྐུའོ། །ཆ་ནི་མགྲིན་པའི་ངག་ཏེ་གསུང་ངོ་། །ཡེ་ཤེས་ནི་གསང་བའི་སྙོམས་འཇུག་གི་གནས་སྐབས་སྟོན་ཏེ། འདི་རྣམས་ཀྱི་གནས་རོ་རྐྱང་ཨ་བ་དྷུ་ཏི་དང་གསུམ་འཁོར་ལོ་དྲུག་ལ་ལྕགས་སྒྲོགས་བཅིངས་པ་ལྟ་བུར་གནས་ཤིང་། སྣ་མོ་གསུམ་ནི་སྔར་བསྟན་པ་བཞིན་ཡིན་པས་རླུང་གི་བཅིངས་པ་ལས། དུ་བ་ལ་སོགས་པའི་རྟགས་རྣམས་དག་པར་འགྱུར་ཞིང་། སྦྱོར་བའི་ལམ་རྫོགས་ནས་འཛིན་པས་མཐོང་པའི་ལམ་དུ་ཞུགས་པ་ན་འཛག་མེད་ཐོབ་པས་མ་རིག་པ་འགག་ཤིང་གནས་སུ་སོན་པ་ཞེས་བྱའོ། །དེ་ནས་གསང་བའི་འཁོར་ལོ་རབ་དུ་བརྟན་པས་འདུ་བྱེད་འགག་པ་དང་། ཉེ་བའི་གནས་ཐོབ་པ་ཞེས་བྱའོ། །དེ་བཞིན་དུ་ལྟེ་བའི་གཉིས་ཀྱིས་རྣམ་པར་ཤེས་པ་དང་། མིང་གཟུགས་འགག་ཅིང་ཞིང་དང་ཉེ་བའི་ཞིང་དུ་སོན་པའོ། །སྙིང་ཁའི་གཉིས་ཀྱིས་སྐྱེ་མཆེད་དང་རེག་པ་འགགས་ཤིང་། ཚན་དྷོ་ཉེ་བའི་ཚན་དྷོ་གྲུབ་པའོ། མགྲིན་པའི་གཉིས་ཀྱིས་ཚོར་བ་དང་། སྲེད་པ་འགག་ནས་འཐུང་གཅོད་ཉེ་བའི་འཐུང་གཅོད་ཐོབ་པའོ། །སྤྱི་བོའི་གཉིས་ཀྱིས་ལེན་པ་དང་སྲིད་པ་འགགས་ནས་འདུ་བ་ཉེ་བའི་འདུ་བར་སོན་པའོ། །གཙུག་གཏོར་གྱི་གཉིས་ཀྱིས་སྐྱེ་བ་དང་རྒ་ཤི་འགགས་ཤིང་དུར་ཁྲོད་དང་ཉེ་བའི་དུར་ཁྲོད་དུ་སོན་པ་ཞེས་བྱའོ། །ཧེ་བཛྲ་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་ཉིད་དང་། །མཚན་དྷོ་ཉེ་བའི་ཚན་དྷོ་དང་། །འཐུང་གཅོད་ཉེ་བའི་འཐུང་གཅོད་དང་། །དེ་བཞིན་འདུ་བ་ཉེ་འདུ་བ། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ནི། །འདི་ནི་གཞན་གྱིས་བརྗོད་མི་བྱ། །ཞེས་གསུངས་སོ། འདིའི་སྒོམ་པའི་ཚུལ་ནི། རྗེས་དྲན་དུ་ཇི་སྐད་བསྟན་པ་ཁོ་ན་ཡིན་ཏེ། བསོད་ནམས་དང་ཡེ་ཤེས་ཀྱི་ཚོགས་ཟུང་དུ་འཇུག་པ་ལ་བརྟེན་ནས་བརྟེན་དང་རྟེན་པའི་ཆ་དབང་དུ་བྱས་པས་ཐོབ་པར་འགྱུར་ཏེ། རྒྱུད་ལས། བསོད་ནམས་ཡེ་ཤེས་རྗེས་སུ་ཆགས་པ་བདེ་བ་སྟེར་བ་རྟག་ཏུ་བྱང་ཆུབ་སེམས་དཔའ་བྱིན་གྱིས་བརླབས། །བདེ་བའི་དམ་ཚིག་དབང་གིས་ཉོན་མོངས་བདུད་རྣམས་ངེས་པར་བཅོམ་པ་གང་ལས་མྱ་ངན་འདས་པར་འགྲོ། །ཞེས་པ་དང་། ཨ་སོགས་ཀ་སོགས་གཅིག་ཏུ་གྱུར་པ་ཟླ་བ་ཉི་མའི་གདན་ནི་རྡོ་རྗེ་ཅན་ལ་ཡོད་མ་ཡིན། །ཧཱུྃ་ལས་གྱུར་པའི་ཕྱག་མཚན་ཉིད་མིན་གཞན་ཡང་ཡོངས་སུ་གྱུར་པས་གཟུགས་དང་ཁ་དོག་འདོད་མ་ཡིན། །རྫོགས་པར་འགྱུར་བ་མེད་པས་འགྱུར་བ་རྣམ་པར་སྤངས་པ་འགྱུར་བ་འདི་ནི་ལྷ་ཡི་དབང་པོ་ལ། །རྣམ་པ་ཀུན་དུ་ཐིག་ལེ་མ་ལུས་རྒྱལ་བའི་བདག་པོ་རྣམས་ཀྱི་སྣ་ཚོགས་སྒྱུ་མ་འཛིན་པའོ། །ཞེས་གསུངས་པས་བརྟགས་པ་ཐམས་ཅད་དང་བྲལ་ལ་སྣང་བ་དང་བདེ་བ་རོ་མཉམ་ཞིང་རྣམ་པ་ཀུན་ལྡན་གྱི་མཆོག་དང་ལྡན་པའི་སྟོང་པ་ཉིད་བསྒོམ་པའོ། ཏིང་ངེ་འཛིན་གྱི་མཚན་ཉིད་ནི། མཉམ་རྗེས་ཀྱི་ཐབས་ཤེས་རབ་ཀྱི་གཟུགས་བརྙན་རྫོགས་པར་བྱ་བ་སྟེ། ཐབས་དང་ཤེས་རབ་བདག་ཉིད་ཅན་གྱི་མི་འགྱུར་བདེ་བའི་དབང་གིས་ཡེ་ཤེས་གཟུགས་བརྙན་ཏིང་འཛིན། །ཞེས་གསུངས་སོ། །རྣམ་པར་དབྱེ་བ་ནི། ས་བཅུའི་ཡེ་ཤེས་གྲུབ་པའི་ཡེ་ཤེས་རྒྱུ་མཚན་གྱིས་བཅུའམ། ཡེ་ཤེས་ལྔའི་དབྱེ་བས་ཡེ་ཤེས་ལྔའོ། །དེ་ཡང་འགྲེལ་ཆེན་ལས། དཔལ་ལྡན་ཏིང་ངེ་འཛིན་ཀྱང་འཁོར་ལོ་ཅན་ཞེས་པ་རྣམ་པར་སྣང་མཛད་རྣམ་པ་བཅུའི། ཏིང་ངེ་འཛིན་ནི་རླུང་རྣམ་པ་བཅུ་འགག་པ་ཞེས་སོ། །དེ་བཞིན་དུ་བཅོམ་ལྡན་འདས་རབ་དུ་མི་གནས་པའི་མྱ་ངན་ལས་འདས་པས་རླུང་འགགས་ཅིང་དག་པ་ཞེས་བྱ་བའི་དོན་ཏོ། །སྒྲ་དོན་ནི། ས་མ་ཏི་ཛ་ཞེས་པ་ངེས་པར་འཛིན་པ་སྟེ། མཆོག་དུ་མི་འགྱུར་བའི་ཡེ་ཤེས་བསམ་གྱིས་མི་ཁྱབ་པར་འཛིན་པའི། རྟགས་ངེས་པ་ནི། ས་དང་པོ་ལ་འཇིག་རྟེན་གྱི་ཁམས་བཅུའི་མཐར་ཐུག་པར་མངོན་པར་ཤེས་པ་འཛིན་པ་དང་། གཉིས་པ་ལ་བརྒྱ་ནས་ས་བཅུ་གསུམ་ལ་ནམ་མཁའ་དང་མཉམ་པར་གྱུར་པའོ། །དེ་ཉིད་ཀྱིས་འོག་ནས་སྟོན་པའི་འབྲས་བུ་འགྲུབ་སྟེ། རྒྱུད་ལས། དེ་ལས་དག་པའི་ཏིང་ངེ་འཛིན་ནི་ཉི་མ་ཅུང་ཟད་ཙམ་གྱིས་ཡེ་ཤེས་སྐུ་ནི་འགྲུབ་པར་འགྱུར། །ཞེས་གསུངས་སོ། །ད་ནི་ནང་དུ་རླུང་དང་ཐིག་ལེ་འགགས་པས་སྐུ་བཞི་འགྲུབ་པའི་རིམ་པ་ནི། རྒྱུད་ལས། ཆགས་དང་ཆགས་བྲལ་མཐའ་དང་ཐོག་མར་སྐད་ཅིག་མ་ལས་ཁྱབ་བདག་དབུགས་ཀྱི་གྲངས་ལས་འཕེལ་བར་འགྱུར། །ཨོ་ཌ་འབར་བའི་བར་དང་ཆགས་བྲལ་ལྷན་སྐྱེས་དག་དང་ཡེ་ཤེས་དབུས་སུའོ། །གཉིད་དང་ཡུར་བའི་འཚམས་དང་རྡོ་རྗེ་པད་མ་དག་ནི་གཉིས་ཀྱི་སྦྱོར་བའི་བདེ་བ་གང་ཞིག་དེ། །དེ་ཡི་འཕེལ་བའི་བྱ་བ་བླ་མའི་ངེས་པའི་དབང་གིས་འཕེལ་བར་འགྱུར་གྱི་འདིར་ནི་སྣ་ཚོགས་མིན། །ཞེས་གསུངས་ཏེ། འདིར་ཆགས་དང་ཆགས་བྲལ་གྱི་དོན་ནི། ཕྱི་རོལ་སུ་དཀར་པོའི་བཅུ་དྲུག་པ་ལ་ཟླ་བ་འཛིན་པ་དང་། ནག་པོའི་བཅུ་དྲུག་པ་ལ་ཉི་མ་འཛིན་པ་ལྟར། འཁོར་བའི་མཐའ་དང་མྱ་ངན་ལས་འདས་པའི་ཐོག་མར་མཐོང་པའི་ལམ་གྱི་སྐད་ཅིག་ཡིན་ཏེ། དེ་ནས་བཟུང་ནས་རླུང་ཡེ་ཤེས་སུ་འགགས་པས་ཐིག་ལེ་བརྟན་པར་འགྱུར་ཏེ། དེ་ཡང་རྡོ་རྗེའི་ནོར་བུ་ནས་གསང་བར་ལོག་སྟེ། ཨོ་ཌ་འབར་བའི་བར་དུ་ཡེ་ཤེས་ཀྱི་ཐིག་ལེ་བརྟན་ཅིང་མི་འཛག་པར་འགྱུར་རོ། །དེ་བཞིན་དུ་ལྟེ་བར་ཆགས་བྲལ་ཏེ་དགའ་བྲལ་དང་ལྷན་སྐྱེས་ཀྱི་དབུས་སུ་སྐུའི་ཐིག་ལེ་དང་། སྙིང་ཁར་ཡེ་ཤེས་དང་རྣམ་ཤེས་ཀྱི་དབུས་སུ་ཐུགས་ཀྱི་ཐིག་ལེ་དང་། །མགྲིན་པར་གཉིད་ལ་ཡུར་བའི་འཚམས་སུ་གསུང་གི་ཐིག་ལེ་བརྟེན་པར་བྱེད་དོ། །དེ་ལྟར་རྡོ་རྗེ་པད་མ་སྟེ་ཐབས་ཤེས་རབ་ཀྱི་སྦྱོར་བས་ཕབ་པའི་བདེ་བའི་ཐིག་ལེ་དཔྲལ་བ་ནས་རྡོ་རྗེ་ནོར་བུའི་བར་དུ་འོངས་པ་སྟེ། འཕེལ་བ་སྟེ་གྱེན་དུ་འགྲོ་བར་བྱ་བའི་བླ་མའི་ངེས་པའི་སྲོག་དཀར་བའི་དབང་གིས་འཕེལ་བར་འགྱུར་གྱི་འདི་ནི་སྣ་ཚོགས་མིན་ཞེས་པ་དེ་ལས་གཞན་པའི་གདམས་ངག་མེད་པ་དོན་ཏེ། རྒྱུ་མཚན་དེས་ན། སྟོང་པ་ཉིད་བཅུ་དྲུག་དང་སྙིང་རྗེ་བཅུ་དྲུག་རོ་མཉམ་པར་བྱ་དགོས་པས་སྟོང་པ་ཉིད་ནི་ཤེས་རབ། །སྙིང་རྗེ་ནི་ཐབས་ཏེ་དེ་ཡང་། སྟོང་པ་ཉིད་དང་ཆེན་པོ་སྟོང་པ་ཉིད་དོན་དམ་པ་སྟོང་པ་ཉིད་ཀྱི་དབྱེ་བས་གསུམ་དང་། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པའི་སྙིང་རྗེ་གསུམ་སྟེ། ནང་གི་དབྱེ་བས་ཕུང་པོ་ལྔ་དང་། ཁམས་ལྔ་དང་དབང་པོ་ལྔའི་སྒྲིབ་པ་སེལ་བས་བཅོ་ལྔར་འགྱུར་ཏེ་བཅུ་དྲུག་པ་ནི། རྣལ་པ་ཐམས་ཅད་ཀྱིས་སྟོང་པ་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་། སངས་རྒྱས་ཀྱི་ཐུགས་རྗེས་ཆེན་པོ་སྟེ། འདི་རྣམས་མཐར་ཕྱིན་པ་ལས་སངས་རྒྱས་སུ་འགྱུར་རོ། །འདི་ལས་འཕྲོས་ནས་སྔགས་ཀྱི་ཐེག་པ་འདིར་བདེ་བ་ལ་སྙིང་རྗེ་ཞེས་བརྗོད་དེ་གང་གིས་བྱང་ཆུབ་ཀྱི་སེམས་ཐིག་ལེ་ལ་དབང་མ་ཐོབ་པས་འཁོར་བར་སྐྱེ་ན་ནི་སྡུག་བསྔལ་མྱོང་བར་འགྱུར་ལ། དེ་ལ་སྐྲག་པས་འཁོར་བར་མི་སྐྱེ་བ་བསྒྲུབ་ན་ནི་ཞི་བར་ལྷུང་བའི་སྐྱོན་ཡོད་པས། །དེས་ན་འཛིན་པ་གྲུབ་ནས་རྗེས་དྲན་གྱི་ཐབས་མཁས་པས་ཉོན་མོངས་པ་དང་བྲལ་བའི་སྐྱེ་བ་ལ་དབང་ཐོབ་པར་བྱེད་པ་སེམས་ཅན་ལ་དམིགས་པའི་སྙིང་རྗེའི་གཙོ་བོ་ཡིན་ནོ། །བཅུ་དྲུག་པོ་རིམ་གྱིས་བསྟན་པས་སྐུ་བཞི་རྫོགས་པས་རང་བཞིན་གྱི་དོན་གྲུབ་པ་ནི་མཐར་ཕྱིན་པ་སྟེ། མདོ་སྡེའི་རྒྱན་ལས། རྩ་བ་སྙིང་རྗེ་མེད་གྱུར་ན། །དཀའ་སྤྱད་བཟོད་པ་ཉིད་མི་འགྱུར། བློ་ལྡན་སྡུག་བསྔལ་མི་བཟོད་ན། །སེམས་ཅན་དོན་སེམས་ཉིད་མི་འགྱུར། །སེམས་དཔའ་དང་ནི་བྲལ་བའི་བློ། །སྐྱེ་བ་དཀར་པོ་རྣམ་དག་དུ། སྨོན་ལམ་འདེབས་པར་མི་འགྱུར་ཏེ། །སྐྱེ་བ་བཟང་པོ་མ་ཐོབ་ན། །སེམས་ཅན་ཡོངས་སྨིན་བྱེད་མི་འགྱུར། །ཞེས་པ་དང་དོན་གཅིག་གོ །སྟོང་པ་ཉིད་རྣམ་པར་དབྱེ་བ་ལམ་རིམ་དང་བཅས་པ་ནི། སློབ་དཔོན་སེང་གེ་བཟང་པོས་བརྒྱད་སྟོང་འགྲེལ་པར་གསུངས་པ་དང་ཁོ་བོས་ཀྱང་བསྡུས་ཡོད་པ་ལས་རྟོགས་པར་བྱའོ། །དེ་ལྟར་བསྒོམ་པའི་ལམ་བགྲོད་ནས་སྐད་ཅིག་མའི་སྦྱོར་བ་འབྱུང་བས་དེ་བསྟན་པ་ནི། རྟོག་པ་མེད་པའི་ཆོས་ཅན་ལ། །སྐད་ཅིག་ཅིག་ལ་མངོན་སངས་རྒྱས། །ཞེས་གསུངས་ཏེ། འདིར་རླུང་གི་མིང་གིས་རྣམ་པར་རྟོག་པ་ཉི་ཁྲི་གཅིག་སྟོང་དྲུག་བརྒྱ་འགགས་ཤིང་། དེའི་ཡན་ལག་ལོ་བརྒྱའི་རླུང་བྱེ་བ་བདུན་ཅུ་དོན་བདུན་ས་ཡ་ཕྲག་བདུན་འབུམ་ཕྲག་དྲུག་གི་ཉོན་མོངས་པ་དང་འཁོར་གསུམ་དུ་རྟོག་པ་དེ་སྙེད་འགགས་ཞིང་། ཆོས་ཀྱི་སྒོ་སྣང་བའི་ཡེ་ཤེས་དེ་སྙེད་ཐོབ་པས་སྐད་ཅིག་གཅིག་དང་ལྡན་པའི་ཡེ་ཤེས་རྣམ་པར་སྨིན་པ་དང་རྣམ་པར་སྨིན་པ་མ་ཡིན་པའི་སྐད་ཅིག་མ་ཐོབ་པ་ནི་ས་བཅུ་གཉིས་པ་དབང་སྐུར་བའི་ས་ཞེས་བརྗོད་དེ་མཐར་ཐུག་པ་ཡིན་ནོ། །དེ་ཡང་རྒྱུད་ལས། རྣམ་པ་ལྔ་པོ་དེར་ནི་ཅིག་པ་འདིར་ནི་མ་ལུས་རྒྱལ་བ་མཆོག་གི་མངོན་པར་བྱང་ཆུབ་པ། །རྣམ་པ་ཉི་ཤུའི་གཟུགས་ཅན་དང་ནི་སླར་ཡང་དེ་ལས་ཀྱང་ནི་སྒྱུ་མ་དུ་མའི་ངོ་བོ་ཉིད། །དེ་ཡི་སྐད་ཅིག་གཅིག་གིས་མཉམ་པའི་བདེ་བ་སྟེར་བར་འགྱུར་བ་གཞན་གྱི་ལས་ཀྱི་རང་བཞིན་མིན། །འདིར་ནི་གང་ཞིག་ཆོས་ཀྱི་དབྱིངས་སུ་འཇུག་པའི་ཐབས་ནི་འཕོ་བ་མེད་པའི་ལྷན་སྐྱེས་སྐད་ཅིག་གོ །ཞེས་གསུངས་ཏེ། མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་མངོན་པར་བྱང་ཆུབ་པ་དང་། དེ་ཉིད་ལ་རྡོ་རྗེ་བཞི་ཡི་དབྱེ་བས་རྣམ་པ་ཉི་ཤུ་དང་། འཕོ་བ་འགགས་པའི་བདེན་དོན་བཅུ་གཉིས་དང་། དགའ་བ་བཅུ་དྲུག་གིས་བརྟེན་པའི་དེ་ཁོ་ན་ཉིད་བཅུ་དྲུག་མཐར་ཕྱིན་པ་ནི་འཕོ་བ་མེད་པའི་ལྷན་སྐྱེས་སྐད་ཅིག་མ་ཡིན་ཞེས་གསུངས་པའོ། མཐར་ཐུག་པའི་ས་བསྟན་པ་ནི། རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །ས་རྣམས་ཡོངས་སུ་རྫོགས་པ་ཡིས། །དངོས་པོ་གཉིས་སུ་རབ་བསྟན་ཏེ། །ཡེ་ཤེས་ཡོད་པ་དེས་ན་དེ། །སྐྱོབ་པ་ཡེ་ཤེས་ཅན་དུ་བརྗོད། ཞེས་གསུངས་པ་ནི། བདེན་པ་བཞི་ལ་བརྟེན་ནས་ལུས་ཀྱི་རྩ་དག་པས། སྐུའི་དགའ་བ་བཞི་སོ་སོར་སྡུད་དང་བསམ་གཏན་གྱིས་རྟོགས་པ་ནི་སྤྲུལ་པའི་སྐུའོ། །སྲོག་རྩོལ་གྱིས་གསུང་གི་དགའ་བ་བཞི་ཐོབ་པར་བྱེད་པས་ཤེས་པ་བརྒྱད་པོ་རྟོགས་པ་འཆང་བ་སྟེ་ངག་རྣམ་པར་དག་པ་ལོངས་སྤྱོད་རྫོགས་པར་འགྱུར་བའོ། །དེ་མཐར་ཕྱིན་པས་འཕོ་བ་བཅུ་གཉིས་འགག་པ་ནི་བདེན་དོན་རྣམ་པ་བཅུ་གཉིས་ལྡན་པའོ། །འཛིན་པ་ལ་བརྟེན་ནས་རྗེས་དྲན་གྱི་ཐུགས་ཀྱི་དགའ་བ་བཞི་འཛིན་པ་ནི། དེ་ཁོ་ན་ཉིད་རྣམ་པ་བཅུ་དྲུག་རིག་པ་སྟེ་ཆོས་ཀྱི་སྐུའོ། །དེ་ཉིད་ཀྱི་ཡེ་ཤེས་དག་པས་གནས་སྐབས་བཞི་འགག་པ་ནི་རྣམ་པ་ཉི་ཤུས་བྱང་ཆུབ་པ་སྟེ་ཡེ་ཤེས་སྐུ་རྡོ་རྗེ་སྐད་ཅིག་མ་ཐོབ་པའོ། །གཞན་རྣམས་སྔར་བཤད་ལྟར་ཡིན་ལ། ཐིག་ལེའི་སྐད་ཅིག་བཅུ་དྲུག་འགག་པ་ནི། རྒྱུད་ལས། འདོད་པ་ལས་ནི་སྤྲུལ་པའི་སྐུར་ནི་འགྱུར་ལ་ངེས་པར་གང་པ་ལས་ནི་དེ་ཡི་གསུང་ཉིད་དོ། །འབར་བ་ལས་ནི་སྤྲུལ་པའི་ཐུགས་ལ་མཆོག་ཏུ་བདེ་བ་བྱེད་པའི་ཡེ་ཤེས་ཉིད་ནི་ཨོ་ཌ་ལས། དགའ་བ་ལོངས་སྤྱོད་སྐུ་ལ་དེ་ཡི་མཆོག་དགའ་དང་ནི་དགའ་བྲལ་དགའ་བ་འདིར་ནི་རིམ་པ་ཡིས། །གསུང་དང་ཐུགས་ལ་ལྷན་ཅིག་སྐྱེས་དགའ་ཉིད་ནི་འདི་ཡི་ཡེ་ཤེས་རྡོ་རྗེར་གྱུར་པ་རང་བྱུང་ངོ་། འདར་བ་ངེས་པར་ཆོས་ཀྱི་སྐུ་སྟེ་སྲིད་པ་གསུམ་གྱིས་བཏུད་པ་དེ་ཡི་བརྗོད་པ་གསུང་དུ་འགྱུར། །གཉིད་ཡུར་ངེས་པར་ཆོས་ཀྱི་ཐུགས་ཏེ་སྲིད་པའི་འཇིགས་པ་འཇོམས་པའི་ཡེ་ཤེས་ཉིད་ནི་གཉིད་ཡིན་ནོ། །ཁ་དོག་ངེས་པར་དག་པའི་སྐུ་ལ་དབྱངས་ཡིག་བྲལ་བའི་ཆ་དང་ཐིག་ལེ་མི་ཤིགས་རིམ་པར་ནི། །གསུང་དང་ཐུགས་དང་ཡེ་ཤེས་རྡོ་རྗེ་རྣམ་གསུམ་བཅོམ་ལྡན་འདས་ནི་དག་པའི་སྐུ་ཡི་རང་བྱུང་ངོ་། སད་པ་དང་ནི་རྨི་ལམ་རང་བཞིན་དང་ནི་གཞན་ཡང་གཉིད་ལོག་དབང་པོ་གཉིས་བདེའི་ངོ་བོ་ཉིད། །ལུས་གནས་དབུགས་དག་བྱིང་ཞིང་ཡུལ་ལ་རྣམ་པར་རྒྱུ་བའི་གཡོ་བ་མེད་པ་སེམས་ནི་ཐིམ་པའོ། །ཡེ་ཤེས་ལ་གནས་བུད་མེད་ཞུགས་པའི་བྱང་ཆུབ་སེམས་ཀྱི་འཇུག་པའི་སྐད་ཅིག་མར་ནི་འགྱུར་བ་རྣམས། །སྤྲུལ་པའི་སྐུ་ལ་སོགས་པ་རིམ་པར་གྱུར་པ་སེམས་ཀྱི་རྡོ་རྗེ་བཞི་ནི་ངེས་པ་ཡིན། །ཞེས་གསུངས་པས། གནས་སྐབས་བཞི་ལ་དགའ་བ་བཞི་བཞིར་ཕྱེ་བས་སྐུ་བཅུ་དྲུག་དུ་འགྱུར་ཏེ། ཐོག་མར་སྤྲུལ་པའི་སྐུ་བཞི་ལ། འདོད་པ་ནི་འདོད་ཆགས་ཀྱི་སེམས་ལུས་ཀྱི་དགའ་བ་འགགས་པ་སྤྲུལ་པའི་སྐུའོ། །སྤྲུལ་པའི་གནས་སུ་ཐིག་ལེས་གང་བ་ནི་ངག་གི་དགའ་བ་འགགས་པ་དེའི་ཞེས་པ་སྤྲུལ་པའི་གསུང་ངོ་། །མགྲིན་པ་ལ་སོགས་པར་ཐིག་ལེ་འཕོ་བས་དྲོད་འབར་བ་ནི་སེམས་ཀྱི་དགའ་བ་འགགས་པ་སྤྲུལ་པའི་ཐུགས་སོ། །ཨོ་ཌ་ནི་མཐའ་སྟེ་ཐིག་ལེ་གསང་གནས་སུ་ཕྱིན་པ་མཆོག་གི་བདེ་བྱེད་ཡེ་ཤེས་ཏེ་ཡེ་ཤེས་ཀྱི་དགའ་བ་འགགས་པ་སྤྲུལ་པའི་ཡེ་ཤེས་སོ། །འདིར་ཐིག་ལེས་མཚོན་ནས་སད་པའི་གནས་སྐབས་བསྟན་པའོ། །དེ་བཞིན་དུ་ལོངས་སྤྱོད་རྫོགས་པའི་སྐུ་ལའང་བཞི་སྟེ། རྨི་ལམ་གྱི་གནས་སྐབས་ཀྱི་དགའ་བ་སྟེ་ལུས་ཀྱི་མཆོག་དགའ་འགགས་པ་ལོངས་སྤྱོད་རྫོགས་པའི་སྐུ། མཆོག་དགའ་སྟེ་ངག་གི་མཆོག་དགའ་འགགས་པ་གསུང་། དགའ་བྲལ་དགའ་བ་སྟེ་སེམས་ཀྱི་མཆོག་དགའ་འགགས་པ་ཐུགས། ལྷན་ཅིག་སྐྱེས་དགའ་སྟེ་ཡེ་ཤེས་ཀྱི་མཆོག་དགའ་འགགས་པ་ཡེ་ཤེས་སོ། །ཆོས་སྐུ་ལའང་བཞི་སྟེ། གཉིད་ཀྱི་ལུས་འདར་ཞིང་གཡོ་བའི་ལུས་ཀྱི་དགའ་བྲལ་འགགས་པ་ཆོས་ཀྱི་སྐུ་སྟེ། སྲིད་པ་གསུམ་གྱིས་བཏུད་པ་ནི་ཕྱག་བྱས་པའོ། །དེའི་བརྗོད་པ་ཞེས་པ་གཉིད་དུས་ཀྱི་བླ་བཅོལ་ངག་གི་དགའ་བྲལ་འགགས་པ་གསུང་ངོ་། །གཉིད་ཡུར་བ་ནི་བརྒྱལ་བ་སྟེ། སེམས་ཀྱི་དགའ་བྲལ་འགགས་པ་ཆོས་ཀྱི་ཐུགས་སྲིད་པའི་འཇིགས་པ་འཇོམས་པའོ། །གཉིད་འཐུག་པོ་ནི་ཡེ་ཤེས་ཀྱི་དགའ་བྲལ་འགགས་པ་ཆོས་ཀྱི་ཡེ་ཤེས་ཡིན་ནོ། །ངོ་བོ་ཉིད་ཀྱི་སྐུ་ལའང་བཞི་ལ། ཁ་དོག་ནི་ཡིག་གེར་བསྒྱུར་བ་ལེགས་སྟེ་ལུས་ཀྱི་མཆོག་དགའ་འགགས་པ་དག་པའི་སྐུའོ། དབྱངས་ཡིག་དང་བྲལ་བའི་ཆ་ནི་ཚེག་དྲག་སྟེ་ངག་གི་ལྷན་ཅིག་སྐྱེས་དགའ་འགགས་པ་གསུང་ངོ་། །ཐིག་ལེས་མཚོན་པ་ནི་སེམས་ཀྱི་ལྷན་ཅིག་སྐྱེས་དགའ་འགགས་པ་ཐུགས་སོ། །མི་ཤིག་པ་ནི་ན་ད་སྟེ་ཡེ་ཤེས་ཀྱི་ལྷན་ཅིག་སྐྱེས་དགའ་འགགས་པ་དག་པའི་ཡེ་ཤེས་སོ། །སྙོམས་འཇུག་གི་གནས་སྐབས་འདིར་ཡི་གེས་མཚོན་ནས་བསྟན་ཏེ། ཡི་གེ་ནི་ཨཀྵ་རའི་སྒྲ་ལས་མི་འགྱུར་བ་ཡིན་ལ། ཐབས་དང་ལྡན་པའི་སྙོམ་འཇུག་གིས་འགྱུར་བ་འཇོམས་པས་སོ། །དེ་ལྟར་རྡོ་རྗེ་རྣམ་གསུམ་ཞེས་པ་སྐུ་གསུང་ཐུགས་དང་རང་བྱུང་སྟེ་ཡེ་ཤེས་རང་བཞིས་སྐུ་བཞི་ལ་ཕྱེ་བས་བཅོམ་ལྡན་འདས་དགའ་བ་བཅུ་དྲུག་སྒྲིབ་པ་རྣམ་པར་དག་པའི་སྐུ་བཅུ་དྲུག་མངོན་དུ་བྱས་པ་ནི་རྡོ་རྗེ་སེམས་དཔའོ། །དེ་ཡང་དུས་སྦྱོར་བཅུ་གཉིས་ཀྱི་རླུང་དང་རྡུལ་གྱི་ཆ་འགགས་པས། རྡོ་རྗེ་ཉི་མ་སྣང་བ་ཆེ། །བདེན་དོན་རྣམ་པ་བཅུ་གཉིས་ལྡན། ཞེས་བྱ་བ་ལ། །ས་བོན་གྱི་ཆ་དགའ་བ་བཅུ་དྲུག་མི་འགྱུར་བའི་བདེ་བ་ཆེན་པོར་གྱུར་པས། རྡོ་རྗེ་ཟླ་བ་དྲི་མེད་འོད། །དེ་ཉིད་རྣམ་པ་བཅུ་དྲུག་རིག །ཅེས་གསུངས་ཏེ། དེ་ཐོབ་པ་ནི་བཅོམ་ལྡན་འདས་དུས་ཀྱི་འཁོར་ལོ་ཉིད་དོ། །དེ་བཞིན་དུ་མཐར་ཐུག་པའི་སའི་རྣམ་གྲངས་གཞན་ཡང་མཆོག་མི་འགྱུར་དུ་གསུངས་པ། དེ་བཞིན་དུ་ཀུན་དུ་བཟང་པོ་འོད་ཉི་མའི་དཀྱིལ་འཁོར་ཆེན་པོའི་འོད་ཀྱི་ས་དང་། །བདུད་རྩི་འོད་ཟླ་བ་ཆེན་པོ་འོད་གསལ་བའི་ས་དང་། ནམ་མཁའི་འོད་ནམ་མཁའ་བཞིན་རང་བྱིན་གྱིས་བརླབ་པའི་ས་དང་། རྡོ་རྗེའི་འོད་ཡིད་དུ་འོང་པའི་ས་དང་། རིན་པོ་ཆེའི་འོད་དབང་བསྐུར་བར་བྱིན་གྱིས་བརླབ་པའི་ས་དང་། པདྨའི་འོད་རང་བཞིན་དག་པའི་ཆོས་སྤྲུལ་པ་སྤྲོ་བར་འཛིན་པའི་ས་དང་། སངས་རྒྱས་ལས་བྱེད་པའི་ས་དང་། དཔེ་མེད་པའི་ས་དང་། དཔེ་ཐམས་ཅད་ཀྱིས་དཔེ་སོ་སོའི་ཁམས་ཀྱི་ས་དང་། ཤེས་རབ་ཀྱི་འོད་བླ་ན་མེད་པའི་ས་དང་། ཐམས་ཅད་མཁྱེན་པའི་འོད་ཆེན་པོ་དབྱིངས་ཀྱི་ས་དང་། སོ་སོ་རང་རིག་པའི་རྣལ་འབྱོར་གྱི་ཡེ་ཤེས་འགེངས་པའི་ས་ཞེས་པས་ཀྱང་། དང་པོ་གཉིས་ནི་སྔར་བསྟན་པ་ཡིན་ལ། དེའི་འོག་དུ་ཆོས་ཀྱི་དབྱིངས་དང་། མེ་ལོང་ལྟ་བུ་དང་། མཉམ་པ་ཉིད་དང་། བྱ་བ་གྲུབ་པ་དང་། དོན་དམ་པ་དང་། ཀུན་རྫོབ་ཀྱི་རྗེས་སུ་འགྲོ་བ་དང་། ཇི་ལྟ་བ་དང་། ཇི་སྙེད་པ་དང་། དེ་བཞིན་གཤེགས་པའི་ཁམས་ཐོབ་པ་ཞེས་བྱ་བ་ཡིན་ནོ། །ཞེས་སྔོན་གྱི་བླ་མ་རྣམས་གསུངས་སོ། །འདི་ནི་གནས་ཡོངས་སུ་གྱུར་པའི་ཡེ་ཤེས་ཐོབ་ཞེས་བརྗོད་དེ། སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་རྒྱུད་བླ་མ་ལས་གསུངས་སོ་བཞིན་ནོ། །ཕུང་པོ་ལ་སོགས་པའི་གནས་གྱུར་གྱི་ཡོན་ཏན་ནི། ཐེག་པ་ཆེན་པོ་བསྡུས་པ་ལས་གསུངས་པ་བཞིན་ནོ། །དབང་པོ་ལྔ་དང་ཡིད་དང་འཛིན་པ་དང་རྣམ་པར་རྟོག་པ་དང་ཀུན་བཞིའི་རྣམ་པར་ཤེས་པ་དང་། འཁྲིག་པ་དང་ནམ་མཁའི་འདུ་ཤེས་ཀྱི་གནས་གྱུར་བསྟན་པའི་རྗེས་ལ། མདོ་སྡེའི་རྒྱན་ལས། དེ་ལྟར་སངས་རྒྱས་དྲི་མེད་པའི། །གནས་ན་གཞན་གྱུར་དཔག་མེད་པས། །བསམ་ཡས་བྱ་བ་སྒྲུབ་པ་ལ། །འབྱོར་པ་དཔག་དུ་མེད་པར་འདོད། །ཞེས་གསུངས་ཏེ། འདི་ཐམས་ཅད་སྐུ་བཞིར་འདུས་པར། །ཕ་རོལ་དུ་ཕྱིན་པ་ལས་ཀྱང་། །ངོ་བོ་ཉིད་ལོངས་རྫོགས་བཅས་དང་། །སྤྲུལ་པ་གཞན་ནི་དེ་བཞིན་དུ། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཞེས་གསུངས་སོ། ཡེ་ཤེས་ཀྱི་འཕྲིན་ལས་བཤད་པ་ནི། དམིགས་པ་མེད་པའི་སྙིང་རྗེ་ཡིས། །སྒྱུ་འཕྲུལ་དྲ་བ་ལས་བྱུང་པ། །ཡིད་བཞིན་ནོར་བུ་ལྟ་བུར་ནི། །མཐའ་ཡས་སེམས་ཅན་རེ་བ་སྐོང་། །ཞེས་གསུངས་ཏེ། འདི་ནི་རྒྱུད་ལས་ཀྱང་། སངས་རྒྱས་ཀྱིས་ཀྱང་རྟོགས་བྱ་མིན་པའི་དཔག་མེད་ཡོན་ཏན་ཅན་གྱི་སངས་རྒྱས་སྤྲུལ་པའི་སྒྱུ་མ་ཡི། །བདག་ཉིད་ཀྱིས་ནི་སྲིད་པ་གསུམ་གྱི་གནས་སུ་སྟོན་པར་མཛད་པ་ཇི་ལྟར་མིག་འཕྲུལ་ལྟ་བུ་ཉིད། །དངོས་པོ་དུ་མར་ཕྱེ་བ་རྒྱལ་སྲས་རྣམས་དང་བཅས་པའི་མི་རྣམས་རང་རང་སེམས་ལ་འཇུག་པར་གྱུར། །འདི་དག་མ་སྐྱེས་ཆོས་ཏེ་ཆུ་དང་ནམ་མཁའ་ལྟ་བུར་འཁྲུལ་པ་སྟེར་བ་འདིར་ནི་སྐྱེ་བོ་རྣམས། ཡུལ་དང་ཡུལ་ཅན་རྣམས་ཀྱིས་རྣམ་པ་ཀུན་དུ་རྟོགས་པར་བྱ་བ་མིན་པ་རྒྱལ་བའི་རྡོ་རྗེའི་སྐུ། །གསུང་གི་རྡོ་རྗེ་སེམས་ཅན་ཀུན་གྱི་རང་གི་སྙིང་ཁའི་སྒྲ་ཡིས་ཆོས་རྣམས་རྫོགས་པར་བྱེད་པ་དང་། །མ་ལུས་པ་སྟེ་སེམས་ཅན་རྣམས་ཀྱི་སེམས་ཀྱི་རང་བཞིན་རྡོ་རྗེ་ཅན་གྱི་རྡོ་རྗེའི་ཐུགས། གང་ཞིག་དངོས་པོ་རྣམས་ལ་འཛིན་པ་དྲི་མེད་ནོར་བུ་ལྟ་བུ་དེ་བཞིན་ཡེ་ཤེས་རྡོ་རྗེ་ཉིད། །ཞེས་གསུངས་ཏེ། སངས་རྒྱས་རྣམས་ཀྱི་ཡེ་ཤེས་བསམ་གྱིས་མི་ཁྱབ་པ་ནི་དབང་བསྐུར་བའི་ས་ཐོབ་པ་རྣམས་ཀྱིས་ཀྱང་། ཐམས་ཅད་རྟོགས་པར་དཀའ་ལ་མིག་འཕྲུལ་དང་མཚུངས་པ་སྟེ། དངོས་པོ་ཐམས་ཅད་དང་རྒྱལ་བའི་སྲས་རྣམས་དང་སེམས་ཅན་ཐམས་ཅད་ཀྱི་སེམས་ལ་རང་གི་མཚན་ཉིད་དང་དབྱེ་བ་མེད་པར་འཇུག་སྟེ། ཆུ་དང་ནམ་མཁའ་ལ་ཟླ་བའི་གཟུགས་ལྟར་འདུས་མ་བྱས་པར་འཕྲིན་ལས་འབྱུང་བའི་ཕྱིར་རོ། །དེས་ན་ནམ་མཁའ་ལྟ་བུའི་རྡོ་རྗེའི་སྐུ་ནི་མཚན་མས་རྟོགས་པར་བྱ་བ་མ་ཡིན་ཏེ། ཡུལ་དང་ཡུལ་ཅན་དང་བྲལ་བའི་ཕྱིར་རོ། །སངས་རྒྱས་རྣམས་ཀྱི་རྡོ་རྗེའི་གསུང་ནི། རྣ་བའི་ཡུལ་མ་ཡིན་ཏེ་རང་རང་གི་སྙིང་ཁའི་ཆོས་ཉིད་ཀྱི་རང་སྒྲར་སོན་པའི་ཕྱིར་རོ། །སངས་རྒྱས་རྣམས་ཀྱི་རྡོ་རྗེའི་ཐུགས་ནི་རྣམ་པར་མི་རྟོག་བཞིན་དུ་རེ་བ་ཐམས་ཅད་བསྐོངས་པ་ཡིན་ཏེ། སེམས་ཅན་རྣམས་ཀྱི་སེམས་ཀྱི་རང་བཞིན་དུ་སོན་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་ནི་རེ་བ་ཐམས་ཅད་སྦྱིན་པ་ཡིན་པ་སྟེ། ཤེས་བྱ་ཐམས་ཅད་ཀྱི་རང་གི་མཚན་ཉིད་འཛིན་པའི་ཕྱིར་རོ། །དེས་ན་འགྲེལ་ཆེན་ལས། སྤྲུལ་པ་ཡི་ནི་སྐུ་གསུང་ཐུགས། །ཡེ་ཤེས་ཅིག་དུ་སྦྱོར་བ་སྡོམ། །ལོངས་སྤྱོད་རྫོགས་པའི་སྐུ་གསུང་ཐུགས། །ཡེ་ཤེས་ཅིག་དུ་སྦྱོར་བར་སྡོམ། དཔལ་ལྡན་ཆོས་ཀྱི་སྐུ་གསུང་ཐུགས། ཡེ་ཤེས་གཅིག་ཏུ་སྦྱོར་བར་སྡོམ། །ལྷན་ཅིག་སྐྱེས་པའི་སྐུ་གསུང་ཐུགས། །ཡེ་ཤེས་ཅིག་ཏུ་སྦྱོར་བར་སྡོམ། །སད་པ་རྨི་ལམ་གཉིད་འཐུག་དང་། །བཞི་པ་དབང་པོ་གཉིས་སྐྱེས་བདེ། །ཡེ་ཤེས་ཐུགས་གསུང་སྐུ་ཡིས་མིན། །གནས་བཞི་རྣམས་སུ་མི་གནས་ཏེ། །ལས་ཀྱི་ཕྱག་རྒྱ་ཡོངས་སུ་བཏང་། །ཡེ་ཤེས་ཕྱག་རྒྱ་རྣམ་པར་སྤངས། །ཕྱག་རྒྱ་ཆེན་པོ་ལས་བྱུང་བ། །ལྷན་སྐྱེས་གཞན་དང་ལྷན་ཅིག་མིན། །རྣམ་རྟོག་བསྒོམ་པ་ལས་འདས་པ། །ཕྱག་རྒྱ་ཆེན་པོ་མི་འགྱུར་བདེ། །གཟུང་དང་འཛིན་པའི་རྣམ་པ་ཡི། །རྟོག་པ་བརྗོད་པ་རྣམ་པ་སྤངས། །དྲི་ཟའི་གྲོང་ཁྱེར་རྣམ་པ་དང་། །པྲ་རྣམས་ཀྱི་ནི་རང་བཞིན་དུ། །ཐབས་དང་ཤེས་རབ་བདག་ཉིད་སྦྱོར། །ཨེ་བཾ་ཡི་གེ་ལ་ཕྱག་འཚལ། །ཞེས་གཞི་ལམ་འབྲས་བུ་ཐམས་ཅད་བསྡུས་ཏེ་གསུངས་སོ། །རྗེས་སུ་དྲན་པ་དང་ཏིང་ངེ་འཛིན་རྣམས་ལ་བརྟེན་ནས་འདི་སྐད་སྨྲས་པ། སྣང་དང་སྟོང་པ་དབྱེར་མེད་པ། །ཆུ་ཟླ་ལྟ་བུའི་སྐུ་མཐོང་ནས། །མི་འགྱུར་དབྱངས་དང་གསལ་བྱེད་ཀྱི། །རླུང་ནི་དུང་ཅན་དབུས་སུ་འགོག །ཡན་ལག་བཅུ་གཉིས་སྲིད་རྩ་སྟོན། །དག་པ་རྣམ་པ་བཅུ་གཉིས་འཆང་། །སྲོག་རྩོལ་གསུང་ནི་རབ་བསྒྲུབས་ནས། །བདུད་རྩི་ཞུ་བ་ཡི་གེ་གཟུགས། །ཕྱག་རྒྱ་གསུམ་གྱིས་མི་འགྱུར་བཅིངས། །ཐུགས་ནི་འཛག་མེད་རབ་བསྒྲུབས་ནས། །སྲིད་ཞི་རྣམ་པར་སྤངས་པའི་ཕྱིར། །སྣ་ཚོགས་ཀུན་བརྟགས་ལྷ་དང་སྔགས། རྟོག་པས་བསྒོམ་པ་དོར་བ་དང་། །ཆགས་སོགས་ཉོན་མོངས་ཀུན་སྤངས་ཤིང་། །བྱིས་པས་ཉེར་སྤྱོད་བསམ་གཏན་དང་། །གཟུགས་མེད་བཞིར་བཅས་བཀག་ནས་ཀྱང་། མི་རྟོག་ཏིང་འཛིན་སྔགས་པར་མཛད། །ཞི་བའི་མཐར་སོང་དགག་པའི་ཕྱིར། །རྟོག་པས་ཅིག་དང་དུ་བྲལ་དུ། །བརྟགས་པའི་སྟོང་པ་བཀག་ནས་ཀྱང་། །རང་གི་ཡེ་ཤེས་སྣང་བའི་གཟུགས། །པྲ་རྣམས་ཀྱི་ནི་རྣམ་པ་ལྟའི། །ཕྱག་རྒྱ་ཆེན་མོ་དང་འཁྱུད་ནས། །དངོས་ཀུན་འོད་གསལ་ངོ་བོར་མཛད། །ཟུང་འཇུག་ལམ་དུ་སོན་པ་དང་། །སྒྱུ་འདྲའི་སྤྲུལ་ལ་དབང་མཛད་ཕྱིར། །སྣ་ཚོགས་ཆོས་རྣམས་ཡེ་ཤེས་ཀྱི། །ཕྱག་རྒྱ་མིག་འཕྲུལ་ལྟ་བུར་སྦྱོངས། །སྒྲ་སྙན་བྲག་ཆ་ལྟ་བུའི་ཆོས། །མི་ཟད་གཟུངས་ཀྱི་སྒོ་རུ་འཛིན། །འདོད་པས་ཉམས་ཐག་འགྲོ་གཟིགས་ན། །ཤུ་དྲ་དེ་བཞིན་གཤེགས་པ་དེ། །རྒྱུ་མཐུན་ལས་ཀྱི་ཕྱག་རྒྱས་བཅིངས། །སླར་ཡང་སྤྱི་གཙུག་བར་དུ་གཤེགས། །སྲེད་སོགས་འཁྲུལ་པ་དང་བྲལ་བ། ལྷན་སྐྱེས་སྐུ་ནི་བཅུ་དྲུག་སྟོན། །འཁོར་བ་ཇི་སྲིད་མཛད་སྟོན་པ། །སྲིད་ཞི་གཉིས་སུ་མི་བཞུགས་ཤིང་། །མྱ་ངན་མི་འདའི་སྒྱུ་མ་མཁན། །གྲུབ་པ་དེ་ལ་ཕྱག་འཚལ་ལོ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། ད་ནི་བསྔོ་བ་ཕན་ཡོན་དང་བཅས་པ་ལ་གཉིས་ལས། །ཕན་ཡོན་ནི་སེམས་ཅན་སྒྲོལ་བའི་བདེ་བ་ཆེ། །འཛག་པའི་འདོད་ཆགས་སེལ་བར་བྱེད། །འགྲོ་དྲུག་སྡུག་བསྔལ་སེལ་བྱེད་པ། །ཞེས་གསུངས་ཏེ། །རྒྱུད་ལས། རོའི་འགྲོ་བས་སོན་པ་ཐམས་ཅད་སྲོག་གི་ཀུན་ནས་བགྲངས་ནས་ཉོན་མོངས་བདུད་ནི་ངེས་པར་འཇོམས། རྫུ་འཕྲུལ་དང་ནི་ཐམས་ཅད་མཁྱེན་པའི་ས་དང་སྲིད་གསུམ་བླ་མ་རྣལ་འབྱོར་པ་ཡི ས་ཚེ་འདི་ལ། གལ་ཏེ་འཆི་བའི་ལམ་དུ་ཞུགས་པར་གྱུར་ན་དེ་ནས་དེ་བཟུང་ནས་ནི་སྐྱེ་བ་གཞན་དུའོ། །ཞེས་གསུངས་ཏེ། འགྲོ་བ་དྲུག་ནི་འཆིང་བ་ཐམས་ཅད་གཅོད་ཅིང་བདུད་ཐམས་ཅད་སེལ་བར་མཛད་པ་ཚེ་ཅིག་ལུས་ཅིག་གིས་སངས་རྒྱས་ཉིད་འགྲུབ་ཅིང་། གལ་ཏེ་ལམ་ལ་ཞུགས་བཞིན་དུ་འཆི་བའི་དུས་བྱས་ན་སྐྱེ་བ་མང་པོ་བརྒྱུད་མི་དགོས་པར་འགྲུབ་པའོ། །དེ་བཞིན་དུ་འགྲེལ་ཆེན་ལས་ཀྱང་། སོ་སོའི་སྐྱེ་བོ་ཉན་ཐོས་ཀྱི་སྡོམ་པའི་ངེས་པ་དང་བྲལ་བ་འདོད་པའི་ཡོན་ཏན་དང་དབང་པོ་གཉིས་ཀྱི་བདེ་བ་ལ་མོས་པ་ཁམས་དྲུག་དང་ལྡན་པའི་མིའི་ལུས་ལ་བསོད་ནམས་དང་ཡེ་ཤེས་ཀྱི་ཚོགས་ཀྱིས་སངས་རྒྱས་ཀྱི་ཡེ་ཤེས་སྟེར་བ་ནི་དེ་བཞིན་གཤེགས་པའི་བཀའ་ཡིན་ཏེ། དེས་ན་འདིར་སྔགས་ཀྱི་ཐེག་པ་ལས་བཅོམ་ལྡན་འདས་ཀྱིས་གསུངས་པ་འདི་ལྟ་སྟེ། རིགས་ངན་སྨིག་མ་མཁན་ལ་སོགས། །མཚམས་མེད་ལྔ་ནི་བྱེད་ལ་སོགས། །སྔགས་ཀྱི་སྤྱོད་པ་རྗེས་སྤྱད་པས། །ཚེ་འདི་ཉིད་ལ་སངས་རྒྱས་འགྱུར། །ཞེས་བྱ་བ་བཅོམ་ལྡན་འདས་ཀྱིས་གསུངས་པ་ནི་བདེན་ཏེ། སྐྱེ་བ་འདིར་གང་སྔོན་དུ་བྱས་པའི་མཚམས་མེད་པ་ལྔ་ལ་སོགས་པའི་མ་རུངས་པའི་ལས་དེ་འདིར་སྔགས་ཀྱི་ཐེག་པའི་ཕྱག་རྒྱ་ཆེན་པོ་མི་འགྱུར་བའི་བདེ་བའི་ཏིང་ངེ་འཛིན་གྱིས་བཅོམ་པ་ཉིད་དེ་གཞན་གློ་བུར་གྱི་མི་དགེ་བ་ལ་མི་འཇུག་པའི་ཕྱིར་རྡོ་རྗེ་ཆོས་འབྱུང་གི་ཁང་པར་བདུད་བཞི་དང་བགེགས་ལ་སོགས་པ་འཇུག་པའི་སྒོ་རྣམས་སུ་བྱམས་པ་དང་སྙིང་རྗེ་དང་དགའ་བ་དང་། བཏང་སྙོམས་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་སྒོ་གླེགས་བཅུག་ནས། དེར་རྡོ་རྗེ་སེམས་དཔའ་བསྒྲུབ་པའི་ཕྱིར་ཕྱག་རྒྱ་ཆེན་པོ་དང་ལྷན་ཅིག་པ་ནི། མཚམས་མེད་པ་བྱས་པ་ཡང་སྐྱེ་བ་འདི་ཉིད་ལ་སངས་རྒྱས་ཉིད་ཀྱི་འབྲས་བུ་རྙེད་པར་འགྱུར་ཞེས་བྱ་བ་ནི་དེ་བཞིན་གཤེགས་པའི་བཀའ་ངེས་པའོ། །སྔགས་ཀྱི་ཐེག་པར་ཞུགས་པ་ཙམ་གྱིས་མཚམས་མེད་པ་ལྔ་ལ་སོགས་པ་མ་རུངས་པའི་ལས་བྱས་པ་ཡང་སྐྱེ་བ་འདི་ཉིད་ལ་སངས་རྒྱས་ཀྱི་འབྲས་བུ་རྙེད་པར་འགྱུར་ཞེས་བྱ་བ་ནི་བཅོམ་ལྡན་འདས་ཀྱི་དགོངས་པ་མ་ཡིན་ནོ། །ཞེས་གསུངས་སོ། །གཞན་ཡང་རྒྱུད་ཐམས་ཅད་ལས་ཕན་ཡོན་མང་དུ་གསུངས་ཀྱང་མ་བྲིས་སོ། །བསྔོ་བ་ནི། ལམ་མཆོག་ཚོལ་དང་ཕྲད་པར་ཤོག །ཞེས་གསུངས་ཏེ། རྡོ་རྗེ་ཐེག་པ་ཆེན་པོ་སངས་རྒྱས་ཀྱི་ལམ་ཚོལ་བ་ཐམས་ཅད་དང་ཕྲད་པར་ཤོག་ཞེས་པའོ། །འདི་ལྟ་བུའི་གདམ་ངག་ཁྱད་པར་འཕགས་པའི་ཆེ་བ་ནི། །རྒྱུད་ལས། དུ་བ་ལ་སོགས་སྒྲུབ་པ་ཉིད་ཀྱིས་འཆི་བའི་འཇིག་པ་བྱེད་པའི་དབུ་མ་ཡང་ནི་བསྒྲུབ་པར་བྱ། །སྲོག་ལ་སོགས་པ་བསྒྲུབ་པ་ཉིད་ཀྱིས་འཛག་པར་གྱུར་པའི་རི་བོང་འཛིན་པའི་ཐིག་ལེ་བསྒྲུབ་པར་བྱ། །དམ་པའི་བདེ་བ་བསྒྲུབ་པ་ཉིད་ཀྱིས་རྒྱལ་བའི་ལྷན་ཅིག་སྐྱེས་སྐུ་ཀུན་དུ་འགྲོ་བ་སྒྲུབ་པར་བྱ། །གང་ཞིག་སེམས་ཅན་རྣམས་ལ་འཆི་བ་སྟེར་བ་མ་ལུས་སྔགས་ཀྱིས་བརླབས་ན་བདུད་རྩིའོ། བགྲོད་བྱ་མིན་པའི་འདོད་པའི་དངོས་གྲུབ་གང་ཞིག་སྲིད་གསུམ་གནས་སུ་དེ་འདིར་བསམ་གཏན་གྱིས་དགྲོད་བྱ། །གང་ཞིག་ངེས་པར་རྙེད་དཀའ་ཡེ་ཤེས་རྡོ་རྗེ་པད་མའི་བདེ་བས་བྱིན་གྱིས་བརླབས་ན་རྙེད་པར་སླ། །དེ་ལྟར་འདི་ལྟར་རྡོ་རྗེ་ཅན་གྱིས་སྲོག་ཆགས་རྣམས་ལ་མཉམ་བདེ་དུས་རྣམས་ཀུན་དུ་སྟེར། །ཞེས་གསུངས་པ་བཞིན་དུ་བསྒྲུབ་པར་བྱའོ། རྣལ་འབྱོར་གསུམ་གྱི་སྙིང་པོ་གསལ་བ་ཞེས་བྱ་བ། བྱང་ཆུབ་སེམས་དཔའ་འཇམ་དཔལ་མིའི་དབང་པོས་མཛད་པའི་འགྲེལ་པ། ཕྱག་ན་པད་མོ་ཅན་གྱི་བྱིན་བརླབས་ལས་རང་བྱུང་རྡོ་རྗེ་ཡིས་སྦྱར་བའོ། །རྡོ་རྗེ་ཐེག་པ་སངས་རྒྱས་ཀུན་གྱི་ལམ། །ཟབ་ཅིང་རྟོགས་པར་དཀའ་བའི་སྙིང་པོའི་དོན། །རྒྱལ་སྲས་མཁས་གྲུབ་རྣམས་ཀྱིས་གསུངས་པ་ལྟར། །བཤད་ལས་དགེ་བ་ཅུང་ཟད་གང་ཐོབ་པ། །སེམས་ཅན་ཡེ་ཤེས་སྐུ་ཉིད་ཐོབ་གྱུར་ཅིག །གལ་ཏེ་འགལ་དང་འཁྲུལ་པ་གྱུར་སྲིད་ན། །བླ་མ་མཁའ་འགྲོའོ་ཚོགས་ལ་བཟོད་པར་གསོལ། །རྟ་ལོ་ཟླ་བ་གཉིས་པའི་ཚེས་གསུམ་ལ་ནགས་ཕུ་དཔལ་གྱི་རི་ཁྲོད་དུ་མཛད་པ་འདི་རེ་ཤིག་རྫོགས་སོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཡི་གེ་པ་ནི་དཀོན་མཆོག་རྒྱལ་མཚན་ནོ། །དགེའོ། །

དཔལ་གསང་བ་འདུས་པའི་མངོན་རྟོགས།

༄༅། །དཔལ་གསང་བ་འདུས་པའི་མངོན་རྟོགས་བཞུགས།

༄༅། །དཔལ་གསང་བ་འདུས་པའི་བསྒྲུབ་པའི་ཐབས་ཕྱི་ནང་གཞན་གསུམ་གསལ་བ་ཞེས་བྱ་བ། དཔལ་རྡོ་རྗེ་འཆང་ལ་ཕྱག་འཚལ་ལོ། །ཨོཾ་ནི་རྒྱལ་བ་ཀུན་གྱི་སྐུ་སྟེ་མཁའ་འདྲ་སྐུ་གཉིས་རྣམ་པར་འཕྲོ། །ཨཱཿལི་ཀ་ལི་བརྗོད་མེད་གསུང་ནི་རྣམ་དག་གསུང་དབྱངས་དྲུག་ཅུ་ལྡན། །ཧཱུྃ་ནི་རྣམ་ཀུན་མཆོག་ལྡན་ཐུགས་ཏེ་ཡེ་ཤེས་ཐུགས་རྗེ་ཚད་མེད་པ། །སྐུ་གསུམ་དང་ལྡན་དཀྱིལ་འཁོར་འཁོར་ལོ་དེ་ལ་གུས་པས་ཕྱག་འཚལ་ནས། །དཔལ་ལྡན་འདུས་པའི་ལམ་གྱིས་ནི། །སྒྲུབ་པའི་ཐབས་འདི་མདོ་བཞིན་་དུ། །འཕགས་པ་ཐུགས་རྗེ་ཆེ་ལྡན་པས། །མཛད་པ་བདེ་བླག་རྟོགས་ཕྱིར་རོ། །འདིར་རྒྱུད་ཀྱི་རྒྱལ་པོ་དབང་བསྐུར་བ་ཐོབ་ཅིང་དམ་ཚིག་དང་ལྡན་པའི་བསྒྲུབ་པ་པོས། ཞེ་སྡང་རྡོ་རྗེའི་རྣལ་འབྱོར་ལ་བརྩོན་པར་འདོད་པས། དགོན་པ་དབེན་པའམ་ཡིད་དང་རྗེས་སུ་མཐུན་པའི་གནས་སུ། སྟན་འཇམ་པ་ལ་སེམས་དཔའི་དཀྱིལ་མོ་དཀྲུང་གིས་འདུག་སྟེ་བསྒོམ་པར་བྱའོ། །གནས་ཀྱི་ངེས་པའོ། །དེ་ནས་ནམ་མཁའ་དང་མཉམ་པའི་སེམས་ཅན་དེ་ཁོ་ན་ཉིད་མ་མཐོང་བ་རྣམས་ལ་སྙིང་རྗེ་ཆེན་པོ་ཚད་མེད་པ་བསྐྱེད་ལ། རང་ཉིད་སྐད་ཅིག་གིས་རྡོ་རྗེ་འཆང་སྐུ་མདོག་དཀར་པོ་རྡོ་རྗེ་དང་དྲིལ་བུས་ཡུམ་རེག་བྱ་རྡོ་རྗེ་མ་ལ་འཁྱུད་པས་རྒྱན་ཐམས་ཅད་དང་ལྡན་པ། ཟླ་བའི་གདན་ལ་རྡོ་རྗེ་དཀྱིལ་དཀྲུང་གིས་བཞུགས་པར་མོས་ཏེ། སྙོམས་པར་ཞུགས་པའི་བྱང་ཆུབ་སེམས་ལས། མཁར་ཨོཾ་ཨཱཿཧཱུྃ་བཛྲ་དྷྲིག་ལས་མི་བསྐྱོད་པ་ཞལ་གསུམ་ཕྱག་དྲུག་པའི་རྣམ་པ་བསྐྱེད་པ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་སྤྲོས་ལ། མཛད་པ་དུ་མས་སེམས་ཅན་ཞེ་སྡང་ཅན་ལ་སོགས་པ་ཐམས་ཅད་ཀྱི་ཉོན་མོངས་པ་ཐམས་ཅད་རྣམ་པར་དག་པར་བྱས་ནས་སངས་རྒྱས་ཀྱི་སྤྲིན་དུ་གྱུར་ཏེ། ཚུར་འདུས་ནས་རྡོ་རྗེ་འཆང་ལ་བསྡུས་པས་རྒྱལ་བ་ཐམས་ཅད་མཉེས་པར་བྱེད་པའི་མཆོད་པའི་སྤྲིན་དང་བཅས་པར་བལྟས་ཏེ་སྙིང་རྗེ་ཆེན་པོ་ལ་དམིགས་པའོ། །དེ་ནས་བསྡུས་པ་དེ་རྡོ་རྗེ་འཆང་ལ་ཐིམ་པས་ཞེ་སྡང་རྡོ་རྗེ་ཉིད་དུ་གྱུར་ཏེ། སྐུ་མདོག་ཨིན་ཏྲ་ནི་ལ་ལྟ་བུ་ཞལ་གསུམ་ཕྱག་དྲུག་པ་གཡས་དཀར་བ་གཡོན་དམར་བ་རྡོ་རྗེ་འཁོར་ལོ་པད་མ་གཡས་དང་། དྲིལ་བུ་རིན་ཆེན་རལ་གྲི་གཡོན་ན་བསྣམས་པ། ཉི་མ་ལ་བཞུགས་པར་གྱུར་ཏེ། སྤྱི་བོར་ཨོཾ། མགྲིན་པར་ཨཿ སྙིང་ཁར་ཧཱུྃ་བཀོད་ལ་བདག་བསྲུང་བར་བྱའོ། །དེ་ནས་གནས་བསྲུང་བར་བྱ་བའི་དོན་དུ། འོད་ཟེར་ལས་འོག་གི་ཕྱོགས་སུ་ཧཱུྃ་སྤྲོས་པ་ལ་རྡོ་རྗེའི་ས་གཞི་སྲ་ཞིང་བརྟན་པ་དེའི་སྟེང་དུ་བྷྲུྃ་ལས་བྱུང་བའི་འཁོར་ལོ་རྩིབས་བཅུ་པ་དེ་ལ་མ་རིག་པའི་པྃ་ལས་པད་མ་རྃ་ལས་ཉི་མའི་གདན་བཅུ་ལས་བྱུང་བའི་ཁྲོ་བཅུ་སྤྲོ་བ་ནི། ཤར་དུ་གཤིན་རྗེ་གཤེད་ནག་པོ་གཡས་དཀར་གཡོན་དམར་བ། གཡས་ན་དབྱུག་པ་རྡོ་རྗེ་འཁོར་ལོ། གཡོན་ན་སྡིག་འཛུབ་དང་བཅས་པའི་ཞགས་པ་དང་དྲིལ་བུ་དགྲ་སྟ་ཅན་ནོ། །ལྷོར་ཤེས་རབ་མཐར་བྱེད་དཀར་པོ། གཡས་ནག་གཡོན་དམར་བ། ཕྱག་གཡས་རྣམས་རྡོ་རྗེ་དང་དབྱུག་པ་རལ་གྲི། གཡོན་ཐུགས་ཀར་སྡིག་འཛུབ་དང་བཅས་པའི་ཞགས་པ་དང་དྲིལ་བུ་དགྲ་སྟ་ཅན་ནོ། །ནུབ་ཏུ་རྟ་མགྲིན་དམར་པོ་གཡས་ནག་གཡོན་དཀར་པོ། ཕྱག་གཡས་རྣམས་པད་མ་རལ་གྲི་གཏུན་ཤིང་། གཡོན་ན་དྲིལ་བུ་དགྲ་སྟ་ཞགས་པ་ཅན་ནོ། །བྱང་དུ་བདུད་རྩི་འཁྱིལ་པ་ལྗང་ཁུ་གཡས་དམར་གཡོན་དཀར་བ། གཡས་རྣམས་སྣ་ཚོགས་རྡོ་རྗེ་འཁོར་ལོ་གཏུན་ཤིང་། གཡོན་སྡིག་འཛུབ་དང་བཅས་པའི་ཞགས་པ་དང་དྲིལ་བུ་དགྲ་སྟ་ཅན་ནོ། །ཤར་ལྷོར་མི་གཡོ་བ་སྔོན་པོ་གཡས་དམར་གཡོན་དཀར་བ། གཡས་རྣམས་རལ་གྲི་རྡོ་རྗེ་འཁོར་ལོ། གཡོན་སྡིག་འཛུབ་དགྲ་སྟ་ཞགས་པ་ཅན་ནོ། །ལྷོ་ནུབ་ཏུ་འདོད་པའི་རྒྱལ་པོ་སྔོན་པོ་གཡས་དམར་གཡོན་དཀར་བ། ཕྱག་དང་པོ་གཉིས་ཧཱུྃ་མཛད་ཀྱི་ཕྱག་རྒྱ་ཅན། གཡས་རྡོ་རྗེ་རལ་གྲི། གཡོན་ཞགས་པ་ལྕགས་ཀྱུའོ། །ནུབ་བྱང་དུ་དབྱུག་སྔོན་སྔོན་པོ་གཡས་དམར་གཡོན་དཀར་བ། གཡས་རྣམས་དབྱུག་པ་རལ་གྲི་འཁོར་ལོ། གཡོན་སྡིག་འཛུབ་པད་མ་དགྲ་སྟ་ཅན་ནོ། །བྱང་ཤར་དུ་སྟོབས་པོ་ཆེ་སྔོན་པོ་གཡས་དམར་གཡོན་དཀར་བ། གཡས་རྣམས་དབྱུག་པ་རལ་གྲི་འཁོར་ལོ། །གཡོན་སྡིག་འཛུབ་དང་བཅས་པའི་ཞགས་པ་དང་། །རལ་གྲི་དགྲ་སྟ་ཅན་ནོ། །སྦྲུལ་གྱི་རྒྱན་པའོ། །སྟེང་དུ་འཁོར་ལོ་འགྱུར་བ་སྐུ་མདོག་སྔོན་པོ་གཡས་དམར་གཡོན་དཀར་བ། ཕྱག་དང་པོ་གཉིས་སྤྱི་བོར་གཙུག་གཏོར་གྱི་ཕྱག་རྒྱ་འཛིན་པ། གཡས་རྡོ་རྗེ་པད་མ་དང་། གཡོན་སྡིག་འཛུབ་རལ་གྲི་ཅན་ནོ། །འོག་ཏུ་གནོད་མཛེས་སྔོན་པོ་གཡས་དམར་གཡོན་དཀར་པོ། གཡས་རྣམས་རྡོ་རྗེ་འཁོར་ལོ་རིན་པོ་ཆེ། གཡོན་སྡིག་འཛུབ་དང་བཅས་པའི་ཞགས་པ་དང་པད་མ་རལ་གྲི་འཛིན་པ་སྟེ། ཐམས་ཅད་གཡོན་བརྐྱང་བས་པད་མ་དང་ཉི་མ་ལ་བཞུགས་པ། ཁྲོས་པ་སྤྱན་གསུམ་པ་མཆེ་བ་གཙིགས་པ། ལྗགས་འདྲིལ་བ་ཁྲོ་བོའི་ཆས་དང་ལྡན་པའོ། །ཡང་གཞན་གཙུག་གཏོར་འདོད་རྒྱལ་མི་གཡོ་བ་གནོད་མཛེས་བཞི་རིན་པོ་ཆེའི་རྒྱན་ཅན། གཞན་རྣམས་སྦྲུལ་གྱིས་བརྒྱན་པ། རང་འོད་ཀྱི་རིག་མ་དང་བཅས་པར་བསྒོམ་པར་བཤད་དོ། །དེ་ནས་གནོད་མཛེས་ཞལ་གཅིག་ཕྱག་གཉིས་པ་གཡས་རྡོ་རྗེ་ཐོ་བ་དང་གཡོན་ཞགས་པ་ལྕགས་ཀྱུ་ཅན་སྤྲོས་ཏེ། རང་ཉིད་ཀྱི་དྲུང་དུ་འཁོད་པ་ལས་བཀའ་བསྒོ་བ། ཨོཾ་སུམྦྷ་ནི་སུམྦྷ་ཧཱུྃ། གྷྲི་་གྷྲི་་ཧཱུྃ། གྷྲི་་པ་ཡ་གྷྲི་་པ་ཡ་ཧཱུྃ། ཨ་ན་ཡ་ཧོ། བྷ་ག་བན་བྷྱི་རྻ་ར་ཛ་ཧཱུྃ་ཕཊ། ཞེས་བརྗོད་པས་ཕྱོགས་བཅུར་སྤྲོས་ལ་ཕྱོགས་སྐྱོང་བཅུས་བགེགས་ཀྱི་ཚོགས་རྣམས་རང་དབང་མེད་པར་ལྕགས་ཀྱུས་ཕུག་ཞགས་པས་བཅིངས་ནས་ཁྲོ་བོ་རྣམས་ཀྱི་དྲུང་དུ་བཀུག་ནས། བདུད་རྩི་འཁྱིལ་པ་ལས་སྟོད་རང་འདྲ་བ་སྨད་ཕུར་བུ་ལྟ་བུ་བཅུ་འཕྲོས་པས་བགེགས་རྣམས་ཀྱི་སྤྱི་བོར་གནས་པ་ལ། ཨོཾ་གྷ་གྷ་གྷ་ཏ་ཡ་གྷ་ཏ་ཡཱ། སརྦ་དུ ཥྚན་ཕཊ་ཕཊཿ ཀི་ལཱ་ཡ་ཀི་ལཱ་ཡ། སརྦ་པ་པྃ་ཕཊ་ཕཊ། ཧཱུྃ་ཧཱུྃ་ཧཱུྃ་བཛྲ་ཀི་ལཱ་ཡ། བཛྲ་དྷ་ར་ཨག་ཛྙྱ་པ་ཡ་ཏི། སརྦ་བྷིན་ནན་ཀ་ཡ་བཱག་ཙི་ཏ། བཛྲ་ཀི་ལ་ཡ་ཧཱུྃ་ཧཱུྃ་ཕཊ་ཕཊ། ཅེས་ཕུར་བུ་ཐོབ་ཅིག་པར་བཀའ་བསྒོ་བས་གནོད་མཛེས་ཀྱིས་ཕུར་བུ་བཏབ་ཅིང་གཡོ་བ་མེད་པར་བྱས་ཏེ། ཉོན་མོངས་པ་ཐམས་ཅད་བསྒྲལ་ནས་བདེ་བ་ཆེན་པོར་བྱའོ། །དེ་མ་ཐག་ཏུ་ཨོཾ་བཛྲ་ཛྷ་ལ་ཨ་ན་ལ་རྐ་ཧཱུྃ། ཞེས་བརྗོད་པས་རྡོ་རྗེའི་མེ་ཕྱོགས་བཅུར་སྤྲོས་ལ་གནོད་བྱེད་རྣམས་བསྲེག་པར་བྱའོ། །ཡང་ཨོཾ་ཏ་ཀི་ནི་ཧཱུྃ་ཛཱ་ཧཱུྃ་ཀ་ར་ཧཱུྃ། ཞེས་སྟེང་འོག་གི་ས་གཞི་དང་ར་བ་བླ་རེ་རྡོ་རྗེར་བྱིན་གྱིས་བརླབ་པོ། །འདི་ནི་ཀུན་རྫོབ་བསྲུང་བ་བཀའི་འཁོར་ལོ་སྤྲོ་བའོ། །དེ་ནས་དོན་དམ་པའི་བསྲུང་བ་བྱས་ཏེ། དངོས་པོ་མེད་པ་བསྒོམ་པ་མེད། །བསྒོམ་པར་བྱ་བ་བསྒོམས་པ་མེད། །དེ་ལྟར་དངོས་པོ་དངོས་མེད་པ། །བསྒོམ་པ་དམིགས་སུ་མེད་པའོ། །ཞེས་བརྗོད་ལ་སྲིད་པ་གསུམ་གྱི་བརྟན་པ་དང་གཡོ་བ་ཐམས་ཅད་སྟོང་པ་ཉིད་དུ་བྱའོ། །འདི་ནི་ཕྱི་རུ་འཇིག་རྟེན་གྱི་ཁམས་མེ་དང་ཆུ་དང་རླུང་གིས་ཞིག་པ་དང་། ནང་དུ་མཁྲིས་པ་དང་བད་ཀན་དང་། རླུང་གི་ཁམས་ཀྱིས་གཞན་དུ་འཆི་བ་ན། ཕྱི་མ་འགྲུབ་པའི་རྒྱུ་ཉེ་བར་སྦྱོར་བ་སྟེ་སྦྱང་བ་དང་། མཐར་ཐུག་ཏུ་སྟོང་པ་ཉིད་ཁོ་ན་བསྲུང་བའི་མཆོག་ཏུ་བསྟན་པ་ཡིན་ནོ། །བསྲུང་བའི་འཁོར་ལོ་སྟོང་པ་ཉིད་དུ་བསྡུ་བ་དང་བཅས་པའོ། །དེ་ནས་ཕྱི་འཇིག་རྟེན་གྱི་ཁམས་སེམས་ཀྱི་སྣང་བའི་ཆ་ལས་བྱུང་བ་ལྟར་རྟེན་བསྐྱེད་པ་ནི། སེམས་ཀྱི་རྡོ་རྗེ་འཆང་ན་ཐའི་འོད་ཟེར་ལས། ནམ་མཁའི་དབྱིངས་སུ་ཧཱུྃ་གིས་རླུང་གི་དཀྱིལ་འཁོར་ཟླ་གམ་ནག་པོ། ཧཱུྃ་རྃ་ཧཱུྃ་ལས་མེའི་དཀྱིལ་འཁོར་གྲུ་གསུམ་དམར་པོ། ཧཱུྃ་བྃ་ཧཱུྃ་ལས་ཆུའི་དཀྱིལ་འཁོར་ཟླུམ་པོ་དཀར་པོ། ཧཱུྃ་ལྃ་ཧཱུྃ་ལས་སའི་དཀྱིལ་འཁོར་གྲུ་བཞི་སེར་པོ་ཐམས་ཅད་སྟེང་འོག་ཧཱུྃ་ལས་རྡོ་རྗེས་མཚན་པའོ། །འབྱུང་བཞི་གཅིག་ཏུ་ཞུ་ཞིང་འདྲེས་པ་ལས་རྡོ་རྗེ་རྒྱ་གྲམ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་ཀྱི་ལྟེ་བ་མཐིང་ནག་ཡངས་ཤིང་རྒྱ་ཆེ་བའི་དབུས་སུ། བྷྲུཾ་ལས་བྱུང་བའི་གཞལ་ཡས་ཁང་། །ཟུར་བཞི་དང་ནི་སྒོ་བཞི་དང་། །རྟ་བབས་བཞི་ནི་མཛེས་པར་བྱས། །གདུང་བཞི་དང་ནི་ཡང་དག་ལྡན། །ཀ་བ་བརྒྱད་ཀྱིས་ཉེ་བར་མཛེས། །དྲ་བ་དྲ་བ་ཕྱེད་པ་དང་། །རྡོ་རྗེ་ནོར་བུ་ཟླ་ཕྱེད་བརྒྱན། །སྒོ་དང་སྒོ་ཁྱུད་འཚམས་རྣམས་སུ། །རྡོ་རྗེ་རིན་ཆེན་རྣམས་ཀྱིས་སྤྲས། །བུམ་པ་ཀ་བ་རྡོ་རྗེ་ཆེ། །བྲེ་ཡི་ཕྲེང་བ་རིམ་བཞིན་གནས། །བ་དན་དྲིལ་བུས་རྣམ་པར་མཛེས། །རྔ་ཡབ་ལ་སོགས་ཀྱིས་བརྒྱན་པའོ། །དེའི་ནང་དུ་རང་བཞིན་དུ་གྲུབ་པའི་བརྟེན་པ་བསྐྱེད་པ་ནི་པད་མ་དང་རང་གི་ཕྱག་མཚན་དང་ཁྲོ་བོ་རྣམས་ཉི་མ་ལྷ་མོ་དང་སེམས་དཔའ་ཟླ་བ་ལ། རྒྱལ་བ་རྣམས་ཉི་ཟླའི་སྟེང་དུ་སྐད་ཅིག་གིས་ལྟའོ། །དབུས་སུ་རྡོ་རྗེ་འཆང་ཞལ་གསུམ་ཕྱག་དྲུག་པ་རེག་རྡོ་རྗེ་དང་བཅས་ཞེ་སྡང་རྡོ་རྗེ་ལྟ་བུའོ། །གཞན་ཐམས་ཅད་ཀྱང་འོག་ནས་སྟོན་པའི་ཕྱག་མཚན་དང་རྣམ་པ་ལྟ་བུ་སྟེ། དེ་ལ་རིམ་པ་དང་པོའི་ཤར་ལྷོ་ནུབ་བྱང་དུ། རྣམ་པར་སྣང་མཛད། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པའོ། །མེ་དང་བདེན་བྲལ་དང་རླུང་དང་དབང་ལྡན་དུ། སྤྱན་མ་དང་མ་མ་ཀི་དང་གོས་དཀར་མོ་དང་སྒྲོལ་མའོ། །དེའི་འཚམས་ཕྱི་མ་བཞིར་མེ་ནས་གཟུགས་རྡོ་རྗེ། སྒྲ་རྡོ་རྗེ། དྲི་རྡོ་རྗེ། རོ་རྗེའོ། རེག་ནི་སྔར་བསྟན་ཏོ། །རིམ་པ་གཉིས་པར། ཤར་དུ་བྱམས་པ་དང་སའི་སྙིང་པོ། ལྷོར་ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཏུ་འཇིག་རྟེན་དབང་ཕྱུག་དང་འཇམ་དཔལ། བྱང་དུ་སྒྲིབ་པ་རྣམ་སེལ་དང་ཀུན་ཏུ་བཟང་པོ་རྣམས་སོ། །རིམ་པ་གསུམ་པར་སྒོ་ལ་སོགས་པ་ཤར་ན་གཤིན་རྗེ་གཤེད་ལ་སོགས་པ་བསྲུང་འཁོར་དུ་བསྟན་པ་བཞིན་ནོ། །དེ་ལྟར་དཀྱིལ་འཁོར་ཐམས་ཅད་ཡེ་ཤེས་ཀྱི་རང་བཞིན་དུ་གྲུབ་པ། རྡོ་རྗེ་འཆང་ཆེན་པོའི་ཐུགས་ཀའི་ཧཱུྃ་ལས་འོད་འཕྲོས་པས་བསྐུལ་ཏེ། ཕྱོགས་བཅུའི་སངས་རྒྱས་ཐམས་ཅད་མཆོད་སེམས་ཅན་ཐམས་ཅད་ཀྱི་དོན་མཛད་དེ། སེམས་ཅན་ཐམས་ཅད་ཀྱིས་དཀྱིལ་འཁོར་མཐོང་ནས་དགའ་བ་དང་ཡིད་བདེ་བ་སྐྱེས་ནས་དཀྱིལ་འཁོར་དུ་ཞུགས་ནས་ལྷར་གྱུར་པར་བསམ་མོ། །དེ་དག་ནི་སའི་ཆ་དང་གཞལ་ཡས་དང་དཀྱིལ་འཁོར་བཀོད་པ་ལྷག་པར་མོས་པའོ། །འདི་ནི་ཕྱི་རོལ་དུ་བསྐལ་པ་དང་པོའི་རྫུས་ཏེ་སྐྱེས་པ་དང་། ནང་དུ་བར་མ་དོའི་དྲི་ཟའི་ལུས་སྦྱོང་བ་སྟེ། འབྲས་བུ་ཆོས་ཀྱི་སྐུ་ལ་ལོངས་སྤྱོད་རྫོགས་པར་སྣང་བའི་དོན་ཏོ། དེ་ནས་རང་ཉིད་ལ་ལུས་ཀྱི་དཀྱིལ་འཁོར་དུ་གཞུག་སྟེ། རྣམ་པར་སྣང་མཛད་ཀྱི་རིགས་ཐམས་ཅད་སྤྱི་བོར་རོ། །དེ་བཞིན་དུ་མགྲིན་པར་འོད་དཔག་མེད། སྙིང་ཀར་མི་བསྐྱོད་པ་ལྟེ་བར་རིན་ཆེན་འབྱུང་ལྡན། རྐང་བ་གཉིས་འདུས་སར་དོན་ཡོད་གྲུབ་པ། སྤྱན་མ་ལ་སོགས་པ་ནི་ཁམས་བཞི་ལ། མིག་ཏུ་སའི་སྙིང་པོ་རྣ་བར་ཕྱག་ན་རྡོ་རྗེ། སྣ་ལ་ནམ་མཁའི་སྙིང་པོ། ལྕེ་ལ་འཇིག་རྟེན་དབང་ཕྱུག ཡིད་ལ་འཇམ་དཔལ། གསང་བར་སྒྲིབ་པ་རྣམ་སེལ། རྩ་ལ་བྱམས་པ། ཚིགས་ལ་ཀུན་ཏུ་བཟང་པོ། ལག་པ་གཡས་གཤིན་རྗེ་གཤེད། གཡོན་གཞན་གྱིས་མི་ཐུབ་པ། ཁ་ལ་རྟ་མགྲིན། རྡོ་རྗེ་ལ་བདུད་རྩི་འཁྱིལ་པ། དཔུང་པ་གཡས་མི་གཡོ་བ། གཡོན་འདོད་པའི་རྒྱལ་པོ། པུས་མོ་གཡས་དབྱུག་སྔོན། གཡོན་སྟོབས་པོ་ཆེ། སྤྱི་བོར་གཙུག་གཏོར་འཁོར་ལོ་བསྒྱུར་བ། རྐང་མཐིལ་དུ་གནོད་མཛེས་རྣམས་བསྡུས་ཏེ་ཐམས་ཅད་རང་ཉིད་དུ་བྱས་ནས། རང་ཉིད་ཀྱང་དོན་དམ་པར་བསྡུས་ཏེ་དེ་ཡང་བདེ་བ་ཆེན་པོའི་འོད་གསལ་བར་བྱས་སོ། །འདི་ནི་བར་དོ་དེ་ཡང་བདེ་བ་ཆེན་པོའི་སྐད་ཅིག་ཏུ་ཞུགས་པས་མངལ་དུ་སྦྱོར་བའི་དོན་ཏོ། །ཡེ་ཤེས་ཀྱི་རིམ་པ་ནི། གཟུགས་ཕུང་གཏོགས་པ་མེ་ལོང་དང་། ས་ཁམས་མིག་གི་དབང་པོ་དང་། །གཟུགས་ཀྱང་ལྔ་པར་འགྱུར་བ་སྟེ། །ཁྲོ་བོ་གཉིས་དང་ཡང་དག་ལྡན། །ཚོར་བའི་ཕུང་པོ་མཉམ་ཉིད་དང་། །ཆུ་ཁམས་སྣ་ཡི་དབང་པོ་དང། །སྒྲ་ཡང་ལྔ་པར་གྱུར་པ་སྟེ། །ཁྲོ་བོ་གཉིས་དང་ཡང་དག་ལྡན། འདུ་ཤེས་སོ་སོར་རྟོག་པ་དང་། །བྱིན་ཟ་སྣ་ཡི་དབང་པོ་དང་། དྲི་ཡང་ལྔ་པར་འགྱུར་བ་སྟེ། །ཁྲོ་བོ་གཉིས་དང་ཡང་དག་ལྡན། །འདུ་བྱེད་བྱ་བ་གྲུབ་པ་དང་། །རླུང་ཁམས་ལྕེ་ཡི་དབང་པོ་དང་། །རོ་ཡང་ལྔ་པར་འགྱུར་བ་སྟེ། །ཁྲོ་བོ་གཉིས་དང་ཡང་དག་ལྡན། །སྟེང་འོག་ཁྲོ་བོ་གཉིས་དང་བཅས། །རང་བཞིན་གྱིས་ནི་སྣང་བ་ཉིད། །རྣམ་ཤེས་ཕུང་པོར་ཞུགས་པ་སྟེ། །རྣམ་ཤེས་ཀྱང་ནི་འོད་གསལ་བའོ། །མྱ་ངན་འདས་བཅས་ཀུན་སྟོང་བ། །ཆོས་ཀྱི་སྐུར་ཡང་བཤད་པ་ཡིན། ཞེས་བྱ་བའི་དོན་དྲན་པར་བྱས་ལ། ཨོཾ་ཤུ་ནྱ་ཏ་ཛྙྱ་ན་བཛྲ་ས་བྷ་བ་ཨད་མ་ཀོ་ཧཾ། ཞེས་བརྟན་པར་བྱས་ཏེ་སྣང་བ་མེད་ཅིང་མཚན་མ་མེད་པའི་དོན་དམ་པ་ཉིད་དུ་བཞག་གོ །དོན་དམ་ལ་འཇུག་པའོ། །དེ་ནས་མངལ་ནས་སྐྱེ་བའི་སྤྲུལ་པ་ཆེན་པོ་བསྒྲུབ་པར་བྱ་བའི་ཕྱིར་ལྡང་བར་བྱ་བ་ནི། འོད་གསལ་བ་ལས་ཧཱུྃ་དེ་ལས་འཕྲོ་བའི་སྦྱོར་བས་ཉི་མའི་དཀྱིལ་འཁོར་མཉམ་པ་ཉིད་དམར་བའི་རང་བཞིན། དེའི་སྟེང་དུ་ཟླ་བ་གང་བ་མེ་ལོང་ལྟ་བུ་དག་དཀར་ཆའི་ངོ་བོ་དེའི་སྟེང་དུ་པད་མ་དམར་པོ་འདབ་མ་བརྒྱད་པའི་དབུས་སུ་ཨོཾ་ཨཱཿཧཱུྃ་དང་བཅས་པ་སོ་སོར་རྟོག་པ་བར་དོ་རྣམ་ཤེས་སྲོག་རླུང་དང་བཅས་པ། དེ་རྣམས་ཟླ་བ་ལ་ཞུགས་པས་བརྟན་པ་ཁམས་དང་གཡོ་བ་རྣམ་པར་ཤེས་པ་ཅིག་ཏུ་འདྲེས་ཤིང་བྱ་བ་ནན་ཏན་ཡེ་ཤེས་བཞི་ཅིག་ཏུ་བསྟན་པར་བྱ་བའི་ཕྱིར། ཨོཾ་དྷརྨ་དྷར་ཏུ་ས་བྷ་བཱ་ཨད་མ་ཀོ་ཧྃ། ཞེས་བརྗོད་པ་ནི་སྦྱོར་བའོ། །དེ་ནས་ཡི་གེ་གསུམ་དང་བཅས་པའི་ཟླ་བ་ལས་གྱུར་པའི་རྡོ་རྗེ་དེ་ཡོངས་སུ་གྱུར་པ་ལས། དང་པོའི་མགོན་པོ་ཞལ་ཅིག་ཕྱག་གཉིས་རྡོ་རྗེ་དྲིལ་བུ་འཛིན་པ་ཀུ་མུ་ཏ་ལྟར་དཀར་བར་གྱུར་པར་བལྟ་སྟེ། ལུས་རྫོགས་པའི་རྒྱུ་རྗེས་སུ་སྦྱོར་བའོ། །དེ་ལ་སྐད་ཅིག་གིས་རང་བཞིན་གྱིས་མི་སྐྱོད་པར་ཞུགས་པས། ཞལ་གསུམ་ཕྱག་དྲུག་པ་ཨིན་ཏྲ་ནི་ལ་ལྟར་སྔོ་བའི་རྡོ་རྗེ་སེམས་དཔའ་གཡས་རྡོ་རྗེ་འཁོར་ལོ་པད་མ། གཡོན་དྲིལ་བུ་རིན་ཆེན་རལ་གྲི་ཅན་དུ་གྱུར་ནས་ཕུང་པོ་ཁམས་དང་སྐྱེ་མཆེད་ཐམས་ཅད་མངོན་པར་གྲུབ་པའི་ལྷར་དགོད་པ་ནི་། ཕྱི་བོར་ཨོཾ་དཀར་པོ་གཟུགས་ཀྱི་ཕུང་པོའི་རང་བཞིན་རྣམ་པར་སྣང་མཛད། མགྲིན་པར་ཨ་དམར་པོ། འདུ་ཤེས་ཀྱི་ཕུང་པོ་འོད་དཔག་མེད། སྙིང་ཁར་ཧཱུྃ་སྔོན་པོ་རྣམ་པར་ཤེས་པའི་རང་བཞིན་མི་བསྐྱོད་པ། ལྟེ་བར་ས་སེར་པོ་ཚོར་བའི་ཕུང་པོ་རིན་ཆེན་འབྱུང་ལྡན། རྐང་པ་གཉིས་འདུས་པར་ཧ་ལྗང་ཀུ་འདུ་བྱེད་ཀྱི་ཕུང་པོ་དོན་ཡོད་གྲུབ་པ། ལུས་ཀྱི་སའི་ཁམས་ལ་ལྃ་ལས་སྤྱན་མ། གཤེར་བའི་ཁམས་ལས་མྃ་ལ་མ་མ་ཀི། དྲོ་བའི་ཁམས་ལ་པྃ་ལས་གོས་དཀར་མོ། རླུང་གི་ཁམས་ལ་ཧྃ་ལས་སྒྲོལ་མའོ། །མིག་ཏུ་ཐལྷིཾ་དཀར་པོ་ལས་སའི་སྙིང་པོ་རྣ་བར་ཨོཾ་སྔོན་པོ་ལས་ཕྱག་ན་རྡོ་རྗེ། སྣ་ལ་ཨོཾ་སེར་པོ་ལས་ནམ་མཁའི་སྙིང་པོ། ལྕེ་ལ་ཨཱཿདམར་པོ་ལ་འཇིག་རྟེན་དབང་ཕྱུག སྙིང་ཁར་ཡིད་ལ་ཧཱུྃ་སྔོན་པོ་ལས་འཇམ་དཔལ། ལུས་ལ་ཨོཾ་ལྗང་ཁུ་ལས་སྒྲིབ་པ་རྣམ་སེལ། རྩ་རྒྱུད་ལ་མཱཻ་དཀར་པོ་ལས་བྱམས་པ། ཚིགས་རྣམས་ ལ་སྃ་སྔོན་པོ་ལས་ཀུན་ཏུ་བཟང་པོའོ། །ཁྲོ་བོ་རྣམས་ནི་ཧཱུྃ་ལས་བྱུང་པ་སྟེ་རྟ་མགྲིན་དང་བདུད་རྩི་འཁྱིལ་པ། དམར་བ་དང་ལྗང་ཁུ་གཞན་ཐམས་ཅད་སྔོ་ནག་གོ །ལག་པ་གཡས་གཤིན་རྗེ་གཤེད། གཡོན་གཞན་གྱིས་མི་ཐུབ་པ། ཁ་ལ་རྟ་མགྲིན། གསང་བར་བདུད་རྩི་འཁྱིལ་པ། དཔུང་པ་གཡས་མི་གཡོ་བ་གཡོན་འདོད་པའི་རྒྱལ་པོ། པུས་མོ་གཡས་དབྱུག་སྔོན། གཡོན་སྟོབས་པོ་ཆེ། སྤྱི་བོར་གཙུག་གཏོར་འཁོར་ལོ་བསྒྱུར་བ། རྐང་མཐིང་གཉིས་ལ་གནོད་མཛེས་རྣམས་འགོད་དེ། དེ་ལྟར་སྐུའི་དཀྱིལ་འཁོར་རྫོགས་པ་ནི་ཆོས་དབྱིངས་དག་པ་སྟེ། ཤིན་དུ་སྦྱོར་བ་ཞེས་བྱའོ། །ནང་དུ་ཟླ་བ་བཅུས་ལུས་རྫོགས་པ་དང་། ཕྱིར་ལས་ཀྱི་དངོས་གྲུབ་མངོན་པར་ཤེས་པ་ལ་སོགས་འགྲུབ་པའི་ཕྱིར་བསྒོམ་པར་བྱའོ། །དེ་ནས་སྦྱོར་བ་ཆེན་པོས་སྐུ་གསུང་ཐུགས་བྱིན་གྱིས་བརླབ་པ། རང་གི་སྤྱི་བོ་ཟླ་བ་ལ་ཨོཾ་དཀར་པོ་འོད་ལྔ་འཕྲོ་བ་བསམས་ཏེ་དེ་ལས་ལྷ་མོ་སྤྱན་མ་དུ་མ་སྤྲོས་ལས། སྐུ་རྡོ་རྗེའི་དཀྱིལ་འཁོར་ནམ་མཁའ་གང་བ་སངས་རྒྱས་ཐམས་ཅད་ཀྱི་སྐུ་སྤྱན་དྲངས་ནས། དེའི་དབུས་ཀྱི་གཙོ་བོ་མཚན་དང་དཔེ་བྱད་ཐམས་ཅད་དང་ལྡན་པ་བསྒོམས་ལ། གསོལ་བ་གདབ་པ། དཔལ་ལྡན་རྡོ་རྗེ་སྐུ་འཆང་པ། །རྡོ་རྗེ་མི་ཕྱེད་གསུམ་བསྒོམས་པས། དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུར་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེའི་སྐུར་ནི་མཛད་དུ་གསོལ། །ཞེས་བརྗོད་ནས་སྤྱན་དང་རྣམ་པར་སྣང་མཛད་དབྱེར་མེད་པར་བཅུག་སྟེ། སྐུ་བྱིན་གྱིས་བརླབས་ནས། སངས་རྒྱས་ཀུན་གྱི་སྐུ་གང་ཡིན། །ཕུང་པོ་ལྔ་ཡིས་རབ་གང་བ། །སངས་རྒྱས་སྐུ་ཡི་ངོ་བོ་ཡིས། །བདག་ཀྱང་དེ་དང་འདྲ་བར་ཤོག །ཨོཾ་སརྦ་ཏ་ཐ་ག་ཏ་ཀ་ཡ་བཛྲ་སྭ་བྷ་ཨད་མ་ཀོ་ཧཾ་གིས་བརྟན་པར་བྱའོ། །ཡང་རང་གི་མགྲིན་པར་པད་མ་ལ་ཨཿདམར་པོ་གནས་པ་ལ་གོས་དཀར་མོ་དུ་མ་སྤྲོས་ནས། སངས་རྒྱས་ཐམས་ཅད་གསུང་རྡོ་རྗེའི་དཀྱིལ་འཁོར་དུ་བཀུག་ནས། ཆོས་ཀྱི་གསུང་མངའ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེ་དག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཞེས་བརྗོད་པས་དབྱེར་མེད་དུ་གྱུར་པར་བསྒོམས་ཏེ་ངག་ལ་བྱིན་གྱིས་བརླབས་པར་བསྒོམས་ལ། རྡོ་རྗེ་ཆོས་ཀྱི་གསུང་གང་ཡིན། །ངེས་པའི་ཚིག་ནི་ཕུན་སུམ་ཚོགས། །བདག་གི་ཚིག་ཀྱང་དེ་འདྲ་ཞིང་། །ཆོས་འཛིན་པ་དང་འདྲ་བར་ཤོག ཨོཾ་སརྦ་ཏ་ཐ་ག་ཏ་བཛྲ་སྭ་བྷ་བཱ་ཨད་མ་ཀོ་ཧྃ་ཞེས་བརྟན་པར་བྱའོ། །ཡང་སྙིང་ཁར་ཉི་མ་ལ་ཧཱུྃ་སྔོན་པོ་བསྒོམ་ནས། སྔར་ལྟར་མ་མ་ཀི་སྤྲོས་ལ། ཐུགས་རྗེའི་དཀྱིལ་འཁོར་སྤྱན་དྲངས་ནས། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། ཞེས་བརྗོད་ནས་གཉིས་སུ་མེད་པར་སྙིང་ཁར་བཅུག་ནས་ཐུགས་བྱིན་གྱིས་བརླབས་ཏེ། ཀུན་ཏུ་བཟང་པོའི་ཐུགས་གང་ཡིན། །གསང་བའི་བདག་པོ་བློ་ལྡན་པ། །བདག་ཀྱང་དེ་དང་འདྲར་གྱུར་ཅིང་། །རྡོ་རྗེ་འཛིན་དང་མཚུངས་པར་ཤོག །ཨོཾ་སརྦ་ཏ་ཐ་ག་ཏ་ཙི་ཏ་བཛྲ་སྭ་བྷ་བཱ་ཨད་མ་ཀོ་ཧཾ་ཞེས་བརྟན་པར་བྱའོ། །དེ་ནས་རིགས་གསུམ་བདག་ཉིད་ཡིན་པའི་ང་རྒྱལ་བསྐྱེད་ལ། ཨོཾ་ན་མཿསརྦ་ཏ་ཐཱ་གྷ་ཏ་ཀ་ཡ་བཱ་ག་ཙི་ཏ་བཛྲ་སྭ་བྷ་བཱ་ཨད་མ་ཀོ་ཧྃ། ཞེས་བརྗོད་དོ། །དེ་ལྟར་དམ་ཚིག་སེམས་དཔའ་གྲུབ་མ་ཐག་ཏུ་སངས་རྒྱས་ཐམས་ཅད་དང་གཅིག་ཏུ་གྱུར་པའི་རྟགས་སུ་སྙིང་ཀར་རང་ལྟ་བུའི་ཡེ་ཤེས་སེམས་དཔའ་སྐུ་མདོག་དམར་པོ་ཟླ་བའི་གདན་ལ་བསྐྱེད་དོ། དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུྃ་སྔོན་པོ་ཕྲ་བ་བསྒོམས་ཏེ། རང་གི་རིག་པ་ཡེ་ཤེས་ཀྱི་ཐིག་ལེར་གྱུར་བར་བསམ་མོ། །འདི་རྣམས་ནི་ལུས་ཅན་རྣམས་སྐྱེས་ནས་སོ་སྐྱེས་ཀྱི་བར་དུ་སྐུ་དང་། དེ་ནས་སོ་ལྷུང་གི་བར་ངག་བྱིན་གྱིས་བརླབ་པ་དེ་ནས་ལོ་བཅུ་དྲུག་གི་བར་བསམ་པ་རྫོགས་པར་བྱེད་པ་ཡིད་བྱིན་གྱིས་བརླབ་པ་དང་། དེ་ཉིད་དབང་བསྐུར་བ་བྱིས་པའི་དབང་བདུན་དུའང་གསུངས་སོ། །སེམས་དཔའ་གསུམ་དགོད་པའོ། །དེ་ལྟར་བསྙེན་པ་རྫོགས་ནས་ཕྱག་རྒྱའི་བསྒྲུབ་པ་སྨེ་ཤྭ་ཅན་ནམ། གཞན་མ་མ་ཀི་ཡིད་ལས་བྱུང་བ་གཟུགས་མཛེས་པ་སྔོ་སངས་སྒེག་པ་རྒྱན་ཐམས་ཅད་དང་ལྡན་པ་སྤྲོས་པ་བྱིན་གྱི་བརླབས་ཏེ་སྤྱི་བོར་ཨོཾ་མགྲིན་པར་ཨཱཿསྙིང་ཁར་ཧཱུྃ། ལྟེ་བར་སྭ། རྐང་བར་ཧ། ས་ཆུ་མེ་རླུང་གི་ཁམས་ལ་ནི་སྤྱན་མ་དང་མ་མ་ཀི་གོས་དཀར་མོ་སྒྲོལ་མའོ། །མིག་ཏུ་གཟུགས་རྡོ་རྗེ་མ། རྣ་བར་སྒྲ་རྡོ་རྗེ་མ། སྣ་ལ་དྲི་རྡོ་རྗེ་མ་ལྕེ་ལ་རོ་རྡོ་རྗེ་མ། ལུས་ལ་རེག་རྡོ་རྗེ་མ། ཡང་སྙིང་ཁར་ཡིད་ལ་ཐུགས་རྡོ་རྗེ་མ་ཚིགས་རྣམས་ལ་སྐུ་རྡོ་རྗེ་མའོ། །དེ་བཞིན་དུ་ཁྲོ་མོ་བཅུ་ནི་ལག་པ་གཡས་སུ་རྡོ་རྗེ་རོ་ལངས་མ། གཡོན་དུ་གཞན་གྱིས་མི་ཐུབ་མ། ཁ་ལ་ཁྲོ་གཉེར་མ། གསང་བར་རལ་ཅིག་མ། དཔུང་པ་གཡས་སུ་རྡོ་རྗེ་མ། གཡོན་དུ་སྣ་ཚོགས་རིན་ཆེན་མ། པུས་མོ་གཡས་སྣ་ཚོགས་པད་མ། གཡོན་སྣ་ཚོགས་ལས་མ། སྤྱི་བོར་མཁའ་རྡོ་རྗེ་མ། རྐང་པ་ས་འཛིན་ལྷ་མོ་རྣམས་ལྷའི་རྣམ་པའམ། ས་བོན་ནི་ཐབས་རྣམས་དང་མཐུན་ནོ། །འདི་རྣམས་ནི་ཐབས་དང་ཤེས་རབ་རོ་མཉམ་པར་བྱའོ། དེ་ནས་ཐབས་ཀྱི་རྡོ་རྗེ་ཧཱུྃ་ལས་རྡོ་རྗེ་རྩེ་ལྔ་པ་ཨོཾ་གྱིས་མཚན་པ་དང་། ཤེས་རབ་ཀྱི་མཁའ་ལས་བྱུང་བའི་པད་མ་འདབ་མ་བརྒྱད་པར་བྱིན་གྱིས་བརླབ་པོ། །དེ་ནས་འོད་ཟེར་ལྔའི་འཕྲོ་འདུས་རང་ཉིད་རིན་ཆེན་ཏོག་གི་ང་རྒྱལ་དུ་བྱས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་ར་ཀ་ཏ་བཛྲ་ས་བྷ་བཱ་ཨད་མ་ཀོ་ཧཾ་ཞེས་བརྗོད་དོ། །ཡང་རྡོ་རྗེ་འཛིན་པའི་ང་རྒྱལ་ལེགས་འཆང་ཞིང་། །ཧཱུྃ་གིས་ཀྱང་ནི་རབ་བསྐྱོད་ནས། །རང་གི་བྱང་ཆུབ་སེམས་ནི་འབྱུང་བའི་ཚེ། །དེར་ནི་ཕཊ་ཀྱི་གསང་སྔགས་བརྗོད་པར་བྱ། །དེ་ནས་བྱང་ཆུབ་ཀྱི་སེམས་ཀྱི་ཆ་ཅིག་གིས་ཕྱོགས་བཅུར་བཞུགས་པའི་སངས་རྒྱས་ཐམས་ཅད་བདེ་བ་ཆེན་པོ་དང་མཆོད་པའི་སྤྲིན་གྱིས་མཆོད་ཅིང་། །རྔ་སྒྲའི་ང་རྒྱལ་གྱིས། ཨོཾ་སརྦ་ཏ་ཐཱ་ག་ཏ་པུ་ཙ་བཛྲ་ས་བྷ་བཱ་ཨད་མ་ཀོ་ཧྃ་ཞེས་བྱིན་གྱིས་བརླབ་པོ། །རྗེས་སུ་ཆགས་པ་དང་མཉེས་པར་བྱ་བ་དེས་ནི་སེམས་ཀྱི་རྡོ་རྗེ་འཆང་ལུས་རྫོགས་པ་ཁམས་དྲུག་དང་ལྡན་པར་གྲུབ་ཅིང་སྦྱོང་བར་འགྱུར་རོ། །དེ་ཡན་ཆད་ནི་བདག་གི་དོན་ཕུན་སུམ་ཚོགས་པའི་ཏིང་ངེ་འཛིན་ཏོ།། །།དེ་ནས་གཞན་གྱི་དོན་བསྒྲུབ་པའི་ཕྱིར། ཡུམ་གྱི་མཁའ་ནས་བྱང་ཆུབ་ཀྱི་སེམས་ཀྱི་རང་བཞིན་ཨོཾ་ཨཱཿཧཱུྃ་དང་། སོ་སོའི་སྔགས་ལ་ལྷ་ཐམས་ཅད་སྤྲོ་བ་ནི། ཨོཾ་ཨཱཿཧཱུྃ་བཛྲ་དྷྲིག་ཧཱུྃ་ལས་མི་བསྐྱོད་པ་མཐིང་ཀ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་བ་སྤྱན་གསུམ་གསུམ་དང་ལྡན་པ་རལ་པའི་ཐོར་ཚུགས་ཅན། སོ་སོའི་གཡས་ཀྱི་ཕྱག་གསུམ་རྡོ་རྗེ་རྩེ་ལྔ་པ་དང་། འཁོར་ལོ་པད་མ་དམར་པོ་གཡོན་གསུམ་གྱིས་དྲིལ་བུ་དང་རིན་པོ་ཆེ་དང་རལ་གྲི་འཛིན་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཡུམ་དང་བཅས་པ་སྤྲོས་པས་ཕྱོགས་བཅུ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ལ་སོགས་པས་སངས་རྒྱས་ཀྱི་མཛད་པ་ཀུན་མཛད་ནས་སེམས་ཅན་ཐམས་ཅད་ཞེ་སྡང་རྣམ་པར་དག་པ་རྡོ་རྗེ་ཅན་གྱི་གནས་ལ་བཀོད་ནས། ཚུར་འདུས་པས་རང་ཉིད་ལ་ཆུ་ལ་ཆུ་ཐིམ་པ་ལྟར་གྱུར་པས། རང་ཉིད་ཀྱང་ཞེ་སྡང་རྡོ་རྗེ་སྔ་མ་ལས་ཆེས་འོད་འབར་བ་རྩ་བའི་ཞལ་དྲག་པོ་གཡས་ཞི་བ་གཡོན་སྒེག་ཅིང་ཆགས་པ་འོད་ཟེར་དམར་པོ་འབར་བ་ཉི་མའི་གདན་ལ་དཀྱིལ་དཀྲུང་གི་བཞུགས་པ། ཡུམ་རེག་བྱ་རྡོ་རྗེ་མ་རང་ལྟ་བུས་འཁྱུད་པར་གྱུར་པར་བལྟའོ། །དེ་ཡང་འཁོར་སྤྲོ་བ་ནི་ཨོཾ་ཨ་ཛཱི་ནཱ་ཛིག་ཧཱུྃ་ལས་རྣམ་པར་སྣང་མཛད་སྐུ་མདོག་དཀར་པོ་ཞལ་གསུམ་ཕྱག་དྲུག་པའི་ཞི་བའི་ཚུལ་ཅན། ཞལ་གཡས་སྔོ་གཡོན་དམར་བ། ཕྱག་གཡས་གསུམ་ན་འཁོར་ལོ་རྡོ་རྗེ་པད་མ། གཡོན་གསུམ་ན་དྲིལ་བུ་རིན་ཆེན་རལ་གྲི་ཅན་སྤྲོས་ལ་སེམས་ཅན་ཐམས་ཅད་གཏི་མུག་རྣམ་པར་དག་པའི་གནས་ལ་བཀོད་ནས་ཚུར་བྱོན་ཏེ་ཤར་ཕྱོགས་སུ་ཟླ་བ་ལ་བཞུགས་སོ། །ཨོཾ་ཨཱཿརད་ན་དྷྲིག་ཧཱུྃ་ལས་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གསུམ་ཕྱག་དྲུག་པ་གཡས་ནག་གཡོན་དཀར་བ། གཡས་རྣམས་རིན་པོ་ཆེ་དང་རྡོ་རྗེ་འཁོར་ལོ། གཡོན་ན་དྲིལ་བུ་པད་མ་སེར་པོ་རལ་གྲི་ཅན་སྤྲོས་ནས་སེམས་ཅན་ཐམས་ཅད་ང་རྒྱལ་རྣམ་པར་དག་པའི་གནས་ལ་བཀོད་ནས། ལྷོར་རིན་པོ་ཆེ་ལ་བཞུགས་སོ། །ཨོཾ་ཨཱཿཨ་རོ་ལིག་ཧཱུྃ་ལས་འོད་དཔག་ཏུ་མེད་པ་དམར་པོ་ཞལ་གཡས་ནག་གཡོན་དཀར་བ། ཕྱག་དྲུག་གི་དང་པོ་གཡོན་གྱིས་དྲིལ་བུ་དང་པད་མའི་སྡོང་པོ་འཛིན་པ། གཡས་ཀྱི་ཐུགས་ཀར་འབྱེད་པ་མཛད་པ་འོག་མ་གཡས་གཉིས་རྡོ་རྗེ་དང་འཁོར་ལོ་གཡོན་གཉིས་རིན་པོ་ཆེ་དང་རལ་གྲི་ཅན། སྒེག་པའི་ཉམས་དང་ལྡན་པ་སྤྲོས་ལ་སེམས་ཅན་ཐམས་ཅད་འདོད་ཆགས་རྣམ་པར་དག་པའི་གནས་ལ་བཀོད་ནས། ནུབ་ཏུ་པད་མ་ལ་བཞུགས་སོ། །ཨོཾ་ཨཱ་པྲད་ཛྙྱ་དྷྲིག་ཧཱུྃ་ལས་དོན་ཡོད་རྡོ་རྗེ་ལྗང་ཁུ་ཞལ་གསུམ་ཕྱག་དྲུག་པ། གཡས་ནག་གཡོན་དཀར་བ། ཕྱག་གཡས་རྣམས་རལ་གྲི་སྣ་ཚོགས་རྡོ་རྗེ་འཁོར་ལོ། གཡོན་རྣམས་དྲིལ་བུ་པད་མ་ལྗང་ཁུ་ནོར་བུ་ཅན་སྤྲོས་ལ་ཕྲག་དོག་ཅན་གྱི་སེམས་ཅན་ཐམས་ཅད་ལོག་པའི་ང་རྒྱལ་རྣམ་པར་དག་པའི་གནས་ལ་བཀོད་ནས། བྱང་དུ་རྒྱ་གྲམ་གྱི་སྟེང་དུ་བཞུགས་སོ། །རྒྱལ་བ་འདི་རྣམས་རྡོ་རྗེའི་དཀྱིལ་དཀྲུང་གིས་བཞུགས་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་སྟོད་གཡོགས་སྨད་གཡོགས་དང་། རལ་པའི་ཐོར་ཚུགས་ཅན་རིགས་ཀྱི་བདག་པོ་མི་སྐྱོད་པའི་དབུ་རྒྱན་པ་ཡིན་ནོ། །ཨོཾ་ཨ་མོ་ཧ་ར་ཏི་ཧཱུྃ་ལས་སྤྱན་མ་དཀར་མོ་ཞལ་གསུམ་ཕྱག་དྲུག་པ་རྣམ་སྣང་ལྟ་བུ་ལ་གཡས་ཐ་མ་ཨུད་པ་ལ་དཀར་པོ་འཛིན་པ་སྤྲོས་ལ། གདོན་དང་ནད་ཐམས་ཅད་ཞི་བར་མཛད་ནས་མེར་ཟླ་བ་ལ་བཞུགས་སོ། །ཨོཾ་ཨཿདྷ་ཤེ་ར་ཏི་ཧཱུྃ་ལས་མ་མ་ཀི་སྔོན་མོ་མི་བསྐྱོད་པ་ལྟ་བུ་ཞལ་གསུམ་ཕྱག་དྲུག་པ། གཡས་ཐ་མས་ཨུད་པ་ལ་སྔོན་པོ་འཛིན་པ་སྤྲོས་ལ་སེམས་ཅན་ཐམས་ཅད་ཀྱི་བགེགས་བསྲུང་བར་མཛད་ནས་བདེན་བྲལ་དུ་བཞུགས་སོ། ཨོཾ་ཨཱཿར་ག་ར་ཏི་ཧཱུྃ་ལས་གོས་དཀར་མོ་དམར་མོ་འོད་དཔག་མེད་ལྟ་བུ་པད་མའི་དོད་དུ་ཨུད་པ་ལ་དམར་པོ་ཅན་སྤྲོས་ལ་སེམས་ཅན་ཐམས་ཅད་ཀྱི་གནོད་པ་ཞི་བར་བྱས་ནས་རླུང་མཚམས་སུ་བཞུགས་སོ། །ཨོཾ་ཨཱཿབཛྲ་ར་ཏི་ཧཱུྃ་ལས་སྒྲོལ་མ་ལྗང་ཁུ་ཞལ་དོན་ཡོད་གྲུབ་པ་ལྟ་བུ་ལས་ཕྱག་དྲུག་གི་གཡས་གསུམ་སྣ་ཚོགས་རྡོ་རྗེ་འཁོར་ལོ་ཨུད་པ་ལ་ལྗང་ཁུ། གཡོན་གསུམ་ན་དྲིལ་བུ་རིན་ཆེན་རལ་གྲི་ཅན་སྤྲོས་ལ་སེམས་ཅན་ཐམས་ཅད་དབང་དུ་མཛད་དེ་དབང་ལྡན་དུ་བཞུགས་སོ། །རིམ་པ་གཉིས་པ་མཚམས་བཞིར། ཨོཾ་ཨཱཿརུ་པ་བཛྲ་ཧཱུྃ་ལ་གཟུགས་རྡོ་རྗེ་སྤྱན་མ་ལྟ་བུ་ལ་ཕྱག་དང་པོ་གཉིས་མེ་ལོང་འཛིན་པ་མེ་རུའོ། ཨོཾ་ཨཱཿཤ་པ་ཏ་བཛྲ་ཧཱུྃ་ལས་སྒྲ་རྡོ་རྗེ་སེར་མོ་མ་མ་ཀི་ལྟ་བུ་ལ་ཞལ་གཡས་ནག་གཡོན་དཀར་བ་ཕྱག་དང་པོ་གཉིས་པི་ཝང་རྡེབས་པ་ལྷོ་ནུབ་ཏུའོ། །ཨོཾ་ཨཱཿགྷན་དྷེ་བཛྲ་ཧཱུྃ་ལས་དྲི་རྡོ་རྗེ་མ་གོས་དཀར་མོ་ལྟ་བུ་ཕྱག་དང་པོ་གཉིས་ཀྱིས་དྲིའི་དུང་བསྣམས་པ་ནུབ་བྱང་དུའོ། །ཨོཾ་ཨཿར་ཀྵྼེ་བཛྲ་ཧཱུྃ་ལས་རོ་རྡོ་རྗེ་མ་སྒྲོལ་མ་ལྗང་གུ་་ཕྱག་དང་པོ་གཉིས་ན་ལྷའི་ཞལ་ཟས་འཛིན་པ་བྱང་ཤར་དུའོ། །ཨོཾ་ཨཱཿཔར་ཤེ་བཛྲ་ཧཱུྃ་ལས་རེག་རྡོ་རྗེ་མ་བདག་པོ་ལྟ་བུ་ཡུམ་ཉིད་ལ་བསྡུས་ཏེ་བདེ་བ་ཆེན་པོའི་རང་བཞིན་འདི་རྣམས་སྤྲོས་པས་ནི། སེམས་ཅན་ཐམས་ཅད་ལ་འདོད་པའི་ཡོན་ཏན་སྟེར་ཞིང་ སྦྱོང་ལ་ཚུར་རྒྱལ་བའི་དཀྱིལ་འཁོར་མཉེས་པར་བྱེད་པའོ། །རིམ་པ་གསུམ་པ་ལ་ཤར་དུ་ཨོཾ་ཨཱཿམཱཻ་མེ་ཏྲི་ན་ཐ་ཤྲི་ཧཱུྃ་ལས་བྱམས་པ་རྩ་རྒྱུས་སྦྱོང་ཞིང་བྱམས་པས་ཁྱབ་པར་བྱེད་པའོ། །མེ་རུ་ཨོཾ་ཨཿཐལྷིཾ་ཀྵི་དེ་གརྦ་ཧཱུྃ་ལས་སའི་སྙིང་པོ་མིག་སྦྱོང་ཞིང་ལྷའི་མིག་རྩོལ་བ་སྟེ། གཉིས་ཀ་རྣམ་སྣང་ལྟ་བུ་ལ་བྱམས་པའི་གཡས་དང་པོ་ཀླུ་ཤིང་མེ་ཏོག་བསྣམས་པའོ། །ལྷོ་ཨོཾ་ཨཱཿཨོཾ་བཛྲ་པ་ནི་ཧཱུྃ་ལས་ཕྱག་ན་རྡོ་རྗེ་རྣ་བ་སྦྱོང་ཞིང་སྒྲ་ཐམས་ཅད་མཁྱེན་པར་བྱེད་པའོ། །ལྷོ་ནུབ་དུ་ཨོཾ་ཨཿཨོཾ་ཁ་གྷར་པ་ཧཱུྃ་ལས་ནམ་མཁའི་སྙིང་པོ་སྣ་སྦྱོང་ཞིང་དྲིའི་མངོན་ཤེས་རྩོལ་བ་སྟེ་གཉིས་ཁ་རིན་ཆེན་འབྱུང་ལྡན་ལྟ་བུའོ། །ནུབ་ཏུ་ཨོཾ་ཨཱཿཨོཾ་ལོ་ཀི་ཤྭ་ར་ཧཱུྃ་ལས་འཇིག་རྟེན་དབང་ཕྱུག་ལྕེ་སྦྱོང་ཞིང་རོའི་མངོན་ཤེས་སྟེར་བའོ། །ནུབ་བྱང་དུ་ཨོཾ་ཨཱཿཧཱུྃ་མན་ཛུ་ཤྲི་ཧཱུྃ་ལས་འཇམ་པའི་དབྱངས་ཐམས་ཅད་དུ་འཇུག་པའི་ཡིད་སྦྱོང་ཞིང་གཞན་གྱི་སེམས་ཤེས་རྩོལ་བ་སྟེ་གཉིས་ཀ་འོད་དཔག་མེད་ལྟ་བུའོ། །བྱང་དུ་ཨོཾ་ཨཿཨོཾ་སརྦ་གྷྃ་བྷི་ར་ཧཱུྃ་ལས་སྒྲིབ་པ་ཐམས་ཅད་སེལ་བ་ལུས་དག་པར་བྱེད་ཅིང་རྡོ་རྗེའི་ལུས་རྩོལ་བའོ། །བྱང་ཤར་དུ་ཨོཾ་ཨཱཿསཾ་ས་མན་ཏ་བྷ་ཏྲ་ཧཱུྃ་ལས་ཀུན་ཏུ་བཟང་པོ་ཚིག་རྣམས་སྦྱོང་ཞིང་ལུས་ཀྱི་རྫུ་འཕྲུལ་སྟེར་བར་མཛད་པ་སྟེ་གཉིས་ཀ་རྔ་སྒྲ་ལྟ་བུའོ། །སྒོ་དང་འཚམས་སུ། །ཨོཾ་ཨཿཡ་མན་ཏ་ཀྲིད་ཧཱུྃ་ཕཊ་ལས་གཤིན་རྗེ་གཤེད་ནག་པོ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་བ་གཡས་རྣམས་དབྱུག་པ་རྡོ་རྗེ་འཁོར་ལོ་གཡོན་ཐུགས་ཀར་སྡིག་འཛུབ་དང་བཅས་པའི་ཞགས་པ་དང་། དྲིལ་བུ་དགྲ་སྟ་ཅན་དབང་པོའི་གདོན་སྐྲག་པར་མཛད་པ་ཤར་དུའོ། །ཨོཾ་ཨཱཿཔྲ་ཛྙྱ་ཏ་ཀྲིད་ཧཱུྃ་ཕཊ་ལས་ཤེས་རབ་མཐར་བྱེད་དཀར་པོ། གཡས་ནག་གཡོན་དམར་བ་ཕྱག་གཡས་རྡོ་རྗེ་དབྱུག་པ་རལ་གྲི། གཡོན་ཐུགས་ཀར་སྡིག་འཛུབ་དང་བཅས་པའི་ཞགས་པ་དང་། དྲིལ་བུ་དགྲ་སྟ་ཅན། གཤིན་རྗེའི་གདོན་བཅོམ་ནས་ལྷོ་སྒོ་རུའོ། །ཨོཾ་ཨཿཔད་མན་ཏ་ཀྲིད་ཧཱུྃ་ཕཊ་ལས་རྟ་མགྲིན་དམར་པོ་གཡས་ནག་གཡོན་དཀར་པོ། ཕྱག་གཡས་པད་མ་རལ་གྲི་གཏུན་ཤིང་། གཡོན་སྙེམས་པ་དང་བཅས་པས་དྲིལ་བུ་དང་དགྲ་སྟ་ཞགས་པ་ཅན། ཀླུ་རྣམས་སྐྲག་པར་མཛད་པ་ནུབ་ཀྱི་སྒོ་རུའོ། །ཨོཾ་ཨཿབིག་ནན་ཏ་ཀྲིད་ཧཱུྃ་ཕཊ་ལས་བདུད་རྩི་འཁྱིལ་པ་སྐུ་མདོག་ལྗང་ཁུ་ཞལ་གཡས་དམར་གཡོན་དཀར་བ། ཕྱག་གཡས་གསུམ་སྣ་ཚོགས་རྡོ་རྗེ། འཁོར་ལོ་གཏུན་ཤིང་། གཡོན་གསུམ་སྡིག་འཛུབ་དང་བཅས་པའི་ཞགས་པ་དང་དྲིལ་བུ་དགྲ་སྟ་ཅན། བགེགས་ཕུར་བུས་འདེབས་པ་བྱང་གི་སྒོ་རུའོ། །ཨོཾ་ཨཿཨརྻ་ཨ་ཙ་ལ་ཧཱུྃ་ཕཊ་ལས་མི་གཡོ་བ་སྔོན་པོ་ཞལ་གཡས་དམར་བ་གཡོན་དཀར་བ། ཕྱག་གཡས་གསུམ་ན་རལ་གྲི་རྡོ་རྗེ་འཁོར་ལོ་གཡོན་གསུམ་ན་སྡིག་འཛུབ་དགྲ་སྟ་ཞགས་པ་ཅན། ཡམས་ལ་སོགས་པ་བཅོམ་ནས་ཤར་ལྷོ་འཚམས་སུ་བཞུགས་སོ། །ཨོ་ཨཿཏ་ཀྲི་ར་ཙ་ཧཱུྃ་ཕཊ་ལས་འདོད་པའི་རྒྱལ་པོ་སྔོན་པོ་ཞལ་གཡས་དཀར་གཡོན་དམར་བ། ཕྱག་དང་པོ་གཉིས་རྡོ་རྗེ་ཧཱུྃ་མཛད་ཀྱི་ཕྱག་རྒྱ་ཅན། གཡས་འོག་མ་གཉིས་རྡོ་རྗེ་རལ་གྲི་གཡོན་ཞགས་པ་ལྕགས་ཀྱུ་ཅན་སྲིན་པོའི་གདོན་སྐྲག་པར་མཛད་པ་ལྷོ་ནུབ་ཏུ་བཞུགས་སོ། །ཨོཾ་ཨཿནི་ལ་དྷན་ཏ་ཧཱུྃ་ཕཊ་ལས་དབྱུག་པ་སྔོན་པོ་མཐིང་ཁ་གཡས་དཀར་གཡོན་དམར་བ། ཕྱག་གཡས་གསུམ་དབྱུག་པ་རལ་གྲི་འཁོར་ལོ། གཡོན་གསུམ་སྡིག་འཛུབ་པད་མ་དགྲ་སྟ་ཅན་ནད་ཀྱི་འཇིགས་པ་བསལ་ནས་ནུབ་བྱང་དུ་བཞུགས་སོ། །ཨོཾ་ཨཿམ་ཧཱ་བ་ལ་ཧཱུྃ་ཕཊ་ལས་སྟོབས་པོ་ཆེ་སྔོན་པོ་ཞལ་གཡས་དམར་གཡོན་དཀར་བ་ཕྱག་གཡས་གསུམ་དབྱུག་པ་རལ་གྲི་འཁོར་ལོ། གཡོན་གསུམ་སྙིང་ཁར་སྡིག་འཛུབ་དང་བཅས་པའི་ཞགས་པ་དང་རལ་གྲི་དགྲ་སྟ་ཅན་སྦྲུལ་གྱིས་བརྒྱན་པ་མཁའ་འགྲོའི་འཇིགས་པ་བཅོམ་ནས་བྱང་ཤར་དུ་བཞུགས་སོ། ཨོཾ་ཨཱཿཨུ་ཤྞི་ཤ་ཙཀྲ་ཝར་ཏི་ཧཱུྃ་ཕཊ་ལས་གཙུག་གཏོར་འཁོར་ལོས་བསྒྱུར་བ་སྔོ་བསངས་ཞལ་གཡས་དཀར་གཡོན་དམར་བ་ཕྱག་དང་པོ་གཉིས་གཙུག་གཏོར་འཛིན་པ་གཡས་འོག་མ་གཉིས་རྡོ་རྗེ་པད་མ་གཡོན་གཉིས་སྡིག་འཛུབ་རལ་གྲི་ཅན་འཚེ་བ་ཐམས་ཅད་བཅོམ་ནས་སྟེང་གི་ཕྱོགས་སུ་བཞུགས་སོ། ཨོཾ་ཨཿསུམ་བྷ་ར་ཙ་ཧཱུྃ་ཕཊ་ལས་གནོད་མཛེས་ནམ་མཁའི་མདོག་ཅན་ཞལ་གཡས་དཀར་གཡོན་དམར་བ་ཕྱག་གཡས་གསུམ་ན་རྡོ་རྗེ་འཁོར་ལོ་རིན་པོ་ཆེ་གཡོན་སྡིག་འཛུབ་དང་བཅས་པའི་ཞགས་པ་དང་པད་མ་རལ་གྲི་ཅན་དུག་དང་བགེགས་ཐམས་ཅད་བཅོམ་ནས་ས་འོག་ཏུ་བཞུགས་སོ། །ཁྲོ་བོ་ཐམས་ཅད་ཉི་མ་ལ་གཡོན་བརྐྱང་པའི་ཞབས་ཀྱིས་བཞུགས་པ་རིན་པོ་ཆེའི་རྒྱན་དང་ཁྲོ་བོ་ཆས་དང་ལྡན་པ། གསུས་པ་འཕྱང་བ་སྤྱན་གསུམ་པ་མཆེ་བ་གཙིགས་པས་འཇིགས་པར་བྱེད་པའོ། །ལྷ་ཐམས་ཅད་ཀྱང་སྟེང་འོག་དང་རེག་རྡོ་རྗེ་མི་བསྐྱོད་པས་བརྒྱན་པའོ། །ཤར་དང་མེ་རྣམས་རྣམ་སྣང་ལྷོ་དང་བདེན་བྲལ་གྱི་ལྷ་རྣམས་ལ་རིན་ཆེན་འབྱུང་ལྡན། ནུབ་དང་རླུང་གི་རྣམས་འོད་དཔག་མེད། བྱང་དང་དབང་ལྡན་རྣམས་དོན་ཡོད་གྲུབ་པའི་དབུ་རྒྱན་ཅན་ནོ། །དེ་ལྟར་གཞན་གྱི་དོན་ཕུན་སུམ་འཚོགས་པའི་དཀྱིལ་འཁོར་ཐམས་ཅད་བསྐྱེད་ནས་སྐུ་གསུང་ཐུགས་བྱིན་བརླབས་དང་ཡེ་ཤེས་སེམས་དཔའ་རང་ཆས་སུ་གནས་པའོ། །ཏིང་འཛིན་སེམས་དཔའ་ནི་ཐུགས་ཁར་སོ་སོའི་ས་བོན་བཀོད་དེ་ངག་གི་བཟླས་པ་ལ་སྤྲོ་བསྡུའི་ཚེ་དགོས་ཕྱིར་རོ། །དེ་ལྟར་གསལ་བར་བསྒོམ་པ་ནི་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ཏོ། །འདི་རྣམས་ནི་ཕྱི་རོལ་ཏུ་ལུས་རྫོགས་པའི་སྐྱེས་བུ་བུ་དང་བུ་མོ་འབྱིན་པ་དང་ལས་ཐམས་ཅད་བྱེད་པའི་འཁྲུལ་པའི་སྦྱོར་བ་དང་། མཐར་ཐུག་ཡེ་ཤེས་ཐོབ་པ་ན་གཟུགས་ཀྱི་སྐུ་རྣམ་པ་གཉིས་ཀྱིས་སེམས་ཅན་གྱི་དོན་བྱེད་པའི་ཚུལ་བརྗོད་པ་ཡིན་ནོ། །ཡང་ལྷའི་སྐུ་རྫོགས་པ་ནི་ཕྱག་རྒྱ་ཆེན་པོའོ། བཙུན་མོ་ནི་དམ་ཚིག་གི་ཕྱག་རྒྱ་སྔགས་ཀྱི་ཡི་གེ་ནི་ཆོས་ཀྱི་ཕྱག་རྒྱ་སྣ་ཚོགས་པའི་སེམས་ཅན་གྱི་དོན་བྱེད་ཅིང་ བསྒྲུབ་པ་ལས་ཀྱི་ཕྱག་རྒྱའོ། །དེ་ལྟར་རྒྱས་བཏབ་པ་ནི་གཞན་གྱི་དོན་སྒྲུབ་པར་བྱེད་པའོ། །དེ་ནས་ཕྲ་མོའི་རྣལ་འབྱོར་བསྒོམས་ཏེ་སྔར་བསྟན་པ་ལྟར་ལྷ་ཐམས་ཅད་ཀྱི་མཁའ་གསང་བྱིན་གྱིས་བརླབས་ནས་བདེ་བ་ཆེན་པོའི་སྦྱོར་བས་བྱང་ཆུབ་ཀྱི་སེམས་བདག་གི་གསང་བར་ཡུངས་དཀར་གྱི་ཚད་ཙམ་ཡི་གེ་གསུམ་གྱིས་མཚན་པ་བསྒོམ་མོ། །སྣ་ཡི་རྩེ་མོར་ཡུངས་དཀར་བསམ། །འགྲོ་དང་མི་འགྲོ་ཡུངས་དཀར་ལ། །གསང་བའི་སྔགས་ཀྱིས་བཏགས་པ་ཡི། །ཡེ་ཤེས་མཆོག་གི་གནས་བསྒོམ་མོ། །ཞེས་བྱ་བ་བྱང་ཆུབ་ཀྱི་སེམས་ཀྱི་ཕྲ་མོའོ། །རླུང་གི་ཕྲ་མོ་ནི་རང་ཉིད་དང་ལྷ་ཐམས་ཅད་ཀྱིའང་རུང་སྟེ་སྟེང་གི་སྣ་རྩེར་རླུང་ལྔའི་ངོ་བོ་ཁ་དོག་ལྔ་དང་ལྡན་པ་ཡུངས་དཀར་ཙམ་ལ་བརྟན་པར་བཞག་ལ། སེམས་བརྟན་པར་གྱུར་པ་དང་། ཁ་དོག་ལྔ་དང་ལྡན་པའི་འོད་རྒྱ་ཆེར་སྤྲོས་ལ་སྣོད་དང་བཅུད་ཐམས་ཅད་ཁྱབ་ནས་ལྷའི་དཀྱིལ་འཁོར་གྱི་སྤྲིན་དུ་གསལ་བར་བསྒོམ་པར་བྱའོ། །རིན་ཆེན་ཁ་དོག་རྣམ་པ་ལྔ། ཡུངས་དཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་རིག་པས་རྟག་ཏུ་བསྒོམ། །རིན་ཆེན་ལྡན་པར་གྱུར་ནས་སྤྲོ། །བརྟན་པར་མ་གྱུར་དེ་མི་སྤྲོ། །སངས་རྒྱས་འབར་བའི་འོད་མཉམ་པ། །རབ་མཆོག་སྤྲིན་ནི་སྤྲོ་བར་བྱ། །ཞེས་གསུངས་པ་ནི་ཡེ་ཤེས་ཀྱི་རིམ་པ་རྡོ་རྗེའི་བཟླས་པའོ། །རྫོགས་རིམས་ནི་འདིར་མི་བརྗོད་དོ། དེ་ནས་ངག་གི་བཟླས་པ་ནི་སྤྲོ་བསྡུ་དང་ལས་སོ་སོ་ལ་དམིགས་པ་གང་ཡང་རུང་བ། ཨོཾ་ཨཿབཛྲ་དྷིག་ཧཱུྃ་ཕཊ་སྭ་ཧཱ་ཞེས་བྱ་བ་ལ་སོགས་པ་སྔར་བརྗོད་པ་བཟླས་སོ། །དེ་ཡང་ཞི་བ་སྒྲ་ཆུང་ངུ་དང་ཁྲོ་བོ་དྲག་ཏུ་བཟླས་པར་བཤད་དོ། །དེ་ནས་དཀྱིལ་འཁོར་དང་བཟླས་པའི་རིམ་པར་འཛིན་པ་དེ་དོན་དམ་པར་འཇུག་པ་ནི། གཙོ་བོའི་གནས་ལྔ་ན་ས་བོན་གནས་པ་ཐམས་ཅད་སྙིང་ཁའི་ཧཱུྃ་ལ་འོད་ལྔ་དང་ལྡན་པའི་ཐིག་ལེར་བསྡུས་ལ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་བསྒོམ་མོ། །དེ་ལྟར་དེ་བཞིན་ཉིད་དུ་ཞུགས་པ་ལ། སྤྱན་མ་ལ་སོགས་པའི་ལྷ་མོ་རྣམས་ཀྱིས་སེམས་ཅན་གྱི་དོན་དུ་གླུས་བསྐུལ་བར་བྱ་སྟེ། ཐོག་མར་སྤྱན་མས་བྱམས་པ་ཚད་མེད་པས་བསྐུལ་བ། །སེམས་ཅན་ཁམས་ན་གནས་པའི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བ་ཡིད་འོང་དོན་ཆེན་འདོད་པ་བདག་ལ་སྐྱབས་ཏུ་གསོལ། མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །མ་མ་ཀིས་སྙིང་རྗེ་ཚད་མེད་པས་བསྐུལ་བ། རྡོ་རྗེའི་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་མཆོག་བསྒྲུབ་རབ་ཏུ་ཕན་པར་གཟིགས། མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །གོས་དཀར་མོས་དགའ་བ་ཚད་མེད་པས་བསྐུལ་བ། །ཁྱོད་ནི་རྡོ་རྗེ་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་ནི་དགོས་པའི་དོན་མཛད་པ་ལ་རབ་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་ཏུ་བཟང་པོ་བདག་ལ་དགྱེས་པར་མཛད་དུ་གསོལ། །སྒྲོལ་མས་བཏང་སྙོམས་ཚད་མེད་པས་བསྐུལ་བ། །ཁྱོད་ནི་རྡོ་རྗེའི་ཐུགས་ཏེ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་པའི་གདུང་མཆོག་མཉམ་པ་ཉིད་གཟིགས་ལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཅེས་བསྐུལ་བ་སྔ་མ་ལྟར་བཞེངས་ནས་དེ་མ་ཐག་ཏུ་དེ་བཞིན་གཤེགས་པ་རྣམས་ཀྱིས་བསྟོད་པར་མཛད་དེ། ཐོག་མར་ཞེ་སྡང་རྡོ་རྗེ་རང་ཉིད་ཀྱི་ཐུགས་ཀ་ནས་མི་བསྐྱོད་པ་སྤྲོས་པས་བསྟོད་པ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུང་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་ལོ། །རྣམ་པར་སྣང་མཛད་ཀྱིས་བསྟོད་པ། རྣམ་པར་སྣང་མཛད་རབ་ཏུ་དག །རྡོ་རྗེ་ཞི་བ་དགའ་ཆེན་པོ། །རང་བཞིན་གྱིས་ནི་འོད་གསལ་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་འབྱུང་ལྡན་གྱིས་བསྟོད་པ། རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །དངོས་ཉིད་དག་པ་གོས་པ་མེད། །གསང་བའི་གསུང་ལ་ཕྱག་འཚལ་ལོ། །འོད་དཔག་མེད་ཀྱིས། རྡོ་རྗེ་མི་མཆི་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་ལོ། །དོན་ཡོད་གྲུབ་པས་བསྟོད་པ། རྡོ་རྗེ་དག་པ་གདོན་མི་ཟ། །བསམ་པ་ཐམས་ཅད་རྫོགས་མཛད་པ། །སངས་རྒྱས་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་ལོ། །ཞེས་བསྟོད་ནས་དེའི་འོག་ཏུ་གཟུགས་རྡོ་རྗེ་ལ་སོགས་པ་རྣམས་ཀྱིས་དཀྱིལ་འཁོར་ཐམས་ཅད་ལ་མཆོད་ཅིང་། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པས་ལྷ་ཐམས་ཅད་མཉེས་པར་བྱས་ནས་ཐུན་བསྡུ་བར་འདོད་པས་ཐུགས་ཁའི་ཧཱུྃ་ལས་འོད་འཕྲོས་ནས་དཀྱིལ་འཁོར་ཐམས་ཅད་ལུས་ཀྱི་དཀྱིལ་འཁོར་དུ་བསྡུའོ། །ལུས་ཀྱི་དཀྱིལ་འཁོར་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཧཱུྃ་ལས་བསྡུའོ། །ཡང་དེ་མ་ཐག་ཏུ་ཧཱུྃ་ལས་འོད་ཟེར་བྱུང་ནས་ཡི་གེ་ཧཱུྃ་གིས་ནམ་མཁའི་ཁམས་བཀང་སྟེ་སེམས་ཅན་ཐམས་ཅད་ལ་ཐིམ་པས་རྡོ་རྗེ་སེམས་དཔའ་ཞལ་ཅིག་ཕྱག་གཉིས་པར་གྱུར་ཏེ་ཐམས་ཅད་བསྡུས་ནས། མགོན་པོ་བདེ་བ་ཆེན་པོ་ཅིག་ཏུ་ཞུགས་པར་གྱུར་ཏོ། །རིམ་པ་འདི་རྣམས་ནི་འདིར་བདག་ཉིད་ཆེན་པོ་ཀླུ་གྲུབ་ཀྱིས། མིར་གྱུར་པ་ཁམས་བཞི་བརྟས་པར་བྱེད་པའི་ཕྱིར། གཉིད་དང་བཟའ་བ་དང་རེག་པ་དང་ཡིད་ལ་བྱེད་པས་ཡང་ནས་ཡང་དུ་བསྐུལ་བ་དེ་སྦྱོང་བའི་ཕྱིར་ལྷ་མོས་བསྐུལ་བ་དང་། གཟུགས་ལ་སོགས་པ་ཕུང་པོ་ལྔ་པོ་དེས་བརྟས་པས་ན་སངས་རྒྱས་ལྔས་བསྟོད་པར་མཛད་པ་ཉིད་དུ་དགོངས་ནས་རིམ་པ་འདི་མཛད་དོ། །དྲི་མ་མེད་པའི་འོད་དུ་ཀླུའི་དོན་སྐྱེ་བའི་སྐབས་སུ་རླུང་བཞིས་བསྐུལ་བར་གསུངས་སོ། །ཐུན་བསྡུ་བའི་རིམ་པ་ནི་ལུས་ཅན་རྣམས་འཆི་བ་ན། ཐོག་མར་ཡན་ལག་བྲི་བས་ཚིགས་ཉམས་པ་དང་། དེ་ནས་སྣང་བ་ཐིམ་པ་དང་དེ་ནས་རགས་པ་ཐིམ་པ་དང་། ཕྲ་བ་སྣང་མཆེད་ཐོབ་པ་ཐིམ་ནས་འོད་གསལ་བ་ལ་འཇུག་པའི་རིམ་པ་རྣམས་ཇི་ལྟ་བ་ཡིན་ནོ། དེ་རྣམས་སྦྱངས་པས་སྐུ་བཞི་ཐོབ་པ་སྟེ། གཉིད་ལ་སོགས་པ་སེམས་མེད་པ་ནི་ཆོས་སྐུ། རྨི་ལམ་དང་བར་དོ་དེ་ནི་ལོངས་སྐུ། ཐ་མལ་གྱི་སྣང་བ་ནི་སྤྲུལ་སྐུ། ཆགས་པ་ནི་ཡེ་ཤེས་ཀྱི་སྐུ་སྟེ། །དེས་ན་འདི་སྦྱངས་པས་འཁྲུལ་པ་དག་པར་གྱུར་པས་རྣལ་འབྱོར་ཅན་རྣམས་ཀྱིས་རིམ་པ་དེ་ལྟར་སྦྱང་གཞི་དང་སྦྱོང་བྱེད་ཤེས་པར་བྱས་ཏེ་བསྒོམ་མོ། །ཐུན་བསྡུ་བའོ། །ལས་རྒྱལ་པོ་མཆོག་གི་ཡན་ལག་བརྗོད་པར་བྱ་སྟེ། བསྐྱེད་རྫོགས་བསྒོམ་པའི་ཚེ་ལུས་བསྐམ་པ་དང་གྲེ་བ་སྐམ་པར་གྱུར་ན་སྤྱི་བོར་བམ་ལས་ཟླ་བའི་དཀྱིལ་འཁོར་བསམས་ལ་བཅུད་འོ་མ་ལྟ་བུ་བྱུང་བས་ལུས་གང་བར་བསྒོམས་ནས་ལྕེའུ་ཆུང་ཨོཾ་གྱིས་མཚན་པ་ལས་རླུང་དང་ལྕེས་བདུད་རྩི་བླངས་ནས་མིད་ལ་རླུང་ཁ་སྦྱོར་བསྒོམས་ན་བཅུད་ལེན་དུ་འགྱུར་ཞིང་ཚེ་རིང་བར་བྱེད་དོ། །ཡང་ཟས་མང་དུ་ཟ་ན་ནང་གི་སྦྱིན་བསྲེག་བྱ་སྟེ། བཟའ་བ་ནི་མེ་རླུང་དང་ཡི་གེ་གསུམ་གྱི་སྦྱང་ངོ་། །རང་གི་མགྲིན་པར་ཧྲི་ལ་པད་མ་འདབ་བརྒྱད་བསམས་ཏེ་དེའི་སྟེང་དུ་ཧཱུྃ་ལས་ལྕེ་རྡོ་རྗེ་རྩེ་ལྔར་བསྒོམ། རྩ་གསུམ་འདུས་པ་ནས་མེ་མཉམ་གྱི་རླུང་གིས་མེ་སྤར་ལ། ལུས་ལྷའི་དཀྱིལ་འཁོར་མཉེས་པར་བྱའོ། །ལྷག་མ་ནི་ཁ་སྦྱོར་གྱི་རླུང་གིས་བཏུལ་བས་མ་ཞུ་བ་མེད་ཅིང་དུག་ཀྱང་འཕྲོག་པར་བྱེད་དོ། །འདིར་བྱེ་བྲག་ཏུ་བསྟན་པ་ནི་རྡོ་རྗེ་ཕྲེང་བ་ལས་རྣལ་འབྱོར་པ་ཐོག་མར་ཚེ་བསྒྲུབས་ན་ལས་ཐམས་ཅད་འགྲུབ་པར་གསུངས་པའི་དོན་གྱིས་བརྗོད་དོ། །ཞི་རྒྱས་དང་གྲུབ་པ་བརྒྱད་དང་ཕྱི་རོལ་གྱི་གཏོར་མ་གཞན་དུ་བསྟན་ཏོ། །ཟབ་མོ་རྫོགས་པའི་རིམ་པ་ནི་རིམ་པ་ལྔ་དང་བླ་མའི་མན་ངག་ལས་རྟོགས་པར་བྱའོ། །གསང་བ་འདུས་པའི་རྒྱུད་ལས་འཕགས་པ་ཀླུ་གྲུབ་ཀྱིས་བསྡུས་པའི་མདོར་བྱས་པའི་བསྒྲུབ་ཐབས་དང་། མདོ་བསྲེ་དང་། ཨརྻ་དྷེ་བའི་བསྒྲུབ་ཐབས་རིམ་བཞི་རྣམས་ཀྱི་དོན་ཕྱོགས་ཅིག་ཏུ་གསལ་བར་བསྡུས་པ། བསྒྲུབ་པའི་ཐབས་ཕྱི་ནང་གཞན་གསུམ་གསལ་བ་རྫོགས་སོ།། །།བླ་མེད་རྒྱུད་རྒྱལ་གསང་བ་འདུས་པ་ལ། །རྡོ་རྗེ་ཕྲེང་སོགས་བཤད་པའི་རྒྱུད་རྣམས་དང་། །བླ་མའི་གསུང་དང་རང་གི་ཡེ་ཤེས་མཐུས། །འཕགས་པ་ཀླུ་གྲུབ་ཐུགས་རྗེ་མངའ་བས་བསྡུས། །དེ་ཡི་མན་ངག་རྒྱུད་རིམས་ལས་འོངས་པ། དིང་སང་དུས་ན་དོན་དུ་གཉེར་བ་ཉུང་། །དེ་ཕྱིར་བློ་ལྡན་འགའ་ལ་ཕན་སྙམ་ནས། །བསྒྲུབ་པའི་ཐབས་འདི་རང་བྱུང་རྡོ་རྗེས་བྱས། །དེ་ལས་བྱུང་བའི་དགེ་བ་ཅི་ཡོད་པས། །འགྲོ་ཀུན་རྡོ་རྗེ་འཛིན་པའི་ས་ཐོབ་ཤོག །ཕྱི་དང་ནང་གི་རྣམ་བཞག་མང་དུ་ཡོད་པ་བསྒོམ་པ་ལ་མི་བདེ་ཡང་དོན་ངེས་ན་བྱང་ཆུབ་ཏུ་འགྱུར་བ་བྲིས་སོ། །སྤྲེའུ་ལོ་ཟླ་བ་བཅུ་གཉིས་པ་ལ་བདེ་ཆེན་སྟེངས་སུ་སྦྱར་བའོ། །ངག་སྣ་ལ་མ་བརྩེགས་པས་ཡི་གེ་མང་ཙམ་བྱུང་སྟེ་བཟོད་པ་མཛོད། བཀྲ་ཤིས་དཔལ་འབར་འཛམ་གླིང་བརྒྱན་དུ་ཤོག། །།

དཔལ་གསང་བ་འདུས་པའི་དབང་གི་ཆོ་ག །

༄༅། །དཔལ་གསང་བ་འདུས་པའི་དབང་གི་ཆོ་ག་བཞུགས།

༄༅། །དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་ཉི་ཤུ་པའི་སྙིང་པོ་གསལ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཕུང་པོ་ཁམས་རྣམས་སངས་རྒྱས་ལྷ་མོར་རྣམ་དག་ཅིང་། །སྐྱེ་མཆེད་རྣམས་ནི་སེམས་དཔའ་སེམས་མའི་རང་བཞིན་ཏེ། །ལས་དབང་བྱེད་པ་ཁྲོ་བོ་བཅུ་ཡི་ངོ་བོ་ཉིད། །སུམ་ཅུ་སོ་གཉིས་དཀྱིལ་འཁོར་དེ་ལ་ཕྱག་འཚལ་ནས། །དཔལ་ལྡན་འདུས་པའི་ལམ་གྱིས་ནི། །སྨིན་བྱེད་དབང་གི་རིམ་པ་རྣམས། །འཕགས་མཆོག་ཀླུ་གྲུབ་མཐུ་ཡིས་ནི། །གསལ་མཛད་ལག་ལེན་བཤད་པར་བྱ། །འདིར་དབང་བསྐུར་བར་བྱེད་པ་ལ་གསུམ་སྟེ། །གང་གིས་བསྐུར་བའི་སློབ་དཔོན་དང་། །གང་ལ་བསྐུར་བའི་སློབ་མ་དང་། ཇི་ལྟར་བསྐུར་བའི་ཆོ་གའོ། །དང་པོ་ནི་ཡོན་ཏན་ཐམས་ཅད་དང་ལྡན་པ། །རིམ་པ་གཉིས་ཀྱི་དོན་ཤེས་དང་། །མཆོག་དང་ཐུན་མོང་བསྒྲུབ་ལ་གནས། །དམ་ཚིག་སྡོམ་ལ་གནས་པ་སྟེ། །རྩ་བའི་ལྟུང་བ་རྣམ་པར་སྤངས། །བཟོད་ལྡན་དྲང་ཞིང་གཡོ་རྒྱུ་མེད། །བརྟན་ཞིང་དུལ་ལ་བློ་གྲོས་ལྡན། །སྔགས་དང་རྒྱུད་ཀྱི་སྦྱོར་བ་ཤེས། །དེ་ཉིད་བཅུ་ནི་ཡོངས་ཤེས་ཤིང་། །རབ་གནས་སྦྱིན་བསྲེག་དཀྱིལ་འཁོར་མཁས། །ཉན་ཐོས་རྣམས་ཀྱི་ལམ་འགྲོ་མིན། །ཕ་རོལ་ཕྱིན་བཅུའི་ཚུལ་ལ་གནས། །ཞེས་བྱ་བ་ལ་སོགས་པ་གསུངས་པའི་མཚན་ཉིད་ཅན་གྱིས། སློབ་མ་ལེགས་པར་བརྟགས་པ་རིན་པོ་ཆེ་ལྟ་བུ་ཡོངས་སུ་རྫོགས་པའི་སྣོད་དང་། གཞན་རྣམས་ལ་ནི་ཅི་རིགས་པར་སྦྱིན་ནོ། །དབང་དངོས་ལ་གསུམ། །སྔོན་དུ་བསྙེན་པ་བྱ་བ་དང་། །ཡན་ལག་ཉི་ཤུ་མདོར་བསྟན་པ་དང་། རྒྱས་པར་བཤད་པའོ། །བསྙེན་པ་ནི་མཚན་མའི་བསྙེན་པའམ། །གྲངས་ནི་དཀྱིལ་འཁོར་གཙོ་བོའི་བཟླས་པ་འབུམ། །དེ་ལས་གཞན་པ་ཁྲི་རུ་བཟླས། །ཞེས་སོ། །གཉིས་པ་ནི་ས་གཞི་སྦྱང་དང་བྱིན་བརླབས་དང་། །ཡོངས་སུ་བཟུང་དང་བསྲུང་བ་དང་། །སའི་ལྷ་དང་དཀྱིལ་འཁོར་ལྷ། །བུམ་པ་རྣམས་དང་སློབ་མ་དག །སྟ་གོན་དུ་ནི་གནས་པ་དང་། ཐིག་གདབ་པ་ཡི་ཆོ་ག་དང་། །དེ་བཞིན་རྡུལ་ཚོན་དགྱེས་པ་དང་། །དཀྱིལ་འཁོར་བྱིན་གྱིས་བརླབ་པ་དང་། །དེ་ལ་མཆོད་པའི་བྱེ་བྲག་དང་། །སློབ་དཔོན་བདག་ཉིད་འཇུག་པ་དང་། །དེ་བཞིན་སློབ་མ་གཞུག་པ་དང་། བུམ་པའི་དབང་དང་གསང་བའི་དབང་། །ཤེས་རབ་ཡེ་ཤེས་དབང་དང་ནི། །དེ་བཞིན་དུ་ནི་བཞི་པ་དང་། །རབ་གནས་དང་ནི་སྦྱིན་བསྲེག་སྟེ། །དཀྱིལ་འཁོར་གྱི་ནི་ཡན་ལག་མཆོག །འདི་ནི་ཆོ་ག་ཉི་ཤུའོ། །ཞེས་ནུབ་དང་པོ་དང་གཉིས་པ་ལ་བརྒྱད། གསུམ་པ་ལ་བཅུ། རབ་གནས་སྦྱིན་བསྲེག །གཉིས་དང་ཉི་ཤུ་ཡོད་པ་ལས། དང་པོ་ས་སྦྱང་བ་ལ་ཡང་བཞི་སྟེ། དང་པོ་སྙན་གསན་དབབ་པའི་དོན་དུ་དཀྱིལ་འཁོར་གང་དུ་བྱེད་པའི་ས་དེར་མཎྜྻལ་གྲུ་བཞི་ཁྲུ་གང་བ་བྱས་ཏེ། མེ་ཏོག་བཀྲམ་ལ་ལྷའི་གདན་དུ་བསམས་ཏེ། དཀྱིལ་འཁོར་བསྐྱེད་ལ་མཆོད་པའི་བར་བྱས་ལ་བསྟོད་ནས། །དགོངས་ཤིག་དུས་གསུམ་མགོན་པོ་རྣམས། །སངས་རྒྱས་ཐམས་ཅད་མཆོད་པ་དང་། །སློབ་མ་རྣམས་ལ་ཕན་དོན་དུ། །བདག་མིང་འདི་ཞེས་བགྱི་བ་ཡིས། །དཔལ་ལྡན་རྡོ་རྗེ་འཛིན་པ་ཡི། །དཀྱིལ་འཁོར་དམ་པ་འབྲི་བར་འཚལ། །རྒྱལ་བ་སྲས་དང་བཅས་རྣམས་ཀྱིས། །བདག་ལ་བྱིན་གྱིས་བརླབ་ཏུ་གསོལ། །ཞེས་ལན་གསུམ་གྱིས་གསོལ་བ་གདབ་པོ། །དེ་ནས་གཉིས་པ་ཕྱོགས་སྐྱོང་རྣམས་བསྐྱེད་ལ། མཆོད་ཡོན་ལ་སོགས་པའི་མཆོད་པ་དང་གཏོར་མ་ཡང་བྱིན་གྱིས་བརླབས་ནས། ཨོཾ་ཨིན་ཏྲ་ཡེ་སྭཱཧཱ། ཡ་མ་ཡེ་སྭཱཧཱ། བཱ་རུ་ན་ཡེ་སྭཱཧཱ། ཀུ་བེ་ར་ཡེ་སྭཱཧཱ། ཨག་ན་ཡེ་སྭཱཧཱ། ནི་རི་ཏེ་རཀྟ་སན་ཏི་པ་ཏ་ཡེ་སྭཱཧཱ། བཱ་ཡ་བྷེ་ཡེ་སྭཱཧཱ། ཨི་ཤ་ན་ཡེ་སྭཱཧཱ། ཨོཾ་ཙན་ཏྲ་ཡེ་སྭཱཧཱ། སུར་དྱ་ཡེ་སྭཱཧཱ། པྲི་ཏི་བྷྱ་སྭཱཧཱ། ཨོཾ་ཨ་ཀ་རོ་མུ་ཁཾ་སརྦ་དྷརྨ་ནཾ། ཨདྱ་ནུད་པན་ནྱད་ཏད་ཏ་ཨོཾ་ཨཱ་ཧཱུྃ་ཕཊ་སྭཱཧཱ། ཞེས་གཏོར་མ་ཕུལ་ལ། ཁམས་གསུམ་གནས་པའི་ལྷ་དང་ཀླུ། །གནོད་སྦྱིན་དྲི་ཟ་ལྷ་མ་ཡིན། །གང་དག་རྫུ་འཕྲུལ་ཆེ་རྣམས་ལྡན། རྡོ་རྗེ་སྤྱན་དང་སྙན་མངའ་བ། །འབྱུང་ལ་གནས་པའི་འབྱུང་པོ་རྣམས། །བདག་མིང་འདི་ཞེས་བགྱི་བ་ཡིས། །སངས་རྒྱས་རྣམས་ལ་མཆོད་པ་དང་། །སེམས་ཅན་རྣམས་ལ་ཕན་དོན་དུ། །ས་ཕྱོགས་དགེ་གནས་འདི་ཉིད་དུ། དམ་པའི་དཀྱིལ་འཁོར་ཆེར་འབྱུང་བ། །ཇི་ལྟར་བསམས་པའི་ལས་བྱེད་ན། །ཁྱེད་ཀྱིས་བར་ཆད་མ་བྱེད་པར། །དགེ་བའི་གྲོགས་པོ་ཉིད་དུ་མཛོད། །དེ་ལྟར་ཁྱོད་ལ་བདག་གིས་ནི། །བཟོད་པར་གསོལ་གྱིས་མ་བསླུ་བར། རྨི་ལམ་ལ་སོགས་མཚན་མ་རྣམས། །ལེགས་ཉེས་ལས་རྣམས་བསྟན་དུ་གསོལ། །ཞེས་ལན་གསུམ་དུ་བརྗོད་ན་གཞི་བདག་ལ་ཡང་གཏོར་མ་སྦྱིན་ནོ། །དེ་ནས་གསུམ་པ་བགེགས་ཞི་བར་བྱ་བའི་ཕྱིར་དྲིའི་ཆུ་ལ་ལས་ཐམས་ཅད་པའི་སྔགས་འདི་བཟླས་ཏེ། ཨོཾ་ན་མཱ་ས་མན་ཏ་ཀ་ཡ་བཱག་ཙི་ཏ་བཛྲ་ནན། ན་མོ་བཛྲ་ཀྲོ་ཏ་ཡ། མ་ཧ་དཾ་ཥྚོད་ཀ་ར་བྷེ་ར་བྷ་ཡ། ཨ་སི་མུ་ས་ལ། པ་ར་ཤུ་པ་ཏ་ཤ་ཧ་ཏ་ཡ། ཨོཾ་ཨརྨི་ཏ་ཀུན་དྷ་ལི། ཧ་ཧཱ་ཁ་ཁ་ཁཱ་ཧི་ཁཱ་ཧི། ཏིཥྚ་ཏིཥྚ། བྷན་དྷ་བྷན་དྷ། ཧ་ན་ཧ་ན། ད་ཧ་ད་ཧ། གར་ཛ་གར་ཛ། བཱི་ཡོ་ཏ་ཡ་བཱི་ཡོ་ཏ་ཡ། སརྦ་བིག་ནན། བྷི་ན་ཡ་ཀ་ནན། མ་ཧཱ་གྷ་ན་པ་ཏི། ཛི་བི་ཏ་ཡན་ཏ་ཀ་ར་ཡ། ཧཱུྃ་ཕཊ་སྭཱ་ཧཱ། ཞེས་ལན་གསུམ་བཟླས་ཏེ་གཏོར་བར་བྱའོ། །ལྕོགས་ན་སྦྱིན་བསྲེག་དང་། གནོད་མཛེས་ཀྱི་སྔགས་ཀྱིས་མི་རུས་ཀྱི་སྦྱིན་བསྲེག་ཀྱང་བྱས་ཏེ་བགེགས་སྦྱང་བའོ། །བཞི་པ་ལས་དང་བྱ་བས་སྦྱང་བ་ནི། ཟབས་སུ་རྐོས་ལ་རུས་པ་དང་སོལ་བ་ལ་སོགས་པའི་སྐྱོན་བསལ་ལ། རིན་པོ་ཆེ་དང་སྨན་ལ་སོགས་པ་བཅུག་ཅིང་སྟེགས་བུ་ལེགས་པར་བྱས་ཏེ་ས་ལ་མ་ལྷུང་བའི་ལྕི་བ་དང་དྲི་ཞིམ་པོས་བྱུག་གོ །དེ་ནས་སྦྱོར་བ་གསུམ་གྱིས་ཏིང་ངེ་འཛིན་བསྒོམ་པ་ནི་ས་སྦྱང་བའོ། གཉིས་པ་ས་བྱིན་གྱིས་བརླབ་པ་ནི། ཧཱུྃ་ཁྃ་ཧཱུྃ་ཞེས་རྣམ་པར་དག་པར་བསམས་ལ། ཧཱུྃ་སུྃ་ཧཱུྃ་ལ་རིན་པོ་ཆེ་བཞིའི་རི་རབ་ཏུ་བསྒོམས་ཏེ། ཧཱུྃ་ལྃ་ཧཱུྃ་ལས་གསེར་གྱི་ས་གཞི་གྲུ་བཞི་ལ་རྡོ་རྗེའི་ཕྲེང་བས་བརྒྱན་པར་བསྒོམས་ཏེ། ལག་པ་ཐལ་མོ་ཁ་སྦུབ་ལ། ཨོཾ་མེ་དྷི་ནི་བཛྲ་བྷ་བཛྲ་བྷན་དྷ་ཧཱུྃ་ཞེས་བརྗོད་ནས་བྱིན་གྱིས་བརླབ་པོ། ནུབ་དང་པོའི་བྱ་བའོ། །དེ་ནས་ནུབ་གཉིས་པའི་སྔ་དྲོ་ས་བཟུང་བ་ནི། དཀྱིལ་འཁོར་གྱི་དབུས་སུ་བདག་ཉིད་ཀྱིས་དང་པོའི་སྦྱོར་བས་ཞེ་སྡང་རྡོ་རྗེ་བསྒོམས་ལ། ལས་བྱེད་པས་རྣམ་སྣང་ལ་སོགས་པའི་སངས་རྒྱས་བཞིའི་ཏིང་ངེ་འཛིན་ལ་གནས་པས། མཆོད་པ་བྱས་ཏེ་བསྐུལ་བ་ནི། ཤར་ནས་དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ལྷོ་ནས། མཚན་རྣམས་ཐམས་ཅད་ཡོངས་སུ་རྫོགས། །མཚན་མིན་ཐམས་ཅད་རྣམ་པར་སྤངས། །ཀུན་ཏུ་བཟང་པོ་སྐུའི་མཆོག །དཀྱིལ་འཁོར་དམ་པ་བཤད་དུ་གསོལ། །ནུབ་ནས། ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག དཀྱིལ་འཁོར་དམ་པ་བཤད་དུ་གསོལ། །བྱང་ནས། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོ་བསྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་གསོལ་བ་བཏབ་ནས་རང་ཉིད་ཞེ་སྡང་རྡོ་རྗེ་ཁྲོ་བོ་ཆེན་པོའི་མིག་གཡས་གཡོན་དུ་མ་དང་ཏ་ལས། ཉི་མ་དང་ཟླ་བའི་དཀྱིལ་འཁོར་གྱི་དབུས་སུ་ཧཱུྃ་ལས་འོད་འབར་བའི་ཟེར་གྱིས་ཐམས་ཅད་ཁྲོ་བོའི་དཀྱིལ་འཁོར་དུ་བསམས་ཏེ། རྐང་པ་ཨ་ལས་སྣ་ཚོགས་རྡོ་རྗེར་བསྒོམས་ལ་རྡོ་རྗེ་དང་དྲིལ་བུ་འཛིན་པས་གཡོ་བག་ཏུ་ལངས་ལ་འདི་སྐད་དུ་བརྗོད་དོ། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་ཐམས་ཅད་བདག་ལ་གསོན། །བདག་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་རབ་སྦྱོར་གྱིས། །ལྷ་དང་ལྷ་མིན་གསང་བ་པ། །བརྗེད་བྱེད་ལ་སོགས་བགེགས་ཀྱི་ཚོགས། །ས་འདིར་མ་འདུག་གཞན་དུ་དེངས། །གལ་ཏེ་དམ་ཚིག་ལས་འདའ་ན། །རྡོ་རྗེ་ཁྲོ་བོ་བཞིན་འབར་བའི། །རྡོ་རྗེ་རབ་ཏུ་འབར་བ་ཡིས། །མགོ་ནི་ཚལ་པ་བརྒྱར་འགས་ཤིང་། །ཞིག་པར་འགྱུར་བ་གདོན་མི་ཟ། །ཞེས་བརྗོད་ནས་དབང་ལྡན་གྱི་མཚམས་སུ་སོང་སྟེ། བདག་རྡོ་རྗེ་སློབ་དཔོན་མིང་འདི་ཞེས་བྱ་བས་སེམས་ཅན་གྱི་དོན་དུ་དཔལ་གསང་བ་འདུས་པའི་དཀྱིལ་འཁོར་བྲི་བར་བྱེད་པས། གང་སུ་དག་ལྷ་དང་མི་དང་ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། བརྗེད་བྱེད་དང་། འབྱུང་པོ་དང་། ནམ་མཁའ་ལྡིང་དང་། མིའམ་ཅི་དང་། རིག་འཛིན་ལ་སོགས་པ་རྒན་པོ་དང་རྒན་མོ་དང་འཁོར་དང་གཡོག་ཏུ་བཅས་པ་རྣམས། རྡོ་རྗེ་འཛིན་པའི་བཀའ་ཐོས་ནས་མྱུར་དུ་དེངས་ཤིག །གང་དག་མི་འགྲོ་བ་དེ་དག་ནི་ཁྲོ་བོའི་རྡོ་རྗེ་རབ་ཏུ་འབར་བས་མགོ་བོ་བརྒྱར་འགས་པར་འགྱུར་རོ། །ཞེས་བརྗོད་ནས། རྡོ་རྗེའི་འགྲོས་ཀྱིས་དཀྱིལ་འཁོར་ལ་ལན་གསུམ་དུ་བསྐོར་རོ། འདིར་བརྗོད་པ། རྩེ་ཅིག་རྩེ་གསུམ་རྩེ་ལྔ་པ་ཡི། །རྡོ་རྗེ་གོམ་པས་བསྐོར་བར་བྱ། །ཤར་དུ་གཡས་བརྐྱང་དབྱུག་འཕེན་ཏེ། །ལྷོ་རུ་གཡོན་བརྐྱང་མདའ་འཕེན་སྟབས། །ནུབ་ཏུ་ས་ག་པད་མ་སྟེ། །བྱང་དང་ཟླུམ་པོ་གཏུན་ཤིང་འཛིན། །དབུས་སུ་པད་མ་ཞི་བ་དང་། །ཧཱུྃ་ཞེས་རྡོ་རྗེའི་གར་གྱིས་བསྐོར། །ས་བཟུང་བའི་ཆོ་གའོ། །དེ་ནས་ས་བསྲུང་བ་ནི། སེང་ལྡེང་ལ་སོགས་པའི་ཕུར་པ་དྲིས་བྱུགས་ལ་སྲད་བུ་དམར་པོ་དང་མེ་ཏོག་གི་ཕྲེང་བ་ཅན་བཅུ་ལ་ཁྲོ་བོའི་ཚོགས་བསྐྱེད་ལ་ཕྱོགས་མཚམས་སུ་ཕུར་བུས་གདབ་པར་བྱ་སྟེ། སུཾ་བྷ་ནི་ཡི་སྔགས་བརྗོད་ནས་རྡོ་རྗེའི་ས་གཞི་དང་ར་བ་དང་གུར་བྱས་ཏེ། ཨོཾ་ཏ་ཀི་ར་ཙ་ཧཱུྃ ཨོཾ་བཛྲ་རཀྵ་རཀྵ་ཧཱུྃ་ཞེས་བརྗོད་ནས་ཞལ་གསུམ་ཕྱག་དྲུག་པ་སྨད་ཕུར་བུའི་རྣམ་པས་ཕྱོགས་བཅུའི་གདོན་ལ་གདབ་སྟེ། ཨོཾ་གྷ་གྷ་གྷ་ཏ་ཡ་སརྦ་དུ་སྟན་ཕཊ་ཕཊ་ཀི་ལ་ཡ་ཀཱི་ལ་ཡ་སརྦ་པ་པྃ་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་དྷ་ར་ཨང་ཛྙྱཱ་པ་ཡ་ཏི། སརྦ་བིག་ནན་ཀ་ཡ་བག་ཙི་ཏ་བཛྲ་ཀི་ལ་ཡ་ཧཱུྃ་ཕཊ་ཞེས་བཏབ་ལ། ཨོཾ་བཛྲ་མུད་ཀ་ར་བཛྲ་ཀི་ལ་ཡ། ཨ་ཀོ་ཊ་ཡ་ཨ་ཀོ་ཊ་ཡ་ཧཱུྃ་ཧཱུྃ་ཕཊ། ཞེས་རྡོ་རྗེ་ཐོ་བས་བརྡུངས་ནས་བདེ་བ་ཆེན་པོར་བྱའོ། །ས་བསྲུང་བའོ། །ལྔ་པ་སའི་ལྷ་མོའི་ལྷག་གནས་ནི། བདག་གིས་མི་སྐྱོད་པའི་ཕྱག་རྒྱ་ས་ལ་བཞག་སྟེ། ཨོཾ་ཏ་ཀི་ཧཱུྃ་ཞེས་བརྗོད་པས། ལཾ་ལས་ས་ཡི་ལྷ་མོ་སེར་མོ་རྒྱན་ཐམས་ཅད་ཀྱིས་བརྒྱན་པ་རྣམ་སྣང་གི་དབུ་རྒྱན་ཅན་ཕྱག་ན་གསེར་གྱི་བུམ་པ་འཛིན་པ་ས་ལས་དགུག་སྟེ། ཨོཾ་ཚུར་སྤྱོན་ཚུར་སྤྱོན་ལྷ་མོ་ཆེ། །ས་ཡི་ལྷ་མོ་བུམ་འཛིན་ཡུམ། །རིན་ཆེན་ཀུན་གྱིས་རབ་གང་བ། །བཟང་པོའི་རྒྱན་གྱིས་རྣམ་པར་བརྒྱན། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔས་རབ་མཆོད་མ། །མཆོད་ཡོན་འདི་ནི་བཞེས་ནས་ཀྱང་། །དཀྱིལ་འཁོར་ལས་ནི་གྲུབ་པར་མཛོད། །ཛ་ཧཱུྃ་བྃ་ཧོ་ཧི། ཨོཾ་པྲ་ཏི་དྷི་བཱི་ཨརྒཾ། པ་ཏྱཾ། ཨ་ཛ་མ་ནཾ། པྲོ་ཁྱ་མ་ནཾ་པྲ་ཏི་ཙྪ་ཡེ་སྭཱཧཱ། ཞེས་པ་དང་། མཆོད་པ་རྣམས་ཀྱང་ཕུལ་ནས། བསྟོད་པ་དང་། བྷ་ལིང་ཕུལ་ནས། གསོལ་བ་གདབ་པ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཅི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་བྲི། །ཞེས་བརྗོད་ནས་དེ་ཉིད་དུ་ཐིམ་པར་བསམ་མོ། །སའི་ལྷ་མོ་ལྷག་གནས་ཆོ་གའོ། །དྲུག་པ་དཀྱིལ་འཁོར་གྱི་ལྷ་ལྷག་པར་གནས་པ་ནི། མཎྜྻལ་གྱི་དབུས་སུ་དྲི་ཞིམ་པོས་ཐིག་ལེ་ལྷ་གྲངས་མཉམ་པར་བྱས་ལ། བསྐྱེད་ཆོག་རྒྱས་པར་བྱས་ཏེ། ཕྱི་ནང་གསང་བའི་མཆོད་པས་མཆོད་ཅིང་བསྟོད་པས་བསྟོད་ལ། ལག་ཏུ་བདུག་སྤོས་ཐོགས་ནས་གསོལ་བ་གདབ་པ་ནི། བཅོམ་ལྡན་རྡོ་རྗེ་འཛིན་པ་མཆོག །རིགས་སྔགས་རྒྱལ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཅན་རྣམས་ཀྱི། །དཀྱིལ་འཁོར་བདག་ནི་བྲི་བར་འཚལ། །སློབ་མ་རྣམས་ལ་བརྩེ་བ་དང་། ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། དེང་ནི་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གང་གཞན་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། གང་ཡང་རྡོ་རྗེའི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་མིང་འདི་ཞེས་བགྱི་བ་ཡིས། །རྡོ་རྗེ་འཛིན་གྱི་དཀྱིལ་འཁོར་ནི། །ཡོ་བྱད་ཅི་འབྱོར་པས་བྲི་ན། །དེང་བདག་སློབ་མར་བཅས་པ་ལ། །ཐུགས་བརྩེ་བར་ནི་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་དུ་བརྗོད་དོ། །ལྷ་སྟ་གོན་གྱི་ཆོ་གའོ། །བདུན་པ་བུམ་པ་ལྷག་གནས་ནི། གསེར་ལ་སོགས་པའི་བུམ་པ་མཚན་ཉིད་དང་ལྡན་པ་ལྷ་གྲངས་དང་མཉམ་པའམ། དྲུག་གམ་གཉིས་ཀྱང་རུང་ཏེ། ཕྱག་མཚན་བྲིས་པས་བརྒྱན་ལ་མགུལ་ཆིངས་དང་ཁ་རྒྱན་བྱས་ཏེ། གུ་གུལ་གྱིས་བདུག་ཅིང་སུཾ་བྷ་ནིས་བསངས་ལ། དྲི་བཟང་པོའི་ཆུ་དཀར་མངར་དང་བཅས་པས་བཀང་ལ། གྲོ་དང་། ནས་དང་། ཏིལ་དང་འབྲས་དང་སོ་བ་དང་མོན་སྲན་ཏེ་འབྲུ་ལྔ་དང་། བྱི་རུ་ས་ལེ་སྦྲམ་དང་། དུང་དང་མུ་ཏིག་དང་། ནོར་བུ་སྟེ་རིན་པོ་ཆེ་ལྔ་དང་། སིང་ཧ་བྷྱ་ཀྲི། ཧ་ས། ཧ་ས་དྷེ་བ། ཀར་ནི་ཀ་སྟེ་སྨན་ལྔ་བླུགས་ལ། ཁ་རྒྱན་གྱི་གསེབ་ཏུ་བདུད་རྩི་ལྔའི་ཆུ་དང་བཅས་པའི་དུང་ཆོས་བཞག་སྟེ་རྡོ་རྗེ་གཟུངས་ཐག་བཏགས་ནས། བདག་ཉིད་བསྐྱེད་པའི་རིམ་པ་ལ་གནས་པས། ཡི་གེ་བྃ་ལས་བྱུང་བའི་གསེར་གྱི་བུམ་པར་ཧྲི་ལས་གྱུར་པའི་པད་མ་དང་ཨ་ལས་བྱུང་བའི་ཉི་ཟླའི་གདན་ལ་རང་རང་གི་མངོན་རྟོགས་ལྟར་བསྐྱེད་ལ་ཡེ་ཤེས་དགུག་གཞུག་དང་མཆོད་བསྟོད་གཏོར་མ་ཡང་ཕུལ་ཏེ། ཨོཾ་བཛྲ་དྷྲིག་སྭཱ་ཧཱ་ལ་སོགས་པའི་ལྷ་སོ་སོའི་བཟླས་པ་བྱས་ནས་གསོལ་བ་གཏབ་སྟེ། ཨོཾ་བཛྲ་ཨུ་ཏ་ཀེ་ཧཱུྃ་གིས་ཆུ་བླངས་ལ་བཞུ་བར་བྱའོ། །ལས་ཐམས་ཅད་པ་ཡང་བསྐྱེད་ཅིང་བཟླས་པ་མཆོད་དེ་བགེགས་བཟློག་པའི་གསོལ་བ་གདབ་བོ། །བུམ་པ་ལྟ་གོན་ནོ། །སྐབས་འདིར་དབུ་རྒྱན་དང་རྡོ་རྗེ་དྲིལ་བུ་དང་དབང་གི་ཡོ་བྱད་གཞན་ཡང་བྱང་ཆུབ་སེམས་དཔའི་འགྲེལ་པ་ལས་བཤད་པ་བཞིན་བྱིན་གྱིས་བརླབས་ན་ལེགས་པར་རྟོགས་སོ། །བརྒྱད་པ་སློབ་མ་ལྷག་གནས་ནི་བཅུ་གསུམ་ལས། ཁྲུས་བྱ་ཞིང་མཎྜྻལ་འབུལ་བ་དང་། གསོལ་བ་གདབ་པ་དང་། ཉན་པར་བསྐུལ་བ་དང་། ལྔ་རྣམ་དག་སྐྱབས་འགྲོ་སེམས་བསྐྱེད་དང་བཅས་པ་དང་། སྡོམ་པ་བསྒྲགས་པ་དང་། ཁས་བླངས་པ་དང་། གནས་གསུམ་བྱིན་གྱིས་བརླབས་ཏེ་མཆོད་པ་དང་། སོ་ཤིང་སྦྱིན་པ་དང་། སྐྱོར་ཆུ་དང་། བསྲུང་སྐུད་དང་། ཀུ་ཤ་སྦྱིན་པ་དང་། ཆོས་བཤད་པ་དང་། རྨི་ལམ་བརྟག་པ་རྗེས་ཀྱི་བྱ་བ་དང་བཅས་པའོ། །དང་པོ་ནི་སློབ་མ་མཚན་ཉིད་དང་ལྡན་པ་རྣམས་ལས་ཀྱི་བུམ་པས་ཕྱི་རོལ་དུ་ཁྲུས་བྱས་ལ། མཎྜྻལ་གྱི་ཆོ་ག་གང་ཡང་རུང་བས་མཎྜྻལ་ཕུལ་ནས་འབྱུང་པོ་ཐམས་ཅད་པའི་གཏོར་མ་ཡང་བཏང་སྟེ། གཉིས་པ་སློབ་དཔོན་གྱིས། ཁྱེད་རྣམས་དལ་འབྱོར་ཐོབ་པར་དཀའ་བ་ཐོབ་ཅིང་བསྟན་པ་དམ་པ་དང་མཇལ། དེ་ལས་ཀྱང་ཚེ་གཅིག་ལུས་གཅིག་གིས་སངས་རྒྱས་ཐོབ་པར་བྱེད་པ་རྡོ་རྗེ་ཐེག་པ་བླ་ན་མེད་པ་གསང་བ་འདུས་པར་འཇུག་པར་བྱེད་པ་ཤིན་ཏུ་ལེགས་ཏེ། འདི་ཡང་རྒྱུད་ལས་དབང་གིས་སྨིན་བྱས་དམ་ཚིག་ལྡན། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། ཞེས་བྱུང་བས་ཐོག་མར་མཎྜྻལ་མཆོད་པའི་བྱེ་བྲག་ལུས་ལོངས་སྤྱོད་དང་བཅས་པ་འབུལ་ཞིང་གསོལ་བ་གདབ་སྙམ་པས་ལད་མོ་མཛོད་ཅིག །དགའ་ཆེན་ཁྱོད་བདག་སྟོན་པ་པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ནི་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཞེས་ལན་གསུམ་མོ། །དེ་ནས་གསུམ་པ་ཉན་པར་བསྐུལ་བ་ནི། སློབ་དཔོན་གྱིས། བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་དག །ཁྱོད་ལ་ཡང་དག་བསྟན་པར་བྱ། །དུས་གསུམ་བྱུང་བའི་སངས་རྒྱས་རྣམས། །སྐུ་གསུམ་ཐུགས་ཀྱི་རྡོ་རྗེ་ཅན། །རྡོ་རྗེ་རབ་སྔགས་བསྒོམས་པ་ཡིས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་ཟད་པ། །དཔུང་ཆེན་དག་ཀྱང་དེ་ཡིས་བཅོམ། །འཇིག་རྟེན་རྗེས་འཇུག་རྟོགས་ནས་སུ། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བསྟན་ལ་དོན་ཡང་བཤད་པར་བྱའོ། །བཞི་པ་ལྔ་རྣམ་དག་སྐྱབས་འགྲོ་སེམས་བསྐྱེད་དང་བཅས་པ་ནི། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་རྣམས་དམིགས་ཏེ་ལུས་གུས་པས་ཕྱག་འཚལ། ལུས་ལོངས་སྤྱོད་དང་བཅས་པ་ནི་འབུལ། ཐོག་མ་མེད་པ་ནས་ཀྱི་ལུས་ངག་ཡིད་གསུམ་གྱི་སྡིག་པ་ཐམས་ཅད་ནི་བཤགས། སོ་སོའི་སྐྱོ་བོ་དང་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་ལ་རྗེས་སུ་ཡིད་རང་། སངས་རྒྱས་ཆོས་མི་གསུང་བ་རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་ནི་གསོལ་བ་འདེབས། བླ་ན་མེད་པའི་སངས་རྒྱས་དང་ཐེག་པ་ཆེན་པོའི་ཆོས་དང་། རྒྱལ་བ འི་སྲས་དགེ་འདུན་ཐམས་ཅད་ལ་ནི། སེམས་ཅན་ཐམས་ཅད་ཀྱི་དོན་དུ་སྐྱབས་སུ་འགྲོ་ཞིང་སེམས་བསྐྱེད། དེ་ཐམས་ཅད་ཀྱང་བྱང་ཆུབ་མཆོག་ཏུ་གྱུར་ཅིག་སྙམ་པས་ལད་མོ་བྱེད་དུ་བཅུག་སྟེ། བདག་གིས་སྡིག་པ་གང་བགྱིས་དང་། །བགྱིད་དུ་སྩལ་དང་ཡིད་རང་བ། །སངས་རྒྱས་སྤྱན་སྔར་མཆིས་ནས་ནི། །དེ་དག་ཐམས་ཅད་ནི་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང་། རང་རྒྱལ་དགྲ་བཅོམ་འགྲོ་རྣམས་ཀྱིས། །བསྒོམ་དང་བཟླས་བརྗོད་བསོད་ནམས་གང་། །དེ་ལ་བདག་ནི་ཡིད་རང་ངོ་། ཕྱོགས་བཅུར་བཞུགས་པའི་རྒྱལ་བ་ལ། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་འདའ་བར་བཞེད་རྣམས་ལ། །དུས་ཀུན་བཞུགས་པར་གསོལ་བར་བགྱིད། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་བསྐོར་བ་དང་། །བྱང་ཆུབ་སེམས་དཔའི་ཚོགས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཅི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་སེམས་ནི་བསྐྱེད་པ་ལྟར། །དེ་བཞིན་དུ་ནི་སེམས་བསྐྱེད་དོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤིང་། །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་བསྒྲོལ། །ཞེས་ལན་གསུམ་དུ་བརྗོད་དོ། །ལྔ་པ་སྡོམ་པ་སྒྲག་པ་ནི། འདི་ལྟར་སྔགས་ཀྱི་ཐེག་པར་མི་དགེ་བ་ཐམས་ཅད་ལས་བཟློག་ཅིང་བསྲུང་བར་བྱ་བ་ལྔ་ལ་སོགས་པ་ལ་སློབ་པ་དང་། རིགས་ལྔའི་སྡོམ་པ་རྣམས་བསྲུང་དགོས་པས་འདི་རྣམས་བསྲུང་བར་ནུས་མི་ནུས་བསྒྲགས་པར་བྱ་ཡིས་ཉོན་ཅིག །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །སྡོམ་པ་བརྟན་པར་འགྱུར་བའོ། །རྡོ་རྗེ་དྲིལ་བུའི་ཕྱག་རྒྱ་དག །བློ་ཆེན་ཁྱོད་ཀྱིས་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་བཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་ཆོས་སོ་སོར་བཟུང་བར་གྱིས། །འདི་ནི་པད་མའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་གྱིས། །མཆོད་པའི་ལས་ཀྱང་ཅི་ནུས་གྱིས། །སྲོག་ཆགས་རྣམས་ཀྱང་བསད་མི་བྱ། །མ་བྱིན་པར་ཡང་མི་བླང་ངོ་། །འདོད་ལོག་དག་ཀྱང་མི་བྱ་ཞིང་། །བརྫུན་དུ་སྨྲ་བར་མི་བྱའོ།། ཉེས་པ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །སེམས་ཅན་འདུལ་བྱ་མ་གཏོགས་པ། བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་འབྱོར་ཅན་ཀུན་བསྙེན་བསྐུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་དག་ནི། །ཅི་ནུས་པས་ནི་རྗེས་སུ་བསྲུང་། །སེམས་ཅན་དོན་ལ་རྒྱབ་མི་ཕྱོགས། །ཐེག་པ་དམན་ལ་འདོད་མི་བྱ། འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་ངན་འདས་མི་བྱ། །ལྷ་དང་ལྷ་མིན་གསང་བ་པ། །དེ་ལ་བརྙས་པར་མི་བྱ་ཞིང་། །ཕྱག་རྒྱ་ཞོན་པ་མཚོན་ཆ་དང་། །མཚན་མ་འགོང་བར་མི་བྱའོ། །དེ་ལྟར་དམ་ཚིག་གསུངས་པ་དག །བློ་ལྡན་ཁྱོད་ཀྱིས་རྟག་ཏུ་བསྲུང་། །ཞེས་བསྒྲགས་ནས། དྲུག་པ་དེ་ལྟར་ཐམས་ཅད་བཟུང་མི་ནུས་ན་ནི་སངས་རྒྱས་མཆོག་གི་སྡོམ་པ་རྐྱང་སྦྱིན་ནོ། །ཐམས་ཅད་གཟུང་ནུས་ན་ནི་གསོལ་བ་གདབ་སྟེ། འཁོར་ལོ་ཕྱིར་མི་ལྡོག་པའི་དབང་། །དམ་པ་བདག་ལ་སྩལ་ནས་ནི། །མགོན་པོ་འཁོར་ལོ་ལྷ་དག་གི །དེ་ཉིད་སློབ་དཔོན་འཕྲིན་ལས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་བགྱིས། །ཅེས་གསོལ་ནས། སངས་རྒྱས་བྱང་ཆུབ་སེམས་དཔའ་རྣམས། །མ་ལུས་བདག་ལ་དགོངས་སུ་གསོལ། །བདག་གིས་དུས་འདི་ནས་བཟུང་ནས། བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་གྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་པོར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སྡོམ་པ་སངས་རྒྱས་རྣལ་འབྱོར་འབྱུང་། དེང་ནས་བརྩམས་ཏེ་བཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །དེ་ཉིད་ཀྱིས་ནི་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པད་མ་ཆེན་པོའི་རིགས་དག་པའི། །བྱང་ཆུབ་ཆེན་པོ་འབྱུང་བ་ལ། །ཕྱི་དང་གསང་བའི་ཐེག་པ་གསུམ། །དམ་ཆོས་སོ་སོར་བཟུང་པར་བགྱི། །ལས་ཀྱི་རིགས་ཆེན་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་རྣམས་ཅི་ནུས་བཞིན། །ཀུན་ནས་སོ་སོར་བཟུང་བར་བགྱི། །སེམས་ཅན་ཀུན་གྱི་དོན་གྱི་ཕྱིར། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ཤིང་། །སྡོམ་པ་མ་ལུས་བཟུང་བགྱིས་ནས། །མ་རྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །གཞན་ཡང་ལུས་ངག་ཡིད་དག་གི །མི་དགེ་བ་ནི་བཅུ་པོ་དང་། །བག་མེད་པ་ཡི་གནས་གྱུར་པའི། ཆང་ནི་རྣམ་པར་སྤང་བར་བྱ། །དེ་བཞིན་ལྷ་དང་ལྷ་མིན་དང་། །གསང་བ་པ་དག་བརྙས་པ་དང་། །མཚན་མ་ལ་སོགས་འགོམ་པ་རྣམས། །དུས་འདི་ནས་ནི་བཟུང་ནས་ནི། །ཅི་སྲིད་བྱང་ཆུབ་སྙིང་པོའི་བར། །བདག་ནི་རབ་ཏུ་ལྡོག་པར་བགྱི། །ཞེས་བརྗོད་དེ་དེ་རྣམས་ཀྱི་དོན་ཡང་བཤད་དོ། །བདུན་པ་གནས་གསུམ་བྱིན་གྱི་བརླབ་པ་ནི། སྤྱི་བོར་ཟླ་བ་ལ་ཨོཾ། མགྲིན་པར་པད་མ་ལ་ཨཱཿ སྙིང་ཁར་ཉི་མ་ལ་ཧཱུྃ་བསྒོམ་དུ་བཅུག་ནས། དྲི་ཡི་ཆུས་ཐིག་ལེ་བཀོད་ཅིང་། མཆོད་པ་ནི། མེ་ཏོག་ལ་སོགས་པས་མཆོད་ལ། དུས་འདི་ནས་ནི་བཟུང་ནས་སུ། །འཁོར་བའི་ཉེས་པས་མ་གོས་པར། །མཆོད་པ་ཀུན་དང་ལྡན་པར་ནི། །དུས་ཀུན་དུ་ནི་བདེ་བར་ནོས། །ཞེས་བརྗོད་དོ། །བརྒྱད་པ་སོ་ཤིང་ནི་འོ་མ་ཅན་ལ་སོགས་པའི་ཤིང་སོར་བཅུ་གཉིས་པ་མེ་ཏོག་གི་ཕྲེང་བ་ཅན་ལ། ཨོཾ་ཨརྨི་ཏ་ཀུན་ཌ་ལི་ཧ་ན་ཧ་ན་ཧཱུྃ་ཕཊ་ཀྱིས་བྱིན་གྱིས་བརླབས་ལ། ལྕི་བ་དང་དྲིས་བྱུགས་པའི་མཎྜྻལ་ལ་དོར་དུ་གཞུག་སྟེ། མི་སྨྲ་བར་རྩེ་མོ་བཅའ་ཞིང་དོར་རོ། །མཚན་མ་ནི། ཤར་ལྷོ་ཕྱོགས་བཞི་རིམ་པ་ལྟར། །ཞི་རྒྱས་དབང་དང་དྲག་པོ་འགྲུབ། །སྟེང་འོག་མཁའ་སྤྱོད་ས་སྤྱོད་དེང་། །འཚམས་སུ་ཕྲ་མོའི་གྲུབ་པ་འཐོབ། །ཞེས་སོ། །དགུ་པ་ངག་གི་ཉེས་པ་སྦྱང་བའི་སྐྱོར་ཆུ་ནི། ཨོཾ་ཧྲི་བཱི་ཤུད་དྷ་ཡ་སརྦ་དྷརྨ་ཡ་སརྦ་པ་པཾ་ནིས་ཙ་ཡ་ཀྵྼར་ཤོ་དྷ་ཡ་སརྦ་བྷི་ཀ ལ་པ་ཨ་པ་ན་ཡ་ཧཱུྃ་ཞེས་ཁྱོར་བར་འཐུང་དུ་གཞུག་གོ །བཅུ་པ་བསྲུང་སྐུད་ནི་ལས་ཐམས་ཅད་པའམ་རྩ་བའི་སྔགས་ཀྱིས་མདུད་པ་བྱས་པའི་སྐུད་པ་དམར་པོ་དཔུང་པ་ལ་བཅིངས་ཏེ། ཨོཾ་བྷུ་ད་མེ་ཏྲི་རཀྵ་རཀྵ་སརྦན་དུ་སྭཱཧཱ། ཞེས་བརྗོད་དོ། །བཅུ་ཅིག་པ་ཀུ་ཤ་སྦྱིན་པ་ནི་རྨི་ལམ་བརྟག་པའི་དོན་དུ། བཛྲ་དྷིཀྵ་བཾ་གིས་ཀུ་ཤའི་ཆུན་པོ་གཉིས་བྱིན་ཏེ། གཅིག་སྔས་གཅིག་སྟན་དུ་བྱས་ཏེ་ཉོལ་ཅིག་ཅེས་བྱའོ། །བཅུ་གཉིས་པ་ཆོས་བསྟན་པ་ནི། འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་བྷ་རའི་མེ་ཏོག་བཞིན། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །སྐལ་པ་བྱེ་བ་དུ་མ་རུ། །སྡིག་པ་བྱས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ལ་གསན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་འདི་བཟླས་ན། །གོ་འཕང་བླ་ན་མེད་པར་འགྱུར། །གང་དག་སྤྱོད་པའི་མཆོག་འདི་ལ། །བློ་གྲོས་བརྟན་མཆོག་མི་གཡོ་བ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་སྤྱད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་ལ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །ས་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བ་ལ། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱི། །རབ་ཏུ་མི་རྟོགས་གནས་མེད་པའོ། །སྤྲོས་པ་ཀུན་དང་བྲལ་བ་སྟེ། །རྟོག་པ་རྣམས་ཀྱི་སྤྲོས་པ་རྣམས། ལས་དང་བྱ་བ་ལ་སོགས་བྲལ། །བདེན་པ་གཉིས་ལ་གནས་པ་སྟེ། །ཐེག་པ་རབ་ཀྱི་མཆོག་འདི་ཡི། །ཚུལ་ལ་གནས་ན་ཐོབ་པར་འགྱུར། ཞེས་བྱ་བའི་དོན་ཡང་ཅུང་ཟད་བཤད་དོ། །བཅུ་གསུམ་པ་ནི་རྨི་ལམ་བཟང་པོ་ནི་དགེ་སྟེ་དངོས་གྲུབ་ཐོབ་ལ། ངན་ན་གཏོར་མ་བྱིན་ལ་སྔགས་ཀྱིས་བཟློག་པར་བྱའོ། །དེ་ནས་ཅི་འབྱོར་པའི་མཆོད་པ་བྱས་ལ་བསྲུང་བར་བྱའོ། །སློབ་མ་ལྷག་པ་གནས་པའི་ཆོ་གའོ། །ཆོ་ག་བརྒྱད་ཀྱིས་སྔོན་དུ་འགྲོ་བའོ། དངོས་གཞི་ལ་བཅུ་བཞི་ཡིས་དཀྱིལ་འཁོར་གྱི་བྱ་བ་སྟོན་ཏེ། དང་པོ་ཐིག་གདབ་པ་ནི། ཐིག་སྐུད་གཉིས་བྱས་ཏེ་ཡེ་ཤེས་ཀྱི་ཐིག་ལ་སྐུད་པ་ཁ་དོག་ལྔ་པ་ལྔ་ལ། རང་གི་མིག་ནས་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་སྐུད་པ་ཛས་བཀུག་སྟེ་ལས་ཐམས་ཅད་པའི་ཆུས་གཏོར་ལ། མཆོད་པ་ཡང་ཕུལ་ནས་ཨོཾ་ཨཱ་ཨོཾ་ཧཱུྃ། ཨོཾ་ཨ་ཨ་ཧཱུྃ། ཨོཾ་ཨ་སྭཱ་ཧཱུྃ། ཨོཾ་ཨ་ཧ་ཧཱུྃ། ཨོཾ་ཨ་ཧཱུྃ་ཧཱུྃ། ཞེས་ཁ་ཁར་བསྒྲིལ་ལ། ཨོཾ་ཨ་ནྱོ་ན་ཨ་ནུད་གྷ་ད་སརྦ་དྷ་རྨ། ཀྵྨྱ་ར་ཀྵྨྱ་ར་ཨཱ་ནུད་གྷ་ཏ་སརྦ་དྷརྨ་ཨ་ཏྱད་ཨ་ནུད་ག་ཏ་སརྦ་དྷརྨ་ཨཿ དྱད་ཨ་ནུད་པྲ་བེ་ཤ་ཡ་སརྦ་དྷརྨ་ཧཱུྃ། ཞེས་གཅིག་ཏུ་བསྒྲིལ་ལོ། །ལས་ཀྱི་ཐིག་སྐུད་ཁ་དོག་གཅིག་པ་ཡང་བྱས་ཏེ། ནམ་མཁར་ཡེ་ཤེས་ཀྱི་ཐིག་སློབ་དཔོན་ཁ་ཤར་དུ་བལྟས་ནས་བརྐྱང་ཏེ། ཨོཾ་བཛྲ་ས་མ་ཡ་སུ་ཏྲ་མ་ཏི་ཀྲ་མ་ཧཱུྃ། ཞེས་བརྗོད་ལ་གདབ་པོ། །དེ་བཞིན་དུ་ལྷོ་བྱང་དང་མཚམས་ཀྱང་གདབ་སྟེ། དེ་ནས་ལས་ཀྱི་སྐུད་པས་གདབ་པོ། ཆ་ཆེན་ཉི་ཤུ་ལ་སོགས་པ། ཆ་ཕྲན་དང་བཅས་ལེགས་པར་གདབ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། ཐིག་བཞི་དང་ནི་ཡང་དག་ལྡན། །ཀ་བ་བརྒྱད་ཀྱིས་ཉེ་བར་མཛེས། ཞེས་བྱ་བ་ལ་སོགས་པ་གསུངས་ཏེ་ལག་ལེན་ལྟར་བྱའོ། གཉིས་པ་རྡུལ་ཚོན་ནི། རིན་པོ་ཆེ་ལྔའམ་འབྲས་ཁ་དོག་བསྒྱུར་བ་ལ་སོགས་པ་ལ། ས་བོན་ལྔ་བཀོད་ནས་ཡེ་ཤེས་ལྔའི་རང་བཞིན་དུ་དགུག་ཅིང་མཆོད་ལ་ཨོཾ་བཛྲ་ཙི་ཏྲང་ས་མ་ཡ་མ་ཏི་ཀྲ་མ་ཧཱུྃ། ཞེས་བརྗོད་ཅིང་བྱིན་གྱིས་བརླབས་ནས། ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་ནི་རྣམ་སྒྲོལ་མཛད། །རྡོ་རྗེ་འཛིན་པ་རྒྱལ་པོ་ཆེ། །རྡུལ་ཚོན་མི་ཕྱེད་ངོ་བོ་ཉིད། ཞེས་གཡོན་པའི་ཁུ་ཚུར་གྱིས་ཕྱི་རོལ་ནས་དཀར་སེར་དམར་ལྗང་ནག་པོའི་རེ་ག་བྱས་ཏེ། དེ་ནས་དབུས་ནས་བྲི་བར་བྱའོ། །དབུས་མཐིང་ཁ། ཤར་དཀར་ལྷོ་སེར་ནུས་དམར་བྱང་ལྗང་བ་རེ་མིག་གི་གདུང་དང་ཀ་བ་མཐིང་ཁའོ། །འདོད་ཡོན་དམར་པོ་ལ་ཕ་གུ་སེར་པོ་དྲ་བ་དྲ་ཕྱེད་མཐིང་ཁ་པུ་ཤུ་མཛེས་པ་རྟ་བབས་སྣ་ཚོགས་པད་མ་དང་རྡོ་རྗེ་དུར་ཁྲོད་འོད་ཀྱི་ཕྲེང་བ་དང་བཅས་པ་མཛེས་པར་བྱས་ཏེ་བྲིའོ། །དེ་ནས་ཕྱག་མཚན་དགོས་པ་ནི། དབུས་སུ་པད་མ་དང་ཉི་ཟླའི་སྟེང་དུ་རྡོ་རྗེ་རྩེ་དགུ་པའོ། །ཤར་དུ་འཁོར་ལོ། ལྷོར་རིན་ཆེན། ནུབ་ཏུ་པད་མ། བྱང་དུ་རལ་གྲི །མཚམས་བར་ཨུད་པ་ལའོ། །སྣམ་བུ་གྲ་བཞིར། མེ་ལོང་། པི་ཝང་། དུང་ཆོས། རོའི་སྣོད་དོ། །ཁྱམས་ཀྱི་བྱམས་པ་ཀླུ་ཤིང་གཞན་གཙོ་བོ་དང་མཐུན་པའོ། །ཁྲོ་བོ་རྣམས་ཀྱི་ཤར་སྒོར་དབྱུག་ཐོ། ལྷོར་རྡོ་རྗེ་དབྱུག་པ། ནུབ་པད་མའི་དབྱུག་པ། བྱང་དུ་རྒྱ་གྲམ། མེར་རལ་གྲི། ལྷོ་ནུབ་ལྕགས་ཀྱུ། རླུང་དུ་རྡོ་རྗེ་དབྱུག་པ། བྱང་ཤར་དུ་ཏྲི་ཤུ་ལའོ། །ནུབ་སྨད་དུ་རྡོ་རྗེ་ཏེ། ཐམས་ཅད་རང་རང་གི་སྔགས་བཟླས་ཤིང་དགོད་དོ། །དཀྱིལ་འཁོར་བྲི་བའོ། །གསུམ་པ་བྱིན་གྱི་བརླབས་པ་ནི། མཆོད་པ་ཐམས་ཅད་ཀྱིས་བསྐོར་ཞིང་བརྒྱན་ལ་བུམ་པ་དང་དབང་རྫས་ཐམས་ཅད་ཀྱང་བཀོད་ལ་རྡོ་རྗེ་སློབ་དཔོན་བདག་ཉིད་དང་པོའི་སྦྱོར་བ་བསྒོམ་ཞིང་། བཛྲ་དྷྲིག་ལ་སོགས་པའི་སྔགས་ཀྱིས་འབྱིན་པའི་སྦྱོར་བས་དཀྱིལ་འཁོར་བསྐྱེད་ནས་ཕྱག་རྒྱ་བཞི་དགོད་པའི་བར་དུ་བྱ་སྟེ། ཡེ་ཤེས་ཀྱི་དཀྱིལ་འཁོར་དགུག་ཅིང་གཞུག་པ་དང་བཅིང་བ་དང་དབང་དུ་བྱས་ནས། སེམས་དཔའ་སུམ་རྩེག་ཏུ་བྱིན་གྱིས་བརླབ་པོ། བཞི་པ་མཆོད་པ་ནི། དང་པོར་མེ་ཏོག་ལ་སོགས་པ་ཕྱིའི་མཆོད་པས་མཆོད་དོ། །དེ་ནས་རེག་བྱ་རྡོ་རྗེ་སྦྱོར་བས་སངས་རྒྱས་ཐམས་ཅད་ལ་མཆོད་པ་ནི་ནང་གི་མཆོད་པའོ། །དེ་ནས་ཤ་ལྔ་དང་བདུད་རྩི་ལྔ་སྦྱངས་ནས་དཀྱིལ་འཁོར་ལ་མཆོད་དེ་རང་ཡང་ཚིམ་པར་བྱ་བ་ནི་གསང་བའི་མཆོད་པའོ། །དེ་ནས་བསྟོད་པ་དང་བཟླས་པས་མཉེས་པར་བྱ་སྟེ། ཕྱིར་ཕྱོགས་སྐྱོང་རྣམས་ལ་གཏོར་མ་སྦྱིན་ནོ། །ཡང་དཀྱིལ་འཁོར་གྱི་ནང་དུ་སོང་སྟེ། སྟོད་གཡོགས་དང་སྨད་གཡོགས་དང་གཙུག་གཏོར་ལ་སོགས་པའི་རྒྱན་ཐམས་ཅད་དང་ལྡན་པས་ཧཱུྃ་མཛད་ཀྱི་སྐུར་བསྒྱུར་ལ། གཡས་ཕྱོགས་ནས་དཀྱིལ་འཁོར་ལ་ལན་གསུམ་དུ་བསྐོར་ལ། ཕྱག་བྱས་ནས་མེ་ཏོག་གི་ཕྲེང་བ་སྔོན་ལ་གཙོ་བོ་ལ་ཕུལ་ཏེ། སླར་བླངས་ནས་ལྷས་གནང་བར་བསམས་པ་འདིས་ནི། རྫས་དང་ཡོ་བྱད་ལ་སོགས་པའི་དྲི་མ་ཐམས་ཅད་དག་པར་འགྱུར་རོ། །དཀྱིལ་འཁོར་མཆོད་པའི་ཆོ་གའོ། །ལྔ་པ་རྡོ་རྗེ་སློབ་དཔོན་བདག་འཇུག་བྱ་བ་ནི། སེམས་བསྐྱེད་པ་ནས་རྗེས་སུ་གནང་བའི་བར་གྱི་ཆོ་ག་ཇི་ལྟ་བས་དཀྱིལ་འཁོར་ལ་བདག་གི་བླང་ཞིང་གནས་སྐབས་དང་སྦྱར་ལ་རྒྱས་བསྡུས་ཅི་རིགས་སུ་བྱས་ཏེ། མཐར་བདེན་པའི་བྱིན་བརླབས་བྱ་བ་ནི། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག སེམས་དཔའི་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་བསྒྲུབས་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་བསྒྲུབས་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་བསྒྲུབས་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་པར་བདག་མཛོད་ཅིག །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཅིག །འདོད་ཆགས་དམ་ཚིག་མཆོག་གྱུར་པའོ། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་པ། །བདེན་པ་དེ་ཡིས་མགོན་བདག་པོ། །ཁྱེད་ཀྱིས་འདོད་པ་རབ་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །དེ་བཞིན་ཉིད་ལས་ངེས་པར་སྐྱེས། བདེན་པ་དེ་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག །ཅེས་ལན་གསུམ་དུ་བརྗོད་དོ། །སློབ་དཔོན་འཇུག་པའོ། །དྲུག་པ་སློབ་མ་འཇུག་པ་ནི་བཅུ་གསུམ་སྟེ། དང་པོ་གདོང་བཅིང་བ་ནི་རས་དམར་པོ་ལ་སོགས་པས་བཀབ་སྟེ་འབྱུང་པོ་ལ་གཏོར་མ་བྱིན་ནས་མཎྜྻལ་ཕུལ་ཏེ་ཡོན་གྱི་མཆོག་ཀྱང་ཕུལ་ནས་གུས་པས་ཐལ་མོ་སྦྱར་ཏེ། སྡུག་པའི་སློབ་མ་ལ། སློབ་དཔོན་གྱིས། ཀྱེ་སྡུག་པ་ཁྱེད་སུ་ཡིན་ཞེས་དྲིའོ། །དེས་ཀྱང་ཀྱེ་བདེ་བ་ཆེན་པོ་བདག་ནི་སྐལ་བ་བཟང་པོའོ། །ཞེས་བརྗོད་དོ། །གཉིས་པས་ནི། ཨོཾ་ཨ་ཁྃ་བི་ར་ཧཱུྃ་གིས་མེ་ཏོག་གི་ཕྲེང་བ་འཛིན་དུ་བཅུག་སྟེ། དཀྱིལ་འཁོར་གྱི་ཡོལ་བའི་ནང་དུ་བཅུག་ནས། ཨོཾ་ན་མ་སརྦ་ཏ་ཐཱ་ག་ཏ་པུ་ཙ་པ་ཏ་ན་ཡ། ཨད་མ་ནཾ་ནིརྻ་ཏ་ཡ་མི་བཻ་རོ་ཙ་ན་པྲ་བར་ཡ་མྃ། དེ་བཞིན་དུ་ཨ་ཀྲོ་བྷྱ། རད་ན་སྭཱ་བྷ་བ། ཨ་མི་དེ་བཱ། ཨ་མོ་ཀ་སིད་དྷི་པྲ་བར་ཏ་ཡ་མཾ་ཞེས་ཕྱག་འཚལ་ལ་གྲལ་ལ་འཁོད་དོ། །གསུམ་པ་དོན་དམ་དུ་སེམས་བསྐྱེད་པ་ནི། རང་རང་དང་པོའི་མགོན་པོ་ཞལ་གཅིག་ཕྱག་གཉིས་པར་བསྐྱེད་པའི་སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ། ཟླ་བའི་དཀྱིལ་འཁོར་ཉ་གང་བའི་དབུས་སུ། དོན་དམ་བྱང་ཆུབ་སེམས་ཀྱི་རང་བཞིན་རྡོ་རྗེ་སྔོན་པོ་རྩེ་ལྔ་པ་བསྒོམས་ཏེ། ཨོཾ་སརྦ་ཡོ་ག་ཙི་ཏ་ཨུད་པ་ཏ་ཡ་མི་སུ་ར་ཏ་ས་མ་ཡ་སྟོཾ་ཧོ། སིདྷ་བཛྲ་ཡ་ཐ་སུ་ཁྃ། ཞེས་བརྗོད་དོ། །བཞི་པ་དམ་ཚིག་སྒྲག་པ་ནི་སྤྲོས་པ་ལ་དགའ་ན་སྔར་ལྟར་ད མ་ཚིག་དང་སྡོམ་པ་འཛིན་དུ་བཅུག་ནས། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི་མ་མཐོང་པ་དད་པ་མེད་པ་རྣམས་ལ་སྨྲ་བར་མ་བྱེད་ཅིག །ཅེས་བརྗོད་ནས་མགོ་ཐོག་དུ་རྡོ་རྗེ་བཟུང་ནས། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མི་བྱའོ། །གལ་ཏེ་སྨྲས་ན་དམ་ཚིག་ཉམས་པར་གྱུར་ཏ་རེ། ཞེས་བརྗོད་དོ། །ཡང་རྡོ་རྗེ་སྙིང་ཁར་བཟུང་ནས། ཨོཾ་བཛྲ་ས་ཏ་ཧཱུྃ། རྡོ་རྗེ་སེམས་དཔའ་དེ་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་སོ། །དེ་ནས་བདུད་རྩིའི་ཆུ་འཐུང་དུ་གཞུག་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུང་ཤིག །ཨོཾ་བཛྲ་ཨར་མྲི་ཏ་ཨུད་ཀ་ཐ་ཐཱ། སློབ་དཔོན་ཁྱོད་ཀྱི་དམ་ཚིག་ནི། དེང་ཕན་ཆད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བརྗོད་པ་གང་ཡིན་པ་དེ་ཡང་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཚེའི་དུས་བྱས་ནས་དམྱལ་བར་ལྟུང་བར་གྱུར་ཏ་རེ། །ཞེས་བརྗོད་དོ། །ལྔ་པ་ཡེ་ཤེས་དབབ་པ་ནི་སློབ་མ་དེ་རྣམས་སྣང་བ་མཐའ་ཡས་སུ་བསྒོམ་དུ་བཅུག་ལ། སྤྱི་བོར་ཧ། མགྲིན་པར་ཨ་དམར་པོ། སྙིང་ཁར་ལཾ་ལས་སའི་དཀྱིལ་འཁོར་གྲུ་བཞི་པའི་དབུས་སུ་ཧཱུྃ། ལྟེ་བར་བྃ་ལས་ཆུའི་དཀྱིལ་འཁོར་ཟླུམ་པོ། སུམ་མདོར་རཾ་ལས་མེའི་དཀྱིལ་འཁོར་དམར་པོ། རྐང་པའི་འོག་ཏུ་ཡྃ་ལས་རླུང་གི་དཀྱིལ་འཁོར་གཞུ་ལྟ་བུ། དེའི་འོག་ཏུ་ཛྷྱཾ་འོད་འབར་བ་གཡོས་ནས་དཀྱིལ་འཁོར་རྣམས་རིམ་པས་བསྐྱོད་ནས་ལུས་ཐམས་ཅད་བདེ་སྟོང་དུ་གྱུར་པར་བསྒོམ་ཞིང། སངས་རྒྱས་ཐམས་ཅད་ཀྱི་བྱིན་བརླབས་འོད་ཟེར་ལྟར་དགུག་ཅིང་མོས་པ་བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་མཛོད་ཅིག །ཅེས་ལན་གསུམ་དུ་གསོལ་བ་གཏབ་ལ། བཛྲ་ཨ་བེ་ཤ་ཡ་སྟོ་བྷ་ཡ་ར་རྭ་ར། ཙ་ལ་ཡ་ཙ་ལ་ཧཱུྃ་ཧ་ཨ་ཛྷྱཱོཾཿ ཞེས་བརྗོད་ཅིང་གུ་གུལ་དང་བྱི་ལའི་བྲུན་སི་ལ་དང་བཅས་པའི་བདུག་སྤོས་བསྲེག་ཅིང་རོལ་མོ་དང་བཅས་པས་བསྐུལ་ལོ། །ཕེབས་པ་དང་ཏི་སྟ་བཛྲ་ཞེས་པས་བརྟན་པར་བྱས་ཏེ། གལ་ཏེ་སྨྲ་ན་ལྕེ་ལ་ཨཿབསྒོམས་ཏེ་སྨྲར་གཞུག་གོ །བབ་པས་ལུས་ངག་ཡིད་གསུམ་བྱིན་གྱིས་རློབ་པར་འགྱུར་རོ། །དྲུག་པ་སྣང་བ་བརྟག་ཅིང་མེ་ཏོག་དོར་བ་ནི། དཀྱིལ་འཁོར་ལ་ལྟར་བཅུག་ལ། ཁ་དོག་ཅི་ལྟར་མཐོང་དྲིའོ། །དཀར་པོ་ཞི་བ། སེར་པོ་རྒྱས་པ། དམར་པོ་དབང་། ནག་པོ་དྲག་པོ། སྣ་ཚོགས་ནི་ལས་ཐམས་ཅད་པའི་ཡེ་ཤེས་འགྲུབ་པོ་ཞེས་བསྟན་ཏོ། དེ་ནས་མེ་ཏོག་དོར་བ་ནི། ཡང་དག་པའི་དཀྱིལ་འཁོར་དུ། །བདག་གིས་སློབ་མ་གཞུག་པར་བགྱི། །ལྷ་རྣམས་རིགས་ཀྱི་རིམ་ཇི་བཞིན། །ཇི་ལྟར་བསོད་ནམས་དེ་བཞིན་ཤོག །པྲ་ཏི་ཙྪ་བཛྲ་ཧོ་ཞེས་མེ་ཏོག་གི་ཕྲེང་བ་དོར་རོ། །གང་ལ་བབས་པའི་ལྷའི་རིགས་སོ། །ཕྱི་རོལ་ཏུ་ལྷུང་ན་ལན་གསུམ་དུ་སྐྱར་རོ། །དེ་ལ་ཡང་མ་བྱུང་ན་སྐལ་བ་མེད་པས་བཏང་ངོ་། །བདུན་པ་སྤྱན་དབྱེ་བ་ནི། ཨོཾ་རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་ཏེ། །རྡོ་རྗེའི་མིག་ནི་བླ་ན་མེད། ཨོཾ་ཙ་ཀྵུ་ས་མ་ཙ་ཀྵུ་བྷི་ཤོ་དྷ་ཡ་སྭ་ཧཱ། །ཞེས་དབྱེའོ། །བརྒྱད་པ་ནི་དཀྱིལ་འཁོར་བསྟན་ཏེ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །གསང་སྔགས་ཕྱག་རྒྱའི་བྱིན་བརླབས་ལས། །འགྲོ་བ་ཕུན་ཚོགས་དངོས་གྲུབ་ཀུན། ཐམས་ཅད་འདི་ལས་འབྱུང་བས་ན། །དངོས་གྲུབ་ཐོབ་ཕྱིར་དམ་ཚིག་སྐྱོངས། །ཐབས་དང་ཤེས་རབ་དབྱེར་མེད་པའི། །གསང་སྔགས་མཉམ་མེད་བཟླས་པར་གྱིས། །ཞེས་བརྗོད་ནས། འདི་ལྟར་དཀྱིལ་འཁོར་ཆོས་ཀྱི་དབྱིངས་མི་མཉམ་པ་མེད་པས་གྲུ་བཞི་པ། དྲན་པ་ཉེ་བར་བཞག་ནས་དབང་པོ་ལྔའི་བར་དག་པའི་སྒོ་བཞི་པ། འཕགས་ལམ་བརྒྱད་ཀྱི་ཀ་བ་ཅན་བྱང་ཆུབ་ཀྱི་ཡན་ལག་དག་པའི་རྟ་བབས་དང་ལྡན་པ། ཡེ་ཤེས་ལྔའི་བརྩིག་པ་དང་། འདོད་ཡོན་དག་པའི་སྣམ་བུ་དང་བསྡུ་བའི་ཕ་གུ་དང་། ཐབས་ཤེས་རབ་ཀྱི་དྲ་བ་དང་། དྲ་བ་ཕྱེད་པ་དང་། དབང་བཅུའི་བ་གུ་ལི་དང་། དགེ་བའི་བཀྲ་མ་ཤི་ཤ་ཅན། ཚད་མེད་པའི་རི་དྭགས་དང་། ཆོས་ཀྱི་འཁོར་ལོ་བུམ་པ་བཟང་པོ། ས་ཐམས་ཅད་རྫོགས་པའི་དུར་ཁྲོད་རྡོ་རྗེ་མེ་རི་དང་བཅས་པ་ནི་དཀྱིལ་འཁོར་གྱི་རང་བཞིན་ནོ། དེའི་དབུས་ན་བཅོམ་ལྡན་འདས་ཀྱི་དཀྱིལ་འཁོར་ནི། གཟུགས་ཕུང་དག་པ་མེ་ལོང་དང་། ཞེས་བྱ་བ་ལ་སོགས་པའི་རྣམ་དག་རྒྱས་པར་བསྟན་པར་བྱའོ། །དགུ་པ་མེ་ཏོག་གི་དབང་ནི། སྔར་གྱི་མེ་ཏོག་ལྷ་དེ་ཉིད་ཀྱི་ངོ་བོར་བསྟིམས་ཏེ་མགོ་ལ་བཞག་ནས། ཨོཾ་པྲ་ཏི་གྷྲི་ན་ཏྭ་ས་མི་མྃ། སརྦ་ས་མ་ཡ་སྟོ་མ་ཧཱ་ས་ལ། ཞེས་དབང་སྦྱིན་ནོ། །དེ་རྣམས་ནི་སློབ་མ་དཀྱིལ་འཁོར་དུ་གཞུག་པའོ། ད་ནི་དབང་བཞི་སྟེ། ཐོག་མར་བུམ་པའི་དབང་ལ་ཡང་གཉིས་ཏེ། རིག་པའི་དབང་ལྔ་དང་། བདག་པོ་སློབ་དཔོན་གྱི་དབང་ངོ་། །དང་པོ་ལ་ཡང་། གསོལ་བ་གདབ་པ་དང་། རིག་པའི་དབང་ལྔ། མེ་ལོང་དང་དྲུག་སྟེ། མཎྜྻལ་ཕུལ་ནས་གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །དབང་མཆོག་དམ་པ་སྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའ་རྡོ་རྗེ་དེང་བདག་སྩོལ། ཞེས་ལན་གསུམ་དུ་བརྗོད་ལ། དེ་མ་ཐག་ཏུ་རྡོ་རྗེ་སློབ་དཔོན་གྱིས། རེག་རྡོ་རྗེ་དང་སྙོམས་པར་ཞུགས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བསྐུལ་ནས་བུམ་པའི་ཆུའི་རང་བཞིན་དུ་གྱུར་པར་བསྒོམས་ཏེ། སློབ་མ་མི་བསྐྱོད་པའི་གཟུགས་སུ་བསམས་པ་ཆུ་དབང་སྦྱིན་ཏེ། གསང་གསུམ་དམ་ཚིག་ལས་བྱུང་པའི། ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་དག་པ་ཡིས། །མི་བསྐྱོད་པ་ཡིས་དབང་བསྐུར་རོ། ཨོཾ་བཛྲ་ཨ་དར་ཤ་ཛྙྱ་ན་ཨ་བྷི་ཤིན་ཙ་ཧཱུྃ། ཞེས་བརྗོད་ལ་ཞེ་སྡང་རྣམ་པར་དག་པར་གྱུར་པར་ལྟའོ། །དེ་ནས་དབུ་རྒྱན་དར་དཔྱངས་དང་བཅས་པ་ལ་རིན་ཆེན་འབྱུང་ལྡན་ཡབ་ཡུམ་དུ་བསྒོམས་ལ་སྔ་མ་བཞིན་སངས་རྒྱས་ཐམས་ཅད་གཞུག་ཅིང་དབུ་རྒྱན་དུ་བསྐུར་ལ། མགོ་ལ་བཅིངས་ཏེ། སངས་རྒྱས་ཀུན་གྱི་རྒྱལ་སྲིད་ཆེ། །དབུ་རྒྱན་རིན་ཆེན་དམ་པ་སྟེ། །རིན་ཆེན་འབྱུང་ལྡན་མཆོག་འགྲོ་བ། །རྫོགས་སངས་རྒྱས་སུ་དབང་བསྐུར་རོ། །ཨོཾ་བཛྲ་ས་མན་ཏ་ཛྙྱ་ན་རད་ན་མ་ཏ་ནི་ཧཱུྃ་ཨ་བྷི་ཤིན་ཙྪ། ཞེས་སློབ་མ་ང་རྒྱལ་དག་པ་རིན་ཆེན་འབྱུང་ལྡན་དུ་བྱའོ། །དེ་ནས་རྡོ་རྗེ་དེ་ལ་འོད་དཔག་མེད་ཡབ་ཡུམ་སྔར་ལྟར་བཀུག་ཅིང་ལག་ཏུ་བྱིན་ཏེ། སངས་རྒྱས་ཀུན་གྱི་རྡོ་རྗེའི་དབང་། །མི་ཕྱེད་རྡོ་རྗེ་འོད་གསལ་བ། །དམ་ཆོས་འབྱུང་བའི་སྒོར་ཞུགས་པ། །རྡོ་རྗེ་ཆོས་ཀྱིས་དབང་བསྐུར་རོ། །ཨོཾ་བཛྲ་པྲ་ཏི་ཨ་བྷི་ཀྵ་ཛྙྱ་ན་བཛྲ་ཨ་བྷི་ཤིན་ཙཱ། ཞེས་འདོད་ཆགས་དག་པ་འོད་དཔག་མེད་དུ་བྱའོ། །དེ་ནས་དྲིལ་བུ་དོན་ཡོད་གྲུབ་པ་ཡབ་ཡུམ་དུ་བྱས་ལ་སྔར་ལྟར་གཡོན་དུ་བྱིན་ལ། ཐབས་དང་ཤེས་རབ་ལྡན་པ་ཡིས། །འགྲོ་དོན་མཉམ་མེད་བྱེད་པ་དང་། །མཆོད་པའི་ལས་ཀུན་རྫོགས་བྱེད་པ། །རྡོ་རྗེ་ལས་ཀྱི་དབང་བསྐུར་རོ། །ཨོཾ་བཛྲ་ཀྲི་ཏ་ཨ་ནུད་ཏ་ན་ཛྙྱ་ན་པ་ཏེ་ཨ་བྷི་ཤིན་ཙཱ། ཞེས་ཕྲག་དོག་དག་པ་དོན་ཡོད་གྲུབ་པར་བྱའོ། །དེ་ནས་རྣམ་པར་སྣང་མཛད་སྔ་མ་ལྟར་དམིགས་ནས་རིགས་དང་མཐུན་པའི་མིང་གི་དབང་བྱིན་ཏེ། རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཤིགས་མི་གཡོ་བ། །རྡོ་རྗེའི་མིང་ད ང་རབ་ཏུ་གྲགས། ཨོཾ་ཤྲཱི་བྷི་ཤོ་ཏ་དྷར་མ་དྷ་དུ་ཛྙྱ་ན་ན་མ་ཨ་ཤིན་ཙཱ། དཔལ་ཞེ་སྡང་རྡོ་རྗེ་མི་བསྐྱོད། རང་བྱུང་ཞེས་པ་དང་། གཏི་མུག །རྟག་པ། སྣང་མཛད་ཤར། ང་རྒྱལ། ཡོན་ཏན། རིན་ཆེན། ལྷོ། འདོད་ཆགས། བདེ་ཆེན། དཔག་མེད། ནུབ། ཕྲག་དོག །ལས་ཀྱི། དོན་ཡོད་བྱང་ངོ་། བུད་མེད་ལ་ནི། རེག་རྡོ་རྗེ་མ་ལ་སོགས་པ་རྣམས་གདགས་སོ། །གཏི་མུག་རྣམ་པར་དག་པའི་རང་བཞིན་དུ་བྱའོ། །དེ་ནས་མེ་ལོང་ལ་ཤེས་རབ་ཀྱི་ཕ་རོལ་ཏུ་ཕྱིན་མ་ཕབ་ལ་བསྒྱུར་ཏེ། མེ་ལོང་བསྟན་ལ། བརྗོད་དང་གཟུང་འཛིན་སྤངས་པ་ཡི། དག་ཅིང་གསལ་ལ་དྲི་མ་མེད། །མེ་ལོང་ནང་གི་གཟུགས་བརྙན་བཞིན། །རང་ལྷའི་གཟུགས་ནི་ཤེས་པར་གྱིས། །ཨོཾ་པྲ་ཏི་བཱ་བྷིམ་པ་ཨ་དར་ཤ་བཱ་མ་ཨ་བྷི་ཤིན་ཙ། ཞེས་བརྟན་པར་བྱའོ། །དེ་ནི་སྔ་མ་རྣམས་ལ་རྒྱས་གདབ་པ་སྟེ། རིག་པའི་དབང་གི་ཆོ་གའོ། །རྡོ་རྗེ་སློབ་དཔོན་གྱི་དབང་ལ། གསོལ་བ་གདབ་པ་དང་། སྐུ་གསུང་ཐུགས་ཀྱི་དམ་ཚིག་གསུམ་སྦྱིན་པ་དང་། དངོས་དང་། ལུས་དཀྱིལ་འཁོར་དུ་བསྟན་པ་དང་། རྗེས་སུ་གནང་བ་དང་ལྔ་ལས། དང་པོ་ནི་མཎྜྻལ་དང་ཡོན་གྱི་མཆོག་ཕུལ་ནས། སྔར་གྱི་བྱང་ཆུབ་རྡོ་རྗེ་ཞེས་པའམ། ཡང་ན། གང་གི་བདག་ནི་ཁྱོད་དྲིན་ལས། །རང་དང་གཞན་དོན་ནུས་གྱུར་པ། །རྡོ་རྗེ་སློབ་དཔོན་གྱི་ནི་དབང་། ཐུགས་རྗེའི་གཏེར་ཀྱེ་བདག་ལ་སྩོལ། །ཞེས་ལན་གསུམ་མོ། དེ་ནས་དཀྱིལ་འཁོར་གྱི་ཤར་ཕྱོགས་སུ། སེང་གེའི་ཁྲི་པད་མ་འདབ་མ་བརྒྱད་པ། གདུགས་ལ་སོགས་པས་བརྒྱན་པ་ལ་སློབ་མ་བཞག་སྟེ། གཉིས་པ་དམ་ཚིག་སྦྱིན་པ་ནི། ཧཱུྃ་ལས་བྱུང་པའི་རྡོ་རྗེ་ལག་ཏུ་བྱིན་ལ། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་རྒྱལ་པོ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །འདི་ནི་ཐུགས་ཀྱི་དམ་ཚིག་གོ །དེ་ནས་ཨ་ལས་བྱུང་བའི་དྲིལ་བུ་བྱིན་ལ། འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། བྱང་ཆུབ་རྡོ་རྗེར་རྒྱལ་བ་བཞེད། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །སྲིད་པའི་མཆོག་ནི་མཛད་པ་ཡིན། །ཞེས་གསུང་གི་དམ་ཚིག་གོ །དེ་ནས་ཨོཾ་དེའི་ལུས་ལ་བསྟིམས་ལ། སྙིང་པོ་བསྙེན་པ་སོགས་སྤྱད་པས། །ཕྱག་རྒྱ་ཆེན་པོར་བྱིན་བརླབས་ལ། །གཟུགས་སོགས་འདོད་པའི་དམ་ཚིག་གིས། །གསང་སྔགས་མ་ཚང་མེད་པར་བཟླས། །རང་གི་རིག་པའི་ངོ་བོ་ཉིད། ཕྱོགས་བཅུ་དུས་གསུམ་བཞུགས་པ་སྟེ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དཀའ་ཐུབ་སྡོམ་པ་མི་བཟད་པས། །བསྟེན་དང་མི་སྣང་མངོན་ཤེས་དང་། །མཁའ་ལ་རྒྱུ་དང་ལུས་ངག་ཡིད། ལས་བྱུང་དངོས་གྲུབ་འགྲུབ་མི་འགྱུར། །དེ་བས་སངས་རྒྱས་སེམས་དཔའ་མཆོག །སྔགས་ཀྱི་སྤྱོད་མཆོག་སྤྱོད་པ་རྣམས། །འདོད་པ་ཐམས་ཅད་བསྟེན་པ་ཡིས། །ཆོས་ཀྱི་ཡི་གེ་མཆོག་བརྙེས་སོ། །བདེ་དང་སྡུག་བསྔལ་བདེ་བདག་མིན། །འདོད་པའི་ཡོན་ཏན་ལྔ་རྣམས་བསྟེན། །ཡེ་ཤེས་དོན་གཉེར་འདོད་ཆགས་ཅན། །སྦྱོར་བས་བསྒྲུབས་ན་མྱུར་དུ་གྲུབ། །སྐུ་གསུང་ཐུགས་ནི་ཡང་དག་འགྲུབ། །གང་གཞན་དམན་པར་བཤད་པ་ནི། སྔགས་ཀྱི་བཟླས་པས་འགྲུབ་འགྱུར་བ། །སྐུ་གསུང་ཐུགས་ནི་བསྒོམས་པས་སོ། །ཞེས་བྱ་བ་ནི་སྐུའི་དམ་ཚིག་གོ །གསུམ་པ་དངོས་གཞིའི་ནི་སློབ་མ་རྡོ་རྗེ་སེམས་དཔའི་ང་རྒྱལ་བསྒོམ་དུ་བཅུག་ལ། སློབ་དཔོན་སྦྱོར་བ་གསུམ་རྫོགས་པར་བསྒོམས་པས་སངས་རྒྱས་ཐམས་ཅད་བསྐུལ་ནས་ལྷ་མོ་རྣམས་ཀྱིས་དབང་བསྐུར་བར་དམིགས་ཏེ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པོ་ཡིས་ཕྱག་བྱས་ལ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །ཞེས་བརྗོད་ཅིང་སངས་རྒྱས་ཐམས་ཅད་ཀྱི་མངའ་བདག་ཏུ་གྱུར་པར་བསྒོམས་ཏེ་སློབ་མ་ལ་མེ་ཏོག་གཏོར་ཏེ། ཨོཾ་སུ་པྲ་ཏིཥྚ་བཛྲ་སྭཱ་ཧཱ། ཞེས་པ་དང་། མཆོད་པ་ལྔས་ཀྱང་མཆོད་དོ། །དེ་ནས་རྡོ་རྗེའི་བརཏལ་ཤུགས་ཀྱང་སྦྱིན་ཏེ། འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརཏལ་ཤུགས་བརྟན། །ཨོཾ་སརྦ་ཏ་ཐཱ་ག་ཏ་སིདྷི་བཛྲ་ས་མ་ཡ་ཏིཥྚ། ཨེ་ཤན་དན་དྷ་ར་ཡ་མི་ཧི་ཧི་ཧི་ཧི་ཧཱུྃ། ཞེས་བརྗོད་ལ་རྡོ་རྗེ་བྱིན་ཏེ། ཁྱོད་ནི་མིང་དེ་དང་ལྡན་པའི་རྡོ་རྗེ་སློབ་དཔོན་དུ་གྱུར་ཏེ། ཐེག་པ་ཆེན་པོ་དབུགས་དབྱུང་བར་འགྱུར་ཏོ། བཞི་པ་ལུས་མཎྜྻལ་དུ་བསྟན་པ་ནི། འདི་ལྟར་དཀྱིལ་འཁོར་གྱི་ཕྱོགས་ཀྱི་ཆོས་རྣམས་ཏེ་ཕུང་པོ་དང་ཁམས་དང་སྐྱེ་མཆེད་ལྷ་དང་ཡེ་ཤེས་ཀྱི་ངོ་བོ་ཡིན་ཏེ། གཟུགས་ཕུང་མེ་ལོང་རྣམ་སྣང་མཛད། །ཚོར་བ་མཉམ་ཉིད་རིན་ཆེན་འབྱུང་། །འདུ་ཤེས་སོར་རྟོག་འོད་དཔག་མེད། །འདུ་བྱེད་བྱ་གྲུབ་དོན་ཡོད་གྲུབ། །རྣམ་ཤེས་ཆོས་དབྱིངས་མི་བསྐྱོད་པ། །ས་ཆུ་མེ་རླུང་ཁམས་བཞི་པོ། །སྤྱན་མ་མ་མ་གོས་དཀར་སྒྲོལ། །ཚད་མེད་རྣམ་པ་བཞིར་ཤེས་བྱ། །གཟུགས་སྒྲ་དྲི་རོ་རེག་བྱ་ནི། །གཟུགས་ཀྱི་རྡོ་རྗེ་ལ་སོགས་ཡིན། །མིག་ནི་ས་ཡི་སྙིང་པོ་སྟེ། །རྣ་བ་ཕྱག་ན་རྡོ་རྗེའོ། །སྣ་ལ་ནམ་མཁའི་སྙིང་པོ་སྟེ། །ལྕེ་ལ་འཇིག་རྟེན་དབང་ཕྱུག་གོ །ཡིད་ནི་འཇམ་པའི་དབྱངས་ཡིན་ཏེ། །ལུས་ནི་སྒྲིབ་པ་རྣམ་སེལ་ཡིན། །ཆོས་དང་རྩ་རྣམས་བྱམས་པའོ། །ནམ་མཁའི་ཚིག་རྣམས་ཀུན་ཏུ་བཟང་། །ལག་པ་གཡས་གཡོན་ཁ་གསང་པ། །གཤིན་རྗེ་གཤེད་དང་གཞན་མི་ཐུབ། །རྟ་མགྲིན་བདུད་རྩི་འཁྱིལ་པ་སྟེ། །བསྡུ་བ་བཞི་ཡི་རང་བཞིན་ནོ། །དཔུང་པ་པུས་མོ་གཡས་གཡོན་དང་། །སྤྱི་གཙུག་རྐང་མཐིལ་གནས་རྣམས་དང་། །རྣམ་ཤེས་དྲུག་གི་ངོ་བོ་ནི། །མི་གཡོ་འདོད་པའི་རྒྱལ་པོ་དང་། །དབྱུག་སྔོན་གཙུག་གཏོར་སྟོབས་ཆེན་བསྒྱུར། །གནོད་མཛེས་ཡིན་ཏེ་ཡེ་ཤེས་དངོས། །ཟད་དང་མི་སྐྱེ་ཤེས་པའོ། །ཞེས་བྱུང་བ་འདིར་བསྡུས་ཏེ་བསྟན་པའོ། །ལྔ་པ་རྗེས་གནང་ནི། ངོ་བོ་ཉིད་ཀྱིས་སེམས་ཅན་རྣམས། །ཇི་ལྟ་ཇི་ལྟར་འདུལ་འགྱུར་བ། །དེ་ལྟ་དེ་ལྟར་ཆགས་ལ་སོགས། །གཙང་བས་སེམས་ཅན་དོན་བྱའོ། །ཉིན་རེ་བཞིན་དུ་ཐུན་བཞི་རུ། །ཏིང་འཛིན་གསུམ་གྱི་སྦྱོར་ལྡན་པས། །གྱུར་ནས་ཐུན་མོང་མཆོག་རྣམས་ཀྱི། །དངོས་གྲུབ་ཐོབ་པ་བསྒྲུབ་པར་བྱ། །མི་སྣང་བ་ན་སྟོང་ཡིན་ཏེ། །མངོན་ཤེས་ལྡན་པ་སྟོང་གཉིས་ཡིན། །རིག་པ་འཛིན་པ་སྟོང་གསུམ་སྟེ། རྡོ་རྗེ་ཅན་ནི་འགྲོ་ཀུན་བདག །ཞི་དང་རྒྱས་སོགས་ལས་གང་དང་། །དེ་ལས་གཞན་པ་ཅི་འདོད་པ། འཁོར་ལོ་རྗེས་མཉམ་སྦྱོར་བ་ཡིན། །བསྒྲུབས་ན་མྱུར་དུ་འགྲུབ་པར་འགྱུར། །ཞེས་གསུངས་པས་ཁྱོད་ཀྱིས་དཔལ་གསང་བ་འདུས་པའི་སྒོ་ནས་དབང་བསྐུར་བ་དང་རྒྱུད་ཉན་པ་དང་སྟོན་པ་དང་ལས་ཐམས་ཅད་བསྒྲུབ་པས་སེམས་ཅན་གྱི་དོན་བྱའོ། །འདིར་ཨོཾ་བཛྲ་དྷྲིག་ཧཱུྃ་ལ་སོགས་པའི་སྔགས་ཀྱི་རྗེས་གནང་བྱས་ན་ཡང་འཐད་དོ། །རྡོ་རྗེ་སློབ་དཔོན་དུ་དབང་བསྐུར་བའི་ཆོ་གའོ། །བྱང་ཆུབ་སེམས་དཔའི་འགྲེལ་པ་གསུམ་ན་རྡོ་རྗེ་སློབ་དཔོན་དབང་བཞི་ཀའི་རྗེས་སུ་བྱ་བར་གསུངས་སོ། །འདིར་ནི་ཕྲེང་བ་ཆུ་དང་ཅོད་པན་དང་། །རྡོ་རྗེ་དྲིལ་བུའི་མིང་དང་ནི། །མེ་ལོང་སློབ་དཔོན་རྗེས་གནང་སྟེ། །ཞེས་དགུ་པོ་འདི་ནི་རྡོ་རྗེ་འཆང་ཆེན་པོའི་སྤྲུལ་པའི་དཀྱིལ་འཁོར་དུ་རིག་པའི་དབང་བསྐུར་བའོ་ཞེས་གསུངས་སོ། །གཉིས་པ་གསང་བའི་དབང་ལ་གསུམ་སྟེ། སྔོན་འགྲོ་དང་། དངོས་གཞི་དང་། རྗེས་སོ། དང་པོ་ནི། བདུད་རྩི་ལྔ་དང་བཅས་པས་བྱུགས་པའི་སར་མཆོད་པ་བཤམས་ཏེ། ཕྱི་ནང་གི་མཆོད་པ་རྣམས་བླ་མའི་མཎྜྻལ་ལ་ཕུལ་ནས། མཎྜྻལ་རིན་པོ་ཆེ་རྣམས་དང་བཅས་པས་གསོལ་བ་གདབ་པ། རྡོ་རྗེ་སེམས་ཁྱོད་སངས་རྒྱས་རྣམས་ཀྱི་བདེ་བ་བསྒྲུབ་པ་སྟེ། །རྣམ་དག་བྱང་ཆུབ་སེམས་དཔའ་རྒྱ་ཆེན་སྲས་སུ་བཅས་པ་རྣམས། །ཡུན་རིང་སྟོང་ཉིད་བསྒོམས་པས་དུབ་པ་བདག་ཅག་ལ། །དགའ་བ་ཡིད་འོང་བདེ་བ་ཆེན་པོ་ཉིད་ཀྱིས་མཉེས་པར་མཛོད། ཀྱེ་འདོད་ཆགས་དེ་ནི་དྲི་མེད་ཀུན་དུ་བཟང་པོའི་སྤྱོད་པ་སྟེ། །དག་པའི་འདོད་ཆགས་རྡོ་རྗེས་དམ་ཚིག་ལས་ནི་གསལ་མཛད་ན། །དཀའ་བ་རྣམ་པ་དྲུག་པོས་སྤྱོད་པས་ཤིན་ཏུ་གདུངས་པ་ཡི། །རབ་ཏུ་དགྱེས་དབང་འདོད་པའི་བདེ་བ་ཉིད་ཀྱིས་རྫོགས་པར་མཛོད། །བྱང་ཆུབ་སེམས་ནི་རིན་ཆེན་འབར་ཕྱུང་བས། །མ་ལུས་རྒྱལ་བ་རྣམས་ནི་ལུས་སྐམས་ལ། །རྣམ་དག་རྡོ་རྗེ་ལས་བྱུང་ཡེ་ཤེས་ཆུས། །དྲི་མེད་རིན་ཆེན་སྤྱི་དབབ་དབང་བསྐུར་མཛོད། མཉམ་དང་མི་མཉམ་འདོད་ཆགས་ཚུལ་དག་པས། །པད་མོའི་གནས་སུ་རྡོ་རྗེ་མཛོད་གཏོང་པ། །སྣ་ཚོགས་སེམས་དཔའ་སེམས་ཅན་བརླག་གྱུར་པ། །སྦྱོར་བ་གཞན་མེད་མ་ཐོགས་བཤད་པར་གསོལ། །རྡོ་རྗེ་སེམས་ཁྱོད་དབང་མཆོག་བདེ་བར་བྱེད། རྡོ་རྗེ་པད་མ་ཕྱེ་བའི་ཚུལ་གྱིས་སྦྱོར། །རྒྱལ་བ་ཀུན་གྱི་གཟུགས་སྐུ་རབ་སྟོན་པ། །ཐམས་ཅད་བདེ་བསྒྲུབ་ཉིད་ཀྱིས་བདག་དགྱེས་མཛོད། །ཞེས་བརྗོད་ནས། དངོས་གཞི་ནི་བླ་མས་ཡིད་སྐྱེས་རེག་རྡོ་རྗེ་ལ་སོགས་པའི་སྦྱོར་བའི་ཏིང་ངེ་འཛིན་ལས་བྱུང་བའི་བྱང་ཆུབ་ཀྱི་སེམས་ཐོད་པའམ་དུང་ཆོས་སུ་བཞག་པ་རོལ་མོ་དང་བཅས་པས་སྦྱིན་ནོ། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་ཆེན་པོ་རྨད་བྱུང་བ། ཁམས་ལྔ་ལས་བྱུང་བཅུད་ཀྱིས་ལེན། །བདེ་བ་ཆེན་པོ་མྱང་བར་གྱིས། །འདས་པའི་རྡོ་རྗེ་འཆང་བ་ཡིས། །རྒྱལ་སྲས་ཇི་ལྟར་དབང་བསྐུར་བ། །བྱང་ཆུབ་སེམས་ཀྱི་ཆུ་ཡིས་ནི། །བུ་ཁྱོད་དེ་བཞིན་དབང་བསྐུར་རོ། །ཞེས་བརྗོད་ཅིང་། སློབ་མས་ལུས་ཀྱི་ལྷ་ཐམས་ཅད་བདེ་བ་ཆེན་པོར་གྱུར་པའི་བསམ་པས། ཨ་ཧོ་མ་ཧཱ་སུ་ཁ་ཞེས་བཏུང་བར་བྱའོ། །རྗེས་ནི་བླ་མ་ལ་བསྟོད་པ་འདིས་བསྟོད་དོ། །ཁོང་སྟོང་ཁྱོད་ཀྱི་སྐུ་ལ་མེད། །ཤ་དང་རུས་པ་ཁྲག་ཀྱང་མེད། །ནམ་མཁའ་ལ་ནི་འཇའ་ཚོན་ལྟར། །ཁྱོད་ཀྱི་སྐུ་ནི་སྟོན་པར་མཛད། །སྐུ་ལ་བསྙུང་མེད་མི་གཙང་མེད། །བཀྲེས་དང་སྐོམ་པ་འབྱུང་མེད་ཀྱང་། །ཁྱོད་ནི་འཇིག་རྟེན་རྗེས་འཇུག་ཕྱིར། །འཇིག་རྟེན་བྱ་བ་སྟོན་པར་མཛད། །ཆུ་ཟླ་བཞིན་དུ་བཟུང་དུ་མེད། །ཆོས་རྣམས་ཀུན་ལ་གནས་པ་མེད། །ང་རྒྱལ་མེད་ཅིང་རྨོངས་མི་མངའ། །དམིགས་མེད་ཁྱོད་ལ་ཕྱག་འཚལ་ལོ། །གཤེགས་དང་བཞུགས་དང་དེ་བཞིན་གཟིམས། །སྤྱོད་ལམ་དག་ཅིང་ཐམས་ཅད་དུ། །ཁྱོད་ནི་རྟག་ཏུ་མཉམ་འཇོག་པ། །དམིགས་མེད་ཁྱོད་ལ་ཕྱག་འཚལ་ལོ། །ཞེས་བསྟོད་པར་བྱའོ། །གསང་བའི་དབང་ངོ་། །གསུམ་པ་ཤེས་རབ་ཡེ་ཤེས་ཀྱི་དབང་ལ་ཡང་གསུམ། བསྟོད་ཅིང་གསོལ་བ་གདབ་པ་དང་། །དངོས་གཞི་དང་རྗེས་གནང་ངོ་། །དང་པོ་ནི་ཡང་མཎྜྻལ་དང་མཆོད་པ་ཐམས་ཅད་ཀྱིས་མཆོད་ནས། བསྟོད་པ་ནི། ཁམས་གསུམ་ལས་ནི་རྣམ་གྲོལ་ཞིང་། ནམ་མཁའ་དང་ནི་མཉམ་གྱུར་ལ། །འདོད་པ་རྣམས་ཀྱིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །ཕུང་པོ་རྣམས་དང་ཁམས་རྣམས་དང་། །སྐྱེ་མཆེད་རྣམས་ལ་མི་བརྟེན་ཅིང་། །ཕྱིན་ཅི་ལོག་ལས་རྣམ་གྲོལ་བ། །དམིགས་མེད་ཁྱོད་ལ་ཕྱག་འཚལ་ལོ། །རྣམ་རྟོག་མེད་ཅིང་ཀུན་རྟོག་མེད། །ཐུགས་ནི་རབ་ཏུ་མི་གནས་པ། །བསམ་གྱིས་མི་ཁྱབ་པ་ཡི་ཐུགས། །དམིགས་མེད་ཁྱོད་ལ་ཕྱག་འཚལ་ལོ། །ཇི་ལྟར་ནམ་མཁའ་གནས་མེད་ཅིང་། སྤྲོས་པས་གོས་པ་མེད་པ་ལྟར། །མཁའ་དང་མཉམ་པའི་ཐུགས་མངའ་བ། །དམིགས་མེད་ཁྱོད་ལ་ཕྱག་འཚལ་ལོ། །ཞེས་བསྟོད་ནས་གསོལ་བ་གདབ་པ་ནི། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེང་འདིར་བཤད་པའི་རིན་ཆེན་གྱིས། །གཙོ་བོས་བདག་ལ་བཀའ་དྲིན་རྩོལ། །ཁྱོད་ཞབས་པད་མ་སྤངས་ནས་ནི། །གཙོ་བོ་གཞན་ནི་སྐྱབས་མ་མཆིས། །འགྲོ་བའི་དཔའ་བོ་མཐུ་ཆེན་གྱིས། །དེ་བས་བློ་མཆོག་ཉེ་བར་མཛད། །ཐམས་ཅད་སྟོང་བའི་རང་བཞིན་ཅན། །མངོན་པར་བྱང་ཆུབ་ལྟ་བར་འཚལ། །ཞེས་ལན་གསུམ་མོ། །དངོས་གཞི་ནི་འདིར་ལས་དང་ཆོས་དང་དམ་ཚིག་གི་ཕྱག་རྒྱ་ནི་ཤེས་རབ་སྟེ། ཡིད་ལས་བྱུང་བ་རེག་བྱ་རྡོ་རྗེ་མ་སྒྱུ་མ་དང་མཚུངས་པ། སློབ་མ་ཞེ་སྡང་རྡོ་རྗེ་དམིགས་པའམ། ཡང་ན་རང་རིགས་ཀྱི་ཡུམ་བསྒོམ་པ་ལ་སོགས་པའི་སྟོབས་ཀྱིས་སྦྱིན་ཏེ། ལྷ་མོ་ཕྱག་རྒྱ་ཆེན་པོ་འདི། །དཔག་མེད་བདེ་བ་རབ་སྟེར་མ། །བུ་ཡིས་ཀུན་ནས་བླངས་ནས་ནི། །བླ་ན་མེད་པའི་མཆོད་པ་གྱིས། ཞེས་བརྗོད་པ་ཇི་ལྟར་དེ་ཁོ་ནའི་མཆོད་པའི་སྐབས་ཀྱི་ཏིང་ངེ་འཛིན་བསྟན་ཏེ་བདག་བྱིན་གྱིས་བརླབ་པའི་རིམ་པའམ། སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པའི་ཀུན་རྫོབ་ཀྱི་བདེན་པའི་མན་ངག་བསྟན་པར་བྱའོ། །ཡང་ན་དམ་ཚིག་གི་ཕྱག་རྒྱ་ནང་གི་མངོན་པར་བྱང་ཆུབ་པའི་འབར་འཛག་བསྟན་ནོ། །རྗེས་གནང་ནི། དེ་རིང་ཕན་ཆད་བུ་ཁྱོད་ཀྱིས། ཇི་སྲིད་བྱང་ཆུབ་སྙིང་པོའི་བར། །རྨི་ལམ་བཞིན་དུ་སེམས་ཅན་གྱི། །བླ་ན་མེད་པའི་དོན་བྱོས་ཤིག །རིག་པ་འདི་ནི་དོར་བྱས་ནས། །ཐབས་གཞན་གྱིས་ནི་སངས་མི་རྒྱ། །བརཏལ་ཤུགས་རྣམས་ཀྱི་མཆོག་གི་མཆོག །རིག་པའི་བརཏལ་ཤུགས་བུ་ཡིས་སྤྱོད། ཞེས་བསྟན་ནོ། །དབང་གསུམ་པའོ། །དབང་བཞི་པ་ནི་གསུམ་སྟེ། གསོལ་བ་གདབ་པ་དང་། དངོས་དང་། དབང་རྣམས་ཀྱི་རྗེས་སུ་གནང་པའི་དམ་ཚིག་བསྟན་པའོ། །དང་པོ་ནི། ལས་དང་སྐྱེ་ལས་རྣམ་གྲོལ་ཞིང་། །སྣང་བ་གསུམ་པོ་སྤངས་པ་ཡི། །མངོན་པར་བྱང་ཆུབ་མཐོང་བར་ནི། །མགོན་པོ་ཆེན་པོ་བདག་འཚལ་ལོ། །སངས་རྒྱས་ཀུན་གྱི་ཡེ་ཤེས་ཆེ། །དེ་བཞིན་གཤེགས་པ་ཀུན་གྱི་གནས། །ཡེ་ཤེས་རྡོ་རྗེ་བླ་ན་མེད། །མགོན་པོ་ཆེན་པོ་བདག་འཚལ་ལོ། །ཐོག་མཐའ་མེད་ཅིང་ཞི་བ་དང་། །ཉོན་མོངས་ཐམས་ཅད་རྣམ་སྦྱོང་ཞིང་། །ལུས་དང་ངག་དང་སེམས་སྦྱོང་བ། །རྡོ་རྗེ་ཆེན་པོ་བདག་འཚལ་ལོ། །ཞེས་གསོལ་བ་བཏབ་ནས། བླ་མས་དབང་བཞི་པ་དོན་དམ་པའི་བྱང་ཆུབ་ཀྱི་སེམས་ཀྱི་དཀྱིལ་འཁོར་ལ་བརྟེན་ནས། རིལ་པོར་འཛིན་པ་དང་། རྗེས་སུ་གཞིག་པའི་རྣལ་འབྱོར་བསྟན་པར་བྱའོ། །དེ་ཡང་ལུས་ངག་ཡིད་གསུམ་སངས་རྒྱས་ཐམས་ཅད་ཀྱི་སྐུ་དང་། རྡོ་རྗེའི་སྔགས་དང་། ཆུ་ཟླ་ལྟ་བུའི་ཐུགས་བདེ་བ་ཆེན་པོའི་རྣལ་འབྱོར་ལ་གནས་ནས་སེམས་ཅན་ཐམས་ཅད་ཀྱི་དོན་བྱེད་པ་དང་། ཆོས་ཐམས་ཅད་ཀྱི་རང་བཞིན་རང་གི་སེམས་སྤྲོས་པ་ཐམས་ཅད་དང་བྲལ་བ་འོད་གསལ་བ་ཕུང་པོ་དང་ཁམས་དང་སྐྱེ་མཆེད་ཀྱི་སྤྲོས་པ་ཐམས་ཅད་དང་བྲལ་བ། དེ་བཞིན་གཤེགས་པ་ཐམས་ཅད་ཀྱི་དོན་དམ་པའི་བྱང་ཆུབ་ཀྱི་སེམས་རྡོ་རྗེ་མངོན་སུམ་དུ་བྱ་བ་ནི་དབང་བཞི་པའོ། །རིགས་ཀྱི་བུ་ཁྱེད་རྣམས་ཀྱིས་དེ་རྟོགས་པར་བྱ་བའི་ཕྱིར། རིམ་པ་ལྔའི་གདམས་ངག་ལས་ཤེས་པར་བྱའོ། །ཞེས་བསྟན་ཏོ། །དེ་ལྟར་དབང་གོང་མ་ཐོབ་ནས་ཐུན་མོང་མ་ཡིན་པའི་དམ་ཚིག་དང་སྡོམ་པ་དགེ་སློང་རྡོ་རྗེ་འཛིན་པ་རྣམས་ཀྱིས་བསྒྲུབ་པ་ནི་འདི་རྣམས་སོ། །དབང་བསྐུར་འདི་ནི་ཇི་ལྟ་བར། །བྱང་ཆུབ་སྤྱོད་གཞན་དེ་བཞིན་དུ། །དགེ་བའི་ཚུལ་ནི་གཞན་གསུངས་པ། སངས་རྒྱས་ཀུན་སོགས་ཐོབ་མི་འགྱུར། །བུ་ཡིས་དམ་ཚིག་བསྲུང་བ་དང་། །རྟག་ཏུ་སྡོམ་པ་བསྐྱང་བར་བྱ། །བཅུ་ཕྱེད་སྒྲོན་མ་མི་འཆི་སྤྱད། །དམ་ཚིག་གཞན་ཡང་བསྲུང་བ་ནི། །དཀོན་མཆོག་གནོད་པ་གཞོམ་བྱ་སྟེ། ཤེས་རབ་ཐམས་ཅད་སྤྱད་པར་བྱ། །གཞན་གྱི་ནོར་ཡང་བླང་བར་བྱ། །རྟག་ཏུ་རྫུན་དུ་སྨྲ་བར་བྱ། ཞེས་བྱ་བ་ཐུན་མོང་མ་ཡིན་པ་ལྔའོ། །རྡོ་རྗེ་ཐེག་པའི་ཕས་ཕམ་པ་དང་འདྲ་བའི་རྩ་བའི་དམ་ཚིག་ཉམས་ན་ལྟུང་བར་འགྱུར་བ་བཅུ་བཞི་ཡོད་དེ། སློབ་དཔོན་ལ་ནི་བརྙས་པ་དང་། །བདེ་གཤེགས་བཀའ་ལས་འདས་པ་དང་། །སྡང་པས་ཡུན་གྱི་སྔགས་མི་སྨྲ། །བྱམས་པ་ཆེན་པོ་སྤོང་བ་དང་། །བྱང་ཆུབ་སེམས་ནི་འདོར་བ་དང་། །ཐེག་པ་གསུམ་ལ་སྨོད་པ་དང་། །སྐལ་མིན་གསང་བ་སྒྲོགས་པ་དང་། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་ཡིད་གཉིས་ཟ། གདུག་ལ་བྱམས་དང་ཆགས་བྲལ་དང་། །ཆོས་ལ་གཉིས་སུ་འབྱེད་པ་དང་། །དད་པའི་སེམས་ཅན་རབ་ཏུ་སྨོད། །དམ་ཚིག་རྙེད་ཚེ་ཇི་སྲིད་པའི། །བརྟགས་པའི་ཤེས་རབ་སྨོད་པ་སྟེ། །སྔགས་པས་འདི་དག་བྱས་ན་ནི། །ཁ་ན་མ་ཐོ་སྦོམ་པོར་འགྱུར། །རྩ་བའི་ལྟུང་བ་ཡིན་པར་བཤད། །ཉིན་དང་མཚན་དུ་ལན་གསུམ་དུ། །བསྔགས་པས་རྟག་ཏུ་བསམ་པར་བྱ། །གཞན་ཡང་ཡན་ལག་དམ་ཚིག་ནི། །དམ་མེད་རིག་མ་མི་བསྟེན་ཅིང་། །ཚོགས་ཀྱི་འཁོར་ལོར་རྩོད་མི་བྱ། །མ་གསུངས་པ་ཡི་རིག་མ་ལ། །དམ་ཚིག་བདུད་རྩི་མི་བླང་ཞིང་། །གསང་ཆོས་དུས་ལྡན་བསྟན་པར་བྱ། །ཅོ་འདྲི་བྲེ་མོའི་གཏམ་མི་བྱ། །ཉན་ཐོས་ནང་དུ་ཞག་བདུན་མིན། །རྣལ་འབྱོར་ཡེ་ཤེས་མི་ཤེས་པར། །རྡོ་རྗེ་འཛིན་པར་ཁས་མི་བླང་། །དུས་མིན་གསང་ཆོས་བསྟན་པ་མིན། །གསང་བས་འདི་དག་ཉམས་མི་བྱ། །ཟད་པས་གྲུབ་པ་ཡོད་མིན་ཏེ། །ནད་དང་སྡུག་བསྔལ་རབ་ཏུ་འཕེལ། །དེ་བས་དམ་ཚིག་བུས་བསྲུངས་ཤིག །ཞེས་སྡོམས་པ་སྦྱིན་ནོ། །དམ་ཚིག་སྡོམ་པ་གྲུབ་པ་འདི། །ཁྱོད་ཀྱིས་རྟག་ཏུ་བཟུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་ཚིག་བདག་གི་བཀའ་ཡིན་ནོ། །བྱང་ཆུབ་སེམས་ནི་བཏང་མི་བྱ། །ཕྱག་རྒྱ་རྡོ་རྗེ་གང་ཡིན་པའོ། །གང་ཞིག་བསྐྱེད་པ་ཙམ་གྱིས་ནི། སངས་རྒྱས་ཉིད་དུ་ཐེ་ཚོམ་མེད། །དམ་པའི་ཆོས་ནི་མི་སྤང་ཞིང་། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ཡི། །ཚུལ་ཆེན་བསྟན་པར་མི་བྱའོ། །བདག་ཉིད་ཡོངས་སུ་སྤངས་ནས་ནི། དཀའ་ཐུབ་ཀྱིས་ནི་མ་གདུངས་པར། །ཅི་བདེ་བར་ནི་བདེ་བ་ཟུང་། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུའི་ཕྱག་རྒྱ་རྣམས། །ནམ་ཡང་དོར་བར་མི་བྱ་ཞིང་། །སློབ་དཔོན་སྨད་པར་མི་བྱའོ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེས་ནི་སངས་རྒྱས་ཀུན་སྨད་པས། རྟག་ཏུ་སྡུག་བསྔལ་ཐོབ་གྱུར་ཏེ། །རིམས་དང་དགྲ་དང་དུག་དང་ནད། །མཁའ་འགྲོ་རྣམས་ཀྱིས་འཚེ་བ་དང་། །གདོན་དང་ལོག་འདྲེན་གཏུམས་པོ་ཡིས། །བསད་ནས་སེམས་ཅན་དམྱལ་བར་ལྟུང་། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རྟག་ཏུ་མི་བཅོམ་པས། །བླ་མ་ལ་ནི་གུས་བཅས་ཡོན། །རྗེས་སུ་མཐུན་པར་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྲུངས། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་འབུལ། །འདི་ནི་སངས་རྒྱས་ཀུན་དང་འདྲ། །དེ་ཕྱིར་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་གྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །ཞེས་གདམས་པ་སྦྱིན་ནོ། །དབང་བཞི་པའོ། །དེ་ནས་བུམ་པ་དང་འབྲེལ་བའི་ལུང་བསྟན་པ་དང་། གསང་བ་དང་འབྲེལ་བའི་དབུགས་དབྱུང་བ་དང་། ཤེས་རབ་དང་འབྲེལ་བའི་གཟེངས་བསྟོད་པ་རྣམས་བྱ་སྟེ། ཡི་གེ་ཨ་ལས་སློབ་དཔོན་ཤཱཀྱ་ཐུབ་པའི་ཆ་ལུགས་སུ་བསྒྱུར་ཏེ། གཡོན་ཆོས་གོས་འཛིན་པ། གཡས་པ་ལུང་སྟོན་པའི་ཕྱག་རྒྱ་མགོ་བོར་བཞག་སྟེ། ཨོཾ་ང་ཡིས་འདི་ལྟར་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པའི་མཆོག་ནི་གྲུབ་པའི་ཕྱིར། །སྲིད་པའི་ངན་འགྲོ་ཉིད་ལས་བཏོན། །ཀྱེ་དེ་བཞིན་གཤེགས་པ་རྡོ་རྗེ་ཆེ་གེ་མོ་ཞེས་བྱའོ། སིད་དྷི་བྷུར་བཱུ་ཝ་སྭཱཧཱ། འདིས་སངས་རྒྱས་ཐམས་ཅད་ཀྱིས་ལུང་བསྟན་པར་འགྱུར་རོ། །དབུགས་དབྱུང་བ་ནི། མཆོག་གསང་དཀྱིལ་འཁོར་དམ་པ་འདིར། །མཐོང་པའམ་ནི་ཞུགས་གྱུར་པས། །སྡིག་པ་ཀུན་ལས་ངེས་པར་གྲོལ། །ཁྱེད་རྣམས་དེ་ཉིད་ལེགས་པར་གནས། །བདེ་ཆེན་ཐེག་པ་འདི་ལ་ནི། །སླར་ཁྱོད་འཆི་བ་ཡོང་མེད་དེ། །མི་ཐུབ་པ་དང་མི་སོད་པས། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །སྟོན་པ་མཆོག་ཏུ་གྱུར་པ་ཡིན། །སྲིད་པ་གཏན་དུ་ཡོད་མ་ཡིན། །ཞེས་བརྗོད་དོ། །གཟེངས་བསྟོད་པ་ནི། གང་ཕྱིར་འདི་ནི་ལེགས་གནས་པ། །དེང་ཁྱོད་སྐྱེ་བ་འབྲས་བུར་བཅས། །ལྷ་དང་དམ་པ་མཉམ་པ་རུ། །དེང་ཁྱོད་གྱུར་པ་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པར། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་པོའི་བདག་པོར་བསྟན་པ་ཡིན། །དེ་རིང་བདུད་ལས་རྒྱལ་གྱུར་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱི་ནི་སངས་རྒྱས་ཉིད། །དེ་ཉིད་ཐོབ་པར་ཐེ་ཚོམ་མེད། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་སྐྱིད་བརྟན་པར་གྱིས། །དེང་ནི་འགྲོ་ལ་མྱུར་བདེ་རྡོ་རྗེ་སེམས་དཔའ་དང་། །རབ་ཏུ་མཉམ་ཞིང་རྟག་པ་ཉིད་དུ་རྟོགས་པར་གྱིས། ཞེས་བརྟན་པར་བྱའོ། །དེ་ནས་ཡང་སྔར་བསྟན་པའི་རྡོ་རྗེའི་རྗེས་གནང་ཡང་སྦྱིན་ནོ། །དེ་ནས་བླ་མ་ལ་ཕྱག་འཚལ་ཏེ། གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བགྱིད་པར་འཚལ། །ཞེས་བྱའོ། །དེ་ནས་རིན་ཆེན་ཁྱིམ་དང་གླང་པོ་རྟ། །ཡུལ་དང་མལ་སྟན་རྣམས་དང་ནི། །བྲན་དང་བྲན་མོ་ཆུང་མ་སྡུག །བུ་མོ་ཤིན་དུ་ཡིད་འོང་དང་། །གང་གིས་བདག་ཀྱང་དབུལ་བྱ་ན། །ལྷག་མ་རྣམས་ཀྱང་སྨོས་ཅི་དགོས། །ཞེས་པས་མཉེས་པར་བྱའོ། །དེ་ནི་དབང་བཞི་པ་ཡོན་ཏན་དང་བཅས་པའི་ཆོ་གའོ། །སྦྱིན་བསྲེག་ནི་ཁོ་བོས་འོད་ཀྱི་སྙེ་མའི་བསྡུས་པར་བསྟན་པས་འདིར་མ་བྲིས་སོ། །རབ་ཏུ་གནས་པ་ནི་བུམ་པ་གཉིས་ལ་བརྟེན་པར་བཤད་པའི་རིམ་པས་བྱའོ། །ཐམས་ཅད་སྟོང་པ་ཟབ་ཅིང་ཕྲ་བས་ན། །རྟོག་གེ་ཡུལ་མིན་འཁྲུལ་པས་ཤེས་མི་ནུས། །དེས་ན་དེ་ལ་འཇུག་པར་བྱ་བའི་ཕྱིར། །རིམ་གཉིས་ཐབས་ཀྱི་སྔོན་འགྲོའི་ཆོ་ག་ཡིན། །དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་སློབ་དཔོན་བདག་ཉིད་ཆེན་པོ་འཕགས་པ་ཀླུ་གྲུབ། བདེ་བར་གཤེགས་པས་མདོ་རྒྱུད་དུ་མ་ནས་ལུང་བསྟན་པ། རིག་པའི་མཆོག་རྨ་བྱ་ཆེན་མོ་གྲུབ་པའི་འཁོར་ལོས་བསྒྱུར་བ། ཅིག་ཏུ་དཔལ་སྒྲ་གཅན་བཟང་པོ་ས་ར་ཧ་པའི་བཀའ་ལུང་སྤྱི་བོས་ནོད་པ་རྡོ་རྗེ་ཐེག་པའི་དོན་གཟིགས་པར་མཛད་པ་དང་། རྒྱུད་ན་བཞུགས་པའི་ཚིག་འགའ་ཡར་དང་། བླ་མ་དམ་པ་རྣམས་ཀྱི་མན་ངག་དང་བཅས་པ་འདི། རང་བྱུང་རྡོ་རྗེའི་མིང་ཅན་གྱིས་ལྷག་པའི་བསམ་པ་རྣམ་པར་དག་པས་བསྡུས་པའོ། བླ་མེད་རྒྱུད་རྒྱལ་གསང་བ་འདུས་པ་ཡིས། །གསལ་བྱེད་རྒྱུད་རྒྱལ་རྡོ་རྗེ་ཕྲེང་བ་ལས། །རྣམ་བཤད་རྒྱུད་ཀྱི་དབང་གི་ཆོ་ག་འདི། །གསལ་བྱས་རྒྱུད་ཀྱི་དོན་ལ་འཇུག་གྱུར་ཅིག །ཉེས་པར་གྱུར་གང་བླ་མ་མཁའ་འགྲོ་ལ། །བཟོད་པར་གསོལ་བས་དངོས་གྲུབ་རྩལ་དུ་གསོལ། །དེང་སང་དུས་ན་མཁས་པར་རློམ་པ་རྣམས། །བླ་མའི་གདམས་པ་རྒྱུད་པ་མི་ཤེས་པར། །རང་བཟོའི་ཆོ་ག་ཅིག་གི་ལག་ལེན་བྱེད། །དེ་དག་སེལ་ཕྱིར་རང་བྱུང་རྡོ་རྗེས་སྦྱར། འགྲོ་བའི་དོན་རྒྱ་ཆེར་གྲུབ་པར་གྱུར་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །

ཤྲཱི་མ་ཧཱ་མ་ཡའི་མངོན་རྟོགས་གཏོར་མའི་ཆོ་ག་དང་བཅས་པ།

༄༅། །ཤྲཱི་མ་ཧཱ་མ་ཡའི་མངོན་རྟོགས་གཏོར་མའི་ཆོ་ག་དང་བཅས་པ་བཞུགས་སོ། །

༄༅། །བླ་མ་དང་དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །དྲག་པོ་འདུལ་མཛད་ཧེ་རུ་ཀ །བདེ་ཆེན་སངས་རྒྱས་མཁའ་འགྲོ་མ། །རྣལ་འབྱོར་མ་ཡི་འཁོར་ལོ་ལ། །ཕྱག་འཚལ་བསྒོམ་པའི་རྣལ་འབྱོར་བཤད། །དཔལ་མ་ཧཱ་མ་ཡའི་དཀྱིལ་འཁོར་དུ་དབང་བསྐུར་བ་ཐོབ་པས། དབྱིབས་དང་སྔགས་ཀྱི་རྣལ་འབྱོར་ཉམས་སུ་བླང་བ་ནི། གནས་དབེན་པར་བདེ་བའི་སྟན་ལ་འདུག་སྟེ། བདུད་རྩིའི་རི་ལུ་ཁར་བཅུག་ལ། ཤྲཱི་ཧེ་རུ་ཀ་ཞེས་བྱ་བའི་དོན་དྲན་པས། སྙིང་ཁར་པད་མ་འདབ་མ་བརྒྱད་པའི་དབུས་ན། རྃ་ལས་ཉི་མའི་སྟེང་དུ་ཧཱུྃ་སྔོན་པོ་འོད་ཁ་དོག་ལྔ་འཕྲོ་བའི་སྣང་བས། མདུན་གྱི་ནམ་མཁར་ལྷ་ལྔའི་དཀྱིལ་འཁོར་བླ་མ་དང་བཅས་པ་བལྟས་ལ། འོད་ཟེར་ལས་བྱུང་བའི་ལྷ་མོ་རྣམས་ཀྱིས་མཆོད་དེ། ཨོཾ་ཨ་ཧྲཱི་བཛྲ་ཨརྒཾ་པྲ་ཏི་ཙ་ཡེ་ཧཱུྃ། ཨོཾ་ཨ་ཧྲི་བཛྲ་པུ་པྃ། དྷུ་པྃ། ཨ་ལོ་ཀེ། ནེ་པེ་ཏེ། ཤ་པ་ཏ་ཧཱུྃ། ཞེས་མཆོད་ཡོན་དང་། མེ་ཏོག་དང་། བདུག་སྤོས་དང་། མར་མེ་དང་། ཞལ་ཟས་དང་། སིལ་སྙན་རྣམས་ཀྱིས་མཆོད་དོ། །དེ་ནས་ལྷ་མོ་ལྔས་ཤ་ལྔ་བདུད་རྩི་ལྔས་ནང་དང་། རེག་རྡོ་རྗེ་མས་བདེ་བ་ཆེན་པོས་མཆོད་ནས། སྡིག་པ་ཐམས་ཅད་བཤགས་པ་དང་། བསོད་ནམས་ཐམས་ཅད་ལ་ཡིད་རང་བ་དང་། བླ་ན་མེད་པའི་ལམ་བརྟན་ཅིང་། སྐྱབས་སུ་འགྲོ་བ་དང་། སེམས་ཅན་ཐམས་ཅད་ཀྱིས་དཔལ་ཧེ་རུ་ཀའི་གོ་འཕང་ཐོབ་པར་བྱ་བའི་ཕྱིར་སེམས་བསྐྱེད་དེ། བྱང་ཆུབ་ཆེན་པོ་གྲུབ་པར་གྱུར་ཅིག་སྙམ་པས། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མའི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡིད་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་རབ་བསྒྲུབ་ཕྱིར། །བདག་གིས་བྱང་ཆུབ་སེམས་མཆོག་བསྐྱེད། །ཨེ་མའོ་སེམས་ཅན་ཀུན་མགྲོན་གཉེར། །བདག་གི་དགེ་བའི་རྩ་བ་ཀུན། །འགྲོ་བ་ཀུན་གྱིས་ཐོབ་པར་ཤོག །ཅེས་བརྗོད་ནས་སེམས་ཅན་ཐམས་ཅད་བདེ་བ་དང་ཕྲད་པར་འདོད་པའི་བྱམས་པ་དང་། སྡུག་བསྔལ་དང་བྲལ་བར་འདོད་པའི་སྙིང་རྗེ། མྱ་ངན་ལས་འདས་པའི་དགའ་བ་ཉེ་རིང་མེད་པའི་བཏང་སྙོམས་ཡུན་རིང་དུ་བསྒོམས་ཏེ། ཡང་ཐམས་ཅད་སྙིང་ཁའི་ས་བོན་ལ་བསྡུས། ཨོཾ་ཤུ་ནྱ་ཏ་ཛྙྱ་ན་བཛྲ་སྭ་བྷ་བ་ཨད་མ་ཀོ་ཧྃ། ཞེས་རྟོག་པ་ཐམས་ཅད་དང་བྲལ་བ་ལ་གནས་པ་ནི་བསོད་ནམས་དང་ཡེ་ཤེས་ཀྱི་ཚོགས་བསགས་པའོ། །དེ་ནས་ན་ཐ་ལས་འོད་འཕྲོས་ཏེ་ཧཱུྃ་ལས་ཆོས་འབྱུང་གི་དབུས་སུ་རྡོ་རྗེ་རྒྱ་གྲམ་བལྟས་ཏེ་འོད་འཕྲོས་ནས་རྡོ་རྗེའི་རྭ་བ་དང་དྲ་བ་དང་གུར་དང་མེ་རྣམས་དང་ལྡན་པའི་བསྲུང་བའི་འཁོར་ལོ་བསྒོམ་མོ། །དེའི་དབུས་སུ་བྷྲུྃ་ལས་བྱུང་བའི་གཞལ་ཡས་ཀྱི་ཁང་པ་གྲུ་བཞི་སྒོ་བཞི་རྟ་བབས་བཞི་དང་ལྡན་པ་དུར་ཁྲོད་བརྒྱད་ཀྱིས་བསྐོར་བའི་དབུས་སུ། པྃ་ལས་པད་མ་འདབ་མ་བརྒྱད་དང་ལྡན་པ། དེའི་དབུས་སུ་ཟླ་བ་དང་ཉི་མའི་གདན། ཕྱོགས་སུ་ཟླ་བ་དང་རོའི་གདན་ལ་ཐིག་ལེ་ཁ་དོག་ལྔ་བསྒོམས་ཏེ། དབུས་སུ་ཐིག་ལེ་ཧྲིའམ་ཧཱུྃ་གིས་མཚན་པ་ཤར་རྡོ་རྗེ་ཧཱུྃ་གིས་མཚན་པ། ལྷོར་རིན་པོ་ཆེ་ས་ཡིས་མཚན་པ། ནུབ་ཏུ་པད་མ་ཨས་མཚན་པ། བྱང་དུ་རལ་གྲི་ཧ་ཡིས་མཚན་པ། ཚད་མེད་པ་བཞིའི་རང་བཞིན་དུ་བལྟས་ཏེ། འོད་འཕྲོས་སངས་རྒྱས་ཐམས་ཅད་ཀྱི་ཐུགས་དམ་བསྐུལ་སེམས་ཅན་གྱི་དོན་བྱས་ཚུར་འདུས་ཏེ་ཡོངས་སུ་གྱུར་པ་ལས། ཤར་གྱི་པད་མ་ལས་རྡོ་རྗེ་མཁའ་འགྲོ་མ་ཞལ་བཞི་ཕྱག་བཞི་མ། སྐུ་དང་རྩ་ཞལ་སྔོན་པོ། གཡས་སེར་གཡོན་ལྗང་རྒྱབ་ཞལ་དམར་བ། ཕྱག་གཡས་དང་པོ་རྡོ་རྗེ། འོག་མ་ཀ་པ་ལ། གཡོན་དང་པོ་དྲིལ་བུ། འོག་མ་ཁ་ཊྶྃ་ག་འཛིན་པའོ། །ལྷོར་རིན་ཆེན་མཁའ་འགྲོ་མ་སེར་མོ། གཡས་སྔོན་གཡོན་ལྗང་རྒྱབ་དམར་བ། ཕྱག་གཡས་དང་པོ་རིན་པོ་ཆེའི་རྒྱལ་མཚན་འོག་མ་ཏྲི་ཤུ་ལ། གཡོན་དང་པོ་ཐོད་པ་འོག་མ་ལྕེ་སྤྱང་ངོ་། །ནུབ་ཏུ་པད་མ་མཁའ་འགྲོ་དམར་མོ། ཞལ་གཡས་སེར་གཡོན་སྔོ་རྒྱབ་ཞལ་ལྗང་ཁུ། ཕྱག་གཡས་དང་པོ་ན་སྣ་ཚོགས་པད་མ། འོག་མ་ན་མདའ། གཡོན་དང་པོ་ཀ་པ་ལ། འོག་མ་གཞུའོ། །བྱང་དུ་སྣ་ཚོགས་མཁའ་འགྲོ་མ་ལྗང་ཁུ། ཞལ་གཡས་སེར་གཡོན་སྔོ་རྒྱབ་དམར་བ། ཕྱག་གཡས་དང་པོ་རལ་གྲི་འོག་མ་ཌ་མ་རུ། གཡོན་དང་པོ་ཞགས་པ། འོག་མ་ཀ་པ་ལའོ། །ཐམས་ཅད་ཀྱང་སྤྱན་གསུམ། དབུ་སྐྲ་དམར་སེར་གྱེན་དུ་བརྫེས་པ། རུས་པའི་རྒྱན་དང་ལྡན་པ། མི་མགོའི་དོ་ཤལ་དང་། མིའི་ལྤགས་པའི་སྟོད་གཡོགས་ཅན། རོ་དང་ཉི་མ་ལ་དཀྱིལ་ཀྲུང་ཕྱེད་པའི་གར་གྱིས་བཞུགས་པའོ། །དེ་ནས་ལྷ་མོ་བཞིས་མགྲིན་གཅིག་ཏུ། ཀྱེ་མ་གཉེན་མཆོག་རྡོ་རྗེའི་འོད་ཀྱིས་པད་མ་ཁ་ཕྱེ་ཅིག ཨ་ལ་ལ་ཧོ། བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག ཉི་མའི་འོད་ཀྱིས་པད་མོ་ཁ་རབ་འབྱེད་པ་བཞིན། ཨ་ལ་ལ་ཧོ། ཞེས་བསྐུལ་བ་ལས་སྐད་ཅིག་གིས་བཅོམ་ལྡན་འདས་ཡབ་ཡུམ་དུ་བཞེངས་པར་བལྟ་སྟེ། སྐུ་མདོག་སྔོན་པོ་ཞལ་བཞི་ཕྱག་བཞི་པ་གར་གྱི་ཉམས་དང་ལྡན་པ། རྩ་ཞལ་སྔོན་པོ། གཡས་སེར་གཡོན་ལྗང་རྒྱབ་དམར་བ། སྤྱན་གསུམ་གསུམ་དང་ལྡན་པ། ཕྱག་གཡས་དང་པོ་ན་མདའ་འོག་མ་ན་ཀ་པ་ལ། གཡོན་དང་པོ་ན་གཞུ་འོག་མ་ན་ཁ་ཊྶཱྃ་ཀ་བསྣམས་པ། མི་མགོ་སྐམ་པོ་ལྔའི་དབུ་རྒྱན་དང་། ཕྱག་རྒྱ་དྲུག་གིས་བརྒྱན་པ། མགོ་བོ་རློན་པ་ལྔ་བཅུའི་དོ་ཤལ་ཅན། མིའི་ལྤགས་པའི་སྟོད་གཡོག་དང་ལྡན་པའོ། །དེའི་ཡུམ་སངས་རྒྱས་མཁའ་འགྲོ་མ་ཡང་བཅོམ་ལྡན་འདས་དང་འདྲ་བ་གཉིས་སུ་མེད་པར་བཞུགས་པའོ། །དེ་ནས་སྐུ་གསུང་ཐུགས་དང་སྐྱེ་མཆེད་བྱིན་གྱིས་བརླབ་པ་ནི། སྤྱི་བོར་ཨོཾ་དཀར་པོ། མགྲིན་པར་ཨཿདམར་པོ། སྙིང་ཁར་ཧཱུྃ་སྔོན་པོ། དཔྲལ་བར་ཙི་སེར་པོ། མིག་གཉིས་ལ་ཨོཾ་དཀར་པོ། ལྕེ་ལ་ཨ་དམར་པོ། རྣ་བ་ལ་ཨ་དམར་པོ། སྣ་ལ་ཁེ་དཀར་པོ། སྙིང་ཁར་ར་དམར་པོ་བསྒོམ་མོ། །དེ་ནས་རང་གི་སྙིང་ཁར་ཉི་མ་ལ་རྡོ་རྗེ་སྔོན་པོ་ཧཱུྃ་གི་མཚན་པ་བསྒོམས་པ་ལས། འོད་ཟེར་འཕྲོས་པས་ཡེ་ཤེས་ཀྱི་དཀྱིལ་འཁོར་བསྐྱེད་པ་ལྟ་བུ་སྤྱན་དྲངས་ཏེ། མཆོད་ནས་ཛ་ཧཱུྃ་བྃ་ཧོ་ཞེས་གཉིས་སུ་མེད་པར་བྱའོ། །དེ་དང་དུས་ཅིག་ཏུ་དེ་བཞིན་གཤེགས་པ་ཐམས་ཅད་མཆོད་ནས། མགོན་པོ་དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་བཏབ་པས། ཐུགས་ཁ་ནས་ལྷ་མོ་བུམ་པ་ཐོགས་པ་རྣམས་ཀྱིས། སྤྱི་བོ་ནས་དབང་བསྐུར་ཏེ། ན་མ་སརྦ་ཏ་ག་ཏ་ཨ་བྷི་ཥིན་ཙ་ཏུ་མྃ་ཞེས་གསུང་ཞིང་ཡེ་ཤེས་ཀྱི་རང་བཞིན་དུ་བྱས་ཏེ། ཆུའི་ལྷག་མ་ལས། གཙོ་བོ་ཡབ་ཡུམ་ལ་མི་བསྐྱོད་པ། རྡོ་རྗེ་མཁའ་འགྲོ་ལ་རྣམ་སྣང་། རིན་ཆེན་མཁའ་འགྲོ་ལ་རིན་འབྱུང་། པད་མ་མཁའ་འགྲོ་ལ་འོད་དཔག་མེད། སྣ་ཚོགས་མཁའ་འགྲོ་ལ་དོན་ཡོད་གྲུབ་པས་དབུ་རྒྱན་པར་བལྟའོ། །དེ་ལྟར་དབྱིབས་ཀྱི་རྣལ་འབྱོར་བསྟན་ནས། མཆོད་པ་ནི། ཕྱི་ནང་གསང་བ་སྔར་ལྟར་རང་ཉིད་ལ་མཆོད་པར་བྱའོ། །དེ་ནས་བསྟོད་པ་ནི། མཆེ་བ་གཙིགས་ཤིང་འཇིགས་པར་མཛད། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པ། །ཧེ་རུ་ཀ་དཔལ་བདག་ཕྱག་འཚལ། །ཞེས་དང་། མི་བསྐྱོད་པ་ནི་ཡེ་ཤེས་ཆེ། །ཞེས་པ་གཏོར་ཆོག་ནས་བཤད་པའི་བསྟོད་པ་གང་རུང་གིས་བསྟོད་དོ། །དེ་ནས་སྔགས་ཀྱི་རྣལ་འབྱོར་བྱེད་པར་འདོད་པས། ཧེ་རུ་ཀའི་ནམ་མཁའ་ཧཱུྃ་ལས་རྡོ་རྗེ་ཨཾ་གིས་མཚན་པ་བུག་པར་ཕཊ་དང་བཅས་པར་བསམ། ཡུམ་སངས་རྒྱས་མཁའ་འགྲོའི་སྤྱི་བོར་ཨོཾ་དཀར་པོ། སྙིང་ཁར་ཧཱུྃ་སྔོན་པོ། ལྟེ་བར་སྭ་སེར་པོ། གསང་པར་ཨཿདམར་པོ། བརླ་ལ་ཧ་ལྗང་ཁུ། ཧྲི་ལས་པད་མ་བྷྲུྃ་གྱིས་མཚན་པ་བསྐྱེད་ནས། ལྷ་མོ་རྣམས་ཀྱིས་བསྐུལ་ནས་གཉིས་སུ་མེད་པའི་སྦྱོར་བས་སངས་རྒྱས་བཀུག་ཅིང་ཞལ་བཞིར་བསྡུས་པས་བདེ་བ་ཆེན་པོས་མཆོད་ནས་དཀྱིལ་འཁོར་ཐམས་ཅད་བདེ་བའི་རང་བཞིན་དུ་བསམ་ཞིང་རླུང་ཅུང་ཟད་བཟུང་བ་ནི་ཡེ་ཤེས་སྐྱེ་བར་བྱེད་དོ། །དེ་ལ་སྐྱོ་ན། ཐུགས་ཀར་ཧཱུྃ་ངམ་ཧྲི་ལ་སྔགས་ཀྱི་འོད་ཟེར་ལས་དང་མཐུན་པའི་སྤྲོ་བསྡུས་དམིགས་ནས། ཨཱོཾ་ཨཱཿཧྲི་ཧཱུྃ་ཧཱུྃ་ཅེས་བཟླས་པར་བྱའོ། །ཨོཾ་བྷུད་དྷ་ཌཱ་ཀི་ནི་ཨ་ཧྲི་ཧཱུྃ། ཨོཾ་བཛྲ་ཌ་ཀི་ནི་ཨ་ཧྲི་ཧཱུྃ། ཨོཾ་རད་ན་ཌ་ཀི་ནི་ཨ་ཧྲི་ཧཱུྃ། ཨོཾ་པད་མ་ཌ་ཀི་ནི་ཨ་ཧྲི་ཧཱུྃ། ཨོཾ་ཀརྨ་ཌ་ཀི་ནི་ཨ་ཧྲི་ཧཱུྃ། །ཨོཾ་བྷི་ཤ་ཌ་ཀི་ནི་ཨ་ཧྲི་ཧཱུྃ། མཁའ་འགྲོའི་བཟླས་པའོ། །ཡི་གེ་གསུམ་གྱི་སྒྲ་ཡིས་ནི། །གཞུག་པ་དང་ནི་དབྱུང་བྱ་བ། །སྟེང་དུ་འགྲོ་བའི་རླུང་གིས་ནི། །ཡི་གེ་གསུམ་གྱི་སྒྲ་ཕྱུང་ཞིང་། །གཞུག་བྱ་ལ་ནི་བཅུག་ནས་སུ། །དལ་ཞིང་དལ་བ་གཞན་མི་འགྲོ། །རབ་ཏུ་སྤྱོད་པའི་སེམས་ཀྱིས་བསྒོམ། །ཨོཾ་ཨཱཿཧཱུྃ་རྡོ་རྗེའི་བཟླས་པའོ། དེ་ནས་ལྷ་མོ་རྣམས་ཞལ་བཞིར་བསྡུས་ཏེ། བདེ་བ་ཆེན་པོའི་རང་བཞིན་མཚན་མ་ཐམས་ཅད་དང་བྲལ་བ། དེ་ཁོ་ན་ཉིད་ཀྱི་མན་ངག་ལྟར་དམིགས་སོ། །སྤྱོད་ལམ་ཐམས་ཅད་ནི་ཧེ་རུ་ཀའི་རང་བཞིན་དུ་བྱའོ། །ཟས་ཟ་བའི་ཚེ་མེ་རླུང་གི་སྦྱོར་བས་གཏོར་མ་ལྟར་བྱིན་གྱིས་བརླབས་ལ་ཨོཾ་ཨ་གྷུ། ་བྷ་ཀྵ་ཧཱུྃ་ཞེས་བརྗོད་ལ་བཟའ་བར་བྱའོ། །ཁྲུས་ནི་དབང་གི་དམིགས་པ་ལྟར་བྱའོ། །ཐམས་ཅད་སྒྱུ་མ་གསུམ་གྱི་རང་བཞིན་དུ་བརྟག་པར་བྱ་བ་ནི་ཆོས་ཀྱི་རྣལ་འབྱོར་རོ། །འདི་ལྟར་བསྒོམས་པས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་འགྱུར་རོ། །ཡེ་ཤེས་མཁའ་འགྲོ་ཀུ་ཀུ་རི་པ་ཡི། །ཞལ་གདམས་བཞིན་དུ་རང་བྱུང་རྡོ་རྗེས་བྲིས། །དགེ་བས་འགྲོ་ཀུན་ཕྱག་རྒྱ་ཆེ་ཐོབ་ཤོག །རྗེས་སུ་འཇུག་རྣམས་ཉམས་ལེན་བརྩོན་པར་མཛོད། །སྐྱེས་མཆོག་མར་པ་ལྷོ་བྲག་པའི་དགོངས་པ་དང་མཐུན་པར་བྱས་སོ།། །།ས་མ་པ་ཐཱཿ དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །དཔལ་སྒྱུ་འཕྲུལ་ཆེན་མོའི་གཏོར་མའི་རིམ་པ་ནི། རང་ཉིད་ཧེ་རུ་ཀར་བསྐྱེད་ནས་སྐྱེ་མཆེད་རྣམས་བསྲུང་བ་བྱས་ཏེ། མདུན་དུ་རྡོ་རྗེའི་གུར་གྱི་ནང་དུ་སེམས་ཅན་ཐམས་ཅད་དུར་ཁྲོད་བརྒྱད་དང་བཅས་པའི་དཀྱིལ་འཁོར་གྱི་ལྷར་བསྐྱེད་ལ། རང་གི་སྙིང་ཁའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་ལྷ་ཐམས་ཅད་སྤྱན་དྲངས་ཏེ། ཨོཾ་ཤྲི་ཧེ་རུ་ཀ་མ་ཧཱ་བཛྲ། ཨ་ཀད་ཏ་ཡཱ་ཨ་ཀད་ཏ་ཡཱ། པྲ་པེ་ཤ་ཡ་པྲ་པེ་ཤ་ཡ། བྷན་དྷ་ཡཱ་བྷན་དྷ་ཡཱ། ཏོ་ཤ་ཡཱ་ཏོ་ཤ་ཡཱ། སརྦ་བཛྲ་ཌ་ཀི་ནི་ནྃ། ཧྲི་ད་ཡ་ཧཱུྃ་ཧཱུྃ་ཕཊ་ཕཊ་ཞེས་བརྗོད་ནས་གཉིས་སུ་མེད་པར་གྱུར་པ་ལ། ཕྱི་ནང་གི་མཆོད་པ་རྣམས་ཀྱིས་མཆོད་ནས། དེ་ནས་གཏོར་མ་ཡྃ་ལས་རླུང་དང་རྃ་ལས་མེ་དང་། ཀྃ་གསུམ་ལས་ཐོད་པའི་སྒྱིད་པུ་དང་། ཨ་ལས་ཀ་པ་ལ་ཡངས་ཤིང་རྒྱ་ཆེ་བའི་ནང་དུ། གྷོ་ཀུ་དྷ་ཧ་ན་ལས། བ་གླང་དང་ཁྱི་དང་རྟ་དང་གླང་པོ་ཆེ་དང་མིའི་ཤ་དང་། བྷི་མུ་མ་ར་ཤུ་ལས། དྲི་ཆེན་དང་དྲི་ཆུ་དང་རྐང་། རག་ཏ་དང་ཤུ་ཏྲར་བསམས་ཏེ། སྟེང་དུ་ཨོཾ་དེའི་སྟེང་དུ་ཨ་ལས་ཟླ་བ། ཧཱུྃ་ལས་རྡོ་རྗེ་བསྒོམས་ནས། མེ་རླུང་འབར་བས་ཐམས་ཅད་ཞུ་ཞིང་རྡོ་རྗེ་ཟླ་བ་ཡང་ཞུ་ཡེ་ཤེས་ཀྱི་བདུད་རྩི་བཀུག་ནས་ཁ་དོག་དང་རོ་ཕུན་སུམ་ཚོགས་པར་གྱུར་པར་བསམ་མོ། །ལྷ་ཚོགས་ཐམས་ཅད་ཀྱི་ལྕེ་རྡོ་རྗེར་བསམས་ནས་གསོལ་བར་བསམ་ཞིང་། ཨོཾ་ཨཱཿཧཱུྃ། ཨོཾ་ཤྲི་ཧེ་རུ་ཀ་མ་ཧཱ་བཛྲ་པྲ་ཏི་ཙྪ་མྃ་བྷ་ལིང་ཏ་ཧཱུྃ་ཕཊ། ཨོཾ་བྷུད་དྷ་ཌ་ཀི་ནི། བཛྲ་དྷ་ཀི་ནི། རད་ན་ཌ་ཀི་ནི། པད་མ་ཌ་ཀི་ནི། བྷི་ཤ་ཌ་ཀི་ནི། སརྦ་ཌ་ཀི་ནི་པྲ་ཏི་ཚ་མྃ་བྷ་ལིང་ཏ་ཧོ་ཕཊ། ཞེས་བརྗོད་ནས་ཕུལ་བས་གཉིས་སུ་མེད་པའི་ཡེ་ཤེས་ཐོབ་པར་བསམས་ཏེ། བསྟོད་པ་ནི། མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་ལོ། །རྣམ་པར་སྣང་མཛད་རབ་ཏུ་དགའ། །རྡོ་རྗེ་ཞི་བ་དགའ་བ་ཆེ། །རང་བཞིན་གྱིས་ནི་འོད་གསལ་མཆོག །སངས་རྒྱས་མཁའ་འགྲོ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའི་དྲི་མ་མེད། །དངོས་མེད་དག་པས་གོས་པ་མེད། །རིན་ཆེན་མཁའ་འགྲོ་ཕྱག་འཚལ་ལོ། །རྡོ་རྗེ་མི་འཆི་འདོད་ཆགས་ཆེ། །མི་རྟག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པད་མ་མཁའ་འགྲོ་ཕྱག་འཚལ་ལོ། །རྡོ་རྗེ་དག་པ་གདོན་མི་ཟ། །བསམ་པ་ཐམས་ཅད་ཡོངས་རྫོགས་པ། །སངས་རྒྱས་ངོ་བོ་ཉིད་ལས་བྱུང་། །སྣ་ཚོགས་མཁའ་འགྲོ་ཕྱག་འཚལ་ལོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །ངོ་བོ་མེད་ཅིང་གནས་པ་མེད། །དེ་ལྟར་ཆོས་འདི་ཤེས་ནས་ཀྱང་། །སེམས་ཅན་དོན་ནི་མཉམ་མེད་བྱོས། །འོན་ཏམ་སངས་རྒྱས་རིགས་སུ་སྐྱེས། །ཞེས་པ་དང་། ཡང་ཡུལ་ཕྱོགས་ན་གནས་པ་རྣམས་ལ་ཡང་། ཨོཾ་ཨཱཿཧཱུྃ། ཡུལ་ཆེ་གེ་མོ་ཞེས་བྱ་བ་ཨི་དྃ་བྷ་ལི་གྷྲི་ནྷ་གྷྲི་ནྷ། མ་མཱ་ས་པ་རི་བཱ་ར། སརྦ་པན་ཙ། སརྦ་པ་པྃ། བྱ་ཏི་བྷི་ག་ནྃ། ཤན་ཏིང་ཀུ་རུ། དྷ་ན་དྷ་བྱ། ཨུ་ཨཱུ་ཨ་རོ་ཀྵྃ། པུ་ཏི་རུ་རུ་སརྦ་མྃ། རཀྵ་རཀྵཿ ཀུ་རུ་ཀུ་རུ་སྭཱ་ཧཱ། སེམས་ཅན་ཐམས་ཅད་ནད་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །སངས་རྒྱས་ཉིད་དང་ཕྲད་གྱུར་པའི། །ལམ་དེ་ཉིད་དུ་འགྲོ་བར་ཤོག །མ་གྲོལ་བ་རྣམས་ད གྲོལ་བ་དང་། །མ་བསྒྲལ་བ་རྣམས་བསྒྲལ་བྱེད་ཅིང་། །རྣལ་འབྱོར་བསྟན་བཅོས་གནས་པ་ནི། །ད་ལྟ་ཉིད་དུ་གནས་པར་ཤོག ཨོཾ་ཨཱཿཧཱུྃ་མུ་ཞེས་གཤེགས་སུ་གསོལ་ལོ། ཀུ་ཀུ་རི་པས་མཛད་པ་ཡི། །གཏོར་ཆོག་རང་བྱུང་རྡོ་རྗེས་སྤེལ། །དགེས་བས་སེམས་ཅན་ཐམས་ཅད་ཀྱིས། །བར་ཆོད་མེད་པ་ཐོབ་པར་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།

དཔལ་པད་མ་རྒྱལ་པོའི་རྒྱུད་ཀྱི་བསྡུས་དོན།

༄༅། །དཔལ་པད་མ་རྒྱལ་པོའི་རྒྱུད་ཀྱི་བསྡུས་དོན་བཞུགས་སོ། །

༄༅། །བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །རྒྱུད་འདི་ལ་དོན་རྣམ་པ་གསུམ་སྟེ། ལེའུ་དང་པོར་མདོར་བསྟན་པ་དང་། ལེའུ་དགུར་བསྐྱེད་རྫོགས་རྒྱས་པར་བཤད་པ་དང་། བཅུ་ཅིག་པར་རྒྱུད་ཀྱི་དོན་བསྡུ་བའོ། །དང་པོ་ལ་གཉིས། མཚན་གྱི་དོན་དང་། བསྡུ་པའི་དོན་ནོ། །དེ་ལ་ལྔ་སྟེ། དུས་དང་། སྟོན་པ་པོ་དང་། གནས་དང་། སྡུད་པ་པོ་དང་། ཆོས་ཕུན་སུམ་འཚོགས་པའོ། །སྡུད་པ་པོ་ལའང་གཉིས་ཏེ། བྱེ་བྲག་དང་། སྤྱིར་སྡུད་པ་པོ་ཕྱོགས་བཅུའི་སངས་རྒྱས་རྣམས་སོ། །ཆོས་ལའང་གཉིས་ཏེ། མདོར་བསྟན་པའི་ཚུལ་གྱིས་དྲིས་ཅིག་པར་གདམས་པ་དང་། དྲིས་པ་དངོས་སོ། །གཉིས་པ་རྒྱས་པར་བཤད་པ་ལ་གཉིས། སྐུ་གསུང་ཐུགས་བཤད་པ་དང་། དེ་དག་གི་ཡོན་ཏན་དང་འཕྲིན་ལས་བྱིན་གྱིས་བརླབས་དང་བཅས་པ་བཤད་པའོ། །དང་པོ་ནི་ལེའུ་གསུམ་ལས། སྐུའི་ལེའུ་འདི་ལ་གསུམ། སྡུད་པ་པོས་ཞུས་པ་དང་། བསྟན་པ་དང་ལེའུ་ཡི་མཚན་ནོ། །བར་པ་ལ་གསུམ་སྟེ། སྐུ་རྣམས་ཀྱི་རྣམ་གྲངས་བསྡུས་ནས་བསྟན་པ་དང་། རྣམ་གྲངས་ཇི་སྙེད་པ་བསྟན་པ་དང་། དེ་དག་བསྡུ་བའོ། །གཉིས་པ་གསུང་གི་ལེའུ་ལ་གསུམ། དྲིས་པ་དང་། གསུང་དངོས་དང་། ལེའུ་ཡི་མཚན་ནོ། །བར་པ་ལ་བཞི་ལས། གསུང་དངོས་དང་། དེའི་དོན་བཤད་པ་དང་། དེ་བསྒྲགས་པ་དང་། བསྒྲགས་པའི་ཕན་ཡོན་ནོ། །གསུམ་པ་ལ་བཞི། སྤྱན་རས་གཟིགས་དངོས་ཀྱིས་བསྒྲགས་པ་དང་། སངས་རྒྱས་དང་བྱང་ཆུབ་སེམས་དཔའ་ཁྲོ་བོས་བསྒྲགས་པའོ། །ཐུགས་ཀྱི་ལེའུ་ལ་གསུམ། ཞུས་པ་དང་། བཤད་པ་དང་། ལེའུ་ཡི་མཚན་ནོ། །བར་པ་ལ་གསུམ་ལས། ཉོན་ཅིག་པར་བསྐུལ་བ་དང་། ཐུགས་ཀྱི་ཡེ་ཤེས་ཀྱི་རྣམ་གྲངས་རྒྱས་པར་བཤད་པ་དང་། ཡེ་ཤེས་ཀྱི་དོན་བསྡུ་བའོ། །དེ་དག་གི་ཡོན་ཏན་དང་འཕྲིན་ལས་བཤད་པ་ལའང་། ལེའུ་དྲུག་ལས། སྐུའི་ཡོན་ཏན་གྱི་ལེའུ་ལའང་གསུམ་སྟེ། ཞུས་པ་དང་། བཤད་པ་དང་། ལེའུ་ཡི་མཚན་ནོ། །བར་པ་ལ་བཞི་སྟེ། ཡོན་ཏན་མདོར་བསྟན་པ་དང་། རྣམ་དག་དང་སྦྱར་ཏེ་རྒྱས་པར་བཤད་པ་དང་། བསྒོམས་པའི་ཡོན་ཏན་དང་། རྒྱུད་ཀྱི་དོན་བདེ་སྟོང་དུ་བསྡུ་བའོ། །གསུང་གི་ཡོན་ཏན་ལ་གསུམ་ལས། ཞུས་པ་དང་། ཡོན་ཏན་དངོས་དང་། ལེའུ་ཡི་མཚན་ནོ། །བར་པ་ལ་གསུམ་ལས། གསུང་དངོས་བཀའ་སྩལ་པ་དང་། ཡོན་ཏན་གྱི་རྣམ་གྲངས་རྒྱས་པར་བཤད་པ་དང་། སོ་སོའི་སྐྱེ་བོས་དཔག་པར་དཀའ་བའོ། །ཐུགས་ཀྱི་ཡོན་ཏན་ལ་གསུམ། ཞུས་པ་དང་། ཡོན་ཏན་དངོས་བཤད་པ་དང་། ལེའུ་ཡི་མཚན་ནོ། །བཞི་པ་ལམ་བཤད་པ་ལའང་གསུམ་ལས། ཞུས་པ་དང་། དངོས་དང་། ལེའུ་ཡི་མཚན་ནོ། །བར་པ་ལ་གཉིས། ལམ་དང་འབྲས་བུ་དངོས་སུ་བསྟན་པ་དང་། དེའི་ཕན་ཡོན་ནོ། །དང་པོ་ལ་ལྔ། ལམ་མཐའ་དག་གི་དོན་བསྡུ་བ་བསྒྱུར་ལམ་གྱིས་ལུས་ངག་ཡིད་གསུམ་དག་པར་བྱ་བའི་སྤྱིར་བསྟན་པ། བྱེ་བྲག་ཏུ་ལུས་ཡེ་ཤེས་ཀྱིས་དག་པ་དང་། ངག་སྔགས་ཀྱིས་དག་པ་དང་། སེམས་ཉིད་ཀྱིས་དག་པ་འོད་གསལ་ཟུང་འཇུག་ཏུ་བསྡུ་བའི། འོག་མ་ལ་གཉིས། དེའི་དོན་བསྒོམ་པར་གདམས་པ་དང་། ཡོན་ཏན་དངོས་སོ། །འཁོར་གྱི་ལེའུ་ལ་གསུམ་ལས། ཞུས་པ་དང་། བཤད་པ་དང་། ལེའུ་ཡི་མཚན་ནོ། །བར་པ་ལ་གཉིས་ལས། འཁོར་བཤད་པ་དང་། ཡུམ་བཤད་པའོ། །དང་པོ་ལ་གཉིས་ལས། བཤད་པ་ཞལ་གྱིས་བཞེས་པ་དང་། འཁོར་གྱི་བྱེ་བྲག་རྣམས་རྒྱས་པར་བཤད་པའོ། །འོག་མ་ལ་གཉིས་ལས། ཡུམ་བཞི་བཤད་པ་དང་། གཙོ་བོ་ཅིག་པུས་ཀྱང་ཆོག་པར་གདམས་པའོ། །བྱིན་གྱིས་བརླབ་པ་ལ་ཡང་གསུམ་ལས། ཞུས་པ་དང་། ལན་དང་། ལེའུ་ཡི་མཚན་ནོ། །ལན་ལ་གསུམ་ལས། སྐུ་གསུང་ཐུགས་བྱིན་གྱིས་བརླབ་པ་དང་། མཆོག་གི་ཡན་ལག་དང་། ཐུན་མོང་གི་ཡན་ལག་དང་། དང་པོ་ལ་གསུམ་ལས། མདོར་བསྟན་པ་དང་། བྱིན་གྱིས་བརླབ་པ་དངོས་དང་། བྱིན་བརླབས་ཞུགས་པའི་རྟགས་སོ། །གཉིས་པ་ལ་གསུམ་ལས། དཀྱིལ་འཁོར་གྱི་སྒོར་འཇུག་པ། ཟིལ་གྱིས་མནན་པ། རྫོགས་པའི་རིམ་པའོ། །གསུམ་པ་ལ་ལྔ། ཐུན་མོང་མཐའ་དག་བསྒྲུབ་པ། ནད་མེད་པར་བྱ་བ། ཚེ་སྦྱིན་པ། བར་ཆད་ཞི་བར་བྱ་བ། དོན་དབྱེར་མེད་དུ་བལྟ་བའོ། །ལེའུ་བཅུ་གཅིག་པ་རྒྱུད་ཀྱི་དོན་བསྡུ་བ་ལ་གསུམ་ལས། རྫུ་འཕྲུལ་གྱི་ཆོ་འཕྲུལ་བསྟན་པ་དང་། བརྒྱུད་ཡོངས་སུ་གཏད་པ་དང་། ལེའུ་ཡི་མཚན་ནོ། །དང་པོ་ལ་གཉིས་ལས། སྐུའི་ཆོ་འཕྲུལ་དང་། གསུང་གི་ཆོ་འཕྲུལ་ལོ། གཉིས་པ་ལ་བཞི་ལས། སྤྱི་དང་བྱེ་བྲག་ཏུ་གཏད་པ་དང་། བསྐུར་སྟིའི་གནས་སུ་སྦྱིན་པ་དང་། ཉིད་ཀྱི་དོན་དེ་བཞིན་དུ་བསྟན་པ་དང་། འཁོར་རྣམས་ཡིད་རང་བའོ། །བཅོམ་ལྡན་འདས་དཔལ་པད་མ་རྒྱལ་པོའི་རྒྱུད་ཀྱི་བསྡུས་པའི་དོན་རྫོགས་སོ།། ༈ །།པད་མ་ཟབ་པའི་རྒྱུད་ཀྱི་བསྡུས་དོན་བཞུགས། །བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །པད་མ་ཟབ་པའི་རྒྱུད་འདི་ལ་གསུམ་སྟེ། ལེའུ་དང་པོར་གླེང་བཞིའི་ཚུལ་གྱིས་མདོར་བསྟན་པ་དང་། ལེའུ་བཅུ་གསུམ་གྱིས་རྒྱས་པར་བཤད་པ་དང་། བཅོ་ལྔ་པར་དོན་བསྡུ་བའོ། །དང་པོ་ལ་བཞི། མཚན་གྱི་དོན་དང་། གླེང་གཞི་དང་། གཞུང་དོན་དང་། ལེའུ་ཡི་མཚན་ནོ། །གསུམ་པ་ལ་གསུམ། སྟོན་པས་འཁོར་སྣང་བར་མཛད་པ་དང་། བསྐྱེད་རྫོགས་ཀྱི་དོན་བསྟན་པ་དང་། སྤྱན་རས་གཟིགས་ཉིད་སྟོན་པར་བསྒྲུབ་པའོ། །ལེའུ་བཅུ་གསུམ་གྱི་རྒྱས་བཤད་ལ་གསུམ། བསྐྱེད་པའི་རིམ་པ་དང་། དེ་ལ་བརྟེན་པའི་དབང་དང་། རྫོགས་པའི་རིམ་པའོ། །དང་པོ་ལ་གཉིས། སྐུ་མངོན་པར་འབྱུང་བ་དང་། གསུང་མངོན་པར་འབྱུང་བའོ། །དང་པོ་ལ་གཉིས། །གཞུང་དང་། ལེའུ་ཡི་མཚན་ནོ། གཞུང་ལ་བཞི། གཙོ་བོའི་སྐུ་མདོག་དང་། ཕྱག་མཚན། ཡབ་ཡུམ། བརྒྱད་དང་། མཁའ་འགྲོ་མ་བཞི། མཆོད་པའི་ལྷ་མོ་དྲུག་གི་སྐུ་མདོག་དང་ཕྱག་མཚན་ནོ། །གསུང་མངོན་འབྱུང་བ་ལ་གསུམ། བཤད་པར་ཞལ་གྱིས་བཞེས་པ། གཞུང་དངོས། ལེའུ་ཡི་མཚན་ནོ། གཞུང་ལ་གསུམ། སྐུ་གསུང་ཐུགས་ཀྱི་དོན། ཞུས་ལན་གྱིས་སྔགས་གསུངས་པ་དངོས་གསུངས་པའི་དོན་ནོ། །དེ་ལ་གསུམ། ཅི་ལྟར་མཆོད་པ་དང་། མཆོད་པའི་ཡོན་ཏན། བདེ་བ་ཆེན་པོ་བཤད་པའོ། །དེ་ལ་བརྟེན་པའི་དབང་ལ་གསུམ། དབང་བསྐུར་བར་གསོལ་བ་དང་། དོན་དངོས་དང་། ལེའུ་ཡི་མཚན་ནོ། །དོན་དངོས་ལ་གསུམ། ཇི་ལྟར་དབང་བསྐུར་བའི་དོན། དངོས་དབང་བསྐུར་བ་དངོས། དེ་ལ་བརྟེན་པའི་ལྷའི་རྣལ་འབྱོར་རོ། །བར་པ་ལ་གཉིས། སྔོན་འགྲོ་དང་། དངོས་གཞིའོ། །དེ་ལ་གསུམ། དབང་བཞིའི་རིམ་པ་དབང་གི་ངེས་ཚིག སྦྱང་གཞི་སྦྱོང་བྱེད་དུ་བཤད་པའོ། །རྫོགས་པའི་རིམ་པ་ལ་གཉིས། ལུས་ཀྱི་དཀྱིལ་འཁོར་ལ་བརྟེན་པའི་རྫོགས་རིམས། དེ་བཞིན་ཉིད་ཀྱི་རྫོགས་རིམས་སོ། །དང་པོ་ལ་གསུམ། ལུས་ལ་ལྷ་དགོད་པ། དེའི་ཕན་ཡོན། གསུང་གི་འཕྲིན་ལས་སོ། །དང་པོ་ལ་གསུམ། ཞུ་བའི་ཚིག་གིས་མཚམས་སྦྱར་བ། གཞུང་དངོས། ལེའུ་ཡི་མཚན་ནོ། །གཞུང་ལ་གཉིས། མདོར་བསྟན་དང་། རྒྱས་བཤད་དོ། །དེ་ལ་ལྔ། གཙོ་བོ་ཡབ་ཡུམ་རིགས་བདག་དང་བཅས་པ་དང་། འཁོར་ལོ་བཞི་ལ་ངག་དགོད་པ་དང་བར་ཆོད་སེལ་བའི་ལྷ་དང་། དབང་པོ་ལ་དགོད་པ་དང་། རྡོ་རྗེའི་བཟླས་པའོ། །དེའི་ཕན་ཡོན་ལ་གསུམ། ཞུ་བས་མཚམས་སྦྱར་བ་དང་། གཞུང་དང་། ལེའུ་ཡི་མཚན་ནོ། །གཞུང་ལ་གཉིས། སོ་སོའི་ཕན་ཡོན། ཐུན་མོང་གི་ཕན་ཡོན་ནོ། །དང་པོ་ལ་གཉིས། གཙོ་བོ་དང་། འཁོར་རོ། །དེ་ལ་གསུམ་སྟེ། ཡུམ་བཞིའི་ཕན་ཡོན་དང་། མཁའ་འགྲོ་བཞི་དང་། ལྷ་མོ་དྲུག་གི་ཕན་ཡོན་ནོ། །གསུང་གི་འཕྲིན་ལས་ལ་གསུམ། ཞུས་པ་དང་། གསུང་གི་འཕྲིན་ལས་དངོས་དང་། ལེའུ་ཡི་མཚན་ནོ། །བར་པ་ལ་དྲུག གཙོ་བོས་གསུངས་པ། སྤྱན་རས་གཟིགས་དང་། ཡུམ་དང་། མཁའ་འགྲོ་བཞི་དང་། ཡུམ་བཞི་དང་། འདོད་ཡོན་གྱི་ལྷ་མོས་བསྒྲགས་པའི་ཕན་ཡོན་དང་བཅས་པའོ། །དེ་བཞིན་ཉིད་ཀྱི་རྫོགས་རིམས་ལ་གསུམ། ཟབ་པ་དང་མི་ཟབ་པ་དང་། དེའི་ཡན་ལག་གོ །དང་པོ་ལ་གཉིས། ཟབ་མོ་ཉིད་བཤད་པ་དང་། ཐེ་ཚོམ་བསལ་བའོ། །དང་པོ་ལ་གཉིས། གཞུང་དང་། ལེའུ་ཡི་མཚན་ནོ། །གཞུང་ལ་གསུམ། དོན་དམ་པའི་རིགས། དེ་ལ་བརྟེན་པའི་ལམ། ཕན་ཡོན་གྱི་ཚིགས་སུ་བཅད་པའོ། །དང་པོ་ལ་གཉིས། རྒྱ་ཆེ་བ་དང་། ཟབ་པའོ། །གཉིས་པ་ལ་གསུམ། སྟོང་ཉིད་སྙིང་རྗེ་དབྱེར་མེད་དུ་གདམས་པ། དབང་པོ་ལ་གདམས་པ། རིམས་འཇུག་ཏུ་གདམས་པའོ། །ཐེ་ཚོམ་བསལ་བ་ལ་གསུམ། ཞུས་པ་དང་། ལན་དང་། ལེའུ་ཡི་མཚན་ནོ། །དང་པོ་ལ་གཉིས། གང་གིས་ཞུས་པ་དང་། གང་གིས་ཞུས་པའི་དོན་ནོ། ལན་ལ་གསུམ་། མདོར་བསྟན་པ་དང་། མདོ་སྔགས་དབྱེར་མེད་ཀྱི་འབྲས་བུའི་རྒྱས་བཤད་དང་། དབྱེར་མི་ཕྱེད་པའི་དོན་ཏོ། །མི་ཟབ་པའི་རྫོགས་རིམས་ལ་གཉིས། རྫོགས་རིམ་དངོས་དང་། བསྒོམས་པའི་དོན་ནོ། དང་པོ་ལ་གསུམ། ཞུས་པ་དང་། གཞུང་དང་། ལེའུ་ཡི་མཚན་ནོ། །གཞུང་ལ་ལྔ། བདེ་སྟོང་ཐ་དད་དུ་མེད་པའི་དོན། རྩ་དང་བྱང་ཆུབ་ཀྱི་སེམས་དང་། རླུང་དང་རྟགས་ཀྱི་རིམ་པའོ། །བསྒོམ་པའི་དོན་ལ་གསུམ། སྔོན་འགྲོ་བྱིན་གྱིས་བརླབ་པའི་རིམ་པ། དངོས་གཞི་བདེ་བ་ཆེན་པོ། ལེའུ་ཡི་མཚན་ནོ། །དེའི་ཡན་ལག་ལ་གསུམ། བྱིན་གྱིས་བརླབ་པ། གང་ཟག་གི་མཚན་ཉིད། དམ་ཚིག་གོ །དང་པོ་ལ་གསུམ། ལུས་ངག་ཡིད་གསུམ་བྱིན་གྱིས་བརླབ་པ་དང་། དོན་བསྡུ་བ་དང་། ལེའུ་ཡི་མཚན་ནོ། །གང་ཟག་གི་མཚན་ཉིད་ལ་གཉིས། དོན་དངོས་དང་། ལེའུ་ཡི་མཚན་ནོ། །དང་པོ་ལ་གསུམ། ཞུས་པ་དང་། ལན་དང་། མཇུག་བསྡུ་བའོ། །དམ་ཚིག་ལ་གཉིས། གཞུང་དང་། ལེའུ་ཡི་མཚན་ནོ། །དང་པོ་ལ་གཉིས། །མདོར་བསྟན་དང་། རྒྱས་བཤད་དོ། །དེ་ལ་གསུམ། ལུས་ཀྱི་ལས། ངག་གི་ལས། ཡིད་ཀྱི་ལས་སོ། །ལེའུ་བཅོ་ལྔ་པར་དོན་བསྡུ་བ་ལ་གསུམ་སྟེ། ཞུས་པ་དང་། དབྱེར་མེད་པར་བསྔགས་པ་དང་། གཞུང་བསྡུ་བའོ། །བར་པ་ལ་གསུམ། ཐམས་ཅད་སྤྱན་རས་གཟིགས་ཉིད་དུ་ངེས་པའི་བསྟོད་པ་དང་། མཁའ་འགྲོ་རྣམས་ཀྱིས་མཆོད་པ་དང་། འཁོར་རྣམས་རྗེས་སུ་ཡིད་རང་བའོ། །བཅོམ་ལྡན་འདས་དཔལ་ཐུགས་རྗེ་ཆེན་པོ་པད་མ་ཟབ་པའི་རྒྱུད་ཀྱི་བསྡུས་དོན་རང་བྱུང་རྡོ་རྗེས་སྦྱར་བ་རྫོགས་སོ།། ༈ །།པད་མ་ཟབ་པའི་རྒྱུད་ཀྱི་མངོན་རྟོགས་བཞུགས། བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །མཁའ་ལྟར་རང་བཞིན་དབྱིངས་ལས་ཚད་མེད་སྙིང་རྗེ་ཕུལ་བྱུང་ལེགས་རྒྱས་པའི། །ཡེ་ཤེས་ལྔ་ལྡན་ཧྲིཿལས་བྱུང་བའི་གསུང་གི་མངའ་བདག་བཅོམ་ལྡན་འདས། །བྷན་དྷུ་ཀའམ་བྱུ་རུའི་ཆུན་པོ་ལྟར་གསལ་རིན་ཆེན་ཕྲེང་བས་མཛེས། །དྲི་མེད་རྒྱལ་སྲས་ཀུན་རྫོགས་འདུས་པའི་བདེ་ཆེན་རོལ་པར་འདུད། །དེ་ལ་རེ་ཤིག་བསྒྲུབ་པ་པོས། །དབང་ཐོབ་དམ་ཚིག་སྡོམ་ལྡན་པས། ཤིན་ཏུ་དབེན་པའི་སར་སོང་སྟེ། །སྙིང་རྗེས་འགྲོ་རྣམས་བདེ་ལ་འགོད། །དཀྱིལ་འཁོར་འཁོར་ལོ་ལེགས་པར་བྱ། །བསྒྲུབ་པའི་རྫས་སོགས་བསགས་ནས་ནི། །བདེ་བའི་སྟན་ལ་འདུག་ནས་ཀྱང་། །བྱང་ཆུབ་སེམས་བསྐྱེད་སྔོན་འགྲོ་བས། །ལྷ་ཚོགས་རིམ་པ་བལྟས་ནས་ཀྱང་། །ཡི་གེ་གསུམ་གྱིས་རང་ལ་བསྡུ། །ཚད་མེད་བཞིར་ལྡན་སྙིང་རྗེ་ལས། །འཕགས་པ་མཆོད་ཅིང་སེམས་ཅན་སྦྱངས། །བརྟན་དང་གཡོ་བའི་དངོས་པོ་ཀུན། །སྐད་ཅིག་ཙམ་གྱིས་སྟོང་པར་བསྒོམ། །ཨོཾ་སྭ་བྷ་བ་བི་ཤུད་དྷོ་སརྦ་དྷརྨ་སྭ་བྷ་བཱ་བུ་ཤུད་དྷོ་ཧཾ། སྟོང་པའི་ངང་ལས་ཡི་གེ་ཧྲཱིཿ ཡེ་ཤེས་ལྔ་དང་ལྡན་པ་ལས། །འོད་ལས་གྱུར་པའི་འཇའ་ཚོན་སྤྲིན། །སྣ་ཚོགས་རྡོ་རྗེ་བྱང་ཆུབ་ཤིང་། །པཾ་ལས་པད་མ་རྒྱས་པའི་སྟེང་། །བྷྲུྃ་ལས་གྱུར་པའི་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བཅས། །ཀ་བ་བརྒྱད་ཀྱིས་ཡང་དག་མཛེས། །རིན་ཆེན་དྲ་ཕྱེད་རྣམ་འཕྱང་བ། །དུར་ཁྲོད་རྡོ་རྗེ་མེ་རིར་བཅས། །དེ་དབུས་བདུད་བཞི་བཅོམ་པའི་ཕྱིར། །པད་མ་ཉི་ཟླ་རྒྱས་པའི་སྟེང་། །ཧྲཱིཿཡི་འོད་ཟེར་འཕྲོ་འདུ་ལས། །འཕགས་པ་མཆོད་ཅིང་སེམས་ཅན་སྦྱིན། །ཡི་གེ་བཅུ་ཡིས་འོད་ཟེར་བསྡུ། །ཨོཾ་ཨཱཿཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ། དེ་ཉིད་ཡོངས་་གྱུར་བཅོམ་ལྡན་འདས། །ཞལ་ཅིག་ཕྱག་བཞི་སྐུ་མདོག་དམར། །ཕྱག་གཉིས་ཐུགས་ཀར་ཐལ་མོ་སྦྱར། །འོག་མས་རྡོ་རྗེ་པད་མ་འཛིན། །རིན་ཆེན་རྒྱན་སོགས་ཡོངས་རྫོགས་པའོ། །ཕྱོགས་བཞིར་ས་བོན་གོང་མ་ལས། །རིགས་བཞིའི་སྤྱན་རས་གཟིགས་དབང་ནི། །ཡུམ་བཞིར་བཅས་པ་ལེགས་བསྐྱེད་ཅིང་། །སྒོ་བཞིར་མཁའ་འགྲོ་མ་བཞི་བསྒོམ། །མཆོད་པའི་ལྷ་མོས་ཡོངས་བསྐོར་བ། །དེ་ལྟར་དཀྱིལ་འཁོར་ཡོངས་རྫོགས་ནས། །གཙོ་བོའི་གནས་གསུམ་ཡི་གེ་གསུམ། །སྤྲོ་བསྡུའི་དམིགས་པས་བྱིན་གྱིས་རློབས། །གཞན་གྱི་རིམ་པའང་དེ་བཞིན་ནོ། །མདུན་དུའང་དེ་ལྟར་ལེགས་བསྐྱེད་ནས། །དེ་ནས་རང་རང་ཐུགས་ཁར་ནི། །པད་མའི་སྟེང་དུ་ཡི་གེ་ཧྲཱི། །སྙིང་པོར་བཅས་པ་དགོད་པར་བྱ། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཨོཾ་བཛྲ་བྷ་ར་ཧི་སརྦ་བུདྡྷ་ཌ་ཀི་ནི་ཡེ། བཛྲ་ཝརྣ་ནི་ཡེ། བཛྲ་བྷེ་རོ་ཙ་ནི་ཡཱེ། ཧ་རི་ནི་ས། གསང་སྔགས་འོད་ཟེར་སྤྲོ་བསྡུ་ཡིས། །ཡེ་ཤེས་སྤྱན་དྲངས་ལེགས་པར་མཆོད། །དབང་བསྐུར་རྒྱས་གདབ་སྐུ་ཡང་བརྒྱན། །མཁའ་ཁྱབ་འགྲོ་བ་མ་ལུས་ཀུན། །མཆོག་གི་ཡོན་ཏན་ཐོབ་པར་བསམ། །འདི་ལ་སྤྲོ་བསྡུའི་བཟླས་པའམ། །རྡོ་རྗེའི་བཟླས་པ་གང་རུང་གིས། །མདུན་བསྐྱེད་དེ་ལ་ལེགས་སྟིམས་ནས། །གྲངས་ཀྱི་བསྙེན་པ་འབུམ་ཚོ་བཅུས། །རྒྱལ་བའི་དཀྱིལ་འཁོར་མཐོང་བར་གསུངས། །རྗེས་སུ་རྫོགས་པའི་རིམ་པ་བསྒོམས། །དེ་ནས་གཞན་ཡང་བཤད་བྱ་བ། །ལུས་ཀྱི་དཀྱིལ་འཁོར་བསྒོམས་པ་ནི། །སྔོན་འགྲོའི་རིམ་པ་ཡོངས་སུ་རྫོགས་ནས། །རང་ཉིད་སྤྱན་རས་གཟིགས་སུ་བསྒོམ། །དབུ་རྒྱན་ལ་ནི་རིགས་ཀྱི་བདག །འཁོར་ལོ་བཞི་ལ་རིགས་བཞི་དགོད། །སངས་རྒྱས་སྤྱན་ནི་དཔྲལ་བར་བསམ། །མ་མ་ཀི་ནི་སྙིང་གར་བསམ། །གོས་དཀར་མོ་ནི་མགྲིན་པའོ། །སྒྲོལ་མ་ལྟེ་བར་བསམ་པར་བྱ། །རྡོ་རྗེ་མཁའ་འགྲོ་དཔྲལ་བ་ནས། །ཁྲུ་གང་ཙམ་གྱི་ས་རུ་བསམ། པད་མ་མཁའ་འགྲོ་ཁ་ཡི་མཁའ། རིན་ཆེན་མཁའ་འགྲོ་རང་གི་ལྟོ། །ལས་ཀྱི་མཁའ་འགྲོ་བྱང་ནས་སྐྱོབ། །གཟུགས་མིག་སྒྲ་སྙན་དྲི་སྣའོ། །རོ་ལྕེ་རེག་ནི་ལུས་ལ་བསྒོམ། །པང་དུ་རྡོ་རྗེ་ཕག་མོ་ནི། །མདོག་དམར་སྟེང་ཞལ་ཕག་མགོ་སྟེ། །རུས་པའི་རྒྱན་ནི་སྣ་ཚོགས་ལྡན། །གཡས་པ་རྡོ་རྗེ་གྲི་གུག་འཛིན། །གཡོན་ན་ཐོད་པ་བདེ་བས་བཀང་། །གཙོ་བོ་ལ་ནི་སྟེར་བའི་ཚུལ། །དེ་ལྟར་བཅོམ་ལྡན་ལེགས་བསྐྱེད་ནས། །གནས་གསུམ་བྱིན་རླབས་དབང་བསྐུར་བ། །ལ་སོགས་རིམ་པ་ཤེས་པར་བྱ། རྣམ་དག་ཡོན་ཏན་བཤད་པར་བྱ། །ལུས་ཀྱི་དཀྱིལ་འཁོར་ལེགས་བསྒོམས་པས། །སངས་རྒྱས་སྤྱན་གྱི་རྣལ་འབྱོར་གྱིས། །ལུས་ལ་བདེ་བ་སྟེར་བར་བྱེད། །གོས་དཀར་དྲོད་ལ་བདེ་བ་སྟེར། །མ་མ་ཀི་ཡིས་ཁྲག་ལའོ། །སྒྲོམ་མས་དབུགས་ལ་བདེ་བ་སྟེར། །ལས་ཀྱི་མཁའ་འགྲོས་བདེ་ཆེན་སྟེར། །པད་མ་མཁའ་འགྲོས་རབ་དགའ་ཉིད། །རིན་ཆེན་མཁའ་འགྲོས་མཆོག་དགའོ། །རྡོ་རྗེས་བདེ་སྟོང་གཉིས་མེད་སྟེར། །གཟུགས་ཀྱིས་མཐོང་བ་ཐམས་ཅད་དང་། །སྒྲ་དྲི་རོ་དང་རེག་ལ་སོགས། །ཐམས་ཅད་བདེ་བར་སྟེར་བར་བྱེད། །དེ་ལྟའི་ཡོན་ཏན་ཐོབ་པར་འགྱུར། །དམན་པ་གོང་གིས་མཎྜྻལ་ལྟར། །བསྒོམས་པའི་ཆོ་གའང་གོང་མ་ལྟར། །བསྒོམ་པར་བྱའོ་རྗེས་སུ་ནི། །ལྷ་དག་བསྡུས་ལ་ཧྲཱིཿཡང་ནི། །ལྷན་ཅིག་སྐྱེད་པའི་རྒྱས་གདབ་བོ། །འཁོར་དང་མྱ་ངན་འདས་པའི་ཆོས། །དངོས་པོ་རྡུལ་ཙམ་ཡོད་མ་ཡིན། །ཐམས་ཅད་བདེ་བ་ཆེན་པོར་སྣང་། །དུས་ཀྱི་ཚད་ཀྱང་སྐད་ཅིག་མ། །སྡུག་བསྔལ་གྱིས་ནི་བར་ཆད་དུ། །བྱ་བར་ནུས་པ་མ་ཡིན་ནོ། །འདི་ལྟར་ཐོབ་པའི་རྣལ་འབྱོར་གང་། །རྒྱུན་དུ་བདག་མེད་སྙིང་རྗེ་བསྒོམ། །ཐུན་མཚམས་སྤྱོད་པའང་དེ་བཞིན་ནོ། །འདི་ལྟར་བརྟན་པ་ཐོབ་པ་ཡིས། །ལས་རྣམས་ཐམས་ཅད་འགྲུབ་པར་བཤད། །དཔལ་ཐུགས་རྗེ་ཆེན་པོའི་པད་མ་ཟབ་པའི་མངོན་པར་རྟོགས་པ་གསུམ་རིམ་པར་བཀོད་པ་རྫོགས་སོ། །རང་བྱུང་རྡོ་རྗེ་ཞེས་བྱ་བས། བྱི་བ་ལོ་ཟླ་བ་བཅུ་པ་ལ་མཚུར་ཕུར་སྦྱར་བའོ།། ༈ །།ཐུགས་རྗེ་ཆེན་པོ་པད་མ་ཟབ་པའི་བསྐྱེད་རྫོགས་ཀྱི་མན་ངག་བཞུགས། སྐུ་བཞིའི་བདག་ཉིད་སྤྱན་རས་གཟིགས་ལ་ཕྱག་འཚལ་ལོ། །འཁོར་ལོ་ལྔའི་མན་ངག་གིས་བདེ་བ་ལམ་དུ་སློང་བར་འདོད་པས་བསྐྱེད་པའི་རིམ་པ་གོང་དུ་བཤད་པ་ལྟར་བསྒོམས་ལ། རྩ་གསུམ་དང་འཁོར་ལོ་ལྔ་གསལ་གདབ། སྤྱི་བོའི་ཧྃ་དང་། གསང་གནས་ཀྱི་ཨ་ཤད་ཙཎ་ཌ་ལི་གསལ་བཏབ་ལ་བསྒོམ། གསང་གནས་སུ་རྡོ་རྗེའི་འཁོར་ལོ་ཁ་དོག་ལྗང་ཁུ་འདབ་མ་སུམ་ཅུ་སོ་གཉིས་པའི་དབུས་ན་ཕྲག་དོག་གི་ས་བོན་ཨཾ་ལྗང་ཁུ། ལྟེ་བ་སྤྲུལ་པའི་འཁོར་ལོ་སེར་པོ་རྩ་འདབ་དྲུག་ཅུ་རྩ་བཞིའི་དབུས་ན་ང་རྒྱལ་གྱི་ས་བོན་ཏྲྃ་སེར་པོ། སྙིང་ཁ་ཆོས་ཀྱི་འཁོར་ལོ་རྩ་འདབ་བརྒྱད་པའི་དབུས་ན་ཞེ་སྡང་གི་ས་བོན་ཧཱུྃ་མཐིང་ཁ། མགྲིན་པ་ལོངས་སྤྱོད་ཀྱི་འཁོར་ལོ་ཁ་དོག་དམར་པོ། རྩ་འདབ་བཅུ་དྲུག་པའི་དབུས་ན་འདོད་ཆགས་ཀྱི་ས་བོན་ཧྲཱི་དམར་པོ། སྤྱི་བོ་བདེ་ཆེན་གྱི་འཁོར་ལོ་ཁ་དོག་དཀར་པོ་རྩ་འདབ་སུམ་ཅུ་རྩ་གཉིས་པའི་དབུས་ན་གཏི་མུག་གི་ས་བོན་ཨོཾ་དཀར་པོ་བསམས་ལ། བླ་མའི་མན་ངག་ལྟར་རླུང་སྦྱོར་བ་བཞི་ལྡན་བསྒོམས་ལ། གཏུམ་མོའི་མེ་ཆེར་སྦར་བས་ཕྲག་དོག་གི་ས་བོན་ཡི་གེ་ཨྃ་བསྲེགས་པས་འཕྲིན་ལས་ཡོངས་སུ་རྫོགས་པའི་སྤྱན་རས་གཟིགས་ལྗང་ཁུ་ཞལ་ཅིག་ཕྱག་བཞི་ཡུམ་དམ་ཚིག་སྒྲོལ་མ་དང་སྦྱོར་བ། བྱ་བ་གྲུབ་པའི་ཡེ་ཤེས་ཀྱི་ངོ་བོར་བསྒོམ། ཡེ་ཤེས་ཀྱི་མེ་ཆེར་སྦར་བས་ང་རྒྱལ་གྱི་ས་བོན་ཏྲཾ་བསྲེགས། ཡོན་ཏན་རྒྱལ་བའི་སྤྱན་རས་གཟིགས་སྐུ་མདོག་སེར་པོ་ཞལ་ཅིག་ཕྱག་བཞི་པ་ཡུམ་སངས་རྒྱས་སྤྱན་མ་དང་སྦྱོར་བ་མཉམ་པ་ཉིད་ཀྱི་ཡེ་ཤེས་ཀྱི་ངོ་བོར་བསྒོམ། ཡང་མེ་ཆེར་སྦར་བས་ཞེ་སྡང་གི་ས་བོན་ཧཱུྃ་བསྲེགས། མི་འགྱུར་ཐུགས་ཀྱི་སྤྱན་རས་གཟིགས་སྐུ་མདོག་མཐིང་། ཞལ་གཅིག་ཕྱག་གཉིས་པ་ཡུམ་མ་མ་ཀི་དང་སྦྱོར་བ། མེ་ལོང་ལྟ་བུའི་ཡེ་ཤེས་ཀྱི་ངོ་བོར་བསྒོམ། ཡང་མེ་ཆེར་སྦར་བས་འདོད་ཆགས་ཀྱི་ས་བོན་ཧྲཱི་བསྲེགས། པད་མ་གསུང་གི་སྤྱན་རས་གཟིགས་སྐུ་མདོག་དམར་པོ་ཞལ་ཅིག་ཕྱག་བཞི་པ་ཡུམ་ན་བཟའ་དཀར་མོ་དང་སྦྱོར་བ། སོ་སོར་རྟོག་པའི་ཡེ་ཤེས་ཀྱི་ངོ་བོར་བསྒོམ། ཡང་ཙཎ་ཌ་ལི་དང་ལྷ་ཚོགས་རྣམས་ལ་མེ་སྦར་བས། གཏི་མུག་གི་ས་བོན་ཡི་གེ་ཨྃ་བསྲེགས་རྣམ་སྣང་སྐུའི་སྤྱན་རས་གཟིགས་སྐུ་མདོག་དཀར་པོ་ཞལ་ཅིག་ཕྱག་བཞི་པ། །ཡུམ་ནམ་མཁའི་དབྱིངས་ཕྱུག་མ་དང་ཞལ་སྦྱོར་དུ་བཞུགས་པ། ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོར་བསྒོམ། ཀུན་ཀྱང་ཞལ་ཅིག་ཕྱག་བཞི་པ། ཕྱག་དང་པོ་ཐམས་ཅད་རང་གི་ཡུམ་གྱི་རྒྱབ་ཏུ་ཐལ་མོ་སྦྱར་བ། འོག་མ་ཐམས་ཅད་ཕྲེང་བ་དང་པད་མ་བསྣམས་པའོ། །ཡུམ་རྣམས་ཀྱང་ཞལ་ཅིག་ཕྱག་བཞི་མ། ཕྱག་དང་པོ་གཉིས་རང་རང་གི་ཡབ་ཀྱི་རྒྱབ་ཏུ་ཐལ་མོ་སྦྱར་བ། འོག་མའི་ཕྱག་མཚན་རྣམས་མངོན་པར་རྟོགས་པ་ལས་འབྱུང་བ་བཞིན་ནོ། །འཁོར་ལོ་ལྔ་སོ་སོའི་རྩ་འདབ་ཀྱི་གྲངས་དང་མཉམ་པའི་རྣལ་འབྱོར་མ་རྣམས་ཀྱང་སྐུ་མདོག་གཙོ་བོ་དང་མཐུན་ལ། ཕྱག་མཚན་གྲི་གུག་དང་ཐོད་ཁྲག་ཅན་རུས་པའི་རྒྱན་དྲུག་དང་ལྡན་པ། གར་ཐབས་དང་བཅས་པ་གསལ་བར་བལྟའོ། །ལྷ་ཚོགས་རྣམས་དང་གཏུམ་མོའི་མེ་སྦར་བས་སྤྱི་བོའི་ཧཾ་ལ་རེག་བྱང་སེམས་ཀྱི་ཆུ་རྒྱུན་བདེ་བ་ཆེན་པོའི་ཨ་བ་དྷུ་ཏིའི་རྒྱུད་ལ་བབས་པས། གསང་གནས་ཀྱི་སྤྱན་རས་གཟིགས་ཡབ་ཡུམ་གྱི་ཞལ་དུ་ཞུགས། བདེ་བ་ཆེན་པོའི་རོས་གང་། དེ་བཞིན་དུ་རྩ་འདབ་ཀྱི་རྣལ་འབྱོར་མ་རྣམས་ཀྱི་ཡང་ཞལ་དུ་ཞུགས་ཏེ། བདེ་བ་ཆེན་པའི་རོས་གང་བས་བདེ་སྟོང་གཉིས་སུ་མེད་པའི་ཡེ་ཤེས་ཆེན་པོ་རབ་ཏུ་འབར་བར་བསྒོམས་ཏེ། འཁོར་ལོ་གཞན་རྣམས་ལ་ཡང་དེ་བཞིན་དུ་ཤེས་པར་བྱའོ། །དེ་ལྟར་བསྒོམས་ཤིང་བླ་མའི་མན་ངག་བཞིན་བསྲེ་བ་དང་སྦྱར་ནས་བསྒོམས་ན་མཆོག་དང་ཐུན་མོང་གི་དངོས་གྲུབ་ཚེ་འདི་ཉིད་ལ་ཐོབ་སྟེ། འོད་གསལ་ཆེན་པོ་འགྲོ་འོང་མེད་པ་མངོན་དུ་གྱུར་ནས། མཁའ་སྤྱོད་ཀྱི་དངོས་གྲུབ་ཐོབ་པར་འགྱུར་རོ། །ཐུགས་རྗེ་ཆེན་པོ་པད་མ་ཟབ་པའི་བསྐྱེད་རྫོགས་ཀྱི་མན་ངག །ཞལ་གྱི་གདམས་པ། སང་གྷ་ལཀྵ་ལས་བྱུང་བ་བཞིན་དུ། རང་བྱུང་རྡོ་རྗེས་མཚུར་ཕུའི་གཙུག་ལག་ཁང་ཆེན་པོར་ཡི་གེར་བཀོད་པ་རེ་ཞིག་རྫོགས་སོ། །ཤིན་ཏུ་གསང་ཞིང་སྦ་བར་བྱ་སྟེ་ཉམས་སུ་མི་ལེན་པ་ལ་བསྟན་པར་མི་བྱའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། ༈ །།ཐུགས་རྗེ་ཆེན་པའི་བཟླས་པའི་མན་ངག་བཞུགས། བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་ཕྱུག་གི་བཟླས་པ་ལ་བརྟེན་ནས་ཉམས་སུ་བླང་བར་འདོད་པས། དོན་གཉིས་སུ་ཤེས་པར་བྱ་སྟེ། སྤྲོ་བསྡུའི་བཟླས་པ་དང་། འགོག་པའི་བཟླས་པའོ། །དང་པོ་ལ་གསུམ་སྟེ། ཐོག་མར་བྱིན་བརླབས་བསྡུ་བའི་ཚུལ་དུ་བཟླས་པ་ནི། བདག་ཉིད་སྤྱན་རས་གཟིགས་ཡབ་ཡུམ་གཉིས་སུ་བསྐྱེད་པའི་ཡབ་ཀྱི་ཐུགས་ཀར་པད་མའི་སྟེང་དུ་ཡི་གེ་ཧྲཱིཿ་དམར་པོ་དང་། ཡུམ་གྱི་ཐུགས་ཀར་ཆོས་འབྱུང་རྐྱང་པའི་དབུས་ན་ཡི་གེ་ཧྲཱིཿདམར་པོ་ལས་འོད་ཟེར་ཁ་དོག་ལྔའི་རང་བཞིན་སྟེང་གི་ཕྱོགས་སུ་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད། དེ་དག་ཐམས་ཅད་སྤྱན་རས་གཟིགས་དབང་ཕྱུག་གི་དཀྱིལ་འཁོར་དུ་གྱུར་ཏེ་ཆར་པ་བབ་པའི་ཚུལ་དུ་རང་གི་ལུས་ངག་ཡིད་གསུམ་ལ་ཐིམ་པར་བསྒོམ་པ་ནི་བྱིན་བརླབས་བསྡུ་བའི་བཟླས་པའོ། ། གཉིས་པ་བདག་གཞན་གྱི་སྡིག་སྒྲིབ་སྦྱང་པ་ལ་སོགས་ཏེ་འཕྲིན་ལས་བཞིའི་ཚུལ་དུ་བཟླས་པ་ནི། བདག་ཉིད་ཡབ་ཡུམ་གྱི་ཐུགས་ཀའི་ཧྲཱིཿལས་འོད་ཟེར་དཀར་པོ་བྱུང་ནས་ཞལ་ནས་འཐོན་ཏེ་མདུན་གྱི་མ་མ་ཀི་ཡབ་ཡུམ་དང་རྡོ་རྗེ་མཁའ་འགྲོ་མའི་ཐུགས་ཀར་ཐིམ། དེ་དག་གི་ཐུགས་ཀའི་ཧྲཱིཿལས་འོད་ཟེར་དཀར་པོ་ཞལ་ནས་ཐོན་ཏེ་བྱུང་ནས་བདག་གི་ཐུགས་ཀའི་ཧྲཱིཿལ་ཐིམ་པས་བདག་གཞན་གྱི་ནད་གདོན་སྡིག་སྒྲིབ་དག་པར་བསམ་པ་ནི་ཞི་བའི་བཟླས་པའོ། །ཡང་བདག་ཉིད་ཡབ་ཡུམ་གྱི་ཐུགས་ཀའི་ཧྲཱི་ལས་འོད་ཟེར་སེར་པོ་བྱུང་སྟེ་སངས་རྒྱས་སྤྱན་མ་ཡབ་ཡུམ་དང་རིན་ཆེན་མཁའ་འགྲོའི་ཐུགས་ཀར་ཐིམ། དེ་དག་གི་ཐུགས་ཀའི་ཧྲཱི་ལས་འོད་ཟེར་སེར་པོ་བྱུང་སྟེ། བདག་ཡབ་ཡུམ་གྱི་ཐུགས་ཀའི་ཧྲཱི་ཿ་ལ་ཐིམ་པས་ཚེ་དང་བསོད་ནམས་འཕེལ་བར་བསམ་པ་ནི་རྒྱས་པའི་བཟླས་པའོ། །ཡང་བདག་ཡབ་ཡུམ་གྱི་ཐུགས་ཀའི་ཧྲཱིཿལས་འོད་ཟེར་དམར་པོ་བྱུང་ནས་ན་བཟའ་དཀར་མོ་ཡབ་ཡུམ་དང་པད་མ་མཁའ་འགྲོའི་ཐུགས་ཀར་ཐིམ། དེའི་ཐུགས་ཀའི་ཧྲཱིཿའོད་ཟེར་དམར་པོ་བྱུང་བ་བདག་ཡབ་ཡུམ་གྱི་ཐུགས་ཀའི་ཧྲཱིཿ་ལ་ཐིམ་པས། ལྷ་འདྲེ་མི་གསུམ་དབང་དུ་འདུས་པར་བསམས་པ་ནི་དབང་གི་བཟླས་པའོ། །ཡང་བདག་ཡབ་ཡུམ་གྱི་ཐུགས་ཀའི་ཧྲཱིཿལས་འོད་ཟེར་མཐིང་ཁའམ་ལྗང་ཁུ་བྱུང་སྟེ་དམ་ཚིག་སྒྲོལ་མ་ཡབ་ཡུམ་དང་ལས་ཀྱི་མཁའ་འགྲོའི་ཐུགས་ཀར་ཐིམ། དེ་དག་གི་ཐུགས་ཀའི་ཧྲཱིཿལས་འོད་ལྗང་ཁུ་བྱུང་སྟེ་བདག་ཡབ་ཡུམ་གྱི་ཐུགས་ཀའི་ཧྲཱིཿལ་ཐིམ་པས་དགྲ་བགེགས་ཐམས་ཅད་ཚར་བཅས་པར་བསམ་པ་ནི་དྲག་པོའི་བཟླས་པའོ། །གསུམ་པ་བདེ་བ་ཆེན་པོའི་བཟླས་པ་ནི། བདག་ཉིད་སྤྱན་རས་གཟིགས་ཀྱི་ཐུགས་ཀའི་ཧྲཱིཿལ་སྙིང་པོ་གཡས་གཡོན་དུ་འཁོར་བ་ལ་འོད་ཟེར་དམར་པོས་སྐུའི་དབྱིབས་རྒྱུད་རྡོ་རྗེ་ནོར་བུ་ནས་ཡུམ་གྱི་པད་མར་བྱོན་ཏེ་སྐུའི་དབྱིབས་རྒྱུད། ཐུགས་ཁའི་ཧྲཱིཿལས་གཡོན་དུ་འཁོར་སྟེ་ཡུམ་གྱི་ཞལ་ནས་ཡབ་གྱི་ཞལ་དུ་ཞུགས་ཏེ། ཐུགས་ཀའི་ཧྲཱི་ལ་ཐིམ་པར་བསྒོམས་པ་ནི་བདེ་བ་ཆེན་པོའི་བཟླས་པས་ཏེ། འགལ་མེ་འཁོར་བ་བཞིན་དུ་བསྒོམ་པར་བྱའོ། །དེ་ལྟར་བསྒོམས་ན་བདེ་སྟོང་གི་ཡེ་ཤེས་འཆར་རོ། །སང་གྷ་ལཀྵ་ཞེས་པས་གསུངས་སོ། །གཉིས་པ་འགོག་པའི་བཟླས་པ་ནི་བདག་ཡབ་ཡུམ་གྱི་ཐུགས་ཀའི་ཧྲཱིཿ་དང་སྙིང་པོ་ལས་འོད་ཟེར་དམར་པོ་ཕན་ཚུན་དུ་བྱུང་ནས་ཅིག་ཏུ་འདྲེས་ཏེ། ཡབ་ཡུམ་གྱི་སྐུ་གསུང་ཐུགས་འོད་ཟེར་གྱི་ཕུང་པོར་གྱུར་ཏེ། སྒྱུ་མ་ལྟ་བུའི་ཏིང་ངེ་འཛིན་ལ་མཉམ་པར་འཇོག་པ་ནི་འགོག་པའི་བཟླས་པ་སྟེ། ནན་ཏན་དུ་བསྒོམ་པར་བྱའོ། །རྡོ་རྗེའི་བཟླས་པ་ནི་རྩ་གསུམ་འཁོར་ལོ་བཞི་གསལ་བཏབ་ལ་ལྟེ་བའི་འོག་སོར་བཞི་ཡི་ཐད་ན། ཆོས་འབྱུང་རྐྱང་པའི་དབུས་ན་ཨ་ཤད་ཙཎ་ཌ་ལི་སོར་བཞི་ཙམ་གསལ་བཏབ་ལ། དེ་ལ་འོད་ཟེར་རྣམ་པ་ལྔ་འཕྲོས་ཏེ་འཁོར་འདས་ཐམས་ཅད་ཐུགས་རྗེ་ཆེན་པོའི་རང་བཞིན་དུ་བསྒོམས་ལ་རླུང་བཟུང་བས་ཐུགས་རྗེ་ཆེན་པོའི་ལྷ་ཚོགས་ཐམས་ཅད་རླུང་དང་གཉིས་སུ་མེད་པར་ཨ་ཤད་ཙཎ་ཌ་ལི་ལ་ཐིམ་པར་བསམ་ཞིང་། རླུང་སྦྱོར་བ་བཞི་ལྡན་དུ་ཡུན་རིང་དུ་བསྒོམ་པ་ནི་རྡོ་རྗེའི་བཟླས་པའོ། །བསྲེ་བའི་མན་ངག་དང་སྦྱར་་བར་བྱའོ། །བཟླས་པའི་མན་ངག་རང་བྱུང་རྡོ་རྗེས་སྦྱར་བའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། ༈ །།པད་མ་སྣང་བའི་དབང་གི་ཆོ་ག་གསལ་བར་བྱེད་པ་བཞུགས་སོ། །བཅོམ་ལྡན་འདས་པད་མའི་སྣང་བ་ཞེས་བྱ་བ་ཆེན་པོ་རབ་ཏུ་རྒྱས་པ་ལ་ཕྱག་འཚལ་ལོ། །རྣམ་དག་མངའ་བདག་ཡོན་ཏན་རྒྱས་པའི་སྐུ། །རྣམ་པར་འཇམ་མཉེན་ཡོངས་སུ་སྒྲོག་པའི་གསུང་། །རྣམ་པར་མཁྱེན་པ་ཡེ་ཤེས་རྒྱས་པའི་ཐུགས། །བརྩེ་ཆེན་ལྡན་པ་ཀུན་གྱི་དཔལ་ལ་འདུད། །དེ་ལ་འདིར་བྱང་ཆུབ་སེམས་དཔའ་གསུང་གི་མངའ་བདག་གི་དཀྱིལ་འཁོར་དུ་དབང་ཡོངས་སུ་རྫོགས་པར་བསྐུར་བར་བྱེད་པ་ལ་སྤྱི་དོན་རྣམ་པ་གསུམ་སྟེ། སྔོན་དུ་འགྲོ་བ་ནུབ་དང་པོའི་བྱ་བ་དང་། གཉིས་པ་རྡོ་རྗེ་སློབ་དཔོན་གྱི་བྱ་བ་ཡོངས་སུ་རྫོགས་པར་བསྟན་པ་དང་། གསུམ་པ་དབང་བསྐུར་བ་རྗེས་ཀྱི་བྱ་བ་དང་བཅས་པའོ། །དེ་ལྟར་བསྐུར་མཁན་གྱི་རྡོ་རྗེ་སློབ་དཔོན་ནི། སྙིང་རྗེ་ཆེན་པོ་དང་ལྡན་ཞིང་། རབ་ཡོན་ཏན་བཅོ་བརྒྱད་དང་ལྡན་པ། འབྲིང་དེ་ཉིད་བཅུ་བཞིའི་རིམ་པ་ལ་མཁས་པ། དེ་ལ་སོགས་པ་དགོས་ཏེ། དེ་ཡང་གུར་ལས། བརྟན་ཞིང་དུལ་ལ་བློ་གྲོས་ལྡན། །རིག་པའི་གནས་རྣམས་ཀུན་ལ་མཁས། །སྦྱིན་བསྲེག་དཀྱིལ་འཁོར་སྔགས་ཤེས་ཤིང་། །རབ་གནས་གཏོར་མའི་ཕ་རོལ་སོན། །ཞེས་པ་དང་། འབྲིང་དུ། དབང་དང་ལྷ་བསྒོམས་ཕྱག་རྒྱ་དང་། །སྟང་སྟབས་གདན་དང་བཟླས་བརྗོད་དང་། །སྦྱིན་བསྲེག་མཆོད་པ་ལས་སྦྱོར་དང་། །ཉེ་བར་བསྡུ་བ་དེ་ཉིད་དོ། །ཞེས་པས་རྡོ་རྗེ་སློབ་དཔོན་དེ་ལྟ་བུའི་ཡོན་ཏན་དང་ལྡན་པ་ལ། སློབ་མ་ནི། འདི་ཉིད་ཀྱི་རྒྱུད་ལས། དད་པ་གསུམ་དང་ལྡན་པ་ལ། །བླ་མ་ལ་གུས་མཉམ་པར་བལྟ། །ཤེས་རབ་ལྡན་ཞིང་སྙིང་རྗེ་ཆེ། །རྟག་ཏུ་ཆོས་ལ་སྤྱོད་པ་དང་། །གསང་སྔགས་ཐེ་ཚོམ་མེད་པ་དང་། །ཡིད་ཆེས་ཚད་མ་སྐྱེས་པ་དང་། །མང་དུ་བློ་གྲོས་སྦྱངས་པ་དང་། །ངེས་པའི་དོན་ལ་འཇུག་པ་དང་། །འཁོར་བ་སྐྱོན་དུ་བལྟ་བ་དང་། །ལྷ་ལ་སྤོང་ལེན་མི་བྱེད་པའོ། །ཞེས་བཤད་པས། སློབ་དཔོན་དང་སློབ་མའི་མཚན་ཉིད་བརྟགས་ཏེ། རྟེན་འབྲེལ་འགྲིག་པར་གྱུར་པ་དང་། དབང་བསྐུར་བར་བྱའོ། །དེ་ལ་བསྙེན་པ་ནི། གྲངས་ཀྱི་བསྙེན་པ་དང་། མཚན་མའི་བསྙེན་པ་རྫོགས་ནས། ནུབ་དང་པོའི་བྱ་བ་ནི། སའི་ཆོ་ག་སྟེ། དེ་ལ་ས་བརྟག་པ་དང་། བསླང་བ་དང་། བསྲུང་ཞིང་བྱིན་གྱིས་བརླབ་པའོ། །བསླང་བའི་དབང་དུ་བྱས་ན། གཉིས་ལས་མིང་སྣང་བ་ལ་གནང་བ་ནི། དཀྱིལ་འཁོར་བྲི་བའི་གནས་དེར་དྲིའི་ཆག་ཆག་བཏབ་ལ་མེ་ཏོག་གི་ཚོམ་བུ་ཅིག་བཀོད། མཆོད་པ་ལྔ་དང་གཏོར་མ་གསུམ་བཤམས། དང་པོ་རང་ལྷའི་ང་རྒྱལ་དང་ལྡན་པས། གཏོར་མ་ཕྱི་ལྟ་བུར་བྱིན་གྱིས་བརླབས་ལ། གཅིག་བླ་མ་ཡི་དམ་མཁའ་འགྲོ་ཆོས་སྐྱོང་ལ་འབུལ། གཅིག་ཕྱོགས་དེ་ན་གནས་པའི་ལྷ་ཀླུ་ལ་འབུལ། གཅིག་གནོད་བྱེད་རྣམས་ལ་བྱིན་ལ། བཀལ་བསྒོ་ཞིང་བདེན་པ་བདར་རོ། །དེ་ནས་ཚོམ་བུ་དེ་སྟོང་པའི་ངང་ལས། པད་མ་འདབ་བརྒྱད་ཀྱི་སྟེང་དུ། པྃ་ལས་སའི་ལྷ་མོ་སྐུ་མདོག་སེར་མོ། ཞལ་གཅིག་ཕྱག་གཉིས་པ། གཡས་ན་རིན་པོ་ཆེ་བསྣམས་པ། གཡོན་ན་རིན་པོ་ཆེའི་བུམ་པ་བསྣམས་པ། སྐུ་ལ་རིན་པོ་ཆེའི་རྒྱན་དང་ལྡན་པ། སྐུ་ཕྱེད་ཐོན་པ་ཅིག་ཏུ་བསྐྱེད་ལ། དེ་ལ་ཡེ་ཤེས་པ་དེ་ཁོ་ན་འདྲ་བ་ཅིག་སྤྱན་དྲངས་ལ། ཛ་ཧཱུྃ་བྃ་ཧོས་དགུག་གཞུག་བྱ། དེ་ནས་མཆོད་པ་ལྔས་མཆོད་ལ། བསྟོད་པ་བྱ་བ་ནི། འདི་སྐད་དུ། ཁྱོད་ནི་ས་འཛིན་ཆེན་མོ་སྟེ། །སྐུ་ཕྱེད་ཐོན་ཏེ་གསེར་གྱི་མདོག །རིན་ཆེན་སྣ་ཚོགས་རྒྱན་གྱིས་བརྒྱན། །ས་འོག་ལྷ་མོ་ཁྱོད་ལ་བསྟོད། །པད་མའི་སྟེང་ན་བུམ་པ་འཛིན། །གསེར་མདོག་བསྟན་པ་བསྲུང་མཛད་པ། །ཁྱོད་ནི་ནོར་འཛིན་རྒྱལ་པོ་སྟེ། །ནོར་འཛིན་ལྷ་མོ་ཕྱག་འཚལ་བསྟོད། །ཅེས་བསྟོད་ལ་གསོལ་བ་གདབ་པ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་ལས། །ས་དང་ཕར་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། ཇི་ལྟར་བདུད་ཀྱི་སྡེ་བཅོམ་ལྟར། །དེ་བཞིན་དུ་ནི་བདུད་ཀྱི་སྟེ། །ཕམ་པར་བྱ་སྟེ་དཀྱིལ་འཁོར་བྲི། །ཞེས་བརྗོད་པས་ཅི་བདེ་བར་སྣང་བ་བྱིན་པར་བསམ་མོ། །དེ་ནས་ཡེ་ཤེས་པ་གཤེགས། དམ་ཚིག་པ་རང་གི་གནས་སུ་ཐིམ་པར་བསམ་མོ། །ས་བརྟག་པ་ནི། དམར་སེར་དཀར་སེར་ཁ་དོག་ལེགས་ཤིང་། ཤིན་ཏུ་ཕྱིན་པ་ནི་རྟེན་འབྲེལ་བཟང་ངོ་། །ས་མེ་ཏོག་གི་བརྟག་པ་དང་། ཆུའི་བརྟག་པ་ནི་ལག་ལེན་ནས་ཤེས་པ་བྱའོ། །གསུམ་པ་བསྲུང་ཞིང་སྦྱང་པ་ནི། དང་པོར་བདག་ཉིད་བསྐྱེད་པའི་རིམ་པ་བསྒོམ་ཞིང་། སྙིང་པོ་ལ་སོགས་པ་བརྗོད་ནས། རྡོ་རྗེ་དྲིལ་བུ་དང་བཅས་པས། འཁྲིག་མ་གཉིས་བསྣོལ་ཏེ་ས་ལ་བཞག་གོ །དེ་ནས་གནས་ཁང་དང་སྦྱར་ཞིང་། དཀྱིལ་འཁོར་ཅི་རིགས་སུ་བྱ་སྟེ། དབུས་མཐོ་བ་མཐའ་བབས་ཀྱིས་གཞོལ་བ་ལེགས་པར་བྱའོ། །དེ་ནས་ཡང་རང་ལྷའི་ང་རྒྱལ་གྱིས་དཀྱིལ་འཁོར་གྱི་སྟེང་དུ་ཉི་མ། །དེའི་སྟེང་སྣ་ཚོགས་རྡོ་རྗེ་ཧཱུྃ་གིས་མཚན་པ་བསྒོམས་ཏེ། འོད་ཟེར་སྤྲོས་པ་ལས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་གུར་ཁང་དུ་གྱུར་པར་བསྒོམས་ནས། ངག་ཏུ། ཨོཾ་བཛྲ་རཀྵ་རཀྵ་ཧཱུྃ་ཞེས་བརྗོད་ཅིང་། ལག་པ་ཐལ་མོ་་ས་ལ་སྤུབ་ལ། བདག་ཏུ་བཟུང་བར་ཡང་བསམ་པའོ། །འདི་དག་ནི་སའི་ཆོ་ག་སྟེ། རྡོ་རྗེ་སློབ་དཔོན་གྱི་ལས་སོ། །ས་ཆོག་འདི་དག་མི་དགོས་པའི་གནས་ནི། བདེ་མཆོག་རྡོ་རྗེ་མཁའ་འགྲོའི་རྒྱུད་ལས། ཁང་བཟང་རྡོ་སྟེངས་གཞི་དང་ནི། །གཙུག་ལག་ཁང་དང་ཞབས་ཀྱིས་བཅགས། །བ་གླང་ལྷས་དང་རྒྱ་མཚོའི་འགྲམ། །དེར་ནི་སྦྱང་བར་བྱ་མི་དགོས། །ཅེས་པས་དགོས་པ་དང་མི་དགོས་པའི་མཚན་ཉིད་ཤེས་པར་བྱའོ། །ནུབ་གཉིས་པ་རྡོ་རྗེ་སློབ་དཔོན་གྱི་བྱ་བ་སྟ་གོན་སྟོན་པ་ལ་བཞི་སྟེ། ལྷ་སྟ་གོན་དུ་གནས་པ་དང་། སྦྱིན་བསྲེག་སྟ་གོན་དུ་གནས་པ་དང་། བུམ་པ་སྟ་གོན་དུ་གནས་པ་དང་། སློབ་མ་སྟ་གོན་དུ་གནས་པའོ། །དེ་ལ་ལག་ལེན་གྱི་བསྐོར་ནི་འདི་ཡིན་ཏེ། ནང་པར་སྔ་བར་ཁྲུས་ལ་སོགས་པ་བྱ་སྟེ། བུམ་པ་དང་། བུམ་རྫས་ཁ་རྒྱན་མགུལ་ཆིངས་རྣམས་དང་སོ་ཤིང་དང་། ཀུ་ཤ་དང་། བསྲུང་སྐུད་དང་། དེ་ལ་སོགས་པ་རྣམས་འཚོགས་པར་བྱེད་པ་ཡིན་ཏེ། ལག་ལེན་ལ་བལྟ་བར་བྱའོ། །དེ་ནས་སྦྱིན་བསྲེག་སྟ་གོན་དུ་གནས་པ་བྱ་བ་ནི། སྦྱིན་བསྲེག་གི་ཆོ་ག་ནས་ཇི་ལྟར་འབྱུང་བ་ལྟར་བྱའོ། །དེ་ནས་ལྷ་སྟ་གོན་ལ་གནས་པའི་ཆོ་ག་ནི། རྡོ་རྗེ་སློབ་དཔོན་ཁྲུས་བྱས་ཤིང་རྒྱན་བགོས་ཏེ། དཀྱིལ་འཁོར་གྱི་དབུས་སུ་འདུག་སྟེ། ཁ་ཤར་དུ་བལྟས་ལ། བསྐྱེད་པའི་རིམ་པ་གསལ་བར་བསྒོམ་ཏེ། བཟླས་པ་ཅུང་ཟད་བྱའོ། །དེ་ནས་ལས་བྱེད་པས་བདུད་རྩི་མྱང་ནས། མ་མ་ཀིའི་ང་རྒྱལ་གྱིས། དཀྱིལ་འཁོར་གྱི་ཤར་ཕྱོགས་ནས། མེ་ཏོག་བདུག་སྤོས་སྣང་གསལ་དང་། །དྲོ་མཆོག་ཞལ་ཟས་མཆིས་པ་ཀུན། །བླ་མ་དཀྱིལ་འཁོར་ལྷ་ལ་འབུལ། །བཞེས་ཏེ་བྱིན་གྱིས་བརླབ་རུ་གསོལ། །ཨོཾ་མཧཱ་གུ་རུ་ཤྲཱི་ཨ་མི་ཏ་བཱ་ཧྲཱི། པུཥྤེ། དྷུ་པེ། གྷན་དྷེ། ནེ་པེ་ཏེ། པུ་ཙ་མེ་ཀ་ས་མུད་ཏྲ་ཀྵྨྱ་ར་ན་ས་མ་ཡེ་ཧཱུྃ། ཞེས་མཆོད་ལ་རྡོ་རྗེ་དྲིལ་ཐབས་དང་བཅས་པས། བསྟོད་པ་བསྡུས་པའམ། ཚིགས་བཅད་ཅིག་བྱའོ། །དེ་ནས་བསྐུལ་བ་ནི། དེ་བཞིན་གཤེགས་པ་ཀུན་ཞི་བ། དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་་ཡི་མཆོག །དཀྱིལ་འཁོར་གཙོ་བོས་བཤད་དུ་གསོལ། །ཞེས་པས་བསྐུལ་ལོ། །དེ་ནས་ལྷོ་ཕྱོགས་སུ་སངས་རྒྱས་སྤྱན་མའི་ང་རྒྱལ་གྱིས། འདི་སྐད་དུ། གཟུགས་དང་སྒྲ་དང་དྲི་དང་རོ། །རེག་དང་འདོད་ཡོན་རྣམ་ལྔ་པོ། །བླ་མ་དཀྱིལ་འཁོར་ལྷ་ལ་འབུལ། །བཞེས་ཏེ་བྱིན་གྱིས་བརླབ་ཏུ་གསོལ། །ཨོཾ་རཏྣ་གུ་རུ་ཤྲཱི་ཨ་མི་དྷེ་བ་ཧྲཱི། རུ་པ་ཏ། གྷན་དྷ་ར་ས་ཏ། པྲ་པ་ཏ། པུ་ཙ་མེ་ག་ས་མུད་ཏྲ་ཀྵྨྱ་ར་ན་ས་མ་ཡེ་ཧཱུྃ། ཞེས་པས་མཆོད་ལ་བསྟོད་དེ་བསྐུལ་བ་ནི། མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་ཏུ་བཟང་པོའི་སྐུ་ཡི་མཆོག །དཀྱིལ་འཁོར་གཙོ་བོས་བཤད་དུ་གསོལ། །ཞེས་སོ། །ཡང་ནུབ་ཕྱོགས་ནས། ན་བཟའ་དཀར་མོའི་ང་རྒྱལ་གྱིས། འདི་སྐད་དུ། ཤ་ཆེན་སྤོས་དང་དྲི་ཡིས་བྱུག །ཞུན་ཆེན་སྣང་གསལ་དྲི་ཆེན་གྱི། །ཞལ་ཟས་ཤ་ལྔ་དང་བཅས་པ། །བླ་མ་དཀྱིལ་འཁོར་ལྷ་ལ་འབུལ། ཨོཾ་རཏྣ་གུ་རུ་ཤྲཱི་ཨ་མི་དྷེ་བཱ་ཧྲཱི། པན་ཙ་ཨ་མྲྀ་ཏ་པན་ཙ་ཨ་གྷུ་ཤ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། ཞེས་མཆོད་ལ། བསྟོད་དེ་བསྐུལ་བ་ནི། ཞི་བའི་མཆོག་ནི་ཆོས་ལས་བྱུང་། །ཡེ་ཤེས་སྤྱོད་པ་རྣམ་སྦྱངས་པ། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་གཙོ་བོས་བཤད་དུ་གསོལ། །ཡང་བྱང་ཕྱོགས་ནས། དམ་ཚིག་སྒྲོལ་མའི་ང་རྒྱལ་གྱིས། འདི་སྐད་དུ། སེམས་ཉིད་ལྷན་ཅིག་སྐྱེས་པ་འདི། །བདེ་ཆེན་ཀུན་ཏུ་བདེ་ཆེན་ཉིད། །འཁོར་འདས་ཀུན་ཁྱབ་ཀུན་དུ་བཟང་། །བླ་མ་དཀྱིལ་འཁོར་ལྷ་ལ་འབུལ། །ཨོཾ་རཏྣ་གུ་རུ་ཤྲཱི་ཨ་མིདྷེ་བ་ཧྲཱི་ན་ཏད་མ་ཧ་སུ་ག་ཏ་པུ་ཙ་མེ་ག་ས་མུད་ཏྲ་ཀྵྨྱ་ར་ན་ས་མ་ཡེ་ཧཱུྃ། ཞེས་མཆོད་ལ། བསྟོད་ཏེ་བསྐུལ་བ་ནི། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་གོས་པ་མེད། །ཀུན་བཟང་ཐུགས་མཆོག་ཁ་ལོ་བསྒྱུར། །དཀྱིལ་འཁོར་གཙོ་བོས་བཤད་དུ་གསོལ། །ཞེས་པས་བསྐུལ་ལོ། །དེ་ནས་རྡོ་རྗེ་སློབ་དཔོན་ཀླུའི་ངོར་བཞེངས་ནས་བགེགས་ལ་བཀའ་བསྒོ་བ་ནི། རྟ་མགྲིན་ཞལ་ཅིག་ཕྱག་གཉིས་པའི་ང་རྒྱལ་གྱིས། མིག་གཡས་སུ་མ་ལས་ཉི་མ། གཡོན་དུ་ཏ་ལས་ཟླ་བ་བསམ། རྐང་པ་གཉིས་སུ་ཧཱུྃ་ལས་རྡོ་རྗེ་རྒྱ་གྲམ་རེ་བསམས་ལ། རྡོ་རྗེའི་འགྲོས་ཀྱིས་དཀྱིལ་འཁོར་གྱི་བྱང་ཤར་མཚམས་སུ་ཕྱིན་ཏེ། བགེགས་ལ་བཀའ་བསྒོ་བ་ནི་འདི་སྐད་བརྗོད་དོ། །ཨེ་མ་སངས་རྒྱས་ཐམས་ཅད་ཀྱིས། །ཐུགས་རྗེ་ཅན་གྱི་ཐབས་ཆེན་གྱིས། །ཞིང་ཡང་སེམས་ཅན་འདུལ་དོན་དུ། །དྲི་མ་མེད་པའི་ཁྲོ་བོར་སྤྲུལ། །རྣམ་དག་དབྱིངས་ལས་ཐུགས་རྗེ་ཆེན་པོར་སྤྲུལ། །སྐྱེ་མེད་ཆོས་ལས་འཇིགས་མེད་སྐུར་སྟོན་པའི། །གདུག་པ་འདུལ་ཕྱིར་ཐུགས་དམ་མི་འགྱུར་རྩེ་ཅིག་ཉིད། །ཁྲོ་ཆེན་འབར་བའི་ཚོགས་ལ་ཕྱག་འཚལ་ལོ། །ཞེས་པ་འདི་ལ་དབྱངས་དང་བཅས་པ་བྱ་སྟེ། གཞན་ཡང་འདི་སྐད་བརྗོད་དོ། །ས་ཕྱོགས་ནམ་མཁའ་ལྟར་ཡངས་ཤིང་རྒྱ་ཆེ་བའི་གནས་འདིར། རྣལ་འབྱོར་གྱི་དབང་ཕྱུག་རྡོ་རྗེ་འཛིན་པ་ཆེ་གེ་མོ་ཞེས་བྱ་བ་བདག་གིས་སློབ་མ་རྣམས་ལ་བྱང་ཆུབ་སེམས་དཔའ་གསུང་གི་མངའ་བདག་སྤྱན་རས་གཟིགས་དབང་ཕྱུག་གི་དབང་བསྐུར་བར་བྱེད་པ་ལ་གང་དག་མི་བཟོད་པའི་གདོན་གྱི་རིགས་སུ་གྱུར་པ། སྟེང་ལྷའི་གདོན་དང་། འོག་ཀླུའི་གདོན་དང་། བར་ལྷ་མ་ཡིན་གྱི་གདོན་དང་། གདོན་ཆེན་པོ་བཅོ་བརྒྱད་ལ་སོགས་པ། གང་དག་མི་བཟོད་ཅིང་མ་རུངས་པའི་སེམས་དང་ལྡན་པ་དེ་དག རྡོ་རྗེ་འཛིན་པའི་བཀའ་ཐོས་པ་ཙམ་གྱིས་ཕྱིར་དེངས་ཤིག གང་དག་མི་འགྲོ་བ་དེ་དག་ནི། བདག་གི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདི་ཁྲོས་རབ་ཏུ་ཁྲོས་པའི་དབང་གིས་མགོ་བོ་ཚལ་པ་བརྒྱར་འགས་པར་གྱུར་ཏ་རེ། ཧཱུྃ་ཞེས་བརྗོད་དོ། །དེ་ནས་གར་དང་སྟངས་སྟབས་ཀྱི་གཞི་དྲུག་ཅུ་རྩ་གཉིས་ལ་སོགས་ཅི་རིགས་པས་བགེགས་བསྐྲད་པར་བྱའོ། །དེ་ནས་ལྷ་སྟ་གོན་དངོས་ལ་གསུམ་ལས། གདན་དགོད་པ་དང་། ལྷ་བསྐྱེད་པ་དང་། སྙན་གསན་དབབ་པའོ། །དང་པོ་ནི། དཀྱིལ་འཁོར་ཕྱག་དར་བྱས་ལ། བའི་རྣམ་ལྔས་བྱུགས་ལ། དཀྱིལ་འཁོར་གྱི་དབུས་སུ་ཆང་ལ་དྲིའི་ཐིག་ལེ་མཐོ་གང་གྲུ་བཞི་པ་ཅིག་བྱས། ཕྱོགས་མཚམས་རྣམས་སུ་ཟླུམ་པོ་སོར་བཞི་པ་རེ་བྱས་ལ། །དེ་རྣམས་ཀྱི་སྟེང་དུ་མེ་ཏོག་གི་ཚོམ་བུ་རེ་བཀོད་དེ་གདན་དུ་བསམ་མོ། །གཉིས་པ་ལྷ་བསྐྱེད་པ་ནི། ས་བོན་ནམ་མིང་ཙམ་ལས། དཀྱིལ་འཁོར་བསྐྱེད་ལ། རང་གི་ཐུགས་ཁའི་ས་བོན་ལས་འོད་སྤྲོས་ལ། ཡེ་ཤེས་སེམས་དཔའ་སྤྱན་དྲངས་ལ་མཆོད་དེ་དགུག་གཞུག་བྱའོ། །དེའི་རྗེས་ལ་མཆོད་བསྟོད་ལོང་དང་སྦྱར་ལ་ཅི་རིགས་པ་ཅིག་བྱས་ལ་བདུད་རྩི་མྱང་བ་ཡང་བྱའོ། །གསུམ་པ་སྙན་གསན་དབབ་པ་ནི་འདི་སྐད་དེ། གཉིས་མེད་ཡེ་ཤེས་ལས་བྱུང་བའི། །སྟོན་པའི་གཙོ་བོ་ཁྲག་འཐུང་དཔལ། །རྣལ་འབྱོར་མ་དང་ཡང་དག་ལྡན། །ཕྱོགས་མཚམས་རྣམས་ཀྱི་མཁའ་འགྲོ་དང་། །རིག་པའི་ལྷ་མོ་རྫུ་འཕྲུལ་ཅན། བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པ། །ནང་པར་དཀྱིལ་འཁོར་འབྲི་བར་འཚལ། །རྗེས་སུ་བརྩེ་བས་ཉེར་དགོངས་ཏེ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་དུ་གསོལ་བ་གདབ་བོ། །དེ་ནས་ཨུ་ཏིཧླ་བཛྲ་ཞེས་པ་སྟ་གོན་གྱི་ལྷ་ནམ་མཁའ་ལ་གདེག་གོ །དེ་ནས་བུམ་པ་སྟ་གོན་དུ་གནས་པར་བྱ་བ་ནི། སྔར་བཤམས་པའི་བུམ་པ་རྣམས་ཀྱི་དཀྱིལ་འཁོར་གྱི་སྟེང་དུ་བཀོད་ལ། རང་ལྷའི་ང་རྒྱལ་དང་ལྡན་པས། བུམ་པ་བྷྲཱུཾ་ལས་རིན་པོ་ཆེའི་གཞལ་ཡས་ཁང་དུ་བསྐྱེད་ལ། དེའི་ནང་དུ་མངོན་རྟོགས་ནས་འབྱུང་བ་ལྟར་སྐད་ཅིག་གིས་བསྐྱེད་དེ། དེ་རྣམས་ལ་ཡེ་ཤེས་པ་དགུག་གཞུག་བྱས་ལ། མཆོད་བསྟོད་རྒྱས་བསྡུས་ཅི་རིགས་པ་ཅིག་བྱའོ། །དེ་ནས་རྣམ་རྒྱལ་གྱི་བུམ་པའི་ཁ་རྒྱན་གྱི་གསེབ་ཏུ་ཀ་པ་ལའི་ནང་དུ་བདུད་རྩིའི་ཆུ་བླུགས་ལ་བཞག་པའི་སྟེང་དུ་རྡོ་རྗེ་ལ་གཟུངས་ཐག་བཏག་ལ་བཞག གཟུངས་ཐག་ལག་པ་གཡས་པས་ཐུགས་ཀར་བཟུང་ལ། རང་གི་ཐུགས་ཀའི་ཧྲཱི་ལ་སྔགས་ཀྱིས་བསྐོར་ནས་ཡོད་པ་དེ་ལས་འོད་ཟེར་རྨ་བྱའི་སྒྲོ་སྦོམས་པ་ལྟ་བུ་ཁ་དོག་སེར་པོ་བྱུང་སྟེ། གཟུངས་ཐག་ལ་འཁྲིལ་ནས་བུམ་པའི་ནང་གི་ལྷའི་ཐུགས་ཀའི་ཧྲཱིཿལས་ཕོག་ཅིང་བུམ་ནང་གི་ཆུ་ལ་ཐིམ་པར་བསམ་ཞིང་། སྔགས་བཟླས་སོ། །སྔགས་ནི། ཨོཾ་ཨཱ་ཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ། ཨོཾ་བཛྲ་བྷ་ར་ཧི། སརྦ་བྷུད་དྷ་ཌ་ཀི་ནི་ཡེ། བཛྲ་ཝརྣ་ནི་ཡེ། བཛྲ་བཻ་རོ་ཙ་ནི་ཡེ་ཧ་རི་ནི་ས་ཞེས་པ་དང་། །ལས་བུམ་ལ། ཨོཾ་ཧ་ཡ་གྷྲི་བ་ཧུ་ལུ་ཧུ་ལུ་ཧཱུྃ་ཕཊ་ཞེས་པ་ལ་སོགས་པས་བཟླས་སོ། །དེ་ནི་བུམ་སྟ་གོན་ནོ། །སློབ་མ་སྟ་གོན་དུ་གནས་པ་ལ་གཉིས་ཏེ། དང་པོར་བར་ཆད་ཞི་བར་བྱ་བའི་དོན་དུ་འབྱུང་པོ་ལ་གཏོར་མ་བཏང་ལ། བར་ཆད་མ་བྱེད་ཅེས་བཀའ་བསྒོ། གཉིས་པ་ནི་ཐུགས་རྗེ་ཆེན་པོའི་རྒྱུད་ལས། ཁྲུས་ལ་གནས་པའི་སྐྱབས་སུ་འགྲོ། །གཉིས་པ་སོ་སོར་ཐར་པ་དགོད། །ཐེག་པ་ཆེན་པོར་སེམས་ཀྱང་བསྐྱེད། །བླ་མ་ལ་ཡང་གསོལ་བ་གདབ། །ཅེས་བཤད་པས། དེ་ལ་གསུམ་སྟེ། སྦྱོར་བ། དངོས་གཞི། རྗེས་ཀྱི་བྱ་བའོ། །དང་པོའི་དབང་དུ་བྱས་ན། ལས་བུམ་གྱི་ཁྲུས་བྱས་ལ། གོས་གསར་པ་གོན་ཏེ། བླ་མ་ལ་མཎྜྻལ་ཕུལ་ལ། ཡོལ་བའི་ཕྱི་རོལ་དུ་གུས་པའི་ཚུལ་གྱིས་འདུག་ཏུ་བཅུག་སྟེ། དེ་ནས་སློབ་དཔོན་གྱིས་ཕྱག་རྒྱ་ཆེན་པོ་ཐོབ་པར་གྱིས་ཤིག་པར་གདམས་པ་ནི། འདི་སྐད་དེ། སྤྱིར་འཇིག་རྟེན་ན་བདེ་བ་འདོད་པ་མང་ཡང་། དེའི་རྒྱུ་ལ་ཤིན་ཏུ་འཇུག་པ་ཉུང་ལ། འགའ་ཞིག་རྒྱུ་ལ་འཇུག་ཀྱང་ལམ་ནོར་བ་མུ་སྟེགས་བྱེད་ཀྱི་ལམ་ལ་འཇུག་པ་མང་། མ་ནོར་བ་ཡིན་ཀྱང་ལམ་དམན་པ། ཉན་ཐོས་དང་རང་རྒྱལ་གྱི་ལམ་ལ་ཞུགས་པ་མང་ལ། ལམ་ཐེག་པ་ཆེན་པོ་ཡིན་ཀྱང་། ཡོངས་སུ་མ་རྫོགས་པ་ཕ་རོལ་ཏུ་ཕྱིན་པའི་ལམ་ཡིན་ལ། འདིར་ལམ་འབད་པ་ཚེགས་ཆུང་ལ་འབྲས་བུ་ཚེ་ཅིག་ལུས་ཅིག་ལ་སངས་རྒྱས་པར་བྱེད་པའི་གསང་སྔགས་རྡོ་རྗེ་ཐེག་པའི་ལམ་ལ་འཇུག་པ་ཡིན་ནོ། །འདིར་འཇུག་པར་བྱེད་པ་ལ་ཚེ་འདིའི་བདེ་བ་ལ་དམིགས་པའམ། ཕྱི་མ་ཡིན་ཀྱང་རང་ཅིག་པུ་འཁོར་བའི་སྡུག་བསྔལ་ལས་ཐར་བར་འདོད་ནའང་དེ་དག་ཐོབ་པར་ཡང་མི་ནུས་ལ། ཐོབ་ཀྱང་འབྲས་བུ་དམན་པ་ཡིན་པས་ཐོབ་བྱ་མ་ཡིན་ནོ། །འོ་ན་བསམ་པ་ཇི་ལྟ་བུ་ཅིག་གིས་འཇུག་པར་བྱ་སྙམ་ན། མ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་སྒོར་འཇུག་པར་བྱ་ཨང་སྙམ་པའི་བསམ་པ་དེ་མ་ཡེངས་པར་གྱིས་ལ་ཉོན་ཅིག ལད་མོ་བཟླ་མི་དགོས་ཀྱིས་བྱས་ལ་འདི་སྐད་དེ། སྔགས་ཀྱི་དངོས་གྲུབ་དོན་གཉེར་པ། །དཀྱིལ་འཁོར་འདིར་ནི་འཇུག་པར་བྱ། །བསོད་ནམས་འདོད་པས་དེ་ལས་གཞན། །གཞན་ནི་འཇིག་རྟེན་ཕ་རོལ་གཉེར། །སླར་ཡང་དད་དང་ལྡན་པ་ཡི། འཇིག་རྟེན་ཕ་རོལ་ལ་དམིགས་ཏེ། །བློ་ལྡན་དཀྱིལ་འཁོར་འཇུག་པར་བྱ། །འདི་ཡི་འབྲས་བུ་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འདི་འབྲས་འབད་པ་མེད་པར་འགྲུབ། །ཅེས་བརྗོད་དོ། །དེ་ནས་ཐུན་མོང་མ་ཡིན་པའི་སེམས་བསྐྱེད་པའི་དོན་དུ། གསོལ་བ་གདབ་པ་ནི། ཕྱག་བྱས་ལ་མཎྜྻལ་ཕུལ་ལ། དེའི་རྗེས་ལ་སློབ་དཔོན་གྱིས། འོ་ད་ཁྱེད་རྣམས་ལམ་འདིར་འཇུག་པ་ལ། སྔོན་དུ་གསོལ་བ་བཏབ་ནས་འཇུག་དགོས་པ་ཡིན་པས། ལད་མོ་གྱིས་ཤིག་བྱས་ལ། འདི་སྐད་བརྗོད་དེ། རྡོ་རྗེ་ཁྲོས་པ་མཛེས་པ་ཡི། བདག་གི་སྟོན་པ་དགའ་ཆེན་ཁྱོད། །སེམས་ཅན་ཀུན་གྱི་དོན་བརྩོན་པ། །མགོན་པོ་དམ་ཚིག་བདག་ལ་སྩོལ། །སྡོམ་པའི་མཆོག་ཀྱང་བདག་ལ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །བྱང་ཆུབ་སེམས་ཀྱང་བདག་ལ་གསོལ། ཀུན་ཏུ་རྟོག་པ་སྤངས་པ་ཡི། །གྲོང་ཁྱེར་ཉམས་དགར་འཇུག་པར་འཚལ། །ཞེས་ལན་གསུམ་དུ་གསོལ་བ་གདབ་པོ། །བཞི་པ་སྔགས་ཀྱི་ཐེག་པར་འཇུག་པ་ལ་སྤྲོ་བ་བསྐྱེད་པ་ནི། ལམ་ཟབ་མོ་གསང་བ་སྔགས་ཀྱི་ཐེག་པ་འདི་ལ་བརྟེན་ནས། དུས་གསུམ་སངས་རྒྱས་རྣམས་ཀྱང་། བླ་ན་མེད་པའི་བྱང་ཆུབ་བརྙེས་པ་ཡིན་པས། སེམས་སྤྲོ་དགའ་དང་བཅས་པས་ཉོན་ཅིག ལད་མོ་བཟླ་མི་དགོས་ཀྱིས་བྱས་ལ། འདི་སྐད་དེ། བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་གྱིས། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། ཐམས་ཅད་མཁྱེན་པའི་མཚན་མ་བརྙེས། །གསང་སྔགས་སྦྱོར་བ་མཉམ་མེད་པས། །སྐྱོབ་པ་སངས་རྒྱས་ཧེ་རུ་ཀས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བྱའོ། །ལྔ་པ་ཉན་པར་རྣ་གཏོད་ཅིག་པར་བསྐུལ་བ་ནི། དེས་ན་ལམ་ཁྱད་པར་ཅན་འདི་ལ་འཇུག་པར་བྱེད་པ་ལ། དྲན་པ་དང་ཤེས་བཞིན་གྱིས་མ་ཟིན་པ་དང་། དོན་དུ་གཉེར་བའི་བསམ་པ་བརྟན་པོ་མེད་ན་མི་འགྲུབ་པས། ཞེ་ཐག་པ་སྙིང་གི་དཀྱིལ་རུས་པའི་ཁོང་ནས་དོན་དུ་གཉེར་བའི་བསམ་པ་བརྟན་པོ་མ་ཡེངས་པ་ཅིག་དགོས་སོ། །ཞེས་འདོམས་པ་ཡིན་གྱིས་བྱས་ལ། འདི་སྐད་བརྗོད་དེ། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོས་ལེགས་པར་ཉོན། །བརྗེད་ངས་བློ་ལ་ཧེ་རུ་ཀ་སོགས་ཀྱི། །བདེ་བར་གཤེགས་པ་རྣམས་གྱིས་བྱིན་མི་རློབ། །ཅེས་བརྗོད། གཉིས་པ་དངོས་གཞི་ལ་གཉིས་ཏེ། དོ་ཁོ་ན་ཉིད་ཀྱི་བྱ་བ་དང་། དེ་ཁོ་ན་ཉིད་ཀྱི་དོན་གྱི་བྱ་བའོ། །དང་པོ་ལ་བཞི་སྟེ་སྐྱབས་སུ་འགྲོ། སེམས་བསྐྱེད་པ། གསོལ་བ་གདབ་པ། དང་པོ་ནི་འདི་བཞིན་དུ་བྱེད་འཚལ་ད་ཁྱོད་རྣམས་ཀྱིས་ཐེག་པ་ཐུན་མོང་བ་དང་སྒོ་མཐུན་པར་ཀུན་རྫོབ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་ལ། འགལ་རྐྱེན་སྤང་ཞིང་མཐུན་རྐྱེན་བསོད་ནམས་ཀྱི་ཚོགས་སྒྲུབ་དགོས་པས། འདི་བཞིན་དུ་བགྱིད་འཚལ། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་རྩ་བ་དང་བརྒྱུད་པར་བཅས་པའི་བླ་མ་ཐམས་ཅད་བཞུགས་པར་བསྒོམས་ཏེ། བདག་གི་ལུས་ལོངས་སྤྱོད་འབྱོར་པ་དང་བཅས་པ་འབུལ་ལོ་སྙམ་དུ་བསམ་ལ། ལད་མོ་གྱིས་ཤིག་བྱས་ལ་འདི་སྐད་དོ། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །མ་ལུས་བདག་ལ་དགོངས་སུ་གསོལ། །འཁོར་བ་ཐོག་མ་མེད་པ་ནས། །ཐ་མ་ད་ལྟ་ཐུག་གི་བར། །འདོད་ཆགས་ཞེ་སྡང་གཏི་མུག་གིས། །ལུས་ངག་ཡིད་གསུམ་སྒོ་ནས་ནི། །སྡིག་པ་དཔག་མེད་བགྱིས་པ་དང་། །བགྱིད་དུ་སྩལ་དང་ཡིད་རང་དང་། །ཁྱེད་ཀྱི་སྤྱན་སྔར་བཤགས་པར་བགྱི། སླན་ཆད་བདག་ནི་མི་བགྱིད་དོ། །སངས་རྒྱས་བྱང་ཆུབ་སེམས་དཔའ་དང་། །འཕགས་པ་རང་རྒྱལ་ཉན་ཐོས་ཀྱི། །ཡན་ལག་རྣམས་ཀྱང་གཟུང་བར་བགྱི། འགྲོ་རྣམས་ཀུན་གྱི་དགེ་བ་ལ། །བདག་ནི་རྗེས་སུ་ཡིད་རང་ངོ་། བདེ་གཤེགས་ཆོས་སྐུ་ལ་བཞུགས་ཏེ། །འགྲོ་བ་ཀུན་ལ་ཕན་དོན་དུ། །ཆོས་ཀྱི་འཁོར་ལོ་བསྐོར་བར་ནི། །བདག་ནི་རྟག་ཏུ་གསོལ་བ་འདེབས། །བདེ་གཤེགས་མཛད་པ་མཐར་ཕྱིན་ནས། །མྱ་ངན་འདའ་བར་བཞེད་པ་ལ། བསྐལ་པའི་མཐའ་མར་བཞུགས་པར་ནི། །བདག་ནི་རྟག་ཏུ་གསོལ་བ་འདེབས། །ལུས་ངག་ཡིད་གསུམ་དགེ་བ་དེས། །བགྱིས་སམ་བགྱིད་དུ་གསལ་བ་གང་། །རྗེས་སུ་ཡིད་རང་དེ་དག་ནི། །འགྲོ་རྣམས་ཀུན་གྱིས་ཐོབ་པར་ཤོག །སྤྱན་རས་གཟིགས་དབང་ཐུག་རྗེའི་བདག །བླ་མར་བཅས་པ་ཐམས་ཅད་ལ། །བདག་ནི་རྟག་ཏུ་གསོལ་བ་འདེབས། །བདག་གི་ལུས་འདི་འབུལ་བ་ཡིས། །ཐེག་པ་དམན་ལ་མི་འཇུག་ཅིང་། །ཐེག་མཆོག་བླ་ན་མེད་པ་ཡི། །ལམ་ཅིག་བདག་ལ་བསྟན་དུ་གསོལ། །ཞེས་བརྗོད་དོ། །དེ་ནས་སྐྱབས་སུ་འགྲོ་བ་ཐུན་མོང་པ་ནི། སོ་སོར་ཐར་པ་རིགས་བདུན་གྱི་སྡོམ་པ་ཅི་རིགས་པ་སྔར་ཐོབ་ན་མི་དགོས། མ་ཐོབ་ན་ཅི་རིགས་པ་འབོགས་པར་བྱའོ། །སྐྱབས་སུ་འགྲོ་བ་ཁྱད་པར་ཅན་ནི། འདི་ལྟ་སྟེ། ཕྱོགས་བཅུ་དང་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བླ་མ་དང་རྡོ་རྗེ་སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས། ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་ཆེན་པོ་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག དོན་དམ་པའི་ཆོས་ཞི་བ་མྱ་ངན་ལས་འདས་པ་རྣམས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག བྱང་ཆུབ་སེམས་དཔའི་དགེ་འདུན་ཕྱིར་མི་ལྡོག་པ་རྣམས་ལ་སྐྱབས་སུ་མཆིའོ། །ལན་གསུམ་བརྗོད་ཅིང་རྗེས་སུ་སློབ་དཔོན་གྱིས་ཐབས་ཡིན་ནོ། །སློབ་མས་ལེགས་སོ་ཞེས་བརྗོད་དེ། དེ་ནས་སེམས་བསྐྱེད་པ་ནི། ཕྱོགས་བཅུ་དུས་གསུམ་བཞུགས་ཡི། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་སློབ་དཔོན་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །སེམས་ཅན་རྣམས་ཀྱི་དོན་སླད་དུ། །བྱང་ཆུབ་མཆོག་ཏུ་ཐུགས་བསྐྱེད་ལྟར། །དེ་བཞིན་བདག་གིས་སེམས་བསྐྱེད་དོ། །ཇི་ལྟར་དུས་གསུམ་མགོན་པོ་རྣམས། །བསོད་ནམས་ཡེ་ཤེས་བྱང་ཆུབ་ལམ། །ཐབས་དང་ཤེས་རབ་གོམས་པས་བགྲོད། །དེ་བཞིན་བདག་གིས་ལམ་བགྲོད་དོ། །ཇི་ལྟར་དུས་གསུམ་མགོན་པོ་རྣམས། །ཐམས་ཅད་མཁྱེན་པར་སངས་རྒྱས་ནས། །མཁའ་་མཉམ་སེམས་ཅན་དོན་མཛད་ལྟར། །དེ་བཞིན་བདག་གིས་དོན་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བ་དང་། །དབུགས་མ་བྱུང་རྣམས་དབུགས་དབྱུང་ཞིང་། །འགྲོ་ཀུན་མྱ་ངན་འདའ་བ་དང་། །ཀུན་ཀྱང་སངས་རྒྱས་ཐོབ་པར་ཤོག །ཅེས་ལན་གསུམ་གྱིས་ཐུན་མོང་གི་སེམས་བསྐྱེད་སྦྱིན་པར་བྱའོ། །དེའི་རྗེས་ལ་ཁྱད་པར་གྱི་སེམས་བསྐྱེད་པ་ནི། འདི་སྐད་དུ། སློབ་མ་སྐད་ཅིག་གིས་ལྷར་མོས་པ་བྱས་ལ། སློབ་མའི་སྙིང་ཁར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བ་ལ་ཧཱུྃ་གིས་མཚན་པ་ཅིག་ཏུ་བསམས་ལ། དེ་ནས་སེམས་བདེ་སྟོང་གཉིས་སུ་མེད་པའི་ངང་ལ་བློ་ཞོག་ཅིག་བྱས་ལ་གནས་གསུམ་དུ་རྡོ་རྗེ་བཞག་ལ། ཨོཾ་སརྦ་ཏ་ཐཱ་ག་ཏ། བོ་ཏེ་ཙི་ཏ་ཨུ་པ་ཏ་ཡ་མི། ཀ་ཡ་ཝ་ག་ཙི་ཏ་སི་ཏི་ཧཱུྃ། གསུམ་པ་སྐུ་གསུངས་ཐུགས་ཀྱི་ལྷ་བསྐྱེད་དེ། མཆོད་བསྟོད་བྱ་བ་ནི། སློབ་མའི་གནས་གསུམ་དུ་སྐུ་རྡོ་རྗེ་གསུང་རྡོ་རྗེ་ཐུགས་རྡོ་རྗེ་གསུམ་གྱི་རང་བཞིན། ཨོཾ་ཨཱ་ཧཱུྃ་གསུམ་དུ་བསྐྱེད་ལ་མཆོད་པ་ཙམ་བྱའོ། །གཉིས་པ་དེ་ཁོ་ན་ཉིད་ཀྱི་དོན་བྱ་བ་ལ་དྲུག་ལས། དང་པོ་རིགས་བརྟག་པའི་སོ་ཤིང་སྦྱིན་པ་ནི། མཎྜྻལ་ལྟ་བུའི་སྟེང་དུ་དོར་དུ་གཞུག་པ་ནི། སློབ་དཔོན་གྱིས་ཨོཾ་ཨཱཿཧཱུྃ་ཞེས་བརྗོད་ལ་སྦྱིན་པར་བྱའོ། །དེ་ནས་དེའི་རྩེ་མོས་སོ་བྲུ་བ་ཙམ་དང་། སོས་ནེམ་ཙམ་བྱས་ལ་ཐལ་མོའི་བར་དུ་བཅུག་ལ། མདུན་དྲང་པོར་དོར་བར་བྱའོ། །དེའི་རྩེ་མོ་གྱེན་དུ་འགྲེང་ནས་བྱུང་ན་མཆོག་གི་དངོས་གྲུབ་ཐོབ་པར་འགྱུར་རོ། ཤར་དུ་བལྟས་ན་གྲུབ་ཆེན་བརྒྱད་འབྱུང་། ལྷོར་བལྟས་ན་འཇིག་རྟེན་པའི་དངོས་གྲུབ་རྣམས་འབྱུང་ལ། ནུབ་ཏུ་བལྟས་ན་ཆོས་སྨྲ་བ་ལ་དབང་བར་འགྱུར་ཞིང་། བྱང་དུ་བལྟས་ན་འཕྲིན་ལས་རྣམས་འགྲུབ་པར་འགྱུར་རོ། ཐུར་དུ་བལྟས་ན་ས་འོག་གི་དངོས་གྲུབ་འགྲུབ་བོ། །ཡང་ཕྱོགས་བཞི་ལ་འཕྲིན་ལས་བཞི་ལ་ཤིས་པར་སྦྱར་ལ་བསྟན་ནོ། །གཉིས་པ་དྲི་མ་དག་པའི་དོན་དུ་སྐྱོར་ཆུ་བླུད་པ་ནི། མ་ད་ན་བྱིན་གྱིས་བརླབས་ལ་ཧུབ་རེ་འཐུང་དུ་བཅུག་ལ། ངག་ཏུ། ཨོཾ་ཧྲཱི་བི་ཤུད་དྷ་དྷ་རྨཱ་པ་པཾ་ན་མ་དྱ་ཤོ་དྷ་ཡ། སརྦ་བི་ཀརྨཱ་ཨ་པ་ན་ཡ་ཧཱུྃ་ཞེས་བརྗོད་དོ། །གསུམ་པ་བར་ཆད་ཞི་བའི་དོན་དུ་བསྲུང་སྐུད་གདགས་པ་ནི། སྲུང་སྐུད་དམར་པོ་ལ་སྔགས་ཀྱི་མདུད་པ་རེ་བྱས་ལ། སྐྱེས་པའི་དཔུང་པ་གཡོན་པ་དང་། བུད་མེད་ཀྱི་གཡས་པ་ལ་གདགས་སོ། །བཞི་པ་རྨི་ལྟས་བརྟག་པའི་དོན་དུ་ཀུ་ཤ་སྦྱིན་པ་ནི། ཀུ་ཤའི་ཆུན་པོ་གཉིས་བྱས་ལ། གཅིག་ལག་པ་གཡས་སུ་གཏད་ལ། བཛྲ་སྭ་ཏ་ཞེས་བྱའོ། །གཅིག་གཡོན་དུ་གཏད་ལ་བཛྲ་ཏིག་སྣ་ཞེས་བརྗོད་དོ། །ལྔ་པ་སྤྲོ་དགའ་བསྐྱེད་པའི་དོན་དུ་ཟབ་པ་དང་རྒྱ་ཆེ་བའི་ཆོས་བཤད་པ་ནི། ཁྱེད་རྣམས་རྣ་བ་མ་གཡེངས་པར་ཉོན་ཅིག་བྱས་ལ། འཇིག་རྟེན་ཁམས་ནི་ཐམས་ཅད་དུ། །ཐམས་ཅད་མཁྱེན་པ་འབྱུང་མི་འགྱུར། །བརྒྱ་ལམ་ན་ཡང་རེ་འགའ་ཞིག །ཨུ་དུམ་འབར་བའི་མེ་ཏོག་བཞིན། །འབྱུང་འགྱུར་ཡང་ནི་མི་འབྱུང་སྲིད། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་སངས་རྒྱས་བྱས་པ་ཡིན། །བསྐལ་པ་གྲངས་མེད་མང་པོར་ནི། །སྔོན་དུ་བྱས་པའི་བསོད་ནམས་གང་། །དེ་ཀུན་ཟད་པར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །ཅེས་བརྗོད་དོ། །དྲུག་པ་ཉལ་དུ་གཞུག་པ་ནི། གནས་དེ་ཉིད་ལག་པ་གཡས་ཀྱི་ཀུ་ཤ་དང་པོ་སྔས་སུ་བཅུག་ལ། གཡོན་གྱི་ཀུ་ཤ་སྟན་འོག་ཏུ་བཅུག་ལ། ཉོལ་ལ་རྨི་ལམ་ཐོབ་ཅིག་ཅེས་བྱའོ། །ལག་ལེན་ལ་བར་སྐབས་འདིར་ཚོགས་དང་གཏོར་མ་བྱས་ནས། དེ་ནས་ཉལ་དུ་འཇུག་པའོ། །གསུམ་པ་རྗེས་ཀྱི་བྱ་བ་ལ་གཉིས་ལས། དང་པོ་སློབ་དཔོན་གྱིས་དཀྱིལ་འཁོར་གྱི་ལྷ་ཚོགས་ལ་མཆོད་པ་དང་། བསྟོད་པ་དང་། འདོད་པའི་དོན་ལ་གསོལ་བ་གདབ་པ་དང་། དགེ་བའི་རྩ་བར་བསྔོ་ཞིང་ཡི་གེ་བརྒྱ་པ་ཅི་རིགས་པ་ཅིག་བརྗོད་ལ་ཉལ་བ་དང་། ནང་པར་གྱི་དུས་སུ་རྨི་ལམ་དྲིས་ལ་ཆོས་ཀྱི་དུང་འབུད་པ་དང་། ནམ་མཁའ་ལ་འགྲོ་བ་ལ་སོགས་པ་བཟང་བ་རྨིས་ན། དངོས་གྲུབ་རབ་ཕྱག་རྒྱ་ཆེན་པོ། འབྲིང་གྲུབ་ཆེན་བརྒྱད། ཐ་མ་ཡང་ཚེ་དང་ལོངས་སྤྱོད་འགྲུབ་པར་འགྱུར་རོ། །ཞེས་ལུང་བསྟན། ཁྱིམ་ཚིག་པའམ་ཆུས་ཁྱེར་བ་ལ་སོགས་པ་ངན་པ་རྨིས་པར་གྱུར་ན། གཉིས་པ་རྨི་ལམ་ངན་པ་བཟློག་པའི་ཆོ་ག་བྱ་བ་ནི། བླ་མ་ལ་མཎྜྻལ་ཕུལ་ལ་གསོལ་བ་གདབ་པ་དང་། གཏོར་མ་བརྒྱ་རྩ་བཏང་བ་དང་། མེ་ལོང་བསྟན་ལ་དེའི་ནང་དུ་གཟུགས་བརྙན་འཆར་བར་བྱས་ལ། གཟུགས་བརྙན་དང་རྨི་ལམ་ལ་ཁྱད་པར་མེད་པས་རྨི་ལམ་ལ་བདེན་པར་མ་འཛིན་ཅིག་བྱས་ལ། གཟུགས་ནི་ལྦུ་བ་གཡོ་པ་འདྲ། །ལྦུ་བ་དེ་ལ་སྙིང་པོ་མེད། །དེ་ལ་རྣལ་འབྱོར་ལྟོས་མི་ལྟོས། ཆོས་ཀུན་དེ་བཞིན་ཤེས་པར་གྱིས། །ཅེས་པ་ལ་སོགས་པའོ། །དེ་རྣམས་ཀྱིས་ནུབ་གཉིས་པ་སྟ་གོན་གྱི་ཆོ་ག་རྡོ་རྗེ་སློབ་དཔོན་གྱི་ལས་སོ། །ནུབ་གསུམ་པ་དཀྱིལ་འཁོར་ཞག་གི་ཚེ་ལ་གཉིས་ཏེ། དཀྱིལ་འཁོར་བྲི་བ་དང་། དཀྱིལ་འཁོར་བསྒྲུབ་པའོ། །འདི་ན་གཉིས་ཏེ། ཐིག་གདབ་པ་དང་། ཚོན་བྲི་པའོ། །ཚོན་བྲི་པ་ལ་གཉིས་ཏེ། བྲི་བ་དངོས་དང་། ཕྱག་མཚན་དགོད་པའོ། །དེ་ལ་སོགས་པ་རྣམས་གཞན་དུ་ཤེས་པར་བྱའོ། །དེ་ནས་དཀྱིལ་འཁོར་ལྷག་པ་དམ་ཚིག་གི་ལྷར་བསྒྲུབ་པ་ནི། རྡོ་རྗེ་སློབ་དཔོན་དཀྱིལ་འཁོར་གྱི་ཤར་སྒོར་སྟན་ནང་ཚངས་ཅན་ལ་འདུག་ལ། རྒྱན་དྲུག་གོན་ལ་ཡེ་ཤེས་ཀྱི་རིག་མ་དང་སྙོམས་པར་ཞུགས་ལ་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་ཐིག་ལེ་སྣང་བར་བསམས་ལ། དངོས་སུ་བདུད་རྩི་ལྔའི་ཆུས་ལག་པ་གཡོན་པའི་མཐེབ་སྲིན་གྱིས་དཀྱིལ་འཁོར་གྱི་ཕྱག་མཚན་ལ་གཏོར་བས། སྤྱན་རས་གཟིགས་དབང་ཕྱུག་གི་དཀྱིལ་འཁོར་རྟེན་དང་བརྟེན་པར་བཅས་པ་བསྐྱེད་ལ་དེ་ལ་སྔར་སྟ་གོན་གྱི་ལྷ་ནམ་མཁའ་ལ་བཏེག་པ་དེ་ཕབ་ལ་གཉིས་སུ་མེད་པར་བྱའོ། །གསུམ་པ་དཀྱིལ་འཁོར་ཡེ་ཤེས་ཀྱི་ལྷར་བསྒྲུབ་པ་ནི། བསྐྱེད་རིམས་བསྒོམས་པའི་རྗེས་ཆགས་ཀྱི་སྐབས་སུ་དངོས་སམ་ཡིད་ཀྱི་རིག་མ་དང་སྙོམས་པར་ཞུགས་པ་བདེ་བ་སྒྱུ་མ་ལྟ་བུའི་སྒྲས། ཕྱོགས་བཅུའི་དེ་བཞིན་གཤེགས་པ་རྣམས་བཀུག་ལ། ཡབ་ཀྱི་ཞལ་དུ་སྐུའི་དབྱིབས་བརྒྱུད་ནས། གསང་བའི་རྡོ་རྗེ་ནས་ཡུམ་གྱི་མཁའ་ལ་བབས་པ་དང་ལྷའི་དཀྱིལ་འཁོར་གྱི་འཁོར་ལོ་རྟེན་གཞལ་ཡས་ཁང་དང་བཅས་པ་རུ་བསྐྱེད་ལ། མདུན་གྱི་ནམ་མཁའ་ལ་བཏེག་ལ་བགེགས་བསྐྲད་ལ། མཆོད་བསྟོད་བྱས་ལ་རྡུལ་ཚོན་གྱི་ལྷ་དཀྱིལ་འཁོར་གྱི་ལྷ་དང་གཉིས་སུ་མེད་པར་བྱའོ། །དེ་ནས་དབང་བསྐུར་བ་ལ་སོགས་པ་ཡན་ལག་དྲུག་ལྡན་རྫོགས་པར་བྱའོ། །བཞི་པ་སློབ་དཔོན་བདག་ཉིད་དབང་བྱིན་བརླབས་དང་ལྡན་པར་བསྒྲུབ་པ་ལ་གསུམ་ལས། དང་པོ་སློབ་མ་གཞུག་པའི་དོན་དུ་གླུས་ཉེ་བར་བསྐུལ་བ་ནི། སྤྲོས་པ་དགའ་ན་དབྱངས་དང་བཅས་པ་བྱ། སྤྲོས་པ་ལ་མི་དགའ་ན་ཚིགས་བཅད་དུ་བྱ་བ་འདི་སྐད་དེ། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་འཛིན་པར་བདག་སྒྲུབས་ཤིག །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་སྒྲུབས་ཤིག །ཉེས་པ་མེད་ལ་བརྟགས་པ་སྟེ། །འདོད་ཆགས་ཀུན་གྱི་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་བདག་སྒྲུབས་ཤིག །ཤིན་ཏུ་དག་པ་ཀུན་གྱི་མཆོག གདོད་ནས་གྲོལ་བ་དེ་བཞིན་གཤེགས། ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་སུ་བདག་སྒྲུབས་ཤིག །དངོས་གྲུབ་ཆེན་པོ་མཆོག་གི་མཆོག །དབང་ཕྱུག་ཆེན་པོ་རྒྱལ་བས་རྒྱལ། །གྲུབ་པའི་རྡོ་རྗེ་ཆེར་གསལ་བས། །རྡོ་རྗེ་སྙེམས་པར་བདག་སྒྲུབས་ཤིག །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཉིད་དེ། །འདོད་ཆགས་མཉམ་པའི་དམ་ཚིག་མཆོག །ཅེས་བརྗོད་དོ། །དེ་ནས་བདེན་པ་བསྒྲག་པ་ནི། ཤེས་རབ་ཐབས་དག་དཀྱིལ་འཁོར་གྱི། །བདེན་པའི་བྱིན་བརླབས་གང་ཡིན་པ། །མགོན་པོ་ཁྱེད་ནི་བདེན་པ་དེས། །བདག་གི་འདོད་པ་སྐོངས་གྱུར་ཅིག །ཅེས་བརྗོད། གཉིས་པ་བར་ཆད་ཞི་བར་བྱ་བའི་དོན་དུ་གཏོར་མ་ཅིག་བཏང་ལ། དེ་ནས་རང་སློབ་མ་ལ་དབང་ཅི་ཙམ་བསྐུར་ཚོད་དེ། ཡི་དམ་གྱི་ལྷ་ལ་བླང་བར་བྱ་བ་ནི། དཀྱིལ་འཁོར་གྱི་ལྷ་གཙོ་བོ་ལ་གཙོ་བོ་གཅིག་ཆད་དེ། ལས་བྱེད་པའི་སློབ་དཔོན་གྱི་ཆ་འཛིན་པ་ལས། ཏིང་ངེ་འཛིན་གཙོ་ཆེ་བའི་ཚུལ་གྱིས། ངག་ཏུ་ཡང་ཆོ་ག་ཅི་རིགས་ཅིག་བརྗོད་ལ་དབང་བླང་བར་བྱའོ། །གསུམ་པ་སློབ་མ་དཀྱིལ་འཁོར་དུ་གཞུག་ཅིང་། ལྷ་ངོ་བསྟན་པ་ལ་གཉིས་ལས། དང་པོ་བར་ཆད་ཞི་བའི་དོན་དུ་གཏོར་མ་བཏང་བ་ནི། ཨ་ཀ་རོས་གཏོར་མ་བཏང་ལ་བདེན་པ་བདར་རོ། །གཉིས་པ་གཞུག་པའི་རིམ་པ་ལ་གཉིས་ལས། དང་པོ་ཕྱི་རྡུལ་ཚོན་གྱི་དཀྱིལ་འཁོར་དུ་གཞུག་པ་ལ་ཡང་གཉིས་ལས། སྔོན་འགྲོ་དང་། དངོས་གཞིའོ། །སྔོན་འགྲོ་ལ་ཡང་བཞི་ལས། དང་པོ་སློབ་མ་གོས་བཟང་བ་གོན་ལ། མདུན་དུ་འདུག་ཏུ་གཞུག་གོ །གཉིས་པ་མཎྜྻལ་ཕུལ་བ་སྔོན་དུ་འགྲོ་བས་གསོལ་བ་གདབ་པ་ལ། སྤྱི་དང་བྱེ་བྲག་གཉིས་ལས། སྤྱི་ནི་འདི་སྐད་དུ། མཎྜྻལ་ཕུལ་ལ་ཐལ་མོ་སྦྱར་ཏེ། འདི་སྐད་དུ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་པ། །དེ་རིང་བཤད་པའི་རིན་ཆེན་འདིས། གཙོ་བོ་བདག་ལ་བཀའ་དྲིན་སྐྱོབས། །ཁྱོད་ཞབས་པད་མ་སྤངས་ནས་ནི། །མགོན་ཚུལ་བདག་ལ་གཞན་མ་མཆིས། །འགྲོ་བའི་དཔའ་བོ་ཐུབ་ཆེན་གྱིས། །དེ་བས་བློ་མཆོག་མཉེས་པར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ལོང་བ་ལྟ་བུའི་སེམས་ཅན་ལ། །ཆོས་ཀྱི་སྒྲོན་མེ་སྤར་དུ་གསོལ། །འོན་པ་ལྟ་བུའི་སེམས་ཅན་ལ། །ཆོས་ཀྱི་གསུང་སྒྲ་བསྒྲག་ཏུ་གསོལ། །སྨྱོན་པ་ལྟ་བུའི་སེམས་ཅན་ལ། ཆོས་ཀྱི་དྲན་པ་བསྐྱེད་དུ་གསོལ། །བདག་ནི་མི་ཤེས་གཏི་མུག་པས། །འཁོར་བའི་འདམ་ནས་དྲང་དུ་གསོལ། །ཞེས་ལན་གསུམ་དུ་བྱའོ། །གཉིས་པ་བྱེ་བྲག་ཏུ་གསོལ་བ་གདབ་པ་ནི། འདི་སྐད་དེ། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཞེས་བརྗོད་ཏུ་གཞུག་གོ དེ་ནས་སློབ་མའི་གདོང་གཡོགས་ལ། སྤོས་ཆུས་གཏོར་ལ། ཨོཾ་ཨཱ་ཧཱུྃ་ཞེས་བརྗོད་ལ་བསང་ལ་གདོང་རས་བཅིང་བར་བྱའོ། །དེ་ནས་སློབ་མ་གཞུག་པའི་དོན་དུ། གདམས་པ་ཁས་བླང་བར་བྱ་བ་ནི་འདི་སྐད་དེ། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཅེས་བརྗོད་ལ། སློབ་དཔོན་ཡོལ་བའི་ནང་དུ་འགྲོའོ། །གཉིས་པ་དངོས་གཞི་འཇུག་པ་ལ་དྲུག་ལས། དང་པོ་ནང་དུ་ཞུགས་ལ། སྒོ་བཞི་ནས་ཕྱག་བྱ་བ་ནི། ལས་བྱེད་པས་རྡོ་རྗེ་ནས་འཛིན་དུ་བཅུག་ལ་ཡོལ་བའི་ནང་དུ་དྲང་བར་བྱའོ། །དེ་ནས་ཤར་སྒོ་ནས་ཕྱག་བྱ་བ་ནི། སློབ་དཔོན་གྱིས་ལྷ་ཚོགས་ལ་དམིགས་ལ་ཕྱག་གྱིས་ཅིག་བྱས་ལ་སྤྱི་བོར་སྦྱར་ལ། ཨོཾ་ན་མོ་ཏེ་ཧཱུྃ། མགྲིན་པར་ཐལ་མོ་སྦྱར་ལ། ཨོཾ་ན་མོ་ནི་ཧཱུྃ། ཞེས་པ་དང་། སྙིང་ཁར་ཐལ་མོ་སྦྱར་ལ། ཨོཾ་ན་མོ་ན་མ་ཧཱུྃ། ཞེས་བརྗོད་ལ་ཕྱག་བྱེད་དུ་གཞུག་སྟེ། དེ་ལྟ་བུ་ལན་གསུམ་དུ་བྱའོ། །དེ་ནས་སློབ་དཔོན་གྱིས་བར་འཁྱམས་ན་ཕར་ལ་འགྲོ་བར་སོམས་ལ་ཤོག་ཅིག་བྱས་ལ། རྡོ་རྗེས་ལྷོ་སྒོ་རུ་ཁྲིད་ལ་སྔར་བཞིན་བྱ། དེ་བཞིན་དུ་ནུབ་དང་བྱང་དུ་ཡང་བྱས་ལ། ད་ཁྱོད་ཤར་ཕྱོགས་ཀྱི་བར་འཁྱམས་ཙམ་ལ་ལྷ་རྣམས་ཀྱི་སྤྱན་སྔར་ཡོད་པར་སོམས་ལ་སྡོད་ཅིག་ཅེས་བྱས་ལ་བཞག་གོ །གཉིས་པ་བདུན་རྣམ་དག་བྱས་ཏེ། ཐུན་མོང་གི་སེམས་བསྐྱེད་པ་ནི། ད་ཁྱོད་ཀྱིས་དཀྱིལ་འཁོར་གྱི་ལྷ་ཚོགས་རྣམས་ཀྱི་སྤྱན་སྔར་སྡིག་པ་བཤགས་པ་ལ་སོགས་པ་བྱས་ཏེ། བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱ་ཨཾ་སྙམ་སེམས་ལ་ལད་མོ་གྱིས་ཤིག་བྱས་ལ་འདི་སྐད་དེ། ཐོག་མེད་དུས་ཀྱི་འཁོར་བ་ནས། །བདག་གིས་སྡིག་པ་ཅི་བགྱིས་དང་། །བགྱིད་སྩལ་གང་ལགས་དེང་འདིར་བཤགས། །རྩོལ་བ་སླར་ཡང་སྡོམ་པར་འཚལ། །རྒྱལ་བ་སྲས་དང་བཅས་རྣམས་ཀྱིས། །འགྲོ་གཞན་དགེ་བ་གང་བགྱིད་ལ། །དེ་དག་ཀུན་ལ་ཡིད་རང་ངོ་། །བྱང་ཆུབ་ཆེད་དུ་བདག་གིས་བསྔོ། །སངས་རྒྱས་ཆོས་དང་གེ་འདུན་ལ། །དེ་རིང་བདག་ནི་སྐྱབས་སུ་མཆི། །འཁོར་བའི་སྡུག་བསྔལ་བཅད་པ་དང་། །དགེ་བ་རྣམས་ནི་སྤེལ་བའི་ཕྱིར། །བྱང་ཆུབ་སེམས་གཉིས་བསྐྱེད་ནས་སུ། །འགྲོ་རྣམས་བདག་གི་མགྲོན་དུ་གཉེར། །སངས་རྒྱས་གྱུར་ནས་འགྲོ་བ་རྣམས། །མ་ལུས་སྲིད་པའི་མཚོ་ལས་བསྒྲལ། །ཞེས་བརྗོད་དོ། །གསུམ་པ་རིགས་ལྔའི་སྡོམ་པ་དབོག་ཅིང་། དམ་ཚིག་བསྒྲག་པ་ནི་འདི་སྐད་བརྗོད་དེ། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་མཆི། །འདི་ནི་སངས་རྒྱས་རིགས་དག་པའི། །སྡོམ་པ་བརྟན་པར་གྱུར་པའོ། །རྡོ་རྗེ་དྲིལ་བུའི་ཕྱག་རྒྱ་ནི། །བློ་ཆེན་ཁྱོད་ཀྱིས་བཟུང་བར་བྱ། །བྱང་ཆུབ་སེམས་གང་རྡོ་རྗེ་ཆེ། །ཤེས་རབ་དྲིལ་བུ་ཅེས་གྲགས་སོ། །སློབ་དཔོན་ཁྱོད་ཀྱིས་བཟུང་བྱ་ཏེ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །དམ་ཚིག་སྡོམ་པ་སྦྱིན་པར་བྱ། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་དུ་ལན་དྲུག་ཏུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་མ་ལུས་བཟུང་། །འདི་ནི་པད་མའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། ཅེས་བརྗོད་ལ། དེ་རྣམས་དང་ལྡན་པར་བསྒྲུབ་དགོས་སོ་ཞེས་སོ། །དེ་ནས་དམ་ཚིག་བསྒྲག་པ་ནི། གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲངས་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོར་བཤད། །བདེ་གཤེགས་བཀའ་ལས་འདས་པ་ནི། ལྟུང་བ་གཉིས་པ་ཡིན་པར་བཤད། །རྡོ་རྗེ་སྤུན་ལ་ཁྲོས་པ་ནི། །ཉེས་པར་བརྗོད་པ་གསུམ་པ་ཡིན། །སེམས་ཅན་རྣམས་ལ་བྱམས་པ་སྤོང་། །བཞི་པ་ཡིན་པར་རྒྱལ་བས་གསུངས། ཆོས་ཀྱི་རྩ་བ་བྱང་ཆུབ་སེམས། །དེ་སྤོང་པ་ནི་ལྔ་པ་ཡིན། །རང་ངམ་གཞན་གྱི་གྲུབ་པའི་མཐའ། །ཆོས་ལ་སྨོད་པ་དྲུག་པ་ཡིན། །ཡོངས་སུ་མ་སྨིན་སེམས་ཅན་ལ། །གསང་བ་བསྒྲོགས་པ་བདུན་པ་ཡིན། །ཕུང་པོ་སངས་རྒྱས་མངའ་བདག་ཉིད། །དེ་ལ་བརྙས་བྱེད་བརྒྱད་པ་ཡིན། །རང་བཞིན་དག་པའི་སེམས་ཉིད་ལ། །སོམ་ཉི་ཟ་བ་དགུ་པ་ཡིན། །གདུག་ལ་རྟག་ཏུ་བྱམས་ལྡན་པ། བྱེད་པ་དེ་ནི་བཅུ་པར་འདོད། །མིང་སོགས་བྲལ་བའི་ཆོས་རྣམས་ལ། །དེར་རྟོགས་པ་ནི་བཅུ་གཅིག་པ། །སེམས་ཅན་དད་དང་ལྡན་པ་ལ། །སེམས་སུན་འབྱིན་པ་བཅུ་གཉིས་པ། །དམ་ཚིག་ལ་ནི་ཇི་བཞིན་རྙེད། །མི་བསྟེན་པ་དེ་བཅུ་གསུམ་པ། །ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །སྔགས་པས་འདི་དག་སྤངས་ནས་ནི། །དངོས་གྲུབ་ངེས་པར་ཐོབ་པར་འགྱུར། །ཞེས་བརྗོད་པ། ད་ལྟ་བདག་གིས་བསྒྲགས་པ་ཙམ་ཡིན་ལ། ཕྱིས་རྒྱས་པར་ཤེས་ཤིང་ཁོང་ཆུད་པར་བྱ་དགོས་སོ་བྱའོ། །བཞི་པ་བསྡུས་པ་དང་རྒྱས་པའི་སྒོ་ནས་སློབ་མའི་དམ་ཚིག་ཁས་ལེན་དུ་གཞུག་པ་ནི། དམ་ཚིག་དང་སྡོམ་པ་འདི་རྣམས་བདག་གིས་བླངས་ལ། ཇི་ལྟ་བ་བཞིན་དུ་བསྒྲུབ་པར་བྱ་སྙམ་དུ་སོམས་ལ་ལད་མོ་ཟློས་ཤིག བྱས་ལ་འདི་སྐད་དེ། སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བགྱིད་པར་འཚལ། །ཞེས་པ་དང་། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་ཡི་སྤང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་བདག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པད་མའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། དམ་པའི་ཆོས་ཀྱང་མ་ལུས་བཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། བདག་གིས་སྡོམ་པ་མ་ལུས་བཟུང་། །མ་གྲོལ་བ་རྣམས་དགྲོལ་བར་བགྱི། །མ་བསྒྲལ་བ་རྣམས་བསྒྲལ་བར་བགྱི། དབུགས་མ་ཕྱུང་བ་རྣམས་དབུགས་དབྱུང་ཞིང་། སེམས་ཅན་མྱ་ངན་འདས་ལ་དགོད། །ཅེས་ལན་གསུམ་དུ་བྱའོ། །ལྔ་པ་མེ་ཏོག་གི་ཕྲེང་བ་འཛིན་དུ་གཞུག་པ་ནི། སློབ་མ་སྐད་ཅིག་ལ་ལྷར་བསམས་ལ། མེ་ཏོག་གི་ཕྲེང་བ་ལ་བུམ་པའི་ཆུས་བསངས་ལ། ཨོཾ་ཨ་ཁྃ་བྷི་ར་ཧཱུྃ་ཞེས་བརྗོད་ལ་འཛིན་དུ་གཞུག་གོ །དྲུག་པ་ཁྱད་པར་གྱི་སེམས་བསྐྱེད་པ་ནི། སློབ་མ་ལྷར་ཡོད་པའི་སྙིང་ཁར་རྡོ་རྗེ་བཞག་ལ་སེམས་མ་བཅོས་པ་བདེ་སྟོང་གཉིས་མེད་ཀྱི་ངང་དུ་ལྷོད་ཀྱིས་གློད་ལ་ཞོག་ཅིག བྱས་ལ། ཨོཾ་ཡོ་ག་ཙི་ཏ་ཨུ་པ་ཏ་ཡ་མི། ཨོཾ་སུ་ར་ཏ་ས་མ་ཡ་སྟཾ་བོ་དེ་ཙི་ཏ་བཛྲ་ཡ་ཐ་སུ་ཁྃ། དེང་རྡོ་རྗེ་རྣལ་འབྱོར་དུ་སེམས་བསྐྱེད་པར་བགྱིའོ། །ཞེས་བརྗོད་དོ། །ད་ནི་གཉིས་པ་ནང་གསང་བའི་དཀྱིལ་འཁོར་དུ་འཇུག་པ་ནི། ཚུལ་གཉིས་ཏེ། སྔོན་འགྲོ་དང་། འཇུག་པ་དངོས་སོ། །སྔོན་འགྲོ་ལའང་གཉིས་ཏེ། དཀྱིལ་འཁོར་ལྷའི་དམ་ཚིག་བསྒྲག་པ་དང་། རྡོ་རྗེ་སློབ་དཔོན་གྱི་དམ་ཚིག་བསྒྲགས་པའོ། །དེའི་དང་པོ་ལའང་གསུམ་ལས། དང་པོ་ཕན་ཡོན་བསྒྲག་པ་ནི་འདི་སྐད་དེ། དེ་རིང་ཁྱོད་དཔའ་བོ་དང་རྣལ་འབྱོར་མ་རྣམས་ཀྱི་ནང་དུ་ཞུགས་ཀྱིས། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་ཡིས་དེ་བཞིན་གཤེགས་པ་ཐམས་ཅད་དང་དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱས་ཏེ། ཁྱོད་དམ་ཚིག་ཉམས་པར་གྱུར་ཏ་རེ་ཞེས་བྱའོ། །གཉིས་པ་ཉེས་དམིགས་ཀྱི་སྒོ་ནས་དམ་བསྒྲག་པ་ནི། ཧེ་རུ་ཀ་དཔལ་དེང་ཁྱོད་ཀྱིས། །སྙིང་ལ་ཡང་དག་ཞུགས་པར་མཛོད། །གལ་ཏེ་ཚུལ་འདི་སྨྲས་ན་ནི། དེ་མ་ཐག་ཏུ་དྲལ་ཏེ་གཤེགས། །ཅེས་བྱའོ། །གསུམ་པ་མནའ་ཆུ་བླུད་པ་ནི། བྱིན་གྱིས་བརླབས་པའི་ཆང་ཐོད་པའི་ནང་དུ་བླུགས་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་བསྲེགས་པར་བྱེད། །དམ་ཚིགས་བསྲུངས་ན་དངོས་གྲུབ་ཀུན། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་སརྦ་པན་ཙ་ཨམྲྀ་ཏ་ཐ་ཀ་ཧཱུྃ། ཞེས་བརྗོད་ལ་འཐུང་དུ་གཞུག་གོ །གཉིས་པ་རྡོ་རྗེ་སློབ་དཔོན་གྱི་དམ་ཚིག་བསྒྲག་པ་ནི། འདི་ནས་བརྩམས་ནས་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ངས་གང་དེ་བྱོས་ཤིག བྱས་པ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པའི་ལས་མ་བྱེད་ཅིག ཁྱོད་མི་བདེ་བ་མ་སྤངས་པར་ཚེའི་དུས་བྱས་ནས། སེམས་ཅན་དམྱལ་བར་ལྟུང་བར་གྱུར་ཏ་རེ། ཞེས་བྱ་བ་དེ་རྣམས་ཀྱིས་བརྡའི་དོན་ཅུང་ཟད་སྤྲད་དོ། །གཉིས་པ་འཇུག་པ་དངོས་ལ་གསུམ་སྟེ། ཡེ་ཤེས་དབབ་པ་དང་། དེ་བརྟན་པར་བྱ་བ་དང་། སྣང་བ་བརྟག་པའོ། །དང་པོ་ལ་གཉིས་ལས། ཡེ་ཤེས་དབབ་པར་གསོལ་བ་གདབ་པ་ནི་འདི་སྐད་དེ། དུས་གསུམ་གྱི་སངས་རྒྱས་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་གྱུར་པ་བླ་མ་རྡོ་རྗེ་འཛིན་པ་དང་། བཅོམ་ལྡན་འདས་རྒྱལ་བ་རྒྱ་མཚོའི་ལྷ་ཚོགས་རྣམས་ཀྱིས་བདག་ལ་བླ་ན་མེད་པའི་ཡེ་ཤེས་དབབ་ཏུ་གསོལ་ཞེས་གསོལ་གདབ་པར་བྱའོ། །གཉིས་པ་དབབ་པ་དངོས་ནི། ལངས་ནས་སྤྱི་བོར་ཆོས་འབྱུང་གི་ཕྱག་རྒྱ་བཅར་བཅུག་སྟེ། ཁུག་པ་བཞིའི་ཏིང་ངེ་འཛིན་བསྒོམ་དུ་བཅུག་ནས། གུ་གུལ་དང་ཚིལ་ཆེན་བསྲེག ལྷ་ཆ་དཀྲོལ་ཞིང་། ངག་ཏུ། ཨོཾ་ཨཱཿཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ། ཨོཾ་བཛྲ་བྷ་ར་ཧི། སརྦ་བྷུད་དྷ་ཌ་ཀི་ནི་ཡེ། བཛྲ་ཝརྣ་ནི་ཡེ། བཛྲ་བཱཻ་རོ་ཙ་ནི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་བཛྲ་བྷ་ར་ཧི། ཨ་བེ་ཤ་ཡ་ཨ་བེ་ཤ་ཡ། ཞེས་ཡེ་ཤེས་དབབ། དེ་ནས་ལུས་ལ་ཕེབས་ན་འཕར་བ་དང་འདར་བ་ལ་སོགས་པ་འབྱུང་། ངག་ལ་ཕེབས་ན་སྨྲ་བ་དང་རྒོད་པ་དང་། དེ་ལ་སོགས་པ་འབྱུང་། སེམས་ལ་ཕེབས་ན་གཉིས་སུ་མེད་པའི་ཡེ་ཤེས་སྐྱེ་བར་འགྱུར་རོ། །གཉིས་པ་ཕེབས་པ་བརྟན་པར་བྱ་བ་ནི། ལུས་ངག་ལ་ཕེབས་ན་ཡང་བུགས་པ་བྱུང་ན། མགོ་ཐོག་ཏུ་ལག་པའམ་རྡོ་རྗེ་བཞག་ལ། སྣ་ཚོགས་རྡོ་རྗེ་ཤིན་ཏུ་ལྕི་བ་རི་རབ་ཙམ་དུ་བསམ་ལ། ཨོཾ་ཏི་སྟ་བཛྲ་ཞེས་བརྗོད་ལ། མིག་ལ་ཇི་ལྟར་སྣང་གིན་འདུག་དྲིས་ལ། དམར་པོར་སྣང་ཟེར་ན་དབང་གི་ལས་འགྲུབ་ཅེས་པའམ། སོ་སོར་ཀུན་རྟོག་གི་ཡེ་ཤེས་ལ་དབང་བར་འགྱུར་རོ། །ཞེས་པ་ལ་སོགས་པ་ཁ་དོག་དང་བསྟུན་ལ་བརྗོད་པར་བྱའོ། །གསུམ་པ་སྣང་བ་བརྟག་པའི་རྗེས་ལ། རྡོ་རྗེའི་གླུ་བླང་བར་བྱ་བ་ནི། འདི་ཡི་དོན་ལ་བློ་ཞོག་ཅིག་བྱས་ལ་འདི་སྐད་དེ། ལྟོས་ཤིག་རང་གི་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། །གྲུབ་པ་མེད་པའི་སེམས་ཉིད་འདི། །སྣ་ཚོགས་སུ་སྣང་བ་ངོ་མཚར་ཆེ། །སྣང་ཙམ་ཉིད་ན་སེམས་སུ་འདུག །སེམས་རྣམས་ཀུན་གྱི་དེ་ཉིད་ནི། །བདེ་བ་ཆེན་པོའི་ཡེ་ཤེས་ཡིན། །རྣམ་པར་མི་རྟོག་བསམ་མི་ཁྱབ། །གསལ་བ་དེ་ནི་ངོ་བོར་སྣང་། མོས་པ་དུ་མའི་སེམས་ཅན་ལ། །ཐབས་རྣམས་སྣ་ཚོགས་བསྟན་པ་སྟེ། །སྣ་ཚོགས་སྒྱུ་མའི་སྦྱོར་བ་ཡིས། །དཔའ་བོ་སེང་གེ་བཞིན་དུ་སྤྱོད། བསམ་གྱིས་མི་ཁྱབ་གོ་འཕང་ཐོབ། །འདི་བླ་མ་རྣམས་ཀྱི་བྱིན་བརླབས་ཡིན། །སྣ་ཚོགས་ནོར་བུ་ཇི་བཞིན་དུ། །སྐལ་ལྡན་རྣམ་ཀྱི་སྤྱོད་ཡུལ་འགྱུར། །ཞེས་བརྗོད་ལ་དྲིལ་བུ་ལྟ་བུའི་སྒྲ་ལ་སེམས་གཏད་ལ་རྩེ་ཅིག་ཞོག་ལ་གློད་ལ་ཞོག་ཅིག་བྱའོ། །གཉིས་པ་ལྷ་ངོ་བསྟན་པ་ལ་བཞི་ལས། དང་པོ་མེ་ཏོག་དོར་བ་ནི། དཀྱིལ་འཁོར་གྱི་ཤར་ཕྱོགས་ཀྱི་སྒོ་བསལ་ཞིང་། དབུས་སྣང་བར་བྱས་ལ། ཅོད་པན་དྲིལ་ལ་ལག་པ་ཐལ་མོ་སྦྱར་བའི་བར་དུ་བཅུག་ལ་ལག་པ་བརྐྱང་ལ། ཁྱོད་ཀྱི་སྐྱེ་བ་སྔ་མ་ལ་ལས་ཀྱི་འཕྲོ་ཡོད་པའི་ཡི་དམ་གང་ཡིན་པའི་ལྷ་ལ་ཕོག་པར་གྱུར་ཅིག་སྙམ་དུ་སོམས་ལ་དྲིལ་བུའི་སྒྲ་བྱུང་བ་དང་། དོར་ཅིག་བྱས་ལ་འདི་སྐད་དེ། ཡང་དག་པ་ཡི་དཀྱིལ་འཁོར་འདིར། །བདག་གིས་སློབ་མ་གཞུག་པར་བགྱི། །ལྷ་རྣམས་ཀྱིས་ནི་རིགས་ཇི་བཞིན། ཇི་ལྟ་བསོད་ནམས་དེ་བཞིན་ཤོག །པྲ་ཏི་ཛ་བཛྲ་ཧོ། ཞེས་བརྗོད་ལ་དྲིལ་བུ་སིལ་བྱའོ། །གཉིས་པ་སློབ་དཔོན་གྱི་རིགས་གང་ལ་ཕོག་པ་བརྟགས་ལ་བླངས་པས། ལྷ་དེ་མེ་ཏོག་དང་གཉིས་སུ་མེད་པར་བསམས་ལ། སློབ་མའི་སྤྱི་བོ་ན་མར་ལ་སྟིམས་ལ་འདི་སྐད་དེ། སེམས་ཅན་སྟོབས་ཆེན་ཁྱོད་ཀྱིས་ནི། །འདི་ནི་རབ་ཏུ་བཟུང་བར་གྱིས། །ཅེས་བརྗོད་པར་བྱའོ། །མིང་འདོགས་པ་ཡང་སྐབས་འདིར་རིགས་དང་བསྟུན་ལ་ཕོ་མོའི་བྱེ་བྲག་གིས་གཙོ་བོ་ཡབ་ཡུམ་ལ་ཕོག་ན། དཔལ་དགྱེས་པའི་པད་མ། དཔལ་པད་མའི་མྱུ་གུ དཔལ་པད་མ་མཛེས་པ། དཔལ་པད་མ་དགྱེས་པ། དཔལ་པད་མ་བརྗིད་པ། དཔལ་པད་མའི་དབང་ཕྱུག་ཅེས་གདགས་སོ། །གསུམ་པ་གདོང་གཡོགས་དགྲོལ་བ་ནི་འདི་སྐད་དེ། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཨོཾ་ཛྙྱཱ་ན་ཙཀྵུ་པར་ཤ་ཞེས་བརྗོད་ལ་རྡོ་རྗེས་དབྱེ་བར་བྱའོ། །བཞི་པ་ལྷ་ངོ་བསྟན་པ་ནི། འདི་སྐད་དེ། ལྟོས་ཤིག་ལྟོས་ཤིག་སེམས་དཔའ་ཆེ། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་ཚོགས་དངོས་གྲུབ་ཀྱང་། །དངོས་གྲུབ་ཐམས་ཅད་འདི་ལས་འབྱུང་། དངོས་གྲུབ་ཐོབ་ཕྱིར་དམ་ཚིག་སྐྱོང་། །གསང་སྔགས་ལ་ཡང་བརྩོན་པར་གྱིས། །ཞེས་བརྗོད་ལ། དེ་ནས་དཀྱིལ་འཁོར་གྱི་རྣམ་དག་བཤད་པ་ནི། འདི་ལྟ་སྟེ། དཀྱིལ་འཁོར་གྲུ་བཞིར་འབྱུང་བ་ནི། ཆོས་ཐམས་ཅད་མི་མཉམ་པ་མེད་པའི་བརྡའ་ཡིན། སྒོ་བཞིར་བྱུང་བ་ནི། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། ཐབས་མཁས་པའི་སྒོ་བཞི་མཚོན་པ་ཡིན། འདབ་མ་བརྒྱད་དུ་འབྱུང་བ་ནི། འཁོར་བའི་འདམ་གྱིས་མ་གོས་པའི་བརྡའ་ཡིན་ལྟེ་བ་དམར་པོར་འབྱུང་བ་ནི། ཐམས་ཅད་དབང་དུ་བསྡུད་པའི་བརྡ་ཡིན་ནོ། །ཞེས་པ་དང་། ཐང་སྐུ་བསྟན་ལ། ད་ལྟ་རྒྱུ་ལམ་གྱི་དུས་ན། བསྐྱེད་རིམས་དབྱིངས་ཀྱི་རྣམ་པ་བསྒོམ་པ་ལ། ནམ་ཞིག་ན་འོག་མིན་གྱི་གནས་སུ་འདི་ལྟ་བུའི་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་བ་ཡིན་ནོ་ཞེས་བརྡའ་སྤྲད་དོ། །དེ་ནས་དབང་བསྐུར་བར་བྱ་སྟེ། ལས་ཀྱི་སློབ་དཔོན་གྱིས་མཎྜྻལ་འབུལ་ཞིང་། གསོལ་བ་ནི་འདི་སྐད་ཅེས་གདབ་པར་བྱའོ། །པད་མ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །དབང་བསྐུར་རྫོགས་པར་མཛད་དུ་གསོལ། །ཞེས་ལན་གསུམ་གསོལ་བ་གདབ་བོ། །ད་ནི་སློབ་དཔོན་གྱི་དབང་བསྐུར་བར་བྱ་སྟེ། བུམ་པ་གདན་དྲངས་ནས་སློབ་མའི་མགོ་ཐོག་ཏུ་བཞག་སྟེ་ཏིང་ངེ་འཛིན་ཡོད་པ་ནི། བུམ་པ་འདི་དང་ཐ་དད་མེད་པར་ཇོ་བོ་ཐུགས་རྗེ་ཆེན་པོའི་ལྷ་ཚོགས་བཞུགས་པར་སོམས། སྐུ་ལ་འོད་ཟེར་དཀར་པོ་བྱུང་ནས། དེ་བདག་གི་ལུས་ལ་ཐིམ། ལུས་ཀྱི་སྡིག་སྒྲིབ་དག བུམ་པའི་དབང་ཐོབ་པར་བསྒོམ། དམ་ཚིག་བརྗོད་པ་ནི། སྤྱན་རས་གཟིགས་དབང་འཇིག་རྟེན་མགོན། །སངས་རྒྱས་རྣམས་ཀྱི་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དོ་ནུབ་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོང་། །ཧཱུྃ་ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། བྷུད་དྷ་ཨ་བྷི་ཥིཉྩྨ་ཧཱུྃ། དེ་ནས་ཤར་སྒོར་རྡོ་རྗེ་སེམས་པའི་དབང་བསྐུར་བར་བྱས་ཏེ། རྡོ་རྗེ་སློབ་མའི་ལག་ཏུ་བཞག་ལ། ཏིང་ངེ་འཛིན་ཡོད་པ་ནི། རྡོ་རྗེ་འདི་དང་ཐ་དད་མེད་པར་ཐུགས་མི་བསྐྱོད་པ་རྡོ་རྗེའི་དབང་ཐོབ་པར་བསྒོམས་ཤིག་བྱས་ལ། དམ་ཚིག་བརྗོད་པ་ནི། སངས་རྒྱས་རྣམས་ནི་ཐམས་ཅད་ཀྱི། །གསང་བ་གསུམ་གྱི་གནས་ལས་བྱུང་། །ཁམས་གསུམ་ཀུན་གྱིས་ཕྱག་བྱས་པའི། ཆུ་ཡི་དབང་བསྐུར་སྦྱིན་པར་བྱ། །ཅེས་པའམ། ཡང་ན། ཧཱུྃ་རྡོ་རྗེ་མི་བསྐྱོད་རིགས་ཀྱི་གཙོ། །ཞེ་སྡང་རྣམ་དག་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །མེ་ལོང་ལྟ་བུའི་དབང་འདི་ཁྱོད་ཀྱིས་ལོང་། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཨོཾ་བཛྲ་སྭ་ཏྭ་ཨ་བྷི་ཥིཉྩྨ་ཧཱུྃ། དེ་ནས་དཀྱིལ་འཁོར་གྱི་ལྷོ་སྒོར་ཡོན་ཏན་གྱི་དབང་བསྐུར་བ་ནི། རིན་ཆེན་འབྱུང་ལྡན་གྱི་ངོ་བོ་དབུ་རྒྱན་བླངས་ལ། སློབ་མའི་མགོ་ལ་བཀོན་ནས་ཏིང་ངེ་འཛིན་ཡོད་པ་ནི། དབུ་རྒྱན་འདི་དང་ཐ་དད་མེད་པར། རིན་ཆེན་འབྱུང་ལྡན་གྱི་ལྷ་ཚོགས་དཔག་ཏུ་མེད་པར་བྱོན་ནས། ཁྱེད་རང་གི་རྒྱུད་ལ་ཐིམ་པས་ཉོན་མོངས་པ་ང་རྒྱལ་དག་ནས། རང་བྱུང་ཡེ་ཤེས་ཀྱི་དབང་ཐོབ་པར་བསྒོམས་ཤིག་བྱས་ལ། ཐོར་གཙུག་ཅོད་པན་གྱིས་བརྒྱན་པའི། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། །ཅེས་པའམ། ཡང་ན། ཧཱུྃ་རིན་ཆེན་མཆོག་གི་དཀྱིལ་འཁོར་དུ། །ང་རྒྱལ་རང་སར་དག་པ་ཡི། །སངས་རྒྱས་རྣམས་ཀྱི་ཡོན་ཏན་དབང་། །དོ་ནུབ་ཁྱོད་ལ་བསྐུར་བར་བྱ། །མཉམ་ཉིད་ཡེ་ཤེས་དབང་འདི་ཁྱོད་ཀྱིས་ལོང་། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། རཏྣ་ཨ་བྷི་ཥིཉྩྨ་ཏྲཾ། དེ་ནས་ནུབ་སྒོར་སྣང་བ་མཐའ་ཡས་ཀྱི་དབང་བསྐུར་བར་བྱ་སྟེ། ཡི་གེ་དྲུག་པའི་དཔེའམ། ཡང་ན་རྡོ་རྗེ་ལ་བྱ་སྟེ། གང་རུང་བ་ལག་ཏུ་བླངས་ནས་སློབ་མའི་ལག་ཏུ་བཞག་ལ། ཏིང་ངེ་འཛིན་ཡོད་པ་ནི། འདི་དང་ཐ་དད་མེད་པར་སྣང་བ་མཐའ་ཡས་ཀྱི་ལྷ་ཚོགས་དཔག་ཏུ་མེད་པ་བྱོན་ནས། ཁྱེད་བདག་ལ་ཐིམ་པས། གསུང་མི་ཟད་པ་རྒྱན་གྱི་འཁོར་ལོའི་དབང་ཐོབ་པར་བསྒོམས་ཤིག་བྱས་ལ། སངས་རྒྱས་ཀུན་གྱི་རྡོ་རྗེའི་དབང་། །སངས་རྒྱས་ཀུན་གྱིས་བསྔགས་པ་ཡི། སངས་རྒྱས་སྐུ་རུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཞེས་པའམ། ཡང་ན། ཧཱུྃ་པད་མ་དབང་གི་དཀྱིལ་འཁོར་དུ། །འདོད་ཆགས་རྣམ་པར་དག་པ་ཡི། །སངས་རྒྱས་རྣམས་ཀྱི་གསུང་མཆོག་དབང་། །དོ་ནུབ་ཁྱོད་ལ་བསྐུར་བར་བྱ། །སོ་སོར་ཀུན་རྟོག་དབང་འདི་ཁྱོད་ཀྱིས་ལོང་། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། པད་མ་ཨ་བྷི་ཥྀཉྩྨ་ཧྲཱི། ད་ནི་བྱང་སྒོར་དོན་ཡོད་གྲུབ་པའི་དབང་བསྐུར་བྱ་སྟེ། དྲིལ་བུ་སློབ་མའི་མགོ་ཐོག་ཏུ་བཞག་ནས། ཏིང་ངེ་འཛིན་ཡོད་པ་ནི། དྲིལ་བུ་འདི་དང་ཐ་དད་མེད་པར། སངས་རྒྱས་རྣམས་ཀྱི་འཕྲིན་ལས་དོན་ཡོད་གྲུབ་པའི་ངོ་བོར་བྱོན་ནས་ཁྱེད་བདག་གི་ལུས་ངག་ཡིད་གསུམ་ལ་ཐིམ་པ་ཙམ་གྱིས་ཤེས་བྱའི་སྒྲིབ་པ་དག་པ། འདུ་བྱེད་ཀྱི་སྒྲིབ་པ་དག་ནས་འཕྲིན་ལས་རྣམ་བཞིའི་དབང་ཐོབ་པར་བསྒོམས་ཤིག ཅེས་བརྗོད་ལ། འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱིངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་པའམ། ཡང་། ཧཱུྃ་འཕྲིན་ལས་ཡོངས་རྫོགས་དཀྱིལ་འཁོར་དུ། །ཕྲག་དོག་རང་སར་དག་པའི་དབང་མཆོག་འདི། །དོ་ནུབ་ཁྱོད་ལ་བསྐུར་བར་བྱ། བྱ་གྲུབ་ཡེ་ཤེས་དབང་འདི་ཁྱོད་ཀྱིས་ལོང་། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཀརྨ་ཨ་བྷི་ཥིཉྩྨ་ཨ། དེ་ནས་རྒྱས་པར་བྱེད་ན་རྡོ་རྗེ་དང་དྲིལ་བུ་མགོ་ཐོག་ཏུ་བཞག་ལ་མིང་གི་དབང་སྦྱིན་པ་ནི་འདི་སྐད་དོ། །སངས་རྒྱས་ཀུན་གྱི་མིང་གི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཉིད་དུ་རབ་བསྒྲུབ་ཕྱིར། །མིང་གི་དབང་བསྐུར་ཆེན་པོ་སྦྱིན། །ཀྱེ་དཔལ་རྡོ་རྗེ་ཆེ་གེ་མོ་ཞེས་ལན་གསུམ་ཙམ་བརྗོད་པར་བྱའོ། །ཚིག་བཅད་ཀྱི་རིམ་པ་འདི་གཉིས་གང་རུང་གིས་བྱའོ། །དེ་བཞིན་དུ་རིག་པའི་དབང་ལྔ་རྫོགས་པར་བསྐུར་བར་བྱའོ། །དེ་དག་ཐམས་ཅད་ལ་བུམ་པའི་ཆུས་སློབ་མ་རྣམས་ལ་ཁྲུས་བྱའོ། །དེས་ནི་སློབ་མ་རྣམས་ལ་བསྐྱེད་རིམས་ཀྱི་གདམས་ངག་བསྟན། དཀྱིལ་འཁོར་ནི་རྡུལ་ཚོན་གྱི་དཀྱིལ་འཁོར་ལ་བརྟེན། དབང་ནི་བུམ་པའི་དབང་བསྐུར། བསྐུར་བའི་གནས་ནི་ལུས་ལ་བསྐུར། སྒྲིབ་པ་ནི་ལུས་ཀྱི་སྒྲིབ་པ་དག གདམས་ངག་ནི་བསྐྱེད་རིམས་སྟོན། བསྒོམ་པ་ནི་ལྷའི་སྐུ་སྣང་ལ་རང་བཞིན་མེད་པ་བསྒོམ། ལྟ་བ་ནི་སྣང་སྟོང་དབྱེར་མེད་དུ་བལྟ། དེ་གོམས་འདྲིས་མཐར་ཕྱིན་པ་ཡིན་ན་འབྲས་བུ་སྤྲུལ་པའི་སྐུ་འཐོབ། དེ་བསྒོམ་པ་ལ་དབང་བར་བྱས་དེའི་མཚན་ཉིད་དང་ལྡན་པར་བྱས། དེའི་སྐལ་བ་དང་ལྡན་པར་བྱས། དེ་ནས་གསང་བའི་དབང་བསྐུར་བ་ནི། ཀ་པ་ལར་བྱང་སེམས་དཀར་དམར་བདུད་རྩིར་སྦྱར་ལ། འཇིག་རྟེན་དབང་ཕྱུག་ཡབ་ཡུམ་གྱི་བདུད་རྩིར་བསམ་ལ། ཡབ་ཡུམ་གྱི་ཏིང་ངེ་འཛིན་བདུད་རྩིའི་ཏིང་ངེ་འཛིན་ལ་ཕོག་ནས། ཀ་པ་ལ་བྱང་ཆུབ་ཀྱི་སེམས་ཀྱིས་གང་བ་ལག་ཏུ་བཟུང་ལ། སློབ་མའི་མགྲིན་པར་གཏུགས་ནས། ཐུགས་རྗེ་ཆེན་པོ་ཡབ་ཡུམ་གྱིས། །གསང་བའི་བདུད་རྩིས་རྒྱས་པ་ཡི། །པད་སྣོད་བྱང་སེམས་གང་བ་འདིས། །སྐལ་ལྡན་ཁྱོད་ལ་དབང་བསྐུར་བས། །གསུང་མཆོག་ཡི་གེ་དྲུག་མའི་སྒྲ། །འགྲོ་ལ་ཆོས་ཀྱི་འཁོར་ལོ་བསྐོར། །སྣང་སྟོང་ཆུ་ཟླ་ལྟ་བུའི་སྐུ། །གྲགས་སྟོང་གསུང་གི་དབང་ཐོབ་ཤོག །རྩ་བའི་སྔགས་ཀྱི་སྟེང་དུ། ཨོཾ་ཤྲཱི་སརྦ་ཏ་ཐཱ་ག་ཏ་བག་ཨ་བི་ཥིཉྩྨ་ཏུ་མཾ། ཅེས་གསང་དབང་ཆོ་ག་གཞན་ལྟར་རྒྱས་པར་བཤད། དེ་ནས་ཤེས་རབ་ཡེ་ཤེས་ཀྱི་དབང་བསྐུར། གསུམ་པ་ཡེ་ཤེས་ངོས་བཟུང་བའི་ཕྱིར་སློབ་མ་ལ་སྔགས་སྐྱེས་མ་གཏད་པ་ནི། གཟུགས་མཛེས་ཡིད་འོང་ཕྱག་རྒྱ་འདི། །སྤྱན་རས་གཟིགས་ཀྱིས་ཁྱོད་སྤྱོད་གནང་། །ལྷ་མོ་འདི་ནི་བདེ་ཆེན་བསྐྱེད། །བུ་ཡིས་ལོང་ལ་མཆོད་པར་གྱིས། །ཅེས་བརྗོད། སློབ་མའི་ལག་པ་གཡོན་པར་གཏད་པར་བྱ། ལྷ་མོ་དེས་ཀྱང་། ཤ་ལྔ་བདུད་རྩི་ལྔ་ལ་སོགས། །དཔའ་བོའི་བྱང་སེམས་ཟ་སྤྲོའམ། །ཕྱག་རྒྱ་རིགས་ལྔ་ལ་གུས་སམ། །ཇི་ལྟར་རོལ་ལ་སྨྲོས་ཅིག་བུ། །ལྷ་མོ་བདག་གི་དམ་ཚིག་ཀུན། །ཕྱག་རྒྱ་རིགས་ལ་ཀུན་དུ་སྤྱད། །ནང་གི་བྱང་སེམས་ཟ་བ་སྤྲོ། །བྱང་སེམས་བདེ་བ་རྟག་ཏུ་བསྟེན། །དེ་ནས་ལྷ་མོ་དེས། བདེ་ཆེན་གསང་བའི་དམ་པ་འདིས། །སངས་རྒྱས་ཀུན་གྱིས་བྱིན་གྱིས་བརླབས། །བདེ་བ་ཆེན་པོས་བརྟེན་སྤྲོ་འམ། །དེ་ནས་དཔའ་བོས། ལྷ་མོས་བསྲུངས་བའི་དམ་ཚིག་ཀུན། །བདག་གིས་བརྟེན་དང་ཁྱོད་ཉིད་དང་། །འབྲལ་བར་མི་བྱ་བདེ་བར་སྤྱོད། །ཅེས་བརྗོད་ལ་མཁའ་གསང་བྱིན་གྱིས་བརླབས་པའི་སྦྱོར་བས། མན་ངག་གིས་གསུམ་པའི་ཡེ་ཤེས་ངོ་ཤེས་པར་བྱས་ལ། བྱང་སེམས་བསྐྱིལ་བ་བཟློག་པ་དབུ་མའི་ནང་དུ་གནས་པས། མི་འཕོ་བའི་ལུས་གནད་ཀྱིས་བཟུང་ངོ་། །གསུམ་པའི་ཡེ་ཤེས་བླ་མའི་མན་ངག་གིས་ངོ་སྤྲད་དོ། །བཞི་པ་ཚིག་དབང་ངོ་སྤྲད་པ་ནི། དབང་གསུམ་པའི་ངོ་སྤྲོད་ཀྱང་སྒྱུ་མའི་དཔེ་བཅུ་གཉིས་ལྟར་ཚིག་ལ་ཡོད་ལ་དོན་ལ་དམིགས་པའི་ཡེ་ཤེས་འགྲོ་བ་ཐམས་ཅད་ཀྱང་སྔོན་ནས་སྟོང་པ་ཡིན་ལ། ད་ལྟར་དང་། ཕྱིས་ཀྱང་ཡིན་པས་ན། དབང་གསུམ་པ་མ་དམིགས་པའི་ཡེ་ཤེས་རྣམ་རྟོག་ཐམས་ཅད་དང་བྲལ་བ། འོད་གསལ་བ་རྣམ་རྟོག་གི་ཡུལ་དང་བྲལ་བ། བརྗོད་པས་མི་ཕེབས་པའི་འོད་གསལ་ཆེན་པོ་ངོ་སྤྲད་པར་བྱའོ། །ཚིག་གི་ཡུལ་ཡིན་པས་དངོས་པོ་ལ་མེད་པས་སྟོང་པ་ཉིད་ལ་དབང་བས་ཚིག་དབང་ཞེས་དབང་རྒྱས་པ་ལྟར་ངོ་སྤྲད་ལ། དུས་རྒྱུན་དུ་ཉམས་སུ་ལེན་པ་ལ་བླ་མས་ངོ་སྤྲད་དོ། །གཞན་ཡང་ཕྱག་རྒྱ་ལྔའི་རྗེས་སུ་གནང་བ་སྦྱིན་པ་ནི། དབུ་རྒྱན་ཡོད་ན་སྐོན་ཞིང་། ངག་ཏུ་བརྗོད་མེད་ན་སེམས་སུ་བཅུག་ལ་འདི་སྐད་དེ། འཁོར་ལོ་ཐོད་པ་རྣ་ཆ་དང་། །མགུལ་རྒྱན་གདུག་གུ་སྐེ་རགས་དང་། །དོ་ཤལ་དང་ནི་རྣམ་བདུན་ཏེ། །ཕྱག་རྒྱ་ལྷ་ཡི་རྣམ་པའི་རྣལ་འབྱོར་གྱིས། །རྗེས་སུ་གནང་བ་རབ་ཏུ་སྦྱིན། །ཞེས་པ་དང་། སྒེག་པ་དང་བཅས་པས་འཕྲེང་བ་འཆང་། སངས་རྒྱས་ཐམས་ཅད་མཆོད་པར་བྱ། །དེ་ནི་བཅོམ་ལྡན་འབྲལ་མི་འགྱུར། །འཕྲེང་བ་འདི་ན་རྒྱན་ཡིན་ནོ། །ཞེས་པས་སྔགས་ལན་གསུམ་རྗེས་བཟློས་བྱའོ། །དེང་ནས་བརྩམས་ཏེ་རྫོགས་སངས་རྒྱས། །སྲས་བཅས་རྣམས་དང་རྣམ་རོལ་ཞིང་། །རྡོ་རྗེ་སེམས་དཔའི་རབ་སྦྱོར་བས། །དགའ་སྟོན་བདེ་བའི་མཆོད་པ་གྱིས། །ཅེས་བརྗོད་དོ། །དེའི་རྗེས་སུ་ལུང་བསྟན་པ་དང་། དབུགས་དབྱུང་བ་དང་། གཟེངས་བསྟོད་པ་རྣམས་བྱའོ། །དེ་ནས་རྡོ་རྗེ་སློབ་དཔོན་དུ་དབང་བསྐུར་བ་ལ་དྲུག་ལས། དང་པོ་སྐུ་གསུང་ཐུགས་ཀྱི་དམ་ཚིག་དབང་བསྐུར་བ་ནི། སློབ་མ་སྐད་ཅིག་ལ་རྡོ་རྗེ་སེམས་དཔའི་གཟུགས་སུ་བསམས་ལ་འདི་སྐད་དེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཛྲ་ཨད་མ་ཀོ་ཧཾ། ཞེས་པས་འཁོར་འདས་ཀྱིས་བསྡུས་པའི་ཆོས་ཐམས་ཅད་མཉམ་པ་ཉིད་ཡིན་པས་མཉམ་པ་ཉིད་ཀྱི་ངང་དུ་བློ་ཞོག་ཅིག་བྱས་ལ། རྡོ་རྗེ་ལག་པ་གཡས་སུ་གཏད་ལ་བསོར་དུ་གཞུག་གོ །གཉིས་པ་གསུང་གི་དབང་ལ་གསུམ་ལས་། དང་པོ་ཐུགས་ཀྱི་དམ་ཚིག་ནི། སློབ་མ་སྐད་ཅིག་གིས་སྣང་བ་མཐའ་ཡས་སུ་མོས་པ་བྱས་ལ་འདི་སྐད་དེ། སྲིད་པ་ངོ་བོ་ཉིད་ཀྱིས་བདག །ངོ་བོ་ཉིད་ཀྱིས་དངོས་མེད་པས། །རང་བཞིན་དག་པའི་སེམས་དཔའ་ནི། །སྲིད་པའི་དམ་པ་བྱེད་པར་འགྱུར། །དྷརྨ་དྷ་ཏུ་ཨ། ཞེས་པས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་སེམས་ཅན་ལ་བསྒྲགས་པར་བྱ། སྙམ་པའི་བློས་དྲིལ་བུ་འདི་ལག་པ་གཡོན་དུ་བཟུང་ལ་དཀྲོལ་ཅིག་བྱས་ལ་གཏད་དོ། །གསུམ་པ་སྐུའི་དམ་ཚིག་སྦྱིན་པ་ནི། སློབ་མ་རྣམ་པར་སྣང་མཛད་དམ་། ཡང་ན་ལྷ་ཡབ་ཡུམ་དུ་བསམས་ལ་འདི་སྐད་དེ། ཡིད་ཀྱི་ལུས་ནི་བརྟན་བྱའི་ཕྱིར། །ཕྱག་རྒྱ་དམ་ཚིག་ཅེས་སུ་བརྗོད། །དམ་ཚིག་ཡིད་ནི་བརྟན་པ་གང་། །དེ་ཕྱིར་ཕྱག་རྒྱ་རབ་ཏུ་གྲགས། །ཞེས་པས་དུས་རྒྱུན་དུ་རང་ལྷའི་ང་རྒྱལ་དང་མ་བྲལ་བར་བྱ་དགོས་སོ་ཞེས་བྱའོ། །གཉིས་པ་རྡོ་རྗེ་སློབ་དཔོན་དུ་དབང་བསྐུར་བ་དངོས་ནི་འདི་སྐད་དེ། རྡོ་རྗེ་ཆེ་དང་དྲིལ་བུ་ལོང་། །རྡོ་རྗེ་ལ་ནི་རབ་ཏུ་གནས། །དེ་ཉིད་རྡོ་རྗེ་སློབ་དཔོན་འགྱུར། །སློབ་མ་དག་ནི་བསྡུ་བར་གྱིས། །ཞེས་བརྗོད་ལ་རྡོ་རྗེ་དང་དྲིལ་བུ་གཏད་ལ། ཁྱོད་ཀྱིས་དེང་ཕྱིན་ཆད་རྡོ་རྗེ་སློབ་དཔོན་གྱིས་ལ། སྣོད་དང་ལྡན་པ་གཞན་ལ་དབང་བསྐུར་བ་དང་། རྒྱུད་བཤད་པ་དང་། ལུང་སྦྱིན་པ་ལ་སོགས་པ་གྱིས་ཤིག་བྱའོ། །གསུམ་པ་རིགས་ལྔའི་རྗེས་སུ་གནང་བ་སྦྱིན་པ་ནི། སློབ་མ་རྣམ་པར་སྣང་མཛད་དུ་བསམས་ལ། ཞབས་འོག་ཏུ་འཁོར་ལོ་བཅུག་ལ་འདི་སྐད་དེ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། ཇི་ལྟར་སྣ་ཚོགས་འདུལ་འགྱུར་བ། ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་དོ། །དེ་ནས་སློབ་མ་མི་བསྐྱོད་པར་བསམས་ལ། ཞབས་འོག་ཏུ་རྡོ་རྗེ་བཅུག་ལ་འདི་སྐད་དེ། འཇིག་རྟེན་ཁམས་ནི་ཐམས་ཅད་དུ། སེམས་ཅན་རྣམས་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །རྡོ་རྗེའི་འཁོར་ལོ་རབ་ཏུ་བསྐོར། །དེ་ནས་སློབ་མ་རིན་ཆེན་འབྱུང་ལྡན་དུ་བསམས་ལ་ཞབས་འོག་ཏུ་ནོར་བུ་བཅུག་ལ་འདི་སྐད་དེ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་པ། །ནོར་བུའི་འཁོར་ལོ་རབ་ཏུ་བསྐོར། །དེ་ནས་སློབ་མ་སྣང་བ་མཐའ་ཡས་སུ་བསམས་ལ། ཞབས་འོག་ཏུ་པད་མ་བཅུག་ལ་འདི་སྐད་དེ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པད་མའི་འཁོར་ལོ་རབ་ཏུ་བསྐོར། །དེ་ནས་སློབ་མ་དོན་ཡོད་གྲུབ་པར་བསམས་ལ། ཞབས་འོག་ཏུ་སྣ་ཚོགས་རྡོ་རྗེ་བཅུག་ལ་འདི་སྐད་དེ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ལས་ཀྱི་འཁོར་ལོ་རབ་ཏུ་བསྐོར། །དེ་ནས་བརྡའ་སྤྲད་པ་ནི། ཁྱོད་ཀྱི་དེང་ནས་བཟུང་ནས་འཁོར་བ་མ་སྟོངས་ཀྱི་བར་དུ། ཕྱོགས་བཅུ་ནམ་མཁའི་མཐའ་གཏུགས་པའི་སེམས་ཅན་ཐམས་ཅད་ལ་རིགས་རྣམ་པ་ལྔ འི་སྒོ་ནས་གང་ལ་གང་འདུལ་གྱི་སྒོ་ནས་སེམས་ཅན་གྱི་དོན་གྱིས་ཤིག་བྱའོ། །གཞན་ཡང་གཟུགས་ལ་རང་བཞིན་མེད་པའི་རྗེས་སུ་གནང་བ་སྦྱིན་པ་ནི། མེ་ལོང་གཏད་ལ་བལྟར་བཅུག་སྟེ་འདི་སྐད་དེ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །དེ་ལྟར་ཆོས་ཀུན་ཤེས་བྱོས་ལ། །སེམས་ཅན་དོན་ལ་རང་བཞིན་མེད། །ཐམས་ཅད་ནམ་མཁའི་རང་བཞིན་པས། །ཀུན་སྤྱོད་ནམ་མཁའི་ངང་དུ་གསལ། །ཞེས་བརྗོད་དོ། །དེ་ནས་མདའ་གཞུ་གཏད་ལ་འདི་སྐད་དེ། ཐབས་དང་ཤེས་རབ་གཉིས་མེད་ལས། །སྤྲུལ་པ་དུ་མ་སྐྱེལ་ལས་ནི། །ཁམས་གསུམ་འཁོར་བའི་སེམས་ཅན་རྣམས། །བླ་མེད་བྱང་ཆུབ་ཐོབ་པར་གྱིས་ཞེས་བརྗོད་དོ། །དེ་ནས་རྡོ་རྗེ་བརཏལ་ཤུགས་ཀྱི་དབང་སྦྱིན་པར་བྱ་བ་ནི་འདི་སྐད་དེ། འདི་དེ་སངས་རྒྱ་ཐམས་ཅད་ཀྱིས། །རྡོ་རྗེ་སེམས་དཔའི་ཕྱག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱན་ན་རྡོ་རྗེའི་རཏལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྷ་བཛྲ་ས་མ་ཡ་ཏི། ཨེ་ཤ་ཧོ་དྷ་ར་ཡ་མི་ཨེ་ཧེ་ཧེ་ཧེ་ཧེ་ཧཱུྃ་ཞེས་བརྗོད་དེ། རྡོ་རྗེ་འཛིན་དུ་གཞུག་གོ །དེ་ནས་ལུང་བསྟན་པ་ནི། ཨོཾ་འདིར་ནི་ངས་ཁྱོད་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་པས་ན། །སྲིད་དང་ངན་སོང་རྣམས་ལས་གྲོལ། །ཨེ་ཨ་མུ་ཀ་ན་མ་སརྦ་ཏ་ཐཱ་ག་ཏ་སིད་དྷི་ས་མ་ཡ་སྟོཾ། བྷུ་རུ་བྷུ་་ཧཱུྃ་ཕཊ་སྭཱཧཱ། ཞེས་པས་ད་ཕྱིན་ཆད་ཁྱེད་རྣམས་ཀྱིས་སྲིད་པའི་སྡུག་བསྔལ་ཐམས་ཅད་ལས་རྒལ་ཏེ། ཕྱིར་མི་ལྡོག་པའི་ས་ལ་གནས་པར་འགྱུར་རོ། །དེ་ནས་དབུགས་དབྱུང་བ་ནི་འདི་སྐད་དེ། ཐེག་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མ་ཡིན། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་ལས་འདས་པའོ། །ཞེས་བརྗོད་དོ། །དེ་ནས་གཟེངས་བསྟོད་པ་ནི། ལུང་བསྟན་པའི་ཤུགས་ལས་འཐོབ་པའོ། །མདོར་ན་རྡོ་རྗེ་སློབ་དཔོན་ལ་བུམ་དབང་བཅུ་བདུན་བསྐུར་བར་བྱའོ། །བཅོམ་ལྡན་འདས་དཔལ་པད་མའི་སྣང་བ་ཆེན་པོ་རབ་ཏུ་རྒྱས་པའི་དབང་གི་ཆོ་ག་རྣམ་པར་གསལ་བར་བྱེད་པ། མུན་པའི་སྒྲོན་མེ་ལྟ་བུ་རྫོགས་སོ། །དུས་གསུམ་སངས་རྒྱས་ཀུན་གྱི་གསུང་གི་མཆོག །ཡོངས་སུ་རྫོགས་པ་སྤྱན་རས་གཟིགས་དབང་གི །དབང་གི་ལག་ལེན་གསལ་བྱེད་སྒྲོན་མེ་འདི། །མི་ཉག་དགེ་སློང་ཤཱཀྱ་རིན་ཆེན་དང་། །ཤཱཀྱའི་དགེ་སློང་གཞོན་ནུ་བླ་མ་ཡིས། །རྣམ་པར་བསྐུལ་ནས་སྤྱན་རས་གཟིགས་དབང་གི །འཕྲིན་ལས་ཆ་ཙམ་བསྒྲུབ་པའི་རྣལ་འབྱོར་པ། །རང་བྱུང་རྡོ་རྗེ་ཞེས་བྱས་རྣམ་པར་སྦྱར། །བདག་ལ་མཁས་པའི་རྣམ་འབྱེད་བློ་མེད་ཀྱང་། །མཁས་པ་རྣམས་ཀྱིས་གཤེ་བ་མི་མཛད་ཞུ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།

རྒྱལ་བ་རྒྱ་མཚོའི་མངོན་རྟོགས།

༄༅། །རྒྱལ་བ་རྒྱ་མཚོའི་མངོན་རྟོགས་བཞུགས།

༄༅། །བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །ཐོག་མར་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ་ནས་སྤྱན་རས་གཟིགས་དབང་ཕྱུག་གི་གོ་འཕང་ཐོབ་པར་བྱ། དེའི་ཆེད་དུ་མངོན་པར་རྟོགས་པ་བསྒོམ་སྙམ་དུ་བསམས་ལ། རང་ཉིད་ཞལ་ཅིག་ཕྱག་གཉིས་པའི་སྤྱན་རས་གཟིགས་དམར་པོ་གཡས་འཕྲེང་བ། གཡོན་པད་མ། ཐུགས་ཁར་ཧྲིཿདམར་པོ་ཚེག་དྲག་དང་བཅས་པ་བལྟས་ལ། འོད་ཟེར་ལས་རྟ་མགྲིན་ཞལ་ཅིག་ཕྱག་གཉིས་པའི་ཚོགས་དང་། མེ་དང་མཚོན་ཆའི་ཚོགས་སྤྲོས་ཏེ། བགེགས་ཐམས་ཅད་ཚར་བཅད་པར་བསམ་མོ། །དེ་ནས་འོག་རྡོ་རྗེའི་ས་གཞི་དང་། རྡོ་རྗེའི་ར་བ་དང་། གུར་ཁང་དུ་བྱིན་གྱིས་བརླབ་བོ། །ཡང་རང་གི་སྙིང་ཁ་ནས་འོད་ཟེར་སྤྲོ་བས། སངས་རྒྱས་དང་བྱང་ཆུབ་སེམས་དཔའ་རྣམས་དང་བླ་མ་ཡི་དམ་རྣམས་མངོན་པར་བལྟས་ཏེ། མཆོད་ཅིང་ཕྱག་འཚལ་བ་ལ་སོགས་པའི་ཡན་ལག་བདུན་པས་བསོད་ནམས་ཀྱི་ཚོགས་བསག་གོ །དེ་ནས་ཨོཾ་སྭ་བྷ་བ་ཤུད་དྷོ་སརྦ་དྷརྨཱ་ས་བྷ་བ་ཤུད་དྷོ་ཧཾ་ཞེས་དེ་དག་ཐམས་ཅད་བསྡུས་ཏེ་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནི་ཡེ་ཤེས་ཀྱི་ཚོགས་སོ། །དེ་ནས་སྟོང་པའི་ངང་ལས་རང་གི་རྣམ་པར་ཤེས་པ་ཡི་གེ་ཧྲིཿདམར་པོ་ལས། འོག་ཕྱོགས་སུ་འོད་ཟེར་ལས་གྱུར་པའི་སངས་རྒྱས་ཀྱི་ཞིང་ཁམས་པད་མ་ར་ག་ལས་གྲུབ་པའི་ཆོས་ཀྱི་དབྱིངས་དང་མཉམ་པ། དེའི་སྟེང་དུ་པད་མའི་སྡོང་པོ། ཉི་མ་དང་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདེ་ཚེག་དྲག་དང་བཅས་པ་ལས་འོད་ཟེར་ཕྱོགས་བཅུར་འཕྲོས། སེམས་ཅན་ཐམས་ཅད་ལ་ཕོག་པས་སྡིག་སྒྲིབ་ཐམས་ཅད་དག་ནས་སེམས་ཅན་ཐམས་ཅད་དང་ཕྱི་སྣོད་ཀྱི་འཇིག་རྟེན་གྱི་ཁམས་འོད་དུ་ཞུ་ནས། ཨོཾ་མ་ཎི་པད་མེ་ཧཱུྃ། ཞེས་བརྗོད་པ་ཙམ་གྱིས་སེམས་ཅན་ཐམས་ཅད་ཐུགས་རྗེ་ཆེན་པོར་གྱུར་པར་བསྒོམ་ཞིང་། འོད་ཟེར་ཚུར་འདུས་རང་ལ་ཐིམ་པས། རང་ཉིད་ཇོ་བོ་ཐུགས་རྗེ་ཆེན་པོ་སྐུ་མདོག་ཤིན་ཏུ་དམར་པོ་ཞལ་ཅིག་ཕྱག་བཞི་པ། ཕྱག་དང་པོ་གཉིས་ཐུགས་ཁར་ཐལ་མོ་སྦྱར་བ། གཡས་ཀྱི་འོག་མ་ན་མུ་ཏིག་གི་འཕྲེང་བ་དམར་པོ་འདྲེན་པ། གཡོན་གྱི་འོག་མ་ན་མེ་ཏོག་པད་མའི་ཡུ་བ་ནས་འཛིན་པ། ཞབས་དཀྱིལ་མོ་དཀྲུང་གིས་བཞུགས་པ། སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དབུ་སྐྲ་རལ་པའི་ཐོར་ཚུགས་གྱེན་དུ་བཅིངས་པ་ལ། དར་གྱི་ཅོད་པན་དང་རིན་པོ་ཆེའི་རྩེ་བྲན་རྣམ་པ་ལྔ་ཡིས་བརྒྱན་པ། གཡས་ཕྱོགས་ན་དཔལ་རྟ་མགྲིན་སྐུ་མདོག་དམར་པོ། ཕྱག་གཡས་ན་ཌ་མ་རུ། གཡོན་ན་དྲིལ་བུ་བསྣམས་པ། རྟ་སྐད་འཚེར་ཞིང་གར་བྱེད་པ་ཙམ་གྱིས་དཔའ་བོ་རྒྱ་མཚོའི་ཚོགས་ཀྱིས་བསྐོར་བར་བསམ་ཞིང་། གཡོན་ཕྱོགས་ན་གསང་བ་ཡེ་ཤེས་ཀྱི་ཌ་ཀི་མ་སྐུ་མདོག་དམར་བ། ཞལ་ཅིག་ཕྱག་གཉིས་པ། གཡས་གྲི་གུག གཡོན་ཐོད་ཁྲག་བསྣམས་པ། རུས་པའི་རྒྱན་ཆ་ལྔ་ཡིས་བརྒྱན་པ། ཨ་ར་ལིའི་སྒྲ་སྒྲོགས་ཤིང་གར་ཐབས་མཛད་པ་ཙམ་གྱི། ཌ་ཀི་རྒྱ་མཚོའི་ཚོགས་ཀྱིས་བསྐོར་བར་བསྒོམ་ཞིང་། སྣང་སྲིད་ཐམས་ཅད་དབང་དུ་བསྡུད་པ་དང་། བྱིན་གྱིས་རློབས་པར་བསྒོམ་མོ། །སྤྱི་གཙུག་ཏུ་གུ་རུ་པད་མ་འབྱུང་གནས་སྐུ་མདོག་ནག་པོ། གཟི་བརྗིད་དང་ལྡན་པ། ཨ་ཙ་རའི་ཆ་བྱད་ཅན། རུས་པའི་རྒྱན་ཆ་དྲུག་གིས་བརྒྱན་པ། སྣང་སྲིད་ཟིལ་གྱིས་གནོན་པའི་ཕྱག་རྒྱ་དང་། གར་ཐབས་མཛད་པའི་ཚུལ་གྱིས་པད་མ་ཟླ་བ་ཉི་མའི་གདན་ལ་བཞུགས་པ། བཀའ་བརྒྱུད་ཀྱི་བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་། སློབ་དཔོན་པད་མའི་ངོ་བོར་སྟེང་གི་ནམ་མཁའ་ལ་ཁྲིགས་ཀྱིས་གང་བར་བཞུགས་པ་ནི། སྟེང་བླ་མ་བཀའ་རྒྱུད་བསྒོམ་པའི་རིམ་པའོ། རང་གི་གདན་གྱི་ཞབས་སུ་ཡེ་ཤེས་པ་དང་འཇིག་རྟེན་པའི་ཆོས་སྐྱོང་བའི་བསྲུངས་མ་རྣམས་དང་། འགྲོ་དྲུག་གི་སེམས་ཅན་རྣམས་ཀྱང་རིགས་བཞི་ཌ་ཀི་མའི་ངོ་བོར་གྱུར་ནས། རང་གི་གདན་བཏེག་པ་དང་། སྣང་སྲིད་དབང་དུ་བསྡུད་པ་དང་། བཀའ་ཉན་གསུང་བསྡོད་ཀྱི་ཚུལ་དུ་བསྒོམ་པ་ནི། འོག་བཀའ་ཉན་གསུང་བསྡོད་བསྲུངས་མའི་དཀྱིལ་འཁོར་རོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ་ནི། སྤྱི་བོར་ཟླ་བའི་སྟེང་དུ་ཨོཾ་དཀར་པོ། མགྲིན་པར་པད་མའི་སྟེང་དུ་ཨ་དམར་པོ། ཐུགས་ཀར་ཉི་མའི་སྟེང་དུ་ཧཱུྃ་སྔོན་པོ་དང་ཧྲཱིཿདམར་པོ་བསྒོམ་པའོ། །དེ་ནས་རང་གི་ཐུགས་ཀའི་ཧྲཱིཿ་ལས་འོད་ཟེར་དམར་པོ་འཕྲོས་པས་རང་གི་བསྐྱེད་པ་ལྟ་བུའི་རྒྱལ་བ་རྒྱ་མཚོའི་དཀྱིལ་འཁོར་སྤྱན་དྲངས་ནས། མདུན་གྱི་ནམ་མཁར་བཞུགས་པ་ལ་ཡན་ལག་བདུན་པ་རྒྱས་པར་བྱས་ཤིང་། ཛཿཧཱུྃ་བཾ་ཧོ་བྱས་པ་ཙམ་གྱིས་རང་ལ་ཐིམ་པར་བསྒོམ་པ་ནི་ཡེ་ཤེས་ཀྱི་འཁོར་ལོ་གཞུག་པའོ། །དེ་ནས་དབང་བསྐུར་བ་ནི། ཡེ་ཤེས་ཀྱི་འཁོར་ལོ་གསལ་བར་དམིགས་ལ། བདག་ལ་དབང་བསྐུར་དུ་གསོལ་ཞེས་བརྗོད་པས་མཁའ་འགྲོའི་ཚོགས་རིན་པོ་ཆེའི་བུམ་པ་ཐོགས་པས། སྤྱི་བོ་ནས་དབང་བསྐུར་ཞིང་། ངག་ཏུ། སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །སངས་རྒྱས་རྣམས་ཀྱི་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དོ་ནུབ་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོང་།། ཞེས་བྱ་བས་དབང་བསྐུར་ཏེ། སྣང་བ་མཐའ་ཡས་ཀྱིས་དབུ་བརྒྱན་པར་བྱའོ། །དེ་ལྟར་སྒྱུ་མ་ལྟར་ཡུན་རིང་དུ་གོམས་པར་བྱ་ཞིང་། བཟླས་པ་བྱ་བ་ནི། ཐུགས་ཀའི་ཧྲིཿལས་སྙིང་པོས་གཡས་བསྐོར་དུ་བསྒོམས་པ་ལས་འོད་ཟེར་འཕྲོས་ཏེ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་སྒྲིབ་པ་སྦྱངས། རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་བསྡུས་པའི་ཚུལ་དུ་བཟླས་པ་ནི། ཨོཾ་ཨཱཿཧཱུྃ་ཧྲིཿཨོཾ་མ་ཎི་པད་མ་ཧཱུྃ། དྷུ་མ་གྷ་ཡེ་ན་མ། ཧ་རི་ནི་ས། རཱ་ཛ་ཧྲཱིཿཡ་ཧཱུྃ་ཛཿ་ཞེས་བཟླ་བར་བྱའོ། །དེ་ནས་བཟླས་པ་ལ་སྐྱོ་ན་རྫོགས་པའི་རིམ་པ་བསྒོམ་པར་བྱ་བ་ནི། ལྷ་ཐམས་ཅད་བདག་ཉིད་ལ་བསྡུས་ཏེ་ཡང་ཧྲཱི་ལ་བསྡུས་ནས་ཁམས་གསུམ་འཁོར་བའི་སེམས་ཅན་རྣམས་ཀྱིས་ཕུང་པོ་ཁམས་དང་སྐྱེ་མཆེད་རྣམས་དང་། སངས་རྒྱས་རྣམས་ཀྱི་སྐུ་གསུང་ཐུགས་དང་། འཁོར་བ་དང་མྱ་ངན་ལས་འདས་པས་བསྡུས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པ། སྐྱེ་བ་མེད་པ་འགག་པ་མེད་པ། རང་སེམས་མཉམ་པ་ཉིད་ཀྱི་ངང་དུ་བསྒོམ་དུ་ཅི་ཡང་མེད་པ། འཁྲུལ་པ་མེད་པ། གཡེང་བ་མེད་པའི་དོན་ལ་རྒྱུན་དུ་གནས་པར་བྱའོ། འདི་ལ་གོམས་ན་མཆོག་གི་དངོས་གྲུབ་ཐོབ་པར་འགྱུར་རོ། །རྒྱལ་བ་རྒྱ་མཚོའི་བསྐྱེད་རྫོགས་བསྡུས་པ་འདི། །གཞུང་དང་འཇིགས་བྱེད་ཆེན་མོ་འཐོར་བ་རྣམས། །ཕྱོགས་ཅིག་རང་བྱུང་རྡོ་རྗེས་བསྡུས་པ་ལ། །འགལ་དང་ནོར་འཁྲུལ་ཆད་ལྷག་གྱུར་པ་རྣམས། །བླ་མ་མཁའ་འགྲོའི་ཚོགས་ལ་བཟོད་པར་གསོལ། །རྫོགས་སོ། །བཀྲ་ཤིས་དཔའ་འབར་འཛམ་གླིང་རྒྱན་དུ་ཤོག། ༈ །།བཅོམ་ལྡན་པད་མ་ཟབ་པའི་མངོན་རྟོགས་ཚིག་ལྷུག་མ་བཞུགས་སོ། །བཅོམ་ལྡན་འདས་པད་མའི་སྣང་བ་ཆེན་པོ་རབ་ཏུ་རྒྱས་པ་ལ་ཕྱག་འཚལ་ལོ། །རབ་འབྱམས་ཆོས་ཀྱི་དབྱིངས་ལ་བདེ་བ་ཅན། །དབང་ཆེན་རོལ་པ་པད་མའི་གསུང་གི་བདག །འཇིག་རྟེན་འདྲེན་པ་རྨད་བྱུང་སྤྱན་རས་གཟིགས། །རྒྱལ་བ་ཐུགས་རྗེ་ཅན་ལ་ཕྱག་འཚལ་འདུད། །དེ་ལ་འདིར་རེ་ཤིག་བཅོམ་ལྡན་འདས་རྒྱལ་བ་རྒྱ་མཚོ་པད་མ་ཟབ་པའི་དཀྱིལ་འཁོར་བསྒོམ་པར་འདོད་པས་དོན་གསུམ་སྟེ། སྔོན་འགྲོ། དངོས་གཞི། རྗེས་སོ། །དང་པོ་ལ་བཞི་ལས། ཐོག་མར་དཀྱིལ་འཁོར་འདི་རུ་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་དང་སྙིང་རྗེ་ཆེན་པོ་དང་ལྡན་པས། དབེན་པའི་གནས་སུ་རྫས་དང་དཀྱིལ་འཁོར་གྱི་བྱ་བ་དབང་མཆོག་ལྟར་ཤེས་པར་བྱའོ། །གཉིས་པ་བདག་ཉིད་སྟན་བདེ་བ་ལ་འདུག་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ་ནས། སྤྱན་རས་གཟིགས་ཀྱི་གོ་འཕང་ཐོབ་པར་བྱ། དེའི་ཆེད་དུ་མངོན་པར་རྟོགས་པ་བསྒོམ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་པར་བྱའོ། །གསུམ་པ་རང་ཉིད་སྤྱན་རས་གཟིགས་དམར་པོ་ཞལ་གཅིག་ཕྱག་གཉིས་པ་གཡས་པད་མ་གཡོན་འཕྲེང་བ་ཅན་གྱི་ཐུགས་ཁར་ཧྲཱིཿདམར་པོ་ཚེག་དྲག་ཅན་བལྟས་ལ། འོད་ཟེར་ལས་རྟ་མགྲིན་ཞལ་ཅིག་ཕྱག་གཉིས་པའི་ཚོགས་དང་། མེ་རི་དང་མཚོན་ཆའི་ཚོགས་སྤྲོས་ཏེ། བགེགས་ཐམས་ཅད་ཚར་གཅད་པར་བསམ། འོག་རྡོ་རྗེའི་ས་གཞི། བར་རྡོ་རྗེའི་ར་བ། སྟེང་རྡོ་རྗེའི་གུར་ཁང་དུ་བྱིན་གྱིས་བརླབ་པར་བྱའོ། །བཞི་པ་རང་གི་སྙིང་ཁའི་ས་བོན་ལས་འོད་འཕྲོས་པས་བདེ་བ་ཅན་གྱི་ཞིང་ཁམས་ནས་བླ་མ་དང་དཀྱིལ་འཁོར་གྱི་འཁོར་ལོ་འོག་ནས་འཆད་པར་བལྟས་ལ། ཡན་ལག་བདུན་པ་རྒྱས་པས་བསོད་ནམས་ཀྱི་ཚོགས་བསག་གོ །དེ་ནས་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་བཞི་བསྒོམས་ནས། ཨོཾ་ཨཱཿཧཱུྃ་གི་ལྷ་ཚོགས་ཐམས་ཅད་བདག་ཉིད་ལ་བསྡུས་ཏེ། ཨོཾ་སྭ་བྷ་བ་ཤུད་དྷོ་སརྦ་དྷརྨཱ་སྭ་བྷ་བ་ཤུད་དྷོ་ཧཾ། ཞེས་པས་ཆོས་ཐམས་ཅད་སྟོང་པ་ཉིད་དུ་བསྒོམས་ཏེ་སྔོན་དུ་འགྲོ་བའོ། །དངོས་གཞི་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །ཐོག་མ་ལ་བདུན་ལས་དང་པོ་ནི་སྟོང་པ་ཉིད་ཀྱི་ངང་ལས་རང་གི་རྣམ་པར་ཤེས་པ་ཡི་གེ་ཧྲཱིཿདམར་པོ་ཡེ་ཤེས་ལྔའི་རང་བཞིན་འོད་ཁ་དོག་ལྔ་འཕྲོ་བའི་འོད་ཟེར་འོག་གི་ཕྱོགས་སུ་འཕྲོས་པས། འོད་ཟེར་ལས་གྱུར་པའི་སངས་རྒྱས་ཀྱི་ཞིང་ཁམས་པད་མ་ར་ག་ལས་གྲུབ་པ་ཆོས་ཀྱི་དབྱིངས་དང་མཉམ་པ། དེའི་དབུས་སུ་སྣ་ཚོགས་རྡོ་རྗེ་ཡངས་ཤིང་རྒྱ་ཆེ་བའི་ལྟེ་བར་བྱང་ཆུབ་གྱི་ཤིང་སྙིང་པོ་རྒྱན་ཡིད་དུ་འོང་བ་འབྲས་བུ་དང་ལོ་མ་ཐམས་ཅད་ནོར་བུ་རིན་པོ་ཆེ་དང་བཀྲ་ཤིས་རྫས་བརྒྱད་དུ་གྲུབ་པ། དེའི་སྟེང་དུ་པཾ་ལས་པད་མ་རྒྱས་པ་ཆོས་ཀྱི་དབྱིངས་དང་མཉམ་པ་སྟེ། དེ་ནི་སངས་རྒྱས་ཀྱི་ཞིང་སྦྱོང་བའོ། །གཉིས་པ་རྟེན་གཞལ་ཡས་ཁང་བསྐྱེད་པ་ནི། པད་མའི་ལྟེ་བར་བྷྲུྃ་ལས་གཞལ་ཡས་ཁང་པ་གྲུ་བཞི་སྒོ་བཞི་རྟ་བབས་དང་བཅས་པ་ཀ་བ་བརྒྱད་ཀྱིས་ཡང་དག་པར་མཛེས་པ། དབུས་སུ་ཟླུམ་བསྐོར་གཙོ་བོའི་འདོམ་གང་བ། དེའི་ནམ་མཁའ་ལ་རྒྱ་གྲམ་གྱི་གདུང་གི་མཐར་རིན་པོ་ཆེའི་གདུང་ཟླུམ་པོ་རྒྱ་གྲམ་གྱི་ཁོང་སེང་དུ་ཟུག་པ། དེའི་མཐར་རྡོ་རྗེའི་གདུང་ཟླུམ་མོ། །དེའི་མཐར་འཁོར་ལོའི་གདུང་ཟླུམ་པོ། དེའི་མཐར་ཕྱོགས་བཞིར་གྱེས་པ་ལས་རྒྱ་གྲམ་གྱི་གདུང་བཞི་པ་ཕྱིར་ལྷག་པ་དང་དེ་ཉིད་ཀྱིས་མཚན་པ་སྟེ། ཐོག་གི་དབྱིབས་སོ། །ཕྱིའི་དབྱིབས་ལོགས་རེ་རེ་ལ་གཙོ་བོའི་འདོམ་བརྒྱད་དང་ལྡན་པ། ཡེ་ཤེས་ལྔའི་བརྡར་པན་ཙ་ར་གའི་བརྩིགས་པ་ལྔ་ནང་ནས་རིམ་པ་ལྟར་དམར་པོ་སྔོན་པོ་སེར་པོ་དཀར་པོ་ལྗང་གུ་སྟེ། པད་མ་ར་ག་དང་། བཻ་ཌུརྻ་དང་། གསེར་དང་། ཤེལ་དང་། ཨིན་ཏྲ་ནི་ལས་གྲུབ་པ་ཞེང་དུ་ཁྲུ་ལྔ་འཕངས་སུ་འདོམ་གསུམ་པ། དེའི་སྟེང་དུ་རིན་པོ་ཆེའི་ཕ་གུ་ཁྲུ་གང་བའི་སྟེང་དུ་རིན་པོ་ཆེའི་བཻ་ཌུརྻའི་སྣམ་བུ་འདོམ་གང་བ། དེའི་སྟེང་དུ་བ་སོའི་གསེང་ཁང་ཁྲུ་གང་བའི་བར་བར་རྣམས་སུ་རིན་པོ་ཆེ་བྲེ་ལ་ཙི་པ་ཏྲའི་ཁ་ནས་བྱུང་བའི་དྲྭ་བ་དང་དྲྭ་བ་ཕྱེད་པ་འཕྱང་བ། དེའི་སྟེང་དུ་གདུང་གི་སྣ་ལ་རྡོ་རྗེ་རྒྱ་གྲམ་གྱིས་མཚན་པ། ཕྱིར་ལ་འདོམ་ཕྱེད་ལྷག་པའི་ཚུལ་གྱིས་འདོད་ཡོན་སྣམ་བུ་དང་མཉམ་པ་སྟེང་དུ་རྡོ་སྐར་མ་ཤི་ཤ་ལས་གྲུབ་པའི་རྩ་བརྒྱད་ཀྱིས་བརྒྱན་པ། སྒོ་བཞི་གློ་འབུར་གྱི་ཚུལ་དུ་གནས་པ་ལ་ཀ་བ་བཞིས་བཞིས་བཏེག་པའི་རྟ་བབས་ཆ་བཞིའི་ཚུལ་དུ་མཛེས་པ། གཙོ་བོའི་ཏོག་གི་རྡོ་རྗེ་རྒྱ་གྲམ་གྱི་སྟེང་དུ་ཆོས་ཀྱི་འཁོར་ལོ་རིམ་པ་བཅུ་གསུམ་དང་ལྡན་པ་ལ་གདུགས་ཆར་ཁེབས་དར་དཔྱངས་ཀྱིས་སྤྲས་པ། རྟ་བབས་རེ་རེའི་སྟེང་དུ་ཡང་ཆོས་ཀྱི་འཁོར་ལོ་རིམ་པ་བཅུ་གསུམ་པ། ཕྱོགས་བཞི་ན་རི་དྭགས་བཞི་བཞི། མཚམས་ན་བ་དན་བཞི་བཞི་བཅུ་གཉིས་ལ་བ་དན་བཅུ་གཉིས་ཀྱིས་བརྒྱན་པའོ། །དེའི་ཕྱི་རོལ་དུ་འདོད་ཡོན་གྱི་སྣམ་བུ་ཟུར་བཅུ་གཉིས་དང་ལྡན་པ་འཁོར་བ། དེའི་ཕྱི་རོལ་དུ་ཆུས་བཅད་པའི་དུར་ཁྲོད་ཆེན་པོ་བརྒྱད། དེའི་ཕྱི་རོལ་དུ་རྡོ་རྗེ་ར་བ་གུར་ཁང་མེ་རི་དང་བཅས་པ་བལྟའོ། །དེའི་དབུས་ན་སྣ་ཚོགས་པད་མ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་དང་བཅས་པའོ། །གསུམ་པ་བརྟེན་པ་ལྷའི་དཀྱིལ་འཁོར་བསྐྱེད་པའི་རིམ་པ་ནི། པད་ཉིའི་སྟེང་དུ་ཧྲཱིཿབབ་པ་ལས་འོད་འཕྲོས་རྒྱལ་བ་སྲས་དང་བཅས་པ་མཆོད། སེམས་ཅན་ལ་ཕོག་སྡིག་སྒྲིབ་དག་ནས་འོད་དུ་ཞུ་སྟེ། ཨོཾ་མ་ཎི་པད་མེ་ཧཱུྃ་ཞེས་བརྗོད་པས་སེམས་ཅན་ཐམས་ཅད་ཐུགས་རྗེ་ཆེན་པོར་གྱུར་པར་བསྒོམ་ཞིང་། ཡང་། ཨོཾ་ཨ་ཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ་ཞེས་བརྗོད་པས་འོད་ཟེར་ཚུར་འདུས་རང་ལ་ཐིམ་ནས་ཡོངས་སུ་གྱུར་པ་ལས། བཅོམ་ལྡན་འདས་སྤྱན་རས་གཟིགས་དམར་པོ་ཡབ་ཡུམ་རྡོ་རྗེ་ཕག་མོ་དང་གཉིས་སུ་མེད་པར་སྦྱོར་བ་ཞལ་ག ཅིག་ཕྱག་བཞི་པ། ཕྱག་དང་པོ་གཉིས་ཡུམ་གྱི་རྒྱབ་ཏུ་འཁྱུད་པའི་ཚུལ་གྱིས་ཐལ་མོ་སྦྱར་བ། གཡས་ཀྱི་འོག་མ་ན་རྡོ་རྗེ་རྩེ་ལྔ་བསྣམས་པ། གཡོན་གྱི་འོག་མ་ན་པད་མ་འདབ་མ་བརྒྱད་པའི་ཡུ་བ་ནས་འཛིན་པ། དབུ་སྐྲ་རལ་པའི་ཐོར་གཙུག་གྱེན་དུ་བཅིངས་པ་ལ་དར་གྱི་ཅོད་པན་དང་རིན་པོ་ཆེའི་རྩེ་བྲན་ལྔས་བརྒྱན་པ་ཞབས་དཀྱིལ་མོ་དཀྲུང་དུ་བཞུགས་པའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་པོ་ཞལ་གཉིས་ཕྱག་གཉིས་མ། ཕག་ཞལ་དམར་མོ་སྤྱི་གཙུག་ཏུ་ཕྱུང་བ། རྩ་བའི་ཁྲོ་ཞལ་སྤྱན་གསུམ་མཆེ་བ་གཙིགས་པ། དབུ་སྐྲ་གྲོལ་བ་ལ་ཐོད་པ་སྐམ་པོ་ལྔས་དབུ་རྒྱན་ཞིང་རློན་པ་ལྔ་བཅུ་རྩ་གཅིག་གིས་དོ་ཤལ་བྱས་པ། རུས་པའི་རྒྱན་ཆ་ལྔས་བརྒྱན་པ། ཕྱག་གཡས་རྡོ་རྗེ་གྲི་གུག་ནམ་མཁའ་ལ་འཕྱར་བ། གཡོན་པས་ཐོད་ཁྲག་ཡབ་ལ་སྟེར་བའི་ཚུལ་གྱིས་འཁྱུད་པ། ཞབས་གཉིས་ཡབ་ཀྱི་རྒྱབ་ནས་འཁྲིལ་བའི་ཚུལ་གྱིས་དཀྱིལ་མོ་དཀྲུང་བཅས་ནས་བཞུགས་པའོ། །དེའི་ཕྱོགས་བཞིར་པད་ཉིའི་སྟེང་དུ་ཡི་གེ་ཧྲཱི་དམར་པོ་བཞི་ལས་འོད་འཕྲོས་སངས་རྒྱས་མཆོད་སེམས་ཅན་གྱི་དོན་བྱས་ཚུར་འདུས་ཧྲིཿལ་ཐིམ་ཡོངས་སུ་གྱུར་པ་ལས། འཕགས་པ་སྤྱན་རས་གཟིགས་སྐུ་མདོག་དམར་པོ་བཞི་རང་གི་ཡུམ་དང་གཉིས་སུ་མེད་པར་སྦྱོར་བ་སྟེ། ཀུན་ཀྱང་ཞལ་གཅིག་ཕྱག་བཞི་པ། ཕྱག་དང་པོ་ཐམས་ཅད་རང་གི་ཡུམ་གྱི་རྒྱབ་ཏུ་འཁྱུད་པའི་ཚུལ་དུ་ཐལ་མོ་སྦྱོར་བ། གཡས་ཀྱི་འོག་མ་ཐམས་ཅད་མུ་ཏིག་གི་ཕྲེང་བ་དམར་པོ་འདྲེན་པ། གཡོན་གྱི་འོག་མ་ཐམས་ཅད་མེ་ཏོག་པད་མ་དམར་པོའི་འདབ་མ་བརྒྱད་པའི་ཡུ་བ་ནས་འཛིན་པ། སྐུ་ལ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དབུ་སྐྲ་རལ་པའི་ཐོར་གཙུག་གྱེན་དུ་བཅིངས་པ་ལ་དར་གྱི་ཅོད་པན་དང་རིན་པོ་ཆེའི་རྩེ་བྲན་ལྔས་བརྒྱན་པ། ཐམས་ཅད་ཞབས་རྡོ་རྗེའི་དཀྱིལ་མོ་ཀྲུང་དུ་བཞུགས་པའི་པང་ན་རང་རང་གི་ཡུམ། སྤྱན་མ་དང་མ་མ་ཀི་དང་ན་བཟའ་དཀར་མོ་དང་དམ་ཚིག་སྒྲོམ་མ་སྟེ། རིམ་པ་བཞིན་དུ་སྔོན་མོ་སེར་མོ་དམར་མོ་ལྗང་ཁུ་སྟེ། ཐམས་ཅད་ཀྱང་ཞལ་གཅིག་ཕྱག་བཞི་མ། ཕྱག་དང་པོ་ཐམས་ཅད་རང་རང་གི་བདག་པོའི་རྒྱབ་ནས་འཁྱུད་པའི་ཚུལ་དུ་ཐལ་མོ་སྦྱར་བ། མ་མ་ཀི་ནི་གཡས་ཀྱི་འོག་མ་ནོར་བུ། སངས་རྒྱས་སྤྱན་མ་འཁོར་ལོ། ན་བཟའ་དཀར་མོ་པད་མ་དཀར་པོ། དམ་ཚིག་སྒྲོལ་མ་ཨུད་པ་ལ། གཡོན་འོག་མ་ཐམས་ཅད་པད་མ་དམར་པོ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱི་བརྒྱན་པ། ཞབས་རྣམས་ཡབ་ཀྱི་རྒྱབ་ཏུ་འཁྲིལ་བའི་ཚུལ་གྱིས་དཀྱིལ་ཀྲུང་བཅས་པའོ། །ཤར་ལྷོའི་འཚམས་སུ་རྡོ་རྗེ་མཁའ་འགྲོ་མ་སྔོན་མོ་གཡས་རྡོ་རྗེ། གཡོན་པད་མ། ལྷོ་ནུབ་ཏུ་རིན་ཆེན་མཁའ་འགྲོ་མ་སེར་མོ་གཡས་ནོར་བུ་གཡོན་པད་མ། ནུབ་བྱང་མཚམས་སུ་པད་མ་མཁའ་འགྲོ་དམར་མོ་གཡས་བུམ་པ་གཡོན་པད་མ། བྱང་ཤར་དུ་ལས་ཀྱི་མཁའ་འགྲོ་ལྗང་ཁུ་གཡས་རལ་གྲི་གཡོན་པད་མ་བསྣམས་པ། སྐུ་ལ་རུས་པ་དང་རིན་པོ་ཆེའི་རྒྱན་གྱིས་བརྒྱན་པའོ། །དེའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་འཁོད་པའི་ལྷ་མོ་རྣམས་ནི། གཟུགས་རྡོ་རྗེ་མ་མེ་ལོང་དང་པད་མ། སྒྲ་རྡོ་རྗེ་མ་གླིང་བུ་དང་པད་མ། དྲི་རྡོ་རྗེ་མ་སྤོས་ཕོར་དང་པད་མ། རོ་རྡོ་རྗེ་མ་མཁར་ཞོང་དང་པད་མ། རེག་རྡོ་རྗེ་མ་ན་བཟའ་དང་པད་མའོ། །བཞི་པ་སྐུ་གསུང་ཐུགས་བྱིན་གྱིས་བརླབ་པ་ནི། ལྷ་ཚོགས་ཐམས་ཅད་ཀྱི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་ཉི་མ་ལ་ཨ་དམར་པོ། ཐུགས་ཀར་པད་མ་ལ་ཧཱུྃ་སྔོན་པོ་དང་ཧྲཱི་དམར་པོ་དབྱེར་མེད་དུ་བསྒོམ། དེ་ནས་ཡབ་རྣམས་ཀྱི་ཐུགས་ཀའི་ཧྲཱི་ལས་ཨོཾ་ཨ་ཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ་གིས་གཡས་སུ་འཁོར་བ། ཡུམ་རྣམས་ཀྱི་ཐུགས་ཀའི་ཧྲི་ཨོཾ་བཛྲ་བྷ་ར་ཧི་སརྦ་བྷུ་དྷ་ཌ་ཀི་ནི་ཡེ། བཛྲ་བྷཻ་རོ་ཙ་ན་ཡེ་གཡོན་དུ་འཁོར་བ། རིགས་བཞི་མཁའ་འགྲོའི་ཐུགས་ཀར་ཧ་རི་ནི་ས་བསྒོམས་པར་བྱའོ། །ལྔ་པ་ཡེ་ཤེས་ཀྱི་འཁོར་ལོ་དགུག་པ་ནི། རང་གི་ཐུགས་ཀའི་ཧྲཱི་ལས་འོད་ཟེར་འཕྲོས་པས་ཇི་ལྟར་བསྐྱེད་པ་ལྟ་བུ་སྤྱན་དྲངས་ལ་ལེགས་པར་མཆོད་དེ། ཛ་ཧཱུྃ་བྃ་ཧོ་ཞེས་པས་ལྷ་ཚོགས་གཞལ་ཡས་ཁང་པ་དུར་ཁྲོད་རྡོ་རྗེ་ར་བ་མེ་རི་དང་བཅས་པ་དམ་ཚིག་སེམས་དཔའ་དང་གཉིས་སུ་མེད་པར་བྱའོ། །དྲུག་པ་དབང་བསྐུར་བ་ནི། མདུན་གྱི་ནམ་མཁའ་ལ་ཡེ་ཤེས་ཀྱི་འཁོར་ལོ་གསལ་བར་བལྟས་ལ། བདག་ལ་དབང་བསྐུར་དུ་གསོལ་ཞེས་བརྗོད་པས་ལྷ་ཚོགས་རྣམས་ཀྱི་ཐུགས་ཀ་ནས་མཁའ་འགྲོ་མའི་ཚོགས་རིན་པོ་ཆེའི་བུམ་པ་ཐོགས་པས་སྤྱི་བོ་ནས་དབང་བསྐུར་བར་བསམ་ཞིང་། སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །སངས་རྒྱས་རྣམས་ཀྱི་བུམ་པའི་དབང་། །དེ་རིང་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོངས། ཨོཾ་མ་ཎི་པད་མེ་ཧཱུྃ། བྷུད་དྷ་ཨ་བྷི་ཥིཉྩྨ་ཨོཾ། ཅེས་པ་དང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ཡ་ས་མ་ཡེ་ཤྲཱི་ཡེ་ཧཱུཾ། ཞེས་དབང་བསྐུར་ཞིང་ཆུའི་ལྷག་མ་ཡར་འཁྱིལ་བ་ལ། གཙོ་བོ་ལ་སྣང་བ་མཐའ་ཡས། རྡོ་རྗེ་ཕག་མོ་ལ་རྣམ་སྣང་། ཕྱོགས་ཀྱི་ཡབ་ཡུམ་རྣམས་ལ་མི་བསྐྱོད་པ། རིན་འབྱུང་། དོན་གྲུབ་རྣམས་ཀྱིས་དབུ་བརྒྱན་པའོ། །དེས་སེམས་ཅན་ཐམས་ཅད་མཆོག་གི་ཡོན་ཏན་ཐོབ་པར་བསམ་མོ། །བདུན་པ་བཟླས་པ་ལ་གཉིས་ཏེ། དང་པོ་སྤྲོ་བསྡུའི་ཚུལ་དུ་བཟླས་པ་བཞི་ལས། བྱིན་བརླབས་བསྡུ་བའི་ཚུལ་དུ་བཟླ་བ་དང་བདག་གཞན་གྱི་སྡིག་སྒྲིབ་སྦྱང་བ་ལ་སོགས་འཕྲིན་ལས་བཞིའི་ཚུལ་དུ་བཟླ་བ་དང་། བདེ་བ་ཆེན་པོ་དང་། འགོག་པའི་བཟླས་པའོ། །དེ་ཐམས་ཅད་ལ་འོད་ཟེར་སྤྲོ་བསྡུ་བྱ་ཞིང་འབུམ་ཚོ་བཅུ་ལ་སོགས་ཏེ་མཚན་མ་མཐོང་གི་བར་དུ་བྱའོ། །གཉིས་པ་རྡོ་རྗེའི་བཟླས་པ་ནི། བསྲེ་བའི་མན་ངག་ལྟར་བསྒོམ་ཞིང་། རླུང་བཟུང་བ་སྟེ། རྫོགས་པའི་རིམ་པའང་ཡིན་ནོ། རྫོགས་པའི་རིམ་པ་ལ་གཉིས་ཏེ། མི་ཟབ་པའི་རྫོགས་རིམས་ནི་རྡོ་རྗེའི་བཟླས་པ་བཞིན་དུ་ཤེས་པར་བྱའོ། །ཟབ་པའི་རྫོགས་རིམས་ནི། རང་གི་ཐུགས་ཀའི་འོད་ཟེར་འཁོར་འདས་ཐམས་ཅད་ལྷ་ཚོགས་སུ་གསལ་བ་ལ་འཕྲོས། དེ་དག་ཐམས་ཅད་འོད་དུ་ཞུ་སྟེ་བསྲུངས་བའི་གུར་ཁང་ལ་ཐིམ། དེ་འོད་དུ་ཞུ་ནས་རིམ་པ་བཞིན་དུ་བདག་ཉིད་ལ་འདུས་ཏེ་བདག་ཐུགས་ཀའི་ཧྲི་ལ་བསྡུ། ཧྲི་ཡང་གོང་བུ་དང་ན་དའི་གཟུགས་ལས་རྣམ་པར་་འདས་ནས་རྣམ་པར་དག་པའི་རང་བཞིན་དུ་བསྒོམས་པར་བྱའོ། །དེའང་བསྒོམ་དུ་མེད་ཅིང་ཡེངས་སུ་མེད་པ། དགག་ཏུ་མེད་ཅིང་བསྒྲུབ་ཏུ་མེད་པ་སྟེ། སྤྲོས་པ་ཐམས་ཅད་ཉེ་བར་ཞི་བའི་རང་བཞིན་དུ་གནས་པར་བྱའོ། འདི་ལ་གོམས་ན་ཕྱག་རྒྱ་ཆེན་པོ་མངོན་དུ་བྱེད་པར་འགྱུར་རོ། །སྤྱི་དོན་གསུམ་པ་རྗེས་ཀྱི་བྱ་བ་ལ་གཉིས་ཏེ། དང་པོ་ཞལ་གཅིག་ཕྱག་གཉིས་པའི་སྤྱན་རས་གཟིགས་ཀྱི་ང་རྒྱལ་གྱིས་ལངས་ཏེ། དགེ་བའི་རྩ་བ་སེམས་ཅན་ཐམས་ཅད་ཀྱི་དོན་དུ་བསྔོ་བར་བྱའོ། །གཉིས་པ་ཐུན་མཚམས་གཏོར་མ་ནི་ཇི་སྐད་བཤད་པའི་རིམ་པ་བཞིན་དུ་རྫོགས་པར་བྱའོ། །དེ་ལྟར་ཐུན་བཞི་རུ་འབད་ནས་ཉམས་སུ་བླངས་པས་རྟགས་དང་ཡོན་ཏན་ཐམས་ཅད་རྒྱུད་ལས་བཤད་པ་ལྟར་སྐྱེ་བར་འགྱུར་རོ། །དེ་དག་ནི་དཀྱིལ་འཁོར་དུ་བསྒོམས་པའི་བསྐྱེད་རྫོགས་ཀྱི་རིམ་པ་ཤིན་ཏུ་གསལ་བར་བྱས་པའོ། །གཞན་ཡང་མཎྜྻལ་བསྒོམ་པ་དང་། ལུས་དཀྱིལ་དུ་བསྒོམ་པ་ནི་མངོན་པར་རྟོགས་པ་ཚིགས་བཅད་མར་བསྟན་ཟིན་ནོ། །དེ་དག་གིས་བསྒྲུབ་པ་བྱེད་ན་རྫས་དང་དཀྱིལ་འཁོར་གོང་དུ་བསྟན་ཟིན་ལ། མདུན་དུ་ཡང་བདག་བསྐྱེད་ལྟར་བསྒོམ་ཞིང་། ལས་དང་མཐུན་པའི་འོད་ཟེར་གྱི་སྤྲོ་བསྡུ་དང་སྔགས་ཀྱི་ཤམ་བུ་བཏགས་ལ་སྒྲུབ་པར་བྱའོ། །གཏོར་མ་མཆོད་འཕྲེང་ལས་ཚོགས་རྣམས་གཞུང་དུ་གསལ་བས་དེ་ལ་བལྟའོ། །དབང་མཆོག་བདུན་ཚིགས་རྣམས་གཉིས་ནི། །ཁོ་བོས་བཤད་བཞིན་ཤེས་པར་བྱ། །འདི་སྡེབས་ནོར་འཁྲུལ་གྱུར་པ་གང་། །བླ་མ་མཁའ་འགྲོའི་ཚོགས་ལ་བཟོད་པར་གསོལ། །འདི་ལ་འཇུག་རྣམས་རིམ་གཉིས་དོན་མཐོང་ནས། །ཚེ་ག ཅིག་སྤྱན་རས་གཟིགས་ཀྱི་ས་ཐོབ་ཤོག །བཅོམ་ལྡན་འདས་རྒྱལ་བ་རྒྱ་མཚོ་པད་མ་ཟབ་པའི་བསྐྱེད་རྫོགས་ཀྱི་རིམ་པ་འདི་ནི། བསྒོམ་པར་འདོད་པ་རྣམས་ཀྱིས་བསྐུལ་ནས་རང་བྱུང་རྡོ་རྗེས་གླང་ལོ་ཟླ་བ་གསུམ་པའི་ཚེས་བཅུ་ལ་ཨུ་རྒྱན་གྱི་མཁན་པོ་པད་མ་འབྱུང་གནས་ཀྱི་བསྒྲུབ་གནས་ཆེན་པོར་བཀོད་པ་རེ་ཤིག་རྫོགས་སོ།། ༈ །།རྒྱལ་བ་རྒྱ་མཚོའི་མཆོད་འབུལ་བཞུགས། །ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཚོགས་མཆོད་དང་དབང་བསྐུར་གྱི་ལག་ལེན་འདི་ལྟར་བྱའོ། །ཧཱུྃ་ལྷོ་ནུབ་སྲིན་པོའི་གྲོང་ཁྱེར་ནས། །གྲུབ་ཐོབ་བྱེ་བ་འབུམ་གྱི་དབུས། །སློབ་དཔོན་པད་མ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །པད་མ་དབང་གི་ཟླ་གམ་ནས། །མགོན་པོ་ཚེ་དབང་འོད་དཔག་མེད། །སྤྱན་རས་གཟིགས་དབང་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མཁའ་སྤྱོད་དག་པའི་གཞལ་ཡས་ནས། །མཁའ་འགྲོ་བྱེ་བ་འབུམ་གྱི་དབུས། །ཡུམ་ཅིག་མཁའ་འགྲོ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མེ་དཔུང་འབར་བའི་ཀློང་དཀྱིལ་ནས། །རྟ་མཆོག་རྒྱལ་པོ་ཧེ་རུ་ཀ །དཔའ་བོའི་ཚོགས་བཅས་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །དག་པ་ཆོས་སྐུའི་གཞལ་ཡས་ནས། །སངས་རྒྱས་མཁའ་འགྲོ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མི་འགྱུར་ཐུགས་ཀྱི་གཞལ་ཡས་ནས། །རྡོ་རྗེ་མཁའ་འགྲོ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །པད་མ་གསུང་གི་གཞལ་ཡས་ནས། །པད་མ་མཁའ་འགྲོ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །ཡོན་ཏན་རྒྱས་པའི་གཞལ་ཡས་ནས། །རིན་ཆེན་མཁའ་འགྲོ་གཤེགས་སུ་གསོལ། །དབང་སྐུར་བྱིན་གྱིས་བརླབ་ཏུ་གསོལ། །འཕྲིན་ལས་གྲུབ་པའི་གཞལ་ཡས་ནས། །ལས་ཀྱི་མཁའ་འགྲོ་གཤེགས་སུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །འཇིག་རྟེན་དུར་ཁྲོད་གཞལ་ཡས་ནས། །འཇིག་རྟེན་མཁའ་འགྲོ་གཤེགས་སུ་གསོལ། །འཕྲིན་ལས་རྣམ་བཞི་བསྒྲུབ་ཏུ་གསོལ། །དམ་ཚིག་ཆེན་པོའི་གནས་མཆོག་ནས། །དམ་ཅན་རྒྱ་མཚོ་གཤེགས་སུ་གསོལ། །ཕོ་ཉ་ལས་མཁན་མཛད་དུ་གསོལ། །ཅེས་དྲིལ་བུ་དཀྲོལ་ཞིང་དབྱངས་དང་བཅས་པས་སྤྱན་དྲངས་པར་བྱའོ། །རྒྱལ་བ་རྒྱ་མཚོ་སྤྱན་རས་གཟིགས། །འགྲོ་བའི་དོན་དུ་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཨོཾ་པད་མ་ཀ་མ་ཀ་ཡེ་སྭཱ་ཧཱ། ཅེས་པས་བཞུགས་སུ་གསོལ་ལོ། །དེ་ནས་ཕྱག་འཚལ་བ་ནི། པད་མ་དབང་གི་དཀྱིལ་འཁོར་དུ། །པད་མ་མཆོག་གི་སྐུར་སྤྲུལ་པའི། གདུག་པ་འདུལ་མཛད་ཐོད་འཕྲེང་ལ། །གུས་པའི་ཡིད་ཀྱིས་ཕྱག་འཚལ་བསྟོད། །ཧཱུྃ་ཐུགས་རྗེ་ཆེན་པོ་འཇིག་རྟེན་དབང་ཕྱུག་སྐུ། །སྐུ་མདོག་དམར་གསལ་འཇིག་རྟེན་དབང་དུ་བསྡུད། སྤྱན་གྱི་འོད་ཟེར་འགྲོ་ལ་ཐུགས་རྗེས་གཟིགས། ཞལ་ནས་ཧཱུྃ་སྒྲས་སྟོང་གསུམ་ཆོས་སྒྲ་སྒྲོགས། །ཤངས་ནས་ཡེ་ཤེས་རླུང་གིས་ཉོན་མོངས་འཐོར། །སྙན་ནས་ཐབས་དང་ཤེས་རབ་འདུལ་ཐབས་མཛད། །ཕྱག་གཉིས་དབྱིངས་དང་ཡེ་ཤེས་གཉིས་མེད་སྦྱོར། །གཡས་པས་བགྲང་འཕྲེང་བྱང་ཆུབ་ལམ་སྣ་འདྲེན། །གཡོན་པ་པད་མས་འཁོར་བའི་སྐྱོན་དང་བྲལ། །རིན་ཆེན་རྒྱན་དྲུག་ཕ་རོལ་ཕྱིན་དྲུག་ལྡན། །ཞབས་གཉིས་འགྲོ་བའི་དོན་ལ་མཉམ་པར་བཞུགས། །འགྲོ་རྣམས་མ་ལུས་ཐུགས་རྗེས་དབང་དུ་བསྡུད། །འཇིག་རྟེན་དབང་ཕྱུག་སྐུ་ལ་ཕྱག་འཚལ་བསྟོད། །དགྱེས་པར་རོལ་པའི་འཛབ་བསྟོད་མཆོད་པར་བཞེས། །དབང་དང་དངོས་གྲུབ་མ་ལུས་སྩལ་དུ་གསོལ། །གསུང་གི་དབང་ཕྱུག་སྣང་བ་མཐའ་ཡས་སྐུ། །འཆི་མེད་ཚེ་དབང་མགོན་པོ་འོད་དཔག་མེད། །དུས་གསུམ་སངས་རྒྱས་ཐམས་ཅད་གསུང་ལས་སྤྲུལ། །བསྒྲུབ་མཆོག་བདག་ལ་དབང་བསྐུར་བྱིན་གྱིས་བརློབས། །གཉིས་མེད་དོན་གྱིས་དངོས་གྲུབ་བདག་ལ་སྩོལ། །པད་མ་དབང་གི་ལྷ་ཚོགས་ལ། །ཕྱི་ཡི་མཆོད་པ་འབུལ་བ་ནི། །རྒྱལ་བའི་སྐུ་ལ་ཉོན་མོངས་མི་མངའ་ཡང་། །སེམས་ཅན་ཉོན་མོངས་བག་ཆགས་སྦྱང་སླད་དུ། །སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །ཁམས་གསུམ་གནས་པའི་དྲི་མ་དག་གྱུར་ཅིག །ཨོཾ་མ་ཎི་པད་མེ་ཧཱུྃ། ཨརྒཾ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། ཚུལ་ཁྲིམས་དྲི་ལྡན་སྤོས་མཆོད་དམ་པ་འདི། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས། །སངས་རྒྱས་ཞིང་དུ་སྤོས་དྲི་ངད་ལྡན་པའི། །རྒྱལ་བ་རྒྱ་མཚོའི་ཚོགས་རྣམས་མཉེས་གྱུར་ཅིག །ཨོཾ་མ་ཎི་པད་མེ་ཧཱུྃ། དྷུ་པེ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། དཀྱིལ་འཁོར་ཀུན་དུ་རྒྱལ་བ་མཉེས་གྱུར་པའི། །ལྷ་རྫས་དབྱིབས་ལེགས་མེ་ཏོག་དམ་པ་འདི། །ནམ་མཁའ་གང་བར་སེམས་ཀྱིས་མངོན་སྤྲུལ་ནས། གཞལ་ཡས་ཁང་དུ་སྤྲིན་བཞིན་གཏིབས་གྱུར་ཅིག །ཨོཾ་མ་ཎི་པད་མེད་ཧཱུྃ །པུས་པེ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། ཉོན་མོངས་དུག་བསྲེག་མ་རིག་མུན་སེལ་བའི། །ཤེས་རབ་གཟི་ལྡན་དཔལ་གྱི་སྒྲོན་མ་འདི། །སྤྲིན་མེད་མཁའ་ལ་ཉི་ཤར་ཇི་བཞིན་དུ། །འོད་ཟེར་སྣང་བས་ཕྱོགས་བཅུར་གསལ་གྱུར་ཅིག །ཨོཾ་མ་ཎི་པད་མེ་ཧཱུྃ། ཨ་ལོ་ཀེ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། སྟོང་གསུམ་ཀུན་དུ་དྲི་དང་ངད་ལྡན་པའི། །སྤོས་དང་སྨན་སྦྱར་ཆུ་གཙང་རྒྱལ་བའི་ཁྲུས། །ཡེ་ཤེས་སྤྲིན་དཔུང་མཁའ་ལ་ཐུགས་རྗེའི་ཆར་རྒྱུན་གྱིས། །མི་གཙང་དྲི་མའི་ཚོགས་རྣམས་དག་གྱུར་ཅིག ཨོཾ་མ་ཎི་པད་མེ་ཧཱུྃ། གྷན་དྷེ་པུ་ཙ་མེ་ག་ས་མུན་ཏྲ་ཀྵྨྱ་ར་ཎ་ས་མ་ཡེ་ཧཱུྃ། རྒྱལ་བའི་སྐུ་ལ་བཀྲེས་པ་མི་མངའ་ཡང་། །འགྲོ་བའི་དོན་དུ་ལྷ་རྫས་བདུད་རྩིའི་བཤོས་། དག་ཅིང་གཙང་མར་བཤམས་ཏེ་འབུལ་ལགས་ན། །བསོད་ནམས་ཞིང་གྱུར་རྣམས་ཀྱིས་བཞེས་སུ་གསོལ། །ཨོཾ་མ་ཎི་པད་མེ་ཧཱུྃ། ནེ་པེ་ཏེ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། དྲིལ་ཆེན་སིལ་སྙན་རྣམ་གྲོལ་ཚངས་པའི་དབྱངས། །བསམ་དག་ངག་གིས་བསྟོད་དེ་གུས་མཆོད་འབུལ། །ས་བཅུ་རིམས་ཀྱིས་བགྲོད་ནས་སངས་རྒྱས་སར། །ཚོགས་གཉིས་རྫོགས་ནས་ཆོས་ཀྱི་རྒྱལ་པོར་ཤོག །ཨོཾ་མ་ཎི་པད་མེ་ཧཱུྃ། ཤ་པ་ཏ་པུ་ཙ་མེ་ག་ས་མུན་ཏྲ་ཀྵྨྱ་ར་ན་ས་མ་ཡེ་ཧཱུྃ། ཧཱུྃ་དུས་གསུམ་སངས་རྒྱས་ཡུམ་གཅིག་མ། །ཐུགས་རྗེའི་མངའ་བདག་འགྲོ་ལ་གཟིགས། །གསང་བ་ཡེ་ཤེས་མཁའ་འགྲོ་མ། །སྐུ་མདོག་དམར་མོ་དབང་གི་ཚུལ། ཚད་མེད་རྣམ་བཞིས་འགྲོ་དོན་མཛད། །རྣམ་རྟོག་རྩད་གཅོད་གྲི་གུག་གཡས། །འགྲོ་བ་དབང་བསྡུད་ཐོད་ཁྲག་གཡོན། །སྐྱེ་ཤི་རྩད་གཅོད་རལ་གྲི་གཡས། །དུག་གསུམ་རྩད་གཅོད་ཁ་ཊྃ་གཡོན། །ཐབས་དང་ཤེས་རབ་བརྐྱང་བསྐུམ་བཞུགས། །འདོད་ཡོན་རང་དག་རུས་པས་བརྒྱན། །གཞོན་ནུའི་ཆ་ལུགས་ཅུང་ཟད་ཁྲོ། །ཐུགས་རྗེ་ཆགས་པས་དབང་དུ་བསྡུད། །ནམ་མཐོང་དྲན་པས་ཡེ་ཤེས་བསྐྱེད། །ཐུགས་རྗེའི་སྤྱན་གྱིས་འགྲོ་ལ་གཟིགས། །དབང་དང་དངོས་གྲུབ་བདག་ལ་སྩོལ། །རྡོ་རྗེ་རིགས་ཀྱི་མཁའ་འགྲོ་མ། །རྡོ་རྗེ་རིགས་ཀྱི་དངོས་གྲུབ་སྩོལ། །རིན་ཆེན་རིགས་ཀྱི་མཁའ་འགྲོ་མ། །ནོར་དང་བསོད་ནམས་དངོས་གྲུབ་སྩོལ། །པདྨ་རིགས་ཀྱི་མཁའ་འགྲོ་མ། །ཆགས་པ་དབང་བསྡུས་དངོས་གྲུབ་སྩོལ། །ལས་ཀྱི་རིགས་ཀྱི་མཁའ་འགྲོ་མ། །དགྲ་བགེགས་ཚར་གཅོད་དངོས་གྲུབ་གསོལ། །མཁའ་གསང་ཡེ་ཤེས་དངོས་གྲུབ་སྩོལ། །ཆོས་དབྱིངས་ལྷུན་གྲུབ་དངོས་གྲུབ་སྩོལ། །མ་ཧ་མུ་ཏྲའི་དངོས་གྲུབ་སྩོལ། །པད་མ་དབང་གི་ལྷ་ཚོགས་ལ། །ནང་གི་མཆོད་པ་འབུལ་བ་ནི། །དུག་ལྔ་རྣམ་པར་དག་པ་ཡིས། །རིགས་ལྔ་དང་ནི་ཡེ་ཤེས་ལྔ། །ཤ་ཆེན་ལྔ་ཡི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །འབྱུང་བ་ལྔ་པོ་རྣམ་དག་ཅིང་། །མ་མ་ཀི་ལ་སོགས་པ་ཡི། །རིགས་ཀྱི་ཡུམ་ཆེན་འབྱུང་བ་ལྔ། །ཤེས་རབ་དྲི་མེད་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །ཐབས་དང་ཤེས་རབ་གཉིས་མེད་ཅིང་། །ཟུང་འཇུག་བདེ་བ་ཆེན་པོ་ཡི། །ཁ་དོག་རེག་བྱ་ཡིད་འོང་ལྡན། །ཟག་མེད་བདེ་ཆེན་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །དབང་བཞི་བསྐུར་དང་རྒྱུད་བཞི་སྨིན། །ཐུན་མོང་མཆོག་གི་དངོས་གྲུབ་སྩོལ། །ཧཱུྃ་ཐུགས་ཀྱི་ལྷ་མཆོག་རྟ་མགྲིན་དབང་གི་རྒྱལ། །སྐུ་མདོག་དམར་ནག་དྲེགས་པས་དབང་དུ་བསྡུད། །སྤྱན་གྱི་འོད་ཟེར་འགྲོ་ལ་ཐུགས་རྗེས་གཟིགས། །ཞལ་གྱི་འཛུམ་ཚུལ་ཐུགས་རྗེས་ཀུན་ལ་སྙོམས། །མཆེ་བ་གཙིགས་པས་སྐྱེ་ཤི་རྩད་ནས་གཅོད། །དབུ་གཙུགས་རྟ་མགོ་གཞན་གྱིས་འགྲན་དུ་མེད། །རྟ་སྐད་འཚེར་བས་ཁམས་གསུམ་དབང་དུ་བསྡུད། །དབང་བསྡུད་ཕྱག་རྒྱས་སྐྱེ་འགྲོ་ཟིལ་གྱིས་གནོན། །པད་མའི་རྒྱལ་མཚན་འཁོར་བའི་སྐྱོན་དང་བྲལ། །རིན་ཆེན་རྒྱན་ཆས་འདོད་ཡོན་མ་སྤངས་དག །ཞབས་གཉིས་བརྐྱང་བསྐུམ་ཡེ་ཤེས་སེམས་དཔའི་ཚུལ། །དབང་ཆེན་རྟ་མཆོག་སྐུ་ལ་ཕྱག་འཚལ་བསྟོད། །བསྒྲུབ་མཆོག་བདག་ལ་དབང་བསྐུར་དངོས་གྲུབ་སྩོལ། །སྐུ་གསུང་ཐུགས་ཀྱི་དངོས་གྲུབ་སྩོལ། །བསྡུ་བ་རྣམ་བཞིས་འཇིག་རྟེན་དབང་དུ་བསྡུད། །འཇིག་རྟེན་ཟིལ་གནོན་འཕྲིན་ལས་དངོས་གྲུབ་སྩོལ། །པད་མ་དབང་གི་ལྷ་ཚོགས་ལ། །གསང་བའི་མཆོད་པ་འབུལ་བ་ནི། །ཐབས་དང་ཤེས་རབ་དབྱེར་མེད་ཅིང་། །ཡབ་ཡུམ་སྤྱོད་པའི་སྦྱོར་བ་ལས། །ཟག་མེད་བདེ་བ་ཆེན་པོ་ཡིས། །ཡེ་ཤེས་བདུད་རྩིའི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །པད་མ་རང་བྱུང་མེ་ཏོག་ལས། །རག་ཏ་རང་བྱུང་བདེ་བའི་གནས། །ཤ་ཆེན་གསུར་དང་བདུག་སྤོས་དང་། ཞུན་ཆེན་སྣང་གསལ་སྒྲོན་མེ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །ལྷན་སྐྱེས་བདེ་བ་ཆེན་པོ་ཡི། །དགའ་བ་བཞི་དང་བདེ་བ་བརྒྱད།། ཟག་མེད་ཉམས་ཀྱིས་བརྒྱན་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །ལོངས་སྤྱོད་རྫོགས་པའི་དཀྱིལ་འཁོར་དུ། །དཔའ་བོའི་ཚོགས་དང་དཔའ་མོའི་ཚོགས། །གཉིས་མེད་བདེ་བར་རོལ་པ་ལས། །ལོངས་སྤྱོད་རྫོགས་པའི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །ལོངས་སྤྱོད་རྫོགས་པའི་དཀྱིལ་འཁོར་དུ། །དཔའ་བོའི་ཚོགས་དང་དཔའ་མོའི་ཚོགས། གཉིས་མེད་བདེ་བར་རོལ་པ་ལས། །ལོངས་སྤྱོད་རྫོགས་པའི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། དབང་བཞི་བསྐུར་དང་རྒྱུད་བཞི་སྨིན། །གསང་བ་བླ་མེད་དངོས་གྲུབ་སྩོལ། །ཧཱུྃ་འགྲོ་བ་ཀུན་ལ་ཐུགས་རྗེས་མཉམ་པར་གཟིགས། །ཉི་མའི་འོད་ཟེར་སྐུ་ལ་ཕྱག་འཚལ་བསྟོད། །ཆགས་རབ་དོན་གྱིས་འགྲོ་བ་དབང་དུ་བསྡུད། །རྡོ་རྗེ་ཕག་མོའི་སྐུ་ལ་ཕྱག་འཚལ་བསྟོད། །སྔགས་ཀྱི་ལས་མཛད་མཛེས་བསྟོད་མཁའ་འགྲོའི་ཚུལ། །རྒྱ་མཚོའི་གླིང་གི་མཁའ་འགྲོའི་སྐུ་ལ་ཕྱག་འཚལ་བསྟོད། །ལས་ཀྱི་མཁའ་འགྲོའི་བཀའ་བསྡོད་བྱིན་བརླབས་ཐོག་མེད་འབེབས། །རྡོ་རྗེ་འཕྲ་མེན་སྐུ་ལ་ཕྱག་འཚལ་བསྟོད། །བསྟན་པའི་རུ་འཛིན་གདུག་པའི་དགྲ་འདུལ་མ། །མཁའ་འགྲོ་བདུད་འདུལ་སྐུ་ལ་ཕྱག་འཚལ་བསྟོད། །རྣལ་འབྱོར་འཁོར་སྐྱོང་བྱིན་བརླབས་ཆར་ལྟར་འབེབས། །མཁའ་འགྲོ་བཞི་ཡི་སྐུ་ལ་ཕྱག་འཚལ་བསྟོད། །ཉི་ཤུ་རྩ་བཞིའི་གནས་མཆོག་ནས། །རིགས་བཞིའི་མཁའ་འགྲོ་ལ་སོགས་པའི། །ཕྱི་ནང་མཁའ་འགྲོ་རྒྱ་མཚོ་ལ། །གུས་པའི་ཡིད་ཀྱིས་ཕྱག་འཚལ་བསྟོད། དབང་བསྐུར་བྱིན་གྱིས་བརླབ་ཏུ་གསོལ། །པད་མ་དབང་གི་ལྷ་ཚོགས་ལ། །དེ་ཁོ་ན་ཉིད་ཀྱི་མཆོད་པ་འབུལ་བ་ནི། །ཆོས་སྐུ་སྐྱེ་བ་མེད་པ་ལས། །རང་བྱུང་ཡེ་ཤེས་མཆོད་པར་འབུལ། །དུས་གསུམ་སྐྱེ་འགག་མེད་པ་ལ། །སྣང་བ་སྣ་ཚོགས་མཆོད་པར་འབུལ། ཕྱག་རྒྱ་ཆེན་པོའི་དངོས་གྲུབ་སྩོལ། །ཐབས་དང་ཤེས་རབ་དབྱེར་མེད་ཅིང་། །ལྷན་སྐྱེས་ཡེ་ཤེས་བདེ་བ་ཆེ། །ཟག་མེད་བདེ་ཆེན་མཆོད་པར་འབུལ། དབང་བཞི་རྫོགས་པར་མཛད་དུ་གསོལ། །དབྱིངས་དང་ཡེ་ཤེས་རོ་མཉམ་ཞིང་། །འགག་མེད་ཡེ་ཤེས་ལྔ་དང་ལྡན། །ཀུན་མཁྱེན་ཡེ་ཤེས་མཆོད་པར་འབུལ། །ངོ་བོ་ཉིད་ཀྱིས་དངོས་གྲུབ་སྩོལ། །ཧཱུྃ་མི་འགྱུར་བདུད་ཀྱི་སྡེ་བཅོམ་རྡོ་རྗེའི་རིགས། །རྡོ་རྗེ་མཁའ་འགྲོའི་སྐུ་ལ་ཕྱག་འཚལ་བསྟོད། །རེ་སྐོང་བདུད་རྩིའི་ཆར་འབེབས་རིན་ཆེན་རིགས། །རིན་ཆེན་མཁའ་འགྲོའི་སྐུ་ལ་ཕྱག་འཚལ་བསྟོད། ཆགས་པ་ཐམས་ཅད་དབང་སྡུད་པད་མའི་རིགས། །པདྨ་མཁའ་འགྲོའི་སྐུ་ལ་ཕྱག་འཚལ་བསྟོད། །དོན་གྲུབ་གདུག་པ་འདུལ་མཛད་ལས་ཀྱི་རིགས། །ལས་ཀྱི་མཁའ་འགྲོའི་སྐུ་ལ་ཕྱག་འཚལ་བསྟོད། །གདུག་པ་འདུལ་མཛད་རྡོ་རྗེ་རིགས་སུ་སྤྲུལ། །རྡོ་རྗེ་གིང་ཆེན་སྐུ་ལ་ཕྱག་འཚལ་བསྟོད། །འདོད་པའི་དངོས་གྲུབ་འབྱུང་བར་བྱེད་པ་ཡི། །རིན་ཆེན་གིང་ཆེན་སྐུ་ལ་ཕྱག་འཚལ་བསྟོད། །ཆགས་རབ་དོན་གྱིས་འགྲོ་བ་དབང་དུ་བསྡུད། །པད་མ་གིང་ཆེན་སྐུ་ལ་ཕྱག་འཚལ་བསྟོད། །ལས་ཀྱི་མཐའ་ཡིས་བསྟན་པའི་རུ་ཏྲ་འདུལ། །ལས་ཀྱི་གིང་ཆེན་སྐུ་ལ་ཕྱག་འཚལ་བསྟོད། །དུས་གསུམ་སངས་རྒྱས་ཐམས་ཅད་ཀྱི། །དགོངས་པ་ལེན་པའི་པད་མ་འབྱུང་གནས་ཀྱིས། །བདག་དང་མོས་པའི་གང་ཟག་ལ། །བྱིན་རླབས་ཆུ་བོའི་རྒྱུན་བཞིན་ཕོབ། །ཚོགས་གཞུང་བཞིན་བྱིན་གྱིས་བརླབ། ཚོགས་བཏབ་པའི་ཆོ་ག་ནི། ཧཱུྃ་ཆོས་ཀྱི་དབྱིངས་ཀྱི་ཕོ་བྲང་ནས། །སློབ་དཔོན་པད་མ་དབང་གི་ལྷ། །རྣམ་འཕྲུལ་མཁའ་འགྲོ་སྤྲིན་ལྟར་གཏིབས། འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་གྱིས་བརླབ་ཏུ་གསོལ། །པད་མ་དབང་གི་ཟླ་གམ་ནས། །མགོན་པོ་ཚེ་དབང་འོད་དཔག་མེད། རྒྱལ་བ་རྒྱ་མཚོའི་དབུས་ན་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་གྱིས་བརླབ་ཏུ་གསོལ། །མཁའ་སྤྱོད་དག་པའི་གཞལ་ཡས་ནས། །གསང་བ་ཡེ་ཤེས་ཌ་ཀི་མ། །མཁའ་འགྲོ་རྒྱ་མཚོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་གྱིས་བརླབ་ཏུ་གསོལ། །མེ་དཔུང་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་པོ་རྟ་མཆོག་དཔལ། དཔའ་བོ་རྒྱ་མཚོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་གྱིས་བརླབ་ཏུ་གསོལ། །ས་འོག་ས་སྟེང་ས་བླ་ཡི། །གནས་གསུམ་མཁའ་འགྲོའི་ཚོགས་རྣམས་ཀྱང་། །འདིར་སྤྱོན་ཚོགས་ཀྱི་མཆོད་པ་བཞེས། །དབང་རྣམས་བསྐུར་ལ་བྱིན་གྱིས་རློབས། གནས་མཆོག་ཉི་ཤུ་རྩ་བཞི་ནས། །བཞུགས་པའི་དཔའ་བོ་མཁའ་འགྲོ་རྣམས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་གྱིས་བརླབ་དུ་གསོལ། །དུར་ཁྲོད་ཆེན་པོ་གནས་བརྒྱད་ནས། །འཇིག་རྟེན་མཁའ་འགྲོ་རྫུ་འཕྲུལ་ཅན། འདིར་གཤེགས་ཚོགས་ཀྱི་མཆོད་པ་བཞེས། །ཕོ་ཉ་ལས་མཁན་མཛད་དུ་གསོལ། །དམ་ཚིག་ཆེན་པོའི་གཞལ་ཡས་ནས། །དམ་ཅན་རྒྱ་མཚོ་སྐུ་བསྐྱོད་འཚལ། །འདིར་གཤེགས་རྒྱན་གྱི་གཏོར་མ་བཞེས། །འཕྲིན་ལས་རྣམ་བཞི་བསྒྲུབ་ཏུ་གསོལ། །ཅེས་ཚོགས་བཏབ་ཅིང་འབུལ་བར་བྱའོ། །བཤགས་པ་དང་། གཤེགས་སུ་གསོལ་བ་དང་། བསྔོ་བ་དང་། སྨོན་ལམ་རྣམས་གཞུང་ན་ཡོད་པ་བཞིན་བྱའོ། །དབང་བསྐུར་ཚོགས་མཆོད་གང་བྱས་ནའང་སྤྱན་འདྲེན་ལ་སོགས་པ་རྒྱས་བསྡུས་ཅི་རིགས་པར་བྱའོ། །ཐུགས་རྗེ་ཆེན་པོ་རྒྱལ་བ་རྒྱ་མཚོའི་མཆོད་འབུལ་ལག་ལེན་ཡེ་ཤེས་སྒྲོན་མེ་ཞེས་བྱ་བ་རང་བྱུང་རྡོ་རྗེས་སྦྱར་བ་རྫོགས་སོ།། ༈ །།རྒྱལ་བ་རྒྱལ་མཚོའི་དབང་ཆོག་བཞུགས། ཐུགས་རྗེ་ཆེན་པོ་ལ་ཕྱག་འཚལ་ལོ། །རྒྱལ་བ་རྒྱ་མཚོའི་དཀྱིལ་འཁོར་དུ་དབང་བསྐུར་བར་བྱེད་པ་ལ་དོན་གསུམ་སྟེ། སློབ་དཔོན་དང་། སློབ་མ་དང་། ཆོ་གའི་རིམ་པའོ། །དེ་ལ་གསུམ་སྟེ། སའི་ཆོ་ག་དང་། སྟ་གོན་དང་། དངོས་གཞིའོ། །དང་པོ་ནི། སའི་ལྷ་མོ་དང་། གཞི་བདག་ལ་གཏོར་མ་སྦྱིན། བདེན་པ་བདར། གནང་བ་བྱིན་བར་བསམ་པ་ཙམ་གྱིས་ཀྱང་ཆོག དཀྱིལ་འཁོར་གཞན་ནས་བཤད་པ་ལྟར་རྒྱས་པར་བྱེད་ན་བཟང་། ལྷ་ཁང་། ཁང་བཟང་། བྲག་གི་སྟེང་། ཆུ་བོའི་འགྲམ། བ་གླང་གི་ལྷས་རྣམས་སུ་ས་ཆོག་བྱེད་མི་དགོས། བསྐྱེད་རིམས་བསྒོམས་པ་ལ་སྔགས་བརྒྱ་བཟླས་ཏེ། ཧཱུྃ་ཧཱུྃ་ཞེས་བརྗོད་ནས་ལག་པས་ས་ལ་རེག་ནས་བདག་གིར་བྱའོ། །སྟ་གོན་ལ་བཞི་སྟེ། ལྷ་དང་། བུམ་པ་དང་། སྦྱིན་བསྲེག་དང་། སློབ་མའོ། །དང་པོ་ནི། དཀྱིལ་འཁོར་གྱི་དབུས་སུ་དྲི་བཟང་ཀྱིས་ཆག་ཆག་བཏབ་ལ། ལྷ་གྲངས་དང་མཉམ་པའི་མེ་ཏོག་གི་ཚོམ་བུ་བྱས་ལ། ལྷ་བསྐྱེད་ཅིང་མཆོད་པ་དང་བསྟོད་པ་བྱས་ནས་གསོལ་བ་གདབ་པ་ནི། གཉིས་མེད་ཡེ་ཤེས་ལས་བྱུང་བ། །སྟོན་པའི་གཙོ་བོ་སྤྱན་རས་གཟིགས། །སངས་རྒྱས་བྱང་ཆུབ་སེམས་དཔའི་ཚོགས། །ཐམས་ཅད་བདག་ལ་དགོངས་སུ་གསོལ། །ལྷ་རྣམས་ལ་ནི་མཆོད་པ་དང་། །སེམས་ཅན་རྣམས་ལ་ཕན་པའི་ཕྱིར། །བདག་མིང་འདི་ཞེས་བགྱི་བ་ཡིས། དཀྱིལ་འཁོར་དམ་པ་འབྲི་བར་འཚལ། །རྗེས་སུ་བརྩེ་བར་ཉེར་དགོངས་ནས། །གནང་བ་རུ་ནི་མཛད་དུ་གསོལ། །ཞེས་ལན་གསུམ་བརྗོད་དོ། །གཉིས་པ་བུམ་པ་ལྷག་པར་གནས་པ་ནི། ལྷ་གྲངས་དང་མཉམ་པ འམ། གཉིས་ཀྱང་རུང་སྟེ། ཁ་བརྒྱན་མགུལ་ཆིངས་བྱས་ལ། ཆུ་གཙང་མ་དང་། འོ་མ་དང་། སྦྲང་དང་། བུ་རམ་བུམ་སྨན་དང་བཅས་པས་བཀང་། རྣམ་རྒྱལ་བུམ་པ་དབུས་སུ་བཞག་ལ་དེའི་ཁར་ཐོད་པ་བདུད་རྩིས་བཀང་ལ། དེའི་སྟེང་དུ་སིན་དྷུ་རའི་མེ་ལོང་བཞག གཞན་རྣམས་ཕྱོགས་མཚམས་སུ་བཞག དེ་རྣམས་ལ་ལྷ་བསྐྱེད། མཆོད་པ་དང་བསྟོད་པ་ལ་སོགས་པ་བྱས་ལ། ལྷ་རྣམས་འོད་དུ་ཞུ་བར་བསམས་ལ་གསོལ་བ་གདབ་བོ། །ལས་བུམ་དུ་རྟ་མགྲིན་བསྐྱེད་ལ། བར་ཆོད་ཀྱི་བགེགས་བསྲུང་བ་དང་། ལས་ཐམས་ཅད་བསྒྲུབ་པའི་གསོལ་བ་གདབ་བོ། །གསུམ་པ་སྦྱིན་བསྲེག་སྟ་གོན་ནི། ཆོ་ག་གཞན་ནས་བཤད་པ་བཞིན་དུ་ལོང་ཡོད་ན་བྱའོ། །བཞི་པ་སློབ་མ་ལྷག་པར་གནས་པ་ལ་ཡོལ་བའི་ཕྱི་རོལ་དུ་ལས་ཀྱི་བུམ་པས་སློབ་མ་རྣམས་ལ་ཁྲུས་བྱས་ལ། གྲལ་ལ་བཀོད་ནས་སློབ་མ་ལ་བར་ཆོད་བྱེད་པའི་བགེགས་ལ་གཏོར་མ་བཏང་ནས། མཎྜྻལ་ཕུལ་ལ། དེ་ནས་སློབ་མ་རྣམས་ལ་འདི་སྐད་བཤད་དེ། ཁྱེད་རྣམས་ཐུགས་རྗེ་ཆེན་པོའི་དཀྱིལ་འཁོར་དུ་དབང་བསྐུར་བ་འདོད་པ་ཤིན་ཏུ་བཟང་། སངས་རྒྱས་ཀྱིས་གསུངས་པའི་ཆོས་ཐམས་ཅད་ཐེག་པ་ཆེ་ཆུང་གཉིས་དང་། སྡེ་སྣོད་གསུམ་དང་རྒྱུད་སྡེ་བཞིར་གསུངས་པ་ལས། ཐུགས་རྗེ་ཆེན་པོ་འདི་ནི་རྒྱུད་སྡེ་བཞིའི་རྩ་བ་ཞག་བདུན་ཙམ་གྱིས་དངོས་གྲུབ་ཐོབ་པར་བྱེད་པ་ཡིན་ཏེ། བྱ་སྤྱོད་ཀྱི་རྒྱུད་དང་མཐུན་པའི་ཨ་མོ་གྷ་པ་ཤའི་རྒྱུད་དང་། ཐུགས་རྗེ་ཆེན་པོའི་གཟུངས་དང་རྟོག་པ་རྣམས་ཡིན། རྣལ་འབྱོར་གྱི་རྒྱུད་དང་མཐུན་པ་ནི། དཔལ་པད་མ་ཅོད་པན་གྱི་རྒྱུད་དང་སྒོ་དྲུག་པ་རྣམས་ཡིན། རྣལ་འབྱོར་བླ་ན་མེད་པའི་རྒྱུད་ནི། ཕ་བླ་ན་མེད་པ་པད་མ་རྒྱལ་པོ་དང་། མ་བླ་ན་མེད་པ་དང་མཐུན་པའི་པད་མ་ཟབ་པའི་རྒྱུད་གསུངས་པ་ལས། འདི་ནི་སློབ་དཔོན་ཆེན་པོ་པད་མ་འབྱུང་གནས་ཀྱིས་བྷ་གྷ་ལའི་ཕག་མོ་ལ་བརྒྱུད་དེ་ཤིན་ཏུ་ཟབ་པ་ཡིན་པས། དཀྱིལ་འཁོར་འདིར་འཇུག་པ་ལ་སྔོན་དུ་གསོལ་བ་གདབ་པ་དང་། ཡན་ལག་བདུན་པ་བྱ་དགོས་པས་མདུན་གྱི་ནམ་མཁར། བླ་མ་དང་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ལུས་ལོངས་སྤྱོད་ཐམས་ཅད་འབུལ་ལ། ཕྱག་འཚལ། སྡིག་པ་བཤགས་དགེ་བ་ལ་རྗེས་སུ་ཡིད་རང་། ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་གསོལ་གདབ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ལམ་ལ་བརྟེན་ནས། བདག་གི་ལུས་ཀྱང་འཕགས་པ་སྤྱན་རས་གཟིགས་ལ་འབུལ། བསོད་ནམས་ཐམས་ཅད་བྱང་ཆུབ་ཏུ་བསྔོ་བའི་ལད་མོ་གྱིས། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །ཐམས་ཅ ད་བདག་ལ་དགོངས་སུ་གསོལ། །འཁོར་བ་ཐོག་མ་མེད་པ་ནས། །ཐ་མ་ད་ལྟ་ཐུག་གི་བར། །འདོད་ཆགས་ཞེ་སྡང་གཏི་མུག་གིས། །ལུས་ངག་ཡིད་གསུམ་སྒོ་ནས་ནི། །སྡིག་པ་དཔག་མེད་བགྱིས་པ་དང་། །བགྱིད་དུ་བསྩལ་དང་ཡིད་རང་དང་། །ཁྱེད་ཀྱི་སྤྱན་སྔར་བཤགས་པ་བགྱི། །སླན་ཆད་བདག་ནི་མི་བགྱིད་དོ། །སངས་རྒྱས་བྱང་ཆུབ་སེམས་དཔའ་དང་། འཕགས་པ་ཉན་ཐོས་རང་རྒྱལ་གྱི། །ཡན་ལག་རྣམས་ཀྱང་བཟུང་བར་བགྱི། །འགྲོ་བ་ཀུན་གྱི་དགེ་བ་ལ། །བདག་ནི་རྗེས་སུ་ཡིད་རང་ངོ་། །བདེ་གཤེགས་ཆོས་སྐུ་ལ་བཞུགས་པ། །འགྲོ་བ་ཀུན་ལ་ཕན་སླད་དུ། །ཆོས་ཀྱི་འཁོར་ལོ་བསྐོར་བར་ནི། །བདག་ནི་རྟག་ཏུ་གསོལ་བ་འདེབས། །བདེ་གཤེགས་མཛད་པ་མཐར་ཕྱིན་ནས། །མྱ་ངན་འདའ་བར་བཞེད་རྣམས་ལ། །བསྐལ་པའི་ཐ་མར་བཞུགས་པར་ནི། །བདག་ནི་རྟག་ཏུ་གསོལ་བ་འདེབས། །བདག་གི་དགེ་བའི་རྩ་བ་གང་། །བགྱིས་སམ་བགྱིད་དུ་བསྩལ་བ་གང་། །རྗེས་སུ་ཡིད་རང་ཐམས་ཅད་ནི། །འགྲོ་བ་ཀུན་གྱིས་ཐོབ་པར་ཤོག །སྤྱན་རས་གཟིགས་དབང་ཐུག་རྗེའི་བདག །བླ་མར་བཅས་པ་ཐམས་ཅད་ལ། །བདག་གིས་ལུས་འདི་ཕུལ་བ་ཡིས། །ཐེག་པ་དམན་ལ་མི་འཇུག་པར། །ཐེག་ཆེན་བླ་ན་མེད་པའི་ལམ། །ཟབ་ཅིང་རྒྱ་ཆེ་བསྟན་དུ་གསོལ། །ཞེས་ལན་གསུམ་བརྗོད་དོ། །དེ་ནས་སྐྱབས་སུ་འགྲོ་བ་ནི། ཐུན་མོང་དང་ཁྱད་པར་གཉིས་ལས། ཐུན་མོང་པ་ནི་ཐམས་ཅད་ཀྱིས་བྱེད་པ་ཡིན་པས་སྔར་ཐོབ་ལ། ཁྱད་པར་གྱི་སྐྱབས་སུ་འགྲོ་བ་ནི་ཐེག་པ་ཆེན་པོའི་གཞིར་གྱུར་པས་གལ་ཆེ་སྟེ། སྐྱབས་སུ་འགྲོ་བའི་ཡུལ། ཡང་དག་པར་རྫོགས་པའི་སངས་རྒྱས་ཆོས་ཀྱི་སྐུ་ཆེན་པོ་དང་། ཐེག་པ་ཆེན་པོའི་ཆོས་ཞི་བ་མྱ་ངན་ལས་འདས་པ་དང་། བྱང་ཆུབ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་ལ་སྐྱབས་སུ་འགྲོ་བའི་ཡུལ་ཡིན་ལ། དུས་ད་ནས་བཟུང་སྟེ་བྱང་ཆུབ་གྱི་སྙིང་པོ་ལ་མཆིས་ཀྱི་བར་དུ། ཆེད་དུ་བྱ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཆེན་པོ་ཐོབ་པར་བྱ་བའི་ཆེད་དུ་སྐྱབས་སུ་འགྲོ་བར་བྱ་བའི་བསམ་པས་ལད་མོ་གྱིས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། དུས་འདི་ནས་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་འཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་མཆོག ཐེག་པ་ཆེན་པོའི་ཆོས་ཞི་བ་མྱ་ངན་ལས་འདས་པ་རྣམས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག བྱང་ཆུབ་སེམས་པའི་དགེ་འདུན་ཕྱིར་མི་ལྡོག་པ་རྣམས་ལ་སྐྱབས་སུ་མཆིའོ། །ཞེས་ལན་གསུམ་དུ་བརྗོད། སྐྱབས་སུ་འགྲོ་བའི་བསླབ་བྱ་དང་། ཕན་ཡོན་རྒྱ་ཆེན་པོ་མདོ་སྡེ་དང་། རྒྱུད་སྡེ་རྣམས་ལས་གསུངས་པས། ད་གཟོད་རིམས་ཀྱིས་ཤེས་པར་གྱིས་ཤིག དེ་ལྟར་སྐྱབས་སུ་སོང་ནས། སེམས་བསྐྱེད་པར་བྱེད་པ་གལ་ཆེ་བས། སེམས་བསྐྱེད་པ་འདི་ནི་བླ་ན་མེད་པའི་བྱང་ཆུབ་ཐོབ་པར་བྱེད་པའི་རྒྱུ་གཞན་དོན་དང་བྱང་ཆུབ་ཀྱི་དོན་འཛིན་པ། དེ་ཉིད་དོན་དུ་གཉེར་བའི་འདུན་པ་དང་མཚུངས་ལྡན་ནི། མཚན་ཉིད་ཡིན་ལ། སྨོན་པ་དང་། འཇུག་པའི་རྣམ་པར་དབྱེ་བ་ཅན་འདི་སྐྱེ་བའི་རྒྱུ་ནི། འཁོར་བར་འཁྱམས་པའི་སེམས་ཅན་ཐམས་ཅད་ལ་སྙིང་རྗེ་ཆེན་པོ་དང་། སྡུག་བསྔལ་བའི་སེམས་ཅན་ལ་སྐྱོབ་པར་བྱེད་པའི་སངས་རྒྱས་རྣམས་ངོ་མཚར་ཆེ་སྙམ་པའི་དད་པ་དང་། བདག་གིས་དེ་ལྟ་བུའི་སངས་རྒྱས་ཐོབ་པར་བྱ། དེའི་ཆེད་དུ་བྱང་ཆུབ་ཏུ་སེམས་བསྐྱེད་ལ། བྱང་ཆུབ་སེམས་དཔའ་རྣམས་དང་མཐུན་པར་ལམ་ཕ་རོལ་ཏུ་ཕྱིན་པ་རྣམས་ལ་བསླབ་པར་བྱ་སྟེ། སེམས་ཅན་མ་བསྒྲལ་བ་རྣམས་བསྒྲལ་བ་དང་། མ་གྲོལ་བ་རྣམས་གྲོལ་བ་དང་། དབུགས་མ་བྱུང་བ་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། སྙམ་པས་ལད་མོ་བྱེད་དུ་བཅུག་སྟེ། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་སློབ་དཔོན་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །སེམས་ཅན་རྣམས་ཀྱི་དོན་སླད་དུ། །བྱང་ཆུབ་མཆོག་ཏུ་ཐུགས་བསྐྱེད་ལྟར། །དེ་བཞིན་བདག་གི་སེམས་བསྐྱེད་དོ། །ཇི་ལྟར་དུས་གསུམ་མགོན་པོ་རྣམས། །བསོད་ནམས་ཡེ་ཤེས་བྱང་ཆུབ་ལམ། །ཐབས་དང་ཤེས་རབ་གོམས་པས་བགྲོད། །དེ་བཞིན་བདག་གིས་ལམ་བགྲོད་དོ། །ཇི་ལྟར་དུས་གསུམ་མགོན་པོ་རྣམས། །ཐམས་ཅད་མཁྱེན་པར་སངས་རྒྱས་ནས། །མཁའ་མཉམ་སེམས་ཅན་དོན་མཛད་ལྟར། །དེ་བཞིན་བདག་གི་དོན་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། །དབུགས་མ་བྱུང་རྣམས་དབུགས་དབྱུང་ཞིང་། འགྲོ་ཀུན་མྱ་ངན་འདས་ལ་དགོད། །ཀུན་ཀྱང་སངས་རྒྱས་ཐོབ་པར་ཤོག །ཅེས་ལན་གསུམ་བརྗོད་དོ། །འདི་ནི་ཕ་རོལ་ཏུ་ཕྱིན་པ་ནས་གསུངས་པ་དང་མཐུན་པ། འདི་ཡི་བསླབ་པར་བྱ་བ་དང་། ཕན་ཡོན་རྒྱ་ཆེན་པོ་རྣམས་ཀྱང་ད་གཟོད་ཤེས་པར་བྱས་ཏེ་བསླབ་པར་བྱའོ། །ད་ནི་བྱ་བ་དང་སྤྱོད་པ་དང་། རྣལ་འབྱོར་གྱི་རྒྱུད་དང་མཐུན་པར་འཇུག་པར་བྱ་སྟེ། དང་པོར་སྤྱི་བོར་རྡོ་རྗེ་སེམས་དཔའ་བསྒོམ་སྟེ། ཐུགས་ཀ་ནས་འོད་ཟེར་བྱུང་པས་སྒྲིབ་པ་དག་པར་བསམ་ཞིང་ཡི་གེ་བརྒྱ་པ་ཚར་རེ་བཟླས་པར་བྱའོ། །དེ་ནས་རྣལ་འབྱོར་གྱི་རྒྱུད་ལས་གསུངས་པའི་རིགས་ལྔའི་སྡོམ་པ་ཡང་བསྒྲག་པར་བྱ་སྟེ། དེ་བཞིན་གཤེགས་པ་རྣམ་པར་སྣང་མཛད་ཀྱི་དམ་ཚིག་དང་སྡོམ་པ་ནི། སྐྱབས་སུ་འགྲོ་བ་དང་སེམས་བསྐྱེད་པ་བྱས་ནས། སྡོམ་པའི་ཚུལ་ཁྲིམས་དང་། དགེ་བའི་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་རྣམས་འཛིན་པ་ཡིན་ལ། མི་བསྐྱོད་པའི་རིགས་ཀྱི་རྡོ་རྗེའི་དམ་ཚིག་ནི། རྡོ་རྗེ་དྲིལ་བུའི་ཕྱག་རྒྱ་ཞེས་བྱ་བ། ཕྱི་རྫས་ཀྱི་རྡོ་རྗེ་དྲིལ་བུ་དང་། ནང་རྩ་རླུང་དང་། གསང་བ་བདེ་བ་དང་སྟོང་པའི་དམ་ཚིག་འཛིན་ཅིང་། བླ་མ་ལ་སངས་རྒྱས་དང་འདྲ་བར་འཛིན་པ་ཡིན་ལ། རིན་ཆེན་འབྱུང་ལྡན་གྱི་རིན་པོ་ཆེའི་རིགས་ཀྱི་དམ་ཚིག་ནི། ཉིན་རེ་བཞིན་དུ་ཟང་ཟིང་གི་སྦྱིན་པ་དང་ཆོས་དང་། སྐྱབས་ཀྱི་སྦྱིན་པ་དང་། བྱམས་པ་ཆེན་པོའི་སྦྱིན་པ་དུས་དྲུག་ཏུ་སྦྱིན་པའོ། །འོད་དཔག་མེད་པའི་པད་མའི་རིགས་ཀྱི་དམ་ཚིག་ནི་ཕྱི་ཉན་ཐོས་ཀྱི་ཐེག་པ་དང་། ནང་ཕ་རོལ་ཏུ་ཕྱིན་པ་དང་། གསང་སྔགས་རྡོ་རྗེའི་ཐེག་པ་རྣམས་མ་འདྲེས་པར་འཛིན་པ་རྣམས་ཡིན་ལ། དོན་ཡོད་གྲུབ་པའི་ལས་ཀྱི་རིགས་ཀྱི་དམ་ཚིག་ནི། ཉིན་རེ་བཞིན་དུ་མཆོད་པ་དང་། བསྟོད་པ་དང་། བཟའ་བ་དང་། སྤྱོད་ལམ་གྱི་དམ་ཚིག་ལ་སོགས་པ་རྣམས་འཛིན་པ་ཡིན་ལ། འདི་རྣམས་ཐམས་ཅད་བསྒྲུབ་པར་ནུས་ན་ནི། མྱུར་དུ་སངས་རྒྱས་ཐོབ་པ་ཡིན་ལ། གལ་ཏེ་ཐམས་ཅད་བསྒྲུབ་མི་ནུས་ན་ཡང་། སངས་རྒྱས་ཀྱི་དམ་ཚིག་ལ་སོགས་པ་གང་བསྲུང་ནུས་པ་རྣམས་ནི་བླངས་ནས་བསྲུང་། བསྲུང་མི་ནུས་པ་རྣམས་ཀྱང་ད་གཟོད་བདག་གིས་ཅི་ནུས་ཀྱིས་བླངས་ནས་བསྲུང་སྙམ་པའི་བསམ་པས་ལད་མོ་གྱིས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་གྱིས། །སངས་རྒྱས་རྣལ་འབྱོར་སྡོམ་པ་ལ། སྡོམ་པ་ཡིས་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་རྣམས། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །དབང་གོང་མ་མི་བྱེད་ན་དེ་ཡན་ཆད་ཀྱིས་ཆོག་གོ །དབང་གོང་མ་བྱེད་ན་གཞན་དག་ཀྱང་བཟུང་བར་བྱ་སྟེ། རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིག་ཆེན་རིགས་མཆོག་ཆེན་པོ་ལ། །ཉིན་རེ་བཞིན་དུ་དུས་དྲུག་ཏུ། །ཟང་ཟིང་ཆོས་དང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་པ། །པད་མའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་ཆོས་སོ་སོར་བཟུང་བར་བགྱི། །ལས་ཀྱི་རིགས་མཆོག་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །ཀུན་ནས་སོ་སོར་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། །དབུགས་མ་ཕྱུང་རྣམས་དབུགས་དབྱུང་ཞིང་། །འགྲོ་ཀུན་མྱ་ངན་འདས་ལ་དགོད། །ཞེས་བཟུང་ངོ་། །དེ་ནས་རང་ཉིད་ལྷར་ལྷག་པར་མོས་པ་བྱ་སྟེ། རང་ཉིད་སྤྱན་རས་གཟིགས་སྐུ་མ དོག་དཀར་པོ། ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་འོག་མ་འཕྲེང་བ། གཡོན་གྱི་འོག་མ་པད་མ་འཛིན་པར་བསྒོམ་ལ། ཐུགས་ཀར་ཡི་གེ་ཧྲཱི་དཀར་པོ་བསམ་སྟེ། འོད་ཟེར་འཕྲོས་པའི་སེམས་ཅན་ཐམས་ཅད་ཀྱི་སྡིག་སྒྲིབ་དག་པར་བསམས་ལ། ཨོཾ་མ་ཎི་པད་མེ་ཧཱུྃ། ཞེས་བརྗོད། འདི་ལྟར་བསྒོམས་པས་ཀྱང་ལུས་ངག་ཡིད་གསུམ་གྱི་སྡིག་སྒྲིབ་དག་པ་དང་། བར་ཆོད་ཀྱི་བགེགས་བསྲུང་བ་དང་། དངོས་གྲུབ་ཐོབ་པར་བཤད་དེ། པད་མ་རྒྱལ་པོའི་རྒྱུད་ལས། ཨོཾ་མ་ཎི་པད་མེད་ཧཱུྃ། རྒྱ་མཚོ་ནང་གི་རིན་ཆེན་བཞིན། །ལན་གཅིག་མོས་པས་བརྗོད་པ་ན། །སེམས་ཅན་དམྱལ་བའི་ནད་ལས་ཐར། །ལན་གཉིས་བརྗོད་པས་ཡིད་དྭགས་སུ། །འགྲོ་བའི་སྒོ་ཡང་འགག་པར་འགྱུར། །ལན་གསུམ་དུད་འགྲོའི་སྒོ་ཡང་འགག །འདོད་པའི་ཡོན་ཏན་ལྔ་སྤྱོད་ཀྱང་། །འདི་དང་མ་བྲལ་གཙང་བར་གནས། །བཟའ་དང་བཏུང་བ་ལོངས་སྤྱོད་ཀྱང་། །འདི་ཉིད་དྲན་ནས་ཉེས་པ་མེད། །བདུད་ཀྱི་བར་དུ་གཅོད་པ་ཀུན། །སྔགས་ཀྱི་རྒྱལ་པོ་བགྲངས་པས་ཞི། །ཞེས་བྱ་བ་གསུངས་པས་ན། སོ་ཤིང་ལ་སོགས་པ་མ་བྱས་ཀྱང་རུང་། བྱེད་ན་དཀྱིལ་འཁོར་གཞན་ནས་བཤད་པ་ལྟར། སོ་ཤིང་དྲི་ཞིམ་པོའི་ཤིང་ལ་སོར་བཅུ་གཉིས་པ་བྱས་ལ། སོ་ཤིང་གིས་མཎྜྻལ་ལ། ཨོཾ་བཛྲ་ཧཱ་སྭཱ་ཧཱ་ཞེས་རྡོ་རྗེ་བཞད་པའི་སྔགས་ཀྱིས་འདོར་སྟེ། རྩེ་མོ་ནམ་མཁར་བསྟན་ན་དེས་མཆོག་གི་དངོས་གྲུབ་ཐོབ། ཤར་དུ་ཞི་བ། ལྷོར་རྒྱས་པ། ནུབ་ཏུ་དབང་། བྱང་དུ་དྲག་པོ། འོག་ཏུ་ས་འོག་གི་དངོས་གྲུབ། མཚམས་སུ་ཐུན་མོང་གི་དངོས་གྲུབ་ཐོབ་པར་བཤད་དོ། །དེ་ནས་སྐྱོར་ཆུ་ནི། ལས་ཀྱི་བུམ་པའི་ཆུའམ། དྲི་བཟང་པོའི་ཆུ་ཁྱོར་བར་བླུགས་ཏེ། ཨོཾ་ཧྲཱི་བྷི་ཤུད་དྷ་སརྦ་དྷརྨཱ་སརྦ་པ་པཾ་ནི་ཙ་ཡ་སཾ་ཤུ་དྷ་ཡ་བྷི་ཀལ་པ། ཨ་པ་ནེ་ཡ་ཧཱུྃ་ཞེས་རྡོ་རྗེ་སྦྱོང་བའི་སྔགས་འདིས་བླུད་ན་ངག་གི་སྒྲིབ་པ་སྦྱོང་བའོ། །བསྲུང་སྐུད་གདགས་པ་ནི། བསྲུང་སྐུད་དམར་པོ་གསུམ་བསྒྲིལ་ལ། སྙིང་པོའམ་རྟ་མགྲིན་གྱི་སྔགས་ཀྱིས་མདུད་པ་བྱས་ལ། སྐྱེས་པའི་དཔུང་པ་གཡོན། བུད་མེད་ཀྱི་གཡས་ལ་གདགས་ཏེ། ཨོཾ་བྷུད་དྷ་མེ་ཏྲི་རཀྵ་རཀྵ་སརྦ་དུ་སྭཱ་ཧཱ། ཞེས་རྡོ་རྗེ་བསྲུང་བའི་སྔགས་ཀྱིས་བསྲུང་ངོ་། །ཀུ་ཤའི་ཆུན་པོ་ཆེ་ཆུང་གཉིས་ལ་ཡི་གེ་དྷིཿབྱིན་གྱིས་བརླབས་ལ། ལག་པ་གཡས་གཡོན་དུ་བྱིན་ཏེ། ཨོཾ་བཛྲ་ཏི་བཾ་ཞེས་རྡོ་རྗེ་རྣོན་པོའི་སྔགས་ཀྱིས་སྔས་དང་སྟན་དུ་བྱིན་ལ། རྨི་ལམ་གྱི་ལྟས་བཟང་ངན་མཐོང་བར་འགྱུར་རོ། །དེ་ནས་ཟབ་པ་དང་རྒྱ་ཆེ་བའི་ཆོས་བཤད་པ་ནི། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས་གསུངས་པས། འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་འབར་བའི་མེ་ཏོག་བཞིན། །རྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་སྲིད། །གསང་སྔགས་སྤྱོད་པའི་ཚུལ་འབྱུང་པ། །དེ་བས་ཀྱང་ནི་དཀོན་པ་སྟེ། །གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་སངས་རྒྱས་འགྲུབ་པར་འགྱུར། །སྐལ་པ་བྱེ་བ་དུ་མ་རུ། །སྔོན་དུ་བྱས་པའི་སྡིག་པ་གང་། །དེ་ཀུན་བྱང་བར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །གྲགས་པ་མཐའ་ཡས་སྔགས་སྤྱོད་པའི།། ཚུལ་ལ་གནས་ན་སྨོས་ཅི་དགོས། །སྐྱོབ་པ་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྲོ། །ཡང་དག་སྤྱོད་པའི་མཆོག་འདི་ལ། །བློ་གྲོས་བརྟན་པོ་མི་གཡོ་ན། །དེ་དག་གི་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་ཀྱིས་ནི། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་ལ། དབང་ཐོབ་འབྲས་བུ་སྐྱེས་བཞིན་པར། །དེས་ན་ཁྱེད་རྣམས་ཐེག་ཆེན་ལ། །ས་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ལམ་འདིར་ཁྱེད་རྣམས་འགྲོ་བ་ལས། །རང་བྱུང་སྐལ་པ་ཆེན་པོ་པ། །འཇིག་རྟེན་ཀུན་གྱིས་འདྲེན་པའི་གནས། །དེ་བཞིན་གཤེགས་པ་རྣམས་སུ་འགྱུར། །ཞེས་བྱ་བའི་དོན་ཅུང་ཟད་བཤད་དེ། ཚོགས་དང་གཏོར་མ་ཅི་རིགས་པ་བྱས་ལ་ཉལ་ཏེ། རྨི་ལམ་བཟང་པོ་ལ་དངོས་གྲུབ་འཐོབ་ཅེས་ལུང་བསྟན། ངན་ན་བཟློག་པའི་ཆོ་ག་བྱའོ། །སློབ་མ་ལྷག་པར་གནས་པའི་ཆོ་གའོ། །དངོས་གཞི་ལ་གཉིས་ཏེ། དང་པོ་ནི་མཎྜྻལ་ལེགས་པར་བྱས་ཏེ་ཐིག་གདབ། དབུས་སུ་པད་མ་འདབ་བརྒྱད་ཕྱོགས་མཚོན། སྒོ་བཞི་རྟ་བབས་དང་བཅས་པ། རྡོ་རྗེ་མེ་རི་དང་བཅས་པ་བྲིའོ། །དེའི་དབུས་སུ་བུམ་པའི་སྟེང་དུ་ཐོད་པའི་ཁར་སིན་དྷུ་རའི་མཎྜྻལ་བཞག ཤར་དུ་རྡོ་རྗེ། ལྷོར་བགྲང་འཕྲེང་། ནུབ་ཏུ་ཡི་གེ་དྲུག་མའི་གླེགས་བམ། བྱང་དུ་མར་མེ་བཞག མཆོད་པ་རྣམས་ཀྱིས་བསྐོར། གཏོར་མ་བཤམས་པར་བྱའོ། །གཉིས་པ་ནི། དཀྱིལ་འཁོར་བསྒྲུབ་མཆོད། བདག་འཇུག དབང་བསྐུར་དངོས་དང་གསུམ་ལས། །དང་པོ་ནི། བདག་ཉིད་བསྐྱེད་པའི་རིམ་པ་བསྒོམས་ལ། བདུད་རྩི་བྱིན་གྱིས་བརླབ་པ་བྱས་ལ། དཀྱིལ་འཁོར་དུ་བསང་གཏོར་བྱ་སྟེ། སྟོང་པའི་ངང་ལས་དཀྱིལ་འཁོར་གཞན་ཡས་ཁང་གྲུ་བཞི་སྒོ་བཞི་རྟ་བབས་དང་བཅས་པའི་དབུས་སུ། དེ་བཞིན་གཤེགས་པའི་རིགས་ཀྱི་གཙོ་བོ་སྤྱན་རས་གཟིགས། ཤར་དུ་མི་བསྐྱོད་པ། ལྷོར་རིན་ཆེན་བྱུང་ལྡན། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པའི་རིགས་ཀྱི་སྤྱན་རས་གཟིགས་རྣམས་བསྐྱེད་ལ། ཡེ་ཤེས་ཀྱི་དཀྱིལ་འཁོར་དགུག་གཞུག་བྱ། ཕྱི་ནང་གི་མཆོད་པ་དང་བསྟོད་པ་བྱས་ལ། བཟླས་པ་ཅུང་ཟད་བྱས་ཏེ་བརྟན་པར་བྱའོ། །བདག་འཇུག་ནི་སློབ་དཔོན་རང་ཉིད་ཀྱིས་མཎྜྻལ་ཕུལ་ལ་ཆོ་ག་རྒྱས་བསྡུས་ཅི་རིགས་པས་དབང་རྣམས་བླངས་ལ་བདེན་པ་བརྗོད་པར་བྱའོ། །དབང་བསྐུར་བ་དངོས་གཞི་ལ་ཁྲུས་བྱས་ཤིང་གཏོར་མ་བཏང་སྟེ། གདོང་བཅིངས་ལ་མཎྜྻལ་ཕུལ་ནས་གསོལ་བ་གདབ་པ་ནི། བདག་ནི་འཁོར་བའི་ཆོས་ལ་སྐྱོ་བ་སྐྱེས། །འཇིག་རྟེན་བྱ་བ་ཐམས་ཅད་སྤངས་ནས་ནི། །ཐར་པ་ཆེན་པོའི་གྲོང་མཆོག་དམ་པ་འདིར། །མགོན་པོས་བདག་ནི་གཞུག་ཏུ་གསོལ། །ཞེས་ལན་གསུམ་དུ་བརྗོད་དོ། །དཀྱིལ་འཁོར་གྱི་འཁོར་ལོ་གསལ་བར་བསྒོམས་ལ། སྒོ་བཞི་ནས། ཨོཾ་མ་ཎི་པད་མེ་ཧཱུྃ། ཞེས་བརྗོད་ལ། ཕྱག་བྱེད་དུ་བཅུག དེ་ནས་དཀྱིལ་འཁོར་གྱི་ལྷའི་དྲུང་དུ། གསང་སྔགས་ཀྱི་དམ་ཚིག་དང་། སྡོམ་པ་བླངས་ནས་བསྲུང་སྙམ་པའི་བསམ་པ་བྱེད་དུ་གཞུག དེ་ནས་ལྷའི་ལྷག་པར་མོས་པ་བྱ་སྟེ། སློབ་མ་རྣམས་ཐུགས་རྗེ་ཆེན་པོ་རྒྱལ་བ་རྒྱ་མཚོ་སྐུ་མདོག་དམར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ན་འཕྲེང་བ། གཡོན་པ་པད་མ་བསྣམས་པ། རིན་པོ་ཆེའི་རྒྱན་གྱིས་བརྒྱན་པར་བསྒོམ་དུ་བཅུག དེའི་སྤྱི་བོར་ཨོཾ་དཀར་པོ། མགྲིན་པར་ཨ་དམར་པོ། སྙིང་ཁར་ཧཱུྃ་སྔོན་པོ། སངས་རྒྱས་ཀྱི་སྐུ་གསུང་ཐུགས་སུ་བྱིན་གྱིས་བརླབ། དེ་ནས་སྔགས་ཀྱི་རྡོ་རྗེ་རྣལ་འབྱོར་དུ་སེམས་བསྐྱེད་པར་བྱས་ཏེ། རང་ཉིད་ཡི་དམ་ལྷའི་ཐུགས་ཀར། ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བའི་སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ། རྡོ་རྗེ་སྔོན་པོ་རྩེ་ལྔ་པ་བསྒོམ་དུ་བཅུག་ལ། རྡོ་རྗེ་སྙིང་ཁར་བཟུང་སྟེ། ཨོཾ་སརྦ་ཡོ་ག་ཙི་ཏ། ཨུ་པ་ཏ་ཡ། སུ་ར་ཏི་ས་མ་ཡ་སྟཾ་ཧོ། སིད་དྷཾ་བཛྲ་ཡ་ཐཱ་སུ་ཁཾ། ཞེས་བརྗོད་དོ། །དེ་ནས་དམ་ཚིག་བསྒྲག་པར་བྱ་སྟེ། དང་པོར་དཀྱིལ་འཁོར་གྱི་ལྷའི་དམ་ཚིག་ནི། སྤྱི་བོར་རྡོ་རྗེ་བཞག་ལ། ཁྱོད་ནི་རྣལ་འབྱོར་རིགས་སུ་སྐྱེས། །ང་ཡིས་ཡེ་ཤེས་རྡོ་རྗེ་སྦྱིན། །བྱིན་པས་དངོས་གྲུབ་ཐོབ་པར་འགྱུར། །གང་ཞིག་འདི་འདྲ་མ་མཐོང་བའི། །དྲུང་དུ་སྨྲ་བར་མ་བྱེད་ཅིག །བག་མེད་སྨྲས་ན་ཉམས་པར་འགྱུར། །དེས་ན་ང་རྒྱལ་བཅོམ་ནས་ནི། །བདག་ཉིད་མ་འཁྲུལ་ཤེས་པར་གྱིས། །ཞེས་བརྗོད་དོ། །དེ་ནས་དམ་ཚིག་གི་ཆུ་སྦྱིན་པ་ནི། བདུད་རྩིའི་ཆུ་བླུད་ཅིང་། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་སརྦ་པན་ཙ་ཨ་མྲྀ་ཏ་ཨུད་ག་ཏ་ཧཱུྃ། ཞེས་བརྗོད་དོ། །དེ་ནས་རྡོ་རྗེ་སློབ་དཔོན་གྱི་དམ་ཚིག་ནི། དེང་འདི་ནས་ནི་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱི། །ང་ཡིས་ཇི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་བསྒྲུབས། །གང་ཡང་ང་ལ་མ་གུས་མིན། །དེ་བཞིན་གུས་པར་མ་བྱས་ན། །བདུད་ཀྱིས་བཅོམ་ནས་ངན་འགྲོར་འགྲོ། །དེ་བས་དམ་ཚིག་གནས་པར་གྱིས། །ཞེས་བརྗོད་ལ། དོན་ཡང་ཅི་རིགས་པར་བཤད་པར་བྱའོ། །འདི་རྣམས་འཇུག་པའི་སྔོན་དུ་འགྲོ་བའོ། །དཀྱིལ་འཁོར་དུ་འཇུག་པ་ལ་གཉིས་ལས། དང་པོ་ཡེ་ཤེས་ཀྱི་དཀྱིལ་འཁོར་དུ་འཇུག་པ་ནི། ཏིང་ངེ་འཛིན་བསྒོམ། གསོལ་བ་གདབ། ཡེ་ཤེས་གཞུག་ཅིང་རྡོ་རྗེའི་གླུ་བླང་བ་ལས། དང་པོ་ཏིང་ངེ་འཛིན་ནི། རང་ཉིད་རྒྱལ་བ་རྒྱ་མཚོར་བསྒོམས་པའི་ལུས་ཀྱི་ནང་སྟོང་སང་ངེ་བའི་ལྟེ་བར་པད་མ་འདབ་མ་བཞི་པའི་སྟེང་དུ། གཡུང་དྲུང་དམར་པོ་གཡོན་དུ་འཁྱིལ་བ་རེ། དེའི་སྟེང་དུ་སྔགས་ཀྱིས་བསྐོར་བར་བསྒོམས་པ་ལས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་རྣམས་ལ་ཕོག་ཅིང་། འོད་ཟེར་ཚུར་འདུས། ལྟེ་བའི་ཧྲི་ལ་ཐིམ་པས་ལུས་སེམས་ཐམས་ཅད་བདེ་བས་ཁྱབ་པར་བསམས་ལ། ངག་ཏུ་གསོལ་བ་གདབ་པ་ནི། ཇོ་བོ་ཐུགས་རྗེ་ཆེན་པོ་སྐལ་པ་བཟང་པོའི་སེམས་དཔའི་ཚོགས་དང་བཅས་པས་བྱིན་གྱིས་བརླབ་པར་མཛད་དུ་གསོལ། སློབ་དཔོན་པད་མ་གྲུབ་ཐོབ་བརྒྱུད་པའི་ཚོགས་དང་བཅས་པས་བྱིན་གྱིས་བརླབ་པར་མཛད་དུ་གསོལ། དཔལ་རྟ་མགྲིན་དཔའ་བོ་རྒྱ་མཚོའི་ཚོགས་དང་བཅས་པས་བྱིན་གྱིས་བརླབ་པར་མཛད་དུ་གསོལ། གསང་བ་ཡེ་ཤེས་ཀྱི་མཁའ་འགྲོ་མ་མཁའ་འགྲོ་རྒྱ་མཚོའི་ཚོགས་དང་བཅས་པས་བྱིན་གྱིས་བརླབ་པར་མཛད་དུ་གསོལ། དམ་ཅན་ཆོས་སྐྱོང་བསྲུངས་མ་དང་བཅས་པས་བྱིན་གྱིས་བརླབ་པར་མཛད་དུ་གསོལ། ཞེས་གསོལ་བ་བཏབ་པས། བླ་མ་ཡི་དམ་མཁའ་འགྲོ་ཆོས་སྐྱོང་བའི་བསྲུངས་མ་དང་བཅས་པ་ཆར་ལྟར་འབབ་པར་བསམས་ཏེ། སྔགས་ཀྱི་རྗེས་སུ། ཨ་བེ་ཤ་ཡ། ཨ་བེ་ཤ་ཡ་ཨ་ཨ་ཞེས་བརྗོད་ཅིང་། གུ་གུལ་དང་སྤོས་ཀྱིས་བདུག་སྟེ། རོལ་མོའི་སྒྲ་དང་བཅས་པས་བྱིན་བརླབས་ཀྱང་རྟགས་མ་བྱུང་གི་བར་དུ་བྱའོ། །རྡོ་རྗེའི་གླུ་བླང་བ་ནི། ལྟོས་ཅིག་རང་གི་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། །གྲུབ་པ་མེད་པའི་སེམས་ཉིད་ལ། །སྣ་ཚོགས་སྣང་བ་ངོ་མཚར་ཆེ། །སྣང་ཙམ་ཉིད་ལ་སེམས་སུ་འདུས། །སེམས་ཅན་ཀུན་གྱི་སེམས་ཉིད་དེ། བདེ་བ་ཆེན་པོའི་ཡེ་ཤེས་ཡིན། །རྣམ་པར་མི་རྟོག་བསམ་མི་ཁྱབ། །གསལ་བ་དེ་ཡི་ངོ་བོར་སྣང་། །མོས་པ་དུ་མའི་སེམས་ཅན་ལ། ཐབས་རྣམས་སྣ་ཚོགས་བསྟན་པ་སྟེ། །སྣ་ཚོགས་སྒྱུ་མའི་སྦྱོར་བ་ཡིས། །དཔའ་བོ་སེང་གེ་བཞིན་དུ་སྤྱོད། །བསམ་གྱིས་མི་ཁྱབ་གོ་འཕང་འཐོབ། །སྤྱན་རས་གཟིགས་ཀྱི་བྱིན་བརླབས་ཡིན། །བླ་མ་བརྒྱུད་པའི་རིམ་པ་འདི། །སྣ་ཚོགས་ནོར་བུ་ཇི་བཞིན་དུ། །སྐལ་ལྡན་རྣམས་ཀྱི་སྤྱོད་ཡུལ་ཡིན། ཞེས་བརྗོད་དོ། །གཉིས་པ་རྡུལ་ཚོན་གྱི་དཀྱིལ་འཁོར་བསྟན་པ་ནི། སྣང་བ་བརྟག མེ་ཏོག་དོར། དཀྱིལ་འཁོར་བསྟན་པ་ལས། དང་པོ་ནི། མིག་དར་འོག་ཏུ་བལྟས་པས། ཁ་དོག་ནི་ཞི་བ་ལ་དཀར། རྒྱས་པ་ལ་སེར། དབང་ལ་དམར། དྲག་པོ་ལ་ནག་པོ། ཁ་དོག་སྣ་ཚོགས་པ་ལ་ལས་སྣ་ཚོགས་འགྲུབ་ཅེས་བསྟན་ཏོ། །མེ་ཏོག་དོར་བ་ནི། བདེ་གཤེགས་སྙིང་པོའི་དཀྱིལ་འཁོར་དུ། །རིག་པའི་མེ་ཏོག་འདི་དོར་བས། །སྔོན་ཚེ་གང་ལ་སྦྱང་པའི་ལྷ། །གང་ཡིན་དེ་ལ་ཕོག་པར་ཤོག །པྲ་ཏི་ཛ་བཛྲ་ཧོ། ཞེས་བརྗོད་ནས་མེ་ཏོག་དོར་ལ། རིགས་གང་ཡིན་པའི་སྤྱན་རས་གཟིགས་ཐིམ་པར་བསམས་ལ་མེ་ཏོག་མགོ་བོར་བཞག་ཅིང་པྲ་ཏི་གྷྲི་་ཨི་མཾ་བ་ལ་མ་ཧཱ་སྭ་ཏྭ་ཞེས་རིགས་སོ་སོའི་མིང་གདགས་པ་ལ། དཔལ་དགྱེས་པའི་པད་མ། དཔལ་པད་མ་མཛེས་པ། དཔལ་པད་མ་དགྱེས་པ། དཔལ་པད་མ་བརྗིད་པ། དཔལ་པད་མའི་དབང་ཕྱུག་ཅེས་གདགས་སོ། །དེ་ནས་མིག་དབྱེ་བ་ནི། སྤྱན་རས་གཟིགས་དབང་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཨོཾ་ཛྙྱཱ་ན་ཙཀྵུ་བི་ཤོ་དྷ་ཡ་སྭཱཧཱ། ཞེས་བརྗོད་ཅིང་། དཀྱིལ་འཁོར་བསྟན་པ་ནི། དཀྱིལ་འཁོར་སྙིང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་ཚོགས་དངོས་གྲུབ་ཀུན། །ཐམས་ཅད་འདི་ལས་འབྱུང་བས་ན། །དངོས་གྲུབ་ཐོབ་ཕྱིར་དམ་ཚིག་བསྐྱོངས། །གསང་སྔགས་ལ་ཡང་བརྩོན་པར་གྱིས། །ཞེས་བརྗོད་ལ་ཆོས་བཤད་དོ། །རྡུལ་ཚོན་གྱི་དཀྱིལ་འཁོར་བྲིས་པ་དཔེ་ཡིན་ཏེ། སངས་རྒྱས་ཀྱི་ཡོན་ཏན་ཐམས་ཅད་རྫོགས་པའི་གཞལ་ཡས་ཁང་པ་ན་རིགས་ལྔ་རྣམ་པར་དག་པའི་སྤྱན་རས་གཟིགས། དཔའ་བོ་མཁའ་འགྲོའི་ཚོགས་དང་བཅས་པ། འདི་ལྟ་བུ་བསྒོམས་པ་ལ་བརྟེན་ནས་སངས་རྒྱས་ཀྱི་འབྲས་བུ་ཐོབ་པ་ཡིན་པས། བསྐྱེད་པའི་རིམ་པ་ལ་བརྩོན་པར་གྱིས་ཤིག་ཞེས་བརྗོད་དོ། །དེ་ནས་དབང་བསྐུར་བ་དངོས་གཞི་ལ་གསོལ་བ་གདབ་པ་དང་། བུམ་པའི་དབང་དང་། གསང་བའི་དབང་དང་། ཤེས་རབ་ཡེ་ཤེས་ཀྱི་དབང་དང་། །དབང་བཞི་པ་རྗེས་གནང་དང་བཅས་པའོ། །དང་པོ་མཎྜྻལ་ཕུལ་ནས་གསོལ་བ་གདབ་པ་ནི། པད་མ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །བདག་ལ་དབང་བསྐུར་མཛད་དུ་གསོལ། །ཞེས་ལན་གསུམ་བརྗོད་དེ་གསོལ་བ་གདབ་བོ། །དེ་ནས་ཐོག་མར་བུམ་པའི་དབང་བསྐུར་བ་ནི། སློབ་མ་རྣམས་ཐུགས་རྗེ་ཆེན་པོར་བསྒོམ་དུ་བཅུག་ལ། ཕྱོགས་བཅུའི་སངས་རྒྱས་ཐམས་ཅད་ཀྱིས་བུམ་པའི་དབང་བསྐུར་ཏེ། ཉོན་མོངས་པ་གཏི་མུག་དག །གཟུགས་ཀྱི་ཕུང་པོ་གནས་གྱུར། ཆོས་ཀྱི་དབྱིངས་ཀྱི་ཡེ་ཤེས་ཀྱི་དབང་ཐོབ་པར་བསྒོམས་ལ། སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །སངས་རྒྱས་རྣམས་ཀྱི་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དེང་འདིར་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱི་ལོང་། །སྐུ་མཆོག་བུམ་པའི་དབང་འདི་ཡོངས་རྫོགས་ཤོག །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། བྷུདྡྷ་ཨ་བྷི་ཥིཉྩྨ་ཧཱུྃ། ཞེས་བརྗོད་ལ་དབང་བསྐུར་ཞིང་། བུམ་ཆུས་ཁྲུས་བྱའོ། །དེ་ནས་མི་བསྐྱོད་པའི་རྡོ་རྗེའི་དབང་ནི། ཕྱོགས་བཅུའི་སངས་རྒྱས་ཐམས་ཅད་ཀྱི་ངོ་བོ་རྡོ་རྗེ་ལག་ཏུ་བྱིན་ལ། ཉོན་མོངས་པ་ཞེ་སྡང་རྣམ་པར་དག་རྣམ་པར་ཤེས་པའི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་ཀྱི་དབང་ཐོབ་པར་བསམ་སྟེ། མི་བསྐྱོད་རྒྱལ་པོ་རིགས་ཀྱི་གཙོ། །ཞེ་སྡང་རྣམ་དག་རྡོ་རྗེའི་དབང་། །དེང་འདིར་ཁྱོད་ལ་བསྐུར་བར་བྱ། །མེ་ལོང་ཡེ་ཤེས་དབང་འདི་ཡོངས་རྫོགས་ཤོག །ཨོཾ་ཨཱ་ཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ། བཛྲ་ས་ཏྭ་ཨ་བྷི་ཥིཉྩྨ་ཨ། དེ་ནས་འོད་དཔག་མེད་ཀྱི་ངོ་བོ་གླེགས་བམ་གྱི་དབང་ནི། ཡི་གེ་དྲུག་པའི་པོ་ཏི་ལག་ཏུ་བྱིན་ལ། ཉོན་མོངས་པ་འདོད་ཆགས་དག འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་ཀྱི་དབང་ཐོབ་པར་བསམས་ཏེ། །པད་མ་དབང་གི་དཀྱིལ་འཁོར་དུ། །འདོད་ཆགས་རྣམ་པར་དག་པ་ཡི། །སངས་རྒྱས་རྣམས་ཀྱི་གསུང་མཆོག་དབང་། །དེང་འདིར་ཁྱོད་ལ་བསྐུར་བར་བྱ། །སོ་སོར་རྟོག་པའི་དབང་འདི་ཁྱོད་ཀྱིས་ལོང་། ཨོཾ་ཨ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། པད་མ་ཨ་བྷི་ཥིཉྩྨ་ཧྲཱི། དེ་ནས་རིན་ཆེན་འབྱུང་ལྡན་གྱི་ངོ་བོ་འཕྲེང་བའམ། དབུ་རྒྱན་གྱི་དབང་མགོ་ཐོག་ཏུ་བཞག་ནས། ཉོན་མོངས་པ་ང་རྒྱལ་རང་སར་དག ཚོར་བའི་ཕུང་པོ་གནས་གྱུར་། མཉམ་པ་ཉིད་ཀྱི་ཡེ་ཤེས་ཀྱི་དབང་ཐོབ་པར་བསམ། རིན་ཆེན་མཆོག་གི་དཀྱིལ་འཁོར་དུ། །ང་རྒྱལ་རང་སར་དག་པ་ཡི། །སངས་རྒྱས་རྣམས་ཀྱི་ཡོན་ཏན་དབང་། །དེང་འདིར་ཁྱོད་ལ་བསྐུར་བར་བྱ། །མཉམ་ཉིད་ཡེ་ཤེས་དབང་དེ་ཁྱོད་ཀྱིས་ལོང་། །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེད་ཧཱུྃ༔ ཨོཾ་རཏྣ་ཨ་བྷི་ཥིཉྩྨ་ཏྲཾ། དེ་ནས་དོན་ཡོད་གྲུབ་པའི་ངོ་བོར་མར་མེའམ་དྲིལ་བུ་ལག་ཏུ་བྱིན་ལ། ཉོན་མོངས་པ་ཕྲག་དོག་རང་སར་དག འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་ལ་དབང་ཐོབ་པར་བསྒོམས་ལ། འཕྲིན་ལས་ཡོངས་རྫོགས་དཀྱིལ་འཁོར་དུ། །ཕྲག་དོག་རང་སར་དག་པ་ཡི། །སངས་རྒྱས་རྣམས་ཀྱི་འཕྲིན་ལས་དབང་། །དེང་འདིར་ཁྱོད་ལ་བསྐུར་བར་བྱ། །བྱ་གྲུབ་ཡེ་ཤེས་དབང་འདི་ཡོངས་རྫོགས་ཤོག །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ ཨོཾ་ཀརྨ་ཨ་བྷི་ཥིཉྩྨ་ཨ། དེ་ནས་རང་ཉིད་རིགས་དྲུག་པ་སངས་རྒྱས་རྣམས་ཀྱི་རྡོ་རྗེ་ལག་ཏུ་བྱིན་ནས། ཡེ་ཤེས་ལྔ་དང་ལྡན་པར་བསྒོམས་ནས། འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་གནས། །ཁྱེད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརཏལ་ཞུགས་བསྟན། །ཨོཾ་ན་མ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་སྟཾ། ཨེ་ཤ་དྷ་ར་ཡ་མི་ཧི་ཧི་ཧི་ཧི་ཧཱུྃ། ཞེས་བརྗོད་པས་དབང་བསྐུར་ཏེ། ཉོན་མོངས་པ་ལྔ་དག ཕུང་པོ་ལྔ་གནས་གྱུར། ཡེ་ཤེས་ལྔའི་སྤྱན་རས་གཟིགས་དབང་ཕྱུག་བསྒོམ་པ་ལ་དབང་བ་ཡིན་ནོ། །དེ་ནས་གསང་བའི་དབང་བསྐུར་བ་ནི། མཎྜྻལ་ཕུལ་གསོལ་བ་བཏབ་ནས། རང་གི་ལུས་ཕུང་པོ་ཁམས་དང་སྐྱེ་མཆེད་སྤྱན་རས་གཟིགས་ཀྱི་དཀྱིལ་འཁོར་དུ་ཤེས་པར་བྱ་སྟེ། ཐུགས་རྗེ་ཆེན་པོ་དང་གསང་བ་ཡེ་ཤེས་ཀྱི་མཁའ་འགྲོ་གཉིས་སུ་མེད་པའི་བྱང་ཆུབ་ཀྱི་སེམས་སུ་མོས་པར་བྱས་ལ། ཀ་པ་ལའི་བདུད་རྩི་ལྕེ་ལ་བཞག་ལ། སངས་རྒྱས་རྣམས་ཀྱི་ཐོད་པའི་དབང་། །སངས་རྒྱས་རྣམས་ཀྱིས་རབ་བསྒྲུབས་པ། །དེང་འདིར་ཁྱོད་ལ་བསྐུར་བར་བྱ། །གསང་མཆོག་ཐོད་པའི་དབང་འདི་ཁྱོད་ཀྱིས་ལོང་། །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཨོཾ་དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཛ་ཧྲི་ཡ་ཧཱུྃ་ཛ་ཨ་བྷི་ཥིཉྩྨ་ཏུ་མཾ། ཞེས་བརྗོད་ལ་དབང་བསྐུར་རོ། འདི་ནི་དཀྱིལ་འཁོར་ནི་ལུས་ཀྱི་དཀྱིལ་འཁོར་ལ་བརྟེན། བསྐུར་བའི་གནས་ནི་ངག་ལ་བསྐུར་སྒྲིབ་པ་ནི་ངག་གི་སྒྲིབ་པ་འདག རླུང་རྡོ་རྗེའི་བཟླས་པ་བསྒོམ་པ་ལ་དབང་ཐོབ་པར་བྱའོ། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་བ་ནི། མཎྜྻལ་ཕུལ་གསོལ་བ་བཏབ་ནས། སིན་དྷུ་རའི་དཀྱིལ་འཁོར་གསང་བ་ཡེ་ཤེས་ཀྱི་མཁའ་འགྲོ་མར་བསྐྱེད་ལ། སློ་མ་རྣམས་ཐུགས་རྗེ་ཆེན་པོར་བསྒོམས་ལ། གསང་བ་ཡེ་ཤེས་ཀྱི་མཁའ་འགྲོ་མ་མར་མེ་ལ་མེ་འཕྲོས་པ་ལྟ་བུར་སློབ་མའི་སྙིང་ཁར་བསྟིམས་ཏེ། དགའ་བ་བཞིའི་ཡེ་ཤེས་རྒྱུད་ལ་སྐྱེས་པར་བསམས་ཏེ། སངས་རྒྱས་རྣམས་ཀྱི་མེ་ལོང་དབང་། །སངས་རྒྱས་རྣམས་ཀྱིས་རབ་བསྒྲུབས་པ། །དེང་འདིར་ཁྱོད་ལ་བསྐུར་བར་བྱ། །ཤེས་རབ་ཡེ་ཤེས་དབང་འདི་ཁྱོད་ཀྱིས་ལོང་། །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ། ཨོཾ་དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧྲཱི་ཡ་ཧཱུྃ་ཛ་ཨ་བྷི་ཥིཉྩྨ་མཾ། ཞེས་བརྗོད་ལ། སིན་དྷུ་རའི་ཐིག་ལེ་སྙིང་ཁར་བྱུགས་ལ་དབང་བསྐུར། དབང་བསྐུར་བ་འདི་ནི་སིན་དྷུ་རའི་དཀྱིལ་འཁོར་ལ་བརྟེན་ནས་སེམས་ལ་དབང་བསྐུར། སེམས་ཀྱི་དྲི་མ་དག གདམས་ངག་ནི་བྱང་ཆུབ་ཀྱི་སེམས་བསྒོམ་པ་ལ་དབང་པར་བྱས་པར་འགྱུར་རོ། །དེ་ནས་དབང་བཞི་པ་ནི། བླ་མས་ཚིག་གི་བརྡའ་སྤྲད་པར་བྱ་སྟེ། ལུས་ལྷ། ངག་སྔགས། སེམས་ཆོས་ཉིད། སྣང་བ་ཐམས་ཅད་གཞལ་ཡས་ཀྱི་ཁང་པ། སེམས་ཅན་ཐམས་ཅད་ཐུགས་རྗེ་ཆེན་པོ་ལ་སོགས་པའི་ལྷའི་རང་བཞིན་དུ་ཤེས་པས་ཆོས་ཐམས་ཅད་རྨི་ལམ་སྒྱུ་མ་བཞིན་དུ་བསྒོམ་པ་ནི། དབང་བཞི་པའི་དོན་ཡིན་ནོ། །འདི་རྣམས་ཀྱི་དོན་ཡང་རྒྱུད་ལས་གསུང་པ། བུམ་པའི་དབང་ནི་དང་པོ་སྟེ། གསང་བའི་དབང་ནི་གཉིས་པའོ། །ཤེས་རབ་བསྐྱེད་པ་གསུམ་པ་སྟེ། །ངེས་ཤེས་བསྐྱེད་པ་བཞི་པ་ཡིན། །ལྷ་དང་སྔགས་དང་སྟོང་པ་ཉིད། །བདེ་སྟོང་འབྲེལ་བར་བསྒོམས་པ་དབང་། །ཐ་མལ་ལུས་ཀྱི་རྣམ་རྟོག་ནི། །དང་པོ་བུམ་པའི་དབང་གིས་བཅད། །རང་གཞན་ལྷ་ཡི་རྣམ་པར་བསྒོམ། །ཐ་མལ་ངག་གི་རྣམ་རྟོག་ནི། །གཉིས་པ་གསང་བའི་དབང་གིས་བཅད། །བཟླས་བརྗོད་རྒྱུན་དུ་བཟླས་པའོ། །ཐ་མལ་སེམས་ཀྱི་རྣམ་རྟོག་ནི། གསུམ་པ་ཤེས་རབ་དབང་གིས་བཅད། །བདེ་དང་སྟོང་བའི་དོན་དྲན་བྱ། །འབྲས་བུ་ཐམས་ཅད་བསྡུས་པ་ནི། །བཞི་པ་ཡེ་ཤེས་དབང་ཡིན་ནོ། །རང་གཞན་ལྷ་རུ་གསལ་བ་དང་། །ང་རྒྱལ་ཕྲ་བ་ཙམ་ཞིག་བསྒོམ། །ཞེས་གསུངས་སོ། །འདི་རྣམས་ནི་དབང་གི་དངོས་གཞིའོ། །ད་ནི་རྗེས་སུ་གནང་བ་ལ་གཉིས་ལས། དང་པོ་རྣམ་པར་སྣང་མཛད་ཀྱི་སྒོ་ནས་ཆོས་ཀྱི་འཁོར་ལོ་རྒྱ་ཆེན་པོས་སེམས་ཅན་གྱི་དོན་བྱེད་པར་མོས་པ་བྱས་ལ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ལ་ནི་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །ཆོས་ཀྱི་འཁོར་ལོ་བསྐོར་བར་གྱིས། །ཅེས་པ་དང་། དེ་བཞིན་དུ་མི་བསྐྱོད་པའི་རྡོ་རྗེ་དང་། རིན་ཆེན་འབྱུང་ལྡན་ཀྱི་ནོར་བུ་དང་། འོད་དཔག་མེད་ཀྱི་པད་མ་དང་། དོན་ཡོན་གྲུབ་པའི་རྒྱ་གྲམ་གྱི་འཁོར་ལོས་སེམས་ཅན་གྱི་དོན་བྱའོ། །གཉིས་པ་སྐུ་གསུང་ཐུགས་ཀྱི་རྗེས་གནང་ནི། དུས་ཐམས་ཅད་དུ་བླ་མ་སྤྱི་བོར་བསྒོམ་པ་དང་། སངས་རྒྱས་རྣམས་ཀྱི་སྐུའི་འཕྲིན་ལས་བསྒྲུབ་པར་གྱིས་ཤིག སྤྱི་བོར་སིན་དྷུ་རའི་ཐིག་ལེ་བྱའོ། །དེ་ནས་འཕྲེང་བ་ལག་ཏུ་བྱིན་ལ། སྔགས་ཀྱི་རྗེས་གནང་བྱིན་ཏེ། ད་ཕྱིན་ཆད་སྔགས་བཟླས་པ་ལ་བརྩོན་པ་དང་། སངས་རྒྱས་རྣམས་ཀྱི་གསུང་གི་འཕྲིན་ལས་སྒྲུབས་པར་གྱིས་ཤིག ཐུགས་ཀྱི་རྗེས་སུ་གནང་བ་ནི། དེང་ནས་བཟུང་སྟེ་སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་དེ། སངས་རྒྱས་རྣམས་ཀྱི་ཐུགས་ཀྱི་འཕྲིན་ལས་བསྒྲུབ་པར་བྱའོ། །དེ་ནས་ལུང་བསྟན་པ་ནི། དེ་རིང་ངས་ཁྱོད་ལུང་བསྟན་ཏེ། །འོད་དཔག་མེད་པའི་དེ་བཞིན་གཤེགས། །སྲིད་པ་ཤིན་དུ་དག་པས་ན། །སྲིད་པའི་སྡུག་བསྔལ་ཀུན་ལས་གྲོལ། །ཨོཾ་སརྦ་ཏ་ཐ་ག་ཏ་སིད་དྷི་ས་མ་ཡ་སྟཾ་བྷུར་བྷུ་བ་སྭཱ་ཧཱ། མ་འོངས་པའི་དུས་ན་རིགས་ཀྱི་གསང་མཚན་དང་མཐུན་པའི་སངས་རྒྱས་ཐོབ་པར་འགྱུར་རོ། །ད་ཕྱིན་ཆད་ཁྱེད་རྣམས་ཀྱིས་སྤྱན་རས་གཟིགས་ཀྱི་སྒོ་ནས་འགྲོ་བའི་དོན་རྒྱ་ཆེན་པོ་སྒྲུབས་ཤིག ཅེས་བརྗོད་དོ། །རྗེས་སུ་གནང་བའི་ཆོ་གའོ། །དེ་ནས་ཡོན་དབུལ། ཚོགས་དང་གཏོར་མ་བཏང་། དགའ་སྟོན་བྱས་ལ། དཀྱིལ་འཁོར་གཤེགས་སུ་གསོལ། བཀྲ་ཤིས་དང་བསྔོ་བ་བྱའོ། །རྒྱལ་བ་རྒྱ་མཚོའི་དབང་གི་ཆོ་ག་དྲི་མེད་དོན་བསྡུས་ཞེས་བྱ་བ་རང་བྱུང་རྡོ་རྗེས་སྦྱར་བ་རྫོགས་སོ། །ཁྱི་ལོ་ཟླ་བ་ལྔ་པ་ལ་ཕོ་བྲང་ཆེན་པོ་ནས་བོད་དུ་བྱོན་པའི་དུས་སུ་སློབ་མ་དགེ་བའི་བཤེས་གཉེན་རྣམས་ཀྱིས་ཞུས་པའི་ངོར་མཛད་པ། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། ༈ །།རྒྱལ་བ་རྒྱ་མཚོའི་དབང་ཆོག་བཞུགས། །བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་ཐུགས་རྗེའི་མངའ་བདག་ཉིད། །སྙིགས་མའི་དུས་འདིར་འགྲོ་བའི་དཔལ་གྱུར་བརྩེ་བ་ཅན། །བྱ་སྤྱོད་རྣལ་འབྱོར་དེ་བཞིན་སྟོན་པ་པོ། །ཅི་ལྟ་ཇི་སྙེད་མཁྱེན་བཞིན་འགྲོ་ཀུན་དཔལ་མཆོག་མཁྱེན་ལ་བསྟོད། །ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་གི་སྒོ་ནས་གཞན་དོན་དུ་སློབ་མ་རྗེས་སུ་འཛིན་པ་ལ་གསུམ་སྟེ། སྔོན་འགྲོ། དངོས་གཞི། རྗེས་ཀྱི་ཆོ་ག་དང་གསུམ་ལས། སྔོན་དུ་འགྲོ་བ་ལ་རྣམ་པ་ལྔ་སྟེ། སའི་ཆོ་ག་ནས་མཆོད་པ་ཡོངས་སུ་རྫོགས་པའི་བར་དང་གཅིག་ལས་རྒྱུ་འབྲས་ཀྱི་ཆོས་བཤད་ཅིང་མི་དགེ་བ་ལས་བཟློག་པར་བྱ་བ་དང་གཉིས། སྐྱབས་སུ་འགྲོ་བ་ཁྱད་པར་ཅན་འབོགས་པ་དང་གསུམ། བྱང་ཆུབ་མཆོག་ཏུ་སེམས་བསྐྱེད་ཅིང་ཉན་ཐོས་དང་རང་སངས་རྒྱས་ལས་བཟློག་པ་དང་བཞི། བླ་མ་དང་བྱང་ཆུབ་སེམས་དཔའི་ཚོགས་ལ་གསོལ་བ་འདེབས་པ་དང་ལྔའོ། །དང་པོ་སའི་ཆོ་ག་ལ། ས་བརྟག་པ་དང་། ས་སྦྱང་བ་ལ་སོགས་ཏེ་སའི་ཆོ་ག་རྣམས་འཁོར་ལོ་བདེ་མཆོག་ལ་སོགས་པ་གཞན་ནས་བཤད་པ་ལྟར་རྒྱས་པར་བྱའོ། །དེ་ནས་དཀྱིལ་འཁོར་བྲི་བ་ནི ཐིག་ལེགས་པར་གདབ་ཅིང་། ས་ཚོན་རྣམས་རིན་པོ་ཆེའི་སྣོད་དུ་བླུགས་ཏེ་ལེགས་པར་བཀོད་པ་ལ་ཧྲཱི་ཧ་རི་ནི་ས་ཅེས་པ་བྲིས་ལ། བཅོམ་ལྡན་འདས་ཐུགས་རྗེ་ཆེན་པོའི་དཀྱིལ་འཁོར་དུ་བསྐྱེད་ལ། མཆོད་པ་དང་བསྟོད་པ་ཡང་ཅི་རིགས་པ་འབུལ་བར་བྱའོ། །དེ་ནས་ཚོན་འགྱེད་པར་བྱ་སྟེ། དབུས་ཟླུམ་བསྐོར་ཆོས་འབྱུང་དང་བཅས་པ་བྲི་ཞིང་པད་མ་འདབ་མ་བརྒྱད་པའི་ཕྱོགས་བཞི་དམར་པོ་བྱ། ཤར་ལྷོ་སྔོན་པོ། ལྷོ་ནུབ་སེར་པོ། ནུབ་བྱང་དམར་པོ། བྱང་ཤར་ལྷང་ཁུ། མུ་ཁྱུད་ནག་པོ། སྒོ་བཞི་པ་མེ་རི་རྡོ་རྗེ་དང་བཅས་པ་བྲི་བར་བྱའོ། །དེ་ནས་བཅའ་གཞི་རྫས་ཀྱི་རིམ་པ་ནི། བུམ་པ་མཚན་ཉིད་དང་ལྡན་པ་ཅིག་ལ་ཁ་རྒྱན་མགུལ་ཆིངས་དང་བཅས་པ་དབུས་སུ་བཞག་ཅིང་། ཡང་ཀ་པ་ལ་མཚན་ཉིད་དང་ལྡན་པ་ཅིག་དྲི་བཟང་པོ་དང་ལྡན་པའི་བཏུང་བས་བཀང་། དེའི་སྟེང་དུ་མེ་ལོང་གཙང་མ་ཅིག་ལ་དྲི་བསང་དང་བདུད་རྩི་བྱུགས་ལ། སིན་དྷུ་ར་ལེགས་པར་བཀོད་ཅིང་གཡོན་བསྐོར་དུ་ཆོས་འབྱུང་བྲིས་ཏེ། དབུས་སུ་ཧྲི་བྲི། དེའི་མཐར་སྙིང་པོ་བྲི་བར་བྱའོ། །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཨོཾ་བཛྲ་བྷ་ར་ཧི། སརྦ་བྷུད་དྷ་ཌ་ཀི་ནི་ཡེ། བཛྲ་ཝརྣ་ནི་ཡེ། བཛྲ་བྷེ་རོ་ཙ་ནི་ཡེ། ཧ་རི་ནི་ས་ཞེས་པ་བྲི། བུམ་པའི་རྫས་བསྟན་པ་ནི། ལྔ་ཚོ་དྲུག་དང་། གསུམ་ཚོ་གཉིས་དང་། དགུ་ཚོ་ཅིག་གོ །དེ་ནས་མཎ་འཇི་བཞིའི་སྟེང་དུ། ཤར་དུ་རྡོ་རྗེ། ལྷོར་བགྲང་འཕྲེང་། ནུབ་ཏུ་གླེགས་བཾ། བྱང་དུ་མར་མེ་བཞག་པར་བྱའོ། །དེ་ནས་མཐའ་མ་མཆོད་པ་ཅི་འབྱོར་གྱིས་བསྐོར་བར་བྱའོ། །དེ་ནས་ལས་ཀྱི་བུམ་པ་ཅིག་ལ་སློབ་དཔོན་གྱིས། ཡི་དམ་ལྷའི་ང་རྒྱལ་དང་ལྡན་པས་བཟླས་པ་བྱས་ལ། ལས་ཀྱི་སློབ་དཔོན་གྱིས་བུམ་པ་དེ་གདན་དྲངས་ཏེ། སློབ་མ་རྣམས་ལ་ཁྲུས་བྱ་ཞིང་ཡར་བོས་ཏེ་ཡོལ་བའི་ཕྱི་རོལ་དུ་བཞག་པར་བྱའོ། །དེ་ནས་སློབ་དཔོན་ལ་གསོལ་བ་འདི་ལྟར་གདབ་སྟེ། བདག་ཉིད་འཁོར་བའི་ཆོས་ལ་སྐྱོ་བ་སྐྱེས། །འཇིག་རྟེན་བྱ་བ་ཐམས་ཅད་སྤངས་ནས་སུ། །རྣམ་པར་ཐར་པའི་གྲོང་མཆོག་དམ་པ་རུ། །དམ་པ་བདག་ནི་ངེས་པར་གཞུག་ཏུ་གསོལ། །ཞེས་བརྗོད་དེ་གསོལ་བ་གདབ་ཅིང་དེ་ནས་སློབ་དཔོན་གྱིས། སློབ་མ་རྣམས་ལ་འཁོར་བའི་སྡུག་བསྔལ་རྒྱུད་ལ་དྲན་ཅིང་མི་རྟག་པ་ཐོབ་པར་བྱ་བའི་ཆེད་དུ། ལས་རྒྱུ་འབྲས་རིགས་དྲུག་གི་སྡུག་བསྔལ། ཐེག་པའི་ཡོན་ཏན་མཐོང་བའི་ཆེད་དུ་ཅི་རིགས་པ་བཤད་པར་བྱའོ། །གསུམ་པ་ནི་ལམ་ལོག་པ་ལས་ཁྱད་པར་དུ་བྱ་བའི་ཆེད་དུ་ཐུན་མོང་གི་སྐྱབས་འགྲོ་ནི། སོ་སོ་ཐར་པའི་རིགས་བདུན་གང་རུང་ལ་དགོད་པར་བྱ། ཉན་ཐོས་ལས་ཁྱད་པར་གྱི་སྐྱབས་སུ་འགྲོ་བ་སྦྱིན་པར་བྱའོ། །དེ་ནས་ཐེག་པ་ཆེན་པོ་ལ་དགོད་པར་བྱ་བའི་དོན་དུ། བྱང་ཆུབ་མཆོག་ཏུ་སེམས་བསྐྱེད་པ་སྦྱིན་པ་ནི། སྨོན་འཇུག་གི་ཆོ་ག་གཞན་ནས་འབྱུང་བ་རྒྱས་པར་བཤད་པ་ལྟར་གྲུབ་ན་ལེགས། མ་གྲུབ་ན་ཐུན་མོང་དང་ཁྱད་པར་སེམས་བསྐྱེད་བསྡུས་པ་ཙམ་བྱས་པའི་རྗེས་ལ། གསང་སྔགས་རྒྱུད་སྡེའི་ལམ་ལ་འཇུག་པར་བྱ་སྟེ་དེ་ཡང་སྤྱན་རས་གཟིགས་དབང་ཕྱུག་གི་རྒྱུད་སྡེ་བཞི་ལ་འཇུག་པར་བྱེད་པ་ལ། བྱ་བའི་རྒྱུད་དང་སྤྱོད་པའི་རྒྱུད་གཉིས་ཀ་མཐུན་པ་ཨ་མོ་གྷ་པ་ཤ་དང། རྣལ་འབྱོར་གྱི་རྒྱུད་དང་མཐུན་པ་པད་མ་ཅོད་པན་ལ་སོགས་པའི་སྒོར་འཇུག་པར་བྱེད་པའམ། ཡང་ན་རྒྱུད་སྡེ་སྤྱིའི་ལྷ་གང་ཡང་རུང་པ་རེ་རེའི་མངོན་པར་རྟོགས་པ་ཙམ་བསྟན་པ་ནི། ཐེག་པའི་རིམ་འཇུག་ཞེས་བྱ་སྟེ། གོང་མ་རྣམས་ཀྱི་ཕྱག་ལེན་གྱི་བཞེད་པར་འདུག་ལ། འདི་ལ་ནི་ཁྱད་པར་གྱི་ཆོས་དྲུག་དག་ལྡན་པ་ཡིན་པ་ལས། དབང་དང་ཐ་དད་མེད་པའི་བྱིན་བརླབས་སུ་འགྱུར་ཞིང་། རྒྱས་པར་ནི་དབང་ཆེན་མོའི་ནང་དུ་ཤེས་པར་བྱའོ། །དེ་ཉིད་ཀྱི་རིམ་པ་ལྟར་ན་སྔོན་འགྲོའི་ཆོས་བདུན་དུ་གནས་པ་ལས་རྒྱུད་སྡེ་རིམ་འཇུག་གསུམ་པོ་ནི། ཐུབ་དབང་སྒོ་དྲུག་པའི་རྒྱུད་ལྟར་གསོལ་བ་འདེབས་པའི་རིམ་པ་ལྟར་སྦྱར་ཏེ། སེམས་བསྐྱེད་ཕན་ཆོད་ཐོན་པའི་རྗེས་དེ་ནས། བླ་མ་ལ་གསོལ་བ་བཏབ་པ་ནི་འདི་སྐད་བརྗོད་དོ། །བདག་གི་སྐྱེ་བ་ཐོག་མེད་ནས། །ད་ལྟའི་ལུས་འདི་བླངས་པའི་བར། །མི་དགེ་བཅུ་ཡི་ལས་དབང་གིས། །འཁོར་བའི་རྒྱ་མཚོར་ཡང་ཡང་འཁོར། །སྡུག་བསྔལ་མང་པོ་རང་གིས་མྱོང་གྱུར་ཀྱང་། །དེ་ལ་ཡིད་ནི་འབྱུང་བར་མ་གྱུར་པས། །ད་རུང་སྡུག་བསྔལ་ཉིད་ལ་མངོན་པར་ཞེན། །ད་ནི་དད་པ་ཆེན་པོ་ལ། །སྙིང་རྗེ་ཁྱད་དུ་འཕགས་པ་ཡིས། །རྟོག་པ་ཐམས་ཅད་བསྡུས་ནས་ནི། །བསམ་པ་བཟང་པོས་ཉན་པར་འཚལ། །རྡོ་རྗེ་བླ་མ་སངས་རྒྱས་དང་། །གཉིས་སུ་མེད་པ་ཁྱོད་གསོན་ཅིག །གཏི་མུག་རྣམ་པར་དག་པ་དང་། །གཟུགས་ཀྱི་ཕུང་པོ་གནས་གྱུར་ནས། །ཆོས་ཀྱི་དབྱིངས་ཀྱི་ཡེ་ཤེས་སུ། །བླ་མས་བདག་ནི་དྲང་དུ་གསོལ། །ཆོས་ཀྱི་འཁོར་ལོ་བསྐོར་བར་བགྱི། །ང་རྒྱལ་རྣམ་པར་དག་པ་དང་། །ཚོར་བའི་ཕུང་པོ་གནས་གྱུར་ནས། །མཉམ་པ་ཉིད་ཀྱི་ཡེ་ཤེས་སུ། །བླ་མས་བདག་ནི་དྲང་དུ་གསོལ། །སྦྱིན་པ་རྣམ་བཞི་སྦྱིན་པ་དང་། །མྱ་ངན་མི་འདའ་གསོལ་བ་བཏབ། །འདོད་ཆགས་རྣམ་པར་དག་པ་དང་། འདུ་ཤེས་ཕུང་པོ་གནས་གྱུར་ནས། །སོ་སོར་རྟོག་པའི་ཡེ་ཤེས་སུ། །བླ་མས་བདག་ནི་དྲང་དུ་གསོལ། །བཟླས་བརྗོད་མང་པོ་བདག་བགྱིའོ། །ཕྲག་དོག་རྣམ་པར་དག་པ་དང་། །འདུ་བྱེད་ཕུང་པོ་གནས་གྱུར་ནས། བྱ་བ་གྲུབ་པའི་ཡེ་ཤེས་སུ། །བླ་མས་བདག་ནི་དྲང་དུ་གསོལ། །མཆོད་པའི་ལས་རྣམས་ཅི་ནུས་བགྱི། །ཞེ་སྡང་རྣམ་པར་དག་པ་དང་། །རྣམ་ཤེས་ཕུང་པོ་གནས་གྱུར་ནས། །མེ་ལོང་ལྟ་བུའི་ཡེ་ཤེས་སུ། །བླ་མས་བདག་ནི་དྲང་དུ་གསོལ། །བླ་མ་དང་ནི་ཡི་དམ་ལྷ། །ཡུད་ཙམ་བརྗེད་པར་མི་བྱའོ། །ཉོན་མོངས་མ་ལུས་དག་པ་དང་། །ཕུང་པོ་ལྔར་བཅས་གནས་གྱུར་པའི། །ཡེ་ཤེས་ལྔ་ཡི་དཀྱིལ་འཁོར་དུ། །བླ་མས་བདག་ནི་དྲང་དུ་གསོལ། བྱམས་དང་སྙིང་རྗེ་དུས་རྟག་ཏུ། །འགྲོ་བ་རྗེས་སུ་བཟུང་བར་བགྱི། །ཞེས་བླ་མ་ལ་གསོལ་བ་གདབ་བོ། །ད་ནི་རིགས་ལྔ་ལ་གསོལ་བ་གདབ་པ་ནི། །རང་ཉིད་འཁོར་ལོས་བསྒྱུར་བའི་རྒྱལ་པོ་ཆེན་པོར་བསམས་ཏེ། ལག་པར་གསེར་ཀྱི་འཁོར་ལོ་རྩིབས་སྟོང་དང་ལྡན་པར་བསྒོམ་ནས་འདི་སྐད་བརྗོད་དོ། །ང་ནི་དེ་བཞིན་གཤེགས་པའི་རིགས། །སངས་རྒྱས་རྣམ་པར་སྣང་མཛད་ལ། །ཀུན་ནས་དད་པས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། །དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་ཡི། །མུན་པ་ཐམས་ཅད་གསལ་བ་དང་། །ལམ་གྱི་བར་ཆད་ཞི་བ་དང་། །འབྲས་བུ་སྐུ་བཞི་ཐོབ་པ་དང་། །བརྩོན་འགྲུས་གསུམ་ལ་འབད་པ་དང་། །གཟུགས་ཀྱི་ཕུང་པོ་རྣམ་པར་དག །གཏི་མུག་ཆོས་དབྱིངས་ཡེ་ཤེས་ཏེ། །སྣང་ལ་རང་བཞིན་མེད་པའི་སྐུ། །སངས་རྒྱས་སྐུ་ཡི་ངོ་བོ་ཉིད། །ཐུགས་རྗེ་ཆེན་པོས་བདག་བཟུང་ལ། །ངེས་པར་ཁྱེད་དང་གཉིས་མེད་པའི། །བདེ་བ་ཆེན་པོའི་གྲོང་མཆོག་ཏུ། །དཀར་ལ་དྲི་མ་མེད་པ་ཡི། །སྐུ་དང་ཐ་མི་དད་པར་མཛོད། །ཞེ་ལན་བདུན་བསྐྱར་ལ་གསོལ་བ་བཏབ། ལྷ་དེ་རང་ལ་བསྟིམ་མོ། རང་གི་འོད་ཀྱིས་འཇིག་རྟེན་གྱི་ཁམས་སྣང་བར་བསམ་མོ། །རང་ཉིད་ས་ལ་བཞུགས་པའི་བྱང་ཆུབ་སེམས་དཔའ་ཆེན་པོ་ལག་ན་པད་མ་འདབ་མ་སྟོང་དང་ལྡན་པ་བསྣམས་པར་བསམས་ལ། འདི་སྐད་ཅེས་གསོལ་བ་གདབ་བོ། །ང་ནི་པད་མའི་རིགས་མཆོག་སྟེ། །སངས་རྒྱས་སྣང་བ་མཐའ་ཡས་ལ། །ཀུན་ནས་དང་བས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། །དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་ཡི། །མུན་པ་ཐམས་ཅད་བསལ་བ་དང་། །ལམ་གྱི་བར་ཆད་ཞི་བ་དང་། །འབྲས་བུ་སྐུ་བཞི་ཐོབ་པ་ཡི། །བརྩོན་འགྲུས་གསུམ་ལ་འབད་པར་བྱ། །འདུ་ཤེས་ཕུང་པོ་རྣམ་པར་དག །འདོད་ཆགས་སོར་རྟོག་ཡེ་ཤེས་ཏེ། །སྣང་ལ་རང་བཞིན་མེད་པའི་གསུང་། །སངས་རྒྱས་གསུང་གི་ངོ་བོ་ཉིད། །ཐུགས་རྗེ་ཆེན་པོས་བདག་ཟུངས་ལ། །ངེས་པར་ཁྱེད་དང་གཉིས་མེད་པའི། །བདེ་བ་ཆེན་པོའི་གྲོང་མཆོག་ཏུ། །དམར་ལ་དྲི་མ་མེད་པ་ཡི། །གསུང་དང་ཐ་མི་དད་པར་མཛོད། །ཞེས་གསོལ་བ་སྔར་བཞིན་བཏབ་བོ། །ལྷ་དེ་རང་ལ་བསྟིམ་མོ། །རང་གི་འོད་ཀྱང་འཇིག་རྟེན་གྱི་ཁམས་ཐམས་ཅད་ཁྱབ་པར་བསམ་མོ། །རང་ཉིད་རིན་ཆེན་མཁའ་འགྲོ་མ་སྐུ་མདོག་གསེར་གྱི་མདངས་དང་ལྡན་པ་ཕྱག་ན་གསེར་གྱི་པད་མ་འདབ་མ་སྟོང་དང་ལྡན་པར་བསམས་ནས། གསོལ་བ་འདི་ལྟར་བཏབ། ང་ནི་ཡོན་ཏན་རིགས་མཆོག་སྟེ། །སངས་རྒྱས་རིན་ཆེན་འབྱུང་ལྡན་ལ། །ཀུན་ནས་དང་པས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་ཡི། །མུན་པ་ཐམས་ཅད་བསལ་བ་དང་། །ལམ་གྱི་བར་ཆད་ཞི་བ་དང་། འབྲས་བུ་སྐུ་བཞི་ཐོབ་པ་ཡི། །བརྩོན་འགྲུས་གསུམ་ལ་འབད་པར་བྱ། །ཚོར་བའི་ཕུང་པོ་རྣམ་པར་དག །ང་རྒྱལ་མཉམ་ཉིད་ཡེ་ཤེས་ཏེ། །སྣང་ལ་རང་བཞིན་མེད་པའི་སྐུ། །སངས་རྒྱས་ཡོན་ཏན་ངོ་བོ་ཉིད། །ཐུགས་རྗེ་ཆེན་པོས་བདག་ཟུང་ལ། །ངེས་པར་ཁྱེད་དང་གཉིས་མེད་པའི། །བདེ་བ་ཆེན་པོའི་གྲོང་མཆོག་ཏུ། །གསེར་ལ་དྲི་མ་མེད་པ་ཡི། །སྐུ་དང་ཐ་མི་དད་པར་མཛོད། །ཞེས་གསོལ་བ་བཏབ་པ་དང་། འོད་ཀྱིས་ཁྱབ་པར་བསམ་པ་ཡན་ཆོད་གོང་གིས་འགྲེའོ། །རང་ཉིད་ཅིག་པའི་ཁྲོ་བོ་སྐུ་མདོག་ལྗང་སྔོན་བརྗིད་པར་ཕྱག་ཏུ་རལ་གྲི་བསྣམས་པར་བསམས་ལ། གསོལ་བ་འདི་སྐད་གདབ་བོ། །ང་ནི་ལས་ཀྱི་རིགས་མཆོག་སྟེ། །སངས་རྒྱས་དོན་ཡོད་གྲུབ་པ་ལ། །ཀུན་ནས་དང་པས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། །དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་དང་། མུན་པ་ཐམས་ཅད་བསལ་བ་དང་། །ལམ་གྱི་བར་ཆད་བསལ་བ་དང་། །འབྲས་བུ་སྐུ་བཞི་ཐོབ་པ་ཡི། །བརྩོན་འགྲུས་གསུམ་ལ་འབད་པར་བྱ། འདུ་བྱེད་ཕུང་པོ་རྣམ་པར་དག །ཕྲག་དོག་བྱ་གྲུབ་ཡེ་ཤེས་ཏེ། །སྣང་ལ་རང་བཞིན་མེད་པ་ཡི། །སངས་རྒྱས་འཕྲིན་ལས་ངོ་བོ་ཉིད། །ཐུགས་རྗེ་ཆེན་པོས་བདག་ཟུངས་ལ། །ངེས་པར་ཁྱེད་དང་གཉིས་མེད་པའི། །བདེ་བ་ཆེན་པོའི་གྲོང་མཆོག་ཏུ། །ཟར་མའི་མེ་ཏོག་འདྲ་བ་ཡི། །སྐུ་ནི་ཐ་མི་དད་པར་མཛོད། །ཅེས་གསོལ་བ་བཏབ་པ་དང་འོད་ཀྱིས་ཁྱབ་པའི་བར་བསམ་པ་སྔར་བཞིན་ནོ། །རང་ཉིད་དགེ་སློང་ཆེན་པོ་ཆོས་གོས་གསུམ་འཆང་བ། རྙེད་པ་སྤོང་བ། ཕྱག་གཉིས་སུ་ཨུ་དུམ་འབར་བའི་མེ་ཏོག་མཛེས་པ་འཛིན་པར་བསམ་ལ། འདི་སྐད་ཅེས་གསོལ་བཏབ་པར་བྱའོ། །ང་ནི་རྡོ་རྗེ་རིགས་མཆོག་སྟེ། །སངས་རྒྱས་རྡོ་རྗེ་སེམས་དཔའ་ལ། །ཀུན་ནས་དང་བས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། །དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་ཡི། །མུན་པ་ཐམས་ཅད་བསལ་བ་དང་། །ལམ་གྱི་བར་ཆད་ཞི་བ་དང་། །འབྲས་བུ་སྐུ་བཞི་ཐོབ་པ་ཡི། །བརྩོན་འགྲུས་གསུམ་ལ་འབད་པར་བྱ། །རྣམ་ཤེས་ཕུང་པོ་གནས་གྱུར་ནས། །ཞེ་སྡང་མེ་ལོང་ཡེ་ཤེས་ཏེ། །སྣང་ལ་རང་བཞིན་མེད་པའི་སྐུ། །སངས་རྒྱས་ཐུགས་ཀྱི་ངོ་བོ་ཉིད། །ངེས་པར་ཁྱེད་དང་གཉིས་མེད་པའི། །བདེ་བ་ཆེན་པོའི་གྲོང་མཆོག་ཏུ། །བེ་ཌུརྻ་ཡི་སངས་རྒྱས་དང་། །སྐུ་དང་ཐ་མི་དད་པར་མཛོད། །ཅེས་གསོལ་བ་ལན་གསུམ་གདབ་བོ། །ལྷ་དེ་རང་ལ་ཐིམ་པར་བསམ་མོ། །རང་གི་འོད་ཟེར་མཐིང་ག་རང་གི་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་བྱས་པར་བསམ་མོ། །རང་ཉིད་ཐ་མལ་པར་བསམས་ཏེ། ལག་པ་ཐལ་མོ་སྦྱར་ནས། སྙེམ་པ་འབྲུ་ལྔས་བཀང་བར་བསམས་ཏེ། གསོལ་བ་འདི་སྐད་ཅེས་གདབ་བོ། །ང་ནི་ཐེག་པ་ཆེན་པོའི་རིགས། །སངས་རྒྱས་འཇིག་རྟེན་དབང་ཕྱུག་ལ། །ཀུན་ནས་དང་བས་སྐྱབས་སུ་མཆི། །བསོད་ནམས་ཚོགས་དང་ཡེ་ཤེས་ཚོགས། །དམ་པ་གཉིས་ནི་བསགས་པ་དང་། །ཉོན་མོངས་ཤེས་བྱའི་སྒྲིབ་པ་ཡི། །མུན་པ་ཐམས་ཅད་བསལ་བ་དང་། །ལམ་གྱི་བར་ཆད་ཞི་བ་དང་། །འབྲས་བུ་སྐུ་བཞི་ཐོབ་པ་ཡི། །བརྩོན་འགྲུས་གསུམ་ལ་འབད་པར་བྱ། །ཕུང་པོ་ལྔ་ནི་རྣམ་དག་པས། །ཉོན་མོངས་ལྔ་པོ་ཡེ་ཤེས་ལྔ། །སྣང་ལ་རང་བཞིན་མེད་པའི་སྐུ། །སྐུ་མདོག་དཀར་པོ་རྣམ་པར་སྣང་མཛད་རིགས། །རིན་ཆེན་བརྒྱད་ནི་རིན་ཆེན་འབྱུང་ལྡན་རིགས། །ཐལ་སྦྱར་རྡོ་རྗེ་རྩེ་ལྔ་མི་བསྐྱོད་རིགས། །པད་མ་དཀར་པོ་སྣང་བ་མཐའ་ཡས་རིགས། །མུ་ཏིག་འཕྲེང་བ་དོན་ཡོད་གྲུབ་པའི་རིགས། སངས་རྒྱས་མ་ལུས་འདུས་པའི་ངོ་བོ་ཉིད། །བཅོམ་ལྡན་ཐུགས་རྗེ་ཆེན་པོ་བདག་ཟུང་ལ། །ངེས་པར་ཁྱེད་དང་གཉིས་སུ་མེད་པ་ཡི། །བདེ་བ་ཆེན་པའི་གྲོང་མཆོག་དམ་པ་རུ། །འོད་ལྔས་མདངས་སྟོན་འཇིག་རྟེན་ཁྱབ་པར་མཛད། །གཉིས་སུ་མེད་པའི་གནས་སུ་དྲང་བར་མཛོད། །ཞེས་ལན་གསུམ་དུ་གསོལ་བ་བཏབ་བོ། །ཁོ་རང་ལ་བསྟིམ་མོ། །འོད་ལྔས་འཇིག་རྟེན་གྱི་ཁམས་ཐམས་ཅད་ཁྱབ་པར་བསམ་མོ། །ཨོཾ་མ་ཎི་པད་མེ་ཧཱུྃ། ཅེས་ལན་མང་དུ་སྐྱར་རོ། །དེ་ཡན་ཆད་སྔོན་དུ་འགྲོ་བའི་ཆོ་ག །ལས་རྒྱུ་འབྲས་དང་སྐྱབས་འགྲོ་སེམས་བསྐྱེད་གསོལ་བ་གདབ་པ་དང་བཅས་པ་རྣམས་ཡིན། ད་ནི་དངོས་གཞི་སྟོན་ཏེ་འདིའི་དུས་སུ་སྤྱན་འགེབས་བཏང་ལ། དེ་ནས་ནང་དུ་ཁྲིད་དེ་གྲལ་དུ་བསྡོད་དུ་གཞུག་ཅིང་། སློབ་དཔོན་གྱིས་རྟ་མགྲིན་གྱི་ང་རྒྱལ་དང་ལྡན་པས། གུ་གུལ་དང་ཚིལ་ཆེན་བསྲེག་ཅིང་བྱིན་བརླབས་བྱས་པའི་གསང་གཏོར་ཏེ་བསྐྲད་ལ། ལས་ཀྱི་སློབ་དཔོན་གྱིས་དཀྱིལ་འཁོར་མཐའ་མ་བསྐོར་ཞིང་། འདི་ལྟར་ལྷ་མོ་ཡ་མཚན་ཅན། །ཞེས་བྱ་བ་ལ་སོགས་པས་མཚམས་བཅད་པར་བྱའོ། །དེ་ནས་རྡོ་རྗེ་སློབ་དཔོན་གྱིས་སློབ་མའི་སྤྱི་བོར་རྡོ་རྗེ་བཞག་སྟེ་འདི་ལྟར་དམ་བསྒྲག་གོ །ཁྱོད་ནི་རྣལ་འབྱོར་རིགས་སུ་སྐྱེས། །ང་ཡིས་ཡེ་ཤེས་དམ་པ་སྦྱིན། །བྱིན་པས་དངོས་གྲུབ་ཐོབ་པར་འགྱུར། །གང་ཞིག་འདི་རྣམས་མ་མཐོང་བའི། །དྲུང་དུ་སྨྲ་བར་མ་བྱེད་ཅིག །བག་མེད་སྨྲས་ན་ཉམས་པར་འགྱུར། །དེ་བས་ང་རྒྱལ་བཅོམ་ནས་ནི། །བདག་ཉིད་མ་འཁྲུལ་ཤེས་པར་གྱིས། །ཞེས་སློབ་མ་དུ་ཡོད་པ་ལ་དམ་བསྒྲག་གོ །དེ་ནས་དམ་ཚིག་གི་ཆུ་བླུད་པ་ནི། །བདུད་རྩི་ལྕེའི་སྟེང་དུ་བཞག་སྟེ། འདི་ནི་དམ་ཚིག་བདུད་རྩིའི་ཆུ། །དམ་ཚིག་བསྲུངས་ན་དངོས་གྲུབ་འཐོབ། །དམ་ཚིག་འདས་ན་བསྲེག་པར་བྱེད། །འཐུང་ཅིག་དམ་ཚིག་རྡོ་རྗེའི་ཆུ། །ཨ་མྲྀ་ཏ་སྭ་ཏ་ཧཱུྃ། ཞེས་བརྗོད་དོ། །དེ་ནས་རྡོ་རྗེ་སློབ་དཔོན་གྱི་དམ་ཚིག་ནི། དེང་འདི་ནས་ནི་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱིས། །ང་ཡིས་ཇི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་གྱིས། །གང་ཡང་ང་ལ་མ་གུས་མིན། །དེ་བཞིན་གུས་པར་མ་བྱས་ན། །བདུད་ཀྱི་བཅོམ་ནས་ངན་འགྲོར་འགྲོ། །དེ་བས་དམ་ཚིག་གནས་པར་གྱིས། །ཞེས་བརྗོད་དོ། །དེའི་མཚན་ཉིད་བཤད་པར་བྱ་སྟེ། ཁྱོད་ནི་རྣལ་འབྱོར་ཅེས་པ་ཐེག་པ་ཆེན་པོ་སྤྱོད་ཅིང་སྐལ་བ་དང་ལྡན་པའི་རྣལ་འབྱོར་གྱི་རིགས་སུ་སྐྱེས་པའོ། །ངའི་ཡེ་ཤེས་ཅེས་པ་ལྷན་ཅིག་སྐྱེས་པའི་ཡེ་ཤེས་རྟོགས་པར་བྱེད་པའི་ཐབས་ཡིན་པས། ལམ་དམ་པ་ཁྱོད་ལ་སྦྱིན་པར་བྱའོ། །ཞེས་བྱ་བ་ཡིན་པས་དེ་ལྟ་བུ་དེ་བྱིན་ནས་ཡང་དག་པའི་དངོས་གྲུབ་ཐོབ་པར་འགྱུར་ཏེ། དེ་ལྟ་བུའི་དངོས་གྲུབ་ཀྱི་རྒྱུད་དེ། ཉན་ཐོས་དང་། རང་སངས་རྒྱས་དང་། བྱིས་པ་ཐ་མལ་པ་སོ་སོའི་སྐྱེ་བོ་བློ་ཆུང་བ་རྣམས་ཀྱི་རྩར་མི་བཤད་དོ། །དེའང་ཚོགས་ཀྱི་འཁོར་ལོ་བྱ་བ་ནི། སྐལ་ལྡན་རྣམས་ཀྱི་གསོལ་ཟས་ཡིན། །སྐལ་མེད་རྣམས་ཀྱི་དུག་ཏུ་འགྱུར། །ཞེས་བྱ་བ་དང་མཚུངས་པར་འདི་ལྟ་བུའི་གསང་སྔགས་དམ་པ་འདི་ཐོས་ནས་སྐྲག་ཅིང་དངངས་པ་དང་། བསྐུར་བར་འདེབས་ཅིང་སྡིག་པའི་རྟེན་དུ་འགྱུར་བ་དང་། བདག་ཉིད་ཀྱི་དམ་ཚིག་ཉམས་པར་འགྱུར་བས། བདག་ཉིད་ཀྱི་ང་རྒྱལ་བཅོམ་སྟེ། ཞི་བ་དང་དུལ་བ་དང་ལྡན་པས། བདག་ཉིད་མ་འཁྲུལ་བར་ཅི་ལྟར་གཞན་གྱི་ཡིད་དང་མཐུན་པར་བྱེད་པའོ། །དམ་ཚིག་རྡོ་རྗེའི་ཆུ་ཞེས་པ་དཔེར་ན་མནའ་ཆུ་བླུད་པ་དང་འདྲ་སྟེ། གཞན་ལ་སྨྲ་བར་མ་བྱེད་ཅིག །སྨྲས་ན་ཉམས་པར་འགྱུར་རོ། །ཞེས་པ་ཡིན་ལ། དམ་ཚིག་བླ་ན་མེད་པ་དེ་བསྲུངས་ནས་དངོས་གྲུབ་འཐོབ་པར་འགྱུར་རོ། །དེང་འདི་ནས་ནི་ཞེས་པས། དུས་འདི་ནས་བཟུང་སྟེ། ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ། གསང་སྔགས་ཀྱི་ལམ་སྟོན་པར་བྱེད་པ་རྡོ་རྗེ་འཛིན་པ་ང་ཡིན་གྱིས། ཅི་ལྟར་ཟེར་བ་མྱུར་དུ་བྱེད་དགོས་སོ། །དེ་ཡང་བླ་མ་དག་གི་བཀའ་བྱུང་ན། །ཡི་གེ་ངའི་རྐེད་པ་ཆོད་ཅེས་པས། ཡི་གེ་ང་ཅེས་པ་ལས་སླ་བ་མེད་པ་ལ། དེའི་བཀའ་བྱུང་ན་ཕྱེད་དུ་ཞོག་ལ་བཀའ་བསྒྲུབས་ཅིག དེ་ཅིའི་ཕྱིར་ན། འཁོར་བའི་སྡུག་བསྔལ་གྱི་རྒྱ་མཚོ་ལས་སྒྲོལ་བར་བྱེད་པ་བླ་མ་ཡིན་པས། མ་གུས་པར་ཅུང་ཟད་ཀྱང་མེད་པ་གྱིས་ཤིག མ་གུས་པའི་རྣམ་པ་ཅུང་ཟད་བྱས་ན། བདུད་ཀྱིས་བཅོམ་ནས་ངན་སོང་གསུམ་ནས་ཐོན་པའི་དུས་མེད་པར་འགྲོ་བ་ཡིན་པས། དེ་བས་དམ་ཚིག་ལ་གནས་པར་གྱིས། ཞེས་པའོ། །ད་ནི་སློབ་མ་རྣམས་ལ་སྤྱན་རས་གཟིགས་དབང་ཕྱུག་གི་མངོན་རྟོགས་འདི་ལྟ་བུ་ཡོད་པར་བྱའོ། །སྣང་ཞིང་སྲིད་པའི་ཆོས་ཐམས་ཅད་ཐོག་མ་མེད་པའི་དུས་ནས། རང་བཞིན་གྱིས་རྣམ་པར་དག་པའི་ཆོས་ཀྱི་སྐུ་ཡིན་པ་ལ། སེམས་ཅན་རྣམས་ཀྱིས་ངོ་མ་ཤེས་ནས། འཁོར་བར་འཁྱམས་པ་འདི་རྣམས་བདེ་བ་དང་ལྡན། སྡུག་བསྔལ་དང་བྲལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་་བྱའོ། །དེའི་ཆེད་དུ་བཅོམ་ལྡན་འདས་ཇོ་བོ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་གོ་འཕང་ཐོབ་པར་བྱ་སྙམ་དུ་སེམས་བསྐྱེད་ནས། ཨོཾ་སྭ་བྷ་བ་བི་ཤུད་དྷོ་སརྦ་དྷརྨ་སྭ་བྷ་བ་བི་ཤུད་དྷོ་ཧཾ། ཞེས་བརྗོད་པས། ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་འགྲོ་བ་མ་ལུས་པ། སྟོང་པ་ཉིད་དུ་བསྒོམ་ཞིང་། སྟོང་པའི་ངང་ལས་ཡི་གེ་བྷྲུཾ་ཅིག་བསྒོམ་དེ་ཡོངས་སུ་གྱུར་པ་ལས། གཞལ་ཡས་ཁང་གྲུ་བཞིའི་སྒོ་བཞི་པ། རྟ་བབས་དང་བཅས་པ་དེ་ལྟ་བུར་ལམ་གྱིས་བསྒོམ་པ་ནི། དང་པོར་དབུས་སུ་བཟླུམ་བསྐོར་གཙོ་བོའི་འདོམ་གང་བ། དེའི་ནམ་མཁའ་ལ་རྡོ་རྗེ་རྒྱ་གྲམ། དེའི་མཐའ་མར་རིན་པོ་ཆེའི་གདུང་ཟླུམ་པོ་རྒྱ་གྲམ་གྱིས་ཁོང་སེང་དུ་ཟུག་པར་བསྒོམ་ཞིང་། དེའི་མཐར་རྡོ་རྗེའི་གདུང་ཟླུམ་པོ། དེའི་མཐར་པད་མའི་གདུང་ཟླུམ་པོ། དེའི་མཐར་འཁོར་ལོ་གདུང་ཟླུམ་པོ། དེའི་མཐར་ཕྱོགས་བཞིར་གྱེས་པ་རྒྱ་གྲམ་གྱི་གདུང་གྲུ་བཞི་པ་ཕྱིར་ལ་ལྷག་པ། རྒྱ་གྲམ་གྱིས་མཚན་པ་བསྒོམ་མོ། །དེ་ལྟ་བུ་ནི་ཐོག་གི་དབྱིབས་སོ། །དེ་མ་ཡིན་པ་པད་མའི་གདུང་རྐྱང་པ་བསྒོམས་ཀྱང་ཆོག ཕྱིའི་དབྱིབས་ནི་ལོགས་རེ་རེ་ལ་གཙོ་བོའི་འདོམ་བརྒྱད་དང་ལྡན་པ་དང་པོ་ཡེ་ཤེས་ལྔའི་བརྡར་པན་ཙ་རེ་ག་ཁ་དོག་ལྔ་དང་ལྡན་པ། ཞིང་དུ་ཁྲུ་ལྔ་དཔངས་སུ་འདོམ་གསུམ་དང་ལྡན་པ་དེའི་སྟེང་དུ་ཕ་གུ་ཁྲུ་གང་བ་དེའི་སྟེང་དུ་རིན་པོ་ཆེ་བཻ་ཌུརྻའི་སྣམ་བུ་འདོམ་ཕྱེད་པ། དེའི་སྟེང་དུ་བ་སོའི་གཟེང་ཁང་ཁྲུ་གང་བ་ལ་བར་བར་དུ། རིན་པོ་ཆེའི་ཕ་གུ་ཙི་པ་ཏྲའི་མགོ་དང་ལྡན་པ་ལས་རིན་པོ་ཆེ་རེ་རེའི་དྲ་བ་དྲ་ཕྱེད་འཕྱང་བ། དེ་ལྟ་བུའི་སྟེང་དུ་གདུང་གི་སྣ་ལ་རྡོ་རྗེ་རྒྱ་གྲམ་གྱིས་མཚན་པ། ཕྱིར་ལ་འདོམ་ཕྱེད་ལྷག་པའི་ཚུལ་གྱིས་འདོད་ཡོན་གྱི་སྣམ་བུ་དང་མཉམ་པ་དེའི་སྟེང་རྡོ་ཀར་མ་ཤི་ཤ་ལས་གྲུབ་པའི་རྩ་བརྒྱད་ཀྱི་རྣམ་པ། སྒོ་བཞི་བློ་བུར་གྱི་ཚུལ་དུ་འདུག་པ་ལ། རྟ་བབས་ཆ་བཞི་མཛེས་པའོ། །གཙོ་བོའི་ཏོག་གི་ནམ་མཁའི་རྡོ་རྗེ་རྒྱ་གྲམ་གྱི་སྟེང་དུ། ཆོས་ཀྱི་འཁོར་ལོ་རིམ་པ་བཅུ་གསུམ་དང་ལྡན་པ། གདུགས་ཆར་ཁེབ་དར་དཔྱངས་ཀྱིས་བརྒྱན་པའོ། །རྟ་བབས་རེ་རེའི་སྟེང་དུ་ཡང་། ཆོས་ཀྱི་འཁོར་ལོ་རིམ་པ་བཅུ་གསུམ་པ་རེ་རེ་ཕྱོགས་བཞི་ནས་རི་དྭགས་བཞི་བཞི་སྟེ་དེ་དག་ནི་བྱང་ཆུབ་སེམས་དཔའ་བཅུ་དྲུག་གོ །དེ་ལྟར་དུ་གཞལ་ཡས་ཁང་བསྐྱེད་ནས། ད་ནི་བདག་བསྐྱེད་པའི་རིམ་པ་བསྒོམ་པ་ནི། སྟོང་པ་ཉིད་ཀྱི་ངང་ལས་བདག་ཉིད་ཀྱི་རྣམ་པར་ཤེས་པ་ཡི་གེ་ཧྲི་གཅིག་ཏུ་གྱུར་པར་བསྒོམ་ཞིང་། དེ་ཡོངས་སུ་གྱུར་པ་ལས་བདག་ཉིད་སྤྱན་རས་གཟིགས་དབང་ཕྱུག་སྐུ་མདོག་དམར་པོ་ཞལ་གཅིག་ཕྱག་བཞི་པ། དང་པོ་གཉིས་ཡུམ་གྱི་རྒྱབ་ཏུ་ཐལ་མོ་སྦྱར་བ། གཡས་ཀྱི་འོག་མ་ན་རྡོ་རྗེ་རྩེ་ལྔ་བསྣམས་པ། གཡོན་གྱི་འོག་མ་ན་མེ་ཏོག་པད་མ་དམར་པོ་འདབ་མ་བརྒྱད་པའི་ཡུ་བ་ནས་འཛིན་པ། ཞབས་དཀྱིལ་མོ་དཀྲུང་དུ་བཞུགས་པ། སྐུ་ལ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའོ། །དེ་ལྟ་བུའི་ཡུམ་རྡོ་རྗེ་རྣལ་འབྱོར་མ། ཞལ་གཉིས་མ་སྤྱན་གསུམ་ཁྲོ་གཉེར་དང་ལྡན་པ་སྐུ་མདོག་མཐུན་པའི་ཕག་ཞལ་ཚངས་བུག་ཏུ་བྱུང་པ། གཡས་གྲི་གུག་གཡོན་ཐོད་ཁྲག་རུས་པའི་རྒྱན་ཆ་ལྔ་ཡིས་བརྒྱན་པ། དེ་ལྟ་བུའི་ཕྱོགས་བཞིར་སྤྱན་རས་གཟིགས་དབང་ཕྱུག་རྒྱན་ཆ་ལུགས་གཙོ་བོ་དང་མཐུན་པ། གཡས་ཀྱི་འོག་མ་ན་བགྲང་འཕྲེང་ངོ་། །མ་མ་ཀི་ནི་ཕྱག་བཞི་པ། དང་པོ་གཉིས་ཡབ་ཀྱི་རྒྱབ་ཏུ་ཐལ་མོ་སྦྱར་བ། གཡས་ཀྱི་འོག་མ་ན་རིན་པོ་ཆེ། གཡོན་པད་མའོ། །ལྷ་མོ་གཞན་རྣམས་ཀྱང་། ཐལ་མོ་སྦྱར་བ་མཐུན་ནོ། །སངས་རྒྱས་སྤྱན་ནི་གཡས་འཁོར་ལོ་གཡོན་པད་མའོ། །ན་བཟའ་དཀར་མོ་གཡས་པད་མ་དཀར་པོ་གཡོན་པད་མ་དམར་པོའོ། དམ་ཚིག་སྒྲོལ་མ་ལྗང་ཁུ་གཡས་ཨུད་པ་ལ། གཡོན་པད་མ། ཡུམ་བཞིའི་ཕྱག་མཚན་ནོ། །མཚམས་བཞིར་རྡོ་རྗེ་མཁའ་འགྲོ་དང་། རིན་ཆེན་མཁའ་འགྲོ་དང་། པད་མ་མཁའ་འགྲོ་དང་། ལས་ཀྱི་མཁའ་འགྲོ་དང་བཞི་ནི། རྡོ་རྗེ་རིན་པོ་ཆེ་དང་། པད་མ་དང་། རལ་གྲིའོ། །དེ་མཁའ་འགྲོ་མ་བཞིའོ། །དེའི་མཐར་མཆོད་པའི་ལྷ་མོ་ལྔ་ནི། གཟུགས་རྡོ་རྗེ། སྒྲ་རྡོ་རྗེ། དྲི་རྡོ་རྗེ། རོ་རྡོ་རྗེ། རེག་བྱ་རྡོ་རྗེ་རྣམས་སོ། །དེ་ལྟ་བུར་གཞལ་ཡས་ཁང་སྣ་ཚོགས་དང་བཅས་པ་བསྐྱེད་དུ་བཅུག་ནས། ཡན་ལག་བདུན་པ། སྤྱན་འདྲེན། མཆོད་བསྟོད། ལས་ཀྱི་སློབ་དཔོན་གྱིས་རྒྱས་པར་བྱའོ། །དེ་ནས་གསོལ་བ་གདབ་པར་བྱའོ། །དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་གྱུར་པ་བླ་མ་རྡོ་རྗེ་འཛིན་པ་ཆེན་པོས་བདག་ཅག་ལ་བླ་ན་མེད་པའི་ཡེ་ཤེས་དབབ་དུ་གསོལ། ཞེས་པ་ལན་གསུམ་གསོལ་བ་གདབ་པར་བྱའོ། །དེ་ནས་ཡེ་ཤེས་དབབ་པར་བྱ་སྟེ། སློ་མ་རྣམས་ལངས་སུ་བཅུག་ཅིང་། སྤྱི་བོར་ཆོས་འབྱུང་གི་ཕྱག་རྒྱ་བཅར་བཅུག་ལ་ཏིང་ངེ་འཛིན་སྦྱོང་པར་བྱས་ཏེ། ཁྱེད་རང་ཐམས་ཅད་རྗེ་བཙུན་རྡོ་རྗེ་རྣལ་འབྱོར་མར་བསྒོམ་ཞིང་བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། གསང་སྔགས་ཀྱི་ལྷ་ཚོགས་ཐམས་ཅད་ཀྱི་ཕྱག་གཡས་ན་ཌ་མ་རུ་གཡོན་དྲིལ་བུ་བསྣམས་པ་གར་ཁྱུག་ཁྱུག་བྱེད་པ་བསམ་གྱིས་མི་ཁྱབ་པ་བཞུགས་ཤིང་བྱིན་གྱིས་རློབ་པར་བསྒོམ་ཅིག་ཅེས་བྱ་སྟེ། ཨོཾ་ཨཱ་ཧཱུྃ། ཨོཾ་མ་ཎི་པད་མེད་ཧཱུྃ། སརྦ་བྷུད་དྷ་ཌ་ཀི་ནི་ཡེ། བཛྲ་ཝརྣ་ནི་ཡེ། བཛྲ་བྷེ་རོ་ཙ་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་བཛྲ་བྷ་ར་ཧི། ཆེ་གེ་མོ་ཨ་བྷི་ཤ་ཧྲིཾ་སྭཱཧཱ། ཧྲིཾ་ཧྲིཾ་ཧྲིཾ། ཕེཾ་ཕེཾ་ཕེཾ། ཅེས་པ་རྣམས་བཟླས་ཤིང་དབབ། གུ་གུལ་དང་ཚིལ་ཆེན་བསྲེག་ཅིང་ལྷ་ཆ་ཡུན་རིང་དུ་དཀྲོལ་བར་བྱའོ། །དེ་ནས་རྗེས་ལ་ཐམས་ཅད་ཡེ་ཤེས་གནས་པའི་བར་དུ་ཡེ་ཤེས་ཀྱི་གླུ་བླང་བ་ནི། ལྟོས་ཅིག་ལྟོས་ཅིག་རང་གི་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། གྲུབ་པར་མེད་པའི་སེམས་ཉིད་ལ། །སྣ་ཚོགས་སྣང་བ་ངོ་མཚར་ཆེ། །སྣང་ཙམ་ཉིད་ལ་སེམས་སུ་འདུས། །སེམས་ཅན་ཀུན་གྱི་སེམས་ཉིད་དེ། །བདེ་བ་ཆེན་པོའི་ཡེ་ཤེས་ཡིན། །རྣམ་པར་མི་རྟོག་བསམ་མི་ཁྱབ། །གསལ་བ་དེ་ཡི་ངོ་བོར་སྣང་། །རྨོངས་པ་དུ་མའི་སེམས་ཅན་ལ། །ཐབས་རྣམས་སྣ་ཚོགས་བསྟན་པ་སྟེ། །སྣ་ཚོགས་སྒྱུ་མའི་སྦྱོར་བ་ཡིས། །དཔའ་བོ་སེང་གེ་བཞིན་དུ་སྤྱོད། །བསམ་གྱི་མི་ཁྱབ་གོ་འཕང་འཐོབ། །འདི་སྤྱན་རས་གཟིགས་ཀྱི་བྱིན་བརླབས་ཡིན། །བླ་མ་རྒྱུད་པའི་བྱིན་བརླབས་ཀྱིས། །སྣ་ཚོགས་ནོར་བུ་ཅི་བཞིན་དུ། །སྐལ་ལྡན་རྣམས་ཀྱི་སྤྱོད་ཡུལ་ཡིན། །ཞེས་བརྗོད་དོ། །དེ་ནས་ཚུར་ཁྲིད་དེ་དཀྱིལ་འཁོར་བསྟན་ལ། སེར་པོ་ཤས་ཆེར་མཐོང་ན་རྒྱས་པ། དམར་པོ་ལ་དབང་། དཀར་པོ་ལ་ཞི་བ། ནག་པོ་ལ་དྲག་པོ། ཁ་དོག་སྣ་ཚོགས་ནི་ལས་སྣ་ཚོགས་པ་ལ་དབང་ངོ་། །དེ་ནས་མེ་ཏོག་དོར་བ་ནི། རྡོ་རྗེ་སློབ་དཔོན་གྱིས། འདི་སྐད་བརྗོད་དོ། །བདེ་གཤེགས་སྙིང་པོའི་དཀྱིལ་འཁོར་དུ། །རིག་པའི་མེ་ཏོག་འདི་དོར་བས། །སྔོན་ཚེ་གང་ལ་སྦྱང་བ་ཡི། །གང་ཡིན་དེ་ལ་ཕོག་པར་ཤོག །དེ་ནས་གཙོ་བོ་ཡབ་ཡུམ་ལ་ཕོག་ནས། དཔལ་དགྱེས་པའི་པད་མ། དཔལ་པད་མའི་མྱུ་གུ། དཔལ་པད་མ་མཛེས་པ། དཔལ་པད་མ་དགྱེས་པ། དཔལ་པད་མ་བརྗིད་པ། དཔལ་པད་མའི་དབང་ཕྱུག ཅེས་གདགས་སོ། །དེ་ནས་སྤྱན་བཀབ་བཤུས་ཏེ། སྤྱན་སྔ་མ་དག་ངོ་བོ་དབྱེར་མེད་དེ། །དབྱེ་དང་མི་དབྱེ་མཚན་ཉིད་གཉིས་མེད་ཀྱང་། །སྲིད་ཞུའི་ཚུལ་གྱིས་གསེར་གྱི་ཐུར་མ་ཡིས། །སྣ་ཚོགས་ཡངས་པའི་སྤྱན་ནི་དབྱེ་བགྱིས་པས། །སྤྱི་དང་རང་གི་མཚན་ཉིད་ཆོས་རྣམས་ཀུན། །ཅི་ལྟར་མཁྱེན་ཅིང་ཐམས་ཅད་གཟིགས་པ་ལྟར། །སངས་རྒྱས་ཡེ་ཤེས་སྤྱན་གྱི་དངོས་གྲུབ་དེས། །ཁྱོད་དམུས་ལོང་ལྟ་བུར་གྱུར་པ་གསལ་བར་ཤོག །ཅེས་བརྗོད་དོ། །ད་དཀྱིལ་འཁོར་བསྟན་པ་ནི་འདི་སྐད་དོ། །དཀྱིལ་འཁོར་གཉན་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། འགྲོ་བ་ཕུན་སུམ་ཚོགས་ཀུན་དང་། །དམ་ཚིག་ཐམས་ཅད་བསྐྱངས་པ་དང་། །གསང་སྔགས་འདི་ལ་བརྩོན་པར་གྱིས། །བྱས་ལ་ཆོས་བཤད་དོ། །དེ་ནས་དབང་བསྐུར་བར་བྱ་སྟེ། ལས་ཀྱི་སློབ་དཔོན་གྱིས་མཎྜྻལ་ཕུལ་ཞིང་གསོལ་བ་འདི་སྐད་ཅེས་གདབ་པར་བྱའོ། །པད་མ་དབང་གི་དཀྱིལ་འཁོར་དུ། མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །དབང་བསྐུར་རྫོགས་པར་མཛད་དུ་གསོལ། །ཞེས་ལན་གསུམ་གསོལ་བ་གདབ་བོ། །ད་ནི་རྡོ་རྗེ་སློབ་དཔོན་གྱིས་དབང་བསྐུར་བར་བྱ་སྟེ། བུམ་པ་གདན་དྲངས་ནས། སློབ་མའི་མགོ་ཐོག་ཏུ་བཞག་སྟེ། ཏིང་ངེ་འཛིན་སྤྱོད་པ་ནི། བུམ་པ་འདི་དང་ཐ་དད་མེད་པར་ཇོ་བོ་ཐུགས་རྗེ་ཆེན་པོའི་ལྷ་ཚོགས་བཞུགས་པར་བསམ། སྐུ་ལ་འོད་ཟེར་དཀར་པོ་བྱུང་ནས་ཁྱེད་རང་གི་ལུས་ལ་ཐིམ། ལུས་ཀྱི་སྡིག་སྒྲིབ་དག་བུམ་པའི་དབང་ཐོབ་པར་བསྒོམ། དམ་ཚིག་བརྗོད་པ་ནི། སྤྱན་རས་གཟིགས་དབང་འཇིག་རྟེན་མགོན། །སངས་རྒྱས་རྣམས་ཀྱི་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དོ་ནུབ་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོང་། །ཨོཾ་ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་སྐུ་ཁྲུས་གསོལ། །ཨོཾ་ཨཱ་ཧཱུྃ་ཧྲི། ཨོཾ་མ་ཎི་པད་མེ་ཧཱུྃ། བྷུདྡྷ་ཨ་བྷི་ཥིཉྩྨ་ཧཱུཾ། དེ་ནས་ཤར་ཕྱོགས་སུ་རྡོ་རྗེ་སེམས་དཔའི་དབང་བསྐུར་བ་ནི། རྡོ་རྗེ་སློབ་མའི་ལག་ཏུ་བཞག་ལ། ཏིང་ངེ་འཛིན་ཡོད་པ་ནི་རྡོ་རྗེ་འདི་དང་ཐ་དད་མེད་པར་ཐུགས་མི་བསྐྱོད་པ་རྡོ་རྗེའི་དབང་ཐོབ་པར་བསྒོམ་ཞིག་བྱ། ཧཱུཾ་རྡོ་རྗེ་མི་བསྐྱོད་རིགས་ཀྱི་གཙོ། །ཞེ་སྡང་རྣམ་དག་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །མེ་ལོང་ལྟ་བུའི་དབང་འདི་ཁྱོད་ཀྱིས་ལོངས། །ཨོཾ་ཨ་ཧཱུཾ་ཧྲཱི། ཨོཾ་མ་ཎི་པདྨེ་ཧཱུཾ། ཨོཾ་བཛྲ་སྭ་ཏྭ་ཨ་བྷི་ཥིཉྩྨ་ཧཱུྃ། ནུབ་སྒོར་སྣང་བ་མཐའ་ཡས་ཀྱིས་དབང་བསྐུར་ཏེ། ཡི་གེ་དྲུག་པའི་དབང་བླངས་ལ། སློབ་མའི་ལག་ཏུ་བཞག་ལ། ཏིང་ངེ་འཛིན་ཡོད་པ་ནི། དཔེ་འདི་དང་ཐ་དད་མེད་པར། སྣང་བ་མཐའ་ཡས་ཀྱི་ལྷ་ཚོགས་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་ཐིམ་པས། གསུང་མི་བཟད་པ་བརྒྱན་གྱི་འཁོར་ལོའི་དབང་ཐོབ་པར་བསྒོམས་ཤིག་བྱ། ཧཱུྃ་པད་མ་དབང་གི་དཀྱིལ་འཁོར་དུ། །འདོད་ཆགས་རྣམ་པར་དག་པ་ཡི། །སངས་རྒྱས་རྣམས་ཀྱི་གསུང་མཆོག་དབང་། །དོ་ནུབ་ཁྱོད་ལ་བསྐུར་བར་བྱ། སོ་སོར་ཀུན་རྟོག་དབང་ནི་ཁྱོད་ཀྱི་ལོང་། །ཨོཾ་ཨ་ཧཱུྃ་ཧྲཱི༔ ཨོཾ་མ་ཎི་པད་མེ་ཧཱུྃ། ཨོཾ་པད་མ་ཨ་བྷི་ཥིཉྩྨ་ཧྲཱི། ད་ནི་དཀྱིལ་འཁོར་གྱི་ལྷོ་སྒོར་ཡོན་ཏན་གྱི་དབང་བསྐུར་བ་ནི། རིན་ཆེན་འབྱུང་ལྡན་གྱི་ངོ་བོ་བགྲང་ཕྲེང་བླངས་ཏེ། སློབ་མའི་མགུལ་དུ་བསྐོན་ལ། ཏིང་ངེ་འཛིན་ཡོད་པ་ནི། ཕྲེང་བ་འདི་དང་ཐ་དད་མེད་པར་རིན་ཆེན་འབྱུང་ལྡན་གྱི་ལྷ་ཚོགས་དཔག་ཏུ་མེད་པ་བྱོན་ནས། ཁྱེད་རང་གི་རྒྱུད་ལ་ཐིམ་པས། ཉོན་མོངས་པའི་ང་རྒྱལ་དག་ནས། རང་བྱུང་ཡེ་ཤེས་ཀྱི་དབང་ཐོབ་པར་བསྒོམ། ཧཱུྃ་རིན་ཆེན་མཆོག་གི་དཀྱིལ་འཁོར་དུ། །ང་རྒྱལ་རང་སར་དག་པ་ཡིས། །སངས་རྒྱས་རྣམས་ཀྱི་ཡོན་ཏན་དབང་། །དོ་ནུབ་ཁྱོད་ལ་བསྐུར་བར་བྱ། །མཉམ་ཉིད་ཡེ་ཤེས་དབང་འདི་ཁྱོད་ཀྱིས་ལོང་། །ཨོཾ་ཨཱ་ཧཱུྃ་ཧྲཱི། ཨོཾ་མ་ཎི་པད་མེ་ཧཱུྃ། རཏྣ་ཨ་བྷི་ཥིཉྩྨ་ཏྲཾ། ད་ནི་བྱང་སྒོར་དོན་ཡོད་གྲུབ་པས་དབུ་རྒྱན་པར་བྱས་ཏེ། མར་མེ་སློབ་མའི་མགོ་ཐོག་ཏུ་བཞག་ལ། ཏིང་ངེ་འཛིན་སྤྱོད་པ་ནི། མར་མེ་འདི་དང་ཐ་དད་མེད་པར་སངས་རྒྱས་རྣམས་ཀྱི་འཕྲིན་ལས་དོན་ཡོད་གྲུབ་པའི་ངོ་བོར་བྱོན་ནས། ཁྱེད་བདག་གི་ལུས་ངག་ཡིད་གསུམ་ལ་ཐིམ་པ་ཙམ་གྱིས་ཤེས་བྱའི་སྒྲིབ་པ་དང་འདུ་བྱེད་ཀྱི་སྒྲིབ་པ་དག་ནས། འཕྲིན་ལས་བཞིའི་དབང་ཐོབ་པ་བསྒོམས་ཤིག ཧཱུྃ་འཕྲིན་ལས་ཡེ་ཤེས་ཡོངས་རྫོགས་དཀྱིལ་འཁོར་དུ། །ཕྲག་དོག་རང་སར་དག་པའི་དབང་མཆོག་འདི། །དོ་ནུབ་ཁྱོད་ལ་བསྐུར་བར་བྱ། །བྱ་གྲུབ་ཡེ་ཤེས་དབང་འདི་ཁྱོད་ཀྱིས་ལོང་། ཨོཾ་ཨཱ་ཧཱུྃ་ཧྲཱི༔ ཨོཾ་མ་ཎི་པད་མེ་ཧཱུྃ། ཀར་མ་ཨ་བྷི་ཥིཉྩྨ་ཨ། དེ་བཞིན་དུ་རིགས་པའི་དབང་བསྐུར་རྫོགས་པར་བྱའོ། །དེ་ནས་བུམ་པའི་ཆུས་སློབ་མ་རྣམས་ལ་ཁྲུས་བྱའོ། །དེ་ནས་སློབ་མ་རྣམས་ལ་བསྐྱེད་རིམ་གྱིས་གདམས་ངག་བསྟན། དཀྱིལ་འཁོར་ནི་རྡུལ་ཚོན་གྱི་དཀྱིལ་འཁོར་བསྟེན་ཏེ། དབང་ནི་བུམ་པའི་དབང་བསྐུར། བསྐུར་བའི་གནས་ནི་ལུས་ལ་བསྐུར། སྒྲིབ་པ་ནི་ལུས་ཀྱི་སྒྲིབ་པ་དག གདམས་ངག་ནི་བསྐྱེད་རིམས་སྟོན། བསྒོམ་པ་ནི་ལྷའི་སྐུ་སྣང་ལ་རང་བཞིན་མེད་པར་བསྒོམ། ལྟ་བ་ནི་སྣང་སྟོང་དབྱེར་མེད་དུ་བལྟ། དེ་གོམས་འདྲིས་མཐར་ཕྱིན་པ་ཡིན་ན། འབྲས་བུ་སྤྲུལ་པའི་སྐུ་འཐོབ། དེ་ལྟ་བུ་བསྒོམ་པ་ལ་དབང་བར་བྱས། དེའི་མཚན་ཉིད་དང་ལྡན་པར་བྱས། དེའི་སྐལ་བ་དང་ལྡན་པར་བྱས་སོ། །དེ་ནས་ངག་དག་པར་བྱེད་པ། གསང་བའི་དབང་བསྐུར་བ་ནི། རྡོ་རྗེ་སློབ་དཔོན་གྱི་ལག་ཏུ་ཐོད་པ་ཐོགས་ལ་འདི་སྐད་བརྗོད་དོ། །སངས་རྒྱས་ཀུན་གྱི་ཐོད་པའི་དབང་། །དོ་ནུབ་ཁྱོད་ལ་བསྐུར་བར་བྱ། །ཐོད་པའི་དབང་འདི་ཁྱོད་ཀྱིས་ལོང་། །དེ་ནས་ཡབ་ཡུམ་གྱི་སྔགས་དང་། དབང་གི་སྔགས་རྣམས་བརྗོད་དོ། །ཐོད་པའི་ཆང་ལན་གསུམ་བླུད། དེ་ནས་རྫོགས་པའི་རིམ་པ་གདམས་ངག་སྟོན། དཀྱིལ་འཁོར་ནི་བླ་མ་ཡབ་ཡུམ་གྱི་དཀྱིལ་འཁོར་ལ་བསྟེན། དབང་ནི་ཀ་པ་ལའི་དབང་བསྐུར། བསྐུར་བའི་གནས་ནི་ངག་ལ་བསྐུར། སྒྲིབ་པ་ནི་ངག་གི་སྒྲིབ་པ་དག གདམས་ངག་ནི་རྣམ་པར་རྟོག་པ་ཤས་ཆེ་ན་རླུང་ལ་སླབ་པའི་གདམས་ངག་སྟོན། བསྒོམ་པ་ནི་གསལ་སྟོང་དབྱེར་མེད་དུ་བསྒོམ། ལྟ་བ་ནི་རིག་སྟོང་དབྱེར་མེད་དུ་བལྟ། དེ་གོམས་འདྲིས་མཐར་ཕྱིན་ན། འབྲས་བུ་ལོངས་སྤྱོད་རྫོགས་པའི་སྐུ་འཐོབ། དེ་ལྟ་བུ་བསྒོམ་པ་ལ་དབང་བར་བྱས། དེའི་མཚན་ཉིད་དང་ལྡན་པར་བྱས། དེའི་སྐལ་བ་དང་ལྡན་པར་བྱའོ། །དེ་ནས་ཡིད་དག་པར་བྱེད་པ་ཤེས་རབ་ཡེ་ཤེས་ཀྱི་དབང་ནི། སློབ་དཔོན་གྱིས་སིན་དྷུ་རའི་དཀྱིལ་འཁོར་ལག་ཏུ་ཐོགས་ལ། འདི་སྐད་བརྗོད་དོ། །སངས་རྒྱས་ཀུན་གྱི་མེ་ལོང་དབང་། །སངས་རྒྱས་ཀུན་གྱིས་རབ་བསྒྲུབ་ཕྱིར། །དོ་ནུབ་ཁྱོད་ལ་བསྐུར་བར་བྱ། །མེ་ལོང་དབང་འདི་ཁྱོད་ཀྱིས་ལོང་། །ཅེས་པའི་སྔགས་དང་། དབང་གི་སྔགས་ལན་གསུམ་བརྗོད་དོ། །དཀྱིལ་འཁོར་ནི་སིན་དྷུ་རའི་དཀྱིལ་འཁོར་ལ་བརྟེན། དབང་ནི་སིན་དྷུ་རའི་དབང་བསྐུར། བསྐུར་བའི་གནས་ནི་སེམས་ལ་བསྐུར། སྒྲིབ་པ་ནི་སེམས་ཀྱི་སྒྲིབ་པ་དག །གདམས་ངག་ནི་ཉོན་མོངས་པ་ཤས་ཆེ་ན་བྱང་ཆུབ་ཀྱི་སེམས་ལ་བསླབ་པའི་གདམས་ངག་སྟོན། བསྒོམ་པ་ནི་བདེ་གསལ་བསྒོམ། ལྟ་བ་ནི་བདེ་སྟོང་གཉིས་སུ་མེད་པར་ལྟ། དེ་གོམས་འདྲིས་མཐར་ཕྱིན་པ་ཡིན་ན། འབྲས་བུ་ཆོས་སྐུ་འཐོབ། དེ་ལྟར་བསྒོམས་པ་ལ་དབང་བར་བྱས། དེའི་མཚན་ཉིད་དང་ལྡན་པར་བྱས། དེའི་སྐལ་བ་དང་ལྡན་པར་བྱས། །དེ་ནས་ཚིག་དབང་ནི། སློབ་དཔོན་གྱིས་མེ་ལོང་བསྟན་ནས། འདི་སྐད་བརྗོད་པར་བྱའོ། །ལྟོས་ཤིག་ལྟོས་ཤིག་སེམས་ལ་ལྟོས། །སེམས་ཉིད་མེ་ལོང་ལྟ་བུ་སྟེ། །དག་ཅིང་གསལ་ལ་དམིགས་སུ་མེད། །སེམས་ཀྱི་དྲི་མ་དག་པའི་ཕྱིར། །གཟུགས་བརྙན་ལྟ་བུར་ཤེས་པར་བྱ། །ཞེས་བརྗོད་ལ་གདམས་ངག་བསྟན་པ་ནི། སེམས་ཀྱི་དབྱིངས་མེ་ལོང་གཡའ་དག་པ་ལྟ་བུ་ཡིན། དེ་ལ་ཉོན་མོངས་པའི་སྒྲིབ་པས་སྒྲིབས་པ་ནི། ཐུགས་རྗེ་ཆེན་པོའི་དཀྱིལ་འཁོར་བྲིས་པ་ལྟ་བུ་ཡིན། དེ་ལ་ཤེས་བྱའི་སྒྲིབ་པ་ཆ་ཕྲ་མོ་ཡོད་པ་ནི། ཐུགས་རྗེ་ཆེན་པོའི་སྔགས་བྲིས་པ་ལྟ་བུ་ཡིན། དེ་ལྟར་དུ་གང་ལ་ཡང་གསལ་ལ་མ་འགགས་པ་རང་བཞིན་གྱིས་རྣམ་པར་དག་པ་ཡིན་ནོ། དཀྱིལ་འཁོར་ནི་སྣང་སྲིད་ཀྱི་དཀྱིལ་འཁོར་ལ་བརྟེན། དབང་ནི་ཚིག་དབང་རིན་ཆེན་བསྐུར། བསྐུར་བའི་གནས་ནི་ལུས་ངག་ཡིད་གསུམ་སྤྱི་ལ་བསྐུར། སྒྲིབ་པ་ནི་ལུས་ངག་ཡིད་གསུམ་གྱི་སྒྲིབ་པ་དག གདམས་ངག་ནི་ངོ་བོ་ཉིད་ཀྱི་རིམ་པ། ཕྱག་རྒྱ་ཆེན་པོའི་གདམས་ངག་སྟོན། བསྒོམ་པ་ནི་རང་གི་སེམས་སྤྲོས་པའི་མཐའ་དང་བྲལ་བ་རང་བཞིན་གྱིས་རྣམ་པར་དག་པ་བསྒོམ། ལྟ་བའི་ཕྱག་རྒྱ་ཆེན་པོ་བློ་ལས་འདས་པ་ལ་ལྟ། དེ་གོམས་འདྲིས་མཐར་ཕྱིན་པ་ཡིན་ན། འབྲས་བུ་ཆོས་སྐུ། ལོངས་སྐུ། སྤྲུལ་སྐུ་གསུམ་ངོ་བོ་དབྱེར་མེད་པས། ངོ་བོ་ཉིད་ཀྱི་སྐུ་འཐོབ་པའོ། །དེ་ནས་སིན་དྷུ་ར་སྤྱི་བོར་བྱུགས་ལ། འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་བར་བྱེད་པ། བཀའ་བརྒྱུད་ཀྱི་བླ་མ་ཡིན་པས། སྤྱི་བོའི་གཙུག་ཏུ་མི་འབྲལ་བར་བསྒོམས་ཤིག་བྱ། སིན་དྷུ་རའི་སྔགས་དང་བཅས་པ་སྤྱི་བོར་བྱུགས། མེ་ལོང་གི་ཡེ་ཤེས་སློབ་མ་རྒྱལ་བ་རྒྱ་མཚོར་བསྐྱེད་པའི་སྙིང་ཁར་བསྟིམ་ལ་འདི་སྐད་བརྗོད་དོ། །བུ་ཁྱོད་ཀྱི་ཡི་དམ་གྱི་ལྷ་རྒྱལ་བ་རྒྱ་མཚོ་ཡིན་པས། དུས་རྟག་ཏུ་སྙིང་ཁར་ཡི་དམ་གྱི་དཀྱིལ་འཁོར་དང་མ་བྲལ་བར་བསྒོམས་ཤིག ཅེས་བརྗོད་ལ། ལག་པ་གཡོན་པའི་སྲིན་ལག་གིས་སློབ་མའི་སྙིང་ཁར་བྱུགས་པར་བྱའོ། །སྙིང་པོའི་རྗེས་སུ་གནང་བ་ནི། འཕྲེང་བ་ལག་ཏུ་གཏད་ལ། སྙིང་པོ་འདིའི་ལད་མོ་བྱེད་དུ་བཅུག་གོ །ཨོཾ་ཨཱ་ཧཱུྃ་ཧྲི། ཨོཾ་མ་ཎི་པད་མེ་ཧཱུྃ། ཨོཾ་བཛྲ་བྷ་ར་ཧི། སརྦ་བྷུ་དྷ་ཌ་ཀི་ནི་ཡཱེ། བཛྲ་ཝརྣ་ནི་ཡེ། བཛྲ་བྷེ་རོ་ཙ་ན་ཡེ། ཧ་རི་ནི་ས་ཧཱུྃ་ཕཊ་སྭཱ་ཧཱ། ཞེས་ལན་མང་དུ་བརྗོད་དོ། །དེ་ནི་རྗེས་སུ་གནང་བའོ། །དེ་ནས་ཚོགས་བཏབ། ཕུད་མཆོད་བྱ། གཏོར་མ་བྱིན་གྱིས་བརླབ་པའོ། །དེ་ནས་ཚོགས་ལ་ལོངས་སྤྱད་པར་བྱའོ། །རྗེས་ཀྱི་ཆོ་ག་ལ། ལྷག་གཏོར་བཏང་བ་དང་། བཀྲ་ཤིས་དང་། བཤགས་པ་དང་། གཤེགས་སུ་གསོལ་བའོ། །བཅོམ་ལྡན་འདས་ཇོ་བོ་ཐུགས་རྗེ་ཆེན་པོའི་དབང་བསྐུར་གྱི་ཆོ་ག་རང་བྱུང་རྡོ་རྗེས་སྦྱར་བ་རྫོགས་སོ།། ༈ །།རྒྱལ་བ་རྒྱ་མཚོའི་དབང་བསྐུར་དང་ཚོགས་མཆོད་ཀྱི་ལག་ལེན་བཞུགས། །ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ཕྱག་འཚལ་ལོ། །དབང་བསྐུར་དང་ཚོགས་མཆོད་ཀྱི་ལག་ལེན་འདི་ལྟར་བྱའོ། །ཐོག་མར་བགེགས་གཏོར་བཏང་། མཚམས་བཅས་ཡན་ལག་བདུན་པ་བྱ། མངོན་རྟོགས་བསྒོམས་ཏེ། དེ་ནས་ཡེ་ཤེས་པ་སྤྱན་དྲང་བ་ནི། ཧཱུྃ་ལྷོ་ནུབ་སྲིན་པོའི་གྲོང་ཁྱེར་ནས། །གྲུབ་ཐོབ་བྱེ་བ་འབུམ་གྱི་དབུས། །སློབ་དཔོན་པད་མ་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །པད་མ་དབང་གི་ཟླ་གམ་ནས། མགོན་པོ་ཚེ་དབང་འོད་དཔག་མེད། །སྤྱན་རས་གཟིགས་དབང་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །མཁའ་སྤྱོད་དག་པའི་གཞལ་ཡས་ནས། །མཁའ་འགྲོ་བྱེ་བ་འབུམ་གྱི་དབུས། །ཡུམ་ཅིག་མཁའ་འགྲོ་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །མེ་དཔུང་འབར་བའི་དཀྱིལ་འཁོར་ནས། །རྟ་མཆོག་རྒྱལ་པོ་ཧེ་རུ་ཀ །དཔའ་བོའི་ཚོགས་བཅས་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །དག་པ་སྐུ་ཡི་ཞལ་ཡས་ནས། །སངས་རྒྱས་མཁའ་འགྲོ་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །མི་འགྱུར་ཐུགས་ཀྱི་གཞལ་ཡས་ནས། །རྡོ་རྗེ་ཌ་ཀི་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །པད་མ་གསུང་གི་གཞལ་ཡས་ནས། པད་མ་ཌ་ཀི་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །ཡོན་ཏན་རྒྱས་པའི་གཞལ་ཡས་ནས། །རིན་ཆེན་ཌ་ཀི་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །འཕྲིན་ལས་གྲུབ་པའི་གཞལ་ཡས་ནས། །ལས་ཀྱི་ཌ་ཀི་གཤེགས་སུ་གསོལ། །དབང་བསྐུར་བྱིན་བརླབས་མཛད་དུ་གསོལ། །འཇིག་རྟེན་དུར་ཁྲོད་གཞལ་ཡས་ནས། །འཇིག་རྟེན་ཌ་ཀི་གཤེགས་སུ་གསོལ། །འཕྲིན་ལས་རྣམ་བཞི་བསྒྲུབ་ཏུ་གསོལ། །དམ་ཚིག་ཆེན་པོའི་གཞལ་ཡས་ནས། དམ་ཅན་རྒྱ་མཚོ་གཤེགས་སུ་གསོལ། །ཕོ་ཉ་ལས་མཁན་མཛད་དུ་གསོལ། ཅེས་ཌ་མ་རུ་དང་དྲིལ་བུ་དཀྲོལ་ཞིང་སྤྱན་དྲངས་བར་བྱའོ། །རྒྱལ་བ་རྒྱ་མཚོ་སྤྱན་རས་གཟིགས། །འགྲོ་བའི་དོན་དུ་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཅེས་བཞུགས་སུ་གསོལ་ལོ། །ཆོས་དབྱིངས་མཐའ་དབུས་མེད་པ་ལ། །ཉི་ཟླ་པད་མའི་གདན་སྟེང་དུ། །ཅི་བདེ་བར་ཡང་བཞུགས་སུ་གསོལ། །ཨོཾ་པད་མ་ཀ་མ་ལ་ཡེ་སྭཱ་ཧཱ། ཕྱག་འཚལ་བ་ནི། པད་མ་མཆོག་གི་དཀྱིལ་འཁོར་ནས། །པད་མ་མཆོག་གི་སྐུར་སྤྲུལ་པ། གདུག་པ་འདུལ་མཛད་ཐོད་འཕྲེང་ལ། །གུས་པས་ཡིད་ཀྱིས་ཕྱག་འཚལ་བསྟོད། །ཐུགས་རྗེ་ཆེན་པོ་འཇིག་རྟེན་དབང་ཕྱུག་སྐུ། །སྐུ་མདོག་དམར་གསལ་འཇིག་རྟེན་དབང་དུ་བསྡུད། །སྤྱན་གྱི་འོད་ཟེར་འགྲོ་ལ་ཐུགས་རྗེས་གཟིགས། །ཞལ་གྱི་འཛུམ་ཚུལ་ཐུགས་རྗེས་ཀུན་ལ་སྙོམས། །ཤངས་ནས་ཡེ་ཤེས་རླུང་གིས་ཉོན་མོངས་འཐོར། །སྙན་ནས་ཐབས་དང་ཤེས་རབ་འདུལ་ཐབས་མཛད། །ཕྱག་གཉིས་དབྱིངས་དང་ཡེ་ཤེས་གཉིས་མེད་སྦྱོར། །གཡས་པ་བགྲང་འཕྲེང་བྱང་ཆུབ་ལམ་ལ་འདྲེན། །གཡོན་པ་པད་མ་འཁོར་བའི་སྐྱོན་དང་བྲལ། །ཞབས་གཉིས་འགྲོ་བའི་དོན་ལ་མཉམ་པར་བཞུགས། །རིན་ཆེན་རྒྱན་དྲུག་ཕ་རོལ་ཕྱིན་དྲུག་ལྡན། །འགྲོ་རྣམས་མ་ལུས་ཐུགས་རྗེས་དབང་དུ་བསྡུད། །འཇིག་རྟེན་དབང་ཕྱུག་སྐུ་ལ་ཕྱག་འཚལ་བསྟོད། །དགྱེས་པའི་འཛབ་འབུལ་མཆོད་པར་བཞེས། །དབང་དང་དངོས་གྲུབ་མ་ལུས་སྩལ་དུ་གསོལ། །གསུང་གི་དབང་ཕྱུག་སྣང་བ་མཐའ་ཡས་སྐུ། །འཆི་མེད་ཚེ་དབང་མགོན་པོ་འོད་དཔག་མེད། །དུས་གསུམ་རྒྱལ་བ་ཀུན་གྱི་གསུང་ལས་སྤྲུལ། །བསྒྲུབ་མཆོག་བདག་ལ་དབང་བསྐུར་བྱིན་གྱིས་རློབས། །མི་དམིགས་དོན་གྱི་དངོས་གྲུབ་བདག་ལ་སྩོལ། །ཕྱིའི་མཆོད་པ་ཡང་། ཨོཾ་ཨཱ་ཧཱུྃ་ཧྲི། ཨོཾ་མ་ཎི་པད་མེད་ཧཱུྃ། ཨརྒཾ་ཞེས་པ་ལ་སོགས་རྗེ་བཙུན་མའི་མཆོད་ཁྲིགས་དང་མཐུན་ནོ། །དུས་གསུམ་བདེ་གཤེགས་ཡུམ་གཅིག་མ། །ཐུགས་རྗེའི་མངའ་བདག་འགྲོ་ལ་གཟིགས། །གསང་བ་ཡེ་ཤེས་མཁའ་འགྲོ་མ། །སྐུ་མདོག་དམར་མོ་དབང་གི་ཚུལ། །ཚད་མེད་བཞི་ཡི་འགྲོ་དོན་ཕྱག །རྣམ་རྟོག་རྩད་གཅོད་གྲི་གུག་གཡས། །འཁོར་བ་དབང་བསྡུད་ཐོད་འཕྲེང་གཡོན། །སྐྱེ་ཤི་རྩད་གཅོད་རལ་གྲི་གཡས། །དུག་གསུམ་རྩད་གཅོད་ཁ་ཊྶཱཾ་གཡོན། །ཐབས་དང་ཤེས་རབ་བརྐྱང་བསྐུམ་ཞབས། །འདོད་ཡོན་རྣམ་དག་རུས་པའི་རྒྱན། །གཞོན་ཚུལ་ཅན་ལ་ཅུང་ཟད་ཁྲོ། །ཐུགས་རྗེ་ཆགས་པས་དབང་བསྡུད་མ། །གང་མཐོང་དྲན་པས་ཡེ་ཤེས་བསྐྱེད། །ཐུགས་རྗེའི་སྤྱན་གྱིས་བདག་ལ་སྐྱོབས། །དབང་དང་དངོས་གྲུབ་ད་ལྟ་གསོལ། །རྡོ་རྗེ་རིགས་ཀྱི་མཁའ་འགྲོ་མ། །རྡོ་རྗེ་ཆོས་ཀྱི་དངོས་གྲུབ་སྩོལ། །རིན་ཆེན་རིགས་ཀྱི་མཁའ་འགྲོ་མ། །རིན་ཆེན་ཟས་ནོར་དངོས་གྲུབ་སྩོལ། །པད་མ་རིགས་ཀྱི་མཁའ་འགྲོ་མ། །ཆགས་པས་དབང་བསྡུད་དངོས་གྲུབ་གསོལ། །ལས་ཀྱི་རིགས་ཀྱི་མཁའ་འགྲོ་མ། །དགྲ་བགེགས་ཚར་གཅོད་དངོས་གྲུབ་སྩོལ། །མཆོག་གི་དངོས་གྲུབ་བདག་ལ་སྩོལ། །གསང་བ་ཡེ་ཤེས་དངོས་གྲུབ་སྩོལ། །ཆོས་དབྱིངས་ལྷུན་གྲུབ་དངོས་གྲུབ་སྩོལ། །ཕྱག་རྒྱ་ཆེན་པོའི་དངོས་གྲུབ་སྩོལ། །བྷུད་དྷ་ཌ་ཀི་ནི། བཛྲ་ཌཱ་ཀི་ནི། རཏྣ་ཌ་ཀི་ནི། པད་མ་ཌ་ཀི་ནི། ཀར་མ་ཌ་ཀི་ནི། སིད་དྷི་སིད་དྷི་ཞེས་གསོལ་བ་གདབ་བོ། །ནང་གི་མཆོད་པ་འབུལ་བ་ནི། པད་མ་དབང་གི་ལྷ་ཚོགས་ལ། །དུག་ལྔ་རྣམ་པར་དག་པ་ཡི། །རིགས་ལྔ་དང་ནི་ཡེ་ཤེས་སོགས། ཤ་ཆེན་ལྔ་ཡི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །འབྱུང་བ་ལྔ་པོ་རྣམ་དག་ཅིང་། །ཐབས་དང་ཤེས་རབ་དབྱེར་མེད་པའི། །ཟུང་འཇུག་བདེ་བ་ཆེན་པོ་ཡི། །ཁ་དོག་ཡིད་འོང་རེག་བྱར་ལྡན། །ཟག་མེད་བདེ་ཆེན་མཆོད་པ་རྣམས། །དཀྱིལ་འཁོར་ལྷ་ཡི་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །དབང་བཞི་བསྐུར་དང་རྒྱུད་བཞི་སྨིན། །ཐུན་མོང་མཆོག་གི་དངོས་གྲུབ་སྩོལ། །ཅེས་ནང་གི་མཆོད་པ་འབུལ་བའི་རིམ་པའོ། །ཐུགས་ཀྱི་ལྷ་མཆོག་རྟ་མགྲིན་དབང་གི་ལྷ། །སྐུ་མདོག་དམར་ནག་དྲེགས་པ་དབང་དུ་བསྡུད། །སྤྱན་གྱི་གཟི་མདངས་འགྲོ་ལ་སྙིང་རྗེས་གཟིགས། །ཞལ་གྱི་སྙིང་རྗེ་ཐུགས་རྗེས་ཀུན་ལ་སྙོམས། །ཅུང་ཟད་མཆེ་གཙིགས་སྐྱེ་ཤི་རྩད་ནས་གཅོད། །དབུ་གཙུག་རྟ་མགོ་གཞན་གྱི་འགྲན་ཟླ་མེད། །རྟ་སྐད་འཚེར་བས་ཁམས་གསུམ་དབང་དུ་བསྡུད། །དབང་སྡུད་ཕྱག་རྒྱས་སྐྱེ་འགྲོ་ཟིལ་གྱིས་གནོན། །པད་མའི་ཕྱག་རྒྱས་འཁོར་བའི་སྐྱོན་མ་གོས། །རིན་ཆེན་རྒྱན་ཆས་འདོད་ཡོན་མ་སྤངས་དག །ཞབས་གཉིས་བརྐྱང་བསྐུམ་ཡེ་ཤེས་སེམས་དཔའི་ཚུལ། དབང་ཆེན་རྟ་མཆོག་སྐུ་ལ་ཕྱག་འཚལ་བསྟོད། །སྒྲུབ་པ་པོ་ལ་དབང་དང་དངོས་གྲུབ་སྩོལ། །ཞེས་བསྟོད་དོ། །པད་མ་དབང་གི་ལྷ་ཚོགས་ལ། །གསང་བའི་མཆོད་པ་འབུལ་བ་ནི། །པད་མ་དབང་གི་དཀྱིལ་འཁོར་ནས། །ཐབས་དང་ཤེས་རབ་དབྱེར་མེད་པའི། །ཡབ་ཡུམ་བཅུ་ཡི་སྦྱོར་བ་ལས། །ཟག་མེད་བདེ་བ་ཆེན་པོ་ཡི། །ཡེ་ཤེས་བདུད་རྩིའི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །པད་མ་རང་བྱུང་མེ་ཏོག་ལ། །རག་ཏ་རང་བྱུང་བདེ་བའི་གནས། །ཤ་ཆེན་ག་པུར་བདུག་སྤོས་དང་། ཞུན་ཆེན་སྣང་གསལ་སྒྲོན་མེ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །ལྷན་སྐྱེས་བདེ་བ་ཆེན་པོ་ཡི། །དགའ་བ་བཞི་དང་བདེ་བ་བརྒྱད། །ཟག་མེད་ཉམས་ཀྱིས་རྒྱན་པ་རྣམས། །ལོངས་སྤྱོད་རྫོགས་པའི་དཀྱིལ་འཁོར་དུ། །དཔའ་བོ་ཚོགས་བཅས་རྣལ་འབྱོར་མ། །གཉིས་མེད་བདེ་ཆེན་རོལ་པ་ལས། །ལོངས་སྤྱོད་རྫོགས་པའི་མཆོད་པ་རྣམས། །དཀྱིལ་འཁོར་ལྷ་ཡིས་བཞེས་སུ་གསོལ། །དབང་བཞི་བསྐུར་དང་རྒྱུད་བཞི་སྨིན། གསང་བ་བླ་མེད་དངོས་གྲུབ་སྩོལ། །ཅེས་སོ། །ཧཱུྃ་འགྲོ་བ་ཀུན་ལ་ཐུགས་རྗེས་མཉམ་པར་གཟིགས། །ཉི་མའི་འོད་ཟེར་སྐུ་ལ་ཕྱག་འཚལ་བསྟོད། །ཆགས་རབ་དོན་གྱི་འགྲོ་བ་དབང་དུ་བསྡུད། །རྡོ་རྗེ་ཕག་མོའི་སྐུ་ལ་ཕྱག་འཚལ་བསྟོད། །སྔགས་ཀྱི་ལས་མཛད་མཛེས་པ་ཌ་ཀིའི་ཚུལ། །རྒྱ་མཚོ་གླིང་གི་ཌ་ཀི་ཡི། །ལས་ཀྱི་མཁའ་འགྲོས་བྱིན་རླབས་ཆར་ལྟར་འབེབས། །རྡོ་རྗེ་ཕྲ་མེན་སྐུ་ལ་ཕྱག་འཚལ་བསྟོད། །བསྟན་པའི་རུ་འཛིན་གདུག་པའི་དགྲ་འདུལ་མ། །ཌ་ཀི་བདུད་འདུལ་སྐུ་ལ་ཕྱག་འཚལ་བསྟོད། །རྣལ་འབྱོར་འཁོར་སྐྱོང་བྱིན་བརླབས་ཆར་ལྟར་འབེབས། །ཌ་ཀི་ཞི་བའི་སྐུ་ལ་ཕྱག་འཚལ་བསྟོད། །ཉི་ཤུ་རྩ་བཞིའི་དཀྱིལ་འཁོར་ནས། རིགས་བཞི་མཁའ་འགྲོ་ལ་སོགས་པའི། །ཕྱི་ནང་ཌ་ཀི་རྒྱ་མཚོ་ལ། །གུས་པ་ཡིད་ཀྱིས་ཕྱག་འཚལ་བསྟོད། །དབང་བསྐུར་བྱིན་གྱིས་བརླབ་ཏུ་གསོལ། །པད་མ་དབང་གི་དཀྱིལ་འཁོར་ནས། དེ་ཁོ་ན་ཉིད་ཀྱི་མཆོད་པ་འབུལ་བ་ནི། ཧཱུྃ་ཆོས་སྐུ་སྐྱེ་འགག་མེད་པ་ལ། །རང་བྱུང་ཡེ་ཤེས་མཆོད་པར་འབུལ། །དུས་གསུམ་སྐྱེ་བ་མེད་པ་ལ། །སྣང་བ་སྣ་ཚོགས་མཆོད་པར་འབུལ། །ཕྱག་རྒྱ་ཆེན་པོའི་དངོས་གྲུབ་སྩོལ། །ཐབས་དང་ཤེས་རབ་གཉིས་མེད་ཅིང་། ལྷན་སྐྱེས་ཡེ་ཤེས་བདེ་བ་ཆེ། །ཟག་མེད་བདེ་ཆེན་མཆོད་པར་འབུལ། །དབང་བཞི་རྫོགས་པར་བྱིན་གྱིས་རློབས། །དབྱིངས་དང་ཡེ་ཤེས་རོ་མཉམ་ཞིང་། །འགག་མེད་ཡེ་ཤེས་ལྔ་ལྡན་ཞིང་། །ཀུན་མཁྱེན་ཡེ་ཤེས་མཆོད་པར་འབུལ། །ངོ་བོ་ཉིད་ལ་དངོས་གྲུབ་སྩོལ། ཅེས་དེ་ཁོ་ན་ཉིད་ཀྱི་མཆོད་པར་འབུལ་ལོ། །མི་འགྱུར་བདུད་ཀྱི་སྡེ་བཅོམ་རྡོ་རྗེའི་རིགས། །རྡོ་རྗེ་ཌ་ཀིའི་སྐུ་ལ་ཕྱག་འཚལ་བསྟོད། །རེ་བསྐོང་བདུད་རྩིའི་ཆར་འབེབས་རིན་ཆེན་རིགས། །རིན་ཆེན་ཌ་ཀིའི་སྐུ་ལ་ཕྱག་འཚལ་བསྟོད། །ཆགས་པས་ཐམས་ཅད་དབང་བསྡུད་པད་མའི་རིགས། །པད་མ་ཌ་ཀིའི་སྐུ་ལ་ཕྱག་འཚལ་བསྟོད། །དོན་གྲུབ་གདུག་པ་འདུལ་མཛད་ལས་ཀྱི་རིགས། །ལས་ཀྱི་ཌ་ཀིའི་སྐུ་ལ་ཕྱག་འཚལ་བསྟོད། །གདུག་པ་འདུལ་མཛད་རྡོ་རྗེའི་རིགས་སུ་སྤྲུལ། རྡོ་རྗེ་གིང་ཆེན་སྐུ་ལ་ཕྱག་འཚལ་བསྟོད། །འདོད་པའི་དོན་གྲུབ་འབྱུང་བར་བྱེད་པ་ཡི། །རིན་ཆེན་གིང་ཆེན་སྐུ་ལ་ཕྱག་འཚལ་བསྟོད། །ཆགས་རབ་དོན་གྱིས་འགྲོ་བ་དབང་དུ་བསྡུད། །པད་མ་གིང་ཆེན་སྐུ་ལ་ཕྱག་འཚལ་བསྟོད། །ལས་ཀྱི་མཐའ་ཡིས་བསྟན་པའི་རུ་ཏྲ་འདུལ། །ལས་ཀྱི་གིང་ཆེན་སྐུ་ལ་ཕྱག་འཚལ་བསྟོད། །དུས་གསུམ་སངས་རྒྱས་ཐམས་ཅད་ཀྱི། དགོངས་པ་ལོན་པའི་པད་མ་འབྱུང་གནས་ཀྱིས། །བདག་དང་མོས་པའི་གང་ཟག་ལ། །བྱིན་བརླབས་ཆུ་བོའི་གཞུང་བཞིན་ཕོབ། །ཅེས་མཆོད་བསྟོད་སྤེལ་བ་འདི་ཉིད་དམ། ཡང་ན་མཆོད་པ་རྣམས་ཕྱོགས་གཅིག་ཏུ་ཕུལ་ལ། བསྟོད་པ་ཅི་རིགས་པར་བྱས་ཀྱང་ཆོག་གོ །དེ་ནས་ཚོགས་གཞུང་བཞིན་བྱིན་གྱིས་བརླབས་ལ། ཚོགས་བཏབ་པའི་ཆོ་ག་ནི། ཧཱུྃ་ཆོས་ཀྱི་དབྱིངས་ཀྱི་དཀྱིལ་འཁོར་ནས། །འཕྲིན་ལས་པདྨ་དབང་གི་ལྷ། །རྣམ་འཕྲུལ་མཁའ་ལ་སྤྲིན་ལྟར་གཏིབས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་བརླབས་མཛད་དུ་གསོལ། །བདེ་བ་ཅན་གྱི་ཞིང་ཁམས་ན། །མགོན་པོ་ཚེ་དབང་འོད་དཔག་མེད། །རྒྱལ་བ་རྒྱ་མཚོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས།། དབང་བསྐུར་བྱིན་བརླབས་མཛད་དུ་གསོལ། །མཁའ་སྤྱོད་དག་པའི་གཞལ་ཡས་ནས། །གསང་བ་ཡེ་ཤེས་མཁའ་འགྲོ་མ། །ཌ་ཀི་རྒྱ་མཚོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་བརླབས་མཛད་དུ་གསོལ། །མེ་དཔུང་འབར་བའི་ཀློང་དཀྱིལ་ནས། །ཁྲོ་བོའི་རྒྱལ་པོ་རྟ་མཆོག་དཔལ། །དཔའ་བོ་རྒྱ་མཚོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་བརླབས་མཛད་དུ་གསོལ། །ས་བླ་ས་འོག་ས་སྟེངས་ཀྱིས། །ཉི་ཤུ་རྩ་བཞིའི་གནས་མཆོག་ནས། དཔའ་བོ་མཁའ་འགྲོའི་དབུས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་རླབས་མཛད་དུ་གསོལ། །དུར་ཁྲོད་ཆེན་པོའི་གནས་བརྒྱད་ནས། །འཇིག་རྟེན་མཁའ་འགྲོ་རྫུ་འཕྲུལ་ཅན། འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་བརླབས་མཛད་དུ་གསོལ། ཕོ་ཉ་ལས་མཁན་མཛད་དུ་གསོལ། །དམ་ཚིག་ཆེན་པོའི་གནས་མཆོག་ནས། །དམ་ཅན་རྒྱ་མཚོ་སྐུ་བསྐྱོད་འཚལ། །འདིར་གཤེགས་ཚོགས་ཀྱི་མཆོད་པ་བཞེས། །དབང་བསྐུར་བྱིན་བརླབས་མཛད་དུ་གསོལ། །འཕྲིན་ལས་རྣམ་བཞི་བསྒྲུབ་ཏུ་གསོལ། །ཅེས་ཚོགས་བཏབ་ཅིང་རོལ་པར་བྱའོ།། །།

སྤྱན་རས་གཟིགས་ཀྱི་སྒོ་ནས་སྒྲིབ་པ་སྦྱོང་བ།

༄༅། །སྤྱན་རས་གཟིགས་ཀྱི་སྒོ་ནས་སྒྲིབ་པ་སྦྱོང་བ་བཞུགས།

༄༅། །བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྤྱན་རས་གཟིགས་དབང་ཕྱུག་གི་སྒོ་ནས་ཚེ་ལས་འདས་པའི་སྒྲིབ་པ་སྦྱོང་བར་འདོད་པས། ཐོག་མར་གནས་གང་ཡང་རུང་བར་ས་བླང་བ་ནས་དཀྱིལ་འཁོར་བྲི་བའི་བར་དབང་གི་ཆོ་ག་བཞིན་དུ་བྱ། སྤྱན་རས་གཟིགས་དང་། རྟ་མགྲིན་གྱི་ལས་ཀྱི་བུམ་པ་གཉིས་ཀྱང་སྟ་གོན་དུ་བྱ། མཆོད་པ་དང་གཏོར་མ་ཅི་ལྟར་འབྱོར་བ་བཞིན་དུ་བཤམས། དེ་ལྟར་བཅའ་གཞི་ཡོངས་སུ་རྫོགས་ནས། ཆོ་གའི་རིམ་པ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལ་གསུམ་ལས། དང་པོ་ནི་ཚེ་ལས་འདས་པ་ཡིས་གཙོ་བྱས་པའི་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་ལ་ཡན་ལག་བདུན་པ་བྱའོ། །གཉིས་པ་བདག་བསྐྱེད་པ་ནི། ཨོཾ་སྭ་བྷ་ཝ་ཤུད་དྷོ་སརྦ་དྷརྨཱ་ས་བྷ་བ་ཤུད་དྷོ་ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། དེའི་ངང་ནས་པད་མ་དང་ཟླ་བ་ཉི་མའི་སྟེང་དུ། རྣམ་པར་ཤེས་པའི་ངོ་བོ་ཡི་གེ་ཧྲི་དམར་པོ། དེ་ལས་འོད་ཟེར་འཕྲོས་པས་སེམས་ཅན་གྱི་དོན་བྱས། ཚུར་འདུས་པ་ལས་བདག་ཉིད་སྤྱན་རས་གཟིགས་དབང་ཕྱུག་སྐུ་མདོག་དཀར་བ་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས་པ། གཡས་འཕྲེང་བ། གཡོན་པད་མ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་སྣ་ཚོགས་ཀྱི་ཤམ་ཐབས་ཅན་ནོ། །དེའི་སྤྱི་བོར་ཟླ་བ་ལ་ཨོཾ། མགྲིན་པར་ཨཿ སྙིང་ཁར་ཧཱུྃ་གིས་སྐུ་གསུང་ཐུགས་བྱིན་གྱིས་བརླབ། དེ་ནས་ཐུགས་ཁར་པད་མ་འདབ་མ་བརྒྱད་པ། དེའི་ལྟེ་བ་ལ་ཧྲཱིཿ་སྙིང་པོ་དང་བཅས་པ་བལྟས་ལ། འོད་ཟེར་གྱིས་དེ་ལྟ་བུ་བདེ་བ་ཅན་ནས་སྤྱན་དྲངས་ལ། ཛ་ཧཱུྃ་བཾ་ཧོས་དབྱེར་མེད་དུ་གཞུག །བཛྲ་པུཥྤེ་ཨ་ཧཱུྃ་ཞེས་པའི་སྔགས་ཀྱིས་བདག་བསྐྱེད་མཆོད། དེ་ནས་འབྱུང་པོ་ལ་གཏོར་མ་དབུལ་ལ་སྙིང་ཁའི་འོད་ཟེར་གྱིས་བགེགས་བསྐྲད་དེ། ཨོཾ་བཛྲ་རཀྵ་རཀྵ་ཞེས་རྡོ་རྗེའི་གུར་ཁང་ཡང་བསམ་མོ། །གསུམ་པ་བུམ་པ་བསྐྱེད་པ་ནི། རྣམ་རྒྱལ་བུམ་པ་ནི། མངོན་པར་རྟོགས་པ་ལྟར་ཡིན་ལ། སྤྱན་འདྲེན་དང་མཆོད་བསྟོད་བསྡུས་པ་ཅིག་བྱའོ། །ལས་བུམ་དུ་ཧྲཱིཿལས་བྱུང་བའི་རྟ་མགྲིན་ཞལ་ཅིག་ཕྱག་གཉིས་པ་བསྐྱེད་ལ། སྐུ་གསུང་ཐུགས་བྱིན་གྱིས་བརླབ། བཛྲ་པུཥྤེ་ལ་སོགས་པས་མཆོད་ལ། ཐུགས་ཀྱི་ལྷ་མཆོག་རྟ་མགྲིན་དབང་གི་རྒྱལ། །ཞེས་པའི་བསྟོད་པས་བསྟོད་དེ། དེ་དག་ནི་སྔོན་དུ་འགྲོ་བའོ། །གཉིས་པ་དངོས་གཞི་ལ་གཉིས་ལས། དང་པོ་སྭ་བྷ་བས་དཀྱིལ་འཁོར་གྱི་འཁོར་ལོ་དང་བཅས་པའི་རྒྱལ་བ་རྒྱ་མཚོའི་ལྷ་བསྐྱེད་པའམ་ཡང་ན་པད་མ་ཅོད་པན་གྱི་རྒྱུད་ལ་སོགས་པ་ནས་བྱུང་བ་ལྟར་བྱེད་ནའང་སོ་སོའི་ཆོ་གས་བསྐྱེད་དེ། སྐུ་གསུང་ཐུགས་ཀྱི་བྱིན་བརླབས་ཡན་ཆད་རྫོགས་ནས། རྡོ་རྗེ་དྲིལ་བུ་དང་བཅས་པས། ཧཱུྃ་ལྷོ་ནུབ་སྲིན་པོའི་གྲོང་ཁྱེར་ནས། །ཅེས་པའི་སྤྱན་འདྲེན་བྱའོ། །ཕྱག་འཚལ་བ་དང་། གདན་འབུལ་བ་དང་། ཕྱི་དང་ནང་གི་ལ་སོགས་པའི་མཆོད་པ་རྣམས་ཕུལ་ལ། ཐུགས་རྗེ་ཆེན་པོ་འཇིག་རྟེན་དབང་ཕྱུག་སྐུ། །ཞེས་པའི་བསྟོད་པས་བསྟོད་ལ། གཞུང་ནས་འབྱུང་བ་བཞིན་གྱི་གཏོར་མའང་བཏང་ངོ་། །དེ་ལྟར་དཀྱིལ་འཁོར་གྱི་ལྷའི་ཆོ་གའི་བྱ་བ་རྫོགས་ནས། གཉིས་པ་ཚེ་ལས་འདས་པའི་དོན་བྱ་བ་དངོས་ལ་དྲུག་ལས། དང་པོ་བསྐྱེད་ཅིང་དགུག་པ་ནི། མིང་བྱང་ལ་སོགས་པ་ལས་བུམ་གྱི་ཆུ་དང་སྭ་བྷ་བས་བསངས་ལ། སྟོང་པའི་ངང་ལས་མིང་གི་ཡི་གེ་དང་པོ་ཎི་ལས་ཚེ་འདས་ཅི་འདྲ་བ་བསྐྱེད་ལ། བདག་གི་ཐུགས་ཁ་ནས་སྔགས་ཀྱི་འོད་ཟེར་འཕྲོས་པས་ཚེ་ལས་འདས་པ་རྣམ་པར་ཤེས་པ་གང་ན་གནས་ཀྱང་བཀུག་པར་བསམས་ཏེ། ངག་ཏུ། དཀོན་མཆོག་གསུམ་གྱི་མཐུ་དང་བདེན་པ་དང་། གསང་སྔགས་དང་རིགས་སྔགས་དང་། གཟུངས་སྔགས་དང་། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་ཐུགས་རྗེའི་བྱིན་བརླབས་ཀྱི་བདེན་པས། ཚེ་འདས་ཆེ་གེ་མོའི་རྣམ་པར་ཤེས་པ་རིགས་དྲུག་སྐྱེ་གནས་བཞི་གར་གནས་ཀྱང་། སྐད་ཅིག་ཙམ་གྱིས་འདིར་མཆིས་པར་གྱུར་ཅིག ཅེས་ལན་གསུམ་བརྗོད་ལ། ཛ་ཧཱུྃ་བཾ་ཧོས་རྟེན་ལ་གཞུག་གོ །གཉིས་པ་གཤེད་དང་དབྲལ་བ་ནི། བགེགས་ཀྱི་གཏོར་མ་ཏིང་ལོ་དང་ཆང་བུར་བཅས་པ་ལ། ཨོཾ་སརྦ་བིག་ནན་ན་མ་སརྦ་ཏ་ཐཱ་ག་ཏེ་བྷྱོ་བི་ཤ་མུ་ཀེ་བྷྱ་སརྦ་ཏད་ཁང་ཨུད་ག་ཏེ་ཀྵྨྱ་ར་ན་ཧི་མཾ་ག་ག་ན་ཁྃ་གྷྲི་རྣ་ཨེ་ཏཾ་བ་ལིང་ཏྃ་སྭཱ་ཧཱ། ཞེས་བརྗོད་ནས་རྟེན་ལ་བསྐོར་ཞིང་། ཚེ་ལས་འདས་པ་ཆེ་གེ་མོའི་གསོན་གྱི་དུས་སུ་ཚེ་ལ་བར་དུ་གཅོད་ཅིང་། གཤིན་གྱི་ཚེ་སྡིག་པ་སྦྱོང་ལ་བར་དུ་གཅོད་པའི་བགེགས་ཐམས་ཅད་གཏོར་མ་འདི་ཁྱེར་ལ། དཔག་ཚད་དང་རྒྱང་གྲགས་སུ་མ་གནས་པར་སོང་ཤིག །ཅེས་བརྗོད་ལ་རྟ་མགྲིན་གྱི་ཏིང་ངེ་འཛིན་དང་སྔགས་བརྗོད་དེ་གུ་གུལ་གྱིས་བདུག་ཡུངས་དཀར་གྱིས་བྲབ། རོལ་མོའི་སྒྲ་དང་བཅས་པས་བགེགས་བསྐྲད་ཅིང་སུམ་བྷ་ནི་ཡང་བཟླས་སོ། །གསུམ་པ་སྡིག་པ་སྦྱང་བ་ནི། ཚེ་འདས་ཀྱི་སྡིག་སྒྲིབ་ལྟེ་བ་ནས་ཀཾ་གི་རྣམ་པ་སྣ་སྒོའི་ལམ་དུ་ཕྱུང་སྟེ་སྡིག་པ་རྭ་ཅན་དུ་གྱུར་ནས་ཏིལ་ལ་ཐིམ་པར་བསམས་ནས་མེར་བསྲེག་ཅིང་ཆུར་དོར་ལ། ཨོཾ་སརྦ་པ་པཾ་དེ་ཧ་ན་བཛྲ་ཡེ་སྭཱ་ཧཱ། ཚེ་ལས་འདས་པ་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་དག་པར་གྱུར་ཅིག ཤིན་ཏིང་ཀུ་རུ་ཡེ་སྭཱཧཱ། ཞེས་བརྗོད་དོ། །བཞི་པ་ཁྲུས་བྱ་བ་ནི། ཐོག་མར་ལྷ་ལ་ཁྲུས་གསོལ་བ་ནི་མེ་ལོང་ལ་ལྷའི་གཟུགས་འཆར་བར་བྱས་ལ། ལས་ཀྱི་བུམ་པས་ཁྲུས་བྱས་ཏེ། ཅི་ལྟར་ལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པད་མེ་ཧཱུྃ། ཨོཾ་ཨ་བྷི་ཥེ་ཀ་ཏ་ས་མ་ཡཱ་ཤྲི་ཡེ་ཧཱུྃ། ཞེས་བརྗོད་ཅིང་ཁྲུས་བྱས་པའི་ཆུ་སླར་བུམ་པར་བླུག་གོ །དེ་ནས་མིང་བྱང་ངམ། རུས་བུ་ལ་སོགས་མེ་ལོང་ལ་གཟུགས་འཆར་པར་བྱས་ལ་བཀྲུ་ཞིང་། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་བརླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་གསོལ་བར་མཛད། །འདི་ནི་སྤྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །སྦྱིན་པ་དྲི་ཡིས་ལེགས་བསྒོས་་་ཆུ། ཁྲུས་ལེགས་མཛད་ཀྱིས་ཁྲུས་བགྱིའོ། །དེ་བཞིན་དུ་གཞན་རྣམས་འགྲེའོ། །འདི་ནི་ཚུལ་ཁྲིམསྎ ཁྲིམས་འཆལ་དྲིྎ ཚུལ་ཁྲིམས་དྲི་ཡིསྎ ཁྲུས་ལེགས་མཛདྎ འདི་ནི་བཟོད་པའི་རང་བཞིནྎ ཁོང་ཁོའི་དྲི་མ་སྦྱོང་ྎ བཟོད་པ་དྲི་ཡིསྎ ཁྲུས་ལེགས་མཛདྎ འདི་ནི་བརྩོན་འགྲུསྎ ལེ་ལོའི་དྲི་མ་སྦྱོང་ྎ བརྩོན་འགྲུས་དྲི་ཡིསྎ ཁྲུས་ལེགས་མཛདྎ འདི་ནི་བསམ་གཏན་རང་བཞིནྎ རྣམ་གཡེང་དྲི་མྎ བསམ་གཏན་དྲི་ཡིས་ལེགསྎ ཁྲུས་ལེགས་མཛད་ལྎ འདི་ནི་ཤེས་རབ་རང་བཞིནྎ གཏི་མུག་དྲི་མྎ ཤེས་རབ་དྲི་ཡིསྎ ཁྲུས་ལེགས་མཛད་ཀྱིས་ཁྲུས་བགྱིའོ། །ཆུ་བོ་དྲུག་གིས་ཁྲུས་བྱས་པས། །བག་ཆགས་རྣམ་དྲུག་སྦྱངས་ནས་ནི། །གང་ལ་ཉེས་པ་མི་མངའ་ཞིང་། །ཁྲུས་ལེགས་མཛད་ལ་ཕྱག་འཚལ་འདུད། །དྲི་ཆུ་དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱངས་ནས་ནི། །རྒྱལ་ཆེན་ཡོན་ཏན་དྲུག་ལྡན་ཞིང་། །ཁྲུས་ལེགས་མཛད་ལ་ཉེས་མི་མངའ། །དྲི་མ་རྣམ་དྲུག་དག་པ་ཡིས། །ཡོན་ཏན་ཐམས་ཅད་ལྡན་པ་ཡི། །སངས་རྒྱས་ཐམས་ཅད་མཆོད་དོན་དུ། །དད་པས་བདག་གིས་ཁྲུས་བགྱིའོ། །ཞེས་བྱ་བའི་ཚིག་བཞི་པ་རེ་རེའི་བར་དུ། ཨོཾ་ཨཱ་ཧཱུྃ་ཧྲཱི༔ ཨོཾ་མ་ཎི་པད་མེ་ཧཱུྃ། ཚེས་ལས་འདས་པ་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་ཤུད་དྷེ་ཤུད་དྷེ་བྷི་ཤུད་དྷེ་སྭཱ་ཧཱ། ཞེས་བྱ་བ་རེ་རེ་དང་སྤེལ་བར་བྱའོ། །ལྔ་པ་དུག་སྦྱང་བ་ནི། འདོད་ཆགས་ཞེས་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འགྲེའོ། །འདོད་ཆགསྎ འདི་དགྎ སངས་རྒྱསྎ དམ་ཆོསྎ དམ་ཆོས་བདེནྎ འདོད་ཆགས་ཞེ་སྡང་ྎ འདི་དགྎ འཕགས་པའི་དགེ་འདུནྎ ས་འདི་དུག་གི་ཕ་ཡིན་ཏེ། །ས་འདི་དུག་གི་མ་ཡང་ཡིན། །བདེན་པའི་བདེན་ཚིག་འདི་དག་གིས། །དུག་གསུམ་ས་ཡི་ནང་དུ་སོང་། །ཆུ་མེ་རླུང་ལ་སོགས་ཀྱིས་འདོན་པ་ཁ་བསྒྱུར་ལ་བརྗོད་དོ། །རྗེས་ལ། དུས་ལས་འདས་པས་གཙོ་བྱས་པའི་སེམས་ཅན་ཐམས་ཅད་ཀྱི་ལས་དང་ཉོན་མོངས་པ་དུག་གསུམ། དཀོན་མཆོག་གསུམ་གྱི་བྱིན་བརླབས་ཀྱིས་འབྱུང་བའི་བག་ལ་ཞ་བར་གྱུར་ཅིག འབྱུང་བའི་ནང་དུ་ཐིམ་པར་གྱུར་ཅིག ཅེས་བརྗོད་དོ། །དེའི་རྗེས་སུ་བདེ་ལེགས་ཀྱི་ཚིག་འདི་བརྗོད་པར་བྱའོ། །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀུན་གྱིས་བསམས་པ་ཡིས། །ཁྱེད་ཀྱི་འདོད་དོན་གང་ཡིན་པ། །དོན་དེ་དེང་འདིར་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་ཤོག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤོག །ཁྱེད་ཅག་ཀུན་ཏུ་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །དུས་ལས་འདས་པ་ཆེ་གེ་མོས་གཙོ་བྱས་པའི་སྐྱེ་དགུ་ཐམས་ཅད་མི་མཐུན་པའི་ཕྱོགས་ཐམས་ཅད་ལས་རྒྱལ་བར་གྱུར་ཅིག དྲུག་པ་སྤྱན་རས་གཟིགས་ཀྱི་དཀྱིལ་འཁོར་དུ་འཇུག་ཅིང་དབང་བསྐུར་བའི་སྒོ་ནས་སྡིག་པ་སྦྱང་བ་ནི་གསུམ་ལས། དང་པོ་སྡིག་པ་བཤགས་པ་ལ་སོགས་བྱ་བ་ནི། ཚེ་འདས་ཀྱི་ཉེ་བ་ཡོད་ན་ལད་མོ་བྱེད་དུ་གཞུག མེད་ན་ཡིད་ཀྱིས་དེ་ཉིད་ཀྱིས་ལད་མོ་བྱེད་པར་བསམས་ལ། མཎྜྻལ་འབུལ་ཞིང་། ངག་ཏུ། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །མ་ལུས་བདག་ལ་དགོངས་སུ་གསོལ། །འཁོར་བ་ཐོག་མ་མེད་པ་ནས། །ཐ་མ་ད་ལྟ་ཐུག་གི་བར། །འདོད་ཆགས་ཞེ་སྡང་གཏི་མུག་གིས། །ལུས་ངག་ཡིད་གསུམ་སྒོ་ནས་ནི། །སྡིག་པ་དཔག་མེད་བགྱིས་པ་དང་། །བགྱིད་དུ་སྩལ་དང་ཡིད་རང་དང་། །ཁྱེད་ཀྱི་སྤྱན་སྔར་བཤགས་པར་བགྱི། །སླད་ཆད་བདག་ནི་མི་བགྱིད་དོ། །སངས་རྒྱས་བྱང་ཆུབ་སེམས་དཔའ་དང་། །འཕགས་པ་རང་རྒྱལ་ཉན་ཐོས་ཀྱི། །ཡན་ལག་རྣམས་ཀྱང་བཟུང་བར་བགྱི། །འགྲོ་རྣམས་ཀུན་གྱི་དགེ་བ་ལ། །བདག་ནི་རྗེས་སུ་ཡིད་རང་ངོ་། །བདེ་གཤེགས་ཆོས་སྐུ་ལ་བཞུགས་ཏེ། །འགྲོ་བ་ཀུན་ལ་ཕན་དོན་དུ། །ཆོས་ཀྱི་འཁོར་ལོ་བསྐོར་བ་ནི། །བདག་ནི་རྟག་ཏུ་གསོལ་བ་འདེབས། །བདེ་གཤེགས་མཛད་པ་མཐར་ཕྱིན་ནས། །མྱ་ངན་འདའ་བར་བཞེད་པ་ལ། །བསྐལ་པའི་མཐར་མར་བཞུགས་པར་ནི། །བདག་ནི་རྟག་ཏུ་གསོལ་བ་འདེབས། །ལུས་ངག་ཡིད་གསུམ་དགེ་བ་དེས། །བགྱིས་སམ་བགྱིད་དུ་སྩལ་བ་གང་། །རྗེས་སུ་ཡིད་རང་དེ་དག་ནི། །འགྲོ་རྣམས་ཀུན་གྱིས་ཐོབ་པར་ཤོག །སྤྱན་རས་གཟིགས་དབང་ཐུགས་རྗེའི་བདག །བླ་མར་བཅས་པ་ཐམས་ཅད་ལ། བདག་ནི་རྟག་ཏུ་སྐྱབས་སུ་མཆི། །བདག་གི་ལུས་འདི་འབུལ་བ་ཡིས། །ཐེག་པ་དམན་ལ་མི་འཇུག་ཅིང། །ཐེག་མཆོག་བླ་ན་མེད་པ་ཡི། །ལམ་ཅིག་བདག་ལ་བསྟན་དུ་གསོལ། །གཉིས་པ་སེམས་བསྐྱེད་པ་ནི། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་སློབ་དཔོན་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །སེམས་ཅན་རྣམས་ཀྱི་དོན་སླད་དུ། །བྱང་ཆུབ་མཆོག་ཏུ་ཐུགས་བསྐྱེད་ལྟར། །དེ་བཞིན་བདག་གིས་སེམས་བསྐྱེད་དོ། །ཇི་ལྟར་དུས་གསུམ་མགོན་པོ་རྣམས། །བསོད་ནམས་ཡེ་ཤེས་བྱང་ཆུབ་ལམ། །ཐབས་དང་ཤེས་རབ་གོ་འཕང་བགྲོད། །དེ་བཞིན་བདག་གིས་ལམ་བགྲོད་དོ། །ཇི་ལྟར་དུས་གསུམ་མགོན་པོ་རྣམས། །ཐམས་ཅད་མཁྱེན་པར་སངས་རྒྱས་ནས། །མཁའ་མཉམ་སེམས་ཅན་དོན་མཛད་ལྟར། །དེ་བཞིན་བདག་གིས་དོན་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བ་དང་། །དབུགས་མ་དབྱུང་རྣམས་དབུགས་དབྱུང་ཞིང་། །འགྲོ་ཀུན་མྱ་ངན་འདའ་བ་དང་། །ཀུན་ཀྱང་སངས་རྒྱས་ཐོབ་པར་ཤོག །ཅེས་ལན་གསུམ་བརྗོད་ལ་སེམས་བསྐྱེད་པར་བྱའོ། །གསུམ་པ་དབང་བསྐུར་བ་དངོས་ནི་རིག་པའི་དབང་ལྔ་སྟེ། ཐོག་མར་དབང་བསྐུར་བའི་དོན་དུ་ཚེ་ལས་འདས་པ་དཀྱིལ་འཁོར་དུ་ཞུགས་པར་བསམ་ཞིང་། གསོལ་བ་གདབ་པ་ནི། པད་མ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །རིག་པའི་དབང་ལྔ་ཡོངས་རྫོགས་ལྟར། །དེ་བཞིན་དབང་བསྐུར་མཛད་དུ་གསོལ། །ཞེས་བརྗོད་ལ་མེ་ཏོག་ཀྱང་དབུལ་ལོ། དེ་ནས་རྣམ་རྒྱལ་བུམ་པས་དབང་བསྐུར་བར་བྱས་སྟེ། ཏིང་ངེ་འཛིན་དང་བཅས་པས། སངས་རྒྱས་རྣམས་ཀྱི་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དོ་ནུབ་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོང་། །བྷུདྡྷ་ཨ་བྷི་ཥིཉྩྨ་ཨོཾ། ཅེས་པ་དང་། ཅི་ལྟར་ལྟམས་པ་ཙམ་གྱིས་ནི། །ཞེས་པས་ཁྲུས་བྱའོ། །དེ་ནས་རྡོ་རྗེ་སེམས་དཔའི་ངོ་བོ་རྡོ་རྗེའི་དབང་ནི། མི་བསྐྱོད་རྡོ་རྗེ་རིགས་ཀྱི་གཙོ། །ཞེ་སྡང་རྣམ་དག་རྡོ་རྗེའི་དབང་། །དེང་འདིར་ཁྱོད་ལ་བསྐུར་བར་བྱ། །མེ་ལོང་ལྟ་བུའི་དབང་ཐོབ་ཤོག །ཨོཾ་བཛྲ་སྭ་ཏྭ་ཨ་བྷི་ཥིཉྩྨ་ཧཱུྃ། དེ་ནས་འོད་དཔག་ཏུ་མེད་པའི་རང་བཞིན་ཡི་གེ་དྲུག་མ་བླངས་ལ། པད་མ་དབང་གི་དཀྱིལ་འཁོར་དུ། །འདོད་ཆགས་རྣམ་པར་དག་པ་ཡི། །སངས་རྒྱས་ཀུན་གྱི་གསུང་མཆོག་དབང་། །དེང་འདིར་ཁྱོད་ལ་དབང་བསྐུར་བྱ། །ཨོཾ་པད་མ་ཨ་བྷི་ཥིཉྩྨ་ཧྲཱི། དེ་ནས་རིན་ཆེན་འབྱུང་ལྡན་གྱི་ངོ་བོ་བགྲང་འཕྲེང་བླངས་ལ། རིན་ཆེན་མཆོག་གི་དཀྱིལ་འཁོར་དུ། །ང་རྒྱལ་རང་སར་དག་པ་ཡི། །སངས་རྒྱས་རྣམས་ཀྱི་ཡོན་ཏན་དབང་། །དེང་འདིར་ཁྱོད་ལ་བསྐུར་བར་བྱ། །ཨོཾ་རཏྣ་ཨ་བྷི་ཥིཉྩྨ་ཏྲྃ། དེ་ནས་དོན་ཡོན་གྲུབ་པའི་ངོ་བོར་མར་མེ་བླངས་ལ། འཕྲིན་ལས་ཡོངས་རྫོགས་དཀྱིལ་འཁོར་དུ། །ཕྲག་དོག་རང་སར་དག་པ་ཡི། །སངས་རྒྱས་ཀུན་གྱི་འཕྲིན་ལས་དབང་། །དེང་འདིར་ཁྱོད་ལ་བསྐུར་བར་བྱ། །ཨོཾ་ཀརྨ་ཨ་བྷི་ཥིཉྩྨ་ཨ། ཞེས་དབང་བསྐུར་རོ། །དབང་བསྐུར་ནས་ཚེ་ལས་འདས་པའི་རྣམ་པར་ཤེས་པ་ལྷའི་ངོ་བོར་གྱུར་པར་བསམས་ལ། མཆོད་པ་བསྡུས་པ་ཙམ་བྱའོ། །གསུམ་པ་རྗེས་ཀྱི་བྱ་བ་ནི་གསུམ་ལས། དང་པོ་ནི། སྤྲོས་པ་ལ་དགའ་ན་ཟས་གཏད་པ་ཡང་བྱས་ལ། དེ་ནས་ནུབ་ཐ་མ་ལ་མིང་བྱང་བསྲེགས་པ་ནི། མིང་བྱང་ལག་ཏུ་ཐོགས་ནས། ཆོས་སྐུ་དྲི་མེད་རྡོ་རྗེ་འཆང་། །སྤྱན་རས་གཟིགས་དབང་འགྲོ་བའི་མགོན། །ཚེ་འདས་སེམས་ཉིད་མཆོད་པར་འབུལ། །མ་དག་གཟུགས་ཀྱི་ཕུང་པོ་སྒྲོལ། །མི་འགྱུར་རྡོ་རྗེ་ལྟ་བུ་ཡིས། །མི་བསྐྱོད་རྡོ་རྗེ་རིགས་ཀྱི་གཙོ། །ཚེ་འདས་རྣམ་ཤེས་མཆོད་པར་འབུལ། །ཞེས་སྡང་དབྱིངས་སུ་བསྒྲལ་མཛད་གསོལ། །དྲི་མེད་པད་མ་ལྟ་བུ་ཡིས། །འཆི་མེད་རྒྱལ་པོ་འོད་དཔག་མེད། ཚེ་འདས་འདུ་ཤེས་མཆོད་པར་འབུལ། །འདོད་ཆགས་དབྱིངས་སུ་བསྒྲལ་མཛད་གསོལ། །ཡིད་བཞིན་ནོར་བུ་ལྟ་བུ་ཡི། །ཡོན་ཏན་ཐམས་ཅད་འབྱུང་བའི་གནས། ཚེ་འདས་ཚོར་བ་མཆོད་པར་འབུལ། །ང་རྒྱལ་དབྱིངས་སུ་བསྒྲལ་མཛད་གསོལ། །འཕྲིན་ལས་ཐམས་ཅད་ཡོངས་རྫོགས་ཤིང་། །རྒྱལ་བའི་དགོངས་པ་རྫོགས་མཛད་པ། །ཚེ་འདས་འདུ་བྱེད་མཆོད་པར་འབུལ། །ཕྲག་དོག་དབྱིངས་སུ་སྒྲོལ་མཛད་གསོལ། །དུས་གསུམ་སངས་རྒྱས་སྐུ་གསུང་ཐུགས། །རྒྱལ་བ་རྒྱ་མཚོ་སྤྱན་རས་གཟིགས། །ཚེ་འདས་སྐྱེ་མཆེད་མཆོད་པར་འབུལ། ཁམས་གསུམ་སྐྱེ་མཆེད་དབྱིངས་སུ་སྒྲོལ། །རང་བཞིན་གདོད་ནས་དག་པ་ལས། ཚོགས་གཉིས་ཟུང་འཇུག་འཕྲིན་ལས་ཀྱིས། །བར་དོར་གནས་པའི་འགྲོ་བ་རྣམས། །ཐུགས་རྗེའི་ལྕགས་ཀྱུས་མྱུར་དུ་དྲོངས། །ཞེས་བརྗོད་ལ་བསྲེག་གོ །གཉིས་པ་ལམ་བསྟན་པ་ནི། དཀོན་མཆོག་རིན་ཆེན་དཔལ་ཞིང་དུ། དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོོམ་པའི་ལམ། །བླ་ན་མེད་པའི་ཁྱད་པར་ལམ། རྣམ་པར་གྲོལ་བའི་ལམ་དག་ལ། །བརྟེན་ནས་རྣམ་པ་ཀུན་སྦྱངས་ཏེ། །འཕགས་པའི་ལམ་དེར་བགྲོད་པར་ཤོག །ཨོཾ་རད་ནེ་རད་ནེ་མཧཱ་རད་ནེ་སྃ་བྷ་བཱ། རད་ནེ་ཀི་རད་ན་མ་ལེ་བྷ་ཤུད་དྷེ། ཤོ་དྷ་ཡཱ་སརྦ་པ་པཾ་ཧཱུྃ་ཕཊ། པད་མ་འདམ་གྱིས་མ་གོས་ལྟར། སྲིད་པའི་དྲི་མས་མ་གོས་པའི། །སྲིད་པའི་པད་མ་ལས་བྱུང་པའི། །བདེ་བ་ཅན་དུ་སྐྱེ་བར་ཤོག །ཨོཾ་པད་མེ་པད་མེ་པད་མོ་ས་བྷ་ས་བྷ་བཱ་སུ་གརྻ་གྷད་ཚ་ཏུ་སྭཱ་ཧཱ། ཞེས་བརྗོད་དོ། །མེ་ཏོག་གཏོར་ཞིང་སྨོན་ལམ་ཡང་གདབ། དཀྱིལ་འཁོར་གྱི་ལྷ་ལ་མཆོད་བསྟོད་ཅི་རིགས་པར་བྱ་སྟེ། བཟོད་པར་གསོལ་བ་དང་གཤེགས་སུ་གསོལ་བ་བཀྲ་ཤིས་ལ་སོགས་མཆོད་འབུལ་ནས་བཤད་པ་ལྟར་བྱའོ། གསུམ་པ་བསྔོ་བ་ནི། དེ་ལྟར་ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད་ཀྱི་དོན་དུ་བསྔོ་བ་གང་རུང་བྱའོ། །དེ་ལྟར་འཕགས་པ་སྤྱན་རས་གཟིགས་ཀྱི་སྒོ་ནས། ཆོ་ག་བྱ་ཞིང་གཟུངས་བཏོན་པའི་ཕན་ཡོན་ནི། ཟ་མ་ཏོག་བཀོད་པ་ལས་བྱུང་ངོ་། །མདོ་དང་རྒྱུད་ལས་ཇི་ལྟར་བྱུང་བ་དང་། །སྤྲུལ་པའི་རྒྱལ་པོས་མཛད་པའི་མན་ངག་དང་། །བླ་མའི་གསུང་ལས་བྱུང་བ་རྒྱས་པ་རུ། །སྤེལ་བའི་ཚིག་འདི་རང་བྱུང་རྡོ་རྗེས་སྦྱར། ཨོཾ་ཨཱ་ཧཱུྃ་ཧྲི༔ ཨོཾ་མ་ཎི་པད་མེ་ཧཱུྃ ཨོཾ་པད་མ་ཚིན་དྷ་མ་ནི་ཛ་ལ་ཧཱུྃ་ཧྲཱི་ཛ། བི་པུ་ནི་གར་རྦེ། མ་ནི་པྲ་བྷེ། ཏ་ཐཱ་ག་ཏ་ནེ་དི་རི་ཤ་ཧེ༔ མ་ཎི་མ་ཎི་སུ་པྲ་བྷེཿ བྷི་མ་ལེཿ ས་ག་ར་གྷཾ་བྷི་ར་ཧཱུྃ་ཧཱུྃཿ ཛྷ་ལ་ཛྷ་ལཿ བྷུད་དྷ་བྷི་ལོ་ཀི་ཏེ། གྷུ་་ཨ་ི་ཤི་ཐ་དེ་གར་བྷེ་སྭཱ་ཧཱ། པད་མ་དྷ་ར། ཨ་མོ་ཀ་དྷ་ར། ཨ་མོ་གྷ་ཛ་ཡ་ཏེཿ ཙུ་རུ་ཙུ་རུ་སྭ་ཧཱ། ཞེས་བྱ་བའི་སྔགས་འདིའམ། གཟུངས་རིངས་ལ་སོགས་པ་རྒྱུན་དུ་བརྗོད་ན། སྡིག་སྒྲིབ་ཐམས་ཅད་འབྱང་བར་བཤད་དོ། །རྫོགས་སོ།། །།དགེའོ། །ལེགས་སོ།། །།

མཁའ་འགྲོ་རྒྱ་མཚོའི་སྙིང་པོའི་མངོན་པར་རྟོགས་པ།

༄༅། །མཁའ་འགྲོ་རྒྱ་མཚོའི་སྙིང་པོའི་མངོན་པར་རྟོགས་པ་བཞུགས་སོ། །

༄༅། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞི་བའི་བདག་ཉིད་འཇིགས་བྱེད་འཇིགས་སུ་རུང་བའི་སྐུ། །བརྗོད་མེད་བདག་ཉིད་སྣ་ཚོགས་སྒྲ་དབྱངས་སྒྲོགས་པའི་གསུང་། །རྟོག་མེད་བདག་ཉིད་ཐུགས་རྗེས་དཀྱིལ་འཁོར་ཁྱབ་པའི་ཐུགས། །སྲིད་ཞིའི་བདག་ཉིད་ཧེ་རུ་ཀ་དཔལ་ལ་ཕྱག་འཚལ། །དཔལ་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་བ་ཐོབ་ཅིང་། དམ་ཚིག་ལ་གནས་པ འི་རྣལ་འབྱོར་པས་ཡིད་མཐུན་པའི་གནས་སུ་སྟན་བདེ་བ་ལ་འདུག་སྟེ། བདུད་རྩི་རི་ལུའམ། དམ་ཚིག་གི་རྫས་སྦྱར་བས། ཕྱོགས་དང་བདག་ཉིད་ལ་གཏོར་ཞིང་། བྷུར་བྷུ་ཝ་སྭཿ ཨོཾ་ཨཿ ཧྶྭུ་མེ་རཀྵ་ཧཱུྃ། ཨོཾ་ཨཿ ཨད་མ་ནཱཾ་མེ་རཀྵ་ཧཱུྃ། ཨོཾ་ཨཱཿ ཡོ་གྷཾ་མེ་རཀྵ་ཧཱུྃ། ཞེས་གནས་དང་བདག་དང་རྣལ་འབྱོར་བསྲུང་བར་བྱའོ། །དེ་ནས་བདག་ཉིད་སྐད་ཅིག་གིས་ཞལ་བཞི་ཕྱག་་བཅུ་གཉིས་པའི་བཅོམ་ལྡན་འདས་སུ་བསྒོམས་པས་ལུས་དག་པར་བྱས་ལ་ཨ་ལི་དང་ཀ་ལི་ཧཱུྃ་ཕཊ་དང་བཅས་པ་བརྗོད་པས་ངག་སྦྱང་ཞིང་། ཤྲི་ཧེ་རུ་ཀ་ཧྃ་ཞེས་ཡིད་དག་པར་བྱའོ། །དེ་ནས་བསྲུང་བའི་འཁོར་ལོ་ནི། ཨོཾ་སུྃ་བྷ་ནི་སུྃ་བྷ་ཀ་ཡི་ཀྃ་ཧཱུྃ་ཧཱུྃ་ཕཊ། ཨོཾ་གྷྲི་་གྷྲི་་བཱ་ཙི་ཀྃ་ཧཱུྃ་ཧཱུྃ་ཕཊ། ཨོཾ་གྷྲི་་པ་ཡ་གྷྲི་་པ་ཡ་ཙཱི་ད་ཀ་ཧཱུྃ་ཧཱུྃ་ཕཊ། ཨོཾ་ཨ་ན་ཡ་ཧོཿ བྷ་ག་ཝན་བཛྲ་ཛྙྱ་ནི་ཀྃ་ཧཱུྃ་ཧཱུྃ་ཕཊ། ཞེས་ཕྱོགས་དང་མཚམས་སུ་སྔགས་ཀྱི་གུར་ཁང་། འོག་ཏུ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་བྱུང་བའི་རྡོ་རྗེའི་ས་གཞི་ཕྱི་རོལ་དུ་རྡོ་རྗེའི་ར་བ་གྲུ་བཞི། རྡོ་རྗེ་ལྔའི་གུར་ཁང་། སྟེང་རྡོ་རྗེའི་བླ་རེ། ཕྱི་རོལ་དུ་མདའི་དྲྭ་བ། དེའི་ཕྱི་རོལ་དུ་ཕྱོགས་སུ་གཡོན་བསྐོར་དུ་ཁྭ་དང་འུག་པ་དང་། ཁྱི་དང་ཕག་པའི་གདོང་པ་ཅན་དང་། མེ་ནས་མཚམས་རྣམས་སུ་གཡས་བསྐོར་གྱིས་གཤིན་རྗེ་བརྟན་མ་དང་། ཕོ་ཉ་མོ་མཆེ་བ་ཅན་འཇོམས་མ་རྣམས་གཡོན་ཕུར་པ་གཡས་རྡོ་རྗེའི་ཐོ་བ་བསྣམས་པའི་མདུན་དུ་ཧཱུྃ་ལས་རྡོ་རྗེའི་དོང་བསམས་ཏེ། སརྦ་བིགྷྣ་ཨ་ན་ཡ་ཛཿ ཞེས་ཕྱོགས་བཅུའི་བགེགས་རྣམས་བཀུག་སྟེ། དོང་དུ་བཅུག་ནས། ཨོཾ་གྷ་གྷ་གྷ་ཏ་ཡ་སརྦ་དུས་ཥྚན་ཕཊ་ཀི་ལ་ཡ་སརྦ་པཱ་པན་ཕཊ་ཧཱུྃ་ཧཱུྃ་ཧཱུྃ་བཛྲ་ཀི་ལ་ཡ་བཛྲ་དྷ་རོ་ཨ་ཛྙྱ་པ་ཡ་ཏི་སརྦ་བྷི་གྷྣ་ཀ་ཡ་བག་ཙི་ཏ་བཛྲ་ཀི་ལ་ཡ་ཧཱུྃ་ཕཊ། ཞེས་ཕུར་བུས་གདབ་ཅིང་། ཨོཾ་བཛྲ་མུད་གཱ་ར་བཛྲ་ཀི་ལ་ཨ་ཀོ་ཊ་ཡ་ཧཱུྃ་ཕཊ། ཞེས་རྡོ་རྗེའི་ཐོ་བས་བརྡུངས་ཏེ་བདེ་བ་ཆེན་པོ་མྱོང་བར་བྱས་ནས་རྡོ་རྗེ་དང་པད་མ་དང་འཁོར་ལོའི་ར་བ་དང་མེ་དཔུང་གིས་མཚམས་བཅིང་བར་བྱའོ། །དེ་ནས་རང་གི་སྙིང་ཁའི་ཧཱུྃ་ལས་འོད་ཟེར་འཕྲོས་བླ་མ་དང་མཁའ་འགྲོ་རྒྱ་མཚོའི་དཀྱིལ་འཁོར་གསལ་བར་བལྟས་ནས། ཨོཾ་ཨཱ་ཧཱུྃ། ཨོཾ་པྲ་བ་ར་སད་ཀ་ར་པཱ་ཏྱྃ་པྲ་ཏི་ཙྪ་ཡ་སྭཱཧཱ་ཞེས་ཞལ་བསིལ་དང་། ཞབས་བསིལ་ཕུལ་ལ། ཨོཾ་ཨཱ་བཛྲ་པུ་པེ་ཧཱུྃ། ཨོཾ་ཨཿབཛྲ་དྷུ་པེ་ཧཱུྃ། ཨོཾ་ཨཱཿབཛྲ་དྷི་པེ་ཧཱུྃ། ཨོཾ་ཨཱཿབཛྲ་གྷན་དྷེ་ཧཱུྃ༔ ཨོཾ་ཨཿབཛྲ་ནེ་པེ་ཏེ་ཧཱུྃ་ཞེས་བྱ་བ་དང་རིག་མ་བཅུ་དྲུག་གིས་ཀྱང་མཆོད་ལ། ཀུན་མཁྱེན་ཡེ་ཤེས་ཕུང་པོ་ཅན། །འགྲོ་དོན་རབ་ཏུ་སྒྲུབ་པ་པོ། །ཡིད་བཞིན་ནོར་བུ་འདིར་བྱུང་བ། །དཔལ་སྡོམ་ཁྱོད་ལ་ཕྱག་འཚལ་ལོ། །སྣ་ཚོགས་ཡེ་ཤེས་ཆེན་པོས་གཡོགས། ཐམས་ཅད་བདག་ཉིད་རྟག་ཏུ་བཞུགས། །ཐུགས་རྗེས་འགྲོ་བ་དྲག་ཆེན་པོ། །དཔལ་སྡོམ་ཁྱོད་ལ་ཕྱག་འཚལ་ལོ། །ཞེས་བྱ་བས་བསྟོད་པ་བྱའོ། །བགྱིད་དང་བགྱིད་བརྩལ་རྗེས་སུ་ཡིད་རང་ལ་སོགས་སྡིག་པ་མ་ལུས་པ་ནི་སྐྱོན་རྣམས་མ་ལུས་ངེས་པར་བཅོམ་པའི། །མདུན་དུ་སོ་སོར་བཤགས་བྱ་སླར་ལ་ཡང་ནི་མི་བྱེད་པའི་སྡོམ་པ་བཟུང་བ་ཉིད་དུ་བྱ། །ཉན་ཐོས་དང་ནི་བསེ་རུ་བླ་མེད་རྒྱལ་བ་རྒྱལ་དང་རྒྱལ་བའི་སྲས་ཀྱིས་བསགས་པའི་དགེ་བ་ལ། །རྗེས་སུ་ཡིད་ནི་རང་ཞིང་བྱང་ཆུབ་ཡང་དག་ཡོངས་སུ་བསྔོ་བར་བདག་གིས་བྱ། །རྒྱལ་བ་རིན་ཆེན་ལ་སོགས་གསུམ་ལ་ཇི་སྙེད་སྐྱབས་སུ་འགྲོ་བར་བྱ་བ་ཐམས་ཅད་དུ་ནི་བསྒོམ། །བྱང་ཆུབ་སེམས་ནི་རྣམ་པར་བཟུང་ངོ་བླ་ན་མེད་པའི་ལམ་ནི་དེ་བཞིན་བསྟེན། །དེ་ནས། ཨོཾ་ཨཿབཛྲ་མུ་ཧཱུྃ། ཞེས་བརྗོད་པས་གཤེགས་པར་བྱའོ། །དེ་ནས་སྙིང་རྗེ་བྱམས་པ་དང་དགའ་བ་དང་བཏང་སྙོམས་དྲན་པར་བྱའོ། །དེའི་རྗེས་སུ། ཨོཾ་སརྦ་དྷ་རྨ། ཤུ་ནྱཱ་ཏ་སྭ་བྷཱ་བཱ་ཤུ་ནྱོ་ཧཾ། ཨོཾ་སརྦ་དྷརྨ་སྭ་བྷཱ་ཝ་ཤུད་དྷ། སྭ་བྷ་བཱ་ཤུད་དྷོ་ཧཾ། ཨོཾ་ནྱ་ཏ་ཛྙྱ་ན་བཛྲ་སྭ་བྷ་བཱ་ཨད་མ་ཀོ་ཧཾ། ཨོཾ་ཡོ་ག་ཤུད་དྷཿསརྦ་དྷརྨཿ ཡོ་ག་ཤུད་དྷོ་ཧཾ། ཞེས་བྱ་བ་བརྗོད་ཅིང་། དོན་དྲན་པར་བྱས་ཏེ་ཆོས་ཐམས་ཅད་ནམ་མཁའི་དཀྱིལ་ལྟར་བསྒོམ་པར་བྱའོ། །དང་པོའི་སྦྱོར་བའོ། །དེ་ནས་སྨོན་ལམ་རྗེས་སུ་དྲན་པས་ན་དེ་ལས་འོག་གི་ཕྱོགས་སུ་འོད་འཕྲོས་ཏེ། ཡྃ་ལས་རླུང་གི་དཀྱིལ་འཁོར་ནག་པོ་གཞུ་ལྟ་བུ། རྃ་ལས་མེ་དམར་པོ་ཟུར་གསུམ་པ། བྃ་ལས་ཆུ་དཀར་པོ་ཟླུམ་པོ། ལྃ་ལས་ས་སེར་པོ་གྲུ་བཞི། སུྃ་ལས་རི་རབ། ཕྱོགས་ཀྱི་ཁ་དོག་ཅན། ཡྃ་ལས་སྣ་ཚོགས་པད་མ། ཧཱུྃ་ལས་སྣ་ཚོགས་རྡོ་རྗེ། རང་རང་གི་ས་བོན་གྱིས་མཚན་པའོ། །དེ་ཐམས་ཅད་ཞུ་བ་ཡོངས་སུ་གྱུར་པ་ལས་ཆོས་ཀྱི་འབྱུང་གནས་ལ་གནས་པའི་གཞལ་ཡས་ཀྱི་ཁང་པ་ཡེ་ཤེས་ཀྱི་དཀྱིལ་འཁོར་ཞེས་བྱ་བ་ཀུན་ནས་བཟླུམ་པོ་སྒོ་བཞི་པ་རྟ་བབས་བཞི་དང་ལྡན་པ་ནག་པ་དང་ལྗང་བའི་བརྩིག་པ་གཉིས་དང་ལྡན་པ་ཕ་གུ་དང་དྲྭ་བ་ཕྱེད་པ་དང་གཟེང་ཁང་དང་མདའ་ཡབ་ཐོག་བྱུར་བུ་རྡོ་རྗེ་དང་གདུགས་རིམ་པ་བཅུ་གསུམ་ནོར་བུ་ཏོག་དང་ལྡན་པ། ཕྱི་རོལ་སྟེགས་བུ་དམར་པོ་ལ་མཆོད་པའི་ལྷ་མོ་དང་ཡེ་ཤེས་ཀྱི་དུར་ཁྲོད་བརྒྱད་ཀྱིས་བརྒྱན་པ། དེའི་དབུས་སུ་སྣ་ཚོགས་པད་མ་འདབ་མ་བཞི་བཅུ་ཞེ་བརྒྱད་པའི་དབུས་འཇིགས་བྱེད་དང་དུས་མཚན་མའི་སྟེང་དུ། ཨ་ལི་ཟླ་བ་མེ་ལོང་ལྟ་བུ། ཀ་ལི་ཉི་མ་མཉམ་པ་ཉིད། དེའི་དབུས་སུ་ན་ད་ལས་ཧཱུྃ་ཡིག་སོ་སོར་རྟོག་པ་ཐམས་ཅད་ཅིག་ཏུ་གྱུར་པ་བྱ་བ་ནན་ཏན། དེ་ཐམས་ཅད་ཡོངས་སུ་གྱུར་པ་ལས་ཆོས་དབྱིངས་རྣམ་པར་དག་པ འི་རྒྱུའི་ཧེ་རུ་ཀ་སྐུ་མདོག་དཀར་པོ་རྩ་བ་དང་གཡོན་དང་རྒྱབ་དང་གཡས་ཀྱི་ཞལ་བཞི་རིམ་པ་བཞིན་དུ་དཀར་ལྗང་དམར་སེར་བ་སྤྱན་གསུམ་པ་རལ་པའི་ཅོད་པན་ཅན། གཡས་བརྐྱང་པས་་ བཞུགས་པ། རྡོ་རྗེ་དྲིལ་བུས་ཤེས་རབ་མ་ལ་འཁྱུད་པ། གཉིས་ཀྱིས་གླང་པོའི་ལྤགས་པ་ཅན། གཡས་འོག་མ་རྣམས་ཌ་མ་རུ། དགྲ་སྟ། གྲི་གུག་རྩེ་གསུམ་པ། གཡོན་འོག་མ་ཁ་ཊྶཱྃ་ག། ཐོད་པ། ཞགས་པ། ཚངས་པའི་མགོ་བོ་ཅན། ཤེས་རབ་རྡོ་རྗེ་ཕག་མོ་གྲི་གུག་ཐོད་པ་ཅན་ཞབས་གཡས་པ་དང་ཕྱག་གཡོན་པས་འཁྱུད་པའོ། །སྙིང་ཁར་ཉི་མ་ལ་གནས་པའི་ཧཱུྃ་ཡབ་ཀྱི་གསང་བར་གནས་པའི་ཧཱུྃ་ལས་རྡོ་རྗེ་བྱྃ་གྱིས་མཚན་པ། ཡུམ་གྱི་མཁའ་ལས་པད་མ་དྱྃ་གྱིས་མཚན་པར་བྱིན་གྱིས་བརླབས་ཏེ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་བདེ་བ་ཆེན་པོའི་རང་བཞིན་ལས་རྣལ་འབྱོར་མ་ཉི་ཤུ་རྩ་བཞི་དང་བདེ་བ་ཆེན་པོའི་སྣོད་ཀྱི་རང་བཞིན་ཉི་ཤུ་རྩ་བཞི་སྤྲོས་ཏེ། ཤར་ནས་མཁའ་འགྲོ་མ། གཟུགས་ཅན་མ། འོད་བྱེད་མ། གཞན་བསྒྱུར་མ། བྱིས་བཅས་མ། རྗེས་འཇུག་མ། ཕྱེད་ནག་ཕྱེད་སྔོ་ཅན་ནོ། །བྱང་ཕྱོགས་ནས་ལཱ་མ། རྣལ་འབྱོར་དབང་ཕྱུག་མ། བཟང་མོ། ཐོད་པ་ཅན་ནག་མོ །རྒྱལ་བསྐོར་མ་སྟེ་ཕྱེད་ལྗང་ཕྱེད་དམར་རོ། །ནུབ་ཕྱོགས་ནས་དུམ་སྐྱེས་མ། དུར་ཁྲོད་མ། རྣམ་པར་ཞུ་མ། ཀུ་རུ་ཀུ་ལ། གླུ་མ་གར་མ། ཕྱེད་དམར་ཕྱེད་སེར་ཅན་ནོ། །ལྷོ་ཕྱོགས་ནས་གཟུགས་ཅན་མ། འཇིགས་བྱེད་མ། གཙུག་པུད་མ། ཐོར་ཚུགས་ཅན། རལ་པ་ཅན། དྲག་མོ་རྣམས་ཕྱེད་སེར་ཕྱེད་ནག་ཐམས་ཅད་རྒྱན་དང་ཆ་ལུགས་ཕྱག་མཚན་ཕག་མོ་ལྟ་བུའོ། །མཚམས་སུ་བདུད་རྩི་ལྔས་གང་བའི་བུམ་པ་དང་ཐོད་པ། དེ་བཞིན་གཤེགས་པ་རྣམས་ཀྱི་རང་བཞིན་བདེ་བ་ཆེན་པོའི་སྙོམས་འཇུག་ལས་སྤྲོས་ཏེ་རྒྱུའི་ཧེ་རུ་ཀའོ། །དེ་ནས་འབྲས་བུའི་ཧེ་རུ་ཀ་ནི་གཙོ་བོ་ཡབ་ཡུམ་བདེ་བ་ཆེན་པོའི་བྱང་ཆུབ་ཀྱི་སེམས་སུ་ཞུ་བ་ལས་མཁའ་འགྲོ་མ་ལ་སོགས་པ་དྲུག་གིས་མགྲིན་གཅིག་ཏུ་ཚད་མེད་པའི་གླུས་བསྐུལ་བ་ནི། མངའ་བདག་ཉི་མ་རེ་རེར་འགྲོ་བས་མགྲོན་འབོད་ན། །ཁྱོད་ནི་ཅིའི་ཕྱིར་ན་སྟོང་པ་ཉིད་དུ་བཞུགས། བཞེངས་ཤིག་བཞེངས་ཤིག་བདག་ནི་སྙིང་རྗེའི་རང་བཞིན་ཏེ། །རྡོ་རྗེ་འཛིན་པ་བདེ་ཆེན་བདག་ལ་འདོད་པ་མཛོད། །ལཱ་མ་ལ་སོགས་པ་རྣམས་ཀྱིས། གསོན་ཅིག་གསོན་ཅིག་གཞན་གྱི་དོགས་པ་ནུབ། །འཇིག་རྟེན་དབང་ཕྱུག་གང་དག་ཤི་བ་བཞིན་དུ་འགྱུར། །བདག་གིས་པད་མ་རྒྱས་པ་ལ་འདོད་མཛོད། །དེ་ལྟར་འཇིག་རྟེན་ཀུན་བདེར་གྱུར་པར་བྱོས། །དུམ་སྐྱེས་མ་ལ་སོགས་པས། རྡོ་རྗེ་འཛིན་པས་བདག་ལ་རོལ་ཅིག་རོལ། །ལྷན་སྐྱེས་རང་བཞིན་བརྗོད་དུ་མེད་པ་ཐོབ། །སེམས་ཅན་འཇིག་རྟེན་གཞན་ནི་རྨོངས་གྱུར་པས། །ཇི་ལྟར་ཁྱོད་ནི་སྟོང་བ་དོན་མེད་གྱུར། །གཟུགས་ཅན་མ་ལ་སོགས་པས་ཀྱང་། །ཁྱོད་ནི་ཆོས་རྣམས་ཀུན་གྱི་བྱེད་པ་སྟེ། །ཅི་ཕྱིར་ལྷན་སྐྱེས་འགྲོ་མེད་བཞུགས། །བདག་ལ་མཆོག་གི་དོན་གྱིས་འདོད་པ་མཛོད། །ཇི་ལྟར་ཁྱོད་ནི་འཇིག་རྟེན་རྣམས་མཐུན་བཞུགས། །དེ་ནས་དེ་རྣམས་ཐིག་ལེ་ཉིད་ལ་ཞུགས་པར་བལྟའོ། །དེ་ནས་ཐིག་ལེ་ཡོངས་སུ་གྱུར་པ་ལས། ཧཱུྃ་ལྗང་སྔོན་སྔགས་འདིས་བྱིན་གྱིས་བརླབས་ཏེ། ཨོཾ་ཨཿཀཱ་བག་ཙིཏྟ་བཛྲ་ཧཱུཾ་ཕཊ་ཧོ༔ ཞེས་བཅོམ་ལྡན་འདས་རྣལ་འབྱོར་མ་དང་བཅས་པ་ཉི་ཟླ་དང་། འཇིགས་བྱེད་དུས་མཚན་དང་། འདོད་ལྷ་དགའ་བོ་གཡས་བརྐྱང་གཡོན་བསྐུམ་པས་གནན་པའི་ཁྲོ་བོ་ཆེན་པོ་ནམ་མཁའ་དང་ཡེ་ཤེས་དག་པའི་སྐུ་ནག་པོ་དང་ལྗང་ཁུ་ཕྱེད་ཕྱེད་པ་ཞལ་བཅུ་བདུན། ཕྱག་བདུན་ཅུ་རྩ་དྲུག་པ། ཞལ་རྩ་བ་ནག་པོ་དང་ལྗང་ཁུ། གཡས་སེར་གཡོན་ལྗང་རྒྱབ་དམར་ལྷག་པའི་ཞལ་བུང་བའི་མདོག་ཅན། སྤྱན་གསུམ་གསུམ་པ་མཆེ་བ་གཙིགས་པ་འཇིགས་པར་བྱེད་པ། རལ་པའི་ཅོད་པན་ཅན། ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པ། གར་གྱི་ཉམས་དགུ་དང་ལྡན་པ། རུས་པ་དང་རིན་པོ་ཆེ་དང་ཐལ་བའི་ཕྱག་རྒྱ་དྲུག་གིས་བརྒྱན་པ། ཐོད་པ་བརྒྱའི་ཕྲེང་བ་དང་སྟག་གི་ལྤགས་པའི་ཤམ་ཐབས་ཅན། དར་གྱི་ཅོད་པན་དང་འོད་ཟེར་གྱི་ཕྲེང་བས་མཛེས་པ་གཡས་ཀྱི་ཕྱག་དང་པོ་གཉིས་རྡོ་རྗེ་དྲིལ་བུས་འཁྱུད་པ། གཉིས་པ་གཉིས་གླང་པོ་ཆེའི་ལྤགས་པ་འཛིན་པ། གསུམ་པ་གཉིས་སྤྱི་བོར་སྐྱེ་གནས་ཀྱི་ཕྱག་རྒྱ་མཛད་པ། གཡས་བཞི་པ་ལ་སོགས་པ་རྣམས་ཀྱིས། རལ་གྲི། མདུང་རིང་། རྩེ་གསུམ། དགྲ་སྟ། གྲི་གུག མདའ། གསལ་ཤིང་་གིས་ཕུག་པ། ཐོ་བ། འཁོར་ལོ། ཅང་ཏེའུ། ཆུ་གྲི། དབྱུག་ཏོ། མཚོན་རྩེ་ཅིག་དུང་། ཟངས་དུང་། དབྱིག་གུ། རྨ་བྱའི་མཇུག་མ། བྱ་རོག་སྒྲོ། པིར། མེ་ཐབ། རི་བོ། དབྱུག་པ། མེ་ལོང་། པི་ཝང་། རྐང་མགོ ལག་མགོ གློ་བ། རྒྱུ་མ། སྒྲ་གཅན། ལྕགས་སྒྲོག གདོས། ཉ་རྒྱ། གདུབ་བུ། མགོ་མེད། འབར་བའི་མར་ནག འཇིགས་བྱེད་གཟུགས་རིམ་པ་བཞིན་ནོ། གཡོན་དུ་ཕུབ་རིང་། མཆེ་བ། གཏུན་ཤིང་། ཞགས་པ། ཐོད་པ། གཞུ། ཁ་ཊྶྃ་ག །པོ་ཏི། ཕུབ་ཆུང་ཡུ་ཅན། སྡིག་འཛུབ། གཡེར་ཀ །ཕྲེང་བ། ལྕགས་སྒྲོག བྲག །དུར་ཁྲོད་ཀྱི་རྡུལ། འབོ་ཁང་། རྔ། ལྤགས་པ་རློན་པ། སྐྲའི་ཐག་པ། རོ་བསྲེག་ཤིང་བུ། འཕོངས། ཕུབ། མགོ་བོ། ཀེང་རུས། ཟོར་བ། མིག །མཁལ་མ། སྙེ་མ། སྤེན་པའི་ཕུར་བུ། ས་བོན་གང་བ། སོག་ལེ། ཁབ། སླུད་བུ། སྤྲིན། ཤིང་། ལྕགས་ཀྱུ་རྣམས་གཡོན་པའོ། །རྡོ་རྗེ་ཕག་མོ་ནི་ཁ་དོག་དམར་པོ། ཞལ་ཅིག་ཕྱག་གཉིས་གྲི་གུག་དང་ཐོད་པ་ཅན། བདུད་རྣམས་སྡིགས་པར་བྱེད་པ། གཅེར་བུ་སྤྱན་གསུམ་པ་སྐྲ་གྲོལ་བ། མཆེ་བ་གཙིགས་པ་ཕྱག་རྒྱ་ལྔ་དང་། ཐོད་པ་སྐམ་པོ་ལྔ་དང་། དར་གྱི་ཅོད་པན་ཅན་མགོ་བོ་ལྔ་བཅུའི་དོ་ཤལ་དང་། དྲི་དང་མེ་ཏོག་གི་ཕྲེང་བས་བརྒྱན་པ། སྐུ་ལ་འོད་ཟེར་འཕྲོ་བའོ། །སྔར་བཞིན་དུ་རྣལ་འབྱོར་མ་རྣམས་ཀྱང་བསྒོམ་པར་བྱའོ། །འཁོར་བཅུ་གཉིས་ཀྱི་དཔའ་བོ་དང་རྣལ་འབྱོར་མ་རྣམས་ཀྱང་འདི་ཉིད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་འཕྲིན་ལས་ཀྱི་བདག་ཉིད་དེ་ཐམས་ཅད་རང་བཞིན་གྱིས་རྫོགས་པ་ཉིད་དོ། །སྒོར་གཡོན་བསྐོར་དུ་ཁྭ་དང་འུག་པ་དང་། ཁྱི་དང་ཕག་པའི་གདོང་པ་ཅན་བཞི་དང་། མཚམས་སུ་གཡས་བསྐོར་དུ་གཤིན་རྗེ་སྲེག་མ་དང་། ཕོ་ཉ་མོ་དང་མཆེ་བ་ཅན་དང་འཇོམས་མ་རྣམས་མཁའ་འགྲོ་མ་ལ་སོགས་པ་བཞིན་དུ་མོས་པ་བྱའོ། །ཕྱི་རོལ་གྱི་དུར་ཁྲོད་ནི་ཤར་ནས་གཡོན་བསྐོར་དུ་གཏུམ་དྲག ཚང་ཚིང་འབར་བ་འཁྲིགས་པའི་ཀེང་རུས་ཅན་འཇིགས་སྡེ། དབང་ལྡན་ནས་གཡས་བསྐོར་དུ་ཧ་ཧ་རྒོད། དཔལ་གྱི་ནགས། མུན་པ་དྲག་པོ། ཀི་ལི་ཀི་ལ་དང་བརྒྱད་རེ། ཕྱོགས་སྐྱོང་བརྒྱད་དང་། ཀླུ་དང་། ཞིང་སྐྱོང་དང་། སྤྲིན་དང་། གྲུབ་པ་དང་། མེ་དང་། ཆུ་དང་། རོ་ལངས་དང་། ལྕེ་སྤྱང་གི་ཚོགས་ཀྱིས་བརྒྱན་པའོ། །འདིར་ཡང་དུར་ཁྲོད་སུམ་ཅུ་སོ་གཉིས་ཀྱི་བདག་ཉིད་རྫོགས་སོ། འདི་དག་ཀྱང་ཁམས་གསུམ་པའི་བརྟན་པ་དང་གཡོ་བ་ཐམས་ཅད་རྣམ་པར་དག་པ་ཕྱི་དང་ནང་དང་གཞན་ཡོངས་སུ་རྫོགས་པའི་བདག་ཉིད་བླ་ན་མེད་པའི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་སོ་བདུན་དང་ལམ་དང་ཕ་རོལ་ཏུ་ཕྱིན་པ་དང་། སངས་རྒྱས་ཀྱི་ཆོས་ཡོངས་སུ་རྫོགས་པའི་བདག་ཉིད་ཡིན་ནོ། །དེ་ནས་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པད་མ་ལ་ཨཱ་དམར་པོ། སྙིང་ཁར་ཉི་མ་ལ་ཧཱུྃ་སྔོན་པོ། དེ་ནས་གོ་ཆ་སྤྲོ་བར་བྱ་སྟེ། སྙིང་ཁར་ཉི་མ་ལ་ཨོཾ་ཧ་བྃ་ཧི་བཱྃ་ཧི་བཱི་ཧུ་བཱུ་ཧུ་བཱུ་ཧེ་བཱེ་ཧཱེ་བེ་ཧཱཻ་བཱཻ་ཧཱཽ་བཱཽ་ཧཾ་བཾ་ཧཿབ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ་ཞེས་བྱ་བ་ཁ་དོག་དཀར་དམར་གཡོན་བསྐོར་དུ་སྦྲུལ་འཁྱིལ་བ་ལྟར་གནས་པ་རྡོ་རྗེ་སེམས་དཔའ་དང་ཕག་མོའི་ངོ་བོའོ། །མགོ་བོར་ཉི་མ་ལ་ཨོཾ་ན་ཧཱྃ་ན་ཧཱཾ་ནི་ཧཱི་ནི་ཧཱི་ནུ་ཧཱུྃ་ནཽ་ཧཱུྃ་ནཱེ་ཧེཾ་ནཱཻ་ཧཱཻ་ནོ་ཧཱྃ་ནཱཽ་ཧཱཽ་ནཱཽ་ཧཱཽ་ནི་ཧྃ་ནཿཧཿ ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ་སེར་ཞིང་སྔོ་བ་རྣམ་པར་སྣང་མཛད་དང་གཤིན་རྗེ་མའི་རང་བཞིན་ནོ། །སྤྱི་གཙུག་ཏུ་ཉི་མ་ལ་ཨོཾ་སྭ་ཧཱི་སྭ་ཧཱི་སྲི་ཧྲཱི་སྲི་ཧྲི་སཱུ་ཧཱུྃ་སཱུ་ཧཱུྃ་སྭེ་ཧྭེཾ་སྭཻ་ཧྲཻ་སོ་ཧྲཱི་སྭཽ་ཧྲཽ་སྭཽ་ཧྲཾ་སྭཿཧྲ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ་ཞེས་བྱ་བ་དམར་ཞིང་དཀར་བ་པད་མ་གར་གྱི་དབང་ཕྱུག་དང་རྨོངས་བྱེད་མའི་ངོ་བོའོ། །དཔུང་པ་གཉིས་ཀྱི་ནང་དུ་ཉི་མ་ལ་ཨོཾ་བཽ་ཧྲཱཾ་བ་ཧྲཾ་བཱི་ཧྲཱིཾ ་བི་ཧྲིཾ་བུ་ཧྲཱཻཾ་བུ་ཧྲཱཽ་བ་ཧྲུྃ་བཱཻ་ཧྲཻ་བཱེ་ཧྲཽ་བཾ་ཧྲཾ་བ་ཧྲ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ་ཞེས་བྱ་བ་ནག་ཅིང་སེར་བ་ཧེ་རུ་ཀ་དང་བཀྲོད་བྱེད་མའོ། །སྤྱན་གཉིས་ལ་ཉི་མའི་སྟེང་དུ་ཨོཾ་ཧཱུྃ་ཧཱུྃ་ཧྃ་ཧྃ་ཧཱྃ་ཧཱྃ་ཧི་ཧི་ཧཱི་ཧཱི་ཧཱུྃ་ཧཱུྃ་ཧེཾ་ཧེཾ་ཧཻཾ་ཧཻཾ། ཧོཾ་ཧོཾ་ཧཱཽཾ་ཧཱཽཾ་ཧཾ་ཧཱཾཾཿཧཿཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ ་ཧཱ་ཞེས་བྱ་བ་དམར་ཞིང་ལྗང་བ་རྡོ་རྗེ་ཉི་མ་དང་སྐྲག་བྱེད་མའོ། །མཛོད་སྤུའི་ཐད་ཀའི་ནང་དུ་ཉི་མ་ལ་ཨོཾ་ཕཊ་ཕཊ་ཕཊ་ཕཱ་ཕཱ་ཕི་ཕི་ཕུ་ཕུ་ཕཱུ་ཕཱུ་ཕེ་ཕེ་ཕཱཻ་ཕཱཻ་ཕོ་ཕོ་ཕཱཽ་ཕཱཽ་ཕྃ་ཕྃ་ཕཿཕཿཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ་ཞེས་བྱ་བ་ལྗང་ཞིང་དུད་ཁ་རྟ་མཆོག་དང་གཏུམ་མོ་སྟེ་འདི་ལས་ཡི་གེའི་ཚོགས་འཕྲོས་པས་རྐང་མཐིལ་ནས་སྤྱི་བོའི་བར་དུ་དེའི་རྡུལ་ཕྲ་རབ་པའོ། །རྡོ་རྗེ་ཕག་མོའི་ལྟེ་བར་ཨོཾ་བྃ་དམར་པོ་དང་། ཧྃ་ཡོཾ་སྔོན་པོ་སྙིང་ཁར་རོ། །ཧྲིཾ་མྃ་དཀར་མོ་ཁ་ལའོ། །ཧྲིཾ་ཧྲིཾ་སེར་མོ་མགོ་བོ་ལའོ། །ཧཱུྃ་ཧཱུྃ་ལྗང་ཁུ་སྤྱི་གཙུག་ཏུའོ། །ཕཊ་ཕཊ་ དུད་ཁ་སྨིན་མཚམས་སུ་བཀོད་དེ། དེ་ལས་འཕྲོས་པའི་ཡི་གེས་ལུས་ཐམས་ཅད་དགང་བའོ། །དེ་ནས་ཡེ་ཤེས་ཀྱི་དཀྱིལ་འཁོར་དང་གཉིས་སུ་མེད་པར་བྱ་སྟེ། དེ་ཡང་འབར་བའི་ཕྱག་རྒྱ་དཔྲལ་བར་བསྐོར་བ་དང་། རྐང་པ་གཡོན་པས་གཡས་པ་མནན་པ་དང་། སྙིང་ཁའི་ས་བོན་གྱི་འོད་ཟེར་གྱིས་གྲུབ་པའི་དཀྱིལ་འཁོར་ཆེན་པོ་མདུན་དུ་སྤྱན་དྲངས་ཏེ། ས་བོན་ལས་སྤྲོས་པའི་པི་ཝང་མ་ལ་སོགས་པས་ཡང་དག་པར་མཆོད་དེ། ཛཿཞེས་པས་རང་རང་གི་སྟེང་དུ་དགུག་པ་དང་། ཧཱུྃ་གིས་ཆུ་ལ་ཆུ་བཞག་པ་བཞིན་དུ་གཞུག་པ་དང་། བཾ་གྱིས་བཅིང་བ་དང་། ཧོཿཡིས་དགྱེས་པར་བྱའོ། །དེ་ནས་ཡང་རང་གི་སྙིང་ཁའི་ས་བོན་གྱི་འོད་ཟེར་རྣམས་ཀྱིས་དཔལ་གསང་བ་འདུས་པ་ནས་འབྱུང་བའི་ཆ་ལུགས་ཅན་གྱིས་རིགས་ལྔ་དཔག་ཏུ་མེད་པ་སྤྱན་དྲངས་པ་རྣམས་ལ་ཡང་པི་ཝང་མ་ལ་སོགས་པ་ཡིས་མཆོད་དེ། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་རྣམས་ཁྲུས་གསོལ་གྱུར། །དེ་དག་ལའང་ཁྲུས་བྱེད་འགྱུར། །ལྷ་ཡི་ཆུ་ཡིས་དག་པར་མཛོད། །ཅེས་གསོལ་བ་བཏབ་པས། དེ་རྣམས་སྙོམས་པར་ཞུགས་པའི་དགའ་བའི་སྒྲས་ཕྱོགས་བཅུའི་སངས་རྒྱས་ཐམས་ཅད་ཞལ་དུ་བཅུག་སྟེ་ཞུ་བ་རྡོ་རྗེའི་ལམ་ནས་བྱུང་བ་ལྷ་མོའི་པད་མ་དང་གཉིས་ཀྱི་བར་ནས་བྱུང་བའི་རང་བྱུང་གི་བདུད་རྩིའི་རྒྱུན་གྱིས་ཐམས་ཅད་ལ་བླུགས་པར་བྱའོ། །དེ་ནས་ལྷ་རྣམས་ཀྱི་སྤྱི་བོའི་ཆུའི་ཐིགས་པ་རྣམས་ལས་བདག་པོ་བསམ་པ་ནི། གཙོ་བོ་ལ་མི་བསྐྱོད་པའོ། །ཕག་མོ་ལ་འོད་དཔག་མེད་དོ། །པད་མའི་མཁའ་འགྲོ་མ་རྣམས་ལ་རིན་ཆེན་འབྱུང་ལྡན་སྒོ་མཚམས་མ་ཐམས་ཅད་ལ་དོན་ཡོད་གྲུབ་པས་སོ། །དེ་ནས་ཨོཾ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ་ཅེས་བརྗོད་ནས་བདག་པོ་རྣམས་ལ་ཐིམ་པར་གྱུར་ཏོ། །དེ་ནས་རང་གི་ས་བོན་ལས་སྤྲོས་པའི་པི་ཝང་མ་ལ་སོགས་པ་དང་གོའུ་རི་ལ་སོགས་པ་ལྷ་མོ་གྲངས་མེད་པ་སྤྲོས་པ་བདག་ཉིད་ཀྱི་དཀྱིལ་འཁོར་ཐམས་ཅད་ལ་མཆོད་པར་བྱའོ། །དེ་ཡང་། གོའུ་རི་རི་དྭགས་སྦྱར་གཅན་འཛིན། །གཙོ་རི་མ་ནི་ཉི་མའི་སྣོད། །བེ་ཏ་ལི་ནི་ཆུ་ལག་མ། །སྨན་འཛིན་མ་ནི་གྷས་སྨ་རི། །པུ་ཀ་སི་ནི་སྟོབས་ལག་ཅན། །ཤ་རི་རོ་འཛིན་དེ་བཞིན་དུ། །ཙིན་དྷ་ལི་མ་ཌམ་རུ་སྒྲོགས། །མགྲིན་པ་ལས་མཁྱུད་ཌོཾ་བི་ནི། །ཞེས་སོ། །གཞན་ཡང་རིག་མ་བཅུ་དྲུག་གིས་མཆོད་ནས། རྐང་པ་བརྒྱད་པ་ལ་སོགས་པའི་སྔགས་ཀྱིས་བསྟོད་དེ། བདུད་རྩི་མྱང་བ་ཡང་བྱས་ལ། སྒྱུ་མ་ལྟ་བུའི་སྐུ་ཡུན་རིང་དུ་གསལ་བར་བྱས་ལ། བསྒོམ་པ་ནི་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ཏོ། །དེ་ནས་བདག་པོ་དང་ལོངས་སྤྱོད་པ་དང་ཐིམ་པའི་རིམ་པས་རྣལ་འབྱོར་མ་ལྔ་དང་། ཀུན་ཏུ་སྤྱོད་པ་དང་ཧེ་རུ་ཀ་བཅུ་གཉིས་ཀྱི་གཟུགས་ཡོངས་སུ་བརྗེ་བ་ནི་ལས་རྒྱལ་མཆོག་གི་ཏིང་ངེ་འཛིན་ཅེས་བྱའོ། །དེ་ནས་རང་གི་སྙིང་ཁའི་ཧཱུྃ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཉི་མ་ལ་གནས་པ འི་ཧཱུྃ་གིས་བྱིན་གྱིས་བརླབས་པའོ། །དེ་ནས་ཡང་ཧཱུྃ་ལས་འོད་ཟེར་ཐོགས་པ་མེད་པ་སེམས་ཅན་ཐམས་ཅད་མཁའ་འགྲོ་རྒྱ་མཚོར་བྱས་པ་ཁྱེར་ནས་འོངས་ཚུར་འདུས་ཏེ་ཧཱུྃ་ལ་ཞུགས་པས་ཧཱུྃ་ཡིག་ཡོངས་སུ་གྱུར་པ་ལས་ཐིག་ལེར་གྱུར་ཏེ་དེའི་ནང་དུ་སྐད་ཅིག་འཁོར་ལོ་བཅུ་གཉིས་ཀྱི་ལྷ་ཚོགས་རྟེན་གྱི་དཀྱིལ་འཁོར་དང་བཅས་པ་བསྒོམས་ཏེ་དེའི་གཙོ་བོའི་ཐུགས་ཀའི་ས་བོན་གྱི་འོད་ཟེར་གྱིས་དཀྱིལ་འཁོར་གསལ་བར་བསྒོམ་ཞིང་དམིགས་པ་འདི་ནི་ཐིག་ལེའི་རྣལ་འབྱོར་རོ། །དེ་ནས་ཡང་ཐིག་ལེའི་དཀྱིལ་འཁོར་གྱི་གཙོ་བོའི་ས་བོན་ལས་འོད་བྱུང་སྟེ། འཐོན་པ་རྣམས་ཀྱིས་དེ་བཞིན་གཤེགས་པ་ཐམས་ཅད་ལ་རེག་སྟེ་ཞལ་གྱི་སྒོ་ནས་ཞུགས་ཏེ་ཞུ་བ་རྡོ་རྗེའི་བུམ་པར་ལྷུང་བ་ལས་རྡོ་རྗེ་ནས་ཀྱི་འབྲུ་ཙམ་གྱིས་ལྟེ་བར་དཀྱིལ་འཁོར་རྫོགས་པ་ཐིག་ལེའི་རྣལ་འབྱོར་གྱི་དབང་དུ་ལྷག་པར་མོས་པ་བྱས་ཏེ་སེམས་བརྟན་པར་མ་གྱུར་གྱི་བར་དུ་བསྒོམ་པར་བྱའོ། །དེ་ནས་སྙིང་ཁའི་རྡོ་རྗེ་དྲངས་ཏེ་དེ་ལ་བསྟིམས་ནས་བཞག་གོ །དེ་དག་གིས་སེམས་རིམས་ཀྱིས་བརྟན་པའི་རྟགས། དུ་བ་ལ་སོགས་པ་མཐོང་བར་འགྱུར་ཏེ། འདི་ནི་ཕྲ་མོའི་རྣལ་འབྱོར་རོ། །དེ་ནས་སྔགས་ཀྱི་བཟླས་པ་བྱ་སྟེ། ཨོཾ་ཤྲི་བཛྲ་ཧེ་ཧེ་རུ་རུ་ཀྃ་ཧཱུྃ་ཧཱུྃ་ཕཊ་ཀི་ལི་ཛ་ལ་ཤྃ་བྷ་ར་སྭཱ་ཧཱ། བཅོམ་ལྡན་འདས་ཀྱི་སྙིང་པོའོ། །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཉེ་བའི་སྙིང་པོའོ། །ཨོཾ་སརྦ་བྷུད་དྷ་ཌ་ཀི་ནི་ཡེ་བཛྲ་ཝར་ཎ་ནི་ཡེ་ཧཱུྃ་ཧཱུྃ་ཕཊ་སྭཱཧཱ། ཕག་མོའི་སྙིང་པོའོ། །ཨོཾ་བཛྲ་བཱཻ་རོ་ཙ་ནི་ཡེ་ཧཱུྃ་ཧཱུྃ་ཕཊ་སྭཱཧཱ། ཉེ་བའི་སྙིང་པོའོ། །གཞན་ཡང་རྐང་པ་བཞི་བཅུ་རྩ་བརྒྱད་པ་དང་བཅས་པའི་རྩ་བའི་སྔགས་གཙོ་བོའི་ཧཱུྃ་ཡིག་ལས་བྱུང་སྟེ་རང་གི་ཞལ་ནས་ཡུམ་གྱི་ཞལ་དུ་ཞུགས་ཏེ། རྡོ་རྗེའི་ལམ་གྱིས་ཡུམ་གྱི་པད་མ་ནས་འཁོར་བའི་རིམ་པས་བཟླས་པའི་སྐྱོན་རྣམས་དང་བྲལ་བས་དུང་ཆེན་གྱི་ཕྲེང་བ་བཟུང་སྟེ་སྐབས་ཡོད་ན་ལྷ་མ་ལུས་པའི་སྔགས་ཀྱང་བཟླས་པར་བྱའོ། །དེ་ནས་ལྷ་ཐམས་ཅད་བསྡུས་ཏེ་རང་ཉིད་མཁའ་འགྲོ་རྒྱ་མཚོའི་གཟུགས་ཀྱིས་གནས་ནས་གཏོར་མ་བཏང་བར་བྱའོ། །ཐུན་བསྡུ་བའི་རྣལ་འབྱོར་ནི། ཡེ་ཤེས་དཀྱིལ་འཁོར་མ་ལུས་པ། །ཕག་མོ་དང་ནི་བསྲེས་པས་ནི། །བསྡུས་བ་ཕ་རོལ་ཕྱིན་པ་སྟེ། །འཇིག་རྟེན་ཁམས་ཀྱི་རྣམ་དག་པའོ། །སྲིད་དང་མྱ་ངན་འདས་གཟུགས་བདག །སྒྱུ་མ་སྙིང་རྗེས་ལས་བྱུང་བའོ། །ཐམས་ཅད་བདེན་མིན་བརྫུན་པ་མིན། །སྐྱེ་མིན་མི་སྐྱེ་མིན་སྤངས་པའོ། །ཞེས་བྱ་བའི་དོན་དྲན་པར་བྱ་ཞིང་གནས་པར་བྱའོ། །ཟས་ཀྱི་དུས་ནི་གཏོར་མ་སྦྱང་བའི་རིམ་པས་དག་པར་བྱ་སྟེ། སྙིང་ཁར་སྐད་ཅིག་གིས་མེའི་དབུས་སུ་དཀྱིལ་འཁོར་བསམས་ལ་སྦྱིན་བསྲེག་ཏུ་བྱའོ། །ཕྱི་རོལ་གྱི་རིག་མ་དང་སྙོམས་པར་འཇུག་པའི་དུས་སུ་ནི་དགའ་བ་རྩོམ་པའི་རིམ་པས་སོ། །ཁྲུས་ཀྱི་དུས་སུ་དབང་བསྐུར་བའི་རིམ་པས་སོ། །གཉིད་ཀྱི་དུས་སུ་ནི་གོང་བུར་བསྡུ་བའི་རིམ་པས་སྙིང་ཁར་ཐིམ་པར་བྱ་ཞིང་འོད་གསལ་དུ་འཇུག་པར་བྱའོ། །དཔལ་མཁའ་འགྲོ་མཚོའི་སྙིང་པོའི་མངོན་པར་རྟོགས་པ་རྫོགས་སོ། །རྡོ་རྗེ་འཆང་ཆེན་གསང་བའི་བདག་པོ་དང་། །སྤྱན་རས་གཟིགས་དབང་པད་མ་བཛྲ་ཡི། །གསུང་ཟེར་པད་མའི་མྱུ་གུས་འགྲེལ་མཛད་དེ། །ཤ་བ་རི་དང་ཨ་བ་དུ་ཏི་པ། །རྣལ་འབྱོར་དབང་ཕྱུག་ཀ་མ་ལ་བཛྲ། །མཁས་མཆོག་རྒྱལ་བའི་སྡེ་ཡིས་རིན་ཆེན་བདུན། །སྤྲོས་མཛད་རྒྱུད་འགྲེལ་གདམས་པར་བཅས་པ་རྣམས། །སྒྲ་བསྒྱུར་དཔལ་མཆོག་དང་པོའི་རྡོ་རྗེ་དང་། །དར་མ་ཡོན་ཏན་གཉིས་ཀྱིས་ལེགས་པར་བསྒྱུར། །བླ་མ་རྒྱ་དང་སེང་གྷ་ལ་ཀྵ་ལ། །བསྒྲུབ་ཐབས་ཡན་ལག་བཅས་པ་ཁོ་བོས་ཐོས། །རྒྱའི་སློབ་མ་ཚུལ་ཁྲིམས་རིན་ཆེན་ལས། འགྲེལ་པ་བཤད་པར་བཅས་པ་བརྒྱུད་པ་ཡིན། །གཞན་ཡང་དར་མ་ཡོན་ཏན་པཎྜྻི་ཏ། །སྐྱོབ་པ་དཔལ་དང་མངའ་རིས་རིན་གཡུང་ལས། །རྒྱུད་རྐྱང་བཤད་པ་ལེགས་པར་ཐོས་པ་ཡིན། །སྤྲོས་ཉུང་ཀུན་ཏུ་འགྲོ་བའི་མངོན་རྟོགས་འདི། །གཞན་ལ་ཕན་ཕྱིར་རང་བྱུང་རྡོ་རྗེས་སྡེབས། །དགེ་བས་འགྲོ་ཀུན་བདེ་བ་ཆེ་ཐོབ་ཅིང་། །ཚེ་གཅིག་དཔལ་ལྡན་ཧེ་རུ་ཀར་གྱུར་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །

དཔལ་མཁའ་འགྲོ་རྒྱ་མཚོའི་དཀྱིལ་འཁོར་ཆེན་པོའི་དབང་གི་ཆོ་ག །

༄༅། །དཔལ་མཁའ་འགྲོ་རྒྱ་མཚོའི་དཀྱིལ་འཁོར་ཆེན་པོའི་དབང་གི་ཆོ་ག་བཞུགས་སོ། །

༄༅། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་ཕུང་པོ་ཁམས་དང་སྐྱེ་མཆེད་རང་བཞིན་དཀྱིལ་འཁོར་རྣམ་དག་པ། །རྒྱལ་བའི་དབང་གིས་རྣམ་པར་སྦྱངས་ནས་བསྐྱེད་དང་རྫོགས་དང་རྣམ་པར་སྦྱོར། །དྲི་མེད་འབྲས་བུ་དཔལ་ལྡན་མཁའ་འགྲོ་རྒྱ་མཚོའི་ཡེ་ཤེས་ནི། །མངོན་སུམ་སྟོན་མཛད་བླ་མ་མཆོག་ལ་ལུས་ངག་ཡིད་གསུམ་ཕྱག་འཚལ་ལོ། །དཔལ་ལྡན་མཁའ་འགྲོ་རྒྱ་མཚོ་ཡི། །དབང་བསྐུར་ཆོ་གའི་རིམ་པ་ནི། །བླ་མའི་མན་ངག་རིམ་པ་བཞིན། །གསལ་བར་འདིར་ནི་བསྟན་པར་བཤད། །དཔལ་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་བར་བྱེད་པ་ལ་དོན་རྣམ་པ་གསུམ་སྟེ། སློབ་དཔོན་དང་། སློབ་མ། ཆོ་གའི་རིམ་པའོ། །དང་པོ་ནི། རྒྱུད་ལས། སེམས་ཅན་ཀུན་ལ་ཕན་བདག་ཉིད། །མི་འཇིགས་པ་ནི་སྟོང་ཉིད་དང་། །སྔགས་དང་རྒྱུད་ཀྱི་སྦྱོར་བ་ཤེས། །སྦྱོར་བ་བཟོ་དང་སྒྱུ་རྩལ་སོགས། །མཐུན་པའི་ངག་དང་ཐམས་ཅད་ལ། །བུ་ཅིག་པ་དང་མཐུན་པ་དང་། །སྟོང་པ་ལ་སོགས་རྟག་ཏུ་དགའ། །བསམ་གཏན་ཏིང་འཛིན་དེ་མཆོག་གཞོལ། །ཇི་ལྟར་སྨྲས་པ་དེ་བཞིན་བྱེད། །འཚེ་བ་མེད་ཅིང་བདེན་པའི་ངག །སེམས་ཅན་ཀུན་ལ་ཐུགས་བརྩེ་དང་། །ལམ་དུ་འཛུད་པ་དེ་མཐར་ཕྱིན། །ཀུན་མཁྱེན་ཡོན་ཏན་དང་མཉམ་དང་། །བསྟན་བཅོས་ཀུན་གྱི་ཕ་རོལ་སོན། །མགོན་མེད་རྣམས་ཀྱི་ཕ་དང་མ། །ཕྱག་རྒྱ་བརྡའ་ནི་བྱེད་པ་པོ། །ཞེས་བྱ་བ་གསུངས་པ་དང་། གཞན་རྒྱུད་ཐམས་ཅད་ནས་གསུངས་པའི་མཚན་ཉིད་དང་ལྡན་པའི་རྡོ་རྗེ་སློབ་དཔོན་ནོ། །སློབ་མ་ཡང་། དད་དང་ཐོས་སོགས་ཡོན་ཏན་ལྡན། །སྙིང་རྗེ་ལྡན་ཞིང་བསྟན་བཅོས་མཁས། །དམ་ཚིག་བསྲུང་ཞིང་གཏོང་ཕོད་ཆེ། །བསྒྲུབ་ལ་མངོན་པར་གཞོལ་བའོ། །དབང་བསྐུར་བའི་ཆོ་ག་ལ་ཡང་རྣམ་པ་གསུམ་སྟེ། སྔོན་དུ་བྱ་བ་དང་། དངོས་གཞི་དང་། རྗེས་ཀྱི་དཀྱིལ་འཁོར་གཤེགས་གསོལ་གྱི་ཆོ་གའོ། །དང་པོ་ནི། སློབ་མ་བསྲུང་བ་དང་། བསྙེན་པའི་རིམ་པ་ནི་གཉིས་ལས། སརྦ་ཏ་ཐཱ་ག་ཏ་ཀ་ཡ་ཝ་ག་ཙི་ཏ་པྲ་ཎ་མི་ཎ་བཛྲ་བྷན་དྷ་ནི། ཀ་རུ་མེ། ཞེས་ཕྱག་འཚལ་ནས། དཔལ་ལྡན་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་བར་མཛད་དུ་གསོལ། ཞེས་ལན་གསུམ་དུ་གསོལ་བ་གདབ་བོ། །དེ་ནས་རྡོ་རྗེ་སློབ་དཔོན་གྱིས་སྙིང་རྗེ་བའི་སེམས་ཀྱིས་སེམས་ཅན་ཐམས་ཅད་དྲང་བའི་བསམ་པ་ཉེ་བར་བཞག་སྟེ། འདི་སྐད་ཅེས་བརྗོད་དེ། འཁོར་བའི་རྒྱ་མཚོར་བྱིང་བ་ནི། །དེ་རྣམས་ཉོན་མོངས་འདམ་གྱིས་གོས། །རྒལ་བར་མི་ནུས་པའི་སེམས་ཅན། །ཤིན་ཏུ་སྡུག་བསྔལ་ཚོགས་རྣམས་དང་། །ཉན་ཐོས་ལ་སོགས་བསྒྲལ་བ་དང་། །བྱང་ཆུབ་སེམས་དཔའ་རྒྱལ་བའི་སྲས། དཔའ་རྣམས་བདེ་ཆེན་ཐོབ་པ་ཡིན། །འཁོར་ལོ་བཅུ་གཉིས་དྲི་མ་སྤངས། བླ་ན་མེད་པའི་དཀྱིལ་འཁོར་དུ། །རབ་ཏུ་འཇུག་པར་ཁྱོད་སྤྲོའམ། །ཞེས་བརྗོད་ལ། སློབ་མས་ཀྱང་བདག་སྤྲོའོ་ཞེས་བརྗོད་དོ། །དེ་ནས་སློབ་མ་དེ་མཁའ་འགྲོ་རྒྱ་མཚོ་ཞལ་གཅིག་ཕྱག་གཉིས་པར་བསྐྱེད་ལ་སྐུ་གསུང་ཐུགས་བྱིན་གྱིས་བརླབས་ནས། གོ་ཆའི་བསྲུང་བ་བྱ་སྟེ། ཨོཾ་ཧ་སྙིང་ཁ་ལ། ན་མ་ཧི་མགོ་ལ། ས་ཧཱ་ཧཱུྃ་སྤྱི་གཙུག བཱཽ་ཤ་ཊ་ཧེ་ཕྲག་པ་ལ། ཧཱུྃ་ཧཱུྃ་ཧོ་མིག་ལ། ཕཊ་ཧཾ་ལྤགས་པའི་མཐར་ཐུག་པར་བསམས་ནས། བདུད་རྩིའི་ཆུ་ཡིས་ཁྲུས་བྱས་ནས་ཡོ་བྱད་རྣམས་བསྒྲུབ་པར་བྱའོ། །སློབ་དཔོན་གྱིས་སྔོན་དུ་བསྙེན་པ་བྱ་སྟེ། རང་གི་ལྷའི་རྣལ་འབྱོར་ནི། མངོན་པར་རྟོགས་པ་བཤད་པ་ནི། །རིམ་པས་ལེགས་པར་བསྒོམ་ལྡན་པས། །བདག་པོའི་རིམ་པ་འབུམ་ཕྲ་གཅིག །ཡུམ་གྱི་དེ་ཕྱེད་འཁོར་གྱི་ཁྲི། །གསང་སྔགས་རྒྱལ་པོ་མ་ཉམས་བཟླ། །ཞེས་གསུངས་པ་བཞིན་དུ་བྱའོ། །དངོས་གཞི་ལ་ཡང་རྣམ་པ་གསུམ་སྟེ། ས་ཆོག་དང་། ལྷག་པར་གནས་པའི་སྟ་གོན་དང་། དབང་བསྐུར་བ་དངོས་གཞིའོ། །དང་པོ་ནི། བཀྲ་ཤིས་པའི་ས་ཕྱོགས་སུ། རང་ཉིད་ལྷའི་རྣལ་འབྱོར་དང་ལྡན་པས། ས་ཕྱོགས་དེའི་བདག་པོར་གྱུར་པ་རྣམས་དང་། དུར་ཁྲོད་ཀྱི་འབྱུང་པོའི་ཚོགས་ལ་སྤྱི་གཏོར་བཞིན་དུ་གཏོར་མ་བྱིན་ལ། པུས་ནུབ་ཙམ་དུ་ས་རྐོས་ལ་བརྟག་པར་བྱའོ། །བྲམ་ཟེ་དཀར་པོ་ཤེས་བྱས་ཏེ། །སེར་པོ་རྒྱལ་པོའི་རིགས་སུ་འདོད། །རྗེའུ་རིགས་དམར་པོར་ཤེས་བྱས་སྟེ། །ནག་པོ་དམངས་རིགས་རབ་ཏུ་གྲགས། །ས་ཡི་ཆ་ནི་སྦྱང་བར་བྱ། །ཐོད་པ་རྩ་བ་རུས་པ་སྐྲ། །ཕུབ་མ་རྡོ་བ་གསེག་མ་དང་། །ཐལ་བ་སོལ་བ་སྲིན་ཐག་ནི། །ཁྲུ་དོ་ཙམ་དུ་བརྐོས་ལ་སྤང་། །ཇི་ལྟར་སྟེགས་བུ་བྱ་བ་ཡང་། གཞན་དག་རྒྱལ་པོ་ལ་ཁྲུ་བརྒྱ། །མཐའ་སྐྱོང་རྣམས་ཀྱིས་དེ་ཡི་ཕྱེད། །གཙོ་བོ་རྣམས་ཀྱིས་དེ་ཡི་ཕྱེད་གསུངས། །ཚོང་དཔོན་རྣམས་ཀྱི་ཁྲུ་བཅུ་གཉིས། །བསྒྲུབ་པ་རྣམས་ཀྱི་ཁྲུ་བརྒྱད་པ། །རང་གི་ཇི་ལྟར་ནུས་པས་བྲི། །ཞེས་གསུངས་པས། སྐྱོན་མེད་པའི་ཁ་དོག་དང་ལྡན་པའི་བཟང་བའི་མཚན་མའོ། །དཀྱིལ་དུ་ཀོང་བྱས་ལ་ཆུ་བཀང་ནས་ཤར་ཕྱོགས་སུ་གོམ་པ་བརྒྱ་སོང་ལ་ཕྱིར་ལོག་ནས་མ་སྐམས་ན་བཟང་བའི་མཚན་མའོ། །དེ་ལྟར་ས་བརྟགས་ནས། སྦྱང་པ་ནི། རུས་པ་དང་སོལ་བ་ལ་སོགས་པའི་སྐྱོན་ཐམས་ཅད་བསལ་ལ། ག་པུར། སི་ལ། གླ་རྩི། ཙན་དན། ཨ་རུ་ར་སྟེ། སྨན་གྱི་བདུད་རྩི་ལྔ་པོ་འདི་དང་། གཞན་དག་ས་བཟང་པོ་འདི་དག་བསྲེས་ལ། དཀྱིལ་འཁོར་གྱི་སྟེགས་བུ་དབུས་མཐོ་བ། བྱང་དང་ཤར་གཞོལ་བ་ལེགས་པར་བྱ་སྟེ། རིན་པོ་ཆེ་ལྔ་དང་། འབྲུ་ལྔ་དང་། བདུད་རྩི་རྣམ་པ་ལྔའི་ཐལ་བ་ཡང་གཞུག་ཅིང་ས་འཐས་པ་ལེགས་པར་བཅག་ལ། དེ་ལྟར་ལས་དང་བྱ་བ་སྦྱངས་ནས། དེ་ནས་དེའི་ཕྱི་རོལ་དུ་དཀྱིལ་འཁོར་གྱི་ཁང་པ་གྲུ་བཞི་སྒོ་བཞི་རྟ་བབས་དང་བཅས་པ་རྒྱན་པ་བྱས་ཏེ། དེར་ལུགས་མ་དང་ཐང་ཀ་དང་པོ་ཏི་དང་བླ་རེ་དང་མེ་ཏོག་གི་ཕྲེང་བ་དང་དྲི་ཞིམ་པོ་དང་བདུག་སྤོས་དང་མར་མེ་རྣམས་བཀྲམ་པ་དང་སྣ་ཚོགས་པའི་གོས་རྣམས་ཀྱིས་བརྒྱན་པར་བྱའོ། །དེ་ནས་སྟེགས་བུའི་དབུས་སུ། སྔར་བཤད་པའི་དྲི་བཟང་པོའི་ཆག་ཆག་བཏབ་ལ། མཆོད་པའི་ཚོགས་དང་། མེ་ཏོག་གི་ཚོམ་བུ་ཅིག་དང་། སའི་ལྷ་མོའི་མཆོད་ཡོན་དང་། གཏོར་མ་བཤམས་ཏེ། རང་ཉིད་དཔལ་མཁའ་འགྲོ་རྒྱ་མཚོའི་མངོན་རྟོགས་ཐིག་ལེ་དཀྱིལ་འཁོར་རམ། ཞལ་ཅིག་ཕྱག་གཉིས་པའི་མངོན་རྟོགས་བསྒོམས་ལ། སྙིང་ཁའི་སྔགས་ཀྱི་འོད་ཟེར་གྱིས། སངས་རྒྱས་དང་བྱང་ཆུབ་སེམས་དཔའ་རྣམས་དང་། ཡུལ་སུམ་ཅུ་སོ་དྲུག་གི་དཔའ་བོ་དང་རྣལ་འབྱོར་མའི་ཚོགས་དང་། འཇིག་རྟེན་སྐྱོང་བ་རྣམས་མདུན་གྱི་ནམ་མཁར་སྤྱན་དྲངས་ལ། ཆུ་བཞི་དང་། ཕྱི་ནང་གི་མཆོད་པ་རྣམས་ཀྱིས་མཆོད་དེ། གསོལ་བ་གདབ་པ་ནི། རྡོ་རྗེ་དྲིལ་བུ་དང་སྤོས་བཟུང་ནས། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་རྒྱ་མཚོའི་རང་བཞིན་གྱིས། །དཔའ་བོ་རྣལ་འབྱོར་མའི་འཁོར་ལོ། །ཚངས་དང་བརྒྱ་བྱིན་ལ་སོགས་པ། །གང་དག་བསྟན་ལ་མངོན་དགའ་བ། །རྡོ་རྗེའི་སྤྱན་དང་ལྡན་པ་ཡི། །འབྱུང་པོ་མཐུ་ཆེན་ཐམས་ཅད་ཀུན། །བདག་ལ་དགོངས་པར་མཛད་དུ་གསོལ། །རྡོ་རྗེ་འཛིན་པའི་ཆེ་གེ་བདག །མཁའ་འགྲོ་རྒྱ་མཚོ་དཀྱིལ་འཁོར་ཆེ། །སེམས་ཅན་དོན་དུ་བགྱིད་པར་འཚལ། །ཀུན་གྱིས་བྱིན་གྱིས་བརླབ་ཏུ་གསོལ། །ཞེས་གསོལ་བ་གདབ་བོ། །དེ་ནས་སའི་ལྷ་མོ་བསྐུལ་བར་བྱ་སྟེ། རང་གི་ལག་པ་གཡས་པ་ཟླ་བའི་དཀྱིལ་འཁོར་ལས་འོད་ཟེར་འཕྲོས་ཏེ། རྡོ་རྗེ་རྩེ་གསུམ་གྱི་ཕྱག་རྒྱས་ཧཱུྃ་ཧཱུྃ་ཧཱུྃ་ཞེས་ལན་གསུམ་དུ་ས་ལ་བསྣུན་པར་བྱས་ཏེ། སྐད་ཅིག་གིས་སའི་ལྷ་མོ་ཁ་དོག་སེར་མོ། ཞལ་གཅིག་ཕྱག་གཉིས་མ། གཡོན་བུམ་པ་བསྣམས་པ། གཡས་མི་འཇིགས་པའི་ཕྱག་རྒྱ། རིན་པོ་ཆེའི་རྒྱན་དང་ལྡན་པ། སྐད་ཅིག་གིས་གསལ་བར་བལྟས་ལ། པྲ་ཏི་དྷི་བི་ས་པ་རི་ཝ་ར་ཨརྒཾ་པྲ་ཏི་ཛ་ཡེ་སྭཱཧཱ། ཞེས་མཆོད་ཡོན་དབུལ། དེ་བཞིན་དུ་པ་ཏྱཾ། ཨ་ཛ་མ་ནྃ། པྲོ་ཀྵ་ནྃ། ཞེས་བྱ་བས། ཞབས་བསིལ། འཐོར་འཐུང་རྣམས་ཕུལ་ལ། དེ་ནས་ཕྱིའི་མཆོད་པ་མེ་ཏོག་ལ་སོགས་པ་དང་། ནང་གི་མཆོད་པ་ཕུལ་ནས། བསྟོད་པ་ནི། མ་མ་རིན་ཆེན་སྣ་ཚོགས་འཛིན། །ལྷ་མོ་ཞལ་གཅིག་ཕྱག་གཉིས་མ། །སྐུ་ཕྱེད་ཐོན་ཏེ་གསེར་གྱི་མདོག །རིན་ཆེན་སྣ་ཚོགས་རྒྱན་གྱིས་བརྒྱན། །གཡོན་པའི་ཕྱག་ན་བུམ་པ་དང་། གཡས་པ་མི་འཇིགས་སྦྱིན་པར་མཛད། །སྒྱུ་འཕྲུལ་སྣ་ཚོགས་ཞལ་མངའ་མ། །ས་འོག་ལྷ་མོ་ཁྱོད་ལ་བསྟོད། །ཞེས་བརྗོད་ནས་གསོལ་བ་གདབ་པ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་ཚུལ་ཁྱད་པར་རྣམས་གསུམ་ནི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གི་བདུད་ལས་ནི། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་བརྗོད་ནས། གནང་བ་བྱིན་པར་བསམས་ལ། ཡང་མཆོད་ཡོན་དང་གཏོར་མ་ལ་སོགས་ཕུལ་ལ། ས་དེ་ཉིད་དུ་ཐིམ་པར་བསམ་མོ། །ཨོཾ་བཛྭི་བྷ་བ་ཧཱུྃ། ཨོཾ་བཛྲ་ཌ྄ཎཱ་ཌི་ཏིཤ྄ཐ་ཞེས་བརྗོད་པས་སའི་ཆོ་གའོ། །འདི་ལྟར་སྦྱང་བ་མི་དགོས་པའི་ས་ནི། ཁ་བཟངས་རྡོའི་སྟེང་གཞི་དང་ནི། །གཙུག་ལག་ཁང་དང་ཞབས་ཀྱིས་བཅགས། །བ་གླང་ལྷས་དང་རྒྱ་མཚོའི་འགྲམ། །དེར་ནི་སྦྱང་བ་བྱ་མི་དགོས། །རང་རང་སྙིང་པོ་བརྒྱ་རྩ་བཟླ། །ཞེས་རྡོ་རྗེ་མཁའ་འགྲོ་ལས་སོ། །དེ་ལྟར་ཉི་མ་དང་པོ་བྱས་ནས། དེ་ནས་གཉིས་པའི་སྔ་དྲོ་རང་ཉིད་དཀྱིལ་འཁོར་གྱི་དབུས་སུ་འདུག་སྟེ། མཁའ་འགྲོ་རྒྱ་མཚོའི་མངོན་རྟོགས་རྒྱས་པའམ། སྙིང་པོ་ཐིག་ལེའི་མངོན་རྟོགས་གསལ་བར་བསྒོམས་ལ། བདུད་རྩི་མྱང་བའི་བར་དུ་བྱས་ནས། སླར་ལེགས་པར་བསླབས་པའི་སློབ་མ་རྣམས་ཀྱིས། ཤར་ལ་སོགས་པ་ཕྱོགས་བཞི་ནས། མཁའ་འགྲོ་མ་ཉི་ཤུ་རྩ་བརྒྱད་ཀྱི་ང་རྒྱལ་གྱིས་མཆོད་པ་དང་བསྟོད་པ། རིག་མ་བཅུ་དྲུག་དང་། གྷོ་རི། ལ་སོགས་པའི་སྔགས་ཀྱིས་མཆོད་ནས། ཤར་ཕྱོགས་ནས་བསྐུལ་བ་ནི། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །དེ་བཞིན་དུ་བྱང་ཕྱོགས་ནས། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་ཏུ་བཟང་པོ་ཐུགས་ཀྱི་མཆོག །དཀྱིལ་འཁོར་དམ་པ་བཤད་དུ་གསོལ། །ནུབ་ཕྱོགས་ནས། ཞི་བའི་ཆོས་མཆོག་ལས་བྱུང་བའི། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བསྟན་དུ་གསོལ། །ལྷོ་ཕྱོགས་ནས། མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མིན་པ་ཐམས་ཅད་སྤངས། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བསྟན་དུ་གསོལ། །ཞེས་གླུ་དང་བཅས་པས་བསྐུལ་ནས། དེ་ནས་ལྷའི་ང་རྒྱལ་བརྟན་པོ་དང་ལྡན་པས་སེམས་དགའ་བ་བསྐྱེད་དེ། དེང་འདིར་བདག་སྐྱེས་འབྲས་བུ་ཡོད། །བདག་གི་འཚོ་བ་འབྲས་བུ་བཅས། །དམ་ཚིག་ལྷ་རྣམས་ཐམས་ཅད་དང་། །བདག་ནི་མཉམ་འགྱུར་ཐེ་ཚོམ་མེད། །བདག་གི་ཉི་མ་དེང་མཆོག་ཡིན། །དེང་བདག་མཆོག་སྦྱིན་བླ་ན་མེད། །སངས་རྒྱས་ཀྱིས་རྗེས་བརྩེ་བ་ཡི། །བཀའ་ལུང་ཐོབ་པར་བདག་གིས་ཤེས། །ཞེས་བརྗོད་ནས། སངས་རྒྱས་ཐམས་ཅད་ལ་ཕྱག་འཚལ་བར་མོས་ཏེ། རྐང་པ་གཉིས་སུ་ཨཿདང་ཧཱུྃ་ལས་རྡོ་རྗེ་དང་མེའི་ཚོགས་འཕྲོ་བར་བསྒོམ་མིག་གཡས་སུ་མ་ལས་ཉི་མའི་འོད་ཟེར་འཕྲོ་བ། གཡོན་དུ་ཨཾ་ལས་བདུད་རྩིའི་ཚོགས་འབབ་པ་བསྒོམས་ཏེ། བྱང་ཤར་མཚམས་ནས་རྡོ་རྗེའི་འགྲོས་ཀྱིས་འགྲོ་སྟེ། མ་ལུས་ཕྱོགས་ནས་བཞུགས་པ་ཡི། །སངས་རྒྱས་ཐམས་ཅད་བདག་ལ་དགོངས། །བདག་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་སྤྲོ་བའོ། །ལྷ་དང་ལྷ་མིན་གསང་བ་པ། །བརྗེད་བྱེད་ལ་སོགས་བགེགས་ཀྱི་ཚོགས། །ས་འདིར་མ་འདུག་གཞན་དུ་དེངས། །གལ་ཏེ་བཀའ་ལས་འདས་འགྱུར་ན། །འཁོར་ལོ་མེ་ལྟར་འབར་བ་ཡིས། །འཇིགས་པར་གྱུར་པ་གདོན་མི་ཟ། །གང་སུ་དག །ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་ཡི་དྭགས་དང་ཤ་ཟ་དང་བརྗེད་བྱེད་དང་འབྱུང་པོ་དང་མཁའ་འགྲོ་མ་དང་གནོན་པོ་དང་རྒད་པོ་དང་རྒན་མོ་དང་རྗེས་སུ་སྤྱོད་པའི་འཁོར་དང་། ནམ་མཁའ་ལྡིང་དང་མིའམ་ཅི་དང་སྐྱེས་བུ་སྔགས་གྲུབ་པ་རྣམས་སའི་ཕྱོགས་འདིར་སློབ་དཔོན་ཆེ་གེ་མོ་ཞེས་བྱ་བའི་ཡང་དག་པའི་བྱང་ཆུབ་སེམས་ཡོངས་སུ་རྫོགས་པར་བྱ་བའི་དོན་དང་། སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་བའི་རྒྱུར་དཔལ་ཧེ་རུ་ཀ་མཁའ་འགྲོ་རྒྱ་མཚོ་འཁོར་ལོ་བཅུ་གཉིས་སུ་མངོན་པར་བརྗོད་པའི་དཀྱིལ་འཁོར་བདག་གིས་བྱའོ། །དཔལ་རྡོ་རྗེ་མཁའ་འགྲོ་རྒྱ་མཚོའི་བཀའ་འདི་ཐོས་ནས་མྱུར་དུ་འགྲོ་བར་གྱིས་ཤིག གང་ཞིག་མི་འགྲོ་ན་དེ་ལ་བདག་དཔལ་ཧེ་རུ་ཀ་རྡོ་རྗེ་རབ་ཏུ་འབར་བའི་ཧཱུྃ་ཞེས་བརྗོད་པ་དང་རབ་ཏུ་ཁྲོས་པའི་ཞལ་ཅན་ཀུན་ནས་འབར་བས་ཡེ་ཤེས་ཆེན་པོའི་རྡོ་རྗེས་སྤྱི་བོ་བརྒྱ་འགས་པར་བྱའོ། །ཞེས་བརྗོད་ཅིང་སྔགས་པས་གཡས་སུ་ལན་གསུམ་བསྐོར་བར་བྱའོ། །བགེགས་ཐམས་ཅད་འབྲོས་པར་བསམ་མོ། །དབང་ལྡན་ཕྱོགས་ནས་བརྩམས་ནས་ནི། །རྡོ་རྗེ་སྙེམས་པར་རོལ་བཅས་པས། །གཡས་བརྐྱང་དབྱུག་འཕེན་དཔའ་བའི་ཉམས། །གཡོན་བརྐྱང་མདའ་འཕེན་མི་སྡུག་པ། །ས་གད་གད་མོ་དེ་བཞིན་ཞི། ཟླུམ་པོ་གཏུན་ཤིན་འཇིགས་རུང་བ། །དེ་ལ་སོགས་པའི་གར་གྱིས་ནི། །གཡས་དང་གཡོན་གྱིས་རྣམ་པས་བསྐོར། །རྩ་བའི་གར་ནི་འདི་དག་གམ། །སྤྲོས་པ་ལ་དགའ་ན་བལྟ་སྟངས་དྲུག་ཅུ་རྩ་བཞི་པ་བྱའོ། །དེ་ནས་ཕུར་བུས་གདབ་པར་བྱ་སྟེ། དེ་ནས་བདག་ཉིད་རྡོ་རྗེ་ཧཱུྃ་མཛད་འབར་བའི་མེ་དང་འདྲ་བར་བསྒོམས་ཏེ་ཧཱུྃ་ཞེས་བརྗོད་པ་དང་། སྙིང་ཁ་ནས་ཧེ་རུ་ཀ་ཞལ་ཅིག་ཕྱག་གཉིས་པ་རྡོ་རྗེ་དང་ཐོད་པ་ཐོགས་པ་དཔག་ཏུ་མེད་པ་མདུན་དུ་ཕྱུང་ལ་སྐུ་གསུང་ཐུགས་བྱིན་གྱིས་བརླབ་པ་བྱས་ནས། ཨོཾ་སུམ་བྷ་ནི་ལ་སོགས་པ་བརྗོད་པས། བགེགས་ཀྱི་བདག་པོ་ཐམས་ཅད་བཀུག་སྟེ། མེ་ལ་སོགས་པའི་གྲ་བཞིར་བཞག་ནས་སེང་ལྡེང་ལས་བྱས་པའི་ཕུར་བུ། ནམ་མཁའི་སྙིང་པོ་དང་པད་མ་གར་གྱི་དབང་ཕྱུག་དང་། རྣམ་པར་སྣང་མཛད་དང་རྡོ་རྗེ་སེམས་དཔའི་ངོ་བོ་བཞི་བྱས་ཏེ། ཨོཾ་བཛྲ་ཀི་ལི་ཀི་ལ་ཡ་ཧཱུྃ་ཞེས་བརྒྱ་རྩ་བརྒྱད་བཟླས་ཏེ། གཡས་དང་གཡོན་གྱི་བསྐོར་བར་བྱས་ནས་བགེགས་ལ་ཕུར་བུས་གདབ་པར་བྱ་སྟེ། ཨོཾ་གྷ་གྷ། གྷ་ཏ་ཡ་གྷ་ཏ་ཡ། སརྦ་དུཥྚ་ཧཱུྃ་ཧཱུྃ་ཕཊ། ཀི་ལ་ཡ་ཀི་ལ་ཡ་སརྦ་པ་པཱྃ་ཧཱུྃ་ཧཱུྃ་ཕཊ། ཧཱུྃ་ཧཱུྃ་བཛྲ་དྷ་ར་ཨ་ཛྙྱ་པ་ཡ་སྟི་སརྦ་དུཥྚན་བཛྲ་ཀི་ལ་ཡ་ཧཱུྃ་ཕཊ། ཅེས་རྡོ་རྗེ་ཕུར་བུ་བཙུགས་ལ། ཨོཾ་བཛྲ་མུད་ཀ་ར་ཨ་ཀོ་ཊ་ཡ་ཨ་ཀོ་ཊ་ཡ་ཧཱུྃ་ཧཱུྃ་ཕཊ་ཞེས་རྡོ་རྗེའི་ཐོ་བས་བརྡུངས་ནས་བགེགས་ཐམས་ཅད་བདེ་བ་ཆེན་པའི་ཉམས་སུ་མྱོང་བར་བྱ་སྟེ། སླར་ཡང་རྡོ་རྗེ་དང་རིན་པོ་ཆེ་དང་པད་མ་དང་རྒྱ་གྲམ་འཁོར་ལོའི་ར་བ་རྣམས་བསྒོམ་ཞིང་། མེའི་མཚམས་བཅིངས་ནས། ཁྲོ་བོ་རྟ་མགྲིན་བསྐལ་པའི་མེ་འབར་བ་གློག་གི་མདོག་ཅན། ལྗགས་འདྲིལ་བ་དྲག་པོ་ཆེན་པོ་བསམས་ཏེ་བགེགས་ལྷག་མ་འཇོམས་པར་བསྒོམ་མོ། །དེ་ནས་བཅོམ་ལྡན་འདས་འཁོར་དང་བཅས་པ་ནམ་མཁའི་ཁམས་སུ་གསལ་བར་བལྟས་ནས་མཆོད་དེ། བསྟོད་པ་བྱ་བ་ནི། ཧེ་རུ་ཀ་དཔལ་ཡེ་ཤེས་ཆེ། །རྣལ་འབྱོར་ཆེན་པོ་མཐུ་ཆེན་པོ། །མགོན་པོ་ཆེན་པོ་བྱེད་པ་ཆེ། །ཐེག་པ་ཆེན་པོ་ཤིང་རྟ་ཆེ། །གསུང་པ་ཆེན་པོ་ཤེས་རབ་ཆེ། དཔའ་བོ་ཆེན་པོ་དོན་ཆེན་མཛད། །འཛིན་པ་ཆེན་པོ་ང་རྒྱལ་ཆེ། རྒྱལ་པོ་ཆེན་པོ་མཆོད་པ་ཆེ། །སྲིད་པ་ཆེན་པོ་སིམ་པ་ཆེ། །རོལ་པ་ཆེན་པོ་གནས་ཆེན་པོ། །མཚོན་ཆ་ཆེན་པོ་དྲག་ཆེན་པོ། །བཞད་པ་ཆེན་པོ་དཀའ་ཐུབ་ཆེ། །ཞེ་སྡང་ཆེན་པོ་འདོད་ཆགས་ཆེ། །གཏི་མུག་ཆེན་པོ་སྟོབས་ཆེན་པོ། །སྣུན་པ་ཆེན་པོ་སྒྲ་ཆེན་པོ། །བསྙེམས་པ་ཆེན་པོ་སྟོབས་པོ་ཆེ། །སྐུ་གསུམ་ལམ་གསུམ་ཆ་བྱད་ཅན། །འཁོར་ལོ་གསུམ་དང་སྲིད་གསུམ་མཆོག །དྲི་མ་གསུམ་སྤངས་དགེ་བ་གསུམ། །སྤྱན་གསུམ་སུམ་ཅུ་གསུམ་དབང་ཕྱུག །སྲིད་པ་གནོན་པ་སྲིད་རྩེའི་མཆོག །སྲིད་པ་ལྡན་པ་སྲིད་ལས་འདས། །སྲིད་པ་དངོས་མེད་སྲིད་སྣང་བ། །སྲིད་པའི་སྟེང་མ་སྲིད་གཙོ་བོ། །རྣལ་འབྱོར་སྤྱོད་པ་རྣལ་འབྱོར་ཆེ། །རྣལ་འབྱོར་མ་ཡི་རྣལ་འབྱོར་བརྩོན། །སྦྱོར་ཤེས་རྣལ་འབྱོར་ལས་ཡོངས་བྱུང་། །རྣལ་འབྱོར་རྣལ་འབྱོར་མངོན་འཇོམས་པོ། །རྡོ་རྗེ་དབང་ཕྱུག་དཔལ་དགྱེས་པ། །རྡོ་རྗེའི་ཕྲེང་བས་རྣམ་པར་བརྒྱན། །རྡོ་རྗེ་ཁ་ངམ་ཕྲད་པའི་ལུས། །རྡོ་རྗེ་རྡོ་རྗེའི་ཕྱག་ཆེན་པོ། །རྡོ་རྗེའི་གར་ནི་བརྟན་པ་ཆེ། །རྡོ་རྗེའི་གླུ་ནི་སྒྲ་ཆེན་པོ། །རྡོ་རྗེ་པདྨའི་ཏིང་འཛིན་བཞུགས། །རྡོ་རྗེའི་གདན་ནི་དགའ་བར་དགྱེས། །བདེ་བའི་བཞེས་པ་ཐོབ་པ་སྟེ། །འོད་ཀྱིས་སྐྱེ་བོ་སྐྱོང་བ་པོ། །ལུས་ངག་ཡིད་ཀྱིས་ཐམས་ཅད་དུ། །ཁྱོད་ལ་གུས་པས་བདག་ཉིད་འདུད། །མཁའ་འགྲོའི་དྲྭ་བ་ལ་ཕྱག་འཚལ། །ཕྱག་འཚལ་མཁའ་འགྲོ་ཡིད་དམ་ལ། །སྟོང་ཉིད་ཡེ་ཤེས་ལ་ཕྱག་འཚལ། །སྟོང་པའི་ཐུགས་ལ་ཕྱག་འཚལ་ལོ། །ཞེས་བྱ་བ་དང་། ཨེ་མའོ་ཆོས་ཨེ་མའོ་ཆོས། །ཨེ་མའོ་ཆོས་ཀྱི་དོན་བྱུང་པ། །ཆོས་བདག་པའི་དོན་བདག་མེད། །རྡོ་རྗེ་རྒྱལ་པོ་ཕྱག་འཚལ་འདུད། །སྐུ་གསུང་ཐུགས་ནི་ཤིན་ཏུ་དག །ནམ་མཁའ་མཉམ་པ་ཉིད་ཀྱི་གནས། །རྣམ་པར་འགྱུར་མེད་སྣང་བ་མེད། །རྡོ་རྗེའི་སྐུ་ལ་ཕྱག་འཚལ་འདུད། །དེ་བཞིན་གཤེགས་པ་ཐུགས་ཀྱི་གཙོ། །དུས་གསུམ་ལམ་ལ་གནས་པ་སྟེ། །གོ་སྐབས་ཆེན་པོའི་དབྱིངས་བྱུང་པ། །ནམ་མཁའ་ལ་ནི་ཕྱག་འཚལ་འདུད། ནམ་མཁའི་སྐུ་ནི་ཡང་དག་བྱུང་། །ནམ་མཁའི་གསུང་ནི་རབ་འཇུག་པ། །ནམ་མཁའི་ཐུགས་ནི་ཆོས་ཀྱི་མཆོག །སྤྱོད་པའི་གོ་འཕང་ཕྱག་འཚལ་འདུད། །རྡོ་རྗེ་སེམས་དཔའ་ཐེག་པ་ཆེ། །ནམ་མཁའི་སྤྱོད་པ་རྣམ་སྦྱོང་བ། ཀུན་ཏུ་བཟང་པོ་མཆོད་པའི་མཆོག །རྒྱལ་བ་མཆོག་གིས་མཆོད་པ་གསུངས། །འདོད་ཆགས་ཞེ་སྡང་གཏི་མུག་ཆེ། །རྡོ་རྗེ་ཐེག་པ་ཉེར་སྟོན་པ། །ནམ་མཁའི་ཁམས་དང་མཉམ་པའི་མཆོག །རྒྱལ་བ་མཆོག་གིས་མཆོད་པ་གསུངས། །ཐར་པའི་ལམ་གྱིས་རབ་སྒྲོལ་བ། །ཐེག་གསུམ་མཆོག་ལམ་གནས་པ་པོ། །སངས་རྒྱས་བསྐལ་བཟང་དག་པའི་བདག །དོན་ཡོད་མཆོད་པ་མི་ཡི་མཆོག །བྱང་ཆུབ་སེམས་ནི་ཡངས་པའི་སྤྱན། །ཆོས་ཀྱི་འཁོར་ལོ་རབ་བསྐོར་བ། །སྐུ་གསུང་ཐུགས་ནི་ཡོངས་སུ་དག །རྡོ་རྗེ་ཐེག་པ་ཕྱག་འཚལ་ལོ། །ཞེས་བྱ་བ་ལ་སོགས་པས་བསྟོད་དོ། །སའི་ཆོ་གའོ། །གཉིས་པ་ལྷག་པར་གནས་པ་ལ་བཞི་སྟེ། དང་པོ་སྦྱིན་བསྲེག་ལྷག་པར་གནས་པ་ནི། སྐབས་དང་སྦྱར་ནས་ཆོ་ག་ལས་བྱུང་བ་བཞིན་དུ་བྱའོ། །ལྷ་སྟ་གོན་དང་། བུམ་པ་སྟ་གོན་དང་། སློབ་མ་སྟ་གོན་ནོ། །མཎྜྻལ་གྱི་དབུས་སུ། རྩ་བའི་ཐིག་བརྒྱད་དང་། འཁོར་ལོ་བཅུ་གཉིས་ཀྱི་ལྷའི་གནས་བཙལ་ན། དྲི་བཟང་པོའི་ཆུས་དབུས་སུ་གྲུ་བཞི། གཞན་རྣམས་བཟླུམ་པོའི་ཐིག་བྱ་སྟེ། དེ་ནས་རང་རང་གི་སྔགས་བརྗོད་ཅིང་མེ་ཏོག་གི་ཚོམ་བུ་དགོད་པར་བྱའོ། །དེ་ནས་གཙོ་བོའི་གནས་སུ་རྃ་ཡོངས་སུ་གྱུར་པ་ལས། ཉི་མའི་དཀྱིལ་འཁོར་གྱི་སྟེང་དུ། ཧཱུྃ་སྔོན་པོ་ལས་དེ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བའི་ཉི་མ་ལ་ཧཱུྃ་བསམས་ཏེ། དེ་ལས་འཁོར་ལོ་བཅུ་གཉིས་སྤྲོས་ཏེ་འགྲོ་བ་དག་པར་བྱས་ཏེ་དེ་ཉིད་ཀྱི་རྣམ་པར་བྱས་པ་དང་། གདོད་མ་ནས་གྲུབ་པའི་སངས་རྒྱས་ཐམས་ཅད་བཀུག་སྟེ་ཞུགས་པའི་ཡོངས་སུ་གྱུར་པ་ལས་ལྷ་ཐམས་ཅད་དུས་ཅིག་ཏུ་བསྐྱེད་དོ། །གོ་ཆ་ཡང་བྱས་ཏེ། དེ་ནས་དེ་ཉིད་ཀྱི་ཐུགས་ཀའི་ས་བོན་གྱི་འོད་ཟེར་གྱི་བདག་ཉིད་ཀྱི་ལུས་ངག་ཡིད་ཀྱི་སྦྱོར་བ་ལས། ཨོཾ་བཛྲ་མཎྜྻལ་ཧཱུྃ་ཛཿ ཡེ་ཤེས་སེམས་དཔའ་དགུག་པར་བྱའོ། །ཨོཾ་བཛྲ་ཀཱི་ལི་ཀཱི་ལ་ཡ་གུ་་མཎྜྻལ་ལྃ། ཞེས་བྱ་བས་གཞུག་པར་བྱའོ། །ཨོཾ་བཛྲ་ཙཀྲ་ཨ་དྷི་ཏི་ཤ྄ཐ་སིད་དྷྱ་ཧཱུྃ་ཞེས་བྱ་བས་བྱིན་གྱིས་བརླབ་པར་བྱའོ། །དེ་ནས་ལྷ་ཐམས་ཅད་ཀྱི་སྔགས་མ་ལུས་པ་བརྗོད་ལ་ཡང་བྱིན་གྱིས་བརླབ་པར་བྱའོ། །དབང་བསྐུར་བ་དང་རིགས་ཀྱི་བདག་པོས་རྒྱས་གདབ་པ་བྱ་སྟེ། མཆོད་ཡོན་ལ་སོགས་པ་ནས་ཕྱིའི་མཆོད་པ་ཁྱད་པར་ཐམས་ཅད་དང་། ལྷ་མོ་བརྒྱད་དང་བཅུ་དྲུག་སྤྲོས་ལ་མཆོད་པར་བྱའོ། །རྡོ་རྗེ་དྲིལ་བུ་འཛིན་པས་བསྟོད་པ་མ་ལུས་པ་བྱའོ། །ཆང་དང་བདུད་རྩི་དང་བཅས་པ་པད་མའི་སྣོད་བཟང་པོ་ལ་གནས་པ་ལ་གཏོར་མ་སྦྱོང་བའི་ཆོ་གས་སྦྱངས་ཏེ། ལྷ་ཐམས་ཅད་ཀྱིས་སྔགས་བརྗོད་ཅིང་ཚིམ་པར་བྱའོ། །དེ་ནས་བདུག་སྤོས་ལག་ཏུ་ཐོགས་ནས་སྙན་གསན་དབབ་པར་བྱས་ཏེ། ཕྱོགས་བཅུའི་རྫོགས་པའི་སངས་རྒྱས་ནི། །སྲས་བཅས་འཇིག་རྟེན་ལ་གྲགས་དང་། །རྡོ་རྗེ་རིན་ཆེན་རིགས་དང་ཡང་། །པད་མ་ལས་ཀྱི་རིགས་དེ་བཞིན། །སྙིང་པོ་ཕྱག་རྒྱ་སྔགས་རིག་པའི། །གང་ཞིག་ལྷ་ཡི་ཚོགས་ཐམས་ཅད། །ཆོས་ཀྱི་དབྱིངས་ལ་བཞུགས་ནས་ནི། །དེ་རྣམས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡང་། །མཁའ་འགྲོ་རྒྱ་མཚོ་དཔལ་མཆོག་གི །ཇི་ལྟར་ནུས་པའི་ཉེར་སྤྱད་ཀྱིས། །དཀྱིལ་འཁོར་བྲི་བར་བྱའོ་ཀྱེ། སློབ་མ་རྣམས་ལ་བརྩེ་དོན་དང་། །ཁྱེད་རྣམས་ལ་ཡང་མཆོད་ཕྱིར་རོ། །རྗེས་སུ་བརྩེ་བར་ཉེར་དགོངས་ལ། །ཉེ་བ་ཉིད་དུ་མཛད་པའི་རིགས། །ཞེས་ལན་གསུམ་དུ་གསོལ་བ་བཏབ་ནས། དཀྱིལ་འཁོར་གྱི་འཁོར་ལོ་རྣམས་ལ་མཆོད་པ་བྱས་ནས། རང་གི་སྙིང་ཁ་རུ་བསྡུ་བར་བྱའོ། །ལྷ་ལྷག་པར་གནས་པའོ། །གསུམ་པ་བུམ་པ་ལྷག་པར་གནས་པ་ནི། གསེར་དངུལ་དང་རག་ཟངས། ས་ལ་བྱས་པ་ཡང་རུང་སྟེ། གས་ཆག་དང་ཞོམ་པའི་སྐྱོན་མེད་པ། རྒྱུད་ལས་གསུངས་པའི་ཚད་དང་ལྡན་པ་ལ་ལྷ་གྲངས་དང་མཉམ་པའམ། ཤིན་ཏུ་བསྡུས་པ་ལ་ཡང་བཅོ་ལྔ་བྱ་སྟེ། རྫའི་བུམ་པ་ཡིན་ན་དཀར་པོས་བྱུགས་ཏེ། ལེགས་པར་བཀྲུས་ནས། སུམ་བྷ་ནིའི་སྔགས་བརྗོད་ལ་གུ་གུལ་བདུག་ཅིང་། ཆུ་གཙང་མས་ནང་བཀང་། དར་རམ་རས་ལ་སོགས་པའི་གཙང་མས་མགུལ་ཆིངས་བྱ། བྱང་ཆུབ་ཀྱི་ཤིང་ལ་སོགས་པས་ཁ་རྒྱན། ས་ཧ་དེ་བ་དང་། བྷྲི་ཧ་ཏི་དང་། ཀན་དྷ་ཀ་རི་དང་། དན་དོད་པ་མ་དང་། ཨ་ས་ཛི་ཏ་སྟེ་སྨན་ལྔ་དང་། གྲོ་དང་འབྲས་སོ་བ་དང་ཏིལ་དང་མ་ཤ་ནས་ཏེ་འབྲུ་ལྔ་དང་། གསེར་དང་དངུལ་དང་བྱུ་རུ་དང་མུ་མན་དང་མུ་ཏིག་སྟེ་རིན་པོ་ཆེ་ལྔ་དང་། བདུད་རྩི་ལྔ་ལ་སོགས་པ་བཅུད་ཀྱིས་བཀང་ལ། གཙོ་བོ་ལ་པད་མ་དང་ཉི་མ་ལ་གནས་པའི་སྟེང་དུ་རྡོ་རྗེ་དང་གྲི་གུག བསྐལ་པ་བཟང་པོ་རྣམས་ལ་པད་མ་དང་ཟླ་བའི་སྟེང་དུ་ཆོས་འཆད་པའི་ཕྱག་རྒྱ་བྲིས་ལ་དགོད་པའི་ཚུལ་ནི། རྣམ་པར་རྒྱལ་བ་དབུས་སུ་བཞག །འཁོར་ལོ་བཅུ་གཉིས་མཚམས་སུའོ། །སངས་རྒྱས་བུམ་པ་ནུབ་ཀྱི་ཆར། །ལས་ཀྱི་བུམ་པ་ཤར་ཕྱོགས་སོ། །དེ་ནས་མེ་ཏོག་ཕྲེང་བ་དང་བདུད་རྩིས་བཀང་བའི་དུང་ཆོས་བཞག་ལ། གཟུངས་ཐག་གིས་ཡོངས་སུ་བསྐོར་ཏེ། མཆོད་པ་རྣམས་བཤམས་ནས། བདག་ལྷའི་ང་རྒྱལ་དང་ལྡན་པས། རྣམ་པར་རྒྱལ་བའི་བུམ་པ་མི་དམིགས་པ་ལས་བྃ་དཀར་པོ་ཡོངས་སུ་གྱུར་པ་ལས། རིན་པོ་ཆེའི་བུམ་པའོ། །དེའི་ནང་དུ་ཧྲི་སྣ་ཚོགས་པའི་མདོག་ཅན་ཡོངས་སུ་གྱུར་པ་ལས་སྣ་ཚོགས་པད་མའོ། །དེའི་ལྟེ་བ་ལ་ཉི་མ་ལ་ཆོ་ག་གསུམ་གྱིས་ལྷ་ཐམས་ཅད་བསྐྱེད་དེ། ཡེ་ཤེས་སེམས་དཔའ་བསྟིམས་ལ་སྙོམས་པར་ཞུགས་པས། ཆུའི་ངོ་བོར་གྱུར་པ་ལ་དྲི་ཞིམ་པོ་དང་ལྡན་པ་མེ་ཏོག་དང་བཅས་པའི་དུང་སྟེང་དུ་བཞག་པ་ལས་ཆུ་ཅུང་ཞིག་ནང་དུ་བླུགས་ཏེ་གཙོ་བོའི་སྙིང་པོ་སྟོང་ཕྲག་ཅིག་དང་བརྒྱ་རྩ་བརྒྱད་བཟླས་སོ། །ལྷ་ཐམས་ཅད་ཀྱི་བརྒྱ་རྩ་བརྒྱད་རྩ་བརྒྱད་ཀྱང་བཟླས་སོ། །དེ་ཡང་རྡོ་རྗེ་མེ་ཏོག་གི་ཕྲེང་བ་བཏགས་པ་སྟེང་དུ་བཞག་ནས་སོ། །དེ་ལ་མཆོད་པ་དང་བསྟོད་པ་དང་བདུད་རྩི་མྱང་པ་ཡང་བྱའོ། །བུམ་པ་ལྷག་མ་ཐམས་ཅད་མིང་གི་ཡི་གེ་དང་པོ་ལས་ཆོ་ག་གསུམ་གྱིས་བསྐྱེད་པ་ལ་སོགས་པ་གོང་བཞིན་བྱའོ། །ལས་ཐམས་ཅད་པར་རོ་ལངས་གྲི་གུག་བྲིས་ཏེ་དུམ་སྐྱེས་མ་བསྐྱེད་ལ། དེའི་སྔགས་བརྒྱ་རྩ་བརྒྱད་སྔགས་ཏེ། མཆོད་བསྟོད་དང་བདུད་རྩི་མྱང་བ་བྱས་ལ་ཕྱིའི་ཤར་སྒོའི་ནང་དུ་བཞག་སྟེ་འདི་བརྗོད་པར་བྱའོ། །ཇི་སྲིད་དཀྱིལ་འཁོར་བྱས་པ་ཡིས། དེ་སྲིད་བྱ་བ་མ་རྫོགས་པར། །བཅོམ་ལྡན་འདས་མ་ཁྱོད་ཀྱིས་ནི། །བདག་གི་བདུག་པ་སྐྲག་པར་མཛོད། །ཅེས་བརྗོད་པར་བྱའོ། །དེ་ནས་དཀྱིལ་འཁོར་གྱི་ཤར་སྒོར་གཏོར་མ་ཤིན་ཏུ་རྒྱ་ཆེན་པོ་བཏང་བར་བྱའོ། །བུམ་པ་ལྷག་པར་གནས་པའི་ཆོ་གའོ། །བཞི་པ་སློབ་མ་ལྷག་པར་གནས་པ་ནི། སྤྲོ་བ་བསྐྱེད་པ། གསོལ་བ་གདབ་པ། ཉན་པར་བསྐུལ་བ་ལྔ་རྣམ་པར་དག་པ། སྐྱབས་སུ་འགྲོ་བ། སེམས་བསྐྱེད་པ། ལྷ་བསྒོམ་ཞིང་བསྲུང་བ་བྱ་བ། སོ་ཤིང་སྦྱིན། སྐྱོར་ཆུ་བླུད། བསྲུང་སྐུད་གདགས། ཀུ་ཤའི་སྔས་སྟན་བྱིན། གསང་སྔགས་ཀྱི་དམ་ཚིག་ལ་དགོད། ཟབ་པ་དང་རྒྱ་ཆེ་བའི་ཆོས་བཤད་པ་སྟེ་བཅུ་གསུམ་མོ། །དང་པོ་ནི་དང་། དད་པ་དང་ལྡན་པའི་སློབ་མ་རྣམས། ལས་ཐམས་ཅད་པའི་བུམ་ཆུས་ཁྲུས་བྱས་ཏེ། མཎྜྻལ་གྱི་ཆོ་ག་ལས་བྱུང་བ་བཞིན་མཎྜྻལ་ཕུལ་ལ། མེ་ཏོག་དང་བཅས་པའི་ཐལ་མོ་སྦྱར་བ་སློབ་མ་མདུན་དུ་འདུག་པ་ལ། བླ་མས་འདི་སྐད་བརྗོད་པར་བྱའོ། །དལ་འབྱོར་དང་ལྡན་པའི་མི་ལུས་རིན་པོ་ཆེ་ཐོབ། སངས་རྒྱས་ཀྱི་བསྟན་པ་འཕྲད་པར་དཀའ་བ་དང་མཇལ། འདི་ལྟ་བུ་སྔོན་དུ་བསོད་ནམས་བསགས་པའི་འབྲས་བུ་ཡིན་པས། ད་ལྟ་ཡང་བསྟན་པའི་སྒོར་ཞུགས་པ་ཤིན་ཏུ་ངོ་མཚར་ཆེ་ཞིང་། དེ་ལས་ཐུན་མོང་དུ་ཆེས་ཁྱད་པར་འཕགས་པས། རྣལ་འབྱོར་མ་བླ་ན་མེད་པའི་རྒྱུད་ཀྱི་དཔལ་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་བར་འདོད་པ་ཤིན་དུ་ངོ་མཚར་ཆེ་བ་ཡིན་ཏེ། རྣལ་འབྱོར་མའི་རྒྱུད་ཀུན་དུ་སྤྱོད་པ་ལས། དད་པ་ཡང་དག་བསྐྱེད་པ་དང་། །རྣལ་འབྱོར་བརྩོན་པས་གནས་པ་ནི། སྐྱེ་བ་བྱེ་བ་སྟོང་ཕྲག་ཏུ། །ང་ཡིས་ཡེ་ཤེས་ཀྱིས་བསྐུལ་ཡིན། །ཞེས་གསུངས་པས། འདི་ལྟ་བུའི་དཀྱིལ་འཁོར་དུ་འཇུག་པ་ལ། འཇིག་རྟེན་འདི་ཡི་བྱ་བ་ཐམས་ཅད་སྤངས་ནས། ཕྱི་མ་བླ་ན་མེད་པའི་བྱང་ཆུབ་ཞེ་ཐག་པ་ནས་ཐོབ་པར་འདོད་པས་བསྒྲུབ་པའི་བསམ་པ་བྱ་སྟེ། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་འཇུག་པར་བྱ། །བསོད་ནམས་འདོད་པ་དེ་ལས་གཞན། །གཞན་དག་འཇིག་རྟེན་ཕ་རོལ་གཉེར། སླར་ཡང་དད་དང་ལྡན་པ་ཡིས། །བློ་ལྡན་དཀྱིལ་འཁོར་འཇུག་པར་བྱ། །ཚེ་འདིའི་འབྲས་བུ་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་དོན་མཆོག་གཉེར་བ་ཡིས། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། །ཞེས་གསུངས་པས། བླ་ན་མེད་པའི་བྱང་ཆུབ་དོན་དུ་གཉེར་བའི་སེམས་རྩེ་གཅིག་པའི་སྒོ་ནས་གསོལ་བ་གདབ་པར་བྱའོ། །ཁྱོད་ནི་སྟོན་པ་དཔལ་ཆེན་པོ། །རྡོ་རྗེ་ཕག་མོ་བདག་སྦྱོར་བ། །མགོན་པོ་ཆེན་པོ་བདག་འཚལ་ལོ། །བྱང་ཆུབ་ཆེན་པོའི་ཚུལ་བསྟན་པ། །དེ་ཉིད་དམ་ཚིག་བདག་ལ་གསོལ། །བྱང་ཆུབ་སེམས་ཀྱི་བདག་ལ་གསོལ། །སངས་རྒྱས་ཆོས་དང་དགེ་འདུན་ཏེ། སྐྱབས་གསུམ་དག་ཀྱང་བདག་ལ་གསོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཞེས་ལན་གསུམ་དུ་གསོལ་བ་གདབ་བོ། །དེ་ནས་སློབ་མ་མི་དམིགས་པར་བྱས་ཏེ། ཆོ་ག་གསུམ་གྱིས་གཙོ་བོའི་གཟུགས་སུ་བསྐྱེད་དེ། སྐུ་གསུང་ཐུགས་བྱིན་གྱིས་བརླབས་ལ། མདུན་དུ་བཞག་ལ་འདི་སྐད་ཅེས་བརྗོད་པར་བྱའོ། །བུ་ཚུར་ཤོག་ཤིག་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱོད་ལ་ཡང་དག་བཤད་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་གང་། །འགྲོ་ལ་ཕན་ཕྱིར་བཞུགས་པ་སྟེ། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །སྐྱོབ་པ་ཤཱཀྱ་སེང་གེ་ཡིས། །བདུད་སྡེ་ཤིན་ཏུ་མི་ཟད་པ། །སྟོབས་ཆེན་དག་ཀྱང་དེ་ཡིས་བཅོམ། །འཇིག་རྟེན་རྗེས་མཐུན་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེས་ན་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །རྟོག་པ་ཡང་ནི་སྤངས་ནས་སུ། །བཟང་པོ་བརྩོན་པའི་ཡིད་ཀྱིས་ཉོན། །མ་ལུས་བརྗོད་མེད་བློ་གྲོས་ལ། །རྡོ་རྗེ་སེམས་དཔའ་ལ་སོགས་ཀྱི། །བདེ་གཤེགས་རྣམས་ཀྱིས་བྱིན་གྱིས་རློབས། །ཞེས་སྤྲོ་བར་ཉན་པར་བསྐུལ་ལོ། །ལྷ་རྣམ་པར་དག་པ་བྱ་བ་ནི། བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དྲུང་དུ། བདག་ཅག་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་བཤགས་པ་བྱ། དེ་ཕྱིན་ཆད་མི་བྱེད་པའི་དམ་བཅའ། སོ་སོ་སྐྱེ་བོ་དང་། ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ལ་རྗེས་སུ་ཡིད་རང་། ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་གསོལ་བ་གདབ། དགེ་བའི་རྩ་བ་བསྔོ་བསམ་པའི་ལད་མོ་བྱེད་དུ་བཅུག་ནས། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་ཇི་སྲིད་ཐོག་མ་མེད་པར་འཁོར་བ་ན་སྡིག་པ་ཅན་གྱི་ལས་བགྱིས་པ་དང་བགྱིད་དུ་བསྩལ་བ་དང་བགྱིད་པ་ལ་རྗེས་སུ་ཡིད་རང་བ་དེ་དག་ཐམས་ཅད་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མདུན་དུ་སོ་སོར་བཤགས་པར་བགྱིའོ། ཕྱོགས་བཅུའི་དེ་བཞིན་གཤེགས་པ་དང་པད་མ་དང་ལས་ཀྱི་རིགས་སུ་བཞུགས་པ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བྱ་བ་དེ་བཞིན་གཤེགས་པ་དང་རྡོ་རྗེ་དང་ནོར་བུ་དང་པད་མ་དང་ལས་ཀྱི་རིགས་སུ་བཞུགས་པ་ཐམས་ཅད་དང་སྙིང་པོ་དང་ཕྱག་དང་གསང་སྔགས་དང་རིག་པའི་ལྷ་ཐམས་ཅད་ཀྱི་མདུན་དུ་སྡིག་པ་ཐམས་ཅད་བླ་ན་མེད་པའི་བཤགས་པས་སངས་རྒྱས་བཅོམ་ལྡན་འདས་ཀྱིས་མཁྱེན་བཞིན་དུ་སོ་སོར་བཤགས་པར་བགྱིའོ། །ཆོས་ཀྱི་དབྱིངས་མ་ལུས་པ་དང་མཉམ་པར་སོན་པའི་བསོད་ནམས་ཐམས་ཅད་ལས་རྗེས་སུ་ཡིད་རང་ངོ་གང་ཡང་ཕྱོགས་བཅུའི་འཇིག་རྟེན་གྱི་ཁམས་སུ་ཆོས་ཀྱི་འཁོར་ལོ་མི་བསྐོར་བ་དེ་རྣམས་བླ་ན་མེད་པའི་ཐེག་པ་ཆེན་པོའི་ཆོས་ཀྱི་འཁོར་ལོ་རབ་ཏུ་བསྐོར་བར་གསོལ་བ་གདབ་པར་བྱའོ། །གང་ཡང་ཆོས་ཀྱི་འཁོར་ལོ་བསྐོར་བ་རྣམས་སེམས་ཅན་གྱི་ཁམས་དེ་སྲིད་དུ་མྱ་ངན་ལས་མི་འདའ་བར་གསོལ་བར་བགྱིའོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་གྱུར། །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་དགྲོལ། །ཞེས་བརྗོད་དོ། །སྐྱབས་སུ་འགྲོ་བ་ནི། དུས་འདི་ནས་བཟུང་ནས་ཇི་སྲིད་བླ་ན་མེད་པའི་བྱང་ཆུབ་སེམས་ཅན་ཐམས་ཅད་ཀྱི་སྐྱབས་གནས་རང་ཉིད་ཀྱིས་མ་ཐོབ་ཀྱི་བར་དུ་ཆེད་དུ་བྱ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སྐྱབས་སུ་འགྲོ་བའི་བསམས་པ་བྱ་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་གཟུང་སྟེ། ཇི་སྲིད་བྱང་ཆུབ་སྙིང་པོའི་བར་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་སྐུ་གསུམ་དུ་རྣམ་པར་བཞུགས་པ་ལ་སྐྱབས་སུ་མཆིའོ། །བླ་ན་མེད་པ་ངེས་པར་འབྱུང་བ་ཆེན་པོ་ཅན་གྱི་ཆོས་ལ་སྐྱབས་སུ་མཆིའོ། །བླ་ན་མེད་པའི་ཕྱིར་མི་ལྡོག་པ་ཅན་གྱི་བྱང་ཆུབ་སེམས་དཔའི་ཚོགས་ལ་སྐྱབས་སུ་མཆིའོ། ཞེས་ལན་གསུམ་དུ་བརྗོད་པར་བྱའོ། །སྐྱབས་སུ་འགྲོ་བའི་བྱ་བ་དང་བསླབ་པར་བྱ་བའི་ཕན་ཡོན་རྣམས། མདོ་རྒྱུད་ལས་གསུངས་པ་བཞིན་གོ་བར་བྱའོ། །སེམས་བསྐྱེད་པ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། བླ་ན་མེད་པའི་བྱང་ཆུབ་སྨོན་པ་དང་འཇུག་པའི་སེམས་བསྐྱེད་དེ། ལམ་ཕ་རོལ་ཏུ་ཕྱིན་པ་དྲུག་ལ་བསླབས་ཤིང་། བྱང་ཆུབ་ཆེན་པོ་ཐོབ་ནས། མ་བརྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་གྲོལ་བ་དང་། །དབུགས་མ་ཕྱིན་པ་རྣམས་དབུགས་དབྱུང་བ་དང་། །ཡོངས་སུ་མྱ་ངན་ལས་མ་འདའ་བ་རྣམས་ཡོངས་སུ་མྱ་ངན་ལས་འདའ་བར་བྱ་བའི་བསམ་པས་ལད་མོ་མཛོད། ཕྱོགས་བཅུ་དུས་གསུམ་བཞུགས་པ་ཡིས། སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་སློབ་དཔོན་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །སེམས་ཅན་རྣམས་ཀྱི་དོན་སླད་དུས། །བྱང་ཆུབ་མཆོག་ཏུ་སེམས་བསྐྱེད་ལྟར། །དེ་བཞིན་བདག་གི་སེམས་བསྐྱེད་དོ། །ཇི་ལྟར་དུས་གསུམ་མགོན་པོ་རྣམས། །བསོད་ནམས་ཡེ་ཤེས་བྱང་ཆུབ་ལམ། །ཐབས་དང་ཤེས་རབ་གོམས་པས་བགྲོད། །དེ་བཞིན་བདག་གིས་ལམ་བསྒྲོད་དོ། །ཇི་ལྟར་དུས་གསུམ་མགོན་པོ་རྣམས། །ཐམས་ཅད་མཁྱེན་པར་སངས་རྒྱས་ནས། །མཁའ་མཉམ་སེམས་ཅན་དོན་མཛད་ལྟར། །དེ་བཞིན་བདག་གིས་དོན་བགྱིའོ། །མ་སྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བ་དང་། །དབུགས་མ་ཕྱིན་པ་དབུགས་དབྱུང་ཞིང་། །འགྲོ་ཀུན་མྱ་ངན་འདས་ལ་དགོད། །ཀུན་ཀྱང་སངས་རྒྱས་ཐོབ་པར་ཤོག །ཞེས་ལན་གསུམ་བརྗོད་ལ། སེམས་བསྐྱེད་པ་འདི་ནི་སངས་རྒྱས་ཐོབ་པའི་རྒྱུར་གྱུར་པ། བསླབ་བྱ་དང་ཡོན་ཏན་དཔག་ཏུ་མེད་པ་མདོ་དང་རྒྱུད་རྣམས་ལས་གསུངས་པ་ཐོས་པ་བྱས་ནས་བསླབ་པར་བྱའོ། །ལྷ་བསྒོམ་ཞིང་བསྲུང་བ་བྱ་བ་ནི། སྟོང་པའི་ངང་ལས་པྃ་ལས་པད་མ་དང་ཨ་ལས་ཟླ་བ་དང་མྃ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་གྱུར་པའི་རྡོ་རྗེ་རྩེ་ལྔ་པ། དེ་ཡོངས་སུ་གྱུར་པ་ལས། སློབ་མ་རྣམས་དཔལ་མཁའ་འགྲོ་རྒྱ་མཚོ་རྒྱུའི་ཧེ་རུ་ཀ་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས། གཡས་སེར། རྒྱབ་དམར། གཡོན་ལྗང་ཞལ་རེ་རེ་ལ་སྤྱན་གསུམ་གསུམ་ལྡན་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ། གཉིས་ཀྱི་གླང་པོ་ཆེའི་ལྤགས་པ། གཡས་ཀྱི་གསུམ་པ་ན་ཌ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག དྲུག་པ་ན་རྩེ་གསུམ་བསྣམས་པ། གཡོན་གྱི་གསུམ་པ་ན་ཁ་ཊྶཱྃ་ཀ། བཞི་པ་ན་ཐོད་ཁྲག ལྔ་པ་ནི་རྡོ་རྗེ་ཞགས་པ། དྲུག་པ་ན་ཚངས་པའི་མགོ་བོ་འཛིན་པ། རུས་པའི་རྒྱན་དང་ལྡན་པར་བསྒོམས་ལ། དེའི་སྤྱི་བོར་ཟླ་བའི་དཀྱིལ་འཁོར་ལ་གནས་པའི་སྟེང་ཨོཾ་དཀར་པོ། མགྲིན་པར་པད་ལ་གནས་པ་ཨཿདམར་པོ། སྙིང་ཁར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ་མཚན་པ་བསྒོམས་ཏེ། སངས་རྒྱས་ཐམས་ཅད་ཀྱི་སྐུ་གསུང་ཐུགས་བྱིན་གྱིས་བརླབས་ནས། དྲིའི་ཆུས་ཐིག་ལེ་གནས་གསུམ་དུ་བྱས་ཏེ། སྐྱེས་པ་རྣམས་ལ་དཔའ་བོའི་གོ་ཆ། བུད་མེད་རྣམས་ལ་དཔའ་མོའི་གོ་ཆ་བཀོད་ནས་བསྲུང་ཞིང་། མཆོད་པ་རྣམ་པ་ལྔ་ཡིས་མཆོད་དོ། །སོ་ཤིང་སྦྱིན་པ་ནི། དྲི་ཞིམ་པོའི་ཤིང་ལ་སོ་ཤིང་སོར་བཅུ་གཉིས་པ་མེ་ཏོག་གི་ཕྲེང་བ་ཅན་བྱས་ཏེ། ཨོཾ་ཨཿཧཱུྃ་ཞེས་བྱིན་ལ་བ་གླང་གི་ལྕི་བ་ལ་སོགས་པའི་སོ་ཤིང་གི་མཎྜྻལ་གྱི་སྟེང་དུ། ཨོཾ་བཛྲ་ཧ་ས་ཧ་ཞེས་བསྐྱུར་ལ། མི་སྨྲ་བ་ནི་སོ་ཤིང་བཅའ། སོ་ཤིང་མདུན་དུ་དྲང་པོར་དོར། །དོར་ཞིང་དེ་བཞིན་མི་བཅའ་ཞིང་། །ཕན་ཚུན་དུ་ཡང་མི་དོར་རོ། །དེ་ནི་རྩེ་མོ་གྱེན་བསྟན་ན། །མཆོག་གི་དངོས་གྲུབ་ཐོབ་པར་འགྱུར། ཤར་དང་བྱང་སོགས་ཁ་བལྟས་ན། །འདི་ནི་དངོས་གྲུབ་འབྲིང་དུ་བཤད། །གལ་ཏེ་མཚམས་སུ་བལྟས་པ་ན། །འཇིག་རྟེན་པ་ཡི་དངོས་གྲུབ་ཐོབ། །གལ་ཏེ་ཐུར་དུ་བལྟས་ན་ནི། །ས་འོག་དངོས་གྲུབ་ཐོབ་པར་འགྱུར། །འདི་ལ་བསྐྱར་བར་བྱ་བ་མེད། །སོ་ཤིང་ངོ་། །སྐྱོར་ཆུ་བླུད་པ་ནི། ཨོཾ་ཁཎ་ཌ་རོ་ཧི་ཧཱུྃ་ཧཱུྃ་ཕཊ་ཅེས་སྔགས་པའི་ཆུས་ཁྱོར་བར་བྱིན་ལ་འཐུང་དུ་གཞུག་སྟེ། ཨོཾ་བི་ཤུད་དྷ་དྷརྨ་སརྦ་པ་པཱ་ནི་ཙ་ཏྱ་བི་ཤོ་དྷ་ཡ་བི་ཀ ལ་པན་ཨ་པ་ན་ཡ་ཧཱུྃ། ཞེས་འཐུང་དུ་གཞུག་གོ །བསྲུང་སྐུད་ནི། སྐུད་པ་དམར་པོ་འདོམ་གང་དྲུག་བཏབ་ཏུ་བསྒྲིལ་ལ། ཨོཾ་ཨཿཧཱུྃ་གིས་མདུད་པ་གསུམ་བྱས་ལ། སྐྱེས་པའི་དཔུང་པ་གཡོན། བུད་མེད་ཀྱི་གཡས་སུ་གདགས་ལ། ཨོཾ་བུད་དྷ་མེ་ཏྲི་རཀྵ་སརྦ་ན་དུ་སྭཱ་ཧཱ་ཞེས་བརྗོད་ཅིང་བྱིན་ལ། འདི་ནི་བར་ཆོད་ཀྱི་བགེགས་བསྲུང་བའོ། །དེ་ནས་རྩ་ཀུ་ཤའི་ཆུན་པོ་ཆེ་ཆུང་གཉིས་བྱས་ཏེ། ཨོཾ་ཨཱཿཧཱུྃ་བཛྲ་ཏིཀ་ཤྞ་བྃ་བྱིན་གྱིས་བརླབས་ནས་ལག་ཏུ་བྱིན་ལ། གཅིག་སྔས་སུ་གཅིག་མལ་སྟན་དུ་བྱིན་ནས་རྨི་ལམ་བརྟག་པའི་དོན་དུ། དམ་ཚིག་སྦྱིན་པ་ནི། རྡོ་རྗེ་ཐེག་པའི་དཀྱིལ་འཁོར་ཆེན་པོར་འཇུག་པ་ལ། ལས་དང་པོ་པ་རྣམས་ཀྱི་བརཏལ་ཞུགས་འདི་རྣམས་ཡང་དག་པར་གཟུང་བར་བྱའོ། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་བླང་བར་མི་བྱ་སྟེ། །འདོད་ལོག་སྤྱོད་པ་མི་བྱ་ཞིང་། །བརྫུན་གྱི་ཚིག་ཀྱང་སྨྲ་མི་བྱ། །ཉེས་པ་ཀུན་གྱི་རྩ་བ་ཡི། །ཆང་གིས་མྱོས་པར་མི་བྱའོ། །བྱ་བ་མ་ཡིན་ཐམས་ཅད་སྤང་། །སེམས་ཅན་དོན་ལ་རྒྱབ་མི་ཕྱོགས། །ལེགས་པ་ཡིས་ནི་ཉེ་བར་གནས། །རྣལ་འབྱོར་རྣམས་ལ་བསྙེན་བསྐུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་ལས་ནི་རྣམ་བཞི་དང་། །ཡིད་ཀྱི་རྣམ་པ་གསུམ་དང་ནི། །ངག་གི་ལས་ནི་རྣམ་བཞི་དང་། ཡིད་ཀྱི་རྣམ་པ་གསུམ་དང་ནི། །ཇི་ལྟར་ནུས་པས་རྗེས་སུ་བསྐྱོངས། །ཐེག་པ་དམན་ལ་འདོད་མི་བྱ། །འཁོར་བ་ཡོངས་སུ་མི་སྤང་ཞིང་། །རྟག་ཏུ་མྱང་འདས་ལ་མི་དགའ། །གསང་བ་གསུམ་གྱི་ལྷ་རྣམས་ལ། །བརྙས་པ་ཉིད་དུ་མི་བྱའོ། །ཕྱག་རྒྱ་གཞོན་པ་མཚོན་ཆ་དང་། །མཚན་མ་འགོང་བར་མི་བྱའོ། །དམ་ཚིག་རབ་བསྲུངས་བསོད་ནམས་ཀྱིས། །ཚེ་འདི་ཉིད་ལ་འགྲུབ་པར་འགྱུར། །ཞེས་གསུངས་པས། མི་དགེ་བ་བཅུའི་ལས་སྤངས་པ་དང་། དགེ་བ་བཅུའི་ལས་ལ་བརྩོན་པར་བྱ་བ་དང་། བསླབ་པ་བཞི་ལྔ་བསྲུང་བ་དང་ལས་དང་པོ་པའི་དམ་ཚིག་རྣམས་དང་གཞན་ཡང་རིགས་ལྔའི་དམ་ཚིག་དང་། མཆོག་གི་དམ་ཚིག་རྗེས་སུ་བསྟན་པ་རྣམས་ཀྱང་ཅི་ནུས་ཀྱིས་བསླབ་པར་བྱའོ། །ད་ཟབ་པ་དང་རྒྱ་ཆེ་བའི་ཆོས་བཤད་པ་ནི། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས་བྱུང་བ། འཇིག་རྟེན་དུ་ནི་ཀུན་མཁྱེན་དག །ཨུ་དུམ་འབར་བའི་མེ་ཏོག་ལྟར། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། བསྐལ་པ་བྱེ་བ་དུ་མ་རུ། །སྡིག་པ་བྱས་པར་གྱུར་པས་ཀྱང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་གཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་ལ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པས། །དེ་ཕྱིར་ཁྱེད་རྣམས་ཐེག་ཆེན་ལ། །ས་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོའི་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །དེ་བཞིན་གཤེགས་པ་རྣམས་སུ་འགྱུར། །རང་བྱུང་བསྐལ་པ་ཆེན་པོ་པ། །འཇིག་རྟེན་ཀུན་གྱི་འདྲེན་པ་ཡི། །ཡོད་དང་མེད་པ་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱིས། །རབ་ཏུ་རྟག་མེད་རྙོག་པ་མེད། །སྤྲོས་པ་ཐམས་ཅད་དང་བྲལ་བ། །སྤྲོས་པ་རྣམས་ཀྱིས་མ་སྤྲོས་པ། བྱ་དང་ལས་ལ་སོགས་དང་བྲལ། །བདེན་པ་གཉིས་ལ་མ་བརྟེན་པའི། །ཡེ་ཤེས་མཆོག་དང་གཙོ་བོ་འདིའི། །ཚུལ་ལ་གནས་པ་འགྱུར་བ་ཡིན། །ཞེས་བརྗོད་ནས། དེ་རྣམས་ཀྱི་དོན་ཡང་ཅུང་ཟད་བཤད་པར་བྱའོ། །ལྷག་པར་གནས་པའི་ཆོ་གའོ། །དངོས་གཞི་ལ་གསུམ་སྟེ། དཀྱིལ་འཁོར་འབྲི་ཞིང་བསྒྲུབ་ཆོས་དང་། རྡོ་རྗེ་སློབ་དཔོན་འཇུག་པའི་ཆོ་ག་དང་། དབང་བསྐུར་བ་དངོས་སོ། །དང་པོ་ལ་ཐིག་གདབ་པ་དང་། བྲི་བ་དང་། ཕྱག་མཚན་དགོད་པ་དང་། གནས་ཉེ་བར་བརྒྱན་པའི་སྒོ་ནས་བསྒྲུབ་པ་དང་། ཏིང་ངེ་འཛིན་གྱི་སྒོ་ནས་དཀྱིལ་འཁོར་བསྐྱེད་ནས་མཆོག་གི་བསྒྲུབ་པ་དང་། དཀྱིལ་འཁོར་མཆོད་པའོ། །དང་པོ་ནི་གསུམ་ལས། ཐིག་སྐུད་བྱིན་གྱིས་བརླབ་པ་ནི། དཀར་པོ་ལ་སོགས་ཁ་དོག་ལྔ། །བཙོ་བར་བྱས་ལ་ཡང་དག་པར། །ཐིག་སྐུད་ལྔ་ནི་བསྒྲིལ་བར་བྱ། །དེ་ཡང་དཀྱིལ་འཁོར་ཉིས་འགྱུར་ལ། །སྦོམས་སུ་སྒོ་ལས་ཉི་ཤུར་ནི། །གཅིག་གིས་མ་ཚང་ཚད་ཅན་ནོ། །སྐུད་པ་ཁ་དོག་ལྔ་ལ་རིགས་ལྔའི་ས་བོན་སྭཱཧཱ་དང་བཅས་པས་བྱིན་གྱིས་བརླབས་ནས། ཡེ་ཤེས་ལྔ་དགུག་ཅིང་། མིག་ལ་ཛ་དང་མའི་ཡི་གེ་བཀོད་ཅིང་། ཨོཾ་དི་པ་ཏ་ཏྲི་ཥྃ་ཡ་ཨ་ཀུ་ཤ་ཛ་ཞེས། ལྷ་རྣམས་དགུག་ཅིང་གཉིས་སུ་མེད་པར་བསམས་ལ། བསྒྲིལ་བར་བྱས་ཏེ། ཨོཾ་ཨ་ནྱོ་ནྱ་ཨ་ནུ་ར་ག་ཏ་སརྦ་དྷརྨཿ ཨོཾ་ཀྵྨྱ་ར་ཀྵྨྱ་ར་ཨ་ནུ་པྲ་བི་ཥྚ་སརྦ་དྷརྨ༔ ཨོཾ་ཨ་དྱན་ཏ་ཨ་ནུ་པྲ་བི་ཥྚ་ཨཿ སརྦ་དྷརྨ་ཞེས་བརྗོད་ནས། བསྒྲིལ་ནས་ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ་ཀྱིས་བརྟན་བར་བྱས་ཏེ། ཨོཾ་བཛྲ་ས་མ་ཡ་ཧཱུྃ་ཏྲྃ་མ་ཏི་ཀྲ་མ་ཧཱུྃ། ཞེས་བརྒྱ་རྩ་བརྒྱད་བཟླས་ནས། མཆོད་པས་མཆོད་དེ། དེ་ནས་ཡེ་ཤེས་ཀྱི་ཐིག་གདབ་པ་ནི། སློབ་དཔོན་གྱིས་ཧེ་རུ་ཀའི་རྣལ་འབྱོར་དང་། ལས་བྱེད་པ་ཁཎ་ཌ་རོ་ཧིའི་ང་རྒྱལ་གྱིས། རྡོ་རྗེ་ཁུ་ཚུར་གྱིས་ཐིག་སྐུད་བཟུང་སྟེ། ཨོཾ་ཛ་ཛ་ཞེས་བརྗོད་ནས། ཤར་ནུབ་ཏུ་གདབ། དེ་བཞིན་དུ་ལྷོ་བྱང་དང་། མེ་རླུང་གི་མཚམས་དང་། སྲིན་པོར་དབང་ལྡན་དུ་བསྐོར་ཏེ། དེ་ནས་ཡེ་ཤེས་ཀྱི་ཐིག་བཏབ་ནས། ལས་ཀྱི་ཐིག་གདབ་པར་བྱའོ། །འདིར་སྨྲས་པ། འཁོར་ལོ་རིམ་པ་བཞི་པོ་ལ། །དང་པོ་ཐིག་ནི་བཅུ་དྲུག་སྟེ། །གཉིས་པ་སུམ་ཅུ་སོ་གཉིས་ཏེ། །དེ་ལས་ཐིག་ནི་དྲུག་ཅུ་བཞི། །དཀྱིལ་འཁོར་གསུམ་ནི་ཟླུམ་པོ་སྟེ། །ཕྱི་མ་གྲུ་བཞི་ཤེས་པར་བྱ། །ཆ་ཕྲན་ནི། དང་དྲུག་ཕྱེད་གདབ་ཕྱི་མ་གདབ། །གཉིས་བདུན་ཆ་བཞིར་བགོ་བྱས་ཏེ། ལྔ་བརྒྱད་དབུས་དོར་མཐའ་གཉིས་གདབ། །མན་ངག་རིམ་པ་འདི་ཉིད་དེ། །རྒྱུད་འགྲེལ་ཐིག་ནི་མང་གསུངས་པ། །སྤྲོས་པ་ཅན་གྱི་དོན་དུའོ། །དེ་ལྟར་དུ་ཐིག་བཏབ་ནས། ཚོན་ཁ་དོག་ལྔ་ལ་དེ་བཞིན་གཤེགས་པ་ལྔའི་ས་བོན་བྲིས་ནས། དཀྱིལ་འཁོར་གྱི་དབུས་དང་ཕྱོགས་སུ་བཀོད་དེ། དེ་བཞིན་གཤེགས་པ་ལྔ་བསྐྱེད་ནས་དགུག་ཅིང་མཆོད་པ་ལྔས་མཆོད་ནས། འདི་ནི་ཆོས་དབྱིངས་དག་པ་སྟེ། །མཁའ་འགྲོ་རྒྱ་མཚོ་བླ་ན་མེད། །དཀྱིལ་འཁོར་ཆེན་པོ་རྨད་བྱུང་བ། །བྱིན་གྱིས་བརླབ་པ་བླ་ན་མེད། །ཨོཾ་བཛྲ་རྃ་ག་ས་མ་ཡ་ཨོཾ་ཨཿཧཱུྃ། ཁུ་ཚུར་གཡོན་པས་དབང་ལྡན་ནས། །རི་མོ་རབ་ཏུ་དབབ་པར་བྱ། །ཕྱི་ནས་ཇི་ལྟར་བདེ་བ་ཡིས། །དཀྱིལ་འཁོར་ནང་ནས་སློབ་རྣམས་ཀྱིས། །དཀར་པོ་ལྗང་ཁུ་དམར་པོ་དང་། །སེར་པོ་ནག་པོ་དེ་བཞིན་མཆོག །ཕྱི་ལ་སོགས་ནས་མཚོན་རྩི་རྣམས། །ར་བ་རྣམས་སུ་རབ་ཏུ་གྲགས། །ཇི་ལྟར་ཕྱེ་བ་དེའི་ཚད་ལས། །སྦོམ་མིན་ཕྲ་བ་མིན་དེ་བཞིན། །འཁྱོག་མིན་ཡོངས་སུ་འཁོར་བ་ནི། །མཁས་པས་རི་མོ་དབབ་པར་བྱ། །ཚོན་འགྱེད་པ་ཡི་བྱ་བ་རྣམས། །མངོན་རྟོགས་རིམ་པ་ལས་ཤེས་བྱ། །ཞེས་གསུངས་པས། དབུས་སུ་ནི། མཐིང་ཀ་དང་ལྗང་ཁུ་ཕྱེད་མ་ལ་གནས་པ་རྡོ་རྗེ་དང་གྲི་གུག་གོ །དེའི་ཕྱི་རོལ་པད་མ་འདབ་མ་བཞི་བཅུ་ཞེ་བརྒྱད་ལ། མཁའ་འགྲོ་མ་ཉི་ཤུ་རྩ་བཞི་དང་། བུམ་པ་ལ་ཁས་བརྒྱན་ཉི་ཤུ་རྩ་བཞི་སྤེལ་བར་བྱའོ། །དེའི་ཕྱི་རོལ་ཏུ། ཐུགས་གསུང་སྐུའི་འཁོར་ལོ། མཐིང་དམར་དཀར་གསུམ་བཅུ་པོ་དྲུག་དྲུག་གོ འཁྱམས་ལ་ནི་བསྐལ་བཟང་སངས་རྒྱས་སོ། །པན་རེག་ནི་ནག་པོ་དང་སྔོན་པོ་གཉིས་སོ། །ཕྱི་རོལ་དུ་དུར་ཁྲོད་བརྒྱད་དོ། །གཉིས་པའི་འཁོར་ལོ་སྔོན་པོ་དང་ལྗང་ཁུ་དང་སེར་པོ་སུམ་ཅུ་སོ་དྲུག་དྲུག་གོ །རེ་ག་ནི་དཀར་དམར་མཐིང་ནག་གསུམ་མོ། །འཁོར་ལོ་གསུམ་པ་ནི། དམར་པོ་དང་དཀར་པོ་སྣ་ཚོགས་པའི་མདོག་ཅན་སུམ་ཅུ་སོ་དྲུག་དྲུག་གོ །བཞི་པའི་སྔོན་པོ་དང་དམར་པོ་དང་དཀར་པོ་སུམ་བཅུ་སོ་དྲུག་དྲུག་གོ །རེ་ག་ནི་བཞི་པ་དང་ལྔ་བའོ། །འདོད་ཡོན་དམར། ཕ་གུ་སེར། དྲ་ཕྱེད་མཐིང་། མདའ་ཡབ་དང་པུ་ཤུ་སྣ་ཚོགས་པས་རྟ་བབས་ནི་མཛེས་མཚོན། དུར་ཁྲོད་སུམ་ཅུ་སོ་གཉིས་ལ་གཞི་ནག་པོ་ལ་ལྷ་བཀོད་དོ། །འཁྱམས་བཞི་ལ། བསྐལ་པ་བཟང་པོ་པ་ཉིས་བརྒྱ་བཞི་བཅུ་ཞེ་དགུ་དགུའོ། །ལྷ་སོ་སོའི་གནས་སུ་ཕྱག་མ ཚན་དང་ཐིག་ལེ་གང་འཐད་བཀོད་དོ། །ཕྱི་རོལ་དུ་པད་མ། རྡོ་རྗེ་འོད་ཀྱི་དྲ་བ་བྱའོ། །ཚོན་སྣ་ཉི་ཤུ་རྩ་ལྔ་སོགས་པས་མཛེས་པར་བྲིས་ཏེ། རྒྱས་པར་ནི་རྒྱུད་འགྲེལ་ལས་གསུངས་པ་བཞིན་དུ་བྲི་བར་བྱའོ། །དེ་ནས་མཆོད་པའི་ཚོགས་ཐམས་ཅད་ཉེ་བར་བརྒྱན་ཏེ། སྔར་བཞིན་དུ་བུམ་པ་རྣམས་ཀྱང་བཀོད་ནས། མེ་ཏོག་བདུགས་སྤོས་མར་མེ་དྲི། །ཞལ་ཟས་རོལ་མོ་བ་དན་དང་། །གདུགས་དང་རྒྱལ་མཚན་ལ་སོགས་པ། །ཡང་ན་ལྷ་གྲངས་མཉམ་པའམ། །མ་འབྱོར་བརྒྱ་ཕྲག་རེ་རེ་སྟེ། །རིན་ཆེན་ལོངས་སྤྱོད་སྣ་ཚོགས་ཀྱིས། །དཀྱིལ་འཁོར་ཉེ་བར་བརྒྱན་པར་བྱ། །བཅོམ་ལྡན་འདས་དང་། མཁའ་འགྲོ་དང་། འབྱུང་པོའི་གཏོར་མ་ཡང་བཤམ་པར་བྱའོ། །དེ་ནས་རྡོ་རྗེ་སློབ་དཔོན་དང་ལེགས་པར་བསླབས་པའི་སློབ་མ་རྣམས་ཀྱིས། བདག་ཉིད་ཀྱི་ལྷ་བསྒོམ་པ་དང་། ལག་པའི་མཆོད་པ་སྔོན་དུ་སོང་ནས། ཉེ་རེག་དཀྱིལ་འཁོར་དུ་བསངས་གཏོར་བྱས་ཏེ། དཀྱིལ་འཁོར་གྱི་འཁོར་ལོ་བསྐྱེད་རིམས་ལྟར་བསྐྱེད་ནས། སྔར་སྟ་གོན་གྱི་ལྷ་ནམ་མཁའ་ལ་བཏེག་པ་དང་། ཁམས་གསུམ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་སྤྱན་དྲངས་པས་དུས་ཅིག་གཞུག་པར་བྱ་སྟེ། སླར་ཡང་ཐིག་ལེ་དང་ཕྲ་མོའི་རྣལ་འབྱོར་བཞིན་དུ་བདེ་བ་ཆེན་པོ་རོ་མཉམ་པར་བྱས་ལ། ཆུ་བཞི་དང་། རིག་མ་བཅུ་དྲུག་དང་། རྒྱལ་སྲིད་རིན་པོ་ཆེ་བདུན་དང་། གཱོ་རི་ལ་སོགས་པ་ལྷ་མོ་བརྒྱད་དང་། རྡོ་རྗེ་རྣམ་པ་གསུམ་གྱི་མཆོད་པས་མཆོད་དེ། རྐང་པ་བཞི་བཅུ་ཞེ་བརྒྱད་པ་དང་། དན་དྷ་ཀ་ལ་སོགས་པ་བསྟོད་པ་རྣམས་ཀྱིས་བསྟོད་ནས། བརྟན་པར་བྱ་བ་ནི། དཀྱིལ་འཁོར་བསྒྲུབ་པའི་རིམ་པ་སྟེ། རང་ཉིད་ལྷ་བསྒོམ་སྔོན་དུ་སོང་བས། གར་ཤེས་བུད་མེད་རྣམ་ལྡན་པས། །གླུ་དང་སྒྲ་ལ་སོགས་ཀུན་གྱིས། །སངས་རྒྱས་ཞིང་དུ་རྣམ་གནས་པ། །སངས་རྒྱས་ཀུན་དང་འཁོར་ཐམས་ཅད། །ནམ་མཁའི་ཕྱོགས་སུ་བཞུགས་རྣམས་དང་། །དཀྱིལ་འཁོར་པ་རྣམས་ལེགས་མཆོད་དེ། །འདི་ལྟར་བསྐུལ་ཞིང་སྤྱན་དྲངས་བྱ། །ཕྱོགས་རྣམས་ཀུན་ནས་བཞུགས་པ་ཡི། །སངས་རྒྱས་བདག་ལ་དགོངས་སུ་གསོལ། །རྡོ་རྗེ་བདག་མིང་ཆེ་གེ་མོ། །དཀྱིལ་འཁོར་བདག་གིས་བསྟན་པར་བྱ། །དེ་ཕྱིར་སངས་རྒྱས་ཀུན་གཤེགས་ལ། །དེང་བདག་དངོས་གྲུབ་བསྩལ་དུ་གསོལ། །དཀྱིལ་འཁོར་བསྒྲུབ་ཅིང་མཆོད་པའི་ཆོ་གའོ། །དེ་ནས་རྡོ་རྗེ་སློབ་དཔོན་རང་ཉིད་འཇུག་པའི་དོན། བདུད་རྩི་ལྔས་སྦྱར་བའི་གཏོར་མ་ལ། ཨོཾ་ཨཱཿཧཱུྃ་གིས་ཉེ་བར་སྦྱངས་པས། འབྱུང་པོའི་ཚོགས་ལ་བྱིན་ནས། ངག་ཏུ་བརྗོད་པ་ནི། གང་དུ་བཅོམ་ལྡན་འདས་ལྷན་ཅིག་འོངས་པའི་ཕྱོགས་ཀྱིས་བདག་པོ་རྣམས། གང་ཡང་རྗེས་སུ་འབྲངས་བཅས་འདིར། །གནས་པ་དེ་དག་ཐམས་ཅད་རྣམས། བདག་ནི་རྗེས་སུ་གཟུང་བའི་ཕྱིར། །ཇི་ལྟར་རིག་པར་གྱུར་པ་འདི། །དྲི་དང་མེ་ཏོག་གཏོར་མ་སོགས། །བཞེས་ཏེ་སེམས་ཅན་ཀུན་ལ་ཡང་། །བྱམས་པའི་སེམས་དང་སློབ་མ་ལ། །བགེགས་མེད་པ་ནི་མཛད་དུ་གསོལ། །ལས་ཀྱི་བུམ་པའི་ཆུས་ཁྲུས་བྱས་ནས། ཇི་སྲིད་དུ་འོག་ཏུ་འཆད་པ་ལྟར་དབང་གི་ཆོ་ག་རྗེས་སུ་གནང་བ་དང་བཅས་པ། ཡི་དམ་གྱི་ལྷ་ལ། རང་ཉིད་ཀྱིས་དབང་གི་ཆོ་ག་རྒྱས་བསྡུས་ཅི་རིགས་ཀྱིས་བླང་བར་བྱའོ། །དེ་ནས་དཀྱིལ་འཁོར་དུ་མེ་ཏོག་གི་ཕྲེང་བ་ཕུལ་ལ། སྔགས་དེ་ཉིད་ཀྱིས་མགོ་བོས་བཅིངས་ཏེ། འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེན་པོ། །རྡོ་རྗེ་སེམས་དཔའ་བདག་འགྲུབ་འགྱུར། །ཨོཾ་པ་ར་མ་སུ་ཁ་ཨ་ཤ་ཡ་ཨ་ལ་ལི་ཏ་བི་ལ་ཨ་པ་ན་མི་ཏེ་ཨ་རི་ན་མཱ་མི་བྷ་ག་ཝན་ཨཿཁྃ་བཱི་ར་ཧཱུྃ། པྲ་ཏི་ཙ་ཀུ་རུ་མ་ར་ཛ་མིཾ་ནཱ་ཐ་ཧོཿ དེ་ནས་བདེན་པའི་ཚིག་བརྗོད་པར་བྱ་སྟེ། ནམ་མཁའ་ལས་ནི་སྐྱེས་པའི་ཕྱིར། །ཐོག་མ་ཐ་མ་མེད་པའི་མཆོག །དམ་ཚིག་སེམས་དཔའ་རྡོ་རྗེ་ཆེ། །རྡོ་རྗེ་སེམས་དཔའ་དེང་བདག་འགྲུབ། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཆང་བ་ཀུན་གྱི་རྒྱལ། །མི་འགྱུར་མཆོག་ཏུ་བདག་འགྲུབ་འགྱུར། །ཉེས་པ་མི་མངའ་བརྟག་པ་ནི། །འདོད་ཆགས་ཀུན་གྱི་རྗེས་ཆགས་པ། འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་གྲུབ་པར་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་ལ་བདག་འགྲུབ་ཤོག །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེ་མཆོག་ཕྱག་རྒྱར་ལྡན། །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་བདག་ཕྱག་འཚལ་ལོ། །ཧེ་རུ་ཀ་དཔལ་སློབ་དཔོན་ཆེ། །སངས་རྒྱས་བྱང་ཆུབ་སེམས་ཀུན་གྱིས། །གསུངས་པའི་ཆོ་ག་དག་གིས་ནི། །ཕུན་སུམ་ཚོགས་པའི་ཆོ་ག་ཡིས། །སེམས་ཅན་དོན་ནི་བདག་གིས་བགྱི། །དེ་ལ་རྗེས་གནང་བཙལ་མཛོད་ལ། །སངས་རྒྱས་བྱང་ཆུབ་སེམས་རྣམས་ཀྱིས། །བདག་ལ་ཉེ་བར་མཛད་དུ་གསོལ། །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་ཡིད་ལ་གནས། །སེམས་ཅན་ཀུན་གྱི་ཡབ་ཀྱང་ཉིད། །དམ་ཚིག་མཆོག་རྣམས་ཀྱི་སྐུ་མཆོག །བྱུང་དང་འབྱུང་བར་འགྱུར་བ་ཡི། དེ་བཞིན་གཤེགས་རྣམས་ཁྱེད་ཀྱིས་བསྒྲུབས། །བདེན་པ་འདི་ཡིས་བདག་མགོན་པོ། །འདོད་པ་ཁྱོད་ཀྱིས་རྫོགས་པར་མཛོད། །བདེན་པའི་བྱིན་གྱིས་བརླབས་ཕྱི་ནས། །བློ་དང་ལྡ་པས་འདི་མཆོད་བྱ། །ཆོས་ཀྱི་དབྱིངས་ཀྱི་བྱིན་བརླབས་དང་། །དམ་ཚིག་ཀྱང་ནི་དྲན་པ་ཡིས། །བརྩེ་བས་སེམས་ཅན་ཀུན་གྱི་དོན། །དངོས་གྲུབ་ཀུན་ཕྱིར་མཛད་དུ་གསོལ། །ཞེས་བརྗོད་པར་བྱའོ། །རྡོ་རྗེ་སློབ་དཔོན་འཇུག་པའི་ཆོ་གའོ། །དབང་བསྐུར་བ་དངོས་ལ་དྲུག་སྟེ། དཀྱིལ་འཁོར་དུ་འཇུག་པ་དང་། བུམ་པའི་དབང་དང་གསང་དབང་དང་། ཤེས་རབ་ཡེ་ཤེས་ཀྱི་དབང་དང་། བཞི་པ་དང་། རྡོ་རྗེ་སློབ་དཔོན་གྱི་དབང་རྗེས་གནང་དང་བཅས་པའོ། །དང་པོ་ལ། ཁྲུས་བྱ། མཎྜྻལ་དབུལ། གདོང་བཅིང་། ཕྱག་རྒྱ། འཇུག་པའི་གསོལ་བ་གདབ་པ། དམ་ཚིག་བྱིན། ལྷར་བསྐྱེད། སྐུ་གསུང་ཐུགས་བྱིན་གྱིས་བརླབ། རྡོ་རྗེ་རྣལ་འབྱོར་དུ་སེམས་བསྐྱེད་གསང་བའི་དམ་ཚིག་ལ་བཞག ཡེ་ཤེས་ཀྱི་དཀྱིལ་འཁོར་དུ་གཞུག རྡུལ་ཚོན་གྱི་དཀྱིལ་འཁོར་དུ་འཇུག་པ་སྟེ་བཅུ་གཉིས་སོ། །དང་པོ་ནི་ལས་ཐམས་ཅད་པའི་བུམ་པས་ཁྲུས་བྱའོ། །གཉིས་པ་གསེར་ལ་སོགས་པའི་མཎྜྻལ་ཕུལ་བར་བྱའོ། །གསུམ་པ་གདོང་བཅིང་བ་ལ། དར་རམ་རས་དམར་པོ་ལ་དུམ་སྐྱེས་མའི་སྔགས་སམ་ཡང་ན་ནི་ཧཱུྃ་བཞིའི་སྔགས་ཀྱིས་བསང་ནས་བྱིན་ལ། ཨོཾ་བཛྲ་ཨུ་ཥྞི་ཤ་ཧཱུྃ་ཞེས་བརྗོད་ལ་གདོང་བཅིང་ངོ་། ཨོཾ་སུཾ་བྷ་ནི་ཧཱུྃ་ཞེས་སྟོད་གཡོགས་སྦྱིན་ནོ། །བཞི་པ་ཕྱག་བྱ་བ་ནི། བླ་མ་དང་དཀྱིལ་གྱི་ལྷ་ཚོགས་གསལ་བའི་ཤར་ཕྱོགས་ནས། ཨོཾ་སརྦ་ཏ་ཐཱ་ག་ཏ་པུ་ཛོ་ཧྶྭ་ནཱ་ཡ་ཨད་མ་ནྃ་ནི་དྱ་ཏ་ཡ་མི་སརྦ་ཏ་ཐ་ག་ཏ་ཨ་ཀྵོ་བྷྱ་ཨ་དྷི་ཏིཥྛ་སྭ་མྃ། ནུབ་ཕྱོགས་ནས། ཨོཾ་སརྦ་ཏ་ཐཱ་ག་ཏ་པུ་ཛ་པྲ་མ་ཏ་ནཱ་ཡ་ཨད་མ་ནཾ་ནི་དྱ་ཏ་ཡ་མི་སརྦ་ཏ་ཐཱ་ག་ཏ་ཨ་མི་ཏ་བྷཾ་པྲ་བར་ཏ་ཡཱ་མི། བྱང་ཕྱོགས་ནས། ཨོཾ་སརྦ་ཏ་ཐཱ་ག་ཏ་པུ་ཛ་ཀརྨ་ཎེ་ཨད་མ་ནཾ་ནི་དྱ་ཏ་ཡཱ་མི་སརྦ་ཏ་ཨད་མོ་གྷ་སིད་དྷི་ཀུ་རུ་མཾ། ཞེས་ཕྱག་འཚལ་ནས། ལྔ་པ་གསོལ་བ་གདབ་པ་ནི། སངས་རྒྱས་ཀུན་གྱི་རང་བཞིན་སྐུ། །བླ་མ་ལ་ནི་སྐྱབས་སུ་མཆི། །བདག་མིང་འདི་ཞེས་བྱ་བ་ཡིས། །བྱང་ཆུབ་སེམས་ནི་ཡོངས་བཟུང་དང་། །གསང་བའི་དཀྱིལ་འཁོར་འདིར་འཇུག་ཅིང་། །དམ་ཚིག་སྡོམ་པ་ནོད་པར་འཚལ། །དེ་ཉིད་སློབ་དཔོན་འཕྲིན་ལས་དང་། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་གྱུར། །ཞེས་ལན་གསུམ་གསོལ་བ་བཏབ་ལ། ཡང་སློབ་དཔོན་གྱིས། མཁའ་འགྲོ་རྒྱ་མཚོའི་དཀྱིལ་འཁོར་ཆེ། །གསང་བ་ཆེན་པོའི་རིགས་དགེ་བ། །གསང་ཆེན་ཡོངས་སུ་བཟུང་བ་རུ། །བདག་ཉིད་ཆེན་པོ་ཁྱོད་འདོད་དམ། །ཡང་སློབ་མས་ལན་དུ། དམ་ཚིག་དེ་ཉིད་བདག་ལ་གསོལ། །སྡོམ་པ་ཡང་ནི་བདག་ལ་གསོལ། །རྡོ་རྗེའི་རིགས་ཀུན་བསྡུས་པ་ལ། །སློབ་དཔོན་ཆེན་པོ་བདག་གཞུག་མཛོད། །ཕྱིར་མི་ལྡོག་པའི་དབང་བསྐུར་བའི། བསྐལ་པ་ཆེན་པོ་བདག་ལ་རྩོལ། །དུས་གསུམ་བཞུགས་རྣམས་སངས་རྒྱས་ཀྱི། །སངས་རྒྱས་བྱང་ཆུབ་གོ་འཕང་མཆོག །སློབ་དཔོན་ཆེན་པོ་བདག་ལ་གསོལ། །མཚན་ཉིད་དང་ནི་དཔེ་བྱད་དང་། །ནམ་མཁའི་འོད་གསལ་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །མགོན་པོ་ཆེན་པོ་བདག་ལ་གསོལ། །དབང་བསྐུར་བ་ནི་རྨད་བྱུང་ཆེ། །སེམས་ཅན་ཀུན་གྱི་དོན་བརྩོན་པས། །རྟག་ཏུ་བདག་ནི་སློབ་དཔོན་གྱུར། །ཞེས་གསོལ་བ་གདབ་བོ། །དྲུག་པ་དམ་ཚིག་སྦྱིན་པ་ལ་གསུམ་སྟེ། དམ་ཚིག་བྱིན་པའི་དོན་དུ་དཀྱིལ་འཁོར་དུ་འཇུག་པ་དང་། དམ་ཚིག་བསྒྲགས་པ་དང་། བཟུང་བའོ། །དང་པོ་ནི་སློབ་དཔོན་གྱིས། དཀྱིལ་འཁོར་དུ། འདི་ལྟ་བུའི་གསོལ་བ་གདབ་སྟེ། བདག་མིང་ཆེ་གེ་ཞེས་བྱ་བའི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བྱ། །དཀྱིལ་འཁོར་སྙིང་པོ་འདི་ཉིད་དུ། །རྡོ་རྗེའི་ཡེ་ཤེས་ཐོབ་བྱའི་ཕྱིར། །དེ་བཞིན་གཤེགས་ཀུན་གྲོང་ཁྱེར་དུ། །བདག་ནི་སློབ་མ་གཞུག་པར་བྱ། །ཨཱཿཁྃ་བྷི་ར་ཧཱུྃ་ཞེས་བརྗོད་ནས་གྲལ་ལ་འཁོད་དོ། །དེ་ནས་དཀྱིལ་འཁོར་དུ་ཞུགས་པས་ལྷག་པར་མོས་པར་བྱས་ཏེ། རིགས་རྣམ་པ་ལྔའི་དམ་ཚིག་བསྒྲག་པ་ནི། ཁྱེད་རྣམས་རྡོ་རྗེའི་ཐེག་པ་དཔལ་མཁའ་འགྲོ་རྒྱ་མཚོའི་དཀྱིལ་འཁོར་དུ་འཇུག་པར་བྱེད་པ་ལ། དེ་བཞིན་རྣམ་པར་སྣང་མཛད་ཀྱི་དམ་ཚིག་ནི། དཀོན་མཆོག་གསུམ་དང་། བྱང་ཆུབ་ཏུ་སེམས་བསྐྱེད་པ། སྡོམ་པའི་ཚུལ་ཁྲིམས། དགེ་བ་ཆོས་བསྡུད། སེམས་ཅན་གྱི་དོན་བྱེད་ཀྱི་ཚུལ་ཁྲིམས་རྣམས་བཟུང་དགོས་ཏེ། སངས་རྒྱས་ཆོས་དང་དགེ་འདུན་ཏེ། །རིན་ཆེན་གསུམ་གྱི་དམ་ཚིག་བསྟེན། །དེ་ལྟར་སངས་རྒྱས་རིགས་དག་གི །སྡོམ་པ་བརྟན་པ་འགྱུར་བའོ། །ཞེས་གསུངས་སོ། །དེ་བཞིན་དུ་མི་བསྐྱོད་པའི་དམ་ཚིག་ནི། ཕྱིའི་རྫས་ཀྱི་རྡོ་རྗེ་དྲིལ་བུ་དང་། ནང་རྩ་རླུང་དང་། དེ་ཁོ་ན་བདེ་སྟོང་ཤེས་རབ་ཀྱི་དམ་ཚིག་བཟུང་ཞིང་། །བླ་མ་ལ་སངས་རྒྱས་ལྟར་བལྟས་ཏེ། རྡོ་རྗེ་དྲིལ་བུ་ཕྱག་རྒྱ་དག །བློ་གྲོས་ཆེན་པོ་ཁྱོད་ཀྱིས་ཟུང་། །བྱང་ཆུབ་སེམས་གང་དེང་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་བཟུང་བར་བགྱི། བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །རིན་ཆེན་འབྱུང་ལྡན་གྱི་དམ་ཚིག་དང་སྡོམ་པ་ནི། ལོངས་སྤྱོད་སྦྱིན་པ་དང་། ཆོས་སྦྱིན་པ་དང་། སྐྱབས་སྦྱིན་པ་དང་། བྱམས་པ་ཆེན་པོའི་སྦྱིན་པ་རྒྱུན་མི་ཆད་པར་བྱ་བ་སྟེ། རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་སྦྱིན་བྱ། །ཞེས་གསུངས་སོ། །འོད་དཔག་མེད་ཀྱི་དམ་ཚིག་དང་སྡོམ་པ་ནི། ཕྱི་ཉན་ཐོས་ཀྱི་ཐེག་པ། ནང་ཕ་རོལ་ཏུ་ཕྱིན་པ་གསང་བ་རྡོ་རྗེ་ཐེག་པ་རྣམས་བཟུང་བར་བྱ་སྟེ། །འདི་ནི་པད་མའི་རིགས་དག་པའི། །དམ་ཚིག་སྡོམ་པ་མཆོག་ཡིན་ཏེ། །ཕྱི་ནང་གསང་བའི་ཐེག་པ་གསུམ། །ཁྱོད་ཀྱིས་དམ་པའི་ཆོས་བཟུང་བྱ། །ཞེས་གསུངས་སོ། །དོན་ཡོད་གྲུབ་པའི་ལས་ཀྱི་རིགས་ཀྱི་དམ་ཚིག་ནི། མཆོད་པ། བསྟོད་པ་དང་། བཟའ་བ་དང་། བཏུང་བ་ལ་སོགས་སྤྱོད་ལམ་གྱི་དམ་ཚིག་མ་ཉམས་པར་བཟུང་བར་བྱ་སྟེ། ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །རང་ཉིད་དེ་ཉིད་སོ་སོར་བཟུང་། །མཆོད་པའི་ལས་ཀྱང་ཅི་ནུས་གྱིས། ཞེས་གསུངས་སོ། །འདི་དག་དང་མཆོག་གི་དམ་ཚིག་གཞན་ཡང་། དབང་གོང་མ་དང་རྗེས་སུ་མཐུན་པར་སྤྱད་པར་བྱ་བ་འདི་དག་མ་ཉམས་པར་བཟུང་ན། ཚེ་གཅིག་གིས་རྡོ་རྗེ་འཆང་གི་གོ་འཕང་ཐོབ་པར་གསུངས་ཤིང་ཐམས་ཅད་བསྒྲུབ་མི་ནུས་པ་རྣམས་ཀྱིས་ཅི་ནུས་ཀྱིས་ཁས་བླངས་པར་བསམས་ལ་ལད་མོ་གྱིས། མགོན་པོ་སངས་རྒྱས་རྣམས་དང་ནི། །སྲས་བཅས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡི། དུས་འདི་ནས་ནི་རབ་བཟུང་སྟེ། །བྱང་ཆུབ་སྙིང་པོ་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱིས་ནི་བསླབ་པ་ལ། །དགེ་བའི་ཆོས་ནི་བསྡུས་པ་དང་། སེམས་ཅན་དོན་བྱེད་ཚུལ་ཁྲིམས་གསུམ། བདག་གི་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་དག །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱིད། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་པའི། །པད་མའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་བཟུར་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བགྱི་ཞིང་། །མཆོད་པའི་ལས་ནི་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་གྲོལ་བ་རྣམས་བདག་གིས་དགྲོལ། །མ་བསྒྲལ་བ་རྣམས་བདག་གིས་བསྒྲལ། །དབུགས་མ་ཕྱིན་པ་རྣམས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཨོཾ་སརྦ་ཏ་ཐཱ་ག་ཏ་ཡོ་ག་ཀཱ་ཡ་ཝ་ཙཱིཏ་ཏ་མུད་པ་ཏ་ཡ་མེ་ཤེ་ཥཱ་ན་བ་ཤེ་ཥཱ་ས་ཏ་དྡྷ་ཏུ་ཧི་ཏ་སུ་ཁོད་ཏ་མ་སིད་དྷི་ཨ་དྱན་དྷ་བྷ་བཱ་སིད་ཏི་མ་ཏེ་ཤྭ་ཏྱ་ཨ་དྷི་པཏ་དྱ་ཙ་ཡ། ཞེས་དམ་ཚིག་དབོག་པར་བྱའོ། །བདུན་པ་ལྷ་བསྐྱེད་པ་ནི། སློབ་མ་རྣམས་སྐད་ཅིག་གིས་པད་མ་དང་ཉི་མའི་སྟེང་དུ་དཔལ་མཁའ་འགྲོ་རྒྱ་མཚོ་སྟ་གོན་གྱི་སྐབས་ལྟར་བསྐྱེད་དོ། །བརྒྱད་པ་སྐུ་གསུང་ཐུགས་བྱིན་གྱིས་བརླབ་པ་ནི་སྤྱི་བོར་ཟླ་བའི་དཀྱིལ་འཁོར་ལ་གནས་པའི་སྟེང་དུ། ཨོཾ་དཀར་པོ། མགྲིན་པར་པད་མ་ལ་གནས་པའི་སྟེང་དུ་ཨཱ་དམར་པོ། སྙིང་ཁར་ཉི་མའི་དཀྱིལ་འཁོར་གྱི་ཧཱུྃ་སྔོན་པོ་མཚན་པ་བསྒོམས་ཏེ། ཨོཾ་སརྦ་བི་ར་ཡོ་གི་ནི་ཀ་ཡ་ཝ་ཀ་ཙི་ཏ་བཛྲ་ས་བྷ་བ་ཨད་མ་ཀོ་ཧྃ། ཞེས་གནས་གསུམ་དུ་དྲིའི་ཆུས་ཐིག་ལེ་བྱས་ཏེ། བྱིན་གྱིས་བརླབ་བོ། དགུ་པ་རྡོ་རྗེ་རྣལ་འབྱོར་དུ་སེམས་བསྐྱེད་པར་བྱ་སྟེ། རང་ཉིད་ལྷར་བསྒོམས་པའི་སྙིང་ཁར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བ་ཉ་གང་བའི་སྟེང་དུ། དོན་དམ་པ་བྱང་ཆུབ་ཀྱི་སེམས་ཀྱི་ངོ་བོ་རྡོ་རྗེ་སྔོན་པོ་རྩེ་མོ་ལྔ་པ་ལྟེ་བ་ཧཱུྃ་གིས་མཚན་པ་བསྒོམ་དུ་བཅུག་ནས། སྙིང་ཁར་རྡོ་རྗེ་བཟུང་ལ། སུ་ར་ཏེ་ས་མ་ཡ་སྟྃ་ཧོ། སིད་དྷྱ་བཛྲ་ཡ་ཐཱ་སུ་ཁྃ། རྡོ་རྗེ་རྣལ་འབྱོར་དུ་སེམས་བསྐྱེད་པར་བྱའོ། །བཅུ་པ་དམ་ཚིག་བསྒྲག་པ་ནི། ཡི་དམ་ལྷའི་དམ་ཚིག་ཕན་ཡོན་བསྒྲག་པ་དང་། ཉེས་དམིགས་ཀྱི་སྒོ་ནས་དམ་ཚིག་བསྒྲག་པ་དང་། དམ་ཚིག་གི་ཆུ་བྱིན་པ་དང་རྡོ་རྗེ་སློབ་དཔོན་གྱི་དམ་ཚིག་རིམ་པ་བསྒྲགས་པ་ལས། དང་པོ་སྤྱི་བོར་རྡོ་རྗེ་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱའོ། །ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ལ་བརྗོད་པར་མ་བྱེད་ཅིག །དམ་ཚིག་ཉམས་པར་གྱུར་ཏེ་རེ། འདི་ནི་དམ་ཚིག་རྡོ་རྗེ་སྟེ། །གལ་ཏེ་ལ་ལར་ཁྱོད་འདི་སྨྲ། །ཁྱོད་ཀྱི་སྤྱི་བོ་འགས་པར་བྱེད། །རྡོ་རྗེ་སྙིང་ཁར་བཞག་ལ། །རྡོ་རྗེ་སེམས་དཔའ་རང་ཉིད་ནི། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པ་དང་། བདུད་རྩིའི་ཆུ་བླུད་པ་ནི། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ནི་དངོས་གྲུབ་ནི། །རྡོ་རྗེ་བདུད་རྩིའི་ཆུ་འཐུང་ཤིག །རྡོ་རྗེ་དྲིལ་བུའི་ཕྱག་རྒྱ་ནི། །དཀྱིལ་འཁོར་མེད་ལ་གལ་ཏེ་སྨྲ། །སྐྱེ་བོ་ཚོགས་པའི་ནང་གནས་ནས། །མ་དད་བཞད་གད་ཀྱིས་མ་ཡིན། བཛྲ་ཨུད་ཏ་ཀྃ་ཨོཾ་ཨཱཿཧཱུྃ། ཞེས་དམ་ཚིག་གི་ཆུ་འཐུང་དུ་གཞུག་གོ །རྡོ་རྗེ་སློབ་དཔོན་གྱི་དམ་ཚིག་བསྒྲག་པ་ནི། དེང་ཚུན་ཆད་ཁྱོད་ཀྱི་དཔལ་མཁའ་འགྲོ་རྒྱ་མཚོ་ང་ཡིན་གྱིས། ངས་འདི་གང་གྱིས་ཤིག་ཅེས་བསྒོ་བ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག ཡ་ང་བ་མ་སྤངས་པར་ཚེའི་དུས་བྱས་ནས། དམྱལ་བར་ལྟུང་བར་གྱུར་ཏ་རེ། ཞེས་གསང་བའི་དམ་ཚིག་བརྗོད་དོ། །བཅུ་གཅིག་པ་ཡེ་ཤེས་ཀྱི་དཀྱིལ་འཁོར་དུ་འཇུག་པ་ནི། ཏིང་ངེ་འཛིན་བསྒོམ་པ་དང་གསོལ་བ་གདབ་པ་དང་། བརྟན་པར་བྱ་བ་ལས། དང་པོ་ཞལ་བཞི་ཕྱག་བཅུ་གཉིས་པའམ། ཡང་ན་ཞལ་གཅིག་ཕྱག་གཉིས་པའི་ལྷའི་རྣལ་འབྱོར་དང་ལྡན་པས། སྙིང་ཁར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་བྃ། དེ་ལས་འོད་ཟེར་འཕྲོས་ནས་དཀྱིལ་འཁོར་གྱི་འཁོར་གྱི་འཁོར་ལོའི་ལྷ་དང་། ཁམས་གསུམ་པ་ཐམས་ཅད་ཀྱི་གནས་སུམ་ཅུ་སོ་དྲུག་གི་དཔའ་བོ་དང་རྣལ་འབྱོར་མའི་འོད་ཟེར་དམར་པོའི་ཚུལ་དུ་བསྡུས་ནས། སྙིང་ཁའི་ས་བོན་ལ་ཐིམ་ནས་ལུས་སེམས་ཐམས་ཅད་བདེ་བ་ཆེན་པོའི་ངོ་བོར་གྱུར་པར་བསམ། གསོལ་བ་གདབ་པ་ནི། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་དཔལ་རྡོ་རྗེ་མཁའ་འགྲོ་རྒྱ་མཚོ་བདག་ལ་སྩལ་ཏུ་གསོལ། འདི་ནི་དམ་ཚིག་རྡོ་རྗེ་སྟེ། །མཁའ་འགྲོ་རྒྱ་མཚོ་ཞེས་བྱར་གྲགས། །ཡེ་ཤེས་རྡོ་རྗེ་བླ་མེད་པ། །དེ་རིང་བདག་ལ་དབབ་ཏུ་གསོལ། །ཞེས་ལན་གསུམ་དུ་གསོལ་བ་བཏབ་ནས། དཀྱིལ་དཀྲུང་ཕྱེད་པའི་འདུག་སྟངས་དང་། འབར་བའི་ཕྱག་རྒྱ་དཔྲལ་བར་བྱས་ཏེ། གུ་གུལ་ནག་པོ་དང་། བྱི་ལ་ནག་པོའི་བྲུན་དང་སི་ལ་ཀ་དང་བཅས་པ་སྤོ ས་ཀྱིས་བདུགས་ཤིང་། སྔགས་འདིས་རོལ་མོའི་སྒྲ་དང་བཅས་པ་ཡེ་ཤེས་ཀྱི་དཀྱིལ་འཁོར་བསྐུལ་བར་བྱ་སྟེ། ཨོཾ་ཏི་ཀྲ་མ་ཧཱ་ཀྲོ་ཏ་ཨ་བེ་ཤ་ཡ། ཤྲི་བཛྲ་ཧེ་རུ་ཀ་བཛྲ་ཌ་ཀི། ཨ་ཨ་ཨཿ ར་ར་ར། ཙ་ལ་ཡ་ཙ་ལ་ཡ། །ཧཱུྃ་ཧཱུྃ་ཧཱུྃ་ཕཊ་ཞེས་དབབ་པར་བྱའོ། །འདི་ཡི་སྐུ་བབ་པ་ནི་སྐུའི་བྱ་བ་བྱེད་དོ། །གསུང་བབས་པའི་རྟགས་ནི་ངག་སྨྲ་བ་དང་གསུང་གི་དབང་ཕྱུག་ཏུ་འགྱུར་རོ། །ཐུགས་བབས་པའི་རྟགས་ནི་ཏིང་ངེ་འཛིན་དང་མངོན་པར་ཤེས་པ་འཆར་བར་འགྱུར་རོ། །རིང་དུ་འཕར་ན་ལྕེ་ཨ་ཨཿདམར་པོ་བསྒོམས་ནས་སྨྲོས་ཤིག་ཅེས་བརྗོད་ན། དགེ་བ་དང་མི་དགེ་བ་སྨྲ་བར་འགྱུར་རོ། །དེ་ནས་བརྟན་པར་བྱ་བ་ནི། བདུད་རྩིའི་ཆུས་རླན་པའི་རྡོ་རྗེ་སྤྱི་བོར་བཞག་ལ། ཏིཥྛ་བཛྲ་ཏྲི་དྷོ་མེ་བྷ་བ། ཤ་ཤཱ་ཏོ་མེ་བྷ་བ་ཧྲི་ད་ཡ་མེ་ཨ་དྷི་ཏི ཥྛ་སརྦ་སིད་དྷ་དྷྃ་མེ་པྲ་ཡཙྪ་སརྦ་ཀརྨ་སུ་ཙ་མེ་ཙི་ཏ་ཤྲི་ཡྃ། ཀུ་རུ་ཧཱུྃ་ཧ་ཧ་ཧ་ཧ་ཧོཿ ཞེས་བརྟན་པར་བྱའོ། །ཡེ་ཤེས་ཀྱི་དཀྱིལ་འཁོར་དུ་འཇུག་པའི་ཆོ་གའོ། །བཅུ་གཉིས་པ་རྡུལ་ཚོན་གྱི་དཀྱིལ་འཁོར་དུ་འཇུག་པ་ལ། མེ་ཏོག་དོར་བ། མིག་འབྱེད་པ། སྣང་བ་བརྟགས་པ། དཀྱིལ་འཁོར་བསྟན་པ་བཞི་ལས། དང་པོ་མེ་ཏོག་དོར་བ་ནི། སློབ་མས་དཀྱིལ་འཁོར་གྱི་ལྷ་རང་གི་ལྷག་པའི་ལྷ་ལ་དམིགས་ཏེ། མེ་ཏོག་གི་ཕྲེང་བ་ཐལ་མོ་སྦྱར་བའི་བར་དུ་བཟུང་ནས། བླ་མས་བདེན་པའི་ཚིག་བརྗོད་པ་ནི། དཀྱིལ་འཁོར་འདི་རུ་ཡང་དག་པར། བདག་གིས་སློབ་མ་བཅུག་པ་ལ། །ཇི་ལྟར་བསོད་ནམས་དེ་བཞིན་ཤོག །ལྷ་རྣམས་ཀུན་གྱི་རིགས་ཀྱི་རིམ། །གང་གི་རིགས་ཀྱི་སྣོད་ཡིན་པས། །གང་འདྲ་འདི་ཡི་དངོས་གྲུབ་འགྱུར། །གང་འདྲའི་བསོད་ནམས་རྗེས་མཐུན་པའི། །དེ་འདྲའི་དཀྱིལ་འཁོར་འདིར་གྱུར་ཅིག །ཨོཾ་པྲ་ཏིཙྪ་བཛྲ་ཧོ། ཞེས་བརྗོད་ཅིང་དོར་དུ་བཅུག་ལ། སླར་ཡང་པྲ་བྷི་ཤྱ་ཀུ་ལྃ་མ་ཧཱ་བ་ལྃ་ཞེས་བྱ་བའི་སྔགས་ཀྱིས་ཕྲེང་བ་དེ་བླངས་ལ། ལྷ་རྣམས་ཀྱི་གནས་ཤེས་པར་བྱས་ནས་མེ་ཏོག་གང་ལ་ཕོག་པའི་ལྷ་དེ་བསྟིམ་པར་བྱའོ། །དེ་ནས་མིག་དབྱེ་བ་ནི། རྡོ་རྗེ་མཁའ་འགྲོ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ཌཱ་ཀཱར་ན་སྭ་ཡན་ཏེ་དྱ། ཙ་ཀྵུ་རུད་པ་ཌ་ན་ཏཏ་པ་ར། ཨུ་པ་ཌ་ཡ་ཏི་སརྦ་ཀྵོ། བཛྲ་ཙཀྵུ་ར་ཨ་ནུད་ཏ་རཿ ཞེས་མིག་དབྱེའོ། །སྣང་བ་བརྟག་པ་ནི། སློབ་དཔོན་གྱིས་བདེན་པའི་ཚིག་བརྗོད་པ་ནི། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་སྐྱེས། །བདེན་པ་འདི་ཡིས་དཀྱིལ་འཁོར་དུ། །གཟུགས་བརྙན་ལྟ་བུར་སློབ་མ་ནི། །གསལ་ཞིང་སྡིག་མེད་མཐོང་བར་ཤོག །ཅེས་དང་། ཁྱོད་ཀྱི་མིག་གིས་ཅི་མཐོང་གྱུར། །ཇི་ལྟར་བདེ་བ་ངེས་པར་སྨྲོས། །ཞེས་བརྗོད་ཅིང་། དཀར་པོར་མཐོང་ན་ཞི་བ། སེར་པོར་མཐོང་ན་རྒྱས་པ། དབང་ལ་དམར་པོ། ནག་པོ་ལ་དྲག་པོ། སྣ་ཚོགས་པ་ལ་འཕྲིན་ལས་སྣ་ཚོགས་འགྲུབ་པར་བཤད་དོ། །དེ་ནས་དཀྱིལ་འཁོར་བསྟན་པར་བྱ་བ་ནི། ད་ནི་དད་པ་རབ་ཏུ་བསྐྱེད། །དཀྱིལ་འཁོར་བཟང་པོ་འདི་ལ་ལྟོས། །སྔགས་དང་ཕྱག་རྒྱས་བྱིན་གྱིས་བརླབས། །སངས་རྒྱས་རྣམས་ཀྱི་རིགས་སུ་བསྐྱེད། །མཐོང་བས་དངོས་གྲུབ་ཐམས་ཅད་འོང་། །ཕུན་སུམ་ཚོགས་པ་མངོན་དུ་འགྱུར། །དམ་ཚིག་བསྲུངས་བ་དངོས་གྲུབ་སྟེ། །ཁྱོད་ཀྱིས་སྔགས་རྣམས་བརྩོན་པར་བྱ། །ཇི་ལྟར་བསོད་ནམས་དག་སྟོབས་ལས། །དཀྱིལ་འཁོར་མཐོང་བ་དེ་ནས་ནི། །སྣ་ཚོགས་འོད་ཟེར་འཕྲོ་བ་ཡི། །དཀྱིལ་འཁོར་མཐོང་བར་ཐེ་ཚོམ་མེད། །དེ་ནས་ཧེ་རུ་ཀ་ལ་སོགས་པའི་གནས་དཀྱིལ་འཁོར་བསྟན་པར་བྱ་སྟེ། གང་ཞིག་ཤྲི་གང་བླ་མེད་པའི། །རྒྱུ་ཉིད་ཀྱང་ནི་མེད་པ་ཡིན། །བརྗོད་དངོས་མེད་ལས་དེ་རྣམས་སྐུ། །དཔལ་ཧེ་རུ་ཀ་ཞེས་བྱར་དྲན། །རྡོ་རྗེ་ཡེ་ཤེས་དབྱེར་མེད་ཕྱིར། །རྟག་ཏུ་སྡིག་པ་ལས་སྒྲིབ་དང་། འདོད་ཆགས་དམན་པའི་སྦྱོར་བ་གང་། །རྡོ་རྗེ་སྔོན་པོ་ཅན་ཕག་མོ། །མཆོག་ཏུ་འགྲོ་བའི་ངང་ཚུལ་ཕྱིར། །མཁའ་འགྲོ་མ་ཞེས་རབ་ཏུ་གྲགས། །དེའི་རིགས་ལྔ་པོའང་དེ་འདྲའོ། །གང་ཞིག་རྟག་ཏུ་གདུག་ཟ་བས། ལཱ་མར་ཞེས་བྱར་དེ་བཞིན་དྲན། །དེའི་རིགས་ལྔ་པོ་ཡང་དེ་དང་འདྲ། །དེ་བཞིན་ཤེས་བྱ་གཞན་གཉིས་ཀྱི་ངང་། དུམ་བུར་བྱེད་ཅིང་བསྐྱེད་པས་ཀྱང་། །དུམ་སྐྱེས་མ་ཞེས་བྱ་བར་བརྗོད། །སྣ་ཚོགས་པ་ཡི་གཟུགས་འཛིན་ཕྱིར། གཟུགས་ཅན་མ་ཞེས་རབ་ཏུ་བཤད། །གཞན་ཡང་བཙོ་མའི་རྣམ་དག་པ། །བདུན་ཅུ་རྩ་གཉིས་ཕྱག་རྣམས་ནི། །རྒྱུ་དག་པར་ནི་བརྗོད་པར་བྱ། །ཕྱག་བཞི་རྒོད་པ་ལ་སོགས་པ། །བཞི་པོ་རྣམས་ནི་དག་པར་འདོད། ཞལ་རྣམས་དག་པའི་དངོས་པོ་ནི། །ལྷན་སྐྱེས་རྫོགས་བྱང་ཆུབ་བཅུ་དྲུག །བཅུ་བདུན་པའི་ཞལ་ཡིད་དུ་བཤད། །སྲིད་དང་མྱ་ངན་འདས་ཞབས་གཉིས། །ཐམས་ཅད་རྒྱན་གྱི་དག་པ་ནི། །ཆོས་དང་ཆོས་པའི་སྐྱེས་རྣམས་སོ། ལྷག་མ་ལྷ་རྣམས་ཐམས་ཅད་ཀྱི། །སོ་སོ་བརྗོད་པར་མི་ནུས་པར། །འཁོར་ལོ་བཅུ་གཉིས་དག་པ་དང་། །གནས་བཅུ་གཉིས་དང་ས་བཅུ་གཉིས། །རྡོ་རྗེ་འཆང་བ་སྒོར་གནས་རྣམས། །དེ་རྣམས་དག་པའི་ངོ་བོ་ཡིན། །ཡེ་ཤེས་ཆོས་དང་ལོངས་སྤྱོད་རྫོགས། །སྤྲུལ་པ་དག་པས་དཀྱིལ་འཁོར་བཞི། །ཡིད་ཀྱི་དཀྱིལ་འཁོར་མཆོག་ཡིན་པ། །གང་ཕྱིར་དཀྱིལ་འཁོར་ཡང་དག་བཤད། །ཡེ་ཤེས་ཆོས་དང་ལོངས་སྤྱོད་རྫོགས། །ཀུན་ནས་ཀུན་དུ་མཉམ་པའི་ཕྱིར། །ཟླུམ་པོའི་དཀྱིལ་འཁོར་གསུམ་ཡིན་ནོ། །སྤྲུལ་པ་ཀུན་དུ་འཕྲུལ་རྒྱས་པས། །དཀྱིལ་འཁོར་བཞི་པ་གྲུབ་བཞི་པ། །ཡང་ན་མཐའ་བཞི་གཅོད་ཕྱིར་རོ། །རླུང་གཉིས་དབུ་མར་འདུས་པ་དང་། །སྐུ་གསུམ་དང་ནི་དགའ་བ་བཞི། །ཡེ་ཤེས་ལྔ་རྣམས་དག་པ་ནི། །དཀྱིལ་འཁོར་བཞི་བརྩེག་ལ་རིམ་སྦྱར། །བཞི་པོ་ཀུན་གྱི་ཐུན་མོང་གི །རྣམ་དག་རྒྱས་པར་གསུངས་བཤད་བྱ། །བྱིན་གྱིས་བརླབས་པ འི་ཐིག་ཡིན་ཕྱིར། མཉམ་མེད་ཚད་མེད་པ་ལས་སོ། །ཚུལ་ཁྲིམས་སྡོམ་པ་བླ་མེད་པ། །རྒྱན་གང་ཡིན་པར་ཡང་དག་བཤད། །དད་པའི་དབང་པོ་སོགས་ཅན་སེམས། །རྩིག་པ་ལྔ་རུ་བྱུང་བ་ཡིན། །རྣམ་པར་ཐར་པ་རྣམ་པ་བཞི། །གང་ཞིག་སྒོར་ནི་ཡང་དག་བཤད། །ཡང་དག་རབ་ཏུ་སྤོང་བ་བཞི། །རྟ་བབས་ཀྱིས་ནི་ཀ་བར་བྱུང་། །དྲན་པའི་ཡེ་ཤེས་བཞི་རྣམས་ནི། །ཁ་ཁྱེར་བཞི་རུ་དྲན་པར་བྱ། །རྫུ་འཕྲུལ་གྱི་ནི་རྐང་པ་བཞི། །སྒོ་ཁྱུད་རྣམ་པ་བཞི་ཡིན་ནོ། །བྱང་ཆུབ་ཡན་ལག་བདུན་ཕྲེང་བ། །བ་དན་མེ་ཏོག་ཕྲེང་བར་བརྗོད། །རྣམ་ཀུན་མཁྱེན་ཉིད་ཡེ་ཤེས་ནི། ཏིང་འཛིན་གཉིས་སུ་བསྟན་པ་ཡིན། ལམ་གྱི་ཡེ་ཤེས་ཁྱད་པར་ནི། །རྔ་ཡབ་ཏུ་ནི་བརྗོད་པ་ཡིན། །ཉོན་མོངས་ཐམས་ཅད་ཟད་བྱེད་པས། །དེ་བཞིན་དྲྭ་བ་ཞེས་བརྗོད་དོ། །ཡང་དག་གཅོད་པའི་རབ་འཕྲོག་དང་། །རྣམ་པར་སེལ་བའི་རབ་འཕྲོག་པ། །ཆོས་གཉིས་ཀྱིས་ནི་སྦྱོར་བས་ཏེ། །ཉོན་མོངས་རྣམས་ཀྱི་ཕྱེད་འཕྲོག་ཕྱིར། །དྲྭ་བ་ཕྱེད་པ་ཞེས་བརྗོད་དོ། །སངས་རྒྱས་ཀུན་གྱི་ཉམས་ཆེན་རྣམས། །དུས་ཐམས་ཅད་དུ་ཀ་བར་བྱུང་བ། །འཕགས་པའི་ལམ་གྱི་ཡན་ལག་བརྒྱད། ཀ་བ་བརྒྱད་ཅེས་བྱ་བར་དྲན། །དེ་ཡི་དབུས་ཀྱི་པད་མའི་ནང་། །སྐྱོན་གྱིས་མ་གོས་པར་སྟོན་ནོ། །འཁོར་ལོ་བཅུ་གཉིས་བཤད་པ་རྣམས། །ས་ཡི་མི་མཐུན་ཕྱོགས་སྤོང་བའོ། །ཡང་དག་བཤད་པའི་རྩིབས་འདི་རྣམས། ཉོན་མོངས་ཉེ་བའི་ཉོན་མོངས་སེལ། །རྡོ་རྗེ་ལ་སོགས་ཕྲེང་བ་གང་། །གློ་བུར་བ་ཡི་དྲི་མ་སེལ། །ཆ་ཤས་བཅུ་དྲུག་རྣམས་ཀྱི་བར། །དུར་ཁྲོད་དག་པར་ཤེས་པར་བྱ། །དཀྱིལ་འཁོར་དག་པ་ཐམས་ཅད་ཀྱང་། ཆོས་དུས་སྟོན་པ་པོ་ཡིན་ནོ། །ལྷག་མ་འཇིག་རྟེན་ཁམས་ཀྱི་ནི། རྣམ་དག་གསལ་དང་མི་གསལ་བའོ། །སངས་རྒྱས་ཡོན་ཏན་དེ་དག་ཀུན། །དཀྱིལ་འཁོར་དུ་ནི་བརྗོད་པ་ཡིན། །སེམས་ཅན་ཀུན་དོན་བརྩོན་རྣམས་ཀྱིས། རྫོགས་སངས་རྒྱས་ཀྱིས་དེ་ཉིད་བསྟན། །ཞེས་དཀྱིལ་འཁོར་གྱི་འཁོར་ལོ་བསྟན་ཅིང་། རྒྱས་པར་ནི་མངོན་རྟོགས་བཞིན་དུ་བསྟན་པར་བྱའོ། །རྡུལ་ཚོན་གྱི་དཀྱིལ་འཁོར་དུ་འཇུག་པའོ། །གཉིས་པ་བུམ་པའི་དབང་ལས་གསོལ་བ་གདབ་པ་དང་། མི་བསྐྱོད་པའི་ཆུའི་དབང་དང་། ཅོད་པན་དང་། རྡོ་རྗེ་དང་། དྲིལ་བུ་དང་། མིང་དང་། བརཏལ་ཞུགས་རྣམ་པ་གཉིས་དང་བདུན་ལས་དང་པོ་གསེར་ལ་སོགས་པའི་མཎྜྻལ་ཕུལ་ནས། གསོལ་བ་གདབ་པ་ནི། དཔལ་ལྡན་མཁའ་འགྲོ་རྒྱ་མཚོ་ཡི། །འཁོར་ལོ་བཅུ་གཉིས་དབང་བསྐུར་བ། །མི་བསྐྱོད་རྡོ་རྗེ་ཆུ་ཡི་དབང་། །དེང་འདིར་བདག་ལ་སྩལ་དུ་གསོལ། །དེ་བཞིན་གཤེགས་པ་ཐམས་ཅད་ཀྱིས། །ཡོན་ཏན་འབྱུང་གནས་བདག་ཉིད་ཆེ། །དཔའ་བོ་ཆེན་པོ་མི་ལྡོག་པའི། དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་བདག་ནི་སློབ་དཔོན་གྱུར། །ཞེས་ལན་གསུམ་དུ་གསོལ་བ་གདབ་བོ། །དེ་ནས་བུམ་པ་ཐམས་ཅད་ཀྱི་ཆུ། རྣམ་པར་རྒྱལ་བར་བསྡུས་ལ། སློབ་མ་རྣམས་ཀྱི་མགོ་ཐོག་ཏུ་བཞག་པ་ཏིང་ངེ་འཛིན་ནི། སློབ་མ་རྣམས་ཀྱང་དཔལ་མཁའ་འགྲོ་རྒྱ་མཚོའི་རྣལ་འབྱོར་དང་ལྡན་པས། སྙིང་ཁའི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་དང་། འཁོར་ལོ་བཅུ་གཉིས་ཀྱི་འཁོར་ལོའི་དཔའ་བོ་དང་རྣལ་འབྱོར་མའི་ཐུགས་ཀ་ནས་བྱུང་བ། རིན་པོ་ཆེའི་བུམ་པ་ཐོགས་པའི་ལྷ་མོ་རྣམས་ཀྱིས་སྤྱི་བོ་ནས་དབང་བསྐུར། རྣམ་པར་ཤེས་པའི་ཕུང་པོ་དང་ཉོན་མོངས་པ་ཞེ་སྡང་དག མེ་ལོང་ལྟ་བུའི་ཡེ་ཤེས་ཀྱི་ཧེ་རུ་ཀར་གྱུར་པར་བསམ་ཞིང་། དེ་དང་དུས་གཅིག་ཏུ་པི་ཝང་མ་ལ་སོགས་པའི་མཆོད་པས་མཆོད། དེ་བཞིན་གཤེགས་པ་རྣམས་ཀྱིས་དབང་གིས་དགོངས་པར་མཛད། ཁྭ་གདོང་མ་ལ་སོགས་པ་ཡིས་བགེགས་བསྲུང་བར་བསམས་ནས། རོལ་མོའི་སྒྲ་དང་བཅས་པས། གསང་གསུམ་དམ་ཚིག་ལས་བྱུང་བ། །ཡེ་ཤེས་བདུད་རྩི་བླ་ན་མེད། །ལྷ་ཡི་ཆུ་ནི་དག་པ་ཡི། །མི་བསྐྱོད་པ་ཡིས་དབང་བསྐུར་རོ། །ཨོཾ་ཤྲི་བཛྲ་ཧེ་རུ་ཀ་ཧཱུྃ། ཌཱ་ཀི་ནི་ཛྷ་ལ་སྃ་བྷ་ར་ཨ་བྷི་ཤིན་ཙ་ཏུ་མྃ། བཛྲ་ཀ་ལ་ཨ་བྷི་ཤེ་ཀ་ཏོ་ས་མ་ཡ་ཤྲཱི་ཧཱུྃ། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཞེས་པ་དང་། བཀྲ་ཤིས་ཀྱི་ཚིག་རྣམས་བརྗོད་ནས་ཁྲུས་བྱའོ། །མི་བསྐྱོད་པའི་ཆུའི་དབང་ངོ་། །རིན་ཆེན་འབྱུང་ལྡན་གྱི་ཅོད་པན་གྱི་དབང་ནི། རིན་པོ་ཆེའི་དབུ་རྒྱན་དང་དར་དཔྱངས་ལ། རིན་ཆེན་འབྱུང་ལྡན་རིན་ཆེན་མཁའ་འགྲོའི་བྱིན་གྱིས་བརླབས་པ། སློབ་མ་རད་ན་ཧེ་རུ་ཀ་མོས་པ་བྱས་པའི་སྤྱི་བོར་བཅིངས་ཏེ། ཚོར་བའི་ཕུང་པོ་དང་ཉོན་མོངས་པ་ང་རྒྱལ་དང་སེར་སྣ་དག་ནས། མཉམ་པ་ཉིད་ཀྱི་ཡེ་ཤེས་བརྟན་པར་གྱུར་པར་ལྟས་ཏེ། སངས་རྒྱས་ཀུན་གྱི་རྒྱལ་སྲིད་ཆེ། །དབུ་རྒྱན་རིན་ཆེན་བླ་ན་མེད། །རིན་ཆེན་འབྱུང་ལྡན་མཆོག་འགྲོ་བ། །རྫོགས་སངས་རྒྱས་ཀྱིས་དབང་བསྐུར་རོ། །ཐོར་ཚུགས་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་ཅོད་པན་སྦྱིན་པར་བྱ། ཨོཾ་རད་ན་མུ་ཀུ་ཊ་ཏྃ་ཨ་བྷི་ཥིན་ཙ་ཏུ་མྃ། སརྦ་བུད་དྷ་ཌ་ཀི་ནི་ཡེ་ཨ་བྷི་ཤེ་ཀ་ཏ་ས་མ་ཡ་ཤྲི་ཧཱུྃ། ཞེས་སྦྱིན་པར་བྱའོ། །དབུ་རྒྱན་དང་དར་དཔྱངས་ཅོད་པན་གྱི་དབང་ངོ་། །འོད་དཔག་ཏུ་མེད་པ་རྡོ་རྗེའི་དབང་ནི། རྡོ་རྗེ་དང་ཨོཾ་ལས་འོད་དཔག་ཏུ་མེད་པ་དང་། ཧྲི་ལས་བྱུང་བའི་པད་མ་མཁའ་འགྲོ་མའི་བྱིན་གྱིས་བརླབས་པ། སློབ་མ་པདྨ་ཧེ་རུ་ཀ་བསྐྱེད་པའི་ལག་པ་གཡས་པ་ལ་བྱིན་ཏེ། འདུ་ཤེས་ཀྱི་ཕུང་པོ་དང་ཉོན་མོངས་པ་འདོད་ཆགས་དག་ནས། སོ་སོར་རྟོག་པའི་ཡེ་ཤེས་ཀྱི་རང་བཞིན་དུ་གྱུར་པར་བལྟས་ལ། སངས་རྒྱས་རྣམས་ཀྱི་རྡོ་རྗེའི་དབང་། །མི་ཕྱེད་རྡོ་རྗེ་འོད་གསལ་བས། །དམ་ཆོས་འབྱུང་བའི་སྒོར་གྱུར་པའི། །འོད་དཔག་མེད་ཀྱིས་དབང་བསྐུར་རོ། །དམ་ཚིག་རྡོ་རྗེ་ཆེན་པོའི་དབང་། །སངས་རྒྱས་རྣམས་ཀྱིས་རབ་བསྒྲུབ་པ། མི་འགྱུར་སྐུར་ནི་བསྒྲུབ་པ་ཡི། །རྡོ་རྗེའི་དབང་བསྐུར་སྦྱིན་པར་བྱ། །ཨོཾ་པད་མ་ཀ་ལ་ཀྵ་ཨ་བྷི་ཥིན་ཙ་ཨཾ་བཛྲ་པད་མ་ཌ་ཀི་ནི་ཡེ་ཨ་བྷེ་ཀ་ཏོ་ས་མ་ཡ་ཤྲི་ཧཱུྃ། ཞེས་རྡོ་རྗེའི་དབང་སྦྱིན་ནོ། །དོན་ཡོད་གྲུབ་པ་དྲིལ་བུའི་དབང་ནི། དྲིལ་བུ་ཁཾ་ལས་དོན་ཡོད་གྲུབ་པ་དང་། ཀར་མ་ཌ་ཀིའི་རང་བཞིན་དུ་བྱིན་གྱིས་བརླབས་པས། སློབ་མ་ཀར་མ་ཧེ་རུ་ཀ་གསལ་བར་བལྟས་ལ། ལག་པ་གཡོན་པ་ལ་བྱིན་ཏེ། སངས་རྒྱས་ཀུན་གྱི་དྲིལ་བུའི་དབང་། །དམ་ཆོས་འབྱུང་བའི་སྒོར་གྱུར་ཅིང་། །མཆོད་པའི་ལས་ཀུན་རྫོགས་བྱེད་པ། །རྡོ་རྗེའི་ལས་ཀྱིས་དབང་བསྐུར་རོ། །འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཨོཾ་ཨ་མོ་གྷ་སིདྷི་ཧ་ཀ་ལ་ཤ་ཨ་བྷི་ཥིན་ཙ་ཧཱུྃ། ཨ་དྷི་པ་ཏི་ཏྃ་ཨ་བྷི་ཤེ་ཀ་ཏ་ས་མ་ཡ་ཤྲི་ཧཱུྃ། ཞེས་དྲིལ་བུའི་དབང་བསྐུར་རོ། །རྣམ་པར་སྣང་མཛད་མིང་གི་དབང་ནི། རྡོ་རྗེ་དང་དྲིལ་བུ་རྣམ་པར་སྣང་མཛད་དང་། རྡོ་རྗེ་ཕག་མོའི་བྱིན་གྱིས་བརླབས་པ། སློབ་མ་ལ་གཏད་ནས། འཁྱུད་པའི་ཚུལ་དུ་བྱས་ཏེ། རྣམ་པར་སྣང་མཛད་ཧེ་རུ་ཀའི་རང་བཞིན་མོས་པར་བྱས་ལ། ལྷའི་རྔ་བོ་ཆེའི་སྒྲ་སྐད་ལྟ་བུར་མིང་གི་དབང་བསྐུར་བས། མིང་དང་གཟུགས་ཀྱི་ཕུང་པོ་དང་ཉོན་མོངས་པ་གཏི་མུག་སྦྱངས་ནས། ཆོས་ཀྱི་དབྱིངས་ཀྱི་ཡེ་ཤེས་སུ་རང་བཞིན་དུ་གསལ་བར་མོས་ཏེ། རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅེས་ཀྱང་མི་ཆོད་མི་ཕྱེད་པས། །རྡོ་རྗེའི་མིང་དུ་རབ་ཏུ་གྲགས། །རྡོ་རྗེ་དྲིལ་བུ་ཡང་དག་འཁྱུད། །གཡོན་བསྙེམས་མ་དང་སྒྲོས་འཛིན་མ། །གཉིས་མེད་གཉིས་མིན་རྣལ་འབྱོར་བདག །ཕྱག་རྒྱ་ཆེན་པོས་བྱིན་གྱིས་བརླབས། །ཨོཾ་བྷུད་དྷ་ཀ་ལ་ཨ་བྷི་ཤིཉྩྨ་ཨོཾ། བཛྲ་བྷཻ་རོ་ཙ་ན་ཡེ་ན་མ་ཨ་བྷི་ཤེ་ཀ་ཏ། ཀྱེ་དཔལ་རོལ་པའི་རྡོ་རྗེ། བདེ་བའི་རྡོ་རྗེ། ཨ་ལ་ལའི་རྡོ་རྗེ། ཞེས་བྱ་བས་སྙིང་པོའི་མིང་ངོ་། །མི་བསྐྱོད་རྡོ་རྗེ། ཞེ་སྡང་རྡོ་རྗེ། ཐུགས་ཀྱི་འཁོར་ལོ་བཞིའི་མིང་ངོ་། །འདོད་ཆགས་རྡོ་རྗེ། འོད་དཔག་མེད་རྡོ་རྗེ། གསུང་གི་འཁོར་ལོ་བཞིའི་མིང་ངོ་། །རྣམ་པར་སྣང་མཛད་རྡོ་རྗེ། གཏི་མུག་རྡོ་རྗེ། སྐུའི་འཁོར་ལོ་བཞིའི་མིང་ངོ་། །རིན་ཆེན་རྡོ་རྗེ། སེར་སྣ་རྡོ་རྗེ། རྣལ་འབྱོར་མ་ཉི་ཤུ་རྩ་བཞིའི་མིང་ངོ་། །དོན་ཡོད་རྡོ་རྗེ། ཕྲག་དོག་རྡོ་རྗེ། སྒོ་མཚམས་མ་སུམ་ཅུ་སོ་གཉིས་ཀྱི་མིང་ངོ་། །རྡོ་རྗེ་ལས། རྡོ་རྗེ་རྒྱུ་ཞེས་པ་ནི་དུར་ཁྲོད་སུམ་ཅུ་སོ་གཉིས་ཀྱིའོ། །མིང་གི་དབང་བསྐུར་བའི་ཆོ་གའོ། །བརཏལ་ཞུགས་རྣམ་པ་གཉིས་ལས། དང་པོ་རིགས་དྲུག་པ་དཔལ་ཧེ་རུ་ཀ་མཁའ་འགྲོ་རྒྱ་མཚོའི་རྣལ་འབྱོར་དང་ལྡན་པས། ཁ་ཊྶཱྃ་ཁ་དང་། ཌ་མ་རུ་དང་། གྲི་གུག་དང་། ཐོད་པ་རྣམས་ལག་ཏུ་བྱིན་ལ། རང་ཉིད་དཔལ་མཁའ་འགྲོ་རྒྱ་མཚོའི་སྦྱོར་བས། ནམ་མཁའ་དང་མཉམ་པའི་སེམས་ཅན་གྱི་དོན་གྱིས་ཤིག །ཧེ་རུ་ཀ་དཔལ་ཁ་ཊྶཱྃ་ག །རྣལ་འབྱོར་མ་ནི་ཌ་མ་རུ། །རྡོ་རྗེ་ཁ་ཊྶཱྃ་རྡོ་རྗེ་བཅས། དྲིལ་བུ་སིལ་སིལ་སྒྲ་སྒྲོགས་པ། །ཚངས་པའི་སྐུད་ཐོགས་རྣལ་འབྱོར་བདག །གྲི་གུག་དང་ནི་ཀ་པ་ལ། །དཔའ་བོ་ཆེན་པོས་བླང་བར་གྱིས། །འདི་ལྟར་ཧེ་རུ་ཀའི་བརཏལ་ཞུགས་ཐོབ་ནས། རྒྱུད་ལྟ་བ་དང་ཉན་པ་དང་བསྒོམ་པ་ལ་སོགས་པའི་གསང་བ་བླ་ན་མེད་པའི་བརཏལ་ཞུགས་དབང་ཐོབ་པར་འགྱུར་རོ། །དེ་ནས་ཡང་རྡོ་རྗེ་སེམས་དཔའི་བརཏལ་ཞུགས་སྦྱིན་པར་བྱའོ། །ཨོཾ་བཛྲ་ས་ཏ་མ་ཧ་སུ་ཁ་ཧཱུྃ། ཞེས་པས་ལག་པ་གཡས་སུ་དམ་ཚིག་རྡོ་རྗེ་བྱིན་ལ། འདི་དེ་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ལག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརཏལ་ཞུགས་བརྟན། ཨོཾ་སརྦ་ཏ་ཐཱ་ག་ཏ་སིད་དྷ་བཛྲ་ས་མ་ཡ་ཏིཥྛ་ཨེ་ཤ་ཏྲྃ་དྷ་ར་ཡ་མཱི་བཛྲ་ས་ཏྭ་ཧི་ཧི་ཧི་ཧི་ཧཱུྃ། འདིས་ནི་སྔ་མའི་དབང་བསྐུར་བ་ཐམས་ཅད་བརྟན་པར་བྱེད་པ། རིགས་དྲུག་པ་རྡོ་རྗེ་སེམས་དཔའི་དབང་ངོ་། །འདི་ལྟ་བུའི་བུམ་པའི་དབང་བདུན་པོ་འདི་དག་གི་དོན་འདི་ཉིད་རྒྱུད་ཆེན་པོ་དང་བྱང་ཆུབ་སེམས་དཔའ་རྣམས་ཀྱི་འགྲེལ་བར། ཇི་ལྟར་གཞི་ལ་གནས་པའི་དྲི་མ་འཁྲུས་པར་བྱེད་པ་བྱས་པ་འཇུག་པའི་དབང་བདུན་ཞེས་བྱ་སྟེ། མངལ་དུ་ཕུང་པོ་དང་ཁམས་དང་སྐྱེ་མཆེད་གྲུབ་ནས་སྐྱེས་པ་དང་འཁྲུས་པར་བྱེད་པ་དག་པ་ཆུ་དབང་། གཙུག་ཕུད་འཇོག་པ་དང་རྣ་བ་འབུགས་པ་དབུ་རྒྱན་དང་དར་དཔྱངས། ལུས་ཀྱི་སྤྱོད་ལམ་རྣམ་པར་དག་པ་རྡོ་རྗེའི་དབང་། ངག་གི་སྨྲ་བ་སློབ་པ་དག་པ་དྲིལ་བུའི་དབང་། མིང་གི་རྟོག་པ་སྦྱོང་བ་མིང་གི་དབང་། རང་གི་བྱ་བ་ཐམས་ཅད་གྲུབ་པར་བྱེད་པ་བརཏལ་ཞུགས་དང་རྗེས་སུ་གནང་བའི་དབང་སྟེ། འདི་དག་རྣམ་པར་སྦྱངས་ནས་བསྐྱེད་རྫོགས་ཀྱི་དོན་བསྒོམས་པ་ཕུལ་དུ་ཕྱིན་པར་གྱུར་ན་འབྲས་བུ་ནི། ས་དང་པོ་རབ་ཏུ་དགའ་བ་ནས་བདུན་པའི་བར་ཐོབ་པར་བྱེད་པར་གསུངས་ཏེ། རྒྱུད་འགྲེལ་གྱི་ལུང་མང་དུ་གསུངས་ཀྱང་འདིར་མ་བྲིས་སོ། །ཡང་དག་པའི་དོན་ཉམས་སུ་ལེན་པ་དང་། གཞན་སློབ་དཔོན་བྱེད་པ་ལ་མ་རྟོགས་པ། ཕལ་པ་རྣམས་ལ་ནི། འདི་ཉིད་ཀྱི་རྗེས་སུ་ལུང་བསྟན་པ་དང་། རྗེས་སུ་གནང་བ་སྦྱིན་པར་བྱའོ། །བུམ་པའི་དབང་ངོ་། །དེ་ནས་དབང་གོང་མའི་སྣོད་དུ་གྱུར་པ་ཡང་དག་པའི་དོན་ཉམས་སུ་ལེན་པ་རིན་པོ་ཆེ་ལྟ་བུའི་གང་ཟག་རྣམས་ལ་ཡང་ནས་ཡང་དུ་གསོལ་བ་གདབ་པ་རྣམས་ལ་སྦྱིན་པར་བྱའོ། །དེ་ཡང་བཅོམ་ལྡན་འདས་ཀྱིས་དཀྱིལ་འཁོར་རྣམ་པ་བཞི་གསུངས་ཏེ། གོང་གི་བྱིས་པ་འཇུག་པའི་དབང་ནི་རྡུལ་ཚོན་གྱི་དཀྱིལ་འཁོར་བྲིས་ནས་དབང་བསྐུར་བའོ། །ལུས་ཀྱི་དཀྱིལ་འཁོར་ལ་བརྟེན་ནས་གསང་པའི་དབང་བསྐུར་བའོ། །བྷ་གའི་དཀྱིལ་འཁོར་ལ་བརྟེན་ནས་ཤེས་རབ་ཡེ་ཤེས་ཀྱི་དབང་བསྐུར་བའོ། །སྣང་སྲིད་ཀྱི་དཀྱིལ་འཁོར་ལ་བརྟེན་ནས། དབང་བཞི་པ་བསྐུར་ཏེ། འཇིག་རྟེན་དང་འཇིག་རྟེན་ལས་འདས་པའི་དབང་བཅུ་གཅིག་གིས་སངས་རྒྱས་ཉིད་གྲུབ་པར་བྱེད་པ་རྡོ་རྗེ་སློབ་དཔོན་གྱི་དབང་དུ་གསུངས་སོ། གསང་བའི་དབང་བསྐུར་བ་ནི་གསོལ་བ་གདབ་པ་དང་། ལུས་ཀྱི་དཀྱིལ་འཁོར་བསྟན་པ་དང་། དབང་བསྐུར་བ་དང་། རྗེས་སུ་གནང་བ་སྦྱིན་པའོ། །དང་པོ་ནི་གསེར་ལ་སོགས་པའི་མཎྜྻལ་ཕུལ་ནས། ཁྱོད་ནི་མཁའ་འགྲོ་རྒྱ་མཚོ་སྟེ། །བདེ་གཤེགས་རྣམས་ཀྱི་བདེ་སྩོལ་མཛད། །བྱང་ཆུབ་སེམས་དཔའ་མཆོག་རྣམས་ལ། །ཇི་ལྟར་དེ་ཉིད་བདུད་རྩི་ཡི། །མཆོག་གི་དབང་ནི་བསྐུར་བ་ལྟར། །དེ་བཞིན་བདག་ལའང་སྩལ་དུ་གསོལ། །ཞེས་ལན་གསུམ་དུ་གསོལ་བ་གདབ་བོ། །གཉིས་པ་ལུས་ཀྱི་དཀྱིལ་འཁོར་བསྟན་པ་ནི། ངེས་པར་བརྗོད་པ་བླ་མའི་རྒྱུད་ལས། ལུས་འདི་གཞལ་ཡས་ཁང་ཡིན་ཏེ། །སངས་རྒྱས་ཀུན་གྱིས་ཡང་དག་བརྟེན། །ཟུར་བཞི་པོ་ནི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ཀྱང་བཤད་པ་ཡིན། །ཞེས་བྱ་བ་ལ་སོགས་པ་ལུས་ཀྱི་དཀྱིལ་འཁོར་དུ་གསུངས་ཤིང་གཞན་ཡང་། རྡོ་རྗེ་སློབ་དཔོན་ལུས་འདི་ལ། །དཀྱིལ་འཁོར་ལྷ་ཚོགས་རང་བཞིན་གནས། །འདི་ཡི་གཟུགས་ཀྱི་ཕུང་པོ་ལ། །དེ་བཞིན་གཤེགས་པ་རྣམ་སྣང་མཛད། །འདི་ཡི་ཚོར་བའི་ཕུང་པོ་ལ། །དེ་བཞིན་གཤེགས་པ་རིན་ཆེན་འབྱུང་། །འདི་ཡི་འདུ་ཤེས་ཕུང་པོ་ནི། །དེ་བཞིན་གཤེགས་པ་འོད་དཔག་མེད། །འདི་ཡི་འདུ་བྱེད་ཕུང་པོ་ལ། །དེ་བཞིན་གཤེགས་པ་དོན་ཡོད་གྲུབ། །འདི་ཡི་རྣམ་ཤེས་ཕུང་པོ་ནི། །དེ་བཞིན་གཤེགས་པ་མི་བསྐྱོད་པའོ། །ཞེས་བྱ་བ་གསུངས་པས། རང་གི་ལུས་ལ་དཔལ་མཁའ་འགྲོ་རྒྱ་མཚོའི་དཀྱིལ་འཁོར་བཅུ་གཉིས་ཀྱི་བདག་ཉིད། འཁོར་ལོ་གསུམ་ལ་ཐིམ་པ་དང་། ལོངས་སྤྱད་པ་དག་བདག་པོའི་བདུན་བཅུ་དོན་གཉིས་ཀྱི་ཕྱག་དང་རྒྱུད་རྣམ་པར་དག་པ། ལྔ་བརྒྱ་དང་བཞིའི་ལྷག་པའི་ལྷ་ཐམས་ཅད་ལུས་ཀྱི་རྩ་དང་ཐིག་ལེ་བྱང་ཆུབ་སེམས་ཀྱི་ངོ་བོར་གནས་པ་ཤེས་པར་བྱས་ལ། འཁོར་ལོ་རྣམ་པ་ལྔ་ནི་རིགས་ལྔ་ཡིན་པས། སྤྲོས་པ་ལ་དགའ་ན་མེ་ཏོག་དོར་བ་དང་མིག་འབྱེད་པ་དཀྱིལ་འཁོར་བསྟན་པ་བཤད་དོ། །དབང་བསྐུར་བ་དངོས་ནི། རྡོ་རྗེ་སློབ་དཔོན་དཔལ་མཁའ་འགྲོ་རྒྱ་མཚོ་དང་དུམ་སྐྱེས་མ་རྡོ་རྗེ་ཕག་མོ་དང་གཉིས་སུ་མེད་པའི་མཁའ་གསང་སྦྱོར་བ་བྱས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བསྡུས་ནས་ཞལ་དུ་ཞུགས་ཏེ། ཨེ་ཨ་ར་ལི་ཛ་ཧཱུྃ་བྃ་ཧོ་སརྦ་བྷུད་དྷ་ཌ་ཀི་ནི་ཕཱཻཾ་ཞེས་སྐུའི་དབྱིབས་བརྒྱུད་ནས། ཨོཾ་སརྦ་ཏ་ཐཱ་ག་ཏ་ཨ་ནུ་ར་ག་ཏ་བཛྲ་སྭ་བྷ་བ་ཨད་མ་ཀོ་ཧྃ། ཞེས་པས་པད་མའི་སྣོད་དུ་གནས་པའི་བདུད་རྩི་ལྔའི་རང་བཞིན་ལྕེ་ལ་བཞག་ནས། འདི་ནི་དཔའ་བོ་རྣལ་འབྱོར་མའི། །དམ་ཚིག་རྨད་བྱུང་ཆེན་པོ་སྟེ། །ཁམས་ལྔ་ལས་བྱུང་བཅུད་ཀྱིས་ལེན། མཁའ་འགྲོ་རྒྱ་མཚོའི་སྦྱོར་ལྡན་པས། །ཕག་མོ་གཉིས་མེད་བྱང་ཆུབ་སེམས། །བདེ་བ་ཆེན་པོར་མྱང་བར་གྱིས། །ཨོཾ་ཨཱཿཧཱུྃ་ཞེས་སྦྱིན་ནོ། །སློབ་མས་ཨ་ཧོ་མ་ཧ་སུ་ཁའོ། །ཞེས་བཏུང་བར་བྱའོ། །འདི་ཡི་སྐབས་སུ་རོལ་མོའི་སྒྲ་དང་བཅས་པས་དམིགས་པ་ནི་གོང་གི་བུམ་པའི་དབང་བཞིན་ནོ། །འདི་ཡི་དོན་བཤད་པར་བྱ་སྟེ། རྒྱུད་ལས་གསུངས་པ། རི་ལུ་རྟག་ཏུ་མཆོད་པ་ནི། །བདུད་རྩི་གསང་བའི་ཆུ་ཡིན་ནོ། །ཕོ་ཉ་ལྷན་སྐྱེས་བདག་ཉིད་ནི། །དབང་གཉིས་སྦྱོར་ལ་བརྩེ་བའོ། །ཡིད་ནི་ནང་དུ་སོང་བ་ནི། །ཁམས་རྣམས་ཀྱང་ནི་ཞུ་བའོ། །རི་ལུ་ཐིག་ལེ་སངས་རྒྱས་རྣམས། །ཞུ་གང་སྦྱོར་བ་ལས་བྱུང་བའོ། །སྦྲང་རྩི་ཁྲག་དང་ག་པུར་བཅས། བཅུ་དྲུག་འདོད་མ་ལ་བྱུང་བའོ། །ཚོགས་དབུས་རབ་ཏུ་བཞུགས་རྣམས་ཀྱིས། །འདི་ཀུན་ལྷན་སྐྱེས་ལ་སྦྱར་བའོ། །མིང་མེད་མཐེ་བོང་ཁར་གཞུག་པ། །སྙོམས་པར་འཇུག་ལས་ཁྲག་བྱུང་བའོ། །ཞི་བའི་བཏུང་བ་མྱང་བ་ནི། །འཕོ་བའི་དུས་ལས་མ་ལུས་གང་། །འདི་རྣམས་བདུད་རྩི་ལྔར་འགྱུར་བ། །འཕོ་ལས་བྱུང་བའི་མིའི་མར་ཁུ། །མཆོད་བཞི་དེ་བཞིན་བྱ་བ་ནི། །བཞི་མཉམ་ག་པུར་བཅས་པའོ། །ལྷ་དང་མི་རྣམས་བདེ་བ་ནི། །དགའ་བ་ཀུན་ལས་གར་བྱུང་བའོ། །བཅུ་དྲུག་ཆ་ཤས་རིན་ཆེན་པ། །ཐམས་ཅད་བདེ་བའི་རང་བཞིན་ཅན། །དེ་ལྟར་དཔའ་བོ་ཐམས་ཅད་ནི། །ཁམས་ཀྱི་རྫས་རྣམས་སུ་སྦྱར་བྱ། །དེ་ནས་རྗེས་སུ་གནང་བ་སྦྱིན་པར་བྱ་སྟེ། འདི་ནི་ཤིན་ཏུ་གསང་ཆེན་དོན། །རྡོ་རྗེའི་ཡེ་ཤེས་ལས་བྱུང་པ། །དབང་བསྐུར་བ་ནི་རྨད་བྱུང་ཆེ། །རྡོ་རྗེ་དྲིལ་བུ་རྣམ་བསྒྲགས་པས། །མཆོག་ཏུ་དགའ་བར་རྟོགས་བྱེད་པ། །འདི་ཡི་འགྲོ་རྣམས་དགུག་པར་བྱ། །ག་པུར་ཁྲག་ཆེན་བཅས་པ་དང་། །ཙན་དན་དམར་དང་བཞི་མཉམ་བཅས། །ལྔ་པ་རྡོ་རྗེ་དྲི་ཆུ་སྟེ། འཆི་མེད་བདུད་རྩི་ལྔ་པོ་འདི། །གཉིས་མེད་ཡེ་ཤེས་སེམས་ཀྱིས་ནི། །མི་བཟའ་བ་ནི་ཅི་ཡང་མེད། །ཞེས་བྱ་བ་ཤ་ལྔ་དང་བདུད་རྩི་ལྔའི་རྗེས་སུ་གནང་བ་སྦྱིན་ནོ། །དབང་བསྐུར་བ་འདི་ནི་ལུས་ཀྱི་དཀྱིལ་འཁོར་ལ་བརྟེན་ནས། གསང་བའི་དབང་བསྐུར། ངག་དང་རླུང་རྣམ་པར་དག་ནས། འཇིག་རྟེན་ན་ཁྱིམ་ཐབ་ལེན་པའི་རྣམ་པར་རྟོག་པ་སྦྱོང་བ། རྫོགས་པའི་རིམ་པ་བསྒོམས་པས། ས་བརྒྱད་པ་མི་གཡོ་བ་ཐོབ་པར་བྱེད་པའོ། །གསང་བའི་དབང་ངོ་། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་བ་ནི། འདི་ཡི་དེ་ཉིད་མི་ཤེས་པའི། །སློབ་མ་རྣམས་ལ་བསྟན་མི་བྱ། །བློ་ལྡན་རྣམ་པར་རྟོག་མེད་ལ། །ལེགས་པས་སྦས་པ་འདི་སྦྱིན་བྱ། །ཞེས་བྱུང་པས། ཐོག་མར་སྔགས་དང་ཞིང་དང་རིགས་ལས་སྐྱེས་པའི་ལེགས་པར་སྦྱངས་བའི་ཕྱག་རྒྱའམ། ཡང་ན་རྣལ་འབྱོར་མའི་འཁོར་ལོ་ཡིད་ལས་སྐྱེས་པ་རིགས་སུམ་ཅུ་སོ་དྲུག་གི་བདག་ཉིད་ཆོས་འབྱུང་གི་དཀྱིལ་འཁོར་དུ་ལེགས་པར་བསྐྱེད་ལ་དབང་སྦྱིན་པར་བྱ་སྟེ། འདི་ལ་ཡང་མཎྜྻལ་ཕུལ་ཞིང་གསོལ་བ་གདབ་པ་དང་། དབང་བསྐུར་བ་དང་། རྗེས་སུ་གནང་བའོ། །དང་པོ་ནི། རིན་པོ་ཆེ་ལ་སོགས་པའི་མཎྜྻལ་ཕུལ་ནས་གསོལ་བ་གདབ་པ་ནི། བདག་གི་མའི་ལྷ་མོ་ཀྱེ། །ལྷ་མོ་ཀུན་གྱིས་རབ་མཆོད་མ། །ཁྱོད་ནི་འདི་རྣམས་ཀུན་གྱི་མ། ཡེ་ཤེས་སྙིང་པོ་ཕྱག་འཚལ་འདུད། །སེམས་ཅན་ཀུན་ལ་སྙིང་རྗེ་ཡི། །གཟུགས་སུ་རང་གིས་སྤྲུལ་པ་མོ། །བདག་ལ་ཀུན་དུ་ཐུགས་རྗེ་ཡི། །བཀའ་དྲིན་ཆེན་པོ་མཛད་པར་རིགས། །བྱང་ཆུབ་རྡོ་རྗེ་སངས་རྒྱས་ལ། །དབང་མཆོག་དམ་པ་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་ལན་གསུམ་གདབ་ནས། སློབ་མ་རྣམས་ཧེ་རུ་ཀ་དཔལ་མཁའ་འགྲོ་རྒྱ་མཚོར་མོས་པ་བྱས་ལ། དངོས་སུ་བཀོད་པ་མ་ཡིན་པ། སིན་དྷུ་རའི་དཀྱིལ་འཁོར་དུ་དཔའ་མོ་སུམ་ཅུ་སོ་བདུན་གྱི་ས་བོན་བསྐྱེད་པ་ལ་མཆོད་པ་དང་བསྟོད་པ་བྱས་ཏེ། ཆོས་ཀྱི་འབྱུང་གནས་ཀྱི་དཀྱིལ་འཁོར་གྱི་སྒོ་རྣམ་པར་དག་པ་ལ་རྣམ་པར་ཐར་པའི་སྒོ་གསུམ་ལ་ཟུར་གསུམ། སངས་རྒྱས་ཀྱི་ཡོན་ཏན་གོང་ནས་གོང་དུ་འཕགས་པའི་གཞལ་ཡས་ནས། རྡོ་རྗེ་ཕག་མོ་དུམ་སྐྱེས་མ་རྣལ་འབྱོར་མའི་འཁོར་ལོ་དང་བཅས་པའི་དཀྱིལ་འཁོར་བསྟན་ཅིང་། མེ་ཏོག་དོར་བ་བྱ་སྟེ། རྡོ་རྗེ་ཕག་མོ་འཕྲོ་བའི་སྦྱིན་པར་བྱ་སྟེ། འདི་ནི་ཁྱོད་ཀྱི་གཟུངས་མ་མཆོག །བསྟེན་པར་སངས་རྒྱས་རྣམས་ཀྱིས་བརྟགས། །འཁོར་ལོའི་རིམ་པ་སྦྱོར་བ་ཡིས། །བདེ་བ་ཡང་དག་མྱོང་བར་གྱིས། །ཐབས་གཞན་གྱིས་ནི་སངས་རྒྱས་མིན། །འགྲོ་བ་གསུམ་པོ་འདི་ཡིས་དག །དེ་ཕྱིར་འདི་དང་མི་འབྲལ་ཞིང་། །ཁྱོད་ཀྱིས་ནམ་ཡང་མི་བཏང་ངོ་། །འདི་དེ་སངས་རྒྱས་ཐམས་ཅད་ཀྱི། །རིག་མའི་བརཏལ་ཞུགས་བླ་ན་མེད། །རྨོངས་པས་གང་ཞིག་འདའ་བྱེད་ན། །དེ་ལ་མཆོག་གི་དངོས་གྲུབ་མེད། །ཞེས་བརྗོད་ནས་སྦྱིན་པར་བྱ། །དེ་ལ་རྡོ་རྗེ་ཕག་མོ་དུམ་སྐྱེས་མ། །དྲི་ཞིམ་མེ་ཏོག་ཕྲེང་རྒྱན་མ། །རྗེས་སུ་བསྟན་པ་གསལ་བར་སྨྲ། །གང་གི་བདུད་རྩི་ལྔ་རྣམས་ནི། །རླུང་གིས་དེ་ཉིད་སྦྱོར་ལྡན་པས། །རྣམ་པར་མི་རྟོག་བཟའ་བྱེད་དམ། །བདེ་བ་ཆེན་པོའི་མཁའ་འདི་ནི། །སངས་རྒྱས་ཀུན་གྱིས་བྱིན་གྱིས་བརླབས། །གང་ཞིག་ཆོ་ག་བཞིན་བསྟེན་ན། །ཡང་དག་སངས་རྒྱས་མཉེས་བྱེད་དེ། །བདེ་ཆེན་རྒྱལ་པོ་རང་ཉིད་ནི། །འདི་ཉིད་ཀྱི་ནི་ཡང་དག་བཞུགས། །བདེ་བ་ཆེན་པོའི་དོན་རྟོགས་ན། །དེ་ཡི་མདུན་དུ་ང་གནས་སོ། །ཞེས་བྱ་བའི་ཚིགས་སུ་བཅད་པ་གསུངས་ལྷག་པར་མོས་པ་བྱས་ལ། དེ་ནས་སློབ་མས་བརྗོད་པར་བྱ་བ་ནི། ཇི་ལྟར་གསུངས་པའི་དམ་ཚིག་ཀུན། །བདག་ནི་ལེགས་པར་བསྲུང་པར་བགྱིད། །རྣམ་པར་མི་རྟོག་རང་བཞིན་གྱི། །མཁའ་འགྲོ་རྣམས་ལ་གུས་པར་བགྱིད། ཞེས་བརྗོད་ནས། རྒྱུད་ལས་གསུངས་པའི། ཡི་གེར་བརྒྱར་ནི་སྙིང་རྩེར་ཡང་དག་ལྡན། །བྷྱ་ནི་མཚན་གྱི་ལྟེ་བ་རྣམ་པར་བཀོད། །ལྟེ་བ་སྙིང་དང་ཁ་དང་དཔྲལ་བ་རུ། །སྔགས་དང་ཚོགས་དང་བཅས་པས་བྱིན་གྱིས་རློབས། །རྣལ་འབྱོར་མ་དང་དཔའ་བོ་གཉིས་མེད་དེ། །ཞེས་གསུངས་པའི་དོན་བསྒོམ་པར་བྱའོ། །རྒྱུད་ལས་ཀྱང་། སྒྲ་དང་གཟུགས་སུ་ཡོངས་བྱུང་པ། །ཁྲག་ཁུ་ནོར་བུའི་བར་དག་ཏུ། །འཇིག་རྟེན་གསུམ་དུ་རྙེད་དཀའ་བ། །རང་རིག་པད་མར་སོན་པའོ། །སྲུབ་དང་སྲུབ་པའི་སྦྱོར་རྣམས་ཀྱིས། །རང་བྱུང་གིས་ནི་རྣམས་བསྲེས་པའོ། །དབུས་མའི་མཆོག་གི་དབུགས་ཀྱང་ནི། །སྐད་ཅིག་དབུ་མར་བཟུང་བའོ། །ཞེས་གསུངས་པ་དང་། ཡང་ནང་གི་དམ་ཚིག་གི་ཕྱག་རྒྱ་བསྒོམ་པ་ནི། ལྟེ་བའི་དཀྱིལ་འཁོར་ཉིད་གནས་པ། །རྒོད་མའི་མེ་འདྲ་ངོ་བོ་ནི། །ཕག་མོའི་ཐིག་ལེར་འདོད་པ་སྟེ། །དཔྱིད་ཐོབ་ནས་ནི་ཚིམ་འགྱུར་རོ། །སྙོམས་པར་འཇུག་པས་ཡང་དག་གནས། །འདི་ནི་ཧེ་རུ་ཀ་དཔལ་ལོ། །ཞེས་བྱ་བས། ལྟེ་བའི་གཏུམ་མོའི་མེ་འབར་ནས། སྤྱི་བོའི་ཧཾ་བྱང་ཆུབ་ཀྱི་སེམས་ཞུ་བས། དགའ་བ་དང་། མཆོག་དགའ་དང་། དགའ་བྲལ་དང་། ལྷན་ཅིག་སྐྱེས་པའི་དགའ་བ་བསྒོམ་པར་བྱའོ། །དེ་ནས་རྗེས་སུ་གནང་བ་ནི། དུས་འདི་ནས་ནི་བཟུང་ནས་ནི། །ཇི་སྲིད་བྱང་ཆུབ་སྙིང་པོའི་བར། །ཕྱག་རྒྱ་བཞི་ཡི་སྦྱོར་བ་ཡིས། །རྨི་འདྲར་སེམས་ཅན་ཐམས་ཅད་ཀྱི། །དོན་ནི་དཔའ་བོ་ཁྱོད་ཀྱིས་གྱིས། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དོ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མི་བྱའོ། །ཞེས་གསུངས་པ་འཁོར་བ་པ་བཞིན་དུ་འཛག་བཞིན་པའི་ཆགས་པ་དང་བྲལ་བ་ལྟ་བུ་དང་། ཉན་རང་ལྟ་བུར་སེམས་ཅན་གྱི་དོན་ལ་ཆགས་པ་དང་བྲལ་བ་གཉིས་ཀ་སྤངས་ལ། སྲིད་པ་དང་ཞི་བ་གཉིས་ཀའི་དམ་ཚིག་རྟོགས་པར་བྱའོ། །ཤེས་རབ་ཡེ་ཤེས་ཀྱི་དབང་ངོ་། །ད་ནི་དབང་བཞི་པ་ཕྱག་རྒྱ་ཆེན་པོའི་དབང་ལ་བཞི། མཎྜྻལ་ཕུལ་ནས་གསོལ་བ་གདབ་པ་དང་། དབང་བསྐུར་བ་དངོས་དང་། དེའི་དོན་བསྟན་པའོ། །དང་པོ་ནི་མཎྜྻལ་དང་རང་གི་ལུས་ལོངས་སྤྱོད་དང་བཅས་པ་བླ་མ་ལ་ཕུལ་ནས། གསོལ་བ་གདབ་པ་ནི། རྡོ་རྗེ་འཆང་གི་བཀའ་དྲིན་གྱིས། །འདིར་ནི་དབང་བསྐུར་རྣམ་གསུམ་ཐོབ། །སྟོང་ཉིད་ཤེས་རབ་མཛེས་པ་ཡིས། །བཞི་པའི་བཀའ་དྲིན་བསྐྱབ་ཏུ་གསོལ། །ཞེས་ལན་གསུམ་དུ་གསོལ་བ་གདབ་བོ། དབང་དངོས་ནི། རང་རིག་པའི་ཡེ་ཤེས་དེ་བཞིན་གཤེགས་པ་ཐམས་ཅད་ཀྱི་ངོ་བོ་ལུས་དག་པའི་བསམ་གཏན་དང་། ངག་དག་པར་བྱེད་པའི་འཛིན་པ་དང་། ཐིག་ལེ་དག་པར་བྱེད་པའི་ཡེ་ཤེས་ཀྱི་གཏུམ་མོ་སྟེ། རྩ་བའི་རྒྱུད་ལས་གསུངས་པ། བདག་ཉིད་རྣམས་ཀྱི་བསྒོམ་པའི་ལམ། །དེ་ཁོ་ན་ཉིད་ལས་དམ་འཁྱུད་མ། །སྐྱོབ་པ་རྣམས་ཀྱིས་གྲོལ་བའི་ལམ། །མཐོ་རིས་མི་ཡུལ་ས་འོག་གི །གྲོལ་བ་རྣམ་པ་གསུམ་ཞེས་བྱ། །མཉམ་པའི་བདེ་བ་མཐོང་འགྱུར་བའང་། རྡོ་རྗེ་འབར་བའི་མཚམས་ན་གནས། །བུམ་པ་ཅན་སོགས་བྱས་གང་ཕྱི། །གཏུམ་མོ་ཕྲ་བའི་རྩ་ཅན་ནོ། །པད་མ་རྩར་ནི་ཐམས་ཅད་ཅན། །དེ་དང་འདྲ་བའི་ཡེ་ཤེས་མེད། །དེ་ཕྱིར་བརྩོན་འགྲུས་འབྱུང་བར་འགྱུར། །སྟོབས་བཅུ་ཡེ་ཤེས་ཡེ་ཤེས་ཅན། །དེ་ལྟར་ཤེས་བྱས་རྟག་རྣལ་འབྱོར། །འདོད་ཅན་མ་ལ་འདོད་སྤྱོད་ཀྱིས། །དཀྱིལ་འཁོར་གྱི་ནི་བདག་མོ་དང་། །གསང་སྔགས་ཡི་གེར་ཡང་དག་བྱུང་། །ལྷན་སྐྱེས་རྫོགས་བྱང་ཆུབ་མཆོག་ཏུ། ལྷ་མོ་ཆེན་མོར་སྐྱེ་བར་འགྱུར། །ཞེས་གསུངས་པས། ཁམས་གསུམ་པའི་གཞལ་ཡས་ཀྱི་ཁང་པར་ལུས་མཁའ་འགྲོ་རྒྱ་མཚོའི་བསྐྱེད་རིམས་དང་ལྡན་པས། ལུས་ཀྱི་གནད་བསམ་གཏན་གྱི་ཆོས་རྣམ་པ་ལྔ་དང་ལྡན་པས་སྐྱེ་བ་དང་འགག་པ་མེད་པ་སྣང་བ་དང་སྟོང་པ་གཉིས་སུ་མེད་པའི་དེ་ཁོ་ན་ཉིད་ཀྱི་ཕྱག་རྒྱ་དམ་པ་དང་འཁྱུད་ནས། སྐྱོབ་པ་སངས་རྒྱས་རྣམས་ཀྱིས་གསུངས་པའི་རྣལ་འབྱོར་གསུམ་གྱི་ལམ་བསྒོམ་པར་བྱ་སྟེ། ས་འོག་སྐུའི་རྡོ་རྗེ། མི་ཡུལ་གསུང་གི་རྡོ་རྗེ། མཐོ་རིས་ཐུགས་ཀྱི་རྡོ་རྗེ་གྲོལ་བར་བྱེད་པའི་ཐབས། བདེ་བ་དང་སྟོང་པ་མཉམ་པའི་རང་བཞིན། བསྒོམ་པའི་ཚུལ་ཡང་རྡོ་རྗེ་སྟོང་པ་ཉིད་ཀྱི་ནམ་མཁའ་ལ། རྣམ་པར་མི་རྟོག་པའི་སེམས་བཟུང་བས། འབར་བ་ལ་སོགས་པའི་རྟགས་རྣམ་པ་བཅུ་མཐོང་བ་ལ་བརྟེན་ནས། ལུས་དག་པར་བྱེད་དོ། །བུམ་པ་ཅན་ལ་སོགས་པའི་སྲོག་རྩོལ་གྱི་སྦྱོར་བ་བྱས་པས་ངག་དག་པར་བྱེད་དོ། ཕྱི་ནས་གཏུམ་མོ་ཕྲ་མོའི་རྣལ་འབྱོར་རྗེས་སུ་དྲན་པ་བསྒོམས་པས་སེམས་དག་པར་བྱེད་དོ། །རྣམ་པ་གསུམ་པོ་འདི་ལས་ལྷག་པའི་ཡེ་ཤེས་མེད་དེ། དེའི་ཕྱིར་བརྩོན་འགྲུས་དང་སྟོབས་དང་ཡེ་ཤེས་ཀྱི་རྣལ་འབྱོར་པ་འདི་འདྲ་དུས་རྟག་ཏུ་སྤྱོད་པས་འདོད་ཅན་མ་ལ་ལོངས་སྤྱད་པས། འདི་ནི་དཀྱིལ་འཁོར་གྱི་བདག་མོ་རྡོ་རྗེ་ཕག་མོའོ། །གསང་སྔགས་ཡི་གེར་ཡང་དག་བྱུང་། །ཞེས་བྱ་བ། མ་ན་ཡིད། ཏྲ་ཡ་སྐྱོབ་པ་སྟེ། ཡིད་བདེ་སྟོང་དུ་བྱིན་གྱིས་བརླབས་པ་དང་ཡི་གེར་ནི་ཨ་ཀྵ་ར་ཞེས་བྱ་སྟེ། འགྱུར་བ་མེད་པའི་ཕྱག་རྒྱ་ཆེན་མོའི་ལྷན་ཅིག་སྐྱེས་པ་རྟོགས་ནས་བླ་ནས་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །འདི་ལྟར་ཉམས་སུ་ལེན་པའི་ཚུལ་ནི། དབང་བཞི་པའོ། །དེ་ཉིད་ཀྱི་རྒྱས་གདབ་པ་རྒྱུད་ལས་གསུངས་པ། དཀྱིལ་འཁོར་བདེ་བ་ཆེན་པོ་བསྒོམ་པར་གྱིས། །རྣལ་འབྱོར་བཅུ་གཉིས་བསོད་ནམས་སྡིག་མེད་པའོ། །ཐམས་ཅད་ཟག་མེད་རང་བཞིན་མོས་པར་གྱིས། དཀྱིལ་འཁོར་ངན་པ་དེ་ནི་བདེ་བར་ཤེས་པར་བྱོས། །དབང་པོ་འཁྲུལ་པ་བདེ་བ་ཆེན་མོར་མོས་པར་གྱིས། །སྐད་ཅིག་དེ་ལ་རང་དང་གཞན་གྱི་ངོ་བོ་མེད། །གང་གི་རྣམ་པ་སྣ་ཚོགས་གཟུགས་ཆེན་གྱིས། །ས་གསུམ་དུ་ནི་དཀྱིལ་འཁོར་སྤྲོ་བར་བྱོས། །ཞེས་གསུང་པའི་དོན་རྣམས་གོ་བར་བྱའོ། །དབང་བཞི་པའོ། །དབང་གོང་མ་གཉིས་པོ་འདི་དག་གིས། འཇིག་རྟེན་པའི་གནས་སྐབས་བཞི་དག་པར་བྱས་ནས། འབྲས་བུ་ས་དགུ་པ་དང་ས་བཅུ་པ་ཐོབ་པར་འགྱུར་རོ། །དེ་ལྟར་མཐར་ཕྱིན་པའི་སློབ་མ། རྡོ་རྗེ་སློབ་དཔོན་དུ་འགྱུར་བས། དེའི་དབང་བཤད་དོ། །དབང་ཐམས་ཅད་རྫོགས་པའི་རྗེས་སུ། རྡོ་རྗེ་སློབ་དཔོན་གྱི་དབང་བསྐུར་བའི་དབང་གི་སྟེགས་བུ་པད་མ་འདབ་བརྒྱད་པ་ཕྱི་རོལ་དུ་རེ་ག་རྣམ་པ་ལྔ་དང་ལྡན་པ་སེང་གེའི་ཁྲི་བཤམས་ཏེ། སྟེང་དུ་གདུགས་དཀར་པོ་བཟུང་བ་དང་། བ་དན་དང་འཕན་ལ་སོགས་པ་མཆོད་པའི་བྱེ་བྲག་བཤམས་ལ། རྡོ་རྗེ་སློབ་དཔོན་གྱི་དབང་གི་གསོལ་བ་གདབ་པ་དང་། དམ་ཚིག་གསུམ་བྱིན་པ་དང་། ཐུན་མོང་མ་ཡིན་པ་རྗེས་གནང་དང་། ཐུན་མོང་གི་རྗེས་སུ་གནང་བའོ། །དང་པོ་ནི་རིན་པོ་ཆེ་གསེར་ལ་སོགས་པའི་མཎྜྻལ་ཕུལ་ནས་གསོལ་བ་གདབ་པ་ནི། མཁའ་འགྲོ་རྒྱ་མཚོའི་སྦྱོར་ལྡན་པའི། །སློབ་དཔོན་བདག་ལ་དགོངས་སུ་གསོལ། །བླ་མ་མཆོག་གི་བཀའ་དྲིན་གྱིས། །རང་གཞན་དོན་ནི་ནུས་འགྱུར་བ། །རྡོ་རྗེ་སློབ་དཔོན་གྱི་ནི་དབང་། །ཐུགས་རྗེ་ལྡན་པ་བདག་ལ་སྩོལ། །ཞེས་ལན་གསུམ་དུ་གསོལ་བ་བཏབ་ནས། སློབ་མ་རྣམས་དབང་གི་སྟེགས་བུ་ལ་བཞག་ནས། དཔལ་མཁའ་འགྲོ་རྒྱ་མཚོའི་རྣལ་འབྱོར་གསལ་བར་བསྒོམས་ལ། ཐོག་མར་བུམ་པའི་ཆུ་ཡིས་ཁྲུས་བྱ་ཞིང་། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །རྩ་བའི་སྔགས་ཀྱི་གཤམ་དུ་ཨོཾ་ཨཱ་བྷི་ཤིཉྩྨ་ཏུ་མྃ་ཞེས་བརྗོད་དོ། །ཕྱོགས་བཅུའི་སངས་རྒྱས་ཐམས་ཅད་ཀྱིས་དབུ་རྒྱན་བསྐོན་པར་བསམས་ལ། ཨོཾ་རད་ན་མུ་ཀུ་ཏྲཾ། ཞེས་དབུ་རྒྱན་སྦྱིན་ནོ། །དེ་ནས་སྐུ་གསུང་ཐུགས་ཀྱི་དམ་ཚིག་སྦྱིན་པར་བྱ་སྟེ། ལག་པ་གཡས་སུ་རྡོ་རྗེ་བྱིན་ཏེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་རྒྱལ་པོ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཨོཾ་བཛྲ་ས་ཏྭ་ཧཱུྃ་ཞེས་བྱིན་ནས། ལག་པ་གཡོན་དུ་དྲིལ་བུ་བྱིན་ལ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བསྒྲགས་བསམ་པ་བྱས་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །སྲིད་པའི་དམ་པ་བྱེད་པར་འགྱུར། །ཨོཾ་དྷར་རྨ་དྷར་དུ་ཨཿ དེ་ནས་རྡོ་རྗེ་དྲིལ་བུ་འཁྱུད་པའི་ཚུལ་དུ་བྱ་ཞིང་། ཡིད་ཀྱི་ལུས་ནི་བརྟན་བྱའི་ཕྱིར། །ཕྱག་རྒྱའི་དམ་ཚིག་ཞེས་སུ་བཤད། །གང་གི་ཐམས་ཅད་སྐུར་བསྟན་པ། །དེས་ན་ཕྱག་རྒྱར་རབ་ཏུ་གྲགས། །རང་གི་ལྷ་ཡི་སྦྱོར་བ་ཡིས། །རང་གཞན་མཆོད་པ་ཉིད་དུ་བྱ། །ཇི་སྲིད་འཁོར་བའི་གནས་འདུག་པ། །རཏལ་ཕོད་མང་པོ་འགྱུར་བ་ཡིས། །དེ་སྲིད་སེམས་ཅན་མཉམ་མེད་དོན། །མྱ་ངན་མི་འདའ་ནུས་པར་གྱིས། །འདི་ནི་སྐུའི་དམ་ཚིག་བླ་ན་མེད་པའོ། །དེ་ནས་རྡོ་རྗེ་སློབ་དཔོན་གྱི་དབང་དངོས་ནི། ཐབས་དང་ཤེས་རབ་སྦྱོར་བ་ཡིས། །རྡོ་རྗེ་དྲིལ་བུ་རྣམ་པར་ཟུང་། །དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཆོ་ག་བཞིན་དུ་ཁྱོད་ཀྱིས་ནི། །དཀྱིལ་འཁོར་དམ་པ་བྲི་བར་བྱ། །སྔགས་དང་རྒྱུད་ཀྱང་འཛིན་པ་ཁྱོད། །རྡོ་རྗེ་འཛིན་པ་བདག་ཉིད་ཆེ། །སངས་རྒྱས་བྱང་ཆུབ་སེམས་དཔའ་རྣམས། །མ་ལུས་ལུས་པ་མེད་འགྲུབ་འགྱུར། །དེང་ནས་བཟུང་སྟེ་དཔལ་མཁའ་འགྲོ་རྒྱ་མཚོའི་སྦྱོར་བས། དབང་བསྐུར་བ་དང་། རྒྱུད་བཤད་པ་དང་། ལས་བཞི་དང་། གྲུབ་པ་ཆེན་པོ་བརྒྱད་སེམས་ཅན་གྱི་དོན་བྱོས་ཤིག ཨོཾ་མ་ཧ་སུ་ཁ་བཛྲ་སྭ་ཏ་ཨ་བྷི་ཤེ་ཀེ་ན་ཏྭྃ་ཨ་བྷི་ཤིན་ཙཱ་མི་སརྦ་ཏ་ཐཱ་ག་ཏ་ཨ་དྷི་པ་ཏི་ཏེ་ན་དྷི་དྷོ་མེ་བྷ་བ་སིད་དྷྱ་ན་མ་ཏེ་བྷ་ག་ཝན་མ་ཧཱ་བཛྲ་དྷ་ར། སུ་ར་སྟྃ་ཨ་ཧཾ་བཛྲ་ས་ཏྭ་ཨོཾ་ཨཱཿཧཱུྃ་བཛྲ་ཨ་བྷི་ཤིན་ཙ། དེ་ནས་མཆོད་པ་རྣམས་མཆོད་ནས། བཀྲ་ཤིས་བརྗོད་དེ། མངའ་བདག་སྐུ་མདོག་སྔོན་པོ་རྒྱལ་གྱུར་ཅིག །དམར་པོས་ཇི་ལྟར་མཛེས་བྱས་རྒྱལ་གྱུར་ཅིག །དམ་ཚིག་གིས་བརྒྱན་མཛེས་པ་རྒྱལ་གྱུར་ཅིག །ཟླ་ཕྱེད་དབུ་ལ་བརྒྱན་པར་རྒྱལ་གྱུར་ཅིག །ལྷ་མོའི་འཁོར་ལོས་བརྒྱན་པ་རྒྱལ་གྱུར་ཅིག །དང་པོ་སངས་རྒྱས་སྐུ་མཆོག་གནས་པ་རྒྱལ་གྱུར་ཅིག །འདོད་པ་ཐར་པ་ནོར་དང་ཆོས་སྦྱིན་རྒྱལ་གྱུར་ཅིག །རྣམ་པར་དགྱེས་རོལ་རང་བཞིན་རྒྱལ་གྱུར་ཅིག །ཕྱག་ན་རྡོ་རྗེ་བདེ་བའི་མགོན་པོ་རྒྱལ་གྱུར་ཅིག །ཞེས་མེ་ཏོག་དོར་ཞིང་བརྗོད་ནས། རྡོ་རྗེ་སློབ་དཔོན་གྱི་དབང་གི་དངོས་གཞིའོ། །ཐུན་མོང་མ་ཡིན་པའི་རྗེས་གནང་ལ་དྲུག་སྟེ། དང་པོ་གཟུགས་ཐམས་ཅད་ཀྱི་རྗེས་སུ་གནང་བ་ནི། གཟུགས་བརྙན་རྣམས་ནི་རྣམ་པ་ལྟར། །སྣང་ལ་རང་བཞིན་མེད་པ་ཡི། །ཆོས་ཀུན་དེ་ལྟར་ཤེས་ནས་ནི། །སྣ་ཚོགས་སྣང་བའི་ཆོས་རྣམས་དོན། །རྣལ་འབྱོར་ལྡན་པས་ཤེས་ནས་ནི། །སེམས་ཅན་ཀུན་ལ་བསྟན་པར་གྱིས། །ཞེས་སོ། །གཉིས་པ་སྒྲ་ཐམས་ཅད་ཀྱི་རྗེས་སུ་གནང་བ་ནི། དེ་བཞིན་གཤེགས་པ་ཐམས་ཅད་ཀྱི། །སྒྲ་ཡི་རྗེས་སུ་འགྲོ་བ་ཡི། །ཤེས་རབ་སྔོན་དུ་རྟོགས་གྱིས་ལ། །འཇིག་རྟེན་ཁམས་རྣམས་ཐམས་ཅད་དུ། །ཀུན་དུ་སྒྲ་སྙན་ལྟ་བུ་ཡིས། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བརྗོད་དེ་པི་ཝང་སྦྱིན་ནོ། །གསུམ་པ་དྲིའི་རྗེས་སུ་གནང་བ་ནི། སྙིང་ཁར་དྲིའི་ཐིག་ལེ་བྱས་ཏེ། དེ་བཞིན་གཤེགས་པ་ཐམས་ཅད་ཀྱི། །སྐྱེ་མེད་ལྷག་པར་རྟོགས་གྱུར་ཅིག །གང་གིས་སངས་རྒྱས་ཞིང་ཀུན་དང་། །འཇིག་རྟེན་ཀུན་དུ་བླ་མེད་པའི། །བསམ་མི་ཁྱབ་པའི་ཚུལ་ཁྲིམས་འདི། །རང་གི་ལུས་ལས་སྤྲོ་བར་བྱོས། །ཞེས་སོ། །བཞི་པ་རོའི་རྗེས་སུ་གནང་བ་བདུད་རྩི་ལྔས་སྦྱར་བའི་ཨམྲྀ་ཏ་བྱིན་ལ། རོ་ཀུན་རང་བཞིན་མེད་པ་ཡི། །ཅིག་གི་རྣམ་པར་རྟོགས་ཀྱིས་ལ། །སངས་རྒྱས་བྱང་ཆུབ་སེམས་དཔའ་དང་། །སྲོག་ཆགས་གྱུར་པ་ཐམས་ཅད་ལ། །ལྷ་རྫས་དཔེ་མེད་རོ་ཡི་མཆོག །རོ་ཀུན་རང་བཞིན་མེད་པ་ཡི། །སྤྲུལ་ནས་སུ་ནི་སྦྱིན་པར་བྱོས། །ཞེས་སོ། །ལྔ་པ་རེག་བྱ་ཐམས་ཅད་ཀྱི་རྗེས་སུ་གནང་བ་ནི། ལྷ་མོའི་རེག་བྱ་དང་ལྡན་པའི། །ལྷ་ཡི་གོས་ནི་བྱིན་བྱས་ཏེ། །གང་གིས་རེག་བྱའི་ཁྱད་པར་རྣམས། །རང་གི་སེམས་ལ་བྱུང་བ་སྟེ། །སྣང་ཡང་རང་བཞིན་མེད་པར་ནི། །བདེ་བ་དམ་པ་རྟོགས་གྱིས་ལ། །སངས་རྒྱས་བྱང་ཆུབ་སེམས་དཔའ་དང་། །སྲོག་ཆགས་གྱུར་པ་ཐམས་ཅད་ལ། །ཀུན་སྦྱོར་རེག་བྱའི་བདེ་བ་ཡི། །སྤྲུལ་ནས་སུ་ནི་སྦྱིན་པར་བྱོས། །ཞེས་སོ། །དྲུག་པ་ཆོས་ཀྱི་གནང་བ་ནི། མེ་ལོང་བསྟན་ལ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལ་ཀུན་དུ་བྱུང་། དེ་ལྟར་ཤེས་བྱས་ཆོས་འདི་ནི། །རང་བཞིན་མེད་པ་རྙོག་པ་མེད། །སེམས་ཅན་དོན་ནི་མཉམ་མེད་ཀྱིས། །སྐྱོབ་པ་རྣམས་ཀྱི་རིགས་སུ་སྐྱེ། །ཞེས་བརྗོད་ནས། ཡུལ་དྲུག་པོ་རྣམས་སྒྱུ་མ་དང་རྨི་ལམ་དུ་ཤེས་པས་སེམས་ཅན་གྱི་དོན་བྱོས་ཤིག ཅེས་བརྗོད་དོ། །ཐུན་མོང་གི་རྗེས་སུ་གནང་བ་ནི། གསང་སྔགས་དང་རུས་པའི་རྒྱན་རྗེས་སུ་གནང་བ་དང་། ཆོས་ཀྱི་འཁོར་ལོ་བསྐོར་བའི་རྗེས་གནང་དང་། ཐུན་མོང་གི་རྗེས་གནང་ཕྲན་དང་། དམ་ཚིག་གི་རྗེས་གནང་དང་། ལུང་བསྟན། དབུགས་དབྱུང་། གཟེང་བསྟོད་དོ། །དང་པོ་ནི། རུས་པའི་རྒྱན་གསང་སྔགས་ཀྱིས་བྱིན་གྱིས་བརླབས་ལ་རིམ་པ་བཞིན་དུ་བྱིན་ཏེ། ཨོཾ་ཧྃ་བཛྲ་ཌ་ཀི་ཧཱུྃ་ཧཱུྃ་ཕཊ། ཨོཾ་བཛྲ་བཱཻ་རོ་ཙ་ན་ཡ་ཧཱུྃ་ཧཱུྃ་ཕཊ། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། འཁོར་ལོའམ་གཟུགས་ཀྱི་མི་བསྐྱོད་པ། །རྣམ་སྣང་མཛད་མའི་སྔགས་གང་ཡང་། །ཐོད་པའི་དབུ་རྒྱན་བྱས་པའོ། །ཡི་གེ་བདུན་པའི་གསང་སྔགས་ཀྱིས། །གདུབ་བསྐོར་གྱི་ནི་རྣ་བ་མཛེས། །རྣ་ཆ་འོད་དཔག་མེད་པའང་ཡིན། །ཨོཾ་སརྦ་བུད་དྷ་ཌ་ཀི་ནི་ཡེ་ཧཱུྃ་ཕཊ། སངས་རྒྱས་ཀུན་གྱི་མཁའ་འགྲོ་མའི། །ལྤགས་པ འི་གོས་མཆོག་འཛིན་པ་ཡིན། །ཨོཾ་ཤྲི་བཛྲ་ཧེ་ཧེ་རུ་རུ་ཀྃ་ཧཱུྃ་ཕཊ། ཌ་ཀི་ནི་ཛ་ལ་སྃ་བྷ་ར་སྭཱཧཱ། དཔའ་བོ་རྩ་བའི་སྔགས་སོགས་གང་། །ཚངས་པའི་སྐུད་སོགས་ཉིད་དུ་འདོད། །ཨོཾ་བཛྲ་ཝར་རྣ་ནི་ཡེ་ཧཱུྃ་ཕཊ། ཨོཾ་ཏྲྃ། མགུལ་གྱི་ཕྲེང་བ་རིན་ཆེན་བདག །ཨོཾ་བྃ། ཧྃ་ཡྃ། ཧྲིཾ་མྃ། ཧྲིཾ་ཧྲིཾ། ཧཱུྃ་ཧཱུྃ་ཕཊ་ཕཊ། རྣལ་འབྱོར་མ་དྲུག་གསང་སྔགས་ཀྱིས། །སྐེ་རགས་བྱས་ཏེ་བརྒྱན་པའོ། །ཨོཾ་ཧ། ན་མ་ཧི། སྭ་ཧ་ཧུ། བཱོ་ཤ་ཌ་ཧེ། ཧཱུྃ་ཧཱུྃ་ཧོ། ཕཊ་ཧྃ། ལག་གདུབ་རྣམ་སྣང་མཛད་སོགས་ཏེ། །སྐེ་རགས་ལ་ནི་དོན་ཡོད་གནས། ཨོཾ་ཊ་ཀི་ནི་ཡེ། རུ་པི་ནི་ཡེ། ཁན་དྷ་རོ་ཧི་ཡེ། ལ་མ་ཡེ་ཧཱུྃ་ཕཊ། འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་བཏུང་བའི་ཐོད་པ་ཡིན། །འདི་ལྟར་བདག་ཉིད་རྣམས་བསམས་ནས། །འཚམ་མམ་སྔགས་ཀྱིས་ཤིན་ཏུ་བསྲུང་། །རྟག་ཏུ་ཚངས་པ་སྤྱོད་གྱུར་པ། །རྐང་པ་བརྒྱད་པའི་སྔགས་ཀྱིས་མཆོད། །འདི་ལྟར་རྒྱུད་ལས་བྱུང་བའི་དོན་རྣམས་ལེགས་པར་དྲན་པར་བྱས་ནས། ཨོཾ་འཁོར་ལོ་ཐོད་པ་རྣ་ཆ་དང་། །མགུལ་རྒྱན་གདུ་བུ་སྐེ་རགས་དང་། །ཚངས་སྐུད་དང་ནི་རྣམ་བདུན་ཏེ། །ཕྱག་རྒྱ་ཡིས་ནི་དབང་བསྐུར་རོ། །ཞེས་རྒྱན་གྱིས་རྗེས་སུ་གནང་བའོ། །དེ་ནས་ཆོས་ཀྱི་འཁོར་ལོ་བསྐོར་བའི་རྗེས་གནང་ནི། འཁོར་ལོ་ལག་ཏུ་བྱིན་ལ། རྣམ་པར་སྣང་མཛད་ཀྱིས་སེམས་ཅན་གྱིས་དོན་བྱེད་དོ། །བསམ་པ་བྱེད་དུ་བཅུག་སྟེ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །གཏི་མུག་ཐབས་ཀྱིས་འདུལ་གྱུར་པ། །ཆོས་ཀྱི་འཁོར་ལོ་བསྐོར་བར་གྱིས། །ཨོཾ་དྷ རྨ་ཙཀྲ་པྲ་བར་དྷ་ཡ་མི། དེ་བཞིན་དུ། ཞེ་སྡང་འདུལ་བའི་འཁོར་ལོ་རྡོ་རྗེ་དང་། སེར་སྣ་འདུལ་བའི་རིན་པོ་ཆེའི་འཁོར་ལོ་དང་། འདོད་ཆགས་ཅན་འདུལ་བའི་པད་མའི་འཁོར་ལོ་དང་། ཕྲག་དོག་ཅན་འདུལ་བའི་རྡོ་རྗེ་ལས་ཀྱི་འཁོར་ལོ་བསྐོར་། ཞེས་བརྗོད་ལ། རྗེས་སུ། ཨོཾ་བཛྲ་ཙཀྲ་པྲ་བར་དྷ་ཡ་ཧཱུྃ། ཨོཾ་རད་ན་ཙཀྲ་པྲ་བར་དྷ་ཡ་ཏྲྃཿ ཨོཾ་པད་མ་པྲ་བར་དྷ་ཡ་ཧྲིཿ ཨོཾ་ཀརྨ་ཙཀྲ་པྲ་བར་དྷ་ཡ་ཁྃ། དེ་ནས་པོ་ཏི་དང་དུང་ལག་ཏུ་བྱིན་ལ། ཁྱོད་ཀྱི་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་ནི། །ཆོས་ཀྱི་དུང་ནི་བླ་ན་མེད། །དྲི་མ་མེད་པ་ཀུན་དུ་ཁོང་། །ཆོས་ཀྱི་སྤྱོད་པའི་ཚུལ་མཆོག་འདི། །རང་གི་མཉམ་མེད་རབ་ཏུ་སྟོན། །བྱ་བ་ཤེས་ཤིང་སངས་རྒྱས་ཀུན། རྟག་ཏུ་ཁྱོད་ལ་བསྲུང་བར་འགྱུར། །ཞེས་བརྗོད་པར་བྱའོ། །ཆོས་ཀྱི་འཁོར་ལོའི་རྗེས་སུ་གནང་བའོ། །དེ་ནས་ཐུན་མོང་གི་རྗེས་གནང་ཕྲ་མོ་ནི། དང་པོར་གླུ་དང་གར་གྱི་རྗེས་སུ་གནང་པ་ནི། ལུས་ཅན་རྣམས་ལ་དམ་ཆོས་ནི། །ཁྱོད་ཀྱིས་གླུ་ནི་བླང་བར་གྱིས། །དེ་ནས་རྣལ་འབྱོར་མ་དེ་དང་། །མྱུར་དུ་བདེ་བ་མྱོང་བར་འགྱུར། །དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་ཏེ་རྣམ་རོལ་པ། །ཤེས་རབ་ཐབས་ཀྱིས་སྙེམས་ཆེན་གྱིས། །གར་མཆོག་བདེ་བའི་དགའ་སྟོན་གྱིས། །ཞེས་བརྗོད་དོ། །གཉིས་པ་ཕྲེང་བའི་རྗེས་གནང་ལ། སྒེག་དང་བཅས་པ་ཕྲེང་བ་འཆང་། །སངས་རྒྱས་ཚོགས་དང་རྣལ་འབྱོར་མ། །དེ་ནི་འབྲལ་བར་མི་འགྱུར་ཏེ། །ཕྲེང་བ་འདི་ནི་རྒྱན་ཡིན་ནོ། །གསུམ་པ་དྲི་བཟང་པོ་དང་སྤོས་ཀྱི་རྗེས་གནང་ནི། ཁྱོད་ཀྱིས་རྒྱལ་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང་། རྣམ་གྲོལ་ཡེ་ཤེས་མཐོང་པ་ཡི། །བྱང་ཆུབ་ལུས་ཅན་རྣམས་ལ་བསྒོ། །ཁྱོད་ཀྱིས་རྒྱལ་ལ་སྤོས་ཕུལ་ལ། །བརཏལ་ཞུགས་བཟང་པོ་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །རང་བཞིན་གྱིས་ནི་འགྲུབ་པར་འགྱུར། །བཞི་པ་མར་མེའི་རྗེས་གནང་ནི། ཆོས་ཀྱི་མར་མེ་ལེགས་སྦར་བས། །པདྨ་གར་དབང་རང་ཉིད་དེ། །འགྲོ་རྣམས་མ་རིག་མདོངས་པ་ལ། །ཡེ་ཤེས་སྒྲོན་མེ་སྤར་བར་གྱིས། །དེ་ནས་གསེར་གྱི་ཐུར་མ་སྨན་དང་བཅས་པ་བྱིན་ལ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཏྃ་ལཾ་ཧྲིཿས་ཧོ་ཞེས་བརྗོད་ནས་མདའ་གཞུ་ལག་ཏུ་བྱིན་ལ་བདུད་རྣམས་འབིགས་པར་བྱེད་པའི་བསམ་པས། ཤེས་རབ་ཐབས་ཀྱི་སྦྱོར་བ་ཡིས། །ཕྱོགས་བཞི་རྣམས་དང་སྟེང་འོག་ཏུ། །སྐྱོབ་པའི་ཐབས་ཀྱིས་སྦྱོར་བ་ཡིས། བདུད་བཞི་རྣམ་པར་གཞོམ་པར་བྱ། །སརྦ་ཏ་ཐཱ་ག་ཏ་ཨ་ནུ་ར་ག་ཡཱ་སྭཿ བདུན་པ་འཕྲིན་ལས་ཀྱི་རྗེས་གནང་ལ། ཞི་དང་རྒྱས་དང་དབང་དང་དགུག །སྡང་བར་བྱ་དང་གནོད་སོགས་དང་། །བསད་དང་བསྐྲད་པ་ལ་སོགས་པའི། །ལས་དེ་རྣམས་ནི་བསྒྲུབ་པར་གྱིས། །རལ་གྲི་མིག་སྨན་ས་འོག་དང་། །རི་ལུ་མི་སྣང་མཁའ་སྤྱོད་དང་། །གནོད་སྦྱིན་མོ་དང་བཅུད་ཀྱིས་ལེན། །དེ་ཡང་ཅི་དགའ་གྲུབ་པར་གྱིས། །ཐུན་མོང་གི་རྗེས་སུ་གནང་བའོ། །དམ་ཚིག་གི་རྗེས་སུ་གནང་བ་ལ། མཁས་པས་དམ་ཚིག་བསྒྲགས་པར་བྱ། །ཐབས་དང་ཤེས་རབ་སེམས་ཀྱི་ནི། །མི་བྱ་བ་ནི་ཅི་ཡང་མེད། །རྟག་ཏུ་དོགས་མེད་བྱས་གྱུར་ནས། །འདོད་པ་ལྔ་ལ་ལོངས་སྤྱོད་བྱ། །ཇི་ལྟ་ཇི་ལྟར་འདུལ་འགྱུར་བ། །སེམས་ཅན་དེ་ཡི་རང་བཞིན་གྱི། །དེ་ལྟ་དེ་ལྟར་སེམས་ཅན་དོན། །འདོད་ཆགས་སོགས་པས་དག་པར་བྱ། །གང་གཞན་དམ་ཚིག་ལ་སྡང་པ། །དམ་ཚིག་ཉམས་པའི་སྐྱེ་བོ་དང་། །འབད་པ་ཡིས་ནི་བསད་པར་བྱ། །སངས་རྒྱས་བསྟན་པ་སྐྱོང་བ་ལ། །སེམས་ཅན་ཀུན་ལ་ཕན་དོན་ཕྱིར། །སངས་རྒྱས་རྣལ་འབྱོར་རབ་སྦྱོར་བས། །ཕ་རོལ་པོ་ཡི་སེམས་ཕྲོགས་ཀྱང་། །སྡིག་པས་གོས་པར་མི་འགྱུར་རོ། །འདོད་ཆགས་ལྟ་བུའི་བདེ་མེད་པས། །སྐྱེ་བོ་རྣམས་ལ་རྟག་ཏུ་སྦྱིན། །སེམས་ཅན་དོན་དུ་གཞན་བུད་མེད། །བསྟེན་པས་བསོད་ནམས་ཐོབ་པར་འགྱུར། །སངས་རྒྱས་ལ་སོགས་སྨོད་པ་ལ། །རིན་ཆེན་འབྱུང་ལྡན་རྣལ་འབྱོར་གྱིས། །ཚིག་ནི་རྩུབ་པོ་ལ་སོགས་པ། །བླ་མེད་དངོས་གྲུབ་ཐོབ་པར་འགྱུར། །འོད་དཔག་མེད་ཀྱི་བརྫུན་ངག་སྨྲ། །དོན་ཡོད་གྲུབ་མཆོག་ཏིང་འཛིན་གྱིས། །བློ་ལྡན་རྒྱུ་སོགས་ཆོ་ག་ཡིན། །དམ་ཚིག་དག་པ་བསྟེན་པར་བྱ། །འདི་དག་ནི་མཆོག་གི་དམ་ཚིག་ཞེས་སུ་བཤད་དོ། །གཞན་ཡང་རྒྱུད་ཐམས་ཅད་ཀྱི་ནང་ན་དམ་ཚིག་ཉེ་བར་བསྡུས་པ། བླ་མ་དམ་པ་མི་བརྙས་དང་། །བདེ་གཤེགས་བཀའ་ལས་མི་འདའ་ཞིང་། །རྡོ་རྗེ་སྤུན་ལ་ཁྲོ་མི་བྱ། །འགྲོ་ལ་བྱམས་པ་མི་སྤང་ཞིང་། །བྱང་ཆུབ་སེམས་ནི་ཉམས་མི་བྱ། །རང་གཞན་གྲུབ་མཐའ་ལ་མི་སྨད། །གསང་བ་མ་སྨིན་ལ་མི་བསྒྲག །རང་གི་ཕུང་པོ་བརྙས་མི་བྱ། །དག་པའི་ཆོས་ལ་སོམ་ཉི་སྤངས། །གདུག་པ་ཅན་ལ་བྱམས་མི་བྱ། །མིང་བྲལ་དོན་གྱི་སྒྲོ་འདོགས་སྤང་། །དད་ལྡན་སེམས་ཅན་སུན་མི་དབྱུང་། །དམ་ཚིག་རྙེད་པ་མི་སྤང་ཞིང་། །ཤེས་རབ་བུད་མེད་སྨད་མི་བྱ། །གལ་ཏེ་འགལ་བར་གྱུར་པ་ན། །རྩ་བའི་ལྟུང་བ་བཅུ་བཞིར་འགྱུར། དམ་མེད་རིག་མ་མི་བསྟེན་དང་། །ཚོགས་ཀྱི་འཁོར་ལོར་བརྩོད་མི་བྱ། །མ་གསུངས་པ་ཡི་རིག་མ་ལས། །དམ་ཚིག་བདུད་རྩི་བླང་མི་བྱ། །གསང་ཆོས་དུས་ལྡན་བསྟན་པར་བྱ། །ཆོས་འདྲི་བྲེ་མོའི་གཏམ་མི་བྱ། །ཉན་ཐོས་ནང་དུ་ཞག་བདུན་མིན། །རྣལ་འབྱོར་ཡེ་ཤེས་མི་ཤེས་པར། །རྡོ་རྗེ་འཛིན་པར་ཁས་མི་བླང་། །འདི་ལྟར་ཚངས་སྤྱོད་ཉི་ཤུ་གཉིས། །ཉམས་པ་མེད་པར་རབ་བསྟེན་ནས། །རྡོ་རྗེ་སེམས་དཔའི་གོ་འཕང་འགྱུར། །ཞེས་རྒྱས་བསྡུས་ཅི་རིགས་ཀྱིས་བསྟན་པར་བྱའོ། །དེ་ནས་ལུང་བསྟན་པ་ནི། སློབ་དཔོན་དཔལ་མཁའ་འགྲོ་རྒྱ་མཚོའི་གཟུགས་ཀྱིས། ལག་པ་གཡོན་པས་ཆོས་གོས་བཟུང་ནས་སེང་གེའི་རྣ་ལྟར་བྱས་ཏེ། གཡས་པ་མི་འཇིགས་པའི་ཕྱག་རྒྱ་བྱས་ལ་ལུང་བསྟན་ཏེ། དེ་རིང་ངས་ཁྱོད་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་བྱའི་ཕྱིར། །སྲིད་པའི་ངན་འགྲོ་ལས་བཏོན་ནོ། ཨོཾ་ན་མ་སརྦ་ཏ་ཐཱ་ག་ཏ་སིད་དྷི་ས་མ་ཡ་སྟོཾ་བྷུར་བྷུ་ཝ་སྭ། ཀྱེ་དཔལ་རྡོ་རྗེ་ཆེ་གེ་མོ་ཞེས་བྱ་བ་མ་འོངས་པའི་དུས་སུ་གསང་བའི་མཚན་དང་མཐུན་པའི་དེ་བཞིན་གཤེགས་པར་འགྱུར་རོ། །ཞེས་ལུང་བསྟན་ནོ། །དབུགས་དབྱུང་བ་ནི། གསང་མཆོག་དཀྱིལ་འཁོར་དམ་པར་ནི། །མཐོང་ནས་སུ་ནི་རབ་ཞུགས་པས། །སྡིག་པ་ཀུན་ལས་རྣམ་པར་གྲོལ། །དེ་རིང་ལེགས་པར་གནས་པར་གྱུར། །བདེ་ཆེན་ཐེག་པ་འདི་ལས་ནི། སླར་ཡང་འཆིང་བ་ཡོད་མ་ཡིན། །མི་ཚུགས་པ་དང་མི་ཆོད་པར། འཇིགས་པ་མེད་པས་རོལ་པར་གྱིས། །སྲིད་པའི་སྡུག་བསྔལ་ཀུན་ལས་འདས། །སྲིད་པ་ཤིན་ཏུ་དག་པའི་ཕྱིར། དངོས་གྲུབ་དམ་ཚིག་སྡོམ་པ་ནི། །འདི་ནི་རྟག་ཏུ་བསྲུང་བར་གྱིས། །ཞེས་གསུངས་པས། རྡོ་རྗེ་ཐེག་པ་ལས་རབ་ཏུ་ཞུགས་ནས་འཁོར་བའི་སྡུག་བསྔལ་ལས་རྣམ་པར་གྲོལ་བར་གྱུར་ཏོ། །གཟེངས་བསྟོད་པར་བྱ་སྟེ། འདི་ལྟར་དཔལ་མཁའ་འགྲོ་རྒྱ་མཚོའི་དཀྱིལ་འཁོར་ཆེན་པོར། དབང་བསྐུར་བ་ཐོབ་ནས། སངས་རྒྱས་སུ་འགྱུར་བས་ཐེ་ཚོམ་མེད་དེ། དེ་རིང་རྡོ་རྗེ་འཛིན་བཅས་པ། །སངས་རྒྱས་ཀུན་གྱིས་དབང་བསྐུར་བ། །ཁམས་གསུམ་གྱི་ནི་རྒྱལ་སྲིད་ཆེ། །རྒྱལ་པོ་བདག་པོས་གནས་པ་ཡིན། །དེ་རིང་བདུད་ལས་རྒྱལ་བྱས་ནས། །གྲོང་ཁྱེར་མཆོག་ཏུ་རབ་ཏུ་ཞུགས། །དེ་རིང་སངས་རྒྱས་ཉིད་ཐོབ་པར། །ཁྱོད་ཉིད་འགྱུར་བ་ཐེ་ཚོམ་མེད། །ཞེས་གསུངས་པས། མ་འོངས་པའི་དུས་ན་ཁམས་གསུམ་ཐམས་ཅད་དབང་ཞིང་། ཆོས་ཀྱི་འཁོར་ལོ་བསྒྱུར་བའི་རྒྱལ་པོ་འཁོར་ལོ་བཅུ་གཉིས་ཀྱི་མངའ་བདག་དཔལ་མཁའ་འགྲོ་རྒྱ་མཚོ་ཧེ་རུ་ཀའི་གོ་འཕང་ཐོབ་པར་འགྱུར་ཏོ། །ལུང་བསྟན་པ་དང་དབུགས་དབྱུང་བ་དང་གཟེངས་བསྟོད་པའི་ཆོ་གའོ། །དེ་ནས་སློབ་མས། བླ་མའི་ཞབས་གཉིས་ལ་ཕྱག་འཚལ་ནས། མེ་ཏོག་དང་བཅས་པའི་ཐལ་མོས། དེ་རིང་བདག་སྐྱེས་བུར་བཅས། །གང་དེར་ལེགས་པར་རབ་ཏུ་གནས། །དམ་ཚིག་ལྷ་རྣམས་དང་མཉམ་མོ། །རང་བྱུང་དུ་ནི་ད་ལྟར་སྐྱེས། །ཇི་ལྟར་གསུངས་ཤིང་བསྟན་པ་ཀུན། །བདག་གིས་དེ་ལྟར་བགྱིད་པར་འཚལ། །ཞེས་བརྗོད་དོ། །རྡོ་རྗེ་སློབ་དཔོན་གྱི་དབང་གི་ཆོ་ག་དང་། རྗེས་སུ་གནང་བ་དང་བཅས་པའི་ཆོ་གའོ། །རྡོ་རྗེ་སློབ་དཔོན་མཆོད་པའི་ཆོ་ག་དང་། དཀྱིལ་འཁོར་གཤེགས་སུ་གསོལ་བ་ནི། དང་པོ་རྒྱུད་ལས་གསུངས་པ། སློབ་དཔོན་མཆོད་བྱ་ཡང་དག་པར། །རྡོ་རྗེ་འཆང་དུ་བྱས་ནས་ནི། །མུ་ཏིག་གསེར་དང་རིན་ཆེན་རྣམས། །གླང་རྟ་ས་གཞི་ཡུལ་ལྗོངས་དང་། །བྲན་ཕོ་བྲན་མོ་འཁོར་རྣམས་དང་། །ཆུང་མ་ཕུན་སུམ་ཚོགས་ཀུན་དང་། །གོས་ཟུང་དུ་མ་རྣམས་དང་ནི། དགྱེས་པའམ་ས་ལ་གང་ཅུང་ཟད། །བདག་ཏུ་ལྟ་བ་དང་བྲལ་བས། །དབུལ་བྱ་གཙོ་བོར་ཞི་བར་གྱིས། །བདག་ཉིད་དངོས་པོ་ཐམས་ཅད་ཀྱིས། །ཕྱག་བྱས་ནས་ནི་དབུལ་བར་བྱ། །ཞེས་གསུངས་པའི་རིམ་པ་བཞིན་ཅི་ནུས་ཀྱིས་རྡོ་རྗེ་སློབ་དཔོན་མཆོད་པར་བྱའོ། །གཉིས་པ་དཀྱིལ་འཁོར་གཤེགས་སུ་གསོལ་བ་ལ། གོང་གི་དབང་བསྐུར་བ་བྱས་ནས། གཏོར་མའི་ཆོ་ག་ལས་བྱུང་བ་བཞིན་དུ། འབྱུང་པོ་རྣམས་ལ་གཏོར་མ་སྦྱིན་ནོ། །དགེ་སློང་དང་དགེ་འདུན་འདུས་པའི་ཚོགས་ལ་དགའ་སྟོན་བྱས་ཏེ། དཀྱིལ་འཁོར་བ་ཐམས་ཅད་ལ་ཕྱི་དང་ནང་གི་མཆོད་པ་དང་བསྟོད་པ་བྱས་ནས། མཁྱེན་པར་གསོལ་བ་ནི། གང་ཡང་སྐྱེ་བོའི་དངོས་གྱུར་དང་། །མ་རྙེད་རྣལ་འབྱོར་དབང་ཕྱིར་དང་། །ཉེ་བར་དགོངས་པ་མ་ཚང་པའམ། །དྲན་པ་རབ་ཏུ་རྨོངས་བྱས་པ། དེ་དག་བཟོད་པར་མཛད་དུ་གསོལ། །མཁྱེན་པར་གསོལ་ནས། གཤེགས་སུ་གསོལ་བ་ནི། ཨོཾ་ཁྱེད་ཀྱི་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་བྱོན་པར་མཛད་དུ་གསོལ། ཨོཾ་ཨཱཿཧཱུྃ་བཛྲ་མུཿཞེས་བརྗོད་ནས། འོད་ཟེར་གྱིས་ཁམས་གསུམ་པ་ཐམས་ཅད་ལ་ཕོག་ནས། སླར་འོད་ཟེར་གྱི་ཚུལ་དུ་བསྡུས་ནས་རང་གི་ལུས་ལ་ཐིམ་པར་བལྟས་ལ། དབུས་ཀྱི་རྡུལ་ཚོན་བླངས་ཏེ། སྤྱི་བོར་བཞག་ནས་ཐམས་ཅད་ལེགས་པར་བསྡུས་ལ། གཞན་མཆོད་པ་རྣམས་ལ་སྦྱིན་པར་བྱ། ལྷག་མ་ཐམས་ཅད་བུམ་པར་བསྡུས་ཏེ། ལས་ཐམས་ཅད་པའི་བུམ་པ་དང་མཆོད་པའི་ཚོགས་ཀྱིས་བསྐོར་ནས་ཆུ་བོའི་འགྲམ་དུ་བསྐྱལ་ལ། ཆུ་བོའི་འགྲམ་དེར་པད་མ་འདབ་བརྒྱད་པ་བྲིས་པའི་སྟེང་དུ་རྡུལ་ཚོན་བཞག་ལ། མཆོད་བསྟོད་བྱས་ནས། ཀླུ་རྣམས་ཀྱིས་གདན་དྲངས་པར་བསམས་ལ་ཆུ་བོ་ལ་དོར་རོ། །སླར་ཡང་བུམ་པ་ལེགས་པར་བཤམས་ནས་ཆུ་གཙང་མས་བཀང་ལ། གནས་ཁང་དུ་ཁྲུས་བྱས་བཀྲ་ཤིས་བརྗོད་དོ། །དཔལ་མཁའ་འགྲོ་རྒྱ་མཚོའི་རྣལ་འབྱོར་བླ་ན་མེད་པའི་རྒྱུད་ཀྱི་རྒྱལ་པོ་ཆེན་པོའི་མ་སྨིན་པ་སྨིན་པར་བྱེད་པའི་དབང་གི་ཆོ་ག །གྲུབ་པའི་སློབ་དཔོན་པད་མ་བཛྲའི་ཞལ་སྔ་ནས་དང་། ཀ་མ་ལ་དྷེ་ནུ་ལས་རིམ་པར་བྱུང་བ། པཎ་ཊི་ཏ་ཛ་ཡ་སེ་ནའི་ཆོ་ག་ལྟར་སྙིགས་མའི་དུས་ན་གངས་ཅན་གྱི་རྒྱུད་དུ་བྱུང་བ་རྡོ་རྗེའི་ཐེག་པའི་ཚུལ་ཅུང་ཟད་རིག་ཅིང་མོས་པ་ལམ་དུ་བྱེད་པ་རོལ་པའི་རྡོ་རྗེའི་མིང་ཅན་གྱི། གསང་སྔགས་ཀྱི་བློ་གྲོས་རྒྱས་ཤིང་དགེ་བའི་བཤེས་གཉེན་དུ་མ་རྣམས་ཀྱིས་བསྐུལ་བ་དང་བླ་མའི་མན་ངག་ཟབ་མོ་རྒྱུད་འགྲེལ་གྱི་དབུས་སུ་འཐོར་བ་རྣམས་དོན་དུ་གཉེར་བའི་སྐྱེས་བུ་རྣམས་ལ་ཕན་འདགས་པའི་དོན་དུ་བྲིས་པའོ། །དཔལ་ལྡན་རྒྱུད་རྒྱལ་བླ་མེད་རྒྱུད་ཀྱི་ལེགས་པར་གསུངས་པ་གང་དེའི། །རྒྱལ་སྲས་སེམས་དཔའ་མཁས་གྲུབ་རྣམས་ཀྱིས་ལེགས་པར་སྤེལ་བར་མཛད་པ་དང་། །སྣོད་དང་ལྡན་པའི་གདུལ་བྱ་རྣམས་ལ་སྨིན་པར་མཛད་པའི་དོན་བྱུང་བ། །བླ་མའི་མན་ངག་བདུད་རྩིའི་ཆུ་རྒྱུན་རང་བྱུང་རྡོ་རྗེས་སྤེལ་བ་ཡིན། །འདི་ལས་བྱུང་བའི་དགེ་བ་ཅི་ཡོད་པ། །རིགས་ལྡན་སྐྱེས་ཐ་རྣམས་ཀྱིས་རྟོགས་པ་དང་། །ནམ་མཁའི་མཐས་གཏུགས་གྱུར་པའི་སེམས་ཅན་རྣམས། །རྡོ་རྗེ་འཆང་གི་ཡེ་ཤེས་རྟོགས་པར་ཤོག ཅུང་ཟད་འགལ་འཁྲུལ་ལྡན་པར་གྱུར་སྲིད་ན། བླ་མ་མཁའ་འགྲོའི་ཚོགས་ལ་བཟོད་པར་གསོལ། བརྒྱུད་པ་ནི། རྡོ་རྗེ་འཆང་བ་གསང་བའི་བདག་པོ་དང་། །སྤྱན་རས་གཟིགས་དབང་པད་མ་བཛྲ་ཡི། །གསུང་ཟེར་པད་མའི་མྱུ་གུས་འགྲེལ་མཛད་དེ། །ཤ་བ་རི་དང་ཨ་བ་དྷུ་ཏི་པ། །རྣལ་འབྱོར་དབང་ཕྱུག་ཀ་མ་ལ་བཛྲ། །མཁས་མཆོག་ཛ་ཡ་སེ་ནས་རིན་ཆེན་བདུན། །སྤྲོས་མཛད་རྒྱུད་འགྲེལ་གདམས་པར་བཅས་པ་རྣམས། །སྒྲ་བསྒྱུར་དཔལ་མཆོག་དང་པོའི་རྡོ་རྗེ་དང་། །དར་མ་ཡོན་ཏན་གཉིས་ཀྱིས་ལེགས་པར་བསྒྱུར། །བླ་མ་རྒྱ་དང་སཾ་ག་ལཀྵ་ལ། སྒྲུབ་ཐབས་ཡན་ལག་བཅས་པ་ཁོ་བོས་ཐོས། །རྒྱ་ཡི་སློབ་མ་བསྒྲད་པས་ཚུལ་རིན་ལ། འགྲེལ་བཤད་དབང་བཀར་བཅས་པ་བརྒྱུད་པ་ཡིན། །གཞན་ཡང་རྒྱུད་ཀྱང་ལུང་གི་བརྒྱུད་པ་ནི། །དར་མ་ཡོན་ཏན་ས་སྐྱ་པཎྜྻི་ཏ། །སྐྱོབ་པ་དཔལ་དང་མངའ་རིས་པ་དང་ནི། །རིན་སྤུངས་སྙལ་སྡེ་ཚུལ་ཁྲིམས་རིན་ཆེན་ལ། །རང་བྱུང་རྡོ་རྗེ་ཞེས་བྱས་གསལ་བར་ཐོས། །བདག་གིས་རྒྱ་ཆེར་གཞན་ལ་བསྒྲགས་པ་ཡིན། །སྟག་ལོ་ཟླ་བ་བདུན་པའི་ཚེས་བརྒྱད་ལ། ཕོ་བྲང་ཆེན་པོ་ཤང་རྡོའི་ཞུ་གུ་དགོན་དུ། །ཆོས་རྗེ་རིན་པོ་ཆེ་རང་བྱུང་རྡོ་རྗེས་མཛད་པ་རྫོགས་སོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།

ཤེས་རབ་སྣང་བའི་སྒྲུབ་ཐབས་ཕག་མོ་དཀར་མོ།

༄༅། །ཤེས་རབ་སྣང་བའི་སྒྲུབ་ཐབས་ཕག་མོ་དཀར་མོ་བཞུགས་སོ། །

༄༅། །དཔལ་རྡོ་རྗེ་ཕག་མོ་ལ་ཕྱག་འཚལ་ལོ། །དེ་ལ་མཚན་མོའི་ཐུན་ཕྱེད་ཀྱི་རྗེས་ལ། ཆོ་ག་བཞིན་དུ་ལངས་ཏེ་དུར་ཁྲོད་ལ་སོགས་པ་ཡིད་དང་རྗེས་སུ་མཐུན་པའི་གནས་ཙན་དན་མཆོག་ལ་སོགས་པས་བྱུགས་ནས། མེ་ཏོག་སྣ་ཚོགས་པས་ཉེ་བར་མཛེས་པར་བྱས་ལ་མངོན་དུ་གྱུར་པའི་རོ་ཡི་གདན་ཀྱང་རུང་སྟེ། ཇི་ལྟར་བདེ་བར་འདུག་ནས། བྱམས་པ་ལ་སོགས་མངོན་དུ་འགྲོ་བས་རང་གི་སྙིང་ཁར་ཨའི་རྣམ་པ་ལས་སྐྱེས་པའི་ཉི་མའི་དཀྱིལ་འཁོར་གྱི་ཡིག་གེ་ཧྲཱིཿདཀར་པོའི་འོད་ཟེར་གྱི་དྲ་བས་རབ་ཏུ་གསལ་བར་བྱས་ནས། རྡོ་རྗེ་ཕག་མོས་གཙོ་བྱས་པའི་བླ་མ་དང་། རྣལ་འབྱོར་མ་དང་དེ་བཞིན་གཤེགས་པ་དང་། བྱང་ཆུབ་སེམས་དཔའ་རྣམས་མདུན་དུ་གནས་ཇི་ལྟར་བར་ཡང་དག་པར་བལྟ་ལ་སྙིང་ཁའི་ས་བོན་ལས་འཐོན་པའི་ལྷ་མོ་རྣམས་ཀྱིས་མཆོད་ཡོན་ལ་སོགས་པ་སྔོན་དུ་འགྲོ་བས། མཆོད་རྟེན་ལ་ཕྱག་འཚལ་བ་དང་། སྡིག་པ་བཤགས་པ་དང་། སླན་ཆད་མི་བྱེད་པར་བསྡོམས་པ་དང་། བསོད་ནམས་ལ་རྗེས་སུ་ཡི་རངས་བ་དང་། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་བརྟེན་པ་དང་། བདག་ཉིད་ཀྱི་དངོས་པོ་འབུལ་བ་དང་། བསྐུལ་བ་དང་། གསོལ་བ་གདབ་པ་རྣམས་ཆོ་ག་བཞིན་དུ་བྱས་ཤིང་བསོད་ནམས་ཡོངས་སུ་བསྔོས་ཏེ་སྟོང་པ་ཉིད་ཀྱི་ཡེ་ཤེས་རབ་ཏུ་རྟོགས་པར་བྱ་བའི་ཕྱིར་སྤྱི་བོར་ཐལ་མོ་སྦྱར་ལ། དེ་བཞིན་གཤེགས་པ་རྣམས་ཀྱིས་མངོན་པར་འདོད་པའི་དངོས་གྲུབ་ཐམས་ཅད་སེམས་ཅན་ལ་སངས་རྒྱས་པར་མཛད་དུ་གསོལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་མཛད་དུ་གསོལ། ཞེས་གསོལ་བ་གདབ་པ་སྔོན་དུ་སོང་བས། ཨོཾ་སྭ་བྷ་བཱ་ཤུ་དྷོ་སརྦ་དྷརྨ་སྭ་བྷ་བྷ་ཤུད་དྷོ་ཧྃ། ཞེས་བརྗོད་དེ་ཐམས་ཅད་སྟོང་པ་ཉིད་དུ་བསྒོམ། ཨོཾ་ཤུ་ནྱ་ཏ་ཛྙྱ་ན་བཛྲ་སྭ་བྷ་ཝ་ཨད་མ་ཀོ་ཧྃ། ཞེས་ང་རྒྱལ་བྱའོ། །དེ་ནས་རང་གི་སེམས་པྃ་དམར་པོ་ཡོངས་སུ་གྱུར་པ་ལས། པད་མའི་སྟེང་དུ་ཨ་ལས་སྐྱེས་པའི་ཉི་མའི་དཀྱིལ་འཁོར་ལ། ཡི་གེ་ཧཱུྃ་དཀར་པོ་ལས་རྡོ་རྗེ་དཀར་པོ་རྩེ་ལྔ་པ་ཉི་མ་ལ་གནས་པའི་ཡི་གེ་ཧྲཱིཿདཀར་པོས་མཚན་པ་བསྒོམས་ནས། སྤྲོ་བ་དང་བསྡུ་བ་སྔོན་དུ་འགྲོ་བས། དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་ཕག་མོ་སྟོན་ཀའི་ཟླ་བ་ལྟར་དཀར་བ། ལོ་བཅུ་དྲུག་ལོན་པའི་རྣམ་པ་ཅན། སྤྱན་གསུམ་དམར་ལ་ཟླུམ་པ། ཞལ་མཆེ་བ་ཅུང་ཟད་གཙིགས་པ། མེ་ཏོག་སྣ་ཚོགས་པས་མཛེས་པ། སྐྲ་ཕྱེད་གྲོལ་ཞིང་ཕྱེད་བཅིངས་པས་མཛེས་པ། རྡོ་རྗེ་ནག་པོའི་ཕྲེང་བ་གཉིས་ཀྱི་དབུས་སུ་ཐོད་པ་ཡི་ཕྲེང་བ་བཅིངས་པའི་ཟུར་ཕུད་གསུམ་པ་ཅན། འཁོར་ལོ་དང་། རྣ་རྒྱན་དང་། མགུལ་བརྒྱན་དང་། གདུག་གུ་དང་འོག་ཕག་གི་བརྒྱན་པ། ཕྱག་གཡས་པ་ན་བ་དན་ཡོངས་སུ་བསྐྱོད་པའི་མཛེས་པའི་རྡོ་རྗེ་མི་ཤེས་པའི་སྐྱེས་བུ་འཇིག་པར་བྱེད་པ་མོ། གཡོན་གྱི་གྲུ་ཁུགས་ན་ཁ་ཊྶཱྃ་གའི་ཡུ་བ་དཀར་པོ། མགོ་བོ་རྩེ་བཞི་པ། སྟེང་ནག་པོ་རྩེ་ལྔ་པ། རྗེས་སུ་འབྲེལ་བའི་མགོ་བོ་སྐམ་པོ་དང་། རྙིང་པ་དང་རློན་པ་དང་། སྣ་ཚོགས་རྡོ་རྗེ་དང་། གསེར་གྱི་བུམ་པའི་རྩ་བ་ལ་བཏགས་པའི་དྲིལ་བུ་ཕྲ་མོའི་སྒྲ་སྒྲོགས་པ་དང་། སྣ་ཚོགས་བ་དན་གྱིས་མཛེས་པའི་ཡུ་བ་དཔུང་པ་ལ་བརྟེན་པ། ཕྱག་གཡོན་ན་བདུད་བཞིའི་ཁྲག་གིས་བཀང་བའི་པད་མའི་སྣོད་བསྣམས་པ་མོ། ཁྲག་འཛག་ཅིང་བརླན་དང་བཅས་པའི་རྒྱུ་མ་ལ་རྒྱུས་པའི་མགོ་བོའི་ཕྲེང་བ་འཕྱང་བ་། པད་མ་དམར་པོའི་སྟེང་ན་ཉི་མ་ལ་གནས་པའི་ཤེས་པ་དང་བྲལ་བའི་སྐྱེས་བུ་ལ། གཡས་བརྐྱང་གཡོན་བསྐུམ་གྱི་ཞབས་ཀྱིས་བཞུགས་པ། ན་བཟའ་དང་བྲལ་བ། རབ་ཏུ་གཏུམ་པའི་ཉི་མའི་འོད་ཅན་མ། བ་སྤུའི་ཕྲེང་བ་ལས་འོད་ཟེར་རབ་ཏུ་འཕྲོ་བ་ཅན། གཟུགས་བརྙན་དང་མཚུངས་པ། སྒེག་པ་ལ་སོགས་པའི་ཉམས་དགུ་དང་ལྡན་པ། སྤྲུལ་པ་སྣ་ཚོགས་ཀྱིས་ཕྱོགས་བཅུའི་འགྲོ་བའི་དོན་ལ་བརྩོན་པ། ཐུགས་ཁར་ཉི་མ་ལ་གནས་པའི་རྡོ་རྗེ། ཉི་མ་ལ་གནས་པའི་ཡི་གེ་ཧྲཱིཿཡིས་མཚན་པ་བསྒོམ་པར་བྱའོ། །དེ་སྔགས་ཀྱི་ཕྲེང་བ་བགྲང་ཕྲེང་གི་རྣམ་པ་དཀར་པོ། འཁོར་ལོ་འཁོར་བའི་སྦྱོར་བས་ཞལ་གྱི་ནང་ནས་འཐོན་ནས། སངས་རྒྱས་ཀྱི་ཡོན་ཏན་གྱི་ཚོགས་དང་། ནོར་བུ་དང་སྔགས་དང་། སྨན་དང་། ཟླ་བ་དང་། རྒྱུ་སྐར་དང་། བསྟན་ཆོས་དང་སྒྱུ་རྩལ་ལ་སོགས་པའི་ནུས་མཐུ་རྣམས་བླངས་ཏེ་སྔགས་ཀྱི་འཁོར་ལོ་ལ་གཞུག་ཅིང་རང་གཞན་གྱིས་མི་ཤེས་པ་ཐམས་ཅད་བསྲེག་པའི་བདག་ཉིད་ཅན་དུ་བསྒོམ་པར་བྱའོ། །ཨོཾ་ཡོ་ག་ཤུ་དྷ་སརྦ་དྷརྨ་ཡོ་ག་ཤུད་དྷོ་ཧཾ། ཞེས་བརྗོད་ལ་ས་བོན་དེའི་འོད་ཀྱི་སྤྱན་དྲངས་པའི་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་བུམ་པ་བདུད་རྩིས་བཀང་བ་སྤྱི་བོར་བཞག་ཅིང་། ཇི་ལྟར་བལྟམས་པ་ཙམ་ཉིད་དེ། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་གྱིས། །ཅེས་བདག་ཉིད་ལ་དབང་བསྐུར་ནས། ཨོཾ་སརྦ་ཏ་ཐཱ་ག་ཏ་ས་མ་ཡ་ཤྲི་ཡེ་ཧཱུྃ། ཅེས་བྱིན་གྱིས་བརླབས་ལ། སྤྱི་བོར་སྣ་ཚོགས་པད་མ་ཉི་མ་ལ་གནས་པའི་མི་བསྐྱོད་པས་དབུ་རྒྱན་པ་བསམ་མོ། །དེ་ནས་མཆོད་པའི་ལྷ་མོ་རྣམས་ཀྱིས་བདག་ཉིད་ལ་མཆོད་ཅིང་བསྟོད་པར་བསམས་ནས་བདུད་རྩི་མྱང་བར་བྱ། བཟླས་པ་བྱ་བ་ནི། དྲོ་བའི་མཐར་གནས་ཡི་གེ་ལ། །མེའི་བུས་ནི་འོག་ཏུ་བརྒྱན། །ང་རོ་གསུམ་པ་སྟེང་དུ་སྦྱིན། །མཐར་ནི་ཚེག་དྲག་སྦྱར་ཏེ་བཟླ། །གང་གི་ཚེ་ལངས་པར་འདོད་པ་དེའི་ཚེ་སྔགས་ཀྱི་ཕྲེང་བ་ལྟེ་བར་གནས་པའི་ཡི་གེ་ལ་བསྟིམས་ལ། མཆོད་པ་སྔོན་དུ་འགྲོ་བར་སྨོན་ལམ་གདབ་སྟེ། བསོད་ནམས་ཡོངས་སུ་བསྔོས་ནས་ཡི་གེ་བརྒྱ་པ་ལན་གསུམ་བརྗོད་དེ། ལྷ་མོའི་ང་རྒྱལ་དང་ལྡན་པས་ཆོས་ཐམས་ཅད་དེའི་ཚུལ་དུ་རྫོགས་པར་ལྟ་ཞིང་ཅི་བདེ་བར་གནས་པར་བྱའོ། །ནམ་ཕྱེད་ཀྱི་ཐུན་ལ་ནི་ཐམས་ཅད་སྔར་བཞིན་བྱས་ནས། ཉལ་བའི་ཚེ་སྔས་སུ་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ནས་མཆོད་ལ། སེང་གེའི་ཉལ་ཐབས་ཀྱིས་ཉལ་བར་བྱའོ། །ནང་པར་སྔ་དྲོའི་ཐུན་ལ་ནི། ལྷ་མོ་རྣམས་ཀྱིས་བསླང་པས་ལངས་ཏེ་སྔར་བཞིན་དུ་བྱའོ། །གཏོར་མ་ནི་གཞན་དང་འདྲའོ། །དེ་ལྟར་བརྩོན་པའི་རྣལ་འབྱོར་པས། འབུམ་ཕྲག་བདུན་བཟླས་ན་བསྟན་ཆོས་ཐམས་ཅད་དང་། སྒྱུ་རྩལ་གྱི་ཚོགས་རྣམས་མངོན་པར་ཤེས་པར་འགྱུར་རོ། །ཡིད་གཞུངས་པ་དང་རཏལ་ཕོད་པ་དང་། འཇིགས་པ་མེད་པ་དང་། འཁོར་གྱིས་ཟིལ་མི་གནོན་པ་དང་། སྨྲ་མཁས་པར་འགྱུར་རོ། །རིམས་ནད་དང་། དུག་དང་། མཁའ་འགྲོ་མ་ལ་སོགས་པའི་གནོད་པ་མེད་པར་འགྱུར་རོ། །གང་གི་ལག་ཏུ་བྱིན་པ་དེ་རྨོངས་པ་ཡིན་ཡང་མཉན་སྔགས་མཁན་དུ་འགྱུར་རོ། །ཤེས་རབ་སྣང་བའི་སྒྲུབ་ཐབས་སློབ་དཔོན་ཀོ་ཀ་སྦྱིན་གྱིས་མཛད་པ་ལས། རང་བྱུང་རྡོ་རྗེས་བསྡུས་པ་རྫོགས་སོ།། ༈ །།མེ་མཆོད་བཞུགས་སོ། །བཅོམ་ལྡན་འདས་འོད་མི་འགྱུར་ལ་ཕྱག་འཚལ་ལོ། །སྦྱིན་བསྲེག་བྱེད་པར་འདོད་པས། ལྷ་གང་ཡང་རུང་བའི་ཞི་རྒྱས་དབང་དྲག་གི་བཅའ་གཞི་ཡོངས་སུ་རྫོགས་ནས། ཆོ་གའི་རིམ་པ་ནི་ཐོག་མར་སེམས་བསྐྱེད། ཐབ་བསངས། མེ་སྦར་ཏེ། ཨོཾ་ཨག་ནེ་ཡེ་དྷེ་བ་ཧ་བ་བྷྱ། ཀ་བ་བྷྱ་བྷན་དྷ་ཡེ། དྷི་བྷྱ་དྷྱ་པ་ཏ་ཡེ་ཛ་ལ་རྃ། ཞེས་པས་མེ་སྦར། དེ་ནས་མར་གྱི་དགང་བླུགས་གསུམ་ཕུལ་ལ། པྲ་བརྟག །ཞི་རྒྱས་ལ་སྒྲ་མེད་པའི་དཀར་སེར་མཆོག་ཏུ་བཟང་། དབང་དྲག་ལ་དམར་ནག་སྒྲ་དང་བཅས་པ་བཟང་། ལྟས་མི་བཟང་པ་ལ་ཡི་དམ་ལྷའི་སྔགས་ཀྱིས་བསང་། དེ་ནས་མེ་ལྷ་བསྐྱེད་པར་བྱ་སྟེ། ཞལ་ཅིག་ཕྱག་བཞི། གཡས་དབྱུག་ཐོ་མཆོད་སྦྱིན། གཡོན་བགྲང་ཕྲེང་དང་རིལ་བ་སྤྱི་བླུགས་བསྣམས་པ། ལས་གང་བྱེད་པའི་ཁ་དོག་དང་མཐུན་པར་བསྐྱེད། དེ་ལ་ཆུ་གསུམ་འབུལ་བར་བྱ་སྟེ། ཨོཾ་ཨག་ནེ་ཡེ་དྷེ་བ་ཏ། ཨ་རྒྷྃ་སྭཱཧཱ། ཞེས་པ་དང་། གྷན་དྷྃ་དང་། པ་ཏྱྃ་པྲ་ཏི་ཛྷ་ཡེ་སྭཱཧཱ། ཞེས་ཕུལ་ལ་སྤྱན་དྲངས་པ་ནི། ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འབར་བའི་ནང་དུ་བཞུགས་སུ་གསོལ། །ཨག་ནེ་ཡེ་དྷེ་བ་ཏ་ས་མ་ཡ་ཛ་ཛ། ས་མ་ཡ་ཏི་སྟ་ལྷན་ཞེས་སྤྱན་དྲངས་ཞིང་བཞུགས་སུ་གསོལ། དེ་ནས་ཨག་ནེ་ཡེ་དྷེ་བ་ཏ་ཡེ་སྭཱ་ཧཱ། ཞེས་མར་འབུལ། ཨོཾ་ཨ་པྲ་ཏི་ཧ་སྟ་བཛྲ་ཡ་སྭཱ་ཧཱ། ཡམ་ཤིང་ངོ་། །ཨོཾ་བཛྲ་ཨ་ཡུ་ཤེ་སྭཱ་ཧཱ། འཇག་མའོ། །ཨོཾ་བཛྲ་ཡག་ཉ་ཡེ་སྭཱ་ཧཱ། དུར་བའོ། །ཨོཾ་སརྦ་པ་པྃ་ད་དྷ་ན་བཛྲ་ཡེ་སྭཱ་ཧཱ། ཏིལ་ལོ། །ཨོཾ་སརྦ་སྟ་བྷན་ཡཱེ་སྭཱ་ཧཱ། ཞོ་ཟན་ནོ། །ཨོཾ་བཛྲ་བྷི་ཛ་ཡེ་སྭཱཧཱ། སོ་བའོ། །ཨོཾ་མཧཱ་བྷེ་ག་ཡེ་སྭཱ་ཧཱ། ནས་སོ། །ཨོཾ་བཛྲ་གྷ་སྨ་རི་ཡེ་སྭཱ་ཧཱ། གྲོའོ། །ཨོཾ་མཧཱ་པ་ལ་ཡེ་སྭཱ་ཧཱ། སྲན་མའོ། །ཨོཾ་བཛྲ་ཕུ་ཏྲ་ཡེ་སྭཱ་ཧཱ། འབྲས་སོ། །ཨོཾ་བཛྲ་ཏི་པ་ལ་ཡེ་སྭཱ་ཧཱ། དར་དཀར་དང་རྒྱ་ཤུག་ལ་སོགས་པའོ། །དེ་ནས་མཆོད་པ་ཅི་རིགས་སུ་ཕུལ་ལ། བསྟོད་པ་ནི། གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྟེར་མཛད་པ། བདག་གཞན་དོན་བརྩོན་ས་ལ་ཞུགས། །ཚངས་སྲས་མཆོག་ལ་ཕྱག་འཚལ་བསྟོད། །མེ་ལྷའི་རྒྱལ་པོ་དགེ་བ་མཆོག །ཚངས་སྲས་འཇིག་རྟེན་སྐྱོང་བའི་སྲས། །བགེགས་རྣམས་མ་ལུས་སེལ་མཛད་པ། །གཟི་བརྗིད་ཆེན་པོ་ཉིད་ལ་འདུད། ཉོན་མོངས་བསྲེག་པའི་ཡེ་ཤེས་འོད། །མངོན་ཤེས་རྫུ་འཕྲུལ་སྟོབས་དང་ལྡན། །ཉེས་པའི་ཚོགས་རྣམས་སེལ་མཛད་པའི། །ཐུགས་རྗེ་ཆེན་པོ་ཉིད་ལ་འདུད། །བདེན་པའི་ཚིག་ནི་མི་བསླུ་བས། འཇིག་རྟེན་སྐྱོང་བ་རྣམས་ཀྱི་རྒྱལ། །ཚངས་པར་གྱུར་པའི་ངག་དང་ལྡན། །རྣམ་པར་འདྲེན་པ་ཉིད་ལ་འདུད། །དྲང་སྲོང་ཆེན་པོ་ཁྱེད་རྣམས་ཀྱིས། །སྔོན་གྱི་ཐུགས་དམ་རྗེས་དགོངས་ལ། །དམ་བཅའ་བཞིན་དུ་མེ་ཡི་ལས། ནུས་པར་བྱིན་གྱིས་བརླབ་ཏུ་གསོལ། །ཞེས་བསྟོད་དོ། །དེ་ནས་མེ་ལྷ་གདན་ཐབས་ཀྱིས་རྒྱ་བསྐྱེད་པའམ། མེ་ཉིད་དུ་བསྒྱུར་བ་གང་འཐད་པ་བྱས་ལ། ལྷ་གང་བྱེད་པའི་བསྐྱེད་པའི་རིམ་པ་གསལ་བར་བྱས་ལ། འགའ་ཞིག་ལ་ཆུ་གསུམ་སྔོན་དུ་འགྲོ་བ་བྱ། ཡེ་ཤེས་པ་སྤྱན་དྲངས་ལ་བསྟིམ། བཞུགས་སུ་གསོལ། ཕྱག་འཚལ། དེ་ནས་རྩ་བའི་སྙིང་པོའི་བཤམ་དུ་གོང་གི་བསྲེག་རྫས་ཀྱི་བཤམ་དུ་བཏགས་ཏེ། ཅི་རིགས་སུ་འབུལ་ཞིང་འཕྲིན་ལས་རྣམ་བཞི་སོ་སོར། ཤན་ཏིང་ཀུ་རུ། པུས་ཏིང་ཀུ་རུ། པ་ཤྃ་ཀུ་རུ། མ་ར་ཡ་ཕཊ་ཅེས་སྦྱར་རོ། །དེ་ནས་གཞུང་སོ་སོ་ནས་བཤད་པའི་མཆོད་པ་དང་། བསྟོད་པ་བྱ། གཏོར་མ་འབུལ། འཕྲིན་ལས་བཞི་སོ་སོའི་གསོལ་བ་གདབ་ཅིང་། བཤགས་པ། སྨོན་ལམ། གཤེགས་སུ་གསོལ་བ་ལ་སོགས་བྱའོ། །དམ་ཚིག་པ་རང་གི་གནས་སུ་བསྡུའོ། །མེ་ལྷ་ལ་དྲིན་ལན་གྱི་ཚུལ་དུ། སླར་བསྲེག་རྫས་ཅི་རིགས་སུ་འབུལ། བཟོད་པར་གསོལ་བ་ནི། བདག་སོ་སོའི་སྐྱེ་བོར་གྱུར་པའི་དབང་གིས་རྫས་དང་ཏིང་ངེ་འཛིན་དང་། ཚིག་ལ་ལྷག་ཆད་དུ་གྱུར་པ་རྣམས་དྲང་སྲོང་ཆེན་པོ་ལ་བཟོད་པར་གསོལ་ལོ། །ཞེས་བརྗོད་ལ་རྒྱས་པར་བྱེད་པའམ། སྦྱིན་བདག་ལ་སོགས་པས་ཞུ་བ་ཡིན་ན། རྡོ་རྗེ་རྒྱ་གྲམ་ཅིག་བཟོས་ནས། ཐབ་དཀྱིལ་དུ་བཅུག་སྟེ། རྫས་རྣམས་བསྡུས་ཏེ། གོང་གི་ཧབ་བྷྱ་ཀབ་བྷྱ་ལ་སོགས་པའི་སྔགས་ཀྱི་རྗེས་སུ། ཤན་ཏིང་ཀུ་རུ། པུས་ཏིང་ཀུ་རུ། པ་ཤྃ་ཀུ་རུ་མ་ར་ཡ་ཕཊ་ལ་སོགས་པས། བསྲེག་རྫས་སུ་འབུལ་ཞིང་། འཕྲིན་ལས་བཞིའི་སྨོན་ལམ་བརྗོད་པར་བྱའོ། །དེ་ནས། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གསོལ། །རང་རང་གནས་སུ་གཤེགས་སུ་གསོལ། །སེམས་ཅན་རྣམས་ཀྱི་དོན་སླད་དུ། །སླར་ཡང་འབྱོན་པར་མཛད་དུ་གསོལ། །ཨག་ནེ་ཡེ་དྷ་བ་ཏ་བཛྲ་མུཿ ཞེས་བརྗོད་ལ་གཤེགས་སུ་གསོལ་ལོ། །བཀྲ་ཤིས་བརྗོད། དགེ་བ་བསྔོ་ཞིང་། ཞི་རྒྱས་ཀྱི་ཐལ་བ་ཆུ་ཆེན་པོའི་འགྲམ་དུ་བསྐྱལ། དབང་དྲག་ལ་མནན་པའམ་རླུང་ལ་སྦྱར་རོ། །ཡང་ན་སོ་སོ་ནས་བཤད་པ་ལྟར་བྱའོ། །སྦྱིན་བསྲེག་ཐམས་ཅད་ཀྱི་སྤྱིའི་དབྱེ་བའམ་ཁ་སྐོངས་ཀྱི་རིམ་པ་རང་བྱུང་རྡོ་རྗེས་སྦྱར་བ་རྫོགས་སོ། །བཀྲ་ཤིས་དཔལ་འབར་འཛམ་གླིང་མཛེས་པའི་རྒྱན་དུ་ཤོག། །། ༈ དཔལ་དྲིལ་བུ་པས་མཛད་པའི་གཞུང་གསུམ་གྱི་ས་བཅད་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། དབང་གི་ཆོ་ག་འདི་ལ་གསུམ་སྟེ། མཚན་གྱི་དོན་དང་། གཞུང་དོན་དང་། མཇུག་ཡོངས་སུ་རྫོགས་པའི་སྨོན་ལམ་མོ། །གཞུང་ལ་གཉིས། སྤྱིར་དབང་གི་རྣམ་གཞག་དང་། དབང་གི་ཆོ་གའོ། །དང་པོ་ལ་བཞི། བཤད་པར་དམ་བཅའ་བ་དང་། དབང་སྔོན་དུ་འགྲོ་བའི་འཐད་པ། ལུས་ཀྱི་རང་བཞིན་གྱི་དཀྱིལ་འཁོར་མདོར་བསྟན་པ། རྒྱས་པར་བཤད་པའོ། །དེ་ལ་བཞི། བཅོས་མའི་ངོ་བོ། དེ་མཁས་པའི་སྤང་བྱར་གདམས་པ། དེའི་འཐད་པ་བཤད་པ། ཀུན་རྫོབ་ཏུ་དབང་བསྐུར་དགོས་པའི་ཚུལ་ལོ། །དབང་གི་ཆོ་ག་གཉིས། མདོར་བསྟན་པ་དང་། རྒྱས་པར་བཤད་པའོ། །དེ་ལ་གསུམ། སྔོན་འགྲོ་དང་། དངོས་གཞི་དང་། མཇུག་བསྡུ་བའོ། །སྔོན་འགྲོ་ལ་ལྔ། ལུས་ཀྱི་དཀྱིལ་འཁོར་བསྒྲུབ་པ་དང་། ལུས་དཀྱིལ་འཁོར་དུ་གཞུག་པ་དང་། དམ་ཚིག་རྣམ་གཉིས་བསྒྲག་པ་དང་། རྗེས་དང་། འདུག་སྟངས་དང་། སྔགས་གསུམ་གྱིས་ཡེ་ཤེས་དབབ་པ་དང་། དཀྱིལ་འཁོར་བསྟན་པའོ། འདི་ལ་གསུམ། མདོར་བསྟན་པ་དང་། ཚིགས་བཅད་དང་། དོན་རྒྱས་བཤད་དོ། །དངོས་གཞི་ལ་བཞི། བུམ་དབང་རྡོ་རྗེ་སློབ་དཔོན་གྱི་དབང་དང་བཅས་པ་དང་། གསང་དབང་དང་། ཤེས་རབ་ཡེ་ཤེས་དང་། བཞི་པའོ། དང་པོ་ལ་གསུམ། གསོལ་བ་གདབ་པ་དང་། དབང་བསྐུར་བ་དངོས། རྡོ་རྗེ་སློབ་དཔོན་གྱི་དབང་ངོ་། །དབང་བསྐུར་བ་དངོས་ལ་བདུན། ཆུ། ཅོད་པན། རྡོ་རྗེ། དྲིལ་བུ། མིང་གི་དབང་དང་། བསྐུར་བའི་དགོས་པ་དང་། སྔགས་དང་རྡོ་རྗེ་བརཏལ་ཞུགས། ཐུན་མོང་ཁྱད་པར་དང་། ལུང་བསྟན། དབུགས་དབྱུང་། གཟེངས་བསྟོད་པའོ། །རྡོ་རྗེ་སློབ་དཔོན་ལ་གསུམ། གསོལ་བ་གདབ་པ་དང་། དབང་བསྐུར་བ་དངོས་དང་། སློབ་མའི་བྱ་བའོ། བར་པ་ལ་ལྔ། ཏིང་ངེ་འཛིན་དང་། ཚིགས་སུ་བཅད་པ་དང་། ལྷག་པར་གནས་ཤིང་མཆོད་པ་དང་། སློབ་དཔོན་དུ་དབང་བསྐུར་བ་དངོས་དང་། རྗེས་གནང་ངོ་། །དེ་ལ་གཉིས། འཕྲིན་ལས་ཀྱི་རྗེས་གནང་། གཞན་དོན་གྱི་རྗེས་གནང་ངོ་། །གཉིས་པ་གསང་དབང་ལ་གསུམ་སྟེ་། མཚམས་སྦྱར་བ་དང་། གསོལ་བ་གདབ་པ་དང་། དབང་བསྐུར་བའོ། །དེ་ལ་ལྔ། ཕྱག་རྒྱ་དང་། བྱང་ཆུབ་ཀྱི་སེམས་བསྒྲུབ་པ་དང་། རྟོག་པ་གཞོམ་པ་དང་། ལན་གདབ་པ་དང་། ཚིགས་སུ་བཅད་པ་དང་བཅས་ཏེ་སྦྱིན་པ་དངོས་སོ། །དབང་གསུམ་པ་ལ་བདུན། གསོལ་བ་གདབ་པ། གསུམ་པའི་རྟེན་ཚིགས་བཅད་དང་བཅས་ཏེ་སྦྱིན་པ། དམ་ཚིག་དྲི་བ། ལན་དང་ལྷན་ཅིག་སྐྱེས་པའི་དོན་གྱི་དྲི་བ་དང་། ལན། རྗེས་གནང་ངོ་། །བཞི་པ་ལ་གཉིས། མདོར་བསྟན་དང་། རྒྱས་བཤད་དོ། །མཇུག་བསྡུ་བ་ལ་གཉིས། མཇུག་བསྡུད་དངོས་དང་། ཞར་ལ་དེ་ཁོ་ན་ཉིད་བསྟན་པའོ། དབང་གི་བསྡུས་དོན་རྫོགས་སོ། །ན་མོ་ཤྲི་ཙ་ཀྲ་སཾ་བྷ་ར། རྫོགས་པའི་རིམ་པ་འདི་ལ་གཉིས་ཏེ། མཚན་དོན་དང་། གཞུང་གི་དོན་ནོ། །དེ་ལ་གསུམ་སྟེ། བཤད་པར་དམ་བཅའ་བ་དང་། བྱིན་གྱིས་བརླབ་པ་དང་། ཉམས་སུ་བླང་བའོ། །བྱིན་བརླབས་ལ་གསུམ། རིམ་གཉིས་དབྱེར་མེད་དུ་ཉམས་སུ་བླང་བའི་ཕྱིར། བསྐྱེད་རིམ་བསྟན་པ་དང་། དེ་ཉིད་ནང་དུ་གནས་པས་བཅོས་མ་སྤང་བ་དང་། བྱིན་གྱིས་བརླབ་པ་དངོས་སོ། དེ་ལ་ལྔ། བླ་མ་གལ་ཆེ་བར་གདམས་པ་དང་། བྱིན་གྱིས་བརླབ་པའི་ཡོན་ཏན་དང་། མངོན་ཞེན་བཟློག་པ་དང་། སྐད་ཅིག་ཏུ་བྱིན་གྱིས་བརླབ་པ་དང་། དེ་རྒྱུད་དུ་སྦས་པའི་ཚུལ་ལོ། །ཉམས་སུ་བླང་བ་ལ་ལྔ། བྱིན་གྱིས་བརླབ་པའི་རིམ་པ་སྣ་ཚོགས་རྡོ་རྗེ། ནོར་བུ་འགེངས་པ། ཛ་ལན་དྷ་ར། བསམ་གྱིས་མི་ཁྱབ་པའི་རིམ་པའོ། །དང་པོ་ལ་གཉིས། ས་བོན་དང་བཅས་པ་དང་། ས་བོན་མེད་པའོ། །དང་པོ་ལ་གསུམ། ས་བོན་དང་བཅས་པའི་དངོས་གཞི་དང་། ཡན་ལག་དང་། ཕན་ཡོན་ནོ། །གཉིས་པ་ལ་གཉིས། དངོས་དང་། ཕན་ཡོན་ནོ། །སྣ་ཚོགས་རྡོ་རྗེའི་རིམ་པ་ལ་གཉིས་ས་བོན་དང་བཅས་པ་དང་། ས་བོན་མེད་པའོ། །དང་པོ་ལ་གསུམ། དངོས་གཞི་དང་། ཡན་ལག་དབང་པོ་ལ་དགོད་པ་དང་། འཁོར་ལོ་ལ་དགོད་པ་ཕན་ཡོན་དང་བཅས་པའོ། །གཉིས་པ་ལ་གཉིས། དངོས་དང་། ཕན་ཡོན་ནོ། །ནོར་བུ་འགེངས་པའི་རིམ་པ་ལ་བཞི། མཚམས་སྦྱར་ཞིང་། དངོས་དང་། ཕན་ཡོན་གྱིས། དམ་ཚིག་གི་ཕྱག་རྒྱ་དང་། དེ་བཞིན་དུ་ལས་ཀྱི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་ཕན་ཡོན་དང་བཅས་པའོ། །ཛ་ལན་དྷ་རའི་རིམ་པ་ལ་གཉིས། དངོས་དང་། ཕན་ཡོན་ནོ། །རིམ་པ་ལྔ་པ་ལ་དྲུག །སེམས་བཟུང་བ་དང་། གཟུང་འཛིན་གཉིས་མེད་དུ་བཞག་པ་དང་། སྟོང་ཉིད་དང་བསྲེ་བ་དང་། བསམ་གྱིས་མི་ཁྱབ་པ་དང་། སངས་རྒྱས་ཀྱི་མངོན་དུ་མཛད་ཚུལ་དང་། ཕན་ཡོན་ནོ། རྫོགས་པའི་རིམ་པའི་བསྡུས་དོན། རང་བྱུང་རྡོ་རྗེས་སྦྱར་བ་རྫོགས་སོ།། ༈ །།དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །སྒྲུབ་ཐབས་འདི་ལ་དོན་གསུམ་སྟེ། མཚན་གྱི་དོན་དང་། གཞུང་དང་། མཇུག་གི་དོན་ནོ། །གཞུང་ལ་གཉིས། ཉམས་སུ་ལེན་པ་པོ་རྟེན་གྱི་གང་ཟག་དང་། ཉམས་སུ་བླང་བྱ་དངོས་སོ། །དེ་ལ་གཉིས། ལམ་དང་། འབྲས་བུའོ། །ལམ་ལ་གཉིས་ཏེ། དངོས་གཞི་མཉམ་པར་བཞག་པའི་རྣལ་འབྱོར་དང་། རྗེས་མཉམ་པར་མ་བཞག་པའོ། །དང་པོ་ལ་གཉིས། བསྐྱེད་རིམས་དང་། རྫོགས་རིམས་སོ། །བསྐྱེད་རིམས་ལ་གཉིས། ལུས་དང་། ཡན་ལག་གོ །དང་པོ་ལ་གསུམ། སྔོན་འགྲོ་དང་། དངོས་གཞི། བཟླས་པའི་རྣལ་འབྱོར་རོ། །དང་པོ་ལ་གསུམ། ལྡང་བའི་རྣལ་འབྱོར། ལུས་ངག་ཡིད་གསུམ་དག་པར་བྱ་བ། ཚོགས་གཉིས་བསགས་པའོ། །དངོས་གཞི་ལ་གཉིས། རྟེན་བསྐྱེད་དང་། བརྟེན་པ་ལྷ་བསྐྱེད་པའོ། །དེ་ལ་གསུམ། གཙོ་བོ་བསྐྱེད་པ་དང་། འཁོར་བསྐྱེད་པ་དང་། བསྐྱེད་པའི་ཡན་ལག་གོ །དང་པོ་ལ་གསུམ། ཡབ་ཀྱི་རྣམ་པ་དང་། ཡུམ་དང་། གཉིས་སུ་མེད་པར་བསྟན་པའོ། །འཁོར་བསྐྱེད་པ་ལ་གསུམ། བདེ་བ་ཆེན་པོའི་འཁོར་ལོ་དང་། འཁོར་ལོ་གཞན་མདོར་བསྟན་པ་དང་། རྒྱས་པར་བཤད་པའོ། །དེ་ལ་ལྔ་སྟེ། ཐུགས་དང་། གསུང་དང་། སྐུ་དང་། རྣམ་པ་དང་། དམ་ཚིག་གི་འཁོར་ལོའོ། །བསྐྱེད་པའི་ཡན་ལག་ལ་བཞི། དག་པ་དང་། གོ་ཆ་གཉིས་བསྒོ་བ་དང་། ཡེ་ཤེས་ཀྱི་འཁོར་ལོ་དགུག་པ་དང་། དབང་བསྐུར་བའོ། །བཟླས་པ་ལ་གཉིས། བཟླས་པ་དངོས་དང་ཚུལ་ཅི་ལྟར་བཟླ་བའོ། །ཡན་ལག་ལ་གསུམ། སྐུ་གསུང་ཐུགས་ཀྱི་དམ་ཚིག་དང་འབྲེལ་པའི་སྤྱོད་པ། ཁ་ཟས་ཀྱི་རྣལ་འབྱོར། རྫས་དང་། དུས་དང་སྔགས་གསུམ་གྱི་གཏོར་མའོ། །རྗེས་མཉམ་པར་མ་བཞག་པ་ལ་གཉིས། རང་དོན་ཐབས་དང་ཤེས་རབ་ཀྱི་སྤྱོད་པ། ཞར་ལ་བཅོམ་ལྡན་འདས་མའི་རང་བཞིན་བསྟན་པའོ། །དཔལ་རྡོ་རྗེ་དྲིལ་བུ་པས་མཛད་པའི་སྒྲུབ་ཐབས་ཀྱི་བསྡུས་དོན་རང་བྱུང་རྡོ་རྗེས་མཛད་པ་རྫོགས་སོ།། ༈ །།དྲིལ་བུ་པའི་དབང་གི་མཚམས་སྦྱོར་བཞུགས་སོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་ཀུན་དངོས་བླ་མ་དང་། །ཧེ་རུ་ཀ་དཔལ་ཕག་མོར་བཅས། །གུས་པས་བཏུད་དེ་དབང་བསྐུར་གྱི། །མཚམས་སྦྱོར་འདིར་ནི་བཤད་པར་བྱ། །དཔལ་རྡོ་རྗེ་དྲིལ་བུ་པས་མཛད་པའི་དབང་གི་ཆོ་ག་འདི་ལ་གསུམ་ལས། མཚན་གྱི་དོན་དང་། གཞུང་དང་། མཇུག་ཡོངས་སུ་རྫོགས་པའི་སྨོན་ལམ་མོ། །དང་པོ་ནི་རྒྱ་གར་སྐད་ནས། ཕྱག་འཚལ་ལོའི་བར་ལོ་ཙྪ་བའི་ངག་ཡིན་ནོ། །གཞུང་ལ་གཉིས་ཏེ། སྤྱིར་དབང་གི་རྣམ་བཞག་དང་། བསྐུར་བའི་ཆོ་གའོ། །དང་པོ་ལ་བཞི་ལས། བཤད་པར་དམ་བཅའ་བ་ནི། ཚིག་བཞི་པ། ཁམས་གསུམ་གྱི་སེམས་ཅན་འཁོར་བ་ན་གནས་པ་ལས་ཐར་བར་བྱེད་པའི་ཐབས་སངས་རྒྱས་ཀྱིས་དཔག་ཏུ་མེད་པ་གསུངས་ཀྱང་། མཐར་ཐུག་པ་ཐུན་མོང་མ་ཡིན་པའི་ལམ་ཉོན་མོངས་པ་ལམ་དུ་བྱེད་པའི་རྡོ་རྗེ་ཐེག་པ་བླ་ན་མེད་པ་ཡིན་ཅིང་། དེ་ཡང་སྐུ་གསུང་ཐུགས་ཀྱི་འཁོར་ལོ་གསུམ་གྱི་རིམ་པ་གཉིས་ལ་རྟེན་ནས། ཚེ་གཅིག་ཉིད་ལ་རྡོ་རྗེ་འཆང་གི་གོ་འཕང་ལ་འགོད་པ་ཡིན་ལ། དེ་ལ་ཡང་སྨིན་པར་བྱེད་པའི་དབང་དགོས་པས། འདིར་རྒྱུད་ནས་ཇི་ལྟར་གསུངས་པའི་དབང་གི་ཆོ་ག་བཤད་པར་བྱའོ། །ཞེས་བྱ་བའོ། །དབང་སྔོན་དུ་འགྲོ་བའི་འཐད་པ་ནི། དབང་བསྐུར་ཞེས་པའི་ཚིག་བཞི་སྟེ། དེ་ཡང་བཅོམ་ལྡན་འདས་ཀྱི་གཞི་ལམ་འབྲས་བུའི་རིམ་པས། དབང་སྔོན་དུ་འགྲོ་བར་རྒྱུད་མང་པོར་གསུངས་ཤིང་། བྱེ་བྲག་ཏུ་ཡང་། ཕྱག་རྒྱ་ཆེན་པོ་ཐིག་ལེའི་རྒྱུད་ལས། དབང་མེད་ན་ནི་དངོས་གྲུབ་མེད། །བྱེ་མ་བཙིར་ཀྱང་མར་མེད་ལྟར། །ཞེས་གསུངས་པས། དབང་དེ་ཡང་རྡོ་རྗེ་སློབ་དཔོན་ཡོན་ཏན་དུ་མ་དང་ལྡན་པ་ཅིག་གིས་བླ་མ་རྒྱུད་པའི་རིམ་པ་ལས་ཇི་ལྟར་འོངས་བ་བཞིན་བསྐུར་བར་བྱའོ། །དེའང་གང་ཟག་གི་རིམ་པས། དབང་པོ་རབ་ཀྱི་ཐ་མ་ལ་རྡུལ་ཚོན་གྱི་དཀྱིལ་འཁོར་ལ་རྟེན་ནས་བསྐུར་གྱི། འབྲིང་དང་རབ་ཀྱི་ལུས་དང་སེམས་ཀྱི་དཀྱིལ་འཁོར་དུ་ཅི་ལྟར་རུང་ཞེ་ན། ལུས་ཀྱི་དཀྱིལ་འཁོར་མདོར་གསུངས་པ། སེམས་ལ་གནས་པ་ཞེས་ཚིག་བཞིས་བསྟན་ཏེ། དེ་ཡང་དོན་དམ་པར། ཕྱི་རོལ་གྱི་ཐིག་དང་རྡུལ་ཚོན་ལ་ལྟོས་པ་ནང་དུ་བདག་ཉིད་ཀྱི་སེམས་དང་ལུས་ལ་གནས་ཏེ། ངེས་བརྗོད་ལས། ཀུ་ལུ་ཏའི་རྡོ་རྗེ་དང་། རིན་པོ་ཆེ་དང་དཀྱིལ་འཁོར་ཐིག །སིན་དྷུ་རྡོ་རྗེ་ཐིག་ཟླུམ་པོ། །པུ་རི་ར་མ་ལ་པད་མ། །ཞེས་པས་སོ། །དེ་བཞིན་དུ་ལུས་ཀྱི་གནས་དཀྱིལ་འཁོར་དུ་སྦྱར་བ་རྒྱས་པར་བདག་གི་བླ་མས་མཛད་པ་ཡོད་པས་འདིར་མ་བཀོད་པ་ཡིན་ནོ། །ལུས་ཀྱི་དཀྱིལ་འཁོར་རྒྱས་པར་བཤད་པ་ནི། བཞི་པ་བཅོས་པའི་ངོ་བོ་ནི། ཚིག་གཉིས་ཏེ། ཕྱི་རོལ་གྱི་རྡུལ་ཚོན་གྱི་དཀྱིལ་འཁོར་ནི་གདུལ་བྱ་འཇུག་པའི་ཕྱིར་ཡིན་ཞེས་པའོ། །དེ་མཁས་པའི་སྤང་བྱར་བསྟན་ཏེ། མཁས་པ་ཞེས་ཚིག་གཉིས་སོ། །དེའི་འཐད་པ་བཤད་པ་ནི། ཚིག་བཞི་སྟེ། རྒྱུད་ལས་ལུས་འཁོར་ལོ་གསུམ་གྱི་བདག་ཉིད་དུ་གསུངས་པས་ལྷ་གྲུབ་ལ། རིམ་པ་འདིས་དབང་གི་དཀྱིལ་འཁོར་ཡང་ལུས་ལ་གྲུབ་པ་སྟེ། དེ་ངོ་སྤྲད་པའི་ཕྱིར་དབང་བསྐུར་བ་ཡིན་ནོ། །ཐོག་མ་ནས་མ་གྲུབ་པ་གྲུབ་པར་བྱེད་པ་ནི་མ་ཡིན། ཅེས་སོ། །ཁ་ཅིག་གིས་ཅི་ནས་མ་གྲུབ་པ་ཡང་གྲུབ་བྱེད་ཟེར་བ་ནི་མ་ཡིན་ཏེ། དང་པོ་ནས་མ་གྲུབ་པ་ཅིག་གྲུབ་པར་བྱེད་མི་ནུས་ཏེ། སོལ་བ་ལ་དཀར་པོ་བཞིན་ནོ། དང་པོ་ནས་གྲུབ་ན་མི་དགོས་སོ་ཞེ་ན་དེ་ཡང་མ་ཡིན་ཏེ། ཤུན་པ་དང་བཅས་པའི་ནོར་བུ་བཞིན་ནོ། །དེས་ན་ཀུན་རྫོབ་ཏུ་དབང་བསྐུར་དགོས་པའི་ཚུལ་ནི། ཚིག་བཞིས་ལུས་སེམས་ལ་གནས་པ་དེ་མི་ཤེས་པས་ཤེས་པར་བྱེད་པ་ལ་སྣོད་དུ་བྱེད་ཅེས་བྱ་བ་འདིས། ཀུན་རྫོབ་ཙམ་དུ་དབང་བསྐུར་དགོས་པར་གྲུབ་བོ་ཞེས་བྱ་བའོ། །དབང་གི་ཆོ་ག་ལ་གཉིས་ལས། མདོར་བསྟན་པ་ནི། སློབ་དཔོན་ཞེས་ཚིག་བཞི་སྟེ། མ་སྨིན་པ་སྨིན་པར་བྱེད་པའི་དབང་རང་ལ་དུ་ཡོད་ཞེ་ན། བུམ་དབང་། གསང་དབང་། ཤེས་རབ་ཡེ་ཤེས། ཚིག་དབང་དང་བཞིའོ། །དེ་ཡང་བཅུ་བཞིར་འགྱུར་བ་ནི། ཙརྻ་པས། མེ་ཏོག་ཆུ་ཡི་དབང་བསྐུར་དང་། །ཅོད་པན་རྡོ་རྗེའི་བདག་པོ་དང་། །མིང་དང་སྔགས་དང་བརཏལ་ཞུགས་དང་། །གནང་དང་དམ་ཚིག་གཟེངས་བསྟོད་དང་། །གསང་དང་ཕྱག་རྒྱ་གཏད་པ་སྟེ། །ཞེས་གསུངས་པའམ། ཡང་ན་བཞི་པ་དང་། བཅུ་བཞིའོ། །དེའི་རིམ་པའི་དབང་བསྐུར་བ་རྒྱས་པར་བཤད་པ་ནི་གསུམ་སྟེ། སྔོན་འགྲོ་དང་། དངོས་གཞི་རྗེས་སོ། །དང་པོ་ནི་སློབ་དཔོན་འདིའི་བཞེད་ཀྱིས་ལུས་དཀྱིལ་འཁོར་དུ་གྲུབ་པས་ས་ཆོག་མི་དགོས། དེ་ཙ་ན་སློབ་མའི་ཡང་ལུས་དཀྱིལ་འཁོར་དུ་གྲུབ་པར་ངོ་འཕྲོད་པས་སློབ་མ་སྟ་གོན་ཀྱང་རྒྱས་པར་མི་དགོས་མོད་ཀྱིས། འོན་ཀྱང་གོང་མ་རྣམས་ཀྱི་ཕྱག་ལེན་ནི་འདི་ལྟར་ཡིན་ཏེ། དུས་ཁྱད་པར་ཅན་ལ་མཚན་ཉིད་དང་ལྡན་པའི་སློབ་མ་ཟུང་དུ་མ་གྱུར་པ་གང་ཡོད་པས་གསོལ་བ་གདབ་པ་སྔོན་དུ་འགྲོ་བས། ཡོ་བྱད་རྣམས་སྟ་གོན་བྱ་སྟེ། བུམ་པ་མཚན་ཉིད་དང་ལྡན་པ་གཉིས་བུམ་སྨན་ཆུ་གཙང་མ་དང་བཅས་པས་ནང་བཀང་། ཤ་ལྔ་བདུད་རྩི་ལྔ་ཡང་གཞུག་ཅིང་། ཁ་རྒྱན་མགུལ་ཆིངས་ལེགས་པར་བྱ་སྟེ། རས་ལ་སོགས་པ་གཙང་མའི་སྟེང་དུ། མེ་ཏོག་གི་ཚོམ་བུ་བཀོད་པའི་སྟེང་དུ་བཞུགས། མཆོད་པས་བསྐོར། གཞན་ཡང་མེ་ཏོག་ཕྲེང་བ་དང་རྡོ་རྗེ་དྲིལ་བུ་དབུ་རྒྱན། ཚངས་སྐུད། ཐོད་པ་བདུད་རྩི་ལྔས་བཀང་པ། ཁ་ཊྶཱྃ་ག སྤྱན་ཡོལ་ལ་སོགས་པ་རྣམས་འཚོགས་པར་བྱས་ཏེ། དེ་ནས་རྡོ་རྗེ་སློབ་དཔོན་གྱིས་རྣམ་རྒྱལ་བུམ་པའི་ནང་དུ། དཀྱིལ་འཁོར་གྱི་འཁོར་ལོ་རྫུས་སྐྱེས་སུ་བསྐྱེད་ལ་ཟླས་པ་ཅུང་ཟད་བྱས་ཏེ་སླར་ཆུའི་རྣམ་པར་བསྒྱུར་ལ། ལས་ཐམས་ཅད་ཀྱི་བུམ་པར་ཡི་གེ་ཌ་ནཾ་ཁན་དྷ་རོ་ཧ་བསྐྱེད་ལ་བཟླས་པ་ཅུང་ཟད་བྱའོ། །དེ་རྣམས་ནི་བུམ་པ་སྟ་གོན་ནོ། །དེ་ནས་ཚོགས་ཀྱི་ཡོ་བྱད་རྣམས་བྱིན་གྱིས་བརླབས། ཅི་འབྱོར་པའི་གཏོར་མ་ཡང་བཤམས་ཏེ་བཞག་གོ །དེའི་འོག་ཏུ་བདག་ཉིད་ལུས་ཀྱི་དཀྱིལ་འཁོར་དུ་བསྒྲུབ་པ་ནི། དང་པོར་རེ་ཤིག་འཁོར་ལོ་གསུམ། །རྡོ་རྗེ་སློབ་དཔོན་བདག་ཉིད་དམིགས། །ཞེས་པ་བདག་བསྐྱེད་ནས། དབང་བླང་བའི་བར་བྱས་ཏེ། སློབ་མ་འཇུག་པ་ནི་ཡོལ་བའི་ཕྱི་རོལ་དུ་ཕྱག་བྱས་ནས་མཎྜྻལ་ཕུལ་ནས་འདུག་སྟེ། སློབ་དཔོན་གྱིས་ཁྱེད་སུ་ཡིན་ཅེས་དྲིའོ། །སློབ་མས། ཀྱེ་བདེ་བ་ཆེན་པོ་བདག་ནི་སྐལ་པ་བཟང་པོའོ། །ཞེས་སོ། །ཁྱེད་ཅི་འདོད། སངས་རྒྱས་མཆོག་གི་དམ་ཚིག་ནོད་འཚལ་ལོ། ཞེས་བརྗོད་ནས། སློབ་དཔོན་གྱིས་ཡིད་ཆེས་པར་བྱ་བའི་ཕྱིར། དེ་ལྟར་ཡིན་ཕན་ཆད་ཁྱེད་རྣམས་ཐེག་པ་བླ་ན་མེད་པ་འདིར་འཇུག་པར་བྱ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱང་ལམ་ཁྱད་པར་ཅན་འདི་ལ་བརྟེན་ནས་སངས་རྒྱས་པ་ཡིན་ནོ། །ཞེས་བྱ་བ་ལ་སོགས་པ་དང་། བཅོས་མ་དང་ལུས་ཀྱི་དཀྱིལ་འཁོར་གྱི་དབྱེ་བ་ཅུང་ཟད་བཤད་ལ་ལས་བུམ་གྱིས་བཀྲུས་ཏེ། གདོང་གཡོགས་ལ་ནང་དུ་བཅུག་སྟེ། བགེགས་ལ་ཨ་ཀ་རོས་གཏོར་མ་གཅིག་བྱིན་ནས། རྡོ་རྗེའི་ར་བ་དང་གུར་ལ་སོགས་པ་དམིགས་ཏེ། དེ་ནས་སློབ་མ་རྣམས་རྣམ་སྣང་གི་རང་བཞིན་ཧེ་རུ་ཀ་དཀར་པོ་ཞལ་ཅིག་ཕྱག་གཉིས་པར་བསྒོམ་དུ་བཅུག་སྟེ། སྙིང་ཁར་ཟླ་བ་ལ་རྡོ་རྗེ་དཀར་པོ་རྩེ་ལྔ་པ་སྒོམ་དུ་བཅུག་སྟེ། དེའི་སྙིང་ཁར་རྡོ་རྗེ་བཞག་ལ། ངག་ཏུ། ཨོཾ་བཛྲ་ཡོ་ག་ཙི་ཏ་ཨུ་པ་ཏ་ཡ་མི། སུ་ར་ཏ་ས་མ་ཡ་སྟམ། སི་དྷ་བཛྲ་ཡ་ཐ་སུ་ཁྃ་ཞེས་བརྗོད་ནས། དེ་ལྟར་སྔགས་ཀྱི་སྨོན་འཇུག་གི་རང་བཞིན་དུ་སེམས་བསྐྱེད་པས། དེང་ཁྱོད་དེ་བཞིན་གཤེགས་པ་རྣམས་ཀྱི་མཆོག་ཏུ་གསང་བའི་དཀྱིལ་འཁོར་དུ་ཞུགས་ཀྱིས། གཞན་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། ཁྱོད་ཀྱིས་མ་དད་པར་ཡང་མི་བྱའོ། །ཞེས་བརྗོད་ནས། སྤྲོས་པ་ལ་དགའ་ན་བགེགས་སྦྱང་བ་ནི། སློབ་མའི་རྐང་མཐིལ་དུ་ཡྃ། རྐང་བོལ་དུ་རཾ། དེའི་སྟེང་དུ་ཧཱུྃ་བསམས་ཏེ། རླུང་གིས་མེ་སྤར་བས། སྙིང་ཁར་ཀྃ་ལ་གནོད་བྱེད་སྡིག་པའི་གཟུགས་སུ་བསྒྱུར་ལ། ཧཱུྃ་རྡོ་རྗེ་གནོད་སྦྱིན་དུ་གྱུར་པས་སྣ་སྒོའི་ལམ་ནས་དེང་ནས་མེར་བསྲེགས་རྒྱ་མཚོར་དོར་བར་བསམས་ཏེ། ཏིལ་ལ་བསྟིམ་ཞིང་། མེ་ལ་བསྲེགས་ཆུ་བླུགས་ལ་སྒོ་དྲུང་དུ་དོར་ཞིང་། ཨོཾ་བཛྲ་ཀྲོ་ཏ་ཀྲི་ལོ་ཀྱ་བི་ཛ་ཡ་ཁ་ཁ་ཁཱ་ཧི་ཁཱ་ཧི་སརྦ་པ་པྃ་དྷ་ཧ་ན་བ་སྨི་ཀུ་རུ་ཧཱུྃ་ཕཊ་ཅེས་བརྗོད་དོ། །དེ་ནས་བླ་མ་རྡོ་རྗེ་འཆང་དཀྱིལ་འཁོར་དང་དབྱེར་མེད་པ་ལ་གསོལ་བ་གདབ་པར་བྱ་སྟེ། སངས་རྒྱས་ཀུན་གྱི་རང་བཞིན་སྐུ། སློབ་དཔོན་ལ་ནི་སྐྱབས་སུ་མཆི། །དཔའ་བོ་རྣལ་འབྱོར་མ་འཁོར་ལོ། །རྣལ་འབྱོར་གནས་ལ་ཕྱག་འཚལ་ལོ། །དོན་དམ་རྣལ་འབྱོར་སྨྲ་བའི་སེང་གེ་ཞེས་བྱ་བ། །ཉོན་མོངས་སྤྱོད་པའི་དོན་ལ་ཤིན་ཏུ་མཁས་གྱུར་པ། སྲིད་པའི་ཉེས་བརྒྱ་བསྐྱེད་རྩའི་ཉོན་མོངས་ཆོམ་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་གྲུབ་པར་མཛོད། །ཅེས་བརྗོད། དེ་ནས་སློབ་དཔོན་གྱིས་ལུས་ཀྱི་དཀྱིལ་འཁོར་དང་རང་བཞིན་དུ་གནས་པ་དབྱེར་མེད་པ་ལ་གསོལ་གདབ་སྟེ། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཞེས་བརྗོད་ནས་སློབ་མ་ལ། དམ་ཚིག་འབོག་པ་ནི། ད་ཁྱེད་རྣམས་ཀྱིས་དམ་ཚིག་དང་སྡོམ་པ་ལ་གནས་པར་བྱའོ། །ཞེས་བརྡའ་སྤྲད་ནས། སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །རྣལ་འབྱོར་གསང་སྔགས་མཁའ་འགྲོ་མ། །འཁོར་ལ་གསུམ་གྱི་བདག་ཉིད་ཅན། །ཀུན་ལ་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ནི་སློབ་དཔོན་ལ། །རྟག་པར་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་སོགས་དཔའ་བོ། །རྣལ་འབྱོར་མོ་དང་སྣང་མཛད་སོགས། །བྱང་ཆུབ་སེམས་དཔའ་དཔག་མེད་པ། །ཐམས་ཅད་བདག་ལ་དགོངས་སུ་གསོལ། །བདག་ནི་དུས་འདི་ནས་བཟུང་སྟེ། །ཇི་སྲིད་གཉིས་མེད་ལ་གནས་བར། །དེའི་ཚངས་སྤྱོད་གཉིས་མེད་པ། །ཉི་ཤུ་རྩ་གཉིས་ལེགས་པར་བསྲུངས། །ཅེས་ཁས་བླང་ཞིང་། རྩ་བ་དང་ཡན་ལག་གི་དམ་ཚིག་ཀྱང་གོ་བ་ཙམ་བྱའོ། །དེ་ནས་རིགས་ལྔའི་སྡོམ་པ་སྦྱིན་པར་བྱ་སྟེ། བསྒྲག་པ་ནི་འདི་སྐད་བརྗོད་དོ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་ཡིད་འོང་། །སྡོམ་པ་བརྟན་པར་འགྱུར་བའོ། །རྡོ་རྗེ་དྲིལ་བུའི་ཕྱག་རྒྱ་ནི། བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་རྡོ་རྗེ་དེ། །ཤེས་རབ་དྲིལ་བུ་ཞེས་གྲགས་སོ། །སློབ་དཔོན་ཁྱོད་ཀྱིས་བཟུང་བྱས་ཏེ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་སྡོམ་པ་ཡིན་པར་བཤད། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་དུ་དུས་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །འདི་ནི་པད་མའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བྱ། །མཆོད་པའི་ལས་ཀྱང་ཅི་ནུས་ཀྱིས། །ཞེས་བརྗོད་དེ། ཁས་བླང་པ་ནི། བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །ཞེས་པའམ་ཡང་ན་རྒྱས་པར་བྱའོ། །དེ་ནས་ལུས་ཀྱི་དཀྱིལ་འཁོར་དུ་འཇུག་པ་དངོས་ནི། སློབ་མའང་བདག་ཉིད་ལྷར་འདྲར་དམིགས་ནས། ཞེས་པ་སྟེ། དེའང་སྔོན་དུ་སློབ་མ་རྣམས་ཀྱིས་གནས་གསུམ་དུ་ཐལ་མོ་རིམ་པ་ལྟར་སྦྱར་ལ། ཨོཾ་ན་མོ་ཏེ་ཧཱུྃ། ན་མོ་ནི་ཧཱུྃ། ན་མོ་ན་མ་ཧཱུྃ། ཞེས་ཕྱག་བྱས་ནས། རང་ཉིད་ལུས་ཀྱི་དཀྱིལ་འཁོར་དུ་བསྐྱེད་ཅེས་བརྗོད་ལ་མངོན་རྟོགས་ལྟར་བཤད་ལ་གོ་ཆ་བཅིང་བའི་བར་བྱའོ། །ཡེ་ཤེས་པ་ནི་ཡེ་ཤེས་དབབ་པའི་དུས་གཞུག དེ་ནས་དམ་ཚིག་གཉིས་བསྒྲག་པ་ནི། རྒྱས་པར་བྱེད་ན་ནག་པོ་པ་ལྟར་རྡོ་རྗེ་སྤྱི་བོར་གཟུང་ལ། དེང་ཁྱོད་དཔའ་བོ་དང་རྣལ་འབྱོར་མ་རྣམས་ཀྱི་ནང་དུ་ཞུགས་ཀྱིས་ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་རྣམས་དང་དཔའ་བོ་དང་རྣལ་འབྱོར་མ་རྣམས་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། རྡོ་རྗེ་སྙིང་ཁར་བཟུང་ལ། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བརྗོད་ལ། དེ་ནས་ཐོད་པའི་བདུད་རྩི་ལྕེ་ལ་བཞག་ལ། གཞུང་གི་བུ་ཁྱོད་ཅེས་པའི་ཚིག་ལྔས་བྱའོ། །རྡོ་རྗེ་སློབ་དཔོན་གྱི་དམ་ཚིག་ཀྱང་ལག་པའམ་རྡོ་རྗེ་སྤྱི་བོར་བཞག་ལ། གཞུང་གི་ཁྱོད་ཀྱིས་ཅེས་པའི་ཚིག་བཞིན་བརྗོད་དོ། །དེ་ནས་ཡེ་ཤེས་དབབ་པ་ནི། དང་པོར་མཎྜྻལ་ཕུལ་ལ། །རྡོ་རྗེ་འཆང་ཆེན་པོས་བདག་ལ་དཔའ་བོ་དང་རྣལ་འབྱོར་མ་རྣམས་དང་དཔལ་ཧེ་རུ་ཀ་དབབ་པར་མཛད་དུ་གསོལ་ཅེས་བརྗོད་ནས། རྫས་དང་འདུག་སྟངས་བཞི་བྱས་ལ། ཡབ་ཡུམ་གྱི་རྩ་སྔགས་ལ་ཏི་སྟ་ཞེས་པ་བཏགས་ལ་དབབ་པོ། །ཏིང་ངེ་འཛིན་ནི་ཉི་ཤུ་རྩ་བཞིའི་དཔའ་བོ་དང་རྣལ་འབྱོར་མ་རྣམས་ཁ་བ་བབ་པ་ལྟར་བྱོན་ནས་བདག་ལ་ཐིམ་པར་བསྒོམ་པའམ། ཡང་ན་ཙརྻ པའི་ལྟར་བྱས་ཀྱང་ཉན་གསུངས་སོ། །སྐུ་གསུང་ཐུགས་ལ་བབས་པའི་རྟགས་གཞན་དང་འདྲའོ། །དེའི་རྗེས་ལ་རྡོ་རྗེའི་གླུ་ཡང་སྤྲོས་པ་ལ་དགའ་ན་བླང་། མི་དགའ་ན་མི་དགོས། དེ་ནས་ལུས་ཀྱི་དཀྱིལ་འཁོར་བསྟན་པ་ནི། ཐོག་མར་མེ་ཏོག་དོར་ཏེ། བླ་མའི་སྐུ་ལྷ་སོ་བདུན་དུ་གནས་པའི་ཐུགས་ཁའི་གཙོ་བོའམ། ཡང་ན་རང་གི་ལྷ་གང་ཡིན་པ་ལ་དོར་བ་དམིགས་ཏེ། ཚིགས་བཅད་དང་བཅས་པའམ་མེད་ཀྱང་རུང་སྟེ། པྲ་ཏི་ཛ་བཛྲ་ཧོ་ཞེས་དོར་ནས། དེ་ནས་སྤྱན་དབྱེ་བ་ནི། ཧེ་རུ་ཀ་དཔལ་དེང་ཁྱོད་ཀྱིས། །མིག་འབྱེད་པ་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཏ་ལང་ཧྲི། ཅེས་བརྗོད་ལ་གདོང་གཡོགས་དབྱེ། ལུས་དཀྱིལ་འཁོར་བསྟན་པ་དངོས་ནི། གཞུང་གི་ཕྱི་ནི་ཞེས་བརྗོད། དེ་ནས་བདག་ཉིད་ཅེས་པའི་དོན། སྙིང་ཁ་ན་དཔལ་ཧེ་རུ་ཀའོ། །ཞེས་བྱ་བ་ནས། གཤིན་རྗེ་འཇོམས་མའི་བར་གྱི་ལྷ་དང་གནས་རྒྱས་པར་བཤད་དོ། །དེ་རྣམས་ནི་སྔོན་འགྲོའོ། །དངོས་གཞི་དབང་ལ་བཅུ་བཞི་ཡོད་ཀྱང་བཞིར་འདུས་ཏེ། བུམ་དབང་རྡོ་རྗེ་སློབ་དཔོན་དང་བཅས་པ་དང་། གསང་དབང་ཤེས་རབ་ཡེ་ཤེས་བཞི་པའོ། །དང་པོ་ལ་གསུམ་ལས། ཐོག་མར་གསོལ་བ་གདབ་པ་ནི། མཎྜྻལ་འབུལ་ཞིང་། ཀུན་མཁྱེན་ཅེས་པའི་ཚིག་བཞིས། ལན་གསུམ་དུ་གསོལ་བ་གདབ་བོ། དབང་དངོས་ལ་བདུན་ལས། དང་པོ་ཆུ་དབང་ནི། སློབ་མ་ལ་ཏིང་ངེ་འཛིན་བསྟན་པ་དང་དུས་ཅིག་ཏུ། རྩ་བ་དང་རྒྱུད་པར་བཅས་པའི་བླ་མ་དང་། མི་བསྐྱོད་རིགས་ཀྱི་དཀྱིལ་འཁོར་གྱི་འཁོར་དགུག་ཅིང་གཞུག་སྟེ། ལྷ་མོ་རྣམས་ཀྱིས་མཆོད་ཅིང་བསྟོད་པར་བསྒོམས་ནས། ངག་ཏུ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷའི་ཆུ་ནི་དག་པ་ཡིས། དེ་བཞིན་བདག་གིས་དབང་བསྐུར་རོ། །ཞེས་པ་དང་། རྩ་སྔགས་ལ་ཤྲི་ཙཀྲ་ཞེས་བཏགས་སོ། །དེ་སྟོན་པའི་གཞུང་ནི། རྣམ་རྒྱལ་ལ་སོགས་པའི་ཚིག་བཅུ་བཞིའོ། གཉིས་པ་ཅོད་པན་ནི། བྲིས་པ་ལ་སོགས་པ་ཚིག་རྐང་བཅུ་གཅིག་སྟེ། དབུ་རྒྱན་རིན་ཆེན་རིགས་ཀྱི་ཧེ་རུ་ཀར་བསྐྱེད་ལ། ཐོར་ཚུག་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་པའི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། །ཞེས་བྱ་བའི་ཚིག་དང་། ཨོཾ་སརྦ་ལ་སོགས་པས་བྱའོ། །གསུམ་པ་རྡོ་རྗེའི་དབང་ནི། ཛིཾ་པད་ལ་སོགས་པ་ཚིག་དགུ་སྟེ། གཞན་ནི་བསྐྱེད་ཆོག་ཡིན་ལ། དཔལ་ལྡན་ཅེས་པའི་ཚིག་བཞིས་དབང་བསྐུར་རོ། །བཞི་པོ་དྲིལ་བུ་ནི། ཁྃ་ཡིག་ལ་སོགས་པའི་ཚིག་བརྒྱད་དང་། ཕྱེད་ཀྱིས་བསྐྱེད་ཆོག་ཡིན་ལ། ཕྱེད་ཀྱིས། འདི་ནི་ཞེས་པའི་ཚིག་བཞི་ངག་ཏུ་བརྗོད་ནས་དབང་སྦྱིན་ནོ། །ལྔ་པ་མིང་གི་དབང་ནི། དཔའ་བོ་ལ་སོགས་ཚིག་བརྒྱད་སྔགས་དང་བཅས་པ་སྟེ། དཔའ་བོ་ལ་སོགས་ཚིག་བཞི་ནི། སྦྱིན་པའི་ཚིགས་བཅད་ཡིན་ལ། དེ་ལ་སྔགས་དང་སྦྲེལ་ལོ། །གཞན་ཚིག་བཞི་ནི་ཏིང་ངེ་འཛིན་དང་ཇི་ལྟར་སྦྱིན་པའོ། །མིང་ནི། བཞད་པའི་རྡོ་རྗེ། རོལ་པའི་རྡོ་རྗེ། ཞེ་སྡང་རྡོ་རྗེ། ཞེས་གཙོ་བོ་ལ འམ་ཡང་ན་སེར་སྣ་ཡོན་ཏན་རྡོ་རྗེ། མི་བསྐྱོད། ཞེ་སྡང་རྡོ་རྗེ། འདོད་ཆགས་དཔག་མེད་རྡོ་རྗེ། གཏི་མུག་རྣམ་པར་སྣང་མཛད་རྡོ་རྗེ། ཕྲག་དོག་དོན་ཡོད་རྡོ་རྗེ། ཞེས་གང་ལ་མེ་ཏོག་ཕོག་པའི་མིང་སྦྱིན་ནོ། །བུད་མེད་ལ་རྡོ་རྗེ་སྙེམས་མ། རྡོ་རྗེ་སྤྱན་མ། རྡོ་རྗེ་མ་མ་ཀི། རྡོ་རྗེ་གོས་དཀར་མོ། རྡོ་རྗེ་རྣམ་པར་སྣང་མཛད་མ། རྡོ་རྗེ་སྒྲོལ་མ་ཞེས་སྦྱིན་ནོ། །དེ་ལྟར་དབང་ལྔ་པོ་བསྐུར་བའི་གནས་ལུས་ལ་བསྐུར། ལུས་ཀྱི་དྲི་མ་འཁྲུད་ཅིང་། ལྷ་བསྒོམ་པའི་སྐལ་བ་ཅན་དུ་བྱས་པའོ། །རིམ་པ་སོ་སོའི་དགོས་པ་ནི། ཞེ་སྡང་སེར་སྣ། འདོད་ཆགས་ཕྲག་དོག གཏི་མུག་རྣམ་པར་དག་ཅིང་། མེ་ལོང་ལྟ་བུ་དང་། མཉམ་ཉིད་སོ་སོར་རྟོག་པ། བྱ་བ་གྲུབ་པ། ཆོས་དབྱིངས་རྣམས་ཀྱི་ཡོན་ཏན་ཐོབ་པར་བྱེད་པའོ། །ཞེས་དུས་ཅིག་ཏུ་བཤད་ཀྱང་ཆོག །སོ་སོར་བཤད་ཀྱང་བཏུབ་བོ། །སྔགས་ཀྱི་དབང་མེ་ཏོག་དང་འབྲེལ་པ་ནི་ཚིག་གཉིས་ཏེ། དེའང་བདག་ཉིད་དང་སློབ་མ་ལྷར་གསལ་བའི་སྙིང་ཟླ་བ་ལ་སྔགས་ཕྲེང་གསལ་བར་བསྒོམས་པ་ལ། བདག་གི་ཞལ་ནས་སློབ་མའི་ཞལ་དུ་ཞུགས་པར་བསྒོམས་ཏེ་ལན་གསུམ་སྦྱིན་ཏེ། ཚིག་ཏུ་ནི། རིག་པ་འདི་ལ་སྦྱིན་ལགས་ཀྱིས། བཅོམ་ལྡན་འདི་ལ་བྱིན་གྱིས་རློབས། །ཞེས་པས་སམ། མེད་ཀྱང་རུང་ངོ་། ཁ་ཅིག་འདི་སྔོན་ལ་མཛད་ཀྱང་འདི་རང་དུ་བྱས་ན་འཐད་པར་སེམས་སོ། །རྡོ་རྗེའི་བརཏལ་ཤུགས་ཀྱི་དབང་ནི་གཉིས་ལས། དང་པོ་ཐུན་མོང་པ་ནི། སྐད་ཅིག་གིས་སློབ་མའི་སྙིང་ཁར་རྡོ་རྗེ་སེམས་དཔའ་བསྒོམས་ལ། གཞུང་གི་འདི་དེ་ཞེས་པས་སྦྱིན་ནོ། །ཐུན་མོང་མ་ཡིན་པ་ནི། གཡས་སུ་རྡོ་རྗེ་ཌ་མ་རུ། གཡོན་དུ་ཐོད་པ་ཁ་ཊྶཱྃ་ཚངས་སྐུད་བྱིན་ལ། ཁ་ཊྶཱྃ་ཅེས་པའི་ཚིག་བཞིས་སྦྱིན་ཅིང་བརྡའ་དོན་ཀྱང་ཅུང་ཟད་སྤྲད་དོ། ལུང་བསྟན་པ་ནི། བདག་ཉིད་ཅེས་ཚིག་ལྔས་ཇི་ལྟར་བྱ་བའོ། །འདི་ལྟར་ཅེས་པ་ལ་སོགས་ཚིག་ལྔ་སྔགས་དང་བཅས་པས་ངག་ཏུ་བརྗོད་ཅིང་། མིང་ནས་སྨོས་ཏེ་དེར་འགྱུར་རོ་ཞེས་བྱའོ། །དབུགས་དབྱུང་གཟེངས་བསྟོད་ནི། ཁམས་གསུམ་ཞེས་པའི་ཚིག་བརྒྱད་དེ། མགོ་ཐོག་ཏུ་ལག་པ་བཞག་ནས་བྱ་སྟེ། གནས་སྐབས་འདི་རང་དུ་བྱ་བའམ་ཡང་ན་ཙ་རྒྱ་པས། དབུགས་དབྱུང་གསང་དབང་དང་འབྲེལ། གཟེངས་བསྟོད་བཞི་པ་དང་འབྲེལ་ཞེས་ཀྱང་ཟེར་ལ། ཡང་ན་ཐམས་ཅད་ཀྱི་ཏིང་ལ་བྱས་ཀྱང་རུང་ཟེར་རོ། གཉིས་པ་རྡོ་རྗེ་སློབ་དཔོན་གྱི་དབང་ལ་གསུམ་ཡོད་པ་ལས། གསོལ་བ་གདབ་པ་ནི། རྡོ་རྗེ་སློབ་དཔོན་གསོལ་བ་གདབ་ཞེས་སོ། །དེའི་ཚིག་ནི གཞུང་གི་ཚིག་བཞི་ཡིས་སོ། །དེ་ཡང་མཎྜྻལ་འབུལ་བ་སྔོན་དུ་འགྲོ་བས་བྱའོ། །དབང་བསྐུར་བ་དངོས་ལ་ལྔ་ལས། ཏིང་ངེ་འཛིན་ནི། སློབ་མ་རྡོ་རྗེ་སློབ་དཔོན་དུ་དབང་བསྐུར་བའི་ཕྱིར་དབང་སྟེགས་ལ་བཞག་ལ། ཡང་རྣམ་རྒྱལ། བུམ་པ་བླངས་ཏེ། ཏིང་ངེ་འཛིན་ནི། དེ་ནས་ལ་སོགས་པའི་ཚིག་བཅུའོ། །གཞན་ཚིག་བཞི་ཡིས་ནི་དབང་གི་ཚིགས་སུ་བཅད་པའོ། །དཔའ་བོ་དག་ཅེས་བྱ་བ་ལ་སོགས་པ་སྔགས་དང་བཅས་པས་ནི་ལྷག་པར་གནས་པར་བྱའོ། །དེས་ནས་དཔའ་བོ་དང་རྣལ་འབྱོར་མའི་བདག་ཉིད་དུ་གྱུར་པའི་ཕྱིར་མཆོད་པའི་ལས་བྱ་བ་ནི། དཔའ་བོ་དང་ཞེས་པའོ། སློབ་དཔོན་དུ་དབང་བསྐུར་བ་དངོས་ནི། རྒྱས་པར་བྱེད་ན་ལག་པ་གཡས་སུ་རྡོ་རྗེ་བྱིན་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཞེས་སྦྱིན་ནོ། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །སྲིད་པའི་དམ་པ་བྱེད་པར་འགྱུར། །ཞེས་དྲིལ་བུ་གཡོན་དུ་བྱིན་ལ། ཆོས་ཀྱི་སྒོ་བརྒྱད་ཁྲི་བཞི་སྟོང་བསྒྲག་སྙམ་པ་གྱིས་ཞེས་བརྗོད་དོ། །དེ་ནས། རྡོ་རྗེ་རབ་གནས་རྡོ་རྗེ་ཉིད། །ཆེ་དང་དྲིལ་བུ་ཆེན་པོ་ཟུང་། །དེ་རིང་རྡོ་རྗེ་སློབ་དཔོན་འགྱུར། །སློབ་མ་བསྡུ་བ་ཉིད་དུ་གྱིས། །དེང་ཁྱོད་ཀྱིས་རྡོ་རྗེ་སློབ་དཔོན་གྱིས་ལ་དབང་བསྐུར་བ་དང་རྒྱུད་བཤད་པའི་སྒོ་ནས་སེམས་ཅན་གྱི་དོན་གྱིས་ཅིག་ཅེས་བརྗོད་དོ། །དེ་ལྟར་སྟོན་པ་ཡང་དེ་ནས་ཞེས་སོ། །རྗེས་གནང་ནི། གཉིས་ལས་འཕྲིན་ལས་ཀྱི་རྗེས་གནང་ནི། གནོད་སྦྱིན་མོ་ལ་སོགས་པའི་ཚིག་དྲུག་གོ །གཞན་དོན་གྱི་རྗེས་གནང་ནི། དཔའ་བོ་ཞེས་ཚིག་བཅུ་གསུམ་མོ། །གསུམ་པ་སློབ་མའི་བྱ་བ་ནི། བྱ་བ་ཞེས་པ་ལ་སོགས་པ་ཚིག་དྲུག་གོ །གཉིས་པ་གསང་དབང་ལ་གསུམ་ལས། འདི་དག་ཀྱང་སློབ་དཔོན་འདིས་ལས་རྒྱ་དང་བཅས་པའི་དབང་དུ་མཛད་ནས་གསུངས་པ་ལས། དང་པོ་མཚམས་སྦྱར་བ་ནི་དེ་ནས་ལ་སོགས་པའི་ཚིག་དྲུག་གོ །གསོལ་བ་གདབ་པ་ནི། སྐྱབས་མེད་སྐྱོབ་པ་ལ་སོགས་ཚིག་བརྒྱད་དེ་མཎྜྻལ་ཕུལ་ལ་བྱའོ། །དངོས་གཞི་ནི་ལྔ་སྟེ། དང་པོ་ཕྱག་རྒྱ་ནི། ས་བོན་ལྔ་ནི། ལྃ་མྃ་པྃ་ཏྃ་ཨྃ་རྣམས་ཏེ། དེས་མཚོན་པའི་ཕྱག་རྒྱ་ཕྱི་དང་ནང་དུ་ལྔ་ལྔ་སྟེ། འོན་ཀྱང་ཕྱིར་བཞི་ཡིན་ནོ་ཞེས་པའོ། །བྱང་ཆུབ་ཀྱི་སེམས་བསྒྲུབ་པ་ནི། དཔའ་བོ་ཞེས་པ་ལ་སོགས་པ་རྣམས་སོ། །རྟོག་པ་གཞོམ་པ་ནི། གང་ཟག་གི་བྱེ་བྲག་གི་སྐུར་ལུགས་གསུམ་པོ་ཚིགས་བཅད་དང་བཅས་པ་སྟེ། ཚིག་བཅུ་གཉིས་སོ། །སློབ་མས་ལན་ཇི་ལྟར་བྱ་བ་ནི་སྔགས་དང་ཚིག་དྲུག་གོ །སྦྱིན་པའི་ཚུལ་ནི་ཚིག་བདུན་དང་། སྦྱིན་པ་དངོས་ཚིག་གསུམ་ཡིན་ནོ། །འདི་རྣམས་ཀྱི་གྲོལ་ལམ་པའི་དབང་དུ་བྱས་པའི་ལག་ལེན་ནི་འདི་ཡིན་ཏེ། སྔར་ནས་ཐོད་པར་འོ་མའམ་ཆང་ལ་བདུད་རྩི་ལྔ་སྦྱར་ལ། འཁོར་ལོ་སྡོམ་པ་ཡབ་ཡུམ་གཉིས་སུ་མེད་པའི་སྦྱོར་མཚམས་ནས་བྱང་ཆུབ་ཀྱི་སེམས་མུ་ཏིག་ལྟ་བུ་བྱུང་བས་ཐོད་པ་གང་བར་བསྒོམས་ལ། གསོལ་བ་བཏབ་པའི་རྗེས་སུ་ཏིང་ངེ་འཛིན་ནི། བླ་མ་དང་ཧེ་རུ་ཀ་ཡབ་ཡུམ་དབྱེར་མེད་ཀྱི་སྦྱོར་མཚམས་ནས་བྱང་ཆུབ་ཀྱི་སེམས་འོད་ཟེར་བདག་གི་ངག་ལ་ཐིམ་ནས་དབང་བསྐུར་བར་བསྒོམས་ལ། ཇི་ལྟར་ལ་སོགས་ཚིག་བདུན་གྱིས་ཐོད་པ་མགྲིན་པའམ་མགོར་བཞག་ལ་འདི་དེ་ཅེས་པ་ཚིག་ལྔས་ལྕེ་ལ་བཞག་གོ །དེ་ལྟར་དབང་ངག་ལ་བསྐུར་ཞིང་། ངག་གི་དྲི་མ་དག་ནས། རྡོ་རྗེའི་བཟླས་པ་ལ་དབང་བར་འགྱུར་རོ། །ཞེས་དོན་ཅུང་ཟད་བཤད་དོ། །གསུམ་པ་ཤེས་རབ་ཡེ་ཤེས་ལ་བདུན་ལས། དང་པོ་ནི་དེ་ནས་ཞེས་ཚིག་ལྔས་མཚམས་སྦྱར་རོ། །གཟུངས་དང་ཞེས་ཚིག་དྲུག་གིས་མཎྜྻལ་ཕུལ་ལ་གསོལ་བ་གདབ་པའོ། །གསུམ་པའི་རྟེན་ཚིགས་བཅད་དང་བཅས་ཏེ་སྦྱིན་པ་ནི་བླ་མས་ཞེས་སོ། །སྦྱིན་པའི་ཚིག་ཟུངས་ཤིག་ལ་སོགས་ཚིག་བརྒྱད་དོ། །དེ་ནས་ལྷ་མོས་དམ་ཚིག་དྲི་བ་ནི། ཚིག་བརྒྱད་ཀྱིས་བླ་མས་བརྗོད་དེ་ལྷ་མོས་བརྗོད་པར་བསམ་ཟེར་རོ། །ལན་ནི། དེ་ནས་དཔའ་བོ། ཇི་ལྟར་ལ་སོགས་ཚིག་བཞི་བྱའོ། །དམ་ཚིག་དང་ལྡན་པ་ལ་དགྱེས་ནས། ལྷན་ཅིག་སྐྱེས་པའི་དྲིས་ལན་ནི། དེ་ལ་ལྷ་མོ་ཞེས་པའི་ཚིག་བརྒྱད་ཀྱིས་རྩ་རྡོ་རྗེ་དབྱིངས་ཀྱི་དབང་ཕྱུག་མ་བསྟན་ན། ཨེ་བྃ་ལ་སོགས་ཚིག་བཅུས་མན་ངག་བརྗོད་པའོ། དཔའ་བོ་དེས་ལྷ་མོ་ལན་ནི། སྔགས་སྐྱེས་ལ་སོགས་ཚིག་ལྔའོ། །རྗེས་གནང་ནི། དེ་ལ་སོགས་ཚིག་བཅུ་བཞིའོ། །དེ་རྣམས་ཀྱི་ལག་ལེན་ནི། འདིར་དངོས་ཀྱི་དབང་དུ་བྱས་པ་ཡིན་ཀྱང་། སློབ་མས་མཎྜྻལ་ཕུལ་ལ་གཟུང་དང་འཛིན་པ་སྐྱོབ་པའི་སྐྱབས་ཞེས་ཚིག་དྲུག་གིས་གསོལ་བ་ལན་གསུམ་དུ་བཏབ་ལ། དེ་ནས་བདག་ཉིད་དཔལ་ཧེ་རུ་ཀའི་ཡུམ་ལས་ཅིག་ཆད་ནས་སློབ་མ་ལ་གཞུག་ཅིང་། དངོས་སུ་སིན་དྷུ་ར་སྔགས་དང་བཅས་ཏེ་སྙིང་ཁར་བྱུགས་ནས། ཟུང་ཞིག་ཅེས་ཚིག་བརྒྱད་བརྗོད་ལ། དེ་ནས་སློབ་དཔོན་གྱིས་ནང་གི་སྔགས་སྐྱེས་རང་ལ་ཡོད་པ་ངོ་སྤྲད་པ་ནི། ལྟེ་བའི་དཀྱིལ་འཁོར་ཉིད་དུ་གནས། །དང་པོའི་དབྱངས་ཡིག་རང་བཞིན་ཏེ། རྫོགས་པའི་རིམ་པའི་རྣལ་འབྱོར་ལས། །དེ་ཉིད་བཅོམ་ལྡན་ཤེས་རབ་མ། ཅེས་པས། རང་གི་རྩ་གསུམ་འདུས་མདོ་ནས། ཨ་ལས་མེ་འབར་ནས། སྤྱི་བོ་ནས་བྱང་ཆུབ་ཀྱི་སེ མས་ཞུ། འཁོར་ལོ་བཞི་ལ། དགའ་བ་དང་། མཆོག་དགའ་དང་། དགའ་བྲལ་དང་། ལྷན་ཅིག་སྐྱེས་དགའ་ངོ་སྤྲད་དོ། །དེ་ནས་སྤྱི་བོར་ལག་པ་བཞག་ལ། དེ་ནས་བཟུང་སྟེ་བུ་ཁྱོད་ཀྱིས། །ཞེས་པའི་ཚིག་ལྔས་གནང་བ་སྦྱིན་ནོ། །ཤེས་རབ་ཡེ་ཤེས་ཀྱི་དབང་འདི་ནི། ཡིད་ལ་བསྐུར། ཡིད་ཀྱི་དྲི་མ་དག་ནས། བྱང་ཆུབ་ཀྱི་སེམས་བསྒོམ་པའི་སྐལ་བ་ཅན་དུ་བྱས་པའོ། །ཞེས་བརྡའ་དོན་སྤྲད་དོ། །དབང་བཞི་པ་ལ་གཉིས་ལས། མདོར་བསྟན་ནི། རིམ་པ་ལ་སོགས་ཚིག་གཉིས་སོ། །རྒྱས་བཤད་ནི། སེམས་ཉིད་ལ་སོགས་ཚིག་བཅུ་གཉིས་སོ། །འདི་ཡང་བསྐུར་བའི་དུས་སུ། དང་པོར་མཎྜྻལ་ཕུལ་ལ་གསོལ་བ་གདབ་པ་ནི། རྡོ་རྗེ་འཆང་གི་བཀའ་དྲིན་གྱིས། །དེང་འདིར་དབང་བསྐུར་རྣམ་གསུམ་ཐོབ། །སྟོང་ཉིད་ཤེས་རབ་མཛེས་མ་ཡི། །བཞི་པའི་བཀའ་དྲིན་སྐྱབ་ཏུ་གསོལ། ཞེས་གསོལ་བ་བཏབ་ལ། དེ་ནས་གཞུང་གི་ཚིག་བཅུ་གཉིས་པོ་བརྗོད་ནས་དེའི་དོན། ད་ལྟར་དབང་གསུམ་པའི་ལྷན་ཅིག་སྐྱེས་པ། རྟོག་བྲལ་བདེ་བ་ཆེན་པོ་ཡིས་ཀྱང་མཚོན་དུ་མེད་པ། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་སྟོང་པ་དང་སྙིང་རྗེ་ཟུང་དུ་འཇུག་པ་འདི་ལ་བརྟེན་ནས་དུས་གསུམ་གྱི་སངས་རྒྱས་ཐམས་ཅད་ཀྱིས་ཀྱང། བླ་ན་མེད་པའི་བྱང་ཆུབ་མཉེས་པ་ཡིན་པས། འདི་དང་བྲལ་བར་མི་བྱའོ་ཞེས་ངོ་སྤྲད་དོ། །དེ་ལྟར་དབང་བཞི་པ་འདི་ལུས་ངག་ཡིད་གསུམ་ལ་བསྐུར་ཞིང་། དེ་ཁོ་ནའི་སྐལ་པ་ཅན་དུ་བྱེད་ལ། གསུམ་ཀའི་དྲི་མ་དག་པའོ་ཞེས་བཤད་དོ། །ཡང་ན་གོང་གི་ཚིག་དྲུག་བཤད་ལ། འོག་གི་ཚིག་བརྒྱད་ཀྱིས་རྗེས་གནང་བྱས་ཀྱང་རུང་ངོ་། །མཇུག་གི་དོན་ནི་གཉིས་ཏེ། དབང་གི་མཇུག་སྡུད་དངོས་ནི། ཆུ་སོགས་ཞེས་ཚིག་དགུ་སྟེ། དེ་ཡང་སློབ་དཔོན་དྲིལ་བུ་པའི་བཞེད་པས། ཆུ་ཅོད་པན་རྡོ་རྗེ་དྲིལ་བུ་མིང་དང་ལྔ། སྔགས་དང་དྲུག བརཏལ་ཞུགས་གཉིས་ཅིག་ཏུ་བྱས་པ་དང་བདུན། སློབ་དཔོན་གྱི་དབང་ལ་བཞི་སྟེ། གསོལ་བ་གདབ་ཅིང་དམ་ཚིག་སྦྱིན་པ། དེའི་བུམ་དབང་། དངོས། རྗེས་གནང་དང་བཅུ་གཅིག གོང་མ་གསུམ་དང་བཅུ་བཞི་པོ་འདི། བརྡའ་ཡིན་པས་ནང་དུ་ཤེས་པར་བྱའོ། །ཞེས་བཞེད་པར་སྣང་ངོ་། །ཞར་ལ་དེ་ཁོ་ན་ཉིད་ཀྱི་བསྐྱང་ཐབས་གསུངས་པ་ནི། ཕྱི་ནི་ཞེས་པའི་ཚིག་བཅུ་གཉིས་ཏེ། རིམ་ལྔ་དང་མཐུན་པས་འདིར་བཤད་པ་མ་བྱས་སོ། །དེ་ནས་རྗེས་སུ་སློབ་མས་ཇི་ལྟར་འབྱོར་པའི་ལོངས་སྤྱོད་ལུས་དང་བཅས་པ་ཕུལ་ཏེ། དཔའ་བོ་དང་མཁའ་འགྲོ་ཆོས་སྐྱོང་རྣམས་ཚོགས་དང་གཏོར་མས་མཉེས་པར་བྱ་སྟེ། དགའ་སྟོན་ཆེན་པོ་བྱའོ། །དེ་རྣམས་ཀྱི་རིམ་པ་ཡང་མཆོད་ཁྲིགས་ལྟར་བྱའོ། །མཇུག་ཡོངས་སུ་རྫོགས་པའི་བསྔོ་བ་ནི། དབང་བསྐུར་ཞེས་ཚིག་བཞིའོ། །ཕྱག་རྒྱ་ཆེན་པོ་གྲུབ་པ་དཔལ་དྲིལ་བུ་པའི་དབང་གི་ཆུ་བོའི་མཚམས་སྦྱོར་གསལ་བར་བསྟན་པའོ། །རྫོགས་སོ། །བདེ་མཆོག་འོ་མའི་རྒྱ་མཚོ་བསྲུབས་པ་ལས། །བྱུང་བའི་ལུས་དཀྱིལ་དབང་གི་རིམ་པ་ལ། །མཁས་འདོད་ཆོ་གའི་སྦྱར་བཤད་མང་མཐོང་ཡང་། །རྣལ་འབྱོར་དགོངས་པ་མ་ཡིན་རང་འདོད་ཡིན། །འདིར་ནི་བླ་མའི་ཞལ་ལས་ལེགས་རྒྱུད་ཅིང་། །མཁས་འདོད་རྟོག་པ་བཅད་ནས་རང་གཞུང་དང་། །མཐུན་པར་བློ་དམན་རྣམས་ལ་ཕན་བྱའི་ཕྱིར། །རང་བྱུང་རྡོ་རྗེ་ཞེས་བྱས་སྦྱར་བ་ཡིན། །དེ་ལས་བྱུང་བའི་དགེ་བ་དྲི་མེད་ཀྱིས། འགྲོ་རྣམས་ཐར་པའི་ལམ་དུ་སྨིན་བྱས་ཏེ། །རིམ་གཉིས་དོན་གྱི་གཤོག་པ་རབ་རྒྱས་ནས། །ཐམས་ཅད་མཁྱེན་པའི་མཁའ་ལ་སྤྱོད་པར་ཤོག །མཁའ་སྤྱོད་ཀྱི་དངོས་གྲུབ་མངོན་སུམ་དུ་བརྙེས་པའི། པུ་རངས་པ་པྲད་ཛྙྱ་གྷིར་ཏི་ལ་འོངས་པའི་བཞེད་པ་འདི། ལུག་ལོ་ཟླ་བ་དང་པོ་ལ་ལྷ་སྟེངས་སུ་སྦྱར་བའོ། །ཉེས་པའི་ཚོགས་རྣམས་བླ་མ་མཁའ་འགྲོས་བཟོད་པར་མཛོད་ཅིག བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། ༈ །།དྲིལ་བུ་པའི་ལུས་ཀྱི་དཀྱིལ་འཁོར་གྱི་ཡིག་སྣ་བཞུགས་སོ། །བླ་མ་དང་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །ཨིན་ཏྲའི་མདོག་ཅན་དུས་མཐའི་མེ་ལྟར་འབར་བའི་འོད། །སྲིད་གསུམ་སྒྲོལ་མཛད་དྲག་པོ་འདུལ་བྱེད་ཁྲོ་བོའི་སྐུ། །སྙིང་རྗེའི་གར་ལྡན་རྣལ་འབྱོར་མ་དཔལ་ལྷན་ཅིག་པའི། །རོལ་པའི་སྐུ་མངའ་ཧེ་རུ་ཀ་ལ་ཕྱག་འཚལ་ནས། །འཁོར་ལོ་སྡོམ་པར་རབ་གསུངས་པ། །ཟབ་མོ་མངོན་པར་རྟོགས་པའི་རིམ། །དྲིལ་བུ་ཞབས་ཀྱིས་སྣང་མཛད་པ། །དེ་འདིར་ཅུང་ཟད་གསལ་བར་བྱ། །དཔལ་དྲིལ་བུ་པས་མཛད་པའི་བསྒྲུབ་ཐབས་འདི་ཉམས་སུ་ལེན་པར་འདོད་པས། རྟེན་གྱི་གང་ཟག་ནམ་མཁའ་དང་མཉམ་པའི་འགྲོ་བ་རྣམས་སངས་རྒྱས་ཐོབ་པར་འདོད་པ་ལ་གཞོལ་བའི་བློ་རྒྱ་ཆེན་པོ་དང་ལྡན་པ། རང་གི་རྒྱུད་རྩེ་ཅིག་པར་རྡོ་རྗེ་འཆང་ཆེན་པོ་ཉིད་དུ་གྲུབ་པར་འདོད་ཅིང་། ཚངས་པའི་གནས་བཞི་ལ་སོགས་པ་རྒྱ་ཆེན་པོ། རྒྱུད་དང་མན་ངག་དབང་བསྐུར་བ་ཇི་ལྟ་བ་བཞིན་ཐོབ་ནས་དམ་ཚིག་ལ་གནས་པའི་གང་ཟག་དེས། རྒྱུད་སྡེ་འོག་མ་པ་ལྟར་ཕྱི་རོལ་གྱི་ལྷའི་རྟོག་པ་སྤང་ཞིང་། མཉམ་པ་ཉིད་ཆེན་པོའི་དོན་ཁོང་དུ་ཆུད་པར་བྱས་ཏེ་ཉམས་སུ་བླང་བར་བྱའོ། །དེའང་བསྐྱེད་རྫོགས་གཉིས་ལས། བསྐྱེད་པའི་རིམ་པ་ནི། འདི་ལྟར་ཉམས་སུ་བླངས་ཏེ། རེ་ཤིག་སྔ་བར་རྡོ་རྗེ་རྣལ་འབྱོར་མའི་གླུ། །ཧཱུྃ་རོལ་གཅིག་རོལ་གཅིག་དགྱེས་པར་རོལ། །བདེ་བ་ཆེན་པོའི་རྡོ་རྗེ་ནི། །བདེ་བ་ཆེན་པོའི་རོ་ཉིད་ལས། །འདི་ཉིད་དུ་ནི་བཞེངས་སུ་གསོལ། །ཅེས་སོ། །སྒྱུ་མ་ལྟ་བུའམ། ཡི་གེ་བདུན་པའི་སྔགས་ཀྱི་སྒྲས་སད་པར་མོས་ཏེ། བདུད་རྩི་རི་ལུའམ། ཆང་ལ་སྦྱར་བ་གང་ཡང་རུང་པས་ཁ་དག་པར་བྱས་ནས། བསམ་གཏན་གྱི་འདུག་སྟངས་ཀྱིས་གནས་ཏེ། ནམ་མཁའ་དང་མཉམ་པའི་སེམས་ཅན་ཐམས་ཅད་སྡུག་བསྔལ་གྱི་རང་བཞིན་དུ་གནས་པ་ལས་ཐར་བར་བྱ་བ་དང་། བདེ་བ་ཆེན་པོ་དང་ཕྲད་པར་བྱ་ཞིང་། དེ་ཉིད་དང་མི་འབྲལ་བའི་ཉེ་རིང་མེད་པར་སེམས་བསྐྱེད་ནས། ཤྲི་ཧེ་རུ་ཀ་ཧྃ་ཞེས། །ཤྲི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །དེའི་དོན་དང་ལྡན་པས་ཡིད་དག་པར་བལྟས་ལ། ཨོཾ་ཨ་ཨཱ་ཨི་ཨཱི་ཨུ་ཨཱུ་རི་རཱི་ལི་ལཱི་ཨེ་ཨཱཻ་ཨོ་ཨཱཽ་ཨཾ་ཨཱཿ ཀ་ཁ་ག་གྷ་ང་། ཙ་ཚ་ཛ་ཛྙྱ་ཉ། ཊ་ཋ་ཌ་དྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ་ཧཱུྃ་ཕཊ། ཅེས་ངག་སྔགས་ཀྱི་དག་པ། དེ་ཉིད་ཀྱི་ངང་ལས་བདག་གི་ལུས་ཞལ་ཅིག་ཕྱག་གཉིས་པའི་བཅོམ་ལྡན་འདས། གར་གྱི་ཉམས་དགུ་དང་ལྡན་པ། ཐུགས་ཁར་ཟླ་བ་འཇིག་རྟེན་པའི་ཡེ་ཤེས་ཀྱི་ངོ་བོའི་སྟེང་དུ། ཞབས་ཀྱུ་བྱ་བ་གྲུབ། ཁོག་པ་སོ་སོར་རྟོག་པ། མགོ་བོ་མཉམ་པ་ཉིད། ཟླ་ཚེས་མེ་ལོང་ལྟ་བུ། ཐིག་ལེ་དང་བྃ་གཉིས་སུ་མེད་པ་ཆོས་ཀྱི་དབྱིངས་ཀྱི་བདག་ཉིད་དུ་བསྒོམ་པས་དུག་གསུམ་སྦྱངས་ཏེ། འོད་ཟེར་འཕྲོས་པས་སྔོན་ཉིད་ནས་གྲུབ་པའི་དཀྱིལ་འཁོར་གྱི་འཁོར་ལོ་བླ་མ་དང་བཅས་པ་མདུན་གྱི་ནམ་མཁའ་ལ་བཀུག་སྟེ། ཨོཾ་མཧཱ་གྷུ་རུ། ཤྲི་ཧེ་རུ་ཀ། ན་མོ་ཏེ་ཧཱུྃ། ན་མོ་ནི་ཧཱུྃ། ན་མོ་ན་ཡེ་ཧཱུྃ། ཞེས་ཕྱག་བྱས་ལ། ཧཱུྃ་གི་འོད་ཟེར་ལས་བྱུང་བའི་མཆོད་པ་རྣམས་ཀྱིས་ཡང་དག་པར་མཆོད་དེ། ཨཱོཾ་ཨ༔བཛྲ་བི་ན་ཧཱུྃ། ཨོཾ་ཨཿབཛྲ་ཝྃ་སེ་ཧཱུྃ། ཨོཾ་ཨཱཿབཛྲ་མུ་རན་ཙེ་ཧཱུྃ། ཨོཾ་ཨཿབཛྲ་མུ་ཀུན་ཌེ་ཧཱུྃ། ཨོཾ་ཨཱཿབཛྲ་ཧ་སེ་ཧཱུྃ། ཨོཾ་ཨཿབཛྲ་ལ་སེ་ཧཱུྃ། ཨོཾ་ཨཿབཛྲ་གྷིར་ཏི་ཧཱུྃ། ཨོཾ་ཨཿབཛྲ་ནིར་ཏི་ཧཱུྃ། ཨོཾ་ཨཿབཛྲ་པུས་པེ་ཧཱུྃ། ཨོཾ་ཨ་བཛྲ་དྷུ་པེ་ཧཱུྃ། ཨོཾ་ཨཿབཛྲ་ཌ་པེ་ཧཱུྃ། ཨོཾ་ཨཿབཛྲ་གན་དྷེ་ཧཱུྃ། ཨོཾ་ཨ་བཛྲ་དྷར་ཤེ་ཧཱུྃ། ཨོཾ་ཨ་བཛྲ་ར་སེ་ཧཱུྃ། ཨོཾ་ཨ་བཛྲ་པར་ཤེ་ཧཱུྃ། ཨོཾ་ཨ་བཛྲ་དྷར་རྨེ་ཧཱུྃ། ཞེས་པི་ཝང་མ་སྔོན་མོ། གླིང་བུ་མ་སེར་མོ། རྫ་རྔ་མ་ལྗང་ཁུ། རྔ་བཟླུམ་མ་དམར་མོ། བཞད་མ་དམར་སེར། སྒེག་མོ་སྔོན་མོ། གླུ་མ་སེར་མོ། གར་མ་ལྗང་ཁུ། མེ་ཏོག་མ་སེར་མོ། བདུག་སྤོས་མ་དུད་ཁ། མར་མེ་མ་དམར་མོ། དྲི་ཆབ་མ་ལྗང་ཁུ། གཟུགས་མ་དཀར་མོ། རོ་མ་དམར་མོ། རེག་མ་ལྗང་ཁུ། ཆོས་མ་དཀར་མོ་རྣམས་ཀྱིས་ཕྱིའི་མཆོད་པ་དང་། ཨོཾ་པཉྩྨ་ཨ་མྲི་ཏ་པུཉྩྨ་མེ་ཀ་ས་མུད་ཏྲ་སྤ་ར་ན་ས་མ་ཡེ་ཧཱུྃ། མཁའ་འགྲོ་མ། ལཱ་མ། དུམ་སྐྱེས་མ། གཟུགས་ཅན་མ་རྣམས་ཀྱིས་ཤ་ལྔ་དང་། བདུད་རྩི་ལྔས་ནང་དང་། གསང་བ་དང་མཆོད་བྱ་མཆོད་བྱེད་དང་བྲལ་བ་དེ་ཁོ་ན་ཉིད་ཀྱི་མཆོད་པས་མཆོད་ནས། སྡིག་པ་བཤགས་པ་དང་། བསོད་ནམས་ལ་ཡིད་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་འདེབས་པ་དང་། ལམ་རྟེན་པ་རྣམས་གཞན་ནས་རྒྱས་པར་ཇི་སྐད་བཤད་པ་བཞིན་ནམ། ཡང་ན་དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡིད་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །བྱང་ཆུབ་མྱུར་དུ་བདག་སྐྱབས་མཆི། །འགྲོ་བ་ཀུན་གྱི་དོན་གྱི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཅེས་ལན་གསུམ་གྱིས་བསོད་ནམས་ཀྱི་ཚོགས་སོ། །དེ་ནས་སྐད་ཅིག་གི་སྔགས་བརྗོད་ཀྱང་རུང་། མ་བརྗོད་ཀྱང་རུང་བས་དེ་ཐམས་ཅད་རང་གི་ལུས་ལ་གཞུག་ཅིང་། ལྷན་ཅིག་སྐྱེས་པའི་ཡེ་ཤེས་སྤྲོས་པས་བྲལ་བ་ལ་མཉམ་པར་བཞག་པ་ནི་སྔོན་འགྲོའོ། །དེ་ནས་སྐད་ཅིག་གིས་རྟེན་གཞལ་ཡས་ཁང་རང་གི་ལུས་ཉིད་ལ་གྲུབ་པར་བལྟ་སྟེ། ཅི་སྐད་བཤད་པའི་འབྱུང་བ་རིམས་བརྩེགས་དང་། སྤྱི་བོ་སྣ་ཚོགས་རྡོ་རྗེ་དང་། །དེ་སྟེང་དྷྃ་སྐྱེས་སུམ་ཅུ་གཉིས། སྙིང་ཁར་ཆུས་སྐྱེས་འདབ་མ་བརྒྱད། །དུར་ཁྲོད་རྣམས་ནི་དབང་པོའི་སྒོ། །ལྤགས་པ་རྡོ་རྗེ་ར་བས་ཏེ། །བ་སྤུ་མདའི་དྲ་བ་ལས། ཡེ་ཤེས་ལྔའི་མེ་འོད་འབར། །ཞེས་པའི་དོན་གསལ་བར་བྱའོ། །དེ་ནས་ལྷ་རྣམས་སྐད་ཅིག་གིས་བསྐྱེད་ཅིང་རིམས་ཀྱིས་གསལ་གདབ་པ་ནི། སྙིང་ཁར་པད་མའི་དབུས་ཀྱི་ཉི་ཟླའི་སྟེང་གི་ཧཱུྃ་བྃ་ལས་བྱུང་བའི་བཅོམ་ལྡན་འདས་ལུས་ཀྱི་དཀྱིལ་འཁོར་གྱི་བདག་པོ་དང་། ཕྱིའི་ཧེ་རུ་ཀ་གསལ་གདབ་པ་གཞུང་ཉིད་དུ་གསལ་ལོ། །ཉམས་དགུ་ནི། སྒེག་པ་དཔའ་བ་མི་སྡུག་པ། །རྒོད་ཅིང་དྲག་ཤུལ་འཇིག་རུང་པ། །སྙིང་རྗེ་རྔམ་ཞིང་ཞི་བ་ཡི། ཞེས་སྐུ་གསུང་ཐུགས་ཀྱི་གར་རོ། །མཁའ་འགྲོ་མ་ལ་སོགས་པ་ནི། ཇི་སྐད་བཤད་པའི་སྐུ་མདོག་དང་གཟུགས་ཅན། སྙིང་ཁའི་པད་མའི་ཕྱོགས་ལ་གཡོན་བསྐོར་གྱིས་མྃ་ལྃ་པྃ་ཏྃ་ལས་བསྐྱེད་ཅིང་། མཚམས་རྣམས་སུ་བདུད་རྩི་འབབ་པའི་རྩ་རྣམས་བུམ་པ་ལ་གནས་པའི་པད་མའི་སྣོད་དུ་བདུད་རྩི་དང་བཅས་པ་བདེ་བ་ཆེན་པོའི་འཁོར་ལོའོ། །དེ་ནས་པུ་ཛ་ལ་སོགས་པའི་ཡི་གེ་ཉི་ཤུ་རྩ་བཞི་བརྗོད་མ་ཐག་ཏུ་དེ་དག་གི་གནས་སུ་འཁོར་ལོ་ཟུར་དྲུག་པ་སྔོན་པོ་དང་། དམར་པོ་དང་། དཀར་པོ་དབུས་ཁོང་སྟོང་ལ་ཡི་གེ་དེ་ཉིད་ལས་བྱུང་བའི་ཐུགས་གསུང་སྐུའི་འཁོར་ལོ་གསལ་གདབ་པ་ནི་གཞུང་ལས་ཇི་སྐད་བཤད་པ་བཞིན་ཏེ། ས་བཅུ་ཡོངས་སུ་དག་པ་ཞལ་ཅིག་ཕྱག་གཉིས་པ་ཕྱག་རྒྱ་ལྔ་དང་ཐོད་པའི་ཕྲེང་བ་དང་། སྟག་གི་ཤམ་ཐབས་ཅན། གར་དགུ་དང་ལྡན་པའོ། ཐམས་ཅད་ཀྱང་གཙོ་བོ་ལ་གཟིགས་པའོ། སྒོ་མཚམས་མ་བརྒྱད་ནི། སྙིང་ཁའི་ཕྱི་བསྐོར་གྱི་འདབས་མ་བརྒྱད་ལ་ཧཱུྃ་རིང་པོ་བརྒྱད་ལས་གྱུར་པའི་ཁ་གདོང་མ་སྔོན་མོ། འུག་གདོང་མ་ལྗང་ཁུ། ཁྱི་གདོང་མ་དམར་མོ། ཕག་གདོང་མ་སེར་མོ། མཚམས་མ་དག་ནི་ཕྱོགས་ཀྱི་ཁ་དོག་ཕྱེད་ཕྱེད་འཛིན་པ། གཞན་དག་ནི་སྙིང་པོའི་རྣལ་འབྱོར་མ་བཞིན་ནོ། །དེ་དག་ཀྱང་སོར་མོ་ལ་སོགས་པ་གནས་ཀྱི་དབྱེ་བ་མང་དུ་འདུག་ཀྱང་། ངོ་བོ་གནས་ཉི་ཤུ་རྩ་བཞི་དང་ལྷ་དྲུག་ཅུ་རྩ་གཉིས་ཀྱི་བདག་ཉིད་དྲན་པ་ཉེ་བར་བཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་རྣམས་ཀྱི་བདག་ཉིད་དོ། །དེ་ནས་ཨོཾ་སརྦ་བྷི་ར་གོ་གི་ནི་ཀ་ཡ་ཝ་ཀ་ཙི་ཏ་བཛྲ་ས་བྷ་ཨད་མ་ཀོ་ཧྃ། བདག་གིས་བསྒོམ་པའི་དཀྱིལ་འཁོར་གྱི་ལྷ་རྣམས་དང་། འཛམ་བུ་གླིང་ན་བཞུགས་པའི་སྤྲུལ་པའི་སྐུ་རྣམས་དང་། འོག་མིན་ན་བཞུགས་པའི་ལོངས་སྤྱོད་རྫོགས་པའི་སྐུ་རྣམས་དབྱེར་མེད་པར་གྱུར་ནས་གཉིས་སུ་མེད་པའི་རང་བཞིན་ཡིན་སྙམ་དུ་དྲན་པ་ལན་ག སུམ་བྱས་ལ་། ཨོཾ་བཛྲ་ཤུད་དྷ་སརྦ་དྷརྨ་བཛྲ་ཤུད་དྷོ་ཧཾ་ཞེས་བརྗོད་པས། ལྷ་རྣམས་ཀྱི་སྤྱི་བོ་དང་མགྲིན་པ་དང་། སྙིང་ཁར་ཨོཾ་ཨཱ་ཧཱུྃ་དཀར་པོ་དང་དམར་པོ་དང་མཐིང་ཀ། སྐུ་གསུང་ཐུགས་རྡོ་རྗེའི་རང་བཞིན་དུ་བྱིན་གྱིས་བརླབ་བོ། །དེ་ནས་ཇི་སྐད་བཤད་པའི་གནས་སུ་ཨོཾ་ཧ་ལ་སོགས་པ་ཡིག་འབྲུ་ཉིད་ལྷ་རྣམས་ཀྱི་ཁ་དོག་དང་མཐུན་པར་གོ་ཆ་དགོད་པ་བྱའོ། །ལྷ་ཉིད་དུ་འགོད་ན། རྡོ་རྗེ་སེམས་དཔའ་ནི། ཞལ་གསུམ་ཕྱག་དྲུག་པ། གཡས་དམར་བ། གཡོན་ནག་པོ། དབུས་དཀར་བ། གཡས་ཀྱི་ཕྱག་ན་རྡོ་རྗེ་དང་། ཌ་མ་རུ་དང་། ཚངས་པའི་མགོ་བོ། གཡོན་ན་དྲིལ་བུ་དང་། ཐོད་པ་དང་། ཁ་ཊྃ་ག་དང་། གཞན་ནི་ཞལ་ཅིག་ཕྱག་བཞི་པ་སྟེ། གཡས་དང་པོ་འཁོར་ལོ་དང་། རྡོ་རྗེ་དང་། རིན་པོ་ཆེ་དང་། རལ་གྲི། འོག་མ་ཌ་མ་དང་། གཡོན་རྣམས་ཐོད་པ་དང་ཁ་ཊྶཱྃ་གའོ། །དེ་དག་གི་ཁ་དོག་ནི་དཀར་པོ། སེར་པོ། དམར་པོ། ནག་པོ་སེར་པོ་ལྗང་ཁུའོ། །དེ་བཞིན་དུ་ཕག་མོ་ནི། ཞལ་གཡས་སྔོ། གཡོན་ལྗང་དབུས་དམར། ཕྱག་གཡས་ན་གྲི་གུག ལྕགས་ཀྱུ། ཚངས་པའི་མགོ་བོ། གཡོན་ན་ཐོད་པ་ཁ་ཊྶཱྃ་ག ཞགས་པ། གཞན་དག་ནི་ཞལ་གཅིག་ཕྱག་བཞི་ལ། གཡས་ཌ་མ་རུ་དང་གྲི་གུག གཡོན་ཐོད་པ་དང་ཁ་ཊྶཱྃ་ག རིམ་པ་ལྟར། ཁ་དོག་དམར་པོ་དང་སྔོན་པོ། དཀར་པོ་སེར་པོ། དུ་བའི་མདོག་རྣམས་སུ་བསྒོམ་མོ་ཞེས་གསུངས་ཏེ། འདིར་ནི་ཡིག་འབྲུ་ལྷའི་རང་བཞིན་ཅན་དུ་བསྒོམ་པ་རང་ལེགས་པར་སེམས་སོ། །དེ་ནས་འབར་བའི་ཕྱག་རྒྱ་དཔྲལ་བའི་དབྱིངས་སུ་བསྐོར་རོ། །ཕེཾ་ཞེས་བརྗོད་ནས་སྙིང་ཁའི་ཧཱུྃ་ལས་འོད་འཕྲོས་པས་རང་བཞིན་གྱིས་གྲུབ་པའི་དཀྱིལ་འཁོར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་སྤྱན་དྲངས་པ་ལ་སྔ་མ་ལྟར་མཆོད་ནས། ཛ་ཧཱུྃ་བྃ་ཧོ་ཞེས་བརྗོད་པས་རང་ལ་བསྟིམ་ནས། ཨོཾ་ཡོ་ག་ཤུད་དྷོ་སརྦ་དྷ་ས་བྷ་བཱ་ཤུ་དྷོ་ཧྃ། ཅེས་བརྗོད་པས་གཉིས་སུ་མེད་པར་གྱུར་པར་བསམ་པ་ནི་ཡེ་ཤེས་པ་གཞུག་པའོ། །ཡང་སྔར་བཞིན་དབང་གི་ལྷ་དྲུག་ཅུ་རྩ་གཉིས་དཀྱིལ་འཁོར་སངས་རྒྱས་དང་བྱང་ཆུབ་སེམས་དཔའ་དང་། ཁྲོ་བོ་དང་། ཁྲོ་མོ་དང་། མཆོད་པའི་ལྷ་མོའི་ཚོགས་དཔག་ཏུ་མེད་པས་བསྐོར་བ་སྤྱན་དྲངས་པ་ལ་སྔ་མ་བཞིན་དུ་མཆོད་ནས། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་བཏབ་པས། ལྷ་རྣམས་ཀྱིས། ཅི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་དབང་བསྐུར་ནས། བཀྲ་ཤིས་ཀྱི་གླུ་དང་། བགེགས་བསྐྲོད་པ་དང་། མཆོད་པ་མཛེས་པ་ཡེ་ཤེས་ཀྱི་ཆུས་ལུས་ཐམས་ཅད་གང་། དྲི་མ་ཐམས་ཅད་དག་ཆུ་ལྷག་མ་སྤྱི་བོར་ལུད་པས་གཙོ་བོ་ཡབ་ཡུམ་ལ་རྡོ་རྗེ་སེམས་པའོ། །མཁའ་འགྲོ་མ་བཞི་ལ་རིན་ཆེན་འབྱུང་ལྡན། ཐུགས་ལ་མི་བསྐྱོད་པ། གསུང་ལ་འོད་དཔག་མེད། སྐུ་ལ་རྣམ་སྣང་། དམ་ཚིག་གི་འཁོར་ལོ་ལ་དོན་ཡོད་གྲུབ་པས་དབུ་རྒྱན་ནོ། །དེ་ནས་འོད་ཟེར་ལ་ཕར་འཕྲོས་ཤིང་ཚུར་ལ་མཆོད་པ་དང་། བསྟོད་པ་བྱ་བ་ནི། མཆོད་ཁྲིགས་ནས་ཇི་སྐད་བཤད་པ་བཞིན། ཕྱི་ནང་གསང་བ་དང་། ཕྲེང་བའི་སྔགས་དང་། རྐང་པ་བརྒྱད་པ་ལ་སོགས་པའི་མཆོད་བསྟོད་བྱའོ། དེ་ལྟར་ལྷའི་སྐུ་སྒྱུ་མ་ལྟ་བུ་ལ་མི་སྐྱོ་བའི་བར་དུ་བསྒོམ་པར་བྱའོ། །བསྙེན་པ་ནི་ཐུགས་ཁའི་ཧེ་རུ་ཀ་ཡབ་ཡུམ་གྱི་གནས་རྣམས་སུ་སྔགས་བཀོད་ལ། བཟླས་པའི་ཡན་ལག་བླ་མའི་ཞལ་ལ་བྱུང་བ་བཞིན། མི་རུས་ཀྱི་ཕྲེང་བ་ལ་སོགས་པ་གང་ཡང་རུང་བ་བླངས་ཏེ་མི་སྐྱོའི་བར་དུ་བཟླས་པར་བྱའོ། །དེ་དག་ནི་བསྐྱེད་པའི་རིམ་པའི་ལུས་སོ། །ཡན་ལག་ནི་གསུམ་ལས། དུས་ཐམས་ཅད་དུ་མཉམ་པར་མ་བཞག་པའི་ཚེ་ཡང་སུམ་བྷ་ནི་དང་གོ་ཆ་ལ་སོགས་པས་བསྲུངས་ཏེ། སྣོད་བཅུད་ཐམས་ཅད་ཧེ་རུ་ཀའི་སྐུ། སྒྲ་ཐམས་ཅད་སྔགས། རྣམ་རྟོག་ཆོས་ཉིད་ཀྱི་རང་བཞིན་དུ་ལྷའི་རྣལ་འབྱོར་དང་ལྡན་པ་དང་། རྟག་ཏུ་ཚངས་པར་སྤྱོད་པ་ལ་གནས་ཤིང་། རྐང་བ་བརྒྱད་པ་ལ་སོགས་པའི་སྔགས་ཀྱང་མཆོད་པར་བྱའོ། །གཉིས་པ་བཟའ་བའི་རྣལ་འབྱོར་ནི། མེ་རླུང་གི་སྦྱོར་བས་བྱིན་གྱིས་བརླབས་ཤིང་། ལག་པ་གཡོན་པའི་མཐིལ་དག་ཏུ་འཁོར་ལོ་བསྒྱུར་བ་དང་། དཔའ་མོ་ལ་སོགས་པའི་སྔགས་བཀོད་ནས། ནང་དུ་གཏུམ་མོའི་མེ་དང་ལྷ་རྣམས་གསལ་བར་དམིགས་ཏེ། ནང་གི་སྦྱིན་བསྲེག་གི་ཚུལ་དུ་ཟོས་ནས། ལྷག་མ་ཨུ་ཙི་ཏས་འབྱུང་པོ་ལ་སྦྱིན་ནོ། །གསུམ་པ་གཏོར་མ་ནི་ཇི་ལྟར་བཤམ་པ་སྟེ། སྭ་བྷ་བཱས་ཉེས་པ་སྦྱངས་ཏེ། ཡྃ་ལས་རླུང་། རྃ་ལས་མེ། ཀྃ་ལས་ཐོད་པའི་སྒྱིད་པུ། ཨ་ལས་སྣོད་ཀ་པ་ལ། ནང་དུ་གྷོ་ཀུ་དྷ་ཧ་ན། བྷི་མུ་མ་ར་ཤུ་ལས་ཤ་ལྔ་དང་བདུད་རྩི་ལྔ། ཧཱུྃ་བྷྲུྃ། ཨོཾ་ཛྭིཾ་ཁྃ་ལས་ཡེ་ཤེས་ལྔ་ལྔའི་བདག་ཉིད་དུ་དམིགས་ཏེ། ཨོཾ་ཨཱ་ཧཱུྃ་ཟླ་བའི་དཀྱིལ་འཁོར་དང་བཅས་པ་ཁ་ཆོད་ཀྱི་ཚུལ་དུ་བལྟས་ལ། འོད་ཟེར་འཕྲོས་ནས་ཡེ་ཤེས་ཀྱི་བདུད་རྩི་བཀུག་ཅིང་། རྡོ་རྗེའི་ཐལ་མོ་ཁ་གྱེན་དུ་ཕྱེ་ལ་ཨོཾ་ཨ་ར་ལི་ཞེས་བྱ་བའི་སྔགས་དང་། རྩ་བའི་སྔགས་ཀྱིས་དཀྱིལ་འཁོར་ལ་ཕུལ་ཏེ། ལྗགས་རྡོ་རྗེའི་སྦུ་གུ་ཅན་གྱིས་གསོལ་བས་མཉེས་པར་བསམ་མོ། །དེ་ནས་ཁ་ཁྭ་ལ་སོགས་པའི་སྔགས་ཀྱིས་འབྱུང་པོ་ཐམས་ཅད་ལ་མཆོད་དེ། མཆོད་པ་དང་བསྟོད་པ། འདོད་པའི་དོན་ལ་གསོལ་བ་གདབ་ཅིང་། ཡི་གེ་བརྒྱ་པ་བརྗོད་ལ་གཤེགས་སུ་གསོལ་ལོ། །ད་ནི་གཉིས་པ་རྫོགས་པའི་རིམ་པ། རྟག་ཏུ་སྙིང་ལ་གནས་པ་ཞེས་བྱ་བའི་དོན་ནི། སྙིང་ཁའི་ཧེ་རུ་ཀ་ཡབ་ཡུམ་སྙོམས་པར་ཞུགས་པ་ཞུ་བས། ལྷ་མོ་རྣམས་ཀྱང་ཞུ་སྟེ། ཟླ་བའི་དཀྱིལ་འཁོར་ལ་གནས་པའི་ལྷག་པ་བྱང་ཆུབ་ཀྱི་སེམས་དངུལ་ཆུ་ལྟ་བུ་ལས་འོད་ཟེར་ལྔ་རབ་ཏུ་འཕྲོ་བ་སྲན་མའི་རྡོག་པོ་ཙམ་པ་དམིགས་ཏེ། ལྷ་གཞན་དག་ཀྱང་བཞུ་བ་དེ་ཉིད་ལ་སྡུས་ནས་རླུང་ཁ་སྦྱར་དུ་བསྒོམས་པས། ལྷན་ཅིག་སྐྱེས་པའི་ཡེ་ཤེས་བདེ་གསལ་མི་རྟོག་པ་སྐྱེ་ཞིང་། རྟགས་བཅུ་ཡོན་ཏན་བརྒྱད་མངོན་དུ་འགྱུར་རོ། །རྒྱས་པར་རིམ་པ་ལྔ་ལས་གསུངས་སོ། །ད་ནི་མཉམ་པར་མ་བཞག་པའི་རྣལ་འབྱོར་སྟོན་ཏེ ། ཁ་ཊྶཱྃ་ག་ནི་ལྷའི་སྐུ་ཞེས་པ་ལ་སོགས་པ་ཚིག་རྐང་བརྒྱད་ཀྱི་དོན། ཤེས་རབ་སྤྲོས་པ་དང་བྲལ་བའི་རང་བཞིན་ལས། ལྷ་སྐུ་བཞིན་ལག་དང་ཁ་དོག་གི་རྣམ་པ་ཐབས་ལྟར་དུ་ཤར་བ་ནི། རིམ་པ་གཉིས་དབྱེར་མེད་པ་སྟེ། གཟུགས་སོགས་ཀྱི་སྣང་བ་རང་བཞིན་ཀྱང་ཤེས་རབ་ཀྱིས་རྒྱས་གདབ་པར་བྱ་ཞིང་། ཌ་མ་རུའི་སྒྲ་ལྟར་ཕྱི་ནང་གི་ངག་ཐབས་སུ་ཤར་བ། ཨ་ལི་ཀ་ལིའི་རང་བཞིན། སྟོང་པ་ཤེས་རབ་ཀྱིས་རྒྱས་གདབ་སྟེ། དེ་ཡང་ཀྱེའི་རྡོ་རྗེ་ལས། ཁ་ཊྶཱྃ་ག་གཟུགས་ཤེས་རབ་སྟེ། ཐབས་ཀྱི་གཟུགས་ཀྱིས་ཅང་ཏེའུ་ཅེས་པ་དང་། རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱིས་ཆོས་འཆད་དོ། །ཞེས་སོ། །དེ་བཞིན་དུ་ཉིན་མོ་སྣང་བའི་ཆ་ནི་ཐབས་ཡིན་ལ། མཚན་མོ་སྣང་མེད་ནི་ཤེས་རབ་སྟེ། དེ་གཉིས་སུ་མེད་པའི་ཡེ་ཤེས་གཅིག་ཏུ་བསྒྲུབ་པའི་སེམས་ཀྱིས་མི་བྱ་བ་ཅི་ཡང་མེད་པ་ནི་དགག་བསྒྲུབ་མེད་པའོ། །དེ་རྟོགས་པར་བྱེད་པ་ལ་བརཏལ་ཞུགས་ཀྱི་སྤྱོད་པ་ལ་སོགས་པ་བཞིས་ཉམས་ང་མེད་པ་སེང་གེ་ལྟར་བསྒྲུབ་པའོ། །ཡང་ཚིག་བཞིས་ནང་དོན་མྱ་ངན་ལས་འདས་པ་མངོན་དུ་བསྒྲུབ་པར་བྱེད་འདོད་པ་རྣམས་སྦྱང་གཞི་ཕུང་པོ་ལྔ་སྦྱོང་བ་ལ་རིགས་ལྔར་སྣང་ལ། དྲུག་པ་ཡིད་ཀྱི་རྣམ་པར་ཤེས་པ་སྦྱོང་བ་ནི། ཧེ་རུ་ཀ་ཡིན་ཏེ། །ཡིད་ཀྱི་ཡུལ་ཆོས་ཡིན་པ་སྦྱོང་བ་ནི། རྣལ་འབྱོར་མའི་གཟུགས་སུ་བསྟན་ཞེས་པའོ། །འདི་དག་ནི་རིམ་གཉིས་དབྱེར་མེད་དུ་སྦྱོར་བའོ། །དེ་ལྟར་ལམ་ཉམས་སུ་བླང་བའི་འབྲས་བུ་ནི། སེམས་ནི་ངལ་བསོ་ཞེས་ཚིག་དྲུག་གི་ལྷན་ཅིག་སྐྱེས་པའི་ཡེ་ཤེས་ལ་གནས་པར་འདོད་པས། ལམ་བསྐྱེད་རྫོགས་ལ་ངལ་བསོ་ནས་ཡེ་ཤེས་མངོན་དུ་གྱུར་པས། ཐེག་པ་དམན་པ་ལྟ་བུའི་མྱ་ངན་ལས་འདས་པ་བསྟན་པ་མ་ཡིན་ཅིང་གཞན་དོན་དང་བཅས་ཏེ་སངས་རྒྱས་སུ་གྱུར་ལ། གནས་སྐབས་སུ་ཡང་འཆི་བ་ལ་སོགས་པས་མི་འཇིགས་ཏེ་མཁའ་སྤྱོད་ཀྱི་གནས་སུ་འཁྲིད་པར་བྱེད་དོ། །མཐར་ཐུག་ཡེ་ཤེས་ལྔ་ཡོངས་སུ་རྫོགས་པའི་སངས་རྒྱས་ཐོབ་པར་བྱེད་པའི་དོན་ཏེ། མཇུག་བསྡུ་པ་ནི། ཆོ་ག་སྣ་ཚོགས་ཅེས་ཚིག་དྲུག་གིས། དེ་ལྟར་ཁྱད་པར་ཅན་གྱི་ཐབས་ཉོན་མོངས་པ་ལམ་དུ་བྱེད་པ། རྒྱུད་དུ་སྦས་པ་རྣམས་རྣལ་འབྱོར་གྱི་དབང་ཕྱུག་དཔལ་དྲིལ་བུ་པས་སྣང་བར་མཛད་པའོ། །ལུས་ཀྱི་དཀྱིལ་འཁོར་གྱི་བསྒྲུབ་པའི་ཐབས། རང་བྱུང་རྡོ་རྗེས་ཅུང་ཟད་གསལ་བར་བྱས་པའོ། །དཔལ་ལྡན་འཁོར་ལོ་སྡོམ་པའི་རྒྱུད་ཀྱི་སྙིང་པོའི་དོན། །པུ་རངས་ལོ་ཙྪ་ལས་རྒྱུད་ཞལ་གྱི་གདམས་པ་འདི། །བླ་མ་རྣམས་ཀྱིས་མཛད་ལས་གཞན་དུ་ཅི་ཞིག་ཡོད། །འོན་ཀྱང་ཉུང་འདུས་གསལ་བར་བཀོད་པའི་དགེ་བ་དེས། །འགྲོ་རྣམས་དཔལ་ལྡན་ཧེ་རུ་ཀ་དཔལ་ཉིད་ཐོབ་ཤོག །ཉེས་པ་མཆིས་ན་བླ་མ་མཁའ་འགྲོས་བཟོད་པར་མཛོད། །བླ་མ་རྒྱ་དང་། གཉན་རས་ཀྱིས་རྩོམ་གཞི་མཛད་པ་ཡོད་ཀྱང་གོ་དཀའ་ཞིང་མང་གྲགས་པས། འདིར་ཤིན་ཏུ་འདུས་པར་བྱས་སོ། །སྦྲུལ་ལོ་ཟླ་བ་བརྒྱད་པ་ལ་ལྷ་སྟེངས་སུ་སྦྱར་བ། རྫོགས་སོ།། །། ༈ ལུས་ཀྱི་དཀྱིལ་འཁོར་གྱི་འཐད་པ་ལུང་སྦྱོར་བཞུགས་སོ། །དཔའ་འཁོར་ལོ་བདེ་མཆོག་ལུས་ཀྱི་དཀྱིལ་འཁོར་འཇའ་ལུས་མཁའ་སྤྱོད་བསྒྲུབ་པའི་ཐབས། དཔལ་བདེ་མཆོག་འཁོར་ལོ་ལ་ཕྱག་འཚལ་ལོ། །ཁྲོ་འཛུམ་ཨིན་ཏྲ་ནི་ལའི་མདོག་ཅན་རྡོ་རྗེ་དྲིལ་བུས་རྣལ་འབྱོར་མ་དཔལ་འཁྱུད། །ཡུམ་དང་གཡས་བརྐྱང་བདེ་བས་དགྱེས་པའི་གར་དགུས་ཉི་མའི་དབུས་སུ་རྣམ་པར་སྦྱོར། །དྲང་སྲོང་ཁྲོས་པའི་སྐུ་ལ་འོད་ཟེར་སྔོན་པོས་ས་གསུམ་ཁྱབ་མཛད་ཨ་ཏ་ཧ་ཡི་གསུང་། །རུས་པའི་རྒྱན་ཅན་སྟག་ལྤགས་ཤམ་ཐབས་གངས་རི་ཕོ་མོ་ཞབས་ཀྱིས་གནོན། །དེ་ལྟའི་བདེ་མཆོག་འཁོར་ལོ་དེ་ནི་ཕྱི་རོལ་མ་ཡིན་རང་ལུས་གདོད་ནས་གྲུབ། །རྡུལ་ཚོན་བཅོས་མ་སྤངས་ཕྱིར་དྲིལ་བུ་པའི་མཁའ་སྤྱོད་གྲུབ་པའི་བསྒྲུབ་ཐབས་འདི། །ཆུ་བོ་ལྗོན་ཤིང་ཚོགས་ཀྱིས་རྣམ་རྒྱན་བྱ་བྲན་སྐད་སྙན་སྒྲོགས་པའི་གནས། །རྒྱུད་སྡེའི་དགོངས་པ་མ་ལུས་མཁྱེན་པའི་བླ་མ་ཉིད་ལ་གསེར་གྱི་མཎྜྻལ་ཕུལ། །ལུས་དཀྱིལ་འདི་ནི་བདེ་མཆོག་དབང་བཞི་རྫོགས་པར་བསྐུར་ནས་རྗེས་སུ་གནང་བ་མཛད། །དྲིལ་བུ་པས་མཛད་བསྒྲུབ་ཐབས་འདི་ནི་བདག་བློས་གསལ་བར་མི་ནུས་བླ་མའི་གསུང་། །སྒྲ་བསྒྱུར་པུ་རངས་ལོ་ཙྪའི་བཤད་སྲོལ་བརྗེད་པར་མི་བྱ་སེམས་ལ་གྱིས་ཞེས་གནང་། །སྒྲུབ་ཐབས་ཉམས་བླངས་སངས་རྒྱས་འབྱུང་ཕྱིར་མངོན་རྟོགས་འདི་ནི་ཨུ་དྷུ་བྷ་རར་བཤད། །བླ་མ་དྲིལ་བུ་པ་འདི་ནི་དཔལ་དྷ་རི་ཀ་པའི་གདམས་ངག་བརྟེན་ནས་ལོ་བཅུ་གཉིས་བསྒྲུབ་པ་མཛད་པའི་མཐར། བླ་མ་རྡོ་རྗེ་རྣལ་འབྱོར་མས་ལུང་བསྟན་ན། བདེ་མཆོག་རྩ་བའི་རྒྱུད། ཨ་བྷི་ད་ན་དང་། སྃ་བུ་ཏ་གསུམ་ལ་ལུས་ཀྱི་དཀྱིལ་འཁོར་གྱི་བསྒྲུབ་ཐབས་ཕྱུང་ནས། དབང་པོ་ཡང་རབ་ཀྱི་དོན་དུ་ཐིག་དང་རྡུལ་ཚོན་བཅོས་མའི་དཀྱིལ་འཁོར་སྤངས་ཏེ། མ་བཅོས་པ་ལུས་ཀྱི་དཀྱིལ་འཁོར་གྱི་ཚེ་ག ཅིག་གིས་རྡོ་རྗེ་འཆང་ཐོབ་པ་མཁའ་སྤྱོད་གྲུབ་པ་འདི་འཛམ་བུའི་གླིང་དུ་བསྟན་ནས་ཚོགས་ལས་རྣམ་པར་རྒྱལ་བའི་སྤྱོད་པ་བྱ་བར་དགོངས་ཏེ། དཔལ་འཁོར་ལོ་སྡོམ་པའི་བསྒྲུབ་ཐབས་འདི་མཛད། འདི་ཉིད་ནས་ཀྱང་། འགྲོ་ཀུན་དོན་ལ་སེམས་གཞོལ་བ། །ཅེས་པས། གདུལ་བྱ་དབང་པོ་རབ་འབྲིང་གསུམ་རབ་ཀྱི་དོན་དུ་ལུས་ཀྱི་དཀྱིལ་འཁོར་གསུངས་ལ། འབྲིང་དང་ཐ་མའི་དོན་དུ་རྡུལ་ཚོན་གྱི་དཀྱིལ་འཁོར་བཅོས་མ་གསུངས་ཏེ། དེའང་བཅོས་མའི་དཀྱིལ་འཁོར་ལ་ངོ་མ་སྤྲད་ན། མ་བཅོས་པ་ལུས་ཀྱི་དཀྱིལ་འཁོར་ཟབ་པར་མི་ཤེས་པ་དང་། ལས་དང་པོ་པ་བློ་ཆུང་བ་རྡུལ་ཚོན་གྱི་དཀྱིལ་འཁོར་དུ་དབང་མ་བསྐུར་བར་ངེས་ཤེས་མི་སྐྱེ་བ་དང་། རིམས་ཀྱིས་འཁྲིད་པ་དབང་པོ་འབྲིང་དང་། ཐ་མའི་དོན་དུ་རྡུལ་ཚོན་གྱི་དཀྱིལ་འཁོར་ལ་ངོ་སྤྲད་ནས་བསྒོམ་པར་གསུངས་ཏེ། དཔལ་བདེ་མཆོག་རྡོ་རྗེ་མཁའ་འགྲོའི་རྒྱུད་ལས། དཀྱིལ་འཁོར་ལ་སོགས་ལས་གང་གི །བཅོས་མའི་སེམས་ཀྱིས་གང་བྱེད་པ། །ཕྱི་རོལ་ལས་རྣམས་གསལ་བྱེད་པས། །དང་པོའི་ལས་ཅན་རྣམས་ལ་བསྔགས། ཅེས་གསུངས་པ་དང་། བཅོས་མའི་དཀྱིལ་འཁོར་ལ་བློ་གྲོ་བ་རྣམས་ཀྱང་། རིམས་ཀྱིས་གདོད་ནས་གྲུབ་པ་མ་བཅོས་པ་ལུས་ཀྱི་དཀྱིལ་འཁོར་རྟོགས་པའི་སྦྱོར་བ་ལ་འཇུག་པར་གསུངས་ཏེ། དཔལ་བདེ་མཆོག་རྡོ་རྗེ་མཁའ་འགྲོའི་རྒྱུད་ལས། རྣལ་འབྱོར་མའི་སྦྱོར་བ་རྟོགས་བྱའི་ཕྱིར། །བཅོས་མ་ཡིས་ནི་བསྒོམ་པར་བྱ། །རྣལ་མའི་སྦྱོར་བ་རྟོགས་གྱུར་ནས། །བཅོས་མའི་སྦྱོར་བ་ཕྱི་རོལ་པས། །བཅོས་མ་དག་ནི་མི་བྱའོ། །དཔེར་ན་གཟིངས་ལ་འཇུས་པ་ཡིས། །ཆུ་བོའི་ཕ་རོལ་ཕྱིན་དོར་ལྟར། །བཅོས་མ་དག་ཀྱང་དེ་བཞིན་ནོ། །ཅེས་གསུངས་པས་ལུས་དཀྱིལ་འཁོར་དུ་གྲུབ་པར་ཤེས་དགོས་པས་འདི་ཉིད་ནས་ཀྱང་། རང་རྒྱུད་སྔགས་དང་རྣལ་འབྱོར་ཤེས། ཅེས་པས། རང་ལུས་གདོད་ནས་གྲུབ་པ་མ་བཅོས་པའི་དཀྱིལ་འཁོར། བླ་མ་བརྒྱུད་པ་དང་དཀྱིལ་འཁོར་གྱི་དེ་ཉིད་ལ་མཁས་པ་བརྙེས་པས། ཞལ་ནས་ངོ་སྤྲད་དགོས་ཏེ། བདེ་མཆོག་ངེས་བརྗོད་བླ་མ་ལས། རྣལ་འབྱོར་དངོས་གྲུབ་བླ་མེད་པ། །བླ་མའི་ཁ་ནས་རྙེད་པར་འགྱུར། །ཅེས་གསུངས་པས་རྡུལ་ཚོན་གྱི་དཀྱིལ་འཁོར་དང་ལུས་ཀྱི་དཀྱིལ་འཁོར་གྱི་ཁྱད་པར་ལུང་གིས་ངེས་ཤེས་བསྐྱེད་ཅིང་རིགས་པས་ཉམས་སུ་བླངས། ངོ་སྤྲད་པར་གསུངས། རྒྱུད་བདེ་མཆོག་ཁྲག་འཐུང་མངོན་འབྱུང་ནས། ཐམས་ཅད་བདག་ཉིད་དུ་ནི་གནས། །ལུས་ནི་དཀྱིལ་འཁོར་ཞེས་གསུངས་སོ། །ཅེས་པ་དང་། རྒྱུད་བདེ་མཆོག་སྡོམ་པ་འབྱུང་བ་ནས། ལུས་ཀྱི་དཀྱིལ་འཁོར་ལ་བརྟེན་ནས། །ཆོས་དང་ལོངས་སྤྱོད་རྫོགས་པའི་སྐུ། རྫོགས་པའི་བྱང་ཆུབ་རིམ་བསྒྲུབ་པས། །ལུས་ཀྱི་དཀྱིལ་འཁོར་ཞེས་གསུངས་སོ། །ཅེས་པས། ལུང་གིས་རང་ལུས་གདོད་ནས་མ་བཅོས་པའི་ལུས་དཀྱིལ་འཁོར་དུ་ངེས་ཤེས་བསྐྱེད་ནས། འདི་ཉིད་ནས། ཕྱི་རོལ་རྣམ་རྟོག་སྤངས་ནས་ནི། །ཅེས་པས། བཅོས་མའི་ས་ཆོག་ཐིག་རྡུལ་ཚོན་གྱི་དཀྱིལ་འཁོར་སྤང་བར་གསུངས་པ་དང་། ལུས་དཀྱིལ་འཁོར་དུ་གྲུབ་པར་མདོར་བསྟན་པའོ། །དང་པོ་རྡུལ་ཚོན་དང་རི་མོ་ཀུན་སྤང་བ་ནི། རྒྱུད་བདེ་མཆོག་རྡོ་རྗེ་མཁའ་འགྲོ་ལས། །སྐྱེས་བུ་བཅོས་མའི་བྱ་བ་རྣམས། །རྒྱུད་ཀྱི་རྗེས་སུ་འབྲེངས་ནས་ནི། །འབད་པས་སྡུག་བསྔལ་སློང་བར་བྱེད། །ཕྱི་རོལ་དཀྱིལ་འཁོར་ལ་སོགས་པའི། །བྱ་བ་ཆོ་ག་ལ་འབད་པ། །ཐར་པ་དང་བྲལ་ཕྱི་རོལ་ཏེ། །སྐྱེས་བུ་ཉོན་མོངས་འབའ་ཞིག་བྱེད། །ཅེས་བཅོས་མའི་དཀྱིལ་འཁོར་མི་བྱ་བར་གསུངས། གཉིས་པ་ལུས་དཀྱིལ་འཁོར་དུ་གྲུབ་པར་བཤད་པ་ནི། རྒྱས་པར་བླ་ན་མེད་པའི་རྒྱུད་རྡོ་རྗེ་ཕྲེང་བ་ནས། ལུས་ནི་གཞལ་ཡས་ཁང་དུ་གྱུར། །སངས་རྒྱས་ཀུན་གྱིས་ཡང་དག་བསྟན། །ཟུར་བཞི་པ་ནི་མདུན་རྒྱབ་དང་། གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ནི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། །ཅེས་པ་དང་། རྣལ་འབྱོར་བླ་ན་མེད་པའི་རྒྱུད། །སངས་རྒྱས་ཐོད་པ་ལས་ཀྱང་། །གལ་ཏེ་བླ་མེད་བྱང་ཆུབ་འདོད། །ལུས་ནི་དཀྱིལ་འཁོར་ཉིད་ཡིན་ཏེ། །ཕྱི་ཡི་དཀྱིལ་འཁོར་བྱ་བ་མེད། །ལྷ་རྣམས་བཤིག་པ་ཙམ་གྱིས་ནི། །སྡིག་པ་ཆེན་པོ་སྐྱེ་བར་འགྱུར། །དེས་ན་རྡུལ་ཚོན་ཙམ་གྱིས་ནི། །དེ་བཞིན་ལྷ་རྣམས་དགའ་མི་འགྱུར། །ཅེས་པའོ། དེ་ལྟར་ལུས་དཀྱིལ་འཁོར་དུ་གྲུབ་པས། ཕྱི་རོལ་རྡུལ་ཚོན་ལྟར་འབྱུང་བ་རིམ་བརྩེགས་བསྐྱེད་མི་དགོས། ལུས་ཀྱི་དབྱིབས་འབྱུང་བ་རིམས་བརྩེགས་སུ་གྲུབ་པར་གསུངས་ཏེ། འདི་ཉིད་ནས། རྐང་པ་སུམ་མདོ་ལྟེ་སྙིང་ཁ། །རླུང་དང་མེ་ཆུ་ས་ཡིན་ནོ། །སྒལ་ཚིགས་རི་རྒྱལ་དེ་བཞིན་ཏེ། །ལུས་ནི་མཉམ་པ་སྒོ་ལ་རླུང་། །ཅེས་པའོ། དེ་ནི་དཔལ་སྃ་བྷུ་ཏ་ནས་གསུངས་ཏེ། རྐང་པའི་མཐིལ་དུ་རྩོམ་ཆེན་རླུང་། གཞུ་ཡི་དབྱིབས་སུ་རྣམ་པར་གནས། །སུམ་མདོ་མེ་ཡི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། ཟླུམ་པ་རྣམ་པའི་གཟུགས་ཀྱིས་ནི། །ཆུ་ནི་ལྟེ་བར་རྣམ་པར་གནས། །སྙིང་ཁ་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱུག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །དེ་ཡི་སྤྱི་བོའི་ཆར་གནས་པ། །འདམ་སྐྱེས་འདམ་མ་སུམ་ཅུ་གཉིས། །དབྱངས་དང་གསལ་བྱེད་མཛེས་པར་གནས། །ཅེས་པས་རླུང་དང་མེ་དང་ཆུ་དང་ས་དང་རི་རབ་ཉི་ཟླ་ལུས་ལ་གདོད་ནས་གྲུབ་པས། བཅོས་མ་མི་བསྒོམ་ཅེས་པའོ། ཐིག་ཀྱང་གདོད་ནས་གྲུབ་པ་ནི། རྒྱུད་ངེས་བརྗོད་བླ་མ་ལས། ཀུ་ལུ་ཏ་ནི་རྡོ་རྗེ་དང་། །རིན་པོ་ཆེ་དང་དཀྱིལ་འཁོར་ཐིག །སིན་དྷུ་རྡོ་རྗེའི་ཐིག་ཟླུམ་མོ། །པུ་ལི་ར་མ་ལ་པད་མ། །ཅེས་ཐིག་དང་སྣ་ཚོགས་པད་མ་གདོད་ནས་ལུས་ལ་གྲུབ་པོ། །འདི་ཉིད་ནས་ཀྱང་། ཁ་སྦྱོར་ཕྱི་ཉིད་ལེགས་ཤེས་པ། །ཐུགས་ཁར་ཨ་བ་དྷུ་ཏི་ཧཱུྃ། བཅོམ་ལྡན་ནང་གི་བདག་ཉིད་དོ། །ཅེས་པའི་དོན་བདེ་མཆོག་རྩ་བའི་རྒྱུད་ནས་གསུངས་ཏེ། བདག་ཉིད་ཁྲག་འཐུང་དཔལ་བྱས་ནས། །དེ་འོག་ཁྲག་འཐུང་དཔལ་དྲན་བྱ། །འཁོར་ལོ་འདི་ཡི་སྙིང་ཁར་དགོད། །ཅེས་པས་བདག་ཉིད་སྤྱིའི་ཁྲག་འཐུང་ཞལ་བཞི་ཕྱག་བཅུ་གཉིས་པར་བསྐྱེད་པའི་ཐུགས་ཀར། དྷུ་ཏི་ཧཱུྃ་ལས་མི་བསྐྱོད་བདེ་མཆོག་ཞལ་བཞི་ཕྱག་བཅུ་གཉིས་པ་ལ་ཡུམ་རྡོ་རྗེ་རྣལ་འབྱོར་མས་འཁྱུད་པ། དེ་ལྟར་གྲུབ་པ་བདེ་མཆོག་སྡོམ་པ་འབྱུང་བ་ལས་གསུངས་པ་ནི། རྩའི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །དེ་རྣམས་དབུས་ཀྱི་རྩ་གསུམ་གང་། །ཐམས་ཅད་ཁྱབ་ཅིང་རྟེན་པའོ། །ཅེས་པ་གཡས་གཡོན་གྱི་རྩ་གཉིས་ན། འབྱུང་བ་བཞིའི་རླུང་རྒྱུ་བ། བདེ་ཆེན་གྱི་ལྷ་མོ་བཞི། མཚམས་བཞིར་བདུད་རྩི་འབྱུང་བའི་རྩ་ནི། བུམ་པ་དང་པད་སྣོད་དུ་གྲུབ་པས། ལྷ་མོ་བཞི་རིན་འབྱུང་གི་རིགས་ཀྱིས་རིན་ཆེན་ཕྲེང་བས་མཛེས་པ་དགོད། འདི་ཉིད་ནས་ཀྱང་། འདི་དག་གནས་སུ་རྣལ་འབྱོར་མ། །རྩ་ཡིན་དཔའ་བོ་ཉི་ཤུ་བཞི། །ལུས་ཀྱི་ཁམས་སུ་བརྟག་པར་བྱ། ཅེས་གསུངས་པ་དང་། རྒྱུད་སྃ་བྷུ་ཏ་ནས། ཧེ་རུ་ཀ་ལ་སོགས་པའི་ལྷ། །རྩ་གཟུགས་མཛེས་པར་ཡང་དག་འབྱུང་། །ལུས་ཀྱི་དཀྱིལ་འཁོར་ཉམས་དགའ་བ། །ཅེས་པས་རྒྱུད་རྡོ་རྗེ་མཁའ་འགྲོར་གསུངས་པ་ལྟར་རྩ་ཉི་ཤུ་རྩ་བཞི་མཁའ་འགྲོ་མར་གྱུར། ཁམས་ཉི་ཤུ་རྩ་བཞི་དཔའ་བོར་གྱུར། ཐུགས་གསུང་སྐུའི་དཔའ་བོ་ཉི་ཤུ་རྩ་བཞི་གདོད་ནས་གྲུབ་པ་ནི། རྒྱུད་ངེས་བརྗོད་ནས། ཛ་ལན་དྷ་ར་ཐུགས་འཁོར་ལོ། །ཨུ་རྒྱན་གནས་ནི་གསུང་འཁོར་ལོ། ཨར་བུ་ཏ་ནི་སྐུའི་འཁོར་ལོ། ཅེས་པ་དཔའ་བོ་ཉི་ཤུ་རྩ་བཞི་ལུས་ལ་གདོད་ནས་གྲུབ་པོ། །དེ་ནས་སྙིང་ཁའི་བདེ་ཆེན་འཁོར་ལོའི་ཕྱི་རོལ་གྱི་པདྨ་འདབ་མ་བརྒྱད་ལ། དམ་ཚིག་འཁོར་ལོ་གདོད་ནས་གྲུབ་པ་ནི། འདི་ཉིད་ནས་ཀྱང་། རྣལ་འབྱོར་དམ་ཚིག་མཉམ་ཉིད་ཆེ། །ཅེས་གསུངས་པ་དང་། རྒྱུད་ངེས་བརྗོད་ནས། ཨོཾ་ཏྲེ་དག་ནི་ཤར་གྱི་སྒོ། །ཏྲི་ཤ་ཀུ་ནི་ལྷོ་ཡི་སྒོ། །ཀོ་ས་ལ་ནི་ནུབ་ཀྱི་སྒོ། །ཀ་ལིང་ཀ་ནི་བྱང་གི་སྒོ། །ར་མེ་ཤ་ར་མེ་ཡི་ཕྱོགས། །དེ་བི་ཀོ་ཏྲ་བདེན་བྲལ་ཕྱོགས། །མ་ལ་བ་ནི་རླུང་གི་ཕྱོགས། །ཀ་མ་རུ་པ་དབང་ལྡན་ཕྱོགས། །ཅེས་གསུངས་པས་སྒོ་མཚམས་མ་བརྒྱད་ཅི་ལྟ་བ་བཞིན་གདོད་ནས་གྲུབ་པ། རྟོག་མེད་མཉམ་པ་ཉིད་དུ་སྤྱོད་པའི་བརྡར་རོའི་གདན་ལ་དམ་ཚིག་གི་འཁོར་ལོ་གྲུབ་བོ། །འདི་ཉིད་ནས། རྒྱལ་རྣམས་རབ་མཛེས་ཧེ་རུ་ཀའི། །ལུས་ནི་དཀྱིལ་འཁོར་དུ་འདོད་དོ། །ཅེས་པའི་དོན་ཏེ། རྒྱུད་ངེས་བརྗོད་ནས། གྲི་ཧ་དེ་བ་ལྷའི་སྣམ་བུ། སོ་ར་ཤྴ་ནི་རིན་ཆེན་ཕ་གུ། །སུ་ཝ་རྣ་དྲ་བ་དྲ་ཕྱེད། །ན་ག་ར་ནི་རྔ་ཡབ་དང་། །དྲིལ་བུ་རྒྱལ་མཚན་བ་དན་ནོ། །ཤར་གྱི་རྟ་བབས་ལམ་པ་ཀ །ཀན་ཙི་ལྷོ་ཡི་རྟ་བབས་ཡིན། །ཧི་མ་ལ་ཡ་ནི་ནུབ་རྟ་བབས། །པྲེ་ཏ་པུ་ར་བྱང་རྟ་བབས། །ཅེས་གསུངས་པས་ལུས་གནས་ཉི་ཤུ་རྩ་བཞི་དཀྱིལ་འཁོར་དུ་གྲུབ་བོ། །དེས་ན་ཐིག་ལས་རྡུལ་ཚོན་གྱི་དཀྱིལ་འཁོར་ཁང་པ་བརྩེག་མར་བསྒོམ་པ་བཅོས་མ་ཡིན་ཏེ། སྤང་བའི་དོན་ནོ། རྡུལ་ཚོན་གྱི་དཀྱིལ་འཁོར་གྱི་ཕྱི་རོལ་དུར་ཁྲོད་བརྒྱད་རྡོ་རྗེ་ར་བ་མེ་རི་བྲི་བ་ནི། ཕྱི་རོལ་དུ་ཡོད་པ་མ་ཡིན། ནང་ལུས་ཀྱི་བུ་ག་བརྒྱད་ལ་དུར་ཁྲོད་བརྒྱད་གྲུབ་པ་ཡིན་ཏེ། རྡོ་རྗེ་སྙིང་པོའི་འགྲེལ་པ་ལས། དབུགས་རྒྱུ་ཞེས་བྱ་གསང་དུར་ཁྲོད། །ལུས་ནི་ནང་གི་དུར་ཁྲོད་ཡིན། །དངོས་པོར་རྟོག་པ་སྣ་ཚོགས་པ། །མི་རྟོག་ཆོས་ཀྱི་དབྱིངས་ཀྱི་དུར། །ཅེས་གསུངས་པ་དང་། དེའི་དོན་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ་རྣལ་འབྱོར་མའི་རྒྱུད་ནས། ལུས་ཀྱི་བུ་ག་བརྒྱད་དུར་ཁྲོད་ཆེན་པོ་བརྒྱད་ཡིན་པར་གསུངས་ཏེ། གཏུམ་ཁྲག་གཞང་ཁའི་དབྱིབས་ཅན་དང་། །གསང་བ་ཚང་ཚིང་ཁ་རུའོ། །འབར་བ་ཞེས་བྱའི་དུར་ཁྲོད་ནི། །སྣ་ཡི་བུ་ག་གཉིས་ན་གནས། །དམྱལ་སོགས་དེ་བཞིན་མི་བཟད་པ། །མིག་གཉིས་ན་ནི་གནས་པའོ། །ཧ་ཧར་རྒོད་དང་གཡེར་ཀ་ཅན། རྣ་བ་གཉིས་ལ་གནས་པའོ། །དེ་ནི་བདེ་མཆོག་རྩ་རྒྱུད་ནས་ཀྱང་། །གདོད་ནས་གྲུབ་པའི་དུར་ཁྲོད་དུ། །ཅེས་པ་དང་། དཔལ་ཕྱག་ན་རྡོ་རྗེས་རྩ་རྒྱུད་འགྲེལ་པ་ནས་ཀྱང་གསུངས་པ་ནི། ཤར་གྱི་དུར་ཁྲོད་གཏུམ་དྲག་ནི། ནང་དུ་ཁ་ལ་གནས་པའོ། །ལྷོ་ཡི་དུར་ཁྲོད་ཧ་ཧ་རྒོད། །ནང་དུ་སྣ་བུག་གཡས་པའི་རྩ། །ནུབ་ཀྱི་དུར་ཁྲོད་མི་བཟད་པ། །ནང་དུ་གནས་པ་ནོར་བུའི་རྩ། །བྱང་གི་དུར་ཁྲོད་ཚང་ཚིང་ནི། །ནང་དུ་སྣ་དབུག་གཡོན་པའི་རྩ། ཕྱི་རུ་དབང་ལྡན་དུར་ཁྲོད་ནི། །ནང་དུ་རྣ་བ་གཡོན་པའི་རྩ། །ཕྱི་རུ་རླུང་གི་དུར་ཁྲོད་ནི། །ནང་དུ་རྣ་བ་གཡས་པའི་རྩ། །ཕྱི་རུ་བདེན་བྲལ་དུར་ཁྲོད་ནི། །ནང་དུ་མིག་ནི་གཡས་པའི་རྩ། །ཕྱི་རུ་མེ་ཡི་དུར་ཁྲོད་ནི། །ནང་དུ་མིག་ནི་གཡོན་པའི་རྩ། །ཅེས་པ་དང་། དུར་ཁྲོད་བརྒྱད་ཀྱི་ཕྱི་རོལ་དུ་རྡོ་རྗེ་ར་བ་དང་། མེ་རི་བྲི་བ་བཅོས་མ་ཡིན་པས་དེའི་ནང་དུ་གནས་པ་སྟེ། དཔལ་ཕྱག་ན་རྡོ་རྗེ་རྩ་རྒྱུད་འགྲེལ་པ་ལས། ལྤགས་པ་རྡོ་རྗེའི་ར་བ་སྟེ། །བ་སྤུ་མདའ་ཡི་དྲ་བ་ལས། །ཡེ་ཤེས་ལྔ་ཡི་མེ་འོད་འབར། །ཅེས་པས་རྡོ་རྗེ་ར་བ་དང་མདའི་དྲ་བ་དང་མེ་རི་གདོད་ནས་ལུས་ལ་གྲུབ་པས། ཕྱི་རོལ་བཅོས་མ་སྤང་ཅེས་པའོ། །བློ་རབ་ཀྱིས་ལུས་དཀྱིལ་འཁོར་དུ་ཤེས་པས་སྤྲོས་པ་ཆོད་པ་དང་། བློ་འབྲིང་གིས་འོག་ནས་མངོན་རྟོགས་སྤྱི་དོན་དགུས་ཉམས་སུ་ལེན་པ་ལ་གོང་གི་ལུས་དཀྱིལ་འཁོར་དུ་གྲུབ་པའི་བཤད་པ་སྦྱར་ནས་བསྒོམ་པར་བྱའོ། །ཅེས་པུ་རངས་ལོ་ཙྪ་བ་བཞེད། ལུས་གདོད་ནས་དཀྱིལ་འཁོར་དུ་གྲུབ་པ་བཤད་ཟིན་ཏེ། ཱ། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །། ༈ དཀྱིལ་འཁོར་གྱི་དེ་ཁོ་ན་ཉིད་སྣང་བ་དྷ་རི་ཀ་པའི་བཞེད་པ་བཞུགས་སོ། །རྒྱ་གར་སྐད་དུ། ཨ་ལ་ཀ་ཨ་བྷ་བ་དྷ་ལ་ན་མ། བོད་སྐད་དུ། དཀྱིལ་འཁོར་མངོན་པར་སྣང་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་ཀུན་དངོས་བླ་མ་ལ། །བཏུད་དེ་བདག་གིས་དཀྱིལ་འཁོར་གྱི། །རིམ་པ་རྒྱུད་ལས་གང་གསུངས་པ། །གསལ་བར་རབ་ཏུ་བཤད་པར་བྱ། །དཔལ་ལྡན་འཁོར་ལོ་སྡོམ་པ་རུ། །དཀྱིལ་འཁོར་རྣམ་པ་གསུམ་གསུངས་ཏེ། །ཕྱི་དང་ནང་དང་གསང་བའོ། །ཕྱི་ལ་གཉིས་ཏེ་རྡུལ་ཚོན་དང་། །བསྒོམ་པར་བྱ་བའི་རིམ་པའོ། །ཐོག་མར་བྲི་བའི་རིམ་པ་ནི། །བདེ་མཆོག་རྒྱུད་པ་ལས་ཤེས་བྱ། བསྒོམ་པའི་རིམ་པ་འདི་ལྟ་སྟེ། །རྡོ་རྗེ་ར་བའི་ནང་དག་ཏུ། །སྒོ་བཞི་ཀུན་ནས་ཟུར་བཞི་པ། །རྟ་བབས་བཞི་ཡིས་རྣམ་པར་བརྒྱན། །རེ་ག་ལྔ་དང་ཡང་དག་ལྡན། །ཀ་བ་བརྒྱད་ཀྱིས་ཉེ་བར་མཛེས། །དོ་ཤལ་དོ་ཤལ་ཕྱེད་པས་བརྒྱན། །རིན་ཆེན་རྡོ་རྗེ་སྲད་བུས་སྤྲས། །དེ་ནི་སྤྱི་ཙམ་བཤད་པའོ། །བྱེ་བྲག་རྣམ་པར་བཤད་པར་བྱ། །རྡོ་རྗེའི་ས་གཞི་ཆེན་པོ་ལ། །གནས་པའི་ཁང་པ་བརྩེག་མ་ནི། །ཆ་ཆེན་གཙོ་བོའི་འདོམ་གང་སྟེ། །དེ་བརྒྱད་ཀུན་དུ་མཉམ་པའོ། །བརྩིག་པའི་སྤངས་སུ་ཆ་གསུམ་སྟེ། །ཁ་ཅིག་ཆ་གཉིས་དག་ཏུ་འདོད། ཞེང་ལ་ཆ་བྲན་ཅིག་ཏུ་འདོད། །ལྔ་ལྡན་མ་འདྲེས་གསལ་བའོ། །དེ་སྟེངས་རིན་ཆེན་ཕ་གུ་ནི། །ཆ་བྲན་ཅིག་གོ་ཕྱི་རོལ་དུ། །ཕྱེད་ལྷག་རིན་ཆེན་གྱིས་སྤྲས་པའོ། །དེ་སྟེང་རིན་ཆེན་བེ་ཌུརྻ། །ཆ་ཕྱེད་ལྷན་སྟེངས་གཟེངས་ཁང་སྟེ། །དེ་ལ་རིན་ཆེན་བྲེ་གནས་པའི། །ཕྱི་ནང་གཉིས་ལས་དྲ་བ་དང་། །དྲ་བ་ཕྱེད་པ་རབ་འཕྱང་བའོ། །གཞན་དག་ཕ་གུ་ལས་བྱུང་འདོད། །དེ་ནས་ཐོག་གི་དབྱིབས་བཤད་བྱ། །བརྩིག་པའི་སྟེང་དུ་རྒྱ་གྲམ་གདུང་། །འཁོར་ལོ་པད་མ་རྡོ་རྗེ་དང་། །རིན་ཆེན་གདུང་དང་རྣམ་པ་ལྔ། །དང་པོ་གྲུ་བཞི་གཞན་རྣམས་ནི། །ཟླུམ་པོའི་དབུས་སུ་རྒྱ་གྲམ་ཡིན། དེ་ལས་གྱེས་པའི་གདུང་རྣམས་ནི། །འོག་མ་འོག་མའི་སྟེང་གནས་པས། །ཆ་ཕྲན་བཞི་ཡིས་མཐོ་བར་འགྱུར། །ཀུན་ལ་ཁོར་ཡུག་རེ་རེ་སྟེ། །རྒྱ་གྲམ་གདུང་ལས་ཕྱི་རོལ་ཏུ། །འདོམ་ཕྱེད་ལྷག་པས་འདོད་ཡོན་གྱི། སྣམ་བུ་དམར་པོ་ཁེབས་པ་ཡིན། །ཕལ་ཆེར་ཐོག་འདི་བྱུར་བུར་འདོད། །དབུས་ཀྱི་རྒྱ་གྲམ་དེ་སྟེང་དུ། །ཆོས་འཁོར་བཅུ་གསུམ་ཆར་ཁབ་ཏོག །ཀུན་ལ་ཆ་གཉིས་ལྡན་པའོ། །དེ་ནས་ཕྱོགས་ཀྱི་སྒོ་རྣམས་ནི། །གློ་འབུར་ཚུལ་དུ་གནས་པ་ལ། །རྣམ་ཐར་ཚུལ་དུ་རེ་རེ་ལ། སྒོ་ནི་གསུམ་གསུམ་ཡོད་པར་འདོད། །ཐམས་ཅད་སྤངས་སུ་ཆ་ཆེན་པོ། །ཕྱེད་དང་གཉིས་གཉིས་མཉམ་པའོ། །དེ་སྟེང་པན་རེག་ཕ་གུ་དང་། །དྲ་ཕྱེད་གཟེང་ཁང་ཁོར་ཡུག་སྟེ། །དེ་སྟེང་སྒོ་ཡི་གདུང་གནས་པ། བཏེགས་པའི་ཕྱི་རོལ་ཀ་བ་བརྒྱད། །ཕྱོགས་ཀྱི་དབྱེ་བས་གཉིས་གཉིས་སོ། །དེ་སྟེང་རྟ་བབས་ཆ་བཞི་སྟེ། །རེ་རེ་ལའང་ཕ་གུ་དང་། །དྲ་ཕྱེད་གཟེང་ཁང་གསུམ་གསུམ་གྱིས། །ཕྱེ་བས་བཅུ་གཉིས་དག་ཏུ་འགྱུར། །བཅུ་གཉིས་ཟུར་ཅན་བཅུ་གཉིས་བརྒྱན། །དེ་སྟེང་གདན་ལ་རི་དྭགས་བཞི། །གཞན་ནི་གཉིས་གཉིས་དག་ཏུ་འདོད། །ཆོས་འཁོར་རིམ་པ་བཅུ་བཅུ་ལ། །ཆར་ཁབ་ཏོག་གིས་བརྒྱན་པ་ཡིན། །ཁ་ཅིག་སྒོ་ནི་རེ་རེ་དང་། །རྟ་བབས་ཕྱེད་པའམ་སྒོ་ཡོལ་ཚུལ། །ཀ་བ་གཉིས་ཀྱིས་བཏེགས་པ་དང་། །སྟོད་པོ་ཆེ་རུ་འདོད་པའང་ཡོད། །ཕྱི་རོལ་སྟེགས་བུ་ལ་གནས་པའི། །ལྷ་མོའི་ཚོགས་ཀྱིས་མཆོད་བྱེད་པ། །གཞི་ནི་ལྷ་ཡི་དབྱེ་བ་ཡིས། །འདིར་ནི་ཐོགས་དང་མཚུངས་པ་ཉིད། །ཟུར་དང་ཕྱོགས་ནི་ཐམས་ཅད་དུ། །གདུགས་དང་རྒྱལ་མཚན་བ་དན་དང་། །ལྡ་ལྡིའི་ཚོགས་ཀྱིས་མཛེས་པའོ། །སངས་རྒྱས་གྲོང་ཁྱེར་ཉམས་དགའ་བ། །རྡོ་རྗེ་འཆང་གིས་གསུངས་པ་སྟེ། །དཀྱིལ་འཁོར་ཆེན་པོ་སྤངས་པ་ཡིན། །རྡོ་རྗེ་སློབ་དཔོན་རྣལ་འབྱོར་པ། །དྷ་རི་ཀ་པའི་བཞེད་པ་ཡིན། །གཉིས་པ་ནང་གི་དཀྱིལ་འཁོར་ནི། །ལུས་འདི་གཞལ་ཡས་ཁང་དུ་འགྱུར། །སངས་རྒྱས་ཀུན་གྱིས་ཡང་དག་བརྟེན། །ཟུར་བཞི་པ་ནི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། །གཞན་ཡང་ལུས་ཀྱི་དབྱེ་བ་ཡིས། །གྷྲི་ཧ་དེ་བ་ལྷ་སྣམ་བུ། །སོའུ་རཏྣ་རིན་ཆེན་ཕག །སུ་ཝ་ན་ནི་དྲ་བ་ཕྱེད། །ན་ག་ར་ནི་རྔ་ཡབ་དང་། །དྲིལ་བུ་རྒྱལ་མཚན་བ་དན་ནོ། །ཤར་གྱི་རྟ་བབས་ལྃ་ཀ་ག །ཀན་ཙི་ལྷོ་ཡི་རྟ་བབས་ཡིན། །ཧི་མཱ་ལ་ཡ་ནི་ནུབ་རྟ་བབས། །པྲི་ཏ་པུ་ར་བྱང་རྟ་བབས། །དུར་ཁྲོད་རྣམས་ནི་དབང་པོའི་སྒོ། །ལྤགས་པ་རྡོ་རྗེའི་ར་བ་སྟེ། །བ་སྤུ་མདའ་ཡི་དྲ་བ་ལས། །ཡེ་ཤེས་ལྔ་ཡི་མེ་འོད་འབར། །དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །དེ་ནི་བླང་བར་བྱེད་པའི་ཕྱིར། །འདུས་པ་དཀྱིལ་འཁོར་ཉིད་དུ་བརྗོད། །དེ་ལྟར་གདོད་ནས་གྲུབ་པ་ཡི། །ལུས་ནི་དཀྱིལ་འཁོར་ཉིད་ཡིན་ཏེ། །འདི་ནི་རྡོ་རྗེ་འཆང་ཆེན་གྱིས། །རྒྱུད་རྣམས་ཀུན་དུ་གསུངས་པ་ཡིན། །གསུམ་པ་གསང་བའི་དཀྱིལ་འཁོར་ནི། །སེམས་ཀྱི་རྡོ་རྗེའི་རང་བཞིན་ཏེ། །དཔལ་ལྡན་རྙོག་པ་མེད་པ་ལས། །སེམས་ཀྱི་དཀྱིལ་འཁོར་དག་པ་སྟེ། །རང་བཞིན་མེད་པར་བསྒོམ་པར་བྱ། །དབུས་ནི་ཆོས་དབྱིངས་རང་བཞིན་ཏེ། མེ་ལོང་ལ་སོགས་ཡེ་ཤེས་བཞི། །ཤར་ལ་སོགས་པའི་ཕྱོགས་བཞིའོ། །སྒོ་བཞི་དྲན་པ་ཉེར་བཞག་བཞི། །ཟུར་བཞི་སྦྱིན་པ་རྣམ་བཞི་སྟེ། །ཏིང་འཛིན་ཡན་ལག་རྟ་བབས་སོ། །གཞན་ཡང་རེ་ག་ཡེ་ཤེས་ལ། །རིན་ཆེན་འདོད་པ་ཀུན་སྟེར་བ། །དྲ་བ་བདེ་སྟོང་རང་བཞིན་ཏེ། །ཐོག་གི་དབྱིབས་ནི་རིགས་ལྔའོ། །ཀ་བ་བརྒྱད་ནི་འཕགས་ལམ་བརྒྱད། །རྟ་བབས་བྱང་ཆུབ་ཡན་ལག་བདུན། །ཟུར་ནི་རྟེན་འབྲེལ་བཅུ་གཉིས་ཏེ། །རི་དྭགས་བཅུ་དྲུག་བྱང་ཆུབ་སེམས། །ཡང་ན་སྙིང་རྗེའི་རང་བཞིན་ནོ། །དབུས་ཀྱི་གདུགས་རྣམས་ཐམས་ཅད་ནི། །བཅུ་གསུམ་པ་ཡི་བདག་ཉིད་དོ། །གཞན་ནི་ས་བཅུ་རྣམ་པར་དག །དྲིལ་བུའི་སྒྲ་ནི་སྟོང་ཉིད་སྒྲ། །ཟླ་བ་ཉི་མ་རིན་ཆེན་དང་། ཐབས་ཤེས་དགོས་པ་བསྒྲུབ་བྱེད་པ། །འདོད་ཡོན་མ་སྤངས་རྟོག་པའི་དོན། །སྦྱིན་སོགས་ཕ་རོལ་ཕྱིན་པ་རྣམས། །མ་འདྲེས་སོ་སོར་གསལ་བ་ཡི། །དཀྱིལ་འཁོར་འདི་ནི་བླ་ན་མེད། །སངས་རྒྱས་ཐམས་ཅད་འབྱུང་བའི་གནས། །བདེན་པ་གཉིས་དང་མི་འགལ་བར། །བཅོམ་ལྡན་འདས་ཀྱིས་གསུངས་པ་ཡིན། །འདི་ལྟར་དཀྱིལ་འཁོར་རིམ་པ་ལ། །རང་གཞན་འདོད་དང་བརྒལ་ལན་གྱིས། །དཔྱད་ན་དཔག་ཏུ་མེད་གྱུར་ཀྱང་། །འདི་ནི་རྟོག་གེའི་ཡུལ་མིན་ཅིང་། །སངས་རྒྱས་རོལ་པ་བསམ་མི་ཁྱབ། །དེས་ན་རྒྱུད་དང་བླ་མ་ཡི། །བཞེད་པ་གཅིག་ཏུ་བསྡུས་པ་འདི། །དཔལ་ལྡན་རོལ་པའི་རྡོ་རྗེ་ཡིས། །སྙན་ངག་ཚིག་རྣམས་སྤངས་ནས་ནི། །གོ་བདེའི་ངག་ཏུ་བྱས་པ་ཡིན། །དེ་ལས་བྱུང་བའི་དགེ་བ་དེས། །འགྲོ་རྣམས་བདེ་བ་ཆེ་ཐོབ་ཤོག །དཀྱིལ་འཁོར་མངོན་པར་སྣང་བ་ཞེས་བྱ། ཨི་ཐི། བཀྲ་ཤིས་དཔལ་འབར་འཛམ་གླིང་མཛེས་པར་ཤོག། །། ༈ དཔལ་བདེ་མཆོག་འཁོར་ལོའི་སྙིང་པོ་བཟླས་ཐབས་བཞུགས་སོ། །བཅོམ་ལྡན་འདས་འཁོར་ལོ་སྡོམ་པ་ལ་ཕྱག་འཚལ་ལོ། །དཀར་མོའི་བདག་པོ་ཟིལ་གནོན་གཟི་བརྗིད་རབ་འབར་བ། །མཚུངས་མེད་དཔལ་ལྡན་ཧེ་རུ་ཀ་ལ་ཕྱག་འཚལ་ནས། །རིན་ཆེན་བརྒྱུད་པའི་བླ་མའི་ཞལ་ལས་ལེགས་འོངས་པ། །བཟླས་པའི་མན་ངག་བདག་གིས་ཅུང་ཟད་གསལ་བར་བྱ། །དེ་ལ་འདིར་བཟླས་པའི་དོན་ལ་བརྟེན་ནས་ཉམས་སུ་བླང་བ་ནི། རྩ་བ་གསུམ་ལ་བརྟེན་ནས། ཡན་ལག་གི་བཟླས་ཐབས་དྲུག་གོ །དང་པོ་ནི་སྤྲོ་སྡུའི་བཟླས་པ་དང་། འགོག་པའི་བཟླས་པ་དང་། རྡོ་རྗེའི་བཟླས་པ་གསུམ་མོ། །དང་པོ་ལ་གསུམ་དུ་འགྱུར་ཏེ། འཕྲིན་ལས་བཞིའི་ཚུལ་དུ་སྡིག་སྒྲིབ་སྦྱང་བའི་བཟླས་པ་དང་། བདེ་བ་ཆེན་པོའི་སྤྲོ་བསྡུ་དང་། རགས་པ་དཀྱིལ་འཁོར་ལ་དམིགས་ཏེ་བཟླ་བའོ། །དང་པོ་ནི་གཙོ་བོའི་ཐུགས་ཁའི་ཧཱུྃ་ལས། འོད་ཟེར་མཐིང་ཁ་བྱུང་མཁའ་འགྲོ་མའི་ཞལ་དུ་ཐིམ། མཁའ་འགྲོ་མའི་ཐུགས་ཀ་ནས་བཅོམ་ལྡན་འདས་ཀྱི་ཐུགས་ཀར་ཐིམ་པས་བདག་གཞན་གྱི་སྡིག་སྒྲིབ་ནད་དང་གནོད་པ་ཐམས་ཅད་ཞི་བར་བསམ་ཞིང་བཟླས་སོ། །དེ་བཞིན་དུ་བདག་གི་ཐུགས་ཀ་ནས་ཧཱུཾ་ལས་འོད་སེར་པོའི་ཚུལ་དུ་གཡས་ཞལ་སེར་པོ་ནས་བྱུང་། གཟུགས་ཅན་མའི་ཞལ་དུ་ཐིམ་གཟུགས་ཅན་མའི་ཐུགས་ཀ་ནས་བཅོམ་ལྡན་འདས་ཀྱི་ཐུགས་ཀར་ཐིམ་པས་ཤེས་རབ་དང་ཚེ་དང་ལོངས་སྤྱོད་ཐམས་ཅད་རྒྱས་པའི་བསམ་པས་བཟླས་སོ། །དེ་བཞིན་ཞལ་དམར་པོ་ནས་འོད་ཟེར་དམར་པོ་དུམ་སྐྱེས་མའི་ཞལ་ནས་ཐིམ་ཞིང་འགྲོ་བ་མི་དང་མི་མ་ཡིན་པ་ཐམས་ཅད་དབང་དུ་བྱས་ཏེ། དུམ་སྐྱེས་མའི་ཐུགས་ཀ་ནས་བདག་གི་ཐུགས་ཀར་ཐིམ་པར་བསམ་ཞིང་བཟླའོ། །དེ་ལྟར་ཞལ་ལྗང་ཁུ་ནས། ལཱ་མ་དང་འོད་ཟེར་གྱི་སྤྲོ་བསྡུ་ལྗང་ཁུས་གདུག་པ་ཅན་ཚར་བཅད་པའི་བསམ་པས་བཟླས་སོ། །གཉིས་པ་བདེ་བ་ཆེན་པོའི་སྤྲོ་བསྡུ་ལ་གཉིས་ལས། དང་པོ་ནི་ཐུགས་ཁའི་ཧཱུྃ་ལས་འོད་ཟེར་བདག་གི་སྐུའི་དབྱིབས་བརྒྱུད་ནས། ཡུམ་གྱི་མཁར་བྱུང་སྟེ་སྐུའི་དབྱིབས་བརྒྱུད། ཡུམ་གྱི་ཞལ་ནས་ཡབ་ཀྱི་ཞལ་དུ་ཞུགས་ཤིང་ཐུགས་ཀའི་ཧཱུྃ་ལ་ཐིམ་པས། བདེ་སྟོང་གི་རྟོགས་པ་སྐྱེ་བར་བསམ་ཞིང་བཟླས་སོ། །གཉིས་པ་ནི་ཡབ་ཀྱི་ཞལ་ནས་འོད་ཟེར་ལྔའི་རང་བཞིན་ཡུམ་གྱི་ཞལ་དུ་ཞུགས། དེ་དང་དུས་མཚུངས་པར་མཁའ་འགྲོ་མ་བཞི་དང་། རྣལ་འབྱོར་མ་རྣམས་ཀྱི་ཐུགས་དམ་གྱི་རྒྱུད་བསྐུལ་ཏེ། ཡུམ་གྱི་སྐུའི་དབྱིབས་རྒྱུད་ཡབ་ཀྱི་ནོར་བུར་ཞུགས་ཏེ་ཐུགས་ཀའི་ཧཱུྃ་ལ་ཐིམ་པར་བལྟས་པས། བདེ་སྟོང་ཆེན་པོ་ཅིག་ཏུ་འཆར་རོ་ཞེས་གསུངས་སོ། །གསུམ་པ་རགས་པ་དཀྱིལ་འཁོར་གྱི་ཚུལ་དུ་བཟླ་བ་ནི། གཙོ་བོའི་སྤྱི་གཙུག་གི་ཨོཾ་དཀར་པོ་དང་། མགྲིན་པའི་ཨ་དམར་པོ་དང་། ཐུགས་ཁའི་ཧཱུྃ་མཐིང་ཁ་ལས། འོད་ཟེར་དཀར་དམར་མཐིང་ཁ་གསུམ་བྱུང་ནས་འཁོར་ལོ་གསུམ་གྱི་དཔའ་བོ་དང་རྣལ་འབྱོར་མ་ཐམས་ཅད་ཁྱབ། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དཔའ་བོ་དང་རྣལ་འབྱོར་མར་གྱུར་ནས་ཤིན་ཏུ་གསལ་བར་བསྒོམ། ཚུར་འདུས་བདག་ཉིད་ཀྱི་ཡི་གེ་གསུམ་ལ་འདུས་ནས་ཤིན་ཏུ་གསལ་བར་བསྒོམ་མོ། །འགོག་པའི་བཟླས་པ་ལ་ཉོན་མོངས་པ་འགོག་པ་སྟེ་བདུད་བཞི་འཇོམས་ཚུལ་དུ་བཟླའ་བ་ཞེས་བྱ་བ་ནི་བདག་ཉིད་ཀྱི་ཐུགས་ཀར་ཡེ་ཤེས་སེམས་དཔའ། དེའི་ཐུགས་ཀར་ཟླ་བའི་སྟེང་དུ་ཧཱུྃ་བསམ། དེའི་མཐར་འཁོར་ལོ་རྩིབས་བཞི་པ། དེའི་མཐར་བདུད་བཞིའི་ས་བོན་བྃ་ནག་པོ་བཞི་བསམ། ཡང་ན་ཀྵ་དམར་ནག་བཞི་བསམས་ཏེ། སྔགས་བཟླས་པས་འཁོར་ལོ་འཁོར་བས་བདུད་བཞིའི་ངོ་བོ་གཅོད་པར་བསམ་ཞིང་བཟླས། ཁྱད་པར་དུ་ཉོན་མོངས་པ་ཤས་ཆེ་ན་ཉོན་མོངས་པ་འབའ་ཞིག་གཅོད་པར་བསམ་ཞིང་བཟླས་འཕྲལ་རྐྱེན་གྱི་བར་དུ་ཕུང་པོའི་བདུད་དང་འཆི་བདག་གི་བདུད་འབའ་ཞིག་གཅོད་པར་བསྒོམ་ཞིང་བཟླས། སེམས་རྩེ་ཅིག་ཏུ་མི་གནས་ན། ལྷའི་བུའི་བདུད་གཅོད་པར་བསམ་ཞིང་བཟླས་སོ། །རྡོ་རྗེའི་བཟླས་པ་ལ་གཉིས་ཏེ། རླུང་རྡོ་རྗེའི་བཟླས་པ་དང་ཕྲ་བ་འོད་གསལ་གྱི་བཟླས་པའོ། །དང་པོ་ནི་རླུང་དང་བསྟུན་ཏེ། ནང་དུ་རྔུབ་པ་ཨོཾ། གནས་པ་ཨཱཿ ཕྱིར་འཕྲོ་བ་ཧཱུྃ་ངོ་། །དེ་ལྟར་བསྒོམས་ཏེ་རླུང་ཅུང་ཟད་བཟུང་བས་ཡིད་ཀྱིས་ཡི་གེ་གསུམ་ལྕེ་རྩེ་གཡོ་བ་ཙམ་དུ་བགྲང་ངོ་། །དེས་སེམས་ཟིན། སེམས་ཟིན་པས་རླུང་འགག དེས་འོད་གསལ་གྱི་ཉམས་སྐྱེ་ཞེས་གསུང་ངོ་། །ཕྲ་བ་འོད་གསལ་དུ་བཟླ་བ་ནི། རྫོགས་པའི་རིམ་པའི་སྐབས་ལྟར་ཐུགས་ཀའི་ཧཱུྃ་ལས་འོད་ཁ་དོག་ལྔ་འཕྲོས་ཏེ། སེམས་ཅན་ཐམས་ཅད་བདེ་མཆོག་ཏུ་གྱུར་ནས་སླར་བདག་ལ་བསྡུ་བ་ནི་རྫོགས་རིམ་དངོས་ཡིན་ནོ། །དེ་ལྟར་བཟླས་པའི་ཕན་ཡོན་དཔག་ཏུ་མེད་པ་རྒྱུད་ལས་བཤད་པ་བཞིན་ནོ། །དཔལ་ལྡན་བླ་མེད་རྒྱུད་སྡེའི་རྒྱ་མཚོ་ལ། །རིན་ཆེན་བརྒྱུད་པའི་རིམ་ལས་བབ་པའི་དོན། །སང་གྷ་ལ་ཀྵའི་ཞལ་ལས་ལེགས་འོངས་པ། །བརྗེད་པས་འཇིགས་ཕྱིར་རང་བྱུང་བདག་གིས་བཀོད། །ནོར་འཁྲུལ་ཆད་ལྷག་འགལ་བར་གྱུར་པ་རྣམས། །དཔལ་དང་མཁའ་འགྲོའི་ཚོགས་ལ་བཟོད་པར་གསོལ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།

དཔལ་ལཱུ་ཧི་པས་མཛད་པའི་སྒྲུབ་ཐབས་ཀྱི་བསྡུས་དོན།

༄༅། །དཔལ་ལཱུ་ཧི་པས་མཛད་པའི་སྒྲུབ་ཐབས་ཀྱི་བསྡུས་དོན་བཞུགས་སོ། །

༄༅། །དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །བསྒྲུབ་ཐབས་འདི་ལ་བཞི་སྟེ། སྒྲུབ་ཐབས་ཀྱི་མཚན་དང་། སྒྲུབ་པའི་གང་ཟག་དང་། གང་བསྒོམ་པའི་དོན་དང་། བསྒོམས་པའི་འབྲས་བུའོ། །གསུམ་པ་ལ་གཉིས། བསྐྱེད་རིམས་དང་། རྫོགས་རིམས་སོ། །དང་པོ་ལ་གཉིས། དངོས་གཞི་ལྷའི་རྣལ་འབྱོར་དང་། རྗེས་སོ། །དང་པོ་ལ་གཉིས། སྔོན་འགྲོ་དང་། དངོས་གཞིའོ། །སྔོན་འགྲོ་ལ་གཉིས། རྒྱུའི་ཡན་ལག་དང་། རྒྱུ་དངོས་སོ། །དང་པོ་ལ་གསུམ། རྣལ་འབྱོར་བསྲུང་བ་ཚངས་པའི་གནས་བཞི་བསྒོམ་པ། བདག་བསྲུང་བ་ལྷའི་རྣལ་འབྱོར། བསྲུང་བའི་འཁོར་ལོའོ། །བར་པ་ལ་ལྔ། མདོར་བསྟན། ཕུང་པོ། སྐྱེ་མཆེད། ཁམས་ལྷའི་བདག་ཉིད་བསྒོམ་པ། མཇུག་བསྡུ་བའོ། རྒྱུ་དངོས་ལ་གཉིས། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་སོ། །དང་པོ་ལ་གཉིས། མཆོད་པའི་ཡུལ་བསྒོམ་པ་དང་། མཆོད་པ་དངོས་སོ། །གཉིས་པ་ལ་གཉིས། བརྟགས་པའི་སྟོང་ཉིད་དང་། རང་བཞིན་གྱིས་སྟོང་པའོ། །དངོས་གཞི་ལ་གཉིས། བསྐྱེད་རིམས་སྤྱིར་བསྟན་པ་དང་། བྱེ་བྲག་ཏུ་བསྟན་པའོ། །དང་པོ་ལ་གཉིས། མདོར་བསྟན། རྒྱས་བཤད་ཀྱིས་འབྱུང་བ་རིམས་བརྩེགས་དང་། རྟེན་པ་ལྷ་བསྐྱེད་པའོ། །དེ་ལ་གཉིས། བསྐྱེད་པའི་ཆོ་ག་དང་། བསྐྱེད་པ་དངོས་སོ། །དེ་ལ་གཉིས། རྫུས་སྐྱེས་དངོས་དང་། རྣམ་པ་གསལ་གདབ་པའོ། །དེ་ལ་ལྔ། གཙོ་བོ་དང་། བདེ་ཆེན་གྱི་འཁོར་ལོ། སྐུ་གསུང་ཐུགས་ཀྱི་འཁོར་ལོ། དམ་ཚིག་གི་འཁོར་ལོ། དུར་ཁྲོད་གསལ་གདབ་པའོ། །གསུམ་པ་ལ་གཉིས། ཕྱོགས་གང་དུ་དགོད་པ་དང་། སྐུ་མདོག་དང་། ཕྱག་མཚན་ནོ། །བྱེ་བྲག་ཏུ་བསྟན་པ་ལ་གསུམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། སྦྱར་བའི་ཆོས་སྐུ་དང་། ལུས་ཀྱི་དཀྱིལ་འཁོར་བསྒོམ་པ་ལོངས་སྐུ་དང་། ཡན་ལག་བསྒོམ་པ་སྤྲུལ་སྐུའོ། །དང་པོ་ལ་གཉིས། མདོར་བསྟན་དང་། རྒྱས་བཤད་དོ། །དེ་ལ་བདུན། དྲན་པ་ཉེ་བར་བཞག་པ་དང་། རྫུ་འཕྲུལ་གྱི་རྐང་པ་དང་། དབང་པོ། སྟོབས། བྱང་ཆུབ་ཀྱི་ཡན་ལག འཕགས་པའི་ལམ། ཡང་དག་པར་སྤོང་བའོ། །གཉིས་པ་ལ་གསུམ། ལུས་ཀྱི་དཀྱིལ་འཁོར་མདོར་བསྟན་པ། རྒྱས་པར་བཤད་པ། སྐུ་གསུང་ཐུགས། མཇུག་བསྡུ་བའོ། །གཉིས་པ་ལ་གསུམ། མཁའ་སྤྱོད་པ་གཉིས་སུ་དག་པ། ས་སྤྱོད་པ་དྲུག་པ། ས་འོག་སྤྱོད་པ་ས་བཅུ་གཉིས་དག་པའོ། །སྤྲུལ་སྐུ་བསྒོམ་པ་ལ་གཉིས། ཡབ་ཡུམ་གྱི་གོ་ཆ་གཉིས། ཡེ་ཤེས་ཀྱི་འཁོར་ལོ་མདོར་བསྟན་པ་དང་། རྒྱས་པར་བཤད་པའོ། །དེ་ལ་དྲུག །ཡབ་ཡུམ་གྱི་གོ་ཆ། ཡེ་ཤེས་ཀྱི་འཁོར་ལོ་དགུག་པ་དངོས། དབང་བསྐུར་བ། བཟླས་པ་བྱ་བ། མཆོད་དེ་བསྟོད་པ། ཕྱི་ནང་གི་གཏོར་མའོ། །རྗེས་ལ་གསུམ། ཁམས་དཔའ་བོའི་དག་པ། རྒྱན་སྔགས་ཀྱི་དག་པ། རྣལ་འབྱོར་གྱི་དག་པའོ། །དང་པོ་ལ་གཉིས། རྒྱས་བཤད་དང་། མཇུག་བསྡུ་བའོ། །རྫོགས་པའི་རིམ་པ་ལ་བཞི། བདེ་བ་ཆེན་པོའི་རྫོགས་རིམས། དམ་ཚིག་སེམས་དཔའ། གཟུགས་ལས་འདས་པ། ཞར་ལ་ཐབས་དང་ཤེས་རབ་ཀྱི་རྫོགས་རིམས་སོ། །བསྒོམས་པའི་འབྲས་བུ་ལ་གཉིས། མཐར་ཐུག་གི་འབྲས་བུ་དང་བར་དོར་མཆོག་གྲུབ་ཚུལ་ལོ། །དང་པོ་ལ་གཉིས། ཐབས་དང་ཤེས་རབ་ཀྱི་འབྲས་བུ་དང་། དེ་བཞིན་ཉིད་སྤྲོས་པ་དང་བྲལ་བའི་འབྲས་བུའོ། །རྣལ་འབྱོར་དབང་ཕྱུག་དཔལ་ལཱུ་ཧི་པས་མཛད་པའི་སྒྲུབ་ཐབས་ཀྱི་བསྡུས་དོན། རང་བྱུང་རྡོ་རྗེ་ཞེས་བྱ་བས་སྦྱར་བ་རྫོགས་སོ།། །། ༈ དཔལ་འཁོར་ལོ་སྡོམ་པའི་མངོན་རྟོགས་ལཱུ་ཧི་པའི་བཞེད་པ་བཞུགས་སོ། །བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །དང་པོར་རེ་ཤིག་རྣལ་འབྱོར་དང་མཐུན་པའི་གནས་སུ་སྟན་བདེ་བ་ལ་འདུག་སྟེ། བདུད་རྩིའི་རི་ལུས་ཁ་དག་པར་བྱས་ཏེ། དཔལ་ཧེ་རུ་ཀའི་དོན་དྲན་པས་ལུས་ངག་ཡིད་ཀྱི་དྲི་མ་སྦྱང་སྟེ་ཞལ་ཅིག་ཕྱག་གཉིས་པའི་ང་རྒྱལ་བྱའོ། །དེ་ནས་སེམས་ཅན་ཐམས་ཅད་ཀྱི་དོན་དུ་བྱམས་པ་དང་སྙིང་རྗེས་དགའ་བ་དང་བཏང་སྙོམས་ཚད་མེད་པ་བསྒོམ་པར་བྱའོ། །དེ་ནས་གཟུགས་ཀྱི་ཕུང་པོ་ལ་རྣམ་པར་སྣང་མཛད། འཚོགས་ཁར་དཀར་པོ་འཁོར་ལོ་དང་དྲིལ་བུ་ཅན། ཚོར་བའི་ཕུང་པོ་ལ་རྡོ་རྗེ་ཉི་མ་ལྟེ་བར་སེར་པོ་རིན་པོ་ཆེ་དང་དྲིལ་བུ། འདུ་ཤེས་ཀྱི་ཕུང་པོ་ལ་པད་མ་གར་གྱི་དབང་ཕྱུག་མགྲིན་པར་དམར་པོ་པད་མ་དང་དྲིལ་བུ། འདུ་བྱེད་ཀྱི་ཕུང་པོ་ལ་རྡོ་རྗེ་རྒྱལ་པོ་རྐང་བོལ་དུ་ལྗང་ཁུ། རྒྱ་གྲམ་དང་དྲིལ་བུ། རྣམ་པར་ཤེས་པའི་ཕུང་པོ་ལ་རྡོ་རྗེ་སེམས་དཔའ་སྙིང་ཁར་དཀར་པོ་རྡོ་རྗེ་དང་དྲིལ་བུ་དེ་བཞིན་གཤེགས་པ་ཐམས་ཅད་ཀྱི་བདག་ཉིད་དཔལ་ཧེ་རུ་ཀ་རྡོ་རྗེ་དཔལ་འབར་མཐིང་ཁ་རྡོ་རྗེ་དང་དྲིལ་བུ་ཅན་ནོ། །མིག་གཉིས་ལ་གཏི་མུག་རྡོ་རྗེ་དཀར་པོ་འཁོར་ལོ་དང་དྲིལ་བུ། རྣ་བར་ཞེ་སྡང་རྡོ་རྗེ་མཐིང་ཁ་རྡོ་རྗེ་དང་དྲིལ་བུ། སྣ་ལ་སེར་སྣ་རྡོ་རྗེ་སེར་པོ་རིན་པོ་ཆེ་དང་དྲིལ་བུ། ལྕེ་ལ་འདོད་ཆགས་རྡོ་རྗེ་དམར་པོ་པད་མ་དང་དྲིལ་བུ། རེག་ལ་ཕྲག་དོག་རྡོ་རྗེ་ནོར་བུ་ལ་ལྗང་ཁུ། སྣ་ཚོགས་རྡོ་རྗེ་དང་དྲིལ་བུ། སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེ། ནུ་མའི་བར་དུ་དཀར་པོ་རྡོ་རྗེ་དང་དྲིལ་བུ་ཅན། ཐམས་ཅད་ཀྱང་ཉི་མ་དང་ཟླ་བའི་གདན་ལ་བཞུགས་པ། གར་གྱི་ཉམས་དགུ་དང་། ཕྱག་རྒྱ་དྲུག་གིས་བརྒྱན་པའོ། །སའི་ཁམས་ལ་ལྟུང་བར་བྱེད་མ་ལྟེ་བར་སེར་མོ་གཡས་དང་པོ་ཌ་མ་རུ། ཆུའི་ཁམས་ལ་གསོད་པར་བྱེད་མ་སྙིང་ཁར་སྔོན་མོ་གཡས་དང་པོ་ན་རྡོ་རྗེ། མེའི་ཁམས་ལ་འགུགས་པར་བྱེད་མ་མགྲིན་པར་དམར་མོ། གཡས་དང་པོ་ན་པད་མ། རླུང་གི་ཁམས་ལ་གར་གྱི་དབང་ཕྱུག་མ་སྤྱི་བོར་ལྗང་ཁུ་གཡས་དང་པོ་ན་སྣ་ཚོགས་རྡོ་རྗེ། ཐམས་ཅད་ཀྱི་གཡས་གཉིས་པ་ན་གྲི་གུག གཡོན་གཉིས་ན་ཁ་ཊྶྃ་ག་དང་ཐོད་པའོ། ནམ་མཁའི་ཁམས་ལ་པད་མའི་དྲ་བ་ཅན་མ། སྤྱི་གཙུག་ཏུ་མཐིང་དམར་དབུས་མཐིང་གཡས་སེར་གཡོན་དམར་བ། གཡས་ན་ལྕགས་ཀྱུ་དང་ཚངས་པའི་མགོ་དང་གྲི་གུག་གཡོན་ན་ཐོད་པ་དང་ཁ་ཊྶཱྃ་ག་དང་ཞགས་པ། ཐམས་ཅད་ཀྱང་རོལ་པའི་ཁྲོ་མོ་ཕྱག་རྒྱ་ལྔ་དང་ལྡན་པའོ། །གཉིས་པ་གནས་བསྲུང་བ་ནི། ཨོཾ་སུྃ་བྷ་ནི་སུྃ་བྷ་ཧཱུྃ་ཧཱུྃ་ཕཊ། ཨོཾ་གྷྲི་རྣ་གྷྲི་རྣ་ཧཱུྃ་ཧཱུྃ་ཕཊ། ཨོཾ་གྷྲི་རྣ་པ་ཡ་གྷྲི་རྣ་པ་ཡ་ཧཱུྃ་ཧཱུྃ་ཕཊ། ཨོཾ་ཨ་ན་ཡ་ཧོ་བྷ་ག་བན་བཛྲ་ཧཱུྃ་ཧཱུྃ་ཕཊ། ཕྱོགས་རྣམས་སུ་གཡོན་བསྐོར་དུ། ཁྭ་དང་འུག་པ་དང་ཁྱི་དང་ཕག་གི་གདོང་ཅན་རྣམས་དགོད་དོ། །ཡང་གཡས་བསྐོར་དུ་གཤིན་རྗེ་བསྲེག་མ་དང་། མཆེ་བ་མ་དང་། ཕོ་ཉ་མ་དང་། འཇོམས་མ་རྣམས་སོ། །འོག་ཏུ་ཧཱུྃ་ལས་སྣ་ཚོགས་རྡོ་རྗེའི་རང་བཞིན་འོད་ཟེར་དང་བཅས་པས་རྡོ་རྗེའི་ས་གཞིར་བྱིན་གྱིས་བརླབ་བོ། །ཨོཾ་མེ་དི་ནི་བཛྲ་བ་བཛྲ་བྷན་དྷ་ཧཱུྃ། ལྷ་མོ་རྣམས་ཀྱི་ནང་རོལ་དུ་སྔགས་ལས་གྱུར་པའི་རྡོ་རྗེའི་ར་བ་དང་གུར་རྣམས་ནི་ཨོཾ་བཛྲ་པྲ་ཀ་ར་ཧཱུྃ་བྃ་ཧཱུྃ། ཨོཾ་བཛྲ་པཎ་ཙ་ར་ཧཱུྃ་བྃ་ཧཱུྃ། ཨོཾ་བཛྲ་བི་ཐ་ན་ཧཱུྃ་ཁྃ་ཧཱུྃ། ཨོཾ་བཛྲ་ས་ར་ཛ་ལ་ཏྲྃ་སྃ་ཏྲྃ། ཞེས་པས་རྡོ་རྗེ་ར་བ་གྲུ་བཞི་པ་དང་། གུར་དང་བླ་རེ་དང་། མདའི་དྲ་བ་རྣམས་བྱིན་གྱིས་བརླབ་བོ། །དེ་ནས་ཁ་ལ་སོགས་པ་རྣམས་ཀྱི་མདུན་དུ་ཧཱུྃ་ལས་དོང་ཁ་ཁྱེར་ཅན་དུ་གྱུར་པར་བལྟ་སྟེ། འོད་ཟེར་གྱིས་བགེགས་ཀྱི་ཚོགས་བཀུག་ཅིང་དོང་གི་ནང་དུ་བཅུག་ནས་ཕུར་བུས་གདབ་པར་བྱའོ། ཨོཾ་གྷ་གྷ་གྷ་ཏ་ཡ་གྷ་ཏ་ཡ། སརྦ་དུ་ཥྚ་ན་ཧཱུྃ་ཧཱུྃ་ཕཊ། ཀི་ལ་ཡ་ཀི་ལ་ཡ་སརྦ་པ་པྃ་ཧཱུྃ་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཀི་ལ་ཡ་བཛྲ་དྷ་རོ་ཨད་ཛྙྱ་པ་ཡ་ཏི་སརྦ་པ་པྃ་སརྦ་དུན་བི་གྷ་ནང་ཀ་ཡ་བག་ཙི་ཏ་བཛྲ་ཀི་ལ་ཡ་ཧཱུྃ་ཕཊ། ཨོཾ་བཛྲ་མུད་ཀ་ར་བཛྲ་ཀི་ལ་ཡ་ཨ་ཀོ་ཏ་ཡ་ཧཱུྃ་ཕཊ། ཅེས་ཐོ་བས་བརྡུང་བར་བྱའོ། །དེ་ལྟར་བགེགས་རྣམས་མེད་པར་བྱ་སྟེ། ལྷ་མོ་ཐམས་ཅད་བསྡུས་ནས། བཛྲ་པྲ་ཀ་ར་ན་ཧཱུྃ། པད་མ་པྲ་ཀ་ར་ན་ཧཱུྃ། ཙཀྲ་པྲ་ཀ་ར་ན་ཧཱུྃ། ཞེས་རྡོ་རྗེ་དང་པད་མ་དང་། འཁོར་ལོའི་ར་བ་ཟླུམ་པོ་བྱ་སྟེ། མཚམས་བཅིང་པར་བྱའོ། །ཐམས་ཅད་ལ་བཛྲ་ཛ་ལ་ཨ་ན་ལ་རྐ་ཧཱུྃ་ཧཱུྃ་གིས་ནི་ཁ་དོག་ལྔར་བྱིན་གྱིས་བརླབས་ཏེ་བདག་དང་གནས་བསྲུང་ངོ་། །དེ་ནས་རང་གི་སྙིང་ཁར་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུྃ་འོད་ཟེར་སྣ་ཚོགས་འཕྲོ་བ་བསྒོམས་ཏེ། བླ་མ་དང་དཀྱིལ་འཁོར་གསལ་བར་ལྟ་སྟེ། སྙིང་ཁའི་འོད་ཟེར་ལས་བྱུང་བའི་མཆོད་པ་ནི། ཨོཾ་ཨ་བཛྲ་བྷི་ནེ་ཧཱུྃ། ཨོཾ་ཨ་བཛྲ་བྃ་སེ་ཧཱུྃ། ཨོཾ་ཨ་བཛྲ་མུ་རན་ཙེ་ཧཱུྃ། ཨོཾ་ཨ་བཛྲ་མུ་ཀུན་དྷ་ཧཱུྃ། ཨོཾ་ཨ་བཛྲ་ཧ་སེ་ཧཱུྃ། ཨོཾ་ཨ་བཛྲ་ལཀྵྼེ་ཧཱུཾ། ཨོཾ་ཨ་བཛྲ་གྷིར་ཏི་ཧཱུྃ། ཨོཾ་ཨ་བཛྲ་ནིར་ཏི་ཧཱུྃ། ཨོཾ་ཨ་བཛྲ་པུ་པེ་ཧཱུྃ། ཨོཾ་ཨ་བཛྲ་དྷུ་པེ་ཧཱུྃ། ཨོཾ་ཨ་བཛྲ་དྷི་པེ་ཧཱུཾ། ཨོཾ་ཨ་བཛྲ་གྷན་དྷེ་ཧཱུྃ། ཨོཾ་ཨ་བཛྲ་དྷར་ཤེ་ཧཱུྃ། ཨོཾ་ཨ་བཛྲ་ར་ཀྵྼེ་ཧཱུྃ། ཨོཾ་ཨ་བཛྲ་པར་ཤེ་ཧཱུྃ། ཨོཾ་ཨ་བཛྲ་དྷར་མེ་ཧཱུྃ། ཞེས་པི་ཝང་མ་སྔོན་མོ། གླིང་བུ་མ་སེར་མོ། རྫ་རྔ་མ་ལྗང་ཁུ། རྔ་ཟླུམ་མ་དམར་མོ། བཞད་མ་དམར་སྐྱ། སྒེག་མོ་སྔོན་མོ། གླུ་མ་སེར་མོ། གར་མ་ལྗང་ཁུ། མེ་ཏོག་མ་དཀར་མོ། བདུག་སྤོས་མ་མཐིང་ཁ། མར་མེ་མ་དམར་སེར། དྲི་ཆབ་མ་དཀར་མོ། གཟུགས་མ་དཀར་མོ། རོ་མ་དམར་མོ། རེག་མ་ལྗང་ཁུ། ཆོས་མ་དཀར་མོས་ཏེ་རིག་མ་བཅུ་དྲུག་མིང་དང་མཐུན་པའི་ཕྱག་མཚན་འཛིན་པ་རྣམས་ཀྱིས་ཕྱི་དང། ཨོཾ་པཎ་ཙ་ཨ་མྲི་ཏ་པུ་ཙ་མི་གྷ་ས་མུན་ཏྲ་པ་ར་ན་ས་མ་ཡེ་ཧཱུཾ་གིས་མཁའ་འགྲོ་མ་ལ་སོགས་པས་ནང་དང་། ཡབ་ཡུམ་གཉིས་སུ་མེད་པའི་བདེ་བ་གསང་བའི་མཆོད་པ་དང་། མཆོད་བྱ་མཆོད་བྱེད་དང་བྲལ་བ། དེ་ཁོ་ན་ཉིད་ཀྱིས་མཆོད་དེ་བསོད་ནམས་ཀྱི་ཚོགས་བསགས་གོ །དེ་ནས། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡིད་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །བྱང་ཆུབ་མྱུར་དུ་བདག་སྐྱབས་མཆི། །འགྲོ་བ་ཀུན་གྱི་དོན་གྱི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཞེས་པས་བསོད་ནམས་ཀྱི་ཚོགས་བསགས་ཏེ་དེ་ཉིད་ཀྱི་རྗེས་སུ་ལྷ་རྣམས་སྙིང་ཁར་བསྡུས་ཏེ། ཨོཾ་ས་བྷ་བཱ་ཤུད་དྷོ་སརྦ་དྷརྨ་ས་བྷ་བཱ་ཤུད་དྷོ་ཧྃ་གིས་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །ཧེ་རུ་ཀ་ཨ་ཧྃ་ཞེས་བདག་ཀྱང་ཧཱུྃ་ལ་བསྡུ་བར་བྱའོ། །ཨོཾ་ཤུ་ནྱ་ཏ་ཛྙྱ་ན་བཛྲ་ས་བྷ་བཱ་ཨད་མ་ཀོ་ཧྃ་ཞེས། ནཱ་དར་ཡང་མི་དམིགས་པ་ལ་གནས་པར་བྱ་བ་ཡེ་ཤེས་ཀྱི་ཚོགས་སོ། །དེ་ནས་རྟེན་དང་བརྟེན་པ་ནི་སྟོང་པའི་ངང་ལས་རྣམ་པར་ཤེས་པ་ནཱ་དར་གྱུར་པར་བལྟ་སྟེ། དེ་ལ་འོད་ཟེར་འོག་ཏུ་འཕྲོས་པས་ཡྃ་ལས་རླུང་གི་དཀྱིལ་འཁོར་གཞུ་ལྟ་བུ་སྔོན་པོ་བ་དན་གྱིས་མཚན་པ། རྃ་ལས་མེའི་དཀྱིལ་འཁོར་གྲུ་གསུམ་དམར་པོ་འབར་བས་མཚན་པ། བྃ་ལས་ཆུའི་དཀྱིལ་འཁོར་ཟླུམ་པོ་དཀར་པོ་བུམ་པས་མཚན་པ། ལྃ་ལས་སའི་དཀྱིལ་འཁོར་གྲུ་བཞི་སེར་པོ་རྩེ་གསུམ་གྱིས་མཚན་པ། སུྃ་ལས་ལྷུན་པོ་རིན་པོ་ཆེ་བཞིའི་རང་བཞིན་ཅན། ཧཱུྃ་ལས་སྣ་ཚོགས་རྡོ་རྗེ། པྃ་ལས་སྣ་ཚོགས་པད་མ། དེ་དག་གི་སྟེང་དུ་བྷྲུྃ་ལས་གཞལ་ཡས་ཀྱི་ཁང་པ་གྲུ་བཞི་སྒོ་བཞི་རྟ་བབས་དང་བཅས་པ་ཀ་བ་བརྒྱད་ཀྱིས་ཉེར་བར་མཛེས་པ། དུར་ཁྲོད་བརྒྱད་དང་ལྡན་པ་སྔར་བསྟན་པ་ལྟ་བུའི་བསྲུང་བའི་འཁོར་ལོ་དང་བཅས་པ་བསྐྱེད་དོ། །དེ་ནས་ནཱ་ད་ལས་ཨ་ལི་ཚན་པ་སུམ་ཅུ་རྩ་བདུན་བྱུང་བས་ཟླ་བའི་དཀྱིལ་འཁོར་སུམ་ཅུ་རྩ་བདུན་དེ་ཉིད་ཀྱིས་མཚན་པའོ། །དེ་ཉིད་དང་མཉམ་པའི་ཀ་ལི་ཉི་མའི་བདག་ཉིད་ཅན་ནོ། །དེ་ནས་ནཱ་ད་དེ་དབུས་ཀྱི་ཉི་ཟླའི་བར་དུ་ཞུགས་པས། ཧཱུྃ་བྃ་ཡེ་ཤེས་ལྔའི་བདག་ཉིད་ཅན་དུ་གྱུར་པར་བལྟའོ། །གཞན་རྣམས་སུ་མྃ་ལྃ་པྃ་ཏྃ། པུ་ཛ་ཨོ་ཨ་གོ་ར་དེ་མཱ། ཀ་ཨོ་ཏྲི་ཀོ་ཀ་ལ་ཀ་ཧི། པྲེ་གྲི་སོ་སུ་ན་སི་མ་ཀུ། ཧཱུྃ་བརྒྱད་ཞུགས་ཅིང་དེ་རྣམས་ལ་འོད་འཕྲོས་པས་ནམ་མཁའ་དང་མཉམ་པའི་དོན་བྱས་སླར་འདུས་པས། ལྷ་དྲུག་ཅུ་རྩ་གཉིས་སུ་གྱུར་པར་བལྟ་སྟེ། ཁྱད་པར་དུ་གཙོ་བོའི་ཐུགས་ཀར་པད་མ་འདབ་མ་བརྒྱད་པ་ལ་དབུས་སུ་བདག་ལྟ་བུ་མཁའ་འགྲོ་བཞི་དང་བྱང་ཆུབ་ཀྱི་སེམས་ལ་སོགས་པའི་སྣོད་བཞི་དང་བཅས་པ་བལྟའོ། །ཕྱི་རོལ་དང་ནང་དབྱེར་མེད་པར་གསལ་གདབ་པ་ནི། བཅོམ་ལྡན་འདས་སྐུ་མདོག་མཐིང་ཁ་མདུན་མཐིང་གཡོན་ལྗང་། རྒྱབ་དམར། གཡས་སེར། རལ་པའི་ཐོར་ཙུགས་ཟླ་བ་ཕྱེད་པ་དང་། སྣ་ཚོགས་རྡོ་རྗེའི་དབུ་རྒྱན་ཅན། ཞལ་རྣམ་པར་འགྱུར་བ་མཆེ་བ་གཙིགས་པ་སྒེག་པ་དང་དཔའ་བ་འཇིགས་སུ་རུང་པ། རྒོད་པ་གཤེ་བ་འཇིགས་སུ་རུང་བར་བྱེད་པ་སྙིང་རྗེ་བ་རྔམ་ཞིང་ཞི་བའི་ཉམས་དང་ལྡན་པ། ཕྱག་དང་པོ་གཉིས་རྡོ་རྗེ་དང་དྲིལ་བུས་ཡུམ་ལ་འཁྱུད་པ། གཉིས་ཀྱིས་གླང་པོ་ཆེའི་ལྤགས་པ་ན་བཟར་བརྒྱངས་པ། གཡས་གསུམ་པ་ན་ཌ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པའོ། །གཡོན་གསུམ་པ་ན་ཁ་ཊྶཱྃ་ག །བཞི་པ་ན་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ་ཕྱག་རྒྱ་དྲུག་གིས་བརྒྱན་པའོ། ཡུམ་རྡོ་རྗེ་ཕག་མོ་ཞལ་ཅིག་ཕྱག་གཉིས་མ་གྲི་གུག་དང་ཐོད་པ་ཅན་ཕྱག་རྒྱ་ལྔ་དང་ལྡན་པའོ། །དང་པོ་མཁའ་འགྲོ་མ་དང་ལ་མ་དང་དུམ་སྐྱེས་མ་དང་། གཟུགས་ཅན་མ། གཡོན་བསྐོར་དུ་ཞལ་གྱི་ཁ་དོག་ཅན། ཞལ་ཅིག་ཕྱག་བཞི་མ་གཡས་ཌ་མ་རུ་དང་གྲི་གུག་གཡོན་ན་ཁ་ཊྶཱ་ག་དང་ཐོད་པ་ཅན་ནོ། །མཚམས་རྣམས་སུ་བྱང་ཆུབ་ཀྱི་སེམས་ལ་སོགས་པའི་སྣོད་བཞི་དགོད་དོ། །དེ་ནས་དང་པོ་ཐུགས་ཀྱི་འཁོར་ལོ་རྩིབས་བརྒྱད་ལ་ཁ་དོག་སྔོན་པོ་རྡོ་རྗེ་སྔོན་པོའི་ཕྲེང་བས་རྣམ་པར་རྒྱན་པ་དེའི་ཤར་ཕྱོགས་ཀྱི་རྩིབས་པུ་ལི་ར་མ་ལ་ཡར། སྤྱི་བོར་ཐོད་པའི་དུམ་བུ་དང་རབ་ཏུ་གཏུམ་མོ། བྱང་ཕྱོགས་ཀྱི་རྩིབས་ཛ་ལན་དྷ་རར་སྤྱི་གཙུག་ཏུ་ཀེང་རུས་ཆེན་པོ་དང་གཏུམ་མིག་མ། ནུབ་ཕྱོགས་ཀྱི་རྩིབས་དབུ་རྒྱན་རྣ་བ་གཡས་པར་ཀེང་རུས་དང་འོད་ལྡན་མ། ལྷོ་ཕྱོགས་ཀྱི་རྩིབས་ཨར་ལྟར་མགོ་བོའི་རྒྱབ་ཏུ་མཆེ་བ་རྣམ་པར་གཙིགས་པ་དང་། སྣ་ཆེན་མ་གནས། ས་དང་པོ་རབ་ཏུ་དགའ་བའོ། །མེའི་མཚམས་ཀྱི་རྩིབས་ཀོ་ཏ་ཝ་རིར་རྣ་བ་གཡོན་པར་ཆང་དཀྲ་དང་དཔའ་བའི་བློ་གྲོས་མ། བདེན་བྲལ་གྱི་ཕྱོགས་ཀྱི་རྩིབས་ར་མི་ཤ་ར་སྨིན་མའི་དབུས་སུ་སྣང་བ་དཔག་མེད་དང་། མི་ཐུང་མ། རླུང་གི་ཕྱོགས་ཀྱི་རྩིབས་དྷེ་ཝི་ཀོ་ཊ་མིག་གཉིས་སུ་རྡོ་རྗེའི་འོད་དང་ལང་ཀའི་དབང་ཕྱུག་མ། དབང་ལྡན་གྱི་རྩིབས་མ་ལ་བར་དཔུང་པའི་མགོར་རྡོ་རྗེའི་ལུས་དང་ཤིང་གྲིབ་མོ་ཉེ་བའི་གནས་ས་དྲི་མ་མེད་པའོ། །འདི་དག་ནི་ཐུགས་ཀྱི་འཁོར་ལོ་སྟེ་ནམ་མཁའ་ལ་སྤྱོད་པའོ། །གཉིས་པ་གསུང་གི་འཁོར་ལོ་རྩིབས་བརྒྱད་པ་དམར་པོ། པད་མ་དམར་པོའི་ཕྲེང་བས་ཡོངས་སུ་བསྐོར་བ་དེའི་ཤར་ཕྱོགས་ཀྱི་རྩིབས་ཀ་མ་རུ་པ་མཆན་ཁུང་གཉིས་སུ་མྱུག་གུ་ཅན་དང་ས་བསྲུངས་མ། བྱང་ཕྱོགས་ཀྱི་རྩིབས་ཨོ་ཏྲ་ནུ་མ་གཉིས་ལ་རྡོ་རྗེའི་རལ་པ་ཅན་དང་འཇིགས་བྱེད་ཆེན་མོ་ཞིང་། ས་འོད་བྱེད་མའོ། །ནུབ་ཕྱོགས་ཀྱི་རྩིབས་ཏྲི་ཤ་ཀུ་ནེར་ལྟེ་བའི་དབུས་སུ་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོ་ཕྱོགས་ཀྱི་རྩིབས་ཀོ་ས་ལ་སྣའི་རྩེ་མོར་རྡོ་རྗེ་ཧཱུྃ་ཀ་ར་དང་ཆང་འཐུང་མ་ཉེ་བའི་ཞིང་། ས་འོད་འཕྲོ་བའོ། །མེའི་ཕྱོགས་ཀྱི་རྩིབས་ཀ་ལིང་ཀ་ཁ་ལ་རབ་ཏུ་བཟང་པོ་དང་སྔོན་བསངས་ལྷ་མོ། བདེན་བྲལ་ཕྱོགས་ཀྱི་རྩིབས་ལམ་པ་ཀ་མགྲིན་པར་རྡོ་རྗེ་བཟང་པོ་དང་ཤིན་ཏུ་བཟང་མོ། ཚན་དྷོ་ཧ་ས་སྦྱང་དཀའ་བའོ། །རླུང་གི་ཕྱོགས་ཀྱི་རྩིབས་ཀན་རྩིར་སྙིང་ཁར་འཇིགས་བྱེད་ཆེན་མོ་དང་རྟ་རྣ་མ། དབང་ལྡན་གྱི་རྩིབས་ཧི་མ་ལ་ཡར་ལྒང་པར་མིག་མི་བཟང་དང་མཁའ་འགྲོ་གདོང་མའོ། །ཉེ་བའི་ཚན་དྷོ་ཧ། ས་མངོན་དུ་གྱུར་པའོ། །གསུང་གི་འཁོར་ལོ་སྟེ་ས་ལ་སྤྱོད་པའོ། །གསུམ་པ་སྐུའི་འཁོར་ལོ་རྩིབས་བརྒྱད་པ་དཀར་པོ་འཁོར་ལོ་དཀར་པོའི་ཕྲེང་བས་བསྐོར་བ། དེའི་ཤར་ཕྱོགས་ཀྱི་རྩིབས་པྲེ་ཏ་པུ་རར་མཚན་མ་ལ་སྟོབས་པོ་ཆེ་དང་འཁོར་ལོའི་ཤུགས་མ། བྱང་ཕྱོགས་ཀྱི་རྩིབས་གྲི་ཧ་དེ་བ་ཏ་གཤང་ལམ་དུ་རིན་ཆེན་རྡོ་རྗེ་དང་དུམ་སྐྱེས་མ་འདུ་བ་ཅན། ས་རིང་དུ་སོང་བའོ། །ནུབ་ཕྱོགས་རྩིབས་སཽའུ་རཥྚ་བརླ་གཉིས་ལ་རྟ་མགྲིན་དང་ཆང་འཚོང་མ། ལྷོ་ཕྱོགས་ཀྱི་རྩིབས་སོའུ་ཝརྣ་དི་པ་བྱིན་པ་གཉིས་ལ། ནམ་མཁའི་སྙིང་པོ་དང་འཁོར་ལོའི་གོ་ཆ་མའོ། །ཉེ་བའི་དུ་བ་ཅན། ས་མི་གཡོ་བའོ། །མེའི་ཕྱོགས་ཀྱི་རྩིབས་ན་ག་ར་སོར་མོ་རྣམས་ལ། དཔལ་ཁྲག་འཐུང་དང་ཤིན་ཏུ་དཔའ་མོ། བདེན་བྲལ་གྱི་ཕྱོགས་ཀྱི་རྩིབས་སི་དྷུ། རྐང་པའི་བོལ་གཉིས་སུ་པད་མ་གར་གྱི་དབང་ཕྱུག་དང་སྟོབས་ཆེན་མོ། དུར་ཁྲོད་ས་ལེགས་པའི་བློ་གྲོས་སོ། །རླུང་གི་ཕྱོགས་ཀྱི་རྩིབས་མ་རུ། མཐེ་བོང་གཉིས་ལ་རྣམ་པར་སྣང་བྱེད་དང་འཁོར་ལོ་བསྒྱུར་མ། དབང་ལྡན་གྱི་རྩིབས་ཀུ་ལུ་ཏ་པུས་མོ་གཉིས་ལ། རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཉེ་བའི་དུར་ཁྲོད། ས་བཅུ་པ་ཆོས་ཀྱི་སྤྲིན་ནོ། །སྐུའི་འཁོར་ལོ་སྟེ་ས་འོག་ལ་སྤྱོད་པའོ། །དཔའ་བོ་ཐམས་ཅད་ཞལ་ཅིག་ཕྱག་བཞི་པ་དང་པོ་གཉིས་རྡོ་རྗེ་དྲིལ་བུས་ཡུམ་ལ་འཁྱུད་པ། གཡོན་འོག་མ་ན་ཁ་ཊྶཱྃ་ག །གཡས་ཌ་མ་རུའོ། །གཞན་དག་ནི་བཅོམ་ལྡན་འདས་ཀྱི་རྣམ་པ་ཅན་ནོ། །ཡུམ་རྣམས་ནི་རྡོ་རྗེ་ཕག་མོ་ཅི་ལྟ་བ་ས་བཅུའི་བདག་ཉིད་རྣམས་སོ། །ཤར་དང་བྱང་དང་ནུབ་དང་ལྷོའི་སྒོ་རྣམས་སུ། ཁྭ་དང་འུག་པ་དང་། ཁྱི་དང་ཕག་གི་གདོང་པ་ཅན་དང་། མཐིང་ཁ་དང་ལྗང་ཁུ་དང་དམར་མོ་དང་སེར་མོ་རྣམས་སོ། །ཤར་ལྷོ་མཚམས་ནས་གཡས་བསྐོར་དུ་གཤིན་རྗེ་སྲེག་མ་དང་། ཕོ་ཉ་མ་དང་། མཆེ་བ་ཅན་དང་། འཇོམས་མ་རྣམས་དེ་གཟུགས་མ་གཉིས་མའོ། །ནང་དུ་ནི། ཁ་དང་སྣ་དང་གསང་བ་དང་གཤང་བའི་གནས་དང་། རྣ་བ་གཡས་དང་གཡོན་པ་དང་། མིག་གཡས་དང་གཡོན་རྣམས་སུ་གོ་རིམས་བཞིན་ནོ། །ཐམས་ཅད་ཀྱང་གཡས་གཉིས་ན་ཌ་མ་རུ་དང་གྲི་གུག་གཡོན་གཉིས་ན་ཁ་ཊྶཱྃ་ག་དང་ཐོད་པ་ཅན་རོའི་གདན་ལ་བཞུགས་པའོ། །ཕྱི་རོལ་དུ་དུར་ཁྲོད་བརྒྱད་ནི་ཤར་ཕྱོགས་ནས་གཡོན་བསྐོར་དུ་གཏུམ་དྲག ཚང་ཚིང་འཁྲིགས་པ། འུར་འུར་འབར་བ། འཇིགས་སུ་རུང་པ། བྱང་ཤར་ནས་གཡས་བསྐོར་དུ་ཧ་ཧ་དགོད་པ། དཔལ་གྱི་ནགས་ཚལ། མུན་པ་དྲག་པོ། ཀི་ལི་ཀི་ལ་སྒྲོགས་པའོ། །དེ་དག་ཏུ་གོ་རིམས་བཞིན། ཤིར་ཤ། ཨ་ཤ་ཏ། ཀང་ཀེ་ལི། ཙུ་ཏ་བྷ་ཏྲ། ཀ་ར་ཛ། པ་ར་ཀ་ཏ། པ་ཏི་པ། ཤིང་བརྒྱད་དོ། །དབང་པོ་དཀར་པོ་རྡོ་རྗེ་ཐོགས་པ་གླང་པོ་ཆེ་ལ་ཞོན་པ། གནོད་སྦྱིན་སེར་པོ་བཱེ་ཙ་པུ་རི་ཐོགས་པ་རྟ་ལ་ཞོན་པ། ཆུ་ལྷ་དཀར་པོ་སྦྲུལ་ཞགས་ཐོགས་པ་ཆུ་སྲིན་ལ་ཞོན་པ། གཤིན་རྗེ་ནག་པོ་དབྱུག་པ་ཐོགས་པ་མ་ཧེ་ལ་ཞོན་པ། བདེ་བྱེད་དཀར་པོ་རྩེ་གསུམ་ཐོགས་པ་ཁྱུ་མཆོག་ལ་ཞོན་པ། མེ་ལྷ་དམར་པོ་མེ་ཐབ་ཐོགས་པ་ར་ལ་ཞོན་པ། རླུང་ལྷ་ལྗང་ཁུ་བ་དན་ཐོགས་པ་ཤ་བ་ལ་ཞོན་པ། ནོར་རྒྱས་ཀྱི་བུ། འཇོག་པོ། སྟོབས་ཀྱི་རྒྱུ། པད་མ་ཅན། པད་མ་ཆེན་པོ་ཧུ་ལུ་རུ། རིགས་ལྡན་དུང་སྐྱོང་། ཤིང་སྐྱོང་ཞོན་པའི་མགོ་ཅན་གྲི་གུག་དང་ཐོད་པ་ཅན་ནོ། །སྒྲ་སྒྲོགས་རྨུགས་འབྱིན། དྲག་པོ་འཁྱིལ་པ། སྟུག་པོ་སྙིང་པོ་ཆར་འབེབས་གཏུམ་པ་རྣམས་སོ། །གཞན་ཡང་ཆུ་དང་མེ་དང་། རྣལ་འབྱོར་ལ་སོགས་པ་དུར་ཁྲོད་ཕུན་སུམ་ཚོགས་པའོ། །དེ་ནས་ལྷ་ཐམས་ཅད་ལ་ཨོཾ་ཨཱཿཧཱུྃ་གིས་སྐུ་གསུང་ཐུགས་བྱིན་གྱིས་བརླབ་པོ། །ཨོཾ་སརྦ་བི་ར་ཡོ་གི་ནི་ཀ་ཡ་བག་ཙི་ཏ་བཛྲ་ས་བྷ་བ་ཨད་མ་ཀོ་ཧཾ་གིས་ཕྱི་རོལ་དང་ནང་གཉིས་སུ་མེད་པའི་བདག་ཉིད་དུ་བྱིན་གྱིས་བརླབ་པོ། །ཨོཾ་བཛྲ་ཤུད་དྷོ་སརྦ་དྷརྨ་བཛྲ་ཤུད་དྷོ་ཧྃ་གིས་བདེ་བ་ཆེན་པོའི་རང་བཞིན་དུ་མོས་པར་བྱའོ། །ཨོཾ་ཧ་ན་མ་ཧི། ས་ཧ་ཧཱུྃ། བྷོ་ཤད་ཧེ། ཧཱུྃ་ཧཱུྃ་ཧོ་ཕཊ་ཀྱིས་བཅོམ་ལྡན་འདས་ཀྱི་སྙིང་ཁ་དང་། ཚོགས་མ་དང་། སྤྱི་གཙུག་དང་། འཕྲག་པ་དང། མིག་དང། ཡན་ལག་ཐམས་ཅད་ལ་མཚོན་ཆའོ། །ཨོཾ་བྃ། ཧྃ་ཡྃ། ཧྲིཾ་མཾ་ཧྲིཾ་ཧྲིཾ། ཧཱུྃ་ཧཱུྃ་ཕཊ་ཕཊ། ཅེས་བྱ་བས་བཅོམ་ལྡན་འདས་མའི་ལྟེ་བ། སྙིང་ཁ། འཚོགས་མ། སྤྱི་གཙུག་ཡན་ལག་ཐམས་ཅད་ལ་དགོད་པར་བྱའོ། །སྤྲོས་པ་ལ་དགའ་བ་དག་གིས་ལྷའི་རྣམ་པར་དགོད་དེ། དེ་ནས་སྔགས་དང་ཕྱག་རྒྱའི་སྦྱོར་བས། ཡེ་ཤེས་ཀྱི་འཁོར་ལོ་ཇི་ལྟར་བསྐྱེད་པ་ལྟ་བུ་དགུག་ཅིང་། ཛ་ཧཱུྃ་བྃ་ཧོ་ཞེས་གཞུག་པར་བྱའོ། །ཡེ་ཤེས་ཀྱི་འཁོར་ལོ་དེ་ཉིད་ལ་མཆོད་པ་རྣམས་ཀྱིས་མཆོད་དེ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་བརྗོད་ཅིང་གསོལ་བ་བཏབ་ལ། ལྷ་ཚོགས་རྣམས་ཀྱིས་མགྲིན་གཅིག་ཏུ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར་ཞིང་། ཨོཾ་ཡོ་ག་ཤུད་དྷ་སརྦ་དྷརྨ་ཡོ་ག་ཤུད་དྷོ་ཧཾ་གིས་ཡིད་དག་པའི་བདག་ཉིད་དུ་བལྟ་སྟེ། དབང་བསྐུར་བའི་རྗེས་སུ་གཙོ་བོ་ལ་རྡོ་རྗེ་སེམས་དཔའ། བདེ་ཆེན་གྱི་ལྷ་མོ་བཞི་ལ་རིན་ཆེན་འབྱུང་ལྡན། ཐུགས་ཀྱི་འཁོར་ལོ་ལ་མི་བསྐྱོད་པ། གསུང་གི་འཁོར་ལོ་ལ་སྣང་བ་མཐའ་ཡས། སྐུའི་འཁོར་ལོ་ལ་རྣམ་པར་མཛད། དམ་ཚིག་གི་འཁོར་ལོ་ལ་དོན་ཡོད་གྲུབ་པ་རྣམས་ཀྱིས་རྒྱས་བཏབ་པར་བྱའོ། །དེ་ནས་བཅོམ་ལྡན་འདས་ཀྱི་གསང་གནས་ཧཱུྃ་ལ་རྡོ་རྗེ་དཀར་པོ་བྷྱ་དམར་པོས་མཚན་པ། བཅོམ་ལྡན་འདས་མའི་ཆོས་འབྱུང་ཨ་ལས་པད་མ་དམར་པོ་འདབ་མ་གསུམ་པ་དྱས་མཚན་པ་གཉིས་སུ་མེད་པའོ། །བཅོམ་ལྡན་འདས་ཀྱི་ལྟེ་བ་དང་སྙིང་ཁ་དང་མགྲིན་པ་དང་དཔྲལ་བར་ཡུམ་གྱི་སྙིང་པོ་དང་། ཉེ་བའི་སྙིང་པོ་དང་། བདག་ཉིད་ཀྱི་སྙིང་པོ་དང་། ཉེ་བའི་སྙིང་པོ་གོ་རིམས་བཞིན་དགོད་ཅིང་ཡུལ་ལའང་བཟློག་པའི་རིམ་པས་བཀོད་དེ། དབང་གི་དོན་དྲན་པར་བྱའོ། །བདུད་རྩི་མྱང་བ་ནི་ལག་པའི་མཆོད་པ་ལྟར་རོ། །དེ་ལྟར་སྒྱུ་མ་ལྟ་བུའི་སྐུ་ལ་སེམས་རྩེ་ཅིག་ཏུ་བསྒོམ་པར་བྱའོ། །བཟླས་པ་ནི་བཟླས་པའི་མན་ངག་ལས་ཤེས་པར་བྱ་བ་ཡིན་ནོ། །སྔགས་ཀྱི་མཆོད་པ་ལ་སོགས་པ་ནི་ཕྱི་རོལ་གྱི་མཆོད་པ་ལས་ཤེས་སོ། རྫོགས་པའི་རིམ་པ་ནི་ས་བོན་ལས་འོད་འཕྲོས་ཏེ། བརྟན་གཡོ་ཐམས་ཅད་དཀྱིལ་འཁོར་གྱི་འཁོར་ལོར་གྱུར་ཏེ་བསྡུས་ལ་ལྟེ་བར་ཨ་ལི་ཀ་ལིར་གྱུར་པ་ལ་ཐིམ་ཞིང་། རྡོ་རྗེ་སེམས་དཔའ་དཀར་པོ་ཞལ་ཅིག་ཕྱག་གཉིས་པ་ཡུམ་རྡོ་རྗེ་ཕག་མོ་དམར་མོ་ལ་འཁྱུད་པར་གྱུར་ཏེ། བདེ་བ་ཆེན་པོར་བསྡུས་ལ་བྱང་ཆུབ་ཀྱི་སེམས་བདེ་བ་ཆེན་པོའི་གོང་བུར་གྱུར་ཅིང་། དེ་ཡང་ཧཱུྃ་དང་ན་ད་དང་ཆོས་ཀྱི་དབྱིངས་སུ་སྤྲོས་པ་ཐམས་ཅད་དང་བྲལ་བ་ལ་མཉམ་པར་བཞག་གོ །གཏོར་མའང་གཏོར་མའི་ཆོ་ག་ལས་ཇི་ལྟར་བྱུང་བ་བཞིན་ནོ། །མངོན་པར་རྟོགས་པ་ཤིན་དུ་བསྡུས་པ་བླ་མ་དམ་པ་རྣམས་ཀྱི་ཕྱག་བཞེས་ཅི་ལྟ་བ་ཡི་གེར་རང་བྱུང་རྡོ་རྗེས་བཀོད་པ་འདི་རེ་ཤིག་རྫོགས་སོ།། །། ༈ དཔལ་འཁོར་ལོ་སྡོམ་པ་ལྷ་དྲུག་ཅུ་རྩ་གཉིས་ཀྱི་མངོན་རྟོགས་ནག་པོ་པའི་བཞེད་པ་བཞུགས་སོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་ཧེ་རུ་ཀ་དཔལ་དང་། སྐུ་གསུང་ཐུགས་ཀྱི་དཀྱིལ་འཁོར་ཅན། །རྣམ་པར་རྒྱལ་སོགས་འཁོར་ལོ་ལ། །རབ་ཏུ་འབད་པས་ཕྱག་བྱས་ནས། །སྤྱོད་འཆང་གསུང་གི་འོད་ཟེར་གྱིས། །འཁོར་ལོ་སྡོམ་པ་པད་མའི་ཚལ། རྒྱུད་བཞིན་བྱེ་བ་རབ་བརླིང་པ། གསལ་བར་བྱ་ཕྱིར་བཤད་པར་བྱ། །དཔལ་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར་བ་ཐོབ་ཅིང་དམ་ཚིག་དང་ལྡན་པས་སྔགས་པས། མངལ་སྐྱེས་ཀྱི་བསྐྱེད་པའི་རིམ་པ་ལ་རྣལ་འབྱོར་དུ་བྱེད་པར་འདོད་པས། སྔ་བར་ཡི་གེ་བདུན་པའམ་རྣལ་འབྱོར་མའི་གླུས་སད་པར་མོས་ཏེ་སྟན་བདེ་བ་ལ་འདུག་ནས། བདུད་རྩིའི་རི་ལུས་ཁ་ལག་དག་པར་བྱས་ཏེ། རང་ཉིད་དཔལ་ཧེ་རུ་ཀའོ་ཞེས་ལུས་སྦྱངས་ནས། ངག་ཨ་ལི་ཀ་ལི་དང་ཡིད་བདེ་བ་ཆེན་པོར་བྱས་ནས། དང་པོའི་སྦྱོར་བ་ནི། ཉི་ཟླའི་ས་བོན་འོད་ཚོགས་ཀྱིས། །མདུན་དུ་བདེ་གཤེགས་སྤྱན་དྲངས་ལ། །མཆོད་པ་ཀུན་གྱིས་ལེགས་མཆོད་ནས། །དཀོན་མཆོག་གསུམ་ལ་སོགས་པ་བརྗོད། །ཞེས་བྱུང་བས། རང་ཉིད་ཧེ་རུ་ཀ་ཞལ་ཅིག་ཕྱག་གཉིས་པའི་སྙིང་ཁར། མ་ལས་ཉི་མ་ཨ་ལས་ཟླའི་དཀྱིལ་འཁོར་ལ་གནས་པའི་ཧཱུྃ་དཀར་པོ་འོད་ཟེར་འཕྲོ་བ་བསྒོམས་ཏེ། དེའི་འོད་ཀྱིས་མདུན་དུ་དཀྱིལ་འཁོར་གྱི་ འཁོར་ལོ་བླ་མ་དང་བཅས་པར་གསལ་བར་བསྒོམས་ལ། སྙིང་ཁའི་སྔགས་ཀྱི་འོད་ཟེར་ལས། པི་ཝང་མ་སྔོན་མོ། གླིང་བུ་མ་སེར་མོ། རྫ་རྔ་མ་དམར་མོ། རྔ་ཟླུམ་མ་ལྗང་ཁུ། བཞད་མ་དམར་མོ། སྒེག་མོ་སྔོན་མོ། ཀླུ་མ་སེར་མོ། གར་མ་ལྗང་ཁུ། མེ་ཏོག་མ་དཀར་མོ། བདུག་སྤོས་མ་མཐིང་ཁ། མར་མེ་མ་དཀར་སེར། དྲི་ཆབ་མ་དཀར་སྔོ། གཟུགས་མ་དཀར་མོ། རོ་མ་དམར་མོ། རེག་མ་ལྗང་ཁུ། ཆོས་མ་དཀར་མོ། ཕྱག་དང་པོས་སོ་སོའི་མཆོད་པ་འཛིན་ཅིང་། འོག་མ་རྡོ་རྗེ་དྲིལ་བུ་ཅན་རྣམས་ཀྱིས་མཆོད་དེ། ཨོཾ་ཨ་བཛྲ་བྷི་ནི་ཧཱུྃ། ཨོཾ་ཨ་བཛྲ་བྃ་སེ་ཧཱུྃ། ཨོཾ་ཨ་བཛྲ་མུ་རན་ཙེ་ཧཱུྃ། ཨོཾ་ཨ་བཛྲ་མུ་ཀུན་ཏེ་ཧཱུྃ། ཨོཾ་ཨ་བཛྲ་ཧ་སེ་ཧཱུཾ། ཨོཾ་ཨ་བཛྲ་ལྭ་སེ་ཧཱུྃ། ཨོཾ་ཨ་བཛྲ་གྷིར་ཏི་ཧཱུྃ། ཨོཾ་ཨ་བཛྲ་ནིར་ཏི་ཧཱུྃ། ཨོཾ་ཨ་བཛྲ་པུཥྤེ་ཧཱུྃ། ཨོཾ་ཨ་བཛྲ་དྷུ་པེ་ཧཱུྃ། ཨོཾ་ཨ་བཛྲ་དྷི་པེ་ཧཱུྃ། ཨོཾ་ཨ་བཛྲ་གྷན་དྷེ་ཧཱུྃ། ཨོཾ་ཨཿབཛྲ་དྷར་ཤེ་ཧཱུྃ། ཨོཾ་ཨཿབཛྲ་ར་སེ་ཧཱུྃ། ཨོཾ་ཨཱཿབཛྲ་པར་ཤེ་ཧཱུྃ། ཨོཾ་ཨཿབཛྲ་དྷར་མེ་ཧཱུྃ། ཞེས་ལྷ་མོ་བཅུ་དྲུག་དང་། མཁའ་འགྲོ་མ་ལ་སོགས་པས་མཆོད་ནས། དེ་ནས་སྡིག་པ་བཤགས་པ་ལ་སོགས་པ་བྱས་ཏེ། དཀོན་མཆོག་གསུམ་ལ་ཕྱག་འཚལ་ལོ། །སྡིག་པ་ཐམས་ཅད་སོ་སོར་བཤགས། འགྲོ་བས་དགེ་ལ་རྗེས་ཡིད་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་རབ་བསྒྲུབས་ཕྱིར། །བདག་གིས་བྱང་ཆུབ་སེམས་མཆོག་བསྐྱེད། །བྱང་ཆུབ་སེམས་སུ་འདི་བགྱིས་ཏེ། །ཨེ་མ་ཧོ་སེམས་ཅན་ཀུན་མགྲོན་གཉེར། །བྱང་ཆུབ་སྤྱོད་མཆོག་མཛད་པ་བཞིན། །འགྲོ་ལ་ཕན་ཕྱིར་སངས་རྒྱས་ཤོག །ཅེས་བརྗོད་ཅིང་དེའི་དོན་བསྒོམ། དེ་ཚད་མེད་པ་བཞི་རྒྱ་ཆེར་བསྒོམས། དེ་ནས་ཐམས་ཅད་སྟོང་པར་བསྒོམས་ཏེ། སྣ་ཚོགས་པད་མ་ཉི་རྡོ་རྗེར། །ཧཱུྃ་འབྱུང་མཁའ་འགྲོ་མ་སོགས་ཀྱིས། །བློ་བཟང་གིས་ནི་ཕུར་སོགས་བྱ། །ཞེས་བྱུང་བས། ཨོཾ་སྭ་བྷ་བ་ཤུད་དྷོ་སརྦ་དྷརྨ་ས་བྷ་བ་ཤུད་དྷོ་ཧ། ཞེས་བྱ་བ་དང་མཆོད་བྱེད་བསྡུས་ཏེ། ཧཱུྃ་དུ་གྱུར་པར་བལྟས་ལ། ཧཱུྃ་ཤུ་ནྱ་ཏ་ཛྙྱ་ན་བཛྲ་ས་བྷ་བ་ཨད་མ་ཀོ་ཧྃ། ཞེས་ན་ད་ཀྱང་བཟླས་པའི་སྟོང་པ་ཉིད་བསྒོམས། དེ་ལྟར་བསོད་ནམས་དང་ཡེ་ཤེས་ཀྱི་རྒྱུ་ལས་ལྡང་བར་བསྒོམས་པ་ནི། ན་ད་ལས་སླར་འོད་འཕྲོས་པས། པཾ་ལས་པད་མ་ལྗང་ཁུ། རྃ་ལས་ཉི་མ། ཧཱུྃ་ལས་བྱུང་བའི་སྣ་ཚོགས་རྡོ་རྗེ། དེ་ལས་སུམ་བྷ་ནི་སུམ་བྷ་ནི་ཧཱུྃ་ཧཱུྃ་ཕཊ། ཨོཾ་གྷྲི་ན་གྷྲི་ན་ཧཱུྃ་ཧཱུྃ་ཕཊ། ཨོཾ་གྷྲི་་པ་ཡ་གྷྲི་་པ་ཡ་ཧཱུྃ་ཧཱུྃ་ཕཊ། ཨོཾ་ཨ་ན་ཡ་ཧོ་བྷ་ག་བཱན། བྷིརྻ་ར་ཛ་ཧཱུྃ་ཧཱུྃ་ཕཊ། ཅེས་གཡོན་བསྐོར་དང་། གཡས་བསྐོར་ལན་གཉིས་སུ་ཤར་ལ་སོགས་པའི་ཕྱོགས་དང་མཚམས་སུའོ། །སྔགས་ཀྱི་འོད་ཟེར་ལས། ཤར་དུ་ཁྭ་དང་། བྱང་དུ་འུག་པ་དང་། ནུབ་ཏུ་ཁྱི་དང་། ལྷོར་ཕག་པའི་གདོང་ཅན་དང་། མེར་སྲེག་མ་དང་། བདེན་བྲལ་དུ་ཕོ་ཉ་མོ་དང་། རླུང་དུ་མཆེ་བ་མ་དང་། དབང་ལྡན་དུ་མཛེས་མ་རྣམས་སྐུ་ཆེན་པོ་གཡས་ཐོ་བ་དང་གཡོན་ཕུར་བུ་ཅན་དུ་བལྟས་ནས། མདུན་དུ་ཧཱུྃ་ལས་རྡོ་རྗེའི་དོང་དུ་ཕྱོགས་བཅུའི་བགེགས་ཀྱི་ཚོགས་ཐམས་ཅད་བཀུག་ཅིང་བཅུག་ནས་ཕུར་བུས་གདབ་པོ། ཨོཾ་གྷ་གྷ་གྷ་ཏ་ཡགྷ་ཏ་ཡ། སརྦ་དུ་ཧླན་ཧཱུྃ་ཧཱུྃ་ཕཊ། ཀི་ལ་ཡཱ་ཀི་ལ་ཡཱ་སརྦ་པ་པྃ་ཧཱུྃ་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཀི་ལ་ཡཱ་བཛྲ་དྷ་ར་ཨ་ཛྙྱ་པ་ཡ་ཏི་སརྦ་དུཥྚན་བྷིག་ནན་ཀ་ཡཱ་བཱག་ཙི་ཏ། བཛྲ་ཀི་ལ་ཡཱ་ཧཱུྃ་ཕཊ། དེ་ནས་ཐོ་བས་བརྡུངས་ཏེ། ཨོཾ་བཛྲ་མུད་ཀ་ར་བཛྲ་ཀི་ལ་ཡཱ། ཨ་ཀོ་ཏྲ་ཡཱ་ཨ་ཀོ་ཏྲ་ཧཱུྃ་ཧཱུྃ་ཕཊ༔ ཅེས་བདེ་བ་ཆེན་པོར་བྱས་ནས་ཐམས་ཅད་འབར་བར་བྱས་ལ་རྡོ་རྗེའི་ར་བ་གྲུ་བཞི་དང་། ས་གཞི་དང་། ཞ་ལ་དང་། བླ་རེ་དང་། མདའི་དྲ་བ་དང་། མེ་དཔུང་གིས་མཚམས་བཅིངས་ཏེ། ཨོཾ་མེ་དྷི་ནི་བཛྲ་བྷ་བཱ་བཛྲ་བྷན་དྷ་ཧཱུྃ། ཨོཾ་བཛྲ་པྲ་ཀ་ར་ན་ཧཱུྃ་སྃ་ཧཱུྃ། ཨོཾ་བཛྲ་པན་ཙ་ར་ཙ་ཧཱུྃ་ཡྃ་ཧཱུྃ། ཨོཾ་བཛྲ་བྷིན་དྷ་ན་ཧཱུྃ་ཁྃ་ཧཱུྃ། ཨོཾ་བཛྲ་ས་ར་ཛྷ་ལ་ཌཾ་སཾ་ཌཾ། ཨོཾ་བཛྲ་ཛ་ལ་ཨ་ན་ལ་ཀ་ཧཱུྃ་ཧཱུྃ། གིས་བྱིན་གྱིས་བརླབ་པོ། གུར་བྱ་བའོ། །དེའི་དབུས་སུ་བློ་དང་ལྡན་པས་མཁའ་དབྱིངས་བསམ། འབྱུང་བ་བཞི་ནི་རྣམས་བསྒོམས་པ། །འབྱུང་བ་ཐམས་ཅད་འདུས་པ་ལས། །གང་ཕྱིར་སྣ་ཚོགས་གཞིར་གྱུར་པ་ལ། ཞེས་ཆོས་ཀྱི་འབྱུང་གནས་ཀྱི་དབུས་སུ། ཡྃ་ལས་རླུང་གི་དཀྱིལ་འཁོར་ཟླ་གམ་ནག་པོ། རྃ་ལས་མེའི་དཀྱིལ་འཁོར་ཟུར་གསུམ་དམར་པོ། བྃ་ལས་ཆུའི་དཀྱིལ་འཁོར་ཟླུམ་པོ་དཀར་པོ་ལྃ་ལས་སའི་དཀྱིལ་འཁོར་གྲུ་བཞི་སེར་པོ། སུྃ་ལས་རི་རབ་རིན་པོ་ཆེ་བཞིའི་རང་བཞིན་ཅན། ཧཱུྃ་ལས་སྣ་ཚོགས་རྡོ་རྗེ། ཤར་དཀར། ལྷོ་སེར། ནུབ་དམར། བྱང་ལྗང་། དབུས་ཀྱི་ལྟེ་བ་ནག་པོ། པྃ་ལས་སྣ་ཚོགས་པད་མ། དེའི་དབུས་སུ་བྷྲུྃ་ལས་བྱུང་བའི་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་། སྣམ་བུ་དང་། པན་ཙ་ར་ག་དང་། ཕ་གུ་དང་། དྲ་བ་དང་དྲ་བ་ཕྱེད་པ་དང་། མདའ་ཡབ་དང་པུ་ཤུ་ནང་ཀ་བ་ཉི་ཤུ་རྩ་བཞི་སྟེང་རིམ་པས་མཐོ་བ་ལ། གདུང་ཆར་ཁེབས་ཏོག་དང་ལྡན་པ། ཕྱི་རོལ་དུ་དུར་ཁྲོད་བརྒྱད་དང་ལྡན་པ་བསྒོམས་པ་ནི། གཞལ་ཡས་ཁང་ངོ་། །དེ་ནས་དེའི་དབུས་སུ། དཀར་དམར་སྔོ་བའི་འཁོར་ལོ་རིམ་པ་གསུམ་གྱིས་དབུས་སུ་པྃ་ལས་པད་མ་འདབ་མ་བརྒྱད་པའི་དབུས་སུ། འཇིགས་བྱེད་དང་དུས་མཚན་གྱི་སྟེང་དུ་ཨ་ལི་དང་ཀ་ལི་དང་ལྡན་པའི་ཟླ་ཉིའི་སྟེང་དུ་ཧཱུྃ་དཀར་པོ་ལས་འོད་འཕྲོས་འདུས་པས་རྡོ་རྗེ་ཧཱུྃ་གིས་མཚན། དེ་ལས་རྒྱུའི་ཧེ་རུ་ཀ་སྐུ་མདོག་དཀར་པོ་ཞལ་བཞི་ཕྱག་བཅུ་གཉིས་པ། རྩ་བའི་ཞལ་དཀར་པོ། གཡས་ནག་གཡོན་དམར། རྒྱབ་ཞལ་སེར་བ། རྩ་བའི་ཕྱག་གིས་རྡོ་རྗེ་དང་དྲིལ་བུས་ཤེས་རབ་མ་ལ་འཁྱུད་པ། ཕྱག་ལྷག་མ་འོག་ནས་འབྱུང་བ་ལྟ་བུ། ཕྱག་རྒྱ་དྲུག་དང་སྟག་གི་ལྤགས་པའི་ཤམ་ཐབས་ཅན་ཐོད་པའི་ཕྲེང་བས་བརྒྱན་པའོ། །གར་གྱི་ཉམས་དང་ལྡན་པའོ། །ཞལ་བཞི་ཕྱག་ནི་བཞི་པ་ནས། །དེ་བཞིན་ཕྱག་འབུམ་བར་དུ་སྟེ། །རྒྱལ་བའི་འོད་ཟེར་སྤྲིན་ཆེན་པོ། །ཀུན་ནས་འགྲོ་བར་རྣམ་པར་བསྒོམས། །དེ་ཡི་ཤེས་རབ་དྲག་ཆེན་མོ། །དུམ་བུས་བརྒྱན་པའི་འོག་པག་ཅན། །རྡོ་རྗེ་ཐོད་པས་འཁྱུད་པ་སྟེ། །རང་གི་ཁ་དོག་རྒྱན་ཆ་འཛིན། །མཁའ་འགྲོ་མ་དང་བཅས་པ་བསྒོམས། དེ་ནས་སུམ་པ་ལ་སོགས་པས། །ཞལ་བཞི་བྱིན་གྱིས་བརླབས་པོ། །ཨོཾ་དྷརྨ་དྷར་ཏུ་སྭ་བྷ་བཱ་ཨད་མ་ཀོ་ཧྃ། བསྙེན་པའོ། །ཧཱུྃ་སྙིང་ཁར་རྡོ་རྗེ་སེམས་དཔའ་དཀར་པོ། མ་མ་ཀི་སྤྱི་བོར་རྣམ་སྣང་སེར། ས་ཧཱ་ཧཱུྃ། སྤྱི་གཙུག་པདྨ་གར་དབང་དམར་པོ། བྷོ་ཤང་ཧེ་ཕྲག་པར་ཧེ་རུ་ཀ་སྔོན་པོ། ཧཱུྃ་ཧཱུྃ་ཧོ་མིག་ཏུ་རྡོ་རྗེ་ཉི་མ་སེར་པོ། ཕཊ་ཧཱུྃ་ཡན་ལག་ཐམས་ཅད་ལ་རྟ་མཆོག་ལྗང་ཁུའོ། །ཡུམ་ལ། ཨོཾ་བྃ་ལྟེ་བར་ཕག་མོ་དམར་མོ། ཧྃ་ཡྃ་སྙིང་ཁར་གཤིན་རྗེ་མ་སྔོན་མོ། ཁ་ལ་ཧྲི་མོང་རྨོངས་བྱེད་མ་དཀར་མོ། སྤྱི་བོར་ཧྲིང་ཧྲིང་སྤྱོད་བྱེད་མ་སེར་མོ། སྤྱི་གཙུག་ཏུ་ཧཱུྃ་ཧཱུྃ་སྒྲོག་བྱེད་མ་སྔོན་མོ། ཡན་ལག་ཐམས་ཅད་ལ་ཕཊ་ཕཊ་གཏུམ་མོ་དུ་བའི་མདོག་ཅན་ཏེ་ཉེ་བའི་བསྒྲུབ་པའོ། སྙིང་ཁར་ཧཱུྃ་ཟླ་བ་ལ་གནས་པ། ཐུགས་རྡོ་རྗེའི། མགྲིན་པར་ཧྲི་ཧ་ཧའི་སྔགས་གསུངས་རྡོ་རྗེའི། དཔྲལ་བར་ཤྲི་ཧེ་ཧེའི་སྔགས་སྐུ་རྡོ་རྗེའོ། །ལྷ་མོའི་སྙིང་ཁར་སརྦ་བྷུད་དྷའོ། མགྲིན་པར་ཨོཾ་བྷེ་རོ་ཙ་ནའི་ཧཱུྃ་ཕཊ་དོ། དཔྲལ་བར་བྷེ་རོ་ཙ་ནའོ། །སྤྱི་གཙུག་ཏུ་ཨཱོཾ། སྙིང་ཁར་ཧཱུྃ། ཟེ་འབྲུ་ལ་ཨཱཿ རྐེད་པར་སཿ བརླ་ལ་ཧ། མཚན་མ་གཉིས་ལ་སྔགས་སྦྱར། སྣ་རྩེར་ཨཱཿ ཡི་གེ་རྣམ་པར་དགོད། བྃ་ཡིག་གིས་མཚན་ལྟེ་བ་ལ། བློ་ལྡན་རྣལ་འབྱོར་མ་ལ་བསྲུབ། །ཅེས་བྱ་བ་བསྒྲུབ་པའོ། །དེ་དག་ནི་རྒྱུའི་ཧེ་རུ་ཀ་བསྐྱེད་པའི་ཆོ་གའོ། །དེ་ནས་བདེ་བ་ཆེན་པོའི་སྦྱོར་བས། སྤྱན་དྲངས་པའི་བདེ་གཤེགས་རྣམས། །ཨ་བ་འདུ་ཏི་གནས་དེ་བཞིན། །སྨིན་མའི་བར་ན་བཞུགས་པར་བྱ། །ཨོཾ་སརྦ་ཏ་ཐཱ་ག་ཏ་ཨ་ནུ་ར་ག་ཏ་ན་བཛྲ་སྭ་བྷ་ཨད་མ་ཀོ་ཧྃཿ ཞེས་བདེ་བའི་རང་བཞིན་དུ་གྱུར་པ། མྃ་ལྃ་པྃ་ཏྃ། པུ་ཛ་ཨོ་ཨ་གོ་ར་དེ་མ། ཀ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྷྲི་སྭོ་སུ་ན་སི་མ་ཀུ། ཧཱུྃ་བརྒྱད་ཀྱིས་བར་དུ་གྱུར་པ་ཕག་མོའི་མཁར་ཕབ་སྟེ། རང་རང་གི་གདན་ལ་ཕྱོགས་མཚམས་སུ་སྤྲོ་བར་བྱའོ། །དེ་ནས་མཁའ་འགྲོ་མ་རྣམས་ཀྱིས། གནས་ན་རྣམ་པར་འགྱིང་སྟེ། ཤར་དུ་མཁའ་འགྲོ་མ་དཀར་སེར། བྱང་དུ་ལཱ་མ་ལྗང་སེར། ནུབ་ཏུ་དུམ་སྐྱེས་མ་དམར་སེར། ལྷོར་གཟུགས་ཅན་མ་དཀར་སེར། ཐམས་ཅད་རོའི་གདན་ལ་གྲི་ཐོད་ཅན་ཕྱག་རྒྱ་ལྔ་དང་ལྡན་པའོ། །མཚམས་སུ་སངས་རྒྱས་ཀྱི་རང་བཞིན་ཐོད་པ་བདུད་རྩི་ལྔས་གང་བ་པད་མ་དང་ཉི་མ་ལའོ། །དེ་ནས་ཐུགས་ཀྱི་འཁོར་ལོ་ལ། ཤར་དུ་ཐོད་པའི་དུམ་བུ་དང་རབ་གཏུམ་མོ། བྱང་དུ་ཀེང་རུས་ཆེན་པོ་དང་གཏུམ་མིག་མ། ནུབ་ཏུ་ཀེང་རུས་དང་འོད་ལྡན་མ། ལྷོར་མཆེ་བ་མ་རྣམས་པར་གཙིགས་པ་དང་སྣ་ཆེན་མ། མེར་ཆང་གྲ་ཧ་དང་དཔའ་བོའི་བློ་གྲོས་མ། ལྷོ་ནུབ་ཏུ་འོད་དཔག་མེད་མི་ཐུང་མ། ནུབ་བྱང་དུ་རྡོ་རྗེའི་འོད་དང་ལང་ཀའི་དབང་ཕྱུག་མ། བྱང་ཤར་དུ་རྡོ་རྗེ་ལུས་དང་ཤིང་གྲིབ་མའོ། །ཐུགས་ཀྱི་འཁོར་ལོ་མཁའ་སྤྱོད་མ། སྙོམ་པར་འཇུག་པས་ཡང་དག་གནས། གཉིས་པ་གསུང་གི་འཁོར་ལོ་ལ། ཤར་དུ་མྱུ་གུ་ཅན་དང་ས་སྲུངས་མ། བྱང་དུ་རྡོ་རྗེ་རལ་པ་ཅན་དང་འཇིག་བྱེད་ཆེན་མོ། ནུབ་ཏུ་དཔའ་བོ་ཆེན་པོ་དང་རླུང་གི་ཤུགས་མ། ལྷོ་རུ་རྡོ་རྗེ་ཧཱུྃ་ཀ་ར་དང་ཆང་འཐུངས་མའོ། །མེར་རབ་ཏུ་བཟང་མོ་དང་སྔོ་བསང་ལྷ་མོའོ། །བདེན་བྲལ་དུ་རྡོ་རྗེ་བཟང་པོ་དང་ཤིན་ཏུ་བཟང་མོ། རླུང་དུ་འཇིགས་བྱེད་ཆེན་པོ་རྟ་རྣ་མ། དབང་ལྡན་དུ་མིག་མི་བཟང་དང་མཁའ་འགྲོ་གདོང་མའོ། །གསུང་གི་འཁོར་ལོ་ས་སྤྱོད་མ། །སྙོམས་པར་འཇུག་པ་ཡང་དག་གནས། །གསུམ་པ་སྐུའི་འཁོར་ལོ་ལ་ཤར་དུ་སྟོབས་པོ་ཆེ་དང་འཁོར་ལོ་ཡི་ཤུགས་མ། བྱང་དུ་རིན་ཆེན་རྡོ་རྗེ་དང་དུམ་སྐྱེས་མ། ནུབ་ཏུ་རྟ་མགྲིན་དང་ཆང་འཚོང་མ། ལྷོར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། མེར་དཔལ་ཁྲག་འཐུང་མ་དང་ཤིན་ཏུ་དཔའ་མོ། བདེན་བྲལ་དུ་པད་མ་དཀར་དབང་དང་སྟོབས་ཆེན་མ། རླུང་དུ་རྣམ་པར་སྣང་བྱེད་དང་འཁོར་ལོ་བསྒྱུར་མ། དབང་ལྡན་དུ་རྡོ་རྗེ་སེམས་དཔའ་དང་བརྩོན་ཆེན་མ་སྟེ། སྐུའི་འཁོར་ལོ་ས་འོག་སྤྱོད། སྙོམས་པར་འཇུག་པ་ཡང་དག་གནས། ཤར་དུ་ཁྭ་གདོང་། བྱང་དུ་འུག་གདོང་། ནུབ་ཏུ་ཁྱི་གདོང་། ལྷོར་ཕག་གདོང་། མེར་གཤིན་རྗེ་སྲེག་མ། བདེན་བྲལ་དུ་ཕོ་ཉ་མོ། རླུང་དུ་མཆེ་བ་ཅན། དབང་ལྡན་དུ་འཇོམས་མ་སྟེ། མཚམས་ཀྱི་ཁ་དོག་གོ །སྔོ་དམར་དཀར་དང་ཕྱོགས་ཀྱི་རྡོ་རྗེ་དྲིལ་བུས་འཁྱུད་པ་དང་། གྲི་གུག་ཐོད་པས་འཁྱུད་པས་ཏེ། རོ་དང་ཉི་མའི་གདན་ལ་དགོད། དཔའ་བོ་ཉི་ཤུ་རྩ་བཞི་ནི་ཧེ་རུ་ཀ་དཔལ་རིགས་ལས་བྱུང་། རྣལ་འབྱོར་མ་ནི་ཉི་ཤུ་བཞི། ཕག་མོ་ཡི་ནི་རིགས་བྱུང་བའོ། །སྤྱན་གསུམ་མཆེ་གཙིགས་ཐོད་ཕྲེང་བརྒྱན། །མགུར་ཆུ་གཙུག་ཕུད་དཔུང་བརྒྱན་དང་། །གདུག་བསྐོར་ཚངས་སྐུད་འགུལ་པའི་རྒྱན། །སྐེ་རགས་སིལ་སིལ་སྒྲ་སྒྲོགས་པའི། །དེ་བཞིན་མ་མོ་བརྒྱད་པོ་ནི། །སྟག་གི་ལྤགས་པས་ཤམ་ཐབས་ཅན། །དེ་ལྟར་མ་ལུས་འཁོར་ལོ་བསྒོམ། །དཀྱིལ་འཁོར་སྤྲོ་བའི་རིམ་པའོ། །ཁ་སྦྱོར་སྦྱར་བར་གྱུར་པ་ལས། །རྡོ་རྗེ་ལུ་གུ་རྒྱུད་དུ་བརྗོད། །རྡོ་རྗེ་པད་མ་དབྱེ་བྱ་ཞིང་། །དེ་ནི་བུང་བ་ལྷ་འཁོར་བྱ། །ལྕགས་ཀྱུ་ཉིད་ཀྱིས་དགུག་བྱ་ཞིང་། །གཏུན་ཤིང་གིས་ནི་བཀྲུག་བྱ་སྟེ། །ཀུན་ནས་འབིགས་བྱེད་མདའ་སྦྱོར་བས། །རིག་མ་ལྷན་ཅིག་ཞུ་བར་གྱུར། །དེ་ལྟར་བཅོམ་ལྡན་འདས་ཡབ་ཡུམ་བྱང་ཆུབ་ཀྱི་སེམས་ཀྱི་རང་བཞིན་དུ་ཞུ་བར་གྱུར་ཏེ། དེ་ལ་སངས་རྒྱས་ཐམས་ཅད་འདུས་པ་ཡིན། མྱུར་ཞིང་སྐྱེན་པར་བདག་ལ་བསྐུལ། ཨོཾ་མ་ཧཱ་སུ་ཁ་བཛྲ་ས་ཏྭ་ཛ་ཧཱུྃ་བྃ་ཧོ་སུ་ར་ཏ་སྟྃ་ཏྲི་ཤ་ཧོ། ཞེས་ཀླུས་བསྐུལ་བས་ཨོཾ་ཨ་ཧཱུྃ་གི་རང་བཞིན་དུ་གྱུར་ཏེ་དེ་ལས་གྱུར་པས་འབྲས་བུའི་ཧེ་རུ་ཀར་གྱུར་པར་བལྟ་སྟེ། ཉི་མ་དང་འཇིགས་བྱེད་དུས་མཚན་ལ་གནས་པ། ཞལ་བཞི་སྟེ། རྩ་བའི་ཞལ་ནག་པོ། གཡས་དཀར་གཡོན་དམར། རྒྱབ་སེར་བ། ཕྱག་བཅུ་གཉིས་ཀྱི་རྩ་བས་རྡོ་རྗེ་དང་དྲིལ་བུས་ཤེས་རབ་མ་ལ་འཁྱུད་པ། གཉིས་ཀྱིས་གླང་པོའི་ལྤགས་པ་ཁྲག་དང་བཅས་པ་ན་བཟར་བརྒྱངས་པ། གཡས་གསུམ་པ་ཌ་མ་རུ། བཞི་པས་དགྲ་སྟ། ལྔ་པ་གྲི་གུག དྲུག་པ་རྩེ་གསུམ་པའོ། གཡོན་གྱི་གསུམ་པ་ན་ཁ་ཊྶཱྃ་ཀ། བཞི་པ་ཐོད་ཁྲག ལྔ་པ་རྡོ་རྗེའི་ཞགས་པ། དྲུག་པ་ཚངས་པའི་མགོ་བོ། སྤྱན་གསུམ་ལ་མཆེ་བ་གཙིགས་པ། ཕྱག་རྒྱ་དྲུག་གིས་བརྒྱན་པ། ཐོད་པ་ལྔ་བཅུའི་ཕྲེང་བ་དང་སྟག་གི་ལྤགས་པའི་ཤམ་ཐབས་འཕྱང་བ། སྒེག་པ་དཔའ་བ་མི་སྡུག་པ། རྒོད་ཅིང་དྲག་ཤུལ་འཇིགས་སུ་རུང་བ་སྙིང་རྗེ་རྔམ་ཞིང་ཞི་བའི་གར་དང་ལྡན་པ། འོད་ཀྱི་དཀྱིལ་འཁོར་དམར་པོ་འབར། །དེ་ཡི་ཤེས་རབ་ཕག་མོ་ནི། དམར་མོ་ཁ་དོག་ཆེར་འབར་མ། །ལྷ་མོ་ཞལ་གཅིག་ཕྱག་གཉིས་མ། །རྡོ་རྗེ་དང་ནི་མི་ཐོད་འཆང་། །རྒྱན་རྣམས་ཀྱིས་བརྒྱན་སྙོམས་པར་འཇུག །དེ་ནས་དེ་མ་ཐག་ཏུ་སྔ་མ་ལྟར་ཞལ་དང་གོ་ཆ་དང་། སྐུ་གསུང་ཐུགས་དང་མཁའ་གསང་བྱིན་གྱིས་བརླབས་པ་དང་ཆས་སུ་བལྟས་ལ། ལྷ་ཐམས་ཅད་རབ་ཏུ་གསལ་བར་མོས་ལ། དེ་དང་དུས་གཅིག་ལྷ་ཐམས་ཅད་བདེ་བ་ཆེན་པོའི་སྦྱོར་བས། སངས་རྒྱས་ཐམས་ཅད་བསྐུལ་ནས་བཅོམ་ལྡན་འདས་ཀྱི་ཞལ་དུ་ཞུགས་ཏེ། ཧེ་རུ་ཀ་ཉིད་ལ་རྫོགས་པར་བལྟ་བར་བྱས་ཏེ། ཐུགས་ཀར་པད་མ་དང་ཉི་མ་ལ་ཧེ་རུ་ཀ་ཕག་མོ་དང་བཅས་པ་རྣལ་འབྱོར་མ་བཞི་དང་། མཆོད་པ་བཞི་དང་བཅས་པའོ། །སྤྱི་བོ་གཙུག་དང་རྣ་བ་གཡས། །ལྟག་པ་རྣ་བ་གཡོན་དེ་བཞིན། །སྨིན་དབུས་མིག་དང་འཕྲག་པ་ལ། །གནས་དང་ཉེ་གནས་ཐུགས་འཁོར་ལོ། །མཆན་ཁུང་ནུ་མ་ལྟེ་བ་དང་། །སྣ་རྩེ་ཁ་དང་མགྲིན་པ་དང་། །སྙིང་ཁ་ལྒང་པ་གསུང་འཁོར་ལོ། ཞིང་དང་ཚན་དྷོ་ཧ་ལ་སོགས། །མཚན་མ་གཤང་ལམ་བརླ་གཉིས་དང་། །བྱིན་པ་སོར་མོ་རྐང་བོལ་དང་། །མཐེ་བོང་པུས་མོ་སྐུ་འཁོར་ལོ། །འདུ་བ་དུར་ཁྲོད་སོགས་རང་བཞིན། །ཁ་དོག་དབྱིབས་ཀུན་སྔར་བསྟན་བཞིན། པུ་ལི་ར་སོགས་ཕྱི་དང་ནང་། །དབྱེར་མེད་རྩ་དང་ཁམས་རང་བཞིན། །དབང་པོའི་སྒོ་རྣམས་མ་མོ་བརྒྱད། །ཐམས་ཅད་གཉིས་སུ་མེད་བསམ་ནས། །ཡེ་ཤེས་དམ་ཚིག་ཡང་དག་འགྱུར། །དེ་ཕྱིར་འདི་དོར་ཅན་ཞེས་བརྗོད། དབང་བསྐུར་གོ་འཕང་བསམ་བྱས་ཏེ། །ཕྱི་ནས་མཆོད་པ་ཡང་དག་བརྩལ། །དེ་ནས་ཐུགས་ཁའི་བཅོམ་ལྡན་འདས་ལ་སྔགས་བཀོད་དེ་ཉི་མ་ལ་གནས་པའི་ཧཱུྃ་ལས་འོད་སྔོན་པོ་སྤྲོས་ལ་སྔོན་ཉིད་ནས་གྲུབ་པ་རྣམས་མཆོད་དེ་འབར་བའི་ཕྱག་རྒྱ་དང་། ཕྲེང་གི་སྒྲས་བཀུག་ནས། ཛ་ཧཱུྃ་བྃ་ཧོས་དབྱེར་མེད་པར་བྱས་ཏེ། དེང་དུས་ཅིག་ཏུ། ཨོཾ་སརྦ་བྷི་ར་ཡོ་ཀི་ནི་ཀ་ཡཱ་ཝག་ཙི་ཏ་བཛྲ་ས་བྷ་བ་ཨད་མ་ཀོ་ཧྃ། ཨོཾ་ཡོ་ག་ཤུད་དྷོ་སརྦ་དྷར་མ་ཡོ་ག་ཤུད་དྷོ་ཧྃ། ཨོཾ་ཧ་ན་མ་ཧི་ས་ཧཱ་ཧཱུྃ། སཱཽ་ཤ་ཊ་ཏེ་ཧཱུྃ་ཧཱུྃ་ཧོ། ཕཊ་ཧྃ། ཨོཾ་བྃ་ཧྃ་ཡྃ་ཧིཾ་མྃ། ཧྲིམ་ཧྲིམ་ཧཱུྃ་ཧཱུྃ་ཕཊ་ཕཊཿ ཞེས་སྐུ་གསུང་ཐུགས་དང་རྣལ་འབྱོར་དང་གོ་ཆ་བརྟན་པར་བྱས་ནས་མགོན་པོ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་དུ་གསོལ་ཞེས་གསོལ་བ་བཏབ་པས། སངས་རྒྱས་ལྔའི་བདག་ཉིད་ཀྱི་བུམ་པ་རྣམས་ཀྱིས་ཧེ་རུ་ཀ་རྣམས་ཀྱི་སྤྱི་བོ་ནས་དབང་བསྐུར་ཏེ། ཇི་ལྟར་བལྟམས་པ་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་སརྦ་ཏ་ཐཱ་གྷ་ཏཱ་ཨ་བཱེ་ཥེ་ཀ་ཏ་ས་མ་ཡེ་ཤྲཱི་ཡེ་ཧཱུྃ། ཅེས་དབང་བསྐུར་ནས་སྤྱི་བོར་བཅོམ་ལྡན་འདས་ལ་རྡོ་རྗེ་སེམས་དཔའ། ལྷ་མོ་རྣམས་ལ་རྣམ་སྣང་། བདེ་བ་ཆེན་པོ་ལ་རིན་འབྱུང་། ཐུགས་ལ་མི་བསྐྱོད་པ། གསུང་ལ་འོད་དཔག་མེད། སྐུ་ལ་རྣམ་སྣང་། དམ་ཚིག་ལ་དོན་ཡོད་གྲུབ་པས་བརྒྱན་པར་བྱས་ནས། བདུད་རྩི་མྱང་བ་ནི་མེ་རླུང་གི་སྦྱོར་བས་གཏོར་མ་ལྟར་བསམ་མོ། །དེ་ནས་བྱང་ཆུབ་ཀྱི་ཕྱོགས་ཀྱིས་རྣམ་པར་དག་པ་བསྒོམ་པར་བྱ་སྟེ། ལུས་དྲན་པ་ཉེ་བར་བཞག་པ་མཁའ་འགྲོ་མ། ཚོར་བ་དྲན་པ་ཉེ་བར་བཞག་པ་ལཱ་མ། ཆོས་དྲན་པ་ཉེ་བར་བཞག་པ་དུམ་སྐྱེས་མ། སེམས་དྲན་པ་ཉེ་བར་བཞག་པ་གཟུགས་ཅན་མའོ། །འདུན་པའི་རྫུ་འཕྲུལ་གྱི་རྐང་པ་རབ་ཏུ་གཏུམ་མོ། བརྩོན་འགྲུས་ཀྱི་རྫུ་འཕྲུལ་གྱིས་རྐང་པ་གཏུམ་མིག་མ། སྤྱོད་པའི་རྫུ་འཕྲུལ་གྱིས་རྐང་པ་འོད་ལྡན་མ། སེམས་ཀྱི་རྫུ་འཕྲུལ་གྱིས་རྐང་པ་སྣ་ཆེན་མའོ། །དད་པའི་དབང་པོ་དཔའ་བའི་བློ་གྲོས་མ། བརྩོན་འགྲུས་ཀྱི་དབང་པོ་མི་ཐུང་མ། དྲན་པའི་དབང་པོ་ལང་ཀའི་དབང་ཕྱུག་མ། ཏིང་ངེ་འཛིན་གྱི་དབང་པོ་ཤིང་གྲིབ་མ། ཤེས་རབ་ཀྱི་དབང་པོ་ས་སྲུང་མའོ། །དད་པའི་སྟོབས་འཇིགས་བྱེད་ཆེན་མོ། བརྩོན་འགྲུས་ཀྱི་སྟོབས་རླུང་གི་ཤུགས་ཅན་མ། དྲན་པའི་སྟོབས་ཆང་འཐུངས་མ། ཏིང་ངེ་འཛིན་གྱི་སྟོབས་ནི་སྔོ་བསངས་ལྷ་མོ། ཤེས་རབ་ཀྱི་སྟོབས་ཤིན་ཏུ་བཟང་མོ། ཏིང་འཛིན་ཡང་དག་བྱང་ཆུབ་ཀྱི་ཡན་ལག་རྟ་རྣ་མ། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་མཁའ་འགྲོ་གདོང་མ། དགའ་བ་ཡང་དག་བྱང་ཆུབ་ཀྱི་ཡན་ལག་འཁོར་ལོའི་ཤུགས་ཅན་མ། ཤིན་ཏུ་སྦྱང་པ་ཡང་དག་བྱང་ཆུབ་ཀྱི་ཡན་ལག་དུམ་སྐྱེས་མ། ཆོས་རབ་ཏུ་འབྱེད་པ་ཡང་དག་བྱང་ཆུབ་ཀྱི་ཡན་ལག་ཆང་འཚོང་མ། དྲན་པ་ཡང་དག་བྱང་ཆུབ་ཀྱི་ཡན་ལག་འཁོར་ལོའི་གོ་ཆ་མ། བཏང་སྙོམས་ཡང་དག་བྱང་ཆུབ་ཀྱི་ཡན་ལག་ཤིན་ཏུ་དཔའ་མོའོ། །ཡང་དག་པའི་ལྟ་བ་སྟོབས་ཆེན་མ། ཡང་དག་པའི་རྟོགས་པ་འཁོར་ལོ་བསྒྱུར་མ། ཡང་དག་པའི་ངག་བརྩོན་ཆེ་མ། ཡང་དག་པའི་ལས་ཀྱི་མཐའ་ཁྭ་གདོང་མ། ཡང་དག་པའི་ཚོར་བ་འུག་གདོང་མ། ཡང་དག་པའི་བརྩོལ་བ་ཁྱི་གདོང་མ། ཡང་དག་པའི་དྲན་པ་ཕག་གདོང་མ། དགེ་བའི་ཆོས་མ་སྐྱེས་པ་བསྐྱེད་པའི་གཤིན་རྗེའི་སྲེག་མ། དགེ་བའི་ཆོས་སྐྱེས་པ་བསྲུང་བ་གཤིན་རྗེ་ཕོ་ཉ་མོ། མི་དགེ་བའི་ཆོས་སྐྱེས་པ་སྤོང་བ་གཤིན་རྗེའི་མཆེ་བ་མ། མི་དགེ་བའི་ཆོས་མ་སྐྱེས་པ་མི་བསྐྱེད་པ་ནི། གཤིན་རྗེའི་འཇོམས་མའོ། །ཡང་དག་པའི་ཏིང་ངེ་འཛིན་དཔལ་ཧེ་རུ་ཀའོ། །ཞེས་མཆོག་གི་དག་པའོ། །དེ་ནས་རྩ་དང་ཁམས་རྣམ་པར་དག་པ་ནི། དབུ་མ་ལ་གནས་པའི་དཔྱིད་ནི་ཐིག་ལེ་དཀར་བ་སྟེ་ཧེ་རུ་ཀའོ། །ཐིག་ལེ་ཨ་ཐུང་ནི་ཕག་མོའོ། །སྙིང་ཁའི་རྩ་བརྒྱད་ཀྱིས་ཕྱོགས་ཀྱིས་འབྱུང་བ་བཞིའི་ཁམས་ནི་མཁའ་འགྲོ་མ་བཞིའོ། །མཚམས་ཀྱིས་རྩ་བ་ལས་བྱུང་བའི་ཁམས་མིག་ལ་སོགས་པའི་དབང་པོ་བཞི་བསྐྱེད་པ་ནི་མཆོད་པ་བཞིའོ། །པུ་ལི་ར་མ་ལ་ཡང་མགོ་བོ་ནས་སོ་དང་སེན་མོ་འབབ་པའོ། །ཛྷ་ལན་དྷ་ར་སྤྱི་གཙུག་ནས་སྐྲ་དང་བ་སྤུ་དང་ཨུ་རྒྱན་རྣ་བ་གཡས་པ་ནས་ལྤགས་པ་དང་དྲི་མ། ཨར་བུ་ཏ་ལྟག་པའི་རྩ་ནས་ཤ། ཀོ་ཏ་རི་རྣ་བ་གཡོན་པའི་རྩ་ནས་ཆུ་བ། ར་མེ་ཤ་ར་སྨིན་དབུས་ནས་རུས་པ། དྷེ་བཱི་ཀོ་ཊ་མིག་གི་རྩ་ནས་མཆིན་པ། མ་ལ་བཱ་དཔུང་བའི་རྩ་ནས་མིག་གི་ཤ་འབབ་པའོ། །ཀ་མ་རུ་པ་མཆན་ཁུང་གཉིས་རྩ་ནས་མིག་གི་ཤ་འབབ་པའོ། །ཨོཾ་ཊ་ནུ་མའི་རྩ་ནས་འཁྲིས་པ་དང་། ཏྲི་ཤ་ཀུ་ནི་ལྟེ་བའི་རྩ་ནས་གློ་བ། ཀོ་ས་ལ་སྣའི་རྩ་ནས་རྒྱུ་མ། ཀ་ལི་ཀ་ཁ་ནས་གྲོད་པའི་ཤ། ལམ་པ་ཀ་མཆུ་ནས་གཉེ་མ་བསྐྱེད་ཅིང་འབབ་པ་སྟེ། མི་ཕྱེད་མ་ནས་བརྩེ་བ་མའི་བར་རོ། །ཡང་གཞོལ་མ་ནས་ཀན་ཙི་སྙིང་ཁ་ནས་འབྲེལ་བའི་རྩས་གཤང་བ། ཧི་མ་ལ་ཡ་རྒྱུ་ཞབས་ནས་འཚོགས་སྲུབ་ཀྱི་ཤ་འབབ་པའོ། །པྲེ་ཏ་པུ་ར་མཚན་མ་ནས་བད་ཀན་བསྐྱེད་དོ། །གྷྲི་ཧ་དེ་བཱ་གཤང་ལམ་ནས་རྣག སོའུ་རཥྚ་བརླའི་རྩ་ནས་ཁྲག སྭཽ་རྦ་རྣ་དྷི་ས་བྱིན་པ་ནས་རྔུལ། ན་ག་ར་སོང་མོ་ནས་ཚིལ་སིན་དྷུ། རྐང་བོལ་ནས་མཆིལ་མ། མ་རུ་མཐེ་བོང་ནས་མཆིལ་མ། ཀུ་ལུ་ཏ་པུས་མོ་ནས་སྣབས་བསྐྱེད་ཅིང་འབབས་པའོ། །དེ་ལྟར་རྩ་ནི་དཔའ་མོ་ཁམས་དཔའ་བོ་རྣམ་པར་གནས་པའོ། །དེ་ནས་མཆོད་པ་ནི། རང་བཞིན་ལ་རིག་མ་བཅུ་དྲུག་དང་། ཐུན་མོང་མ་ཡིན་པའི་སྔགས་ཀྱིས་མཆོད་པ་ལ་སོགས་པ་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད་ནས། རྐང་པ་བརྒྱད་པ་ལ་སོགས་པས་བསྟོད་པར་བྱའོ། །བཟླས་པ་བྱེད་པར་འདོད་པས། ས་བོན་ལ་སྤྲོ་བསྡུའམ། འཕྲིན་ལས་བསྒྲུབས་པའམ། མདའི་ཤུགས་ལྟ་བུ་ལ་སོགས་པས་བཟླས་སོ། །རྫོགས་པའི་རིམ་པ་ནི་ཐོག་མར་ངེས་པར་གསུངས་པ། སྙིང་གི་ནང་གནས་པད་མ་ནི། འདབ་མ་བརྒྱད་པར་སྙིང་ཁར་བཅས། །དེའི་དབུས་སུ་གནས་པའི་རྩ། །མར་མེ་ལྟ་བུའི་ངོ་བོ་ཉིད། །ཆུ་ཤིང་གི་ནི་མེ་ཏོག་བཞིན། །འཕྱང་ཞིང་ཁ་ནི་འོག་ཏུ་བལྟས། །དེ་ཡི་དབུས་གནས་དཔའ་བོ་ནི། །སྨིན་མཚམས་སུ་ཐིག་ལེ་ཡུངས་དཀར་ཙམ་པ་སྟེ། །བ་མོ་ལྟ་བུར་འཛག་པ་ཉིད། །ལུས་ཅན་རྣམས་ཀྱིས་སྙིང་དགའ་བ། །དཔྱིད་ཅེས་བྱ་བ་རྣམ་པར་བཤད། །རྒོད་མའི་མེ་འདྲའི་ངོ་བོ་ནི། །ཕག་མོའི་ཐིག་ལེར་འདོད་པ་སྟེ། །ལས་ཀྱི་རླུང་གིས་དཔུར་བ་ཡིས། །ལྟེ་བས་དཀྱིལ་འཁོར་འདིར་འབར་བའོ། །དཔྱིད་ཐོབ་ནས་ནི་ཚིམ་འགྱུར་རོ། །སྙོམས་པར་འཇུག་པར་རྣམ་པར་གནས། །འདི་དག་ཁྲག་འཐུང་དཔལ་དཔའ་བོ། །དཔྱིད་དང་ཐིག་ལེ་འདོད་པ་སྟེ། །ཞེས་བྱ་བ་ནི་དམ་ཚིག་གི་ཕྱག་རྒྱ་གཏུམ་མོ་བསྟན་ཏེ། སྟོང་པ་ཉིད་ཀྱི་ཚུལ་བླངས་ནས། རྒྱུ་དང་མི་རྒྱུ་ཡང་དག་གནས། །སྐུ་གསུང་ཐུགས་ཀྱི་དབྱེ་བ་ཡིས། །སྒོ་ནི་རྣམ་པ་གསུམ་འབྱུང་བར། །འགྲོ་བ་དང་ནི་འོང་བར་བྱེད། །ཅེས་བྱ་བ་ནི་ཕྱག་རྒྱ་ཆེན་པོའོ། །འདི་ནི་ཀུན་གྱི་ལུས་ལ་གནས། །ལྟེ་བར་ཨ་ཡིག་གཟུགས་སུ་སྟེ། །ཐུང་ངུ་རུ་ནི་རབ་ཏུ་གྲགས། །སྙིང་ཁ་ཡང་ནི་ཡི་གེ་ཧཱུྃ། །རིང་པོའི་ཚད་ནི་གཉིས་སུ་ནས། །མགྲིན་པར་ཨོཾ་ཡིག་གཟུངས་ཀྱིས་ཏེ། ཚད་གསུམ་ཤིན་ཏུ་རིང་ཞེས་བརྗོད། །དཔྲལ་བ་རུ་ནི་ཡི་གེ་ཧ། །ན་ད་ཐིག་ལེ་གཞོམ་མེད་པའོ། །འཁོར་ལོ་བཞི་ཡི་རབ་དབྱེ་བས། །ས་སོགས་འབྱུང་བ་ཆེན་པོ་དང་། །ཐུན་བཞིར་བྱིན་གྱིས་བརླབས་པ་ནི། །པད་མ་བཞི་ནི་ཡང་དག་འབྱུང་། །དགའ་བ་བཞིའི་ངོ་བོ་དང་། །རྣལ་འབྱོར་བཞི་རུ་གཞོལ་བ་ཡིས། །མཆོག་ཏུ་དགའ་བའི་ངོ་བོ་ཡིས། །བྱ་དང་བྱེད་པས་དངོས་པོ་རུ། །རྡོ་རྗེ་སེམས་དཔའ་རང་བཞིན་གྱིས། །འདི་ནི་ཅི་ལྟར་བདེ་བར་རྩེ། །ཞེས་བྱ་བ་ནི་བདེ་བ་ཆེན་པོའི་རིམ་པ་རྒྱས་པའོ། །ཕྱོགས་བཞིར་རྣམ་པར་གནས་པ་ནི། །འདབ་མ་བཞི་པོ་རྣམས་ལ་སྤངས། །འབྱུང་བ་བཞི་ཡི་རྩ་རྣམས་ནི། །མར་མེ་ལྟ་བུའི་ངོ་བོ་ནས། །མཚམས་སུ་རྣམ་པར་གནས་པའི་རྩ། །དེ་རུ་གནས་པ་བཞི་པོ་དག །དེ་ཡང་བདུད་རྩི་ལྔ་བབས་པས། །དེ་ནི་མཆོད་པའི་ངོ་བོར་བརྟེན། །དེ་དངོས་ཁོ་ནའི་རང་བཞིན་གྱིས། །མཆོད་པ་བཞི་ཞེས་རྣམ་པར་བཤད། །འདིར་ནི་ལུས་ཀྱི་སྙིང་དཀྱིལ་ནས། །རྩ་བརྒྱད་དག་ཏུ་རྣམ་པར་གནས། །སྐུ་གསུང་ཐུགས་ཀྱི་དབྱེ་བ་གཞན། །ཉི་ཤུ་རྩ་བཞིར་བརྗོད་པའོ། །གནས་སོགས་པ་ལ་བརྟེན་བྱས་ནས། །གནས་དང་གནས་སུ་ཡང་དག་ནས། །ལྷུང་བྱེད་ལ་སོགས་རྣམ་དག་པས། །བྱ་རོག་གདོང་སོགས་སྔར་ཅི་བཞིན། །བཅོམ་ལྡན་རྡོ་རྗེ་ཅན་གྱིས་ནི། །ཕྱག་རྒྱ་གདབ་གྱུར་གནས་ཞེས་གསུངས། །ཞེས་བྱ་བ་ནི་སྔ་མའི་ངེས་པ་དང་། ས་བོན་དང་བཅས་པ་དང་། སྣ་ཚོགས་རྡོ་རྗེ་ལ་སོགས་པའི་རིམ་པ་རྒྱས་པར་མཛད་པའོ། །སྔགས་རྣམས་དང་གཏོར་མ་ནི་ཐམས་ཅད་དུ་གསུངས་པས་མ་བྲིས་སོ། །མདོར་བསྡུས་ན་ཅི་སྲིད་དཀྱིལ་འཁོར་དང་གཏུམ་མོ་བསྒོམས་པ་ལས་སྐྱོ་ན་ལྷ་ཐམས་ཅད་ཡི་གེ་ཨོཾ་ཨཿཧཱུྃ་ཧྃ་ལ་བསྡུས་ལ་བདེ་སྟོང་གིས་ངང་དུ་རྣམ་པར་མི་རྟོག་པར་བཞག་པ་ནི་རྫོགས་པའི་རིམ་པའོ། །ཧེ་རུ་ཀ་དཔལ་ལུང་བསྟན་བསྟན་ཆོས་གྱིས་ཅིག་ཅེས། །གནང་ནས་ནག་པོ་གཞུང་དྲུག་རྒྱུད་ལས་ལེགས་བསྡུས་པ། རྨད་བྱུང་བསྐྱེད་རིམས་ཡི་གེ་བསྡུས་ལ་དོན་རྒྱས་པས། །བོད་འདིར་རྣམ་དབྱེ་མ་ནུས་དོར་བ་བཞིན་དུ་གྱུར། །དེ་ཕྱིར་ཆོ་གའི་སྐབས་སུ་གཞན་ལ་ཕན་བསམས་ནས། །བསྒོམས་པའི་རིམ་པར་རང་བྱུང་རྡོ་རྗེས་བསྡུས་པ་ལ། མཁའ་འགྲོ་རྣམས་ཀྱིས་བཟོད་པར་མཛོད། །དངོས་གྲུབ་རྒྱ་ཆེར་གསོལ་ན། །སེམས་ཅན་ཐམས་ཅད་རྡོ་རྗེ་ཐེག་པས་གྲོལ་བར་ཤོག དཔལ་ནག་པོ་པས་མཛད་པའི་མངལ་སྐྱེས་ཀྱི་བསྐྱེད་རིམས་བསྒོམས་པའི་རིམ་པ་བདེ་ཆེན་སྟེངས་སུ་བྱི་བའི་ལོ་ལ་མཛད་པ་དགེའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།