༧༣

དེ་ལྟར་ཡན་ལག་གི་ཆོས་བཞིའི་ཟིན་པའི་དངོས་གཞི་ཕྱག་རྒྱ་ཆེན་པོ་དེ་ཉིད་ལ་རྒྱལ་བ་འབྲི་ཁུང་པའི་ཞལ་ནས། སེམས་ཉིད་ཀྱི་ནམ་མཁའ་ཡངས་པ་ལ། །རྣམ་རྟོག་གི་སྤྲིན་ཚོགས་མ་དེངས་ན། །མཁྱེན་གཉིས་ཀྱི་གཟའ་སྐར་མི་བཀྲ་བས། །སེམས་མི་རྟོག་འདི་ལ་ནན་ཏན་མཛོད། །ཅེས་འབྱུང་བས། སེམས་དེ་ཉིད་ཀྱི་ཁམས་གསུམ་པ་ལ་སོགས་པའི་སྤྲོས་ཆོས་སུ་རྟོག་པས་འཁོར་བ་དང་དེར་མི་རྟོག་པས་མྱང་འདས་ཐོབ་པར་འགྱུར་བས་མི་རྟོག་ཡེ་ཤེས་ཉིད་ལ་བསྔགས་ནས། རྗེ་སྒམ་པོ་པས་རྣམ་རྟོག་གི་ངོ་བོ་ཉིད་ལ་བལྟ་བའི་རྟོགས་པ་ཕྱག་ཆེན་དུ་གསུངས་པ་དང་འགལ་ལོ་སྙམ་ན། དེ་ལྟར་རྟོག་པས་ཁ་ཕྱིར་བལྟ་བས་ཀུན་རྫོབ་འཁོར་བའི་ཆོས་སུ་སྣང་ཡང་རྣམ་རྟོག་དེ་ཉིད་ཀྱི་ངོ་བོ་ལ་ཁ་ནང་དུ་བལྟས་པས་རྟོག་པ་ཉིད་ཀྱི་ངོ་བོ་རྟོག་མེད་སྟོང་པ་ཉིད་དུ་རྟོགས་པ་ན་དོན་དམ་མྱ་ངན་ལས་འདས་པ་ཉིད་ཀྱི་ཕྱིར། རྣམ་རྟོག་གི་ངོ་བོ་ལ་བལྟས་པས་མི་རྟོག་ཡེ་ཤེས་སུ་འགྲོ་བ་དང་མི་རྟོག་ཡེ་ཤེས་ཀྱང་རྣམ་རྟོག་གི་ངོ་བོ་ལས་གཞན་དུ་མེད་པས་རྣམ་རྟོག་ཆོས་སྐུ་དང༌། འཁོར་འདས་དབྱེར་མེད་ཀྱི་ལྟ་སྒོམ་བདེ་བླག་ཏུ་འགྲུབ་པ་ཡིན་ནོ། །