༢

དེས་ན་རང་རེ་རྣམས་མཁའ་ཁྱབ་སེམས་ཅན་གྱི་དོན་བྱེད་པ་ལ་རྫོགས་པའི་སངས་རྒྱས་ཐོབ་དགོས་པ་ལས། རྫོགས་པའི་སངས་རྒྱས་ཀྱི་ངོ་བོ་གདུལ་བྱ་རང་ཅག་འདུལ་བ་ལ་བྱོན་པའི་དཔལ་ལྡན་བླ་མ་རྡོ་རྗེ་འཆང་ཆེན་པོ་འདི་ཉིད་ཡིན་པས། དེའི་སྐུ་ལས་བུམ་པའི་དབང་བླངས་ལུས་ཀྱི་སྒྲིབ་པ་སྦྱངས། ལུས་སྐུ་རྡོ་རྗེ་སྤྲུལ་པའི་སྐུར་མངོན་པར་རྫོགས་པར་སངས་རྒྱས་པར་བྱས། དེའི་གསུང་ལས་གསང་བའི་དབང་བླངས་ཏེ་ངག་གི་སྒྲིབ་པ་སྦྱངས། ངག་གསུང་རྡོ་རྗེ་ལོངས་སྤྱོད་རྫོགས་པའི་སྐུར་མངོན་པར་རྫོགས་པར་སངས་རྒྱས་པར་བྱས། དེའི་ཐུགས་ལས་ཤེས་རབ་ཡེ་ཤེས་ཀྱི་དབང་བླངས་ཏེ་ཡིད་ཀྱི་སྒྲིབ་པ་སྦྱངས། ཡིད་ཐུགས་རྡོ་རྗེ་ཆོས་སྐུར་སངས་རྒྱས་པར་བྱས། དེའི་སྒོ་གསུམ་ལས་ཤེས་རབ་ཡེ་ཤེས་ཆེན་པོའི་དབང་བླངས་ཏེ་ཡེ་ཤེས་ཀྱི་ཁམས་ཀྱི་སྒྲིབ་པ་སྦྱངས། ཡེ་ཤེས་ཡེ་ཤེས་རྡོ་རྗེ་བདེ་བ་ཆེན་པོའི་སྐུར་མངོན་པར་རྫོགས་པར་སངས་རྒྱས་པར་བྱས་ནས་དགེ་རྩ་བྱང་ཆུབ་ཆེན་པོར་བསྔོ་བ་བླ་མའི་རྣལ་འབྱོར་ཏེ་གསུམ་པའོ། །བདག་རྒྱུད་དམ་ཚིག་རྡོ་རྗེ་བཞི་པོ་ལ། །གཞན་མཆོག་ཡེ་ཤེས་རྡོ་རྗེ་བཞི་པོ་ཡིས། །དབང་བཞི་བསྐུར་ཐོབ་དེ་ཡི་ཚོགས་རྫོགས་ནས། །སྒྲིབ་སྦྱངས་སྒྲིབ་བྲལ་རྡོ་རྗེ་བཞིར་གྱུར་ཏོ། །