མཚན་སྤེལ་གྱི་བསྟོད་པ་རིན་ཆེན་དཀོན་མཆོག་མ།

ན་མོ་རཏྣ་དྷྭ་ཛཱ་ཡ། རིན་ཆེན་དཀོན་མཆོག་གསུམ་གྱི་ངོ་བོ་ཉིད། །རྒྱལ་བ་ཀུན་འདུས་དྲུག་པ་རྡོ་རྗེ་འཆང་། །མཚན་ཙམ་དྲན་པས་སྲིད་ཞིའི་དཔལ་སྟེར་བ། །དངོས་གྲུབ་བཟང་པོའི་གཏེར་ལ་གསོལ་བ་འདེབས། །མཁྱེན་རབ་འོད་ཀྱིས་ཟབ་དོན་པད་ཚལ་འབྱེད། །ཐུགས་རྗེའི་ལྕགས་ཀྱུས་ཉམ་ཐག་འགྲོ་བ་འདྲེན། །ཕྲིན་ལས་ཆར་གྱིས་གདུལ་བྱ་ཚིམ་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཉེས་སྤྱོད་འདམ་བུའི་ཚལ་རྣམས་ཀུན་ཏུ་བཅོམ། །གཞན་ཕན་གསེར་གྱི་དྲྭ་བས་གདོང་མཛེས་ཤིང་། །གསང་ཆེན་གདམས་པའི་ཁུར་གྱིས་མི་ངལ་བའི། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཡིད་བཞིན་ནོར་འདྲའི་ཐུགས་ལ་དབང་བསྒྱུར་ཞིང་། །ཡང་དག་ལྟ་བས་ཆོས་ཀུན་སྒྱུ་མར་གཟིགས། །ཡི་དམ་ལྷ་དང་བླ་མའི་ལུང་བསྟན་བརྙེས། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཁྱོད་ཀྱི་ཕུང་ཁམས་རྒྱལ་དང་རྒྱལ་བའི་ཡུམ། །དབང་སོགས་སེམས་དཔའ་ཡུལ་རྣམས་ལྷ་མོར་སྟོན། །ཉིད་སྐུའི་ཆ་ཤས་ཁྲོ་བོ་བཅུར་སྤྲུལ་པའི། །དཔལ་ལྡན་བླ་མའི་ཞབས་ལ་གསོལ་བ་འདེབས། །དུས་གསུམ་རྒྱལ་བ་མཆོད་པའི་བསོད་ནམས་ཀུན། །གང་གི་བ་སྤུའི་ཁུང་བུ་གཅིག་ཉིད་ལ། །རྣམ་པར་གནས་ཞེས་རྒྱལ་བས་བདེན་གསུངས་པ། །དེ་སླད་དངོས་པོ་ཀུན་གྱིས་རབ་ཏུ་མཆོད། །རབ་མང་ཉེས་པའི་ཚོགས་རྣམས་སོ་སོར་བཤགས། །རབ་དཀར་དགེ་བ་ཀུན་ལ་རྗེས་ཡི་རང་། །རབ་ཟབ་ཆོས་ཀྱི་འཁོར་ལོ་བསྐོར་བར་བསྐུལ། །རབ་འབྱམས་འགྲོ་བའི་དོན་དུ་བཞུགས་སུ་གསོལ། །དཀོན་མཆོག་གསུམ་དངོས་རྗེ་བཙུན་ཁྱོད་ཉིད་ལ། །སེམས་མཆོག་དད་པས་གསོལ་བ་བཏབ་པའི་མཐུས། །དགེ་མཆོག་བསགས་པ་གང་དེས་འགྲོ་བ་ཀུན། །འདྲེན་མཆོག་བླ་མས་རྗེས་སུ་འཛིན་པར་ཤོག །དོན་མེད་ཚེ་འདིའི་བྱ་བས་མི་གཡེང་བར། །དོན་ཆེན་སྒྲུབ་བྱེད་བྱང་ཆུབ་སེམས་མཆོག་དང་། །དོན་དམ་རྟོགས་པའི་ཤེས་རབ་ཕུན་ཚོགས་རྣམས། །དོན་གཞན་སྤངས་ནས་རྩེ་གཅིག་བསྒོམ་པར་ཤོག །དམ་ཚིག་སྡོམ་པ་རྣམ་དག་དང་ལྡན་ཞིང་། །དམ་ཆོས་སྙིང་པོ་རིམ་གཉིས་ཟབ་མོའི་ལམ། །དམ་པས་བསྔགས་པའི་གནས་སུ་ལེགས་བསྒོམས་པས། །དམ་པའི་དོན་མཆོག་ཟུང་འཇུག་རྟོགས་པར་ཤོག །དགེ་བ་འདི་ཡིས་བདག་གཞན་འགྲོ་བ་ཀུན། །བསོད་ནམས་ཡེ་ཤེས་ཚོགས་གཉིས་མྱུར་རྫོགས་ནས། །ཤཱཀྱ་སེང་གེའི་གོ་འཕང་མངོན་གྱུར་ཏེ། །མཐའ་ཡས་འགྲོ་བ་འདྲེན་པའི་དཔལ་དུ་ཤོག །ཅེས་པ་འདི་ཡང་དད་ལྡན་གྱིས། །བསྐུལ་ནས་བསོད་ནམས་སེང་གེ་ཡིས། །བདེ་བ་ཅན་དུ་ལེགས་པར་སྦྱར། །དགེ་ཚོགས་བྱང་ཆུབ་ཆེན་པོ་བསྔོ།། །།ཤུ་བྷཾ།། །།