སློབ་དཔོན་སྦྱིན་བཟང་པའི་བསྟོད་པ། ན་མོ་གུ་ར་ཝེ། དགེ་ལེགས་རིན་ཆེན་ཀུན་གྱི་གཏེར་གྱུར་པ། །ལེགས་གསུང་འདུལ་བ་རྒྱ་མཚོའི་དབུས་གནས་ཤིང་། །བསླབ་གསུམ་གདེངས་ཀས་བརྗིད་པའི་གཟི་འོད་ཅན། །འདུལ་འཛིན་ཆེན་པོའི་ཞབས་ལ་གསོལ་བ་འདེབས། །རླབས་ཆེན་བྱང་ཆུབ་སེམས་ཀྱི་ཆུ་མཚོ་ལས། །སྦྱིན་སོགས་སྤྱོད་པའི་འདབ་སྟོང་རབ་རྒྱས་ཏེ། །ཕྲིན་ལས་བཟང་པོའི་ཟེའུ་འབྲུས་ལེགས་སྤྲས་པའི། །རྒྱལ་སྲས་ཆེན་པོའི་ཞབས་ལ་གསོལ་བ་འདེབས། །རྣམ་མང་རྒྱུད་སྡེའི་རིན་ཆེན་ལས་གྲུབ་ཅིང་། །རྨད་བྱུང་དབང་བཞིའི་བང་རིམ་ཕྲེང་བ་ཅན། །རིམ་གཉིས་ཉི་ཟླ་གསལ་བའི་མདངས་ལྡན་པ། །རྡོ་རྗེ་འཛིན་པའི་ཞབས་ལ་གསོལ་བ་འདེབས། །དཔལ་ལྡན་བླ་མར་ཚུལ་བཞིན་བསྔགས་པ་ཡི། །དགེ་ཚོགས་གང་དེས་གནས་འདི་ལོངས་སྤྱོད་དང་། །ཆོས་ཀྱིས་རྒྱས་ཤིང་མཐའ་ཡས་འགྲོ་བ་ཀུན། །ཀུན་མཁྱེན་རྒྱལ་པོའི་གོ་འཕང་མྱུར་ཐོབ་ཤོག །བསྟན་པའི་རྩ་ལག་སྦྱིན་པ་བཟང་པོ་ཞེས། །རབ་ཏུ་གྲགས་པ་དེ་ཡི་བསྟོད་ཚིག་འདི། །དད་ལྡན་བློ་གྲོས་འབུམ་གྱིས་ལེགས་བསྐུལ་ནས། །མང་ཐོས་དགེ་སློང་བསོད་ནམས་སེང་གེས་སྦྱར། །དགེའོ།། །།