པཎྜི་ཏ་གྲགས་པ་རྡོ་རྗེའི་བསྟོད་པ།

མ་ཧཱ་པཎྜི་ཏ་གྲགས་པ་རྡོ་རྗེ་ལ་བསྟོད་པ་དད་པའི་པད་མོ་རྒྱས་བྱེད་ཅེས་བྱ་བ། དཔལ་ལྡན་འཇམ་པའི་རྡོ་རྗེ་ལ་ཕྱག་འཚལ་ལོ། །བློ་གྲོས་དཀྱིལ་འཁོར་གྲགས་པའི་གཟི་འབར་བ། །མི་འགྱུར་རྡོ་རྗེའི་མཁའ་ལ་རྣམ་རོལ་ཞིང་། །བདེ་གཤེགས་བསྟན་པའི་པད་ཚལ་རྒྱས་མཛད་པ། །མཁས་མཆོག་ཉིན་བྱེད་དབང་པོ་ལ་ཕྱག་འཚལ། །ལེགས་གསུང་འདུལ་བ་རྒྱ་མཚོའི་དབུས་གནས་ཤིང་། །རྣམ་དག་ཚུལ་ཁྲིམས་བསླབ་པའི་མེ་འོད་ཀྱིས། །འཆལ་ཚུལ་སྨག་རུམ་མུན་པ་བསལ་མཛད་པ། །གནས་བརྟན་གདེངས་ཅན་དབང་པོ་ལ་ཕྱག་འཚལ། །སྲིད་གསུམ་འགྲོ་བའི་སྡུག་བསྔལ་སེལ་བའི་ཕྱིར། །ཐེག་མཆོག་ལམ་གྱི་ཐེམ་སྐས་ཀུན་འཛེགས་ཏེ། །རྒྱལ་བའི་ཕྲིན་ལས་མ་ལུས་བསྒྲུབ་མཛད་པ། །རབ་འབྱམས་རྒྱལ་སྲས་དབང་པོ་ལ་ཕྱག་འཚལ། །མཐའ་ཡས་རྒྱུད་སྡེའི་དགོངས་པ་བདུད་རྩིའི་རྒྱུན། །རྨད་བྱུང་བརྩོན་པའི་སྙིམ་པས་ལེགས་གསོལ་ནས། །སྐལ་ལྡན་འགྲོ་ལ་ཚུལ་བཞིན་འདོམས་མཛད་པ། །གསང་ཆེན་གདམས་པའི་དབང་ཕྱུག་ལ་ཕྱག་འཚལ། །རིག་གནས་པད་མོ་ཟུམ་པ་མ་བཟོད་ནས། །ཡོངས་རྫོགས་བསྟན་པའི་མངའ་བདག་པཎྜི་ཏ། །འཇམ་དབྱངས་ཉི་མ་སླར་ཡང་གསལ་བྱོན་པ། །འཛམ་གླིང་མཁས་པའི་དབང་པོ་ལ་ཕྱག་འཚལ། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་ཆེན་འབུལ། །སྡིག་པ་ཀུན་བཤགས་དགེ་ལ་རྗེས་ཡི་རང་། །ཟབ་ཡངས་ཆོས་ཀྱི་འཁོར་ལོ་བསྐོར་བ་དང་། །རྟག་ཏུ་མྱ་ངན་མི་འདའ་བཞུགས་སུ་གསོལ། །གང་སྐུ་རིན་ཆེན་གསེར་ལྟར་བཟང་བ་དང་། །དེའི་གསུང་གྲགས་པས་ས་དང་མཁའ་ཁྱབ་ཅིང་། །ཁྱོད་ཐུགས་རྡོ་རྗེ་ལྟ་བུར་བརྟན་པ་ཡིས། །བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག །པཎ་ཆེན་གྲགས་པ་རྡོ་རྗེ་ཡི། །ཡོན་ཏན་ཆ་ཙམ་བརྗོད་པས་ཀྱང་། །དད་པའི་པད་མོ་རྒྱས་བྱེད་འདི། །བསོད་ནམས་སེང་གེས་སྦྱར་བ་དགེ། །།