༣༠

ཡང་ཀུན་རྫོབ་པའི་རྫུན་སྣང་འདི་ཉིད་ཀྱི་གཞལ་ངོ་ན་ད་ལྟ་རང་རེའི་ལས་མཐུན་གྱི་ཆུ་བུར་གྱི་མིག་གིས་ཆོད་པའི་རྡུལ་ཕྲ་རབ་ལྟ་བུའི་ཡུལ་དང་ཡུལ་ཅན་ཉི་ཚེ་བ་ཙམ་གྱི་གོར་ཡང་དཔེར་མཚོན་ན་སྟོང་གསུམ་བྱེ་བ་ཕྲག་བརྒྱའི་འཇིག་རྟེན་གྱི་ཁམས་ཀྱི་སྣོད་བཅུད་ཁམས་གསུམ་པའི་འགྲོ་བ་རིགས་དྲུག་སོགས་གཞལ་དུ་མ་མཆིས་པ་ཞིག་ཡོད་པར་ལས་དང་རྟེན་འབྲེལ་གྱི་ལྟོས་པས་སྣང་རུང་ལ། གནས་དེ་དག་གི་རྡུལ་ཕྲ་རབ་རེ་རེ་ལའང་འཇིག་རྟེན་གྱི་ཁམས་རྒྱ་མཚོ་སྙེད་ཀྱི་སྣོད་བཅུད་སྣང་དུ་རུང་ཞིང་སྣོད་བཅུད་དེ་ཉིད་ཀྱི་རྡུལ་ཕྲ་རབ་རེ་རེ་ལ་ཡང་འཇིག་རྟེན་གྱི་ཁམས་བརྗོད་གཞལ་མེད་པའི་སྣོད་བཅུད་མཐའ་ཡས་པར་སྣང་རུང་ལ། དེ་ལྟར་གཞལ་དུ་མེད་པའི་སྣོད་བཅུད་མཐའ་མེད་པ་དེ་ཙམ་དུ་མཁའ་ཁྱབ་ཀྱི་སེམས་ཅན་ཇི་སྙེད་པས་རང་རེ་ལ་འཁོར་བའི་བདེ་འབྱོར་ཟད་གཞལ་མེད་པར་བྱིན་པའི་དྲིན་ཅན་མཐའ་མེད་པ་དེ་སྙེད་ཀྱི་སྡུག་བསྔལ་རང་ཐོག་ཏུ་བབ་སྟེ་སེམས་ཅན་དེ་ཉིད་ལ་སྙིང་རྗེའི་གྲངས་དེ་སྙེད་སྐྱེ་བས། སྙིང་རྗེ་དཔེ་དྲངས་པའི་བྱམས་པ་དང་བྱང་ཆུབ་ཀྱི་སེམས་ཀྱང་སེམས་ཅན་དེ་སྙེད་ཀྱི་གྲངས་ཀྱི་ཚད་གཞལ་མེད་པར་སྤྲིན་ཆེན་ལས་ཆར་ཆེར་གཡོ་བ་ལྟར་རྩོལ་མེད་དུ་འབྱུང་བ་ན་ལས་ཚུལ་བསམ་གྱིས་མི་ཁྱབ་པའི་རྟེན་འབྲེལ་གྱི་སྣང་ཚུལ་སྒྱུ་མ་ལྟ་བུའི་ཆོས་ལ་སྒྱུ་མ་ཙམ་དུ་ནམ་མཁའི་མཐས་ཀླས་པའི་མ་རྒན་རྣམས་ཀྱི་སྡུག་བསྔལ་གྱི་རྒྱུན་གཏན་དུ་བཅད་ནས་མི་གནས་པའི་མྱང་འདས་སྒྱུ་མ་ལྟ་བུ་ལ་འགོད་པར་ནུས་སོ་སྙམ་པའི་ངེས་ཤེས་ཤུགས་དྲག་གི་བློ་ཡང་ནས་ཡང་དུ་གོམས་པར་བྱས་ཏེ། བསྒོམས་པས་མ་རྒན་སེམས་ཅན་མཐའ་མེད་ཀྱི་སྡུག་བསྔལ་གཏིང་དཔོགས་པར་རང་ཐོག་ཏུ་ཁེལ་བ་དང༌། དེ་ལྟར་ཁེལ་བ་ན་དེ་དག་བསྒྲལ་བར་མི་ནུས་སོ་སྙམ་པའི་སྒྱིད་ལུག་དང་བྲལ་ནས་བྱང་ཆུབ་ཆེན་པོའི་སྒྲུབ་པ་མཐར་འདོན་གྱི་སྙིང་སྟོབས་ཆེན་པོ་རིམ་གྱིས་འབྱུང་བས། དེའི་རྩལ་གོང་ནས་གོང་དུ་བསྐྱེད་དེ་སྒོམ་པར་བྱའོ། །