➤
Share / བགོ་འགྲེམ།
Facebook
Telegram
Whatsapp
Toggle navigation
Table of Contents
Share
Search Options
Return to Search Results
New Search
Print View
Search This Text
ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།
རྗེ་བླ་མ་ཀུན་མཁྱེན་ཆེན་པོའི་བཀའ་འབུམ་གྱི་པོ་ཏི་ཐོག་མའི་སྐབས་ལས་བསྟོད་ཚོགས་ཀྱི་སྐོར་རྣམས་བཞུགས།
ཕར་ཕྱིན་དང་ཚད་མ་བརྒྱུད་པའི་བླ་མ་ལ་མཆོད་བསྟོད་རིན་པོ་ཆེའི་ཕྲེང་བ།
རྟགས་འཇུག་གི་ཊཱིཀ་བཞུགས་སོ།།
རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་རྣམ་པར་བཤད་པ་ཀུན་ཏུ་བཟང་པོའི་འོད་ཟེར། རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་རྣམ་པར་བཤད་པ་ཀུན་ཏུ་བཟང་པོའི་འོད་ཟེར་ཞེས་བྱ་བ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །མ་ལུས་འགྲོ་ལ་མ་ལྟར་བརྩེ་བའི་དམིགས་མེད་ཐུགས་རྗེའི་ལྷ་ལམ་ཡངས་པར་ནི། །རྒྱུ་བཅས་སྡུག་བསྔལ་རྒྱུ་ཡི་གཉེན་པོ་ཐབས་མཆོག་རྟོགས་པ་སྟོན་པའི་རྟ་བདུན་གྱིས། །ཁྱད་པར་གསུམ་གྱིས་ཁྱད་པར་བྱས་པའི་བདེ་གཤེགས་ཉི་མའི་དཀྱིལ་འཁོར་ལེགས་དྲངས་ཏེ། །རྣམ་མང་གདུལ་བྱ་རྣམ་དཀར་སྣང་བས་སྐྱོབ་མཛད་ཚད་མར་གྱུར་པ་དེ་ལ་འདུད། །ཉི་བཟང་འཆར་ཀའི་དམར་སེར་ལ་འགྲན་དམར་སེར་འོད་ཀྱི་ཁོར་ཡུག་ཅན། །གློག་ཕྲེང་འགྱུ་བའི་ཕྲེང་མཛེས་དང་འགྲོགས་ཕྲེང་མཛེས་གཡོ་བའི་སིལ་སྒྲ་འབྱིན། །ལྷ་བརྒྱའི་གཙུག་ནོར་འོད་ཟེར་དང་འདྲེས་འོད་ཟེར་ཕྲེང་ལྡན་པདྨར་འགྱིང་། །ལྷ་མཆོག་གང་དེ་བདག་གི་ཡིད་ལ་བདག་གི་རེ་བ་རྫོགས་པར་མཛོད། །ཕྱོགས་ཀྱི་གླང་པོ་གཞན་ལ་ཕན་པའི་བསམ་པ་ཅན་ཞེས་ཉི་མའི་གཉེན་གྱིས་ལུང་བསྟན་ཅིང་། །ཕྱི་མའི་དུས་ན་བསྟན་བཅོས་ཀུན་གྱི་མིག་གཅིག་འགྱུར་ཞེས་འཇམ་དབྱངས་མགོན་པོས་དབུགས་དབྱུང་མཛད། །ཕས་རྒོལ་འདམ་བུའི་གྲོང་རྣམས་རིགས་པའི་རྩལ་གྱིས་བརླག་ཞེས་སྲིད་ན་གྲགས་པའི་གོམ་སྟབས་གཡོ། །ཕྱིན་དྲུག་སྤྱོད་པའི་དྲྭ་བས་མཛེས་ཤིང་ཐུབ་བསྟན་དྲི་མེད་ཁུར་གྱིས་བརྗིད་པ་དེ་ལ་འདུད། །གང་ཞིག་དངོས་སྟོབས་རིགས་པའི་རིན་ཆེན་རྡུལ་བརྩེགས་བརྩོན་པ་གཉིས་ཀྱིས་སྲུབ་ཐག་བསྒྱུར་བ་ཡིས། །རང་གཞན་གྲུབ་མཐའི་རྒྱ་མཚོ་བསྲུབས་པ་ལས་བྱུང་སྡེ་བདུན་བདུད་རྩིའི་ཐིག་ལེ་འོད་དཀར་ཅན། །ཟབ་ཅིང་རྒྱ་ཆེའི་ཆོས་ཀྱི་ཆ་ཤས་ཡོངས་རྫོགས་རྣམ་དཀར་གྲགས་པའི་བསིལ་ཟེར་འཕྲོ་བ་ཡིས། །ཐུབ་བསྟན་ཀུ་མུད་སྐྱོང་མཛད་སྨྲ་བའི་ཟླ་བར་འདུད་དོ་བདག་བློའི་ཀུན་དའང་རྒྱས་པར་མཛོད། །དགེ་ལེགས་ཡོན་ཏན་དུ་མའི་གཞིར་གྱུར་ཟབ་ཡངས་མཁྱེན་པའི་གཏིང་མཐའ་མི་མངོན་ཡིད་མཚོར་ནི། །བཅུ་དྲུག་ཕྱེད་ཕྱེད་པཎ་ཆེན་བློ་ཡི་མ་དྲོས་ལས་བྱུང་སྒྲ་ཚད་རྒྱུན་བཞི་ལེགས་འབབ་ཅིང་། །སྒྲུབ་དང་སུན་འབྱིན་རིགས་པའི་ཕུཊ་སྒྲ་ཆེར་སྒྲོགས་རྣམ་དཔྱོད་སྤོབས་པའི་ཀླུ་དབང་བསྟི་བའི་གནས། །ཡོན་ཏན་རྒྱ་མཚོ་ས་སྐྱ་པ་ཞེས་གྲགས་པའི་རྦ་རླབས་གཡོ་བ་དེ་ལ་སྙིང་ནས་འདུད། །རིགས་པའི་སྟོབས་རྒྱས་རིགས་པ་སྨྲ་བའི་སེང་གེ་ལ་སོགས་བརྒྱུད་པའི་ཚོགས་རྣམས་དང་། །སངས་རྒྱས་བསྟན་ལ་སངས་རྒྱས་གསུང་གི་དཔལ་གྱིས་རྣམ་རོལ་མཁས་མཆོག་གང་དེ་དང་། །ཤཱཀྱའི་རིགས་འཁྲུངས་ཤཱཀྱའི་བསྟན་པའི་རྒྱལ་མཚན་སྲིད་པ་གསུམ་ན་འཛིན་མཛད་དང་། །རབ་འབྱམས་འགྲོ་ལ་རབ་འབྱམས་གཞུང་གི་དགའ་སྟོན་འགྱེད་མཛད་ཡོངས་འཛིན་མཆོག་ལ་འདུད། །གང་ཞིག་ཐོས་ན་འབྲུག་སྒྲ་ལྟ་བུར་དོན་གཉེར་ཆར་འདོད་བྱེའུའི་རྣར་སྙན་ཅིང་། །ལེགས་པར་བསམས་ན་གློག་ཕྲེང་ལྟ་བུར་མཁས་མང་རྩྭ་ལྗང་མྱུ་གུའི་རྩེ་ན་མཛེས། །ཚུལ་བཞིན་བསྒོམས་ན་གནམ་ལྕགས་ལྟ་བུར་གཟུང་འཛིན་རྟོག་པའི་བྲག་རི་བཤིག་བྱེད་པའི། །གཞུང་ལུགས་ནམ་མཁར་རྣམ་དཔྱོད་སྤྲིན་ལས་ལེགས་བཤད་ཆར་གྱིས་སྐྱེ་དགུ་ཚིམ་པར་བྱེད།། །།འགྲོ་བ་མཐའ་དག་ལ་གནས་སྐབས་དང་མཐར་ཐུག་གི་ཕན་བདེ་མ་ལུས་པ་སྦྱིན་པའི་གཉེན་གཅིག་པུ་སྟོན་པ་ཡང་དག་པར་རྫོགས་པའི་སངས་རྒྱས་དང་། དེའི་བསྟན་པ་ལ་ཕས་ཀྱི་རྒོལ་བའི་ལོག་སྨྲའི་དྲི་མ་མཐའ་དག་བསལ་ནས་རྗེས་འཇུག་གི་གདུལ་བྱ་རྣམས་ངེས་པ་སྐྱེས་པའི་སྒོ་ནས་འཇུག་པའི་ཆེད་དུ་སློབ་དཔོན་ཕྱོགས་ཀྱི་གླང་པོས་ཚད་མའི་བསྟན་བཅོས་ཐོར་བུ་བ་མང་དུ་མཛད་ཅིང་ཕྱིས་དེ་དག་གི་དོན་ཕྱོགས་གཅིག་ཏུ་བསྡུས་ནས་ཚད་མ་ཀུན་ལས་བཏུས་པ་མཛད་དོ། །འདི་ཉིད་ཀྱི་དོན་རྣམ་པར་འགྲེལ་བར་བྱེད་པ་མང་དུ་བྱུང་ཡང་། ཕྱིན་ཅི་མ་ལོག་པར་ཐུགས་སུ་ཆུད་པ་ནི་འཇམ་དཔལ་རྩ་བའི་རྒྱུད་ལས། ཡི་གེ་དྷཿཞེས་སྡོམ་བརྩོན་ཉིད། །ལྷོ་ཡི་ཕྱོགས་སུ་རྣམ་པར་བསྒྲགས། །ཕ་རོལ་རྒོལ་བ་བཟློག་ནས་ནི། །དེ་བཞིན་སྡོམ་བརྩོན་སྔགས་ཀྱང་འགྲུབ། །ཅེས་ལུང་བསྟན་པའི་མཁས་ཤིང་གྲུབ་པ་བརྙེས་པའི་སྐྱེས་བུ་ཆེན་པོ་དཔལ་ལྡན་ཆོས་ཀྱི་གྲགས་པ་ཡིན་ལ། དེས་དགོངས་འགྲེལ་གྱི་བསྟན་བཅོས་རབ་ཏུ་བྱེད་པ་སྡེ་བདུན་མཛད་དེ། ཡང་དག་པའི་ཤེས་པ་བདེ་བླག་ཏུ་རྟོགས་པའི་ཐབས་སུ་གཞན་ལུགས་དགག་པ་དང་། རང་ལུགས་གཞག་པ་གཉིས་ཀ་རྒྱས་པ་རྣམ་འགྲེལ། རང་ལུགས་གཞག་པ་རྒྱས་ཤིང་གཞན་ལུགས་དགག་པ་ཅུང་ཟད་བསྡུས་པ་འབྲིང་རྣམ་ངེས། རང་ལུགས་གཞག་པ་ཡང་བསྡུས་ཏེ་སྟོན་པ་བསྡུས་པ་རིགས་ཐིགས་ཏེ་གཙོ་བོ་ལུས་ལྟ་བུའི་བསྟན་བཅོས་གསུམ། མངོན་གསུམ་ལེའུ་ལས་འཕྲོས་པ་ནི་མེད་ལ། རང་དོན་ལེའུ་ལས་འཕྲོས་ནས་ཕྱོགས་ཆོས་དང་ཁྱབ་པ་སྤྱིར་གཏན་ལ་འབེབས་པ་གཏན་ཚིགས་ཐིགས་པ། རྟོགས་དཀའ་བ་བཏགས་ཆོས་ཀྱི་འབྲེལ་བ་གཏན་ལ་འབེབས་པ་འབྲེལ་པ་བརྟག་པ་གཉིས་དང་། གཞན་དོན་ལེའུ་ལས་འཕྲོས་ནས་རྒོལ་ཕྱིར་རྒོལ་རྩོད་པ་བྱེད་པའི་རྣམ་གཞག་དང་། ཚར་གཅད་ཀྱི་གནས་ལ་སོགས་པ་གཏན་ལ་འབེབས་པ་རྩོད་པའི་རིགས་པ་དང་། ངག་ལས་གཞན་གྱི་བློ་ཐ་སྙད་དུ་སེམས་ཙམ་པ་ལ་ཡང་མི་འགལ་བར་སྟོན་པ་རྒྱུད་གཞན་གྲུབ་པ་གཉིས་ཏེ་གྱེས་པ་ཡན་ལག་ལྟ་བུའི་བསྟན་བཅོས་བཞི་མཛད་དོ། །དེ་དག་ལས་འདིར་སྐབས་སུ་བབ་པ་རྒྱས་པའི་བསྟན་བཅོས་ཚད་མ་རྣམ་འགྲེལ་འཆད་པ་ལ་དོན་གསུམ་སྟེ། སྒྱུར་བྱེད་དམ་པའི་ཀླད་ཀྱི་དོན། རྩོམ་བྱེད་དམ་པའི་གཞུང་གི་དོན། བསྒྱུར་བ་མཐར་ཕྱིན་མཇུག་གི་དོན་ནོ། །
སྒྱུར་བྱེད་དམ་པའི་ཀླད་ཀྱི་དོན།
རྩོམ་བྱེད་དམ་པའི་གཞུང་གི་དོན།
དོན་དང་དོན་མིན་རྣམ་པར་འབྱེད་བྱེད་ཚད་མ་གྲུབ་པ་བཤད་པ།
སྐབས་སུ་བབ་པའི་ལེའུ་ལྷག་མར་ལུས་པ་གཉིས་པོ་བཤད་པ།
གཞན་དོན་ལེའུ་བཞུགས།
Collapse All
|
Expand All
ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།
གསུང་འབུམ་པོད། ཀ༽
ཀུན་མཁྱེན་གོ་རམས་པ་བསོད་ནམས་སེང་གེ
Nitartha International
[
Dedication
]
