༢༠

དེ་ལྟ་བུ་ཞིག་གི་བློ་སྐྱེས་པ་ན། ཚེ་འདིའི་བྱ་བ་ཕལ་པ་ཚ་དྲོའི་གཡོ་སྦྱོར་ཙམ་ཡང་བྱེད་མི་ཁོམ་ཁོམ་གྱི་བརྩོན་འགྲུས་རབ་ཏུ་འབར་ནས་ཉིན་མཚན་གྱི་ཆ་ཐམས་ཅད་ཀྱང་ཆེས་ཐུང་དུ་སོང་བ་འདྲ་བའི་ཉམས་འབྱུང༌། དེའི་དུས་ལྟོ་གོས་དང་གནས་མལ་འབྱོར་མ་འབྱོར་དང༌། ན་ཚ་སོགས་ཀྱིས་གཙེར་མ་གཙེར་གང་གིས་ཀྱང་རྩིས་གདབ་མེད་པར། ཚེ་རབས་ཕྱི་མ་ཕན་གྱི་རང་གཞན་ལ་ཕན་བདེའི་རྒྱུའི་དགེ་བློ་འཕེལ་ཐབས་ཁོ་ན་ལས་གཞན་གྱི་གཉེར་བྱ་མེད་པ་ན། ད་ལྟ་འཆི་བའི་རྐྱེན་དཔག་མེད་བྱུང་ཡང་དམ་པའི་ཆོས་མི་གཏོང་བར་སྲོག་དང་བསྡོས་ཏེ་དམ་པའི་ཆོས་ཉམས་སུ་ལེན་པ་ཞིག་འབྱུང་ངོ༌། །དེ་ལྟའི་དད་པ་ཅན་ལ་དགེ་བློ་ཉམས་པའི་རྐྱེན་དུ་འགྱུར་ན་ལོ་བརྒྱར་འཚོ་ཞིང་བདེ་སྐྱིད་ཡོ་བྱད་ལྷ་དབང་བརྒྱ་བྱིན་ལྟར་ཕུན་སུམ་ཚོགས་པ་འདྲ་ཞིག་བྱུང་ཡང་བྱ་རྟོད་ལ་མནན་པ་ལྟ་བུའི་བློ་ཞིག་མི་འབྱུང་མི་སྲིད་པས། དེ་བྱུང་བ་ན་སླར་ཤེས་པ་དེ་ཉིད་ལ་ངར་ཡང་ཡང་བླུད་ནས་རང་གི་སྒྲུབ་པའི་དམ་བཅའ་ལ་སངས་རྒྱས་ཉིད་བྱོན་ནས་བཟློག་ཀྱང་མི་ལྡོག་པ་ཞིག་འབྱུང༌། དུས་དེར་གཞན་ཟེར་ཚེ་འདི་སྒྲུབ་པའི་རང་གཞན་གཉིས་ཕུང་གི་ཚིག་ལ་སྙིང་པོ་མེད་པས་སུས་ཅི་ཟེར་ཀྱང་མི་ཉན་པར་འབྲོང་སྣ་ཐག་བོལ་བ་ལྟ་བུ་ཞིག་འབྱུང་བས་གོ་ཆ་དེ་ཉིད་ལ་ཡང་ཡང་དྲན་ཤེས་ཀྱིས་མཉམ་པར་བཞག་གོ །