ཀྱེ་རྡོར་འགྲེལ་པ་ལུགས་ཀྱི་བརྒྱུད་པའི་ཁ་སྐོང་། བློ་གྲོས་ཕུན་ཚོགས་ཐུབ་བསྟན་རྒྱལ་མཚན་འཛིན། །དཔལ་ལྡན་ཕྲིན་ལས་བཟང་པོ་སྐྱེ་རྒུའི་མགོན། །ཆོས་ཀྱི་རྒྱལ་པོའི་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །འཕགས་པས་རྗེས་བཟུང་རྒྱུད་དོན་མ་ལུས་རིག །རྨད་བྱུང་བཤད་པའི་སྲོལ་འཛིན་དགའ་ལྡན་པ། །བཀྲ་ཤིས་དཔལ་གྱི་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །རབ་དཀར་བསོད་ནམས་བརྒྱ་ཡི་གངས་རི་ལས། །རྨད་བྱུང་མཁྱེན་བརྩེའི་དཔལ་གྱི་ཆུ་རྒྱུན་ཅན། །རྒྱལ་བ་བྲག་ཕུག་པ་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །རྣམ་དག་བློ་གྲོས་ནམ་མཁའ་ཡངས་པ་ལ། །རབ་ཏུ་བརྟན་པའི་ཏིང་འཛིན་དཀྱིལ་འཁོར་རྒྱས། །མཚུངས་མེད་རི་ཁྲོད་པ་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །ཚོགས་གཉིས་དཔལ་ལྡན་སྒྲིབ་གཉིས་གཡུལ་ལས་རྒྱལ། །སྡོམ་གསུམ་ཚུལ་ཁྲིམས་ཉེས་གསུམ་དྲི་མས་དབེན། །དཔལ་ལྡན་ཚུལ་ཁྲིམས་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །ཡེ་ཤེས་ཁང་བཟང་ཐུགས་རྗེའི་རྒྱལ་མཚན་གྱིས། །ལེགས་པར་སྤྲས་པའི་དཔལ་འབྱོར་བཟང་པོ་ཅན། །རྗེ་བཙུན་རྟོག་མེད་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །ཁྱོད་ཐུགས་ཤེས་བྱ་ཀུན་ལ་ལེགས་སྦྱངས་པས། །རྒྱལ་བའི་བསྟན་ལ་རྒྱལ་བ་གཉིས་པར་གྱུར། །འདྲེན་མཆོག་བཟང་པོའི་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །རྣམ་དག་མཁྱེན་པས་ཆོས་ཀུན་སྒྱུ་མར་གཟིགས། །དམིགས་མེད་ཐུགས་རྗེས་གཞན་ལ་ཕན་དགོངས་པ། །དཀོན་མཆོག་རྒྱལ་མཚན་ཞབས་ལ་ཕྱག་འཚལ་ལོ། །རྟག་ཏུ་བདག་ལ་བྱིན་གྱིས་བརླབ་ཏུ་གསོལ། །ཞེས་པ་འདི་ནི་ཆོས་ཀྱི་རྒྱལ་པོ་འཕགས་པས་མཛད་པའི་ཀྱེ་རྡོར་འགྲེལ་པ་ལུགས་ཀྱི་བརྒྱུད་པའི་ཁ་སྐོང་དུ་དགེ་སློང་བསོད་ནམས་སེང་གེས་སྦྱར་བའོ།། །།དགེའོ།། །།