༥༡

དེ་ལྟར་བདག་མེད་གཉིས་ཀྱི་ལྟ་བ་རིགས་ཚུལ་གྱི་སྒོ་ནས་གཏན་ལ་མ་ཕབ་ཀྱང་བླ་མའི་ལུང་ཙམ་གྱིས་དེ་ལྟར་བརྡ་སྤྲད་ནས་སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ཙམ་དུ་གཏན་ལ་ཕབ་ནས་སེམས་དེ་ཉིད་ཀྱི་སྟེང་དུ་མྱོང་བ་ལ་བཀར་ནས་ལྟ་སྒོམ་ཡང་ནས་ཡང་དུ་བྱས་པས། སེམས་ལ་སོགས་པའི་ཕུང་སོགས་ཀྱི་ཆོས་གྲུབ་བདེན་དུ་སྣང་བ་ཐམས་ཅད་གྲུབ་བདེན་དུ་སྣང་བ་ལྟར་གྲུབ་བདེན་དང་བྲལ་བའི་དོན་དམ་སྟོང་པ་ཉིད་དུ་རྟོགས་པ་ཉིད་ཀྱིས་འཁོར་འདས་སོགས་ཀྱི་ཀུན་རྫོབ་རྒྱུ་འབྲས་ཀྱི་རྟེན་འབྲེལ་དུ་རུང་བའི་མྱོང་བ། དཔེར་ན་སྒྱུ་མའི་བསླད་གཞི་སྒྱུ་མར་བསླད་པ་ལྟར་མ་གྲུབ་ཀྱང་བསླད་པའི་སྒྱུ་མ་ལྟར་སྣང་དུ་རུང་བ་ལྟར་ཆོས་ཐམས་ཅད་སྒྱུ་མ་ལྟ་བུའི་ཉམས་བཟང་པོ་སྐྱེས་ནས་སླར་ཡང་སྒྱུ་མ་ལྟ་བུའི་འདུས་བྱས་དང་འདུས་མ་བྱས་ཀྱི་བསོད་ནམས་དང་ཡེ་ཤེས་ཀྱི་ཚོགས་ལ་འབད་པ་ཆེན་པོས་འཇུག་པ་གོང་ནས་གོང་དུ་འཕེལ་བར་འགྱུར་བས། དེ་ལྟའི་སྒྲུབ་པ་ཡང་ཡང་དམ་བཅའ་ཞིང་དེ་ཉིད་མཐར་ཅི་ཕྱིན་དུ་ནན་ཏན་བྱའོ། །