༥༠

དེ་ལྟར་ཆོས་ཐམས་ཅད་སེམས་ཀྱི་བཏགས་སྣང་ཙམ་ལས་གཞན་དུ་མ་གྲུབ་ཅིང་སེམས་དེ་ཉིད་སྐྱེ་འགག་གནས་པ་ལ་སོགས་པའི་སྤྲོས་ཆོས་ཀྱི་བདག་ཉིད་དུ་མི་གནས་ན། དེ་ཉིད་ལས་གཞན་པའི་སེམས་ཀྱི་ཁ་ལོ་བསྒྱུར་བའི་བྱེད་པོའི་གང་ཟག་རང་དབང་དུ་གྲུབ་པ་སོགས་བདག་གཞན་གྱི་རྒྱུད་ལ་ཡོད་མེད་སེམས་པ་ན་འགར་ཡང་མ་རྙེད་པའི་ཚེ། སེམས་དེ་ཉིད་ལ་མཁའ་མཉམ་སེམས་ཅན་ཐམས་ཅད་སངས་རྒྱས་ཐོབ་ཆེད་དུ་རང་གཞན་སངས་རྒྱས་ཐོབ་ཆེད་ཀྱི་ཟག་མེད་ཀྱི་ཚོགས་གཉིས་བསགས་པའི་ལས་མ་གཏོགས་ཚུ་རོལ་འཁོར་བའི་མཐའ་ལ་ཆགས་པའི་ཟག་བཅས་དགེ་བའི་ལས་དང༌། ཕ་རོལ་ཞི་བའི་མཐའ་ལ་ཆགས་པའི་དམན་པའི་མྱང་འདས་ཀྱི་ཆེད་ཀྱི་ཟག་མེད་ཀྱི་དགེ་བའི་རྩ་བ་ཉི་ཚེ་བ་མི་བསོག་པར། སྲིད་ཞིའི་རྒྱ་མཚོ་ཆེན་པོ་རྩ་ཐོན་དུ་སྟོངས་པའི་བསོད་ནམས་དང་ཡེ་ཤེས་ཀྱི་འདུས་བྱས་མ་བྱས་ཀྱི་དགེ་རྩ་ཆུ་བོའི་རྒྱུན་ལྟར་བསགས་པ་དང༌། ལྷག་པར་འདུས་མ་བྱས་ཡེ་ཤེས་ཀྱི་ཚོགས་ཀྱི་དགེ་རྩ་བསྐྱེད་པའི་ཆེད་དུ་སྒོ་གསུམ་གྱི་འདུས་བྱས་བསོད་ཚོགས་ཀྱི་དགེ་རྩ་ཉིན་མཚན་ལུང་མ་བསྟན་གྱི་བྱ་བས་བར་ཆད་པར་སྒྲུབ་པར་བྱ་སྟེ། འཕྲལ་གྱི་ཆོས་སྤྱོད་ཀྱི་རིམ་པ་རྣམས་རྒྱལ་བ་རྒོད་ཚང་པ་ཆེན་པོས་ཐུགས་དམ་དུ་མཛད་པ་ལྟར་སྒྲུབ་དགོས་པས། གཉིད་དང་བཟའ་བཏུང་དང་ལེ་ལོའི་བདེ་བའི་རོ་མི་མྱོང་བར་དབེན་པར་དགེ་སྦྱོར་ལ་བརྩོན་པའི་ཉམས་མྱོང་གི་དགའ་སྤྲོའི་རོ་མྱོང་བས་ཁམས་གསོ་བར་བྱས་ནས་སྒྲུབ་པ་ཐང་ལྷོད་མེད་པར་ཐང་ངེ་དང་སྦྲིང་ངེ་བྱའོ། །