༨༦དེས་ན་གྲོགས་ངན་གྱི་གྲིབ་ཅེས་བྱ་བ་ནི། སྣང་བ་དང་ལྡན་པར་འགྲོ་བ་ན། དེའི་རང་གྲིབ་མ་གཞི་ལ་ཕོག་པ་ལྟར། རང་རྒྱུད་དགེ་བའི་སྒྲུབ་པ་སྣང་བ་དང་ལྡན་པ་ལ་མངོན་པར་ཕྱོགས་པ་ན། མི་དགེ་བའི་གྲོགས་ཀྱིས་མི་དགེ་བའི་ལས་མུན་པ་ལྟ་བུས་རང་ཉིད་ཀྱི་དགེ་བའི་སྒྲུབ་པ་སྣང་བ་ལྟ་བུ་དེ་མི་གསལ་བ་མུན་པར་བྱེད་པའི་ཕྱིར། གྲོགས་ངན་གྱི་དུག་གསུམ་གྱི་གྲིབ་ཀྱི་ཕོག་ཅེས་བྱ་བར་འཇོག་གོ། དེ་ཡང་གྲོགས་འདོད་ཆགས་ཀྱི་དུག་ཡོད་པ་དེའི་གྲིབ་ཕོག་པ་ན་བརྣབ་སེམས་དང་ངག་རྐྱལ་དང་མ་བྱིན་ལེན་དང་མི་ཚངས་སྤྱོད་སོགས་ལ་ཡོན་ཏན་དུ་བལྟ་བ་དང་དེ་བྱེད་སྙིང་འདོད་པ་དང་བྱེད་པ་དང༌། གྲོགས་ཞེ་སྡང་གི་དུག་གི་གྲིབ་ཕོག་པས་གནོད་སེམས་དང་སྲོག་གཅོད་དང༌། ཕྲ་མ་དང་ཚིག་རྩུབ་སོགས་ལ་ཡོན་ཏན་དུ་བལྟ་ཞིང་བྱེད་འདོད་ཅིང་བྱེད་པ་དང༌། གྲོགས་གཏི་མུག་གི་དུག་གི་གྲིབ་ཕོག་པས་ལོག་ལྟ་དང་རྫུན་དང་ལུས་ངག་བག་མེད་པའི་སྤྱོད་པ་སོགས་ལ་ཡོན་ཏན་དུ་བལྟ་ཞིང་དེ་ལྟར་བྱེད་སྙིང་འདོད་ཅིང་བྱེད་པ་དང༌། འཇིག་རྟེན་ཆོས་བརྒྱད་ཀྱི་དུག་གི་གྲིབ་ཕོག་པས་ཚེ་འདིའི་མཁས་བཙུན་བཟང་བ་སོགས་ཀྱི་ཆོས་བརྒྱད་ཀྱི་ཆེད་དུ་སྡེ་སྣོད་གསུམ་རྒྱུད་སྡེ་བཞི་རིགས་པའི་གནས་ལྔ་སོགས་འཆད་རྩོད་རྩོམ་པ་བྱེད་སྐད་པ་དང༌། གར་ཐིག་དབྱངས་གསུམ་བཟོ་རྩིས་སྨན་སོགས་སྦྱོར་བ་དང་དཀའ་སྤྱད་ལོ་མཚམས་རི་འགྲིམ་དང་མངོན་ཤེས་གྲུབ་རྟགས་ལྟར་བཅོས་པ་སོགས་བྱས་ནས་སྦྱིན་བདག་དང་གྲྭ་སློབ་ཀྱི་ལོག་འཚོའི་རྙེད་བཀུར་སྡུད་ནས་འདུས་པ་དེ་དག་བསོད་ནམས་མིན་པའི་ལས་ལ་སྦྱོར་བ་དང༌། རྣམ་གཡེང་གི་དུག་གི་གྲིབ་ཕོག་ན། དགེ་བའི་ལས་ལྟར་སྣང་བ་དུ་མས་གཡེངས་ཤིང་བྲལ་ནས་དགེ་བ་མཚན་ཉིད་པའི་ལས་ཕྱི་ཤོལ་དུ་སོང་བཞིན་པར་འཆི་བ་དང༌། ལེ་ལོ་དང་སྙོམས་ལས་ཅན་གྱི་དུག་གི་གྲིབ་ཕོག་པ་ན། དགེ་བའི་ཕྱོགས་ལ་སེམས་མི་སྤྲོ་ཞིང་གཉིད་དང་ལོང་གཏམ་དང་སྙེལ་བ་དང་ཕྲཻས་པ་དང་བཟའ་བཏུང་དང་གླུ་གར་སོགས་ཀྱིས་དུས་འདའ་བས། རང་གི་སྐྱེ་རྒན་འཆི་སོགས་འཁོར་བའི་སྡུག་བསྔལ་སྐྲག་གི་བློ་མི་སྐྱེ་བར་དུད་འགྲོ་ལྟར་བྱིང་ངེར་གནས་པ་དང༌། རང་དོན་ཡིད་བྱེད་ཀྱི་དུག་གི་གྲིབ་ཕོག་པ་ན། རང་ཉིད་འཁོར་བའི་སྡུག་བསྔལ་ལ་ཡ་ཆེས་ང་ནས་དེ་ལས་ཐར་ཐབས་མ་གཏོགས། སེམས་ཅན་མ་རྒན་གྱི་སྡུག་བསྔལ་དར་དྲག་གི་སྡུག་བསྔལ་དང་ཕྲད་དོགས། བདེ་བ་དང་བྲལ་དོགས་ཀྱི་ཤ་ཚ་སྙིང་ལ་མི་བྲབས་པར་སེམས་ཅན་གྱི་དོན་ལ་སྙིང་ལས་ཆུང་ངུར་འགྱུར་བ་དང༌། ལས་འབྲས་དང་བདེན་པ་དང་དཀོན་མཆོག་སོགས་ལ་དད་པ་མེད་ཅིང་མ་དག་པའི་སྣང་བ་ཅན་གྱི་གང་ཟག་གི་དུག་གི་གྲིབ་ཕོག་པ་ན། རང་ཉིད་ལས་ཡོན་ཏན་གྱིས་ལྷག་པའི་མཆོད་བསྟོད་ཀྱི་བླ་མའི་གནས་རྣམས་ལ་འདིའི་ཡོན་ཏན་ནི་ཅིར་ཡང་མི་སྣང་བས་ཡོན་ཏན་འདི་ལྟ་བུ་ལ་ཤེས་འདོད་ཀྱི་དད་པ་དང་མོས་པ་མེད་ཅིང༌། དེ་མེད་པའི་དབང་གི་བླ་མ་དམ་པ་དེ་ལྟ་བུའི་གོ་འཕང་ཐོབ་འདོད་ཀྱི་རྣམ་ཐར་གྱི་རྗེས་སུ་མི་སློབ་པར། བླ་མ་དམ་པ་འདི་ནི་བག་མེད་པའོ། །འཆལ་པའོ། །རྩེ་རེག་ཅན་ནོ། །ཚུལ་ཆོས་ཅན་ནོ། །ཁ་གསགས་ཙམ་བུ་ཅན་ནོ། །ཁེངས་པ་ང་རྒྱལ་ཅན་ནོ། །རྣམ་གཡེང་འདུ་འཛི་ཅན་ནོ། །ཁོང་འཁྱོག་ཀོ་ལོང་ཅན་ནོ། །གདུག་ཅན་ཞི་ཚུལ་ཅན་ནོ། །ཁ་འཇམ་ཁོང་དྲན་ཅན་ནོ། །ཟོག་པོ་བསླུ་ཆོས་ཅན་ནོ། །ཐེག་དམན་བློ་ཆུང་མཆོག་འཛིན་ཅན་ནོ། །ཞེས་སོགས་ཀྱི་རང་སྐྱོན་ལ་ཡོན་ཏན་དུ་བལྟ་བའི་ང་རྒྱལ་གྱིས་རང་གི་སྒོ་གསུམ་གྱི་སྐྱོན་མི་སྤང་བར་ཁ་རྒྱལ་དུ་བཏང་བ་དང༌། ཡང་བླ་མའི་གནས་སུ་གྱུར་པ་དག་གི་དབང་དུ་བྱས་ནས་གང་ཟག་གཏོང་ཕོད་ཅན་ལ་མདོ་མེད་པོ་དང༌། ངེས་འབྱུང་ཞེན་ལོག་ཅན་ལ་སྙིང་མེད་བསམ་རླག་པོ་དང༌། དག་སྣང་མོས་གུས་ཅན་ལ་འབྱུང་མེད་ཕྲ་ཆལ་པོ་དང༌། འགྲོ་ཀུན་སྤྱི་བོར་ཁུར་བའི་དམན་པ་ཅན་ལ་ཁོས་མེད་རང་ཚུགས་ཤོར་བའི་ཟུངས་ཟད་པོ་དང༌། ཕན་སེམས་སྙིང་རྗེ་ཅན་གྱི་སྤྱི་ཚིས་པོ་ལ་ཀླད་མེད་སྙིང་སྟོང་བྱ་སྒྲོ་མགོ་དང༌། བྱང་སེམས་ཞི་དུལ་ཅན་གྱི་འགྲོ་བ་སྐྱོང་བ་ལ་ཆོས་བརྒྱད་ཞེ་འདོད་ཅན་གྱི་འཇིག་རྟེན་ཕེར་རྒོད་ཅན་དང༌། ཚེ་འདི་བློས་དང་སྙིང་ནས་སྒྲུབ་པ་བྱེད་ལ་གཏད་མེད་རླུང་ཁྱེར་སྨྱོན་བཅོས་མཁན་དང༌། རྒྱལ་ཁ་གཞན་ལ་སྟེར་ནས་བུབ་ཁ་རང་གིས་ལེན་པ་ལ་མི་གོ་མ་ཆོད་མཁོས་མེད་ཆོས་ལ་སྐྱབས་དང༌། གྲུབ་རྟགས་རྫུ་འཕྲུལ་མངོན་ཤེས་འགྲོ་འདུལ་ཅན་ལ་ཟོག་པོ་བདུད་ཁྱེར་ཆོས་བརྒྱད་ཅན་དང༌། ཤེས་བྱ་གཏན་ལ་འབེབས་པའི་མཁས་པ་གཞན་དོན་ཅན་ལ་མི་ཤེས་དགུ་ཤེས་མི་བྱེད་དགུ་བྱེད་ཅན་དང༌། རྒྱལ་ཁམས་དབང་དུ་བསྡུས་ནས་བདེ་ལ་འགོད་པའི་ཐུགས་རྗེ་ཅན་ལ་རྫས་སམ་སྔགས་ཀྱིས་སྣང་བ་བསྒྱུར་ནས་རྒྱལ་ཁམས་ཕུང་ལ་གཏད་པའི་སྒྱུ་མ་ཅན་ནོ་ཞེས་ཟེར་ན། རང་ཉིད་ཀྱི་མི་དགེ་བའི་ལས་ངན་པ་སྤྱོད་པའི་བླ་གྲོགས་གཡོག་འཁོར་སྦྱིན་བདག་སོགས་ཁ་ཤས་རེ་དང་ངན་མཐུན་ཕྱོགས་གཅིག་མཐོས་ན་ཟླ་ཤས། དམས་ན་ཞག་ཤས་ཙམ་དུ་བསྡེབས་ནས་རང་དང་རིས་མཐུན་གྱི་རེ་ཟུང་རེ་མ་གཏོགས་ཆོས་གང་ཟག་ཐམས་ཅད་ལ་འབར་བཏག་སྣ་ཚོགས་བྱེད་ཅིང༌། གྲོགས་དེ་དག་དང་ཡ་ཟུངས་མི་ཐུབ་པར་སྐད་ཅིག་རེར་མིག་ལྟ་ལུགས་ལེགས་ཉེས་ཙམ་གྱིས་བརྩེ་རེག་མ་བཟོད་པར་འགྲས་ཏེ་སྙིང་བཟས་ནའང་མི་ཚིམ་པར་དགྲ་ནག་པོར་བཟུང་ནས་གཏན་མཁོན་དུ་བྱེད་པའི་སྤྲེའུ་དང་ཁྲ་དང་ཝ་ལྟ་བུའི་སྒོ་གསུམ་གྱི་སྤྱོད་པ་ཅན་དུ་འགྱུར་བར་བྱེད་པས། དེ་ལྟར་འགྱུར་བའི་གྲོགས་སུ་མ་ཟད། དེ་ལྟའི་དུག་བླ་མ་མཁན་སློབ། ཕ་མ་རྒན་རབས། ཆོས་འཇིག་རྟེན་གྱི་དྲིན་ཅན། ནང་གཡོག་སྒེར་མཛའ་སྙིང་སྡུག་གྲྭ་སློབ་སྦྱིན་བདག་འབྲེལ་ཡོད་སུ་ལ་འདུག་ནའང་དེའི་ལྟ་སྤྱོད་སྒོམ་པའི་གྲིབ་རང་ལ་ཕོག་ཡོང་བས་དེ་ལྟ་བུ་དང་མི་མཛའ་མི་མཁོན་པས་ཆོས་དང་ཟང་ཟིང་གི་འབྲེལ་པ་བཅོད་རིང་དུ་འབྲོས་པར་བྱའོ། ། |