༢༡

དེ་ལྟར་འཁོར་བ་མཐའ་དག་གི་བདེ་བའང་སྡུག་བསྔལ་གྱི་རྒྱ་མཚོར་ཤེས་པའི་ངེས་པ་དྲག་པོས་ཆགས་ཞེན་ལོག་པ་ན། ཚེ་འདིའི་བདེ་སྐྱིད་གཏམ་གསུམ་གྱི་འབྱོར་ཐབས་ཕྱི་ས་ལྟར་དོར་བ་ཞིག་མི་ཡོང་ཀ་མེད་པའི་དུས་ཟང་ཟིང་རྙེད་བཀུར་གྱི་འཁྲི་བ་བཙན་ཐབས་སུ་ཆོད་པས། ཚེ་འདིའི་དཔལ་འབྱོར་གྱི་འདུ་འཛི་བྲེལ་བ་ཐམས་ཅད་ཀྱི་ཆེད་གཉེར་སྐད་ཅིག་ཙམ་ཡང་གཉེར་མེད་དུ་བབས་པའི་འཇིག་རྟེན་བློས་བཏང་གི་བྱ་བྲལ་གྱི་ལྟ་སྒོམ་སྤྱོད་པའི་ཚུལ་ལ་རང་ཉིད་ཀྱང་ལེགས་བྱས་སུ་མཐོང་ནས་རྗེས་སུ་ཡི་རང་བའི་དགའ་བས་རང་གི་ལུས་སེམས་ཀྱང་བདེ་བར་ཚིམ་སྟེ། ལུས་ཀྱི་བྲོ་ནད་སོགས་ཀྱང་བྲལ་སྟོབས་དང་མདངས་དང་གཟི་བརྗིད་སོགས་ཀྱང་རྒྱས་ནས་དད་པས་དགེ་བའི་ཁམས་སོས་ཤིང༌། འཇིག་རྟེན་འདིའི་ཆོས་བརྒྱད་སྒྲུབ་བློ་ཟད་པའི་བྱ་བཏང་གི་སྐྱེས་བུ་ཁྱད་པར་ཅན་རྣམས་ཀྱི་མཛད་སྤྱོད་རྣམ་ཐར་དང་བཅས་པའི་ཆོས་གང་ཟག་ལ་ཡིད་འཕྲོག་པའི་དད་པས་རྗེས་སུ་ཡི་རང་བ་དང་དགའ་བའི་མོས་པ་སྐྱེས་ནས་དེའི་རྣམ་ཐར་ལ་སྨོན་པ་ཉིན་མཚན་དུས་འདའ་བ་འབྱུང་བས་དེ་ལྟར་གྱི་བློ་རྩལ་དེ་ཉིད་ལ་ཐུན་མཚམས་ཐམས་ཅད་དུ་དགེ་སྦྱོར་གྱི་ཤུགས་བསྐྱེད་དེ། དེ་ལྟའི་སྐྱེས་བུ་དམ་པའི་མཛད་པ་ལ་སློབ་པའི་འདུན་པ་དྲག་པོས་དྲངས་ནས་དགེ་སྦྱོར་རྣམས་ལ་རྣམ་གཡེང་གི་དབང་དུ་མི་གཏོང་པའི་དྲན་བསྐུལ་ཡང་ཡང་དུ་བྱའོ། །