རྗེ་རིན་པོ་ཆེ་སྐུ་སྐྱེ་བའི་དྲུང་གི་བསྟོད་པ།

ཨོཾ་སྭསྟི། ཆོས་རྗེ་བསོད་ནམས་ཆོས་ཀྱི་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོ་ལ་བསྟོད་པ། ཡོན་ཏན་གསལ་བའི་མཚན་གྱི་ཟླ་ཟེར་ཞེས་བྱ་བ། མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཕུན་ཚོགས་བསོད་ནམས་དཔལ་ལས་འཁྲུངས་པའི་སྐུ། །ལེགས་བྱས་བསོད་ནམས་བརྒྱ་ཡིས་བསྐྲུན་པའི་གསུང་། །རྒྱ་ཆེན་བསོད་ནམས་ཡེ་ཤེས་ལྡན་པའི་ཐུགས། །གང་ལ་མངའ་བའི་སྐྱེས་ཆེན་དེ་ལ་འདུད། །ཐེག་ཆེན་ཆོས་ཀྱི་སྙིང་པོ་བསྡུས་པའི་བཅུད། །ཟབ་ཡངས་ཆོས་ཀྱི་དེ་ཉིད་རྟོགས་པའི་ཐབས། །གསུང་ངག་ཆོས་ཀྱིས་རང་རྒྱུད་རྣམ་གྲོལ་ནས། །གཞན་རྒྱུད་སྨིན་པར་མཛད་པ་དེ་ལ་འདུད། །མཁས་པ་ཀུན་དགའི་མཁྱེན་པ་ཟབ་མོ་དང་། །འགྲོ་བ་ཀུན་དགའི་ཐུགས་རྗེ་རྨད་བྱུང་གིས། །རྒྱལ་བ་ཀུན་དགའ་ཕྲིན་ལས་སྒྲུབ་མཛད་པ། །མཁྱེན་བརྩེ་ནུས་པ་མཐར་ཕྱིན་དེ་ལ་འདུད། །ཐོས་མང་བཀྲ་ཤིས་རྩ་བ་རབ་བརྟན་ཞིང་། །བསམ་བྱུང་བཀྲ་ཤིས་མེ་ཏོག་རྣམ་པར་བཀྲ། །བསྒོམས་པའི་བཀྲ་ཤིས་ཉམས་རྟོགས་འབྲས་བུས་བརྒྱན། །དཔག་ཡས་ཡོན་ཏན་ལྗོན་པ་དེ་ལ་འདུད། །དཀོན་མཆོག་རྒྱལ་མཚན་གསུང་གི་མན་ངག་ལས། །ཆོས་ཀྱི་རྒྱལ་མཚན་དྲི་མེད་ལེགས་བཟུང་ནས། །བསྟན་པའི་རྒྱལ་མཚན་འཛིན་པར་དབང་བསྐུར་ཏེ། །ལུང་བསྟན་དབུགས་དབྱུང་བརྙེས་པ་དེ་ལ་འདུད། །ཚོགས་གཉིས་དཔལ་འབྱོར་གཏིང་མཐའ་མི་མངོན་ཞིང་། །སྲིད་ཞིའི་དཔལ་འབྱོར་རིན་ཆེན་དུ་མས་གཏམས། །དོན་གཉིས་དཔལ་འབྱོར་རྦ་རླབས་རབ་གཡོ་བ། །དགེ་ལེགས་ཀུན་གྱི་རྒྱ་མཚོ་དེ་ལ་འདུད། །གྲགས་པ་བཟང་པོ་ལ་སོགས་མཚུངས་བྲལ་བའི། །ཡོངས་འཛིན་བཟང་པོའི་བཀའ་ལུང་མཐར་ཕྱིན་ནས། །ཕྲིན་ལས་བཟང་པོས་ཐུབ་བསྟན་རྒྱས་མཛད་པ། །སྟོན་པའི་བསྟན་འཛིན་དེ་ལ་ཕྱག་འཚལ་ལོ། །ཀུན་ཏུ་བཟང་པོའི་མཆོད་སྤྲིན་རྒྱ་ཆེར་འབུལ། །ཀུན་རྟོག་ངན་པའི་ཉེས་རྣམས་སོ་སོར་བཤགས། །ཀུན་གྱི་དགེ་བ་ཀུན་ལ་རྗེས་ཡི་རང་། །ཀུན་མཁྱེན་ཆོས་འཁོར་བསྐོར་ཞིང་རྟག་བཞུགས་གསོལ། །སྒོ་གསུམ་དྭང་བས་བསྟོད་པའི་བསོད་ནམས་དང་། །དུས་གསུམ་བསགས་པའི་དགེ་གཞན་ཅི་མཆིས་པ། །འཁོར་གསུམ་རྣམ་པར་མི་རྟོག་ཤེས་རབ་ཀྱིས། །སྐུ་གསུམ་མངོན་འགྱུར་སངས་རྒྱས་ཐོབ་ཕྱིར་བསྔོ། །རྒྱལ་བ་འགྲོ་ལ་དམ་ཆོས་སྟོན་པ་དང་། །དམ་ཆོས་སྤྱོད་པས་དགེ་འདུན་རྒྱས་པ་དང་། །དགེ་འདུན་བདེར་གཤེགས་བསྟན་པ་སྐྱོང་བ་ཡིས། །བསྟན་པ་དར་ཞིང་རྒྱས་པའི་བཀྲ་ཤིས་ཤོག །ཚུལ་འདི་ཐོས་བསམ་རི་མོ་རབ་བཀྲ་སྟག་དང་ནི། །སྒོམ་པའི་ལོག་ཞོལ་འཕྱང་བའི་གནས་བརྟན་རྒྱ་བོ་ཡིས། །ཡང་ཡང་བསྐུལ་ནས་གསུང་རབ་བྲག་ལ་གནས་བཅས་ཤིང་། །ལུང་རིགས་གཤོག་ཡངས་རྒྱས་པ་གོ་བོས་སྦྱར། །དགེའོ།། །།