ཀུན་མཁྱེན་སངས་རྒྱས་འཕེལ་བ་ལ་བསྟོད་པ།

ན་མོ་དྷརྨཱ་སྭ་མི་བུད་དྷ་ཝར་དྷ་ཡེ། དཔལ་ལྡན་ལྷ་དབང་ཀླུ་རྒྱལ་དཔག་བསམ་ཤིང་། །རྟ་བདུན་རི་དྭགས་རྒྱལ་པོ་ཡིད་བཞིན་ནོར། །གླང་པོ་བསིལ་ཟེར་ཅན་འདྲའི་བླ་མ་ལ། །རྗེས་བསྔགས་སྡེབ་སྦྱོར་ཕྲེང་བས་བསྟོད་པར་བགྱི། །དགེ་ཚོགས་ལྷུན་པོའི་སྤོ་ལ་བརྟན་བཞུགས། །བློ་གྲོས་སྤྱན་སྟོང་ལྡན་པའི་གཟི་ལྡན། །བློ་གསལ་ཉེ་དབང་ཚོགས་ཀྱིས་ཉེར་བསྟེན། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །མཐའ་གཉིས་གནས་བསལ་དབུ་མའི་རྒྱ་མཚོར། །ཡང་དག་རིགས་པའི་གདེངས་ཀས་བརྗིད་ཅིང་། །སྟོང་ཉིད་སྨྲ་བའི་ཕུཊ་སྒྲ་ཆེར་སྒྲོགས། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །རྣམ་མང་ཐོས་པའི་རྩ་བ་བརྟན་ཅིང་། །བསམ་བྱུང་རིགས་པའི་ཡལ་གས་ཉེར་མཛེས། །ཟབ་དོན་བསྒོམ་པའི་འབྲས་བུ་སྟོང་ལྡན། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །མ་ལུས་གསུང་རབ་མཁྱེན་པའི་ནམ་མཁའ། །སྐྱོང་བྲལ་སྡོམ་གསུམ་དཀྱིལ་འཁོར་ཡོངས་རྫོགས། །བྱམས་དང་སྙིང་རྗེའི་འོད་ཟེར་སྟོང་འཕྲོ། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །ལེགས་བཤད་འཆད་པའི་ལུས་སྟོབས་ཆེར་རྒྱས། །རིགས་ལམ་རྩོད་པའི་མཆེ་སྡེར་རྣོ་ཞིང་། །སྤེལ་ལེགས་རྩོམ་པའི་རལ་པའི་ཁུར་ལྡན། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །སངས་རྒྱས་བསྟན་པ་དབང་གི་རྒྱལ་པོ། །བཤད་སྒྲུབ་རྒྱལ་མཚན་རྩེ་མོར་མཆོད་ནས། །གདུལ་བྱའི་དགོས་འདོད་འཕེལ་བའི་མཐུ་ལྡན། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །རྣམ་དཀར་འདུལ་བའི་དྲྭ་བས་ཉེར་མཛེས། །རྒྱ་ཆེན་མངོན་པའི་ཡན་ལག་བདུན་ལྡན། །ཟབ་མོ་མདོ་སྡེའི་ཁུར་གྱིས་བརྗིད་པའི། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །དངོས་སྟོབས་རིགས་པའི་དཀྱིལ་འཁོར་ལས་འབྱུང་། །སྒྲུབ་དང་སུན་འབྱིན་འོད་དཀར་དྲྭ་བས། །ཐུབ་བསྟན་ཀུན་དའི་ཕྲེང་བ་རྒྱས་མཛད། །ཀུན་མཁྱེན་སངས་རྒྱས་འཕེལ་ལ་ཕྱག་འཚལ། །བསྔགས་འོས་གང་དེའི་ཡོན་ཏན་ཆ་ཙམ། །རྗེས་བསྔགས་སྡེབ་སྦྱོར་ཕྲེང་བས་སྤེལ་བའི། །བསྔགས་འོས་དགེ་དེས་ཀུན་མཁྱེན་བླ་མ། །འགྲོ་བའི་གཙུག་ན་བསྔགས་པར་ཤོག་ཅིག །ཐུབ་བསྟན་པད་མོའི་ཚལ་རབ་རྒྱས་ཤིང་། །འགྲོ་ལ་ལམ་བཟང་སྣང་བའི་ཆེད་དུ། །འདྲེན་མཆོག་ཉིན་བྱེད་སྐུ་ཚེ་བརྟན་ཞིང་། །ཕྲིན་ལས་ཕྱོགས་བཅུར་རྒྱས་པར་ཤོག་ཅིག །ཚུལ་འདི་བསོད་ནམས་སེང་གེའི་མགུར་ནས། །ཕྱུང་སྟེ་སྐྱེད་ཚལ་མཛེས་པའི་བློ་གསལ། །འདུས་པའི་ཚོགས་ལ་སྐྱེས་སུ་འབུལ་གྱི། །བསྟོད་དབྱངས་སྙན་པའི་རྫ་རྔ་སྒྲོགས་ཤིག །ཤུ་བྷཾ།། །།