དགེ་བའི་བཤེས་གཉེན་བཀའ་གདམས་པ་རྣམས་ཀྱི་དམ་པའི་ཆོས་བྱུང་བའི་ཚུལ་ལེགས་པར་བཤད་པ་ངོ་མཚར་རྒྱ་མཚོ་ཞེས་བྱ་བ་བཞུགས་སོ།།

བཀའ་གདམས་ཆོས་འབྱུང་།

ངག་དབང་ཀུན་དགའ་བསོད་ནམས།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

སྟོན་པ་སངས་རྒྱས་ཀྱི་བྱོན་ཚུལ།

༄༅། །དགེ་བའི་བཤེས་གཉེན་བཀའ་གདམས་པ་རྣམས་ཀྱི་དམ་པའི་ཆོས་བྱུང་བའི་ཚུལ་ལེགས་པར་བཤད་པ་ངོ་མཚར་རྒྱ་མཚོ་ཞེས་བྱ་བ་བཞུགས་སོ།

ན་མོ་ཤྲཱི་ཝན་གུ་རུ་དྷརྨ་སྭ་མི་བུདྡྷ་དྷྭ་ཛ་ཡེ། །ལྷ་མིའི་བླ་མ་སྟོན་མཆོག་ཉི་མའི་གཉེན། །སྒྲིབ་གཉིས་དྲི་མ་ཀུན་སེལ་དམ་པའི་ཆོས། །ཡང་དག་ལམ་གྱིས་རྒྱུད་གྲོལ་དགེ་འདུན་ཚོགས། །སྐྱབས་མཆོག་རྣམས་ལ་བྱང་ཆུབ་བར་དུ་འདུད། །རྒྱལ་བ་མར་མེ་མཛད་དང་འབྲོམ་སྟོན་རྗེ། །ཕུ་ཆུང་པ་དང་སྤྱན་སྔ་པོ་ཏོ་བ། །ཡབ་སྲས་སྐུ་མཆེད་བརྒྱུད་པར་བཅས་པ་ཡི། །རྣམ་ཐར་དྲན་པས་ལན་བརྒྱར་ཕྱག་བགྱི་འོ། །འཇིག་རྟེན་དབང་ཕྱུག་ཞིང་ཁམས་གངས་ལྗོངས་འདིར། །ཡོངས་རྫོགས་བསྟན་པའི་མངའ་བདག་ས་སྐྱ་པ། །ཀུན་དགའ་སྙིང་པོ་སྲས་དང་དབོན་དུ་བཅས། །རིམ་པར་བྱོན་ལ་བདག་ཅག་སྙིང་ནས་དད། །སྙིགས་དུས་བསྟན་པའི་མེ་རོ་གསོ་བ་ལ། །བསམ་བཞིན་སྐྱེ་བ་བཞེས་པའི་སྔགས་འཆང་རྗེ། །གང་གི་ཐུགས་སྲས་བསོད་ནམས་དབང་པོ་དང་། །གྲགས་པ་བློ་གྲོས་སྐྱེ་དགུའི་གཙུག་ན་མཛེས། །ཨ་ཏི་ཤ་དང་རྒྱལ་བའི་འབྱུང་གནས་ལྟར། །བདག་ལ་གཅིག་ཏུ་དགོངས་པའི་ཐུགས་རྗེ་ཅན། །བཀའ་དྲིན་མཉམ་མེད་རྒྱལ་བ་མུས་པ་ཆེ། །སངས་རྒྱས་བསྟན་པའི་རྒྱལ་མཚན་འཛིན་ཁྱོད་བསྔགས། །གང་གི་ཟབ་ཡངས་གསུང་གི་བདུད་རྩིའི་རྒྱུན། །ངོམ་པར་གསོལ་བའི་སྐྱེས་ཆེན་མཆོག་རྣམས་དང་། །གཞན་ཡང་འགྲོ་ཀུན་དགའ་མཛད་རང་གཞན་གྱི། །དོན་གཉིས་ལྷུན་གྲུབ་སྤྱན་སྔ་རིན་ཆེན་རྒྱལ། །གང་བློ་འཇམ་པའི་རྡོ་རྗེས་ཉེར་བཟུང་བས། །དེང་སང་མཁས་པ་ཀུན་གྱི་གཙུག་གི་རྒྱན། །ངག་གི་དབང་ཕྱུག་ཆོས་ཀྱི་གྲགས་པ་ཡིས། །ཀུན་ཁྱབ་ཐམས་ཅད་མཁྱེན་དེར་ཕྱག་བཙལ་ནས། །རྒྱལ་བའི་རྒྱལ་ཚབ་བཤེས་གཉེན་བཀའ་གདམས་པའི། །ཟབ་དང་རྒྱ་ཆེའི་དམ་ཆོས་བྱུང་བའི་ཚུལ། །ལེགས་པར་བཤད་པ་ངོ་མཚར་རྒྱ་མཚོ་འདི། །བསྟན་དང་འགྲོ་ལ་ཕན་ཕྱིར་འདིར་སྤེལ་ལོ། །དེ་ལ་འདིར་བཅོམ་ལྡན་འདས་ཐུབ་པའི་དབང་པོ་འདི་ཉིད་ཀྱིས་བསྐལ་པ་གྲངས་མེད་པའི་སྔོན་རོལ་ནས་ཚོགས་གཉིས་ཀྱི་མཛད་པ་རྨད་དུ་བྱུང་བ་དུ་མ་ཞིག་གིས་གདུལ་བྱའི་དོན་དུ་བསྒྲུབས་པའི་འབྲས་བུ་ནི། སྐྱོན་ཀུན་ཟད་ཅིང་། ཡོན་ཏན་ཀུན་རྫོགས་པའི་སངས་རྒྱས་ཉིད་ཡིན་ལ། དེའི་བསྟན་པ་རྗོད་བྱེད་ལུང་སྡེ་སྣོད་གསུམ་དང་། བརྗོད་བྱ་བསླབ་པ་རིན་པོ་ཆེ་གསུམ་ནི་ཐར་འདོད་རྣམས་ཀྱི་ཕན་བདེའི་འཇུག་ངོགས་ཁོ་ནར་གྱུར་པས། བཤད་སྒྲུབ་ཀྱིས་འཛིན་པའི་སྐྱེས་ཆེན། རྒྱ་བོད་དུ་ཇི་ལྟར་བྱོན་པའི་ཚུལ་ནི་འདིར་བཤད་པར་བྱ་བའི་དོན་ནོ། །འདི་ལ་དྲུག སྟོན་པ་སངས་རྒྱས་ཀྱི་བྱོན་ཚུལ། དེའི་བཀའ་ཇི་ལྟར་བསྡུས་པ། བསྟན་འཛིན་ཤིང་རྟའི་སྲོལ་འབྱེད་བྱོན་ཚུལ། སྲོལ་འཛིན་ཨ་ཏི་ཤའི་རྣམ་ཐར། དེའི་རྗེས་སུ་སློབ་པའི་བཤེས་གཉེན་བྱོན་ཚུལ། དེ་རྣམས་ཀྱིས་ཟབ་པ་དང་རྒྱ་ཆེ་བའི་བསྟན་བཅོས་ངོ་མཚར་ཅན་ཇི་ལྟར་མཛད་པའི་ཚུལ་བཤད་པའོ། །

དང་པོ་ལ་ཐེག་པ་མཆོག་དམན་གྱི་གདུལ་བྱའི་དབང་གིས། མི་འདྲ་བའི་ཁྱད་པར་མང་དུ་གསུངས་ཀྱང་རྒྱས་པར་མ་སྤྲོས་ལ། འདིར་བྱང་ཆུབ་སེམས་དཔའི་སྡེ་སྣོད་ལས་གསུངས་པའི་དབང་དུ་བྱས་ནས། དང་པོ་ཐུགས་བསྐྱེད་ཚུལ་ནི། སྙིང་རྗེ་པད་དཀར་ལས། བྲམ་ཟེ་རྒྱ་མཚོའི་རྡུལ་དུ་གྱུར་པའི་ཚེ། སངས་རྒྱས་རིན་ཆེན་སྙིང་པོའི་དྲུང་དུ་དང་པོར་ཐུགས་བསྐྱེད་པར་གསུངས། །སྐལ་བཟང་ནས། ང་ནི་སྔོན་ཚེ་དམན་པར་གྱུར་པ་ན། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་དབུལ་བ་བྱས་ནས་ཀྱང་། །དང་པོ་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་དང་། དྲིན་ལན་བསབ་པ་ལས། སྟོན་པ་སྔོན་ལས་ཀྱི་ནུས་པས་དམྱལ་བར་ཤིང་རྟ་འདྲེན་པའི་གྱད་དུ་འཁྲུངས་པའི་ཚེ། ཟླ་བོ་སྟོབས་ཆུང་བ་ལ་སྙིང་རྗེ་སྐྱེས་པའི་རྐྱེན་གྱི་དང་པོར་ཐུགས་བསྐྱེད་པར་བཤད། ཕུང་པོ་གསུམ་པ་ལས། ཚོང་དཔོན་གྱི་མངོན་དགར་གྱུར་པས་སངས་རྒྱས་མཛེས་ཆེན་གྱི་དྲུང་དུ་ཐུགས་བསྐྱེད་པ་དང་། རྫ་མཁན་གྱི་ཁྱིའུ་སྣང་བྱེད་དུ་གྱུར་ནས་སངས་རྒྱས་ཤཱཀྱ་ཐུབ་པ་ཆེན་པོ་ལ་ཐུགས་བསྐྱེད་པར་བཤད་དེ། མི་འདྲ་བ་ནི་གདུལ་བྱའི་བྱེ་བྲག་གམ། སྔ་ཕྱི་ཡིན་པས་འགལ་བར་མི་སེམས་ཞེས་མཁས་པ་དག་གི་གསུང་རབ་ལས་འབྱུང་ངོ་། །གཉིས་པ་ཚོགས་བསགས་ཚུལ་ནི། བྱང་ཆུབ་སེམས་དཔའི་སྡེ་སྣོད་ལས། གྲངས་མེད་བདུན་དང་། བཅུ་དང་། སོ་གསུམ་སོགས་བཤད་ཀྱང་། མདོ་སྡེ་རྒྱན་ལས། གྲངས་མེད་གསུམ་དུ་གསུངས་པ་ལྟར་ན། མདོ་ལས། དང་པོ་གཞོན་ནུ་བརྩོན་འགྲུས་སྤྱོད་དུ་གྱུར་པ་ན་དེ་བཞིན་གཤེགས་པ་ཕུང་པོ་ཆེན་པོ་ལ་དགེ་བའི་རྩ་བ་བསྐྲུན་པ་ནས་བརྩམས་ཏེ་གྲངས་མེད་གཅིག་ཏུ་ཚོགས་བསགས་པས་ས་དང་པོ་དང་། དེ་ནས་ཚོང་དཔོན་ཤེས་བཟུང་དུ་གྱུར་པ་ན། དེ་བཞིན་གཤེགས་པ་དཀོན་མཆོག་ཡན་ལག་བསྙེན་བཀུར་བ་ནས་བཟུང་སྟེ་གྲངས་མེད་གཅིག་ཏུ་ཚོགས་བསགས་པས་ས་བདུན་པ་ཐོབ་པར་གྱུར། དེ་ནས་བྲམ་ཟེའི་ཁྱིའུ་སྤྲིན་དུ་གྱུར་པའི་ཚེ། བྲམ་ཟེ་མར་མེའི་བདག་པོའི་སྲས་དེ་བཞིན་གཤེགས་པ་མར་མེ་མཛད། རྒྱལ་པོ་དགྲ་འདུལ་གྱི་ཕོ་བྲང་པདྨ་ཅན་ཞེས་པའི་ཚོང་འདུས་དང་ཉེ་བར་བཞུགས་པ་ལ་ལྷ་རྣམས་ཀྱི་མཆོད་པ་འབུལ་བ་མཐོང་ནས་དྲིས་པས། ཁྱེད་ཀྱིས་མི་ཤེས་སམ། འདི་ན་སངས་རྒྱས་མར་མེ་མཛད་བཞུགས་སོ་ཟེར་བས་དད་དེ། ཨུཏྤ་ལ་ལྔ་ཉོས་པ་སངས་རྒྱས་ལ་གཏོར། ཀྲྀཥྞ་ས་ལེའི་ལྤགས་པ་དང་རང་གི་དབུ་སྐྲ་བཏིང་ནས། མར་མེ་མཛད་དེ་བཞིན་གཤེགས་པ་ཀུན་ནས་དང་བས་སྤྱན་དྲངས་ཏེ། བདག་གི་ལྷག་པའི་བསམ་པ་ཐུགས་སུ་ཆད་པར་མཛོད་ལ། རི་དྭགས་ཀྱི་པགས་པ་རལ་པ་དང་བཅས་པ་འདི་ལ་ཞབས་མི་འཇོག་གམ། ལུང་མི་སྟོན་ན་འདི་ཉིད་དུ་ལུས་སྐམ་པར་བྱའོ། །ཞེས་ཡིད་དམ་བཅས་པས། སྟོན་པས་ཞབས་བཞག་ཏེ། མ་འོངས་པའི་དུས་སུ་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པས་ནམ་མཁའ་ལ་འཕགས། ཏིང་ངེ་འཛིན་བརྒྱ་སྟོང་མངོན་དུ་བྱས་ནས་ས་བརྒྱད་པ་ཐོབ་སྟེ། ཇི་སྐད་དུ། སངས་རྒྱས་མར་མེ་མཛད་ལ་ཨུཏྤལ་ལྔ། །གཏོར་ཏེ་རལ་པ་སྟན་དུ་བཏིང་བྱས་པས། །མི་སྐྱེའི་ཆོས་ལ་བཟོད་པ་ཐོབ་གྱུར་ནས། །ཤཱཀྱའི་རྒྱལ་པོར་འགྱུར་ཞེས་ང་ལུང་བསྟན། །ཞེས་པ་དང་། ལུང་ལས། གང་ཚེ་མར་མེ་མཛད་ཀྱི་ང་། །ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཏེ། །དབང་བཅུ་དག་ཀྱང་ཐོབ་པར་གྱུར། །ཅེས་སོ། །དེ་ན་གྲངས་མེད་གཅིག་ཏུ་ཚོགས་བསགས་པས་ས་བཅུ་རྫོགས་པར་གསུངས་པ། འདིར་དོན་ལ་གནས་སོ་ཞེས་མཁས་པ་དག་བཞེད་དོ། །ཚོགས་ཀྱི་ངོ་བོ་ནི། བསོད་ནམས་དང་ཡེ་ཤེས་ཏེ། དེ་ཡང་ཕ་རོལ་ཏུ་ཕྱིན་པ་དྲུག་དང་། བསྡུ་བའི་དངོས་པོ་བཞི་དང་ལྡན་པ་ལ་སོགས་པའི་སྒོ་ནས་འཇུག་བསོག་པར་མཛད་པ་སྟེ། རྒྱས་པར་གཞན་དུ་བལྟའོ། །གསུམ་པ་སངས་རྒྱས་པའི་ཚུལ་ནི། དེ་ཡང་བྲམ་ཟེའི་ཁྱིའུ་བླ་མ་ལས་རིམ་གྱིས་ཚེ་འཕོས་ནས། དགའ་ལྡན་དུ་ལྷའི་བུ་དམ་པ་ཏོག་དཀར་དུ་གྱུར་ཏེ་དགའ་ལྡན་གྱི་ལྷ་རྣམས་ལ་ཆོས་སྟོན་པ་ན། སྔོན་གྱི་དགེ་བའི་མཐུས། ལྷ་རྣམས་ཀྱིས་རོལ་མོའི་སྒྲ་ལས། མར་མེ་མཛད་ཀྱི་ལུང་བསྟན་དགོངས་པར་མཛད་དོ། །ཞེས་སོགས་ཀྱིས་བསྐུལ་བ་གསན་པས། འཛམ་བུའི་གླིང་དུ་གཟིགས་པ་རྣམ་པ་བཞིའམ་ལྔ་ལས། བཞི་ནི། རྒྱལ་ཆེ་རོལ་པ་ལས། གནས་འཛམ་བུ་གླིང་། དུས་ཚེ་ལོ་བརྒྱ་པ། རིགས་རྒྱལ་རིགས། ཡུམ་སྒྱུ་མ་ལྷ་མཛེས་སམ། ལུང་ལྟར་ན་བཙུན་མོའི་འཁོར་དང་ལྔ་ལ་གཟིགས་ཏེ་གཤེགས་པར་བཞེད་པ་ན། མི་ཕམ་པ་ཉིད་ཀྱི་རྒྱལ་ཚབ་ཏུ་དབང་བསྐུར། དེ་ནས་མང་པོས་བཀུར་པའི་རྒྱལ་པོ་ནས་མི་རབས་ས་ཡ་གཅིག བདུན་ཁྲི། ཆིག་སྟོང་ལྔ་བརྒྱ། ལྔ་བཅུ་འདས་པ་ན། ཤཱཀྱ་གཞུ་བརྟན་བྱུང་། དེའི་བུ་སེང་གེ་འགྲམ་དང་། སེང་གེ་སྒྲ་གཉིས། སེངྒེ་འགྲམ་གྱི་བུ་ཟས་གཙང་། ཟས་དཀར། བྲེའོ་ཟས། བདུད་རྩི་ཟས་བཞི་དང་། བུ་མོ་གཙང་མ། དཀར་མོ། བྲེ་མོ། བདུད་རྩི་མོ་རྣམས་སོ། །དེ་དག་གི་ནང་ནས་རྒྱལ་པོ་ཟས་གཙང་དང་། ཡུམ་སྒྱུ་འཕྲུལ་ཆེན་མོ་གཉིས་ཀྱི་སྲས་སུ། ཇོ་བོ་རྗེའི་བཞེད་པ་ནི། ཤིང་ཕོ་བྱི་བའི་ལོ་དཔྱིད་ཟླ་ཐ་ཆུང་ས་ག་ཉ་བའི་ཚེས་བཅོ་ལྔའི་ཉིན། ཁ་ཅིག་སྐར་མ་རྒྱལ་འཆར་བའི་དུས་སྦྱོར་ཞེས་གསུངས་ལ། དེ་ཡང་གླང་པོ་ཆེའི་ཕྲུ་གུ་ཐལ་དཀར་མཆེ་བ་དྲུག་པ་གསེར་གྱི་དྲ་བས་བརྒྱན་པའི་གཟུགས་ཀྱིས་ཡུམ་གྱི་གློ་གཡས་ནས་ཞུགས་པ་ནི་དགའ་ལྡན་ནས་འཕོས་པ་དང་། ལྷུམས་སུ་ཞུགས་པའི་མཛད་པ། དེ་ནས་ཟླ་བ་བཅུ་རྫོགས་པ་ཤིང་མོ་གླང་གི་ལོ་ལ་སྐུ་བལྟམས་པའི་མཛད་པ། དེ་ནས་ལོ་ཉི་ཤུ་རྩ་དགུའི་བར་དུ་ཁབ་ཏུ་བཞུགས་ནས། བཟོའི་གནས་ལ་མཁས་པའི་མཛད་པ་དང་བཙུན་མོའི་འཁོར་གྱི་རོལ་པའི་མཛད་པ། ལོ་ཉི་ཤུ་རྩ་དགུ་པ་ཆུ་མོ་སྦྲུལ་གྱི་ལོ་ལ་ཁབ་ནས་ངེས་པར་འབྱུང་བའི་མཛད་པ་བསྟན་ཏེ། མཆོད་རྟེན་རྣམ་དག་གི་དྲུང་དུ་རབ་ཏུ་བྱུང་ནས། ཆུ་ཀླུང་ནྱེའི་རཉྫ་ནའི་འགྲམ་དུ་ལོ་དྲུག་ཏུ་དཀའ་བ་སྤྱད་པའི་མཛད་པ། བྱང་ཆུབ་སྙིང་པོ་རྡོ་རྗེ་གདན་དུ་གཤེགས་པའི་མཛད་པ་དང་། ལོ་སུམ་ཅུ་རྩ་ལྔ་བཞེས་པ་ས་མོ་ཕག་གི་ལོ་དཔྱིད་ཟླ་ཐ་ཆུང་ས་ག་ཟླ་བའི་ཡར་ངོ་ཚེས་བཅོ་ལྔའི་སྲོད་ལ་ལྷའི་བུའི་བདུད་བཅོམ་པའི་མཛད་པ། ཐོ་རངས་མངོན་པར་སངས་རྒྱས་པའི་མཛད་པའོ། །དེ་ནས་དམ་པའི་ཆོས་ཀྱི་ཆེ་བ་བྱུང་བའི་ཕྱིར། སངས་རྒྱས་སྟོང་པོ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་པོ་མི་བརྗེད་ཀྱི་བདག་པོ་ལྷ་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས་གསོལ་བ་བཏབ་ཀྱང་ཞག་བདུན་ཕྲག་བདུན་དུ་ཆོས་མ་གསུངས་པར། བདུན་ཕྲག་ཐ་མ་ལ་ཝ་ར་ན་སིར་དབྱར་ཟླ་འབྲིང་པོ་ཆུ་སྟོད་ཟླ་བའི་ཡང་ངོའི་ཚེས་བཞི་ལ། ལྔ་སྡེ་བཟང་པོ་ལ་བདེན་བཞིའི་ཆོས་ཀྱི་འཁོར་ལོ་བསྐོར་བའི་མཛད་པ་བསྟན་ཏོ། །

དེ་ནས་སྐུ་དངོས་ཀྱི་གདུལ་བྱ་རྣམས་ལ་ཆོས་ཀྱི་འཁོར་ལོ་རིམ་གྱིས་བསྐོར་ནས་སྨིན་པར་མཛད་དེ། ཤིང་ཕོ་སྤྲེའུའི་ལོ་ལ་མྱ་ངན་ལས་འདའ་བའི་མཛད་པ་བསྟན་པར་བཞེད་དོ། །དེ་ཡང་སྟོན་པའི་འཁྲུངས་ལོ་སོགས་ལ་བཞེད་ཚུལ་མི་འདྲ་བ་ཅུང་ཟད་ཡོད་ཀྱང་། འདི་ཇོ་བོ་རྗེའི་བཞེད་པ་ལྟར་ཡིན་ལ། ཆོས་རྗེ་ས་སྐྱ་པ་ནི། མེ་མོ་ཡོས་ལ་ལྷུམས་སུ་ཞུགས། ས་ཕོ་འབྲུག་ལ་བལྟམས། ཆུ་ཕོ་སྟག་ལ་སངས་རྒྱས། མེ་མོ་ཕག་ལ་གཤེགས་པར་བཞེད། དུས་འཁོར་ལས། མེ་ཕོ་རྟའི་ལོ་ལ་ལྷུམས་སུ་ཞུགས་པར་བཞེད་དོ། །དེ་ཡང་ཀ་མ་ལ་ཤི་ལས། ཐུབ་པའི་མཛད་པ་བསམ་གྱིས་མི་ཁྱབ་ཀྱང་། གཙོ་བོ་དང་གྲངས་ལ་དགའ་བ་རྗེས་སུ་བཟུང་བའི་ཕྱིར་མཛད་པ་བཅུ་གཉིས་སུ་བསྡུས། ཞེས་གསུངས་པ་ལྟར་མཛད་པའི་གཙོ་བོ་རྣམས་ཡིན་ལ། དེ་དག་ལ་ཡང་འདྲེན་ཚུལ་མི་འདྲ་བ་འགའ་རེ་འདུག་ཀྱང་རྒྱུད་བླ་ལས་གསུངས་པ་ལྟར་ཡིན་ནོ། །མཛད་པ་བཅུ་གཉིས་རྒྱས་པར་ནི། རྒྱ་ཆེར་རོལ་པ། མདོ་མངོན་བྱུང་། འདུལ་བ་ལུང་རྣམས་ལས་འབྱུང་ཞིང་། བོད་ཀྱིས་མཛད་པའི་ཆོས་འབྱུང་སོགས་རྒྱས་བསྡུས་མང་དུ་སྣང་བ་རྣམས་ལས་ཤེས་ཤིང་། འདིར་མང་པས་མ་སྤྲོས་སོ། །

དེའི་བཀའ་ཇི་ལྟར་བསྡུས་པ།

དེའི་བཀའ་ཇི་ལྟར་བསྡུས་པ་ལ་གཉིས། ཐེག་པ་ཐུང་མོང་བ་དང་། ཐེག་ཆེན་ཐུང་མོང་མ་ཡིན་པའི་བསྡུས་ཚུལ་ལོ། །དང་པོ་ལ་བཀའ་བསྡུ་རིམ་པ་གསུམ་ལས། དང་པོ་ནི། དུས་སྟོན་པ་མྱ་ངན་ལས་འདས་པའི་ཕྱི་ལོ་དེ། གནས་རྒྱལ་པོའི་ཁབ་ནྱ་གྲོ་ཏའི་ཕུག་ཏུ་སྦྱིན་བདག་རྒྱལ་པོ་མ་སྐྱེས་དགྲས་མཛད་ནས། ཚོགས་པ་དགྲ་བཅོམ་པ་ལྔ་བརྒྱ་དབྱར་གནས་མཛད་དེ། ཀུན་དགའ་བོས་མདོ་སྡེ། ཉེ་བ་འཁོར་གྱིས་འདུལ་བ། འོད་སྲུང་ཆེན་པོས་མངོན་པ་རྣམས་བསྡུས་ཤིང་། དགོས་པ་ལྷ་རྣམས་ཀྱི་འཕྱ་བ་བསལ་བ་དང་། བསྟན་པ་ཡུན་རིང་དུ་གནས་པའི་ཕྱིར་དུ་བཀའ་བསྡུ་དང་པོ་མཛད་དོ། །གཉིས་པ་ནི། དུས་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་ན། གནས་ཡངས་པ་ཅན་དུ། སྦྱིན་བདག་ཆོས་རྒྱལ་མྱ་ངན་མེད་ཀྱིས་མཛད་དེ། ཚོགས་པ་དགྲ་བཅོམ་པ་བདུན་བརྒྱ་འདུས་ཏེ། དགྲ་བཅོམ་གྲགས་པ་དང་། ཐམས་ཅད་ལ་སོགས་པས་སྡེ་སྣོད་གསུམ་ཞལ་འདོན་དུ་མཛད་དེ། དགོས་པ་རུང་བ་མ་ཡིན་པའི་གཞི་བཅུ་བསལ་བ་དང་། །བསྟན་པ་ཡུན་རིང་རུ་གནས་པའི་ཕྱིར་བཀའ་བསྡུ་གཉིས་པ་མཛད་དོ། །བསྡུ་བ་གསུམ་པ་ལུང་ན་མེད་པས་མི་མཐུན་པ་མང་ཡང་ཡོངས་སུ་གྲགས་པ་ནི། དུས་སྟོན་པ་གཤེགས་ནས་ལོ་སུམ་བརྒྱ་ན། གནས་ཁ་ཆེའི་ཡུལ་གྱི་དགོན་པ་ཀུ་པ་ན་ཞེས་པར། སྦྱིན་བདག་ཛ་ལནྡྷ་རའི་རྒྱལ་པོ་ཀ་ནི་ཀས་བྱས་ཏེ། ཚོགས་པ་དགྲ་བཅོམ་པ་ལྔ་བརྒྱ། ཝ་པུ་མི་ཊ་ལ་སོགས་པའི་བྱང་ཆུབ་སེམས་དཔའ་ལྔ་བརྒྱ། སོ་སོ་སྐྱེ་བོའི་པཎྜི་ཏ་ཁྲི་དྲུག་སྟོང་འདུས་ནས། བསྡུ་པ་པོ་པུརྞི་ཀ་ལ་སོགས་པས་སྡེ་སྣོད་གསུམ་ཞལ་འདོན་དུ་མཛད་དེ། དགོས་བ་སྡེ་བ་བཅོ་བརྒྱད་པོ་ཐམས་ཅད་ཀྱི་གྲུབ་མཐའ་ལ་རྟེན་ནས་རྣམ་གྲོལ་ཀྱི་འབྲས་བུ་ཐོབ་པར། རྒྱལ་པོ་ཀྲི་ཀྲིའི་རྨིས་ལྟས་ལུང་བསྟན་པའི་མདོ་ལ་བརྟེན་ནས་སྒྲུབ་པ་དང་། བསྟན་པ་ཡུན་རིང་དུ་གནས་པའི་ཆེད་དུ་བཀའ་བསྡུ་གསུམ་པ་མཛད་དོ། །དེ་ཡང་སངས་རྒྱས་འོད་སྲུང་འཛམ་བུའི་གླིང་ན་བཞུགས་པའི་ཚེ། རྒྱལ་པོ་ཀྲི་ཀྲིའི་རྨི་ལམ་དུ་རས་ཡུག་གཅིག་སྐྱེས་བུ་སྟོབས་དང་ལྡན་པས་བཅོ་བརྒྱད་དུ་བྱས་ཏེ། ཐམས་ཅད་ཁ་ཚར་མ་ཉམས་པ་རེ་རེར་གྱུར་པ་རྨིས་པས། འོད་སྲུང་གིས་མ་འོངས་པའི་དུས་སུ་ཤཱཀྱ་ཐུབ་པའི་བསྟན་པ་ལ་ཉན་ཐོས་སྡེ་པ་བཅོ་བརྒྱད་དུ་འགྱུར་བ་ནི། རས་ཡུག་གཅིག་དུམ་བུ་བཅོ་བརྒྱད་དུ་གྱུར་པའོ། །ཐམས་ཅད་ཀྱང་ཁ་ཚར་མ་ཉམས་པ་ནི་སྡེ་པ་དེ་དག་རེ་རེའི་གྲུབ་མཐའ་ལ་རྟེན་ནས་ཀྱང་རྣམ་གྲོལ་གྱི་འབྲས་བུ་ཐོབ་པར་ནུས་སོ། །ཞེས་མདོ་ལས་བཤད་དོ། །

འདི་དག་གི་ཁྱད་པར་ལ། རྩ་བའི་སྡེ་པ་བཞི་ནི། ཕལ་ཆེན་པ། ཐམས་ཅད་ཡོད་པར་སྨྲ་བ། གནས་བརྟན་པ། མང་པོས་བཀུར་བ་པ་རྣམས། ལེགས་སྦྱར་གྱི་སྐད་དང་། རང་བཞིན་གྱི་སྐད་དང་། ཟུར་ཆག་གི་སྐད་དང་། པི་ཤ་ཙིའི་སྐད་དུ་སོ་སོར་གནས་པ་ཡིན་ནོ། །དེ་ལས་གྱེས་པ་བཅོ་བརྒྱད་ནི། །དུལ་བའི་ལྷས། ཤར་དང་ནུབ་དང་གངས་རི་དང་། །ཞེས་སོགས་གསུངས་པའི་དོན། ཕལ་ཆེན་པ་ལ། ཤར་དུ་གནས་པ། ནུབ་དུ་གནས་པ། གངས་རིར་གནས་པ་གསུམ་ནི་ཡུལ་གྱི་ཕྱེ་བ་ཡིན་ལ། འཇིག་རྟེན་ལས་འདས་པར་སྨྲ་བ། རྟོག་པར་སྨྲ་བ་གཉིས་ནི་དོན་གྱི་ཕྱེ་བའི་སྡེ་པ་སྟེ་ལྔའོ། །ཐམས་ཅད་ཡོད་པར་སྨྲ་བའི་སྡེ་པ་ལ། །གཞི་ཀུན་ཡོད་པར་སྨྲ་བའི་སྡེ་དང་། འོད་སྲུང་གི་སྡེ་དང་། ས་སྟོན་གྱི་སྡེ་དང་། ཆོས་སྲུང་གི་སྡེ་དང་། མང་དུ་ཐོས་པའི་སྡེ་དང་། རྣམ་པར་བརླག་པའི་སྡེ། གོས་དམར་ཅན་གྱི་སྡེ་སྟེ་ལྔ་ནི་སློབ་དཔོན་གྱིས་ཕྱེ་ཞིང་། འཕགས་པ་གནས་བརྟན་པ་ལ། རྒྱལ་བྱེད་ཚལ་དུ་གནས་པ། འཇིགས་མེད་དུ་གནས་པ། གཙུག་ལག་ཁང་དུ་གནས་པ་གསུམ་སྟེ། གནས་ཀྱི་སྒོ་ནས་ཕྱེ་བ་གསུམ་མོ། །མང་པོས་བསྐུར་བ་ལ་ས་སྒྲོག་རིགས་དང་། སྲུང་བ་པ་དང་། གནས་མ་བུ་པའི་སྡེ་པ་སྟེ་དོན་གྱི་སྒོ་ནས་ཕྱེ་བ་གསུམ་མོ། །གཉིས་པ་ཐེག་ཆེན་ཐུན་མོང་མ་ཡིན་པའི་བསྡུས་ཚུལ་ནི། རྒྱལ་པོའི་ཁབ་ཀྱི་ལྷོ་ཕྱོགས་བྷི་མ་ལ་སམ་བྷ་བ་ཞེས་པའི་རི་ལ། རྒྱལ་སྲས་འབུམ་ཕྲག་བཅུ་འདུས་སྟེ། འཇམ་དཔལ་གྱིས་མངོན་པ། བྱམས་པས་འདུལ་བ། ཕྱག་ན་རྡོ་རྗེས་མདོ་སྡེ་བསྡུས་ཞེས་གྲགས་སོ། །རྟོག་གེ་འབར་བ་ལས་ཀྱང་། ཐེག་པ་ཆེན་པོ་སངས་རྒྱས་ཀྱི་གསུང་ཡིན་ཏེ། རྩ་བའི་སྡུད་པར་བྱེད་པ་པོ་ཀུན་ཏུ་བཟང་པོ་དང་། འཇམ་དཔལ་དང་། གསང་བའི་བདག་པོ་དང་། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །བདག་ཅག་གི་རྩ་བའི་བསྡུས་པར་བྱེད་པ་པོ་ཉན་ཐོས་ནི་མ་ཡིན་ཏེ། ཐེག་པ་ཆེན་པོའི་གསུངས་ནི་དེ་དག་གི་ཡུལ་མ་ཡིན་པའི་ཕྱིར། །ཞེས་འབྱུང་ངོ་། །ཐེག་པ་ཆེན་པོ་གསང་སྔགས་ཀྱི་སྡུད་པ་པོ་ནི། རྒྱུད་རང་རང་གི་ཞུ་བ་པོས་བསྡུས་པ་ཡང་ཡོད་ལ། ཕལ་ཆེར་ཕྱག་ན་རྡོ་རྗེས་བསྡུས་པ་ཉིད་དོ། །དེ་ཐམས་ཅད་ཀྱང་དུས་དབྱེ་ན་འཁོར་ལོ་རིམ་པ་གསུམ་མམ་བཞི། རྗོད་བྱེད་ཀྱིས་དབྱེ་ན། གསུང་རབ་ཡན་ལག་བཅུ་གཉིས་སམ། སྡེ་སྣོད་གསུམ། བརྗོད་བྱ་བསླབ་པ་རིན་པོ་ཆེ་གསུམ་དུ་བསྟན་པའི་ཆོས་ཐམས་ཅད་འདུས་པར་གསུངས་ལ། གསང་སྔགས་ནི། ཤནྟི་པས་ཟབ་མོའི་དོན་བསྡུས་ཏེ་སྟོན་པའི་ཕྱིར་མདོ་སྡེའོ། །ཞེས་དང་། དཔུང་བཟང་ལས། གསང་སྔགས་མདོ་སྡེའི་ཚུལ་དུ་བཤད་ཀྱི་ཉོན། །ཅེས་མདོ་སྡེའི་སྡེ་སྣོད་དུ་གསུངས་ལ། ཨ་བྷྱས། སྡེ་སྣོད་གསུམ་ཀའི་དོན་ཆ་ལྡན་དུ་སྟོན་པས་གསུམ་ཀའི་ཆར་གཏོགས་པར་བཞེད་དོ། །དེ་ལྟ་བུའི་ལུང་སྡེ་སྣོད་གསུམ་འཆད་ཉན་ཀྱིས་གཏན་ལ་འབེབས་ཤིང་། བསླབ་པ་རིན་པོ་ཆེ་གསུམ་སྒྲུབ་པ་ཉམས་ལེན་གྱིས་རྒྱུད་སྨིན་པར་མཛད་པ་དེ་ལ་བསྟན་པ་འཛིན་པའི་གང་ཟག་ཞེས་བྱ་ཞིང་། དེ་ཇི་སྲིད་གནས་ཀྱི་བར་བསྟན་པ་གནས་པ་ཞེས་བྱའོ། །བསྟན་པའི་གཏད་ལུགས་ཀྱང་། ཐུབ་དབང་ཉེ་བ་འཁོར་དང་ཀུན་དགའ་བོ། །ཤ་ནའི་གོས་ཅན་ཉེར་སྦས་དྷི་དྷི་ཀ ནག་པོ་ལེགས་མཐོང་བློས་མི་འབེབས་ལ་སོགས། །ཞེས་སོགས་གསུངས་པ་ལྟར་བྱོན་ནོ། །འདི་ལུང་ཕྲན་ཚེགས་ལས་གསུངས་པ། ཉན་ཐོས་པའི་ལུགས་ཡིན་ཀྱང་དོན་ལ་མི་འགལ་ཏེ། བསྟན་པའི་རྩ་བ་སོ་སོ་ཐར་པ་ཡིན་པས་སོ། །

བསྟན་འཛིན་ཤིང་རྟའི་སྲོལ་འབྱེད་བྱོན་ཚུལ།

གསུམ་པ་བསྟན་འཛིན་ཤིང་རྟའི་སྲོལ་འབྱེད་བྱོན་པའི་ཚུལ་ལ་གསུམ། ཟབ་མོ་ལྟ་བའི་བརྒྱུད་ལ་ཀླུ་སྒྲུབ་ཡབ་སྲས་བྱོན་ཚུལ། རྒྱ་ཆེན་སྤྱོད་པའི་བརྒྱུད་པ་བྱམས་པའི་རྗེས་འབྲང་ཐོགས་མེད་སྐུ་མཆེད་བྱོན་ཚུལ། ཉམས་ལེན་བྱིན་རླབས་ཀྱི་བརྒྱུད་པ་བྱོན་ཚུལ་ལོ། །དང་པོ་ནི། བདག་ཉིད་ཆེན་པོ་འཕགས་པ་ཀླུབ་སྒྲུབ་འདི། སྔོན་བསྐལ་པ་དཔག་ཏུ་མེད་ཅིང་ཆེས་མང་པོའི་སྔ་རོལ་དུ་དེ་བཞིན་གཤེགས་པ་སྒྲ་གཅན་ཟིན་ལས། དང་པོར་ཐུགས་བསྐྱེད་པར་མཛད་ཅིང་། དེ་བཞིན་གཤེགས་པ་མར་མེ་མཛད་ཀྱིས་ཀྱང་ལུང་བསྟན་པར་མདོ་ལས་གསུངས་ལ་ཐུབ་པའི་དབང་པོ་འདིས་ལུང་བསྟན་པ་ནི། ལང་ཀར་གཤེགས་པ་ལས། སོ་སོ་རང་རིག་ཐེག་པ་ནི། །རྟོག་གེ་བ་ཡིས་སྤྱོད་ཡུལ་མིན། །མགོན་པོ་འདས་པའི་འོག་ཏུ་ནི། །འཛིན་པར་སུ་འགྱུར་བཤད་དུ་གསོལ། །བདེ་གཤེགས་མྱ་ངན་འདས་པའི་འོག །ཚུལ་རྣམས་འཛིན་པར་འགྱུར་བ་དེ། །དུས་དག་འདས་ནས་འབྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་སྒྲུབ་སྟེ། །བདེ་བ་ཅན་དུ་དེ་འགྲོ་འོ། །ཞེས་དང་། སྤྲིན་ཆེན་པོ་ལས། ཀུན་དགའ་བོ། ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱི་མཐོང་ན་དགའ་བ་ཞེས་བྱ་བ་འདི་ནི། ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན། ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱི་རབ་ཏུ་དང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བ་འགྱུར་རོ། །ཞེས་དང་། འཇམ་དཔལ་རྩ་རྒྱུད་སོགས་མདོ་རྒྱུད་དུ་མ་ནས་ལུང་བསྟན་པའི་བདག་ཉིད་ཆེན་པོ་ཀླུ་སྒྲུབ་དེ་ཉིད་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ན། ལྷོ་ཕྱོགས་བེ་ཏའི་ཡུལ་དུ་བྲམ་ཟེ་རིགས་ཕུན་སུམ་ཚོགས་པ་ཞིག་བུ་མེད་པ་ལ། རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་ཅེས་ལྷས་ལུང་བསྟན་ནོ། །དེ་ལྟར་བྱས་ནས་གསོལ་བ་བཏབ་པས། ཟླ་བ་དགུ་ན་ཁྱེའུ་གཅིག་བཙས་ཏེ་མཚན་མཁན་ལ་བསྟན་པས། མཚན་བཟང་མོད་ཀྱི། འོན་ཀྱང་ཞག་བདུན་གྱི་ཚེ་ལས་མེད་ཟེར། དེ་ལ་ཅིས་ཕན་དྲིས་པས། བྲམ་ཟེ་བརྒྱ་ལ་ཆོས་སྟོན་དྲངས་ན་ཟླ་བ་བདུན་དང་། དགེ་སློང་བརྒྱ་ལ་ཆོས་སྟོན་དྲངས་ན་ལོ་བདུན་ཐུབ། དེ་ལས་ཐབས་མེད་ཟེར། དེ་ལྟར་བྱས་ཏེ་ལོ་བདུན་དུ་ཉེ་བ་ན། བུའི་རོ་མཐོང་བ་ཕ་མས་མ་བཟོད་དེ་གཡོག་དང་བཅས་པ་འཁྱམ་དུ་བཏང་སྟེ། རིམ་གྱིས་སོང་ནས་ཁར་ས་པ་ཎའི་ཞལ་ལྟས། རིམ་གྱིས་ན་ལེནྡྲའི་སྒོ་དྲུང་དུ་སོང་སྟེ། སྙན་ངག་གི་རིག་བྱེད་བསྒྲགས་པ། དེ་ན་བྲམ་ཟེ་སྒྲ་གཅན་འཛིན་བཞུགས་པས་གསན་ནས། ནང་དུ་ཁྲིད་དེ་ཇི་ལྟར་གྱུར་པའི་རྒྱུ་མཚན་ཞུས་པས། རབ་ཏུ་བྱུང་ན་ཐབས་ཡོད་གསུངས་ཏེ་རབ་ཏུ་འབྱུང་བར་ཁས་བླངས་ནས། ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་སྟེ་གཟུངས་འདོན་དུ་བཅུག ཁྱད་པར་ལོ་བདུན་ལོན་པའི་ནུབ་མོ་མཚན་ཐོག་ཐག་བཏོན་པས་འཆི་བདག་གི་འཇིགས་པ་ལས་གྲོལ། དེ་ནས་ལོ་བརྒྱད་ལོན་པ་དང་། བྲམ་ཟེ་ཆེན་པོ་དེ་ཉིད་ལ་རབ་ཏུ་བྱུང་། རིག་པའི་གནས་རྣམས་དང་། ཐེག་པ་ཆེ་ཆུང་ཐམས་ཅད་ལ་མཁས་པར་སྦྱངས་སོ། །ཕྱིས་ཕ་མ་དང་མཇལ་བས་དགའ་བར་གྱུར། །དེ་ནས་བྲམ་ཟེ་ཆེན་པོ་དེ་ཉིད་ལ་དཔལ་གསང་བ་འདུས་པ་ལ་སོགས་པའི་གསང་སྔགས་ཀྱི་ཆོས་ཞུས་པས། དེས་ཀྱང་དཀྱིལ་འཁོར་དུ་བཅུག དབང་བསྐུར་རྒྱུད་བཤད། ཞལ་ནས་སྙན་དུ་བརྒྱུད་པའི་གདམས་པ་དང་། རྗེས་སུ་བསྟན་པ་མ་ལུས་པ་གནང་ངོ་། །དེ་ཉིད་ལ་མཁན་པོ་ཞུས་ཏེ་བསྙེན་པར་རྫོགས་པ་མཛད། མཚན་དགེ་སློང་དཔལ་ལྡན་ཞེས་གྲགས། དེའི་ཚེ་མཁན་པོས་ལོ་བཅུ་གཉིས་སུ་མུ་གེ་འོང་བས། གཙུག་ལག་ཁང་ཉམས་དམས་པར་གཟིགས་ནས། དགེ་འདུན་གྱི་ཞལ་ལྟ་བར་དགེ་སློང་དཔལ་ལྡན་བསྐོས་ཏེ། མཁན་པོ་དཔལ་གྱི་རི་ལ་སྤྱོད་པ་ལ་གཤེགས་པའི་མཚན་བྲམ་ཟེ་ཆེན་པོ་ས་ར་ཧ་ཞེས་གྲགས་སོ། །དེར་སློབ་དཔོན་གྱིས་ཐུགས་དགོངས་ལ་གསེར་འགྱུར་གྱི་རྩི་བྱས་ནས། དཀོན་མཆོག་དང་དགེ་འདུན་གྱི་ཞབས་ཏོག་བྱའོ་སྙམ་དུ་དགོངས་ཏེ། སློབ་དཔོན་བྷ་ལི་བ་ཞེས་བྱ་ལ་གསེར་འགྱུར་གྱི་གདམས་ངག་ཞུས། གླིང་བར་ནས་གསེར་འགྱུར་གྱི་རྫས་རྣམས་བླངས་ནས་གསེར་འགྱུར་བྱས་པས་མ་གྲུབ་པ་དང་། ཆང་ཚོང་མ་ཞིག་གི་སྐྱ་བ་གསེར་དུ་འདུག་པ་མཐོང་ནས། དེ་ལ་ཞུས་པས་གསེར་འགྱུར་གྲུབ་སྟེ། ཟངས་རྣམས་གསེར་དུ་འགྱུར། མུ་གེ་མ་བྱུང་པའི་ས་ནས་འབྲུ་མང་པོ་དྲངས་ཏེ་དགེ་འདུན་གྱི་གདུགས་ཚོད་སྦྱར། དེའི་ཚེ་ཡུལ་ཕྱོགས་ཀྱི་མི་སྟོབས་མེད་རྣམས་ཤི སྟོབས་ཆེན་རྣམས་གཞན་དུ་དེངས་ཏེ་ཡུལ་སྟོང་པར་གྱུར་པ་པཎྜི་ཏ་རྣམས་ཀྱིས་རིག་ནས། ཁྱེད་ཀྱི་དགེ་འདུན་ལ་མ་ཞུས་པར་གསེར་འགྱུར་བྱས། དགེ་འདུན་ལོག་འཚོ་ལ་བཀོད་འདུག་པས་གནས་ནས་ཕྱུང་ལ་གཙུག་ལག་ཁང་དང་། མཆོད་རྟེན་བྱེ་བ་གྱིས་ཤིག་ཅེས་བསྒོ་བའོ། །དེའི་ཚེ་དགེ་སློང་བདེ་བྱེད་ཅེས་བྱ་བས་རིགས་པའི་རྒྱན་ཞེས་བྱ་བའི་འབུམ་ཕྲག་བཅུ་གཉིས་པ་བྱས་ནས་ཐམས་ཅད་སུན་འབྱིན་པ་ལ། དེའི་གཉེན་པོར་ཆོས་སྡེ་སྣོད་མང་པོ་གསུངས་ནས། ལྟ་བ་ལོག་པ་རྣམས་སུན་ཕྱུང་ངོ་། །དེར་བྱིས་པ་གཉིས་ཆོས་ཉན་དུ་འོང་པའི་ཚེ། དྲི་ཞིམ་པོས་འཁོར་ཀུན་ཏུ་ཁྱབ་པར་གྱུར་ཅིང་། སོང་བ་ན་དྲི་མེད་པར་གྱུར་པ་དང་། དེ་གཉིས་ལ་རྒྱུ་མཚན་དྲིས་པས། ངེད་ཀླུའི་རྒྱལ་པོ་འཇོག་པོའི་བུ་ཡིན། མི་ཡུལ་དུ་འགྲོ་བ་ལ་ཙནྡ་གོར་ཤིརྵའི་སྲུང་བ་བྱས་པ་ཡིན་ཟེར་རོ། །དེར་ཙནྡ་དེ་ལ་སྒྲོལ་མའི་སྐུ་ཅིག་བཞེངས་ན་ཕན་ཡོན་ཆེ་བར་དགོངས་ནས། ཙནྡ་དེ་བླང་དུ་ཡོད་དམ་བྱས་པས། ཡབ་ལ་དྲི་ཡིས་ཟེར་ནས་དྲིས་པས། སློབ་དཔོན་ཀླུའི་ཡུལ་དུ་འབྱོན་ན་འབུལ་ཟེར་བས། ཞལ་གྱི་བཞེས་ནས་ཀླུའི་ཡུལ་དུ་བྱོན། ཀླུའི་ཁབ་སྒོ་ན་བཞུགས་པ་དང་། ཀླུའི་རྒྱལ་པོ་ན་རེ། དུག་གི་མི་ཚུགས་ན་ནང་དུ་བྱོན་ཟེར་བས་བྱོན། ཀླུའི་རྒྱལ་པོ་འཁོར་དང་བཅས་པ་ལ་ཆོས་བསྟན། བསོད་སྙོམས་བཞེས་སོ། །དེའི་ཚེ་ཀླུ་རྣམས་ཀྱི་བཞུགས་པར་ཞུས་པ་དང་། ང་མཆོད་རྟེན་བྱེ་བ་བཞེངས་འདམ་འཚོལ་བ་དང་། འབུམ་གདན་འདྲེན་དུ་འོངས་ཀྱིས། བསྡད་མི་ཁོམ། ཕྱིས་ཡོང་བ་སྲིད་གསུངས་ཏེ། འདམ་མང་པོ་དང་། འབུམ་དང་། ཡི་གེ་ཉུང་ངུ་མང་གདན་དྲངས་ཏེ། འབུམ་གྱི་ཞབས་ནས་བག་ཙམ་ཀླུས་མ་བསྐུར་ཞེས་གྲགས་སོ། །དེ་ནས་འདམ་དེས་འཛམ་བུའི་གླིང་དུ་མཆོད་རྟེན་བྱེ་བ་ལ་སོགས་པ་བཞེངས། ཀླུ་རྣམས་ཀྱིས་གྲོགས་བྱས་ཏེ་ཕལ་ཆེར་གྲུབ་ལ། འགའ་ཞིག་ཀླུའི་ཡུལ་དུ་མི་འགྲོ་བའི་ཕྱིར་མ་བྱས་ཟེར་ཏེ། དེ་ན་ཀླུ་སྒྲུབ་ཞེས་མཚན་དུ་གྲགས་སོ། །

ཀླུ་སྒྲུབ་ཀྱི་སྐད་དོད་ནཱ་གརྫུ་ནའི་ནཱ་ག་ནི་ཀླུ་སྟེ། ཆོས་དབྱིངས་སུ་སྐྱེས་པ་རྟག་ཆད་གཉིས་ཀྱི་མཐའ་ལ་མི་གནས་པ། གསུང་རབ་རིན་པོ་ཆེའི་བང་མཛོད་ལ་མངའ་བརྙེས་པ་བདག་མེད་རྟོགས་པའི་ཡེ་ཤེས་ཀྱི་གྲུབ་མཐའ་ངན་པའི་བུ་ཤིང་བསྲེག་ཅིང་གསལ་བའི་ལྟ་བ་དང་ལྡན་པས་ཀླུའོ། །ཨར་ཛུ་ན་ནི་སྲིད་སྒྲུབ་སྟེ། ཆོས་ཀྱི་རྒྱལ་སྲིད་སྐྱོང་བ་དང་། ཉོན་མོངས་པའི་དགྲ་ཚོགས་འདུལ་བས་སྲིད་སྒྲུབ་ཏེ་ཀླུ་སྒྲུབ་བོ། །ཚིག་གསལ་དུ། གང་ཞིག་མཐའ་གཉིས་གནས་ལ་གནས་གསལ་ཞིང་། །རྫོགས་སངས་རྒྱས་བློ་རྒྱ་མཚོ་སྐྱེ་བ་བརྙེས། །དམ་ཆོས་མཛོད་ཀྱི་ཟབ་མོ་ཉིད་ཇི་ལྟར། །རྗེས་སུ་རྟོགས་ཤིང་ཐུགས་རྗེས་སྟོན་པར་མཛད། །གང་གི་ལྟ་བའི་མི་དག་གིས། །ད་དུང་ཕས་རྒོལ་གཞུང་ལུགས་ཀྱི། །བུ་ཤིང་དང་ནི་འཇིག་རྟེན་གྱི། །ཡིད་ཀྱི་མུན་རྣམས་འཇོམས་པར་མཛད། །གང་གི་གཉིས་མེད་ཡེ་ཤེས་གསུང་མདའི་ཚོགས། །ལྷ་དང་བཅས་པའི་གདུལ་བྱའི་འཇིག་རྟེན་ལ། །ཁམས་གསུམ་དག་ཏུ་རྒྱལ་ཐབས་ལེགས་མཛད་པས། །སྲིད་པའི་དགྲ་སྡེ་མ་ལུས་འཇོམས་མཛད་པ། །ཀླུ་སྒྲུབ་དེ་ལ་ཕྱག་འཚལ་ནས་ནི་དེའི། །ཞེས་གསུངས་སོ། །དེ་ནས་ལི་ཁ་ར་ཤིང་འཕེལ་དུ་ཡང་གསེར་འགྱུར་བྱས་ཏེ་སྦྱིན་པ་རྒྱ་ཆེན་པོ་མཛད། དེའི་ཚེ་བྲམ་ཟེ་རྒན་རྒོན་གཉིས་ལ་གསེར་མང་པོ་གནང་པས་དད་སྟེ། རྒན་པོས་ཉེ་གནས་བྱས། ཆོས་བསྟན་པས་སློབ་དཔོན་ཀླུའི་བྱང་ཆུབ་ཅེས་མཆོག་བརྙེས་པར་གྱུར་ཏོ། །དེ་ནས་ཤར་ཕྱོགས་ཊ་ཝེ་ས་དང་། ཡུལ་ར་དྷར་ཡང་བྱོན་ནས་ལྷ་ཁང་མང་པོ་བཞེངས། དེ་ནས་སེང་ལྡེང་གི་ནགས། དྲི་ལྡན་གྱི་འདབས་སུ་བྱོན་ནས། དྲིལ་བུ་ལྟ་བུའི་བྲག་གསེར་དུ་བསྒྱུར་བར་རྩོམ་པའི་ཚེ། མ་ཧེ་འཚོ་བའི་བྱིས་པ་ཅིག་ནགས་ཀྱི་ནང་དུ་ཕྱིན་པ་ན། དེ་ལ་རྒན་མོ་གཅིག་སྣང་བ་ན་རེ། ཁྱོད་ཀྱི་བཙུན་པ་མ་ཀི་ཚོའི་ནང་ན་ཀླུ་སྒྲུབ་བྱ་བ་ཡོད་ཀྱིས། དེ་ལ་ཁྱོད་རང་གི་མ་རྒན་མོ་ན་རེ། རེ་ཤིག་འདིར་ཤོག་གྱིས་དང་ཟེར། ཕྱིན་པས་གང་ཡིན་ངོ་མ་ཤེས། སླར་ལོག་འོངས་པས། ཏ་ལའི་ལོ་མ་བཟུང་ནས་ཁ་ལྟ་བྱེད་པ་དེ་ཡིན། ཆོས་གོས་ཀྱི་རྒྱབ་ན་ཡི་གེ་ཨ་གཅིག་ཀྱང་ཡོད་གསུངས། དེར་དེ་ལ་དེ་སྐད་བྱས་པས། ཀླུ་སྒྲུབ་ཀྱི་བྱོན་པའི་ཚེ་དེར་སྒྲོལ་མ་ལྷ་ལྔ་ཞལ་གཟིགས། དེའི་ཞལ་ནས། ཁྱོད་ཀྱིས་གསེར་འགྱུར་གྱིས་སེམས་ཅན་གྱི་དོན་བྱས་པ་ཡང་བཟང་སྟེ། དེ་བས་ཀྱང་མཆོག་བསྒྲུབ་ན་སེམས་ཅན་གྱི་དོན་ཆེན་པོ་དེ་ལས་འབྱུང་བས། དཔལ་གྱི་རི་ལ་སྒྲུབ་པ་གྱིས་ཤིག་གསུངས་ཏེ་མི་སྣང་པར་གྱུར། དེར་དེའི་སྒྲུབ་ཐབས་ཀྱང་མཛད་དོ། །དེ་ནས་སྒྲ་མི་སྙན་དུ་གཤེགས་པའི་ལམ་དུ་གྲོང་ཁྱེར་ས་ལ་ཨ་ན་ན་བྱིས་པ་ཅིག་འཇི་ཏ་ཀའི་ལག་བྲིས་ལས། རྒྱལ་པོར་ལུང་བསྟན་ཏེ་སྒྲ་མི་སྙན་དུ་བྱོན། ན་བཟའ་ཤིང་ལ་བཀལ་ནས་ཁྲུས་འཛད་པས། གོས་དེ་གཞན་གྱིས་ཁྱེར་བ་ལ། ངའི་ཡིན་བྱས་པས་ང་བདག་ཅན་ཟེར་ནས་གཏད་སྐད། དེར་སྒྲ་མི་སྙན་པའི་དོན་བྱས་ཏེ་བྱོན། དཔལ་གྱི་རི་ལ་གཤེགས་པར་དགོངས་ནས་བྲམ་ཟེ་ཆེན་པོའི་དྲུང་དུ་ཕྱག་རྟེན་ལ་བདུད་རྩིའི་བུམ་པ་གང་ཁྱེར་ནས་བྱོན་པའི་ལམ་དུ་སྔར་ལུང་བསྟན་པའི་བྱིས་པ་དེ་རྒྱལ་པོ་བདེ་སྤྱོད་བཟང་པོ་ཞེས་པར་གྱུར་ཏེ་དེས་བདག་གི་མཆོད་གནས་སུ་མ་མཐའ་ལོ་གསུམ་བཞུགས་པ་ཞུ་ཟེར་ནས་གཏོང་དུ་མ་ཉན་ཏེ་ལོ་གསུམ་བཞུགས་ནས་རྒྱལ་པོ་ཡབ་ཡུམ་གྱི་དོན་མཛད། དེ་ནས་དཔལ་གྱི་རི་ལ་བྱོན། བྲམ་ཟེ་ཆེན་པོ་ལ་བདུད་རྩིའི་བུམ་པ་ཕུལ་བས། ཁྱེད་བདུད་རྩི་ལ་དགའ་ན་ངས་རྒྱ་མཚོ་འདི་ཡང་བདུད་རྩིར་བསྒྱུར་བར་བྱའོ་གསུངས་ནས། སྐད་ཅིག་གིས་རྒྱ་མཚོ་ཡང་བདུད་རྩིར་བྱས་སོ། །དེ་ནས་སློབ་དཔོན་ཡབ་སྲས་དཔལ་གྱི་རི་ལ་སྒྲུབ་པ་མཛད་པས་སློབ་དཔོན་གྱིས་བདེན་པ་མངོན་སུམ་དུ་གཟིགས་ཚད་མའི་སྐྱེས་བུར་གྱུར་ནས། འཛམ་བུའི་གླིང་དུ་སེང་གེའི་སྒྲ་ལན་གསུམ་དུ་བསྒྲགས་ཏེ་རིགས་ཚོགས། བསྟོད་ཚོགས། གཏམ་ཚོགས་སོགས་དང་མདོ་ཀུན་ལས་བཏུས། ཤེས་རབ་བརྒྱ་པ། གསང་བ་འདུས་པའི་སྒྲུབ་ཐབས་མདོར་བྱས། བསྐྱེད་རྫོགས་ཀྱི་གཞུང་དུ་མ། གཞན་ཡང་རིགས་གནས་ཐམས་ཅད་ལ་བསྟན་བཅོས་རེ་རེ་ཡང་མཛད། ལོ་དྲུག་བརྒྱ་བཞུགས་ནས་བསྟན་པ་ཆེས་ཆེར་གསལ་བར་མཛད་དོ། །བདག་ཉིད་ཆེན་པོ་ཀླུ་སྒྲུབ་ལ་སློབ་མའི་མཆོག ཨརྻ་དེ་བ་ཞེས་གྲགས་པ། འཇམ་དཔལ་རྩ་རྒྱུད་ལས་ལུང་བསྟན་པ་དེ་ཉིད། སྔོན་སྟོན་པའི་སྤྱན་སྔར་འཁོར་གྱི་ནང་ནས་བྱང་ཆུབ་སེམས་དཔའ་ལག་ན་པདྨོ་ཞེས་པས་མུ་སྟེགས་འདུལ་བར་སྨོན་ལམ་བཏབ་ཅིང་། སྟོན་པས་ཀྱང་རྗེས་སུ་གནང་བ་དེ། སིང་ག་ལའི་རྒྱལ་པོའི་མེ་ཏོག་གི་ལྡུམ་རར་པདྨོའི་སྦུབས་ལས་འཁྲུངས་པས། རྒྱལ་པོའི་སྲས་སུ་བཟུང་བ་ཀླུ་སྒྲུབ་ཀྱི་སྤྱན་སྔར་རབ་ཏུ་བྱུང་སྟེ། རིག་གནས་མཐའ་དག་ལ་མཁས་པར་གྱུར་པ་དེས། མ་གོམ་ཞེས་པ་ལྷ་དབང་ཕྱུག་གིས་མངལ་སྐྱེས་ཐམས་ཅད་ཀྱིས་མི་ཐུབ་པར་བྱིན་གྱིས་བརླབས་པ་བཏུལ་ནས། ཕྱིས་ནང་པ་ལ་ཞུགས་ནས་སློབ་དཔོན་དཔའ་བོ་ཞེས་པ་དང་། སློབ་དཔོན་སངས་རྒྱས་སྐྱང་ཅེས་པ་མཆོག་བརྙེས་པ་དང་། སློབ་དཔོན་ལེགས་ལྡན་འབྱེད་ཅེས་པ་སྐུ་ལུས་དེ་ཉིད་ཀྱིས་སྤྱན་རས་གཟིགས་ཀྱི་ཞིང་ཁམས་སུ་གཤེགས་པར་གྲགས་པ་དང་། སློབ་དཔོན་ན་ག་བོ་དྷི་ཞེས་རིག་པ་འཛིན་པའི་ས་ཐོབ་ནས། ལྷོ་ཕྱོགས་དཔལ་གྱི་རི་ལ་ད་ལྟའང་བཞུགས་ནས་སྐལ་བར་ལྡན་པ་རྣམས་དངོས་སུ་བྱིན་གྱིས་རློབ་པ་སོགས་མཆོག་ཐུན་མོང་གི་དངོས་གྲུབ་བརྙེས་པའི་སློབ་མ་བསམ་གྱིས་མི་ཁྱབ་པ་བྱོན་པའི་ནང་ནས་འཕགས་པའི་དགོངས་པ་གསལ་བར་མཛད་པའི་མཆོག་གོ །དཔལ་ལྡན་ཟླ་བ་གྲགས་པ་ནི་ཡུལ་རྒྱ་གར་ལྷོ་ཕྱོགས་ས་མ་ཎ་ཞེས་པའི་གྲོང་ས་མན་ཏར། ཡབ་བྲམ་ཟེ་འགྲེ་རི། ཡུམ་ཟླ་བའི་སྒྲོན་མ་གཉིས་ལ་སྲས་མེད་པ། ལྷ་དབང་ཕྱུག་ཆེན་པོ་ལ་གསོལ་བ་བཏབ་པས། ཁྱེའུ་མཚན་དང་ལྡན་པ་རྨེ་བའི་ག་ཤལ་ཅན་གཅིག་འཁྲུངས། །མཚན་མཁན་ལ་བསྟན་པས། འདི་མིང་ཟླ་བ་གྲགས་པ་སྟེ། །སྟོང་ཉིད་ཏིང་འཛིན་སྨྲ་བར་བྱེད། །ཅེས་དང་། དེ་ནས་དབང་ཕྱུག་ཆེན་པོ་ལ་དྲིས་པས། འདི་མིང་ཟླ་བ་གྲགས་པ་སྟེ། །འདི་ནི་ང་ཡི་རིགས་འདས་ནས། །སྒྲ་གཅན་འཛིན་ནས་བདུན་འདས་པའི། །མཁན་པོ་ཟླ་བའི་མགོན་པོ་ལ། །ན་ལེནྡྲ་ཡི་གཙུག་ལག་ཁང་། །རབ་བྱུང་དགེ་སློང་ཆེན་པོར་འགྱུར། །སྟོང་ཉིད་ཏིང་འཛིན་སྨྲ་བར་བྱེད། །སངས་རྒྱས་བསྟན་པ་འདི་ཡིས་སྐྱོང་། །ཅེས་ལུང་བསྟན་པས། ཡུམ་གྱི་བསམ་པ་ལ་ཕའི་རིགས་མི་འཛིན་པའི་བུ་མ་སྐྱེས་པ་དང་འདྲ་ཟེར་ནས། མཁན་པོ་ཟླ་བའི་མགོན་པོ་ལ་ཕུལ། རབ་ཏུ་བྱུང་སྟེ། མདོ་རྒྱུད་ཀྱི་ཚིག་དོན་ལ་སྦྱངས། ཀླུ་སྒྲུབ་ཡབ་སྲས་ཀྱི་གསུང་རབ་ལ་རྟེན་ནས་མཁས་པ་ཆེན་པོར་གྱུར། སྐྱེ་བ་ལྔ་བརྒྱར་འཕགས་པ་འཇམ་དཔལ་གྱིས་བྱིན་གྱིས་བརླབས་ཤིང་། དངོས་པོར་འཛིན་པ་བཟློག་པའི་ཕྱིར་རི་མོར་བྲིས་པའི་བ་ལ་འོ་མ་འཇོས་ཏེ། དགེ་འདུན་གྱི་འཚོ་བ་སྦྱར་ཞིང་། རྡོའི་ཀ་བ་ལ་ཕྱག་མི་ཐོག་པ་དང་། དུ་རུ་ཀའི་དམག་བྱུང་པའི་ཚེ། རྡོའི་སེང་གེ་བསྐུལ་བས་དམག་ཟློག་ཏེ། ནམ་མཁའ་ནས་ལྷས། དཔལ་ལྡན་ཟླ་བ་གྲགས་པ་ཡིས། །སྟོབས་ལྡན་རྡོ་ཡི་སེང་གེ་བསྐུལ། །དུ་རུ་ཀ་ཡི་དམག་ཚོགས་ཟློག །ཤི་རྨས་མེད་པ་ངོ་མཚར་ཆེ། །ཞེས་བསྟོད་པ་དེས། རྩ་ཤིའི་འགྲེལ་པ་ཚིག་གསལ། གསང་འདུས་འགྲེལ་པ་སྒྲོན་གསལ་ཏེ་གསལ་བ་རྣམ་གཉིས་སུ་གྲགས་པ་དང་། འཇུག་པ་རྩ་འགྲེལ་ལ་སོགས་པའི་བསྟན་བཅོས་མང་དུ་མཛད་ཅིང་། བཤད་སྒྲུབ་ཀྱི་བསྟན་པ་རྒྱས་པར་མཛད་ནས་ལོ་བཞི་བརྒྱའི་བར་དུ་བཞུགས་སོ། །སློབ་དཔོན་འདི་འཕགས་པ་ཀླུ་སྒྲུབ་ཀྱི་དངོས་ཀྱི་སློབ་མ་ཡིན་མིན་ལ། བསྟན་པའི་བདག་པོ་རྗེ་བཙུན་ས་སྐྱ་པ་རྣམས། ཇོ་བོས། ཀླུ་སྒྲུབ་སློབ་མ་ཟླ་གྲགས་ཡིན། །ཞེས་པའི་དོན་ཀླུ་སྒྲུབ་ཀྱི་དགོངས་པ་སྐོང་བའམ། ཆོས་ཀྱི་རྒྱུད་པ་འཛིན་པའི་མཆོག་ལ་དགོངས་ཀྱི་དཔེར་ན་དབང་ཕྱུག་སྡེ་བར་ན་ཡོད་ཀྱང་། ཕྱོགས་གླང་ཆོས་གྲགས་ཅེས་བགྲང་པ་དང་འདྲ་ཞེས་གསུངས་ཤིང་། བཀའ་གདམས་རྒྱུད་པ་འདི་པའི་ལུགས་ཀྱི་དངོས་སློབ་ཏུ་བཞེད་དོ། །དེ་ལ་སློབ་དཔོན་ཙནྟྲ་གོ་མི་ལ་སོགས་པ་སློབ་མ་མང་དུ་བྱོན་པ་ལས། སྲས་ཀྱི་ཐུ་བོ་རིག་པའི་ཁུ་བྱུག་ཆེ་བ་ནི་བྲ་ཟེའི་རིགས་ལས་རབ་ཏུ་བྱུང་ཞིང་། གཞོན་ནུའི་དུས་ནས་ཟླ་བ་གྲགས་པའི་སྤྱན་སྔར་མཁས་པར་སྦྱངས་ནས་གྲུབ་པ་བརྙེས་ཏེ། སངས་རྒྱས་ཀྱི་བསྟན་པ་གསལ་བར་མཛད་ཅིང་། ལོ་སུམ་བརྒྱའི་བར་དུ་བཞུགས་སོ། །དེའི་སློབ་མ་རིག་པའི་ཁུ་བྱུག་ཆུང་བ་ནི། ཐོག་མར་མཚན་ཉིད་ཐེག་པ་ལ་མཁས་པར་སྦྱངས། ཀླུ་སྒྲུབ་ཡབ་སྲས་ཀྱི་དགོངས་པ་ཐུགས་སུ་ཆུད་དེ་རྡོ་རྗེ་ཐེག་པའི་ལམ་ལ་རྟེན་ནས་མཆོག་གི་དངོས་གྲུབ་བརྙེས་སོ། །བླ་མ་ཁ་ཅིག འདི་རི་ནག་པོའི་ཁོང་སེང་ན་བཞུགས་པའི་བླ་མ་ཨ་ཝ་དྷུ་ཏི་པ་དང་དོན་གཅིག་གསུངས་ལ། ཟབ་མོ་ལྟ་བའི་རྒྱུད་པ། དེ་དག་གི་ཡོན་ཏན་རྫོགས་པར་ནི་དཔལ་ལྡན་ཨ་ཏི་ཤ་ཉིད་ལ་མངའ་བ་ཡིན་ནོ། །ཤིང་རྟའི་སྲོལ་འབྱེད་གཉིས་པ་རྒྱ་ཆེན་སྤྱོད་པའི་བརྒྱུད་པ་བྱམས་པའི་རྗེས་འབྲང་ཐོགས་མེད་སྐུ་མཆེད་བྱོན་ཚུལ་ནི། མདོ་དགོངས་འགྲེལ་གྱི་འགྲེལ་ཆེན་དུ་ལུང་དྲངས་པར། ང་ནི་མྱ་ཅན་འདས་འོག་ཏུ། །ལོ་ནི་དགུ་བརྒྱ་ལོན་པ་ན། །ཞེས་དང་། འཇལ་དཔལ་རྩ་རྒྱུད་ལས། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །འཇིག་རྟེན་རིག་པ་སྟོན་བདག་ཉིད། །གཞུང་འབྱེད་ངང་ཚུལ་ཅན་དུ་འགྱུར། །དེ་ཡི་རིག་པ་གྲུབ་པ་ནི། །ས་ལའི་ཕོ་ཉ་མོ་ཞེས་བརྗོད། །དེ་ཡི་སྔགས་ཀྱི་མཐུ་ཡིས་ནི། །བློ་ནི་བཟང་པོ་སྐྱེ་བར་འགྱུར། །བསྟན་པ་ཡུན་རིང་གནས་བྱའི་ཕྱིར། །མདོ་ཡི་དེ་ཉིད་དོན་སྡུད་བྱེད། །ལོ་ནི་བརྒྱ་དང་ལྔ་བཅུ་འཚོ། །དེ་ལུས་ཞིག་ནས་ལྷ་ཡུལ་འགྲོ །འཁོར་བ་རྣམས་སུ་འཁོར་བ་ན། །ཡུན་རིང་བདེ་བ་རྗེས་མྱོང་ནས། །བདག་ཉིད་ཆེན་པོ་མཐར་གྱི་དེ། །བྱང་ཆུབ་ཐོབ་པ་འགྱུར་བ་ཡིན། །ཞེས་ལུང་བསྟན་ཏེ། དེ་ཡང་ཆོས་མངོན་པ་ལ་དགྲ་ལན་གསུམ་བྱུང་བའི་ཚེ། བྲམ་ཟེ་མོ་གསལ་བའི་ཚུལ་ཁྲིམས་ཞེས་པས། རྒྱལ་པོའི་རིགས་ཐོག་མེད་དང་། བྲམ་ཟེའི་རིགས་དབྱིག་གཉེན་གཉིས་ལུས་ལས་བསྐྲུན་ཏེ། ཆེར་སྐྱེས་པའི་ཚེ། ཕའི་ལས་གང་ཡིན་དྲིས་པས། མ་ན་རེ་ཁྱེད་དེའི་ཕྱིར་མ་བསྐྱེད་ཀྱིས་བློ་སྦྱང་གྱིས་ལ་བསྟན་པ་དར་བར་གྱིས་ཤིག་གསུངས་པས། རབ་ཏུ་བྱུང་སྟེ། གཅེན་གྱི་རི་བྱ་རྐང་གི་ཕུག་ཏུ་རྗེ་བཙུན་བྱམས་པ་ལོ་བཅུ་གཉིས་ཀྱི་བར་སྒྲུབས་པས་ཞལ་མངོན་སུམ་དུ་བསྟན་ནས་ཁྱོད་ཅི་འདོད་གསུངས་པས། ཐེག་པ་ཆེན་པོའི་ཆོས་དར་བར་འདོད་ཞུས་ཏེ། བྱམས་པའི་ཆོས་གོས་ཀྱི་གྲ་ལ་འཇུས་ནས་དགའ་ལྡན་དུ་བྱོན། ལྷའི་དྲོ་སྐད་ཙམ་དུ་བཞུགས་ནས་ཡུམ་གྱི་མདོ་ལ་སོགས་པ་ཐེག་ཆེན་གྱི་མདོ་སྡེ་མང་དུ་གསན། དེ་དག་གི་དོན་སྟོན་པའི་བསྟན་བཅོས་རྩོམ་པར་ཞུས་པས། བྱམས་ཆོས་ལྔ་མཛད། དེ་ནས་ཐོགས་མེད་ཀྱི་འཛམ་བུའི་གླིང་དུ་བྱོན་ནས་བྱམས་ཆོས་ལྔ་ཡི་གེར་བཏབ། མདོའི་དགོངས་འགྲེལ་ས་སྡེ་ལྔ། སྡོམ་རྣམ་པ་གཉིས་དེ་ཉིད་རྣམ་ངེས་དང་། རྒྱུད་བླའི་འགྲེལ་པ་དང་། དགོངས་འགྲེལ་གྱི་འགྲེལ་ཆེན་སོགས་བསྟན་བཅོས་མང་དུ་བརྩམས་ཏེ་བསྟན་པ་ཆེས་གསལ་བར་མཛད་ཅིང་། ས་གསུམ་པའི་རྟོག་པ་བརྙེས་སོ། །གཅུང་དབྱིག་གཉེན་གྱིས་ཁ་ཆེར་སློབ་དཔོན་འདུལ་བཟང་གི་དྲུང་དུ་བྱོན། མངོན་པ་སྡེ་བདུན། དགྲ་བཅོམ་གཉེར་སྦས་ཀྱིས་མཛད་པའི་བྱེ་བྲག་ཏུ་བཤད་པ་གཞུང་འབུམ་ཕྲག་གཅིག་ཡོད་པ་གསན་པས་ཚེགས་མེད་པར་མཁྱེན་ནས། རྒྱ་གར་དུ་བྱོན། གཅེན་ལ་ཐེག་ཆེན་གྱི་ཆོས་མང་དུ་གསན། འབྲེལ་གཏམ་མཛད་པས། གཅུང་སྤོབས་པ་ཤིན་ཏུ་མྱུར། གཅེན་ཅུང་ཟད་བུལ་བའི་ལན་བཟང་པོ་བྱུང་། དེའི་རྒྱུ་ཅི་ཡིན་ཞུས་པས། ཁྱོད་སྐྱེ་བ་ལྔ་བརྒྱར་པཎྜི་ཏར་གྱུར་པས་སྐྱེས་སྟོབས་ཀྱི་ཤེས་རབ་ཆེ་བ་ཡིན། ང་དེ་ལྟ་བུ་མིན་པས། ཡི་དམ་ཞིག་ལ་དྲིས་ཤིང་ལན་འདེབས་པ་ཡིན་གསུངས། དེ་བདག་ལ་སྟོན་པར་ཞུས་པས། རྗེ་བཙུན་ལ་ཞུ་ཡིས་གསུངས་ཏེ་ཞུས་པས། ཁོ་སོ་སོ་སྐྱེ་བོ་ཡིན་ཞིང་། དང་པོ་ཐེག་ཆེན་ལ་སྐུར་པ་བཏབ་པས་སྒྲིབ་པ་བྱང་བའི་ཕྱིར་དུ་ཐེག་ཆེན་གྱི་མདོ་འགྲེལ་མང་དུ་བརྩམས། གཙུག་ཏོར་རྣམ་རྒྱལ་ཐོན་ཕྱི་མ་ལ་འཇལ་གསུངས་པས། གཅེན་ལ་ལྷག་པར་དད་དེ། རྗེ་བཙུན་གྱི་གསུང་སྒྲུབ་པ་དང་། འབུམ་སྡེ་གོ་དགུའི་ཚིག་དོན་ཐུགས་ལ་མངའ་བས། བཀའ་དང་པོའི་དགོངས་པ་འགྲེལ་བ་མཛོད་རྩ་འགྲེལ། བར་པ་སེམས་ཙམ་དུ་འགྲེལ་པ་ཡུམ་གྱི་གཞུང་འགྲེལ། ཐ་མ་ངེས་དོན་དུ་བཤད་པ་རབ་ཏུ་འབྱེད་པ་སྡེ་བརྒྱད་དང་། གཞན་ཡང་ས་བཅུ་པའི་མདོ་ལ་སོགས་པའི་འགྲེལ་པ་མང་དུ་བརྩམས་ཏེ་བསྟན་པ་གསལ་བར་མཛད་དོ། །དེའི་སློབ་མ་རང་ལས་མཁས་པར་གྲགས་པ་བཞི་བྱོན་ཏེ། མངོན་པ་རང་ལས་མཁས་པ་སློབ་དཔོན་བློ་བསྟན། ཕར་ཕྱིན་རང་ལས་མཁས་པ་འཕགས་པ་རྣམ་གྲོལ་སྡེ། ཚད་མ་རང་ལས་མཁས་པ་སློབ་དཔོན་ཕྱོགས་ཀྱི་གླང་པོ། འདུལ་བ་རང་ལས་མཁས་པ་བྲམ་ཟེའི་བཙུན་པ་ཡོན་ཏན་འོད་དང་བཞིའོ། །དེ་ལ་སློབ་དཔོན་བློ་གྲོས་བརྟན་པ་ནས། དེའི་སློབ་མ་གང་བ་སྤེལ། དེས་ཀུ་ས་ལི་ཆེ་བ། ཀུ་ས་ལི་ཆུང་བ། དེས་དཔལ་ལྡན་ཨ་ཏི་ཤ་ལ་བརྒྱུད་དོ། །རྒྱ་ཆེན་སྤྱོད་པའི་བཤད་སྒྲུབ་ཀྱི་མན་ངག་རྫོགས་པར་མངའ་བ་འཕགས་པ་རྣམ་གྲོལ་སྡེ་ནི། ས་དང་པོ་རབ་ཏུ་དགའ་བའི་རྟོགས་པ་བརྙེས། སངས་རྒྱས་ལ་ཆོས་དངོས་སུ་གསན། མངོན་རྟོགས་རྒྱན་གྱི་འགྲེལ་པ། ཉི་ཁྲི་སྣང་བ་ལ་སོགས་པ་མཛད་དོ། །དེའི་སློབ་མ་བཙུན་པ་རྣམ་གྲོལ་སྡེ་ནི། རིག་པའི་གནས་མཐའ་དག་ལ་མཁས་པ། སངས་རྒྱས་ལ་ཆོས་གསན་ཅིང་། ཐེག་པ་ཆེན་པོ་སྦྱོར་ལམ་གྱི་རྟོགས་པ་བརྙེས་སོ། །དེའི་སློབ་མ་མཆོག་གི་སྡེ། དེའི་སློབ་མ་དུལ་བའི་སྡེ། དེའི་སློབ་མ་གྲགས་པའི་དཔལ་དང་། མཁན་པོ་རྣམ་སྣང་མཛད། མཁན་ཆེན་ཞི་བ་མཚོ་གསུམ་དོན་ཅིག་མཚན་གྱི་རྣམ་གྲངས་ཡིན་གསུངས། འདི་ཟ་ཧོར་རྒྱལ་པོའི་སྲས་སུ་སྐུ་འཁྲུངས། ཡོད་སྨྲའི་སྡེ་ལ་རབ་ཏུ་བྱུང་ཞིང་རིག་གནས་ལ་མཁས་པར་སྦྱངས། རྗེ་བཙུན་འཇམ་དབྱངས་ཀྱིས་རྗེས་སུ་བཟུང་སྟེ། ལོ་དགུ་བརྒྱ་དང་གོ་དགུ་བཞུགས་པར་གྲགས་ལ། གངས་ཅན་གྱི་ལྗོངས་འདིར་ཡང་བཀའ་དྲིན་མཆོག་ཏུ་ཆེ་བ་དེའི་སྐུ་ཚེའི་སྟོད་ཀྱི་སློབ་མ་སློབ་དཔོན་སེང་གེ་བཟང་པོ་སོགས་དང་། སྨད་ཀྱི་སློབ་མ་ཀ་མ་ལ་ཤཱི་ལ་སོགས་ཡིན་པ་ལས། སློབ་དཔོན་སེང་གེ་བཟང་པོ་ནི་རྒྱལ་རིགས་ལས་རབ་ཏུ་བྱུང་སྟེ་ཕྱི་ནང་གི་གྲུབ་མཐའ་ཐམས་ཅད་ལ་མཁས་པ། ཁྱད་པར་དུ་ཡུམ་གྱི་དོན་ལ་རིང་དུ་གོམས་པ་ཞིག་བྱུང་བ་ལས། དེས་རང་གི་མཁན་པོ་རྣམ་སྣང་མཛད་བཟང་པོ་ལ་བྱམས་པའི་སྒྲུབ་ཐབས་ཞུས་ནས་བསྒྲུབས་པས། རྨི་ལམ་དུ་དགེ་སློང་གུར་གུམ་གྱི་མདོག་ཅན་སྤྱོད་ལམ་མཛེས་པ་ཞིག་རྨིས་ཏེ། ཤར་ཕྱོགས་ཁརྶ་པ་ཎིར་སོངས་ཤིག་ཅེས་ལུང་བསྟན། སང་དེར་སོང་ནས་ཞག་གསུམ་དུ་སྙུང་གནས་བྱས་ཏེ་རྨི་ལམ་བརྟགས་པས། ཐོ་རངས་རྨི་ལམ་དུ་ཨོ་ཏྱནྟ་པུ་རི་པི་ཧ་རིའི་གན་ཏོ་ལའི་སྟེང་གི་ནམ་མཁའ་ལ་སྤྲིན་ཕུང་འཐུག་པོ་ཞིག་གི་གསེབ་ན་ལྷའི་བུ། ལུས་སྟོད་སྤྲིན་གྱི་གསེབ་ནས་ཕྱུང་ནས་མཆོད་རྫས་སྣ་ཚོགས་ཀྱིས་མཆོད་པ་མཐོང་སྟེ་ཅི་བྱེད་དྲིས་པས། རྗེ་བཙུན་བྱམས་པ་བརྒྱད་སྟོང་པ་གསུངས་པ་ལ་མཆོད་པ་བྱེད་པ་ཡིན་ཟེར་ཏེ་རིང་དུ་བལྟས་པས། རྗེ་བཙུན་ཞལ་གསེར་གྱི་མདོག་ཅན་སྤྱི་གཙུག་མཆོད་རྟེན་གྱིས་སྤྲས་པ། ཕྱག་གཡས་ཆོས་འཆད་ཀྱི་ཕྱག་རྒྱ་མཛད་པ་ཙམ་ཞིག་མཐོང་ནས་ཕྱག་དང་མཆོད་པ་བྱས་ཏེ། ཉིད་ཀྱི་བསྟན་བཅོས་ལ་དེང་སང་འགྲེལ་པ་མང་དུ་མཆིས་ན་གང་གིས་གང་གི་རྗེས་སུ་འཇུག་པར་བགྱི། །ཞེས་ཞུས་པས། ཐམས་ཅད་ཀྱི་གཞུང་ལེགས་པར་རྟོགས་ལ་འཐད་པ་བསྡུས་ཏེ། ཁྱོད་ཀྱི་ཕྱོགས་གཅིག་ཏུ་རྩོམས་ཤིག་ཅེས་གནང་བ་ཐོབ་པའོ། །སང་དེ་མཆོད་པ་བྱས་ནས་བསྟན་བཅོས་རྩོམ་པའི་སྦྱིན་བདག་བཙལ་བའི་ཕྱིར། ཤར་ནས་ནུབ་ཏུ་བྱོན་པ་དང་། རྒྱལ་པོ་ས་སྐྱོང་ཞེས་བྱ་བ་ཡུམ་ལ་ལྷག་པར་དད་པ་ཞིག་བྱུང་སྟེ། ཕྱོགས་ཀུན་ཏུ་ཡུམ་འཆད་པ་འཚོལ་བ་ལ་ཞུགས་པ་ན། དེའི་ཚེ་ཡུམ་འཆད་པ་ལ་སློབ་དཔོན་སེང་གེ་བཟང་པོ་མཁས་པར་ཐོས་པས་སྤྱན་འདྲེན་དུ་བཏང་པའི་ཕོ་ཉ་དང་ལམ་དུ་འཕྲད་དོ། །དེ་ལས་འཕྲོས་ཏེ་རྒྱལ་པོ་ས་སྐྱོང་གི་ལོ་རྒྱུས་ནི། སྔོན་རྒྱ་གར་ཤར་ཕྱོགས་སེང་ལྡེང་གི་ནགས་སུ་ཤིང་གི་ལྷ་ཞིག་ཡོད་པ་དང་། ཡུལ་དེའི་ཕྱུགས་རྫི་དུས་ལས་འདས་པའི་ཆུང་མ་ཕྱུག་འཚོར་སོང་བ་གཉིས་ཀྱི་བུ་གཽ་པཱ་ལ་ཞེས་པ་ལ། ཕས་ནོར་བུ་རིན་པོ་ཆེ་སྦྱིན་པས་དེའི་ཕན་ཡོན་གྱིས་ས་ཐམས་ཅད་ལ་ཁ་ལོ་བསྒྱུར་བ་ཞིག་བྱུང་སྟེ། དེས་ན་ལནྡྲ་བརྩིགས་སོ། །དེའི་བཙུན་མོ་དབང་ཆུང་བས། རྒྱལ་པོ་དབང་དུ་བྱ་བའི་ཕྱིར་སློབ་དཔོན་བྲམ་ཟེ་ཞིག་ལ་རིག་པ་ཞུས་པས། དེས་རི་བོ་གངས་ཅན་ལས་སྨན་བླངས་ཏེ་རྒྱ་བཏབ་ནས། བྲན་མོ་ལ་བསྐུར་བས་དེ་ས་བཏེགས་ལས་འདྲེད་དེ་བཏུང་བ་ཆུས་ཁྱེར་ཏེ་རིམ་གྱི་རྒྱ་མཚོར་ཞུགས་པ། ཀླུའི་རྒྱལ་པོས་བླངས་ཏེ་ཟོས་པས། ཀླུའི་རྒྱལ་པོ་རྒྱ་མཚོ་སྐྱོང་དབང་དུ་གྱུར་ནས་བཙུན་མོ་དང་འཕྲད་པས་སྲས་དཔལ་ལྡན་ཆོས་སྐྱོང་བལྟམས་སོ། །དེས་ལྷ་ཁང་གཞན་ལས་ཁྱད་པར་འཕགས་པ་ཞིག་བརྩིགས་པར་འདོད་ནས་བལྟས་མཁན་ལ་དྲིས་པས། དགེ་སྦྱོང་དང་བྲམ་ཟེའི་རས་ལ་སྡོང་བུ་བྱས་ཏེ་རྒྱལ་པོ་དང་ཚོང་དཔོན་གྱི་ཁྱིམ་ནས་མར་བླངས་ཤིང་། དཀའ་ཐུབ་པའི་ལྷ་གནས་ནས་ཀོང་བུ་བླངས་ཏེ་མར་མེ་སྤར་བ། ཡིད་དམ་གྱི་མདུན་ནུ་བཞག་སྟེ་གསོལ་བ་བཏབ་ན། ཆོས་སྐྱོང་གི་སྤྲུལ་པས་ཀོང་བུ་སྐྱུར་བར་འགྱུར་བས། དེར་རྩིགས་ཤིག་ཟེར་ནས་དེ་ལྟར་བྱས་པས། བྱ་རོག་ཞིག་བྱུང་ནས་ཀོང་བུ་མཚོར་སྐྱུར་བས་ཡིད་ཆད་པ་ན། མཚན་མོ་ཀླུའི་རྒྱལ་པོ་སྦྲུལ་མགོ་ལྔ་པ་བྱུང་སྟེ། ང་ཁྱོད་ཀྱི་ཕ་ཡིན་པས་མཚོ་སྐམས་ལ་བརྩིག་ཏུ་གཞུག་གོ །ཞག་བདུན་བདུན་ན་མཆོད་པ་ཆེན་པོ་བགྱིས་ཤིག་ཟེར་ཏེ། དེ་བཞིན་བྱས་པས་ཞག་ཉེར་གཅིག་ན་མཚོ་སྐམས། ཨོ་ཏྱནྟ་པུ་རིའི་གཙུག་ལག་ཁང་བཞེངས་སོ། །རྒྱལ་པོ་དེ་ལ་སྲས་རྒྱལ་པོ་དང་། པནྜི་ཏ་དང་། གྲུབ་ཐོབ་དང་། སྡིག་སྤྱོད་ཀྱི་རྒྱལ་པོ་དང་བཞི་ལས། དེའི་སྲས་དེ་ཝ་པཱ་ལ་ཞེས་པ་བྱུང་། དེའི་སྲས་རྒྱལ་པོ་ས་སྐྱོང་ཡིན་ཏེ། དེས་གོང་དུ་བཤད་པ་ལྟར། སློབ་དཔོན་སེང་གེ་བཟང་པོ་སྤྱན་དྲངས་ཏེ་སྦྱིན་བདག་མཛད་ནས། འཕགས་པའི་འགྲེལ་པ་དང་མཐུན་པར་ཉི་ཁྲི་ལེའུ་བརྒྱད་མ་དང་། བརྒྱད་སྟོང་པ་དང་སྦྱར་བ་བརྒྱད་སྟོང་འགྲེལ་ཆེན་དང་། ཡུམ་གསུམ་ཆར་གྱི་བརྒྱན་དུ་གྱུར་པ་འགྲེལ་པ་དོན་གསལ་དང་། གཞན་ཡང་སྡུད་འགྲེལ་རྟོགས་པར་སླ་བ་དང་། ཤེར་ཕྱིན་བསྒོམ་པ་ལ་འཇུག་པ་ལ་སོགས་པ་མཛད་དེ་བསྟན་པ་ཆེས་གསལ་བར་མཛད་དོ། །དེའི་སློབ་མ་ཀུ་ས་ལི་ཆེ་བ་ཡིན་ལ། ཀུ་ས་ལི་ནི་བོད་སྐད་དུ་དགེ་བ་ཅན་ཅེས་པ་སྟེ། མཚན་དངོས་ནི། ཆེ་བ་ལ་རིན་ཆེན་བཟང་པོ། ཆུང་བ་ལ་རིན་ཆེན་མདོ་ཟེར། ཆེ་བ་ནི་རིགས་བྲམ་ཟེ་ཡིན་ལ། ལུང་གི་ཡོན་ཏན་རིག་པའི་གནས་མཐའ་དག་ལ་མཁས་པ། འཇམ་དཔལ་དབྱངས་ལ་ཆོས་དངོས་སུ་གསན་པས། རྟོགས་པའི་ཡོན་ཏན་ཕུན་སུམ་ཚོགས་པ་དང་ལྡན་ཞིང་། ལམ་ཡིག་ལས། སངས་རྒྱས་མྱ་ངན་ལས་འདས་ནས་བསྟན་པ་འོད་སྲུང་ཆེན་པོ་ལ་གཏད། དེས་ཀུན་དགའ་བོ་ལ། དེས་གཅིག་ནས་གཅིག་ཏུ་བརྒྱུད་པའི་མན་ངག་མངའ་བ་ཀུ་ས་ལི་ཆེ་བ་ཡིན། གསང་བ་འདུས་པ་ལ་བརྟེན་ནས་ཕྱག་རྒྱ་ཆེན་པོའི་དངོས་གྲུབ་ཐོབ་པའི་མན་ངག་སློབ་དཔོན་ཀླུ་སྒྲུབ་ནས་བརྒྱུད་པ། སངས་རྒྱས་ཡེ་ཤེས་ཞབས་ནས་བརྒྱུད་པ། ཨིནྡྲ་བོ་དྷི་ནས་བརྒྱུད་པ། པཎྜི་ཏ་མགྲིན་པ་གསུམ་པ་ནས་བརྒྱུད་པའི་མན་ངག་རྫོགས་པར་མངའ་བ་ཡང་། ཀུ་ས་ལི་ཆེ་བ་ཡིན། འཕགས་པ་ཐོགས་མེད་ཀྱིས་བྱམས་པ་མཉེས་པར་བྱས་པ་ལས་བྱུང་བ། རྒྱ་ཆེན་སྤྱོད་པའི་བརྒྱུད་པའི་ཆོས་མ་ལུས་པར་མངའ་བ་ཡང་། ཀུ་ས་ལི་ཆེ་བ་ཡིན་ནོ། །ཞེས་གསུངས་སོ། །དེའི་སློབ་མ་ཀུ་ས་ལི་ཆུང་བ་ཡིན་ཏེ། བྱམས་པ་ཁོ་ན་ཁྱད་པར་དུ་སྒོམ་པས་བྱམས་པའི་རྣལ་འབྱོར་པ་ཞེས་པར་ཡང་གྲགས་ལ། བླ་མ་འདི་ལ་ཀུ་ས་ལི་ཆེ་བའི་ཡོན་ཏན་མ་ལུས་པ་མངའ་བས། གསེར་གླིང་པའི་ཡང་བླ་མ་ཡིན་ལ། བླ་མ་འདིས་བྱམས་སྙིང་རྗེ་བྱང་ཆུབ་ཀྱི་སེམས་དགྱེར་སྒོམ་རྡོ་རྗེའི་གླུའི་དོན་ཡུན་རིང་དུ་སྒོམ་ཞིང་ཞལ་འདོན་མཛད་པས། རེ་ཞིག་ན་ཆུ་བོ་གངྒའི་འགྲམ་དུ་བཅོམ་ལྡན་འདས་བྱམས་པ་ལྷའི་རྒྱལ་པོའི་ཆ་བྱད་དུ་བྱོན་ནས་ཆོས་གསུངས་སོ། །ཀུ་ས་ལི་ཆུང་བའི་ཡོན་ཏན་རྫོགས་པར་མངའ་བ་དཔལ་ལྡན་ཨ་ཏི་ཤའི་བླ་མའི་གཙོ་བོར་གྱུར་པ་འགྲན་ཟླ་དང་བྲལ་བའི་བླ་མ་གསེར་གླིང་པ་ཡིན་ལ། དེའི་ལོ་རྒྱུས་ནི། གསེར་གླིང་ཞེས་པ་གླིང་བཞི་གླིང་ཕྲན་བརྒྱད་གང་དུ་ཡང་མ་གཏོགས་པ། འཛམ་བུ་གླིང་དང་ཉེ་བ། རིན་པོ་ཆེ་སྣ་ཚོགས་ཡོད་པའི་གླིང་དེ་ལ་གསེར་གླིང་ཞེས་ཟེར། དེར་རེས་ནང་པའི་བསྟན་པ། རེས་ཕྱི་པའི་བསྟན་པ་འབྱུང་བ་ལས། དེ་དུས་ཕྱི་པའི་བསྟན་པ་ཡོད་པ་ལ་གླིང་དེའི་རྒྱལ་པོའི་སྲས། རྒྱལ་བུ་སེ་ན་ཞེས་པ་འཁྲུངས་མ་ཐག་དཀོན་མཆོག་ལ་སྐྱབས་འགྲོ་མཛད་པས། མུ་སྟེགས་བྱེད་རྣམས་ཀྱི་བློ་ལ་མ་རན་ཀྱང་། རྒྱལ་པོའི་སྲས་སུ་སོང་བས་ཅི་ཡང་བྱེད་མ་ནུས། རྒྱལ་བུ་ལོ་དྲུག་བདུན་ལོན་དུས་ནགས་གསེབ་ཏུ་བྱོན་པས་ཐུབ་པའི་གསེར་སྐུ་མཐོ་གང་ཙམ་ཞིག་རྙེད་པ། དེ་ལ་ཕྱག་མཆོད་འབའ་ཞིག་མཛད་པས་ཐུབ་པ་དངོས་སུ་བྱོན་ཏེ། གསེར་གླིང་པའི་དབུ་ལ་ཕྱག་གིས་བྱུགས། སྐུ་ལུས་འོད་ཀྱིས་ཁྱབ་པར་མཛད་དེ། གླིང་དེ་སྔར་བས་བདུན་འགྱུར་གྱི་ལོ་ལེགས་པ། ནད་ཉུང་བ་སོགས་བཀྲ་ཤིས་པར་གྱུར་པས་གསེར་གླིང་པ་ཐམས་ཅད་སངས་རྒྱས་ཀྱི་བསྟན་པ་ལ་དད་དེ། རྒྱལ་བུ་འདི་རྒྱ་གར་དུ་ཆོས་སློབ་ཏུ་བཏང་ན་ལེགས་ཟེར་བས། རྒྱལ་བུ་དགྱེས་ཏེ་ཐོག་མར་རྡོ་རྗེ་གདན་སྟོན་པ་མངོན་པར་བྱང་ཆུབ་པའི་གནས་ཡིན་པས་དེར་བྱོན། སྲིན་པོ་མཆོད་པ་བྱེད་པ་དང་དུས་འཛོམ་སྟེ། གང་ཟག་ཡོན་ཏན་ཅན་རྣམས་ཀྱང་འདུ་བ་ལས། སློབ་དཔོན་མཧཱ་ཤྲཱི་རཏྣ་ཞེས་པ་མཆོག་གི་དངོས་གྲུབ་བརྙེས་པ་ཞིག་དེར་བྱོན་པ་ལ། དམ་པ་གཞན་ལས་ཀྱང་དེ་ལ་ལྷག་པར་དད་དེ་ཞག་བདུན་འགྲོགས་ནས། སློབ་དཔོན་མི་སྣང་བར་གྱུར། དེར་གནས་ཐམས་ཅད་དུ་བཙལ་ཀྱང་མ་རྙེད་དེ། རྒྱལ་བུ་རང་གི་ཡུལ་དུ་འགྲོ་སྙམ་པ་ལ་མདུན་དུ་བུ་མོ་གཉིས་གླུ་ལེན་ཏེ། གཉེན་འདུན་འཛའ་ཤེས་མང་པོ་དང་། །ཡུལ་དང་ཁང་ཁྱིམ་ནོར་ཆེན་དང་། །ཟས་སྐོམ་གོས་ཀྱི་ལོངས་སྤྱོད་པ། །མྱ་ངན་སྐྱེ་བར་འགྱུར་བ་སྟེ། །ཆོས་དང་རིང་དུ་འགྱུར་བ་ཡིན། །ནོར་མ་རྙེད་ཀྱི་ཚོང་པ་དག །ཡུལ་དུ་སྟོང་པར་ལྡོག་པ་འདྲ། །ཟེར་བས་ངེས་པར་ང་ལ་ཟེར་སྙམ་ཙ་ན་མི་སྣང་ངོ་། །དེར་རྒྱལ་བུ་དགྱེས་ཏེ་ཆོས་སྐྱོང་མ་ཅིག་ཡིན་པར་འདུག་པ་ལ་ད་ཡལ་བས་འདྲི་ས་མེད་ཀྱང་། ལོང་ཡོད་ཀྱིས་སྙམ་སྟེ། ལོ་བདུན་རྒྱ་གར་དུ་བཞུགས་ནས་བླ་མ་མང་པོ་ལ་ཆོས་གསན། རིག་པ་བསླབས་མཁས་པར་གྱུར་ཏེ། རྡོ་རྗེ་གདན་དུ་རྒྱལ་བུས་མཆོད་པ་བྱེད་ཅིང་ཆོས་སྐྱོང་མ་དེ་དང་འཕྲད་ན་སྙམ་པ་ན། རྒན་མོ་གཅིག་ན་རེ། སྐམ་སར་ཆུ་ནི་དྲངས་པ་བཞིན། །ཉིད་དང་མཚན་མོ་འདས་པ་ཡི། །མི་རྣམས་ཚེ་ནི་ཟད་པར་བྱེད། །རྨོངས་པ་ལོངས་ཡོད་མ་ཟེར་ཅིག །ཟེར་བས་མི་སྣང་ངོ་། །དེར་རྒྱལ་བུས། སློབ་དཔོན་མཧཱ་ཤྲཱི་རཏྣ་འབའ་ཞིག་ཡིད་ལ་བྱས་པས། རྒྱལ་བུའི་རྨི་ལམ་དུ་སློབ་དཔོན་བྱོན་ཏེ། རྒྱལ་སྲིད་ནི་དམན་པའོ། །དམ་པ་མ་ཡིན་ནོ། །དམ་པ་ལས་རིང་དུ་བྱེད་པའོ། །ཁྱོད་ཀྱི་ཆོས་ཀྱི་རྒྱལ་སྲིད་འཛིན་ནུས་སམ་ཞེས་ལན་གསུམ་གསུངས་པ་ལ། རྒྱལ་བུས་ཀྱང་ནུས་སོ་ཞེས་ལན་གསུམ་ཁས་བླངས་པ་ན་གཉིད་སད་དེ། སློབ་དཔོན་དངོས་སུ་བཞུགས་ནས་བྱིན་གྱིས་བརླབས་ཏེ། སངས་རྒྱས་ཀྱི་བཀའ་དང་གདམས་པ་རྣམས་གནང་། ཁྱད་པར་དུ་བྱང་ཆུབ་ཀྱི་སེམས་ལ་བརྟེན་པའི་ཆོས་མང་དུ་གསུངས། ཆོས་ཐམས་ཅད་ཀྱི་གནས་ལུགས་ཐུགས་སུ་ཆུད་དེ་མཚན་ཆོས་ཀྱི་གྲགས་པར་བཏགས་སོ། །དེ་ནས་གསེར་གླིང་དུ་བྱོན་ཏེ། མུ་སྟེགས་པ་རྣམས་ཆོས་ཀྱི་ཚར་བཅད། སངས་རྒྱས་ཀྱི་བསྟན་པ་ལ་བཀོད་དོ། །ཆོས་དང་ཟང་ཟིང་གི་དཔལ་འབྱོར་རྒྱས་པར་མཛད་དེ། ལོ་བརྒྱ་དང་ལྔ་བཅུ་བཞུགས་མདོར་ན་ཆོས་ཀྱི་གྲགས་པས་འཛམ་གླིང་ཁྱབ་པས། མཚན་དོན་དང་ལྡན་པ་ཡིན་ཞེས་བཀའ་གདམས་པའི་བླ་མ་རྣམས་གསུངས། དེ་ལ་སློབ་མའི་མཆོག པཎྜི་ཏ་ཆེན་པོ་བཞི་ནི། ཤནྟི་པ། ཇོ་བོ་རྗེ། ཛྙཱ་ན་ཤྲཱི་མི་ཏྲ། རཏྣ་ཀིརྟི་རྣམས་ལས། ཡོན་ཏན་རྫོགས་པར་མངའ་བ་ནི། ཇོ་བོ་རྗེ་ཡིན་ཏེ། ཐོག་མར་མཇལ་བའི་ཚུལ་ནི། གསེར་གླིང་པ་དེ་ཉིད་སངས་རྒྱས་པ་ཐམས་ཅད་ཀྱི་གཙུག་གི་ནོར་བུ། ཁྱད་པར་བྱམས་སྙེང་རྗེ་ལས་བརྩམས་ཏེ་ཆོས་སྟོན་པ་ཅིག་ཡོད་པ་འདུག་ཟེར་བའི་སྙན་པ་ཇོ་བོས་གསན་པས། སྐུ་ཚེ་དཔག་ཏུ་མེད་པའི་བླ་མར་མཁྱེན་ནས། མཚན་ཐོས་པ་ཙམ་གྱིས་དད་གུས་ཚད་མེད་པ་འཁྲུངས། བརྩོན་པ་ཆེན་པོས་པཎྜི་ཏ་སའི་སྙིང་པོ་ལ་སོགས་པའི་འཁོར་མང་པོ་དང་བཅས་ཏེ། ནོར་བུ་ལེན་པའི་ཚོང་པ་དང་འགྲོགས་ནས་གཟིངས་ཆེན་པོ་བཅས་ཏེ་བྱོན་པ་ལ། དབང་ཕྱུག་ལ་སོགས་པས་བར་གཅོད་བརྩམས་ཏེ། རླུང་དམར་གཡོ་བ་དང་། ཐོག་འབེབས་པ་དང་། ཆུ་སྲིན་ཉ་མིད་ལ་སོགས་པ་གདུག་རྩུབ་ཅན་མང་པོའི་གནོད་པར་བརྩམས་ཀྱང་། དེ་དག་གི་གནོད་པ་བྱ་བར་མ་ནུས་ཤིང་། གཤིན་རྗེ་གཤེད་ཀྱི་སྐུར་སྤྲུལ་ནས་བཏུལ་བ་དང་། གསེར་གླིང་དུ་ཡང་འཛམ་བུ་གླིང་ནས་པཎྜི་ཏ་ཆེན་པོ་གཅིག་འབྱོན་པའི་གྲགས་པ་བྱུང་བས། དགེ་འདུན་རྣམས་ཀྱི་བསུ་བ་མཛད་ཚུལ་སོགས་རྣམ་ཐར་ཆོས་ཀྱི་འབྱུང་གནས་སུ་གསལ་ལོ། །དེ་ནས་བླ་མ་དང་མཇལ་བས་སྔར་འདྲིས་ཀྱི་མི་བཞིན་གཅིག་ལ་གཅིག་གི་ངོ་མཁྱེན་པར་གྱུར་ཏེ། ཇོ་བོའི་དབུ་ལ་ཕྱག་བཞག་ནས་ཤིས་པ་མང་པོ་བརྗོད། བླ་མའི་ཞལ་ནས་ཁྱོད་བྱམས་སྙིང་རྗེ་བྱང་ཆུབ་ཀྱི་སེམས་ལ་སློབ་ནུས་སམ་འདིར་ལོ་བཅུ་གཉིས་སྡོད་ཁོམ་མམ་གསུངས་པ་ལ། ཇོ་བོས་ཞལ་གྱིས་བཞེས་བས་མཉེས་ཏེ། བསྟན་པའི་བདག་པོར་མངའ་གསོལ་བའི་རྟེན་འབྲེལ་ཡིན་གསུངས་ནས་སྔར་རྙེད་པའི་སྟོན་པའི་གསེར་སྐུ་ཡང་གནང་། དེ་ནས་ལོ་ངོ་བཅུ་གཉིས་སུ་དབུ་སྔས་སྦྲེལ་ཏེ་ཐེག་པ་ཆེན་པོའི་ཆོས་མཐའ་དག་གསན། ཤིང་རྟ་ཆེན་པོའི་སྲོལ། རྒྱལ་ཆེན་སྤྱོད་པའི་རྒྱུད་ཀྱི་ཡོན་ཏན་ཐམས་ཅད་རྫོགས་པར་མཛད་ནས། ཇོ་བོའི་བླ་མ་རྣམས་ཀྱི་ནང་ནས་ཀྱང་བཀའ་དྲིན་མཆོག་ཏུ་ཆེ་བར་འཛིན་པར་མཛད་དོ། །དབུ་མའི་ལྟ་བའི་གནད་རྣམས་ནི་ཇོ་བོས་གསེར་གླིང་པ་ལ་འབྲེལ་གཏམ་གྱི་སྒོ་ནས་ཡར་བསྟན་ཏེ་སྒྲོ་འདོགས་བཅད་ཅིང་། གསང་སྔགས་ཀྱི་ཆོས་རྣམས་གསན་རེས་མཛད་ཅེས་རྣམ་ཐར་ལས་འབྱུང་ཞིང་། གཞན་ཡང་བཀའ་གདམས་ཀྱི་དགེ་བའི་བཤེས་གཉེན་རྣམས་ཀྱི་རྣམ་ཐར་ལ། དཀོན་མཆོག་གི་མཆོད་པ་ཕུན་སུམ་ཚོགས་པ་འབུལ་བའི་ཕྱག་སྲོལ་རྣམས་ཀྱང་བླ་མ་གསེར་གླིང་པའི་ཕྱག་སྲོལ་ཡིན་གསུངས། རྒྱས་པར་གཞན་དུ་བལྟའོ། །

བརྒྱུད་པ་གསུམ་པ་ཉམས་ལེན་བྱིན་རླབས་ཀྱི་བརྒྱུད་པ། ཐེག་པ་ཆེན་པོ་གསང་སྔགས་ལ་ཆོས་ཁུངས་བཙུན་པར་རྟོགས་པའི་ཕྱིར། རྒྱུད་གསུངས་ཚུལ་ནས་བརྒྱུད་པ་ཟམ་མ་ཆད་པ་གོང་མ་རྣམས་ཀྱང་འདེད་པ་རིང་བརྒྱུད། ཧེ་རུ་ཀ་དང་ཡེ་ཤེས་ཀྱི་མཁའ་འགྲོ་མ་ལ་དངོས་སུ་ཆོས་གསན་ནས། དེ་ཉིད་ལས་བརྒྱུད་པ་ཉེ་བརྒྱུད་དང་གཉིས་ལས། དང་པོ་ནི་སློབ་དཔོན་ཀུན་དགའ་སྙིང་པོའི་བཞེད་པས། ཁྱབ་འཇུག་ལ་སོགས་པ་འདོད་ཆགས་ཅན་རྣམས་རྗེས་སུ་གཟུང་བའི་དོན་དུ་གཞན་འཕྲུལ་དབང་བྱེད་ཀྱི་གནས་སུ་གསང་བ་འདུས་པ་ལ་སོགས་པ་གསུངས་པར་བཤད་ཅིང་། རབ་ཏུ་སྒྲོན་གསལ་ལས་དགའ་ལྡན་དུ་རྒྱུད་སྡེ་ཐམས་ཅད་བསྟན་པར་ཡང་བཤད་ལ། བླ་མ་མཁས་པ་དག་གི་བཞེད་པས་ཨུ་རྒྱན་དུ་གསུངས་པར་བཞེད་དེ། དེ་ཡང་རྒྱལ་པོ་ཨིནྡྲ་བྷུ་ཏིས་ནམ་མཁའ་ལ་ཉན་ཐོས་ཀྱི་དགེ་འདུན་སྔ་དྲོ་ཤར་ནས་ནུབ་དང་། ཕྱི་དྲོ་ནུབ་ནས་ཤར་དུ་འགྲོ་བ་གཟིགས་ནས་ཅི་ཡིན་དྲིས་པས། སངས་རྒྱས་ཤཱཀྱ་ཐུབ་པའི་ཉན་ཐོས་སོ་ཟེར་བ་ཐོས་ནས་དད་པ་སྐྱེས། མཆོད་པ་རྒྱ་ཆེན་པོ་བཤམས་ཏེ། བཅོམ་ལྡན་འདས་འཁོར་དང་བཅས་པ་བདག་གི་གནས་འདིར་གཤེགས་སུ་གསོལ་ཞེས་གསོལ་བ་བཏབ་པས། བཅོམ་ལྡན་འདས་འཁོར་དང་བཅས་པ་དེར་བྱོན་པ་ལ་མཆོད་པ་དང་བསྙེན་བཀུར་གྱིས་མཉེས་པར་བྱས་ནས། བདག་ཀྱང་ཐམས་ཅད་མཁྱེན་པའི་ལམ་ལ་འགོད་པར་ཞུ་ཞེས་ཞུས་པས། ཁྱིམ་ནས་ཁྱིམ་མེད་པར་རབ་ཏུ་བྱུང་ལ་བསླབ་པ་གསུམ་ལ་སློབས་ཤིག་ཅེས་བཀའ་སྩལ་པ་དང་། བདག་འདོད་ཡོན་ལ་སྤྱོད་བཞིན་དུ་འཚང་རྒྱ་བའི་ཐབས་འཚལ། ཞེས་ཞུས་པས། སྟོན་པས་སྤྲུལ་སྐུའི་སྣང་བ་བསྡུས་ཏེ། དཔལ་གསང་བ་འདུས་པའི་དཀྱིལ་འཁོར་སྤྲུལ་ནས་རྒྱལ་པོ་ཨིནྡྲ་བྷུ་ཏི་ལ་སོགས་པ་སྐལ་བ་དང་ལྡན་པ་རྣམས་ལ་དབང་བསྐུར། དཔལ་གསང་བ་འདུས་པའི་རྒྱུད་བསྟན་ནས། རྡོ་རྗེ་ཆོས་ལ་རྒྱུད་བསྟན་པར་བཞེད་དོ། །དེས་ན་གནས་ཨུ་རྒྱན་དུ་སྡུད་པ་པོ་ཕྱག་ན་རྡོ་རྗེས། དུས་བཅོམ་ལྡན་འདས་བཞུགས་པའི་དུས་ཉིད་དུ། སྔགས་ཀྱི་རྒྱུད་སྡེ་མཐའ་དག་བསྡུས་ནས། རྒྱལ་པོ་ཨིནྡྲ་བྷུ་ཏི་འཁོར་དང་བཅས་པ་ལ་གནང་། དེ་དག་གིས་ཀྱང་དངོས་གྲུབ་ཐོབ་པར་གྱུར་པས། རང་བཞིན་གྱིས་གྲུབ་པའི་དཔའ་བོ་དང་རྣལ་འབྱོར་མ་ཞེས་གྲགས་ཤིང་། དེ་ནས་ཨུ་རྒྱན་གྱི་ཡུལ་དེ་སྟོང་ནས། མཚོ་ཆེན་པོ་ཀླུས་གང་བ་ཅིག་ཏུ་གྱུར། དེ་ནས་ཡང་ཕྱག་ན་རྡོ་རྗེས་རྒྱུད་མཐའ་དག་གླེགས་བམ་ལ་བྲིས་ནས། མཚོའི་ཀླུ་དེ་རྣམས་ལ་གཏད་དེ་སྨིན་པར་མཛད་པས། དེ་རྣམས་རིམ་གྱིས་མིའི་གཟུགས་སུ་བསྒྱུར་ཏེ། མཚོའི་འགྲམ་དུ་གྲོང་ཁྱེར་བྱས་ནས། རྡོ་རྗེ་ཐེག་པ་ཉམས་སུ་བླངས་པས་ཕལ་ཆེར་གྲུབ་པ་བརྙེས་པར་གྱུར་ཏོ། །སྐྱེས་བ་རྣམས་ནི་དཔའ་བོ། བུད་མེད་རྣམས་ནི་མཁའ་འགྲོ་མར་གྱུར་ཏོ། །དེའི་ཚེ་སྒྲུབ་པའི་སྐལ་བ་མེད་པ་རྣམས་གཞན་དུ་དེངས་ཏེ། མཚོ་དེ་ཡང་སྐམ་པར་གྱུར་ནས་དེའི་ཤུལ་དུ་ཧེ་རུ་ཀ་རང་བྱུང་གི་ལྷ་ཁང་ཞེས་བྱ་བ་བྱོན། དེར་ཡེ་ཤེས་ཀྱི་དཔའ་བོ་དང་མཁའ་འགྲོ་རྣམས་བཞུགས་ཤིང་། དེའི་ཚེ་ཕྱག་ན་རྡོ་རྗེ། གསང་བ་འདུས་པ་ལ་སོགས་པ་རིན་པོ་ཆེ་ཞུན་མས་བྲིས་པའི་གླེགས་བམ་དེ་རྣམས་དཔའ་བོ་དང་རྣལ་འབྱོར་མ་དེ་དག་ལ་གཏད་དོ། །དེ་ནས་རྡོ་རྗེ་ཐེག་པ་རྒྱ་གར་དུ་དར་བའི་ཚུལ་ནི། དེའི་ཚེ་རྒྱ་གར་ལྷོ་ཕྱོགས་ཨོ་བྷྱེ་ཤ་ན། རྒྱལ་པོ་བི་སུ་ཀལྤ་ཞེས་བྱ་བ་མཚན་ཉིད་ཀྱི་ཐེག་པ་ལ་མཁས་པ་ཞིག་བཞུགས་ཏེ། དེའི་ཐུགས་དགོངས་ལ་ཕ་རོལ་དུ་ཕྱིན་པའི་ཚུལ་འདིར། ལས་དང་པོ་པས་འདོད་ཡོན་སྤངས་ནས། དཀའ་ཐུབ་དང་དཀའ་སྤྱད་ཀྱིས་བསླབ་པ་གསུམ་གྱི་ལམ་བསྒོམ་སྟེ། ཉོན་མོངས་སྤངས་ནས་བྱང་ཆུབ་བསྒྲུབ་པར་གསུངས་པ་ལས་འདོད་ཡོན་ལ་སྤྱོད་བཞིན་དུ་ལམ་བསྒོམ་པ་ལ་འབྲས་བུ་འགྲུབ་པ། དེ་ལྟ་བུའི་ཐེག་པ་མཆོག་ཅིག་དང་མཇལ་བར་ཤོག་ཅིག་ཅེས་སྨོན་པའི་ཚེ། རྨི་ལམ་དུ་མཁའ་འགྲོ་མས། ཁྱོད་དེ་ལྟ་བུའི་ཐེག་པ་མཆོག་འདོད་ན། འདི་ནས་བྱང་ཕྱོགས་སུ་ཕྱིན་པ་ན། དཔལ་ཨུ་རྒྱན་གྱི་ཡུལ་ཞེས་བྱ་བར་ཧེ་རུ་ཀ་རང་བྱུང་གི་ལྷ་ཁང་ན། དཔལ་གསང་བ་འདུས་པ་ལ་སོགས་པའི་རྒྱུད་སྡེ་རིན་པོ་ཆེ་རྣམས། ཡེ་ཤེས་ཀྱི་མཁའ་འགྲོ་མ་རྣམས་ཀྱི་བདག་བྱས་ནས་ཡོད་པས། དེར་སོང་ལ་ཞུས་ཤིག་ཅེས་ལུང་བསྟན་ནོ། །དེར་རྒྱལ་པོས་དཔལ་ཨུ་རྒྱན་གྱི་གནས་སུ་བྱོན། ཧེ་རུ་ཀ་རང་བྱུང་གི་ལྷ་ཁང་གི་སྒོ་བཞི་ལ་རིམ་པ་བཞིན་ཕྱག་དང་། སླར་ཡང་ཤར་སྒོ་ནས་ཕྱག་བྱས་གསོལ་བ་བཏབ་པས། བུད་མེད་ཅིག་བྱུང་སྟེ་དེ་ནི་ཀླུ་ལས་གྱུར་པའི་རྣལ་འབྱོར་མར་གྲགས་པ་དེ་ཡིན་ཞིང་། དེས་ཁྱོད་རྒྱལ་པོ་བི་སུ་ཀལྤ་ཡིན་ནམ་གསུངས། ཡིན་ཞུས་པས། ལྷ་ཁང་གི་ནང་དུ་ཁྲིད། དཔལ་གསང་བ་འདུས་པའི་ཡེ་ཤེས་ཀྱི་དཀྱིལ་འཁོར་དུ་མངོན་སུམ་དུ་བཅུག་དབང་བསྐུར། རྒྱུད་བཤད། གདམས་པ་དང་རྗེས་སུ་བསྟན་པ་མཐའ་དག་གནང་ནས་གླེགས་བམ་གཏད། དེས་ཀྱང་དེའི་དོན་ཉམས་སུ་བླངས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་སོ། །དེའི་ཚེ་ཡུལ་ར་ཌའི་བྲམ་ཟེ་ཅིག་ལ། སྲས་བཞི་ཡོད་དེ། དེ་རྣམས་གཞོན་ནུའི་དུས་ན་སྒྲའི་བསྟན་བཅོས་ལ་སོགས་པ་རིག་པའི་གནས་རྣམས་ལ་ལེགས་པར་སྦྱང་ནས། ཕྱིས་བསྟན་པ་ལ་དད་པར་གྱུར་པ་དང་། དེའི་ནང་ནས་གཅིག་སྲས་སྒྲ་གཅན་འཛིན་བཟང་པོ་ལས་རབ་ཏུ་བྱུང་སྟེ། མཚན་ཡང་སྒྲ་གཅན་འཛིན་བཟང་པོར་བཏགས་སོ། །དེས་ཕྱིས་མཚན་ཉིད་ཀྱི་སྡེ་སྣོད་ལ་ལེགས་པར་སྦྱངས་པས་མཁས་པ་ཆེན་པོར་གྱུར་ཏེ། དཔལ་བཱེ་ཀྲ་མ་ལ་ཤཱི་ལའི་གཙུག་ལག་ཁང་གི་མཁན་པོ་མཛད་དེ། བསྟན་པའི་བྱ་བ་རྒྱ་ཆེར་མཛད་པ་དང་། རྒྱལ་པོ་བི་སུ་ཀལྤ་ལ་མཁའ་འགྲོ་མས་གནང་བའི་གསང་སྔགས་ཀྱི་ཆོས་ཡོད་པ་ཐོས་པས་དད་ནས། དེའི་དྲུང་དུ་སོང་སྟེ་མཎྜལ་སྔོན་དུ་འགྲོ་བས་གུས་པ་དང་བཅས་ཏེ། གསོལ་བ་བཏབ་པས། དེས་དཔལ་གསང་བ་འདུས་པའི་དཀྱིལ་འཁོར་དུ་བཅུག་སྟེ་དབང་བསྐུར། རྒྱུད་བཤད། གདམས་པ་དང་རྗེས་སུ་བསྟན་པ་མཐའ་དག་གནང་ངོ་། །དེས་ཀྱང་དེའི་དོན་ཉམས་སུ་བླངས་པས། བསྐྱེད་རྫོགས་ཀྱི་དོན་ལ་བསྟན་པ་ཅུང་ཟད་ཐོབ་པ་དང་། མཐར་ཕྱིན་པར་བྱ་བའི་ཕྱིར་འཕགས་པ་ཀླུ་སྒྲུབ་ལ་བསྟན་པ་གཏད་དེ། སྤྱོད་པ་ལ་གཤེགས་སོ། །དེའི་ཚེ་མདའ་འཕེན་པའི་སྤྱོད་པ་མཛད་དེ། མདའ་ལེགས་པར་བསྲངས་ན་གནད་དུ་འཕོགས་པ་བཞིན་དུ། སེམས་ཉིད་གནས་ལུགས་ཀྱི་སྟེང་དུ་བསྲངས་ན་གྲོགས་བར་རྟོགས་ཏེ་རྟོགས་པ་མཆོག་བརྙེས་སོ། །དེ་ནས་ས་ར་ཧ་སྟེ། མདའ་བསྣུན་ཞེས་གྲགས་ལ། དེས་རང་གི་རྟོགས་པའི་དོན་གླུར་བླངས་པ། དོ་ཧ་མཛོད་ཅེས་གྲགས་པ་དམངས་དོ་ཧ་ཡིན་ལ། བོད་ན་རྡོ་ཧ་བསྐོར་གསུམ་མཛད་ཅེས་ཟེར་ཀྱང་། རྒྱལ་པོ་དྷོ་བ་དང་། བཙུན་མོ་དྷོ་ཧ་ནི་བལ་པོ་ཨ་སུས་ཁ་གཡར་ནས་བྱས་པར། བལ་པོ་ན་གྲགས་ཤེས་ཆོས་རྗེ་བུ་སྟོན་གསུངས་སོ། །མཐར་དཔལ་གྱི་རི་ལ་གཤེགས་སྟེ་ལོ་སུམ་སྟོང་བཞི་བརྒྱ་བཞུགས་ནས་སྐལ་ལྡན་གྱི་དོན་མཛད་ཅེས་འབྱུང་ངོ་། །དེའི་ཚེ་སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་སོང་བ་ན་འཕགས་པ་ཀླུ་སྒྲུབ་བྱོན་ཏེ། དེའི་རྣམ་ཐར་གོང་དུ་བཤད་ལ། དེས་བྱིན་གྱིས་བརླབས་པ་ནི་དཔལ་ཤ་ཝ་རི་དབང་ཕྱུག་ཡིན་ཏེ། ཁ་ཅིག་ས་ར་ཧ་དང་། ཤ་ཝ་རི་དབང་ཕྱུག་གཅིག་ཏུ་འདོད་པ་ནི་མི་འཐད་དེ། འདི་དང་པོ་གར་མཁན་པའི་རིགས་ཡིན་པར་བཤད་ཅིང་། རི་ཕྲོད་དབང་ཕྱུག་ཅེས་ཟེར་ཀྱང་། དེས་གྲུབ་ཆེན་ལཱུ་ཧི་པ་ལ་གདམས། དེས་རྗེས་སུ་བཟུང་བ་རྒྱལ་པོ་བི་མ་ཙནྡྲའམ། དྷ་རི་ཀ་པ་དང་། སློབ་དཔོན་བྲམ་ཟེའི་རིགས་ཌཾ་གི་པ་གཉིས་ལས། དྷཱ་རི་ཀ་པས། སློབ་དཔོན་རྡོ་རྗེ་དྲིལ་བུ་པ་ལ་གདམས། དེས་རུས་སྦལ་ཞབས་ལ། དེས་ཛ་ལེནྡྷ་ར་པ་ལ། དེས་ནག་པོ་སྤྱོད་པ་ལ། དེས་གུ་ཧྱ་པ་ལ། དེས་རྣམ་རྒྱལ་ཞབས་ལ། དེ་རྣམས་ཀྱི་རྣམ་ཐར་དོན་དུ་གཉེར་ན་ཁོ་བོས་བྱས་པའི་དཔལ་འཁོར་ལོ་བདེ་མཆོག་གི་ཆོས་འབྱུང་རྒྱས་བསྡུས་སོགས་སུ་བལྟ་བར་བྱའོ། །དེ་ནས་ཏེ་ལོ་པ་དང་། ནཱ་རོ་པ་རྣམས་ལས་བརྒྱུད་པ་ནི་རིང་བརྒྱུད་ཡིན་ལ། ཉེ་བརྒྱུད་ཀྱི་དབང་དུ་བྱས་ན། ཏེ་ལོ་པའི་རྣམ་ཐར་ནི། དེ་དང་པོ་རྒྱལ་རིགས་ལས་རབ་ཏུ་བྱུང་སྟེ། མཚན་ཤེས་རབ་བཟང་པོ་ཞེས་པར་བཏགས། རིག་པའི་གནས་རྣམས་ལ་སྦྱངས་པས་མཁས་པ་ཆེན་པོར་གྱུར་ནས། བླ་མ་རྣམ་རྒྱལ་ཞབས་ལ་གཏུགས། དཔལ་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར། རྒྱུ་མན་ངག་དང་བཅས་པ་ཞུས། དེར་བླ་མས་ལུང་བསྟན་ཏེ་ཤར་ཕྱོགས་བྷཾ་ག་ལའི་རྒྱུད། ཧ་རི་ཀེ་ལ་ཞེས་བྱ་བ་ཟ་ཧོར་གྱི་གྲོང་ཁྱེར་དེ་ན་སྤྲུལ་པའི་རྒྱལ་པོ་ཨུཏྨ་སྐྱེས་པ་ཞེས་བྱ་བས་བྱིན་གྱིས་བརླབས་པའི་སྒྲུབ་ཐག་ཉེ་བའི་གནས་ཡོད། དེ་ན་པཉྩ་པ་ཏ་ན་ཞེས་བྱ་བའི་ཚོང་འདུས་ན་སྨད་འཚོང་མ་ཏིལ་རྡུང་བ་ཞིག་ཡོད་ཀྱིས། དེའི་གཡོག་གྱིས་ལ་རྟོགས་པ་སྦྱོངས་ཤིག་ཅེས་ལུང་བསྟན་པ་དེར་བྱོན་ཏེ། སྨད་འཚོང་མའི་གཡོག་བྱས་པས། མོས་ཏིལ་བརྡུང་དུ་བཅུག་ཏེ། སློབ་དཔོན་གྱིས་ཏིལ་བརྡུངས་ཤིང་ཉམས་སུ་བླངས་པས། ཏིལ་ལ་མར་གནས་ཀྱང་རྡུང་བ་དང་བཙིར་བ་མ་བྱས་ན་མངོན་དུ་མི་འགྱུར། དེ་བཞིན་དུ་རང་སེམས་སངས་རྒྱས་གནས་ཀྱང་ཉམས་ལེན་མ་བྱས་ན་མངོན་དུ་མི་འགྱུར་བར་དགོངས་ཏེ་ཉམས་སུ་བླངས་པས་དེ་ཁོ་ན་ཉིད་མངོན་སུམ་དུ་གྱུར་པའི་རྟོགས་པ་སྐྱེས་ཏེ། རྡོ་རྗེ་འཆང་གི་མངོན་སུམ་དུ་དབང་བསྐུར་བྱིན་གྱིས་བརླབས་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །དེར་སྨད་འཚོང་མས་ཁོང་མཚན་མོ་ནམ་མཁའ་ལ་མེ་དཔུང་འབར་བའི་དབུས་ན་འདུག་པ་མཐོང་སྟེ་འགྱོད་ནས་བཤགས་པ་བྱས། རྗེས་སུ་གཟུང་བར་གསོལ་བ་བཏབ་པས། དེས་དབང་བསྐུར་བྱིན་གྱིས་བརླབས་པས་མོས་ཀྱང་དངོས་གྲུབ་ཐོབ་ནས་རྒྱལ་པོ་ལ་སྨྲས་པས། རྒྱལ་པོ་འཁོར་དང་བཅས་པ། སློབ་དཔོན་ལ་མཇལ་དུ་འོང་པ་ལ། ནམ་མཁར་བཞུགས་ནས་ཏིལ་མར་གྱི་དཔེས་མཚོན་པའི་ཆོས་ཟབ་མོ་གསུངས་པས། རྒྱལ་པོ་འཁོར་བཅས་དད་དེ་ཉམས་སུ་བླངས་པས་མཁའ་སྤྱོད་གྲུབ་སྟེ། རེ་ཞིག་ཡུལ་དེ་སྟོང་པ་ཙམ་དུ་གྱུར་ཏོ། །དེའི་སློབ་མ་ནཱ་རོ་པ་ནི། ཡབ་ཁ་ཆེ་བ་ཡིན་ལ། ཁ་ཅིག་རྒྱལ་རིགས་སུ་བཞེད་དེ། ཁུང་ཐུབ་ལས་བྲམ་ཟེའི་རིགས་སུ་གསུངས་པས་དེ་ལ་རིགས་དཀར་ནག་བརྒྱད་ཡོད་པའི་ནང་ནས། བཟང་ཤོས་ནཱ་རོ་ཏ་པ་ཞེས་བྱ་བའི་རིགས་ཡིན་ཞིང་། དེས་དང་པོར་སྒྲ་ལ་སོགས་པ་རིག་པའི་གནས་ཐམས་ཅད་ལ་སྦྱངས་པའི་མཁས་པ་ཆེན་པོར་གྱུར་ནས། ཕྱིས་སངས་རྒྱས་ཀྱི་བསྟན་པ་ལ་རབ་ཏུ་བྱུང་སྟེ། མཚན་ཛྙ་ན་སིདྡྷི་ཞེས་གྲགས་ལ། ནཱ་རོ་འགྲེལ་ཆེན་ལས། སྙན་གྲགས་བཟང་པོ་ཞེས་བཤད་དེ། མཚན་བརྒྱད་ཡོད་པའི་གཅིག་ཡིན་ནོ་ཞེས་བླ་མ་དག་གསུངས་སོ། །དེ་ནས་སྡེ་སྣོད་གསུམ་དང་རྒྱུད་སྟེ་བཞི་ལ་སྦྱངས་ཤིང་ཡོངས་རྫོགས་ཀྱི་པཎྜི་ཏར་གྱུར་ཏོ། །

དེའི་ཚེ་དཔལ་ན་ལེནྡྲ་ན་མཁས་པ་སྒོ་དྲུག་ཏུ་གྲགས་པ་ཡོད་པའི། ཤར་སྒོར་ཤནྟིཔ། ལྷོ་སྒོར་ངག་དབང་གྲགས་པ། ནུབ་སྒོར་ཤེར་འབྱུང་བློ་གྲོས། དབུས་ན་ཛྙཱ་ན་མི་ཏྲ་དང་། རིན་ཆེན་རྡོ་རྗེ་གཉིས་ཡོད་ཅིང་། ནཱ་རོ་པ་བྱང་སྒོ་བར་གྲགས། དེས་ཐོས་བསམ་ཉན་བཤད་ཀྱིས་འགྲོ་བའི་དོན་མཛད་ཅིང་བཞུགས་པའི་ཚེ། བདག་ཤེས་བྱ་རིག་པའི་གནས་ལ་མཁས་ཀྱང་། རང་གི་སེམས་བ་འཇོ་བའི་ཡུན་ཙམ་དུའང་མི་གནས་པས་སེམས་ལ་དབང་ཐོབ་པའི་གདམས་པ་གཅིག་དགོས་པར་འདུལ་སྙམ་ནས་གནས་དབེན་པར་དཔལ་འཁོར་ལོ་སྡོམ་པའི་ཉེ་སྙིང་ཡི་གེ་བདུན་པ་ལ་བསྙེན་པ་འབུམ་ཕྲག་བདུན་བྱས་པས། ས་གཡོ་བ་ལ་སོགས་པའི་བལྟས་བྱུང་ནས་ཤར་ཕྱོགས་སུ་བླ་མ་ཏེ་ལོ་པའི་དྲུང་དུ་སོངས་ཤིག ཅེས་མཁའ་འགྲོ་མས་ལུང་བསྟན་ཏོ། །དེ་ནས་རང་གི་གྲོགས་པོ་ལ་སྦྲན་པས་རིན་ཆེན་རྡོ་རྗེ་ན་རེ། ཁོང་ཡོངས་རྫོགས་ཀྱི་པཎྜི་ཏར་གྱུར་ནས། ཀུ་ས་ལའི་རྐང་པ་ལ་ཕྱག་མི་འཚལ་ཟེར་ནས་འགྲོར་མ་ཉན། དེར་སློབ་དཔོན་གྱི་རྒྱ་གར་ཤར་ཕྱོགས་ཛྭ་ར་བི་ཧ་ར་ཞེས་པ་དེར་བྱོན་ཏེ་མི་ཐམས་ཅད་ལ་ཏེ་ལོ་པ་ག་ན་ཡོད་དྲིས་པས། ལ་ལ་ན་རེ་རབ་ཏུ་བྱུང་བའི་ཆ་ལུགས་སུ་བཞུགས་ཟེར། ལ་ལ་ན་རེ་རྣལ་འབྱོར་པའི་ཆ་ལུགས་སུ་བཞུགས། རེས་འདིར་འོང་རེས་བི་ཧ་རིའི་གཙུག་ལག་ཁང་དུ་འགྲོ་བ་ཡིན་ཟེར་ཏེ་མ་རྙེད། ལན་ཅིག་རིམས་ནད་འཕྲོག་པའི་ལྷ་ཁང་ན་ཐམས་ཅད་ཆོས་སྟོན་ཟ་བའི་ཚེ། དགེ་འདུན་གྱི་གྲལ་བྱེད་པའི་ཕྱི་རོལ་ན་མེ་ཕུང་ཡོད་པའི་དྲུང་དུ། མི་སྔོ་བ་རིད་པ་ཉི་ལྷགས་ཀྱིས་ཁྱེར་བ་འདོམ་དཀྲིས་ཀྱི་རས་ཙམ་ལས་གོས་མེད་པ་ཞིག་བྱུང་སྟེ། ཉ་མ་ཤི་བ་ཁ་ཅིག་ཁྱེར་ནས་མེ་སེབ་ཏུ་བཅུག་ཅིང་བསྲེགས། དེ་ནཱ་རོ་པས་མཐོང་སྟེ། འདི་ལྟར་མ་བྱེད་བྱས་པས། ཉ་བསྲེགས་པ་ཆུར་བཅུག་སྟེ་ཕུས་བཏབ་པས། མ་ཤི་བར་གསོས་སོ། །འདི་ནུས་པ་ཐོབ་པ་ཅིག་འདུག་པས། ཏེ་ལོ་པ་ཡིན་ནམ་སྙམ་པ་དང་། ནཱ་རོ་པ། ང་ཏེ་ལོ་པ་ཡིན་ཟེར། དེ་ལ་སོགས་པ་མངོན་པར་ཤེས་པ་མང་དུ་གསུངས་པས་ཏེ་ལོ་པ་ཡིན་པར་ཡིད་ཆེས་ནས་ཕྱི་བཞིན་དུ་འབྲངས་ཏེ། དཀའ་སྤྱད་བཅུ་གཉིས་པ་ལ་སོགས་པ་དུ་མས་ཏེ་ལོ་པ་མཉེས་པར་མཛད་པ་ནི་གཞན་དུ་གསལ་ལོ། །དེ་ནས་དབང་དང་། རྒྱུད་དང་། མན་ངག་ལ་སོགས་པ་མཐའ་དག་རྫོགས་པར་གནང་ནས། ཀྱེ་ཧོ། འདི་ནི་རང་རིག་ཡེ་ཤེས་ཆེན་པོ་སྟེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏེ་ལོ་ང་ཡིས་ཅི་ཡང་བསྟན་དུ་མེད། །རང་ལ་རང་གིས་བརླན་ཏེ་ཤེས་པར་བྱོས། །ཞེས་གསུངས་ཏེ། འདིས་ནི་རྒྱ་མཚོ་དང་འདྲ་བའི་དོན་མཚོན་པ་བསྟན་ནས། ཁྱོད་སྒྲུབ་པ་སྙིང་པོར་གྱིས་ཤིག ཞེས་གསུངས་ནས་མི་སྣང་བར་གྱུར། དེ་ནས་ནཱ་རོ་པས་ཀྱང་བཤད་པ་དང་སྒྲུབ་པ་གཉིས་ཀ་མཛད་ཅིང་། བསྒོམས་པས་རྟོགས་པ་སྐྱེས་ཏེ་གླུར་བླངས་པ་ནི། འཆར་བ་མེད་ཅིང་ནུབ་པ་མེད། །ཉིན་མོ་མེད་ཅིང་ནུབ་མོ་མེད། །བླ་མའི་རྟོགས་པས་རྨོངས་པ་བཅད་དེ་སོང་། །གར་འགྲོ་གང་དུ་གནས་པ་མ་ཤེས་ཏེ། །བདེ་ཆེན་གྱིས་ནི་དབང་པོའི་གྲོང་འདི་བཅོམ། །བསམ་དུ་མེད་པའི་རྣལ་འབྱོར་དེ་ལས་སྐྱེས། །དེ་ལས་བདག་གིས་ཅི་ཞིག་བསམ་པར་བྱ། །ཕྱོགས་རྣམས་སྟོང་ཞེས་རང་ཡང་རྣམ་པར་བྲལ། །གང་བལྟས་པ་དེ་རྟག་ཏུ་དེ་ཡིན་ཏེ། །གཉུག་མའི་ཡིད་ནི་གདོད་ནས་སྟོང་པར་སོང་། །རྒྱུ་དང་འབྲས་བུ་བཏང་སྙོམས་དག་ཏུ་དོར། །འདི་ཡི་ཁྱད་པར་ཏེ་ལོ་པ་དབང་ངོ་། །ཞེས་གསུངས་སོ། །དེ་ལྟ་བུའི་སློབ་དཔོན་དེའང་རྒྱལ་པོ་དཔུང་དང་བཅས་པ་རེང་ནུས་པ་དང་། ཚོགས་ཀྱི་འཁོར་ལོའི་དུས་སུ་ཤིང་ཐོག་ལ་སོགས་པ་འགུགས་ནུས་པ་དང་། སྦྱིན་སྲེག་གི་ཐབ་ཏུ་འཁོར་ལོ་བདེ་མཆོག་གི་ལྷ་དྲུག་ཅུ་རྩ་གཉིས་ཞལ་བལྟ་ནུས་པ་དང་། ཏིང་ངེ་འཛིན་གྱི་རྟོགས་པ་བརྟན་པོ་ཐོབ་པས་དངོས་གྲུབ་ཐོབ་པར་གྲགས་ཤིང་། རྗེ་མར་པའི་བརྒྱུད་འཛིན་ལས་བརྒྱུད་པ་རྣམས་ནི། སྐུ་ཚེ་འདི་ལ་མཆོག་གི་དངོས་གྲུབ་བརྙེས་པར་བཞེད། བཀའ་གདམས་བརྒྱུད་པ་འདི་པ་དང་། བསྟན་པའི་མངའ་བདག་རྗེ་བཙུན་ས་སྐྱ་པ། ཞྭ་ལུ་བུ་སྟོན་པ་རྣམས་བར་དོར་མཆོག་བརྙེས་པར་བཞེད་དོ། །དེ་ལ་སློབ་མ་དཔལ་མཆོག་ཌོམྦྷི་བ། ཤནྟི་པ། ཇོ་བོ་རྗེ། དྷ་རི་པ། གུ་སུ་ལུ་བ། ཁ་ཆེ་ཛྙཱ་ན་དཔལ། ཤར་ཕྱོགས་པ་ཛ་ཡ་ཀ་ར་སྟེ། ཆེ་བར་གྲགས་པ་བདུན་དང་། ཞི་བ་བཟང་པོ། ཞི་བའི་གོ་ཆ། ཇོ་བོ་སྨྲྀཏྟི་ལ་སོགས་པ་པཎྜི་ཏའི་སློབ་མ་མང་པོ་དང་། མཻ་ཏྲི་པ། ཕཾ་ཐིང་པ་སྐུ་མཆེད་ལ་སོགས་པ་ཡུན་རིང་བསྟེན་པའི་སློབ་མ་རྣམས་དང་། གཞན་ཡང་མཁས་གྲུབ་ཀྱི་སློབ་མ་དཔག་ཏུ་མེད་པ་རྣམ་གྲོལ་ལ་བཀོད་དེ། དེའི་ནང་ནས་ཤནྟི་པ་མཁས་པ་སྒོ་དྲུག་གི་ནང་ཚན་པཎ་གྲུབ་མཉམ་པོ་ཡིན་ཡང་། ནཱ་རོ་པའི་ཞབས་ལ་གཏུགས་ནས་བདེ་མཆོག་འཁོར་ལོའི་དཀྱིལ་འཁོར་དུ་དབང་ཞུས། རྒྱུད་མན་ངག་དང་བཅས་པ་དང་། མཧཱ་མ་ཡ་དབང་རྒྱུད་མན་ངག་དང་བཅས་པ་གསན་ཅིང་། ཇོ་བོ་ཆེན་པོའི་བླ་མ་གནས་བརྟན་བྱང་ཆུབ་བཟང་པོ་ལ་ཡང་། དཔལ་ཀྱཻ་རྡོ་རྗེའི་རྩ་རྒྱུད་གདམས་ངག་དང་བཅས་པ་ནོས་ཏེ་ཐུགས་ཉམས་སུ་བཞེས་ཤིང་། ཐམས་ཅད་མཁྱེན་པ་གཉིས་པ་ལྟ་བུར་གྲགས་པས། གསང་འདུས། དགྱེས་རྡོར། མཧཱ་མ་ཡ། དགྲ་ནག་ལ་སོགས་པའི་རྒྱུད་མང་པོ་དང་། ཉི་ཁྲི་དང་བརྒྱད་སྟོང་པ་ལ་སོགས་པའི་མདོ་མང་པོ་དང་། མདོ་སྡེ་རྒྱན་ལ་སོགས་པའི་བསྟན་བཅོས་མང་པོ་ལ་འགྲེལ་པ་མཛད་ནས། དཔལ་འཁོར་ལོ་སྡོམ་པའི་རྒྱུད་ལ་འགྲེལ་པ་རྩོམ་པར་བཞེད་པའི་ཚེ། རྨི་ལམ་དུ་རྡོ་རྗེ་ཕག་མོས་ཞལ་བསྟན་ནས། ཀླ་ཀློའི་སྐད་ཀྱིས་ཤིན་ཏུ་སྦས་པའི་རྒྱུད་འདི་གསལ་བར་མ་འགྲོལ་བར། དོན་ཟབ་མོ་ཉམས་སུ་ལོངས་ཤིག ཅེས་པའི་ལུང་བསྟན་ཐོབ་ནས། ཕྱི་རུ་ཉན་ཐོས་ཀྱི་སྤྱོད་པ་མཛད། ནང་དུ་དོན་ཟབ་མོ་ཉམས་སུ་བླངས་པས་གྲུབ་པ་བརྙེས་པ་ཡིན་ཏེ། རྡོ་རྗེ་གདན་པས། རྒྱལ་རིགས་སྤྱོད་པ་མཐར་ཕྱིན་ནས། །འདུལ་འཛིན་གསང་སྔགས་དངོས་གྲུབ་བརྙེས། །ཤནྟི་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །ཞེས་འབྱུང་ངོ་། །དེ་ལྟར་ནཱ་རོ་པ་དང་། ཤནྟི་པ་གཉིས་ཀྱི་ཡོན་ཏན་རྫོགས་པར་མངའ་བ་ཡང་ཇོ་བོ་ཆེན་པོ་ཉིད་ཡིན་ཏེ་ལམ་ཡིག་ལས། བི་ཀྲ་མ་ལ་ཤཱི་ལའི་གཙུག་ལག་ཁང་དུ་ཇོ་བོ་རྗེ་བཞུགས་པའི་དུས། ནཱ་རོ་པ་བྱོན་པ་ལ་དགེ་འདུན་རྣམས་ཀྱིས་བསུ་བ་རྒྱ་ཆེན་མཛད། ནཱ་རོ་པའི་ཞལ་ནས། ཇོ་བོ་ལ་ད་ནི་སངས་རྒྱས་ཀྱི་བསྟན་པའི་བདག་པོ་ཁྱེད་ཡིན་ནོ་གསུངས། ཇོ་བོས། ཁྱེད་ཉི་མ་དང་འདྲ་བ་བཞུགས་བཞིན་དུ། ཁོ་བོ་མེ་ཁྱེར་ལྟ་བུས་འཇིག་རྟེན་གསལ་བར་ག་ལ་ནུས་ཞུས་པས། ཁོ་བོ་ཡུན་རིང་དུ་མི་བསྡོད་གསུངས། དེར་ཞག་ཉི་ཤུ་ཙམ་བཞུགས། ལྷོ་ཕྱོགས་སུ་བྱོན་ཏེ་ཞག་ཉི་ཤུ་ཙམ་ན་གཤེགས་པའི་གདུང་རུས། མི་འབྲལ་བའི་དམ་ཚིག་རྟེན་རྣམས་དང་བཅས་པ་ཕྱག་ཏུ་བྱུང་བ་བོད་དུ་སྤྱན་དྲངས་ཞེས་འབྱུང་ངོ་། །དེ་ལྟར་ན་ཇོ་བོས་ནཱ་རོ་པ་ལ་ཆོས་མཐའ་དག་རྫོགས་པར་གསན་ཀྱང་། བར་དུ་དཔལ་མཆོག་ཌོམྦྷི་བ་འབྱུང་བ། བྱིན་རླབས་ཀྱི་བརྒྱུད་པ་ཡིན་པར་ལམ་ཡིག་ལས་གསུངས་ཏེ། དེའི་ལོ་རྒྱུས་ནི། ཌོམྦྷི་པ་རིགས་ངན་ཞིག་ཕྱུགས་འཚོ་བ། ནཱ་རོ་པ་ཡུལ་དབུས་ཀྱི་ནགས་ཁྲོད་ཅིག་ཏུ་སྒོམ་གྱིན་བཞུགས་པ་ལ་དད་དེ། ཉིན་རེ་བཞིན་གོ་ལའི་ཤིང་ཁྲེས་རེ་བཙོངས་པའི་རིན་གྱིས་བསྙེན་བཀུར་བྱས་པས། ཁྱོད་ང་ལ་དད་དམ་གསུངས། དད་ཞུས་པས། འོ་ན་བྱ་བ་ངན་པ་སྤོངས་ལ་ངའི་ཉེ་འཁོར་དུ་སྡོད་གསུངས་ཏེ། དབར་བསྐུར་བྱིན་གྱིས་བརླབས་སྒྲུབ་པ་མཛད་པས་མཆོག་གི་དངོས་གྲུབ་བརྙེས་ཏེ་གྲགས་པས་ཀུན་ཏུ་ཁྱབ་པའོ། །དུས་དེར་ཇོ་བོ་བི་ཀྲ་མ་ལ་ཤཱི་ལའི་གཙུག་ལག་ཁང་དུ་ཡོན་ཏན་གྱི་ཚོགས་མ་ལུས་ཤིང་ལུས་པ་མེད་པས་ཐུགས་རྒྱུད་ཡོངས་སུ་གང་བར་གྱུར་ཀྱང་། དམ་པ་རྣམས་ནི་རང་རྒྱུད་ཡོན་ཏན་གྱིས་ངོམ་པ་མེད་པ་ཆོས་ཉིད་ཡིན་པས། སྐབས་ཅིག་ཌོམྦྷི་བའི་སྙན་པ་གསན་ནས་གསོལ་བ་བཏབ་པས། མནལ་ལམ་དུ་ནམ་མཁའ་ལ་དགེ་སློང་གཉིས་མི་ཤ་ལག་པ་གཅིག་ཟ་ཞིང་བྱུང་བ། ཇོ་བོ་ལ་ཡང་གསོལ་ཟེར་བས་དགེ་སློང་ལ་སྦོམ་པོར་མི་འགྱུར་རམ་དགོངས་པ་ན། རྒན་པ་ལ་གཞོན་པས་སངས་རྒྱས་ལ་འཁྲུལ་པ་མངའ་འམ་ཟེར་བ་ལ། རྒན་པས་མི་མངའ་ཟེར་བའི་ལན་ལ་དགོངས་ཏེ་གསོལ་བས། སང་ཉི་མ་དྲོ་ཁ་བར་ཏིང་ངེ་འཛིན་ཅིག་ཏུ་གྱུར། ཕྱིས་དངོས་སུ་མཇལ་ཏེ་གསང་སྔགས་ཀྱི་ཆོས་མཐའ་དག་རྫོགས་པར་གསན་ནོ། །དེ་དག་རྣམས་ནི་བརྒྱུད་པ་གསུམ་གྱི་ཡོན་ཏན་རྫོགས་པར་དཔལ་ལྡན་ཨ་ཏི་ཤ་ཉིད་ལ་མངའ་ཚུལ་ཟུར་ཙམ་སྨོས་པ་སྟེ། རྒྱས་པར་གཞན་དུ་བལྟ་ཞིང་། གཞན་ཡང་སྔགས་དང་མཚན་ཉིད་ཀྱི་ཆོས་རྣམས་རྫོགས་པར་གསན་པའི་སོ་སོའི་བརྒྱུད་པ་ཅུང་ཟད་འོག་ཏུ་འབྱུང་ལ། གཙོ་བོར་གྱུར་པ་ནི་བརྒྱུད་པ་གསུམ་པོ་དེ་ཉིད་ཡིན་པར་བཞེད་དེ། ཇོ་བོ་སྙེ་ཐང་ནས་དགའ་ལྡན་དུ་གཤེགས་ཁར། བཤེས་གཉེན་སྟོན་པ་ལ་བསྟན་པ་གཏད་པའི་ཚུལ། མི་ཆུག་པར་གདམས་པ་ལས། ཀ་བ་ཤཱཀྱ་དབང་ཕྱུག་ལ་སོགས་པ། །བོད་སྟོན་ཐམས་ཅད་འདུས་པའི་སློབ་གྲལ་དུ། མི་ཆུག་བསྡམས་པའི་ཁོང་གཟེར་ཞེས་བྱ་བ། །ཕ་རྗེས་བུ་ལ་བཞག་པའི་གནད་འཇུན་འདི། །མགོན་པོ་ཐུགས་རྗེ་ཅན་དེས་འབྲོམ་ལ་གཏད། །དཔལ་ལྡན་གནས་དང་རྡོ་རྗེ་གདན་ལ་སོགས། །གང་དུ་བསྟན་པའི་བདག་པོ་ནས་བཟུང་སྟེ། །བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། །མཆོག་སྡེ་དུལ་བའི་སྡེ་དང་གྲགས་པའི་དཔལ། །སེང་བཟང་ཀུ་ས་ལི་དང་གསེར་གླིང་པ། །རྒྱ་ཆེན་སྤྱོད་པའི་བརྒྱུད་ཀྱིས་ཁོ་བོ་བཟུང་། །ང་ནི་རང་བྱུང་བཅོས་མའི་བླ་མ་མིན། །འབྲོམ་སྟོན་སྤྱི་ལ་སོམས་ལ་ཕ་རྗེས་ཟུངས། །འཇམ་དཔལ་ཀླུ་སྒྲུབ་ཟླ་བ་གྲགས་པ་དང་། །རིག་པའི་ཁུ་བྱུག་ཨ་ཝ་དྷུ་ཏི་གཉིས། །ཟབ་མོ་ལྟ་བའི་བརྒྱུད་པས་ཁོ་བོ་བཟུང་། །ལྟ་བ་ཕྱོགས་སུ་ལྷུང་བའི་དགེ་སློང་མིན། །འབྲོམ་སྟོན་སྤྱི་ལ་སོམས་ལ་ཕ་རྗེས་ཟུངས། །ཐུགས་རྗེ་ཆེན་པོ་བདེ་གཤེགས་རྡོ་རྗེ་འཆང་། །ཆོས་གཟིགས་ཏེ་ལོ་པ་དང་ནཱ་རོ་པ། །ཉམས་ལེན་བྱིན་རླབས་བརྒྱུད་པས་ཁོ་བོ་བཟུང་། །མདོ་རྒྱུད་རང་གར་ཤོར་བའི་སློབ་དཔོན་མིན། །འབྲོམ་སྟོན་སྤྱི་ལ་སོམས་ལ་ཕ་རྗེས་ཟུངས། །བོ་དྷི་སཏྭ་མཉྫུ་ཤྲཱི་བྷ་དྲ། །རཏྣ་ཤྲཱི་དང་དྷརྨ་རཀྵི་ཏ། །ཤནྟི་པ་དང་རཏྣ་ཨ་ཀ་ར། །ཝ་ཀི་ཤྭ་ར་བྲམ་ཟེ་ཛེ་ཏ་རི། །བརྒྱ་དང་ལྔ་བཅུའི་ཚོགས་རབ་བཅས་པ་ཡི། །བླ་མ་རྣམས་ཀྱི་མདོ་རྒྱུད་གཞུང་འགྲེལ་དང་། །མན་ངག་བརྒྱུད་པས་ཁོ་བོ་རྗེས་སུ་བཟུང་། །བླ་མ་བསླུ་བའི་སློབ་མ་ང་མ་ཡིན། །ཁོ་བོ་རྒྱལ་པོ་སྨྲ་བ་ལན་ཅིག་ཡིན། །འབྲོམ་སྟོན་སྤྱི་ལ་སོམས་ལ་ཕ་རྗེས་ཟུངས། །ཞེས་གསུངས་པས་སོ། །

སྲོལ་འཛིན་ཨ་ཏི་ཤའི་རྣམ་ཐར།

བཞི་པ་སྲོལ་འཛིན་ཨ་ཏི་ཤའི་རྣམ་ཐར་ནི། ཇོ་བོ་ཆེན་པོ་འདི་ཉིད་ནི་བསྐལ་པ་དཔག་ཏུ་མེད་པའི་སྔོན་རོལ་ཏུ། བཅོམ་ལྡན་འདས་ཐུབ་པ་ཆེན་པོ་དང་ཐུགས་མཉམ་དུ་བསྐྱེད་ཅིང་། སྟོན་པ་སངས་རྒྱས་པའི་དུས། རྒྱལ་སྲས་བཟང་སྐྱོང་ཞེས་པར་བཞུགས་ཤིང་། སྐལ་བཟང་འདི་ལ་སངས་རྒྱས་ཀྱི་མཛད་པ་སྟོན་པར་བཀའ་གདམས་བླ་མ་རྣམས་ཀྱི་གསུང་ལས་འབྱུང་། སྐུ་སྐྱེ་བ་འདིའི་རྣམ་ཐར་ཐུན་མོང་དུ་གྲགས་པ་རྣམས་ལམ་ཡིག་ཏུ་འབྱུང་བ་དང་། ཐུན་མོང་མ་ཡིན་པ་སྣོད་མིན་ལ་གསང་བ་རྣམས་ཟུར་དུ་རྒྱས་བསྡུས་དུ་མ་སྣང་ཡང་། འདིར་གདུལ་བྱ་ཐུན་མོང་བ་དང་གཙོ་ཆེར་མཐུན་པ་ཟུར་ཙམ་བཀོད་ན། ཤིང་མོ་གླང་ལ་བོད་དུ་རྒྱལ་པོ་གླང་དར་གྱིས་བསྟན་པ་ནུབ་པར་བྱས་པ་དེ་ནས། ལོ་དོན་བརྒྱད་སོང་བའི་དུས། ཇོ་བོ་ཆེན་པོ་སྐུ་འཁྲུངས་ཏེ། དེའི་རྣམ་ཐར་ནི་པཎྜི་ཏ་སའི་སྙིང་པོ་དང་། ལོ་ཙཱ་བ་ནག་ཚོ་གཉིས་ཀྱིས། ཕོ་བྲང་ན་བཞུགས་པའི་དུས་དང་། ཐར་པར་གཤེགས་པའི་ཡོན་ཏན་གཉིས་སུ་གསུངས་པའི། དང་པོ་ལ་གཉིས། ལོངས་སྤྱོད་དང་རིགས་ཕུན་སུམ་ཚོགས་པའི་ཚུལ་དང་། རྟེན་དེ་ལ་ཡོན་ཏན་མཉེས་ཚུལ་ལོ། །དང་པོ་ནི། རྡོ་རྗེ་གདན་གྱི་ཤར་ཕྱོགས་བྷཾ་ག་ལ་ཟ་ཧོར་གྱི་ཡུལ་ན། གྲོང་ཁྱེར་ཆེན་པོ་བི་ཀྲ་མ་ལ་པུ་རི་ཞེས་པ། མི་ཁྱིམ་འབུམ་ཕྲག་ཉི་ཤུ་རྩ་བདུན་ཡོད་པའི་དབུས་ན། ཕོ་བྲང་གསེར་གྱི་རྒྱལ་མཚན་ཞེས་པ་གསེར་གྱི་རྒྱལ་མཚན་སྟོང་ཕྲག་ཉི་ཤུ་ལྔ། སྐྱེད་མོས་ཚལ་དང་རྫིང་བུ་ལྔ་སྟོང་། ཏ་ལའི་ཕྲེང་བ་བདུན་གྱིས་བསྐོར་བ། མདོར་ན་ལོངས་སྤྱོད་དང་མངའ་ཐང་འབྱོར་པ་རྣམས་རྒྱ་ནག་སྟོང་ཁུན་རྒྱལ་པོ་དང་མཉམ་ལ། དེར་ཡབ་རྒྱལ་པོ་དགེ་བའི་དཔལ་དང་། ཡུམ་དཔལ་མོ་འོད་ཟེར་ཅན་གཉིས་ལ། སྲས་གསུམ་འཁྲུངས་པ། པདྨའི་སྙིང་པོ། ཟླ་བའི་སྙིང་པོ། དཔལ་གྱི་སྙིང་པོ་གསུམ་ལས། འབྲིང་པོ་ཟླ་བའི་སྙིང་པོ་བླ་མ་རྗེ་བཙུན་འདི་ཉིད་ཡིན་ཏེ། པཎྜི་ཏ་སའི་སྙིང་པོས་རིགས་ཕུན་སུམ་ཚོགས་པར་བསྟོད་པ་ལས། ཤར་ཕྱོགས་ཟ་ཧོར་ཡུལ་མཆོག་ན། །དེ་ན་གྲོང་ཁྱེར་ཆེན་པོ་ཡོད། །བི་ཀྲ་མ་ནི་པུ་ར་ཡིན། །དེ་ཡི་དབུས་ན་རྒྱལ་པོའི་ཁབ། །གསེར་གྱི་རྒྱལ་མཚན་ཅན་ཞེས་བྱ། །ལོངས་སྤྱོད་མངའ་ཐང་འབྱོར་པ་ནི། །རྒྱ་ནག་སྟོང་ཁུན་རྒྱལ་པོ་འདྲ། །ཡུལ་དེའི་རྒྱལ་པོ་དགེ་བའི་དཔལ། །བཙུན་མོ་དཔལ་མོ་འོད་ཟེར་ཅན། །ཡབ་ཡུམ་གཉིས་ལ་སྲས་གསུམ་མངའ། །པདྨའི་སྙིང་དང་ཟླ་བའི་སྙིང་། །དཔལ་གྱི་སྙིང་པོ་ཞེས་བྱ་འོ། །རྒྱལ་པོ་པདྨའི་སྙིང་པོ་ལ། །བཙུན་མོ་ལྔ་ཡོད་སྲས་ནི་དགུ། །སྲས་ཀྱི་ཐུ་བོ་བསོད་ནམས་དཔལ། །ད་ལྟའི་དུས་ན་མཁས་པ་ཆེ། །དྷ་ན་ཤྲཱི་ཞེས་བྱ་བར་གྲགས། །ཆུང་བ་དཔལ་གྱི་སྙིང་པོ་ནི། །དགེ་སློང་བིདྱ་ཙནྟྲ་ཡིན། །འབྲིང་པོ་ཟླ་བའི་སྙིང་པོ་ཡིན། །ད་ལྟ་བླ་མ་རྗེ་བཙུན་ཡིན། །ཞེས་འབྱུང་པ་ལྟར་རོ། །གཉིས་པ་རྟེན་དེ་ལ་ཡོན་ཏན་བརྙེས་ཚུལ་ནི། ཆུ་ཕོ་རྟ་ལོ་ལ་ཕོ་བྲང་གི་ཡང་ཐོག་ཏུ་འཁྲུངས་མ་ཐག ཐོག་མཚམས་ན་ཨུཏྤ་ལ་སྔོན་པོ་སྐྱེས་པ་འཁོར་ཀུན་གྱིས་མཐོང་སྟེ། རྒྱལ་བུས་སྒྲོལ་མའི་ཞལ་དངོས་སུ་གཟིགས། སྐྱེ་བ་དཔག་ཏུ་མེད་པའི་ལྷ་ཡིན་པས་འབྲལ་མེད་དུ་རྗེས་སུ་འཛིན་པ་ཡིན་གསུངས། དགུང་ལོ་བཅུའི་བར་དུ་ཡི་གེ་དང་། བཟོ་དང་། གསོ་སྤྱད་དང་། ལུགས་ཀྱི་བསྟན་བཅོས་རྣམས་ལ་ལེགས་པར་སྦྱངས། དགུང་ལོ་ཉེར་གཅིག་གི་བར་དུ་སྒྲ་དང་། ཚད་མ་དང་། སྒྱུ་རྩལ་དྲུག་ཅུ་རྩ་བཞི། ཟློས་གར་གྱི་བསྟན་བཅོས། སྙན་ངག མངོན་བརྗོད། རྩིས་ཀྱི་བསྟན་བཅོས་རྣམས་ལ་གཙོ་བོར་ལེགས་པར་སྦྱངས། བྲམ་ཟེ་ཛེ་ཏ་རི། བྱང་ཆུབ་བཟང་པོ། རིག་པའི་ཁུ་བྱུག ཨ་ཝ་དྷུ་ཏི་པ། རྣལ་འབྱོར་པ་ར་ཧུ་ལ་གུབྟ། བོད་སྐད་དུ་གསང་བའི་སྒྲ་གཅན་འཛིན་ཞེས་པ་རྣམས་ལ་ཐེག་པ་ཆེན་པོའི་ཆོས་མཐའ་དག་དང་། ཁྱད་པར་ར་ཧུ་ལ་ལ་དགྱེས་རྡོར་ཞུས། མཚན་ཡེ་ཤེས་གསང་བའི་རྡོ་རྗེ་ཞེས་བྱ་བར་བཏགས། རྒྱུད་མན་ངག་དང་བཅས་པ་རྫོགས་པར་གསན། དེ་ནས་ལོ་དྲུག་རིག་པ་བརྟུལ་ཞུགས་ཀྱི་སྤྱོད་པ་མཛད། ཁྱད་པར་དུ་རྒྱུད་སྡེ་བཞི་ལ་སྦྱངས་པས་མཁས་ཤིང་གྲུབ་པ་བརྙེས། ཡི་དམ་མང་པོའི་ཞལ་གཟིགས། ཏིང་ངེ་འཛིན་དཔག་ཏུ་མེད་པ་འཁྲུངས། མངོན་ཤེས་ལྔ་ཐོབ། རྡོ་རྗེ་རྣལ་འབྱོར་མ་དང་དངོས་སུ་ཞལ་མཇལ། དཀྱིལ་འཁོར་ཆེན་པོ་སྤྲུལ་ནས་དབང་བསྐུར་ཏེ། རྒྱུད་མན་ངག་མ་ལུས་པར་གནང་ངོ་། །དེའི་ཚེ་སྔགས་ལ་མཁས་པའི་ཐུགས་རྒྱལ་བྱུང་བ་ལ། མཁའ་འགྲོ་མ་རྣམས་ཀྱིས་ཨུ་རྒྱན་ནས་རྒྱུད་ཀྱི་གླེགས་བམ་བསམ་གྱིས་མི་ཁྱབ་པ་སྤྱན་དྲངས་ཏེ་ཐུགས་རྒྱལ་བཅག དེའི་དུས་སུ་བྷཾ་ག་ལའི་བསྟན་པ་ཕལ་ཆེར་མུ་སྟེགས་པ་ལ་ཤོར་བ་དང་། དེའི་གནས་བརྟན་མྱ་ངན་དུ་གྱུར་པ་ལ། ཇོ་བོ་འདི་སློང་མོ་པའི་ཚུལ་གྱིས་བཞུགས་པའི་ཚེ། སྐུ་ལ་འོད་ཟེར་འཕྲོ་བ་མཐོང་བས་མུ་སྟེགས་དང་རྩོད་ནུས་སམ་ཞུས་པས་ནུས་གསུངས། དེ་ནས་དུས་བྱས་ཏེ་བརྩད་པས། ཕྱི་རོལ་པ་ཐམས་ཅད་ཚར་བཅད་དེ་བསྟན་པ་ལ་བཙུད་དོ། །

སྤྱི་དོན་གཉིས་པ་ཐར་པར་གཤེགས་པའི་ཡོན་ཏན་ནི། ཇོ་བོའི་དགོངས་པ་ལ། ད་ནི་རྣལ་འབྱོར་པའི་ཆ་ལུགས་ཀྱིས་ནགས་སམ་དུར་ཁྲོད་དུ་བསྡད་ལ་གསང་སྔགས་ཀྱི་སྒོ་ནས་མཆོག་བསྒྲུབ་དགོངས་པ་ལ། ར་ཧུ་ལ་གུཔྟ་རི་བྱ་རྐང་ཅན་ན་བཞུགས་པས་མཁྱེན་ནས་རྫུ་འཕྲུལ་གྱིས་བྱོན་ཏེ་རབ་ཏུ་བྱུང་བར་བསྐུལ་བ་དང་། མནལ་ལམ་དུ་གཙུག་ལག་ཁང་ཆེན་པོ་ན་སྟོན་པ་ཉན་ཐོས་དང་བཅས་པའི་གྲལ་བཤམ་ན་བཞུགས་པ་ལ། ཐུབ་པའི་གསུངས་ནས། མི་མ་གི་ཅི་ལ་ཆགས་ནས་རབ་ཏུ་མི་འབྱུང་གསུངས་པས། ཐུགས་བསྐུལ་ཏེ་ཕལ་ཆེན་སྡེ་པའི་མཁན་པོ། སྦྱོར་ལམ་པ་ཤཱི་ལ་རཀྵི་ཏ་ཞེས་པ་ཚུལ་ཁྲིམས་བསྲུང་བ་ལས་རབ་ཏུ་བྱུང་ཞིང་བསྙེན་པར་རྫོགས། མཚན་དཱི་པཾ་ཀ་ར་ཤྲཱི་ཛྙ་ན་ཞེས་བཏགས་ཏེ། དཱི་པཾ་མར་མེ་ཀ་ར་མཛད་ཤྲཱི་དཔལ། ཛྙཱ་ན་ཡེ་ཤེས་ལ་འཇུག ཏི་པཾ་ཞེས་པ་མ་དག་པར་བཤད་དོ། །དགུང་ལོ་ཉེར་བརྒྱད་དམ་ཉེར་དགུ་ལ་རབ་ཏུ་བྱུང་སྟེ། དེ་ནས་ཨོ་ཌྱན་ཏ་པུ་རིར་བླ་མ་དྷརྨཱ་རཀྵི་ཏ་ལ་བྱེ་བྲག་བཤད་མཚོ་སོགས་ཐེག་དམན་གྱི་བསྟན་བཅོས་དང་། སྡེ་པ་བཞི་ཀའི་འདུལ་བ་ལག་ལེན་དང་བཅས་པ་གསན་སྦྱོང་མཛད། གཞན་ཡང་བརྒྱུད་པ་གསུམ་ལྡན་གྱི་བླ་མ་རྣམས་ལ་སྡེ་སྣོད་མཐའ་དག་གསན་ནས་མཁས་པའི་གྲགས་པས་ཕྱོགས་ཐམས་ཅད་དུ་ཁྱབ་ལ། ཁྱད་པར་དུ་བྱང་ཆུབ་སེམས་ཀྱི་སྒོམ་པའི་མན་ངག་ལ་ནན་ཏན་སྙིང་པོར་མཛད་དེ་གསན་པས་གོང་དུ་བརྗོད་པ་ལྟར་བླ་མ་གསུམ་གྱི་གདམས་ངག་རྫོགས་པར་མངའ་ཞིང་། ལོ་ཙཱ་བའི་བསྟོད་པ་ལས་ཀྱང་། རྟག་ཏུ་བསྟེན་པའི་བླ་མ་ནི། །ཤནྟི་པ་དང་གསེར་གླིང་པ། །བྷ་དྲ་བོ་དྷི་ཛྙཱ་ན་ཤྲཱི། །དངོས་གྲུབ་ཐོབ་པ་མང་པོ་དང་། །ཁྱད་པར་དུ་ནི་ཀླུ་སྒྲུབ་ནས། །གཅིག་ནས་གཅིག་ཏུ་བརྒྱུད་པ་ཡི། །ཟབ་པ་དང་ནི་རྒྱ་ཆེ་བའི། །གདམས་པ་ཁྱེད་ལ་མངའ་བ་ཡིན། །ཞེས་གསུངས་པ་ཡིན་ལ། དེ་ལ་ཟབ་པ་ལྟ་བའི་བཤད་པ་དང་། མན་ངག་འཕགས་པ་ཀླུ་སྒྲུབ་ནས་བརྒྱུད་པ་དང་། རྒྱ་ཆེན་སྤྱོད་པའི་བརྒྱུད་པ་འཕགས་པ་བྱམས་པ་ནས་བརྒྱུད་པ་སོགས་ནི་གོང་དུ་སྨོས་པ་ལྟར་དང་། གཞན་ཡང་རྗེ་བཙུན་འཇམ་དབྱངས་ཀྱིས་རྗེས་སུ་བཟུང་བ། ངོ་མཚར་ཅན་གྱི་གཏམ་བདུན་ལ་སོགས་པའི་ཡོན་ཏན་དང་ལྡན་པའི་རྒྱལ་སྲས་ཞི་བ་ལྷ་ལ་བརྒྱུད་པའི་གདམས་ངག་རྫོགས་པར་མངའ་ཞིང་། སོ་སོར་ཕྱེ་ན་གསང་སྔགས་ལ་ཡང་བརྒྱུད་པ་ལུགས་སྲོལ་དུ་མ་ཞིག་བཞུགས་པ་ལས། ཐུན་མོང་པའི་བརྒྱུད་པ་ནི། འཇམ་དཔལ། སངས་རྒྱས་ཡེ་ཤེས་ཞབས། མར་མེ་མཛད་བཟང་པོ། ཡི་གེ་པ། ཀརྞ་པ། ཛྙཱ་ན་ཤྲཱི་མི་ཏྲ་རྣམས་སོ། །

གསང་སྔགས་མཐའ་དག་གི་བརྒྱུད་པ་ལུགས་གཅིག་ནི། ཀླུ་སྒྲུབ། ཨརྻ་དེ་ཝ། མ་ཏི་ཙ་ལ། ཏེ་མ་ཛོ་ཀི ཙ་ཏི་མ། མཉྫུ་ཤྲཱི་བྷ་དྲ། བོ་དྷི་བྷ་དྲ། ཤནྟི་པ་རྣམས་སོ། །ལུགས་གཅིག་ནི། སངས་རྒྱས་ཡེ་ཤེས། སངས་རྒྱས་ཞི་བ། སངས་རྒྱས་གསང་བ། ཀུ་ས་ལི་ཆེ་བ། ཀུ་ས་ལི་ཆུང་བ་རྣམས་སོ། །གསང་འདུས་མཐའ་དག་གསན་པའི་བརྒྱུད་པ་གསུམ་ལས། དང་པོ་ནི། ཨིནྟྲ་བྷུ་ཏི། ཀླུ་མོ་རྣལ་འབྱོར་མ། ས་ར་ཧ། ཀླུ་སྒྲུབ། ཙ་ན་ཀིརྟི། བིདྱ་ཨིནྡྲ། ཙོ་བི་པ་ལ་ཏ། རོལ་པའི་རྡོ་རྗེ། ས་འགེབས་པའི་ཞབས། ཤནྟི་པ་དང་། ཡང་ཀླུ་སྒྲུབ། ཟླ་གྲགས། རིག་པའི་ཁུ་བྱུག ཀུ་ས་ལི་ཆུང་བ་རྣམས་དང་། ཡང་སངས་རྒྱས་ཡེ་ཤེས་ཞབས། པདྨ་བཛྲ། ཨིནྟྲ་བྷུ་ཏི། ལྕམ་ལེགས་སྨིན་ཀ་ར། སྤྱི་བོ་སྐྱེས། འཇམ་དཔལ་བཤེས་གཉེན། སངས་རྒྱས་ཡེ་ཤེས། ཀཾ་བི་ལི། རོལ་པའི་རྡོ་རྗེ། ས་འགེབས་པ། ཤནྟི་པ་རྣམས་སོ། །བདེ་མཆོག་མཐའ་དག་གསན་པའི་བརྒྱུད་པ། ལཱུ་ཧི་པ། ཌཱེང་གི་པ། དྷ་རི་པ། ཛེ་ཏ་རི་རྣམས་སོ། །ཀྲི་ཡ་དང་ཡོ་ག་མཐའ་དག་གསན་པའི་བརྒྱུད་པ་ནི། ཀུ་ས་ལི་ཆེ་བ་དང་། ཀུ་ས་ལི་ཆུང་བ་རྣམས་དང་། གཤིན་རྗེ་གཤེད་མཐའ་དག་ནི། ཀ་མ་ལ་རཀྵི་ཏ་དང་། ནག་པོ་ཞབས་རྣམས་ལ་གསན་ནོ། །བརྒྱུད་པའི་ལུགས་སྲོལ་འདི་དག་ནི་རྗེ་བསོད་ནམས་ལྷའི་དབང་པོས་མཛད་པའི་བཀའ་གདམས་ཆོས་འབྱུང་བ་ལས་ཇི་ལྟར་འབྱུང་བ་བཞིན་བཀོད་པ་ཡིན། དེ་ལྟར་བརྒྱུད་པ་བསམ་གྱིས་མི་ཁྱབ་པ་མངའ་བའི་གཙོ་བོ་ནི་གོང་དུ་སྨོས་པའི་བརྒྱུད་པ་གསུམ་པོ་དེར་འདུའོ། །མདོར་ན་ལྟ་བ་ལུང་སྟོན་པའི་བླ་མ་ནཱ་རོ་པ། བརྟུལ་ཞུགས་བྱིན་གྱིས་རློབ་པ་ཌོམྦྷི་བ། ལས་ཚོགས་བྱིན་བརླབས་སྟེར་བ་བ་ལིཾ་ཏ་ཨ་ཙརྻ། རྫུ་འཕྲུལ་བྱིན་རླབས་སྟེར་བ་མི་ཆེན་པོ། ཕག་མོའི་བྱིན་རླབས་སྟེར་བ་བྷུ་ཏ་ཀོ་ཊི། ཀླུ་སྒྲུབ་ཀྱི་གདམས་པ་སྟེར་བ་མཁས་པ་རྟ་མཆོག བྱང་ཆུབ་ཀྱི་སེམས་སྟེར་བ་ཤེས་རབ་བཟང་པོ། ཚིག་དོན་རྒྱས་པར་བྱེད་པ་ཤནྟི་པ། བསྟན་པའི་རྩ་བ་བློ་སྦྱོང་གི་སྒོར་འཇུག་པ་གསེར་གླིང་པ་ཆོས་ཀྱི་གྲགས་པ་རྣམས་ཏེ། དེ་ལྟར་མཁས་གྲུབ་ཀྱི་བླ་མ་དེ་རྣམས་བསྟེན་པས་མཁས་པའི་ཡོན་ཏན་ནི་གོང་གི་བླ་མ་བརྒྱུད་པ་དེ་ཐམས་ཅད་ཀྱི་ཡོན་ཏན་རྫོགས་པར་མངའ་ཞིང་། རྡོ་རྗེའི་གདན་བྱང་ཆུབ་ཆེན་པོའི་ཕོ་བྲང་དུ་མུ་སྟེགས་ཀྱི་སྨྲ་བ་ངན་པ་ལན་གསུམ་དུ་ཆོས་ཀྱིས་ཕམ་པར་མཛད་ནས་སངས་རྒྱས་ཀྱི་བསྟན་པ་བཟུང་ཞིང་། བཙུན་པའི་ཡོན་ཏན་ནི་སོ་ཐར་དང་འགལ་བའི་ཉེས་པ་འོང་མ་མྱོང་། བྱང་སེམས་དང་གསང་སྔགས་ཀྱི་སྡོམ་པ་ལ་ཅུང་ཟད་བྱུང་སྲིད་ཀྱང་བཤགས་བསྡམས་སོགས་ཀྱིས་ཉེས་པ་དང་ཞག་ཏུ་འགྲོགས་མ་མྱོང་ཞེས་ཇོ་བོ་ཉིད་ཀྱིས་གསུངས་པར་བཤད་པ་དང་། རྟོགས་པའི་ཡོན་ཏན་ནི། བྱང་ཆུབ་ཀྱི་ཐུགས་ལ་མངའ་བརྙེས། ཏིང་ངེ་འཛིན་ཕུན་སུམ་ཚོགས་པ་དང་། ལྷའི་སྤྱན་དང་མངོན་པར་ཤེས་པའི་ཡོན་ཏན་དང་ལྡན། དྷ་རི་ཀ་པའི་སློབ་མ་བྲམ་ཟེ་སྡོམ་པ་བཟང་པོ་སོགས་ལ་བདེ་མཆོག་གི་སྐོར་གསན་ནས། ཤར་ཕྱོགས་བྷཾ་ག་ལ་འོད་མའི་ཚལ་མེ་ཏོག་གླིང་དུ་སྒྲུབ་པ་མཛད་པས། བདེ་མཆོག་གི་དཀྱིལ་འཁོར་ཞལ་གཟིགས་བསྟོད་པ་ཡང་མཛད། མནལ་ཐུན་ཅིག་ལ་རྒྱུད་རྒྱལ་འབུམ་ཚོ་གཅིག་དང་། བཞི་བརྒྱ་ལྔ་བཅུ་རྩ་ལྔ་གསན་པར་མཛད། ཆོས་ཀྱི་གཎྚའི་སྒྲ་ནམ་མཁའ་ལ་བསྒྲགས་པ་གསན་པས་སྐྱེ་བ་མེད་པའི་དོན་ཐུགས་སུ་ཆུད་པ་སོགས། དེ་ལྟ་བུས་མཚོན་པའི་ཡོན་ཏན་བསམ་གྱི་མི་ཁྱབ་པ་རྣམས་དང་ལྡན་པའི་ཇོ་བོ་ཆེན་པོ་དེ་ཉིད་ཀྱི་སྙན་པའི་གྲགས་པས་འཕགས་ཡུལ་ཀུན་དུ་ཁྱབ་སྟེ། དེའི་ཚེ་མ་ག་དྷ་དང་། ཨོ་ཌྱན་ཏ་པུ་རི་དང་། སོ་མ་པུ་རི་དང་། ན་ལེནྟྲ་དང་། བི་ཀྲ་མ་ལ་ཤཱི་ལའི་གནས་གཞི་རྣམས་ན་པནྜི་ཏ་དང་གྲུབ་ཐོབ་ཤིན་ཏུ་མང་ཡང་། ཐམས་ཅད་ཀྱི་གཙུག་གི་ནོར་བུ་ལྟ་བུར་བཞུགས་པའི་དུས་སུ། རྒྱལ་པོ་དྷརྨ་པཱ་ལས། ཇོ་བོ་རྗེ་རྡོ་རྗེ་གདན་ནས་བི་ཀྲ་མ་ཤཱི་ལར་སྤྱན་དྲངས་ནས་བསྟན་པའི་བདག་པོར་མངའ་གསོལ་བ་ཡིན་ཏེ། སྐབས་འདིར་བི་ཀྲ་མ་ཤཱི་ལ་བཞེངས་པའི་ལོ་རྒྱུས་ཅུང་ཟད་བཤད་ན། ན་ལེནྟྲ་ན་སློབ་དཔོན་ཀམ་པ་ལ་བྱ་བ་ཕྱག་རྒྱ་ཆེན་པོའི་དངོས་གྲུབ་བརྙེས་པ་གཅིག་བཞུགས་པ་དེས། ཆུ་བོ་གངྒཱའི་འགྲམ་ན་བྲག་དེའུ་ཅིག་ཡོད་པ་དེའི་སྟེང་དུ་གཙུག་ལག་ཁང་བརྩིགས་ན་སངས་རྒྱས་ཀྱི་བསྟན་པ་ལ་ཕན་ཆེ་བ་མངོན་ཤེས་ཀྱིས་གཟིགས་ནས། དེ་བརྩིགས་པ་ལ་རབ་ཏུ་བྱུང་པ་བས། རྒྱལ་པོའི་རྟེན་ནུས་པ་ཆེ་བར་དགོངས་ཏེ། རྒྱལ་པོ་གཽ་པ་ལའི་སྲས་དེ་ཝ་ཕ་ལ་བྱ་བ་མངའ་རིས་ཕུན་སུམ་ཚོགས་པ་དང་ལྡན་པ་དེའི་བཙུན་མོའི་རྨི་ལམ་དུ། རྣམ་སྦྱར་དམར་སེར་གྱོན་པ་ལྷུང་བཟེད་དང་འཁར་སིལ་ཐོགས་པ་ཅིག་གནས་གཡར་ཟེར་བ་རྨིས་ཏེ། རྒྱལ་པོ་ལ་བརྗོད་པས། དོ་ནུབ་ཀྱང་བྱུང་ན་གནས་གཏང་གི་གྱིས་གསུངས། ཡང་བྱོན་པ་ལ་དེ་ལྟར་བྱས་པས། རྒྱལ་པོ་དེའི་སྲས་སུ་སྐུ་སྐྱེ་བ་བཞེས་པ་རྒྱལ་པོ་དྷརྨ་པཱ་ལ་བྱ་བ། ཡུལ་དབུས་མ་ག་དྷ་ཐམས་ཅད་ལ་དབང་བསྒྱུར་བ་དེས་བྲག་དེའུ་དེའི་ཁར་གཙུག་ལག་ཁང་བཞེངས་ཏེ་བི་ཀྲ་མ་ཤཱི་ལ་བྱ་བར་གྲགས་ཏེ། བོད་སྐད་དུ། ཚུལ་ཁྲིམས་ཀྱི་ངད་དང་ལྡན་པ་བྱ་བར་འོང་བར་བཤད། དེར་རྩ་བའི་སྡེ་བཞིའི་དགེ་སློང་ཚང་བར་བཞུགས་ཤིང་འཚོ་བ་ཡང་རྒྱལ་པོས་སྦྱོར་པ་དང་། རིག་པའི་གནས་ལྔའི་འཆད་ཉན་དར་བས་དེར་བཞུགས་པའི་རབ་བྱུང་ཕལ་ཆེ་བ་པཎྜི་ཏ་ཤ་སྟག་ཡིན་ནོ། །དེའི་ཚེ་རྡོ་རྗེ་གདན་ནས་ཇོ་བོ་རྗེ་བི་ཀྲ་ལ་ཤཱི་ལར་རྒྱལ་པོ་དྷརྨཱ་པཱ་ལས་སྤྱན་འདྲེན་པའི་རྒྱུ་ཡང་པན་གྲུབ་རྣམས་ཀྱི་ནང་ནས་འདི་ཁོ་ན་ལྷག་པར་གཟིགས་ཏེ་སྤྱན་དྲངས་ཤིང་མཚན་ཡང་ཨ་ཏི་ཤ་ཞེས་མཚན་གསོལ་ཞིང་། དེ་བོད་ཀྱི་སྐད་དུ་ཕུལ་དུ་བྱུང་བ་ཞེས་བྱ་སྟེ། དེ་དུས་སྐྱེས་ཆེན་རྣམས་ཀྱི་གཙུག་གི་ནོར་བུ་ལྟ་བུར་མངའ་གསོལ་བ་ཡིན་ལ། དེ་ནས་རྗེ་བཙུན་གྱིས་ཀྱང་རྒོལ་བ་ངན་པ་ཐམས་ཅད་ཚར་བཅད། སངས་རྒྱས་ཀྱི་བསྟན་པའི་སྲོག་ཤིང་ལྟ་བུར་བཞུགས་ནས། སྡེ་པ་ཐ་དད་པ་རྣམས་ཀྱི་བྱིན་ལེན་ལ་སོགས་པ་བླང་དོར་གྱི་གནས་ཕྲ་མོ་རྣམས་ཡན་ཆད་མ་འདྲེས་པར་ཐེ་ཚོམ་བཅད་པར་མཛད་པ་ཡིན་ཏེ། ལོ་ཙཱ་བའི་བསྟོད་པ་ལས། བྱང་ཆུབ་ཆེན་པོའི་ཕོ་བྲང་དུ། །ཐམས་ཅད་འདུས་ཤིང་ཚོགས་པ་ན། །རང་དང་གཞན་གྱི་སྡེ་པ་ཡི། །གྲུབ་མཐའ་ངན་པའི་རྒོལ་བ་ཀུན། །སེང་གེའི་ང་རོའི་སྒྲ་སྐད་ཀྱིས། །ཐམས་ཅད་ཀྱི་ནི་ཀླད་པ་འགེམས། །ཞེས་དང་། ཨོ་ཏན་ཏའི་པུ་རི་ན། །རབ་བྱུང་བརྒྱ་ཕྲག་ཕྱེད་དང་གསུམ། །བི་ཀྲ་མ་ལ་ཤཱི་ལ་ན། །རབ་བྱུང་བརྒྱ་ཕྲག་མང་པོ་དང་། །རྩ་བའི་སྡེ་བཞི་ཚང་བར་བཞུགས། །སྡེ་བའི་ཁེ་གྲག་ཁྱོད་མི་མཛད། །མ་ག་དྷ་ཡི་ཡུལ་གྱི་ནི། །གནས་གཞི་མ་ལུས་ཐམས་ཅད་ཀྱི། །སྟོན་པའི་འཁོར་ནི་བཞི་པོ་ཡི། །ཀུན་གྱི་གཙུག་གི་ནོར་བུར་འགྱུར། །ཁྱོད་ནི་སྡེ་པ་བཅོ་བརྒྱད་ཀྱི། །ཀུན་གྱི་སྤྱི་ལ་བཞུགས་པས་ན། །ཐམས་ཅད་ཀྱི་ནི་ལུང་ཡང་ལེན། །ཞེས་འབྱུང་བ་ལྟར་རོ། །དེ་ཡང་བསྟན་པ་བསྲུང་བ་ལ། ཚུལ་ཁྲིམས་ཀྱི་སྟོབས་ཀྱིས་བསྲུང་བ། རྣལ་འབྱོར་གྱི་སྟོབས་ཀྱིས་བསྲུང་བ། དབང་ཕྱུག་གི་སྟོབས་ཀྱིས་བསྲུང་བ། རིག་པའི་སྟོབས་ཀྱིས་བསྲུང་པ་བཞི་ལས། དེ་བཞི་ཀའི་སྟོབས་ཀྱིས་སངས་རྒྱས་ཀྱི་བསྟན་པ་བསྲུང་བ་ནི་ཇོ་བོ་རྗེ་ཉིད་ཙམ་ཡིན་ཞེས་དགེ་བའི་བཤེས་གཉེན་བཀའ་གདམས་པ་རྣམས་གསུངས་ཤིང་། རྒྱས་པར་གཞན་དུ་བལྟའོ། །དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་པ་དེ་བོད་དུ་སྤྱན་དྲངས་པའི་ཚུལ་ནི། དེ་ཡང་སྤྱིར་བོད་ཀྱི་མི་རྣམས་བྱུང་ཚུལ་དང་། བསྟན་པ་སྔ་དར་གྱི་དུས་སུ་དམ་པའི་ཆོས་འཕེལ་འགྲིབ་བྱུང་བའི་ཚུལ་རྣམས་ཅུང་ཟད་བཤད་ན། དེ་ཡང་བོད་ཀྱི་མི་རྣམས། བཀའ་ཆེམས་ཀ་བཀོལ་མ་ལས། སྤྲེའུ་དང་བྲག་སྲིན་གྱི་རྒྱུད་དུ་བཤད། ལྷ་ལས་ཕུལ་དུ་བྱུང་བའི་བསྟོད་འགྲེལ་ལས། སྐྱབས་སེང་བུ་སྡེ་ལྔ་དང་། དགྲ་ངན་དཔུང་ཚོགས་བཅུ་གཉིས་མ་མཐུན་པའི་ཚེ། རྒྱལ་པོ་རུ་པ་ཏི་ཞེས་པ་དཔུང་དང་བཅས་པ་ཁ་བ་ཅན་དུ་བྲོས་པའི་རྒྱུད་ཡིན་པར་བཤད་དེ། བཀའ་གདམས་བརྒྱུད་པ་འདི་པ་གཉིས་ཀའི་རྒྱུད་དུ་བཞེད་ལ། དེ་ནས་བོད་ཀྱི་རྒྱལ་པོ་ལ་སྔ་མ་རྗེ་གཉའ་ཁྲི་བཙན་པོ་ནས། རྒྱལ་རབས་ཉི་ཤུ་རྩ་བརྒྱད་པ། སངས་རྒྱས་སྨན་བླའི་སྤྲུལ་པ་ལྷ་ཐོ་ཐོ་རི་གཉན་བཙན་བྱོན་ཏེ་དམ་པའི་ཆོས་ཀྱི་དབུ་བརྙེས་པ་ཙམ་མཛད། དེ་ནས་རྒྱལ་རབས་ལྔ་པ་ལ་འཕགས་པ་སྤྱན་རས་གཟིགས་དབང་ཕྱུག་གིས་རྒྱལ་པོ་སྲོང་བཙན་སྒམ་པོའི་སྐུར་སྤྲུལ་ཏེ། བོད་ཀྱི་མི་རྣམས་དགེ་བ་བཅུའི་ལམ་ལ་བཀོད་ཅིང་དུད་འགྲོ་རྣམས་ཀྱི་རྣ་བར་ཡང་། ཨརྻ་ཨ་ཝ་ལོ་ཀ་ཞེས་བསྒྲགས་པ་སོགས་རིམ་གྱིས་ཐར་པའི་ས་བོན་འཇོག་པར་མཛད། དེ་ནས་རྒྱལ་རབས་བཞི་ན་འཕགས་པ་འཇམ་དཔལ་གྱི་སྤྲུལ་པར་གྲགས་པ་བྱང་ཆུབ་སེམས་དཔའ་ཁྲི་སྲོང་ལྡེའུ་བཙན་གྱིས་ཟ་ཧོར་གྱི་མཁས་པ་ཆེན་པོ་ཞི་བ་འཚོ་སྤྱན་དྲངས་ནས། སད་མི་མི་བདུན་ལ་སོགས་པ་རབ་ཏུ་བྱུང་ཞིང་། སློབ་དཔོན་པདྨ་འབྱུང་གནས་ཀྱིས་བོད་ཀྱི་ལྷ་སྲིན་གདུག་པ་ཅན་རྣམས་བཏུལ། སངས་རྒྱས་ཀྱི་བསྟན་པ་བཙུགས་པ་ལས། དེ་དག་ཉིད་ཀྱི་རིང་ལ་ཕ་རོལ་ཏུ་ཕྱིན་པ་དང་། རྡོ་རྗེ་ཐེག་པའི་བསྟན་པ་མཐའ་དག་རྒྱས་པར་བྱུང་ཞིང་། དེ་དག་གི་རྒྱ་དཔེ་བསམ་ཡས་སུ་བཞུགས་པ་རྣམས་ཕྱིས་ཇོ་བོ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་གཟིགས་པས་ངོ་མཚར་བ་འཁྲུངས་ཏེ། དུས་དེར་འབྱུང་བའི་བོད་ཀྱི་བསྟན་པ་འདྲ་བ་རྒྱ་གར་དུ་ཡང་བྱུང་དཀའ་བར་འདུག་ཅེས་གསུངས་ཞེས་ལམ་ཡིག་ལས་འབྱུང་ངོ་། །དེ་ལྟ་བུའི་བསྟན་པ་ཕུན་སུམ་ཚོགས་པ་དེ་ཡང་། རྒྱལ་པོ་དར་མ་ཞེས་པས་སྡིག་ཅན་གྱི་བློན་པོ་དང་བགྲོས་ཏེ། རབ་ཏུ་བྱུང་བ་མང་པོ་ཁྱིམ་པར་ཕབ་ཅིང་། རྟགས་འདོར་དུ་མ་འདོད་པ་རྣམས་བཀྲོངས་ནས། བསྟན་པ་རིན་པོ་ཆེ་བསྣུབས་སོ། །དེའི་དུས་སྔགས་ཀྱི་བསྟན་པ་འཛིན་པར་རློམ་པའི་ཁྱིམ་པ་མང་པོས་རང་གི་ཡི་དམ་ཙམ་ལ་རྟེན་པ་དང་། སྔགས་ཀྱི་གླེགས་བམ་ལུས་པ་རྣམས་ཆུད་མ་ཟོས་པར་བྱས་ཀྱང་། བཤད་སྒྲུབ་ཀྱི་བསྟན་པ་རྣལ་མ་མེད་པས་རྒྱུད་དོན་ལོག་པར་འགྲེལ་བ་དང་། མངོན་སྤྱོད་ཀྱི་ལས་གཙོ་བོར་བྱེད་པ་མང་དུ་བྱུང་ངོ་། །དུས་དེར་གཙང་རབ་གསལ་ལ་སོགས་པ་དགེ་སློང་གསུམ་དཔལ་ཆུ་བོ་རིར་སྒྲུབ་པ་མཛད་ཅིང་བཞུགས་པ་ལ། རྒྱལ་པོས་བསྟན་པ་བསྣུབས་པ་གསན་པས། འདུལ་བའི་དཔེ་མང་དུ་བསྣམས་ནས་བྲོས་ཏེ་རིམ་གྱིས་མདོ་སྨད་ཀྱི་ཆར་བྱོན་ནས། བླ་ཆེན་དགོངས་པ་རབ་གསལ་རབ་ཏུ་བྱུང་བ་དང་བསྙེན་པར་རྫོགས་པར་མཛད་དེ། བླ་ཆེན་གྱིས་ཀྱང་དགེ་སློང་དང་དགེ་ཚུལ་མང་དུ་སྤེལ་ལ། དེ་ནས་བླ་མ་ཆེན་པོ་ཉིད་ཀྱིས་དགེ་སློང་གསུམ་པོ་དེ་ལས་འོང་པའི་འདུལ་བ་དང་མངོན་པའི་སྡེ་སྣོད་མང་པོ་དག་དང་། བླ་མ་གཞན་ལས་ཀྱང་སྔགས་དང་ཕ་རོལ་ཏུ་ཕྱིན་པའི་གཞུང་མང་པོ་གསན་ཞིང་། སྐུའི་སྐྱེ་བ་ཕྱི་མ་དགའ་ལྡན་དུ་གཤེགས་པ་དེའི་སློབ་མ་བརྒྱུད་པ་དང་བཅས་པའི་དྲིན་ལས། དབུས་གཙང་གི་ས་ཆར་ཡང་མདོ་སྔགས་ཀྱི་བསྟན་པ་བྱུང་མོད་ཀྱི། འོན་ཀྱང་ཁྱིམ་པ་ཕལ་ཆེར་རྒྱལ་པོའི་མགོ་གནོན་དང་བྲལ་བས་འཐབ་རྩོད་ལ་དགའ་ཞིང་། དེའི་རིགས་ལས་བྱུང་བའི་སྔགས་པ་མང་པོས་དགྲའི་ཕྱོགས་ལ་མངོན་སྤྱོད་ཀྱི་ལས་བྱས་པས་སྐྱེ་བོ་མང་པོ་ཕུང་བར་གྱུར་པ་དང་། སྔགས་ཀྱི་གསང་པའི་སྤྱོད་པ་ལས་ཉམས་ཏེ། གསང་བའི་གནས་རྣམས་འཆོལ་པར་སྟོན་ཅིང་། སྦྱོར་སྒྲོལ་སོགས་སྔགས་ལ་སྙད་པའི་རྩིང་ཆོས་སྣ་ཚོགས་དང་། ཆོ་ག་རྣམས་ཀྱང་མ་ཚང་ཞིང་འཁྲུལ་པ་མང་དུ་བྱུང་བ་དང་། གཞན་ཡང་བམ་སྒྲུབ་སོགས་ལོགས་ཆོས་སྣ་ཚོགས་དར་ཞིང་། རྒྱ་ནག་ལུགས་ཀྱི་རྫོགས་པ་ཆེན་པོའི་ལུགས་འཛིན་པ་འགའ་ཞིག་གིས། སྟོང་པ་ཉིད་གཅིག་པུ་བསྒོམ་པས་དྲི་མ་མཐའ་དག་དང་བྲལ་བའི་ཆོས་ཀྱི་སྐུ་ཐོབ་ལ། དེ་ཐོབ་ན་གཟུགས་ཀྱི་སྐུ་ཤུགས་ལ་འབྱུང་བས། སྦྱིན་པ་ལ་སོགས་པའི་ཐབས་མང་པོ་ལ་སློབ་པ་ནི་ཚེགས་ཆེའོ་ཟེར་བ་དག་ཀྱང་བྱུང་ཞིང་ཧ་ཤང་གི་ལྟ་བ་ཞེས་མིང་ལ་སྐྱོན་དུ་ལྟ་ཡང་། དོན་ལ་མཆོག་ཏུ་འཛིན་པ་དང་། ལྟ་སྤྱོད་ཡ་བྲལ་གྱིས་སངས་རྒྱས་ཐོབ་པར་འདོད་པ་སོགས་ཆོས་ལྟར་བཅོས་པ་སྣ་ཚོགས་ཀྱིས་བསྟན་པ་རིན་པོ་ཆེ་དྲི་མ་ཅན་དུ་གྱུར་ཅིང་། དཀའ་བའི་གནད་རྣམས་ལ་ཡང་ཐེ་ཚོམ་དུ་གྱུར་པ་དེའི་ཚེ། མདོ་རྒྱུད་ནས་ལུང་བསྟན་པའི་ལྷ་བླ་མ་ཡེ་ཤེས་འོད་ཅེས་བྱ་བའི་བོད་ཀྱི་རྒྱལ་བརྒྱུད་དྲི་མ་མེད་པར་བསམ་བཞིན་དུ་བྱོན་པ་དེས། དེ་རྣམས་ལ་ཐུགས་མ་ཆེས་པར། མངའ་རིས་སྐོར་གསུམ་ནས་ཁྱེའུ་བློ་རྣོ་བ་ཉེར་གཅིག དམ་པའི་ཆོས་དང་པཎྜི་ཏ་འཚོལ་བའི་ཞལ་བཀོད་དང་བཅས་ཏེ་རྒྱ་གར་དུ་བརྫངས་པས། དེ་རྣམས་ཀྱི་ནང་ནས་ལོ་ཆེན་རིན་ཆེན་བཟང་པོ་དང་། ལོ་ཆུང་ལེགས་པའི་ཤེས་རབ་གཉིས་མཁས་པའི་མཐར་ཕྱིན་པར་གྱུར་ཏེ། བོད་ལ་ཕན་ཐོག་པའི་པཎྜི་ཏ་བཙལ་བས། བི་ཀྲ་མ་ཤཱི་ལའི་པཎྜི་ཏ་ཆེན་པོ་དཱི་པཾ་ཀཱ་ར་ཤྲཱི་ཛྙཱ་ནའི་ཡོན་ཏན་གྱི་ཁྱད་པར་མཐའ་ཡས་པ་རྣམས་གསན་ཀྱང་། རང་གིས་སྤྱན་འདྲེན་པ་མ་སྤོབས་ཏེ་ཚུར་བྱོན་ནས། རྒྱལ་པོ་ལ་ལོ་རྒྱུས་རྒྱས་པར་ཞུས་པས། ཐུགས་མཉེས་ཤིང་ཐེ་ཚོམ་ཡང་ཆོད་པར་མཛད་དོ། །དེའི་ཚེ་ལོ་ཙཱ་བ་རིན་ཆེན་བཟང་པོའི་དྲིན་གྱིས། གསང་སྔགས་སྤྱི་དང་། དཀྱིལ་འཁོར་ཆོ་གའི་ལག་ལེན་སོགས་མངའ་རིས་སྐོར་གསུམ་དུ་དར་བར་གྱུར་ཀྱང་། རབ་ཏུ་བྱུང་བ་འགའ་ཞིག་ཚུལ་ཁྲིམས་ཀྱི་ཀུན་ཏུ་སྤྱོད་པ་དག་པས་སོ་སོར་ཐར་པ་ཙམ་གྱིས་ཆོག་ཤེས་ནས། ཐེག་པ་ཆེན་པོ་བྱང་ཆུབ་སེམས་དཔའི་ཀུན་ཏུ་སྤྱོད་པ་ལ་གཡེལ་ཞིང་། བྱེ་བྲག་ཏུ་ཕ་རོལ་ཏུ་ཕྱིན་པ་ལ་སྒྲུབ་པ་ལྷུར་ལེན་པ་ཉུང་བ་ཉིད་དང་། སྔོན་གྱི་ལོག་པར་རྟོག་པ་མཐའ་དག་སེལ་བ་ལ་པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དེ་ཉིད་བོད་དུ་སྤྱན་དྲངས་ན། བསྟན་པ་སྐྱོན་དང་བྲལ་བར་འགྱུར་རོ་སྙམ་དུ་ཆོས་རྒྱལ་ཉིད་ཀྱི་ཐུགས་ལ་དགོངས་ནས་འབད་པ་ཆེན་པོས། ལོ་ཙཱ་བ་རྒྱ་བརྩོན་སེང་འཁོར་བརྒྱ་ཙམ་གསེར་མང་པོ་དང་བཅས་ཏེ་རྒྱ་གར་དུ་བཏང་ཡང་། འཁོར་ཕལ་ཆེ་བ་ཚད་པས་གུམ། གསེར་རྣམས་ཀྱང་བརླགས་ནས། ཇོ་བོ་སྤྱན་མ་འདྲོངས། དུས་དེར་ལྷ་བླ་མ་ཡེ་ཤེས་འོད་གསེར་འཚོལ་དུ་བྱོན་པ། གར་ལོག་གི་རྒྱལ་པོས་བཟུང་བས། དེའི་དབོན་པོ་ལྷ་བཙུན་བྱང་ཆུབ་འོད་ཀྱིས་ཁུ་བོ་བསླུ་བ་དང་། ཨ་ཏི་ཤ་སྤྱན་འདྲེན་པ་ལ་དཀའ་སྤྱད་ཇི་ལྟར་མཛད་པའི་ཚུལ་རྣམས་ལམ་ཡིག་ལས་འབྱུང་བ། རྣམ་ཐར་ཆོས་ཀྱི་འབྱུང་གནས་སུ་རྒྱས་པར་གསུངས་པ་བཞིན་འདིར་བཤད་པར་བྱ་སྟེ། དེ་ཡང་ཨ་ཏི་ཤ་ཉིད་སྤྱན་འདྲེན་པའི་ཕོ་ཉ་ལ། ལོ་ཙཱ་བ་ནག་ཚོ་དེ་རྒྱུ་མཚན་དུ་མས་ལེགས་པར་དགོངས་ཏེ། ལྷ་བཙུན་པས་སྤྱན་སྔར་བོས་བསྙེན་བཀུར་ནས། འདུལ་བ་འཛིན་པ་ལ་ཞུ་ན། ངའི་ཡབ་མེས་རྒྱལ་བློན་བྱང་ཆུབ་སེམས་དཔའ་དེ་རྣམས་ཀྱི་སངས་རྒྱས་ཀྱི་བསྟན་པའི་དབུ་བསྙེངས། སྲོལ་གཏོད་དར་ཞིང་རྒྱས་པར་མཛད་པ་ཡིན་པ་ལ། དུས་དིང་སང་སངས་རྒྱས་ཀྱི་བསྟན་པ་ཉམས་དམས། བདུད་རིགས་ཀྱི་སེམས་ཅན་ཁ་རྒྱལ། ཆོས་ལྟར་བཅོས་པ་རྣམས་དར་བས། ཤེས་པ་སྐྱོ་བར་བྱུང་། ངེད་ཁུ་དབོན་གཉིས་ཀྱིས། མི་འདི་གོ་ཆོད་དམ། འདི་སངས་རྒྱས་ཀྱི་བསྟན་པ་ལ་སེམས་སམ་སྙམ་པ་རྣམས་ལ། གསེར་སྲང་བརྒྱ་སྐོར་རེས་མ་མཐའ་བྱས། ཇོ་བོ་གདན་འདྲེན་དུ་བཏང་པ་ཡིན་ནའང་། བསྟན་པའི་བྱ་བ་ཆེས་པས་གདན་མ་འདྲོངས་དེས་བློ་མ་སད་པར། ལྷ་ཆེན་པོ་དེས་བལ་ཡུལ་གྱི་མཐའ་འཁོབ་ཏུ། ཇོ་བོ་སྤྱན་འདྲེན་པའི་གསེར་འཚོལ་དུ་བྱོན་པས། གར་ལོག་གི་རྒྱལ་པོས། ཆོས་ཀྱི་རྒྱལ་པོ་པཎྜི་ཏ་གདན་འདྲེན་པའི་གསེར་འཚོལ་བ་རིག་ནས། འདིའི་ཕ་མེས་རྣམས་ཀྱིས་སྔོན་ཡང་སངས་རྒྱས་ཀྱི་བསྟན་པ་དར་བར་བྱས། འདིས་ཀྱང་པཎྜི་ཏ་གདན་འདྲེན་བསྟན་པ་དར་བར་བྱེད་པས་ཟུངས་ལ་བཙོན་ཁང་དུ་ཆུག་ཟེར་ནས་མནར། དེ་བདག་གིས་ཐོས་པས། ཁུ་བོ་བཟློག་ཏུ་ཕྱིན་ཡང་། གར་ལོག་གི་རྒྱལ་པོ་ཚན་ཆེས་ནས་མ་ལྡོག ཡང་དམག་བྱས་ན་བཟློག་པར་སྣང་སྟེ། དེའི་བར་དུ་འགྲོ་བ་མང་པོའི་སྲོག་འཆད་པ་དང་། ང་རང་ལ་ཡང་བར་ཆད་བྱུང་ན་ཇོ་བོ་སྤྱན་མི་འདྲོངས་པར་གདའ་བས་ཁོ་རང་དང་བསྟུན། ཁོ་ན་རེ། འོ་ན་པཎྜི་ཏ་གདན་འདྲེན་པའི་འཕྲོ་བཤོལ། ངའི་བསྟན་པ་ལ་ཞུགས། ཡང་ན་གསེར་རྒྱལ་པོ་རང་དང་མཉམ་པ་ཁྱེར་ལ་ཤོག དེ་ནས་བཏང་གི་ཟེར་བས། གསེར་ལ་འདམ་ནས་ལུས་དང་མཉམ་པས་བསླུས་ཀྱང་མ་ཉན། དེ་ནས་ཁོ་བོ་ལ། ད་ངས་དབུ་ཙམ་ཅིག་བརྙེད་པ་དང་བསླུར་འོང་གིས་ཞུས་པས། བཞད་ཅིག་མཛད་ནས། ད་དེས་ཆོག ངའི་བསམ་པ་ལ་བོད་འདི་ཆོས་ཁྲིམས་མ་འཆོས་པར་ཤི་ན་མི་རུང་སྙམ་པ་ཡིན་ཏེ། ད་ན་སོ་ཡང་རྒས། འཁོར་བ་ཐོགས་མེད་ནས་ཆོས་ཀྱི་ཕྱིར་དུ་ལུས་བཏང་པ་མེད། ད་ལེན་ཆོས་ཕྱིར་ཤི་ན་ལེགས་པ་ཡིན་པས། སྡིག་རྒྱལ་འདི་ལ་གསེར་སེ་བ་གཅིག་ཀྱང་མ་སྟེར། གསེར་ཐམས་ཅད་རྒྱ་གར་དུ་ཁྱེར་ལ། ད་དུང་ཨ་ཏི་ཤ་གདན་ཅི་འདྲོངས་གྱིས། པཎྜི་ཏ་ཆེན་པོའི་སྙན་དུ་ཡང་། ངས་ཁྱོད་དང་སངས་རྒྱས་ཀྱི་བསྟན་པའི་ཕྱིར་དུ་ལུས་སྲོག་གར་ལོག་གི་རྒྱལ་པོ་ངན་པ་ལ་བྱིན་ཡོད་པས། ཚེ་རབས་ཐམས་ཅད་དུ་བདག་ཐུགས་རྗེས་འཛིན་པ་དང་། ངའི་བསམ་པའི་གཙོ་བོ་ཁྱེད་བོད་དུ་བྱོན་ནས་སངས་རྒྱས་ཀྱི་བསྟན་པ་དར་བར་བྱེད་པ་ཡིན་པས། དེ་ཁོ་ན་བཞིན་དུ་མཛད་པར་ཞུ། སྐྱེ་བ་འདིའི་འོག་རོལ་ཏུ་ཁྱེད་དང་ངེས་པར་མཇལ་བར་བྱིན་གྱིས་བརླབས་ཏུ་གསོལ། ཞེས་ང་འཕྲིན་དུ་མཛོད་ཅིག དེ་ལྟར་ལགས་པས་ང་བློས་ཐོང་ལ། སངས་རྒྱས་ཀྱི་བསྟན་པ་ལ་སོམས་ཤིག་གསུངས་པ་ཡིན་པས། དེས་ན་ཁུ་བོ་གར་ལོག་གི་རྒྱལ་པོས་མེད་པར་བྱས་པས་གཏམ་དེ་རྣམས་མགོན་པོ་ཨ་ཏི་ཤའི་སྙན་དུ་ཐོས། ངེད་བོད་མཐའ་འཁོབ་ཀྱི་སེམས་ཅན་མ་རིག་པ་རྣམས་ཀྱི་སྙིང་སྟོབས་དེ་འདྲ་ན། ཁྱེད་འགྲོ་བའི་སྐྱབས་གནས་ཐུགས་རྗེ་ཅན་ཇི་ལྟར་སོང་། ཞེས་ཞུས་ཤིག འདི་ན་གསེར་སྲང་བདུན་བརྒྱ་ཡོད་པ་བླ་མའི་ཕྱག་ཏུ་ཕུལ། ངེད་བོད་པྲེ་ཏ་པུ་རིའི་གྲོང་ཁྱེར་ལྟ་བུ་ན། གསེར་སེ་བ་རེ་ཙམ་ལའང་རྩིས་ཆེན་པོ་ཡོད་ལ། ད་འདིས་བདག་ཅག་མི་ནོར་ཐམས་ཅད་རྫོགས་ནས་ཡོད་ཀྱི། ད་ལན་ཇོ་བོ་བོད་ལ་མ་བྱོན་ན། ཁྱེད་དམ་པ་རྣམས་ཀྱི་ཐུགས་རྗེ་ཡང་དེ་ལྟར་བས་པས། ངེད་ཀྱང་བྱ་བ་ཅི་བདེར་སྤྱད་པར་བགྱིའོ། །ཞེས། ཁྱེད་འདུལ་བ་འཛིན་པས་ལོ་རྒྱུས་འདི་རྣམས། ཇོ་བོ་ལ་ཞུས་པའི་ཐ་མ་འབྱོན་དུ་མ་བཞེད་ནའང་སྙན་དུ་ཐེབས་པ་མཛོད། གསུངས་ནས་ཤུམས་ཤིང་གསུང་བྱོན་ཏེ། དེའི་ཚེ་ལྷ་བཙུན་པ་མི་ཆེན་པོ་ཅིག་གིས་དེ་ལྟར་མཛད་པས། ལོ་ཙཱ་བས་ཀྱང་ཡིན་མིན་གྱི་ཚིག་ཟུར་ཙམ་ཡང་སྨྲ་མ་ནུས། དེའི་སྟོབས་ཀྱིས་ལུས་སྲོག་དང་ལམ་གྱི་དཀའ་ཚེགས། ཚེ་འདིའི་བདེ་སྐྱིད་གང་ལ་ཡང་མ་ཆགས་པར། དཔོན་གཡོག་བདུན་གྱིས་གསེར་རྣམས་ཁྱེར་ཏེ། རྒྱ་གར་གྱི་ལམ་དུ་ཞུགས་པ་དང་ལྷ་བཙུན་པས་སྐྱེལ་ཐུང་མཛད་དེ། དགེ་སློང་ཁྱེད་ཀྱིས་ངེད་ཀྱི་བྱ་བ་བྱས། །ད་ལན་དཀའ་བ་ཆེ་ནའང་ཕར་བྱོན་ལ། །འབད་རྩོལ་ཆེན་པོས་ལུས་དང་སྲོག་ལ་བརྡོས། །འཁོར་ནས་བྱས་ཤེས་བཀའ་དྲིན་བཟོ་བར་བྱ། །ཞེས་གསུངས་ནས། ཕྱི་ཕྱག་མཛད་ནས་གཤེགས། སླར་ཡང་ཇོ་བོ་ཐུགས་རྗེ་ཆེན་པོ་ལ་གསོལ་བ་འདེབས་ཀྱི་གཤེགས་པར་ཞུ་གསུངས། དེ་ནས་བལ་པོ་རྫོང་ལ་བྱོན་ཙ་ན་མི་རེང་གཅིག་དང་འཕྲད་པས། ཁྱེད་ཡུལ་ས་ཐག་རིང་པོར་དོན་ཆེན་པོ་ལ་འགྲོ་བར་སྣང་བ་འདི་སྐད་ཟེར་གྱིན་སོང་དང་དོན་གྲུབ་ནས་འོང་གི དཀོན་མཆོག་གསུམ་ལ་ཕྱག་འཚལ་ལོ། །ཁ་བ་ཅན་གྱི་རྒྱལ་ཁམས་སུ། རྒྱལ་བ་ཐམས་ཅད་ཀྱི་འབྱུང་གནས། དམ་པའི་ཆོས་འཕེལ་བར་གྱུར་ཅིག ཅེས་བརྗོད་ཅིང་སོང་ན་ལམ་དུའང་ཉེ་ཞོ་མི་འབྱུང་ཟེར། ཁྱེད་སུ་ལགས་བྱས་པས། རིམ་གྱིས་ཤེས་པར་འགྱུར་གྱིས་ཟེར། དེ་ནས་བལ་པོའི་མཐའ་འཁོབ་ཏུ་སླེབ་པ་ན། ཨ་ཙ་ར་ལ་གནས་གཡར་བས་སྙུག་ཁང་ཅིག་ཏུ་བསྙལ། ཁོས་གསེར་ཡོད་པར་ཤེས་ནས། སྙུག་ཁང་ལ་མེ་སྤར་ཏེ་བསད་ནས་གསེར་འཁྱེར་བར་འདོད་པ་ན། ལོ་ཙཱ་བ་དཔོན་གཡོག་ས་ཐག་རིང་པོ་ལ་ངལ་ཞིང་། ཚད་པས་གདུངས་གཉིད་ཀྱིས་མྱོས་པའི་སྔས་མགོར། མི་རེང་དཀར་པོ་ཅིག སྙུག་ཁང་གི་མཐོངས་ཕྱེ་ནས་བྱུང་སྟེ། མ་ཉལ་མ་ཉལ་མྱུར་དུ་ཡར་ལ་ལོངས། །མ་ཕེབས་ད་ལྟ་ལོངས་ལ་ལམ་དུ་ཞུགས། །ཉལ་ན་རིན་ཆེན་སྲོག་དང་འབྲལ་བ་ཡོད། །ང་ནི་བོད་ཁམས་ཡོངས་ཀྱི་ཡི་དམ་ཡིན། །ཞེས་གསུངས་པས། ཐུགས་རྗེ་ཆེན་པོ་ལ་གསོལ་བ་བཏབ་ནས་བྲོས། ནམ་ལངས་པ་དང་། བལ་པོའི་རྒྱལ་ཕྲན་ཅིག བྷི་ཀྲ་མ་ལར་འགྲོ་བ་དང་འཛོམ་སྟེ། དེ་དང་འགྲོགས་ནས་ཆུ་བོ་གངྒཱའི་འགྲམ་དུ་སླེབས་པ་དང་། རྒྱལ་པོ་དབང་ཆེ་བས་སྔོན་དུ་གྲུ་ལ་སོང་། དེར་ཉི་མ་ཕྱིས་པས་གསེར་རྣམས་བྱེ་མའི་འོག་ཏུ་སྦས་ཏེ། ཕྱོགས་གཞན་ཞིག་ཏུ་ཉལ་བ་ན། གཉན་པ་དཀར་པོ་གཅིག་གྲུ་ལ་སྐྱ་བ་ཆལ་ཆལ་འདེབས་ཀྱིན་བྱུང་། དེར་ལོ་ཙཱ་བས་ཁྱེད་སུ་ཡིན་གར་གཤེགས་དྲིས་པས། དཔོན་གཡོག་འཁོར་བཅས་བསུ་རུ་འོང་བ་ཡིན། །སེམས་ཅན་སྙིང་སྟོབས་ཆེན་པོས་འདིར་འོང་ཚེ། །འཕགས་པ་གྲུ་དང་མཉན་པ་ལྟ་བུ་ཡིས། །འཇིགས་པའི་དུས་སུ་སུ་བསྐྱེལ་མ་བྱས་ན། །སེམས་ཅན་ཉོན་མོངས་ཅན་གྱིས་ཇི་ལྟར་འགྲུབ། །ཚུར་ཞུགས་བདུན་བརྒྱ་པོ་རྣམས་མ་ལུས་པར། །འབོལ་ལེ་ཀ་མ་ལ་རུ་སྒྲོལ་བར་བྱ། །ཞེས་ཟེར་བ་དང་། གསེར་རྣམས་བཏོན་ཏེ་གྲུར་ཞུགས་མ་ཎི་བགྲངས་པས། མཉན་པ་ན་རེ། ངེད་ཁ་བ་ཅན་གྱི་ཐུགས་རྗེ་ཆེན་པོ་དེ། །མ་ཎི་འདི་ལྟར་བྱེད་པ་ཡིན་ཟེར་ནས་བགྲངས་བྱུང་ཙ་ན། ཡིད་འཛིན་གྱུར་པས། ཐེ་ཚོམ་དུ་གྱུར་ཏེ། ཁྱེད་སུ་ཡིན་ནམ་གསུང་ཞིག་འབྱོན་པར་ཞུ་བྱས་པས། གཉན་པ་ན་རེ། ཚེ་དང་ལྡན་པ་སྔ་འགྲོགས་ཀྱི་དུས་སུ་སྤོབས་པ་མ་མྱུར། གཞུང་འགྲོགས་ཀྱི་དུས་སུ་ཁྲེལ་གཞུང་མ་ཆུང་། ཕྱི་འགྲོགས་ཀྱི་དུས་སུ་ཕྱི་ཐག་མ་ཐུང་བྱ་བ། མ་ནུས་པའི་དུས་ཕན་པ་དང་། དགོས་དུས་སླེབ་པ་བྱ་བ། ཡུན་དུ་འགྲོགས་པ་ལ་དགོས་པ་ཡིན། རིམ་གྱིས་ཤེས་པར་འགྱུར་གསུངས་དེ་མ་ཐག་གྲུ་སྒྲོལ་བ་དང་། ད་ནམ་ཕྱེད་དུ་སོང་། དུག་སྦྲུལ་དང་། ཆོམ་རྐུན་གྱི་འཇིགས་པ་འོང་བས། དོ་ནུབ་བི་ཀྲ་མ་ལའི་སྒོ་སྤེ་འོག་ཏུ་ཉོལ་གསུངས་ནས་གཞན་དུ་སོང་། དེར་སླེབ་པ་ན། རྒྱ་བརྩོན་འགྲུས་སེང་གེ་སྒོ་ཁང་སྟེང་ན་བཞུགས་པས་གསན་ཏེ། ཁྱེད་རྣམས་གང་ནས་འོང་གསུངས། ངེད་རྣམས་མངའ་རིས་སྟོད་ནས་ཡིན་ཞུས་པས། འོ་ན་སྒོ་བ་བྱིས་པ་ཅིག་ཡོད་དེ་ལ་ཁྱེད་རང་གི་ནོར་རྣམས་ཆོལ་ལ་དེར་གཟིམས་གསུངས། དེ་ནས་བྱིས་པ་ལ་གསེར་རྣམས་བཅོལ་བས། བློ་གཏད་ཐུབ་པ་གྲོགས་ཀྱི་མཆོག་བྱ་བ་ཡིན། །ཁྱེད་རང་རྣམས་བག་ཕེབས་པར་གཟིམས་ཟེར། ནངས་པར་སྒོ་ཕྱེ་མ་ཐག བྱིས་པ་གཞོན་ནུ་ཅིག་གིས་བོད་ཀྱི་སྐད་དུ། ཁྱེད་རྣམས་གང་ནས་བྱོན། ལམ་ལ་འཇིགས་པ་མི་འདུག་གམ་ཟེར་བས། ངེད་མངའ་རིས་ནས་འོང་། ལམ་འཇམ་པར་བྱུང་། ཁྱོད་སུ་ཡིན་བྱས་པས། ང་ཡང་བོད་ཅིག་ཡིན། ངེད་རང་བོད་འདི་ཁ་མང་ལ་གཏིང་ལྷོད། གཏམ་ཁམས་ཆེན་སྦེད་མི་ཤེས། བྱ་བ་གལ་ཆེན་གསང་ནས་སྒྲུབ་དགོས་པ་ཡིན། རྒྱ་བརྩོན་སེང་གེ་བོད་ཀྱི་སྤྱི་ཁང་ན་ཡོད་དེར་སོང་ཟེར་ནས། ཁོ་ཡུད་ཀྱིས་སོང་། དེ་ནས་སྲང་རིང་པོ་ཅིག་ལ་ཕྱིན་ཙ་ན་དྲང་སྲོང་རྒན་པོ་ཆུ་ཤིང་གི་འཁར་བ་ཐོགས་པ་ཅིག་དང་འཕྲད་པས། དེ་ན་རེ། ཁྱོད་གང་ནས་འོང་། གང་དུ་འགྲོ། དོན་ཅི་ལ་འོངས་ཟེར་བས། ངེད་བོད་མངའ་རིས་ནས་ཨ་ཏི་ཤ་སྤྱན་འདྲེན་དུ་འོངས་པ་ཡིན། རྒྱ་བརྩོན་སེང་གི་ཁང་པ་གང་ན་ཡོད་བྱས་པས། ཁོ་འཁར་བ་ལ་རྟེན་ནས་ཕྱིར་མིག་གཅུ་བ་ཅིག་བྱས། ད་ནངས་ཀྱི་བྱིས་པ་དེ་བདེན། བོད་ཀྱི་མི་ལ་ཨོལ་མདུད་མེད་པས། སྲང་ནང་གི་མི་འཁྱམས་པོ་ཚུན་ལ་ཡིན་ཚུལ་སང་ངེ་འཆད་པ། ཁྱོད་ཀྱིས་ཀྱང་དོན་འགྲུབ་ཏུ་རེ་བ་ཨང་། ད་ལན་ངའི་རྩར་བྱས་པས་དྲག །ད་ཇོ་བོ་མིན་པ་གཞན་གྱི་རྩར་ཁར་མ་འདོན། རྒྱ་བརྩོན་སེང་ལ་ཟུར་ཙམ་ཟེར་ནའང་རིགས། སྒོ་ངས་བསྟན་ཟེར་ནས་ཁོ་ག་ལེ་སོང་བའི་ཕྱི་ལ། ལོ་ཙཱ་བས་མགྱོགས་པོས་མ་སླེབ། ཁོ་བོད་ཀྱི་སྤྱི་ཁང་སྒོར་བསྒུགས་འདུག་པས། ལོ་ཙཱ་བ་ཡ་མཚན་ཞིང་ཐེ་ཚོམ་དུ་གྱུར་པ་དང་། ཁོ་ན་རེ། བྱ་བ་ཆེན་པོ་བསྒྲུབ་པ་ལ་གོ་ལོ་མགྱོགས་པ་ཡིན། འདོད་ཐག་མ་ཉེ་བར་རི་བོ་འགས་ཀྱིས་འཛེགས། ཁང་པ་འདི་ཡིན་ཟེར། ནང་དུ་ཕྱིན་པ་ན། ལོ་ཙཱ་བ་རྒྱ་བརྩོན་སེང་རྒྱ་དཔེ་ཚན་ཅིག་གཟིགས་ཀྱིན་འདུག་པ་ལ། ཕྱག་རྟེན་གསེར་མཚོན་བྱེད་རེ་ཕུལ་བས། ལོ་ཙཱ་བས་ཁྱེད་རྣམས་དོན་ཅི་ལ་འོངས་གསུངས། དེ་ལ་གོང་གི་ལོ་རྒྱུས་རྣམས་ཞིབ་པར་ཞུས་པས། ཁོང་གི་ཞལ་ནས་ད་ཨ་ཏི་ཤ་གདན་འདྲེན་དུ་ཡོང་སྐད་ཡེ་མ་ཟེར། སློབ་གཉེར་ལ་ཡོང་ཟེར་བ་སྨྲོས། འདི་ན་གནས་བརྟན་རཏྣ་ཨ་ཀ་ར་དབང་ཆེ་བས། དེས་ཚོར་དུ་ཡེ་མི་བཏུབ། ད་ལྟ་རང་ཁོང་ལ་གསེར་སྲང་ཕྱེད་ཕུལ་ལ། དེར་བོད་ནས་འོང་པཎྜི་ཏ་ནི་སྤྱན་མ་དྲོངས་ད་ཁྱེད་ཀྱིས་པཎྜི་ཏ་དང་ཁྱད་མེད་པའི་སློབ་གཉེར་གཅིག་ཐུགས་ལ་འདོགས་པ་ཞུ་ཞེས་ཞུས། དེ་ནས་ཀྱང་རིང་རིང་དང་བློ་མ་ཕེབས་པར་མ་བྱེད་པར། སློབ་གཉེར་གྱིས་ལ་སོས་གདོལ། དེ་ནས་འོ་ཅག་ཐབས་མཁས་པས་ཇོ་བོ་ལ་ཞུ་བ་བྱེད་པ་ཡིན་གསུངས། དེ་ནས་ནག་ཚོ་ལོ་ཙཱ་བ་ཅི་གསུངས་བལྟ་བའི་ཆེད་དུ། མགོན་པོ་ཨ་ཏི་ཤ་ཅིས་ཀྱང་གདན་མ་འདྲོངས་ན། དེའི་འོག་ནས་གང་ཆེ་བའི་པཎ་ཆེན་གཅིག་གདན་དྲངས་ན་ཞུས་པས། ལོ་ཙཱ་བའི་ཞལ་ནས། དེ་འདྲ་སོ་སྒོར་མ་འདོན། དེ་ཡིན་ན་ན་ནིང་ནས་པཎ་ཆེན་ཞིག་ལ་ཅིག་ཆེ་བ་ཉི་ཤུ་ཙམ་གདན་དྲངས་ནའང་འདྲོངས་ཏེ། འོ་སྐོལ་བོད་ཀྱི་སེམས་ཅན་གྱི་སྤྱོད་གཤིས་རྒྱུས་མེད་དམ་ཨ་ཏི་ཤ་མ་གཏོགས་སུས་ཀྱང་བོད་ཀྱི་སེམས་ཅན་མི་ཐུལ་བས། ད་དུང་ཨ་ཏི་ཤ་རང་གདན་ཅི་འདྲོངས་བྱེད་དགོས་གསུངས། གཞན་པཎྜི་ཏ་ཅི་འདྲ་ཡོད་ཞུས་པས། འདི་ལྟར་ཤནྟི་པ། ནཱ་རོ་པ། ཌོམྦྷི་པ། མར་མེ་མཛད་བཟང་པོ། ཨ་ཝ་དྷུ་ཏི་པ། བྱང་ཆུབ་བཟང་པོ། རིན་ཆེན་བཟང་པོ། རིན་ཆེན་རྡོ་རྗེ། ལྷའི་བློ་གྲོས། ངག་དབང་གྲགས་པ། ནག་པོ་པ། ཛེ་ཏ་རི་དགྲ་ལས་རྣམ་པར་རྒྱལ་བ། རོལ་པའི་རྡོ་རྗེ། ས་འགེབས་པའི་ཞབས། ཡེ་ཤེས་གསང་བ། ཆོས་ཀྱི་བཤེས་གཉེན། ཚུལ་ཁྲིམས་དབང་པོ་ལ་སོགས་པ་པཎྜི་ཏ་བསམ་གྱིས་མི་ཁྱབ་པ་ལྔ་བཅུ་རྩ་གཉིས་ཙམ་ཡོད་ཀྱང་། ཐམས་ཅད་རང་ས་རང་ས་ན་ངོ་མཚར་ཆེ་མོད། འོ་སྐོལ་བོད་ལ་མགོན་པོ་ཨ་ཏི་ཤ་མིན་པས་ཕན་པ་མེད་གསུངས། འོ་ན་ཨ་ཏི་ཤ་སྟོན་པར་ཞུ་དང་ཞུས་པས། ཁྱོད་རང་ནངས་པར་དགེ་འདུན་གྱི་ཀུན་དགའ་ར་བར་དགེ་འདུན་སྟོང་ཕྲག་མང་པོ་འོང་གི དེའི་ནང་ན་ལྷང་ངེ་། ལྷམ་མེ་བ། སྐུ་བལྟ་བས་ཆོག་མི་ཤེས་པ། གྲལ་གང་དུ་བཞུགས་ཀྱང་མཛེས་པ་ཞིག་ཡོད་ཀྱི། དེ་ཨ་ཏི་ཤ་ཡིན་པས། དེ་ལ་ཉིན་མཚན་དུ་གསོལ་བ་ཐོབ་གསུངས། དེ་ནས་རྒྱ་བརྩོན་སེང་དཔོན་སློབ་གཉིས་ཀྱིས་གནས་བརྟན་རཏྣ་ཨ་ཀ་རའི་དྲུང་དུ་ཕྱིན། ཕྱག་བྱས་གསེར་སྲང་ཕྱེད་ཕུལ་ཏེ་རྒྱས་བསླབས་པ་བཞིན་ནག་ཚོས་ཞུས་པས། གནས་བརྟན་གྱི་ཞལ་ནས། ཤིན་ཏུ་ལེགས། ཚེ་དང་ལྡན་པ་འདི་ལྟར་ཡིན། ངེད་འདིར་མི་ལ་ཙག་པ་མིན་ཏེ། འདི་ན་ཨ་ཏི་ཤ་མེད་ན་རྒྱ་གར་སངས་རྒྱས་ཀྱི་བསྟན་པའི་འབྱུང་གནས་ཡིན་པས། འདི་ཉམས་ན་སེམས་ཅན་སྤྱིའི་བདེ་སྐྱིད་ཉམས་འགྲོ་བ་ཡིན་མོད། དེའི་རྒྱུ་མཚན། རྒྱ་གར་གྱི་ཆོས་སྲོལ་དང་། གཙུག་ལག་ཁང་ཐམས་ཅད་ཀྱི་ལྡེ་མིག་ཨ་ཏི་ཤའི་ཕྱག་ན་ཡོད་པ་ཡིན། དེ་མིན་ན་ངེད་ཀྱང་བོད་ཀྱི་སེམས་ཅན་ལ་སེམས་བརྩེ་ཞིང་། ཁྱད་པར་དུ་བོད་ཀྱི་ཆོས་རྒྱལ་དེའི་མི་ནོར་མང་པོ་ཟད་པས་ངོ་གནོང་སྟེ། སངས་རྒྱས་ཀྱི་བསྟན་པ་ལ་བསམ་པ་ཡིན་ན་བརྩོན་འགྲུས་དྲག་པོས་སངས་རྒྱས་ཀྱི་བསྟན་པ་རབ་འབྱམས་ལ་སློབ་གཉེར་གྱིས་ངས་ཀྱང་ཕྱིས་སུ་ཅི་འགྲོ་བྱེད། ཁྱེད་བོད་རྒྱ་གར་བ་ལ་འདི་ལྟར་སེམས་པ་ངོ་མཚར་ཆེ། ཞེས་གསུངས། དེ་ནས་གནས་བརྟན་གྱིས་ཁྲིད་དེ་དགེ་འདུན་གྱི་གདུགས་ཚོད་གྲལ་དུ་ཕྱིན་ཨ་ཏི་ཤ་གྲལ་གྱི་དབུ་ལ་བཞུགས་སམ་སྙམ་པ་ལ། ཤནྟི་པ་བཞུགས་འདུག་པ། འདི་ཨ་ཏི་ཤ་ལགས་སམ་བྱས་པས། ཚེ་དང་ལྡན་པ་འདི་ནི། ཤནྟི་པ་ཞེས་པ་མཁས་གྲུབ་ཆེན་པོ་ཨ་ཏི་ཤའི་ཡང་བླ་མ་དེ་ལགས་མོད་ཟེར། དེ་ལྟར་རྗེ་བཙུན་ནཱ་རོ་པ་ལ་སོགས་པ་གྲལ་གྱི་དབུ་ལ་འདུག་པ་ལ་རེ་རེ་བཞིན་འདི་ཨ་ཏི་ཤ་ཡིན་ནམ། ཞེས་དྲིས་པས། འདི་ནཱ་རོ་པ་ཞེས་པ་དིང་སང་འགྲན་ཟླ་དང་བྲལ་བ་ཨ་ཏི་ཤའི་ཡང་བླ་མ་ཡིན་ཟེར། གཞན་དུ་ཨ་ཏི་ཤ་མ་མཐོང་པས་ཡིད་ཞུམ་པ་ན། དུས་རེ་ཞིག་བི་ཀྲ་མ་ལའི་རྒྱལ་པོ་ཁྲི་བཤམས་པའི་སྟེང་ན་འདུག་པ་པཎྜི་ཏ་ཆེ་ཆུང་གང་ལའང་ལང་བ་མི་བྱེད་པར་སྣང་བ་ལ། ཨ་ཏི་ཤ་སྐུ་གཟི་བརྗིད་ཆེ་ཞིང་ཞལ་འཛུམ་ཆགས་པ། ཅམ་པོར་གཤེགས་པ་ཅིག་ནང་དུ་བྱོན་པ་དང་། རྒྱལ་པོ་དེས་ཁྲི་ལས་ལངས་པས། པཎྜི་ཏ་དང་དགེ་འདུན་ཐམས་ཅད་ཀྱིས་ལྡང་བ་བྱས། གྲལ་སྟོད་དུ་བཞུགས་པ་མཐོང་བས། འདི་ཨ་ཏི་ཤ་ཡིན་ནམ་དྲིས་པས་ཅི་ཟེར། འདི་དཔའ་བོ་བཞད་པའི་རྡོ་རྗེ་ཞེས་པ་གནས་ངེས་མེད་དུ་བྱོན་པའི་པཎྜི་ཏ་གཅིག་ཡིན་ཟེར། འདི་ལ་ཡོན་ཏན་ཇི་ཙམ་ཡོད་བྱས་པས། འདིའི་ཡོན་ཏན་གྱི་ཚོད་ངེད་ཀྱིས་མི་ལོན་ཟེར་ནས། ཨ་ཏི་ཤ་ཡིན་པ་ལ་འཆད་མ་ཉན། དེ་ནས་ནག་ཚོས་གཙུག་ལག་ཁང་གི་སྒོ་དྲུང་དུ། ཤེས་རབ་སྙིང་པོའི་མེད་ཀྱི་ཐད་དུ། གཟུགས་ཧ། ཚོར་བ་ཧ་བྱས་པས། པཎྜི་ཏ་གཞན་རྣམས་ཅང་མི་གསུང་བ་ལ། ཇོ་བོ་བྱོན་ཞལ་འཛུམ་མཛད་དེ། ཚེ་དང་ལྡན་པ་དེ་ཕལ་སྐད་ཡིན། གཟུགས་ཨ། ཚོར་བ་ཨ་ཟེར་བ་ཡིན་གསུངས། ནངས་པར་དེ་ལྟར་བཏོན་པས། ཇོ་བོའི་ཞལ་ནས། དེ་ཡང་གྱོང་པོ་ཅིག་ཡོང་པར་སྣང་། སྤྱན་རས་གཟིགས་ཀྱི་གསུང་ཡིན་གཟུགས་མེད་ཚོར་བ་མེད་གྱིས་གསུངས་པས། ལྷག་པར་དད་དེ་རྗེས་སུ་འབྲངས་པ་ན། སྤྲང་པོའི་ཚོགས་ལ་ཟན་གནང་བ་མཐོང་བས། བྱིས་པ་ཅིག་གི་སྐལ་བ་ཆད་དེ་ཕྱི་ལ་བརྒྱུག་ཅིང་། ཨ་ཏི་ཤ། བྷ་ལ་ཧོ། བྷ་ཏ་འོན། ཞེས་པ་ཐོས་པས། ཨ་ཏི་ཤ་ཡིན་ངེས་སྙམ་ནས་ཡུས་ཀྱིས་དངངས་ཏེ་ཕྱི་ལ་ཕྱིན་པས། དེར་བཞུགས་ཏེ། ཚེ་དང་ལྡན་པ་བདེན། མཆི་མ་མ་འབྱིན། ཁྱེད་བོད་ངས་ད་དུང་བློས་བཏང་བ་མེད་ཀྱིས། དཀོན་མཆོག་ལ་གསོལ་བ་ཐོབ་གསུངས། དེ་ནས་ལན་གཅིག་རྒྱའི་གཟིམ་ཁང་དུ་ཚུལ་ཁྲིམས་རྒྱལ་བས། ཇོ་བོ་སྤྱན་དྲངས་ནས་གསེར་སྲང་བདུན་བརྒྱ་མཎྜལ་དང་བཅས་པ་ཕུལ། ཇོ་བོ་སྤྱན་འདྲེན་པ་ལ་བོད་ཀྱི་མི་ནོར་སོང་བ་དང་། ཆོས་རྒྱལ་ཁུ་དབོན་གྱིས་ཁྱེད་ཀྱི་ཕྱོགས་སུ་དཀའ་བ་སྤྱད་ལུགས། བོད་ན་ཆོས་ལོག་ཡོད་ཚུལ་ལ་སོགས་པ་ལྷ་བཙུན་པས་ཞུ་བ་བསྐུར་བ་རྣམས་རྒྱ་བརྩོན་འགྲུས་སེང་གེས་རྒྱས་པར་སྙན་དུ་གསོལ་ཏེ། ད་ཡང་ཚེ་དང་ལྡན་པ་འདི་ཇོ་བོ་སྤྱན་འདྲེན་པ་ལ་བཏང་བར་འདུག་པས། མགོན་པོ་ངེད་གཉིས་ཀྱིས་ཇི་ཙམ་པའི་དཀའ་བ་ཅིག་སྤྱད་ཀྱང་། འདོད་པའི་དོན་མ་གྲུབ་པ་ངེད་བོད་ཀྱི་སེམས་ཅན་རྣམས་སྙིང་མི་རྗེའམ། ལྷག་པར་ཡང་གུང་ཐང་པ་འདི་རབ་ཏུ་བྱུང་ནས་སངས་རྒྱས་ཀྱི་བསྟན་པ་ལ་ཐོས་བསམ་མ་གཏོགས། མི་འགྲུབ་པའི་བྱ་བ་མ་བབས། ད་ལན་ཅིས་ཀྱང་འབྱོན་པར་མཛད་དུ་གསོལ་ཞུས་པས། ཇོ་བོའི་ཞལ་ནས། ཁྱེད་ལོ་ཙཱ་བ་རྣམས་ཤིན་ཏུ་བདེན། བོད་ཀྱི་ཆོས་རྒྱལ་དེའི་མི་ནོར་མང་པོ་སོང་བས་ངོ་གནོང་། ཁོ་བོ་སྙིང་རྗེ་ཆུང་པ་མིན་ཀྱང་བསྟན་པའི་བྱ་བ་ཆེས། གཙུག་ལག་ཁང་བརྒྱ་རྩ་བརྒྱད་ཀྱི་ལྡེ་མིག་དང་ཆོས་འཕྲོ་ཡང་མང་པོ་ཡོད་ན་ཡང་རྒས་པས་ཐོན་པར་དཀའ་མོད། འོན་ཀྱང་བོད་ཀྱི་ཆོས་རྒྱལ་ཁུ་དབོན་དང་། ལོ་ཙཱ་བ་རྣམས་ཀྱི་དཀའ་སྤྱད་ཆུད་མ་ཟོས་པ་ཞིག་བྱ་ཡིས། རེ་ཞིག་གསེར་རྣམས་ཚགས་མཛོད། ངེད་འབོད་དུ་འོང་སྐད་མ་ཟེར། ལོ་ཙཱ་མཁས་པར་སློབས་གསུངས། དེའི་ནུབ་མོ་ཇོ་བོས་རྗེ་བཙུན་མ་སྒྲོལ་མ་ལ་མཎྜལ་ཕུལ་ཏེ། བོད་དུ་ཕྱིན་ན་སངས་རྒྱས་ཀྱི་བསྟན་པ་ལ་ཕན་ནམ། རྒྱལ་པོ་བྱང་ཆུབ་སེམས་དཔའི་ཐུགས་དགོངས་རྫོགས་སམ། ལུས་སྲོག་གི་བར་ཆད་དུ་མི་འགྱུར་རམ། ཞེས་ཞུས་པས། སངས་རྒྱས་ཀྱི་བསྟན་པ་ལ་ཕན་ཞིང་། རྒྱལ་པོའི་ཐུགས་དགོངས་རྫོགས། ཁྱད་པར་ཨུ་པ་སི་ཀ་གཅིག་ལ་བརྟེན་ནས་འགྲོ་བ་མང་པོ་ལ་ཕན་པས། ཐེ་ཚོམ་མེད་པར་བོད་དུ་བཞུད། ཅེས་ལུང་བསྟན། དེ་ནས་ཇོ་བོའི་ཞལ་ནས་རྡོ་རྗེ་གདན་དུ་ལྡེང་གསུངས་པས། དེར་ཕྱིན་པ་ན་བྱིས་པ་གཞོན་ནུ་དར་དཀར་གྱི་གོས་གྱོན་པ། ཤེལ་གྱི་མདའ་གཞུ་ཐོགས་པ་ཞིག་བྱུང་སྟེ་ཕྱག་འཚལ་ཞིང་ད་མགོན་པོ་བོད་དུ་བྱོན་པར་ཞུ། བོད་ཀྱི་ཚེ་དང་ལྡན་པ་འདི་ཀུན་སྙིང་རྗེ་མོད་ཟེར་ཏེ་སོང་། ཇོ་བོ་ལ་བོད་སྐད་སྨྲ་བའི་བྱིས་པ་དེ་སུ་ཡིན་ཞུས་པས། ནངས་པར་རྡོ་རྗེ་གདན་གྱི་བྱང་ཕྱོགས་ནས་རྣལ་འབྱོར་མ་གཅིག་ཡོང་པས། དེ་ལ་དྲིས་པས། ནངས་པར་རྣལ་འབྱོར་མ་ཀྲྀཥྞ་སྐེད་ལ་དཀྲིས་པ། ཌཱ་མ་རུ་དཀྲོལ་ཞིང་གར་སྟབས་ལིང་ངེ་བ་ཞིག་བྱུང་པ་ལ། ཁ་སང་གི་ལོ་རྒྱུས་དྲིས་པས། ཁྱེད་བོད་ཀྱི་མི། ངེད་རྒྱ་གར་བ་ལ་འདྲི་བ་ཟེར་ནས་སོང་། ཡང་ཇོ་བོ་བྱང་ཆུབ་ཆེན་པོའི་དྲུང་ན་བཞུགས་པའི་གཡས་གཡོན་ན། ཁ་སང་གི་བྱིས་པ་དེ་དང་། བུ་མོ་སྔོ་ལྗང་མ་གཅིག་འདུག་པས། ལོ་ཙཱ་བའི་རྟོག་པ་ལ་འདི་གཉིས་ཀྱི་དབུས་སུ་ཇོ་བོ་བཞུགས་མི་ཐང་པ་ལ་སྙམ་པ་དང་། བུ་མོ་ན་རེ། རྒྱལ་བའི་མདུན་ན་རྒྱལ་སྲས་བཟང་པོ་སྐྱོང་། །རྒྱལ་བར་གནས་ཀྱང་མ་རྒྱལ་ལྟ་བུར་སྟོན། །རྒྱལ་བའི་མཛད་པ་མཐར་ཕྱིན་འགྲོ་བའི་མགོན། །རྒྱལ་བ་ཡབ་སྲས་གཉིས་ལ་ཕྱག་འཚལ་ལོ། །ཟེར། བྱིས་པ་ན་རེ། གང་དུ་རྒྱལ་བའི་རྣམ་ཐར་སྐྱོང་བ་ན། །བུ་མོ་ཁྱོད་ཀྱང་བདག་གི་ཁྱིམ་འོང་ཞིང་། །བུ་དང་ལོངས་སྤྱོད་དཔལ་འབྱོར་སྤེལ་བ་དང་། །དགའ་བར་འགྲོགས་ཤིང་བར་ཆད་བསལ་འཚལ་ལོ། །ཧེ་ཧེ། ད་ཇོ་བོ་ཡང་བོད་དུ་འབྱོན་རན་ཟེར་ནས་ཁོང་གཉིས་གཞན་དུ་སོང་། སྤྲུལ་པ་ཞིག་ཡིན་པར་ཤེས་ནས། ཇོ་བོ་ལ། ངེད་བོད་ནས་འཕགས་ནས་ཕན་ཐོགས་ཀྱི་སྤྲུལ་པ་ཟམ་མ་ཆད་པ་ཞིག་བྱུང་བ་དེ་རྣམས་ཀྱང་གསུང་པ་དང་། ཕར་གཤེགས་པའི་གོ་ཆ་ཡང་མྱུར་དུ་མཛད་པ་ཞུ་ཞུས་པས། ཇོ་བོའི་ཞལ་ནས། བི་ཀྲ་མའི་ཕོ་བྲང་གི་ལྷོ་སྒོ་ན་བུ་མོ་རས་འཐག་པ་ཞིག་ཡོད། དེ་ལ་དྲིས་གསུངས། དེར་ཕྱིན་ནས་དྲིས་པས། ཁྱེད་བོད་ན་དགེ་བསྙེན་གྲགས་ཆེ་བ་ཇི་སྐད་བྱ་བ་ཡོད་ཟེར་བས། དགེ་གཉེན་ཆོས་འཕེལ་བྱ་བ་ཡོད་བྱས་པས། མོ་ན་རེ། ཨུ་པཱ་སི་ཀ་དེ་ཨ་ཏི་ཤའི་སྲས་པོ་མ་ལགས་སམ། དུས་རྣམས་རྟག་ཏུ་སྤྲུལ་པ་བསྟན་པ་ཡིན། །ཞེས་སོགས་གླུ་བླངས་པས། བལ་པོ་རྫོང་གི་མི་རང་ནས། ཁ་སང་གི་བྱིས་པ་བུ་མོ་གཉིས་ཀྱི་བར་རྣམས་དགེ་བསྙེན་ཆོས་འཕེལ་གྱི་སྤྲུལ་པར་སྣང་བ་ལ་སྙམ་ནས་སེམས་ངལ་སོས་པར་གྱུར། དེ་དུས་ཇོ་བོ་ཉིད་ལ་བླ་མ་དུ་ཧ་ར་ནག་པོ་བྱ་བས། ས་སྤྱད་རིན་པོ་ཆེ་འཕྲུལ་གྱི་མེ་ལོང་ཇོ་བོ་ལ་གནང་ནས། ཁྱོད་བོད་དུ་འགྲོ་བར་འདུག གདན་ས་བྱང་སྐྱབས་པ་ལྷོ་གཞོལ་བ། རྩི་ཤིང་ནགས་ཚལ་དང་ལྡན་པ་ཞིག་འོང་། ཁྱོད་ཀྱི་བུ་སློབ་མང་པོས་དགེ་འདུན་གྱི་སྡེ་དང་། གཙུག་ལག་ཁང་མང་པོ་བཞེངས་པར་འགྱུར། དེ་ཙ་ན་འདི་དགོས་པ་ཡིན་གསུངས། དེ་ནས་རིམ་པ་ལྟར། བླ་མ་དྷརྨཱ་རཀྵི་ཏ། རྗེ་བཙུན་ཌོམྦྷི་བ། བླ་མ་ཨ་ཝ་དྷུ་ཏི་པ། ཀུ་སུ་ལུ། རིག་པའི་ཁུ་བྱུག ཡི་དམ་ལྷའི་ལུང་བསྟན་ཇི་སྙེད་ཅིག རྣམ་ཐར་རྒྱས་པ་རྣམས་སུ་འབྱུང་བ་ལས། ཕྱོགས་ཙམ་ཞིག་འདིར་བཤད་ན། ལན་ཅིག་དཀྱིལ་འཁོར་༼བསྒྲུབ་མཆོད་༽ཅིག་ལ་ཞུགས་པ་ན། །རྡོ་རྗེའི་གར་དང་མཆོད་པ་ཕུལ་བའི་ཚེ། །མ་ཅིག་རང་བཞིན་དབྱིངས་ཀྱི་རྣལ་འབྱོར་མ། །རུས་པའི་རྒྱན་ཆ་གསོལ་ནས་གར་དུ་བྱོན། །ཧཱུཾ་ཞེས་རྣམ་དག་རྡོ་རྗེ་ཀླུར་བླངས་ནས། །མི་མངོན་དབྱིངས་ནས་ཚོགས་གཉིས་དཔལ་འབྱོར་བའི། །དཔའ་བོ་ཆེན་པོ་དམ་ཚིག་རོལ་པའི་ལྷ། །ཁྱབ་བདག་རིན་ཆེན་ཚོགས་ཀྱི་བདག་པོ་ཁྱེད། །ཡེ་ཤེས་གསང་བའི་རྡོ་རྗེ་མ་ལགས་སམ། །ཁྱོད་ཀྱིས་རྡོ་རྗེ་ཐེག་པའི་སྒོར་ཞུགས་ནས། །བྱང་ཕྱོགས་རྒྱུད་ཀྱི་མཐའ་འཁོབ་མ་བཏུལ་ན། །ལས་ཀྱི་དཔའ་བོ་ཆེན་པོར་མི་རུང་བས། །མྱུར་དུ་རི་བོ་གངས་ཆེན་རྒྱུད་དུ་སོང་། །དེ་ན་རིགས་གསུམ་མགོན་པོའི་སྤྲུལ་པ་ཡོད། །གཅིག་ནི་བྲུཾ་རྗེ་སྤྲུལ་པའི་ཆོས་འཕེལ་ལོ། །གཅིག་ནི་རྔོག་སྟོན་ལེགས་པའི་ཤེས་རབ་བོ། །གཅིག་ནི་ཁུ་སྟོན་བརྩོན་འགྲུས་གཡུང་རུང་ངོ་། །གཞན་ཡང་ཐུབ་པ་མཆོག་གིས་བྱིན་བརླབས་པའི། །སྤྲུལ་པའི་དགེ་སློང་ཤིན་ཏུ་མང་བར་ཡོད། །དེ་དག་ཐམས་ཅད་ཁྱོད་ཀྱི་སྲས་སུ་འགྱུར། །གངས་ཅན་རྒྱུད་དེར་བསྟན་པ་དར་བར་བྱེད། །དེར་སོང་ཆོས་ཀྱི་བྱ་བ་འདི་ལྟར་མཛོད། །རྡོ་རྗེ་ཐེག་པ་ནང་དུ་དར་བར་མཛོད། །གཞུང་ལུགས་རྒྱ་མཚོ་ཕྱི་རུ་དར་བར་མཛོད། །བསླབ་གསུམ་རྣམ་དག་རང་རང་དར་བར་མཛོད། །ལས་ཅན་བརྟགས་ཤིང་བཅུད་ཀྱིས་སྨིན་པར་མཛོད། །ཚིག་གི་སྤྲོས་པ་མཐའ་ནས་ཆོད་པར་མཛོད། །ཤེས་རབ་རྟོགས་པ་ནང་ནས་རྒྱས་པར་མཛོད། །འཕྲིན་ལས་བཟང་པོ་ཕྱོགས་མཐར་ཁྱབ་པར་མཛོད། །གདུལ་བྱ་ཡོངས་ལ་ཕྱོགས་རིས་མེད་པར་མཛོད། །སྒོ་གསུམ་ཐུབ་པ་ཆེན་པོ་བརྟན་པར་མཛོད། །གཉེན་པོ་མི་གཡོ་མགོན་པོ་ཚུགས་པར་མཛོད། །འགྲོ་དྲུག་ཐུགས་རྗེ་ཆེན་པོར་བརྩེ་བར་མཛོད། །འགྲོ་བའི་སྡུག་བསྔལ་ཐམས་ཅད་སྒྲོལ་བར་མཛོད། །བསླབ་པ་གསུམ་གྱིས་ཉིན་མཚན་ཕྱུག་པར་མཛོད། །ལྷ་ཆོས་བདུན་གྱི་འབྱོར་བས་ཕྱུག་པའི་ཚེ། །གསང་སྔགས་ལྷུན་གྱིས་གྲུབ་པར་མཆིས་འོ་ཨང་། །ཞེས་གསུངས་པ་ལ། དེ་ལྟར་བླ་མ་དང་ཡི་དམ་རྣམས་ཀྱིས་བོད་ཁ་བ་ཅན་དུ་འབྱོན་པར་ལུང་བསྟན་པ་ན་ཡང་། ཨ་ཏི་ཤ་རང་ཉིད་བསྟན་པའི་བྱ་བ་ལ་གཞི་ཆེས་པ་དང་། གནས་བརྟན་རཏྣ་ཨ་ཀ་ར་ལ་སོགས་པ། ཇོ་བོ་བོད་དུ་བྱོན་པ་ལ་མི་དགའ་བ་རྣམས་ཀྱིས་ཚོར་དོགས་པ་དང་། རྡོ་རྗེ་གདན་གྱི་རྒྱལ་པོ་ལ་སོགས་པ་མི་རེ་རེ་ཙམ་གྱིས་བཤོལ་བཏབ་པས། གཙུག་ལག་ཁང་མཆོད་ཅིང་ཡམ་ཡོམ་དུ་ལུས་པ་ན། ལན་ཅིག་ཇོ་བོ་རྡོ་རྗེ་གདན་དུ་བྱོན་པའི་རྗེས་སུ་ལོ་ཙཱ་བ་གཉིས་ཀྱིས་བྱོན་ནས། ཞབས་ལ་གཏུགས་ཏེ་གདོང་མཆི་མས་གང་བཞིན་དུ་གསོལ་བ་ཡང་ཡང་བཏབ་པས། ཇོ་བོས་ཀྱང་བོད་དུ་འབྱོན་པའི་ཐག་ཆོད་ཀྱི་ཞལ་བཞེས་དང་། གཙུག་ལག་ཁང་གི་གཉེར་གཏད་ཐམས་ཅད་མཛད་དེ། གཞན་གྱི་མིག་བྲིད་པའི་ཕྱིར་རེས་གར་གཤེགས། རེས་འགའ་གཤེགས་པ་ལྟར་མཛད་ནས། བོད་དུ་འབྱོན་པར་ཆས་པ་ན་སྐུ་གསུང་ཐུགས་ཀྱི་རྟེན་དང་། དཔེ་རྣམས་སྤྲུལ་པའི་མི་གཉིས་ཀྱིས་གཡག་ཁྱུ་གཅིག་དེད་བྱུང་སྟེ། ས་ཐག་རིང་པོར་འགྲོ་བ་ལ་ཟར་སྔ་དགོས་པ་ཡིན་ཟེར་ནས་དྲངས་སོང་། ནངས་པར་ཇོ་བོས། གནས་བརྟན་རཏྣ་ཨ་ཀ་ར་ལ། བོད་འདི་རྣམས་ལ་གནས་ཆེན་རྣམས་ཀྱི་གཙུག་ལག་ཁང་སྟོན་པ་དང་། མཆོད་པ་རེ་སྐྱེལ་དུ་འགྲོ་བས་བདེ་བར་བཞུགས་པ་ཞུ་གསུངས་པས། གནས་བརྟན་གྱི་ཞལ་ནས་དེ་ལྟར་ལེགས། ངེད་ཀྱང་རྗེས་སུ་འཇུག་པར་ཞུ་ཟེར་ནས། གནས་ཆེན་མང་དུ་བྱོན་པའི་རྗེས་སུ། གནས་བརྟན་ཆེན་པོ། ངེད་མི་དྲའི་གཙུག་ལག་ཁང་དུ་འགྲོ་བས། ཁྱོད་ཤུགས་ཐག་རིང་པོ་ལ་འོ་བརྒྱལ་གསུངས་པས། གནས་བརྟན་གྱི་ཐུགས་ལ། ད་བོད་དུ་འབྱོན་པར་སྣང་སྙམ་ནས། ནག་ཚོ་ལ་ཚེ་དང་ལྡན་པ་ཁྱོད་སློབ་གཉེར་ལ་འོང་ཟེར་ནས་ངའི་པཎྜི་ཏ་རྐུར་འོང་པར་སྣང་། འོན་ཀྱང་བོད་ཀྱི་ཆོས་རྒྱལ་བྱང་ཆུབ་སེམས་དཔའ་དེ་ལ་སེམས་བརྩེ་ཞིང་། དེའི་མི་ནོར་མང་པོ་ཆུད་ཟོས་པ་དང་། ཁྱོད་ཀྱང་ངའི་སློབ་མ་ཡིན་པས་ལོ་གསུམ་སྤྱན་དྲོངས། དེ་ནས་ཚུར་སྤྱན་མ་དྲངས་ན་རྒྱ་གར་ཡང་བསྟན་པ་ནུབ་པ་ཙམ་དུ་འགྲོ་བ་ཡོད་གསུངས་པས། ནག་ཚོས་ཀྱང་ཁས་བླངས། དེར་ཇོ་བོའི་ཞལ་ནས་གསེར་སྲང་རྣམས་ཁྱེར་ཤོག་གསུངས་ནས། ཆ་བཞིར་བགོས་ཏེ་བླ་མ་རྣམས་དང་། དགེ་འདུན་སྤྱི་དང་། བི་ཀྲ་མའི་རྒྱལ་པོ་དང་། གཙུག་ལག་ཁང་རྣམས་ལ་བསྔོས། གཏད་གཉེར་ཐམས་ཅད་རཏྣ་ཨ་ཀ་ར་ལ་མཛད་དེ་ཕྱིར་ལྡོག་གོ །དེ་ཡང་ཇོ་བོ་དགུང་ལོ་ང་བདུན་བཞེས་པ་སྟག་གི་ལོ་ལ་རྒྱ་གར་ནས་བཏེགས། ཁ་ཅིག་ང་དགུ་བཞེས་པའི་ལྕགས་ཕོ་འབྲུག་ལ་བཏེགས་པ་དང་། ཁ་ཅིག་དགུང་ལོ་རེ་གཅིག་ལ་བཏེགས་པར་འདོད་དེ། སྔ་མ་འཐད་པར་སེམས་སོ། །དེ་ནས་ཇོ་བོ་དཔོན་སློབ་མི་དྲའི་གཙུག་ལག་ཁང་ནས་རྒྱ་གར་གྱི་སའི་མཐའ་ལ་བྱོན་པ་ན། མུ་སྟེགས་ཀྱི་གཅེར་བུ་པ་བཅོ་བརྒྱད་ཙམ་རྫུ་འཕྲུལ་གྱིས་ང་རྒྱལ་ལ། བོད་དུ་སངས་རྒྱས་ཀྱི་བསྟན་པ་དར་བ་ལ་ཕྲག་དོག་གིས། དེར་རྫུ་འཕྲུལ་གྱིས་ལྷགས་ནས། ཇོ་བོ་དཔོན་སློབ་རྣམས་ལ་བར་ཆད་བྱེད་པར་བརྩམས་པས། ཇོ་བོས་སྒྲོལ་མའི་བསྐྱེད་རིམ་གྱིས། རེངས་པར་བྱེད་པའི་ཇག་ཆིངས་མཛད་དེ། ཐམས་ཅད་ལྡེར་བཟོ་བཞིན་དུ་སོང་། དེ་ནས་བལ་པོའི་མཐར་ཕེབས་པ་ན། མུ་སྟེགས་བསམ་པ་ངན་པས་རང་ཕུང་བར་བྱས་པ་ཡིན་གསུངས་ནས་བྱེ་མ་ལ་སྔགས་བཏབ་སྟེ་ཚོང་པ་ལ་བསྐུར་ནས། ལམ་ཁ་ན་གཅེར་བུ་བ་འདི་འདྲ་བ་ཡོད་པས་བྱེ་མ་འདི་ཐོར། ལངས་འོང་གིས་བྲེད་མི་དགོས། ངེད་ཀྱིས་བཅིངས་པ་ཡིན་གསུངས། ཚོང་པ་རྣམས་ཀྱིས་དེ་ལྟར་བྱས་པ་གྲོལ་ཏེ་སོང་ངོ་། །དེ་ནས་འཕགས་པ་ཤིང་ཀུན་ཏུ་ཕྱགས་ཕེབས་པ་ན་རྒྱ་གར་ནས་ཁྱེར་བའི་དངོས་སྤྱད་རྣམས་དང་། ལྷ་བཙུན་པའི་བསུ་བ་གཙོ་བོ་མི་དྲུག་ཀྱང་དེར་སླེབས། དཀོན་མཆོག་མཆོད་པ་དང་། བོད་ལུགས་ཀྱི་གདན་གྱི་བཀོད་པ་བཟང་པོ་བཤམས། ཇོ་བོ་ཏ་ལའི་བསིལ་གྲིབ་ལ་གྲལ་གྱི་གུང་ལ་སྤྱན་དྲངས། གཙོ་བོ་གསུམ་པ་བྱ་བས། དཀར་ཡོལ་འབྲུག་རྒྱབ་གསེར་སྲང་ལྔ་རི་བ་ཇ་བཙོ་མས་བཀང་སྟེ་ཕུལ་བས། འདི་ལ་ཅི་ཟེར་གསུངས། བོད་ཀྱི་རབ་ཏུ་བྱུང་བའི་བཏུང་བ་ཇ་ཟེར་ཞུས་པས་ཤིན་ཏུ་མཉེས། ཇ་བུ་རམ་སོགས་ཀྱིས་བསྙེན་བཀུར། གཙོ་བོ་མི་དྲུག་གིས་རྟ་མཆོག་དཀར་པོ་མཐོང་སྨོན་རླུང་གཤོག་བྱ་བ། རིན་པོ་ཆེ་སྣ་ཚོགས་ཀྱིས་བརྒྱན་པ་ཞིག་དང་། དར་དཀར་པོ་ཡུག་རེ་ཕུལ། དེར་དགེ་བསྙེན་ཆོས་འཕེལ་གྱི་སྤྲུལ་པ་འབྲོག་ཕྲུག་ཅིག་གིས། ལི་ཡུལ་ནས་ཇོ་བོ་འཇམ་དཔལ་རྡོ་རྗེ། ལིའི་རྒྱལ་པོའི་ཞུ་ཡིག་དང་བཅས་ཏེ་ཕེབས་པས། ཇོ་བོའི་ཞལ་ནས། རྟེན་འབྲེལ་ཐམས་ཅད་ལེགས་གསུངས་ཏེ་ཤིན་ཏུ་མཉེས། དུས་དེར་ལོ་ཙཱ་བ་རྒྱ་བརྩོན་སེང་བསྙེལ་བའི་ཚུལ་བསྟན་ནས། ད་ནི་ཨུ་པཱ་སི་ཀ་ཡོད། །ང་ནི་རང་བཞིན་གནས་སུ་འགྲོ །མི་ལ་ཡིད་ཆེས་མི་སྐྱེ་བས། །ཤི་བ་སྐད་དུ་དུར་དུ་སྐྱོལ། །ང་ནི་འོད་གསལ་སེམས་ཀྱི་ལུས། །འབྱུང་གནས་དེ་ལ་ཐིམ་ནས་འགྲོ །རྒྱ་བོད་གཉིས་སུ་བྱ་བ་བྱས། །ཁ་བ་ཅན་དུ་གཅིག་གིས་ཆོག །ཅེས་གསུངས་ཏེ་མཁའ་སྤྱོད་དུ་གཤེགས་སོ། །དེ་ནས་ཇོ་བོ་དཔོན་སློབ་བལ་པོའི་རྒྱལ་པོ་གྲགས་པ་མཐའ་ཡས་ཀྱིས་སྤྱན་དྲངས། ཇོ་བོའི་ཆིབས་གླང་པོ་ཆེ་མཐོང་སྨོན་བྱ་བ་རྒྱལ་པོས་གནང་སྟེ། ང་ཐང་འདིར་བྷི་ཧ་ར་ཞེས་པའི་གཙུག་ལག་ཁང་བཞེངས་པས། འབྱོར་པ་ཅི་དགོས་པ་དང་། རྒྱ་གར་དང་བོད་ཀྱི་རབ་ཏུ་བྱུང་བའི་གྲངས་འཛུགས་པའི་རྒྱུ་བྱིན་ཅིག ཅེས་གསུངས་པས། རྒྱལ་པོ་དད་དེ་ཞབས་སྤྱི་བོར་བླངས། གང་བཞེད་པ་ཐམས་ཅད་བསྒྲུབ་པར་དམ་བཅས། སྲས་པདྨའི་སྙིང་པོ་ཕུལ་ནས་རབ་ཏུ་བྱུང་། མཚན་ལྷའི་དབང་པོར་བཏགས། མཁས་པར་གྱུར་ནས། ཕྱིས་ཐང་བྷི་ཧ་རའི་མཁན་པོ་མཛད་དོ། །དེ་ནས་ཨ་ཏི་ཤ་དཔོན་སློབ་རྣམས་བལ་བོའི་རྒྱལ་པོས་སྐྱེལ་ཐུང་པ་རྟ་པ་བརྒྱས་བསྐོར་བ་དང་བཅས་ཏེ་བལ་པོ་རྫོང་ལ་ཕྱགས་ཕེབས་པ་ན། དེར་ལྷ་བཙུན་པའི་རྟ་པ་སུམ་བརྒྱ་ཙམ་བསུ་བ་ལ་གོས་དཀར་པོ་འབའ་ཞིག་གྱོན། རྒྱན་ཐམས་ཅད་ཀྱང་དཀར་པོ་འབའ་ཞིག་བྱས། བློན་པོ་ཆེན་པོ་ལྷའི་དབང་ཕྱུག་དང་། ལྷའི་བློ་གྲོས་དང་། ལྷའི་ཤེས་རབ་དང་། ལྷའི་སྲིད་འཛིན་ཞེས་བྱ་བ་བཞི་ལ་དར་མདུང་དཀར་པོ་ཐོགས་པ་བཅུ་དྲུག་བཅུ་དྲུག་གིས་བསྐོར། གཞན་ཐམས་ཅད་ལ་ཡང་བ་དན་ཆུང་ངུ་རེ་དང་། ཆུ་དར་གྱི་གདུགས་ཉི་ཤུ་དང་། པི་ཝཾ་དང་། གླིང་བུའི་སྒྲ་སྙན་པོ་ཁྲོལ་བ་དང་། དཔོན་གཡོག་ཐམས་ཅད་ཀྱང་ངག་མཐུན་པར་དཀོན་མཆོག་གསུམ་ལ་སྐྱབས་སུ་འགྲོ་ཞིང་། བོད་དུ་སངས་རྒྱས་ཀྱི་བསྟན་པ་དར་བར་འགྱུར་རོ། །ཞེས་པའི་ཁ་བརྡ་བཟང་པོ་བྱེད་པ་དང་། ཨ་ཏི་ཤ་ལ་གནོད་པའི་ཕས་རྒོལ་ཐམས་ཅད་བདག་གིས་གཞོམ་པར་བྱའོ། །ཞེས་དཔའ་བསྐྱེད་པ་དང་། ཐམས་ཅད་རྟ་ལས་མི་འབབ་པར་གྲལ་སྒོར་མོ་ཞིག་བྱས་ཏེ། དབུས་སུ་ཨ་ཏི་ཤ་ཆིབས་མཐོང་སྨོན་རླུང་གཤོག་གི་སྟེང་ན་བཞུགས་ཏེ་པཎྜི་ཏ་གཞན་དང་ཕན་པ་བཟང་པོ་དང་། པཎྜི་ཏ་བིརྻ་ཙནྜ་དང་། པཎྜི་ཏ་ཡེ་ཤེས་སྒྲོན་མེ་དང་། ལོ་ཙཱ་བ་གུང་ཐང་པ་ལ་སོགས་པ་རབ་ཏུ་བྱུང་བའི་རྟ་པ་སུམ་ཅུ་རྩ་ལྔས་བསྐོར་བ་དབུས་སུ་བཞུགས་པ་ལ་མི་རྟ་ཐམས་ཅད་ཀྱིས་མགོ་ནང་དུ་འདུད་ཅིང་། བློན་པོ་ཆེན་པོ་བཞིས་དབུས་སུ་འོང་སྟེ། སྔོན་རྒྱལ་པོ་ཡོན་མཆོད་ཞལ་འཛོམ་པའི་ཐོག་མར། མཁན་པོ་བོ་དྷི་ས་ཏྭའི་དྲུང་དུ། བློན་པོ་རིག་པ་ཅན་རྣམས་ཀྱིས་ཟེར་མའི་གླུ་བླངས་པ་ལྟར། བློན་པོ་རྣམས་ཀྱིས་གླུ་མཛད་པ་ནི། ལོ་ཞེས་བྱ་བ་གྲགས་སྟོང་སྙན་པའི་གླུ་དབྱངས་ལོ། །ཨ་ཞེས་བྱ་བ་སྐྱེ་བ་མེད་པའི་གནས་ལུགས་ཡིན། །ལེ་ཞེས་བྱ་བ་སྣང་སྟོང་ཟུང་དུ་འཇུག་པའི་གླུ། །མ་ཞེས་བྱ་བ་བྱམས་པའི་འགྲོ་བ་ཡོངས་ལ་ཁྱབ། །ལོ་དེ་ཞེས་པ་དེ་ཙམ་ཐུགས་ལ་བཞག་འཚལ་ལོ། །ཨ་ལོ་ལ་ཞེས་པ་སྐྱེ་བ་མེད་ཀྱང་གཏམ་འདི་གསོན། །ཁྱེད་རྒྱ་གར་ཡུལ་ནས་བྱོན་པའི་མཁས་གྲུབ་པཎྜི་ཏ། ཡིད་བསམ་པ་བཞིན་དུ་འགྲུབ་པའི་ནོར་བུ་རིན་ཆེན་བཞིན། །བོད་གསོལ་བ་འདེབས་པའི་རྟེན་དུ་བྱོན་པ་བཀའ་དྲིན་ཆེ། །ཞེས་པ་ནས། ངེད་སྙིང་སྟོབས་ཆེན་པོའི་ལྷ་བཙུན་དྲུང་ནས་འོངས། །ལུས་རྐང་པའི་མཐིལ་ནས་ཚངས་པ་མན་ཆད་འདི། །སེམས་གུས་དང་བཅས་ཏེ་བླ་མ་ཁྱེད་ལ་འབུལ། །ལྷ་ཁྱེད་ཀྱི་འཕྲིན་ལས་གང་དགོས་ངེད་ཀྱིས་བསྒྲུབ། །རྗེ་རྒྱལ་པོའི་མངའ་རིས་དཔལ་གྱི་གཙུག་ལག་དེ། །ཐུགས་མི་སྐྱོ་མི་བསྙེལ་རང་ཡུལ་ལགས་པར་འབྱོན་པར་ཞུ། །ལྷ་བཙུན་བྱང་ཆུབ་འོད་དེ་ལྷ་དབང་བརྒྱ་བྱིན་ལྟར། །འཁོར་ཉེ་དབང་ལྟ་བུས་བཀུར་གནས་མཛད་ཅིང་ལྷམ་མེ་བཞུགས། །ལོ་ཨ་ལེ་མ་ལོ་དེ་ཨ་ལོ་ལ། །ཞེས་བློན་པོ་རྟ་པ་སུམ་བརྒྱ་དང་བཅས་པས། རྗེའི་སྙན་དུ་གླུ་དབྱངས་དེ་ཕུལ་བ་དང་། ཨ་ཏི་ཤ་ཆིབས་ཀྱི་སྟེང་ན་ཁྲུ་གང་ཙམ་འཕགས་ཏེ། སྐུའི་དཀྱིལ་འཁོར་མཚན་དཔེས་སྤྲས་པ་ཞལ་འཛུམ་པ་དང་བཅས་པས། ཨ་ཏི། ཨ་ཏི། ཕ་ལ་ཕ་ལ། ཤིན་ཏུ་བཀྲ་ཤིས། ཞེས་སོགས་དང་། འདི་ལྟར་རྒྱན་དཀར་བ། གོས་དཀར་བ། ཚིག་ཐམས་ཅད་དམ་པའི་ཆོས་སུ་འབྱུང་བ། བློན་པོ་འདི་དག་གི་ལུགས་ཀྱི་ཆོས་ཀྱི་རྒྱལ་པོ་ལྷ་བཙུན་པ་དེ་ལྷའི་དབང་པོ་བརྒྱ་བྱིན་དང་ཁྱད་པར་མེད་པར་བཞུགས་ངེས། ཞེས་གསུངས། དེ་ནས་བློན་པོ་ཆེན་པོ་ལྷའི་དབང་ཕྱུག་གིས་ཇོ་བོའི་དྲུང་དུ་ཐལ་མོ་སྦྱར་ནས། བསྟན་པའི་བདག་པོ་བོད་དུ་བྱོན་ལགས་སམ་སེམས་ཅན་རྣམས་ལ་བརྩེ་བར་བྱོན་ལགས་སམ། །ཨེ་མ་དུས་གསུམ་འདོམས་པར་བྱོན་ལགས་སམ། །ཤུགས་རིང་ལམ་ལ་བསྙེལ་བར་མ་གྱུར་ཏམ། །ཞེས་ཞུས་ཏེ། སྤྱན་རས་གཟིགས་ཀྱི་སྐུ་རྩ་ཕྱག་བཞི་བཅུ་པ་བྲིས་མ་ཐག་ཅིག་ཕྱག་རྟེན་དུ་ཕུལ་བ་དང་། མགོན་པོ་ཤིན་ཏུ་མཉེས་ནས། དེ་མ་ཐག་རབ་གནས་མཛད་ཅིང་། སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །གཞན་ལ་ཕན་ཕྱིར་བརྩོན་པའི་གོ་ཆ་བསྣམས། །ཐུགས་རྗེའི་རང་བཞིན་དྲི་མེད་དཀྱིལ་འཁོར་ཅན། །འགྲོ་བའི་སྡུག་བསྔལ་སེལ་ལ་ཕྱག་འཚལ་ལོ། །དེང་སང་ཁོ་བོ་ཁྱོད་ཀྱི་ཞིང་འདིར་མཆིས། །ཐུགས་རྗེས་འགྲོ་བའི་དོན་དུ་སྐྱོབ་ཏུ་གསོལ། །ཞེས་གསུངས། དེ་ནས་བློན་པོ་གཞན་རྣམས་ཀྱིས་ཀྱང་། རས་ཡུག་དཀར་པོ་རེ་ཕྱག་རྟེན་དུ་ཕུལ་ལོ། །ཇོ་བོའི་ཞལ་ནས། ཁོ་བོ་ད་གཟོད་ཞིང་འདིར་སླེབ་པར་འོང་། །འཁོར་བའི་ནགས་སུ་བདེ་བ་མ་མཆིས་ནའང་། །ཤུགས་རིང་ལམ་ལ་འབྱུང་བཞི་སྙོམས་པར་བྱུང་། །ཆོས་རྒྱལ་འཁོར་བཅས་གཞི་ལ་བདེ་ལགས་སམ། །གསུངས། དེ་ནས་ཐམས་ཅད་ངག་མཐུན་པར། ལྷ་ཆེན་པོ་གདུལ་བྱའི་དབང་གིས་ཞིང་གཞན་དུ་གཤེགས་ནའང་། ཕྱིས་དཀོན་མཆོག་གི་སྐྱབས་འོག་ནས་ལྷ་བཙུན་ཆེན་པོས་དབུ་བགྱིས། བློན་འབངས་ཐམས་ཅད་བཀྲ་ཤིས་པར་ཡོད་ཅེས་ཞུས། དེ་ནས་ཇོ་བོ་ཆེན་པོ་དཔོན་སློབ་རིམ་གྱིས་མཚོ་མ་ཕམ་གྱི་འགྲམ་དུ་ཕྱགས་ཕེབས། དེར་ཆུ་སྦྱིན་མཛད་པ་ལ། གུང་ཐང་པས་གཟིགས་པས། མཚོའི་དཀྱིལ་ན་ཁརྶ་པ་ཎི་བཞེངས་པའི་ཕྱག་གི་མཐིལ་ནས་ཧྲིཿདཀར་པོ་ཅིག་ལས་བདུད་རྩིའི་རྒྱུན་བབས་པས་མཚོ་ལུད་པ་ཙམ་དུ་གྱུར་པ། ཡི་དྭགས་དཔག་ཏུ་མེད་པས་འཐུང་སྟེ་ཚིམ་པར་མཐོང་། དེ་ནས་ཨ་ཏི་ཤ་མཚོ་མ་ཕམ་འགྲམ་དུ་ཕེབས་ཟེར་བ་མངའ་རིས་སྐོར་གསུམ་གྱིས་ཐོས། དེའི་ཚེ་མངའ་རིས་ན་ལོ་ཆེན་རིན་ཆེན་བཟང་པོ་དང་། བལ་པོར་ཧ་སུ་ཞེས་མཉམ་པར་གྲགས་པས། ཨ་ཏི་ཤ་བསྟན་པའི་མངའ་བདག་བལ་པོའི་རྒྱལ་པོ་ལྷ་པས་ཞབས་སྤྱི་བོར་བླངས་པ། བལ་པོ་ཧ་སུས་མ་བཟོད་པར། མངའ་རིས་ན་མར་རྣལ་འབྱོར་འཁྱམས་པོ་གཏང་ནས། ཨ་ཏི་ཤའི་ཆེད་དུ་མི་ནོར་དེ་ཙམ་བཏང་པ་ལས། བལ་པོ་ཧ་སུ་བོས་ན། ད་ཙམ་མི་ནོར་ཆོས་གསུམ་འཛོམ་པ་གཅིག་ཡོང་པར་ཡོད་དེ། ཅེས་བསྒྲགས་ཀྱང་གནོད་པར་མ་ནུས། དེ་ནས་བློན་པོ་ལྷའི་བློ་གྲོས་མངའ་རིས་སུ་ལྷ་བཙུན་པའི་དྲུང་དུ་སླེབས་ནས་ཞུ་བ་མཛད་པ། ཐམས་ཅད་མཁྱེན་པས་བལ་པོར་ཕེབས། བལ་པོའི་རྒྱལ་པོ་འཁོར་དང་བཅས་པས་བསྙེན་བཀུར་ཞིང་། རྒྱལ་པོ་ཡབ་སྲས་རྟ་བ་བརྒྱའི་ཚོགས་དང་། ཨ་ཏི་ཤའི་འཁོར་པཎྜི་ཏ་ཆེན་པོ་གསུམ། གུང་ཐང་པ་ལ་སོགས་པ་སྡེ་སྣོད་འཛིན་པ་སུམ་ཅུ། རྒྱལ་པོ་སའི་ས་གྷ་ཞེས་པ་རྒྱ་གར་ནུབ་ཕྱོགས་ཐམས་ཅད་ཀྱི་བདག་པོ། རྒྱལ་སྲིད་སྤངས་ནས་ཨ་ཏི་ཤའི་ཐུགས་དམ་བསྐུལ་བའི་རྐྱེན་མཛད་དུ་བྱོན་པ། མདོར་ན་བསུ་སྐྱེལ་རྟ་པ་བཞི་བརྒྱ་སུམ་ཅུ་རྩ་ལྔ་ཙམ་མཚོ་མ་ཕམ་པའི་འགྲམ་ན་བཞུགས་ནས་སྐྱེ་བོའི་ཚོགས་དཔག་ཏུ་མེད་པའི་དོན་མཛད་དེ། རིང་པོར་མི་ཐོགས་པར་ཡང་གླིང་གསེར་གྱི་ལྷ་ཁང་དུ་ཕེབས་པར་ཡོད་པས་ཐུགས་དགྱེས་པར་ཞུ་ཞེས་ཞུས་པས། ལྷ་བཙུན་ཆེན་པོ་དགྱེས་པའི་མཐར་ཐུག་ནས། ངས་དད་གུས་མ་ལོག་པར་གསོལ་བ་རྒྱུན་དུ་བཏབ་ནས་ཡུན་རིང་སོང་སྟེ། ད་ཨ་ཏི་ཤ་དང་མཇལ་བ་ཡིན། མདང་རྨི་ལམ་ན། ནུབ་ཕྱོགས་ནས་ཉི་མའི་དཀྱིལ་འཁོར་གཅིག་ཤར་བྱུང་བ་དང་། ཤར་ཕྱོགས་ནས་ཟླ་བའི་དཀྱིལ་འཁོར་ཉ་གང་བ་ཞིག་ཤར་བྱུང་བ་ལྷན་ཅིག་ཏུ་ཚོགས་པས། སྤྲིན་དང་ཁུ་རྡུལ་ཐམས་ཅད་རང་སར་དེངས། སྐར་ཚོགས་གྲ་མ་ཉམས་པར་འདུད་པར་རྨིས་པས། ཟླ་བ་དེ་ང་ཡིན་ནམ་སྙམ་ཡང་། ཤར་ཕྱོགས་ནས་བྱུང་པ། གང་ཡིན་ཀྱང་དེས་གོ་ཆོད་པར་སྣང་། རྨི་ལྟས་ཤིན་ཏུ་བཟང་གསུངས། དེ་ནས་ལྷ་བཙུན་པས་ཡང་གླིང་གསེར་གྱི་ལྷ་ཁང་དུ་རྟ་པ་བཏང་སྟེ། ལམ་པོ་ཆེ་དང་། གནས་ཐམས་ཅད་ལ་བྱི་དོར་དང་། དར་ཟབ་ཀྱིས་བརྒྱན་ཏེ། སྐུ་གསུང་ཐུགས་ཀྱི་རྟེན་དང་། མཆོད་པའི་བྱེ་བྲག་བསམ་གྱིས་མི་ཁྱབ་པ་གཤོམ་དུ་བཅུག གཞན་ཡང་ཕྱོགས་ཀུན་དུ་ཕོ་ཉ་བཏང་སྟེ། ཇོ་བོ་ལ་བསུ་བའི་ཕྱིར་དུ་སྐྱེ་བོའི་ཚོགས་དང་། སྡེ་དགོན་རབ་ཏུ་བྱུང་བ་ཐམས་ཅད་བསྡུས་པས། ལྷ་བཙུན་པ་ཁུ་དབོན་གྱིས་དཀའ་སྤྱད་དེ་ཙམ་བྱས་པའི་པཎྜི་ཏ་དེ་ཡ་མཚན་པ་ཅི་འདྲ་ཞིག་བལྟའོ་ཟེར་ནས། ལམ་རིང་ཐུང་ཐམས་ཅད་དུ་སྐྱེ་བོའི་ཚོགས་ཆེན་པོ་འདུས། ལྷ་བཙུན་པས་ཀྱང་འཁོར་རྟ་པ་དྲུག་བརྒྱ་དང་ལྷན་ཅིག་ཏུ་བྱོན་ནས། ཇོ་བོ་དཔོན་སློབ་སྤྱན་དྲངས། དེར་ཐམས་ཅད་ཀྱིས་ཇོ་བོ་ལ་བལྟས་པ་ན་པཎྜི་ཏ་དང་། གུང་ཐང་པ་ལ་སོགས་པ་སྡེ་སྣོད་འཛིན་པ་དང་། བལ་པོའི་རྒྱལ་པོ་ལ་སོགས་པའི་དབུས་ན། མཚན་དང་དཔེ་བྱད་ཀྱིས་བརྒྱན་པ་ལྷམ་མེར་བཞུགས་པ་མཐོང་བས། སྐྱབས་སུ་མཆིའོ་ཞེས་པ་དང་། ད་ནི་འཇིག་རྟེན་གྱི་མགོན་པོ་བོད་དུ་བྱོན་ནོ། །བདག་ཅག་བོད་ཀྱི་སེམས་ཅན་རྣམས་ལ་ཐུགས་རྗེས་གཟིགས་ཤིག ཞེས་དད་པ་ཕྱོགས་གཅིག་ཏུ་འུར་བ་དང་། ལྷ་བཙུན་པས་ཀྱང་། ཇོ་བོ་ལ། བླ་མ་རྗེ་བཙུན་ཆེན་པོའི་ཞལ་སྔ་ནས། །རྒྱ་གར་ཡུལ་ནས་བོད་ཀྱི་ཡུལ་དུ་བྱོན། །ཤུགས་ཐག་རིང་པ་སྐུ་ཉོན་མ་མོངས་སམ། །འདུ་བ་རྣམ་བཞིའི་སྐུ་བསྙུན་མི་མངའ་འམ། །སྐུ་ཁམས་བདེ་འམ་དགྱེས་པར་སྤྱོད་ལགས་སམ། །སྐུ་གསུང་ཐུགས་ལ་གནོད་པ་མི་མངའ་འམ། །ཞེས་གསོལ་ཏེ། བདག་ཅག་བོད་ཀྱི་སྐྱེ་བོ་ཕལ་ཆེར་ནི། །བླ་མ་དང་བྲལ་རང་དགར་སྨྲ་བ་སྟེ། །ཀླ་ཀློའི་སྤྱོད་པ་མ་རུང་སྤྱོད་པ་རྣམས། །ཨ་ཏི་ཤ་ཡིས་བཟོད་པར་མཛད་དུ་གསོལ། །ཞེས་བོད་སྤྱིའི་བཟོད་གསོལ་དང་། དེ་ནས་ལོ་ཙཱ་བ་ལ། སློབ་དཔོན་ཚུལ་ཁྲིམས་རྒྱལ་བའི་སྤྱན་སྔ་ནས། །རེ་བ་ཆེ་བས་བདག་གི་ཐུགས་དམ་ཞུས། །ཐུགས་ལ་བཏགས་ནས་རྒྱ་གར་ཡུལ་དུ་བྱོན། །དཀའ་བ་མང་པོ་སྤྱད་པ་བཟོད་པར་གསོལ། །ཞེས་གསུངས། དེ་ནས་ཇོ་བོ་བོད་དུ་འགྲོ་དོན་འབྱུང་བར་སྨོན་ལམ་བཏབ་པ་ནི། ཨེ་མ་ཧོ། དགེ་སློང་བྱང་ཆུབ་འོད་བདག་གིས། །རྟག་ཏུ་བསམ་པའི་བླ་མ་སྤྱན་འདྲོངས་པས། །བོད་ཀྱི་ཡུལ་དུ་སྐྱེས་བུ་དམ་པ་འདིའི། །གཞུང་ལུགས་ཤིན་ཏུ་དར་ཞིང་རྒྱས་པར་ཤོག །ཅེས་ཞུས་པས་ཇོ་བོ་མཉེས་ནས། བོད་ཀྱི་སེམས་ཅན་རྣམས་ཁོ་བོ་ལ་འདི་ལྟར་དད་པ་ཆེ་བ། ཕན་བདེའི་འབྱུང་གནས་དཀོན་མཆོག་གསུམ། །ངའི་གདུལ་བྱ་ཐེག་པ་ཆེན་པོའི་རིགས་ཅན་འདི་རྣམས་ལ་ཐུགས་རྗེས་ཟུང་ཞིག གསུངས་ནས། ཁྲོམ་ཐམས་ཅད་ལ་གཟིགས་ཤིང་བྱིན་རླབས་མཛད། དེ་ནས་མཐོ་ལིང་པདྨོ་གླིང་དུ་ཕེབས་ནས། ཨ་ཏི་ཤས། བལ་པོའི་རྒྱལ་པོ་ལ། ཁྱོད་ཀྱི་ཐང་བྷི་ཧ་རའི་གཙུག་ལག་ཁང་དང་། ལྷོ་ཕྱོགས་སུ་དགེ་འདུན་གྱི་འདུ་ཁང་། རྒྱ་བོད་གཉིས་ཀྱི་རབ་ཏུ་བྱུང་བ་ལ་ཆོས་གྲྭ་ལེགས་པར་ཚུགས། དེའི་ས་བརྟགས་པ་སོགས་རྟེན་འབྲེལ་ཐམས་ཅད་ཁོ་བོ་རང་གིས་ཚར་མོད། དེའི་ནང་དུ་དེ་བཞིན་གཤེགས་པའི་སྐུ་དགུང་ལོ་བརྒྱད་པའི་ཚད། སེང་ལྡེང་ལ་རྗེ་བཙུན་མ་སྒྲོལ་མའི་སྐུ། ཙནྡན་གྱེ་ལྡེ་གུ་ལ་སྤྱན་རས་གཟིགས་ཀྱི་སྐུ། གཙུག་ཏོར་དྲི་མེད་ཀྱི་སྐུ་ལ་སོགས་པ་གང་གྲུབ་བཞེངས། དེའི་བཀོད་པ་ལ་པཎྜི་ཏ་གསུམ་གཏོང་བས། ཟླ་བ་དགུའི་ནང་དུ་གྲུབ་པ་གྱིས། རབ་ཏུ་གནས་པ་ཁོ་བོ་རང་ལ་བརྡ་སྦྱོར་གསུངས། དེ་ནས་བལ་པོའི་རྒྱལ་པོའི་འཁོར་བཅས་ཕྱིར་ལྡོག་པ་ན། ལྷ་བཙུན་པས་བསྙེན་བཀུར་ཏེ། རྟ་སུམ་ཅུ་རྩ་གཉིས་དང་། པཎྜི་ཏ་གསུམ་ལ་ཡང་གསེར་སྲང་རེ་ཕུལ་ཏེ། ལྔ་བརྒྱའི་དུས་འདིར་དམ་ཆོས་རྣམ་མང་ཡང་། །ལམ་དུ་འགྲོ་བ་བརྒྱ་ལ་སྲིད་པ་ཙམ། །བླ་མར་བཞུགས་པ་ཤིན་ཏུ་མང་ན་ཡང་། །ཨ་ཏི་ཤ་ཉིད་གཅིག་པུ་ཉིད་དུ་ཟད། །བལ་པོའི་ཐང་ནས་སྐྱེལ་དུ་བྱོན་པ་ལེགས། །ཞབས་སླའི་ཚུལ་དུ་རྟའི་ཚོགས་འདི་དག་འབུལ། །སྐྱེ་རྒ་ན་འཆིའི་ཆུ་བོ་རབ་སོམས་ལ། །རྒྱལ་པོའི་དྲེགས་པ་སྤོངས་ལ་གཞན་དོན་རྟེན། །ཞེས་གསུངས་པས། བལ་པོའི་རྒྱལ་པོ་དགྱེས་བཞིན་དུ་གསེར་སྲང་སུམ་བརྒྱ། སྲས་ལྷའི་དབང་པོའི་ལག་ཏུ་གཏད་དེ། ལྷ་བཙུན་ལ་ཕུལ་ནས། བལ་པོའི་རྒྱལ་པོས་གསོལ་པ། རྒྱལ་རིགས་ལུས་ལ་རྣམ་དག་ཁྲིམས་ལྡན་ཞིང་། །སངས་རྒྱས་བསྟན་ལ་དཔའ་བའི་གོ་གྱོན་ནས། །འཇིག་རྟེན་སྒྲོན་མེ་བོད་དུ་སྤྱན་དྲངས་ཏེ། །ཐམས་ཅད་ཆོས་ལ་འགོད་པ་ངོ་མཚར་ཆེ། །བདག་གིས་བསྐྱེད་པའི་བུ་འདི་རྗེ་ལ་འབུལ། །བསམ་པ་བཟང་པོ་གསེར་དང་འདྲ་བ་འདི། །ཆོས་རྒྱལ་བོད་དུ་ཆོས་གྲྭ་འཛུགས་པ་ལ། །གསེར་སྲང་སུམ་བརྒྱ་རེ་ཞིག་འདེགས་སུ་འབུལ། །སླད་མ་སངས་རྒྱས་བསྟན་པ་དར་བ་དང་། །ཨ་ཏི་ཤ་ཡང་ཕྱོགས་འདིར་ཡུན་རིང་ཞིང་། །བདག་ཀྱང་འཕྲེང་བས་ཡུན་དུ་འགྲོགས་པར་ཞུ། །ཞེས་ཞུས་ཏེ། རྒྱལ་པོ་པཎྜི་ཏ་གསུམ་དང་བཅས་པ་བལ་པོར་བྱོན། དེ་ནས་ཨ་ཏི་ཤ་དཔོན་སློབ་ལྷ་བཙུན་པས་དབུ་བགྱིས། བསུ་བའི་རྟ་པ་དགུ་བརྒྱའི་འཁོར་དང་། རྔ་དང་རྔ་བོ་ཆེ་དང་། སིལ་སྦུག་དང་། དཀར་དུང་དང་། རག་དུང་ལ་ལོ་པཎ་སྤྱན་འདྲེན་གྱི་རྒྱུད་བྱ་བར་གྲགས་ཤིང་། དེ་ལ་སོགས་པ་རོལ་མོའི་ཚོགས་དང་བཅས་ཏེ་རྒྱལ་པོའི་ཕོ་བྲང་དུ་སྤྱན་དྲངས་བསྙེན་བཀུར་ཏེ། བོད་འདིར་ཆོས་ཟབ་ཟབ་པོ་ལས་ཀྱང་། ཐོག་མར་ལས་རྒྱུ་འབྲས་ལ་རྟེན་པའི་ཆོས་ཀྱིས་སྐྱོང་བར་ཞུ་ཞུས་པས། ཇོ་བོའི་ཞལ་ནས། ཆོས་ཀྱི་གནད་གོ་བའི་གཏམ་ཡིན། ནན་ལྟར་ཟབ་པ་ལས་རྒྱུ་འབྲས་ཁོ་ན་ཡིན། ཡི་དམ་གྱི་ལྷ་ཞལ་མཐོང་བ་བས། ལས་རྒྱུ་འབྲས་ལ་ཡིད་ཆེས་ན་དེ་ཉིད་མཆོག་ཏུ་གྱུར་པ་ཡིན་ཏེ། གཤིན་རྗེ་གཤེད་ཀྱི་རྣལ་འབྱོར་པ་དང་། བི་ཀྲ་མའི་གནས་བརྟན་གྱི་ལོ་རྒྱུས་གསུངས་ནས། དེ་ལྟར་མཛད་པས་མངའ་རིས་སུ་པཎྜི་ཏ་ལས་རྒྱུ་འབྲས་པར་གྲགས་ཏེ། ཁོ་བོའི་མིང་ཙམ་གྱིས་ཀྱང་བསྟན་པ་ལ་ཕན་པར་བྱས་གསུངས་ནས་མཉེས། དེའི་དུས་བོད་དབུས་གཙང་གི་མཁས་པ་ཕལ་ཆེ་བ་དེར་ཚོགས་ཏེ། ལྟ་བའི་གནད་ལ་སོགས་པ་བསྟན་པ་རིན་པོ་ཆེ་ལས་བརྩམས་པའི་དྲི་བ་མང་དུ་ཞུས་པས། རང་རང་གི་ཐེ་ཚོམ་གྱི་དྲ་བ་ཆོད་པར་མཛད་དོ། །དེ་ནས་ལོ་ཙ་བ་ནག་ཚོས། ད་ནི་ཇོ་བོ་བོད་དུ་ལོ་གཅིག་ལས་མི་བཞུགས་པའི་ཆད་སོ་ཡོད་པས། ཆོས་ཞུ་བ་རྣམས་ཞུས་ཤིག་ཅེས་ལྷ་བཙུན་པ་སོགས་ལ་བསྐུལ་བས། ཇོ་བོ་ལ་ལྷ་བཙུན་པས་གསེར་སྲང་སུམ་བརྒྱའི་མེ་ཏོག་དང་བཅས་ཏེ། བོད་ཀྱི་ཡུལ་འདིར་ཐེག་པ་ཆེན་པོའི་ལམ་ལ་ལོག་པར་རྟོག་པའི་གང་ཟག དགེ་བའི་བཤེས་གཉེན་གྱིས་མ་ཟིན་པ་དག ཕན་ཚུན་རྩོད་ཅིང་། རང་རང་གི་རྟོག་གེས་ཟབ་པ་དང་རྒྱ་ཆེ་བའི་དོན་ལ་སྤྱོད་པ་ལ་རྩོད་ཅིང་། སོ་སོར་མི་མཐུན་པ་དག་མཆིས་པས། དེ་དག་གི་ཐེ་ཚོམ་བསལ་དུ་གསོལ། ཞེས་པ་དང་། གཞན་ཡང་ཐེག་པ་ཐུན་མོང་པའི་དྲི་བ་གཉིས། ཕ་རོལ་ཏུ་ཕྱིན་པའི་དྲི་བ་གཉིས། གསང་སྔགས་ལ་དྲི་བ་གསུམ་ལ་སོགས་པ་མང་དུ་ཞུས་ནས། བྱམས་པ་དང་། ཀླུ་སྒྲུབ་ནས་བརྒྱུད་པའི་གདམས་ངག་བླ་མ་ཉིད་ཀྱིས་ཐུགས་ཉམས་སུ་བཞེས་པ། ཚིག་ཉུང་ལ་དོན་རྒྱས་པ་ཞིག་མཛད་པར་ཞུ་ཞུས་པས་མདོ་སྔགས་གཉིས་ཀའི་གནད་བསྡུས་ནས་སྟོན་པས། བརྗོད་བྱ་ཡོངས་སུ་རྫོགས་པ་དང་། སེམས་འདུལ་བའི་རིམ་པ་གཙོ་བོར་མཛད་པ་ལག་ཏུ་བླང་བདེ་བ་དང་། ཤིང་རྟ་ཆེན་པོ་གཉིས་ཀྱི་ལུགས་ལ་མཁས་པའི་བླ་མ་གཉིས་ཀྱི་གདམས་པས་བརྒྱན་པ་ལུགས་གཞན་ལས་ཁྱད་པར་དུ་འཕགས་པ། བྱང་ཆུབ་ལམ་གྱི་སྒྲོན་མེ་རྩ་འགྲེལ་མཛད། ཡང་ལྷ་བཙུན་པས། རྒྱུད་གསང་བ་འདུས་པ། མན་ངག་ཡེ་ཤེས་ཞབས་ལུགས་དང་། གཙོ་བོ་སྤྱན་རས་གཟིགས་ཀྱིས་མཛད་པའི་སྒྲུབ་ཐབས་ཞུས་པས། གསང་འདུས་འཇིག་རྟེན་དབང་ཕྱུག་ལྷ་བཅུ་དགུའི་སྒྲུབ་ཐབས་མཛད་དེ་གནང་ངོ་། །དེའི་ཚེ་ལོ་ཙཱ་བ་རིན་ཆེན་བཟང་པོས། རྒྱལ་པོས་སྤྱན་དྲངས་ལུགས། དཀའ་སྤྱད་དུ་མའི་མཐར་སྤྱན་འདྲོངས་ཚུལ་དང་། པཎྜི་ཏའི་ཡོན་ཏན་གྱི་ཁྱད་པར་མཐའ་ཡས་པ། སྔར་ནས་ཀྱང་རང་ཕྱོགས་སུ་བྱོན་ཚུལ་རྣམས་གསན་པས། དུས་དིང་སང་ང་ལས་ཡོན་ཏན་ཆེ་བ་མེད་དམ། པཎྜི་ཏ་བྱོན་ཀྱང་ཞུ་རྒྱུ་ཙམ་མ་མཆིས། ལྷག་པར་ཡང་པཎྜི་ཏ་དེ་འདུལ་ཁྲིམས་དང་མདོ་སྡེ་ལ་རྩལ་དུ་འདོན་པ་གཅིག་འདུག་ཟེར། དེའི་རིགས་ལ་ཐེག་པ་ཆེན་པོ་གསང་སྔགས་ཀྱི་ལུགས་འབྱུང་བ་ཤིན་ཏུ་དཀའ་ལ་གང་ཟག་བཟང་པོ་ཞིག་ཡིན་པར་ཤེས། རྨི་ལྟས་ལ་སོགས་པའང་བཟང་། ཅུང་ཟད་ཅིག་བསུས་ནས་བསྙེན་བཀུར་བ་བབ་སྙམ་དུ་སེམས་པའི། དེ་ནུབ་རྨི་ལམ་ན་མི་རེང་དཀར་པོ་ཞིག་བྱུང་ནས། ཁོ་བོ་སེམས་ཅན་གྱི་དོན་ལ་བྱས་ཡུས་ཆེ། འོན་ཀྱང་རྒྱལ་བ་སྤྱན་འདྲེན་པ་ལ་དཀའ་སྤྱད་དུ་མ་བྱས། ད་དུང་མི་ཤེས་པ་ཡང་ཞུ་རྒྱུ་མང་པོ་མཆིས། ལོ་ཙཱ་བ་ཐོས་རྟགས་ཞི་ཞིང་དུལ་བ་བྱ་བ་ཡིན། རྒྱ་བོད་ཀྱི་ལོ་པཎ་ཐམས་ཅད་ཀྱི་ཡོན་ཏན་དྲིལ་ཀྱང་པཎྜི་ཏའི་གཞུང་གི་ཡོན་ཏན་མི་རྫོགས། བོད་འདི་ཀུན་མན་ངག་གི་སྣ་རྩེས་འདུལ་བ་ཡིན། མན་ངག་ཐམས་ཅད་བོད་ཀྱིས་མི་ལོན་ཟེར་ནས་གཏམ་དྲི་ལོང་མེད་པར་ཡལ་ནས་སོང་། ལོ་ཙཱ་བ་གཉིད་སད་པ་དང་། པཎྜི་ཏ་དེ་སྙིང་རྗེ་ཆེ་བ་ཞིག་ཡོད་པར་འདུག སྣ་ལ་ཐུགས་རྗེ་ཆེན་པོ་འོང་བ་དེ་བཟང་སྙམ། དེ་ནས་ནངས་པར་ཐག་རིང་པོ་ནས་བསུས་ཏེ། སྐུའི་སྤྱོད་པ་ལ་བལྟས་པས་ཆོག་མི་ཤེས། རིམ་གྱིས་རང་གི་ཁང་པར་སྤྱན་དྲངས་ནས་བསྙེན་བཀུར་བར་བཞེད་པ་ལ། པཎྜི་ཏ་དང་། ཁོང་རང་སྟན་མཉམ་པ་ཙམ་བཤམས། དེ་ནས་པཎྜི་ཏ་ནང་དུ་བྱོན་པ་དང་། ལྷ་ཁང་འོག་ན་ཐེག་པ་ཐུན་མོང་གི་ལྷ་བོད་ལུགས་སུ་བཞེངས་པ་ཡོད་པ་ལ་ཕྱག་ལ་སོགས་པ་སཾསྐྲྀ་ཏའི་སྐད་ཀྱིས་ཡན་ལག་བདུན་པ་མཛད་དེ། ལྷ་རེ་ལ་བསྟོད་པ་ཚིག་བཞི་པ་རེ་མཛད་ཅིང་འདུག དེ་བཞིན་དུ་བར་ཁང་ན་ཐེག་པ་ཆེན་པོའི་ལྷ་སྐུ་མང་པོ་ཡོད་པ་དང་། གསུམ་ཐོག་ན་གསང་སྔགས་བླ་མེད་ཀྱི་ལྷ་སྐུ་མང་པོ་ཡོད་པ་ལའང་ཡན་ལག་བདུན་པ་ཕུལ་ནས། ལྷ་རེ་རེ་ལ་རང་རང་གི་རྒྱུད་དང་མཐུན་པའི་བསྟོད་པ་ཚིགས་སུ་བཅད་པ་ཚིག་བཞི་པ་རེ་མཛད། དེར་ལོ་ཙཱ་བས་སཾསྐྲྀ་ཏའི་སྐད་སྙན་པོ་དེ་ཐོས་པས་སྙན་ངག་ཕུལ་དུ་ཕྱིན་པ་འདུག་པ་དང་། སྔར་མ་གཟིགས་པའི་ལྷ་རིས་རྣམས་ལའང་བསྟོད་པ་མཛད་པས། ཐེག་པ་ཆེན་པོ་ལའང་དེ་འདྲ་ན། དང་ཚུགས་ཉེ་བ་འཁོར་ཡིན་ནམ་སྙམ་པ་ལ་བརྟེན་ནས། རང་གི་སྟན་ལ་འབྲིད་ཐེབས་གསུམ་བྱས། མཐར་སྟན་མེད་པ་ཙམ་དུ་ང་རྒྱལ་སྐྱུངས། དེ་ནས་བསྙེན་བཀུར་ཏེ་ལོ་ཙཱ་བས། རྒྱ་གར་གྱི་ལོ་རྒྱུས་མང་པོ་དྲིས་པས། སྒྲོ་བསྐུར་མེད་པ་ཚར་བ་ལན་དུ་བྱུང་། དེ་ནས་ཡོན་ཏན་གང་ལ་མཁས་ཞུས་པས། ཁྱེད་ཐུན་མོང་པ་ལ་ཟེར་རམ། ཐུན་མོང་མ་ཡིན་པ་ལ་ཟེར་གསུངས། ལོ་ཙཱ་བས་ཐུན་མོང་བ་ལ་ཤིན་ཏུ་མཁས། ཐུན་མོང་མ་ཡིན་ལ་འདྲི་བ་ཡིན་ནམ་གསུང་བར་གོ་ནས། ཐུན་མོང་མ་ཡིན་པ་ལ་ལགས་མོད་ཞུས་པས། ཁོ་བོ་འདི་དང་འདི་ལའང་མཁས་གསུངས་ནས། ལོ་ཙཱ་བས་རྣ་བར་མ་ཐོས་པའང་མང་པོ་བཏོན་ནས་བྱུང་། དེར་ལོ་ཙཱ་བའི་ང་རྒྱལ་ཐམས་ཅད་ཞི། དེ་ནས་པཎྜི་ཏའི་ཞལ་ནས། འདུ་བླ། མདོ་སྡེ། མངོན་པ། གསང་སྔགས་ལ་སོགས་པ་དུ་མ་ལས་བརྩམས་ཏེ། འདི་ཤེས་སམ་འདི་ཤེས་སམ་ཞེས་དྲིས་པས། ཁོ་བོ་དེ་ལའང་མཁས་ཟེར་བ་མིན་པ་མ་བྱུང་། པཎྜི་ཏ་དེ་ལ་ཤིན་ཏུ་མཉེས་ནས་ཁྱེད་ལྟ་བུ་ཡོད་པ་ལ་ཁོ་བོ་བོད་དུ་འོང་མི་འཚལ་བ་འདུག་པ་ལ་ཞེས་པའང་གསུངས། ཡང་ལོ་ཙཱ་བ་དེ་དག་ཐམས་ཅད་གདན་ཐོག་གཅིག་ཏུ་ཧྲིལ་ནས་ཉམས་སུ་ལེན་པ་ཇི་ལྟར་བྱེད་གསུངས་པས། ལོ་ཙཱ་བ་ན་རེ། ཐེག་པ་མ་འདྲེས་སོ་སོར་གསལ། །བྱ་བ་ཁྱེད་ལ་མ་འདྲེས་པར། །རང་སར་ཉམས་སུ་ལེན་ལགས་མོད། །ཞུས་པས། ཇོ་བོའི་ཞལ་ནས། ལོ་ཙཱ་བ་ངན་པར་ཐལ། བོད་ལ་ཁོ་བོ་དགོས་པར་འདུག་གསུངས་ནས་ལན་གཞན་མི་སྨྲ་བར་བཞུགས། དེའི་ནུབ་མོ་ལོ་ཙཱ་བས་ནམ་ཐུན་གསུམ་དུ་བགོས་ནས། གནས་གསུམ་དུ་རིམ་གྱིས་ཐེག་པའི་མཐོ་དམན་དང་བསྟུན་ཏེ་བསྒོམས་པས། ཁོང་གི་སྤྱོད་པ་ཐམས་ཅད་པཎྜི་ཏས་མཁྱེན་ནས། ནངས་པར་ལོ་ཙཱ་བ་ཙབ་ཏ་ཙོབ་ཏ་མང་པོས་ཅི་བགྱི། གང་ཟག་དམ་པ་རྡོ་རྗེའི་གདན་ནོན་དགོས་པ་ཡིན་གསུངས། དེར་ལོ་ཙཱ་བས། ཐེག་པའི་ཉམས་སུ་ལེན་ལུགས་ཞུས་པས། ལོ་ཙཱ་བ། དེས་མི་འོང་གསུངས། འོ་ན་ཁྱེད་རང་ཇི་ལྟར་མཛད་ལགས་ཞུས་པས། ཅི་ཟེར། གནས་གར་སྡོད། གྲོགས་སུ་དང་འགྲོགས། སྤྱོད་ལམ་ཅི་བྱེད་ཀྱང་འདུལ་ཁྲིམས་ལ་གཞི་བྱས་ལ། སེམས་ཅན་ཐམས་ཅད་མ་ཡིན་པས་དེར་བསྒོམ་དགོས། མ་ལྟར་དག་སྣང་སྦྱོངས། ལྷ་སྐྱེ་མེད་ཡིན་པས་དེར་སྒོམས། འདྲིལ་མ་ཤེས་ན་སྙིང་པོ་མི་ལོན་ཞེས་གསུངས་ནས། འདི་སྐད་དུ། ཁྲིམས་ནི་ཡོན་ཏན་ཀུན་གྱི་གཞིར། །རང་གི་སྟོན་པས་ལེགས་པར་གསུངས། །སྙིང་རྗེ་ཆེན་པོ་དང་འབྲེལ་བའི། །བྱང་ཆུབ་སེམས་ནི་མཆོག་ཏུ་བསྔགས། །བཟང་རྟོག་མཚན་མས་མ་བཅིངས་པའི། །བསྐྱེད་རྫོགས་ཟུང་འབྲེལ་ངེས་འཚང་རྒྱ། །སྐྱེས་བུ་ཆུང་དང་ཆེར་གྱུར་པའི། །བྱ་བ་འདི་ཡིན་འབྲིང་པོ་ལའང་། །མི་རྟག་བརྩོན་པས་བསྐུལ་བ་གཅེས། །རང་དགའ་སྤངས་ནས་རྒྱལ་བའི་བཀའ། །རྒྱས་པར་འབྱེད་པ་མཁས་པ་ཡིན། །སྙིང་པོར་བསྡུས་ནས་ཉམས་ལེན་པའི། །སྐྱེས་བུ་དེ་ནི་བཟང་པོར་གྲགས། །ལས་འབྲས་ཁྱད་དུ་མི་གསོད་པའི། །བག་ཡོད་ཅན་དེ་བཙུན་པར་བཞེད། །ཀུན་ཤེས་གཅིག་སྡུག་མཁས་པའི་སྐྱོན། །ལག་ལེན་མི་བྱེད་འཆལ་བ་ཡིན། །བླང་དོར་མི་བྱེད་བཙུན་པོའི་གསོག །ཤེས་པར་མཛོད་ཅིག་རིན་ཆེན་བཟང་། །ཐུགས་རྗེ་ཆེན་པོས་བསྐུལ་བར་ཟད། །ཅེས་གསུངས། ལོ་ཙཱ་བས་དམ་པར་ཤེས་ནས། ལྷ་ཡི་ལྷར་གྱུར་པཎྜི་ཏ། །རྣམ་དག་སྐུ་མཆོག་ཁྲིམས་ཀྱིས་སྤྲས། །དོན་གཉིས་འབྱོར་པའི་ནོར་གྱིས་ཕྱུག །གྲོལ་ནས་འདྲེན་པར་ཁོ་བོས་འཚལ། །ཁོ་བོའི་ལུང་རིགས་སྒྲོན་མེ་ཡིས། །སྦས་པ་ཁྱོད་ཀྱི་ཡོན་ཏན་མཐོང་། །སྔོན་ཆད་ཚིག་དང་འགལ་ན་ཡང་། །ད་ནི་ཁྱོད་བཞིན་ཉམས་སུ་ལེན། །ཞེས་བསྟོད་དོ། །གཞན་ཡང་མདོ་སྔགས་ཀྱི་ཆོས་རང་རང་གི་སྐལ་བ་དང་འཚམས་པར་གནང་སྟེ། བོད་ལོག་པར་ལྟ་བ་ལུང་རིགས་ཀྱིས་ཚར་བཅད། ཐེ་ཚོམ་ཟ་བ་སྤང་བླང་གི་མིག་ཕྱེ་ནས་བསྟན་པ་ཆེས་གསལ་བར་མཛད་དོ། །དེ་ལྟར་ན་ཇོ་བོ་ཆེན་པོས་ཆོས་ཀྱི་རྒྱལ་པོ་ལྷ་བཙུན་པ་སོགས་ཀྱི་ཐུགས་དགོངས་རྫོགས་པར་མཛད་ནས། བལ་པོའི་རྒྱལ་པོ་པཎྜི་ཏ་དང་བཅས་པས་གཙུག་ལག་ཁང་བཞེངས་ཚར་བའི་ཞུ་བ་བྱུང་སྟེ་འབྱོན་དུ་ཉེ་བ་ན། ཇོ་བོ་ཆེན་པོ་དགུང་ལོ་རེ་གཅིག་བཞེས་པའི་དུས། བླ་མ་དང་ཡི་དམ་གྱིས་ལུང་བསྟན་པའི་བཤེས་གཉེན་སྟོན་པ་རང་ལོ་སོ་དགུ་བཞེས་པ། དང་པོར་ཡང་གླིང་གསེར་གྱི་ལྷ་ཁང་དུ་མཇལ་ནས་བྱིན་གྱིས་བརླབས་པའི་ཚུལ་སྟོན་པའི་རྣམ་ཐར་གྱི་སྐབས་སུ་འབྱུང་ལ། དེ་ནས་བཤེས་གཉེན་སྟོན་པ་དང་། ལྷ་བཙུན་པས། ཇོ་བོ་རྒྱ་གར་དུ་འབྱོན་དུ་མ་སྟེར། དབུས་ཀྱི་རྒྱལ་ཁམས་སུ་བསུ་བ་གནད་ལ་དགར་བའི་སྤྲིང་ཡིག་ཚིགས་སུ་བཅད་པ་བཅུ་དགུ་པ་བཏང་། བོད་སྟོན་རྣམས་ལ་སློབ་རིང་ལ་ཐབས་དུ་མས་ཇོ་བོའི་ཐུགས་དང་བསྲིངས་ཏེ། རྒྱ་དཔེ་རྟེན་གསུམ་ལ་སོགས་པའི་གཞི་ཐམས་ཅད་བལ་པོར་མ་བཀུར། དེའི་དུས་ཇོ་བོའི་ཕྱག་ཕྱིར་གུང་ཐང་པ། སའི་ས་ཀ ཨུ་པཱ་སི་ཀ ཨེ་ལ་བྷ་རི་ལ་སོགས་པ་དཔོན་སློབ་ཉི་ཤུས་བལ་པོར་བྱོན་ནས། མུ་སྟེགས་བཅིངས་པའི་མཆོད་རྟེན་ནག་པོ་བཞི་མཛད། ཨུ་པཱ་སི་ཀས། བཀྲ་ཤིས་པའི་མཆོད་རྟེན་དཀར་ཆེན་ཞེས་པ་ཆེ་བ་གཅིག་བཞེངས། གུང་ཐང་པས། ཇོ་བོ་ཡབ་སྲས་ཞལ་སྤྲོད་ཀྱི་རས་བྲིས་ཆེ་བ་གཅིག ཨུ་པཱ་སི་ཀས། ཇོ་བོའི་སྐུ་ལ་ལྷ་བཙུན་པ་དང་། གུང་ཐང་པ་ལྡེམ་དུ་བྱས་པ་གྱང་རིས་ལ་བཀོད་དེ་རབ་གནས་ལ་སོགས་པ་ཞག་ཉི་ཤུ་རྩ་གཉིས་ལ་ཚར་བར་མཛད་དོ། །དེ་ནས་ཇོ་བོ་རྒྱ་གར་དུ་འབྱོན་པར་བཞེད་ཀྱང་། ཨུ་པཱ་ས་ཀ་དང་། བོད་ཀྱི་བསོད་ནམས་ཀྱི་མཐུས། སླར་ཡང་མང་ཡུལ་དུ་བྱོན་ནས། ལྷ་ཁང་ཀེང་རུ་བྱ་བ་བཞེངས། དེ་ནས་ལྷ་བཙུན་པས་དབུས་སུ་སྤྱན་དྲངས་ཏེ་ལས་སྟོད་དུ་ཕེབས། བོད་སྟོན་རྣམས་ཀྱང་དེར་བྱོན། གཙང་གི་ས་ཆ་རྣམས་སུ་བོད་ཀྱི་རྡོ་རྗེ་གདན་དཔལ་ས་སྐྱ་དང་། སྣར་ཐང་ལ་སོགས་པ་ལུང་བསྟན་མང་དུ་མཛད་དེ། ལོ་ཕྱེད་བཞུགས། དེ་ནས་བསམ་ཡས། ཐང་པོ་ཆེ། ལྷ་ས་རྣམས་སུ་ལྷ་བཙུན་བོ་དྷི་རཱ་ཛ། ཁུ་སྟོན་རྔོག་ལེགས་ཤེས་རྣམས་ཀྱིས་རིམ་གྱིས་སྤྱན་དྲངས་ནས་ཆོས་མང་དུ་གསུངས། གསང་ཕུ་ལ་སོགས་པ་ལུང་བསྟན། ཁྱད་པར་ལྷ་སར་ཀ་བ་བུམ་པ་ཅན་གྱི་ཉེ་འཁོར་ནས་རྒྱལ་རབས་ཀ་བཀོལ་མ་མཁའ་འགྲོས་ལུང་བསྟན་ནས་བཏོན། དེ་ནས་རྔོག་བྱང་ཆུབ་འབྱུང་གནས་གྱིས་ཡེར་པར་སྤྱན་དྲངས། དུས་དེར་བཀའ་གདམས་གླེགས་བམ་གྱི་ཞུ་ལན་ཕལ་ཆེ་བ་རྔོག་གིས་ཞུས་ནས་གནས་དེར་མཛད། དེ་ནས་དཔང་སྟོན་གྱིས་སྙེ་ཐང་དུ་སྤྱན་དྲངས། ལོ་ངོ་དགུ་བཞུགས་པའི་ལོ་དྲུག་གི་བར་ལ་འགྱུར་མང་པོ་དང་། རྒྱུད་སྒྲུབ་ཐབས། མན་ངག་སོགས་གང་ལ་གང་འདུལ་གྱི་ཆོས་གསུངས། རིན་པོ་ཆེ་སྣ་ལྔའི་མེ་ཏོག་གི་ཆར་བབས། ལོ་གསུམ་མམ། ངོ་བཞིར་མཁའ་འགྲོའི་དབུས་སུ་རྡོ་རྗེའི་གླུ་རྣམས་གསུངས། དེ་རྣམས་སུ་ཡང་ཡི་དམ་དཔག་ཏུ་མེད་པའི་ཞལ་གཟིགས་པ་སོགས་རྒྱས་པར་ལམ་ཡིག་ཏུ་གསལ་ལོ། །མདོར་ན་གངས་རིའི་ཁྲོད་དུ་བསྟན་པ་སྔ་དར་ལ་མཁན་ཆེན་ཞི་བ་འཚོ། སློབ་དཔོན་པདྨ་སམྦྷ་བ། སློབ་དཔོན་ཀ་མ་ཤི་ལ་རྣམས་བཀའ་དྲིན་ཆེས་ཤིན་ཏུ་ཆེ་ལ། བསྟན་པ་ཕྱི་དར་ལ། ལྟ་སྤྱོད་ལོག་པར་སྨྲ་བ་འགའ་ཞིག་ཤིང་རྟ་ཆེན་པོའི་གཞུང་རྣམས་ལ་ཉམས་ལེན་གྱི་གནད་མེད་པའི་བཤད་ཆོས་སུ་བསམ་ཞིང་། ཉམས་ལེན་སྙིང་པོའི་དོན་སྟོན་པའི་མན་ངག་ཟུར་དུ་ཡོད་པར་འདོད་པས། བཤད་པ་དང་སྒྲུབ་པའི་ཆོས་དོན་ཐ་དད་དུ་འཛིན་པ་དང་། སྡོམ་པ་གསུམ་འགལ་བར་བསམས་ནས་ཚུལ་ཁྲིམས་ཀྱི་བསླབ་པ་ཁྱད་དུ་གསོད་པ་དང་། ལམ་ཕྱོགས་རེ་བས་ཐར་པ་ཐོབ་པར་འདོད་པ་རྣམས་འགོག་པ་ལ། དཔལ་ལྡན་ཨ་ཏི་ཤ་ཉིད་ཁ་བ་ཅན་པ་ཐམས་ཅད་ལ་བཀའ་དྲིན་ཆེ་བ་ཡིན་ཏེ། རྒྱལ་བའི་གསུང་རབ་ཐམས་ཅད་ཀྱི་གནད་བསྡུས་པ། ཤིང་རྟ་ཆེན་པོ་ཀླུ་སྒྲུབ་དང་། ཐོགས་མེད་གཉིས་ཀྱི་ལམ་སྲོལ། རྣམ་པ་ཐམས་ཅད་མཁྱེན་པའི་སར་འགྲོ་བའི་སྐྱེ་བོ་མཆོག་གི་ཆོས་ལུགས། སྐྱེས་བུ་གསུམ་གྱི་ཉམས་སུ་བླང་བའི་རིམ་པ་མ་ཚང་བ་མེད་པར་བསྡུས་པ་བྱང་ཆུབ་ལམ་གྱི་སྒྲོན་མེའི་སྒོ་ནས་སྐལ་བ་དང་ལྡན་པ་རྣམས་རིམ་གྱིས་སངས་རྒྱས་ཀྱི་སར་ཁྲིད་པའི་ལམ་མ་ནོར་བ་གསལ་བར་མཛད་པས་བཀའ་དྲིན་ཆེ་བ་ཡིན་ནོ། །དེ་ཡང་སྤྱིར་རྒྱལ་བའི་ལུང་གི་བསྟན་པ་ཐམས་ཅད་སྡེ་སྣོད་གསུམ་དུ་འདུ་བས། རྟོགས་པའི་བསྟན་པ་ཡང་བསླབ་པ་གསུམ་དུ་འདུ་ལ། ཚུལ་ཁྲིམས་ཀྱི་བསླབ་པ་ནི། ཏིང་ངེ་འཛིན་གྱི་བསླབ་པ་སོགས་ཡོན་ཏན་ཐམས་ཅད་ཀྱི་རྟེན་དུ་གསུངས་ཤིང་། ཏིང་ངེ་འཛིན་དང་ཤེས་རབ་ཀྱི་བསླབ་པ་ནི། བྱང་ཆུབ་མཆོག་ཏུ་སེམས་བསྐྱེད་ནས། ཕ་རོལ་ཏུ་ཕྱིན་པ་དྲུག་སོགས་ལ་གཙོ་བོར་སློབ་པ་བྱང་ཆུབ་སེམས་དཔའི་ལམ་དངོས་ཡིན་ཞིང་། རྡོ་རྗེ་ཐེག་པ་ཉམས་སུ་ལེན་པ་རྣམས་ཀྱིས་ཀྱང་དབང་བསྐུར་རྣམ་དག་ཐོབ་ནས་དམ་ཚིག་དང་སྡོམ་པ་བསྲུང་བ། བསྐྱེད་རྫོགས་ཉམས་སུ་ལེན་པ་རྣམས་ཐབས་ཀྱི་ཆ་ནས་ཁྱད་ཆེ་ཡང་། འདུལ་ལུགས་ཀྱི་དབང་དུ་བྱས་ན་བསླབ་པ་གསུམ་དུ་མ་འདུས་པ་མེད་པས། དེས་ན་ཇོ་བོ་ཆེན་པོ་འདིས་བསྟན་པ་ཐམས་ཅད་འགལ་མེད་དུ་གསལ་བར་མཛད་དོ། །དེ་ལྟ་བུའི་བླ་མ་ཡོན་ཏན་རྒྱ་མཚོ་ལྟ་བུ་མངའ་བ་དེའི་རྣམ་ཐར། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡུལ་དུ་གྱུར་པ། སོ་སོ་སྐྱེ་བོ་བློ་དམན་པ་དག་གི་ཡུལ་མ་ཡིན་ཞིང་། ཡི་གེ་ཉུང་ངུ་དག་གིས་ཀྱང་རྟོགས་པར་དཀའ་ལ། མཐོང་ཚོད་ཙམ་ཞིག་བྲིས་ནའང་མང་པས། འདིར་ནི་ཟུར་ཙམ་ཞིག་བརྗོད་པ་སྟེ། རྣམ་ཐར་རྒྱས་པ་དོན་དུ་གཉེར་ན་བླ་མ་དང་ཡི་དམ་གྱི་ལྷས་ལུང་བསྟན་པ་དངོས་གྲུབ་ཀྱི་འོད་ཟེར་དང་། ལམ་ཡིག་དམ་པ་ཆོས་ཀྱི་འབྱུང་གནས་ཆུང་བ་དང་། ཆོས་ཀྱི་འབྱུང་གནས་ཆེ་བ་ལ་གསང་སྐོར་དུ་གྲགས་པ་རྣམས་སྟོན་པས་མཛད་པ་དང་། དེ་རྣམས་དང་ཕྱོགས་མཐུན་པ་ལོ་ཙཱ་བས་བསྟོད་པ་བརྒྱད་ཅུ་པ་དང་། ཐུན་མོང་མ་ཡིན་པ་རྣམས་བཀའ་གདམས་གླེགས་བམ་དུ་སྐྱེས་རབས་ཉི་ཤུ་རྩ་གཉིས་གསུངས་པ། ཇོ་བོ་ཡབ་སྲས་གཉིས་ཀའི་རྣམ་ཐར་ཤུགས་ལ་རྒྱས་པར་འབྱུང་བ་རྣམས་སུ་ཤེས་པར་བྱའོ། །དེ་ལྟར་སྐལ་བ་དང་ལྡན་པ་རྣམས་ལ་མདོ་སྔགས་ཀྱི་གཞུང་གདམས་ངག་མ་ལུས་པ་བསྟན་ནས། བསྟན་པའི་སྲོལ་ནུབ་པ་རྣམས་གསར་དུ་བཙུགས། སྲོལ་ཅུང་ཟད་ཡོད་པ་རྣམས་འཕེལ་བར་མཛད། ལོག་པར་རྟོག་པའི་དྲི་མས་སྦགས་པ་རྣམས་ལེགས་པར་བསལ་ཏེ། བསྟན་པ་རིན་པོ་ཆེ་དར་ཞིང་རྒྱས་པར་མཛད་ནས་དགུང་ལོ་དོན་གསུམ་ཤིང་ཕོ་རྟའི་དབྱུག་གུ་ཟླ་བའི་ཚེས་ཉི་ཤུ་ལ་དགའ་ལྡན་དུ་གཤེགས་པ་ལམ་ཡིག་ཏུ་གསུངས་ཀྱང་། སྟོན་པའི་གསུང་གི་གྲལ་ཚེས་བཅོ་བརྒྱད་ལ་བྱོན་པར་བཞེད་དེ། དགའ་ལྡན་དུ་རྗེ་བཙུན་བྱམས་པའི་དྲུང་དུ་ལྷའི་བུ་ནམ་མཁའ་དྲི་མ་མེད་པ་ཞེས་བྱ་བར་གྱུར་ཏེ། བཀའ་གདམས་པའི་བླ་མ་དམ་པ་རྣམས་ཀྱི་གསུང་ལས། བསྐལ་བཟང་འདི་ལ་རྗེ་བཙུན་བྱམས་པའི་རྗེས་སུ། རྒྱལ་བ་སེང་གེ་འབྱོན་པར་གསུངས་པ་དེ་ཇོ་བོ་རྗེ་ཡིན་པར་བཞེད་དོ། །

སློབ་པའི་བཤེས་གཉེན་བྱོན་ཚུལ།

ལྔ་པ་དེའི་རྗེས་སུ་སློབ་པའི་བཤེས་གཉེན་བྱོན་ཚུལ་ལ་གཉིས། རྒྱ་གར་དུ་བྱོན་ཚུལ་དང་། བོད་དུ་བྱོན་ཚུལ་ལོ། །དང་པོ་ནི། རྒྱ་གར། ཁ་ཆེ། ཨུ་རྒྱན། གསེར་གླིང་། ལི་ཡུལ། བལ་པོ་རྣམས་སུ་དངོས་སློབ་པཎྜི་ཏ་དང་། གྲུབ་ཐོབ་དུ་མ་དང་། དེ་དག་གི་ཡང་ཉིང་སློབ་བསམ་གྱིས་མི་ཁྱབ་པ་ཞིག་བྱོན་ལ། བི་ཀྲ་མ་ཤི་ལར་ཡང་སློབ་མ་པཎྜི་ཏ་རཏྣ་ཀིརྟི། ཏ་ཐཱ་ག་ཏ་རཀྵི་ཏ། སུ་མ་ཏི་ཀིརྟི། བཻ་རོ་ཙ་ན་རཀྵི། བཱ་ལོ་ཀ་ན་ཀཱ་ཤཱི་ལ་སོགས་པ་སུམ་ཅུ་ཙམ་ཡོད་ཀྱང་། ཐུན་མོང་མ་ཡིན་པའི་སློབ་མ་ལྔ་ནི། པཎྜི་ཏ་ཆེན་པོ་བི་ཏོ་པ། དྷརྨཱ་ཨ་ཀ་ར་མ་ཏི། དབུ་མ་སེང་། བཤེས་གཉེན་གསང་བ། སའི་སྙིང་པོ་རྣམས་ནི་ཇོ་བོ་དང་རྟོགས་པ་བྱིན་རླབས་མི་མཉམ་ཡང་། མཁྱེན་པ་མཉམ་པ་ཙམ་དུ་གྲགས་སོ། །གཉིས་པ་བོད་དུ་བྱོན་ཚུལ་ནི། གངས་རིའི་ཁྲོད་འདིར་རབ་ཏུ་བྱུང་བ་དང་སྐྱེ་བོ་ཕལ་ཆེ་བས་ཆོས་ཐོབ་ཅིང་བཀའ་དྲིན་གྱིས་ཁྱབ་པ་ལས། དེ་རྣམས་ཀྱི་ནང་ནས་ཆོས་བརྒྱུད་འཛིན་པ་ལ་སློབ་མ་གྲགས་ཆེ་བ་བྱོན་ཚུལ་དང་། སློབ་མ་མཆོག་བྱོན་ཚུལ་ལོ། །དང་པོ་ནི། མངའ་རིས་སྐོར་གསུམ་ནས་ལྷ་བྱང་ཆུབ་འོད་དང་། ཕོ་བྲང་ཞི་བ་འོད། ལོ་ཆེན་རིན་བཟང་། རྒྱ་བརྩོན་སེང་། ནག་ཚོ་ལོ་ཙཱ་བ། ལོ་ཆུང་ལེགས་ཤེས། མང་ཡུལ་ལོ་ཙཱ་བ་གྲགས་འབྱོར་ཤེས་རབ། འབྲོ་ལོ་ཙཱ་བ་ཤེས་རབ་འོད། ལོ་ཙཱ་བ་དགེ་བློ། ལོ་ཙཱ་བ་ཤཱཀྱ་བློ་གྲོས། གོ་མི་བསྒོམ་ཆེན། འདུལ་འཛིན་གཟུས་རྡོ་རྗེ་རྒྱལ་མཚན། གནས་བརྟན་གསེར་བཟོ་རྣམས་བྱོན་པ་ལས། ལྷ་བཙུན་པས་ཇོ་བོ་ཆེན་པོའི་ཆོས་མང་དུ་མཁྱེན། འཇིག་རྟེན་དབང་ཕྱུག་གི་ཞལ་གཟིགས། མངོན་ཤེས་ལྔ་ཐོབ་བོ། །ལོ་ཆེན་རིན་ཆེན་བཟང་པོ་ནི། རིགས་ཁ་ཆེའི་གཡུ་རི་གཡུ་སྒྲ་བྱ་བ། ཡབ་གཞོན་ནུ་དབང་ཕྱུག ཡུམ་ཅོག་རོ་ཀུན་བཟང་ཤེས་རབ་བརྟན་མ། ལྕམ་སྲིང་བཞི་ཡོད་པའི་གཅེན་ཤེས་རབ་དབང་ཕྱུག་གི་གཅུང་རིན་ཆེན་དབང་ཕྱུག་ཏུ་སྐུ་སྐྱེ་བ་བཞེས། དགུང་ལོ་བཅུ་གསུམ་ལ་མཁན་པོ་ལེགས་པ་བཟང་པོ་ལས་རབ་ཏུ་བྱུང་སྟེ། མཚན་རིན་ཆེན་བཟང་པོར་གསོལ། དེའི་མོད་ལ་འདུལ་བ་རྒྱ་ཆེར་འགྲེལ་ཐུགས་སུ་ཆུད། དེ་ནས་རྒྱལ་པོའི་བཀས་ཁ་ཆེར་བྱོན། ལོ་ཙཱ་མཁས་པར་བསླབས། པཎྜི་ཏ་ཀ་ར་རྣམ་གསུམ་སོགས་རྒྱ་གར་གྱི་པཎ་གྲུབ་དུ་མ་ལ་གཏུགས། ཐེག་པ་མཐའ་དག་གི་ཆོས་ལ་སྦྱངས། བསྟན་པ་ལ་བྱ་བ་ཆེར་མཛད། ཨ་ཏི་ཤ་དང་པུ་རངས་སུ་མཇལ་ཏེ། གུ་གེ་ཁྲི་ཐང་པས་མཛད་པའི་ལོ་ཆེན་གྱི་རྣམ་ཐར་ལས། དགུང་ལོ་བརྒྱད་ཅུ་རྩ་བདུན་ལ་མཇལ་བར་གསུངས། ཇི་ལྟར་མཇལ་བའི་ཚུལ་སོགས་ནི་གོང་དུ་བཤད་པ་ལྟར་ཡིན་ལ། གཞན་ཡང་ཡོ་ག གསང་འདུས། བདེ་མཆོག་སོགས་ཀྱི་དབང་དང་རྒྱུད་ཀྱི་བཤད་པ། མན་ངག་སོགས་ཐེག་པ་གོང་འོག་གི་ཆོས་མཐའ་དག་གིས་ཐུགས་ཚིམ་པར་མཛད། རྡོ་རྗེ་རྣལ་འབྱོར་མའི་བྱིན་རླབས་གནང་བས་རྟོགས་པ་ཁྱད་པར་ཅན་འཁྲུངས་པས་ལྷག་པར་དད་དེ། ལྷ་རྟེན་དང་དཔེ་མ་གཏོགས་པ་གང་ཡོད་ཕུལ། ཇོ་བོས་དབུས་སུ་ལོ་ཙཱ་ལ་འགྲོ་དགོས་གསུངས་པས། ང་རྒས་པས་མི་ནུས་ཞུས། འོ་ན་སྒྲུབ་པ་བགྱིས་གསུངས་པས་མཉེས་ཏེ། ལོ་ཙཱ་བ་ཆེན་པོ་ལ་པཎྜི་ཏའི་བླ་མ་དྲུག་ཅུ་ཡོད་ཀྱང་། ཇོ་བོ་ཉིད་མ་གཏོགས་པ་གཞན་རྣམས་ཀྱིས་སྒྲུབ་པ་ལ་མ་ཆུད། དེ་ནས་ལོ་ཙཱ་བས་སྒོ་གསུམ་རིམ་དུ་བྱས་པ་ལ། དམ་བཅའ་བའི་ཡི་གེ་གསུམ་བྲིས་ཏེ་སྒྲུབ་པ་མཛད་པས། གསང་འདུས་དང་བདེ་མཆོག་གི་ཞལ་གཟིགས། དགུང་ལོ་དགུ་བཅུ་རྩ་བརྒྱད་ལ་དགུན་ཟླ་ཐ་ཆུང་གི་ཚེས་བཅུ་བདུན་སྐར་མ་རྟ་པ་ཡོད་པའི་ཉིན་མཁའ་སྤྱོད་དུ་གཤེགས་པར་གུ་གེ་ཁྲི་ཐང་པས་གསུངས་སོ། །

རྒྱ་བརྩོན་སེང་གཙང་སྟག་ཚལ་དུ་འཁྲུངས། རྟེན་དགེ་བསྙེན་ཟེར་ཏེ་ཕྱིས་རབ་ཏུ་བྱུང་བ་མཛད། རྒྱ་གར་དུ་ཇོ་བོ་ལ་ཆོས་མང་དུ་གསན། འཇམ་དབྱངས་ཀྱི་སྤྲུལ་པར་ཆོས་ཀྱི་འབྱུང་གནས་སུ་བཤད་ཅིང་བལ་པོར་སྐུ་གཤེགས། ལོ་ཙཱ་བ་ནག་ཚོ་ནི། ཡུལ་གུང་ཐང་། གདུང་ནག་ཚོ། མཚན་ཚུལ་ཁྲིམས་རྒྱལ་བ། འདུལ་བ་འཛིན་པར་གྲགས། རྒྱ་བརྩོན་སེང་ལ་མངོན་པ་མཁས་པར་བསླབས། དགུང་ལོ་ཉེར་བདུན་ལ་རྒྱ་གར་དུ་ཇོ་བོ་ཆེན་པོ་སྤྱན་འདྲེན་དུ་བྱོན། ལོ་བཅུ་དགུའི་བར་ཚུལ་བཞིན་དུ་བསྟེན། ཐུན་མོང་གི་ཡོན་ཏན་རྣམས་རྫོགས་པར་མཛད། ནག་ཚོ་སྙེ་ཐང་ནས་མངའ་རིས་སུ་འབྱོན་ཁར། ཇོ་བོས་བསླབ་བྱ་མང་དུ་མཛད་དེ། དམ་ཚིག་གསུམ་བཀོད་ཀྱི་སྐུ་ཕྱག་ཏུ་བཟུང་ནས་བྱིན་རླབས་མཛད། འདུལ་བ་མདོ་རྩ་དང་། གསང་བ་འདུས་པའི་རྒྱ་དཔེ་དང་། འགྲོ་ཆོས་སུ་ཐུན་མོང་མ་ཡིན་པའི་སྤྱན་རས་གཟིགས་ཀྱི་སྒྲུབ་སྐོར་སོགས་སྦས་ཆོས་ཉི་ཤུ་གནང་སྟེ་ལུང་བསྟན་མང་དུ་མཛད། ཇོ་བོ་རང་གི་སྐུ་མཐེ་བོང་ཙམ་སེང་ལྡེང་ལ་བྲིས་ཏེ་གའུར་བཅུག་ནས་གུང་ཐང་པའི་དཔུང་པ་ལ་བཏགས། མཉེས་མཉེས་རྒྱ་ཆེར་མཛད། ཇོ་བོ་ལ་གུང་ཐང་པས་ཀྱང་ལན་གསོལ་ཏེ་ཕྱི་བཞག་རྣམས་འབྲོམ་ལ་བཞག རྣལ་འབྱོར་པས་ཀྱང་ནག་ཚོ་ལ་བསླབ་བྱ་ཇི་ལྟར་མཛད་པའི་ཚུལ་རྣམས། སྙེ་ཐང་དུ་མཛད་པའི་ཞུ་ལན་དང་། རྣལ་འབྱོར་པའི་བསྟོད་ཡིག་ཏུ་གྲགས་པར་གསལ་ལོ། །དེ་ནས་མངའ་རིས་སུ་བྱོན་ནས་ལུང་བསྟན་པ་བཞིན་སྒྲུབ་པ་མཛད་པས། འཇམ་དཔལ་རྡོ་རྗེ། སྒྲོལ་མ། ཡི་གེ་དྲུག་པ་རྣམས་ཞལ་གཟིགས། མངོན་ཤེས་ཀྱང་མངའ་ལ། དེ་ལས་སློབ་བརྒྱུད་ཕྱག་སོར་བ་སོགས་བྱོན་ཚུལ་འོག་ཏུ་འཆད་དོ། །ལོ་ཆུང་ལེགས་ཤེས་ནི་འཁྲུངས་ཡུལ་མངའ་རི་པུ་ཧྲང་པ། བལ་པོར་ཐང་བི་ཧ་ར་བྱ་བ་རྒྱལ་པོས་བཞེངས་པའི་གཙུག་ལག་ཁང་དུ་རྔོག་རིན་ཆེན་རྒྱལ་མཚན་གྱིས་ཞུས་སྣ་བྱས་ཏེ་མཇལ། རྡོ་རྗེ་འབྱུང་བ། གཙུག་དགུ། ཁམས་གསུམ་རྣམ་རྒྱལ་གྱི་དཀྱིལ་ཆོག་བསྟོད་འགྲེལ་དང་བཞིའི་རྒྱ་དཔེ། གསང་འདུས་ཀྱི་ཆོས་སྐོར་ཞུ་བའི་རྟེན་དུ་ཕུལ་ནས། ཇོ་བོ་དང་། ལོ་ཙཱ་བས་བསྒྱུར། དེ་ནས་ཡོ་ག་རྣམས་གསུངས་ཏེ་བོད་དུ་ཇོ་བོའི་ཡོ་གའི་འཁོར་འདུས་པ་དང་པོ་ལོ་ཆུང་ལེགས་ཤེས་ཡིན་གསུངས། ལོ་ཙཱ་བ་དགེ་བློ་ནི། ལོ་ཆེན་གྱི་སློབ་མ་རིག་པ་ཅན་གྱི་ཁྱེའུ་ལྔའི་ནང་ནས། གཉིས་ཁ་ཆེར་ཚད་པས་གྲོངས། གསུམ་ནི་སྨྲ་ལོ་ཙཱ་བ་དགེ་བའི་བློ་གྲོས། མང་ཝེར་གྱི་ལོ་ཙཱ་བ་བྱང་ཆུབ་རྩེ་མོ། ལྗང་ལོ་ཙཱ་བ་རིན་ཆེན་གཞོན་ནུ་དང་གསུམ་ལས། འདི་ཉིད་དང་པོ་སྟེ། ལོ་ཆེན་ལ་མཁས་པར་སྦྱངས། ཇོ་བོ་ཆེན་པོའི་དྲུང་དུ་ཆོས་མང་དུ་ཞུས་ཡུན་རིང་དུ་བསྟེན། ལམ་སྒྲོན་སོགས་འགྱུར་མང་དུ་མཛད་དོ། །གོ་མི་སྒོམ་ཆེན་ནི། ཇོ་བོ་ལ་ལོ་ཆེན་གྱི་རྣལ་འབྱོར་རྒྱུད་ཀྱི་སྐོར་གསན་པའི་དུས་སུ་སྦྱོང་རྒྱུད་དང་། གཙུག་དགུའི་དབང་དང་། རྒྱུད་ཀྱི་བཤད་པ་སོགས་གསན་ཏེ་ད་ལྟ་ཡང་གོ་མི་ནས་བརྒྱུད་པ་ཀུན་རིག་སོགས་བསྣུར་ལུགས་སུ་གྲགས་པ་རྣམས་སོ། གཟུས་རྡོ་རྗེ་རྒྱལ་གྱིས་དང་པོར་ཀླུ་མེས་ཅན་དུ་བྱོན་ཏེ་མདོ་རྩ་འགྲེལ་པ་དང་བཅས་པ་སོགས་འདུལ་བའི་གཞུང་རྣམས་ལ་མཁས་པར་སྦྱངས། དེ་ནས་ཇོ་བོའི་དྲུང་དུ་ཐེག་པ་ཆེ་ཆུང་གི་ཆོས་མང་དུ་གསན་ཏེ། ངས་བསླབས་པའི་ཆོས་ཐམས་ཅད་ཀྱང་ལམ་དུ་སོང་གསུངས། འདི་ལ་བུ་ཆེན་བཞི་སྟེ། སྟོད་དུ་ཞང་ཞུང་པ་རྒྱལ་བའི་ཤེས་རབ། འཛིམ་པུ་གཞོན་ཚུལ། དབུས་སུ་འབྲོམ་སེང་དཀར། བསྟོད་པ་ཡེ་ཤེས་བླ་མ། དེ་རྣམས་ཀྱི་སློབ་མ་རྒྱ་འདུལ་འཛིན་ཡིན་ལ། འདིས་དགུང་ལོ་བརྒྱད་ཅུ་རྩ་ལྔ་བཞུགས། གྲྭ་བ་འདུལ་བའི་བཤད་ཉན་ཕེར་བ་སྟོང་ཕྲག་ལྷག་པ་སོགས་བྱུང་སྟེ། བོད་དུ་འདུལ་བའི་བཤད་གྲྭ་རྣམས་དང་། འདུལ་འཛིན་གསེར་རིའི་ཕྲེང་བ་ལྟ་བུ་བྱོན་པ་རྣམས་ཕལ་ཆེར་འདི་ལས་མཆེད་ཅིང་། ཨ་ཏི་ཤ་ནས་བརྒྱུད་པའི་ཆོས་སྐོར་ལ་ཉམས་ལེན་མཛད་པས་སློབ་བརྒྱུད་དུ་གྱུར་པ་ཡིན་ནོ། །

གཞན་ཡང་གློ་བོའི་ཡུལ་ནས་སྟོན་པ་ཡང་རབ་སོགས་དང་། གཙང་སྟོད་ནས་གྲགས་སྟོན་ཆེ་ཆུང་གཉིས། ལེགས་འབྲེལ་ཆེ་ཆུང་གཉིས་བྱོན། གཙང་སྨད་ནས་འགར་མགོས་ཡོལ་གསུམ་ཞེས་གྲགས་ཆེ་བས། དེ་དག་གི་ལོ་རྒྱུས་ཅུང་ཟད་བཤད་ན། རོང་པ་འགར་དགེ་བ་གསལ་གྱིས་ཇོ་བོ་ལ་མདོ་སྔགས་ཀྱི་ཆོས་མང་དུ་ཞུས། ཁྱད་པར་ལཱུ་ཧི་པའི་དབང་བཀའ། ལྷ་སྦས་ཀྱི་འགྲེལ་པ་ལ་བརྟེན་པའི་བཤད་བཀའ། ཆོས་ཚན་དགུ་ལ་སོགས་པའི་རྫོགས་རིམ་ཡོངས་སུ་རྫོགས་པར་གསན་ནས། དེས་ལྷ་རྗེ་བསྟོད་པ། སྟེང་པ་ཟླ་གསལ་སོགས་ལ་བརྒྱུད་དོ། །རྗེ་འགོས་ནི། རུས་འགོས། ཡབ་ཡུམ་རུས་གཅིག་པས་ཁུག་པ། ལྷས་ཕུག་ཏུ་འཁྲུངས་པས་ལྷས་བཙས་ཏེ། གྱི་ཇོ་ཟླ་བའི་འོད་ཟེར་དང་འགྲོགས་ཏེ་རྒྱ་གར་དུ་བྱོན། སྤྱིར་པཎྜི་ཏ་བདུན་ཅུ། མཁའ་འགྲོའི་བླ་མ་གཉིས་ལ་ཆོས་གསན། དེའི་ཚེ་པཎྜི་ཏ་མཉམ་པོ་ལའང་། འདུས་པ་ལ་ཁ་ཟིན་ཆེ་བར་སྣང་བས། ཐོག་མར་གསང་འདུས་ལ་སློབ་གཉེར་མཛད་དེ། འདུས་པ་ལ་མཁས་པའི་པཎྜི་ཏ་བཅུ་ཙམ་བསྟེན་པའི་ནང་ནས། ཡུལ་བྷཾ་ག་ལའི་མཁས་པ་ཆེན་པོ་དཱི་པཾ་ཀ་ར་ཞེས་རྒྱ་གར་དུ་འདུས་པ་གསན་པའི་དཔོན་སློབ་ཡིན་ལ། ཇོ་བོའི་གསང་འདུས་འཕགས་སྐོར་ཐམས་ཅད་མངའ་ཞིང་། བོད་དུ་ཡང་ཆོས་མང་དུ་གསན་ཏེ་རྩ་བའི་སློབ་མ་ཡིན། སྤྱིར་སྔགས་ཐམས་ཅད། ཁྱད་པར་དུ་གསང་བ་འདུས་པ་ལ་མཁས་པར་གྲགས། འདི་ལ་སློབ་མ་རྒྱུད་ཀྱི་ཀ་བ་ཚུགས་པ་བཞི། མན་ངག་གི་གདུང་ཐེག་པ་བརྒྱད། ལས་ཚོགས་དང་འཕྲིན་ལས་ལ་མཁས་པ་ལྕམ་དང་གྲལ་མ་ལྟར་དཔག་ཏུ་མེད་པ་བྱོན་ནོ། །ཡོལ་ཆོས་དབང་ནི། སྐུ་མཆེད་གསུམ་སྟེ། ཡོལ་དྲང་སྲོང་། ཡོལ་ཐོག་འབེབས་དང་གསུམ་ཀ་ཇོ་བོའི་དངོས་སློབ་ཏུ་གཏོགས་པ་ཡིན་ཡང་། འདིར་དང་པོ་སྟེ། ཇོ་བོ་གཙང་ཉང་ཚོ་གནས་སུ་ཕེབས་དུས། ཇོ་བོའི་ཞལ་ནས། ད་ནངས་ཐོ་རངས་ནམ་མཁའ་ལ་ཧྲིཿདཀར་པོ་སྒྲ་དང་བཅས་པ་ཅིག་བྱུང་། བཅུ་གཅིག་ཞལ་གྱི་སྐུ་ལི་མ་འདི་ལ་ཕོག དེ་ལས་འོད་འཕྲོས་བོད་ཐམས་ཅད་འོད་ཀྱིས་ཁྱབ་ནས་འོད་དེ་བན་ཆུང་གཞོན་ནུ་ཞིག་ལ་ཕོག་པས། དེའི་སྒྱུ་ལུས་འོད་གསལ་དུ་ཤར་བ་རྨིས་གསུངས། ཉི་མ་རྩེ་ཤར་ལ་ཡོལ་ཆོས་དབང་བཙུན་ཆུང་ལོ་བཅུ་དྲུག་ལོན་པ་གཅིག་གིས་དར་དང་གསེར་ཕུལ། བདག་ལ་ཐུགས་རྗེ་ཆེན་པོའི་གདམ་ངག་ཞིག་ཞུ་ཟེར་བས། ཇོ་བོ་དགྱེས་ནས་བཅུ་གཅིག་ཞལ་གྱི་སྐུ་དེ་ཡང་གནང་། སྤྱན་རས་གཟིགས་དང་། རྟ་མགྲིན་སོགས་ཀྱི་ཆོས་སྐོར་རྣམས་སྔ་ཕྱིར་རྫོགས་པར་གནང་། ཐུགས་རྗེ་ཆེན་པོ་ཞི་ཁྲོ་མང་དུ་ཞལ་གཟིགས་ཏེ་དངོས་གྲུབ་བརྙེས་སོ། །གཞན་ཡང་སྟོད་ལུང་གནམ་གྱི་རྫིང་ཁ་བ། མལ་ཤེས་རབ་སེམས་པས་ཇོ་བོ་ལ་ཡུན་རིང་དུ་བསྟེན་ཏེ། བསྒོམས་པས་སྨིན་མཚམས་ནས་འོད་ཟེར་བྱུང་། དེའི་རྗེས་སེམས་བཅུག་ནས་བསྒོམས་པས་ཞིང་ཁམས་མང་པོ་མཐོང་བ་བྱུང་སྟེ། ཇོ་བོ་ལ་ལམ་དུ་འགྱུར་རམ་ཞུས་པས། ཞི་གནས་ཀྱི་ཆ་མཐུན་ཡིན། བླ་མ་མཚན་ཉིད་དང་ལྡན་པས་ཟིན་ན་ལམ་དུ་འགྱུར་གསུངས། ཡང་ལན་ཅིག་སྙེ་ཐང་ན། ཇོ་བོའི་གཟིམ་ཆུང་དུ་ཁོང་རྟོགས་པ་འབུལ་བ་ལ། ཁུ་སྟོན་གྱིས་ལྐོག་ཉན་བྱས་པས། ས་ཐོབ་པ་ཙམ་དུ་མངོན་ཏེ། ཁོང་ཕྱིར་བྱུང་བའི་རྗེས། ཁུ་སྟོན་གྱིས་ཇོ་བོ་ལ། དེ་སུ་ལགས། རྟོགས་པ་ཇི་ཙམ་དུ་འདུག་ཞུས་པས། མལ་ཤེས་རབ་སེམས་དཔའ་བྱ་བ་ཐེག་པ་ཆེན་པོའི་སྦྱོར་ལམ་དྲོ་ལ་ཉེ་བར་འདུག་གསུངས། དེ་གར་སོང་ཞུས་པས། ཁོ་རྐང་མགྱོགས་ཀྱི་དངོས་གྲུབ་ཐོབ་པས་རླུང་ཤོད་ངར་གྱི་ལ་ལ་སླེབས་སོང་། རང་སྒྲེང་ལ་འགྲོ་བར་འདུག་གསུངས། འདིས་སྟོད་ལུང་ཚ་ཐོག་གི་དགོན་པ་བཏབ་སྟེ། སྤྱན་སྔའི་རབ་བྱུང་མཛད་པའི་མཁན་པོ་ཡིན་ནོ། །དབུས་ནས་ཁུ་རྔོག་འབྲོམ་གསུམ་གྲགས་ཆེ་བས་དེ་རྣམས་ཀྱི་ལོ་རྒྱུས་འོག་ཏུ་འཆད་ལ། གཞན་ཡང་རྔོག་བྱང་ཆུབ་འབྱུང་གནས། རླན་ཡེ་ཤེས་ཤེས་རབ། ཞང་སྣ་ནམ་རྡོ་རྗེ་དབང་ཕྱུག་གསུམ་ལ། ཐེག་ཆེན་གདུང་རྒྱུད་རྟེན་མཛད་གསུམ་དུ་གྲགས། ཀ་བ་སྟོན་པ་ཤཱཀྱ་དབང་ཕྱུག རག་ཤི་སྟོན་པ་ཚུལ་ཁྲིམས་གཞོན་ནུ། རྨ་སྟོན་པ་ཤཱཀྱ་བྱང་ཆུབ། དར་སྟོན་པ་བྱང་ཆུབ་དཔལ། སྦ་སྟོན་པ་གཡུ་རུང་རིན་ཆེན། གར་མི་སྟོན་པ་ཡོན་ཏན་གཡུ་རུང་། རྒྱུས་སྟོན་པ་ཆོས་ཀྱི་རྒྱལ་པོ། བང་སྟོན་ཆོས་ཀྱི་རྒྱལ་མཚན། འདང་འཇང་སྟོན་པ། ཞང་སྣ་ཆུང་སྟོན་པ། ལྷབ་མི་སྟོན་པ་ཤེས་རབ་འོད་ཟེར་ཏེ་དབུས་ཀྱི་སྟོན་ཆེན་བཅུ་གཅིག་གོ །ཞང་བཙུན་ཡེར་པ་བ་ཡེ་ཤེས་འབར། ས་ཕུག་པ་ཞུ་སྒོམ། མཁའ་རུ་བ་ཆེན་པོ་གྲགས་པ་སྔ་མ་སྟེ་སྒྲུབ་པ་རྩེ་གཅིག་ཏུ་མཛད་པ་གསུམ་མོ། །གཞན་ཡང་རྔོག་སྒོམ་ཡོན་ཏན་རྒྱལ་པོ། སྒོམ་པ་དད་པ་བླ་མ། རྣལ་འབྱོར་པ་གཡུང་དྲུང་རྒྱལ་མཚན། སུམ་པ་མཐུ་ཆེན། སྒྲོ་ཨརྻ་བྱང་ཆུབ། ཁུ་སེངྒེ་རྒྱལ་མཚན་རྣམས་བྱོན་ཅིང་། ཞང་བཙུན་ཡེར་བ་པ་ཡེ་ཤེས་འབར་ནི། རྗེ་བཙུན་བྱམས་པ་ལ་ཆོས་གསན་པར་གསུངས་ཤིང་། པོ་ཏོ་པའི་གནས་ཀྱི་སློབ་དཔོན་ཡིན་ལ། ཕྱིས་ཀྱི་ཞང་ཡེར་འབར་བ་རྟེན་སྐྱ་བོ་བླ་མ་ཞང་གི་བླ་མ་དང་མི་ཅིག་ལ། དེ་རྣམས་ཇོ་བོ་ཆེན་པོའི་ཐུན་མོང་མ་ཡིན་པའི་སློབ་མ་ཡིན་ནོ། །གཞན་ཡང་མར་པ་ལོ་ཙཱ་ལ་དབང་རིན་ཆེན་ཕྲེང་བ་གནང་། ཁྱུང་པོ་རྣལ་འབྱོར་ལ་སེམས་བསྐྱེད། བྱམས་ཆོས། བདེ་མཆོག གསང་འདུས། གཤེད་བསྐོར་དང་བཅས་པ་གནང་། མར་པ་དོ་བ་དང་། པུ་ཧྲང་ལོ་ཆུང་ལ་བདེ་མཆོག་གི་བསྐོར་རྣམས་གནང་། བ་རི་ལོ་ཙཱ་ལ་སྒྲའི་སྐོར་རྣམས་གནང་སྟེ། མདོར་ན་གངས་རིའི་ཁྲོད་འདིར་སྐྱེས་མཆོག་ཀུན་ལ་བཀའ་དྲིན་གྱིས་ཁྱབ་པར་མཛད་དོ། །ཁམས་ནས་རྣལ་འབྱོར་པ་ཆེན་པོ་དཔལ་ལྡན་དགོན་པ་བ། རྣལ་འབྱོར་པ་ཤེས་རབ་རྡོ་རྗེ། ཕྱ་དར་སྟོན་པ་དང་བཞི་ལ་ཁམས་པ་སྐུ་མཆེད་བཞི་ཞེས་གྲགས་པ་དེ་རྣམས་ཀྱི་ལོ་རྒྱུས་ཅུང་ཟད་བརྗོད་ན། རྣལ་འབྱོར་པ་ཆེན་པོ་འཁྲུངས་ཡུལ་མདོ་སྨད་ཙོང་ཁ་ཡོས་བུ་ལོ་བ། གདུང་རུས་ལུང་། མཚན་བྱང་ཆུབ་རན། ལོ་སུམ་ཅུ་རྩ་གཉིས་ལ་དབུས་སུ་བྱོན། ཇོ་བོ་དང་ཐོག་མར་མང་ཡུལ་བཟོར་གནས་སུ་མཇལ། ལོ་དགུ་བསྟེན། དཔལ་ལྡན་དགོན་པ་བ། མདོ་ཁམས་སྟོད་ཀྱི་ལྡན་མ་སྒ་པའི་སྒྲོལ་མ་ལྷ་ཁང་པ། གདུང་རུས་འཛེང་། འབྲུག་ལོ་པ། མཚན་དབང་ཕྱུག་རྒྱལ་མཚན། མདོ་ཁམས་ནས་དང་པོ་ཀཾ་པོ་རི་པ་བྱ་བའི་གྲུབ་ཐོབ་གཅིག་ལ་གཏད་ནས་བྱོན། མངའ་རིས་ན་པཎྜི་ཏ་བྱོན་འདུག་བྱ་བ་གསན་པས། ཇོ་བོ་དང་ཉ་མཚོ་གནས་རྙིང་དུ་མཇལ། རྣལ་འབྱོར་པ་དང་གཉིས་ལ་ཇོ་བོས་ཐུན་མོང་གི་ཆོས་བཞིས་རྒྱུད་སྣོད་རུང་དུ་མཛད་ནས། ལྷ་འདི་དང་ལས་འབྲེལ་འདུག་གསུངས་ཏེ། དམ་ཚིག་གསུམ་བཀོད་ཀྱི་སྒྲུབ་ཐབས་གནང་ནས་བསྒྲུབས་པས། བཟླས་པ་སྟོང་ཕྲག་བརྒྱད་བརྒྱད་སོང་ནས་ཞལ་གཟིགས། ཇོ་བོ་ལོ་དགུ་བསྟེན། རྣལ་འབྱོར་པ་ཤེས་རབ་རྡོ་རྗེས་ཇོ་བོ་ལོ་ལྔ་བསྟེན་ཅིང་། ཕྱིས་རྔོག་ལེགས་ཤེས་དང་ལྷན་དུ་བཞུགས་ཏེ་གསང་ཕུར་སྐུ་གཤེགས་སོ། །ཕྱ་དར་སྟོན་པས་ཀྱང་ཇོ་བོ་ལོ་ལྔ་བསྟེན་ཏེ་སྙེ་ཐང་དུ་བོད་སྟོན་རྣམས་ཀྱིས་ཕར་ཕྱིན་གསུང་བ་ཞུས་པས། ཐོག་མར་པཎྜི་ཏའི་བཤད་ལུགས་དང་། དེ་ནས་ཇོ་བོ་ཉིད་ཀྱི་བཞེད་པ། སྟོན་པ་བཞིའི་སྒོ་ནས་ཁྲིད་ཚུལ་གསུངས་པས། ཕྱ་དར་སྟོན་པས་ཟིན་བྲིས་སུ་བཏབ་པས་ཤིན་ཏུ་ལེགས་པ་ཅིག་བྱུང་། ཕར་ཕྱིན་ཁམས་ལུགས་མར་གྲགས་ཏེ། ཁོང་ཕར་ཕྱིན་ལ་རྩལ་ཐོན་པར་གསུངས། གཉིས་པ་ཆོས་བརྒྱུད་འཛིན་པའི་སློབ་མ་མཆོག་བྱོན་ཚུལ་ལ་གསུམ། བཤེས་གཉེན་སྟོན་པ་བྱོན་ཚུལ། དགེ་བཤེས་གསང་ཕུ་བ་བྱོན་ཚུལ། ནག་ཚོའི་རྗེས་སློབ་བྱོན་ཚུལ་ལོ། །དང་པོ་ནི། དེ་རྣམས་ཀྱི་ནང་ནས་ཇོ་བོ་ཆེན་པོའི་ཆོས་ཀྱི་བརྒྱུད་འཛིན་པའི་མཆོག་འབྲོམ་སྟོན་པ་རྒྱལ་བའི་འབྱུང་གནས་ཡིན་ཏེ། འཁྲུངས་ཡུལ་བྱང་རྩ་དགྱེ་མོ་ཕྱོགས་སུ་མཛད། གདུང་རུས་འབྲོམ་གྱི་ནང་ཚན་བྲག་གསུམ། ཡབ་ལྟག་སྐུ་བཞེར། ཡུམ་ཁུ་རྡོ་འོད་བཟའ་གཉིས་ཀྱིས་སྲས་སུ་ཤིང་ཕོ་འབྲུག་ལ་འཁྲུངས། གཞུར་ཞང་པོའི་སར་གཡུང་ཆོས་མགོན་ལ་ཀློག་བསླབས། སློབ་གཉེར་མཛད་ཀྱིན་ཡོད་པའི་དུས། རྒྱལ་གྱི་ཞང་ཆེན་པོ་ལ་དགེ་བསྙེན་གྱི་སྡོམ་པ་བླངས། དེ་ནས་དགུང་ལོ་བཅུ་བདུན་བཞེས་པ་ལ། སེ་བཙུན་དབང་ཕྱུག་གཞོན་ནུ་ཁམས་ནས་ཡར་བྱོན། རྒྱ་གར་དུ་འབྱོན་པར་བཞེད་དེ། བལ་ཡུལ་བར་བྱོན། ལོ་གཅིག་ན་སླར་ལོག་པ་དང་མཇལ་ཁྲིད་པར་ཞུས་པས། སང་རེད་ཤོག་གསུངས་བས། ཚོང་པ་དང་འགྲོགས་ཏེ་བྱོན། ཁམས་སུ་ལོ་ཧྲིལ་པོ་བཅུ་དགུ་སེ་བཙུན་ལ་བསྟེན། མདོ་སྔགས་ཀྱི་ཆོས་མང་དུ་གསན་མཁས་པར་གྱུར་ཏེ་དགེ་བསྙེན་ཆོས་འཕེལ་དུ་གྲགས། སྙིང་རྗེ་པད་དཀར་དུ། བྱང་ཕྱོགས་སུ་བསྟན་པ་ལ་དད་པ་ལྷར་སྐྱེ་ཞིང་། རབ་བྱུང་ཆོས་བཞིན་མི་སྤྱོད་པ་ལོག་པར་ལྟུང་། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང་། ཞེས་པ་དང་། སངས་རྒྱས་ཕལ་པོ་ཆེར་ཡང་། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་འབྲོམ་སྟོན་པ་ཉིད་ལུང་བསྟན་པ་ཡིན་ནོ། །དེ་ནས་འབྲོམ་གྱི་དགོངས་པ་ལ། དལ་འབྱོར་མི་ལུས་ཐོབ་པར་དཀའ་བ་སྐྱེད་པའི་དུས་འདིར་ཆོས་རྣལ་མ་གཅིག་བྱེད་ན་འདི་ཙམ་གྱི་ཆོག་གམ་མི་ཆོག རྒྱ་གར་མཁས་པ་གཅིག་ལ་དྲི་བ་ལ་བར་དུ་ལོ་ཙཱ་བ་མི་དགོས་པ་བྱེད་དགོངས་ཏེ་པཎྜི་ཏ་སྒྲའི་ཚེར་མ་བྱ་བ་ལ་བི་ཝརྟ་ལ་སོགས་པ་བསླབས། ཁ་ཅིག་སྨྲྀརྟི་ཉྫཱ་ན་དང་གཅིག་པར་འདོད། དེ་ནས་ལོ་ཙཱ་མཁས་པར་བསླབས། དེ་ནས་སེ་བཙུན་གྱི་ཞལ་ནས་ཕ་དང་ཕྲད་པར་སོང་གསུངས་ཏེ། དགུང་ལོ་སོ་བརྒྱད་འགྲོ་བ་ལ་ཡར་བྱོན། བྱང་འཕྲང་ཁ་སོགས་ཆུ་ཁར་ཕེབས། འཕྲང་ཁ་བེར་ཆུང་གིས་ར་སྒྲེང་གི་དགོན་པ་ཕུལ། མངའ་རིས་སུ་ལྷ་བླ་མས་པཎྜི་ཏ་སྤྱངས་ཏེ་ཕེབས་པ་སྔར་ནས་གསན་ཀྱང་། དེའི་ཚེ་རིང་པོར་མི་ཐོགས་པར་རྒྱ་གར་དུ་འབྱོན་པར་འདུག་ཟེར་བས། མཚན་ཐོས་པ་ཙམ་གྱིས་དད་པ་ལྷག་པར་སྐྱེས་ཏེ་ཡར་བྱོན། ཇོ་བོ་དཔོན་སློབ་པུ་ཧྲང་ན་བཞུགས་པ་ལ། སྒྲོལ་མའི་ཞལ་ནས། ད་ནི་ཞག་གསུམ་དྲོས་དང་བཞི་བོད་ཀྱི་ཨུ་པཱ་ས་ཀ་འབྱོན་པས་བྱིན་གྱིས་རློབས་ཤིག་གསུངས། ཇོ་བོས་ཀྱང་དེའི་སྟ་གོན་མཛད། ཨུ་པཱ་ཉེ་བ། ཨ་ས་ཀ་གནས་པ་སྟེ་མཚམས་སྦྱར་བས། ཨུ་པཱ་ས་ཀ་ཉེ་བར་གནས་པའམ། དགེ་བསྙེན་ལ་འཇུག་ལ། པའི་རིང་ཆ་ཆད་པ་དང་། སེ་ཀ་ཅེས་པ་མ་དག་སྟེ། ཨུ་པ་སེ་ཀ་དགེ་བསྙེན་མ་ལ་འཇུག་གོ །དེ་ནས་རྟའི་ལོ་རང་ལོ་སོ་དགུ་ལ་ཇོ་བོ་དང་མཇལ། བྱིན་གྱིས་བརླབས། དབང་སྐུར། འཇམ་དཔལ་རྡོ་རྗེའི་སྐུ་ཡང་གནང་། ཁྱོད་བླ་མ་རྣམས་དང་། སྒྲོལ་མས་ལུང་བསྟན་པའི་སློབ་མ་ཡིན་པས་ངའི་རྩར་སྡོད། ངའི་བཀའ་བརྒྱུད་འདི་ལ་གསོལ་བ་ཐོབ་དང་བྱིན་རླབས་ཡོད་ཀྱིས། བྱིན་རླབས་འབྱུང་གི་གསུངས། དེའི་ཚེ་ཇོ་བོ་ཉིད་ཀྱང་རྒྱ་གར་དུ་ལོག་པར་བཞེད། ལོ་ཙཱ་བ་ཡང་སྔར་གྱི་ཆད་ཡོད་པས་ཕར་བསྐྱལ་བར་བཞེད་པ་ལ། སྟོན་པས་ཀྱང་བཞུགས་པར་ཞུ་མ་ནུས། འོན་ཀྱང་ཐབས་ལ་མཁས་པས་དབུས་ན་རྒྱལ་བློན་གྱི་བཞེངས་པའི་གཙུག་ལག་ཁང་ཡོད་ཚུལ་དང་། དགེ་འདུན་གྱི་སྡེ་མང་དུ་བཞུགས་པ་རྣམས་ཇོ་བོ་ཕེབས་པར་མོས་ཚུལ་དང་། བོད་སྟོན་རྣམས་ལ་ཡང་ཆད་ཡོད་པ་བཞིན་འཕྲིན་ཡིག་བཏང་བ་སོགས་གོང་དུ་བཤད་པ་ལྟར་དཀའ་མ་དུ་མས་བོད་དུ་སྤྱན་དྲངས་ཏེ་སྟོན་པས་ལོ་ངོ་བཅུ་གསུམ་ཚུལ་བཞིན་དུ་བསྟེན་ཅིང་། བཤེས་གཉེན་སྟོན་པ་ལ་བླ་མ་ལྔ་ཡོད་པ་ནི། དང་པོར་ཀློག་བསླབ་པའི་སློབ་དཔོན། གཞུའི་ཀུན་དགའ་ར་བའི་གཡུང་ཆོས་མགོན། རྒྱལ་གྱི་ཞང་ཆེན་པོ། སེ་བཙུན་དབང་ཕྱུག་གཞོན་ནུ། པཎྜིཏ་སྒྲའི་ཚེར་མ་ཅན། ཇོ་བོ་ནི་འགྲན་གྱི་དོ་མེད་ཡིན་ལ། སྤྱིར་ཇོ་བོའི་ཆོས་ཐམས་ཅད་ཐུགས་ལ་མངའ་བ་ཡིན་ཏེ། མི་འཆུག་བསྡམས་པ་ལས་ཀྱང་། ཇོ་བོའི་ཞལ་ནས། གཞུང་བཟང་ཁྱོད་ནི་ཚངས་སྤྱོད་སྡོམ་པས་ཕྱུག །སྨོན་འཇུག་སེམས་སྐྱེད་ལག་ལེན་སྙིང་རྗེས་མཛད། །དབང་བཞི་ཡོངས་རྫོགས་གསང་བ་ཕྱིར་མི་སྒྲོག །སྡོམ་གསུམ་ཁྱོད་ཀྱི་རྒྱུད་ལ་རྫོགས་པར་གནས། །དེ་དག་ཀུན་གྱི་ལམ་རིམ་ལག་ལེན་རྣམས། །རིམ་པ་བཞིན་དུ་ཉམས་ཁྲིད་བསྐྱངས་པ་ལས། །ཀུན་ལ་ཐོགས་མེད་ཁྱོད་ཀྱི་བློ་ལ་རྫོགས། །གཞན་ཡང་བསླབ་བསྡུས་སྤྱོད་འཇུག་ལ་སོགས་པ། །དོན་ཡོད་གོ་སྟེ་སེམས་ལ་ཕན་པའི་ཆོས། །བརྒྱ་དང་བཅུ་གསུམ་ཁྱོད་ཀྱིས་དག་པར་བསླབས། །གསང་བ་གཞན་ལ་བསྟན་པར་དཀའ་བ་ཡང་། །སྦས་པའི་ཆོས་རྣམས་ཁྱོད་ཀྱིས་ལོན་པར་མཛད། །ཁྱོན་ནི་ཞུ་མཁས་ཁོ་བོ་སྣོད་ལ་རྟོག །ལྷ་རྣམས་ཀུན་ལ་བག་ཆགས་བཞག་པའི་ཕྱིར། །སྒྲུབ་ཐབས་སྟོང་ཕྲག་ཉི་ཤུ་རྩ་བཞིའི་ཁྲིད། །ཁོ་བོ་ཕྱོགས་འདིར་བོས་པའི་དགོས་པ་དང་། །སྡོམ་གསུམ་དོན་དུ་གཉེར་བར་འདོད་པ་ལ། །སོ་སོའི་ལག་ལེན་རིམ་པར་དཀྲོལ་བ་ལགས། །ཞེས་སོགས་མང་དུ་གསུངས་པ་སོགས་ཀྱིས་ཤེས་སོ། །ཁྱད་པར་དུ་རྒྱལ་བས་ལུང་བསྟན་པ་ཤིང་རྟ་ཆེན་པོ་གཉིས་ཀྱི་གདམས་པའི་བཅུད། རྒྱལ་བའི་བཀའ་བསྟན་བཅོས་ཐམས་ཅད་འགལ་མེད་དུ་ཉམས་སུ་ལེན་པའི་ལམ་མ་ནོར་བའི་གདམས་ངག་ཁྱད་པར་ཅན་དཔལ་ལྡན་ཨ་ཏི་ཤ་ལ་མངའ་བ་དེ་གཙོ་བོར་འབྲོམ་སྟོན་པས་ཐོབ་པར་མཛད་ཅིང་། བཤེས་གཉེན་སྟོན་པའི་རྗེས་འཇུག་སྐུ་མཆེད་གསུམ་ལ་སོགས་པ་རྣམས་ལ་ཡང་བཀའ་གདམས་པ་ཞེས་མཚན་དུ་གྲགས་ལ། སྟོན་པས་མཛད་པའི་ལྷ་ཆོས་བདུན་ལྡན་ཆུང་བ་ལས། ངོ་མཚར་བཀའ་ནི་སྡེ་སྣོད་གསུམ་པོ་སྟེ། །གདམས་པ་སྐྱེས་བུ་གསུམ་གྱིས་ཕྱུག་པ་ཡིན། །བཀའ་གདམས་རིན་ཆེན་གསེར་གྱི་ཕྲེང་བ་ལ། །འགྲོ་བ་གང་གིས་བགྲངས་ཀྱང་དོན་ཡོད་འགྱུར། །ཞེས་པ་ནས། བདག་གི་བླ་མ་འགྲན་གྱི་དོ་མེད་འདི། །ཚུལ་ཁྲིམས་གོས་ཅན་ལྟ་བའི་རྣལ་འབྱོར་པ། །ཡེ་ཤེས་ལུས་ཅན་མཚན་དང་དཔེ་བྱད་ལྡན། །ལོག་པའི་ཆོས་ལས་ངེས་པར་འདས་པ་ཡིན། །ཨེ་མ་ཡ་མཚན་བསམ་གྱིས་མི་ཁྱབ་པའི། །བདེ་བར་གཤེགས་པ་རྒྱལ་བ་གཉིས་པ་འདིའི། །བརྒྱུད་པར་བཅས་པའི་རྗེས་སུ་འབྲང་དུ་བྱུང་། །དེ་ཡིས་ཁོ་བོ་བོད་དུ་ལུས་བླངས་ཀྱང་། །བསོད་ནམས་མི་ཆུང་ཤིན་ཏུ་སྐལ་བ་བཟང་། །ཞེས་པའི་བར་གསུངས་སོ། དེ་ལྟར་འབྲོམ་སྟོན་ཇོ་བོ་དང་མཇལ་བའི་དུས་དང་། བསྟེན་པའི་ལོ་གྲངས་ལ་མི་མཐུན་པ་མང་ཡང་འདི་ལས་གཞན་དུ་འདོད་པ་མ་དག་པར་མངོན་ནོ། །ཇོ་བོ་དགའ་ལྡན་དུ་གཤེགས་ནས། ཀ་བ་ཤཱཀྱ་དབང་ཕྱུག་སོགས་བོད་སྟོན་རྣམས་ཀྱིས་ཇོ་བོའི་འདས་མཆོད་ཆེན་པོ་སྙེ་ཐང་དུ་བཏང་། སྟོན་པས་སྙེ་ཐང་དུ་ལོ་གཅིག་བཞུགས། ཇོ་བོའི་གདུང་དང་རྟེན་གསུམ་སོགས་སྤྱན་དྲངས་ཏེ། ཤིང་མོ་ལུག་གི་ལོ་ལ་ར་སྒྲེང་དུ་བྱོན། དགོན་པའི་ས་སྤྱད་གཟིགས་པས་ཤིན་ཏུ་ལེགས་པར་དགོངས་ཏེ། བྲག་སེང་གེའི་ཞོལ་དུ་མནལ་ལམ་བརྟགས་པས། དབུ་རྩེའི་ས་ན་གསེར་གྱི་མཆོད་རྟེན་འདུག་པའི་འོད་ཟེར་ལས། དབུ་རྩེ་དགའ་འཇི་ར་སེར་ལྷག་གེ་བ་མང་པོ་བྱུང་ནས་བོད་ཡུལ་ཐམས་ཅད་འོད་ཀྱིས་གང་བར་བྱས་ཏེ་ཚུར་འདུས་ཤུག་པའི་གསེབ་ཐམས་ཅད་གང་བ་དང་། གཞན་ཡང་འཆིང་དཀར་བ་མར་གྱི་ཕུང་པོ་དང་། ཕ་འོང་ཐང་རིན་པོ་ཆེའི་ཕུང་པོར་སོང་བ་ལ་སོགས་པའི་བལྟས་ཁྱད་པར་ཅན་མང་པོ་རྨིས་ཏེ། ནང་པར་སུམ་པ་མཐུ་ཅན་དང་། རྣལ་འབྱོར་པ། དགོན་པ་བ་གསུམ་གྱིས་བལྟས་བཟང་ངམ་ཞུས་པས། བཟང་གསུངས་ནས། དགོན་པ་འདེབས་པར་ཐག་བཅད། ས་འདུལ་ལ་བརྒྱད་སྟོང་པ་འགྲེལ་པ་དང་བཅས་པ་གསུངས། མེ་ཕོ་སྤྲེའུ་ལོ་ལ་དགོན་པ་གོང་དང་། གཟིམ་ཁང་རྣམས་མཛད། མེ་མོ་བྱའི་ལོ་ས་ག་ཟླ་བའི་ཚེས་གཉིས་ལ་ས་ཆོག་མཛད། དཔལ་གསང་བ་འདུས་པ་ལྷ་བཅུ་དགུའི་ཐིག་བཏབས་ཏེ། ཀ་གཉིས་མའི་རྨང་བཏིང་། གུར་དཀར་ཕེབས། ཇོ་བོའི་གདུང་དང་། དངུལ་གདུགས་ཅན། འཇམ་དཔལ་རྡོ་རྗེ་ལས་སོགས་པ་བཞུགས། བཟོ་བོ་བི་རི་རྣལ་འབྱོར་བྱ་བས་ཀ་གཉིས་མ་རྒྱ་ཕིབས། ཁྱམས་སྟོད་ཀ་བ་བཅུ་གཉིས་རྣམས་བྱ་ལོ་རང་ལ་གྲུབ་པར་མཛད། རྟེན་གསར་བཞེངས་པ་རྣམས་ཀྱི་རབ་གནས་སོགས་རྣལ་འབྱོར་པ་གོང་འོག་གིས་གྲོགས་མཛད་དེ་ཕུན་སུམ་ཚོགས་པར་གྲུབ་ནས། ཇོ་བོའི་གདུང་བཞུགས་པའི་ཁྱུང་མགོ་གྲུབ་ནས། འདི་མན་ཆད་ལ་བྱེད་པ་པོ་གཅིག་འོང་གིས་གསུངས་ནས། འཛིམ་རྡོ་ཡོན་ཏན་འབར་ལ། ཁྱོད་འཇིག་རྟེན་གྱི་ཤེས་ཆེ་བས་གྱིས། ཁོ་བོས་ཚེ་འདིའི་རྣམ་རྟོག་ཡོངས་བློ་ཅིག་བགྱི་གསུངས་ཏེ། འཇིག་རྟེན་མཁྱེན་པ་རྙེད་དང་མ་རྙེད་དང་། །ཞེས་སོགས་གསུངས་ཤིང་། འཇིག་རྟེན་ཆོས་བརྒྱད་མགོ་སྙོམས་མཛད་དོ། །དེ་དུས་རྣལ་འབྱོར་པ་ཕྱག་ཁྲི་མཆོག ཇོ་བོ་ལོ་ལྔ་བསྟེན་པ་དེ་ར་སྒྲེང་ན་བཞུགས་པ་ལ་ཁོ་བོ་མཚམས་ཤིག་བྱེད་པ་ཡིན་གསུངས་ནས། འཇིག་རྟེན་གྱི་རྣམ་པར་རྟོག་པ་ལ་མཚམས་པོ་ཆེ་མཛད་དེ་ཤུག་སིབ་ན་གང་དགར་བཞུགས་ནས་རྩེ་གཅིག་ཏུ་སྒྲུབ་པ་མཛད། དགུང་ལོ་ཞེ་གཉིས་འགྲོ་བའི་དུས་བཤེས་གཉེན་སྟོན་པས་འཁོར་ཅིག་ལ་བདུད་རྩིའི་ཀ་པཱ་ལ་གང་བཀུར་ཏེ། ཕྱག་ཁྲི་མཆོག་ལ་གཏད་པ་གསོལ་ནས་མཁའ་སྤྱོད་དུ་གཤེགས་སོ། །དེ་ལྟར་བཤེས་གཉེན་སྟོན་པ་ཐུགས་ཟབ་ལ་སྐྱེལ་ཆེ་བ་མཁྱེན་པ་རྒྱ་མཚོ་ལྟ་བུ་མངའ་བ་དེས། མདོ་རྒྱུད་དུ་མ་ནས་ལུང་བསྟན་པའི་ར་སྒྲེང་དེ། བོད་ཀྱི་སྡེ་པ་གང་གི་ཡང་ཕྱོགས་སུ་མ་ཆད་པ། བི་ཀྲ་མ་ཤཱི་ལའི་གནས་ཆུང་། ཇོ་བོའི་གདན་ས། རྣལ་འབྱོར་གོང་འོག་རྣམས་ཀྱི་སྒྲུབ་གནས། བོད་ཀྱི་སྤྱི་མཆོད་ཁྱད་པར་ཅན་འདི་བྱུང་བ་ཡིན་ནོ། །དེ་ཡང་སྔོན་གྱི་ཡི་གེ་ལས། ཆོས་ཀྱི་རྒྱལ་པོ་སྲོང་བཙན་སྒམ་པོ་བྱང་དུ་མི་རྒོད་འདུལ་བ་ལ་བྱོན་དུས། ར་སྒྲེང་དུ་ཕེབས་ཏེ་དབུ་སྐྲ་གཏོར་ནས། འདིར་སྤོས་ཤིང་རྒྱས་པར་གྱུར་པའི་ཚེ། གནས་འདིར་ངའི་སྤྲུལ་པ་འབྱུང་། ཞེས་གསུངས་པ། བཤེས་གཉེན་སྟོན་པ་ཡིན་པར་བཞེད་དོ། །དེ་ལྟ་བུའི་ར་སྒྲེང་དེར་སངས་རྒྱས་ཀྱི་བསྟན་པ། ཨ་ཏི་ཤའི་ཆོས་སྲོལ་དྲི་མ་མེད་པ་རྣམས་བཙུགས་ཏེ། སྤྱིར་ལས་དང་སྐལ་ལྡན་གྱི་སློབ་མ་བརྒྱད་ཅུ་ཙམ་སྨིན་པར་མཛད་ཅིང་། ཁྱད་པར་དུ་སྐུ་མཆེད་རིན་པོ་ཆེ་གསུམ་ཇོ་བོ་ཉིད་ཀྱི་སྙེ་ཐང་དུ་ལུང་བསྟན་ཏེ། འབྲོམ་རྗེ་ཐུབ་པའི་བསྟན་པ་ལྔ་སྟོང་གནས། །འོན་ཀྱང་བོད་དུ་ཆོས་སྤྱོད་ཇི་ལྟར་དར། །བདག་གིས་བསྟན་པ་སྐྱོང་སྐྱེད་བྱས་པ་ཡིན། །ད་ནི་ལེགས་པར་གཞི་བཞེངས་ཚར་བ་ཡིན། །ཆོས་འདི་ལེགས་པར་སྐྱོངས་ཤིག་རྒྱལ་བ་འབྲོམ། །མཐའ་རྒྱ་བྱང་ནས་སྐྱེད་ཅིག་སྙིང་སྟོབས་ཅན། །ཕོ་རུས་རྣམ་ཐར་ཟུངས་ཤིག་ཁྲོལ་གཞུང་ཅན། །ཕ་གཅིག་བུ་གཅིག་ཡིན་ནོ་སྙིང་ལ་སོམས། །ཤེས་དང་། བདག་གིས་བསྟན་པ་འདི་ནི་ཁྱོད་ལ་གཏད། །ལོ་སྐོར་གཅིག་གི་བར་དུ་བྱང་ཕྱོགས་སུ། །ཆོས་ཀྱི་ཆར་པ་ཕོབས་ལ་གཞན་དོན་མཛོད། །དེ་ནས་ཁྱོད་ཀྱི་ཡོན་ཏན་མ་ལུས་པ། །གང་ཟག་གཅིག་གིས་བླང་བར་མི་ནུས་ཀྱིས། །ལས་ཅན་བརྒྱད་ཅུར་བགོས་ལ་མཐའ་རྒྱ་སྐྱོད། །གཙོ་བོ་སྤྲུལ་པའི་སྐུ་མཆེད་གསུམ་པོ་ལ། །གཞུང་དང་མན་ངག་ཐུན་མོང་གསུམ་བྱིན་ལ། །ལྷག་ཆད་མེད་པར་རང་གི་གདན་ས་གཏོད། །གནས་ཀྱི་གདན་སར་ཨ་མེས་ཆེན་པོ་བསྐོས། །དེ་ནས་ཞེན་ཅིང་ཆགས་པ་མ་བྱེད་པར། །དགའ་ལྡན་གནས་སུ་བདག་གི་དྲུང་དུ་ཤོག །ཅེས་བཤེས་གཉེན་སྟོན་པ་བསྟན་པའི་བདག་པོར་བྱིན་གྱིས་བརླབས་ཤིང་། ཆོས་ཀྱི་གདན་ས་སྐུ་མཆེད་གསུམ་དང་གནས་ཀྱི་གདན་ས་རྣལ་འབྱོར་པ་དང་བཅས་པ་ལུང་བསྟན་ཅིང་། ལས་ཅན་བརྒྱད་ཅུའི་ནང་ནས་གྲགས་ཆེ་བ་གོང་དུ་བཤད་པའི་ཁམས་པ་སྐུ་མཆེད་བཞི་དང་། གཞན་ཡང་ཁམས་ནས་རྣལ་འབྱོར་པ་བྱམས་པའི་བློ་གྲོས། ཡོངས་རྫོགས་རྣལ་འབྱོར་པ། ལྷོ་བྲག་ནས་རྣལ་འབྱོར་པ་ཕྱག་ཁྲི་མཆོག བཙུན་པ་དགེ་སྐྱོང་སོགས་དང་བི་རི་རྣལ་འབྱོར་པ། སྟོང་རྩན་ནམ་གོ རྒྱུ་ར་གཞོན་ནུ་འོད་ཟེར། ལྷབ་མི་ཤེས་རབ་གཡུང་དྲུང་། སྒོམ་པ་རིན་ཆེན་བླ་མ། གཙང་པ་ཇོ་པད། ཀ་བ་རྒྱ་དཀར། མར་བ་ཇོ་ལེགས། བྲན་ཀ་ཇོ་བཙུན། སུམ་སྒོམ་དབང་ཕྱུག་འོད་ཟེར། རྣལ་འབྱོར་པ་གཡུང་དྲུང་རྒྱལ་མཚན་སྟེ་འདི་རྣམས་ཇོ་བོ་དང་སྟོན་པ་ཐུན་མོང་པའི་སློབ་མ། ཡི་དམ་ལྷ་ཞལ་གཟིགས་པ། སྐྱེས་བུ་ཆེན་པོའི་ལམ་ལ་བཞུགས་པ་ཤ་སྟག་གོ །སྲས་ཀྱི་ཐུ་བོ་ནི་སྐུ་མཆེད་གསུམ་པོ་ཉིད་ཡིན་ལ། ཁ་ཅིག་ཁམས་ལུང་པ་དང་སྐུ་མཆེད་བཞིར་ཡང་འདོད་དེ། འདིས་ཡུང་ངའི་ཁམས་ལུང་དུ་དགོན་པ་བཏབ། འགྲོ་དོན་མཛད་ཅིང་ལོ་གོ་བཞི་བཞུགས་སོ། །

གཞན་ཡང་ཞང་ཡེ་ཤེས་རྒྱལ་མཚན། བྲག་རྒྱབ་པ་གཉན་སྟོན་ཤཱཀྱ་འབྱུང་། མངའ་རིས་པ་འདུལ་འཛིན་རུག་པའི་ཞང་ཆེན་པོ། རྣམ་ཐར་གཙང་བའི་ཀ་སྐྱོག་པ་ཆེན་པོ། འཛིན་སྒོམ་ཡོན་ཏན་འབར། སྒྲོ་བྱང་ཆུབ་ཚུལ་ཁྲིམས། ཨ་མི་ཐར་པ་རྒྱལ་མཚན། ཨ་མི་སྨན་ལ་སོགས་པ་དེ་རྣམས་བཤེས་གཉེན་སྟོན་པའི་སློབ་མ་ཐུན་མོང་མ་ཡིན་པར་གྲགས་ཆེ་བ་རྣམས་ཡིན་ནོ། །དེ་ལྟར་སློབ་མ་རྣམས་སྨིན་པར་མཛད་དེ། ལོ་དགུར་བསྟན་པའི་མངའ་བདག་མཛད་ནས་དྲུག་ཅུ་རེ་གཅིག་པ་འབྲུག་ལོ་ལ་ར་སྒྲེང་ནས། རྗེ་བཙུན་བྱམས་པའི་དྲུང་ན་ཇོ་བོ་རྗེ་ཉིད་ལྷའི་བུ་ནམ་མཁའ་དྲི་མ་མེད་པ་ཞེས་བྱ་བར་བཞུགས་པའི་དྲུང་དུ་གཤེགས། བཀའ་གདམས་ཀྱི་གསུངས་རབ་དག་ལས། སྟོན་པ་ནི་ལྷའི་བུ་རྒྱལ་བ་རྒྱལ་མཚོ། ཀ་བ་ཤཱཀྱ་དབང་ཕྱུག་ནི་ལྷའི་བུ་ཤཱཀྱ་དྲི་མེད། རྔོག་ལེགས་ཤེས་ནི་ལྷའི་བུ་ཤེས་རབ་སྒྲོན་མ། ལོ་ཙཱ་བ་ནག་ཚོ་ནི་ལྷའི་བུ་ཚུལ་ཁྲིམས་ལྡན་ཞེས་བྱ་བར་འགྱུར་བར་གསུངས་སོ། །དེའི་སྲོལ་འཛིན་བྱོན་ཚུལ་ལ་གསུམ། ར་སྒྲེང་དུ་བྱོན་ཚུལ། སྐུ་མཆེད་གསུམ་བྱོན་ཚུལ། དེ་ལས་འཕེལ་བའི་སློབ་བརྒྱུད་བྱོན་ཚུལ་ལོ། །དང་པོ་ནི། རྣལ་འབྱོར་པ་ཆེན་པོས་སྟོན་པ་ཡང་ལོ་དགུ་བསྟེན། ར་སྒྲེང་གི་གདན་ས་ལོ་བཅུ་གཉིས་མཛད་པའི་རིང་། དགོན་པ་གོང་ནས་ཕྱིར་བྱོན། ད་ལྟ་དབུ་རྩེ་ཀ་བ་བཅུ་དྲུག་མའི་ས་དེར་གཟིམ་ཆུང་མཛད། དེ་དུས་ཞང་ཕྲེང་ཁ་ཟེར་ཆུང་གི་སྲས་དགྲ་བཅོམ། དེའི་སྲས་བེར་བརྒྱུད་དར་མ་ཡེ་ཤེས་ཀྱིས་ཀ་གཉིས་མའི་ཁྱམས་རྨད། ཁྱམས་ཆུང་། ནག་ཚང་གསུམ་མཛད་དེ་རབ་གནས་རྣལ་འབྱོར་པ་ཆེན་པོས་མཛད། གྲྭ་ས་མང་དུ་བཙུགས། གདུལ་བྱ་དུ་མ་སྨིན་པར་མཛད་དེ་དགེ་འདུན་སམ་བརྒྱ་ཙམ་འདུས། དྲུག་ཅུ་རྩ་གཉིས་པ་འབྲུག་ལོ་རྒྱལ་ཟླའི་ཚེས་བརྒྱད་ལ་ར་སྒྲེང་ནས་གཤེགས། དཔེ་ལ་ལར། རྟ་ལོ་བ་ཡོས་ལ་གཤེགས་པས་བདུན་ཅུ་ཐམ་པ་བཞུགས་ཟེར་བ་ཡང་སྣང་ངོ་། །དེ་ནས་དཔལ་ལྡན་དགོན་པ་བ་གདན་སར་བསྐོས། སྟོན་པ་ཡང་ལོ་དགུ་བསྟེན་པ་རྣལ་འབྱོར་པ་དང་འདྲ། ར་སྒྲེང་གི་གདན་ས་ལོ་བཅུ་མཛད། དགོན་པ་གོང་དུ་བཞུགས་ནས། སྣེའུ་ཟུར་བ་ལ་སོགས་པའི་སློབ་མ་མང་དུ་སྨིན་པར་མཛད་དེ་དྲུག་ཅུ་རྩ་བདུན་པ་ཁྱི་ལོའི་མངོན་པར་བྱང་ཆུབ་པའི་ཉ་ལ་ར་སྒྲེང་དུ་གཤེགས། དགོན་པ་བ་ལ་སློབ་མ་མང་དུ་བྱོན་པའི་མཆོག བུ་ཆེན་བཅུ་ནི། ཀླུང་ཤོད་རུག་པའི་ཞང་ཀ་མ་བ་ཤེས་རབ་འོད། ཁ་རག་སྒོམ་ཆུང་། རོག་ཆོར་བུ་བ་སྨྲ་བའི་སེང་གེ མཐའ་བཞི་སྒོམ་པ། འཕན་ཡུལ་རྒྱལ་དུ་སྙན་སྣ་མོ་བ་དང་། འབྲི་གོ་ཏེ་ལུང་པ་ཚུལ་ཁྲིམས་སྐྱབས་གཉིས། དར་ཡུལ་དུ་ཆུ་སྒོམ་གཞོན་ནུ་སྙིང་པོ་དང་། ཚུལ་སྒོམ་ཡེ་ཤེས་རྒྱལ་མཚན་གཉིས། འཕན་ཡུལ་གཉའ་ར་སྨན་འཛར། འགར་འདུལ་འཛིན། སྤྲས་མཐོང་པ་སར་སྣེའུ་ཟུར་བ་རྣམས་སོ། །དེ་རྣམས་ཀྱི་ནང་ནས་ཆོས་རྒྱུད་འཛིན་པའི་མཆོག སྣེའུ་ཟུར་བ་ཡིན་ཏེ། འདིའི་ལོ་རྒྱུས་ཅུང་ཟད་འོག་ཏུ་འཆད་དོ། །དེ་རྣམས་རྣལ་འབྱོར་བ་དང་ཐུན་མོང་བའི་སློབ་མ་ཡིན་ཀྱང་། དགོན་པ་བའི་བུ་ཆེན་དུ་ཡི་གེ་རྙིང་མ་རྣམས་སུ་བགྲང་པ་བཞིན་འདིར་ཡང་བཀོད་པ་ཡིན་ནོ། །ཁ་རག་སྒོམ་ཆུང་ནི། གཙང་དུ་སྐུ་འཁྲུངས། ལམ་པོ་གནས་སུ་མཁན་པོ་མར་སྒོམ་ལས་རབ་ཏུ་བྱུང་སྟེ། མཚན་དབང་ཕྱུག་བློ་གྲོས་སུ་བཏགས། དང་པོ་སྦ་སྒོམ་བསོད་ནམས་ཡེ་ཤེས་བྱ་བ་ཇོ་བོའི་སློབ་མ་ཅིག་ལ་ཆོས་གསན། དེ་ནས་ར་སྒྲེང་དུ་བྱོན་ལོ་དྲུག་བཞུགས་ནས། རྣལ་འབྱོར་པ་དང་། དགོན་པ་བ་གཉིས་ལ་ཆོས་མང་དུ་གསན། སྒོམ་ཆུང་པའི་ཐུགས་དགོངས་ལ། ད་ནི་རང་གིས་ཀྱང་ཆིག་སྐྱ་ཐུབ་སྟེ་འོང་སྙམ་སྟེ། ཉུང་མའི་ས་བོན་ཕུལ་གང་ཁྱེར་ནས་སྤྲས་ཀྱི་སྣེའུ་ཀེ་རུ་རུ་བྱོན། དབྱར་ལོ་ཐུག་གསོལ། དགུན་ཉུང་ཐུག་ལ་ཕྱེ་བུན་རེ་བཏབ་ནས་གསོལ་གྱིན་ལོ་བཅུ་གཅིག་སྒྲུབ་པ་རྩེ་གཅིག་ཏུ་མཛད། དེ་ནས་ཁ་རག་ཏུ་བྱོན་ནས་སྒྲུབ་པ་མཛད་པས། ཁ་རག་སྒོམ་ཆུང་ངུ་གྲགས། ཁ་ཅིག་མཐོ་ཆོས་དང་། ཨཾ་ཡིག་བདུན་ཅུ་རྣམས་སྤྲས་བྲག་རྒྱབ་ཏུ་མཛད་ཟེར་ཏེ། རྣམ་ཐར་ན་ཁ་རག་ཤར་དུ་མཛད་གསུངས་སོ། །འདིས་རྣལ་འབྱོར་པ་གོང་འོག་གི་གསུང་ལ་རྟེན་ནས་ལམ་རིམ་དོན་ཚན་བཅུ་གཉིས་སུ་བསྡུས་པ་མཛད་དེ། ཁ་རག་བསྐོར་གསུམ་དུ་གྲགས་པའི་གཅིག་ཡིན་ནོ། །བདུན་ཅུ་རྩ་ལྔ་ལ་གཙང་གི་ཕུག་ནག་པོ་བྱ་བར་གཤེགས་ཁར། ལྷོ་པ་ལ་སྐྱེས་པའི་ཡུལ་སྤོངས། ཉེ་དུ་དང་ཐག་བསྲིངས། བཤེས་གཉེན་རྟག་ཏུ་བསྟེན། ཧྲུལ་པོའི་གོས་གྱོན། དམན་པའི་ས་ཟུང་། ངན་པའི་ཟས་ཟོ། ལོ་ཚོད་ཆུ་བཞིན་དུ་འཐུངས་ལ་སྒྲུབ་པ་གྱིས་གསུངས་པའི་གདམས་ངག་གནང་སྟེ། རུས་པ་ལྷག་རལ་རོལ་ཚོ་བསྡུས་ལ། བྱང་ར་སྒྲེང་ན་དཔལ་ལྡན་དགོན་པ་བའི་སྐུ་འབུམ་ཡོད་པ། དེའི་གྲིབ་མ་དང་སེར་བུ་ཕོག་སར་སྐྱོལ་ཅིག་གསུངས་ཏེ། དེ་ལྟར་བྱས་སོ། །དེ་ནས་ར་སྒྲེང་དུ་དཔལ་ལྡན་དགོན་པའི་རྗེས་སུ། པོ་ཏོ་བས་གདན་ས་ལོ་གསུམ་མམ། གཅིག་མཛད་ཀྱང་ཟེར་ཏེ། ཞང་ཆོས་རྒྱལ་ལ་སོགས་པ་ཁམས་པ་མ་རུང་པ་འགའ་ཞིག་གིས་བཞུགས་དབང་མ་བྱུང་པ་དང་། པོ་ཏོ་བ་རང་གི་མནལ་ལམ་དུ་ཡང་། ཞིང་ས་མ་དུལ་བ་སོགས་བྱུང་བས། དེར་མ་བཞུགས་པར་སྐུ་མཆེད་གསུམ་པོ་དཀའ་ཐུབ་ཀྱི་སྒོ་ནས་རི་སུལ་རྣམས་སུ་དྲང་སྲོང་གི་སྤྱོད་ཚུལ་གྱིས་གནས་ངེས་མེད་དུ་ཐུགས་དམ་དང་། གཞན་ཕན་གོང་འཕེལ་མཛད་པས། ར་སྒྲེང་དུ་གདན་ས་ལ་བར་སྟོང་ལོ་སུམ་ཅུ་ཙམ་དང་། ཆོས་ཚུལ་ལ་ཡང་དར་རྒུད་ཆེར་བྱུང་། དེ་ནས་སྐུ་མཆེད་གསུམ་གཤེགས་ནས་ལོ་གཅིག་གཉིས་ན། མཐའ་བཞི་སྒོམ་པ་བྱ་བ། སྟོན་པ་ལ་ཡང་ཐུག་ཅིང་། སྐུ་མཆེད་གསུམ་གྱི་སློབ་མ་ཡིན་པ། ཡིད་དམ་གྱི་ལྷ་མང་པོ་ཞལ་གཟིགས་ཅིང་། གཞན་དོན་འཕྲིན་ལས་ལ་དབང་འབྱོར་པ་དེས་བླ་མའི་གདན་ས་ཉམས་པའི་གཏམ་གསན་པས། ར་སྒྲེང་དུ་བྱོན་གནས་ཚུལ་རྣམས་གཟིགས་ཏེ། ཤར་པ་བ་ཞོའི་ཁང་པ་གནས་ན་བཞུགས་པ་དང་། བྱ་ཡུལ་བ་ཆེན་པོ། གླང་རི་ཐང་པ། ཀ་མ་པ། ལོར་སྡིང་པོ་བ་རྣམས་ཀྱི་དྲུང་དུ་བྱོན་ནས། ཁྱེད་རྣམས་བླ་མའི་གདན་ས་ལ་ཕྱིར་མིག་ལྟ་ན་དུས་ལ་བབ་ནས་འདུག་གསུངས་ཏེ་བསྐུལ་བས། དེ་རྣམས་ཀྱིས་གྲོགས་མཛད་འབུལ་བ་ཆེན་པོ་བྱུང་སྟེ། ར་སྒྲེང་དུ་གྲྭ་ཚང་ཡང་མང་དུ་བཙུགས། བུད་མེད་དང་། ར་ལུགས་རྣམས་ཕུད། ཆོས་ཁྲིམས་ཤིན་ཏུ་དམ་པ་དང་། དགེ་འདུན་མང་པོ་ཡང་བཞུགས་པར་མཛད་དེ་ཆོས་སྲོལ་ཆེར་བཙུགས། ཚོགས་དཔོན་བཤེས་གཉེན་མཐའ་བཞིས་ལོ་ཤས་སུ་མཛད་དོ། །ཁྱད་པར་ཤར་བ་པས། ཀ་གཉིས་མའི་ནུབ་ཏུ་དབུ་རྩེ་ཀ་དགུ་མ་གཅིག་དང་པོར་བཞེངས་པ། ཕྱིས་དཔོན་གྱད་པ་དང་། ཟེར་གུ་ཆོས་གྲགས་གཉིས་ཀྱིས་མགོ་བྱས་བཟང་འདུས་བཅུ་དྲུག་བྱ་བས་བདག་རྐྱེན་བྱས་ནས། ཀ་ཆེན་བཅུ་དྲུག་ཡོད་པ་ལྷོ་སྒོར་བསྟན། ཉིས་ཐོག གསེར་འབྲུ། གསེར་བྱ་གཉིས་དང་བཅས་པ་བཞེངས། དེའི་ཁྱམས་སྨན་སྒང་ཕྱུག་པོ་བྱ་བས་བྱས་སོ། །པོ་ཏོ་བ་བཞུད་ནས། ལོ་མང་པོའི་བར་དུ་མཐའ་བཞི་ལ་སོགས་པ་སྒྲེས་པ་རེས་གྲལ་དབུ་ཙམ་མ་གཏོགས། གདན་སར་མིང་བཏགས་པ་དང་། འཆད་ཉན་སོགས་ཆེར་མེད་ལ་སྐབས་ཞིག་ཏུ་རྔོག་བློ་ལྡན་ཤེས་རབ་ལ་ཕུལ་བས། གསང་ཕུ་དང་སྦྲེལ་ཏེ་ལོ་ཁ་ཡར་དུ་ཆོས་བར་ཟླ་བ་གཅིག་གཉིས་ཙམ་བཞུགས་པ་ཡང་མཛད་དོ། །དེ་ནས་ཀ་གཉིས་མ་བཞེངས་ནས་ལོ་དགུ་བཅུ་རྩ་གསུམ་ལོན་པ་ས་ཕོ་འབྲུག་གི་ལོ་ལ་ཀ་བ་ཉི་ཤུ་རྩ་བཞི་མ་བཞེངས་པའི་སྦྱིན་བདག བྲང་ཁ་བེར་ཆུང་གི་བརྒྱུད་པ་སེའོ་གཞོན་ཚུལ་ཞེས་པ། སྤྱིར་ར་སྒྲེང་གི་སྐོར་དུ་ཞབས་ཏོག་ཆེར་མཛད། ཁྱད་པར་དབུ་རྩེ་ཀ་བ་ཉི་ཤུ་རྩ་བཞི། ཀ་གཉིས་མའི་ཤར་ཕྱོགས་སུ་བཞེངས་པར་འདོད་པ་ལ། རིན་ཆེན་སྒང་དུ་སངས་རྒྱས་དབོན་སྟོན་ལ་ས་སྤྱད་ཞུས་པས། ཤར་ནུབ་ནས་རྡོ་གཉིས་ཁྱེར་ཤོག་གསུངས་ཏེ། དེ་ལ་གཟིགས་པས། ཤར་ཕྱོགས་སུ་ཀླུའི་རྒྱལ་པོའི་ཕོ་བྲང་ལ་གནོད་པར་འདུག་པས། ནུབ་ཕྱོགས་སུ་གྱིས་གསུངས་པས། བཤེས་གཉེན་ཞང་འོད་འཇོ་བས་ར་སྒྲེང་དུ་ལོ་བཅུ་གཉིས་བཞུགས་པའི་བཅུ་པའི་ཐོག་ཏུ་ས་ཆོག་མཛད། རྨང་བཏིངས། དེ་ནས་ལོ་གཉིས་ལྕགས་ཕོ་རྟའི་ལོ་བདུན་ཏུ་རྩ་གསུམ་པ་བྱ་ཟླའི་ཚེས་བཅོ་ལྔ་ལ་གཤེགས། འཕན་ཡུལ་ཇོག་པོ་འཆད་ཁར་བྱོན་པའི་བཤེས་གཉེན་ནམ་མཁའ་འབུམ་གྱི་བླ་མ་དེ་ཡིན་ནོ། །

དེ་ནས་གཞོན་ཚུལ་གྱི་ཀ་བ་ཉི་ཤུ་རྩ་བཞི། ཉི་ཐོག ལྷོ་སྒོར་བསྟན། སྤེན་བད་གསེར་འབྲས་མཛེས་པ་བྱས། དེའི་ཁྱམས་སྨད་རྩོང་ཁ་ཤཀ་འབྱུང་གིས་བཞེངས། དེ་རྣམས་ཀྱི་རབ་གནས་པ་སངས་རྒྱས་དབོན་སྟོན་གྱིས་མཛད་དོ། །ཞང་འོད་འཇོ་བ་གཤེགས་ཁར་དགོན་པ་དང་གདན་ས། དགོན་འོད་འཇོ་བ་ལ་གཏད་ཀྱང་། ར་སྒྲེང་པ་གཞན་རྣམས་ཀྱིས་མ་ཕུལ་བ། སྒང་ཐང་དཀར་བས་ཐང་དཀར་དང་། ར་སྒྲེང་སྦྲེལ་ནས་ལོ་ཉི་ཤུ་རྩ་དགུ་གདན་ས་མཛད། ཆུ་མོ་བྱ་ལ་གཤེགས། དེར་རྗེས་སྔར་གྱི་འབྲེལ་པས་ཞང་འོད་འཇོ་བའི་སློབ་མ་དགོན་འོད་འཇོ་བ་ཡང་ཟེར། ཞོགས་པ་ཆེན་པོར་གྲགས་པ་དེས་གདན་ས་ལོ་བཅུ་དྲུག་མཛད། དེ་ནས་སྒང་ཐང་དཀར་བའི་རྗེ་དང་གཉིས་སུ་གྱེས་པས། དགོན་གོང་འོག་གཉིས་སུ་གྲགས་པ་བྱུང་ངོ་། གཉིས་པ་སྐུ་མཆེད་རིན་པོ་ཆེ་གསུམ་བྱོན་ཚུལ་ནི། དེ་ལྟར་བཤེས་གཉེན་སྟོན་པས་ར་སྒྲེང་དུ་བཀའ་གདམས་ཀྱི་ཆོས་སྲོལ་རྣམ་པར་དག་པ་བཙུགས་ཏེ་བཞུགས་པའི་དུས་སུ་འཕགས་པ་སྐུ་མཆེད་གསུམ་གྱི་བྱོན་ཚུལ་བཞིན་དུ་བསྟེན་ཏེ་ཡོན་ཏན་རྣམས་རྫོགས་པར་མཛད་དོ། །དེ་ཡང་བཤེས་གཉེན་ཕུ་ཆུང་བ་ནི། རྒྱལ་གྱི་རའི་ཕུ་ཆུང་དུ་ལྕགས་མོ་ལུགས་ལ་འཁྲུངས། རུས་ཟུར་ཚང་། ཡབ་ཡུམ་འབྱོར་པ་ཆུང་ཡང་གསེར་ཞོ་དོ་བསྣམས་ནས། རྒྱལ་ལྷ་ཁང་དུ་ཞང་ཆེན་པོ་ལ་རབ་ཏུ་བྱུང་སྟེ། མཚན་གཞོན་ནུ་རྒྱལ་མཚན་དུ་བཏགས། ཁུ་སྟོན་ལ་ཕར་ཕྱིན་འགྲེལ་པ་དོན་གསལ་ཚར་བཅོ་ལྔ་དང་། འདུལ་མངོན་ལ་སོགས་པ་མང་དུ་གསན་ཏེ་ཐོས་པ་ཆེར་མཛད། སྣེ་ཐང་དུ་ཇོ་བོ་ལ་ཆོས་ཀྱི་འབྲེལ་པ་ཞུས་པས། མི་རྟག་པ་རང་འཁྲུངས་སུ་བྱུང་སྟེ་གང་ལ་ཡང་ཞེན་ཆགས་མེད་པའི་བློ་སྐྱེས་གསུངས། དེ་ནས་ར་སྒྲེང་དུ་བྱོན་པས། སྐུ་མཆེད་གཞན་གཉིས་ཀྱང་བྱོན་ཏེ་རྟེན་འབྲེལ་དང་། ཕ་རོལ་ཏུ་ཕྱིན་པའི་གདམས་ངག བསླབ་ཕྱོགས། སྤྱོད་ཕྱོགས་ཀྱི་སྐོར་རྣམས་ཞུས། ལོ་བདུན་བསྟེན། ཁོང་རང་ལ་ཆོས་ཞུས་མང་དུ་བྱུང་ཡང་། ཤ་ཟུག་བཟང་པོ་རང་བཟའ་བའི་དུས་ཡིན། གཞན་ལ་སྟེར་བའི་དུས་མིན་གསུངས་ནས་སྒྲུབ་པ་གཙོ་བོར་མཛད་པས། བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་། ཆོས་ཐམས་ཅད་བདག་མེད་པར་རྟོགས་པའི་ཤེས་རབ་ཁྱད་པར་ཅན་འཁྲུངས། ཡི་དམ་མང་པོའི་ཞལ་གཟིགས། ཉམས་ལེན་བྱིན་རླབས་ཀྱི་བརྒྱུད་པའི་བཀའ་གཙོ་བོར་བབས། དེ་ནས་སྐུ་མཆེད་གསུམ་འབྲལ་མེད་དུ་སྒྲུབ་པ་མཛད་ཀྱིན་བཞུགས། ཕྱིས་ཡུང་ངའི་ཕུ་ཆུང་དུ་བཞུགས་ནས་ཀྱང་སྒྲུབ་པ་གཙོ་བོར་མཛད་དེ། བྲག་གི་དཀྱིལ་ན་གསེར་བྲེ་ཡོད་པ་མངོན་པར་མཁྱེན་པའི་དགོངས་ནས་ཕྱག་འཁར་གྱིས་རེག་པས་རང་བྱེ་སྟེ་བཏོན་པའི་རྗེས་དང་། གཟིམ་ཁང་གི་ནུབ་ན་བྲག་ལ་ཕྱག་མཛུབ་བཙུགས་སར་སྒྲུབ་ཆུ་དང་། ཞབས་རྗེས་དང་། དབུ་ཞྭའི་རྗེས་ཡིན་ཟེར་བ་ཡང་ད་ལྟ་བར་དུ་ཡོད་པར་གྲགས། འདི་ལ་སློབ་མ་གྲགས་ཆེ་བ། ཤ་ཕོ་སྒང་པ་དང་། འབན་ཚུལ་ཁྲིམས་རྒྱལ་བ་ཞེས་པ་སྐུ་ལུས་མ་སྤངས་པར་མཁའ་སྤྱོད་དུ་གཤེགས་པ་དང་། ཞོགས་སུ་འཁྲུངས་པ་སྡིང་པ་ཤེས་རབ་རྒྱ་མཚོ་དང་། ཞོགས་ཕུའི་ཀརྨ་བྲག་པ་རྒྱུན་དུ་བཟང་སྤྱོད་ལ་ཞལ་འདོན་མཛད་པ་ལ། ཆུ་ལེན་དུས་བདེ་བ་ཅན་གྱི་ཞིང་དེར་རབ་ཏུ་འགྲོ །ཞེས་པའི་སྐབས་སུ་མཁའ་སྤྱོད་དུ་གཤེགས་པ་སོགས། སྒྲུབ་པ་སྙིང་པོར་མཛད་པ་ཉི་ཤུ་ཙམ་བྱོན་ནོ། །སྤྱིར་སྐུ་མཆེད་གསུམ་གྲྭ་པ་ལ་རེས་སུ་ཆད་པ་མེད་པས། ཆོས་ཀྱི་འབྲེལ་པ་ལ་ཁྱད་པར་མེད་དོ། །དེ་ནས་པོ་ཏོ་བ་གཤེགས་པའི་གདུང་ཆ་ལྔར་བགོས་ཏེ། ཆ་གཅིག་དང་། ཐུགས་བཞུགས་པའི་དངུལ་གྱི་མཆོད་རྟེན་ཁྲུ་བཞི་པ་ཅིག་བྱས་པ། ཕུ་ཆུང་པས་གསན་པས། དངུལ་ལས་བྱས་ན་ངའི་གྲོགས་པོའི་གདུང་མ་འོངས་པ་ན་མི་ངན་གྱི་གྲོག་མོར་ཕུང་ངོ་འོངས་དོགས་འདུག་སྟེ། ད་བྱས་སྟིངས་རབ་གནས་ང་ལ་བབས་པས། དབྱར་རྒྱལ་གྱི་དོ་བོ་དགོན་པར་འགྲོ་བའི་ཞོར་ལ་བྱ་གསུངས་ནས་ཚུལ་ཁར་རབ་གནས་མཛད། ཁྱི་ལོའི་སྟོན་ཡུང་ངའི་ཕུ་ཆུང་དུ་བྱོན། བདུན་ཅུ་རྩ་དྲུག་བཞེས་པ་རྒྱལ་ཟླའི་ཉི་ཤུ་གཉིས་ལ་གཤེགས། ལ་ལར་པོ་དོ་དགོན་པར་གཤེགས་ཟེར་བ་ཡང་འདུག་གོ །བཤེས་གཉེན་པོ་ཏོ་བ་ནི། འཁྲུངས་ཡུལ་སྤྲས་བྲ་འོ་ཐང་། གདུང་རུས་གཉོས། ཡབ་སྐུ་བཤེན་སྲིད་ལ་དབང་ཕྱུག ཡུམ་མེ་མོ་བྱ་བའི་སྲས་སུ་མེ་མོ་ཡོས་ལ་འཁྲུངས། བྱིས་པའི་དུས་སུ་ཡབ་ཀྱི་མཆོད་གནས་མ་སྒོམ་བྱ་བ་ལ་སྒོམ་བསླབ་པར་ཞུས་པས། ཁོང་གི་ཞལ་ནས། ཐོས་པ་ཨེན་གཅིག་མ་བྱས་པའི་སྒོམ་མཆན་ཁུང་བས་ཕུ་ཐག་ཐུང་གསུངས། བྱིས་པའི་དུས་ནས་བྱང་ཆུབ་ཀྱི་སེམས་སྐྱེས་ཐོབ་ཏུ་མངའ་བར་ཤ་ར་བའི་བསྟོད་པ་ནས་གསུངས། དེ་ནས་ཡེར་པར་རྔོག་བྱང་ཆུབ་འབྱུང་གནས་དང་། རླན་ཚུལ་ཁྲིམས་བྱང་ཆུབ་ལ་མཁན་སློབ་ཞུས་ནས་རབ་ཏུ་བྱུང་། མཚན་རིན་ཆེན་གསལ་དུ་བཏགས། ཇོ་བོ་ཆེན་པོ་ལ་ཡང་དེའི་དུས་ཡེར་པ་མཇལ། དགེ་བཤེས་སྟོན་པ་བྱང་དུ་འབུལ་བའི་གསེར་སྒྲུབ་པ་ལ་བཞུད་འདུག་པས། ནག་ཚོས་ལོ་ཙཱ་མཛད། སྒོམ་རིམ་ཚར་གཅིག་གསན། དེ་ནས་ཁུ་སྟོན་གྱི་དྲུང་དུ་བྱོན་མཚན་ཉིད་ཀྱི་ཆོས་མང་དུ་གསན། ཡེར་པའི་ཞང་བཙུན་ལ་གནས་ཀྱི་སློབ་དཔོན་ཞུས། དེ་ནས་ར་སྒྲེང་དུ་བཤེས་གཉེན་སྟོན་པའི་དྲུང་དུ་དབྱར་དེ་གདམས་ངག་གཅིག་ཞུས་ནས་ཁམས་སུ་འབྱོན་དགོངས་པ་ལ། སྐུ་མཆེད་གསུམ་ལྷན་གཅིག་ཏུ་ཐོག་མར་ལམ་རིམ་དང་། སྤྱོད་འཇུག་གསན་ནས། བདག་ནི་གྲོལ་བ་དོན་གཉེར་ལ། །སྙེད་དང་བཀུར་སྟིས་འཆིང་མི་ནུས། །ཞེས་པའི་སྐབས་ཀྱི་མན་ངག་གསུངས་པའི་ཐད་དུ་ཐུགས་སྣ་འགྱུར་ཏེ། ཚེ་འདིའི་རྣམ་རྟོག་སྐྱུར་ནས་བཤེས་གཉེན་བསྟེན་པ་ཡིན་གསུངས། སྟོན་པ་ལོ་བདུན་བསྟེན་ནས་ཡོན་ཏན་ཐམས་ཅད་རྫོགས་པར་ཐོབ། ཐུགས་རབ་ཆེ་བས་ཤིན་ཏུ་མཉེས། སྟོན་པ་གཤེགས་ཁར། སྐུ་མཆེད་གསུམ་གྱི་ཐུགས་ལ་འཇིགས་སར་སྐྱེལ་མས་བོར་བ་འདྲ་བ་ཅིག་ཡོང་པར་འདུག་ན། ད་སུ་ལ་བརྟེན་སྙམ་སྟེ་སྤྱན་ཆབ་བྱུང་བས། མངོན་ཤེས་ཀྱིས་མཁྱེན་ནས། ངས་ཁྱེད་གསུམ་བརྟེན་པ་སུ་ཡང་མ་མཐོང་བས། ད་ཕྱིན་གསུམ་ཡན། ལྔ་མན་དཔུང་སྟེང་ཆོས་ལ་དགེ་བའི་བཤེས་གཉེན་མདོ་སྡེ་ལ་གྱིས། སེམས་བཟང་པོར་གྱིས་དང་ཁྱད་པར་ཅན་ཅིག་དང་། འཕྲད་དེ་ཡོང་གིས་གསུངས། མདུན་ན་ཇོ་ལེགས་ཡོད་པས་སེམས་བཟང་པོ་བྱ་བ་བྱང་ཆུབ་ཀྱི་སེམས་ལ་ཟེར་བ་མ་ལགས་སམ། ཞུས་པས། ཡིན་མོད་གསུངས་པས་དེ་སྔ་ནས་མ་གོ་རྒྱུས་མེད་པ་ལ། དེས་གསལ་བཏབ་པ་འདྲ་བ་ཅིག་བྱུང་ནས། དེའི་ཐབས་ལྐོག་ཏུ་མན་ངག་ཏུ་ཡང་གསུངས། ཚོགས་སུ་ལུང་དང་སྦྱར་ནས་ཀྱང་གསུངས། ཐ་ན་བཀའ་སྐྱོན་ཚུན་ཆོད་ཀྱིས་ཀྱང་དེའི་ཐབས་གསུངས་ནས་ཡོད་པས་ལོ་གཉིས་ཙམ་དུ་མྱ་ངན་བསངས་པ་འདྲ་བ་ཅིག་བྱུང་། ཕྱིས་སེམས་བཟང་པོ་བྱེད་པ་ལ། ཁོང་རང་དགོས་པར་སོང་བས་མྱ་ངན་ལ་སངས་དུས་མ་བྱུང་གསུངས། ར་སྒྲེང་ནས་བྱོན་ཏེ་སྐུ་མཆེད་གསུམ། དང་པོ་ཀླུང་ཤོད་ན་མགོར་བཞུགས། དེས་ནས་གནས་ངེས་མེད་དུ་སྒྲུབ་པ་མཛད། ཐུགས་གཏིང་ཟབ་པས་ཡོན་ཏན་འདི་ཡོད་ཆེར་མི་གསུང་ཡང་། བྱང་ཆུབ་ཀྱི་ཐུགས་རང་འཁྲུངས་ཀྱི་ཚུལ་དུ་མངའ། ཡི་དམ་ལྷ་དཔག་ཏུ་མེད་པའི་ཞལ་གཟིགས། མངོན་པར་ཤེས་པ་རྒྱ་ཆེན་པོ་དང་ལྡན་པའི་ཚུལ་བསམ་གྱིས་མི་ཁྱབ་བོ། །གཞན་ཕན་མཛད་པའི་ཐོག་མར་ལམ་སྒྲོན། ཡོན་ཏན་མཐའ་ཡས་པར་བསྟོད་པ། བསླབ་བཏུས་སོགས་གསུངས་པས་གྲངས་སུམ་བརྒྱ་ཙམ་བྱུང་། དེ་ནས་རིམ་གྱིས་འཕེལ་ཏེ། གྲྭ་པ་ཉིས་སྟོང་ཙམ་འདུས། དེ་ཐམས་ཅད་ཀྱང་ཚེ་འདི་བློས་ཐོང་པ་ཤ་སྟག་ཡོད་པར་གྲགས། རམ་སྡིངས་མ་བསྲུང་ན་བཞུགས་དུས་ཆ་རྐྱེན་མེད་པས་གོས་ཅུང་ཟད་གནང་བ་ལ། འདི་ཡེ་མི་གནང་བར་ཞུ། བདག་གི་བློ་ཆུད་ཟོས་ནས། ཟད་དུས་དགེ་བཤེས་ཀྱིས་གནང་སྟེ་འོང་སྙམ་ནས་བརྣབ་སེམས་སྐྱེ་ཞུས་པས་ཁྱེད་མ་འཛོམས་སྙམ་ནས་ཡིད་ཆད་མི་དགོས། ང་གནས་བརྟན་བཅུ་དྲུག་གི་གཅིག་ཡིན་པས་ང་དང་མཇལ་བས་བསོད་ནམས་ཆེ་གསུངས། ཕྱིས་གནས་བརྟན་ཡན་ལག་འབྱུང་གི་སྤྲུལ་པར་ཞལ་གྱིས་བཞེས། ཟང་ཟིང་གི་དངོས་པོ་བྲེ་གང་ཡང་འཛིན་ཆགས་མི་མཛད། ཕྱིས་པོ་ཏོར་བཞུགས་ནས་གཟིམ་ཆུང་ཀ་གཉིས་མ་དཔེ་ཁང་དུ་གྲགས་པ་སོགས་ལ་བརྟེན་ནས་བཞུགས། གཞན་ཕན་མཆོག་ཏུ་གྱུར་ཏེ་དགུང་ལོ་དོན་དགུ་བཞེས་པ་བྱ་ལོ་ལ་པོ་ཏོར་ཡི་དམ་མང་པོ་ཞལ་གཟིགས། ཤར་ཕྱོགས་ཀྱི་ནམ་མཁའ་ལ་ལྷས་རོལ་མོ་དང་བཅས་ཏེ་སྤྱན་དྲངས་པ་སྣང་བ་ལས་དག་པ་རྣམས་ཀྱིས་མཐོང་། དེ་ན་ཕྱག་ཐལ་མོ་སྦྱར་ཏེ་སེམས་ཅན་རྣམས་ཀྱི་སྐྱབས་དང་མགོན་དུ་གྱུར་ཅིག་གསུངས་ཏེ་གཤེགས། གདུང་བཞུ་བས་ཐུགས་ལྗགས་དང་། རིང་བསྲེལ་ཁ་དོག་སྣ་ལྔ་མང་དུ་བྱོན། དེ་ནས་སྲས་ཆེན་བརྒྱད་ཀྱི་ཀ་བ་རེ་བཙུགས་པའི་དབུ་རྩེ་ཀ་བརྒྱད་མ་དང་། ཞང་སྟོན་ཤར་བ་པས་སྔར་གྱི་ཆོས་རའི་ས་ལ་ཁྱམས་ཀ་བ་ཉི་ཤུ་རྩ་ལྔ་ཡོད་པ་བཞེངས་སོ། །སྔོན་གྱི་གཏམ་བརྒྱུད་ལ་པོ་ཏོའི་སྒོ་ལ་སུ་འཛུལ་རྒྱལ། སྡིངས་མའི་ཆུ་ལ་སུ་འཐུང་རྒྱལ་ཟེར་བ་ལ་ཁ་ཅིག་པོ་ཏོའི་སྒོ་སྟེང་དུ། སྡིངས་མ་བའི་གཟིམས་ས་མཛད་པས་ཟེར་ཀྱང་། པོ་ཏོ་བ་ཆོས་གསུངས་བའི་སྒོ་ནང་དུ་སུ་ཚུད་རྒྱལ་ཟེར་བའི་དོན་ཡིན་ཞེས་བཀའ་གདམས་པའི་བླ་མ་གོང་མ་རྣམས་གསུང་བར་གྲགས། རྒྱས་པར་དོན་དུ་གཉེར་ན་རྣམ་ཐར་ཆེ་ཆུང་གཉིས་ལ་སོགས་པར་བལྟའོ། །འདི་ལ་སློབ་མའི་མཆོག་བཀའ་བབས་བརྒྱད་པ་སོགས་པ་བཀའ་གདམས་གཞུང་པའི་སྲོལ་འཛིན་བྱོན་ཚུལ་འོག་ཏུ་འཆད་དོ། །གྲུབ་པའི་དབང་ཕྱུག་ཆེན་པོ་སྤྱན་སྔ་ནི། འཁྲུངས་ཡུལ་ཉན་གྱི་སྣང་ར་སྒང་། གདུང་རུས་དབས། ཡབ་ཤཱཀྱ་རྡོ་རྗེ། ཡུམ་ལི་མོ་ཡེ་ཤེས་སྒྲོན་གྱི་སྲས་སུ་ལྕགས་མོ་བྱ་ལ་འཁྲུངས། མཚན་སྟག་ཚབ་འབར་དུ་བཏགས། བྱིས་པའི་དུས་སུ་ཡུམ་གྱི་པང་དུ་ཁྱེར་ནས། གྲོང་འདུལ་བྱ་བ་ལ་ཕུང་པོ་ལྔའི་རབ་བྱེད་གསན་པས་ཕུང་པོ་འདི་ལྔར་འབྱེད་ཚོད་ཀྱིས་མཐར་སྟོང་པ་ཉིད་དུ་འདུག་སྙམ་དུ་རང་བཞིན་མེད་པའི་དོན་ཐུགས་སུ་ཆུད། དགུང་ལོ་བཅུ་གཉིས་ལ་གོང་མོ་སྣང་པ་བྱ་བ། རང་བཞིན་གྱི་རྣལ་འབྱོར་མ་ཅིག་བྱོན་རྫོགས་རིམ་ཟབ་པ་ཅིག་གནང་ནས་འདི་སྒོམས་གསུངས་ཏེ་མི་སྣང་བར་གྱུར། ཕྱིས་དེའི་སྟེང་དུ་སླེབ་པ་དཔལ་ལྡན་དགོན་པ་བས་གནང་བ་དེ་མིན་པ་མ་བྱུང་གསུངས། ལོ་བཅོ་བརྒྱད་ལ་ཏོད་ལུང་ཚ་ཐོག་དགོན་པར་མལ་ཤེས་རབ་སེམས་དཔའ་ལ་རབ་ཏུ་བྱུང་། མཚན་ཚུལ་ཁྲིམས་འབར་དུ་བཏགས། དེར་ཡུམ་གྱི་རྨི་ལམ་དུ་དུང་དཀར་གཅིག་བུས་པ་འཛམ་བུ་གླིང་བྱིན་གྱིས་ཐོས་པ་ཅིག་བྱུང་བས། ངའི་བུ་དེ་རབ་ཏུ་བྱུང་ནས་གྲགས་པ་ཡང་ཆེ་བ་ཅིག་འོང་བར་འདུག་གསུངས། སློབ་གཉེར་མཛད་དུས་ཚ་ཐོག་དགོན་པར་འབྱོན་པའི་ཞོར་ལ་ཇོ་བོ་སྙེ་ཐང་ན་མོ་ཆེར་བཞུགས་པ་དང་མཇལ་ཏེ་སེམས་བསྐྱེད་གསུངས་པ་གསན་དེའི་དུས་སྤྱི་བོར་ཕྱག་བཞག སཾསྐྲྀ་ཏའི་སྐད་དུ་བཀྲ་ཤིས་ཀྱི་ཚིགས་བཅད་མང་པོ་མཛད། གསེར་གླིང་པའི་བུམ་པ་པདྨའི་མཆུ་ཅན་གནང་། ངའི་ཆོས་བརྒྱུད་འཛིན་པ་ཅིག་འོང་གསུངས། དེ་ནས་ལན་ཚ་རབ་དང་། རུག་པར་སྡེ་སྣོད་ཀྱིས་གསན་སྦྱོང་མང་དུ་མཛད། རྒྱ་གར་རྡོ་རྗེ་གདན་ཆོས་ཀྱི་འབྱུང་ཁུངས་ཡིན་པས་དེར་འབྱོན་དགོངས་ཏེ། ལོ་ཙཱ་དང་རྒྱ་གར་གྱི་ཡིག་སྣ་མང་དུ་བསླབས། དེའི་ཚེ་སུམ་རུག་བར་བྱོན་ནས། འདི་རྣམས་ཕལ་ཆེར་དགྲ་འདྲེས་རྩེར་བ་དང་། ལྟོ་དོན་དུ་གཉེར་བ་ཤ་སྟག་ཡིན། ཆོས་བྱ་བསམ་ནས་རབ་ཏུ་བྱུང་བ་ནི་ཁྱོད་དང་། ཞང་བཙུན་གཉིས་ཡིན། སྙིང་ནས་ཆོས་བྱེད་ན་ར་སྒྲེང་དུ་དེངས་ཟེར་ནས་ཡུམ་གྱིས་ཁྲིད་ནས། དགུང་ལོ་ཉེར་དྲུག་ལ་འབྲོམ་སྟོན་པ་དང་མཇལ། སྤྱན་སྔའི་ཞལ་ནས། ངའི་མ་རང་བཞིན་གྱི་རྣལ་འབྱོར་མ་ཡིན་པས་འདིར་བསྐྱལ་བ་ཡིན་གསུངས། རྒྱ་གར་དུ་འགྲོ་བའི་ཆོས་འདྲ་ཞུས་པས། སྟོན་པའི་ཞལ་ནས། ཁྱོད་རྡོ་རྗེ་གདན་དུ་མ་འགྲོ ངས་རྗེས་སུ་འཛིན་པ་ཡིན། ཚེས་གྲངས་འདི་ལ་ལམ་རིམ་གྱི་དབུ་འཛུགས་གསུངས་ཏེ་བྱོན། ཉི་མ་ཤར་བ་དང་འཛོམས་པས་རྟེན་འབྲེལ་བཟང་གསུངས་ཏེ། ལམ་རིམ་གྱིས་ཁྲིད་པས་ཇི་ལྟ་བ་བཞིན་ཐུགས་ལ་འཁྲུངས། སྐུ་མཆེད་གཞན་གཉིས་དང་ལྷན་ཅིག་གཞུང་གི་བཤད་པ་གསན། སྤྱན་སྔའི་ཞལ་ནས། ཟིན་ངེས་པ་རེ་ལའང་ལན་གསུམ་གསུམ་སྟོན་པའི་སྤྱན་སྔར་བསྐྱར་ནས་ཤོག་བུ་དམར་པོ་ལ་བྲིས་ཡོད་གསུངས། ནུབ་ཅིག་མནལ་ལམ་དུ་རྡོ་རྗེ་གདན་དུ་བྱོན་པ་རྨིས་ཏེ། ཇོ་བོ་ཤེས་རབ་དབང་ཕྱུག་བྱ་བ་རྡོ་རྗེ་གདན་ལ་ལན་གསུམ་སྐོར་བ་ཅིག་དང་། ལོ་རྒྱུས་རྣམས་ཞུ་ཐུབ་བྱས་པས་ཅིག་པར་བྱུང་། རྒྱ་གར་དུ་མི་ཐོན་པ་ལ་ལྟ་བར་འདུག་པས་དེའི་དམ་བཅའ་མ་གྲུབ་པའི་སྡིག་སྦྱོང་དུ། ངས་ཚ་ཚ་བསགས་ན་རི་དེའུ་ཙམ་འོང་བ་བཏབ་གསུངས། སྟོན་པ་ལོ་བདུན་ཚུལ་བཞིན་དུ་བསྟེན། གཟིམས་གཡོག་ཀྱང་མཛད། རྒྱུན་དུ་སྤྱན་སྔར་བཞུགས་པས་མཚན་ཡང་དེ་ལྟར་དུ་གྲགས། ཡོན་ཏན་ཐམས་ཅད་རྫོགས་པར་མཛད། དེ་དུས་སྟོན་པས་ཐེག་པ་ཆེན་པོ་གསང་སྔགས་ལ་འོ་སྐོལ་ཕ་སྤད་གཉིས་ཙམ་ཡིན་གསུངས་པའི་ཡོངས་རྫོགས་རྣལ་འབྱོར་པས་ཞུས་སྣ་མཛད་དེ་གསང་སྔགས་ཀྱི་ཆོས་མང་པོ་སྐུ་མཆེད་གཞན་གཉིས་ལ་ཐུགས་རྒྱུས་མེད་པར་ལྐོག་ཆོས་སུ་སྣང་བས་ཡོངས་རྫོགས་རྣམ་འབྱོར་པ་དེ་ང་ལ་དྲིན་ཆེ་གསུངས། སྟོན་པ་གཤེགས་ནས་ཟང་ཟིང་གི་དགོས་སྐལ་མེད་དེ། ཆོས་ཀྱི་དགོས་སྐལ་ངེད་གསུམ་གྱིས་ཐོབ་གསུངས། དེ་ནས་ཇོ་བོའི་དངོས་སློབ་གྲགས་ཆེ་བ་རྣམས་ལ་བསྟེན་པའི་དམ་བཅའ་མཛད་དེ། རྣལ་འབྱོར་པ། དགོན་པ་བ། ཤེས་རབ་རྡོ་རྗེ། ཕྱག་དང་སྟོན་པ་སོགས་དང་། གསང་ཕུར་རྔོག་ལེགས་ཤེས་ལ་ཡང་ཟླ་བ་བཅོ་བརྒྱད་བསྟེན། ར་སྒྲེང་དུ་ཟླ་བ་རེ་ལ་ནས་བྲེ་ལྔ་ལ་བརྟེན་ཏེ་སྒྲུབ་པ་མཛད་དུས། ཡི་དམ་གྱི་ལྷས། རིགས་ཀྱི་བུ་དལ་འབྱོར་གྱི་མི་ལུས་ཐོབ་པ་དྲན་ནམ་གསུངས་ནས། མནལ་སངས་ཏེ་ཉིན་མཚན་གཡེལ་མེད་དུ་ཐུགས་དམ་མཛད་པས། རྣལ་འབྱོར་པའི་ཞལ་ནས། བུ་ཁམས་བག་རེ་བསང་གསུངས་པས། དལ་འབྱོར་རྙེད་པར་དཀའ་བ་འདི་བསམ་ན། སྐད་ཅིག་ཀྱང་གཡེལ་མ་ནུས་གསུངས། བསྐྱེད་རིམ་ལ་བརྟན་པ་ཐོབ་པར་རང་ལུས་མི་གཡོ་བའི་སྐུར་གཟིགས། མི་གཡོ་བའི་བསྙེན་པ་དུང་ཕྱུར་དགུ་སོང་། སྤྱན་རས་གཟིགས་པདྨ་གར་དབང་དང་། འཇམ་དཔལ་བརྟན་པའི་འཁོར་ལོ་ལ་སོགས་པ་ཞལ་གཟིགས། ཕ་འོང་ཐང་དུ་གྲུབ་ཆེན་ཀླུའི་བྱང་ཆུབ་དང་མཇལ། ཆོས་ཞུ་དགོངས་པ་ན་མི་སྣང་པར་གྱུར། རང་དད་གུས་ཆུང་པ་ཡིན་ནམ་དགོངས་ནས། བདག་བྱིན་རླབས་ཀྱི་སྒོར་བཞུགས་ནས་གསོལ་བ་བཏབ་པས། དངོས་སུ་བྱོན་ནས་བྱིན་གྱིས་བརླབས། ཆོས་བཞི་ཚན་བཞི་ལ་སོགས་པ་གསུངས་པ་ནི། གཉིད་དང་རྨི་ལམ་གྱི་དཔེས། སྣང་བ་འདི་འཁྲུལ་པར་ཤེས་པའི་རྣལ་འབྱོར། ཆབ་དང་ཆབ་བྲོལ་གྱི་དཔེས། སྣང་སྟོང་དབྱེར་མེད་དུ་ཤེས་པའི་རྣལ་འབྱོར། བུ་རམ་གྱི་མི་གཟུགས་ཀྱི་དཔེས། སྣང་གྲགས་ཀྱི་ཆོས་ཐམས་ཅད་རོ་གཅིག་ཏུ་ཤེས་པའི་རྣལ་འབྱོར་སྤྱོད་པ་ཕ་རོལ་ཏུ་ཕྱིན་པ་དྲུག་ལ་བསླབ་གསུངས། ཐམས་ཅད་སེམས་སུ་རྟོགས་པས་ཆོས་ཐམས་ཅད་ལ་སྐུར་པ་མི་གདབ་སེམས་སངས་རྒྱས་སུ་རྟོགས་ཀྱང་དགེ་བའི་བཤེས་གཉེན་མི་སྤངས། རང་ལ་འཁོར་བ་དང་ངན་སོང་གི་དོགས་པ་མེད་ཀྱང་སྡིག་པ་མི་དགེ་བ་ཕྲ་མོ་ཙམ་ཡང་སྤངས། རང་དང་སེམས་ཅན་ཐ་དད་མེད་པར་རྟོགས་ཀྱང་སེམས་ཅན་ཐམས་ཅད་ལ་སྙིང་རྗེ་ཆེན་པོ་མི་སྤང་གསུངས། ཏིང་ངེ་འཛིན་སེམས་ལ་ཞོགས། ཡང་དག་དོན་ལ་ལྟོས། བྱམས་དང་སྙིང་རྗེ་བསྒོམ། ལྷ་སྐུ་འཇའ་ཚོན་ལྟ་བུར་སྦྱོངས་གསུངས། ཨ་སྐྱེ་བ་མེད་པ། རླུང་མཚན་མ་མེད་པ། སེམས་རང་བཞིན་མེད་པ། རེ་ཤིག་ལུས་ལ་བརྟེན་པ་ཡིན་ཞེས་སོགས་མང་དུ་གསུངས་སོ། །

དེ་ནས་སྐུ་མཆེད་གསུམ་སོ་སོར་བྱོན་ནས། རླུང་ཤོད་ཕྱོར་བ་སོགས་གནས་ངེས་མེད་དུ་གཞན་དོན་རྒྱ་ཆེར་མཛད། དགུང་ལོ་དྲུག་ཅུ་ལ་ཉན་དུ་ཕེབས། ར་སྒྲེང་བཏབ་ནས་ལོ་ངོ་ཉི་ཤུ་རྩ་ལྔ་འགྲོ་བའི་ལྕགས་མོ་བྱ་ལོ་ལ། ཇོ་བོ་ཡབ་སྲས་ཀྱི་ལུང་བསྟན་པ། ལོའི་གཙུག་ལག་ཁང་གསང་བ་འདུས་པའི་ཐིག་བཏབ་ནས་རྨང་བཏིང་། དབུ་རྩེ་ཁྱམས་སྟོད་དང་བཅས་པ་དང་། འགྲན་གྱི་དོ་མེད་ལྔ་ལ་སོགས་པ་བཞེངས་ནས་དེའི་དུས་གླང་རི་ཐང་པ། ཉན་གྱི་ཚན་པར་དཔོན་སློབ་སྟོང་ཙམ་དང་། ཤར་བ་པ་སློབ་མ་མང་པོ་བཅས་ཏེ་ཆོས་གསན་ཅིང་། མཁར་ལས་ཀྱི་གྲོགས་མཛད་པས་དགོན་པ་མྱུར་དུ་གྲུབ། དབུ་རྩེའི་རྒྱབ་ཏུ་སྒྲུབ་ཆུ་དང་། བཀྲིས་མཆེད་ལྔའི་བླ་ཡེའི་རབ་གནས་ལ་ན་ག་བྷོ་དྷི་དངོས་སུ་སྤྱན་དྲངས་ཚུལ་སོགས་ཀྱི་སྙན་གྲགས་ཀྱང་འབྱུང་ངོ་། །ལོར་ལོ་བརྒྱད་བཞུགས། དགེ་འདུན་བདུན་བརྒྱ་ཙམ་འདུས། ལོ་ནས་སྙུག་གྲུམ་དགོན་པར་འབྱོན་པའི་ལམ་དུ། ཕ་བོང་དཀར་ལེབ་བྱ་བའི་སྟེང་ནས་བྱ་ཡུལ་གྱི་རྒྱབ་རི་གཟིགས་པས། རི་དེ་རྒྱལ་བའི་གཙུག་ཏོར་འདྲ། །ཡན་ལག་བརྒྱད་ལྡན་ཆུ་བོ་འབབ། །དེ་ཡི་ཤར་ལྷོ་ཕྱོགས་མཚམས་ན། །ཚེ་དང་ལྡན་པའི་དགོན་གནས་ཡོད། །རི་བྱ་ཡུལ་ཕ་གིའི་ཐད་དུ་གཙུག་ལགས་ཁང་བཞེངས་ནས་སེམས་ཅན་ལ་ཕན་པ་རྒྱ་ཆེན་པོ་གྱིས། ཞེས་ལུང་བསྟན། དེར་ཞབས་རྗེས་ཀྱང་བྱོན། དེ་ནས་སྙུག་གྲུམ་དུ་ལོ་གསུམ་བཞུགས་བླ་མ་དང་ཡི་དམ་མང་པོ་ཞལ་གཟིགས། ང་ནི་ཚོགས་ཡོངས་སུ་རྫོགས་པའི་གང་ཟག་ཡིན། ངའི་རྡོ་རྗེའི་གདན་འདི་ཡིན་གསུངས་སོ། །གཙང་པ་རིན་པོ་ཆེའི་ཞལ་ནས། བར་དོར་མཆོག་གི་དངོས་གྲུབ་བརྙེས་པའི་གསུངས་ཡིན་གསུངས་སོ། །དགུང་ལོ་དོན་གཅིག་བཞེས་པ། ལུག་ལོའི་སྨིན་དྲུག་ཟླ་བའི་ཉེར་གཉིས་སྙུག་གྲུམ་དུ་གཤེགས། འདི་ལ་སློབ་མའི་མཆོག་བསྒོམ་བཞི། འགྲན་གྱི་དོ་མེད་གསུམ་ལ་སོགས་པ་བཀའ་གདམས་གདམ་ངག་པའི་སྲོལ་འཛིན་བྱོན་ཚུལ་འོག་ཏུ་འཆད་དོ། །དེ་ཡང་སྐུ་མཆེད་གསུམ་པོ་འདི་ཁོང་རང་གསུམ་གྱི་གསུང་ལྟར་ན་གནས་བརྟན་ཆེན་པོ་བཅུ་དྲུག་གི་རྣམ་འཕྲུལ་དུ་བྱེད། རིགས་གསུམ་མགོན་པོའི་སྤྲུལ་པར་བྱེད་པ་ནི། ལམ་ཡིག་ལས། བལ་ཡུལ་གྱི་འཕགས་པ་ཤིང་ཀུན་ལ་ནམ་གྱི་གུང་མི་མ་ཡིན་རྣམས་སྐོར་བ་བྱིན་པའི་ཁྲོད་དུ་རྡོ་རྗེ་ཕག་མོའི་གྲུབ་པ་ཐོབ་པ་གཅིག་གིས་སྐོར་བ་བྱས་པས་གླིང་བུའི་སྐད་འདྲ་བའི་གླུ་ལས། སྔོན་དང་སྔོན་གྱིས་དུས་ཙ་ན། །ཐུགས་དགོངས་བླ་ན་མེད་པ་དེ། །ཇོ་བོ་ཨ་ཏི་ཤ་ལ་ཡོད། །རྟོགས་པ་བླ་ན་མེད་པ་དེ། །ཇོ་བོ་ཨ་ཏི་ཤ་ལ་ཡོད། །ད་ལྟ་མ་རིག་འཁྲུལ་པར་འཁྱམས། །ཟེར་བ་དང་། ཡང་། ཨ་ཏི་ཤ་ཡི་གདུང་ཚོབ་པ། །འཕགས་པ་སྐུ་མཆེད་གསུམ་པོ་ཡིན། །ཅིག་ཙམ་ལྷོ་བྲག་མཚམས་ན་ཡོད། །འཕགས་པ་འཇམ་དཔལ་གཉིས་སུ་མེད། །ཅིག་ཙམ་བལ་པོའི་ཡུལ་ན་ཡོད། །འཕགས་པ་ཝ་ཏི་གཉིས་སུ་མེད། །ཅིག་ཙམ་མང་ཡུལ་གྲོང་ན་ཡོད། །འཕགས་པ་པུ་གང་གཉིས་སུ་མེད། །ཟེར་བ་གསན་པས་དེའི་དོན་ནི་བརྟེན་དེ་རྣམས་རིགས་གསུམ་མགོན་པོ་དངོས་དང་ཁྱད་མེད་པས། དེ་རྣམས་གྱི་སྤྲུལ་པ་ཡིན་པར་བྱེད། ཅེས་བླ་མ་གོང་མ་རྣམས་ཀྱི་གསུང་ལས་འབྱུང་བ་དང་། ཡང་བཀའ་གདམས་གླེགས་བམ་གྱི་རྒྱལ་བུ་ཆགས་པ་མེད་པའི་སྐྱེས་རབས་ལས། བླ་ལ་ཆགས་པ་མེད་པའི་ཞལ་ནས། སྲས་ཀྱི་སྙིང་པོ་ཆགས་པ་མེད། །བདག་གི་རབ་འབྱིན་མགོན་པོ་གྱུར། །དེ་བཞིན་ཁྱེ་འུ་སྟོང་ཕྲག་དག །ལྔ་རྡོ་སྙིགས་མ་མ་རུང་ཚེ། །ཁྱེད་ཀྱིས་སྲིད་འཛིན་འགྲོ་བ་སྐྱོང་། །མཐའ་འཁོབ་ཡུལ་གྱི་དབུས་སུ་བྱེད། །རིན་ཆེན་ཕྲེང་བ་བསྟན་པའི་དཔལ། །ནོར་བུ་རྩེགས་པ་བཞིན་དུ་སྐྱོང་། །ས་བཅུའི་མགོན་པོ་འཇམ་པའི་དཔལ། །བསྟན་པ་རིན་ཆེན་གསལ་བར་བྱེད། །ས་བཅུའི་དབང་ཕྱུག་སྤྱན་རས་གཟིགས། །སྟོན་པའི་རྒྱལ་མཚན་འཛིན་པར་བྱེད། །ས་བཅུའི་དབང་ཕྱུག་རྡོ་རྗེ་འཛིན། །ཚུལ་ཁྲིམས་མེ་ལྕེ་རབ་འབར་ཏེ། །འཆལ་པའི་བུད་ཤིང་བསྲེག་པར་བྱེད། །ཅེས་གསུངས་པས་ཀྱང་རིགས་གསུམ་མགོན་པའི་སྤྲུལ་པར་གྲུབ་པ་ཡིན་ནོ། །དེ་ལྟར་བཤེས་གཉེན་སྟོན་པ་ལ། ལས་ཅན་གྱིས་སློབ་མ་བརྒྱད་ཅུ་ཙམ། མཚོ་ལ་པདྨས་བརྒྱན་པ་ལྟར་བྱོན་པ་ལས། ཆོས་ཀྱི་བརྒྱུད་པ་འཛིན་པའི་མཆོག་འཕགས་པ་སྐུ་མཆེད་གསུམ་ཡིན་ནོ། །གསུམ་པ་དེ་ལས་འཕེལ་བའི་སློབ་བརྒྱུད་བྱོན་ཚུལ་ལ་གཉིས། པོ་ཏོ་བ་ནས་བརྒྱུད་པ། བཀའ་གདམས་གཞུང་པའི་སློབ་མ་རྣམས་བྱོན་ཚུལ། རྗེ་སྤྱན་སྔ་ནས་བརྒྱུད་པ་བཀའ་གདམས་གདམ་ངག་པའི་སློབ་མ་རྣམས་བྱོན་ཚུལ་ལོ། །དང་པོ་ནི། པོ་ཏོ་བ་ལ་སྤྱིར་སློབ་མ་མང་དུ་བྱོན་ཀྱང་། གྲགས་ཆེ་བ་མཐའ་ཆེན་བརྒྱད། དབུས་ཀྱི་ཉི་ཟླ་ཟུང་གཅིག་ཅེས་པ་ལྟར་ན། གཙང་དུ་རམ་སྣང་གཉིས། མཉལ་དུ་གླིང་གཉོས་གཉིས། དོལ་དུ་འབེ་རོག་གཉིས། ཁམས་སུ་བྱ་ཕག་གཉིས་དང་། དབུས་སུ་གླང་ཤར་གཉིས་རྣམས་ཡིན་ལ། བཀའ་བབས་བརྒྱད་དུ་བྱེད་ན། བྱ་ཕག་གཉིས་མི་འདྲེན་པར། བྱམས་སྙིང་རྗེ་བྱང་ཆུབ་ཀྱི་སེམས་བདག་གཞན་བརྗེ་ནུས་པའི་བཀའ། གླང་རི་ཐང་པ་རྡོ་རྗེ་སེང་གེ་ལ་བབས། བཀའ་འགྱུར་རོ་ཅོག་ལ་གཞུང་བཤད་འཆད་པ་ཐམས་ཅད་མཁྱེན་པའི་ཡེ་ཤེས་ལ་མངའ་བསྙེས་པ་འདྲ་བ་ཡོད་པའི་བཀའ། ཤར་ར་བ་ཡོན་ཏན་གྲགས་ལ་བབས། གསུང་རབ་ཐམས་ཅད་སྐྱེས་བུ་གསུམ་གྱི་གདམས་ངག་ཏུ་དྲིལ་ནས། སྨན་པ་མཁས་པས་ནད་བརྟགས་ཏེ་ནད་ཐོག་ཏུ་སྨན་བཏང་བ་འདྲ་བ་ཡོད་པའི་བཀའ། སྣང་གྲེའུ་ལྷས་པ་ཡེ་ཤེས་རྒྱལ་མཚན་ལ་བབས། སྟོང་ཉིད་ཀྱི་བལྟ་བས་དངོས་པོ་དང་མཚན་མར་འཛིན་པ་ཐམས་ཅད་འཇིག་ནུས་པ་ཡོད་པའི་བཀའ། རམ་སྡིངས་མ་བ་འབྱུང་གནས་རྡོ་རྗེ་ལ་བབས། རྩོད་པ་པཎྜི་ཏའི་རྒོལ་བ་ཡང་བཟློག་ནུས་པ་ཡོད་པའི་བཀའ། དོལ་པ་ཤེས་རབ་རྒྱ་མཚོ་ལ་བབས། བླ་མ་ལ་སངས་རྒྱས་དངོས་ཀྱི་མོས་གུས་རྒྱུན་ཆད་མེད་པའི་བཀའ། གཉལ་པ་ཆོས་འབར་ལ་བབས། དང་ཚུགས་མཆོག་ཟུང་ཅིག་ལ་འགྲན་ནུས་པ་ཡོད་པའི་བཀའ། གྲབ་པ་ཡོན་ཏན་འོད་ལ་བབས། རྒྱུན་དུ་དཀོན་མཆོག་གི་དྲུང་དུ་མཆོད་པ་ཁྲ་ལམ་མེ་བ་འབུལ་བ་ཡོད་པའི་བཀའ། དགེ་བཤེས་བྲག་དཀར་བ་ལ་བབས་སོ། །དེ་ཡང་གླང་རི་ཐང་པ་ནི། འཁྲུངས་ཡུལ་འཕན་ཡུལ་གཉའ་གོང་གསེར་མ་གཤོང་། ཡབ་ཇོ་བོ་དར་མ་མདོ་བཟང་གི་སྲས་སུ་རྟ་ལོ་ལ་འཁྲུངས། རུས་ཞུགས་ཚངས། ཁོང་རང་གི་ཞང་བོ་བཤེས་གཉེན་གྲོག་མོ་མཁར་པ་ལ་རབ་ཏུ་བྱུང་། མཚན་རྡོ་རྗེ་སེངྒེར་བཏགས། རྒྱལ་བ་འོད་དཔག་ཏུ་མེད་པའི་སྤྲུལ་པར་བྱེད་ལ། སྔོན་ལོ་ཙཱ་བ་ཀ་བ་དཔལ་བརྩེགས་སུ་སྤྲུལ་ནས་བསྟན་པ་ཆེར་གསལ་བར་མཛད་ཅིང་། འདིར་གདུལ་བྱ་བློ་དམན་པ་རྣམས་ཀྱི་ངོར། དང་པོ་ཤིན་ཏུ་བཀྲེན་པའི་ཚུལ་མཛད་དེ། ལོ་ན་སྤྱན་སྔ་བ་ལ་ཆོས་གསན་དུས། ཡོས་པར་བ་རེས་གདན་ནོན་མཛད་ཀྱིན་བཞུགས། དེ་ནས་བསོད་སྙོམས་མཛད་པའི་བསྙེན་པ་གང་བྱུང་སྤྱིར་དགེ་འདུན་དང་། ཁྱད་པར་པོ་ཏོ་བ་དཔོན་སློབ་ལ་དྲངས་པས། སྐུ་བསོད་སྐྱེས་པ་ལྟར་མཛད་དེ། གྲྭ་པ་ཉིས་སྟོང་ཙམ་འཚོགས་པའི་རྒྱགས་ཁོང་རང་གིས་གནང་། གནས་ངེས་མེད་དུ་བཤད་སྒྲུབ་ཟུང་འབྲེལ་དུ་མཛད། གཙོ་བོར་པོ་ཏོ་བ་ལ་ཡུན་རིང་དུ་བསྟེན། ཕུ་ཆུང་བ་དང་། ཁམས་ལུང་བ་ཆེན་པོ་སོགས་ལ་ཡང་ཆོས་གསན། པོ་ཏོ་བ་གཤེགས་ནས། ཐང་གྲོང་ལྟག་ཏུ་གཏོར་མ་མཛད་དུས། གཏོར་སྡེར་བྱ་རོག་གིས་ཁྱེར་ཏེ་གླང་ཐང་གི་ཤར་རི་དེའུ་དེའི་ཁར་བཞག་པས། དཔོན་ཤཱཀྱ་བྱ་བས་ཞབས་ཏོག་བྱས་ཏེ་དེར་ལོ་གསུམ་སྒྲུབ་པ་མཛད། ཞོལ་དུ་སྒྲུབ་ཆུ་ཡང་བྱུང་། ཉིན་མཚན་དབྱེར་མེད་དུ་བྱང་ཆུབ་སེམས་ཀྱི་ཏིང་ངེ་འཛིན་སྒོམ་པའི་མདངས་ལ། ཀླུ་མོ་སྤུན་གསུམ་གྱིས་གླང་ཐང་གི་གནས་ཕུལ། དགེ་འདུན་གྱི་སྡེ་འཛུགས་པར་ཞུས། ཕྱིས་རི་དེའི་སྟེང་ནས་ཡར་འཕུར་ཏེ། ཐུགས་དམ་གྱི་ཕྲེང་བ་སྐྱུར་སར་ཁྲོན་པ་བྲུས། དབུ་ཞྭ་སྐྱུར་སར་བླ་བྲང་བྱས་ཏེ་དགོན་པ་བཏབ། སློབ་མ་མང་དུ་འདུས། བཀའ་གདམས་གཞུང་དྲུག ལམ་སྒྲོན་སོགས་ལ་འཆད་ཉན་མཛད་ཅིང་། བདག་གཞན་བརྗེ་བའི་བྱང་ཆུབ་ཀྱི་སེམས་ཁོ་ན་གཙོ་བོར་མཛད་དེ། གསུང་ལས་ཀྱང་། ཁོ་བོས་རླུང་ཐ་མལ་དུ་གཏོང་མ་མྱོང་གསུངས། ཞལ་བཞུགས་རིན་གླང་ཐང་གི་ལྕགས་རིའི་ནང་དུ་སྲོག་ཆགས་རྣམས་ཅིག་ལ་ཅིག་མི་འཚོ་བར་གྲགས། དགུང་ལོ་བདུན་ཅུ་པ་ཡོས་ལོ་ས་ག་ཟླ་བའི་ཉེར་གསུམ་ལ་དཔེའི་ཆུ་ལུང་དུ་གཤེགས། རྒྱ་ལྕགས་རི་གོང་ཁ་བ་ནི། ཁམས་སུ་གླང་རི་ཐང་པའི་སྙན་པ་ཐོས་པས། དབུས་སུ་ཆོས་ལ་འབྱོན་པའི་འདུན་པ་ཡོད་པས། གླང་རི་ཐང་པས་མཁྱེན་ནས་དེར་བྱོན། བགེགས་བསྐྲད། གཏོར་མས་བྱིན་གྱིས་བརླབས་པས་མིའི་ལུས་སུ་གྱུར། སྲིན་མོ་ཅིག་གི་གནོད་པས་ཕོ་བོ་དྲུག་འདས། ཁོང་རང་ཡང་སྔགས་ཀྱི་བཅིངས་ཏེ། ཁྱིའི་ལུས་སུ་བསྒྱུར་ཀྱང་། གླང་རི་ཐང་པ་ལ་མཇལ་བར་མགྲོན་པོའི་ཕྱི་ལ་ཡོང་། སྲིན་མོ་མནན་དུ་སླེབ་པ་ན། གླང་རི་ཐང་པས་མཁྱེན་ནས་དེར་བྱོན། བགེགས་བསྐྲད། གཏོར་མས་བྱིན་གྱིས་བརླབས་པས་མིའི་ལུས་སུ་གྱུར། སྟོང་ཉིད་སྙིང་རྗེ་ཐུགས་སུ་ཆུད་དེ་སློབ་མའི་མཆོག་ཏུ་གྱུར། ཇོ་བོའི་སློབ་མ་བཤེས་གཉེན་བལ་པོ་བས་བཏབ་པའི་ལྕགས་རི་གོང་ཁར་བཞུགས་པས་རྒྱ་ལྕགས་རི་བར་གྲགས། གཞན་ཡང་སློབ་མ་ཆེ་བ་དགེ་བཤེས་ལྕགས་ཞིང་བ། ཁྱུང་པོ་རྣལ་འབྱོར། རཱ་ལོ་ཙཱ་བ། གཉན་ཆེན་པོ། ཞང་ཞུང་པ། མདོ་སྡེ་པ་སོགས་བྱོན་ལ། ཞང་ཤ་ར་བ་ཆེན་པོ་ནི། པ་ཚབ་རོམ་པོའི་རྒྱུད་དུ་ཁྱི་ལོ་ལ་ཡུམ་ཕྱུགས་སྐྱོང་བའི་དུས་རྡོ་ལེབ་སྟེང་དུ་འཁྲུངས་ཏེ། དེ་ལ་ཞབས་རྗེས་ཀྱང་བྱོན། དགུང་ལོ་བཅོ་བརྒྱད་ལ་རླུང་ཤོད་ཕྱོར་བར་བྲོས་ཏེ་རབ་ཏུ་བྱུང་། མཚན་ཡོན་ཏན་གྲགས་སུ་བཏགས། དེ་ནས་སྤྱན་སྔ་ཕྱོར་ཕུར་སྐུ་འཚམས་མཛད་པའི་སར་མཇལ། ཟླ་བ་བཞི་མཚམས་ཁྲོད་དུ་བཞུགས་ཏེ་ཆོས་གསན། ད་ངའི་གྲོགས་པོའི་རྩར་རྒྱུགས་གསུངས་པས། སྟག་ལུང་དུ་པོ་ཏོ་བའི་སྤྱན་སྔར་བྱོན། གྲྭ་པ་ལོ་དགུ ནང་མི་ལོ་དགུ་སྟེ་བཅོ་བརྒྱད་བསྟེན། ཞར་ལ་ཕུ་ཆུང་པ་དང་། སྤྱན་སྔ་ལ་འདོད་ཆོས་རྫོགས་པར་གསན། པོ་ཏོ་བ་གཤེགས་ནས། ཡོན་ཏན་གྱི་རྗེས་སུ་འབྲང་བའི་འཁོར་རྣམས་དང་ལྷན་ཅིག་ཐོག་མར་རླུང་ཤོད་དུ་བྱོན་ཏེ་ཚོགས་བསྡུས། དེ་ནས་གནས་ངེས་མེད་དུ་འཆད་ཉན་མཛད་པས། གྲྭ་པ་ཉིས་སྟོང་བརྒྱད་བརྒྱ་ཙམ་འདུས། དེ་རྣམས་ཕལ་ཆེར་ཆོས་དོན་དུ་གཉེར་བ་ཤ་སྟག་གོ །དེ་ཡང་བཤེས་གཉེན་སྟོན་པ། རྣལ་འབྱོར་བ། དགོན་པ་བ། སྐུ་མཆེད་གསུམ་པ། སྣེའུ་ཟུར་པ། ཤ་ར་བ་རྣམས་ལ་བཀའ་གདམས་ཞལ་བརྒྱད་དུ་གྲགས་སོ། །རམ་སྡིངས་མ་བ་འབྱུང་གནས་རྡོ་རྗེ་ནི། ཁོང་ལ་རྣམ་ཐར་ཆེ་ཆུང་གསུམ་འབྱུང་བའི་སྐྱེ་བ་བཅུ་དྲུག་པའི་རྣམ་ཐར་དུ་བདག་ཉིད་ཏིང་ངེ་འཛིན་ལ་མཉམ་པར་བཞག་ཙ་ན། བསྐལ་པ་སྟོང་གི་སྐྱེ་བ་དྲན་ཏེ། ཡབ་ཡུམ། བླ་མ་དང་། ཆོས་གང་ལ་བཞུགས་པ། རུས་དང་རིགས་དང་། གནས་དང་ས་ཕྱོགས་ཐམས་ཅད་ཀྱང་དྲན། དུས་རྒྱུན་དུ་ས་ལེ་བ་ནི། སྐྱེ་བ་བཅུ་དྲུག་དྲན་ནོ་ཞེས་གསུངས་ལ། གཙང་དུ་རམ་སྡིངས་མ་བ་ཡི་ཆོས་སྡེ་བཏབ། གཞི་བདག་གི་མཛོ་མོ་དཀར་མོ་ཅིག་ཕུལ་བ་ས་ལ་ཐིམ་པས། ཆུ་མིག་ཁྱད་པར་ཅན་ཞིག་བྱུང་སྟེ། རྒྱ་གར་གྱི་མདའ་ཆུ་ཁྲོན་པ་སྐྱེས་དང་ཁྱད་མེད་སུས་འཐུངས་ཀྱང་རྒྱལ་གསུངས། ལྷོ་བྲག་སྡིངས་མ་བ་དེའོ། །དོལ་པ་ཤེས་རབ་རྒྱ་མཚོ་ནི། ཇོ་བོ་དོལ་དུ་ཕེབས་དུས་ཡུལ་འདི་ནས་བྱང་ཆུབ་སེམས་དཔའ་རྟགས་མཚན་ཅན་ཞིག་འབྱུང་། ཞེས་ལུང་བསྟན་ཏེ། ཕག་ལོ་ལ་འཁྲུངས། ཞོགས་ཡ་གད་ཀྱི་གཙུག་ལག་ཁང་བཞེངས། བེའུ་བུམ་སྔོན་པོའི་རྩ་ཚིག་སོགས་མཛད། དོལ་པ་དམར་གཞུང་དུ་གྲགས་ཏེ། འཁོར་ཉིས་སྟོང་ཙམ་འདུས། བདུན་ཅུ་རྩ་གསུམ་པ་ཕག་ལོ་རྒྱལ་ཟླའི་ཚེས་བཅུ་གསུམ་ལ་གཤེགས། སློབ་མ་ཆེ་བ་བདེ་གཤེགས་ཕག་མོ་གྲུབ་པ་སོགས་བྱོན་ཀྱང་། ཆོས་བརྒྱུད་འཛིན་པའི་མཆོག་ལྷ་དོན་སྟོང་པ་དང་། དེའི་སློབ་མ་འབྲི་སྒང་པ་སོགས་ཡིན་ནོ། །ལྷ་དོན་སྟེང་པས་བེའུ་བུམ་སྔོན་པོའི་རྩ་ཚིག་འགྲེལ་པ་མཛད་དོ། །གྲབ་པ་ཡོན་ཏན་འོད་ནི། འཕན་ཡུལ་གྲབ་ཏུ་འཁྲུངས། བཞུགས་གནས་གྲབ་ཕུའི་ཕོ་བྲང་སྡིངས་ཏེ། ཁོང་རང་གཞོན་དུས་ནས་ཐོས་པ་ཆེ་བས། དང་པོ་པོ་ཏོ་བ་ལ་ཆོས་ཀྱི་ཚོད་ལྟར་བྱོན་ཀྱང་། ཕྱིས་མི་ཕྱེད་པའི་དད་པ་སྐྱེས་ཏེ། ལྐོག་ཆོས་ལོ་བཅུ་དྲུག་གསན། པོ་ཏོ་བའི་གསུང་བགྲོས་བསྒྲིགས་པ། དཔེ་ཆོས་རྩ་འགྲེལ་མཛད་དོ། །དགེ་བཤེས་བྲག་དཀར་བ་ནི། སྤྲེའུ་ལོ་ལ་འཁྲུངས། འཁོར་བཞི་བརྒྱ་ཙམ་འདུས། དཔེ་ཆོས་གསན་པའི་ཆེད་དུ་གྲབ་པའི་སློབ་མ་མཛད། བརྒྱད་ཅུ་ཐམས་པ་ཡོས་ལོའི་དགུན་ཟླ་ཐ་ཆུང་གི་ཉེར་གཉིས་ལ་གཤེགས། དེའི་སློབ་མ་སློབ་དཔོན་བྱང་ཆུབ་སྣང་བ་པ། དེའི་སློབ་མ་གྲུབ་ཐོབ་གཅེས་སྒོམ། དེའི་སློབ་མ་སྐྱེར་སྒང་པ་ལ་སོགས་པ་བྱོན་ནོ། བཀའ་བབས་རྣམས་ཀྱི་ནང་ནས་ཞང་སྟོན་ཤ་ར་བ་པོ་ཏོ་བའི་ཆོས་སྲོལ་འཛིན་པའི་མཆོག་སྟེ། འདི་ལ་སློབ་མའི་མཆོག་བཀའ་བབས་ལྔར་གྲགས་པ་ནི། བྱང་ཆུབ་ཐུགས་ཀྱི་བཀའ་བབས་བྱ་འཆད་ཁ་བ། བྱིན་རླབས་ཀྱི་བཀའ་བབས་གཏུལ་སྟོན་བློ་གྲོས་གྲགས། གཞུང་བཤད་ཀྱི་བཀའ་བབས་དམ་པ་སྟབས་ཁ་བ། རྣམ་ཐར་གྱི་བཀའ་བབས་ཉི་མའི་འདུལ་འཛིན། ལོངས་སྤྱོད་ཀྱི་བཀའ་བབས་རྣལ་འབྱོར་ཤེས་རྡོར་རོ། །དང་པོ་བྱ་འཆད་ཁ་བ་ནི། འཁྲུངས་ཡུལ་ལོ་རོ། གདུང་རུས་ཇ། ཡབ་འཕགས་པ་སྐྱབས། ཡུམ་བསོད་ནམས་སྐྱིད་ཀྱི་སྲས་སུ་སྦྲུལ་ལོ་ལ་འཁྲུངས། སློབ་དཔོན་དྭགས་པོ་གཙང་འདུལ་ལ་རབ་བྱུང་ཞུས། མཚན་ཡེ་ཤེས་རྡོ་རྗེར་བཏགས། གཉལ་དུ་ངོར་རྗེ་བཙན་པོའི་ཆོས་འཁོར་ལ་བྱོན་པས། བ་རི་ལོ་ཙཱ་བ། རྔོག་ལོ་ཙཱ་བ་སོགས་སྡེ་སྣོད་འཛིན་པ་མང་པོ། གྲུབ་མཐའི་རྣམ་དབྱེ་འབྱེད་པ་གཟིགས་པས། ཆོས་འཚོལ་བ་ལ་མོས་ཏེ་བྱོན། གཡེ་ཆུང་གི་སྒྲེ་དགོན་པ་ན་སྤྱན་སྔའི་སློབ་མ་སྒྲེ་པ་ཆེན་པོ་བཞུགས་པ་དང་མཇལ། བསྙེན་རྫོགས་ཀྱི་མཁན་པོ་ཞུས་པས་མ་གནང་། ཁྱད་པར་གླང་རི་ཐང་པའི་སློབ་མ་ལྕགས་ཞིང་པ་ལ་བློ་སྦྱོང་ཚིག་བརྒྱད་མ་གསན་པས་དད་ནས། པོ་ཏོ་བའི་སློབ་མ་དོལ་པ་དང་། སྒྲེ་བ་ཇོ་གདན་ཚ་རོང་པ་དང་། དགས་པོ་གཙང་འདུལ་མཇལ་དུ་བྱོན་པ་ལ། མཁས་སློབ་ཞུས་ནས་བསྙེན་རྫོགས་མཛད་དེ། ཤ་མི་ལ་འདུལ་བ་གསན། དེ་ནས་ཡར་ལུང་དུ་བྱོན་ཏེ་བཤེས་གཉེན་མང་པོ་བསྟེན། ཁྱད་པར་གླང་རི་ཐང་པའི་སློབ་མ་ལྕགས་ཞིང་པ་ལ་བློ་སྦྱོང་ཚིག་བརྒྱད་མ་གསན་པས་དད་ནས། པོ་ཏོ་བའི་སློབ་མ་དོལ་པ་དང་། ལུང་སྣང་པ་གཉིས་ལོ་བཞི་བསྟེན། དོལ་པ་ལ་བེའུ་བུམ་སྔོན་པོ་ཡང་གསན། དེ་ནས་དགུང་ལོ་སུམ་ཅུ་ལ་གླང་རི་ཐང་པ་ལ་གཏད་ནས་བྱོན་ཀྱང་མ་མཇལ་བར། ཤ་ར་བ་ཞོའི་ཁང་པར་གནས་ན་བཞུགས་པ་དང་མཇལ། དང་པོར་ཚོགས་ཆོས་གསན། དེ་ནས་བློ་སྦྱོང་རྩད་ཆོད་དེ་ཉམས་ཁྲིད་དུ་ལོ་དགུ་བསྐྱངས་པས། བདག་གཅེས་འཛིན་གྱི་འཕྲི་བ་ཆོད་པ་ཅིག་བྱུང་གསུངས། སྟོན་ཆོས་ལ་བྱ་ཡུལ་དུ་བྱོན། སྤྲུལ་སྐུ་བྱ་ཡུལ་བ་ལ་གདམས་ངག་གི་སྐོར་རྣམས་རྫོགས་པར་གསན། འཕན་ཡུལ་དུ་བྱོན་ནས་ཀྱང་ཤ་ར་བ་ཡུན་རིང་དུ་བསྟེན། དེ་ནས་གནས་ངེས་མེད་དུ་ཐུགས་དམ་གྱི་གཙོ་བོ་བློ་སྦྱོང་ལ་མཛད་ཅིང་བཀའ་དོག་པ་ལ། ཕྱིས་འགྲེས་བུ་སྒོམ་ཆེན་སྡིངས་སུ་ཉེར་གནས་ལ་ཁྱོད་ཀྱི་སློབ་མ་འདི་རྣམས་ལ་མར་ཁུའི་སྐྱོགས་འདྲེན་གྱིས་མིང་སྟོན་བྱེད་གསུངས་ནས། དོན་བདུན་གྱི་ས་བཅད་མཛད་དེ་ཚོགས་ཆོས་སུ་གསུངས། དེ་ནས་མལ་གྲོར་བྱོན། འཆད་ཁ་རྙིང་མ་བཏབ། ལོ་བཅུ་གཅིག་ཏུ་ཆོས་གསུངས་པས་སློབ་མ་སྟོང་ཙམ་འདུས། དེ་ནས་མཐའ་ཕུར་ཟླ་བ་བརྒྱད་བཞུགས། ཁྱད་པར་གྱི་སྲས་སེ་སྤྱིལ་བུ་བ། རན་ཚན་རབ་ཀྱི་རྣལ་འབྱོར་བྱང་སེང་། རང་པོ་བོ་དྷི་ས་ཏྭ། དགས་པོ་ཉང་སོགས་དང་། ཡབ་སྲས་གཉིས་ཀའི་སློབ་མ་རྣལ་འབྱོར་བྱང་སེང་གིས་གྲོ་ས་དགོན་པ་བཏབ། གཞན་ཡང་ལྷོ་པ་ཐམས་ཅད་མཁྱེན་པ་སོགས་མང་དུ་བྱོན། བདུན་ཅུ་རྩ་ལྔ་པ་ལུག་ལོ་ཟླ་བ་བཅུ་གཅིག་པའི་ཚེས་ལྔ་ལ་མཐའ་ཕུར་གཤེགས། གདུང་བཞུ་བས་ཐུགས་ལྗགས་སོགས་བྱོན། གསེར་གྱི་མོ་ཏོག་གི་ཆར་བབས་པར་གྲགས་ཏེ། རྒྱས་པར་བློ་སྦྱོང་གི་བྱུང་ཚུལ་དང་། རྣམ་ཐར་ཆེ་ཆུང་དུ་བལྟའོ། །དེའི་ཁྱད་པར་གྱི་སྲས་སེ་སྤྱིལ་བུ་བ་ནི། འཁྲུངས་ཡུལ་ལྷོ་སྟོད་དེར་མ་སྒང་། གདུང་རུས་སེ། དགུང་སྙིང་གླང་ལོ་པ། རབ་བྱུང་དང་བསྙེན་རྫོགས་གཉིས་ཀའི་མཁན་པོ་ཆ་བས་མཛད། མཚན་ཆོས་ཀྱི་རྒྱལ་མཚན་དུ་བཏགས། བྱ་འཆད་ཁ་བ་དང་མཇལ། ཡུན་རིང་དུ་བསྟེན་ཅིང་། ཡོན་ཏན་བུམ་པ་གང་བྱོའི་ཚུལ་དུ་མཛད། སྔར་བྱ་འཆད་ཀྱི་ལུང་བསྟན་པ་བཞིན་འཆད་ཁ་གསར་མ་བཏབ། འཆད་ཁ་པ་ཆེན་པོའི་ནང་རྟེན་དུ་སྐུ་ལྡེར་རིན་པོ་ཆེ་དང་། ཕྱི་རྟེན་གྱི་མཆོད་རྟེན་ལ་སོགས་པ་བཞེངས་ནས་ཀླུང་ཤོད་དུ་བྱོན། སྤྱིལ་བུའི་དགོན་པ་བཏབ་སྟེ་རྣམ་གཡེང་སྤངས་ནས། སྟོད་དུ་མཁར་གོང་ལ་ག སྨད་དུ་ཉུང་ཞིང་སྣང་དུ་མཚམས་ཐོ་བརྒྱབས་ནས། ལོ་བདུན་དུ་མཚམས་མི་འདའ་མཛད། དེ་ནས་བྲག་དཀར་གནས་བརྟན་སོགས་ཀྱིས་སྤྱན་དྲངས་ནས་འཆད་ཁར་དགུན་ཆོས་ལ་བྱོན། གདུལ་བྱ་དུ་མ་སྨིན་པར་མཛད་ནས་དྲུག་ཅུ་རྩ་དགུ་པ་བྱ་ལོའི་དབྱར་ཟླ་ར་བའི་ཚེས་བཅུ་གསུམ་ལ་སྤྱིལ་བུར་གཤེགས། འདི་ལ་སློབ་མའི་མཆོག་ལྷ་ཆེན་པོ། གྱ་ཡངས་པ་ཐང་པ། ཉན་ལྷ་ལྡིངས་པ་སོགས་མང་དུ་བྱོན་པ་ལས། ལྷ་ཆེན་པོ་ནི། ཡབ་ཇོ་བོ་རྣལ་འབྱོར། ཡུམ་སྣ་ནམ་ཟའི་སྲས་སུ་སྟག་ལོ་ལ་ཕོ་བྲང་ཁང་དམར་དུ་འཁྲུངས། དགུང་ལོ་བཅོ་ལྔ་ལ་རྒྱ་དུར་གྱི་མཁན་པོ་ཀླུབ་དཀར་དང་། གཙང་པ་ཁྱུང་པོ་ལ་མཁན་སློབ་ཞུས། བྱ་པར་རབ་ཏུ་བྱུང་སྟེ། མཚན་བྱང་ཆུབ་རིན་ཆེན་དུ་བཏགས། དེ་ནས་བྱ་འཆད་ཁ་བའི་སྐུ་འདྲ་གཟིགས་པས་དད་པའི་རྐྱེན་བྱས་ཏེ་དགེ་བཤེས་སེ་དང་མཇལ། ཆོས་མང་དུ་ཞུས། ཉི་ཤུ་རྩ་བཞི་ལ་རྒྱ་སར་སྒང་ནས་མཁན་པོ་རླན་སྤྱན་དྲངས་ཏེ་བསྙེན་པར་རྫོགས། གཞན་ཡང་ཁ་ཆེ་པཎ་ཆེན་ལ་སོགས་པ་མང་དུ་བསྟེན། སེ་སྤྱིལ་བུ་བ་གཤེགས་ནས། འཆད་ཁ་སྤྱིལ་བུའི་གདན་ས་མཛད། བཀའ་འགྱུར་གྱི་ལུང་བཞུགས་པས། ལྷ་ལུང་གི་དབང་ཕྱུག་ཏུ་གྲགས། སངས་རྒྱས་སྨན་བླ་སོགས་ཡི་དམ་མང་པོའི་ཞལ་གཟིགས་པ་རྣམ་ཐར་དུ་གསལ། འབྲུག་ལོ་བདུན་ཅུ་རྩ་ལྔ་ལ་འཆད་ཁར་གཤེགས། ལྷ་འགྲོ་མགོན་ནི། ཡབ་ཇོ་འབག་གི་སྲས་སུ་རྟ་ལོ་ལ་འཁྲུངས། ལོ་བཅུ་དྲུག་པ་ལ་འཆད་ཁར་ཁུ་བོའི་དྲུང་དུ་དགེ་བསྙེན་ཞུས། དེ་ནས་སྐྱུར་མོ་ལུང་དུ་སྦ་ཏི་ལ་རབ་ཏུ་བྱུང་སྟེ། མཚན་དབང་ཕྱུག་འོད་དུ་བཏགས། དེ་ནས་པོ་ཏོར་དགེ་བཤེས་གནས་བརྟན་ལ་མཁན་པོ་ཞུས་ཏེ་བསྙེན་པར་རྫོགས། ལྷ་ཆེན་པོ་གཤེགས་ནས་གདན་ས་མཛད། མི་གཡོ་བའི་གྲུབ་པ་བརྙེས་པས་སྟག་ཤམ་ཅན་དུ་ཡང་གྲགས། གདུལ་བྱ་མང་པོ་སྨིན་པར་མཛད་ནས་བདུན་ཅུ་རྩ་བཞི་པ་ལུག་ལོ་ཟླ་བ་དགུ་པའི་ཉེར་གཅིག་ལ་སྤྱིལ་བུར་གཤེགས། ལྷ་བྲག་ཁ་བ་ནི། ཇོ་བོ་ཤཱཀྱ་བཀྲ་ཤིས་ཀྱི་སྲས་སུ་ཁྱི་ལོ་ལ་འཁྲུངས། ལྷ་འགྲོ་མགོན་དང་མཇལ་ཏེ་རབ་ཏུ་བྱུང་། མཚན་ཡེ་ཤེས་བློ་གྲོས་སུ་བཏགས། སྦས་པ་སྟོན་གཞོན་སོགས་ལ་ཆོས་རྣམས་རྫོགས་པར་གསན། འཆད་ཁ་སྤྱིལ་བུའི་གདན་ས་མཛད། སུམ་ཅུ་རྩ་བདུན་ལ་གཤེགས། དེ་ནས་ཇོ་འཕེལ་གྱི་སྲས་ལྷ་དབང་ཕྱུག་ཡེ་ཤེས། འབྲུག་ལོ་པ། ཟུར་ཁང་པ་སྔ་བར་གྲགས་པས་གདན་ས་མཛད་དེ་དྲུག་ཅུ་ལ་གཤེགས། དེ་ནས་གྲགས་པ་རིན་ཆེན་གྱི་སྲས་ལྷ་བློ་གྲོས་འོད་བྱ་ལོ་པ། གདན་ས་ལོ་བཞི་བཅུ་མཛད་དེ། ལྷ་རིན་ཆེན་སེང་གེ མཁན་ཆེན་སེངྒེ་རྒྱལ་མཚན་སོགས་སྨིན་པར་མཛད། དྲུག་ཅུ་རྩ་བཞི་ལ་གཤེགས། མཁན་ཆེན་སེངྒེ་རྒྱལ་མཚན་པའི་སྐུ་ཆེ་བའི་ཡོན་ཏན་རྣམས། ཇོ་བོ་བརྟན་སྒོམ་དཔལ་གྱིས་བྱས་པའི་རྣམ་ཐར་དུ་གསལ་ལ། དེ་ལ་སློབ་མ་རྗེ་བཙུན་ཡེ་མགོན་པ། བྱང་སེམས་ར་སྒྲེང་པ་ཤཱཀྱ་བསོད་ནམས་སོགས་མང་དུ་བྱོན་ནོ། །རྒྱ་ཡངས་པ་ཐང་པ་ནི། གདུང་རུས་རྒྱ། མཚན་ཉི་མ་དབང་ཕྱུག སྤང་པའི་དགོན་པ་བཏབ། དགུང་ལོ་ལྔ་བཅུ་བཞུགས། དེ་ནས་གདན་ས་ཡང་མང་དུ་ཉན་ལྷ་སྡིངས་པས་ཉན་གྱི་ལྷ་སྡིངས་བཏབ། བློ་སྦྱོང་གི་བླ་མ་བརྒྱུད་པར་རམ་པ་ལྷ་སྡིངས་པ་ཞེས་འབྱུང་ལ། སྟོད་ལུང་མདར་རམ་པ་ལྷ་སྡིངས་ཞེས་པའི་དགོན་པ་ཡོད་པས། འདི་དང་བླ་མ་གཅིག་མི་གཅིག་བརྟག་པར་བྱའོ། །རམ་པ་ལྷ་སྡིངས་པ་ནས། སངས་རྒྱས་དབོན། སློབ་དཔོན་ཡོན་ཏན་དཔལ། མཁན་ཆེན་བདེ་པ་དཔལ། མཁན་ཆེན་བཀའ་བཞི་བ། རིན་པོ་ཆེ་བསོད་གྲགས་པ། རྒྱལ་སྲས་ཐོགས་མེད་པ་སྟེ། དེ་རྣམས་ཀྱི་རྣམ་ཐར་ཆོས་རྗེ་མཚལ་མིན་པ་བསོད་ནམས་བཟང་པོས་མཛད་པར་གསལ་ལོ། །བྱིན་རླབས་ཀྱི་བཀའ་བབས་གཏུམ་སྟོན་བློ་གྲོས་གྲགས་ནི། གདུང་རུས་གཏུམ། འཁྲུངས་པ་ལྕགས་མཁར་སྟེ། ཤ་ར་བ་སོགས་བཀའ་གདམས་ཀྱི་བླ་མ་མང་དུ་བསྟེན། དེ་ནས་སྣར་གྱི་མདའི་ཐང་ལ་ལོ་ར་ཡོད་པར་སྤྱིལ་བུ་མཛད་དེ། ཆུ་མོ་བྱའི་ལོ་ལ་གཞི་བཙུགས་སྣར་ཐང་གི་དགོན་པ་བཏབ་སྟེ། ལོ་བཅུ་བཞི་བཞུགས། གྲྭ་པ་སྟོང་ཙམ་འདུས་པའི་གྲགས་ཆེ་པ་རྡོ་སྟོན་རྡོ་རྗེ་གྲགས། བདུད་རྩི་གྲགས་ཞག་བཙུན་རྡོ་རྗེ་འོད། སྒ་སྟོན་ཤེས་རབ་གྲགས་རྣམས་ལས་རྡོ་རྟོན་རྡོ་རྗེ་གྲགས་ལ་ཉིད་ཀྱི་དགོན་པ་འདི་བཟུང་ལ་འགྲོ་དོན་སྐྱོངས་གསུངས་ནས། ཁོང་རང་བྱང་རྟ་སྡེའི་ཆོས་ལུང་དུ་ཐུགས་དམ་ལ་བཞུགས་ཏེ། ཆོས་ལུང་སྐུ་གཤེགས་སུ་གྲགས། རྡོ་སྟོན་གྱི་གདན་ས་ལོ་ཉི་ཤུ་མཛད། དེ་ནས་ཞང་བཙུན་རྡོ་རྗེ་འོད་ཀྱིས་གདན་ས་ལོ་བརྒྱད་མཛད། དཔལ་ལྡན་གྲོ་མོ་ཆེ་བ་ནི། གདུང་རུས་གྲོ། འཁྲུངས་ཡུལ་ཆུ་སྒོ་བ། མཚན་བདུད་རྩིའི་གྲགས། ཡི་དམ་མང་པོ་དང་གནས་བརྟན་བཅུ་དྲུག་ཞལ་གཟིགས། སྣར་ཐང་གི་དབུ་རྩེ་རྙིང་མ་བཞེངས། གདན་ས་ལོ་སུམ་ཅུ་སོ་དགུ་མཛད། དེ་ནས་ཞང་སྟོན་ཆོས་ཀྱི་བླ་མས་གདན་ས་ལོ་བཅུ་མཛད་དེ། དེ་ནས་སངས་རྒྱས་སྒོམ་པས་གདན་ས་ལོ་བཅུ་མཛད་དེ། ཚོགས་ཆོས་ཆེན་མོར་གྲགས་པ་དང་། ལམ་སྒྲོན་ཊཱིཀྐ་སོགས་མཛད་ཅིང་། དབེན་གནས་བྱང་ཆེན་བཏབ། གཉལ་ཞིག་གི་སློབ་མ་གྲགས་པ་སེངྒེ་སྤྱན་དྲངས་ཏེ་མཚན་ཉིད་ཀྱི་བཤད་གྲྭ་བཙུགས། དེ་ནས་འཆིམ་ནམ་མཁའ་གྲགས་པ་ཞེས་བྱ་བ། གདུང་རུས་འཆིམ། ཉང་སྟོད་སྨོན་གྲོའི་ཤུ་ཁའུ་བྱ་བར་སྐུ་འཁྲུངས། གནས་བརྟན་བཅུ་དྲུག་གི་གཅིག་ཏུ་གྲགས། མཁྱེན་རབ་དང་འཕྲིན་ལས་ཆེ་བས་རྩོམ་ཆོས་མང་དུ་མཛད་ཅིང་། གདན་ས་ལོ་སུམ་ཅུ་རྩ་དྲུག་མཛད། ཆོས་རྒྱལ་འཕགས་པའི་བླ་མ་ཡང་མཛད་ནས། ཆོས་འཁོར་ཆེན་པོ་ཅིག་གི་གྲལ་དབུ་ལ་སྤྱན་འདྲེན་ཞུས། དེ་ནས་སྐྱེ་སྟོན་པར་གྲགས་པས་གདན་ས་ལོ་བཅོ་ལྔ་མཛད་དེ། སྣར་ཐང་གི་གཙུག་ལག་ཁང་ཆེ་བ་དང་ལྕགས་རི་སོགས་མཛད། དེ་ནས་ཆོས་རྗེ་ཉི་མ་བ། མཁན་ཆེན་འདུལ་བ་འཛིན་པ། འཆིམ་བློ་བཟང་གྲགས་པ་སོགས་དཔལ་སྣར་ཐང་དུ་བཀའ་གདམས་པའི་བཤེས་གཉེན་བཟང་ལ་མང་བ་རིམ་པར་བྱོན་པ་ཡིན་ནོ། །གཞུང་བཤད་ཀྱི་བཀའ་བབས་དམ་པ་སྟབས་ཁ་བས། སྟབས་ཁ་གྲྭ་པའི་སྒང་། འདོད་འཇོ་ཆོས་ཀྱི་སྒང་། ཁྲ་ཕུ་ལོངས་སྤྱོད་ཀྱི་སྒང་སྟེ་དགོན་པ་གསུམ་བཏབ། གྲྭ་པ་བརྒྱད་བརྒྱ་ཙམ་འདུས། གྲགས་ཆེ་བའི་ཞང་བཞི་ནི། ཞང་སྟོན་འདོད་འཇོ་བ་དར་མ་གཡུང་དྲུང་། ཞང་སྟོན་ཁང་མོ་ཆེ་བ། ཞང་སྟོན་ཤོ་མ་ར་བ། ཞང་སྟོན་གཙོ་ཐང་པ་ཆེན་པོའོ། །ཐུགས་ཀྱི་སྲས་བཞི་ནི། སྒང་ཐང་དཀར་བ་རྡོ་རྗེ་རིན་ཆེན། གུ་ར་བ་ཚུལ་ཁྲིམས་རྡོ་རྗེ། སྟབས་ཁའི་རྣལ་འབྱོར་པ་ནམ་མཁའ་རིན་ཆེན། ཁྲ་ཕུ་བ་འདུལ་བ་འཛིན་པའོ། །འདོད་འཇོ་ཞང་སྟོན་དར་མ་གཡུང་དྲུང་ལ་གཏད། དེ་ནས་རོང་སྟོན་ཁ་པོ་ཆེས་བསྐྱངས་སོ། །ཁྲ་ཕུ་འདུལ་འཛིན་པས་བསྐྱངས་ཏེ། དེ་ལས་འཕེལ་བའི་ཞང་སྟོན་དར། གྲབ་ཕུ་བ་ཆེན་པོ། དེའི་སློབ་མ་བཙན་དགོན་པ་བ་སོགས་བྱོན་ཏེ་རྒྱས་པར་མ་སྤྲོས་སོ། །གཉིས་པ་རྗེ་སྤྱན་སྔ་ནས་བརྒྱུད་པ་བཀའ་གདམས་གདམ་ངག་པ་རྣམས་བྱོན་ཚུལ་ནི། རྣལ་འབྱོར་གྱི་དབང་ཕྱུག་སྤྱན་སྔ་ལ་སློབ་མའི་མཆོག་སྒོམ་བཞི། འགྲན་གྱི་དོ་མེད་གསུམ་དང་། གཞན་ཡང་མཁར་ཕུ་བ། རོལ་པོ་རྡོ་རྗེ། གཡོ་ནས་སྒྲེ་པ་ཆེན་པོ། ཞང་སྟོན་དཔལ་བརྩེགས། རྒྱ་རྩེ་སྒྲོ་བ། འཕན་ཡུལ་གྱི་སྒྲོ་ལག་པ་ཆེན་པོ། ཞང་ཀ་མ་བ་ཆེན་པོ་ཤེས་རབ་འོད། ཀུ་མ་ར་ཤཱཀྱ། སྐུ་སྲུང་སྟོན་པ། འདུལ་འཛིན་ལ་གུར་སྟོན་པ། འཆང་བུ་བ་ཆེན་པོ། དགག་དབྱེ་ཤེས་རིན་སོགས་མིང་ཆེན་ཉི་ཤུ་རྩ་ལྔ་ཙམ་བྱོན་པའི་དགག་དབྱེ་ཤེས་རིན་གྱི་ཉན་ཆེར་སྒྱེས་ཀྱིས་མཆོད་ཁང་བཞེངས། སྤྱིར་གྲྭ་པ་བདུན་བརྒྱ་ཙམ་འཚོགས་པའི་སྒོམ་བཞི་ནི། ཟར་པ་ཟག་སྒོམ་རྡོ་རྗེ་ཡེ་ཤེས་ཀྱིས་མལ་གྲོ་ཟར་གྱི་མཆོད་ཁང་བཞེངས། རུག་པ་སྟོན་སྒོམ་གྱིས་ཀླུང་ཤོད་རུག་པའི་མཆོད་ཁང་བཞེངས། མང་ར་སྒོམ་པ་བརྩོན་འགྲུས་འབར་གྱིས་ཐང་སྐྱའི་དགོན་པ་བཏབ། དབུ་རྩེ་གསར་མ་བཞེངས། རལ་པ་སེང་སྒོམ་གྱིས་རླུང་ཤོད་ངོར་གྱི་མཆོད་ཁང་བཞེངས། འགྲན་གྱི་དོ་མེད་གསུམ་ནི། སྟོན་ལུང་པ་ཆེན་པོ། བྱ་ཡུལ་བ་ཆེན་པོ། སྙུག་གྲུམ་པ་ཆེན་པོའོ། སྙུག་གྲུམ་པས་ཀླུང་ཤོད་མདར་སྙུག་གྲུམ་དགོན་པ་བཏབ། སྟོད་ལུང་པ་ཆེན་པོ་ནི། འཁྲུངས་ཡུལ་སྟོད་ལུང་གསེར་ཕུག དགུང་སྙིང་སྤྲེའུ་ལོ་པ། རབ་ཏུ་བྱུང་པ་ཁྱུང་པོ་ཇོ་བསོད་ལ་མཛད། མཚན་རིན་ཆེན་སྙིང་པོར་བཏགས། གཙང་ཕྱོགས་ལ་གཞོན་ནུ་ནས་མཚན་ཉིད་ཀྱི་སློབ་གཉེར་ལ་བྱོན་ནས། བླ་མ་སེང་གེ་སྒྲ་གཅན་འཛིན་བཟང་པོ་དང་། པཎྜི་ཏ་འབུམ་ཕྲག་གསུམ་པ་སོགས་མཁས་པ་མང་པོ་ལ་མདོ་སྔགས་ཀྱི་གསན་སྦྱོང་རྒྱ་ཆེར་མཛད། རྩོད་པ་ཡང་བཟང་། དེ་ནས་སྟོད་ལུང་ཐག་མར། དབུས་གཙང་གི་སྟོན་ཆེན་ཐམས་ཅད་འཚོགས་ནས་ཆོས་ཀྱི་བགྲོས་གླེང་འབའ་ཞིག་མཛད་པས། ཁོང་གིས་ཀྱང་གྲྭ་སྐོར་ལ་བྱོན། རྩོད་པ་མཛད་པས། ཀློ་ཀྱ་གཙོ་རྒན་བྱ་བས་ཉན་ནས། ཁོང་ན་རེ་བོད་དབུས་གཙང་གི་སྟོན་ཆེན་འདི་ཙམ་ཅིག་ཉིན་རེ་བཞིན་འཚོགས་ནས། མར་འཁོར་བ་ཡོང་ལུགས། ཡར་ཐར་པ་སྒྲུབ་ལུགས་ཀྱི་ཆོས་ཚིག་བཞི་པ་ཅིག་མེད་པར། ཀླད་པ་གས་གས་བ་གླང་དཀར་ཟལ་ལ་འཆི་བ་འདི་བྱུང་རེ་ཆེ་ཟེར་བ་གསན་པས། ཁོས་ཀྱང་དེ་ཙམ་ཅིག་གོ་འདུག་ན། ད་རྒྱ་གར་དུ་ཆོས་འཚོལ་བ་ལ་འགྲོ་དགོངས་ནས་བྱོན་པ་དང་། མཁའ་རུ་བའི་གྲྭ་བ་དགེ་སློང་སྣམ་སྦྱར་ཕྲག་པར་བཞག་པ་ཚུལ་ཁྲིམས་ཀྱི་དྲི་བྲོ་བ་ཅིག་དང་མཇལ་ཏེ། ཚེ་འདི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པ་མཚོ་ལ་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བགྱི། །ཞེས་གསུངས། དེ་སུས་མཛད་བྱས་པས། ཇོ་བོའི་གསུང་ཡིན་ཟེར། གང་ནས་བྱོན་བྱས་པས། མཁའ་རུ་དགོན་པ་ནས་འོང་ཟེར་བས། མཁའ་རུར་བྱོན། སྐྱབས་འགྲོའི་ཆོས་སྐོར་གསུངས་པ་གསན། དེ་ནས་མཁའ་རུ་བས་ལུང་བསྟན་ནས། ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན། ལྟ་བའི་དྲི་བ་མང་པོ་མཛད་པས། སྟོན་པ་སྔོན་དུ་ཐབས་གོམས་པས་རྒྱུ་སྨིན་དགོས་པ་ཡིན་གསུངས་ནས་ཐོག་མར་སྐྱབས་འགྲོ་དང་། བྱམས་སྙིང་རྗེ་ནས་རིམ་གྱིས་ཁྲིད་དེ་ཆོས་མང་དུ་གསན་ནོ། །དེ་ནས་སྤྱན་སྔ་སྐུ་མཚམས་ལ་བཞུགས་པས། རྣལ་འབྱོར་པས་མཇལ་སྣ་མཛད་དེ་ཆོས་གསན། རྩ་བའི་བླ་མ་ཞུས། དེ་ནས་རྣལ་འབྱོར་པ་ལོ་དགུ། དགོན་པ་བ་ལོ་ལྔ་བསྟེན། སྤྱན་སྔ་ལོ་བདུན་འབྲལ་མེད་དུ་བསྟེན་ཏེ་བཀའ་གདམས་ཀྱི་ཆོས་ཐམས་ཅད་རྫོགས་པར་གསན། གསེར་སྲང་བརྒྱད་བརྒྱ་འབུལ་བར་དམ་བཅས་ཏེ། ཕྱེད་ཕྱག་ཏུ་ཕྱིན་པ་ལ་སྤྱན་སྔ་གཤེགས་པས། བཞི་བརྒྱའི་ཚབ་ཏུ་དགུང་ལོ་དོན་གཉིས་ལ། ལམ་པའི་གཙུག་ལག་ཁང་གི་རྨང་བཏིངས་ཏེ་རྫོགས་པར་གྲུབ། སྐུ་གསུང་ཐུགས་ཀྱི་རྟེན་སྔ་ཕྱི་དཔག་ཏུ་མེད་པ་བཞེངས་པའི་གྲགས་ཆེ་བ་ལ། རབ་གནས་ཀྱི་དུས་སུ་སྤྱན་སྔ་པ་ལ་ཆོས་གསུངས་པའི། འཇམ་དཔལ་དཔའ་བོའི་སྐུ་ལ་སོགས་པ། རྒྱུད་སྦྱངས་མ་བདུན་དང་། རྣལ་འབྱོར་པས་རབ་གནས་མཛད་པ། པོ་ཏོའི་གསུང་འབྱོན། མཁའ་རུའི་ལྗང་སྐྱེས། བཙན་འགྲོའི་ཆུ་ཁོལ་ཞེས། རྟེན་རྟགས་ཐོན་གསུམ་དུ་གྲགས་པ་སོགས་རྟེན་མང་དུ་བཞེངས། སྤྱན་དང་མངོན་པར་ཤེས་པ་མངའ། ཡི་དམ་མང་པོས་ཞལ་གཟིགས། བདེན་གཉིས་ཀྱི་རྟོགས་པ་ཐུགས་ལ་འཁྲུངས། འགྲོ་དོན་རྒྱ་ཆེར་མཛད་དེ། སློབ་མ་རྟོགས་ལྡན་སྡིངས་པོ་བ་སྣུབ་ཆོས་འབར། དགེ་བཤེས་ལྷ་བཟོ། ཁྱུང་ཁམས་པོ་ཆེ། ཀློག་སྐྱ། དགེ་བཤེས་ཟར་པ། བྱ་འདུལ་འཛིན། དགེ་བཤེས་གནས་བརྟན་ལ་སོགས་པ་རྟོགས་པ་དང་། གཞན་ཕན་ལ་མངའ་བརྙེས་པ་མང་དུ་བྱོན་ནོ། །དེ་ནས་སྟོད་ལུང་པ། དགེ་བཤེས་ལྷ་བཟོ་ལ་གདན་པས་གཏོད་དགོངས་པ་ལ། ལྷ་བཟོས་མངོན་ཤེས་ཀྱི་རིག་ནས། གྲམ་རྟ་ཆད་སྐད་པར་བཞུགས་པས། གླེན་པ་ལྷ་བཟོ་དེ་བྱུང་ན་བསླབ་བྱ་འདྲ་བྱ་རྒྱུ་ཡོད་པ་ཡིན་ཏེ་མ་བྱུང་། ད་དགེ་བཤེས་ཀློག་སྐྱ་དང་། ཟར་པ་གཉིས་ཀྱི་འདི་དང་མལ་གྲོ་ཟར་གཉིས་སྤྱི་ལ་སྐྱོང་གསུངས། དེར་ཡོད་པ་རྣམས་ཀྱི་རྗེས་སུ་རྟེན་བཞེངས་སོགས་ཇི་ལྟར་བྱེད་ཞུས་པས། སྤུར་འདི་གཡའ་ཕུ་རུའི་རྩེ་ལ་སྐྱོལ། རྟེན་མ་བཞེངས་གསུངས། འོ་ན་སྤྲུལ་སྐུ་བྱ་ཡུལ་བ་རྟེན་བཞེངས་པ་འདུག་ན་ཇི་ལྟར་བྱེད་ཞུས་པས། ང་ཁོང་ལ་དྲིན་ཆེ་བ་ཡིན། ལོ་བདུན་འགྲོ་བ་ནས་བསྐྱངས། བླ་མ་སྤྱན་སྔ་རྣལ་འབྱོར་ལྟ་བུ་ལ་སྤྲད། ཁོང་རང་ཇི་ལྟར་དགོངས་པ་མཛད་དུ་ཆུག་གསུངས། དེ་ནས་སྐུ་གཤེགས་ཁར། ངས་དོན་ཁྱད་པར་ཅན་གྲུབ་པ་ཡིན། ཞེས་ལན་གསུམ་གསུངས། དྲུང་ན་ཡོད་པས། ཡི་དམ་གྱི་ལྷ་ཞལ་གཟིགས་པ་ཡིན་ནམ་ཞུས་པས། ཡི་དམ་ཀྱི་ལྷ་ཟེར་ནས་མིག་ཧུ་རེ། རྣ་བ་ཅོ་རེ་བ་ཡོད་པ་ཡིན། ཆོས་ཐམས་ཅད་དོན་དམ་པར་སྐྱེ་བ་མེད་ཅིང་། ཀུན་རྫོབ་ཏུ་རྨི་ལམ་སྒྱུ་མ་ལྟ་བུར་རྟོགས་གསུངས་ཏེ། བརྒྱད་ཅུ་རྩ་ལྔ་པ་སྤྲེའུ་ལོ་མངོན་པར་བྱང་ཆུབ་པའི་ཟླ་བའི་ཚེས་བརྒྱད་ལ་ལམ་པ་དགོན་པར་གཤེགས། སང་ལྷ་བཟོ་དཔོན་སློབ་ཀྱིས་ཀྱང་ཕེབས། ཉ་ག་མོ་པས་མདངས་མ་གིར་བཞུགས་པས་མ་བྱུང་ཞུས་པས། ཚེ་དང་ལྡན་པ། མི་ཐེག་པའི་ཁུར་ཆེན་པོ་ཅིག་བཀུར་བར་འདུག་པས་བསྡད་པ་ཡིན། བླ་མ་དང་འདང་མཇལ། བཟོད་གསོལ་ཀྱང་ཚར་གསུངས། དེར་ཀློག་སྐྱའི་ཞལ་ནས། ང་རྒས་པས་ཡ་གིར་མི་ཐོན། ཁྱོད་ཀྱི་ཟར་སྐྱོངས་གསུངས། ཟར་པའི་ཞལ་ནས། ང་ཡང་བླ་མའི་གདན་ས་དགའ་སྟེ། ངས་ཟར་བསྐྱངས་ཤིག་གསུངས། དེ་ནས་བྱ་ཡུལ་བ་ཆེན་པོས་ཀྱང་ཕེབས། སྔར་གྱི་ཞལ་བཀོད་རྣམས་སྙན་དུ་གསོལ་པས། གཞི་འདི་ལ་ཟན་ཀྱི་དགོས་པའི་དགོངས་པ་ཡིན་ཡོང་གསུངས་ཏེ། ཆས་རྐྱེན་ཐམས་ཅད་དང་། སོལ་བ་ཚུན་ཆད་དབུ་སྟོད་ནས་དྲངས་ཏེ་གདུང་ཁང་ཆེན་པོ་བཞེངས་སོ། །སྤྲུལ་པའི་སྐུ་བྱ་ཡུལ་བ་ནི། མདོ་ཏིང་འཛིན་གྱི་རྒྱལ་པོ་ལས། ཕྱི་མའི་ཚེ་ན་ཏིང་ངེ་འཛིན་པ་དག །ལྔ་བརྒྱ་ལས་ནི་མི་ཉུང་དེ་འབྱུང་སྟེ། །མདོ་སྡེ་མཆོག་འདི་རྒྱ་ཆེར་བཟུང་བ་ལ། །དེ་དག་སྔོན་དུ་འདྲེན་པ་གཞོན་ནུ་ཡིན། །ཞེས་ལུང་བསྟན་ཏེ། འཁྲུངས་ཡུལ་སྟོད་ལུང་གོ་ག་ལུང་གི་གྲོང་མཁའ་རོག གདུང་རུས་གཉོས། ཡབ་གཡུང་དྲུང་འབར། ཡུམ་སྟོད་ལུང་པའི་ལྕམ་སྲིང་ལྗང་ཟ་ལྕམ་བུ་སྟེ། ཡོས་ལོ་ལ་འཁྲུངས། དགུང་ལོ་བདུན་ལ་སྟོན་ལུང་པ་ཆེན་པོ་དང་མཇལ། ལོ་བཅུ་གཉིས་ལ་སྟོད་ལུང་ཚ་ཐོག་དགོན་པར། རྣལ་འབྱོར་པའི་སློབ་མ་སྒོམ་པ་བྱང་གྲགས་དང་། སྤྱན་སྔའི་སློབ་མ་སྒོམ་པ་ཡེ་ཤེས་རྒྱལ་མཚན་གཉིས་ལ་མཁན་སློབ་ཞུས་དགེ་ཚུལ་མཛད། མཚན་གཞོན་ནུ་འོད་དུ་བཏགས། དེ་ནས་སྟོད་ལུང་པ། མལ་གྲོ་ཟར་དུ་འབྱོན་པའི་ཕྱག་ཕྱིར་བྱོན། ལོ་བཅུ་ཞབས་ཏོག་ཚུལ་བཞིན་དུ་མཛད། ཐུགས་འཛིན་ཡངས་པས་བསླབ་སྤྱོད་གཞུང་ཆེ་ཆུང་རྣམས་ཚེགས་མེད་པར་ཐུགས་སུ་ཆུད་པར་མཛད། དེ་ནས་སྤྱན་སྔ་ཆོ་བ་ན་བཞུགས་པ་ན། སྟོད་ལུང་པ་དཔོན་སློབ་གཉིས་ཀྱིས་མཇལ་དུ་བྱོན་པས་མངོན་ཤེས་ཀྱིས་གཟིགས་ནས་སྟོད་ལུང་པ་ལ། ཇོ་བོ་སྟོན་པ་རེ་སྐྱེད་འཁོར་འདི་ལྟ་བུ་ཡོད་པ། ཤེས་ཡང་ཡང་གསུངས་པས། བླ་མ་མཉེས་པར་དགོངས་ཏེ་ཕུལ། ལོ་བཅུ་གསུམ་ཞབས་ཏོག་ཚུལ་བཞིན་དུ་མཛད་པས། སྤྱན་སྔ་མཉེས་པའི་གསུང་མང་པོ་དང་། བྱིན་རླབས་ཞུགས་ཏེ། ནང་མ་གཅིག་ལ་སྡེ་སྣོད་གསུམ་དང་། རྒྱུད་སྡེ་བཞིའི་ཚིག་དོན་ཐུགས་ལ་འཁྲུངས། སྤྱན་སྔ་ལ་དཔོན་སློབ་ནཱ་ག་བོ་དྷི་དང་མཇལ་བ་བདེན་ནམ་ཞུས་པས། བཙུན་ཆུང་འདི་འདིར་བཅུག་པའི་ཆོས་མི་འདྲ་བ་གསུངས། ཕྱི་གཤེགས་ཁར་ངས་སློབ་དཔོན་ནཱ་ག་བོ་དྷི་དང་དངོས་སུ་མཇལ། ཆོས་མང་དུ་ཞུས། རྩ་བའི་བླ་མར་བྱེད་པ་ཡིན། ཁྱོད་རང་ཡང་གསོལ་བ་ཐོབ་དང་རྗེས་སུ་འཛིན་པར་འདུག་གསུངས། མདོར་ན་སྤྱན་སྔའི་ཡོན་ཏན་བུམ་པ་གང་བྱོའི་ཚུལ་དུ་མངའ་ཞིང་། སྤྱན་སྔ་སྙུག་གྲུམ་དུ་གཤེགས་ནས་སྐུ་གདུང་བཞུ་བའི་དུས། ཐུགས་ནམ་མཁའ་ལ་འོད་དང་བཅས་སྟེ་སྤྲུལ་སྐུ་ཆེན་པོའི་པང་པར་བབས་པ། ཕྱིས་བྱ་ཡུལ་གྱི་གདུང་ཁང་དུ་བཞུགས་སོ། །སྙུག་གྲུམ་དུ་སྐུ་མཚམས་ལོ་དགུ་མཛད། དེ་ནས་ཚོགས་བསྡུས་ཏེ། ཐོག་མར་བུལ་གྱི་ར་བ་དཀར་པོར་དགོན་པ་བཏབ། དགེ་འདུན་ལྔ་བརྒྱ་ཙམ་འདུས། དེའི་ཚེ་རྗེ་བཙུན་མ་སྒྲོལ་མ་ལ་སོགས་པ་ཡི་དམ་མང་པོ་ཞལ་གཟིགས། ནཱ་ག་བོ་དྷི་ལ་དངོས་སུ་ཆོས་གསན། དེ་ནས་གདུལ་བྱ་བསམ་གྱིས་མི་ཁྱབ་པ་དང་། དགོན་པ་འབུལ་བ་ཡང་མང་དུ་བྱུང་བ་ལ། བླ་མ་དང་སྒྲོལ་མས་ལུང་བསྟན་པའི་གནས་བྱ་ཡུལ་དུ་དགོན་པ་འདེབས་དགོངས་ཀྱང་། ཡོན་བདག་རྣམས་ཐེ་ཚོམ་བསལ་བའི་ཕྱིར། བཤེས་གཉེན་མཐའ་བཞི་སྤྱན་དྲངས་ཏེ། དགོན་པ་ཐམས་ཅད་ནས་རྡོ་རེ་བླངས་པ་ལ་ས་སྤྱད་མཛད་པས། སེ་གཡའ་བའི་གཡུང་དྲུང་གི་ཕུལ་བ་བྱ་ཡུལ་ནས་བླངས་པའི་རྡོ་ལ་སའི་སྤྱད་བཟང་བར་ལུང་བསྟན་པས། གཞན་རྣམས་ཀྱང་མ་དགའ་བ་མེད་པར་མཛད་དེ། ལོ་དགོན་པ་བཏབ་ནས་ལོ་ངོ་ཉི་ཤུ་རྩ་གཉིས་པ་ཆུ་ཕོ་རྟའི་ལོ་ལ་གཙུག་ལག་ཁང་གི་རྨང་བཏིངས་ནས་ལོ་བཅུ་གསུམ་རྟ་ལོའི་ནང་ཚུན་ལ་དགོན་པ་རྫོགས་པར་གྲུབ། དེའི་ཚེ་སྤྱན་སྔ་བ་མནལ་ལམ་དུ་བྱོན་ནས། སྣམ་སྦྱར་གསེར་མདོག་ཅན་བསྐོན་པ་རྨིས་པས། བླ་མས་སྣང་བ་བྱུང་གསུངས་ནས། མཁན་པོ་བྱ་འདུལ་འཛིན། ལས་སློབ་མང་ར་སྒོམ་པ། གསང་སྟོན་རྒྱ་ཤེས་རབ་འབར་གྱིས་མཛད་དེ་བསྙེན་པར་རྫོགས། བྱ་ཡུལ་དུ་དགེ་འདུན་ཉིས་སྟོང་ལྔ་བརྒྱ་ཙམ་འདུས། དེ་དུས་བྱ་ཡུལ། ཀླུང་ཤོད། མལ་གྲོ་གསུམ་དུ་དུས་གཅིག་ལ་གྲལ་དབུ་མཛད་པ་དང་། མདོ་སྨད་དུ་ངང་ཚང་བའི་གཙུག་ལག་ཁང་གི་རབ་གནས་དང་། དྭགས་པོར་ཤ་བ་གླིང་པའི་མཆོད་རྟེན་གྱི་རབ་གནས་ཞུས་པས། དུས་ཚོད་ཚེས་གྲངས་འདི་ལ་མཆོད་པ་རྒྱ་ཆེན་པོ་བཤོམས། གསོལ་བ་ཐོབ། ངས་གཟིམས་ཆུང་འདིའི་སྟེང་ནས་རབ་གནས་བྱེད་པ་ཡིན་གསུངས་ཏེ། ཀུན་གྱིས་མཐོང་བར་གཙུག་ལག་ཁང་དང་། མཆོད་རྟེན་སྟེང་དུ་ཕྱག་ནས་བབས་པས། དེ་ནས་སྤྲུལ་སྐུར་གྲགས། མི་མ་ཡིན་མང་པོ་ལ་ཆོས་གསུངས་པ་དང་། བསྐྱེད་རྫོགས་ཀྱི་རྟོགས་པ་མངའ་བ། མངོན་ཤེས་མང་དུ་གསུངས་པ་སོགས་དོན་དུ་གཉེར་ན་རྣམ་ཐར་ཆེ་ཆུང་དང་། གཙུག་ལག་ཁང་བཞེངས་ཚུལ་རྒྱས་པར་རྟེན་བཤད་ཀྱི་ཡི་གེར་གསལ་ལོ། །དེ་ལྟར་སློབ་མ་མང་དུ་སྨིན་གྲོལ་ལ་བཀོད། འགྲོ་དོན་རྒྱ་ཆེར་མཛད་དེ་དགུང་ལོ་དྲུག་ཅུ་རྩ་བཞི་པ་རྟ་ལོ་ལ་བྱ་ཡུལ་དུ་གཤེགས། དེ་ནས་གཞི་བྱེས་ཀྱི་གྲྭ་པ་མང་པས། སྐུ་གདུང་བཞུགས་པ་དང་བཞུ་བ་ལ་མ་འཆམས་པས། སྐུ་སྟོད་རྡོ་རྒྱུས་ཀྱིས་པང་ཁེབས་ཀྱིས་དྲིལ་ནས། སྐུ་སྨད་བཞུ་ཕུལ་བས་སྤུར་དུད་ཀྱིས་གང་ཁྱབ་ཏུ་རིང་བསྲེལ་འབྱུང་བ་དང་། དུང་གཡས་འཁྱིལ། སྒྲོལ་དཀར། རྣམ་རྒྱལ་མཆོད་རྟེན་རྣམས་བྱོན་ནོ། །སྤྲུལ་སྐུ་ཆེན་པོ་ལ་སློབ་མ་ཉིས་སྟོང་རེ་འདུས་པའི་ནང་ནས་ཏིང་ངེ་འཛིན་སྐྱེས་པ་ལྔ་བརྒྱ། དགེ་བཤེས་ཇག་རྩེ་འཆང་བ་བརྒྱ་དང་བཅུ། དེའི་ནང་ནས་གྲགས་ཆེ་བ། ཕྱིའི་ཆེན་པོ་བརྒྱད། ནང་གི་ཆེ་པོ་བརྒྱད། ཐུགས་ཀྱི་སྲས་བཞི་དང་། རྗེ་སྒམ་པོ་པར་གྲགས་པ་དྭགས་པོ་ལྷ་རྗེ་སོགས་པ་བྱོན་པའི། ཕྱིའི་ཆེན་པོ་བརྒྱད་ནི། མདོ་སྨོན་ནས་ངང་ཚང་པ་ཆེན་པོ། གྲགས་མར་ཆེན་པོ། དྭགས་པོར་ཤ་པ་གླིང་པ་ཆེན་པོ། ལྷོར་ལྷ་རྒྱ་རི་བ་དང་། དགེ་གཡེལ་བ་ཆེན་པོ། སྟོད་ལུང་དུ་རྣམ་པར་བ་དང་། ཉ་ག་མོ་པ་ཆེན་པོ། དཀོན་མཆོག་འོད་ཟེར། གཙང་དུ་མུས་སྨན་པ་ཆེན་པོ་དང་བརྒྱད་དོ། །ནང་གི་ཆེན་པོ་བརྒྱད་ལ། ཁྲོམ་ཞེར་ཆེན་པོ་འབྲུག་ལོ་པ། མཚན་རིན་ཆེན་འོད། སྐམ་སྐམ་དང་། བྲག་པར་སོགས་དགོན་པ་མང་དུ་བཏབ། དོན་གཅིག་བར་བཞུགས་སོ། །སྙུག་གྲུམ་པ་ཆེན་པོ་ནི། སྔ་ཕྱི་གཉིས་བྱུང་པའི་ཕྱི་མ་ཡིན་ནོ། །མལ་གྲོར་བུལ་པ་ཆེན་པོ་ནི། རུས་ཀློག་སྐྱ། དགུང་སྟེང་ཡོས། མཚན་དབང་ཕྱུག་རིན་ཆེན། བྱ་ཡུལ་བ་ཆེན་པོ་དང་ཐོག་མར་འབྲོམ་དུ་མཇལ། རྒྱལ་སྟེང་གི་དགོན་པ་བཏབ། དོན་གྲུབ་བཞུགས་སོ། །སྐུ་འཇོལ་པ་ཆེན་པོའམ། བ་ངར་བ་ཆེན་པོར་གྲགས་པས། བ་ངར་གྱི་མཆོད་ཁང་བཞེངས། འཕན་ཡུལ་དུ་རྟ་པ་ཞང་སྒོམ་ཆེན་པོས་རྟ་ཕུའི་དགོན་པ་བཏབ། འབྲོམ་དུ་བཀྲ་ཤིས་སྒང་པ་ཆེན་པོས་སྨོན་གྲོང་གི་དགོན་པ་བཏབ། རྒྱ་མིག་མང་པ་ཆེན་པོ་དང་བརྒྱད་དོ། ཐུགས་ཀྱི་སྲས་བཞིའམ་ལྔ་ནི། རྒྱ་པར་སྒང་ནས། རྒྱ་ཆེན་པོས་རྒྱ་པར་སྒང་གི་མཆོད་ཁང་གསར་རྙིང་གཉིས་བཞེངས། འཕན་ཡུལ་ཆར་རྗེ་ནས་སྣུབ་མཆོད་ནས། དགོན་མཁའ་རུ་བ་ལ་གསུམ་བྱོན་པའི་བར་པ་དང་། གཙང་པ་རིན་པོ་ཆེ་དང་བཞི། སྲས་ལྔར་བྱེད་ན། སྒྱེར་སྒོམ་ཆེན་པོ་གཅིག་ཡིན་ལ། དཔེ་ཁ་ཅིག་ཏུ། ནང་གི་ཆེན་པོར་བགྲང་པ་ཡང་སྣང་བས། མི་འདྲ་བ་ཅུང་ཟད་འདུག་ཀྱང་རྣམ་ཐར་གཙོ་བོར་བྱས་སོ། །དྭགས་པོ་ལྷ་རྗེ་ནི་སྙིང་རྗེ་པད་དཀར་དུ། དགེ་སློང་འཚོ་བྱེད་ཅེས་བྱ་བ་ཐེག་ཆེན་པ་འབྱུང་། ཞེས་ལུང་བསྟན་ཏེ། འཁྲུངས་ཡུལ་མཉལ་བདོ་གཉེར་གཉི་བ། དབུ་རྩོ་རྒྱ་ལ་འབར་གྱི་སྲས་སུ་ས་མོ་ལུགས་ལ་འཁྲུངས། དགུང་ལོ་ཉེར་ལྔ་ལ་དྭགས་པོར་མར་ཡུལ་བློ་ལྡན་དང་། ཤར་པ་གླིང་པ་ལ་རབ་བྱུང་བསྙེན་རྫོགས་ཞུས། མཚན་བློ་གྲོས་གྲགས་པར་བཏགས། བཀའ་རྒྱུད་གསེར་ཕྲེང་དུ། སྐྱ་མིང་དར་མ་གྲགས་དང་། ཆོས་མཚན་བསོད་ནམས་རིན་ཆེན་ཟེར། དེ་ནས་བྱ་ཡུལ་བ། ཤ་པ་གླིང་པ། དགེ་བཤེས་སྒྲེ་བ། སྙུག་གྲུམ་པ། རྒྱ་ལྕགས་རི་གོང་ཁ་བ་དང་ལྔ་ལ་བཀའ་གདམས་གསན། དེ་ནས་སྒྲུབ་པ་བྱ་དགོངས་ནས་ཁོང་རང་གི་ཡབ་མེས་ཀྱི་བརྩིགས་པའི་གསེར་ཁ་བྱ་བའི་གཙུག་ལག་ཁང་ཡོད་སར་བྲང་ཁང་བརྩིགས། ཕ་ཞིང་ལ་ཡོན་བདག་བྱས་ཏེ་སྒྲུབ་པ་བྱེད་པའི་དུས། ཉིན་ཅིག་ལྕགས་རིའི་ལྷོ་ཕྱོགས་སུ་སྐྱོ་སངས་ལ་བྱོན་པ་ན། སྤྲང་པོ་གསུམ་ལས། རྗེ་བཙུན་མི་ལའི་སྙན་པ་གསན་པས། དད་པའི་རྐྱེན་བྱས་ཏེ། ཕ་ཞིང་གསེར་ཞོ་བཞི་དང་ཆ་ཞོ་གང་ལ་བཙོངས་ནས། དགེ་བཤེས་རྒྱ་ལྕགས་རི་བ་དང་། བྱ་ཡུལ་པ། སྙུག་གྲུམ་ལ་རྣམས་ལ་ཕྱི་ཕྱག་མཛད་པས། བྱ་ཡུལ་བའི་ཞལ་ནས། ཁྱེད་རྣལ་འབྱོར་པ་ཁྱི་ཐུལ་ཅན་གྱི་སྤྱན་སྔར་མ་འགྲོ ཅིས་ཀྱང་འགྲོ་ན་ངེད་ཀྱི་རྟགས་རྣམ་ཐར་མ་དོར་བ་ཤོག་ཅིག ལར་སེར་ཁ་ལ་ཕན་ན་ཁྱི་ཚིལ་ཡང་སྨན་ཡིན། ཟངས་ངེད་ཀྱི་བརྡུངས་ནས་ཟངས་སྐད་མི་ཡིས་འདོན་པ་ཅིག་འོང་བར་འདུག་སྟེ། ཐབས་མེད་གསུངས། སྙུག་གྲུམ་པའི་ཞལ་ནས། ཁྱོད་ཀྱི་ང་རྒས་ཁར་མ་བོར་བ་ཤོག་ཅིག་གསུངས། དེ་ནས་མི་ལ་དང་མཇལ་གདམས་ངག་གི་ཐུགས་ཚིམ་པར་མཛད། འཕྲིན་ལས་མཐའ་ཡས་ཤིང་། དགས་ལྷ་སྒམ་པོར་དགུང་ལོ་བརྒྱད་ཅུ་བར་དུ་བཞུགས་ཤིང་། རྣམ་ཐར་རྒྱས་པ་བཀའ་བརྒྱུད་གསེར་ཕྲེང་སོགས་སུ་གསལ་ལོ། །འདི་དག་བཀའ་གདམས་ཀྱི་བརྒྱུད་པ་དངོས་སུ་མི་འཛིན་ཀྱང་། བཀའ་ཕྱག་ཟུང་འབྲེལ་བས་གྲགས་པས་སློབ་མའི་ཁོངས་སུ་གཏོགས་པ་ཡིན་ནོ། །དེ་ནས་ལོ་བྱ་ཡུལ་གྱི་གདན་པ་རིམ་པར་བྱོན་པའི་ཚུལ་ནི། སྤྱན་སྔ་རྣལ་འབྱོར་གྱི་དབང་ཕྱུག་སྐུ་གཤེགས་ནས། ལོར་གནས་བརྟན་གྱི་བུ་གཞོན་ནུ་སྨོན་ལམ་གྱིས་གདན་ས་ལོ་དགུ དེ་ནས་རྟོགས་ལྡན་སྡིངས་པོ་བ་སྣུབ་ཆོས་འབར་གྱིས་གདན་ས་ལོ་གསུམ། དེ་ནས་གནས་བརྟན་སྨོན་ལམ་བློ་གྲོས་ཀྱིས་ཟླ་བ་བཅོ་བརྒྱད་བྱས། ཡང་སྡིངས་པོ་བས་ལོ་དྲུག་དྲིལ་བས་ལོ་དགུ་མཛད། བདུན་ཅུ་རྩ་བརྒྱད་ལོར་གཤེགས། དེ་ནས་གཙང་པ་རིན་པོ་ཆེ་བྱོན་ནས་གདན་ས་མཛད་དོ། །བྱ་ཡུལ་དུ་སྤྲུལ་སྐུ་ཆེན་པོ་གཤེགས་ནས། དགེ་བཤེས་རྒྱ་སྤྲེའུ་ལོ་པས་གདན་ས་ལོ་ལྔ་མཛད། དྲུག་ཅུ་རྩ་བཞི་པ་རྟའི་ཟླ་བའི་ཉེར་བརྒྱད་ལ་བྱ་ཡུལ་དུ་གཤེགས། དེ་ནས་སྣུབ་མཆོད་གནས་ཁྱི་ལོ་པ་གཞོན་ནུ་རྒྱལ་མཚན་གྱིས་ལོ་ཉི་ཤུ་རྩ་བཞི་མཛད། བརྒྱད་ཅུ་རྩ་དྲུག་པ་མངོན་པར་བྱང་ཆུབ་པའི་ཟླ་བའི་ཚེས་བརྒྱད་ལ་བྱ་ཡུལ་དུ་གཤེགས། དེ་ནས་ལོ་བརྒྱད་གདན་ས་བ་མེད་པའི་རྗེས་ལ། ལོར་གཙང་པ་རིན་པོ་ཆེའི་རྗེས་སུ་རིན་པོ་ཆེ་གླང་ལུང་པ་བཞུགས་པ། མལ་གྲོ་འདར་སྟོན་མོའི་གྲལ་དབུ་ནས་བྱ་ཡུལ་དུ་གདན་དྲངས། དེ་ནས་བྱ་ཡུལ་གྱི་གདན་ས་སྦྲེལ་བའི་སྲོལ་བྱུང་ངོ་། །གཙང་པ་རིན་པོ་ཆེ་ནི་འཁྲུངས་ཡུལ་གཙང་གི་རྔུབས་ཡུལ་རོལ། གདུང་རུས་སྣུབ། ཡབ་སྣུབ་ཨ་ལ་ལ། ཡུམ་རལ་ཆགས་བཟང་ལྕམ་གྱི་སྲས་སུ་འབྲུག་ལོ་ལ་འཁྲུངས། མཚན་ནམ་མཁའ་རྡོ་རྗེར་བཏགས། དཔེ་ཁ་ཅིག་ཏུ་རྡོ་རྗེ་རྒྱལ་མཚན་ཞེས་པ་ཡང་སྣང་། རྟེན་ཚངས་སྤྱོད་ཀྱི་དགེ་བསྙེན་མཛད། གཞོན་ནུའི་དུས་ནས་ཆོས་ཐམས་ཅད་རྨི་ལམ་སྒྱུ་མའི་ཉམས་དང་། མཁའ་འགྲོ་མང་པོ་ཞལ་གཟིགས། དེ་ནས་གཉན་ལོ་ཙཱ་བ་རྒྱ་གར་ནས་བྱོན་པ་དང་མཇལ་ཏེ། མདོ་སྔགས་ཀྱི་ཐོས་པ་རྒྱ་ཆེར་དང་། ཁྱད་པར་སྔགས་ལ་མཁས་པར་སྦྱངས། བོད་ཀྱི་མཁས་པ་མང་པོ་ལ་ནི་ངས་ཐུག ད་རྒྱ་གར་དུ་འགྲོ་དགོངས་ཏེ། དིང་རིར་དམ་པ་མཇལ་བར་བྱོན་པས། ཆོས་མི་གསུང་པར་བརྡ་ཆོས་བཞི་མཛད་པའི་ཅིག རྡོ་དཀར་པོ་ཤར་ཕྱོགས་སུ་འཕངས་སོང་པ། དམ་པ་ཀུན་དགའ་ལ་དྲིས་པས་ཁྱོད་ཀྱི་ཡོངས་འཛིན་ཤར་ན་ཡོད་ཟེར་བའི་བརྡ་ཡིན་ཟེར་བས། ལྷ་སར་ཇོ་བོ་མཇལ་བ་དང་། ཡེར་པར་སྒྲུབ་པ་ལ་བྱོན་པས། བྱ་ཡུལ་བ་ཆེན་པོ་འབྲོམ་སྨོན་གྲོང་དུ་ཆོས་བར་ལ་བྱོན་པའི་ཆོས་ཉན་པ་མང་པོ་དང་འཕྲད་དེ། སྤྲུལ་སྐུ་བྱ་ཡུལ་བ་ལ་ཆོས་ཉན་དུ་འགྲོ་ཟེར། དེ་ལ་ཡོན་ཏན་ཅི་ཡོད་བྱས་པས། གཞན་ནི་མ་ཤེས། བླ་མས་བྱིན་གྱིས་བརླབས་པ་ཅིག་ཡིན་པར་འདུག་ཟེར། ཁོང་གིས་ཀྱང་ཚོད་བལྟ་བའི་ཕྱིར། ཆོས་རའི་མཐར་བཞུགས་པས། སེམས་ལ་ཕན་པ་མང་དུ་བྱུང་སྟེ། མཇལ་བས་མི་ཕྱེད་པའི་དད་པ་འཁྲུངས། ཕྱག་ཕྱིར་བྱ་ཡུལ་དུ་བྱོན་ནས་ལོ་བཅུ་བཞི་བསྟེན། བཀའ་གདམས་ཀྱི་ཆོས་ཐམས་ཅད་རྫོགས་པར་གསན། ཡི་དམ་མང་པོ་ཞལ་གཟིགས། ཆོས་ཉིད་ཀྱི་བདེན་པ་མངོན་སུམ་དུ་གཟིགས། ཕྱིས་ལོར་བྱོན་པ་ལ་མཁའ་འགྲོ་མ་དུང་ཕྲེང་ཅན་མང་པོས་བསུ་བ་མཛད་དེ། རྡོ་རྗེ་གདན་གྱི་ཆོས་སྐྱོང་དང་གཅིག་པར་སྣང་གསུངས། དགུང་ལོ་རེ་གཅིག་ལ་དགའ་ལྡན་དུ་བྱོན་པའི་མནལ་ལམ་བྱུང་པས། སྒྲོལ་མ་དཀར་མོའི་སྒྲུབ་པ་མཛད། ལོའི་གདན་སར་ལོ་བཅོ་ལྔ་བཞུགས་ཏེ། བརྒྱད་ཅུ་རྩ་ལྔ་པ་ཟླ་བ་བཞི་པའི་ཚེས་བརྒྱད་ལ་ལོར་གཤེགས། འདི་ལ་སློབ་མ་དགེ་བཤེས་འགར་ལ་སོགས་པ་བུ་བཞི་དང་། ཚེ་བློས་ཐོངས་པ་བཅུ་བཞི་ལ་སོགས་པ་བྱོན་ཏེ་འདིར་མ་སྤྲོས་སོ། །དེའི་སློབ་མ་རིན་པོ་ཆེ་གླང་ལུང་པ། འཁྲུངས་ཡུལ་སྟོད་ལུང་ཚུར་བུ། ཡབ་རྡོ་རྗེ་གྲགས་ཀྱི་སྲས་སུ་ཡོས་ལོ་ལ་འཁྲུངས། ལོ་བཅུ་དགུ་ལ། པ་ཚབ་ལོ་ཙཱ་བ་ལས་རབ་ཏུ་བྱུང་སྟེ། མཚན་བརྩོན་འགྲུས་གཞོན་ནུར་བཏགས། ཟུར་ཆོས་པ་གཅིག་ལ་འདུལ་བ་མཁས་པར་བསླབ། ཉ་ག་མོ་བ་ལ་ལོ་བདུན་ལམ་རིམ་ཁྲིད་ཚར་གཅིག་བསྐྱངས་པས། ཇི་ལྟར་འདོད་པ་བཞིན་བློ་བཀོལ་དུ་བཏུབ་པ་བྱུང་གསུངས། ཉེར་བདུན་ལ་སྣོན་གྱི་གྱད་པར་བྱ་འདུལ་འཛིན། ཆ་པ་ཆོས་སེང་། བཙུན་པ་ཆོས་མཆོག་གསུམ་ལ་བསྙེན་པར་རྫོགས། དེ་ནས་ལོར་གཙང་པ་རིན་པོ་ཆེ་ལོ་ལྔ་བསྟེན། ཆོས་མང་དུ་གསན། དད་གུས་ཚད་མེད་པ་འཁྲུངས་པས་རྟོགས་པ་བཟང་པོ་མང་དུ་འཁྲུངས་ལ། སྔོན་དུ་ལོའི་གདན་ས་ལོ་བཅུ་གཉིས་དང་། དེ་ནས་ལོ་བྱ་ཡུལ་སྦྲེལ་ནས་ལོ་དྲུག་སྟེ་བཅོ་བརྒྱད་མཛད། བདུན་ཅུ་རྩ་ལྔ་པ་ལ་བྱ་ཡུལ་དུ་གཤེགས། གླང་ལུང་པའི་དུས་སུ་ཆོས་རྗེ་འཇིག་རྟེན་མགོན་པོ་བྱ་ཡུལ་དུ་བྱོན་ཏེ། ཁྲོམ་ཤེར་དང་གཉིས་ལ་བཀའ་གདམས་ཀྱི་ཆོས་གསན་པའི་དུས་སུ། དེ་གཉིས་ཀྱི་སློབ་མ་སྐྱོ་རིན་པོ་ཆེ་ལ་ངེད་དབེན་གནས་བྱོན་པའི་ས་ཅིག་དགོས་གསུངས་པས། གཞོའི་ཕུ་ན་འབྲི་ཕྱུགས་འཇོག་པའི་སེ་ནགས་ཡོད་པ་ཕུལ། དགོན་པ་བཏབ་ཏེ་འཕྲིན་ལས་རྒྱས་པའི་ཚུལ་གཞན་དུ་གསལ་ལོ། །གླང་ལུང་པའི་རྗེས་སུ་སེ་རྣལ་འབྱོར་པ་བསོད་ནམས་རྒྱལ་མཚན་འཁྲུངས་ཡུལ་གཞུང་། ཡབ་སེ་ཤེས་རྡོར་ཀྱི་སྲས་སུ་འཁྲུངས། གླང་ལུང་པའི་ཕྱག་ཕྱིར་ཡུན་རིང་བཞུགས། བླ་མཆོད་པ་ལོ་འགའ་དང་། ལོ་བྱ་ཡུལ་གྱི་གདན་ས་ལོ་དགུ་མཛད་ནས། གྲོག་གི་དབྱེ་ཕུ་དགོན་པ་བཏབ་པའོ། །སངས་རྒྱས་སྒོམ་པ་ནི། འཁྲུངས་ཡུལ་གཞུང་། ཡབ་འབེ་སྤྱན་རས་གཟིགས་ཀྱི་སྲས་སུ་འབྲུག་ལོ་ལ་འཁྲུངས། ལོ་བཅུ་བཞི་ལ་འདུལ་བ་འཛིན་པ་སྦལ་ཏིའི་སར་རབ་ཏུ་བྱུང་། མཚན་རྡོ་རྗེ་གཞོན་ནུར་བཏགས། དེ་ནས་ལོ་བཅོ་བརྒྱད་ལ་གླང་ལུང་པ་སྟོད་ལུང་དུ་བྱོན་པ་དང་མཇལ། ལོ་བཅུ་བཞི་བསྟེན། རྟོགས་པ་ཁྱད་པར་ཅན་འཁྲུངས། དེ་ནས་ལ་མོ་ལྷ་ཁང་དུ་ལོ་དྲུག་སྐུ་མཚམས་མཛད། སོ་བརྒྱད་ལ་ར་མོ་ཆེར་མཁན་པོ་སྦལ་ཏི་ལ་བསྙེན་རྫོགས་ཞུས། འདུལ་བ་མཁས་པར་བསླབས། ལོར་བྱོན་ནས་ཞེ་བཞི་ལ་ལོ་བྱ་ཡུལ་གྱི་གདན་སར་བྱོན། གླང་ལོ་བར་བདུན་ཅུ་བཞུགས། ཟླ་བ་བཞི་པའི་ཚེས་བཞི་ལ་ལོར་གཤེགས། དེ་ནས་གཙང་པ་ཇོ་སྲས་ཀྱི་ལོ་དགུ་མཛད། ལོའི་དབུ་རྩེ་གསར་མ་བཞེངས། ཟེམ་རིན་པོ་ཆེ་ནི། ཡུལ་ཧ་མ་མདོའི་དེའུ་གོང་བྱ་བ། ཕག་ལོ་ལ་ཡབ་པ་ཡག་རྩེ་མོའི་བུར་འཁྲུངས། ལོ་བཅུ་བདུན་ལ་ལོར་སངས་རྒྱས་སྒོམ་པའི་སྤྱན་སྔར་བྱོན་པས། སྔོན་ལ་གྲོ་སར་སོང་གསུངས་ནས་རྣལ་འབྱོར་བྱང་སེང་ལ་རབ་བྱུང་ཞུས། མཚན་གྲགས་པ་སེང་གེར་བཏགས། འདུལ་བ་དང་། ཇོ་བོ་ནས་བརྒྱུད་པའི་ཆོས་མང་དུ་གསན། ལོ་ལྔ་བཞུགས། ཡར་ལམ་རིན་ཆེན་སྒང་དུ་སངས་རྒྱས་དབོན་ལ་ཆོས་ཞུས། དེ་ནས་ཧ་མ་མདོར་ལོ་བཞི་སྒྲུབ་པ་མཛད་པས་སངས་རྒྱས་པདྨ་གར་དབང་ཞལ་མཇལ། དེ་ནས་བྱ་ཡུལ་དུ་སངས་རྒྱས་སྒོམ་པ་ལ་ཚོགས་ཆོས། ལྐོག་ཆོས་ཐམས་ཅད་རྫོགས་པར་མཛད། ཐུགས་དམ་བུམ་པ་དབུ་ཐོག་ཏུ་བཞག་པས་ཏིང་ངེ་འཛིན་ཁྱད་པར་ཅན་འཁྲུངས། ར་སྒྲེང་དུ་བྱོན་དུས་ཇོ་བོ་འཇམ་དཔལ་རྡོ་རྗེས་ཆོས་གསུངས། ལོ་བྱ་ཡུལ་གྱི་གདན་ས་ལོ་བཅོ་བརྒྱད་མཛད། དྲུག་ཅུ་རྩ་དྲུག་པ་འབྲུག་ལོ་ཟླ་བ་གཉིས་པའི་ཉི་ཤུ་ལ་གླང་ལུང་དུ་གཤེགས། འདི་ལ་སློབ་མའི་མཆོག་བཟང་པོ་དྲུག་ཏུ་གྲགས་པའི། རི་མེར་བ་ཆེན་པོས་ལྷོ་རི་མེར་གྱི་དགོན་པ་བཏབ། འོད་གསལ་སྒང་པ་ནི། འཁྲུངས་ཡུལ་འོན་བྲ་མ་ཐང་། དོན་སྟེང་པ་ལ་རབ་བྱུང་ཞུས། གྲོ་སར་རྣལ་འབྱོར་བྱང་སེང་ལ་འདུལ་བ་སོགས་བསླབས། ཕར་འབྱོན་པར་ཆས་པ་ལ། སྣ་ར་སྨན་རྩར་ཟེམ་ཕེབས་པ་དང་མཇལ་བས་མི་ཕྱེད་པའི་དད་པ་སྐྱེས། ལོ་དགུ་བསྟེན། འདིས་ཞོགས་ཀྱི་འོད་གསལ་དགོན་པ་བཏབ་བོ། སྨད་ཀྱི་བྱང་ཆུབ་སེམས་དཔའ་ཟླ་བ་རྒྱལ་མཚན། འདིས་དུམ་བུ་རིའི་དགོན་པ་བཏབ། གཞན་ཡང་དྭགས་པོ་སྤྱི་ཐེར་འབྲི་སྒང་པ། ཆོས་རྒྱལ་ཁམས་ལུང་པ་རྣམས་བྱོན། ཁམས་ལུང་པའི་འཁྲུངས་ཡུལ་ཉན་ཀ་ཀ་བ། གདུང་རུས་དབས། ཡབ་རྣལ་འབྱོར་མགོན་པོའི་སྲས་སུ་འབྲུག་ལོ་ལ་འཁྲུངས། བྱིས་པ་ནས་ཟེམ་རིན་པོ་ཆེ་ལོར་ཕར་འབྱོན་མར་འབྱོན་མཛད་པ་དང་མཇལ་རེས་ཀྱིས་སེམས་ཕྲོགས་པ་བཞིན་བྱུང་། ལོ་བཅུ་གཉིས་ལ་ཟེམ་བྱ་ཡུལ་དུ་བཞུགས་པ་ལ་རབ་བྱུང་ཞུས། མཚན་རིན་ཆེན་སེང་གེར་བཏགས། དེ་ནས་ཕྱག་ཕྱིར་ལོ་བདུན་བཞུགས། ཚོགས་ཆོས་རྣམས་རྫོགས་པར་གསན། ཟེམ་ཀྱི་ཞལ་ནས། ཁྱོད་ངའི་ཡོན་ཏན་འདི་རྣམས་རྩད་ཆོད། བསྙེན་རྫོགས་གྱིས་གསུངས་པས། ཟེམ་ལམ་དགོན་དུ་ཕེབས་པ་ལ་སྐྱོར་མོ་ལུང་གི་མཁན་པོ་ཞིག་པོ་བྱ་བ་མཇལ་དུ་བྱུང་དུས་བསྙེན་རྫོགས་དང་། འདུལ་བ་ཡང་གསན། དེ་ནས་ཟེམ་ལ་ལྐོག་ཆོས་རྣམས་ཞུས། མ་འོངས་པ་ན་འདི་ལྟར་གྱིས་ཀ་ལུང་བསྟན་མང་པོ་མཛད། ཟེམ་གཤེགས་ནས། རི་ཡེར་པ་གདན་སར་སྤྱན་དྲངས་ཀྱང་། ཁྱེད་རང་གི་ཕ་གི་ན་འོས་པ་ཅིག་ཆོས་སྐྱོང་གི་བདག་ཏུ་བཟུང་འདུག་གསུངས་ནས་ལུང་བསྟན་མཛད་དེ་མ་བྱོན། ཁོང་ཡུ་ངའི་ཁམས་ལུང་དུ་བྲོས་ཏེ་དེ་ནས་སྤྱན་དྲངས་པས། མཚན་ཡང་དེ་ལྟར་གྲགས། ཉི་ཤུ་རྩ་ལྔ་ལ་གདན་སར་བསྐོས་ཉི་ཤུ་རྩ་བདུན་མཛད། ལོའི་མཆེད་ཁང་གི་ཁྱམས་སྨད། གླིང་བསྐྱེད་པ། གསེར་ཐོག་སོགས་བཞེངས་པས་བཀའ་དྲིན་ཆེ་ཞིང་། ལྔ་བཅུ་ང་གཉིས་པ་རྟ་ལོ་ཟླ་བ་གཉིས་པའི་ཉེར་ལྔ་ལ་ཀ་ཕུག་ཏུ་གཤེགས། ཡར་ལུང་ཇོ་བོའི་ཆོས་འབྱུང་དུ་འདིའི་དུས་སུ་བཀའ་གདམས་ཀྱི་བཤེས་གཉེན་གྲགས་ཆེ་བ་ཐུས་ཆེན་བརྒྱད་དུ་གྲགས་པ་བྱུང་ཞེས་བཤད་དོ། སངས་རྒྱས་ཇོ་བོ་ནི་འཁྲུངས་ཡུལ་རྒྱ་སར་སྒང་། ཡབ་ལྷའི་བརྒྱུད་པ་ཇོ་བོ་བསོད་ནམས་མགོན་གྱི་སྲས་སུ་སྦྲུལ་ལོ་ལ་འཁྲུངས། གཞོན་ནུ་ནས་སངས་རྒྱས་སྒོམ་པ་ཤར་ཕྱོགས་དང་བའི་འོད་ཀྱི་འཇིག་རྟེན་ན་བཞུགས་ཟེར་བའི་དབྱངས་འཐེན་པ་གསན་པས་མཚན་ཐོས་པ་ཙམ་གྱིས་དད་གུས་སྐྱེས། བཅུ་གཉིས་ལ་ཟེམ་གླང་ལུང་དུ་བཞུགས་པ་ལ་རབ་བྱུང་ཞུས། མཚན་དབང་ཕྱུག་གཞོན་ནུར་བཏགས། ཉི་ཤུ་རྩ་གཉིས་ལ་ཟེམ་ལ་མཁན་པོ་ཞུས་ཏེ་བསྙེན་པར་རྫོགས་བཀའ་གདམས་ཀྱི་ཆོས་ལ་སོགས་པ་གསན་སྦྱོང་མཛད། ལྔ་བཅུ་རྩ་གཉིས་ལ་ལམ་དགོན་གྱི་གདན་སར་བྱོན་ལོ་དགུ་མཛད། དྲུག་བཅུ་ལ་ལོ་བྱ་ཡུལ་གྱི་གདན་སར་བྱོན་པའི་དུས་མངོན་ཤེས་མང་དུ་གསུངས་བྱ་ཡུལ་གཙུག་ལག་ཁང་དང་། གླིང་གི་ཞིག་གསོས་སོགས་མཛད་དེ་བཀའ་དྲིན་ལྷག་པར་ཆེ་ཞིང་། བླ་མ་ཡི་དམ་ཆོས་སྐྱོང་མང་པོ་ཞལ་གཟིགས། གདན་ས་ལོ་བཅོ་བརྒྱད་མཛད། བདུན་ཅུ་དོན་བདུན་བྱ་ལོ་དབྱུག་གུ་ཟླ་བའི་ཚེས་བཅུ་བར་དུ་བཞུགས། སངས་རྒྱས་སྟོན་པ་ནི། འཁྲུངས་ཡུལ་ལྷོ་བྲག་གྲུ་ཤུམ་སྒོ། ཡབ་སུམ་པ་བཀྲ་ཤིས་ཀྱི་སྲས་སུ་བྱི་བ་ལོ་ལ་འཁྲུངས། བཅུ་བཞི་ལ་ཁམས་ལུང་པའི་དྲུང་དུ་རབ་བྱུང་ཞུས། མཚན་ཚུལ་ཁྲིམས་སེང་གེར་བཏགས། ཉི་ཤུ་ལ་མཁན་པོ་དགེ་གཡོ་བ་ལ་བསྙེན་པར་རྫོགས། འདུལ་བ་མཁས་པར་མཁྱེན། དེ་ནས་ལོ་བྱ་ཡུལ་གྱི་ཆོས་སྐྱོང་རྣམས་ཀྱི་བསུ་བ་བྱས་པའི་སྣང་བ་བྱུང་བ་དང་དུས་མཚུངས་པར། སངས་རྒྱས་ཇོ་བོས་ཤོག་གསུངས་ཏེ་བྱ་ཡུལ་སྟེང་ཁང་དུ་བསྐོས། ཇོ་བོ་ཆེན་པོ་ཞལ་གཟིགས། དེ་ནས་གདན་སར་བྱོན་ཏེ་ལོ་བཅུ་དྲུག་མཛད། ལོ་བྱ་ཡུལ་དུ་ཆོས་ཁྲིམས་ཤིན་ཏུ་དམ་པ་དང་། བཀའ་གདམས་ཀྱི་སྲོལ་བཟང་པོ་བཙུགས། གླང་ལོ་བར་དྲུག་ཅུ་རྩ་གཉིས་བཞུགས། སངས་རྒྱས་སྒོམ་པ་གསར་མ་འཁྲུངས་ཡུལ་ལོ་རོ་ཐུ་ཤུལ། ཡབ་སུམ་པ་བརྒྱད་སྟོང་དཔལ་གྱི་སྲས་སུ་འབྲུག་ལོ་ལ་འཁྲུངས། གཞོན་ནུའི་དུས་མཚོ་སྣ་པ་ལ་དགེ་ཚུལ་ཞུས། མཚན་ཚུལ་ཁྲིམས་ཤེས་རབ་ཏུ་བཏགས། དེ་ནས་བྱ་ཡུལ་དུ་བྱོན་ནས་སངས་རྒྱས་ཇོ་བོ་དང་སྟོན་པ་ལ་བསྙེན་རྫོགས་ཞུས། བཀའ་གདམས་ཀྱི་ཆོས་རྫོགས་པར་གསན། ཁྱད་པར་དུ་སངས་རྒྱས་སྟོན་པ་ལ་སྔགས་ཀྱི་རྫོགས་རིམ་གསན་པས། འོད་གསལ་ཀྱི་རྟོགས་པ་འཁྲུངས། དེ་ནས་ལམ་དགོན་གྱི་གདན་ས་ལོ་གསུམ་མཛད་དུས་ཐུགས་སྐྱོ་བ་ཅུང་ཟད་སྐྱེས་ཏེ་ཤམ་པོ་གངས་ལ་བཞུགས་པ། ལོ་བྱ་ཡུལ་གྱི་གདན་སར་སྤྱན་དྲངས་ནས་ལོ་བཅུ་གསུམ་མཛད། ང་དགུ་པ་སྟག་ལོ་བྱ་ཡུལ་དུ་གཤེགས། སངས་རྒྱས་དབོན་པོ་གཞོན་ནུ་སྨོན་ལམ་དགས་པོར་སྤྲེའུ་ལོ་ལ་འཁྲུངས། དྭགས་པོ་སྤྱི་ཐེར་གྱི་དབོན་པོར་གྲགས། རྒྱལ་སྟེང་གི་གདན་ས་ལོ་མང་རབ་དང་། དེ་ནས་གདན་ས་གོང་ལོ་གསུམ་མཛད། བདུན་ཅུ་རྩ་གཉིས་པ་ལུག་ལོ་ཟླ་བ་གཉིས་པའི་ཚེས་བརྒྱད་ལ་ལོར་གཤེགས། རིན་པོ་ཆེ་བཅུ་བཞི་པ་རླུང་ཤོ་ཤོ་ནག་ཐང་བྱ་བར། ཡབ་སེང་གེའི་སྲས་སུ་ཡོས་ལ་འཁྲུངས། གདུང་རུས་རྩི། ལོ་བཅོ་ལྔ་ལ་ལུག་རུར་སངས་རྒྱས་ཇོ་བོ་ལ་རབ་ཏུ་བྱུང་། མཚན་ཚུལ་ཁྲིམས་མགོན་པོར་བཏགས། ལོ་བཞི་བསྟེན། ཚོགས་ཆོས་རྫོགས་པར་གསན། བཅུ་དགུ་ལ་བྲག་ཚབ་ཏུ་བསྙེན་རྫོགས་མཛད། དེ་ནས་སྐྱོར་མོ་ལུང་དང་། ཐང་སག་དུ་འདུལ་བ་དང་དབུ་མ་མཁས་པར་སྦྱངས། སངས་རྒྱས་སྟོན་པ་ལོ་བཅུ་གསུམ་བསྟེན། ལྐོག་ཆོས་རྫོགས་པར་གསན། ཡི་དམ་ཞལ་གཟིགས་པ། མངོན་ཤེས་མངའ་བ་སོགས་རྣམ་ཐར་དུ་གསལ། འཁོར་རྣམས་ལ་ངེད་ཡན་ཆད་དུ་བཀའ་བརྒྱུད་འདི་ལ་དམ་ཚིག་དང་ལྟ་སྤྱོད་ལ་ལྷད་དང་ཟེགས་མེད། བྱིན་རླབས་ཀྱི་བརྒྱུད་པ་མ་ཉམས། ཉམས་རྟོག་རྒྱུན་ཆད་མེད་པ་ཡིན་པས། ཁྱེད་ཞབས་རྟོག་བྱེད་པ་དོན་དང་ལྡན་པ་ཡིན་གསུངས། བྱ་ཡུལ་གྱི་མཁན་པོ་ལོ་གསུམ། ལམ་དགོན་གྱི་གདན་ས་ལོ་བརྒྱད། གདན་ས་ཆེ་བ་ལོ་ཉི་ཤུ་རྩ་གཉིས་མཛད་དེ། བདུན་ཅུ་རྩ་གཅིག་པ་གླང་ལོ་ཟླ་བ་དགུ་པའི་ཚེས་བཅུ་བཞི་ལ་ལོར་གཤེགས། སྟོད་ལུང་པ་རིན་ཆེན་སྙིང་པོའི་སྤྲུལ་པར་གྲགས་སོ། །རིན་པོ་ཆེ་གནམ་གང་པ་འཁྲུངས་ཡུལ་འོལ་ཁ། གདུང་རུས་བྱེན། ཡབ་ཆོས་སྐྱོང་བསམ་མེའི་སྲས་སུ་ཁྱི་ལོ་ལ་འཁྲུངས། ལོ་བཅུ་གཅིག་ལ་རྒྱས་སྟེང་དུ་སངས་རྒྱས་དབོན་པོ་ལ་རབ་ཏུ་བྱུང་། མཚན་གཞོན་ནུ་ཡེ་ཤེས་སུ་བཏགས། མཁན་ཆེན་ཆ་རུ་བ་ལ་འདུལ་བ། སྤྱོད་འཇུག གདམས་ངག་སྐོར་མང་དུ་གསན། བཅུ་དགུ་ལ་རིན་པོ་ཆེ་ཚུལ་ཁྲིམས་མགོན་པོ་ལ་བསྙེན་རྫོགས་ཞུས། ངེད་ཀྱི་གཟིམས་གཡོག་བགྱིས། ཟིན་བྲིས་ཐོབ་གསུངས་པས་དེ་ལྟར་མཛད་དེ། ཚོགས་ལྐོག་གི་ཆོས་རྫོགས་པར་གསན་པས། ཐུགས་རབ་ལ་མཉེས་ཏེ་བློ་གྲོས་རྣམས་དག་ཅེས་གསུངས། ལོ་ཉེར་དྲུག་ལ་རྒྱས་སྟེངས་སུ་བསྐོས་བཅོ་ལྔ་མཛད། དེ་ནས་རིན་པོ་ཆེ་བཅུ་བཞི་པས། ཐུབ་པའི་གསེར་སྐུ། དབུ་ཞྭ། སྟན་རིམ་སོགས་གནང་ནས་བྱིན་གྱིས་བརླབས། བཞི་བཅུ་ལ་གདན་སར་བྱོན་ལོ་སོ་བཞི་མཛད། དོན་གསུམ་པ་ཁྱི་ལོ་ཟླ་བ་གཉིས་པའི་གནམ་གང་བར་དུ་བཞུགས། རིན་པོ་ཆེ་ཚེས་བཅུ་པ་འཁྲུངས་ཡུལ་འོལ་ཁ་གདུང་རུས་ལྗང་། ཡབ་དཔོན་དཀར་གྱི་སྲས་སུ་འབྲུག་ལོ་ལ་འཁྲུངས། ལོ་བཅུ་བཞི་ལ་རིན་པོ་ཆེ་བཅུ་བཞི་པ་རབ་བྱུང་ཞུས། མཚན་ཆོས་ཀྱི་རྡོ་རྗེར་བཏགས། ཉེར་གཅིག་ལ་བྱ་ཡུལ་དུ་རིན་པོ་ཆེ་དེ་ཉིད་ཀྱི་དྲུང་དུ་བསྙེན་རྫོགས་མཛད་དེ། དལ་དང་འབྱོར་པ་བརྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། །གསུངས་པའི་སྐབས་སུ་ཐུགས་ལ་ངེས་ཤེས་སྐྱེས་ཏེ། ཚུལ་ཁྲིམས་མིག་འབྲས་བཞིན་དུ་སྲུངས་གསུངས། བཅུ་བཞི་པ་ལོ་དགུ་བསྟེན། བཀའ་གདམས་ཀྱི་ཆོས་རྫོགས་པར་གསན། གསང་སྔགས་ཀྱང་མནོས་ཏེ། འདུལ་མངོན། སྤྱོད་འཇུག་སོགས་མཁས་པར་སྦྱངས། བྱེས་ཀྱི་མཁན་པོ་ལོ་གསུམ། རྒྱས་སྟེངས་སྤྱན་པས་སྦྲེལ་བ་ལོ་ཉི་ཤུ་རྩ་བརྒྱད། གདན་ས་གོང་ལོ་བརྒྱད་མཛད། བདེ་མཆོག་སོགས་ཞལ་གཟིགས་པ། མགོན་པོ་ལྷོ་ནུབ་པ་བྲན་བཞིན་དུ་འཁོལ་བ་སོགས་རྣམ་ཐར་དུ་གསལ། བདུན་ཅུ་རྩ་གསུམ་པ་དགུན་ཟླ་ཐ་ཆུང་གི་ཚེས་བཅུ་བར་དུ་བཞུགས། རིན་པོ་ཆེ་བཅོ་བརྒྱད་པ་དགུང་སྙིང་ཡོས། ཞོགས་སུ་འཁྲུངས། རིན་པོ་ཆེ་གནམ་གང་པ་ལ་རབ་བྱུང་བསྙེན་རྫོགས་ཞུས། མཚན་བློ་གྲོས་རིན་ཆེན་དུ་བཏགས། འོད་གསལ་གྱི་གདན་ས་ལོ་བདུན། གདན་ས་གོང་ལོ་བརྒྱད་མཛད་དེ། བཞི་བཅུ་རྩ་དྲུག་པ་བྱི་བ་ལོ་དཔྱིད་ཟླ་ར་བའི་ཚེས་བཅོ་བརྒྱད་བར་དུ་བཞུགས། རིན་པོ་ཆེ་རིན་ཆེན་རྒྱལ་མཚན། ཡབ་ལྷས་པ་དཔོན་རྡོར་གྱི་སྲས་སུ་གྲོ་བཞིར་བྱི་བ་ལོ་ལ་འཁྲུངས། རབ་བྱུང་དང་བསྙེན་རྫོགས་རིན་པོ་ཆེ་གནམ་གང་པ་ལ་ཞུས། མགོན་པོ་གྲི་གུག་ཞལ་གཟིགས། བླ་མ་བཅོ་ལྔ་བསྟེན། གདན་ས་ལོ་ཉི་ཤུ་རྩ་གསུམ་མཛད། ལྔ་བཅུ་རྩ་དགུ་པ་ཁྱི་ལོ་ཟླ་བ་དང་པོའི་ཚེས་བཅོ་ལྔ་བར་བཞུགས། ཡོངས་འཛིན་ཆེན་པོ་ཚུལ་ཁྲིམས་དར་གྱི་ཞལ་སྔ་ནས། ཡབ་དཔོན་བསམ་འགྲུབ་དང་། ཡུམ་སོག་མོ་རྡོ་རྗེ་སྒྲོན་གྱི་སྲས་སུ་ཤིང་ཕོ་སྟག་ལ་ལྕས་བར་འཁྲུངས། དགུང་ལོ་བཅུ་གསུམ་ལ་གུགས་རྫོང་དུ་སློབ་དཔོན་ཚུལ་རྒྱལ་བ་ལ་རབ་ཏུ་བྱུང་། མཚན་ཚུལ་ཁྲིམས་དར་དུ་བཏགས། ཉི་ཤུ་རྩ་ལྔ་ལ་རིན་པོ་ཆེ་ཆོས་ཀྱི་རྡོ་རྗེའི་དྲུང་དུ་བསྙེན་རྫོགས། སྐྱོར་མོ་ལུང་དུ་སློབ་དཔོན་བསམ་གཏན་དོན་གྲུབ་དང་། གྲོ་སར་མར་སྟོན་དབུ་མ་པ་སོགས་ལ་འདུལ་བའི་སྡེ་སྣོད་མཐའ་དག་ལ་མཁས་པར་སྦྱངས། མཁན་ཆེན་སངས་རྒྱས་དཔལ་བ་དང་། ཆོས་རྗེ་ཐམས་ཅད་མཁྱེན་པ་སོགས་ལས། ཤེར་ཕྱོགས་བྱམས་ཆོས་མཐའ་དག་ཐུགས་སུ་ཆུད་པར་མཛད། ཐང་སག་ཏུ་ཟླ་གྲགས་གསར་མ་དང་། སློབ་དཔོན་ཚུལ་དཔལ་བ་ལ་དབུ་མའི་གཞུང་ཆེ་ཆུང་མཐའ་དག་གསན། རིན་པོ་ཆེ་རིན་ཆེན་རྒྱལ་མཚན་སོགས་བླ་མ་ལྔའི་དྲུང་དུ་བཀའ་གདམས་ཀྱི་ཆོས་སྐོར་རྣམས་དང་། ཆོས་རྗེ་ཀུན་བཀྲས་པ་སོགས་ལ་ས་ལུགས་ཀྱི་ཆོས་སྐོར་དང་། ཞ་ལུ་གྲགས་པ་རྒྱལ་མཚན་པ་ལ་བུ་ལུགས་ཀྱི་ཆོས་བསྐོར་དང་། གདན་ས་ཐེལ་དུ་ཆོས་རྗེ་བསོད་ནམས་རྒྱལ་མཚན་པ་ལ་ཕྱག་རྒྱ་བའི་ཆོས་བསྐོར་དང་། རྟོགས་ལྡན་སྔོ་ཉལ་མ་དང་། དྲུང་རིན་རྒྱལ་བ་ལ་དུས་འཁོར་རྒྱུད་འགྲེལ་སོགས་ལ་མཁས་པར་མཛད། མདོར་ན་མཁས་གྲུབ་ཀྱི་བླ་མ་སུམ་ཅུ་ཙམ་བསྟེན་ཏེ། བདེ་བར་གཤེགས་པའི་གསུང་རབ་མཐའ་དག་གི་ཚིག་དོན་ལ་མངའ་བརྙེས་པར་མཛད་དེ། མཁས་པའི་གྲགས་པས་ཕྱོགས་ཀུན་ཁྱབ། འཆད་ཉན་སོགས་གཞན་ཕན་རྒྱ་ཆེར་མཛད་དེ། སློབ་མའི་མཆོག ཆོས་རྗེ་དགེ་བ་རྒྱལ་མཚན། ཟད་པ་བློ་རྒྱམ། ཟད་པ་པདྨ་བཟང་པོ། ཆོས་རྗེ་བློ་བརྟན་པ། ཁམས་སུ་ལྷ་འབྲི་སྟོན་པ་སོགས་མང་དུ་བྱོན། ཤེར་ཕྱོགས་གསུངས་བའི་ཚེ་མེ་ཏོག་གི་ཆར་འབབ་པ། ཡི་དམ་དང་ཆོས་སྐྱོང་ཞལ་གཟིགས་པ་སོགས་རྒྱས་པར་རྣམ་ཐར་དུ་གསལ་ལ། ལོར་བྱེས་པ་མཁན་པོ་ལོ་ལྔ། གཟིམ་འོག་ལོ་གསུམ། གདན་ས་གོང་ལོ་བཅུ་བདུན་མཛད། བདུན་ཅུ་དོན་ལྔ་པ་འབྲུག་ལོ་ཟླ་བ་བཅུ་གཅིག་པའི་ཉེར་དྲུག་བར་དུ་བཞུགས། རྗེ་བསོད་ནམས་ལྷའི་དབང་པོ་ནི། བྱམས་མགོན་གཉིས་པ་རིན་པོ་ཆེ་ཚུལ་ཁྲིམས་དར་ལས་བསྙེན་རྫོགས་མཛད་དེ། བཀའ་གདམས་ཀྱི་ཆོས་བསྐོར་ཕལ་ཆེར་གསན། རོང་སྟོན་ཐམས་ཅད་མཁྱེན་པ། བྱང་ར་སྒྲེང་པ་སེམས་དཔའ་ཆེན་པོ་ཤཱཀྱ་བསོད་ནམས། ར་སྒྲེང་པ་རིན་ཆེན་གྲགས་པ། ཆོས་རྗེ་ཀུན་དགའ་རྒྱལ་མཚན་པ། དྭགས་པོ་འཇམ་དབྱངས་བཀྲ་ཤིས་རྣམ་རྒྱལ། དུས་ཞབས་དོན་གྲུབ་ཀུན་དགའ། བཀའ་འགྱུར་བ་ཤཱཀྱ་རྒྱལ་མཚན་སོགས་ཡོངས་འཛིན་མང་དུ་བསྟེན་ནས་མདོ་སྔགས་རབ་འབྱམས་ཀྱི་དབང་ལུང་ཁྲིད་མན་ངག་སོགས་ཀྱི་གསན་པ་དཔྱིས་ཕྱིན་པར་མཛད་ཅིང་། དཔལ་ལོ་དགོན་པའི་སྤྱན་སྔ་ལོ་མང་དུ་མཛད། དགུང་ལོ་དོན་དྲུག་གི་བར་དུ་སྤྱིར་བསྟན་པ་དང་། ཁྱད་པར་བཀའ་གདམས་ཀྱི་བསྟན་པ་ཆེས་ཆེར་གསལ་བར་མཛད་ཅིང་བཞུགས་སོ། །སྤྱན་སྔ་ངག་དབང་ཆོས་ཀྱི་གྲགས་པ་ནི། ཡབ་སྟོང་དཔོན་འཕགས་པ་དཔལ་དང་། ཡུམ་སྤྱོད་ཡུལ་མཚོ་གཉིས་ཀྱི་སྲས་སུ་ལྕགས་མོ་གླང་གི་ལོ་སྐུ་བལྟམས། བསོད་ནམས་ལྷའི་དབང་པོ་ལས་རབ་ཏུ་བྱུང་། མཚན་ངག་དབང་ཆོས་གྲགས་རྒྱལ་མཚན་དཔལ་བཟང་པོར་བཏགས། འཇམ་དབྱངས་ཀུན་དགའ་ཆོས་བཟང་ལས་བསྙེན་པར་རྫོགས། མཁན་པོ་དེ་ཉིད་དང་། ཆོས་རྗེ་བློ་གྲོས་རྒྱལ་མཚན། རྗེ་མཁྱེན་རབ་རིན་ཆེན་མཆོག་གྲུབ། སྙུག་ལ་པཎ་ཆེན་ངག་དབང་གྲགས་པ། སྔགས་འཆང་རིན་ཆེན་རྣམ་རྒྱལ། མུས་ཆེན་སངས་རྒྱས་རིན་ཆེན། ས་ལོ་ཐམས་ཅད་མཁྱེན་པ། རྗེ་བྱམས་པ་ཆོས་ཀྱི་ཉི་མ། བདག་ཆེན་ངག་གི་དབང་ཕྱུག་སོགས་བླ་མ་མང་དུ་བསྟེན་ནས་མདོ་སྔགས་རིག་གནས་ཀྱི་བསྡུས་པའི་ཆོས་ཚུལ་རྒྱ་མཚོ་ལྟ་བུའི་ཕ་མཐར་གསོན། ཐུགས་དམ་ལ་གཅིག་ཏུ་གཞོལ་བས་ཉམས་དང་རྟོགས་པའི་དབང་ཕྱུག་ཏུ་གྱུར། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་སྔགས་འཆང་ཆོས་ཀྱི་རྒྱལ་པོ་ངག་དབང་ཀུན་དགའ་རིན་ཆེན་ཡབ་སྲས་སྐུ་མཆེད་སོགས་ཀྱི་བཀའ་གདམས་ཀྱི་ཆོས་བུམ་པ་གང་བྱོར་གསན་པའི་བླ་མར་བསྟེན། ལོ་བྱ་ཡུལ་སོགས་བཀའ་གདམས་ཀྱི་དགོན་གནས་རྣམས་ཀྱི་གདན་ས་སྐུ་ཚེ་རིལ་པོར་མཛད། སྤྱི་དང་བྱེ་བྲག་གི་བསྟན་པ་ཡར་ངོའི་ཟླ་བ་ལྟར་རྒྱས་པར་མཛད་དེ། དགུང་ལོ་བརྒྱད་ཅུ་རྩ་དགུ་པ་སྦྲུལ་ལོ་སྨིན་དྲུག་ཟླ་བའི་ཉེར་ལྔའི་ཉིན་བདེ་བར་གཤེགས་སོ། །དེ་ལྟ་བུའི་སྐྱེས་ཆེན་དམ་པ་དེ་ཉིད་ཀྱི་སྐུའི་རྣམ་པར་སྤྲུལ་པ་བདག་གི་བླ་མ་སྤྱན་སྔ་རིན་པོ་ཆེ་བྱམས་པ་ཀུན་དགའི་མཚན་ཅན་འདི་ཉིད་ནི། ལུག་ལོ་བཀྲ་ཤིས་པའི་དགེ་མཚན་དང་བཅས་ནས་སྐུ་འཁྲུངས། མཁས་གྲུབ་ཀྱི་བླ་མ་དུ་མ་ལས་གསན་པ་རྒྱ་མཚོའི་ཕ་རོལ་དུ་གསོན་ཏེ། ལུང་དང་རྟོགས་པའི་ཡོན་ཏན་བསམ་གྱི་མི་ཁྱབ་པའི་མངའ་བདག་ཏུ་གྱུར། ལོ་དང་བྱ་ཡུལ་སོགས་བཀའ་གདམས་ཀྱི་དགོན་གྲྭ་ཆེན་པོ་རྣམས་ཀྱི་གདན་ས་མཛད་བཞིན་པར་ད་ལྟ་དགུང་ལོ་ལྔ་བཅུ་རྩ་གཉིས་ཀྱི་སྟེང་ན་བཞུགས་པ་འདི་ཉིད་སྟེ། ཡོངས་འཛིན་དམ་པ་འདི་ཉིད་ཀྱི་རྣམ་པར་ཐར་པ་རྒྱས་པ་ནི་ལོགས་སུ་འཆད་པར་ཤ་ཆགས་པས་འདིར་མ་སྤྲོས་སོ། །བདག་ཅག་གི་ཡོངས་འཛིན་དམ་པ་འཇམ་མགོན་གྲུབ་པའི་དབང་ཕྱུག་བསོད་ནམས་དབང་པོ་དང་། ཡབ་རྗེ་སྦས་པའི་སངས་རྒྱས་སྔགས་འཆང་གྲགས་པའི་མཚན་ཅན། ཁྱབ་བདག་འཁོར་ལོའི་མགོན་པོ་རྗེ་བཙུན་མུས་པ་ཆེན་པོ་སངས་རྒྱས་རྒྱལ་མཚན། མཁན་ཆེན་ཐམས་ཅད་མཁྱེན་པ་ངག་དབང་ཆོས་གྲགས་རྣམས་ཀྱི་ངོ་མཚར་བའི་མཛད་པའི་ཆ་ཤས་མཐའ་དག་ནི་སྔར་ནས་ལོགས་སུ་བཤད་ཅིང་། འཆད་པར་གྱུར་པའི་རྣམས་ཐར་ཀྱི་ཡི་གེ་བྱས་པ་དག་ལས་ཁོངས་སུ་ཚུད་པར་བྱ་ཞིང་། འདིར་སྐབས་སུ་བབས་པ་དགེ་པའི་བཤེས་གཉེན་བཀའ་གདམས་པ་རྣམས་ནས་བརྒྱུད་པའི་ཆོས་ཚུལ་རྣམས་བདག་གི་བླ་མ་སོ་སོས་གསན་པ་དང་། རང་ཉིད་ཀྱིས་ཇི་ལྟར་ཐོས་པའི་ཚུལ་མདོ་ཙམ་བརྗོད་ན། འཇམ་དབྱངས་བསོད་ནམས་དབང་པོས་ནི་སྤྱན་སྔ་ངག་དབང་ཆོས་གྲགས་དང་། ཡབ་སྔགས་འཆང་ཆེན་པོ་གཉིས་ལས་བཀའ་གདམས་པའི་ཆོས་རྣམས་རྫོགས་པར་གསན་ཞིང་། སྔགས་འཆང་གྲགས་པའི་མཚན་ཅན་གྱིས་རང་གི་ཡབ་སྔགས་འཆང་ཆོས་ཀྱི་རྒྱལ་པོ་ངག་དབང་ཀུན་དགའ་རིན་ཆེན་གྱི་དྲུང་དུ་རྒྱས་པར་གསན་ལ། རྗེ་བཙུན་མུས་པ་ཆེན་པོ་དང་མཁན་ཆེན་ངག་དབང་ཆོས་གྲགས་གཉིས་ཀྱི། ལོ་ནས་སྤྱན་སྔ་རིན་པོ་ཆེའི་ངག་དབང་ཆོས་གྲགས་ཀྱི་དངོས་སློབ་པཎ་ཆེན་ནམ་མཁའ་དབང་ཕྱུག་དང་། འཇམ་དབྱངས་དཀོན་མཆོག་རྒྱ་མཚོ་སོགས་ཀྱི་དྲུང་དུ་བཀའ་གདམས་ཐིག་ལེ་བཅུ་དྲུག་གི་དབང་ཁྲིད། གཞུང་དྲུག་གི་ལུང་། ཆོས་ཆུང་བརྒྱ་རྩ། ལྷ་བཞིའི་ཁྲིད། རིན་སྤུང་བསྐོར་གསུམ། བཀའ་གདམས་གླེགས་བམ་ཡོངས་རྫོགས། བློ་སྦྱོང་གི་སྐོར་སོགས་མཐའ་ཆོད་པར་གསན་ཞིང་། དེ་ལྟར་འཇམ་པའི་དབྱངས་སྐུ་མཆེད་དང་། རྒྱལ་བ་མུས་པ་ཆེན་པོ་སངས་རྒྱས་རྒྱལ་མཚན། སྤྱན་སྔ་ཀུན་དགའ་དོན་གྲུབ། མཁན་ཆེན་འཇམ་པའི་དབྱངས་ངག་དབང་ཆོས་གྲགས། གཞན་ཡང་བརྒྱུད་ལྡན་གྱི་བླ་མ་ཡིད་ཆེས་ཅན་དུ་མའི་དྲུང་དུ་ས་སྐྱ་པ་སྔགས་འཆང་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོ་བདག་གིས་དགེ་བའི་བཤེས་གཉེན་བཀའ་གདམས་པ་ནས་བརྒྱུད་པའི་ཆོས་སྐོར་རྣམས་དྭང་འདོད་ཡིད་ཆེས་ཀྱི་དད་པ་བླ་ན་མེད་པའི་སྒོ་ནས་འབད་རྩོལ་ཆེན་པོས་རྫོགས་པར་མནོས་ཤིང་། ལྷག་པར་སྔོན་ཇོ་བོ་ཆེན་པོ་དཔལ་ལྡན་ཨ་ཏི་ཤས་འབྲོམ་སྟོན་པ་ལ་ཐུགས་ཀྱི་སྲས་གཅིག་པུ་ལྟ་བུར་མཛད་པ་ལྟར་དུས་གསུམ་སྒྲིབ་མེད་དུ་གཟིགས་པའི་རྗེ་བཙུན་མུས་པ་ཆེན་པོ་དེ་ཉིད་ཀྱིས་ཁོ་བོ་ཅག་ལ་ཐུགས་རྗེའི་སྤྱན་རས་ཀྱི་བུ་གཅིག་པ་ལྟར་འཚོ་བར་མཛད་པའི་སྐལ་བ་མཆོག་ཀྱང་ཐོབ་པ་ལགས། གོང་དུ་སྨོས་པའི་སྟོད་ལུང་པའི་སློབ་མ་ལ་གྲགས་ཆེ་བ་སྡིངས་བུ་བ། ཀློག་སྐྱ། དགེ་བཤེས་ཟར་པ། དགེ་བཤེས་ལྷ་བཟོ་བ། ཁྱུང་ཁམས། བྱ་འདུལ་འཛིན་དང་དྲུག་ལས། སྟོད་ལུང་པའི་དགོངས་པ་ལོན་པ་ཕྱི་མ་གསུམ་ཡིན་ཏེ། ལྷ་བཟོས་མངོན་ཤེས་ལྔ་ཐོབ། སྟོད་ལུང་པ་འཁོར་ལོ་བདེ་མཆོག་དང་གཉིས་སུ་མེད་པར་གཟིགས་གསུངས། ཁྱུང་ཁམས་ཀྱི་སྒྱུ་ལུས་ཀྱི་རྟོགས་པ་བརྙེས། སྟོད་ལུང་པའི་ཞལ་ནས། ཁྱོད་ཀྱི་གདུལ་བྱ་གཙང་དུ་ཡོད་པས་དེར་སོང་། དགོན་པ་ཐོབ། སློབ་མ་བསྡུས་ལ་བདེན་གཉིས་ཤོད། ངའི་བདེན་གཉིས་འདི་མ་དོར་ཅིག་གསུངས་པས། ཁྱུང་ཁམས་གཙང་ལ་འབྱོན་ཁར། བདེན་གཉིས་དང་ཁྱུང་ཁམས་གཙང་ལ་བཞུད། བདེན་ནམ་མི་བདེན། ཕ་བོང་འཕེན་གཡག་ལ་དྲིས་གསུངས་ནས་ཕྱག་མཁར་བརྡབས་པས་ཚལ་པར་གས། དེ་ནས་ཉང་རོ་ཐ་མཚལ་དུ་བྱོན་ནས་སྡིངས་བུ་དགོན་པའི་རྨང་བཏིངས། བདེན་གཉིས་ཆོས་ཚན་བཅུ་གཉིས་སུ་བསྡུས་པ་གསུངས། གཞན་ཕན་བསྐྱངས་པས་སློབ་མ་མང་དུ་འཕེལ་ལོ། བྱ་འདུལ་འཛིན་ནི་འཁྲུངས་ཡུལ་གཙང་རོང་གཡུང་གི་ནང་གི་སྙ་པ། ཡབ་བྱ་རྒྱལ་བ་ལ་སྲས་གཉིས་ཡོད་པའི་གཅུང་པོ། ལྕགས་མོ་ལུག་ལ་འཁྲུངས། གཞོན་ནུའི་དུས་རོང་མནར་མདའ་ཚ་དམར་གྱི་གཙུག་ལག་ཁང་དུ་འབྲེ་ཤེས་རབ་འབར། ཆོས་གཞི་ལ་བྱོན་པ་དང་མཇལ་དུ་བྱོན་པས། ཕར་ཕྱིན་གསུངས་པའི་ལམ་ཤེས་ཀྱི་སྐབས་སུ་སླེབ་ཆོས་གསན་པས། ལྷའི་མེ་ཏོག་གི་ཆར་འབབ་པ་མཐོང་། དད་པ་སྐྱེ་པས། ཡབ་ལ་ཞུས་པས། རབ་ཏུ་བྱུང་། མཚན་བརྩོན་འགྲུས་འབར་དུ་བཏགས། འབྲེའི་ཞལ་ནས། རབ་ཏུ་བྱུང་བས་འདུལ་བ་བསླབ་དགོས་པས་ཐོག་པར་འདུལ་བ་སློབས་གསུངས་པས། ལྡན་དུ་སོག་ཚུལ་ཁྲིམས་བླ་མ། དེ་ནས་རྒྱ་འདུལ་འཛིན་དང་། རྨ་ཚོ་ལ་འདུལ་བ་གསན་ཅིང་མཁས་པར་གྱུར། དེ་ནས་རྒྱ་ཚ་ཞང་ཡེ་ལ་དབུ་ཚད་དང་། དཀར་ལོ་ཙཱ་བ་ལ་ཡོ་ག་བསླབས། འགོ་ནས་བཤད་ཉན་མཛད་པའི་སྐབས་སུ་དཔེ་ཆ་རྣམས་ཁམས་པའི་གྲྭ་པས་བརྐུས་པས། ཐུགས་སྐྱོ་བ་སྐྱེས་ཏེ་སྟོད་ལུང་པའི་དྲུང་དུ་བཀའ་གདམས་ཞུ་རུ་བྱོན་པས། ཡོན་ཏན་ཆེ་བའི་ང་རྒྱལ་གྱིས་དང་པོར་ཕྱག་མ་བྱས་པ་སོགས་སྤྱོད་པ་འགའ་ཞིག་ལ་རྟེན་ནས། སྟོད་ལུང་པའི་བཀའ་བཀྱོན་དྲག་ཏུ་མཛད་དེ་བསྐྲད། དེར་ལོག་ནས་བྱོན། སྟོད་ལུང་ཟམ་ཁར་བསླེབས་པ་ན་འགྱོད་པ་སྐྱེས་ཏེ། ཆོས་ཞུར་འོང་པ་ལ་དེ་ལྟར་བྱེད་པ་ང་མ་བདེན་སྙམ་དུ་དགོངས་པ་དང་། སྟོད་ལུང་པའི་ཞལ་ནས་ཉེ་གནས་ལ། ད་ཁོ་འགྱོད་པ་སྐྱེས་ནས་འདུག་གི་མར་གདན་དྲོངས་ལ་ཤོག་གསུངས། གདན་དྲངས་བཀུར་བསྟི་བྱས། དེར་བཀའ་གདམས་ཀྱི་གདམས་ངག་ཐམས་ཅད་ཡོངས་སུ་རྫོགས་པར་གསན་ནས་ཐུགས་དམ་གྱི་གཙོ་བོ་མཛད་དོ། །དེ་ནས་ཟུལ་ཕུར་བཤད་གྲྭ་བཙུགས་ཏེ་ཚོགས་ལོ་དགུའི་བར་དུ་བསྐྱངས། མདོ་རྩའི་ཊཱིཀྐ་ཆེ་ཆུང་དང་འདུལ་པ་སྤྱིའི་རྣམ་གཞག་མཛད། དེའི་ཚེ་བསམ་ཡས་དཔེ་དཀར་གྱི་བར་ཆད་རྩོམ་པའི་ཕྱིར་བཙུན་པར་སྤྲུལ་ནས་ཞབས་ཏོག་ལོ་མང་དུ་བྱས་ཀྱང་། འདུལ་བ་དང་འགལ་བའི་མཛད་པ་ན་བཟའི་སྤུ་ཕྱིར་བསྟན་ཏེ་གྱོན་པ་ཙམ་མ་གཏོགས་སྐྱོན་མ་བརྙེད་པས་དཔེ་དཀར་ཡང་དད་པར་གྲགས་སོ། །དེ་ལྟར་བཀའ་གདམས་ཀྱི་མན་ངག་ལ་ཉམས་ལེན་མཛད། བུ་ཆེན་འདུལ་བ་ལ་མཁས་ཤིང་འགྲོ་དོན་ཕུན་སུམ་ཚོགས་པ་བདུན་ཅུ་རྩ་དྲུག་བྱུང་པའི་ནང་ནས། དབུས་ཀྱི་བུ་ཆེན་གསུམ་ནི། ཀ་པ་དར་སེང་། རྣལ་འབྱོར་བྱང་སེང་། རྗེ་མོ་ཆོས་སེང་དང་གསུམ། གཙང་ནས་གཙང་ངུ་རིན་སྐྱབས། རྩིས་པ་གཞོན་ནུ་སེང་གེ་སོགས་བྱོན། དེ་ལྟར་བསྟན་པའི་བྱ་བ་རྒྱ་ཆེར་མཛད། དགུང་ལོ་བདུན་ཅུ་དོན་དྲུག་བཞེས་པ་ལ་ཟུལ་ཕུར་སྐུ་གཤེགས། གདུང་བཞུ་བས་ཐུགས་ལྗགས་རིང་བསྲེལ་སོགས་མང་དུ་བྱོན་ནོ། །དེ་ནས་སྒྱེར་སྒོམ་ཆེན་པོ་ནས་བརྒྱུད་པ་ཅུང་ཟད་བཤད་ན། དང་པོ་ཡར་ལུང་འཕྱོང་རྒྱས་ཀྱི་བང་སོ་པདྨ་ཅན་བྱ་བ། ཡོན་བདག་ཉི་མ་མགོན་གྱི་སྲས། སྒྱེར་ཤེས་རབ་སྐྱབས་ཟེར་བ་དབུ་རུ་སྣོན་མདའི་རོག་སྣར་ཡུལ་འཆུགས། བཙུན་མོ་ཚལ་སྟོད་ནས་ཀླུ་ལྕམ་བྱ་བ་ཁབ་ཏུ་བཞེས། སྲས་གསུམ་བྱུང་བ། ཁྲེ་ལ་སྟག བུ་མོ་སྟག ཁྲེ་ལ་དར་རོ། ཆེ་བ་ཁྲེ་ལ་སྟག་རབ་ཏུ་བྱུང་སྟེ། སྒོམ་པ་ཤེས་རབ་གྲགས་ཟེར། ཆུང་བ་ཁྲེ་ལ་དར་དགུང་ལོ་བཅུ་གཉིས་ལ་སྣོན་ཕུ་གཉེར་དུ། སྤྲུལ་སྐུ་བྱ་ཡུལ་བས་མཁན་པོ་མཛད། ཞང་སྙིང་ཕུག་པས་སློབ་དཔོན་མཛད་ནས་རབ་ཏུ་བྱུང་སྟེ། མཚན་གཞོན་ནུ་གྲགས་སུ་བཏགས། དགུང་ལོ་བཅུ་བདུན་ལ་སྣེའུ་ཟུར་དུ་བྱོན་ལོ་དགུ་བཞུགས། སྣེའུ་ཟུར་པ་གཤེགས་ནས་བྱ་ཡུལ་པ་ཆེན་པོ་ལོ་ལྔ་བསྟེན། བཀའ་གདམས་ཀྱི་ཆོས་སྐོར་རྫོགས་པར་ཞུས། སློབ་མ་བརྒྱད་བརྒྱ་ཙམ་བྱོན་པའི་ནང་ནས་གྲགས་ཆེ་བ། སྦ་བྱ་ཟུར་དང་གསུམ། དགེ་བཤེས་གཡོར་སྟོན། སྐྱིས་སྟོན། ལྷོ་བྲག་སྟོན་པ། དམར་སྟོན། ཁམས་སྟོན། སྟོན་པ་འོད་ཟེར་བླ་མ། སྨོན་ལམ་བཟང་པོ། སྟོན་པ་གཞོན་ལེགས་སོགས་བྱོན། སངས་རྒྱས་དབོན་སྟོན་ནི་འགྲན་གྱི་དོ་མེད་ཡིན་ནོ། །མེ་མོ་བྱ་ལ་ར་སྒྲེང་བཏབ་ནས་ལོ་དྲུག་ཅུ་རེ་གཉིས་སོང་ནས། ས་མོ་ཕག་ལ་རིན་ཆེན་སྒང་གི་གཙུག་ལག་ཁང་རྙིང་མ་བཞེངས། བླ་མའི་གདན་ས་ལ་སྒོ་བཏོན་གསུངས་ནས་བྱ་ཡུལ་ཕྱོགས་སུ་བསྟན། ཇོ་བོ་མི་གཡོ་བ། དམ་ཚིག་གསུམ་བཀོད། ཇོ་བོ་འཇམ་དཔལ་རྡོ་རྗེའི་ཞལ་གཟིགས། སྣེའུ་ཟུར་པ་དང་། བྱ་ཡུལ་བའི་གསུངས་བགྲོས་སྒང་བསོས་ནས། ལམ་རིམ་པོ་ཏི་བཞི་མ་དང་། གཉིས་མ་བྱ་བ་སངས་རྒྱས་དབོན་སྟོན་སོགས་ལ་གནང་བས། སངས་རྒྱས་དབོན་སྟོན་གྱིས་ཟིན་བྲིས་སུ་བཏབ། གདན་སར་ལོ་ལྔ་བཅུ་བཞུགས། གྱ་གཉིས་ལ་གཤེགས། སངས་རྒྱས་དབོན་སྟོན་ནི། སྒྱེར་སྒོམ་ཆེན་པོའི་སྤུན་ཟླ་སྒྱེར་བུ་མོ་སྟག་ཞེས་པ་དང་། ཡུམ་ཤ་མོ་རྡོག་གེའམ། ཤ་མོ་འདོ་ལེ་ཞེས་པ་ལ་སྲས་གསུམ་བྱུང་བའི་ཆེ་བ་ཡོན་བདག་ཡ་པོ་ཞེས་པ་དགེ་འདུན་དང་དཀོན་མཆོག་ལ་དད་པ་ཅིག་བྱུང་། བར་པ་སངས་རྒྱས་དབོན་སྟོན། ཆུང་བ་སློབ་དཔོན་སྟོན་པ། ཁོང་གིས་ཆོས་སྐྱོང་གྲི་གུག་ཞལ་གཟིགས། སངས་རྒྱས་དབོན་སྤྲུལ་སྐུ་བྱ་ཡུལ་བའི་སྐུ་སྐྱེར་བྱེད་པས། སྒྱེར་བསྒོམ་གྱི་ཞལ་ནས། ངས་བླ་མའི་གསུང་གཅིག་ལ་བརྟེན་ནས་བཙུན་ཆུང་འདི་ལ་བྱམས་པར་བྱས་པ་ཡིན་གསུང་། སངས་རྒྱས་དབོན་དགུང་ལོ་བཅུ་བདུན་ལ་དགེ་བཤེས་འབན་ཐང་པས་མཁན་པོ། དྭགས་པོ་བང་རིམ་པ་འདེའུ་བསྒོམ་གྱིས་སློབ་དཔོན་མཛད་དེ་རབ་ཏུ་བྱུང་། མཚན་གཞོན་ནུ་འབྱུང་གནས་སུ་བཏགས། ལོ་བཅུ་དགུ་ལ་སྐྱི་སྨད་དུ་བྱོན། དགེ་བཤེས་ཉང་རན་དང་། དགེ་བཤེས་ཁ་ཆེས་མཁན་སློབ་མཛད་དེ་བསྙེན་པར་རྫོགས། འཕན་ཡུལ་མདར་ཀ་བ་དར་སེང་ལ་འདུལ་བ་དང་། གཞན་ཡང་སྡེ་སྣོད་མང་དུ་གསན། །དེ་ནས་ལོ་བཅོ་བརྒྱད་ཀྱི་རིང་ལ་སྒྱེར་བསྒོམ་རང་བསྟེན་ནས་གསུང་རབ་མཐའ་དག་དང་། ལུང་མན་ངག་རྫོགས་པར་གསན། ཡི་དམ་ཆོས་སྐྱོང་དཔག་ཏུ་མེད་པ་ཞལ་གཟིགས། རྒྱ་མའི་དབུ་རྩེ་གསར་མ་བཞེངས་པ་དང་། རིན་ཆེན་སྒང་གི་གླིང་རྒྱ་བསྐྱེད་པ། ཕྱོགས་ཀྱི་གཙུག་ལག་ཁང་དང་། རྟེན་གསུམ་མང་པོའི་རབ་ཏུ་གནས་པ་སོགས་འགྲོ་དོན་རྒྱ་ཆེ་ཞིང་། སངས་རྒྱས་སྐལ་ལྡན་ཤིང་རྟ་ཞེས་པར་འགྱུར་བར་ཞལ་གྱིས་བཞེས། སྤྱན་རས་གཟིགས་ཀྱི་སྤྲུལ་པར་ཡང་གྲགས། རྒྱས་པར་དོན་དུ་གཉེར་ན། ཁུ་དཔོན་གྱི་རྣམ་ཐར་ཐུན་མོང་བ་ཆེ་བ་གཅིག་དང་། མཆོད་ཁང་བཞེངས་ཚུལ་བཀྲ་ཤིས་ལེབ་བརྒྱད་མ་བྱ་བ་ལྷོ་པ་དབུ་མ་པ་ཟེར་བའི་སློབ་མ་ཅིག་གི་བྱས་པ་དང་། རི་བོ་མཎྜལ་རྩེར་བྱོན་པའི་རྣམ་ཐར་རྣམས་སུ་གསལ་ལོ། །སློབ་མ་རྟོགས་ལྡན་བཟང་མོ་བ། ནགས་སྤོ་བ། ཟུང་ཆུ་སྤོ་པ། ནག་མོ་སང་ཡོན་དང་མོ་བཞིར་གྲགས་པ་རྣམས་སོ། གདན་སར་ལོ་བཞི་བཅུ་བཞུགས་ཏེ་བདུན་ཅུ་དོན་གཉིས་པ་སྨལ་པོ་ཟླ་བའི་ཚེས་བཞི་ལ་རྒྱ་མ་གནས་སུ་གཤེགས། རྟོགས་ལྡན་བཟང་མོ་བ་ནི། ཡུལ་དྭགས་པོ་བྲད་ལྷ་ས་བ། གདུང་རུས་སྤྱིལ། ཡབ་རྣལ་འབྱོར་ཇོ་སྟག་ལ་སྲས་གསུམ་ཡོད་པའི་འབྲིང་པོ། མཚན་གཞོན་ནུ་སེང་གེ་ཟེར། བྱིས་པའི་དུས་དྭགས་པོ་སྒམ་པོ་བ་ལ་ཕྱག་རྒྱ་བའི་ཁྲིད་འགའ་དང་། བྱ་ཡུལ་བའི་སློབ་མ་བོ་ཐང་བ་ལ་བཀའ་གདམས་ཀྱི་ཆོས་སྐོར་དང་། པུ་གུ་དོར་ས་ཆེན་གྱི་སློབ་མ་གཤེན་རྡོ་རྗེ་སེང་གེ་ལ་ས་སྐྱ་པའི་ཆོས་སྐོར་གསན། བཅུ་དགུ་ལ་གེམ་ཆུང་དུ་ཞང་བན་ལ་བསྙེན་རྫོགས་མཛད། དེ་ནས་སངས་རྒྱས་དབོན་བློ་མདའ་གྲོང་མོ་ཆེ་ན་སློབ་མ་མང་པོ་ལ་བཀའ་གདམས་ཀྱི་ཆོས་སྐོར་གསུང་བ་དང་མཇལ་བས་དད་དེ་ཉི་ཤུ་རྩ་བརྒྱད་ནས་རིན་ཆེན་སྒང་པའི་གྲྭ་པ་མཛད་ཡུལ་རིང་དུ་བསྟེན། བཀའ་གདམས་ཀྱི་ཆོས་རྫོགས་པར་གསན། དེ་ནས་བསམ་ཡས་ཕུའི་བཟང་མོ་དགོན་པ་བཏབ། བདུན་ཅུ་རྩ་བདུན་པ་ཆོ་འཕྲུལ་ཟླ་བའི་ཚེས་བཞི་ལ་བཟང་མོ་དགོན་པར་གཤེགས། ཁོང་གི་སློབ་མ་ཇོ་གདན་ལྷས་ཕུ་བས། ལྷས་ཕུ་དགོན་གསལ་དང་། ལྷ་དགེ་འདུན་སྒང་པས་དགེ་འདུན་སྒང་བཏབ། གཞན་ཡང་འཕན་ཡུལ་ཟོང་དགོན་པ་སོགས་བྱུང་། ནགས་མོ་བས། བྱོན་གྱི་ནགས་མོ་དགོན་པ་བཏབ། ཟུང་ཆུ་མོ་པས་འཕན་ཡུལ་མདའི་ཟུང་ཆུར་དགོན་པ་བཏབ་ཏེ། ཕྱིས་སྤོས་པ་གྲབ་ཀྱི་སས་ཁང་ཡིན་ནོ། གོང་དུ་སྨོས་པ་སྣེའུ་ཟུར་པ་ལས་འཕེལ་ཚུལ་ནི། སྣེའུ་ཟུར་པ། གདུང་རུས་བཙོས་པོ། སྤྲས་མཐོང་པ་སར་བྱ་ལོ་ལ་འཁྲུངས། བྱིས་པའི་དུས་ནས་ཏིང་ངེ་འཛིན་རང་འཁྲུངས་སུ་མངའ། རབ་ཏུ་བྱུང་ནས་མཚན་ཡེ་ཤེས་འབར་དུ་བཏགས། དགོན་པ་བ་སྐུ་མཆེད་གསུམ་ལ་སོགས་པ་བླ་མ་མང་དུ་བསྟེན། དགོན་པ་བ་དང་ཐོག་མར་མཇལ་བའི་དུས། ཐུགས་ཁ་ནས་ཐུབ་པའི་སྐུ་འོད་འཕྲོ་བ་ཅིག་བྱོན་ནས་སྣེའུ་ཟུར་པ་ལ་ཐིམ་པས་ཏིང་ངེ་འཛིན་ཁྱད་པར་ཅན་སྐྱེས། བླ་མ་ལ་གུས་པ། བྱང་ཆུབ་ཀྱི་སེམས་གནས་པ་བརྟན་པ། སྒྱུ་མ་ལྟ་བུའི་ཏིང་ངེ་འཛིན་རྣམས་འཛོམ་ན། སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་ཞལ་གཟིགས་པ་ཆོས་ཉིད་ཡིན་གསུངས། གཞན་ཡང་སྒྱུ་ལུས་ཀྱི་རྟོགས་པ་བརྙེས་པས། རང་ལུས་མི་གཡོ་བའི་སྐུར་ལྡང་ནུས་པ་དང་། མངོན་པར་ཤེས་པ་རྒྱ་ཆེན་པོ་མངའ་ཞིང་། དགོན་པ་བ་དང་། སྐུ་མཆེད་གསུམ་གྱི་གསུང་ཕྱོགས་གཅིག་ཏུ་བསྒྲིགས་པའི་བསྟན་རིམ་མཛད། དགུང་ལོ་དོན་དྲུག་བཞུགས། གདུང་བཞུས་པས་རིང་བསྲེལ་དཔག་ཏུ་མེད་པ་དང་། ལྷའི་སྤོས་ཀྱི་དྲིས་སྣེའུ་ཟུར་གྱི་གནས་ཐམས་ཅད་ཁྱབ་པ་སོགས་རྣམ་ཐར་དུ་གསལ་ལོ། །སློབ་མ་བདུན་བརྒྱ་ཙམ་བྱུང་བའི་ནང་ནས་གྲགས་ཆེ་བ་བཞི་ནི། ལྷ་བཀའ་གདམས་པ། ཐག་མ་པ་ཆེན་པོ། བྱང་སེམས་ཟླ་བ་རྒྱལ་མཚན། དགུན་པ་ལྷ་རྗེ་ཐུགས་རྗེ་རྒྱལ་མཚན་རྣམས་དང་། གཞན་ཡང་གཙང་ནས་གྲང་པོ་ལུང་པ་ཞེས་འཕགས་པ་དོན་ཞགས་དང་། བཅུ་གཅིག་ཞལ་གྱི་ཆོས་བདག་ཏུ་བྱེད་པ་དང་། སྤྱི་བོ་ལྷས་པ་བྱང་ཆུབ་འོད་ཅེས་གྲགས་པ་རྣམས་སོ། །འདི་རྣམས་བཀའ་གདམས་གདམས་ངག་པ་གཙོ་བོར་བྱེད་པས་དེའི་ཕྱོགས་སུ་གཏོགས་ཞེས་ཡར་ལུང་ཇོ་བོའི་ཆོས་འབྱུང་དུ་འབྱུང་ངོ་། །སྤྱི་བོ་ལྷས་པ་ལ་ཆོས་ཀྱི་རྗེ་ས་སྐྱ་པཎྜི་ཏས་རབ་བྱུང་བསྙེན་རྫོགས་ཀྱི་སློབ་དཔོན་ཞུས། བཀའ་གདམས་གཞུང་གདམས་ངག་གི་ཆོས་རྣམས་གསན་པར། རྣམ་ཐར་ངོ་མཚར་སྣང་བ་ལས་གསུངས་ཏེ། ཐག་མ་པའི་སློབ་མ། ནམ་མཁའ་སེང་གེ་ཡང་སྟོད་ལུང་ཐག་མར་བྱོན། དེ་ནས་ནམ་མཁའ་རྒྱལ་པོ། སེང་གེ་བཟང་པོ། རྒྱལ་སྲས་བཟང་པོ། གསང་བའི་བདག་པོས་བྱིན་གྱིས་བརླབས་པ་ནམ་མཁའ་རྒྱལ་མཚན་དང་བཞི་ནི་ལྷོ་བྲག་ཐིག་ཕྱིར་བྱོན་ནོ། །

ཡང་བཀའ་གདམས་གཞུང་པའི་བརྒྱུད་པ། སེ་སྤྱི་ཕུ་བ་ཡན་སྔར་བཞིན་ལ། དེ་ནས་ལྷ་ལུང་གི་དབང་ཕྱུག་དང་། འགྲོ་མགོན་གྱི་སློབ་མ་ཟངས་ཆེན་པ་དར་མ་བསོད་ནམས། དེའི་སློབ་མ་མཚོ་སྣ་པ་ཆེན་པོ་ཤེས་རབ་བཟང་པོ། དེའི་སློབ་མ་མོན་གྲབ་པ་ཚུལ་ཁྲིམས་བཀྲ་ཤིས། དེའི་སློབ་མ་མཁན་ཆེན་ཆོས་སྐྱབས་བཟང་པོའོ། །ཡང་མཁན་ཆེན་ཆོས་སྐྱབས་པ་དང་། གསང་བདག་ནམ་མཁའ་རྒྱལ་མཚན་གྱི་དྲུང་དུ་རྗེ་བློ་བཟང་གྲགས་པས་བཀའ་གདམས་གཞུང་གདམས་ངག་གི་ཆོས་རྣམས་གསན་ནས་གྲོ་ལུང་པའི་བསྟན་རིམ་ལ་གཞི་མཛད་དེ། བྱང་ཆུབ་ལམ་སྒྲོན་གྱི་དོན་འགྲེལ་ལམ་རིམ་ཆེ་ཆུང་བརྩམས་ཏེ་བཀའ་གདམས་པའི་བརྒྱུད་འཛིན་དུ་ནན་གྱིས་འཇུག་པར་མཛད་དོ། །ཇོ་བོ་ཨ་ཏི་ཤའི་སྲས་ཀྱི་ཐུ་བོ་གཉིས་པ། རྔོག་ལོ་ཙཱ་བའི་བཤད་བརྒྱུད་འཛིན་པ་ནི་གངས་ཅན་གྱི་ལྗོངས་འདིར་བསྟན་པ་སྤྱི་ལ་བཀའ་དྲིན་ཆེ་བས། དེའི་བྱོན་ཚུལ་སྔོན་གྱི་ཡི་གེ་ལས་འབྱུང་བ་བཞིན་བཤད་ན། ཁ་བ་ཅན་གྱི་ལྗོངས་འབྲོག་ཚོ་དང་ཉེ་བའི་སར། སྔགས་རྙིང་མ་བའི་དགེ་བཤེས་རྡོ་རྗེ་གཞོན་ནུ་བྱ་བ་ལ། སྲས་ལྔ་ཡོད་པའི་ཆེ་ཤོས་རྔོག་ལེགས་པའི་ཤེས་རབ་ཀྱིས། སྤྱིར་ཇོ་བོ་ཆེན་པོ་ལོ་བཅུ་བསྟེན་ཅིང་ཕྱག་ཕྱིར་བྱོན་པའི་དུས་སུ། གསང་ཕུ་ལ་ཕྱག་མཛུབ་བཙུགས་ཏེ། ལུང་པ་ཡ་གིའི་ནང་ན་དུང་གཡས་སུ་འཁྱིལ་བ་འདྲ་བ་ཡོད། དེར་ལེགས་ཤེ་ཁྱོད་ཀྱིས་གཙུག་ལག་ཁང་ཐོབ་ལ། བཤད་ཉན་གྱིས། བསྟན་པ་ལ་ཕན་པར་འགྱུར། ཞེས་ལུང་བསྟན་པས། གསང་ཕུ་ནེའུ་ཐོག་གི་ས་ཆ་གཟིགས་ཏེ། བླ་མས་ལུང་བསྟན་པའི་གནས་དེ་ཡིན་པར་མཁྱེན་ནས། གསང་ཕུ་ནེའུ་ཐོག་གི་གཙུག་ལག་ཁང་བཞེངས། བསྟན་པའི་བྱ་བ་མཛད་དེ། དང་པོར་དགེ་འདུན་ལྔ་བརྒྱ་ཙམ་འདུས་སོ། །དེ་ལས་འཕྲོས་པ་ལ་གཉིས། ལོ་ཙཱ་བ་བློ་ལྡན་ཤེས་རབ་ལས་སློབ་མ་འཕེལ་ཚུལ། མངའ་རིས་པ་ཤེས་རབ་རྒྱལ་མཚན་ལས་བཀའ་གདམས་གླེགས་བམ་བྱུང་ཚུལ་ལོ། །དང་པོ་ནི། ལེགས་ཤེའི་གཅུང་པོ་ཀླུང་ཁྲི། ཀླུ་བྱང་། ཆོས་སྐྱབས། ཐུབ་པ་བཞི་ལས། ཆོས་སྐྱབས་ཀྱི་སྲས་ལོ་ཙཱ་བ་བློ་ལྡན་ཤེས་རབ་ཡིན་ཏེ། དེའང་ལྕགས་མོ་ཕག་གི་ལོ་ལ་སྐུ་འཁྲུངས། སྐྱེས་བུ་དམ་པ་དེས་སྐུ་ན་གཞོན་ནུའི་དུས་ནས། ཁུ་བོ་དང་། བཀའ་ཆུའི་སློབ་ཆུང་ཚུལ་ཁྲིམས་ཤེས་རབ་ལ་སོགས་པ་བསྟེན་ནས་རབ་ཏུ་བྱུང་། རྒྱུད་སྦྱངས། དགུང་ལོ་བཅུ་བདུན་ལོན་པའི་དུས། མངའ་རིས་སྟོད་ཀྱི་ལྷ་བླ་མ་བྱང་ཆུབ་འོད་ཀྱི་དབོན་པོ་མངའ་བདག་རྩེ་ལྡེས། རྒྱ་གར་དུ་ལོ་ཙཱ་སློབ་པ་ལ་བརྫངས་ཏེ་ཡུལ་དབུས་དང་ཁ་ཆེ་ལ་སོགས་པར་བྱོན། པཎྜི་ཏ་པད་རྫ་ན་དང་། འབུམ་ཕྲག་གསུམ་པ། པ་ར་ཧེ་ད་མ་ཧཱ་ཛ་ན། སུ་མ་ཏི་ཀིརྟི་དང་། སྐལ་ལྡན་རྒྱལ་པོ་ལ་སོགས་པ་མཁས་གྲུབ་མང་དུ་བསྟེན། རྒྱ་བལ་དུ་ལོ་བཅུ་བདུན་བཞུགས་ནས། མངའ་རིས་སྟོད་དུ་ཕེབས། མངའ་བདག་དབང་ལྡེ་དང་། ཁྲི་བཀྲ་ཤིས་དབང་ཕྱུག་བཙན་གྱིས་འགྱུར་གྱི་སྦྱིན་བདག་མཛད་ནས། ཚད་མ་རྒྱན་ལ་སོགས་པ་བསྟན་བཅོས་མང་དུ་བསྒྱུར། དེ་ནས་དབུས་སུ་ཕེབས། ཁུ་བོའི་གདན་ས་གསང་ཕུ་ནེའུ་ཐོག་དང་། ར་སྒྲེང་ལ་སོགས་པ་གནས་ཁྱད་པར་ཅན་མང་པོར་ཆོས་གསུངས། སློབ་མ་ཁྲི་ཕྲག་ལྷག་ཙམ་འདུས་པར་གྲགས་ཤིང་། དབུས་གཙང་། ལྷོ་བལ། མདོ་སྟོད་སྨད། ཤར་བཙོང་ཁ། རྒྱ་མི་ཉག་སོགས་སུ་གྲུབ་མཐའ་འཛིན་པའི་སློབ་མ་དང་། ཉིང་སློབ་ཏུ་མ་གྱུར་པ་མེད་ཅིང་། དབུས་གཙང་དུ་ལོ་བཅུ་བདུན་འགྲོ་དོན་མཛད། རྒྱས་པར་གྲོ་ལུང་པས་མཛད་པའི་རྣམ་ཐར་དུ་ཤེས་སོ། །དེའི་ཐུགས་སྲས་ཞང་ཚེ་སྤོང་ཆོས་ཀྱི་བླ་མ། ཞང་གྲོང་ལུང་པ་བློ་གྲོས་འབྱུང་གནས། ཁྱུང་རིན་ཆེན་གྲགས། འབྲེ་ཤེས་རབ་འབར་བཞི་ལ་སྲས་ཀྱི་ཐུ་བོ་བཞི་ཟེར། གཞན་ཡང་གངས་པ་ཤེའུ། གུང་བུ་རྭ་ཅན། ཤམ་པོ་མི་ཏིག་ལ་སོགས་པ་བསམ་གྱིས་མི་ཁྱབ་པ་སྨིན་པར་མཛད་པའི་ནང་ནས། ཞང་ཚེ་སྤོང་ཆོས་ཀྱི་བླ་མས་ནེའུ་ཐོག་གི་གདན་ས་ལོ་སུམ་ཅུ་སོ་གཉིས་མཛད། དེའི་རྗེས་གཉལ་བ་རི་ལུས་ལོ་གཉིས། རྣམ་པར་བས་ལོ་བརྒྱད་མཛད། དེ་ནས་གྲོ་ལུང་པ་གདན་སར་གདན་དྲངས་པས། གྲོགས་ཆོས་ཀྱི་སྤྱན་ལྡན་དེའི་གདན་ས་དྲོན་མོ་ལ་ཤེས་འདོད་ཡོད་ཀྱང་། རལ་རིལ་ཐམས་ཅད་ཀྱི་རྗེས་སུ་མི་བྱེད་གསུངས་པས། གོང་གི་བླ་མ་དེ་གསུམ་གྱི་སློབ་མ་དགེ་བའི་བཤེས་གཉེན་ཆ་པ་ཆོས་ཀྱི་སེང་གེས་ནེའུ་ཐོག་གི་གདན་ས་ལོ་བཅོ་བརྒྱད་མཛད་ཅིང་། སླར་ཡང་གྲོ་ལུང་པའི་སྤྱན་སྔར་བྱོན་ནས་སྒྲོ་འདོགས་བཅད་དེ། སློབ་མ་བསམ་གྱིས་མི་ཁྱབ་པ་བྱོན་པ་ལས། སྲས་ཀྱི་ཐུ་བོ་སེང་ཆེན་བརྒྱད་ནི། གཙང་ནག་བརྩོན་འགྲུས་སེངྒེ་། དན་འབག་སྨྲ་བའི་སེངྒེ་། བྲུ་ནག་བསོད་ནམས་སེངྒེ་། རྨ་བྱ་རྩོད་པའི་སེངྒེ་། རྩེགས་དབང་ཕྱུག་སེངྒེ་། ཉང་རན་པ་ཆོས་ཀྱི་སེངྒེ་། ལྡན་མ་དཀོན་མཆོག་སེངྒེ་། གཉལ་པ་ཡོན་ཏན་སེངྒེ་སྟེ། འགའ་ཞིག་གཙང་པ་འཇམ་སེང་འདྲེན་ནོ། །ཇོ་སྲས་བཞི་ནི། འཁོན་ཇོ་སྲས་རྩེ་མོ། རྔོག་ཇོ་སྲས་ར་མོ། ཁུ་ཇོ་སྲས་ནེ་ཙོ། སྙོས་ཇོ་སྲས་དཔལ་ལེ་རྣམས་སོ། །ཡང་འགར་དབང་གྲུབ། ཀོང་པོ་འཇག་ཆུང་། ལྷོ་པ་སྒོག་ཟན། ཡར་ཕུ་བ་བློ་གྲོས་སེངྒེ་བཞི་ལ་ཤེས་རབ་ཅན་བཞི་ཟེར། གཞན་ཡང་འཇད་པ་སྟོན་སྐྱབས། རྡོ་རྗེ་འོད་ཟེར་ལ་སོགས་པ་སྡེ་སྣོད་འཛིན་པ་མང་པོ་དང་། ཚུར་ཕུ་བ་གྲུབ་ཐོབ་དབུ་སེ། ཞང་ཚལ་པ། ཆོས་རྗེ་ཕག་མོ་གྲུབ་པ་ལ་སོགས་པ་མཁས་གྲུབ་དུ་མ་སྨིན་པར་མཛད་པའི་ནང་ནས། རྩེགས་དབང་ཕྱུག་སེངྒེས་གདན་ས་ལོ་ལྔ། དེ་གཉིས་ཀྱི་སློབ་མ་གཉལ་པ་དད་པ་བཟང་པོས་ལོ་བདུན། འཇམ་རྩེ་ནས་ལོ་བདུན་བྱས། འདི་ནས་གླིང་སྟོད་སྨད་གཉིས་སུ་གྱེས་པར་འདོད་དོ། །སྨད་པ་ལ་ཟད་པ་དར་མ་འོད་དང་། ཟད་པ་དོན་གྲུབ་གཉིས་ཀྱིས་ལོ་སུམ་ཅུ་མཛད། དེ་ནས་སློབ་དཔོན་འོད་ཟེར་མགོན་པོས་ལོ་སུམ་ཅུ་སོ་ལྔ་གདན་ས་མཛད་པ་ལ། སློབ་མ་སློབ་དཔོན་ཤཱཀྱ་གཞོན་ནུ། དོན་གྲུབ་དཔལ། ཁ་རག་པ་ལ་སོགས་པ་བྱོན་པའི་ཤཱཀྱ་གཞོན་གྱིས་གདན་ས་མཛད་དེ། དེ་ནས་རིམ་པ་ལྟར་བྱོན་ནོ། །གླིང་སྟོད་པ་ནི། འཇམ་རྩི་ནིའི་སློབ་མ་གཙང་པ་འཇམ་སེང་། དེའི་རྗེས་སུ་འཛིན་སྟོན་ཞུས་སྟོན། བློ་གྲོས་འབར་རྣམས་རིམ་པར་བྱོན། དེ་ནས་སློབ་དཔོན་གཉལ་ཞིག་འོན་བྱང་རྡོ་ནས་སྤྱན་དྲངས་ཏེ་གདན་ས་ལོ་བཅོ་བརྒྱད་མཛད་ཅིང་། སློབ་མ་བུ་དགུར་གྲགས་པ་ནི། ཟད་རིང་། ཕུ་དར་དཀོན། གཙང་པ་གླུ་གུ་རྣམས་ལ་སྔ་ཚར་བ་གསུམ། འུ་ཡུག་པ་བསོད་ནམས་སེངྒེ། བོ་དོང་རིན་ཆེན་སེངྒེ། སློབ་དཔོན་འཛམ་ནམ་གསུམ་ལ་བར་ཚར་གསུམ། རྒྱ་འཕྲེང་། འཇམ་གསར། སྐྱེ་བ་ནག་གསུམ་ལ་ཕྱི་ཚར་གསུམ་ཟེར་རོ། །དེ་ལྟར་སློབ་མ་མང་ཡང་གདན་ས་རྒྱལ་བ་པོ་སྟོན་གྱིས་བྱས། དེ་ནས་རྒྱ་འཕྲེང་པ་བདེ་བ་ཅན་ནས་སྤྱན་དྲངས་ཏེ་གདན་ས་མཛད། དེ་ནས་ཆུ་མིག་པ་སེངྒེ་དཔལ་གྱིས་གདན་ས་ལོ་བཅོ་བརྒྱད་མཛད། དེ་ནས་ད་ལྟའི་བར་དུ་གདན་ས་མ་ཆད་པར་བྱོན་པའོ། །ལོ་ཙཱ་བའི་བུ་ཆེན་ཁྱུང་རིན་ཆེན་གྲགས་ཀྱི་སློབ་མ། སྟོད་ལུང་རྒྱ་དམར། སྟག་པ་ཁ་ཆེ་སོགས་ལས་བརྒྱུད་པ་ཉང་སྟོད་གནས་གསར་ལ་སོགས་སུ་དར་རོ། །འབྲེ་ཤེས་རབ་འབར་གྱི་ཉང་སྟོད་གནས་རྙིང་དུ་ཕར་ཕྱིན་གྱི་གྲྭ་ས་བཙུགས་ཏེ། ལས་སྟོད་པ་དཀོན་མཆོག་འབར་ལ་སོགས་པ་སྨིན་པར་མཛད་དོ། །ཨར་བྱང་ཆུབ་ཡེ་ཤེས་ཀྱིས་གནམ་རྩེང་ལྡིང་དང་། གཞུ་ཀུན་དགའ་ར་བ་སོགས་སུ་ཆོས་གསུངས་ཏེ། གྲྭ་པ་དཔེ་འགྲེམས་དུས་གཅིག་ལའང་བརྒྱད་བརྒྱ་ཙམ་འདུས། གྲགས་ཆེ་བ་དཀར་ཆུང་རིང་མོ་སོགས་མང་དུ་བྱོན་ནོ། །གཞན་ཡང་གཉལ་ཞིག་གི་སློབ་མ་ལས་བརྒྱུད་པའི་ས་སྐྱ། ཞ་ལུ་སོགས་གཙང་གི་ཆོས་སྡེ་གྲགས་ཆེ་བ་རྣམས་སུ་མཚན་ཉིད་ཀྱི་བཤད་གྲྭ་བཙུགས་ཏེ། མདོར་ན་རྔོག་ལོ་ཙཱ་བ་ཁུ་དབོན་ནས་བརྒྱུད་པ་རྣམས་ཨ་ཏི་ཤའི་སློབ་བརྒྱུད་ཀྱི་མཆོག་ཏུ་གཏོགས་ཤིང་། བསྟན་པ་སྤྱི་ལ་བཀའ་དྲིན་ཆེ་བས་ཟུར་ཙམ་སྨོས་པའོ། །གཉིས་པ་མངའ་རིས་པ་ཤེས་རབ་རྒྱལ་མཚན་ལས། གླེགས་བམ་བྱུང་ཚུལ་ནི། རྔོག་ལེགས་པའི་ཤེས་རབ་དེ་ཉིད་གསང་ཕུར་གྲྭ་པ་ལྔ་བརྒྱ་ཙམ་འདུས་ཏེ། གཞན་ཕན་སྐྱོང་བའི་དུས་སུ་དེ་རྣམས་ཀྱི་ནང་ནས་རྣམ་གཡེང་ལ་མི་དགའ་ཞིང་། འདོད་ཡོན་ལ་ཆེད་དུ་མི་བྱེད་པའི་བྱང་ཆུབ་སེམས་དཔའ་ཤེས་རབ་རྒྱལ་མཚན་ཞེས་པ་མངའ་རིས་སྟོད་པ། ཇོ་བོ་དང་འབྲོམ་གཉིས་ཀ་ལ་ཆོས་ཀྱང་ཐོས་པ་ཅིག་ཡོད་པ་དེ། འདུ་ཚོགས་ལ་མི་འོང་བར། གསང་ཕུའི་ནགས་ཁྲོད་ཅིག་ན་སྒོམ་འབའ་ཞིག་མཛད་ཀྱིན་བཞུགས་པ་ལ། དེ་དུས་རྔོག་གསང་ཕུ་བ། ནགས་གསེབ་ན་ཡར་སྐྱོ་སངས་ལ་བྱོན་པ་ན། བྱང་ཆུབ་སེམས་དཔའ་ཤེས་རབ་རྒྱལ་མཚན་དང་མཇལ་ནས། རྔོག་ལ་ཕྱག་འཚལ་བ་དང་། རྔོག་ན་རེ་ཁྱེད་བཟའ་བཏུང་། ལོངས་སྤྱོད་ལ་མི་བལྟ་བ་ངོ་མཚར་ཆེ། དུས་དེང་སང་རྣམ་གཡེང་སྤངས་ནས་འདི་ལྟ་བུའི་དགེ་སྦྱོར་བྱེད་པ་ལ་དཀའ་ལས་ཡོད། ཁྱེད་ཐུགས་དམ་གྱི་མཐིལ་ཅི་ལ་མཛད་གསུངས་པས་ཤེས་རབ་རྒྱལ་མཚན་ན་རེ། ཡོངས་འཛིན་དམ་པ་གསན་དུ་གསོལ། འདུས་བྱས་ཆོས་ནི་འདི་འདྲ་བ། །སྐྱེས་པའི་ཐ་མ་འཆི་བའི་ཆོས། །བསགས་པའི་ཐ་མ་འཛད་པ་ལ། །ཚེ་འདིའི་སྣང་བ་བག་རེ་ལ། །རྒྱུ་མཚན་ཅི་ཡང་མི་གདའ་བ། །དེ་བས་མི་རྟག་ཐུན་རེ་སྒོམ། །གསུངས་པས། རྔོག་གིས་དགོངས་པ་ལ། འདི་ཆོས་སྐད་ཐུན་མོང་བ་ཡིན། འདི་ལ་དགེ་སྦྱོར་གྱི་ཁྲིགས་དང་། དད་གུས་ཅི་འདུག་ལྟ་སྙམ་ནས། དྲི་ལན་མང་དུ་མཛད་པས། བཀའ་གདམས་གླེགས་བམ་རྔོག་གི་ཕྱག་ཏུ་བཞུགས་པ་ཤེས་རབ་རྒྱལ་མཚན་གྱིས་བཙད་ཆོད་དེ་ཞུས་པ། ཐོག་མར་བུ་ཆོས་ཀྱི་ལེའུ་དང་པོ། བྲམ་ཟེའི་ཁྱེའུ་གསལ་བར་སྐུ་སྐྱེ་བ་བཞེས་ཚུལ་སོགས་གསུངས། མདོར་ན་ཚིག་རེ་རེ་ལའང་བསླབ་པ་གསུམ། ལྷ་བཞི། རྗེས་དྲན་ལྔ་ཚང་བ་རེ་མཛད་དེ་བསླབ་གསུམ་ཡང་། ཚུལ་ཁྲིམས་བསྲུང་བ་དང་། གཞན་དོན་དུ་བསམ་པ་བཟང་པོ་བྱེད་པ་དེ་ཐམས་ཅད་བདེན་གཉིས་སུ་དྲིལ་ནས་ཉམས་སུ་ལེན་པ་དང་། ལྷ་བཞི་ནི། རབ་ཏུ་བྱུང་བའི་ཆ་ནས་ཤཱཀྱ་ཐུབ་པ། ཚད་མེད་པ་བཞི་ལ་དགེ་སྦྱོར་བྱེད་པའི་ཆ་ནས་ཐུགས་རྗེ་ཆེན་པོ། འགྲོ་དོན་བྱེད་པའི་ཆ་ནས་རྗེ་བཙུན་མ་སྒྲོལ་མ། གཉེན་པོ་བསྟེན་པའི་ཆ་ནས་མི་གཡོ་བ་དང་། རྗེས་དྲན་ལྔ་ནི། ལྷག་པར་སྒྲོལ་མ་འདི་སྐད་གསུངས། །སྲས་ཀྱི་ཐུ་བོ་སྤྱན་རས་གཟིགས། །ཁྱོད་ཀྱི་རྗེས་འབྲང་ཁོ་མོས་སྐྱབས། །ཁོ་མོའི་གདམས་པ་འདི་ལོངས་ལ། །རྗེས་སུ་འབྲངས་ལ་བསྟན་པར་གྱིས། །སྐྱབས་གནས་བླ་མ་དྲན་པར་མཛོད། །ལུས་ནི་ལྷ་ཡི་རང་བཞིན་ཏེ། ངག་ནི་བཟླས་བརྗོད་རྒྱུན་པར་མཛོད། །འགྲོ་བ་མ་ལུས་ཕ་མར་སོམས། །སེམས་ཀྱི་གནས་ལུགས་སྟོང་པར་སྤྱོད། །ལྔ་པོ་དེ་ཡི་སྐྱ་བར་ནས། །དགེ་རྩ་ཐམས་ཅད་དག་པར་མཛོད། །ཅེས་ཏེ། འདི་རྣམས་ཀྱི་ནང་དུ་གླེགས་བམ་གྱི་ཉམས་ལེན་འདུ་བར་བཞེད་ཅིང་། བཀའ་བབས་ཆེ་ཆུང་གང་ཟག་བློ་མཐོ་དམན་གྱི་རིམ་པས་འབྱེད་ཚུལ་གླེགས་བམ་ལས་གསུངས་པ་རྣམས་བསྟན་ནས། དེ་ནས་རྗེས་སུ་གླེགས་བམ་གྱི་པོ་སྟི་ཚང་བ་བཀའ་རྒྱ་དང་བཅས་ཏེ་གནང་། ཤེས་རབ་རྒྱལ་མཚན་གྱིས་ཀྱང་གནས་ངེས་མེད་དུ་བཞུགས་ནས་ཉམས་ལེན་མཛད་དོ། །དེ་ནས་སྤྱན་རས་གཟིགས་ཀྱི་སྤྲུལ་པ་ཕུ་ཆུང་པ་གཞོན་ནུ་རྒྱལ་མཚན་ལ་གནང་། དེས་ཀ་མ་བ་རྣལ་འབྱོར་པ་རིན་ཆེན་རྒྱལ་མཚན་ལ། དེས་སྟབས་ཁ་བ་ཞང་སྟོན་དར་མ་རྒྱལ་མཚན་ལ། དེས་ལྷ་བླ་མ་ཡེ་ཤེས་འོད་ཀྱི་སྐུ་སྐྱེ་བྱང་ཆུབ་བཟང་པོ་ལ། དེས་ནམ་མཁའ་རིན་ཆེན་ལ་གནང་། དེ་དག་གི་ལོ་རྒྱུས་རྒྱས་པར་དོན་དུ་གཉེར་ན། གླེགས་བམ་གྱི་བྱུང་ཚུལ་ངོ་མཚར་རྨད་དུ་བྱུང་བའི་དཔལ་འབྱོར་ཞེས་པར་བལྟའོ། །ཞར་ལ་ཁུ་སྟོན་བརྩོན་འགྲུས་གཡུང་དྲུང་གི་ལོ་རྒྱུས་ནི། ཡར་ལུང་ཐང་པོ་ཆེ་དང་ལྷ་སྡིངས་སུ་བྱོན། སྤྱིར་ཇོ་བོའི་ཆོས་མང་དུ་མངའ། ཁྱད་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྩལ་ཐོན། གཤིན་རྗེ་གཤེད་ཀྱི་ཞལ་གཟིགས། སློབ་མའི་མཆོག་མངོན་པ་ལ་མཁས་པ་བྲང་ཏི་དར་མ་སྙིང་པོ་སོགས་དང་། གླེགས་བམ་ལས། ན་ག་རཱ་ཛ་ལ་སོགས་པའི་འཁོར་ལྔ་བརྒྱ་ཙམ་ཡོད་ཅེས་འབྱུང་ངོ་། །གསུམ་པ་ནག་ཚོའི་རྗེས་སློབ་བྱོན་ཚུལ་ནི། ནག་ཚོ་ལོ་ཙཱ་བ་ལ། མངའ་རིས་སྐོར་གསུམ་དུ་སློབ་མ་མང་དུ་བྱོན་པ་ལ། དབུས་སུ་གྲགས་ཆེ་བ་རོང་པ་ཕྱག་སོར་བ་ཡིན་ཏེ། ཁོང་རང་གི་སྐྱེ་བ་བཅུ་གསུམ་དྲན་ཅིང་། མངོན་པར་ཤེས་པ་རྒྱ་ཆེན་པོ་མངའ་བ། སྒོམ་པའི་སྟོབས་ཀྱིས་རིག་པའི་གནས་ལ་མཁས་པ་དང་། དང་པོར་ཇོ་བོ་ཆེན་པོའི་གདམས་ངག་ཁོ་ན་རྩད་གཅོད་པ་ལ་ཇོ་བོའི་དངོས་ཀྱི་སློབ་མ་ཞང་བཙུན་ཡེར་པ་བ། ཡེར་པ་གཟིམ་ཁང་གི་སྒོམ་པ་དད་པ་བླ་མ། ར་སྒྲེང་དུ་བཤེས་གཉེན་སྟོན་པ། རྣལ་འབྱོར་པ་ཆེན་པོ། དཔལ་ལྡན་དགོན་པ་བ། མཁའ་རུ་བ་སྔ་མ། ལོ་ཙཱ་བ་ནག་ཚོ། ཇོ་བོ་ལེགས་དང་བརྒྱད། ཉིང་སློབ་མཁའ་རུ་བ་ཕྱི་མ། དགེ་བཤེས་ཡུང་ང་བ་དང་བཅུ་ལ་བསྟེན་ནས་བཤད་པ་དང་སྒྲུབ་པའི་གདམས་པ་དང་། ཇོ་བོའི་ལོ་རྒྱུས་རྩད་བཅད་པས། ཇོ་བོ་དངོས་ཀྱི་སློབ་མ་རྣམས་གསུང་མཐུན་པར་བྱུང་། ཉིང་སློབ་གཉིས་གསུང་མ་མཐུན་ཏེ། ཁྱད་པར་དུ་བསྟན་རིམ་གྱི་མཚན་འདོགས་ལུགས་ལ། མཁའ་རུ་བ་ཕྱི་མའི་ཞལ་ནས། བསྟན་པའི་སྲོལ་ཁ་བྱ་བ་ཡིན་གསུངས། ཡུང་ང་བའི་ཞལ་ནས། ཁྱོད་ཀྱི་སློབ་དཔོན་བློ་རྟུལ་བས་མ་ཟིན་པར་སྣང་། བླ་མ་རྣམས་བསྟན་པའི་རིམ་པ་ཞེས་གསུངས་པ་ཡིན། དེ་ཡང་། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །བྱ་བའི་དོན་ཡིན་གསུངས། དེ་ནས་རོང་པ་ཕྱག་སོར་བའི་དགོངས་པ་ལ། ཇོ་བོ་དངོས་ལ་ལོ་བཅུ་དགུ་བསྟེན་པའི་ལོ་ཙཱ་བ་ཆེན་པོ་དེ། ད་དུང་མངའ་རིས་གུང་ཐང་ན་བཞུགས་ཡོད་འདུག་པས། ཇོ་བོ་དངོས་སུ་བཞུགས་ཀྱང་ལོ་ཙཱ་བ་བར་དུ་འཇུག་དགོས་པས། དེ་རང་ལ་ཅིག་གཏུག་དགོས་དགོངས་ནས་མང་ཡུལ་དུ་བྱོན་པས། ལོ་ཙཱ་བ་ཆེན་པོ་དེ་གུང་ཐང་ཡང་ཐོག་གི་གཙུག་ལག་ཁང་ན་བཞུགས་པའི་དྲུང་དུ་བྱོན་ནས། དང་པོར་གསང་སྔགས་ཀྱི་གདམས་པ་ཆེ་ཆུང་མང་དུ་ཞུས་ནས་བག་ཕབ། དེ་ནས་ཕྱི་དེ་ལོ་ལ་ཕ་རོལ་ཏུ་ཕྱིན་པའི་སྒྲུབ་པའི་གདམས་པ་དང་། ཇོ་བོ་ཆེན་པོའི་སྐུ་ཆེ་བའི་ཡོན་ཏན་དང་། བོད་དུ་སྤྱན་དྲངས་ལུགས་གསུང་བར་ཞུ་བ་ཕུལ་བས། ལོ་ཙཱ་བའི་ཞལ་ནས། དེ་ལ་ང་མཁས་པ་ཡིན། ལོ་དགུ་བསྟེན། བོད་དུ་ངས་སྤྱན་དྲངས་པས། ཇོ་བོའི་ལོ་རྒྱུས་ལ་ཤིན་ཏུ་མཁས་པ་ཡིན་ཏེ། ཁྱོད་མིན་པ་རྩད་གཅོད་པ་རང་ཡང་མ་བྱུང་གསུངས་ནས། ལོ་རྒྱུས་ཆེན་མོ་ལམ་ཡིག་དེའི་དུས་སུ་གསུངས། སྒྲུབ་པའི་གདམས་ངག་ཀྱང་མ་ལུས་པ་གནང་སྟེ། ཉིན་རེ་ལ་ཆོས་ཐུན་གསུམ་གསུམ་གསུངས། ཐེག་པ་ཆེན་པོ་སྔགས་ཀྱི་སྒོར་ཡང་བཅུག་སྟེ། དབྱར་རེ་ལ་སྔགས་ཀྱི་གླེགས་བམ་དྲུག་ཅུ་ཙམ་ཐོན་པར་བྱས་ཏེ་ལོ་གསུམ་བཞུགས། བསྟན་རིམ་གྱི་མཚན་འདོགས་ལུགས་ཀྱང་། ཡུང་ང་བའི་གསུང་བཞིན་དུ་འདུག་གསུངས། དེ་ནས་མར་འབྱོན་ཁར། ཁྱོད་ཀྱིས་སྒྲུབ་པའི་གནས་འདི་ལྟ་བུ་ཅིག་ཏུ་སྒྲུབས་ཤིག འཕགས་པ་སྤྱན་རས་གཟིགས་ཞལ་མཐོང་པར་འགྱུར་རོ་ཞེས། ལག་སོར་དགོན་པའི་ལུང་བསྟན་ཡང་མཛད། དེ་ནས་མར་ལ་སྐྱེལ་ཐུང་མཛད་དེ། འགྲོ་ཆོས་ཤིག་ཞུས་པས། གོང་ཐང་པའི་ཞལ་ནས། དལ་འབྱོར་རྟེན་ཅིག་ཤེས་རབ་ཅན། །ཚེ་འདི་ཇི་ལྟར་བྱས་ཀྱང་ཕྱི། །བླ་མེད་བྱང་ཆུབ་རྙེད་དཀའ་བས། །འབད་པ་ཆེན་པོ་བྱ་འཚལ་ལོ། །ཞེས་པ་ལ་བརྟེན་ནས་ཆོས་ཐུན་གཅིག་གསུངས། དེར་ཐེག་པ་ཆེན་པོ་མཐའ་དག་གི་ཆོས་མ་ལུས་པ་འདུས་པ་ཡིན་གསུངས། དེ་ནས་མར་བྱོན། ཕོད་མདོ་བས་སྣེ་ལེན་བཟང་དུ་བྱས་ཏེ། བསྟན་པ་ལ་ཕན་པའི་ཆོས་ཤིག་ཞུ་ཟེར་བས། མདོ་རྩ་དང་བསླབ་པ་ཀུན་ལས་བཏུས་པ་གཉིས་གསུངས། དེ་ནས་ཚེ་འདིའི་བྱ་བ་ཐམས་ཅད་ལིང་གིས་བསྐྱུར་ནས་བླ་མས་ལུང་བསྟན་པའི་གནས་ལག་སོར་དགོན་པར་བཞུགས་ཏེ། ཉེ་གནས་དང་ཡང་མི་མཇལ་བས། གསོལ་བ་བུག་སྒོ་ལ་བླངས་ཏེ་སྒྲུབ་པ་རྩེ་གཅིག་ཏུ་མཛད་པས། ལོ་གསུམ་ན་ཐུགས་རྗེ་ཆེན་པོའི་ཞལ་མཐོང་། ལུང་བསྟན་ཏེ། ཁྱོད་ཀྱིས་ཚེ་འདི་ཉིད་དུ་མཐོང་ལམ་ཐོབ་ནས། སློབ་མ་ཡང་སུམ་ཅུས་ཞལ་མཐོང་བར་འགྱུར་གསུངས། དེ་ནས་ལོ་ཉི་ཤུ་རྩ་བཞི་སོང་བའི་དུས་མནལ་ལམ་དུ་མཁའ་འགྲོ་མ་མང་པོ་བྱུང་ནས་ཇོ་བོའི་རིང་བསྲེལ་མ་སྦ་བར་སྟོན་ཟེར་ནས། རིང་བསྲེལ་སྡེར་གང་གཏད་པ་ལྷོ་ཕྱོགས་སུ་གཏོར་བ་ཞིག་རྨིས། ཕྱིས་རོང་པའི་བུ་བཞིར་གྲགས་པ་ལྷོར་འབྱུང་བ་ལ་ལྟ་བར་འདུག་གསུངས། དེ་ནས་པ་ཚབ་འཕྲང་ཁ་རྗེའི་འཁྲུག་པའི་འདུམས་མཛད་པ་ལ། ཕོད་མདོར་བྱོན་པ་དང་། རྨ་ཚོ་བྱང་རྡོར་ཟེར་བ་འདུལ་བ་འཛིན་པ་ཆེན་པོ་དེ་དང་མཇལ་བས། ཁོང་དད་དེ། སྐྱིད་ཤོད་འོན་ལྗང་རྡོར་སྤྱང་ཆོས་བཙུགས་པ་བས་དེའི་དུས་རྨ་ཚོའི་ཟུར་ཆོས་པ་ཆེ་བ་བཞིས་ཆོས་ཞུས་པས། རོང་པའི་བུ་བཞིར་གྲགས་པ་ནི། བྱ་འདུལ་བ་འཛིན་པ། རོག་འཆིང་ཕུ་བ། རྣམ་སྤར་བ། དགེ་བཤེས་ཞུ་ལན་པའོ། །རྒྱ་ར་སྟོན་བརྗིད་དགེ་བསྙེན་པས་བུར་མ་བགྲང་། དེ་ལྔས་ཇོ་བོའི་གདམས་པ་ཞུས། ཟིན་བྲིས་མཛད་པས་བྱ་འདུལ་བ་འཛིན་པས་གདམས་པ་དང་ལོ་རྒྱུས་ཉུང་འདུས་གཅིག་མཛད། འཆིང་ཕུ་བས་ལོ་རྒྱུས་ཉུང་འདུས་ལ་གདམས་པ་མང་བ་ཞིག་བྱས། རྣམ་སྤར་བས་ལོ་རྒྱུས་མ་བྲིས་པ་གདམས་ངག་རྣམས་བྲིས། ཞུ་ལན་པས་གདམས་ངག་དང་ལོ་རྒྱུས་གཉིས་ཀ་རྒྱས་པར་བྱས་ནས། ཁྱད་པར་དུ་ལོ་རྒྱུས་ཞིབ་པར་མཛད་དེ། མདོ་སྡེ་རྣམས་ལས། སངས་རྒྱས་ཀྱིས་ཡུལ་འདིར་གང་ཟག་འདི་ལ་ཆོས་འདི་གསུངས་བྱ་བ་ཡོད་པས། ཆོས་ཁུངས་བཙུན་པར་རྟོགས་པ་ལ་ལོ་རྒྱུས་འདི་གལ་ཆེ་བ་ཡིན་གསུངས་ནས་རྒྱས་བར་བྲིས། ཡི་གེ་དེ་ཐམས་ཅད་འདུལ་བ་འཛིན་པའི་ཕྱག་ཏུ་བྱུང་བས་ཁོང་གི་ཕྱོགས་གཅིག་ཏུ་བསྒྲིགས་པས། ཇོ་བོའི་ལམ་ཡིག་ཏུ་གྲགས། རྒྱ་ར་སྟོན་བརྗིད་ལ་སྔགས་ཀྱི་གདམས་པ་གཙོ་བོར་གནང་། འདིས་རྒྱ་རའི་དགོན་པ་བཏབ། གཞན་ཡང་། བ་སྤུ་བ་ཤེས་རབ་ཚུལ་ཁྲིམས་ཀྱིས་ཕྱག་སོར་བ་ཡུན་རིང་དུ་བསྟེན། ཇོ་བོ་ནས་བརྒྱུད་པའི་ཆོས་སྐོར། ཁྱད་པར་སྤྱན་རས་གཟིགས་ཀྱི་གདམས་ངག་ཐམས་ཅད་མ་ལུས་པར་གནང་། ལུང་བསྟན་ནས་ཐུགས་རྗེ་ཆེན་པོ་བསྒྲུབས་པས་ལོ་ལྔ་ན་ཞལ་མཐོང་། ཐེག་པ་ཆེན་པོ་སྦྱོར་ལམ་གྱི་རྟོགས་པ་བརྙེས་པ་ཡིན་གསུངས། བ་སྤུ་བས་འཕགས་གཅེས་སྒོམ་ཤེས་རབ་རྡོ་རྗེ་དང་། མངའ་རིས་པ་ཤེས་རབ་རྒྱལ་མཚན་གཉིས་ལ་གསུངས། དེ་གཉིས་ཚོགས་ལམ་ཆེན་པོ་བ་ཡིན་གསུངས། གཅེ་སྒོམ་གྱིས་ཐོག་མར་བྲག་ལྷ་ཀླུ་ཕུག་ཏུ་ལོ་བརྒྱད་སྒྲུབ་པ་མཛད་ནས། འཕགས་པའི་ཞལ་དངོས་སུ་མཐོང་ངོ་། །བླ་མ་མངའ་རིས་པ་ལ་རུ་མཚམས་ཀྱི་བྲག་ཕུག་ཏུ་བསྒྲུབས་པས་ཞལ་མཐོང་བར་འགྱུར་གསུངས་ནས་ལུང་བསྟན་ཏེ། བསྒྲུབས་པས་ལོ་བཞི་ན་ཞལ་མཐོང་། དུས་རྒྱུན་དུ་མི་མ་ཡིན་གྱིས་འཚོ་བ་དྲངས་གསུངས། དེ་གཉིས་ཀ་ལ་གྲུབ་ཐོབ་སྐྱེར་སྒང་པས་ཞུས་པས། ལོ་ཕྱེད་དང་བཞི་བསྒྲུབས་བས་ཞལ་མཐོང་ནས། སྙིགས་མའི་དུས་སུ་ཞལ་མཐོང་གི་བརྒྱུད་པ་མང་དུ་འབྱུང་གསུངས་ལུང་བསྟན་མཛད་དེ། སློབ་མ་ཡང་ལྔ་བཅུས་ཞལ་མཐོང་ངོ་། །དེས་སངས་རྒྱས་གཉན་སྟོན་ལ་གསུངས་ཏེ། སྐྱེར་སྒང་དུ་དབྱར་ཐོག་དགུན་ཐོག་བཅུ་གསུམ་བཞུགས། གདམས་ངག་གཅིག་བརྒྱུད་ཐམས་ཅད་མ་ལུས་པར་གནང་ནས། ལོ་གསུམ་བསྒྲུབས་པས། ཕྱག་བཞི་པ། ཁརྶ་པ་ཎི། བཅུ་གཅིག་ཞལ། ཕྱག་སྟོང་སྤྱན་སྟོང་རྣམས་ཞལ་མཐོང་། སློབ་མ་བཅུ་གཅིག་གིས་ཞལ་མཐོང་བའི་ལུང་བསྟན་མཛད་པ་བཞིན་བྱུང་གསུངས། དེ་ནས་དེ་ལྟ་ཡང་བརྒྱུད་པ་མ་ཆད་པར་བཞུགས་པ་དང་། གཞན་ཡང་ནག་ཚོ་ནས་བརྒྱུད་པའི་ཆོས་སྐོར། གསང་བ་འདུས་བའི་བཤད་རྒྱུད་ཡེ་ཤེས་རྡོ་རྗེ་ཀུན་ལས་བཏུས་ལ་བརྟེན་པའི་མན་ངག་ལ་སོགས་པ་འགའ་རེ་གནང་ངོ་། །

དྲུག་པ་དེ་རྣམས་ཀྱིས་བསྟན་བཅོས་ཇི་ལྟར་མཛད་པ།

དྲུག་པ་དེ་རྣམས་ཀྱིས་བསྟན་བཅོས་ཇི་ལྟར་མཛད་པ་ནི། རྒྱལ་བས་གདུལ་བྱའི་བསམ་པ་དང་རྗེས་སུ་མཐུན་པར་མདོ་རྒྱུད་ཀྱི་གསུང་རབ་མཐའ་ཡས་ཤིག་བཀའ་བསྩལ་པ་དང་། དེའི་དགོངས་པ་གསལ་བར་མཛད་པའི་ཤིང་རྟ་ཆེན་པོ་རྣམས་ཀྱི་བསྟན་བཅོས་རྩོད་བྲལ་དུ་མ་ཞིག་མཛད་པ་དེ་ཐམས་ཅད་བཀའ་གདམས་རིན་པོ་ཆེའི་ཁུངས་སུ་བྱེད་པའི་གཞུང་ཡིན་ལ། དེ་རྣམས་ཀྱི་ནང་ནས་བསླབ་སྤྱོད་གཉིས། ས་རྒྱན་གཉིས། སྐྱེས་ཚོམས་གཉིས་དང་དྲུག་ལ་བཀའ་གདམས་གཞུང་དྲུག་ཅེས་གསུངས་པའི་དོན་ཡང་། ཟབ་མོ་ལྟ་བའི་རྒྱུད་ཀྱི་གཞུང་བསམ་གྱིས་མི་ཁྱབ་ཀྱང་། དོན་བསླབ་སྤྱོད་གཉིས་སུ་འདུ་བ་དང་། རྒྱ་ཆེན་སྤྱོད་པའི་རྒྱུད་ཀྱི་གཞུང་བསམ་གྱིས་མི་ཁྱབ་ཀྱང་། དོན་ས་རྒྱན་གཉིས་སུ་འདུ་བ་དང་། སྐྱེས་རབས་ཀྱིས་བཅོམ་ལྡན་འདས་ཀྱི་སྔོན་གྱི་མཛད་པ་ལས་བརྩམས་ཏེ། བྱང་ཆུབ་སེམས་དཔའི་སྤྱོད་པ། ཕ་རོལ་ཏུ་ཕྱིན་པ་དྲུག་དབྱེ་བ་དང་བཅས་པའི་དོན་ཉམས་སུ་ལེན་ཚུལ་གསུངས་པ་དང་། ཆེད་དུ་བརྗོད་པའི་ཚོམས་དགྲ་བཅོམ་པ་ཆོས་སྐྱབས་ཀྱིས་མཛད་པ། བརྗོད་བྱ་སྣ་ཚོགས་པ་ཚོམས་སུ་བསྡུས་ནས་གསུངས་པས། ཆོས་སྤྱི་ལ་གལ་ཆེ་བར་དགོངས་ཏེ་གཞུང་དྲུག་ཏུ་མཛད་དོ། །བཤེས་གཉེན་གོང་མ་རྣམས་འདུལ་སྤྱོད་གཉིས་ཞེས། འདུལ་བས་ལྷག་པ་ཚུལ་ཁྲིམས་ཀྱི་བསླབ་པ། སྤྱོད་འཇུག་གིས་བྱང་ཆུབ་སེམས་དཔའི་བསླབ་པ་གསུམ་ལ་སློབ་པ་སྟོན་པས་དེ་རྣམས་ཟབ་ལམ་རྡོ་རྗེ་ཐེག་པའི་རྟེན་དུ་ཡང་ངེས་པར་དགོས་པ་ལ་དགོངས་སོ། །གཞན་ཡང་ཇོ་བོའི་ཆོས་ཆུང་བརྒྱ་རྩར་གྲགས་པའམ། བྱང་ཆུབ་སེམས་དཔའི་སྤྱོད་པ་གཙོ་བོར་སྟོན་པས་སྤྱོད་ཕྱོགས་བརྒྱ་རྩ་ཞེས་པའི་གླེགས་བམ་ལ། ཐོག་མར་མཆོད་བརྗོད་ཀྱི་ཚུལ་གྱིས་བསྟོད་པའི་སྐོར་ལ། དཀོན་མཆོག་གསུམ་རྗེས་སུ་དྲན་པའི་མདོ། ལྷ་ལས་ཕུལ་བྱུང་བར་བསྟོད་པ་བདེ་བྱེད་བདག་པོས་མཛད་པ། བཤགས་པའི་བསྟོད་པ་ཙནྡྲ་གོ་མིས་མཛད་པ། ཡོན་ཏན་མཐའ་ཡས་པར་བསྟོད་པ་དཀོན་མཆོག་འབངས་ཀྱིས་མཛད་པ། དེའི་འགྲེལ་པ་དང་། དོན་བསྡུས་པའི་ཚིགས་བཅད་ཕྱོགས་ཀྱི་གླང་པོས་མཛད་པ་དང་དྲུག སྐྱབས་འགྲོའི་སྐོར་ལ། སྐྱབས་གསུམ་བདུན་ཅུ་པ་ཟླ་གྲགས་ཀྱིས་མཛད་པ། སྐྱབས་འགྲོ་དྲུག་བཅུ་པ་བི་མ་ལ་མི་ཏྲས་མཛད་པ། སྐྱབས་འགྲོ་བསྟན་པ་ཇོ་བོ་རྗེས་མཛད་པ་དང་གསུམ། བྱང་ཆུབ་མཆོག་ཏུ་སེམས་བསྐྱེད་པའི་ཆོ་ག་ལ། འཕགས་པ་ཀླུ་སྒྲུབ་ཀྱིས་མཛད་པ། སློབ་དཔོན་བྱང་བཟང་གི་མཛད་པ། ཛེ་ཏ་རི་དགྲ་ལས་རྣམ་པར་རྒྱལ་བས་མཛད་པ། སེམས་བསྐྱེད་པའི་ཆོ་ག་དང་། བླ་མའི་བྱ་བའི་རིམ་པ་གཉིས་ཇོ་བོས་མཛད་པ། སྡོམ་པ་ཉི་ཤུ་པ་ཙནྡྲ་གོ་མིས་མཛད་པ། དེའི་འགྲེལ་པ་ཞི་བ་འཚོས་མཛད་པ་དང་བདུན་ནོ། །བྱང་ཆུབ་སེམས་དཔའི་སྤྱོད་པའི་སྐོར་ལ། བྱང་ཆུབ་ལམ་གྱི་སྒྲོན་མ། དེའི་རང་འགྲེལ་དང་། སྤྱོད་པ་བསྡུས་པའི་སྒྲོན་མ། བསྡུས་དོན་སྒྲོན་མེ། དབུ་མའི་མན་ངག སྙིང་པོ་བསྡུ་བ། སྙིང་པོ་ངེས་པར་བསྡུ་བ། བྱང་ཆུབ་སེམས་དཔའི་སྤྱོད་པ་ནོར་བུའི་ཕྲེང་བ། འདི་བཀའ་གདམས་གླེགས་བམ་གྱི་རྩ་ཚིག་ཡིན་ནོ། །བྱང་ཆུབ་སེམས་དཔའི་སྤྱོད་པ་མདོ་ཙམ་གདམས་ངག་ཏུ་བརྗོད་པ་ཐེག་པ་ཆེན་པོའི་ལམ་གྱི་སྒྲུབ་ཐབས་ཡི་གེར་བསྡུས་པ། ཐེག་པ་ཆེན་པོའི་ལམ་གྱི་སྒྲུབ་ཐབས་ཤིན་ཏུ་བསྡུས་པ། རང་གི་བྱ་བའི་རིམ་པ་བསྐུལ་བ་དང་བཅས་པ་ཡི་གེར་བྲིས་པ། མདོ་སྡེའི་དོན་ཀུན་ལས་བཏུས་པའི་མན་ངག ཀླུ་སྒྲུབ་ཀྱིས་མཛད་པའི་མདོ་ཀུན་ལས་བཏུས་པའི་དོན་བསྡུས་པ། མི་དགེ་བཅུའི་ལས་ཀྱི་ལམ་བསྟན་པ། ལས་རྣམ་པར་འབྱེད་པ། ཁ་ཏོན་དང་གླེགས་བམ་ཀློག་པ་སྔོན་དུ་བྱ་བའི་ཆོ་ག ཕ་རོལ་ཏུ་ཕྱིན་པའི་ཚ་ཚ་གདབ་པའི་ཆོ་ག བྱང་ཆུབ་སེམས་དཔའ་ལས་དང་པོ་པའི་ལམ་ལ་འཇུག་པ། དེ་ལྟར་བཅུ་དགུ་ཇོ་བོ་ཆེན་པོས་མཛད། འཕགས་པ་རྟོག་པ་ཆེན་པོ་ཡོངས་སུ་རྒྱས་པའི་མདོ་སྡེའི་སྡིག་བཤགས་དང་། སྒྲུབ་པ་མདོ་དེ་ཉིད་ལས་ཕྱུང་བ་ལས་དང་པོ་པའི་ས་སྦྱང་བ། དགྲ་ལས་རྒྱལ་བའི་གསང་བས་མཛད་པ། དེ་བཞིན་གཤེགས་པའི་ཡི་གེ་བརྒྱ་པའི་སྒོ་ནས་སྡིག་པ་བཤགས་པ་ཞི་བ་ལྷས་མཛད་པ་དང་ཉི་ཤུ་རྩ་གཉིས་སྒོམ་རིམ་དང་བསམ་གཏན་གྱི་ཡི་གེ་སྣ་ཚོགས་ལ། རྟེན་ཅིང་འབྲེལ་པར་འབྱུང་བ་དང་། དེའི་རྣམ་པར་བཤད་པ་འཕགས་པ་ཀླུ་སྒྲུབ་ཀྱིས་མཛད་པ། སྒོམ་རིམ་གསུམ་དང་། རྣལ་འབྱོར་བསྒོམ་པ་ལ་འཇུག་པ་ཀ་མ་ལ་ཤི་ལས་མཛད་པ། དོན་དམ་བྱང་ཆུབ་ཀྱི་སེམས་སྒོམ་པ་རིན་པོ་ཆེའི་སྒྲོན་མེ་དང་། ཀུན་རྫོབ་བྱང་ཆུབ་ཀྱི་སེམས་སྒོམ་པ་པདྨ་སྤུང་པ་གཉིས་སློབ་དཔོན་རྟ་དབྱངས་ཀྱིས་མཛད་པ། ཏིང་ངེ་འཛིན་གྱི་ཚོགས་ཀྱི་ལེའུ་སློབ་དཔོན་བྱང་ཆུབ་བཟང་པོས་མཛད་པ། རྣལ་འབྱོར་གྱི་མཚན་ཉིད་ཀྱི་བདེན་པ། ཡང་ཏིང་ངེ་འཛིན་གྱི་ལེའུ་ནག་པོ་ཞབས་ཀྱིས་མཛད་པ། བསམ་གཏན་གྱི་ཆོས་དྲུག་རྣམ་པར་བཞག་པ་ཨ་ཝ་དྷུ་ཏི་པས་མཛད་པ། དེའི་འགྲེལ་པ་དྷ་ན་ཤྲཱི་ལས་མཛད་པ། རྣལ་འབྱོར་པའི་རྟོགས་པའི་གེགས་སེལ་བ་སངས་རྒྱས་གསང་བས་མཛད་པ། རྣལ་འབྱོར་ཀྱི་མཚན་ཉིད་ཀྱི་བདེན་པ་སློབ་དཔོན་བྱང་ཆུབ་བཟང་པོས་མཛད་པ། དབུ་མའི་མན་ངག་རིན་ཆེན་ཟ་མ་ཏོག་ཁ་ཕྱེ་བ་དང་། བདེན་པ་གཉིས་ལ་འཇུག་པ་དང་། དྲན་པ་ཅིག་པའི་མན་ངག་གཉིས་མར་མེ་མཛད་ཡེ་ཤེས་ཀྱིས་མཛད་པ། རྣལ་འབྱོར་སྒོམ་པའི་ལམ་ཡེ་ཤེས་སྙིང་པོས་མཛད་པ། རྣལ་འབྱོར་ལ་འཇུག་པ་ཕྱོགས་ཀྱི་གླང་པོས་མཛད་པ། མི་སྡུག་པ་བསྒོམ་པའི་རིམ་པ་དགེ་བའི་གོ་ཆས་མཛད་པ། ལུས་ཡོངས་སུ་སྤྱད་པའི་སྒོམ་རིམ་ནག་པོ་ཞབས་ཀྱིས་མཛད་པ། སེམས་མགུ་བར་བྱ་བའི་ཚིགས་སུ་བཅད་པ་ཐེག་ཆེན་ཉི་ཤུ་པ་ཀླུ་གྲུབ་ཀྱིས་མཛད་པ། ཕ་རོལ་ཏུ་ཕྱིན་པའི་ཐེག་པའི་རིམ་པའི་མན་ངག་དཔལ་ཡེ་ཤེས་གྲགས་པས་མཛད་པ། སངས་རྒྱས་རྗེས་སུ་དྲན་པ་བླ་ན་མེད་པའི་མདོ་སྡེའི་རྗེས་སུ་འགྲོ་བ་མཧཱ་མ་ཏིས་མཛད་པ། ཤེས་རབ་ཀྱི་ཕ་རོལ་དུ་ཕྱིན་པའི་མན་ངག་རིན་ཆེན་འབྱུང་གནས་ཞི་བས་མཛད་པ། རྣལ་འབྱོར་ལ་འཇུག་པའི་མན་ངག་ཆོས་ཀྱི་དབང་པོས་མཛད་པ། རྣལ་འབྱོར་སྤྱོད་པའི་སྒོམ་པའི་དོན་བསྡུས་ཏེ་བསྟན་པ་ཡེ་ཤེས་ཟླ་བས་མཛད་པ་དང་ཉི་ཤུ་རྩ་བདུན། གསང་སྔགས་ཀྱི་ལམ་རིམ་ལ། ཡི་གེ་དྲུག་པའི་གླུ། སྤྱོད་པའི་གླུ། དེའི་འགྲེལ་པ། འཁོར་བ་ལས་ཡིད་ངེས་པར་འབྱུང་བའི་གླུ། ཆོས་ཀྱི་གླུ། ཏིང་ངེ་འཛིན་གྱི་གླུ། རྡོ་རྗེ་གདན་གྱི་གླུ། དེའི་འགྲེལ་པ་ཆོས་ཀྱི་དབྱིངས་སུ་ལྟ་བའི་གླུ། ཏིང་ངེ་འཛིན་གྱི་ཚོགས་ཀྱི་ལེའུ། འཇིག་རྟེན་ལས་འདས་པའི་ཡན་ལག་བདུན་པའི་ཆོ་ག རབ་ཏུ་གནས་པའི་ཆོ་ག་དང་། བཅུ་གཅིག་ཇོ་བོ་རྗེས་མཛད་པ། བདེ་བ་བཅུ་གསུམ་པའི་གླུ་ཨ་ཏི་ཤས་མཛད་པ། མན་ངག་བདུད་རྩིའི་འཁོར་ལོ་ཕྱག་ན་རྡོ་རྗེས་བསྡུས་པ། བྱང་ཆུབ་སེམས་ཀྱི་རྣམ་པར་བཤད་པ་འཕགས་པ་ཀླུ་སྒྲུབ་ཀྱིས་མཛད་པ། མཎྚལ་གྱི་ཆོ་ག་དགྲ་ལས་རྣམ་རྒྱལ་གྱིས་མཛད་པ། མཎྚལ་གྱི་ཆོ་ག་སངས་རྒྱས་གསང་བས་མཛད་པ། མཎྚལ་གྱི་ཆོ་ག་རྡོ་རྗེ་གདན་པས་མཛད་པ། མཎྚལ་གྱི་ཆོ་ག་ཀ་མ་ལ་ཤི་ལས་མཛད་པ། མཎྚལ་གྱི་ཆོ་ག་རྙོག་མེད་རྡོ་རྗེས་མཛད་པ་དང་བཅུ་དགུ གཏམ་དུ་བྱ་བ་སྣ་ཚོགས་ལ། རྨི་ལམ་ཡིད་བཞིན་གྱི་ནོར་བུའི་གཏམ་ཀླུ་སྒྲུབ་ཀྱིས་མཛད་པ། ཡོན་ཏན་བདུན་རབ་ཏུ་བརྗོད་པའི་གཏམ་དབྱིག་གཉེན་གྱིས་མཛད་པ། སྦྱིན་པའི་གཏམ་སློབ་དཔོན་གུ་ན་པྲ་བྷ་བས་མཛད་པ། ཚུལ་ཁྲིམས་ཀྱི་གཏམ། ཚོད་ཟིན་པའི་གཏམ། ཚོགས་ཀྱི་གཏམ་དང་གསུམ་དབྱིག་གཉེན་གྱིས་མཛད་པ། མི་ཁོམ་པ་བརྒྱད་ཀྱི་གཏ་རྟ་དབྱངས་ཀྱིས་མཛད་པ། ལེགས་བཤད་ཟ་མ་ཏོག་ལྟ་བུའི་གཏམ་སློབ་དཔོན་དཔའ་བོས་མཛད་པ། ཕྱིན་ཅི་ལོག་བཞི་སྤང་བའི་གཏམ་དང་། རྩོད་པའི་དུས་ཀྱི་གཏམ་མ་ཏི་ཙི་ཏྲས་མཛད་པ། དབེན་པའི་གཏམ་ས་མཚོ་སྦྱིན་གྱིས་མཛད་པ་དང་བཅུ་གཅིག་གོ །སྤྲིངས་ཡིག་གི་སྐོར་ལ། བཤེས་པའི་སྤྲིངས་ཡིག་ཀླུ་སྒྲུབ་ཀྱིས་མཛད་པ། སློབ་མ་ལ་སྤྲིངས་པ། ཙནྟྲ་གོ་མིས་མཛད་པ། རྒྱལ་པོ་ཀ་ནི་ཀ་ལ་སྤྲིངས་པ་མ་ཏི་ཙི་ཏས་མཛད་པ། རབ་གསལ་གཞོན་ནུ་ལ་སྤྲིངས་པ་འཕགས་པ་སྤྱན་རས་གཟིགས་ཀྱིས་མཛད་པ། སེམས་རིན་པོ་ཆེ་རྣམ་པར་སྦྱང་བའི་སྤྲིངས་ཡིག་ཛེ་ཏ་རིས་མཛད་པ། དྲི་མ་མེད་པ་རིན་པོ་ཆེའི་སྤྲིངས་ཡིག རྒྱལ་པོ་ནེ་ཡ་པ་ལ་གདམས་པ་དང་། པུ་ཧྲང་ཇོ་བོ་ལ་སྤྲིངས་ཡིག་སུམ་ཅུ་པ་ཇོ་བོས་མཛད་པ་དང་བདུན། དྲན་པ་ཉེར་བཞག་གི་ཚིག་ལེའུར་བྱས་པ་དང་། དགེ་བ་བཅུའི་ལས་ཀྱི་ལམ་བསྟན་པ་ཆོས་ལྡན་རབ་འབྱོར་དབྱངས་ཀྱིས་མཛད་པ། ཡང་མི་དགེ་བ་བཅུའི་ལས་ཀྱི་ལམ་བསྟན་པ་དང་། མྱ་ངན་བསལ་བ་རྟ་དབྱངས་ཀྱིས་མཛད་པ། འདོད་པའི་ཡོན་ཏན་ལྔའི་ཉེས་དམིགས་བཤད་པ་དབྱིག་གཉེན་གྱིས་མཛད་པ་དང་ལྔ་སྟེ་བཅུ་གཉིས་སུ་བཞེད་དོ། །རྟོགས་བརྗོད་ལ། གཞོན་ནུ་མ་བདུན་གྱི་རྟོགས་པ་བརྗོད་པ་གསང་བ་བྱིན་གྱིས་མཛད་པ་གཅིག ལུགས་ཀྱི་བསྟན་བཅོས་ལ། ཤེས་རབ་བརྒྱ་པ་འཕགས་པ་ཀླུ་སྒྲུབ་ཀྱིས་མཛད་པ། དྲི་མེད་དྲིས་ལན་རིན་པོ་ཆེ་ཕྲེང་བ་དོན་ཡོད་ཆར་གྱིས་མཛད་པ་དང་གཉིས། བསྔོ་བ་དང་སྨོན་ལམ་ལ། ཡན་ལག་བདུན་པའི་ཆོ་ག་ཚིགས་སུ་བཅད་པ་ཉི་ཤུ་པ་ཀླུ་སྒྲུབ་ཀྱིས་མཛད་པ། སྨོན་ལམ་བདུན་ཅུ་པ་གཞན་ལ་ཕན་པའི་དབྱངས་དགོན་པ་བས་མཛད་པ་དང་གཉིས་སོ། །མདོར་ན་གླེགས་བམ་གཅིག་ལ་བརྒྱ་དང་བཅུ་གཉིས་བཞུགས་སོ། །གཞན་ཡང་ཇོ་བོ་ཆེན་པོས་མཛད་པ་ལ། བྱང་ཆུབ་ལྟུང་བཤགས་ཀྱི་འགྲེལ་པ་དམ་ཚིག་གིས་བསྡུས་པ་ཞེས་པའི་རྩ་ལྟུང་གི་བཤད་པ། གསང་འདུས་ཡེ་ཤེས་ཞབས་ལུགས་ལྷ་བཅུ་དགུའི་སྒྲུབ་ཐབས། བསྟོད་པ། འཇམ་དཔལ་རྡོ་རྗེ་དཔའ་བོ་གཅིག་པའི་སྒྲུབ་ཐབས། གསང་འདུས་འཇིག་རྟེན་དབང་ཕྱུག་ལྷ་བཅུ་དགུའི་སྒྲུབ་ཐབས་དང་། འཇིག་རྟེན་དབང་ཕྱུག་དཔའ་བོ་གཅིག་པའི་སྒྲུབ་ཐབས། འཇིག་རྟེན་དབང་ཕྱུག་གི་གཏོར་ཆོག་རྒྱས་པ། རྒྱལ་བ་རིགས་ལྔའི་བཀྲ་ཤིས་ཀྱི་ཚིགས་སུ་བཅད་པ། གྲུབ་ཆེན་ལཱུ་ཧི་པས་མཛད་པའི་དཔལ་མངོན་པར་རྟོགས་པའི་འགྲེལ་བ་ཆེན་མོ། འཁོར་ལོ་སྡོམ་པ་ལྷ་བཅུ་གསུམ་དང་། ལྷ་ལྔ་དང་། དཔའ་བོ་གཅིག་པའི་སྒྲུབ་ཐབས། ཤར་ཕྱོགས་བྷཾ་ག་ལའི་ཚལ་དུ་བདེ་མཆོག་དཀྱིལ་འཁོར་ཞལ་གཟིགས་དུས་སུ་བསྟོད་པ། རྡོ་རྗེ་ཕག་མོའི་སྒྲུབ་ཐབས་ཆེ་བ་རིན་ཆེན་རྒྱན་ཞེས་པ་དང་། ཆུང་བ་གཅིག རྡོ་རྗེ་རྣལ་འབྱོར་མ་ཞལ་གཟིགས་པའི་དུས་སུ་བསྟོད་པ། ཡང་མཁའ་སྤྱོད་མ་དཀར་མོའི་སྒྲུབ་ཐབས་ཆེ་ཆུང་གཉིས། འབྱུང་པོ་ཐམས་ཅད་པའི་གཏོར་མའི་ཆོ་ག རབ་ཏུ་གནས་པའི་ཆོ་ག འཕགས་པ་ཀླུ་སྒྲུབ། ན་རོ་པ། སྒེག་པའི་རྡོ་རྗེ་དང་གསུམ་སྙན་ནས་སྙན་དུ་བརྒྱུད་པའི་མན་ངག་ཕྱོགས་གཅིག་ཏུ་མཛད་པ། སྒྲོལ་མ་ཡིད་བཞིན་འཁོར་ལོའི་སྒྲུབ་ཐབས། འཕགས་པ་བཅུ་གཅིག་ཞལ་གྱི་བསྟོད་པ། སྤྱན་རས་གཟིགས་གཙོ་འཁོར་གསུམ་གྱི་སྒྲུབ་ཐབས། ཡི་གེ་དྲུག་པའི་མན་ངག སྤྱན་རས་གཟིགས་ཀྱི་རི་མོའི་བརྡ་པ། སྒྲོལ་མ་སྔོན་མོའི་བསྟོད་པ་ཞལ་གཟིགས་དུས་སུ་མཛད་པ། ཛམྦྷ་ལ་དཀར་པོའི་བསྟོད་པ། སྨན་བླ་གཙོ་འཁོར་གསུམ་གྱི་སྒྲུབ་ཐབས། ཚོགས་བདག་དཀར་པོའི་སྒྲུབ་ཐབས་ཆེ་ཆུང་གཉིས། མི་གཡོ་བ་སྔོན་པོའི་སྒྲུབ་ཐབས། མགོན་པོ་གྲི་གུག་གི་སྒྲུབ་ཐབས། རྡོ་རྗེ་ལྕགས་སྒྲོག་གི་སྒྲུབ་ཐབས། རྟ་མགྲིན་ཤོ་ན་བཞི་བསྐོར་ལྷ་ལྔའི་སྒྲུབ་ཐབས་དང་། དཀྱིལ་ཆོག ཇོ་བོ་བོད་དུ་འབྱོན་ཁར་སློབ་མ་རྣམས་ལ་ཕྱི་ཆོས་སུ་གདམས་པ། རྣམ་དག་གཙུག་གི་ནོར་བུ། གཞན་ཡང་ལྷ་བཙུན་པ་བྱང་ཆུབ་འོད། ལོ་ཆེན་རིན་ཆེན་བཟང་པོ། འོལ་རྒོལ་པ་ཡེ་ཤེས་འབར། ཞང་སྣ་ཆུང་སྟོན་པ་རྣམས་ལ་གདམས་པ་དང་། ཇོ་བོས་མཛད་པའི་མདོ་བསྡུས་ཆེན་མོ། དང་པོ་རྒྱ་དཔེར་ལུས་པ། ཞང་ཤར་པ་བའི་ཕྱག་ཏུ་བྱུང་བས། པ་ཚབ་ལོ་ཙཱ་བ། གནས་གཞི་ཡ་གད་དུ་སྤྱན་དྲངས་ནས་བསྒྱུར་བར་བཤད་དེ། འདི་རྣམས་ནི་ཇོ་བོས་མཛད་པ་རྩོད་བྲལ་ཡིན་ལ། གཞན་ཡང་བསྟན་འགྱུར་གྱི་ཐོ་རྣམས་སུ་ཇོ་བོའི་མཛད་བྱང་འབྱར་བ་གཙུག་ཏོར་དྲི་མེད་དང་། གདུགས་དཀར་སོགས་རྒྱ་གཞུང་མང་དུ་འདུག་ཀྱང་འདིར་མ་བཀོད་དོ། །སྙེ་ཐང་དུ་མཛད་པར་གྲགས་པ་རིགས་ཀྱི་སྨོན་ལམ། ལྟ་སྒོམ་སྤྱོད་གསུམ་གྱི་གླུ། བསམ་གཏན་ལ་བསྐུལ་བའི་གླུ། བདེ་བ་དྲུག་གི་གླུ། ལྟ་སྤྱོད་ཟུང་དུ་འབྲེལ་བའི་གླུ། དུས་མཆོད་བཞིའི་ངོས་འཛིན་དང་ཕན་ཡོན། བདེ་མཆོག་རྒྱུད་ལ་བསྟེན་པའི་རླུང་གི་མན་ངག གཞན་ཡང་སྟོང་ཐུན་བརྒྱད་བཅུ་རྩ་གཉིས་སོགས་མཛད་བྱང་འབྱར་བ་མང་དུ་སྣང་ཞིང་། ཕལ་ཆེར་མཛད་པར་མངོན་ཏེ། འདིར་དཔྱད་པ་ཞིབ་ཏུ་མ་བྱས་སོ། །རྩ་ལྟུང་གི་འགྲེལ་པ་སོགས་ཁ་ཅིག་ལ་ཡང་། ཇོ་བོས་མཛད་པ་ཡིན་མིན། བོད་སྔ་མ་དག་དཔྱད་པ་མཛད་མོད། འདིར་ཞིབ་ཏུ་མ་བྲིས་སོ། །བཀའ་གདམས་གླེགས་བམ་དུ་གཏོགས་པ་ལ། སྤྱིར་དཔེ་ཚན་ལྔ་བཅུ་ང་བཞི་ལས། སྦྱོར་བའི་ཆོས་ལ་དཔེ་ཚན་བཞི་སྟེ། འབྲོམ་ཆོས་ཀྱི་རྒྱལ་པོ་ཉིད་ཀྱིས་ལོགས་སུ་ནན་གྱིས་གཏད་པའི་བཀའ་རྒྱ་དང་། རང་རྒྱུད་བསྐུལ་མ་འདེབས་པ་དད་པའི་ལྗོན་ཤིང་གཉིས། སྦྱོར་དངོས་གཉིས་ཀར་གལ་ཆེ་ལ། ལོ་རྒྱུས་ངོ་མཚར་རྨད་དུ་བྱུང་བའི་དཔལ་འབྱོར་ཞེས་པ་གླེགས་བམ་གྱི་ཆོས་འབྱུང་དང་། སྙིང་གི་ཐིག་ལེའི་གསལ་བྱེད་ཟུང་འཇུག་ཉི་མའི་ཐིག་ལེ་གཉིས་ཏེ་དཔེ་ཚན་བཞི་པོ་འདི་གླེགས་བམ་དངོས་གཞི་ལ་མི་ཐེའོ། །བྱང་ཆུབ་སེམས་དཔའི་སྤྱོད་པ་ནོར་བུའི་ཕྲེང་བ་ནི། དངོས་གཞི་ཕ་ཆོས། བུ་ཆོས་གཉིས་ཀའི་རྩ་ཚིག་ཡིན་ལ། ཕ་ཆོས་ནི། བླ་མ་རྣམས་ལ་ཕྱག་འཚལ་ལོ། །ཞེས་པ་ནས་མང་པོའི་ནང་དུ་ངག་ལ་བརྟག གཅིག་པུར་འདུག་ན་སེམས་ལ་བརྟག ཅེས་པའི་བར་ལེའུ་ཉི་ཤུ་རྩ་གསུམ་དུ་བསྡུས་ནས་གསུངས་པའི་སྟེང་དུ། བཀའ་རྒྱ་མ། མ་འོངས་ལུང་བསྟན། འཆི་མེད་རྡོ་རྗེའི་གླུའི་ལེའུ་དང་གསུམ་བསྣན་པས་ཉི་ཤུ་རྩ་དྲུག་དང་། བུ་ཆོས་ལ། ཐེ་ཚོམ་ཐམས་ཅད་སྤང་བྱ་ཞིང་། །ཞེས་པ་ལས་འཕྲོས་ཏེ། བྲམ་ཟེའི་ཁྱེའུ་གསལ་པའི་སྐྱེས་རབས་དང་། དེ་ནས་རིམ་པ་བཞིན་རྩ་ཚིག་ལས་བརྩམས་ཏེ། རྔོག་གི་ཞུས་པའི་སྐྱེས་རབས་ཉི་ཤུ་ལ། རྔོག་ཆོས་ཉི་ཤུ་དང་། ཁུ་སྟོན་ཕེབས་ནས་ཞུས་པ་གཉིས་ལ། ཁུ་ཆོས་གཉིས་ཏེ་ཉི་ཤུ་རྩ་གཉིས་བུ་ཆོས་ཡིན་ལ། ཁ་སྐོང་གི་ལེའུ་སྟེ་བཞི་བཅུ་ཞེ་དགུ་ནི་གླེགས་བམ་དངོས་གཞིའོ། །རྒྱལ་བ་ཡབ་སྲས་ཀྱི་བཀོད་པ་ཕུན་སུམ་ཚོགས་པའི་གཏེར་ཞེས་པ་ཕྱིས་སྣར་ཐང་པས་བྱས་པར་སྣང་བས། དོན་བསྡུ་ལྟ་བུར་སྣང་ལ་འདི་དངོས་གཞི་ལ་མི་ཐེའོ། །གཞན་ཡང་ལམ་རིམ་དང་། གསུང་བགྲོས་ཐོར་བུ་བ་དང་། འཕྲིན་ཡིག་དང་། མན་ངག་སྣ་ཚོགས་པའི་སྐོར་རོ། །དང་པོ་ལམ་རིམ་ལ། པོ་ཏོ་བ་ནས་བརྒྱུད་པ། སྤྱན་སྔ་ནས་བརྒྱུད་པ། གསང་ཕུ་བ་ནས་བརྒྱུད་པའོ། །དང་པོ་ནི། དོལ་པ་དམར་ཞུར་གྱི་བེའུ་བུམ་གྱི་རྩ་ཚིག་དང་། དེའི་འགྲེལ་པ་ལྷ་དོན་སྟེངས་པས་མཛད་པ་ལ། ན་བཟའ་ལས་མཚན་དུ་གསོལ་བ། བེའུ་བུམ་སྔོན་པོ་དང་། བེའུ་བུམ་དམར་པོ་ཞེས་པ་ལོ་རྒྱུས། རྩ་བ། འགྲེལ་བ། ས་བཅད་དང་བཞི་འདུག་པ། ཡེར་པའི་ཞང་བཙུན་གྱིས་མཛད་པ་ཟེར་ཡང་། ཞང་ཡེར་པ་བ་དང་གཉིས་གང་གིས་མཛད་བརྟག་པར་བྱའོ། །བེའུ་བུམ་ཁྲ་བོ་ཞེས་པ་བཀའ་གདམས་ཀྱི་གསུང་བགྲོས་སྣ་ཚོགས་པ་ཕྱོགས་གཅིག་ཏུ་བསྒྲིགས་པ་ཞིག་སྣང་བ་ལས། གཅེར་སྒོམ་གྱི་བཀའ་གདམས་ཐོར་བུ་བ་བཏུས་པར་མངོན་ནོ། །དགེ་བཤེས་གྲབ་པས་མཛད་པའི་དཔེ་ཆོས་དང་། བྲག་དཀར་བས་དེ་ཉིད་རྒྱས་སུ་བཏང་བ་གཉིས་ལ་བརྟེན་ནས་གཅེར་སྒོམ་གྱི་དཔེ་ཆོས་རིན་ཆེན་སྤུངས་པ་རྩ་འགྲེལ་མཛད་པར་གྲགས་ཆེ་ལ། འདིའི་ཞབས་སུ་སྤྲོས་བསྡུས་བྱས་ཞེས་པ། གྲབ་པས་མཛད་པ་ལས་ཅུང་ཟད་སྤྲོས། བྲག་དཀར་བས་མཛད་པའི་རྒྱས་པ་ལ་བསྡུས་ཞེས་པའི་དོན་ནོ། །གཞན་ཡང་ཤ་ར་བས་མཛད་པའི་ལམ་རིམ་ཆེ་ཆུང་གཉིས། བྱ་འཆད་ཀྱི་གསུང་བགྲོས་ཐོར་བུ་བ་རྣམས་དང་། དེ་ལས་བརྒྱུད་པ་བློ་སྦྱོང་གི་ཡིག་ཆ་ཆེ་ཆུང་དང་། སེ་སྤྱིལ་བའི་ལམ་སྒྲོན་ས་བཅད། ཊིཀྐ། སྦས་པ་སྟོན་གཞོན་གྱི་ལམ་རིམ་དང་། ལམ་སྒྲོན་ཊིཀྐ་སོགས་ཐོར་བུ་བ་འགའ་དང་། རྣལ་འབྱོར་བྱང་སེང་གི་བསྟན་རིམ་ལེགས་པ་ཞིག་ཀྱང་སྣང་ངོ་། །སྣར་ཐང་པས་ཀྱང་ཡིག་ཆ་འགའ་རེ་མཛད་ལ། ཁ་རག་སྐོར་གསུམ་དུ་དཔལ་ལྡན་དགོན་པ་བའི་གསུང་བགྲོས་བསྒྲིགས་པའི་ལམ་རིམ་དང་། གཞན་ཡང་གཞུང་པ་བརྒྱུད་པའི་གསུང་བགྲོས་མཛད་བྱང་མེད་པ་མང་དུ་སྣང་ངོ་། །གཉིས་པ་བཤེས་གཉེན་སྤྱན་སྔ་ནས་བརྒྱུད་པ་ལ། དགེ་བཤེས་སྟོན་པའི་གསུང་། སྤྱན་སྔ། བྱ་ཡུལ་བ། གཙང་པ་རིན་པོ་ཆེ་རྣམས་སྙན་ནས་སྙན་དུ་བརྒྱུད་པ། རིན་པོ་ཆེ་གླང་ལུང་པས་བསྒྲིགས་པའི་ལམ་རིམ་དང་། ཡང་རྣལ་འབྱོར་པ་ནས་སྟོད་ལུང་པ་ཆེན་པོ། དགེ་བཤེས་ལྷ་བཟོ། ཉ་ག་མོ་པ། གླང་ལུང་པ་ནས་བླ་མ་ན་རིམ་གྱིས་བསྟན་རིམ་ཆེན་མོ་ལ་ཟིན་བྲིས། མཛད་བྱང་ཡོད་མེད་མང་དུ་སྣང་བའི་འབེ་སངས་རྒྱས་སྒོམ་པས་མཛད་པའི་ཟིན་བྲིས་དང་། རིན་པོ་ཆེ་གསེར་ཁང་པའི་ཟིན་བྲིས་དང་། རིན་པོ་ཆེ་ཚུལ་ཁྲིམས་དར་གྱི་ཞལ་སྔ་ནས་མཛད་པའི་བསྟན་རིམ་ཆེན་པོ་ཉིད་མཆོག་ཡིན་ནོ། །དེ་ལྟ་བུའི་བསྟན་རིམ་དེ་ནི་ཚོགས་སུ་འཆད་ན་བསྟན་པའི་རིམ་པ། ཉམས་ལེན་དུ་དྲིལ་བ་ལམ་གྱི་རིམ་པ། གཞུང་དུ་བཀོད་པ་བྱང་ཆུབ་ལམ་གྱི་སྒྲོན་མ་སྟེ། དོན་གཅིག་ལ་མིང་གསུམ་བཏགས་པ་དང་འདྲ་གསུངས་པ་དང་། ཐར་པ་དོན་གཉེར་གྱི་གང་ཟག་སངས་རྒྱས་ཀྱི་སར་འགྲོ་བ་ལ་བསྟན་པའི་ཆོས་ཐམས་ཅད་ལམ་གྱི་རིམ་པར་དྲིལ་ནས་ཉམས་སུ་ལེན་པས་ལམ་བསྟན་པའི་རིམ་པ་ཞེས་གསུངས་པ་ལྟར་ན། ཁྱད་པར་ཆེར་མེད་ཀྱང་། ཅུང་ཟད་འབྱེད་ན། ཆོས་ཁུངས་བཙུན་པར་རྟོགས་པའི་ཕྱིར། ཐོག་མར་ལོ་རྒྱུས་དང་། དེ་ནས་བརྒྱུད་པ་རྗོད་བྱེད་སྡེ་སྣོད་གསུམ་དང་། བརྗོད་བྱ་བསླབ་པ་གསུམ། གང་ཟག་གཅིག་གི་ལམ་དུ་ལུང་རྣམ་དག་དང་སྦྱར་ཏེ་འགལ་མེད་དུ་སྟོན་པ་བསྟན་པའི་རིམ་པ་དང་། དེའི་དོན་ཐེག་པ་ཆེན་པོའི་ལམ་གྱི་རིམ་པར་དྲིལ་ནས་སྟོན་པ་ལམ་རིམ་ཞེས་གསུངས་པ་ཡིན་ནོ། །ཡང་སྟོད་ལུང་པ་ནས་བརྒྱུད་པའི་བདེན་གཉིས། བདེན་བཞིའི་ཆོས་སྐོར་དང་། ཆོས་ཐུན་རེར་ཉམས་ལེན་དོན་ཚན་བཞི་བཞིར་བསྡུས་པ། བཞི་ཚན་ཆོས་ཐུན་བཅུ་དགུ ཇ་ཆོས་ཆོས་ཐུན་ལྔ་བཅུ་དང་། ཇོ་བོས་མང་ཡུལ་ལྕོག་ཀ་རི་ལ། ལྗོངས་རྒྱུ་བའི་དུས་གསུངས་པ། རི་ཆོས་སུ་གྲགས་པ་དང་། ལམ་སྒྲོན་ལ་གོང་དུ་སྨོས་པའི་ཊིཀྐ་དང་། འཆིམ་ནམ་མཁའ་གྲགས། ཆུ་མིག་པ་གཉིས་ཀྱི་ཊིཀྐ། གཞན་ཡང་གསུང་བགྲོས་བཀོད་པའི་ཊིཀྐ་མཛད་བྱང་མེད་པ་མང་དུ་སྣང་བ་ནི། བཀའ་གདམས་ཀྱི་བཤེས་གཉེན་གོང་མ་རྣམས་བླ་མའི་གསུང་ལ་ཟིན་བྲིས་ཙམ་ལས། མཛད་བྱང་མི་སྦྱོར་བ་དང་། སློབ་མ་རྣམས་ཀྱིས་ཀྱང་བཀའ་འབུམ་བསྒྲིགས་པ་སོགས་ཆེར་མ་མཛད་ཅིང་། གསུང་བགྲོས་ཐོར་བུ་འདུག་པ་ཡང་ཡུན་རིང་བས་ཁ་ཐོར་བ་སོགས་མ་སྤྲོས་སོ། །གསུམ་པ་གསང་ཕུ་བ་ནས་བརྒྱུད་པ་ལ། རྔོག་ལེགས་ཤེས་མཛད་པའི་ལམ་རིམ་ཤླཽ་ཀ་དྲུག་དང་། དེའི་གསལ་བྱེད་བློ་ལྡན་ཤེས་རབ་ཀྱིས་མཛད་པ་ཤོག་བུ་ཉི་ཤུ་ཙམ་དང་། དེ་ཉིད་རྒྱས་པར་འཆད་པ་གྲོ་ལུང་པས་མཛད་པའི་བསྟན་རིམ་ཆེན་མོ་ཉིད་ཡིན་ནོ། །གཉིས་པ་གསུང་བགྲོས་ཐོར་བུ་བའི་སྐོར་ལ། བློ་སྦྱོང་མཚོན་ཆ་འཁོར་ལོ། རྨ་བྱ་དུག་འཇོམས། དགྱེས་སྒོམ་རྡོ་རྗེའི་གླུ། བློ་སྦྱོང་སེམས་པའི་རིམ་པ། གསེར་གླིང་པས་ཇོ་བོ་ལ་གནང་བའི་རྟོག་པ་འབུར་འཇོམས་རྩ་འགྲེལ། བློ་སྦྱོང་ཐབས་བཞི་པ། དེའི་སྒོ་ནས་སྡིག་པ་བཤགས་པ་དང་། འཁོན་སྦྱང་བའི་ཆོ་ག ཀུ་སུ་ལུའི་ཚོགས་བསག བློ་སྦྱོང་ཀུན་ཏུ་བཟང་པོ། བློ་སྦྱོང་སྟན་ཐོག་གཅིག་མ། བློ་སྦྱོང་ཐུན་བརྒྱད་མ། གླང་ཐང་པའི་ཚིག་རྐང་བརྒྱད་མ། དེའི་འགྲེལ་པ་བྱེད་སྟོན་གྱིས་མཛད་པ། བློ་སྦྱོང་རྟེན་འབྲེལ་སྙིང་པོ་དང་། བཀའ་གདམས་ཐོར་བུ་བ་སོགས་དང་། གཞན་ཡང་རྒྱལ་པོ་སའི་ས་གྷས་བོད་ཀྱི་རྣམ་གཞག ལོ་ཆེན་དང་། ནག་ཚོ་ལ་ཞུས་ཀྱང་གསལ་བར་མ་བྱུང་པ། ཐོ་མཐིང་གསེར་གྱི་ལྷ་ཁང་དུ་ཇོ་བོ་དང་སྟོན་པ་ཞལ་འཛོམ་པར་ཞུས་པས། སྟོན་པས་མངོན་པར་ཤེས་པས་གཟིགས་ཏེ། བོད་ཀྱི་ས་བཅད་དང་གནས་ལུགས་རྣམས་ཞིབ་པར་གསུངས་པ་སོགས་མང་དུ་སྣང་ངོ་། །གསུམ་པ་འཕྲིན་ཡིག་གི་སྐོར་དང་། ཇོ་བོས་མཛད་པ་གོང་དུ་བཤད་ལ། ལོ་ཙཱ་བ་རིན་ཆེན་བཟང་པོས་སྐུ་མཚམས་ནས་གྲོགས་པོ་རྣམས་ལ་སྤྲིངས་པ། དགེ་བཤེས་སྟོན་པས་ཇོ་བོ་སྤྱན་འདྲེན་པའི་དུས་མངའ་རིས་ནས་བོད་སྟོན་རྣམས་ལ་སྤྲིངས་པ་ཚིགས་སུ་བཅད་པ་བཅུ་དགུ་པ། ཞང་འཕྲང་ཁ་བེར་ཆུང་ལ་སྤྲིངས་པ་སྔ་ཕྱི་གཉིས། སྒོམ་ཆེན་བྱང་ཆུབ་ལ་སྤྲིངས་པ། བཤེས་གཉེན་བློ་གྲོས་འབྱུང་གནས་ལ་སྤྲིངས་པ། ཨ་ལི་སྨན་རྒན་སོགས་ལ་གདམས་པའོ། །པོ་ཏོ་བས་རང་གི་སློབ་མ་རྣམས་ལ་སྤྱིར་སྤྲིངས་པ། རང་གི་གྲོགས་པོ་དོལ་པའི་བླ་མ་ལ་སྤྲིངས་པ། གཡའ་ངོས་དགོན་པར་སྤྲིངས་པ། ཡུང་ངའི་ཆང་འཐུང་རྣམས་ལ་སྤྲིངས་པ། བྱ་ཡུལ་གྱི་མཆོད་གནས་ལོ་ཆུང་ལ་སྤྲིངས་པ། ཞོགས་ཡ་གད་དུ་སྤྲིངས་པའི་ཡི་གེ་རྣམས་སོ། །སྤྱན་སྔས་སྣེའུ་ཟུར་པ་ལ་དང་པོ་སྤྲིངས་པ། རྗེས་སུ་སྤྲིངས་པ་གདམས་ངག་ཚིག་དྲུག་མ་དང་། དགེ་བཤེས་དབང་སེང་ལ་སྤྲིངས་པ། བྱ་ཡུལ་བ་ཉེར་གནས་མཛད་དུས་གདམས་པ་ཟེར་བ་སོགས་དང་། སྟབས་ཀ་བས་མངའ་རིས་རྒྱལ་པོ་ལ་སྤྲིངས་པ། ཤ་ར་བས་རྔོག་བློ་ལྡན་ལ་སྤྲིངས་པ། མཆོད་གནས་དབང་ངེ་ལ་སྤྲིངས་པ། ཤའོ་སྒང་པ་ལ་སྤྲིངས་པ། སྒོམ་ཆེན་སེངྒེ་སྐུ་ལ་སྤྲིངས་པ་སོགས། ཤ་ར་བའི་འཕྲིན་ཡིག་སུམ་ཅུ་རྩ་བཞི། གཞན་ཡང་དཔལ་ལྡན་དགོན་པ་བའི་བཅའ་ཡིག པོ་ཏོ་བའི་བཅའ་ཡིག ཞང་སྟོན་ཤར་བ་པས་སྔ་ཕྱིར་བྱས་པ་གཉིས་ཏེ་དགེ་འདུན་སྤྱིའི་བཅའ་ཡིག་བཞིའོ། །དེ་རྣམས་ནི་ཐོས་ཚོད་ཙམ་མིན་པར་མཐོང་བ་རྣམས་བཀོད་དོ། །བཞི་པ་མན་ངག་གི་སྐོར་ལ་བཀའ་གདམས་ལྷ་བཞིར་གྲགས་པ། དམ་ཚིག་གསུམ་བཀོད་ཀྱི་རྒྱུད་ལ་རྟེན་པ། ཐུབ་པ་གཙོ་འཁོར་གསུམ་བསྒོམས་ཏེ། དེ་བཞིན་གཤེགས་པའི་ཡིག་བརྒྱ་བཟླས་ནས། སྡིག་པ་སྦྱངས་པ་དང་། བྱང་ཆུབ་སེམས་དཔའི་ལྟུང་བ་བཤགས་པ། གཙུག་ལག་ཁང་བཞེངས་ཚུལ་སོགས་སྣང་ངོ་། །སྤྱན་རས་གཟིགས་ཀྱི་སྐོར་ལ། ཇོ་བོས་མཛད་པ་གོང་དུ་སྨོས་ལ། དེའི་གསལ་བྱེད་ཀྱི་སྒྲུབ་ཐབས། རྫོགས་རིམ། ལས་ཚོགས་མ། རྣལ་འབྱོར་ལྔ་དང་། དུག་གསུམ་ཤད་ཀྱིས་སྦྱོང་བའི་མན་ངག ཞི་དྲག་གི་སྦྱིན་སྲེག་སོགས་ཉི་ཤུ་ཙམ་དང་། སྒྲོལ་མའི་སྐོར་ལ། ཇོ་བོ་རྒྱ་གར་ནས་བོད་དུ་འབྱོན་ཁར། རྡོ་རྗེ་གདན་ལ་སྐོར་བ་མཛད་པའི་དུས། སྒྲོལ་མ་ཉིད་ཀྱིས་གསུངས་པའི་བསྟོད་པ་ཤླཽཀ་ཉེར་གཅིག་དང་སྦྱར་བའི་སྒྲུབ་ཐབས། ལས་ཚོགས་རྣམས་དང་། སྒྲོལ་མ་དཀར་མོ་ལ། ཇོ་བོའི་གཞུང་དང་རྗེས་སུ་འབྲེལ་བ། ངག་དབང་གྲགས་པ་དང་། གསེར་གླིང་པ་ནས་བརྒྱུད་པའི་ཚེ་ཁྲིད་ལས་ཚོགས་མང་བ་དང་བཅས་པ། མི་གཡོ་བ་སྔོན་པོ་ལ་ཇོ་བོའི་གཞུང་དང་། དཔལ་ལྡན་དགོན་པ་བ། གུར་གྱི་ཉ་ག་མོར་སྒོམ་མཛད་ཀྱིན་བཞུགས་པ་ལ་བར་ཆད་ཀྱི་མཚན་མ་བྱུང་བ། ཇོ་བོ་ལ་ཞུས་པས། ང་ལ་རྣལ་འབྱོར་སྲུང་བའི་མན་ངག་ཡོད་གསུངས་ནས། མི་གཡོ་བའི་དམིགས་པ་སྐོར་གསུམ་དང་། སྒྲུབ་ཡིག་ཆེ་ཆུང་རྒྱུད་མན་ངག་དང་བཅས་པ་རྫོགས་པར་གནང་། ཁ་ཅིག སྒྲུབ་ཡིག་ཆེ་བ་བྱ་རྒྱུད་ཀྱི་ནང་གི་མི་གཡོ་བའི་རྒྱུད་ལ་ལེའུ་དང་ལས་ཚོགས་མང་དུ་ཡོད་པ་འདི་ཡིན་ཞེས་ཟེར། སྒྲུབ་ཡིག་བར་པ་སོགས་མན་ངག་རྣམས། དགོན་པ་བ་ནས་སྣེའུ་ཟུར་པ་ལ་བརྒྱུད་པ་དང་། བྱ་ཡུལ་བ་ནས་བརྒྱུད་པ་གཉིས་སྒྱེར་སྒོམ་ལ་བཞུགས་པ་སངས་རྒྱས་དབོན་ལ་གནང་། དེའི་གསུང་ལ་རྟོགས་ལྡན་བཟང་མོ་བས་ཟིན་བྲིས་སུ་བཏབ་པ་ད་ལྟ་ཡོད་པ་འདིའོ། །མི་གཡོ་བ་བླ་མེད་ཀྱི་རྒྱུད། ཕྱིས་ཤུད་སྒྱེ་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར་ཅིང་། དབང་རྒྱུད་དང་བཅས་པ་བྱུང་ངོ་། །གཞན་ཡང་ཚོགས་བདག་དཀར་པོ་ལ། གསེར་གླིང་པ། ན་རོ་པ། ཁ་ཆེ་རིན་ཆེན་རྡོ་རྗེ་རྣམས་ཀྱི་རྒྱ་གཞུང་རེ། ཇོ་བོས་མཛད་པ་གཉིས་དང་ལྔ། ཚོགས་བདག་གི་སྐྱེས་རབས། གཟུངས་རིང་། ཕྱི་སྒྲུབ། ནང་སྒྲུབ། གསང་སྒྲུབ་ཀྱི་སྐོར། གསེར་གླིང་པས་ཇོ་བོ་ལ་གནང་བ་དང་། གཞན་ཡང་ལས་ཚོགས་ལེའུ་བཅོ་ལྔ་པ་དང་། ལེའུ་སུམ་ཅུ་སོ་གཅིག་པ་རྣམས་ཇོ་བོས་རྣལ་འབྱོར་པ། དེས་སྤྱན་སྔ་པ། དེས་བྱ་ཡུལ་པ་ལ་བརྒྱུད་པའོ། །ཚོགས་བདག་དཀར་པོ་འདི་འཇིག་རྟེན་པའི་ཚུལ་བསྟན་ཀྱང་། ཁ་ཅིག་སྤྱན་རས་གཟིགས་ཀྱི་སྤྲུལ་པར་བཞེད། བཀའ་བརྒྱུད་འདིའི་ལུགས་ཀྱིས་བདུད་རྩི་འཁྱིལ་པའི་སྤྲུལ་པར་བཞེད་དེ་མི་འགལ་ལོ། །ཡང་ཛམྦྷ་ལ་དཀར་པོ་འབྲུག་བཞོན་ལྷ་མོ་བཞིས་བསྐོར་བ་ནི་ཇོ་བོ་རི་བོ་པོ་ཏ་ལའི་འགྲམ་ན་བྱོན་པའི་དུས། སྤྱན་རས་གཟིགས་ཀྱིས་ཞལ་དངོས་སུ་བསྟན་ནས་གནང་སྟེ། ཕྱི་ནང་གསང་གསུམ་གྱི་ལས་ཚོགས་དང་། ཆུ་སྦྱིན་བྱ་ཐབས་སོགས་དང་། སྨེ་བརྩེགས་ལྗང་ཁུའི་སྒྲུབ་ཐབས་ལས་ཚོགས་དང་བཅས་པ་དང་། གཙུག་ཏོར་དྲི་མེད། གཙུག་ཏོར་གདུགས་དཀར་གྱི་རྗེས་གནང་ལ་སོགས་པ་ཇོ་བོ་ནས་བརྒྱུད་པ་ད་ལྟ་མ་ཆད་པ་མང་དུ་བཞུགས་སོ། །ཇོ་བོ་ནས་བརྒྱུད་པའི་དབང་བརྒྱུད་ཡོད་པ་ལ། བདེ་མཆོག་ལཱུ་ཧི་པ། བདེ་མཆོག་བཅུ་གསུམ་མ། གསང་འདུས་འཕགས་ལུགས། ཡེ་ཤེས་ཞབས་ལུགས། ཇོ་བོ་ཉིད་ཀྱི་གསང་འདུས་འཇིག་རྟེན་དབང་ཕྱུག མཧཱ་མ་ཡ། ཡོ་ག་གཙུག་དགུ ཀུན་རིག་ཇོ་ལུགས། སྣུར་པ་རྣམས་དེ་ལས་བརྒྱུད་ཅིང་ཕྱག་ལེན་མཛད་པས་སྣུར་ལུགས་སུ་གྲགས་པ་དང་། རྡོ་རྗེ་ཕག་མོ་རིན་ཆེན་རྒྱན་དང་། སྤྱན་རས་གཟིགས་ལྷ་མང་དུ་གྲགས་པ། ཀླུ་སྒྲུབ་དང་། ཇོ་བོ་ཉིད་ཀྱིས་མཛད་པའི་གཞུང་དང་རྗེས་སུ་འབྲེལ་བའི་དབང་བཀའ་ལ་སོགས་པ་ད་ལྟ་བཞུགས་པ་མང་དུ་ཡོད་པར་སེམས་སོ། །ཆོས་སྐྱོང་སྐོར་ལ། བཀའ་གདམས་པ་སྤྱི་ལ་གྲགས་པ། མགོན་པོ་གྲི་གུག་ལ་གཙོ་རྐྱང་ལྷ་གསུམ། ལྷ་བཞི། ལྷ་ལྔ། ལྷ་མང་སོགས་ལུགས་མང་དུ་འདུག་པ་རྣམས་ལ་མགོན་པོའི་རྒྱུད་འགའ་རེ་དང་། རྒྱ་གཞུང་ཆེ་ཆུང་བཅོ་ལྔ་ཙམ་སྣང་བའི་གཙོ་རྐྱང་ལ་ཇོ་བོ་ཆེན་པོ་དང་། ཨ་ཝ་དྷཱུ་ཏི་པ་གཉིས་ཀྱི་གཞུང་རེ་དང་། དེ་ལ་པཎྜི་ཏ་འཇམ་དཔལ་དབྱངས་ཀྱི་འགྲེལ་པ་དང་། གཙོ་འཁོར་གསུམ་དུ་བྱེད་པ་པཎྜི་ཏ་གྲགས་པ་རྡོ་རྗེའི་རྒྱ་གཞུང་དང་། དེའི་གསལ་བྱེད་བྱ་ཡུལ་བས་མཛད་པ་ལ་བརྟེན་པ་བྱིན་རླབས་ཀྱི་བརྒྱུད་པ་ཡང་མངའ་བས། བླ་མ་གོང་མ་རྣམས་འདི་མཛད་པ་མང་ལ། ལྷ་བཞི་བྱེད་ན། མགོན་པོའི་མདུན་དུ་གནོད་སྦྱིན་ལག་ན་རྡོ་རྗེ། རྡོ་རྗེ་གསོར་ཐབས་སུ་འཛིན་པ། གནོད་སྦྱིན་གྲངས་མེད་པའི་ཚོགས་ཀྱིས་བསྐོར་བ། ན་རོ་པའི་གཞུང་དང་། བསྐུལ་ནས་འབྱུང་བ་བཞིན་བསྐྱེད་པ་དང་། ཡང་ལག་ན་རྡོ་རྗེའི་དོད་དུ་མགོན་པོ་ཏྲག་ཤད་ཡོད་པ། བོད་ཀྱིས་བྱས་པའི་ལྷ་བཞི་ཞིག་ཀྱང་འདུག་གོ །ལེགས་སྲེད་དམར་པོ་འདི་ལྷོ་ནུབ་པ་ཡིན་པར་བཞེད་ཅིང་། མདུན་དུ་བསྐྱེད་ནས། ལས་ལ་སྐུལ་བའི་སྒྲུབ་ཡིག་ཀྱང་ཡོད་དོ། །ཡང་ཇོ་བོའི་རྒྱ་གཞུང་དུ། གཙོ་བོ་ལ་མཁའ་འགྲོ་མ་བཞིས་བསྐོར་བའི་ལྷ་ལྔ་ཞིག་གསུངས་པ་དང་། ཡང་གྲི་གུག་རིགས་ལྔ་དང་། གཙོ་བོ་ལ་གཤིན་རྗེ་ཕོ་བརྒྱད་མོ་བརྒྱད་ཀྱིས་བསྐོར་བ། ལྷ་བཅུ་བདུན་ཟངས་གྲི་ཅན་དུ་གྲགས་པ་གཉིས་ལ། བྲམ་ཟེ་མཆོག་སྲེད་ཀྱི་གཞུང་ཆེ་ཆུང་། དབང་རྒྱུད་དང་བཅས་པ་ཡོད་པ་དང་། ཡང་གཙོ་བོ་ལ་ཡེ་ཤེས་ཞབས་ལུགས་ཀྱི་ཕྱོགས་སྐྱོང་བཅོ་ལྔས་བསྐོར་བ་དང་། མགོན་པོ་རྟ་མང་དུ་གྲགས་པ་མགོན་པོས་བསྐུལ་ནས་འབྱུང་བ་སོགས་ཡོད་པས། དེ་དག་གི་མངོན་རྟོགས་དང་། རྒྱ་གཞུང་གང་ནས་གང་བཤད་སོགས་དོན་དུ་གཉེར་ན་གཞན་དུ་བལྟའོ། །ཡང་མགོན་པོ་ལྷོ་ནུབ་པ། ཞལ་དམར་བ། མི་ཐུང་གསོད་བྱེད། མཐར་སྐྱེས་མ་ཞེས་མཚན་གྱི་རྣམ་གྲངས་བཞི་དང་ལྡན་པ་འདི་ལ། ཇོ་བོའི་རྒྱ་གཞུང་དང་། དེའི་གསུང་བཤེས་གཉེན་སྟོན་པས་བཀོད་པའི་གབ་པ་སྔོན་བྱུང་དུ་གྲགས་པ། ཕྱི་སྒྲུབ། ནང་སྒྲུབ། གསང་སྒྲུབ་སོགས་ལ་ཕྱིས་ཀྱིས་བྱས་པའི་ཡིག་ཆ་མང་དུ་འདུག་ལ། འདི་དབང་གི་གྲི་གུག་ཡིན་པར་རིན་པོ་ཆེ་ཆོས་ཀྱི་རྗེས་བཞེད་དོ། །གྲི་གུག་གི་འཁོར་དུ་ཡོད་པའི་མགོན་པོ་ཅེ་སྤྱང་གདོང་ཅན་ལ་གླང་རི་ཐང་པ་ནས། རྒྱ་ལྕགས་རི་གང་ཁ་བ་ལ་བརྒྱུད་པའི་རྗེས་གནང་། ལས་ཚོགས་སོགས་འདུག་ལ། མགོན་པོ་བེང་ལ། ཇོ་བོ་ནས་བརྒྱུད་པ་གཙོ་འཁོར་ལྔའི་རྗེས་གནང་དགོས་སྒྲུབ་སོགས་དང་། མགོན་པོ་ཏྲག་ཤད་ལ་མི་འདྲ་བ་མང་ཡང་། བཀའ་གདམས་པ་ནས་བརྒྱུད་པ། རྐང་ཐང་དང་། སེང་ཞོན་དུ་ངེས་པས། འདི་ལ་སྒྲུབ་ཐབས། ཞི་དྲག་གི་ལས་ཚོགས་མང་ངོ་། །ནམ་མཁའི་གོས་ཅན་ལ། བཀའ་གདམས་གླེགས་བམ་ནས་མཆེད་བཅུ་གཉིས་སུ་གསུངས་པ་ནི། གསེར་མཚོ་མ་དང་འོ་མཚོ་མ། །བསྟན་སྐྱོང་མ་དང་ཡིད་འཛིན་མ། །སྟོབས་མོ་ཆེ་དང་དྲག་ཤུལ་ཅན། །ཁྲག་མདོག་མ་དང་དུད་ཁ་མ། །ཐོགས་མེད་མ་དང་སྟོབས་མོ་ཆེ། །དབང་བསྡུད་མ་དང་ལས་འཇོམས་མ། །བཅུ་གཉིས་སྟོབས་ཆེན་བསྟན་སྲུང་ཀུན། །ཁོ་བོའི་བསྟན་པ་མི་སྐྱོང་ན། །ཅི་སྟེ་ཁོ་བོའི་སླད་བཞིན་འབྲངས། །ཞེས་གསུངས་ཤིང་། ལམ་ཡིག་ལས། མཆེད་བཞིར་གསུངས་པ་ནི། རྡོ་རྗེ་ཤུགས་ཆེན་མ། འོད་ལྡན་མ། དུང་སྐྱོང་མ། ནམ་མཁའི་གོས་ཅན་རྣམས་སོ། །མགོན་པོ་ལྷོ་ནུབ་པ་དང་། ནམ་མཁའི་གོས་ཅན་ནི་རྒྱ་གར་ནས་ཇོ་བོའི་ཕྱག་ཕྱིར་ལུགས་སྐུ་དང་། རྒྱ་དཔེའི་དགོས་ཀྱི་བཀའ་སྲུང་ལ་བྱོན་ཞེས་འབྱུང་ལ། ནམ་མཁའི་གོས་ཅན་ཞེས་པ་སྐུ་གཅེར་བུའི་དོན་ཡིན་ཡང་། རྒྱན་ཅན་སོགས་ནི་ཞལ་གཟིགས་ཡིན་ནོ། །བྱ་ཡུལ་གྱི་ལྷ་མོ་དམར་མོ་ནི། རེ་མ་ཏི་མཆེད་བཞིའི་དབང་གི་རེ་མ་ཏི་ཡིན་ཏེ། འདི་ལ་ཙཎྚི་དམར་མོ་ཞེས་པ་གཏུམ་མོ་དམར་མོ་ཞེས་པའོ། །གཞན་ཡང་སྔོན་གྱི་སྐྱེས་ཆེན་རྣམས་ཀྱི་གསན་ཡིག་ཆེ་ཆུང་དང་། བླ་མ་རྣམས་ཀྱི་གསུང་ལས་མང་དུ་ཐོབ་ཀྱང་འདིར་རྒྱས་པར་མ་སྤྲོས་ཤིང་། དེང་སང་དུས་ཀྱི་དབང་གིས་ལུགས་འདི་དག་དོན་དུ་གཉེར་བ་དཀའ་བར་སྣང་ཡང་། འདི་དག་ལ་བརྟེན་ནས་ཀྱང་རགས་པ་ཙམ་རྟོགས་ཤིང་། ཞིབ་ཏུ་འཚོལ་བའི་སྒོར་འགྱུར་བ་སྲིད་དམ་སྙམ་ནས་བཀོད་ལ། བློ་གྲོས་དང་ལྡན་ཞིང་། བཀའ་གདམས་བརྒྱུད་པ་འདི་ལ་དད་པ་དང་ལྡན་པ་རྣམས་ཀྱིས་ཇི་ལྟར་རིགས་པ་བསྣན་ཅིང་སྤེལ་བར་བྱའོ། །འདིར་སྨྲས་པ། ཐོག་མཐའ་བར་གསུམ་དགེ་བ་རྒྱལ་བའི་བཀའ། །དེ་དོན་བསླབ་པ་གསུམ་གྱིས་རྒྱུད་གཏམས་པའི། །བཤེས་གཉེན་དམ་པ་རིམ་པར་བྱོན་རྣམས་ཀྱི། །རྣམ་ཐར་དྲན་པས་སླར་ཡང་ཕྱག་བགྱི་འོ། །དེ་ལྟའི་སྐྱེས་ཆེན་རྣམས་ཀྱིས་གངས་ལྗོངས་འདིར། །ཟབ་རྒྱས་ཆོས་ཀྱི་སྒྲོན་མེ་ཆེར་སྦར་ནས། །བོད་ཡུལ་རྨོངས་པའི་མུན་པ་བསལ་ཚུལ་གྱི། །གཏམ་འདི་དཔྱོད་ལྡན་ཡིད་རབ་འཕྲོག་བྱེད་ཡིན། །སྔོན་ཚེ་ཆོས་རྒྱལ་བྱང་ཆུབ་སེམས་དཔའ་ཡིས། །བསྟན་འགྲོའི་ཆེད་དུ་རང་གི་སྲོག་ཀྱང་བཏང་། །འདི་འདྲ་ཐོས་ཀྱང་ཇི་སྙམ་མི་སེམས་པའི། །སྙིགས་མའི་སྐྱེ་བོ་འདི་ཀུན་ཆེས་རབ་བླུན། །ཁོ་བོ་སྔོན་བསགས་ལས་ཀྱི་འཕྲོ་བཟང་བས། །ཕན་བདེའི་འབྱུང་གནས་བསྟན་པ་རིན་ཆེན་རྒྱུན། །ཕྱོགས་གཅིག་མ་ཡིན་ཀུན་ཀྱང་རྒྱས་འདོད་པ། །འདི་ལ་དཀོན་མཆོག་ཐུགས་རྗེས་ཅིས་མི་གཟིགས། །ཆོས་སྒོར་ཞུགས་ནས་མཁས་བཙུན་བཟང་གསུམ་གྱི། །ཡོན་ཏན་ཐོབ་ཀྱང་ཚེ་འདིའི་ཆེ་ཐབས་ལ། །གཅིག་ཏུ་གཞོལ་བས་མི་ཚེ་སྟོང་ཟད་མཁན། །དེང་སང་ཆོས་པ་ཕལ་གྱི་རྣམ་ཐར་ལགས། །དཀོན་མཆོག་དད་དང་དལ་འབྱོར་རྙེད་དཀའ་དང་། །མི་རྟག་རྒྱུ་འབྲས་ཆོས་ལ་ཡིད་ཆེས་ནས། །ཐེག་ཆེན་ལྟ་སྤྱོད་ཟུང་འབྲེལ་ཉམས་ལེན་གྱིས། །མི་ཚེ་སྐྱེལ་རྣམས་བཀའ་གདམས་བཤེས་གཉེན་ཡིན། །མདོར་ན་ཚུལ་གནས་ཐོས་བསམ་སྒོམ་པ་སོགས། །སྒོ་གསུམ་དགེ་བ་ཆེ་ཕྲ་ཅི་བགྱིད་ཀྱང་། །ཕྱི་མའི་དོན་དུ་དམིགས་ནས་བསྒྲུབ་པ་ལ། །བཀའ་གདམས་གསུང་རབ་འདི་རྣམས་ཆེས་ངོ་མཚར། །དོན་གྱི་སྙིང་པོ་དྲིལ་ན་འདི་ལྟ་སྟེ། །ཕྱི་མ་མི་བསམ་འདིར་སྣང་ཨ་འཐས་ཀྱི། །མཁས་བཙུན་བཟང་པོར་རློམ་པ་མང་ན་ཡང་། །རང་གཞན་གཉིས་ཕུང་ཆོས་པའི་གཟུགས་བརྙན་ཡིན། །དེས་ན་སྔོན་བྱོན་བཀའ་གདམས་བཤེས་གཉེན་གྱི། །རྣམ་ཐར་བཞིན་དུ་སྒོ་གསུམ་དགེ་བའི་ལས། །ཅི་བྱེད་འཇིག་རྟེན་ཕྱི་མའི་དོན་ཆེན་དུ། །དམིགས་ནས་སྒྲུབ་འདི་ཆོས་ཀྱི་སྲོག་རྩ་ལགས། །དེ་ལྟར་རྒྱལ་བ་གཉིས་པ་ཨ་ཏི་ཤའི། །ཆོས་བརྒྱུད་བྱུང་ཚུལ་ངོ་མཚར་རྒྱ་མཚོ་འདི། །ཕྱོགས་འདིར་རང་ཉིད་མོས་པ་གཙོར་བྱས་ཤིང་། །གཞན་ཡང་བསྟན་དང་འགྲོ་ལ་ཕན་ཕྱིར་སྦྱར། །འདི་བརྩམས་དགེ་བས་བདག་ཅག་དཔོན་སློབ་རྣམས། །ཇོ་བོ་ཡབ་སྲས་སློབ་མར་བཅས་པ་བཞིན། །ནམ་ཡང་འབྲལ་མེད་བསམ་དོན་མཐར་ཕྱིན་ནས། །ཕྱི་མ་ལྷན་ཅིག་བདེ་བ་ཅན་བགྲོད་ཤོག ཅེས་དགེ་བའི་བཤེས་གཉེན་བཀའ་གདམས་པ་རྣམས་ཀྱི་དམ་པའི་ཆོས་བྱུང་ཚུལ་ལེགས་པར་བཤད་པ་ངོ་མཚར་རྒྱ་མཚོ་ཞེས་བྱ་འདི་ཡང་། འཇམ་མགོན་གྲུབ་པའི་འཁོར་ལོ་བསྒྱུར་བ་བསོད་ནམས་དབང་པོའི་ཞལ་སྔ་ནས་དང་། ཡབ་རྗེ་སྦས་པའི་སངས་རྒྱས་སྔགས་འཆང་གྲགས་པའི་མཚན་ཅན་དུས་གསུམ་སྒྲིབ་མེད་དུ་གཟིགས་པའི་རྒྱལ་བ་མུས་པ་ཆེན་པོ་རྡོ་རྗེ་འཆང་སངས་རྒྱས་རྒྱལ་མཚན། སྤྲུལ་པའི་སྐུ་ལོ་ནས་སྤྱན་སྔ་རིན་པོ་ཆེ་ཀུན་དགའ་དོན་གྲུབ། མཁན་ཆེན་ཐམས་ཅད་མཁྱེན་པ་ངག་དབང་ཆོས་ཀྱི་གྲགས་པ་ལ་སོགས་ཏེ་ཡོངས་འཛིན་དགེ་བའི་བཤེས་གཉེན་བསླུ་མེད་ཀྱི་བླ་མ་དུ་མའི་ཞབས་སེན་རིན་པོ་ཆེ་དབང་གི་རྒྱལ་པོ་སྤྱི་བོའི་ཅོད་པན་དུ་འཛིན་པའི་སྐལ་བ་བཟང་པོ་ཅན་དཔལ་ས་སྐྱ་པ་ཤཱཀྱའི་དགེ་བསྙེན་པཎྜི་ཏ་སྔགས་འཆང་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོས་བསམ་པ་དག་ཅིང་སྦྱོར་བ་གུས་པའི་སྒོ་ནས་ཆོས་ཀྱི་རྗེ་བསོད་ནམས་ལྷའི་དབང་པོས་མཛད་པའི་བཀའ་གདམས་ཆོས་འབྱུང་ཉིན་མོར་བྱེད་པའི་འོད་སྟོང་ཞེས་བྱ་བའི་གསུང་རབ་ལ་གཞི་བྱས། ཚིག་སྦྱོར་ཅུང་ཟད་མ་ངེས་པ་རྣམས་བཏང་སྙོམས་སུ་བྱས་ཏེ། འཕགས་པའི་ཡུལ་ན་བྷ་ཝ་ར། ཞེས་པ། གངས་ཅན་གྱི་ཡུལ་དུ་དངོས་པོ་ཞེས་གྲགས་ཤིང་། རྒྱ་ནག་ལུགས་ལ་ཤིང་ཕོ་ཁྱིའི་ལོ་ནག་པ་ཟླ་བའི་དཀར་ཕྱོགས་དགའ་བ་གསུམ་པའི་ཚེས་ལ་བོད་ཀྱི་རྡོ་རྗེ་གདན་དཔལ་ལྡན་ས་སྐྱའི་ཆོས་གྲྭ་ཆེན་པོ་བཞི་ཐོག་བླ་བྲང་གི་ཡང་རྩེ་དཔེ་ཁང་གསར་པ་ཆོས་མཛོད་ཆེན་མོར་སྦྱར་བའི་ཡི་གེ་པ་ནི་ལུགས་འདིའི་འདུ་བྱེད་ལ་མཁས་པའི་ཕུལ་དུ་ཕྱིན་པ་བསམ་འགྲུབ་ཀྱིས་ལེགས་པར་བགྱིས་སོ། །འདི་བགྱིས་དགེ་བས་བདག་ཅག་དཔོན་སློབ་ཀྱི་འདི་ཕྱིའི་དོན་ཐམས་ཅད་ཡིད་བཞིན་དུ་གྲུབ་སྟེ་སྤྱི་དང་བྱེ་བྲག་གི་བསྟན་པ་ནམ་ལངས་པ་ལ་ཉི་མ་ཤར་བ་ལྟ་བུ་བྱ་ནུས་པའི་མཐུ་དང་ལྡན་པར་གྱུར་ཅིག དེ་དེ་བཞིན་དུ་གྱུར་ཅིག དེ་ལས་གཞན་དུ་ནམ་ཡང་མ་གྱུར་ཅིག །སྭ་སྟི་ཛ་ཡནྟུ་སརྦ་མངྒ་ལཾ།། །།