ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ང༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

རབ་ཏུ་བྱུང་བ་རྣམས་ཀྱི་བསླབ་བྱ་ཉམས་སུ་བླང་བའི་ཆོས་འདུལ་བ་རྒྱ་མཚོའི་སྙིང་པོ།

རབ་ཏུ་བྱུང་བ་རྣམས་ཀྱི་བསླབ་བྱ་ཉམས་སུ་བླང་བའི་ཆོས་འདུལ་བ་རྒྱ་མཚོའི་སྙིང་པོ་ཞེས་བྱ་བ་བཞུགས་སོ།། དགེ་སློང་གི་བསླབ་བྱ་གསལ་བར་སྟོན་པ་འདུལ་བ་རྒྱ་མཚོའི་སྙིང་པོ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །ཟབ་ཡངས་ཡེ་ཤེས་རྒྱ་མཚོར་སྐྱེ་བ་བརྙེས། །ཡོན་ཏན་རིན་ཆེན་གླིང་ལ་དབང་འབྱོར་ཞིང་། །རྣམ་དཀར་མཛད་པའི་གདེངས་ཀ་མངོན་མཐོ་བ། །ལྷ་མིའི་སྟོན་པ་གདེངས་ཅན་དབང་པོར་འདུད། །ལེགས་གསུང་སྡུད་པོ་མཆོད་འོས་ཉེ་བ་འཁོར། །ལེགས་པར་བསྙེན་པའི་མཁན་པོ་སྒྲ་ཅན་འཛིན། །ལེགས་ལམ་འདོམས་མཛད་འཕགས་པ་ཡོན་ཏན་འོད། །ཆོས་འདུལ་སྲོག་ཤིང་གསུམ་ལའང་ཕྱག་བགྱིས་ནས། །རྣམ་དཀར་ཚུལ་ཁྲིམས་ཇི་ལྟར་ཐོབ་པ་དང་། །ཚུལ་བཞིན་བསྲུང་དང་ཉམས་པ་གསོ་བའི་ཚུལ། །ཆོས་འདུལ་རྒྱ་མཚོའི་སྙིང་པོ་མདོར་བསྡུས་པ། །དོན་གཉེར་རེ་བ་བསྐང་ཕྱིར་བཤད་པར་བྱ། །སྐལ་བ་དང་ལྡན་པའི་གང་ཟག་བདག་ལེགས་སུ་འདོད་པ་དག་གིས་འཁོར་བའི་སྡུག་བསྔལ་མཐའ་དག་སྤངས་ནས་རྣམ་པར་གྲོལ་བའི་གོ་འཕང་ཐོབ་པར་བྱ་དགོས་ལ། དེ་ལ་ཡང་ཟག་པ་མེད་པའི་ཤེས་རབ་ཀྱིས་ཉོན་མོངས་པ་བག་ཆགས་དང་བཅས་པ་སྤང་དགོས། ཤེས་རབ་དེ་ཡང་ཏིང་ངེ་འཛིན་གྱི་ཆུ་གཙང་མ་ལ་བརྟེན། དེ་ལ་ཚུལ་ཁྲིམས་རྣམ་པར་དག་པའི་སྣོད་གཙང་མ་དགོས་པས། བསླབ་པ་གསུམ་པོ་ནི་རྣམ་པར་གྲོལ་བའི་ལམ་གྱི་གཙོ་བོ་ཡིན་ཏེ། ལུང་སྨན་གྱི་གཞི་ལས། དགེ་སློང་དག་ཚུལ་ཁྲིམས་གོམས་པར་བྱས་ན་ཏིང་ངེ་འཛིན་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་གོམས་པར་བྱས་ན་ཤེས་རབ་ཡུན་རིང་དུ་གནས་པར་འགྱུར་རོ། །ཤེས་རབ་གོམས་པར་བྱས་ན་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་ལས་སེམས་ཡང་དག་པ་ཁོ་ནར་རྣམ་པར་གྲོལ་བར་འགྱུར་རོ། །ཞེས་བཤད་པས་སོ། །ཚུལ་ཁྲིམས་རྣམ་པ་དག་པ་དེ་ཡང་ངེས་འབྱུང་གི་བསམ་པས་ཀུན་ནས་བསླངས་པའི་སོ་སོར་ཐར་པ་རིས་བདུན་ཡིན་ལ། དེ་རྣམས་ཀྱི་མཆོག་ཏུ་གྱུར་པ་ནི་དགེ་སློང་གི་སྡོམ་པ་ཡིན་པས་དེའི་བསླབ་བྱ་གསལ་བར་བཤད་པ་ལ། དོན་བཞི་སྟེ། མ་ཐོབ་པ་ཐོབ་པར་བྱེད་པའི་ཆོ་ག ཐོབ་པ་མི་ཉམས་པར་བསྲུང་བའི་ཚུལ། ཉམས་ན་ཕྱིར་བཅོས་པའི་ཚུལ། དེ་དག་གི་དོན་གྱི་འབྲེལ་བརྩི་བའོ། །དང་པོ་ལ་གཉིས་ཏེ། གང་ཟག་སྐལ་ལྡན་གྱི་དབང་དུ་བྱས་པ་སྔོན་གྱི་ཆོ་ག ཐུན་མོང་གི་དབང་དུ་བྱས་པ་ད་ལྟར་གྱི་ཆོ་གའོ། །དང་པོ་ལའང་གསོལ་བཞིའི་ལས་ལ་མི་ལྟོས་པའི་སྔོན་ཆོག་དང་། དེ་ལ་ལྟོས་པའི་སྔོན་ཆོག་གཉིས་ལས། དང་པོ་ནི་རང་བྱུང་དང་། ཡེ་ཤེས་ཁོང་དུ་ཆུད་པ་དང་། ཚུར་ཤོག་སོགས་ཡིན་ལ། ཕྱི་མ་ནི་ལུང་གཞི་དང་། མདོ་རྩ་དང་། ཀརྨ་ཤ་ཏམ་ལས་གསུངས་པའི་གསོལ་བཞིའི་ལས་ཀྱི་ཅིག་ཅར་རབ་ཏུ་བྱུང་བ་དང་། བསྙེན་པར་རྫོགས་པ་སྒྲུབ་པར་བྱེད་པའི་ཆོ་ག་དེ་ཉིད་དོ། །གཉིས་པ་ལ། སྐྱེ་ལ་ཉེས་བཅས་ཀྱི་དབང་དུ་བྱས་ན་ཚིགས་སྔ་མ་གཉིས་སྔོན་དུ་མ་སོང་བ་ལ་ཡང་སྐྱེ་ཞིང་། ཉེས་མེད་ཕུན་ཚོགས་ཀྱི་དབང་དུ་བྱས་ན་ཚིགས་སྔ་མ་གཉིས་རིམ་ཅན་དུ་བླངས་པ་མ་ཉམས་པའི་སྟེང་དུ། མངོན་གྱུར་བཅུའི་སྒོ་ནས་བསྙེན་པར་རྫོགས་པའི་སྡོམ་པ་བསྒྲུབ་པར་བྱ་དགོས་ཏེ། ལས་ཀྱི་ཆོ་ག་དག་ལས་ཤེས་པར་བྱའོ། །གཉིས་པ་ཐོབ་པ་མི་ཉམས་པར་བསྲུང་བའི་ཚུལ་ལ་ལྔ་སྟེ། ཕྱིའི་རྐྱེན་གང་ཟག་གཞན་ལ་བརྟེན་ནས་བསྲུང་བ་དང་། ནང་གི་ཉེར་ལེན་རང་གི་བསམ་པ་ཕུན་སུམ་ཚོགས་པའི་སྒོ་ནས་བསྲུང་བ་དང་། སྤང་བྱ་མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ་དང་། དགེ་བ་ཉམས་སུ་ལེན་པ་བསླབ་པ་ཡོངས་སྦྱོང་གི་སྒོ་ནས་བསྲུང་བ་དང་། བདེ་བར་གནས་པའི་རྐྱེན་བསྟེན་པའི་སྒོ་ནས་བསྲུང་བའོ། །དང་པོ་ལ་བདུན་ཏེ། ཡུལ་གང་ལ་གནས་སུ་གཟུང་བ། གང་ཟག་གང་གིས་གཟུང་བ། བསམ་པ་ཅི་ལྟ་བུས་གཟུང་བ། ཡུན་ཅི་སྲིད་དུ་གཟུང་བ། ཆོ་ག་གང་གིས་འཛིན་ཅིང་བྱ་བ་ཞུ་བ། དགོས་པ་གང་གི་ཕྱིར་འཛིན་པ། གནས་འཇིག་པའི་རྒྱུ་སྤོང་ཞིང་ཆད་པ་བཅད་པས་ཕྱིར་བཅོས་པའི་ཐབས་སོ། །དང་པོ་ནི། གནས་ཀྱི་བླ་མའི་མཚན་ཉིད་ནི། འདུལ་བ་སུམ་བརྒྱ་པ་ལས། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ནད་པ་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་དག་བླ་མར་བསྔགས། །ཞེས་གསུངས་ཏེ། ཚུལ་ཁྲིམས་ལྡན་པ་ནི་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་སྟེ། དེའི་ཁྱད་པར་གྱི་ཆོས་ལྟ་བ་དང་མཚན་མཐུན་པ། ཐ་སྙད་གསུམ་དང་ལྡན་པ། བྱེ་བ་ན་ཆོས་མ་ཡིན་པའི་ཕྱོགས་སུ་མ་སོང་བ། ས་རང་བཞིན་དུ་གནས་པ་རྣམས་ཀྱང་དགོས། འདུལ་བའི་ཆོ་ག་ཤེས་པ་ནི་ལྔ་ཕྲུགས་ཀྱི་གཙོ་བོ་སྟེ་ལྔ་ཕྲུགས་སུ་སྦྱར་བ་ཉི་ཤུ་རྩ་གཅིག་གང་རུང་དང་ལྡན་པ་དགོས་སོ། །དེ་ཡང་ལུང་བར་སྡོམ་ལས། ལོ་བཅུ་འཛིན་དང་མཁས་པ་དང་། །རིག་དང་གསལ་དང་འཛིན་འཇུག་དང་། །སློབ་དང་སློབ་འཇུག་རྣམ་པ་གཉིས། །ཕུན་སུམ་ཚོགས་གཉིས་རྣམ་པ་གསུམ། །སློབ་དང་མི་སློབ་བྱུང་ཤེས་དང་། །གནས་འཆའ་འཆར་འཇུག་ལྟུང་ཤེས་སོ། །ཞེས་ཏེ་གཞུང་གི་སྟེང་དུ་རྟོགས་པར་བྱའོ། །ནད་པ་སྙིང་བརྩེ་སོགས་ནི་འཁོར་ལ་ཕན་འདོགས་པ་སྟེ། མདོར་བསྡུ་ན། མདོ་རྩར། ཚུལ་ཁྲིམས་དང་། ཤེས་པ་དང་། འཁོར་ལ་ཕན་འདོགས་པ་གསུམ་དུ་གསུངས་ཏེ། དེ་ལྟ་བུ་གནས་ཀྱི་སློབ་དཔོན་དུ་གཟུང་ངོ་། །གཉིས་པ་ནི། སུམ་བརྒྱ་པ་ལས། བླ་མ་ལ་གུས་ཚུལ་ཁྲིམས་ཡོངས་དག་དང་། །བསམ་གཏན་དང་ནི་འདོན་ལ་རྟག་བརྩོན་དང་། །གྲིམ་ཞིང་དུལ་ལ་བཟོད་དང་ལྡན་པ་ནི། །སྡོམ་བརྩོན་གནས་པའི་ཆོས་ལྡན་ཤེས་པར་བྱ། །ཞེས་གསུངས་པ་ནི། སློབ་མ་ཕུན་སུམ་ཚོགས་པའི་ཁྱད་པར་ཡིན་ལ། ངེས་པར་དགོས་པ་ནི། རབ་ཏུ་བྱུང་བ་སྡེ་ལྔའི་སྡོམ་པ་གསོ་རུང་ཡན་ཆད་དང་ལྡན་པ། མཚན་དང་ལྟ་བ་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་པར་གནས་པ། གནས་ནས་ཕྱུང་བ་མ་ཡིན་པ། ལས་དང་པོ་པ་མ་ཡིན་པ། ཆོས་གཉིས་ལྡན་མ་ཡིན་པའོ། །གསུམ་པ་ནི། མྱ་ངན་ལས་འདས་པའི་བསམ་པ་བརྟན་པོས་གནས་སུ་འཛིན་ནོ། །བཞི་པ་ནི། ཇི་སྲིད་འཚོའི་བར་རམ། རང་ཉིད་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་དང་། ལྔ་ཕྲུགས་སུ་སྦྱོར་བ་ཉི་ཤུ་རྩ་གཅིག་གང་རུང་དང་ལྡན་པ་སྟེ། ཆོས་གཉིས་ལྡན་དུ་མ་གྱུར་གྱི་བར་དུ་གནས་སུ་འཛིན་ནོ། །ལྔ་པ་ལ་སྦྱོར་བ། དངོས་གཞི། རྗེས་གསུམ། དང་པོ་ནི། དྲི་བ་ལ་སོགས་པས་གནས་ཀྱི་འོས་ཡིན་མིན་བརྟག་སྟེ། སྔར་བཤད་པའི་གནས་དེ་ལྟ་བུ་བ་ལ་བསླབ་པ་རྒན་ན་གུས་པས་ཕྱག་གསུམ་བྱས་ནས་གནས་ཀྱི་བླ་མའི་ཞབས་མཐིལ་གཉིས་ལ། རང་གི་ལག་མཐིལ་གཉིས་ཀྱིས་བཅངས་ཏེ་ཙོག་ཙོག་པུར་འདུག་ནས་སོ། །གཞོན་ན་ཕྱག་བྱ་མི་དགོས་པར་བཤད། སྤྱོད་ལམ་གཞན་འདྲའོ། །གཉིས་པ་ནི། སྔར་ཆོས་འབྲེལ་མེད་ན། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ། བཙུན་པ་ལ་གནས་སུ་གསོལ་གྱི། བཙུན་པ་བདག་གི་གནས་མཛད་དུ་གསོལ། བཙུན་པ་ལ་གནས་ནས་བདག་མཆི་བར་བགྱིའོ། །ཞེས་ལན་གསུམ་བརྗོད། གསུམ་པ་མཇུག་ནི། ཡུལ་གྱིས་ཐབས་ཡིན་ནོ། །གཟུང་བ་པོས་ལེགས་སོ་ཞེས་བརྗོད་དོ། །ཆོས་འབྲེལ་ཡོད་ན། སློབ་དཔོན་དགོངས་སུ་གསོལ་ཞེས་བརྗོད། མཁན་པོ་ལ་ནི་ཆོ་གའི་སྒོ་ནས་བཟུང་བ་མི་དགོས་ལ་བྱ་བ་ཞུ་བས་ཆོག་གོ །བྱ་བ་ཞུ་བའི་ཚུལ་ནི་དམིགས་བསལ་མ་གཏོགས་ཉིན་ཞག་ཕྲུགས་གཅིག་གིས་ལུས་ངག་གི་རྩོམ་པ་ཅི་བྱེད་གནས་ཀྱི་བླ་མ་དེ་ལ་ཞུས་པས་ངོ་ཚ་ཁྲེལ་ཡོད་ཀྱི་བསམ་པ་གོང་ནས་གོང་དུ་འཕེལ་བར་བྱེད་པའི་ཐབས་ཁྱད་པར་ཅན་ཡིན་ཏེ། དེའི་སྦྱོར་བ་ནི་གནས་ཀྱི་བླ་མ་ལ་ཕྱག་གསུམ་བྱ། ཙོག་ཙོག་པུར་འདུག་ནས་དངོས་གཞི་སློབ་དཔོན་ནམ་མཁན་པོ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་དགུང་དང་གདུགས་ཀྱི་རིམ་པ་ལ་འཚལ་མ་འཚལ་བ་དང་། ཆོས་ཁུམས་པ་དང་། ཞབས་ཏོག་བགྱིད་པ་དང་། ཕྱིས་མལ་འཆའ་བ་དང་། ཕྱིས་ཉལ་བ་དང་། སྲོད་དང་ཐོ་རངས་དགེ་བའི་སྦྱོར་བ་རྔོ་ཐོགས་ཚད་བྱེད་པ་དང་། གཞན་ཡང་བགྱིད་པར་འོས་པ་མཐའ་དག་བགྱིད་པར་ཞུ་འཚལ། ཞེས་ལན་གཅིག་བརྗོད། འཇུག་ཡུལ་གྱིས་བག་དང་ལྡན་པར་མཛོད་ཅིག་ཅེས་བྱས་པའི་རྗེས་ལ། སྤྱོད་ལམ་ལ་བློ་བཟེ་བར་བྱས་ཏེ། བུ་དང་ཕའི་འདུ་ཤེས་ཀྱིས་མཚམས་ནང་གཅིག་ཏུ་གནས་པར་བྱའོ། །དེས་ནི་ཉིན་ཞག་ཕྲུགས་གཅིག་གི་བྱ་བ་ཉམས་སུ་ལེན་ཚུལ་བསྟན་ལ། གནས་དང་སློབ་མ་ལྷན་ཅིག་གནས་གཅིག་ན་ཡོད་ན། སྔ་དྲོ། ཕྱི་དྲོ། མཚན་མོ་སྟེ་དུས་གསུམ་གྱི་ཡང་བྱ་བ་ཞུ། རྒྱང་གྲགས་གཅིག་གིས་བར་དུ་ཆོད་པ་ལ་ཉིན་རེ་ལ་ལན་རེ། རྒྱང་གྲགས་ལྔས་བར་དུ་ཆོད་ན་ཞག་ལྔའམ་དྲུག དཔག་ཚད་ཕྱེད་དང་གསུམ་གྱིས་བར་དུ་ཆོད་ན་ཟླ་བ་ཕྱེད་ཀྱི་བྱ་བ་ཞུ་ཚུལ་ཡང་ཤེས་པར་བྱའོ། །དམིགས་བསལ་ནི་དབྱར་གྱི་གཙོ་བོ་ཟླ་བ་གཉིས་ཁས་བླངས་ཟིན་ལ་བབ་པ་ན་གནས་ཀྱི་སློབ་དཔོན་ཚེའི་དུས་བྱས་པ་དང་། གནས་ཕྱུང་ལྟ་བུ་ཆད་པའི་བྱ་བ་དང་ལྡན་ན་གནས་མེད་ཀྱང་ཉེས་པ་མེད་ལ། གཞན་གྱི་ཚེ་གནས་ཚོལ་བ་ལ་ཞུགས་པ་ན་ཞག་ལྔའམ་དྲུག་གི་བར་དུ་དང་། གློ་བུར་དུ་འོངས་པའི་ཉི་མ་དང་པོ་ལ་ཡང་གནས་མེད་པ་ལ་ཉེས་པ་མེད་དོ། །རབ་ཏུ་བྱུང་བ་སྡེ་གཞན་ཡིན་ན། བདག་དགེ་སློང་མིང་འདི་ཞེས་བགྱི་བའི་སྐབས་ཀྱི་དགེ་སློང་གི་འདོན་པ་གཞན་ལ་སྒྱུར་ཚུལ་ཡང་ཤེས་པར་བྱའོ། །དྲུག་པ་ནི། གནས་མེད་ཀྱི་ཉེས་པ་འགོག་ཅིང་ཚུལ་ཁྲིམས་ཕུན་སུམ་ཚོགས་པར་བྱ་བའི་དགོས་པ་ཡོད་དོ། །བདུན་པ་ནི། གཉིས་ཀ་ལ་མི་ལྟོས་པ་སྐྱེ་བ་སོགས་གསོལ་བ་བཏབ་པ་འཇིག་པའི་རྒྱུ་དང་། གནས་དང་མཚམས་ཐ་དད་དུ་གྱུར་པ་སོགས་བྱ་བ་འཇིག་པའི་རྒྱུ་སྤངས་ནས། གནས་ཀྱི་བླ་མ་མཚན་ཉིད་དང་ལྡན་པ་ལ་བརྟེན་ཏེ། བྱ་བ་ཐམས་ཅད་དེའི་གསུང་བཞིན་བསྒྲུབས་པས་ཉེས་ལྟུང་གིས་རྒྱུད་ལ་མ་གོས་པར་བྱའོ། །གལ་ཏེ་ཡུལ་ཉེ་བར་གྱུར་པའི་སྟོབས་ཀྱིས་ཉེས་པར་སྤྱོད་པའི་ཆོས་གང་ཞིག་གིས་རྒྱུད་ལ་གོས་ན། གང་ལ་གང་འོས་ཀྱིས་ཕྱིར་བཅོས་བྱེད་དགོས་པ་ལས་ཕྱིར་བཅོས་མི་བྱེད་པར་འཇོག་ན་གནས་ཀྱི་བླ་མ་དེས་བསམ་པ་འཇམ་པོ་ཕན་སེམས་ཀྱིས་སྦྱོར་བ་རྩུབ་པོ་ཆོས་དང་ཟང་ཟིང་མཐའ་དག་གིས་བསྐྲད་པའི་ལས་བྱས་ནས་ཉེས་སྤྱོད་སྤོང་དུ་འཇུག་པར་བྱའོ། །གཉིས་པ་ནང་གི་ཉེར་ལེན་བསམ་པ་ཕུན་སུམ་ཚོགས་པའི་སྒོ་ནས་བསྲུང་བ་ནི། རང་ཉིད་རིགས་དང་། ཡོན་ཏན་དང་། རྟགས་དང་། ཆ་ལུགས་འདི་ལྟ་བུ་དང་ལྡན་པས་ཉེས་སྤྱོད་ལ་འཇུག་པ་མི་རུང་སྙམ་པ་དང་། མཁན་སློབ་དང་། གྲོགས་ཚངས་པ་མཚུངས་པར་སྤྱོད་པ་སོགས་ཀྱིས་ཁྲེལ་བར་འགྱུར་བས་ཉེས་སྤྱོད་ལ་འཇུག་པ་མི་རུང་ངོ་སྙམ་པའི་ངོ་ཚ་ཤེས་པ་དང་། ཁྲེལ་ཡོད་ཁྱད་པར་ཅན་དང་། ལུས་ངག་གི་བྱ་བ་གང་དང་གང་བྱེད་པ་ལ་འདི་བྱ་རུང་ངམ་མི་རུང་སྙམ་དུ་དང་པོར་སོ་སོར་རྟོག་པ་དང་། བྱ་བ་རྩོམ་པའི་ཚེ་ཉིད་ན། འདི་རུང་བར་འདུག་གམ་མི་རུང་བར་འདུག་སྙམ་དུ་འཕྲལ་ལ་རྟོགས་པའི་ཤེས་བཞིན་དང་། དེ་དག་གི་དམིགས་རྣམ་མི་བརྗེད་པར་དྲན་པའི་སྒོ་ནས་བསྲུང་དགོས་ཏེ། མདོ་རྩར། ལྟུང་བའི་སྒོར་གྱུར་པའི་འཇུག་པ་ཐམས་ཅད་ལ་དྲན་པས་བསྒྲུབ་པར་བྱའོ་ཞེས་བཤད་དོ། །སྤངས་བྱ་ཉོན་མོངས་པ་དྲག་ལ་ཡུན་རིང་དུ་སྐྱེས་པའི་དུས་སུ་གཉེན་པོ་ཡང་དྲག་ལ་ཡུན་རིང་བའི་བག་ཡོད་བརྟན་པ་དགོས་ཏེ། སོ་སོར་ཐར་པའི་མདོ་ལས། ཚེ་དང་ལྡན་པ་དག་བག་ཡོད་པས་རྣལ་འབྱོར་དུ་བྱའོ། །ཞེས་གསུངས་སོ། །དེས་ན་བསླབ་པའི་སོ་མཁར་བསྲུང་བ་ལ་སོ་བ་དང་འདྲ་བའི་ཤེས་བཞིན་གྱིས་རང་གི་རྒྱུད་ལ་བྱ་ར་བྱས་ནས་སྤངས་བྱ་ཉོན་མོངས་པའི་དགྲ་ཤེས་རྒྱུད་ལ་འཇུག་པ་འདུག་གམ་མི་འདུག་བརྟག འདུག་ན་དྲན་པ་སྒོ་བ་ལྟ་བུའི་བརྩོན་འགྲུས་ཅན་གཅིག་གིས་ནང་དུ་འཇུག་ཏུ་མི་སྟེར། དེས་མ་བཟློག་ན་དཔའ་བོ་དང་མཚུངས་པའི་བག་ཡོད་ཀྱི་གཉེན་པོས་མཚོན་ཐོགས་ནས་བཟློག་པས་བསླབ་པའི་སོ་མཁར་མ་ཤོར་བ་བྱས་ན་ཤེས་རྒྱུད་དེ་དུས་སམ་གནས་སྐབས་ཐམས་ཅད་བདེ་བར་ནུས་པ་ཡིན་ནོ། །གསུམ་པ་སྤང་བྱ་མི་མཐུན་པའི་ཕྱོགས་ངོ་ཤེས་པའི་སྒོ་ནས་བསྲུང་བ་ལ། མི་མཐུན་པའི་ཕྱོགས་ནི་གཉིས་ཏེ། སྡོམ་པ་སྤྱི་དང་འགལ་བའི་མི་མཐུན་ཕྱོགས་དང་། སོ་སོ་དང་འགལ་བའི་མི་མཐུན་ཕྱོགས་སོ། །དང་པོ་ནི། རྒྱུད་ལ་ཡོད་པའི་གཉེན་པོ་ཀུན་གཏོང་། མཐའ་དག་གཏོང་། མ་ལུས་པ་གཏོང་བར་བྱེད་པའི་རྒྱུ་ནི། གྲུབ་པའི་མཐའ་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །སོ་སོར་ཐར་པའི་འདུལ་བ་གཏོང་། །ཞེས་པ་དང་། མདོ་རྩ་བ་ནས། ཤེས་ན་ནི་དེ་ཞིག་གོ་ཞེས་ལོ་ཉི་ཤུ་མ་ལོན་པ་ལ་མ་ལོན་པར་ཤེས་པས་སྡོམ་པ་གཏོང་བ་དང་། དང་པོ་གཉིས་ལ་ནི་མི་ཉམས་སོ་ཞེས་པའི་ཤུགས་ཀྱིས་མཚན་གཉིས་ལན་གསུམ་གྱུར་པས་སྡོམ་པ་གཏོང་ཡང་དགེ་སློབ་མའི་གཉེན་པོ་སྡོམ་པར་འདོད་པ་ལྟར་ན། བརྟེན་པའི་ཕྱིར་ཁས་བླངས་པས་གཏོང་བ་རྣམས། སྡོམ་པའི་གཏོང་རྒྱུ་ཐུན་མོང་བ་ཡིན་ཏེ། གྲུབ་མཐའ་ཐམས་ཅད་ཀྱིས་སྡོམ་པའི་གཏོང་རྒྱུར་འདོད་པའི་ཕྱིར་རོ། །འགའ་ཞིག་གིས། རྩ་བའི་ལྟུང་བ་བྱུང་བ། དམ་ཆོས་ནུབ་པ་གཉིས་ནི་གཏོང་རྒྱུ་ཐུན་མོང་བ་འདོད་པ་མི་འཐད་དེ། འགའ་ཞིག་གིས་སྡོམ་པའི་གཏོང་རྒྱུར་འདོད་ཀྱང་། འགའ་ཞིག་གིས་མི་འདོད་པའི་ཕྱིར་རོ། །དེ་དག་གི་ནང་ནས་བསླབ་པ་འབུལ་བ་ནི་ཡུལ་ཐ་སྙད་དང་ལྡན་པ་ལ། རང་གི་བསླབ་པ་འབུལ་འདོད་ཀྱི་ཀུན་སློང་གིས་ཀུན་ནས་བསླངས་ནས་ལུས་ངག་གི་རིག་བྱེད་ཀྱིས་ཕུལ་བ་ཡུལ་གྱིས་དོན་གོ་ན་སྡོམ་པ་གཏོང་བ་ཡིན་ཏེ། གྲུབ་པའི་མཐའ་ལས། བཏང་བ་བློ་ཡིས་བཏང་བ་ཡིན། །གོ་བ་བྱེད་པ་ཐམས་ཅད་ཀྱིས། །བརྡ་ཕྲད་མི་ལ་གོ་བྱེད་ནའོ། །ཞེས་བཤད། དེ་ལ་རྒྱུད་ལ་ཕམ་པས་མི་གོས་པའི་དགོས་པ་ཡོད་ཀྱང་གཉེན་པོ་བརྟེན་ནུས་སུ་བྱུང་ན་མི་མཐུན་པའི་ཕྱོགས་སུ་ངོ་ཤེས་པར་བྱས་ནས་མི་འབུལ་བ་གལ་ཆེ་སྟེ། མདོ་དྲི་མ་མེད་པ་ལས། སྡོམ་པ་ལན་གཅིག་ཕུལ་ན་སྐྱེ་བ་ལྔ་བརྒྱར་མི་ལུས་སུ་བརྒྱུད་ནས་སྡོམ་པ་བླངས་ཀྱང་ལན་དེ་སྙེད་དུ་འབུལ་དགོས་པར་བཤད་པས་སོ། །གཉིས་པ་ལ་གཉིས་ཏེ། སྡེ་ལྔ་སྤྱིའི་དོན་དང་། སོ་སོའི་མཚན་ཉིད་དོ། །དང་པོ་ལ་དོན་བཅུ་སྟེ། ལྟུང་བ་རྣམས་ཀྱི་དབྱེ་བ། བསྡུ་བ། གྲངས་ངེས་པ། གོ་རིམ་ངེས་པ། མིང་གི་དོན། མཚན་ཉིད། བསླབ་པ་བཅས་པའི་ཕན་ཡོན། དེ་དག་ལས་འདས་ཤིང་འགལ་ན་ཅིར་འགྱུར་དང་བཅས་པ། བསྲུངས་པའི་ཕན་ཡོན། མ་བསྲུངས་པའི་ཉེས་དམིགས་སོ། །དང་པོ་ལ་གཉིས་ཏེ། བསླབ་པའི་སྡོམ་པའི་གཞིའི་སྒོ་ནས་དབྱེ་བ་དང་། བསླབ་པ་བཅས་པའི་སྡོམ་པའི་སྒོ་ནས་དབྱེ་བའོ། །དང་པོ་ནི། མཛོད་ལས། སྤངས་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བར་མནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཆེད་དང་དགེ་སློང་ཉིད། །ཅེས་གསུངས་པ་ལྟར་རོ། །གཉིས་པ་ནི། ངོ་བོ་ཉིད་ཙམ་གྱི་སྒོ་ནས་དབྱེ་ན་དཔག་ཏུ་མེད་ལ། དགེ་སློང་ཕ་མའི་བྱེ་བྲག་གིས་དབྱེ་ན་ཉིས་བརྒྱ་ལྔ་བཅུ་རྩ་གསུམ་དང་། སུམ་བརྒྱ་དྲུག་ཅུ་རྩ་བཞིའོ། །གཉིས་པ་བསྡུ་བ་ནི། གཞི་དང་སྐྱེད་པ་དང་ནི་འབྱུང་བའི་སྒོ། །བྱ་བ་དང་ནི་བྱེད་པར་འགྱུར་བའི་རྒྱུ། །གནས་སྐབས་ངོ་བོ་རིགས་དང་སྡེ་ཚན་ཏེ། །འདི་དག་བསྡུ་བའི་ཚིགས་སུ་བཅད་པ་ཡིན། །ཅེས་འབྱུང་བས། མི་ཚངས་སྤྱོད་ལྟ་བུ་གཞི་སེམས་ཅན་ལ་བརྟེན་པ་དང་། ས་རྐོ་མེ་རེག་ལ་སོགས་སེམས་ཅན་མ་ཡིན་པ་ལ་བརྟེན་པ་གཉིས་ཡིན། སེམས་ཅན་ལ་བརྟེན་ནས་སྐྱེད་པ་ལའང་མི་ཚངས་སྤྱོད་ཁུ་བ་འབྱིན་པ་ལྟ་བུ་སེམས་ཅན་སྤྱི་ཙམ་ལ་བརྟེན་ནས་བསྐྱེད་པ་དང་། མི་ཆོས་བླ་མའི་རྫུན་སྨྲ་ལ་སོགས་པ་བྱེ་བྲག་ལ་བརྟེན་ནས་སྐྱེད་པ་གཉིས་ཡིན། སེམས་ཅན་མ་ཡིན་པ་ལ་བརྟེན་ནས་བསྐྱེད་པ་ལ། འབྱུང་བ་ལ་བརྟེན་ནས་སྐྱེད་པ་ལ་ས་རྐོ། མེ་རེག ཆུ་ལ་རྩེ་བའི་ལྟུང་བྱེད་དང་། རྫི་ཕྱོགས་དང་རྫི་ཕྱོགས་མ་ཡིན་པར་སྡོད་པའི་སྦོམ་པོ་དང་ཉེས་བྱས་རྣམས་ཡིན། འབྱུང་འགྱུར་ལ་བརྟེན་ནས་སྐྱེད་པ་ལ། རྒྱུའི་རང་བཞིན་ཁ་ན་མ་ཐོ་བ་ལ་བརྟེན་ནས་སྐྱེད་པ་དང་། དེ་ལས་གཞན་པ་ལ་བརྟེན་ནས་སྐྱེད་པ་གཉིས་ཡིན། དང་པོ་ནི། སྐུར་འདེབས་ཀྱི་ལྟུང་བ་རྣམས་ཡིན་ལ། དེ་ལས་གཞན་པ་ལ་བརྟེན་ནས་སྐྱེད་པ་ལ། ལོངས་སྤྱོད་ནོར་ལ་བརྟེན་ནས་སྐྱེད་པ་དང་། དེ་ལས་གཞན་པ་ལ་བརྟེན་ནས་སྐྱེད་པ་གཉིས་ཡིན། དང་པོ་ནི། གསེར་དངུལ་ལ་རེག་པའི་སྤང་བ་ལ་སོགས་པ་ཡིན་ལ། གཉིས་པ་ནི། ཟས་གོས་གནས་མལ་སྣོད་སྤྱད་བཞི་ལ་བརྟེན་ནས་སྐྱེད་པའི་ལྟུང་བ་རྣམས་ཡིན་ནོ། །བྱེད་པ་ལ་རང་ཁོ་ནའི་བྱེད་པ་ཅན། བཅོལ་ཡང་རྫོགས་པའི་བྱེད་པ་ཅན་གཉིས་ཡིན། དང་པོ་ནི། མི་ཚངས་སྤྱོད་དང་རྫུན་སྨྲའི་ཕམ་པ་སོགས་ཡིན་ལ། གཉིས་པ་ནི། སྲོག་གཅོད་མ་བྱིན་ལེན་གྱི་ཕམ་པ་ལྟ་བུ་ཡིན་ནོ། །ལྟུང་བ་འབྱུང་བའི་སྒོ་ནི་དངོས་གཞི་སྐྱེད་པ་ལུས་ངག་གཉིས་སོ། །བྱ་བ་ལ་བྱ་བའི་རྒྱུ་མི་བྱེད་པའི་ཕྱིར་སྦྱོར་བ་མེད་པའི་ལྟུང་བ་དང་། མི་བྱ་བའི་རྒྱུ་བྱེད་པའི་ཕྱིར་སྦྱོར་བ་དང་བཅས་པའི་ལྟུང་བའི་རིགས་གཉིས་ཡིན། དང་པོ་ནི། འཆང་སྤང་ལྟ་བུ་ཡིན་ལ། གཉིས་པ་ནི། སྲོག་གཅོད། མ་བྱིན་ལེན་ལ་སོགས་པའོ། །ལྟུང་བ་འབྱུང་བའི་རྒྱུ་ནི་བཞི་སྟེ། མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པའོ། །ཞེས་བཤད། ལྟུང་བ་འབྱུང་བའི་གནས་སྐབས་ཀྱང་བཞི་སྟེ། སེམས་བསྐྱེད་པ་དང་། སྦྱོར་བའི་སྦྱོར་བ་དང་། སྦྱོར་བ་དང་། དངོས་གཞིའོ། །ངོ་བོའི་སྒོ་ནས་རང་བཞིན་དང་འབྲེལ་བ་དང་། བཅས་པ་དང་འབྲེལ་བ་གཉིས་ལས། དང་པོ་ནི། དུག་གསུམ་གྱིས་ཀུན་ནས་བསླངས་ཤིང་རྟེན་བྱེ་བྲག་མེད་པ་ལ་བཀག་པ་སྲོག་གཅོད་ལྟ་བུའོ། །གཉིས་པ་ནི། བསམ་པ་ཉོན་མོངས་ཅན་མ་ཡིན་པས་ཀྱང་བསྐྱེད་པར་ནུས་པ་ཕྱི་དྲོའི་ཁ་ཟས་ཀྱི་ལྟུང་བྱེད་ལྟ་བུའོ། །ལྟུང་བའི་རིགས་ལ་གཉིས་ཏེ། གནང་ལ་ཚད་བཟུང་དང་འབྲེལ་པ་དང་། མ་གནང་ལ་ཚད་བཟུང་དང་འབྲེལ་པའོ། །ཡང་ན་འཕེན་པས་འགྲུབ་པ་དང་། མི་འགྲུབ་པའི་རིགས་གཉིས་སམ། དངོས་པོ་གཙོ་བོ་དང་། འདུ་ཤེས་གཙོ་བོའི་རིགས་གཉིས་སུ་ཡོད་དོ། །སྡེ་ཚན་གྱི་སྒོ་ནས་བསྡུ་ན་ཕམ་པའི་སྡེ་ལ་སོགས་པ་ལྔར་འདུས་སོ། །གསུམ་པ་གྲངས་ངེས་ནི། དངོས་གཞི་ཆད་པའི་བྱེ་བྲག་མི་འདྲ་བ་ལྔ་ལ་ལྟོས་ནས་ལྔར་གྲངས་ངེས་སོ། །ཡང་ན་བྱེད་ལས་མི་འདྲ་བ་ལྔ་ཡོད་པས་ལྔར་གྲངས་ངེས་སོ། །བཞི་པ་གོ་རིམ་ངེས་པ་ནི། སྤྱིར་སྡེ་ལྔའི་གོ་རིམ་ནི་ལྕི་ཡང་གི་གོ་རིམ་ཡིན་ལ། ཕམ་པ་བཞིའི་གོ་རིམ་ནི། བྱུང་ཞིང་བཅས་པའི་གོ་རིམ་ཡིན་ཞིང་། ལྷག་མ་སྡེ་བཞི་སོ་སོའི་གོ་རིམ་ནི། ཆེད་དུ་བསྒྲིགས་པའི་གོ་རིམ་ཀྱང་ཡིན་ནོ། །ལྔ་པ་མིང་གི་དོན་ནི། ཅིའི་ཕྱིར་ཕམ་པ་ཞེས་བྱ་ཞེ་ན། དམ་པའི་ཆོས་ཀྱི་སྲས་པོ་ལས་ཉམས་པར་བྱེད། ཉོན་མོངས་པ་རྒྱལ་བར་བྱེད། གཉེན་པོ་ཕམ་པར་བྱེད་པའི་དོན་གྱིས་ན་ཕམ་པ། དགེ་འདུན་ཆོ་ག་ཁྱད་པར་ཅན་ལ་བརྟེན་ནས་ཕྱིར་བཅོས་པར་བྱ་བའི་ལྷག་མ་དང་བཅས་པའི་དོན་གྱིས་ན་ལྷག་མ། དངོས་པོ་དེ་ཉིད་ཞག་གཅིག་སྤོང་ཞིང་བྲལ་བ་སྔོན་དུ་གཏོང་དགོས་པས་ན་སྤང་བ། མ་བཤགས་ན་ངན་སོང་དུ་ལྟུང་བར་བྱེད་པས་ན་ལྟུང་བྱེད། མཐོལ་བ་ལ་བཤགས་པའི་མིང་གིས་བཏགས་ནས་སོ་སོར་མཐོལ་དགོས་པས་ན་སོ་སོར་བཤགས་པ། མི་འབྱུང་བ་ལ་བསླབ་ཅིང་གོམས་པར་བྱ་བས་ན་བསླབ་བྱ་ཉེས་བྱས་སོ། །དྲུག་པ་ལྟུང་བའི་མཚན་ཉིད་ལ་ལྟུང་བ་སྤྱིའི་མཚན་ཉིད། སྡེ་ལྔ་སོ་སོའི་མཚན་ཉིད་གཉིས་ལས་དང་པོ་ནི། རང་བྱུང་གི་སྟོན་པས་བཅས་པ་ལས་འདས་པའི་ཁ་ན་མ་ཐོ་བ་གཉིས་པ་ནི། ཕམ་པའི་མཚན་ཉིད་བསྙེན་པར་རྫོགས་པའི་རྒྱུད་ཀྱི་དངོས་གཞིའི་ལྟུང་བ་གང་ཞིག ཁྱོད་ཀྱི་དག་བྱེད་ཆད་པའི་བསླབ་པ་ལ་ལྟོས་པའི་རིགས་ཡིན་པ། འོད་ལྡན་དུ། དེ་རླག་འགྱུར་ཞེས་བྱ་བ་ནི། །དགེ་ཚུལ་ལ་ཡང་ཕམ་པ་སྟེ། །ཞེས་བཤད་དོ་ཞེ་ན། ཕམ་པ་དང་བྱེད་ལས་འདྲ་བའི་སྒོ་ནས་དེར་བཤད་པ་ཡིན་ནོ། །དགེ་འདུན་ལྷག་མའི་གང་ཞིག་འདྲ། ངོ་བོའི་ཆ་ནས་དབྱུང་བས་ཁྱོད་ལས་སློང་དུ་རུང་བའི་རིགས་ཡིན་པ། ཡང་ན་གང་ཞིག་ངོ་བོའི་ཆ་ནས་ཕམ་པ་ལས་ཡང་ཞིང་སྤང་བ་སོགས་ལས་ལྕི་བའི་རིགས་ཡིན་པ། མན་ཆད་ཀྱང་ཚུལ་དེ་དག་ལས་དཔག་པར་བྱའོ། །ཁ་ཅིག་ཕམ་པའི་མཚན་ཉིད། བསྙེན་པར་རྫོགས་པའི་རྒྱུད་དང་འགལ་བ་ངོ་བོའི་ཆ་ནས་ལྷག་མ་མན་ཆད་ལས་ཆད་པའི་ལས་ལྕི་རུ་རུང་བ་ཞེས་བཞེད་དོ། །བདུན་པ་བསླབ་པ་བཅས་པའི་ཕན་ཡོན་ནི། སྟོན་པ་ཆོས་ཀྱི་རྗེས་བསླབ་པ་རེ་རེ་བཅས་པའི་སྐབས་སུ་ཡང་ཕན་ཡོན་བཅུ་བཅུ་གཟིགས་ནས་བཅས་ཏེ་དགེ་འདུན་བསྡུ་བར་བྱ་བའི་ཕྱིར་དང་། དགེ་འདུན་ལེགས་པར་གནས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་ཁུར་བའི་གང་ཟག་རྣམས་ཚར་བཅད་པར་བྱ་བའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང་། ཚེ་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང་། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་དང་ཡངས་པར་འགྱུར་བ་དང་ལྷ་དང་མིའི་བར་དག་ལ་རབ་ཏུ་བསྟན་པ་ཡུན་རིང་དུ་གནས་པར་འགྱུར་བ་ལ་གཟིགས་ཏེ། ཡུལ་དང་། གང་ཟག་དང་། ཉོན་མོངས་པ་དང་། ཉེས་པ་བཞི་ལ་བརྟེན་ནས་བསླབ་པ་བཅའ་བ་མཛད་དོ། །དེ་དག་གི་དོན་ནི། དང་པོ་རིགས་བཞི་པོ་བསྡུ་བའི་ཆེད་དོ། །གཉིས་པ་འདོད་པ་སྤོང་ཞིང་ཆོས་བསྟན་པའི་རྗེས་སུ་འཇུག་པས་སོ། །གསུམ་པ་བདག་ཉིད་ངལ་བའི་རྗེས་སུ་བརྩོན་པའི་མཐའ་རྣམ་པར་སྤངས་པའོ། །བཞི་པ་ནན་བཏུར་བྱས་པས་སོ། །ལྔ་པ་འགྱོད་པ་སེལ་བས་སོ། །དྲུག་པ་ཡོ་བྱད་རྐྱེན་དུ་འབབ་པ་དག་ཡོད་པས་སོ། །བདུན་པ་ཞུགས་པ་དག་ཡོངས་སུ་སྨིན་པར་བྱ་བའི་ཕྱིར་རོ། །བརྒྱད་པ་ཀུན་དཀྲིས་མགོ་གནོན་པས་སོ། །དགུ་པ་བག་ལ་ཉལ་སྤོང་བས་སོ། །བཅུ་པ་བསྟན་པ་རྒྱུན་མི་ཆད་པར་འགྱུར་བས་ཏེ། ཐོབ་པ་བདེ་བར་གནས་པ་དང་། མ་ཐོབ་པ་བདེ་བར་འཇུག་པའི་ཕྱིར་རོ། །བརྒྱད་པ་དེ་དག་ལས་འདས་ཤིང་འགལ་ན་ཅི་འགྱུར་ནི། ལྟུང་བ་སྡེ་ལྔའི་ཅི་རིགས་པར་འགྱུར། དེའི་དོན་ཡང་ཚེ་འདིར་ལས་ལ་སྒྲིབ། ལམ་ལ་སྒྲིབ་སྟེ། བཙུན་པ་ལྟུང་བས་སྒྲིབ་པ་ལགས་སམ། མ་སྒྲིབ་པ་ལགས། ཉེ་བ་འཁོར་ལྟུང་བས་ནི་སྒྲིབ་པ་ལགས་སོ་ཞེས་བཤད་པས་སོ། །གཞན་གྱི་འཕྱ་བའི་དགག་བྱ་ཡོད་པ་ཡིན་ཏེ། ཁ་ཟེར། འཕྱར་ཀ་གཏོང་། སྨོད་པར་བྱེད་པ་ལ་བརྟེན་ནས་ཞེས་བཤད་པས་སོ། །བྱེ་བྲག་ཏུ་རྩ་བའི་ལྟུང་བ་ལས་འདས་ཞིང་འགལ་ན་གཉེན་པོ་གསོར་མེད། ཕྱིན་ཆད་བླངས་ཀྱང་མི་སྐྱེ། སྡིག་པ་དང་ལྟུང་བ་བཤགས་ཀྱང་མི་འདག་པའི་བྱེད་ལས་དང་ལྡན་པར་འགྱུར་ཏེ། ཉམས་པ་ཞེས་བྱ་བ་ནི་གསོར་མི་རུང་བ་ཅན་དུ་ཉམས་པ་སྟེ་ཞེས་དང་། དེའི་དགེ་སྦྱོང་གི་ཚུལ་ཕྱིར་བླང་དུ་མེད་ཅེས་བཤད་པས་སོ། །འཆབ་སེམས་མ་སྐྱེས་ན་བསླབ་པ་སྤྱད་ན་འདག་ལ། དག་ན་དག་པའི་ཕན་ཡོན་ཐོབ་པའི་བྱེད་ལས་དང་ལྡན་པར་འགྱུར་ཏེ། དགའ་བྱེད་ཀྱིས་བསླབ་པ་སྤྱད་པས་དགྲ་བཅོམ་པའི་འབྲས་བུ་ཐོབ་པར་བཤད་པས་སོ། །དགུ་པ་བསྲུངས་པའི་ཕན་ཡོན་ནི་རྣམ་པ་བཅུ་སྟེ། འགྱོད་པ་མེད་པའི་རིམ་གྱིས་མཆོག་ཏུ་དགའ་བ་སྔོན་དུ་འགྲོ་བའི་ཆོས་ཐོབ་པར་འགྱུར་བ་དང་། འགྱོད་པ་མེད་པ་འཆི་བའི་དུས་བྱེད་པར་དང་། ཕྱོགས་བཅུར་སྙན་པའི་སྒྲ་གྲགས་པར་དང་། བདེ་བར་གཉིད་ལོག་ཅིང་བདེ་བར་སད་པར་དང་། གཉིད་ལོག་པ་ན་ལྷ་རྣམས་ཀྱིས་བསྲུང་བར་དང་། གཞན་ལས་སྡིགས་པའི་བག་ཚ་བ་དང་འཇིགས་པ་དང་དངངས་པ་མེད་པར་དང་། དགྲ་བོ་རྣམས་ཀྱིས་གླགས་ཤིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པས་ཕན་འདོགས་པར་དང་། གནོད་སྦྱིན་དང་མི་མ་ཡིན་པ་དང་། གདུག་པ་གཉུག་མར་གནས་པ་རྣམས་ཀྱིས་གླགས་ཤིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པས་ཕན་འདོགས་པར་དང་། གཞན་ལས་ཆོས་གོས་ལ་སོགས་པ་ཚེགས་ཆུང་ངུས་ཐོབ་པར་དང་། གང་དུ་སྐྱེ་བ་འདོད་པ་ལ་སོགས་པའི་སྨོན་ལམ་ཡང་དག་པར་འགྲུབ་པར་འགྱུར་བའོ། །དེ་ལ་དང་པོ་དགུ་ནི་མཐོང་བའི་ཕན་ཡོན་དང་། ཕྱི་མ་ནི་མ་མཐོང་བའི་ཕན་ཡོན་ཏེ། འདི་དག་ནི་ས་སྡེ་དང་། བམ་ལྔར་བཤད་པའོ། །གཞན་ཡང་གཞི་དང་། རྣམ་འབྱེད་དུ་རབ་ཏུ་བྱུང་བའི་ཕན་ཡོན་ལྔ་བཤད་པ་དང་། སློབ་དཔོན་ཆོས་ཀྱི་ཚོང་དཔོན་གྱིས་འདུལ་བའི་བསྟོད་པ་ལས་ཇི་སྐད་བཤད་པ་དང་། འཆར་ཀ་གཟེངས་བསྟོད་པའི་སྐབས་ལ་སོགས་པར་ཡང་ཤེས་པར་བྱའོ། །བཅུ་པ་མ་བསྲུངས་པའི་ཉེས་དམིགས་ནི། སྟོན་པས་སྨོད་པ་དང་། ལྷས་དང་། མཁན་སློབ་ལ་སོགས་པ་གྲོགས་དམ་པ་དང་། བདག་ཉིད་ཀྱིས་དང་། དེས་མ་སྨད་ཀྱང་ཆོས་ཉིད་ཀྱིས་དང་། དམ་པའི་ཆོས་མ་ཐོབ་པ་ཐོབ་པར་མི་འགྱུར་བ་དང་། ཐོས་པ་བརྗེད་པ་དང་། མ་རྟོགས་པ་མི་རྟོགས་པ་དང་། ཕྱོགས་དང་ཕྱོགས་མཚམས་སུ་སྡིག་པའི་སྒྲ་གྲགས་པ་དང་། འགྱོད་པ་དང་བཅས་ཏེ་འཆི་བར་འགྱུར་བ་དང་། ངན་སོང་གསུམ་དུ་སྐྱེ་བ་ལ་སོགས་པ་དུ་མ་ཡོད་དོ། །གཉིས་པ་སྡེ་ལྔ་སོ་སོའི་མཚན་ཉིད་ལ་གཉིས་ཏེ། ཡན་ལག་སྤྱིར་བསྟན་པ་དང་། སོ་སོར་བཤད་པའོ། །དང་པོ་ལ་རྟེན་གྱི་ཡན་ལག་ནི། དགེ་སློང་གི་སྡོམ་པ་གསོ་རུང་ཡན་ཆད་དང་ལྡན་པ་དང་། བསླབ་པ་བཅས་པ་དང་འབྲེལ་བ་དང་། ཤེས་པ་རང་བཞིན་དུ་གནས་པ་གསུམ་ནི་ཐམས་ཅད་ཀྱི་ཐུན་མོང་གི་ཡན་ལག་ཡིན་ལ། གཟུགས་གཞན་དུ་མ་སྒྱུར་བ་དང་། མི་སྣང་བར་མ་བྱས་པ་དང་། མཚན་མ་གྱུར་པ་གསུམ་ནི་འགའ་ཞིག་གི་ཡན་ལག་ཡིན་ནོ། །བཅས་པའི་ཡན་ལག་ལ། བསླབ་པ་འཆའ་བའི་བསྙད་ཀ་གླེང་གཞི་དང་། བཅས་པ་འཇོག་པའི་རྒྱུ་མཚན་དགག་བྱ་དང་། ལྟུང་བའི་རྒྱུ་ཚོགས་ཡན་ལག་རྩི་བ་དང་གསུམ་ལས། དང་པོ་ནི། ཡུལ་དང་། དུས་དང་། གང་ཟག་དང་། ཉོན་མོངས་པ་དང་། ཉེས་པ་ལ་བརྟེན་ནས་སྟོན་པ་ཆོས་ཀྱི་རྗེས་བཅས་པ་མཛད་པའོ། །གཉིས་པ་ནི། མཐོང་བའི་ཆོས་ཀྱི་ཉེས་དམིགས། ལུས་དང་། སྲོག་དང་། ཚངས་པར་སྤྱོད་པ་དང་། དགེ་སྦྱོང་ཚུལ་དང་། ལོངས་སྤྱོད་དང་། བསོད་ནམས་ཀྱི་བར་ཆད་དང་། གཞན་མ་དད་པ་ལ་སོགས་པའོ། །མ་མཐོང་བའི་ཆོས་ཀྱི་ཉེས་དམིགས་ནི། མཛོད་ལས། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་བུ་འབྱིན་པར་འདོད། །ཅེས་པ་ལྟར་རོ། །གསུམ་པ་ལ་བཞི་སྟེ། གཞིའི་ཡན་ལག བསམ་པའི། སྦྱོར་བའི། མཐར་ཐུག་གི་ཡན་ལག་གོ །གཉིས་པ་སོ་སོར་བཤད་པ་ལ་ལྔ་སྟེ། གཅོད་པར་བྱེད་པ་ཕམ་པའི་སྡེ། གསོ་བ་དགེ་འདུན་ལ་རག་ལས་པ་དགེ་འདུན་ལྷག་མའི་སྡེ། ལྟུང་བར་བྱེད་པ་ལྟུང་བྱེད་ཀྱི་སྡེ། སྨྲེ་སྔགས་འདོན་པའི་སྒོ་ནས་སོ་སོར་བཤགས་པར་བྱ་བའི་སྡེ། བསླབ་པར་བྱ་བ་ཉེས་བྱས་ཀྱི་སྡེའོ། །དང་པོ་ནི། སྡོམ་ལ། མི་ཚངས་སྤྱོད་དང་རྐུ་བ་དང་། །མི་ལ་བསད་པར་མི་བྱ་བ། །རྫུན་དུ་སྨྲ་དང་བཅས་པ་ཡི། །ཆོས་བཞི་འདིར་ནི་གསུངས་པ་ཡིན། །ཅེས་ཏེ། མི་ཚངས་སྤྱོད་ཅེས་པ་སྦྱོར་བའི་ཆ་སྡོམ་དུ་བླངས། རྟེན་གྱི་ཡན་ལག་ཐུན་མོང་གི་ཆོས་གསུམ་དང་ལྡན་པས། གཞིའི་ཡན་ལག་ལ་གསུམ་ལས། གང་ལ་རྩལ་བའི་ཡུལ་གྱི་ཡན་ལག་ནི། ལུས་ཕྱེད་དུ་ལོངས་པ་ཡན་ཆད་ཀྱི་རྨའི་སྒོ་གསུམ་གང་ཡང་རུང་བ་མ་ཉམས་པ་དང་། བགྲོད་པར་ནུས་པའོ། །དེ་ལ་རྩལ་བ་རྟེན་གྱི་ཡན་ལག་ནི། རང་རྒྱུད་དུ་གཏོགས་པའི་ནོར་བུ་ནད་མེད་པ་དང་། ལས་སུ་རུང་བའོ། །བསམ་པའི་ཡན་ལག་ལ་འདུ་ཤེས་འཁྲུལ་མ་འཁྲུལ་འདྲ། ཀུན་སློང་བདེ་བ་ཉམས་སུ་མྱོང་བར་འདོད་པའོ། །སྦྱོར་བ་རེག་ཅིང་རྩོལ་བར་ཞུགས་པའོ། །མཐར་ཐུག་དེའི་བདེ་བ་ཉམས་སུ་མྱོང་བའོ། །རྐུ་བ་དང་ཅེས་པ་སྦྱོར་བའི་ཆ་སྡོམ་དུ་བླངས། འདི་ལ་བཞི་ལས། གཞི་ལ། ཡུལ་ནི་མིའི་འགྲོ་བ་པ་བདག་ཉིད་ལས་རྫས་ཐ་དད་པའོ། །དངོས་པོ་ཁ་ཟས་སུ་བྱས་པ་མ་ཡིན་པ་དང་། རིན་ཐང་ཚང་བའོ། །དེ་ཡང་བརྐུ་བའི་གནས་དང་། དུས་དང་། བརྐུ་བྱ་དང་། རྐུ་བྱེད་ལ་ལྟོས་ནས་སྦྱོར་བ་གཅིག་གི་ནང་དུ་ཀརྴ་པ་ནི་བཞི་ཆར་ལོངས་པའོ། །དེས་ན་ཀརྴ་པ་ནིའི་བཞི་ཆ་རིན་ཐང་གི་གཙོ་བོ་ཡིན་ལ། དེ་ལ་མ་ཤ་ཀ་ལྔའི་ཚད་དུ་ཞུ་བར་གསུངས་པ་ནི་མ་ཤ་ཀ་ཉི་ཤུ་ལ་ཀརྴ་པ་ནི་གཅིག་ཏུ་བྱས་པའི་ཡུལ་དུས་ཀྱི་དབང་དུ་བྱས་པ་ཡིན་གྱི་གཞན་དུ་ནི་མ་ངེས་ཏེ། གཏམ་གྱི་གཞིར། བཙུན་པ་མ་ཤ་ཀ་གསུམ་བརྐུས་ན། ཕམ་པར་འགྱུར་བ་མཆིས་སམ། བཀའ་སྩལ་པ་ཡོད་དེ། གནས་གང་ན་མ་ཤ་ཀ་བཅུ་གཉིས་ལ་ཀརྴ་པ་ན་གཅིག་ཏུ་འགྱུར་བ་ནའོ། །མ་ཤ་ཀ་ལྔ་ལས་ལྷག་པ་བརྐུས་ན་ཕམ་པར་མི་འགྱུར་བ་མཆིས་སམ། བཀའ་སྩལ་པ་ཡོད་དེ། གང་ན་མ་ཤ་ཀ་བཞི་བཅུ་ལ་ཀརྴ་པ་ན་གཅིག་ཏུ་འགྱུར་བ་ན། ཞེས་གསུངས་སོ། །ཊཱིཀ་མཛད་པའི་དུས་སུ་ནི་པ་ན་བཞིས་རིན་ཐང་ཚང་བར་འགྱུར་བར་གསུངས་སོ། །པ་ན་བཞིའི་རྣམ་བཞག་མེད་པས་བོད་ཡུལ་ལྟ་བུར་དངོས་པོའི་ཚད་ཇི་ཙམ་ཡིན་ཞེ་ན། ཁ་ཅིག་ན་རེ། རྟ་རྒོད་མ་རེ་ཙམ་ཡིན་ཏེ། གསོད་པའི་ཆད་པ་དང་སྒོ་བསྟུན་པའི་ཕྱིར་དང་། དེ་ཙམ་གྱིས་དགག་བྱ་རྫོགས་པའི་ཕྱིར་གསུང་ངོ་། །ཁ་ཅིག་ནས་ཁལ་གཅིག་ཙམ་ཡིན་ཏེ། འོད་ལྡན་དུ་ཆུ་གཏོང་འགོག་གི་སྐབས་སུ། དེ་ལ་དཔེ་བྱས་པའི་ཕྱིར་གསུངས་སོ། །གཞན་དག་ནི་དེ་དག་གིས་དགག་བྱ་མི་ཁེགས་པའི་ཕྱིར་དང་། གསོད་པའི་ཆད་པ་ཁོ་ན་དང་བསྟུན་པའི་རྟགས་ཀྱང་མ་གྲུབ་སྟེ། ཆད་པས་གཅོད་པ་ཙམ་དང་བསྟུན་པའི་ཕྱིར་ཏེ། ཇི་ཙམ་མ་བྱིན་པར་བླངས་ན་གྱོད་ལ་བཀྲི་ཞིང་སྲོག་དང་བྲལ་བར་བྱེད་དྲིས་ཤིག་ཅེས་དང་། གསོད་དམ། འཆིང་ངམ། སྤྱུགས་ཀྱང་རུང་སྟེ། ཞེས་སོགས་གསུངས་པའི་ཕྱིར་རོ། །དེས་ན་འཇིག་རྟེན་ཕལ་གྱིས་རྐུས་པའི་ཐ་སྙད་དང་། ཆད་པས་གཅོད་པར་རིགས་པ་ཙམ་དུ་བྱེད་པ་ཡན་ཆད་ཡིན་པར་རིགས་ཏེ། ལུང་དུ། ཇི་ཙམ་མ་བྱིན་པར་བླངས་ན་དེ་རྒྱལ་པོའམ་བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས་ཀྱེ་མི་ཁྱོད་ནི་རྐུན་མའོ། །བྱིས་པའོ། །ཞེས་སོགས་གསུངས་པའི་ཕྱིར་རོ། །དེས་ན་སེ་བ་གསུམ་ཙམ་ལ་དངོས་པོ་ངེས་པར་ཚང་བ་ཡིན་ཏེ། དོན་བརྒྱད་མར། རྒྱ་གར་གྱི་རིན་ཐང་དང་སྦྱར་ན་དངུལ་ཞོ་གཅིག་ཙམ་རྐུས་ན་ཕས་ཕམ་པར་རྩིའོ། །ཞེས་གསུངས། ཡང་ཁ་ཅིག་གིས་ཞོའི་བརྒྱད་ཆ་གཅིག་བྱ་སྟེ། དེ་ཙམ་གྱིས་རིན་ཐང་ཚང་བར་བརྩིའོ་ཞེས་དང་། སློབ་ཕན་དུ་ནས་ཁལ་ཕྱེད་ལ་དངོས་པོ་ཚང་བར་བཤད་པ་དང་། ཤ་ན་རེ། དེང་སང་གི་དུས་དང་སྦྱར་ཏེ་རྒྱ་གར་ཡུལ་གྱི་མ་ཤ་ཀ་ལྔ་ལ་བོད་ཀྱི་དངུལ་གྱི་རིན་ཐང་དུ་བརྩིས་ན་དངུལ་ཞོའི་བརྒྱད་ཆ་གཅིག་ཡོད་དེ། བརྒྱད་ཆ་གཅིག་ཡན་ཆད་བརྐུས་ན་ཞེས་སོགས་གསུངས་པའི་ཕྱིར་དང་། རྙེད་པ་ཆུང་ངུ་ལ་ཡང་པ་ན་ལྔ་ལ་སོགས་པའོ། །ཞེས་དང་། དེའི་དོན་ཊཱི་ཀ་དག་གིས་བསབ་རིན་མེད་པར་གསུངས་པ་དང་། གོས་ལྕི་བ་བསྟེན་པའི་སྐབས་སུ་རིན་གྱིས་ལྕི་བ་ཀརྴ་པ་ན་ཉི་ཤུར་གསུངས་པ་དང་། བྱ་བ་ཕྲན་ཚེགས་དང་། དངོས་པོ་ཆུང་ངུའི་རིན་དུ་པ་ན་དང་། ཀརྴ་པ་ན་མང་པོ་སྦྱིན་པ་ལ་སོགས་པ་གསུངས་པའི་ཕྱིར་རོ། །དེས་ན་སྐྱེ་བོ་འགའ་ཞིག་ཉམས་རྐྱེན་མ་བྱས་ན་ལེགས་སོ་ཞེས་དམར་སྟོན་བཞེད་པ་དང་། རྗེ་བཙུན་གྲགས་པ་རྒྱལ་མཚན་གྱིས་ཀྱང་རིན་ཐང་གི་ཚད་འདི་ཙམ་ཞིག་ལ་བཞེད་པས་ཕྱོགས་འདི་ལ་གཟབ་འཚལ་ལོ། །བསམ་པ་ལ་གཉིས་ལས། འདུ་ཤེས་མ་འཁྲུལ་བ། ཀུན་སློང་ནི་གཞན་གྱི་ཡིན་ཏེ། མ་གནང་ཀྱང་བདག་ཉིད་ཀྱི་འཚོ་བའི་ཆེད་དུ་གཏན་དུ་དབྲལ་སྙམ་པའོ། །སྦྱོར་བ་ལུས་ངག་དུ་གྲུབ་ཅིང་མ་འཁྱོགས་པས་རྐུ་བར་བརྩམས་པའོ། །མཐར་ཐུག་གྲུབ་བློས་ཁྱད་པར་དུ་བྱས་པའི་གནས་སྤོས་སོ། །གསུངས་ཀྱང་གཏམ་པ་བརྣོག་པ་སོགས་གྲུབ་བློ་གཙོ་བོར་དགོས་པ་རྣམས་ལ་གྲུབ་བློ་དང་དཀོན་པ་ཕུད་པ་སོགས་གནས་སྤོས་གཙོ་བོར་དགོས་པ་རྣམས་ལ་གྲུབ་བློས་ཁྱད་པར་དུ་བྱས་པའི་གནས་སྤོས་པ་ཡིན་པར་མངོན་ནོ། །མི་ལ་གསོད་པར་མི་བྱ་ཞེས་པ་གཉེན་པོའི་ཆའོ། །འདི་ལ་བཞི་ལས། གཞི་ལ་མིའི་འགྲོ་བ་པ་ཡིན་པ་དང་བདག་ཉིད་ལས་རྒྱུད་ཐ་དད་པ་གཉིས། བསམ་པ་ལ་གཉིས་འདུ་ཤེས་སྤྱི་དང་བྱེ་བྲག་ལ་མ་འཁྲུལ་བ། སྦྱོར་བ་རང་ངམ་བསྐོས་པས་ལུས་ངག་ཏུ་གྲུབ་ཅིང་མ་འཁྱོགས་པར་གསོད་པར་རྩོམ་པའོ། །མཐར་ཐུག་དེའི་རྐྱེན་གྱིས་སྲོག་འགགས་པའོ། །རྫུན་དུ་སྨྲ་དང་བཅས་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་རྟེན་ཐུན་མོང་གི་ཡན་ལག་གསུམ་དང་ལྡན་ཅིང་གཟུགས་གཞན་དུ་མ་བསྒྱུར་བ་དང་མི་སྣང་བར་མ་བྱས་པའོ། །ཡུལ་ཐ་སྙད་ལྔ་ལྡན་བདག་ཉིད་ལས་རྒྱུད་ཐ་དད་གཟུགས་གཞན་དུ་བསྒྱུར་བ་དང་མི་སྣང་བར་བྱས་པ་མ་ཡིན་པའོ། །དངོས་པོ་མིའི་ཆོས་བླ་མའི་མཚན་ཉིད་ཅན་ནོ། །བསམ་པ་གཉིས་ལས། འདུ་ཤེས་འདྲ། ཀུན་སློང་འདུ་ཤེས་བསྒྱུར་ཏེ་སྨྲ་བར་འདོད་པའོ། །སྦྱོར་བ་ངག་མཚན་ཉིད་ལྔའམ་དྲུག་ལྡན་ནོ། །མཐར་ཐུག་དེའི་རྐྱེན་གྱིས་དོན་གོ་བའོ། །དེ་ལ་ཐ་སྙད་གསུམ་ནི་སྨྲ་ཤེས། དོན་གོ བསམ་པ་རང་བཞིན་དུ་གནས་པ། བཞི་པ་མི་ཡིན་པ། ལྔ་པ་ནི་མ་ནིང་དང་མཚན་གཉིས་པ་མ་ཡིན་པ་ཞེས་པ་ནི་འོག་ཏུ་ཡང་ཤེས་པར་བྱ་སྟེ་རབ་བྱུང་གི་སྟེང་དུ་ཐ་སྙད་བརྩི་ན་ཕྱི་མ་གཉིས་མི་དགོས་ཤིང་། ཡུལ་འགའ་ཞིག་ལ་ཐ་སྙད་ཕྱེད་དང་ལྔ་ལྡན་ཞེས་འབྱུང་བ་རྣམས་ལ་མ་ནིང་མ་ཡིན་པ་ཞེས་སྦྱར། མཚན་གཉིས་པ་ཡིན་པ་སྲིད་པའི་དབང་དུ་བྱས་སོ། །ངག་མཚན་ཉིད་ལྔའམ་དྲུག་ལྡན་ནི་རང་གི་དང་། ངག་དང་། བདག་ཉིད་དང་འབྲེལ་པ་དང་། བསམ་པའི་དོན་དང་། གསལ་པོར་དང་། མངོན་དུ་སྨྲས་པ་སྟེ། འོག་ཏུ་ངག་མཚན་ཉིད་དྲུག་ལྡན་ཞེས་པ་ཀུན་ལ་ཤེས་པར་བྱའོ། །གཉིས་པ་གསོ་བ་དགེ་འདུན་ལ་རག་ལས་པ་དགེ་འདུན་ལྷག་མའི་སྡེ་ནི། སྡོམ་ལ། ཁུ་བ་འཛིན་དང་འཁྲིག་ཚིག་བསྙེན་བཀུར་སྨྱན། །ཁང་པ་ཁང་ཆེན་དང་ནི་གཞི་མེད་དང་། །བག་ཙམ་དགེ་འདུན་དབྱེན་དང་དེར་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་ཏེ། ཁུ་བ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་གང་དབྱུང་བ་རང་གི་ཁུ་བ་ཡིན་པ་དང་། དང་པོའི་གནས་ན་གནས་པ་དང་། ཐ་སྙད་བྱར་ཡོད་པའི་ཚད་དུ་ལོངས་པ། གང་ལ་དབྱུང་བ་སྐྱེས་པའི་ཡན་ལག་གི་རྣམ་པ་ཡིན་པ། གང་གིས་དབྱུང་བ་སེམས་ཅན་དུ་བགྲངས་པ་དང་དེའི་རྣམ་པར་གནས་པའོ། །བསམ་པའི་ཡན་ལག་ལ། འདུ་ཤེས་འཁྲུལ་མ་འཁྲུལ་འདྲ། ཀུན་སློང་ཁུ་བ་ཕྱུང་བའི་འདུན་པ་རྒྱུན་ལྡན་ནོ། །སྦྱོར་བ་རེག་ཅིང་བརྩལ་བར་ཞུགས་པ། མཐར་ཐུག་སྦུབས་སུ་འོངས་ཤིང་བདེ་བ་མྱོང་བའོ། །འཛིན་དང་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ། ཡུལ་མི་ཡི་བུད་མེད། ཤེས་པ་རང་བཞིན་དུ་གནས་པ། མཚན་དོན་བྱེད་ནུས་པ། ལུས་བསྟེན་རུང་མ་ཉམས་པ། རྨའི་སྒོ་གསུམ་ལས་གཞན། ལུས་དངོས་སམ། སྐྲའམ། དེ་དང་འབྲེལ་པའི་གོས་ཡིན་པའོ། །རེག་བྱེད་ནི་རང་གིས་ལུས་མ་ཉམས་པ་ཟག་བྱེད་ལས་གཞན་པ། མིག་ནས་པུས་མོའི་བར་ཡིན་པའོ། །བསམ་པ་ལ་གཉིས་ལས། འདུ་ཤེས་འདྲ། ཀུན་སློང་རེག་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་ཀུན་ཏུ་འདོད་ཆགས་དང་ལྡན་པའོ། །སྦྱོར་བ་རེག་པར་རྩོམ་པ། མཐར་ཐུག་རེག་པ་ལས་བྱུང་བའི་བདེ་བ་མྱོང་བའོ། །འཁྲིག་ཚིག་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ། ཡུལ་མིའི་བུད་མེད། མཚན་དོན་བྱེད་ནུས་པ། ཐ་སྙད་བཞི་དང་ལྡན་པ། རྫུ་འཕྲུལ་མ་ཐོབ་པའོ། །གང་བརྗོད་པའི་དངོས་པོ་ཡུལ་དུས་དེར་འཁྲིག་པར་གྲགས་པའོ། །ཀུན་སློང་འཁྲིག་པ་སྨྲ་བ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་སོགས་སོ། །སྦྱོར་བ་ངག་དྲུག་ལྡན་ནོ། །མཐར་ཐུག་ཡུལ་དེས་དོན་གོ་བའོ། །བསྙེན་བཀུར་ཅེས་པ་དངོས་པོའི་ཆའོ། །འདི་ལ་གཞི་འདྲ། དངོས་པོ་ཡུལ་དུས་དེར་འཁྲིག་པར་གྲགས་པས་བསྔགས་པའོ། །ཀུན་སློང་དེ་སྨྲས་པ་ལས་བྱུང་བའི་བདེ་བ་སོགས་སོ། །ཕྱི་མ་གཉིས་འདྲའོ། །སྨྱན་ཅེས་པ་སྦྱོར་བའམ་གླེང་གཞིའི་ཆའོ། །འདི་ལ་བཞི་ལས། གཞི་ལ་སྤྲད་བྱ་ནི་མཚན་དོན་བྱེད་ནུས་པ་ཐ་སྙད་བཞི་དང་ལྡན་པ། ལུས་བརྟེན་དུ་རུང་བ། མི་མཐུན་པར་གནས་པ། བདག་ཉིད་ལས་རྒྱུད་ཐ་དད་ཅིང་ནང་རྒྱུད་ཐ་དད་པའོ། །བདག་པོ་ལྟ་བུ་ལ་སྨྱན་བྱེད་ན་དེ་གཉིས་ཐ་སྙད་ལྔ་དང་ལྡན་པའོ། །ཀུན་སློང་ཕྲད་པའི་དོན་དུ་སྤྲད་བྱ་མི་མཐུན་པ་མཐུན་པར་བསྒྲུབ་པའི་ཕྱིར་ཕྲིན་གྱི་སྦྱོར་བ་གསུམ་བྱེད་པར་འདོད་པའོ། །སྦྱོར་བ་རང་ངམ་བསྐོས་པས་ཕྲིན་གསུམ་བྱེད་པའོ། །མཐར་ཐུག་དེ་གཉིས་ཀྱི་བསྟེན་བྱ་སྟེན་བྱེད་ཕྲད་པའོ། །ཁང་པ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ས་གཞི་དང་ཡོ་བྱད་བཙལ་བའམ། དེས་གནང་བ། གཞི་མ་དག་པ་དང་། མ་བསྟན་པའོ། །དེ་ལ་མ་དག་པ་ནི་གཞི་མི་རུང་བ་དང་། རྩོད་པ་དང་བཅས་པ་དང་། བརྩམ་དུ་མི་རུང་བ་གསུམ་ལས། དང་པོ་ནི། སྡིག་སྦྲུལ་སོགས་ཀྱི་གནས་དང་། གཉིས་པ་ནི་རྒྱལ་པོ་སོགས་ཀྱིས་བདག་ཏུ་བཟུང་བ་དང་། གསུམ་པ་ནི་ཕྱི་རོལ་འདོམ་གང་ཚུན་ཆད་དུ་ཆུ་ཀླུང་སོགས་དང་འདོམས་པའོ། །གང་བརྩིག་པར་བྱ་བ་ནི་གཅིག་གི་ཆེད་ཡིན་པ་ཁང་པའི་ནང་སྲིད་དུ་ཁྲུ་བཅོ་བརྒྱད་དང་། ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་ལྷག་པ། སྤྱོད་ལམ་བཞི་ཤོང་བ། སྔར་གཞན་གྱིས་བརྩམས་པ་མ་ཡིན་པའོ། །ཀུན་སློང་རྩིག་འདོད་རྒྱུན་མ་ཆད་པའོ། །སྦྱོར་བ་རང་ངམ་བསྐོས་པས་རྩིག་པར་ཞུགས་པའོ། །མཐར་ཐུག་སྐོར་བ་དང་བཀབ་ཟིན་པའོ། །ཁང་ཆེན་ཞེས་པ་དངོས་པོའི་ཆའོ། །འདིའི་ཡན་ལག་ལ་བཙལ་བ་དང་། ཚད་ལྷག་དང་། གཅིག་ཆེད་གསུམ་མི་སྦྱར་ཏེ། ཚོགས་ཀྱི་ཆེད་དུ་ཞེས་སྦྱར། གཞན་རྣམས་འདྲའོ། །ཁང་པ་དང་ཁང་ཆེན་གྱི་ཁྱད་པར་ནི་བདག་པོ་གང་ཟག་གི་ཆེད་དུ་དང་། དཀོན་མཆོག་གསུམ་གྱི་ཆེད་དུ་ཡིན་པའོ། །གཞི་མེད་ཅེས་པ་ཡུལ་གྱི་ཆའོ། །འདི་ལ་བཞི་ལས། གཞི་ནི་ཡུལ་བསྙེན་པར་རྫོགས་པའི་སྡོམ་པ་དང་ལྡན་པ། ཐ་སྙད་གསུམ་དང་ལྡན་པ། རྒྱུད་ཐ་དད་པའོ། །གོ་བྱའི་ཡུལ་ཐ་སྙད་ལྔ་དང་ལྡན་ཞིང་རྒྱུད་ཐ་དད་པའོ། །དངོས་པོ་ཕམ་པ་བཞིའམ་བརྒྱད་ལས་གང་ཡང་རུང་བའོ། །ཀུན་སློང་འདུ་ཤེས་སྒྱུར་བའི་དོན་ཅན་ཉམས་པར་འདུན་པས་སྐུར་བར་འདོད་པའོ། །སྦྱོར་བ་ཡུལ་དེའི་མིང་གིས་ངག་མཚན་ཉིད་དྲུག་ལྡན་གྱིས་སྐུར་བ་སྟེ་བདག་ཉིད་དང་འབྲེལ་པ་མ་གཏོགས་པའོ། །མཐར་ཐུག་ཡུལ་གྱིས་དོན་གོ་བའོ། །བག་ཙམ་ཞེས་པ་སྦྱོར་བའི་ཆའོ། །འདི་ལ་གཞི་དང་བསམ་པ་འདྲ། སྦྱོར་བ་མིང་ནས་སྨོས་ཞིང་། མིང་གཉིས་དངོས་སུ་མ་སྦྱར་བར་གཞན་ལ་གནས་པའི་མི་གསལ་བའི་ཚིག་གིས་སྨྲས་པའོ། །མཐར་ཐུག་སྐུར་པ་གདབ་པའི་ཡུལ་དེ་ཉིད་དམ་ཐ་སྙད་ལྔ་ལྡན་གྱིས་དོན་གོ་བའོ། །དགེ་འདུན་དབྱེན་ཅེས་པ་སྦྱོར་བའི་ཆ་སྡོམ་དུ་བླངས། འདི་ལ་བཞི་ལས། གཞི་ལ་གང་དབྱེ་བར་བྱ་བའི་དངོས་པོ་ནི་ཆོས་ལས་ཐ་དད་པའི་དངོས་པོ། གང་ཟག་གང་དབྱེ་བ་ནི་སོ་སོ་སྐྱེ་བོའི་དགེ་སློང་ཁ་སྐོང་བར་འོས་པ་གྲངས་བརྒྱད་དུ་ཚང་བ། མི་མཐུན་པ་མེད་པའོ། །དུས་དང་གནས་ནི། དང་པོ་མཐའ་སྐྱོན་ཟུང་གཅིག་གིས། །སྔ་རོལ་ཐུབ་པ་ནོངས་པ་དང་། །མཚམས་མ་བཅད་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །ཞེས་པ་ལྟ་བུའོ། །འབྱེད་པ་པོ་ནི་སྡེ་སྣོད་གསུམ་ཤེས་པ། ཚུལ་ཁྲིམས་རྣམ་པར་དག་པ་དང་ལྡན་པའི་དགེ་སློང་ཁ་སྐོང་བའི་ཆོས་དང་ལྡན་པའོ། །བསམ་པ་ལ་འདུ་ཤེས་མ་འཁྲུལ་པ། ཀུན་སློང་བསམ་པ་ཐག་པ་ནས་ཆོས་ལས་ཐ་དད་པར་འབྱེད་པར་འདོད་པ་དང་། བརྗོད་པ་གསུམ་པའི་མཐར་མི་གཏོང་བར་འདོད་པ་རྒྱུན་མ་ཆད་པའོ། །སྦྱོར་བ་བཟློག་པར་བྱེད་པའི་རྐྱེན་མཚན་ཉིད་དང་ལྡན་པ་ལ་ཕྱིན་ཅི་ལོག་པར་ཞུགས་ཤིང་གཞི་དེ་ཉིད་སྒྲུབ་པར་བརྩོན་པའོ། །མཐར་ཐུག་ཟློག་བྱེད་ཀྱི་རྐྱེན་ལྔའི་མཐར་མི་གཏོང་བའོ། །རྐྱེན་ལྔ་ནི། བཞམས་ཏེ་བསྒོ་བ། གསོལ་བ། བརྗོད་པ་གསུམ་མོ། །དེར་རྗེས་ཕྱོགས་ཞེས་པ་སྦྱོར་བའི་ཆའོ། །འདི་ལ་རང་ཉིད་འཁོར་ལོའི་དབྱེན་བྱེད་པ་པོ་དངོས་མ་ཡིན་ཡང་དེའི་གྲོགས་བྱེད་པར་རྗེས་སུ་བསྒྲུབ་པའི་ཡིན་ལ། ཡན་ལག་གཞན་ཐམས་ཅད་སྔ་མ་བཞིན་ནོ། །ཁྱིམ་སུན་འབྱིན་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ནི་གང་ལ་སྐུར་པ་གདབ་པའི་ཡུལ་རང་སྐྲོད་པར་བྱེད་པའི་དགེ་འདུན་གྲངས་ཚང་བ། ཁ་སྐོང་གི་ཆོས་དང་ལྡན་པ། འགྲོ་བ་བཞི་དང་བྲལ་བ། ཆོས་ལྡན་གྱི་ལས་ཀྱིས་རང་སྐྲོད་པ་པོ་ཡིན་པའོ། །སྐུར་པ་དེ་གང་ལ་སྨྲ་བའི་ཡུལ་ནི་རང་སྐྲོད་པར་བྱེད་པའི་དགེ་སློང་གི་དགེ་འདུན་དེའམ། གཞན་ཡང་རུང་སྟེ་ཐ་སྙད་ལྔ་ལྡན་ནོ། །གང་གིས་སྐུར་བ་འདེབས་པར་བྱེད་པ་པོ་ནི་འགྲོ་བ་བཞི་ལས་གང་ཡང་རུང་བ་དང་ལྡན་པ། བཞམས་བསྒོ་བྱས་ལ་ཆགས་པ། བདག་ཉིད་བསྐྲད་པའོ། །བསམ་པ་ལ་འདུ་ཤེས་མ་འཁྲུལ་པ་དང་། བདེན་པའི་འདུ་ཤེས་བསྒྱུར་ནས་བརྫུན་པའི་འདུ་ཤེས་སོ། །ཀུན་སློང་རང་སྐྲོད་པའི་དགེ་འདུན་པ་བརྫུན་གྱི་སྒོ་ནས་སྐུར་བ་འདེབས་པར་འདོད་པ་རྒྱུན་མ་ཆད་པའོ། །སྦྱོར་བ་རང་སྐྲོད་པའི་དགེ་འདུན་ལ་བརྫུན་གྱི་སྒོ་ནས་སྐུར་པ་འདེབས་པ་དེ་ཉིད་བསྒྲུབ་པར་བརྩོན་པའོ། །མཐར་ཐུག་ཟློག་བྱེད་ཀྱི་རྐྱེན་ལྔའི་མཐར་མ་བཏང་ནའོ། །བཀའ་བློ་མི་བདེ་བ་ཞེས་པ་སྦྱོར་བའི་ཆའོ། །འདི་ལ་བཞི་ལས། བཟློག་པར་བྱ་བའི་ཡུལ་ནི་ཕྱོགས་བཅུ་ན་བཞུགས་པའི་དགེ་འདུན་བསྙེན་པར་རྫོགས་པའི་སྡོམ་པ་རྣམ་དག་དང་ལྡན་པ། ལྟ་བ་དང་མཚན་མཐུན་པ་ཐ་སྙད་གསུམ་དང་ལྡན་པའོ། །གོ་བར་བྱ་བའི་ཡུལ་ནི་ཇི་སྐད་བཤད་པའི་མཚན་ཉིད་དང་ལྡན་པའི་དགེ་སློང་བདག་ཉིད་ཀྱི་ཚུལ་ཁྲིམས་ལ་ཕྱིན་ཅི་མ་ལོག་པར་གླེང་པ་པོ་ཡིན་པའོ། །བདག་ཉིད་ནི་བཀའ་བློ་མི་བདེ་བའི་རང་བཞིན་དུ་གྱུར་པ་ལ་གླེང་དྲན་དང་བཞམས་བསྒོ་བྱས་ལ་ཆགས་པའོ། །བསམ་པ་ལ་འདུ་ཤེས་མ་འཁྲུལ་བ། ཀུན་སློང་བདག་ཉིད་ཀྱི་ཚུལ་ཁྲིམས་ལ་སུ་གང་གིས་ཀྱང་གླེང་བ་འགོག་པར་འདོད་པ་རྒྱུན་མ་ཆད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་དགེ་སློང་ཐམས་ཅད་ཀྱི་གླེང་བ་འགོག་པར་བརྩོན་པའོ། །མཐར་ཐུག་བཟློག་བྱེད་ཀྱི་རྐྱེན་ལྔའི་མཐར་མི་གཏོང་བའོ། །སོ་སོར་ཐར་པའི་མདོ་ལས། སྡོམ་ལ། དབེན་པ་སྐྱབས་ཡོད་འདུག་པ་འོ། །ཞེས་བུད་མེད་དང་བར་འདོམ་གང་གི་ནང་དུ་སྐྱེ་བོའི་རྒྱུན་ལུགས་ཀྱིས་དབེན་པ་དང་། རྩིག་པ་དང་། མུན་པ་སོགས་ཀྱི་སྐྱབས་ཡོད་པ་ན་འདུག་ན་ཕམ་པ་དང་། ལྷག་མ་དང་ལྟུང་བྱེད་གསུམ་གང་རུང་གཅིག་འབྱུང་ཉེ་ལ་འདི་འབྱུང་མ་ངེས་པ་དང་། བར་འདོམ་གང་གི་ཕྱི་རོལ་ན་དེ་གཉིས་གང་རུང་གཅིག་འབྱུང་དུ་ཉེ་ལ་འདི་འབྱུང་མ་ངེས་པ་གཉིས་བཤད་ཀྱང་མདོ་རྩར་དེ་གཉིས། དེ་གསུམ་གང་རུང་གི་ཕྱིར་བཅོས་ཀྱི་ཁོངས་སུ་གཏོགས་པ་ལ་དགོངས་ནས་ལོགས་སུ་མ་བཤད་དོ། །གསུམ་པ་ལྟུང་བྱེད་ཀྱི་སྡེ་ལ་གཉིས་ཏེ། ཞག་གི་ཆད་ལས་དང་འབྲེལ་པ་སྤང་བའི་ལྟུང་བྱེད་ཀྱི་སྡེ་དང་། བཤགས་པ་ཙམ་དང་འབྲེལ་པ་ལྟུང་བྱེད་འབའ་ཞིག་པའི་སྡེའོ། །དང་པོ་ལ། བཅུ་ཚན་གསུམ་ལས། བཅུ་ཚན་དང་པོ་ནི། སྡོམ་ལ། འཆང་བ་འབྲལ་བ་འཇོག་པ་དང་། །འཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་ཏེ། འཆང་བ་ཞེས་པ་སྦྱོར་བའི་ཆ་སྡོམ་དུ་བླངས། འདི་ལ་བཞི་ལས། གཞི་ལ་དངོས་པོ་ནི་གོས་སུ་གྲུབ་པ་དང་། རྒྱུ་དང་དབྱིབས་དང་ཁ་དོག་གིས་རུང་བ་དང་། ཁྲུ་གང་གི་ཚད་དུ་ལོངས་པ་དང་། རང་དབང་བ་དང་གནས་སྐབས་དབང་བྱར་ཡོད་པ་དང་། བྱིན་གྱིས་བརླབ་པ་དང་མ་འབྲེལ་ལམ་འབྲེལ་ཀྱང་རྗེས་སུ་ཞུགས་པ་དང་བཅས་པ་དང་། ཟླ་བར་བཞག་པ་མིན་པའོ། །འདིར་སྲ་བརྐྱང་བཏིང་བ་མིན་པའོ། །ཀུན་སློང་འཆང་བར་འདོད་པའོ། །མཐར་ཐུག་ཞག་བཅུ་གཅིག་པའི་སྐྱ་རེངས་ཤར་བའོ། །འབྲལ་བ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་ཆོས་གོས་གསུམ་ལས་གང་ཡང་རུང་བ་རང་གི་བྱིན་རླབས་ཅན། རུང་བ་ཚད་ལྡན་དང་བདག་ཉིད་གནང་བ་ཐོབ་པ་དང་། སྲ་བརྐྱང་བཏིང་བ་དང་། དགོན་པ་བ་དང་། བར་ཆད་དང་ལྡན་པ་རྣམས་མ་ཡིན་པའོ། །གནས་ནི་དེའི་གནས་ཉེ་འཁོར་དང་བཅས་པ་ལས་གཞན་པའོ། །མཐར་ཐུག་ཞག་གཅིག་གི་མཚན་མོའི་མཐའ་འདས་པའོ། །འཇོག་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞག་བྱའི་དངོས་པོ་ནི་གོས་སུ་གྲུབ་པ་ཁྲུ་གང་ཡན་ཆད་པ། རང་དབང་བ་དབང་བྱར་ཡོད་པ་རེ་བའི་ཆོས་ལྔ་དང་ལྡན་པའོ། །བདག་ཉིད་བྱིན་གྱིས་བརླབ་པར་བྱ་བ་མེད་པ་དང་། སྲ་བརྐྱང་མ་བཏིང་བའོ། །ཀུན་སློང་འཆང་བར་འདོད་པའོ། །མཐར་ཐུག་སོ་གཅིག་པའི་སྐྱ་རེངས་ཤར་བའོ། །འཁྲུར་འཇུག་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ། ཡུལ་ནི་རྫོགས་པའི་སྡོམ་པ་དང་ལྡན་པ་ལྟ་བ་མཐུན་པ་མཚན་མི་མཐུན་པ་ཐ་སྙད་གསུམ་དང་ལྡན་པ། ལུས་བརྟེན་དུ་རུང་བ། ལུས་ཐ་མལ་པར་གནས་པ། རྫུ་འཕྲུལ་མ་ཐོབ་པ། ཉེ་དུ་མ་ཡིན་པ་སྟེ། བརྒྱད་ལྡན་ཏེ་དགེ་སློང་མས་སྐྱེད་པ་ཕལ་ཆེར་ལ་ཤེས་པར་བྱའོ། །དངོས་པོ་ཆོས་གོས་གསུམ་དང་གདིང་བ་ལས་གང་ཡང་རུང་བ་དང་། རུང་བ་ཚད་དང་ལྡན་པ། རང་གི་ཡིན་པ་བྱིན་གྱིས་བརླབས་པ། འཁྲུར་འཇུག་འོས་པ་སྔར་ཕྱེད་བྱས་པ་མ་ཡིན་པའོ། །ཀུན་སློང་འཁྲུ་བ་ལ་སོགས་པ་བྱེད་དུ་འཇུག་པར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་བྱ་བ་ཡོངས་སུ་རྫོགས་པའོ། །ལེན་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་མ་ཐུན་མོང་གི་ཆོས་བརྒྱད་ལྡན། རྫས་ཐ་དད་པ། དད་པ་ཅན་དང་སེམས་གཡེང་ཅན་གཉིས་མ་ཡིན་པའོ། །དངོས་པོ་གོས་དངོས་སུ་གྲུབ་པ། རུང་བ་ཚད་དུ་ལོངས་པ། དགེ་སློང་མ་དེའི་ཡིན་པའོ། །བདག་ཉིད་དགེ་འདུན་ལ་གོས་འབུལ་བ་ལེན་པ། གོས་བོར་བ། ཚིག་པ། བརླག་པ་བཞི་མ་ཡིན་པའོ། །ཀུན་སློང་རུང་མི་རུང་བརྗེ་པ་མ་ཡིན་པར་ལེན་པར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་ལེན་པར་བརྩོམ་པའོ། །མཐར་ཐུག་ལག་ཏུ་ཐོབ་པའོ། །སློང་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན་བདག་ཉིད་ལས་རྫས་ཐ་དད་པ་ཉེ་དུ་མ་ཡིན་པ་ལུས་ཐ་མལ་པར་གནས་པ་མ་སློང་བའི་སྔ་རོལ་དུ་སྟེར་བ་པོ་མ་ཡིན་པ་སྟེ་དྲུག་ལྡན་ནོ། །དངོས་པོ་གོས་དངོས་སུ་གྲུབ་པ་རུང་བ་ཚད་དང་ལྡན་པ་དང་ཁྱིམ་པ་དེ་ཉིད་ཀྱི་ཡིན་པའོ། །རྒྱུ་མཚན་ཡུལ་དངོས་པོ་གསུམ་པོ་དེ་འོག་མ་གསུམ་ལའང་སྦྱར་རོ། །བདག་ཉིད་སྲ་བརྐྱང་མ་བཏིང་བ་དང་། འཚོ་བའི་ཡོ་བྱད་ཚང་བའོ། །ཀུན་སློང་སློང་བར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་ལག་ཏུ་ཐོབ་པའོ། །སྟོད་གཡོགས་སྨད་གཡོགས་བཅས་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་བསླང་བའི་ཡུལ་ནི་གོང་དང་འདྲ་བ་ལ་སྦྱིན་བདག་གཅིག་གོ །རང་ཉིད་ནི་སློང་བར་རིགས་པའོ། །དངོས་པོ་ནི་སྔ་མ་དང་འདྲ་བ་ལ། སློང་དུ་གནང་བའི་ཚད་ལས་ལྷག་པའམ་སྦྱིན་པར་བྱ་བ་མི་སྦྱིན་པ་ཚད་དུ་ཆོག་པའོ། །བསམ་པ་ལ་འདུ་ཤེས་མ་འཁྲུལ་བ། ཀུན་སློང་རང་ཁོ་ནའི་དོན་དུ་ཚད་ལས་ལྷག་པ་སློང་བར་འདོད་པའམ། སྦྱིན་པར་བྱ་བ་མི་སྦྱིན་པར་འདོད་པའི་བསམ་པ་རྒྱུན་མ་ཆད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་ལྷག་པ་སློང་བར་རྩོམ་པའམ་སྦྱིན་པར་བྱ་བ་མི་སྦྱིན་པར་ཞུགས་པའོ། །མཐར་ཐུག་ལྷག་པོ་ཐོབ་པའི་སྦྱིན་པར་བྱ་བ་མི་སྦྱིན་པར་ཐག་བཅད་ནའོ། །དེ་ལ་སློང་བར་རིགས་པ་ནི་རང་ཉིད་ལ་ཡོ་བྱད་ཐམས་ཅད་སློང་བར་རིགས་ལ། དེ་བཞིན་དུ་སྣམ་སྦྱར་ལྟ་བུ་གང་མེད་པ་དེ་དང་དེ་སློང་བར་རིགས་སོ། །ཚད་ནི་ནོར་བདག་གཅིག་ལ་ཁྱིམ་པའི་སྟོད་གཡོགས་སྨད་གཡོགས་སམ་རབ་ཏུ་བྱུང་བའི་སྟོད་གཡོགས་སྨད་གཡོགས་ཀྱང་རུང་སྟེ་ཟུང་གཅིག་སློང་བར་བྱའོ། །ཁྱིམ་པའི་སྟོད་གཡོགས་སྨད་གཡོགས་ཆུང་ཚད་ཐོབ་ན་འབྲིང་ཚད་དུ་ཁ་བསྐང་བ་དང་། འབྲིང་ཚད་ཐོབ་ན་ཆེ་ཚད་དུ་ཁ་བསྐང་སློང་བར་མི་བྱ་ཞིང་། ལྷག་པ་ཐོབ་ན་ཡང་སྦྱིན་མི་དགོས་སོ། །རབ་ཏུ་བྱུང་བའི་ཆུང་ཚད་ཐོབ་ན་འབྲིང་ཚད་དུ་ཁ་བསྐང་བ་དང་། འབྲིང་ཚད་ཐོབ་ན་ཆེ་ཚད་དུ་ཁ་བསྐང་བ་བླང་བར་བྱ་ཞིང་། ཆེ་ཚད་ལས་ལྷག་པ་ཐོབ་ན་ཡང་སྦྱིན་པར་བྱའོ། །དེ་ལྟར་ན་འདི་ལ་ལྟུང་བ་འབྱུང་བའི་སྒོ་གསུམ་ཡོད་དེ། བདག་པོ་གཅིག་ལ་ཟུང་གཅིག་ལས་ལྷག་པ་བླངས་ན་ཉེས་བྱས། ཐོབ་ན་དངོས་གཞི། ཁྱིམ་པའི་སྟོད་གཡོགས་སྨད་གཡོགས་ཆུང་ཚད་འབྲིང་ཚད་ཐོབ་པ་ལས་ཁ་བསྐང་བ་བླངས་ན་ཉེས་བྱས། ཐོབ་ན་དངོས་གཞི། རབ་ཏུ་བྱུང་བའི་ཆེ་ཚད་ལས་ལྷག་པ་ཐོབ་པ་མི་སྦྱིན་པར་སེམས་ན་ཉེས་བྱས། ཐག་བཅད་ན་དངོས་གཞིའོ། །རིན་ཐང་ཞེས་པ་གླེང་གཞིའི་ཆའོ། །འདི་ལ་བཞི་ལས། གཞི་ལ་བདག་ཉིད་གནང་བའི་རྐྱེན་དང་མི་ལྡན་པ། ཡུལ་ཁྱིམ་པ་ཐུན་མོང་གི་ཆོས་ལྔ་ལྡན་དང་། ལྐོག་ཏུ་སྨོས་ཤིང་མངོན་སུམ་དུ་སྟོབ་པ་པོ་མ་ཡིན་པ། སྤུངས་ཆུང་བས་ཁྱད་པར་དུ་བྱས་པའི་ཆོས་བདུན་ལྡན་གྱིས་བདག་གིར་བྱས་པའི་གོས་རུང་བ་ཚད་ལྡན་ནོ། །བསམ་པ་ལ་གཉིས་ལས། འདུ་ཤེས་མ་འཁྲུལ་བ། ཀུན་སློང་རང་གི་དོན་དུ་དཔགས་པ་སྔ་ཚོམས་སུ་ལེན་པར་འདོད་པའི་བསམ་པའོ། །སྦྱོར་བ་དེ་ལེན་པ་ལ་ལུས་ངག་གིས་ཞུགས་པའོ། །མཐར་ཐུག་ལག་ཏུ་ཐོབ་པའོ། །སོ་སོ་ཞེས་པ་ཡུལ་གྱི་ཆའོ། །འདི་ལ་སྤུངས་ཆེ་བ་ཞེས་སྦྱར། གཞན་ཡན་ལག་ཐམས་ཅད་སྔ་མ་བཞིན་ནོ། །བསྐུར་བ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན། རྫས་ཐ་དད་པས་བདག་གིར་བྱས་པའི་རིན་བསྒྱུར་བ་ལས་གྲུབ་པའི་གོས་རུང་བ་ཚད་དང་ལྡན། ཕོ་ཉ་བ་ཆོས་བཞི་ལྡན་ལ་བསྐུར། དེས་ཞལ་ཏ་བ་ཆོས་བཞི་ལྡན་ལ་གཏད་པ་སྟེ། གསུམ་ཆར་ཡང་ནང་ཕན་ཚུན་དང་བདག་ཉིད་ལས་རྫས་ཐ་དད་པ་རེ་བ་མེད་པའི་ཚེ་སྦྲན་ན་སེམས་བསྡུ་བར་ཁས་མི་ལེན་པའོ། །བསམ་པ་ལ་གཉིས་ལས། འདུ་ཤེས་མ་འཁྲུལ་བ། ཀུན་སློང་རང་གི་དོན་དུ་བསྐུལ་བསྡད་ལྷག་པས་ལེན་པར་འདོད་པའམ། སེམས་བསྡུ་བར་ཁས་མི་ལེན་པ་ལས་ལེན་པར་འདོད་པའི་བསམ་པ་རྒྱུན་ལྡན་ནོ། །སྦྱོར་བ་བསྐུལ་བསྡད་དྲུག་ལས་ལྷག་པའམ་ཁས་མི་ལེན་པ་ལ་ལེན་པར་ཞུགས་པའོ། །མཐར་ཐུག་ལག་ཏུ་ཐོབ་པའོ། །བཅུ་ཚན་གཉིས་པ་ནི། སྡོམ་ལ། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་ལེན། །མངོན་ཚན་ཅན་དང་ཉོ་ཚོང་ངོ་། །ཞེས་ཏེ། སྲིན་བལ་ཞེས་པ་དངོས་པོའི་ཆ་སྡོམ་དུ་བླངས། འདི་ལ་བཞི་ལས། གཞི་ལ། དངོས་པོ་ནི་སྲིན་བལ་ཡིན་པ་རུང་བ་ཚད་དང་ལྡན་པ་གསར་པ་ཡིན་པ་དམན་པ་དང་མ་འདྲེས་པ་རང་གི་ཡིན་པ། སྔར་གཞན་གྱིས་བཟོ་རྩོམ་མ་བྱས་པའོ། །གནས་ནི་སྲིན་བལ་རིན་ཆེ་བའི་གནས་ཡིན་པའོ། །ཀུན་སློང་སྟན་བྱེད་པར་འདོད་པའོ། །སྦྱོར་བ་རང་ངམ་གཞན་གྱིས་རྩོམ་པའོ། །མཐར་ཐུག་བཀོད་དེ་བཀྲམ་པ་ཡོངས་སུ་རྫོགས་པའོ། །འབའ་ཞིག་ཅེས་པ་དངོས་པོའི་ཆའོ། །འདི་ལ་སྲིན་བལ་གྱི་ཚབ་ཏུ་ལུག་གི་བལ་ནག་པོ་འབའ་ཞིག་སྦྱར། གཞན་འདྲའོ། །ཆ་གཉིས་ཞེས་པ་དངོས་པོའི་ཆའོ། །འདི་ལ་ཡང་སྲིན་བལ་གྱི་ཚབ་ཏུ། ལུག་གི་བལ་ནག་པོ་ཕྱེད་དང་། དཀར་པོ་དང་འཁོབ་བལ་ཕྱེད་ལས་ནག་པོ་སྲང་ཕྱེད་ཀྱིས་ལྷག་པ་ཞེས་སྦྱར། གཞན་འདྲའོ། །དྲུག་དང་ཞེས་པ་དུས་ཀྱི་ཆའོ། །འདི་ལ་བཞི་ལས། བརླིང་བའི་སྟན་གསར་པ་ཡིན་པ་དམན་པ་དང་མ་འདྲེས་པ། རང་གི་ཡིན་པ་སྔར་གཞན་གྱིས་བཟོ་རྩོམ་མ་བྱས་པའོ། །བདག་ཉིད་སྟན་གཞན་ཡོད་པའམ་རང་དགར་བཏང་བ། གནང་བ་མ་ཐོབ་པ། སྟན་སྔ་མ་བྱས་ནས་ལོ་དྲུག་མ་ལོན་པའོ། །ཀུན་སློང་སྟན་ཕྱི་མ་བྱེད་པར་འདོད་པའོ། །སྦྱོར་མཐའ་འདྲའོ། །མཐོ་གང་ཞེས་པ་ཚད་ཀྱི་ཆའོ། །འདི་ལ་བཞི་ལས། དངོས་པོ་ནི་གདིང་བ་གསར་པ་རང་གི་ཡིན་པ་རུང་བ་ཚད་ལྡན་ནོ། །བདག་ཉིད་གདིང་བ་རྙིང་པ་ལ་མཐུད་ཅིང་སྦྱར་བ་ཚུན་ཆད་ཀྱིས་བདེ་བར་གཤེགས་པའི་མཐོ་གང་གི་ཚད་ཡོད་བཞིན་དུ་དེས་མ་གླན་པའོ། །ཀུན་སློང་ལོངས་སྤྱོད་པར་འདོད་པའོ། །སྦྱོར་བ་ལོངས་སྤྱོད་པར་རྩོམ་པའོ། །མཐར་ཐུག་ལོངས་སྤྱོད་པའོ། །ལམ་དང་ཞེས་པ་བགྲོད་པར་བྱ་བའམ་གནས་ཀྱི་ཆའོ། །འདི་ལ་བཞི་ལས། གཞི་ལ་དངོས་པོ་བལ་རུང་བ་ཁུར་ཚད་དུ་ལོངས་པ་རང་དབང་བ། ངོ་མ་སྤོས་པའོ། །ལའམ་སའམ་ཆུ་ལ་བརྟེན་པ་རྒྱང་གྲགས་གཅིག་ཏུ་ལོངས་པའོ། །བདག་ཉིད་རྫུ་འཕྲུལ་དང་། སྤྲུལ་པའི་གནས་སྐབས་མ་ཡིན་པ། དུས་ཉི་མ་གཅིག་གི་དུས་ཡིན་པའོ། །ཀུན་སློང་ཁུར་ཏེ་འགྲོ་བར་འདོད་པ། སྦྱོར་བ་འགྲོ་བར་རྩོམ་པ། མཐར་ཐུག་རྒྱང་གྲགས་ལས་འདས་པའོ། །འཁྲུ་བ་དང་ནི་ཞེས་པ་བྱ་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་མ་ཆོས་བརྒྱད་ལྡན། དངོས་པོ་རང་གི་བལ་རུང་བ་ཚད་ལྡན། རྨེལ་བར་འོས་པ་རྨེལ་བ་ལ་སོགས་པའི་རྩོམ་པ་མ་བྱས་པ། ཀུན་སློང་རང་གི་དོན་དུ་རྨེལ་བ་འཆོལ་འདོད་ཀྱིས། སྦྱོར་བ་ངག་མཚན་ཉིད་དྲུག་ལྡན་གྱིས་བཅོལ་བ། མཐར་ཐུག་ཕྱོགས་ལས་བྱས་པའོ། །གསེར་དངུལ་ལེན་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ནི་རིན་པོ་ཆེ་བཀག་པ་དངོས་སམ་དེ་དང་འདྲ་བ་དང་། ཐ་སྙད་གདགས་སུ་རུང་བ་དང་། ཚད་དང་ལྡན་པ་རང་གི་ཡིན་པ་རུང་བ་མ་བྱས་པའོ། །ཀུན་སློང་བདག་གིར་བྱེད་འདོད་པའོ། །སྦྱོར་བ་རང་ངམ་བསྐོས་པས་རེག་པར་རྩོམ་པའོ། །མཐར་ཐུག་བདག་གིར་བྱས་པའོ། །མངོན་ཚན་ཅན་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ནི་ཁྱིམ་པ་ཐ་སྙད་ལྔ་ལྡན་རྫས་ཐ་དད་པ། ཉེ་དུ་མ་ཡིན་པའོ། །དངོས་པོ་པ་ནའམ་རིན་པོ་ཆེ་རང་དབང་བ། ཐ་སྙད་དུ་གདགས་སུ་རུང་བ་ཚད་དང་ལྡན་པའོ། །ཀུན་སློང་རྙེད་པར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་བསྐྱེད་པར་རྩོམ་པའོ། །མཐར་ཐུག་སྐྱེད་ཁྲུ་གང་དུ་ལོངས་པ་ཐོབ་པའོ། །ཉོ་ཚོང་ངོ་ཞེས་པ་སྦྱོར་བའི་ཆའོ། །འདི་ལ་དངོས་པོ་པ་ན་དང་རིན་པོ་ཆེ་ལ་སོགས་པ་ལས་གཞན་གཞལ་བར་བྱ་བ་འབྲུ་དང་གོས་ལ་སོགས་པ་སྦྱར། གཞན་འདྲའོ། །བཅུ་ཚན་གསུམ་པ་ནི། སྡོམ་ལ། ལྷུང་བཟེད་གཉིས་དང་ཐ་ག་གཉིས། །བྱིན་འཕྲོག་སྟོན་ཟླ་ཐ་ཆུང་དང་། །དགོན་པ་པ་དང་རས་ཆེན་དང་། །བསྔོས་པ་དང་ནི་གསོག་འཇོག་གོ །ཞེས་ཏེ། ལྷུང་བཟེད་གཉིས་ཞེས་པ་དངོས་པོའི་ཆའོ། །ལྷུང་བཟེད་དང་པོ་ལ་བཞི་ལས། གཞི་ལ་དངོས་པོ་ནི་རང་གི་ལྷུང་བཟེད་རུང་བ་ཚད་ལྡན་དབང་བྱར་ཡོད་པ། བྱིན་རླབས་དང་མ་འབྲེལ་བའམ་འབྲེལ་ཀྱང་རྗེས་སུ་ཞུགས་པ་དང་བཅས་པ་དང་། འབྲེལ་མེད་མ་ཡིན་པའོ། །ཀུན་སློང་རང་ཆེད་དུ་འཆང་བར་འདོད་པའོ། །སྦྱོར་བ་རང་ཆེད་དུ་འཆང་བའོ། །མཐར་ཐུག་ཞག་བཅུ་གཅིག་པའི་སྐྱ་རེངས་ཤར་བའོ། །ལྷུང་བཟེད་གཉིས་པ་ལ་བཞི་ལས། གཞི་ལ་ཡུལ་ཁྱིམ་པ་ཆོས་དྲུག་ལྡན། དངོས་པོ་ལྷུང་བཟེད་རུང་བ་ཚད་ལྡན་ཡུལ་དེ་ཉིད་ཀྱི་ཡིན་པའོ། །བདག་ཉིད་ལྷུང་བཟེད་རུང་བ་ཚད་ལྡན་ལོངས་སྤྱད་བཟོད་དབང་བྱར་ཡོད་པ། འབྲེལ་མེད་མིན་པ་ཡོད་པའོ། །ཀུན་སློང་སློང་བར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་ནོ། །མཐར་ཐུག་ལག་ཏུ་ཐོབ་པའོ། །ཐ་ག་གཉིས་ཞེས་པ་ཡུལ་གྱི་ཆའོ། །ཐ་ག་དང་པོ་ལ་བཞི་ལས། གཞི་ལ་ཡུལ་ཐ་ག་པ། ཁྱིམ་པ་ཆོས་དྲུག་ལྡན་ནོ། །གླ་བརྔན་ཅི་བདེར་སྟོབ་པ་པོ་མ་ཡིན་པའོ། །དངོས་པོ་གོས་ཀྱི་རྒྱུ་རུང་བ་ཚད་ལྡན་རང་དབང་བའོ། །ཀུན་སློང་རྐུ་སེམས་དང་ཡིད་གཅུགས་ལས་གཞན་པ་གླ་བརྔན་མེད་པར་ཐག་ཏུ་འཇུག་པར་འདོད་པའོ། །སྦྱོར་བ་རང་ངམ་བསྐོས་པས་ངག་བཞི་ལྡན་ནོ། །མཐར་ཐུག་གོས་གྲུབ་པའོ། །ཐ་ག་གཉིས་པ་ལ་བཞི་ལས། གཞི་ལ་ཡུལ་སྦྱིན་བདག་དང་ཐ་ག་པ་ཆོས་ལྔ་ལྡན་ནོ། །དངོས་པོ་གོས་ཀྱི་རྒྱུའི་དོག་པ་རུང་བ་ཚད་ལྡན། ཁྱིམ་པ་དེ་ཉིད་ཀྱི་ཡིན་པ་བཟོ་རྩོམ་མ་བྱས་པའོ། །རྟེན་སྦྱིན་བདག་དང་ཐ་ག་པས་མ་གནང་བའོ། །ཀུན་སློང་ཐ་ག་པ་བསྐྱེད་པར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་དོག་པ་ཟད་པའམ་བརྔན་པ་མ་བྱིན་པ་གང་རུང་གི་རྒྱུས་གོས་ཐོབ་པའོ། །བྱིན་འཕྲོག་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་རྫོགས་པའི་སྡོམ་པ་དང་ལྡན། ལྟ་བ། མཚན་མཐུན་པ། ཐ་སྙད་གསུམ་ལྡན། རྒྱུད་ཐ་དད། ལུས་ཐ་མལ་པར་གནས་པ་སྟེ་དྲུག་ལྡན་ནོ། །དངོས་པོ་དགེ་སློང་གི་ཡོ་བྱད་རུང་བ་ཚད་ལྡན་ཡུལ་དེར་དབང་བའོ། །ཀུན་སློང་རྐུ་སེམས་དང་ཡིད་གཅུགས་ལས་གཞན་པ་དང་། ཕན་སེམས་མེད་པར་གཏན་དུ་དབྲལ་འདོད་པའོ། །སྦྱོར་བ་རང་ངམ་བསྐོས་པས་ལུས་ངག་གང་ཡང་རུང་བས་འཕྲོག་པར་རྩོམ་པའོ། །མཐར་ཐུག་ཡུལ་གྱི་ལུས་ལས་བྲལ་བའམ་ཐོབ་པའོ། །སྟོན་ཟླ་ཐ་ཆུང་ཞེས་པ་དུས་ཀྱི་ཆ་སྡོམ་དུ་བླངས། བརྟད་པའི་སྤོང་བ་འདི་ལ་གསུམ་སྟེ། དབྱར་རྙེད་བདག་གིར་བྱས་པ་དང་། འགོད་སྔས་པ་དང་། འགོད་ཕྱིས་པའི་སྤང་ལྟུང་ངོ་། །དང་པོ་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན་རྫས་ཐ་དད་པའོ། །དངོས་པོ་ཟས་ལས་གཞན་པའི་དབྱར་རྙེད་རུང་བ་ཚད་ལྡན་ནོ། །བདག་ཉིད་དབྱར་ཁས་བླངས་པ་སྐལ་བ་ལེན་འདོད་པའོ། །དུས་དབྱར་གྱི་ནང་ཡིན་པ་བརྟད་པའི་དབང་གིས་མཐའི་ཞག་བཅུ་མ་ཡིན་པའོ། །བསམ་པ་ལ་འདུ་ཤེས་མ་འཁྲུལ་ཞིང་། ཀུན་སློང་བདག་གིར་བྱེད་འདོད་པའོ། །སྦྱོར་བ་དེ་ལྟར་རྩོམ་པ། མཐར་ཐུག་རྙེད་པ་ཐོབ་པའོ། །གཉིས་པ་ལ་གཞན་རྣམས་གོང་དང་འདྲ་ཞིང་། མཐའི་ཞག་བཅུ་ཡིན་མིན་དང་བརྟད་པའི་དབང་ཡིན་མིན་འདྲ། སྔ་མ་ནི་དབྱར་རྙེད་འགོད་པའི་ཆོ་ག་མ་བྱས་པ་ཡིན་ལ་འདི་ནི་བྱས་པ་ཡིན་ནོ། །གསུམ་པ་ལ་བཞི་ལས། གཞི་ལ་དངོས་པོ་ཟས་ལས་གཞན་པའི་དབྱར་རྙེད་རུང་བ་ཚད་ལྡན་རང་གི་ཡིན་པའོ། །བདག་ཉིད་སྐལ་བ་ལེན་འདོད་པ་རྙེད་པ་དབང་བ། རྙེད་པ་སྦེད་པ་མ་བསྐོས་པ་སྦྱིན་བདག་གི་ཚིག་གིས་དབང་མེད་པ་མ་ཡིན་པའོ། །བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་གནང་བའི་དུས་ལས་འདས་ཏེ་འཆང་བར་འདོད་པའོ། །མཐར་ཐུག་གནང་བའི་དུས་ལས་འདས་པའི་སྐྱ་རེངས་ཤར་བའོ། །གནང་བའི་དུས་ནི་དགག་དབྱེའི་ཉིན་བར་རོ། །མདོ་རྩ་དང་སོ་ཐར་གོ་རིམ་མི་མཐུན་པ་ཅི་ཡིན་ཞེ་ན། །རས་ཆེན་དང་བརྟད་པ་གཉིས་དབྱར་ལ་བརྟེན་པར་འདྲ་བས་གཞི་དང་ཞུ་བར་དེ་ལྟར་བཤད་ལ་སོ་ཐར་དུ་སྡེབ་སྦྱོར་གྱི་དབང་གིས་སོ་ཞེས་སྔ་མ་དག་བཞེད་དོ། །དགོན་པ་པ་དང་ཞེས་པ་བདག་ཉིད་ཀྱི་ཆའོ། །འདི་ལ་བཞི་ལས། གཞི་ལ་དངོས་པོ་ཆོས་གོས་གསུམ་གང་ཡང་རུང་བ། རུང་བ་ཚད་ལྡན་རང་གིས་བྱིན་གྱིས་བརླབ་པ་ཡིན་པའོ། །བདག་ཉིད་མི་འབྲལ་བའི་གནང་བ་ཐོབ་པ་དང་སྲ་བརྐྱང་བཏིང་བ་དང་། བར་ཆད་དང་ལྡན་པ་གསུམ་པོ་མ་ཡིན་པ་དང་དགོན་པ་པ་ཡིན་པའོ། །གནས་ཆོས་གོས་ཡོད་པ་ལས་ཐ་དད་པའོ། །ཀུན་སློང་ཐ་དད་དུ་འདུག་པར་འདོད་པའོ། །སྦྱོར་བ་ཐ་དད་དུ་འདུག་པའོ། །མཐར་ཐུག་བདུན་པའི་སྐྱ་རེངས་ཤར་བའོ། །རས་ཆེན་ཞེས་པ་དངོས་པོའི་ཆའོ། །འདི་ལ་བཞག་ཕྱིས་དང་བཙལ་སྔས་གཉིས་ལས། དང་པོ་ལ་བཞི་ལས། གཞི་ལ་དངོས་པོ་རང་གི་རས་ཆེན་རུང་བ་ཚད་ལྡན་རྙིང་པ་མ་ཡིན་པའོ། །བདག་ཉིད་རས་ཆེན་སྦེད་པ་ལ་མ་གཏད་པའོ། །ཀུན་སློང་འཆང་བར་འདོད་པའོ། །སྦྱོར་བ་གནང་བའི་དུས་ལས་འདའ་བར་འཆང་བའོ། །མཐར་ཐུག་དབྱར་རྫོགས་པའི་འོག་ཟླ་བ་ཕྱེད་ཀྱི་མཚན་མོ་འདས་པའོ། །བཙལ་སྔས་ལ་བཞི་ལས། གཞི་ལ་གང་ལ་བཙལ་བའི་ཡུལ་ནི་ཁྱིམ་པ་ཆོས་དྲུག་ལྡན་ནོར་མི་གཅིག་པ། ལུས་ཐ་མལ་པར་གནས་པ་མ་བླངས་པའི་སྔ་རོལ་དུ་སྟེར་བ་པོ་མ་ཡིན་པའོ། །དངོས་པོ་དབྱར་གྱི་རས་ཆེན་རུང་བ་ཚད་ལྡན་ཁྱིམ་པ་དེ་ཉིད་ལ་དབང་བ་རྙང་རྙིང་མ་ཡིན་པའོ། །དུས་གནང་བའི་སྔ་རོལ་དུའོ། །བསམ་པ་ལ་འདུ་ཤེས་མ་འཁྲུལ་ཞིང་། ཀུན་སློང་དུས་ཀྱི་སྔ་རོལ་དུ་ཚོལ་བར་འདོད་པ་རྒྱུན་མ་ཆད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་ཚོལ་བར་རྩོམ་པའོ། །མཐར་ཐུག་ལག་ཏུ་ཐོབ་པའོ། །བསྔོས་པ་ཞེས་པ་དངོས་པོའི་ཆའོ། །བསྔོས་པ་བསྒྱུར་བའི་སྤང་བ་འདི་ལ་བཞི་ལས། གཞི་ལ་དངོས་པོ་ནི་ཁ་ཟས་ལས་གཞན་པའི་རྙེད་པ་རུང་བ་ཚད་ལྡན་རྫོགས་པ་དྲུག་ལྡན་ནམ་དགེ་འདུན་ལ་བསྔོས་པའོ། །སྔོ་བ་པོའི་སྦྱིན་བདག་ནི་ཁྱིམ་པ་ཐ་སྙད་ལྔ་ལྡན་རང་དང་བསྔོས་པ་གཉིས་ལས་རྫས་ཐ་དད་པའོ། །བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་དང་ཡིད་གཅུགས་ལས་གཞན་པས་རང་ལ་བསྒྱུར་བར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་རང་ཉིད་ལ་བསྒྱུར་བར་རྩོམ་པའོ། །མཐར་ཐུག་ལག་ཏུ་ཐོབ་པའོ། །གསོག་འཇོག་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་སྨན་རྣམ་པ་བཞི་གང་རུང་གི་ངོ་བོར་གྲུབ་པ་གནས་སྐབས་དབང་བྱར་ཡོད་པ། རང་ཉིད་ཟ་བའི་ཆེད་དུ་རང་ངམ་རང་དང་འདྲ་བས་བྱིན་ལེན་བྱས་ལ་མ་ཞིག་པ། སྨན་གོང་མ་གསུམ་ལ་བྱིན་གྱིས་བརླབས་པའམ་མ་བརླབས་ཀྱང་བརླབས་པའི་ཤན་རྗེས་སུ་འབྲེལ་བ་གང་རུང་ངོ་། །བསམ་པ་ལ་འདུ་ཤེས་མ་འཁྲུལ་ཞིང་། ཀུན་སློང་རང་ཟ་བའི་དོན་དུ་དུས་ལས་འདས་པ་འཇོག་པར་འདོད་པ་རྒྱུན་མ་ཆད་པ། སྦྱོར་བ་དེ་ལྟ་བུ་རྩོམ་པ། མཐར་ཐུག་རང་རང་སོ་སོའི་དུས་ལས་འདས་པའོ། །སྤོང་བའི་ལྟུང་བྱེད་བཤད་ཟིན་ཏོ།། ༈ །།གཉིས་པ་བཤགས་པ་ཙམ་དང་འབྲེལ་བ་ལྟུང་བྱེད་འབའ་ཞིག་པའི་སྡེ་ལ། སྤྱི་སྡོམ་ལ། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་ཡང་དང་། །ཆུ་དང་ཁྱིམ་དང་བསམ་བཞིན་དང་། །འགྲོན་མང་རྐུན་མ་མཆོད་སྟོན་ནོ། །ཞེས་པ་ལྟར་བཅུ་ཚན་དགུ་ལས་བཅུ་ཚན་དང་པོ་ནི། །སྡོམ་ལ། །བརྫུན་སྐྱོན་དགེ་སློང་ཕྲ་མ་དང་། །སྐྱོ་སྔོགས་བྱེད་དང་སྟོན་པ་དང་། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཅེས་ཏེ། རྫུན་ཞེས་པ་དངོས་པོའི་ཆ་སྡོམ་དུ་བླངས། ཤེས་བཞིན་གྱི་བརྫུན་སྨྲ་བའི་ལྟུང་བྱེད་ལ་བཞི་ལས། གཞི་ལ་གང་ལ་སྨྲ་བའི་ཡུལ་ནི་རང་ལས་རྒྱུད་ཐ་དད་པ་ཐ་སྙད་ལྔ་ལྡན་ནོ། །དངོས་པོ་ནི་བརྫུན་དུ་སྨྲ་བ་སྟེ་ཕམ་པ་ལྷག་མ་སྦོམ་པོ་ཉེས་བྱས་བཤེས་ངོར་འཕྱ་བ། ཟས་ཅུང་སྐུར་འདེབས་ཉེར་འཇོག་སྤོང་བ་ད་གདོད་ཀྱི་བརྫུན་དྲུག་ལས་གཞན་པའོ། །བསམ་པ་ལ་འདུ་ཤེས་བསྒྱུར་བ་དང་། ཀུན་སློང་སྨྲ་བར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་བརྫུན་དུ་སྨྲ་བ་རྩོམ་པའོ། །མཐར་ཐུག་ཡུལ་དེས་ཚིག་ཐོས་ཤིང་དོན་གོ་བའོ། །སྐྱོན་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་ནི་རྫོགས་པ་དྲུག་ལྡན་ནོ། །དངོས་པོ་ནི་ཡུལ་དུས་དེར་སྐྱོན་དུ་གྲགས་པའོ། །ཀུན་སློང་བརྗོད་པར་འདོད་པ་རྒྱུན་མ་ཆད་པའོ། །སྦྱོར་བ་འཇམ་པོ་དང་རྩུབ་པོ་གང་ཡིན་ཀྱང་རུང་ངག་ཚིག་དྲུག་ལྡན་ནོ། །མཐར་ཐུག་ཚིག་ཐོས་ཤིང་དོན་གོ་བའོ། །དགེ་སློང་ཕྲ་མ་ཞེས་པ་ཡུལ་དང་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ནི་རྫོགས་པ་ཆོས་དྲུག་ལྡན། གཉིས་ཡན་ཆད་རང་ལས་རྒྱུད་ཐ་དད་པའོ། །དངོས་པོ་ནི་ཡུལ་དུས་དེར་ཕན་ཚུན་སྐྱོན་དུ་གྲགས་པའོ། །བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་མི་མཛའ་བ་མཛར་མི་འཇུག་པ་དང་། མཛའ་བ་འབྱེད་པར་འདོད་པ་རྒྱུན་མ་ཆད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་དེ་ལྟར་རྩོམ་པའོ། །མཐར་ཐུག་བྱེ་ཡང་རུང་མ་བྱེ་ཡང་རུང་ཚིག་ཐོས་ཤིང་དོན་གོ་བའོ། །སྐྱོ་སྔོགས་བྱེད་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ནི་རྫོགས་པ་ཆོས་དྲུག་ལྡན། གཉིས་ཡན་ཆད་སྔར་རྩོད་པ་ལ་ཞུགས་ནས་ད་ལྟ་ཞི་བ། བདག་ཉིད་ལས་རྒྱུད་ཐ་དད་པའོ། །དངོས་པོ་ནི་རྩོད་པ་རྣམ་པ་བཞི་གང་རུང་ཆོས་ཕྱོགས་སུ་ལེགས་པར་ཞི་བར་བྱས་པའོ། །གོ་བྱའི་ཡུལ་ནི་ཡུལ་དེ་དག་དང་ཞི་བྱེད་དུ་གཏོགས་པ་རྣམས་ལའོ། །བདག་ཉིད་རྩོད་པ་ཞི་བྱེད་དུ་གཏོགས་པའོ། །བསམ་པ་ལ་འདུ་ཤེས་ནི་རྩོད་པ་དེ་དག་ཞི་བ་ལ་ཞི་བར་ཡིད་གཉིས་ཡན་ཆད་ཀྱི་འདུ་ཤེས་མ་འཁྲུལ་བའོ། །ཀུན་སློང་རྩོད་པ་ཞི་བ་སྤང་བར་འདོད་པའོ། །སྦྱོར་བ་ངག་མཚན་ཉིད་དྲུག་ལྡན་གྱིས་རྩོད་པ་སློང་བར་རྩོམ་པའོ། །མཐར་ཐུག་ཚིག་ཐོས་ཤིང་དོན་གོ་ནའོ། །སྟོན་པ་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ནི་བུད་མེད་ཐ་སྙད་བཞི་ལྡན་མཚན་གྱིས་དོན་བྱེད་ནུས་པའོ། །ཁྱིམ་པ་ཉེ་དུ་མ་ཡིན་པ་རྫུ་འཕྲུལ་དང་མི་ལྡན་ཞིང་ཉན་འདོད་པའོ། །དངོས་པོ་སངས་རྒྱས་སམ་ཉན་ཐོས་ཀྱིས་གསུངས་པའི་ཆོས་ཚད་ལྡན་ཡུལ་དེས་མི་ཤེས་པ། གནས་དང་དུས་གཅིག་པ་ཡོན་བཤད་པ་སོགས་མ་ཡིན་པའོ། །བདག་ཉིད་རིག་པའི་སྐྱེས་པ་དང་མི་ལྡན་པའོ། །ཀུན་སློང་སྟོན་པར་འདོད་པའོ། །སྦྱོར་བ་འདྲའོ། །མཐར་ཐུག་ཚིག་ལྔའམ་དྲུག་ལས་ལྷག་པའོ། །འདོན་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་མ་རྫོགས་པ་ཐ་སྙད་ལྔ་ལྡན་བསམ་པ་ཐག་པ་ནས་འདོན་པར་འདོད་པ། དངོས་པོ་འདྲའོ། །བདག་ཉིད་མཉམ་པོའམ་མཇུག་ཏུ་འདོན་འདོད་པའོ། །ཀུན་སློང་འདོན་པར་འདོད་པའོ། །སྦྱོར་བ་འདྲ། མཐར་ཐུག་བཏོན་པའོ། །གནས་ངན་ལེན་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་ལྔ་ལྡན། དངོས་པོ་ཕམ་ལྷག་གང་རུང་དང་དེ་ལས་བྱུང་བའོ། །གོ་བྱ་མ་རྫོགས་པ་ཐ་སྙད་ལྔ་ལྡན་ཕམ་ལྷག་མི་ཤེས་པ་བདག་ཉིད་གླེང་བར་བསྐོ་བ་དང་གསོལ་བ་མ་བྱས་པའོ། །ཀུན་སློང་གནས་ངན་ལེན་བརྗོད་པར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་དོན་གོ་བའོ། །ཆོས་ཞེས་པ་དངོས་པོའི་ཆའོ། །མི་ཆོས་བླ་མ་བདེན་པ་བརྗོད་པ་འདི་ལ་བཞི་ལས། གཞི་ལ་ཡུལ་མ་རྫོགས་པ་ཐ་སྙད་ལྔ་ལྡན། བདེན་པ་མ་མཐོང་བའོ། །དངོས་པོ་མིའི་ཆོས་བླ་མའི་མཚན་ཉིད་ཅན་རང་གིས་ཐོབ་པའོ། །ཀུན་སློང་དེ་བརྗོད་པར་འདོད་པའོ། །སྦྱོར་མཐའ་འདྲའོ། །བཤེས་ངོར་བྱེད་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་རྫོགས་པ་ཆོས་དྲུག་ལྡན་ནོ། །བསྔོ་ས་གང་ཟག་ཐ་སྙད་ལྔ་ལྡན་རང་དང་དེ་ལས་རྫས་ཐ་དད་པའོ། །དངོས་པོ་དགེ་འདུན་གྱིས་ཟས་མ་ཡིན་པའི་རྙེད་པ་རུང་བ་ཚད་ལྡན་ཡང་དག་པར་བསྔོས་པའོ། །བདག་ཉིད་མཐུན་ཏེ་རུང་བའི་ལས་དེ་ལ་གཏོགས་པའོ། །གོ་བྱ་ཐ་སྙད་ལྔ་ལྡན་རང་ལས་རྒྱུད་ཐ་དད་པའོ། །ཀུན་སློང་སྐུར་པར་འདོད་པའོ། །སྦྱོར་མཐའ་གཉིས་འདྲའོ། །ཁྱད་དུ་གསོད་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་འདུལ་བར་གཏོགས་པའི་བསླབ་པའི་གཞི་ཡིན་པའོ། །གོ་བྱ་དགེ་སློང་ཆོས་དྲུག་ལྡན་ནོ། །ཁ་ཅིག་གནས་དང་དུས་གསོ་སྦྱོང་གི་ཚེ་ཡིན་པ་དགོས་གསུང་ངོ་། །ཀུན་སློང་ཁྱད་དུ་གསོད་འདོད་པའོ། །སྦྱོར་མཐའ་གཉིས་འདྲའོ། །བཅུ་ཚན་གཉིས་པ་ནི། སྡོམ་ལ། ས་བོན་འཕྱ་བ་བསྒོ་བ་དང་། །ཁྲི་དང་གདིང་དང་སྐྲོད་པ་དང་། །ཕྱིས་སྣོན་འབྱུང་བ་འདེབས་པ་དང་། །རིམ་པ་གཉིས་སུ་རྩིག་པའོ། །ཞེས་ཏེ། །ས་བོན་ཅེས་པ་དངོས་པོའི་ཆ་སྡོམ་དུ་བླངས། འདི་ལ་བཞི་ལས། གཞི་ལ་དངོས་པོ་ས་བོན་སྐྱེ་བ་རང་གི་ཆོས་སུ་གྲུབ་པ་དང་། མ་ཉམས་པ་རུང་བར་མ་བྱས་པའོ། །བདག་ཉིད་རྫུ་འཕྲུལ་དང་སྤྲུལ་པའི་གནས་སྐབས་མ་ཡིན་པ། བར་ཆད་མི་ལྡན་པ་དོན་ཁྱད་པར་ཅན་བསྒྲུབ་པའི་གནས་སྐབས་མ་ཡིན་པའོ། །ཀུན་སློང་ཉམས་པར་འདུན་པ། སྦྱོར་བ་རང་ངམ་གཞན་གྱིས་རྩོམ་པ། མཐར་ཐུག་ཉམས་པར་གྱུར་པའོ། །འཕྱ་བ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ནི་རྫོགས་པ་དྲུག་ལྡན། དགེ་འདུན་གྱི་ཞལ་ཏ་ཚུལ་བཞིན་དུ་བྱས་ཟིན་པའམ་བྱེད་བཞིན་པ་གང་ཟག་བཅུ་གཉིས་ཀྱིས་བསྡུས་པ། བདག་ཉིད་ལ་གནས་མལ་སོགས་ལོག་པར་སྟོབ་པ་པོ་མ་ཡིན་པ་བདག་ཉིད་ངན་པའི་གྲངས་སུ་བགྲངས་པའོ། །དངོས་པོ་ནི་བདག་དང་འབྲེལ་པའི་དོན་གྱིས་འཕྱ་བ་སྟེ། ཁྱོད་ཀྱིས་བདག་ལ་གནས་མལ་ལོག་པར་བསྟབས་སོ་ཞེས་ངོར་འཕྱ་བ་དང་། གང་ཟག་འགའ་ཞིག་གིས་བདག་ལ་ལོག་པར་བསྟབས་སོ་ཞེས་ཟུར་གྱིས་བཞོག་འཕྱས་ཀྱིས་ཀྱང་རུང་ངོ་། །ཀུན་སློང་བརྫུན་གྱི་སྒོ་ནས་འཕྱ་བར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་དོན་གོ་བའོ། །གང་ཟག་བཅུ་གཉིས་ནི། གནས་མལ་ཟས་ལ་བསྒོ་བ་གཉིས། །ཐུག་པ་བག་འཚོས་འགྲིམ་པ་གཉིས། །ཕྲན་ཚེགས་འགྲིམ་པར་བྱེད་པ་དང་། །སྣོད་སྤྱད་འབྲུབ་དང་གོས་ཀྱིས་གཉིས། །དབྱར་གྱི་རས་ཆེན་སྦེད་དང་འགྱེད། །མངག་གཞུག་པ་དང་མཛེས་ཆོས་ཏེ། །ཞེས་པ་ལྟར་རོ། །བསྒོ་བ་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་ནི་རྫོགས་པ་དྲུག་ལྡན། བདག་ཉིད་ལ་ཆོས་དང་ལྡན་པ་བསྒོ་བ་པོ་ཡིན་པའོ། །བདག་ཉིད་ངན་པའི་གྲངས་སུ་བགྲངས་པའོ། །ཀུན་སློང་རྣ་ལ་གཟོན་པར་འདོད་པའོ། །སྦྱོར་མཐའ་འདྲའོ། །ཁྲི་དང་ཞེས་པ་དངོས་པོའི་ཆའོ། །གནས་མལ་གྱི་ལྟུང་བྱེད་འདི་ལ་བཞི་ལས། གཞི་ལ་གང་ལོག་པར་སྒྲུབ་པའི་དངོས་པོ་ནི་དགེ་འདུན་རྫོགས་པ་དྲུག་ལྡན་གྱི་གནས་མལ་རུང་བ་ཚད་དང་ལྡན་པ་ཆུད་ཟ་བའི་དགག་བྱ་ཡོད་པ། རང་ངམ་བསྐོས་པས་བཏིང་ངམ་སྤྱད་པའོ། །བདག་ཉིད་དང་བསྡུ་བ་ཁས་བླངས་སམ་བསྡུ་བའི་སྦྱོར་བ་མ་བྱས་པ་རྫུ་འཕྲུལ་དང་སྤྲུལ་པའི་གནས་སྐབས་མ་ཡིན་པ། དོན་ཁྱད་པར་ཅན་བསྒྲུབ་པའི་སྐབས་མ་ཡིན་པ་བར་ཆད་དང་མི་ལྡན་པའོ། །ཀུན་སློང་མལ་ཆ་མི་བསྡུ་བར་འདོད་པའོ། །སྦྱོར་བ་རང་དགར་ནང་དུ་འཇུག་པ་དང་འགྲོ་བར་རྩོམ་པའོ། །མཐར་ཐུག་འདོམ་བཞི་བཅུ་རྩ་དགུ་འདས་པའམ་ཕེན་ཕུན་དུ་གྱུར་པའོ། །ཕེན་ཕུན་ནི་གསུམ་སྟེ་རླུང་གིས་མགོ་མཇུག་བཟློག་པ་དང་། ཆར་པས་རིམ་པ་གཞན་དུ་སླེབ་པ་དང་། འབུ་སྲིན་གྱིས་རིམ་པ་གཞན་དུ་སླེབ་པའོ། །གདིང་དང་ཞེས་པ་དངོས་པོའམ་སྦྱོར་བའི་ཆའོ། །འདི་ལ་བཞི་ལས། གཞི་ལ་ལོག་པར་སྒྲུབ་པའི་གནས་ནི་དགེ་འདུན་མཚན་ཉིད་དང་ལྡན་པའི་གཙུག་ལག་ཁང་ཡིན་པ། གནས་ཀྱི་མཚན་ཉིད་དུ་གྲུབ་པ་སྤྱོད་ལམ་བཞིའི་སྣོད་ཡིན་པ། ཆུད་ཟ་བའི་དགག་བྱ་ཡོད་པའོ། །དངོས་པོ་ནི་རྩྭའམ་ལོ་མའི་གདིང་བ་ཚད་དང་ལྡན་པའོ། །བདག་ཉིད་དང་བསམ་པ་དང་སྦྱོར་བ་དང་མཐར་ཐུག་གོང་བཞིན་ནོ། །སྐྲོད་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གང་སྐྲོད་པར་བྱ་བ་རྫོགས་པ་དྲུག་ལྡན་རང་ལས་སྔ་བར་ཞུགས་པའོ། །གནས་དགེ་འདུན་གྱི་གཙུག་ལག་ཁང་མཚན་ཉིད་དང་ལྡན་པ་ནས་སོ། །ཀུན་སློང་ཕན་སེམས་མ་གཏོགས་པ་སྐྲོད་པར་འདོད་པའོ། །སྦྱོར་བ་རང་ངམ་བསྐོས་པས་སྐྲོད་པའོ། །མཐར་ཐུག་ཉེ་འཁོར་ལས་འདས་པའོ། །ཕྱིས་གནོན་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ནི་སྔར་དང་འདྲ། ཀུན་སློང་རང་དགར་ན་བ་དང་། འཇིགས་པའི་དབང་མ་གཏོགས་པར་ཕྱིས་གནོན་བྱེད་པར་འདོད་པ། སྦྱོར་བ་ལུས་ངག་གང་ཡང་རུང་བས་ཕྱིས་གནོན་བྱེད་པར་རྩོམ་པའོ། །མཐར་ཐུག་ཡུལ་དེས་དོན་གོ་བའོ། །འབྱུང་བ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་གང་ལ་ལོག་པར་སྒྲུབ་པའི་གནས་ནི་དགེ་འདུན་གྱི་གཙུག་ལག་ཁང་ཐོག་རྡོལ་བའི་ཉེན་ཡོད་པའོ། །དངོས་པོ་ནི་ཁྲིའི་རྩ་བ་ཕུར་བུ་ལྟར་རྣོ་བ་ཐོག་ལ་མི་གནོད་པའི་ཐབས་མ་བྱས་པའོ། །ཀུན་སློང་རང་དགར་ཁྲིའི་སྟེང་དུ་འདུག་པར་འདོད་པའོ། །སྦྱོར་བ་དེ་ལྟར་རྩོམ་པའོ། །མཐར་ཐུག་འདུག་ཙམ་ཉིད་ནའོ། །འདེབས་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དུད་འགྲོའི་སྐྱེ་གནས་སུ་གཏོགས་པ། ཐ་མལ་པའི་མིག་ལམ་དུ་སྣང་དུ་རུང་བ། རྩྭ་ཤིང་སོགས་གཞི་དང་བཅས་པའོ། །ཀུན་སློང་སེམས་ཅན་གྱི་སྲོག་ལ་ལྟོས་པ་མེད་པར་གཞན་དོན་དུ་འདེབས་པར་འདོད་པའོ། །སྦྱོར་བ་རང་ངམ་བསྐོས་པས་འདེབས་པར་ཞུགས་པའོ། །མཐར་ཐུག་རང་ཤི་བའི་སྔ་རོལ་དུ་སྲོག་ཆད་པའོ། །རིམ་པ་གཉིས་སུ་བརྩིགས་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གང་བརྩིགས་པའི་དངོས་པོ་ནི་གཙུག་ལག་ཁང་སྤྱོད་ལམ་བཞི་ཤོང་བ། ཕལ་ཆེར་གཡོགས་ཤིང་ཕལ་ཆེར་སྐོར་བ་ལ་སོགས་པ་གནས་ཀྱི་མཚན་ཉིད་དུ་གྲུབ་པ། འཇིག་པའི་རྟེན་དང་བཅས་པ་སྔར་བཟོ་རྩོམ་མ་བྱས་པའོ། །བདག་ཉིད་མི་འཇིག་པའི་ཐབས་མ་བྱས་པ་གཞན་གྱིས་དབང་མེད་དུ་མ་བསྐུལ་བའོ། །དུས་འཇིམ་པས་སྦྱར་བ་སོགས་མ་བྱས་ན་ཉི་མ་དུ་མ་བྱས་ན་ཉི་མ་གཅིག་གོ །ཀུན་སློང་ཕ་གུ་རིམ་པ་གསུམ་ལས་ལྷག་པར་རྩིག་པར་འདོད་པའོ། །སྦྱོར་བ་རང་ངམ་བསྐོས་པས་དེ་ལྟར་རྩོམ་པའོ། །མཐར་ཐུག་ཕ་གུ་རིམ་པ་བཞི་པའི་སྣ་ཚུན་ཆད་འཕྲོད་པ་ནའོ། །བཅུ་ཚན་གསུམ་པ་ནི། སྡོམ་ལ། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཞེས་ཏེ། མ་བསྐོས་ཞེས་པ་བདག་ཉིད་ཀྱི་ཆ་སྡོམ་དུ་བླངས། འདི་ལ་བཞི་ལས། གཞི་ལ་གང་ལ་སྟོན་པའི་ཡུལ་ནི་དགེ་སློང་མ་ཆོས་དགུ་ལྡན། བསམ་པ་ཐག་པ་ནས་ཉན་འདོད་པའོ། །དངོས་པོ་ལུང་གི་ཆོས་ཚད་དང་ལྡན་པའོ། །བདག་ཉིད་དགེ་སློང་མའི་སྟོན་པར་མ་བསྐོས་པའམ་བསྐོས་ཀྱང་ཡོན་ཏན་ཚང་བར་མི་ལྡན་པ། དགེ་འདུན་དུ་མ་ལོངས་པའི་ཚེ་གསོལ་བ་མ་བཏབ་པ། མིའི་ཆོས་བླ་མའི་མཐུ་དང་མི་ལྡན་པའོ། །ཀུན་སློང་ཆོས་སྟོན་པར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་དོན་གོ་བའོ། །ཉི་མ་ནུབ་པ་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་ཡུལ་དང་དངོས་པོ་སྔར་དང་འདྲ། ཁྱད་པར་ནི་གནས་འཇིགས་པ་དང་བཅས་པ་དུས་ཉི་མ་ནུབ་ནས་སྐྱ་རེངས་མ་ཤར་བ། མཚན་ཐོག་ཐག་ཏུ་སྟོན་པའི་སྐབས་མ་ཡིན་པའོ། །གཞན་གསུམ་སྔ་མ་དང་འདྲའོ། །ཟས་དང་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་ཟང་ཟིང་ཅུང་ཟད་ཙམ་གྱི་ཕྱིར་ཆོས་སྟོན་པ་མ་ཡིན་པའོ། །གོ་བྱ་ཐ་སྙད་ལྔ་ལྡན་ལུས་ཐ་མལ་པར་གནས་པ་རྒྱུད་ཐ་དད་པའོ། །ཀུན་སློང་བརྫུན་གྱི་སྒོ་ནས་སྐུར་བར་འདོད་པའོ། །སྦྱོར་མཐའ་འདྲའོ། །ཆོས་གོས་གཉིས་ཞེས་པ་དངོས་པོའི་ཆའོ། །དང་པོ་དགེ་སློང་མའི་གོས་བྱེད་པའི་ལྟུང་བྱེད་ལ་བཞི་ལས། གཞི་ལ་ཡུལ་དགེ་སློང་མ་བརྒྱད་ལྡན་ནོ། །དངོས་པོ་གོས་རུང་བ་ཚད་ལྡན་དགེ་སློང་མ་དེ་ཉིད་ཀྱི་ཡིན་པ་དང་། དེས་བདག་ལ་ངག་གིས་སྩལ་བ་སྔར་བཟོ་རྩོམ་མ་བྱས་པའོ། །ཀུན་སློང་བཟོ་བྱེད་འདོད་པའོ། །སྦྱོར་བ་རྩོམ་པ། མཐར་ཐུག་བཟོ་རྩོམ་རྫོགས་པའོ། །གཉིས་པ་དགེ་སློང་མ་ལ་གོས་སྦྱིན་པའི་ལྟུང་བྱེད་ལ་བཞི་ལས། གཞི་ལ་ཡུལ་དགེ་སློང་མ་ཆོས་བརྒྱད་ལྡན་དགེ་འདུན་ལ་གོས་འབུལ་བ་ལེན་པ་སོགས་ལྔ་མ་ཡིན་པས་རྫས་ཐ་དད་པའོ། །དངོས་པོ་གོས་རུང་བ་ཚད་ལྡན་རང་གི་ཡིན་པའོ། །བདག་ཉིད་དད་པ་ཅན་དང་སེམས་ཡེངས་ཅན་མ་ཡིན་པ་དང་རུང་མི་རུང་བརྗེ་བ་མ་ཡིན་པའོ། །ཀུན་སློང་སྟེར་བར་འདོད་པའོ། །སྦྱོར་བ་སྟེར་བར་རྩོམ་པའོ། །མཐར་ཐུག་དེས་ལག་ཏུ་ཐོབ་པའོ། །དོན་མཐུན་ཞེས་པ་གྲོགས་ཀྱི་ཆའོ། །འདི་ལ་བཞི་ལས། གཞི་ལ་ཉེ་དུ་མ་ཡིན་པ་འཇིགས་པའི་དབང་མ་གཏོགས་པ་དགེ་སློང་མ་ཆོས་བརྒྱད་ལྡན་བདག་ཉིད་ལ་ཕན་འདོགས་པ་མ་ཡིན་པ་དང་། འཐམས་པའོ། །ལམ་ས་ལ་བརྟེན་པ་རྒྱང་གྲགས་སུ་ལོངས་པ་འཇིགས་པ་དང་བཅས་པ་མ་ཡིན་པ། དུས་ཉི་མ་གཅིག་གི་དུས་ཡིན་པའོ། །ཀུན་སློང་ལམ་གཅིག་ལ་འགྲོ་བར་འདོད་པའོ། །སྦྱོར་བ་འགྲོ་བར་རྩོམ་པའོ། །མཐར་ཐུག་རྒྱང་གྲགས་ལས་འདས་པའོ། །གྲུ་དང་ཞེས་པ་དངོས་པོའི་ཆའོ། །འདི་ལ་ལམ་ལ་ཆུའི་ལམ་ཞེས་དང་། འགྲམ་གཉིས་འཇིགས་པ་དང་བཅས་པ་དང་ཐད་ཀར་ཞེས་སྦྱར་གཞན་འདྲའོ། །དབེན་པ་གཉིས་ཞེས་པ་གནས་ཀྱི་ཆའོ། །འདི་ལ་གཉིས་ལས། དང་པོ་བུད་མེད་དང་འདུག་པའི་ལྟུང་བྱེད་ལ་བཞི་ལས། གཞི་ལ་ཡུལ་བུད་མེད་ཀྱི་མཚན་དོན་བྱེད་ནུས་པ་ཐ་སྙད་ཕྱེད་དང་ལྔ་ལྡན་པ་ལུས་བསྟེན་དུ་རུང་བ་རྫུ་འཕྲུལ་མ་ཐོབ་པ་ཉེ་དུ་མིན་པ་གྲོགས་དང་མི་ལྡན་པ་ལུས་ཐ་མལ་པར་གནས་པ་བདག་ཉིད་ལ་ཕན་འདོགས་པ་མིན་པ་འདུག་པའི་སྤྱོད་ལམ་ཅན་ནོ། །གནས་ཕྱོགས་དབེན་པ་སྐྱབས་བཅས་འདོམ་གང་གི་ནང་ཡིན་པའོ། །བདག་ཉིད་ཀྱང་འདུག་པའོ། །ཀུན་སློང་འདུག་པར་འདོད་པའོ། །སྦྱོར་བ་རྩོམ་པ། མཐར་ཐུག་རྐུབ་ཙོས་ཙམ་ས་ལ་གཞག་པའོ། །གཉིས་པ་བུད་མེད་དང་ལྷན་ཅིག་འགྲེང་བའི་ལྟུང་བྱེད་ལ་སྦྱོར་བ་འགྲེང་བ་དང་། ཡུལ་དགེ་སློང་མ་ཞེས་སྦྱར། གཞན་འདྲའོ། །དགེ་སློང་མས་སྦྱོར་བཅུག་པ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན་རྫས་ཐ་དད་པའོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་མགྲོན་གཅིག་གི་ཚད་དུ་ལོངས་པ་སྦྱིན་བདག་དེ་ཉིད་ཀྱི་ཡིན་པ། བདག་ཉིད་ཀྱིས་ཡང་དག་པ་མ་ཡིན་པའི་ཡོན་ཏན་གྱིས་སྦྱོར་དུ་བཅུག་པ་ཡིན་པའོ། །སྦྱོར་བྱེད་དགེ་སློང་མ་ཆོས་བརྒྱད་ལྡན་ནོ། །བདག་ཉིད་མགྲོན་དུ་མ་བོས་སམ་བོས་ཀྱང་ལྷག་པའོ། །ཀུན་སློང་ཟ་བར་འདོད་པའོ། །སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པའོ། །བཅུ་ཚན་བཞི་པ་ནི། སྡོམ་ལ། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབ་པ་དང་། །འདུས་དང་དུས་མིན་གསོག་འཇོག་དང་། །ཁ་ནས་མིད་དང་བསོད་པ་ཉིད། །ཅེས་ཏེ། ཡང་ཡང་ཞེས་པ་དུས་ཀྱི་ཆ་སྡོམ་དུ་བླངས་པའོ། །འདི་ལ་བཞི་ལས། གཞི་ལ་ཡུལ་དེ་གཉིས་ཁྱིམ་པ་ཐ་སྙད་ལྔ་ལྡན་དེ་གཉིས་ཕན་ཚུན་དང་བདག་ཉིད་ལས་རྫས་ཐ་དད་པ་དང་། ནར་མར་སྦྱོར་བ་མིན་པ་བསམ་པ་ཐག་པས་འབོད་པ་པོ་ཡིན་པའོ། །ཟས་དེ་གཉིས་བཟའ་བ་ལྔའི་ཁོངས་སུ་གཏོགས་པ་རུང་བ། མགྲོན་བོས་ཀྱི་ཚད་དུ་ལོངས་པ་ཕན་ཚུན་ཁོངས་སུ་གཏོགས་པ་མིན་པ་ཕྱི་མ་ལ་རྙེད་པ་མེད་པའོ། །བདག་ཉིད་ན་བ་ལས་བྱས་པ་ལམ་དུ་ཞུགས་པ་སྲ་བརྐྱང་བཏིང་བ་བཞི་དང་། བདག་ཉིད་ཀྱི་ཕྱིར་མིན་པར་དགེ་འདུན་བོས་པ་མིན་པའོ། །དུས་མུ་གེའི་དུས་མ་ཡིན་པ་དང་ཉི་མ་གཅིག་ཡིན་པའོ། །ཀུན་སློང་སོགས་གསུམ་སྔ་མ་བཞིན་ནོ། །འདུག་གནས་གཅིག་ཅེས་པ་གནས་ཀྱི་ཆའོ། །འདི་ལ་བཞི། གཞི་ལ་གནས་དེའི་བདག་པོ་ཁྱིམ་པ་ཆོས་ལྔ་ལྡན་ནོ། །དེའི་མཆོད་གནས་སུ་མུ་སྟེགས་ཅན་ཐ་སྙད་གསུམ་ལྡན་བཞིར་ལོངས་པའོ། །གནས་གནས་ཀྱི་མཚན་ཉིད་དུ་གྲུབ་པ་ཡ་མཚན་ཅན་སྤྱིའི་གནས་མ་ཡིན་པའོ། །དངོས་པོ་སྔ་མ་དང་འདྲ་བར་མངོན་ཏེ། ཊཱི་བམ་དུ། བཙུན་པ་རེ་ཞིག་དགེ་སློང་གིས་བཟར་བགྱི་བ་མ་གཏོགས་པ་དེ་ལས་གཞན་པའི་བཅའ་བ་དང་བཏུང་བ་དང་གཞིབ་པ་དང་ལྡག་པ་དག་འཚལ་ན། ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །བཟའ་བ་ཞེས་པ་ནི་འབྲས་ཆན་ལ་སོགས་པ་ལྔ་ཡིན་ནོ་ཞེས་གསུངས་པའི་ཕྱིར་རོ། །ཞེས་དམར་སྟོན་བཞེད་ལ། བླ་མ་དག་དུས་རུང་། རུང་བ་ཚད་ལྡན་ཡིན་པར་གསུངས་སོ། །འདུག་གནས་པ་དེ་ཉིད་ཀྱི་ཡིན་པའོ། །རྟེན་ནད་པ་དང་སྟོབ་པ་མ་ཡིན་པ་དང་། ཞག་གཅིག་གནས་ཤིང་ཟན་གཅིག་ཟོས་པའོ། །གསུམ་འདྲའོ། །ཕྱེ་དང་ཞེས་པ་དངོས་པོའི་ཆའོ། །ལྷུང་བཟེད་དོ་གསུམ་ཙམ་ལས་ལྷག་པ་ལེན་པའི་ལྟུང་བྱེད་འདི་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན། ཡོངས་སུ་དཔགས་པ་དང་ཅི་བདེར་སྟོབ་པ་མ་ཡིན་པའོ། །དངོས་པོ་འདྲ་བ་ལས་བྲེ་ཕྱེད་དང་ལྔ་ལས་བྲེ་ཕྱེད་དང་། ཕུལ་ཕྱེད་དང་ལྔ་ཡན་ཆད་ལས་ལྷག་པ་སྟེ་གཡོས་སུ་བྱས་པའོ། །གནས་དེ་ལས་གཞན་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་མགུལ་དུ་མིད་པའོ། །བཅའ་དང་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན་ལྷག་པོར་མ་བྱས་ཤིང་དཀོན་ཟས་མ་ཡིན་པའོ། །བདག་ཉིད་སྤངས་པ་ཡོངས་རྫོགས་ཡིན་ཞིང་། ནད་པ་དང་མིད་པ་གཉིས་པ་མ་ཡིན་པའོ། །དུས་སྤངས་པ་ཉིན་མཚན་གྱི་དུས་ཡིན་པ་དང་། མུ་གེའི་དུས་མ་ཡིན་པའོ། །ཀུན་སློང་ཟ་བར་འདོད་པ། སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པའོ། །སྟོབ་པ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན། སྤངས་པ་ཡོངས་རྫོགས་ནད་པ་མ་ཡིན་པའོ། །དངོས་པོ་དང་དུས་འདྲའོ། །ཀུན་སློང་སྟོབ་པར་འདོད་པ། སྦྱོར་བ་ངག་དྲུག་ལྡན། མཐར་ཐུག་དོན་གོ་བའོ། །འདུས་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གནས་ནི་མཚམས་ནང་ཡིན་པ་དང་། གཞན་དགེ་འདུན་དུ་ལོངས་པ་ཡོད་པའོ། །ཡུལ་ནི་དགེ་སློང་ཆོས་ལྔ་ལྡན་གསུམ་ཡན་ཆད་དུ་ལོངས་པའོ། །ཅིག་ཆར་དང་ལྷན་ཅིག་ཏུ་ཟ་བ་པོ་ཡིན་པའོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན། མུ་གེ་དང་དུས་སྟོན་ཆེན་པོའི་ཟས་ལས་གཞན་པ་དང་ཟས་གཅིག་པ་མ་ཡིན་པའོ། །བདག་ཉིད་ན་བ་དང་ལས་བྱས་པ་དང་ལམ་དུ་ཞུགས་པ་དང་སྲ་བརྐྱང་བཏིང་བ་བཞི་མ་ཡིན་པའོ། །ཀུན་སློང་ཟ་བར་འདོད་པ་དང་། སྦྱོར་བ་ཟ་བར་རྩོམ་པའོ། །མཐར་ཐུག་མགུལ་དུ་མིད་པའོ། །དུས་མིན་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་གང་ཟ་བར་བྱ་བའི་དངོས་པོ་ནི་དུས་རུང་གི་ཁ་ཟས་རུང་བ་ཚད་དང་ལྡན་པ། མིད་པ་གཉིས་ཀྱི་སྒྲེགས་པ་བཞི་ཕན་ཆད་མ་ཡིན་པའོ། །དུས་ནི་རང་གླིང་གི་ཉི་མ་ཕྱེད་ཡོལ་ནས་ཉི་མ་མ་ཤར་བའི་བར་མུ་གེའམ་མུ་གེ་དང་འདྲ་བའི་དུས་མ་ཡིན་པའོ། །བདག་ཉིད་དེས་ཕན་པའི་ནད་ཅན་མ་ཡིན་པའོ། །ཀུན་སློང་ཟ་བར་འདོད་པ་རྒྱུན་མ་ཆད་པ། སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པའོ། །གསོག་འཇོག་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་བཟའ་བར་བྱ་བའི་དངོས་པོ་ནི་སྨན་རྣམ་པ་བཞི་ལས་གང་རུང་གི་ངོ་བོར་ཡོངས་སུ་གྲུབ་པ། ཆོ་གའི་སྒོ་ནས་མི་རུང་བ། གཞི་གཞན་གྱི་རུང་བ་ཚད་དང་ལྡན་པ། རང་ངམ་རང་དང་འདྲ་བས་གསོག་འཇོག་མཚན་ཉིད་པར་གྱུར་པ་མ་ཞིག་པའོ། །དུས་མུ་གེའམ་མུ་གེ་དང་འདྲ་བ་མ་ཡིན་པའོ། །བདག་ཉིད་ནད་པ་མ་ཡིན་པའོ། །བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་གསོག་འཇོག་ཏུ་གྱུར་པ་ཟ་བར་འདོད་པ་རྒྱུན་མ་ཆད་པའོ། །སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པའོ། །ཁ་ནས་མིད་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་ཆུ་དང་སོ་ཤིང་ལས་གཞན་པ་དང་། བྱིན་ལེན་དང་མ་འབྲེལ་བ་དང་། མགུལ་དུ་མིད་པ་མངོན་པའོ། །བདག་ཉིད་ནད་པ་དང་ཟན་ཆད་པ་མ་ཡིན་པའོ། །གནས་ནི་སྒྲ་མི་སྙན་ནམ་དེ་དང་འདྲ་བ་མ་ཡིན་པའོ། །ཀུན་སློང་ཟ་བར་འདོད་པའོ། །སྦྱོར་བ་ཟ་བར་རྩོམ་པའོ། །མཐར་ཐུག་མགུལ་དུ་མིད་པའོ། །བསོད་པ་ཉིད་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་ཡུལ་དུས་དེར་ཟས་བསོད་པར་གྲགས་པ། རུང་བ་ཚད་དང་ལྡན་པ་སྦྱིན་བདག་དེ་ཉིད་ཀྱི་ཡིན་པའོ། །ཡུལ་ཁྱིམ་པ་ཐ་སྙད་ལྔ་ལྡན་ཉེ་དུ་མ་ཡིན་པ་རྫས་ཐ་དད། མ་བླངས་པར་སྟེར་བ་པོ་མ་ཡིན་པ་ལུས་ཐ་མལ་པར་གནས་པ་སྟེ་ཆོས་དྲུག་ལྡན་ནོ། །བདག་ཉིད་ནད་པ་དང་ཅི་བདེར་བསྟབས་པ་མ་ཡིན་པའོ། །ཀུན་སློང་བླངས་ཏེ་ཟ་བར་འདོད་པའོ། །སྦྱོར་བ་རང་གི་ངག་ཏུ་བདག་ཉིད་དང་འབྲེལ་བར་བསམ་པའི་དོན་གསལ་པོར་མངོན་སུམ་དུ་སྨྲས་པ་སྟེ་དྲུག་ལྡན་ནོ། །མཐར་ཐུག་མགུལ་དུ་མིད་པའོ།། ༈ །།བཅུ་ཚན་ལྔ་པ་ནི། སྡོམ་ལ། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་བཤམ་དཀྲུགས་འགྲོ་བ་དང་། །བརྡེག་དང་གཟས་དང་གནས་ངན་ལེན། །ཞེས་ཏེ། སྲོག་ཆགས་བཅས་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་སྔར་འདེབས་པའི་ལྟུང་བ་དང་འདྲ་བ་ལས། འདི་རང་ཆེད་ཅེས་སྦྱར། གཞན་གསུམ་པོ་འདྲའོ། །ཉལ་སར་འདུག་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གནས་གཞན་ཡིན་པ། གེགས་བྱེད་གཞན་མེད་པ་མངོན་སུམ་ཡིན་པའོ། །རྣམ་ཊཱིཀ་ལས་འདོམ་གང་གི་ནང་ཡིན་པར་བཤད་དོ། །བདག་ཉིད་བར་ཆད་མི་ལྡན་པ་དང་འདུག་པའོ། །ཡུལ་ནི་སྐྱེས་པ་དང་བུད་མེད་ཁྱིམ་པ་ཐ་སྙད་ཕྱེད་དང་ལྔ་དང་ལྡན་པ། ལུས་བརྟེན་དུ་རུང་བ་རྫུ་འཕྲུལ་མ་ཐོབ་པ་སྐྲོད་པ་ལ་ཞུགས་པའམ་ཕྱོགས་པའོ། །ཀུན་སློང་རྣག་པས་འདུག་པར་འདོད་པའོ། །སྦྱོར་བ་འདུག་པར་རྩོམ་པ། མཐར་ཐུག་འདུག་པ་རྫོགས་ཤིང་ཚོར་བའོ། །འགྲེང་དང་ཅེས་པ་སྦྱོར་བའི་ཆའོ། །འདི་ལ་ཡང་གནས་དབེན་པ་དང་བདག་ཉིད་འགྲེང་བ་ཞེས་སྦྱར། གཞན་འདྲའོ། །གཅེར་བུ་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་མུ་སྟེགས་ཅན་གྱི་བསླབ་པ་ཅན་ཐ་སྙད་གསུམ་དང་ལྡན་པ། རྫས་ཐ་དད་པ་དང་། ཉེ་དུ་ནད་པ་རབ་ཏུ་འབྱུང་བར་འདོད་པ་འདི་པ་ལ་འཚོ་བ་ལྟོས་པ་བཞི་མ་ཡིན་པའོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན་རང་གི་ཡིན་པ་དམན་པ་མ་ཡིན་པའོ། །ཀུན་སློང་སྡིག་ལྟ་དང་བྲལ་འདོད་མ་ཡིན་པར་སྟེར་བར་འདོད་པ། སྦྱོར་བ་དེ་རྩོམ་པ། མཐར་ཐུག་དེས་ཐོབ་པའོ། །དམག་དང་ཅེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་ནི་ཁྱིམ་པ་སྐྱེས་པ་ཐ་སྙད་ལྔ་ལྡན་དམག་གི་མཚན་ཉིད་དུ་གྲུབ་པ་གཡུལ་སྤྲོད་པའི་ཕྱིར་ཆས་པ་ཡིན་པའོ། །བདག་ཉིད་རྐྱེན་དགོས་དང་མི་ལྡན་ཞིང་དེ་ན་གནས་པའི་དོན་ཅན་མ་ཡིན་པའོ། །ཀུན་སློང་ལྟ་བར་འདོད་པའོ། །སྦྱོར་བ་རྩོམ་པ། མཐར་ཐུག་ཉེ་འཁོར་ལས་འདས་ཏེ་མཐོང་བའོ། །ཞག་གཉིས་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་གནས་ནི་དམག་ཆས་པ་མ་གཏོགས་པ་བཞི་ལྡན་གནས་པའོ། །བདག་ཉིད་དེར་འདུག་དགོས་པའི་རྐྱེན་དགོས་མེད་པའོ། །ཀུན་སློང་འདུག་པར་འདོད་པ། སྦྱོར་བ་རྩོམ་པ། མཐར་ཐུག་དགོས་པ་མེད་པའི་ཞག་ལས་འདས་ནས་ཕྱི་དེ་ཉིན་གྱི་སྐྱ་རེངས་ཤར་བའོ། །བཤམ་དཀྲུགས་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གང་བཤམ་པ་དཀྲུགས་པའི་དམག་ནི་ལྟ་སྐབས་བཞིན་ནོ། །བདག་ཉིད་དམག་གི་ནང་ན་འདུག་པ་ཡིན་པའོ། །ཀུན་སློང་རང་དགར་རེག་པ་དང་ལྟ་བ་དང་ཕན་ཚུན་དཀྲུགས་པར་འདོད་པ་རྒྱུན་མ་ཆད་པའོ། །སྦྱོར་བ་དེ་ལྟར་རྩོམ་པའོ། །མཐར་ཐུག་དེའི་བྱ་བ་རྫོགས་པའོ། །བརྡེག་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་ནོ། །ཀུན་སློང་གསོད་སེམས་ལས་གཞན་པའི་རྙོག་པ་ཅན་གྱི་སེམས་ཀྱིས་བརྡེག་པར་འདོད་པའོ། །སྦྱོར་བ་རྩོམ་པ། མཐར་ཐུག་ལུས་ལ་རེག་པའོ། །གཟས་དང་ཅེས་པ་སྦྱོར་བའི་ཆའོ། །འདི་ལ་བརྡེག་པའི་ཚབ་ཏུ་བརྡེག་པར་གཟས་པ་ཞེས་པ་དང་། ལུས་ལ་རེག་པའི་ཚབ་ཏུ་གཟས་པ་རྫོགས་པ་ཞེས་སྦྱར། གཞན་འདྲའོ། །གནས་ངན་ལེན་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་རྫོགས་པའི་སྡོམ་པ་དང་ལྡན་པ། ལྟ་བ་དང་མཚན་མཐུན་པ། ཐ་སྙད་གསུམ་དང་ལྡན་པ། རྒྱུད་ཐ་དད་པ་ལུས་ཐ་མལ་པར་གནས་པ་སྟེ་ཆོས་དྲུག་ལྡན་ནོ། །དངོས་པོ་ཕམ་ལྷག་གང་རུང་ཡུལ་དེ་ལ་བྱུང་བའོ། །གནས་མཚམས་ནང་ན་མཐོལ་ཡུལ་མཚན་ཉིད་པ་ཡོད་པའོ། །ཀུན་སློང་རྐྱེན་དགོས་ལ་ལྟོས་པ་མེད་པར་འཆབ་པར་འདོད་པའོ། །མཐའ་མཚན་མོ་འདས་པའོ། །བཅུ་ཚན་དྲུག་པ་ནི། སྡོམ་ལ། བདེ་དང་མེ་དང་འདུན་པ་དང་། །བསྙེན་པར་མ་རྫོགས་ཆོས་གཏམ་སྨྲ། །དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཞེས་ཏེ། བདེ་དང་ཞེས་པ་གླེང་གཞིའི་ཆའོ། །འདི་ལ་བཞི་ལས། གཞི་ལ་སྦྱིན་བདག་ཁྱིམ་པ་ཐ་སྙད་ལྔ་ལྡན། རང་དང་ཡུལ་དེ་གཉིས་ཀ་ལས་རྫས་ཐ་དད་པའོ། །ཡུལ་དགེ་སློང་ཆོས་དྲུག་ལྡན་ནོ། །དངོས་པོ་དུས་རུང་གི་བཟའ་བའམ་བཅའ་བ་རུང་བ་ཚད་ལྡན་ཡུལ་དེ་ལ་བསྔོས་པའོ། །ཀུན་སློང་ནད་ཀྱི་གཉེན་པོའི་དོན་མ་གཏོགས་པར་ཆེད་དུ་བསམས་ཏེ་སྦྱིན་པ་པོ་ཟན་གཅོད་དུ་འཇུག་འདོད་པའོ། །སྦྱོར་བ་རང་གི་ངག་ཏུ་བདག་ཉིད་དང་འབྲེལ་བར་བསམ་པའི་དོན་གསལ་པོར་མངོན་སུམ་དུ་སྨྲས་པ་སྟེ་དྲུག་ལྡན་ནོ། །མཐར་ཐུག་ཡུལ་དེས་དོན་གོ་བའོ། །མེ་དང་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་མེ་ཡིན་པ་ཚད་དང་ལྡན་པ། མེ་མར་མུར་དང་མེ་ལྕེ་ལས་གཞན་པའོ། །བདག་ཉིད་ནད་པ་མ་ཡིན་པའོ། །ཀུན་སློང་རེག་པར་འདོད་པའོ། །སྦྱོར་བ་རང་ངམ་བསྐོས་པས་རེག་པ་རྩོམ་པའོ། །མཐར་ཐུག་རེག་པའོ། །འདུན་པ་དང་ཅེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་དགེ་འདུན་མཚན་ཉིད་དང་ལྡན་པའི་ལས་མཚན་ཉིད་དང་ལྡན་པ་དགེ་སློང་གི་ཆེད་དུ་བྱས་པ་ལས་ཆགས་པའོ། །བདག་ཉིད་འདུན་པ་ཕུལ་ཟིན་པའོ། །གོ་བྱ་དང་དགེ་སློང་ཆོས་དྲུག་ལྡན། འདུན་པ་ལེན་པ་པོ་ཡིན་པའོ། །ཀུན་སློང་འདུན་པ་བསྒྱུར་བར་འདོད་པའོ། །སྦྱོར་བ་ངག་དྲུག་ལྡན་ནོ། །མཐར་ཐུག་དོན་གོ་བའོ། །བསྙེན་པར་མ་རྫོགས་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་ངོ་བོའི་རྣམ་གྲངས་ཀྱི་སྒོ་ནས་མ་རྫོགས་པ་ཐ་སྙད་ལྔ་དང་ལྡན་པའོ། །བདག་ཉིད་ནད་པ་དང་ནད་གཡོག་དང་རྨྱ་བ་དང་། དབྱར་ཟླ་བ་གཉིས་ལ་བབ་པའི་ཚེ་སྡིག་ཅན་ཉེ་བར་གནས་པ་རྣམས་མ་ཡིན་པ་དང་། ཡུལ་རྟེན་གཉིས་ཀ་ཉལ་ཞིང་གཉིད་ལོག་པའི་སྤྱོད་ལམ་ཅན་ཡིན་པའོ། །དུས་མཚན་མོའི་དུས་ཡིན་པའོ། །གནས་མཚན་ཉིད་དུ་གྲུབ་པ་དང་གཅིག་པའོ། །ཀུན་སློང་ཉལ་བར་འདོད་པའོ། །སྦྱོར་བ་ཉལ་བར་རྩོམ་པ། མཐར་ཐུག་མཚན་མོ་གསུམ་པའི་མཐའ་ལའོ། །ཆོས་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དགེ་སློང་ཆོས་དྲུག་ལྡན་ནོ། །དངོས་པོ་ཆོས་ལས་ཕྱིན་ཅི་ལོག་གི་ཚིག་གོ །རྐྱེན་གསོལ་བཞིའི་ལས་མཚན་ཉིད་པའོ། །ཀུན་སློང་སྡིག་ལྟ་མི་གཏོང་བར་འདོད་པ། སྦྱོར་བ་རྩོམ་པ། མཐར་ཐུག་བརྗོད་པ་གསུམ་ལས་འདས་པའོ། །གཏམ་སྨྲ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ལྟ་བ་མཐུན་པ་མ་གཏོགས་པ་ལྔ་ལྡན། སྤངས་པ་ཕྱིར་བཅོས་མ་བྱས་པའོ། །བདག་ཉིད་གནས་ཕྱུང་མ་ཡིན་པའོ། །ཀུན་སློང་ནད་པ་དང་ལྟ་བ་དང་དབྲལ་བར་འདོད་པ་མ་ཡིན་པའོ། །སྦྱོར་བ་རྗེས་སུ་ཕྱོགས་པར་རྩོམ་པའོ། །མཐར་ཐུག་ལུང་དབོག་པ་ལ་སོགས་པ་གང་རུང་བྱས་པའོ། །དགེ་ཚུལ་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་དགེ་ཚུལ་བསྙིལ་བ་ཞེས་སྦྱར། གཞན་འདྲའོ། །ཁ་དོག་བསྒྱུར་བ་ཞེས་པ་གཉེན་པོའི་ཆའོ། །འདི་ལ་བཞི་ལས། གཞི་ལ་དངོས་པོ་རང་གི་ཡིན་པའི་གོས་རུང་བ་ཚད་དང་ལྡན་པ་ཁ་མ་བསྒྱུར་བ་རུང་བས་སྟེང་གཡོགས་པ་མིན་པ་ཆུ་ཚགས་ལས་གཞན་པའོ། །བདག་ཉིད་གནང་བ་མ་བྱིན་པའོ། །ཀུན་སློང་ལོངས་སྤྱོད་པར་འདོད་པའོ། །སྦྱོར་བ་རྩོམ་པའོ། །མཐར་ཐུག་བྱེད་པའོ། །རིན་པོ་ཆེ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་རིན་པོ་ཆེའམ་དེར་སྨོས་པ་ཡིན་པ་རུང་བར་གྱུར་པ་རིན་པོ་ཆེའི་ཆ་ནས་གཞན་དབང་བ། ཆུད་ཟ་བ་དང་སྦྱིན་བདག་བསོད་ནམས་འདོད་པས་བསྟབས་པ་དང་། མི་མིན་གྱི་གནས་སུ་དེའི་བསོད་ནམས་ཀྱིས་བྱུང་བ་མིན་པའོ། །བདག་ཉིད་རྫུ་འཕྲུལ་དང་སྤྲུལ་པའི་གནས་སྐབས་དང་བར་ཆད་ཅན་དང་། དོན་ཁྱད་པར་ཅན་བསྒྲུབ་པ་དང་ཆོས་འཆད་པའི་སྐབས་མ་ཡིན་པའོ། །ཀུན་སློང་རྒོད་བག་གིས་རེག་པར་འདོད་པ། སྦྱོར་བ་རང་ངམ་གཞན་གྱིས་རྩོམ་པ། མཐར་ཐུག་རེག་པའོ། །ཚ་བའི་དུས་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་དུས་ཟླ་བ་ཕྱེད་དང་གསུམ་དང་། ཟླ་བ་ཕྱེད་ཕྱེད་ཅིང་གནང་བའི་དུས་མ་ཡིན་པ་དང་། བདག་ཉིད་ནད་པ་ལས་བྱས་ལམ་ཞུགས་དྲི་རླུང་ཆར་བསྲོ་ཁང་སྐྲ་མཁར་ལེན། སྒོག་པ་རོ་རེག་ཕྱག་དར་བྱས་པ་རྣམས་མིན་པ། ལུས་དངོས་ཡིན་པའོ། །དངོས་པོ་ཆུ་ཡིན་པའོ། །གནས་ཨསྨ་པ་རན་ཏའམ་དེ་དང་འདྲ་བ་མ་ཡིན་པའོ། །ཀུན་སློང་ཁྲུས་བྱེད་པར་འདོད་པ། སྦྱོར་བ་རྩོམ་པ། མཐར་ཐུག་ལུས་ཕྱེད་ཙམ་དུ་སོན་པའོ། །བཅུ་ཚན་བདུན་པ་ནི། སྡོམ་ལ། དུད་འགྲོ་འགྱོད་པ་སོར་མོ་དང་། །རྩེ་དང་ལྷན་ཅིག་སྔངས་བྱེད་དང་། །སྦེད་དང་གདིང་མེད་གཞི་མེད་དང་། །སྐྱེས་པ་མེད་པར་ལམ་འགྲོ་བའོ། །ཞེས་ཏེ། དུད་འགྲོ་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་འཇིག་རྟེན་ན་གྲགས་པའི་དུད་འགྲོ་ཡིན་པ། ཐ་མལ་པའི་མིག་ལམ་དུ་སྣང་དུ་རུང་བའོ། །ཀུན་སློང་ཆེད་དུ་བསམ་ནས་གསོད་པར་འདོད་པའོ། །སྦྱོར་མཐའ་གཉིས་འདེབས་སྤྱོད་ཀྱི་སྐབས་བཞིན་ནོ། །འགྱོད་པ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་ནོ། །དངོས་པོ་དགེ་སློང་མ་ཡིན་པའི་དོན་ཅན་ཡིན་པའོ། །ཀུན་སློང་འགྱོད་པ་བསྐྱེད་པར་འདོད་པའོ། །སྦྱོར་བ་ངག་དྲུག་ལྡན། མཐར་ཐུག་དོན་གོ་བའོ། །སོར་མོ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་ལུས་མ་ཉམས་པའོ། །ཀུན་སློང་ནི་གཡའ་བར་བྱ་བའི་བསམ་པ། སྦྱོར་བ་རྩོམ་པ། མཐར་ཐུག་རེག་པའོ། །རྩེད་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་ཆུ་ཡིན་པ་ལུས་ཕྱེད་ཙམ་ནུབ་པའི་ཚད་དུ་ལོངས་པའོ། །ཀུན་སློང་རྒོད་བག་གིས་དགའ་བ་ཉམས་སུ་མྱོང་བར་འདོད་པའོ། །སྦྱོར་བ་རང་ངམ་བསྐོས་པས་རྩེ་བར་རྩོམ་པ། མཐར་ཐུག་རྩེས་པའོ། །ལྷན་ཅིག་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གནས་ཀྱི་མཚན་ཉིད་དུ་གྲུབ་པ་དང་གཅིག་པའོ། །ཡུལ་བུད་མེད་ཀྱི་མཚན་དོན་བྱེད་ནུས་པ་ཐ་སྙད་ལྔ་དང་ལྡན་པའོ། །ལུས་བརྟེན་དུ་རུང་བ། རྫུ་འཕྲུལ་ཐོབ་པ། ཉེ་དུ་དང་། ཕན་འདོགས་པ། སྲུང་མ་དང་ལྡན་པ་བཞི་མ་ཡིན་པ། ཉལ་ཞིང་གཉིད་ལོག་པའི་སྤྱོད་ལམ་ཅན་ཡིན་པའོ། །དུས་མཚན་མོ་ཡིན་པའོ། །བདག་ཉིད་གྲོགས་དང་མི་ལྡན་པ་དང་ཉལ་ཞིང་གཉིད་ལོག་པའོ། །ཀུན་སློང་ལྷན་ཅིག་ཉལ་བར་འདོད་པ། སྦྱོར་བ་རྩོམ་པ། མཐར་ཐུག་མཚན་མོ་འདས་པའོ། །སྔངས་བྱེད་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་ནོ། །དངོས་པོ་འཇིགས་པའི་རྒྱུ་ཡིད་དུ་མི་འོང་བའོ། །ཀུན་སློང་སྐྱོ་བ་བསྐྱེད་པའི་དོན་མ་གཏོགས་པར་སྔངས་བར་འདོད་པའོ། །སྦྱོར་བ་རང་ངམ་བསྐོས་པས་ངག་དྲུག་ལྡན་ནོ། །མཐར་ཐུག་དོན་གོ་བའོ། །སྦེད་དང་ཅེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་རབ་ཏུ་བྱུང་བ་སྡེ་ལྔ་གང་རུང་། ལྟ་བ་མཐུན་པ་ཐ་སྙད་གསུམ་ལྡན་རྒྱུད་ཐ་དད་པའོ། །དངོས་པོ་དགེ་སྦྱོང་གི་ཡོ་བྱད་རུང་བ་ཚད་ལྡན་དེ་ཉིད་དབང་བའོ། །ཀུན་སློང་རྐུ་སེམས་དང་ཕན་འདོགས་མ་གཏོགས་པ་སྦེད་པར་འདོད་པ། སྦྱོར་བ་རང་ངམ་བསྐོས་པས་རྩོམ་པ། མཐར་ཐུག་སྦས་མ་ཐག་ཏུ་ལྟུང་ཞེས་ཁྱད་པར་སྒྲོགས་ཟེར་རོ། །གདེང་མེད་ཅེས་པ་བསམ་པའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་གཞི་དེས་མི་དགའ་བའོ། །དངོས་པོ་གོས་རུང་བ་ཚད་ལྡན་རང་གི་ཕྱིར་བླང་བ་མེད་པར་བྱིན་པའོ། །ཀུན་སློང་རྐུ་སེམས་དང་ཡིད་གཅུགས་ལས་གཞན་རང་གི་བྱིན་པའི་བསམ་པས་ལོངས་སྤྱོད་འདོད་པའོ། །སྦྱོར་བ་རྩོམ་པ། མཐར་ཐུག་ལོངས་སྤྱོད་པའོ། །གཞི་མེད་ཅེས་པ་ཡུལ་གྱི་ཆའོ། །འདི་ལ་རྒྱུ་མཚན་སོགས་གཞི་མེད་ཀྱི་དགེ་འདུན་ལྷག་མ་དང་འདྲ་བ་ལས་དངོས་པོ་དགེ་འདུན་ལྷག་མ་ཞེས་སྦྱར་རོ། །སྐྱེས་པ་མེད་པར་ལམ་འགྲོ་བ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་བུད་མེད་ཁྱིམ་པ་མོ་ལུས་བསྟེན་རུང་ཐ་སྙད་ཕྱེད་དང་ལྔ་ལྡན། རྫུ་འཕྲུལ་ཐོབ་པ་ཉེ་དུ་ཕན་འདོགས་པ་གསུམ་མ་ཡིན་པའོ། །བདག་ཉིད་གྲོགས་དང་མི་ལྡན་པའོ། །ལམ་སའམ་ཆུ་ལ་བརྟེན་པ་རྒྱང་གྲགས་སུ་ལོངས་པའོ། །དུས་ཉི་མ་གཅིག་ཡིན་པའོ། །ཀུན་སློང་རང་དགར་འགྲོ་བར་འདོད་པ་རྩོམ་པ། སྦྱོར་བ་རྩོམ་པ། མཐར་ཐུག་རྒྱང་གྲགས་ལས་འདས་པའོ། །བཅུ་ཚན་བརྒྱད་པ་ནི། སྡོམ་ལ། རྐུ་དང་ཉི་ཤུ་མ་ལོན་དང་། །རྐོ་དང་མགྲོན་དང་བསླབ་པ་དང་། །འཐབ་དང་མི་སྨྲར་འགྲོ་བ་དང་། །མ་གུས་ཆང་འཐུང་དུས་མིན་པའོ། །ཞེས་ཏེ། རྐུ་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་ཁྱིམ་པ་སྐྱེས་པ་ཐ་སྙད་ལྔ་ལྡན། རྐུ་མའམ་ཤོ་གམ་འདྲལ་བའི་ཚོང་པ་ཡིན་པ་ཕན་འདོགས་པ་པོ་མ་ཡིན་པའོ། །ལམ་ལ་སོགས་པ་སྔ་མ་བཞིན་ནོ། །ཉི་ཤུ་མ་ལོན་ཞེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་དངོས་པོ་དང་རྟགས་དང་བསམ་པ་དང་སྡོམ་པ་སྐྱེ་བའི་རྟེན་དུ་མ་གྱུར་པ་དང་། སྐྱེ་བའི་བར་ཆད་གཞན་དང་མི་ལྡན་པའོ། །བདག་ཉིད་མཁན་པོ་བྱེད་པ་ཡིན་པའོ། །ཀུན་སློང་བསྙེན་པར་རྫོགས་པར་བྱེད་འདོད་པ། སྦྱོར་བ་རྩོམ་པ། མཐར་ཐུག་བརྗོད་པ་གསུམ་པ་རྫོགས་པའོ། །རྐོ་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་ས་ཡིན་པ་སྲ་བ་དང་འབྲེལ་བ། སོར་བཞི་ཡན་ཆད་དུ་ཚད་དུ་ལོངས་པ་འཐས་པར་གནས་པའོ། །བདག་ཉིད་རྫུ་འཕྲུལ་གྱི་སྐབས་དང་། བར་ཆད་དང་ལྡན་པ་དང་། དོན་ཁྱད་པར་ཅན་བསྒྲུབ་པའི་གནས་སྐབས་གསུམ་མ་ཡིན་པའོ། །ཀུན་སློང་རྐོ་བར་འདོད་པའོ། །སྦྱོར་བ་རང་ངམ་བསྐོས་པས་རྩོམ་པའོ། །མཐར་ཐུག་སོར་བཞི་ཙམ་ལས་ཕྲལ་བའོ། །མགྲོན་དང་ཅེས་པ་ཡུལ་གྱི་ཆའོ། །འདི་ལ་བཞི་ལས། གཞི་ལ་ཡུལ་ཁྱིམ་པ་ཆོས་ལྔ་ལྡན་ནོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན་སྦྱིན་པ་པོ་དེ་ཉིད་ཀྱིས་ཡིན་པའོ། །བདག་ཉིད་མགྲོན་དུ་བོས་པ་དང་། ཕྱིས་མ་བོས་པ་དང་། ནད་པ་མ་ཡིན་པའོ། །དུས་ནི་བཤམ་པ་རྫོགས་པའི་འོག་ཡིན་པའོ། །ཀུན་སློང་རིང་དུ་འདུག་སྟེ་ཟ་བར་འདོད་པའོ། །སྦྱོར་བ་རྩོམ་པ། མཐར་ཐུག་མགུལ་དུ་མིད་པའོ། །བསླབ་པ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་འདུལ་བའི་བྱ་བ་མངོན་པར་ཤེས་པ་དང་། བསླབ་པ་ལ་ཉེ་བར་འཇོག་པ་པོ་ཡིན་པའོ། །དངོས་པོ་འདུལ་བར་གཏོགས་པའི་བསླབ་པ་ཡིན་པའོ། །ཀུན་སློང་སྤོང་བའི་ཚིག་སྨྲ་བར་འདོད་པའོ། །སྦྱོར་བ་ངག་དྲུག་ལྡན་གྱིས་མི་ཤེས་པ་ཉིད་སྒྲོགས་པའོ། །མཐར་ཐུག་དོན་གོ་བའོ། །འཐབ་དང་ཅེས་པ་ཡུལ་དང་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་དགེ་སློང་ཆོས་དྲུག་ལྡན་བདག་ཉིད་དང་རྩོད་པའི་ཕྱིར་གྲོས་བྱེད་པ་པོ་གཉིས་ཡན་ཆད་ཡིན་པའོ། །དངོས་པོ་བདག་ཉིད་དང་རྩོད་པའི་རྩོད་པ་བཞི་པོ་གང་རུང་ཡིན་པའོ། །ཀུན་སློང་ཞི་བར་འདོད་པ་མིན་པར་ཉན་རྣ་བྱེད་འདོད་པའོ། །སྦྱོར་བ་རྩོམ་པའོ། །མཐར་ཐུག་ཚིག་ཐོས་ཤིང་དོན་གོ་བའོ། །མི་སྨྲ་འགྲོ་བ་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་གནས་ནི་ལས་ཆོས་ལྡན་གསོལ་བ་མ་ཟིན་པ་བྱེད་བཞིན་པའོ། །བདག་ཉིད་ལས་དེར་ཐོས་པའི་ཉེ་འཁོར་དུ་འདུས་ཤིང་དགེ་སློང་འཁོད་པ་ལ་མ་སྨྲས་པ། བར་ཆད་དང་མི་ལྡན་པའོ། །ཀུན་སློང་འགྲོ་བར་འདོད་པའོ། །སྦྱོར་བ་རྩོམ་པ། མཐར་ཐུག་ཐོས་པའི་ཉེ་འཁོར་ལས་འདས་པའོ། །མ་གུས་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་ཡུལ་སངས་རྒྱས་སམ་དགེ་འདུན་ནམ་དེའི་ཐ་སྙད་པ་ཡིན་པ་དང་། དངོས་པོ་ཆོས་ལྡན་གྱིས་བསྒོ་བའམ་དེ་དང་འདྲ་བ་ཡིན་པའོ། །བདག་ཉིད་ཤད་སྦྱང་མ་བྱས་པའོ། །ཀུན་སློང་མ་གུས་པས་བཟློག་སྟེ་འགལ་བར་བྱེད་འདོད་པ། སྦྱོར་བ་འགལ་བར་རྩོམ་པ། མཐར་ཐུག་འགལ་བ་རྫོགས་པའོ། །ཆང་འཐུང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་སྦྱར་ཆང་བཅོས་ཆང་གཉིས་ལས་གང་ཡང་རུང་བ་དང་། འཁྲུལ་པ་བསྐྱེད་པའི་ནུས་པ་དང་ལྡན་པ་ཚད་ལོངས་པའོ། །ཀུན་སློང་འཐུང་བར་འདོད་པ། སྦྱོར་བ་རྩོམ་པ། མཐར་ཐུག་མགུལ་དུ་མིད་པའོ། །དུས་མིན་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་གང་དུ་འགྲོ་བའི་གནས་ནི་གནས་ཀྱི་མཚན་ཉིད་གྲུབ་པ། འབྱུང་འཇུག་ལ་ཁྱིམ་པ་དབང་ཆེ་བ། བདག་པོ་ཁྱིམ་པ་ཐ་སྙད་ལྔ་ལྡན་གྲོང་པའི་ཆོས་སྤྱོད་པའོ། །གང་ནས་འགྲོ་བ་མཚམས་ནང་དང་སྨྲ་ཡུལ་ཡོད་པའོ། །བདག་ཉིད་རྫུ་འཕྲུལ་དང་སྤྲུལ་པའི་གནས་སྐབས་མ་ཡིན་པ་དང་བར་ཆད་དང་མི་ལྡན་པ། དོན་ཁྱད་པར་ཅན་སྒྲུབ་པའི་གནས་སྐབས་མ་ཡིན་པ་དང་། ཡུལ་ལ་མ་སྨྲས་པའོ། །དུས་ཕྱི་དྲོ་ཡིན་པའོ། །ཀུན་སློང་འགྲོ་བར་འདོད་པ། སྦྱོར་བ་རྩོམ་པ། མཐར་ཐུག་སྒོ་གཏན་ནམ་ཉེ་འཁོར་ལས་འདས་པའོ། །བཅུ་ཚན་དགུ་པ་ནི། སྡོམ་ལ། ཟས་བཅས་སྐྱ་རེངས་ད་གདོད་དང་། །ཁབ་རལ་དང་ནི་ཁྲི་རྐང་དང་། །བརྡལ་དང་གདིང་དང་གཡན་པ་དང་། །རས་ཆེན་བདེ་གཤེགས་ཆོས་གོས་སོ། །ཞེས་ཏེ། ཟས་བཅས་ཞེས་པ་གནས་ཀྱི་ཆ་སྡོམ་དུ་བླངས་པའོ། །དང་པོ་ལ་ཕྱི་དྲོ་གྲོང་རྒྱུ་དང་སྔ་དྲོ་གྲོང་རྒྱུ་གཉིས་ལས། དང་པོ་ལ་བཞི་ལས། གཞི་ལ་བདག་ཉིད་སྔར་གྲོང་གསུམ་རྒྱུས་པ་དང་། དུས་ཉི་མ་གཅིག་ཡིན་པ་ཞེས་སྦྱར། གསུམ་ལ་ཁྱིམ་པ་ཞེས་སྦྱར། གཞན་སྔ་མ་བཞིན་ནོ། །གཉིས་པ་ལ་བཞི་ལས། གཞི་ལ་གང་ནས་འགྲོ་བའི་གནས་ནི་སྦྱིན་བདག་ཆོས་གསུམ་ལྡན་གྱི། ཟས་ཆོས་བཞི་ལྡན་ལ་མཆོད་གནས་ཆོས་བདུན་ལྡན་ཞབས་ནས་འདེགས་པའི་གནས་ཡིན་པའོ། །སྦྱིན་བདག་ཁྱིམ་པ་ཐ་སྙད་ལྔ་ལྡན་རང་དང་དགེ་འདུན་གཉིས་ཀ་ལས་རྫས་ཐ་དད་པའོ། །ཟ་བ་ནི་དུས་རུང་གི་བཟའ་བའམ་བཅའ་བ་རུང་བ་ཚད་ལྡན་བསམ་པ་ཐག་པས་བསྔོས་པའོ། །མཆོད་གནས་ནི་དགེ་སློང་ཆོས་ལྔ་ལྡན་བཞིར་ལོངས་ཤིང་རང་གི་ཚིག་གིས་བོས་པའོ། །རང་གང་དུ་འགྲོ་བའི་གནས་སྔ་མ་བཞིན་ནོ། །བདག་ཉིད་འདྲ་བ་ལས་བྲིམ་པ་ཡོལ་བར་མ་བྱེད་ཅིག་ཅེས་མ་བསྒོས་པའོ། །དུས་ཉི་མ་གཅིག་དང་སྔ་དྲོ་ཡིན་པའོ། །གསུམ་འདྲའོ། །སྐྱ་རེངས་ཞེས་པ་དུས་ཀྱི་ཆའོ། །འདི་ལ་བཞི་ལས། གཞི་ལ་གནས་རྒྱལ་པོའམ་དེའི་བཙུན་མོ་ཡིན་པ་དང་། དུས་འོད་དམར་ནུབ་ནས་སྐྱ་རེངས་མ་ཤར་བའི་དུས་ཡིན་པ་སྦྱར། གཞན་ལྔ་མ་བཞིན་ནོ། །ད་གདོད་ཅེས་པ་གླེང་གཞིའི་ཆའོ། །འདི་ལ་བཞི་ལས། གཞི་ལ་དངོས་པོ་སོ་སོ་ཐར་པར་གཏོགས་པའི་བསླབ་པའི་གཞི་ཡིན་པའོ། །བདག་ཉིད་གསོ་སྦྱོང་གི་ལས་ལན་གཉིས་ཉམས་སུ་མྱོང་ཞིང་ཡིད་རྨོངས་པ་མ་ཡིན་པ། གནས་དུས་གསོ་སྦྱོང་གི་ཚེ་ཡིན་པའོ། །ཀུན་སློང་བཞད་གད་ཡིན་ཀྱང་རུང་ཁྱད་དུ་གསོད་འདོད་པ། སྦྱོར་བ་འདི་ཡང་འདིའི་ནང་དུ་གཏོགས་པ་གཟོད་ཤེས་པའི་ཚིག་དྲུག་ལྡན་ནོ། །མཐར་ཐུག་དོན་གོ་བའོ། །ཁབ་རལ་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་ཁབ་རལ་གྱི་རྒྱུ་རུང་བ་སོར་བཞི་ཡན་ཆད་དུ་ལོངས་པ་རང་གི་ཡིན་པ། སྔར་བཟོ་རྩོམ་མ་བྱས་པའོ། །ཀུན་སློང་བྱེད་འདོད་པ། སྦྱོར་བ་རང་ངམ་བསྐོས་པས་རྩོམ་པ། མཐར་ཐུག་ཟིན་པའོ། །ཁྲི་རྐང་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་དངོས་པོ་དགེ་འདུན་མཚན་ཉིད་པའི་ཁྲི་རྐང་གི་རྒྱུ་རུང་བ་བུ་གར་གཞུག་པ་མ་གཏོགས་པ་ཁྲུ་གང་ལས་སོར་ཕྱེད་ཡན་ཆད་ཀྱིས་ལྷག་པའི་ཚད་ལོངས་པ་སྔར་བཟོ་རྩོམ་མ་བྱས་པའོ། །གསུམ་འདྲའོ། །བརྡལ་དང་ཞེས་པ་སྦྱོར་བའི་ཆའོ། །འདི་ལ་བཞི་ལས། གཞི་ལ་དངོས་པོ་དགེ་འདུན་མཚན་ཉིད་པའི་གནས་མལ་རུང་བ་ཚད་ལྡན་ནོ། །གོས་པར་བྱེད་པ་ལུས་སམ་གནས་མལ་ལ་གནོད་པའི་ཤིང་བལ་ཡིན་པའོ། །བར་པ་གཉིས་འདྲ་ལ། མཐར་ཐུག་སུམ་ཆ་ཙམ་བགོས་པའོ། །གདིང་དང་གཡན་པ་དང་རས་ཆེན་ཞེས་པ་རྣམས་དངོས་པོའི་ཆའོ། །གདིང་བ་ལས་གྱུར་པ་ལ་བཞི་ལས། གཞི་ལ་དངོས་པོ་གདིང་བའི་རྒྱུ་རུང་བ་ཚད་ལྡན་རང་དབང་བ། རྙིང་པ་དང་སྔར་གཞན་གྱིས་བཟོ་རྩོམ་བྱས་པ་གཉིས་མ་ཡིན་པའོ། །ཀུན་སློང་ཚད་ལས་ལྷག་པར་བྱེད་འདོད་པ། སྦྱོར་བ་རང་ངམ་བསྐོས་པས་རྩོམ་པ། མཐར་ཐུག་ཟིན་པའོ། །གཡན་པ་དགབ་པ་དང་རས་ཆེན་ལ་ཡང་རང་རང་གི་རྒྱུ་རུང་བ་ཚད་ལྡན་སོགས་སྔ་མ་བཞིན་སྦྱར་རོ། །གདིང་བའི་ཚད་ནི་སྲིད་དུ་ཁྲུ་གསུམ་མོ། །མི་ཆོག་ན་ཕྱེད་དང་ལྔ་མན་ཆད་དོ། །ཞེང་དུ་ཁྲུ་དོ་དང་སོར་དྲུག་གོ །གཡན་པ་དགབ་པའི་ཚད་ནི་སྲིད་དུ་ཁྲུ་དྲུག་དང་། ཞེང་དུ་ཁྲུ་གསུམ་མོ། །རས་ཆེན་གྱི་ཚད་ནི་སྲིད་དུ་ཁྲུ་དགུ་དང་། ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འདི་གསུམ་གྱི་ཁྲུ་ནི་བདེ་བར་གཤེགས་པའི་མཐོ་གང་གི་སུམ་གཉིས་ལ་བཤད་དོ། །བདེ་གཤེགས་ཆོས་གོས་ཞེས་པ་དངོས་པོའི་ཆའོ། །འདི་ལ་བཞི་ལས། གཞི་ལ་གང་བཟོ་བའི་དངོས་པོ་ནི་ཆོས་གོས་རྣམ་པ་གསུམ་ལས་གང་ཡང་རུང་བའོ། །བདེ་བར་གཤེགས་པའི་ཆོས་གོས་ཀྱི་ཚད་དམ་དེ་ལས་ལྷག་པ། རང་གི་ཡིན་པ། སྔར་བཟོ་རྩོམ་མ་བྱས་པའོ། །བདག་ཉིད་བདེ་བར་གཤེགས་པའི་ལུས་ཙམ་མེད་པའོ། །གསུམ་འདྲའོ། །བདེ་བར་གཤེགས་པའི་ཆོས་གོས་ཀྱི་ཚད་ནི་བདེ་བར་གཤེགས་པའི་རང་གི་ཁྲུས་གཞལ་བའི་ཆོས་གོས་སྤྱི་དང་འདྲའོ། །ལྟུང་བྱེད་འབའ་ཞིག་ཏུ་གྱུར་པ་རྣམས་བཤད་ཟིན་ཏོ།། ༈ །།བཞི་པ་སོ་སོར་བཤགས་པར་བྱ་བའི་སྡེ་ནི། སྡོམ་ལ། གྲོང་དང་ཁྱིམ་གཞན་ཉིད་དང་ནི། །བསླབ་པ་རྣམས་དང་དགོན་པ་དག །སངས་རྒྱས་ཕན་པར་མཛད་པ་ཡིས། །སོ་སོར་བཤགས་པར་བྱ་བ་གསུངས། །ཞེས་ཏེ། བསླབ་པ་རྣམས་ཞེས་པ་དངོས་པོའི་ཆ། གཞན་གསུམ་གནས་ཀྱི་ཆའོ། །དང་པོ་དགེ་སློང་མ་ལས་ཟས་ལེན་པའི་སོར་བཤགས་ལ་བཞི་ལས། གཞི་ལ་ཡུལ་དགེ་སློང་མ་ཆོས་བརྒྱད་ལྡན། གྲོང་ངམ་གྲོང་གི་ཉེ་འཁོར་རམ། ལམ་པོ་ཆེ་དང་གསུམ་གང་རུང་ན་འདུག་པའོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན་དགེ་སློང་མ་དེ་ཉིད་ཀྱིས་མི་འགྲིམ་པའི་རྣམ་པས་ཕུལ་བའོ། །བདག་ཉིད་ཀྱང་གནས་གསུམ་པོ་གང་རུང་ན་འདུག་པའོ། །ཀུན་སློང་ལེན་པར་འདོད་པ། སྦྱོར་བ་དངོས་སུ་ལེན་པར་རྩོམ་པ། མཐར་ཐུག་ཟོས་པར་གྱུར་པའོ། །གཉིས་པ་གྲལ་རིམ་དུ་མ་ཕེབས་པར་ཟ་བའི་སོར་བཤགས་ལ་བཞི་ལས། གཞི་ལ་ཁྱིམ་པ་ཐ་སྙད་ལྔ་ལྡན་ཉེ་དུ་མ་ཡིན་པ། རང་ངམ་དགེ་སློང་མ་གཉིས་ལས་རྫས་ཐ་དད་པའོ། །དངོས་པོ་དུས་སུ་རུང་བའི་བཟའ་བའམ་བཅའ་བ་རུང་བ་ཚད་ལྡན་ནོ། །བསྐོ་ཤོམ་བྱེད་པ་དགེ་སློང་མ་བདུན་ལྡན་ཚིག་གདགས་སུ་རུང་བ་ན་འདུག་པ་དང་བསྐོ་ཤོམ་བྱེད་པ་ལ་ཞུགས་པ་དང་། གང་ཡང་རུང་བས་མ་བསྐོ་བའོ། །གྲོགས་དགེ་སློང་དྲུག་ལྡན་རང་དང་གསུམ་མན་ཆད་དོ། །བདག་ཉིད་དེའི་ཚིག་གིས་སམ་དེའི་ཉེ་དུས་བོས་པ་མ་ཡིན་པའོ། །ཀུན་སློང་ལེན་པར་འདོད་པ། སྦྱོར་བ་རང་ངམ་བསྐོས་པས་བླངས་ཏེ་རྩོམ་པ། མཐར་ཐུག་མགུལ་དུ་མིད་པའོ། །གསུམ་པ་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་ལ་བཞི་ལས། གཞི་ལ་ཡུལ་ཁྱིམ་པ་བསླབ་པའི་སྡོམ་པ་བྱིན་པ་དང་འབྲེལ་པ་རྫས་ཐ་དད་པའོ། །དངོས་པོ་དུས་སུ་རུང་བའི་བཅའ་བའམ་བཟའ་བ་རུང་བ་ཚད་ལྡན་དེ་ཉིད་ཀྱི་ཡིན་པ། ལ་ཕུག་ལ་སོགས་པ་མོད་པ་མ་ཡིན་པའོ། །བདག་ཉིད་སྡོམ་པ་བྱིན་པའི་མདུན་དུ་མགྲོན་དུ་བོས་པ་མ་ཡིན་པའོ། །གསུམ་འདྲའོ། །བཞི་པ་ནགས་མ་བརྟགས་པར་ཟས་ཟ་བའི་སོར་བཤགས་ལ་བཞི་ལས། གཞི་ལ་ཡུལ་ཁྱིམ་པ་ཐ་སྙད་ལྔ་ལྡན་རྫས་ཐ་དད་པའོ། །དངོས་པོ་འདྲའོ། །གནས་གྲོང་ངམ་གཙུག་ལག་ཁང་ནས་རྒྱང་གྲགས་ཀྱི་ཕྱི་རོལ་ཡིན་པ་འཇིགས་པ་དང་བཅས་པའོ། །བདག་ཉིད་དགོན་པ་བ་མ་ཡིན་པ། རང་གཞན་གྱིས་མ་བསྲུངས་པའོ། །བསམ་པ་ལ་གཉིས་ལས། འདུ་ཤེས་སྤྱི་དང་བྱེ་བྲག་ལ་མ་འཁྲུལ་བ། ཀུན་སློང་བླངས་ཏེ་ཟ་བར་འདོད་པའོ། །སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པ་རྫོགས་པའོ། །སོ་སོར་བཤགས་པའི་སྡེ་རྣམས་བཤད་ཟིན་ཏོ། །སྡེ་བཞི་པོ་འདི་དག་གི་ཡན་ལག་བརྩིས་པ་རྣམས་ནི་དམར་སྟོན་གྱི་ལུགས་སུ་བགྱིས་སོ།། །།ལྔ་པ་བསླབ་པར་བྱ་བ་ཉེས་བྱས་ཀྱི་སྡེ་ལ་དགུ་སྟེ། གོས་བགོ་བའི་སྡེ། སྤྱོད་ཡུལ་དུ་འགྲོ་བའི་སྡེ། སྟན་ལ་འདུག་པའི་སྡེ། ཟས་བླང་བའི་སྡེ། ཟས་ཟ་བའི་སྡེ། ལྷུང་བཟེད་ལ་སྤྱོད་པའི་སྡེ། ཆོས་བསྟན་པའི་སྡེ། སྒྲུབ་པའི་ཚུལ་ལས་གྱུར་པའི་སྡེ། རྒྱུ་བ་དགག་པའི་སྡེའོ། །དང་པོ་ནི། སྡོམ་ལ། ཤམ་ཐབས་ལ་ཡང་རྣམ་པ་བདུན། །སྟོད་གཡོགས་ལ་ཡང་རྣམ་པ་གསུམ། །ཅེས་ཏེ། ནམ་ལངས་པའི་ཚེ་ཤམ་ཐབས་ཀྱི་གཟན་ཕུད་དེ་བཞག ཤམ་ཐབས་གོན་པར་བྱའོ། །དེ་ལ་རྣམ་པ་བདུན་ཏེ། ཤམ་ཐབས་ཟླུམ་པོར་བགོ་བར་བྱའོ། །ཧ་ཅང་རྩིངས་པ་མ་ཡིན་པ་དང་། ཧ་ཅང་འཇོལ་བ་མ་ཡིན་པ་དང་། གྲྭ་གླང་པོ་ཆེའི་སྣ་ལྟར་ནར་བ་མ་ཡིན་པ་དང་། གོང་དུ་མ་ལྟེབ་པ་དང་། ཕུར་མ་ལྟར་འདུག་པ་མ་ཡིན་པ་དང་། སྦྲུལ་མགོའི་གདེངས་ཀ་ལྟར་ཕྱིར་བྱུང་བ་མ་ཡིན་པའི་ཚུལ་གྱིས་བགོ་བ་ལ་བསླབ་པར་བྱའོ། །དེ་བཞིན་དུ་སྟོད་གཡོགས་ཀྱང་ཟླུམ་པོར་བགོ་བ་དང་། ཧ་ཅང་རྩིངས་པ་མ་ཡིན་པ་དང་། ཧ་ཅང་འཇོལ་བ་མ་ཡིན་པར་བགོ་བ་ལ་བསླབ་པར་བྱའོ། །གཉིས་པ་ནི། སྡོམ་ལ། ཤིན་ཏུ་བསྡམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །མཆོང་ལ་སོགས་པ་རྣམ་པ་ལྔ། །ལུས་ལ་སོགས་པ་རྣམ་པ་ལྔ། །ཞེས་ཏེ། ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ། །ལེགས་པར་བགོས་པ་དང་། སྒྲ་བསྐྱུངས་པ་དང་། མིག་མི་ཡེངས་པ་དང་། གཉའ་ཤིང་གང་ཙམ་དུ་ལྟ་ཞིང་འགྲོ་བར་བྱའོ། །གཞན་ཡང་མགོ་གོས་ལ་སོགས་པ་མི་གཡོགས་པ་དང་། གོས་པུས་གོང་དུ་མི་རྫེ་བ་དང་། ཕྲག་པ་ལ་མི་གཟར་བ་དང་། ལག་པ་གཉའ་གོང་དུ་མི་བསྣོལ་བ་དང་། ལྟག་པར་མི་བསྣོལ་བའི་ཚུལ་གྱིས་འགྲོ་བར་བྱའོ། །གཞན་ཡང་མི་མཆོངས་པ་དང་། མི་བརྒྱང་པ་དང་། ཙོག་པུས་མ་ཡིན་པ་དང་། བྲང་ས་ལ་བཙུགས་པ་མ་ཡིན་པ་དང་། དཀུར་མི་བརྟེན་པའི་ཚུལ་གྱིས་འགྲོ་བར་བྱའོ། །གཞན་ཡང་ལུས་མི་བསྒྱུར་བ་དང་། ལག་པ་མི་གཡུག་པ་དང་། མགོ་མི་བསྒྱུར་བ་དང་། ཕན་ཚུན་ཕྲག་པ་མི་སྦྲེལ་བ་དང་། ལག་པ་མི་སྦྲེལ་བའི་ཚུལ་གྱིས་འགྲོ་བར་བྱའོ། །གསུམ་པ་ནི། འདུག་པར་བྱ་བ་དགུ་དག་དང་། །ཅེས་ཏེ། གང་དུ་ཕྱིན་པ་དེར་འདིར་འདུག་ཅིག་ཅེས་མ་བསྒོ་བར་སྟན་ལ་འདུག་པར་མི་བྱའོ། །བརྟག་དཔྱད་མ་བྱས་པར་འདུག་པར་མི་བྱའོ། །ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་འདུག་པར་མི་བྱའོ། །རྐང་པ་གཉིས་མི་སྣོལ་བ་དང་། བརླ་གཉིས་མི་སྣོལ་བ་དང་། ལོང་བུའི་སྟེང་དུ་ལོང་བུ་མི་གཞག་པ་དང་། རྐང་པ་ཁྲིའི་འོག་ཏུ་མི་དགུག་པ་དང་། རྐང་པ་གཉིས་མི་བསྒྲད་པ་དང་། འདོམས་མི་སྣང་བར་འདུག་པར་བྱའོ། །ལག་པས་འགྲམ་པ་ལ་མི་བརྟེན་པ་དང་། སྟན་ཐབས་མི་བསྐུར་བ་གཉིས་ནི་སློབ་དཔོན་ཡོན་ཏན་འོད་ཀྱིས་རུང་མཐུན་དུ་སྦྱར་ནས་གསུངས་པའོ། །བཞི་པ་ནི། བྱིན་ལེན་བྱ་བ་བརྒྱད་རྣམས་སོ། །ཞེས་ཏེ། དེ་ལྟར་སྟན་ལ་འདུག་ནས་ཟས་བླངས་པའི་ཚེ་ཐམས་ཅད་དུ་ཟས་ལེགས་པར་བླང་བར་བྱའོ། །མུ་དང་ཁད་ཆད་དུ་མ་ཡིན་པ་དང་། ཚོད་མ་དང་མཉམ་པ་མ་ཡིན་པར་བླང་བར་བྱའོ། །མཐར་ཆགས་སུ་དང་། ལྷུང་བཟེད་ལ་ལྟ་ཞིང་དང་། བཟའ་བ་དང་བཅའ་བ་མ་བྱུང་བར་ལྷུང་བཟེད་མི་བཟེད་པ་དང་། ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ། ཚོད་མས་འབྲས་ཆན་མི་དགབ་པ་དང་། ཟས་ཀྱི་སྟེང་དུ་སྣོད་མི་གཟུང་བར་བླང་བར་བྱའོ། །ལྔ་པ་ནི། སྡོམ་ལ། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ། །ལག་པ་ལྡག་ལ་སོགས་པ་ལྔ། །འཕྱ་ལ་སོགས་པ་རྣམ་པ་བཞི། །ཞེས་ཏེ། དེ་ལྟར་ཟས་བླངས་ནས་ཟ་བའི་ཚེ་ལེགས་པར་ཟས་བཟའ་བར་བྱའོ། །ཁམ་ཧ་ཅང་ཆེ་བ་མ་ཡིན་པ་དང་། ཧ་ཅང་ཆུང་བ་མ་ཡིན་པ་དང་། ཁམ་རན་པ་དང་། ཁམ་མ་བཟས་པར་ཁ་མི་གདངས་པ་དང་། ཁ་ཁམ་གྱིས་བཀང་སྟེ་མི་སྨྲ་བའི་ཚུལ་དུ་བཟའ་བར་བྱའོ། །གཞན་ཡང་ཙུག་ཙུག་མི་བྱའོ། །ཅག་ཅག་མི་བྱའོ། །ཧུ་ཧུ་མི་བྱའོ། །ཕུ་ཕུ་མི་བྱའོ། །ལྕེ་ཕྱུང་སྟེ་ཟས་མི་ཟའོ། །གཞན་ཡང་འབྲུ་རེ་རེ་ནས་བླངས་ཏེ་མི་ཟའོ། །ཟས་ལ་འཕྱས་མི་གདགས་སོ། །མཁུར་བ་མི་སྤོའོ། །རྐན་མི་ཏོག་གོ །ཁམ་འཕྲོར་མི་གཅད་དོ། །གཞན་ཡང་ལག་པ་མི་ལྡག་གོ །ལྷུང་བཟེད་སོགས་མཛུབ་མོ་དང་ལྕེས་མི་བྱོག་གོ །ཟས་ཀྱིས་སྦགས་པའི་ལག་པ་མི་སྤྲུག་གོ །ལྷུང་བཟེད་མི་སྐྱོམ་མོ། །ཟས་ལ་མཆོད་རྟེན་འདྲ་བར་བྱས་ཏེ་མི་གཞོམ་མོ། །གཞན་ཡང་གཞན་གྱི་ལྷུང་བཟེད་སོགས་ལ་འཕྱས་གདགས་པར་བྱ་བའི་ཕྱིར་མི་བལྟའོ། །ལག་པ་སྦགས་པས་ཆུ་སྣོད་སོགས་གཙང་མ་ལ་མི་གཟུང་ངོ་། །དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་རོ། །ཁྱིམ་པ་ལ་མ་དྲིས་པར་ཁྲུས་ཆུ་གར་བབ་བབ་ཏུ་དབོ་བར་མི་བྱའོ། །དྲུག་པ་ནི། ལྷུང་བཟེད་ལ་ཡང་རྣམ་པ་བཅུ། །ཞེས་ཏེ། ཟས་ཟ་བའི་མཇུག་ཏུ་ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་རོ། །ལྷུང་བཟེད་ལན་གསུམ་བཀྲུས་པའི་ནང་དུ་ཆུ་གཙང་མ་ལ་གཙུག་ལག་གི་ཚིགས་སུ་བཅད་པ་དག་གིས་བརྗོད་པར་བྱ་སྟེ་སྦྱིན་པར་བྱའོ། །འདི་གཉིས་སྡོམ་གྱིས་མ་བསྡུས་ལ། བསྡུས་པ་ནི་འོག་གཞི་མེད་པའི་ས་དང་། གད་ཁ་དང་། གཡང་ས་དང་། དཀན་གཟར་པོར་ལྷུང་བཟེད་མི་གཞག་གོ །གད་ཁ་སོགས་གསུམ་དུ་མི་བཀྲུའོ། །འབབ་ཆུ་དྲག་པོའི་རྒྱུན་ལས་བཟློག་སྟེ་མི་བཀྲུའོ། །ལམ་གྱི་གཞི་མདོར་མི་བཀྲུའོ། །བདུན་པ་ནི། སྡོམ་ལ། འགྲེང་བར་བྱེད་པ་ལ་སོགས་ལྔ། །མགོ་གཡོག་ལ་སོགས་རྣམ་པ་ལྔ། །དོ་ཀེར་ཅན་ལ་སོགས་པ་ལྔ། །གླང་ཆེན་ལ་སོགས་ཞོན་པ་ལྔ། །ལག་ན་འཁར་བ་ལ་སོགས་དྲུག །ཅེས་ཏེ། དེ་ལྟར་ཟས་ཀྱི་བྱ་བ་རྫོགས་པའི་མཇུག་ཏུ། སྦྱིན་པ་བཤད་པ་དང་། ཡོན་བཤད་པ་བྱ་དགོས་སོ། །དེའི་ཚུལ་ནི། ཉན་པ་པོ་འདུག་པ་ལ་འཆད་པ་པོས་འགྲེངས་ཏེ་ཆོས་མི་བཤད་དོ། །ཉལ་བ་ལ་འདུག་སྟེ་མི་བཤད་དོ། །གདན་མཐོན་པོ་དང་བཟང་པོ་ལ་འདུག་པ་ལ་དམའ་བ་དང་ངན་པར་འདུག་སྟེ་མི་བཤད་དོ། །མདུན་དུ་འགྲོ་བ་ལ་ཕྱི་ནས་འགྲོ་ཞིང་མི་བཤད་དོ། །ལམ་གྱི་དབུས་ནས་འགྲོ་བ་ལ་ཟུར་ནས་འགྲོ་ཞིང་མི་བཤད་དོ། །གཞན་ཡང་མགོ་གཡོགས་པ་དང་གོས་བརྫེས་པ་དང་། ཕྲག་པ་ལ་གཟར་བ་དང་། ལག་པ་གཉའ་གོང་དུ་བསྣོལ་བ་དང་། ལྟག་པར་བསྣོལ་བ་ལ་ཆོས་མི་བཤད་དོ། །གཞན་ཡང་མགོ་དོ་ཀེར་ཅན་ཏེ་ཐོར་ཅོག་ཅན་དང་། ཞྭ་གྱོན་པ་དང་། ཅོད་པཎ་ཅན་དང་། ཕྲེང་བ་ཅན་དང་ཐོད་དཀྲིས་པ་རྣམས་ལ་ཆོས་མི་འཆད་དོ། །གཞན་ཡང་གླང་པོ་ཆེ་དང་། རྟ་ཞོན་པ་དང་། ཁྱོགས་དང་། བཞོན་པའི་སྟེང་ན་འདུག་པ་དང་། མཆིལ་ལྷྭམ་གོན་པ་རྣམས་ལ་ཆོས་མི་བཤད་དོ། །གཞན་ཡང་ལག་ན་འཁར་བ་དང་། གདུགས་དང་། མཚོན་ཆ་དང་། རལ་གྲི་དང་། དགྲ་ཆ་ཐོགས་པ་དང་། གོ་གྱོན་པ་ལ་ཆོས་མི་བཤད་དོ། །བརྒྱད་པ་སྒྲུབ་པའི་ཚུལ་ལས་གྱུར་པའི་སྡེ་དང་། དགུ་པ་རྒྱུ་བ་དགག་པའི་སྡེ་གཉིས་ནི། ན་བ་རྣམ་པ་བརྒྱད་རྣམས་སོ། །ཞེས་ཏེ། དེ་ལྟར་ཟས་ཟོས་ཟིན་པའི་རྗེས་སུ་ཟས་ཀྱི་རྒྱུ་མཐུན་ཟག་པ་འདོར་བའི་ཚུལ་ནི། འགྲེངས་ཏེ་བཤང་གཅི་མི་བྱ། ཆུའི་ནང་དུ་མི་བྱ། བྱས་ཟིན་མི་དོར་རོ། །དེ་བཞིན་དུ་སྣབས་དང་། སྐྱུགས་པ་དང་། རླུགས་པ་དང་། ལུད་པ་རྣམས་ཆུའི་ནང་དུ་མི་བྱ། བྱས་ཟིན་མི་དོར་རོ། །རྩྭ་སྔོན་ཡོད་པའི་ཕྱོགས་སུ་དེ་དག་མི་བྱ། མི་དོར་རོ། །ཕྱོགས་ཐམས་ཅད་དུ་རྩྭ་སྔོན་གྱིས་ཁྱབ་ན་ལྟུང་བ་མེད་དོ། །དེ་དག་ནི་སྒྲུབ་པའི་ཚུལ་ལས་གྱུར་པའི་སྡེའོ། །རྒྱུ་བ་དགག་པའི་སྡེ་ནི། གནོད་པ་བྱུང་བ་རྣམས་མ་གཏོགས་ཤིང་ལ་སོགས་པ་ལ། མི་གོང་ཙམ་མཐོར་མི་འཛེག་གོ །མདོར་ན་རབ་ཏུ་བྱུང་བ་རྣམས་ཀྱིས་འགྲོ་འཆག་ཉལ་འདུག་པའི་སྤྱོད་ལམ་ཐམས་ཅད་བག་ཡོད་པར་བྱ་ཞིང་གཞན་གྱིས་མ་དད་པའི་དམིགས་རྐྱེན་མི་བྱའོ། །དགོངས་མོའི་དུས་སུ་ཡང་ཀློག་པ་ཐོས་བསམ་མམ། སྒྲུབ་པ་བསམ་གཏན་གང་རུང་ལ་འབད་པར་བྱའོ། །ནམ་གྱི་སུམ་ཆ་སོང་ནས་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ཏེ། ལུས་དང་། སེམས་དང་། གོས་མ་འཕྱར་བས་ཉལ་བར་བྱའོ། །ལུས་མ་འཕྱར་བ་ནི་གཞོགས་གཡས་པ་ས་ལ་ཕབ་སྟེ་ལག་པ་གཡོན་པ་བརླའི་སྟེང་དུ་བཞག གཡས་པས་འགྲམ་པ་བརྟེན། པུས་མོ་སྙིང་གར་སླེབ་པར་དགུག འདོད་པའི་ཕྱོགས་སུ་མགོ་བོ་སྟན་ཏེ་ཉལ་བར་བྱའོ། །སེམས་མ་འཕྱར་བ་ནི་མྱུར་དུ་ལངས་ཏེ་དགེ་སྦྱོར་བྱའོ་སྙམ་པ་དང་། སྣང་བ་སྐྱ་འོལ་ཡིད་ལ་བྱ་བ་དང་། འཆི་བ་མི་རྟག་པ་དང་། འཁོར་བའི་ཉེས་དམིགས་དང་། དཀོན་མཆོག་གི་ཡོན་ཏན་བསམ་པ་སོགས་དགེ་བའི་སེམས་ཀྱིས་ཉལ་བར་བྱའོ། །གོས་མ་འཕྱར་བ་ནི། ཤམ་ཐབས་ཕུད། ཤམ་ཐབས་ཀྱི་གཟན་བགོས། སྣམ་སྦྱར་དང་བླ་གོས་རིམ་པ་མང་དུ་ལྟེབ་ནས་སྔས་སུ་བཅུག རུང་བའི་སྟན་ལ་ཉལ་བར་བྱའོ། །དགེ་སློང་གི་ལྟུང་བ་སྡེ་ལྔ་དང་། དེ་དག་སྤོང་བའི་གཉེན་པོ་རྣམས་བཤད་ཟིན་ཏོ། །དགེ་སློང་མའི་བསླབ་པ་ནི། མཐའ་བརྒྱད་དགེ་འདུན་ལྷག་མ་ཉི་ཤུ་དང་། །དེ་བཞིན་སྤོང་བ་སུམ་ཅུ་རྩ་གསུམ་དང་། །ལྟུང་བྱེད་འབའ་ཞིག་བརྒྱ་དང་བརྒྱད་ཅུ་དང་། །སོ་སོར་བཤགས་པར་བྱ་བ་བཅུ་གཅིག་དང་། །བསླབ་པའི་ཕྲེང་བ་ལྷག་མར་བཅས་པ་སྟེ། །ཞི་བར་བྱེད་པ་དགེ་སློང་ཕ་དང་མཐུན། །ཅེས་ལྟུང་བ་སུམ་བརྒྱ་དྲུག་ཅུ་རྩ་གཉིས་གསུངས་ཏེ་གཞན་དུ་ཤེས་པར་བྱའོ། །བསླབ་པའི་མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ་བསྟན་ཟིན་ཏོ།། ༈ །།བཞི་པ་བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ་ལ་གསུམ་སྟེ། དུས་ཅིག་ཆར་བ་དང་འབྲེལ་བ་གསོ་སྦྱོང་། དགག་དབྱེའི་རྒྱུ་དབྱར་གནས། དུས་རེས་འགའ་བ་དང་འབྲེལ་པ་དགག་དབྱེའི་སྒོ་ནས་བསྲུང་བའོ། །དང་པོ་ནི། བསླབ་པ་གསུམ་གསོ་ཞིང་མི་མཐུན་ཕྱོགས་སྦྱོང་བར་བྱེད་པས་ན་གསོ་སྦྱོང་སྟེ། ཀརྨ་ཤ་ཏམ་ལས། གསོ་སྦྱོང་ཞེས་བྱ་བ་ནི། བསླབ་པ་གསུམ་པོ་དག་གསོ་ཞིང་སྦྱོང་བར་བྱེད་པ་སྟེ་ཞེས་གསུངས་པས་དབྱེ་ན་བསླབ་པ་གཞན་གཉིས་གསོ་ཞིང་སྦྱོང་བར་བྱེད་པ་ཞི་གནས་ཀྱི་གསོ་སྦྱོང་དང་། ཚུལ་ཁྲིམས་ཀྱི་བསླབ་པ་གསོ་ཞིང་སྦྱོང་བར་བྱེད་པ་མཐུན་པའི་གསོ་སྦྱོང་གཉིས་ལས། དང་པོ་ནི། སྤོང་ཁང་མཚན་ཉིད་དང་ལྡན་པ། ཞལ་ཏ་བ་དང་བཅས་པར་དགེ་སློང་བསམ་གཏན་པས་འདུག་སྟེ། ཞི་གནས་ལྷག་མཐོང་ཟུང་སྦྲེལ་གྱི་སེམས་དང་སེམས་ལས་བྱུང་བའི་ཏིང་ངེ་འཛིན་བསྒོམས་པས་ལྟུང་བའི་རྒྱུ་ཉོན་མོངས་པ་དང་རྣམ་པར་རྟོག་པ་སྤངས་པ་ལས་རྒྱུད་ལ་ལྟུང་བས་མི་གོས་ཤིང་ཚུལ་ཁྲིམས་རྣམ་པར་དག་པར་འགྱུར། དེ་ལ་བརྟེན་ནས་སེམས་དང་ཤེས་རབ་ཀྱི་བསླབ་པ་གོང་ནས་གོང་དུ་འཕེལ་བར་བྱེད་པའི་ཐབས་ཤིག་ཡིན་ཏེ། གཞན་དུ་སྟོན་ཏོ། །གཉིས་པ་མཐུན་པའི་གསོ་སྦྱོང་ལ་སྤྱིར་བསྟན་པ་དང་། སྐབས་སུ་བབ་པ་བྱེ་བྲག་ཏུ་བཤད་པ་གཉིས་ལས། དང་པོ་ནི། ཀརྨ་ཤ་ཏམ་ལས། མཐུན་པའི་གསོ་སྦྱོང་ནི་རྣམ་པ་ལྔ་སྟེ། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་ཀྱི་གསོ་སྦྱོང་དང་། གནོད་པ་དབྱུང་བའི་གསོ་སྦྱོང་དང་། བསྡུམ་པའི་གསོ་སྦྱོང་ངོ་ཞེས་སོ། །དེ་ལ་བཅུ་བཞི་པ་དང་། བཅོ་ལྔ་པ་གཉིས་འོག་ཏུ་བསྟན་ལ། བཀྲ་ཤིས་ཀྱི་གསོ་སྦྱོང་ནི། ཧུ་ལུ་ཧུ་ལུ་ཡི་རང་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གཉིས་དཀྲུགས་དང་གདིང་། །གསེར་གྱི་རུང་བ་བྱས་པ་ནི། །འདི་དག་རུང་མིན་གཞི་བཅུ་ཡིན། །ཞེས་རུང་བ་མ་ཡིན་པའི་གཞི་བཅུ་ལྟ་བུ་སེལ་བ་དང་། རབ་གནས་སོགས་བཀྲ་ཤིས་པའི་དུས་དང་། གནོད་པ་དབྱུང་བའི་གསོ་སྦྱོང་ནི། ནད་ཡམས་སོགས་ཞི་བའི་ཆེད་དང་། བསྡུམ་པའི་གསོ་སྦྱོང་ནི་དགེ་འདུན་བྱེ་ན་བསྡུམ་པ་སོགས་ཀྱི་ཚེ་བྱ་ཞིང་། ལས་བྱེད་པའི་ཚེ་ནའང་འདིའང་དགེ་འདུན་གྱི་བཀྲ་ཤིས་པའི་གསོ་སྦྱོང་ལགས་ལ་ཞེས་བརྗོད་དོ། །གཉིས་པ་ནི་བཅུ་བཞི་པ་དང་། བཅོ་ལྔ་པ་ཡིན་པས་འདི་ལ་དྲུག་སྟེ། གནས་གང་དུ། དགེ་འདུན་གང་དག་གིས། དུས་ནམ་གྱི་ཚེ། ཆོ་ག་ཇི་ལྟ་བུས། དགོས་པ་གང་གི་ཕྱིར་གསོ་སྦྱོང་བྱ་བ་དང་། གསོ་སྦྱོང་གི་དམིགས་བསལ་ལོ། །དང་པོ་ནི། མཚམས་གང་དུ་དགེ་འདུན་གསོ་སྦྱོང་སྔོན་དུ་བྱེད་པར་གསོལ་བ་དང་གཉིས་ཀྱི་ལས་ཀྱིས་བློ་མཐུན་པར་བྱས་པ་དེར་གསོ་སྦྱོང་བྱེད། གསོལ་གཉིས་ཀྱི་ལས་ནི་འོག་ནས་སྟོན། གཉིས་པ་དགེ་འདུན་ནི་མཚམས་ནང་ན་ཡོད་པ་ཇི་སྙེད་འདུས་སམ་འདུན་པས་འདུ་དགོས་ལ། བཞི་ཡན་ཆད་ཚང་བའི་མཚན་ཉིད་གསུམ་དང་ལྡན་པས་སོ། །གསུམ་པ་དུས་ནམ་གྱི་ཚེ་བྱ་བ་ནི་འདིར་དུས་ཚིགས་ཀྱི་རྣམ་གཞག་ཤེས་དགོས་པས། རྒྱས་པར་ནི་གཞན་དུ་འཆད་ལ་སྐབས་སུ་མཁོ་བ་ནི་སྨིན་དྲུག་གི་ཉ་བའི་ཕྱི་དེ་ཉིན་བར་མར་ངོའི་ཚེས་གཅིག་ནས་བཟུང་སྟེ་མགོའི་ཉ་བའི་ཟླ་བ་ནི་དུས་ཚིགས་རྣམས་ཀྱི་ཟླ་བའི་དང་པོ་ཡིན་ལ། དེ་ནས་རྒྱལ་དང་། མཆུ་དང་། དབོ་དང་། ནག་པ་དང་། ས་ག་དང་། སྣྲོན་དང་། གྲོ་ཞུན་དང་། ཆུ་སྟོད་དང་། ཁྲུམས་སྨད་དང་། ཐ་སྐར་དང་། སྨིན་དྲུག་ཟླ་བ་སྟེ་བཅུ་གཉིས་ལ་གཉིས་ཚན་དྲུག་ཏུ་བྱས་པའི་ཟླ་བ་ཕྱེད་དང་གཉིས་འདས་ནས་ཕྱེད་ལུས་པ་དྲུག་ལ་གསོ་སྦྱོང་བཅུ་བཞི་པ་འབྱུང་ལ། ཉ་ཤི་གཞན་བཅོ་བརྒྱད་ལ་བཅོ་ལྔ་པ་འབྱུང་སྟེ། དཔེར་མཚོན་ན་སྔར་གྱི་མགོའི་ཟླ་བ་རྫོགས་ནས་རྒྱལ་གྱི་ཟླ་བའི་ཕྱེད་ལུས་པའི་མར་ངོ་ལ་བཅུ་བཞི་པ་འབྱུང་བ་ལྟ་བུའོ། །བཞི་པ་ཆོ་ག་གང་གིས་གསོ་སྦྱོང་བྱེད་པ་ལ་སྦྱོར་བ། དངོས་གཞི། མཇུག་གསུམ་ལས། དང་པོ་ནི། རང་དང་། གཞན་དང་། གཉིས་ཀའི་ལྟུང་བ་ཕྱིར་བཅོས་པ་གསུམ་སྔོན་དུ་བཏང་ནས་གཙུག་ལག་ཁང་ཆག་ཆག་དང་། ཕྱག་དར་དང་། ལྕི་བ་གསར་པའི་བྱུག་པ་སོགས་ཀྱིས་གཙང་བར་བྱས་ནས། སྐུ་གསུང་ཐུགས་ཀྱི་རྟེན་ཚང་ཞིང་མཆོད་པ་ཅི་འབྱོར་པ་ཡང་བཤམས་ནས། དགེ་བསྐོས་པས་གནས་མལ་ཤོམ་པ་དང་། གྷཎྜི་བརྡུང་བར་བྱས་ནས་དྲིས་པའི་ཚིག་གིས་དགེ་སློང་རྣམས་ལ་བསྒོས་ཏེ། མཚམས་ནང་དེར་གནས་པའི་དགེ་འདུན་ཚོགས་པར་བྱ་ཞིང་། ནད་པ་སོགས་འདུ་བར་མི་ནུས་པ་རྣམས་ལས་འདུན་པ་དང་ཡོངས་དག་བླང་བར་བྱའོ། །བླ་མ་དག་སྐབས་འདིར་ཐོག་མར་སྟོན་པ་སངས་རྒྱས་ལ་སྤྱི་ཕྱག་དང་། དེ་ནས་དགེ་འདུན་རྣམས་ཟིངས་ཕྱག་བྱས་ནས་ཕན་ཚུན་ཙོག་པུར་འདུག་སྟེ། སྤྱི་བཤགས་ཚར་གསུམ་གྱི་རྗེས་སུ། ཐོག་མར་དགེ་སློང་གཅིག་གིས་གནས་བརྟན་ལ་མཐོང་སྡོམ་དྲིས་ནས་དེ་ནས་གནས་བརྟན་གྱིས་ཀུན་ལ་མཐོང་སྡོམ་དྲི་བའི་ཕྱག་ལེན་མཛད་པ་ནི་འདུལ་བར་ལས་གྲལ་དུ་མ་འདུས་པའི་གོང་དུ་རང་གཞན་གྱི་ལྟུང་བ་ཕྱིར་བཅོས་གྲུབ་པའི་དབང་དུ་བྱས་ནས་འདི་མ་བཤད་ཀྱང་དེ་མ་གྲུབ་ན་འདི་ཙམ་ལ་ཡང་ངེས་པར་བརྟེན་དགོས་པ་འདྲའོ། །དེ་ནས་གནས་བརྟན་གྱིས་བཅོམ་ལྡན་འདས་ཀྱིས་གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ་ཞེས་གསུངས་པ་ལྟར་ཕྱག་ལེན་དུ་བགྱིད་པ་ལ། སྦྱོར་དངོས་རྗེས་གསུམ་ལས། སྦྱོར་བ་ལ་རང་གཞན་གྱི་ལྟུང་བ་ཕྱིར་བཅོས་པ། གྷཎྜི་བརྡུང་བ། དགེ་འདུན་བསྡུ་བ། དྲིས་པའི་ཚིག་གིས་ལན་གདབ་པ། སྟན་ཐབས་མི་ཉམས་པར་བྱ་བ་རྣམས་སྔོན་དུ་སོང་ནས། མདོ་རྩ་བར། ཚེས་བརྒྱད་དང་། བཅུ་བཞི་དང་། བཅོ་ལྔའི་ནུབ་མོ་ཆོས་ཉན་པ་སྦྱིན་པར་བྱ་ཞེས་བཤད་པས། བཤད་ཉན་མ་བྱས་པའི་ཉེས་པ་སྤོང་བའི་ཆེད་དུ་མདོ་ཐུང་གཅིག་འདོན་པར་བགྱི་བས་གསན་འཚལ་ཞེས་བརྗོད་ལ། འདུལ་བ་རྒྱལ་པོ་རྗེ་ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པ་རབ་ཐུལ་བ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་པ་ཅུང་ཟད་བརྗོད་པར་བྱ། །ལྷ་དང་ཀླུ་དང་ལྷ་མིན་མིའམ་ཅི་ཡི་དབང་པོ་དང་། །བརྒྱ་བྱིན་ལ་སོགས་ཆོས་ཀྱི་མཆོག་ལ་བྱ་བ་བྱས་པ་རྣམས། །སངས་རྒྱས་གསུངས་པ་རབ་ཏུ་ཞི་ཞིང་བདེ་བའི་རྒྱུར་གྱུར་པ། །འདི་དག་བཤད་ཀྱིས་དམ་པའི་ཆོས་ཉན་ཕྱིར་ནི་འདིར་གཤེགས་ཤིག །གང་ཞིག་གསེར་མཆོག་རི་རབ་ལ་གནས་ལྷ་དང་མནྡཱ་རར་བཅས་གནོད་སྦྱིན་གང་ཡིན་དང་། །གདེངས་ཀའི་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རི་ནི་དཔལ་གྱིས་རོལ་ཞིང་རབ་ཏུ་ཡིད་དགའ་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་ཉན་ཕྱིར་ནི་འདིར་གཤེགས་ཤིག །དེ་བས་རྒྱ་ཆེན་ཡོན་ཏན་རིན་ཆེན་གཏེར་གྱུར་པ། །དོན་གཞན་བྱེད་པ་འདི་ལ་དད་ཅིང་གུས་པར་གྱིས། །འདི་བས་ལྷག་པའི་མཉན་བྱ་གཞན་དག་ཡོད་མིན་པས། །དབང་པོའི་རྟ་ནི་ལེགས་པར་ཐུལ་ལ་ཐུབ་པའི་གསུང་ཉན་གྱིས། །སྟོན་པའི་ཞལ་ནས་བྱུང་བའི་སྐྱེ་བོའི་མིག་ནི་བཀྲ་ཤིས་ཀྱི། །འབྱུང་གནས་སེམས་ལ་ཞོག་ཅིག་གང་ཕྱིར་འདི་ནི་ལུས་ཅན་ཀུན་གྱི་རྣ་བའི་བདུད་རྩི་དང་། །ཉོན་མོངས་པ་ཡི་ནད་ཀུན་སེལ་བར་མཛད་པ་ཡིན་པས་འདི་དོན་ཡང་དག་བསམ་པར་གྱིས། །འཇིག་རྟེན་སངས་རྒྱས་འབྱུང་བ་བརྒྱ་ལམ་ན། །མི་ཡི་ལུས་ནི་ཚོགས་ཀྱིས་རྙེད་པ་ཡིན། །ཀྱེ་མ་དད་པ་དང་ནི་ཆོས་ཉན་པ། །འདི་འདྲ་བསྐལ་པ་བརྒྱར་ཡང་རྙེད་པར་དཀའ། །མཁས་པ་རྟག་ཏུ་དགོས་པ་བག་ཡོད་ཅིང་། །བསོད་ནམས་ཡིད་ལ་བྱ་བ་དེ་བརྩོན་བྱ། །རྒྱུ་འདི་རྣམས་ཀྱིས་སངས་རྒྱས་ཀྱི་ནི་གསུང་ངག་མཉན་པར་བྱ་བའི་རིགས། །སྟོབས་བཅུ་ཏིང་འཛིན་སོགས་དང་། མི་མཆོག་འདུལ་བ་སོགས་དང་། ཉི་མའི་འོད་ཟེར་སོགས་དང་། ཁམས་གསུམ་པ་ཡི་སོགས་དང་། གང་གིས་འཆིང་རྣམས་སོགས་དང་། ཡོན་ཏན་རིན་ཆེན་སོགས་ཀྱིས་སྟོན་པ་ལ་ཕྱག་བྱས་ནས།། ༈ །།འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རྭ་བ་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤེས་པ་ནི་འགྲིབ། སྲོག་ནི་ཆད། ཚེའི་འདུ་བྱེད་ནི་ངེས་པར་འཇོམས་པར་འགྱུར་ན། ཅིའི་ཕྱིར་བརྩོན་འགྲུས་དང་བརྟུལ་བ་བརྟན་པོས་སྒྲུབ་པར་མི་བྱེད། མིའི་ལུས་ནི་ཤིན་ཏུ་རྙེད་པར་དཀའ་ན་དེ་ཐོབ་ནས་རྙེད་པའི་རྒྱལ་བའི་བསྟན་པ་ལ་རབ་ཏུ་བྱུང་བ་ཡང་རྙེད་ནས་ཐར་པའི་དོན་དང་མི་མཐུན་པ་དག་གིས་བསླུས་ཏེ་སྡུག་བསྔལ་བར་གྱུར་ཏ་རེ། སྲོག་དང་བྲལ་ཞིང་ཤི་བ་ནི་སླའི་ཚུལ་ཁྲིམས་ཉམས་ཤིང་ཞིག་པ་ནི་དེ་ལྟར་མ་ཡིན་ནོ། །དེ་ཅིའི་ཕྱིར་ཞེ་ན། སྲོག་དང་བྲལ་བ་ནི་ཚེ་འདི་ཉིད་ཀྱི་སྐྱེ་བ་ཟད་པར་གྱུར་གྱི། ཚུལ་ཁྲིམས་ཉམས་ཤིང་ཞིག་པས་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤངས་ཏེ། རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །དེ་ཕྱིར་སྟོན་པས་ཚུལ་ཁྲིམས་རབ་བསྔགས་བཤད། །ཚུལ་ཁྲིམས་བསྲུངས་པས་སངས་རྒྱས་འབྱུང་དང་ཕྲད། །ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག །ཚུལ་ཁྲིམས་ལྡན་པ་དྲི་དང་བྱུག་པ་ཡིན། །ཚུལ་ཁྲིམས་ལྡན་པ་དགའ་བ་ཀུན་གྱི་གནས། །ཚུལ་ཁྲིམས་གདུང་བ་སེལ་བ་བསིལ་བའི་ཆུ། །ཚུལ་ཁྲིམས་ལྡན་པ་འཇིག་རྟེན་ཀུན་གྱིས་བསྟོད། །ཚུལ་ཁྲིམས་དག་གིས་འགྲོ་བ་དམ་པ་མནོས། །ཇི་ལྟར་སྦྲུལ་གདུག་ཀླུ་ཆེན་ནག་པོ་ཡང་། །ཚུལ་ཁྲིམས་ཅན་ལ་གནོད་མེད་གཞན་ཅི་སྨོས། །ཚུལ་ཁྲིམས་ལྡན་པའི་དགེ་སློང་འོད་དང་ལྡན། །ཚུལ་ཁྲིམས་ལྡན་པ་གྲགས་འགྱུར་བདེ་བ་ཐོབ། །ཚུལ་ཁྲིམས་དག་གིས་མཐོ་རིས་སྐྱེ་བའི་རྒྱུ། །ཚུལ་ཁྲིམས་ལྡན་པས་མྱ་ངན་འདས་ཐོབ་འགྱུར། །ཇི་ལྟར་མིག་མེད་གཟུགས་མཐོང་མི་རུང་ལྟར། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཇི་ལྟར་བུམ་པ་བཟང་པོ་རིན་ཆེན་སྣོད། །དེ་བཞིན་ཚུལ་ཁྲིམས་ཆོས་ཀུན་སྐྱེ་བའི་གཞི། །ཇི་ལྟར་བུམ་ཆག་རིན་ཆེན་སྣོད་མི་རུང་། །དེ་བཞིན་ཚུལ་ཁྲིམས་རལ་པས་ཆོས་ཀུན་གཏུགས། །དང་པོ་ཚུལ་ཁྲིམས་མེད་པར་གྱུར་པ་དེ། །ཕྱིས་ནས་མྱ་ངན་འདས་པ་ཐོབ་སྙམ་མམ། །སྣ་མེད་སྣ་རྡུམ་ལ་སོགས་གང་ཡིན་པ། །དེ་ལ་མེ་ལོང་དག་ནི་དགོས་མི་འགྱུར། །རྣ་བས་མ་ཐོས་མིག་སྔར་མ་མཐོང་ཡང་། །བསྟན་བསྲུང་མི་དེ་མཐོ་རིས་འགྲོ་བར་འགྱུར། །ཐོས་མང་ཐོས་ལྡན་ཐོས་བསྲུང་མཐོ་རིས་ཉིད། །བུད་མེད་བསྟེན་དུ་ག་ལ་རུང་། །རྒྱལ་པོའི་ཕོ་བྲང་ག་ལ་དགའ། །ལྦུ་བ་སྙིང་པོ་ག་ལ་ཡོད། །ལོངས་སྤྱོད་རྟག་པ་ག་ལ་ཡིན། །བུད་མེད་དག་ལ་རུང་བ་མེད། །རྒྱལ་སྲིད་དག་ལ་དགའ་བ་མེད། །ལྦུ་བ་དག་ལ་སྙིང་པོ་མེད། །ལོངས་སྤྱོད་དག་ལ་རྟག་པ་མེད། །ལོངས་སྤྱོད་དག་ནི་འབབ་ཆུ་བཞིན། །གྲུ་དེ་ཅི་འདྲ་ཁྱིམ་དེ་འདྲ། །མེ་ཏོག་ཅི་འདྲ་གཟུགས་དེ་བཞིན། །སྲོག་ནི་ཆུ་བུར་འདྲ་བ་ཡིན། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཉེ་བ་འཁོར་ལ་སོགས་པའི་དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་ཚུལ་ཁྲིམས་ཀྱི་ཆེ་བའི་ཡོན་ཏན་ལན་གཅིག་བརྗོད་པར་བྱ། དེའི་འོག་ཏུ་ཐམས་ཅད་ཀྱིས། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་བསྔོ་བ་རྣམ་པར་དག་པས་རྒྱས་གདབ་པར་བྱའོ། །དགེ་ཚུལ་གྱི་གསོ་སྦྱོང་བྱེད་པ་མདོ་རྩ་བ་ནས་མ་བསྟན་ཀྱང་སློབ་དཔོན་ཤཱཀྱ་འོད་ཀྱིས་དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད་ཅེས་གསུངས་པ་དང་། མདོ་རྩ་བ་ནས་སྡེ་པ་ལྔ་ཆར་གྱིས་དབྱར་གནས་པར་ཁས་བླང་བར་བྱའོ། །དེའི་འོག་ཏུ་དགེ་ཚུལ་རྣམས་ལ་དགག་དབྱེ་བྱའོ། །ཞེས་གསུངས་པ་དང་བསླབ་པ་ཡོངས་སུ་སྦྱང་བའི་གཞི་གསུམ་པོས་རྒྱུད་དག་པར་བྱེད་པར་མཚུངས་པས། དགེ་ཚུལ་གྱིས་ཀྱང་གསོ་སྦྱོང་བྱེད་དགོས་པས། དེའི་འོག་ཏུ་གནས་བརྟན་གྱིས་དགེ་ཚུལ་རྣམས་གསོ་སྦྱོང་བཅུ་བཞི་པའམ་བཅོ་ལྔ་པ་མཛོད་ཅིག་ཅེས་སྐབས་དང་སྦྱར་ལ་བརྗོད། དགེ་ཚུལ་རྣམས་ཀྱིས་ཀྱང་མདོ་འདོན་པ་པོ་མཁན་པོ་སློབ་དཔོན་གནས་བརྟན་ལ་སོགས་གང་ཡིན་སྐབས་དང་སྦྱར་ནས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ལ་བདག་དགེ་ཚུལ་མིང་འདི་ཞེས་བགྱི་བའི་ཡང་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་མཆིའོ། །བདག་ཡོངས་སུ་དག་པར་མཁན་པོས་གཟུང་དུ་གསོལ། ཞེས་པ་ལྟ་བུ་ལན་གསུམ་བརྗོད་པའི་རྗེས་ལ། ཡུལ་གྱིས་ཐབས་ཡིན་ནོ། །དགེ་ཚུལ་གྱིས་ལེགས་སོ་ཞེས་བརྗོད། དགེ་ཚུལ་རྣམས་ཕྱག་བྱས་ཏེ་སོང་བའི་འོག་ཏུ་དགེ་སློང་རྣམས་སོ་སོའི་རྒྱུད་ལ་ཡོད་པའི་ལྟུང་བ་སོ་སོའི་མིང་རིགས་ཀྱི་སྒོ་ནས་ཕྱིར་བཅོས་ལེགས་པར་གྲུབ་ན་སྡེ་ལྔའི་བཤགས་པ་དང་ལྟུང་བ་སྤྱིའི་བྱིན་རླབས་མི་དགོས་མོད་ཀྱི་འོན་ཀྱང་ལག་ལེན་དོག་མཐའ་ལ་བརྟེན་པ་སངས་རྒྱས་པའི་ཕྱག་བཞེས་ལགས་པས་དགེ་སློང་རྣམས་ཀྱིས་སྡེ་ལྔའི་བཤགས་པ་ལན་གསུམ་མཐོང་སྡོམ་དང་བཅས་པ་བྱ་ཞིང་དགེ་འདུན་རྣམས་ལྟུང་བ་སྤྱིའི་བྱིན་རླབས་ལ་ཐུགས་གཏད་པར་ཞུ་བྱས་ནས། གནས་བརྟན་གྱིས་དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་ཅག་དགེ་སློང་ཐམས་ཅད་ནི་ལྟུང་བ་དག་དང་བཅས་པར་གྱུར་ན་གང་གི་མདུན་དུ་བདག་ཅག་གི་ལྟུང་བ་དེ་ཆོས་བཞིན་དུ་སླར་བགྱི་བ་བདག་ཅག་ལས་དགེ་སློང་གནས་གཞན་དུ་མཆིས་ཏེ་དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་བགྱིད་པའི་དགེ་སློང་སུ་ཡང་སྤྲོ་བ་མ་མཆིས་ན་གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དེང་དགེ་འདུན་གྱིས་ལྟུང་བ་དེ་དག་བྱིན་གྱིས་རླབས་ཏེ་གསོ་སྦྱོང་མཛད་ལ། སླད་ཀྱི་དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་བགྱིའོ། །འདི་ནི་གསོལ་བའོ་ཞེས་ལན་གཅིག་བརྗོད། དེའི་འོག་ཏུ་སྔར་བློ་མཐུན་མེད་དམ་ཡོད་ཀྱང་ཞིག་ན་གནས་ཀྱི་བློ་མཐུན་གཅིག་ཀྱང་བགྱི་བྱས་ནས་དགེ་འདུན་བཙུན་པ་རྣམས་དགོངས་སུ་གསོལ། གནས་ཐམས་ཅད་བགྱིས་པའམ་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིད་ན་གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་གནས་ཐམས་ཅད་བགྱིས་པའམ་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །ལས་བྱ་བ་ནི། གསོལ་བའི་ལས་ཐལ་ནས་བརྗོད་པའི་ལས་ལ་ཐུགས་གཏད་པར་ཞུ་འཚལ་བྱས་ལ། དགེ་འདུན་བཙུན་པ་རྣམས་དགོངས་སུ་གསོལ། གནས་ཐམས་ཅད་བགྱིས་པའམ་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམས་གང་དང་བཅས་པ་འདི་དགེ་འདུན་གྱིས་གསོ་སྦྱོང་གི་གནས་སུ་བློ་མཐུན་པར་བཞེད་དེ། དེའི་སླད་དུ་དགེ་འདུན་གྱིས་གནས་ཐམས་ཅད་བགྱིས་པའམ་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་མཛད་ན། ཚེ་དང་ལྡན་པ་གང་དག་གནས་ཐམས་ཅད་བགྱིས་པའམ་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་མཛད་པར་བཟོད་པ་དེ་དག་ནི་ཅང་མ་གསུངས་ཤིག གང་དག་མི་བཟོད་པ་དེ་དག་ནི་གསུངས་ཤིག དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གནས་ཐམས་ཅད་བགྱིས་པའམ་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་མཛད་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བརྗོད་པར་བྱའོ། །གསོ་སྦྱོང་གི་གནས་སུ་བློ་མཐུན་བྱས་ལ་མ་ཞིག་པ་དེར་ལས་གཞན་བྱེད་ན་བློ་མཐུན་བསྐྱར་མ་ནི་བྱེད་མི་དགོས་ཏེ། མདོ་རྩར་ལས་གཞན་གྱི་གནས་ཀྱང་དེ་ཡིན་ནོ་ཞེས་བཤད་པས་སོ། །དེའི་འོག་ཏུ་དགེ་སློང་གཞོན་པ་གཅིག་གིས་མདོ་འདོན་པ་ལ་མེ་ཏོག་དབུལ་ཞིང་ཕྱག་བྱས་ལ་གནས་བརྟན་ཐུགས་བརྩེ་བ་ཅན་ཐུགས་བརྩེ་བས་ཉེ་བར་དགོངས་ལ་བདག་ཅག་དགེ་འདུན་འདིར་འདུས་པ་རྣམས་ལ་སོ་སོར་ཐར་པའི་མདོ་བཀས་གནང་བ་ཞུ་ཞེས་ལན་གསུམ་གསོལ་བ་གདབ་བོ། །དེ་དག་ནི་སྦྱོར་བའི་ཆོ་གའོ། །གཉིས་པ་དངོས་གཞིའི་ཆོ་ག་ནི། མདོ་འདོན་པ་པོས་རང་ལ་དགེ་སློང་གི་འདུ་ཤེས། སོ་སོར་ཐར་པ་ལ་སྟོན་པ་སངས་རྒྱས་ཀྱི་འདུ་ཤེས། སངས་རྒྱས་ཀྱི་བསྟན་པ་ཡུན་རིང་དུ་གནས་པའི་འདུ་ཤེས་གསུམ་བཞག་ནས་གསན་འཚལ་ཞེས་བརྗོད་ལ། སོ་སོར་ཐར་པའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །སྙན་པའི་བ་དན་འཇིག་རྟེན་གསུམ་དུ་གྲགས། །ཞེས་པ་ནས། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་པའི་བར་གླེང་གཞི་དང་། གསོལ་བ་དང་རྣམ་གཞག་འཛིན་དུ་གཞུག་པ་རྣམས་ནི་ངེས་པར་འདོན་དགོས་ལ་དེའི་སྟེང་དུ་ཕམ་པའི་སྡེ་དང་། ལྷག་མའི་སྡེ་དང་། མ་ངེས་པའི་སྡེ་ཅི་ཙམ་འདོན་ནུས་པ་བཏོན་ནས་ལྷག་མ་ཐོས་པ་བསྒྲགས་པས་ཀྱང་རུང་ངོ་། །ལྟུང་བྱེད་ལ་རེག་ན་རིལ་གྱིས་འདོད་པར་བྱའོ། །དེ་ལ་དང་པོའི་རྗེས་སུ་ཐོས་པ་བསྒྲགས་ན་སླད་མ་ཕམ་པ་འདོན་པ་དང་། ལྷག་མ་འདོན་པ་དང་། མ་ངེས་པ་འདོན་པ་དང་། རིལ་གྱིས་འདོན་པ་རྣམས་ནི་སྔར་གསན་པའམ་སླད་ཀྱིས་གསན་པར་འགྱུར་བ་ལ་ལྟོས་པ་ལགས་སོ་ཞེས་ལན་གཅིག་བརྗོད་པར་བྱའོ། །སྔར་སོ་ཀ་རྣམས་ཀྱི་འདས་པ་དང་ལྷག་མ་ཅི་ཙམ་པ་དེ་ཙམ་མོ་ཞེས་པའི་སྐབས་སུ་དགུན་སྟོད་དང་། དགུ་སྨད་དང་། དཔྱིད་དང་། སོས་ཀ་དང་། དབྱར་དང་། སྟོན་ཏེ་དུས་ཚིགས་དྲུག་ཏུ་བྱས་ནས་དྲུག་པོ་རང་རང་གི་འདས་པ་དང་། འབྱུང་བར་འགྱུར་བ་བརྗོད་དགོས་ཏེ། སྨིན་དྲུག་གིས་ཉ་བའི་ཟླ་བ་རྫོགས་པའི་འོག་ཟླ་བ་ཕྱེད་འདས་པའི་དུས་སུ་དགུན་སྟོད་ཀྱི་དུས་ཟླ་བ་གཉིས་ལས་ཕྱེད་ནི་འདས་ལ། ཕྱེད་དང་གཉིས་ནི་སླད་དུ་ལུས་པ་ལགས་སོ་ཞེས་པ་དང་། མགོའི་ཉ་བའི་ཚེ། དགུན་སྟོད་ཀྱི་དུས་ཟླ་བ་གཉིས་ལས་གཅིག་ཉིད་འདས་ཏེ། གཅིག་ཉིད་སླད་དུ་ལུས་པ་ལགས་སོ་ཞེས་དང་། དེ་ནས་ཟླ་བ་ཕྱེད་འདས་པ་ན་དགུན་སྟོད་ཀྱི་དུས་ཟླ་བ་གཉིས་ལས། ཕྱེད་དང་གཉིས་ནི་འདས་ཏེ་ཕྱེད་ནི་སླད་དུ་ལུས་པ་ལགས་སོ་ཞེས་པ་དང་། རྒྱལ་གྱི་ཟླ་བའི་ཚེ་དགུན་སྟོད་ཀྱི་དུས་ཟླ་བ་གཉིས་ནི་འདས་ཏེ་སླད་དུ་མ་ལུས་པ་ལགས་སོ་ཞེས་བརྗོད། གསོལ་བའི་སྐབས་སུ་བཅུ་བཞི་པའམ་བཅོ་ལྔ་གང་རུང་སྐབས་དང་བསྟུན་ནས་སྦྱར་ནས་བརྗོད་དོ། །གསུམ་པ་མཇུག་གི་ཆོ་ག་ནི་གནས་བརྟན་གྱིས། སོ་སོར་ཐར་པ་འདོན་པ་ཡི། །ཞེས་བརྗོད་པ་དང་། ཉན་པ་པོ་རྣམས་ཀྱིས། སོ་སོར་ཐར་པ་མཉན་པ་ཡི། །ཞེས་སོགས་ཚིགས་བཅད་གཅིག་གིས་བསྔོ་བ་རྣམ་པར་དག་པས་རྒྱས་གདབ། དེའི་འོག་ཏུ་བརྩམས་པར་བྱ་ཞིང་དབྱུང་བར་བྱ། །ཞེས་སོགས་ཚིགས་བཅད་གཉིས་བརྗོད་ནས། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཞེས་སོགས་སྨོན་ལམ་དང་། འབྱུང་པོ་གང་དག་འདིར་ནི་ལྷགས་གྱུར་ཏེ། །ཞེས་སོགས་བརྗོད་པར་བྱའོ། །ལྔ་པ་དགོས་པ་ནི། དངོས་སུ་གསོ་སྦྱོང་མ་བྱས་པའི་ཉེས་པ་སྤོང་། བརྒྱུད་ནས་བསླབ་པ་གསུམ་གསོ་ཞིང་སྦྱོང་བའི་དགོས་པ་ཡོད་དོ། །དྲུག་པ་དེ་དག་གི་དམིགས་བསལ་ནི། གནས་དེ་ན་སོ་སོར་ཐར་པའི་མདོ་འདོན་པ་མེད་པའི་ཚེ་དང་། ཚོགས་སུ་མ་ཚང་བ་དང་། སྒྲ་མི་འདོད་པའི་ཚེ་ན་གསོ་སྦྱོང་བྱིན་གྱིས་བརླབ་སྟེ། དེ་ལ་སྦྱོར་བ། དངོས་གཞི། རྗེས་གསུམ་ལས། དང་པོ་ནི། ཡུལ་དགེ་སློང་ཆོས་དགུ་ལྡན་གཅིག་གི་མདུན་དུ། བདག་ཉིད་སྡེ་ལྔའི་སྡོམ་པ་གསོ་རུང་བ་ལ་ཞུགས་པ་ཡན་ཆད་དང་ལྡན་པ། བསམ་པ་རང་བཞིན་དུ་གནས་ཤིང་རྐྱེན་དང་ལྡན་པ། ཉ་ཤིའི་ཚེ་བྱིན་གྱིས་བརླབ་པའི་ཡུལ་དགེ་འདུན་དང་གང་ཟག་རང་བས་རྒན་པ་ལ་ཕྱག་བྱ། གཞོན་ན་ཐུགས་གཏད་པར་ཞུ་བ་དབུལ། གཉིས་པ་དངོས་གཞི་ནི། དགེ་འདུན་བཙུན་པ་རྣམས་དགོངས་སུ་གསོལ། ཞེས་པའམ་གང་ཟག་གི་མདུན་དུ་བྱིན་གྱིས་བརློབ་ན་རྒན་ན་བཙུན་པ། གཞོན་ན་ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་གསོ་སྦྱོང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་མཆིའོ། །བདག་ཡོངས་སུ་དག་པར་བཙུན་པས་གཟུང་དུ་གསོལ། བདག་དགེ་སློང་མིང་འདི་ཞེས་བགྱི་བའི་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བགྱི་བའི་སླད་དུ། དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་མཐུན་པ་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་གསོ་སྦྱོང་རྒྱ་ཆེར་ཉམས་སུ་མྱོང་བར་བྱ་ཞིང་། སོ་སོར་ཐར་པའི་མདོ་འདོན་པ་ཡང་གདོན་པར་བགྱིའོ་ཞེས་ལན་གསུམ་བརྗོད། མཇུག་ཏུ་ཐབས་ཡིན་ནོ། །ལན་དུ་ལེགས་སོ་ཞེས་བརྗོད། དགེ་འདུན་ནམ་གང་ཟག་མེད་ན་སྦྱོར་བ་གོང་དང་འདྲ། དངོས་གཞི་ལ་ལྷ་རྣམས་དགོངས་སུ་གསོལ། དེང་དགེ་འདུན་ཞེས་ཆོ་ག་སྔར་བཞིན་བརྗོད། དེ་དག་གིས་དུས་ཅིག་ཅར་བ་དང་འབྲེལ་བ་གསོ་སྦྱོང་གི་སྒོ་ནས་སྦྱོང་བ་བསྟན་ཏོ།། ༈ །།གཉིས་པ་དགག་དབྱེའི་རྒྱུར་གྱུར་པ་དབྱར་གྱི་གཞི་ནི། དབྱར་ཟླ་བ་གསུམ་མཚམས་ནང་གཅིག་ཏུ་ཁས་བླངས་དམ་བཅའ་བརྟན་པོའི་ལྕགས་ཀྱུས་བཟུང་ནས་གནས་པས་རང་གཞན་གྱི་ལུས་སྲོག་གི་བར་ཆད་བསྲུང་གཞན་མ་དད་པ་སྤོང་། གནས་རལ་གྲུམས་འཆོས་ཤིང་། དགག་དབྱེ་དང་། སྲ་བརྐྱང་འབྱུང་། ཐོས་བསམ་སྒོམ་གསུམ་གྱི་ཤེས་རབ་གོང་ནས་གོང་དུ་འཕེལ་བར་བྱེད་པའི་ཐབས་ཅིག་ཡིན། དེ་ལ་གསུམ་སྟེ། སྦྱོར་བ། དངོས་གཞི། མཇུག་གོ །དང་པོ་ནི། དབྱར་ཟླ་འབྲིང་པོའི་ཐ་ཆུང་གི་ཚེས་བཅོ་ལྔ་ལ་གསོ་སྦྱོང་ཟིན་པའི་མཐར་དགེ་སློང་གནས་མལ་སྟོབ་པར་འོས་པ་ལག་ལེན་ཤེས་པ་གཅིག་གིས་དགེ་འདུན་ལ་བསྟབ་རྒྱུའི་གནས་མལ་དང་ཚུལ་ཤིང་གི་བམ་པོ་ཁྲུ་གང་ཡན་ཆད་ཀྱི་ཚད་དང་ལྡན་པ་སྟ་གོན་བྱ། དེ་ལ་དྲི་བཟང་གི་ཆུས་བྱུགས་ལ་རས་དཀར་པོ་དྲི་མ་མེད་པས་དཀྲིས་ཤིང་། གཟེབ་ཀྱི་སྤྲོག་མར་བཅུག དགོང་མོ་རྒྱུ་སྐར་རྣམས་མ་ཤར་ཅིང་མུན་པ་མ་བྱུང་བ་ལ། དགེ་སློང་རྣམས་ཕྱོགས་གཅིག་ཏུ་ཚོགས་རྒན་རིམ་བཞིན་དུ་འཁོད་དེ། དེ་ནས་དགེ་སློང་ལས་མཁན་གཅིག་གིས་དགེ་སློང་མིང་འདི་ཞེས་བྱ་བ་ཁྱོད་དབྱར་གྱི་གནས་མལ་སྟོབ་པར་སྤྲོའམ་ཞེས་དྲི། ཡུལ་དེས་སྤྲོ་ལགས་ཞེས་བརྗོད་པར་བྱའོ། །དེའི་རྗེས་ལ་གསོལ་བ་དང་། གཉིས་ཀྱི་ལས་ཀྱིས་གནས་མལ་སྟོབ་པར་བསྐོ་བ་ཡིན་ཏེ། དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་མིང་འདི་ཞེས་བགྱི་བ་དབྱར་གྱི་གནས་མལ་སྟོབ་པ་སྤྲོ་ན་གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་ལ་གནས་མལ་སྟོབ་པར་བསྐོས་ཏེ། དགེ་སློང་གནས་མལ་སྟོབ་པ་མིང་འདི་ཞེས་བྱ་བ་དགེ་འདུན་ལ་གནས་མལ་སྟོབ་བོ། །འདི་ནི་གསོལ་བའོ། །དེས་གསོལ་བའི་ལས་ཐལ། བརྗོད་པའི་ལས་ལ་ཐུགས་གཏད་པར་ཞུ་བྱས་ལ། དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབ་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་ལ་གནས་མལ་སྟོབ་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་དགེ་འདུན་ལ་གནས་མལ་སྟོབ་པར་བསྐོ་བར་བཟོད་པ་དེ་དག་ནི་ཅང་མ་གསུངས་ཤིག གང་དག་མི་བཟོད་པ་དེ་དག་ནི་གསུངས་ཤིག དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་མལ་སྟོབ་པར་བསྐོས་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །ཞེས་ལན་གཅིག་བརྗོད། དེའི་རྗེས་ལ་གནས་མལ་སྟོབ་པའི་དགེ་སློང་དེས་ཚུལ་ཤིང་གི་བམ་པོ་སྟ་གོན་བྱས་པ་དེ་རྒན་པའི་མཐར་བཞག་ལ་དབྱར་གྱི་ནང་དུ་ཁྲིམས་སུ་བཅའ་བ་གང་དང་གང་བྱེད་པ་དགེ་འདུན་གྲོས་བྱས་པ་དེ། གནས་མལ་སྟོབ་པ་པོས་ཁོང་དུ་ཆུད་པར་བྱས་ལ། འགྲེང་སྟེ་འདུད་པ་དང་བཅས་པའི་སྒོ་ནས་དགེ་འདུན་བཙུན་པ་རྣམས་དགོངས་སུ་གསོལ། དགོན་པའམ་གཙུག་ལག་ཁང་འདི་ཉིད་ན་ཁྲིམས་སུ་བཅའ་བ། ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལ་ཅུང་ཟད་ཤེས་པ་དེ་ད་སྨྲོས་ཤིག ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལ་འཁྲུག་ལོང་བསྐྱེད་པར་འགྱུར་བ་དེ་ལ། དགེ་འདུན་གྱིས་ཕྱིས་ཉེ་བར་བརྟག་པར་དགོངས་སོ་ཞེས་བྱ་བ་འདི་དང་། བསྟན་པ་སྤྱི་ལ་ཕན་པ་དགོང་མོར་ཆོས་སྤྱོད་ལ་སྟབས་གཅིག་ཏུ་ཚོགས་པ་དང་། ཆོས་ཐོས་བསམ་སྒོམ་གསུམ་ལ་བརྩོན་པར་བྱ་བ་དང་། ཡུལ་མི་སྤྱི་ལ་ཕན་པ་ལོ་ཐོག་ལ་སད་སེར་བ་ལ་སོགས་པའི་གནོད་པ་བྱུང་ན་སྔགས་གདབ་པ་དང་། མཚམས་ནང་ན་ཡོད་པ་སྤྱི་ལ་ཕན་པ་ཆུ་འགོར་ཟག་པ་མི་འདོར་བ་དང་། བྲེ་སྲང་ལ་སོགས་པ་མཁོ་ཞིང་སྤྱད་པའི་དངོས་པོ་སྤྱིའི་སར་མྱུར་དུ་བསྐྱལ་བ་འདི་ཡོད་དེ། ཁྱེད་ཅག་ལས་གང་ཁྲིམས་སུ་བཅས་པ། ཁྱེད་ཅག་ལས་གང་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལ་ཅུང་ཟད་ཤེས་པ་དེ་ད་སྨྲོས་ཤིག ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལ་འཁྲུག་ལོང་བསྐྱེད་པར་འགྱུར་བ་དེ་ལ་དགེ་འདུན་གྱིས་ཕྱིས་ཉེ་བར་བརྟག་པར་དགོངས་སོ་ཞེས་བྱ་བ་འདི་དང་། བསྟན་པ་སྤྱི་ལ་ཕན་པ་དགོང་མོ་ཆོས་སྤྱོད་ལ་སྟབས་གཅིག་ཏུ་ཚོགས་པ་འདི་དང་། ཆོས་ཐོས་བསམ་སྒོམ་གསུམ་ལ་བརྩོན་པར་བྱ་བ་དང་། ཡུལ་མི་སྤྱི་ལ་ཕན་པ་ལོ་ཐོག་ལ་སད་སེར་བ་ལ་སོགས་པའི་གནོད་པ་བྱུང་ན་སྔགས་གདབ་པ་དང་། མཚམས་ནང་ན་ཡོད་པ་སྤྱི་ལ་ཕན་པ་ཆུ་འགོར་ཟག་པ་མི་འདོར་བ་དང་། བྲེ་སྲང་ལ་སོགས་པ་མཁོ་ཞིང་སྤྱད་པའི་དངོས་པོ་སྤྱིའི་སར་མྱུར་དུ་བསྐྱལ་བ་འདིས་གནས་འདིར་གནས་པར་སྤྲོ་བ་དེ་དག་ཚུལ་ཤིང་བཞེས་ཤིག ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལ་ཅུང་ཟད་ཤེས་པ་དེ་ད་སྨྲོས་ཤིག ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལ་འཁྲུག་ལོང་བསྐྱེད་པར་འགྱུར་བ་དགེ་འདུན་གྱི་ཕྱིས་ཉེ་བར་བརྟག་པར་དགོངས་སོ་ཞེས་ལན་གཅིག་བརྗོད། དེ་ནས་དགེ་སློང་གནས་མལ་སྟོབ་པར་འོས་པ་དེ་སྟན་ལ་འདུག་ནས། དགེ་སློང་ལས་མཁན་དེས། དབྱར་ཁས་བླངས་པ་དང་ཚུལ་ཤིང་བླང་བའི་དོན་དུ་གསོལ་བ་འབའ་ཞིག་གི་ལས་བྱ་སྟེ། དེ་ཡང་དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་གྲལ་ཚེས་བཅོ་ལྔ་ལགས་ལ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ཚུལ་ཤིང་བཞེས་ཏེ། སང་ནངས་པར་དབྱར་གནས་པར་ཁས་བླང་ངོ་། །འདི་ནི་གསོལ་བའོ་ཞེས་ལན་གཅིག་བརྗོད། དེའི་རྗེས་ལ་ཚུལ་ཤིང་བྲིམས་པ་ཡིན་ཏེ། དགེ་འདུན་གྱི་གནས་བརྟན་གྲལ་འགོ་མ་དེས། དང་པོར་སྟོན་པ་སངས་རྒྱས་ཀྱི་ཚུལ་ཤིང་བླངས། དེ་ནས་དགེ་སློང་ཐམས་ཅད་ཀྱིས་རང་རང་གི་ཚུལ་ཤིང་ལེན་པ་ན་སྟན་ལས་ཕྱེད་འཕགས་ཏེ། ལག་པ་གཉིས་ཀས་མ་འཕྲོགས་པར་གུས་པས་བླངས། དེ་ནས་དགེ་སློང་རྣམས་ཀྱི་ཚུལ་ཤིང་བྲིམས་པ་རྣམས་བསྡུས་ལ་དེའི་འོག་ཏུ་དགེ་ཚུལ་རྣམས་ཀྱི་ཚུལ་ཤིང་རང་གི་མཁན་པོའམ། སློབ་དཔོན་གྱིས་བླང་ངོ་། །དེའི་འོག་ཏུ་དགེ་སློང་གྲལ་འགོ་བ་དེས་གཉུག་མར་གནས་པ་ཆོས་སྐྱོང་གི་ཚུལ་ཤིང་བླངས་ལ་དགེ་སློང་གི་གསེབ་ཏུ་བགྲང་། དེ་ནས་དགེ་སློང་དང་དགེ་ཚུལ་རྣམས་ཀྱི་ཚུལ་ཤིང་སོ་སོར་བགྲངས་ནས་རྒན་པའི་མཐའ་ལོགས་སུ་འགྲེང་སྟེ་འདུད་པ་དང་བཅས་པས་དགེ་འདུན་བཙུན་པ་རྣམས་དགོངས་སུ་གསོལ། གནས་འདིར་དགེ་སློང་གྲངས་འདི་སྙེད་ཅིག་དང་། དགེ་ཚུལ་འདི་སྙེད་ཅིག་གི་དབྱར་གནས་པའི་སླད་དུ་ཚུལ་ཤིང་བཞེས་སོ་ཞེས་ལན་གཅིག་གོ་བར་བྱའོ། །དེ་ནས་རྒན་རིམ་བཞིན་དུ་བྲང་ཁང་གི་སྒོ་ལྕགས་དང་། ལྡེ་མིག་ཀུན་ལག་ཏུ་བླངས་ནས། གནས་ཁང་ཤིན་ཏུ་ཡངས་པ། བདེ་བ་བསིལ་བ་གཅིག་གདའ་ཡིས་བཞེས་ཤིག་ཅེས་བརྗོད་དོ། །དེ་ཁོ་ན་བཞིན་དུ་སྟན་ཆའི་ཟུར་ནས་བཟུང་ནས། གནས་ལམ་འདི་ནི་རྒྱུ་རུང་བ་ཁ་དོག་རུང་བ། དབྱིབས་ལེགས་པ་གཅིག་གདའ་ཡིས་བཞེས་ཤིག་ཅེས་ཡོན་ཏན་ཅི་རིགས་པར་བརྗོད། དེའི་རྗེས་ལ་རྒན་པའི་མཐར་འགྲེང་སྟེ་འདུད་པ་དང་བཅས་པས་དགེ་འདུན་བཙུན་པ་རྣམས་དགོངས་སུ་གསོལ། ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱོད་པར་མི་བྱའོ། །གདིང་བ་རུང་བ་མ་ཡིན་པས་ལོངས་སྤྱོད་པར་མི་བྱའོ། གདིང་བ་དྲི་མ་ཅན་གྱིས་ལོངས་སྤྱོད་པར་མི་བྱའོ་ཞེས་ལན་གཅིག་གོ་བར་བྱ། དེའི་རྗེས་ལ་དགེ་འདུན་རྣམས་ཀྱིས། སང་སྦྱིན་བདག་དང་། ཞལ་ཏ་བ་དང་། བྲོ་གཡོག་པ་དང་། སྤྱོད་ཡུལ་གྱི་གྲོང་ཁྱེར་སོ་སོར་སྨོས་པས་དབྱར་གནས་པར་ཞལ་གྱིས་བཞེས་པར་འགྱུར་རོ་ཞེས་ལན་གཅིག་གོ་བར་བྱ། །གཉིས་པ་དངོས་གཞིའི་ཆོ་ག་ནི། གྲལ་ཚེས་བཅུ་དྲུག་གི་ཉིན་པར་གནས་སྟེང་གཡོགས་དང་བཅས་པའི་སར། ཡུལ་དགེ་སློང་མཚན་ཉིད་དང་ལྡན་པ་གཅིག་ལ། རང་བས་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་དབུལ། སྤྱོད་ལམ་ཙོག་པུར་འདུག་སྟེ་ཐལ་མོ་སྦྱར་ལ། དབྱར་ཟླ་བ་གསུམ་དུ་འདི་ཉིད་དུ་གནས་པར་བྱས་ལ། དབྱར་གྱི་དམ་ཚིག་ཇི་ལྟར་ཡིན་པ་བཞིན་དུ་བསྲུང་སྙམ་དུ་བསམས་ལ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར་འདི་ལྟ་སྟེ། གནས་རལ་བ་དང་གྲུམས་པ་བཅོས་པའི་སླད་དུ་སྦྱིན་བདག་མིང་འདི་ཞེས་བགྱི་བ་དང་། ཞལ་ཏ་བ་མིང་འདི་ཞེས་བགྱི་བ་དང་། སྤྱོད་ཡུལ་གྱི་གྲོང་ཁྱེར་མིང་འདི་ཞེས་བགྱི་བ་དང་། བྲོ་གཡོག་པ་མིང་འདི་ཞེས་བགྱི་བ་ལ་བརྟེན་ནས་དབྱར་སྔ་མའམ་ཕྱི་མ་ཟླ་བ་གསུམ་གནས་པར་ཁས་བླང་པར་བགྱིའོ། བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ་ཞེས་ལན་གསུམ་བརྗོད། མཇུག་ཐབས་ཡིན་ནོའི་ལན་དུ་ལེགས་སོ་ཞེས་བརྗོད། ཆོ་ག་འདི་མ་བྱས་ཀྱང་དབྱར་ཟླ་བ་གསུམ་འདི་ཉིད་དུ་གནས་པར་བྱའོ་སྙམ་དུ་ཡིད་ཀྱིས་དམ་བཅས་ན། དབྱར་གནས་པར་ནི་འགྱུར་ཏེ། མདོ་རྩ་ལས་དམ་བཅས་པས་གནས་མི་བཏང་ན་གནས་པ་ཉིད་ཡིན་ནོ་ཞེས་བཤད། འོན་ཀྱང་ཆོ་ག་མ་བྱས་ན་ཉེས་བྱས་སུ་འགྱུར། དེ་ལྟར་དབྱར་གནས་པར་ཁས་བླངས་པས་མཚམས་ཀྱི་ཕྱི་རོལ་དུ་མཐའི་ཞག་དྲུག་མ་གཏོགས་པར་ཆོས་ལྡན་གྱི་དོན་དུ་ཞག་གཅིག་འགྲོ་དགོས་པ་བྱུང་ན་ཞག་གཉིས་སུ་བྱིན་གྱིས་རློབ་ཅིང་། ཞག་དྲུག་གི་བར་དུ་མཚམས་ཀྱི་ཕྱི་རོལ་དུ་འགྲོ་དགོས་ཡོད་ན་ཞག་བདུན་དུ་བྱིན་གྱིས་རློབ་དགོས་པ་ཡིན་ཏེ། ཆོ་ག་ལས་དེ་ཚུན་ཆད་སླར་འཁོར་བར་བྱིན་གྱིས་བརླབ་པར་བགྱིའོ་ཞེས་འབྱུང་། ཞག་བཞི་བཅུའི་གནང་བ་ཐོབ་པས་ཀྱང་ཞག་བཞི་བཅུའི་ནང་རོལ་དུ་མཚམས་ནང་དུ་སླེབ་པར་བྱེད་དགོས། འདིས་ཀྱང་བྱིན་གྱིས་རློབ་པའི་ཆོ་ག་ནི་བྱེད་དགོས་ཏེ། སྔགས་སྟོབས་ཀྱིས་ཆོ་ག་སྦྱར་བས་སོ། །ཞག་བདུན་དུ་བྱིན་གྱིས་བརླབ་པ་དེ་ལ་གསུམ་སྟེ། སྦྱོར་བ། དངོས་བཞི། མཇུག་གི་ཆོ་གའོ། །དང་པོ་ནི། སྟེང་གཡོགས་དང་བཅས་པའི་གནས་སུ་དགེ་སློང་རྒན་གཞོན་གང་ཡང་རུང་བ་ལ་སྒྲུབ་ཚུལ་དང་རང་གི་སྤྱོད་ལམ་སྔར་དང་འདྲ། གཉིས་པ་དངོས་གཞི་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར་དབྱར་སྔ་མའམ་ཕྱི་མ་ཟླ་བ་གསུམ་གནས་པར་ཁས་བླངས་པ་ལས་བགྱི་བ་ཆོས་དང་ལྡན་པ་ཞིག་གི་སླད་དུ། མཚམས་ཀྱི་ཕྱི་རོལ་དུ་དགུང་བདུན་མཆི་བ་དང་། དེ་ཚུན་ཆད་སླར་འཁོར་བར་བྱིན་གྱིས་བརླབ་པར་བགྱིའོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ་ཞེས་ལན་གསུམ་བརྗོད། གསུམ་པ་མཇུག་ཐབས་ཡིན་ནོའི་ལན་དུ་ལེགས་སོ་ཞེས་བརྗོད། འདིས་ཞག་བཞི་བཅུར་བྱིན་གྱིས་བརླབ་པའི་ཆོ་ག་ཡང་མཚོན། གསུམ་པ་མཇུག་གི་ཆོ་ག་ནི་དབྱར་ཁས་བླངས་པ་རྣམས་ཀྱིས་ཐུན་མོང་དང་ཐུང་མོང་མ་ཡིན་པའི་དམ་ཚིག་ཇི་ལྟ་བ་བཞིན་དུ་བསྲུང་ཞིང་གནས་པར་བྱེད་དགོས་པ་ཡིན་ནོ།། ༈ །།གསུམ་པ་དུས་རེས་འགལ་བ་དང་འབྲེལ་པ་དགག་དབྱེའི་ཆོ་ག་ནི་དབྱར་རྣམས་ཀྱི་ཐ་མའི་ཉི་མ་སྟེ་དབྱར་སྔ་མ་ཁས་བླངས་ན་སྟོན་ཟླ་འབྲིང་པོའི་ཉ་དང་། ཕྱི་མ་ཁས་བླངས་ན་སྟོན་ཟླ་ཐ་ཆུང་གི་ཉ་ལ་བྱེད་དེ། དེ་ཡང་དབྱར་ཟླ་བ་གསུམ་དུ་ལྟུང་བ་གླེང་དྲན་བྱེད་པ་བཀག་པ་ཡིན་པས་དེ་རིང་ཕྱོགས་བཅུ་ན་བཞུགས་པའི་དགེ་འདུན་མཐའ་དག་གམ་དེ་དག་གིས་བསྐོས་པའི་དགེ་སློང་གིས་བདག་གི་རྒྱུད་ལ་མཐོང་ཐོས་དོགས་གསུམ་གྱིས་གླེང་དྲན་བྱ་རྒྱུ་འདུག་ན་གླེངས་ཤིག་ཅེས་སྐབས་ཕྱེ་བའི་སྒོ་ནས་ཆོས་དང་ཚུལ་ཁྲིམས་རྣམ་པ་དག་པར་འགྱུར་བའི་ཐབས་ཅིག་ཡིན་ཏེ། འདི་ལ་གཉིས་ཏེ། ཆོ་ག་དངོས་དང་། དམིགས་བསལ་ལོ། །དང་པོ་ལ་གསུམ་སྟེ། སྦྱོར་བ། དངོས་གཞི། མཇུག་གི་ཆོ་གའོ། །དང་པོ་ནི། སྤྱོད་ཡུལ་དུ་བརྗོད་པ་གཙུག་ལག་ཁང་པ་རྒྱན་ཅིང་བྱི་དོར་བྱ་བ་སྔོན་དུ་བཏང་སྟེ། དགེ་འདུན་ཐམས་ཅད་ཀྱིས་ཕྱག་བྱས་ནས་དབྱར་གྱི་ནང་དུ་སོ་སོ་ནས་ཐུགས་དང་འགལ་བ་གདའ་ན་བཟོད་པ་མཛད་པ་ཞུ་ཞེས་ཀུན་གྱིས་བརྗོད་དེ། ཚོགས་པ་ཐམས་ཅད་ཀྱིས་ཕན་ཚུན་ཀུན་དགའ་བར་བྱ། བཅུ་བཞི་མཚན་ཐོག་ཐག་དང་བཅོ་ལྔ་ལས་ཀྱི་མདུན་རོལ་ཚུན་ཆད་ཆོས་ཉན་པ་དང་བཤད་པས་དུས་འདའ་བར་གསུངས་པས་དེ་དག་གྲུབ་རྗེས་གསོ་སྦྱོང་གི་སྦྱོར་བའི་སྐབས་ཀྱི་ཚུལ་ཁྲིམས་ཡོངས་དག་གི་མདོ་འདོན་པ་ཡན་ཆད་སྔོན་དུ་བཏང་ནས་གསོ་སྦྱོང་དངོས་ནི་བྱེད་མི་དགོས་ཏེ། དགག་དབྱེ་བྱས་ན་འདི་མ་གྲུབ་པ་ཉིད་མ་ཡིན་ཞེས་བཤད་དོ། །དགེ་སློང་ལས་མཁན་གྱིས་ལྟུང་བ་སྤྱིའི་བྱིན་རླབས་དང་གནས་ལ་བློ་མཐུན་གཉིས་དགོས་ན་བྱ། དགག་དབྱེ་བྱེད་པའི་དགེ་སློང་གཅིག་གམ་གསུམ་མན་ཆད་ཚོགས་པ་དང་སྦྱར་ནས་བསྐོ་བ་ཡིན་ཏེ། དེ་ཡང་དགེ་སློང་མིང་འདི་ཞེས་བྱ་བ་ཁྱོད་དབྱར་གནས་པའི་དགེ་འདུན་ལ་དགག་དབྱེ་བྱེད་པ་སྤྲོའམ་དྲིས་ལ། ཡུལ་དེས་ཀྱང་སྤྲོ་ལགས་ཞེས་བརྗོད། དེའི་འོག་ཏུ་ཁོང་སྤྲོ་བར་གདའ་བས་དགག་དབྱེ་བྱེད་པ་བསྐོ་བའི་གསོལ་གཉིས་ཀྱི་ལས་ཀྱི་ཐོག་མར་གསོལ་བའི་ལས་ལ་ཐུགས་གཏད་པར་ཞུ་བྱས་ལ། དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན་གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བྱེད་པར་བསྐོ་སྟེ། དགེ་སློང་དགག་དབྱེ་བགྱིད་པ་མིང་འདི་ཞེས་བྱ་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་བར་བགྱིའོ། །འདི་ནི་གསོལ་བའོ། །གསོལ་བའི་ལས་ཐལ། བརྗོད་པའི་ལས་ལ་ཐུགས་གཏད་པར་ཞུ་འཚལ་བྱས་ལ། དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་བར་བཟོད་པ་དག་ནི་ཅང་མ་གསུངས་ཤིག གང་དག་མི་བཟོད་པ་དེ་དག་ནི་གསུངས་ཤིག དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་ལན་གཅིག་བརྗོད་པར་བྱའོ། །དེའི་རྗེས་ལ་དགེ་འདུན་བཙུན་པ་རྣམས་དགག་དབྱེ་བྱ་བའི་དོན་དུ་གསོལ་བ་འབའ་ཞིག་པའི་ལས་བྱ་བ་ནི། དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དེང་དགེ་འདུན་གྱི་དགག་དབྱེ་མཛད་དོ། །འདི་ནི་གསོལ་བའོ་ཞེས་ལན་གཅིག་བརྗོད། གཉིས་པ་དངོས་གཞི་ནི། དེའི་རྗེས་ལ་དགེ་སློང་དགག་དབྱེ་བྱེད་པ་བསྐོས་པ་དེས། དགེ་སློང་རྣམས་ལ་རྩྭ་དར་བྷར་ཁྱེད་པར་བྲིམས། ལུང་འགྲེལ་ལས། རྩྭ་ཀུ་ཤ་འདི་དག་འདུད་པར་བྱེད་པ་བཞིན་དུ་བདག་ཀྱང་ལྟུང་བ་ཆོས་བཞིན་དུ་ཕྱིར་བཅོས་པའི་ཕྱིར་དགེ་སློང་རྣམས་ལ་འདུད་པར་བྱེད་དོ་ཞེས་བཤད་པས་དགེ་སློང་རྣམས་ཀྱིས་རྩྭའི་ཆུན་པོ་ལེགས་པར་སྒྲིལ་བ་རྩ་བ་དང་རྩེ་མོ་གཉིས་སུ་ཡོད་པ་སྐེད་པ་ཕན་ཚུན་མདུད་པ་བྱ། དགག་དབྱེ་བྱེད་པར་བསྐོས་པ་དེ་རང་ལས་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་ཕུལ་ལ་སྤྱོད་ལམ་ཙོག་པུར་འདུག་སྟེ། ཡུལ་དང་རང་གི་རྐང་པའི་འོག་ཏུ་རྩྭའི་རྩ་བ་དང་། གཉིས་ཀ་ཐལ་མོ་སྦྱར་བའི་བར་དུ་རྩེ་མོ་གཉིས་སོ་སོར་ཡོད་པར་བྱ། བསྐོས་པས་དགག་དབྱེ་བྱས་ཟིན་གྱི་བར་དུ་དགེ་སློང་རེ་རེའི་མདུན་དུ་འདུག་པར་བྱའོ་ཞེས་གསུངས་ཀྱང་དུ་མ་མཁན་པོ་གཅིག་པ་གསུམ་མན་ཆད་ཅེས་པའི་ཆོ་གའི་རུང་མཐུན་སྦྱར་ནས་དགེ་སློང་གསུམ་གསུམ་ལ་བྱེད་པ་ཡིན་ཅེས་བརྗོད་ལ། དགོངས་གསོལ་སྐབས་དང་སྦྱར་ཏེ། གནས་བརྟན་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱི། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་གདམས་སུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་གཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་འདུལ་བ་བཞིན་སླར་བགྱིའོ་ཞེས་ལན་གསུམ་བརྗོད་ཐབས་ལེགས་དང་བཅས་པ་བྱ། འདིའི་དམིགས་བསལ་ནད་པ་ངལ་བ་དང་གནས་མལ་ཕན་ཕུན་དུ་འགྱུར་ན་ལན་གཉིས་སམ་ལན་གཅིག་ཆོ་ག་བརྗོད་པས་ཀྱང་རུང་ངོ་། །བསྐོས་པའི་དགེ་སློང་གིས་ཟླ་ཡོད་ན་ཟླ་ལ་དགག་དབྱེ་བྱ་ཞིང་མེད་ན་གྲལ་ན་འདུག་པའི་དགེ་སློང་གང་ཡང་རུང་བ་ལ་བྱ། དེ་རྗེས་རྩྭ་རྣམས་ལེགས་པར་བསྡུས་ལ་ཡིད་ཀྱིས་གྲངས་གཟུང་། བསྐོས་པ་ཐང་ལ་འདུག་སྟེ་རང་གིས་རྫས་ཁ་ཟས་ལས་གཞན་ཁབ་ལྟ་བུ་ལག་ཏུ་བཟུང་ནས་དགེ་འདུན་བཙུན་པ་རྣམས་དགོངས་སུ་གསོལ། བདག་གིས་རྫས་ཀྱི་དངོས་པོ་ཁབ་འདི་ལྟ་བུས་ཀྱང་དབྱར་གནས་པའི་དགེ་འདུན་ལ་དགག་དབྱེ་བགྱིད་རུང་ངོ་ཞེས་ལན་གཅིག་གོ་བར་བྱའོ། །དེའི་རྗེས་ལ་དགེ་སློང་རྣམས་ཀྱིས་ལེགས་པར་རུང་ངོ་ཤིན་ཏུ་རུང་ངོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་རྣམས་ཀྱིས་རྙེད་པ་ཐམས་ཅད་ཕྱོགས་གཅིག་ཏུ་བསྡུས་ལ་བཞག དེའི་འོག་ཏུ་དགེ་ཚུལ་རྣམས་བོས་ལ། རྩྭ་དར་བྷར་བྲིམས། ཕྱག་བྱ་བ་སྔོན་དུ་བཏང་བའི་ཆོ་ག་བྱེད་དུ་གཞུག་རྩྭ་དེ་རྣམས་ཀྱང་བསྡུས་ལ་གྲངས་བཟུང་སྟེ་དགེ་འདུན་གྱི་དབུས་སུ་སྤྱོད་ལམ་འགྲེང་སྟེ་འདུད་པ་དང་བཅས་པས་དགེ་འདུན་བཙུན་པ་རྣམས་དགོངས་སུ་གསོལ། གཙུག་ལག་ཁང་ཆེ་གེ་མོ་ཞེས་བགྱི་བ་འདིར་དགེ་སློང་འདི་སྙེད་དང་། དགེ་ཚུལ་འདི་སྙེད་ཀྱིས་དབྱར་གནས་པའི་དགེ་འདུན་ལ་དགག་དབྱེ་མཛད་ལགས་སོ་ཞེས་ལན་གཅིག་བརྗོད། དགེ་སློང་གྲལ་ལ་འཁོད་པ་རྣམས་ཀྱིས་ལེགས་པར་མཛད་དོ། །ཤིན་ཏུ་མཛད་དོ་ཞེས་ཀུན་གྱིས་བརྗོད་པར་བྱའོ། །དེ་ནས་རྙེད་པ་རྣམས་དགེ་འདུན་གྱི་གནས་བརྟན་ནས་བཟུང་སྟེ་གསར་བུའི་བར་ལ་ཁྱེད་པར་དབུལ་ལོ། །གསུམ་པ་མཇུག་གི་ཆོ་ག་ནི། བསྔོ་བ་རྣམ་པར་དག་པས་རྒྱས་གདབ་པར་བྱའོ། །གཉིས་པ་དམིགས་བསལ་ནི། འདི་དག་ལ་གཞིའམ་གང་ཟག་གཉིས་བཞག་ནས་དགག་དབྱེ་བྱེད་དུ་རུང་བ་དངོས་པོའི་དམིགས་བསལ། བྱིན་གྱིས་བརླབས་ཏེ་སོང་བས་སྔར་དགག་དབྱེ་བྱེད་པ་དག་དང་ལྷན་ཅིག་དགག་དབྱེ་བྱ་བ། དབྱར་གྱི་ནང་དུ་བྱ་བས་འགྲོ་དགོས་པས་ཉ་ཤི་དང་བསྟུན་ཏེ་བྱ་བ། འཐབ་དཀྲོལ་ཅན་གྱི་རྐྱེན་གྱིས་སྔོན་རོལ་དུ་བྱ་བ། གནས་པར་མི་ནུས་པས་ཚོགས་པའི་དགག་དབྱེ་དུས་ཀྱི་སྔོན་རོལ་དུ་བྱ་བ། འཐབ་དཀྲོལ་ཅན་གྱི་རྐྱེན་གྱིས་དུས་ཀྱི་འོག་རོལ་དུ་དགག་དབྱེ་བྱར་རུང་བའི་དམིགས་བསལ་ཡོད་དོ། །ཚོགས་པའི་དགག་དབྱེ་མ་གཏོགས་པ་རྣམས་ནི་དེང་དགེ་འདུན་གྱི་དགག་དབྱེ་བཅུ་བཞི་པའམ་བཅོ་ལྔ་པ་ལགས་ལ་ཞེས་སྔར་བཞིན་ཆོ་ག་སྦྱོར་དངོས་རྗེས་ཚང་བར་བརྗོད་པ་ཡིན། ཚོགས་པའི་དགག་དབྱེ་ནི་ཉ་ཤིའི་དུས་ལ་མི་ལྟོས། སྦྱོར་རྗེས་སྔར་དང་འདྲ་བས་དངོས་གཞི། བཙུན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་དགག་དབྱེ་ལགས་ཏེ། བདག་དགེ་སློང་མིང་འདི་ཞེས་བགྱི་བས་དེང་དགག་དབྱེ་བྱིན་གྱིས་བརླབ་པར་བགྱིའོ། །གང་གི་ཚེ་དགེ་འདུན་མཐུན་པ་ཚོགས་པ་རྙེད་པ་དེའི་ཚེ་བདག་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་དོ་ཞེས་ལན་གསུམ་བརྗོད། དེ་དག་གིས་དུས་རེས་འགའ་བ་དང་འབྲེལ་པ་དགག་དབྱེའི་གཞི་སྟེ་དེ་རྣམས་ཀྱིས་དགེ་བ་ཉམས་སུ་ལེན་པ་བསླབ་པ་ཡོངས་སུ་སྦྱང་བའི་སྒོ་ནས་བསྲུང་བ་བསྟན་ནོ། །ལྔ་པ་བདེ་བར་གནས་པའི་རྐྱེན་ལ་བརྟེན་ནས་བསྲུང་བ་ལ་གསུམ་སྟེ། བདེ་བར་གནས་པའི་རྐྱེན་གོས་ལ་བརྟེན་ནས་བསྲུང་བ། ཟས་ལ་བརྟེན་ཏེ་བསྲུང་བ། གནས་མལ་ལ་བརྟེན་ཏེ་བསྲུང་བའོ། །དང་པོ་ལ་གསུམ་སྟེ། གོས་གཞན་འབྱུང་བ་གཏེར་ལྟ་བུ་སྲ་བརྐྱང་གི་གཞི། གོས་དངོས་ཀྱི་གཞི། མི་རུང་བ་ཕལ་ཆེ་བ་ཀོ་ལྤགས་ཀྱི་གཞིའོ། །དང་པོ་ལ་གསུམ་སྟེ། གདིང་བ་དང་། བཅང་བ་དང་། དབྱུང་བའོ། །གདིང་བ་ལ་སྤྱི་དོན་བརྒྱད་དེ། དགོས་པ་དང་། གང་ཟག་དང་། གནས་དང་། དངོས་པོ་དང་། བྱེད་པ་བསྐོས་པ་དང་། དུས་ནམ་གྱི་ཚེ་དང་། ཡུན་ཇི་སྲིད་དུ་དང་། ཆོ་ག་གང་གིས་གདིང་བའོ། །དང་པོ་དགོས་པ་ལ་གསུམ་སྟེ། གནས་བསྡུ་བའི་དགོས་པ་དང་། ལྟུང་བ་བཅུ་གནང་བས་དགེ་སློང་རྣམས་བདེ་བ་ལ་རེག་པར་གནས་པའི་དགོས་པ་དང་། སྦྱིན་པར་བྱ་བའི་ཆོས་བཤམ་པ་ལ་ལོངས་སྤྱོད་པའི་དགོས་པའོ། །ཚུལ་དབང་ཞལ་ནས་དགོས་པ་དེ་གསུམ་སྲ་བརྐྱང་བཏིང་བའི་ཕན་ཡོན་བཅུ་པོ་འདི་ལས་ཚོལ་ཏེ། འདི་ལྟར་གནས་བསྡུ་བའི་དགོས་པ་ནི་གསུམ་སྟེ། འདུས་ཤིང་ཟ་བ་དང་། མ་སྨྲས་པར་གྲོང་དུ་འགྲོ་བ་དང་། ལྷག་མ་རྣམས་དང་རྙེད་པ་ཐུན་མོང་དུ་འགྱུར་བའོ། བདེ་བ་ལ་རེག་པའི་དགོས་པ་ནི་ལྔ་སྟེ། འཆང་བ་དང་། འབྲལ་བ་དང་། འཇོག་པ་དང་། གོས་རུང་བར་མ་བྱས་པར་ཇི་སྲིད་འདོད་པར་འཆང་བ་དང་། སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུ་བའོ། །ཐ་མ་ལ་གཉིས་ཏེ། ཡང་ཡང་ཟ་བ་དང་། གོས་སློང་བའོ། །དེ་དག་ལས་བརྒྱད་ནི་དངོས་སུ་བཤད་ལ། གཉིས་ནི་ཤུགས་ལའོ་ཞེས་འདོད་དོ། །གང་ཟག་ལ་བཅུ་སྟེ། བསྙེན་པར་རྫོགས་པའི་སྡོམ་པ་རྣམ་པར་དག་པ་དང་ལྡན་པ་དང་། ལྟ་བ་མཐུན་པ་དང་། མཚན་མཐུན་པ་དང་། རང་བཞིན་དུ་གནས་པ་དང་། དབྱར་འདི་ཉིད་དུ་ཁས་བླངས་པ་དང་། དབྱར་སྔ་མ་ཁས་བླངས་པ་དང་། དབྱར་མ་རལ་བ་དང་། ས་གཞན་ན་གནས་པ་མ་ཡིན་པ་དང་། དེ་ཉིད་ཐོབ་པ་མ་ཡིན་པ་དང་། བྱེ་བ་དག་ན་ཆོས་གཞན་པའི་རྗེས་སུ་སོང་བ་མ་ཡིན་པའོ། །གནས་ནི་དབྱར་གནས་པའི་སའམ་འདིངས་ཀར་གཅིག་ཏུ་བྱས་པའོ། །དངོས་པོ་ལ་དྲུག་སྟེ། དབྱར་བཏུས་པའི་རྒྱུ་ལས་བྱུང་བའི་གོས་ཀྱི་རྙེད་པར་བགྲང་བ་དང་། དགག་དབྱེའི་དངོས་གཞིའི་དུས་ཀྱི་མཐའ་འམ་ཚེས་བཅུ་དྲུག་གི་གདིང་བའི་ཉི་མའི་མཐར་གྲུབ་པ་དང་། བདག་པོ་དགེ་འདུན་མཚན་ཉིད་དང་ལྡན་པའི་ཡིན་པ་དང་། རུང་བ་དང་། ཚད་དང་ལྡན་པ་དང་། གྲངས་ཚང་བའོ། །རུང་བ་ལ་བཞི་སྟེ། རྒྱུའི་སྒོ་ནས་དང་། དབྱིབས་ཀྱི་སྒོ་ནས་དང་། ཁ་དོག་གི་སྒོ་ནས་དང་། རུང་བའི་ཆོ་གའི་སྒོ་ནས་རུང་བའོ། །ལྔ་པ་ནི། ཆོས་བཅུ་དྲུག་དང་ལྡན་པ་བསྐོ་བ་སྟེ། བཅུ་དྲུག་ནི་སྔར་གྱི་བཅུའི་ཐོག་ཏུ་བདུན་པས་མི་འགྲོ་བ་ལ་སོགས་པ་བཞི་དང་། བསྐོས་པ་དང་མ་བསྐོས་པའི་བྱེ་བྲག་ཤེས་པ་དང་། འདིངས་པའི་ཆོ་ག་ལ་མཁས་པའོ། །དུས་ནི་སྟོན་ཟླ་འབྲིང་པོའི་ཚེས་བཅུ་དྲུག་ལའོ། །ཡུན་ནི་དེ་ཉིད་ནས་ཟླ་བ་ལྔའོ། །ཆོ་ག་ལ་གསུམ་སྟེ། སྦྱོར་བ་དང་། དངོས་གཞི་དང་། མཇུག་གོ །སྦྱོར་བ་ལ་གཉིས། དགེ་འདུན་གྱི་དང་། བསྐོས་པའི་འོ། །དགེ་འདུན་གྱི་ལ་བཞི་སྟེ། ཞག་མ་ལོན་པར་ཚོགས་པས་མོས་པར་བྱ་བ་དང་། མཚམས་ཀྱི་ནང་དུ་བློ་མཐུན་པར་བྱ་བ་དང་། འདིངས་མཁན་བསྐོ་བ་དང་། གསོལ་བ་བྱས་ཏེ་དེ་ལ་གཏད་པའོ། །བསྐོས་པའི་ལ་བཞི་སྟེ། མནོད་པ་ལ་སོགས་པའི་ཚེ་བསམ་པ་རྣམ་པ་གསུམ་བསྐྱེད་པ་དང་། དྲུབ་པ་ལ་སོགས་པ་ལ་དེས་སྔོན་དུ་འགྲོ་བར་བྱ་བ་དང་། དགག་དབྱེའི་ཉིན་མོ་འདིངས་པར་གོ་བར་བྱ་བ་དང་། ཉི་མ་དེ་ཉིད་ལ་འདུ་བའི་སྐབས་རྗེས་སུ་སྒྲུབ་པའོ། །དངོས་གཞིའི་ཆོ་ག་ནི་བསྐོས་པའི་གང་ཟག་གིས་སྲ་བརྐྱང་གཟེབ་ཀྱི་སྐྲོག་མར་རས་དཀར་པོས་དཀྲིས་ཤིང་དྲི་དག་གིས་བརྒྱན་པ་ཐོགས་ཏེ་རྒན་ལོགས་སུ་འདུག་ནས་ལན་གསུམ་བརྗོད་པའོ། །མཇུག་ཏུ་བརྗོད་པའི་ཆོ་ག་ལ་གཉིས་ཏེ། བསྐོས་པའི་གང་ཟག་གིས་རེ་རེའི་མདུན་དུ་གོ་བར་བྱ་བ་དང་། དགེ་འདུན་གྱིས་མ་དད་པ་སྤང་བའི་ཕྱིར་ལེགས་པར་བཏིང་ངོ་། །ཤིན་ཏུ་བཏིང་ངོ་། །འདི་ལས་བྱུང་བའི་རྙེད་པ་དང་ཕན་ཡོན་བདག་གི་ཡང་ཡིན་ནོ་ཞེས་བརྗོད་པའོ། །བཅང་བ་ལ་གསུམ་སྟེ། ཆུད་ཟ་བ་སྤང་བ་དང་། མ་གུས་པ་སྤང་བ་དང་། འབྲལ་བ་སྤང་བའོ། །དབྱུང་བ་ལ་གཉིས་ཏེ། རང་འཇུག་པ་དང་བྲལ་བ་དང་། བཅོས་མས་དབྱུང་བའོ། །རང་འཇུག་པ་དང་བྲལ་བ་ལ་གཉིས་ཏེ། དགེ་འདུན་མཐའ་དག་གི་དང་། གང་ཟག་སྒོས་ཀྱིའོ། །དགེ་འདུན་གྱི་ལ་དྲུག་སྟེ། སྲ་བརྐྱང་གིས་མཚམས་གཞན་དུ་ཕྱིན་པ་དང་། བྱིན་གྱིས་རློབ་པ་པོ་མེད་པར་མཚམས་ནང་དུ་སྐྱ་རེངས་ཤར་བ་དང་། དུས་ཀྱི་འཕེན་པ་ཟད་པ་དང་། དུས་མ་ཡིན་པར་བཏིང་བ་ལ་དེར་ཤེས་པ་དང་། རྟེན་ཞིག་པ་སྟེ་སྲ་བརྐྱང་བརླག་པ་དང་། བྱེད་པ་པོ་ཉམས་པ་སྟེ། འདིངས་མཁན་དགེ་སློང་མ་ཡིན་པར་སོང་བའོ། །གང་ཟག་སྒོས་ཀྱི་ལ་བཞི་སྟེ། སྦྱོར་བས་འགྲོ་བ་དང་། ངེས་པར་བྱེད་པ་དང་། ཡིད་གཉིས་དང་། ཐོས་པ་ལས་བྱུང་བའོ། །སྦྱོར་བས་འགྲོ་བ་ནི་མཚམས་ལས་ཕྱིས་མི་འོང་བའི་བསམ་པས་འགྲོ་བ་སྟེ། དེ་ལ་བཞི་སྟེ། གོས་ལ་རེ་བ་མེད་པ་ན་མཚམས་ལས་འདས་ན་འབྲེལ་མེད་ཀྱི་ལ་གཅིག་གོ །འབྲེལ་བཅས་གསུམ་ནི་གོས་ལ་རེ་བ་ཡོད་ན་བྱེད་པར་འགྱུར་བ་མཐར་ཐུག་པ་དང་། བརྩམ་པ་ཞིག་པ་དང་། བསམ་པ་རྒྱུན་ཆད་པ་སྟེ་གསུམ་མོ། །ངེས་པར་བྱེད་པ་ལ་བཞི་སྟེ། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་སམ་གོས་ལ་རེ་བ་མེད་ན་འབྲེལ་མེད་ཀྱི་ལ་གཅིག་གོ །གོས་ལ་རེ་བ་ཡོད་ན་སྔ་མ་བཞིན་དུ་གསུམ་མོ། །ཡིད་གཉིས་ལ་མཚམས་ཀྱི་ནང་ན་དང་མཚམས་ཀྱི་ཕྱི་རོལ་དུའོ། །ནང་ལ་དྲུག་སྟེ། གོས་ལ་ངེས་པ་སྐྱེས་ནས་མཚམས་ལ་ཡིད་གཉིས་དང་། མཚམས་ལ་ངེས་པ་སྐྱེས་ནས་གོས་ལ་ཡིད་གཉིས་དང་། གཉི་ག་ལ་ཡིད་གཉིས་ཟ་བ་སྟེ་འབྲེལ་མེད་གསུམ་མོ། །འབྲེལ་བཅས་ནི་གོས་ལ་རེ་བ་ཡོད་ན་སྔ་མ་བཞིན་གསུམ་མོ། །མཚམས་ཀྱི་ཕྱི་རོལ་དུ་ཡང་དེ་བཞིན་ཏེ་དྲུག་གོ །ཐོས་པ་ལས་བྱུང་བ་ལ་གཉིས་ཏེ། མཚམས་ནང་དུ་ཐོས་པ་སྦྱོར་འགྲོ་དང་བསྟུན་པ་བཞིའོ། །ཕྱི་རོལ་དུ་ཐོས་པ་ངེས་བྱེད་དང་བསྟུན་པ་དང་བཞི་སྟེ་བརྒྱད་དོ། །བཅོས་མས་དབྱུང་བ་ནི་གཉིས་ཏེ། དུས་སུ་དབྱུང་བ་དང་། གོང་རོལ་དུའོ། །དེ་ལྟར་ན་མ་ལྟ་བུའི་ཚིགས་སུམ་ཅུ་རྩ་དྲུག་གོ །གཉིས་པ་གོས་དངོས་ཀྱི་གཞི་ལ། འཚོ་བའི་ཡོ་བྱད། ཁོ་བའི་ཡོ་བྱད། ལྷག་པའི་ཡོ་བྱད། ཡོ་བྱད་ཕྲན་ཚེགས་དང་བཞི་ཡིན། དེ་དག་ཀྱང་ཧ་ཅང་བཟང་ཆེས་པ་དང་། ངན་ཆེས་པ་ལོངས་སྤྱོད་དུ་མི་རུང་། དེའི་ས་མཚམས་བྱིན་རླབས་ཀྱིས་འཛིན་ཏེ་བྱིན་རླབས་འཚགས་སུ་རུང་བ་ནི་ལོངས་སྤྱད་བྱའོ། །དང་པོ་འཚོ་བའི་ཡོ་བྱད་ལ་བཅུ་གསུམ་སྟེ། སྣམ་སྦྱར་དང་། བླ་གོས་དང་། མཐོང་གོས་དང་། ཤམ་ཐབས་དང་། ཤམ་ཐབས་ཀྱི་གཟན་དང་། རྔུལ་གཟན་དང་། རྔུལ་གཟན་གྱི་གཟན་དང་། གདོང་ཕྱིས་དང་། གཡན་པ་དགབ་པ་དང་། རྣག་གཟན་དང་། སྐྲ་བཟེད་དང་། གདིང་བ་དང་། རས་ཆེན་ནོ། །དེ་རྣམས་གང་ཡང་རུང་བ་བྱིན་གྱིས་རློབ་པ་ལ། སྦྱོར་དངོས་རྗེས་གསུམ་ལས། དང་པོ་སྦྱོར་བ་ལྷྭམ་ཕུད། བླ་གོས་ཕྲག་པར་བཀལ། ཡུལ་དགེ་སློང་སྟེ་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་དབུལ། ཡུལ་རྟེན་འགྲེངས་ཏེ་བདུད་པ་དང་བཅས་པའི་སྒོ་ནས་ཆོས་གོས་ཀྱི་གྲྭ་ནས་བཟུང་སྟེ། དངོས་གཞི་གང་བྱིན་གྱིས་རློབ་པ་དེར་བརླབ་པར་བགྱིའོ་སྙམ་དུ་སེམས་བསྐྱེད་ལ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་བདག་གི་ཆོས་གོས་སྣམ་སྦྱར་དུ་བྱིན་གྱིས་བརླབ་པར་བགྱིའོ་ཞེས་ལན་གསུམ་བརྗོད། མཇུག་ཐབས་ཡིན་ནོ་ཞེས་པའི་ལན་དུ་ལེགས་སོ་ཞེས་བརྗོད། དེས་མཚོན་ནས་བླ་གོས་ལ་སོགས་བཅུ་གཉིས་པོ་ཀུན་ལ་མིང་བརྗེས་པས་ཆོག་པ་ཡིན་ཏེ། དེ་ནི་ཡོངས་སུ་རྫོགས་པའི་བྱིན་རླབས་ཡིན་ནོ། །ཆོས་གོས་སྣམ་སྦྱར་སོགས་གསུམ་གྱི་རྒྱུ་བྱིན་གྱིས་རློབ་ན་སྦྱོར་བ་དང་མཇུག་གོང་དང་འདྲ། དངོས་གཞི་བདག་དགེ་སློང་མིང་འདི་ཞེས་བགྱི་བའི་གོས་འདི་བདག་གི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །འཚལ་ལ་བར་ཆད་མ་བྱུང་ན་སྣམ་ཕྲན་དགུ་པ་ལ་སོགས་པར་བགྱིས་ཏེ་གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བཀྲུའོ། །བཅང་ངོ་། །དྲའོ། །སྡེབ་བོ། །ཟུང་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་ནི་རུང་བར་སྤྱོད་པར་འོས་པའོ་ཞེས་ལན་གསུམ་བརྗོད། །བླ་གོས་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་འདི་བདག་གི་ཆོས་གོས་བླ་གོས་སུ་བྱིན་གྱིས་བརླབ་བོ། །འཚལ་ལ་བར་ཆད་མ་བྱུང་ན་སྣམ་ཕྲན་བདུན་པར་བགྱིས་ཏེ། གླེགས་བུ་ཕྱེད་དང་གསུམ་པར་བགྱིའོ། །བཀྲུའོ་ལ་སོགས་པ་བདུན་གོང་དང་འདྲ། ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་ནི་རུང་བ་སྤྱོད་པར་འོས་པའོ་ཞེས་ལན་གསུམ་བརྗོད། མཐང་གོས་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་འདི་བདག་གི་ཆོས་གོས་མཐང་གོས་སུ་བྱིན་གྱིས་བརླབ་བོ། །འཚལ་ལ་བར་ཆད་མ་བྱུང་ན་སྣམ་ཕྲན་ལྔ་པར་བགྱིས་ཏེ། གླེགས་བུ་ཕྱེད་དང་གཉིས་པར་བགྱིའོ། །བཀྲུའོ་ལ་སོགས་གོང་དང་འདྲ། གཉིས་པ་མཁོ་བའི་ཡོ་བྱད་ཀྱི་གོས་བྱིན་གྱིས་བརླབ་པ་ནི་དཀར་པོ་དང་། ཁ་ཚར་ཅན་དང་། ཕུན་ཚར་ཅན་ཁྲུ་གང་ཡན་ཆད་ལའང་བྱིན་རླབས་འཆགས་པ་ཡིན་ཏེ། དེ་བྱིན་གྱིས་བརླབ་པ་ནི། སྦྱོར་བ་དང་མཇུག་གོང་དང་འདྲ། དངོས་གཞི་བསམ་པས་རུང་བ་མ་ཡིན་པའི་དངོས་པོ་འདི་བདག་དང་གྲོགས་ཚངས་པར་མཚུངས་པར་སྤྱོད་པའི་རུང་བའི་དངོས་པོར་བསྒྲུབ་པར་བགྱིའོ་སྙམ་དུ་བསམས་ལ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་འདི་བདག་དང་གྲོགས་ཚངས་པ་མཚུངས་པར་སྤྱོད་པའི་མཁོ་བའི་ཡོ་བྱད་དུ་བྱིན་གྱིས་བསླབ་པར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ་ཞེས་ལན་གསུམ་བརྗོད། གསུམ་པ་ལྷག་པའི་ཡོ་བྱད་ཀྱི་གོས་བྱིན་གྱིས་བརླབ་པ་ནི། གང་ཟག་སྐྱིད་དེ་བ་དང་། ཤིག་སྲོ་མང་བ་དང་། ཡུལ་ངན་པར་གནས་པ་དང་། རྔུལ་དང་དྲི་མ་ཆེ་བ་དང་། ཐོབ་པ་ཉུང་བ་དང་། ལྷ་ལས་ཚེ་འཕོས་པ་དང་། གོས་ཟས་ཀྱི་འདུན་པ་ཆུང་བ་སྟེ། བདུན་པོ་དེ་ལ་འཚོ་བའི་ཡོ་བྱད་གཉིས་པ་གནང་བ་ཡིན་པས་བྱིན་གྱིས་བརླབ་པ་ནི། སྦྱོར་བ་དང་མཇུག་གོང་དང་འདྲ། དངོས་གཞི་ལ་གོས་དེ་མཁན་པོའམ་སློབ་དཔོན་གྱི་ཡིན་པར་བཅང་བར་བྱའོ་སྙམ་དུ་བསམས་ཏེ། དེ་གཉིས་མ་ཡིན་པ་གཅིག་གི་དྲུང་དུ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་ལྷག་མ་རུང་བ་མ་བགྱིས་པ་རུང་བ་བགྱི་བར་འོས་པ་འདི་མཁན་པོའི་ལགས་པར་རུང་བར་བགྱིའོ། །མཁན་པོ་ལ་ཡིད་གཏད་དེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ་ཞེས་ལན་གསུམ་བརྗོད། བཞི་པ་ཡོ་བྱད་ཕྲན་ཚེགས་པ་ནི། འཚོ་བའི་ཡོ་བྱད་ཕྲན་ཚེགས་གཏུར་བུ་དང་། ཞྭ་དང་། སྐེ་རགས་དང་། ཆུ་ཚགས་དང་། ཚད་དུ་མ་ཆོག་པའི་གདོང་ཕྱིས་དང་། སྟན་དང་། ལྷྭམ་དང་། བྱིས་ཆིངས་དང་། ལྷྭམ་འབོབ་དང་། ལྷྭམ་སྒྲོག་དང་། པར་པུར་གྱི་སྣོད་དང་། ལྷུང་བཟེད་ཀྱི་སྣོད་དང་། ལྷུང་བཟེད་ཀྱི་ཁ་གཡོགས་སོགས་རང་རང་གི་ཚད་དུ་ལོངས་པ་རྣམས་ཡིན་ལ་དེ་རྣམས་བྱིན་གྱིས་བརླབ་པ་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་འདི་གཏུར་བུར་བྱིན་གྱིས་བརླབ་པར་བགྱིའོ་ཞེས་ལན་གསུམ་དུ་བརྗོད་དོ། །སྦྱོར་བ་དང་འཇུག་གོང་དང་འདྲ། ཞྭ་ལ་སོགས་པ་གཞན་ལའང་དེ་དང་འདྲ་ཞིང་མིང་བརྗེ། ཚད་དུ་མ་ལོངས་པའི་རས་རོས་ལ་ངག་ཏུ་བརྗོད་པའི་བྱིན་རླབས་མི་དགོས། རང་རང་གི་མིང་གིས་ལན་གཅིག་སེམས་བསྐྱེད་པས་ཆོག ལྷག་པའི་ཡོ་བྱད་ཀྱི་གོས་ཕྲན་ཚེགས་གཏུར་བུ་སོགས་གཉིས་པ་ལྟ་བུ་དང་། མཁོ་བའི་ཡོ་བྱད་ཀྱི་གོས་ཕྲན་ཚེགས་ནི་གོས་ཁྲུ་གང་བས་ཆུང་བ་ལྟ་བུ་ནི་རང་རང་གི་མིང་དུ་སེམས་བསྐྱེད་པས་བྱིན་གྱིས་བརླབ་པར་བགྱིའོ། །དེ་རྣམས་ཀྱིས་དངོས་ཀྱི་དོན་བྱིན་གྱིས་བརླབ་པའོ། །ཞར་ལ་དེ་དག་གི་བྱིན་རླབས་དབྱུང་བ་ནི། འཚོ་བའི་ཡོ་བྱད་ཀྱི་གོས་བྱིན་རླབས་འབྱིན་ན། མངོན་སུམ་དུ་གྱུར་པ་དང་། མ་གྱུར་ཀྱང་རང་གི་ལག་ན་འདུག་པར་བསམས་ལ། སྦྱོར་བ་དང་མཇུག་བྱིན་གྱིས་རློབ་པ་དང་འདྲ། དངོས་གཞི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བར་སྤྱད་པར་འོས་པ་འདི་བདག་གི་ཆོས་གོས་སྣམ་སྦྱར་དུ་བྱིན་གྱིས་བརླབས་པ་ལས། དེ་ལྟ་བས་ན་དངོས་པོ་དེ་སླར་དབྱུང་བར་བགྱིའོ་ཞེས་ལན་གསུམ་བརྗོད། བླ་གོས་དང་མཐང་གོས་གཉིས་ཀྱང་དེ་དང་མིང་བརྗེས་པས་ཆོག ལྷག་པའི་ཡོ་བྱད་ཀྱི་བྱིན་རླབས་འབྱིན་པའི་ཆོ་ག་མེད། འཚོ་བའི་ཡོ་བྱད་ཀྱི་གོས་ཕྲན་ཚེགས་ལ་ཚད་དུ་ལོངས་པ་གཏུར་བུ་ལྟ་བུའི་བྱིན་རླབས་འབྱིན་ན། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་གོས་འདི་གཏུར་བུར་བྱིན་གྱིས་བརླབས་པ་ལས། དེ་ལྟ་བས་ན་དངོས་པོ་དེ་སླར་དབྱུང་བར་བགྱིའོ། །ཞེས་ལན་གསུམ་བརྗོད། ཚད་དུ་མ་ལོངས་པ་ལ་འདིའི་བྱིན་རླབས་དབྱུང་བར་བྱའོ་སྙམ་དུ་སེམས་བསྐྱེད་པས་ཆོག་གོ །ལྷག་པའི་ཡོ་བྱད་ཀྱི་གོས་ཕྲན་ཚེགས་ཀྱང་སེམས་བསྐྱེད་པའི་དབྱུང་བས་ཆོག མཁོ་བའི་ཡོ་བྱད་ཀྱི་གོས་ཕྲན་ཚེགས་ལ་དབྱུང་བ་མེད་དོ། །གསུམ་པ་མི་རུང་བ་ཕལ་ཆེ་བ་ཀོ་ལྤགས་ཀྱི་གཞི་ནི། ཡུལ་མཐའ་འཁོབ་ཏུ་དགེ་སློང་ལྔས་བསྙེན་པར་རྫོགས་པ་དང་། ཞྭ་དང་། མཆིལ་ལྷྭམ་དང་། ཀོ་ལྤགས་སྤྱི་དང་། ཐ་གུའི་ལྷྭམ་གནང་ལ་ཡུལ་དབུས་སུ་བཀག་གོ །དབུས་དང་མཐའ་འཁོབ་ཀྱི་ཁྱད་པར་ནི་ཆོས་ཚིགས་ཀྱིས་ཕྱེ་བ་དང་། ས་ཚིགས་ཀྱིས་ཕྱེ་བ་གཉིས་ལས། འདིར་ཕྱི་མ་སྟེ། མ་ག་དྷ་རྡོ་རྗེའི་གདན་ནས་ཤར་དུ་ལི་ཁ་ར་ཤིང་འཕེལ། ལྷོར་གྲོང་ཁྱེར་འདམ་བུ་ཅན། ནུབ་ཏུ་བྲམ་ཟེ་ཀ་བ་དང་ཉེ་བའི་ཀ་བའི་གྲོང་། བྱང་དུ་རི་བོ་མུན་པ་ཅན་གྱི་བར་རྣམས་ནི་ཡུལ་དབུས་ཡིན་ལ། དེའི་ཕྱི་རོལ་ནི་མཐའ་འཁོབ་ཡིན་ནོ། ཀོ་ལྤགས་ཀྱི་བྱེ་བྲག་སེང་གེ་དང་། སྟག་དང་། གུང་ལ་སོགས་པ་ཡུལ་མཐའ་འཁོབ་ཏུ་ཡང་བཀག་ལ། ནད་པ་ལ་ནི་ཞྭ་དང་། མཆིལ་ལྷྭམ་དང་། ཀོ་ལྤགས་ཀྱི་བྱེ་བྲག་ཡུལ་དབུས་སུ་ཡང་གནང་ངོ་། །དེ་དག་གིས་ནི་བདེ་བར་གནས་པའི་རྐྱེན་གོས་ལ་བརྟེན་ནས་བསྲུང་བ་བཤད་ཟིན་ཏོ།། །།གཉིས་པ་བདེ་བར་གནས་པའི་རྐྱེན་ཟས་ལ་བརྟེན་ནས་བསྲུང་བ་ལ་གསུམ་སྟེ། ཟས་དངོས་ཇི་ལྟར་བསྟེན་པ། ཟས་ཀྱི་སྣོད་སྤྱད་ཅི་ལྟར་བསྟེན་པ། ཟས་ཀྱི་གནས་རུང་ཁང་ཅི་ལྟར་བྱ་བའི་ཚུལ་ལོ། །དང་པོ་ལ་བདུན་ཏེ། དབྱེ་བ། ངོ་བོ། མཚན་ཉིད། མིང་འདོགས་པའི་རྒྱུ། དགོས་པ། བསྟེན་ཚུལ། བྱིན་གྱིས་རློབ་པའི་ཚུལ་ལོ། །དང་པོ་ནི། དུས་སུ་རུང་བ། ཐུན་ཚོད་དུ་རུང་བ། ཞག་བདུན་པ། འཚོ་བའི་བར་དུ་བཅང་བའོ། །གཉིས་པ་ལ་དུས་སུ་རུང་བ་ནི། བཟའ་བ་ལྔ་དང་། བཅའ་བ་ལྔ་ལ་སོགས་པ་རང་གླིང་གི་སྐྱ་རེངས་ཤར་ནས་གུང་ཚིགས་ཚུན་ཆད་བསྟེན་དུ་རུང་བའོ། །ཐུན་ཚོད་དུ་རུང་བ་ནི་ཙོ་ཚྭ་དང་། ཆུ་ཤིང་གི་འབྲས་བུ་དང་། རྒྱ་ཤུག་དང་། ཨ་ཤྭ་ཀ་དང་། ཨུ་དུམ་ཝཱ་ར་དང་། པ་རུ་ཤ་ཀ་དང་། རྒུན་འབྲུམ་དང་། འབྲ་གོའི་བཏུང་བ་སོགས་དང་། བཅོས་པའི་ཚྭ་དང་། འབྲུའི་ཚྭ་དང་། ཞོའི་ཁ་ཆུ་དང་། དར་བའི་དྭངས་མ་དང་། རྩབས་མོ་སྟེ་སྐྱུར་པོ་ལྔ་རུང་ཆུས་བཏབ་པ། ཚགས་ཀྱིས་བཙགས་པ། ཤིན་ཏུ་སླ་བ་བཞིན་སྣང་བ། འདམ་བུ་ཉག་མའི་མདོག་ལྟ་བུའི་བཏུང་བ་དེ་རྣམས་བྱིན་གྱིས་མ་བརླབས་པ་ནི་ཐམས་ཅད་ཀྱིས་བཏུང་དུ་རུང་ཞིང་། བྱིན་གྱིས་བརླབས་པ་ནི་ནད་པས་བཏུང་བར་བྱ་བ་ཡིན་ནོ། །རྒྱུ་དུས་རུང་ཡིན་ན་དེ་སྔ་དྲོ་ནས་མཚན་མོའི་ཐུན་དང་པོའི་བར་དུ་བསྟེན་དུ་རུང་བའོ། །ཞག་བདུན་པ་ནི་ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་ལྟ་བུ་བྱིན་གྱིས་མ་བརླབས་པ་དུས་ཐམས་ཅད་དུ་ཐམས་ཅད་ཀྱིས་བསྟེན་དུ་རུང་ཞིང་། བྱིན་གྱིས་བརླབས་པ་ནད་པ་དང་། ལམ་ཞུགས་དང་། དགེ་སྐོས་དང་། ལག་གི་གླ་རྣམས་ཀྱིས་བསྟེན་དུ་རུང་ལ། གཞན་གྱིས་བསྟེན་དུ་མི་རུང་ངོ་། །འཚོ་བའི་བར་དུ་བཅང་བ་ནི་རྩ་བ་དང་། སྡོང་བུ་དང་། མེ་ཏོག་དང་། འདབ་མ་དང་། འབྲས་བུའི་སྨན་ཏེ་ཨར་བར་སྐྱུར་གསུམ་ལ་སོགས་པ་དང་། ཚྭ་ལྔ་དང་། འགྱུར་བྱེད་ལྔ་ལ་སོགས་པའོ། །གསུམ་པ་ལ་དུས་རུང་གི་མཚན་ཉིད། བཀྲེས་པ་སེལ་བ་གཙོ་བོར་གྱུར་ཅིང་། སྤྱིར་བཏང་དུ་ཕྱི་དྲོ་མི་རུང་བའོ། །ཐུན་ཚོད་དུ་རུང་བའི་མཚན་ཉིད། རབ་བྱུང་ལ་གནང་ཞིང་སྐོམ་པ་སེལ་བ་གཙོ་བོར་གྱུར་པའི་བཏུང་བའོ། །ཞག་བདུན་པའི་མཚན་ཉིད། བཀྲེས་པ་དང་འདུས་ནད་སེལ་བ་གཙོ་བོར་གྱུར་ཅིང་བྱིན་གྱིས་མ་བརླབས་ན་དུས་ཐམས་ཅད་དུ་རུང་ཞིང་ཞག་བདུན་ལས་མ་འདས་པར་བྱིན་གྱིས་བརླབ་པའོ། །འཚོ་བའི་བར་དུ་བཅང་བའི་མཚན་ཉིད། འདུས་ནད་སེལ་བ་ལ་གཙོ་བོར་གྱུར་ཅིང་། ནད་ཞི་བའི་མཐའ་ཚུན་ཆད་དུ་བཅང་དུ་རུང་བའོ། །བཞི་པ་ནི་སྔ་དྲོའི་དུས་ཁོ་ནར་རུང་བས་དུས་རུང་། ཐུན་ཚོད་ཀྱི་མཐར་རུང་བས་ཐུན་ཚོད་རུང་བ། བྱིན་གྱིས་བརླབ་ན་ཞག་བདུན་ཁོ་ནར་རུང་བས་ཞག་བདུན་པ། ནད་སོས་ཀྱི་བར་དུ་རུང་བས་འཚོ་བའི་བར་དུ་བཅང་བའོ། །ལྔ་པ་དགོས་པ་ནི། བཀྲེས་པ་སེལ་བ་སོགས་གོང་བཞིན་ནོ། །དྲུག་པ་ནི་ནད་པས་ནི་མིག་སྨན་དང་དོམ་ལྤགས་སོགས་ལུས་ཀྱིས་བསྟེན་པ་དང་། དུས་རུང་དུས་མ་ཡིན་པར་བསྟེན་པ་དང་། དུས་མ་ཡིན་པར་རུང་བ་བྱིན་གྱིས་བརླབས་པའི་མཐའ་ཚུན་ཆད་དུ་བསྟེན་པ་ལ་སོགས་པའོ། །མི་ན་བས་དུས་རུང་དུས་དེ་ཉིད་དུ་བསྟེན་པ་དང་། དུས་མ་ཡིན་པ་རུང་བ་བྱིན་གྱིས་མ་རླབས་པ་དུས་ཐམས་ཅད་དུ་བསྟེན་དུ་རུང་ངོ་། །བདུན་པ་སྨན་བྱིན་གྱིས་བརླབ་ཚུལ་ནི་ཐུན་ཚོད་དུ་རུང་བ་ལ་སྔ་དྲོ་རུང་ཆུ་གཏོར། བྱིན་ལེན་བྱས་ནས་ཡུལ་དང་བརྟེན་གཉིས་ཀ་འགྲེང་སྟེ། ལག་པ་གཡོན་དུ་བཞག་གཡས་པས་བཀབ་ནས། དགོངས་གསོལ། བདག་མིང་འདི་ཞེས་བགྱི་བའི་ཐུན་ཚོད་དུ་རུང་བའི་སྨན་འདི་བདག་དང་ཚངས་པར་མཚུངས་པར་སྤྱོད་པ་རྣམས་ཀྱིས་བགྱི་བ། ཐུན་ཚོད་དུ་རུང་བར་བྱིན་གྱིས་བརླབ་བོ་ཞེས་ལན་གསུམ་དང་ཐབས་ལེགས་བྱའོ། །ཞག་བདུན་པ་དང་འཚོ་བའི་བར་དུ་བཅང་བ་ལ་ཡང་དེ་བཞིན་ནོ། །ལྷག་པ་བྱིན་གྱིས་བརླབ་ན་དགོངས་གསོལ། བདག་མིང་འདི་ཞེས་བགྱི་བའི་སྨན་ལྷག་པ་རུང་བ་མ་བགྱིས་པ་རུང་བར་བགྱི་བར་འོས་པ་འདི། མཁན་པོའི་ལགས་པར་རུང་བར་བགྱིའོ། །མཁན་པོ་ལ་ཡིད་གཏད་དེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ་ཞེས་ལན་གསུམ་དང་ཐབས་ལེགས་བྱའོ། །སྨན་ཕྲན་ཚེགས་བྱིན་གྱིས་བརླབ་པ་ནི་སྣར་བླུགས་པ་དང་། རྐང་ལག་བཀྲུ་བ་དང་། ཤུ་བ་དང་། བོལ་ཐོག་ལ་སོགས་པ་ལ་བྱུག་པའི་དོན་དུ་བཅང་བར་བགྱིའོ་སྙམ་དུ་སེམས་བསྐྱེད་པས་ཆོག་གོ །བྱིན་རླབས་དབྱུང་བ་ནི། དགོངས་གསོལ། བདག་མིང་འདི་ཞེས་བགྱི་བའི་སྨན་འདི་གང་གི་ཚེ་ཐུན་ཚོད་དུ་རུང་བར་བྱིན་གྱིས་བརླབས་པ་ལས། དེ་ལྟ་བས་ན་དངོས་པོ་དེ་ཉིད་སླར་དབྱུང་བར་བགྱིའོ་ཞེས་ལན་གསུམ་ཐབས་ལེགས་བྱའོ། །གཞན་གྱི་མིང་ཡིན་ན་མིང་བརྗེའོ། །ལྷག་པའི་དབྱུང་བ་ནི། དགོངས་གསོལ་བདག་མིང་འདི་ཞེས་བགྱི་བའི་སྨན་ལྷག་པ་འདི་གང་གི་ཚེ་མཁན་པོའི་ལགས་པར་རུང་བར་བགྱིས་པ་ལས་དེ་ལྟ་བས་ན་དངོས་པོ་དེ་ཉིད་སླར་དབྱུང་བར་བགྱིའོ་ཞེས་ལན་གསུམ་དང་ཐབས་ལེགས་བྱའོ། །བྱིན་རླབས་འཇིག་པའི་རྒྱུ་ནི་བྱིན་ལེན་ཞིག་པ་དང་། རོ་འགྱུར་བ། ཆོ་གས་ཕྱུང་བ་དང་། རང་རང་གི་དུས་ལས་འདས་པའོ། །གཉིས་པ་སྨན་གྱི་སྣོད་སྤྱད་ཇི་ལྟར་བསྟེན་པའི་ཚུལ་ནི། སྣོད་སྤྱད་ཀྱང་མཐའ་གཉིས་སྤངས་ཏེ། རུང་བ་ཚད་ལྡན་བྱིན་གྱིས་བརླབས་ཏེ་ལོངས་སྤྱད་པ་ཡིན་པས། དེའི་སྦྱོར་བ་ནི་ཡུལ་དགེ་སློང་དེ་རྒན་ན་ཕྱག་འཚལ། གཞོན་ན་ཐུགས་གཏད་པར་ཞུ་བ་དབུལ། གཉིས་ཀ་སྤྱོད་ལམ་འགྲེང་སྟེ། གཉིས་ཀའི་ལག་པ་གཡོན་པའི་སྟེང་དུ་ལྷུང་བཟེད་བཞག གཡས་པས་ཁ་དགབ། དངོས་གཞི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་སློང་བའི་སྣོད་དུ་བྱིན་གྱིས་བརླབ་པར་བགྱིའོ་ཞེས་ལན་གསུམ་བརྗོད། མཇུག་ཐབས་ཡིན་ནོ་ཞེས་པའི་ལན་དུ་ལེགས་སོ་ཞེས་བརྗོད། སྣོད་སྤྱད་ཕྲན་ཚེགས་པ་ནི། ལྷུང་བཟེད་ཆུང་ངུ་དང་། འཕུལ་བའི་བཏུང་ཕོར་དང་། སྨན་ཕོར་དང་། སྡེར་སྤྱད་དང་། རིལ་བ་སྤྱི་བླུགས་དང་། ཡོ་བྱད་ཕྲན་ཚེགས་པ་ནི། ཁབ་དང་། གྲི་གུ་དང་། སྤུ་གྲི་དང་། སེན་མོ་གཅོད་པའི་ལག་ཆ་དང་། སྙུང་བུ་ལ་སོགས་པ་ཡིན་ཏེ། དེ་དག་གི་བྱིན་རླབས་ནི། རང་རང་གི་མིང་གིས་སེམས་བསྐྱེད་པས་ཆོག་གོ །ལྷུང་བཟེད་ཀྱི་བྱིན་རླབས་འབྱིན་པ་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་སློང་བའི་སྣོད་དུ་བྱིན་གྱིས་བརླབས་པ་ལས། དེ་ལྟ་བས་ན་དངོས་པོ་དེ་སླར་དབྱུང་བར་བགྱིའོ་ཞེས་ལན་གསུམ་བརྗོད། གསུམ་པ་ཟས་ཀྱི་གནས་རུང་ཁང་ཇི་ལྟར་བྱ་བའི་ཚུལ་ལ་ལྔ་སྟེ། གཞི་གང་ལ་རུང་ཁང་བཅད་པ་དང་། གང་ཟག་གང་གི་དང་། དུས་ནམ་གྱི་ཚེ་དང་། དགོས་པ་གང་གི་ཆེད་དང་། བཅད་པའི་ཆོ་གའོ། །དང་པོ་ནི། རང་ངམ་རང་དང་འདྲ་བའི་མཚམས་ཀྱི་ནང་སྲ་བ་དང་འབྲེལ་བ། བླ་གབ་མེད་པ་དང་། ཀུན་ལ་མཁོ་བ་དང་། ཤིང་དྲུང་དང་། གླང་པོ་ཆེའི་རྭ་བ་སོགས་སངས་རྒྱས་ཀྱིས་བཀག་པ་མ་ཡིན་པའོ། །གཉིས་པ་ནི། ལག་གི་གླ་འབའ་ཞིག་གིས་དང་། ལག་གི་གླ་དང་། དུ་མས་དང་། དགེ་འདུན་གྱིས་དང་། དེ་དག་མེད་པ་ན་གནས་པའི་ཕྱིར་དགེ་སློང་ཇི་སྙེད་ཕྱིན་པའོ། །གསུམ་པ་ནི། དང་པོ་སོ་ཕག་འགྲེམས་པའི་དུས་དང་། ཕྱིས་ལས་གསར་པ་དང་བཅས་པའི་དུས་དང་། གཞན་གྱི་ཚེ་དགེ་སློང་གནས་པ་དང་མ་བྲལ་བའི་དུས་དང་། དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པའོ། །བཞི་པ་ནི་མཚམས་བཙོས་དང་། ཞག་ལོན་ལ་སོགས་པའི་ཉེས་པ་མཚམས་ནང་ན་གནས་པའི་དགེ་སློང་ཀུན་ལ་མི་འབྱུང་བའོ། །ལྔ་པ་ཆོ་ག་ལ་གསུམ་ལས། དང་པོ་གཉིས་ལ་ནི་ལག་གི་གླས་སོ་ཕག་ལྟ་བུ་གཅིག་བཟུང་ནས་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ། །ཞེས་སེམས་བསྐྱེད་པར་བྱ་ཞིང་ངག་ཏུ་ཡང་བརྗོད་པའོ། །གསུམ་པ་ལ་ནི་དགེ་སློང་བཞི་ཡན་ཆད་ཀྱིས་མཆིལ་ལྷྭམ་ཕུད། སྤྱོད་ལམ་ཐང་ལ་འདུག་ནས་ལས་མཁན་གཅིག་གིས་ལྟུང་བ་ཐུན་མོང་བ་བྱིན་གྱིས་བརླབས་པ་དང་། གནས་ཀྱི་བློ་མཐུན་བྱས་ནས་དགོངས་གསོལ། གནས་ཐམས་ཅད་བགྱིས་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བཞེད་ན། གལ་ཏེ་དགེ་འདུན་གྱིས་དུས་ལ་བབས་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི། དགེ་འདུན་གྱི་རུང་བ་ཁང་པར་བློ་མཐུན་པར་བགྱིའོ། །འདི་ནི་གསོལ་བའོ་ཞེས་ལན་གཅིག་བརྗོད། བརྗོད་པའི་ལས་ལ་ཐུགས་གཏད་པར་ཞུ་བྱས་ལ། དགེ་འདུན་བཙུན་པ་རྣམས་དགོངས་སུ་གསོལ། གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པའི་འདི་དགེ་འདུན་གྱི་རུང་བའི་ཁང་པར་བཞེད་དེ། དེའི་སླད་དུ་དགེ་འདུན་གྱིས་གནས་ཐམས་ཅད་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི། དགེ་འདུན་གྱི་རུང་བའི་ཁང་པར་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུངས་ཤིག གང་དག་མི་བཟོད་པ་དེ་དག་ནི་གསུངས་ཤིག དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གནས་ཐམས་ཅད་ལགས་པ། ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་ལན་གཅིག་བརྗོད། བཞི་པ་ལ་ནི་སེམས་བསྡུས་པས་བྱིན་གྱིས་བརླབས་ཏེ། གནས་ཁང་དེར་དགེ་འདུན་ཕྱིན་པ་ཐམས་ཅད་ཀྱིས་གཞི་འདི་ནི་དགེ་འདུན་གྱི་རུང་བའི་ཁང་པར་སེམས་སྡུས་ཤིག་ཅེས་ལན་གསུམ་བརྗོད་དོ། །རུང་ཁང་བྱིན་གྱིས་བརླབས་པའི་རྐྱེན་དེ་དག་མ་འབྱོར་ཞིང་། ཟས་བཙོ་བ་དང་། འཇོག་པ་དང་། རེག་པ་སོགས་བྱེད་དགོས་བྱུང་ན་འདི་ཙམ་དྲན་པར་བྱ་སྟེ། བདག་ནི་བསླབ་པ་རྣམས་ལ་མི་གུས་པ་མ་ཡིན་ནོ། །ཇི་ལྟར་སངས་རྒྱས་བཅོམ་ལྡན་འདས་མཁྱེན་པ་དང་ལྡན། གཟིགས་པ་དང་ལྡན་པ་དག་གི་རུང་བའི་ཁང་པ་དང་། ཟས་ཀྱི་ཁང་པར་ལོངས་སྤྱོད་ཅིང་། མཁྱེན་ཅིང་གཟིགས་པ་དེ་ལྟ་ན་འདི་བདག་གི་ཕྱིར་དྲན་པ་ཉེ་བར་འཇོག་གོ །དེས་བདག་གི་ཚངས་པར་སྤྱོད་པ་རྗེས་སུ་འཛིན་པར་གྱུར་ཅིག་ཅེས་སེམས་བསྐྱེད་པར་བྱ་ཞིང་ངག་ཏུ་ཡང་བརྗོད་པར་བྱའོ། །དེ་ལྟར་རབ་བྱུང་གི་གཞི་ནས་སྨན་གྱི་གཞིའི་བར་གཞི་བརྒྱད་སོང་ནས་སྐབས་འདིར་སློབ་དཔོན་ཡོན་ཏན་འོད་ཀྱིས་ལས་ཀྱི་གཞི་གསུངས་པ་ནི་གོང་འོག་ཐམས་ཅད་ལས་ལ་རག་ལས་པ་ལ་དགོངས་ལ་ལས་ལ་རྣམ་པ་མང་ཡང་། ཕྱི་རབས་ཀྱི་གང་ཟག་རྣམས་ལ་ཉེ་བར་མཁོ་བའི་ལས་རྣམས་བསྡུས་ནས་བརྒྱ་རྩ་གཅིག་སྟེ་ལུང་གཏམ་གྱི་གཞི་ལས། བཙུན་པ་ལས་དུ་དག་ཏུ་མཆིས། ཉེ་བར་འཁོར་བརྒྱ་རྩ་གཅིག་གོ །བཙུན་པ་ལས་དུ་དག་གིས་ལས་ཐམས་ཅད་བསྡུས། ཉེ་བར་འཁོར་གསུམ་གྱིས་ཏེ་གསུམ་གང་ཞེ་ན། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་སོ། །དང་པོ་ནི་ཉེར་བཞིའོ། །གཉིས་པ་ནི་བཞི་བཅུ་རྩ་བདུན་ནོ། །གསུམ་པ་ནི་སུམ་ཅུའོ་ཞེས་གསུངས་པ་ལྟར་ཤེས་པར་བྱའོ། །གསུམ་པ་བདེ་བར་གནས་པའི་རྐྱེན་གནས་མལ་ལ་བརྟེན་ནས་བསྲུང་བ་ནི། དང་པོར་གཞུང་ལས་འབྱུང་བ་བཞིན་བསྒྲུབ་པར་བྱ་ཞིང་། དེའང་དགེ་འདུན་གྱི་གནས་མལ་དང་། གང་ཟག་གི་ཁྲ་བོ་དང་དཀར་པོ་ཕལ་ཆེར་མ་ཉམས་པ་ལ། གདིང་བ་མཚན་ཉིད་དང་ལྡན་པས་བསྐྱབ་པ་སོགས་ཚུལ་བཞིན་ལོངས་སྤྱོད་དགོས་པ་ཡིན་ནོ། །མཐུན་པའི་རྐྱེན་དེ་དག་ཀྱང་རང་གི་ནོར་དང་། གཞན་གྱི་རྙེད་པ་ལ་ལྟོས་དགོས་ཏེ། དེ་དག་ཇི་ལྟར་སྒྲུབ་པའི་ཚུལ་དང་། བྱིན་གྱིས་བརླབ་པ་གཉིས་ཡིན། ཇི་ལྟར་སྒྲུབ་པ་ལ། དུས་རྒྱུན་དང་གློ་བུར་གྱི་རྙེད་པ་དང་། ཤི་བའི་ཡོ་བྱད་ཀྱི་རྙེད་པ་གཉིས་ཡིན། དང་པོ་ལའང་གནས་ཀྱིས་བསྒྲུབ་པ། དབྱར་གྱིས་བསྒྲུབ་པ། མཚམས་ཀྱིས་བསྒྲུབ་པ། ཆོས་ཀྱིས་བསྒྲུབ་པ། ཁྲིམས་སུ་བཅའ་བས་བསྒྲུབ་པའོ། །གཉིས་པ་ཤི་བའི་ཡོ་བྱད་ལའང་ངོ་བོའི་སྒོ་ནས་དགེ་འདུན་སྤྱིར་དབང་བ་དང་། གཞན་སེལ་བའི་སྒོ་ནས་དགེ་འདུན་ལ་མི་དབང་བ་གཉིས་ཡིན། དེ་དག་གཞན་གྱི་འཕྱས་སྨད་མེད་ཅིང་། རང་གིས་བསམ་ན་ཡིད་མི་བརློང་པ། དགེ་འདུན་ནམ་གྲོགས་དང་བཅས་པས་ཆོས་ལྡན་གྱི་རྙེད་པ་གྲུབ་ན། སྤུ་ས་ལིའི་འདབ་མ་ཙམ་དང་། མར་མེའི་སྙིང་པོ་ཙམ་གྱི་ཚད་ཀྱིས་ཀྱང་སྙོམས་པར་བགོ་བཤའ་བྱའོ། །དེའང་རྙེད་པ་ལ་ལྔ་བྱའོ། །དེང་རྙེད་པ་འགྱེད་པར་འགྱུར་གྱི་དེར་ཁྱེད་ཅག་ཚོགས་པར་བྱའོ་ཞེས་དགེ་འདུན་ལ་བརྗོད་པར་བྱ་བ་དང་། གཎྜི་བརྡུང་བ་དང་། ཚུལ་ཤིང་འགྲིམ་པ་དང་། བགྲངས་པ་དང་། སོ་སོའི་སྐལ་བ་བྲིམ་པའོ་ཞེས་པ་ལྔ་པོ་རྙེད་པ་བགོ་བ་ཀུན་ལ་བྱའོ། །གཉིས་པ་བྱིན་གྱིས་བརླབ་པ་ནི་ཤི་བའི་ནོར་རྫས་དང་། ནོར་འདྲ་བྱིན་གྱིས་བརླབ་པར་འདོད་ན་རོ་དབྱུང་བ་དང་། རིམ་གྲོ་དང་། ཆོས་ཉན་དུ་གཞུག་པ་དག་བྱས་ནས་གསོལ་བ་འབའ་ཞིག་གིས་བྱིན་གྱིས་བརླབ་པ་ཡིན་ནོ། །རིན་པོ་ཆེ་གསེར་དངུལ་ལ་སོགས་པ་བྱིན་གྱིས་བརླབ་པ་ནི། སྦྱིན་བདག་གམ་ཞལ་ཏ་བས་མཐུན་པའི་རྐྱེན་བསྒྲུབ་ན་ལེགས་མོད་ཀྱི་དེ་དག་མེད་པ་རང་གིས་བྱིན་གྱིས་བརླབ་ན། སྦྱོར་བ་ནི་བསྙེན་པར་མ་རྫོགས་པ་གཅིག་ལ་ཟུར་གྱིས་བསྒོས་ནས་ཡུལ་དགེ་སློང་དང་། རང་གི་མདུན་དུ་འཇོག་ཏུ་བཅུག་ལ་ཡུལ་དེ་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་དབུལ། ཡུལ་དང་བདག་ཉིད་གཉིས་ཀས་སྤྱོད་ལམ་འགྲེང་སྟེ། གཉིས་ཀའི་ལག་པ་རིན་པོ་ཆེ་ལ་མ་རེག་པ། མེ་འདེ་བའི་ཕྱག་རྒྱས་དགབ། དངོས་གཞི་ནི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ཡིན་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བའི་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདིས་དངོས་པོ་རུང་བ་བསྒྲུབ་པར་བགྱིའོ། །ཞེས་ལན་གསུམ་བརྗོད། མཇུག་ཏུ་ཐབས་ལེགས་བྱ། གོས་ཟས། སྣོད་སྤྱད། གནས་ཁང་། གནས་མལ་རུང་བ་ཚད་ལྡན་རྣམས་བྱིན་གྱིས་བརླབས་ནས་ལོངས་སྤྱད་དུ་རུང་བ་ཡིན་ན། དེ་དག་མི་རུང་བ་དང་། ཚད་དུ་མ་ཆོག་པ་རྣམས་ལ་རྐྱེན་དང་ལྡན་པའི་དུས་སུ་ལོངས་ཇི་ལྟར་སྤྱད། བཅས་པའི་ཁ་ན་མ་ཐོ་བ་བསྲུང་པས་རང་གཞན་གྱི་ལུས་དང་ལོངས་སྤྱོད་ཚངས་པར་སྤྱོད་པའི་བར་ཆད་དུ་འགྱུར་ན་ཇི་ལྟར་སྤང་སྙམ་ན་དུས་དྲན་བྱེད་པ་ཡིན་ཏེ། མདོ་རྩ་ལས། སྟོན་པ་དང་། ཆོས་དང་། དགེ་འདུན་དང་། ཚངས་པ་མཚུངས་པར་སྤྱོད་པ་རྣམས་ཀྱི་ཆོས་དང་ལྡན་པའི་དོན་ཉིད་དང་། ལྷུང་བཟེད་དང་། ཚོན་གྱི་ལས་ལ་བརྟག་པ་ནི་དུས་བྱིན་གྱིས་བརླབ་པ་ཡིན་ནོ་ཞེས་གསུངས། དེ་ལ་བདུན་ཡོད་པའི་དུས་དྲན་གྱི་བྱེད་པ་ནི་ཉེས་བྱས་འགོག་བྱེད་ཡིན་ཏེ། གནང་བའི་རྐྱེན་ཉེ་བར་གནས་པའི་ཚེ་དུས་དྲན་མ་བྱས་ཀྱང་དངོས་གཞི་མི་འབྱུང་སྟེ། དགག་བཅས་དང་འགལ་བ་མེད་ཅིང་སྒྲུབ་པའི་བཅས་པ་ཡལ་བར་དོར་བ་མེད་པས་སོ། །དེས་ན་ཉེས་བྱས་འགོག་བྱེད་ཀྱང་གནང་བའི་དུས་དྲན་པར་མ་བྱས་པའི་ཉེས་བྱས་འགོག་པར་བྱེད་དོ། །གཉིས་པ་དུས་དྲན་གྱི་གཞི་ནི་བཀག་པ་དེ་རྐྱེན་ལ་ལྟོས་ཏེ་གནང་བ་སྟེ། དེ་ཡང་ངེས་པ་ལྔ་དང་བྲལ་བའོ། །གསུམ་པ་གང་གི་ཚེ་བྱ་བ་ནི། མ་ཞུགས་པ་འཇུག་པར་འདོད་པའི་ཚེའོ། །བཞི་པ་དུས་ཇི་སྙེད་དུ་བྱ་བ་ནི། བྱ་བ་དེ་མ་ཟིན་གྱི་བར་དུ་ཡིན་ལ། དེ་ཡང་སྦྱོར་བ་ཐ་དད་པ་དང་། ཉིན་མཚན་ཐ་དད་པ་གཉིས་ནི་མ་ཡིན་ནོ། །ལྔ་པ་ངོ་བོ་ནི། དགེ་སྦྱོང་གིས་བརྟག་པའི་ཚུལ་བཞིན་ཡིད་བྱེད་དང་བཅས་པའི་ས་མཚམས་འཛིན་པར་བྱེད་པ་དང་། དགག་བྱ་འགོག་པར་བྱེད་པའོ། །དྲུག་པ་དབྱེ་བ་ནི། དགག་བྱ་ཉེས་དམིགས་འགོག་པ་དང་། བརྒྱུད་པ་རྒྱུར་འགྲོ་འགོག་པའོ། །བདུན་པ་དུས་དྲན་གྱི་དགོས་པ་ལ་གཉིས་ཏེ། དངོས་ཀྱི་དགོས་པ་ནི་ཆོ་ག་མ་བྱས་པའི་ཉེས་པ་འགོག་པའོ། །བརྒྱུད་པའི་དགོས་པ་ནི། གནང་བའི་དུས་དྲན་བྱས་པས་མ་གནང་བའི་དུས་སེལ་བར་བྱེད། དེས་བཅས་པ་རྣམ་གཞག་མཚམས་བསྲུང་བའི་དགོས་པ་འགྲུབ་པ་དང་། དགག་བྱ་ཉེས་དམིགས་ཁེགས་པའོ། །དེ་དག་གིས་ཐོབ་པ་མི་ཉམས་པར་བསྲུང་བའི་ཐབས་བསྟན་ཟིན་ཏོ།། །།གསུམ་པ་ཉམས་ན་ཕྱིར་བཅོས་པའི་ཐབས་ལ་གཉིས་ཏེ། ལྟུང་བ་ཕྱིར་བཅོས་པ་དང་། རྩོད་པ་ཕྱིར་བཅོས་པའོ། །དང་པོ་ལ་གཉིས་ཏེ། མོས་པ་བཤགས་པའི་སྒོ་ནས་ཕྱིར་བཅོས་པ་དང་། མི་མོས་པ་གླེང་ཞིང་བསྐུལ་བའི་སྒོ་ནས་ཕྱིར་བཅོས་པའོ། །དང་པོ་ལ་གཉིས་ཏེ། ཕྱིར་བཅོས་དངོས་དང་། དེའི་ཆ་རྐྱེན་ནོ། །དང་པོ་ལ་གཉིས་ཏེ། བདག་ཉིད་མི་སྤྲོ་བ་ལ་ནན་ཏུར་གྱིས་ཕྱིར་བཅོས་པ་དང་། སྤྲོ་བ་མཐོལ་བ་ལ་སོགས་པའི་སྒོ་ནས་ཕྱིར་བཅོས་པའོ། །དང་པོ་ལ་གསུམ་སྟེ། ནན་ཏུར་སྤྱིར་བཏང་བ་དང་། ནན་ཏུར་བྱས་པ་ལ་བཟོད་པ་བླང་བ་དང་། ནན་ཏུར་སོ་སོའི་མཚན་ཉིད་དོ། །དང་པོ་ལ་དྲུག་སྟེ། གཞི་གང་ལ་བྱ་བ། དགེ་འདུན་གང་གིས་བྱ་བ། ཆོ་ག དགོས་པ། སའི་ཁྱད་པར། སྒྲ་དོན་ནོ། །དང་པོ་ནི། གཞི་མ་ཞི་བར་ཤེས་པ་ལ་མཐོང་ཐོས་ཀྱིས་ནན་ཏུར་བྱེད་དོ། །གཉིས་པ་ནི། དགེ་འདུན་མཚན་ཉིད་གསུམ་ལྡན་གྱིས་སོ། །གསུམ་པ་ནི། སྦྱོར་བ་གླེང་དྲན་བཞམས་བསྒོ་སྔོན་དུ་སོང་ནས། དངོས་གཞི་གསོལ་བཞིའི་ལས་དང་། མཇུག་གནས་འདིའམ་དགེ་འདུན་འདི་ཉིད་ཀྱིས་ཁྱོད་བག་ཡངས་སུ་བྱེད་པར་འགྱུར་རོ་ཞེས་པའོ། །བཞི་པ་ནི། རྒྱུ་མ་བཏང་བ་ལ་བཤགས་པ་བྱས་ཀྱང་མི་འཆགས་པས་བྱ་བ་ངན་པ་འཕྲོ་གཅོད་པ་དང་། ལམ་ངན་པ་ལས་བཟློག་ནས་ལམ་དུ་གཞུག་པ་དང་། དགེ་སློང་རྣམས་ཡིད་ཆེས་པའི་དགོས་པའོ། །ལྔ་པ་ནི། ནན་ཏུར་གྱི་ནང་ནས་ས་གཞན་ན་གནས་པའི་ཁྱད་པར་ནི་མཉམ་པ་དང་ཁྱད་པར་ཅན་གྱིས་སྤྱོད་པ་དོར་བའོ། །དྲུག་པ་ནི། འགྲེལ་པས་འོག་ཏུ་གཞུག་ཅིང་བཤུང་བའི་དོན་གྱིས་ནན་ཏུར་ཞེས་སོ། །གཉིས་པ་ལ་དྲུག་སྟེ། ཡུལ་གང་ལ་དང་། དགེ་འདུན་གང་གིས་དང་། མཚམས་གང་དུ་དང་། བསམ་པ་ཅི་ལྟ་བུས་དང་། ཆོ་ག་གང་གིས་དང་། དགོས་པ་གང་གི་ཆེད་དུའོ། །ཡུལ་ལ་བཅུ་གཅིག་སྟེ། འཁོན་གྱི་བསམ་པས་མི་འཛིན། རྟེན་ཕྱིན་ཅི་ལོག་ལ་མི་བརྟེན། རྟགས་ཕྱིན་ཅི་ལོག་མི་འཆང་། བསླབ་པ་ཕྱིན་ཅི་ལོག་མི་སློབ། ང་རྒྱལ་དང་རྒྱགས་པ་སྤང་བ་དང་། དམན་པ་ནས་འབྱུང་བ་བསྐྱོད་པ་དང་། མཉམ་པའི་སྤྱོད་པ་ལ་སློབ་པ་དང་། རྒྱུ་ལས་ལོག་པ་དང་། བཟོད་པར་གསོལ་བ་དང་། རང་བཞིན་དུ་གནས་པ་དང་། ཚོགས་སུ་མ་ལོངས་པ་དང་། གཟུགས་མ་བསྒྱུར་བའོ། །དགེ་ཚུལ་ལ་དགེ་སློང་གི་བསླབ་པ་ལ་སློབ་པ་དབྲིའོ། །ཁྱིམ་པ་ལ་བཟོད་པ་བླང་བ་ལ་དགེ་སློང་གི་བསླབ་པ་ལ་སློབ་པ་དང་། ཆོ་ག་མ་ཡིན་པ་མི་སྤྱོད་པ་དང་། ཁྱིམ་པའི་རྟགས་མི་འཆང་བ་བོར་བའི་མཚན་ཉིད་གཞན་དགོས་པའོ། །དགེ་འདུན་ནི་མཚན་ཉིད་གསུམ་དང་ལྡན་པ་དང་། ནན་ཏུར་བྱེད་མཁན་གྱིས་བསྐོས་པའོ། །གནས་ནི་མཚམས་ནང་ནའམ། དེ་ཉིད་བསྐོས་པའི་མཚམས་ནང་ནའོ། །བསམ་པ་འདུ་ཤེས་མ་འཁྲུལ་བ། ཀུན་སློང་མྱ་ངན་ལས་འདས་པའི་བསམ་པས་བསམ་པ་ཐག་པས་བཟོད་པ་གསོལ་བར་འདོད་པའོ། །ཆོ་ག་ལ་གསུམ་ལས་སྦྱོར་བ་ནི་ལན་གསུམ་གསོལ་བ་བཏབ་པའོ། །དངོས་གཞི་གསོལ་བ་དང་བཞིས་སྦྱིན་པའོ། །མཇུག་སྤྲོ་བ་བསྐྱེད་པའོ། །དགོས་པ་ནི་རང་བཞིན་དུ་གནས་པ་ཐོབ་པའོ། །གསུམ་པ་ནན་ཏུར་སོ་སོའི་མཚན་ཉིད་ལས་དང་པོ་བསྡིག་པ་ནན་ཏུར་ལ་སྤྱི་དོན་དྲུག་སྟེ། གཞི་གང་ལ་བྱ་བ་དང་། དགེ་འདུན་གང་གིས་དང་། ཆོ་ག་དང་། དགོས་པ་དང་། སའི་ཁྱད་པར་དང་། མིང་གདགས་པའི་རྒྱུ་མཚན་ནོ། །གཞི་ནི་དོན་ཡོད་རུང་མེད་རུང་ཆེ་རུང་ཆུང་རུང་འཐབ་དཀྲོལ་རྒྱུན་དུ་བྱེད་པའོ། །དགེ་འདུན་མཚན་ཉིད་གསུམ་ལྡན་གྱིས་སོ། །ཆོ་ག་ལ་གསུམ་ལས་སྦྱོར་བ་གླེང་དྲན་བཞམས་བསྒོ་སྔོན་དུ་སོང་བའོ། །དངོས་གཞི་གསོལ་བ་དང་བཞིའི་ལས་ཀྱིས་སོ། །མཇུག་ཏུ་བརྗོད་པ་གནས་འདིའམ་དགེ་འདུན་འདི་ཉིད་ཀྱིས་ཁྱོར་བག་ཡངས་སུ་བྱེད་པར་འགྱུར་རོ་ཞེས་བརྗོད་པའོ། །དགོས་པ་ནི་བྱ་བ་ངན་པ་འཕྲོ་གཅོད་དུ་གཞུག་པ་དང་། ལམ་ངན་པ་ལས་བཟློག་ནས་ལམ་དུ་གཞུག་པའི་ཕྱིར་རོ། །སའི་ཁྱད་པར་ནི་ཁྱད་པར་ཅན་གྱིས་སྤྱོད་པ་སྤངས་པའོ། །མིང་གདགས་པའི་རྒྱུ་མཚན་ནི་འཐབ་དཀྲོལ་ཅན་ལ་ལས་ཀྱིས་བསྡིགས་པས་ནའོ། །དེ་བཞིན་དུ་ནན་ཏུར་གྱི་ལས་ཐམས་ཅད་ལ་ཡང་སྤྱི་དོན་དྲུག་ཏུ་ཤེས་པར་བྱའོ། །བསྡིགས། སྨད། བསྐྲད། ཕྱིར་འགྱེད་བཞི་ནི་ཁྱད་པར་ཅན་གྱི་སྤྱོད་པ་སྤོང་བའོ། །གནས་དབྱུང་བདུན་ནི་དེའི་ཐོག་ཏུ་ཆོས་དང་ཟང་ཟིང་གིས་སྤོང་བའོ། །གནས་དབྱུང་བདུན་ནི་མ་མཐོང་བ་གནས་ནས་དབྱུང་བ། ཕྱིར་མི་འཆོས་པ། སྡིག་ལྟ་མི་གཏོང་བ། འཐབ་དཀྲོལ་བྱེད་པ། རྣམ་པར་གཏན་ལ་འབེབས་པ་ལས་གྱུར་པ་ཉེ་བར་མ་ཞི་བ། འཐབ་དཀྲོལ་གྱི་རྒྱུ་ཉེ་བར་བསྒྲུབ་པ། དགེ་སློང་མ་དང་སྡེ་ཞིང་གནས་པ་དབྱུང་བའོ། །བཅུ་གཅིག་པོ་དེའི་སྟེང་དུ་གསོ་སྦྱོང་བཞག་པ། དགག་དབྱེ་བཞག་པ་སྟེ་རབ་བྱུང་ལ་ནན་ཏུར་བཅུ་གསུམ་ཡིན་ལ། ཁྱིམ་པ་ལ་ལྷུང་བཟེད་ཁས་སྦུབ་པ་དང་བཅུ་བཞིའོ། །བསྡིགས་པ་སོགས་བཞི་ནི་རིམ་པ་ལྟར་འཐབ་དཀྲོལ་བྱེད་པ་དང་། ལྷག་མའི་ལྟུང་བ་ཕྱིར་མི་འཆོས་པར་རྒྱུན་དུ་བྱེད་པ་དང་། ཁྱིམ་སུན་འབྱིན་པ་དང་། ཁྱིམ་པ་ལ་བརྙས་ཐབས་བྱེད་པ་རྣམས་ལ་བྱའོ། །གཉིས་པ་བདག་ཉིད་སྤྲོ་བ་མཐོལ་བ་ལ་སོགས་པའི་སྒོ་ནས་ཕྱིར་བཅོས་པ་ལ་གཉིས་ཏེ། ཕྱིར་བཅོས་པའི་རྒྱུ་མཐོལ་བ་དང་། བཤགས་པ་དངོས་སོ། །དང་པོ་ལ་ལྔ་སྟེ། ཡུལ་དང་། གང་ཟག་དང་། བསམ་པ་དང་། ཆོ་ག་དང་། དགོས་པའོ། །ཡུལ་ནི་བསྒོ་བ་ལས་གྱུར་པ་རྣམས་ནི་ཆོས་དྲུག་ལྡན་མཚམས་ཀྱི་ཁོངས་སུ་གཏོགས་པ་ཐམས་ཅད་ལའོ། །སོ་སོར་བཤགས་པ་རྣམས་ནི་གནས་དེར་གཏོགས་པའི་ཆོས་དྲུག་དང་ལྡན་པའོ། །དེ་ལས་གཞན་པ་རྣམས་ནི་ཆོས་དྲུག་ལྡན་པ་གཅིག་ལའོ། །ཆོས་དྲུག་ལྡན་ནི་བསྙེན་པར་རྫོགས་པའི་སྡོམ་པ་རྣམ་པར་དག་པ་དང་ལྡན་པ་དང་། ལྟ་བ་མཐུན་པ་དང་། མཚན་མཐུན་པ་དང་། ཐ་སྙད་དང་ལྡན་པ་དང་། མཚམས་ཀྱི་ནང་ན་གནས་པ་དང་། ས་རང་བཞིན་དུ་གནས་པའོ། །གང་ཟག་ལ་ལྔ་སྟེ། བསྙེན་པར་རྫོགས་པའི་སྡོམ་པ་རྣམ་པར་དག་པ་དང་ལྡན་པ། གནས་ནས་མ་ཕྱུང་བ་དང་། ལྟུང་བ་དྲན་པར་ནུས་པ་དང་། བསམ་པ་རང་བཞིན་དུ་གནས་པ་དང་། བཤགས་པའི་རྐྱེན་མ་རྫོགས་པའོ། །བསམ་པ་ལ་གསུམ་སྟེ། མྱ་ངན་ལས་འདས་པའི་བསམ་པ་བརྟན་པོ་དང་ལྡན་པ་དང་། སྔ་མ་ལ་འགྱོད་ཅིང་ཕྱིན་ཆད་སྡོམ་སེམས་དང་ལྡན་པ་དང་། བསམ་པ་ཐག་པ་ནས་མཐོལ་བར་འདོད་པའོ། །ཆོ་ག་ལ་གཉིས་ཏེ། དངོས་གཞི་ཉེས་པ་མཐོལ་བ་དང་། བཅབ་པའི་ཉེས་པ་མཐོལ་བའོ། །དང་པོ་ལ་གཉིས་ཏེ། སྤྱིར་བཏང་བ་དང་། དམིགས་ཀྱིས་བསལ་བའོ། །སྤྱིར་བཏང་བ་ནི་དེས་དེའི་མདུན་དུ་མཆིལ་ལྷྭམ་གཉིས་ཕུད་བླ་གོས་ཕྲག་པ་གཅིག་ཏུ་གཟར་ནས་རྒན་ན་ཕྱག་བྱས་ལ་ལན་གསུམ་གྱི་བར་དུ་བྱའོ། །དམིགས་བསལ་ཐ་ན་མིང་གོ་བར་བྱའོ། །འཆབ་པའི་ཉེས་པ་མཐོལ་བ་ལ་ཞག་གྲངས་ལ་སོགས་པ་མི་ཤེས་ན་དཔག་ཏུ་མེད་པ་བརྗོད། ལྔ་ནས་གྲངས་ཀྱིས་ཆོད་ཀྱི་བར་ལ་ཚད་ཤིན་ཏུ་མང་པོ་ཞེས་བརྗོད་དོ། །མཐོལ་བ་ལ་མ་བཅབས་པ་མཐོལ་བ་དང་། བཅབས་པ་མཐོལ་བའོ། །མ་བཅབས་པ་ལ་སྤྱིར་བཏང་། དམིགས་བསལ་གཉིས་སོ། །བཅབས་པ་མཐོལ་བ་ལ་ཕྱུར་ན་རེ། མུ་དགུ་སྟེ། ལྟུང་བ་གཅིག་ཞག་གཅིག་དང་། ལྟུང་བ་གཅིག་ཞག་ཚད་མང་པོ་དང་། ལྟུང་བ་གཅིག་ཞག་དཔག་ཏུ་མེད་པ་དང་གསུམ། ལྟུང་བ་ཚད་ཤིན་ཏུ་མང་པོ་ཞག་གཅིག་དང་། ཞག་མང་པོ་དང་། ཞག་དཔག་ཏུ་མེད་པ་དང་གསུམ་མོ། །ལྟུང་བ་དཔག་ཏུ་མེད་པ་ཞག་གཅིག་དང་། ཞག་མང་པོ་དང་། ཞག་དཔག་དུ་མེད་པ་བཅབ་པ་དང་གསུམ་མོ། །འདི་དག་གི་སྐབས་སུ་སློབ་དཔོན་རྒྱ་ནི། འཆབ་པ་ལ་མཐོལ་བ་བྱ་ལ་ཕྱིས་འཆབ་པའི་ཉེས་པ་དང་། ཡོད་ལ་ཕྱིར་མི་འཆོས་པ་གཉིས་སྡོངས་པ་ལ་མཐོལ་བཤགས་དུས་གཅིག་པ་བྱ། དངོས་གཞི་ཉེས་པ་ནི་བཤགས་རྐྱང་བྱ་གསུངས། སློབ་དཔོན་རྨ་ཚོ་ནི། འཆབ་པ་ལ་མཐོལ་བས་ཆོག་གི་བཤགས་མི་དགོས། ཡོད་ན་ཕྱིར་མི་འཆོས་པ་ལ་མཐོལ་བཤགས་དུས་གཅིག་པ་བྱ། དངོས་གཞི་གཞན་གྱིས་བསྐུལ་ན་ཉེས་པ་ལ་བཤགས་རྐྱང་བྱ་ཞེས་གསུངས། མཁས་པ་བྱ་ནི། ཊཱིཀྐ་ལས། མཐོལ་བཤགས་དུས་གཅིག་པའི་ཆོ་ག་མ་སྦྱར་བས་འཆབ་པའི་ཉེས་པ་བྱུང་ཟིན་གྱི་ཆ་ནས་མིང་འཕེལ་བར་མ་ཟད་རིགས་ཀྱང་འཕེལ་བས་དུས་གཅིག་པ་བྱ་ལ། སྔར་འཆབ་པའི་ཉེས་པ་བྱུང་མ་ཟིན་ན་ཕྱིས་མིང་དང་རིགས་མི་འཕེལ་བར་བྱ་བའི་ཕྱིར་མཐོལ་རྐྱང་འབའ་ཞིག་བྱ། དངོས་གཞི་ལ་བཤགས་རྐྱང་བྱ་ཞིང་ཡོད་ལ་ཕྱིར་མི་འཆོས་པ་ལ་དུས་གཅིག་ཏུ་བྱའོ་ཞེས་གསུངས། དེའི་རྗེས་སུ་འབྲངས་ཏེ་དང་པོ་མཐོལ་བཤགས་དུས་གཅིག་པ་ནི་བརྫུན་སྨྲའི་ལྟུང་བྱེད་འཆབ་པ་དང་བཅས་པ་བྱུང་ན་ཡུལ་དགེ་སློང་ལྟུང་བ་མིང་རིགས་མི་མཐུན་པས་ཁྱད་པར་དུ་བྱས་པའི་ཆོས་བདུན་ལྡན་གྱི་དྲུང་དུ་རྒན་ན་ཕྱག་འཚལ་བ་དང་། གཞོན་ན་ཐུགས་གཏད་པར་ཞུ་བ་ཕུལ་ཏེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ལྟུང་བྱེད་ཀྱི་སྡེ་ཚན་ལས། ཤེས་བཞིན་དུ་བརྫུན་དུ་སྨྲ་བའི་ལྟུང་བྱེད་འཆབ་པ་དང་བཅས་པ་བྱུང་སྟེ། བདག་དགེ་སློང་མིང་འདི་ཞེས་བྱ་བའི་ལྟུང་བ་དེ་བཙུན་པའི་སྤྱན་སྔར་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་ནི་བདག་བདེ་བ་ལ་རེག་པར་གནས་པར་གྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ། །ཞེས་ལན་གསུམ་མཐོང་སྡོམ་དང་། ཐབས་ལེགས་དང་བཅས་པར་བྱ། བརྫུན་སྨྲའི་ལྟུང་བྱེད་འཆབ་མེད་ཀྱི་མཐོལ་བ་འབའ་ཞིག་པ་ནི་ཡུལ་དང་སྦྱོར་བ་སྔར་དང་འདྲ་བ་ལ་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བྱེད་ཀྱི་སྡེ་ཚན་ལས་ཤེས་བཞིན་དུ་བརྫུན་དུ་སྨྲ་བའི་ལྟུང་བྱེད་བྱུང་སྟེ། བདག་དགེ་སློང་མིང་འདི་ཞེས་བྱ་བའི་ལྟུང་བ་དེ། བཙུན་པའི་སྤྱན་སྔར་མཐོལ་ལོ། །མི་འཆབ་བོ། །མཐོལ་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་ན་དེ་ལྟར་མི་འགྱུར་བ་ལགས་སོ། །ཞེས་ལན་གསུམ། མཐོང་སྡོམ། ཐབས་ཡིན་ནོ། །ལེགས་སོ་དང་བཅས་པ་བྱ། འདིས་མཐོལ་བ་དངོས་བསྟན་ཅིང་། ལྟུང་བ་གཞན་རྣམས་ཀྱི་མཐོལ་བ་ཡང་འདིས་མཚོན་ནོ། །གཉིས་པ་བཤགས་པས་ལྟུང་བ་ཕྱིར་བཅོས་པ་ནི་ཡིད་ཀྱི་ཁ་ན་མ་ཐོ་བ་ནི་སྔ་མ་ལ་འགྱོད་ཅིང་ཕྱིན་ཆད་སྡོམ་པའི་བློས་འདག་ལ། ལུས་ངག་གི་རིག་བྱེད་དུ་གྲུབ་པ་རྣམས་སྔར་བྱས་ལ་འགྱོད་པ་ཁོང་དུ་དུག་སོང་བ་སྐྱུག་པར་འདོད་པ་ལྟ་བུ་ཕྱིན་ཆད་སྡོམ་པ་སྲོག་ལ་བབ་ཀྱང་མི་བྱ་སྙམ་དུ་ཞེ་མནའ་སྐྱེལ་ཕོད་པ་གཅིག་དགོས་ཏེ། མདོ་རྩ་བ་ལས། བསམ་པས་ལྟུང་བ་ལས་ལྡང་གི་ཆད་པའི་ལས་ཀྱིས་ནི་མ་ཡིན་ནོ་ཞེས་བཤད། དེ་ལྟར་དངོས་སུ་ལྟུང་བའི་མིང་རིགས་བརྗོད་པ་མགོ་ལ་མེ་ཤོར་བར་གསོད་པར་འདོད་པ་ལྟ་བུའི་བརྩོན་འགྲུས་དང་ལྡན་པ་གཅིག་དགོས་ཏེ། མདོ་རྩ་བ་ལས། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ་ཞེས་བཤད། དེ་ལ་ཕམ་པ་དངོས་གཞི་སྦོམ་པོ་ལྕི་ཡང་ཆ་ཤས་དང་བཅས་པ་ཕྱིར་བཅོས་པའི་ཆོ་ག ལྷག་མ་དངོས་གཞི་སྦོམ་པོ་ལྕི་ཡང་ཆ་ཤས་དང་བཅས་པ་ཕྱིར་བཅོས་པའི་ཆོ་ག སྤང་ལྟུང་དངོས་གཞི་ཆ་ཤས་དང་བཅས་པ་ཕྱིར་བཅོས་པའི་ཆོ་ག སོ་སོར་བཤགས་པ་དངོས་གཞི་ཆ་ཤས་དང་བཅས་པ་ཕྱིར་བཅོས་པའི་ཆོ་ག བསླབ་བྱ་ཉེས་བྱས་ཕྱིར་བཅོས་པའི་ཆོ་ག གཞི་སྟོད་སྨད་ཀྱི་སྦོམ་པོ་དང་ཉེས་བྱས་ཕྱིར་བཅོས་པའི་ཆོ་ག གང་ཟག་ཁྱད་པར་ཅན་ལྔའི་ལྷག་མ་དངོས་གཞི་ཕྱིར་བཅོས་པའི་ཆོ་ག་དང་བདུན་ཡིན་ནོ། །དང་པོ་ཕམ་པ་དངོས་གཞི་འཆབ་སེམས་དང་བཅས་པས་རྒྱུད་ལ་གོས་ན་ཕྱིར་བཅོས་པའི་ཐབས་མེད་དེ། ལུང་ལས། དེའི་དགེ་སྦྱོང་ཚུལ་ནི་ཕྱིར་བླང་དུ་མེད་པར་འགྱུར་རོ་ཞེས་དང་། མདོ་རྩ་བ་ལས་ཀྱང་། ཚུལ་ཁྲིམས་འཆལ་བ་བསྐྲད་པར་བྱའོ། །ཞེས་གསུངས་པས་སོ།། །།ཕམ་པ་འཆབ་སེམས་མ་སྐྱེས་པས་རྒྱུད་ལ་གོས་ན་དགེ་འདུན་ལ་གསོལ་བ་ལན་གསུམ་བཏབ་སྟེ། དགེ་འདུན་གྱིས་གསོལ་བ་དང་བཞིའི་ལས་ཀྱི་ཆད་པ་ལས་ཀྱི་བསླབ་པ་དང་། སྡོམ་པ་ལས་ཀྱི་བསླབ་པ་བྱིན་ནས་སྤོ་སྤྱོད་མགུ་སྤྱོད་ཀྱི་སྐབས་སུ་འཆད་པ་ལྟར་རང་བཞིན་དུ་གནས་པ་རྣམས་ལས་ཁྱད་པར་གྱི་སྤྱོད་པ་དང་། མཉམ་པའི་སྤྱོད་པ་སྤངས་ཏེ། དམན་པའི་སྤྱོད་པས་ཇི་སྲིད་འཚོའི་བར་རམ་དགྲ་བཅོམ་པ་མ་ཐོབ་བར་དུ་གུས་པས་ཞབས་ཏོག་བསྒྲུབས་པས་ཆད་པ་ལས་ཀྱི་བསླབ་པས་ཕམ་པའི་སྡིག་པ་དག་ཅིང་། སྡོམ་པ་ལས་ཀྱི་བསླབ་པས་སྡོམ་པ་སོར་ཆུད་པར་འགྱུར་བ་ཅིག་ཡིན། བྱེ་བྲག་ཏུ་སྨྲ་བ་ཕམ་པ་བྱུང་བས་སྡོམ་པ་མི་བཏང་བར་འདོད་པས་སྡོམ་པ་སོར་ཆུད་ཅེས་མ་བརྗོད་ཀྱང་རུང་། ཕམ་པར་གཏོགས་པའི་སྦོམ་པོ་ལྕི་བ་ཕྱིར་བཅོས་པའི་སྦྱོར་བ་ནི་དགེ་སློང་མཚམས་ཀྱི་ཕྱི་ནང་དུ་མ་བཅད་པ་དྲུག་གི་མདུན་དུ་ཕྱག་འཚལ། ཙོག་པུར་འདུག་ནས་དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཕམ་པར་འགྱུར་བའི་སྡེ་ཚན་ལས་མི་ཚངས་པར་སྤྱོད་པའི་དངོས་གཞིའི་རྣམ་པའི་སྦོམ་པོ་ལྕི་བ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་སྦོམ་པོ་དེ། དགེ་འདུན་བཙུན་པ་རྣམས་ཀྱི་མདུན་དུ་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་ནི་བདག་བདེ་བ་ལ་རེག་པར་གནས་པར་འགྱུར་གྱི་མ་མཐོལ་མ་བཤགས་ན་ནི་དེ་ལྟར་མི་འགྱུར་རོ། །ཞེས་ལན་གསུམ་བརྗོད། མཇུག་མཐོང་སྡོམ་ཐབས་ལེགས་དང་བཅས་པ་བྱ། དེ་ནི་རྨ་ཉམས་པའི་ནང་དུ་བདེ་བ་ཉམས་སུ་མྱོང་བ་ལྟ་བུའོ། །ཕམ་པར་གཏོགས་པའི་སྦོམ་པོ་ཡང་བ་ཕྱིར་བཅོས་པའི་སྦྱོར་རྗེས་སྔར་དང་འདྲ། དངོས་གཞི་ནི། ཡུལ་དགེ་སློང་བཞིའི་མདུན་དུ་འདུག་སྟེ། དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཕམ་པར་འགྱུར་བའི་སྡེ་ཚན་ལས་མི་ཚངས་པར་སྤྱོད་པའི་དངོས་གཞི་ཕམ་པའི་སྦོམ་པོ་ཡང་བ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་སྦོམ་པོ་དེ། དགེ་འདུན་བཙུན་པ་རྣམས་ཀྱི་མདུན་དུ་མཐོལ་ལོ། །བཤགས་སོ། །མི་འཆབ་བོ། །མཐོལ་ཞིང་བཤགས་ན་ནི་བདག་བདེ་བ་ལ་རེག་པར་གནས་པར་འགྱུར་གྱི་མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ། །ཞེས་ལན་གསུམ་བརྗོད་དོ། །ཕམ་པའི་ཆ་ཤས་ཀྱི་ལྟུང་བ་ཕྱིར་བཅོས་ན་བསམ་པ་སེམས་བསྐྱེད་པའི་གནས་སྐབས་ཀྱི་ཉེས་བྱས་ནི་སྔར་བཞིན་བསྡོམས་པས་འདག སྦྱོར་བའི་སྦྱོར་བའི་ཉེས་བྱས་ནི་སྦྱོར་རྗེས་སྔར་བཞིན། དངོས་གཞི་ནི་དགེ་སློང་རྣམ་དག་གཅིག་གིས་མདུན་དུ་འདུག་སྟེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཕམ་པར་འགྱུར་བའི་སྡེ་ཚན་ལས་མི་ཚངས་སྤྱོད་ཀྱི་ཕམ་པའི་སྦྱོར་བའི་སྦྱོར་བའི་ཉེས་བྱས་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ཉེས་པ་དེ། བཙུན་པའི་མདུན་དུ་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ། །ཞེས་ལན་གསུམ། སྦྱོར་བའི་སྦོམ་པོའི་ཕྱིར་བཅོས་ནི་སྦྱོར་རྗེས་སྔར་དང་འདྲ། དངོས་གཞི་ལྟུང་བ་མིང་རིགས་མི་མཐུན་པས་ཁྱད་པར་དུ་བྱས་པའི་དགེ་སློང་རྣམ་དག་གི་མདུན་དུ་འདུག་སྟེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཕམ་པར་འགྱུར་བའི་སྡེ་ཚན་ལས་མི་ཚངས་སྤྱོད་ཀྱི་ཕམ་པའི་སྦྱོར་བའི་སྦོམ་པོ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་སྦོམ་པོ་དེ། བཙུན་པའི་མདུན་དུ་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་ནི་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་ཞིང་མ་བཤགས་ན་ནི་དེ་ལྟར་མི་འགྱུར་བ་ལགས་སོ་ཞེས་ལན་གསུམ། ཕམ་པའི་བསླབ་བྱའི་ཉེས་བྱས་ཀྱི་གོས་ན་སྦྱོར་མཇུག་གོང་བཞིན། དངོས་གཞི་ནི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཕམ་པར་གྱུར་པའི་སྡེ་ཚན་ལས་མི་ཚངས་པར་སྤྱོད་པའི་བསླབ་བྱ་ལས་འདས་པའི་ཉེས་བྱས་མ་བསྲུངས་པར་ཉིན་མོ་གློ་ས་ཕབ་སྟེ་གཉིད་ལོག་པའི་ལྟུང་བ་ཞིག་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ལྟུང་བ་དེ། བཙུན་པའི་མདུན་དུ་མཐོལ་ལོ། །བཤགས་སོ། །མི་འཆབ་བོ། །མཐོལ་ཞི་བཤགས་ན་ནི་བདག་བདེ་བ་ལ་རེག་པར་གནས་པར་འགྱུར་གྱི་མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ། །ཞེས་ལན་གསུམ། འདིས་ལྷག་མ་མན་ཆད་ཀྱི་ལྟུང་བ་རྣམས་ཀྱི་ཡང་ཆ་ཤས་དང་བསླབ་བྱའི་ཉེས་པ་ཕྱིར་བཅོས་པ་ལ་མིང་རིགས་སྐབས་དང་སྦྱར་ཏེ་ཤེས་པར་བྱའོ། །གཉིས་པ་ལྷག་མ་དངོས་གཞི་སྦོམ་པོ་ལྕི་ཡང་ཆ་ཤས་དང་བཅས་པ་ཕྱིར་བཅོས་པའི་ཆོ་གའི་དངོས་གཞི་ཕྱིར་བཅོས་ཚུལ་ལ། སྤོ་བའི་སྒོ་ནས་འཆབ་པ་ཕྱིར་བཅོས་པ་དང་། མགུ་བ་དང་དབྱུང་བའི་སྒོ་ནས་ལྷག་མ་དངོས་གཞི་ཕྱིར་བཅོས་པའི་ཚུལ་གཉིས་ཡིན། སྤྱིར་ལྟུང་བ་ཐམས་ཅད་ཀྱི་འཆབ་པའི་ཉེས་པ་སྔོན་དུ་ཕྱིར་བཅོས་དགོས་ཏེ། ཊཱིཀྐ་ལས་སྔར་འཆབ་པའི་ཉེས་པ་ཕྱིར་བཅོས་ཤིང་། ཕྱི་ནས་ལྟུང་བ་ཕྱིར་བཅོས་པར་བྱའོ་ཞེས་པ་ཀུན་ལ་མཚུངས།། །།འཆབ་པའི་ཉེས་པ་འབྱུང་ཚུལ་ཡང་བསྙེན་པར་རྫོགས་པ་གནས་ནས་མ་ཕྱུང་ཞིང་། ལས་དང་པོ་པ་མིན་པ་ལྟུང་བ་དྲན་ཤེས་དང་ལྡན་པའི་རང་བཞིན་དུ་གནས་པས་རང་རྒྱུད་ཀྱི་ལྟུང་བ་མཐོལ་བའི་ཡུལ་མཚན་ཉིད་དང་ལྡན་པ་ཡོད་ཀྱང་མ་མཐོལ་བར་འཆབ་པའི་སེམས་ཀྱིས་མཚན་མོའི་མཐའ་འདས་པས་བཅབ་པར་འགྱུར་རོ། །དེ་ཡང་དུས་དང་དུས་མ་ཡིན་པ་བསྡུས་པ་འབྱུང་བའི་གཞི་ལས་བསྟན་ནོ། །དང་པོ་སྤོ་བའི་སྒོ་ནས་འཆབ་པ་ཕྱིར་བཅོས་པ་ལ་སྤོ་བ་སྦྱིན་པ་དང་། སྤྱད་པ་གཉིས་ཡིན། དང་པོ་སྤོ་བ་སྦྱིན་པ་ནི་མཚན་ཉིད་གསུམ་ལྡན་གྱི་དགེ་འདུན་གྱིས་ཡུལ་བསྙེན་པར་རྫོགས་པའི་སྡོམ་པ་གསོ་རུང་ཡན་ཆད་དང་ལྡན་པ། ལྷག་མའི་ལྟུང་བ་དྲན་ཤིང་དམན་པའི་གང་ཟག་ཡིན་ཞིང་། འཆབ་པའི་ཉེས་པ་དང་ལྡན་པ་ཚོགས་སུ་མ་ཚང་བས་གསོལ་བ་ལན་གསུམ་དུ་འདེབས་པ་དེ་ལ་སྤོ་བ། གཞི་ནས་སྤོ་བ། ཡང་གཞི་ནས་སྤོ་བ་གསུམ་ཇི་སྲིད་བཅབ་པའི་དུས་དེ་སྲིད་དུ་གསོལ་བཞིའི་ལས་ཀྱིས་བྱིན་པས་སྤོ་བ་སྤྱད་པ་ཆགས་ཤིང་། སྒྲ་དོན་ཡང་དམན་པའི་སར་སྤོ་བ་དེ་ཡིན། གཉིས་པ་སྤོ་བ་སྤྱད་པ་ནི་གང་ཟག་སྤོ་བ་མནོས་ལ་ཆགས་པ་དེས་ཡུལ་མཚན་ཉིད་གསུམ་ལྡན་གྱི་དགེ་སློང་མཚམས་ནང་ན་གནས་པ་གུད་དུ་མ་བཅད་པ། གནས་བརྟན་དང་བཅས་སོ་སོར་ཐར་པ་དང་བཅས་པར་བསམ་པ་མྱ་ངན་ལས་འདས་པའི་བསམ་པ་བརྟན་པོ་སྔར་བྱས་ཀྱི་ལྟུང་བ་ལ་འགྱོད་པ། གུས་པའི་སྒོ་ནས་ཇི་སྲིད་བླངས་པའི་དུས་དེ་སྲིད་དུ་སྤོ་བ་སྤྱོད་པར་འདོད་པས་ཁྱད་པར་ཅན་གྱི་སྤྱོད་པ་ལྔ་དང་། གྲོགས་ཚངས་པ་མཚུངས་པར་སྤྱོད་པ་དང་མཉམ་པའི་སྤྱོད་པ་སྤངས་ཏེ། དམན་པའི་སྤྱོད་པ་ལྔ་དང་དུ་བླངས་ཏེ་ཇི་སྲིད་བླངས་པའི་དུས་དེ་སྲིད་དུ་འདུས་པའི་དགེ་འདུན་ལ་འདས་པ་དང་འབྱུང་བར་འགྱུར་བ་བརྗོད་ཅིང་གནས་པས་མགུ་བ་སྤྱོད་པའི་རྟེན་དུ་རུང་བ་གཅིག་ཡིན། ཁྱད་པར་ཅན་གྱི་སྤྱོད་པ་ལྔ་ནི་ཕྱག་ལ་སོགས་པ་བསྙེན་བཀུར་བདག་གིར་བྱེད་པ་སྤོང་། ཆོས་དང་ཟང་ཟིང་གི་ལོངས་སྤྱོད་སྟབས་གཅིག་ཏུ་བྱེད་པ་ལ་སོགས་མཉམ་པའི་སྤྱོད་པ་སྤོང་། མཁན་སློབ་བྱེད་པ་ལ་སོགས་པ་དགེ་སྦྱོང་བླ་མའི་གནས་ལྟ་བུ་སྤོང་། དགེ་སྦྱོང་ཉམས་པ་ལ་ལྟུང་བ་གླེང་བ་ལ་སོགས་པ་ནན་ཏུར་གྱི་ལས་བྱེད་པ་སྤོང་། ཁྱོད་ནི་ཕྱིར་མི་འཆོས་པ་ཡིན་ནོ་ཞེས་མཐོ་བའམ་ང་རྒྱལ་གྱི་བསམ་པ་སྤོང་བ་ཡིན་ནོ། །མཉམ་པའི་སྤྱོད་པ་ནི་རང་བཞིན་དུ་གནས་པ་དང་ལྷན་ཅིག་གཡོགས་མ་གཅིག་ཏུ་ཉལ་བ་སྤོང་བ་དང་། སྤོ་མགུ་སྤྱོད་པ་དང་ལྷན་ཅིག་ཉལ་བ་སྤོང་བ་དང་། ཚངས་པ་མཚུངས་པར་སྤྱོད་པ་རྣམས་དང་གོམ་པ་མཉམ་དུ་འདོར་བ་དང་། འཇིང་སྒྲིལ་བ་སོགས་སྤོང་བའོ། །དམན་པའི་སྤྱོད་པ་ལྔ་དྭང་དུ་བླང་བ་ནི་གཙུག་ལག་ཁང་གི་སྒོ་དབྱེ་བ་ལ་སོགས་པ་ནངས་པར་གྱི་དུས་སུ་ཇི་ལྟར་སྒྲུབ་པ་དང་། གཎྜི་བརྡུང་བ་ལ་སོགས་པ་ཆོས་སྟོན་གྱི་དུས་སུ་ཇི་ལྟར་བསྒྲུབ་པ་དང་། དགེ་འདུན་གྱི་གདན་ཆ་བཤམ་པ་ལ་སོགས་པ་འདུ་བའི་དུས་སུ་ཇི་ལྟར་བསྒྲུབ་པ་དང་། མར་མེ་བཤམ་པ་ལ་སོགས་པ་དགོང་མོའི་དུས་སུ་ཇི་ལྟར་བསྒྲུབ་པ་དང་། དགེ་སློང་རྣམས་ཀྱི་འོག་དགེ་ཚུལ་རྣམས་ཀྱི་གོང་དུ་བསྡད་ནས་རྙེད་པའི་ཐ་མ་ལེན་པ་ལ་སོགས་པ་དུས་ཐམས་ཅད་དུ་ཇི་ལྟར་བསྒྲུབ་པའོ། །ལྷག་མ་དངོས་གཞི་ཕྱིར་བཅོས་པའི་ཐབས་མགུ་བ་ལའང་སྦྱིན་པ་དང་། སྤྱད་པ་གཉིས་ཡིན། སྦྱིན་པ་ནི་དམན་པའི་གང་ཟག་སྤོ་བ་སྤྱད་ཟིན་དེའམ། འཆབ་པ་དང་མི་ལྡན་པའི་ལྷག་མ་བྱུང་བ་མགུ་བ་ནོད་པའི་དོན་དུ་གསོ་བ་ལན་གསུམ་འདེབས་ལ། མཚན་ཉིད་གསུམ་ལྡན་གྱི་དགེ་འདུན་གྱིས་ཞག་དྲུག་གི་བར་དུ་གསོལ་བཞིའི་ལས་ཀྱི་མགུ་བ་སྦྱིན་པ་བཅུ་གཉིས་གང་འོས་བྱིན་པས་དགེ་འདུན་ཡིད་མགུ་བར་བྱེད་པ་སྟེ། མགུ་བ་ཆགས་པའི་ཐབས་ཤིག་ཡིན། གཉིས་པ་མགུ་བ་སྤྱད་པ་ནི། སྤོ་སྤྱོད་ཀྱི་སྐབས་བཞིན་བསླབས་པས་དབྱུང་བའི་རྟེན་དུ་རུང་བ་ཞིག་ཡིན། སྤོ་སྤྱོད་མགུ་སྤྱོད་ཀྱི་ཚུལ་དེ་དག་ནི་ས་གཞན་ན་གནས་པའི་གཞི་ལས་བསྟན་ནོ། །དབྱུང་བ་སྦྱིན་པ་ནི་མགུ་བ་སྤྱད་པའི་གང་ཟག་དབྱུང་པའི་དོན་དུ་གསོལ་བ་ལན་གསུམ་འདེབས་པ་དེ་ལ། རྩྭ་བཀྲམ་པའི་སྟེང་དུ་ཁ་བུབ་ཏུ་བསྙལ་བ་ལ་གྲངས་ཉི་ཤུའམ། མཐའ་འཁོབ་ཏུ་བཅུར་ཚང་བས་ཁྱད་པར་དུ་བྱས་པའི་མཚན་ཉིད་གསུམ་ལྡན་གྱི་དགེ་འདུན་གྱིས་ཡུལ་དེ་ལ་ཁྱོད་ཀྱིས་ལྟུང་བ་འདི་སྤྱད་པས་ཁྱོད་ཀྱི་འགྲོ་བ་ནི་གཉིས་ཏེ། དམྱལ་བ་དང་། བྱོལ་སོང་གི་སྐྱེ་གནས་སོ་ཞེས་པ་སྔོན་དུ་བཏང་ནས་གསོལ་བཞིའི་ལས་ཀྱིས་ཡུལ་དབུས་སུ་དབྱུང་བ་སྦྱིན་པ་བཅུ་གཉིས་པོ་སྐབས་དང་སྦྱར་ཏེ་གང་ཡིན་བྱ། བརྗོད་པའི་ལས་ཚར་བ་དང་། ཡུལ་དེ་བསླང་སྟེ། ཁྱེད་ཀྱིས་ལྟུང་བ་འདི་བཤགས་པས་ཁྱེད་ཀྱི་འགྲོ་བ་ནི་གཉིས་ཏེ། ལྷ་དང་མིའོ་ཞེས་དང་། གང་ཟག་དམ་པ་ནི་གཉིས་ཏེ། ལྟུང་བ་མ་བྱུང་བ་དང་། བྱུང་བ་ཕྱིར་འཆོས་པའོ་ཞེས་པ་ལ་སོགས་ཀྱིས་གཟེངས་བསྟོད་ལ། སྤོ་སྤྱོད་མགུ་སྤྱོད་གཉིས་ཀ་ཡང་དམན་པའི་ས་ན་གནས་པ་ཡིན་པ་ལ་དེ་ནས་དབྱུང་བས་ན་སྒྲ་དོན་ཡང་དབྱུང་བའོ། །ལྷག་མའི་སྦོམ་པོ་ལྕི་བའི་ཕྱིར་འཆོས་ཀྱི་སྦྱོར་བ་ནི། ལྟུང་བ་མིང་རིགས་མི་མཐུན་པས་ཁྱད་པར་དུ་བྱས་པའི་དགེ་སློང་ལྔའི་མདུན་དུ་ཕྱག་འཚལ་ཙོག་པུར་འདུག་སྟེ། དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་དགེ་འདུན་ལྷག་མའི་སྡེ་ཚན་ལས་ཁུ་བ་འབྱིན་པའི་ལྷག་མའི་དངོས་གཞིའི་སྦོམ་པོ་ལྕི་བ་བྱུང་སྟེ་བདག་དགེ་སློང་མིང་འདི་ཞེས་བགྱི་བའི་སྦོམ་པོ་དེ་དགེ་འདུན་གྱི་མདུན་དུ་མཐོལ་ལོ། །མི་འཆབ་བོ། །བཤགས་སོ། །མཐོལ་ཞི་བཤགས་ན་བདག་བདེ་བ་ལ་རེག་པར་གནས་པར་གྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ་ཞེས་ལན་གསུམ་མོ། །ལྷག་མའི་སྦོམ་པོ་ཡང་བ་ནི། ཡུལ་ལྟུང་བ་མིང་རིགས་མི་མཐུན་པས་ཁྱད་པར་དུ་བྱས་པའི་དགེ་སློང་རྣམ་དག་གཅིག་གི་མདུན་དུ་འདུག་ལ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་དགེ་འདུན་ལྷག་མའི་སྡེ་ཚན་ལས། ཁུ་བ་འབྱིན་པའི་ལྷག་མའི་དངོས་གཞིའི་སྦོམ་པོ་ཡང་བ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་སྦོམ་པོ་དེ་བཙུན་པའི་སྤྱན་སྔར་ཞེས་སྔར་བཞིན་ཆོ་ག་ལན་གསུམ་མཐོང་སྡོམ་དང་བཅས་པས་འདག་གོ །འཆབ་པའི་ཉེས་པའི་མཐོལ་ཚུལ་ཙམ་སྔར་བསྟན་མོད་ཀྱི་རྣམ་གྲངས་བརྗོད་ཚུལ་ཙམ་བྱས་ན་ལྟུང་བ་གཅིག་ཞག་གཅིག་བཅབ་པ་ལྟ་བུ་ཡིན་ན་ཡུལ་དགེ་སློང་རྣམ་དག་ལ་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་ཕུལ་ཏེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་དགེ་འདུན་ལྷག་མའི་སྡེ་ཚན་ལས་བསམ་བཞིན་དུ་ཁུ་བ་ཕྱུང་བའི་དགེ་འདུན་ལྷག་མ་གཅིག་དགུང་གཅིག་བཅབ་པ་འཆབ་པའི་ཉེས་པ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ལྟུང་བ་དེ་བཙུན་པའི་སྤྱན་སྔར་མཐོལ་ལོ། །མི་འཆབ་བོ། །མཐོལ་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་ན་དེ་ལྟར་མི་འགྱུར་བ་ལགས་སོ་ཞེས་ལན་གསུམ། ལྟུང་བ་ཞག་གཉིས་བཅབ་པ་ལའང་དེས་མཚོན། ལྟུང་བ་ཞག་གསུམ་ཡན་ཆད་ནས་བརྒྱ་སྟོང་འབུམ་ལ་སོགས་པ་བཅབ་པ་མཐོལ་བའི་སྦྱོར་ཆོག་སྔར་བཞིན། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་བསམ་བཞིན་དུ་ཁུ་བ་ཕྱུང་བའི་ལྷག་མའི་ལྟུང་བ་ཚད་ཤིན་ཏུ་མང་པོ་དང་ལྡན་པ་དགུང་ཚད་ཤིན་ཏུ་མང་པོ་བཅབ་པའི་འཆབ་པའི་ཉེས་པ་ཚད་ཤིན་ཏུ་མང་པོ་བྱུང་སྟེ་ཞེས་སྔར་བཞིན་བརྗོད། གྲངས་གཏན་ནས་མི་ཤེས་པ་མཐོལ་བའི་སྦྱོར་བ་སྔར་དང་འདྲ། དངོས་གཞི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་བསམ་བཞིན་དུ་ཁུ་བ་ཕྱུང་བའི་ལྟུང་བ་དཔག་ཏུ་མ་མཆིས་པ། དགུང་དཔག་དུ་མ་མཆིས་པ་བཅབ་པའི་ཉེས་པ་དཔག་ཏུ་མ་མཆིས་པ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ཞེས་སྔར་བཞིན་མཐོལ། མཇུག་ཐབས་ཡིན་ནོ་ལེགས་སོ་དང་བཅས་པ་བྱ། དེ་དག་གིས་ནི་ལྟུང་བ་གཞན་རྣམས་ཀྱི་བཅབ་པ་བརྗོད་ཚུལ་ལའང་མཚོན་ཏེ་ཤེས་པར་བྱ་ཞིང་། ལྟུང་བ་དང་ཞག་གི་གྲངས་མི་མཉམ་པ་ལའང་བརྗོད་ཚུལ་རྣམས་ཤེས་པར་བྱའོ། །གསུམ་པ་སྤང་ལྟུང་དངོས་གཞི་ཆ་ཤས་དང་བཅས་པ་ཕྱིར་འཆོས་པའི་ཆོ་ག་ལ་གཉིས་ཏེ། སྤང་བའི་ལྟུང་བྱེད་དངོས་གཞི་ཕྱིར་བཅོས་པ་དང་། ལྟུང་བྱེད་འབའ་ཞིག་པའི་དངོས་གཞི་ཕྱིར་བཅོས་པའོ། །དང་པོ་ནི་ཞག་བཅུ་པའི་སྤང་ལྟུང་ལྟ་བུ་ལ་མཚོན་ན། སྤང་བའི་ལྟུང་བ་བྱུང་བའི་གོས་དེ་གནས་ཁང་ཐ་དད་པའི་དགེ་སློང་གཞན་གཅིག་ལ་དོ་ནུབ་ལྟ་བུ་སྤང་ལ། སང་ལྟ་བུ་ཡུལ་དགེ་སློང་རྒན་ན་ཕྱག་བྱ། གཞོན་ན་ཐུགས་གཏད་པར་ཞུ་བ་དབུལ། སྤྱོད་ལམ་ཙོག་པུར་འདུག་སྟེ། དངོས་གཞི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་སྤང་བ་ལྟུང་བྱེད་ཀྱི་སྡེ་ཚན་ལས་ཞག་བཅུ་འཆང་བའི་ལྟུང་བ་གཅིག་བྱུང་སྟེ། ལྟུང་བ་དེ་བཙུན་པའི་མདུན་དུ་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ་ཞེས་ལན་གསུམ། མཇུག་མཐོང་སྡོམ་ཐབས་ཡིན་ནོ་ལེགས་སོ་དང་བཅས་པ་བྱ། དེས་སྤང་ལྟུང་གཞན་གྱི་ཕྱིར་བཅོས་ཀྱང་མཚོན། གཉིས་པ་ལྟུང་བྱེད་འབའ་ཞིག་པའི་ཕྱིར་བཅོས་ནི་ཞག་གཅིག་སྤངས་པའི་ཆད་པ་མི་དགོས་ཀྱང་ཁབ་རལ་བཅག་པ་དང་། ཁྲི་རྐང་བཅད་པ་དང་། ཤིང་བལ་བསྡུས་པ་ལ་སོགས་ཀྱི་ཆད་པ་སྔོན་དུ་གཏོང་དགོས་པ་ནི་ཡོད་དོ། །ཤེས་བཞིན་དུ་བརྫུན་དུ་སྨྲ་བ་ལྟ་བུའི་ཕྱིར་བཅོས་ཀྱི་སྦྱོར་རྗེས་སྔར་དང་འདྲ། དངོས་གཞི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ལྟུང་བྱེད་ཀྱི་སྡེ་ཚན་ལས་ཤེས་བཞིན་དུ་བརྫུན་དུ་སྨྲ་བའི་ལྟུང་བྱེད་བྱུང་སྟེ། བདག་དགེ་སློང་མི་འདི་ཞེས་བགྱི་བའི་ལྟུང་བ་དེ་བཙུན་པའི་སྤྱན་སྔར་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་རོ་ཞེས་ལན་གསུམ། མཐོང་སྡོམ་ཐབས་ལེགས་དང་བཅས་པར་བྱ། ལྟུང་བྱེད་གཞན་རྣམས་ལའང་དེས་མཚོན་ཏེ་ཤེས་པར་བྱའོ། །བཞི་པ་མཐོལ་བ་ལ་བཤགས་པའི་མིང་གིས་བཏགས་པ་སོ་སོར་བཤགས་པའི་དངོས་གཞི་ཆ་ཤས་དང་བཅས་པ་ཕྱིར་བཅོས་པའི་ཆོ་ག་ནི་མཐོལ་བའི་ཡུལ་གནས་ཁང་དེར་འདུས་པའི་དགེ་འདུན་ཐམས་ཅད་ལ་ཕྱག་འཚལ་བ་སྔོན་དུ་བཏང་སྟེ། དགེ་འདུན་བཙུན་པ་རྣམས་ཞེས་པའམ་ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་སོ་སོར་བཤགས་པའི་སྡེ་ཚན་ལས་སྨད་པའི་གནས་མི་རིགས་པ་དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་བྱུང་གིས་ཆོས་དེ་ཚེ་དང་ལྡན་པའི་སྤྱན་སྔར་སོ་སོར་བཤགས་སོ་ཞེས་ལན་གཅིག་བརྗོད། སོར་བཤགས་གཞན་ལའང་དེས་མཚོན། ལྔ་པ་བསླབ་བྱ་ཉེས་བྱས་ཕྱིར་བཅོས་པའི་ཆོ་ག་ནི། སྦྱོར་རྗེས་སྔར་བཞིན་དངོས་གཞི་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་བསླབ་བྱ་ཉེས་བྱས་ཀྱི་སྡེ་ཚན་ལས་ཤམ་ཐབས་ཟླུམ་པོར་མ་བགོས་པའི་ཉེས་བྱས་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ལྟུང་བ་དེ་བཙུན་པའི་སྤྱན་སྔར་མཐོལ་ལོ། །མི་འཆབ་བོ། །གཤགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་རོ་ཞེས་ལན་གསུམ། མཐོང་སྡོམ་ཐབས་ལེགས་དང་བཅས་པ་བྱ། བསླབ་བྱའི་ཉེས་བྱས་གཞན་ལའང་དེས་མཚོན་ཏེ་ཤེས་པར་བྱའོ། །ལྷག་མ་མན་ཆད་ཀྱི་སེམས་བསྐྱེད་པ་སྦྱོར་བའི་སྦྱོར་བ། སྦྱོར་བའི་ཁ་ན་མ་ཐོ་བ་བསླབ་བྱའི་ཉེས་བྱས་དང་བཅས་པ་ཕྱིར་བཅོས་པའི་ཐབས་ནི་ཕམ་པ་དང་པོའི་སྐབས་སུ་བསྟན་པས་མཚོན་ཏེ་ཤེས་པར་བྱའོ། །དྲུག་པ་གཞི་སྟོད་སྨད་ཀྱི་སྦོམ་པོ་དང་ཉེས་བྱས་ཕྱིར་བཅོས་པའི་ཆོ་ག་ནི་སྦྱོར་རྗེས་སྔར་བཞིན། དངོས་གཞི་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་གཞིས་བསྡུས་པའི་སྡེ་ཚན་ལས། གཞན་གྱི་འཁོར་ཆད་པས་བཅད་པ་ལེན་པའི་ཉེས་པ་སྦོམ་པོ་བྱུང་སྟེ་ཞེས་པའམ་གནས་ལ་མ་བརྟེན་པའི་ཉེས་བྱས། སྣམ་སྦྱར་དང་མི་ལྡན་པའི་ཉེས་བྱས། གསོ་སྦྱོང་དང་དགག་དབྱེ་མ་བྱས་པའི་ཉེས་བྱས་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ལྟུང་བ་དེ་བཙུན་པའི་སྤྱན་སྔར་མཐོལ་ལོ། །མི་འཆབ་བོ། །བཤགས་སོ། །མཐོལ་ཞིང་བཤགས་ན་ནི་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་བ་ལགས་སོ། །ཞེས་ལན་གསུམ་མཐོང་སྡོམ་ཐབས་ལེགས་དང་བཅས་པ་བྱ། གཞི་སྟོད་སྨད་ཀྱི་སྦོམ་པོ་དང་ཉེས་བྱས་གཞན་དག་ཕྱིར་བཅོས་པ་ཡང་དེས་མཚོན་ཏེ་ཤེས་པར་བྱའོ། །བདུན་པ་གང་ཟག་ཁྱད་པར་ཅན་ལྔའི་ལྷག་མའི་དངོས་གཞི་ཕྱིར་བཅོས་པའི་ཆོ་ག་ནི། ངོ་ཚ་དང་ལྡན་པ་དང་། འདུལ་བ་དང་། མདོ་སྡེ་དང་། མ་མོ་འཛིན་པ་དང་། ཤེས་པས་ནི་གཅིག་གི་མདུན་དུ་བཤགས་པས་དགེ་འདུན་ལྷག་མ་ལས་འདག་གོ་ཞེས་པ་མདོ་རྩ་བ་ནས་བཤད་པས། སྤོ་སྤྱོད། མགུ་སྤྱོད་ཀྱི་སྤྱད་པ་ལ་མི་ལྟོས། མིང་རིགས་ཀྱི་ཕྱིར་བཅོས་བྱེད་ཐབས་ནི་སྦྱོར་བ་ལྟུང་བ་མིང་རིགས་མི་མཐུན་པས་ཁྱད་པར་དུ་བྱས་པའི་དགེ་སློང་གཅིག་གི་མདུན་དུ་སྦྱོར་བ་རྒན་ན་ཕྱག་བྱ་བ་སོགས་འདྲ། དངོས་གཞི་སྔར་གྱི་མཐོལ་བཤགས་དུས་གཅིག་པའི་ཆོ་ག་ལ་དགེ་འདུན་ལྷག་མ་གང་ཡིན་པ་དེའི་མིང་རིགས་སྦྱར་བའོ། །དེ་དག་གིས་ནི་ཕྱིར་བཅོས་པ་དངོས་བསྟན་ཟིན་ཏོ།། །།གཉིས་པ་དེའི་ཆ་རྐྱེན་ལ་དུས་དང་དུས་མ་ཡིན་པ་བསྡུས་པ་འབྱུང་བའི་གཞི་དང་། ས་གཞན་ན་གནས་པའི་སྤྱོད་པའི་གཞི་གཉིས་ལས། དང་པོ་ནི། དགེ་འདུན་ལྷག་མའི་ལྟུང་བ་ལས་དབྱུང་བ་ལ་མགུ་བ་དགོས་ལ། མགུ་བ་ལ་འཆབ་པའི་ཉེས་བྱས་མེད་པ་དགོས་པ་དང་། ཕམ་པ་འཆབ་སེམས་མ་སྐྱེས་ན་མཐའ་ལས་ལྡང་ཞེས་དང་། ལྟུང་བ་གཞན་ཡང་འཆབ་པ་དངོས་ལ་བཤགས་པ་དགོས་པས་འཆབ་པ་འབྱུང་བའི་དུས་དང་དུས་མ་ཡིན་པ་བསྡུས་པ་འབྱུང་བའི་གཞི་འབྱུང་སྟེ། འདི་ལ་ལུང་ལས་གང་ཟག་གི་གཞི་ཞེས་འབྱུང་ངོ་། །དེ་ཡང་དགེ་འདུན་ལྷག་མ་རྣམས་མི་ཤེས་པ་ཉིད་དང་བྱས་སམ་མ་བྱས་ཅི་ཞིག་ཇི་ལྟ་བུ་ཞིག་ཅེས་དྲན་པར་མི་ནུས་པ་ལ་འཆབ་པ་མི་འབྱུང་སྟེ། དཔེར་ན་ས་ལ་བྱེ་མར་ཤེས་པ་ལ་ཀུན་སློང་གི་བསམ་པ་མེད་པ་བཞིན་ནོ། །བསྙེན་པར་མ་རྫོགས་པ་ལ་ནི་སྤོ་བ་སྤྱོད་དགོས་ཀྱི་འཆབ་པ་མི་འབྱུང་སྟེ་ལྷག་མ་མེད་པའི་ཕྱིར་རོ། །བསྡམ་བྱ་ནི་འབྱུང་ངོ་། །གནས་ནས་ཕྱུང་བ་ལ་ནི་འཆབ་པ་མི་འབྱུང་སྟེ། མཐོལ་བའི་ཡུལ་མེད་པའི་ཕྱིར་རོ། །ཐ་སྙད་དུ་རུང་བའི་འདུ་ཤེས་ཉམས་པ་སོགས་མདོ་གཉིས་ནི་རྣམ་འབྱེད་ཀྱི་བརྗོད་བྱ་ཡིན་ཡང་ཚིག་ཚོགས་ཆུང་བའི་ཕྱིར་འདིར་མ་སྨོས་སོ། །ཅི་ལྟ་བུ་ཞིག་ཅེས་པ་ནི་ཉོན་མོངས་པས་ཀུན་ནས་བསླང་ངམ་མ་བསླང་སྙམ་དུ་རྒྱུད་ལ་ཡིད་གཉིས་ཟ་བ་ཡིན་ལ། དགེ་འདུན་ལྷག་མ་ལ་ཡིད་གཉིས་ཟ་བ་ནི་རང་གི་ངོ་བོ་ལ་ཡིད་གཉིས་ཟ་བ་ཡིན་པས་འཆབ་པའི་ཉེས་པ་འབྱུང་ངོ་། །དེ་ལྟར་འཆབ་པ་མི་འབྱུང་བའི་དུས་དངོས་སུ་སྨོས་པས་འབྱུང་བའི་དུས་ཤུགས་ལ་རྟོགས་པ་ནི་དུས་དང་དུས་མ་ཡིན་པ་བསྡུས་པའོ། །གཉིས་པ་ས་གཞན་ན་གནས་པའི་སྤྱོད་པའི་གཞི་ལ་གཉིས་ཏེ། སྤོ་སྤྱོད་གསུམ་དང་། མགུ་སྤྱོད་གསུམ་སྟེ་དྲུག་དང་། སྤོ་ལྡན་གསུམ། མགུ་ལྡན་གསུམ་སྟེ་དྲུག བསླབ་པ་བྱིན་པ་དང་། ངོ་བོ་ཉིད་ཚོལ་བ་གཉིས་དང་། བསྡིག་པ་ལ་སོགས་པ་བཞི་དང་། གནས་ནས་ཕྱུང་བ་བདུན་དང་ཉི་ཤུ་རྩ་ལྔའོ། །བསྡུ་ན་གསུམ་སྟེ། སྤང་བའི་ས་གཞན་ན་གནས་པ་ནི་གནས་ནས་ཕྱུང་བ་བདུན་ཏེ། ཆོས་དང་ཟང་ཟིང་གིས་སྤངས་པའི་ཕྱིར་རོ། །སྨད་པའི་ས་གཞན་ན་གནས་པའི་གཞི་བསྡིག་པ་ལ་སོགས་པ་བཞིའོ། །རྣམ་པར་དག་པའི་ས་གཞན་ན་གནས་པ་ནི་སྤོ་སྤྱོད་མགུ་སྤྱོད་དྲུག་དང་། སྤོ་ལྡན་མགུ་ལྡན་དྲུག བསླབ་པ་བྱིན་པ། ངོ་བོ་ཉིད་ཚོལ་བ་སྟེ་བཅུ་བཞིའོ། །ཡང་ན་བསྡུ་བ་ནི་གཉིས་ཏེ། ས་གཞན་ན་གནས་པ་ཆེན་པོ་པ་དང་། ཆུང་ངུ་པའོ། །ཆུང་ངུ་པ་ནི་བཅུ་བདུན་ཏེ། གནས་ནས་ཕྱུང་བ་བདུན་དང་། བསྡིག་པ་ལ་སོགས་པ་བཞི་དང་། སྤོ་ལྡན་མགུ་ལྡན་དྲུག་སྟེ་དེ་རྣམས་ནི་ཆུང་ངུ་པའོ། །ཆེན་པོ་པ་ནི་བརྒྱད་དེ། སྤོ་སྤྱོད་མགུ་སྤྱོད་དྲུག་དང་། བསླབ་པ་བྱིན་པ་དང་། ངོ་བོ་ཉིད་ཚོལ་བ་སྟེ་བརྒྱད་དོ། །ཆུང་ངུ་པ་བཅུ་བདུན་གྱིས་ནི་ཁྱད་པར་ཅན་གྱི་སྤྱོད་པ་སྤངས་པས་ཆོག་ལ་དམན་པའི་སྤྱོད་པ་དྭང་དུ་བླང་མི་དགོས་སོ། །ཁྱད་པར་ཅན་གྱི་སྤྱོད་པ་ལྔ་ནི་བླ་མའི་གནས་ལྟ་བུ་དང་། མཉམ་པའི་སྤྱོད་པ་དང་། རང་བཞིན་དུ་གནས་པ་ལ་ནན་ཏུར་གྱི་ལས་དང་། ང་རྒྱལ་དང་རྒྱགས་པ་དང་། ཆད་པ་དེའི་རྒྱུ་སྤང་བའོ། །དེ་ལ་བླ་མའི་གནས་ལྟ་བུའི་སྤྱོད་པ་སྤང་བ་ནི་རབ་ཏུ་བྱུང་བའི་གཞི་ནས་མདོ་འདོན་པར་མི་བྱ་བའི་བར་རོ། །གསོལ་བ་དང་བརྗོད་པ་ཁས་མི་བླང་བ་ནི་ཁ་བསྐང་ལ་བཤད་དོ། །མཉམ་པའི་སྤྱོད་པ་སྤང་བ་ནི་ཕྱག་དང་ལྡང་བ་ལ་སོགས་པ་བདག་གིར་མི་བྱ་བ་ལ་སོགས་པའོ། །ནན་ཏུར་གྱིས་ལས་སྤང་བ་ནི་དགེ་སློང་ལ་ཉམས་པས་གླེང་བར་མི་བྱ་བ་ལ་སོགས་པའོ། །དེ་རྣམས་ཆུང་ངུ་པ་བཅུ་བདུན་གྱིས་ཀྱང་སྤང་དགོས་ལ། ཆེན་པོ་པས་ནི་དེ་རྣམས་ཀྱི་ཐོག་ཏུ་ནངས་པར་སྔ་བར་ལངས་ཏེ་སྒོ་དབྱེ་བ་ལ་སོགས་པ་ལྔའོ། །དེ་རྣམས་ལ་ནན་ཏུར་གྱིས་ཁྱབ་བམ་མ་ཁྱབ་པ་ནི་ས་གཞན་ན་གནས་པ་ཡང་ཡིན་ལ་ནན་ཏུར་ཡང་ཡིན་པ་ནི་གནས་ནས་ཕྱུང་བ་བདུན་དང་། བསྡིགས་པ་ལ་སོགས་པ་བཞི་སྟེ་བཅུ་གཅིག་སྟེ་རང་མི་དགའ་བཞིན་བྱེད་པས་སོ། །ནན་ཏུར་ཡིན་ལ་ས་གཞན་ན་གནས་པ་མ་ཡིན་པ་ནི་གསོ་སྦྱོང་བཞག་པ་དང་དགག་དབྱེ་བཞག་པའོ། །ས་གཞན་ན་གནས་པ་ཡིན་ལ་ནན་ཏུར་མ་ཡིན་པ་ནི་སྤོ་སྤྱོད་མགུ་སྤྱོད་དྲུག སྤོ་ལྡན་མགུ་ལྡན་དྲུག བསླབ་པ་བྱིན་པ་དང་ངོ་བོ་ཉིད་ཚོལ་བ་སྟེ་བཅུ་བཞི་སྟེ། དེ་རྣམས་ནི་རང་དགའ་བཞིན་དུ་བྱེད་པས་སོ། །དེ་གཉིས་ཀ་མ་ཡིན་པ་ནི་རང་བཞིན་དུ་གནས་པ་ལྟ་བུའོ། །དེ་ལྟར་ན་མུ་བཞི་སྲིད་དོ།། །།གཉིས་པ་མི་མོས་པ་ལ་གླེང་ཞིང་བསྐུལ་བས་ཕྱིར་བཅོས་པ་ནི་ཡོངས་སུ་སྦྱང་བའི་གཞི་ཡིན་ལ་འདི་ལ་བརྒྱད་དེ། དངོས་པོ་གང་གིས་གླེང་བ་དང་། ཡུལ་གང་ལ་དང་། གང་ཟག་གང་གིས་དང་། བསམ་པ་གང་གིས་དང་། དུས་དང་གནས་གང་དུ་དང་། ཆོ་ག་གང་གིས་དང་། དགོས་པ་གང་གི་ཕྱིར་དང་། གླེང་ནས་ཇི་ལྟར་བསྒྲུབ་པའོ། །དང་པོ་ལ་བཞི་སྟེ། ཚུལ་ཁྲིམས་དང་། ཆོ་ག་དང་། འཚོ་བ་དང་། ལྟ་བ་ཉམས་པ་སྟེ། དེ་དག་ཀྱང་གཞི་དང་བཅས་པས་གླེང་བའོ། །ཡུལ་ལ་དྲུག་སྟེ། བསྙེན་པར་རྫོགས་པའི་སྡོམ་པ་དང་ལྡན་པ་དང་། གནས་ནས་མ་ཕྱུང་བ་དང་། ཆོས་གཞན་པའི་ཕྱོགས་སུ་མ་སོང་བ་དང་། ནད་པ་མིན་པ་དང་། རང་བཞིན་དུ་གནས་པ་དང་། ཞེ་འགྲས་པ་མིན་པའོ། །གང་ཟག་གང་གིས་གླེང་བ་ལ་བདུན་ཏེ། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ་དང་། ས་གཞན་ན་གནས་པ་ལ་ཡང་དེ་གནང་ངོ་། །ཆོས་གཞན་པའི་ཕྱོགས་སུ་མ་སོང་བ་དང་། གནས་ནས་ཕྱུང་བ་མ་ཡིན་པ་དང་། ནད་པ་མ་ཡིན་པ་དང་། སྐྱེས་པའི་མཚན་དང་ལྡན་པ་དང་། བྱས་པ་དང་བྱ་བའི་རང་གི་ངོ་བོ་ལེགས་པར་ཤེས་པ་ཡིན་པའོ། །བསམ་པ་གང་གིས་གླེང་བ་ནི་བྱམས་པ་དང་སྙིང་རྗེ་སྔོན་དུ་གཏང་ཞིང་། གནས་དང་དུས་དང་གླེང་བྱ་གླེང་བྱེད་ལ་སོགས་མཚན་ཉིད་དང་ལྡན་མི་ལྡན་སྔོན་དུ་བཏང་བས་གླེང་བའོ། །ཆོ་ག་གང་གིས་གླེང་བ་ནི་གཉིས་ཏེ། གླེང་བྱེད་ཀྱི་དང་། གླེང་བྱའོ། །གླེང་བྱེད་ཀྱི་ལ་གཉིས་སྟེ། ཚེ་དང་ལྡན་པ་ཁོ་བོ་ནི་ཤེས་བཞིན་དུ་སྨྲའི་མི་ཤེས་པས་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་བརྟག་པ་དང་། སྐབས་འབྱེད་དུ་གཞུག་པའོ། །གླེང་བྱ་ལ་གསུམ་སྟེ། གླེང་བྱ་གླེང་བྱེད་དང་། གནས་དང་དུས་སོགས་མཚན་ཉིད་དང་ལྡན་མི་ལྡན་བརྟག་པའོ། །མཚན་ཉིད་དང་ལྡན་ན་དགའ་བ་བསྐྱེད་དེ་སྐབས་དབྱེའོ། །མཚན་ཉིད་དང་མི་ལྡན་ན་སྐབས་མི་དབྱེའོ། །དུས་དང་གནས་ལ་གསུམ་སྟེ། དབྱར་གྱི་ནང་མ་ཡིན་པ་དང་། འབྲེལ་པ་མ་ཡིན་པ་དང་། མང་པོ་ཚོགས་པ་མ་ཡིན་པའོ། །དགོས་པ་ནི་ལྟུང་བ་ལས་ལྡང་བར་བྱེད་པའོ། །གླེང་ནས་ཇི་ལྟར་བསྒྲུབ་པ་ནི་གཉིས་ཏེ། རྣལ་དུ་ཕེབ་ན་ཕྱིར་བཅོས་ཀྱི་གཞིའི་རྒྱུར་འགྲོའོ། །མ་ཕེབ་ན་གཉིས་ཏེ། འབྱེད་པ་དང་། མི་འབྱེད་པའོ། །མི་འབྱེད་པ་ལ་གཉིས་ཏེ། དགེ་འདུན་མཐའ་དག་དང་བསླབ་པའི་གཞི་མཐའ་དག་ལ་སྐབས་མི་འབྱེད་ན་བཀའ་བློ་མི་བདེ་བར་འགྲོའོ། །ཡན་གར་བ་ལ་མི་འབྱེད་ན་སྐབས་ཕྱེས་ཤིག་ཁོ་བོ་ལ་དགེ་འདུན་གྱི་བརྗོད་པའི་ཕྱིར་བསྡོགས་པ་ཡོད་དོ་ཞེས་བརྗོད་པས་སོ། །དེས་མ་ཞི་ན་གདམས་ངག་བཞག་གོ །དེས་མ་ཞི་ན་གསོ་སྦྱོང་བཞག་གོ །དེས་ཀྱང་མ་ཞི་ན་དགག་དབྱེའོ། །དེས་ཀྱང་མ་ཞི་ན་གནས་ནས་དབྱུང་ངོ་། །གསོ་སྦྱོང་དང་དགག་དབྱེ་གཉིས་སུ་ངེས་པ་མེད་དེ། སྔོན་ལ་གསོ་སྦྱོང་ལ་བབ་ན་གསོ་སྦྱོང་འཇོག་ལ། དགག་དབྱེ་ལ་བབ་ན་དགག་དབྱེ་འཇོག་གོ །དབྱར་གྱི་ནང་དུ་ལྟུང་བ་གླེང་དུ་མི་རུང་བས་དགག་དབྱེ་འཇོག་པ་འགལ་ལོ་སྙམ་ན་མི་འགལ་ཏེ། དགག་དབྱེའི་གོང་རོལ་ཟླ་བ་ཕྱེད་ཙམ་ནས་གླེང་དུ་རུང་སྟེ། དབྱར་གྱི་སྦྱོར་བ་ཀློད་དགོས་པས་སོ། །སྐབས་འབྱེད་པ་ལ་གཉིས་ཏེ། མཉན་ན་ཕྱིར་བཅོས་ཀྱི་གཞིར་འགྲོ་ལ་མི་མཉན་པ་ཉིད་དང་སྐབས་མི་འབྱེད་པ་ཉིད་ན་ཕུར་བཅས་སོ། །དེས་ཀྱང་མ་ཞི་ན་གདམས་ངག་འཇོག་གོ །དེས་ཀྱང་མ་ཞི་ན་གསོ་སྦྱོང་ངོ་། །དེས་ཀྱང་མ་ཞི་ན་དགག་དབྱེའོ། །དེས་ཀྱང་མ་ཞི་ན་ཕྱིར་མི་བཅོས་པ་གནས་ནས་དབྱུང་བའོ། །ལྟུང་བ་གླེང་བ་ལས་ལྟུང་བ་ཁས་བླངས་ནས་ཕྱིར་མི་འཆོས་ན་དེའི་གནས་ནས་དབྱུང་བའི་ལས་བྱེད་དོ། །གླེང་བ་ལ་བརྟེན་ནས་གླེང་བྱ་གླེང་བྱེད་མ་མཐུན་ན། གླེང་བྱེད་གཟུ་བོས་ཞལ་ལྕེ་བཅད་ནས་ངོ་བོ་ཉིད་འཚོལ་དུ་མི་འདོད་ན་གནས་ནས་དབྱུང་སྟེ། གནས་ནས་དབྱུང་བ་བྱེད་པའི་སེམས་ཀྱིས་ལས་ལོགས་གཅིག་ཏུ་བྱས་ན་ལས་བྱེ་བར་ཡང་འགྲོའོ། །དེ་བཞིན་དུ་ལྟུང་བ་གླེང་བ་ལ་བརྟེན་ནས་ཁོ་བོ་ཅག་ལྷས་བྱིན་པའི་ལུགས་དེ་ལྟ་བུ་ལ་ལྟུང་བ་མི་འབྱུང་བར་འདོད་ཟེར་ནས་སྙོན་པ་ཐ་དད་དུ་བཟུང་བ་ལ་བརྟེན་ནས་འཁོར་ལོ་བྱེ་བའི་གཞི་དང་། ལྟུང་བ་མ་ཡིན་ཟེར་བ་ལ་བརྟེན་ནས་གཞན་དུ་ཡང་འགྲོའོ། །གཉིས་པ་རྩོད་པ་ཕྱིར་བཅོས་པ་ལ་གསུམ་སྟེ། གནས་ནས་དབྱུང་བ་ལས་འཕྲོས་པ་ལས་བྱེ་བའི་གཞི། ལྟུང་ཕྱིར་རྩོད་པ་ལས་འཕྲོས་པ་འཁོར་ལོ་བྱེ་བའི་གཞི། རྩོད་པ་ཞི་བར་བྱེད་པའི་ཆོས་དངོས་སོ། །དང་པོ་ལ་ལྔ་སྟེ། ལས་བྱེ་བའི་རྒྱུ་དང་། གནས་དང་། གླིང་དང་། གྲངས་དང་། བྱེ་བའི་མཚན་ཉིད་དོ། །དང་པོ་ནི་ཆོས་ལས་ཐ་དད་པའི་དངོས་པོ་ལ་ཞེན་པའོ། །གཉིས་པ་ནི་མཚམས་གཅིག་པར་འབྱུང་གི་ཐ་དད་པ་ནི་མ་ཡིན་ནོ། །གསུམ་པ་ནི་གླིང་གསུམ་དུ་སྟེ། སངས་རྒྱས་བཞུགས་པ་ལ་རག་ལས་པའི་ཕྱིར་རོ། །བཞི་པ་ནི་གང་ཟག་བརྒྱད་ཡན་ཆད་དོ། །ལྔ་པ་ནི་མཚམས་ནང་གཅིག་ཏུ་ལས་ཐ་དད་པར་བྱས་པ་ཙམ་གྱི་བྱེ་བ་ཡིན་ནོ། །བཀྲ་ཤིས་པ་དང་གནོད་པ་དབྱུང་བའི་གསོ་སྦྱོང་གི་ཁྱད་པར་ལ། རྒྱ་ཤེའི་ཞལ་ནས་གནོད་པ་བྱུང་དུ་དོགས་པ་ལ་དང་པོ་བྱ་ལ། བྱུང་ཟིན་པ་ལ་ཕྱི་མ་བྱ་ཞེས་ཟེར་རོ། །ཁྲི་ལྡེའི་ཞལ་ནས་གཉིས་ཀ་ཡང་བྱུང་ཟིན་ལ་བྱ་སྟེ། ཕྱིའི་ཡམས་ལ་སོགས་པ་བྱུང་བ་ལ་བཀྲ་ཤིས་པའི་གསོ་སྦྱོང་དང་། ནང་གི་རིམས་ནད་ལ་སོགས་པ་བྱུང་བ་ལ་གནོད་པ་དབྱུང་བའི་གསོ་སྦྱོང་བྱེད་པ་ཡིན་ཏེ། འགྲེལ་པ་ལས། སྔ་མ་ལ་ཡམས་ལ་སོགས་པ་ཕྱིའི་གནོད་པ་ལ་བཤད་ལ། ཕྱི་མ་ལ་རིམས་ཉིན་གཅིག་པ་ལ་སོགས་པ་ནང་གི་གནོད་པ་ལ་ཞེས་བཤད་པས་སོ་ཞེས་ཟེར་རོ། །བྱའི་ཞལ་ནས། ལུང་ལས་ནི་ཚུལ་ཁྲིམས་དང་ལྟ་བ་ལ་གནོད་པ་བྱུང་ན་བཀྲ་ཤིས་ཀྱི་གསོ་སྦྱོང་བྱ་ལ། ལུས་དང་ལོངས་སྤྱོད་ལ་གནོད་པ་བྱུང་ན་གནོད་པ་དབྱུང་བའི་གསོ་སྦྱོང་བྱ་ཞེས་གསུངས་པས་སོ་ཞེས་བཞེད་དོ། །གཉིས་པ་འཁོར་ལོ་བྱེ་བའི་གཞི་ལ་བཅུ་གཅིག་སྟེ། དབྱེན་ཆགས་པའི་གཞི་དང་། བསམ་པ་དང་། སྦྱོར་བ་དང་། མཐར་ཐུག་དང་། དབྱེན་འབྱུང་བའི་དུས་དང་། གནས་པའི་ཚད་དང་། ཉེས་དམིགས་དང་། ཁ་ན་མ་ཐོ་བ་གང་དུ་གཏོགས་པ་དང་། དབྱེན་དེ་གང་ཟག་གང་ལ་ལྡན་པ་དང་། ཕྱིར་བཅོས་པའི་ཐབས་དང་། འཁོར་ལོ་ཞེས་སྒྲ་འཇུག་པའི་རྒྱུ་མཚན་ཏེ་རྒྱས་པར་གཞན་དུ་ཤེས་པར་བྱའོ། །གསུམ་པ་རྩོད་པ་ཞི་བྱེད་དངོས་ལ་ལྔ་སྟེ། རྩོད་པའི་རྒྱུ། འབྲས་བུ་རྩོད་པའི་དབྱེ་བ། རྩོད་པའི་ངོ་བོ། ཞི་བར་བྱེད་པའི་ཆོས། རྩོད་པའི་བསླབ་བྱའོ། །དང་པོ་ལ་གཉིས་ཏེ། ནང་ན་གནས་པ་དང་། ཕྱི་ན་གནས་པའོ། །དང་པོ་ནི། བདག་ཏུ་འཛིན་པའི་ཕྲ་རྒྱས་ལ་སོགས་པ་སྟེ་སྐབས་འདིའི་བརྗོད་བྱ་མ་ཡིན་ནོ། །གཉིས་པ་ལ་བཞི་སྟེ། དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་དང་། གདམས་ངག་ལ་སོགས་པ་འཇོག་པ་སྤོང་བ་དང་། ལྟུང་བ་དང་བཅས་པ་དང་། ལས་ལ་མཐུན་པ་མི་སྦྱིན་པའོ། །གཉིས་པ་ལ་བཞི་སྟེ། འབྱེད་ཕྱིར་རྩོད་པ་དང་། མི་གདམས་པའི་ཕྱིར་རྩོད་པ་དང་། ལྟུང་ཕྱིར་རྩོད་པ་དང་། བྱ་བའི་ཕྱིར་རྩོད་པའོ། །གསུམ་པ་ནི། འཁྲུག་ལོང་གི་ཕྱིར་སེམས་གཞོལ་བ་སྟེ། འཛིན་ཅིང་སེམས་པའོ། །ཞི་བྱེད་ལ་གཉིས་ཏེ། ནང་ན་གནས་པའི་ཞི་བྱེད་དང་། ཕྱི་རོལ་ན་གནས་པའི་ཞི་བྱེད་དོ། །དང་པོ་ནི་བདག་མེད་བསྒོམ་པ་ལ་སོགས་པས་ཞི་བར་བྱེད་པ་སྟེ་ཞི་གནས་ཀྱི་གསོ་སྦྱོང་ལ་སོགས་པ་སྐབས་གཞན་ནས་སྟོན་ནོ། །གཉིས་པ་ནི། མངོན་སུམ་དྲན་པ་མ་སྨྱོས་དང་། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླངས་པར་ཡང་བྱ་བའོ། །ཞེས་བདུན་དུ་གསུངས་པ་བསྡུ་ན་བཞི་སྟེ། འབྱེད་ཕྱིར་གྱི་རྩོད་པ་ཇི་ལྟར་ཞི་བར་བྱ་བ་དང་། མི་གདམས་པའི་ཕྱིར་གྱི་རྩོད་པ་ཇི་ལྟར་ཞི་བར་བྱ་བ་དང་། ལྟུང་ཕྱིར་གྱི་རྩོད་པ་ཇི་ལྟར་ཞི་བར་བྱ་བ་དང་། བྱ་ཕྱིར་གྱི་རྩོད་པ་ཇི་ལྟར་ཞི་བར་བྱ་བའོ། །དང་པོ་ལ་གཉིས་ཏེ། མངོན་སུམ་བརྒྱད་ཀྱིས་ཞི་བར་བྱ་བ་དང་། ཚུལ་ཤིང་གང་མང་གིས་ཞི་བར་བྱ་བའོ། །དང་པོ་ལ་རྒོལ་ཕྱིར་རྒོལ་གྱི་མངོན་སུམ་དང་། གཟུ་བོའི་དང་། དགེ་འདུན་གཞི་པོའི་དང་། གསལ་བའི་དང་། ཡང་གསལ་གྱི་དང་། གནས་བརྟན་དང་སོ་སོར་ཐར་པ་དང་བཅས་པའི་དང་། སྡེ་སྣོད་འཛིན་པའི་དང་། གནས་བརྟན་མཐུ་དང་ལྡན་པའི་མངོན་སུམ་མོ། །དེས་མ་ཞི་ན་གང་མང་ངོ་། །གང་མང་ལ་སྤྱི་དོན་དྲུག་སྟེ། གཞི་གང་ལ་བྱ་བ་དང་། དུས་ནམ་གྱི་ཚེ་དང་། དགེ་འདུན་གང་གིས་དང་། བྱེད་པ་པོ་དང་། ཆོ་ག་དང་། དགོས་པའོ། །གཞི་ལ་གསུམ་སྟེ། ཆོས་རྣམ་པར་གཏན་ལ་དབབ་པ་དང་། རྒོལ་ཕྱིར་རྒོལ་གྱིས་གཅེས་པར་བཟུང་བ་དང་། བསྡམ་པར་བྱ་བ་མ་ཡིན་པའི་དོན་ཏོ། །དུས་ལ་གཉིས་ཏེ། མངོན་སུམ་གྱིས་མཐར་ཐུག་པ་དང་། དགེ་འདུན་བྱེ་བར་དོགས་པའི་དགག་བྱ་ཡོད་པས་སོ། །དགེ་འདུན་མཚན་ཉིད་དང་ལྡན་པས་སོ། །བྱེད་པ་པོ་བསྐོས་པས་སོ། །ཆོ་ག་སྦྱོར་བ་དང་། དངོས་གཞིའི་འོ། །སྦྱོར་བ་ལ་བཞི་སྟེ། གང་ཟག་བསྐོ་བ་དང་། དེས་ཚུལ་ཤིང་སྟ་གོན་བྱ་བ་དང་། འདུ་བའི་སྐབས་བསྒྲུབ་པ་དང་། ཚོགས་ལ་བརྗོད་པའོ། །དངོས་གཞི་ལ་གཉིས་ཏེ། འགྲིམ་པའི་དང་། ལེན་པའི་འོ། འགྲིམ་པའི་ལ་བཞི་སྟེ། ཆོས་མ་ཡིན་པའི་ལེན་པ་མང་ན་མི་བྲིམས་པ་དང་། ཆོས་ཀྱི་ཚུལ་ཤིང་གཡོགས་པའམ་ཕྱེ་བ་གང་གིས་ལེན་པ་མང་བར་འགྱུར་བ་དེ་ལྟར་བྲིམས་པ་དང་། གསར་བུས་ཆོས་མ་ཡིན་པའི་ལེན་ན་རྣ་དྲུང་དུ་བཤུབ་པ་དང་། ཆོས་མ་ཡིན་པའི་ལེན་ན་ཚིག་གཉིས་པ་ལ་མི་སྦྱིན་ཞིང་གསུམ་པ་ལ་སྦྱིན་པའོ། །ལེན་པའི་ལ་བཞི་སྟེ། སྡེ་སྣོད་འཛིན་པ་ལ་མ་དྲིས་པར་མི་བླང་བ་དང་། ཆོས་མ་ཡིན་པའི་མི་བླང་བ་དང་། དབྱེན་དུ་འགྱུར་བའི་བཟོད་པས་མི་བླང་བ་དང་། མཉམ་ན་ཉན་ཐོས་ཆེན་པོའི་བླང་བའོ། །དགོས་པ་དགེ་འདུན་མཐུན་པ་དང་། ཁ་ན་མ་ཐོ་བ་མེད་པའོ། །གང་མང་ནི་འབྱེད་པའི་ཕྱིར་རྩོད་པ་ལ་འོང་ལ་གཞན་ལ་མི་བཏུབ་བོ། །གཞན་ཞི་བྱེད་ཐམས་ཅད་འཁྲུལ་མར་འོང་ངོ་། །དེས་མ་ཞི་ན་རྣམ་པར་གཏན་ལ་འབེབས་པས་ཉེ་བར་མ་ཞི་བ་ཆོས་མ་ཡིན་པར་སྨྲ་བ་གནས་ནས་འབྱིན་ནོ། །འགྱེད་པའི་ཕྱིར་རྩོད་པ་ལ་ཁས་བླངས་ཀྱི་ཞི་བའོ། །འདི་རྒོལ་ཕྱིར་རྒོལ་དང་ཁྱད་ཅི་ཡོད་སྙམ་ན། རྒོལ་ཕྱིར་རྒོལ་གྱིས་ནི་ལན་མེད་པར་རྡུགས་པའོ། །ཁས་བླངས་ནི་རིགས་པས་རྡུགས་པར་བྱེད་མ་ནུས་ཀྱང་ཁས་བླངས་པས་མངོན་སུམ་དུ་རྡུགས་པར་བྱ་བ་ཙམ་དུ་ཟད་དོ། །མི་གདམས་པའི་ཕྱིར་རྩོད་པ་ལ་གཉིས་ཏེ། རྒྱུ་དང་བཅས་པ་དང་། རྒྱུ་མེད་པའོ། །རྒྱུ་དང་བཅས་པ་ལ་མངོན་སུམ་གྱིས་ཞི་བར་བྱེད་པའོ། །འདི་ལ་ཡང་མངོན་སུམ་བརྒྱད་ཀ་འོང་ངོ་། །དེས་མ་ཞི་ན་མ་མཐོང་བ་གནས་ནས་འབྱིན་ནོ། །རྒྱུ་མེད་པ་ལ་བཞི་སྟེ། གཞི་མེད་པ་དང་། གཞན་རྗེས་སུ་སྒྲུབ་པ་དང་། ཕྱིར་བཅོས་པ་ལ་མི་ལྟོས་པ་དང་། སྨྱོན་པས་བྱས་པའོ། །དང་པོ་གསུམ་ལ་དྲན་པས་འདུལ་བ་སྟེར་ཏེ། དེའི་གོ་བ་ནི་དགེ་འདུན་གྱིས་གསོལ་བ་དང་གཞིའི་ལས་ཀྱིས་དྲན་པ་བྱིན་ནས་འདི་ད་ལྟ་དྲན་པར་འདུག་པས་ལྟུང་བ་མེད་ཞེའམ་མི་དྲན་པར་འདུག་པས་དགེ་འདུན་གྱིས་ལྟུང་བ་མེད་པར་འཛིན་པའོ། །སྨྱོན་པས་བྱས་པ་ལ་ནི་མ་སྨྱོས་པས་འདུལ་བ་སྟེར་བའོ། །དེའི་གོ་བ་ནི་འདི་ད་ལྟ་རང་བཞིན་དུ་གནས་པར་འདུག་པས་ལྟུང་བ་མི་དྲན་པར་འདུག་པས་རང་བཞིན་དུ་མི་གནས་པའི་དུས་སུ་བྱས་པས་ལྟུང་བ་མེད་པར་འཛིན་པའོ། །དེ་ལྟར་དག་རྒྱ་སྦྱིན་དུ་རུང་ན་གླེང་བྱེད་ཉན་དུ་མི་འདོད་ན་བརྙས་ཐབས་བྱེད་པ་ཡིན་པས་དེ་ལ་ཕྱིར་འགྱེད་པའོ། །དེས་མ་ཞི་ན་བརྙས་ཐབས་བྱེད་པ་ལ་འབད་པས་མ་ལོག་པ་གནས་ནས་དབྱུང་བའོ། །གླེང་བྱ་གླེང་བྱེད་ལ་མི་རིགས་པ་བྱ་སྙམ་ན་བརྙས་ཐབས་ལ་སོགས་པའི་ཚད་དུ་ཡང་འགྲོའོ། །གླེང་བྱ་དག་རྒྱ་གསོལ་དུ་མི་འདོད་ན་ཕྱིར་མི་བཅོས་པའི་ཆ་ལག་ཡིན་པས་ཕྱིར་མི་འཆོས་པ་གནས་ནས་འབྱིན་པའོ། །ལྟུང་བའི་ཕྱིར་རྩོད་པ་ལ་གཉིས་ཏེ། ཉེས་པ་རང་གི་ངོ་བོ་ཤེས་པ་དང་། མི་ཤེས་པའོ། །ཤེས་པ་ལ་གསུམ་སྟེ། འཕྲོས་པ་མེད་པ་དང་། འཕྲོས་པ་དང་བཅས་པ་རྣམ་པ་གཉིས་པོ་ཉི་ཚེ་བ་དང་། དགེ་འདུན་མཐའ་དག་དང་འབྲེལ་བའོ། །དང་པོ་ནི་རྒོལ་ཕྱིར་རྒོལ་ཁོ་ན་ལ་ཡོད་ཀྱི་གཞན་དུ་མ་འཕྲོས་པའོ། །དེས་མ་ཞི་བ་ལ་མ་མཐོང་བ་གནས་ནས་དབྱུང་བའོ། །འཕྲོས་པ་དང་བཅས་པ་ཉི་ཚེ་བ་ལ་ནི་མངོན་སུམ་གྱིས་ཞི་བར་བྱ་བ་དང་། དེས་མ་ཞི་ན་མ་མཐོང་བ་གནས་ནས་དབྱུང་ངོ་། །དགེ་འདུན་མཐའ་དག་དང་འབྲེལ་པ་ལ་ནི་རྩྭ་བཀྲམ་པས་ཞི་བར་བྱའོ། །དེ་ལ་གནས་ནས་དབྱུང་བ་ནི་མེད་དེ་དགེ་འདུན་བྱེ་བའི་དགག་བྱ་ཡོད་པས་སོ། །ཉེས་པ་རང་གི་ངོ་བོ་མི་ཤེས་ན་ངོ་བོ་ཉིད་ཚོལ་བ་སྟེར་ཏེ། མི་འདོད་ན་ཕྱིར་མི་འཆོས་པ་གནས་ནས་འབྱིན་ནོ། །ངོ་བོ་ཉིད་མ་རྙེད་ན་རྙེད་རྙེད་དུ་སྡོད་དོ། །རྙེད་ནས་གཞན་ན་གནས་པར་བྱེད་དོ། །བྱ་བའི་ཕྱིར་གྱི་རྩོད་པ་ཞི་བྱེད་ནི། ཞི་བྱེད་ཐམས་ཅད་ནི་བྱ་བའི་ཕྱིར་གྱི་རྩོད་པ་ལ་འཇུག་སྟེ། ལས་ཀྱི་གནས་ནས་འོངས་པ་ལ་རྟག་མི་རྟག་ལ་སོགས་པའམ། གདམས་ངག་བཞག་མ་བཞག་གམ། ལྟུང་བ་བྱུང་མ་བྱུང་ལ་རྩོད་པའི་དུས་སུའོ། །རྩོད་པའི་བསླབ་བྱ་ནི་ཉེ་བར་ཞི་བའི་མཐུ་ཡོད་པ་ལྟར་ན་མི་འབད་པར་མི་བྱ་སྟེ་འབད་དགོས་སོ། །བཞི་པ་དེ་དག་གི་དོན་གྱི་འབྲེལ་བརྩི་བ་ནི། རྣམ་གྲོལ་དོན་གཉེར་བྱང་ཆུབ་གསུམ་ཐོབ་པར་བྱེད་པའི་ཐབས་ནི་ལམ་བསླབ་པ་གསུམ་ཡིན་ལ། བསླབ་པ་གཞན་གཉིས་ཀྱི་རྩ་བ་ཡང་ཚུལ་ཁྲིམས་ཀྱི་བསླབ་པ་ཡིན་པས་བསྟན་པའི་རྩ་བ་སོ་སོར་ཐར་པ་ཡིན་ཏེ། སོ་སོར་ཐར་པའི་མདོ་ལས། འདི་ནི་ཐར་པའི་གྲོང་འཇུག་པའི། །ཐེམ་སྐས་བཞིན་དུ་འདྲ་བར་གནས། །ཞེས་དང་། བཤེས་པའི་སྤྲིང་ཡིག་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་གསུངས་པས་སོ། །ལྷག་པ་ཚུལ་ཁྲིམས་ཀྱི་བསླབ་པ་ཉམས་སུ་ལེན་པའི་ལག་ལེན་ཐམས་ཅད་མདོར་བསྡུ་ན། མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། ཉམས་ན་ཕྱིར་བཅོས་པ་དང་གསུམ་ཡིན་པ་ལས། ཐོག་མར་མ་ཐོབ་པ་ཐོབ་པར་བྱེད་པའི་ཆོ་ག་དགོས་ཏེ། བསྲུང་བ་ལ་ཐོབ་པ་སྔོན་དུ་འགྲོ་དགོས་པའི་ཕྱིར་རོ། །དེ་ཡང་འགལ་བའི་རྐྱེན་སྤང་ཞིང་མཐུན་པའི་རྐྱེན་ཚང་བ་ལ་བརྟེན་ནས་སྐྱེ་བ་ལས། འགལ་རྐྱེན་ཡང་བསྡུ་ན་བཞིར་འདུས་ཏེ། མཚམས་མེད་ཅན་ལ་སོགས་པ་སྡོམ་པ་སྐྱེ་བའི་བར་ཆད། བྲན་རྗེ་དཔོན་གྱི་དབང་དུ་གྱུར་པ་སོགས་གནས་པའི་བར་ཆད། ནད་པ་སོགས་གཉེན་པོ་ཁྱད་པར་དུ་འགྲོ་བའི་བར་ཆད། ལག་རྡུམ་སོགས་མཛེས་པའི་བར་ཆད་དེ། རྣམ་པ་བཞི་སྤངས་པ་དགོས་སོ། །མཐུན་པའི་རྐྱེན་ནི་རྣམ་པ་ལྔ་དགོས་ཏེ། ཡུལ་དང་། བསམ་པ་དང་། རྟགས་དང་། རྒྱུད་དང་། ཆོ་ག་མཐུན་པའི་རྐྱེན་ཏེ་ལྔ་ཚང་བ་ལས་སྐྱེའོ། །དཔེར་ན་འཇིག་རྟེན་པ་སོ་ནམ་གྱིས་སྟོན་ཐོག་སྒྲུབས་པའི་དཔེས་བསྟན་ན་འགལ་རྐྱེན་སྤངས་པ་ནི་ཞིང་ས་བཟང་པོ་ལྟ་བུ་ཡིན་ལ། མཐུན་རྐྱེན་ཚང་བ་ནི་རྐྱེན་ཆུ་ལུད་འཛོམ་པ་ལྟ་བུ་ཡིན་ཏེ། ས་བོན་གྲུང་པོ་ཞིང་ས་བཟང་བ་ལ་གདབ། རྐྱེན་ཆུ་ལུད་འཛོམ་འགལ་རྐྱེན་སད་སེར་སོགས་དང་མི་ལྡན་ན་སྟོན་ཐོག་འབྱུང་བ་བཞིན། གང་ཟག་གི་རྒྱུད་ལ་སོ་ཐར་གྱི་སྡོམ་པ་སྐྱེ་ནུས་ཀྱི་ས་བོན་གང་རུང་ཡོད་པ་དེ་ཞིང་བཟང་དང་འདྲ་བའི་བར་ཆད་ཀྱི་ཆོས་དང་མི་ལྡན་པའི་དལ་འབྱོར་གྱི་ཞིང་ལ་གདབ། རྐྱེན་ཆུ་ལུད་དང་འདྲ་བའི་མཐུན་རྐྱེན་ལྔ་ཚང་། སད་སེར་དང་འདྲ་བའི་ལྟུང་བས་རྒྱུད་ལ་མ་གོས་ན་འབྲས་བུ་སྟོན་ཐོག་དང་འདྲ་བའི་སྡོམ་པ་སྐྱེ་བ་ཡིན་ནོ། །འོ་ན་སྡོམ་པ་དེ་ཐོབ་པ་ཙམ་གྱིས་ཆོག་གམ་སྙམ་ན་མི་ཆོག་སྟེ། ཐོབ་ནས་མ་བསྲུངས་ན་འཇིག་རྟེན་ན་མཚོན་ཐང་ལ་འཁྱམ་པ་རང་གི་ལུས་ལ་བསྣུན་པ་དང་འདྲ་བའི་ཉེས་དམིགས་ཡོད་པས་ན་ཐོབ་ནས་བསྲུང་བ་གལ་ཆེའོ། །འདི་ལ་ལྔ་ཡོད་པ་ལས། དང་པོར་ཕྱིའི་རྐྱེན་ནི་གང་ཟག་གཞན་ལ་བརྟེན་ནས་བསྲུང་དགོས་ཏེ། ལས་དང་པོ་པ་སྡོམ་པ་བསྲུང་བ་ལ་ཉེ་བར་མཁོ་ཞིང་བསྲུང་ཐབས་གཞན་དག་ཀྱང་དེ་ལ་བརྟེན་ནས་འབྱུང་བས་དང་པོར་བསྟན་ཏེ། ཉེ་བར་མཁོ་ལུགས་གསར་དུ་བསྙེན་པར་རྫོགས་མ་ཁད་ཀྱི་གང་ཟག་དེ་དཔེར་ན་འཇིག་རྟེན་ན་བུ་ཆུང་བཙས་མ་ཁད་དང་འདྲ་བ་ཡིན་ཏེ། བུ་ཆུང་བཙས་མ་ཁད་དེ་མ་མ་ཐབས་ལ་མཁས་པ་ཞིག་གིས་མ་བསྐྱངས་ན་ཆེ་སྟེ་སྲོག་གི་བར་ཆད་དམ། ཆུང་སྟེ་རྐང་ལག་ཞ་གྲུམ་དུ་སོང་ནས་ཕུན་སུམ་ཚོགས་པ་གཅིག་མི་འབྱུང་བ་ཡིན། དེ་ལས་གཞན་མ་མ་ཐབས་ལ་མཁས་པའི་གང་ཟག་གཅིག་གིས་མཐུན་རྐྱེན་ཚང་ཞིང་འགལ་རྐྱེན་སྤངས་པའི་སྒོ་ནས་བསྐྱངས་ན་དུས་ཚོད་ལས་ཕུན་སུམ་ཚོགས་པ་གཅིག་འབྱུང་ཟེར་ཏེ། ཅི་ལ་བཏང་ཡང་ཐོགས་པ་མེད་པ། ཕ་མ་རང་བས་ཀྱང་ལྷག་པ་སྐད་ཟེར་བ་གཅིག་འབྱུང་བ་ཡིན། དཔེ་དེ་བཞིན་དུ་གསར་དུ་བསྙེན་པར་རྫོགས་མ་ཁད་ཀྱི་གང་ཟག་དེ་དགེ་བའི་བཤེས་གཉེན་གང་གིས་མ་བསྐྱངས་ན་ཆེ་སྟེ་སྲོག་གི་བར་ཆད་དང་མཚུངས་པར་རྩ་བའི་ལྟུང་བ་འཆབ་སེམས་དང་བཅས་པས་རྒྱུད་ལ་གོས་པའམ། ཆུང་སྟེ་རྐང་ལག་ཞ་གྲུམ་དང་མཚུངས་པར་ལྷག་མ་མན་ཆད་ཀྱི་བདུད་ཀྱིས་ནོན་ནས་ཕུན་སུམ་ཚོགས་པོ་གཅིག་མི་འབྱུང་བ་ཡིན་ལ། དེ་ལ་གཞན་དགེ་བའི་བཤེས་གཉེན་གང་གིས་བསྐྱངས་ནས་འདི་རྣམས་ཁྱོད་ཀྱིས་སྤང་བྱ་ཡིན་པས་སྤོངས་ཤིག འདི་རྣམས་ཁྱོད་ཀྱིས་ཉམས་སུ་བླང་བྱ་ཡིན་པས་ལོངས་ཤིག་ཅེས་ལུང་འབོགས་རྗེས་སུ་བསྟན་ནས་གང་ཟག་དེས་དེའི་རྗེས་སུ་ཞུགས་ནས་ལྡོག་འཇུག་བྱས་པ་ལ་བརྟེན་ནས་ཚུལ་ཁྲིམས་རྣམ་པར་དག དེ་གཞི་མར་བཞག་སྟེ་དུས་ཚོད་ལ་བརྗོད་བྱེད་སྡེ་སྣོད་རིན་པོ་ཆེ་གསུམ་ལ་མཁས་པ། བརྗོད་བྱ་བསླབ་པ་གསུམ་ལ་འདྲིས་པ། མཁས་བཙུན་སྐྱེས་བུ་དམ་པ་གཞུ་མོའི་རྒྱུད་དང་འདྲ་བ་སྦྲིང་ཐག་ཆོད་པ་གཞན་གྱི་དམིགས་པའི་ཡུལ་བཏུབ་པ། མཁན་སློབ་རང་བས་ཀྱང་མཁས་བཙུན་ང་རང་འཛོམ་མམ་སྙམ་པ་གཅིག་འབྱུང་བ་ཡིན། བསྲུང་ཐབས་གཞན་དག་ཀྱང་འདི་ལ་བརྟེན་ནས་འབྱུང་བར་ལུང་ལས། བླ་མ་དང་ནི་འགྲོགས་པ་དང་། །མཁན་པོས་རྗེས་སུ་བསྟན་པ་ལས། །འཇིགས་པས་སྐལ་ལྡན་གུས་བྱེད་པ། །དྲན་པ་བདེ་བླགས་སྐྱེ་བར་འགྱུར། །ཞེས་གསུངས་པས། དེ་ལྟར་ཕྱིའི་རྐྱེན་དགེ་བའི་བཤེས་གཉེན་ལ་བསྟེན་པ་དེས་རང་གི་བསམ་པ་ཕུན་སུམ་ཚོགས་པས་བསྲུང་དགོས་ཏེ། ནང་གི་ཉེར་ལེན་མེད་ན་ཕྱིའི་རྐྱེན་གྱིས་འབྲས་བུ་ཕུན་ཚོགས་མི་འབྱུང་བའི་ཕྱིར་རོ། །དེ་ལ་རང་རིགས་དང་། ཡོན་ཏན་དང་རྟགས་ཆ་ལུགས་འདི་ལྟ་བུ་དང་ལྡན་པས་ཉེས་སྤྱོད་ལ་འཇུག་པ་ངོ་ཚ་སྙམ་པའི་ངོ་ཚ་ཤེས་པ་དང་བདག་གིས་ཉེས་སྤྱོད་འདི་ལྟ་བུ་བྱས་ན་མཁན་སློབ་དང་གྲོགས་ཚངས་པ་མཚུངས་པར་སྤྱོད་པ་སོགས་ཀྱིས་ཁྲེལ་ནས་འགྲོ་བས་མི་བྱ་སྙམ་པའི་ཁྲེལ་ཡོད་ཁྱད་པར་ཅན་དགོས་ཏེ། ངོ་ཚ་ཁྲེལ་ཡོད་ནི་ཁ་ན་མ་ཐོ་བ་སྤང་བའི་རྒྱུའི་གཙོ་བོ་ཡིན་པའི་ཕྱིར་རོ། །ཆོས་རང་དང་སྤྱིའི་མཚན་ཉིད་གང་ཡིན་ཀྱང་འདྲིས་པ་ལ་མི་བརྗེད་པ་གལ་ཆེ་བ་ཡིན་ཏེ། མདོ་རྩ་བ་ལས། ལྟུང་བའི་སྒོར་གྱུར་པའི་འཇུག་པ་ཐམས་ཅད་ལ་དྲན་པས་ཉེ་བར་བསྒྲུབ་པར་བྱའོ། །ཞེས་བཤད་པས་སོ། །ལུས་ངག་གི་བྱ་བ་གང་དང་གང་བྱེད་པ་ལ་འདི་བྱར་རུང་ངམ་མི་རུང་སྙམ་དུ་སོ་སོར་རྟོག་པ་དང་། བྱ་བ་རྩོམ་པའི་ཚེ་ཉིད་ལ་འདི་རུང་བར་འདུག་གམ་མི་རུང་བར་འདུག་སྙམ་དུ་འཕྲལ་ལ་རྟོག་པ་ཡིན་ཏེ། མདོ་རྩ་ལས། ཤེས་བཞིན་དུ་བྱའོ་ཞེས་བཤད་པས་སོ། །སྤང་བྱ་ཉོན་མོངས་པ་དྲག་ལ་ཡུན་རིང་བ་སྐྱེས་པའི་དུས་སུ་གཉེན་པོ་དྲག་ལ་ཡུན་རིང་བའི་བག་ཡོད་པ་བསྟེན་དགོས་ཏེ། སོ་སོར་ཐར་པ་ལས། ཚེ་དང་ལྡན་པ་དག་བག་ཡོད་པས་རྣལ་འབྱོར་དུ་བྱའོ་ཞེས་བཤད་པས་སོ། །དེ་ལྟར་ནང་གི་ཉེར་ལེན་དང་ལྡན་པ་དེས་སྤང་བྱ་མི་མཐུན་པའི་ཕྱོགས་ངོ་ཤེས་པའི་སྒོ་ནས་བསྲུང་དགོས་ཏེ། ཕྱིའི་རྐྱེན་དགེ་བའི་བཤེས་གཉེན་ལ་བརྟེན། ནང་གི་ཉེར་ལེན་བསམ་པ་ཕུན་སུམ་ཚོགས་པ་དང་ལྡན་ཀྱང་སྤང་བྱ་མི་མཐུན་པའི་ཕྱོགས་ངོ་མ་ཤེས་ན་འཇིགས་རྟེན་ན་དགྲ་ལ་ཟོན་བྱེད་པ་ལ་དགྲ་ངོ་མི་ཤེས་པའམ། ནད་པ་ལ་སྨན་གཏོང་བ་ལ་ནད་ངོ་མི་ཤེས་པ་དང་འདྲ་བས་སྤང་བྱས་རྒྱུད་ལ་གོས་ཀྱང་མི་ཚོར་བ་འབྱུང་བས་སོ། །དེས་ན་མི་མཐུན་ཕྱོགས་ངོ་ཤེས་པར་བྱ་དགོས་ལ་དེ་ལ་ཡང་སྡོམ་པ་སྤྱི་དང་འགལ་བའི་མི་མཐུན་པའི་ཕྱོགས་དང་། སྡོམ་པ་སོ་སོ་དང་འགལ་བའི་མི་མཐུན་ཕྱོགས་གཉིས་ཡོད་པ་ཐམས་ཅད་ཤེས་པར་བྱས་ནས་སྤོང་དགོས་པ་ཡིན་ནོ། །དེ་ལྟར་ཡང་མི་མཐུན་པའི་ཕྱོགས་ངོ་ཤེས་པར་བྱས་སུ་ཟིན་ཀྱང་དགེ་བ་ཉམས་སུ་མ་བླངས་ན་ཚུལ་ཁྲིམས་ཀྱི་བསོད་ནམས་རྒྱུན་ཆགས་སུ་གོང་ནས་གོང་དུ་འཕེལ་དུ་མི་བཏུབ་པས་དགེ་བ་ཉམས་སུ་ལེན་པར་བྱེད་པ་གལ་ཆེ་བ་ཡིན་ཏེ། དགེ་བ་ཉམས་སུ་བླངས་པས་ཚུལ་ཁྲིམས་ཀྱི་བསོད་ནམས་ཟླ་བ་ཡར་གྱི་ངོ་བཞིན་དུ་གོང་ནས་གོང་དུ་རྒྱས་པར་འགྱུར་བའི་ཕྱིར་ཏེ། འོད་ལྡན་ལས། ཇི་སྲིད་དུ་ནི་དགེ་བའི་རྒྱུན་འཕེལ་བ་ཞེས་བཤད་པས་སོ། །དེ་ལ་ཡང་གསུམ་སྟེ། དུས་གཅིག་ཆར་བ་དང་འབྲེལ་པ་གསོ་སྦྱོང་གི་གཞི། དགག་དབྱེའི་རྒྱུར་གྱུར་པ་དབྱར་གྱི་གཞི། དུས་རེས་འགའ་བ་དང་འབྲེལ་བ་དགག་དབྱེའི་གཞིའོ། །དང་པོ་ནི། ཟླ་བ་ཕྱེད་ཕྱེད་ཀྱི་དུས་སུ་སྔར་སྐྱེས་ཀྱི་ལྟུང་བ་ཐམས་ཅད་ཕྱིར་བཅོས། ཕྱིས་འབྱུང་གི་ལྟུང་བ་རྒྱུན་བསྡམས་ནས་རང་གི་ཤེས་རྒྱུད་འདི་ཉེས་ལྟུང་གི་དབང་དུ་མ་སོང་བས་སྤང་བྱ་རང་གི་མཚན་ཉིད་འཛིན་པའི་ཆོས་ཉོན་མོངས་པ་སྤངས་ནས་ཚུལ་ཁྲིམས་དག་པར་བྱེད་པའི་ཐབས་ཡིན་ནོ། །གཉིས་པ་ནི། དབྱར་ཟླ་བ་གསུམ་མཚམས་ནང་གཅིག་ཏུ་ཁས་བླངས་བརྟན་པོའི་ལྕགས་ཀྱུས་བཟུང་ནས་གནས་པས་རང་གཞན་གྱི་ལུས་སྲོག་གི་བར་ཆད་བསྲུང་། གཞན་མ་དད་པ་སྤངས། གནས་རལ་བ་དང་། གྲུམས་པ་འཆོས་ཤིང་དགག་དབྱེ་དང་སྲ་བརྐྱང་འབྱུང་། ཐོས་བསམ་སྒོམ་གསུམ་གྱི་ཤེས་རབ་གོང་ནས་གོང་དུ་འཕེལ་བར་བྱེད་པའི་ཐབས་ཅིག་ཡིན་ནོ། །གསུམ་པ་ནི། དབྱར་གྱི་ནང་དུ་འཁྲུག་ལོང་བསྐྱེད་ཀྱི་དོགས་ནས་དགེ་འདུན་རྣམས་ལྟུང་བ་གླེང་བ་དགག་པ་དེ་ཉིད་ཕྱོགས་བཅུའི་དགེ་འདུན་ཐམས་ཅད་ལ་དབྱེ་སྟེ། ཆོས་དང་ཚུལ་ཁྲིམས་ཕུན་སུམ་ཚོགས་པར་བྱེད་པའི་ཐབས་ཅིག་ཡིན་ནོ། །དེ་ལྟར་དགེ་བ་ཉམས་སུ་ལེན་པ་དེས་ཀྱང་བདེ་བར་གནས་པའི་རྐྱེན་ལ་བརྟེན་ནས་བསྲུང་དགོས་ཏེ། རབ་ཏུ་བྱུང་བ་ལ་མ་བཀག་ཅིང་རྗེས་སུ་གནང་ལ་ཉེ་བར་འཆམས་པའི་རྐྱེན་མཐའ་གཉིས་སུ་མ་ལྷུང་བ་ལ་མ་བརྟེན་ན་བསྲུང་མི་ནུས་པས་དེ་ལ་བརྟེན་ནས་བསྲུང་བ་ལ་གསུམ་སྟེ། བདེ་བར་གནས་པའི་རྐྱེན་གོས་ལ་བརྟེན་དེ་བསྲུང་བ། ཟས་ལ་བརྟེན་དེ་བསྲུང་བ། གནས་མལ་ལ་བརྟེན་ཏེ་བསྲུང་བ་བའོ། །དང་པོ་གོས་ལ་བརྟེན་ཏེ་བསྲུང་བ་ལ་གསུམ་ལས། དང་པོ་ནི་གོས་གཞན་འབྱུང་བའི་རྒྱུ་ཡིན་ལ། གཉིས་པ་ནི་གོས་དངོས་ཁ་དོག་དང་དབྱིབས་ལ་སོགས་པའི་སྒོ་ནས་ཇི་ལྟར་རུང་བ་དང་། བཟོ་འཚེམས་ལ་སོགས་པའི་སྒོ་ནས་ཇི་ལྟར་བསྒྲུབ་པ་དང་། ཆོ་གའི་ཚིག་གིས་ཇི་ལྟར་བྱིན་གྱིས་བརླབས་པ་དང་། སྟོད་གཡོགས་སྟོད་དང་། སྨད་གཡོགས་སྨད་དུ་སོགས་ཇི་ལྟར་ལོངས་སྤྱོད་པའི་ཚུལ་ཡིན་ནོ། །གསུམ་པ་ནི་གོས་ཀྱི་བྱེ་བྲག་ཀོ་ལྤགས་ཡུལ་དང་གང་ཟག་གི་དབང་གིས་རུང་བ་དང་མི་རུང་པའི་ཚུལ་ཡིན་ནོ། །གཉིས་པ་ཟས་ལ་བརྟེན་ཏེ་བསྲུང་བ་ནི། ཟས་ཀྱང་ཧ་ཅང་བཟང་ཆེས་པ་དང་། ངན་ཆེས་པ་སྤངས་ནས་རུང་བ་ཚད་ལྡན་བྱིན་གྱིས་བརླབས་པར་འོས་པ་བྱིན་གྱིས་བརླབས་ཏེ་ལོངས་སྤྱོད་པས་བཀྲེས་པ་དང་། སྐོམ་པ་དང་། འདུ་བ་དང་། འདུས་པའི་ནད་རྣམས་བསལ་ནས། བདེ་བ་ལ་རེག་པར་གནས་པར་བྱེད་པས་ཚུལ་ཁྲིམས་རྣམ་པར་དག་པའི་ཐབས་ཡིན་ཏེ། རིམ་པ་ལྟར་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བར་བྱ་བ་རྣམས་མཐའ་གཉིས་སྤངས་པ་ཡིན་ནོ། །གསུམ་པ་བདེ་བར་གནས་པའི་རྐྱེན་གནས་མལ་ལ་བརྟེན་པ་ནི་དེ་ལྟར་གོས་དང་ཟས་མཐའ་གཉིས་སྤངས་པ་ལ་བརྟེན་པ་དེས་གནས་མལ་ཡང་ཚུལ་བཞིན་བསྒྲུབ་ནས་དགེ་འདུན་གྱི་རྩྭ་དང་ལོ་མའི་གདན་མ་གཏོགས་པའི་གནས་མལ་དང་གང་ཟག་གི་ཁྲ་བོ་དང་། ཁྱིམ་པའི་དཀར་པོ་ཕལ་ཆེར་མ་ཉམས་པ་ལ་གདིང་བ་མཚན་ཉིད་དང་ལྡན་པས་བསྐྱབས་པ་སོགས་ཀྱི་སྒོ་ནས་ལོངས་སྤྱོད་པས་གཞན་གྱི་རྫས་ཆུད་ཟ་བ་སྤངས་ཤིང་། རང་ཉིད་ཀྱང་འདོད་པ་བསོད་ཉམས་ཀྱི་མཐའ་དང་ངལ་ཞིང་དུབ་པའི་མཐའ་གཉིས་སྤངས་ནས་ཚུལ་ཁྲིམས་རྣམ་པར་དག་པའི་ཐབས་ཡིན་ནོ། །གསུམ་པ་ཉམས་ན་ཕྱིར་བཅོས་པའི་ཐབས་ནི། དེ་ལྟར་བསྲུང་ཐབས་རྣམ་པ་ལྔའི་སྒོ་ནས་བསྲུངས་པས་ཉེས་པས་རྒྱུད་ལ་མ་གོས་ན་དེ་ལས་ལྷག་པ་མེད་མོད་ཀྱི། གལ་ཏེ་ལྟུང་བས་གོས་ན་ཡང་ཕྱིར་བཅོས་བྱེད་དགོས་པ་ཡིན་ཏེ། ལུང་ལས་སྐྱེས་བུ་དམ་པ་ནི་གཉིས་ཏེ། དང་པོ་ལྟུང་བ་མི་འབྱུང་བ་དང་། བྱུང་བ་ཕྱིར་བཅོས་པའོ་ཞེས་བཤད་པས་སོ། །དེ་ལ་ཡང་སྐབས་དོན་ལྟུང་བ་ཕྱིར་བཅོས་པ་དང་། ལྟུང་བ་ལ་བརྟེན་པའི་རྩོད་པ་ཕྱིར་བཅོས་པའི་ཐབས་གཉིས་ལས། དང་པོ་ལ། ཕྱིར་བཅོས་པ་དངོས་བསྟན་པ་ཕྱིར་བཅོས་ཀྱི་གཞི་དང་། དེ་དག་གི་སྐབས་སུ་ཕམ་པ་ལ་འཆབ་པ་ཡོད་མེད་ཀྱིས་ཕྱིར་བཅོས་སུ་རུང་མི་རུང་། ལྷག་མ་འཆབ་པ་ཡོད་མེད་ཀྱིས་སྤོ་བ་སྤྱོད་དགོས་མི་དགོས་དང་། ལྟུང་བྱེད་མན་ལ་འཆབ་པ་ཡོད་མེད་ཀྱིས་མཐོལ་བ་དགོས་མི་དགོས་ཀྱི་ཁྱད་པར་གསུངས་པའི་འཆབ་པ་གང་ལ་འབྱུང་བ་དང་མི་འབྱུང་བའི་ཚད་བཟུང་བ་དུས་དང་དུས་མ་ཡིན་པ་བསྡུས་པ་འབྱུང་བའི་གཞི་དང་། ཕྱིར་བཅོས་ཀྱི་གཞིའི་སྐབས་སུ་སྤོ་མགུ་བསླབ་པ་སྤྱོད་པ་སོགས་ས་གཞན་ན་གནས་པ་གསུངས་པའི་སྤྱོད་པའི་ཁྱད་པར་སྟོན་པ་ས་གཞན་ན་གནས་པའི་སྤྱོད་པའི་གཞི་དང་། རང་ཉིད་བཤགས་པར་མི་མོས་པ་ལ་ལྟུང་བ་གླེང་བའི་སྒོ་ནས་འཆགས་སུ་གཞུག་པ་ཡོངས་སུ་སྦྱོང་བའི་གཞི་དང་རྣམ་པ་བཞིའོ། །གཉིས་པ་ལྟུང་བ་ལ་བརྟེན་པའི་རྩོད་པ་ཕྱིར་བཅོས་པ་ལ་ཡང་རྩོད་པའི་འབྲས་བུ་ལས་བྱེ་བ་དང་། འཁོར་ལོ་བྱེ་བའི་གཞི་དང་། རྩོད་པའི་གཉེན་པོ་ཞི་བྱེད་ཀྱི་ཆོས་བདུན་སྟོན་པ་རྩོད་པའི་གཞི་དང་གསུམ་མོ། །དེ་ལྟར་ན་ལྷག་པ་ཚུལ་ཁྲིམས་ཀྱི་བསླབ་པའི་གཙོ་བོ་དགེ་སློང་གི་སྡོམ་པ་རྣམ་པར་དག་པ་ཐོག་མར་འགལ་རྐྱེན་སྤོང་ཞིང་མཐུན་རྐྱེན་ཚང་བའི་སྒོ་ནས་ཐོབ་པར་བྱས་ནས། ཐོབ་ཟིན་པ་བསྲུང་ཚུལ་ལྔ་ཡི་སྒོ་ནས་ཚུལ་བཞིན་དུ་བསྲུང་ཏེ་གལ་ཏེ་ཉམས་ན་གང་འོས་ཀྱིས་ཕྱིར་བཅོས་ཀྱི་སྒོ་ནས་ཕྱིར་བཅོས་པར་བྱས་ནས་དགེ་སློང་གི་སྡོམ་པ་ཕུན་སུམ་ཚོགས་པར་འགྱུར་བ་ནི། ལྷག་པའི་སེམས་དང་། ལྷག་པའི་ཤེས་རབ་ཀྱི་གཞི་ཡིན་ཅིང་བསླབ་པ་གསུམ་པོ་ཐེག་པ་ཆེན་པོའི་སེམས་བསྐྱེད་ཀྱིས་ཟིན་པར་བྱས་ནས་བསྐལ་པ་གྲངས་མེད་གསུམ་དུ་སྦྱངས་ན་བླ་ན་མེད་པའི་བྱང་ཆུབ་ཐོབ་པར་འགྱུར་བ་ནི་ལུགས་འདིའི་ཡང་ལམ་གྱི་གཙོ་བོ་ཡིན་ཅིང་དེ་ཉིད་སེམས་ཅན་མ་ལུས་པའི་སྐྱོབ་པར་འགྱུར་བ་ནི་སངས་རྒྱས་པ་ཀུན་ཀྱང་འདོད་པའོ། །ཆོས་འདུལ་རྒྱ་མཚོ་གཏིང་མཐའ་མི་མངོན་ཞིང་། །ཚིག་དོན་རྦ་རླབས་ཕྲེང་བས་འཇིགས་པ་རྣམས། །བསྟན་བཅོས་འདི་ཡི་གྲུ་གཟིངས་ལ་བརྟེན་ནས། །བཅས་མཚམས་རིན་ཆེན་གླིང་དུ་འཇུག་པར་རིགས། །འདི་སྦྱར་དགེ་བ་དབང་གི་རྒྱལ་པོ་གང་། །མཐུ་ལྡན་དྲི་མེད་ཅི་སྙེད་ཐོབ་པ་དེས། །མར་གྱུར་འགྲོ་བ་དལ་འབྱོར་ལུས་བཟང་ལ། །ཚུལ་ཁྲིམས་རྒྱན་གྱིས་མཛེས་པ་ཐོབ་པར་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །རྣམ་དཀར་ཚུལ་ཁྲིམས་བསླབ་པས་གཞི་བཟུང་ནས། །ཞི་ལྷག་ཟུང་འབྲེལ་གསལ་བའི་ཉི་འོད་ཀྱིས། །སངས་རྒྱས་ཡེ་ཤེས་སྣང་བ་ཐོབ་པར་ཤོག །དགེ་སློང་གི་བསླབ་བྱ་གསལ་བར་སྟོན་པ་འདུལ་བ་རྒྱ་མཚོའི་སྙིང་པོ་ཞེས་བྱ་བ་འདི་ནི་དད་པ་དང་ལྡན་ཞིང་དོན་དུ་གཉེར་བ་དུ་མས་ཡང་ཡང་བསྐུལ་བའི་ངོར། སྡེ་སྣོད་འཛིན་པ་བསོད་ནམས་སེང་གེས་ལྕགས་མོ་གླང་གི་ལོ་སྣྲོན་གྱི་ཟླ་བའི་ཡར་ཚེས་བརྒྱད་ལ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།བཀྲ་ཤིས། འདི་བསྒྲུབས་པ་ལས་བྱུང་བ་ཡི། །དགེ་བ་གང་དང་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

ཆོས་མངོན་པ་མཛོད་ཀྱི་བཤད་ཐབས་ཀྱི་མན་ངག་ངོ་མཚར་གསུམ་ལྡན།

ཆོས་མངོན་པ་མཛོད་ཀྱི་བཤད་ཐབས་ཀྱི་མན་ངག་ངོ་མཚར་གསུམ་ལྡན་ཞེས་བྱ་བ་བཞུགས་སོ།། ཆོས་མངོན་པ་མཛོད་ཀྱི་བཤད་ཐབས་ཀྱི་མན་ངག་ངོ་མཚར་གསུམ་ལྡན་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་མཚལ་ལོ། །འཇིག་རྟེན་མེས་པོ་གདོང་བཞི་ལྡན་པ་དང་། །སྐབས་གསུམ་དབང་པོ་མིག་སྟོང་ལྡན་པ་སོགས། །སྲིད་ན་དྲེགས་པའི་ང་རོ་ཆེར་སྒྲོགས་ཤིང་། །ཐོར་ཚུགས་ཅོད་པཎ་མཐོ་བར་རློམས་རྣམས་ཀྱིས། །གང་གི་ཞབས་པད་མཛེས་པའི་སྟེགས་བྱས་པ། །འཇིག་རྟེན་རྣམ་འདྲེན་གོའུ་ཏམ་ལྷ་ཡི་ལྷ། །མི་མཇེད་ཞིང་གི་སྟོན་པ་ཤཱཀྱའི་གཙོ། །སྲས་དང་སློབ་མར་བཅས་ལ་གུས་ཕྱག་མཚལ། །སྙིང་གི་དཀྱིལ་འཁོར་དབུས་སུ་རྣམ་བསམ་ནས། །རྒྱུན་དུ་གསོལ་བ་འདེབས་པའི་ཡི་དམ་ལྷ། །འཇམ་དཔལ་འཇམ་དབྱངས་འཇམ་པའི་རྡོ་རྗེ་ཡིས། །ལྷན་སྐྱེས་ཡིད་ཀྱི་མུན་པ་སེལ་བར་མཛོད། །བློ་གྲོས་རབ་ཏུ་གསལ་བའི་ཁང་བཟང་དབུས། །གཞུང་ལུགས་འབུམ་སྡེ་དགུ་བཅུ་གོ་དགུ་ཡི། །ནོར་གྱིས་གཏམས་པའི་མཛོད་ལ་དབང་འབྱོར་པ། །ཀུན་མཁྱེན་གཉིས་པ་དེ་ལ་ཕྱག་འཚལ་ནས། །གྲུབ་མཐའ་དང་པོའི་རི་མོ་རྣམ་བཀྲ་ཞིང་། །མ་ལུས་གཞུང་ལ་ཁྱབ་པའི་འགྲོས་བཞི་ལྡན། །བརྒལ་དཀའ་གནད་ཀྱི་རི་ལས་བརྒལ་བ་ཡི། །ལེགས་བཤད་ངོ་མཚར་སུམ་ལྡན་བརྩམ་པར་བྱ།། །།འདི་ལ་དོན་གསུམ་སྟེ། བཤད་པ་སྔོན་འགྲོ་རྒྱ་སྟག་ཁྲ་བོའི་རི་མོ། དཀྱུས་ཀྱིས་བཅད་པ་རུས་སྦལ་རྒྱ་བོའི་བཞི་འགྲོས། དཀའ་བའི་གནས་ལ་དཔྱད་པ་གངས་སེང་དཀར་མོའི་མཆོང་སྟངས་སོ། །དང་པོ་ལ་ལྔ་སྟེ། རྩོམ་པ་པོ་སློབ་དཔོན་གྱི་ཆེ་བ། དེས་བསྟན་བཅོས་ཇི་ལྟར་བརྩམས་པའི་ཚུལ། བརྩམས་པའི་བསྟན་བཅོས་ཀྱི་མཚན་དོན། མཚན་ལྡན་གཞུང་གི་དགོས་འབྲེལ། དགོས་ལྡན་བསྟན་བཅོས་སྤྱིའི་རྣམ་གཞག་གོ །དང་པོ་ནི། བསྟན་བཅོས་འདིའི་མཛད་པ་པོ་ནི་ཀུན་མཁྱེན་གཉིས་པ་དབྱིག་གཉེན་ཡིན་ལ། འདིའི་ཆེ་བའི་ཡོན་ཏན་ལ། རིགས་སུ་འཁྲུངས་པའི་ཡོན་ཏན། སྐྱེས་ཐོབ་དང་སྦྱངས་པའི་ཡོན་ཏན། ལུང་བསྟན་བརྙེས་པའི་ཡོན་ཏན་དང་གསུམ། དང་པོ་ནི། སྟོན་པ་མྱ་ངན་ལས་འདས་ནས་བཀའི་བསྡུ་བ་རིམ་པ་གསུམ་བྱུང་བའི་རྗེས་སུ་ཐེག་པ་ཆེན་པོའི་བསྟན་པ་དར་བར་གནས་པ་ན་ཆོས་མངོན་པ་ལ་དགྲ་ལན་གསུམ་དར་ནས་ཐེག་པ་ཆེན་པོའི་མངོན་པ་ཅུང་ཟད་ནུབ་པའི་ཚེ། བྲམ་ཟེ་མོ་གསལ་བའི་ཚུལ་ཁྲིམས་ཀྱིས་ཆོས་མངོན་པ་དར་བར་བཞེད་ནས། རྒྱལ་རིགས་གཅིག་དང་ལྷན་ཅིག་འདུས་པ་ལས་འཕགས་པ་ཐོགས་མེད་དང་། བྲམ་ཟེའི་རིགས་གཅིག་དང་ལྷན་ཅིག་འདུས་པ་ལས་སློབ་དཔོན་དབྱིག་གཉེན་སྐུ་འཁྲུངས་ཏེ། ཆུང་ངུའི་དུས་ནས་ལྕེ་ལ་གི་ཝང་གི་དྷཱིཿཡིག་བྲི་བ་ལ་སོགས་པ་བློ་རྣོ་བའི་ཐབས་མང་དུ་བྱས་སོ། །གཉིས་པ་ནི། སྐྱེ་བ་ལྔ་བརྒྱར་བར་མ་ཆད་དུ་པཎྜི་ཏར་སྐུ་འཁྲུངས་པས་སྐྱེས་ཐོབ་ཀྱི་བློ་གྲོས་མཚུངས་པ་མེད་པ་དང་ལྡན་ཅིང་། རིགས་པའི་གནས་ལྔའི་ཕ་རོལ་ཏུ་སོན་པས་གཞུང་ལུགས་འབུམ་སྡེ་དགུ་བཅུ་གོ་དགུ་ཐུགས་སུ་ཆུད་དེ། བརྒྱད་སྟོང་པ་ལ་རྒྱུན་དུ་ཞལ་འདོན་བྱེད་པ་ཞིག་གོ །གསུམ་པ་ནི། འཇམ་དཔལ་རྩ་རྒྱུད་ལས། དེ་འོག་རྣམ་པར་གྲགས་པ་ནི། །ལྷོ་ཡི་ཕྱོགས་སུ་བྲམ་ཟེ་ནི། །ཡི་གེ་དང་པོ་བ་བསྟན་པ། །སྟོན་པའི་བསྟན་ལ་དེ་གཙོ་བྱེད། །མཆོད་རྟེན་ཀུན་དགའ་རྭ་བར་གནས། །སྟོན་པའི་གཟུགས་བརྙན་ཡིད་འོང་གིས། །ས་ནི་རྒྱ་མཚོ་གཉིས་མཐར་ཐུག །ཐམས་ཅད་ཀྱི་ནི་རྒྱན་དུ་བྱས། །ཞེས་གསུངས་པས་བསྟན་ཏོ། །གཉིས་པ་ནི། བྱེ་བྲག་ཏུ་སྨྲ་བ་རྣམས་ན་རེ། ཆོས་ཀྱི་ཕུང་པོ་ཤཱ་རིའི་བུས། །གདགས་པའི་བསྟན་བཅོས་མཽ་འགལ་བུས། །ཁམས་ཀྱི་ཚོགས་ནི་གང་པོས་བསྡུས། །རྣམ་ཤེས་ཚོགས་ནི་ལྷ་སྐྱིད་ཀྱིས། །ཡེ་ཤེས་ལ་འཇུག་ཀ་ཏྱའི་བུས། །རབ་ཏུ་བྱེད་པ་དབྱིག་བཤེས་ཀྱི། །འགྲོ་བའི་རྣམ་གྲངས་གསུས་པོ་ཆེས། །ཞེས་པ་ལྟར་ཆོས་མངོན་པ་སྡེ་བདུན་པོ་འདི་སྟོན་པ་རྫོགས་པའི་སངས་རྒྱས་ཀྱིས་གནས་ཐ་དད་དུ་གང་ཟག་སོ་སོ་ལ་ཐོར་བུ་ཐོར་བུར་གསུངས་པ་དེ་ཉིད་དགྲ་བཅོམ་པ་བདུན་གྱིས་བསྡུས་པས་བཀའ་ཡིན་ཏེ། གཞན་དུ་ན་མདོ་ལས་དགེ་སློང་སྡེ་སྣོད་གསུམ་པ་ཅན་ཞེས་གསུངས་པའི་སྡེ་སྣོད་གསུམ་མ་ཚང་བར་འགྱུར་རོ་ཞེས་ཟེར་རོ། །མདོ་སྡེ་པ་ན་རེ། མངོན་པ་སྡེ་བདུན་སངས་རྒྱས་ཀྱི་བཀའ་མ་ཡིན་ཏེ། དེ་ལས་འདུས་མ་བྱས་རྫས་སུ་གྲུབ་པ་ལ་སོགས་པ་རིགས་པ་དང་འགལ་བ་དུ་མ་སྣང་ལ། སངས་རྒྱས་ནི་ཆོས་རྣམས་ཀྱི་རང་སྤྱིའི་མཚན་ཉིད་ཕྱིན་ཅི་མ་ལོག་པར་ཐུགས་སུ་ཆུད་པས་རིགས་པ་དང་འགལ་བ་གསུངས་མི་སྲིད་པའི་ཕྱིར། དེས་ན་དགྲ་བཅོམ་པ་བདུན་གྱིས་རང་དགར་བརྩམས་པ་ཡིན་ཞིང་། བཀའ་ལ་སྡེ་སྣོད་གསུམ་མ་ཚང་བའི་སྐྱོན་ཡང་མེད་དེ། འདུལ་བ་དང་མདོ་སྡེའི་ནང་དུ་ཆོས་རྣམས་ཀྱི་རང་སྤྱིའི་མཚན་ཉིད་སྟོན་པའི་ཆ་རྣམས་མངོན་པའི་སྡེ་སྣོད་ཡིན་པའི་ཕྱིར་ཞེའོ། །སྔ་རབས་པ་ཁ་ཅིག མདོ་སྡེ་པ་ལྟར་ན། དེ་བཀའ་མིན་ཡང་ཚད་མར་ཁས་བླངས་དགོས་ཏེ། དགྲ་བཅོམ་པ་དེ་དག་ལ་ཟག་མེད་ཀྱི་ཤེས་རབ་མངའ་བས་འཁྲུལ་བ་མེད་པའི་ཕྱིར། ཞེས་ཟེར་བ་ནི་མ་ངེས་སྟེ། ཟག་མེད་ཀྱི་ཤེས་རབ་མངའ་ཡང་ཉོན་མོངས་པ་ཅན་མ་ཡིན་པའི་མུན་པ་མ་སྤངས་པས་ཤིན་ཏུ་ལྐོག་གྱུར་ལ་འཁྲུལ་པ་སྲིད་པའི་ཕྱིར་རོ། །དེ་ལྟ་བུའི་མངོན་པ་སྡེ་བདུན་གྱི་དགོངས་པ་འགྲེལ་བ་ལ་པཎྜི་ཏ་ལྔ་བརྒྱ་འདུས་ནས་བྱེ་བྲག་བཤད་མཚོ་ཆེན་མོ་ཞེས་བྱ་བ་ཤླཽ་ཀ་འབུམ་ཡོད་པ་ཞིག་བརྩམས། དེའི་ཚིག་དོན་རྒྱ་ཆེ་བས་དབང་པོ་རྟུལ་པོ་རྣམས་ཀྱིས་བདེ་བླག་ཏུ་རྟོག་པར་མ་ནུས་ནས་ཁ་ཆེ་འདུས་བཟང་གི་དུས་སུ་སློབ་དཔོན་དབྱིག་གཉེན་ཚིག་དོན་ལ་མཁས་པར་གྲགས་པས་དེའི་ཚིག་དོན་བསྡུས་པའི་བསྟན་བཅོས་བརྩམ་པར་གསོལ་བ་གདབ་པས་ཆོས་མངོན་པ་མཛོད་ཀྱི་ཚིག་ལེའུར་བྱས་པ་འདི་བརྩམས་སོ། །འདིའི་ནང་དུ་ལོ་གྲགས་ཟེར་གསུམ་གྱི་ཚིག་བྱུང་བ་ལ། འགའ་ཞིག་སློབ་དཔོན་རྩོམ་པ་ལ་མཁས་པས་ཚིག་རྒྱན་ཡིན་ཟེར། ལ་ལ་ཟུར་ཟ་ཡིན་ཟེར་ཏེ་ཡིད་མ་ཆེས་ཏེ། སླར་ཡང་འགྲེལ་པ་བརྩམ་པར་གསོལ་བས་ལོ་གྲགས་ཟེར་གསུམ་གྱི་ཐད་དུ་བྱེ་བྲག་སྨྲ་བའི་འདོད་པ་བཀག་ནས་རང་ཉིད་མདོ་སྡེ་པའི་གྲུབ་མཐའ་ལྟར་མཛད་པའི་རང་འགྲེལ་བརྩམས་སོ། །གསུམ་པ་ནི། ཆོས་མངོན་མཛོད་ཀྱི་བསྟན་བཅོས་རབ་བཤད་བྱ། །ཞེས་གསུངས་ན་ཅིའི་ཕྱིར། ཆོས་དང་། མངོན་པ་དང་། མཛོད་དང་། བསྟན་བཅོས་ཞེས་བྱ་ཞེ་ན། ཆོས་ནི་རྣམ་བཤད་རིག་པར། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །གསུང་རབ་ཚེ་དང་བསོད་ནམས་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དོན་བཅུ་ལ་འཇུག་པར་གསུངས་པ་ལས། འདིར་ནི་མངོན་པའི་ཡུལ་ལ་འཇུག་ན། ཤེས་བྱ་ཙམ་ལ་ཆོས་ཞེས་བྱ། ཆོས་དང་མངོན་པའི་གཞི་མཐུན་ལ་འཇུག་ན། ལམ་དང་གསུང་རབ་ལ་ཆོས་ཞེས་བྱ་སྟེ། དོན་དམ་པའི་མངོན་པ་ནི་ལམ་ཡིན་ཞིང་། བརྡར་བཏགས་པའི་མངོན་པ་ལ་ལམ་དང་གསུང་རབ་གཉིས་ཀ་ཡོད་པའི་ཕྱིར་རོ། །གཉིས་པ་མངོན་པ་ལ། དབྱེ་བ། གྲངས་ངེས། སོ་སོའི་ངོ་བོ། ངེས་ཚིག་དང་བཞི་ལས། དང་པོ་ལ་ཁ་ཅིག མངོན་པ་ལ་ལམ་གྱི་ངོ་བོར་གྱུར་པའི་ཤེས་རབ་དང་གསུང་རབ་གཉིས་སུ་གྲངས་ངེས་པར་འདོད་པ་ནི་མི་འཐད་དེ། ཟག་མེད་ཀྱི་ཤེས་རབ་དོན་དམ་པའི་ཆོས་མངོན་པར་འཇོག་པའི་ཚེ། རྗེས་འབྲང་དང་བཅས་ན་ཕུང་པོ་ལྔ་ཆར་ཡང་ཆོས་མངོན་པར་འཇོག་དགོས་པའི་ཕྱིར་ཏེ། ཆོས་མངོན་ཤེས་རབ་དྲི་མེད་རྗེས་འབྲང་བཅས། །ཞེས་གསུངས་པའི་ཕྱིར། མཆིམས་ཀྱིས་བརྒྱད་སྟོང་དོན་བསྡུར། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དེ་དོན་སྦྱོར་བ་ཡི། །གཞུང་དང་ལམ་ལ་དེ་སྒྲ་ཡིན། །ཞེས་པ་ལྟར། མངོན་པ་ལ་གཞུང་ལམ་འབྲས་བུའི་མངོན་པ་གསུམ་དུ་དབྱེ་ཞེས་གསུང་ཡང་ལུང་དེ་དང་མི་མཐུན་ཏེ། ལུང་དེས་ནི་ཤེར་ཕྱིན་མཚན་ཉིད་པ་སངས་རྒྱས་ཀྱི་ས་ཁོ་ནར་བཞག་ནས་གཞུང་ལམ་གཉིས་ཤེར་ཕྱིན་བཏགས་པ་བར་བསྟན་ལ། འདིར་ནི་མངོན་པ་ལ་གསུམ་དུ་ཕྱེ་བའི་ཚེ། ལམ་དང་མངོན་པ་མཚན་ཉིད་པའི་གཞི་མཐུན་ཡོད་པའི་ཕྱིར་ཏེ། མཐོང་སྒོམ་གྱི་ལམ་བཞིན་ནོ། །གལ་ཏེ་འབྲས་བུ་མངོན་པ་ནི་ཟག་མེད་ཀྱི་ཤེས་རབ་དང་། ལམ་མངོན་པ་ནི་ཟག་བཅས་ཀྱི་ཤེས་རབ་ལ་འཇོག་པས་སྐྱོན་མེད་དོ་སྙམ་ན། དེ་ལྟར་ན་འབྲས་བུ་མངོན་པ་མཚན་ཉིད་པ་དང་། གཞན་གཉིས་བཏགས་པ་བར་གྲུབ་མོད། ཤེར་ཕྱིན་ལ་གསུམ་དུ་དབྱེ་བ་དང་དཔེ་དོན་མི་འགྲིག་སྟེ། དེའི་ཚེ་འབྲས་བུ་ཤེར་ཕྱིན་སངས་རྒྱས་ཀྱི་ས་ཁོ་ནར་བཞག་ལ། འདིར་ནི་འབྲས་བུ་མངོན་པ་སློབ་པའི་རྒྱུད་ལ་ཡང་ཡོད་པར་འདོད་དགོས་པའི་ཕྱིར་རོ། །འཐད་པའི་ཕྱོགས་ནི་འདི་ཡིན་ཏེ། སྤྱིར་ཆོས་མངོན་པ་ཞེས་བྱ་བའི་སྒྲ་འཇུག་པ་ཙམ་ལ་དབྱེ་ན་དོན་དམ་པའི་ཆོས་མངོན་པ་དང་། བརྡར་བཏགས་པའི་ཆོས་མངོན་པ་གཉིས། དང་པོ་ལ། ས་མཚམས་ཀྱི་སྒོ་ནས་མཐོང་སྒོམ་མི་སློབ་པའི་ལམ་གསུམ། དེ་རེ་རེ་ལ་ཡང་གཙོ་འཁོར་གྱི་སྒོ་ནས་ཕུང་པོ་ལྔ་ལྔའོ། །གཉིས་པ་ལ་བརྗོད་བྱ་རྗོད་བྱེད་གཉིས། དང་པོ་ལ། སྐྱེས་ཐོབ། ཐོས་བྱུང་། བསམ་བྱུང་། སྒོམ་བྱུང་གི་ཤེས་རབ་འཁོར་དང་བཅས་པ་སྟེ་བཞི། གཉིས་པ་ལ་བཀའ་དང་བསྟན་བཅོས་གཉིས་སོ། །གཉིས་པ་གྲངས་ངེས་ནི། མངོན་པ་ལ་དོན་དམ་པའི་ཆོས་མངོན་པ་དང་། བརྡར་བཏགས་པའི་ཆོས་མངོན་པ་གཉིས་སུ་ངེས་ཏེ། ཐོབ་བྱ་མངོན་པ་མཚན་ཉིད་པ་དང་། ཐོབ་བྱེད་མངོན་པ་བཏགས་པ་བ་གཉིས་སུ་ངེས་པའི་ཕྱིར། དང་པོ་ལ་མཐོང་སྒོམ་མི་སློབ་པའི་ལམ་གསུམ་དུ་ངེས་ཏེ། ཆོས་མངོན་པའི་གཙོ་བོ་ནི་ཟག་མེད་ཀྱི་ཤེས་རབ་ཡིན་ལ། དེ་ནི་ལམ་དེ་གསུམ་དུ་ངེས་པའི་ཕྱིར་རོ། །གཉིས་པ་ལ་བརྗོད་བྱ་རྗོད་བྱེད་གཉིས་སུ་ངེས་ཏེ། དོན་དམ་པའི་ཆོས་མངོན་པ་དེ་ཐོབ་པར་བྱེད་པའི་ལམ་དང་། དེ་གཉིས་བརྗོད་བྱར་སྟོན་པའི་གསུང་རབ་གཉིས་སུ་ངེས་པའི་ཕྱིར་རོ། །དང་པོ་ལའང་བཞིར་ངེས་ཏེ། སྐྱེས་ཐོབ་དང་། སྦྱོར་བྱུང་གཉིས་སུ་ངེས་ཤིང་། ཕྱི་མ་ལ་ཐོས་བྱུང་། བསམ་བྱུང་། སྒོམ་བྱུང་གསུམ་དུ་ངེས་པའི་ཕྱིར་རོ། །གསུམ་པ་དབྱེ་བ་སོ་སོའི་ངོ་བོ་ལ་གཉིས་ལས། དང་པོ་དོན་དམ་པའི་ཆོས་མངོན་པ་ནི། ཟག་མེད་ཀྱི་ཤེས་རབ་རྗེས་འབྲང་དང་བཅས་པ་སྟེ། འདི་ལ་ལམ་གང་གིས་བསྡུས་པ། ས་གང་ལ་བརྟེན་པ། རྟེན་དང་བརྟེན་པའི་དོན། འཁོར་དང་བཅས་ན་ཕུང་པོ་དུ་ཡིན་པ། གཙོ་འཁོར་གོ་ལོག་པའི་རྩོད་པ་སྤོང་བ། མངོན་པ་མཚན་ཉིད་པར་འཇོག་པའི་རྒྱུ་མཚན་དང་དྲུག་ལས། དང་པོ་ནི། མཐོང་སྒོམ་མི་སློབ་པའི་ལམ་གསུམ་གྱིས་བསྡུས་ཏེ། འདིའི་གཙོ་བོ་ནི་ཟག་པ་མེད་པའི་ཤེས་རབ་ཡིན་ལ། དེ་ནི་ལམ་དེ་གསུམ་གྱིས་བསྡུས་པའི་ཕྱིར་རོ། །གཉིས་པ་ནི། མཐོང་ལམ་གྱི་ངོ་བོར་གྱུར་པ་ནི་བསམ་གཏན་ས་དྲུག་དང་། སྒོམ་ལམ་དང་མི་སློབ་ལམ་གྱི་ངོ་བོར་གྱུར་པ་རྣམས་ནི་དེའི་སྟེང་དུ་གཟུགས་མེད་དང་པོ་གསུམ་སྟེ་ཟག་མེད་ས་དགུ་ལ་བརྟེན་པ་ཡིན་ཏེ། འདོད་པ་ནི་མ་ཞི་བ་དང་། སྲིད་རྩེ་ནི་སེམས་ཀྱི་རྒྱུ་བ་མི་གསལ་བས་ཟག་མེད་ཀྱི་ཤེས་རབ་ཀྱི་རྟེན་དུ་མི་རུང་བའི་ཕྱིར་རོ། །གསུམ་པ་ནི། སྐད་ཅིག་སྔ་ཕྱི་ལ་རྟེན་དང་བརྟེན་པར་བཞག་པ། དུས་མཉམ་ངོ་བོ་གཅིག་པ་ལ་རྟེན་དང་བརྟེན་པར་བཞག་པ། དུས་མཉམ་རྫས་ཐ་དད་ལ་རྟེན་དང་བརྟེན་པར་བཞག་པ་གསུམ་ལས་དང་པོ་ནི། སྦྱོར་ལམ་གྱི་སེམས་རྟེན་ས་དྲུག་ལ་བརྟེན་ནས་མཐོང་ལམ་སྐྱེས་པའི་ཚེ་མཐོང་ལམ་དེ་སྦྱོར་ལམ་གྱི་སེམས་རྟེན་ལ་བརྟེན་ཞེས་པ་ལྟ་བུ་སྟེ། དེ་གཉིས་སེམས་རྟེན་རིས་མཐུན་གཅིག་ལ་བརྟེན་པའི་ཕྱིར། གཉིས་པ་ནི། མཐོང་ལམ་དེ་བསམ་གཏན་གྱི་དངོས་གཞི་ལ་བརྟེན་པའི་ཚེ་མཐོང་ལམ་གྱི་ངོ་བོར་གྱུར་པའི་ཏིང་ངེ་འཛིན་དེ་བསམ་གཏན་གྱི་དངོས་གཞིར་སོང་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་བསམ་གཏན་གྱི་དངོས་གཞིར་སོང་ལ། མཐོང་ལམ་གྱི་ངོ་བོར་གྱུར་པའི་ཤེས་རབ་དེ་དོན་དམ་པའི་ཆོས་མངོན་པར་སོང་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་དོན་དམ་པའི་ཆོས་མངོན་པར་སོང་བས་ན་དེ་ལྟ་བུའི་སེམས་སེམས་བྱུང་ཐམས་ཅད་བསམ་གཏན་གྱི་དངོས་གཞི་དང་། དོན་དམ་པའི་ཆོས་མངོན་པའི་གཞི་མཐུན་ཡིན་པ་ལྟ་བུའོ། །གསུམ་པ་ནི། མཐོང་ལམ་དེ་བསམ་གཏན་གྱི་དངོས་གཞི་ལ་བརྟེན་པའི་ཚེ། དེས་བསྡུས་པའི་ཟག་མེད་ཀྱི་སྡོམ་པ་གཟུགས་ཅན་དང་། དེའི་ཐོབ་པ་དང་། མཚན་ཉིད་སྐྱེ་སོགས་ཟག་མེད་རྣམས་བསམ་གཏན་གྱི་དངོས་གཞི་དེ་དང་དུས་མཉམ་རྫས་ཐ་དད་ཡིན་པ་ལྟ་བུའོ། །བཞི་པ་ནི། ཆོས་མངོན་པ་དེ་བསམ་གཏན་ས་དྲུག་ལ་བརྟེན་པའི་ཚེ་ཕུང་པོ་ལྔ་པ་ཡིན་ཏེ། གཟུགས་ཕུང་ནི་ཟག་མེད་ཀྱི་སྡོམ་པ་གཟུགས་ཅན། ཚོར་བ་ནི་བསམ་གཏན་དང་པོའི་དངོས་གཞི་ཙམ་པོ་དང་གཉིས་པ་ལ་བརྟེན་པའི་ཚེ་ཡིད་བདེ། གསུམ་པ་ལ་བརྟེན་པའི་ཚེ་བདེ་བ་དང་པོའི་ཉེར་བསྡོགས་དང་། དངོས་གཞི་ཁྱད་པར་ཅན་དང་། བཞི་པ་ལ་བརྟེན་པའི་ཚེ་གཏང་སྙོམས་ཡིན་ལ། འདུ་ཤེས་ནི་ཟག་མེད་ཀྱི་ཡིད་ཀྱི་འདུས་ཏེ་རེག་པ་ལས་བྱུང་བའི་འདུ་ཤེས་དང་། འདུ་བྱེད་ལ་མཚུངས་ལྡན་འདུ་བྱེད་དང་། ལྡན་མིན་འདུ་བྱེད་གཉིས་ལས། དང་པོ་ནི། ཚོར་འདུ་གཉིས་མ་གཏོགས་སེམས་ཀྱི་ས་མང་བརྒྱད། དགེ་བའི་ས་མང་བཅུ། བསམ་གཏན་དང་པོའི་དངོས་གཞི་ཙམ་པོ་མན་རྟོག་དཔྱོད་གཉིས་དང་ཉི་ཤུ། ལྡན་མིན་འདུ་བྱེད་ནི་དེ་དག་གི་ཐོབ་པ་དང་མཚན་ཉིད་སྐྱེ་སོགས་རྣམས་སོ། །རྣམ་པར་ཤེས་པ་དེ་དག་དང་མཚུངས་པར་ལྡན་པའི་གཙོ་སེམས་སོ། །གཟུགས་མེད་དང་པོ་གསུམ་ལ་བརྟེན་པའི་ཚེ་གཟུགས་ཕུང་མེད་པས་ཕུང་པོ་བཞིའོ། །དེར་ཟག་མེད་ཀྱི་སྡོམ་པའི་ཐོབ་པ་ཡོད་པས་མི་འཐད་དོ་སྙམ་ན། ཟག་མེད་ཀྱི་སྡོམ་པའི་ཐོབ་པ་ཡོད་པ་ནི་འདུ་བྱེད་ཀྱིས་ཕུང་པོ་ཡིན་ལ་སྡོམ་པ་གཟུགས་ཅན་མངོན་གྱུར་པ་མེད་པས་སྐྱོན་མེད་དོ། །ལྔ་པ་ནི། ཟག་མེད་ཀྱི་ཤེས་རབ་གཙོ་བོར་བྱས་ནས་འཁོར་དང་བཅས་ན་ཕུང་པོ་ལྔར་བཞག་པ་ནི་གཙོ་འཁོར་གོ་ལོག་པའི་སྐྱོན་ཡོད་དེ། སེམས་བྱུང་ལ་གཙོ་བོ་དང་གཙོ་སེམས་ལ་འཁོར་དུ་བཞག་འདུག་པའི་ཕྱིར་ཞེ་ན་སྐྱོན་མེད་དེ། སེམས་སེམས་བྱུང་གི་གཙོ་འཁོར་འཇོག་པའི་ཚེ་སེམས་ལ་གཙོ་བོ་དང་སེམས་བྱུང་ལ་འཁོར་དུ་འཇོག་ལ། འདིར་མངོན་པའི་གཙོ་འཁོར་འཇོག་པའི་སྐབས་ཡིན་པས། ཟག་མེད་ཀྱི་ཤེས་རབ་ལ་གཙོ་བོ་དང་། དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་འཁོར་དུ་བཞག་པའི་ཕྱིར། དཔེར་ན་ཡུལ་གྱི་མིའི་གཙོ་འཁོར་འཇོག་པའི་ཚེ་རྒྱལ་པོ་གཙོ་བོ་ཡིན་ཡང་ཡིག་མཁན་གྱི་གཙོ་འཁོར་འཇོག་པའི་ཚེ་ཡིག་དཔོན་གཙོ་བོ་ཡིན་པ་བཞིན་ནོ། །དེ་བཞིན་དུ་དྲན་པ་ཉེར་གཞག་འཇོག་པའི་ཚེ་དྲན་པ་ཤེས་རབ་གཉིས་ལ་གཙོ་བོར་བྱས་ནས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་ལ་འཁོར་དུ་འཇོག་པ་སོགས་དང་། སེམས་བསྐྱེད་ལ་འདུན་པ་དང་སེམས་པ་གཙོ་བོ་དང་གཞན་རྣམས་འཁོར་དུ་གཞག་པའང་ཤེས་པར་བྱའོ། །དྲུག་པ་ནི་ཟག་མེད་ཀྱི་ཤེས་རབ་རྗེས་འབྲང་དང་བཅས་པ་ཆོས་ཅན། ཆོས་མངོན་པ་མཚན་ཉིད་པ་ཡིན་ཏེ། ཆོས་རྣམས་རང་དང་སྤྱིའི་མཚན་ཉིད་མངོན་དུ་གྱུར་པའི་བློ་ཡིན་པའི་ཕྱིར། དེ་དག་གི་ཐོབ་པ་དང་མཚན་ཉིད་སྐྱེ་སོགས་དང་། ཟག་མེད་ཀྱི་སྡོམ་པ་གཟུགས་ཅན་རྣམས་ཆོས་ཅན། དེ་ཡིན་ཏེ། ཟག་མེད་ཀྱི་ཤེས་རབ་དེའི་སྟོབས་ཀྱིས་ཆོས་མངོན་པར་སོང་བའི་ཕྱིར། གཉིས་པ་བརྡར་བཏགས་པའི་ཆོས་མངོན་པ་ལ་མངོན་པ་ཐོབ་པའི་ཕྱིར་དུ་ཞུགས་པ་དང་། དེ་འཐོབ་པར་བྱེད་པའི་ཐབས་བརྗོད་བྱར་སྟོན་པ་གཉིས་ལས། དང་པོ་ནི། དོན་དམ་པའི་ཆོས་མངོན་པ་ཐོབ་པའི་ཕྱིར་ཞུགས་པའི་ཟག་པ་དང་བཅས་པའི་ཤེས་རབ་རྗེས་འབྲང་དང་བཅས་པ་སྟེ། འདི་ལ་ལམ་གང་གིས་བསྡུས་པ། ཁམས་གང་ན་ཡོད་ཅིང་ས་གང་ལ་བརྟེན་པ། འཁོར་དང་བཅས་ན་ཕུང་པོ་དུ་ཡིན་པ། མངོན་པར་བཏགས་པ་བར་འཇོག་པའི་རྒྱུ་མཚན་དང་བཞིའོ། །དང་པོ་ནི། སྐྱེས་ཐོབ། ཐོས་བྱུང་། བསམ་བྱུང་གསུམ་ནི་ལམ་མ་ཞུགས་ནས་སྦྱོར་ལམ་ཆོས་མཆོག་མན་ཆད་ན་ཡོད་ཅིང་། སྒོམ་བྱུང་ནི་ཚོགས་སྦྱོར་ཁོ་ནས་བསྡུས་སོ། །གཉིས་པ་ནི། སྐྱེས་ཐོབ་ནི་ཁམས་གསུམ་ཆར་ན་ཡོད་ཅིང་། སེམས་རྟེན་ས་དགུ་ཀ་ལ་བརྟེན་ཏེ། འདོད་སེམས་ཀྱི་ངོ་བོར་གྱུར་པའི་སྐྱེས་ཐོབ་ཡོད་པ་ནས། སྲིད་རྩེའི་ངོ་བོར་གྱུར་པའི་སྐྱེས་ཐོབ་ཀྱི་ཤེས་རབ་ཀྱི་བར་རྣམས་སུ་ཡོད་པའི་ཕྱིར། ཐོས་བྱུང་ནི་འདོད་གཟུགས་གཉིས་ན་ཡོད་ཀྱི་གཟུགས་མེད་ན་མེད་དེ། སྒྲ་ཉན་པ་མེད་པའི་ཕྱིར་དང་། གང་ཟག་ཕན་ཚུན་ཡུལ་དུ་མི་འགྱུར་བའི་ཕྱིར། སེམས་རྟེན་ནི་འདོད་པ་དང་བསམ་གཏན་དང་པོའི་ཉེར་བསྡོགས་ལ་བརྟེན་ནོ། །བསམ་བྱུང་ནི་འདོད་པ་ཁོ་ནར་ཡོད་དེ། ཁམས་གོང་ན་སེམས་ལོང་མེད་པར་ཏིང་ངེ་འཛིན་དུ་འགྱུར་བའི་ཕྱིར། སེམས་རྟེན་ནི་ཁམས་གསུམ་ས་དགུ་ལ་བརྟེན་ནོ། །སྒོམ་བྱུང་ནི་ཁམས་གསུམ་ཆར་ན་ཡོད་ཅིང་། སེམས་རྟེན་ནི་བསམ་གཏན་དང་པོའི་ཉེར་བསྡོགས་ནས་སྲིད་རྩེའི་བར་བརྒྱད་ལ་བརྟེན་ནོ། །གསུམ་པ་ནི། དང་པོ་གསུམ་ནི་ཕུང་པོ་བཞི་པ་ཅན་ཡིན་ལ། སྒོམ་བྱུང་ནི་ཕུང་པོ་ལྔ་པ་ཅན་ཡིན་ཏེ། བསམ་གཏན་གྱི་སྡོམ་པ་གཟུགས་ཅན་ཡོད་པའི་ཕྱིར། འོ་ན་དང་པོ་གསུམ་ཡང་ཕུང་པོ་ལྔ་པ་ཅན་དུ་འགྱུར་ཏེ། སོ་ཐར་གྱི་སྡོམ་པ་གཟུགས་ཅན་ཡོད་པའི་ཕྱིར་ཞེ་ན། མི་མཚུངས་ཏེ། སོ་ཐར་ནི་སྐྱེས་ཐོབ་སོགས་གསུམ་གྱིས་ཐོབ་པ་མ་ཡིན་པར་ཆོ་གས་ཐོབ་པ་ཡིན་ལ། བསམ་གཏན་གྱི་སྡོམ་པ་ནི་སྒོམ་པའི་སྟོབས་ཀྱིས་ཐོབ་པ་ཡིན་པའི་ཕྱིར། བཞི་པ་ནི། དེ་རྣམས་ཆོས་ཅན། ཆོས་མངོན་པ་ཞེས་བརྗོད་པའི་རྒྱུ་མཚན་ཡོད་དེ། མངོན་པ་མཚན་ཉིད་པ་དེའི་རྒྱུ་ཡིན་པའི་ཕྱིར། བཏགས་པ་ལ་དགོས་པ་ཡོད་དེ། མངོན་པ་མཚན་ཉིད་པ་དེ་ཐོབ་པར་འདོད་པས་ཁྱོད་ལ་འཇུག་དགོས་སོ་ཞེས་ཤེས་པའི་ཆེད་ཡིན་པའི་ཕྱིར། གཉིས་པ་དེ་བརྗོད་བྱར་སྟོན་པ་ལ་བཀའ་དང་བསྟན་བཅོས་གཉིས། འདི་ལ་ཁ་ཅིག་མདོ་སྡེ་པ་ལྟར་ན། སྒྲ་དང་མཚན་པ་དང་། དེ་དག་གི་མཚན་ཉིད་སྐྱེ་སོགས་རྣམས་ལྡན་མིན་འདུ་བྱེད་ཡིན་པས། གཞུང་མངོན་པ་ནི་ཕུང་པོ་གཉིས་པར་འདོད། བྱེ་བྲག་སྨྲ་བས། དེ་དག་མིང་ཡིན་པས་འདུ་བྱེད་ཀྱི་ཕུང་པོར་འདོད་ཅེས་པའང་མི་འཐད་དེ། སྒྲ་རང་མཚན་ལ་ཐོབ་པ་བརྩིར་མེད་པའི་ཕྱིར་དང་། དེ་དག་གི་མཚན་ཉིད་སྐྱེ་སོགས་རྣམས་གཞུང་མངོན་པར་མི་འདོད་པའི་ཕྱིར། ཁ་ཅིག་མངོན་པ་སྡེ་བདུན་གྱི་ནང་ནས་ཡེ་ཤེས་ལ་འཇུག་པ་གཙོ་བོ། གཞན་དྲུག་འཁོར་དུ་འདོད་པ་དང་། གཞན་དག་བཀའ་གཙོ་བོ་དང་། བསྟན་བཅོས་ཕལ་བ་ཞེས་པའང་མི་འཐད་དེ། འདིར་འཁོར་དང་བཅས་ན་ཕུང་པོ་དུ་ཡིན་དཔྱད་པའི་སྐབས་གྱི་གཙོ་འཁོར་ཙམ་དཔྱད་པ་མིན་པའི་ཕྱིར། དེས་ན་གཞུང་མངོན་པ་ནི་བརྗོད་བྱ་དོན་གྱི་མངོན་པ་བརྗོད་བྱར་སྟོན་པའི་བཀའ་བསྟན་བཅོས་གཉིས་ཡིན་ལ། དེ་ཡང་མདོ་སྡེ་པས་ཚིག་ཡིན་པས་གཟུགས་ཕུང་དང་། བྱེ་བྲག་ཏུ་སྨྲ་བས་མིང་ཡིན་པས་འདུ་བྱེད་ཀྱི་ཕུང་པོར་འདོད་དེ། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག །ཚིག་གམ་མིང་ཡིན་དེ་དག་ནི། །གཟུགས་དང་འདུ་བྱེད་དག་ཏུ་བཤད། །ཅེས་གསུངས་པའི་ཕྱིར། བཞི་པ་སྒྲ་དོན་ནི། མདོ་སྡེ་རྒྱན་ལས། མངོན་དུའི་ཕྱིར་དང་ཡང་ཡང་དང་། །ཟིལ་གནོན་རྟོགས་ཕྱིར་མངོན་པའི་ཆོས། །ཞེས་གསུངས་ཏེ། མངོན་པའི་སྐད་དོད་དུ་ཨ་བྷི་ཞེས་འབྱུང་བ་ལ་མུ་ཁ་བསྣན་པས་ཨ་བྷི་མུ་ཁ་ནི་མངོན་དུ་བྱེད་པའི་སྒོ་ཞེས་པ་སྟེ། མྱང་འདས་མངོན་དུ་བྱེད་པའི་སྒོ་ཡིན་པས་མངོན་པ་ཞེས་བྱའོ། །ཀྵ་ཎ་བསྣན་ནས་ཨ་བྷི་ཀྵ་ཎ་ནི་ཡང་ཡང་མངོན་དུ་བྱེད་པ་ཞེས་པ་སྟེ་ཆོས་རེ་རེའང་ཟག་བཅས་ཟག་མེད། ཐོགས་བཅས་ཐོགས་མེད། བསྟན་ཡོད་བསྟན་མེད་སོགས་ཀྱི་སྒོ་ནས་ཡང་ཡང་བསྟན་པས་ན་མངོན་པ་ཞེས་བྱའོ། །བྷུ་ཏ་བསྣན་པས་ཨ་བྷི་བྷུ་ཏ་ནི་མངོན་དུ་ཟིལ་གྱིས་གནོན་པ་ཞེས་པ་སྟེ། གཞུང་འདིའི་ཚིག་དོན་རྒྱ་མཚོ་ལྟ་བུའི་ཕ་རོལ་ཏུ་སོན་པས་ཕས་ཀྱི་རྒོལ་བ་ཟིལ་གྱིས་གནོན་པས་ན་མངོན་པ་ཞེས་བྱའོ། །ས་མ་ཡ་བསྣན་པས་ཨ་བྷི་ས་མ་ཡ་ནི་མངོན་པར་རྟོགས་པ་ཞེས་པ་སྟེ། འདི་ལ་བརྟེན་ནས་མདོ་སྡེའི་སྡེ་སྣོད་མངོན་པར་རྟོགས་པར་བྱེད་པས་ན་མངོན་པ་ཞེས་བྱའོ། །གསུམ་པ་མཛོད་ནི། འདིར་དེའི་དོན་དུ་ཡང་དག་ཆུད་ཕྱིར་རམ། །འདི་ཡི་གནས་དེ་ཡིན་པས་ཆོས་མངོན་མཛོད། །ཅེས་གསུངས་ཏེ། གནས་བརྒྱད་པ་ཅན་གྱི་བསྟན་བཅོས་འདིར་ཆོས་མངོན་པ་སྡེ་བདུན་པོ་ཆུད་པའི་ཕྱིར་ན་འདི་ལ་མཛོད་ཅེས་བྱའོ། །དེ་ཡང་ཚིག་མ་ལུས་པ་ཆུད་པ་མིན་གྱི་དོན་ཡིན་ལ་དོན་གྱི་ཡང་གཅེས་པ་རྣམས་ཆུད་པའི་ཕྱིར་དེ་སྐད་ཅེས་བྱ་སྟེ། རྒྱལ་པོའི་ནོར་གཅེས་པ་ཆུད་པའི་ཁང་པ་ལ་རྒྱལ་པོའི་མཛོད་ཅེས་པ་བཞིན་ནོ། །ཡང་ན་འདི་གང་ནས་ཕྱུང་བའི་གནས་མངོན་པ་སྡེ་བདུན་པོ་དེ་ཡིན་པས་ན་འདི་ལའང་མཛོད་ཅེས་བྱ་སྟེ། རལ་གྲི་གང་ནས་ཕྱུང་བའི་གནས་ཤུབ་ཡིན་པས་རལ་གྲི་ལའང་རལ་གྲིའི་ཤུབ་ཅེས་བརྗོད་པ་བཞིན་ནོ། །མཆིམས་ན་རེ། དེ་ལྟར་དུ་འཇིག་རྟེན་ན་མ་གྲགས་པས་རྒྱལ་པོའི་མཛོད་ནས་བྱུང་བའི་ནོར་ལ་མཛོད་ཅེས་པ་དཔེར་བྱའོ། །ཞེས་གསུངས་མོད། འདི་ལ་སྔ་མ་གྲགས་ཆེ་སྟེ། ཤུབ་དང་བཅས་པའི་རལ་གྲི་ལེན་པར་འདོད་པ་ན། རལ་ཤུབ་འོན་ཅིག་ཅེས་པ་འཇིག་རྟེན་ན་མཐོང་བའི་ཕྱིར་རོ། །བཞི་པ་བསྟན་བཅོས་ལ་ངོ་བོ། ངེས་ཚིག དབྱེ་བ། རྣམ་གྲངས། ལྡང་ཚད། བརྩམ་པའི་དགོས་པ། བརྩམ་པའི་རྒྱུ་དང་བདུན་ལས། དང་པོ་ནི། སྤྱིར་གྲུབ་མཐའ་སྨྲ་བ་བཞི་ཆར་གྱིས་མིང་ཚིག་ཡི་གེའི་ཚོགས་སུ་སྣང་བ་ལ་འདོད་པར་མཚུངས་ལ། ཁྱད་པར་ནི་བྱེ་བྲག་སྨྲ་བས་མིང་ཚིག་ཡི་གེའི་ཚོགས་ཀྱི་བསྡུས་པ། ཡིད་ཀྱི་རྣམ་ཤེས་ཀྱིས་གཟུང་བྱ། ལྡན་པ་མིན་པའི་འདུ་བྱེད། ཕུང་པོ་གཞན་བཞི་ལས་རྫས་གཞན་པ་ཞིག་ལ་འདོད་དེ། དེས་དོན་དངོས་སུ་གོ་བར་བྱེད་པའི་ཕྱིར་ཏེ། རྗོད་བྱེད་ཀྱི་སྒྲ་རང་མཚན་རྣ་བས་ཐོས་པའི་རྗེས་སུ་ཡིད་ཀྱི་རྣམ་ཤེས་ལ་མིང་ཚིག་ཡི་གེའི་རྣམ་པ་སྣང་ཞིང་། དེ་ལས་དོན་དངོས་སུ་གོ་བའི་ཕྱིར། རྗོད་བྱེད་ཀྱི་སྒྲ་རང་མཚན་པ་དང་། ཡིག་འབྲུའི་གཟུགས་རྣམས་བསྟན་བཅོས་བཏགས་པ་བ་ཡིན་ཏེ། འདོགས་པའི་རྒྱུ་མཚན་ནི་དོན་བརྒྱུད་ནས་གོ་བར་བྱེད་པའི་ཕྱིར། བཏགས་པའི་དགོས་པ་ནི་དོན་གོ་བ་ལ་རྗོད་བྱེད་ཀྱི་སྒྲ་རང་མཚན་རྣ་བས་ཉན་པ་དང་། ཡིག་འབྲུ་ལ་མིག་གིས་བལྟ་དགོས་ཞེས་རྟོགས་པའི་ཆེད་ཡིན་པའི་ཕྱིར། དངོས་ལ་གནོད་བྱེད་ནི་དོན་དངོས་སུ་སྟོན་བྱེད་མིན་པའི་ཕྱིར། མདོ་སྡེ་པའི་ལུགས་ནི་ཁ་ཅིག་རྟོགས་པ་ལ་སྣང་བའི་སྒྲ་སྤྱི་ལ་འདོད་པ་ནི་མངོན་པ་སྨྲ་བའི་མདོ་སྡེ་པའི་ལུགས་མིན་ཏེ། དེ་གཟུགས་ཕུང་མི་རུང་བའི་ཕྱིར་རོ། །དེས་ན་འདིའི་ལུགས་ནི་རྗོད་བྱེད་ཀྱི་སྒྲ་རང་མཚན་ཡིན་པས་གཟུགས་ཕུང་དུ་བཤད་ལ། ཚད་མ་སྨྲ་བའི་མདོ་སྡེ་པ་ལྟར་ན་སྔ་མ་ལྟར་འདོད་པས་བསྟན་བཅོས་རྫས་སུ་མ་གྲུབ་པ་ནི་ཁྱད་པར་རོ། །དེའི་རྒྱུ་མཚན་ཡང་བསྟན་བཅོས་དོན་དངོས་སུ་རྗོད་བྱེད་ལ་འདོད་ལ། དངོས་ཀྱི་བརྗོད་བྱ་རྗོད་བྱེད་དོན་སྤྱི་དང་སྒྲ་སྤྱི་ཞེན་པའི་བརྗོད་བྱ་རྗོད་བྱེད་དོན་དང་སྒྲ་རང་མཚན་ལ་འདོད་པའི་ཕྱིར་དང་། རྩོམ་བྱེད་མིང་ཚིག་ཡི་གེ་གསུམ་ཡང་རྫས་སུ་མ་གྲུབ་ན་དེས་བརྩམས་པའི་བསྟན་བཅོས་རྫས་སུ་གྲུབ་པ་འགལ་བའི་ཕྱིར་རོ། །སེམས་ཙམ་པའི་ལུགས་ནི་ཁྱད་པར་བཞི་དང་ལྡན་པ་སྟེ། ངོ་བོའི་ཁྱད་པར་ཡིད་ཤེས་ལ་མིང་ཚིག་ཡི་གེའི་ཚོགས་སུ་སྣང་བའི་རྣམ་རིག རྣམ་པའི་ཁྱད་པར་ཚིགས་བཅད་དམ་ལྷུག་པར་གནས་པ། བྱེད་ལས་ཀྱི་ཁྱད་པར་གདུལ་བྱའི་བློ་གྲོས་གོང་ནས་གོང་དུ་འཕེལ་བར་བྱེད་པ་དང་། རང་རང་གི་འདོད་པའི་དོན་གོ་བར་བྱེད་པ། རྒྱུད་ཀྱི་ཁྱད་པར་ཉན་པ་པོའི་རྒྱུད་ཀྱིས་བསྡུས་པའོ། །འོ་ན་དེ་རྩོམ་པ་པོས་ཅི་ལྟར་བརྩམས་ཤིང་འཆད་པ་པོས་ཇི་ལྟར་འཆད་ཅེ་ན། རྩོམ་པ་པོས་རང་ལ་སྣང་བའི་རྣམ་རིག་དེ་ཉིད་བརྩམས་ཤིང་འཆད་པ་པོས་རང་ལ་སྣང་བའི་རྣམ་རིག་དེ་ཉིད་བཤད་པས་ཉན་པ་པོས་རང་གི་རྣམ་རིག་དེ་ཉིད་གོ་བ་ཡིན་ཏེ། ཉི་ཤུ་པ་ལས། གཅིག་ལ་གཅིག་གི་དབང་གིས་ན། །རྣམ་པར་རིག་པ་ཕན་ཚུན་འགྱུར། །ཞེས་དང་། འབྲི་ལ་སོགས་པའི་ཡིད་དབང་གིས། །དྲན་པ་ཉམས་སོགས་འགྱུར་བ་བཞིན། །ཞེས་སོ། །གཉིས་པ་ངེས་ཚིག་ནི། བསྟན་བཅོས་ཀྱི་སྐད་དོད་དུ། ཤཱསཏྲ་ཞེས་པ་ཡོད་ལ། ཤཱ་ས་ནི་འཆོས་པ་སྟེ། གདུལ་བྱའི་སེམས་རྒྱུད་བསླབ་པ་གསུམ་ལྡན་དུ་འཆོས་པ་དང་། ཏཱ་ར་ནི་སྒྲོལ་བའམ་སྐྱོབ་པ། དེ་ངན་འགྲོ་དང་སྲིད་པའི་སྡུག་བསྔལ་ལས་སྐྱོབ་པ་སྟེ། དེ་སྐད་དུ་རྣམ་བཤད་རིགས་པར། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོ་སྲིད་ལས་སྐྱོབ་བྱེད་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་སྟེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་གསུངས་སོ། །གསུམ་པ་རབ་ཏུ་དབྱེ་བ་ནི། གཏན་ལ་དབབ་པ་བསྡུ་བ་ལས་མིང་གི་སྒོ་ནས་དགུ་དང་། རྫས་ཀྱི་སྒོ་ནས་གསུམ་དུ་གསུངས་པ་ལས། དང་པོ་ནི། དོན་མེད་དོན་ལོག་དོན་དང་ལྡན། །ངན་གཡོ་བརྩེ་བྲལ་སྡུག་བསྔལ་སྤངས། །ཐོས་རྩོད་སྒྲུབ་པ་ལྷུར་ལེན་པ། །བསྟན་བཅོས་དྲུག་བྲལ་གསུམ་དུ་འདོད། །ཅེས་པའོ། །གཉིས་པ་ནི། དགུ་པོ་དེ་དག་ཀྱང་ཕྱི་རོལ་པའི་རིག་བྱེད་ཀྱི་གསང་ཚིག་སྙན་ནས་སྙན་དུ་བརྒྱུད་པ་དང་། སངས་རྒྱས་པ་དང་རྩོད་པ་སྨྲ་བའི་བསྟན་བཅོས་དང་། སངས་རྒྱས་པའི་ཐར་པ་ཐོབ་པ་དང་རྗེས་སུ་མཐུན་པའི་བསྟན་བཅོས་གསུམ་དུ་འདུས་པར་གསུངས་སོ། །བཞི་པ་རྣམ་གྲངས་ནི། སློབ་མའི་སེམས་རྒྱུད་འཆོས་པར་བྱེད་པས་ན་བསྟན་བཅོས་དང་། མདོའི་དོན་གསལ་བར་བྱེད་པས་ན་མདོ་སྡེའི་རྒྱན་དང་། སྐབས་སུ་བབ་པའི་དོན་གསལ་བར་བྱེད་པས་ན་རབ་ཏུ་བྱེད་པ་ཞེས་བྱ་བ་ནི་རྣམ་གྲངས་ཡིན་ལ། འོན་ཀྱང་མདོ་སྡེའི་རྒྱན་ནི་བསྟན་བཅོས་བྱེ་བྲག་དང་། རབ་ཏུ་བྱེད་པ་ནི་བསྟན་བཅོས་ཀྱི་ནང་ཚན་ལ་འཇུག་པ་ཡང་ཡོད་དོ། །ལྔ་པ་ལྡང་ཚད་ནི། ཡི་གེ་དུ་མ་འདུས་པ་ལས་མིང་། མིང་དུ་མ་འདུས་པ་ལས་ཚིག ཚིག་དུ་མ་འདུས་པ་ལས་ཕུང་ཁམས་སྐྱེ་མཆེད་རེ་རེ་རྫོགས་པར་སྟོན་པ་ནི་རབ་བྱེད། དེ་གསུམ་ཆར་རྫོགས་པར་སྟོན་པ་ནི་བསྟན་བཅོས། ཡང་ན་ཅི་ལྟ་བ་དང་ཅི་སྙེད་པ་གང་རུང་རེ་རེ་རྫོགས་པར་སྟོན་པ་ནི་རབ་བྱེད་དང་། གཉིས་ཀ་རྫོགས་པར་སྟོན་པ་ནི་བསྟན་བཅོས་སོ། །ཡང་ན་དམིགས་པའི་རབ་དབྱེ། སྤང་བྱའི་ཉོན་མོངས། སྤོང་བྱེད་ཀྱི་གཉེན་པོ། སྤོང་བའི་གང་ཟག སྤངས་པའི་འབྲས་བུ་རྣམས་ལས་གང་རུང་རེ་རེ་རྫོགས་པར་སྟོན་པ་ནི་རབ་བྱེད་དང་། དེ་ཐམས་ཅད་རྫོགས་པར་སྟོན་པ་ནི་བསྟན་བཅོས་སོ། །བསྟན་བཅོས་འདི་ལ་དོན་གསུམ་ཆར་ཚང་ངོ་། །དྲུག་པ་བརྩམས་པའི་དགོས་པ་ནི། གཏན་ལ་དབབ་པ་བསྡུ་བ་ལས། །དོན་མང་མོས་འཇུག་ཉམས་པ་གསོ། །འཐོར་སྡུད་ཟབ་དགྲོལ་མཛེས་པ་བསྐྱེད། །ཅེས་དྲུག་གསུངས་པ་ལས་དོན་མང་བ་ནི་བསྟན་བཅོས་བརྩམས་པ་ལ་བརྟེན་ནས་ཡི་གེ་འབྲི་མཆོད་སྦྱིན་པ་ལ་སོགས་ཆོས་སྤྱོད་བཅུའི་མང་པོ་འབྱུང་བའོ། །མོས་འཇུག་ནི་དེ་ལ་བརྟེན་ནས་གདུལ་བྱ་མོས་པ་རྣམས་འཇུག་པའོ། །ཉམས་པ་གསོ་བ་ནི་བཀའ་གང་གི་དགོངས་འགྲེལ་དུ་བཤད་པ་ལས་གང་ཟག་གི་ཆ་རྐྱེན་ཉམས་པ་གསོ་བའོ། །འཐོར་བ་སྡུད་པ་ནི་བཀའ་གང་གི་དོན་དུ་བཤད་པ་ལས་བརྗོད་བྱའི་དོན་ཕྱོགས་གཅིག་ཏུ་བསྡུ་བར་འོས་པ་རྣམས་འཐོར་ནས་གནས་པ་ཕྱོགས་གཅིག་ཏུ་བསྡུ་བའོ། །ཟབ་མོ་དགྲོལ་བ་ནི། ཕ་དང་མ་ནི་གསད་བྱ་ཞིང་། །རྒྱལ་པོ་གཙང་སྦྲ་ཅན་གཉིས་དང་། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་པའི་དོན། ལས་དང་སྲེད་པ་སྤང་བྱ་ཞིང་། །སྦྱོར་བའི་རྣམ་ཤེས་མཆོག་འཛིན་གཉིས། །སྐྱེ་མཆེད་སྤྱོད་ཡུལ་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་པར་འཆད་པ་ལྟ་བུའི་བཀའི་ནང་དུ་དོན་གཞན་དུ་བསྒྱུར་ནས་འཆད་དགོས་པ་རྣམས་བསྟན་བཅོས་ཀྱིས་ཀྱང་འཆད་པའོ། །དྲུག་པ་མཛེས་པ་བསྐྱེད་པ་ནི། བསྟན་བཅོས་སུ་སྙན་ངག་དང་ཚིག་རྒྱན་ལ་སོགས་པ་བཀོད་པས་ཚིག་དང་དོན་མཛེས་པར་འགྱུར་བའོ། །དེ་ལྟར་དྲུག་ལས་ཁ་ཅིག་བསྟན་བཅོས་འདི་ལ་དང་པོ་གསུམ་ཚང་བ་དང་། གཞན་དག་དྲུག་ཆར་ཚང་བར་བཞེད་ཀྱང་། ཉམས་པ་གསོ་བ་དང་། ཟབ་མོ་དགྲོལ་བ་གཉིས་ཚང་བར་དཀའ་ཞིང་། གཞན་བཞི་ཆར་ངེས་པར་ཚང་ངོ་། །བདུན་པ་བརྩམ་པའི་རྒྱུ་ནི། ཚིག་དོན་ཕྱིན་ཅི་མ་ལོག་པར་རྟོགས་པའི་ཤེས་རབ་དང་སྙིང་རྗེ་ནི་རྒྱུའི་གཙོ་བོ་ཡིན་ནོ། །ཡང་ན་གཏན་ལ་དབབ་པ་བསྡུ་བ་ལས་སྔོན་གྱི་སློབ་དཔོན་ལ་ང་མི་རྒྱལ་བ་དང་། རང་གི་གྲགས་པ་མི་སྒྲོགས་པ་དང་། ཆོས་མཐུན་ལ་བྱམས་པ་དང་། སེམས་ཅན་ལ་སྙིང་བརྩེ་བ་བཞི་དང་ལྡན་ན་བསྟན་བཅོས་བརྩམས་པར་གསུངས་པ་ལྟར་རོ། །བཞི་པ་མཚན་ལྡན་གཞུང་གི་དགོས་འགྲེལ་ནི། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ། །དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ། །ཞེས་པས་བསྟན་ཏེ། འདི་ལ་དགོས་སོགས་ཆོས་བཞི་ངོས་གཟུང་བ་དང་། དེ་གཞུང་གིས་ཇི་ལྟར་བསྟན་པའི་ཚུལ་གཉིས་ལས། དང་པོ་ནི། བརྗོད་བྱའི་གཙོ་བོ་ནི་ལྷག་པ་ཤེས་རབ་ཀྱི་བསླབ་པ་སྟེ། ཆོས་མངོན་པའི་སྡེ་སྣོད་རྣམས་ཀྱིས་ལྷག་པ་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་ཕྱིར་རོ། །ཟག་བཅས་ཟག་མེད་ཀྱི་ཆོས་གཞན་རྣམས་ནི་བརྗོད་བྱ་ཙམ་ཡིན་ཏེ། ལྷག་པ་ཤེས་རབ་ཀྱི་བསླབ་པ་གཏན་ལ་འབེབས་པ་ལ་དེའི་ཡུལ་གཏན་ལ་དབབ་དགོས་པས་དེའི་སྒོ་ནས་བརྗོད་བྱར་འགྱུར་བའི་ཕྱིར་རོ། །དགོས་པ་ནི་བསྟན་བཅོས་འདི་ལ་བརྟེན་ནས་སྐྱེས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་བོ། །ཉིང་དགོས་ནི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཉམས་སུ་བླངས་པ་ལ་བརྟེན་ནས་ཟག་མེད་ཀྱི་ཤེས་རབ་ཀྱི་ཉོན་མོངས་སྤངས་པའི་མྱང་འདས་སོ། །འབྲེལ་པ་ནི་སྤྱི་དང་མཐུན་ནོ། །གཉིས་པ་ནི། ཆོས་རྣམས་ཞེས་པས་བརྗོད་བྱ་ཙམ་དངོས་སུ་བསྟན་ནས། བརྗོད་བྱའི་གཙོ་བོ་དོན་གྱིས་བསྟན་ནོ། །དགོས་པ་ནི། རབ་ཏུ་རྣམ་འབྱེད་ཅེས་དང་། དེ་ཕྱིར་ཞེས་པས་བསྟན་ཏེ། ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་པའི་ཆེད་དུ་འདི་བརྩམ་པར་བསྟན་པའི་ཕྱིར་རོ། །ཉིང་དགོས་ནི། མེད་པར་ཞེས་པ་ནས་དེ་བས་ཞེས་པའི་བར་གྱིས་བསྟན་ཏེ། དངོས་སུ་ཆོས་རབ་ཏུ་རྣམ་འབྱེད་ཀྱི་ཤེས་རབ་མེད་པར་ཉོན་མོངས་སྤོང་བའི་ཐབས་མེད། ཉོན་མོངས་མ་སྤངས་ན་འཁོར་བར་འཁྱམས་པ་བསྟན་ནས་ཤུགས་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་ཉོན་མོངས་དང་འཁོར་བ་སྤངས་པའི་མྱང་འདས་ཐོབ་པར་བསྟན་པའི་ཕྱིར། འབྲེལ་པ་ནི། མེད་པར་ཞེས་པས་བསྟན་ཏེ། དངོས་སུ་དགོས་པ་མེད་པར་ཉིང་དགོས་མི་འབྱུང་བར་བསྟན་ནས་ཤུགས་ལ་བསྟན་བཅོས་དང་། བརྗོད་བྱ་དང་། དགོས་པ་དང་། ཉིང་དགོས་རྣམས་སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་འབྱུང་བར་བསྟན་པའི་ཕྱིར་རོ། །ལྔ་པ་དགོས་ལྡན་བསྟན་བཅོས་སྤྱིའི་རྣམ་གཞག་ལ། གནས་བརྒྱད་ཀྱི་གྲངས་ངེས་དང་། གོ་རིམ་ངེས་པ་གཉིས་ལས། དང་པོ་ལ་སྔ་རབས་པ་རྣམས་ཆོས་མངོན་པ་མཛོད་ཀྱི་གནས་དེ་ལ་བརྒྱད་དུ་གྲངས་ངེས་ཏེ། ཐར་པ་དོན་གཉེར་གྱི་གང་ཟག་གི་ཆ་རྐྱེན་ལ་དམིགས་པའི་ཡུལ། ཉམས་ལེན་གྱི་སྤྱོད་པ། ཉམས་སུ་བླངས་པའི་འབྲས་བུ་གསུམ་དུ་ངེས་ཤིང་། དེ་དག་སྟོན་པ་ལ་གནས་བརྒྱད་ལས་མང་མི་དགོས་ཤིང་ཉུང་ན་མི་འདུ་བའི་ཕྱིར། གང་ཟག་གི་ཆ་རྐྱེན་ལ་གསུམ་པོ་དེར་ངེས་ཏེ། ཡུལ་མ་བསྟན་ན་ཉམས་སུ་ལེན་མི་ཤེས། ཉམས་སུ་མ་བླངས་ན་འབྲས་བུ་མི་ཐོབ། འབྲས་བུ་མེད་ན་ཉམས་སུ་ལེན་པ་དགོས་པ་མེད་པའི་ཕྱིར་རོ། །གསུམ་པོ་དེ་དག་གནས་བརྒྱད་ཀྱིས་ཅི་ལྟར་སྟོན་ན། དམིགས་པའི་ཡུལ་ལ་ཅི་སྙེད་པ་དང་ཅི་ལྟ་བ་གཉིས་ལས། དང་པོ་ནི། ཕུང་ཁམས་སྐྱེ་མཆེད་ཡིན་ལ། དེ་ནི་གནས་དང་པོས་བསྟན། དེའི་ནང་ནས་འདུས་བྱས་ཆོས་ཀྱི་ནང་ཚན། དེ་དག་སྐྱེ་ཚུལ་རྣམས་གཉིས་པས་བསྟན། ཅི་ལྟ་བ་ནི་འཕགས་པའི་བདེན་པ་བཞི་ཡིན་ལ། དེ་ལ་སྡུག་བསྔལ་གྱི་བདེན་པ་ནི། སེམས་ཅན་སྐྱེ་བ་དང་སྐྱེ་བའི་གནས་ཀྱིས་བསྡུས་པ་ཡིན་པས་གནས་གསུམ་པས་བསྟན། ཀུན་འབྱུང་བདེན་པ་ནི་ཟག་བཅས་ཀྱི་ལས་དང་། ཉོན་མོངས་པ་ཡིན་པས་གནས་བཞི་པ་དང་ལྔ་པས་བསྟན། འགོག་བདེན་དང་ལམ་བདེན་སོ་སོར་བརྟགས་པས་འགོག་པ་གང་ཞེ་ན། ཟག་མེད་ལམ་གྱི་བདེན་པ་དང་། །ཞེས་པས་བསྟན། ཡང་ན་འགོག་བདེན་ནི་ཕྲ་རྒྱས་ཀྱི་མཇུག་ཏུ་ཡོངས་ཤེས་དང་། ལམ་བདེན་ནི། བདེན་པ་མཐོང་དང་སྒོམ་པ་ལས། །ཞེས་པའི་མཐོང་སྒོམ་གཉིས་ཀྱིས་བསྟན་ལ། བདེན་པ་བཞི་ཆར་ཡང་དེའི་བདེན་པ་ཞེས་པའི་ཚིག་གིས་བསྡུས་ནས་བསྟན་ཏོ། །ཉམས་ལེན་གྱི་སྤྱོད་པ་ནི། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པའི་ཚུལ་གྱིས་གནས་དྲུག་པས་བསྟན། འབྲས་བུ་ཟག་མེད་ཀྱི་ཡེ་ཤེས་ནི་གནས་བདུན་པས། ཡོན་ཏན་གྱི་ཁྱད་པར་འགའ་ཞིག་ནི་གནས་བརྒྱད་པས་བསྟན་ཏོ་ཞེས་བཞེད་དོ། །གང་སྤེལ་གྱིས། ཟག་བཅས་ཟག་པ་མེད་ཆོས་རྣམས། །ཞེས་པའི་ཚུལ་གྱིས་འདིའི་བརྗོད་བྱའི་གཙོ་བོ་ནི་ཟག་བཅས་ཟག་མེད་ཀྱི་ཆོས་གཉིས་ཡིན་ཏེ། ཐར་པ་དོན་གཉེར་གྱི་བླང་དོར་གྱི་གཙོ་བོ་ནི། དོར་བྱ་ཉོན་མོངས་ཀྱི་ཆོས་དང་། བླང་བྱ་རྣམ་བྱང་གི་ཆོས་གཉིས་སུ་ཡོད་པའི་ཕྱིར། དེ་གཉིས་སོ་སོར་མི་ཕྱེ་བར་ཐུན་མོང་དུ་སྟོན་པ་ནི་གནས་དང་པོ་གཉིས་ཏེ། ཕུང་ཁམས་སྐྱེ་མཆེད་དང་། དབང་པོ་ཉེར་གཉིས་མཚུངས་ལྡན་འདུ་བྱེད་འདུས་བྱས་ཀྱི་ཆོས་ཀྱི་སྐྱེ་ཚུལ་རྣམས་ནི་ཉོན་མོངས་དང་རྣམ་བྱང་ཐུན་མོང་གི་ཆོས་ཡིན་པའི་ཕྱིར། སོ་སོར་སྟོན་པ་ལ་ཀུན་ནས་ཉོན་མོངས་པ་ནི། གང་ཀུན་ནས་ཉོན་མོངས་ན་འགྲོ་བ་རིས་ལྔ། གང་དུ་ན་སྣོད་ཀྱི་འཇིག་རྟེན་དུ། ཚུལ་ཇི་ལྟར་ན་རྟེན་འབྲེལ་བཅུ་གཉིས་དང་། སྐྱེ་གནས་བཞིའི་ཚུལ་གྱིས་སོ་ཞེས་པ་ནི་གནས་གསུམ་པས་བསྟན། གང་གིས་ཀུན་ནས་ཉོན་མོངས་ན་ཟག་བཅས་ཀྱི་ལས་དང་། ཉོན་མོངས་ཀྱིས་སོ་ཞེས་པ་ནི་བཞི་པ་དང་ལྔ་པས་སྟོན། རྣམ་བྱང་གི་ཆོས་ལ་གང་རྣམ་པར་བྱང་ན་ཞུགས་གནས་བརྒྱད། གང་དུ་ན། འདོད་པ་གསུམ་ཐོབ་ཐ་མ་ནི། །གསུམ་དུ་འོ་ཞེས་པའི་ཚུལ་གྱིས་ཁམས་གསུམ་དུ། ཚུལ་ཅི་ལྟར་ན། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པའི་ཚུལ་གྱིས་སོ་ཞེས་པ་ནི་གནས་དྲུག་པས་བསྟན་ནོ། །གང་གི་རྣམ་པར་བྱང་ན་ཟག་མེད་ཀྱི་ཡེ་ཤེས་དང་། དེའི་སེམས་རྟེན་སྙོམས་འཇུག་གིས་སོ་ཞེས་པ་ནི་གནས་བདུན་པ་དང་བརྒྱད་པས་བསྟན་ཏོ་ཞེས་བཞེད་དོ། །འོན་ཀྱང་ཐེག་པ་གསུམ་གྱི་ལམ་བགྲོད་ཚུལ་དང་སྦྱར་ན་འདི་ལྟར་ཡིན་ཏེ། སྤྱིར་བྱེ་བྲག་ཏུ་སྨྲ་བའི་ལུགས་ལ། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པའི་ཚུལ་གྱིས། བདེན་པ་མཐོང་དང་གོམས་པ་ལས། །ཞེས་པའི་སྐབས་ཀྱི་མཐོང་སྒོམ་གྱི་ལམ་གཉིས་བསྐྱེད་དེ། ཉོན་མོངས་སྤངས་པ་ཞེས་བཤད་པ་ཞེས་པའི་སྐབས་ཀྱི་མཐོང་སྤང་ཉོན་མོངས་དང་། སྒོམ་སྤང་ཉོན་མོངས་སྤངས་ནས་མི་སློབ་ལམ་ཐོབ་པ་ནི་ཐེག་པ་གསུམ་གྱི་ལམ་བགྲོད་ཚུལ་ཐུན་མོང་བ་ཡིན་ལ། དེ་དག་གི་ཁྱད་པར་སྟོན་པ་ལ་གནས་བརྒྱད་དུ་ངེས་ཏེ། དེ་ལ་དམིགས་པ་ཡུལ་གྱི་ཁྱད་པར། སྤང་བྱ་སྒྲིབ་པའི། བགྲོད་བྱེད་གང་ཟག་གི བགྲོད་ཚུལ་ལམ་གྱི། ཉམས་ལེན་སྤྱོད་པའི། འབྲས་བུ་ཐོབ་དུས་ཀྱི། ཐོབ་འབྲས་ཡོན་ཏན་གྱི་ཁྱད་པར་དང་བདུན་ལས། དང་པོ་ནི། ཉན་ཐོས་དང་རང་སངས་རྒྱས་རྣམས་ཀྱི་དམིགས་ཡུལ་ཁམས་གསུམ་སྣོད་བཅུད་ཀྱི་འཇིག་རྟེན་སྡུག་བསྔལ་དུ་ཤེས་པ་ཙམ་གྱིས་གྲོལ་བ་ཐོབ་པས་དེ་ནི་གནས་གསུམ་པས་བསྟན། ཐེག་པ་ཆེན་པོ་པས་དེའི་སྟེང་དུ་ཡང་ཇི་སྙེད་པ་མཁྱེན་པ་ཡེ་ཤེས་ཀྱི་རྒྱུར་ཕུང་ཁམས་སྐྱེ་མཆེད་ཀྱི་རབ་དབྱེ་མ་ལུས་པ་ཤེས་དགོས་ལ། དེ་ནི་གནས་དང་པོ་གསུམ་གྱིས་བསྟན། གཉིས་པ་ནི། ཉན་ཐོས་དང་རང་སངས་རྒྱས་ཀྱི་སྤང་བྱ་ཟག་བཅས་ཀྱི་ལས་དང་ཉོན་མོངས་པ་སྤངས་པ་ཙམ་གྱིས་བྱང་ཆུབ་ཐོབ་པས་དེ་ནི་གནས་བཞི་པ་དང་ལྔ་པས་བསྟན། ཐེག་ཆེན་གྱི་བྱང་ཆུབ་ཐོབ་པ་ལ་ཉོན་མོངས་ཅན་མ་ཡིན་པའི་མུན་པ་ཡང་སྤང་དགོས་པས་དེ་ནི་ཕུང་ཁམས་སྐྱེ་མཆེད་ཀྱི་ཤུགས་ལ་བསྟན་པའམ། མཆོད་བརྗོད་ཀྱིས་དངོས་སུ་བསྟན་ནོ། །གསུམ་པ་ནི། ཐེག་པ་ཆེན་པོ་དང་རང་རྒྱལ་ནི་ཚོགས་ལམ་གྱི་གནས་སྐབས་སུ་ཚོགས་ཐམས་ཅད་ཡོངས་སུ་རྫོགས་པར་བྱས་ནས་སྲིད་པ་ཐ་མ་པའི་དུས་སུ་དྲོད་ནས་མི་སློབ་ལམ་གྱི་བར་གྱི་རྟོགས་པ་རྣམས་བསམ་གཏན་བཞི་པ་ལ་བརྟེན་ནས་སྟན་ཐོག་གཅིག་ལ་བགྲོད་པས་ཞུགས་གནས་ཀྱི་རྣམ་གཞག་མེད་ལ། ཉན་ཐོས་ཀྱི་དེ་ལྟར་བྱེད་མི་ནུས་པས་ཞུགས་གནས་ཀྱི་རྣམ་པར་བཞག་པ་ཡོད་ཅིང་། དེ་ནི་གནས་དྲུག་པའི་གང་ཟག་བསྟན་པས་བསྟན། བཞི་པ་ནི་དབུགས་དབྱུང་རྔུབ་དང་མི་སྡུག་པ་སྒོམ་པ་ལ་བརྟེན་ནས་དང་པོར་ཞི་གནས་བསྐྱེད། དེ་ནས་ལྷག་མཐོང་དྲན་པ་ཉེར་གཞག་བསྐྱེད་ནས་ཚོགས་རྫོགས་པར་བྱེད་པ་ནི་ཐེག་པ་གསུམ་ཀའི་ལམ་བགྲོད་ཚུལ་ཐུན་མོང་བ་ཡིན་ལ། དྲི་མ་དང་བྲལ་བའི་ཁྱད་པར་ནི་ཉན་ཐོས་རྣམས་ཀྱིས་མཐོང་ལམ་ཐོབ་རྗེས་སུ་ཡང་འདོད་པར་སྐྱེ་སྲིད་བཅུ་བཞི་ལེན་པ་དང་། གཟུགས་སུ་བཅུ་དྲུག་ལེན་པ་དང་། གཟུགས་མེད་དུ་བཞི་ལེན་པ་སོགས་ཡོད་ཅིང་། བསེ་རུ་ལྟ་བུའི་རང་སངས་རྒྱས་དང་ཐེག་ཆེན་པ་རྣམས་དྲོད་ནས་མི་སློབ་ལམ་གྱི་བར་སྟན་གཅིག་ལ་བསྐྱེད་པས་མཐོང་ལམ་ཐོབ་རྗེས་སུ་དེ་ལྟ་བུའི་སྐྱེ་བ་ལེན་ཚུལ་གྱི་དབྱེ་བ་མེད་ལ། དེ་ནི་གནས་དྲུག་པའི་ལམ་བསྟན་པས་བསྟན་ནོ། །ལྔ་པ་ནི་ལུས་འདུ་འཛི་ལས་བསྲིང་བ་དང་། སེམས་རྣམ་རྟོག་ལས་བསྲིང་བ་སྟེ་བསྲིང་བ་གཉིས་དང་། བསོད་སྙོམས་དང་། གནས་མལ་དང་། ཆོས་གོས་ངན་ངོན་ཙམ་གྱིས་ཆོག་ཤེས་པ་དང་། སྤང་བ་དང་སྒོམ་པ་ལ་དགའ་བའི་སྤྱོད་པ་ནི་ཐེག་པ་གསུམ་ཆར་གྱི་ཐུན་མོང་གི་ཉམས་ལེན་སྤྱོད་པ་ཡིན་ལ། དེ་ནི་གནས་དྲུག་པར། བསྲིང་གཉིས་ལྡན་ཆོག་མི་ཤེས་དང་། །ཞེས་པས་བསྟན་ཏོ། །ཐེག་པ་ཆེན་པོ་པས་དེའི་སྟེང་དུ་ཡང་བསྐལ་པ་གྲངས་མེད་གསུམ་དུ་སངས་རྒྱས་འབྱུང་བ་མཉེས་པར་བྱེད་ཅིང་། མགོ་དང་རྐང་ལག་གཏོང་བ་སོགས་སྦྱིན་སོགས་ཕར་ཕྱིན་བཅུ་རྫོགས་པར་བྱེད་ཅིང་། འཚང་རྒྱ་བ་ལ་བསྐལ་པ་བརྒྱ་ལུས་པའི་ཚེ་བྱང་ཆུབ་སེམས་དཔའ་ངེས་གནས་སུ་གྱུར་པ་ནས་ཕྱིར་མི་ལྡོག་པའི་བྱང་སེམས་ཚོགས་ལམ་པ་དེས་མཚན་གྱི་རྒྱུ་སྒྲུབ་པར་བྱེད་ལ། དེ་ནི་གནས་བཞི་པར། གང་ནས་བྱང་ཆུབ་སེམས་དཔའ་ཡིན། །ཞེས་སོགས་ཀྱིས་བསྟན་ཏོ། །དྲུག་པ་ནི། ཉན་ཐོས་རྟོག་པ་བུལ་བས་ནི། སངས་རྒྱས་འོད་སྲུང་གི་བསྟན་པ་ལ་ལམ་དུ་ཞུགས། ཤཱཀྱ་ཐུབ་པའི་བསྟན་པ་ལ་དགྲ་བཅོམ་ཐོབ་པ་དག་ཀྱང་ཡོད་ལ། བརྩོན་འགྲུས་མྱུར་བས་ཚེ་གསུམ་ལ་དགྲ་བཅོམ་ཐོབ་པ་ཡང་ཡོད། རང་སངས་རྒྱས་ནི་ཚོགས་ལམ་གྱི་གནས་སྐབས་སུ་བསྐལ་པ་བརྒྱར་ཚོགས་བསགས་ནས་དྲོད་ནས་མི་སློབ་ལམ་གྱི་བར་སྟན་ཐོག་གཅིག་ལ་མངོན་དུ་བྱེད། ཐེག་ཆེན་པས་ནི་ཚོགས་ལམ་དུ་བསྐལ་པ་གྲངས་མེད་གསུམ་དུ་ཚོགས་བསགས་ནས་དྲོད་ནས་མི་སློབ་ལམ་གྱི་བར་སྟན་ཐོག་གཅིག་ལ་མངོན་དུ་བྱེད་པ་ཡིན་ལ། དེ་དག་ནི། མྱུར་བ་སྲིད་པ་གསུམ་གྱིས་ཐར། །ཞེས་དང་། བསེ་རུ་བསྐལ་པ་བརྒྱ་ཡི་རྒྱུས། །ཞེས་དང་། དེ་གྲངས་མེད་གསུམ་ལ་སངས་རྒྱས། །ཞེས་སོགས་ཀྱིས་བསྟན་ཏོ། །བདུན་པ་ནི། སྒོམ་ལམ་རྡོ་རྗེ་ལྟ་བུའི་རྗེས་སུ་ཟད་མི་སྐྱེ་ཤེས་ཀྱི་ཡེ་ཤེས་མངོན་དུ་བྱེད་པ་ནི་ཐེག་པ་གསུམ་ཆར་གྱི་བྱང་ཆུབ་ཐོབ་ཚུལ་ཐུན་མོང་བ་ཡིན་ལ། དེ་ནི། དེ་ཟད་ཐོབ་དང་ཟད་པར་ཤེས། །དེ་ཚེ་དེ་མི་སློབ་དགྲ་བཅོམ། །ཞེས་དང་། གནས་བདུན་པའི་ཟད་མི་སྐྱེ་ཤེས་ཀྱི་ཡེ་ཤེས་སྟོན་པའི་གཞུང་རྣམས་ཀྱིས་སྟོན་ཏོ། །ཡོན་ཏན་དེ་ལ་ཤེས་པས་བསྡུས་པ་དང་། མ་བསྡུས་པ་གཉིས། དང་པོ་ལ། ཐུན་མོང་དང་། ཐུང་མོང་མ་ཡིན་པ་གཉིས། དང་པོ་ནི། ཉོན་མོངས་མེད་པ་དང་། སྨོན་གནས་མཁྱེན་པ་དང་། སོ་སོར་ཡང་དག་རིག་པ་བཞི་དང་། མངོན་ཤེས་དྲུག་སོགས་ཡིན་ལ། དེ་ནི་གནས་བདུན་པས་སྟོན་ཅིང་། གཉིས་པ་ནི། སྟོབས་བཅུ། མི་འཇིགས་པ་བཞི། དྲན་པ་ཉེ་བར་བཞག་པ་གསུམ། ཐུགས་རྗེ་ཆེན་པོ་སྟེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡིན་ལ། དེ་ཡང་གནས་བདུན་པས་སྟོན། ཤེས་པས་མ་བསྡུས་པའི་ཡོན་ཏན་ནི། བསམ་གཏན་བཞི། གཟུགས་མེད་བཞི། རྣམ་ཐར། ཟད་པར། ཟིལ་གནོན་རྣམས་ཡིན་ལ། དེ་ནི་གནས་བརྒྱད་པས་སྟོན་ནོ། །དེ་ལྟར་ན་ཐེག་པ་གསུམ་གྱི་ལམ་བགྲོད་ཚུལ་ཐུན་མོང་བ་དང་། ཐུན་མོང་མ་ཡིན་པའི་རྣམ་གཞག་སྟོན་པའི་དབང་དུ་བྱས་ནས་བརྒྱད་དུ་ངེས་པ་ཡིན་ནོ། །གཉིས་པ་གོ་རིམ་ངེས་པ་ནི། ཐོག་མར་དོན་གཉིས་ཕུན་ཚོགས་མངའ་བའི་སངས་རྒྱས་ལ། །གང་ཞིག་ཀུན་ལ་མུན་པ་གཏན་བཅོམ་ཞིང་། །ཞེས་སོགས་རྐང་པ་གསུམ་གྱིས་མཆོད་པར་བརྗོད་ནས་ལས་སུ་བྱ་བ་ཅི་བྱེད་ཞེ་ན། ཆོས་མངོན་མཛོད་ཀྱི་བསྟན་བཅོས་རབ་བཤད་བྱ། །ཞེས་བཤད་པར་དམ་བཅས་པའོ། །ཅིའི་ཕྱིར་ཆོས་མངོན་མཛོད་ཅེས་བྱ་ཞེ་ན། ཆོས་མངོན་ཤེས་རབ་དྲི་མེད་རྗེས་འབྲང་བཅས། །ཞེས་སོགས་ཤླཽ་ཀ་གཅིག་གིས་ཆོས་མངོན་པ་དང་མཛོད་ཀྱི་སྒྲ་དོན་བསྟན་ནོ། །འོ་ན་ཆོས་མངོན་པ་དེ་དགོས་པ་གང་གི་ཆེད་དུ་ཐོག་མར་སུ་ཞིག་གིས་གསུངས་པ་ཡིན་ཞེ་ན། ཉོན་མོངས་པ་སྤང་བའི་ཕྱིར་དུ་དང་པོར་སྟོན་པ་སངས་རྒྱས་ཀྱིས་གསུངས་སོ། །ཞེས་པ་ནི། ཆོས་རྣམས་རབ་ཏུ་རྣམ་འབྱེད་མེད་པར། །ཞེས་སོགས་ཤླཽ་ཀ་གཅིག ཆོས་རྣམས་རབ་ཏུ་རྣམ་འབྱེད་ཅེས་པའི་འབྱེད་རྒྱུའི་ཆོས་དེ་གང་ཞེ་ན། ཟག་བཅས་ཟག་མེད་ཀྱི་ཆོས་གཉིས་སོ་ཞེས་པ་ནི། ཟག་བཅས་ཟག་པ་མེད་ཆོས་ཞེས་པས་བསྟན། ཟག་བཅས་ཟག་མེད་ཀྱི་མཚན་གཞི་དང་། ཟག་མེད་ཀྱི་ནང་གསེས་ཀྱི་དབྱེ་བ་དང་བཅས་པ་ནི། ལམ་མ་གཏོགས་པའི་འདུས་བྱས་རྣམས། །ཞེས་སོགས་རྐང་པ་བཅུ་གཅིག་གིས་བསྟན། ལམ་མ་གཏོགས་པའི་འདུས་བྱས་རྣམས། །ཞེས་པའི་འདུས་བྱས་དེ་གང་ཞེ་ན། གཟུགས་སོགས་ཕུང་པོ་ལྔ་པོ་ཞེས་ཕུང་པོ་གཙོ་བོར་སྟོན་ཅིང་། ཞར་ལ་ཁམས་དང་སྐྱེ་མཆེད་རྣམས་ཀྱང་སྟོན་པས་ཕུང་ཁམས་སྐྱེ་མཆེད་གསུམ་སྟོན་པ་ནི། འདུས་བྱས་ཆོས་རྣམས་དེ་དག་ཀྱང་། །ཞེས་པ་ནས་གནས་དང་པོ་རིལ་གྱིས་སོ། །གནས་དང་པོར། བཅུ་གཉིས་ནང་གིར་བཤད་དབང་པོར། །ཞེས་དབང་པོའི་མིང་ཙམ་དང་། འདུས་བྱས་ཆོས་ཀྱི་རྣམ་བཞག་རྒྱས་པར་བཤད་ཀྱང་། དེ་དག་གི་སྐྱེ་ཚུལ་དང་། རྒྱུ་རྐྱེན་འབྲས་བུ་དང་བཅས་པ་མ་བསྟན་པས་དབང་པོའི་རྣམ་བཞག་དང་འདུས་བྱས་ཀྱི་སྐྱེ་ཚུལ་དང་། རྒྱུ་རྐྱེན་འབྲས་བུ་དང་བཅས་པ་རིམ་པ་བཞིན་སྟོན་པ་ནི་གནས་གཉིས་པའོ། །གནས་དང་པོར་ཁམས་ཀྱི་རྣམ་པའི་རབ་དབྱེའི་སྐབས་སུ་ཁམས་གསུམ་གྱིས་བསྡུས་ཚུལ་དང་། གནས་གཉིས་པར་དབང་པོ་ཉེར་གཉིས་དང་མཚུངས་ལྡན་འདུ་བྱེད་ཀྱི་སྐབས་སུ་ཡང་ཁམས་གསུམ་གྱིས་བསྡུས་ཚུལ་དང་། དེ་མ་ཐག་རྐྱེན་གྱི་སྐབས་སུ་ཁམས་གསུམ་གྱིས་བསྡུས་པའི་ཤེས་པ་བཅུ་དང་། ཟག་མེད་ཀྱི་ཤེས་པ་གཉིས་ཏེ་ཤེས་པ་བཅུ་གཉིས་གང་གི་མཇུག་ཐོག་ཏུ་གང་འབྱུང་བ་གསུངས་ཀྱང་སྡུད་བྱེད་ཁམས་གསུམ་གྱི་རྣམ་བཞག་མ་གསུངས་པས་དེ་དག་རྒྱས་པར་སྟོན་པ་ནི་གནས་གསུམ་པའོ། །གནས་གསུམ་པར། བདག་མེད་ཕུང་པོ་ཙམ་ཉིད་དོ། །ཞེས་བྱེད་པ་པོའི་བདག་མེད་པར་གསུངས་ཤིང་། སྣོད་བཅུད་ཀྱི་འཇིག་རྟེན་གྱི་རྣམ་བཞག་གསུངས་པ་ལ་ཕྱི་རོལ་པ་ཁ་ཅིག བྱེད་པ་པོའི་བདག་མེད་པ་མི་འཐད་དེ། སྣོད་བཅུད་ཀྱི་འཇིག་རྟེན་བདག་གིས་བྱས་པའི་ཕྱིར། ཞེས་དང་། ཁ་ཅིག་གཙོ་བོས་བྱས་པ་དང་། ཁ་ཅིག་དབང་ཕྱུག་གིས་བྱས་པ་དང་། ཁ་ཅིག་རྒྱུ་མེད་དུ་བྱུང་ཞེས་འདོད་པ་བསལ་ནས་ཟག་བཅས་ཀྱི་ལས་ལས་བྱུང་བར་སྟོན་པ་ནི་གནས་བཞི་པའོ། །ལས་དེ་ཉིད་གང་ལས་བྱུང་ཞེ་ན། ཕྲ་རྒྱས་ལས་བྱུང་ཞེས་པ་ནི་གནས་ལྔ་པའོ། །ཕྲ་རྒྱས་བསྟན་པའི་ཐོག་མར་མཐོང་སྤང་དང་སྒོམ་སྤང་གི་རྣམ་བཞག་དང་། མཇུག་ཏུ་སྤྱིར་གཉེན་པོས་སྤོང་ཚུལ་དང་། སྤངས་པའི་འབྲས་བུ་ཡང་ཤེས་བསྟན་པ་ལས་འཕྲོས་ནས། གཉེན་པོ་མཐོང་སྒོམ་གྱི་རང་བཞིན་དེའི་དམིགས་ཡུལ་བདེན་པ་བཞི་དང་། བདེན་པ་གཉིས་ཀྱི་རྣམ་གཞག་དང་། ལམ་དེ་ལ་འཇུག་པའི་ཚུལ་དང་། དེ་ལ་གནས་པའི་གང་ཟག་གི་རྣམ་གཞག་དང་། དེའི་ཐོབ་བྱ་འབྲས་བུའི་རྣམ་གཞག་རྣམས་རིམ་པ་བཞིན་སྟོན་པ་ནི་གནས་དྲུག་པའོ། །གནས་དྲུག་པར་བཟོད་པ་དང་། ཤེས་པ་དང་ལྟ་བ་ཞེས་པ་མང་དུ་གསུངས་པ་ལས་འཕྲོས་ནས་བཟོད་ཤེས་ལྟ་བའི་ཁྱད་པར་དང་། བྱེ་བྲག་ཏུ་ཤེས་པ་ལ་བཅུར་དབྱེ་བ་དང་། ཤེས་པས་བསྡུས་པའི་ཐུན་མོང་དང་ཐུན་མོང་མ་ཡིན་པའི་ཡོན་ཏན་སྟོན་པ་ནི་གནས་བདུན་པའོ། །དེ་དག་ལས་འཕྲོས་ནས་འོ་ན་ཤེས་པས་མ་བསྡུས་པའི་ཡོན་ཏན་ཡང་ཡོད་དམ་ཞེ་ན། ཤེས་པས་མ་བསྡུས་པའི་ཡོན་ཏན་ནི་བསམ་གཏན་བཞི། གཟུགས་མེད་བཞི། ཚད་མེད་བཞི། རྣམ་ཐར། ཟད་པར། ཟིལ་གནོན་རྣམས་ཡིན་ནོ་ཞེས་པ་ནི་གནས་བརྒྱད་པས་བསྟན་ཏོ། །དཔལ་ཤེས་རབ་གྲགས་ཀྱིས་སྦྱར་བ་ལས་འདི་ལྟར་འབྱུང་སྟེ། ཐར་པ་འདོད་ཉིད་ལ། །ཐར་པ་ཐོབ་བྱ་ནི། །ཕྲ་རྒྱས་སྤང་དགོས་ཏེ། །ཕྲ་རྒྱས་སྤོང་བ་ལ། །གཉེན་པོ་ལམ་བསྐྱེད་འཚལ། །གཉེན་པོ་ལམ་བསྐྱེད་ལ། །དམིགས་ལ་རྟེན་བསྐྱེད་པས། །དམིགས་པ་ཤེས་པར་བྱ། །དམིགས་པ་རྣམ་གཉིས་ཏེ། །ཟག་བཅས་ཟག་མེད་ཆོས། །དེ་ཉིད་བསྟན་པའི་ཕྱིར། །ཕུང་པོ་སྐྱེ་མཆེད་དང་། །ཁམས་རྣམས་རབ་སྟོན་པའི། །མཛོད་ཉིད་དང་པོར་བསྟན། །ཁམས་བསྟན་མཛོད་ཉིད་ལས། །དབང་པོའི་མིང་ཙམ་སྨོས། །དེ་ཡི་དབྱེ་བ་དག །རྒྱས་པར་དཔྱད་ཕྱིར་དང་། །གཞན་ཡང་དེ་ཉིད་ལས། །འདུས་བྱས་ཆོས་རྣམས་ཀྱི། །མཚན་ཉིད་སོ་སོར་བསྟན། །དེ་དག་སྐྱེ་བའི་ཚུལ། །རྒྱུ་དང་རྐྱེན་རྣམས་དང་། །འབྲས་བུར་བཅས་པ་དག །རབ་ཏུ་བསྟན་པའི་ཕྱིར། །དབང་པོ་བསྟན་པའི་མཛོད། དེ་ཡི་འོག་ཏུ་བསྟན། །དབང་པོའི་མཛོད་ཉིད་ལས། །ཁམས་གསུམ་ངེས་པ་ཡི། །སེམས་དང་སེམས་བྱུང་དང་། །དབང་པོའི་དབྱེ་བ་བྱས། །ཁམས་གསུམ་མ་བསྟན་པས། །དེ་ཉིད་བསྟན་པའི་ཕྱིར། །འཇིག་རྟེན་བསྟན་པའི་མཛོད། །དེ་ཡི་འོག་ཏུ་བསྟན། །མུ་སྟེགས་ལོག་རྟོག་ཀྱིས། །སེམས་ཅན་འདི་ལྟར་རྟོག །གལ་ཏེ་བསྐྱེད་པའི་རྒྱུ། །བདག་ཅིག་ཡོད་ལྟ་ན། །ཕྱི་ནང་སྣོད་བཅུད་ཀྱི། །འཇིག་རྟེན་སྣ་ཚོགས་དག །དེ་ལས་སྐྱེ་འགྱུར་ན། །བྱེད་པའི་བདག་མེད་ན། །དེ་དག་ཅི་ལས་སྐྱེ། །སྙམ་དུ་ཐེ་ཚོམ་ཟ། །དེ་ཕྱིར་དེ་དག་གི །ཐེ་ཚོམ་བསལ་ཕྱིར་དང་། །མངོན་པས་མདོ་འཆད་པས། །མདོ་ལས་བྱུང་བ་ཡི། །ལས་རྣམས་བསྟན་པའི་ཕྱིར། །ཤུན་བཅས་འབྲས་སོགས་ཀྱིས། །འདུལ་བ་ལས་བསྟན་མཛོད། །དེ་ཡི་འོག་ཏུ་བསྟན། །དེ་དག་དེ་ལྟ་བུའི། །ལས་དེའི་རྣམ་སྨིན་གྱིས། །ཡང་སྲིད་ཕྱི་མ་ཡི། །རྣམ་སྨིན་འགྲུབ་ངེས་པ། །ཕྲ་རྒྱས་དབང་གིས་བྱུང་། །དེ་བས་ཕྲ་རྒྱས་ཀྱི། །མཚན་ཉིད་བསྟན་པའི་ཕྱིར། །ཀླུ་ལ་སོགས་པ་དང་། །འདྲ་བའི་ཕྲ་རྒྱས་མཛོད། །དེ་ཡི་འོག་ཏུ་བསྟན། །ཕྲ་རྒྱས་མཛོད་ཉིད་ལས། །བདེན་པ་རྣམ་བཞིའི་དོན། །མཐོང་དང་སྒོམ་པ་ཡིས། །མཐོང་སྤང་སྒོམ་སྤང་གཉིས། །རིམ་བཞིན་སྤོང་བར་བཤད། །མཐོང་སྒོམ་ལམ་ཉིད་ཀྱི། །རང་བཞིན་མ་བསྟན་པས། །དེ་ཉིད་བསྟན་པའི་ཕྱིར། །གང་ཟག་བསྟན་པའི་མཛོད། །དེ་ཡི་འོག་ཏུ་བསྟན། །ལམ་དང་གང་ཟག་དག །བསྟན་པའི་མཛོད་ཉིད་ལས། །ཤེས་པ་རྣམ་བཞི་བཤད། །དེ་ཡི་དབྱེ་བ་དག །རྒྱས་པར་བཤད་པའི་ཕྱིར། །ཡེ་ཤེས་བསྟན་པའི་མཛོད། །དེ་ཡི་འོག་ཏུ་བསྟན། །ཡེ་ཤེས་མཛོད་ཉིད་ལས། །དེ་བཞིན་གཤེགས་པ་ལ། །ཡོན་ཏན་རྣམ་གཉིས་བསྟན། །ཐུན་མོང་ཡོན་ཏན་དང་། །ཐུན་མོང་མ་ཡིན་པའོ། །ཐུན་མོང་ཡོན་ཏན་ནི། །ཉོན་མོངས་མེད་སྨོན་ཤེས། །སོ་སོ་ཡང་དག་པར། །རིག་པ་རྣམ་བཞི་དང་། །མངོན་པར་ཤེས་པ་དང་། །བསམ་གཏན་གཟུགས་མེད་དང་། །ཚད་མེད་རྣམ་ཐར་དང་། །ཟད་པར་ལ་སོགས་པ། །དེ་དག་བསྟན་པའི་ཕྱིར། །སྙོམས་འཇུག་བསྟན་པའི་མཛོད། །དེ་ཡི་འོག་ཏུ་བསྟན། །ཞེས་སོ། །བཤད་པ་སྔོན་འགྲོ་རྒྱ་སྟག་ཁྲ་བོའི་གཞུང་རིས་བཤད་ཟིན་ཏོ།། །།ད་ནི་དཀྱུས་ཀྱི་ས་བཅད་པ་རུས་སྦལ་རྒྱ་བོའི་བཞི་འགྲོས་བཤད་པར་བྱ་སྟེ། འདི་ལ་གསུམ། སྒྱུར་བྱེད་དམ་པའི་ཀླད་ཀྱི་དོན། །རྩོམ་བྱེད་དམ་པའི་གཞུང་གི་དོན། །བསྒྱུར་བ་མཐར་ཕྱིན་མཇུག་གི་དོན་ཏོ། །དང་པོ་ལ་གཉིས། མཚན་གྱི་དོན།་་་་་རྒྱ་གར། འགྱུར་གྱི་ཕྱག་གོ་་་་་འཇམ་དཔལ། །གཉིས་པ་ལ་གསུམ་སྟེ། གཞུང་དོན་ལ་འཇུག་པའི་ཡན་ལག གཞུང་དོན་ཆོས་མངོན་པའི་ཡུལ་བཤད་པ། གཞུང་དོན་ཡོངས་སུ་རྫོགས་པའི་བྱ་བའོ། །དང་པོ་ལ་བཞི་སྟེ། མཆོད་པར་བརྗོད་པ།་་་་་གང་ཞིག བཤད་པར་དམ་བཅའ་བ།་་་་་ཆོས་མངོན། བཤད་བྱའི་མཚན་དོན། མཚན་ལྡན་གཞུང་གི་དགོས་འབྲེལ་ལོ། །གསུམ་པ་ལ་གཉིས་ཏེ། ཆོས་མངོན་པའི་དོན།་་་་་ཆོས་མངོན། མཛོད་ཀྱི་དོན།་་་་་འདིར་དེ། བཞི་པ་ལ་གཉིས་ཏེ། དགོས་འབྲེལ་དངོས།་་་་་ཆོས་རྣམས། དང་པོར་སུས་བསྟན་པའོ།་་་་་འདི་ནི། །གཉིས་པ་གཞུང་དོན་ཆོས་མངོན་པའི་ཡུལ་བཤད་པ་ལ་གཉིས་ཏེ། མདོར་བསྟན།་་་་་ཟག་བཅས། རྒྱས་པར་བཤད་པའོ། །འདི་ལ་གསུམ། ཟག་བཅས་བཤད།་་་་་ལམ་མ། ཟག་མེད་བཤད། དེ་དག་གཏན་ལ་དབབ་པའོ། །གཉིས་པ་ལ་གཉིས། ཟག་མེད་སྤྱིར་བསྟན།་་་་་ཟག་མེད། འདུས་མ་བྱས་བྱེ་བྲག་ཏུ་བཤད་པའོ།་་་་་དེ་ལ། །གསུམ་པ་ལ་གནས་བརྒྱད་ལས། དང་པོ་ཁམས་བསྟན་པའི་གནས་ལ་གསུམ་སྟེ། འདུས་བྱས་ཕུང་པོར་བསྟན་པ་རྣམ་གྲངས་དང་བཅས་པ། ཕུང་ཁམས་སྐྱེ་མཆེད་རྒྱས་པར་བཤད་པ། ཁམས་ཀྱི་རྣམ་པའི་རབ་དབྱེ་བཤད་པའོ། །དང་པོ་ལ་གཉིས་ཏེ། དབྱེ་བ།་་་་་འདུས་བྱས། རྣམ་གྲངས་སོ། །འདི་ལ་གཉིས་ཏེ། འདུས་བྱས་སྤྱིའི་རྣམ་གྲངས།་་་་་དེ་དག བྱེ་བྲག་ཟག་བཅས་ཀྱི་རྣམ་གྲངས་སོ།་་་་་གང་དག །གཉིས་པ་ལ་ལྔ་སྟེ། ཕུང་པོ་གཙོ་བོར་བྱས་པའི་ཆོས་གསུམ་གྱི་རྣམ་བཞག ཆོས་གསུམ་སོ་སོའི་སྒྲ་དོན།་་་་་སྤུང་དང་། ཆོས་གསུམ་བསྟན་པའི་དགོས་པ།་་་་་རྨོངས་དབང་། དེ་དག་ངེས་པའི་རྒྱུ་མཚན། མིང་ཅན་གཞན་ཡང་དེར་བསྡུ་བའོ། །དང་པོ་ལ་གསུམ་སྟེ། སོ་སོར་བཤད་པ། གསུམ་དུ་བསྡུ་བ།་་་་་ཕུང་པོ། མིག་ལ་སོགས།་་་་་ཁམས་མང་བར་ཐལ་བ་སྤང་བའོ། །དང་པོ་ལ་གསུམ་སྟེ། གཟུགས་ཕུང་གཙོ་བོར་བྱས་པའི་ཆོས་གསུམ། ཕུང་པོ་བར་པ་གསུམ་གཙོ་བོར་བྱས་པའི་ཆོས་གསུམ། རྣམ་ཤེས་ཀྱི་ཕུང་པོ་གཙོ་བོར་བྱས་པའི་ཆོས་གསུམ་མོ། །དང་པོ་ལ་གཉིས་ཏེ། གཟུགས་ཕུང་གི་ངོ་བོ། དབང་དོན།་་་་་དེ་ལས་ཕྱུངས་ཏེ་གཟུགས་ཅན་གྱི་ཁམས་དང་སྐྱེ་མཆེད་དུ་བཞག་པའོ། །དང་པོ་ལ་གཉིས་ཏེ། མདོར་བསྟན།་་་་་གཟུགས་ནི། རྒྱས་པར་བཤད་པའོ། །འདི་ལ་གསུམ་སྟེ། དབང་པོ་ལྔ་མཚན་ཉིད་ཀྱི་སྒོ་ནས་བཤད།་་་་་དེ་དག དོན་ལྔ་དབྱེ་བའི་སྒོ་ནས་བཤད།་་་་་གཟུགས་རྣམས། རིགས་བྱེད་མིན་པ་ངོ་བོའི་སྒོ་ནས་བཤད་པའོ། །འདི་ལ་གཉིས་ཏེ། དངོས་ཀྱི་དོན།་་་་་གཡེངས་དང་། ཞར་ལ་རྒྱུ་འབྱུང་བ་བཤད་པའོ། །འདི་ལ་བཞི་སྟེ། དབྱེ་བ།་་་་་འབྱུང་བ། བྱེད་ལས།་་་་་འཛིན་པ། མཚན་ཉིད།་་་་་སྲ་གཤེར། འབྱུང་བ་དང་ཁམས་ཀྱི་ཁྱད་པར་རོ།་་་་་འཇིག་རྟེན་གྱི། །གཉིས་པ་ལ་གཉིས་ཏེ། ཕུང་པོ་བར་པ་གསུམ་གྱི་ངོ་བོ།་་་་་ཚོར་བ། དེ་གསུམ།་་་་་དེ་དག་གཞན་དང་བཅས་ཏེ་ཆོས་ཀྱི་ཁམས་དང་སྐྱེ་མཆེད་དུ་བཞག་པའོ། །གསུམ་པ་ལ་གཉིས་ཏེ། རྣམ་ཤེས་ཀྱི་ཕུང་པོའི་ངོ་བོ།་་་་་རྣམ་ཤེས། དེ་ལས་ཕྱུངས་ཏེ་སེམས་ཀྱི་སྐྱེ་མཆེད་དང་ཁམས་སུ་བཞག་པའོ།་་་་་ཡིད་ཀྱི། །བཞི་པ་དེ་དག་ངེས་པའི་རྒྱུ་མཚན་ལ་བཞི་སྟེ། སེམས་བྱུང་ལས་ཚོར་འདུ་ཕུང་པོ་ལོགས་སུ་སྟོན་པའི་རྒྱུ་མཚན།་་་་་རྩོད་པའི། འདུས་མ་བྱས་ཕུང་པོར་མི་འཇོག་པའི་རྒྱུ་མཚན།་་་་་ཕུང་པོ། ཕུང་ཁམས་སྐྱེ་མཆེད་ཀྱི་གོ་རིམ་ངེས་ཚུལ། གཟུགས་དང་ཆོས་ཀྱི་སྐྱེ་མཆེད་གཉིས་བྱེ་བྲག་ལ་བཞག་པའི་རྒྱུ་མཚན་ནོ།་་་་་བྱེ་བྲག །གསུམ་པ་ལ་གཉིས་ཏེ། ཕུང་པོའི་གོ་རིམ།་་་་་རིམ་ནི། སྐྱེ་མཆེད་དང་ཁམས་ཀྱི་གོ་རིམ་མོ།་་་་་ད་ལྟའི། །ལྔ་པ་མིང་ཅན་གཞན་ཡང་དེར་བསྡུ་བ་ལ་གསུམ་སྟེ། ཕུང་པོའི་མིང་ཅན་ཕུང་པོར་བསྡུ་བ། ཕུང་ཁམས་སྐྱེ་མཆེད་ཀྱི་མིང་ཅན་གཞན་ཡང་བསྡུ་བ།་་་་་དེ་བཞིན། ཞར་ལ་ཁམས་གཉིས་ཀྱི་ངོ་བོའོ།་་་་་བུ་ག །དང་པོ་ལ་གཉིས་ཏེ། ཆོས་ཕུང་གཟུགས་དང་འདུ་བྱེད་དུ་བསྡུ་བ།་་་་་ཆོས་ཀྱི། ཞར་ལ་ཆོས་ཕུང་གི་ཚད་བསྟན་པའོ།་་་་་ཁ་ཅིག །གསུམ་པ་ཁམས་ཀྱི་རྣམ་པའི་རབ་དབྱེ་བཤད་པ་ལ་བདུན་ཏེ། གཉིས་ཚན། གསུམ་ཚན། བཅས་མ་བཅས། གཟུགས་ཅན་གྱི་དབྱེ་བ། བྱུང་བ་གསུམ། ཐོབ་པའི་ཁྱད་པར།་་་་་མིག་དང་། ཕྱི་ནང་ལ་སོགས་པའི་དབྱེ་བའོ། །དང་པོ་ལ་གཉིས་ཏེ། བསྟན་ཡོད་བསྟན་མེད།་་་་་བསྟན་ཡོད། ཐོགས་བཅས་ཐོགས་མེད་དོ།་་་་་ཐོགས་དང་། །གཉིས་པ་ལ་གཉིས་ཏེ། དགེ་སོགས་གསུམ་གྱི་ཁྱད་པར།་་་་་ལུང་མ། ཁམས་གསུམ་གྱི་ཁྱད་པར་རོ།་་་་་འདོད་ཁམས། །གསུམ་པ་ལ་གསུམ་སྟེ། ཟག་བཅས་ཟག་མེད།་་་་་དེ་གསུམ། རྟོགས་བཅས་དཔྱོད་བཅས།་་་་་རྟོགས། དམིགས་བཅས་དམིགས་མེད་དོ།་་་་་དམིགས་བཅས། །བཞི་པ་ལ་བཞི་སྟེ། ཟིན་མ་ཟིན།་་་་་མ་ཟིན། འབྱུང་བ་འབྱུང་འགྱུར།་་་་་རེག་བྱ། བསགས་མ་བསགས།་་་་་གཟུགས་ཅན། གཅོད་བྱེད་གཅད་བྱ་སོགས་སོ།་་་་་གཅོད་བྱེད། །ལྔ་པ་ལ་གཉིས་ཏེ། སྤྱིར་བཏང་།་་་་་རྣམ་སྨིན། དམིགས་ཀྱིས་བསལ་བའོ།་་་་་རྫས་དང་། །བདུན་པ་ཕྱི་ནང་སོགས་ཀྱི་དབྱེ་བ་ལ་བདུན། ཕྱི་ནང་གི་དབྱེ་བ།་་་་་ནང་གི རྟེན་བཅས་དེ་མཚུངས།་་་་་ཆོས་ཞེས། མཐོང་སྤང་སོགས་ཀྱི་བྱེ་བྲག ལྟ་བ་ལྟ་མིན་གྱི་བྱེ་བྲག རྣམ་ཤེས་གང་གིས་ཤེས་པར་བྱ་བ།་་་་་གཉིས་ཀྱི། རྟག་མི་རྟག་གི་དབྱེ་བ།་་་་་འདུས་མ། དབང་པོ་ཡིན་མིན་གྱི་དབྱེ་བའོ།་་་་་གང་དག །གསུམ་པ་ལ་གཉིས་ཏེ། དངོས་དང་།་་་་་བཅུ་ནི། རྩོད་པ་སྤང་བའོ།་་་་་ཉོན་མོངས། །བཞི་པ་ལ་གཉིས་ཏེ། དངོས་དང་།་་་་་མིག་དང་། དེ་ལས་འཕྲོས་པའོ། །འདི་ལ་བདུན་ཏེ། སྒོ་ལྔའི་ཤེས་པ་ལྟ་བར་འདོད་པ་དགག་་་་་རྣམ་ཤེས། རྟེན་བཅས་ཀྱི་མིག་ལྟ་བར་བསྒྲུབ།་་་་་མིག་གིས། དབང་པོས་ཡུལ་འཛིན་པའི་ཚུལ། རྟེན་གྱི་དུས་ངེས་པ།་་་་་ཐ་མའི། དབང་པོ་རྟེན་དུ་འཇོག་པའི་ཚུལ།་་་་་དེ་དག དབང་ཤེས་བརྟེན་པར་འདོད་པའི་རྒྱུ་མཚན།་་་་་དེ་ཕྱིར། རྟེན་སོགས་བཞིའི་ས་མཚུངས་པའི་ཁྱད་པར་རོ། །གསུམ་པ་ལ་གསུམ་སྟེ། མིག་གཉིས་ཀས་མཐོང་བ།་་་་་མིག་ནི། ཕྲད་མ་ཕྲད་ཀྱི་འཛིན་ཚུལ།་་་་་མིག་དང་། མཉམ་མི་མཉམ་གྱི་འཛིན་ཚུལ་ལོ།་་་་་སྣ་ལ་སོགས། །བདུན་པ་ལ་བཞི་སྟེ། མིག་སོགས་བཞིའི་ཁྱད་པར།་་་་་ལུས་ལ། རྣ་བའང་དེ་དང་མཐུན་པར་བསྟན་པ།་་་་་རྣ་བའང་། སྣ་སོགས་གསུམ་གྱི་ངེས་པ།་་་་་གསུམ་ངག ཡིད་མ་ངེས་པར་བསྟན་པའོ།་་་་་ཡིད་མ། །གཉིས་པ་དབང་པོ་བསྟན་པ་ལ་གསུམ་སྟེ། སྐབས་དོན་དབང་པོའི་རང་བཞིན། འདུས་བྱས་ཆོས་ཀྱི་སྐྱེ་ཚུལ། སྐྱེད་བྱེད་རྒྱུ་རྐྱེན་འབྲས་བུ་དང་བཅས་པའོ། །དང་པོ་ལ་དྲུག་སྟེ། དབང་པོའི་རྣམ་གཞག རྣམ་པའི་རབ་དབྱེ། རྙེད་པའི་ཚུལ།་་་་་འདོད་པར། གཏོང་བའི་ཚུལ།་་་་་གཟུགས་མེད། དགེ་སྦྱོང་ཚུལ་གྱི་འབྲས་བུ་དབང་པོ་དུས་འཐོབ་པ།་་་་་འབྲས་བུ། དབང་པོའི་ལྡན་ཚུལ་ལོ། །དང་པོ་ལ་གསུམ་སྟེ། དབང་སྒྱུར་བའི་སྒོ་ནས་ངོ་བོ་བཤད། དབང་བསྒྱུར་བྱའི་སྒོ་ནས་གྲངས་ངེས་བཤད། སྐབས་སུ་བབ་པའི་དབང་པོ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། བྱེ་བྲག་ཏུ་སྨྲ་བའི་ལུགས།་་་་་ལྔ་པོ། མདོ་སྡེ་པའི་ལུགས་སོ།་་་་་རང་གི །གཉིས་པ་ལ་གཉིས་ཏེ། བྱེ་བྲག་ཏུ་སྨྲ་བའི་ལུགས།་་་་་སེམས་ཀྱི། ཡང་ན།་་་་་མདོ་སྡེ་པའི་ལུགས་སོ། །གསུམ་པ་ལ་གཉིས་ཏེ། ཚོར་བ་ལྔའི་ངོ་བོ།་་་་་ལུས་ཚོར། དྲི་མེད་གསུམ་གྱི་ངོ་བོའོ།་་་་་མཐོང་སྒོམ། །གཉིས་པ་ལ་དྲུག་སྟེ། ཟག་བཅས་ཟག་མེད།་་་་་གསུམ་ནི། རྣམ་སྨིན་ཡིན་མིན།་་་་་སྲོག་ནི། རྣམ་སྨིན་དང་བཅས་མ་བཅས།་་་་་དེ་གཅིག་ནི། དགེ་སོགས་གསུམ་གྱི་ཁྱད་པར།་་་་་དགེ་བ། ཁམས་གསུམ་གྱི་ཁྱད་པར།་་་་་དྲི་མེད། སྤང་བྱ་དང་སྤང་བྱ་མ་ཡིན་པའི་དབྱེ་བའོ།་་་་་ཡིད་དང་། །དྲུག་པ་ལ་གསུམ་སྟེ། ངེས་ལྡན་་་་་་བཏང་སྙོམས། ཉུང་ལྡན།་་་་་དགེ་མེད། མང་ལྡན་ནོ།་་་་་མང་པོར། །གཉིས་པ་འདུས་བྱས་ཆོས་ཀྱི་སྐྱེ་ཚུལ་ལ་གཉིས་ཏེ། གཟུགས་ཅན་གྱི་སྐྱེ་ཚུལ་དང་།་་་་་འདོད་ན། གཟུགས་ཅན་མ་ཡིན་པའི་སྐྱེ་ཚུལ་ལོ། །འདི་ལ་གཉིས་ཏེ། མདོར་བསྟན།་་་་་སེམས་དང་། རྒྱས་པར་བཤད་པའོ། །འདི་ལ་གཉིས་ཏེ། སེམས་དང་མཚུངས་ལྡན་གྱི་སྐྱེ་ཚུལ། མི་ལྡན་པའི་འདུ་བྱེད་ཀྱི་སྐྱེ་ཚུལ་ལོ། །དང་པོ་ལ་བཞི་སྟེ། ངེས་པ་ལས་བརྩམས་པའི་སྡེ་ཚན། མ་ངེས་པ་དང་བཅས་པའི་མཚུངས་ལྡན། གཅིག་པ་ལྟ་བུའི་ཐ་དད། ཐ་དད་ལྟ་བུའི་གཅིག་པའོ།་་་་་སེམས་དང་། །དང་པོ་ལ་གཉིས་ཏེ། མདོར་བསྟན།་་་་་སེམས་བྱུང་། རྒྱས་པར་བཤད་པའོ། །འདི་ལ་ལྔ་སྟེ། སེམས་ཀྱི་ས་མང་པོ་པ།་་་་་ཚོར་དང་། དགེ་བའི་ས་མང་པོ་པ།་་་་་དད་དང་། ཉོན་མོངས་པའི་ས་མང་པོ་པ།་་་་་རྨོངས་དང་། མི་དགེ་བའི་ས་མང་པོ་པ།་་་་་མི་དགེ ཉོན་མོངས་ཆུང་ངུའི་ས་པའོ།་་་་་ཁྲོ་བ། །གཉིས་པ་ལ་གཉིས་ཏེ། འདོད་པའི་མཚུངས་ལྡན།་་་་་འདོད་པའི། ཁམས་གོང་མའི་མཚུངས་ལྡན་ནོ།་་་་་དེ་ལས། །གསུམ་པ་ལ་བཞི་སྟེ། ངོ་ཚ་མེད་པ་དང་ཁྲེལ་མེད་ཀྱི་ཁྱད་པར།་་་་་མ་གུས། དགའ་བ་དང་གུས་པའི་ཁྱད་པར།་་་་་དགའ་བ། རྟོག་པ་དང་དཔྱོད་པའི་ཁྱད་པར།་་་་་རྟོག་དང་། ང་རྒྱལ་དང་རྒྱགས་པའི་ཁྱད་པར་རོ།་་་་་ང་རྒྱལ། །གཉིས་པ་མི་ལྡན་པའི་འདུ་བྱེད་ལ་གསུམ་སྟེ། མདོར་བསྟན།་་་་་མི་ལྡན། རྒྱས་པར་བཤད་པ། ཆོས་ཀྱི་ཁྱད་པར་གཞན་བསྟན་པས་མཇུག་བསྡུ་བའོ།་་་་་དེ་བཞིན། །གཉིས་པ་ལ་བདུན་ཏེ། ཐོབ་མ་ཐོབ། སྐལ་མཉམ།་་་་་སྐལ་མཉམ། འདུ་ཤེས་མེད་པ།་་་་་འདུ་ཤེས། སྙོམས་འཇུག་གཉིས། སྲོག་་་་་སྲོག མཚན་ཉིད།་་་་་མཚན་ཉིད། མིང་གི་ཚོགས་ལ་སོགས་པ་རྒྱས་པར་བཤད་པའོ། །དང་པོ་ལ་གསུམ་སྟེ། ཐོབ་མ་ཐོབ་ཀྱི་ངོ་བོ།་་་་་ཐོབ་དང་། དེ་དག་གང་གི་ཡིན་པ།་་་་་ཐོབ་དང་། དེ་དག་གི་ཆོས་ཀྱི་ཁྱད་པར་རོ། །འདི་ལ་གཉིས་ཏེ། ཐོབ་པའི་ཆོས་ཀྱི་ཁྱད་པར།་་་་་དུས་གསུམ། མ་ཐོབ་པའི་ཆོས་ཀྱི་ཁྱད་པར་རོ།་་་་་མ་ཐོབ། །བཞི་པ་ལ་གཉིས་ཏེ། ངོ་བོ་སོ་སོར་བཤད། རྟེན་ཐུན་མོང་དུ་བསྟན་པའོ།་་་་་གཉིས་ཀ །དང་པོ་ལ་གཉིས་ཏེ། འདུ་ཤེས་མེད་པའི་སྙོམས་འཇུག འགོག་པའི་སྙོམས་འཇུག་གོ །དང་པོ་ལ་བདུན་ཏེ། དགག་བྱ།་་་་་དེ་བཞིན། ས།་་་་་བསམ་གཏན། ཡིད་བྱེད།་་་་་འབྱུང་འདོད། ངོ་བོ།་་་་་དགེ་བ། མྱོང་འགྱུར།་་་་་སྐྱེ་གནས། གང་ཟག་་་་་འཕགས་པའི། ཐོབ་ཚུལ་ལོ།་་་་་དུས་གཅིག །གཉིས་པ་ལ་བདུན་ཏེ། དགག་བྱ།་་་་་འགོག་པ། ཡིད་བྱེད།་་་་་འདི་གནས། ས།་་་་་སྲིད་རྩེ། ངོ་བོ།་་་་་དགེ་བ། མྱོང་འགྱུར།་་་་་གཉིས་སུ། གང་ཟག་་་་་འཕགས་པའི། ཐོབ་ཚུལ་ལོ།་་་་་སྦྱོར་བས། །བདུན་པ་ལ་གཉིས་ཏེ། ཚོགས་གསུམ་གྱི་ངོ་བོ།་་་་་མིང་གི ཆོས་ཀྱི་ཁྱད་པར་རོ།་་་་་འདོད་དང་། །གསུམ་པ་སྐྱེད་བྱེད་རྒྱུ་རྐྱེན་འབྲས་བུ་དང་བཅས་པ་བཤད་པ་ལ་གཉིས་ཏེ། རྒྱུ་འབྲས་བཤད་པ། རྐྱེན་བཤད་པའོ། །དང་པོ་ལ་གསུམ་སྟེ། རྒྱུ་དྲུག་བཤད་པ། འབྲས་བུ་ལྔ་བཤད་པ། རྒྱུ་འབྲས་ཐུན་མོང་གི་ཆོས་སོ། །དང་པོ་ལ་གསུམ་སྟེ། དབྱེ་བ། བྱེད་རྒྱུ། སོ་སོའི་རང་བཞིན། དུས་ངེས་པས་མཇུག་བསྡུ་བའོ།་་་་་ཀུན་འགྲོ། །གཉིས་པ་ལ་དྲུག་སྟེ། བྱེད་རྒྱུ།་་་་་རང་ལས། ལྷན་ཅིག་འབྱུང་བའི་རྒྱུ།་་་་་ལྷན་ཅིག སྐལ་མཉམ་གྱི་རྒྱུ།་་་་་སྐལ་མཉམ། མཚུངས་ལྡན་གྱི་རྒྱུ།་་་་་མཚུངས་ལྡན། ཀུན་འགྲོའི་རྒྱུ།་་་་་ཀུན་འགྲོ། རྣམ་སྨིན་གྱི་རྒྱུའོ།་་་་་རྣམ་སྨིན། །གཉིས་པ་འབྲས་བུ་ལྔ་བཤད་པ་ལ་གཉིས་ཏེ། མདོར་བསྟན།་་་་་འདུས་བྱས། རྒྱས་པར་བཤད་པའོ། །འདི་ལ་གཉིས་ཏེ། རྒྱུ་གང་གི་འབྲས་བུ་གང་ཡིན་པ།་་་་་རྣམ་སྨིན། འབྲས་བུ་ལྔ་པོ་སོ་སོའི་ངོ་བོའོ། །འདི་ལ་ལྔ་སྟེ། རྣམ་སྨིན་གྱི་འབྲས་བུ།་་་་་རྣམ་སྨིན། རྒྱུ་མཐུན་གྱི་འབྲས་བུ།་་་་་རྒྱུ་མཐུན། བྲལ་བའི་འབྲས་བུ།་་་་་བྲལ་བ། སྐྱེས་བུའི་བྱེད་པའི་འབྲས་བུ།་་་་་གང་གིས། བདག་པོའི་འབྲས་བུའོ།་་་་་སྔོན་བྱུང་། །གསུམ་པ་རྒྱུ་འབྲས་ཐུན་མོང་གི་ཆོས་ལ་གཉིས་ཏེ། རྒྱུས་འབྲས་བུ་འཛིན་འབྱིན་གྱི་དུས་དང་།་་་་་ལྔ་པོ། འབྲས་བུ་གང་རྒྱུ་གང་ལས་སྐྱེས་དཔྱད་པའོ།་་་་་ཉོན་མོངས། །གཉིས་པ་རྐྱེན་བཤད་པ་ལ་གཉིས་ཏེ། མདོར་བསྟན།་་་་་རྐྱེན་ནི། རྒྱས་པར་བཤད་པའོ། །འདི་ལ་བཞི་སྟེ། རྐྱེན་བཞི་སོ་སོའི་རང་བཞིན། རྐྱེན་གང་དུས་གང་ལ་བྱ་བ་བྱེད་པ།་་་་་རྒྱུ་གཉིས། དངོས་པོ་གང་རྐྱེན་དུ་ལས་སྐྱེ་བ།་་་་་བཞི་ཡིས། དེ་མ་ཐག་རྐྱེན་བྱེ་བྲག་ཏུ་བཤད་པའོ། །དང་པོ་ལ་བཞི་སྟེ། རྒྱུའི་རྐྱེན།་་་་་རྒྱུ་ཞེས། དེ་མ་ཐག་པའི་རྐྱེན།་་་་་སེམས་དང་། དམིགས་པའི་རྐྱེན།་་་་་དམིགས་པ། བདག་པོའི་རྐྱེན་ནོ།་་་་་བྱེད་རྒྱུ། །བཞི་པ་ལ་གསུམ་སྟེ། སེམས་བཅུ་གཉིས་ཀྱི་དེ་མ་ཐག་རྐྱེན་སྐྱེ་ཚུལ། དེའི་སེམས་ཉི་ཤུར་བཤད་པ།་་་་་བཅུ་གཉིས། སེམས་བཅུ་གཉིས་གང་ལ་དུར་རྙེད་པའོ།་་་་་ཁམས་གསུམ། །དང་པོ་ལ་གཉིས་ཏེ། སེམས་བཅུ་གཉིས་སུ་དབྱེ་བ།་་་་་འདོད་ཡིད། དེ་མ་ཐག་རྐྱེན་བྱེད་པའི་ཚུལ་ལོ། །འདི་ལ་གཉིས་ཏེ། ཟག་བཅས་ཀྱི་དབང་དུ་བྱས་པ། ཟག་མེད་ཀྱི་དབང་དུ་བྱས་པའོ། །དང་པོ་ལ་གསུམ་སྟེ། འདོད་པའི་སེམས་ཀྱི།་་་་་འདོད་སེམས། གཟུགས་ཀྱི་སེམས་ཀྱི།་་་་་གཟུགས་ན། གཟུགས་མེད་པའི་སེམས་ཀྱི་དབང་དུ་བྱས་པའོ།་་་་་གཟུགས་མེད། །གཉིས་པ་ལ་གཉིས་ཏེ། སློབ་པའི་དབང་དུ་བྱས་པ།་་་་་སློབ་པ། མི་སློབ་པའི་དབང་དུ་བྱས་པའོ།་་་་་མི་སློབ། །གསུམ་པ་འཇིག་རྟེན་བསྟན་པ་ལ་གཉིས་ཏེ། སེམས་ཅན་གྱི་འཇིག་རྟེན། སྣོད་ཀྱི་འཇིག་རྟེན་ནོ། །དང་པོ་ལ་ལྔ། སེམས་ཅན་སྐྱེ་བ་པོ་འགྲོ་བའི་དབྱེ་བ། སྐྱེ་ཚུལ་རྟེན་འབྲེལ་གྱི་རང་བཞིན། སྐྱེས་པ་གནས་པའི་རྟེན། གནས་པ་འཆི་འཕོ་བའི་སེམས། སེམས་ཅན་གྱི་ཚོགས་གསུམ་དུ་བསྡུ་བའོ།་་་་་འཕགས་དང་། །དང་པོ་ལ་གསུམ་སྟེ། ཁམས་གསུམ་དུ་དབྱེ་བ། འགྲོ་བ་ལྔར་དབྱེ་བ། སྐྱེ་གནས་བཞིར་དབྱེ་བའོ། །དང་པོ་ལ་གསུམ་སྟེ། འདོད་པའི་དབྱེ་བ།་་་་་དམྱལ་བ། གཟུགས་ཀྱི་དབྱེ་བ།་་་་་གོང་མའི། གཟུགས་མེད་ཀྱི་དབྱེ་བའོ།་་་་་གཟུགས་མེད། །གཉིས་པ་ལ་གསུམ་སྟེ། དབྱེ་བ་དངོས།་་་་་དེར་ནི། དེའི་རང་བཞིན།་་་་་ཉོན་མོངས། དེ་དག་གི་ཁྱད་པར་བསྟན་པའོ། །འདི་ལ་བཞི་སྟེ། རྣམ་ཤེས་གནས་པ་བདུན་བཤད་པ།་་་་་ལུས་དང་། སེམས་ཅན་གྱི་གནས་དགུ་བཤད་པ།་་་་་སྲིད་རྩེ། རྣམ་ཤེས་གནས་པ་བཞི་བཤད་པ།་་་་་གནས་པ། བདུན་དང་བཞིའི་མུ་བཞི་བཤད་པའོ།་་་་་བསྡུ་ན། །གསུམ་པ་སྐྱེ་གནས་བཞིར་དབྱེ་བ་ལ་གསུམ་སྟེ། གང་དུ་འཇུག་པའི་སྐྱེ་གནས་ཀྱི་དབྱེ་བ།་་་་་དེར་ནི། གང་གིས་འཇུག་པའི་བར་སྲིད་བཤད་པ། དེ་ཉིད་སྐྱེ་གནས་སུ་འཇུག་པའི་ཚུལ་ལོ། །གཉིས་པ་ལ་གསུམ་སྟེ། བར་སྲིད་ཀྱི་ངོ་བོ།་་་་་འདིར་གང་། དེའི་སྒྲུབ་བྱེད། དེ་ཉིད་གཏན་ལ་དབབ་པའོ།་་་་་དེ་ནི། །གཉིས་པ་ལ་གཉིས་ཏེ། རིགས་པའི་སྒྲུབ་བྱེད་དང་།་་་་་འབྲུ་ཡི། ལུང་གི་སྒྲུབ་བྱེད་དོ།་་་་་མགུར་ནས། །གསུམ་པ་དེ་ཉིད་སྐྱེ་གནས་སུ་འཇུག་པའི་ཚུལ་ལ་གསུམ་སྟེ། བསམ་པ་གང་གིས་འཇུག་ཚུལ།་་་་་བློ་ནི། དབྱིབས་གང་གིས་འཇུག་ཚུལ།་་་་་དམྱལ་བ། མངལ་དུ་འཇུག་པའི་རབ་དབྱེའོ།་་་་་གཅིག་ནི། །གཉིས་པ་སྐྱེ་ཚུལ་རྟེན་འབྲེལ་གྱི་རང་བཞིན་ལ་གསུམ་སྟེ། བདག་མེད་ཀྱང་ཕུང་པོ་ཉིང་མཚམས་སྦྱོར་བ།་་་་་བདག་མེད། ཕུང་པོའི་རྒྱུན་ཐོག་མ་མེད་པར་བསྟན་པ།་་་་་ཅི་ལྟར། དེ་རྟེན་འབྲེལ་བཅུ་གཉིས་སུ་བཞག་པའོ། །འདི་ལ་གསུམ་སྟེ། ཉོན་མོངས་གསུམ་གྱིས་བསྡུས་པའི་རྟེན་འབྲེལ། ཉོན་མོངས་གསུམ་པོ་དཔེས་བསྟན་པ།་་་་་འདིར་ནི། དེ་རྣམས་སྲིད་པ་བཞིར་བསྟན་པའོ།་་་་་སྲིད་པ། །དང་པོ་ལ་གཉིས་ཏེ། གནས་སྐབས་པའི་རྟེན་འབྲེལ་བསྟན། སྐབས་སུ་བབས་པའི་ངོ་བོ་བཤད་པའོ། །དང་པོ་ལ་གཉིས་ཏེ། དབྱེ་བ་མདོར་བསྟན།་་་་་དེར་ནི། ཡན་ལག་རྒྱས་པར་བཤད་པའོ། །འདི་ལ་བཞི་སྟེ། ཚེ་གསུམ་ལ་རྫོགས་པའི་ཚུལ། ཉོན་མོངས་པ་གསུམ་དུ་བསྡུ་བ།་་་་་ཉོན་མོངས། ཚེ་གཉིས་ཀྱིས་ཡན་ལག་མདོར་བསྡུས་པའི་རྒྱུ་མཚན།་་་་་གཉིས་ནི། ཡན་ལག་བཅུ་གཉིས་ཀྱི་གྲངས་ངེས་པའོ། །དང་པོ་ལ་ལྔ་སྟེ། ཚེ་གསུམ་ལ་བཞག་པའི་ཚུལ།་་་་་སྔོན། དེ་ལྟར་བཞག་པའི་ཡན་ལག་ངོས་བཟུང་།་་་་་མ་རིག དེ་ཉིད་གནས་སྐབས་པར་བསྟན་པ།་་་་་འདི་ནི། ཡན་ལག་གཙོ་བོའི་སྒོ་ནས་བཞག་པ།་་་་་གཙོ་བོའི། ཚེ་གསུམ་ལ་བཞག་པའི་དགོས་པའོ།་་་་་སྔོན་དང་། །བཞི་པ་ཡན་ལག་བཅུ་གཉིས་ཀྱི་གྲངས་ངེས་པ་ལ་གཉིས་ཏེ། གྲངས་ངེས་དངོས།་་་་་ཉོན་མོངས། འབྱུང་བ་དང་བྱུང་བའི་ཁྱད་པར་རོ།་་་་་འདིར་ནི། །གཉིས་པ་སྐབས་སུ་བབས་པའི་ངོ་བོ་ལ་གཉིས་ཏེ། ཡན་ལག་བཞི་དངོས་སུ་བསྟན། ལྷག་མ་བཤད་འཆད་ལ་ལྟོས་པའོ།་་་་་བཤད་དང་། །དང་པོ་ལ་བཞི་སྟེ། མ་རིག་པ། མིང་།་་་་་མིང་ནི། རེག་པ།་་་་་རེག་དྲུག ཚོར་བ་བཤད་པའོ། །དང་པོ་ལ་གཉིས་ཏེ། ངོ་བོ་ངོས་བཟུང་།་་་་་རིག་པའི། དེ་ཤེས་རབ་ངན་པར་འདོད་པ་དགག་པའོ།་་་་་གལ་ཏེ། །བཞི་པ་ལ་གཉིས་ཏེ། དབྱེ་བ་སྤྱིར་བསྟན།་་་་་དེ་ལས། སེམས་ཚོར་བྱེ་བྲག་ཏུ་བཤད་པའོ། །འདི་ལ་གསུམ་སྟེ། མདོར་བསྟན།་་་་་དེ་ཡིད། རྒྱས་པར་བཤད། དོན་བསྡུ་བའོ།་་་་་བཅོ་བརྒྱུད། །བར་པ་ལ་གསུམ་སྟེ། འདོད་པ་ན།་་་་་འདོད་ན། གཟུགས་ཁམས་ན།་་་་་བསམ་གཏན། གཟུགས་མེད་ན་དུ་ཡོད་པའོ།་་་་་གཟུགས་མེད། །གསུམ་པ་སྐྱེས་པ་གནས་པའི་རྟེན་ལ་གསུམ་སྟེ། མདོར་བསྟན།་་་་་འགྲོ་བ། རྒྱས་པར་བཤད། ཟས་བཞིར་ངེས་པས་མཇུག་བསྡུ་བའོ།་་་་་འདི་ལ། །བར་པ་ལ་གསུམ་སྟེ། ཁམ་ཟས་བཤད་པ།་་་་་ཁམ་གྱི། ཟས་ལྷག་མ་བཤད་པ།་་་་་རེག་དང་། ཞར་ལ་བར་སྲིད་ཀྱི་རྣམ་གྲངས་སོ།་་་་་ཡིད་ལས། །བཞི་པ་གནས་པ་འཆི་འཕོ་བའི་སེམས་ལ་བཞི་སྟེ། སྤྱིར་བསྟན།་་་་་འཆད། བྱེ་བྲག་ཏུ་བཤད། རྣམ་ཤེས་གང་དུ་འགག་་་་་འོག་མའི། གནད་གཅོད་པའི་རྒྱུའོ།་་་་་གནད་གཅོད། །གཉིས་པ་ལ་གསུམ་སྟེ། ཚོར་བའི་ཁྱད་པར།་་་་་འཆི་འཕོ། སེམས་ཀྱི་ཁྱད་པར།་་་་་རྩེ་གཅིག ལྷག་མེད་དུ་འཇུག་ཚུལ་ལོ།་་་་་མྱ་ངན། །གཉིས་པ་སྣོད་ཀྱི་འཇིག་རྟེན་ལ་གསུམ་སྟེ། རྟེན་སྣོད་ཀྱི་གནས་ལུགས་དངོས། ཞར་ལ་བརྟེན་པ་སེམས་ཅན་གྱི་ཚད། དེ་དག་འཇལ་བྱེད་ཀྱི་ཚད་བཤད་པའོ། །དང་པོ་ལ་གསུམ་སྟེ། སྣོད་ཀྱི་གནས་ལུགས་སྤྱིར་བསྟན། ནང་ཚན་གྱི་གནས་ལུགས་བྱེ་བྲག་ཏུ་བཤད།་་་་་གླིང་བཞི། སྟོང་གསུམ་ངོས་བཟུང་ཞིང་འབྱུང་འཇིག་མཉམ་དུ་བསྟན་པའོ། །དང་པོ་ལ་གཉིས་ཏེ། རྟེན་དཀྱིལ་འཁོར་གསུམ་བཤད།་་་་་དེ་ལ། བརྟེན་པ་རི་མཚོ་བཤད་པའོ། །འདི་ལ་གཉིས་ཏེ། རི་དགུ་བཤད།་་་་་དེ་ལ། མཚོ་བརྒྱད་བཤད་པའོ།་་་་་དེ་དག །གཉིས་པ་ནང་ཚན་གྱི་གནས་ལུགས་བྱེ་བྲག་ཏུ་བཤད་པ་ལ་གསུམ་སྟེ། མིའི་གནས། དམྱལ་བའི་གནས། ལྷའི་གནས་སོ། །དང་པོ་ལ་གཉིས་ཏེ། གླིང་བཅུ་གཉིས་སྤྱིར་བསྟན། འཛམ་གླིང་བྱེ་བྲག་ཏུ་བཤད་པའོ།་་་་་འདི་ནས། །དང་པོ་ལ་གཉིས་ཏེ། གླིང་བཞི་བཤད།་་་་་དེ་ལ་ནི། གླིང་ཕྲན་བརྒྱད་བཤད་པའོ།་་་་་དེ་ཡི། །གཉིས་པ་ལ་གསུམ་སྟེ། འདི་འོག་་་་་ཚ་དམྱལ་བརྒྱད་བཤད། ཉེ་འཁོར་བཅུ་དྲུག་བཤད།་་་་་བརྒྱད་པོ། གྲང་དམྱལ་གྱི་གནས་བཤད་པའོ།་་་་་ཆུ་བུར། །གསུམ་པ་ལྷའི་གནས་བཤད་པ་ལ་གཉིས་ཏེ། གནས་དངོས། ཞར་ལ་དེར་གནས་པའི་སེམས་ཅན་གྱི་ཁྱད་པར་རོ། །དང་པོ་ལ་གཉིས་ཏེ། ས་གཞི་དང་འབྲེལ་བ་དང་། མ་འབྲེལ་བའོ།་་་་་དེ་སྟེང་། །དང་པོ་ལ་གཉིས་ཏེ། རྒྱལ་ཆེན་རིས་བཞི་པའི་གནས། སུམ་ཅུ་རྩ་གསུམ་པའི་གནས་སོ། །དང་པོ་ལ་གཉིས་ཏེ། གཞལ་མེད་ཁང་ལ་བརྟེན་པའི་གནས། རི་ལ་བརྟེན་པའི་གནས་སོ།་་་་་འདི་ལ། །དང་པོ་ལ་བཞི་སྟེ། ཉི་ཟླའི་བར་ཐག་གི་ཚད།་་་་་ཉི་ཟླ། ཉི་མས་གླིང་བཞིར་བྱ་བ་བྱེད་ཚུལ།་་་་་ནམ་ཕྱེད། དེ་ལ་བརྟེན་པའི་དུས་ཚིགས་ཀྱི་ཁྱད་པར།་་་་་དབྱར་གྱི། ཟླ་བ་འཕེལ་འགྲིབ་ཀྱི་རྒྱུ་མཚན་ནོ།་་་་་ཉི་མ། །གཉིས་པ་སུམ་ཅུ་རྩ་གསུམ་པའི་གནས་ལ་གཉིས་ཏེ། མདོར་བསྟན།་་་་་ལྷུན་པོའི། རྒྱས་པར་བཤད་པའོ། །འདི་ལ་ལྔ་སྟེ། གྲོང་ཁྱེར།་་་་་དབུས་ན། སྐྱེད་ཚལ།་་་་་ཕྱི་རོལ། དེ་དག་་་་་ས་གཞི། ལྗོན་ཤིང་།་་་་་བྱང་ཤར། འདུན་མའོ།་་་་་ལྷོ་ནུབ། །གཉིས་པ་དེར་གནས་པའི་སེམས་ཅན་གྱི་ཁྱད་པར་ལ་ལྔ་སྟེ། འདོད་པ་སྤྱོད་པའི།་་་་་འདོད་པ། ལྷའི་བུ་སྐྱེ་བའི།་་་་་བྱིས་པ། འདོད་བདེ་སྐྱེ་བའི།་་་་་འདོད་པ། བར་ཐག་གི་ཁྱད་པར།་་་་་གནས་ནས། གོང་དུ་བགྲོད་ཚུལ་ལོ།་་་་་རྫུ་འཕྲུལ། །གཉིས་པ་ཞར་ལ་དེར་གནས་པའི་སེམས་ཅན་གྱི་ཚད་བཤད་པ་ལ་གཉིས་ཏེ། ལུས་ཚད་དང་། ཚེ་ཚད་དོ། །དང་པོ་ལ་གསུམ་སྟེ། མིའི་དང་།་་་་་འཛམ་བུའི། འདོད་ལྷའི་དང་།་་་་་འདོད་དང་། གཟུགས་ཁམས་པའི་ལུས་ཚད་དོ།་་་་་གཟུགས་ཅན། །གཉིས་པ་ལ་གཉིས་ཏེ། ཚེ་ཚད་དངོས། སྒྲ་མི།་་་་་བར་དུ་འཆི་བ་ཡོད་མེད་དཔྱད་པའོ། །དང་པོ་ལ་གཉིས་ཏེ། བདེ་འགྲོའི་ཚེ་ཚད། ངན་འགྲོའི་ཚེ་ཚད་དོ།་་་་་ཡང་སོས། །དང་པོ་ལ་གསུམ་སྟེ། མིའི།་་་་་སྒྲ་མི། འདོད་ལྷའི།་་་་་མི་རྣམས། ཁམས་གོང་མའི་ཚེ་ཚད་དོ། །འདི་ལ་གསུམ་སྟེ། གཟུགས་ཅན་གྱི་ཚེ་ཚད།་་་་་གཟུགས་ཅན། གཟུགས་མེད་ཀྱི་ཚེ་ཚད།་་་་་གཟུགས་མེད། ཚེ་ཚད་ཀྱིས་བསྐལ་པ་ངོས་བཟུང་བའོ།་་་་་འོད་ཆུང་། །གསུམ་པ་དེ་དག་འཇལ་བྱེད་ཀྱི་ཚད་ལ་གཉིས་ཏེ། བརྩམ་གཞི།་་་་་གཟུགས་མིང་། བརྩམ་པ་འཇལ་བྱེད་དོ། །འདི་ལ་གཉིས་ཏེ། རྡུལ་གྱི་ཚད།་་་་་ཕྲ་རབ། དུས་ཀྱི་ཚད་དོ། །འདི་ལ་གཉིས་ཏེ། ལོའི་ཚད།་་་་་སྐད་ཅིག བསྐལ་པའི་ཚད་དོ། །འདི་ལ་གསུམ་སྟེ། བསྐལ་པ་ངོས་བཟུང་བ། ཡ་ཐོག་རིང་མོའི་འགྲིབ་ཚུལ། འཇིག་པའི་བསྐལ་པའི་ཚུལ་ལོ། །དང་པོ་ལ་གཉིས་ཏེ། མདོར་བསྟན།་་་་་བསྐལ་པ། རྒྱས་པར་བཤད་པའོ། །འདི་ལ་ལྔ་སྟེ། འཇིག་པའི།་་་་་འཇིག་པའི། འཆགས་པའི།་་་་་འཆགས་པའི། གནས་པའི། ཞིག་ནས་འདུག་པའི་བསྐལ་པ།་་་་་འཆགས་པ། བསྐལ་པ་ཆེན་པོའོ། །གསུམ་པ་ལ་ལྔ་སྟེ། ཐོག་མའི་ཡ་ཐོག་་་་་བར་གྱི། བར་གྱི་ཁུག་པ།་་་་་དེ་ནས། མཐའི་མ་ཐོག་་་་་ཡར་སྐྱེ། ཡར་འཕེལ་བཅུ་དགུའི་མཚམས།་་་་་དེ་དག དེ་རྣམས་གནས་པའི་བསྐལ་པར། བསྟན་པའོ།་་་་་ད་ལྟར། །ལྔ་པ་ལ་གཉིས་ཏེ། དངོས་དང་།་་་་་དེ་དག ཞར་ལ་གང་ཟག་གསུམ་གྱི་འབྱུང་ཚུལ་ལོ། །འདི་ལ་གསུམ་སྟེ། སངས་རྒྱས། རང་རྒྱལ། འཁོར་ལོས་སྒྱུར་བ་འབྱུང་ཚུལ་ལོ། །དང་པོ་ལ་གཉིས་ཏེ། ཚོགས་ཀྱི་ཚད།་་་་་དེ་གྲངས། འབྱུང་བའི་དུས་སོ།་་་་་མར་ན། །གཉིས་པ་ལ་གཉིས་ཏེ། འབྱུང་བའི་དུས།་་་་་རང་སངས། ཚོགས་ཀྱི་ཚད་དོ།་་་་་བསེ་རུ། །གསུམ་པ་ལ་གསུམ་སྟེ། འབྱུང་བའི་དུས།་་་་་འཁོར་ལོས། འཁོར་ལོས་སྒྱུར་ཚུལ།་་་་་གསེར་དངུལ། མཚན་གྱི་ཁྱད་པར་རོ།་་་་་ཐུབ་མཚན། །གཉིས་པ་ཡ་ཐོག་རིང་མོའི་འགྲིབས་ཚུལ་ལ་གསུམ་སྟེ། བསྐལ་པ་དང་པོ་པའི་ཁྱད་པར།་་་་་སྔར་བྱུང་། དེ་ལས་ཇི་ལྟར་འགྲིབ་ཚུལ།་་་་་དེ་ནས། འགྲིབ་པའི་མཐར་ཇི་ལྟར་འབྱུང་བའོ།་་་་་བསྐལ་པ། །གསུམ་པ་འཇིག་པའི་བསྐལ་པའི་ཚུལ་ལ་གསུམ་སྟེ། འཇིག་པ་གསུམ་གྱི་རྩེ་མོ།་་་་་མེ་དང་། འཇིག་པ་ཡོད་མེད་ཀྱི་རྒྱུ་མཚན།་་་་་དེ་ཡི། ཇི་ལྟར་འཇིག་པའི་གོ་རིམ་མོ།་་་་་མེ་ཡིས། །བཞི་པ་ལས་བསྟན་པ་ལ་གསུམ་སྟེ། མཚམས་སྦྱར་བའི་ཚུལ་གྱིས་མདོར་བསྟན།་་་་་ལས་ལས། ལས་དངོས་རྒྱས་པར་བཤད། ཞར་ལ་ཆོས་ཀྱི་རྣམ་གྲངས་ཁ་ཅིག་བསྟན་པས་མཇུག་བསྡུ་བའོ།་་་་་བསོད་ནམས། །བར་པ་ལ་གཉིས་ཏེ། ལས་ཀྱི་ངོ་བོ། མདོ་ལས་བྱུང་བའི་ལས་ཀྱི་རྣམ་གྲངས་བཤད་པའོ། །དང་པོ་ལ་གཉིས་ཏེ། མདོར་བསྟན།་་་་་དེ་ནི། རྒྱས་པར་བཤད་པའོ། །འདི་ལ་གསུམ་སྟེ། ལུས་ངག་གི་ལས་ཀྱི་རང་བཞིན། ལས་གསུམ་གྱི་སྤྱིའི་ཆོས་ཀྱི་ཁྱད་པར། རིག་བྱེད་མ་ཡིན་པ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། གཉིས་སུ་དབྱེ་བ།་་་་་དེ་དག སོ་སོའི་རང་བཞིན་ནོ། །འདི་ལ་གཉིས་ཏེ། རིག་བྱེད་བཤད། རིག་བྱེད་མིན་པར་བཤད་པའོ། །དང་པོ་ལ་གཉིས་ཏེ། ལུས་ཀྱི་རིག་བྱེད། ངག་གི་རིག་བྱེད་དོ།་་་་་ངག་རྣམ། །དང་པོ་ལ་གཉིས་ཏེ། བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས་སོ།་་་་་གཉིས་བཟུང་། །དང་པོ་ལ་གཉིས་ཏེ། ངོ་བོ་ངོས་བཟུང་བ།་་་་་ལུས་རྣམ། ལོག་རྟོག་དགག་པའོ།་་་་་འགྲོ་མིན། །གཉིས་པ་ལ་བཞི་སྟེ། སྒྲུབ་བྱེད།་་་་་རྣམ་གསུམ། རྒྱུ་འབྱུང་བའི་དུས་དང་སའི་ཁྱད་པར།་་་་་འདོད་གཏོགས། ངོ་བོའི་ཁྱད་པར།་་་་་རྣམ་རིག རྒྱུ་འབྱུང་བའི་ཆོས་ཀྱི་ཁྱད་པར་རོ།་་་་་རྒྱུ་མཐུན། །གཉིས་པ་ལ་བཞི་སྟེ། དགེ་སོགས་གསུམ་གྱི་ཁྱད་པར།་་་་་རྣམ་རིག ཁམས་གསུམ་གྱི་ཁྱད་པར།་་་་་མི་དགེ་ནི། ཞར་ལ་དགེ་སོགས་གསུམ་གྱི་དབྱེ་བ། ཀུན་སློང་བྱེ་བྲག་ཏུ་བཤད་པའོ། །གསུམ་པ་ལ་གསུམ་སྟེ། དགེ་བའི།་་་་་ཐར་པ། བཟློག་པ།་་་་་མི་དགེ་བའི། ལུང་མ་བསྟན་གྱི་དབྱེ་བའོ།་་་་་དོན་དམ། །བཞི་པ་ལ་བཞི་སྟེ། དབྱེ་བ།་་་་་ཀུན་སློང་། གཉིས་ལས།་་་་་སོ་སོའི་ངོ་བོ། མཚན་གཞི།་་་་་མཐོང་བས། འཇུག་ཚུལ་ལོ། །འདི་ལ་གཉིས་ཏེ། སྤྱིར་བཏང་།་་་་་རབ་ཏུ། དམིགས་ཀྱིས་བསལ་བའོ།་་་་་རྣམ་སྨིན། །གསུམ་པ་རིག་བྱེད་མ་ཡིན་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན།་་་་་རྣམ་རིག རྒྱས་པར་བཤད་པའོ། །འདི་ལ་གཉིས་ཏེ། སྡོམ་པ་ཁྱད་པར་དུ་བཤད། ཐམས་ཅད་ཐུན་མོང་དུ་བཤད་པའོ། །དང་པོ་ལ་གཉིས་ཏེ། །མདོར་བསྟན།་་་་་སྡོམ་པ། རྒྱས་པར་བཤད་པའོ། །འདི་ལ་གསུམ་སྟེ། སོ་ཐར་གྱི་སྡོམ་པ། བསམ་གཏན་དང་ཟག་མེད། ཞར་ལ་ཡིད་དང་དབང་པོའི་སྡོམ་པ་བཤད་པའོ།་་་་་ཤེས་བཞིན། །དང་པོ་ལ་ལྔ་སྟེ། དབྱེ་བསྡུ།་་་་་སོ་སོར། མཚན་ཉིད།་་་་་སྤང་བྱ། རྣམ་གྲངས།་་་་་ཚུལ་ཁྲིམས། ངེས་ཚིག་་་་་དང་པོའི། གང་ཟག་གོ་་་་་སོ་སོར། །གཉིས་པ་ལ་གསུམ་སྟེ། གང་ལ་ལྡན་པ།་་་་་བསམ་གཏན། སེམས་ཀྱི་རྗེས་འབྲང་།་་་་་ཐ་མ། སྤོང་བའི་སྡོམ་པའོ།་་་་་བར་ཆད། །གཉིས་པ་ཐམས་ཅད་ཐུན་མོང་དུ་བཤད་པ་ལ་བཞི་སྟེ། དུས་ཇི་སྲིད་ལྡན། ཚུལ་ཇི་ལྟར་ཐོབ། རྒྱུ་གང་གིས་གཏོང་། རྟེན་གང་ལ་ལྡན་པའོ།་་་་་ཟ་མ། །དང་པོ་ལ་གསུམ་སྟེ། རིག་བྱེད་མིན་པའི་ལྡན་ཚུལ། རིག་བྱེད་ཀྱི་ལྡན་ཚུལ། དེ་དག་གི་མུ་བཞི་བརྩི་བའོ།་་་་་བར་མ། །དང་པོ་ལ་གསུམ་སྟེ། སོ་ཐར་དང་སྡོམ་མིན་གྱི་ལྡན་ཚུལ།་་་་་སོ་སོ། མཉམ་པར་བཞག་པའི་ལྡན་ཚུལ།་་་་་བསམ་གཏན། བར་མའི་ལྡན་ཚུལ།་་་་་བར་གནས། གཉིས་པ་ལ་གཉིས་ཏེ། ལྡན་ཚུལ་དངོས།་་་་་རྣམ་རིག་གི ཞར་ལ་སྡོམ་མིན་གྱི་རྣམ་གྲངས་སོ།་་་་་སྡོམ་པ། །གཉིས་པ་ཚུལ་ཇི་ལྟར་ཐོབ་པ་ལ་གསུམ་སྟེ། སྡོམ་པའི། སྡོམ་མིན་གྱི། བར་མའི་ཐོབ་ཚུལ་ལོ།་་་་་ལྷག་མའི། །དང་པོ་ལ་གཉིས་ཏེ། ཐོབ་ཚུལ་དངོས། གང་ལས་ཐོབ་པའོ། །དང་པོ་ལ་གསུམ་སྟེ། བསམ་གཏན།་་་་་བསམ་གཏན། ཟག་མེད་་་་་་ཟག་མེད། སོ་ཐར་ཐོབ་ཚུལ་ལོ། །འདི་ལ་གཉིས་ཏེ། ཐོབ་ཚུལ་ཐུན་མོང་དུ་བསྟན།་་་་་སོ་སོར། ཁྱད་པར་བྱེ་བྲག་ཏུ་བཤད་པའོ། །འདི་ལ་གསུམ་སྟེ། དུས་ཀྱི་ཁྱད་པར། བསྙེན་གནས་ཀྱི་ཁྱད་པར། དགེ་བསྙེན་གྱི་ཁྱད་པར་རོ། །དང་པོ་ལ་གཉིས་ཏེ། སྡོམ་པའི་དུས་ཀྱི་ཁྱད་པར།་་་་་ཇི་སྲིད། ཞར་ལ་སྡོམ་མིན་གྱི་དུས་ཀྱི་ཁྱར་པར་རོ།་་་་་ཉིན་ཞག །གཉིས་པ་ལ་གསུམ་སྟེ། ཇི་ལྟར་ནོད་པའི་ཚུལ།་་་་་དམའ་བར། ཡན་ལག་གི་གྲངས་ངེས།་་་་་ཚུལ་ཁྲིམས། གཞན་ལའང་་་་་་རྟེན་ཀྱི་ཁྱད་པར་རོ། །གསུམ་པ་ལ་ལྔ་སྟེ། ལུང་གི་དོན་བཤད་པས་དགེ་བསྙེན་ཐམས་ཅད་སྡོམ་ལྡན་དུ་བསྟན།་་་་་དགེ་བསྙེན། གལ་ཏེ།་་་་་དེ་ལ་ནང་འགལ་སྤོང་བ། ཞར་ལ་སྡོམ་པ་ཆེ་ཆུང་གི་ཁྱད་པར།་་་་་ཆུང་ངུ་། གང་ཞིག་་་་་སྐྱབས་གནས་ཀྱི་ཁྱད་པར། ཡན་གལ་གི་ཁྱད་པར་རོ། །འདི་ལ་གསུམ་སྟེ། ལོག་གཡེམ།་་་་་ལོག་གཡེམ། བརྫུན།་་་་་བསླབ་པ། བཅས་པའི།་་་་་མྱོས་འགྱུར་སྤོང་བ་ཡན་ལག་དུ་འཇོག་པའི་རྒྱུ་མཚན་ནོ། །གཉིས་པ་གང་ལས་ཐོབ་པ་ལ་གཉིས་ཏེ། སྡོམ་པ་གསུམ་གྱི་ཁྱད་པར།་་་་་འདོད་གཏོགས། སྡོམ་པ།་་་་་དེའི་ནང་གསེས་ཀྱི་ཁྱད་པར་རོ། །གཉིས་པ་སྡོམ་མིན་ཐོབ་ཚུལ་ལ་གཉིས་ཏེ། གང་ལས་ཐོབ་པ།་་་་་སྡོམ་པ། ཇི་ལྟར་ཐོབ་པའོ།་་་་་སྡོམ་པ། །གསུམ་པ་རྒྱུ་གང་གིས་གཏོང་བ་ལ་བཞི་སྟེ། སྡོམ་པའི། སྡོམ་མིན་གྱི།་་་་་སྡོམ་མིན། བར་མ།་་་་་བར་མའི། དེ་གསུམ་ལས་གཞན་པའི་གཏོང་རྒྱུའོ།་་་་་འདོད་གཏོགས། །དང་པོ་ལ་གསུམ་སྟེ། སོ་ཐར་གྱི།་་་་་བསླབ་པ། བསམ་གཏན།་་་་་བསམ་གཏན་གྱི། ཟག་མེད་ཀྱི་གཏོང་རྒྱུའོ།་་་་་འཕགས་པ། །གཉིས་པ་མདོ་ལས་བྱུང་བའི་ལས་ཀྱི་རྣམ་གྲངས་བཤད་པ་ལ་གཉིས་ཏེ། ཐུན་མོང་དུ་བཤད་པ། སོ་སོར་བཤད་པའོ། །དང་པོ་ལ་གསུམ་སྟེ། ངོ་བོ་རྒྱུ་འབྲས་ཀྱི་དབྱེ། རྟེན་གྱི་སྒོ་ནས་དབྱེ། རྒྱུ་འབྲས་ཉིད་ཀྱི་སྒོ་ནས་དབྱེ་བའོ། །དང་པོ་ལ་གཉིས་ཏེ། ལས་གསུམ་དུ་གསུངས་པའི་དོན། ལས་བཞིར་གསུངས་པའི་དོན་ནོ། །དང་པོ་ལ་གསུམ་སྟེ། དགེ་སོགས་ཀྱི། བསོད་ནམས་སོགས་ཀྱི། ཡོན་པོ་སོགས་ཀྱི་དོན་ནོ།་་་་་ཡོན་སྐྱོན། །གཉིས་པ་ལ་གཉིས་ཏེ། མདོར་བསྟན།་་་་་བསོད་ནམས། རྒྱས་པར་བཤད་པའོ། །འདི་ལ་གཉིས་ཏེ། བསོད་ནམས་སོགས་དང་།་་་་་བསོད་ནམས། བདེ་བ་མྱོང་།་་་་་ལས་བདེ། འགྱུར་སོགས་སོ། །འདི་ལ་གསུམ་སྟེ། མྱོང་འགྱུར་གསུམ་བཤད། དེ་མྱོང་འགྱུར་ལྔར་བསྟན།་་་་་ངོ་བོ། སྐབས་ཀྱི་མྱོང་འགྱུར་གཏན་ལ་དབབ་པའོ། །དང་པོ་ལ་གཉིས་ཏེ། རང་ལུགས་དང་།་་་་་བསམ་གཏན། གཞན་ལུགས་སོ།་་་་་འོག་ནའང་། །གསུམ་པ་ལ་གཉིས་ཏེ། མདོར་བསྟན།་་་་་དེ་ཡང་། རྒྱས་པར་བཤད་པའོ། །འདི་ལ་གསུམ་སྟེ། དབྱེ་བ་སྤྱིར་བསྟན།་་་་་མཐོང་བའི། དེ་དག་ཁྱད་པར་དུ་བཤད། བྱེ་བྲག་མྱོང་ངེས་ཀྱི་དོན་གཏན་ལ་དབབ་པའོ། །གཉིས་པ་ལ་གཉིས་ཏེ། ལས་གང་གིས་རིས་མཐུན་འཕེན་པ།་་་་་གསུམ་གྱིས། ཁམས་གོང་ན་ལས་འཕེན་དུ་ཡོད་པའོ། །འདི་ལ་གསུམ་སྟེ། སྤྱིར་བསྟན།་་་་་ཐམས་ཅད། གང་ལས།་་་་་དམིགས་ཀྱིས་བསལ། བར་སྲིད་ན་ལས་འཕེན་དུ་ཡོད་པའོ།་་་་་སྲིད་པ། །གསུམ་པ་བྱེ་བྲག་མྱོང་ངེས་ཀྱི་དོན་གཏན་ལ་དབབ་པ་ལ་གསུམ་སྟེ། མྱོང་ངེས་སྤྱིར་བསྟན།་་་་་ཉོན་མོངས། མཐོང་ཆོས་མྱོང་འགྱུར་བྱེ་བྲག་ཏུ་བཤད། ལས་འབྲས་མྱོང་ཚུལ་གཞན་བསྟན་པའོ། །གཉིས་པ་ལ་གཉིས་ཏེ། དངོས་དང་།་་་་་མཐོང་ཆོས། ཞིང་གི་ཁྱད་པར་རོ།་་་་་གང་དག །གསུམ་པ་ལ་གསུམ་སྟེ། སེམས་ཚོར་མྱོང་ཚུལ།་་་་་རྣམ་པར། ལུས་ཚོར་མྱོང་ཚུལ།་་་་་མི་དགེ སེམས་གཡེངས་རྒྱུ་རྟེན་དང་བཅས་པའོ།་་་་་གཡེངས་པའི། །གཉིས་པ་ལ་བཞིར་གསུངས་པའི་དོན་ལ་གཉིས་ཏེ། མདོར་བསྟན།་་་་་དཀར་ནག རྒྱས་པར་བཤད་པའོ། །འདི་ལ་གསུམ་སྟེ། ལས་བཞི་སྤྱིར་བསྟན།་་་་་མི་དགེ ཟག་མེད་བྱེ་བྲག་ཏུ་བཤད།་་་་་ཆོས་བཟོད། གཞན་ལུགས་དགག་པའོ།་་་་་གཞན། །གཉིས་པ་རྟེན་གྱི་སྒོ་ནས་དབྱེ་བ་ལ་གཉིས་ཏེ། ལས་གསུམ་དུ་བསྟན། དེ་ལས་བཅུར་དབྱེ་བའོ། །དང་པོ་ལ་བཞི་སྟེ། ཐུབ་པ་གསུམ།་་་་་མི་སློབ་པའི། གཙང་བྱེད་གསུམ།་་་་་ལེགས་སྤྱད། ཉེས་སྤྱད་གསུམ།་་་་་ལུས་ཀྱི། ལེགས་སྤྱད་གསུམ་མོ།་་་་་བཟློག །གཉིས་པ་ལ་གཉིས་ཏེ། མདོར་བསྟན།་་་་་དེ་ལས། རྒྱས་པར་བཤད་པའོ། །འདི་ལ་གསུམ་སྟེ། ལས་ལམ་དངོས། ལས་ལམ་གྱི་འབྲས་བུ།་་་་་ཐམས་ཅད། ལུས་དང་།་་་་་ལོག་འཚོ་ལོགས་སུ་སྨོས་པའི་རྒྱུའོ། །དང་པོ་ལ་དྲུག་སྟེ། རིག་བྱེད་ཡིན་མིན་དུ་དབྱེ། རྩ་བ་གསུམ་གསུམ་དུ་བསྟན།་་་་་སྦྱོར་བ། མཐར་འབྱིན་སོགས་གསུམ་དུ་བསྟན། མི་དགེ་བའི་ལས་ལམ་སོ་སོའི་མཚན་ཉིད། ལས་ལམ་དུ་དང་སེམས་པ་ལྷན་ཅིག་འཇུག་པ། འགྲོ་བ་གང་ན་ལས་ལམ་དུ་ཡོད་པའོ། །དང་པོ་ལ་གསུམ་སྟེ། དངོས་གཞིའི།་་་་་མི་དགེ ཉེར་བསྡོགས།་་་་་སྦྱོར་བའི། མཇུག་གི་ཁྱད་པར་རོ།་་་་་བཟློག་པ། །གསུམ་པ་ལ་གསུམ་སྟེ། ཉོན་མོངས་གང་གིས་མཐར་འབྱིན་པ།་་་་་གསོད་དང་། གང་གི་གཞི་གང་ཡིན་པ།་་་་་གཞི་ནི། སྔ་དང་།་་་་་དངོས་གཞིར་འགྱུར་བའི་ཚད་དོ། །བཞི་པ་ལ་གསུམ་སྟེ། མཚན་ཉིད་དངོས། ལས་ལམ་གྱི་སྒྲ་དོན།་་་་་འདི་ལ། ལོག་ལྟའི་བྱེད་ལས་སོ། །དང་པོ་ལ་གསུམ་སྟེ། ལུས་ཀྱི། ངག་གི ཡིད་ལས་ཀྱི་མཚན་ཉིད་དོ།་་་་་བསྣབ་སེམས། །དང་པོ་ལ་གསུམ་སྟེ། སྲོག་གཅོད།་་་་་སྲོག་གཅོད། མ་བྱིན་ལེན།་་་་་མ་བྱིན། འདོད་ལོག་གོ་་་་་བསྒྲོད་མིན། །གཉིས་པ་ལ་བཞི་སྟེ། རྫུན། ཕྲ་མ།་་་་་ཕྲ་མ། ཚིག་རྩུབ།་་་་་ཚིག་རྩུབ། ཉོན་མོངས།་་་་་ཀྱལ་པའོ། །དང་པོ་ལ་གཉིས་སྟེ། ལས་ལམ་དངོས།་་་་་རྫུན་ཚིག ཞར་བྱུང་མཐོང་སོགས་་་་་་མིག་རྣ། དཔྱད་པའོ། །གསུམ་པ་ལོག་ལྟའི་བྱེད་ལས་ལ་གསུམ་སྟེ། ཆད་ལྟས་དགེ་རྩ་གཅོད།་་་་་མེད་པར། ཆད་པའི་ངོ་བོ།་་་་་དེ་ནི། མཚམས་ནི།་་་་་ཆད་པ་མཚམས་སྦྱོར་ཚུལ་ལོ། །ལྔ་པ་ལ་གཉིས་ཏེ། མི་དགེ་བ་དང་།་་་་་མི་དགེ དགེ་བ་དུ་དང་ལས་ལམ་ལྷན་ཅིག་འཇུག་པའོ།་་་་་དགེ་བ། །དྲུག་པ་ལ་གཉིས་ཏེ། འགྲོ་བ་གང་ན་མི་དགེ་བ་དང་།་་་་་དམྱལ་བ། དགེ་བ་དུ་ཡོད་པའོ།་་་་་དགེ་བ། །གསུམ་པ་རྒྱུ་འབྲས་ཉིད་ཀྱི་སྒོ་ནས་དབྱེ་བ་ལ་གསུམ་སྟེ། ལས་གང་འབྲས་བུ་གང་དང་ལྡན་པ། ལས་གང་རྒྱུ་གང་གིས་བྱེད་པ།་་་་་རིག་མིན། ལས་འཕེན་རྫོགས་ཀྱི་ཁྱད་པར་རོ།་་་་་གཅིག་གིས། །དང་པོ་ལ་གཉིས་ཏེ། ལས་གང་འབྲས་བུ་དུ་དང་ལྡན། ཕན་ཚུན་ལས་འབྲས་དུ་དང་ལྡན་པའོ། །དང་པོ་ལ་གཉིས་ཏེ། དྲིར་བཅས།་་་་་སྤོང་ལམ་དུ་ལྡན། སྤོང་ལམ་མིན་པ་དུ་དང་ལྡན་པའོ།་་་་་ཟག་བཅས། །གཉིས་པ་ལ་ལྔ་སྟེ། དགེ་བ་སོགས།་་་་་དགེ་བའི། འདས་པ་སོགས།་་་་་འདས་པའི། རང་ས་སོགས།་་་་་རང་གི སློབ་པ་སོགས།་་་་་སློབ་པའི། མཐོང་བས།་་་་་མཐོང་སྤང་སོགས་དུ་དང་ལྡན་པའོ། །གཉིས་པ་ལས་སོ་སོར་བཤད་པ་ལ་གསུམ་སྟེ། སྤང་བྱ་སྒྲིབ་པ་གསུམ། བསྟེན་བྱ་བསོད་ནམས་བྱ་བའི་གཞི་གསུམ། ཆ་མཐུན་དགེ་བ་གསུམ་བཤད་པའོ།་་་་་བསོད་ནམས། །དང་པོ་ལ་གསུམ་སྟེ། མཚམས་མེད།་་་་་སྒྲིབ་པ་གསུམ་གྱི་ངོ་བོ། །གང་ན་སྒྲིབ་པ་གང་ཡོད་པ།་་་་་མཚམས་མེད། ལས་སྒྲིབ་བྱེ་བྲག་ཏུ་བཤད་པའོ། །འདི་ལ་གཉིས་ཏེ། མཚམས་མེད་བཤད། དེ་དང་ཉེ་བ་བཤད་པའོ། །དང་པོ་ལ་གསུམ་སྟེ། མཚམས་མེད་དངོས། དེའི་ལས་འབྲས། ལས་འབྲས་ཀྱི་ཞར་བྱུང་ངོ་།་་་་་འཇིག་རྟེན། །དང་པོ་ལ་གསུམ་སྟེ། དགེ་འདུན་གྱི་དབྱེན། མཚམས་མེད་ཀྱི་གྲངས་ངེས།་་་་་ཕན་འདོགས། མཚམས་མེད་གཞན་གྱི་གཞི་ངོས་བཟུང་བའོ།་་་་་མཚན་ནི། །དང་པོ་ལ་བཞི་སྟེ། གང་ཟག་གང་ལ་ལྡན་པ། འཁོར་ལོའི་དབྱེན་བཤད།་་་་་བསྐལ་པ། ལས་ཀྱི།་་་་་ལས་ཀྱི་དབྱེན་བཤད། འཁོར་ལོའི་དབྱེན་མི་འབྱུང་བའི་དུས་སོ།་་་་་དང་པོ། །དང་པོ་ལ་གཉིས་ཏེ། དབྱེན་གང་ལ་ལྡན།་་་་་དགེ་འདུན། བརྫུན་གང་ལ་ལྡན་པའོ།་་་་་དེ་ཡི། །གཉིས་པ་དེའི་ལས་འབྲས་ལ་གཉིས་ཏེ། འབྲས་བུ་ཐོབ་མི་ཐོབ་ཀྱི་ཁྱད་པར།་་་་་མཚམས་མེད། དགེ་འདུན།་་་་་ལས་ལྕི་ཡང་གི་ཁྱད་པར་རོ། །གཉིས་པ་དེ་དང་ཉེ་བ་བཤད་པ་ལ་གསུམ་སྟེ། ཉེ་བ་ལྔའི་ངོ་བོ།་་་་་མ་དགྲ། ཞར་ལ་ལས་གསུམ་གྱི་གེགས་སུ་བསྟན་པ།་་་་་བཟོད་དང་། ཡུལ་གྱི་ཁྱད་པར་ངེས་གནས་བྱེ་བྲག་ཏུ་བཤད་པའོ། །འདི་ལ་གཉིས་ཏེ། ངེས་གནས་སྤྱིའི་རྣམ་གཞག བྱེ་བྲག་སྟོན་པས་སྔོན་ཇི་ལྟར་མཛད་པའོ། །དང་པོ་ལ་གཉིས་ཏེ། དྲིས་ཏེ་བསྟན།་་་་་གང་ནས། དེ་ཉིད་བཤད་པའོ། །འདི་ལ་གསུམ་སྟེ། ཅི་ཙམ་ནས་ཡོན་ཏན་གང་དང་ལྡན།་་་་་བདེ་འགྲོ། དེ་ནི།་་་་་མཚན་རྣམས་སྨིན་པའི་ཚུལ། མཚན་གྱི་རྒྱུའོ།་་་་་རེ་རེ་ལ། །གཉིས་པ་ལ་གཉིས་ཏེ། རྣམ་གཟིགས།་་་་་གྲངས་མེད་གང་གི་ཐོག་མར་སངས་རྒྱས་གང་བྱུང་ཚུལ། ཕར་ཕྱིན་གང་དུས་གང་ལ་རྫོགས་པའོ།་་་་་ཀུན་ལ། །གཉིས་པ་བསྟེན་བྱ་བསོད་ནམས་བྱ་བའི་གཞི་ལ་གསུམ་སྟེ། ཐུན་མོང་གི་ངེས་ཚིག་་་་་གསུམ་པོ། སོ་སོའི་རང་བཞིན། ཆོས་སྦྱིན་བྱེ་བྲག་ཏུ་བཤད་པའོ།་་་་་ཆོས་སྦྱིན། །གཉིས་པ་ལ་གཉིས་ཏེ། སྦྱིན་བྱུང་བཤད། གཞན་གཉིས་བསྟན་པའོ། །དང་པོ་ལ་གསུམ་སྟེ། སྦྱིན་པའི་ངོ་བོ།་་་་་གང་གིས། དབྱེ་བ།་་་་་བདག་གཞན། ཁྱད་པར་རོ། །འདི་ལ་གཉིས་ཏེ། མདོར་བསྟན།་་་་་དེ་ཡི། རྒྱས་པར་བཤད་པའོ། །འདི་ལ་གཉིས་ཏེ། ཁྱད་པར་དངོས། དེ་ལས་འཕྲོས་པའོ། །དང་པོ་ལ་གསུམ་སྟེ། སྦྱིན་བདག་གི་་་་་སྦྱིན་བདག ཁ་དོག་་་་་དངོས་པོའི། ཞིང་གི་ཁྱད་པར་རོ། །འདི་ལ་གསུམ་སྟེ། སྤྱིར་བསྟན།་་་་་འགྲོ་དང་། སྦྱིན་པའི་མཆོག་་་་་མཆོག་ནི། ཞིང་གི་བྱེ་བྲག་གོ་་་་་འཕགས་པ། གཉིས་པ་ལ་གསུམ་སྟེ། ལྕི་ཡང་གི་ཁྱད་པར།་་་་་མཇུག་དང་། བསགས་མ་བསགས་ཀྱི་ཁྱད་པར།་་་་་བསམ་བཞིན། ལོག་རྟོག་དགག་པའོ། །འདི་ལ་གཉིས་ཏེ། ལེན་པ་མེད་ཀྱང་བསོད་ནམས་འབྱུང་བ།་་་་་མཆོད་རྟེན། ཞིང་ངན་ཡང་འབྲས་བུ་འབྱུང་བར་འདོད་པའོ།་་་་་རྒྱུ་ལས། །གཉིས་པ་གཞན་གཉིས་བསྟན་པ་ལ་གསུམ་སྟེ། སོ་སོའི་རང་བཞིན། གཉིས་ཀའི་འབྲས་བུ།་་་་་མཐོ་རིས། བསྐལ་པར།་་་་་ཚངས་པའི་བསོད་ནམས་སོ། །དང་པོ་ལ་གཉིས་ཏེ། ཚུལ་ཁྲིམས་དང་།་་་་་འཆལ་བའི། སྒོམ་པའོ།་་་་་མཉམ་པར། །ལྔ་པ་ཕྲ་རྒྱས་བསྟན་པ་ལ་གསུམ་སྟེ། སྤང་བྱ་ཕྲ་རྒྱས་ཀྱི་རང་བཞིན། སྤོང་བྱེད་གཉེན་པོའི་རང་བཞིན། སྤངས་པའི་འབྲས་བུ་ཡོངས་ཤེས་སོ། །དང་པོ་ལ་གཉིས་ཏེ། མཚམས་སྦྱོར་བའི་སྒོ་ནས་མདོར་བསྟན།་་་་་སྲིད་པའི། ཕྲ་རྒྱས་ཉིད་གཏན་ལ་དབབ་པའོ། །འདི་ལ་གསུམ་སྟེ། ཕྲ་རྒྱས་ཀྱི་དབྱེ་བ། ཕྲ་རྒྱས་ཀྱི་སྐྱེ་ཚུལ། རྣམ་གྲངས་སོགས་བཤད་པའོ། །དང་པོ་ལ་གསུམ་སྟེ། ངོ་བོའི་དབྱེ་བ། རྣམ་པའི་དབྱེ་བ། སེམས་ཉོན་མོངས་པ་དང་བཅས་པའི་དབྱེ་བའོ། །དང་པོ་ལ་གསུམ་སྟེ། དབྱེ་བ་དངོས། སྤང་བྱ་གཉིས་ཀྱི་ངེས་པ། ལྟ་བ་དང་ང་རྒྱལ་བྱེ་བྲག་ཏུ་བཤད་པའོ། །དང་པོ་ལ་བཞི་སྟེ། རྩ་བའི་སྒོ་ནས་དྲུག་་་་་དྲུག ཆགས་པའི་དབྱེ་བས་བདུན།་་་་་དེ་དྲུག ལྟ་བའི་དབྱེ་བས་བཅུ།་་་་་ལྟ་བ། དེ་དག་་་་་ཁམས་བཅས་གྲངས་ཀྱི་སྒོ་ནས་བརྒྱད་དུ་དབྱེ་བའོ། །གཉིས་པ་ལ་གསུམ་སྟེ། མཐོང་སྤང་ཁོ་ན་ཡིན་པ།་་་་་སྲིད་རྩེ། ལྷག་སྐྱེས།་་་་་སྤང་བྱ་གཉིས་ཀ་ཡིན་པ། བསྒོམ་སྤང་ཁོ་ན་ཡིན་པའོ།་་་་་བསྒོམ་པས། །གསུམ་པ་ལ་གཉིས་ཏེ། ལྟ་བའི་དབྱེ་བ། ང་རྒྱལ་གྱི་དབྱེ་བའོ། །དང་པོ་ལ་གསུམ་སྟེ། ལྟ་བ་ལྔའི་ངོ་བོ།་་་་་བདག་དང་། མཆོག་འཛིན་གཉིས་པ་ལ་རྩོད་པ་སྤོང་བ།་་་་་དབང་ཕྱུག འཕྲོས་དོན་ཕྱིན་ཅི་ལོག་གི་རྣམ་གཞག་གོ་་་་་ལྟ་བ། །གཉིས་པ་ལ་གསུམ་སྟེ། དབྱེ་བ་དངོས།་་་་་ང་རྒྱལ། མཐོང་དང་།་་་་་སྤང་བྱ་གང་ཡིན་པ། མ་སྤངས་ཀྱང་མངོན་དུ་མི་འགྱུར་བའི་ཁྱད་པར་རོ།་་་་་འཕགས་པ། །རྣམ་པའི་དབྱེ་བ་ལ་ལྔ་སྟེ། ཀུན་འགྲོ་ཡིན་མིན་གྱི། ཟག་བཅས་ཟག་མེད་ལ་དམིགས་པའི། གང་གིས་རྒྱས་པར་འགྱུར་བའི། མི་དགེ་བ་དང་ལུང་མ་བསྟན་གྱི་རྣམ་པའི་དབྱེ་བ། དུས་གསུམ་ལ་ཕྲ་རྒྱས་གང་ལྡན་པའོ། །དང་པོ་ལ་གསུམ་སྟེ། སྐལ་བ་མཉམ་པའི།་་་་་སྡུག་བསྔལ། སྐལ་བ་མི་མཉམ་པའི། དེ་ལས་གཞན་པའི་ཀུན་འགྲོའི་དབྱེ་བའོ།་་་་་དེ་དག །གཉིས་པ་ལ་གསུམ་སྟེ། མདོར་བསྟན།་་་་་འགོག་དང་། རྒྱས་པར་བཤད།་་་་་རང་གི རྩོད་པ་སྤང་བའོ།་་་་་འདོད་ཆགས། །གསུམ་པ་ལ་གཉིས་ཏེ། དམིགས་པས་དང་།་་་་་ཕྲ་རྒྱས། མཚུངས་ལྡན་གྱིས་རྒྱས་པའོ།་་་་་གང་ཞིག །བཞི་པ་ལ་གསུམ་སྟེ། ངོ་བོའི་དབྱེ་བ།་་་་་གོང་མ། དེ་དག་གི་རྩ་བའི་དབྱེ་བ། དེ་ལས་འཕྲོས་པའོ།་་་་་མགོ་གཅིག །གཉིས་པ་ལ་གཉིས་ཏེ། མི་དགེ་བའི་དང་།་་་་་འདོད་ན། ལུང་མ་བསྟན་གྱི་རྩ་བའོ། །འདི་ལ་གཉིས་ཏེ། གསུམ་དུ་བསྟན་པ།་་་་་ལུང་མ། བཞིར་བསྟན་པའོ།་་་་་བཞི་ཞེས། །ལྔ་པ་ལ་གསུམ་སྟེ། ལྡན་ཚུལ་དངོས། སྤངས་པ་ལྡན་པར་བཞག་ཚུལ།་་་་་སྡུག་བསྔལ། ཆོས་གང་ལ་སེམས་གང་གི་དམིགས་པའོ། །དང་པོ་ལ་གསུམ་སྟེ། རང་གི་མཚན་ཉིད་པའི་ལྡན་ཚུལ། སྤྱིའི་མཚན་ཉིད་པའི་ལྡན་ཚུལ།་་་་་ལྷག་མ། ལྡན་པ་དུས་གསུམ་དཔྱད་པའོ། །དང་པོ་ལ་གཉིས་ཏེ། དུས་གཉིས་ཀྱི་དང་་་་་་འདས་དང་། མ་འོངས་པའི་ལྡན་ཚུལ་ལོ།་་་་་ཡིད་ཀྱི། །གསུམ་པ་ལ་གསུམ་སྟེ། འདོད་པ་བརྗོད། དེ་དགག དེའི་ལན་ནོ།་་་་་ཆོས་ཉིད། །དང་པོ་ལ་གསུམ་སྟེ། དམ་བཅའ་དང་རྟགས་དགོད།་་་་་དུས་རྣམས། དེ་ཡོད།་་་་་ཡོད་སྨྲའི་དབྱེ་བ། དབྱིག་བཤེས་ཀྱི་ལུགས་འཐད་པའོ།་་་་་གསུམ་པ། །གཉིས་པ་དེ་དགག་པ་ལ་གཉིས་ཏེ། གེགས་སུ།་་་་་གནོད་བྱེད་བརྗོད། སྒྲུབ་བྱེད་དགག་པའོ།་་་་་འདི་ལ་གཞུང་མེད། །གསུམ་པ་ཆོས་གང་ལ་སེམས་གང་གིས་དམིགས་པ་ལ་གཉིས་ཏེ། ཁམས་གསུམ་གྱི་ཆོས་ལྔ་ལ་དང་། ཟག་མེད་ལ་སེམས་གང་གིས་དམིགས་པའོ།་་་་་ཟག་མེད། །དང་པོ་ལ་གཉིས་ཏེ། ཆོས་གསུམ་ལ་དང་།་་་་་དང་པོའི། ཆོས་གཉིས་ལ་སེམས་གང་གིས་དམིགས་པའོ།་་་་་འགོག་དང་། །གཉིས་པ་ཕྲ་རྒྱས་ཀྱི་སྐྱེ་ཚུལ་ལ་གཉིས་ཏེ། སྐྱེ་བའི་རིམ་པ།་་་་་རྨོངས་ལས། ཕྲ་རྒྱས།་་་་་སྐྱེ་བའི་རྒྱུའོ། །གསུམ་པ་རྣམ་གྲངས་སོགས་བཤད་པ་ལ་གསུམ་སྟེ། རྣམ་གྲངས་དངོས། དེ་རྣམས་གང་དང་མཚུངས་པར་ལྡན། སྒྲིབ་པ་ལྔ་འདོད་ཁམས་པར་བསྟན་པའོ། །དང་པོ་ལ་གཉིས་ཏེ། ཟག་པ་སོགས་བཞིར་བསྟན། ཀུན་སྦྱོར་སོགས་ལྔར་བསྟན་པའོ། །དང་པོ་ལ་གཉིས་ཏེ། དབྱེ་བ་དངོས། ངེས་ཚིག་གོ །དང་པོ་ལ་གསུམ་སྟེ། ཟག་པ། ཆུ་སྦྱོར། ཉེར་ལེན་ནོ། །དང་པོ་ལ་གསུམ་སྟེ། འདོད་པའི་ཟག་པ།་་་་་འདོད་ན། སྲིད་པའི་ཟག་པ།་་་་་གཟུགས་དང་། རྩ་བ།་་་་་མ་རིག་པའི་ཟག་པའོ། །གཉིས་པ་ལ་གཉིས་ཏེ། དངོས་དང་།་་་་་ཆུ་བོ། རྩོད་པ་སྤོང་བའོ།་་་་་ཟག་པར། །གསུམ་པ་ལ་གཉིས་ཏེ། དངོས་དང་།་་་་་ཇི་སྐད། མ་རིག་་་་་རྩོད་པ་སྤོང་བའོ། །གཉིས་པ་ལ་གཉིས་ཏེ། ཕྲ་རྒྱས་སྤྱིའི་དང་།་་་་་གང་ཕྱིར། དེ་དག་་་་་བྱེ་བྲག་ཟག་པ་སོགས་ཀྱི་ངེས་ཚིག་གོ །གཉིས་པ་ཀུན་སྦྱོར་སོགས་ལྔར་བསྟན་པ་ལ་གཉིས་ཏེ། མདོར་བསྟན།་་་་་དེ་དག རྒྱས་པར་བཤད་པའོ། །འདི་ལ་བཞི་སྟེ། ཀུན་སྦྱོར། འཆིང་བ།་་་་་ཚོར་བའི། ཉོན་མོངས།་་་་་ཉེ་ཉོན། ཀུན་དཀྲིས་སོ། །དང་པོ་ལ་གཉིས་ཏེ། ཀུན་སྦྱོར་དགུར་བསྟན། ཆ་མཐུན་ལྔར་བཤད་པའོ། །དང་པོ་ལ་གཉིས་ཏེ། ལྟ་བ་གསུམ་དང་།་་་་་རྫས་དང་། གང་ཕྱིར།་་་་་ཕྲག་དོག་སེར་སྣ་ཀུན་སྦྱོར་དུ་བཞག་པའི་རྒྱུའོ། །གཉིས་པ་ལ་གཉིས་ཏེ། ཐ་མའི་དང་། གོང་མའི་ཆ་མཐུན་ལྔའོ།་་་་་གོང་མའི། །དང་པོ་ལ་གཉིས་ཏེ། ངོ་བོ་བྱེད་ལས་དང་བཅས་པ།་་་་་ཐ་མའི། སྒོ་དང་།་་་་་ཀུན་སྦྱོར་གསུམ་གྱི་རྒྱུ་མཚན་ནོ། །བཞི་པ་ཀུན་དཀྲིས་ལ་གསུམ་སྟེ། དངོས་ཀྱི་དོན། ཞར་ལ་དྲི་མ་བཤད་པ། དེའི་ཁྱད་པར་བཤད་པའོ། །དང་པོ་ལ་གཉིས་ཏེ། ཀུན་དཀྲིས་སོགས་ཀྱི་དབྱེ་བ།་་་་་ངོ་ཚ། དེ་ཉེ་ཉོན་དུ་བཞག་པའོ།་་་་་འདོད་ཆགས། །གཉིས་པ་ལ་གཉིས་ཏེ། དྲི་མའི་དབྱེ་བ།་་་་་གཞན་ཡང་། རྒྱུ་དང་།་་་་་དེ་ཉེ་ཉོན་དུ་བཞག་པའོ། །གསུམ་པ་ལ་གསུམ་སྟེ། མཐོང་སྤང་དང་སྒོམ་སྤང་གི་ཁྱད་པར།་་་་་དེ་ལས། འདོད་ན།་་་་་མི་དགེ་བ་དང་ལུང་མ་བསྟན་གྱི་ཁྱད་པར། ཁམས་དང་སའི་ཁྱད་པར་རོ།་་་་་འདོད་དང་། །གཉིས་པ་དེ་རྣམས་གང་དང་མཚུངས་པར་ལྡན་པ་ལ་གཉིས་ཏེ། ས་པ་གཉིས་སུ་དབྱེ་བ།་་་་་མཐོང་སྤང་། ཚོར་བ་གང་དང་མཚུངས་པར་ལྡན་པའོ། །འདི་ལ་གཉིས་ཏེ། རྩ་ཉོན་དང་། ཉེ་ཉོན་ཚོར་བ་གང་དང་མཚུངས་པར་ལྡན་པའོ། །དང་པོ་ལ་གཉིས་ཏེ། འདོད་པའི་ས་དང་། གོང་མའི་ལྡན་ཚུལ་ལོ།་་་་་ས་གང་། །དང་པོ་ལ་གཉིས་ཏེ། སོ་སོ་གང་དང་ལྡན་པ།་་་་་བདེ་བ། བཏང་སྙོམས།་་་་་ཀུན་འགྲོ་གང་དང་གང་ལྡན་པའོ། །གཉིས་པ་ལ་གསུམ་སྟེ། སོ་སོའི་དང་།་་་་་འགྱོད་དང་། བཏང་སྙོམས།་་་་་ཀུན་གྱི་དང་། ས་མང་བཞིའི་ལྡན་ཚུལ་ལོ།་་་་་བཞི་པོ། །གསུམ་པ་སྒྲིབ་པ་ལྔ་འདོད་ཁམས་པར་བསྟན་པ་ལ་གཉིས་ཏེ། དངོས་དང་།་་་་་འདོད་ན། མི་མཐུན།་་་་་གྲངས་ངེས་སོ། །གཉིས་པ་སྤོང་བྱེད་གཉེན་པོའི་རྣམ་གཞག་ལ་ལྔ་སྟེ། ཚུལ་ཇི་ལྟར་སྤང་བ། གཉེན་པོ།་་་་་སྤོང་བྱེད་གཉེན་པོའི་དབྱེ་བ། གང་ལས་ཕྱེ་ནས་སྤོང་ཚུལ།་་་་་དམིགས་པ། མཚན་ཉིད།་་་་་སྤངས་པ་ཐག་བསྲིང་ཚུལ། སྤངས་པའི་ཐོབ་པ་ཡང་ཡང་དུ་བསྟན་པའོ།་་་་་ལན་ཅིག །དང་པོ་ལ་གཉིས་ཏེ། མཐོང་སྤང་དང་།་་་་་དམིགས་པ། གཉེན་པོ།་་་་་སྒོམ་སྤང་སྤོང་ཚུལ་ལོ། །གསུམ་པ་སྤོང་བའི་འབྲས་བུ་ཡོངས་ཤེས་ལ་ལྔ་སྟེ། ཡོངས་ཤེས་ཀྱི་དབྱེ་བ། གང་གི་འབྲས་བུ་གང་ཡིན་པ། གྲངས་ངེས།་་་་་བྲལ་བའི། ལྡན་ཚུལ། ཐོབ་གཏོང་ངོ་།་་་་་ལ་ལ། །དང་པོ་ལ་གཉིས་ཏེ། མཐོང་ལམ་གྱི་དྲུག་དང་།་་་་་ཡོངས་སུ། སྒོམ་ལམ་གྱི་གསུམ་དུ་དབྱེ་བའོ།་་་་་ཡོངས་སུ། །གཉིས་པ་ལ་བཞི་སྟེ། མཐོང་བསྒོམ་དང་།་་་་་དྲུག་བཟོད། ས་དང་།་་་་་མི་ལྕོག ལམ་དང་།་་་་་ཐམས་ཅད། ཤེས་པ་གང་གི་འབྲས་བུ་གང་ཡིན་པའོ།་་་་་རྗེས་ཀྱི། །བཞི་པ་ལ་གཉིས་ཏེ། མི་ལྡན་པའི།་་་་་གཅིག་མིན། ལྡན་པའི་གང་ཟག་གོ །འདི་ལ་གཉིས་ཏེ། དངོས་དང་། རྩོད་སྤང་ངོ་།་་་་་ཁམས་ལས། །དང་པོ་ལ་གཉིས་ཏེ། མཐོང་ལམ་པ་དང་།་་་་་མཐོང་ལ། བསྒོམ་ལ།་་་་་སྒོམ་ལམ་པ་ལ་དུ་ལྡན་ནོ། །དྲུག་པ་ལམ་དང་གང་ཟག་བསྟན་པ་ལ་གསུམ་སྟེ། བདེན་པ་མངོན་པར་རྟོགས་པའི་ལམ། བདེན་པ་མངོན་པར་རྟོགས་པའི་གང་ཟག་བཤད། ལམ་ཉིད་ཀྱི་ཁྱད་ཆོས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། མཚམས་སྦྱར་བ།་་་་་བདེན་པ། ལམ་དངོས་སོ། །འདི་ལ་གསུམ་སྟེ། ལམ་གྱི་ངོ་བོ།་་་་་སྒོམ་པའི། དམིགས་པ། སྐྱེ་ཚུལ་ལོ། །གཉིས་པ་ལ་གཉིས་ཏེ། བདེན་པ་བཞི། བདེན་པ་གཉིས་སོ།་་་་་གང་ལ། །དང་པོ་ལ་གསུམ་སྟེ། དབྱེ་བ།་་་་་བདེན་པ། རྟོགས་པའི་གོ་རིམ།་་་་་དེ་ལྟར། ཟག་བཅས་སྡུག་བསྔལ་དུ་བསྟན་པའོ།་་་་་ཡིད་འོང་། །གསུམ་པ་སྐྱེ་ཚུལ་ལ་གཉིས་ཏེ། འཇུག་ཚུལ་མདོར་བསྟན། སྒོམ་ཚུལ་རྒྱས་པར་བཤད་པའོ། །དང་པོ་ལ་གཉིས་ཏེ། བྱ་བའི་རིམ་པ།་་་་་ཚུལ་གནས། བློའི་ངོ་བོའོ།་་་་་ཐོས་སོགས། །གཉིས་པ་ལ་གཉིས་ཏེ། རྟེན་སྣོད་དུ་རུང་བ་སྒོམ་པ་པོའི་ཁྱད་པར། དེས་བསྒོམ་བྱའི་ལམ་གྱི་རིམ་པའོ། །དང་པོ་ལ་གཉིས་ཏེ། མདོར་བསྟན།་་་་་བསྲིང་གཉིས། རྒྱས་པར་བཤད་པའོ། །འདི་ལ་གཉིས་ཏེ། གཉིས་ལྡན་བཀག་་་་་མཆོག་མིང་། བཟློག་པས་བླང་བའོ། །འདི་ལ་གཉིས་ཏེ། བཟློག་པ་གཉེན་པོར་བསྟན།་་་་་བཟློག་པ། དེ་འཕགས་རིགས་སུ་བསྟན་པའོ། །འདི་ལ་གཉིས་ཏེ། དངོས་དང་།་་་་་འཕགས་རིགས། དེའི་ཁྱད་པར་དཔྱད་པའོ། །འདི་ལ་གཉིས་ཏེ། དེས་དོན་གང་བསྟན་པ།་་་་་གསུམ་གྱིས། དེ་ལྟར་བསྟན་པའི་དགོས་པའོ།་་་་་སྲེད་པ། །གཉིས་པ་དེས་བསྒོམ་བྱའི་ལམ་གྱི་རིམ་པ་ལ་གཉིས་ཏེ། ཞི་གནས་སྒོམ་ཚུལ། ལྷག་མཐོང་སྒོམ་ཚུལ་ལོ། །དང་པོ་ལ་གཉིས་ཏེ། མདོར་བསྟན།་་་་་དེ་ལ། རྒྱས་པར་བཤད་པའོ། །འདི་ལ་གཉིས་ཏེ། མི་སྡུག་པ་སྒོམ་པ། དབུགས་འབྱུང་རྔུབ་དྲན་པའོ། །དང་པོ་ལ་གཉིས་ཏེ། མདོར་བསྟན།་་་་་ཀེང་རུས། རྒྱས་པར་བཤད་པའོ། །འདི་ལ་གཉིས་ཏེ། རྣལ་འབྱོར་བསྒོམ་ཚུལ།་་་་་རུས་པ། དེ་ཉིད་ངེས་པར་བྱ་བའོ།་་་་་མི་སྡུག །གཉིས་པ་ལ་གཉིས་ཏེ། ཐུན་མོང་དུ་བསྟན།་་་་་དབུགས་རྔུབ། ཁྱད་པར་དུ་བཤད་པའོ། །འདི་ལ་གསུམ་སྟེ། སྒོམ་ཚུལ་གྱི་དབྱེ་བ།་་་་་བགྲང་ལས། ཡུལ་གྱི་ངོ་བོ།་་་་་དབུགས་རྡུབ། འོག་མ།་་་་་ཡུལ་ཅན་གྱི་ཁྱད་པར་རོ། །གཉིས་པ་ལྷག་མཐོང་སྒོམ་ཚུལ་ལ་གསུམ་སྟེ། ཚོགས་ལམ་གྱི་དང་། སྦྱོར་ལམ་གྱི་དང་། བདེན་པ་རྟོགས་པའི་ལམ་གྱི་སྐྱེ་ཚུལ་ལོ།་་་་་མངོན་པར། །དང་པོ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ཏེ། གང་ཟག་་་་་་ཞི་གནས། བསྒོམ་ཚུལ་ལོ།་་་་་ལུས་ཚོར། །གཉིས་པ་ལ་གཉིས་ཏེ། ཐུན་མོང་གི་བསྒོམ་ཚུལ། ཆོས་དྲན་པ་ཉེར་བཞག་གི་སྒོམ་ཚུལ་ལོ།་་་་་དེ་ནི། །དང་པོ་ལ་གསུམ་སྟེ། ངོ་བོ།་་་་་ཤེས་རབ། རིམ་ནི།་་་་་གོ་རིམ། གྲངས་ངེས་སོ།་་་་་ཕྱིན་ཅི། །གཉིས་པ་སྦྱོར་ལམ་གྱི་སྐྱེ་ཚུལ་ལ་བཞི་སྟེ། སྐྱེ་ཚུལ། ངོ་བོ།་་་་་བསྒོམ་བྱུང་། ཁྱད་པར། སྔོན་འགྲོའོ།་་་་་དེ་ཡི། །དང་པོ་ལ་གསུམ་སྟེ། སྐྱེ་བའི་རིམ་པ།་་་་་དེ་ལས། དེ་ཕུང་པོ་ལྔས་བསྡུས་པ།་་་་་ཐམས་ཅད། དོན་བསྡུ་བའོ།་་་་་དེ་ལྟར། །གསུམ་པ་ལ་ལྔ་སྟེ། སའི་དང་།་་་་་མི་ལྕོགས། རྟེན་གྱི་དང་།་་་་་འདོད་རྟེན། ཐོབ་གཏོང་གི་དང་།་་་་་འཕགས་པས། ཡོན་ཏན་གྱི་དང་།་་་་་རྩེ་མོ། རིགས་ཀྱི་ཁྱད་པར་རོ།་་་་་གཉིས་སློབ། །གསུམ་པ་བདེན་པ་མངོན་པར་རྟོགས་པའི་ལམ་གྱི་སྐྱེ་ཚུལ་ལ་ལྔ་སྟེ། སེམས་བཅུ་དྲུག་གི་སྐྱེ་ཚུལ།་་་་་འཇིག་རྟེན། མངོན་རྟོགས་གསུམ་དུ་བསྟན་པ།་་་་་རྣམ་གསུམ། ས་གང་ལ་བརྟེན་པ།་་་་་དེ་ནི། སེམས་བཅུ་དྲུག་གི་གྲངས་ངེས།་་་་་བཟོད་དང་། ལམ་གང་གིས་བསྡུས་པའོ།་་་་་དེ་ལ། །གཉིས་པ་བདེན་པ་མངོན་པར་རྟོགས་པའི་གང་ཟག་ལ་གསུམ་སྟེ། གང་ཟག་ཟུང་བཞི་བཤད། རྣམ་གྲངས་བདུན་དུ་དབྱེ།་་་་་གང་ཟག རྫས་དྲུག་དུ་བསྡུ་བའོ། །དང་པོ་ལ་གསུམ་སྟེ། མཐོང་ལམ་དང་། སྒོམ་ལམ་དང་། མི་སློབ་ལམ་ལ་གནས་པའི་གང་ཟག་གོ །དང་པོ་ལ་གཉིས་ཏེ། དབང་པོའི་སྒོ་ནས་དབྱེ་བ།་་་་་དབང་པོ། འབྲས་བུའི་སྒོ་ནས་དབྱེ་བའོ། །འདི་ལ་གསུམ་སྟེ། རྒྱུན་ཞུགས་ཞུགས་པ།་་་་་སྒོམ་པས། ཕྱིར་འོང་ཞུགས་པ།་་་་་གཉིས་པ། འདོད་པའམ།་་་་་ཕྱིར་མི་འོང་ཞུགས་པའོ། །གཉིས་པ་ལ་གཉིས་ཏེ། མཐོང་སྤང་སྤངས་པའི་སྒོ་ནས་བཞག་པ། སྒོམ་སྤང་སྤང་ཚུལ་གྱི་སྒོ་ནས་བཞག་པའོ། །དང་པོ་ལ་གསུམ་སྟེ། འབྲས་བུའི་སྒོ་ནས་དང་།་་་་་གང་གིས། དབང་པོའི་སྒོ་ནས་དང་།་་་་་དེ་ཚེ། ཙམ་ཁྱད་ཀྱི་སྒོ་ནས་བཞག་པའོ།་་་་་འབྲས་ཐོབ། །གཉིས་པ་ལ་གཉིས་ཏེ། རྒྱུ་མཚན་སྤང་གཉེན་གྱི་རྣམ་གཞག་་་་་ས་དང་། རྒྱུ་མཚན་ཅན་གང་ཟག་གི་རྣམ་གཞག་གོ །འདི་ལ་གསུམ་སྟེ། རྒྱུན་ཞུགས་ཀྱི། ཕྱིར་འོང་གི ཕྱིར་མི་འོང་གི་སྐོར་རོ། །དང་པོ་ལ་གཉིས་ཏེ། ཙམ་པོ་དང་།་་་་་འབྲས་གནས། རྣམ་གསུམ།་་་་་ཁྱད་པར་ཅན་ནོ། །གཉིས་པ་ལ་གཉིས་ཏེ། ཞུགས་པ་དང་།་་་་་རྣམ་པ། འབྲས་གནས་སོ། །འདི་ལ་གཉིས་ཏེ། ཙམ་པོ།་་་་་རྣམ་པ། ཉེས་ཆ།་་་་་ཁྱད་པར་ཅན་ནོ། །གསུམ་པ་ལ་གཉིས་ཏེ། ཞུགས་པ་དང་།་་་་་གསུམ་པ། འབྲས་གནས་སོ། །འདི་ལ་གསུམ་སྟེ། ཙམ་པོ་དང་།་་་་་དེ་དགུ། ཁྱད་པར་ཅན་གྱི་དབྱེ་བ། དེ་གཉིས་ཕྱི་མའི་ཁྱད་པར་བཞག་པའོ།་་་་་སྲིད་རྩེ། །གཉིས་པ་ལ་གཉིས་ཏེ། སྐྱེ་བ་ལེན་ཚུལ་གྱི་སྒོ་ནས་དང་། ཡོན་ཏན་ཐོབ་ཚུལ་གྱི་སྒོ་ནས་བཞག་པའོ།་་་་་འགོག་པ། །དང་པོ་ལ་གསུམ་སྟེ། ཁམས་གོང་དུ་འགྲོ་བ། ཚེ་འདིར་མྱ་ངན་ལས་འདའ་བ།་་་་་གཞན་ནི། དེ་དག་གི་ཁྱད་པར་བཤད་པའོ། །དང་པོ་ལ་གཉིས་ཏེ། གཟུགས་སུ་ཉེར་འགྲོ། གཟུགས་མེད་ཉེར་འགྲོའོ།་་་་་གཞན་ནི། །དང་པོ་ལ་གསུམ་སྟེ། བར་འདའ་བ།་་་་་དེ་ནི། སྐྱེས་འདུ།་་་་་སྐྱེས་འདའ་བ། གོང་འཕོའོ། །འདི་ལ་གཉིས་ཏེ། ངོ་བོ།་་་་་གོང་དུ། དབྱེ་བའོ། །འདི་ལ་གཉིས་ཏེ། འོག་མིན་འགྲོ།་་་་་དེ་ནི། སྲིད་རྩེར་འགྲོའོ།་་་་་གཞན་སྲིད། །གསུམ་པ་དེ་དག་གི་ཁྱད་པར་བཤད་པ་ལ་བཞི་སྟེ། གཟུགས་སུ་ཉེར་འགྲོ་དགུར་དབྱེ།་་་་་གསུམ་ལ་གཅིག གོང་དུ།་་་་་དམ་པའི་འགྲོ་བ་བདུན་དུ་བསྡུ། དབྱེ་བ་དེ་དག་གང་གིས་དབང་དུ་བྱས་པ།་་་་་འདོད་པར། བསམ་གཏན་སྤེལ་སྒོམ་གྱི་ཚུལ་ལོ། །འདི་ལ་བཞི་སྟེ། དང་པོར་གང་སྤེལ།་་་་་དང་པོར། གྲུབ་པའི་ཚད།་་་་་སྐད་ཅིག སྤེལ་བའི་དགོས་པ།་་་་་སྐྱེ་དང་། གྲངས་ངེས་པའོ།་་་་་དེ་ནི། །གསུམ་པ་མི་སློབ་ལམ་ལ་གནས་པའི་གང་ཟག་ལ་གསུམ་སྟེ། འབྲས་གནས་དངོས།་་་་་དེ་བདེ། དེའི་ཞར་བྱུང་། འབྲས་གནས་ཀྱི་དབྱེ་བའོ། །གཉིས་པ་ལ་གསུམ་སྟེ། འདོད་ཆགས་དང་བྲལ་བའི་ཚུལ་དཔྱད། གལ་ཏེ།་་་་་ཟད་པ་ཤེས་པའི་རྗེས་ལ་གང་བྱུང་དཔྱད། དགེ་སྦྱོང་གི་ཚུལ་དང་འབྲས་བུ་ངོས་བཟུང་བའོ། །དང་པོ་ལ་བཞི་སྟེ། ཆགས་བྲལ་སྤྱིར་བསྟན།་་་་་འཇིག་རྟེན། བྲལ་ཐོབ་ཀྱི་སྐྱེ་ཚུལ་བཤད།་་་་་འཇིག་རྟེན། ཟག་མེད།་་་་་ས་གང་གིས། གང་ལ་འདོད་ཆགས་བྲལ་བའི་ཚུལ། འཇིག་རྟེན།་་་་་འཇིག་རྟེན་པའི་ལམ་གྱི་རྣམ་པའོ། །གསུམ་པ་ལ་གསུམ་སྟེ། དངོས་ཀྱི་དོན། དེ་ཉིད་ཚངས་པའི་འཁོར་ལོར་བསྟན།་་་་་དེ་ཉིད། ཁམས་གང་དུ་འབྲས་བུ་གང་ཐོབ་པའོ།་་་་་འདོད་པར། །དང་པོ་ལ་གཉིས་ཏེ། ངོ་བོ།་་་་་དགེ་སྦྱོང་། རྩོད་སྤོང་ངོ་།་་་་་འབྲས་བུ། །གསུམ་པ་འབྲས་གནས་ཀྱི་དབྱེ་བ་ལ་གཉིས་ཏེ། དྲུག་ཏུ་དབྱེ། དགུར་དབྱེ་བའོ།་་་་་སངས་རྒྱས། །དང་པོ་ལ་བཞི་སྟེ། དགྲ་བཅོམ་རིགས་དྲུག་ཏུ་དབྱེ་བ། རིགས་དབྱེ་སྟེ་གཞན་ལ་སྦྱར་བ།་་་་་སློབ་དང་། ཉམས་པའི་ཚུལ་ལ་རྩོད་པ་སྤོང་།་་་་་ཐོབ་དང་། མི་གཡོ།་་་་་དབང་པོ་ཇི་ལྟར་འཕོ་བའི་ཚུལ་ལོ། །དང་པོ་ལ་གཉིས་ཏེ། དབྱེ་བ་སོ་སོའི་ངོ་བོ།་་་་་དགྲ་བཅོམ། ཆོས་གང་ལས་ཉམས་པའོ།་་་་་བཞི་ནི། །གསུམ་པ་རྫས་དྲུག་ཏུ་བསྡུ་བ་ལ་གསུམ་སྟེ། དྲུག་ཏུ་བསྡུ་བ་དངོས།་་་་་དེ་དག རྣམ་གྲོལ་གཉིས་ཀྱི་ཁྱད་པར།་་་་་འགོག་ཐོབ། སློབ་མི་སློབ་གང་གིས་རྫོགས་པའོ།་་་་་སྙོམས་འཇུག །གསུམ་པ་ལམ་ཉིད་ཀྱི་ཁྱད་ཆོས་བྱེ་བྲག་ཏུ་བཤད་པ་ལ་ལྔ་སྟེ། ལམ་བཞིར་དབྱེ་བ།་་་་་མདོར་ན། གནས་དང་དབང་པོ་ཐ་དད་པའི་ལམ་དུ་བསྟན་པ།་་་་་བསམ་གཏན། བྱང་ཆུབ་ཕྱོགས་མཐུན་དུ་བསྟན་པ། མདོའི་དོན་ལ་རྩོད་པ་སྤངས་པ། ལམ་གྱིས་ཐོབ་པའི་རྣམ་གྲོལ་ལོ། །གསུམ་པ་ལ་ལྔ་སྟེ། བྱང་ཆུབ་ཕྱོགས་མཐུན་གྱི་དབྱེ་བསྡུ།་་་་་ཟད་དང་། ཆོས་གང་གནས་སྐབས་གང་དུ་བསྒོམ་པ།་་་་་སྡེ་ཚན། ཆོས་དུ་ཟག་བཅས་ཟག་མེད་ཡིན་པ།་་་་་བྱང་ཆུབ། ས་གང་ན་ཆོས་དུ་ཡོད་པ།་་་་་བསམ་གཏན། གནས་སྐབས་གང་དུ་ཤེས་ནས་དད་པ་ཐོབ་དཔྱད་པའོ།་་་་་བདེན་གསུམ། །བཞི་པ་ལ་གཉིས་ཏེ། ཡང་དག་པའི་རྣམ་གྲོལ་ལམ།་་་་་བཅིངས་ཕྱིར། ཡང་དག་པའི་ཤེས་པའོ།་་་་་བྱང་ཆུབ། །ལྔ་པ་ལ་བཞི་སྟེ། སེམས་གང་སྒྲིབ་པ་ལས་གྲོལ།་་་་་མི་སློབ། འགག་པར།་་་་་ལམ་གང་གིས་སྒྲིབ་པ་སྤང་། རྣམ་གྲོལ་ལ་སོགས་པའི་ཁྱད་པར།་་་་་འདུས་མ། སྡུག་བསྔལ།་་་་་ཡིད་འབྱུང་ལས་བྱུང་བའི་མུ་བཞིའོ། །བདུན་པ་ཡེ་ཤེས་བསྟན་པ་ལ་གཉིས་ཏེ། ཁྱད་གཞི་ཤེས་པ། དེའི་ཁྱད་ཆོས་བཤད་པའོ། །དང་པོ་ལ་གསུམ་སྟེ། བཟོད་ཤེས་ལྟ་བའི་ཁྱད་པར། ཤེས་པ་བཅུ་ངོས་བཟུང་བ། དེའི་ཁྱད་པར་དཔྱད་པའོ། །དང་པོ་ལ་གཉིས་ཏེ། ཟག་མེད་བཟོད་ཤེས་ལྟ་བའི་དང་།་་་་་དྲི་མེད། ཟག་བཅས་ཤེས་པ་ལྟ་བའི་ཁྱད་པར་རོ།་་་་་གཞན་ཤེས། །གཉིས་པ་ལ་གསུམ་སྟེ། བཅུར་དབྱེ་བ། ཟད་མི་སྐྱེ་ཤེས་པའི་ཁྱད་པར།་་་་་ཟད་པ། ཤེས་པ་བཅུའི་གྲངས་ངེས་སོ། །དང་པོ་ལ་བཞི་སྟེ། ཤེས་པ།་་་་་གསུམ་དུ་དབྱེ། དེ་ལས་ཕྱུངས་ཏེ་བཞིར་བཞག་་་་་དེ་དག དེ་ལས་ཕྱུངས་ཏེ་གཉིས་སུ་བཞག་་་་་རྣམ་བཞི། དེ་ལས་ཕྱུངས་ཏེ་གཅིག་ཏུ་བཞག་པའོ། །འདི་ལ་གཉིས་ཏེ། ངོ་བོ་དང་།་་་་་བཞི་ལས། ཁྱད་པར་རོ། །འདི་ལ་གཉིས་ཏེ། གང་གིས་གང་མི་ཤེས་པ།་་་་་དེས་ནི། གང་གིས་གང་ཤེས་པའོ།་་་་་ཉན་ཐོས། །གསུམ་པ་ཤེས་པ་བཅུའི་གྲངས་ངེས་ལ་གཉིས་ཏེ། གྲངས་ངེས་དངོས།་་་་་རང་བཞིན། སྒོམ་པའི།་་་་་གཉེན་པོ་བྱེ་བྲག་ཏུ་བཤད་པའོ། །གསུམ་པ་དེའི་ཁྱར་པར་དཔྱད་པ་ལ་གཉིས་ཏེ། རྣམ་པའི་ཁྱད་པར། ཤེས་པའི་ཁྱད་པར་རོ། །དང་པོ་ལ་གཉིས་ཏེ། ཤེས་པ་སོ་སོའི་རྣམ་པ།་་་་་ཆོས་ཤེས། རྣམ་པ་སོ་སོའི་ངོ་བོའོ། །འདི་ལ་གཉིས་ཏེ། རྣམ་པ་བཅུ་དྲུག་གི་ངོ་བོ།་་་་་དྲི་མེད། རྣམ་པའི་རྣམ་པ།་་་་་ངོ་བོ་ངོས་བཟུང་དང་བཅས་པའོ། །གཉིས་པ་ལ་ཤེས་པའི་ཁྱད་པར་ལ་ལྔ་སྟེ། དང་པོ།་་་་་ངོ་བོའི་དང་། དང་པོ།་་་་་སའི་དང་། དེ་ནི།་་་་་རྟེན་གྱི་དང་། དྲན་པ་ཉེར་བཞག་གི་དང་།་་་་་འགོག་བློ། དམིགས་པའི་ཁྱད་པར་རོ། །འདི་ལ་གསུམ་སྟེ། ཤེས་པ་དུ་གང་གིས་དམིགས་པ་ཡིན།་་་་་ཆོས་བློའི། ཆོས་བཅུ།་་་་་ཆོས་དུ་གང་གིས་དམིགས་པ་ཡིན། ཤེས་པ་གཅིག་གིས་ཅི་ཙམ་ཤེས་པའོ།་་་་་ཀུན་རྫོབ། །གཉིས་པ་དེའི་ཁྱད་པར་གྱི་ཆོས་བཤད་པ་ལ་གསུམ་སྟེ། ཤེས་པའི་ལྡན་པ།་་་་་ཟག་མེད། ཐུན་མོང་གི་ཐོབ་པ། ཤེས་པའི་ཡོན་ཏན་ནོ། །གཉིས་པ་ལ་གསུམ་སྟེ། མཐོང་ལམ་གྱི་གནས་སྐབས་སུ་ཐོབ་པ།་་་་་མཐོང་བའི། ཆགས་བཅས།་་་་་གཞན་གྱི་གནས་སྐབས་སུ་ཐོབ་པ། ཐོབ་པའི་དབྱེ་བའོ།་་་་་རྙེད་དང་། །གསུམ་པ་ཤེས་པའི་ཡོན་ཏན་ལ་གཉིས་ཏེ། ཐུན་མོང་མ་ཡིན་པའི་དང་། ཐུན་མོང་གི་ཡོན་ཏན་ནོ། །དང་པོ་ལ་གསུམ་སྟེ། དབྱེ་བའི་སྒོ་ནས་མདོར་བསྟན།་་་་་སངས་རྒྱས། སོ་སོའི་རང་བཞིན་རྒྱས་པར་བཤད་པ། མཉམ་མི་མཉམ་གྱི་སྒོ་ནས་མཇུག་སངས་རྒྱས་་་་་་བསྡུ་བའོ། །གཉིས་པ་ལ་བཞི་སྟེ། སྟོབས་བཅུ། མི་འཇིགས་པ་བཞི།་་་་་མི་འཇིགས། དྲན་པ་ཉེར་བཞག་གསུམ།་་་་་དྲན་དང་། ཐུགས་རྗེ།་་་་་ཐུགས་རྗེ་ཆེན་པོའོ། །དང་པོ་ལ་གསུམ་སྟེ། སོ་སོའི་རང་བཞིན།་་་་་གནས་དང་། ས་གང་གིས་བསྡུས་པ།་་་་་སྔོན་གནས། སངས་རྒྱས་ཉིད་ལ་བཞག་པའོ།་་་་་ཅིའི། །གཉིས་པ་ཐུན་མོང་བའི་ཡོན་ཏན་ལ་གཉིས་ཏེ། མདོར་བསྟན།་་་་་ཆོས་གཞན། རྒྱས་པར་བཤད་པའོ། །འདི་ལ་གཉིས་ཏེ། འཕགས་པ་དང་ཐུན་མོང་བ། ཕལ་ཆེར་སོ་སྐྱེ་དང་ཐུན་མོང་བའོ། །དང་པོ་ལ་གཉིས་ཏེ། སོ་སོའི་ངོ་བོ། དེ་རྣམས་ཐུན་མོང་གི་ཐོབ་ཚུལ་ལོ།་་་་་མ་ཚང་། །དང་པོ་ལ་གསུམ་སྟེ། ཉོན་མོངས་མེད་པ།་་་་་ཉོན་མོངས། སྨོན་གནས་ཤེས་པ།་་་་་སྨོན་གནས། སོ་སོ་ཡང་དག་རིག་པའོ།་་་་་དེ་བཞིན། །གཉིས་པ་ཕལ་ཆེར་སོ་སྐྱེ་དང་ཐུན་མོང་བ་ལ་དྲུག་སྟེ། དབྱེ་བ།་་་་་རྫུ་འཕྲུལ། རྣམ་གྲོལ།་་་་་ངོ་བོ། ས།་་་་་ལྔ་ནི། སྤྱོད་ཡུལ།་་་་་རང་དང་། ཐོབ་བྱ།་་་་་འཐོབ་ཚུལ། དེ་གཏན་ལ་དབབ་པའོ། །འདི་ལ་གཉིས་ཏེ། ཐུན་མོང་དུ་དང་། ཁྱད་པར་དུ་གཏན་ལ་དབབ་པའོ། །དང་པོ་ལ་བཞི་སྟེ། གསུམ་པ།་་་་་དྲན་པ་ཉེར་བཞག་བཞི། དགེ་སོགས་གསུམ།་་་་་མིག་དང་། རིགས་པ་གསུམ།་་་་་གསུམ་ནི། ཆོ་འཕྲུལ་གསུམ་དང་སྦྱར་བའོ།་་་་་དང་པོ། །གཉིས་པ་ལ་གསུམ་སྟེ། རྫུ་འཕྲུལ་གྱི་མངོན་ཤེས། མིག་རྣའི་མངོན་ཤེས།་་་་་ལྷ་ཡི། གཞན་ཡང་།་་་་་སྐྱེས་ཐོབ་སོགས་ཀྱི་རང་བཞིན་ནོ། །དང་པོ་ལ་ལྔ་སྟེ། རྫུ་འཕྲུལ་གྱི་ཁྱད་པར།་་་་་རྫུ་འཕྲུལ། ཡུལ་སེམས་ངོས་བཟུང་བ།་་་་་དེ་དག རང་གི་་་་་དེས་ཇི་ལྟར་སྤྲུལ་པ། སྤྲུལ་སེམས་ཀྱི་ངོ་བོ།་་་་་བསྒོམ་ལས། རྫུ་འཕྲུལ།་་་་་རྫུ་འཕྲུལ་གྱི་དབྱེ་བའོ། །བརྒྱད་པ་སྙོམས་འཇུག་བསྟན་པ་ལ་གཉིས་ཏེ། སྙོམས་འཇུག་དངོས། དེ་ལ་བརྟེན་པའི་ཡོན་ཏན་ནོ། །དང་པོ་ལ་གསུམ་སྟེ། སྙོམས་འཇུག་བརྒྱད་དུ། ཏིང་ངེ་འཛིན་གསུམ་དུ། ཏིང་ངེ་འཛིན་བཞིར་དབྱེ་བའོ།་་་་་དགེ་བའི། །དང་པོ་ལ་གསུམ་སྟེ། བསམ་གཏན།་་་་་བསམ་གཏན་གྱི་དབྱེ་བ། རྒྱུ་སྙོམས་འཇུག ཐུན་མོང་དུ་གཏན་ལ་དབབ་པའོ། །གཉིས་པ་ལ་གསུམ་སྟེ། བསམ་གཏན་བཞི། གཟུགས་མེད་བཞི།་་་་་དེ་ནི། དེ་ལྟར།་་་་་གཉིས་ཀའི་མཇུག་བསྡུ་བའོ། །དང་པོ་ལ་གཉིས་ཏེ། སྤྱིའི་ངོ་བོ།་་་་་སྙོམས་འཇུག སོ་སོའི་མཚན་ཉིད་དོ།་་་་་དཔྱོད་དང་། །གསུམ་པ་ཐུན་མོང་དུ་གཏན་ལ་དབབ་པ་ལ་དྲུག་སྟེ། སྙོམས་འཇུག་གསུམ་དང་སྦྱར་བ།་་་་་བདུན་རྣམ། བསམ་གཏན་གྱི་ཡན་ལག་ངོས་བཟུང་བ། སྙོམས་འཇུག་ཐོབ་ཚུལ། རྟེན་གང་གིས་གང་མངོན་དུ་བྱེད་པ།་་་་་བསམ་གཏན། སྤྱོད་ཡུལ་གང་ལ་དམིགས་པ།་་་་་སྲེད་བཅས། ཉོན་མོངས་གང་གིས་སྤོང་བའོ། །གཉིས་པ་ལ་གསུམ་སྟེ། ཡན་ལག་དངོས། བསམ་གཏན་གྱི་ཁྱད་པར། དེ་དག་ལ་རྩོད་པ་སྤང་བའོ།་་་་་གཉིས་པ། །དང་པོ་ལ་གཉིས་ཏེ། ཐུན་མོང་དུ་བསྟན་པ།་་་་་དང་པོ། ཁྱད་པར་དུ་བསྟན་པའོ།་་་་་དང་པོ། །གཉིས་པ་ལ་གསུམ་སྟེ། ཉོན་མོངས་ཅན་ཡིན་མིན།་་་་་ཉོན་མོངས། སྐྱོན་ཅན་སྐྱོན་མེད།་་་་་སྐྱོན་བརྒྱད། སྐྱེ་བ་དང་སྙོམས་འཇུག་གི་ཁྱད་པར་རོ།་་་་་སྐྱེ་བའི། །གསུམ་པ་སྙོམས་འཇུག་ཐོབ་ཚུལ་ལ་གསུམ་སྟེ། །ཐོབ་ཚུལ་དངོས།་་་་་དེ་དང་། གང་གི་མཇུག་ཏུ་གང་སྐྱེ་བ། ས་བརྒྱད།་་་་་ཐོད་རྒལ་གྱི་སྙོམས་འཇུག་ཇི་ལྟར་སྐྱེ་བའོ། །གཉིས་པ་ལ་གཉིས་ཏེ། ཐུན་མོང་དུ་བསྟན་པ།་་་་་ཟག་པ། དག་པ་ཁྱད་པར་དུ་བཤད་པའོ།་་་་་དག་པ། །དྲུག་པ་ཉོན་མོངས་གང་གིས་སྤོང་བ་ལ་གསུམ་སྟེ། སྤོང་ཚུལ་དངོས།་་་་་ཟག་པ། ཉེར་བསྡོགས་ཀྱི་ཁྱད་པར།་་་་་དེ་དག བསམ་གཏན་ཁྱད་པར་ཅན་ནོ།་་་་་རྟོག་མེད། །གཉིས་པ་ཏིང་ངེ་འཛིན་གསུམ་དུ་དབྱེ་བ་ལ་གསུམ་སྟེ། རྟོགས་བཅས་དཔྱོད་བཅས་སོགས་གསུམ་དུ་དབྱེ་བ།་་་་་མན་ཆད། སྟོང་པ་ཉིད་སོགས་གསུམ་དུ་དབྱེ་བ། སྟོང་ཉིད།་་་་་སྟོང་ཉིད་སོགས་གསུམ་དུ་དབྱེ་བའོ། །གཉིས་པ་ལ་གཉིས་ཏེ། དབྱེ་བ་དངོས།་་་་་མཚན་མེད། དེ་ཁྱད་པར་དུ་བཤད་པའོ།་་་་་དག་དང་། །གཉིས་པ་སྙོམས་འཇུག་གི་ཡོན་ཏན་ལ་གཉིས་ཏེ། ཚད་མེད་བཤད། རྣམ་ཐར་སོགས་བཤད་པའོ། །དང་པོ་ལ་གཉིས་ཏེ། དབྱེ་བ་དང་།་་་་་ཚད་མེད། ཁྱད་པར་གྱི་ཆོས་སོ།་་་་་ཞིང་། །གཉིས་པ་ལ་བཞི་སྟེ། ཡོན་ཏན་དངོས། དེ་དག་གི་ཐོབ་ཚུལ།་་་་་འགོག་པ། གཟུགས་མེད།་་་་་རྟེན་གྱི་ཁྱད་པར། ཏིང་ངེ་འཛིན་གྱི་སྐྱེ་ཚུལ་ལོ།་་་་་ཁམས་གཉིས། །དང་པོ་ལ་གསུམ་སྟེ། རྣམ་ཐར། ཟིལ་གནོན།་་་་་ཟིལ་གྱིས། ཟད་པར་རོ།་་་་་ཟད་པར། །དང་པོ་ལ་གཉིས་ཏེ། མདོར་བསྟན།་་་་་རྣམ་ཐར། རྒྱས་པར་བཤད་པའོ། །འདི་ལ་གཉིས་ཏེ། ངོ་བོ་དང་། ཡུལ་ལོ།་་་་་དང་པོ། །དང་པོ་ལ་གསུམ་སྟེ། དང་པོ།་་་་་གཟུགས་ཅན་གྱི་དང་། གཟུགས་མེད།་་་་་།གཟུགས་མེད་ཀྱི་དང་། འགོག་པ།་་་་་འགོག་པའི་རྣམ་ཐར་རོ། །གསུམ་པ་གཞུང་ཡོངས་སུ་རྫོགས་པའི་བྱ་བ་ལ་ལྔ་སྟེ། སྟོན་པའི།་་་་་སྟོན་པའི་དམ་ཆོས་ཀྱི་དབྱེ་བ། དེ་འཛིན།་་་་་དེ་འཛིན་པའི་གང་ཟག བདག་གིས།་་་་་བསྟན་བཅོས་ཇི་ལྟར་བརྩམས་པའི་ཚུལ། ཉེས་པ་བཟོད་པར་གསོལ་བའོ།་་་་་ཉེས་པར། །ཐར་པ་འདོད་པས་བག་ཡོད་བྱ་བར་གདམས་པའོ། །འདི་ལ་གསུམ་སྟེ། སྟོན་པ།་་་་་དེ་ཉིད་མཐོང་བ་འདས་པར་བསྟན། དེ་ཉིད།་་་་་དེ་ཉིད་མ་མཐོང་རང་བཟོར་སྤྱོད། དེ་ལྟར།་་་་་དེས་ན་བག་ཡོད་བྱ་བར་གདམས་པའོ། །གསུམ་པ་བསྒྱུར་བ་མཐར་ཕྱིན་པ་མཇུག་གི་དོན་ལ་གཉིས་ཏེ། ཆོས་མངོན་པ།་་་་་བརྩམས་པའི་བཀའ་དྲིན་དྲན་པའི་ཆེད་དུ་རྩོམ་བྱེད་སྨོས། རྒྱ་གར།་་་་་བསྒྱུར་བ་དྲིན་དྲན་པའི་ཆེད་དུ་སྒྱུར་བྱེད་སྨོས་པའོ། །དཀྱུས་ཀྱི་ས་བཅད་པ་རུ་སྦལ་རྒྱ་བོའི་བཞི་འགྲོས་བཤད་ཟིན་ཏོ།། །།ད་ནི་དཀའ་བའི་གནས་ལ་དཔྱད་པ་གངས་སེང་དཀར་མོའི་མཆོངས་སྟངས་བཤད་པར་བྱ་སྟེ། ཆོས་རྣམས་རབ་ཏུ་རྣམ་འབྱེད་ཅེས་པའི་སྐབས་སུ། ཤུགས་ལས་ཆོས་རབ་ཏུ་རྣམ་འབྱེད་ཡོད་ན། ཉོན་མོངས་ཞི་བའི་ལྷག་བཅས་དང་། སྡུག་བསྔལ་ཞི་བའི་ལྷག་མེད་ཐོབ་པར་བསྟན་ཏེ། འདི་ལ་གཉིས་ཏེ། སྤྱིར་བསྟན་པ་དང་། རྟེན་གྱི་སྒོ་ནས་བྱེ་བྲག་ཏུ་བཤད་པའོ། །དང་པོ་ནི། ཀུན་འབྱུང་དང་སྡུག་བསྔལ་སྤངས་པས་རབ་ཏུ་ཕྱེ་བས་ཀུན་འབྱུང་སྤོང་ལ་སྡུག་བསྔལ་གྱི་ལྷག་མ་ལུས་པ་དང་། མ་ལུས་པའོ། །འོ་ན། སྡུག་བསྔལ་ཀུན་འབྱུང་འཇིག་རྟེན་དང་། །ཞེས་དེ་གཉིས་ཁྱབ་མཉམ་པར་བཤད་པ་ཅི་ལྟ་བུ་ཞེ་ན། དེ་ནི་བྱེ་བྲག་ཏུ་སྨྲ་བས་ཐམས་ཅད་དུ་མཉམ་པ་དང་། མདོ་སྡེ་པ་དང་། སེམས་ཙམ་པ་དགྲ་བཅོམ་པའི་ཕུང་པོ་ཐ་མ་སྡུག་བསྔལ་ཡིན་ལ་ཀུན་འབྱུང་མ་ཡིན་པ་དང་། བསྡུ་བར། དགྲ་བཅོམ་པའི་ཕུང་པོ་རིལ་པོ་ཀུན་འབྱུང་མ་ཡིན་པར་བཤད་པ་གསུམ་ཡོད་ཀྱང་། འདིར་ནི་ཀུན་འབྱུང་གི་གཙོ་བོ་ལས་དང་ཉོན་མོངས་པ་སྤངས་ལ། སྡུག་བསྔལ་གྱི་གཙོ་བོ་རྣམ་སྨིན་གྱི་ཕུང་པོ་མ་ལོག་པ་སྟེ། མདོར་ན་སྐུ་ཚེའི་འདུ་བྱེད་མ་བཏང་བ་དང་། བཏང་བའི་སོ་སོར་བརྟགས་འགོག་གོ །གཉིས་པ་ནི། བྱང་ཆུབ་གསུམ་ལས། ཉན་ཐོས་དགྲ་བཅོམ་པ་ནི་ཁམས་གསུམ་པའི་རྟེན་ཅན་ཏེ། དེ་ལ་འདོད་པའི་རྟེན་ཅན་ནི་ཁམས་གསུམ་གྱི་ཉོན་མོངས་པ་ཞི་བའི་སོ་སོར་བརྟགས་འགོག་ནི་ཐོབ་ཅིང་མངོན་དུ་བྱས་ལ། སྡུག་བསྔལ་ཞི་བའི་འགོག་པ་ཐོབ་ཀྱང་མངོན་དུ་མ་བྱས་པ་སྟེ། ཅི་ཞིག་ལུས་ན་མཽའུ་འགལ་གྱི་བུ་དང་། སྒུར་ཆུང་ལྟ་བུ་ཚོར་བ་སྡུག་བསྔལ་རྟེན་བཅས་སྡུག་བསྔལ་དང་། ཚོར་བ་བདེ་བ་རྟེན་བཅས་འགྱུར་བ་དང་། ཟག་བཅས་ཐམས་ཅད་ལ་ཁྱབ་པའི་འདུ་བྱེད་སྡུག་བསྔལ་གསུམ་ཀ་ལུས་ལ། ནམ་སྐུ་ཚེ་བཏང་བའི་ཚེ་ལྷག་མེད་དུ་མྱ་ངན་ལས་འདའ་ཞེས་དང་། སྡུག་བསྔལ་དེ་གསུམ་ཞི་བའི་འགོག་པ་ཐོབ་ལ་མངོན་དུ་བྱས་ཞེས་ཏེ། དེ་ནི་བྱེ་བྲག་ཏུ་སྨྲ་བས་བརྟག་ཅིང་དགེ་བའི་རྫས་སུ་འདོད་ལ། མདོ་སྡེ་པས་ཟག་བཅས་ཅང་མེད་དུ་སོང་བའི་མེད་དགག་ལ་འདོད་དེ། མདོ་ལས། མ་ཞུམས་པ་ཡི་སེམས་ཀྱིས་སུ། །ཚོར་བ་དང་དུ་ལེན་མོད་ཀྱི། །མར་མེ་ཤི་བར་གྱུར་པ་ལྟར། །དེ་ཡིས་སེམས་ནི་རྣམ་པར་ཐར། །ཞེས་འདོད་དོ། །བསམ་གཏན་དང་པོ་གསུམ་གྱི་རྟེན་ནི་ལྷག་བཅས་ཀྱི་ཚེ་ཁམས་གསུམ་གྱི་ཉོན་མོངས་དང་། སྡུག་བསྔལ་གྱི་སྡུག་བསྔལ་ཞི་བ་མངོན་དུ་བྱས་ཤིང་། སྡུག་བསྔལ་ཕྱི་མ་གཉིས་ཞི་བའི་འགོག་པ་ཐོབ་ཀྱང་མངོན་དུ་མ་བྱས་ལ་ལྷག་མེད་ཀྱི་ཚེ་མངོན་དུ་བྱས་པའོ། །བསམ་གཏན་བཞི་པ་ནས་སྲིད་རྩེའི་བར་གྱི་རྟེན་ཅན་ནི། ཉོན་མོངས་དང་སྡུག་བསྔལ་དང་པོ་གཉིས་ཞི་བ་མངོན་དུ་བྱས་ཤིང་། འདུ་བྱེད་ཀྱི་སྡུག་བསྔལ་ཞི་བའི་འགོག་པ་ཐོབ་ཀྱང་མངོན་དུ་མ་བྱས་ལ་ལྷག་མེད་ཀྱི་ཚེ་མངོན་དུ་བྱས་པའོ། །རང་སངས་རྒྱས་ནི་གླིང་གསུམ་གྱི་སྐྱེ་པའི་རྟེན་ཅན་ཏེ་སྡུག་བསྔལ་གསུམ་ལུས་པ་ནི་ལྷག་བཅས་དང་། དེ་དོར་བ་ལྷག་མེད་དུ་འཇོག་པའི་ཚུལ་ཉན་ཐོས་འདོད་པའི་རྟེན་ཅན་དང་འདྲའོ། །ཡང་དག་པར་རྫོགས་པའི་སངས་རྒྱས་ནི། འཛམ་བུའི་གླིང་གི་སྐྱེས་པ་སྟེ། ཟད་པ་ཤེས་པ་མངོན་དུ་བྱས་པ་ནས་སྐུ་ཚེའི་འདུ་བྱེད་མ་བཏང་གི་བར་ལ་ཞབས་ལ་སེང་ལྡེང་གི་ཚལ་པ་ཟུག་པ་དང་། སྐུ་རོ་རྒྱབ་བསྙུང་བ་དང་། དབུ་ཀླད་པ་མི་བདེ་ནས་སྨན་ཨུཏྤལ་བཙལ་བ་ལ་སོགས་པ་ཚོར་བ་སྡུག་བསྔལ་རྟེན་དང་བཅས་པ་དང་། རེས་འགའ་བདེ་བ་དང་དགྱེས་པར་སྤྱོད་པ་སོགས་ཚོར་བ་བདེ་བ་དང་། ཡིད་བདེ་རྟེན་དང་བཅས་པ་དང་། ཚོར་བ་བཏང་སྙོམས་རྟེན་དང་བཅས་པའི་སྡུག་བསྔལ་གསུམ་ལུས་པ་ནི་ལྷག་བཅས་ཡིན་ལ། ནམ་གྲོང་ཁྱེར་རྩྭ་མཆོག་ཏུ་སྐུ་ཚེའི་འདུ་བྱེད་བཏང་བ་ན་ལྷག་མེད་དུ་ཁས་ལེན་ཏོ། །འོ་ན་ཉན་ཐོས་སྡེ་པ་འདི་དག་ཐེག་པ་ཆེན་པོ་བཀར་མི་འདོད་ཅིང་། སངས་རྒྱས་ནི་ཐེག་པ་ཆེན་པོ་པ་ཡིན་པས་དེའི་མྱང་འདས་ཇི་ལྟར་འདོད་ཅེ་ན། དེ་ལ་ཉན་ཐོས་ནི་བསྡུ་བ་ལས། སྤྲུལ་པ་དང་། མངོན་པའི་ང་རྒྱལ་ཅན་དང་། ཞི་བ་བགྲོད་པ་གཅིག་པུ་པ་དང་། རྫོགས་པའི་བྱང་ཆུབ་ཏུ་འགྱུར་བ་དང་བཞི་གསུངས་པའི་མངོན་པའི་ང་རྒྱལ་ཅན་གྱི་ཉན་ཐོས་ནི། གྲུབ་མཐའ་སྨྲ་བའི་སྡེ་པ་གཉིས་སམ། རྩ་བའི་སྡེ་པ་བཞི་པོ་ལ་རྒྱས་པར་ཕྱེ་ན་སྡེ་པ་བཅོ་བརྒྱད་དུ་འགྱུར་བ་རྣམས་ཡིན་ལ། དེ་དག་ནི་ལངྐར་གཤེགས་པ་ལས། ཆོས་ལྔ་དང་ནི་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་དངོས་པོར་ནི། །ཐེག་པ་ཆེན་པོ་མཐའ་དག་འདུས། །ཞེས་པ་ལྟར་གྱི་ཐེག་ཆེན་དེ་དང་། བརྗོད་བྱ་ཟབ་པ་དང་། རྒྱ་ཆེ་བར་སྟོན་པ་འབུམ་དང་། ཕལ་པོ་ཆེ་ལ་སོགས་པ་བཀར་མི་འདོད་པ་ཡིན་གྱི། སྤྱིར་ཉན་ཐོས་ལས་ལྷག་པའི་ཐེག་ཆེན་མི་འདོད་པ་ནི་མ་ཡིན་ཏེ། ཁོ་རང་གི་གྲུབ་མཐའ་ཉིད་ལས་སེམས་བསྐྱེད་དང་། བརྩོན་འགྲུས་དང་། དུས་ཀྱི་བྱེ་བྲག་གིས་བྱང་ཆུབ་གསུམ་ཐོབ་པར་འདོད་པའི་ཕྱིར་ཏེ། མྱུར་བ་སྲིད་པ་གསུམ་གྱི་མཐར། །ཞེས་དང་། བསེ་རུ་བསྐལ་པ་བརྒྱ་ཡི་རྒྱུས། །ཞེས་དང་། དེ་གྲངས་མེད་གསུམ་ལ་སངས་རྒྱས། །ཞེས་པ་ལྟར་རོ། །འོ་ན་མཐར་ཐུག་ཐེག་པ་གསུམ་ཡིན་ནམ་གཅིག་ཡིན་ཞེ་ན། ཉན་ཐོས་སྡེ་པས་ཉན་ཐོས་རིགས་མ་ངེས་པ་བཟོད་འབྲིང་མན་ཆད་དུ་རང་རྒྱལ་དུ་འགྱུར་བ་སྲིད། རྩེ་མོ་མན་ཆད་དུ་ཐེག་ཆེན་དུ་འགྱུར་པ་སྲིད་ཀྱང་། བཟོད་པ་ཐོབ་ནས་ཐེག་ཆེན་དུ་འགྱུར་མི་སྲིད་དེ། ཐེག་ཆེན་དུ་འགྱུར་བ་ལ་གཞན་དོན་དུ་ངན་སོང་དུ་སྐྱེ་བ་ལེན་དགོས་ཤིང་། བཟོད་པ་ཐོབ་ནས་ངན་སོང་དུ་སྐྱེ་མི་སྲིད་པའི་ཕྱིར། ཞེས་འདོད། སེམས་ཙམ་པས་ནི་ལྷག་བཅས་ཀྱི་མྱང་འདས་མན་ཆོད་དུ་ཉན་ཐོས་རིགས་མ་ངེས་པ་ཐེག་ཆེན་དུ་འགྱུར་བ་སྲིད་པར་འདོད་ཀྱང་དེ་ཐམས་ཅད་ཀྱིས་ལྷག་མེད་ཐོབ་ནས་འདུས་བྱས་ཀྱི་འཇུག་པ་རྒྱུན་ཆད་པས་ཐེག་ཆེན་དུ་འཇུག་པར་མི་སྲིད་པར་འདོད་དོ། །དེ་ན་མཐར་ཐུག་ཐེག་པ་གསུམ་ཡིན་ལ་གཅིག་ཏུ་གསུང་བ་ནི་དྲང་བའི་དོན་ནོ་ཞེས་འདོད། དབུ་མ་པས་ནི་མཐར་ཐུག་ཐེག་པ་གཅིགཡིན་ཏེ། ཉན་རང་གི་ལྷག་མེད་ཀྱི་མྱང་འདས་ཀྱི་སྐབས་སུ་ཡང་སེམས་སེམས་བྱུང་རགས་པ་འགགས་པ་ཙམ་ཡིན་གྱི་ཕྲ་བ་མ་འགག་པར་ཡོད་པས་ནམ་ཞིག་དེ་བཞིན་གཤེགས་པའི་སྨིན་མཚམས་ནས་བྱུང་བའི་འོད་ཟེར་གྱིས་བསླངས་ནས་མ་རིག་བག་ཆགས་ཀྱི་ས་དང་ཟག་མེད་ཀྱི་ཡིད་ཀྱི་ལས་ཀྱིས་ཡིད་ཀྱི་རང་བཞིན་གྱི་ཕུང་པོ་དང་། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བའི་སྒོ་ནས་བསྐལ་པ་གྲངས་མེད་གསུམ་དུ་ཚོགས་བསགས་ནས་སངས་རྒྱ་བར་བཞེད་དེ། སེམས་འགྲེལ་ལས། ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་བསྐུལ་བར། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་དགའ་བྱེད་ཅིང་། །ཞེས་སོ། །ཟག་བཅས་ཟག་མེད་ཆོས་རྣམས་ཞེས་པའི་སྐབས་སུ། ཟག་བཅས་ལ་དཔྱད་པ་དང་། ཟག་མེད་ལ་དཔྱད་པ་གཉིས་ལས། དང་པོ་ལ་གསུམ་སྟེ། གཞན་ལུགས་དགག རང་ལུགས་བཞག རྩོད་པ་སྤོང་བའོ། །དང་པོ་ནི། ཁ་ཅིག ཟག་བཅས་ཀྱི་དོན་ཟག་པ་དང་མཚུངས་པར་ལྡན་པའོ་ཞེ་ན། སེམས་སེམས་བྱུང་ཉོན་མོངས་ཅན་ཁོ་ནར་ཟག་བཅས་སུ་འགྱུར་རོ། །ཁ་ཅིག་ལྷན་ཅིག་འབྱུང་བའོ་ཞེ་ན། ཉོན་མོངས་ཀུན་ཏུ་སྤྱོད་པའི་ཕུང་པོ་ལྔ་ཁོ་ན་ཟག་བཅས་སུ་འགྱུར་རོ། །དཔེ་སྟོན་པས་ཟག་པའི་རྟེན་བྱེད་པའོ། །ཞེས་པ་ལྟར་ན། ནང་གི་སྐྱེ་མཆེད་དྲུག་ཁོ་ན་ཟག་བཅས་སུ་འགྱུར་བས། གསུམ་པོ་དེ་དག་ནི་ཁྱབ་ཆུང་བར་འགྱུར་རོ། །ཁ་ཅིག་ཟག་པའི་དམིགས་པར་གྱུར་པ་ཞེ་ན་ཁྱབ་ཆེས་ཏེ། འགོག་ལམ་གཉིས་པོ་ཡང་ཟག་པའི་དམིགས་པར་ཕྲ་རྒྱས་བསྟན་པའི་སྐབས་སུ་འཆད་པར་འགྱུར་བས་ཟག་བཅས་སུ་ཐལ་བར་འགྱུར་བའི་ཕྱིར་རོ། །གཉིས་པ་ནི། ཟག་པ་ནི་རྩ་བ་དང་། ཉེ་བའི་ཉོན་མོངས་པ་རྣམས་ཡིན་ལ་དེ་དག་དམིགས་པ་དང་མཚུངས་ལྡན་གང་རུང་གི་སྒོ་ནས་རྒྱས་པར་འགྱུར་བ་ནི་ཟག་བཅས་ཏེ། རྒྱས་པའི་དོན་ཡང་དམིགས་པ་དང་མཚུངས་ལྡན་གྱི་སྟོབས་ཀྱིས་སྐད་ཅིག་རྒྱུན་ཆགས་སུ་སྐྱེད་ནུས་ཤིང་གནས་ཐོབ་པའོ། །གསུམ་པ་ནི། །འོ་ན་སྣོད་ཀྱི་འཇིག་རྟེན་དང་། དགྲ་བཅོམ་པའི་ཕུང་པོ་ཟག་བཅས་ཅི་ལྟར་ཡིན་ཅེ་ན། སེམས་ཅན་གཞན་གྱི་ཟག་པ་དམིགས་པའི་སྒོ་ནས་རྒྱས་སུ་རུང་བས་ཟག་བཅས་སུ་འདོད་དོ། །འགོག་ལམ་ལ་ཟག་པས་དམིགས་ཀྱང་ཟག་པ་རྒྱས་པར་མི་འགྱུར་ཏེ། བཏགས་པ་ཙམ་གྱི་སྒོ་ནས་དམིགས་པ་ཡིན་གྱི་དངོས་པོར་མི་དམིགས་པས་ཟག་བཅས་སུ་ཐལ་བར་མི་འགྱུར་རོ། །གཉིས་པ་ཟག་མེད་བཤད་པ་ལ་གསུམ་སྟེ། མཚན་གཞི། མཚན་ཉིད། དབྱེ་བའོ། །དང་པོ་ནི། ལམ་གྱི་བདེན་པ་དང་འདུས་མ་བྱས་རྣམས་སོ། །འོ་ན། ཟག་མེད་ལམ་གྱི་བདེན་པ་དང་། །འདུས་མ་བྱས་རྣམ་གསུམ་ཡང་སྟེ། །ཞེས་དངོས་སུ་ཟག་མེད་དུ་བསྟན་པ་དང་། ཟག་བཅས་ཀྱི་མཚན་གཞིར། ལམ་མ་གཏོགས་པའི་འདུས་བྱས་རྣམས། །ཞེས་པའི་ཤུགས་ལ་དེ་དག་ཟག་མེད་དུ་བསྒྲུབ་པ་གཉིས་ཟློས་སོ་ཞེ་ན། དེའི་ལན་ལ་གསུམ་སྟེ། ཁ་ཅིག་ཕུང་པོ་གསུམ་པའི་ལོག་རྟོག་བཟློག་པའི་ཕྱིར་ཏེ། ཚོར་བ་ལ་བདེ་བ་སྡུག་བསྔལ་བཏང་སྙོམ་གསུམ་ཡོད་པ་ལྟ་བུའམ། སྣོད་དང་དགྲ་བཅོམ་པའི་ཕུང་པོ་ཟག་པའི་རྟེན་དང་གཉེན་པོ་གཉིས་ཀ་མ་ཡིན་པས། གཉིས་ཀ་མ་ཡིན་པའི་ཕུང་པོ་གསུམ་པ་ཡིན་ནམ་སྙམ་པའི་དོགས་པ་བཟློག་པའི་ཕྱིར་རོ་ཞེས་ཟེར་རོ། །ཁ་ཅིག་ན་རེ། དོན་གྱིས་གོ་ཡང་གསལ་བར་འཆད་པས་མི་ཟློས་ཏེ། མདོར་བསྟན་དང་རྒྱས་བཤད་བཞིན་ནོ། །ཞེས་ཟེར་རོ། །སློབ་དཔོན་ཡོན་ཏན་བློ་གྲོས་ན་རེ། ལམ་མ་གཏོགས་ཞེས་བསྟན་པས་འཇིག་རྟེན་པའི་ལམ་ཡང་ཟག་མེད་ཡིན་ནམ་སྙམ་དུ་དོགས་པ་དགག་པའི་ཕྱིར། ལམ་གྱི་བདེན་པ་ཞེས་སྨོས་ལ། འདུས་མ་བྱས་ནི་མ་གྲགས་པས་ཟག་མེད་དུ་མི་གོ་བའི་ཕྱིར་རང་གི་སྒྲས་བསྟན་ཏོ། །ཞེས་ཟེར་རོ། །གཉིས་པ་ནི་སྔར་གྱི་ཟག་བཅས་ཀྱི་མཚན་ཉིད་ལས་བཟློག་པའོ། །མངོན་པ་གོང་མར་ནི། ཟག་བཅས་ཟག་མེད་ཀྱི་དོན་ཟག་པའི་སྒོ་དྲུག་དང་འབྲེལ་བ་དང་། མ་འབྲེལ་བ་ལ་བཤད་དོ། །གསུམ་པ་ལ་གཉིས་ཏེ། ཟག་མེད་འདུས་བྱས་དང་། ཟག་མེད་འདུས་མ་བྱས་སོ། །དང་པོ་ནི། ལམ་གྱི་བདེན་པ་སྟེ་ཕུང་པོ་ལྔ་པ་ཡིན་པར་སྔར་བཤད་ཟིན་ཏོ། །གཉིས་པ་ལ་གསུམ་སྟེ། ནམ་མཁའི་མཚན་གཞི་ནི། འདུས་མ་བྱས་ལུང་མ་བསྟན་རྫས་སུ་ཡོད་པ་ཞིག་སྟེ། མདོ་ལས་བྲམ་ཟེ་ཞིག་གིས། ཀྱེ་གོའུ་ཏ་མ། ས་ཅི་ལ་བརྟེན་ལགས། བྲམ་ཟེ་ཆུ་ལ་བརྟེན་ནོ། །ཆུ་ཅི་ལ་བརྟེན། རླུང་ལ་བརྟེན་ནོ། །རླུང་ཅི་ལ་བརྟེན། ནམ་མཁའ་ལ་བརྟེན་ནོ། །དེ་ཅི་ལ་བརྟེན། དེ་ནི་རྟེན་མེད་པ། སྣང་བ་མེད་པ། དམིགས་པ་མེད་པ། ཞེས་གསུངས་པས་རྟེན་གྱི་དོན་དོན་བྱེད་ནུས་པའི་རྫས་ཡོད་ཡིན་ཞེས་བྱེ་བྲག་ཏུ་སྨྲ་བ་ཟེར་རོ། །མདོ་སྡེ་པ་ནི། ཟག་བཅས་ཉེ་བར་ཞི་བ་ཙམ་ལས་རྫས་ཀྱི་དངོས་པོ་མེད་པར་འདོད་དོ། །མཚན་ཉིད་ནི་མི་སྒྲིབ་པ་སྟེ་ཐོགས་བཅས་མིན་པས་བསྒྲིབ་པར་བྱ་བ་དང་། སྒྲིབ་པར་བྱེད་པ་གཉིས་ཀ་མེད་པའོ། །འོ་ན་སེམས་དང་སེམས་བྱུང་དང་། འགོག་པ་གཉིས་ཀྱང་ནམ་མཁར་འགྱུར་ཏེ། མི་སྒྲིབ་པའི་ཕྱིར་རོ་ཞེ་ན། གཏན་ཚིགས་མ་གྲུབ་སྟེ། རྣལ་འབྱོར་པ་མཐུ་ལྡན་གྱི་ཤེས་པས་གཞན་གྱི་ཤེས་པ་སྨྱོ་བ་ལ་སོགས་པར་བྱེད་པས་སོ་ན་འདུག་པ་ལ་སྒྲིབ་པའི་ཕྱིར་དང་། འགོག་པ་གཉིས་ཀྱང་མ་འོངས་པའི་ཆོས་འགའ་ཞིག་སྐྱེ་བ་ལ་སྒྲིབ་པའི་ཕྱིར་ཞེས་སྔ་རབས་པ་རྣམས་བཤད་པ་ལེགས་སོ། །སྒྲའི་དོན་ནི་ཨ་ཀ་ཤའི་སྒྲ་ལས་དྲང་ན་གོ་འབྱེད་པའི་དོན་གྱིས་ན་ནམ་མཁའ་འོ། །གཉིས་པ་སོ་སོར་བརྟགས་པའི་འགོག་པ་ལ་གསུམ་ལས། མཚན་གཞི་ནི། ཆོས་གང་ཞིག་ཟག་བཅས་དང་བྲལ་བ་སྟེ། བྱེ་བྲག་ཏུ་སྨྲ་བས་ལུང་ལས་བདེན་པ་བཞིར་བཤད་པས། འགོག་པ་ནི་རྫས་སུ་ཡོད་པ་སྟེ། བདེན་པར་བཤད་པའི་ཕྱིར། ལྷག་མ་གསུམ་བཞིན་ནོ་ཞེས་འདོད་ལ། མདོ་སྡེ་པས་ནི། དགག་བྱ་ཟག་བཅས་ཞི་བ་ཙམ་གྱི་མེད་དགག་ལ་འདོད་དོ། །གཉིས་པ་ལ་མཚན་ཉིད་ནི། ཟག་མེད་བར་ཆད་མེད་ལམ་གྱི་སྟོབས་ཀྱིས་ཐོབ་པར་བྱ་བའི་འགོག་པའོ། །ཁ་ཅིག་ཟག་མེད་བར་ཆད་མེད་ལམ་གྱི་ངོས་སྐལ་གྱི་སྤང་བྱ་སྤངས་པས་ཐོབ་པ་ཞེས་པ་ཡང་མི་འཐད་དེ། འཇིག་རྟེན་པའི་ལམ་གྱིས་ཐོབ་པའི་འབྲས་བུ་གཉིས་ལ་མ་ཁྱབ་པའི་ཕྱིར་རོ། །འོ་ན་སྔ་མ་ལ་ཡང་མ་ཁྱབ་པར་མཚུངས་སོ་སྙམ་ན། སྤང་བྱ་འཇིག་རྟེན་པའི་ལམ་གྱིས་སྤངས་ཀྱང་རང་གི་ངོ་བོ་འདས་ལམ་གྱིས་ཐོབ་པས་མ་ཁྱབ་པ་མེད་དོ། །སྒྲ་དོན་ནི། སྡུག་བསྔལ་ལ་སོགས་པའི་བདེན་པ་ལ་སོ་སོར་བརྟགས་པའི་ཤེས་རབ་ཀྱི་སྟོབས་ཀྱིས་ཐོབ་པའི་འགོག་པ་སྟེ། མར་གྱིས་གང་བའི་བུམ་པ་ལ་མར་གྱི་བུམ་པ་ཞེས་པ་ལྟར་བར་གྱི་སྒྲ་མི་མངོན་པར་བྱས་པའོ། །གསུམ་པ་དབྱེ་བ་ནི། འོ་ན་ཟག་བཅས་ཐམས་ཅད་ཀྱི་འགོག་པ་གཅིག་གམ་ཐ་དད་ཞེ་ན། རྫས་སོ་སོ་བ་ཁོ་ན་ཡིན་ཏེ། འགྲེལ་པར། ལྡན་པའི་རྫས་རྣམས་ཅི་སྙེད་པ་བྲལ་བའི་རྫས་རྣམས་ཀྱང་དེ་སྙེད་དོ་ཞེས་གསུངས་པས། ལྡན་པའི་རྫས་སྤང་བྱ་རིས་ལྔ་རྫས་ཐ་དད་པས་དེ་དག་སྤངས་པའི་འགོག་པ་ལྔ་ཡང་རྫས་ཐ་དད་ཡིན་པའི་ཕྱིར། དེ་ལྟ་མིན་ན་སྡུག་བསྔལ་མཐོང་སྤང་གི་འགོག་པ་ཐོབ་པ་ན་སྤང་བྱའི་རིས་གཞན་རྣམས་ཀྱི་འགོག་པའང་ཐོབ་པར་འགྱུར་བས་རིས་ལྷག་མ་རྣམས་སྤང་བའི་ཆེད་དུ་གཉེན་པོ་བསྒོམ་པ་དོན་མེད་དུ་འགྱུར་བའི་ཕྱིར་རོ། །ཁ་ཅིག་རྣམ་གྲོལ་འདུས་མ་བྱས་བརྒྱད་ཅུ་རྩ་དགུ་ཐ་དད་དུ་བཤད་པས་རྫས་ཐ་དད་ཅེས་འདོད་ཀྱང་གཉེན་པོ་རྫས་ཐ་དད་མེད་པ་རྣམས་ལ་སྤང་བྱའི་སྒོ་ནས་བྲལ་བའི་དབྱེ་བ་མི་འབྱེད་ཅེས་སྔ་རབས་པ་རྣམས་ཀྱིས་གསུངས་པས་དཔྱད་པའི་གཞིའོ། །དེ་ལྟར་ན་ལྡན་པའི་རྫས་རྣམས་ཞེས་པའི་དོན་སྤང་བྱ་དང་། གཉེན་པོ་གཉིས་ཀ་ལ་བྱེད་དགོས་པར་མངོན་ནོ། །འགྲེལ་པར། འོ་ན་འགོག་པ་ནི་འདྲ་བ་མ་ཡིན་ནོ་ཞེས་བཤད་པས་འདི་ཡི་དོན་ཅི་ལྟ་བུ་ཡིན་ཞེ་ན། ཚིག་དེའི་དོན་ནི་འདི་འདྲ་བའི་རྒྱུ་གང་ཡང་མ་ཡིན་ལ། འདི་ཡང་གང་གི་འདྲ་བའི་རྒྱུ་ཡང་མ་ཡིན་ཞེས་བྱའི་འདི་ལ་འདྲ་བ་གང་ཡང་མེད་དོ། །ཞེས་བྱ་བའི་དོན་ནི་མདོ་ལས། དགེ་སློང་མ་མཆོད་སྦྱིན་མ་ཞེས་འཕགས་མ་ཞིག་ལ། སྔོན་གྱི་ཁྱོར་གྱུར་པའི་དགེ་བསྙེན་ས་ག་ཞེས་པས་འཕགས་མ་འགོག་པ་འདྲ་བ་ཡིན་ནམ། ཚེ་དང་ལྡན་པ་ས་ག་འདྲ་བ་མིན་ནོ་ཞེས་པས་འགོག་པ་དེ་ནི་ཐ་དད་མེད་པའི་དོན་ཏེ། ཐ་དད་ན་འདྲ་བ་པོ་དང་། འདྲ་ཡུལ་དང་། འདྲ་ཆོས་ཡོད་དགོས་པས་སོ་ཞེ་ན། མདོ་ལས། རྒྱུའི་སྒྲ་མི་མངོན་པར་བྱས་པ་སྟེ་འདི་ནི་འདྲ་བའི་རྒྱུ་ཡང་མིན་ལ་འདིའི་འདྲ་བའི་རྒྱུ་ཡང་ཆོས་གཞན་གང་ཡང་མིན་པ་སྟེ། འདྲ་བའི་རྒྱུ་འབྲས་ནི་འདུས་མ་བྱས་ཡིན་པའི་ཕྱིར། ཞེས་པའི་དོན་ཡིན་གྱི། འགོག་པ་ཕན་ཚུན་འདྲ་བ་བཀག་པ་ནི་མ་ཡིན་ཞེས་པའོ། །མདོ་སྡེ་པ་ནི་འགོག་པ་མེད་དགག་ཡིན་པས་གཅིག་དང་ཐ་དད་ལས་གྲོལ་ཡང་དགག་བྱའི་གྲངས་ལ་ལྟོས་ནས་གྲངས་ཀྱི་ཐ་སྙད་ཙམ་ཡོད་པ་ལ་འགལ་བ་མེད་པར་འདོད་དོ། །གསུམ་པ་སོ་སོར་བརྟག་མིན་གྱི་འགོག་པ་ལ། མཚན་གཞི། མཚན་ཉིད། སྒྲ་དོན། འགོག་པ་གཉིས་དང་འབྲེལ་བའི་མུ་བཞི་བརྩི་བ་བཞི་ལས། དང་པོ་ནི། འདུས་མ་བྱས་རྫས་སུ་གྲུབ་པ་སྟེ། ལུང་ལས། བཅོམ་ལྡན་འདས་ཀྱིས་རྒྱུན་དུ་ཞུགས་པའི་ངན་སོང་གི་འགྲོ་བ་འགགས་སོ། །ཞེས་གསུངས་ལ། ངན་སོང་གི་རྒྱུ་མི་དགེ་བ་སྒོམ་སྤང་ཡིན་པས་རྒྱུན་ཞུགས་ཀྱིས་བརྟགས་འགོག་མ་ཐོབ་ཀྱང་མཐོང་ལམ་སྐྱེས་པས་མི་དགེ་བ་བྱེད་པའི་རྐྱེན་མ་ཚང་བས་བརྟགས་མིན་ཐོབ་པ་སྟེ། རྐྱེན་མ་ཚང་བ་ཙམ་ཡིན་ན། དེ་དང་འདྲ་བའི་རྐྱེན་ཉེ་བ་ན་སྐྱེ་བར་འགྱུར་བ་ལས་སྐྱེ་མི་སྲིད་པའི་ཕྱིར་རྫས་སུ་གྲུབ་པའོ། །མདོ་སྡེ་པས་ནི་རྐྱེན་མ་ཚང་བས་མ་སྐྱེས་པ་ཙམ་ལ་འགོག་པའི་མིང་གིས་བཏགས་པར་འདོད་དོ། །གཉིས་པ་ནི། དགག་བྱ་སྐྱེ་བ་ལ་གཏན་དུ་གེགས་བྱེད་པའི་འགོག་པ་གང་ཞིག །སོ་སོར་བརྟགས་འགོག་ལས་གཞན་པ་སྟེ། སྐྱེ་ལ་ཅེས་པའི་མཚན་ཉིད་ཀྱིས་འགོག་པ་སྐྱེས་ཟིན་འཇིག་པའི་མི་རྟག་པ་གཅོད། གཏན་དུ་ཞེས་པས་སྐྱེ་བ་དང་། སྙོམས་འཇུག་གི་འགོག་པ་སེམས་མེད་གསུམ་གཅད་དོ། །གེགས་བྱེད་པ་ཞེས་པས་དེ་དག་མི་སྐྱེ་བ་ཙམ་གྱི་མེད་དགག་གཅོད། འགོག་གཞན་ཞེས་པས་སོ་སོར་བརྟགས་འགོག་གཅོད་དོ། །གསུམ་པ་ནི། སོ་སོར་བརྟགས་པའི་ཤེས་རབ་མིན་པས་ཐོབ་པ་སྟེ། ཤེས་རབ་ལས་གཞན་རྐྱེན་མ་ཚང་བས་ཐོབ་པའོ། །དཔེར་ན་གཟུགས་ཞིག་ལ་མིག་དང་ཡིད་གཡེང་བའི་ཚེ་རྒྱབ་ཀྱི་བྱ་རོག་འཛིན་པའི་ཤེས་པ་མི་སྐྱེ་བ་ལྟ་བུ་སྟེ། དམིགས་རྐྱེན་མ་ཚང་བའམ། དེ་མ་ཐག་རྐྱེན་མ་ཚང་བས་ཤེས་པ་དེ་གཏན་མི་སྐྱེ་བའོ། །བཞི་པ་ནི། གང་ཞིག་བརྟགས་པས་འགོག་པའི་གཞི་གང་ཡིན་པ་དེ་བརྟགས་མིན་གྱིའང་ཡིན་ནམ། བརྟགས་མིན་གྱི་གཞི་གང་ཡིན་པ་དེ་བརྟགས་འགོག་གིའང་ཡིན་ནམ་ཞེ་ན། འདི་ལ་མུ་བཞི་ལས། མུ་དང་པོ་ནི། ཟག་བཅས་སྐྱེ་འགྱུར་ཏེ། ཟག་བཅས་ཡིན་པས་བརྟགས་འགོག་ཐོབ་ལ། སྐྱེ་བའི་ཆོས་ཅན་ཡིན་པས་བརྟགས་མིན་མི་ཐོབ་པའོ། །མུ་གཉིས་པ་ནི། ཟག་མེད་མི་སྐྱེ་བའི་ཆོས་ཅན་ཏེ། རྒྱུ་མཚན་བཟློག་པའོ། །མུ་གསུམ་པ་ནི། ཟག་བཅས་མི་སྐྱེ་བ་སྟེ་རྒྱུ་མཚན་རིམ་པ་བཞིན་ནོ། །མུ་བཞི་པ་ནི། ཟག་མེད་དུ་གསུམ་པ་སྐྱེ་འགྱུར་ཏེ་རྒྱུ་མཚན་སྔ་མས་བསྒྲེས་ཏེ་ཤེས་པར་བྱའོ། །ཕུང་ཁམས་སྐྱེ་མཆེད་ཀྱི་རྣམ་གཞག་རྒྱས་པར་ནི་གཞན་དུ་བསྟན་ཟིན་པས་དེར་བལྟ་བར་བྱའོ།། །།གཡེང་དང་སེམས་མེད་པ་ཡི་ཡང་། །ཞེས་པའི་སྐབས་སུ། རྣམ་པར་རིག་བྱེད་མིན་པའི་གཟུགས་ལ་དངོས་དང་། ཞར་བྱུང་གཉིས་ལས། དང་པོ་ལ། མཚན་གཞི། མཚན་ཉིད། སྒྲ་དོན་གསུམ་ལས། དང་པོ་ལ་དྲུག་ལས། གཡེང་བ་ཞེས་པའི་སྒྲ་དོན་དུ་མ་ལ་འཇུག་ཀྱང་འདིར་རང་ཀུན་ནས་སློང་བའི་སེམས་ལས་གཞན་པ་སྟེ། དགེ་བ་རིག་བྱེད་མིན་པའི་ཀུན་སློང་གི་སེམས་དགེ་བ་ཡིན་ཞིང་དེ་ལས་གཞན་པའི་སེམས་ཀྱི་རྗེས་སུ་ཡང་མ་བཏང་གི་བར་དུ་འཇུག་པའོ། །འདིས་ནི་རྒྱལ་པོ་སྲས་ལྟར་ན་རིག་བྱེད་ཙམ་དང་། གང་སྤེལ་ལྟར་ན། ལུས་ཀྱི་རིག་བྱེད་ལས་ཁྱད་པར་དུ་བྱེད་ཅེས་སོ། །ཡང་སེམས་མེད་པ་ཞེས་པས་སྙོམས་འཇུག་གཉིས་ལ་གནས་པའི་རྒྱུད་ཀྱི་རྗེས་སུ་ཡང་བྱེད་དོ། །འདིས་ནི་སེམས་དང་སེམས་བྱུང་ལས་ཁྱད་པར་དུ་བྱེད་དོ། །འདི་ནི་འདོད་པའི་རིག་བྱེད་མིན་པའི་དབང་དུ་བྱས་ཀྱི་མཉམ་བཞག་གི་ས་པ་གཉིས་ནི་སེམས་ཀྱི་རྗེས་འབྲང་ཡིན་པས་མ་ངེས་སོ། །ཡང་ཞེས་པས་ནི་མ་གཡེངས་པ་དང་སེམས་བཅས་ཀྱི་རྗེས་སུ་བྱེད་པ་སྟེ། འདིས་ནི་སེམས་དང་འགལ་བ་མེད་པར་སྟོན་ཏོ། །དགེ་དང་མི་དགེ་ཞེས་པས་ནི་སེམས་བྱུང་ལུང་མ་བསྟན་ནི་སྟོབས་ཆུང་བས་འདི་ཀུན་ནས་སློང་མི་ནུས་པའི་ཕྱིར་ན་ངོ་བོ་དགེ་མི་དགེ་གང་རུང་དུ་ངེས་པ་སྟེ། འདིས་མིག་ལ་སོགས་པ་སེལ་ཏོ། །རྗེས་འབྲེལ་གང་ཞེས་པ་ནི་རྒྱུན་མཆོག་ཏུ་བརྟན་པ་སྟེ། གཡེང་བ་ལ་སོགས་པའི་གནས་སྐབས་ན་ཡང་རྒྱུན་མ་ཆད་པའོ། །འདིས་རིག་བྱེད་ཙམ་མམ་ངག་གི་རིག་བྱེད་ལས་ཁྱད་པར་དུ་བྱེད་དོ། །འབྱུང་བ་ཆེ་རྣམས་ཞེས་པས། སྐྱེ་བྱེད། རྟེན། གནས། བརྟེན་པ། འཕེལ་བའི་ཚུལ་གྱིས་རྒྱུར་བྱས་པ་སྟེ། འདིས་ཐོབ་པའི་རྒྱུན་སེལ་ཏོ། །ཁྱད་པར་དྲུག་ལྡན་ནི་རྣམ་པར་རིག་བྱེད་མིན་པར་བརྗོད་ཅེས་པ་ནི་སློབ་དཔོན་གྱི་བཞེད་པ་སྟོན་པའོ། །སློབ་དཔོན་འདུས་བཟང་ནི་འདི་ལ། མ་ཚང་བ་དང་འགལ་བ་དང་། །ཉམས་དང་དེ་ཉིད་དུ་ཐལ་བ། །ཡང་སྒྲ་ལྷག་བརྗོད་ཁྱད་པར་དུ། །བྱ་བ་ཁྱད་པར་དུ་མ་བྱས། །ཞེས་པའི་སྐྱོན་དྲུག་སྟེ། སྐད་ཅིག་དང་པོར་རྒྱུན་མ་ཡིན་པས་མ་ཚང་བ་དང་། རྒྱུན་རྫས་སུ་མེད་པས་བསྟན་བཅོས་ལས་རྫས་སུ་བཤད་པ་དང་འགལ་བ་དང་། གཡེང་བ་དང་སེམས་མེད་པའི་རྗེས་སུ་འབྲེལ་པ་ལ་མཉམ་བཞག་ལ་མེད་པས་ཉམས་པ་དང་། མ་གཡེངས་སེམས་བཅས་ལ་ཡོད་སྙམ་ན། དགེ་མི་དགེའི་རིག་བྱེད་ཀྱང་དེ་ཉིད་དུ་ཐལ་བ་དང་། གཡེངས་པས་སེམས་བཅས་ཐམས་ཅད་བསྡུས་པས་ཡང་ཞེས་པའི་སྒྲ་ལྷག་པར་འཇུག་པ་དང་། བསྟན་མེད་ཐོགས་མེད་ཀྱི་གཟུགས་ཞེས་ཁྱད་པར་དུ་བྱ་བ་ཁྱད་པར་དུ་མ་བྱས་པའོ། །ཞེས་སུན་ཕྱུངས་ནས་རང་གི་ལུགས། བྱས་པ་དང་ཡང་མི་འདྲ་བའི། སེམས་ལའང་སེམས་མེད་པ་ལ་གང་། །ལུང་བསྟན་ཐོགས་པ་མེད་པའི་གཟུགས། །དེ་ནི་རྣམ་རིག་བྱེད་མིན་འདོད། །ཅེས་བཞེད་དོ། །གཉིས་པ་ནི་བསྟན་དུ་མེད་ཅིང་ཐོགས་པ་མེད་པའི་གཟུགས་ཞེས་ཏེ། ཐོགས་བཅས་བཅུ་དང་། གཟུགས་ཅན་མིན་པ་སེལ་བའོ། །གསུམ་པ་ནི། རིག་བྱེད་ལྟར་རང་ཀུན་ནས་སློང་བའི་སེམས་གཞན་ལ་རིག་པར་མི་བྱེད་པས་རིག་བྱེད་མ་ཡིན་པའོ། །གཉིས་པ་ཞར་ལ་རྒྱུ་འབྱུང་བ་བཤད་པ་ལ་ལྔ་སྟེ། དབྱེ་བ། སྒྲ་དོན། ལས། མཚན་ཉིད། འབྱུང་བ་དང་ཁམས་ཀྱི་ཁྱད་པར་རོ། །དང་པོ་ནི། འབྱུང་བ་ཆེ་རྣམས་རྒྱུར་བྱས་པ། །ཞེས་དང་། གོང་དུ་རེག་བྱ་བཅུ་གཅིག་ཞེས་པའི་འབྱུང་བ་དེ་དག་གང་ཞེ་ན། སའི་ཁམས་དང་། ཆུ་དང་། མེ་དང་། རླུང་གི་ཁམས་རྣམས་སོ། །གཉིས་པ་ནི། ཅི་ཕྱིར་འབྱུང་བ་ཞེས་བྱ་ཞེ་ན། ཐོག་མ་མེད་པ་ནས་མི་འབྱུང་མ་མྱོང་བས་སམ། འབྲས་བུའི་གཟུགས་རྣམས་རང་གི་རྣམ་པར་འབྱུང་བར་བྱེད་པས་འབྱུང་བ་ཡིན་ནོ། །ཅིའི་ཕྱིར་ཆེན་པོ་ཞེས་བྱ་ཞེ་ན། འབྲས་བུའི་གཟུགས་རྣམས་ཀྱི་རྒྱུར་ཆེ་བའམ། རང་གི་བྱ་བ་ལ་ཤས་ཆེ་བས་ན་ཆེན་པོ་སྟེ། འགྲེལ་པར། འབྱུང་བ་ཆེན་པོ་བཞི་རྣམས་ཞེས་བྱ་བ་འདི་དག་གཟུགས་གཞན་ཐམས་ཅད་ཀྱི་རྟེན་ཉིད་དུ་རིག་པའི་ཕྱིར་ན་ཆེན་པོ་ཉིད་དོ། །ཡང་ན་ས་དང་། ཆུ་དང་། མེ་དང་། རླུང་གི་ཕུང་པོ་དེ་དག་བྱ་བ་ལ་ཤས་ཆེ་བ་དག་ལ་དེ་རྣམས་ཆེན་པོར་གནས་པའི་ཕྱིར་རོ་ཞེས་སོ། །མངོན་པ་གོང་མ་ལས་ནི་ཡོད་པ་རྒྱ་ཆེ། རྟེན་པ་ལྟོས་ཆེ། གནས་པ་ཐ་གྲུ་ཆེ་བས་ཆེན་པོ་ཞེས་སོ། །ཅི་ཕྱིར་ཁམས་ཞེས་བྱ་ཞེ་ན། དྷ་ཏུ་ཞེས་པ་རྐྱེན་གྱི་བྱེ་བྲག་གིས་དྷ་ར་ཞེས་པའི་དོན་འཛིན་པ་ལ་འཇུག་ལ། དེ་ཡང་རང་གི་མཚན་ཉིད་འཛིན་པའམ་འབྲས་བུའི་གཟུགས་འཛིན་པས་ན་ཁམས་སོ། །གསུམ་པ་ལ་ལས་དངོས་དང་། ཞར་ལ་འབྱུང་ཆུང་བཅུ་དྲུག་ཐ་མི་དད་དུ་བསྒྲུབ་པ། ལས་ལ་བརྟེན་ནས་གྲངས་ངེས་པ་དང་གསུམ་ལས། དང་པོ་ནི། ཐུན་མོང་གི་ལས་འབྱུང་འགྱུར་ལ་ལྟོས་ནས་བསྐྱེད་པ་དང་། རྟེན་དང་། གནས་དང་། བརྟེན་པ་དང་། འཕེལ་བ་སྟེ་ལྔ་བྱེད་ལ། ཐུན་མོང་མིན་པའི་ལས་ནི། སས་འབྲས་གཟུགས་ཐུར་དུ་མི་ལྷུང་བར་འཛིན་པ་དང་། ཆུས་མི་གྱེས་པར་སྡུད་པ་དང་། མེས་མ་རུལ་མ་མྱགས་པར་སྨིན་པ་དང་། རླུང་གིས་གོང་ནས་གོང་དུ་རྒྱས་པར་བྱེད་པའོ། །གཉིས་པ་ནི། བྱེ་བྲག་ཏུ་སྨྲ་བས་འབྱུང་བ་དག་ངེས་པར་ལྷན་ཅིག་སྐྱེ་བ་ནི་ལས་ཀྱི་རྗེས་སུ་དཔག་པས་གྲུབ་པས་འབྲས་གཟུགས་ཀུན་གྱི་ཚོགས་པ་ན་འབྱུང་བ་བཞི་ཚང་བའོ། །ཞེས་ཟེར་ཏེ། འདི་ལྟར་རྡོ་བ་ལྟ་བུ་སྲ་བ་སའི་ཁམས། ཚོགས་པ་དེ་ན་སྡུད་པ་དང་། སྨིན་པ་དང་། བསྐྱོད་པའི་ལས་སྣང་བས་གཞན་གསུམ་ཡང་ཡོད་པར་གྲུབ། ཆུ་ལ་ཡང་གྲུ་འདེགས་པའི་འཛིན་པ་དང་། མ་རུལ་བའི་སྨིན་པ་དང་། ཐུར་དུ་འགྲོ་བའི་གཡོ་བ་སྣང་བས་གཞན་གསུམ་ཡོད་པར་གྲུབ། མེ་ལ་ཡང་རྡུལ་འདེགས་པའི་འཛིན་པ་དང་། མེ་ལྕེ་གཅིག་ཏུ་སྡུད་པ་དང་། གྱེན་དུ་གཡོ་བ་སྣང་བས་གཞན་གསུམ་གྲུབ། རླུང་ལ་ཡང་སྤུར་མ་འདེགས་པའི་འཛིན་པ་དང་། ཚུབ་མ་གཅིག་ཏུ་སྡུད་པ་དང་། སྨིན་པའི་དྲོ་བ་སྣང་བའི་ཕྱིར་གཞན་གསུམ་ཡོད་པར་གྲུབ་པའི་ཕྱིར་རོ། །མདོ་སྡེ་པ་ནི་གང་ན་གང་སྣང་བ་ན་མངོན་གྱུར་དུ་ཡོད་ལ། མི་སྣང་བ་ས་བོན་ནམ་ནུས་པའི་ཚུལ་དུ་ཡོད་པར་འདོད་དོ། །སེམས་ཙམ་པ་ནི་བོང་བ་སྐམ་པ་ལྟ་བུ་འབྱུང་བ་གཅིག་ལས་བྱུང་བ་དང་། དེ་ཉིད་གཤེར་བ་ལྟ་བུ་གཉིས་ལས་གྱུར་པ་དང་། དེ་ཉིད་དྲོ་བ་ལྟ་བུ་གསུམ་ལས་གྱུར་པ་དང་། དེ་ཉིད་འགྲིལ་བ་ལྟ་བུ་བཞི་ལས་གྱུར་པ་ཞེས་སོགས་འདོད་དོ། །གསུམ་པ་ནི། འབྲས་བུའི་གཟུགས་སྐྱེད་པ་ལ་ཉུང་ན་མི་ནུས་ཤིང་། མང་ན་མི་དགོས་པས་བཞི་ཁོ་ནར་གྲངས་ངེས་ཏེ། ས་མེད་ན་འབྲས་གཟུགས་རྣམས་ཐུར་དུ་ལྷུང་བར་འགྱུར་བས་འཛིན་པ་ས་དང་། ཆུ་མེད་ན་ཐལ་བ་སྐམ་པོ་ལྟར་ཡས་པས་སྡུད་པ་ཆུ་དང་། མེ་མེད་ན་དབྱར་ཁའི་ཤའི་གོང་བུ་ལྟར་རུལ་བར་འགྱུར་བས་སྨིན་པ་མེ་དང་། རླུང་མེད་ན་རྡོའི་འོག་གི་མྱུ་གུ་ལྟར་རྒྱས་པར་མི་འགྱུར་བས་རྒྱས་བྱེད་རླུང་སྟེ་བཞི་དགོས་ལ་འདི་ཙམ་གྱིས་བསྐྱེད་ནུས་པའི་ཕྱིར་རོ། །བཞི་པ་ནི། སྲ་གཤེར་དྲོ་ཉིད་དབྱེ་བ་རྣམས། །ཞེས་པའི་གཞུང་གིས་སྟོན་ནོ། །ལྔ་པ་ནི། བསྟན་བཅོས་ལས་གྲགས་པའི་སའི་ཁམས་ལ་སོགས་པ་དང་། འཇིག་རྟེན་ལ་གྲགས་པའི་ས་ལ་སོགས་པ་ལ་ཁྱད་པར་ཡོད་དམ་ཞེ་ན། ཁྱད་པར་ཡོད་དེ། འཇིག་རྟེན་པ་དག་ནི་སའི་ཁ་དོག་དང་དབྱིབས་ལ་སའི་ཐ་སྙད་བརྗོད་པས་འབྲས་བུའི་གཟུགས་མིག་གི་ཡུལ་ཡིན་ལ། བསྟན་བཅོས་ལས་ནི་སྲ་བའི་རེག་བྱ་ལ་སའི་ཁམས་སུ་འདོད་པའི་ཕྱིར་རོ། །ཆུ་དང་མེ་ཡང་འཇིག་རྟེན་ན་ཁ་དོག་དང་དབྱིབས་ལ་བརྗོད་ཅིང་། བསྟན་བཅོས་ལས་ནི་རེག་བྱ་ལ་བརྗོད་པ་སྔ་མ་བཞིན་ནོ། །རླུང་གི་ཚོགས་ལ་ནི་འཇིག་རྟེན་པས་ཀྱང་རེག་བྱ་ལ་བརྗོད་པས་བསྟན་བཅོས་དང་མཐུན་པའམ། ཁ་དོག་དང་དབྱིབས་ལ་བརྗོད་པས་མི་མཐུན་པ་རྣམ་པ་གཉིས་ཡོད་དོ། །དེ་ལ་ལེ་སྟོན་ན་རེ། གཞན་ལ་ཡང་བསྟན་བཅོས་དང་མཐུན་པ་ཡོད་པར་འཆད་པར་རིགས་ཏེ། མིག་གིས་མ་མཐོང་བར་སྲ་བ་ས་དང་། གཤེར་བ་ཆུ་དང་། དྲོ་བ་མེ་ཞེས་སྟོན་པའི་ཕྱིར་ཞེས་འཆད་དེ། འདི་ནི་མེད་པར་སྣང་ངོ་། །མདོར་ན་བསྟན་བཅོས་ལས། རིགས་པས་དཔྱད་པའི་དབང་དུ་བྱས་པ་དང་། འཇིག་རྟེན་གྱི་ཐ་སྙད་ལས་བརྗོད་པ་མ་དཔྱད་པའི་དབང་དུ་བྱས་པ་གཉིས་གཉིས་སུ་ཕྱེ་བ་ནི་དངོས་སྨྲ་བའི་གཞུང་ལུགས་འཆད་པའི་ཚེ་ན་གནད་དུ་ཆེ་བར་སྣང་ངོ་། །རྣམ་ཤེས་སོ་སོར་རྣམ་རིག་པ། །ཞེས་པའི་སྐབས་སུ། རྣམ་ཤེས་ཀྱི་མཚན་ཉིད། གྲངས་ངེས། སྐྱེད་མཆེད་དང་ཁམས་སུ་བཞག་པ། ཞར་ལ་ཡིད་ཀྱི་ཁམས་ཀྱི་མཚན་ཉིད། དེ་ཁམས་གཞན་དུ་སྒྲུབ་པ་དང་ལྔ་ལས། དང་པོ་ནི། དོན་གྱི་ངོ་བོ་ཙམ་སོ་སོར་རྣམ་པར་རིག་པ་སྟེ། མིག་གི་རྣམ་ཤེས་ཀྱིས་གཟུགས་ནས། ཡིད་ཀྱི་རྣམ་ཤེས་ཀྱིས་ཆོས་ཀྱི་རང་གི་ངོ་བོ་རིག་པའི་བར་དུའོ། །གཉིས་པ་ནི། བྱང་ཆུབ་སེམས་དཔའ་དགའ་བོ་དང་། ཀླུའི་སྡེ་ལ་སོགས་པ་ནི། མདོ་ལས། གང་ཞིག་ལུས་མེད་ཕུག་གནས་ཤིང་། །རིང་དུ་འགྲོ་ཞིང་གཅིག་པུ་རུ། །གདུལ་བར་དཀའ་བའི་སེམས་འདུལ་བྱེད། །དེ་ནི་བྲམ་ཟེར་ངས་བཤད་དོ། །ཞེས་པས་རྣམ་ཤེས་ནི་རྫས་གཅིག་ཡིན་ལ། དྲུག་ཏུ་སྨྲ་བ་ནི་ཁང་པ་བུ་ག་དགུ་པའི་སྤྲེའུའམ། ནོར་ལྟར་སྒོ་ཐ་དད་པའི་དབང་གིས་བྱུང་ཞིང་། གནས་གྱུར་ཡེ་ཤེས་ནི་གསེར་འོད་དམ་པ་ལས། ཡེ་ཤེས་ནི་གཅིག་སྟེ། མི་རྟོག་པའི་ཡེ་ཤེས་སོ། །ཞེས་པས་གཅིག་ཉིད་ཡིན་ལ། ཟག་མེད་ཀྱི་ཕྱིར་མི་འོངས་མཉམ་པར་བཞག་པའི་སྒོམ་སྤང་གི་ས་བོན་ནི་བྱེ་བྲག་ཏུ་སྨྲ་བས་སྲོག་ལ་བརྟེན་ཞེས་སོ། །སེམས་ཙམ་པའི་པཎྜི་ཏ་རྣམས་ནི་དེ་མི་འཐད་དེ། བདག་རྐྱེན་དང་དམིགས་རྐྱེན་ལ་སོགས་པའི་རྒྱུ་ཚོགས་ཐ་དད་པས་བྱུང་བའི་ཕྱིར་ན་རྣམ་པར་ཤེས་པ་བརྒྱད་ཐ་དད་དུ་སྐྱེས་ཏེ། རྫས་གཅིག་ན་རྣམ་ཤེས་ཐམས་ཅད་དུས་གཅིག་ལ་སྐྱེ་བས་ཅིག་ཆར་ཡུལ་ཐམས་ཅད་རྟོག་པར་འགྱུར་བའི་ཕྱིར་རོ། །སེམས་ཙམ་པའི་སློབ་དཔོན་ཡང་དག་བདེན་ནི་བརྒྱད་ཀྱི་སྟེང་དུ་དྲི་མ་མེད་པའི་རྣམ་ཤེས་དང་དགུ་ཡིན་ཏེ། མདོར། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །དྲི་མ་མེད་པའི་སེམས་ལ་རྣམ་པར་བརྟེན། །ཞེས་གསུངས་པས་སོ་ཞེས་འདོད་དོ། །འདིར་མདོ་སྡེ་པའི་རང་ལུགས་ནི་རྒྱུ་ཚོགས་ཐ་དད་ལས་སྐྱེས་པས་རྫས་གཅིག་ཏུ་མི་འདོད་དེ། དྲི་མ་མེད་པའི་ཡིད་མངོན་དུ་གྱུར་ན་འཕགས་པར་འགྱུར་ལ། ཀུན་གཞི་དང་ཉོན་ཡིད་ཀྱང་རིགས་པས་མི་གྲུབ་པས་ཚོགས་དྲུག་ཏུ་གྲངས་ངེས་སོ། །གསུམ་པ་ནི། དེ་སྐྱེ་མཆེད་དུ་བཞག་པའི་ཚེ་ཡིད་ཀྱི་སྐྱེ་མཆེད་དེ། རྣམ་ཤེས་དྲུག་གི་ལྡོག་པ་སྐྱེ་མཆེད་དུ་མི་འཆད་པ་ནི་དེ་འབྲས་བུ་ཡིན་ལ་སྐྱེ་མཆེད་རྒྱུ་ཡིན་པས་སོ། །དེ་ན་རྣམ་ཤེས་དྲུག་སྐྱེ་མཆེད་དུ་འཇོག་པའི་ཆ་ཐམས་ཅད་ནི་དབང་པོའི་སྐྱེ་མཆེད་དུ་འཇོག་དགོས་ལ། དེ་ཡང་ཡིད་ཀྱི་དབང་པོ་ལས་མ་འདས་པས་སྐྱེ་མཆེད་བཅུ་གཉིས་སུ་གྲངས་ངེས་པ་ཡང་འགྲུབ་བོ། །དེ་ཁམས་རྣམ་པར་བཞག་པའི་ཚེ། ཁམས་བདུན་ཏེ། ཁམས་ལ་དབང་པོའི་ཁམས་དང་། འབྲས་བུ་རྣམ་པར་ཤེས་པའི་ཁམས་གཉིས་ཀ་ཡོད་པས་རྣམ་ཤེས་དྲུག་རང་ལྡོག་ནས་ཁམས་སུ་བཞག་ཏུ་རུང་བའོ། །བཞི་པ་ནི། རྣམ་པར་ཤེས་པ་དྲུག་ནི། འབྲས་བུ་རྣམ་པར་ཤེས་པའི་ཁམས་དྲུག་ཏུ་བཞག་ན། ཡིད་ཀྱི་ཁམས་ཀྱི་མཚན་ཉིད་གང་ཞེ་ན། རྣམ་ཤེས་གང་ཞིག་རང་འགག་མ་ཐག་ཏུ་བདག་འབྲས་ཡིད་ཀྱི་རྣམ་པར་ཤེས་པ་བསྐྱེད་པའོ། །འོ་ན་འབྲས་བུ་རྣམ་ཤེས་ཀྱི་ཁམས་དང་ཁྱད་པར་ཅི་ཡོད་ཅེ་ན། ད་ལྟར་གྱི་རྣམ་ཤེས་དྲུག་པོ་དེ་ཉིད་བདག་རྐྱེན་དང་དམིགས་རྐྱེན་ལས་སྐྱེས་པའི་ཆ་ནས་འབྲས་བུའི་རྣམ་པར་ཤེས་པའི་ཁམས་དང་ཡིད་ཀྱི་རྣམ་ཤེས་བསྐྱེད་པའི་ཆ་ནས་ཡིད་ཀྱི་ཁམས་དང་། ཡིད་ཀྱི་དབང་པོར་འཇོག་པ་སྟེ། འགྲེལ་པར། རྣམ་པར་ཤེས་པ་གང་དང་གང་འགག་མ་ཐག་པ་དེ་ནི་ཡིད་ཀྱི་ཁམས་ཞེས་བྱ་སྟེ། དཔེར་ན་བུ་དེ་ཉིད་གཞན་གྱི་ཕར་ཡང་འགྱུར་བ་དང་། དེ་ཉིད་གཞན་གྱི་ས་བོན་ཡིན་པ་ལྟ་བུའོ་ཞེས་གསུངས་སོ། །དེ་ན་རྣམ་ཤེས་འགགས་པ་འདས་པ་དེ་ཉིད་ཡིད་དབང་ཡིན་ཞེས་དང་། ཡིད་དབང་དུ་འཇོག་པ་ལ་བདག་འབྲས་སྐྱེས་པའི་ཚེ་ན་འཇོག་དགོས་ཞེས་པ་རྣམས་ནི་དོན་མ་རྟོག་པ་སྟེ། འདས་པ་ད་ལྟར་གྱི་དངོས་པོར་མེད་པས་བདག་རྐྱེན་བྱེད་མི་ནུས་པའི་ཕྱིར་དང་། བདག་འབྲས་མ་སྐྱེས་པའི་གོང་ནས་བདག་རྐྱེན་ཉིད་བདག་རྐྱེན་དུ་འཇོག་དགོས་པའི་ཕྱིར་རོ། །མདོར་ན་དབང་པོའི་ཁམས་སུ་འཇོག་པ་ནི་རང་འགག་མ་ཐག་ཏུ་རང་གི་བདག་འབྲས་བསྐྱེད་པའི་ཆ་ནས་འཇོག་དགོས། རྣམ་པར་ཤེས་པའི་ཁམས་སུ་འཇོག་པ་ནི་རང་གི་རྐྱེན་གསུམ་ལས་སྐྱེས་མ་ཐག་པའི་ཆ་ནས་འཇོག་ཅེས་པའི་ཁྱད་པར་ཤེས་པའི་ཆེད་དུ་འགག་མ་ཐག་པ་ཞེས་སྨོས་པ་ཤེས་པར་བྱའོ། །ལྔ་པ་ནི། འོ་ན་རྣམ་ཤེས་དྲུག་དང་ཡིད་གཅིག་གིས་གཅིག་བསྡུས་པའི་ཡིད་སྨོས་ན་ཁམས་བཅུ་གཉིས་དང་། རྣམ་ཤེས་སྨོས་ན་ཁམས་བཅུ་བདུན་དུ་འགྱུར་རོ་ཞེ་ན། སྐྱོན་མེད་དེ། རྣམ་ཤེས་ལྔའི་རྟེན་མིག་ལ་སོགས་པ་ཡིན་ལ། དྲུག་པ་ཡིད་ཀྱི་རྣམ་ཤེས་ཀྱི་རྟེན་སེམས་ཙམ་པས་ཉོན་མོངས་པ་ཅན་གྱི་ཡིད་དང་། གོས་དམར་བས་སྙིང་གི་དངོས་པོར་འདོད་ཀྱང་འདི་པས། དེ་དག་མི་འདོད་ཅིང་རྟེན་མེད་པར་ཡང་སྐྱེ་མི་སྲིད་པའི་ཕྱིར་ན་དྲུག་པ་ཡིད་ཀྱི་རྣམ་པར་ཤེས་པའི་རྟེན་སྒྲུབ་པར་བྱ་བའི་ཕྱིར། རྣམ་ཤེས་དྲུག་པོ་དེ་ཉིད་རང་གི་བདག་འབྲས་སྐྱེད་པའི་ཆ་ནས་ཡིད་ཀྱི་ཁམས་ཞེས་ལོགས་སུ་བགྲང་བས་རྟེན་དབང་པོའི་ཁམས་དྲུག དམིགས་པ་ཡུལ་གྱི་ཁམས་དྲུག འབྲས་བུ་རྣམ་པར་ཤེས་པའི་ཁམས་དྲུག་སྟེ། ཁམས་བཅོ་བརྒྱད་ཀྱིས་གྲངས་ངེས་འགྲུབ་བོ། །ཆོས་ཀྱི་ཕུང་པོ་བརྒྱད་ཁྲི་དག །ཞེས་པའི་སྐབས་སུ་ཕུང་པོ་དང་སྐྱེ་མཆེད་ཀྱི་མིང་ཅན་གཞན་ཡང་དེར་བསྡུ་བ་ལ་གསུམ་སྟེ། ཆོས་ཀྱི་ཕུང་པོ་ཕུང་པོར་བསྡུ་བ། ཞར་ལ་ཆོས་ཕུང་གི་ཚད། མིང་ཅན་གཞན་ཡང་བསྡུ་བའི་ཚུལ་ལོ། །དང་པོ་ནི། ཅི་མདོ་ལས་ཕུང་པོ་དང་། སྐྱེ་མཆེད་དང་ཁམས་ཀྱི་མིང་ཅན་གཞན་བཤད་པ་དག་འདི་དག་ཉིད་ཀྱིས་བསྡུས་སམ། འོན་ཏེ་ཐ་དད་ཅེ་ན་བསྡུས་པ་ཁོ་ན་སྟེ། ཕུང་པོའི་མིང་ཅན་ཆོས་ཀྱི་ཕུང་པོ་ཉན་ཐོས་སྡེ་པས་བརྒྱད་ཁྲིའམ། ཐེག་ཆེན་པས་བརྒྱད་ཁྲི་བཞི་སྟོང་དུ་འདོད་པ་དང་། རྣམ་བཤད་རིགས་པ་ལས། ཀུན་དགའ་བོས་སངས་རྒྱས་ཀྱི་ཉེ་གནས་ལོ་ཉི་ཤུ་རྩ་ལྔ་བྱས་པ་ལ་ཆོས་ཀྱི་ཕུང་པོ་བརྒྱད་ཁྲི་ལྷག་ཅིག་བཅོམ་ལྡན་འདས་ལས་མངོན་སུམ་དུ་བཟུང་ངོ་། །གཉིས་དགེ་སློང་ཞིག་ལས་སོ་ཞེས་འབྱུང་བ་ལ་དེས་བཀའ་ཐམས་ཅད་བསྡུས་སམ་ཞེ་ན་མ་བསྡུས་ཏེ། སངས་རྒྱས་ནས་ལྔ་བཅུ་རྩ་ལྔའི་བར་བཞི་སྟོང་ལས་ལྷག་པར་གསུངས་པར་རིགས་པ་དང་། སློབ་དཔོན་ཀླུ་སྒྲུབ་སྟོན་པ་ཐམས་ཅད་མཁྱེན་པའི་དགོངས་པ་མངའ་བ་ཀླུའི་ཡུལ་ན་གཤེགས་པའི་ལམ་ན་མིང་ཡང་མི་ཤེས་པའི་གླེགས་བམ་བཞུགས་པར་བཤད་པའི་ཕྱིར་རོ། །གང་ལྟར་ཡང་འདོད་ཆགས་ལ་སོགས་པ་ཉོན་མོངས་པ་རྣམས་ཀྱི་གཉེན་པོར་ཆོས་ཀྱི་ཕུང་པོ་ཇི་སྙེད་གསུངས་པ་དེ་དག་ནི་མདོ་སྡེ་པ་ལྟར་ན་དང་པོར་སངས་རྒྱས་ཀྱི་གསུངས་གི་རིག་བྱེད་དང་། ཕྱིས་འཆད་པ་པོའི་ངག་གི་རིག་བྱེད་སྒྲ་རང་མཚན་པ་ཡིན་པས་གཟུགས་ཕུང་དུ་འདུས་ལ། བྱེ་བྲག་ཏུ་སྨྲ་བ་ལྟར་ན་མིང་ཡིན་པར་འདོད་པས་འདུ་བྱེད་ཀྱི་ཕུང་པོར་འདུས་སོ། །གཉིས་པ་ནི། ཆོས་ཀྱི་ཕུང་པོ་རེ་རེའི་ཚད་ཇི་ཙམ་ཞེ་ན། སྡེ་པ་ཁ་ཅིག་ན་རེ། ཤཱ་རིའི་བུའི་བསྟན་བཅོས་ཆོས་ཀྱི་ཕུང་པོའི་ཚད་དང་མཉམ་སྟེ། ཤླཽ་ཀ་དྲུག་སྟོང་པ་ཉན་ཐོས་ཀྱི་ས་དང་མཉམ་པར་འཆད་དོ། །སྡེ་པ་གཞན་དག་ནི་ཕུང་པོ་དང་སྐྱེ་མཆེད་ལ་སོགས་པའི་གཏམ་རྒྱུད་རེ་རེ་ཚང་བ་ནི་ཆོས་ཀྱི་ཕུང་པོའི་ཚད་ཡིན་པས་གཏམ་རྒྱུད་མདོ་གང་ནས་གསུང་ཡང་བརྒྱད་ཁྲིའི་གྲངས་སུ་བགྲང་ངོ་ཞེས་གསུངས་སོ། །སློབ་དཔོན་རང་གི་ལུགས་ཀྱི་ཚད་ནི་སེམས་ཅན་གྱི་སྤྱོད་པ་འདོད་ཆགས་ལ་སོགས་པ་རྣམས་ཀྱི་གཉེན་པོར། ཆོས་ཀྱི་ཕུང་པོར་མི་སྡུག་པ་ལ་སོགས་པར་མཐུན་པར་གསུངས་པས་གཉེན་པོ་རེ་རེའི་གཏམ་རྫོགས་པ་རེ་རེ་ལ་ཆོས་ཀྱི་ཕུང་པོའི་ཚད་དུ་འདོད་པའམ། ཡང་ན་དུག་གསུམ་དང་། དུག་གསུམ་ཆ་མཉམ་པ་སྟེ་བཞིའི་གཉེན་པོར་ཉི་ཁྲི་སྟེ་བརྒྱད་ཁྲིའམ། ཉི་ཁྲི་ཆིག་སྟོང་རེ་རེ་སྟེ་བརྒྱད་ཁྲི་བཞི་སྟོང་ངོ་། །འདི་དག་ཀྱང་གདུལ་བྱའི་བློ་ལ་ལྟོས་པའི་གྲངས་ངེས་སོ། །གསུམ་པ་ནི། ཆོས་ཀྱི་ཕུང་པོ་བརྒྱད་ཁྲི་ཕུང་པོ་ལྔར་བསྡུས་པ་དེ་བཞིན་དུ་ཕུང་པོའི་མིང་ཅན་རྣམ་གྲོལ་གྱི་ཕུང་པོ་ལྔ་འབྱུང་བ་ལས། ཚུལ་ཁྲིམས་ཀྱི་ཕུང་པོ་རིག་བྱེད་མིན་པ་སྟེ་གཟུགས་ཕུང་དུ་སྡུད་ལ། ཏིང་ངེ་འཛིན་དང་། ཤེས་རབ་དང་། རྣམ་གྲོལ་ནི་མོས་པ་དང་། རྣམ་གྲོལ་གྱི་ཡེ་ཤེས་མཐོང་བ་ནི་ཟད་པ་དང་མི་སྐྱེ་བ་ཤེས་པ་སྟེ་ཐམས་ཅད་སེམས་བྱུང་ཡིན་པས་འདུ་བྱེད་དུ་བསྡུས་སོ། །སྐྱེད་མཆེད་ཀྱི་མིང་ཅན་ནི། མདོ་ལས། རྣམ་གྲོལ་གྱི་སྐྱེ་མཆེད་ལྔ་སྟེ། ཐོས་པ་དང་། དབྱངས་ཀྱི་ཁ་ཏོན་བྱས་པ་དང་། གཞན་ལ་བཤད་པ་དང་། ཐོས་པའི་དོན་སེམས་པ་དང་། ཏིང་ངེ་འཛིན་གྱི་མཚན་མ་བསྒོམ་པ་ལས་བྱུང་བའི་ཤེས་རབ་སྟེ། དེ་དག་གོམས་པས་རྣམ་གྲོལ་སྐྱེ་བའི་སྒོ་བྱེད་པའི་ཕྱིར་རོ། །དེ་ཐམས་ཅད་ནི་ཤེས་རབ་ཡིན་པས་ཆོས་ཀྱི་སྐྱེ་མཆེད་དུ་བསྡུའོ། །ཟིལ་གྱིས་ནོན་པའི་སྐྱེ་མཆེད་བརྒྱད་དང་། ཟད་པར་གྱི་སྐྱེ་མཆེད་བཅུའི་དང་པོ་བརྒྱད་ནི་སེམས་བྱུང་མ་ཆགས་པ་སྟེ། ཆོས་ཀྱི་སྐྱེ་མཆེད་དུ་བསྡུས་ལ། འཁོར་དང་བཅས་ན་ཕུང་པོ་ལྔ་ཡོད་པས་ཡིད་དང་ཆོས་ཀྱི་སྐྱེ་མཆེད་གཉིས་ཀྱིས་བསྡུས་སོ། །གཟུགས་མེད་སྐྱེ་མཆེད་རིས་བཞི་ནི་ཕུང་པོ་བཞི་པ་ཅན་ཡིན་པས་ཡིད་དང་ཆོས་ཀྱི་སྐྱེ་མཆེད་ཀྱིས་བསྡུས་སོ། །ཁམས་ཀྱི་མིང་ཅན་ཁམས་མང་པོ་བ་ཞེས་ཀྱང་བྱ། ཆོས་ཀྱི་མེ་ལོང་ཆེན་པོ་ཞེས་ཀྱང་བྱ་བ་ལས། བཙུན་པ་ཅི་ཙམ་གྱིས་ན་ཁམས་ལ་མཁས་པ་ལགས། ཀུན་དགའ་བོ་ཁམས་དྲུག་ཅུ་རྩ་གཉིས་ལ་མཁས་ན་ཁམས་ལ་མཁས་པའོ་ཞེས་སོ། །སྡོམ་ནི། མིག་སོགས་ཁམས་ནི་བཅོ་བརྒྱད་དང་། །འབྱུང་བཞི་ནམ་མཁའ་རྣམ་ཤེས་དང་། །ཚོར་བ་ལྔ་དང་མ་རིག་དང་། །འདོད་ཁམས་གནོད་སེམས་རྣམ་པར་འཚེ། །ངེས་འབྱུང་གནོད་སེམས་མེད་པ་དང་། །རྣམ་མི་འཚེ་སྟེ་དྲུག་ཚན་གསུམ། །གཟུགས་མ་གཏོགས་པའི་ཕུང་པོ་བཞི། །འདོད་དང་གཟུགས་དང་གཟུགས་མེད་ཁམས། །ངན་པ་བར་མ་གྱ་ནོམ་ཁམས། །གཟུགས་དང་གཟུགས་མེད་འགོག་པའི་ཁམས། །དགེ་དང་མི་དགེ་ལུང་མ་བསྟན། །སློབ་དང་མི་སློབ་གཉིས་ཀ་མིན། །འདས་དང་མ་འོངས་ད་ལྟར་ཏེ། །དེ་ལྟ་ན་ནི་གསུམ་ཚན་དྲུག །ཟག་བཅས་ཟག་པ་མེད་ཁམས་དང་། །འདུས་བྱས་འདུས་མ་བྱས་ཁམས་ཏེ། །ཁམས་ནི་དྲུག་ཅུ་རྩ་གཉིས་སོ། །ཞེས་བྱ་བ་རྣམས་རང་རང་གི་མཚན་ཉིད་དཔྱད་དེ་ཇི་ལྟར་རིག་པར་སྦྱར་བར་བྱའོ། །མིག་དང་ཆོས་ཀྱི་ཁམས་ཕྱོགས་ནི། །ཞེས་པའི་སྐབས་སུ། ལྟ་བ་ལ་མཚན་ཉིད། དབྱེ་བ། ལྟ་ཚུལ། དོགས་པ་དཔྱད་པ་དང་བཞི་ལས། དང་པོ་ནི། གཟུགས་ལ་ལྟ་བ་དང་། ཤེས་བྱ་ལ་ངེས་པར་རྟོགས་པའི་ཤེས་རབ་གང་རུང་གིས་བསྡུས་པའི་ཁམས་སོ། །གཉིས་པ་ལ་གཉིས་ཏེ། གཟུགས་ལ་བལྟ་བའི་ལྟ་བ་དང་། ཤེས་བྱ་ལ་ངེས་པར་རྟོག་པའི་ལྟ་བའོ། །དང་པོ་ནི། རྟེན་བཅས་ཀྱི་མིག་དབང་གཟུགས་ཅན་པ་དེ་ཉིད་དོ། །གཉིས་པ་ལ། འཇིག་ཚོགས་ལ་ལྟ་བ་ལ་སོགས་པ་ལྔ་དང་། འཇིག་རྟེན་པ་དང་། སློབ་པ་དང་། མི་སློབ་པའི་ཡང་དག་པའི་ལྟ་བ་གསུམ་སྟེ་བརྒྱད་དོ། །གསུམ་པ་ནི། མིག་ལྟ་བར་འཇོག་པའི་ཚུལ་ནི། མིག་གཟུགས་ལ་བལྟ། རྣ་བ་སྒྲ་ལ་ཉན། ཞེས་སོགས་ཀྱི་ཟླས་ཕྱེ་བའི་ཚུལ་གྱིས་སོ། །གཞན་བརྒྱད་པོ་ལྟ་བར་འཇོག་པའི་ཚུལ་ལ་འཇིག་ལྟ་སོགས་ལྔ་ནི་ཉོན་མོངས་ཅན་གྱི་ཡིད་དང་མཚུངས་པར་ལྡན་པའི་ཤེས་རབ་ཡིན་པས་ཤེས་བྱ་ཕྱིན་ཅི་ལོག་ཏུ་ངེས་པར་རྟོག་པ་ཡིན་ལ། འཇིག་རྟེན་པའི་ཡང་དག་པའི་ལྟ་བ་ནི་ལས་རྒྱུ་འབྲས་ལ་ངེས་པར་རྟོག་པ་དང་། བསྒོམ་བྱ་བདེན་པ་དོན་སྤྱིའི་ཚུལ་གྱིས་ཤེས་པའི་སྒོ་ནས་ལྟ་བ་དང་། ཟག་མེད་ཀྱི་ལྟ་བ་གཉིས་ནི་བདེན་པ་མངོན་སུམ་དུ་ཤེས་པའི་ཚུལ་གྱིས་ངེས་པར་རྟོག་པའོ། །བཞི་པ་ནི། སྒོ་ལྔའི་རྣམ་པར་ཤེས་པ་དང་མཚུངས་ལྡན་གྱི་ཤེས་རབ་ཅིའི་ཕྱིར་ལྟ་བར་མི་འཇོག་ཅེ་ན། ཤེས་པར་གྱུར་པའི་ལྟ་བ་ཡིན་ན་ངེས་པར་རྟོགས་པའི་ལྟ་བ་ཡིན་དགོས་པ་ལས་དེ་དག་ལ་ངེས་པར་རྟོག་པ་མེད་པའི་ཕྱིར་རོ། །བོད་ཁ་ཅིག རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། ལྟ་བ་མིན་པར་ཐལ། ངེས་པར་རྟོག་པ་མེད་པའི་ཕྱིར། འཁོར་གསུམ་ཆར་བྱེ་བྲག་ཏུ་སྨྲ་བས་ཁས་བླངས་སོ་ཞེས་སྨྲ་བ་ནི། རང་ཉིད་བློ་གྲོས་རྩིང་བ་དང་། གྲུབ་མཐའ་ལ་དབང་ཟ་བ་དང་། གྲུབ་མཐའ་སྨྲ་བ་ལ་བརྙས་པ་ཆེ་བ་གསུམ་མཚོན་པར་བྱེད་པའོ། །མིག་དང་ཡིད་དང་རྣ་བ་ནི། །ཞེས་པའི་སྐབས་སུ། དབང་པོས་ཡུལ་འཛིན་ཚུལ་ལ། དབང་པོ་རྣམས་ཀྱི་ཚད་དང་བཀོད་པ་ཅི་ལྟར་གནས་པ་དང་། ཕྲད་མ་ཕྲད་དུ་འཛིན་པའི་ཚུལ་དང་། མཉམ་མི་མཉམ་དུ་འཛིན་པའི་ཚུལ་གསུམ་ལས། དང་པོ་ནི། མིག་ནི་མིག་འབྲས་ཀྱི་ནང་ན་གོ་སྙོད་ནག་པོའི་མེ་ཏོག་དང་། ཟར་མའི་མེ་ཏོག་བཞིན་དུ་གནས་ཏེ། དབང་པོའི་རྡུལ་སིལ་བུ་ལ་ཁ་དོག་དྭངས་པས་པགས་པ་བཞིན་དུ་བཀབ་པས་མི་འབྱེས་པའམ། དབང་རྟེན་གྱི་བླ་འོག་ཏུ་ཉུངས་འབྲུ་ལྟར་གནས་ཏེ་ཤེལ་བཞིན་དྭངས་པས་ཕན་ཚུན་མི་སྒྲིབ་པའོ། །ཞེས་སོ། །རྣ་བ་ནི་རྣ་བའི་ནང་ན་གྲོ་གའི་མཛེར་པ་བཅུས་པ་ལྟ་བུ་མདོག་ཀྱང་གྲོ་ག་འདྲ་བ་ཡོད་པ་དེའི་ནང་ན་གནས་སོ། །སྣ་ནི་མཚུལ་བའི་ཕུག་ན་ཟངས་ཀྱི་མོ་ཁབ་གཉིས་གཤིབས་པ་ལྟར་གནས་ཏེ། དེ་གསུམ་ནི་ཕྲེང་བ་བཞིན་དུ་མ་འཁྲུག་པར་འཁོར་མོར་གནས་པའོ། །ལྕེ་ནི་ལྕེ་ཡི་རྩེ་མོའི་དབུས་ན་སྐྲ་ཡི་རྩེ་མོའི་ཁྱོན་ཙམ་ཞིག་དབང་པོས་མ་ཁྱབ་པས་ཕན་ཚུན་གཉིས་ན་ཟླ་གམ་ལྟ་བུར་གནས་ཏེ། སའི་རྩ་ལག་ལས་དེ་ནི་ཀླད་རྒྱས་འཛག་པའི་ལམ་ཡིན་པས་དེ་མེད་ན་ཡི་ག་འཆུས་ཤིང་དང་ཁམས་མི་བདེ་བར་འགྱུར་བའོ་ཞེས་ཟེར་རོ། །ལུས་ནི་ཁྲབ་ཀྱི་བྱང་བུའམ་བྱ་རེག་ན་འཇམ་གྱི་པགས་པ་ལྟ་བུར་གནས་ཞེས་ཟེར་ཡང་། ནང་ན་དབང་པོས་མ་ཁྱབ་པར་འགྱུར་བས་དབང་རྟེན་གྱི་བཀོད་པ་ལྟར་གནས་སོ། །རིགས་པ་སྨྲ་བའི་མདོ་སྡེ་པ་ནི་འདི་ལྟ་བུའི་ཁ་དོག་དང་དབྱིབས་ཀྱི་ཁྱད་པར་ནི་མི་གྲུབ་པས་དབང་རྟེན་དེ་དག་གི་ནང་ན་གནས་པའི་དབང་པོའི་རྣམ་ཤེས་རང་དབང་དུ་བསྐྱེད་པའི་ནུས་པ་ཞིག་ལ་འདོད་དོ། །གཉིས་པ་ནི། དབང་པོ་དྲུག་གིས་ཡུལ་དང་ཕྲད་ནས་སམ་མ་ཕྲད་པར་འཛིན་ཅེ་ན། མིག་གིས་ནི་ཡུལ་དང་མ་ཕྲད་པར་འཛིན་ཏེ། གཟུགས་རྒྱང་རིང་པོ་ནས་མཐོང་ཞིང་། བར་ན་ནམ་མཁའ་མེད་པའི་མིག་སྨན་དང་། ཐུར་མ་དང་པགས་པ་མི་མཐོང་བའི་ཕྱིར་རོ། །རྣ་བས་ཀྱང་ཡུལ་དང་མ་ཕྲད་པར་འཛིན་ཏེ་རྒྱང་རིང་པོའི་སྒྲ་ཐོས་ལ། སྒྲ་དེ་ཚུར་འོངས་པ་ཡིན་ན་སྒྲ་རྒྱུན་དང་བཅས་པར་འགྱུར་བའི་ཕྱིར་རོ། །འོ་ན་མ་ཕྲད་པར་འདྲ་བས་བར་ཆོད་པ་དང་ཆེས་རིང་བ་ཡང་འཛིན་པར་འགྱུར་རོ་ཞེ་ན། དེ་ནི་མ་ཁྱབ་སྟེ། རྡོ་ཁབ་ལེན་གྱིས་ལྕགས་འདྲེན་ཡང་བར་ཆོད་པ་དང་ཆེས་རིང་བའི་ལྕགས་མི་འདྲེན་པ་བཞིན་ནོ། །ཡིད་ཀྱིས་ཀྱང་མ་ཕྲད་པར་འཛིན་ཏེ། ལུས་ཅན་མ་ཡིན་པས་ཕྲད་པར་མི་རུང་བར་འགྱུར་བའི་ཕྱིར་རོ། །སྣ་ལྕེ་ལུས་གསུམ་ནི་ཕྲད་ནས་འཛིན་ཏེ། དབུགས་མ་བརྔུབས་པར་དྲི་མི་ཚོར་ཞིང་། ལྕེ་དང་ལུས་ལ་མ་རེག་པར་རོ་དང་རེག་བྱ་མི་འཛིན་པའི་ཕྱིར་རོ། །ཕྲད་པའི་དོན་ནི་ཐམས་ཅད་ཀྱིས་འདབ་འབྱོར་བ་ལ་འདོད་ལ། དེའི་དོན་ཁ་ཆེ་བ་རྣམས་ན་རེ། རྡུལ་ཕྲན་ཕན་ཚུན་རེག་པ་ནི་མེད་དེ། བདག་ཉིད་ཐམས་ཅད་ཀྱིས་རེག་ན་རགས་པ་མི་རྩོམ་པར་འགྱུར་ཞིང་། ཕྱོགས་རེས་རེག་ན་རྡུལ་ཆ་བཅས་སུ་འགྱུར་བས་སོ། །དེས་ན་རྡུལ་ཆ་མེད་ལ་ཕྱོགས་དྲུག་གི་རྡུལ་གྱིས་བསྐོར་བ་ནི་བར་ཆ་དང་བཅས་ཀྱང་བར་ན་རྡུལ་གཞན་མེད་པ་ལ་ཕྲད་པ་ཞེས་འདོད་དོ། །བཙུན་པ་དབྱིག་བཤེས་ན་རེ། རྡུལ་རེག་ན་སྐད་ཅིག་དང་པོ་ལ་སྐྱེས་ནས་གཉིས་པ་ལ་རེག་པའི་ཕྱིར། རྟག་པར་འགྱུར་བས་རེག་པ་མེད་དོ། །འོ་ན་རྔ་དང་དབྱུག་གུ་ལས་སྒྲ་ཇི་ལྟར་འབྱུང་ཞེ་ན། མ་རེག་པ་དེ་ཉིད་ཀྱི་ཕྱིར་སྒྲ་འབྱུང་སྟེ། རེག་པར་འགྱུར་ན་འདག་པ་ལ་འདག་པ་བསྣུན་པ་བཞིན་དུ་འབྱིང་བར་འགྱུར་བས་སྒྲ་མི་འབྱུང་ངོ་། །འོ་ན་འདུས་པའི་གོང་བུའི་རྡུལ་སོ་སོར་གནས་པས་འབྱེས་པར་མི་འགྱུར་རམ་ཞེ་ན། མི་འགྱུར་ཏེ་རླུང་གིས་བཟུང་བའི་ཕྱིར་རོ། །འོ་ན་རླུང་གི་གཏོར་བར་འགྱུར་རོ་ཞེ་ན་མ་ཡིན་ཏེ། འཇིག་པའི་རླུང་ལྟ་བུར་རླུང་ཁ་ཅིག་འཇིག་པར་བྱེད་པ་དང་། འཆགས་པའི་རླུང་ལྟ་བུ་ཁ་ཅིག་འཛིན་པར་ཞུགས་པ་གཉིས་ཡོད་པ་ལས། ཕྱི་མས་བཟུང་བའི་ཕྱིར་རོ། །སློབ་དཔོན་བཙུན་པ་ན་རེ། རྡུལ་འབྱར་བའམ་རེག་པ་ནི་མེད་ཀྱི། གཡག་རྔ་དང་ནེའུ་སིང་ལྟར་བར་མེད་པ་ལ་རེག་གོ་སྙམ་དུ་འདུ་ཤེས་པར་ཟད་དོ་ཞེས་གསུང་། སློབ་དཔོན་ལུགས་འདི་བཞེད་དེ། དེ་ལྟ་མ་ཡིན་པར་རྡུལ་ཕྲན་བར་དང་བཅས་ན་བར་སྟོང་པ་དེར་རྡུལ་གཞན་འགྲོ་བར་སུས་ཀྱང་འགོག་མི་ནུས་པའི་ཕྱིར་རོ། །གསུམ་པ་ནི། འོ་ན་དབང་པོས་ཡུལ་མཉམ་པའམ་མི་མཉམ་པ་གང་འཛིན་ཞེ་ན། སྣ་ལྕེ་ལུས་གསུམ་གྱིས་ནི་རང་དང་ཕྲད་ནས་འཛིན་དགོས་པས་མཉམ་པ་ཁོ་ན་འཛིན་དགོས་ལ། མིག་གིས་ནི་ཆུང་ངུ་སྐྲ་ཡི་རྩེ་མོ་དང་། ཆེན་པོ་རི་བོ་ལ་སོགས་པ་དང་། མཉམ་པ་རྒུན་འབྲུམ་ཙམ་ལ་སོགས་པ་འཛིན་ཅིང་། རྣ་བས་ཀྱང་ཆུང་ངུ་སྦྲང་བུའི་སྒྲ་དང་། ཆེན་པོ་འབྲུག་གི་སྒྲ་དང་། མཉམ་པ་རྣ་བའི་ནང་དུ་འདྲུབ་པའི་སྒྲ་ཡིན་ལ། ཡིད་ནི་ལུས་ཅན་མ་ཡིན་པས་ཆད་ཡོངས་སུ་ཆད་པ་མེད་དོ། །ལུས་ལ་འོག་མའི་མིག་མ་ཡིན། །ཞེས་པའི་སྐབས་སུ། ལུས་རྟེན་གང་ལ་གནས་ཏེ་མིག་གིས་གཟུགས་རྣམས་ལྟ་བ་ན་ཅི་ལུས་དང་། མིག་དང་། གཟུགས་དང་། རྣམ་ཤེས་དེ་རྣམས་ས་གཅིག་པ་ཞིག་ཡིན་ནམ། འོན་ཏེ་མི་གཅིག་པ་ཡིན་ཞེ་ན། འདི་ལ་དབང་པོ་དྲུག་གི་ཆོས་བཞིའི་ངེས་པ་བརྩི་བ་དང་། གཞུང་གི་འབྲུ་ལ་སྦྱར་ཏེ་ས་མཚུངས་དངོས་དང་། ས་རེ་རེ་ལ་ལྟོས་པའི་ས་མཚུངས་ཀྱི་གྲངས་དཔྱད་པ་གསུམ་ལས་དང་པོ་ནི། མིག་དང་རྣ་བ་གཉིས་ཀྱི་རྟེན་དང་། དབང་པོ་དང་ཡུལ་གསུམ་ནི། འདོད་པ་ནས་བསམ་གཏན་བཞི་པའི་བར་གྱི་ས་ལྔ་པ་ཡིན་ལ། སྣ་ལྕེ་གཉིས་ཀྱི་རྟེན་དང་། དབང་པོ་སྔར་བཤད་པ་ལྟར་ས་ལྔ་པ་ཡིན་ཀྱང་ཡུལ་དྲི་རོ་གཉིས་པོ་ནི། འདོད་པའི་ས་པ་ཁོ་ནའོ། །ལུས་ཀྱི་ཆོས་གསུམ་ཡང་སྔར་བཤད་པ་ལྟར་ས་ལྔ་པའོ། །མིག་རྣ་ལུས་ཀྱི་དབང་པོའི་རྣམ་པར་ཤེས་པ་གསུམ་ནི་འདོད་པ་དང་། བསམ་གཏན་དང་པོའི་ས་གཉིས་པ་ཡིན་གྱི་བསམ་གཏན་གཉིས་པ་ཡན་ཆད་ན་རྟོག་དཔྱོད་མེད་པས་རང་སས་བསྡུས་པའི་དབང་ཤེས་མེད་དོ། །སྣ་ལྕེའི་རྣམ་པར་ཤེས་པ་གཉིས་ནི་འདོད་པའི་ས་པ་ཁོ་ན་ཡིན་གྱི། བསམ་གཏན་དང་པོ་ན་ཡང་མེད་དེ། ཡུལ་དྲི་རོ་གཉིས་མེད་པའི་ཕྱིར་རོ། །འོ་ན་དབང་པོ་གཉིས་ཀྱང་མེད་པར་འགྱུར་རོ་སྙམ་ན་རྟེན་མཛེས་པར་བྱ་བའི་ཕྱིར་དུ། ལས་ཀྱི་དབང་གིས་དབང་པོ་གཉིས་ཡོད་ཅེས་བྱེ་བྲག་ཏུ་སྨྲ་བ་འདོད་དོ། །ཡིད་ཀྱི་རྟེན་ལུས་ནི་ས་ལྔ་པ་ཡིན་ལ་ཆོས་གཞན་གསུམ་ནི་འདོད་པ་ནས་སྲིད་རྩེའི་བར་གྱི་ས་དགུ་པ་ཡིན་ནོ། །གཉིས་པ་ནི། ས་གོང་མའི་ལུས་ལ་ས་འོག་མའི་མིག་མངོན་དུ་བྱེད་པ་མ་ཡིན་ཏེ། རང་ས་ན་མིག་མཆོག་ཏུ་གྱུར་པ་ཡོད་པས་འོག་མའི་མིག་དམན་པ་མངོན་དུ་བྱེད་པ་ལ་དགོས་པ་མེད་པའི་ཕྱིར་རོ། །དེའི་ཤུགས་ཀྱིས་རང་སའི་ལུས་ལ་རང་སའི་མིག་དང་། གོང་སའི་མིག་མངོན་དུ་བྱེད་པར་རུང་བར་བསྟན་པས་འདོད་པའི་མིག་ས་གཅིག་གི་རྟེན་ཅན་ཡིན་པ་ནས། བཞི་པའི་མིག་ས་ལྔ་པའི་རྟེན་ཅན་གྱི་བར་དུ་སྦྱར་བར་བྱའོ། །ས་འོག་མའི་མིག་གིས་གོང་མའི་གཟུགས་མཐོང་བ་མ་ཡིན་ཏེ། དམན་པའི་ཡུལ་མཆོག་མ་ཡིན་པའི་ཕྱིར་རོ། །དེའི་ཤུགས་ཀྱིས་རང་ས་དང་འོག་སའི་གཟུགས་མཐོང་བས་འདོད་པའི་མིག་གིས་ཡུལ་ས་གཅིག་ནས་བསམ་གཏན་བཞི་པའི་མིག་གིས་ཡུལ་ས་ལྔ་པའི་བར་དུ་སྦྱར་བར་བྱའོ། །རྣམ་པར་ཤེས་པའང་ཞེས་པ་ནི། ལུས་ལ་འོག་མའི་མིག་མ་ཡིན། །ཞེས་པའི་ཚབ་ཏུ། མིག་ལ་གོང་མའི་ཤེས་མ་ཡིན། །ཞེས་སྦྱར་ཏེ། སེང་གེའི་འོ་མ་རྫ་ལ་མི་ཆགས་པ་ལྟར་རྟེན་དམན་པ་འོག་མའི་མིག་ལ་བརྟེན་པ་ཁྱད་པར་ཅན་གོང་མའི་རྣམ་པར་ཤེས་པ་བརྟེན་དུ་མི་རུང་བས། འདོད་པ་དང་བསམ་གཏན་དང་པོར་རང་སའི་མིག་ལ་རང་སའི་རྣམ་ཤེས་བརྟེན་ལ། གཉིས་པ་ཡན་ཆད་ལ་གོང་མའི་མིག་ལ་འོག་ས་བསམ་གཏན་དང་པོའི་རྣམ་ཤེས་མངོན་དུ་བྱེད་དགོས་ཏེ། འོག་མའི་མིག་ལ་མི་བརྟེན་ཅིང་། རང་ས་ན་མིག་གི་རྣམ་ཤེས་མེད་པས་སོ། །འོན་ཀྱང་གོང་མ་བསམ་གཏན་བཞི་ན་འོག་མ་འདོད་པའི་རྣམ་ཤེས་མངོན་དུ་མི་བྱེད་དེ། བསམ་གཏན་དང་པོ་ན་མཆོག་ཡོད་པས་སོ། །བསམ་གཏན་དང་པོའི་མིག་གི་རྣམ་ཤེས་དེའི་ཡུལ་གཟུགས་ལ་འོག་གི་ཐམས་ཅད་དུ་ཞེས་པ་སྦྱར་ཏེ། དང་པོའི་མིག་ལ་བརྟེན་པའི་ཚེ་འདོད་པ་དང་། དང་པོའི་གཟུགས་མཐོང་བ་ན་ས་བཞི་པའི་མིག་ལ་བརྟེན་པའི་ཚེ་ས་ལྔ་ཆར་གྱི་གཟུགས་མཐོང་བའི་བར་དུའོ། །དམན་པའི་ཡུལ་མཆོག་མ་ཡིན་པར་འདོད་པ་འདི་ལ་ཡང་མཚུངས་སམ་ཞེ་ན། མི་སྟོབས་ཆུང་ཡང་རྒྱལ་པོ་ལ་བརྟེན་ན་སྟོབས་ཆེ་བར་འགྱུར་བ་ལྟར་གོང་མའི་མིག་མཆོག་ལ་བརྟེན་པས་སོ། །རྟེན་ལུས་ཀྱིའང་ཡུལ་གཟུགས་དང་། རྣམ་ཤེས་གཉིས་ཀ་ཐམས་ཅད་ཀྱི་ཡུལ་ཅན་དང་རྟེན་ཡིན་ཏེ། ས་ལྔ་ཀའི་ལུས་ལ་བརྟེན་ན་ས་ལྔ་ཀའི་གཟུགས་མཐོང་ཞིང་། རྣམ་ཤེས་ནི་འདོད་པའི་ལུས་ལ་འདོད་པ་དང་། བསམ་གཏན་དང་པོ་གཉིས་ཀའི་རྣམ་ཤེས་བརྟེན་ལ། བསམ་གཏན་བཞི་པའི་ལུས་ལ་ནི་དང་པོ་ཁོ་ནའི་རྣམ་ཤེས་བརྟེན་ནོ། །རྣ་བའི་ཆོས་བཞིའི་ས་མཚུངས་ནི། མིག་ལ་བཤད་པ་དེ་བཞིན་ཏེ། །ལུས་ལ་འོག་མའི་རྣ་མ་ཡིན། །རྣ་བས་གོང་མའི་སྒྲ་མ་ཡིན། །རྣམ་པར་ཤེས་པའང་དེ་ཡི་སྒྲ། །ལུས་ཀྱིའང་གཉིས་ཀ་ཐམས་ཅད་དུ། །ཞེས་ཅི་ལྟ་བ་བཞིན་སྦྱར་བར་བྱའོ། །སྣ་ལྕེ་ལུས་གསུམ་གྱིས་ནི་ཡུལ་དང་ཕྲད་ནས་འཛིན་པས་བར་དུ་ཆོད་པ་དང་། རྒྱང་རིང་པོ་ཡུལ་དུ་བྱེད་པའི་མངོན་ཤེས་མེད་པའི་ཕྱིར་ན་རྟེན་དང་། དབང་པོ་དང་། ཡུལ་དང་། རྣམ་ཤེས་ཐམས་ཅད་རང་གིས་ས་པ་ཉིད་ཡིན་ནོ། །འོ་ན་རྟེན་དང་དབང་པོ་གོང་མ་ན་ཡང་ཡོད་པ་མ་ཡིན་ནམ་སྙམ་ན། རྟེན་དེ་ལ་བརྟེན་ནས་རྟེན་བཅས་ཀྱི་དབང་པོ་གཟུགས་ཅན་པས་ཡུལ་འཛིན་པའི་ཚེ་ན་བཞི་ཆར་ས་མཚུངས་ཞེས་པའི་དོན་ཡིན་པས་སྐྱོན་མེད་དོ། །ཐམས་ཅད་དེ་ལྟར་ཡིན་ནམ་ཞེ་ན། དམིགས་ཀྱི་བསལ་བ་ནི། བསམ་གཏན་གོང་མ་གསུམ་དུ་སྐྱེས་པའི་ཚེ་རེག་བྱ་ལ་རེག་པ་ན་ལུས་ཀྱི་རྣམ་ཤེས་འོག་བསམ་གཏན་དང་པོའི་ལུས་ཤེས་མངོན་དུ་བྱེད་པ་དང་། འདོད་པ་དང་བསམ་གཏན་དང་པོའི་རེག་བྱ་རེག་པ་ན་རང་གི་སའི་རྣམ་ཤེས་མངོན་དུ་བྱེད་པས་འདིའི་རྣམ་ཤེས་ལ་ས་མི་མཚུངས་པ་ཡང་ཡོད་དོ། །ཡིད་ཀྱི་ཆོས་བཞི་ལ་འདོད་པའི་རྟེན་ལ་འདོད་པའི་རྣམ་ཤེས་ནས་སྲིད་རྩེའི་རྣམ་ཤེས་ཀྱི་བར་དགུ་བསྐྱེད་པ་ཡོད་ཅིང་། བསམ་གཏན་དང་པོའི་རྟེན་ལ་བསམ་གཏན་དང་པོའི་རྣམ་ཤེས་ནས་སྲིད་རྩེའི་རྣམ་ཤེས་ཀྱི་བར་བརྒྱད་བསྐྱེད་པ་ཡོད་པ་སོགས་འོག་མ་འོག་མའི་རྟེན་ལ་གོང་མ་གོང་མའི་རྣམ་ཤེས་བསྐྱེད་པ་ཡོད་ཅིང་། དེའི་ཚེ་དེ་དག་གི་ཡུལ་ས་གོང་འོག་ཐམས་ཅད་རུང་བས་ས་མཚུངས་པ་དང་། མི་མཚུངས་པ་ཅི་རིགས་པ་ཡོད་དོ། །གསུམ་པ་ནི། འདོད་པའི་རྟེན་ལ་འདོད་པའི་མིག་གིས་འདོད་པའི་གཟུགས་ལ་བལྟ་བའི་ཚེ་བཞི་ཆར་ས་མཚུངས་པ་དང་། ཡང་རྟེན་དེ་ཉིད་ལ་བསམ་གཏན་དང་པོའི་མིག་གིས་འདོད་པའི་གཟུགས་ལ་ལྟ་བའི་ཚེ་རྟེན་དང་ཡུལ་གཉིས་ས་མཚུངས། དབང་པོ་དང་རྣམ་ཤེས་གཉིས་ས་མི་མཚུངས་པ་ལྟ་བུ་དང་། ཡང་རྟེན་དེ་ཉིད་ལ་བསམ་གཏན་དང་པོའི་མིག་གིས་བསམ་གཏན་དང་པོའི་གཟུགས་ལ་ལྟ་བའི་ཚེ་གསུམ་ས་མཚུངས། རྟེན་ས་མི་མཚུངས་པ་ནས་བཟུང་སྟེ། ཡང་རྟེན་དེ་ཉིད་ལ་བསམ་གཏན་བཞི་པའི་མིག་གིས་བསམ་གཏན་གཉིས་པའི་གཟུགས་ལ་ལྟ་བའི་ཚེ་བཞི་ཆར་ས་མི་མཚུངས་པ་སོགས་ཞིབ་ཏུ་ཕྱེ་ལ་རྒྱ་ཆེར་སྤྲོ་བར་བྱའོ། །ཁམས་བསྟན་པའི་གནས་ཀྱི་དཀའ་བའི་གནས་རྣམས་བཤད་ཟིན་ཏོ།། །།ལྔ་པོ་རྣམས་ནི་དོན་བཞི་ལ། །ཞེས་པའི་སྐབས་སུ། དབང་པོར་འཇོག་པའི་རྒྱུ་མཚན་ལ་བྱེ་བྲག་ཏུ་སྨྲ་བའི་ལུགས་བརྗོད། སློབ་དཔོན་རང་གི་ལུགས་བཞག་པ་གཉིས་ལས། དང་པོ་ནི། དབང་པོའི་སྐད་དོད་ལ་ཨིནྡྲ་ཞེས་པའི་དོན་མུ་སྟེགས་བརྡ་སྤྲོད་པ་དག་བདག་གི་རྟགས་སམ། མཚན་མར་གྱུར་པས་དབང་པོ་ཞེས་ཟེར་ལ། ནང་པས་རྐྱེན་བྱིན་ཏེ། ཨིནྡྲ་ཨི་ཤྭ་ར་ཞེས་པས་དབང་ནི་དབང་ཕྱུག་དམ་པའོ་ཞེས་པར་འགྱུར་ཞིང་། དེ་ནི་ཤིན་ཏུའམ་ལྷག་པར་དབང་བྱེད་པས་དབང་པོ་སྟེ། གང་ཞིག་གང་ལ་དབང་བྱེད་ཅེ་ན། མིག་སོགས་ལྔ་པོ་རྣམས་ནི་དོན་བཞི་བཞི་ལ་དབང་བྱེད་དེ། མིག་ལོང་བ་དང་། རྣ་བ་འོན་པ་དང་། ལྕེ་མེད་པ་དང་། ལུས་ཉམས་པ་ནི་མི་མཛེས་པས་རྟེན་མཛེས་པ་དང་། མིག་དང་རྣ་བས་གཟུགས་སྒྲ་ཡ་ང་བ་སྤང་བ་དང་། སྣ་ལྕེ་ལུས་གསུམ་གྱིས་དྲི་རོ་རེག་བྱའི་ཁམ་ཟས་ལ་ལོངས་སྤྱོད་པས། དབང་པོ་རྟེན་བཅས་རྒྱས་ཤིང་ལུས་བསྲུང་བ་དང་། མཐོང་ངོ་ཞེས་པ་ལ་སོགས་པ་གཞན་ལ་མེད་པའི་ཐ་སྙད་ཐུན་མོང་མ་ཡིན་པ་དང་། རང་རང་གི་རྣམ་ཤེས་མཚུངས་ལྡན་དང་བཅས་པ་བསྐྱེད་པ་ལ་དབང་བྱེད་དོ། །ཕོ་མོ་སྲོག་ཡིད་བཞི་པོ་རྣམས་དོན་གཉིས་གཉིས་ལ་དབང་བྱེད་དེ། ཕོ་མོས་ནི་འདི་ནི་ཕོ་དང་མོའི་ཞེས་བྱེ་བྲག་དང་། ཕོ་ནི་ཁ་དོག་དཀར་བ་དང་། ནུ་མ་ཆུང་བ་དང་། ང་རོ་གསང་མཐོ་བ་སོགས་ཡིན་ལ། མོ་ནི་དེ་ལས་བཟློག་པ་ཡིན་པས་ཁྱད་པར་ལ་དབང་བྱེད་ཅིང་། སྲོག་ནི་ཉིང་མཚམས་སྦྱོར་བ་དང་། རིས་མཐུན་གནས་པ་ལ་དབང་བྱེད། ཡིད་ནི་ཡང་སྲིད་པར་མཚམས་སྦྱོར་བ་དང་། ཡིད་ཀྱི་རྗེས་སུ་ལུས་ངག་གི་ལས་ལ་སོགས་པ་མཐུན་པར་འཇུག་པས་དབང་པོའི་ངོ་བོ་དང་མཐུན་པར་དབང་བྱེད་དོ། །ལྔ་དང་བརྒྱད་པོ་དེ་རྣམས་ནི། །ཀུན་ནས་ཉོན་མོངས་རྣམ་བྱང་ལ། །ཞེས་པ་ནི་གོ་བར་ཟད་དོ། །གཉིས་པ་ནི། །ལོ་ཞེས་པ་ནི་སློབ་དཔོན་དེ་དག་ལ་མ་རངས་པ་སྟེ། ལྔ་བཞི་ལ་དབང་བྱེད་པ་མིན་ཏེ། རྟེན་མཛེས་པ་ནི་དབང་རྟེན་གྱིས་བྱེད་ལ་ལུས་བསྲུང་བ་དང་། ཐ་སྙད་ཐུན་མོང་མ་ཡིན་པ་ཡུལ་འཛིན་པ་ལ་ལྟོས་པས་རྣམ་ཤེས་ཁོ་ནས་བྱེད་པའི་ཕྱིར་རོ། །ཐ་མ་གཅིག་པུ་འཐད་ཅིང་། བསྐལ་པ་དང་པོའི་མི་དང་གཟུགས་ཀྱི་ལྷ་ཡང་ཕོ་མོ་མིན་པས་སེམས་ཅན་གྱི་བྱེ་བྲག་ཕོ་མོའི་དབང་པོས་བྱས་པ་མིན་གྱི་ཁྱད་པར་ཁོ་ནས་བྱས་པ་ཡིན་ལ། སྲོག་ཀྱང་ཉིང་མཚམས་སྦྱོར་བ་མ་ཡིན་ཞིང་། ཡིད་ཀྱི་གཉིས་ནི་སྐྱོན་མེད་ཡིན་ནོ་ཞེས་སུན་ཕྱུངས་ནས་རང་ལུགས་མདོ་སྡེ་པ་ལྟར་བཞེད་དེ། རང་གི་དོན་དང་ཐམས་ཅད་ལ། །ཞེས་སོགས་ཀྱི་གཞུང་གིས་སྟོན་ཏོ། །སེམས་ཀྱི་རྟེན་དང་དེའི་བྱེ་བྲག །ཞེས་པའི་སྐབས་སུ་དབང་པོའི་གྲངས་ངེས་ལ། གྲངས་གཞན་འགོག་པ་དང་། གྲངས་ངེས་སྒྲུབ་པ་གཉིས་ལས་དང་པོ་ནི། སྤྱིར་དབང་བྱེད་པས་དབང་པོ་ཡིན་ན། ཉུང་བར་སྨྲས་པ་སྟེ། གྲངས་ཅན་པ་དག་དབང་པོ་བཅུ་གཅིག་འདོད་པས། ངག་དང་། ལག་པ་དང་། རྐང་པ་དང་། ཉེར་གནས་དང་། འདོམས་ཏེ། ལས་ཀྱི་དབང་པོ་ལྔས་རིམ་པ་ལྟར་སྨྲ་བ་དང་། ལེན་པ་དང་། འགྲོ་བ་དང་། ཟག་པ་འདོར་བ་དང་། ཀུན་དགའ་བ་ལ་དབང་བྱེད་པ་དང་། རང་གི་སྡེ་པ་ལ་གྲགས་པའི་མ་རིག་པ་ལ་སོགས་པ་ཡན་ལག་སྔ་མ་སྔ་མ་རྣམས་ཀྱིས་འདུ་བྱེད་ལ་སོགས་པའི་ཡན་ལག་ཕྱི་མ་ཕྱི་མ་ལ་དབང་བྱེད་པས་དེ་དག་ཀྱང་ཁ་བསྐང་བར་བྱ་དགོས་སོ་ཞེ་ན། དེ་ནི་མ་ཡིན་ཏེ། ངག་སྨྲ་བ་སློབ་པ་ལ་ལྟོས་པ་དང་། རྐང་ལག་མེད་པའི་སྦྲུལ་ཡང་འགྲོ་ཞིང་ལེན་པ་དང་། ཟག་པ་འདོར་བ་ཡང་རྫས་ལྕི་བ་ནམ་མཁའ་ལ་བཞག་པ་ལྟར་རང་གི་ངང་གིས་སམ། རླུང་གིས་ཀྱང་འབྱུང་བར་བྱེད་པ་དང་། ཀུན་དགའ་བ་ཡང་ཕོ་མོའི་དབང་པོས་བྱེད་པ་མ་ཡིན་པས་དེ་དག་ལྷག་པར་དབང་བྱེད་པར་མི་གྲུབ་པའི་ཕྱིར་རོ། །ཅུང་ཟད་དབང་བྱེད་པ་ཙམ་གྱིས་དབང་པོར་འཇོག་ན། ལྐོག་མ་དང་། སོ་དང་། མིག་གི་ལམ་དང་། ཚིགས་རྣམས་ཀྱང་། མིད་པ་དང་། བཅའ་བ་དང་། འབྱེད་འཛུམ་དང་། བསྐུམ་པ་དང་བརྐྱང་བའི་བྱ་བ་དག་ལ་དབང་པོ་ཉིད་དུ་འགྱུར་ཅིང་། རྒྱུར་གྱུར་པ་ཐམས་ཅད་རང་རང་གི་བྱ་བ་ལ་དབང་པོ་ཉིད་དུ་འགྱུར་རོ། །གཉིས་པ་ནི། མདོར། སྐྱེས་བུ་ལ་ཉེ་བར་མཁོ་བའི་དབང་བསྒྱུར་བྱ་ཉི་ཤུ་རྩ་གཉིས་ཁོ་ན་ལ་དབང་བྱེད་པའི་བདག་ནི་མེད་ཀྱི། ཆོས་གང་ཞིག་གནས་སྐབས་གང་ལ་ལྷག་པར་བྱེད་པ་ལ་དགོངས་ནས་ཉི་ཤུ་རྩ་གཉིས་སུ་གྲངས་ངེས་པར་མཛད་དེ། དེ་ཡང་བྱེ་བྲག་ཏུ་སྨྲ་བས་ཀུན་ནས་ཉོན་མོངས་པ་དང་། རྣམ་པར་བྱང་བ་རྟེན་དང་བཅས་པའི་དབང་དུ་བྱས་ནས་གྲངས་ངེས་པ་ནི། སེམས་ཀྱི་རྟེན་དང་དེའི་བྱེ་བྲག །ཞེས་སོགས་ཀྱིས་བསྟན་ནོ། །མདོ་སྡེ་པས་འཁོར་བར་འཇུག་ལྡོག་གི་དབང་དུ་བྱས་ནས་གྲངས་ངེས་པ་ནི། ཡང་ན་འཇུག་པའི་རྟེན་དང་ནི། །ཞེས་སོགས་ཀྱིས་སྟོན་ཏོ། །སྲོག་ནི་རྣམ་སྨིན་ཞེས་པའི་སྐབས་སུ། དངོས་དང་། དོགས་པ་བཅད་པ་གཉིས་ལས། དང་པོ་ནི། སྲོག་ནི་མཐོ་རིས་དང་ངན་སོང་ན་དགེ་མི་དགེའི་རྣམ་སྨིན་གྱི་འབྲས་བུ་ཁོ་ནའོ། །གཉིས་པ་ནི། འོ་ན་དགྲ་བཅོམ་པ་སྐུ་ཚེ་གཏོང་འཇོག་བྱེད་པར་བཤད་པས་རྣམ་སྨིན་གྱི་འབྲས་བུ་ཡིན་ན་འདོད་དགུར་འབྱུང་བ་འགལ་ལོ་ཞེ་ན། འདི་ལ་རྣམ་སྨིན་ཁོ་ནར་འདོད་པའི་ལུགས། ཕལ་ཆེར་རྣམ་སྨིན་དུ་འདོད་པའི་ལུགས། ཞར་ལ་སྐུ་ཚེ་གཏོང་འཇོག་བཤད་པ་གསུམ་ལས། དང་པོ་ནི། ཁ་ཅིག་བསྟན་བཅོས་ལས་དགྲ་བཅོམ་པ་རབ་མཐའི་བསམ་གཏན་ལ་སྙོམས་པར་འཇུག་ཅིང་། དེ་ལས་ལངས་ཏེ་དགེ་འདུན་ནམ་གང་ཟག་ལ་འཚོ་བའི་ཡོ་བྱད་ཕུལ་ཏེ་བདག་གི་ལོངས་སྤྱོད་ཀྱི་རྣམ་སྨིན་དེ་ཚེའི་རྣམ་སྨིན་དུ་གྱུར་ཅིག་ཅེས་སྨོན་ཞིང་ངག་ཏུ་ཡང་སྨྲས་པས་ཚེ་རིང་བར་འགྱུར་རོ་ཞེས་གསུངས་པས། དེ་ཉིད་མཐོང་ཆོས་ཀྱི་ལས་འཕེན་རྫོགས་གཉིས་ཀ་ཡིན་པའམ། བདེན་པ་མཐོང་ལ་འཕེན་བྱེད་མེད་པ་ལྟར་ན། རྫོགས་བྱེད་ཀྱི་རྣམ་སྨིན་དེ་མཐོང་ཆོས་ཀྱི་ལས་ཀྱི་རྣམ་སྨིན་དུ་དངོས་སུ་ཁས་ལེན་དགོས་སོ། །ཁ་ཅིག་དགྲ་བཅོམ་པ་ཐམས་ཅད་ལ་ཚེ་སྲིང་དུ་ཡོད་པ་མ་ཡིན་གྱི་སྔོན་ཚེ་ལོ་བརྒྱ་ཐུབ་པར་འཕངས་པ་ལས་རྐྱེན་གྱིས་དུས་མིན་པར་བྲིད་ནས་ཚེ་ལྷག་ལུས་པ་འགའ་ཞིག་དེས་མཐོང་སྟེ། སྔར་གྱི་སྦྱོར་བས་འདིར་འདྲེན་པར་འདོད་དེ། འདིས་མཐོང་ཆོས་ཀྱི་འབྲས་བུ་རྣམ་སྨིན་གྱི་རྒྱུས་འབྲས་བུ་བསྐྱེད་པ་དང་འདྲ་བས་རྣམ་སྨིན་དུ་བཏགས་པ་ཙམ་དུ་ཁས་བླངས་དགོས་སོ། །གཉིས་པ་ནི། བཙུན་པ་དབྱངས་སྒྲོག་ན་རེ། ཚེ་བསྲིང་བ་ལུས་དེ་ཉིད་ལ་རབ་མཐའི་བསམ་གཏན་གྱི་སྟོབས་ཀྱིས་བསམ་གཏན་བཞི་པའི་འབྱུང་བ་ཚེ་དང་མཐུན་པ་དག་བསྐྱེད་ནས། ལས་ལས་བྱུང་བའི་དབང་པོའི་འབྱུང་བ་དང་སྡོམ་ནས་ཚེ་བསྲིང་ལ། གཏོང་བ་ན་ཚེ་དང་འགལ་བའི་འབྱུང་བ་དག་བསྐྱེད་དེ། དེས་ན་དེ་ཉིད་ལས་ཀྱི་འཕེན་པ་ཟད་ནས་ཏིང་ངེ་འཛིན་གྱི་མཐུས་འཕེན་པས་རྣམ་སྨིན་མ་ཡིན་ཡང་སྲོག་ནི་རྣམ་སྨིན་ཞེས་པ་ཕལ་ཆེ་བ་ལ་དགོངས་སོ་ཞེས་པ། བཙུན་པ་གོ་ཆ་མཐའ་ཡས་ན་རེ། དེ་བཞི་སྐྱོན་དང་བཅས་པ་ཡིན་ཏེ། དང་པོ་ནི། ཚེ་རྫོགས་བྱེད་ཀྱི་འབྲས་བུར་འདོད་ན། སྤྱིར་སྲོག་འཕན་བྱེད་ཀྱི་འབྲས་བུར་བྱེད་པ་དང་འགལ་ཞིང་། གཉིས་པ་ནི། སྔོན་གྱི་ཚེ་ལྷག་འདིར་འབྱུང་བས་མཐོང་ཆོས་ལ་མྱོང་བ་ལ་སོགས་པའི་ངེས་པ་མེད་པར་འགྱུར་ལ། གསུམ་པ་ནི། གཟུགས་ཀྱི་འབྱུང་བས་གནས་ན་དེ་ལ་འདོད་པའི་ཚེ་དང་འགལ་བ་མི་སྲིད་པས་གཏན་དུ་གནས་པར་འགྱུར་ཞིང་། བཞི་པ་ནི། ལས་ཀྱི་འཕེན་པ་ཟད་པས་ཤི་འཕོས་པར་འགྱུར་རོ་ཞེས་སོ། །གསུམ་པ་ལ་དྲུག་སྟེ། རྟེན་གང་ལ། གང་ཟག་གང་གིས། ཚུལ་ཇི་ལྟར། དགོས་པ་གང་གི་ཕྱིར་གཏོང་འཇོག་བྱེད་པ། སྲོག་དང་ཚེའི་ཁྱད་པར། བྱེ་བྲག་ཏུ་སྟོན་པའི་སྐུ་ཚེ་གཏོང་འཇོག་བྱས་པའི་དགོས་པའོ། །དང་པོ་ནི། བློ་གསལ་བས་གླིང་གསུམ་གྱི་ཕོ་མོའི་རྟེན་ཅན་ནོ། །གཉིས་པ་ནི། དགྲ་བཅོམ་པ་རབ་མཐའི་བསམ་གཏན་ཐོབ་པ། དུས་དང་མི་སྦྱོར་བ་གཉིས་ཀའི་ཆ་ལས་རྣམ་པར་གྲོལ་བ་སྟེ། ཉོན་མོངས་མེད་ཅིང་དབང་པོ་རྣོ་བས་ཏིང་ངེ་འཛིན་ལ་དབང་འབྱོར་བའི་ཕྱིར་རོ། །གསུམ་པ་ནི། འཇོག་ཚུལ་ནི་བསམ་གཏན་ལ་འཇུག་ཅིང་ཡོ་བྱད་ཕུལ་ནས་བདག་གི་ལོངས་སྤྱོད་ཀྱིས་འབྲས་བུ་ཚེར་གྱུར་ཅིག་ཅེས་དང་། གཏོང་ཚུལ་ནི། བསམ་གཏན་ལ་འཇུག་ཅིང་ཡོ་བྱད་ཕུལ་ནས་བདག་གི་ཚེའི་རྣམ་སྨིན་ལོངས་སྤྱོད་དུ་གྱུར་ཅིག་ཅེས་སྨོན་ལམ་འདེབས་པའོ། །བཞི་པ་ནི། གཞན་ལ་ཕན་པའམ་བསྟན་པ་བསྲུང་ཞིང་གནས་པའི་དོན་དུ་ཚེ་བསྲིང་ལ་གསོན་ཡང་དོན་གཉིས་མ་མཐོང་བ་དང་འཁོར་བས་སྐྱོ་བས་གཏོང་སྟེ། ཚངས་སྤྱོད་འདི་ལ་ལེགས་སྤྱད་ཅིང་། །ལམ་ལའང་ཤིན་ཏུ་བསྒོམ་ན་ནི། །ཚེ་ཟད་པ་ལ་དགའ་འགྱུར་ཏེ། །དཔེར་ན་ནད་དང་བྲལ་བ་བཞིན། །ཅེས་སོ། །ལྔ་པ་ནི། མདོར། སྲོག་གི་འདུ་བྱེད་བྱིན་གྱིས་བརླབས་ནས་ཚེའི་འདུ་བྱེད་གཏང་ངོ་ཞེས་པའི་ཁྱད་པར་ཅི་ཡིན་ཞེ་ན། བྱེ་བྲག་ཏུ་སྨྲ་བ་ན་རེ། ཁྱད་པར་མེད་དེ། གདགས་པ་ལས། སྲོག་གང་ཞེ་ན་ཁམས་གསུམ་པའི་ཚེའོ་ཞེས་གསུངས་པས་སོ། །མདོ་སྡེ་པ་ནི། སྔོན་གྱི་ལས་ཀྱི་འབྲས་བུ་ཚེ་དང་། ད་ལྟར་གྱི་ལས་ཀྱི་འབྲས་བུ་སྲོག་ཡིན་ལ། འདུ་བྱེད་ཅེས་པ་ནི་མུ་སྟེགས་པ་ལྟར། སྲོག་རྟག་པ་གཅིག་པུར་མེད་པའམ། མི་ལྡན་པའི་འདུ་བྱེད་ཀྱི་རྫས་མེད་ཀྱི་ཕུང་པོའི་རྒྱུན་གནས་པ་ཙམ་དུ་སྟོན་པའོ་ཞེས་འདོད་དོ། །དྲུག་པ་ནི། སྐུ་ཚེ་ལ་མངའ་བརྙེས་པར་བསྟན་པའི་ཕྱིར་ཏེ། དེ་ཡང་ངས་རྫུ་འཕྲུལ་གྱི་རྐང་པ་བཞི་བསྒོམས་པས་བསྐལ་པའམ་དེ་ལས་ལྷག་པར་བཞུགས་པར་ནུས་སོ་ཞེས་པའི་དམ་བཅའ་སྒྲུབ་པ་དང་། ཀུན་ཏུ་རྒྱུ་རབ་བཟངས་འདུལ་བའི་ཕྱིར། ཟླ་བ་གསུམ་བྱིན་གྱིས་བརླབས་ལ་དེ་ཕྱིན་ཆད་གདུལ་བྱའི་དོན་མེད་པའི་ཕྱིར་གཏང་ངོ་ཞེས་སློབ་དཔོན་བཞེད་དོ། །བྱེ་བྲག་ཏུ་སྨྲ་བ་ནི། བདུད་བཞི་ལས་རྒྱལ་བར་བསྟན་པའི་ཕྱིར་ཏེ། བྱང་ཆུབ་ཀྱི་ཤིང་དྲུང་དུ་ཐུན་དང་པོ་ལ་ལྷའི་བུ་དང་། ཐུན་གཉིས་པ་ལ་ལྷའི་སྤྱན་གྱིས་འཇིག་རྟེན་ལ་གཟིགས་ཤིང་། གསུམ་པ་ལ་ཉོན་མོངས་པ་དང་། ཡངས་པ་ཅན་དུ་སྲོག་གི་འདུ་བྱེད་བྱིན་གྱིས་བརླབས་པས་འཆི་བདག་དང་། སྐུ་ཤའི་གྲོང་བརྒྱད་ཀྱི་ཉེ་འཁོར་དུ་ཚེའི་འདུ་བྱེད་གཏོང་བས་ཕུང་པོའི་བདུད་ལས་རྒྱལ་ལོ་ཞེས་འདོད་དོ། །སེམས་བྱུང་རྣམ་ལྔ་སྟེ་ཞེས་པའི་སྐབས་སུ་སྤྱིའི་དོན་བརྒྱད་དེ། སེམས་བྱུང་སྤྱིའི་མཚན་ཉིད། ནང་གསེས་ཀྱི་རབ་ཏུ་དབྱེ་བ། རྫས་དང་བཏགས་པའི་ཁྱད་པར། གཙོ་འཁོར་གྱི་ཁྱད་པར། ཁམས་དང་སའི་ཁྱད་པར། རྣམ་ཤེས་གང་གི་འཁོར་དུ་འབྱུང་བ། སྡེ་ཚན་གྱི་གོ་རིམ། སྤྱིའི་སྒྲ་དོན་ནོ། །དང་པོ་ནི། སེམས་དང་མཚུངས་པ་རྣམ་པ་ལྔས་མཚུངས་པར་ལྡན་པ་སྟེ། དེ་གཉིས་རྟེན་གཅིག་ལ་བརྟེན་པས་རྟེན་མཚུངས་པ་དང་། ཡུལ་གཅིག་ལ་དམིགས་པས་དམིགས་པ་མཚུངས་པ་དང་། ཡུལ་དེའི་འཛིན་སྟངས་གཅིག་པ་ཅན་ཡིན་པས་རྣམ་པ་མཚུངས་པ་དང་། སྐྱེ་གནས་འཇིག་གསུམ་དུས་གཅིག་ལ་བྱེད་པས་དུས་མཚུངས་པ་དང་། རྣམ་ཤེས་རྫས་རེ་རེ་བ་ཡིན་པ་ལྟར། སེམས་བྱུང་ཚོར་བ་ལ་སོགས་པའང་རྫས་རེ་རེ་བ་ཡིན་པས་རྫས་མཚུངས་པ་སྟེ། འདི་ནི་སེམས་སེམས་བྱུང་རྫས་ཐ་དད་དུ་འདོད་པའི་ལུགས་སོ། །རྫས་གཅིག་པ་ལྟར་ན། དང་པོ་བཞི་གཅིག་པ་ལ་འཆད་པ་ལྟར་འདིའང་གཅིག་པ་ལ་འཆད་དེ་འཆད་ཚུལ་འགལ་བ་མེད་པའོ། །གཉིས་པ་ནི། མངོན་པ་གོང་མར་སེམས་བྱུང་ལྔ་བཅུ་རྩ་གཅིག་གསུངས་པ་ལས་འདིར་གྲངས་ཀྱི་དབྱེ་བ་བསྡུ་བའི་ཚུལ་བཤད་ན་རྫས་ཡོད་བཞི་བཅུ་ཞེ་དྲུག བཏགས་ཡོད་ལྔ། དེའི་སྟེང་དུ་གཞི་ཕྲན་ཚེགས་ཀྱི་ཉེར་བཞི་རྣམས་ལས། དང་པོ་ལ་ངེས་པའི་སྡེ་ཚན་དང་། མ་ངེས་པའི་སྡེ་ཚན་གཉིས། དང་པོ་ལ་སྡེ་ཚན་ལྔ་ལས། ཀུན་འགྲོ་ལྔ་དང་། ཡུལ་ངེས་ལྔ་ནི། འདིར་སེམས་ཀྱི་ས་མང་པོ་པ་ཞེས་བཞག་སྟེ། ཚོགས་དྲུག ཟག་བཅས། ཟག་མེད། ཁམས་གསུམ་ཆར་གྱི་སེམས་བྱུང་ཐམས་ཅད་ལ་འབྱུང་བས་སོ། །དགེ་བ་བཅུ་གཅིག་གི་གཏི་མུག་མེད་པ་མ་གཏོགས་གཞན་བཅུ་པོ་དགེ་བའི་ས་མང་པོ་པར་བཞག་སྟེ། ཚོགས་དྲུག་ཟག་བཅས། ཟག་མེད། ཁམས་གསུམ་གྱི་དགེ་བའི་སེམས་ཐམས་ཅད་ལ་འབྱུང་བས་སོ། །རྩ་ཉོན་གྱི་ནང་ནས་མ་རིག་པ་དང་། ཉེ་ཉོན་བཅུ་ཚན་འོག་མའི་ནང་ནས་བག་མེད་སོགས་ལྔ་སྟེ་དྲུག་ནི་ཉོན་མོངས་པའི་ས་མང་པོ་པར་བཞག་སྟེ། ཚོགས་དྲུག་དང་ཁམས་གསུམ་གྱི་ཉོན་མོངས་ཅན་གྱི་སེམས་ཐམས་ཅད་ལ་འབྱུང་བས་སོ། །ཉེ་ཉོན་བཅུ་ཚན་འོག་མའི་ནང་ནས་ངོ་ཚ་མེད་པ་དང་ཁྲེལ་མེད་པ་གཉིས་ནི་མི་དགེ་བའི་ས་མང་པོ་པར་བཞག་སྟེ། ཚོགས་དྲུག་གི་མི་དགེ་བའི་སེམས་ཐམས་ཅད་ལ་བྱུང་བས་སོ། །ཁྲོ་བ་སོགས་ཉེ་ཉོན་བཅུ་ཚན་དང་པོ་ནི། ཉོན་མོངས་ཆུང་ངུའི་ས་པར་བཞག་སྟེ། ཆགས་སྡང་སོགས་ལྔ་དང་རྣམ་པ་འགལ་བས་མ་རིག་པ་ཙམ་དང་མཚུངས་པར་ལྡན་པ་དང་། བདེན་པ་ལ་ལོག་པར་མི་རྟོག་པས་བསྒོམ་སྤང་གི་སེམས་དང་མཚུངས་པར་ལྡན་པ་དང་། སྒྲ་དོན་འདྲེས་འཛིན་གྱི་རྟོག་པ་ཡིན་པས་ཡིད་ཙམ་དང་མཚུངས་པར་ལྡན་པའི་ཕྱིར་རོ། །མ་ངེས་པའི་སྡེ་ཚན་ནི། གཞན་འགྱུར་བཞི་དང་། མ་རིག་པ་དང་ལྟ་བ་མ་གཏོགས་པའི་རྩ་ཉོན་གཞན་བཞི་ལ་བཞག་སྟེ། སྔར་གྱི་སྡེ་ཚན་གང་དུ་ཡང་མཐའ་གཅིག་ཏུ་མ་ངེས་པའི་ཕྱིར་རོ། །དེའི་སྡོམ་ཚིག་ནི་དབྱིག་བཤེས་ཀྱིས། རྟོག་དང་དཔྱོད་དང་འགྱོད་པ་དང་། །གཉིད་དང་ཁོང་ཁྲོ་ཆགས་རྣམས་དང་། །ཡིད་དང་ཐེ་ཚོམ་ཅེས་བྱ་བ། །བརྒྱད་ནི་ངེས་པ་མིན་པར་བཤད། །ཅེས་གསུངས་སོ། །དེ་ལ་ཡིད་ཅེས་པ་ནི། ཡིད་ལ་མ་ན་ཞེས་ཐུང་བ་དང་། ང་རྒྱལ་ལ་མཱ་ན་ཞེས་རིང་བར་ཡོད་པ་ལོ་ཙཱ་བས་སྒྲ་ནོར་བ་སྟེ། དོན་ང་རྒྱལ་ཡིན་ཞེས་མཆིམས་ཀྱིས་བཞེད་དོ། །རྒྱལ་པོའི་སྲས་ཀྱིས་ལྟ་བ་ཡང་མ་ངེས་པ་ཡིན་པས་སྡོམ་ཚིག་དེ་རྣ་བར་མི་འོང་ཞེས་འཆད་ཀྱང་། མཁས་པ་སྔ་མ་དག ལྟ་བ་རྫས་ཡོད་མ་ཡིན་པས་སྐྱོན་མེད་ཅེས་གསུངས་པ་ལེགས་སོ། །གཉིས་པ་བཏགས་ཡོད་ནི། དགེ་བ་བཅུ་གཅིག་གི་ནང་ནས་གཏི་མུག་མེད་པ་དང་། རྩ་ཉོན་གྱི་ནང་ནས་ལྟ་བ་དང་། ཉེ་ཉོན་བཅུ་ཚན་འོག་མའི་ནང་ནས་ཤེས་བཞིན་མ་ཡིན་པ་གསུམ་ནི། ཤེས་རབ་ཉོན་མོངས་ཅན་ཡིན་པས་ཤེས་རབ་ལ་བཏགས། བརྗེད་ངས་ནི་དྲན་པ་ཉོན་མོངས་ཅན་དང་། རྣམ་གཡེང་ནི་ཏིང་ངེ་འཛིན་ཉོན་མོངས་ཅན་ཡིན་པས་དེ་དག་ལ་བཏགས་པའོ། །གཞི་ཕྲན་ཚེགས་ཀྱི་ཉི་ཤུ་རྩ་བཞི་ནི། མི་དགའ་བ་དང་གླལ་བྱེད་པ་དང་། སེམས་ཞུམ་པ་ཉིད་དང་། རྨྱ་བ་དང་། ཟས་ཀྱི་དྲོད་མི་ཟིན་པ་ཉིད་དང་། ཐ་དད་པ་ཉིད་འདུ་ཤེས་དང་། ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རུ་རྡུག་དང་། འཕྱ་སྨོད་དང་། བསྣམ་པ་ཉིད་དང་། མི་བསྣམ་པ་ཉིད་དང་། རང་བཞིན་དུ་མི་འདུག་པ་ཉིད་དང་། འདོད་པའི་དང་། འཚེ་བའི་དང་། ཉེ་དུའི་དང་། ཡུལ་མིའི་དང་། མི་འཆི་བའི་དང་། བརྙས་པ་དང་ལྡན་པའི་དང་། རིགས་སྙེམས་པ་དང་ལྡན་པའི་རྣམ་པར་རྟོགས་པ་དང་། མྱ་ངན་དང་། སྡུག་བསྔལ་དང་། ཡིད་མི་བདེ་བ་དང་། འཁྲུག་པ་རྣམས་ཏེ། མཆིམས་ཀྱིས་འདི་དག་རྫས་ཡོད་ཡིན་པས་རྫས་ཡོད་བདུན་ཅུ་ཐམ་པའོ། །ཞེས་བཞེད་ཀྱང་རིགས་ལ་བརྟགས་ན་བརྟགས་ཡོད་དུ་འཐད་དོ། །གསུམ་པ་ནི། སྤྱིར་རྫས་ཡོད་ལ་རིགས་པས་དཔྱད་བཟོད་དང་། རྟག་ཅིང་བརྟན་པ་དང་། དོན་བྱེད་ནུས་པ་དང་། རང་རྐྱ་ཐུབ་པ་དང་བཞི་ལས། འདིར་ནི་རང་དབང་དུ་བློ་ཡི་ཡུལ་དུ་འགྱུར་བ་ཡིན་ནོ། །བཏགས་ཡོད་ལའང་སྒྲོ་བཏགས་པ་དང་། གནས་སྐབས་ལ་བཏགས་པ་དང་། ཆ་ལ་བཏགས་པ་དང་། དེ་ལས་གཞན་པ་ལ་བཏགས་པ་བཞི་ལས། འདིར་ནི་གསུམ་པ་སྟེ། གཞན་ལ་ལྟོས་ནས་བློའི་ཡུལ་དུ་འགྱུར་བའོ། །མཚན་གཞི་ནི་སྔར་བཤད་ཟིན་ཏོ། །བཞི་པ་ནི། དབུས་མཐར། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་པའི་དོན་བྱེ་བྲག་ཏུ་སྨྲ་བས། རང་སྟོབས་ཀྱིས་དོན་ཙམ་འཛིན་པ་ནི་སེམས་དང་། རང་སྟོབས་ཀྱིས་དོན་གྱི་ཁྱད་པར་སིམ་གདུང་ལ་སོགས་པར་འཛིན་པ་ནི་སེམས་ལས་བྱུང་བ་ཡིན་ཞེས་འདོད་དགོས་ཏེ། དཔེར་ན། སྔོ་འཛིན་མིག་གི་རྣམ་པར་ཤེས་པས་སྔོ་ཙམ་འཛིན་པ་ནི་རང་སྟོབས་ཀྱིས་ཡིན་ཅིང་། དེའི་འཁོར་གྱི་ཚོར་བ་ལ་སོགས་པས་སྔོ་ཙམ་འཛིན་པ་ནི་གཞན་སྔོ་འཛིན་མིག་གི་རྣམ་པར་ཤེས་པའི་སྟོབས་ཀྱི་ཡིན་ཏེ། རྣམ་ཤེས་གཞན་གྱི་འཁོར་དུ་བྱུང་བའི་ཚེ་དེ་འཛིན་པར་མ་ངེས་པའི་ཕྱིར་རོ། །ཡང་དེའི་འཁོར་གྱི་ཚོར་བ་བདེ་བའི་སྔོན་པོ་ཡིད་དུ་འོང་བ་འཛིན་པ་ནི་རང་སྟོབས་ཀྱིས་ཡིན་ཞིང་། སྔོ་འཛིན་མིག་གི་རྣམ་པར་ཤེས་པས་དེ་འཛིན་པ་ནི་གཞན་སྟོབས་ཀྱི་ཡིན་ཏེ་ཚོར་བ་སྡུག་བསྔལ་སོགས་དང་མཚུངས་པར་ལྡན་པའི་ཚེ་དེ་འཛིན་པར་མ་ངེས་པའི་ཕྱིར་རོ། །རིགས་པའི་རྗེས་འབྲང་གི་མདོ་སེམས་གཉིས་ཀྱིས་སེམས་སེམས་བྱུང་རྫས་གཅིག་ཏུ་འདོད་པ་ལྟར་ན་ཤེས་པ་རྫས་གཅིག་གི་སྟེང་གི་དོན་གྱི་ངོ་བོ་ཙམ་འཛིན་པའི་ཆ་གཙོ་སེམས་དང་། དོན་གྱི་ཁྱད་པར་འཛིན་པའི་ཆ་སེམས་བྱུང་དུ་འཇོག་པས་རང་སྟོབས་གཞན་སྟོབས་ཁས་ལེན་མི་དགོས་ཤིང་། དབུས་མཐའི་འགྲེལ་ཆེན་དུ་སློབ་དཔོན་བློ་བརྟན་གྱིས་སེམས་སེམས་བྱུང་རྣམ་པ་མི་མཚུངས་པར་བཤད་པ་ཡང་། ངོ་བོ་དང་ཁྱད་པར་གྱི་རྣམ་པ་མི་མཚུངས་པའི་དོན་ཡིན་པར་དཔང་ལོ་ཆེན་པོས་བཞེད་པ་ཉིད་རྩ་འགྲེལ་གཉིས་ཆར་གྱི་དགོངས་པར་མཐོང་ངོ་། །བྱེ་བྲག་ཏུ་སྨྲ་བའི་ལུགས་ལ་མཐའ་གཅིག་ཏུ་རྣམ་པ་མཚུངས་པར་འདོད་པས་རྣམ་པ་མི་མཚུངས་པའི་དོན་བཤད་མི་དགོས་པར་སེམས་སོ། །དོན་འདི་ལ་སྔོན་གྱི་མཁས་པ་རྣམས་ཀྱང་གྲུབ་མཐའི་རྣམ་དབྱེ་མ་ཕྱེད་པའི་ཅལ་ཅོལ་མང་པོ་གསུངས་པར་འདུག་གོ །ལྔ་པ་ནི། སྡེ་ཚན་དང་པོ་གསུམ་དང་། ལྔ་པའི་རྒྱགས་པ་དང་། མ་ངེས་པའི་ཆགས་པ་དང་། ང་རྒྱལ་དང་ཐེ་ཚོམ་རྣམས་ནི་ཁམས་གསུམ་ཆར་དང་། སྡེ་ཚན་བཞི་པ་དང་ལྔ་པའི་གཡོ་སྒྱུ་རྒྱགས་པ་གསུམ་མ་གཏོགས་པའི་བདུན་དང་། མ་ངེས་པའི་གཉིད་འགྱོད། ཁོང་ཁྲོ་རྣམས་ནི་འདོད་པ་ཁོ་ན་དང་། ལྔ་པའི་གཡོ་སྒྱུ་དང་། མ་ངེས་པའི་རྟོག་དཔྱོད་ནི་འདོད་པ་དང་། བསམ་གཏན་དང་པོ་ཁོ་ནར་ཡོད་དོ། །དྲུག་པ་ནི། སྡེ་ཚན་དང་པོ་བཞི་དང་། མ་ངེས་པའི་རྟོག་དཔྱོད་ཆགས་སྡང་རྣམས་ནི་རྣམ་ཤེས་དྲུག་ཆར་དང་། གཞན་རྣམས་ནི་ཡིད་ཤེས་ཁོ་ནའི་འཁོར་དུ་འབྱུང་ངོ་། །བདུན་པ་ནི། སྡེ་ཚན་དང་པོ་སེམས་ཐམས་ཅད་ལ་འབྱུང་བས་ཁྱབ་ཆེ་བས་ན་དང་པོར་བསྟན། གཉིས་པ་ནི། གཞན་རྣམས་ལ་ལྟོས་ནས་མཆོད་པར་འོས་པས་ན་གཉིས་པར་བསྟན། གསུམ་པ་ནི། ཉོན་མོངས་ཅན་ཐམས་ཅད་ལ་འབྱུང་བས་འོག་མ་གཉིས་ལས་ཁྱབ་ཆེ་བས་ན་གསུམ་པར་བསྟན། བཞི་པ་ནི་མི་དགེ་བ་ཐམས་ཅད་ལ་འབྱུང་སྟེ་ཐ་མ་བས་ཁྱབ་ཆེ་བས་ན་བཞི་པར་བསྟན། ལྔ་པ་ནི་གོང་མ་ཐམས་ཅད་ལས་ཁྱབ་ཆུང་བས་ན་ཐ་མར་བསྟན་ནོ། །བརྒྱད་པ་ནི། སེམས་ལ་བསྟན་ནས་སྐད་ཅིག་རེ་རེ་ཞིང་འཕྲལ་འཕྲལ་དུ་འབྱུང་བས་ན་སེམས་ལས་བྱུང་བའོ། །འོ་ན་སེམས་དང་དུས་མཉམ་ཡིན་ནམ་སྙམ་ན་འདིར་མཚུངས་ལྡན་གྱི་རྒྱུ་འབྲས་ཞེས་དུས་མཉམ་པའི་རྒྱུ་འབྲས་སུ་འདོད་པས་སྐྱོན་མེད་དོ། །དེས་ན་སེམས་སེམས་བྱུང་རྫས་ཐ་དད་པ་ལྟར་ན་སེམས་བྱུང་ལ་རྒྱུན་མེད་པར་འདོད་ཅིང་། རྫས་གཅིག་པ་ལྟར་ན། རྒྱུན་ཡོད་མེད་ཀྱི་ཁྱར་པར་མི་བཞེད་དོ། །འདི་དག་ནི་གཞུང་ལུགས་འདིའི་ལུགས་ཀྱི་སེམས་སེམས་བྱུང་གི་འཇོག་ཚུལ་ཐུན་མོང་མ་ཡིན་པ་ཡིན་ལ། མངོན་པ་གོང་མའི་ལུགས་ནི་གཞན་དུ་རྒྱ་ཆེར་བཤད་ཟིན་པས་དེར་བལྟ་བར་བྱའོ།། །།མི་ལྡན་པ་ཡི་འདུ་བྱེད་རྣམས། །ཞེས་པའི་སྐབས་སུ། མི་ལྡན་པའི་འདུ་བྱེད་ཀྱི་མཚན་ཉིད། དབྱེ་བ། རྫས་སུ་གྲུབ་པའི་སྒྲུབ་བྱེད་དང་གསུམ་ལས། དང་པོ་ནི། སེམས་དང་ལྡན་པ་མིན་པའི་འདུ་བྱེད་ཅེས་ཏེ། ལྡན་པ་མིན་པ་ཅེས་པས་མཚུངས་ལྡན་དང་། འདུ་བྱེད་ཅེས་པས་ཕུང་པོ་གཞན་བཞི་དང་འདུས་མ་བྱས་བསལ་ལོ། །གཉིས་པ་དབྱེ་བ་ནི། འདིར་བཅུ་བཞི་དང་། མངོན་པ་གོང་མར་ཉེར་གསུམ་གསུངས་ལ། ཡང་ཞེས་པའི་སྒྲས་མངོན་པ་གོང་མར་གསུངས་པའི་ཆ་མཐུན་དགུ་དང་། དབུ་མ་རྩ་བར། ཇི་ལྟར་དཔངས་རྒྱ་དེ་བཞིན་ཆུད། །མི་ཟ་ལས་ནི་བུ་ལོན་བཞིན། །ཞེས་དང་། ལས་གྲུབ་པའི་རབ་ཏུ་བྱེད་པ་ལས། མང་པོས་བཀུར་བའི་སྡེ་པ་ཆུད་མི་ཟ་བའི་ཆོས་ཀྱིས་འབྲས་བུ་འབྱིན་པར་འདོད་ཅེས་བཤད་པའི་ཆུད་མི་ཟ་དང་། དགེ་འདུན་གྱིས་དབྱེན་ལ་སོགས་པ་སྡུད་དོ། །གསུམ་པ་རྫས་སུ་གྲུབ་པའི་སྒྲུབ་བྱེད་ནི། སྤྱིར་དབྱེ་གཞི་ལྔ་ཆར་རྫས་སུ་གྲུབ་པས་ལྡན་པ་མ་ཡིན་པའི་འདུ་བྱེད་ཀྱི་གཞི་ཡང་རྫས་སུ་ཡོད་དགོས་ཤིང་། སོ་སོར་ཕྱེ་ན་ཐོབ་པ་རྫས་སུ་ཡོད་དེ། གང་ཟག་དེ་ལ་ཆོས་དེ་ལྡན་པར་བྱེད་པའི་རྫས་མེད་ན་ཆོས་དེ་དང་བྲལ་བར་འགྱུར་བའི་ཕྱིར་དང་། མ་ཐོབ་པ་རྫས་སུ་ཡོད་དེ། གང་ཟག་དེ་ལ་བྲལ་བྱའི་ཆོས་དེ་མི་ལྡན་པར་བྱེད་པའི་རྫས་མེད་ན་ཆོས་དེ་དང་ལྡན་པར་འགྱུར་བའི་ཕྱིར། ཞེས་སོགས་སོ་སོའི་བྱེད་ལས་ལ་དཔག་སྟེ་རྫས་སུ་ཡོད་པར་ཤེས་པར་བྱའོ། །ཐོབ་དང་མ་ཐོབ་ཅེས་པའི་སྐབས་སུ། ཐོབ་པ་དང་མ་ཐོབ་པའི་མཐའ་དཔྱད་པ་ལ། མཚན་ཉིད། དབྱེ་བ། དེ་ཆོས་གང་གི་ཡིན་པ། རྫས་སུ་ཡོད་པའི་སྒྲུབ་བྱེད། དེ་སུན་ཕྱུང་ནས་སློབ་དཔོན་རང་གི་ལུགས་བཞག་པ། བྱེ་བྲག་ཏུ་སྨྲ་བའི་འདོད་པ་བསྡུས་ཏེ་བསྟན་པ་དང་དྲུག་ལས། དང་པོ་ནི། ཐོབ་བྱའི་ཆོས་གང་ཟག་དེ་ལ་ལྡན་པར་བྱེད་པའི་མི་ལྡན་པའི་འདུ་བྱེད་རྫས་གྲུབ་པ་དང་། ཐོབ་བྱའི་ཆོས་དེ་ལྡན་པའི་གེགས་སུ་གྱུར་པའི་མི་ལྡན་པའི་འདུ་བྱེད་རྫས་གྲུབ་པ་རིམ་པ་བཞིན་ནོ། །གཉིས་པ་ནི། ཐོབ་པ་ལ་དབྱེ་ན་ལྔ་སྟེ། ཟག་མེད་སྐད་ཅིག་དང་པོའི་ཐོབ་པ་ལྟ་བུ་གཏན་མ་རྙེད་པ་ལས་གསར་དུ་རྙེད་པ་དང་། བསམ་གཏན་གྱི་སྡོམ་པའི་ཐོབ་པ་ལྟ་བུ་སྔོན་ཐོབ་པ་ཉམས་ནས་སླར་ཐོབ་པ་སྐད་ཅིག་དང་པོ་ནི་རྣམ་པ་ཉམས་པ་ལས་གསར་དུ་རྙེད་པ་སྟེ་གཉིས་དང་། དེ་གཉིས་ཀྱི་སྐད་ཅིག་གཉིས་པ་ཕན་ཆད་རྒྱུན་ལྡན་པ་གཉིས་དང་། སོ་སྐྱེ་ལ་སྲིད་རྩེའི་ཉོན་མོངས་ལྟ་བུ་ཡེ་ནས་ལྡན་པ་རྣམས་སོ། །མ་ཐོབ་པ་ལ་དབྱེ་ན་གསུམ་སྟེ། སྐད་ཅིག་མ་བཅུ་དྲུག་པའི་ཚེ་དང་པོའི་མ་ཐོབ་པ་ལྟ་བུ་རྣམ་པར་ཉམས་པའི་མ་རྙེད་པ་དང་། དེ་ཕྱིན་ཆད་དེའི་རྒྱུན་མི་ལྡན་པ་དང་། སོ་སོ་སྐྱེ་བོ་ལ་ཟག་མེད་ཀྱི་ལམ་ལྟ་བུ་ཡེ་ནས་མི་ལྡན་པ་རྣམས་སོ། །གསུམ་པ་ནི། ཐོབ་པ་དང་མ་ཐོབ་པ་འདི་དག་ཆོས་གང་གི་ཡིན་ཞེ་ན། རང་རྒྱུད་དུ་གཏོགས་པའི་ཆོས་རྣམས་ཀྱི་ཡིན་ཏེ། རྒྱུ་དང་མ་འབྲེལ་བའི་བུམ་སྣམ་ལྟ་བུ་ཡིན་ན། གཞན་དང་ཐུན་མོང་བ་སྲིད་པའི་ཕྱིར་དང་། རྒྱུད་དང་འབྲེལ་ཡང་གཞན་རྒྱུད་ཀྱི་ཐོབ་པ་འབྱུང་ན། དགྲ་བཅོམ་པ་ལ་བྱིས་པའི་ཉོན་མོངས་དང་། བྱིས་པ་ལས་ཡང་འཕགས་པའི་ལམ་གྱི་ཐོབ་པ་འབྱུང་བར་འགྱུར་བས་འབད་པ་དོན་མེད་པ་དང་། མ་འབད་ཀྱང་གྲོལ་བར་འགྱུར་བའི་ཕྱིར་རོ། །དམིགས་ཀྱིས་བསལ་བ་ནི་འགོག་པ་གཉིས་རྒྱུད་དང་མ་འབྲེལ་ཡང་དགག་བྱ་རྒྱུད་དང་འབྲེལ་བས་དེ་བཀག་པའི་ཐོབ་པ་དང་། མ་ཐོབ་པ་ཡོད་དེ། སོ་སོར་བརྟགས་མིན་གྱི་འགོག་པ་ནི་ཆོས་ཅི་རིགས་པའི་རྐྱེན་མ་ཚང་བ་ཡིན་པས་སེམས་ཅན་ཐམས་ཅད་ལ་ལྡན་པའི་ཕྱིར་ཏེ། བསྟན་བཅོས་ལས། ཟག་མེད་ཀྱི་ཆོས་རྣམས་དང་སུ་ཞིག་ལྡན་ཞེ་ན། སེམས་ཅན་ཐམས་ཅད་དོ་ཞེས་འབྱུང་བའི་ཕྱིར་དང་། བརྟགས་འགོག་ནི་འཆིང་བ་མཐའ་དག་དང་ལྡན་པ་ཟག་མེད་སྐད་ཅིག་དང་པོ་ལ་གནས་པ་མ་གཏོགས་པ་འཕགས་པ་ཐམས་ཅད་དང་། སོ་སོའི་སྐྱེ་བོ་ས་དང་ས་ལ་འདོད་ཆགས་དང་བྲལ་བ་ཁ་ཅིག་ཀྱང་ལྡན་པའི་ཕྱིར། ནམ་མཁའ་ལ་ནི་ཐོབ་པ་མེད་དེ། འགྲེལ་པར་ནམ་མཁའ་དང་ནི་འགའ་ཡང་ལྡན་པ་མེད་དེ་ཞེས་གསུངས་པའི་དོན་རྒྱལ་པོའི་སྲས་ཀྱིས་འདིས་འབྲེལ་པ་མེད་པའི་ཕྱིར་རོ་ཞེས་དང་། གང་སྤེལ་ལས། གང་དང་ཡང་འབྲེལ་པ་མེད་དེ། དགག་བྱ་དང་འགོག་པ་མེད་པའི་ཕྱིར་རོ་ཞེས་སོ། །གང་ལ་ཐོབ་པ་ཡོད་པ་དང་མེད་པ་ལ་མ་ཐོབ་པ་ཡང་ཡོད་པ་དང་མེད་པ་ནི་གྲུབ་པའི་མཐའོ། །བཞི་པ་ནི། ཐོབ་པ་ཞེས་བྱ་བ་རྫས་སུ་གྲུབ་པ་ཡོད་པའི་སྒྲུབ་བྱེད་གང་ཞེ་ན། ལུང་དང་རིགས་པས་ཤེས་ཏེ། ལུང་ནི་མདོར། དེ་མི་སློབ་པའི་ཆོས་བཅུ་པོ་འདི་དག་སྐྱེད་ཅིང་སོ་སོར་ཐོབ་ལ་ཀུན་ཏུ་ལྡན་པས་ན་ཡན་ལག་ལྔ་རྣམ་པར་སྤངས་པའི་འཕགས་པར་འགྱུར་རོ་ཞེས་གསུངས་པས་སོ། །རིགས་པ་ནི་ཐོབ་པ་མེད་ན་འཇིག་རྟེན་པའི་ཡིད་དང་ལྡན་པའི་འཕགས་པ་དང་། སོ་སོའི་སྐྱེ་བོ་དག་ལ་ཁྱད་པར་མེད་པར་འགྱུར་བ་ལས་ཟག་མེད་ཀྱི་ལམ་ཐོབ་པ་འཕགས་པ་དང་། མ་ཐོབ་པ་སོ་སོའི་སྐྱེ་བོར་འཇོག་པ་ཤེས་སོ། །དེའི་ཕྱིར་མ་ཐོབ་པ་ཡང་ཡོད་དེ། ཐོབ་པ་གང་ལ་ཡོད་པའི་ཆོས་དེ་ལ་མ་ཐོབ་པ་ཡང་ཡོད་པའི་ཕྱིར་ཞེས་བྱེ་བྲག་ཏུ་སྨྲ་བ་ཟེར་རོ། །ལྔ་པ་ནི། སློབ་དཔོན་གྱིས་ལུང་གི་སྒྲུབ་བྱེད་མི་འཐད་དེ། མདོ་དེར་ནི་དབང་བ་ཉིད་ལ་ལྡན་པའི་སྒྲར་གསུངས་པ་ཡིན་གྱི། གཞན་དུ་ན་སེམས་ཅན་དུ་མི་སྟོན་པའི་ནོར་བུ་སོགས་དང་། སེམས་ཅན་གཞན་རྟ་གླང་སོགས་དག་དང་ཡང་ལྡན་པའི་ཐོབ་པ་ཡོད་པར་འགྱུར་ཏེ། མདོ་ལས་དགེ་སློང་དག་འཁོར་ལོས་བསྒྱུར་བའི་རྒྱལ་པོ་ནི་རིན་པོ་ཆེ་སྣ་བདུན་དང་ལྡན་པ་ཞེས་གསུངས་པའི་ཕྱིར་རོ། །རིགས་པའི་སྒྲུབ་བྱེད་ཀྱང་མི་འཐད་དེ། འཕགས་པ་དང་བྱིས་པའི་བྱེ་བྲག་ནི་མཐོང་སྤང་གི་ཉོན་མོངས་པ་སྤངས་པ་དང་མ་སྤངས་པའི་བྱེ་བྲག་ལས་འབྱུང་བར་འོས་པའི་ཕྱིར་རོ། །གལ་ཏེ་དེ་ཡང་ཐོབ་པ་ཡོད་པ་དང་མེད་པའི་བྱེ་བྲག་ལས་འབྱུང་བ་ཡིན་ནོ་སྙམ་ན་མ་ཡིན་ཏེ། ཟག་མེད་ཀྱི་ལམ་གྱིས་ཉོན་མོངས་པའི་ས་བོན་སྤངས་པའི་འཇིག་རྟེན་པའི་ལམ་གྱིས་ས་བོན་ཉམས་པར་བྱས་པ་དེ་ནི་ཉོན་མོངས་སྤངས་པ་ཞེས་བྱ་བ་ཡིན་ལ། བཟློག་པ་ནི་མ་སྤངས་པ་ཡིན་པས། གང་མ་སྤངས་པ་དེ་དང་ནི་ལྡན། གང་སྤངས་པ་དེ་དང་ནི་མི་ལྡན་ཞེས་བྱ་བར་འོས་པའི་ཕྱིར་རོ། །གལ་ཏེ་ཆོས་རྣམས་སྐྱེ་བའི་རྒྱུ་ལ་ཐོབ་པ་ཞེས་བྱའོ་ཞེ་ན། འོ་ན་འདུས་མ་བྱས་གཉིས་པོ་རྣམས་ཀྱི་ཐོབ་པ་ཡོད་པར་མི་འགྱུར་ཏེ། དེ་དག་སྐྱེ་བའི་རྒྱུ་མེད་པའི་ཕྱིར་དང་། ཆོས་གང་དག་མ་ཐོབ་པ་རྣམས་དང་། གང་དག་ས་འཕོས་ནས་གཏོང་བ་དང་། འདོད་ཆགས་དང་བྲལ་བས་གཏོང་བ་དེ་དག་སྐྱེ་བར་མི་འགྱུར་བས་དེ་དག་གིའང་ཐོབ་པ་མེད་པར་འགྱུར་བའི་ཕྱིར་རོ། །སྒྲུབ་བྱེད་མེད་པར་མ་ཟད་གནོད་བྱེད་ཀྱང་ཡོད་དེ། གཟུགས་སྒྲ་ལ་སོགས་པ་དང་། ཆགས་སྡང་ལ་སོགས་པ་ལྟར་འདིའི་རང་གི་ངོ་བོའང་མ་ཡིན་ཞིང་། མིག་དང་རྣ་བ་ལ་སོགས་པ་ལྟར་བྱ་བའང་མི་སྣང་བའི་ཕྱིར་རོ། །དེ་ན་དབང་དང་ལྡན་པ་དང་། ས་བོན་དང་ལྡན་པ་དང་། མངོན་གྱུར་དུ་ལྡན་པ་གསུམ་ལས། དང་པོ་གཉིས་ཡོད་པ་དང་མེད་པ་ལ་ཐོབ་པ་དང་མ་ཐོབ་པའམ། ལྡན་པ་དང་མི་ལྡན་པར་གདགས་སོ་ཞེས་བཞེད་དོ། །དྲུག་པ་ནི། བྱེ་བྲག་ཏུ་སྨྲ་བ་རྣམས་ན་རེ། གཉིས་ཀ་རྫས་ཁོ་ན་ཡིན་ནོ་ཞེས་བརྗོད་དོ། །ཅིའི་ཕྱིར་ཞེ་ན། འདི་ནི་ཁོ་བོ་ཅག་གི་གྲུབ་པའི་མཐའ་ཡིན་ནོ་ཞེས་ཟེར་རོ།། །།ལམ་མ་ཐོབ་པ་སོ་སོ་ཡི། །སྐྱེ་བོར་འདོད་དོ་ཞེས་པའི་སྐབས་སུ། དྲི་མེད་ཀྱི་ཡང་ཞེས་པའི་དོན་ཟག་མེད་ཀྱི་མ་ཐོབ་པ་ཡང་ཁམས་གསུམ་དུ་གཏོགས་པར་བསྟན་པས་ཟག་མེད་ཀྱི་ཐོབ་པ་ཟག་མེད་ཡོད་པ་ལྟར། ཟག་མེད་ཀྱི་མ་ཐོབ་པ་ཟག་མེད་ཡོད་པར་ནི་མི་བཞེད་དོ། །ཅིའི་ཕྱིར་ཞེ་ན། ཟག་མེད་ཀྱི་མ་ཐོབ་པ་ནི་སོ་སོའི་སྐྱེ་བོ་ཉིད་དུ་འདོད་དེ། བསྟན་བཅོས་ལས། སོ་སོའི་སྐྱེ་བོ་ཉིད་གང་ཞེ་ན། འཕགས་པའི་ཆོས་རྣམས་ཀྱིས་མ་རྙེད་པའོ་ཞེས་འབྱུང་ཞིང་། སོ་སོའི་སྐྱེ་བོ་ནི་ཟག་མེད་དུ་མི་འོས་པའི་ཕྱིར་དང་། མ་ཐོབ་པ་ཟག་མེད་ཡོད་ན་དེ་འདུས་བྱས་སུ་གྱུར་པའི་ཟག་མེད་ཡིན་པས་ལམ་བདེན་དུ་འགྱུར་ལ། དེ་ལྟར་ན་བྱིས་པ་ལ་ཟག་མེད་ཀྱི་ཆོས་ཀྱིས་མ་ཐོབ་པ་ཡོད་པས་ལམ་མངོན་དུ་གྱུར་པ་ཁས་བླང་དགོས་པའི་ཕྱིར་རོ། །འོ་ན་ཐེག་པ་གསུམ་གྱི་ལམ་གང་མ་ཐོབ་པ་དེ་སོ་སོའི་སྐྱེ་བོ་ཉིད་ཡིན་ན། ཉན་ཐོས་ཀྱི་ཡིན་ན་ཕྱི་མ་གཉིས་དང་། རང་རྒྱལ་གྱི་ཡིན་ན་སྔ་མ་གཉིས་དང་། ཐེག་ཆེན་གྱི་ཡིན་ན་སྔ་མ་གཉིས་སོ་སོའི་སྐྱེ་བོ་ཉིད་དུ་འགྱུར་རོ་ཞེ་ན། བསྟན་བཅོས་ལས་ཁྱད་པར་མེད་པར་སྤྱིར་འབྱུང་བས་ཟག་མེད་ཀྱི་ཆོས་ཐམས་ཅད་ཀྱི་མ་ཐོབ་པ་ཡིན་ནོ། །འོ་ན་ལམ་གྱིས་མ་ཐོབ་པ་ཁོ་ན་ཞེས་པའི་སྒྲ་འདོན་དགོས་སོ་ཞེ་ན། མི་དགོས་ཏེ་དོན་གྱིས་གོ་བའི་ཕྱིར། དཔེར་ན་ཆུ་འཐུང་རླུང་ཟ་ཞེས་པ་བཞིན་ནོ། །དེས་ན་བྱེ་བྲག་ཏུ་སྨྲ་བས་སོ་སོའི་སྐྱེ་བོ་ཉིད་དམ་དེ་དང་ལྡན་པའི་གང་ཟག་ཐ་དད་དུ་བྱེད་དེ། སྔ་མ་ནི་ཕུང་པོ་རྫས་ཡོད་དང་། ཕྱི་མ་ནི་གང་ཟག་བཏགས་ཡོད་དུ་འདོད་པའི་ཕྱིར་རོ། །འོ་ན་འཕགས་པ་དང་། དེ་དང་ལྡན་པའི་གང་ཟག་ཀྱང་ཐ་དད་དུ་བྱེད་པར་འགྱུར་རོ་ཞེ་ན། དེ་ཡང་བྱེད་དེ། སྔ་མ་ནི་མཐོང་སྒོམ་མི་སློབ་ལམ་གྱིས་བསྡུས་པའི་ལམ་ཟག་མེད་དང་། ཕྱི་མ་ནི་གང་ཟག་བཏགས་ཡོད་དུ་འདོད་པའི་ཕྱིར་རོ། །མདོ་སྡེ་པ་ནི་འཕགས་ལམ་མ་སྐྱེས་པའི་རྒྱུད་ནི་སོ་སོའི་སྐྱེ་བོ་དང་། འཕགས་ལམ་སྐྱེས་པའི་རྒྱུད་ནི་འཕགས་པར་འདོད་ཀྱང་སྔ་མ་གང་ཟག་ཏུ་མི་འདོད་དེ། ལྡན་མིན་འདུ་བྱེད་དུ་འདོད་པའི་ཕྱིར་རོ། །ཅི་ཐོབ་པ་དང་མ་ཐོབ་པའི་ཐོབ་པ་དང་མ་ཐོབ་པ་ཡོད་དམ་ཞེ་ན། གཉིས་ཀའི་གཉིས་ཀ་ཡོད་དོ། །འོ་ན་ཐུག་པ་མེད་པར་འགྱུར་རོ་ཞེ་ན། ཕན་ཚུན་ལྡན་པའི་ཕྱིར་མ་ཡིན་ཏེ། ཐོབ་བྱའི་ཆོས་དང་། དེའི་ཐོབ་པ་དང་། ཐོབ་པའི་ཐོབ་པ་གསུམ་ལས། ཐོབ་པས་ཐོབ་བྱའི་ཆོས་དང་ཐོབ་པའི་ཐོབ་པ་ལྡན་པར་བྱེད། ཐོབ་པའི་ཐོབ་པས་ཐོབ་པ་ཁོ་ན་ལྡན་པར་བྱེད་པའི་ཕྱིར་རོ། །དེའི་སྐད་ཅིག་གཉིས་པ་ལ་དེ་གསུམ་གྱི་ཐོབ་པ་གསུམ་དང་། ཐོབ་པའི་ཐོབ་པ་གསུམ་སྟེ་དགུ་དང་། གསུམ་པ་ལ་དེ་དགུའི་ཐོབ་པ་དགུ་དང་། དགུ་པོ་དེའི་ཐོབ་པ་དགུ་སྟེ་ཉེར་བདུན་དང་། བཞི་པ་ལ་ཉེར་བདུན་ཕྲག་གསུམ་ལ་སོགས་པ་སྐྱེ་བར་འདོད། སློབ་དཔོན་གྱིས་ནི་སྐྱེ་བ་འདིས་ནི་ཐོབ་པ་རྣམས་ཀྱི་དགའ་སྟོན་ཞིག་སྟེ་བརྟས་ཏེ་ཐོགས་པ་མེད་པས་འདི་ལྟར་གོ་སྐབས་རྙེད་ཀྱི་དེ་ལྟ་མ་ཡིན་ན་སྲོག་ཆགས་གཉིས་པས་ནི་ནམ་མཁའ་ལ་གོ་སྐབས་རྙེད་པར་མི་འགྱུར་རོ་ཞེས་སུན་འབྱིན་པར་མཛད་དོ། །བྱེད་རྒྱུ་ལྷན་ཅིག་འབྱུང་བ་དང་། །ཞེས་པའི་སྐབས་སུ་རྒྱུ་ལ་མཚན་ཉིད། མཚན་གཞི། དབྱེ་བ། གྲངས་ངེས། དབྱེ་བ་སོ་སོའི་མཚན་ཉིད་དང་ལྔ་ལས། དང་པོ་ནི། ཆོས་གཞན་སྐྱེ་བ་ལ་གེགས་མི་བྱེད་པའི་རྫས་སོ། །གཉིས་པ་ནི། ཤེས་བྱ་གཞི་ལྔ་པོ་ཐམས་ཅད་དེ། རིགས་པས་དཔྱད་བཟོད་ཀྱིས་རྫས་ཡོད་ཐམས་ཅད་རྒྱུ་ཡིན་པའི་དབང་དུ་བྱས་པའོ། །གསུམ་པ་ནི། བྱེད་རྒྱུ་དང་། ལྷན་ཅིག་འབྱུང་བ་དང་། སྐལ་མཉམ་དང་། མཚུངས་པར་ལྡན་པ་དང་། ཀུན་འགྲོ་དང་། རྣམ་སྨིན་གྱི་རྒྱུ་སྟེ་དྲུག་གོ །དྲུག་ཏུ་འདོད་ཅེས་པ་ནི་བྱེ་བྲག་ཏུ་སྨྲ་བའི་གྲུབ་མཐའ་འཇོག་པའི་ཚེ་ཡང་དག་པར་བསྡུས་པའི་གཞི་ཉམས་པས་རྒྱུ་དྲུག་ཚང་བར་སྟོན་པའི་མདོ་ནི་ནུབ་ལ། སོ་སོར་སྟོན་པ་བསྡུས་ནས་དྲུག་ཏུ་འདོད་ཅེས་པ་སྟེ། དེ་ནི་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་པས་བྱེད་རྒྱུ་དང་། ལམ་གྱི་ཡན་ལག་གསུམ་པོ་འདི་དག་ནི་ཡང་དག་པའི་ལྟ་བའི་རྗེས་སུ་འབྲངས་ནས་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པའོ་ཞེས་པས་ལྷན་ཅིག་འབྱུང་བའི་རྒྱུ་དང་། འདིའི་དགེ་བའི་རྩ་བ་ལས་དགེ་བའི་རྩ་བ་གཞན་སྐྱེ་བར་འགྱུར་བས་ཆུང་ངུ་དང་ལྷན་ཅིག་འགྱུར་བ་ཡོད་ན་འདི་ཕྱིས་ནས་རྣམ་པར་དག་པའི་ཆོས་ཅན་དུ་འགྱུར་རོ་ཞེས་པས་སྐལ་མཉམ་གྱི་རྒྱུ་དང་། སྐྱེས་ནས་ཤེས་པ་དང་མཚུངས་པར་ལྡན་པ་འདི་ནི་མཐོང་བའི་ལམ་གྱི་གཞི་ཅན་གྱི་དད་པའོ་ཞེས་པས་མཚུངས་ལྡན་གྱི་རྒྱུ་དང་། གང་ཟག་ལོག་ལྟ་ཅན་གྱི་ལུས་ངག་ཡིད་ཀྱི་ལས་ནི་མི་འདོད་པ་དང་མི་སྡུག་པ་ལ་སོགས་པར་འགྱུར་རོ་ཞེས་པས་ཀུན་འགྲོའི་རྒྱུ་དང་། ཆེད་དུ་བསམ་པའི་ལས་བསམ་ཞིང་བསགས་པའི་རྣམ་སྨིན་ཞེས་པས་རྣམ་སྨིན་གྱི་རྒྱུ་བསྟན་པ་རྣམས་ཕྱོགས་གཅིག་ཏུ་བསྡུས་པའོ། །བཞི་པ་ནི། ཅིའི་ཕྱིར་རྒྱུ་དྲུག་ཏུ་གྲངས་ངེས་ཞེ་ན། འབྲས་བུའི་རིགས་ལ་ལྟོས་ནས་ཐུན་མོང་གི་རྒྱུ་དང་། ཐུན་མོང་མ་ཡིན་པའི་རྒྱུ་གཉིས་ལས། དང་པོ་ནི་བྱེད་རྒྱུ། གཉིས་པ་ལ་དུས་མཉམ་པའི་རྒྱུ་དང་། དུས་ཐ་དད་པའི་རྒྱུ་གཉིས་ལས། དང་པོ་ལ་སྤྱིར་ལྷན་ཅིག་འབྱུང་བ་དང་། བྱེ་བྲག་མཚུངས་པར་ལྡན་པའི་རྒྱུ་གཉིས། གཉིས་པ་ལ་འདྲ་བར་སྐྱེད་པའི་རྒྱུ་དང་། མི་འདྲ་བར་སྐྱེད་པའི་རྒྱུ་གཉིས་ལས། དང་པོ་ལ་སྤྱིར་སྐལ་མཉམ་དང་། བྱེ་བྲག་ཀུན་ཏུ་འགྲོ་བའི་རྒྱུ་གཉིས། ཕྱི་མ་ནི་རྣམ་སྨིན་གྱི་རྒྱུའོ། །ལྔ་པ་ལ་དྲུག་པོ་རེ་རེ་ཡང་མཚན་ཉིད་དང་། མཚན་གཞི་གཉིས་གཉིས་ཀྱི་སྒོ་ནས་ངེས་པར་བྱ་བ་ལས། དང་པོ་བྱེད་རྒྱུ་ལ་མཚན་ཉིད་ནི། འདུས་བྱས་ཀྱི་ཆོས་གཞན་སྐྱེ་བ་ལ་གེགས་མི་བྱེད་པའམ། བྱ་བ་བྱེད་པའི་སྒོ་ནས་རྒྱུར་བཞག་ཏུ་རུང་བ། མཚན་གཞི་ལ་བྱེད་རྒྱུ་ནུས་མེད་དང་ནུས་བཅས་གཉིས་ལས། དང་པོ་ནི། འདུས་མ་བྱས་ཀྱི་ཆོས་ཐམས་ཅད་འདུས་བྱས་ཀྱི་བྱེད་རྒྱུ་ཡིན་པ་དང་། འདུས་བྱས་ལ་ཡང་མི་སྐྱེ་བའི་ཆོས་ཅན་རྣམས་འདུས་བྱས་གཞན་རྣམས་ཀྱི་བྱེད་རྒྱུ་དང་། སྐྱེས་ཟིན་པ་ལ་ཡང་བུམ་པ་སྣམ་བུའི་བྱེད་རྒྱུ་ཡིན་པ་སོགས་སོ། །བྱེད་རྒྱུ་ནུས་བཅས་ནི་མིག་དང་གཟུགས་ལ་བརྟེན་ནས་མིག་གི་རྣམ་ཤེས་སྐྱེ་བ་སོགས་རྒྱུ་གཞན་ལྔ་པོ་ཐམས་ཅད་དོ། །གཉིས་པ་ལ་མཚན་ཉིད་ནི། རང་དང་དུས་མཉམ་པའི་འབྲས་བུ་དེ་དང་ཕན་ཚུན་རྒྱུ་འབྲས་སུ་འགྱུར་བའོ། །མཚན་གཞི་ནི་ཚོགས་པ་གཅིག་པའི་འབྱུང་བ་ལྟ་བུ་གཟུགས་ཕུང་ཕན་ཚུན་དང་། སེམས་དང་སེམས་ཀྱི་རྗེས་འཇུག་ལྟ་བུ་རྣམ་པར་ཤེས་པའི་ཕུང་པོ་དང་། ཕུང་པོ་བར་པ་གསུམ་ཕན་ཚུན་དང་། མཚན་གཞི་འདུས་བྱས་དང་། མཚན་ཉིད་སྐྱེ་སོགས་བཞི་ལྟ་བུ་ཕུང་པོ་ལྔ་ཆར་དང་། མི་ལྡན་པའི་འདུ་བྱེད་ཕན་ཚུན་རྒྱུ་འབྲས་སུ་འགྱུར་བ་གསུམ་གསུངས་སོ། །གསུམ་པ་ལ་མཚན་ཉིད་ནི། རང་གི་འབྲས་བུ་ཕྱི་མ་རང་དང་རིགས་འདྲ་བར་བསྐྱེད་པའི་རྒྱུའོ། །མཚན་གཞི་ལ་ཟག་བཅས་དང་། ཟག་མེད་གཉིས་ལས། དང་པོ་ལ་རྒྱུ་འབྲས་རིགས་འདྲ་བའི་ཚད། རྒྱུ་འབྲས་གཉིས་ཀ་ཡང་དགེ་བ་དང་། ཉོན་མོངས་པ་ཅན་དང་། མ་སྒྲིབ་པ་གསུམ་པོ་གང་རུང་དུ་འདྲ་བ་སྟེ་དེ་ཡང་ས་གཅིག་པའི་སྤང་བྱ་རིས་ལྔ་པོ་གང་རུང་དུ་འདྲ་བའོ། །དེ་ཡང་ས་བོན་གྱིས་མྱུ་གུ་བསྐྱེད་པ་དང་། རྔ་དང་དབྱུག་གུས་རྔ་སྒྲ་བསྐྱེད་པ་དང་། ཆུས་ཆུ་སྒྲ་བསྐྱེད་པ་སོགས་རྒྱུ་འབྲས་གཉིས་ཀ་འདོད་པ་ལྟ་བུའི་ས་གཅིག་གིས་བསྡུས་པའི་སྒོམ་སྤངས་སུ་རིགས་འདྲ་བས་སྐལ་མཉམ་གྱི་རྒྱུར་འགྱུར་བའོ། །འདིའི་འབྲས་བུ་རྒྱུ་མཐུན་གྱི་འབྲས་བུར་འོག་འབྲས་བུའི་སྐབས་སུ་བཤད་པས་སྒྲ་ལ་རྒྱུ་མཐུན་ལས་བྱུང་བ་ཡོད་པའི་གནད་ཀྱང་འདི་ཉིད་ཡིན་ནོ། །ཚུལ་འདི་མ་ཤེས་པར་ཊཱིཀྐ་གསར་པ་བྱེད་པ་དག་གིས་སྒྲ་ལ་རྒྱུན་མེད་པས་རྒྱུ་མཐུན་ལས་བྱུང་བ་མི་འཐད་ཅེས་རྩ་བ་སུན་འབྱིན་པར་གྲག་གོ །ཟག་མེད་ཀྱི་དབང་དུ་བྱས་པ་ནི་ས་གཅིག་པ་མི་དགོས་ཏེ། ཟག་མེད་ས་དགུ་ལ་བརྟེན་པའི་ལམ་བདེན་ནི་ཕན་ཚུན་སྐལ་མཉམ་གྱི་རྒྱུར་འགྱུར་བ་ཡོད་པའི་ཕྱིར་རོ། །འདི་ལ་ཡང་། མཐོང་ལམ་སྐད་ཅིག་དང་པོ་རང་གི་རྒྱུན་ཕྱི་མ་དང་། བསྒོམ་ལམ་དང་མི་སློབ་པའི་ལམ་གསུམ་གྱི་སྐལ་མཉམ་གྱི་རྒྱུ་ཡིན་པ་དང་། དེ་བཞིན་དུ་བསྒོམ་ལམ་གཉིས་ཀྱི་དང་། མི་སློབ་ལམ་གཅིག་གི་དང་། དེ་བཞིན་དུ་དབང་རྟུལ་གྱི་ལམ་གཉིས་ཀྱི་དང་། དབང་རྣོན་གྱི་ལམ་གཅིག་གི་དང་། དུས་སྦྱོར་དང་པོའི་ལམ་དྲུག་གི་དང་། མི་གཡོ་བའི་ཆོས་ཅན་གྱི་ལམ་གཅིག་གི་སྐལ་མཉམ་གྱི་རྒྱུ་ཡིན་པ་སོགས་མཉམ་པ་དང་ཁྱད་པར་ཅན་གྱི་ཡིན་གྱི་དམན་པའི་སྐལ་མཉམ་གྱི་རྒྱུ་ནི་མ་ཡིན་ནོ། །བཞི་པ་ལ་མཚན་ཉིད་ནི། རང་དང་དུས་མཉམ་པའི་འབྲས་བུ་དེ་དང་ཕན་ཚུན་རྒྱུ་འབྲས་སུ་འགྱུར་བ་གང་ཞིག མཚུངས་ལྡན་ཡིན་པ། མཚན་གཞི་ནི། དམིགས་པ་དང་། རྣམ་པ་དང་། རྫས་དང་དུས་མཚུངས་པ་ཙམ་མཚུངས་ལྡན་གྱི་རྒྱུར་འཇོག་ན་གང་ཟག་ཕན་ཚུན་གྱི་སེམས་སེམས་བྱུང་རྣམས་ཀྱང་མཚུངས་ལྡན་གྱི་རྒྱུར་འགྱུར་བས་རྟེན་དབང་པོ་གཅིག་ལ་བརྟེན་པའི་སེམས་སེམས་བྱུང་རྣམས་སོ། །ལྔ་པ་ལ་མཚན་ཉིད་ནི། ཀུན་འགྲོ་ཞེས་བྱ་བའི་ཉོན་མོངས་ཅན་གང་ཞིག རང་འབྲས་རང་སས་བསྡུས་པའི་ཉོན་མོངས་ཅན་ཕྱི་མ་བསྐྱེད་པ་སྟེ། གང་ཞིག་གིས་སྐལ་མཉམ་གྱི་རྒྱུ་གཞན་རྣམས་གཅོད། རང་སས་བསྡུས་པའི་ཉོན་མོངས་ཅན་གྱིས་རྣམ་སྨིན་གྱི་རྒྱུ་གཅོད། ཕྱི་མ་ཞེས་པས་ལྷན་ཅིག་འབྱུང་བ་དང་མཚུངས་ལྡན་གྱི་རྒྱུ་གཅོད་དོ། །མཚན་གཞི་ལ་གང་ཞིག་གི་དོན་ནི་སྡུག་བསྔལ་མཐོང་སྤང་གི་ལྟ་བ་ལྔ། ཀུན་འབྱུང་མཐོང་སྤང་གི་ལོག་ལྟ་དང་། ལྟ་བ་མཐར་འཛིན་གཉིས། དེ་གཉིས་ཀྱི་ཐེ་ཚོམ་གཉིས། དེ་དང་མཚུངས་ལྡན་དང་། མ་འདྲེས་པའི་མ་རིག་པ་རིས་གཉིས་ཏེ་བཅུ་གཅིག་གོ །དེ་དག་ཀྱང་རང་དང་དུས་མཉམ་ལ་རྒྱུ་གཉིས་དང་། ཕྱི་མ་རྣམས་ལ་རྣམ་སྨིན་གྱི་རྒྱུར་འགྱུར་བ་ཡོད་ཀྱང་འདིར་ནི་རང་སས་བསྡུས་པའི་ཉོན་མོངས་ཅན་ཕྱི་མ་བསྐྱེད་པའི་ཆའོ། །དེ་ལྟར་ན་འདི་དང་སྐལ་མཉམ་གྱི་རྒྱུ་གཉིས་ལ་མུ་བཞི་ལས་གཉིས་ཀ་ཡིན་པ་ནི་སྔར་གྱི་སྤང་བྱ་རིས་གཉིས་པ་རང་གི་རིས་ཕྱི་མ་བསྐྱེད་པའི་ཆའོ། །སྐལ་མཉམ་གྱི་རྒྱུ་ཡིན་ལ་ཀུན་འགྲོའི་རྒྱུ་མ་ཡིན་པ་ནི་དེ་ལས་གཞན་པའི་སྐལ་མཉམ་གྱི་རྒྱུ་རྣམས་སོ། །ལྡོག་པ་ནི་སྔར་གྱི་སྤང་བྱ་རིས་གཉིས་པོ་རང་སས་བསྡུས་པའི་རིས་གཞན་གྱི་ཉོན་མོངས་ཅན་གྱི་རྒྱུར་འགྱུར་བ་ལྟ་བུའོ། །གཉིས་ཀ་མིན་པ་ནི་ལྷན་ཅིག་འབྱུང་བ་དང་། མཚུངས་ལྡན་དང་། རྣམ་སྨིན་གྱི་རྒྱུ་ལྟ་བུའོ། །དྲུག་པ་ལ་མཚན་ཉིད་ནི། རང་གི་འབྲས་བུའི་གཙོ་བོ་རྣམ་སྨིན་གྱི་ཕུང་པོ་བསྐྱེད་པར་བྱེད་པའོ། །མཚན་གཞི་ནི་མི་དགེ་བ་དང་དགེ་བ་ཟག་བཅས་ཁོ་ན་ཡིན་གྱི་ལུང་མ་བསྟན་མིན་ཏེ། མཐུ་ཆུང་བའི་ཕྱིར། ས་བོན་རུལ་པ་བཞིན་ནོ། །ཟག་མེད་ནི་མ་ཡིན་ཏེ། སྲེད་པའི་རླན་དང་བྲལ་བའི་ཕྱིར། ས་བོན་རླན་དང་བྲལ་བ་བཞིན་ནོ། །འདུས་བྱས་བྲལ་བཅས་འབྲས་བུ་ཡིན། །ཞེས་པའི་སྐབས་སུ་འབྲས་བུའི་མཚན་ཉིད། དབྱེ་བ། མཚན་གཞི། དེ་ལས་འཕྲོས་པའི་བརྒལ་ལན་དང་བཞི་ལས། དང་པོ་ནི། རྒྱུས་བསྐྱེད་པར་བྱ་བའམ་ཐོབ་པར་བྱ་བའི་རིས་སུ་གནས་པའོ། །གཉིས་པ་ནི། ལྔ་སྟེ། རྣམ་སྨིན། རྒྱུ་མཐུན། བྲལ་བ། སྐྱེས་བུ། བྱེད་པ། བདག་པོའི་འབྲས་བུ་སྟེ་འདི་དག་ལ་དྲུག་པོ་གང་གི་འབྲས་བུ་གང་ཡིན་པ་དང་། སོ་སོའི་ངོ་བོ་རྣམས་ནི་གཞུང་ན་གསལ་ལོ། །གསུམ་པ་ནི། འདུས་བྱས་ཐམས་ཅད་དང་། སོ་སོར་བརྟགས་འགོག་གོ །བཞི་པ་ནི། འདུས་མ་བྱས་གསུམ་ཆར་རྒྱུ་དང་བྲལ་བའི་འབྲས་བུ་ཡིན་ཀྱང་། འདུས་མ་བྱས་ལ་རྒྱུ་དང་འབྲས་བུ་ནི་མེད་དེ། དེ་ལ་རྒྱུ་དྲུག་དང་འབྲས་བུ་ལྔ་མི་སྲིད་པའི་ཕྱིར་རོ། །གལ་ཏེ་རྒྱུ་གཞན་ལྔ་མེད་ཀྱང་བྱེད་རྒྱུ་ཅི་ཕྱིར་མེད་ཅེ་ན། དེ་ཡང་མེད་དེ། བྱེད་རྒྱུའི་དོན་ནི། ཆོས་གཞན་སྐྱེ་བ་ལ་གེགས་མི་བྱེད་པ་ཡིན་ལ། འདུས་མ་བྱས་ལ་སྐྱེ་བ་མེད་པའི་ཕྱིར་རོ། །དེས་ན་ལམ་བདེན་ཡང་བྲལ་བའི་བྱེད་རྒྱུ་མ་ཡིན་ནོ། །འོ་ན་བྲལ་བའི་ལམ་གྱི་འབྲས་བུ་ཇི་ལྟར་འཇོག་ཅེ་ན་ལམ་གྱི་སྟོབས་ཀྱིས་ཐོབ་པའི་ཕྱིར་རོ། །འོ་ན་ཐོབ་པའི་རྒྱུར་འགྱུར་རོ་ཞེ་ན། ནུས་པ་མི་གཅིག་སྟེ། ལམ་གྱིས་ཐོབ་པ་ནི་སྐྱེད་པར་བྱེད་ལ། བྲལ་བ་ནི་ཐོབ་པར་བྱེད་པའི་ཕྱིར་རོ། །འབྲས་བུ་གཞན་བཞི་པོ་མེད་ཀྱང་བདག་པོའི་འབྲས་བུ་ཅི་ཕྱིར་མེད་དེ། འདུས་མ་བྱས་ཆོས་གཞན་གྱི་བྱེད་རྒྱུར་འགྱུར་བའི་ཕྱིར་དང་། བདག་པོའི་འབྲས་བུ་དང་པོའི་ཡིན་ཞེས་བཤད་པས་སོ་ཞེ་ན། ཆོས་གཞན་གྱི་རྒྱུར་འགྱུར་ཡང་འདིའི་འབྲས་བུ་མེད་དེ། དུས་ཀྱིས་མ་བསྡུས་པས་འབྲས་བུ་འཛིན་འབྱིན་ལས་གྲོལ་བའི་ཕྱིར་རོ། །དེས་ན། སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ན་བདག་པོའི་འབྲས། །ཞེས་པ་ཡང་ལེགས་པར་གྲུབ་བོ། །མདོར་ན་ལུགས་འདི་ལ་ཁྱོད་ཆོས་དེའི་རྒྱུ་ཡིན་ན། ཆོས་དེ་ཁྱོད་ཀྱི་འབྲས་བུ་མ་ཡིན་པ་བུད་ཅེས་དང་། ཁྱོད་རྒྱུ་ཡིན་ན། ཁྱོད་ཀྱི་འབྲས་བུ་མེད་པ་བུད་ཅེས་དང་། ཁྱོད་ཆོས་དེའི་འབྲས་བུ་ཡིན་ན། ཆོས་དེ་ཁྱོད་ཀྱི་རྒྱུ་མ་ཡིན་པར་བུད་ཅེས་དང་། ཁྱོད་འབྲས་བུ་ཡིན་ན་ཁྱོད་ཀྱི་རྒྱུ་མེད་པ་བུད་ཅེས་པ་བཞི་ལ་ཁྱབ་པ་ཁས་མི་ལེན་པ་ནི་གནད་ཀྱི་དོན་ཏོ། །འདིར་མདོ་སྡེ་པས་འདུས་མ་བྱས་རྒྱུ་མ་ཡིན་པ་དང་། རྫས་སུ་མེད་པ་དང་། དངོས་པོ་མེད་པའི་ལུང་རིགས་མང་དུ་བཀོད་པ་དང་། བྱེ་བྲག་ཏུ་སྨྲ་བས་དེ་ལས་བཟློག་པའི་བརྒལ་ལན་རྣམས་ནི་འགྲེལ་པར་བལྟ་བར་བྱའོ། །འདོད་ཡིད་དགེ་དང་མི་དགེ་དང་། །ཞེས་པའི་སྐབས་སུ། དེ་མ་ཐག་རྐྱེན་དུ་འགྱུར་བའི་སེམས་བཅུ་གཉིས་སུ་དབྱེ་བ། ཚེའམ་གནས་སྐབས་བརྒྱད་དུ་དབྱེ་བ། འགྱུར་ཚུལ་གཅིག་ལ་དཔེར་མཚོན་པ་དང་གསུམ་ལས། དང་པོ་ནི། སྤྱིར་སེམས་ལ་འདོད་པའི་བཞི། ཁམས་གོང་མ་གཉིས་ཀྱི་གསུམ་གསུམ། ཟག་མེད་གཉིས་ཏེ་བཅུ་གཉིས་སུ་དབྱེ་བ་ནི་གཞུང་ན་གསལ་ལོ། །གཉིས་པ་ནི། ཚེའམ་གནས་སྐབས་བརྒྱད་ཤེས་པར་བྱ་སྟེ། རིས་འདྲ་སྔ་མ་ལས་ཕྱི་མ་འབྱུང་བ་རྒྱུན་གྱི་ཚེའམ། ས་གཅིག་པའི་རིས་མི་འདྲ་བ་དག་ཀྱང་འབྱུང་བས་མཚུངས་པའི་ཚེ་དང་། ཁམས་གསུམ་གྱི་སེམས་ལས་ཤི་ཡང་སྐྱེས་སེམས་ཉོན་མོངས་ཅན་ཁོ་ན་འབྱུང་བ་ཉིང་མཚམས་སྦྱོར་བའི་ཚེ་དང་། ཁམས་གསུམ་གང་རུང་གི་དགེ་བས་ཟག་བཅས་ཟག་མེད་ཀྱི་མཉམ་གཞག་ལ་སྦྱོར་བ་སྙོམས་པར་འཇུག་པའི་ཚེ་དང་། མཉམ་གཞག་དེ་ལས་ལངས་པ་ན་སྔར་གྱི་དགེ་བ་གསུམ་པོ་གང་རུང་འབྱུང་བ་སྙོམས་འཇུག་ལས་ལྡང་བའི་ཚེ་དང་། ས་གོང་མའི་ཏིང་ངེ་འཛིན་སྒོམ་པ་ན་གལ་ཏེ་ཉོན་མོངས་ཅན་དུ་འགྱུར་ན། འདི་ལས་འོག་མའི་དགེ་བའང་བླའི། གོང་སའི་ཉོན་མོངས་པ་ནི་མི་བླའོ་སྙམ་ནས། འོག་སའི་དགེ་བས་ལྡང་བར་གྱུར་ཅིག་ཅེས་འཕངས་པ་ན་འོག་སའི་དགེ་བ་ལ་གནས་པ་སྙོམས་མཇུག་ཉོན་མོངས་ཅན་གྱིས་གཟིར་བའི་ཚེ་དང་། ཟག་བཅས་ཀྱི་དགེ་བ་ལ་འདོད་གཟུགས་ཀྱི་སྤྲུལ་སེམས་ལུང་མ་བསྟན་འབྱུང་བ་སྤྲུལ་པ་ལ་འཇུག་པའི་ཚེ་དང་། སྤྲུལ་པས་སེམས་དེ་དག་ལས་ལངས་པ་ན་གཟུགས་ཀྱི་དགེ་བ་ཁོ་ན་འབྱུང་བ་སྤྲུལ་པ་ལས་ལྡང་བའི་ཚེའོ། །གསུམ་པ་ནི། འདོད་པའི་སེམས་དགེ་བ་ལས་མཇུག་ཐོག་ཏུ་སེམས་དགུ་འབྱུང་སྟེ། རྒྱུན་གྱི་ཚེ་རང་སའི་དགེ་བ་དང་། ས་མཚུངས་པའི་ཚེ་རང་སའི་གཞན་བཞི་དང་། ཉིང་མཚམས་སྦྱོར་བའི་ཚེ་གོང་མའི་སྒྲིབ་པ་གཉིས་དང་། དགེ་བ་སྦྱོར་བྱུང་ལ་སྙོམས་པར་འཇུག་པའི་ཚེ་གཟུགས་ཀྱི་དགེ་བ་དང་ཟག་མེད་གཉིས་འབྱུང་བའི་ཕྱིར་རོ། །གོང་མའི་མ་བསྒྲིབས་པ་གཉིས་ཚེ་བརྒྱད་པོ་གང་ཡང་མ་ཚང་བས་མི་འབྱུང་ངོ་། །སྙོམས་པར་འཇུག་པའི་ཚེ་གཟུགས་མེད་ཀྱི་དགེ་བ་མི་འབྱུང་ངམ་སྙམ་ན། རྟེན་དང་། རྣམ་པ་དང་། དམིགས་པ་དང་། གཉེན་པོ་སྟེ་རིང་བ་བཞི་ཡིས་རིང་བས་མི་འབྱུང་ངོ་། །དེ་བཞིན་དུ་གཞན་རྣམས་ལའང་ཞིབ་ཏུ་སྦྱར་བར་བྱའོ། །སློབ་པ་བཞི་ལས་ཞེས་གསུངས་པས་ན་ལུགས་འདི་ལ་དགྲ་བཅོམ་གྱི་འབྲས་བུ་ལས་ཉམས་པ་ཡོད་པས་མི་སློབ་པའི་སེམས་ཀྱི་རྗེས་སུའང་སློབ་པ་འབྱུང་བ་མ་ཡིན་ནམ་སྙམ་ན། དེ་ནི་མ་ཡིན་ཏེ། འདིར་ནི་དེ་མ་ཐག་རྐྱེན་བྱེད་ཚུལ་འཆད་པའི་སྐབས་ཡིན་ལ། འབྲས་བུ་ལས་ཉམས་པའི་ཚེ་དང་པོར་མི་སློབ་པའི་ཟག་མེད་ཀྱི་རྗེས་སུ་རྗེས་ཐོབ་འབྱུང་། དེའི་ཚེ་ཉོན་མོངས་མངོན་དུ་གྱུར་ནས་སློབ་པར་འགྱུར་བས་ན་ཤེས་པ་རིགས་མི་མཐུན་གྱིས་བར་དུ་ཆོད་པའི་ཕྱིར་རོ། །དེ་ན་སློབ་པ་བཞིའི་རྗེས་སུ་འབྱུང་ཞིང་། མི་སློབ་པ་ནི་བསྒོམ་ལམ་ཐ་མའི་རྗེས་སུ་ཟད་པ་ཤེས་པ་འབྱུང་བས་ལྔའི་རྗེས་སུ་འབྱུང་བ་ལེགས་པར་གྲུབ་བོ། །དབང་པོ་བསྟན་པའི་གནས་ཀྱི་དཀའ་བའི་གནས་རྣམས་བཤད་ཟིན་ཏོ།། ༈ །།དམྱལ་བ་ཡི་དྭགས་དུད་འགྲོ་དང་། །ཞེས་པའི་སྐབས་སུ་ཤེས་པར་བྱ་བའི་དངོས་པོ་དང་། ཤེས་པར་བྱ་བའི་དོན་གཉིས་ལས། དང་པོ་ནི། བཅུད་ཀྱི་འཇིག་རྟེན་ནོ། །གཉིས་པ་ནི། བསོད་ནམས་མ་ཡིན་པས་དེར་ཁྲིད་པས་སམ། ཡི་གེ་བསྣན་པའི་ངེས་ཚིག་གིས་ན་དགག་ཚིག་གི་ར་རི་དགའ་བ། ཀ་ར་བྱེད་པ་སྟེ་དགའ་བར་བྱེད་པ་མེད་པས་ན་དམྱལ་བའོ། །སློབ་དཔོན་འདུས་བཟང་ནི་ས་ར་ཀ་ནི་མ་རྙེད་པའི་དོན་ཅན་ཡིན་པས་སྐྱབས་མི་རྙེད་ཅིང་མེད་པས་དམྱལ་བའོ་ཞེས་གསུངས་སོ། །མི་ལྟར་འགྲེངས་ཏེ་མི་འགྲོ་ཡི་དུད་དེ་འགྲོ་བས་དུད་འགྲོའོ། །ཕྱིར་མི་ལྡོག་པར་སོང་བས་སམ་སྐམ་སར་འགྲོ་བས་ཡི་དྭགས་སོ། །ཡིད་ཤས་ཆེ་བས་སམ། སྐྱེ་རྒུའི་བདག་པོ་ཤེད་ཀྱི་བུ་ཡིན་པས་མིའོ། །རྒྱལ་པོ་ཆེན་པོ་བཞིའི་རིས་སུ་གཏོགས་པས་སམ་བཞིའི་གནས་ན་ཡོད་པས་དེའོ། །ལེགས་བྱས་ལྷན་ཅིག་བྱས་པ་རྣམས་དེར་སྐྱེས་པས་སམ། འཆི་མེད་མཛོད་ཀྱི་འགྲེལ་པར། དབང་པོ་འཛིན་བྱེད་ཡང་གཞན་དང་། །འཇོག་པོ་རྒྱས་བྱེད་བསྟན་བྱ་དང་། །ཆ་ཅན་རྣམས་གནས་ཁྱབ་འཇུག་དང་། །འོད་ཆེན་བསྒྲོད་བྱེད་བཤེས་གཉེན་ཉིད། །ཅེས་པ་ཉི་མའི་མིང་ཅན་བཅུ་གཉིས་དང་། གཅིག་པུར་མ་སྐྱེས་འཆིང་བྱེད་དང་། །འཇོག་པོ་དྲག་པོ་བརྩོན་འགྲུས་ལྡན། །འཕྲོག་བྱེད་ཉིད་དང་བདེ་འབྱུང་དང་། །མིག་གསུམ་གཞན་གྱིས་མི་ཐུབ་པ། །དབང་ལྡན་དང་ནི་ས་གསུམ་པ། །དྲག་པོ་བཅུ་གཅིག་རྣམས་སུ་བཤད། །ཅེས་དང་། ཡིད་རྩུགས་ངེས་བྱེད་ཟླ་བ་ཅན། །འཛིན་པ་ཉིད་དང་རླུང་དང་མེ། །ཐོ་རངས་དང་ནི་རབ་གསལ་བྱེད། །ཅེས་པ་དེ་བརྒྱད་ནོར་ལྷར་བཤད། །ཅེས་པ་དང་། ཐ་སྐར་གྱི་བུ་གཉིས་ཏེ་སུམ་ཅུ་རྩ་གསུམ་ཡོད་པས་དེའོ། །ལ་ལ་ནི་བྱང་ཆུབ་དང་། སྟོབས་མཆོག་དང་། དགེ་བ་སོགས་ནོར་ལྷ་བརྒྱད། ཁྱབ་འཇུག་དང་། ཚོགས་བདག་དང་། གཤིན་རྗེ་དང་། ཙ་ར་དང་། མ་ཧཱ་ཀཱ་ལ་དང་། བྷྲྀང་གི་རི་ཊི་དང་། ཀ་ར་སོགས་དྲག་པོ་བཅུ་གཅིག་དང་། དགའ་བ་དང་། ཉེ་དགའ་དང་། དབང་ཕྱུག་དང་། འདོད་བྱེད་དང་། འོད་སྐྱོང་དང་། ཐབས་ཆེན་དང་། སེང་གེ་དང་། གང་པོ་དང་། བདེ་བ་དང་། ཤེས་ཆེན་དང་། ལེགས་ཆེན་དང་། ལྷ་མཆོག་ནི་ཉི་མ་བཅུ་གཉིས་རྣམས་སུ་སྨྲའོ། །ལྷ་དང་ལྷ་མིན་འཐབ་པ་དང་བྲལ་བས་སམ། བསོད་ནམས་ཀྱིས་སོང་བས་སམ། ལྷ་མཚེ་མར་བརྫུས་ཏེ་སྐྱེ་བས་སམ། མེལ་ཚེ་ཐུན་རེ་ལ་བསྐུལ་བའི་སྐད་འབྱུང་བས་ཡ་མའོ། །ཆོས་ཀྱི་བདེ་བ་དང་དགའ་བ་ལྷག་པར་ཆེ་བས་དགའ་ལྡན་ནོ། །རང་གི་སྤྲུལ་པའི་ལོངས་སྤྱོད་ལ་དགའ་བར་བྱེད་པས་འཕྲུལ་དགའ་འོ། །གཞན་གྱིས་སྤྲུལ་པའི་ལོངས་སྤྱོད་ལ་དབང་བསྒྱུར་བས་གཞན་སྤྲུལ་དབང་བྱེད་དོ། །ས་འགྲེལ་དུ་སྡིག་པ་སྤོང་བ་ལ་སྤྱོད་པའི་ཕྱིར་སྡིག་པའི་ཆོས་བསལ་བས་ན་ཚངས་པ་སྟེ་དེའི་རིས་སུ་གཏོགས་པས་དེའོ། །ཚངས་པ་ཆེན་པོའི་མདུན་དུ་འདུག་སྟེ་ཚིག་འདོན་པས་དེའོ། །ཚེ་དང་ཁ་དོག་སོགས་ཚངས་པ་གཞན་པས་ཆེ་བས་ཚངས་ཆེན་ནོ། །རང་གི་ས་པ་གོང་མ་དག་ལ་ལྟོས་ནས་འོད་ཆུང་བས་འོད་ཆུང་ངོ་། །ཚད་གཟུང་བར་མི་ནུས་པས་ཚད་མེད་འོད་དོ། །གནས་གཞན་ཀུན་སྣང་བར་བྱེད་པས་འོད་གསལ་ལོ། །ཡིད་ཀྱི་ས་པའི་བདེ་བ་ལ་དགེ་བར་བཏགས་ཏེ་དེ་རང་གི་ས་པ་གོང་མ་ལས་ཆུང་བ་ཡོད་པས་དགེ་ཆུང་ངོ་། །བདེ་བ་ས་འོག་མ་ལས་ཚད་གཟུང་དུ་མེད་པ་ཡོད་པས་ཚད་མེད་དགེའོ། །བདེ་བ་ཆེར་རྒྱས་པས་དགེ་རྒྱས་སོ། །ས་གཞི་སྤྲིན་ཆགས་པ་ལྟ་བུ་འདབས་ཆགས་པ་མེད་པས་དེའོ། །མི་གཡོ་བའི་ལས་ལས་བྱུང་བས་བསོད་ནམས་སྐྱེས་སོ། །གནས་གཞན་དང་འབྲེལ་བའི་བྱིས་པ་ཀུན་ལས་འབྲས་བུ་ཆེ་བས་འབྲས་བུ་ཆེའོ། །ཚོགས་དྲུག་གི་འཁོར་གྱི་འདུ་ཤེས་རྒྱུན་བཅད་དེ་གནས་པས་འདུ་ཤེས་མེད་པའོ། །སོ་སོའི་སྐྱེ་བོ་དང་མ་འདྲེས་པའི་གནས་གཙང་མ་གོང་མ་རྣམས་ལས་མི་ཆེ་བས་དེའོ། །ཏིང་ངེ་འཛིན་ཁྱད་པར་ཅན་ཐོབ་པས་ཉོན་མོངས་པའི་གདུང་བ་མེད་པས་མི་གདུང་བའོ། །རབ་ཏུ་ཞི་ཞིང་མིག་སྔར་མཛེས་པས་གྱ་ནོམ་སྣང་ངོ་། །མཐོང་བའམ་བལྟ་བ་རྣམ་པར་དག་ཅིང་བཟང་བས་ཤིན་ཏུ་མཐོང་ངོ་། །གནས་ཡོད་པ་ལ་འདི་ལས་ཆུ་ཞེང་ལ་སོགས་པའི་ཡོན་ཏན་མཆོག་གཞན་མེད་པས་འོག་མིན་ནོ། །ཡང་ན་གཟུགས་ཀྱི་མཐའ་ཡིན་པས་བསགས་མཐའ་འོ། །སྙོམས་འཇུག་གི་སྦྱོར་བའི་དུས་སུ་ནམ་མཁའ་མཐའ་ཡས་པའོ་སྙམ་པའི་རྣམ་པར་བྱེད་ཅིང་ལམ་དེ་ཉིད་སྐྱེད་བྱེད་ཡིན་པས་འབྲས་བུ་སྐྱེ་བ་ལའང་དེ་ཞེས་བྱའོ། །དེ་བཞིན་དུ་རྣམ་ཤེས་མཐའ་ཡས་སོ་སྙམ་པ་དང་། ཅི་ཡང་མེད་དོ་སྙམ་པ་རྣམ་པར་བྱེད་པས་དེ་དག་གོ །འདུ་ཤེས་ནི་འབྲས་དང་ཟུག་རྔུ་ལྟ་བུའོ། །འདུ་ཤེས་མེད་པ་ནི་ཀུན་ཏུ་རྨོངས་པའོ་སྙམ་ནས་འདུ་ཤེས་གཞན་ལས་འབྱུང་བས་དེའོ། །གཉིས་པ་ཤེས་པར་བྱ་བའི་དོན་ལ་སར། གྲངས་དང་གནས་དང་ཚད་རྣམས་དང་། །ཚེ་ཡི་ཚད་དང་ལོངས་སྤྱོད་དང་། །སྐྱེ་བ་དང་ནི་ལུས་རྣམས་དང་། །རྒྱུ་དང་རྐྱེན་རྣམས་རྒྱ་ཆེར་རོ། །ཞེས་གསུངས་པ་ལྟར་བརྒྱད་ལས། དང་པོ་གྲངས་ནི། འགྲོ་བ་རིགས་དྲུག་གམ། རྒྱུད་དང་། ལམ་ལྔ་སྟེ། དེར་ནི་དམྱལ་སོགས་འགྲོ་བ་ལྔ། །རང་གི་མིང་གིས་བསྟན་དེ་རྣམས། །ཉོན་མོངས་ཅན་མིན་ལུང་བསྟན་མིན། །སེམས་ཅན་ཞེས་བྱར་བར་སྲིད་མིན། །ཞེས་སོ། །ལྷ་མ་ཡིན་ནི་ལྷའི་འགྲོ་བས་བསྡུས་པར་སར་གསུངས་ཤིང་། དོན་གསང་དུ་འཕེན་བྱེད་མི་དགེ་བས་འཕངས་པར་བཤད་པ་ནི་བརྟག་དགོས་ལ། དྲན་པ་ཉེར་གཞག་གི་མདོར། ལྷ་མ་ཡིན་དུད་འགྲོ་ཡིན་ནོ་ཞེས་པ་ནི་མི་བླུན་པོ་ལ་བ་ལང་ཞེས་འཐབ་པ་ལྟར་སྨད་པ་ཙམ་མོ། །ཡང་གྲུལ་བུམ་དང་། ཤ་ཟ་དང་། འབྱུང་པོ་དང་། སྲུལ་པོ་དང་། ལུས་སྲུལ་པོ་དང་། སྨྱོ་བྱེད་དང་། བརྗེད་བྱེད་དང་། སྐེམ་བྱེད་དང་། གྲིབ་གནོན་དང་། སྲིན་པོ་དང་། ནམ་གྲུའི་གདོན་དང་། བྱའི་གདོན་དང་། ཚངས་པའི་སྲིན་པོ་རྣམས་ནི་ཡི་དྭགས་སུ་འདུ་བ་ཡིན་པ་བྱེ་བྲག་ཏུ་རྟོགས་བྱེད་ཆེན་མོར་འཆད་ཅིང་། འཆི་མེད་མཛོད་དུ་ནི། རིག་འཛིན་ལྷ་ཡི་སྨད་འཚོང་མ། འདིར་ཚིག་བཞི་མི་ཚང་།་་་་་ྎགནོད་སྦྱིན་དང་། །སྲིན་པོ་ཤ་ཟ་མི་འམ་ཅི། །ཤ་ཟ་གསང་བ་གྲུབ་པ་དང་། །འབྱུང་པོ་ལྷ་ཡི་སྐྱེ་གནས་ཅན། །ཞེས་ཀྱང་བཤད་དོ། །བར་དོ་ནི་རིགས་དྲུག་ཏུ་མ་འདུས་པར་རྒྱ་མཚོ་སྤྲིན་དུའང་བཤད་ཅིང་། གདགས་པར་ཡང་སྲིད་པ་བར་མ་ནི་འགྲོ་བ་ལྔས་མ་བསྡུས་པའོ་ཞེས་བཞེད་དོ། །ལྟོ་འཕྱེ་ཆེན་པོ་དུད་འགྲོའོ། །གཉིས་པ་ལ་འདོད་ཁམས་ན་གནས་སུམ་ཅུ་རྩ་དྲུག་སྟེ། ཚ་དམྱལ་བརྒྱད། གྲང་དམྱལ་བརྒྱད། ཡི་དྭགས་ལྷ་མིན་རྣམས་དང་། གླིང་བཞི་གླིང་ཕྲན་བརྒྱད། འདོད་ལྷ་དྲུག་རྣམས་སོ། །འདིར་ནི། དམྱལ་བ་ཡི་དྭགས་དུད་འགྲོ་དང་། །མི་རྣམས་དང་ནི་ལྷ་དྲུག་དང་། །འདོད་པའི་ཁམས་ཡིན་དམྱལ་བ་དང་། །གླིང་དབྱེ་བ་ལས་དེ་ཉི་ཤུ། །ཞེས་གསུངས་ཏེ། དམྱལ་བ་བརྒྱད་དང་གླིང་བཞིར་དབྱེ་བས་སོ། །གཟུགས་ཁམས་ལ་གནས་བཅོ་བརྒྱད་དེ། གཞུང་གི་བཅུ་བདུན་དང་། དབང་ཕྱུག་ཆེན་པོའི་གནས་ཞེས་བྱ་བ་བྱང་ཆུབ་སེམས་དཔའ་ས་བཅུ་པ་ལ་གནས་པ་ཁོ་ན་བཞུགས་པའོ། །དེ་ཉིད་ལ་འོག་མིན་ཆེན་པོ་ཞེས་ཀྱང་ཟེར་རོ། །ཉི་འོག་བྱེ་བྲག་ཏུ་སྨྲ་བ་བཅུ་བདུན་དུ་སྨྲ་ལ། ཁ་ཆེ་བ་ནི། ཚངས་ཆེན་པ་མདུན་ན་འདོན་གྱི་དགོན་པ་ལྟ་བུ་ཡིན་པས་ན་བཅུ་དྲུག་ཏུ་སྨྲའོ། །གཟུགས་མེད་ཁམས་ནི་གནས་བཞིའམ་གནས་མེད་པ་སྟེ། གཟུགས་མེད་ཁམས་ན་གནས་མེད་དོ། །སྐྱེ་བ་ལས་ནི་རྣམ་པ་བཞི། །ཞེས་སོ། །དེ་ཉིད་ལས་དགུ་སྟེ། འདོད་པའི་ས་དང་། གཟུགས་ཁམས་བསམ་གཏན་ས་བཞི་དང་། གཟུགས་མེད་ས་བཞིའོ། །ཁམས་གསུམ་གྱིས་ནི་ས་དགུ་མ་བསྡུས་ཏེ། བསམ་གཏན་དང་པོ་ནས་ཅི་ཡང་མེད་པའི་སྐྱེ་མཆེད་ཀྱི་བར་ལ་མཐོང་ལམ་སོགས་བརྟེན་པ་ན་ས་བདུན་པོ་དེ་ཟག་མེད་དུ་སྐྱེས་པས་སོ། །དེས་ན་བསྡུ་བར། དབང་པོ་ཀུན་ཤེས་པ་གསུམ་སོགས་ཁམས་གསུམ་གྱིས་མ་བསྡུས་ཤིང་ས་ཡིས་བསྡུས་པར་བཤད་དོ། །ས་དགུ་ནི་ཆགས་བྲལ་གྱི་རིམ་པ་དགུའོ། །གསུམ་པ་ལུས་ཚད་ལ་དངོས་དང་། འཇལ་བྱེད་ཀྱི་ཚད་གཉིས་ལས། དང་པོ་ནི། ཆོས་མངོན་པར། ངན་སོང་གསུམ་གྱི་ལུས་ཚད་ངེས་པ་མེད་པར་བཤད་ཅིང་། རྒྱལ་བའི་ཡུམ་དུའང་དམ་པའི་ཆོས་སྤོང་བ་དམྱལ་བར་སྐྱེས་པའི་ལུས་ཚད་བཤད་དུ་མི་རུང་བར་བཀའ་སྩལ་ཏོ། །བཟང་སྐྱོང་གིས་ཞུས་པར་དམྱལ་བ་འགའ་ཞིག་མ་གཏོགས་པ་ལ་རང་གི་ཁྲུ་བརྒྱད་ཡོད་ཅེས་དང་། དྲན་པ་ཉེར་གཞག་ཏུ་མཚམས་མེད་གཅིག་བྱས་པའི་མནར་མེད་ཀྱི་ལུས་དཔག་ཚད་གཅིག་ནས་ལྔ་བྱས་པ་ལ་དཔག་ཚད་ལྔའི་བར་ཡོད་ཅེས་དང་། མྱ་ངན་ལས་འདས་པའི་མདོར། མཚམས་མེད་བརྒྱད་བྱས་པའི་ལུས་ལ་དཔག་ཚད་བརྒྱད་ཁྲི་ཡོད་ཀྱང་གཅིག་ལ་གཅིག་མི་ཐོགས་ཞེས་དང་། དཀོན་མཆོག་ཏ་ལའི་མདོར། ཐེག་ཆེན་ལ་སྐུར་བ་བཏབ་པའི་དམྱལ་བའི་ལྕེ་ལ་དཔག་ཚད་འབུམ་ཡོད་ཅེས་དང་། ཉི་མའི་སྙིང་པོའི་མདོར། ཡི་དྭགས་ཆུང་བ་ལ་མཐོ་གང་དང་། ཆེ་བ་ལ་དཔག་ཚད་སྟོང་ཡོད་པ་དང་། དུད་འགྲོ་ཆུང་བ་ལ་སྐྲ་རྩེའི་ལྔ་བཅུའི་ཆ་དང་། གླང་པོ་རབ་བརྟན་དང་ས་སྲུང་གི་བུ་ལ་མཐའ་སྐོར་དུ་དཔག་ཚད་བདུན་དང་། རྒྱ་མཚོར་གནས་པའི་ཀླུའི་རྒྱལ་པོ་རྣམས་ཀྱིས་དེ་ལས་ལུས་མ་འཕགས་པར་རོ་སྟོད་ཀྱིས་སུམ་ཅུ་རྩ་གསུམ་དུ་ཕྱིན་ཏེ་ཐུབ་པ་ལ་ཆོས་ཉན་ཞེས་དང་། ལས་བརྒྱ་པར་ཆུ་སྲིན་ཆེ་བ་ལ་དཔག་ཚད་ཉིས་སྟོང་བདུན་བརྒྱ་ཡོད་ཅེས་དང་། རྣམ་པར་ཤེས་པ་འཕོ་བའི་མདོར། ཀླུ་དགའ་བོ་དང་ཉེ་དགའ་བོའི་ལུས་ཀྱིས་རི་རབ་ཀྱང་གཡོ་ཞིང་དབུགས་ཀྱི་དུག་གིས་རྒྱ་མཚོའང་བཏུང་དུ་མི་རུང་བར་བྱེད་ཅེས་དང་། ལུང་གཞིར། ཀླུ་གཉིས་ཀྱིས་རི་རབ་ལ་ལན་གསུམ་དཀྲིས་པར་བཀའ་སྩལ་ཏེ། ཀླུའི་ལུས་རྣམས་ནི་སྤྲུལ་པ་ཡིན་པ་ཡང་སྲིད་དོ། །འཛམ་བུ་གླིང་པའི་མི་ལུས་རེས་ཆེ་ཞིང་རེས་ཆུང་ཡང་རང་གི་ཁྲུ་ཕྱེད་བཞིའོ། །འཛམ་བུ་གླིང་པ་རྣམས་ཀྱི་ཚད། །ཁྲུ་བཞི་པ་དང་ཕྱེད་དང་བཞི། །ཤར་དང་བ་ལང་སྤྱོད་དང་བྱང་། །ཞེས་བྱ་ཕྱི་མ་ཉིས་འགྱུར་བསྐྱེད། །ཅེས་ཏེ་ལུས་འཕགས་སོགས་ཀྱང་རང་རང་གི་ཁྲུ་ཕྱེད་དང་བཞིར་གསུངས་སོ། །བསྐལ་པ་དང་པོའི་མི་འགའ་ཞིག་ནི་བརྒྱ་བྱིན་དང་མཉམ་སྟེ། ཡབ་སྲས་འཇལ་བར་སྤྱི་བོ་སྐྱེས་དང་། བརྒྱ་བྱིན་སྟན་གཅིག་ལ་འདུག་པ་ན་མིག་འབྱེད་འཛུམ་ཡོད་མེད་མ་གཏོགས་པ་ཁྱད་པར་མེད་པར་བཀའ་སྩལ་བས་སོ། །སར། ལྷ་མ་ཡིན་རྣམས་ཀྱི་ལུས་དང་ཚེ་ཚད་སུམ་ཅུ་རྩ་གསུམ་དང་འདྲ་བར་གསུངས་སོ། །འདོད་དང་ལྡན་པའི་ལྷ་ཡི་ལུས། །བཞི་ཆ་ནས་ནི་རྒྱང་གྲགས་ནི། །ཕྱེད་དང་གཉིས་ཀྱི་བར་དུ་བསྐྱེད། །ཅེས་པ་དགའ་ལྡན་པ་ལ་རྒྱང་གྲགས་ཏེ་གོ་སླའོ། །གཟུགས་ཅན་དང་པོ་དཔག་ཚད་ཕྱེད། །དེ་ཡི་གོང་མ་ཕྱེད་ཕྱེད་བསྐྱེད། །འོད་ཆུང་རྣམས་ཀྱི་ལྟག་ཡན་ཆད། །ལུས་ནི་ཉིས་འགྱུར་ཉིས་འགྱུར་ཏེ། །སྤྲིན་མེད་དཔག་ཚད་གསུམ་དོར་རོ། །ཞེས་ཏེ་ཚངས་རིས་པའི་དཔག་ཚད་ཕྱེད་དང་། འོད་ཆུང་བའི་གཉིས་དང་། ཚད་མེད་འོད་པའི་བཞི་ནས་དགེ་རྒྱས་པའི་དྲུག་ཅུ་རྩ་བཞི་དང་། སྤྲིན་མེད་པའི་གསུམ་དོར་བས་བརྒྱ་ཉེར་ལྔ་དང་། འོག་མིན་པའི་ཁྲི་དྲུག་སྟོང་གི་བར་སྟེ་བར་པ་རྣམས་རང་གི་བརྩིས་པས་ཤེས་སོ། །གཟུགས་མེད་ན་གཟུགས་མེད་པས་ལུས་ཚད་མེད་དོ། །དེ་ནའང་དགེ་འདུན་ཕལ་ཆེན་སྡེ་པ་དང་གོས་དམར་ཅན་གྱི་སྡེ་པ་གཟུགས་ཕྲ་བ་ཡོད་པར་འདོད་དེ། དེ་འགོག་པའི་བརྒལ་ལན་ནི་མཛོད་འགྲེལ་དུ་རྒྱས་པར་བཤད་པས་དེར་བལྟའོ། །གཉིས་པ་ནི། གཟུགས་མིང་དུས་མཐའ་རྡུལ་ཡིག་དང་། །སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་ནས། །སོར་ཚིགས་ཞེས་བྱ་གོང་བདུན་བསྒྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་ནི་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་པ་ལ། ཉི་ཟེར་གྱི་རྡུལ་བཞི་བཅུ་རྩ་དགུ་ལ་རྡུལ་ཕྲ་རབ་བོ་ཞེས་གསུངས་པ་ནི་མི་འཐད་དེ། དེ་ནི་ལུག་རྡུལ་ཡིན་པས་སོ། །ལུང་རྣམ་འབྱེད་དུ་སྔ་ཕྱི་རྣམས་དྲུག་འགྱུར་དང་། གདགས་པར་རྡུལ་ཕྲན་བདུན་ལ་ཉི་ཟེར་གྱི་རྡུལ་དུ་བཤད་པའང་ཡོད་དོ། །ཁྲུ་ནི་དང་པོ་ཆོས་མངོན་པ་བཤད་དུས་ཙམ་གྱི་མི་ཡི་ཁྲུ་ཡིས་བརྩིའོ་ཞེས་སློབ་དཔོན་རྒྱལ་པོའི་སྲས་སོ། །དུས་འཁོར་དུ་གཞུ་ཉིས་སྟོང་ལ་རྒྱང་གྲགས་དང་། དེ་བཞི་ལ་དཔག་ཚད་དུ་བཀའ་སྩལ་ཏོ། །བཞི་པ་ཚེ་ཚད་ལའང་གཉིས་ལས། དང་པོ་ནི། སྒྲ་མི་སྙན་ན་ཚེ་སྟོང་སྟེ། །གཉིས་ན་ཕྱེད་ཕྱེད་སྤངས་པའོ། །འདི་ན་མ་ངེས་ཐ་མར་ནི། །ལོ་བཅུ་དང་པོ་དཔག་ཏུ་མེད། །བ་ལང་སྤྱོད་པའི་ལྔ་བརྒྱ་དང་། །ལུས་འཕགས་ཉིས་བརྒྱ་ལྔ་བཅུའོ། །མི་རྣམས་ཚེ་ལོ་ལྔ་བཅུ་ལ། །འདོད་པ་ཡི་ནི་ལྷ་རྣམས་ལས། །འོག་མ་རྣམས་ཀྱི་ཉིན་ཞག་སྟེ། །དེ་ཡི་ཚེ་ལོ་ལྔ་བརྒྱའོ། །གོང་མ་གཉིས་ཀ་ཉིས་འགྱུར་རོ། །ཞེས་ཏེ། ཉིན་ཞག་དེ་ཡིས་བགྲངས་པའི་ཞག་སུམ་ཅུ་ལ་ཟླ་བ་དང་། དེ་བཅུ་གཉིས་ལ་ལོ་གཅིག་ཏུ་བྱེད་པ་སྟེ། སུམ་ཅུ་རྩ་གསུམ་པ་སོགས་ལྔའི་རིམ་པ་བཞིན་མི་ལོ་བརྒྱ་དང་། ཉིས་བརྒྱ་དང་། བཞི་བརྒྱ་དང་། བརྒྱད་བརྒྱ་དང་། སྟོང་དྲུག་བརྒྱས་རང་གི་ཉིན་ཞག་དང་། དེས་བགྲངས་པའི་རང་རང་གི་ལོ་སྟོང་ནས་ཁྲི་དྲུག་སྟོང་བར་ཚེ་ཚད་དོ། །ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །དེས་ན་དེ་དག་རྣམས་ཀྱི་ཚེ། །འདོད་པའི་ལྷ་དང་འདྲ་བ་ཡིན། །ཞེས་པ་སྟེ། རིམ་པ་བཞིན་གྲངས་ནི་འདྲའོ། །མཛོད་འགྲེལ་དུ་གཉའ་ཤིང་འཛིན་ཡན་ཆད་ན། ཉི་ཟླ་མེད་ཀྱང་ཉིན་མཚན་ནི་ཀུ་མུད་དང་། པདྨ་སོགས་མེ་ཏོག་ཁ་འབྱེད་འཛུམ་དང་། བྱ་རྣམས་སྐད་འབྱིན་མི་འབྱིན་དང་། གཉིད་སངས་པ་དང་བྲོ་བ་ལས་བཞག་སྟེ། སྣང་བའི་བྱ་བ་ནི་རང་གི་འོད་ཀྱིས་སོ། །རབ་ཏུ་ཚ་ཕྱེད་མནར་མེད་ནི། །བར་གྱི་བསྐལ་པའོ་དུད་འགྲོ་རྣམས། །མཆོག་རིང་བསྐལ་པའོ་ཡི་དྭགས་རྣམས། །ཟླ་བ་ཉིན་ཞག་གིས་ལྔ་བརྒྱ། །ཞེས་ཏེ། མིའི་ཟླ་བས་ཉིན་ཞག་བྱས་པའི་ལྔ་བརྒྱ་ནི། བཤེས་པའི་སྤྲིང་ཡིག་ཏུ། ལྔ་སྟོང་དག་དང་ཁྲིར་ཡང་འཆིར་མི་འགྱུར། །ཞེས་པ་དང་དོན་གཅིག་གོ །གྲང་དམྱལ་རྣམས་ཀྱི་ཚེ་ཚད། སར། ཚ་དམྱལ་རྣམས་ཀྱི་ཕྱེད་ཕྱེད་ཐུབ་པར་གསུངས་ལ། འདིར་ནི། ཏིལ་རྫང་ནང་ནས་ལོ་བརྒྱ་ཞིང་། །ཞེས་སོགས་གསུངས་སོ། །ཉེ་འཁོར་བ་དང་ཉི་ཚེ་བའི་སེམས་ཅན་དམྱལ་བ་ལ་ནི་ཚེ་ཚད་མ་ངེས་པར་གསུངས་སོ། །ཚངས་རིས་པས་བར་གྱི་བསྐལ་པ་ཉི་ཤུ་དང་། མདུན་ན་འདོན་པས་བཞི་བཅུ་དང་། ཚངས་ཆེན་པས་དྲུག་ཅུ་དང་། འོད་ཆུང་བས་བསྐལ་པ་ཆེན་པོ་གཉིས་དང་། ཚད་མེད་འོད་པས་བཞི་ནས། དགེ་རྒྱས་པས་དྲུག་ཅུ་རྩ་བཞི་དང་། སྤྲིན་མེད་པས་བརྒྱ་ཉི་ཤུ་རྩ་ལྔ་དང་། འོག་མིན་པས་ཁྲི་དྲུག་སྟོང་ཐུབ་པའི་བར་ཏེ། གཟུགས་ཅན་ཉིན་མཚན་མེད་ཚེ་ནི། །རང་ལུས་གཞལ་བའི་བསྐལ་པ་ཡིས། །འོད་ཆུང་ནས་བཟུང་བསྐལ་ཆེན་ཏེ། །དེ་ཡི་འོག་མ་ཕྱེད་ཡིན་ནོ། །ཞེས་སོ། །གཟུགས་མེད་པ་བཞིས་ཉི་ཁྲི་དང་། བཞི་ཁྲི་དང་། དྲུག་ཁྲི་དང་། བརྒྱད་ཁྲི་ཐུབ་སྟེ། གཟུགས་མེད་བསྐལ་པ་སྟོང་ཕྲག་ནི། །ཉི་ཤུ་ལྷག་པས་ལྷག་པ་ཡིན། །ཞེས་སོ། །ཚེ་ཚད་མ་རྫོགས་པར་འཆི་བ་ནི། སྒྲ་མི་སྙན་མ་གཏོགས་པར་འཆི། །ཞེས་སོ། །གཞན་ཡང་བར་སྐབས་སུ་མི་འཆི་བ་བྱང་སེམས་སྐྱེ་བ་གཅིག་གིས་ཐོགས་པ་དང་། སྲིད་པ་ཐ་མ་པ་དང་། རྒྱལ་བས་ལུང་བསྟན་པ་དང་། རྒྱལ་བའི་ཐད་དུ་བཏང་བའི་ཕོ་ཉ་དང་། དད་པ་དང་ཆོས་ཀྱི་རྗེས་སུ་འབྲང་བ་དག་དང་། བྱང་ཆུབ་སེམས་དཔའ་ཐ་མ་པ་དང་། འཁོར་ལོས་བསྒྱུར་བ་དང་། དེ་དག་མངལ་ན་ཡོད་པའི་ཡུམ་སོགས་སོ། །གཉིས་པ་འཇལ་བྱེད་བཤད་པ་ནི། འདིར། སྐད་ཅིག་མ་བརྒྱ་ཉི་ཤུ་ལ། །ཞེས་སོགས་གསུངས་སོ། །སྐད་ཅིག་གི་ཚད་ནི་རྣམ་འགྲེལ་ལས། རྡུལ་གཅིག་བསྒྲེས་རྡུལ་ཆུང་བ་ཡི། །མཐར་ཐུག་དུས་ནི་སྐད་ཅིག་འདོད། །ཅེས་དང་། མཛོད་འགྲེལ་དུ། ཆོས་མངོན་པ་བ་རྣམས་ན་རེ། སྐྱེས་བུ་སྟོབས་དང་ལྡན་པས་སེ་གོལ་གཏོགས་པ་ཙམ་གྱིས་སྐད་ཅིག་དྲུག་ཅུ་རྩ་བཞི་འདའ་འོ་ཞེས་ཟེར་རོ་ཞེས་པ་ལྟར་རོ། །ཞག་མི་ཐུབ་པ་ནི་ལོ་གཅིག་ལ་དྲུག་སྟེ། མཛོད་འགྲེལ་དུ། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་ཏེ། དུས་དེ་གསུམ་ལ་ཟླ་བ་བཞི་བཞིའོ། །ཐུབ་པའི་དགོངས་རྒྱན་དུ། དེ་ནས་རྒྱལ་བ་ཅན་དང་། དབོ་དང་། ས་ག་དང་། ཆུ་སྟོད་དང་། ཁྲུམས་དང་། སྨིན་དྲུག་ཅན་རྣམས་ཀྱི་གནམ་སྟོང་ཆད་པ་ན་ཞག་ཉེར་དགུ་ཟླ་བའོ། །དགུན་ནི་སྨིན་དྲུག་ཅན་གྱི་ཉ་ནས་རྩོམ་མོ། །ལྔ་པ་ལ་དུཿཁ་དང་བདེ་བ་དང་ཁ་ཟས་དང་འཁྲིག་པའི་ལོངས་སྤྱོད་ཅི་རིགས་པར་ཏེ། དམྱལ་བའི་དུཿཁ་ནི། ལྕགས་ཀྱི་ས་བཞི་འབར་བ་མེ་ལྕེས་ཁྱབ་པ་ལྕགས་ཀྱི་རྭ་བས་ཀུན་ནས་བསྐོར་བ་ན་ཡང་སོས་ནི་ལས་ལས་བྱུང་བའི་མཚོན་ཆ་སྣ་ཚོགས་ཀྱིས་དགྲའི་འདུ་ཤེས་ཀྱིས་ཕན་ཚུན་བཏབ་པས་བརྒྱལ་ཏེ་ས་ལ་འགྱེལ་བ་ན་ནམ་མཁའ་ལས་ཁྱེད་རྣམས་ཡང་སོས་པར་གྱུར་ཅིག་ཅེས་སྒྲ་འབྱུང་བའམ། རླུང་གྲང་མོ་ལངས་པས་ཡང་སོས་ཏེ། སྔ་མ་ལྟ་བུར་ཡང་ཡང་ལས་མ་ཟད་བར་དུ་མྱོང་ངོ་། །བསྐལ་པ་འཇིག་དུས་ཀྱི་མེ་བས་ཡང་སོས་ཀྱི་མེ་ཚ་ཞིང་དེ་བས་འོག་མ་འོག་མ་བཞི་འགྱུར་གྱི་ཚ་བར་བཤད་དོ། །ཐིག་ནག་ནི་ལུས་ལ་དམྱལ་སྲུང་གིས་ཐིག་ཆ་བཞིའམ། བརྒྱད་དམ་དུ་མར་བཏབ་སྟེ། གཤེགས་ཅིང་འཇོག་པ་དང་། བསྡུས་འཇོམས་པ་གཅིག་ཏུ་ཚོགས་པ་ན་དམྱལ་སྲུང་གིས་ལྕགས་ཀྱི་རི་རའི་གདོང་ལྟ་བུ་གཉིས་དང་། ལུག་དང་། རྟ་དང་། གླང་པོ་ཆེ་དང་། སེང་གེ་དང་། སྟག་གི་གདོང་ལྟ་བུ་གཉིས་གཉིས་ཀྱི་བར་དུ་གཙགས་མ་ཐག་ཏུ་བཙིར་བས་སྒོ་ཀུན་ནས་ཁྲག་རྒྱུན་འབབ་པ་དང་། ཡང་འདུས་པ་ན་ལྕགས་ཀྱི་འཁྲུལ་འཁོར་ཆེན་པོས་བུད་ཤིང་ལྟར་འཚིར་ཞིང་ཁྲག་རྒྱུན་འཛག་པ་དང་། ཡང་འདུས་པ་ན་ལྕགས་ཀྱི་ཕ་བོང་གི་ཆར་པས་ས་གཞི་ལ་ཇ་ཇིར་དུ་རྡུང་བ་ན་ཁྲག་རྒྱུན་འབབ་པའོ། །ངུ་འབོད་པ་གནས་ཚོལ་བ་ན་ལྕགས་ཀྱི་ཁང་པར་ཞུགས་པ་དེར་མེ་བཏང་བ་འབར་ཞིང་འཚེད་དེ་བསྲེགས་པས་ངུ་ཞིང་སྡུག་སྐད་འབྱིན་པའོ། །ངུ་འབོད་ཆེན་པོ་བ་དེ་དང་འདྲ་བ་ལས་ཁང་སྦྲུམ་དུ་འདུག་པའོ། །ཚ་བ་པ་ལྕགས་ཀྱི་ཕྲུ་བ་དཔག་ཚད་དུ་མ་ཡོད་པ་མེ་འབར་བའི་ནང་དུ་ཉ་བཞིན་བསྲེག་པ་དང་། ལྕགས་ཀྱི་གསེག་ཤིང་འབར་བས་རྐུབ་ནས་ཕུག་པས་སྤྱི་བོར་ཕྱུང་ཞིང་ལུས་ཀྱི་བུ་ག་རྣམས་དང་བ་སྤུའི་ཁུང་བུ་ཀུན་ནས་མེ་འབར་བ་དང་། ལྕགས་བསྲེགས་ཀྱི་ས་གཞི་ལ་ལྕགས་ཀྱི་ཐོ་བ་འབར་བས་བརྡུང་བའོ། །རབ་ཏུ་ཚ་བ་པ་ལྕགས་ཀྱི་གསལ་ཤིང་རྩེ་གསུམ་པས་རྐུབ་ནས་ཕུག་པ་ཕྲག་པ་གཉིས་དང་སྤྱི་བོར་བྱུང་ཞིང་བུ་ག་རྣམས་ནས་མེ་ལྷབ་ལྷབ་འབར་བ་དང་། ལྕགས་ལེབ་འབར་བས་ལུས་ལ་ཀུན་ཏུ་འཁྲི་བ་དང་། བཤེས་པའི་སྤྲིང་ཡིག་ཏུ། ཁ་ཅིག་ལྕགས་ལས་བྱས་པའི་ཟངས་ཆེན་དུ། །འབྲས་ཀྱི་བཅུད་འཕེན་བཞིན་དུ་བསྐོལ་ཞིང་འཚེད། །ཅེས་པ་སྟེ། དེར་ཀེང་རུས་ཙམ་ལུས་པ་ན་སྲུང་མས་ས་ལ་བཀྲམ་པས་ཤ་ལྤགས་དང་ཁྲག་སླར་སྐྱེས་པ་ཡང་ནང་དུ་འཇུག་པའོ། །མནར་མེད་པ་ཕྱོགས་བཞི་ནས་ས་ཆེན་པོ་མེ་འབར་བ་འོང་བས་འདིའི་ལུས་མར་མེའི་སྡོང་བུ་ལྟར་བསྲེགས་པ་ན་མེ་ཉིད་ཀྱི་ཕུང་པོར་སྣང་ཞིང་། སྡུག་སྐད་ལས་སེམས་ཅན་ཡོད་པར་ཤེས་པ་ཙམ་དང་། ལྕགས་ཀྱི་ཞིབ་མར་ལྕགས་ཀྱི་མདག་མ་འབར་བར་འཁྲབ་པ་དང་། ལྕགས་བསྲེགས་ཀྱི་རི་ཆེན་པོ་ལ་འབབ་འཛེག་བྱེད་དུ་འཇུག་པ་དང་། ཁ་ནས་ལྕེ་ཕྱུང་སྟེ་ལྕགས་ཕུར་བརྒྱས་བརྒྱངས་ནས་གཉེར་འཁུམ་མེད་པར་བྱེད་པ་དང་། ས་ལ་གན་རྐྱལ་དུ་བཞག་སྟེ་ཁ་ལྕགས་ཀྱི་འབྱེད་སྤྱད་ཀྱིས་ཕྱེ་ནས་ལྕགས་ཀྱི་ཐོ་ལུམ་མེ་འབར་བ་དང་ཟངས་བསྐོལ་བ་བླུགས་པས་ཁ་དང་ལྐོག་མ་དང་། ནང་ཁྲོལ་ཀུན་ཚིག་སྟེ་རོ་སྨད་ནས་ཕྱིར་འབྱུང་བ་སོགས་ལས་མ་ཟད་བར་དུ་མྱོང་ངོ་། །འདི་རྣམས་ཀྱི་དུཿཁ་འགའ་ཞིག་ཡན་མན་དུ་ཡོད་པར་གསལ་ལོ། །ཉེ་འཁོར་གྱི་གནས་ནི། བརྒྱད་པོ་ཀུན་ལས་ལྷག་བཅུ་དྲུག །དེ་རྣམས་ཀྱི་ནི་ཕྱོགས་བཞི་ན། །མེ་མ་མུར་དང་རོ་མྱགས་དང་། །སྤུ་གྲིའི་ལམ་སོགས་ཆུ་བོ་ཡིན། །ཞེས་ཏེ། བརྒྱད་པོའི་ཕྱོགས་རེ་རེ་ན་མེ་མ་མུར་པུས་མོ་ནུབ་པ་ཙམ་ལ་གནས་ཚོལ་དུ་འགྲོ་བ་ན་རྐང་པ་འདེགས་འཇོག་གི་ཤ་སྐྱེ་འཇིག་བྱེད་པ་དང་། རོ་མྱག་གི་ཕྱི་སའི་འདམ་དྲི་ང་བ་འབུ་མཆུ་རྣོན་གྱིས་རུས་པའི་བར་དུ་འབུགས་པ་དང་། སྤུ་གྲིས་གཏམས་པའི་ལམ་དང་། རལ་གྲི་ལོ་མའི་ནགས་ཚལ་དུ་གྲིབ་མ་ལ་འཁོད་པ་ན་རལ་གྲི་ལྷུང་བས་གཅོད་ཅིང་འགྱེལ་ཏེ་ཁྱི་སྲེ་བོ་རྣམས་ཀྱིས་བཤུལ་ཤ་གཅོད་ཅིང་ཟ་བ་དང་། ལྕགས་ཀྱི་ཤིང་ཤལ་མ་རིའི་ནགས་ཚེར་མ་རྣོན་པོ་སོར་བཅུ་དྲུག་ཏུ་ཡན་མན་ཁ་ལྟ་བ་ལ་འཛེགས་པ་དང་འབབ་པ་ན་ལུས་འབིགས་ཤིང་། ཁྭ་ལྕགས་ཀྱི་མཆུ་ཅན་གྱིས་མིག་འབྱིན་པ་གསུམ་མཚོན་ཆར་འདྲ་བས་གཅིག་ཏུ་བྱས་པ་དང་། ཆུ་བོ་རབ་མེད་འགྱུར་བྱེད་ཀྱི་ཆུ་ཁོལ་བས་གང་བ་ལ་ལྷུང་སྟེ། ངོས་གཉིས་ནས་སྐྱེ་བུ་མཚོན་ཆ་སྣ་ཚོགས་ཐོགས་པས་བསྲུང་ཞིང་འཚེད་ལ་མཆིལ་པས་ཕྱུངས་ནས་ས་ལ་གན་རྐྱལ་དུ་བཞག་སྟེ། ཅི་འདོད་དྲིས་པ་ན་བདག་གིས་མི་ཤེས་མི་མཐོང་སྟེ་འོན་ཀྱང་བཀྲེས་སོ་སྐོམ་མོ་ཟེར་བ་ན་ཐུ་ལུམ་དང་ཟངས་ཁུ་མནར་མེད་ལྟར་བསྙོད་པའོ། །འོ་ན་དམྱལ་སྲུང་རྣམས་སེམས་ཅན་ཡིན་ནམ་མིན་ཞེ་ན། སར་སྤྲུལ་པ་ལྟ་བུ་འབྱུང་བར་འགྱུར་རོ་ཞེས་གསུངས་སོ། །མདོ་སྡེ་པས། ལས་ཀྱི་མཐུས་འབྱུང་བ་ཆེན་པོ་ས་སོགས་ཀྱི་བྱེ་བྲག་ཏུ་འདོད་ཅིང་། བྱེ་བྲག་སྨྲ་བ་འགའ་ཞིག་སེམས་ཅན་དུ་སྨྲའོ། །དེ་དག་གི་བརྒལ་ལན་རྒྱས་པ་ཉི་ཤུ་པ་རྩ་འགྲེལ་དུ་བལྟ་སྟེ། གལ་ཏེ་དེ་ཡི་ལས་ཀྱིས་དེར། །འབྱུང་བ་རྣམས་ནི་འབྱུང་བ་དང་། །དེ་ལྟར་འགྱུར་བར་འདོད་ན་གོ །རྣམ་པར་ཤེས་པ་ཅིས་མི་འདོད། །ཅེས་སོགས་སོ། །གྲང་དམྱལ་ནི་ཉི་ཟླའི་འོད་ཀྱི་སྣང་བ་མེད་པའི་མུན་ཁྲོད་འཁྱགས་པའི་སྲུབས་ན་གྲང་བས་ཉེན་ནས་ཆུ་བུར་འབྱུང་བ་དང་། ཆུ་བུར་བརྡོལ་ཏེ་འཁུམས་པ་དང་། གྲང་ནས་སོ་ཐམ་ཐམ་པ་དང་། ཨ་ཆུ་ཟེར་བ་དང་། ཀྱི་ཧུད་ཟེར་བ་དང་། ཨུཏྤལ་ལྟར་གས་པ་ལྤགས་པ་སྔོན་པོ་ཁ་ལྔའམ་དྲུག་ཏུ་གས་པ་དང་། པདྨ་ལྟར་གས་པ་དམར་པོ་ཁ་བཅུའམ་དེ་ལས་ལྷག་པར་གས་པ་དང་། པདྨ་ལྟར་གས་པ་ཆེན་པོ་ཤིན་ཏུ་དམར་བ་ཁ་བརྒྱའམ་དེ་ལས་ལྷག་པར་ཡང་གས་པའོ། །ཉི་ཚེ་བ་ནི་རྒྱལ་པོའི་ཁབ་ཀྱི་བ་གླང་གི་ཤན་པར་སྐྱེས་པ་ཁང་པ་བརྩེགས་པ་ཙམ་ཉན་སྐད་ཀྱིས་ངུ་ཤིང་ནམ་མཁའ་ལ་འོང་བ་དང་། བ་ལང་གི་ཤན་པའི་སློབ་མ་རུས་གོང་དྲི་ང་བ་ལ་བྱ་རོག་སོགས་ཀྱིས་འཐོགས་པར་སྐྱེས་པ་དང་། བཤེས་མ་སྐྱེས་པ་ཐལ་གོང་དང་ཁ་སྣ་ལ་བྱ་རོགས་སོགས་ཀྱིས་འཐོགས་པ་དང་། ཉ་བ་སྐྱེས་པ་ལུས་ལྕགས་ཀྱིས་དཀྲིས་པ་དང་། གཞལ་བ་ལ་སྒྱུ་བྱེད་པ་རླིག་པ་རྫ་མ་ཙམ་དུ་གྱུར་པ་མདོ་སྡེར་གསུངས་པའམ། དགེ་འདུན་སྲུང་གིས་རྟོགས་པ་བརྗོད་པ་ལས་བཤད་པ་ལྟ་བུ་མྱོང་ངོ་། །དེ་ལྟར་དམྱལ་བ་ལ་དུཿཁ་དཔག་མེད་དེ། བཤེས་པའི་སྤྲིང་ཡིག་ཏུ། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་དུཿཁ་གང་ཡིན་པ། །དེས་ནི་དམྱལ་བའི་དུཿཁ་ཆུང་ངུ་ལའང་། །འོལ་ཡང་མི་བགྱི་ཆར་ཡང་མི་ཕོད་དོ། །ཞེས་གསུངས་ཤིང་། རྒྱས་པར་དམ་ཆོས་དྲན་པ་ཉེར་བཞག་སོགས་སུ་བལྟའོ། །ཡི་དྭགས་ལ་ཟས་སྐོམ་ལ་ཕྱིའི་སྒྲིབ་པ་ཅན་ནི་བཀྲེས་སྐོམ་གྱིས་ཉེན་པས་ལུས་དང་ཁ་སྐོམ་ཤིང་ཆུ་མིག་སོགས་སུ་རྒྱུག་པ་ལ་མཚོན་ཆ་ཐོགས་པས་བསྲུང་ཤིང་ཆུ་ཡང་རྣག་ཁྲག་ཏུ་མཐོང་བའོ། །ནང་གི་སྒྲིབ་པ་ཅན་ནི་དེ་ཉིད་དུ། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་ལྟོས་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་དང་། ཁ་ཅིག་ལྦ་བ་སྨིན་མའི་རྣག་འཚལ་ལོ། །ཞེས་དང་། ཟས་སྐོམ་ཉིད་ཀྱི་སྒྲིབ་པ་ཅན་ནི། མེ་ལྕེའི་ཕྲེང་བ་ཅན་ཟོས་འཐུངས་ཀུན་གྱིས་འཚིགས་པ་དང་། ལྗན་ལྗིན་ཟ་བ་བཤང་གཅི་དང་དྲི་ང་བ་སྨད་པ་ཟ་ནུས་ལ་རང་གི་ཤ་ཟ་ཞིང་། ཟས་བསོད་པ་ཟ་མི་ནུས་པའོ། །ཡང་དྲན་པ་ཉེར་བཞག་ཏུ་བཀའ་སྩལ་པ། ལྟོ་གུག་ཁ་ཁབ་ལྟར་ཕྲ་དང་། །བཤང་ཟ་ཀུན་སྟོན་དྲི་ཟ་དང་། །ཆོས་ཟ་སྦྱིན་པ་ཟ་བ་དང་། །ཆུ་འཐུང་བསམ་པས་འཚོ་བ་དང་། །མཆིལ་མ་ཟ་དང་ཕྲེང་བ་ཟ། །ཁྲག་ཟ་ཤ་ཟ་བདུག་པ་ཟ། །དྲག་ཤུལ་སྤྱོད་དང་གླགས་ལྟ་དང་། །ས་འོག་གནས་དང་མཐུ་བོ་ཆེ། །མཚན་མོ་ལུས་འབར་མི་ལྤགས་ལྟ། །འདོད་གཟུགས་གླིང་བར་གནས་པ་དང་། །གཤིན་རྗེ་དབྱུག་པ་བྱིས་པ་ཟ། །ཚངས་སྲིན་འབྲུ་ཡི་ཤུན་པ་ཟ། །མི་གཙང་ཟ་དང་ལམ་ཆེན་གནས། །མང་དུ་ཟ་དང་མེ་མདག་ཟ། །དུག་ཟ་དགོན་པར་གནས་པ་དང་། །དུར་ཁྲོད་གནས་དང་ཤིང་ལ་གནས། །ལམ་གྱི་བཞི་མདོར་གནས་པ་དང་། །བདུད་ཀྱི་སྡེ་སྟེ་སུམ་ཅུ་དྲུག །ཅེས་པ་སོ་སོའི་གདུང་བ་མྱོང་ངོ་། །དུད་འགྲོ་ཆེ་བས་ཆུང་བ་མིད་དེ་ཟ་བ་དང་། དེས་ཆེ་བའི་ལུས་ཕུག་སྟེ་ཟ་བ་དང་། བྱ་མཆུ་ཅན་གྱིས་རི་དྭགས་སོགས་ཟ་བ་དང་། ཀླུ་རྣམས་ནི་ཉིན་རེ་བཞིན་བྱེ་ཚན་གྱིས་ཤ་རུས་པ་ལ་ཐུག་པར་བསྲེགས་པ་དང་། མཁའ་ལྡིང་གིས་ཟ་བ་སྟེ། གསུམ་ལ་སྐྱབས་སུ་འགྲོ་བས་དེ་དག་བཟློག་པར་བཤད་དོ། །ཁ་འཐོར་བ་རྣམས་ནི་རང་དབང་མེད་པར་བསད་པ་དང་། བརྡེགས་པ་དང་། བཀོལ་བཙོགས་སོགས་ཀྱིས་མནར་བ་སྟེ། བཤེས་པའི་སྤྲིང་ཡིག་ཏུ། ཁ་ཅིག་མུ་ཏིག་བལ་དང་རུས་པ་ཁྲག །ཤ་དང་ལྤགས་པའི་ཆེད་དུ་འཆི་བར་འགྱུར། །དབང་མེད་གཞན་ནི་རྡོག་པ་ལག་པ་དང་། །ལྕག་དང་ལྕགས་ཀྱུས་གདབ་པས་བཏབ་སྟེ་བཀོལ། །ཞེས་སོ། །མི་ལ་བཀྲེས་སྐོམ་དང་། ཚ་གྲང་དང་། འདོད་པས་ཕོངས་པ་དང་། སེམས་ཅན་དང་དེ་མ་ཡིན་པའི་གནོད་འཚེ་དང་། ཁ་ཟས་ངན་པ་དང་། འགྲོ་བ་དང་། ཚོལ་ཁྲོ་དང་། ངལ་བ་དང་། ཐང་ཉལ་དང་། མུན་པ་སོགས་ཀྱིས་སྒྲིབ་པ་དང་། ཐང་ཆད་པ་དང་། སྐྱེ་བ་སོགས་ཀྱིས་མནར་རོ། །འདོད་ལྷ་ནི། ལུས་ཀྱི་ཁ་དོག་མི་སྡུག་འགྱུར་བ་དང་། །སྟན་ལ་མི་དགའ་མེ་ཏོག་ཕྲེང་རྙིང་དང་། །གོས་ལ་དྲི་མ་ཆགས་དང་ལུས་ལས་ནི། །སྔོན་ཆད་མེད་པའི་རྔུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བྱེད་འཆི་ལྟས་ལྔ། །ཞེས་དང་། ཉེ་བའི་འཆི་ལྟས་མཛོད་འགྲེལ་དུ་རྒྱན་དང་གོས་ལ་སྒྲ་མི་སྙན་པ་འབྱུང་བ་དང་། འོད་ཆུང་བ་དང་། ཁྲུས་ཀྱི་ཆུ་ཐིགས་ལུས་ལ་ཆགས་པ་དང་། བློ་ཡུལ་གཅིག་ལ་མི་ཆགས་པ་དང་། མིག་འབྱེད་འཛུམ་སྟེ་དེ་ལྔ་བཟློག་ཤིང་། སྔ་མ་ལྔ་མི་བཟློག་པར་བཤད་ཅིང་། དེ་ཡིས་ལྷ་མོ་རྣམས་ལྷ་གཞན་དང་དགའ་མགུར་སྤྱོད་པ་མཐོང་བས་གདུང་བ་དང་། ལྷ་མཐུ་ཆེ་བ་ཆུང་བས་མཐོང་ན་སྤ་བཀོང་བ་དང་། འོག་མ་གཉིས་ལ་ལྷ་མ་ཡིན་དང་འཐབ་པ་ན་རྩོད་འབྲེལ་དང་། མགོ་བཅད་པས་བསད་པ་དང་སྤྱུགས་པས་ཉེན་ཏོ། །དེ་དག་ནི་ལྷ་ལྷ་མ་ཡིན་གྱི་བུ་མོ་འདོད་པ་དང་། ལྷ་མིན་ལྷའི་བདུད་རྩི་བཟང་པོ་འདོད་པས་ཞེ་འགྲས་ཏེ། ལྷ་མ་ཡིན་རྣམས་རི་རབ་ཀྱི་ཁོང་གསེང་ནས་གསེར། དངུལ། ཤེལ། མན་ཤེལ། བཻ་ཌཱུརྻའི་མཚོན་ཐོགས་ཤིང་གོ་ཆ་གྱོན་ཏེ་ཆས་པ་ན་དམག་གི་བེར་གྱིས་བརྒྱ་བྱིན་གྱི་གདན་འགུལ་བས་དམག་འོང་བར་ཤེས་སོ། །དེ་རྣམས་ཀླུ་དང་འཐབ་པས་ཕམ་ན་རང་གི་གནས་སུ་ལྡོག་ལ། དཀར་པོའི་ཀླུ་རྣམས་ཕམ་ན་ཆུ་མཚམས་ནས་འཐོན་ནས་རྫུ་འཕྲུལ་གྱིས་ནམ་མཁའ་ལ་འཕགས་ནས་བང་རིམ་གྱི་ལྷ་སོགས་དང་འཐབ་བོ། །དྲན་པ་ཉེར་བཞག་ཏུ། ལྷའི་གནས་མི་གསལ་བར་བྱ་བའི་ཆེད་དུ་སྒྲ་གཅན་གྱིས་ཉི་ཟླ་ལག་པས་སྒྲིབ་ཅིང་། རྒྱལ་ཕམ་སྐྱེ་དགུའི་བདེ་སྡུག་འཛམ་བུ་གླིང་པའི་དགེ་སྡིག་ལ་རག་ལས་པ་དང་། ཟླ་བའི་མདོར། ཟླ་བ་ཟིན་པ་ན་དགེ་བ་འབུམ་འགྱུར་དང་། ཉི་མ་ཟིན་པ་ན་དགེ་བ་བྱེ་འགྱུར་དུ་བཀའ་སྩལ་ཏོ། །ལྷ་ཕམ་ན་ཕོ་ཉ་རྒྱུ་ཞིང་སོང་སྟེ། ལྷའི་དབང་པོ་མཁྱེན་པར་མཛོད་ཅིག ལྷ་མ་ཡིན་གྱི་དཔུང་ཚོགས་རྒྱལ་ཆེན་རིས་བཞི་པས་མ་ཐུབ་པས། རྩ་གསུམ་པས་བཟློག་པར་མཛོད་ཅིག་ཅེས་སྨྲས་པས་དབང་པོས་གཞན་རྣམས་ལ་བསྒོའོ། །གླང་པོ་ཆེ་རབ་བརྟན་ཡང་དབང་པོའི་བསམ་པ་ཤེས་ཏེ་དེར་ཕྱིན་ནས་ལྷ་རྣམས་རྩུབ་འགྱུར་གྱི་ཚལ་དུ་ཕྱིན་པས་འཐབ་པར་མོས་ཏེ་རི་རབ་ཀྱི་ནུབ་ཀྱི་སྟེང་དུ་འཐབ་བོ། །དྲན་པ་ཉེར་བཞག་ཏུ། ལྷ་མིན་རྣམས་རི་འཕེན་ཅིང་དེ་ཀུན་དབང་པོའི་རྡོ་རྗེས་བཅོམ་པའི་དུམ་བུ་རོལ་མཚོ་སོགས་སུ་ལྷུང་བས་སྲོག་ཆགས་དུ་མ་ཤི་སྟེ་མཚོ་དམར་པོར་འགྲོ་བར་གསུངས་སོ། །ལྷའི་མགོ་དང་རྐེད་པ་ཆད་ན་འཆི་ལ་ཡན་ལག་བཅད་ཀྱང་སྐྱེ་སྟེ་དུཿཁ་ཆེན་པོ་འབྱུང་ངོ་། །ལྷ་མ་ཡིན་མི་བཞིན་དུ་གནད་དུ་ཕོག་ན་འཆི་ལ། དེའང་གསེར་གྱི་ས་གཞིའི་སྟེང་དུ་མཚོ་ཀུན་སྣང་ལ་ཤི་བ་དང་། རྐང་ལག་ཆད་པ་ལ་སོགས་གཟུགས་བརྙན་ཤར་ཏེ་དམག་མ་ལོག་པའི་གོང་དུ་མྱ་ངན་བྱེད་པར་བཤད་དོ། །གསང་བ་བསམ་གྱིས་མི་ཁྱབ་པའི་མདོར། ཐགས་བཟང་རིས་ཀྱི་ཤིང་རྟ་དཔག་ཚད་བདུན་བརྒྱ་པ་དྲག་ཏུ་འགྲོ་བའང་དབང་པོའི་ལག་པ་གཡོན་པས་འཛིན་ནུས་པ་བཀའ་སྩལ་ཏོ། །དེ་དག་སུ་ཕམ་པ་རང་གི་གྲོང་ཁྱེར་དུ་ཞུགས་པས་བདེ་སྟེ་ཕན་ཚུན་མི་ཚུགས་སོ། །ཁམས་གོང་མ་དག་རེ་ཞིག་དུཿཁ་ཡི་དུཿཁ་ལས་འདས་ཀྱང་ཉོན་མོངས་པ་དང་སྒྲིབ་པ་དང་ལྡན་ཅིང་། འཆི་འཕོ་དང་སྐྱེ་བ་ལ་རང་དབང་མེད་པས་གནས་ངན་ལེན་གྱི་དུཿཁ་ཅན་ཏེ། རྒྱུད་བླ་མར། མི་གཙང་བ་ལ་དྲི་ཞིམ་མེད་བཞིན་འགྲོ་ལྔ་རྣམས་ལ་བདེ་བ་མེད། །ཅེས་པ་ལྟར་རོ། །བདེ་བའི་ལོངས་སྤྱོད་ལ་དམྱལ་བ་བཞིན་བདེ་བ་མྱོང་བ་མེད་དོ་ཞེས་གསུངས་པ་ནི། བདེ་བ་རྣམ་སྨིན་སྐྱེས་ཀྱི་དབང་དུ་བྱས་ཀྱི་རྒྱུ་མཐུན་སྐྱེས་ཡོད་ཅེས་ཁ་ཅིག་གསུངས་ལ། ཁ་ཅིག་ནི་དེ་སྟོན་པས་དགེ་སློང་དག་རེག་པའི་སྐྱེ་མཆེད་དྲུག་ཞེས་བྱ་བའི་སེམས་ཅན་དམྱལ་བ་ཡོད་དེ། གང་དེར་སྐྱེ་བ་ནི་ཤིན་ཏུ་དུཿཁ་བ་ཁོ་ན་ཉམས་སུ་མྱོང་བར་འགྱུར་རོ་ཞེས་བཀའ་སྩལ་པ་དེའི་དབང་དུ་བྱས་པའོ་ཞེས་སྨྲའོ། །མཛོད་འགྲེལ་དུ་ནི་མནར་མེད་ན་བདེ་བ་གཏན་མེད་ལ། གཞན་དུ་ཡང་སོས་ན་རླུང་གྲང་མོས་སོས་པ་སོགས་ཡོད་པ་དང་རྒྱུ་མཐུན་སྐྱེས་ཡོད་པའི་ལུགས་གཉིས་བཤད་དོ། །ཡི་དྭགས་རྫུ་འཕྲུལ་ཆེ་བ་ཆོས་ཀྱི་རྒྱལ་པོ་གཤིན་རྗེ་དང་། ཀླུའི་རྒྱལ་པོ་ལ་ལ་ལ་ལྷའི་དཔལ་ལྟ་བུའི་བདེ་བ་ཡོད་ཅིང་རབ་བརྟན་དང་ས་བསྲུངས་ཀྱི་བུ་དང་། རྟ་རིན་པོ་ཆེ་ལ་སོགས་ལ་བདེ་བ་ཅི་རིགས་པ་ཡོད་དོ། །མིའི་འཇིག་རྟེན་ན་གདགས་པར་འཛམ་བུའི་གླིང་ན་གསེར་དངུལ་ཉོ་བཙོང་བྱེད་ཅིང་ཤར་ན་རས་དང་བེའུ་རས་དང་། ནུབ་ན་བ་གླང་དང་། ནོར་བུ་ལ་སྟེ། བྱང་ན་མེད་དོ། །འདི་ན་ཁ་ཟས་འབྲས་ཆན་དང་འཁུར་བ་དང་། ཟན་དང་། ཕྱེ་དང་ཤ་ཆང་ཡོད་པ་ལྟར་ཤར་ནུབ་ནའང་ཡོད་ཅིང་། བྱང་ན་མ་རྨོས་མ་བཏབ་པའི་འབྲས་སཱ་ལུ་ཟའོ། །འདི་ན་ཆར་འབབ་མཁས་མི་མཁས་དང་ལོ་ལེགས་ཉེས་དང་མུ་གེ་དང་མི་དགེ་བ་དང་འཇིགས་པ་དང་། ཚ་གྲང་དང་། ཉོ་ཚོང་དང་། ཁ་དོག་དུ་མ་དང་ཁང་པ་ཆེད་དུ་བྱས་པ་དང་། བལ་གོས་དང་། གོས་སྟན་ལྗི་བ་དང་། བག་མ་གཏོང་ལེན་དང་། རྗེ་ཁོལ་དང་། དེ་རྣམས་ལ་ཞེན་པ་ཡོད་པ་ལྟར་ཤར་ནུབ་ནའང་ཡོད་ལ་བྱང་ན་ཁ་དོག་དཀར་པོ་ཁོ་ན་དང་། ཆེད་དུ་མ་བྱས་པའི་ཁང་པ་དང་། དཔག་བསམ་གྱི་ཤིང་ལས་བྱུང་བའི་གོས་སྲང་གཅིག་པ་ཡོད་ཅིང་། གང་ལའང་ཡོངས་འཛིན་མེད་དེ། བུ་ཚ་རྣམས་ཀྱང་སྐྱེས་མ་ཐག་མས་འདོར་ཞིང་རང་གི་མཐེ་བོང་ལས་ནུ་ཞོ་འབྱུང་བར་བཤད་དོ། །གླིང་བཞི་ཀ་ན་བཀྲེས་སྐོམ་དང་། ཕོ་མོའི་དབང་པོ་ཐ་དད་དང་། ཕ་མ་དང་། ཉིན་མཚན་དང་། དུས་བཞི་དང་། བཤང་གཅི་དང་། ཟླ་མཚན་དང་། སྦྲུམ་མ་དང་། བུ་བཙའ་བ་ཡོད་དོ། །དེའང་དྲན་པ་ཉེར་བཞག་ཏུ། བླུན་པོས་དགེ་བ་བྱས་པས་སྒྲ་མི་སྙན་དུ་སྐྱེ། །ཞེས་དང་། མྱ་ངན་ལས་འདས་པའི་མདོར་གཞན་གྱིས་མི་འདོད་བཞིན་དུ་ཚུལ་ཁྲིམས་བསྲུང་དུ་བཅུག་པ་ཤར་ནུབ་གཉིས་སུ་སྐྱེ་བར་བཀའ་སྩལ་ཏོ། །མིའི་ནང་ན་འཁོར་ལོས་སྒྱུར་བའི་བདེ་བ་ནི་མཆོག་སྟེ། འཁོར་ལོས་བསྒྱུར་བ་འབྱུང་བ་ནི། སྟོང་ཕྲག་བརྒྱད་ཅུ་ལས་མི་ཕྱི། དེ་མན་ཆད་དུ་ཕུན་ཚོགས་མི་རྫོགས་པས་ཚེ་ལོ་དཔག་མེད་ནས་བརྒྱད་ཁྲིའི་བར་ལ་འབྱུང་ངོ་། །སྟོབས་ཀྱི་འཁོར་ལོས་བསྒྱུར་བ་ནི་དེ་ལས་ཕྱིས་ཀྱང་ཡོད་དོ། །དེ་ལ་རིན་པོ་ཆེ་སྣ་བདུན་ཡོད་དེ། ས་འགྲེལ་དུ་མདོ་དྲངས་པ། དེ་ལ་ཚེས་བཅོ་ལྔ་ལ་ངོ་གདོང་དང་བཅས་པ་བཀྲུས་ནས་བསྙེན་གནས་བྱས་ཤིང་བློན་པོའི་ཚོགས་ཀྱིས་བསྐོར་ཏེ་འདུག་པ་ན། ཤར་ཕྱོགས་ནས་ལྷའི་འཁོར་ལོ་བརྒྱ་བྱིན་གྱི་ཚིག་གིས་ལས་ཐམས་ཅད་པས་བྱས་པ་རྒྱལ་པོ་ཆེན་པོ་བཞིས་རྒྱལ་པོ་ལ་བསྟན་པ་འབྱུང་ངོ་ཞེས་སོ། །དྲན་པ་ཉེར་བཞག་ཏུ་གསེར་ལས་བྱས་པ་དཔག་ཚད་ལྔ་བརྒྱ་པ་རྩིབས་སྟོང་ཡོད་པ་མཛེས་པ་ནམ་མཁའ་ལ་དཔག་ཚད་འབུམ་དུ་ཉི་མ་གཅིག་གིས་འགྲོ་བ་གླིང་བཞི་དང་། ལྷའི་རིས་སུ་གླང་པོ་སོགས་ཀུན་མཁའ་ལ་འགྲོ་བ། རྒྱལ་པོས་མི་ཐོབ་པ་དེས་ཐོབ་པར་བྱེད་པ་འགྲན་པ་སུ་ཡང་མེད་པར་བྱེད་པའོ། །རྒྱལ་པོ་ཤི་ནས་སྒོ་ཁང་དུ་ཟུག་ནས་སྡོད་དེ་བུ་ལ་མི་ཕན་ནོ། །ནོར་བུ་ནི་མི་ཆེན་པོའི་བརླ་ཙམ་པ་ཟུར་བརྒྱད་པ་སྟེ། མཚན་མོ་དཔག་ཚད་བརྒྱར་འོད་འབྱུང་བ། ཉི་མ་ཚ་ན་བསིལ་བ་འབྱུང་བ། སྐོམ་ན་ཆུ་ཡན་ལག་བརྒྱད་ལྡན་འབྱུང་བ། རྒྱལ་པོས་ཅི་བསམ་པ་འབྱུང་བ། དཔག་ཚད་བརྒྱར་ནད་མེད་པར་བྱེད་ཅིང་ལས་ཀུན་ལ་ཇི་ལྟར་འདོད་པའི་འབྲས་བུ་འབྱུང་བ། ཀླུ་ངན་པས་སེར་བ་སོགས་འབེབས་མི་ནུས་པ། མྱ་ངམ་དང་གཡང་སའི་ཡུལ་ཀུན་ལྗོན་པ་མཚེའུ་ཕུན་སུམ་ཚོགས་པར་འགྱུར་བ། མི་དུས་མིན་དུ་མི་འཆི་ཞིང་། དུད་འགྲོ་གང་གིས་ཀྱང་མི་གནོད་པ། སྦྲུལ་དང་ནེའུ་ལེ་ལྟ་བུའི་མི་མཐུན་པས་ཀྱང་མི་གནོད་པ་ཞིག་དབང་པོས་སྟེར་རོ། །བཙུན་མོ་ནི་ལུས་ལས་ཙནྡན་དང་། ཁ་ནས་ཨུཏྤ་ལའི་དྲི་འབྱུང་བ། རེག་ན་ཉོན་མོངས་པ་མེད་པར་འགྱུར་བ་གླིང་དེའི་བཀྲེས་སྐོམ་དང་མྱ་ངན་བྲལ་བར་བྱེད་པ། རྒྱལ་པོས་མཐོང་ན་གྲང་དུས་དྲོ་ཞིང་། དྲོ་དུས་སུ་བསིལ་བར་བྱེད་པ། མི་ཀུན་གྱིས་མ་དང་སྲིང་མོ་ལྟར་མཐོང་བ། བསམ་པ་དང་མཐུན་ཅིང་བུ་མང་པོ་བཙས་པ། ཁྱིམ་ཐབས་བུད་མེད་གཞན་ལ་འགྲོ་ན་ཕྲག་དོག་མེད་པའམ། ཁྱིམ་ཐབས་མེད་ཀྱང་འདོད་ཡོན་ལྔའི་དབང་དུ་མི་འགྱུར་བ་ཞིག་བློན་པོས་འབུལ་ཏེ། དེ་ནས་ཤི་ནས་ལྷར་སྐྱེའོ། །བློན་པོ་ནི་བྱ་བ་རྣམས་མ་བསླབས་ཀྱང་ཤེས་ནས་བྱེད་པ། མི་དགེ་བ་སྤངས་ཞིང་ཉོན་མོངས་པ་མེད་པ་སེམས་ཅན་ཀུན་ལ་ཕ་མ་ལྟར་ཕན་པའོ། །གླང་པོ་ནི་ཅང་ཤེས་ཤིང་བཀའ་ཉན་པས་ཕ་རོལ་ལས་རྒྱལ་བར་བྱེད་པ། གླང་པོ་ཆེ་སྟོང་གི་སྟོབས་ཡོད་པ། ཆུ་དང་སྐམ་དང་བར་སྣང་གསུམ་དུ་གཡུལ་འགྱེད་པ། ཉིན་གཅིག་ལ་འཛམ་བུའི་གླིང་ལན་གསུམ་འཁོར་བ། སྐུད་པས་ཀྱང་བཀྲིར་རུང་ཞིང་རྒྱལ་པོས་ཞོན་པའི་ཚེ་བསྐུལ་མི་དགོས་པ། དལ་གྱིས་འགྲོ་བ་ཞིག་དབང་པོས་སྟེར་རོ། །ས་འགྲེལ་དུ་རབ་བརྟན་གྱི་བུ་ཐ་ཆུང་ངོ་ཞེས་སོ། །རྟ་མཆོག་ནི་ཀུ་མུ་ཏ་དང་། དུང་ལྟར་དཀར་བ་གླང་པོ་དང་སྟོབས་མཚུངས་པ་ཞིག་དབང་པོས་སྟེར་རོ། །ས་འགྲེལ་དུ་རྟའི་རྒྱལ་པོ་སྤྲིན་གྱི་ཤུགས་ཅན་གྱི་བུ་ཐ་ཆུང་ལུས་སྔོ་ལ་མགོ་ནག་པའོ་ཞེས་སོ། །ཁྱིམ་བདག་ནི་མཛོད་གསེར་དངུལ་སོགས་ཀྱིས་འགེངས་ཞིང་རྒྱལ་པོའི་བཀའ་ཉན་པ་སྐྱེ་བོ་ཀུན་ལ་མི་གནོད་པའོ་ཞེས་སོ། །རྒྱལ་པོའི་སྲས་ནི་ཁྱིམ་བདག་ནི་མཛོད་ཀྱི་སྤྱན་དང་། བློན་པོ་ནི་དཔུང་གི་སྤྱན་ལྟ་བུའོ་ཞེས་འཆད་དོ། །ཉེ་བའི་རིན་ཆེན་སྣ་བདུན་ཡང་། རལ་གྲི་ཡང་རྒྱལ་པོ་དང་འགལ་བ་བྱེད་འདོད་པ་དེར་སོང་སྟེ་མ་བཏབ་ཀྱང་ཀུན་གྱིས་འདུད་པའོ། །དམག་དཔོན་ནི་དགྲའི་ཚོགས་མ་ལུས་པ་འཇོམས་པའི་ནུས་པ་ཡོད་ཀྱང་གཞན་ལ་མི་འཚེ་བའི་སྐྱེས་བུའོ། །ལྤགས་པ་ནི་ཆུར་དཔག་ཚད་བཅུ་གཉིས་ཞེང་དུ་དཔག་ཚད་ལྔ་པ། ཆར་གྱིས་མི་བརླན་ཞིང་རླུང་གིས་མི་བསྐྱོད་པ། གྲང་ན་དྲོ་ཞིང་། དྲོ་ན་བསིལ་བར་བྱེད་དོ། །བུད་མེད་ནི་མི་སྡུག་པ་མི་མཐོང་བ་ཉི་མ་ཟླ་བའི་འོད་སྣང་བ། ཀླུའི་ལྤགས་པ་རྒྱ་མཚོ་ནས་འབྱུང་བ་གང་འགྲོ་སར་བློན་པོས་ཁྱེར་ཏེ། ཁང་པའི་བྱ་བ་བྱེད་པ་ཞིག་སྟེ་ཚངས་པས་འབུལ་ལོ། །ཁང་པ་ནི་ཆུར་དཔག་ཚད་བཅུ་གཉིས། ཞེང་དུ་དཔག་ཚད་བདུན་པ། རིན་པོ་ཆེ་དང་ཟླ་བ་དང་རྒྱུ་སྐར་རྣམས་བལྟ་བར་འདོད་ན་ཁང་པ་དེར་འོང་བ། རྨི་ལམ་དགེ་བར་མཐོང་བ། གྲང་ན་དྲོ་ཞིང་ཚ་ན་བསིལ་བའི་རླུང་ལྡང་བ། དེར་ལྷ་མོ་འོང་ནས་རོལ་མོ་བྱེད་པའོ། །གོས་ནི་འཇམ་ལ་དྲི་མས་མི་གོས་པ་གྱོན་ན་ཚ་གྲང་བཀྲེས་སྐོམ་ངལ་དུབ་ཀྱིས་མི་གནོད་པ། མེས་མི་འཚིག་ཅིང་མཚོན་གྱིས་མི་ཆོད་པའོ། །ཚལ་ནི་རྒྱལ་པོས་དེར་ཕྱིན་པ་དང་ཚལ་གྱི་མཐུས་ལྷའི་བུ་མོ་དང་བྱ་སོགས་འོང་སྟེ་འདོད་ཡོན་ལ་སྤྱོད་པའོ། །མལ་ཆ་ནི་བསམ་གཏན་བྱེད་ན་རྣམ་པར་གྲོལ་ཞིང་བློ་གསལ་བ་དང་། ཀུན་ནས་ཉོན་མོངས་མི་སྐྱེ་བའོ། །ལྷྭམ་ནི་གྱོན་ན་ཆུ་ལ་མི་འབྱིང་བ་ཡུད་ཙམ་གྱིས་དཔག་ཚད་བརྒྱར་འགྲོ་བ་ལའང་ངལ་བ་མེད་པའོ། །མི་སྟོང་ཐུབ་པའི་བུ་སྟོང་དང་དགྲ་ཟིལ་གྱིས་གནོན་པའི་མདའ་གཞུའང་འབྱུང་ངོ་། །དེའི་ཁྱད་པར་ནི། གསེར་དངུལ་ཟངས་ལྕགས་འཁོར་ལོ་ཅན། །དེ་རྣམས་གླིང་གཅིག་གླིང་གཉིས་དང་། །གསུམ་དང་བཞི་ལ་མས་རིམ་བཞིན། །ལྷན་ཅིག་གཉིས་མིན་སངས་རྒྱས་བཞིན། །ཕས་བསུ་རང་འགྲོ་གཡུལ་བཤམས་དང་། །མཚོན་བརྩམས་པས་རྒྱལ་གནོད་པ་མེད། །ཅེས་བཤད་པ་སྟེ། མཚོན་བརྩམས་ནི་གཟས་པའོ། །རྒྱལ་ཡང་གསོད་པ་མེད་ཅིང་རྒྱལ་ནས་སེམས་ཅན་རྣམས་དགེ་བ་བཅུ་ལ་འགོད་པས་དེ་རྣམས་ངེས་པར་ལྷར་སྐྱེའོ། །དེ་རྣམས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀྱང་རྒྱལ་པོ་གཞན་ལས་ཁྱད་པར་དུ་འཕགས་ཏེ་རིན་ཆེན་ཕྲེང་བར། འཁོར་ལོས་བསྒྱུར་བ་ཐམས་ཅད་ལ། །འདི་རྣམས་ཡོད་པར་འདོད་མོད་ཀྱི། །དག་དང་མཛེས་དང་གསལ་བ་ནི། །སངས་རྒྱས་རྣམས་ཀྱི་ཆར་མི་ཕོད། །ཅེས་སོ། །གླིང་འདིའི་ཉེ་འཁོར་ན་འཁོར་ལོས་བསྒྱུར་བའི་ལམ་གསེར་གྱི་རང་བཞིན་རྒྱལ་ཆེན་བཞིའི་རིས་པའི་པུས་ནུབ་ཙམ་རྒྱ་མཚོར་ནུབ་པ་ཡོད་དེ། དེ་བྱུང་བ་ན་ཆུ་སྐམ་མོ། །འདིའི་རྒྱུ་ནི་བྱམས་པ་བསྒོམ་པ་སོགས་ཏེ། མཛངས་བླུན་དུ། སེང་གེ་ཡི་དམ་བརྟན་པས་རང་ཉིད་གསོད་པའི་མངོན་པ་ལ་བྱམས་པ་བསྒོམས་པས་བསྐལ་པ་འབུམ་དུ་འཁོར་ལོས་བསྒྱུར་བར་སྐྱེ་བར་གསུངས་པའོ། །འོན་ཀྱང་བྱིས་པ་དེར་སྐྱེས་པ་དུ་ཁ་ཕྱི་མ་གཉིས་ཀྱིས་གཙེས་པ་སྟེ། འཕགས་པས། འཁོར་ལོས་བསྒྱུར་བ་ཉིད་དུ་གྱུར་ནས་ཀྱང་། །འཁོར་བ་ན་ནི་ཡང་བྲན་ཉིད་དུ་འགྱུར། །ཞེས་གསུངས་པས་སོ། །འདོད་ལྷའི་བདེ་བ་ནི་ལྷ་དྲུག་ན་གོས་སྲང་ཕྱེད་དང་། སྲང་བཞི་ཆ་དང་། བརྒྱད་ཆ་དང་། བཅུ་དྲུག་ཆ་དང་། སུམ་ཅུ་རྩ་གཉིས་ཆ་དང་། དྲུག་ཅུ་རྩ་བཞིའི་ཆའོ། །རྗེ་ཁོལ་དང་བག་མ་བཏང་ལེན་དང་། ཕ་མ་དང་ཕོ་མོའི་དབང་པོ་དང་། བཀྲེས་སྐོམ་དང་། དུས་བཞི་དང་། ཉིན་མཚན་རྣམས་ཡོད་ལ། མུ་གེ་དང་། ཉོ་ཚོང་དང་། ནད་དང་རྒ་བ་མེད་ཅིང་། ཚ་གྲང་ནི་དང་པོ་ན་ཡོད་ཀྱི་དེ་ལས་གོང་ན་མེད་དོ། །ལུས་ཀྱི་ཕྱི་ནང་གཙང་ཞིང་རྡུལ་དང་དྲི་མ་དང་རུས་པ་དང་། ནང་ཁྲོལ་དང་བཤང་གཅི་མེད་དོ། །གསེར་དངུལ་ཤེལ་བཻ་ཌཱུརྻ་ལས་གྲུབ་པའི་གཞལ་མེད་ཁང་དང་བ་གམ་དང་བསིལ་ཁང་སྟེགས་བུ་དང་སྐར་ཁུངས་དྲྭ་བ་ཅན་ཉམས་དགའ་བ་ནོར་བུ་སྣ་ཚོགས་པས་སྤྲས་ཤིང་སྣང་བ་འགྱེད་པ་མཛེས་པ་ཡོད་དོ། །བཟའ་བ་འབྱུང་བའི་ལྗོན་ཤིང་དང་། དེ་བཞིན་དུ་བཏུང་བ་སྦྲང་རྩི་དང་སྦྲང་ཆང་འབྱུང་བའི་དང་། བཞོན་པ་དང་། གོས་འབྱུང་བའི་དང་། རྒྱན་འབྱུང་བའི་དང་། དྲི་བཟང་དང་། བདུག་པ་དང་། མེ་ཏོག་ཕྲེང་བ་འབྱུང་བའི་དང་། བཞད་གད་དང་། གར་དང་། གླུ་དང་རོལ་མོའི་སྒྲ་འབྱུང་བའི་དང་། སྣོད་སྤྱད་ཡོད་བྱད་སྣ་ཚོགས་འབྱུང་བའི་ལྗོན་ཤིང་རྣམས་ཡོད་དོ། །ཡན་ལག་བརྒྱད་ལྡན་གྱི་ཆུས་གང་བའི་རྫིང་བུ་དང་། མཚོ་མེ་ཏོག་སྣ་ཚོགས་དང་བྱ་སྣ་ཚོགས་ཀྱིས་སྐད་སྙན་འབྱིན་པ་ཅན་དང་། དུས་དུས་སུ་བག་མེད་ལས་བསྐུལ་བར་བྱེད་པའི་རྔ་སྒྲ་དང་། ལམ་སྲང་ཀུན་ཏུ་སིལ་སྙན་དང་། ཕེག་རྡོབ་པའི་སྒྲ་སྒྲོགས་པའི་ལྷ་མོ་མཛེས་མས་གང་བ་དང་། ས་ལ་མེ་ཏོག་མནྡ་ར་བ་པུས་ནུབ་ཙམ་གྱིས་ཁེབས་པའི་རྙིང་པ་རྣམས་རླུང་གིས་གཏོར་ཞིང་གསར་པ་རྣམས་ལེགས་པར་འགྲེམས་ཏེ། དྲན་པ་ཉེར་བཞག་ཏུ། ལྷ་རྣམས་བསོད་ནམས་དབང་རྐྱེན་གྱིས། །ལྷ་ཡི་དྲུང་དུ་རླུང་ཆེན་ལྡང་། །མེ་ཏོག་རྙིང་པ་འདོར་བྱེད་ཅིང་། །མེ་ཏོག་གསར་པ་ལེགས་པར་འགྲེམས། །ཞེས་སོ། །སུམ་ཅུ་རྩ་གསུམ་པའི་བརྩི་ཚུལ་ནི། གདགས་པ་དང་། དཀོན་མཆོག་ཏ་ལའི་གཟུངས་སུ། ཤིང་རྟ་སྣ་ཚོགས་ཀྱི་ཚལ་ན་གླང་པོ་ས་བསྲུང་གི་བུ་གཟུགས་བཟང་ཤིང་མཛེས་པ་དཀར་བ་ཡན་ལག་ལེགས་པར་གནས་པ། མགོ་དམར་བ་མཆེ་བ་དྲུག་པ། སྲིད་དུ་དཔག་ཚད་གཅིག་པ། ཁོར་ཡུག་ཏུ་བདུན་ཡོད་པ་འཁོར་གླང་པོ་བརྒྱ་སྟོང་དང་ལྡན་པ་གནས་ཏེ། ལྷ་རྣམས་སྐྱེད་མོས་ཚལ་དུ་འགྲོ་བ་ན། དེས་མགོ་སུམ་ཅུ་རྩ་གསུམ་དུ་སྤྲུལ་ཞིང་། མགོ་རེ་རེ་ལ་མཆེ་བ་དྲུག་དྲུག་དང་། དེ་རེ་རེ་ལ་རྫིང་བུ་བདུན་བདུན་དང་། དེ་རེ་རེ་ལ་པདྨའི་སྡོང་བུ་བདུན་རེ་དང་། པདྨ་རེ་རེ་ལ་ལྷ་མོ་བདུན་རེ་དང་དེ་རེ་རེ་ལ་གཡོག་མོ་བདུན་བདུན་དང་། དེ་རེ་རེ་ལ་སིལ་སྙན་ཁྲོལ་བ་བདུན་བདུན་སྤྲུལ་ཏེ། མགོ་དབུས་མ་ལ་དབང་པོ་དང་། གཞན་ལ་ཉེ་དབང་སུམ་ཅུ་རྩ་གཉིས་དང་། གླང་པོ་གཞན་རྣམས་ལ་འཁོར་རྣམས་ཞོན་ནས་འགྲོ་བ་མི་མངོན་པ་ལྟ་བུ་མགྱོགས་པས་ལྷ་རྣམས་དྲངས་ནས་སྐྱེད་མོས་ཚལ་དུ་སྐྱེལ་ལ། དེ་ནས་རྫུ་འཕྲུལ་དེ་བཏང་ནས་ལྷར་སྤྲུལ་ཏེ་འདོད་པ་ལ་སྤྱོད་པར་གསུངས་སོ། །དེ་བས་ཀྱང་གོང་མ་གོང་མ་འདོད་པའི་ཡོན་ཏན་ལྷག་ཅིང་། དགའ་ལྡན་པ་ནི་ས་བཅུའི་དབང་ཕྱུག་གི་དྲུང་ན་ཐེག་པ་ཆེན་པོའི་ཆོས་ལ་སྤྱོད་པས་ལྷག་སྟེ། དྲན་པ་ཉེར་བཞག་གི་ཚིག་ལེའུར་བྱས་པ་ལས། ཐོས་པ་མང་དང་ཆོས་འཛིན་དང་། །ཤེས་རབ་ལྡན་ཅིང་ཐར་པར་འདོད། །ཡོན་ཏན་རྣམས་ལ་དགའ་བའི་མི། །དེ་རྣམས་དགའ་ལྡན་ཉེ་བར་འགྲོ། །ཞེས་བཤད་ཅིང་། ཉི་ཁྲི་སྣང་བར་ནི། འཕགས་པ་ཁོ་ནར་དེར་སྐྱེ་བར་གསུངས་སོ། །ཁམས་གོང་མའི་བདེ་བ་ནི་མཉམ་པར་བཞག་པའི་སྟེ། དེའང་སར། བསམ་གཏན་ས་བཞི་པོ་བཏང་སྙོམས་དང་། དྲན་པ་ཡོངས་སུ་དག་པ་དང་། ཞི་བའི་བདེ་བ་ཅན་མི་གཡོ་བ་མྱོང་བ་དང་། གཟུགས་མེད་པ་ཞི་བའི་རྣམ་པར་ཐར་པའི་བདེ་བ་ཅན་མྱོང་ངོ་། །ཞེས་གསུངས་སོ། །ཁམ་ཟས་ཀྱི་ལོངས་སྤྱོད་ནི་དམྱལ་བ་ན་རླུང་རྒྱུ་བའི་ཁམ་ཟས་ཕྲ་བས་གནས་པར་སར་གསུངས་ཤིང་། མཛོད་འགྲེལ་དུ་ནི་ཐུ་ལུམ་དང་ཟངས་ཞུན་དག་གིས་བཀྲེས་སྐོམ་འཇོམས་ནུས་པས་ཟས་སུ་ཉི་ཚེ་བའི་སེམས་ཅན་དམྱལ་བ་ལ་ཁམ་ཟས་མི་དང་འདྲ་བར་ཡོད་པར་བཤད་དོ། །དུད་འགྲོ་ཡི་དྭགས་མི་རྣམས་ཀྱི་ཁམ་ཟས་རགས་ཤིང་། མེར་མེར་པོ་སོགས་ཀྱི་སེམས་ཅན་དང་། ལྷ་དང་བར་དོ་དང་། བསྐལ་པ་དང་པོའི་མི་རྣམས་ཀྱི་ཕྲ་བ་སྟེ། ཁམས་གོང་མ་ན་མེད་དོ། །འཁྲིག་པའི་ལོངས་སྤྱོད་ནི། དམྱལ་བ་ཁོ་ནར་དུཿཁ་དྲག་པོ་རྒྱུན་དུ་མྱོང་བས་ཡེ་མེད་དོ། །དུད་འགྲོ་དང་ཡི་དྭགས་དང་མི་ལ་ཡོད་ཅིང་ཁུ་བའང་འབྱུང་ངོ་། །འདོད་ལྷ་དྲུག་ལ། གཉིས་གཉིས་འཁྱུད་དང་ལག་བཅངས་དང་། །དགོད་དང་བལྟ་བས་འཁྲིག་པ་ཡིན། །ཁུ་བ་འབྱུང་བ་མེད་ཀྱི། མཚན་གྱི་སྒོ་ནས་རླུང་ཉི་ཚེ་བ་འབྱུང་བས་གདུང་བ་དང་བྲལ་ལོ། །བྱེ་བྲག་ཏུ་སྨྲ་བ་ནི། དྲུག་ཆར་གཉིས་ཀྱི་གཉིས་སྤྲོད་ཀྱང་། །གདགས་པར་དེ་སྐད་འབྱུང་བ་ནི། །འཁྲིག་པའི་དུས་ཀྱི་ཚད་ཡིན་ཞེས་སྨྲའོ། །གླིང་གསུམ་དང་ཡི་དྭགས་རྫུ་འཕྲུལ་ཆེ་བ་དང་། ལྷ་འོག་མ་བཞི་ལ་ཆུང་མ་འཆང་བ་དང་། བག་མ་བཏང་ལེན་ཡོད་ཀྱི། སྒྲ་མི་སྙན་དང་གོང་མ་གཉིས་ན་མེད་ཅིང་། ལྷ་མོ་རྣམས་ལ་མངལ་གྱི་གནས་མེད་ཅེས་པར་རོ། །ཕ་དང་མའི་ཕྲག་པའམ་པང་པར་འདོད་ལྷ་དྲུག་པོ་བྱིས་པ་ལོ་ལྔ་ལོན་པ་ནས། །ལོ་བཅུ་ལོན་པ་ལྟ་བུའི་བར། །དེ་རྣམས་སུ་སྐྱེ་གཟུགས་ཅན་རྣམས། །ཀུན་རྫོགས་གོས་དང་བཅས་པ་ཉིད། །ཅེས་ཏེ། འདོད་ཁམས་པ་ནི་ངོ་ཚ་ཁྲེལ་ཡོད་ཤས་ཆུང་བས་གཅེར་བུར་སྐྱེ་ཞིང་། རྒྱལ་བུ་དོན་གྲུབ་དང་། དགེ་སློང་མ་དཀར་མོ་དང་། དགེ་ཚུལ་མ་སྣར་མ་ནི་གོས་དང་བཅས་པར་རོ། །གཞན་རྣམས་ལུས་མྱུར་དུ་རྫོགས་ཤིང་། བརྒྱ་བྱིན་ལུས་རྫོགས་པ་སྐྱེ་བས་སྔ་ཕྱི་བརྗེ་བའང་གཞན་གྱིས་མི་ཚོར་ཏེ། ཤཱཀྱ་སེང་གེ་བཞུགས་དུས་ཀྱི་བརྒྱ་བྱིན་ནི་ཀོའུ་ཤི་ཀ་ཞེས་བྱ་བའོ། །ལྷ་ཀུན་ཀྱང་སཾ་སྐྲྀ་ཏའི་སྐད་དུ་སྨྲའོ། །དྲུག་པ་སྐྱེ་བ་ལ། འདོད་པ་སྐྱེ་བ་གསུམ་པོ་ནི། །འདོད་པའི་ལྷ་དང་མིར་བཅས་རྣམས། །བདེ་བ་སྐྱེ་བ་གསུམ་པོ་ནི། །བསམ་གཏན་གསུམ་ལས་ས་བཞི་དགུ། །ཞེས་ཏེ། མི་དང་ལྷ་དང་པོ་བཞི་འདོད་པ་ཇི་ལྟར་སྐྱེས་པ་ལ་ལོངས་སྤྱོད་པའི་དང་། འཕྲུལ་དགའ་བ་འདོད་པ་རང་གི་སྤྲུལ་པ་ལ་དབང་བྱེད་པའི་དང་། གཞན་སྤྲུལ་དབང་བསྒྱུར་བ་གཞན་གྱིས་སྤྲུལ་པ་ལའང་དབང་བྱེད་པའི་སྐྱེ་བ་སྟེ། བསམ་གཏན་དང་པོ་ན་དབེན་པ་ལས་སྐྱེས་པའི་བདེ་བ་ཅན། གཉིས་པ་ན་ཏིང་ངེ་འཛིན་ལས་སྐྱེས་པ་དང་། གསུམ་པ་ན་དགའ་བ་མེད་པའི་བདེ་བ་ཅན་གྱི་སྐྱེ་བའོ། །ཡང་དེ་ཉིད་ནི་སྒོ་ང་ལས་སྐྱེས་སོགས་ནི། སེམས་ཅན་སྐྱེ་གནས་བཞི་རྣམས་སོ། །མི་དང་དུད་འགྲོ་རྣམ་པ་བཞི། །དམྱལ་བ་རྣམས་དང་ལྷ་རྣམས་དང་། །སྲིད་པ་བར་མར་བརྫུས་ཏེ་སྐྱེ། །ཡི་དྭགས་མངལ་ནས་སྐྱེ་བའང་ཡིན། །ཞེས་ཏེ། མི་སྒོང་སྐྱེས་ནི་ཁྲུང་ཁྲུང་མོ་ལས་སྐྱེས་པ་བྲག་དང་། ཉེ་བྲག་དང་། རི་དྭགས་འཛིན་གྱི་མའི་བུ་སུམ་ཅུ་རྩ་གཉིས་དང་། རྒྱལ་པོ་ལྔ་ལེན་གྱི་བུ་ལྔ་བརྒྱ་ལྟ་བུའོ། །དྲོད་གཤེར་སྐྱེས་ནི་རྒྱལ་པོ་གསོ་སྦྱོང་འཕགས་ཀྱི་སྤྱི་བོ་ལས་ང་ལས་ནུ་དང་། དེའི་བརླ་གཡས་པ་ལས་མཛེས་པ་དང་། གཡོན་ནས་ཉེར་མཛེས་སྐྱེས་པ་དང་། རྒྱལ་པོ་ཚངས་པས་བྱིན་གྱི་བྲང་གི་ཤ་འབུར་བ་ལས་ཐི་བའི་ཕྲེང་ཅན་མ་དང་། ཨ་མྲ་སྐྱོང་མ་ཆུ་ཤིང་གི་སྡོང་པོ་ལས་སྐྱེས་པ་ལྟ་བུའོ། །བརྫུས་སྐྱེས་ནི་བསྐལ་པ་དང་པོ་རྣམས་དང་། སློབ་དཔོན་འཕགས་པའི་ལྷ་སེང་ག་ལའི་གླིང་གི་རྒྱལ་པོའི་ལྡུམ་རར་པདྨ་ལས་སྐྱེས་པ་ལྟ་བུའོ། །དུད་འགྲོ་རྫུས་སྐྱེས་ནི་ཀླུ་དང་། མཁའ་ལྡིང་སོགས་ཏེ་གདགས་པར་མཁའ་ལྡིང་བརྫུས་སྐྱེས་ཀྱིས་ཀླུ་བཞི་ཀ་དང་། དྲོད་གཤེར་སྐྱེས་པས་གསུམ་དང་། མངལ་སྐྱེས་ཀྱིས་གཉིས་དང་། སྒོང་སྐྱེས་ཀྱིས་སྒོང་སྐྱེས་ཁོ་ན་ཟ་བར་བཤད་དོ། །འོ་ན་བརྫུས་སྐྱེས་ལ་རོ་མེད་པས་ཇི་ལྟར་ཟ་ཞེ་ན། མ་ཤེས་ནས་བཟའ་བའི་ཆེད་དུ་འདྲེན་པའམ་མ་ཤིའི་བར་དུ་ཟ་བས་སོ། །ཡི་དྭགས་ནི་བརྫུས་སྐྱེས་དང་། མངལ་སྐྱེས་ཀྱང་ཡོད་དེ། ལུང་དུ། མཽའུ་མགལ་གྱི་བུ་ལ་ཡི་དྭགས་མོས་སྨྲས་པ། བདག་གིས་མཚན་མོ་བུ་ལྔ་དང་། །དེ་བཞིན་ཉིན་མོ་བུ་ལྔ་རྣམས། །བསྐྱེད་ནས་དེ་རྣམས་ཟ་མོད་ཀྱི། །འོན་ཀྱང་བདག་ནི་ཚིམ་པ་མེད། །ཅེས་སོ། །བཞི་ལས་བརྫུས་སྐྱེས་བཟང་ངོ་། །འོ་ན་རྒྱལ་བུ་དོན་གྲུབ་མངལ་ནས་སྐྱེས་པ་ཇི་ལྟར་ཞེ་ན། ཉེ་དུའི་འབྲེལ་བས་ཤཱཀྱའི་རིགས་ཆེན་པོ་ཆོས་ལ་གཟུད་པ་དང་། འདི་འཁོར་ལོས་བསྒྱུར་བའི་རིགས་སོ་ཞེས་གུས་པ་བསྐྱེད་དུ་གཞུག་པ་དང་། མིར་གྱུར་ཀྱང་གྲུབ་པ་འདི་ཐོབ་ཅེས་གདུལ་བྱ་སྤྲོ་བ་བསྐྱེད་པ་དང་། མུ་སྟེགས་རྣམས་ན་རེ། བསྐལ་པ་བརྒྱ་ན་སྒྱུ་མ་མཁན་གྱི་སྒྱུ་མས་འཇིག་རྟེན་འཚོའོ་ཞེས་ཟེར་བ་དེ་ལྟ་བུ་དོགས་པ་སྤོངས་བའི་ཆེད་དུའོ། །བདུན་པ་ནི་ལུས་ཐོབ་པ་གང་རང་ཉིད་ཀྱི་སེམས་ཀྱིས་འཆི་ཡི་གཞན་གྱི་སེམས་ཀྱིས་མིན་པ་འདོད་ལྷ་རྩེད་མོས་མྱོས་པ་དང་། ཡིད་འཁྲུགས་པར་བྱེད་པ་དང་། གཞན་གྱི་སེམས་ཀྱིས་འཕོ་ཡི་རང་གི་ཡིད་མ་ཡིན་པ་ནི་མངལ་དང་སྒོ་ང་ན་གནས་པ་རྣམས་དང་། གཉིས་ཀ་ཡིན་པ་འདོད་པ་ན་སྤྱོད་པ་གཞན་ཕལ་ཆེར་དང་། གཉིས་མིན་ནི་གཟུགས་དང་གཟུགས་མེད་པ་དང་། རྒྱལ་བས་གཏང་བའི་ཕོ་ཉ་དང་། མཐོང་ལམ་པ་དང་། བྱམས་པ་དང་། ཉོན་མོངས་པ་མེད་པ་དང་། འགོག་པ་དང་འདུ་ཤེས་མེད་པའི་སྙོམས་འཇུག་དང་། བར་དོ་དང་འཁོར་ལོས་བསྒྱུར་བ་དང་རབ་ཏུ་བྱུང་བ་སོགས་དང་། སྔར་བར་སྐབས་སུ་མི་འཆི་བར་བཤད་པ་རྣམས་སོ། །བརྒྱད་པ་རྒྱུ་རྐྱེན་ནི་བཤད་ཟིན་འཆད་པར་འགྱུར་རོ། །དོན་ཚན་བརྒྱད་པོ་འདི་དག་ནི་དཔང་ལོ་ཆེན་པོའི་ལེགས་བཤད་ལྟར་བྲིས་པའོ། །དེ་ལ་སྣོད་ཀྱི་འཇིག་རྟེན་གྱི་ཞེས་པའི་སྐབས་སུ་ཤེས་པར་བྱ་བའི་དོན། ཤེས་པར་བྱ་བའི་དངོས་པོ་གཉིས། དང་པོ་ནི། སྣོད་ཀྱི་འཇིག་རྟེན་གྱི་གནས་ཚུལ་ལོ། །གཉིས་པ་ལ་ལྔ་སྟེ། གླིང་བཞི་པ་དང་། སྟོང་སྤྱི་ཕུད་དང་། སྟོང་གཉིས་པ་དང་། སྟོང་གསུམ་པ་དང་། ཕྱོགས་བཅུའི་འཇིག་རྟེན་བཤད་པའོ། །དང་པོ་ལ་ཆགས་ཚུལ་དང་། ཚད་དང་བཀོད་པ་རྣམས་ནི་གཞུང་ཉིད་ལས་ཤེས་པར་བྱ་ཞིང་། གནས་བྱེ་བྲག་ཏུ་བཤད་ན། འཛམ་བུ་གླིང་དང་། རྒྱལ་ཆེན་རིས་བཞི་པའི་གནས་དང་། སུམ་ཅུ་རྩ་གསུམ་པའི་གནས་དང་། ལྷ་མ་ཡིན་གྱི་གནས་བྱེ་བྲག་ཏུ་བཤད་པ་བཞི་ལས། དང་པོ་ནི། འདི་ནས་བྱང་དུ་རི་ནག་པོ། །ཞེས་སོགས་ཚིགས་བཅད་གཅིག་གིས་སྟོན་ཏེ། མཆིམས་ཀྱིས་རྡོ་རྗེ་གདན་འདི་ནས་ཞེས་གསུངས་པ་ལ་ཕྱི་མ་དག་དེ་ནི་ལེགས་སྦྱར་དང་མི་མཐུན་པས་འཛམ་བུ་གླིང་འདི་ནས་ཞེས་འཆད་དགོས་ཞེས་གསུངས་ཀྱང་། འཛམ་བུ་གླིང་འདི་ནས་ཞེས་པའི་དོན་མཚན་གཞི་བཟུང་ན། སྟོན་པས་ཆོས་མངོན་པ་གསུངས་པའི་གནས་རྡོ་རྗེ་གདན་འདི་ནས་ཞེས་པ་ལས་འོས་མེད་དེ། ལུང་པ་འདི་ནས་ཞེས་སྨོས་ཀྱང་གོང་དུ་སྨོས་པའི་དེ་ཉིད་ལ་ངོས་བཟུང་དགོས་པ་བཞིན་ནོ། །དེ་ནས་རི་ནག་པོ་དགུ་ནི་བ་རི་བ་རིན་པོ་ཆེའི་རི་མ་ཡིན་པ་ས་ནག་པོ་ཞེས་སྨོས་ཏེ། ཁ་དོག་ནག་པོ་མ་ཡིན་པར་བཞེད་ལ། དེ་ལྟར་ན་རི་བོ་གངས་ཅན་དང་། སྤོས་ངད་ལྡང་བ་ཡང་ནག་པོར་འཆད་པར་འགྱུར་བས་ཁ་དོག་ནག་པོ་ཞེས་མ་ཧཱ་བཞེད་དོ། །དེ་ལྟར་དགུ་འདས་པའི་ཕ་རོལ་ན་རི་བོ་གངས་ཅན་ཡོད་ལ། དེའི་བྱང་ངོས་ན་རི་སྤོས་ངད་ལྡན་པ་ཡོད་པའི་ཚུ་རོལ་ན་ཀླུའི་རྒྱལ་པོ་མ་དྲོས་པའི་གནས་མཚོ་མ་དྲོས་པ་ཞེས་བྱ་བ་ཡན་ལག་བརྒྱད་དང་ལྡན་པའི་ཆུས་གང་བ། ཆུ་དང་། ཞེང་དང་། ཟབས་སུ་དཔག་ཚད་ལྔ་བཅུ་ཡོད་པ། མཐའ་ཉིས་བརྒྱས་འཁོར་བ་གྲུ་བཞི་པ། ཆུ་བོ་ཆེན་པོ་བཞི་འབབ་པ་ཡོད་དེ་གདགས་པ་ལས། གངྒཱ་དང་ནི་སིནྡྷུ་པཀྵཱུ་དང་། །སིཏྟཱ་རྦ་རླབས་ལྦུ་བའི་ཕྲེང་བ་ཅན། །ཐམས་ཅད་འབབ་ཅིང་གསལ་བའི་ཆུ་ཡིན་ཏེ། །ཕྱོགས་བཞིར་འཁོར་བ་འཁོར་ཡུག་དག་ནས་འབྱུང་། །གངྒཱ་ཤར་ཕྱོགས་རྒྱ་མཚོར་འགྲོ་བ་སྟེ། །སིནྡྷུ་ལྷོ་ཕྱོགས་རྒྱ་མཚོར་འགྲོ་བ་ཡིན། །པཀྵཱུ་ཡང་ནི་ནུབ་ཕྱོགས་རྒྱ་མཚོར་འགྲོ། །དེ་ཡི་བྱང་ཕྱོགས་རྒྱ་མཚོར་སིཏྟཱ་འགྲོ། །ཆུ་ཀླུང་རབ་མཆོག་བཞི་པོ་འདི་དག་ནི། །མཆོག་ཏུ་བཟང་ཞིང་ཡིད་འོང་འབབ་པ་སྟེ། །རེ་རེ་ཡང་ནི་ལྔ་བརྒྱ་ཁྱེར་ནས་ནི། །ཆུ་བོའི་རྒྱུན་རྣམས་རྒྱ་མཚོ་ཆེན་པོར་འགྲོ། །ཞེས་དང་། གངྒཱ་གླང་པོའི་ཁ་ནས་ཤར། །སིནྡྷཱུ་ཁྱུ་མཆོག་ཁ་ནས་ལྷོར། །པཀྵཱུ་རྟ་ཡི་ཁ་ནས་ནུབ། །སིཏྟཱ་སེང་གེའི་ཁ་ནས་བྱང་། །དངུལ་དང་བཻ་ཌཱུར་ཤེལ་གསེར་གྱི། །བྱེ་མ་འདྲེན་ཅིང་འབབ་པ་ཡིན། །ཞེས་སོ། །དེ་དག་ཀྱང་ཆུ་བྲན་ལྔ་བརྒྱ་དང་བཅས་ནས་མཚོ་ལ་བསྐོར་བ་ལན་གསུམ་བྱས་ནས་ཕྱིའི་རྒྱ་མཚོར་འབབ་པར་བཤད་ལ། ཕལ་པོ་ཆེར་ནི་ལན་བདུན་བདུན་བསྐོར་བར་བཤད་དོ། །དེའི་འགྲམ་ན་ཤིང་འཛམ་བུ་བྲྀཀྵ་ཞེས་བྱ་བ་འབྲས་བུ་མངར་པོ་རྫ་མ་ཙམ་དང་ལྡན་པ་དེ་སྨིན་པ་ཆུར་ལྷུང་བ་ལས་འཛམ་བུ་ཞེས་པའི་སྒྲ་དང་། འཛམ་བུ་ཆུ་བོའི་གསེར་དྲི་མ་མེད་པ་འབྱུང་སྟེ། དེས་མཚོན་པའི་གླིང་ལ་འཛམ་བུའི་གླིང་ཞེས་བྱའོ། །སྔོན་སེར་སྐྱའི་གྲོང་ཁྱེར་ན་ཡང་ཤིང་དེ་ཡོད་དེ། བྱང་ཆུབ་སེམས་དཔའ་འཛམ་བུའི་གྲིབ་མ་ལ་བསམ་གཏན་མཛད་པས་འཛམ་བུའི་གྲིབ་མས་ཁྱབ་པ་མ་བཏང་བར་བཤད་དོ། །མཚོ་མ་དྲོས་པའི་བྱང་ངོས་ན་བྲག་གསེར་གྱི་བྱ་སྐྱིབས་ཅན་ཞེས་བྱ་བ་ཆུ་ཞེང་དུ་དཔག་ཚད་ལྔ་བཅུ་གྱེན་དུ་ཕྱེད་དང་བཞི་པ་གཡོག་ལྔ་བརྒྱ་དང་བཅས་པ་དང་། རྫིང་བུ་དལ་གྱིས་འབབ་པ་ཞེས་པའི་ཆུ་ཡན་ལག་བརྒྱད་དང་ལྡན་པས་གང་བ་དེའི་ནང་ན་པདྨའི་འདབ་མ་བ་གླང་གི་ཀོ་བ་ཙམ། སྡོང་བུ་ཤོལ་འདབ་ཙམ། མེ་ཏོག་ཤིང་རྟའི་འཕང་ལོ་ཙམ་རོ་སྦྲང་རྩི་ལྟ་བུ་སྐྱེ་བ་རྫིང་གཡོག་ལྔ་བརྒྱ་དང་ལྡན་པ། ཤིང་སཱ་ལའི་རྒྱལ་པོ་རབ་བརྟན་ཞེས་པ་གཞུ་འདོམ་བཞི་བཅུ་ཐུར་དུ་ཟུག་པ། འོབ་རིམ་པ་བདུན་གྱི་དང་པོ་དཔག་ཚད་བཅུ་གསུམ་ནས་ཐ་མ་བདུན་གྱི་བར་དུ་འཕགས་པ་རྣམས་ཡོད་པ། ལྷའི་དབང་པོ་བརྒྱ་བྱིན་ལ་གླང་པོ་གཉིས་ཡོད་པའི་གཡུལ་ངོར་སྤྱད་པའི་རབ་བརྟན་ནི་ལུས་མེ་ཏོག་ཀུ་མུ་ཏ་ལྟར་དཀར་བ། མགོ་བོ་ནོར་བུ་ཆུ་ཤེལ་ལྟར་དམར་བ་མཆེ་བ་དྲུག་དང་ལྡན་པ། དཔངས་སུ་དཔག་ཚད་ཕྱེད་དང་གཉིས། སྲིད་དུ་ཕྱེད་དང་གསུམ། ཞེང་དུ་གཅིག མཐར་བདུན་གྱིས་འཁོར་བ་ཡོད་དེ། དེ་རྣམས་སུ་དགུན་དང་དཔྱིད་དང་དབྱར་ཟླ་བ་བཞི་བཞིར་གནས་ཤིང་། བླ་མ་ཁ་ཅིག་ནི་གསུམ་གསུམ་དང་། གསུམ་སུམ་ཅུ་རྩ་གསུམ་དུའོ་ཞེས་གསུངས་ཏེ། ཐོབ་ཐང་བརྩིས་པ་འདྲའོ། །གཞན་ཡང་གླིང་འདིའི་དབུས་སུ་བྱང་ཆུབ་སེམས་དཔའ་སྲིད་པ་ཐ་མ་པས་རྡོ་རྗེ་ལྟ་བུའི་ཏིང་ངེ་འཛིན་སྐྱེད་པའི་གནས་རྡོ་རྗེ་གདན་གྱི་སྤོ་ཞེས་པ་མེ་ལ་སོགས་པས་མ་འཇིག་པར་མངོན་པར་གྲུབ་པས་གླིང་གཞན་དུ་སངས་རྒྱས་མི་འབྱུང་བ་དང་། ཤར་དུ་རི་བོ་རྩེ་ལྔ་ཞེས་པ་འཇམ་པའི་དབྱངས་ཀྱི་གནས་དང་། ལྷོ་རུ་རི་བོ་གྲུ་འཛིན་ཞེས་པ་སྒྲོལ་མའམ་སྤྱན་རས་གཟིགས་ཀྱི་གནས་དང་། ནུབ་ཏུ་ཨུ་རྒྱན་ཞེས་པ་རིགས་གསུམ་མགོན་པོའི་གནས་དང་། དུས་འཁོར་བ་ལྟར་ན་བྱང་དུ་ཤམྦྷ་ལ་ཞེས་པ་རིགས་ལྡན་གྱི་རྒྱལ་པོའི་གནས་རྣམས་ཡོད་དོ། །གཞན་ཡང་གླིང་འདིར་ཐོ་དཀར་དང་། རྒྱ་ཡུལ་དང་། ཧུ་ལུ་ན་དང་། སྐམ་པོ་རྩེ་དང་། ཤ་ཁ་དང་། སྦལ་པ་དང་། ཁྱི་གདོང་དང་། ཀྲི་ཝ་ཤ་རི་ཀ་དང་། གནམ་གདོང་དང་། ཕྱིར་ཕྱོགས་གདོང་དང་། བཤོག་ཐོག་གཅེར་བུ་དང་། རྒུར་ཏེ་འགྲོ་བ་དང་། སྣ་མེད་དང་། ཀློ་ཁ་ཀྲ་ལ་སོགས་པ་ཡུལ་ཆེན་པོ་བཅུ་དྲུག་དང་། ཡུལ་ཕྲན་སྟོང་ཕྲག་དང་བཅས་པ་དང་གྲོང་ཁྱེར་ཆེན་པོ་དྲུག་གིས་བརྒྱན་པའི་ཡུལ་དབུས་དང་མཐའ་འཁོབ་ཀྱིས་རབ་ཏུ་ཕྱེ་བའི་མི་རིགས་དང་། སྐད་རིགས་སྣ་ཚོགས་པ་དང་། ལྷོ་ཕྱོགས་ན་རི་རྒྱལ་མ་ལ་ཡ་ཞེས་པ་དུག་གསུམ་ཤས་ཆེ་བའི་རྟགས་སུ་རྩེ་མོ་ན་ཕུག་རོན་དང་། རྐེད་པ་ན་སྦྲུལ་དང་། རྩ་བ་ན་ཕག་གནས་པ་དང་། གཞན་ཡང་རི་བྱ་རྐང་དང་། འབིགས་བྱེད་དང་། མནྡ་ར་བ་ལ་སོགས་པ་དུ་མས་བརྒྱན་པའོ། །གཉིས་པ་ལ་གཉིས་ཏེ། རི་ལ་བརྟེན་པའི་གནས་དང་། གཞལ་མེད་ཁང་ལ་བརྟེན་པའི་གནས་སོ། །དང་པོ་ནི། རི་རབ་ལ་བང་རིམ་བཞི་ཡོད་པའི་དང་པོ་ལ་ལག་ན་ཡོལ་གོ་ཐོགས་པ་དང་། ཁྲག་ཐོགས་པ་དང་། རྟག་མྱོས་དང་། ཕྲེང་ཐོགས་རྣམས་གནས་པར་ས་ལས་བཤད་ལ། འདིར་ནི། དེ་ལ་ལག་ན་གཞོང་ཐོགས་དང་། །ཕྲེང་ཐོགས་དང་ནི་རྟག་མྱོས་དང་། །རྒྱལ་ཆེན་བཞི་པའི་ལྷ་རྣམས་གནས། །ཞེས་གསུངས་སོ། །དེ་ཡང་བང་རིམ་བཞི་པའི་ཤར་ཕྱོགས་ན་ཡུལ་འཁོར་སྲུང་གི་ཕོ་བྲང་ཡུལ་འཁོར་སྲུང་དང་། ལྷོར་འཕགས་སྐྱེས་པོའི་ཕོ་བྲང་འཕགས་པར་སྐྱེས་པ་དང་། ནུབ་ཏུ་མིག་མི་བཟང་གི་ཕོ་བྲང་སྣ་ཚོགས་གཟུགས་དང་། བྱང་དུ་རྣམ་ཐོས་སྲས་ཀྱི་ཕོ་བྲང་ལྕང་ལོ་ཅན་ཏེ། འདི་ན་གསང་བའི་བདག་པོ་ཕྱག་ན་རྡོ་རྗེ་བཞུགས་པར་གསང་བ་བསམ་གྱིས་མི་ཁྱབ་པའི་མདོ་ལས་གསུངས་སོ། །སར་ནི་རི་གཉའ་ཤིང་འཛིན་གྱི་ངོས་བཞི་ན་ཡོད་པར་གསུངས་སོ། །དེ་རྣམས་ནི་གདགས་པར་ཆུ་ཞིང་དུ་དཔག་ཚད་ཉིས་བརྒྱ་ལྔ་བཅུ་པ། ཁོར་ཡུག་ཏུ་དཔག་ཚད་སྟོང་གིས་འཁོར་བ། གྲུ་བཞི་པ་ལམ་སྲང་དང་། སྐྱེད་མོས་ཚལ་དང་། དཔག་བསམ་གྱི་ཤིང་། རྫིང་བུ་དང་། གསེར་གྱི་རྭ་བ་དང་། ཟམ་པ་རྒྱུན་མ་དང་། གསེར་གྱི་བྱེ་མ་བརྡལ་བ་དང་། ཙནྡན་གྱི་ཆུས་ཆག་ཆག་བཏབ་པ་དང་། ཚོན་སྣ་བརྒྱ་རྩ་གཅིག་གིས་མིག་མང་རིས་སུ་བྲིས་པ་སོགས་ཁྱད་པར་ཅན་དུ་མ་བཤད་དོ། །རི་བདུན་དང་ལྕགས་རི་ལ་ཡང་དེ་དག་གི་གྲོང་དང་། གྲོང་རྡལ་ཡོད་དོ། །གཉིས་པ་ནི། ཉི་མ་དང་། ཟླ་བ་དང་། སྐར་མ་རྣམས་ཏེ། དེ་དག་ལ་ཡང་རྒྱལ་ཆེན་རིས་བཞི་པའི་ལྷ་གནས་ཤིང་། གཞན་ཡང་ཆུ་ཀླུང་དང་ལྗོན་ཤིང་དང་། ནགས་ཚལ་དང་། ས་བླ་དང་། ནམ་མཁའ་དང་། རྒྱ་མཚོ་རྣམས་ལ་ཡང་དེ་དང་དེ་ཡི་ལྷ་གནས་ཏེ། མཛོད་འགྲེལ་དུ་དེ་ཉིད་ཀྱི་ཕྱིར་ལྷའི་རིས་ཐམས་ཅད་སས་ཕྱེ་བའོ་ཞེས་གསུངས་པས་སོ། །གསུམ་པ་ནི། འདིར་ནི། ལྷུན་པོའི་རྩེ་ན་སུམ་ཅུ་གསུམ། །དེ་ཡི་ངོས་ལ་བརྒྱད་ཁྲིའོ། །ཞེས་སོགས་གསུངས་སོ། །དབུས་ན་གྲོང་ཁྱེར་བལྟ་ན་སྡུག འདིར་ངོས་ལ་ཉིས་སྟོང་ལྔ་བརྒྱ་པར་གསུངས་ཤིང་། སར་ནི་ཆུ་ཞེང་དུ་དཔག་ཚད་ཁྲི་ཁྲི་ཡོད་པར་གསུངས་སོ། །གདགས་པར་དེ་གསེར་གྱི་རྭ་བ་དང་དཔག་ཚད་ཕྱེད་གསུམ་པས་བསྐོར་བ། རྩིག་སྐྱབས་གསེར། དངུལ། བཻ་ཌཱུརྻ། ཤེལ་ལས་བྱས་པ། མདའ་ཡབ་བཟང་པོ་བཞི་དང་ལྡན་པ། སྒོ་སྟོང་དུ་གཅིག་གིས་མ་ཚང་བ། སྒོ་ལ་དཔངས་སུ་དཔག་ཚད་ཕྱེད་དང་གསུམ་དང་། ཞེང་དུ་ཕྱེད་དང་གཉིས་ཡོད་པ། རིན་པོ་ཆེའི་རྒྱན་དུ་མས་སྤྲས་པ། སྒོ་རེ་རེ་ལ་ཡང་སྲུང་མ་གོ་མཚོན་ཐོགས་པ་ལྔ་བརྒྱ་ལྔ་བརྒྱ་ཡོད་པ། ལམ་སྲང་ཞེང་དུ་དཔག་ཚད་བཅུ་གཉིས་དང་། རིང་བར་ཉིས་སྟོང་ལྔ་བརྒྱ་པས་མཛེས་པ། གསེར་གྱི་བྱེ་མ་བརྡལ་བའོ་ཞེས་བཤད། དེའི་དབུས་ན་བརྒྱ་བྱིན་གྱི་ཕོ་བྲང་རྣམ་པར་རྒྱལ་བྱེད་ངོས་རེ་ལ་དཔག་ཚད་ཉིས་བརྒྱ་ལྔ་བཅུ་པ། གྲོང་ལས་དཔག་ཚད་ཕྱེད་དང་ལྔས་གྱེན་དུ་འཕགས་པ། རྨང་རིན་པོ་ཆེ་བཞི་ལས་བྱས་པ། ཐེམ་སྐས་བཞི་དང་ལྡན་པ། ཀ་བ་བཞི་གསེར། དངུལ། བཻ་ཌཱུརྻ། ཤེལ་ལས་བྱས་པ། ཀ་རྟེན་དང་། ཀ་གཞུ་དང་། བྲེ་ཕུལ་དུང་ལ་སོགས་པས་བྱས་པ། བ་གམ་བརྒྱ་རྩ་གཅིག་པ། བ་གམ་རེ་རེ་ལ་ཁང་པ་རྩེགས་པ་བདུན་བདུན། དེ་རེ་རེ་ལ་ཁང་མིག་བདུན་བདུན། དེ་རེ་རེ་ལ་ལྷ་མོ་བདུན་བདུན། དེ་རེ་རེ་ལ་གཡོག་མོ་བདུན་བདུན། དེ་རེ་རེ་ལ་སིལ་སྙན་འཁྲོལ་བ་བདུན་བདུན་ཡོད་པའོ། །དེའི་ཕྱི་རོལ་དུ་ཚལ་བཞི་ནི། ཤིང་རྟ་སྣ་ཚོགས་པ་དང་། རྩུབ་འགྱུར་དང་། འདྲེས་པའི་ཚལ་དང་། དགའ་བས་བརྒྱན་པ་བཞི་ཡོད་ལ། དེའི་ཕྱི་རོལ་དཔག་ཚད་ཉི་ཤུས་བཅད་པ་ན་ས་གཞི་བཟང་པོ་ཚལ་ལ་འགྲན་པ་ལྟ་བུ་དང་། གྲོང་ཁྱེར་གྱི་ཕྱིའི་བྱང་ཤར་མཚམས་ན་ཤིང་ཡོངས་འདུས་ས་བརྟོལ་ཞེས་བྱ་བ་དཔག་ཚད་ལྔ་བཅུ་ཐུར་དུ་ཟུག་པ། བརྒྱ་གྱེན་དུ་འཕགས་པ། ཡལ་ག་དང་འདབ་མས་བརྒྱད་ཅུའམ་ལྔ་བཅུར་ཁྱབ་པ། མེ་ཏོག་གི་དྲི་རྫི་ཕྱོགས་སུ་དཔག་ཚད་བརྒྱ་དང་། རྫི་ཕྱོགས་མིན་པར་ལྔ་བཅུ་ལྡང་བའོ། །གྲོང་ཁྱེར་དེའི་ལྷོ་ནུབ་མཚམས་ན་ཆོས་བཟང་ལྷའི་མདུན་ས་ཡོད་ལ། དེའི་འདབས་ན་ཨར་མོ་ནི་ཀ་ལྟ་བུའི་རྡོ་ལེབ་དཀར་པོ་ཆུ་ཞེང་དུ་དཔག་ཚད་བརྒྱ་དང་། རྔམས་སུ་དྲུག་དང་བཅོ་བརྒྱད་ཀྱི་ཆ་ཡོད་པ། དབུས་ན་བརྒྱ་བྱིན་གྱི་སེང་གེའི་ཁྲི་དང་། ཉེ་འཁོར་ན་ཉེ་དབང་རྣམས་ཀྱི་ཁྲི་ཡོད་པའོ། །བཞི་པ་ལྷ་མ་ཡིན་གྱི་གནས་ནི་རི་རབ་ཆུ་ལ་ནུབ་པའི་ཁོང་སེང་ན་ཡོད་དེ། དྲན་པ་ཉེར་གཞག་ལས། དཔག་ཚད་སུམ་ཁྲི་ན་འོད་ལྡན་གྱི་གྲོང་ན་སྒྲ་གཅན་དང་། དེ་ནས་བཞི་སྟོང་ན་དཀར་ཕྲེང་གི་གྲོང་ན་མགུ་ཕྲེང་དང་། དེ་ནས་བཞི་སྟོང་ན་བརྟན་པའི་གྲོང་ན་རབ་རྣོན་དང་། དེ་ནས་བཞི་སྟོང་ན་ཟབ་པའམ་གསེར་ལྡན་གྱི་གྲོང་ན་ཐགས་བཟང་རིས་གནས་སོ། །དེ་རྣམས་དམའ་ཤོས་བཟང་ཞིང་བཞི་པའི་གསེར་གྱི་ས་གཞི་ལ་བལྟ་ན་སྡུག་གི་དོད་གསེར་ལྡན་དང་། རྣམ་རྒྱལ་གྱི་དོད་སྡོམ་པ་ཅན། ཆོས་བཟང་གི་དོད་ནོར་བཟང་དང་། ཡོངས་འདུའི་དོད་ཙི་ཏྲ་པ་ཏྲ་བ། ཟླ་བ་དཀར་པོའི་དོད་རྡོ་ལེབ་བཟང་པོ་དང་། ཚལ་བཞི་ནི། ཤར་སོགས་ན་ཀུན་དགའ་དང་། རབ་དགའ་དང་། དགའ་བ་དང་། ཀུན་དགའ་རྭ་བའོ། །ས་གཞི་བཞི་ནི་ཀུན་དགའ་ཅན་ནས་ཀུན་དགའ་རྭ་བ་ཅན་གྱི་བར་རོ། །གླང་པོ་ཆེ་རབ་བརྟན་གྱི་དོད་བཟོད་པར་དཀའ་བ་དང་། ས་སྲུང་གི་བུའི་དོད་ཏི་སེ་གངས་བརྩེགས་དང་། རྟ་སྤྲིན་གྱི་ཤུགས་ཅན་གྱི་དོད་བྲག་འཇིངས་ཞེས་བྱ་བའོ། །གཉིས་པ་སྟོང་སྤྱི་ཕུད་ནི། གླིང་བཞི་པ་དང་ཉི་མ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །ཅེས་གསུངས་ཤིང་། ཚངས་པའི་འཇིག་རྟེན་ནི་བསམ་གཏན་དང་པོའོ་ཞེས་སློབ་དཔོན་རྒྱལ་པོའི་སྲས་དང་། ཨ་བྷྱ་འཆད་ལ། ཁ་ཅིག མི་དགེ་བ་ལས་ཚངས་པས་ན་གཟུགས་ཁམས་པ་ཀུན་ཡིན་ཏེ། ཕལ་པོ་ཆེར་སྟོང་གསུམ་ལ་འོག་མིན་བྱེ་བ་ཕྲག་བརྒྱ་ཡོད་པར་བཀའ་སྩལ་པས་སོ་ཞེས་གསུངས། དཔང་ལོས་དེ་དག་གདུལ་བྱའི་བསམ་པ་དང་མཐུན་པའི་མདོ་སོ་སོའི་བཤད་པར་མངོན་ནོ་ཞེས་བཤད་དོ། །འདི་ལ་ཆུ་དང་རླུང་གིས་འཇིག་ཚུལ་དང་བསྟུན་ན་ཕལ་པོ་ཆེའི་མདོ་ལྟར་དག་གམ་སྙམ་མོ། །གསུམ་པ་སྟོང་གཉིས་པ་ནི། དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །ཞེས་པ་ལྟར་རོ། །བཞི་པ་སྟོང་གསུམ་ནི། དེ་སྟོང་ལ་ནི་སྟོང་གསུམ་མོ། །མཉམ་དུ་འཇིག་ཅིང་འབྱུང་བ་ཡིན། །ཞེས་གསུངས་ཏེ། འཇིག་པ་ནི་མེ་ལ་སོགས་པས་འཇིག་པའོ། །འབྱུང་བ་ནི་སྣོད་བཅུད་ཆགས་པའོ། །སྟོང་གསུམ་གྱི་འཇིག་རྟེན་ཁམས་ལ་ཁོར་ཡུག་ཆེན་པོས་བསྐོར་བར་མངོན་པ་གོང་མར་བཤད་དོ། །ལྔ་པ་ཕྱོགས་བཅུའི་འཇིག་རྟེན་བཤད་པ་ནི། ཕྱོགས་བཅུའི་ཞིང་ཐམས་ཅད་མཉམ་དུ་འཇིག་ཅིང་ཆགས་པ་མ་ཡིན་ཏེ། ཆར་གྱི་རྒྱུན་གཉའ་ཤིང་ཙམ་བབས་པ་ན་བར་མཚམས་མི་མངོན་པ་བཞིན། ཕྱོགས་བཅུའི་ཞིང་ལ་ལ་ཆགས་པ་དང་། ལ་ལ་འཇིག་པའི་བར་མཚམས་མི་མངོན་པར་མངོན་པ་གོང་མར་གསུངས་པའི་ཕྱིར་རོ། །འདི་ལ་བྱེ་བྲག་སྨྲ་བས་སྣོད་གཅིག་གི་སྟེང་འོག་ན་སྣོད་མེད་ཀྱི་ཐད་ཀར་མཐའ་མེད་དུ་གནས་ཏེ། མདོར་འཆགས་འཇིག་ཕྱོགས་བཞིར་བར་མཚམས་མེད་པར་གསུངས་ཀྱི། སྟེང་འོག་ཏུ་མ་གསུངས་པའི་ཕྱིར་རོ་ཞེས་སྨྲའོ། །ཕལ་པོ་ཆེར་ཞིང་རབ་འབྱམས་དེ་རྣམས་ནི་ནམ་མཁའ་དང་། ནོར་བུའི་རྒྱ་མཚོ་དང་། པདྨའི་རྒྱ་མཚོ་དང་། སངས་རྒྱས་ཀྱི་སྐུའི་བྱིན་པ་ལ་སོགས་པ་ལ་གནས་ཤིང་། དབྱིབས་ནི་ཟླུམ་པོ་དང་། ཟུར་གསུམ་དང་། གྲུབ་བཞི་དང་། ནོར་བུ་དང་། པདྨ་དང་། འཁོར་ལོ་ལྟ་བུ་དང་། ཟུར་བརྒྱད་པ་དང་། སངས་རྒྱས་ཀྱི་མཚན་ལྟ་བུར་བཤད་དོ། །སངས་རྒྱས་རི་རབ་འོད་ཡང་དག་པར་འཕགས་པའི་ཞིང་ཡིད་རབ་ཏུ་དགའ་བ་ན་འཛམ་བུ་གླིང་ལ་དཔག་ཚད་བྱེ་བ་དང་། གླིང་གཞན་གསུམ་ལ་བརྒྱད་ཁྲི་རེ་ཡོད་པར་གསུངས་པ་དང་། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱི་མདོར། འདས་པའི་དུས་སུ་སངས་རྒྱས་སེང་གེའི་བློ་གྲོས་བྱོན་པ་ན་འཛམ་བུ་གླིང་འདི་ལ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་ཡོད་པ་དང་། ཡབ་སྲས་མཇལ་བར། རྒྱལ་པོ་གྲགས་པ་མཐའ་ཡས་ཀྱི་དུས་སུ་འཛམ་བུའི་གླིང་འདིར་ནི་རྒྱར་དཔག་ཚད་ཁྲི་བརྒྱད་སྟོང་པར་འགྱུར་ཞེས་བཀའ་སྩལ་པ་དང་། མངོན་པར་དགའ་བའི་ཞིང་ན་གསེར་དངུལ་གྱི་སྐས་ལ་འཛེགས་ནས་སུམ་ཅུ་རྩ་གསུམ་དུ་འགྲོ་སྟེ་མི་རྣམས་ལྷ་ལ་མི་སྨོན་ཅིང་། ལྷ་རྣམས་འཛམ་བུ་གླིང་ན་སངས་རྒྱས་བཞུགས་སོ་ཞེས་སྨོན་པར་མི་འཁྲུགས་པའི་ཞིང་གི་བཀོད་པར་འབྱུང་བ་སོགས་སོ། །ཡང་འཇམ་དཔལ་གྱི་ཞིང་གི་བཀོད་པར་སངས་རྒྱས་ནོར་བུ་བརྩེགས་པའི་ཞིང་ན་ཉི་ཟླ་མེད་པར་སངས་རྒྱས་ཀྱི་ནོར་བུས་གསལ་བར་བྱེད་པ་བཀའ་སྩལ་པ་དང་། སངས་རྒྱས་ཀུན་ཏུ་བཟང་པོའི་ཞིང་མིག་མི་འཛུམ་པ་ན་སྟོང་གསུམ་རིལ་པོ་ཉི་ཟླ་ཟུང་གཅིག་གིས་གསལ་བར་བྱེད་ཅེས་འབྱུང་བ་དང་། ཕལ་པོ་ཆེའི་ལེའུ་དགུ་པར། ཞིང་རྣམས་ལ་ལ་འོད་མེད་དེ། །བདུན་པའི་འཇིགས་པ་ཤིན་ཏུ་ཆེ། །རེག་ན་སྡུག་བསྔལ་སྤུ་གྲི་འདྲ། །བལྟ་ན་མི་བཟད་ཅི་ཡང་གཡའ། །ཞིང་རྣམས་ལ་ལ་ལྷ་འོད་ཅན། །ལ་ལ་ཁྱིམ་གྱི་འོད་ཅན་ཏེ། །ལ་ལ་ཉི་ཟླའི་འོད་དང་ལྡན། །ཞིང་རྣམས་ལ་ལ་རང་གི་འོད། །ཤིང་གི་འོད་ཅན་དྲི་མ་མེད། །ལ་ལ་རི་བོའི་འོད་ཅན་སྟེ། །ཞིང་རྣམས་ལ་ལ་ནོར་བུའི་འོད། །ལ་ལ་མར་མེའི་འོད་ཅན་སྟེ། །ཞིང་རྣམས་ལ་ལ་སངས་རྒྱས་འོད། །ཞིང་རྣམས་ལ་ལ་པདྨའི་འོད། །སྤོས་ཆུའི་འོད་དང་ལྡན་པའང་ཡོད། །སྨོན་ལམ་དབང་གིས་རྣམ་པར་སྦྱངས། །ཞེས་དང་། ཡང་རྒྱན་གྱི་ཁྱད་པར་ཡང་། ཞིང་གི་རྒྱན་མངས་བྱེ་བ་ཡིས། །ཞིང་རྣམས་ལ་ལ་རྣམ་པར་བྲིས། །རྒྱན་དང་ཚུལ་རྣམས་ཐ་དད་པར། །སྣ་ཚོགས་མིག་གཡོར་ལྟ་བུར་སྣང་། །ཞེས་དང་། ཡང་སངས་རྒྱས་ཡོད་མེད་ཀྱི་ཁྱད་པར་ཡང་། ཞིང་རྣམས་ལ་ལར་སངས་རྒྱས་མེད། །ཞིང་རྣམས་ལ་ལར་སངས་རྒྱས་བཅས། །ལ་ལའི་ཞིང་ན་སངས་རྒྱས་གཅིག །ལ་ལར་སངས་རྒྱས་མང་པོའོ། །ཞེས་དང་། ཡང་གནས་པའི་ཡུན་ཡང་། ཞིང་རྣམས་ལ་ལ་བསྐལ་པ་ཙམ། །ལ་ལ་བསྐལ་པ་བཅུ་པ་སྟེ། །ཞིང་རྣམས་ལ་ལ་རྡུལ་མཉམ་པའི། །བསྐལ་པ་བྱེ་བར་བརྗོད་པ་ཡིན། །ཞེས་བཀའ་སྩལ་ཏོ། །ཡང་འཇིག་རྟེན་གྱི་ཁམས་ཐད་ཀ་བ་འདི་ལྟ་བུ་དང་། སྣྲེལ་ཞི་ལ་སོགས་ལ་རྐང་པ་བཙུགས་པ་དང་། སྤྱིའུ་གཙུགས་སུ་འགྲོ་བ་གསུམ་དུ་འཆད་དེ། ཕྱི་མ་གཉིས་ནི་ས་བཅུ་པའི་འགྲེལ་པར། འཆོལ་བ་གོ་རིམ་དུ་མི་གནས་པ་དང་། སྟེང་གཡོགས་མེད་པར་ཁྱིམ་གནས་པ་མ་བྱས་པར་བཀྲལ་ལོ། །ནམ་ཕྱེད་ཉི་མ་ནུབ་པ་དང་། །ཉི་མ་ཕྱེད་དང་འཆར་དུས་གཅིག །ཅེས་པའི་སྐབས་སུ། དུས་བཞི་འཆོལ་བའི་ལུགས། དུས་བཞི་གཅིག་ཆར་བའི་ལུགས། འཐད་པའི་ཕྱོགས་ངོས་བཟུང་བ་དང་གསུམ་ལས། དང་པོ་ལ་བཞི་སྟེ། འཆོལ་བའི་ལུགས་བརྗོད། གཞུང་ནས་བསྟན་པའི་དུས་བཞི་གང་ལ་འབྱུང་ངོས་བཟུང་བ། ཉི་མ་མྱུར་བུལ་གྱི་རྒྱུ་མཚན། ཉི་མས་གླིང་དུ་ལ་བྱ་བ་བྱེད་ངོས་བཟུང་བའོ། །དང་པོ་ནི། སྔོན་གྱི་མཁས་པ་ཁ་ཅིག་ན་རེ། འཛམ་བུ་གླིང་དུ་དགུན་ཉི་ཐུང་བ་མཐར་ཐུག་པའི་ཚེ་བྱང་སྒྲ་མི་སྙན་དུ་དབྱར་ཉི་རིང་བ་མཐར་ཐུག་པ་དང་། ཤར་ལུས་འཕགས་གླིང་དུ་དཔྱིད་ཉིན་མཉམ་མཚན་མཉམ་དང་། ནུབ་བ་གླང་ལོངས་སྤྱོད་དུ་སྟོན་ཉིན་མཉམ་མཚན་མཉམ་འབྱུང་ངོ་། །དེའི་ཚེ་འཛམ་བུ་གླིང་དུ་ཉིན་མོ་ལ་ཡུད་ཙམ་བཅུ་གཉིས། མཚན་མོ་ལ་ཡུད་ཙམ་བཅོ་བརྒྱད། བྱང་དུ་དེ་ལས་ལྡོག་པ་འབྱུང་ཞིང་། ཤར་གྱི་སྔ་དྲོ་ལ་ཡུད་ཙམ་དགུ་འབྱུང་སྟེ། བྱང་གི་ཕྱི་དྲོ་ལ་ཡུད་ཙམ་དགུ་ཡོད་པ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར་རོ། །ཤར་གྱི་ཕྱི་དྲོ་ལ་ཡུད་ཙམ་དྲུག་འབྱུང་སྟེ། ལྷོའི་སྔ་དྲོ་ལ་ཡུད་ཙམ་དྲུག་འབྱུང་བ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར། དེའི་ཚེ་ནུབ་ཀྱི་སྔ་དྲོ་ལ་ཡུད་ཙམ་དྲུག་འབྱུང་སྟེ། ལྷོའི་ཕྱི་དྲོ་ལ་ཡུད་ཙམ་དྲུག་འབྱུང་བ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར་རོ། །དེ་ནས་ཟླ་བ་གསུམ་སོང་བ་ན་འཛམ་བུའི་གླིང་དུ་དཔྱིད་ཉིན་མཚན་མཉམ་པ་དང་། ནུབ་ཏུ་དགུན་ཉི་ཐུང་བའི་མཐར་ཐུག་དང་། བྱང་དུ་སྟོན་ཉིན་མཉམ་མཚན་མཉམ་དང་། ཤར་དུ་དབྱར་ཉི་རིང་བའི་མཐར་ཐུག་པ་འབྱུང་ལ་དེ་ནས་ཟླ་བ་གསུམ་སོང་བ་ན་འཛམ་བུ་གླིང་དུ་དབྱར་ཉི་རིང་བའི་མཐར་ཐུག་པ་དང་། གཞན་རྣམས་དེས་འགྲེ། དེ་ནས་ཟླ་བ་གསུམ་སོང་བ་ན་འཛམ་བུའི་གླིང་དུ་སྟོན་ཉིན་མཉམ་མཚན་མཉམ་དང་། གཞན་རྣམས་དེས་འགྲེ་སྟེ། དེ་རྣམས་གླིང་གང་རུང་གཅིག་གིས་ལོ་གཅིག་ལ་འཁོར་བའོ། །གཉིས་པ་ནི། ལུགས་འདི་ལ་འཛམ་བུའི་གླིང་དུ་ནམ་ཕྱེད་པ་དང་། ནུབ་ཏུ་ཉི་མ་ནུབ་པ་དང་། བྱང་དུ་ཉི་མ་ཕྱེད་པ་དང་། ཤར་དུ་ཉི་མ་ཤར་བ་རྣམས་དུས་གཅིག་པ་ཞག་རེ་བཞིན་དུ་འབྱུང་བས་ཁྱབ་བོ། །གསུམ་པ་ནི། འོ་ན་ཉི་མ་གླིང་གི་དཀྱིལ་གྱི་ཐད་ཀྱི་ནམ་མཁར་འགྲོ་བའི་ཚེ་ལམ་ཐུང་ཡང་འགྲོ་བ་བུལ་བ་དང་། གླིང་གི་ཕྱི་རོལ་རྒྱ་མཚོར་འབབ་པའི་ཚེ་ལམ་རིང་ཡང་བགྲོད་པ་མྱུར་བའི་རྒྱུ་མཚན་ཅི་ཞེ་ན། རྒྱ་མཚོར་འབབ་པའི་ཚེ་རང་འདྲེན་བྱེད་ཀྱི་རླུང་གི་སྟེང་དུ་ལྕགས་རི་ཁའི་རླུང་བསྣན་པས་ཤིན་ཏུ་མྱུར་ལ། དེ་ནས་རི་རབ་ལ་ཐག་ཉེར་སོང་བའི་ཚེ་ལྕགས་རི་ཁའི་རླུང་དང་ཇེ་འགྱང་དུ་སོང་བས་བགྲོད་པ་ཇེ་བུལ་དུ་སོང་ལ། བྱང་བགྲོད་མཐར་ཐུག་པའི་ཚེ་རང་འདྲེན་བྱེད་ཀྱི་རླུང་ཁོ་ནས་འདྲེན་པས་ཤིན་ཏུ་བུལ་བར་སྔོན་གྱི་མཁས་པ་དག་བཞེད་དོ། །བཞི་པ་ནི། ལུགས་འདི་ལ་ཉི་མས་གླིང་གཉིས་ནི་སྣང་བར་བྱེད་པ་དང་། གླིང་གཉིས་ནི་མུན་པར་བྱེད་པ་རྒྱུན་དུ་འབྱུང་ངོ་། །གཉིས་པ་ལ་བཞི་སྟེ། ཅིག་ཆར་བའི་ལུགས་བརྗོད། གཞུང་ནས་བསྟན་པའི་དུས་བཞི་གང་ནས་འབྱུང་ངོས་བཟུང་། ཉི་མ་མྱུར་བུལ་གྱི་རྒྱུ་མཚན། ཉི་མས་གླིང་དུ་ལ་བྱ་བ་བྱེད་བཤད་པའོ། །དང་པོ་ནི། མཁས་པ་ཁ་ཅིག གླིང་བཞི་ཆར་དུ་དགུན་དགུན་མཉམ། དཔྱིད་དཔྱིད་མཉམ། དབྱར་དབྱར་མཉམ། སྟོན་སྟོན་མཉམ་འབྱུང་ངོ་། །གཉིས་པ་ནི། གླིང་བཞི་ལ་ནམ་ཕྱེད་ཉི་མ་ནུབ་པ་དང་། ཉི་མ་ཕྱེད་དང་འཆར་དུས་གཅིག་པ། སྟོན་ཉིན་མཉམ་མཚན་མཉམ་གྱི་དུས་ཉིན་ཞག་གཅིག་དང་། དཔྱིད་ཉིན་མཉམ་མཚན་མཉམ་གྱི་དུས་ཉིན་ཞག་གཅིག་ཁོ་ན་ལ་འབྱུང་གི་གཞན་རྣམས་ལ་མི་འབྱུང་ངོ་། །གསུམ་པ་ནི་སྔ་མ་དང་འདྲའོ། །བཞི་པ་ནི་ཉི་ཟླས་གླིང་གཅིག་ཁོ་ན་ལ་བྱ་བ་བྱེད་པའི་དུས་ཡོད་དེ། དགུན་ཉི་ཐུང་བ་མཐར་ཐུག་པའི་ཚེ་གླིང་གང་རུང་གཅིག་གི་ཉིན་ཕྱེད་ཀྱི་དུས་སུ་གླིང་དེ་ཁོ་ན་ལ་བྱ་བ་བྱེད་པའི་ཕྱིར་ཏེ། གླིང་གཅིག་ཤོས་ནས་ཉི་མ་ནུབ་ནས་ཡུད་ཙམ་གསུམ་སོང་། གཅིག་ཤོས་སུ་ཉི་མ་ཤར་བ་ལ་ཡུད་ཙམ་གསུམ་ལུས་པས་དེ་ལ་བྱ་བ་མི་བྱེད་པའི་ཕྱིར་རོ། །དེ་ནས་ཡུད་ཙམ་གསུམ་སོང་བ་ན་མདུན་ཕྱོགས་ཀྱི་གླིང་ལ་ཉི་མ་ཤར་བས་གླིང་གཉིས་ལ་བྱ་བ་བྱེད་ཅིང་། དེ་ནས་ཡུད་ཙམ་དྲུག་སོང་བ་ན་མདུན་ཕྱོགས་ཀྱི་གླིང་དུ་ཉི་མ་ཕྱེད་པའི་ཚེ་གླིང་དེ་ཁོ་ན་ལ་བྱ་བ་བྱེད་པའི་ཚུལ་ནི་སྔར་བཞིན་ནོ། །ཡང་ཉི་མས་གླིང་གཉིས་ཁོ་ན་ལ་བྱ་བ་བྱེད་པ་ཡོད་དེ། སྟོན་དཔྱིད་ཀྱི་ཉིན་མཉམ་མཚན་མཉམ་གྱི་དུས་ཀྱི་ཞག་གཉིས་པོ་དེ་ལ་གླིང་གཉིས་ཁོ་ན་ལ་བྱ་བ་བྱེད་པའོ། །ཉི་མས་གླིང་གསུམ་ལ་བྱ་བ་བྱེད་པ་ཡང་ཡོད་དེ། དབྱར་ཉི་རིང་བ་མཐར་ཐུག་པའི་ཚེ། གླིང་གང་རུང་གཅིག་གིས་ཉིན་ཕྱེད་ཀྱི་དུས་སུ། གླིང་གཅིག་ཤོས་ནས་ཉི་མ་ནུབ་པ་ལ་ཡུད་ཙམ་གྱི་གསུམ་ལུས། མདུན་ཕྱོགས་ཀྱི་གླིང་དུ་ཉི་མ་ཤར་ནས། ཡུད་ཙམ་གསུམ་སོང་བའི་ཕྱིར་རོ། །ལུགས་འདི་ལ་གླིང་གང་རུང་གཅིག་གི་དཀྱིལ་དུ་ཉི་མ་ཡོད་པའི་ཚེ་ཉི་མའི་འོད་ཟེར་གྱི་མཐའ་ཟད་མ་ཟད་ཀྱི་སྒོ་ནས་ཉི་མ་འཆར་ནུབ་འཇོག་པ་ཡིན་གྱི་སྒྲིབ་བྱེད་ཡོད་མེད་ཀྱི་སྒོ་ནས་འཆར་ནུབ་འཇོག་པ་མ་ཡིན་ཏེ། ཐང་ཆེན་པོའི་དཀྱིལ་དུ་མར་མེ་བཞག་པ་བཞིན་ནོ་ཞེས་ཟེར་རོ། །གསུམ་པ་ནི། ལུགས་དེ་གཉིས་ལས་གང་ཞིག་འཐད་ཅེ་ན། ལུགས་དང་པོ་ལ་སྐྱོན་འདི་ལྟར་གནས་ཏེ། འཛམ་བུ་གླིང་དུ་དཔྱིད་ཉིན་མཉམ་མཚན་མཉམ་གྱི་དུས་ཀྱི་ཉི་མ་འཆར་ཁའི་ཐད་ཀྱི་ནམ་མཁའ་དེ་ཆོས་ཅན། ཁྱོད་ལས་ཉི་མ་བྱང་དུ་ཅུང་ཟད་ཀྱང་བགྲོད་དུ་མེད་པར་ཐལ། ཁྱོད་ཤར་ལུས་འཕགས་གླིང་གི་ཉི་མ་བྱང་བགྲོད་མཐར་ཐུག་པའི་ཉི་མ་གནས་པའི་ནམ་མཁའ་ཡིན་པའི་ཕྱིར། རྟགས་ཁས་བླངས་ཏེ། དུས་བཞི་འཆོལ་བ་དང་། ནམ་ཕྱེད་སོགས་བཞི་པོ་དུས་གཅིག་པ་རྒྱུན་དུ་འབྱུང་བར་ཁས་བླངས་པས་སོ། །རྩ་བར་འདོད་ན། དེ་ནས་བཟུང་སྟེ་དབྱར་ཉི་རིང་བ་མཐར་ཐུག་པའི་བར་ཟླ་བ་གསུམ་དུ་ཤར་ཕྱོགས་ཀྱི་ཉི་མ་ཡང་བྱང་བགྲོད་དུ་འགྲོ་བ་མངོན་སུམ་དུ་མཐོང་བས་བསལ་ལོ། །དེ་བཞིན་དུ་འཛམ་བུ་གླིང་དུ་སྟོན་ཉིན་མཉམ་མཚན་མཉམ་གྱི་དུས་ཀྱི་ཉི་མ་འཆར་བའི་ཚེ་ཉི་མ་གནས་པའི་ནམ་མཁའ་ཆོས་ཅན། ཁྱོད་ལས་ཉི་མ་ལྷོར་ཅུང་ཟད་ཀྱང་བགྲོད་དུ་མེད་པར་ཐལ། ཁྱོད་ཤར་ལུས་འཕགས་གླིང་དུ་ཉི་མ་ལྷོ་བགྲོད་མཐར་ཐུག་པའི་དུས་ཀྱི་ཉི་མ་གནས་པའི་ནམ་མཁའ་ཡིན་པའི་ཕྱིར། འདོད་ན་དེ་ནས་ཟླ་བ་གསུམ་གྱི་བར་ཤར་ཕྱོགས་ཀྱི་ཉི་མ་ལྷོ་བགྲོད་དུ་འགྲོ་བར་མངོན་སུམ་གྱིས་མཐོང་བས་གསལ་ལོ། །སྐྱོན་འདི་དག་ཉིན་ཕྱེད་ཀྱི་དུས་ལ་སོགས་པ་གང་ལ་སྦྱར་ཀྱང་འདྲའོ། །མདོར་ན་སྟོན་དཔྱིད་ཀྱི་ཉིན་མཉམ་མཚན་མཉམ་ནས་ཟླ་བ་གསུམ་གྱི་བར་ཉི་མ་འཆར་ས་དང་གནས་པའི་ཉི་མ་ལྷོ་བགྲོད་དང་བྱང་བགྲོད་སོ་སོར་འབྱུང་ན་ལུགས་འདི་འཐད་ཀྱང་དེ་མི་སྲིད་པས་འདི་མི་འཐད་པ་ཁོ་ནའོ། །དེས་ན་ལུགས་ཕྱི་མ་དེ་ཉིད་འཐད་པར་མཐོང་སྟེ། ཉི་ཟླའི་མཐོ་དམན་ནི་གསེར་རི་དང་པོ་དང་མཉམ་ཞིང་། འཆར་ས་ནི་གསེར་རི་བདུན་ཆར་བརྒལ་ནས་ཕྱིའི་རྒྱ་མཚོའི་དཀྱིལ་དུ་གླིང་དཀྱིལ་ཕན་ཆད་དུ་འཆར་བས་ཉི་མའི་འོད་ཟེར་གྱི་ནུས་པ་མ་ཟད་ན་གླིང་གསུམ་ཆར་གསལ་བ་ལ་སྒྲིབ་བྱེད་ཅུང་ཟད་ཀྱང་མེད་པའི་ཕྱིར་རོ། །ཕྱོགས་འདི་ལའང་དབྱར་ཉི་རིང་བ་མཐར་ཐུག་པའི་ཚེ། ཉིན་ཞག་གཅིག་ལ་ཡུད་ཙམ་སུམ་ཅུ་སོ་དྲུག་ཡོད་པར་ཐལ། དེའི་ཚེ་འཛམ་བུ་གླིང་གི་ཉིན་བར་ལ་ཡུད་ཙམ་བཅོ་བརྒྱད་ཡོད་པ་གང་ཞིག བྱང་སྒྲ་མི་སྙན་གྱི་ཉིན་བར་ལ་ཡང་ཡུད་ཙམ་བཅོ་བརྒྱད་ཡོད་པ་དེ་འཛམ་བུ་གླིང་གི་མཚན་མོར་བྱ་དགོས་པའི་ཕྱིར་རོ། །ཞེས་པ་འདི་གནོད་བྱེད་དུ་འཇུག་གོ་སྙམ་ན། གཏན་ཚིགས་ཕྱི་མ་མ་གྲུབ་སྟེ། དེའི་ཚེ་འཛམ་བུའི་གླིང་དུ་ཉི་མ་འཆར་བའི་ཚེ་བྱང་སྒྲ་མི་སྙན་དུ་ཉི་མ་ནུབ་པ་ལ་ཡུད་ཙམ་གསུམ་ལུས་པའི་ཕྱིར་དང་། འཛམ་བུའི་གླིང་དུ་ཉི་མ་ནུབ་པའི་ཚེ་སྒྲ་མི་སྙན་དུ་ཉི་མ་ཤར་ནས་ཡུད་ཙམ་གསུམ་སོང་བ་དེའི་ཉིན་མོ་ལྷོའི་འཛམ་བུ་གླིང་པའི་མཚན་མོ་དང་མི་མཉམ་པའི་ཕྱིར་རོ། །དེ་བཞིན་དུ་ལྷོ་བགྲོད་མཐར་ཐུག་པའི་ཚེ་ཉིན་ཞག་གཅིག་ལ་ཡུད་ཙམ་ཉི་ཤུ་རྩ་བཞི་ལས་མེད་པར་ཐལ་བ་ཡང་འདི་ཉིད་ཀྱིས་གསལ་ཏེ། ནམ་ཕྱེད་ཉི་མ་ནུབ་པ་དང་། ཉི་མ་ཕྱེད་དང་འཆར་དུས་གཅིག་པ་ལོ་གཅིག་ལ་ཉིན་ཞག་གཉིས་ལས་མེད་པའི་གནད་འདི་ཤེས་ན་ཐམས་ཅད་རང་གྲོལ་དུ་འགྱུར་རོ། །གཞུང་འོག་མ་དང་ཡང་འདི་ཉིད་འབྲེལ་ཏེ་འོག་ཏུ་བཤད་པར་བྱའོ། །དབྱར་གྱི་ཟླ་བ་གཉིས་པ་ཡི་ཞེས་པའི་སྐབས་སུ་ཐུན་མོང་དུ་མཁོ་བ་ཐ་སྙད་ཀྱི་རྣམ་གཞག དེ་ལ་བརྟེན་ནས་དུས་ཚིགས་ཀྱི་རྣམ་གཞག་བྱེ་བྲག་ཏུ་བཤད་པ་གཉིས་ལས། དང་པོ་ནི། མགོ་དང་རྒྱལ་དང་མཆུ་ནི་དགུན། །དབོ་དང་ནག་པ་ས་ག་དཔྱིད། །སྣྲོན་དང་ཆུ་སྟོད་གྲོ་བཞིན་དབྱར། །ཁྲུམ་དང་ཐ་སྐར་སྨིན་དྲུག་སྟོན། །ཞེས་པ་འདི་རྣམས་ནི་ཉ་སྐར་ཡིན་ལ། ཟླ་བཤོལ་འབྱུང་བ་ལ་ཉེ་བའི་ཚེ་འདི་ལ་འབབ་པའི་ངེས་པ་ནི་མེད་དོ། །ཐ་སྐར་བྲ་ཉེ་སྨིན་དྲུག་དང་། །སྣར་མ་མགོ་ལག་ནམ་སོ་རྒྱལ། །སྐག་མཆུ་གྲེ་དབོ་མེ་བཞི་དང་། །ནག་པ་ས་རི་ས་ག་དང་། །ལྷ་མཚམས་སྣོན་སྣུབ་ཆུ་སྟོད་སྨད། །གྲོ་བཞིན་མོན་གྲེ་མོན་གྲུ་དང་། །ཁྲུམ་སྟོད་ཁྲུམ་སྨད་ནམ་གྲུ་རྣམས། །རྒྱུ་སྐར་ཉི་ཤུ་བདུན་དུ་འདོད། །ཅེས་པ་སྟེ། མགོ་དང་རྒྱལ་གྱི་བར་དུ་ལག་དང་ནམ་སོ་གཉིས། གྲོ་བཞིན་དང་ཁྲུམ་སྟོད་ཀྱི་བར་དུ་མོན་གྲེ་དང་མོན་གྲུ་གཉིས། ཁྲུམ་སྟོད་དང་ཐ་སྐར་གྱི་བར་དུ་ཁྲུམ་སྨད་དང་ནམ་གྲུ་གཉིས། གཞན་རྣམས་ཀྱི་བར་དུ་རེ་རེ་སྤེལ་བར་བྱའོ། །གཉིས་པ་ལ་ལྔ་སྟེ། དུས་ཚིགས་ཀྱི་རབ་དབྱེ། དེ་ལྟར་ཕྱེ་བའི་དགོས་པ། དུས་འགོ་གང་ནས་འཛིན་པ། གསོ་སྦྱོང་བཅུ་བཞི་པ་གང་ལ་འབྱུང་བ། ཟླ་བ་ཤོལ་འདོར་བ་རྒྱུ་མཚན་དང་བཅས་པའོ། །དང་པོ་ལ་བཞི། གསུམ་དང་། བཞི་དང་། ལྔ་དང་། དྲུག་ཏུ་དབྱེ་བའོ། །དང་པོ་ནི། དགུན་གྱི་དུས། དཔྱིད་ཀྱི་དུས། དབྱར་གྱི་དུས་གསུམ་དུ་བྱས་ནས་དེ་རེ་རེ་ལ་ཟླ་བ་བཞི་བཞིར་བྱེད་པ་ནི་སངས་རྒྱས་པའི་ལུགས་ཐུན་མོང་མ་ཡིན་པ་ཡིན་ཏེ། འདིར་ཡང་། དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། །དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་བཟློག །ཅེས་དང་། ཚིག་ལེར། ཁ་བ་སོས་ཀ་དབྱར་རྣམས་ཀྱི། །ཟླ་བ་གཉིས་དང་བཞི་ཡི་ཉིན། །ཞེས་དང་། རྒྱལ་པོའི་སྲས་སུ་གསུང་རབ་ལས་ནི་དུས་གསུམ་ཁོ་ན་ཡིན་གྱི་འཇིག་རྟེན་པའི་ལྟ་བུར་དྲུག་ནི་མ་ཡིན་ཏེ། དགུན་སྟོད་ནི་གྲང་བར་འདྲ་བའི་ཕྱིར་དགུན་དུ་བཤད་དོ། །སོས་ཀ་ནི་ཚ་བར་འདྲ་བའི་ཕྱིར་དཔྱིད་དུ་བཤད་དོ། །སྟོན་སྨད་ནི་ཆར་པ་འབབ་ཏུ་འདྲ་བའི་ཕྱིར་དབྱར་དུ་བཤད་དོ། །དེ་ལྟར་ན་དགུན་དང་དཔྱིད་དང་། དབྱར་དག་ཡིན་ནོ་ཞེས་པ་ལྟར་རོ། །གཉིས་པ་ནི། དགུན། དཔྱིད། དབྱར། སྟོན་གྱི་དུས་དང་བཞིར་ཕྱེ་ནས་དེ་རེ་རེ་ལ་ཡང་ར་བ། འབྲིང་པོ། ཐ་ཆུང་གསུམ་གསུམ་དུ་བྱས་པ་སྟེ། མདོ་རྩར། དབྱར་གནས། དགག་དབྱེ། སྲ་བརྐྱང་གི་སྐབས་རྣམས་སུ་འདིའི་ཐ་སྙད་གསུངས་ཤིང་དགེ་སློང་གི་ལོ་དྲི་བར་དགུན་གྱི་ཚད་ཇི་ཙམ་ཞེ་ན། ཟླ་བ་བཞིའོ། །བཞི་པོ་གང་ཞེ་ན། དགུན་ཟླ་ར་བ་དང་། འབྲིང་པོ་དང་། ཐ་ཆུང་དང་། དཔྱིད་ར་བ་དག་གོ་ཞེས་དང་། རྒྱ་ཆེར་འགྲེལ་ལས་ཀྱང་། སྟོན་ཟླ་ཐ་ཆུང་ཉ་ནས་དགུན་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་ཞེས་སོགས་དང་། དེ་བཞིན་དུ་བཞི་འགྲེལ་ལས་ཀྱང་འདིའི་ཐ་སྙད་གསུངས་པའི་ཕྱིར་རོ། །གསུམ་པ་ནི། དགུན། དཔྱིད། དབྱར། དབྱར་ཐུང་ངུ་། དབྱར་རིང་པོའི་དུས་དང་ལྔར་ཕྱེ་སྟེ། དགུན་དང་དཔྱིད་ཀྱི་དུས་ལ་ཟླ་བ་བཞི་བཞི། དབྱར་གྱི་དུས་ཟླ་བ་གཅིག དབྱར་ཐུང་ངུའི་དུས་ཉིན་ཞག་གཅིག དབྱར་རིང་པོའི་དུས་ཟླ་བ་གསུམ་དུ་ཉིན་ཞག་གཅིག་གིས་མཆོག་པ་སྟེ། འདི་ནི་ལུང་བཞི་དང་། ཀརྨ་ཤཱ་ཏམ་དང་། མདོ་རྩའི་དགེ་སློང་གི་དུས་བརྗོད་པའི་སྐབས་རྣམས་ལས་གསུངས་སོ། །བཞི་པ་ནི། དགུན་དང་། དགུན་སྨད་དང་། དཔྱིད་དང་། སོས་ཀ་དང་། དབྱར་དང་། སྟོན་གྱི་དུས་དྲུག་ཏུ་ཕྱེ་ནས་དེ་རེ་རེ་ལ་ཡང་ཟླ་བ་གཉིས་གཉིས་སུ་བྱས་པ་སྟེ། མདོ་རྩར་ཉིན་ཞག་གཅིག་གིས་མི་ཆོག་པར་བྱའོ། །དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ནའོ་ཞེས་པའི་རྒྱ་ཆེར་འགྲེལ་ལས། སྟོན་ཟླ་ཐ་ཆུང་ཉ་ནས་དགུན་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་དགུན་གྱི་དུས་ཚིགས་སོ། །དགུན་ཟླ་འབྲིང་པོའི་ཉ་ནས་དཔྱིད་ཟླ་ར་བ་ཉའི་བར་གྱི་ཟླ་བ་གཉིས་ནི། དགུན་སྨད་ཀྱི་དུས་སོ། །དཔྱིད་ཟླ་ར་བ་ཉ་ནས་དཔྱིད་ཟླ་ཐ་ཆུང་ཉའི་བར་གྱི་ཟླ་བ་གཉིས་ནི་དཔྱིད་ཀྱི་དུས་སོ། །དཔྱིད་ཟླ་ཐ་ཆུང་ཉ་ནས་དབྱར་ཟླ་འབྲིང་པོའི་ཉའི་བར་གྱི་ཟླ་བ་གཉིས་ནི་སོས་ཀའི་དུས་སོ། །དབྱར་ཟླ་འབྲིང་པོའི་ཉ་ནས་སྟོན་ཟླ་ར་བའི་ཉའི་བར་གྱི་ཟླ་བ་གཉིས་ནི་དབྱར་གྱི་དུས་སོ། །སྟོན་ཟླ་ར་བ་ཉ་ནས་སྟོན་ཟླ་ཐ་ཆུང་ཉའི་བར་གྱི་ཟླ་བ་གཉིས་ནི་སྟོན་གྱི་དུས་སོ་ཞེས་གསུངས་པས་སོ། །གཉིས་པ་ནི། དེ་ལྟར་དུས་ཚིགས་དུ་མའི་རྣམ་གཞག་ལ་དགོས་པ་ཅི་ཡོད་སྙམ་ན། དུས་ཚིགས་གསུམ་དུ་ཕྱེ་བའི་དགོས་པ་ནི། ཕྱག་དར་ཁྲོད་ཀྱི་གོས་ངོས་ཟིན་པའི་ཆེད་ཡིན་ཏེ། ཕྱག་དར་ཁྲོད་ལ་བོར་བ་ཕྱག་དར་ཁྲོད་དང་། དམན་པ་ཕྱག་དར་ཁྲོད་གཉིས་ལས། ཕྱི་མ་ནི་གཞན་གྱིས་ཟླ་བ་བཞིར་ལོངས་སྤྱོད་པ་ལ་འཇོག་པའི་ཕྱིར་ཏེ། མདོ་རྩར་དུས་ཚིགས་སུ་སྤྱད་པ་ལ་ནི་དེ་གཉིས་འགྱུར་དུའོ་ཞེས་གསུངས་པས་སོ། །དུས་ཚིགས་བཞིར་ཕྱེ་བའི་དགོས་པ་ནི། འཇིག་རྟེན་པ་དང་ཐ་སྙད་སྒོ་བསྟུན་ནས་རྟོགས་སླ་བའི་ཆེད་ཡིན་ཏེ། འཇིག་རྟེན་ན་རབ་འབྲིང་པོ་སོགས་ཀྱི་ཐ་སྙད་ཕྱེད་པའི་ཕྱིར་རོ། །ལྔར་ཕྱེ་བའི་དགོས་པ་ནི་དབྱར་ཐུང་ངུ་ཤི་བ་དང་འདྲ་བ་ངོས་ཟིན་པའི་ཆེད་ཡིན་ལ། དེ་ཡི་དགོས་པ་ཡང་དེ་ལས་འདས་ན་དབྱར་ཁས་ལེན་པ་མི་ཆགས་ཞེས་ཤེས་པའི་ཆེད་ཡིན་ནོ། །འདིའི་ངོས་འཛིན་ལ། ཕྲན་འགྲེལ་ལས་དབྱར་ཟླ་ཐ་ཆུང་གི་ཚེས་བཅུ་དྲུག་ནི་དབྱར་ཐུང་ངུ་ཡིན་ནོ་ཞེས་དང་། དགེ་སློང་གི་ལོ་དྲི་བར་དབྱར་ཐུང་ངུའི་དུས་ཉིན་ཞག་གཅིག་གོ །དེ་གང་ཞེ་ན་སྟོན་ཟླ་ར་བ་ཚེས་གཅིག་གི་ཉིན་ཞག་གོ་ཞེས་ངོས་འཛིན་གཉིས་བྱུང་བའི་དང་པོ་ནི་ཡར་ངོ་སྔོན་འགྲོ་དང་། ཕྱི་མ་ནི་མར་ངོ་སྔོན་འགྲོའི་དབང་དུ་བྱས་པ་ཡིན་པས་མི་འགལ་ཞིང་གནད་གཅིག་ཏུ་འབྱུང་ངོ་། །དྲུག་ཏུ་ཕྱེ་བའི་དགོས་པ་ནི། གསོ་སྦྱོང་བཅུ་བཞི་པ་ངོས་ཟིན་པའི་ཆེད་ཡིན་ཏེ། རྩ་འགྲེལ་ཉིད་ན་གསལ་ལོ། །གསུམ་པ་ལ་གསུམ་སྟེ། ཞག་གི་འགོ་གང་ནས་འཛིན་པ། ཟླ་བའི་འགོ་གང་ནས་འཛིན་པ། ལོའི་འགོ་གང་ནས་འཛིན་པའོ། །དང་པོ་ནི། སྤྱིར་ཞག་ནི་གསུམ་སྟེ། ཚེས་ཞག་དང་། ཉིན་ཞག་དང་། ཁྱིམ་ཞག་གོ །དང་པོ་ནི། ཟླ་བ་འཕེལ་གྲིབ་ལ་སུམ་ཅུར་བྱས་པའི་ཆ་གཅིག་གམ། གཟའ་བདུན་ཚེས་ལ་སྤྱོད་པའི་ཡུན་ནོ། །གཉིས་པ་ནི། ནམ་ལངས་པ་ནས་སང་ནམ་ལངས་ཁའི་བར་རོ། །གསུམ་པ་ནི། ལུག་གླང་འཁྲིག་པ་ཀརྐ་ཊ། །སེང་གེ་བུ་མོ་སྲང་སྡིག་པ། །གཞུ་དང་ཆུ་སྲིན་བུམ་པ་ཉ། །ཞེས་པའི་ཁྱིམ་དེར་ཉི་མ་ཇི་ཙམ་གནས་པའི་སུམ་ཅུའི་ཆ་གཅིག་གོ །ལོ་རེ་ལ་དེ་དག་ཇི་ཙམ་འབྱུང་ན་འདིར་ཟླ་བ་གཉིས་གཉིས་ནས་ཞག་མི་ཐུབ་དོར་བའི་རགས་རྩིས་ཀྱི་དབང་དུ་བྱས་ན་ཚེས་ཞག་སུམ་བརྒྱ་དོན་གཅིག ཉིན་ཞག་སུམ་བརྒྱ་དང་རེ་ལྔ། ཁྱིམ་ཞག་སུམ་བརྒྱ་དང་དྲུག་ཅུ་ཐམ་པ་འབྱུང་སྟེ། མཛོད་ལས། ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག །ཅེས་པའི་དབང་དུ་བྱས་པའོ། །དེ་ལྟར་ན་ཚེས་ཞག་གི་འགོ་ནི་གཟའ་བདུན་ཚེས་ལ་ལོངས་སྤྱོད་པའི་འགོ་ནས་འཛིན་དགོས་པས་ཉིན་མཚན་སྔ་ཕྱི་གང་ལ་འབྱུང་བ་ངེས་པ་མེད་དོ། །ཉིན་ཞག་གི་འགོ་ནི་ནམ་ལངས་པ་ནས་འཛིན། ཁྱིམ་ཞག་གི་འགོ་ནི་ཉི་མ་ཁྱིམ་བཅུ་གཉིས་པོ་གང་རུང་གཅིག་ལ་ལོངས་སྤྱོད་པའི་སུམ་ཅུའི་ཆ་དང་པོ་ནས་འཛིན་དགོས་པས་འདིའང་གང་ལ་འབྱུང་ངེས་པ་མེད་དོ། །གཉིས་པ་ནི། དུས་ཚིག་བཞིར་བྱས་པ་ལ་ཡར་ངོའི་ཚེས་གཅིག་ནས་འཛིན་པ་དང་། མར་ངོའི་ཚེས་གཅིག་ནས་འཛིན་པ་གཉིས་འབྱུང་སྟེ། དང་པོ་ནི། མདོ་རྩར། དབྱར་སྔ་མའི་ཁས་ལེན་དབྱར་ཟླ་འབྲིང་པོའི་ཚེས་བཅུ་དྲུག་ལ་བྱེད་པ་དང་། དེའི་དགག་དབྱེ་སྟོན་ཟླ་འབྲིང་པོའི་ཉ་ལ་བྱེད་པར་གསུངས་ཤིང་། རྒྱ་ཆེར་འགྲེལ་ལས་སྟོན་དཔྱིད་གཉིས་འབྲིང་མི་ཐུབ། དབྱར་དགུན་གཉིས་ར་བ་དང་། ཐ་ཆུང་མི་ཐུབ་པར་གསུངས་པ་རྣམས་སྟེ། མར་ངོའི་ཚེས་གཅིག་ལ་བཅུ་དྲུག་ཞེས་པའི་ཐ་སྙད་ཉིད་ཀྱིས་ཡར་ངོའི་སྔོན་འགྲོ་ཡིན་པར་གྲུབ་པའི་ཕྱིར་དང་། སྟོན་དཔྱིད་གཉིས་འབྲིང་མི་ཐུབ་པར་གསུངས་པ་འདིའང་ཡར་ངོ་སྔོན་འགྲོ་མ་ཡིན་ན་གསོ་སྦྱོང་བཅུ་བཞི་པ་གང་ལ་འབྱུང་བའི་ཉ་སྐར་དང་མི་འགྲིགས་པའི་ཕྱིར་ཏེ་འོག་ཏུ་འཆད་དོ། །གཉིས་པ་ནི་དགེ་སློང་གི་ལོ་དྲི་བར། གསོ་སྦྱོང་དུ་ཡོད། ཉི་ཤུ་རྩ་བཞི་སྟེ། དགུན་ཟླ་འབྲིང་པོ་དང་། དབྱར་ཟླ་ར་བ་དང་། ཐ་ཆུང་དང་། དབྱར་ཟླ་འབྲིང་པོ་དང་། སྟོན་ཟླ་ར་བ་དང་། ཐ་ཆུང་རྣམས་ཀྱི་མར་ངོའི་གསོ་སྦྱོང་ནི་བཅུ་བཞི་པའོ། །ལྷག་རྣམས་ནི་བཅོ་ལྔ་པའོ་ཞེས་གསུངས་པ་འདི་ར་བ་ཐ་ཆུང་གི་འགོ་མར་ངོའི་ཚེས་གཅིག་ནས་བཟུང་བའི་དབང་དུ་བྱས་པ་ཡིན་པའི་ཕྱིར་ཏེ། གཞན་དུ་ན་སྔར་གྱི་རྒྱ་ཆེར་འགྲེལ་གྱི་ལུང་དང་འགལ་བས་གང་རུང་གཅིག་འདོར་དགོས་པར་ཐལ་བའི་ཕྱིར་དང་། སྨིན་དྲུག་ཅན་ལ་གསོ་སྦྱོང་བཅུ་བཞི་པར་འབྱུང་བར་གསུངས་པ་དང་། འདིར་སྟོན་ཟླ་ཐ་ཆུང་ལ་གསོ་སྦྱོང་བཅུ་བཞི་པར་གསུངས་པ་གཉིས་དོན་གཅིག་ཏུ་བྱས་པའི་ཕྱིར་ན་མར་ངོ་སྔོན་དུ་འགྲོ་བ་ལས་འོས་མེད་པའི་ཕྱིར་རོ། །དེའི་དང་པོ་ལ་རིལ་ཚེས་དང་། ཕྱི་མ་ལ་ཕྱེད་ཚེས་ཞེས་པར་གྲགས་སོ། །གཞན་དུས་ཚིགས་ཀྱི་རྣམ་གཞག་གསུམ་པོ་དང་། ཉ་སྐར་གྱི་མིང་ནས་སྨོས་པའི་ཟླ་བ་ཐམས་ཅད་ལ་མར་ངོ་སྔོན་འགྲོ་འབའ་ཞིག་གསུངས་ཀྱི་ཡར་ངོ་སྔོན་འགྲོ་གསུངས་པ་མ་ཡིན་ནོ། །གསུམ་པ་ལ་བོད་ཀྱི་མཁས་པ་རྣམས་ཀྱི་འདོད་ཚུལ་གསུམ་སྣང་སྟེ། དེང་སང་ཧོར་ཟླ་བ་བརྒྱད་པར་བྱས་པ་ཁྲུམ་གྱི་ཉ་བའི་ཉ་ལ་ལོ་སྔ་མའི་ལོ་འཇུག་རྫོགས་ནས། དེའི་ཕྱི་དེ་ཉིན་པར་ནས་ལོ་འགོ་འཛིན་པར་འདོད་པ་དང་། ཧོར་ཟླ་དགུ་པ་ཐ་སྐར་གྱིས་ཉ་བའི་ཕྱི་དེ་ཉིན་པར་ནས་འཛིན་པ་དང་། ཧོར་ཟླ་བཅུ་པ་སྨིན་དྲུག་གི་ཉ་བའི་ཕྱི་དེ་ཉིན་པར་ནས་འཛིན་པར་འདོད་པའི་ལུགས་སོ། །དེ་ཐམས་ཅད་ཀྱང་དུས་ཚིགས་ཀྱི་དབྱེ་བ་བཞི་ཆར་ལ་ལོ་འགོ་དགུན་ནས་འཛིན་པར་འདོད་པ་མཚུངས་ཏེ། རྒྱལ་པོའི་སྲས་སུ་སངས་རྒྱས་པ་ཐམས་ཅད་ཀྱི་དུས་ཀྱི་དང་པོ་ནི་དགུན་དག་ཡིན་ནོ། །གཉིས་པ་ནི་དཔྱིད་དོ། །གསུམ་པ་ནི་དབྱར་རོ་ཞེས་གསུངས་པ་འདིའི་རྗེས་སུ་འབྲངས་པའོ། །དེའི་རྒྱུ་མཚན་ཡང་མཁས་པ་སྔ་མ་དག་འཇིག་རྟེན་པ་དང་ཕྱི་རོལ་པ་རྣམས་དང་པོ་འཕེལ་བ་ལྟར་སྣང་ཡང་ཕྱིས་འགྲིབ་པར་འགྱུར་བས་དེ་ལས་བཟློག་ནས་སངས་རྒྱས་པ་དང་པོར་འགྲིབ་པ་ལྟར་སྣང་ཡང་ཕྱིས་འཕེལ་བར་འགྱུར་བ་མཚོན་པའི་ཆེད་དུ། ཟླ་བའི་འགོ་མར་ངོ་ནས་འཛིན་པ་དང་། ལོ་འགོ་དགུན་ནས་འཛིན་པར་བཞེད་དོ། །དེ་ལ་ལུགས་དང་པོ་ནི། མཆིམས་དང་བུ་སྟོན་སོགས་ཀྱི་བཞེད་པ་སྟེ། ཕྱེད་ཚེས་ལ་ཐ་སྐར་དང་། སྨིན་དྲུག་དང་། མགོ་དང་། རྒྱལ་དང་བཞི་ནི་དགུན་གྱི་དུས་ཡིན་ཞིང་དུས་ཚིགས་བཞིར་བྱས་པའི་ཚེ་དང་པོ་གསུམ་དགུན་ཟླ་ར་བ་དང་། འབྲིང་པོ། ཐ་ཆུང་གསུམ་ཡིན་ཏེ། དེ་ནས་རིམ་པ་བཞིན་བརྩིའོ། །འདི་ཡང་། དབྱར་གྱི་ཟླ་བ་གཉིས་པ་ཡི། །ཞེས་སོགས་ཀྱི་གཞུང་ཉི་མ་ལྡོག་མཚམས་ངོས་འཛིན་པའི་དབང་དུ་བྱས་པར་མངོན་ཏེ། དགུན་རྣམས་ཀྱི་ནི་བཞི་པ་ལ། །ཞེས་པ་རྒྱལ་གྱི་ཟླ་བ་ལ་བབ་པས་དེ་ནི་དགུན་ཉི་ལྡོག་པ་ལ་བསམ་མོ། །དེ་ནི་མི་འཐད་དེ། དབྱར་གནས། དགག་དབྱེ། སྲ་བརྐྱང་གི་དུས་གསུམ་ཆར་མི་འགྲིགས་པའི་ཕྱིར་རོ། །དབྱར་གནས་མི་འགྲིགས་པ་ནི། ལུགས་འདི་ལ་ས་གས་ཉ་བའི་ཕྱི་དེ་ཉིན་པར་དབྱར་སྔ་མ་ཁས་བླང་དགོས་པར་འགྱུར་ཏེ། དབྱར་ཟླ་འབྲིང་པོ་ཉ་བའི་ཕྱི་དེ་ཉིན་པར་གྱི་ཚེས་བཅུ་དྲུག་ཡིན་པའི་ཕྱིར། ཁྱབ་སྟེ། མདོ་རྩར། ཚེས་བཅུ་དྲུག་ལའོ། །དབྱར་ཟླ་འབྲིང་པོ་ཉའི་ཕྱི་དེ་ཉིན་པར་གྱིའོ་ཞེས་གསུངས་པའི་ཕྱིར། འདོད་ན། དེ་ཆོས་ཅན། གྲོ་བཞིན་ཟླ་བའི་ཚེས་གཅིག་ཏུ་ཐལ། འདོད་པ་དེའི་ཕྱིར། ཁྱབ་སྟེ། ཚིག་ལེར། གྲོ་བཞིན་ཅན་གྱི་ཚེས་གཅིག་ལ། །སྔ་མའི་དབྱར་ཏེ་གཙོ་བོ་ཡིན། །ཞེས་གསུངས་པའི་ཕྱིར། ཡང་སྣྲོན་གྱི་ཉ་བའི་ཕྱི་དེ་ཉིན་པར་དབྱར་ཕྱི་མར་ཁས་ལེན་གྱི་དུས་སུ་ཐལ། རྒྱུ་མཚན་སྔ་མ་དེའི་ཕྱིར། འདོད་ན། དེ་ཆོས་ཅན། ཁྲུམ་གྱི་ཟླ་བའི་ཚེས་གཅིག་ཏུ་ཐལ། འདོད་པ་དེའི་ཕྱིར། ཁྱབ་སྟེ་དེ་ཉིད་ལས། དེ་ཉིད་ཁྲུམ་སྟོད་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཞེས་གསུངས་པའི་ཕྱིར་རོ། །དེ་ཉིད་ཀྱི་དགག་དབྱེ་མི་འགྲིག་པ་ཡང་སྦྱོར་ཏེ། དོན་གྱི་གནད་གཅིག་པའི་ཕྱིར་དང་། ལུང་རྣམ་འབྱེད་དུ་དགུན་གྱི་གུང་ནི་རིང་དགུན་སྨད་ཀྱི་དུས་ཀྱི་ཚེ་ནི་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་ལྡང་ཞེས་དང་། ཕྲན་ཊཱིཀ་ལས། གྲང་བའི་དུས་ཞེས་བྱ་བ་ནི། དགུན་ཟླ་ཐ་ཆུང་དང་། དཔྱིད་ཟླ་ར་བའོ་ཞེས་པ་དང་འགལ་བའི་ཕྱིར་རོ། །སྲ་བརྐྱང་མི་འགྲིགས་པའི་སྐྱོན་ནི་ཁྲུམ་གྱི་ཟླ་བའི་ཚེས་གཅིག་ནས། སྲ་བརྐྱང་གདིང་དགོས་པར་འགྱུར་ཏེ། དེ་དབྱར་སྔ་མའི་དགག་དབྱེའི་ཕྱི་དེ་ཉིན་པར་ཡིན་པའི་ཕྱིར། འདོད་ན། ཚིག་ལེར། སྨིན་དྲུག་ནས་ནི་ཁྲ་ཡི་བར། །སྲ་བརྐྱང་གདིང་བའི་དུས་སུ་གསུངས། །ཞེས་པ་དང་འགལ་ལོ། །ལུགས་གཉིས་པ་ནི་ཕྱིས་ཀྱི་མཁས་པ་མང་པོས་ཐ་སྐར་གྱི་ཟླ་བ་ལ་སྟོན་ཟླ་ཐ་ཆུང་དུ་བྱས་ནས་དེའི་ཉའི་ཕྱི་དེ་ཉིན་པར་ནས་ལོ་འགོ་འཛིན་ཅིང་། སྣྲོན་གྱི་ཉ་བའི་ཕྱི་དེ་ཉིན་པར་ནས་དབྱར་སྔ་མའི་ཁས་ལེན་བྱེད་པར་བཞེད་དོ། །འདི་ཡང་མི་འཐད་དེ། དབྱར་གནས་དགག་དབྱེ་སྲ་བརྐྱང་གསུམ་མི་འགྲིགས་པའི་སྐྱོན་སྔར་བཤད་པར་རྣམས་ཟླ་བ་རེ་རེ་བསྣུར་ནས་བརྗོད་ནས་མེ་ཏོག་ཕྲེང་རྒྱུད་ཀྱི་གཞུང་དང་འགལ་བ་ལ་ནི་ཁྱད་པར་མེད་དོ། །འདི་ལ་སྐྱོན་ལྷག་པོ་གསོ་སྦྱོང་བཅུ་བཞི་པ་མི་འགྲིག་པ་ནི་ཐ་སྐར་གྱི་ཉ་ནས་བཟུང་སྟེ་མགོའི་ཉ་བའི་བར་གྱི་ཟླ་བ་གཉིས་པོ་དེ་དུས་ཚིགས་དྲུག་ཏུ་ཕྱེ་བའི་དང་པོ་ཡིན་པར་ཁས་ལེན་དགོས་ཏེ། རྒྱ་ཆེར་འགྲེལ་ལས། སྟོན་ཟླ་ཐ་ཆུང་ཉ་ནས་དགུན་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་དགུན་གྱི་དུས་ཚིགས་སོ་ཞེས་གསུངས་པའི་ཕྱིར་རོ། །འདོད་ན། མགོའི་ཟླ་བའི་ཕྱེད་ལུས་པ་ན་གསོ་སྦྱོང་བཅུ་བཞི་པ་འབྱུང་བར་ཐལ་ཏེ། སྨིན་དྲུག་གི་ཉ་བའི་རྗེས་ཀྱི་མར་ངོ་ལ་གསོ་སྦྱོང་བཅུ་བཞི་པ་འབྱུང་བར་ཁས་ལེན་དགོས་ཏེ། དེ་གཉིས་རིལ་ཚེས་ལྟར་ན་སྨིན་དྲུག་གི་ཟླ་བ་ཞེས་པ་རུང་ཡང་། སྨིན་དྲུག་ཟླ་བའི་ཕྱེད་ལུས་པ་ཞེས་པ་མི་རུང་བའི་ཕྱིར་རོ། །འདོད་ན་དགེ་ཚུལ་གྱི་ལོ་དྲི་བ་དང་ཚིག་ལེ་གཉིས་ཀ་ལས། སྨིན་དྲུག་དང་རྒྱལ་ལ་གསོ་སྦྱོང་བཅུ་བཞི་པ་འབྱུང་བར་གསུངས་པ་དང་འགལ་ལོ། །གཞན་ཡང་། དབྱར་གྱི་ཟླ་བ་གཉིས་པ་ཡི། །ཞེས་པའི་གཞུང་ཉིན་མཉམ་མཚན་མཉམ་ངོས་འཛིན་པ་ལ་བྱེད་དམ། ཉི་མ་ལྡོག་དུས་ངོས་འཛིན་པ་ལ་བྱེད། དང་པོ་ལྟར་ན། མཆུའི་ཟླ་བ་དཔྱིད་ཉིན་མཉམ་མཚན་མཉམ་དུ་ཁས་ལེན་དགོས་པས་ས་ག་ཟླ་བ་ལ་དབྱར་ཉི་ལྡོག་པ་དང་། སྨིན་དྲུག་ཟླ་བ་ལ་དགུན་ཉི་ལྡོག་པར་ཁས་བླང་དགོས་པས་དེ་ཡང་མི་སྲིད་དོ། །ཕྱི་མ་ལྟར་ན་མཆུ་ཡི་ཟླ་བ་ལ་དགུན་ཉི་ལྡོག་པ་དང་། གྲོ་བཞིན་ཟླ་བ་ལ་དབྱར་ཉི་ལྡོག་པ་ཁས་ལེན་དགོས་པས་དེ་ཡང་མི་སྲིད་དོ། །ལུགས་གསུམ་པ་ནི་སྨིན་དྲུག་ཟླ་བའི་ཉ་ནས་ལོ་སྔ་མའི་ལོ་མཇུག་རྫོགས་ཏེ། དེའི་ཕྱི་དེ་ཉིན་མགོའི་ཚེས་གཅིག་ནས་ལོ་གོ་འཛིན་པ་སྟེ། དེ་ནས་བཟུང་སྟེ་དུས་ཚིགས་གསུམ་དང་། ལྔ་དང་། དྲུག་རྣམས་ཀྱི་ཟླ་བའི་འགོ་ཡང་འཛིན། དུས་ཚིགས་བཞིའི་ཕྱེད་ཚེས་ཀྱི་དབང་དུ་བྱས་པའི་ཟླ་འགོ་འཛིན་ཅིང་། རིལ་ཚེས་ལ་ནི་མར་ངོ་དེ་ཉིད་སྟོན་ཟླ་ཐ་ཆུང་དུ་གཏོགས་པའོ། །ལུགས་འདི་ལ་གསོ་སྦྱོང་བཅུ་བཞི་པ་འགྲིག་པ་ནི་འོག་ཏུ་འཆད་ཅིང་། དབྱར་གནས་འགྲིག་པ་ནི་གྲོ་བཞིན་ཟླ་བའི་ཚེས་གཅིག་དང་། དབྱར་ཟླ་འབྲིང་པོའི་ཚེས་བཅུ་དྲུག་དོན་གཅིག་ཏུ་འབྱུང་བས་མདོ་རྩ་དང་། ཚིག་ལེ་གཉིས་ཀ་དང་འགྲིག་ལ། དེ་ཉིད་ཀྱི་དགག་དབྱེ་ཡང་འགྲིག་པར་གྲུབ་བོ། །སྲ་བརྐྱང་འགྲིག་པ་ནི་སྨིན་དྲུག་ཟླ་བའི་ཚེས་གཅིག་དང་། སྟོན་ཟླ་འབྲིང་པོ་ཉའི་ཕྱི་དེ་ཉིན་པར་གྱི་ཚེས་བཅུ་དྲུག་དོན་གཅིག་ཏུ་འབྱུང་བས་གཞུང་གཉིས་ཀ་དང་འགྲིག་གོ །དབྱར་གྱི་ཟླ་བ་གཉིས་པ་ཡི། །ཞེས་སོགས་ཀྱི་གཞུང་སྟོན་དཔྱིད་ཀྱི་ཉིན་མཉམ་མཚན་མཉམ་ལ་སྦྱར་བ་དང་ཡང་འགྲིག་སྟེ་དབྱར་གྱི་ཟླ་བ་གཉིས་པ་ནི་ཁྲུམ་གྱི་ཟླ་བར་གྲུབ་ལ། དེའི་ཐ་མ་ནི་ཕྱེད་ཚེས་ཀྱི་དབང་དུ་བྱས་ནས་ཡར་ངོ་ཡིན་ལ། དེའི་ཚེས་དགུ་ལ་སྟོན་ཉིན་མཉམ་མཚན་མཉམ་དང་དབོའི་ཟླ་བའི་ཡར་ངོའི་ཚེས་དགུ་ལ་དཔྱིད་ཉིན་མཉམ་མཚན་མཉམ་འབྱུང་བའི་ཕྱིར་རོ། །དེ་ཉིད་ཀྱིས་ཉི་མ་ལྡོག་པའི་དུས་ཀྱང་ཤུགས་ལ་གྲུབ་སྟེ། མགོའི་ཟླ་བའི་ཡར་ངོ་ལ་དགུན་ཉི་དང་། སྣྲོན་གྱི་ཟླ་བའི་ཡར་ངོ་ལ་དབྱར་ཉི་ལྡོག་པར་གྲུབ་ཅིང་ད་ལྟར་མཐོང་བའི་ཕྱིར་རོ། །རྒྱལ་གྱི་ཟླ་བའི་ཡར་ངོ་ལ་དགུན་ཉི་དང་། ཆུ་སྟོད་ཟླ་བའི་མར་ངོ་ལ་དབྱར་ཉི་ལྡོག་པ་རེས་འགའ་འབྱུང་བ་ནི་ཟླ་ཤོལ་འདོར་བ་ལ་ཉེ་བའི་དུས་ཏེ། དཔྱད་པས་གསལ་ལོ། །བཞི་པ་གསོ་སྦྱོང་བཅུ་བཞི་པ་གང་ལ་འབྱུང་བ་ནི་སྔར་བཤད་པ་དག་གིས་རྟོགས་ནུས་ལ་བྱེ་བྲག་རང་མིང་གིས་བརྗོད་ན་ཚིག་ལེར། ཁ་བ་སོས་ཀ་དབྱར་རྣམས་ཀྱི། །ཟླ་བ་གཉིས་དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ། །ས་ག་དང་ནི་ཆུ་སྟོད་དང་། །དེ་བཞིན་ཁྲུམ་སྨད་སྨིན་དྲུག་ཅན། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །ཅེས་དང་། དགེ་ཚུལ་གྱི་ལོ་དྲི་བར། རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམ་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་དང་། དགེ་སློང་གི་ལོ་དྲི་བར་ཕྱེད་ཚེས་ཀྱི་དབང་དུ་བྱས་ནས་དབྱར་དགུན་འབྲིང་མི་ཐུབ། སྟོན་དཔྱིད་འབྲིང་ཐུབ་པར་གསུངས་པ་དང་། རྒྱ་ཆེར་འགྲེལ་ལས། རིལ་ཚེས་ཀྱི་དབང་དུ་བྱས་ནས་དེ་ལས་ལྡོག་སྟེ་གསུངས་པ་རྣམས་དོན་གཅིག་ཏུ་འབྱུང་བ་དགོས་ལ། སྔར་གྱི་ལོ་འགོ་འཛིན་ཚུལ་དང་། རྒྱུ་སྐར་གྱི་མིང་ནས་སྨོས་པའི་ཟླ་བ་རྣམས་ཕྱེད་ཚེས་ཀྱི་དབང་དུ་བྱས་པའི་ཚུལ་རྟོགས་ན་འདི་རང་ཤུགས་ཀྱིས་འབྱུང་ངོ་། །ལྔ་པ་ཟླ་ཤོལ་འབྱུང་བ་རྒྱུ་མཚན་དང་བཅས་པ་ནི། ལུང་གླེང་གཞིར། དེ་ལྟ་བས་ན་ལོ་རེ་རེ་བཞིན་བཤོལ་མ་བོར། ལོ་དྲུག་དྲུག་ཅིང་བཤོལ་དོར་གཅིག དྲུག་ལྔ་སུམ་ཅུ་སྟེ་དེ་ལྟ་བུར་ཞག་དང་། ཟླ་བ་ཕྱེད་པོ་དང་། ཟླ་བ་དང་། ལོ་སྦྲེལ་མཉམ་པར་འགྱུར་ཏེ། མུ་སྟེགས་ཅན་རྣམས་ཀྱིས་གླགས་བཙལ་ཀྱང་གླགས་རྙེད་པར་མི་འགྱུར་རོ་ཞེས་གསུངས་པས་ལོ་ལྔ་ལྔའི་ཞག་དྲུག་དྲུག་ཏུ་བསགས་པས་ལོ་དྲུག་པ་ལ་ཟླ་བར་ལངས་པ་འདོར་བའི་དབང་དུ་བྱས་པའོ། །དེ་ལྟར་འདོར་ཀྱང་མ་འགྲིག་པའི་ཚེ་ཟླ་ཤོལ་འདོར་བ་རྩིས་མཁན་གྱི་རྗེས་སུ་འབྲང་དགོས་ཤིང་། རྒྱལ་པོའི་དྲུང་ན་རྩིས་མཁན་རྣམས་ཡོད་པས་རྒྱལ་པོའི་རྗེས་སུ་འབྲང་བར་གསུངས་ཏེ། མདོ་རྩར། ཟླ་ཤོལ་འདོར་བ་ནི་རྒྱལ་པོའི་རྗེས་སུ་འབྲང་བར་བྱའོ། །རྒྱུ་སྐར་ནི་སྐར་མཁན་གྱི་རྗེས་སུ་འབྲང་བས་སོ་ཞེས་དང་། ཚིག་ལེར། ལོ་དང་ཟླ་བ་ཟླ་ཤོལ་དག །རྒྱལ་པོའི་བཀའ་ཡིས་ཀྱང་ནི་བསྔགས། །བཀའ་བཙན་གྲགས་ལྡན་ཤེས་རབ་ཅན། །དཔུང་ལྡན་དེ་ཡི་རྗེས་འབྲང་བྱ། །ཞེས་གསུངས་སོ། །དེ་ཡང་དགེ་སློང་དག་དོན་ཉུང་ཞིང་བྱ་བ་ཉུང་ལ་ཀློག་པ་དང་སྤོང་བ་ལ་མངོན་པར་བརྩོན་པས་རྩིས་ཀྱི་རྣམ་བཞག་ཕལ་ཆེར་གྱིས་མི་ཤེས་ལ། ཟླ་ཤོལ་ལ་སོགས་པ་འཇིག་རྟེན་ན་གྲགས་པའི་རྗེས་སུ་འབྲང་དགོས་སོ་སྙམ་དུ་དགོངས་སོ། །དུས་འཁོར་བ་དག ཟླ་བ་སུམ་ཅུ་རྩ་ཕྱེད་དང་གསུམ་གསུམ་ན་བཤོལ་གྱི་ཟླ་བ་རེ་རེ་འབྱུང་བར་གསུངས་པ་དང་། ཊཱིཀ་ཆུང་དུ་ལོ་ཕྱེད་དང་གསུམ་གསུམ་ན་ཤོལ་གྱི་ཟླ་བ་རེ་རེ་འབྱུང་བར་གསུངས་པ་དང་། ཁ་ཅིག རྟག་བྱ་བྱི་བ་ཡོས་ལ་ཤོལ། །སྟོན་དབྱར་དཔྱིད་དགུན་འབྲིང་པོ་གཉིས། །སྔ་མ་ཤོལ་ཏེ་ཐུབ་པར་ངེས། །ཞེས་པ་ལྷ་བླ་མ་ཡེ་ཤེས་འོད་ཀྱི་རྒྱལ་པོའི་ལུགས་བརྩིས་པ་ཡིན་གསུངས་པ་དང་། ཁ་ཅིག་དངོས་པོའི་ཆོས་ཉིད་ཡིན་གྱི་དེའི་རྒྱུ་མཚན་འགོད་མི་དགོས་སོ་ཞེས་པ་སོགས་ཡོད་ཀྱང་ཐ་སྙད་སྟོན་བདེ་བའི་ཆེད་དུ་ལོ་གསུམ་དང་། ཕྱེད་དང་གསུམ་དུ་ཤོལ་འབྱུང་བ་དང་། རྟ་བྱ་བྱི་བ་ཡོས་ལ་ཤོལ་འབྱུང་བ་སོགས་བརྗོད་པ་ཙམ་ལ་འགལ་བ་མེད་མོད་ཀྱི་མཐའ་གཅིག་ཏུ་ངེས་པ་ནི་དུས་ཀྱི་འཁོར་ལོའི་རྩིས་ཀྱི་རྗེས་སུ་འབྲང་དགོས་པས་སྟོན་པས་ཀྱང་རྒྱལ་པོའི་རྗེས་སུ་འབྲང་བར་གསུངས་པའི་གནད་འདི་ཉིད་ཡིན་ནོ། །དེང་སང་ཞག་གྲང་ལྷག་ཆད་མི་བརྩི། ཟླ་ཤོལ་མི་མདོར་ཞེས་སྨྲ་བ་ནི་སྔོན་རྒན་མོ་ཞིག་གིས་དེ་ལྟར་བྱས་པས་གནམ་སྟོང་གི་ནུབ་མོར་ཚེས་བཅོ་ལྔའི་ཟླ་བ་ཤར་བར་གྲག་གོ །འོ་ན་ཟླ་ཤོལ་འབྱུང་བའི་ཚེ་གསོ་སྦྱོང་ཉི་ཤུ་རྩ་དྲུག་འབྱུང་བས་ཤོལ་གྱི་ཟླ་བའི་མར་ངོ་ལ་བཅུ་བཞི་པའམ་བཅོ་ལྔ་པ་གང་བྱ་ཞེ་ན། ཁ་ཅིག ཐུབ་པ་ཁོ་ན་ཡིན་ནོ་ཞེས་དང་། ཁ་ཅིག་མི་ཐུབ་པ་ཁོ་ན་ཡིན་ནོ་ཞེས་སྨྲ་བ་ལ་ནི་རྒྱུ་མཚན་མེད་པས་ཤོལ་གྱི་ཟླ་བ་ཉ་སྐར་གང་ལ་བབ་པ་དེ་དང་བསྟུན་དགོས་ཏེ། ཉ་སྐར་དྲུག་ལ་ཐུབ་པ་དང་། གཞན་དྲུག་ལ་མི་ཐུབ་པར་བྱ་དགོས་པའི་ཕྱིར། འདི་དག་ནི་གསུང་རབ་ནས་བཤད་པའི་དུས་ཚིགས་མ་ནོར་བར་བཀོད་པའོ། །དེང་སང་སྔོན་གྱི་གྲུབ་མཐར་མི་བརྟེན་པ་དག དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། །ཞེས་པ་སྟོན་ཉིན་མཉམ་མཚན་མཉམ་ངོས་བཟུང་བ་ཡིན་ལ་དེ་ནམ་བྱུང་བ་ནས་ལོ་འགོ་འཛིན་པར་གྲག་གོ །འདི་ལ་ལོ་གཅིག་ཟླ་བཅུ་ལས་མེད་པའི་སྐྱོན་དང་། འདུལ་བ་ནས་གསུངས་པའི་དུས་ཚིགས་རྣམས་ཀྱིས་ལོ་འགོ་འཛིན་པ་མིན་ན་ནི། ལོ་འགོ་འཕངས་ནས་འཛིན་ན་ཡང་འཛིན་ལ་རགས་ལས་པ་དང་། ཡིན་ན་ནི་གསོ་སྦྱོང་། དབྱར་གནས། དགག་དབྱེ་སྲ་བརྐྱང་གདིང་བ་རྣམས་ཟླ་བ་གཅིག་ལ་ཞག་སུམ་ཅུར་བྱས་པའི་ཞག་གང་ལ་འབྱུང་བ་ངེས་པ་མེད་པའི་སྐྱོན་གནས་པ་སོགས་མང་དུ་ཡོད་ཀྱང་བརྡ་ཁྱད་རགས་པ་ཡོད་པ་དག་གིས་ཀྱང་ནོར་བར་གོ་བའི་ཕྱིར་འདིར་མ་སྤྲོས་སོ། །བསྐལ་པའི་རྣམ་པ་མང་བཤད་པ། །ཞེས་པའི་སྐབས་སུ། བསྟན་བཅོས་འདིར་བསྐལ་པའི་ཐ་སྙད་བདུན་སྣང་སྟེ། འཇིག་པའི་བསྐལ་པ། ཆགས་པའི་བསྐལ་པ། གནས་པའི་བསྐལ་པ། ཞིག་ནས་འདུག་པའི་བསྐལ་པ། བར་གྱི་བསྐལ་པ། བསྐལ་པ་ཆེན་པོ། གྲངས་བཟུང་བདེ་བའི་ཕྱིར་བསྐལ་པའི་ཐ་སྙད་བྱས་པའོ། །དང་པོ་ནི། གནས་བསྐལ་རྫོགས་ནས་སྐྱེ་དགུའི་ཚེ་ལོ་བརྒྱད་ཁྲི་པར་གྱུར་པ་དང་། དམྱལ་བར་སེམས་ཅན་གསར་སྐྱེ་མེད་པར་དུས་མཉམ་པ་ནས་བཟུང་སྟེ་ངན་སོང་བ་རྙིང་པ་རྣམས་ལས་ཟད་ན་བདེ་འགྲོར་སྐྱེ་ལ། ལས་མ་ཟད་ན་འཇིག་རྟེན་གཞན་གྱི་ངན་སོང་དུ་སྐྱེ་སྟེ་སྟོང་པར་འགྱུར། དེ་ནས་འཛམ་བུ་གླིང་པའི་མི་འགའ་ཞིག་ལ་སློབ་དཔོན་མེད་པར་ཆོས་ཉིད་ཀྱིས་ཐོབ་པའི་བསམ་གཏན་དང་པོའི་ཏིང་ངེ་འཛིན་སྐྱེ་སྟེ། དེ་ལས་ལངས་ནས་ཀྱེ་མ་དབེན་པ་ལས་སྐྱེས་པའི་བདེ་བ་དང་དགའ་བ་ནི་བདེ་བའོ་ཞེས་སྨྲས་པ་དེ་ཐོས་ནས་གཞན་ཡང་བསམ་གཏན་དང་པོ་ལ་སྙོམས་པར་འཇུག་ཅིང་ཤི་འཕོས་ནས་ཚངས་པའི་འཇིག་རྟེན་དུ་སྐྱེའོ། །དེས་བསམ་གཏན་གཉིས་པ་བསྒོམ་པའམ། ས་ལས་སྔར་གྱི་བསམ་གཏན་དང་པོའི་རྗེས་སུ་གཉིས་པ་བསྒོམ་ནས་བསམ་གཏན་གཉིས་པར་སྐྱེ་བར་བཤད་དོ། །ཤར་དང་ནུབ་ཀྱང་དེ་བཞིན་ནོ། །སྒྲ་མི་སྙན་པ་ནི་ཆགས་བྲལ་གྱི་ལམ་གྱི་རྟེན་མ་ཡིན་པས་ཐོག་མར་འདོད་ལྷར་སྐྱེ་ཞིང་འདོད་ལྷ་རིས་དྲུག་གི་རྟེན་ལ་བསམ་གཏན་བསྒོམ་པས་བསམ་གཏན་དང་པོར་སྐྱེ་བ་དང་། དེར་ཆོས་ཉིད་ཀྱི་ས་གཉིས་པའི་ཏིང་ངེ་འཛིན་ཐོབ་ནས་གཉིས་པར་སྐྱེ་སྟེ་བཅུད་འཇིག་པ་ལ་བར་བསྐལ་བཅུ་དགུའོ། །དེ་ནས་ཉི་མ་བདུན་འཆར་བའི་ཚེ་མདོ་ལས་འབྱུང་བ་ལྟར། སྤྲིན་ལས་ཆར་མི་འབབ། ཉི་མ་འདིས་ཆུ་ལས་གྱུར་པའི་དངོས་པོ་དང་། འདི་ལ་ས་གཞན་བཞི་འགྱུར་གྱི་ཚ་བ་གཉིས་པས་ཆུ་བྲན་དང་། ལྟེང་ཀ་དང་། ཆུང་ངུ་དང་། གསུམ་པས་ཆུ་བོ་ཆེན་པོ་བཞི་དང་། བཞི་པས་མཚོ་མ་དྲོས་པ་དང་། ལྔ་པས་ཕྱིའི་རྒྱ་མཚོ་ཆུ་བོ་ལ་ནུབ་ཀྱི་བར་དང་། དྲུག་པས་མ་ལུས་པར་བསྐམ་ཤིང་། རི་རབ་ལའང་དུ་བ་འཐུལ་བར་བྱེད་པ་དང་། བདུན་པས་མེ་འབར་ཏེ་འདོད་པའི་སྣོད་མེ་རྒྱུན་གཅིག་དང་། དེས་མེ་གཞན་བསྐྱེད་ནས་ཚངས་པའི་གནས་བསྲེགས་ཏེ་ཐལ་བའི་ལྷག་མ་ཙམ་ཡང་མ་ལུས་པར་ཟད་པའི་སྣོད་འཇིག་པ་ལ་བར་བསྐལ་གཅིག་གོ །ཆུས་འཇིག་པའི་ཚེ་བསམ་གཏན་གཉིས་པ་བ་རྣམས་ལའང་ཆོས་ཉིད་ཀྱིས་བསམ་གཏན་གསུམ་པ་སྐྱེས་ཏེ་བསམ་གཏན་གསུམ་པར་སྐྱེ་བ་ནི་བཅུད་འཇིག་པའི་ཁོངས་སུ་གཏོགས་ལ། དེ་ནས་འོད་གསལ་ལས་བྱུང་བའི་ཆུས་སྣོད་ཐམས་ཅད་ལན་ཚྭ་ཆུར་བཅུག་པ་བཞིན་སྤྲུལ་པར་བྱེད་དོ། །རླུང་གིས་འཇིག་པའི་ཚེ་བསམ་གཏན་གསུམ་པ་བ་རྣམས་ལ་བསམ་གཏན་བཞི་པའི་ཏིང་ངེ་འཛིན་ཆོས་ཉིད་ཀྱིས་ཐོབ་སྟེ་བསམ་གཏན་བཞི་པར་སྐྱེས་པ་ནི་བཅུད་འཇིག་པའི་ཁོངས་སུ་གཏོགས་ལ། དེ་ནས་དགེ་རྒྱས་ལས་བྱུང་བའི་རླུང་གིས་སྣོད་ཀྱི་འཇིག་རྟེན་སྐམ་པའམ་འཐོར་བར་བྱེད་དེ། དུས་ནི་བར་གྱི་བསྐལ་པ་ཉི་ཤུར་མཉམ་མོ། །གཉིས་པ་ནི། དང་པོའི་རླུང་ཞེས་བྱ་བ་སྣོད་ཀྱི་འཇིག་རྟེན་ཆགས་པའི་སྔ་ལྟས་སུ་རླུང་འཇམ་པོ་ལངས་ཏེ་རླུང་གིས་ཞིག་པའི་རྗེས་སུ་དགེ་རྒྱས་ནས་དང་། ཆུས་ཞིག་པའི་རྗེས་སུ་འོད་གསལ་ནས་དང་། མེས་ཞིག་པའི་རྗེས་སུ་ཚངས་ཆེན་ནས་འཐབ་བྲལ་གྱི་བར་གྱི་སྣོད་ཀྱི་འཇིག་རྟེན་ཡས་མར་རིམ་པ་བཞིན་ཆགས། དེ་ནས་འོག་བཞི་རླུང་གི་དཀྱིལ་འཁོར་ནས་སུམ་ཅུ་རྩ་གསུམ་གྱི་བར་མས་ཡར་རིམ་པ་བཞིན་ཆགས་ཏེ་བར་བསྐལ་གཅིག་གོ །དེ་ནས་བཅུད་ཆགས་པ་ནི་རླུང་གིས་ཞིག་པའི་རྗེས་སུ་བསམ་གཏན་བཞི་པའི་ལྷ་ཚེ་ཟད་ལས་ཟད་བསོད་ནམས་ཟད་པ་ཞིག་དགེ་རྒྱས་སུ་དང་། ཆུས་ཞིག་པའི་རྗེས་སུ་བསམ་གཏན་གསུམ་པའི་ལྷ་འོད་གསལ་དུ་དང་། མེས་ཞིག་པའི་རྗེས་སུ་བསམ་གཏན་གཉིས་པའི་ལྷ་ཚངས་ཆེན་དུ་སྐྱེས་པ་ནས་བཟུང་སྟེ། རྒྱལ་ཆེན་རིས་བཞི་པའི་བར་གྱི་ལྷ་རྣམས་རིམ་པ་བཞིན་ཆགས་ལ། དེ་ནས་མི་བྱང་དང་། ནུབ་དང་། ཤར་དང་། ལྷོ་རིམ་པ་བཞིན་ཆགས། དེ་ནས་དུད་འགྲོ་དང་། ཡི་དྭགས་དང་། དམྱལ་བ་མནར་མེད་པར་སེམས་ཅན་གཅིག་སྐྱེས་པའི་བར་དུ་བར་བསྐལ་བཅུ་དགུའོ། །འདི་ནི་མེས་ཞིག་པའི་རྗེས་ཡིན་ཏེ། མདོ་ལས་སེམས་ཅན་འོད་གསལ་གྱི་ལྷ་ལས་ཆད་དོ་ཞེས་གསུངས་པའི་ཕྱིར་རོ། །གསུམ་པ་ནི། མི་རྣམས་ཚེ་ལོ་དཔག་མེད་ནས་འབྲི་སྟེ། བརྒྱད་ཁྲི་བར་སླེབས་པ་དང་། མནར་མེད་དུ་སེམས་ཅན་གཅིག་སྐྱེས་པ་དུས་མཉམ་པ་ནི་ཆགས་པའི་བསྐལ་པར་གཏོགས་ལ། བརྒྱད་ཁྲི་པ་ནས་འབྲི་སྟེ་ཚེ་ལོ་བཅུ་པར་གྱུར་པའི་བར་ནི་བར་བསྐལ་དང་པོ་ཡ་ཐོག་རིང་མོ་ཞེས་བྱའོ། །འོ་ན། བར་གྱི་བསྐལ་པ་དཔག་མེད་ནས། །ཚེ་ལོ་བཅུ་པའི་བར་དུའོ། །ཞེས་པ་དང་འགལ་ལོ་སྙམ་ན་འགྲིབ་པའི་ཐོག་མར་བསྟན་པའི་ཆེད་དུ་དཔག་མེད་སྨོས་པ་ཡིན་གྱི་བར་བསྐལ་བརྒྱད་ཁྲི་ནས་བཟུང་ཞེས་མཆིམས་ཀྱིས་གསུངས་པ་ཉིད་ལེགས་ཏེ། གཞན་དུ་ན་དཔག་མེད་ནས་བརྒྱད་ཁྲི་པའི་བར་དེར་ཆགས་པའི་བསྐལ་པ་ལ་ཆད་པ་དང་། གནས་པ་ལ་ལྷག་པར་འགལ་བའི་ཕྱིར་རོ། །ཚེ་ལོ་བཅུ་པ་དེ་ནས་ཡར་བརྒྱད་ཁྲི་པའི་བར་སྐྱེ་བ་དང་། ཡར་མར་འབྲི་བ་ཟུང་དུ་བྱས་པའི་བར་གྱི་ཁུག་པ་བཅོ་བརྒྱད་དང་། ཡང་ཚེ་ལོ་བརྒྱད་ཁྲི་པའི་བར་ཡར་འཕེལ་བ་བར་གྱི་བསྐལ་པ་གཅིག་ཡིན་ཏེ། མ་ཐོག་རིང་མོ་ཞེས་བྱ་བའོ། །རིང་ཐུང་གི་རྒྱུ་མཚན་ནི་ཁ་ཅིག སྔ་ཕྱི་གཉིས་ལོ་ཉིས་བརྒྱ་དང་། བར་མ་བརྒྱ་ལ་འཕེལ་འགྲིབ་བྱེད་པའོ་ཞེས་པ་ལ། མཆིམས་ཀྱིས་བསྐལ་པ་ལོས་བགྲང་ནུས་པར་འགྱུར་བས་མི་རིགས་སོ་གསུངས་པ་ཤིན་ཏུ་ལེགས་ཤིང་། ཞིབ་ཏུ་བརྩིས་ན་ཚ་བའི་སེམས་ཅན་དམྱལ་བ་ལས་རབ་ཏུ་ཚ་བ་ཚེ་ཚད་ཐུང་བར་ཐལ་བའི་སྐྱོན་ཡང་ཡོད་དོ། །དེས་ན་འཕེལ་འགྲིབ་མྱུར་བུལ་ནི་དགེ་བ་དང་མི་དགེ་བ་ལ་སྤྱོད་པ་ཤས་ཆེ་ཆུང་ཡིན་ཀྱང་། ལས་ཀྱི་བྱེ་བྲག་གིས་བར་བསྐལ་རྣམས་ནི་མཉམ་སྟེ། གོང་སྤེལ་ལས་མཐའི་བསྐལ་པ་གཉིས་ནི་དལ་གྱིས་འགྲོ་ལ་བར་བསྐལ་བཅོ་བརྒྱད་མགྱོགས་པར་འགྲོ་བས་ཐམས་ཅད་དུས་མཉམ་པར་འགྲོ་བས་ཞེས་སོ། །བཞི་པ་ནི། སྣོད་བཅུད་སྔ་མ་ཞིག་ཟིན་ནས། ཕྱི་མ་ཆགས་པའི་འགོ་བརྩམས་པའི་བར་ལ་སྔར་གྱི་གནས་བསྐལ་དང་མཉམ་པས་བར་བསྐལ་ཉི་ཤུའོ། །ལྔ་པ་ནི་བསྐལ་པ་ལོས་གཞལ་མི་ནུས་པས་བར་བསྐལ་ངོས་བཟུང་བའི་ཚུལ་ནི་སྔར་གྱི་གནས་བསྐལ་ཉི་ཤུ་པོ་གང་རུང་གཅིག་གི་ཡུན་ཚད་ལ་ངོས་བཟུང་བའོ། །དྲུག་པ་ནི། དེ་ལྟ་བུའི་བར་བསྐལ་བརྒྱད་ཅུ་ལ་བསྐལ་པ་ཆེན་པོ་གཅིག་སྟེ། སྣོད་བཅུད་ཆགས། གནས། འཇིག ཞིག་ནས་འདུག་པ་ཚན་གཅིག་དང་དུས་མཉམ་པའོ། །ཚངས་ཆེན་གྱི་ཚེ་ཚད་བར་བསྐལ་དྲུག་ཅུར་གསུངས་པ་ཡང་། སློབ་དཔོན་གྱིས་གྲངས་ཀྱི་རྒྱུར་བགྲང་བདེ་བའི་ཆེད་དུ་གསུངས་པ་ཡིན་གྱི། དོན་ལ་སྣོད་ཆགས་པ་དང་འཇིག་པའི་བར་བསྐལ་གཉིས་མི་ཐེ་བས་ལྔ་བཅུ་རྩ་བརྒྱད་དོ། །འཇིག་ཆགས་ཀྱི་བསྐལ་པ་དྲུག་ཅུ་རྩ་བཞིའི་ཚེ། དགེ་རྒྱས་པ་ལ་ཡང་དེ་དང་འདྲའོ། །བསྐལ་ཆེན་གྲངས་མེད་གསུམ་དུ་ཚོགས་བསགས་པ་ལས་སངས་རྒྱས་དང་། བརྒྱར་ཚོགས་བསགས་པ་ལས་བསེ་རུ་ལྟ་བུའི་རང་སངས་རྒྱས་འབྱུང་བར་གྲུབ་མཐའ་བཞི་ཆར་མཐུན་ལ། གྲངས་མེད་ཀྱི་དོན་གྲངས་ཀྱི་གནས་གཞན་དྲུག་ཅུ་པ་ལ་བྱ་བ་ཡིན་གྱི། གྲངས་གཏན་མེད་ནི་མ་ཡིན་ནོ། །ལུང་སིལ་བུ་ལས་འབྱུང་བ་སྡོམ་དུ་བསྡུ་ན། གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དུང་ཕྱུར་རྣམས། །རྐྱང་པ་ཡིན་པར་ཤེས་པར་བྱ། །ཐེར་འབུམ་ཕྲག་ཁྲིག་རབ་ཀྲམ་དང་། །གཏམ་དཀྲིགས་མི་འཁྲུགས་ཁྱད་ཕྱིན་དང་། །སྤངས་སྟེང་དེ་འདྲེན་མཐའ་སྣང་དང་། །རྒྱུ་རིག་འོད་མཛེས་དབང་པོ་དང་། །ལེགས་བྱིན་རྟོགས་འགྲོ་འབྱིང་འདུལ་དང་། །བརྒྱ་བརྒྱ་སྟོབས་འགྲོ་འདྲ་ཤེས་དང་། །རྣམ་བྱུང་དང་ནི་སྟོབས་མིག་རྣམས། །ཆེན་པོ་དང་ནི་བཅས་པ་སྟེ། །གྲངས་མེད་པ་ནི་ཐ་མ་ཡི། །བར་ནས་བརྒྱད་ནི་མ་རྙེད་པས། །དུང་ཕྱུར་མན་ཆད་དག་ཏུ་ནི། །གང་ཡང་རུང་བ་བརྒྱད་བསྣན་ནོ། །ཞེས་པའོ། །དེ་ཡང་འདི་པས་གྲངས་མེད་གསུམ་ཚོགས་ལམ་ཁོ་ན་ལ་འདའ་བར་འདོད་ཅིང་། ཐེག་ཆེན་པས་མོས་སྤྱོད་དང་། ས་བདུན་དང་། ས་གསུམ་ལ་འདའ་བར་འདོད་དོ། །བདུན་པ་ནི། བར་བསྐལ་བཞི་བཅུ་ལ་བསྐལ་པ་ཞེས་པའི་ཐ་སྙད་བྱས་པ་སྟེ། ཆོས་མངོན་པའི་བསྟན་བཅོས་ལས། ཚངས་རིས་པའི་ཚེ་ཚད་བར་བསྐལ་ཉི་ཤུ། ཚངས་པ་མདུན་ན་འདོན་པའི་བཞི་བཅུ། ཚངས་ཆེན་པས་ལྔ་བཅུ་རྩ་བརྒྱད། འོད་ཆུང་བའི་བསྐལ་ཆེན་གཅིག་ཞེས་པ་ནས་སྤྲིན་མེད་པའི་བསྐལ་ཆེན་བརྒྱ་ཉི་ཤུ་རྩ་ལྔ་ཞེས་སོགས་སོ། །རང་རང་གི་ཚེ་ཚད་ངེས་པ་ཅན་བགྲང་ནས་ཡོད་པ་ལ་སློབ་དཔོན་གྱིས། རང་ལུས་གཞལ་བའི་བསྐལ་པ་ཡིས། །ཞེས་པའི་འགྱུར་སྒྲེ་བའི་ཚེ། གཟུགས་ཅན་དང་པོ་བསྐལ་པ་ཕྱེད། །དེ་ཡི་གོང་མ་ཕྱེད་ཕྱེད་བསྐྱེད། །འོད་ཆུང་རྣམས་ཀྱི་ལྟག་ཡན་ཆད། །ཚེ་ནི་གཉིས་འགྱུར་གཉིས་འགྱུར་ཏེ། །སྤྲིན་མེད་བསྐལ་པ་གསུམ་དོར་རོ། །ཞེས་བསྡུ་བའི་ཆེད་དུ་སློབ་དཔོན་ཉིད་ཀྱིས་ཐ་སྙད་མཛད་པའོ། །སྔར་བྱུང་སེམས་ཅན་གཟུགས་ཅན་བཞིན། །ཞེས་སོགས་ཀྱི་སྐབས་སུ། བསྐལ་པ་དང་པོའི་མིའི་མཚན་ཉིད། དེ་ལས་འགྲིབ་པའི་ཚུལ། བསྐལ་པ་འདི་ཉིད་ངོས་བཟུང་བ་གསུམ་ལས། དང་པོ་ནི། གླིང་བཞིའི་མི་ཆགས་པ་ནས་བཟུང་སྟེ་ཚེ་ལོ་དཔག་མེད་ནས་འགྲིབ་པའི་འགོ་མི་རྩོམ་པའི་བར་གྱི་སེམས་ཅན་རྣམས་ནི་གཟུགས་ཅན་གྱི་ལྷ་བཞིན་དུ་རང་གི་ལུས་ལ་འོད་ཡོད་པ་དང་། ཡིད་ལས་བྱུང་ཞིང་རྫུ་འཕྲུལ་དང་ལྡན་པ་དང་། ཟས་སུ་དགའ་བ་ཟ་ཞིང་། ཡན་ལག་དང་དབང་པོ་ཚང་བ་དང་། རྒྱུད་འཇམ་ཤིང་ཚེ་རིང་བ་ལ་སོགས་པ་སྟེ་སེམས་ཅན་སེམས་ཅན་ཞེས་བྱ་བ་ཙམ་མ་གཏོགས། ཕོ་མོའི་བྱེ་བྲག་དང་། མིང་ཐ་དད་པ་ཡང་མེད་པར་བཤད་དོ། །གཉིས་པ་ནི། དེ་ནས་རིམ་གྱིས་རོ་ལ་ཆགས་ཏེ། ཐོག་མར་སའི་བཅུད་ཁ་དོག་དམར་སེར། རོ་སྦྲང་རྩི་མ་བསྐོལ་བ་ལྟ་བུའི་རོ་སེམས་ཅན་བརྐམ་པའི་རང་བཞིན་ཅན་འགའ་ཞིག་གིས་མྱོང་ཞིང་ཟོས་པས་ཁམ་ཟས་ཀྱི་དང་པོ་བྱུང་ངོ་། །དེ་ལྟར་གཞན་གྱིས་ཀྱང་ཟོས་པས་ལུས་ལྕི་ཞིང་འོད་ནུབ་པ་དང་། ལྷའི་བུ་ཉི་མ་གཞལ་མེད་ཁང་ལ་ཞུགས་ནས་གླིང་བཞི་བསྐོར་བས་ཉི་མ་བྱུང་། དེ་ནུབ་པ་དང་ཟླ་བ་ཤར་བས་ད་ནང་གི་དེའི་ཟླ་བྱུང་ཞེས་གྲགས་སོ། །དེ་ནས་སའི་ཞག་དོང་ཀའི་མེ་ཏོག་ལྟ་བུ་བྱུང་སྟེ། དེ་ཡང་སྔ་མ་ལྟར་ཟད། དེ་ནས་མྱུ་གུའི་ཚལ་ཀ་དམ་པའི་མེ་ཏོག་ལྟ་བུ་བྱུང་སྟེ་ཡང་ཟད། དེ་ནས་མ་སྨོས་མ་བཏབ་པའི་འབྲས་སཱ་ལུ་ཕུབ་ཤུན་མེད་པ་བྱུང་སྟེ། ཟོས་པ་དང་། དེ་ཆེས་རགས་པས་རྒྱུ་མཐུན་གྱི་ལམ་གཉིས་དོད་ཅིང་། སྔོན་གོམས་པའི་དབང་གིས་ལོག་པར་ཞུགས་པ་ལ་གཞན་གྱིས་གནོད་པ་བསྐྱབ་པའི་ཕྱིར། ཁང་པ་བྱས་པས་ཁྱིམ་ཞེས་གྲག་གོ །དེ་ཡང་འབྲས་སཱ་ལུ་ནང་ནུབ་ཟ་རེས་ཀྱིས་ལེན་ཅིང་། སླར་སྐྱེ་བ་ལ་ལེ་ལོ་ཅན་འགའ་ཞིག་གིས་གསོག་འཇོག་བྱས་ཤིང་། གཞན་གྱིས་ཀྱང་དེ་ལྟར་བྱས་པས་སཱ་ལུ་ཟད་དོ། །དེ་ནས་འཛིན་བཅས་རྣམས་ཀྱི་ཞིང་ལ་ས་བོན་བཏབ་སྟེ། ཞིང་སོ་སོར་བགོས་ནས་བདག་ཏུ་འཛིན་པ་དང་བཅས་ཏེ་ས་བོན་བཏབ་པ་ལ་རྐུན་མ་སོགས་བྱུང་བས་དེར་སྐྱོ་ཞིང་ཡིད་ཕྱིར་ཕྱོགས་ཏེ་དགོན་པར་སོང་བས་བྲམ་ཟེ་བྱུང་། རྩོད་པ་མི་འབྱུང་བར་བྱ་བའི་ཕྱིར། མི་རྣམས་ཀྱིས་འདིའི་ཁྱད་པར་བློ་གཟུ་བོ་འགའ་ཞིག་ཞིང་དཔོན་དུ་བསྐོས་ཏེ། རང་རང་གི་སྟོན་ཐོག་དྲུག་ཆས་བསྟབས་པ་ནི་རྒྱལ་རིགས་སོ། །དེ་ཉིད་སོ་སྐྱེ་ཕལ་པོ་ཆེས་བཀུར་བའི་མང་པོས་བཀུར་བའི་རྒྱལ་བརྒྱུད་ཀྱི་དང་པོ་སྟེ། མང་པོས་བཀུར་དང་འོད་མཛེས་དང་། །དགེ་བ་དགེ་མཆོག་གསོ་སྦྱོང་འཕགས། །བསྐལ་པ་དང་པོའི་རྒྱལ་པོ་ལྔ། །སྤྱི་བོ་སྐྱེས་དང་མཛེས་པ་དང་། །ཉེར་མཛེས་མཛེས་ཅན་མཛེས་ལྡན་ཏེ། །འཁོར་ལོས་བསྒྱུར་བའི་རྒྱལ་པོ་ལྔ། །གླིང་བཞི་ལ་སོགས་རིམ་པར་དབང་། །ཞེས་པ་རྣམས་སོ། །བརྒྱད་ཁྲི་པ་མན་ཆོད་དུ་འཁོར་ལོས་བསྒྱུར་བ་མི་འབྱུང་བས་དེའི་བརྒྱུད་པ་དུ་མ་འབྱུང་བའི་བར་སྐབས་སུ། རྒྱལ་པོ་བྷ་ར་དྷྭ་ཛ་དང་། གོའུ་ཏ་མ་གཉིས་བྱུང་བའི་དང་པོས་རྒྱལ་སྲིད་བཟུང་། གཉིས་པས་དྲང་སྲོང་མདོག་ནག་གི་དྲུང་དུ་ཚངས་པར་སྤྱོད་པ་ལ་ཆད་པས་ཕོག་པས་གསལ་ཤིང་ལ་བསྐྱོན་པའི་ཚེ་ཚུལ་བཞིན་མ་ཡིན་པ་ཡིད་ལ་བྱས་པའི་ས་བོན་ལས་སྒོ་ང་གྲུབ་པ་ཉི་མས་སྨིན་པར་བྱས་པ་དང་། གོའུ་ཏ་མའི་བུ་ཡིན་པ་དང་། བུ་རམ་ཤིང་གི་གསེབ་ནས་རྙེད་པས་ཉི་མའི་གཉེན་དང་། གོའུ་ཏ་མ་དང་། བུ་རམ་ཤིང་པ་ཞེས་པའི་མིང་གསུམ་བྱུང་བ་ཡིན་ནོ། །དེ་ནས་རིམ་གྱིས་རྒྱལ་པོ་སྐྱབ་སེང་གི་བུ་སྔ་ཚར་བཞི། སེར་སྐྱའི་གནས་སུ་སྤྱུགས་པ་སྲིང་མོ་དང་ལྷན་ཅིག་འདུས་པས་ཤཱཀྱའི་རིགས། དེ་ནས་རིམ་གྱིས་སེང་གེ་འགྲམ་དང་ཟས་གཙང་མ་དང་། དོན་ཐམས་ཅད་གྲུབ་པ་དང་། སྒྲ་གཅན་ཟིན་གྱི་བར་དུ་བྱུང་ངོ་། །མ་ག་དྷའི་རྒྱལ་པོ་གཟུགས་ཅན་སྙིང་པོ་དང་། ཀོ་ས་ལའི་རྒྱལ་པོ་གསལ་རྒྱལ་དང་། བད་ས་ལའི་རྒྱལ་པོ་འཆར་བྱེད་དང་། འཕགས་རྒྱལ་གྱི་རྒྱལ་པོ་རབ་སྣང་ལ་སོགས་པ་ནི་ཁམས་ཀྱི་རྒྱལ་ཕྲན་ཞེས་བྱའོ། །བོད་རྣམས་ནི་སྔོན་སྟོན་པ་མ་བྱོན་པའི་དུས་ན་རྒྱལ་པོ་སྐྱབ་སེང་ཞེས་པས་རྩོད་པ་རྒྱལ་བར་བྱས་པའི་ཚེ། རཱུ་པའི་ཞེས་པའི་རྒྱལ་པོ་ཞིག་དཔུང་དང་བཅས་པ་བུད་མེད་ཀྱི་ཆས་སུ་ཞུགས་ནས་གངས་ཅན་གྱི་ཕྱོགས་སུ་བྲོས་པ་ལས་འཕེལ་བ་ནི་དེང་སང་ཡན་ཆད་བོད་ཅེས་གྲགས་སོ་ཞེས་སློབ་དཔོན་ཤེས་རབ་གོ་ཆས་བཤད་དོ། །གསུམ་པ་ནི་བར་གྱི་བསྐལ་པ་འདི་ནི་ཡ་ཐོག་རིང་མོ་ཡིན་པར་སྔར་གྱི་རྒྱལ་བརྒྱུད་བྱུང་ཚུལ་གྱིས་ཤེས་ལ། ད་དུང་གནས་པ་ལ་བར་བསྐལ་བཅུ་དགུ་ཡོད་པའོ། །འཇིག་རྟེན་བསྟན་པའི་གནས་ཀྱི་དཀའ་བའི་གནས་རྣམས་བཤད་ཟིན་ཏོ།། །།དེ་ནི་སེམས་པ་དང་འདུས་བྱས། །ཞེས་པའི་སྐབས་སུ།། །།

ཕུང་ཁམས་སྐྱེ་མཆེད་ཀྱི་རྣམ་གཞག་ཇི་སྙེད་ཤེས་བྱའི་སྒོ་འབྱེད།

ཕུང་ཁམས་སྐྱེ་མཆེད་ཀྱི་རྣམ་གཞག་ཇི་སྙེད་ཤེས་བྱའི་སྒོ་འབྱེད་ཅེས་བྱ་བ་བཞུགས་སོ།། ཕུང་པོ་དང་ཁམས་དང་སྐྱེ་མཆེད་ཀྱི་རྣམ་པར་གཞག་པ་ཇི་སྙེད་ཤེས་བྱའི་སྒོ་འབྱེད་ཅེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །གང་སྐུ་བཙོ་མའི་གསེར་ལྟར་རང་བཞིན་མཛེས་པ་གླེགས་བམ་རལ་གྲིས་བརྒྱན། །གང་གསུང་ཚངས་པའི་དབྱངས་ལྟར་རང་བཞིན་མཉེན་པ་ཡན་ལག་དྲུག་ཅུས་སྤྲས། །གང་ཐུགས་ཉི་མའི་འོད་ལྟར་རང་བཞིན་གསལ་བ་ཡེ་ཤེས་འོད་ཀྱིས་མཛེས། །གང་གི་ཡིད་བཞིན་ནོར་ལྟར་རང་བཞིན་རྟོག་མེད་བློ་གྲོས་ལྷུན་གྲུབ་རྒྱལ། །ཛམྦུའི་གླིང་དུ་དམ་ཆོས་མ་མོ་གང་གིས་རྣམ་ཕྱེ་ཐོགས་མེད་དང་། །གསུང་རབ་འཛིན་མར་ཐ་སྙད་སྣང་བ་གང་གིས་བཀྱེ་མཛད་དབྱིག་གི་གཉེན། །བློ་གྲོས་རྒྱ་མཚོར་ལེགས་བཤད་ཆར་པ་གང་གིས་འབེབས་མཛད་ཡོངས་འཛིན་མཚོ། །སྔོན་ཆད་འདས་དང་ད་ལྟ་གང་ན་བཞུགས་པ་རྣམས་ལ་གུས་ཕྱག་འཚལ། །མཁས་མཆོག་སྔ་མས་ཡང་ཡང་མ་དཔྱད་ཤེས་བྱའི་གནས་དེ་ཡོད་མིན་ཀྱང་། །མཁའ་ལྡིང་དབང་པོ་ལིང་ལིང་བསྒྱུར་བའི་གར་གྱིས་རྩེ་བའི་ལྷ་ལམ་དུ། །བུང་བ་གཞོན་ནུ་དིར་དིར་སྒྲོགས་པའི་གཤོག་རྩེ་བསྐྱོད་པ་ཇི་བཞིན་ཏུ། །བློ་གྲོས་གསལ་ལྡན་རིག་རིག་མིག་གིས་གནས་ལུགས་འབྱེད་ལ་སྤྲོ་བ་སྐྱེས། །འདིར་སྡོམ་ནི། ཆོས་གསུམ་གསུངས་པའི་དགོས་པ་དང་། །ཆོས་གསུམ་སྤྱི་ཡི་རྣམ་གཞག་དང་། །ཕུང་པོའི་དཀའ་གནས་བྱེ་བྲག་ཏུ། །བཤད་པ་གསུམ་གྱིས་དོན་འདི་བསྡུས། །དེ་ལ་དང་པོ་ནི། ཡང་དག་པར་རྫོགས་པའི་སངས་རྒྱས་ཀྱིས་ཕུང་པོ་དང་། ཁམས་དང་། སྐྱེ་མཆེད་ཀྱི་རྣམ་གཞག་ཇི་སྙེད་ཅིག་གསུངས་པ་ཐམས་ཅད་ནི་ཉོན་མོངས་ཀྱི་རྩ་བ་བདག་ཏུ་འཛིན་པ་སྤོང་བའི་ཆེད་ཡིན་ལ། དེ་ལ་ཡང་བདག་འཛིན་གྱི་ཞེན་ཡུལ་སུན་ཕྱུང་བའི་སྒོ་ནས་སྤང་དགོས་ཏེ། རྣམ་འགྲེལ་ལས། འདི་ཡུལ་སུན་ཕྱུང་མེད་པར་ནི། །དེ་སྤོང་བ་ནི་ནུས་མ་ཡིན། །ཡོན་ཏན་སྐྱོན་དང་རྗེས་འབྲེལ་བའི། །འདོད་དང་སྡང་སོགས་སྤོང་བ་ནི། །དེ་དག་ཡུལ་ལ་མ་མཐོང་བས། །ཡིན་གྱི་ཕྱི་ཚུལ་དག་གིས་མིན། །ཞེས་གསུངས་སོ། །ཞེན་ཡུལ་དེ་ཡང་ངར་འཛིན་ལྷན་སྐྱེས་ཀྱིས་ཕུང་ཁམས་སྐྱེ་མཆེད་ལ་དམིགས་ནས་ངར་འཁྲུལ་པའི་ང་ཙམ་དེ་ཉིད་ཡིན་པས་འཁྲུལ་གཞི་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཙམ་དུ་ཤེས་པ་ན་ངར་འཁྲུལ་པའི་འཁྲུལ་པ་དེ་ཉིད་ལྡོག་སྟེ། འཁྲུལ་གཞི་ཐག་ཁྲ་ངོས་ཟིན་པ་ན་སྦྲུལ་འཛིན་གྱི་བློ་ལྡོག་པ་བཞིན་ནོ། །དེའི་ཕྱིར་བདག་ཏུ་འཁྲུལ་པའི་བློ་ཡང་རྣམ་པ་གསུམ་སྟེ། རིལ་པོའི་བདག་ཏུ་འཛིན་པ་དང་། ཟ་བ་པོའམ་ལོངས་སྤྱོད་པོའི་བདག་ཏུ་འཛིན་པ་དང་། བྱེད་པ་པོའམ་རྒྱུའི་བདག་ཏུ་འཛིན་པའོ། །དང་པོའི་གཉེན་པོར་ཕུང་པོ་ལྔ་གསུངས་ཏེ། བདག་ཏུ་འཁྲུལ་པའི་གཞི་ཕུང་པོ་ལྔར་རྟོགས་པ་ན་རིལ་པོའི་བདག་མེད་པར་རྟོགས་པའི་ཕྱིར་རོ། །གཉིས་པའི་གཉེན་པོར་སྐྱེ་མཆེད་བཅུ་གཉིས་གསུངས་ཏེ། ཟ་བ་པོའི་བདག་ཏུ་འཁྲུལ་པའི་གཞི་ནང་གི་སྐྱེ་མཆེད་དྲུག་ཏུ་རྟོགས་པ་ན་ཟ་བ་པོའི་བདག་མེད་པར་རྟོགས་པའི་ཕྱིར། གསུམ་པའི་གཉེན་པོར་ཁམས་བཅོ་བརྒྱད་གསུངས་ཏེ། རྒྱུའམ་བྱེད་པ་པོ་ཁམས་སུ་རྟོགས་པ་ན་རྒྱུའམ་བྱེད་པ་པོའི་བདག་མེད་པར་རྟོགས་པའི་ཕྱིར། དེ་སྐད་དུ་ཡང་ཕུང་པོ་ལྔའི་རབ་བྱེད་ལས། ཅིའི་ཕྱིར་ཕུང་པོ་ལ་སོགས་པ་བཤད་ཅེ་ན། བདག་ཏུ་འཛིན་པ་རྣམ་པ་གསུམ་གྱི་གཉེན་པོར་གོ་རིམ་བཞིན་ནོ། །བདག་ཏུ་འཛིན་པ་རྣམ་པ་གསུམ་ནི་གཅིག་པུར་འཛིན་པ་དང་། ཟ་བར་འཛིན་པ་དང་། བྱེད་པར་འཛིན་པའོ་ཞེས་གསུངས་སོ། །ཡང་གསུམ་ཆར་ཡང་རིལ་པོའི་བདག་ཏུ་འཛིན་པའི་གཉེན་པོར་གསུངས་ཏེ། འདི་ལྟར་སེམས་བྱུང་ལ་རིལ་པོའི་བདག་ཏུ་འཛིན་པའི་གཉེན་པོར་ཕུང་པོ་ལྔ་གསུངས་ཏེ། གཟུགས་དང་རྣམ་པར་ཤེས་པ་རེ་རེར་བསྡུས་ནས་སེམས་བྱུང་ལ་ཕུང་པོ་གསུམ་དུ་ཕྱེ་བའི་ཕྱིར་རོ། །གཟུགས་སེམས་གཉིས་ཀ་ལ་རིལ་པོའི་བདག་ཏུ་འཛིན་པའི་གཉེན་པོར་ཁམས་བཅོ་བརྒྱད་གསུངས་ཏེ། གཟུགས་ལ་གཟུགས་ཅན་གྱི་ཁམས་བཅུ་དང་། སེམས་ལ་རྣམ་པར་ཤེས་པའི་ཁམས་བདུན་དུ་ཕྱེ་བའི་ཕྱིར་རོ། །གཟུགས་ལ་རིལ་པོའི་བདག་ཏུ་འཛིན་པའི་གཉེན་པོར་སྐྱེ་མཆེད་བཅུ་གཉིས་གསུངས་ཏེ། གཟུགས་ལ་གཟུགས་ཅན་གྱི་སྐྱེ་མཆེད་བཅུར་ཕྱེ་ནས་སེམས་ཡིད་ཀྱི་སྐྱེ་མཆེད་གཅིག་ཏུ་བསྡུས་པའི་ཕྱིར་རོ། །གཉིས་པ་ལ་སྡོམ་ནི། ངོ་བོ་དབྱེ་བ་རྣམ་གཞག་དང་། །གྲངས་དང་གོ་རིམ་ངེས་པ་དང་། །སྒྲ་དོན་ཉེར་ལེན་འཇོག་ཚུལ་དང་། །ཕུང་པོ་སྐྱེ་མཆེད་དོགས་གཅོད་དང་། །ཆོས་གསུམ་རེ་རེས་བསྡུས་ཚུལ་དང་། །མིང་ཅན་གཞན་ཡང་བསྡུས་ཚུལ་དང་། །རབ་དབྱེ་ལ་སོགས་ཁ་འཕངས་ཏེ། །དོན་ཚན་རྣམ་པ་བཅུ་གཉིས་སོ། །དང་པོ་ངོ་བོ་ལ་ཕུང་པོའི་ངོ་བོ་ནི་དུ་མ་སྤུངས་པའོ། །དུ་མ་སྤུངས་པའི་དོན་ཡང་བློས་ཕྱོགས་གཅིག་ཏུ་སྤུངས་སུ་རུང་བ་ཙམ་ཡིན་གྱི་དོན་ལ་སྤུངས་པ་ནི་མ་ཡིན་ཏེ། དུས་སྔ་ཕྱི་དང་། རྒྱུད་ཐ་དད་ཀྱི་གཟུགས་རྣམས་ཕྱོགས་གཅིག་ཏུ་སྤུངས་པར་བཤད་ཅིང་། དེ་དག་དོན་ལ་ཕྱོགས་གཅིག་ཏུ་སྤུངས་སུ་མི་རུང་བའི་ཕྱིར་ཏེ། ཕུང་པོ་ལྔའི་རབ་བྱེད་ལས། ཅིའི་ཕྱིར་ཕུང་པོ་ཞེས་བྱ་ཞེ་ན་སྤུངས་པའི་ཕྱིར་ཏེ། དུས་དང་། རྒྱུ་དང་། རྣམ་པ་དང་། འགྲོ་བ་དང་། ཡུལ་ཐ་དད་པའི་གཟུགས་ལ་སོགས་པ་ཉིད་མདོར་བསྡུས་པ་ཉིད་ཀྱི་ཕྱིར་རོ། །ཞེས་གསུངས་སོ། །ཁམས་ཀྱི་ངོ་བོ་ནི་ཉེར་སྤྱོད་འཛིན་པའོ། །དེ་ལ་ཉེར་སྤྱོད་ནི་ཡུལ་ལ་ཉེ་བར་ལོངས་སྤྱོད་པ་ན་རྣམ་པར་ཤེས་པ་ཡིན་ལ། དེ་ཉིད་གནས་དང་། དམིགས་པ་དང་། རང་གི་ངོ་བོ་གསུམ་པོ་གང་ཡང་རུང་བའི་སྒོ་ནས་འཛིན་པས་སོ། །སྐྱེ་མཆེད་ཀྱི་ངོ་བོ་ནི་ཉེར་སྤྱོད་སྐྱེ་བའི་སྒོར་གྱུར་པ་སྟེ། གནས་དང་དམིགས་པ་གང་རུང་གི་སྒོ་ནས་ཉེར་སྤྱོད་སྐྱེ་བའི་སྒོར་གྱུར་པའོ། །འདིར་འབྲས་བུ་རྣམ་པར་ཤེས་པའི་སྐྱེ་མཆེད་མ་བཞག་པ་ནི་ཉེར་སྤྱོད་སྐྱེ་བའི་སྒོ་འབྱེད་པའི་ཆ་ནས་ཡིད་ཀྱི་སྐྱེ་མཆེད་དུ་འདུས་ལ། སྐྱེས་ཟིན་གྱི་ཆ་ནས་སྐྱེ་མཆེད་དུ་འཇོག་པའི་སྐབས་མིན་པའི་ཕྱིར་རོ། །གཉིས་པ་དབྱེ་བ་ལ་གསུམ་ལས། ཕུང་པོ་ལ་དབྱེ་ན་ལྔ་སྟེ། གཟུགས་ཀྱི་ཕུང་པོ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོའོ། །དང་པོའི་མཚན་ཉིད། གཟུགས་སུ་ཡོད་པ་རྣམ་པ་གཉིས་ཀྱིས་གཟུགས་སུ་རུང་བ་དུ་མ་སྤུངས་པའོ། །གཟུགས་སུ་ཡོད་པ་གཉིས་ནི་རེག་པས་གཟུགས་སུ་རུང་བ་དང་། ཡུལ་དཔྱད་པས་གཟུགས་སུ་རུང་བ་ཡིན་ལ། དང་པོ་ནི། ལག་པ་ལ་སོགས་པའི་རེག་པས་རེག་ན་གནོད་པ་བྱར་རུང་བ་སྟེ། སྒྲ་ལྟ་བུ་ལ་ཡང་དེའི་རྒྱུ་རྔ་ལྟ་བུ་ལ་རེག་པས་གནོད་པ་བྱར་རུང་བ་དང་། དབང་པོ་གཟུགས་ཅན་པ་རྣམས་ལ་ཡང་དབང་རྟེན་ལ་རེག་པས་གནོད་པ་བྱར་རུང་བའོ། །གཉིས་པ་ནི། ཡིད་ཀྱི་རྣམ་པར་ཤེས་པ་རྟོག་བཅས་ལ་གཟུགས་འདི་དང་འདིའོ། །འདི་ལྟ་བུ་དང་འདི་ལྟ་བུའོ་ཞེས་བཀྲ་བར་སྣང་དུ་རུང་བ་སྟེ། ཆོས་ཀྱི་སྐྱེ་མཆེད་ཀྱི་ཁོངས་སུ་གཏོགས་པའི་ཀུན་བཏགས་དང་དབང་འབྱོར་པའི་གཟུགས་རྣམ་པ་གཉིས་སོ། །ཚོར་བའི་ཕུང་པོའི་མཚན་ཉིད། སིམ་གདུང་བར་མ་གང་རུང་དུ་ཉམས་སུ་མྱོང་བ་དུ་མ་སྤུངས་བའོ། །གལ་ཏེ་ཉམས་སུ་མྱོང་བའི་དོན་ཡུལ་མྱོང་བའམ་རང་མྱོང་བ་ལ་བྱེད། གཉིས་ཀ་ལྟར་ན་ཡང་སེམས་སེམས་བྱུང་ཐམས་ཅད་ཚོར་བར་འགྱུར་རོ་ཞེ་ན། དེ་གཉིས་ཀ་ལྟར་མིན་གྱི་རྣམ་སྨིན་གྱི་ངོ་བོར་གྱུར་པའི་བདེ་སྡུག་བཏང་སྙོམས་སུ་ཉམས་སུ་མྱོང་བའོ། །འདུ་ཤེས་ཀྱི་ཕུང་པོའི་མཚན་ཉིད། ཡུལ་དབང་རྣམ་ཤེས་གསུམ་འདུས་ནས་ཡུལ་གྱི་མཚན་མ་སོ་སོར་གཅོད་པར་བྱེད་པའི་སེམས་བྱུང་དུ་མ་སྤུངས་པའོ། །དེ་ཡང་ཆོས་རྣམས་ལ་གཞན་དང་མ་འདྲེས་པའི་ཐུན་མོང་མིན་པའི་ཁྱད་ཆོས་རེ་རེ་ཡོད་པ་ནི་མཚན་མ་ཡིན་ལ་དེ་འཛིན་པའི་སྒོ་ནས་འདི་ནི་འདིའོ་ཞེས་ཐ་སྙད་འདོགས་པའི་རྒྱུར་གྱུར་པ་སྟེ། དཔེར་ན་ནོག་ལྐོག་ཤལ་བཟུང་ནས་འདི་ནི་བ་ལང་ངོ་ཞེས་པའི་ཐ་སྙད་འདོགས་པའི་རྒྱུར་གྱུར་པ་ལྟ་བུའོ། །འདུ་བྱེད་ཀྱི་ཕུང་པོའི་མཚན་ཉིད་ལ། མཛོད་ལས། ཕུང་པོ་བཞི་ལས་དོན་གཞན་དུ་གྱུར་པའི་འདུས་བྱས་ཞེས་གསུངས་པ་ནི་ལྡན་མིན་འདུ་བྱེད་རྫས་སུ་གྲུབ་ཅིང་རང་གང་ལ་ལྡན་པའི་གནས་སྐབས་ཅན་དེ་ལས་རྫས་གཞན་དུ་འདོད་པའི་ལུགས་སོ། །ཀུན་བཏུས་ལྟར་ན་སེམས་ཡུལ་ལ་མངོན་པར་འདུ་བྱེད་པ་གཙོ་བོར་གྱུར་པའི་སེམས་བྱུང་དང་གཟུགས་དང་སེམས་དང་སེམས་ལས་བྱུང་བའི་གནས་སྐབས་ལ་བཏགས་པའི་བཏགས་ཡོད་གང་རུང་གིས་བསྡུས་པའི་འདུ་བྱེད་དུ་མ་སྤུངས་པའོ། །སེམས་ཡུལ་ལ་མངོན་པར་འདུ་བྱེད་པ་ནི་སེམས་པ་ཡིན་ལ། དེ་ཉིད་འདུ་བྱེད་ཀྱི་ཕུང་པོའི་གཙོ་བོར་བཤད་དེ། དེའི་དབང་གིས་སེམས་དགེ་བ་དང་། ཉོན་མོངས་ཅན་དང་། གནས་སྐབས་ཀྱི་བྱེ་བྲག་ལ་མངོན་པར་འདུ་བྱེད་པས། དགེ་བ་ལ་མངོན་པར་འཇུག་པའི་ཚེ་སེམས་བྱུང་དགེ་བ་དང་། ཉོན་མོངས་ཅན་ལ་མངོན་པར་འདུ་བྱེད་པའི་ཚེ་སེམས་བྱུང་ཉོན་མོངས་ཅན་དང་། གནས་སྐབས་ཀྱི་བྱེ་བྲག་ལ་མངོན་པར་འདུ་བྱེད་པའི་ཚེ་སེམས་བྱུང་སྒྲིབ་ལུང་མ་བསྟན་འབྱུང་ལ། འདུ་བྱེད་པའི་གནས་སྐབས་ཉིད་ལ་ལྡན་མིན་འདུ་བྱེད་དུ་བཞག་པའི་ཕྱིར་རོ། །རྣམ་པར་ཤེས་པའི་ཕུང་པོའི་མཚན་ཉིད། དམིགས་པའི་ངོ་བོ་རང་སྟོབས་ཀྱིས་སོ་སོར་རྣམ་པར་རིག་པ་དུ་མ་སྤུངས་པའོ། །སོ་སོར་རྣམ་པར་རིག་པའི་དོན་ནི་མིག་གི་རྣམ་པར་ཤེས་པས་གཟུགས་ཀྱི་སྐྱེ་མཆེད་རིག་གི་སྒྲའི་སྐྱེ་མཆེད་མི་རིག་པ་ལ་སོགས་པའོ། །གཉིས་པ་ཁམས་ལ་དབྱེ་ན་བཅོ་བརྒྱད་དེ། མིག རྣ་བ། སྣ། ལྕེ། ལུས། ཡིད་ཀྱི་ཁམས་ཏེ་རྟེན་དབང་པོའི་ཁམས་དྲུག གཟུགས། སྒྲ། དྲི། རོ། རེག་བྱ་ཆོས་ཀྱི་ཁམས་ཏེ་དམིགས་པ་ཡུལ་གྱི་ཁམས་དྲུག མིག་གི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་འབྲས་བུ་རྣམ་པར་ཤེས་པའི་ཁམས་དྲུག་གོ །མིག་གི་ཁམས་ཀྱི་མཚན་ཉིད། ཉེར་སྤྱོད་མིག་གི་རྣམ་པར་ཤེས་པ་གནས་ཀྱི་སྒོ་ནས་འཛིན་པ་དང་། མིག་གི་ས་བོན་གང་རུང་གིས་བསྡུས་པའི་སྒོ་ནས་དབང་པོའི་ཁམས་སུ་བཞག་པའོ། །ཉེར་སྤྱོད་འཛིན་པ་ལ་མིག་གི་རྣམ་པར་ཤེས་པའི་བདག་རྐྱེན་བྱས་ཟིན་པ་དང་། བྱེད་བཞིན་པ་གཉིས་ཡོད་ཀྱི་མ་འོངས་པ་ནི་ཉེར་སྤྱོད་འཛིན་པར་མ་ངེས་པས་མ་སྨྲོས་པར་བཤད་དོ། །མིག་གི་ས་བོན་ལ་མ་འོངས་པ་ན་མིག་འབྱུང་རུང་ད་ལྟ་ནུས་པའི་ངོ་བོར་གནས་པ་དང་། རྣམ་པར་སྨིན་པའི་ཀུན་གཞིའི་རྣམ་པར་ཤེས་པ་ལས་ད་ལྟ་མིག་གྲུབ་ཟིན་པ་གཉིས་ཡོད་པར་གསུངས་སོ། །དེ་ལྟར་ན་མིག་དང་མིག་གི་ཁམས་ལ་མུ་བཞི་ཡོད་དེ། མིག་ཡིན་ལ་མིག་གི་ཁམས་མ་ཡིན་པ་ནི་དགྲ་བཅོམ་པ་ཐ་མའི་མིག་ལྟ་བུའོ། །མིག་གི་ཁམས་ཡིན་ལ་མིག་མ་ཡིན་པ་ནི་མངལ་ན་གནས་པའི་མིག་མ་དོད་པའི་གནས་སྐབས་ཀྱི་མིག་གི་རྒྱུ་དང་། གཟུགས་མེད་པར་སྐྱེས་པའི་སོ་སོའི་སྐྱེ་བོའི་རྒྱུད་ཀྱི་ས་བོན་ལྟ་བུའོ། །གཉིས་ཀ་མ་ཡིན་པ་ནི་ཕུང་པོ་ལྷག་མེད་ཀྱི་དང་། གཟུགས་མེད་པར་སྐྱེས་པའི་འཕགས་པའི་རྒྱུད་ཀྱི་ཆོས་ལྟ་བུའོ། །གཉིས་ཀ་ཡིན་པ་ནི་གནས་སྐབས་གཞན་གྱི་མིག་ལྟ་བུའོ། །མིག་གི་ཁམས་ཀྱི་མཚན་ཉིད་ཇི་ལྟ་བ་བཞིན་དུ་ཡིད་ཀྱི་ཁམས་ཀྱི་བར་གྱི་མཚན་ཉིད་རྣམས་ལའང་བསྒྲེ་བར་བྱའོ། །གཟུགས་ཀྱི་ཁམས་ཀྱི་མཚན་ཉིད། ཉེར་སྤྱོད་མིག་གི་རྣམ་པར་ཤེས་པ་དམིགས་པའི་སྒོ་ནས་འཛིན་པའམ། མིག་གི་དབང་གིས་གྲུབ་པའི་ཡུལ་གང་རུང་གིས་བསྡུས་པའི་སྒོ་ནས་ཡུལ་གྱི་ཁམས་སུ་རྣམ་པར་བཞག་པའོ། །ཉེར་སྤྱོད་འཛིན་པ་ལ་མིག་གི་རྣམ་པར་ཤེས་པའི་དམིགས་རྐྱེན་བྱས་ཟིན་པ་དང་བྱེད་བཞིན་པ་གཉིས་ཡོད་ལ། མིག་གི་དབང་གིས་གྲུབ་པའི་དོན་ནི་གདུགས་ནམ་མཁའ་ལ་བཟུང་བ་ན་གྲིབ་མ་ས་ལ་འབབ་པ་ལྟར་དབང་པོ་ལྔ་གྲུབ་པའི་སྟོབས་ཀྱིས་ཕྱི་རོལ་དུ་ཡུལ་ལྔ་གྲུབ་པའོ། །གཟུགས་ཀྱི་ཁམས་ཀྱི་མཚན་ཉིད་ཇི་ལྟ་བ་བཞིན་དུ་ཆོས་ཀྱི་ཁམས་ཀྱི་བར་ལ་མཚན་ཉིད་དེ་བཞིན་དུ་ཤེས་པར་བྱའོ། །མིག་གི་རྣམ་པར་ཤེས་པའི་ཁམས་ཀྱི་མཚན་ཉིད། རྟེན་མིག་དང་དམིགས་པ་གཟུགས་ལ་བརྟེན་ནས་གཟུགས་ཀྱི་ངོ་བོ་ཙམ་རིག་པའི་རྣམ་པར་རིག་པ་དང་། མིག་གི་རྣམ་པར་ཤེས་པའི་ས་བོན་གང་རུང་གིས་བསྡུས་པའི་སྒོ་ནས་འབྲས་བུའི་ཁམས་སུ་རྣམ་པར་བཞག་པའོ། །ས་བོན་ལ་འབྱུང་འགྱུར་དང་། གྲུབ་ཟིན་གཉིས་ཡོད་པ་དང་། མུ་བཞི་བརྩི་བའི་ཚུལ་ནི་མིག་གི་ཁམས་ཀྱི་སྐབས་སུ་བཤད་པ་ལས་དཔག་སྟེ་ཤེས་པར་བྱའོ། །གསུམ་པ་སྐྱེ་མཆེད་ལ་དབྱེ་ན་བཅུ་གཉིས་ཏེ། མིག་སོགས་ནང་གི་སྐྱེ་མཆེད་དྲུག གཟུགས་སོགས་ཕྱིའི་སྐྱེ་མཆེད་དྲུག་གོ །འདི་དག་གི་མཚན་ཉིད། ཀུན་ལས་བཏུས་ལས་ཁམས་ཇི་ལྟ་བ་བཞིན་དུ་བལྟ་སྟེ་དེ་ཡང་ཇི་ལྟར་མཐུན་མཐུན་དུ་སྦྱོར་ཞེས་པ་ཙམ་ལས་མ་གསུངས་ཀྱང་། ཁམས་ཀྱི་དོན་ཉེར་སྤྱོད་འཛིན་པ་དང་། སྐྱེ་མཆེད་ཀྱི་དོན་ཉེར་སྤྱོད་སྐྱེ་བའི་སྒོར་གྱུར་པ་ནི་ཁྱད་པར་ཡིན་པས་མིག་གི་སྐྱེ་མཆེད་ཀྱི་མཚན་ཉིད། ཉེར་སྤྱོད་མིག་གི་རྣམ་པར་ཤེས་པ་གནས་ཀྱི་སྒོ་ནས་སྐྱེ་བའི་སྒོར་གྱུར་པ་སྟེ། མིག་གི་རྣམ་པར་ཤེས་པ་ཞེས་པས་ནང་གི་སྐྱེ་མཆེད་གཞན་རྣམས་ལས་ཁྱད་པར་དུ་བྱས་ལ། གནས་ཀྱི་སྒོ་ནས་ཞེས་པས་ཕྱིའི་སྐྱེ་མཆེད་རྣམས་ལས་ཁྱད་པར་དུ་བྱས་པའོ། །ཁམས་བཞིན་དུ་ཞེས་པའི་དོན་ནི་ཉེར་སྤྱོད་མ་འོངས་པ་སྐྱེ་བཞིན་པ་དང་། མིག་གི་ས་བོན་གཉིས་ཡོད་ཅེས་པའི་དོན་ཡིན་ལ། ཇི་ལྟར་མཐུན་མཐུན་ཞེས་པའི་དོན་ནི་ཉེར་སྤྱོད་འདས་པ་དང་ད་ལྟ་བ་ནི་སྐྱེས་ཟིན་པས་དེས་སྐྱེ་བའི་སྒོ་འབྱེད་པ་ལ་སྐྱེ་མཆེད་དུ་མི་འཇོག་གོ་ཞེས་པའི་དོན་ནོ། །མིག་གི་སྐྱེ་མཆེད་ཀྱི་མཚན་ཉིད་ཇི་ལྟ་བ་བཞིན་ཏུ་ཡིད་ཀྱི་སྐྱེ་མཆེད་ཀྱི་བར་གྱི་མཚན་ཉིད་ཀྱང་དེ་དང་འདྲ་བའོ། །གཟུགས་ཀྱི་སྐྱེ་མཆེད་ཀྱི་མཚན་ཉིད། ཉེར་སྤྱོད་མིག་གི་རྣམ་པར་ཤེས་པ་དམིགས་པའི་སྒོ་ནས་སྐྱེ་བའི་སྒོར་གྱུར་པ་སྟེ། དེས་ཆོས་ཀྱི་སྐྱེ་མཆེད་ཀྱི་བར་གྱི་མཚན་ཉིད་ཀྱང་རིགས་བསྒྲེ་སྟེ་ཤེས་པར་བྱའོ། །གསུམ་པ་མཚན་གཞིའི་རྣམ་གཞག་ལ་གསུམ་ལས། དང་པོ་ཕུང་པོ་ལ་ཡང་གཟུགས་ཀྱི་ཕུང་པོའི་མཚན་གཞི་ནི་འབྱུང་བ་ཆེན་པོ་བཞི་དག་དང་། འབྱུང་བ་ཆེན་པོ་བཞི་དག་རྒྱུར་བྱས་པའི་གཟུགས་རྣམ་པ་གཉིས་སོ། །འབྱུང་བ་ཆེན་པོ་བཞི་ནི། ས། ཆུ། མེ། རླུང་བཞི་སྟེ་མཚན་ཉིད་རིམ་བཞིན། སྲ་བའི་སྒོ་ནས་དང་། རླན་པའི་སྒོ་ནས་དང་། ཚ་བའི་སྒོ་ནས་དང་། ཡང་ཞིང་གཡོ་བའི་སྒོ་ནས་ལུས་ཤེས་ཀྱི་གཟུང་དོན་དུ་གྱུར་པའོ། །ཅིའི་ཕྱིར་ཆེན་པོ་ཞེས་བྱ་ཞེ་ན། འབྲས་བུའི་གཟུགས་ཐམས་ཅད་ཀྱི་རྟེན་དུ་གྱུར་པ་དང་། དེ་ཐམས་ཅད་ལ་ཁྱབ་པའི་ཕྱིར་རོ། །གཉིས་པ་འབྲས་བུའི་གཟུགས་ལ་མཛོད་དང་། པན་ཀན་ལས། དབང་པོ་ལྔ་དང་། དོན་ལྔ་དང་། རྣམ་པར་རིག་བྱེད་མ་ཡིན་པའི་གཟུགས་དང་བཅུ་གཅིག་ཏུ་གསུངས་ལ། ཀུན་ལས་བཏུས་ལས། ཆོས་ཀྱི་སྐྱེ་མཆེད་ཀྱི་གཟུགས་དང་བཅུ་གཅིག་ཏུ་གསུངས་སོ། །དབང་པོ་ལྔའི་མཚན་ཉིད་ལ། མཛོད་ལས། མིག་གི་རྣམ་པར་ཤེས་པའི་རྟེན་དུ་གྱུར་པའི་ནང་གཟུགས་དང་བ་ཞེས་སོགས་གསུངས་ཤིང་། པན་ཀན་ལས། གཟུགས་ཀྱི་ཡུལ་ཅན་དུ་གྱུར་པའི་ནང་གཟུགས་དང་བ་ཞེས་སོགས་གསུངས་ཤིང་། ཀུན་ལས་བཏུས་ལས། འབྱུང་བ་ཆེན་པོ་བཞི་དག་རྒྱུར་བྱས་པ་ཞེས་བསྣན་པ་མ་གཏོགས་མཛོད་དང་འདྲའོ། །ལྔ་པོ་དེ་དག་ལ་ཡང་དབྱེ་ན། རྟེན་བཅས་ཀྱི་དབང་པོ་དང་། དེ་མཚུངས་ཀྱི་དབང་པོ་གཉིས་སུ་ཡོད་དོ། །གཟུགས་ཀྱི་མཚན་ཉིད། འབྱུང་གྱུར་གང་ཞིག མིག་གི་དབང་པོའི་སྤྱོད་ཡུལ་དུ་གྱུར་པའི་ཕྱི་དོན་ཏེ། མངོན་པ་གོང་འོག་གཉིས་ཀ་ལས་མིག་གི་དབང་པོས་གཟུགས་མཐོང་བའི་དབང་དུ་བྱས་པའོ། །དེས་རེག་བྱའི་བར་གྱི་མཚན་ཉིད་ལ་ཡང་འགྲེ་ཞིང་། གཟུགས་ལ་དབྱེ་ན། མཛོད་ལས། གཟུགས་རྣམ་གཉིས་དང་རྣམ་ཉི་ཤུ། །ཞེས་རྩ་བའི་དབྱེ་བ་ཁ་དོག་གི་གཟུགས་དང་། དབྱིབས་ཀྱི་གཟུགས་གཉིས། ཁ་དོག་ལ་སྔོན་པོ་སོགས་བཞི། དབྱིབས་ལ་རིང་པོ་ལ་སོགས་པ་བརྒྱད་ཡོད་ཅིང་། ཡང་ཉི་ཤུར་ཡང་དབྱེ་སྟེ། སྔོ་སེར་དཀར་དམར་རིང་ཐུང་དང་། །ལྷམ་པ་ཟླུམ་པོ་མཐོ་དམའ་དང་། །ཕྱ་ལེ་ཕྱ་ལེ་མ་ཡིན་དང་། །སྤྲིན་དང་དུ་བ་རྡུལ་ཁུག་རྣ། །གྲིབ་མ་ཉི་མ་སྣང་མུན་ནོ། །ཞེས་པའོ། །ཀུན་ལས་བཏུས་ལས། དེའི་སྟེང་དུ་རྡུལ་ཕྲ་མོ་དང་། རགས་པ་དང་། མངོན་པར་སྐབས་ཡོད་པའི་དང་། རྣམ་པར་རིག་བྱེད་དང་། ནམ་མཁའ་ཁ་དོག་གཅིག་པའོ་སྟེ་ཉི་ཤུ་རྩ་ལྔར་བཤད་དོ། །པན་ཀན་ལས་ནི། ཁ་དོག་དང་། དབྱིབས་དང་། རྣམ་པར་རིག་བྱེད་གསུམ་དུ་གསུངས་སོ། །སྒྲ་ལ་མཛོད་ལས། སྒྲ་ནི་རྣམ་པ་བརྒྱད་ཡོད་དེ། །ཞེས་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ། སེམས་ཅན་དུ་སྟོན་པ་དང་། མི་སྟོན་པ་གཉིས། མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ། སེམས་ཅན་དུ་སྟོན་པ་དང་། མི་སྟོན་པ་གཉིས་ཏེ་བཞི། དེ་རེ་རེ་ལ་ཡང་ཡིད་དུ་འོང་མི་འོང་གཉིས་གཉིས་ཏེ་བརྒྱད་དུ་གསུངས་སོ། །ཀུན་ལས་བཏུས་ལས། ཡིད་དུ་འོང་བ་དང་། མི་འོང་བ་དང་། གཉིས་ཀ་མིན་པ་དང་གསུམ། ཟིན་པ་དང་། མ་ཟིན་པའི་དང་། དེ་གཉིས་ཀའི་འབྱུང་བ་ཆེན་པོའི་རྒྱུ་ལས་བྱུང་བ་གསུམ། འཇིག་རྟེན་གྱི་གྲགས་པ་དང་། གྲུབ་པས་བསྟན་པ་དང་། ཀུན་བཏགས་པ་དང་། འཕགས་པས་ཐ་སྙད་བཏགས་པ་དང་། འཕགས་པ་མ་ཡིན་པས་ཐ་སྙད་བཏགས་པ་སྟེ་བཅུ་གཅིག་ཏུ་གསུངས་སོ། །པན་ཀན་ལས་ནི། ཟིན་པ་དང་། མ་ཟིན་པ་དང་། གཉིས་ཀའི་འབྱུང་བ་ཆེན་པོའི་རྒྱུ་ལས་བྱུང་བ་གསུམ་དུ་གསུངས་སོ། །དྲི་ལ་མཛོད་ལས། དྲི་རྣམ་བཞི་ཞེས་དྲི་ཞིམ་པ་དང་། དྲི་ང་བ་དང་། དྲི་མཉམ་པ་དང་། མི་མཉམ་པ་སྟེ་བཞི་གསུངས་སོ། །ཀུན་བཏུས་ལས། སྔ་མ་གསུམ་པོ་དེའི་སྟེང་དུ། ལྷན་སྐྱེས་དང་། སྦྱར་བྱུང་དང་། གྱུར་པ་ལས་བྱུང་བ་སྟེ་དྲུག་ཏུ་གསུངས་སོ། །པན་ཀན་ལས། དྲི་ཞིམ་པ་དང་། དྲི་ང་བ་དང་། དེ་ལས་གཞན་པ་དང་གསུམ་དུ་གསུངས་སོ། །རོ་ལ་གཞུང་གསུམ་ཀ་ལས། མངར་སྐྱུར་ལན་ཚྭ་ཚ་བ་དང་། ཁ་བ་དང་ནི་བསྐ་བ་སྟེ། དྲུག་གསུངས་ལ། ཀུན་ལས་བཏུས་ལས། དེའི་སྟེང་དུ། ཡིད་དུ་འོང་བ་དང་། ཡིད་དུ་མི་འོང་བ་དང་། དེ་གཉིས་ཀ་མ་ཡིན་པ་དང་། ལྷན་སྐྱེས་སོགས་གསུམ་སྟེ་བཅུ་གཉིས་སུ་གསུངས་སོ། །རེག་བྱ་ལ་མཛོད་དང་། པན་ཀན་ལས། འབྱུང་བཞི་འཇམ་རྩུབ་ལྕི་ཡང་དང་། །གྲང་བ་བཀྲེས་པ་སྐོམ་པ་སྟེ། །བཅུ་གཅིག་གསུངས་ལ། ཀུན་ལས་བཏུས་ལས། འབྱུང་བཞི་བཞག་ནས་ཕྱི་མ་བདུན་པོའི་སྟེང་དུ། མཉེན་པ་ཉིད་དང་། ལྷོད་པ་ཉིད་དང་། ལྷོད་པ་མ་ཡིན་པ་དང་། ཚིམས་པ་དང་། ཉམ་ཡོད་པ་དང་། ཉམ་ཆུང་བ་དང་། བརྒྱལ་བ་དང་། གཡའ་བ་དང་། འགྲེད་པ་དང་། ན་བ་དང་། རྒ་བ་དང་། འཆི་བ་དང་། ངལ་བ་དང་། ངལ་སོས་པ་དང་། སྤུངས་ཆེ་བ་སྟེ་ཉེར་གཉིས་སུ་གསུངས་སོ། །ཆོས་ཀྱི་སྐྱེ་མཆེད་པའི་གཟུགས་ལ། ཀུན་བཏུས་ལས། བསྡུས་པ་ལས་གྱུར་པ་དང་། མངོན་པར་སྐབས་ཡོད་པའི་དང་། ཡང་དག་པར་བླངས་པ་ལས་བྱུང་བ་དང་། ཀུན་བཏགས་པ་དང་། དབང་འབྱོར་པ་དང་ལྔ་གསུངས་པའི་དང་པོ་ནི། གཟུགས་ཅན་རགས་པ་བློས་རྣམ་པར་ཕྱེ་ནས་མཐར་བློས་རྡུལ་ཕྲ་རབ་ཏུ་བཞག་པའོ། །གཉིས་པ་ནི། ཡིད་ཀྱི་རྣམ་པར་ཤེས་པའི་ཡུལ་དུ་གྱུར་པའི་བར་སྣང་སྐྱ་སེང་པར་གྱུར་པའོ། །གསུམ་པ་ནི། རྣམ་པར་རིག་བྱེད་མ་ཡིན་པའི་གཟུགས་ཏེ་གསུམ་པོ་དེ་དག་ནི་གཟུགས་བཏགས་པ་བའོ། །བཞི་པ་ནི། མི་སྡུག་པའི་ཏིང་ངེ་འཛིན་ལ་སྣང་བའི་ཀེང་རུས་ལ་སོགས་པའི་གཟུགས་སོ། །ལྔ་པ་ནི། ཟད་པར་གྱི་ཏིང་ངེ་འཛིན་ལ་སྣང་བའི་ས་དང་ཆུ་ལ་སོགས་པའི་གཟུགས་ཏེ། གཉིས་པོ་འདི་ནི་ཡུལ་དཔྱད་པས་གཟུགས་སུ་རུང་བའི་མཚན་གཞིའོ། །རྣམ་པར་རིག་བྱེད་མིན་པའི་གཟུགས་ནི་བྱེ་བྲག་ཏུ་སྨྲ་བས་གཟུགས་མཚན་ཉིད་པར་འདོད་ཅིང་དེའི་མཚན་ཉིད་ནི་གནས་སྐབས་ཀྱི་ཁྱད་པར་ཡིད་གཞན་དུ་གཡེངས་མ་གཡེངས་དང་། སེམས་ཡོད་མེད་ཀྱི་གནས་སྐབས་ཀུན་ཏུ་ཡོད་པ། ངོ་བོའི་ཁྱད་པར་དགེ་མི་དགེ་གང་རུང་དུ་ངེས་པ། རྒྱུན་གྱི་ཁྱད་པར་རྒྱུན་རྗེས་སུ་འབྲེལ་པ། རྒྱུའི་ཁྱད་པར་འབྱུང་བ་བཞི་པོ་རྒྱུར་བྱས་པ་སྟེ་ཁྱད་པར་བཞི་ལྡན་དུ་འདོད་དོ། །མདོ་སྡེ་པ་ཡན་ཆད་ཀྱིས་ནི་ལུས་ངག་གི་རྣམ་པར་རིག་བྱེད་དང་། ཏིང་ངེ་འཛིན་གང་རུང་ལས་བྱུང་བ་རང་གི་ངོ་བོ་ཀུན་སློང་རྣམ་པར་རིག་པར་མི་བྱེད་པའི་ལུས་ངག་གི་ལས་སུ་གྱུར་པའི་སེམས་བྱུང་སེམས་པ་ལ་འདོད་དོ། །ཚོར་བའི་ཕུང་པོའི་མཚན་གཞི་ལ། མཛོད་ལས། ཚོར་བ་བདེ་བ། སྡུག་བསྔལ། ཡིད་བདེ། ཡིད་མི་བདེ། བཏང་སྙོམས་སྟེ་ལྔ་གསུངས་པའི་དང་པོ་ནི། བསམ་གཏན་དང་པོ་མན་ཆད་ཀྱི་དབང་ཤེས་འཁོར་དུ་བྱུང་བའི་སིམ་པར་ཉམས་སུ་མྱོང་བ་ཡིན། བསམ་གཏན་གསུམ་པར་ནི་ཡིད་ཤེས་འཁོར་དུ་བྱུང་བའི་སིམ་པར་ཉམས་སུ་མྱོང་བ་སྟེ་གཉིས་ཡོད་དོ། །གཉིས་པ་ནི། དབང་ཤེས་འཁོར་དུ་བྱུང་བའི་གདུང་བར་ཉམས་སུ་མྱོང་བའོ། །གསུམ་པ་ནི། ཡིད་ཤེས་འཁོར་དུ་བྱུང་བའི་སིམ་པར་ཉམས་སུ་མྱོང་བ་གང་ཞིག བསམ་གཏན་གཉིས་པ་མན་ཆད་ཀྱི་སས་བསྡུས་པའོ། །བཞི་པ་ནི། ཡིད་ཤེས་འཁོར་དུ་བྱུང་བའི་གདུང་བར་ཉམས་སུ་མྱོང་བའོ། །ལྔ་པ་ནི། སིམ་གདུང་བར་མར་ཉམས་སུ་མྱོང་བ་སྟེ། དབང་ཤེས་དང་ཡིད་ཤེས་གཉིས་ཀར་ཡོད་དོ། །ཀུན་ལས་བཏུས་ལས། རྟེན་རྒྱས་པའི་དབང་དུ་བྱས་ནས་མིག་གི་འདུས་ཏེ་རེག་པ་ལས་བྱུང་བའི་ཚོར་བ་སོགས་དྲུག རྟེན་བསྡུས་པའི་དབང་དུ་བྱས་ནས་ལུས་ཚོར་དང་། སེམས་ཚོར་གཉིས། ཀུན་ནས་ཉོན་མོངས་པ་དང་། རྣམ་བྱང་གི་དབང་དུ་བྱས་ནས་ཟང་ཟིང་དང་བཅས་པ་དང་། ཟང་ཟིང་མེད་པ་གཉིས། འཇིག་རྟེན་པའི་ཆགས་བྲལ་གྱི་སྤང་གཉེན་གྱི་དབང་དུ་བྱས་ནས་ཞེན་པ་རྟེན་པ་དང་། མངོན་པར་འབྱུང་བ་རྟེན་པ་གཉིས་ཡོད་ཅིང་། དེ་དག་རེ་རེ་ལའང་ངོ་བོའི་སྒོ་ནས་བདེ་བ་དང་། སྡུག་བསྔལ་དང་། བཏང་སྙོམས་ཏེ་གསུམ་གསུམ་ཡོད་པར་གསུངས་སོ། །པན་ཀན་ལས་ནི། བདེ་སྡུག་བཏང་སྙོམས་གསུམ་དུ་གསུངས་སོ། །འདུ་ཤེས་ལ། མཛོད་ལས། མིག་གི་འདུས་ཏེ་རེག་པ་ལས་བྱུང་བའི་འདུ་ཤེས་སོགས་དྲུག་ཏུ་གསུངས་ཤིང་། ཀུན་བཏུས་ལས། དྲུག་པོ་དེ་ཉིད་གཞིར་བཞག་ནས། མཚན་མ་དང་བཅས་པ་དང་། མཚན་མ་མེད་པ་དང་། ཆུང་ངུ་དང་། རྒྱ་ཆེན་པོར་གྱུར་པ་དང་། ཚད་མེད་པ་དང་། ཅི་ཡང་མེད་པའི་འདུ་ཤེས་དྲུག་སྟེ་བཅུ་གཉིས་སུ་གསུངས་སོ། །པན་ཀན་ལས། ཆུང་ངུ་དང་། རྒྱ་ཆེན་པོར་གྱུར་པ་དང་། ཚད་མེད་པའི་འདུ་ཤེས་གསུམ་དུ་གསུངས་སོ། །འདུ་བྱེད་ཀྱི་མཚན་གཞི་ལ། གཞུང་གསུམ་ཆར་ལས། མཚུངས་ལྡན་གྱི་འདུ་བྱེད་དང་། ལྡན་པ་མ་ཡིན་པའི་འདུ་བྱེད་གཉིས་གསུངས་སོ། །རྣམ་པར་ཤེས་པའི་མཚན་གཞི་ལ། མཛོད་ལས། རྣམ་པར་ཤེས་པའི་ཚོགས་དྲུག་ཏུ་ངེས་པར་གསུངས་སོ། །ཀུན་བཏུས་དང་། པན་ཀན་ལས། སེམས་དང་། ཡིད་དང་། རྣམ་པར་ཤེས་པ་གསུམ་དུ་བྱས་ནས་སེམས་ནི་ཀུན་གཞིའི་རྣམ་པར་ཤེས་པ། ཡིད་ལ་ཉོན་མོངས་པ་ཅན་གྱི་ཡིད་དང་། དྲུག་པོ་འགག་མ་ཐག་པའི་ཡིད་གཉིས། རྣམ་པར་ཤེས་པ་ལ་ཚོགས་དྲུག་ཏུ་གསུངས་སོ། །དེ་དག་གིས་ཕུང་པོའི་རྣམ་གཞག་བསྟན་ཟིན་ནས། ཁམས་དང་སྐྱེ་མཆེད་ཀྱི་རྣམ་པར་གཞག་པ་ལ། དབང་པོ་ལྔ་དང་། དོན་ལྔ་པོ་དེ་ཉིད་ཁམས་རྣམ་པར་གཞག་པའི་ཚེ་ན་གཟུགས་ཅན་གྱི་ཁམས་བཅུ་དང་། སྐྱེ་མཆེད་རྣམ་པར་གཞག་པའི་ཚེ་གཟུགས་ཅན་གྱི་སྐྱེ་མཆེད་བཅུར་འཇོག་གོ །ཕུང་པོ་བར་པ་གསུམ་དང་། མཛོད་དང་པན་ཀན་ལྟར་ན། རྣམ་པར་རིག་བྱེད་མ་ཡིན་པའི་གཟུགས་དང་། ཀུན་བཏུས་ལྟར་ན། ཆོས་ཀྱི་སྐྱེ་མཆེད་པའི་གཟུགས་དང་། སྔར་གྱི་ཕུང་པོས་མ་བསྡུས་པ་མཛོད་ལྟར་ན། ནམ་མཁའ། སོ་སོར་བརྟགས་འགོག སོ་སོར་བརྟགས་མིན་གྱི་འགོག་པ་སྟེ་འདུས་མ་བྱས་གསུམ་དང་། པན་ཀན་ལྟར་ན། དེའི་སྟེང་དུ་དེ་བཞིན་ཉིད་གཉིས་ཏེ་བཞི་དང་། ཀུན་བཏུས་ལྟར་ན། དེ་བཞིན་ཉིད་ལ་གསུམ་དུ་ཕྱེ་བ་དང་། མི་གཡོ་བ་དང་། འདུ་ཤེས་དང་། ཚོར་བ་འགོག་པ་རྣམས་ནི་ཁམས་རྣམ་པར་གཞག་པའི་ཚེ་ཆོས་ཀྱི་ཁམས་དང་། སྐྱེ་མཆེད་རྣམ་པར་གཞག་པའི་ཚེ་ཆོས་ཀྱི་སྐྱེ་མཆེད་དུ་འཇོག་གོ །རྣམ་པར་ཤེས་པའི་ཕུང་པོ་དེ་ཉིད་ཁམས་རྣམ་པར་གཞག་པའི་ཚེ་རྣམ་པར་ཤེས་པའི་ཁམས་རྣམ་པ་དྲུག ཡིད་ཀྱིས་ཁམས་ཏེ་བདུན་དང་། སྐྱེ་མཆེད་རྣམ་པར་གཞག་པའི་ཚེ་ཡིད་ཀྱི་སྐྱེ་མཆེད་དུ་འཇོག་གོ །བཞི་པ་གྲངས་ངེས་ལ། སྤྱིར་ཕུང་པོ་དང་། སྐྱེ་མཆེད་དང་། ཁམས་གསུམ་དུ་གྲངས་ངེས་པ་ནི། མཛོད་ལས། སེམས་བྱུང་ལ་རིལ་པོའི་བདག་ཏུ་རྨོངས་པ་དང་། གཟུགས་ལ་རིལ་པོའི་བདག་ཏུ་རྨོངས་པ་དང་། གཟུགས་སེམས་གཉིས་ཀ་ལ་རིལ་པོའི་བདག་ཏུ་རྨོངས་པ་སྟེ་རྨོངས་པ་གསུམ་དང་། དབང་པོ་རྣོན་པོ་དང་། འབྲིང་པོ་དང་། རྟུལ་པོ་གསུམ་དང་། ཚིག་བསྡུས་པ་དང་། བར་པ་དང་། རྒྱ་ཆེན་པོ་འདོད་པ་གསུམ་གྱི་ཕྱིར་གྲངས་ངེས་པ་གསུངས་སོ། །ཕུང་པོའི་གྲངས་ངེས་མཛོད་ལས་གསུངས་པ་མི་སྣང་ཞིང་། ཀུན་བཏུས་ལས། བདག་ཏུ་འཁྲུལ་པའི་འཁྲུལ་གཞི་སོགས་རྣམ་པ་ལྔར་གྲངས་ངེས་པའི་ཕྱིར་ཏེ། བདག་གི་འཁྲུལ་གཞི་ལུས་ཡོངས་སུ་བཟུང་བ་དང་བཅས་པ་དང་། ལོངས་སྤྱོད་དང་། ཐ་སྙད་དང་། ཆོས་དང་ཆོས་མ་ཡིན་པ་མངོན་པར་འདུ་བྱེད་པ་དང་། དེ་དག་གི་གནས་རྣམ་པ་ལྔར་གྲངས་ངེས་པའི་ཕྱིར་རོ། །ཁམས་ཀྱི་གྲངས་ངེས་ལ་ཀུན་བཏུས་ལས། ཉེར་སྤྱོད་འཛིན་པ་ཁམས་ཀྱི་དོན་ཡིན་པས་ཉེར་སྤྱོད་གནས་ཀྱི་སྒོ་ནས་འཛིན་པ་ལ་ནང་དབང་པོའི་ཁམས་དྲུག དམིགས་པའི་སྒོ་ནས་འཛིན་པ་ལ་ཕྱི་ཡུལ་གྱི་ཁམས་དྲུག རང་གི་ངོ་བོའི་སྒོ་ནས་འཛིན་པ་ལ་རྣམ་པར་ཤེས་པའི་ཁམས་དྲུག་ཏུ་གྲངས་ངེས་པར་གསུངས་སོ། །སྐྱེ་མཆེད་ཀྱི་གྲངས་ངེས་ལ། སེམས་སེམས་བྱུང་གནས་ཀྱི་སྒོ་ནས་སྐྱེ་བའི་སྒོར་གྱུར་པ་ལ་ནང་གི་སྐྱེ་མཆེད་དྲུག དམིགས་པའི་སྒོ་ནས་སྐྱེ་བའི་སྒོ་འབྱེད་པ་ལ་ཕྱིའི་སྐྱེ་མཆེད་དྲུག་ཏུ་གྲངས་ངེས་ཤིང་། འདིར་རང་གི་ངོ་བོའི་སྒོ་ནས་སྐྱེ་མཆེད་དུ་མི་འཇོག་སྟེ། རང་གི་ངོ་བོ་སྐྱེས་ཟིན་ན་སྐྱེ་བའི་སྒོ་འབྱེད་མི་དགོས་པའི་ཕྱིར། ལྔ་པ་གོ་རིམ་ངེས་པ་ལ། ཕུང་པོ་དང་པོར་སྟོན་པ་ནི། དེ་ལས་ཕྱུངས་ཏེ་ཁམས་དང་སྐྱེ་མཆེད་དུ་གཞག་དགོས་པའི་ཕྱིར། ཁམས་དང་། སྐྱེ་མཆེད་ལ། མཛོད་དང་པན་ཀན་ལས་སྐྱེ་མཆེད་དང་པོར་གསུངས་ཤིང་། ཀུན་བཏུས་ལས་ཁམས་དང་པོར་གསུངས། གོ་རིམ་མཐའ་གཅིག་ཏུ་ངེས་པ་མེད་པ་འདྲའོ། །ཕུང་པོ་ལྔའི་གོ་རིམ་ལ་མཛོད་ལས། གཟུགས་ནི་ཐོགས་པ་དང་བཅས་པས་གཟུགས་ཅན་མ་ཡིན་པ་རྣམས་ལས་རགས་པས་ན་དང་པོར་བསྟན། གཟུགས་ཅན་མ་ཡིན་པ་རྣམས་ལས་ཚོར་བ་རྒྱུ་བ་རགས་པ་དང་། འདུ་ཤེས་དང་། འདུ་བྱེད་དང་། རྣམ་ཤེས་གསུམ་ལའང་། སྔ་མ་སྔ་མ་རགས་པས་དང་པོར་བསྟན་ནོ། །ཡང་ཀུན་ནས་ཉོན་མོངས་སྐྱེ་བའི་གོ་རིམ་ཡང་ཡིན་ཏེ། ཕོ་མོ་དག་ཐོག་མར་ཕན་ཚུན་གཟུགས་ལ་ལྟ། དེ་ཡང་ཚོར་བའི་རོ་མྱོང་བ་ལས་བྱུང་། དེ་ཡང་འདུ་ཤེས་ཕྱིན་ཅི་ལོག་ལས་བྱུང་། དེ་ཡང་འདུ་བྱེད་ཀྱི་ཁོངས་སུ་གཏོགས་པའི་ཀུན་ནས་ཉོན་མོངས་པས་སྐྱེད། དེས་སེམས་ཀུན་ནས་ཉོན་མོངས་པ་ཅན་དུ་བྱས་པའི་ཕྱིར། ཡང་ན་སྣོད་ལ་སོགས་པའི་གོ་རིམ་ཡིན་ཏེ། ཕུང་པོ་ལྔ་ནི་རིམ་པ་ལྟར། སྣོད་དང་། ཟས་དང་། ཚོད་མ་དང་། བྱན་པོ་དང་། ཟ་བ་པོ་ལྟ་བུ་ཡིན་པའི་ཕྱིར་རོ། །ཡང་ན་ཁམས་ཀྱི་གོ་རིམ་ཡིན་ཏེ། འདོད་པའི་ཁམས་ནི་གཟུགས་ཀྱིས་རབ་ཏུ་ཕྱེ། བསམ་གཏན་རྣམས་ནི་ཚོར་བས་རབ་ཏུ་ཕྱེ། གཟུགས་མེད་དང་པོ་གསུམ་ནི་འདུ་ཤེས་ཀྱིས་རབ་ཏུ་ཕྱེ། སྲིད་རྩེ་ནི་འདུ་བྱེད་ཀྱིས་རབ་ཏུ་ཕྱེ་ཞིང་དེ་ཐམས་ཅད་ལ་རྣམ་པར་ཤེས་པ་གནས་པའི་ཕྱིར་རོ། །ཀུན་བཏུས་ལས། རྣམ་པར་ཤེས་པའི་གནས་བཞི་དང་པོར་བསྟན་ནས། གནས་པ་རྣམ་པར་ཤེས་པ་ཕྱིས་བསྟན་པའི་གོ་རིམ་གསུངས་པ་ནི་བཤད་མ་ཐག་པ་དང་འདྲའོ། །ཡང་སྔ་མ་སྔ་མ་ཕྱི་མ་ཕྱི་མའི་རྟེན་ཡིན་པའི་ཕྱིར་ཏེ། གཟུགས་ཇི་ལྟ་བ་དེ་བཞིན་དུ་མྱོང་། ཇི་ལྟར་ཚོར་བར་བྱེད་པ་དེ་བཞིན་ཏུ་འདུ་ཤེས་སུ་བྱེད། ཇི་ལྟར་འདུ་ཤེས་སུ་བྱེད་པ་དེ་བཞིན་ཏུ་སེམས་པར་བྱེད། ཇི་ལྟར་སེམས་པར་བྱེད་པ་དེ་བཞིན་ཏུ་རྣམ་པར་ཤེས་པར་བྱེད་པའི་ཕྱིར། ཡང་ཀུན་ནས་ཉོན་མོངས་པ་དང་། རྣམ་པར་བྱང་བའི་གོ་རིམ་ཡིན་ཏེ། གང་དུ་ཀུན་ནས་ཉོན་མོངས་པ་དང་། རྣམ་པར་བྱང་བའི་དབང་དུ་བྱས་ནས་གཟུགས་ཀྱི་ཕུང་པོ་དང་། མྱོང་བ་དང་། མཚན་མར་འཛིན་པ་དང་། མངོན་པར་འདུ་བྱེད་པ། གང་གིས་ཀུན་ནས་ཉོན་མོངས་པ་དང་རྣམ་པར་བྱང་བའི་དབང་དུ་བྱས་ནས་ཕུང་པོ་བར་པ་གསུམ་དང་། གང་ཀུན་ནས་ཉོན་མོངས་པ་དང་། རྣམ་པར་བྱང་བའི་དབང་དུ་བྱས་ནས་རྣམ་པར་ཤེས་པའི་ཕུང་པོ་བཞག་པའི་ཕྱིར་རོ། །ཁམས་ཀྱི་གོ་རིམ་ལ། ཐོག་མར་ནང་གི་ཁམས་དྲུག་གི་གོ་རིམ་ནི་མཛོད་ལས། ད་ལྟར་བ་ཡུལ་དུ་བྱེད་པའི་དབང་དུ་བྱས་ནས་མིག་སོགས་ལྔ་དང་པོར་བསྟན། ཡིད་ནི་དུས་གསུམ་ཆར་དང་། དུས་ཀྱིས་མ་བསྡུས་པ་ཡང་ཡུལ་དུ་བྱེད་པས་ཕྱིས་བསྟན་ནོ། །དང་པོ་ལྔ་ལའང་འབྱུང་འགྱུར་ཡུལ་དུ་བྱེད་པས་མིག་སོགས་དང་པོ་བཞི་བསྟན་ཅིང་། འབྱུང་བ་དང་། འབྱུང་འགྱུར་གཉིས་ཀ་ཡུལ་དུ་བྱེད་པས་ལུས་ཕྱིས་བསྟན་ཏོ། །བཞི་པོ་ལའང་ཡུལ་ཆེས་རིང་བ་ལ་འཇུག་པས་མིག་དང་རྣ་བ་དང་པོར་བསྟན་ཅིང་། དེ་ལ་ཡང་མིག་ཆེས་རིང་བ་ལ་འཇུག་པས་དང་པོར་བསྟན་ཏོ། །སྣ་དང་། ལྕེ་གཉིས་ལ་ཡང་། སྣ་ཆེས་མྱུར་བའི་དབང་དུ་བྱས་ནས་དང་པོར་བསྟན་ཏེ། ཟས་ལྕེ་དང་མ་རེག་པར་དྲི་འཛིན་པ་བཞིན་ནོ། །ཡང་ཇི་ལྟར་གནས་པའི་གོ་རིམ་ཡིན་ཏེ། ལུས་འདི་ལ་མིག་གི་རྟེན་དང་པོར་གནས། དེའི་འོག་ཏུ་རྣ་བ། དེའི་འོག་ཏུ་སྣ། དེའི་འོག་ན་ལྕེ། ལུས་ནི་ཕལ་ཆེར་དེའི་འོག་ན་གནས་ཤིང་ཡིད་ནི་དེ་དག་ལ་བརྟེན་པའི་ཕྱིར་རོ། །ཀུན་བཏུས་ལས། འཇིག་རྟེན་གྱི་ཐ་སྙད་དང་མཐུན་པའི་གོ་རིམ་ཡིན་ཏེ། འཇིག་རྟེན་ན་ཐོག་མ་ཁོ་ནར་ཕན་ཚུན་དུ་ལྟ། ལྟ་བ་ལ་རྟེན་ནས་ཀུན་ཏུ་སྨྲ། དེའི་འོག་ཏུ་ཁྲུས་དང་། བྱུག་པ་དང་། ཕྲེང་བ་ལོངས་སྤྱོད་དུ་བྱེད། དེའི་འོག་ཏུ་བཟའ་བཏུང་ལོངས་སྤྱོད་དུ་བྱེད། དེའི་འོག་ཏུ་མལ་ཆ་དང་། གདིང་བ་དང་། བུད་མེད་ལ་ཡོངས་སུ་སྤྱོད་དོ། །དེ་ཐམས་ཅད་ནི་རྣམ་པར་རྟོག་པ་ཅན་གྱི་ཡིད་ཡིན་པའི་ཕྱིར་རོ། །ནང་གི་ཁམས་ཀྱི་གོ་རིམ་དེས་ཕྱིའི་ཁམས་ཀྱི་གོ་རིམ་ཡང་འགྲུབ་སྟེ། རྒྱལ་པོ་དྲུག་གི་གྲལ་འགྲིགས་ན་བཙུན་མོ་དྲུག་གི་གྲལ་འགྲིགས་པ་བཞིན་ནོ། །དེ་དག་གིས་འབྲས་བུ་རྣམ་པར་ཤེས་པའི་ཁམས་ཀྱི་གོ་རིམ་ཡང་འགྲུབ་སྟེ། རྒྱལ་པོ་དྲུག་གི་གྲལ་འགྲིགས་ན་རྒྱལ་བུ་དྲུག་གི་གྲལ་འགྲིགས་པ་བཞིན་ནོ། །ཁམས་ཀྱི་གོ་རིམ་དེས་སྐྱེ་མཆེད་ཀྱི་གོ་རིམ་ཡང་ཤེས་པར་བྱ་སྟེ། ཁྱད་པར་མེད་པའི་ཕྱིར་རོ། །དྲུག་པ་སྒྲ་དོན་ལ། ཕུང་པོའི་སྒྲ་དོན་ནི་དུ་མ་སྤུངས་པ་སྟེ། མདོ་ལས། གཟུགས་གང་ཡིན་པ་ཅིའང་རུང་། འདས་པའམ། མ་འོངས་པའམ། ད་ལྟར་བའམ། ནང་གིའམ། ཕྱིའི་འམ། རགས་པའམ། ཕྲ་བའམ། ངན་པའམ། གྱ་ནོམ་པའམ། ཐག་རིང་བ་ན་ཡོད་པ་གང་ཡིན་པའམ། ཉེ་བ་ན་ཡོད་པ་གང་ཡིན་པ་དེ་དག་གཅིག་ཏུ་བསྡུས་ཏེ། གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ། །ཞེས་གསུངས་པའི་ཕྱིར་རོ། །མདོ་སྡེ་པ་རྣམས་ནི། ཕུང་པོའི་དོན་དུ་མ་སྤུངས་པ་ཡིན་པས། ཕུང་པོ་རྣམས་བཏགས་ཡོད་ཡིན་ཏེ། རྫས་དུ་མ་འདུས་པ་ཡིན་པའི་ཕྱིར། དཔེར་ན་གང་ཟག་བཞིན་ནོ། །ཞེས་པའོ། །བྱེ་བྲག་ཏུ་སྨྲ་བ་ན་རེ། དེ་ནི་མ་ཡིན་ཏེ། ཕུང་པོའི་ཆ་ཤས་སུ་གྱུར་པའི་རྫས་ཀྱི་རྡུལ་ཕྲ་རབ་གཅིག་ཀྱང་ཕུང་པོར་ཁས་ལེན་དགོས་པའི་ཕྱིར་རོ། །ཞེས་ཟེར། དེ་ལ་མདོ་སྡེ་པ་ན་རེ། དེ་ནི་མི་འཐད་དེ། རྡུལ་ཕྲ་རབ་གཅིག་ལ་སྤུངས་པའི་དོན་མེད་པའི་ཕྱིར། ཞེས་པའོ། །ཀུན་བཏུས་ལས། ཕུང་པོའི་དོན་སྤུངས་པ་ལ་འཆད་པའི་ཚུལ་སྔ་མ་དང་འདྲ་ལ། སྐནྡྷ་ཞེས་པའི་སྒྲ་སྡུག་བསྔལ་ཤིན་ཏུ་རྒྱས་པ་དང་། ཁུར་ཁྱེར་བ་གཉིས་ལ་འཇུག་པས། སྡུག་བསྔལ་ཤིན་ཏུ་རྒྱས་པའི་ཕྱིར་ན་ཕུང་པོ་སྟེ། ཤིང་གི་ཕུང་པོ་བཞིན་ནོ། །ཉོན་མོངས་པའི་ཁུར་ཁྱེར་བའི་ཕྱིར་ན་ཕུང་པོ་སྟེ་ཕྲག་ཁུར་ཁྱེར་བ་བཞིན་ནོ། །ཞེས་གསུངས་ལ། མཛོད་འགྲེལ་ལས་ནི། ཕུང་པོའི་དོན་ཕྲག་ཁུར་ཁྱེར་བ་དང་། ཡོངས་སུ་འཆད་པའི་དོན་ལ་འཆད་པ་ནི་མདོ་ལས་སྤུངས་པའི་དོན་དུ་བཤད་པ་དང་འགལ་བས་མི་འཐད་དོ། །ཞེས་བཀག་གོ །ཁམས་ཀྱི་སྒྲ་དོན་ནི། དྷ་ཏུ་ཞེས་པའི་སྒྲ། རིགས་དང་། ཁམས་དང་། རྒྱུ་ལ་སོགས་པ་དུ་མ་ལ་འཇུག་པས་ན་རིགས་ཀྱི་དོན་ནི་ཁམས་ཀྱི་དོན་ཏེ། རྒྱུད་གཅིག་ལ་རིགས་བཅོ་བརྒྱད་ཡོད་པ་དག་ལ་ཁམས་བཅོ་བརྒྱད་ཅེས་བྱ་བ་བཞིན་ནོ། །དེ་བཞིན་དུ་རྒྱུའི་དོན་ནི་ཁམས་ཀྱི་དོན་ཏེ། སྐལ་མཉམ་གྱི་རྒྱུ་བྱེད་པའི་ཕྱིར། ཉེར་སྤྱོད་འཛིན་པའི་དོན་ནི་ཁམས་ཀྱི་དོན་ཏེ། སྔར་བཤད་ཟིན་ཏོ། །ཀུན་བཏུས་ལས་ནི། ས་བོན་གྱི་དོན་དང་། རང་གི་མཚན་ཉིད་འཛིན་པའི་དོན་དང་། རྒྱུ་དང་འབྲས་བུའི་དངོས་པོ་འཛིན་པའི་དོན་དང་། ཆོས་ཀྱི་རྣམ་པ་ཐམས་ཅད་བསྡུས་ནས་འཛིན་པའི་དོན་ཏེ་བཞི་ལ་བཤད་དོ། །སྐྱེ་མཆེད་ཀྱི་སྒྲ་དོན་ནི་སེམས་སེམས་བྱུང་སྐྱེ་བའི་སྒོའི་དོན་ཏེ། སེམས་སེམས་བྱུང་དང་པོར་སྐྱེ་བར་བྱེད། སྐྱེས་པ་རྒྱས་ཤིང་མཆེད་པར་བྱེད་པའི་ཕྱིར། བདུན་པ་ཉེར་ལེན་དུ་འཇོག་པའི་ཚུལ་ལ། ཅིའི་ཕྱིར་ཟག་པ་དང་བཅས་པའི་ཕུང་པོ་རྣམས་ལ་ཉེ་བར་ལེན་པའི་ཕུང་པོ་ཞེས་བྱ་ཞེ་ན། མཛོད་ལས། ཉེ་བར་ལེན་པ་ནི་ཉོན་མོངས་པ་སྤྱིའི་མིང་ཡིན་ལ་དེ་ལས་བྱུང་བའི་ཕྱིར་ཉེ་བར་ལེན་པའི་ཕུང་པོ་སྟེ། རྩྭ་སོགས་ལས་བྱུང་བའི་མེ་ལ་རྩྭ་སོགས་ཀྱི་མེ་ཞེས་བརྗོད་པ་བཞིན་ནོ། །དེ་ལ་རག་ལུས་པའི་ཕྱིར་ན་ཉེ་བར་ལེན་པའི་ཕུང་པོ་སྟེ། རྒྱལ་པོ་ལ་རག་ལས་པའི་མི་ལ་རྒྱལ་པོའི་མི་ཞེས་པ་བཞིན་ནོ། །ཡང་དེ་ལས་ཉེ་བར་ལེན་པ་རྣམས་བྱུང་བའི་ཕྱིར་ན་ཉེ་བར་ལེན་པའི་ཕུང་པོ་སྟེ། མེ་ཏོག་དང་འབྲས་བུ་འབྱུང་བའི་ཤིང་ལ་མེ་ཏོག་དང་འབྲས་བུའི་ཤིང་ཞེས་པ་བཞིན་ནོ། །ཀུན་བཏུས་ལས་ནི། ཉེ་བར་ལེན་པ་འདུན་པ་དང་། འདོད་ཆགས་ལ་བྱས་ནས་དེ་དང་ལྡན་པས་ཉེ་བར་ལེན་པའི་ཕུང་པོའོ། །དེ་གཉིས་ལ་ཉེ་བར་ལེན་པ་ཞེས་བྱ་སྟེ། འདུན་པས་མ་འོངས་པའི་ཕུང་པོ་མངོན་པར་འགྲུབ་པ་དང་། འདོད་ཆགས་ཀྱིས་ད་ལྟར་གྱི་ཕུང་པོ་ཡོངས་སུ་མི་གཏོང་བའི་ཕྱིར། ཁམས་ཟག་བཅས་ལ་ཉེ་བར་ལེན་པའི་ཁམས་སུ་འཇོག་པ་དང་། སྐྱེ་མཆེད་ཟག་བཅས་ལ་ཉེ་བར་ལེན་པའི་སྐྱེ་མཆེད་དུ་འཇོག་པའི་ཚུལ་ཡང་སྔ་མ་བཞིན་དུ་ཤེས་པར་བྱའོ། །བརྒྱད་པ་ཕུང་པོའི་དོགས་གཅོད་ནི། ཅིའི་ཕྱིར་སེམས་བྱུང་གཞན་རྣམས་འདུ་བྱེད་ཀྱི་ཕུང་པོར་བསྡུས་ནས་ཚོར་བ་དང་འདུ་ཤེས་ཀྱི་ཕུང་པོ་ལོགས་སུ་འཇོག་གོ་ཞེ་ན། མཛོད་ལས། ཚོར་བ་དང་འདུ་ཤེས་གཉིས་རྩོད་པའི་རྩ་བར་གྱུར་པ་དང་། འཁོར་བའི་རྒྱུར་གྱུར་པ་དང་། ཕུང་པོ་ལྔའི་གོ་རིམ་འགྲུབ་པའི་རྒྱུ་ཡིན་པའི་ཕྱིར་ན་ཕུང་པོ་ལོགས་སུ་བཞག་སྟེ། རྩོད་པའི་རྩ་བ་ནི། འདོད་པ་ལ་ལྷག་པར་ཞེན་པ་དང་། ལྟ་བ་ལ་ལྷག་པར་ཞེན་པ་གཉིས་ཡིན་ལ། ཚོར་བའི་རོ་མྱོང་བའི་དབང་གིས་འདོད་པ་ལ་ལྷག་པར་ཞེན། འདུ་ཤེས་ཕྱིན་ཅི་ལོག་གིས་ལྟ་བ་ལ་ལྷག་པར་ཞེན་ཅིང་། ཞེན་པ་དེ་གཉིས་ཀྱི་དབང་གིས་འཁོར་བར་འགྱུར་བའི་ཕྱིར་རོ། །འོ་ན་འདུས་མ་བྱས་སྐྱེ་མཆེད་དང་ཁམས་སུ་བཞག་ནས་ཕུང་པོར་ཅིའི་ཕྱིར་མི་འཇོག་ཅེ་ན། གཟུགས་ནས་རྣམ་པར་ཤེས་པའི་བར་མ་ཡིན་པས་ཕུང་པོའི་དོན་དུ་མི་རུང་བའི་ཕྱིར་ཏེ། ཕུང་པོའི་དོན་ནི་དུ་མ་སྤུངས་པའི་ཕྱིར་རོ། །དགུ་པ་སྐྱེ་མཆེད་ཀྱི་དོགས་གཅོད་ནི། གཟུགས་ཅན་གྱི་སྐྱེ་མཆེད་བཅུ་ཆར་གཟུགས་ཡིན་ན། ཅིའི་ཕྱིར་མིག་གི་ཡུལ་ཁོ་ན་ལ་གཟུགས་ཀྱི་སྐྱེ་མཆེད་དུ་འཇོག ཐམས་ཅད་ཆོས་ཡིན་ན་ཅིའི་ཕྱིར་ཡིད་ཀྱི་ཡུལ་ཁོ་ན་ལ་ཆོས་ཀྱི་སྐྱེ་མཆེད་དུ་འཇོག་ཅེ་ན། མཛོད་ལས། ཡུལ་དང་ཡུལ་ཅན་སོ་སོར་ཕྱེ་བ་སྐྱེ་མཆེད་ཡིན་གྱི་སྤྱིར་མིན་པས་མིག་ལ་སོགས་པའི་བྱེ་བྲག་གི་མིང་གིས་མ་བཏགས་པའི་གཟུགས་ཉིད་གཟུགས་ཀྱི་སྐྱེ་མཆེད་དུ་འགྱུར་བའི་ཕྱིར་དང་། མིག་གིས་ཡུལ་ནི་ཐོགས་པ་དང་བཅས་པ་དང་། རེག་པས་གཟུགས་སུ་རུང་བ་དང་། བསྟན་དུ་ཡོད་པས་གཟུགས་ཀྱི་གཙོ་བོ་ཡིན་པའི་ཕྱིར་དང་། བྱེ་བྲག་གི་དོན་སྔ་མ་བཞིན་དང་། ཆོས་མང་པོ་ཚོར་བ་ལ་སོགས་པ་ཡང་བསྡུས་པའི་ཕྱིར་དང་། ཆོས་ཀྱི་མཆོག་མྱ་ངན་ལས་འདས་པ་ཡང་བསྡུས་པའི་ཕྱིར་ན་མིག་གི་ཡུལ་ལ་གཟུགས་ཀྱི་སྐྱེ་མཆེད་དང་། ཡིད་ཀྱི་ཡུལ་ལ་ཆོས་ཀྱི་སྐྱེ་མཆེད་དུ་འཇོག་པར་འདོད་དོ། །དོགས་གཅོད་འདི་དག་ཀུན་བཏུས་སུ་ནི་མི་སྣང་ངོ་། །བཅུ་པ་ཆོས་གསུམ་རེ་རེས་བསྡུས་ཚུལ་ནི། ཕུང་པོའི་ནང་ནས་གཟུགས་ཀྱི་ཕུང་པོ་དང་། སྐྱེ་མཆེད་ཀྱི་ནང་ནས་ཡིད་ཀྱི་སྐྱེ་མཆེད་དང་། ཁམས་ཀྱི་ནང་ནས་ཆོས་ཀྱི་ཁམས་གསུམ་གྱིས་ཕུང་ཁམས་སྐྱེ་མཆེད་ཐམས་ཅད་བསྡུས་ཏེ། གཟུགས་ཀྱི་ཕུང་པོས་གཟུགས་ཅན་གྱི་ཁམས་དང་། སྐྱེ་མཆེད་བཅུ་དང་། ཆོས་ཀྱི་ཁམས་དང་སྐྱེ་མཆེད་ཀྱི་ཕྱོགས་གཅིག ཆོས་ཀྱི་སྐྱེ་མཆེད་པའི་གཟུགས་རྣམས་བསྡུས་པའི་ཕྱིར་དང་། ཡིད་ཀྱི་སྐྱེ་མཆེད་ཀྱིས་རྣམ་པར་ཤེས་པའི་ཕུང་པོ་དང་། སེམས་ཀྱི་ཁམས་བདུན་བསྡུས་པའི་ཕྱིར་དང་། ཆོས་ཀྱི་ཁམས་ཀྱི་ཕུང་པོ་བར་པ་གསུམ་དང་། ཆོས་ཀྱི་སྐྱེ་མཆེད་ཀྱང་བསྡུས་པའི་ཕྱིར། ཆོས་གསུམ་པོ་དེས་རང་རང་གི་སྡེ་ཚན་གཞན་ནི་མ་བསྡུས་ཏེ། རང་རང་གི་སྡེ་ཚན་གཞན་ནི་རང་ལས་གཞན་ཡིན་པའི་ཕྱིར་དེ་ལྟར་ཡང་མཛོད་ལས། ཕུང་པོ་དང་ནི་སྐྱེ་མཆེད་དང་། །ཁམས་གཅིག་གིས་ནི་ཐམས་ཅད་བསྡུས། །རང་གི་ངོ་བོ་ཉིད་ཀྱིས་ཏེ། །གཞན་གྱི་དངོས་དང་མི་ལྡན་ཕྱིར། །ཞེས་གསུངས་སོ། །བཅུ་གཅིག་པ་མིང་ཅན་གཞན་ཡང་བསྡུས་ཚུལ་ནི། འོ་ན་བཅོམ་ལྡན་འདས་ཀྱིས་མདོ་ལས། ཕུང་པོ་དང་སྐྱེ་མཆེད་དང་ཁམས་ཀྱི་མིང་ཅན་གཞན་ཡང་མང་དུ་གསུངས་པ་རྣམས་འདིར་འདུས་སམ་ཞེ་ན། ཤིན་ཏུ་འདུས་ཏེ། འདིར་བཤད་པའི་ཆོས་གསུམ་པོས་ཆོས་ཐམས་ཅད་བསྡུས་པའི་ཕྱིར་རོ། །འདི་ལ་གསུམ་ལས། ཕུང་པོའི་མིང་ཅན་ཕུང་པོར་བསྡུ་ཚུལ་ནི། ཆོས་ཀྱི་ཕུང་པོ་བརྒྱད་ཁྲི་ཞེས་འབྱུང་བ་རྣམས་སངས་རྒྱས་ཀྱི་གསུང་ཚིག་གི་རང་བཞིན་ཡིན་པ་ལྟར་ན་གཟུགས་ཀྱི་ཕུང་པོས་བསྡུས་ལ། མིང་གི་རང་བཞིན་ཡིན་པ་ལྟར་ན་འདུ་བྱེད་ཀྱི་ཕུང་པོས་བསྡུས་སོ། །ཡང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཞེས་འབྱུང་བའི་ཚུལ་ཁྲིམས་ཀྱི་ཕུང་པོ་ནི་གཟུགས་ཀྱི་ཕུང་པོས་བསྡུས། ལྷག་མ་རྣམས་ནི་འདུ་བྱེད་ཀྱི་ཕུང་པོས་བསྡུས་སོ། །གཉིས་པ་སྐྱེ་མཆེད་ཀྱི་མིང་ཅན་སྐྱེ་མཆེད་དུ་བསྡུ་ཚུལ་ནི། ཟད་པར་གྱི་སྐྱེ་མཆེད་བཅུ་ཞེས་འབྱུང་བའི་དང་པོ་བརྒྱད་ནི། སེམས་བྱུང་མ་ཆགས་པའི་རང་བཞིན་ཡིན་པའི་ཕྱིར་ན་ཆོས་ཀྱི་སྐྱེ་མཆེད་ཀྱིས་བསྡུས། འཁོར་དང་བཅས་ན་ཕུང་པོ་ལྔའི་རང་བཞིན་ཡིན་པས་ཡིད་ཀྱི་སྐྱེ་མཆེད་ཀྱིས་བསྡུས་ཏེ། འདིའི་གཟུགས་ཀྱང་ཆོས་ཀྱི་སྐྱེ་མཆེད་པའི་གཟུགས་ཡིན་པའི་ཕྱིར། ཟིལ་གྱིས་གནོན་པའི་སྐྱེ་མཆེད་རྣམས་ཀྱང་དེ་དང་འདྲའོ། །ཟད་པར་ནམ་མཁའ་དང་། རྣམ་ཤེས་ཀྱི་སྐྱེ་མཆེད་ནི་ཕུང་པོ་བཞིའི་རང་བཞིན་ཡིན་པས་ཡིད་དང་ཆོས་ཀྱི་སྐྱེ་མཆེད་ཀྱིས་བསྡུས་སོ། །རྣམ་པར་གྲོལ་བའི་སྐྱེ་མཆེད་ལྔ་པོ་དག་ནི་ཤེས་རབ་ཀྱི་རང་བཞིན་ཡིན་པའི་ཕྱིར། ཆོས་ཀྱི་སྐྱེ་མཆེད་ཀྱིས་བསྡུས་སོ། །གཟུགས་མེད་ཀྱི་སྐྱེ་མཆེད་བཞི་ནི་ཕུང་པོ་བཞིའི་རང་བཞིན་ཡིན་པའི་ཕྱིར་ན་ཡིད་དང་ཆོས་ཀྱི་སྐྱེ་མཆེད་ཀྱིས་བསྡུས་སོ། །གསུམ་པ་ཁམས་ཀྱི་མིང་ཅན་ཁམས་སུ་བསྡུ་བ་ནི། འདོད་པའི་ཁམས་དང་། གཟུགས་ཀྱི་ཁམས་ནི་རིམ་པ་བཞིན་ཁམས་བཅོ་བརྒྱད་དང་། དྲི་རོ་གཉིས་དང་། སྣ་ལྕེའི་རྣམ་ཤེས་གཉིས་མ་གཏོགས་པའི་ཁམས་བཅུ་དང་བཞིས་བསྡུས་ལ། གཟུགས་མེད་པའི་ཁམས་ནི་ཡིད་ཀྱིས་དང་། ཆོས་ཀྱི་ཁམས་ཀྱིས་བསྡུས་སོ། །ཡང་འདོད་པའི་ཁམས། གནོད་པའི་ཁམས། རྣམ་འཚེའི་ཁམས་ཞེས་པ་རྣམས་ནི་སེམས་བྱུང་ཡིན་པས་ཆོས་ཀྱི་ཁམས་ཀྱིས་བསྡུས་སོ། །དེ་བཞིན་ཏུ་ཁམས་མང་པོ་པ་ལས་ཁམས་དྲུག་ཅུ་རྩ་གཉིས་བསྟན་པ་དེ་དག་ཀྱང་། ཅི་རིགས་པར་བསྡུས་པར་ཤེས་པར་བྱའོ། །བཅུ་གཉིས་པ་རབ་དབྱེ་ལ་སོགས་ཁ་འཕངས་པ་ནི། ཁམས་ཀྱི་རྣམ་པའི་རབ་དབྱེ་ལ། མཛོད་ལས། བསྟན་ཡོད་བསྟན་མེད། ཐོགས་བཅས་ཐོགས་མེད། དགེ་སོགས་གསུམ། ཁམས་ལྷ། ཟག་བཅས་ཟག་མེད། རྟོག་བཅས་རྟོག་མེད། དམིགས་བཅས་དམིགས་མེད། ཟིན་མ་ཟིན། འབྱུང་བ་འབྱུང་འགྱུར། བསགས་མ་བསགས། གཅོད་བྱེད་གཅད་བྱ། བསྲེག་བྱ་སྲེག་བྱེད། གཞལ་བྱ་འཇལ་བྱེད། འབྱུང་བ་གསུམ། རྟག་པའི་རྫས་ཡིན་མིན། ཕྱི་ནང་གི་རབ་དབྱེ། རྟེན་བཅས་དེ་མཚུངས། སྤང་བྱ་གསུམ། ལྟ་བ་ཡིན་མིན། རྣམ་ཤེས་གང་གིས་ཤེས་པར་བྱ་བ། རྟག་མི་རྟག དབང་པོ་ཡིན་མིན་ཏེ་ཉི་ཤུ་རྩ་གསུམ་གྱི་སྒོ་ནས་གཏན་ལ་ཕབ་པར་གསུངས་སོ། །ཀུན་བཏུས་ལས། ཆོས་གསུམ་ཆར་རྫས་སུ་ཡོད་མེད་ལ་སོགས་པ་རྒྱས་པའི་རབ་དབྱེ་དྲུག་ཅུ། ཀུན་བཏགས་པའི་མཚན་ཉིད་ཀྱི་རབ་དུ་དབྱེ་བ་སོགས་བསྡུས་པའི་རབ་དབྱེ་བཅུ་གསུམ་གྱི་སྒོ་ནས་གཏན་ལ་འབེབས་པར་གསུངས་སོ། །པན་ཀན་ལས། གཟུགས་ཅན་ཡིན་མིན་སོགས་བཅུ་གསུམ་གྱི་སྒོ་ནས་གཏན་ལ་འབེབས་པར་གསུངས་སོ། །གཞན་ཡང་། ཀུན་བཏུས་ལས། ཕན་ཚུན་བསྡུས་པའི་ཚུལ་བཅུ་གཅིག་དང་། མཚུངས་པར་ལྡན་པའི་ཚུལ་རྣམ་པ་བཅུ་དྲུག་དང་། ལྡན་པའི་ཚུལ་རྣམ་པ་གསུམ་ལ་སོགས་པའི་སྒོ་ནས་ཕུང་པོ་དང་ཁམས་དང་སྐྱེ་མཆེད་གཏན་ལ་དབབ་སྟེ། ཤེས་རབ་ཀྱི་དམིགས་པ་ཤེས་བྱ་ཇི་སྙེད་པའི་གནས་ལུགས་ལ་མཁས་པར་བྱ་དགོས་པར་གསུངས་པའི་ཕྱིར་རོ། །གསུམ་པ་ཕུང་པོའི་དཀའ་གནས་བྱེ་བྲག་ཏུ་བཤད་པ་ལ་གཉིས་ཏེ། འདུ་བྱེད་ཀྱི་ཕུང་པོ་བྱེ་བྲག་ཏུ་བཤད་པ་དང་། རྣམ་ཤེས་ཀྱི་ཕུང་པོ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། མཚུངས་ལྡན་གྱི་འདུ་བྱེད་བཤད་པ་དང་། ལྡན་པ་མ་ཡིན་པའི་འདུ་བྱེད་བཤད་པའོ། །དང་པོ་ལ། ཀུན་བཏུས་ཀྱི་ལུགས་དང་། མཛོད་ཀྱི་ལུགས་གཉིས་ལས། དང་པོ་ལ་ཚོར་བ་དང་འདུ་ཤེས་གཉིས་མཚུངས་ལྡན་གྱི་འདུ་བྱེད་མ་ཡིན་ཡང་། སེམས་བྱུང་དུ་རིགས་གཅིག་པས་དེ་དང་བཅས་ཏེ་འཆད་པ་ལ་སྡོམ་ནི། མཚན་གཞི་དང་ནི་མཚན་ཉིད་དང་། །གཅིག་འདོད་འཁོར་དུ་ལྡན་ཚུལ་དང་། །རྫས་བཏགས་འདོད་ན་ཤིན་སྦྱངས་དང་། །སྡེ་ཚན་སྒྲ་དོན་གྲངས་ངེས་དང་། །སྒྲ་དོན་སོ་སོའི་ངོ་བོ་སྟེ། །སྡེ་ཚན་བཅུ་ཡིས་དོན་འདི་བསྡུས། །དང་པོ་མཚན་གཞི་ནི་སེམས་བྱུང་ཙམ་གྱི་དབང་དུ་བྱས་ན་སྔར་གྱི་ཚོར་བ་དང་། འདུ་ཤེས་གཉིས་བསྣན་པས་ལྔ་བཅུ་རྩ་གཅིག འདུ་བྱེད་ཀྱི་ཕུང་པོའི་དབང་དུ་བྱས་ན་བཞི་བཅུ་རྩ་དགུའོ། །གཉིས་པ་ལ་གསུམ་སྟེ། སེམས་དང་ཐུན་མོང་དུ་མཚན་ཉིད་དཔྱད་པ། མཚུངས་ལྡན་ངེས་པར་བྱ་བ། དེ་ལ་ནང་འགལ་སྤོང་བའོ། །དང་པོ་ནི། དབུས་མཐར། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་གསུངས་པས་དོན་གྱི་ངོ་བོ་ཙམ་དམིགས་པར་བྱེད་པའི་བློ་ནི་སེམས་དང་། དོན་གྱི་ཁྱད་པར་དམིགས་པར་བྱེད་པའི་བློ་ནི་སེམས་བྱུང་སྟེ། དེ་ལ་དོན་གྱི་ངོ་བོ་ནི་གཟུགས་དང་སྒྲ་ལ་སོགས་པ་རྟེན་ཆོས་ཅན་ལྟ་བུར་སྣང་བའོ། །ཁྱད་པར་ནི། བདེ་སོགས་ཀྱི་གནས་ཡིད་དུ་འོང་མི་འོང་སོགས་དང་། བུད་མེད་སྐྱེས་པ་སོགས་སུ་ཐ་སྙད་གདགས་པའི་གཞིར་གྱུར་པའི་མཚན་མ་ལ་སོགས་བརྟེན་པ་ཆོས་ལྟ་བུར་སྣང་བ་སེམས་ལས་བྱུང་བ་དེ་དང་དེའི་འཛིན་སྟངས་ཀྱི་གཟུང་བྱར་གྱུར་པ་རྣམས་སོ། །ཡང་སེམས་བྱུང་ནི། སེམས་དང་མཚུངས་ལྡན་ལྔས་མཚུངས་པར་ལྡན་པ་སྟེ། ཕུང་པོ་ལྔའི་རབ་བྱེད་ལས། སེམས་ལས་བྱུང་བའི་ཆོས་རྣམས་ཅི་ཞེ་ན། ཆོས་གང་རྣམས་སེམས་དང་མཚུངས་པར་ལྡན་པ་རྣམས་སོ་ཞེས་སོ། །མཚུངས་ལྡན་ལྔ་ནི། རྟེན་དང་། དམིགས་པ་དང་། རྣམ་པ་དང་། དུས་དང་། རྫས་མཚུངས་པའོ། །དང་པོ་ནི། སེམས་སེམས་བྱུང་གཉིས་ཀ་རྟེན་དབང་པོ་གཅིག་ལ་བརྟེན་པའོ། །གཉིས་པ་ནི། ཡུལ་གཟུགས་ལྟ་བུ་ལ་དམིགས་པའོ། །གསུམ་པ་ནི། སེམས་སྔོན་པོའི་རྣམ་པ་ཅན་ཡིན་ན། དེ་དང་མཚུངས་ལྡན་གྱི་སེམས་བྱུང་ཡང་སྔོན་པོའི་རྣམ་པ་ཅན་ཡིན་པ་ལྟ་བུའོ། །བཞི་པ་ནི། སེམས་ད་ལྟ་བ་ཡིན་ན། དེ་དང་མཚུངས་ལྡན་གྱི་ཚོར་བ་སོགས་ཀྱང་ད་ལྟ་བ་ཡིན་པ་ལྟ་བུའོ། །ལྔ་པ་ནི། རྫས་གྲངས་ངེས་མཉམ་པ་སྟེ། སེམས་གཅིག་གི་འཁོར་དུ་སེམས་བྱུང་ཚོར་བ་ལྟ་བུ་རྫས་གཉིས་མེད་པ་ལྟ་བུའོ། །གཉིས་པ་ནི། ཅིའི་ཕྱིར་མཚུངས་ལྡན་ལྔ་ཀ་སྨོས་ཤེ་ན། དམིགས་པ་མཚུངས་པ་ཙམ་སྨོས་ན། རྣམ་ཤེས་གཞན་དང་ཡིད་ཀྱི་རྣམ་ཤེས་ཀྱང་སེམས་སེམས་བྱུང་དུ་འགྱུར་བའི་ཕྱིར། དམིགས་རྣམ་མཚུངས་པ་ཙམ་སྨོས་ན་གང་ཟག་གཉིས་ཀྱིས་ཟླ་བ་གཅིག་ལ་ལྟ་བའི་མིག་ཤེས་གཉིས་ཀྱང་སེམས་སེམས་བྱུང་དུ་ཐལ་བའི་ཕྱིར། དམིགས་རྣམ་དང་རྟེན་མཚུངས་པ་ཙམ་སྨོས་ན་མིག་ཤེས་དོན་མཚུངས་པ་སྔ་ཕྱི་གཉིས་ཀྱང་སེམས་སེམས་བྱུང་དུ་ཐལ་བའི་ཕྱིར་དང་། ཐ་མ་རྫས་མཚུངས་སྨོས་པས་ནི་ཁྲ་བོ་འཛིན་པའི་མིག་ཤེས་སོགས་ལ་རྫས་དུ་མར་འཛིན་པ་སེལ་བའི་ཕྱིར་ཡིན་ནོ། །གསུམ་པ་ལ་རྩོད་པ་དང་། ལན་གཉིས། དང་པོ་ནི། དོན་གྱི་ངོ་བོ་དང་། ཁྱད་པར་སོ་སོ་བ་རེ་ཁོ་ན་རྟོགས་ན་སེམས་དང་སེམས་བྱུང་རྣམ་པ་མི་མཚུངས་པར་འགྱུར་ཞིང་། འདོད་ན། རྒྱས་བཤད་དུ་རྣམ་པ་མཚུངས་པར་བཤད་པ་དང་འགལ་ལོ། །ཅི་སྟེ་གཉིས་ཀས་གཉིས་ཀ་འཛིན་ན། དབུས་མཐའི་ཊཱིཀྐར། དེ་རྣམས་ཀྱང་གནས་དང་དམིགས་པ་དང་དུས་དང་རྫས་མཚུངས་ཀྱིས་རྣམ་པར་ཤེས་པ་དང་ཁྱད་པར་མེད་པར་ཐལ་བར་འགྱུར་བས་རྣམ་པ་མཚུངས་པ་ནི་མ་ཡིན་ནོ་ཞེས་པ་དང་འགལ་ལོ། །གཉིས་པ་ལ། མི་འཐད་པ་དགག་པ་དང་། འཐད་པ་བརྗོད་པའོ། །དང་པོ་ལ་བཞི་སྟེ། ཁྱབ་མ་ཁྱབ་ཀྱིས་འབྱེད་པ་དང་། རྗེས་ཤེས་ཀྱིས་འབྱེད་པ་དང་། རང་སྟོབས་གཞན་སྟོབས་ཀྱིས་འབྱེད་པ་དང་། གྲུབ་མཐས་འབྱེད་པ་དགག་པའོ། །དང་པོ་ནི། ཁ་ཆེའི་བྱམས་ཆོས་པ་ཁ་ཅིག སེམས་དོན་ཙམ་གྱི་རྣམ་པ་འཛིན་པ་ལ་ཁྱད་པར་འཛིན་པས་མ་ཁྱབ་པས་མི་མཚུངས་པར་བཤད་ལ། སེམས་བྱུང་ཁྱད་པར་འཛིན་པ་ལ་དོན་ཙམ་འཛིན་པས་ཁྱབ་པས་མཚུངས་པར་བཤད་དོ། །ཞེས་གསུངས་པ་མི་འཐད་དེ། དེ་ལྟར་ན་སེམས་བྱུང་སེམས་དང་རྣམ་པ་མཚུངས། སེམས་སེམས་བྱུང་དང་རྣམ་པ་མི་མཚུངས་ཞེས་པའི་དོན་དུ་སོང་གི སེམས་བྱུང་སེམས་དང་རྣམ་པ་མཚུངས་པར་བཤད་པ་དང་མི་མཚུངས་པར་བཤད་པ་གཉིས་ཀྱི་དོགས་པ་གཅོད་དགོས་པ་ལས་དེའི་དོགས་པ་ད་དུང་མ་ཆོད་པའི་ཕྱིར་དང་། སེམས་རང་གི་འཁོར་དུ་འབྱུང་བའི་ངེས་པ་མེད་པའི་སེམས་བྱུང་རྣམས་དང་རྣམ་པ་མི་མཚུངས་པའི་དོན་དུ་འདོད་ན་ནི། སེམས་ཀུན་འགྲོ་ལྔ་དང་རྣམ་པ་ཐམས་ཅད་དུ་རྣམ་པ་མཚུངས་པར་ཁས་ལེན་དགོས་པའི་ཕྱིར་རོ། །གཉིས་པ་ནི། ངུར་སྨྲིག་པས་གཉིས་ཀ་ལ་གཉིས་ཀ་སྣང་བས་རྣམ་པ་མཚུངས་ཤིང་། ངོ་བོ་ཁྱད་པར་དུ་སོ་སོར་ཞེན་ལུགས་ཐ་དད་དུ་ཡོད་པའམ། སེམས་ཙམ་པ་ལྟར་ན་ངོ་བོ་དང་ཁྱད་པར་དུ་སྒྲོ་འདོགས་ལུགས་ཐ་དད་དུ་ཡོད་པས་རྣམ་པ་མི་མཚུངས་པར་བཤད་པ་ཡིན་ཞེས་གསུངས་པ་ཡང་མི་རིགས་ཏེ། རྟོག་མེད་ཀྱི་སེམས་བྱུང་ལ་ཞེན་པ་དང་སྒྲོ་འདོགས་པ་མེད་པས་རྣམ་པ་མི་མཚུངས་པའི་དོན་བཤད་དུ་མེད་པར་ཐལ་བའི་ཕྱིར་རོ། །གསུམ་པ་ལ་བཞི་སྟེ། རྩ་བའི་དམ་བཅའ་དང་། དེ་ལ་བརྒལ་ལན་གྱི་རིམ་པ་དང་། སྟོབས་ཀྱིས་འཇོག་ཚུལ་གཞན་དགག་པ་དང་། རྒྱུ་འབྲས་དུས་མཉམ་དགག་པའོ། །དང་པོ་ནི། སློབ་དཔོན་འབན་གྱིས་གཉིས་ཀས་གཉིས་ཀ་འཛིན་ཡང་སེམས་ཀྱིས་དོན་ཙམ་འཛིན་པ་ནི་རང་སྟོབས་ཀྱིས་ཏེ། སེམས་སྐྱེས་ཕན་ཆད་དོན་ཙམ་འཛིན་པ་རང་བཞིན་ནམ་ཆོས་ཉིད་ཡིན་པས་སོ། །དོན་གྱི་ཁྱད་པར་འཛིན་པ་ནི་གཞན་སྟོབས་ཀྱིས་ཏེ། སེམས་བྱུང་དང་འགྲོགས་པའི་སྟོབས་ཀྱིས་འཛིན་པས་སོ། །སེམས་བྱུང་གིས་ཁྱད་པར་འཛིན་པ་རང་སྟོབས་དང་། དོན་ཙམ་འཛིན་པ་གཞན་སྟོབས་ཀྱིས་ཡིན་པ་ལ་ཡང་དེ་བཞིན་དུ་སྦྱར་རོ། །འདི་སྒྲུབ་པ་ལ། ལུང་དང་། རིགས་པ་གཉིས་ལས། དང་པོ་ནི། མདོ་ལས། སེམས་འདི་ནི་ཡུན་རིང་པོ་ནས་འདོད་ཆགས་ཀྱི་ཀུན་ནས་ཉོན་མོངས་པ་ཉིད་ཅན་དུ་གྱུར་པའོ། །ཞེས་དང་། འདི་ཉིད་དུ་ཡང་། ངོ་བོ་ཉིད་ཀྱི་དགེ་བ་དང་འབྲེལ་པས་དགེ་བ་སོགས་དང་། སུམ་ཅུ་པར། བསྒྲིབས་ལ་ལུང་དུ་མ་བསྟན་པའི། །ཉོན་མོངས་བཞི་དང་རྟག་ཏུ་འགྲོགས། །ཞེས་བཤད་པས་སོ། །གཉིས་པ་རིགས་པ་ནི། མིག་གི་རྣམ་ཤེས་ཀྱིས་གཟུགས་ཀྱི་དོན་ཙམ་འཛིན་པ་ནི་རང་སྟོབས་ཀྱིས་ཏེ། དེ་དེའི་རང་བཞིན་ནམ་གཤིས་ལུགས་ཡིན་པས་སོ། །དེའི་འཁོར་གྱི་དད་པ་ལ་གཟུགས་ཀྱི་ངོ་བོ་འཛིན་པ་ནི་གཞན་སྟོབས་ཀྱིས་ཏེ། དེ་དེའི་ཆོས་ཉིད་མ་ཡིན་པས་མིག་ཤེས་དང་འགྲོགས་པས་དེ་བྱེད་པའི་ཕྱིར་ཏེ། ཆུའི་ཚ་བ་ལྟར་རོ། །ཡང་དད་པས་དང་ཆ་འཛིན་པ་ཡང་རང་སྟོབས་དང་། མིག་གི་རྣམ་ཤེས་ཀྱིས་དང་ཆ་འཛིན་པ་གཞན་སྟོབས་ཀྱིས་ཏེ་རྒྱུ་མཚན་སྔ་མ་ལྟར་རོ། །ཞེས་གསུངས་སོ། །གཉིས་པ་ནི། སློབ་དཔོན་རོག་དང་གཉགས་གཉིས་ཀྱིས་ནི་དེ་མི་འཐད་དེ། སྟོབས་ཞེས་པ་ནི་དེ་དག་ཕན་ཚུན་གཅིག་གིས་གཅིག་ལ་རྟོགས་པའི་ཁྱད་པར་བསྐྱེད་པ་ཡིན་ན་ནི་ཕན་ཚུན་ཕན་འདོགས་པ་ཡོད་དགོས་ཤིང་། དེ་ཡང་འདོད་ན་དུས་མཉམ་པའི་རྒྱུ་འབྲས་ཡོད་དགོས་པས་དེ་མིན་པའི་ཕྱིར། ཞེས་པའི་སྐྱོན་བརྗོད་པ་ལ། ཁོ་ན་རེ། དུས་མཉམ་པའི་རྒྱུ་འབྲས་ནི་ཤིན་ཏུ་ཡང་འདོད་དེ། འདི་ཉིད་དུ་སེམས་དང་སེམས་བྱུང་ཕན་ཚུན་དུ་ལྷན་ཅིག་འབྱུང་བ་དང་མཚུངས་ལྡན་གྱི་རྒྱུར་བཤད་པ་དང་། ཐེག་བསྡུས་ལས། ཀུན་གཞིའི་རྣམ་ཤེས་དང་། ཀུན་ནས་ཉོན་མོངས་ཀྱི་ཆོས་རྣམས་དུས་མཉམ་དུ་གཅིག་གི་རྒྱུར་གཅིག་འགྱུར་བ་མར་མེའི་མེ་ལྕེ་འབྱུང་བ་དང་། སྙིང་པོ་ཚིག་པ་དུས་མཉམ་པ་དང་། མདུང་ཁྱིམ་དུས་མཉམ་པ་ཕན་ཚུན་བརྟེན་ནས་མི་འགྱེལ་བའི་དཔེས་གསུངས་པའི་ཕྱིར་དང་། དུས་མཉམ་ལ་རྒྱུ་འབྲས་མེད་ན་སྔ་ཕྱིའི་རྒྱུ་འབྲས་ཀྱང་མེད་ཅེས་འགྲེ་ཞིང་། དུས་མཉམ་ལ་རྒྱུ་འབྲས་གྲུབ་དུས་ན་འབྲས་བུ་གྲུབ་མ་གྲུབ་བརྟགས་ནས་ཕན་གདགས་བྱ་འདོགས་བྱེད་མི་འཐད་ན་སྔ་ཕྱི་ལ་ཡང་གཅིག་དངོས་པོར་ཡོད་པའི་ཚེ་གཅིག་ཤོས་དངོས་པོར་མེད་པས་ཕན་འདགས་བྱ་འདོགས་བྱེད་དུ་མི་འཐད་པའི་ཕྱིར་རོ། །ཞེས་གསུངས་ཤིང་། འབྲིང་མཚམས་ཞར་ཡང་། མྱུ་གུ་དང་། དེའི་གྲིབ་མ་དང་། མར་མེ་དང་། དེའི་འོད་དང་། ས་གཞི་དང་། སེམས་ཅན་གནས་པ་ལྟ་བུ་རྒྱུ་འབྲས་དུས་མཉམ་ཡོད་ཅེས་གསུངས་སོ། །དེ་ལ་དང་པོ་མི་འཐད་དེ། ཡིད་ཀྱི་རྣམ་པར་ཤེས་པས་གཟུགས་འཛིན་པ་ཡང་ཆོས་ཉིད་ཡིན་པར་མ་ངེས་པས་རང་སྟོབས་མ་ཡིན་པར་འགྱུར་བ་དང་། སེམས་བྱུང་ནང་ལ་ཡང་འདུ་ཤེས་ཀྱིས་དད་པའི་ཡུལ་འཛིན་པ་ལྟ་བུ་གཞན་སྟོབས་ཀྱིས་དོན་གྱི་ཁྱད་པར་འཛིན་པ་ཡོད་པར་འགྱུར་བ་དང་། སེམས་ཀྱིས་ཀུན་འགྲོ་ལྔའི་ཡུལ་འཛིན་པ་རང་སྟོབས་སུ་འགྱུར་བའི་ཕྱིར་རོ། །གལ་ཏེ་དེ་གཉིས་ཕན་ཚུན་ལྟོས་པ་ཙམ་གཞན་སྟོབས་སུ་འདོད་ན་ཐམས་ཅད་ཀྱང་གཞན་སྟོབས་ཁོ་ནར་འགྱུར་ཏེ། དེ་དག་ལྷན་ཅིག་འབྱུང་བ་དང་། མཚུངས་ལྡན་གྱི་རྒྱུར་བཤད་པས་སོ། །འཇད་པ་གཞོན་བྱང་། སེམས་བྱུང་གིས་དོན་གྱི་ཁྱད་པར་འཛིན་པ་དེ་གཞན་སྟོབས་སུ་ཐལ་ཏེ། བཙུན་པས་མི་རྟོགས་པ་མིང་ཙམ་རྟོགས་པ་ལ་རག་ལས་པ་ལྟར་སེམས་ཀྱིས་དོན་རྟོགས་པ་དོན་ཙམ་རྟོགས་པ་ལ་རག་ལས་པའི་ཕྱིར་རོ་ཞེས་པའི་སྐྱོན་བརྗོད་པ་ནི་མི་འཇུག་སྟེ། འདིར་ནི་དོན་གྱི་ངོ་བོ་དང་། ཁྱད་པར་ནི་ཆོས་ཅན་དང་། ཆོས་ཡིན་གྱི་སྤྱི་དང་བྱེ་བྲག་མ་ཡིན་པའི་ཕྱིར་རོ། །གསུམ་པ་ནི། འབྲིང་མཚམས་ཞང་གིས། བློ་དེ་ཡིན་པའི་སྟོབས་ཀྱིས་ཡུལ་གྱི་ལྡོག་པ་དེ་འཛིན་པ་དེ་རང་སྟོབས་དང་། ཤེས་རིག་གཞན་དང་འགྲོགས་པའི་སྟོབས་ཀྱིས་ཡུལ་གྱི་ལྡོག་པ་དེ་འཛིན་པ་གཞན་སྟོབས་ཡིན་པར་གསུངས་པ་ཡང་མི་འཐད་དེ། སེམས་ཀྱི་དོན་ཙམ་འཛིན་པ་དེ་གཞན་སྟོབས་སུ་ཐལ་ཏེ། སེམས་བྱུང་དང་འགྲོགས་པའི་སྟོབས་ཀྱིས་འཛིན་པའི་ཕྱིར། རྟགས་གྲུབ་སྟེ། སེམས་ལས་བྱུང་བ་མེད་པར་ནི། །སེམས་ནི་ནམ་ཡང་མི་འབྱུང་སྟེ། །ཉི་མ་དང་ནི་འོད་ཟེར་བཞིན། །དེ་རྣམས་ཉིད་དང་ལྷན་ཅིག་འབྱུང་། །ཞེས་བཤད་སྦྱར་དུ་དྲངས་པས་སོ། །ཞེས་རིན་ཆེན་རྩེ་གསུངས་སོ། །ཡང་སྟག་སྡེ་པ་སེང་གེ་རྒྱལ་མཚན་གྱིས། དོན་ཙམ་དང་། དོན་གྱི་ཁྱད་པར་གཉིས་སུ་ཕྱེ་བའི་ནང་ནས་ཤེས་པ་རང་གི་ཡུལ་ལ་དམིགས་པ་རང་སྟོབས་དང་། གཞན་གྱི་ཡུལ་ལ་དམིགས་པ་གཞན་སྟོབས་ཏེ། རང་གི་ཡུལ་ན་འདུག་པ་དང་། གཞན་གྱི་ཡུལ་ན་འདུག་པ་ལྟར་རོ་ཞེས་གསུངས་ལ། དཔངས་ལོ་ཆེན་པོས། རང་སྟོབས་དང་གཞན་སྟོབས་གཞུང་ནས་བཤད་པ་མེད་ཅིང་རིགས་པས་མ་གྲུབ་པས་དཔྱད་མི་དགོས་ལ། རྩ་བའི་རྩོད་གཞི་ཉིད་ལན་དུ་བྱས་པ་ལྟ་བུར་མངོན་པས་མི་འཐད་དོ་གསུང་། བཞི་པ་ནི། དུས་མཉམ་པའི་རྒྱུ་འབྲས་མི་འཐད་དེ། རྒྱུར་འདོད་པ་ཕན་ཚུན་གཉིས་པོ་མ་སྐྱེས་པའི་ཚེ་རྒྱུ་མིན་པར་འགྱུར་ཏེ། མེད་པས་ནུས་པ་མེད་པའི་ཕྱིར་དང་། གཉིས་ཀ་སྐྱེས་པ་ན་ཡང་རྒྱུ་མིན་པར་འགྱུར་ཏེ། ཕན་མི་འདོགས་པའི་ཕྱིར་ཏེ། རྣམ་འགྲེལ་དུ། མེད་པ་སྔར་ནུས་མེད་ཕྱིར་དང་། །ཕྱིས་ཀྱང་ཉེ་བར་མི་སྦྱོར་ཕྱིར། །རྒྱུ་རྣམས་ཐམས་ཅད་སྔར་ཡོད་ཡིན། །ཞེས་གསུངས་པ་ལྟར་རོ། །ཐེག་བསྡུས་སུ་གསུངས་པ་ནི་བར་མ་ཆོད་པ་ལ་དུས་མཉམ་པའི་མིང་གིས་བཏགས་པ་སྟེ། དེ་ཉིད་ཀྱི་འགྲེལ་པ་བཤད་སྦྱར་དུ། ལྷན་ཅིག་འབྱུང་བའི་རྒྱུ་ཉིད་ནི་བཏགས་པ་བ་སྟེ་དུས་གཅིག་ཏུ་འབྱུང་བ་རྣམས་ལ་རྒྱུ་དང་འབྲས་བུའི་དངོས་པོ་མི་རུང་བའི་ཕྱིར་རོ། །ཞེས་བཤད་དོ། །མྱུ་གུ་དང་གྲིབ་མ་སོགས་ཀྱང་སྐད་ཅིག་སྔ་མའི་མྱུ་གུ་དང་། མར་མེ་ལས་སྐད་ཅིག་ཕྱི་མའི་གྲིབ་མ་དང་། འོད་ཀྱང་འབྱུང་བས་དུས་མཉམ་མ་ཡིན་ནོ། །བཞི་པ་གྲུབ་མཐས་འབྱེད་པ་དགག་པ་ནི། འཇམ་སར་གྱིས། སེམས་ཙམ་པའི་ལུགས་ལ་དེ་གཉིས་རྣམ་པ་མི་མཚུངས་ལ་རྣམ་པ་མཚུངས་པར་བཤད་པ་ནི་བྱེ་བྲག་ཏུ་སྨྲ་བའི་ལུགས་སོ་ཞེས་གསུངས་པ་མི་འཐད་དེ། སྔར་གྱི་གཞུང་གཉིས་ཀ་སེམས་ཙམ་པའི་གཞུང་དུ་འདྲ་བའི་ཕྱིར་རོ། །གཉིས་པ་འཐད་པ་བརྗོད་པ་ནི། གཟུགས་འཛིན་གྱི་མིག་གི་རྣམ་པར་ཤེས་པ་དང་། དེའི་འཁོར་གྱི་སེམས་བྱུང་རྣམས་གཟུགས་འཛིན་ཡིན་པའི་རྣམ་པ་མཚུངས་པས་རྣམ་པ་མཚུངས་པར་བཤད་ཅིང་། གཟུགས་ཀྱི་ངོ་བོ་དང་ཁྱད་པར་འཛིན་པའི་རྣམ་པ་མི་མཚུངས་པས་ཁྱད་མེད་དུ་མི་འགྱུར་རོ། །དེ་ཡང་ཡིད་ཀྱི་སར་དེ་ཉིད་ལ་གང་སྡུག་པ་དང་། མི་སྡུག་པ་དང་། གཉིས་ཀ་ལས་བཟློག་པའི་མཚན་ཉིད་དེ་རག་པས་རིག་པར་བྱེད་དོ། །དེ་ཉིད་ལ་གང་ཕན་པ་དང་། གནོད་པ་དང་། གཉིས་ཀ་ལས་བཟློག་པའི་མཚན་ཉིད་དེ་ཚོར་བས་རིག་པར་བྱེད་དོ། །དེ་ཉིད་ལ་གང་ཐ་སྙད་ཀྱི་མཚན་མའི་མཚན་ཉིད་དེ་འདུ་ཤེས་ཀྱིས་རིག་པར་བྱེད་དོ། །ཞེས་སོགས་གསུངས་ཤིང་། མཛོད་འགྲེལ་དུ། རྣམ་པ་རེ་རེ་ནས་བྱེ་བྲག་ཏུ་གཅོད་པའི་ཕྱིར་རྣམ་པ་དང་བཅས་པ་རྣམས་སོ། །ཞེས་སོ། །དེའི་འགྲེལ་བཤད་དུ། རྣམ་པར་ཤེས་པས་སྔོན་པོ་ལ་སོགས་པའི་རྣམ་པ་བྱེ་བྲག་ཏུ་གཅོད་ལ་དམིགས་པ་དེ་ཉིད་ལ་ཚོར་བས་མྱོང་ངོ་། །འདུ་ཤེས་ཀྱིས་ཡོངས་སུ་གཅོད་དོ། །ཞེས་བཤད་ཅིང་། སའི་བསྟོད་འགྲེལ་དུའང་། ངོ་བོ་ཉིད་ཀྱི་བྱེ་བྲག་ལ་དམིགས་པའི་ཕྱིར། དེ་རྣམས་ཀྱི་དམིགས་པ་ཐ་དད་པ་མིན་ནམ་ཞེ་ན། དེ་ལྟ་ཡིན་དུ་ཟིན་ཀྱང་དམིགས་པའི་དངོས་པོ་གཅིག་པའི་ཕྱིར་རོ། །དེ་སྐད་སྨྲས་སོ་ཞེས་བཤད་དོ། །ཞེས་དཔངས་ལོ་ཆེན་པོས་བཤད་པ་འདི་ཉིད་འཐད་པའི་ཕྱོགས་སུ་མཐོང་ངོ་། །འདི་ལ་ཡང་སེམས་སེམས་བྱུང་རྫས་གཅིག་པ་ལྟར་ན་སེམས་བྱུང་གིས་དོན་ཙམ་འཛིན་པ་མིན་ཏེ། དེའི་ཁྱད་པར་ངེས་པར་འཛིན་དགོས་པའི་ཕྱིར་རོ། །སེམས་ཀྱིས་དོན་གྱི་ཁྱད་པར་འཛིན་པ་མིན་ཏེ། སེམས་ཀྱིས་རྫས་ལ་དོན་གྱི་ཁྱད་པར་འཛིན་པའི་ཆ་ཤས་ཡོད་པ་རྣམས་ནི་སེམས་བྱུང་ཡིན་གྱི་སེམས་མ་ཡིན་པའི་ཕྱིར་རོ། །དཔེར་ན་རྟོག་མྱོང་རང་རིག་མངོན་སུམ་དེས་རྟོག་པའི་ཡུལ་ལ་ཞེན་པ་མ་ཡིན་ཡང་དེའི་རྫས་ལ་ཡུལ་ལ་ཞེན་པའི་ཆ་ཡོད་པ་ནི་རྟོག་པ་ཡིན་གྱི་རྟོག་མྱོང་རང་རིག་མངོན་སུམ་མ་ཡིན་པ་བཞིན་ནོ། །ཞེས་པའི་ཁྱད་པར་ཕྱེད་དགོས་སོ། །སྤྱིའི་གསུམ་པ་ལ་གསུམ་སྟེ། རྣམ་ཤེས་གཅིག་པུར་འདོད་པ་ལ་བརྒལ་ལན། སེམས་བྱུང་གསུམ་དུ་འདོད་པ་ལ་བརྒལ་ལན། སེམས་སེམས་བྱུང་རྫས་གཅིག་པའི་རང་ལུགས་སོ། །དང་པོ་ནི། བྱང་ཆུབ་སེམས་དཔའ་རྣམ་ཤེས་གཅིག་པུར་སྨྲ་བ་སོགས་ནི། མདོ་ལས། རིང་དུ་སོང་ཞིང་གཅིག་ཏུ་རྒྱུ། །འདུལ་བར་དཀའ་བའི་སེམས་འདུལ་བྱེད། །ཅེས་གསུངས་པས་སེམས་ཅན་རེ་རེའི་རྒྱུད་ཀྱི་རྣམ་ཤེས་རྣམས་རྫས་གཅིག་ཡིན་ལ། དེ་ཉིད་དབང་པོ་དུ་མ་ལ་བརྟེན་ཅིང་། ཡུལ་དྲུག་ལ་དམིགས་པས་རྣམ་ཤེས་དུ་མར་མངོན་པ་ནི་བུ་ག་དུ་མ་ཅན་གྱི་ཁང་པར་སྤྲེའུ་བཅུག་པའམ་མར་མེ་བཏེག་པ་ལྟར་རོ། །དེ་ཉིད་ལུང་གིས་སྒྲུབ་པ་ནི། སེམས་ཅན་རྣམས་ནི་རྣམ་པར་ཤེས་པའི་རྒྱུད་རེ་རེ་བའོ། །ཞེས་དང་། སྐྱེ་མཆེད་བཅུ་གཉིས་བསྟན་པའི་མདོར། རྣམ་ཤེས་དྲུག་ནི་ཡིད་ཀྱི་སྐྱེ་མཆེད། ཅེས་གསུངས་སོ། །ཡང་སེམས་ཉིད་བདེ་སོགས་སྣ་ཚོགས་སུ་འབྱུང་བས། སེམས་སེམས་བྱུང་རྫས་གཅིག་ཏེ། རྨ་བྱའི་མདོངས་སྣ་ཚོགས་སུ་སྣང་ཡང་སྒྲོའི་ངོ་བོ་གཅིག་ཡིན་པ་བཞིན་ནོ། །ཞེས་སྨྲའོ། །འདི་ཉིད་ཐོགས་མེད་ཀྱིས་བཀག་པའི་ཚུལ་དང་། དབྱིག་གཉེན་གྱིས་བཀག་པའི་ཚུལ་གཉིས། དང་པོ་ནི། བསྡུ་བར། དགེ་སྦྱོང་དང་བྲམ་ཟེ་གང་ལ་ལ་མིང་ལས་སེམས་ཙམ་ཞིག་རྫས་སུ་འདོད་ལ་སེམས་ལས་བྱུང་བའི་ཆོས་རྣམས་ནི་མི་འདོད་པ་གང་དག་ཡོད་པ་དེ་ཡང་མི་འཐད་དོ། །ཞེས་སོགས་རྒྱས་པར་གསུངས་ནས་དོན་བསྡུ་བར། ལྔ་ཉིད་འཐད་པ་མེད་ཕྱིར་དང་། །དེ་ཡི་གནས་སྐབས་སྐྱོན་ཕྱིར་དང་། །བྱེད་རྒྱུ་བྱེ་བྲག་མེད་ཕྱིར་དང་། །ལུང་དང་འགལ་བར་འགྱུར་ཕྱིར་རོ། །ཞེས་ཏེ། སེམས་བྱུང་རྫས་སུ་མེད་ན། ཚོར་བ། འདུ་ཤེས། འདུ་བྱེད་དེ་སེམས་བྱུང་རྣམས་རྣམ་ཤེས་སུ་འདུས་པས་ཕུང་པོ་ལྔ་མི་འཐད་པའི་ཕྱིར་དང་། ཅི་སྟེ་གནས་སྐབས་ཀྱི་བྱེ་བྲག་ལ་ཕུང་པོ་ལྔར་རྟོག་ན་གནས་སྐབས་དེ་དག་ཕན་ཚུན་བྱེད་པ་ཐ་དད་ཡོད་ན་རང་བཞིན་མི་འདྲ་བས་རྫས་ཐ་དད་དུ་གྲུབ་ཅིང་། མེད་ན་གནས་སྐབས་ཐ་དད་རྟོགས་པ་དོན་མེད་པར་འགྱུར་རོ། །མིག་ཤེས་སོགས་དྲུག་གི་གནས་སྐབས་ལྟར་ཐ་དད་པ་ཡང་མ་ཡིན་ཏེ། དེ་རྣམས་ནི་གནས་དང་དམིགས་པ་ཐ་དད་ཅིང་ཚོར་བ་སོགས་ཀྱི་གནས་སྐབས་རྣམས་ནི་གཅིག་ལ་ཡང་དམིགས་པས་སོ། །སྐད་ཅིག་གཅིག་ལ་སེམས་དེ་གནས་སྐབས་སྣ་ཚོགས་པར་འགྱུར་བ་ཡང་མི་རུང་སྟེ། དེ་ལྟར་འགྱུར་བའི་བྱེད་རྒྱུའི་བྱེ་བྲག་མེད་པའི་ཕྱིར་རོ། །ལུང་ལས། འདོད་ཆགས་དང་། ཞེ་སྡང་དང་། གཏི་མུག་གིས་ཉེ་བར་ཉོན་མོངས་པ་ཅན་དུ་གྱུར་པའི་སེམས་ནི་རྣམ་པར་མི་གྲོལ་ལོ། །ཞེས་བཀའ་སྩལ་པ་དང་ཡང་འགལ་ལོ། །སེམས་སེམས་བྱུང་གཉིས་གཅིག་ཅར་འབྱུང་བ་མེད་ན་བཅིང་བྱ་འཆིང་བྱེད་དུ་མི་རུང་བའི་ཕྱིར། ཡང་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་ཞེས་བཀའ་སྩལ་པ་དང་ཡང་འགལ་ཏེ། གཅིག་ལ་ལྷན་ཅིག་དང་འདྲེས་པ་མི་རུང་བའི་ཕྱིར་རོ། །གཉིས་པ་ནི། དབུས་མཐའི་འགྲེལ་པར། གཅིག་པུ་ཡང་ཡིན་ལ་དབྱེར་ཡོད་པའི་སྣ་ཚོགས་ཀྱང་ཡིན་པ་འགལ་ལོ། །ཞེས་པའི་རིགས་པ་དང་། མདོ་ལས། ཚོར་བ་དང་། འདུ་ཤེས་དང་། སེམས་པ་གང་ཡིན་པ་དང་། རྣམ་ཤེས་གང་ཡིན་པའི་ཆོས་འདི་རྣམས་ནི་འདྲེས་པ་སྟེ་མ་འདྲེས་པ་མིན་ནོ་ཞེས་པའི་ལུང་གིས་བཀག་གོ །གཉིས་པ་ནི། མདོ་སྡེའི་བཙུན་པ་དཔལ་ལེན་ན་རེ། ཚོར་བ་སོགས་སེམས་བྱུང་གསུམ་ཉིད་རྫས་སུ་འདོད་དེ། ཚོར་བ་དང་། འདུ་ཤེས་དང་། སེམས་པ་རྣམས་ནི་ལྷན་ཅིག་སྐྱེའོ་ཞེས་བཀའ་སྩལ་པས་སོ། །ཞེས་སྨྲ་བ་ནི་མཛོད་འགྲེལ་ལས། ཆོས་ཐམས་ཅད་ནི་འདུན་པའི་རྩ་བ་ཅན་ཡིད་ལ་བྱེད་པ་ལས་བྱུང་བ་རེག་པའི་ཀུན་འབྱུང་བ་ཅན་དྲན་པའི་བདག་པོ་ཅན་ཞེས་བཀའ་སྩལ་བ་དང་འགལ་ལོ་ཞེས་བཀག་གོ །གསུམ་པ་ནི། དཔལ་ལྡན་གྲགས་པ་ནི་སེམས་སེམས་བྱུང་རྫས་གཅིག་ཏུ་བཞེད་དེ། ཡིད་ཤེས་རྟོག་པའི་འཁོར་གྱི་སེམས་བྱུང་རྣམས་རྟོག་མེད་ཡིན་ན་དེས་རང་མཚན་དང་། རྟོག་པས་སྤྱི་མཚན་འཛིན་པས་དམིགས་པ་མི་མཚུངས་པར་འགྱུར་རོ། །རྟོག་པ་ཡིན་ན་རྟོག་པ་རྫས་དུ་མ་རྒྱུད་གཅིག་ལ་དུས་གཅིག་ཅར་དུ་འཇུག་པར་འགྱུར་བ་ལས། རྣམ་འགྲེལ་དུ། རྟོག་གཉིས་ཅིག་ཅར་མཐོང་བ་མེད། །ཅེས་དང་། འདི་ལྟར་རྣམ་པར་རྟོགས་པ་རྣམས། །རིམ་གྱིས་འབྱུང་བར་ཡང་དག་རྟོགས། །ཞེས་གསུངས་པ་དང་འགལ་ལོ། །དཔངས་ལོ་ཆེན་པོས། དེ་ཉིད་བློ་ཡུལ་དུ་བདེ་ལ། གཞུང་འདི་ཉིད་དུའང་། སེམས་ཀྱི་འཇུག་པ་སྟེ། ཞེས་དང་། སེམས་མངོན་པར་སྤྲོ་བ་སྟེ། ཞེས་པ་ལ་སོགས་པ་སེམས་ཞི་བ་པ་ཞེས་པའི་བར་རྫས་གཅིག་ཏུ་གསལ་བར་སྟོན་པ་དུ་མ་ཞིག་གསུངས་ཤིང་། བསྡུ་བར་ཐ་དད་དུ་གསུངས་པ་ནི་བྱེ་བྲག་སྨྲ་བ་དང་སྒོ་བསྟུན་པ་སྟེ། དོན་གསང་དུ། རྣལ་འབྱོར་སྤྱོད་པའི་སར་ནི་ཉན་ཐོས་ལ་སོགས་པ་དང་ཐུན་མོང་དང་། ཐུན་མོང་མ་ཡིན་པའི་ཡང་དབང་དུ་བྱས་ནས་མཛད་དོ། །ཞེས་པ་ལྟར་རོ། །གཞན་དུ་ན་ལྡན་མིན་འདུ་བྱེད་ཀྱང་ཕུང་པོ་ལོགས་པར་མི་འཐད་ཅིང་། སེམས་ཙམ་གྱི་ཚུལ་ལ་གཟུགས་རྫས་སུ་མེད་པས་ཕུང་པོ་ཐ་དད་དུ་མི་སྟོན་པར་འགྱུར་རོ་ཞེས་བཞེད་དོ། །དཔལ་ལྡན་ས་སྐྱ་པཎྜི་ཏས་ཀྱང་། སེམས་དང་སེམས་བྱུང་རྫས་གཞན་དུ་མེད་པར་གསུངས་ཤིང་། མཁས་གྲུབ་གཡག་ལ་སོགས་པ་རྣམས་ཀྱང་དེ་བཞིན་ཏུ་བཞེད་པས་མདོ་སྡེ་པ་ཡན་ཆད་ཀྱི་ལུགས་ལ། སེམས་སེམས་བྱུང་རྫས་གཞན་དུ་མེད་པ་ནི་གྲུབ་མཐའི་རྣམ་དབྱེ་ཕྱེད་པ་རྣམས་ཀྱི་ལུགས་སུ་སྣང་ངོ་། །འདི་སྒྲུབ་བྱེད་ཀྱི་ལུང་རིགས་ནི་སྡེ་བདུན་རབ་གསལ་དུ་རྒྱས་པར་བསྟན་ཟིན་པས་དེར་བལྟ་བར་བྱའོ། །མདོར་ན་བྱེ་བྲག་སྨྲ་བའི་ལུགས་ལ་ལྡན་མིན་འདུ་བྱེད་གཟུགས་སེམས་ལས་རྫས་གཞན་དུ་འདོད་པའི་ཚེ་སེམས་བྱུང་རྣམས་ཀྱང་རྣམ་ཤེས་ལས་རྫས་གཞན་དུ་འདོད་པ་ཡིན་ལ། མདོ་སྡེ་པ་ཡན་ཆད་དུ་སྔོན་པོ་དང་སྔོན་པོའི་མི་རྟག་པ་རྫས་གཅིག་ཏུ་འདོད་པའི་ཚེ་སེམས་སེམས་བྱུང་གཉིས་རྫས་གཅིག་ཏུ་འདོད་པ་ནི་གནད་ཀྱི་དོན་ནོ། །སྤྱིའི་བཞི་པ་ནི། ཀུན་གཞིའི་འཁོར་དུ་ཀུན་འགྲོ་ལྔ་ཁོ་ན་འབྱུང་གི་དེ་ལས་གཞན་མི་འབྱུང་སྟེ། ཡུལ་སོ་སོར་ངེས་པ་ལྔ་ནི་དམིགས་པ་ཆད་པས་དམིགས་པ་མི་མཚུངས་པའི་ཕྱིར་དང་། དེ་རྣམས་རྣམ་ཤེས་གསལ་བ་དང་མཚུངས་པར་ལྡན་པའི་ཕྱིར། དགེ་བ་བཅུ་གཅིག་དང་། ཉོན་མོངས་པ་དང་། ཉེ་བའི་ཉོན་མོངས་པ་རྣམས་ཀུན་གཞི་དང་ངོ་བོ་མི་མཐུན་པས་སོ། །གཞན་འགྱུར་བཞི་ནི་གདགས་གཞི་མི་འབྱུང་བའི་ཕྱིར་ཏེ། རྟོགས་དཔྱོད་སེམས་པ་ལ་གདགས་པ་ཡང་སེམས་པ་ཀུན་ལ་མི་འདོགས་ཀྱི་ཚོལ་ཞིང་སོ་སོར་རྟོག་པའི་རྣམ་པ་ཅན་ལ་འདོགས་ལ་དེ་ལྟ་བུ་དང་ཀུན་གཞི་མི་ལྡན་པའི་ཕྱིར་རོ། །ཉོན་མོངས་པ་ཅན་གྱི་ཡིད་ཀྱི་འཁོར་དུ་ཀུན་འགྲོ་ལྔ་དང་ཉོན་མོངས་པ་བཞི་འབྱུང་སྟེ། དོན་གསང་དུ། འདིའི་སེམས་ལས་བྱུང་བ་ནི་དགུ་ཁོ་ནའོ། །ཞེས་སོ། །དེ་ལས་གཞན་མི་འབྱུང་བ་ལ་འདུན་པ་གསུམ་ལས་ཕྲད་པར་འདོད་པ་དང་། དོན་དུ་གཉེར་བའི་འདུན་པ་ནི་རིང་བ་ལ་དམིགས་ཤིང་ཉོན་ཡིད་ཉེ་བ་ལ་དམིགས་པའི་ཕྱིར་དང་། མི་འབྲེལ་བའི་འདུན་པ་བྲལ་གྱིས་དོགས་པ་ལས་འབྱུང་བ་ལ། དེ་ཉོན་ཡིད་ལ་མེད་པས་སོ། །མོས་པ་སྔར་ཐེ་ཚོམ་ཟ་བ་ལས་ངེས་པ་རྙེད་པ་ཡིན་པ་ལས་ཉོན་ཡིད་ལ་ཐེ་ཚོམ་དེ་མེད་པས་དང་། དེ་དང་དྲན་པ་ཡང་སྔར་མྱོང་བ་ལ་དམིགས་ཤིང་། ཡིད་ནི་སྔོན་མེད་པའི་རྫས་ལ་དམིགས་པས་སོ། །ཏིང་ངེ་འཛིན་ནི་སྔར་གཡེང་བ་ཡོད་པ་ལས་མཉམ་པར་འཇོག་པ་ཡིན་ན་དེ་ཡིད་ལ་མེད་པས་སོ། །ཤེས་རབ་ནི་ལྡན་ཏེ་ལྟ་བ་དང་ལྡན་པས་སོ། །དགེ་བ་བཅུ་གཅིག་ནི་མི་ལྡན་ཏེ། སྒྲིབ་པ་དང་ངོ་བོ་མི་མཚུངས་པས་སོ། །ཁོང་ཁྲོ་དང་ཐེ་ཚོམ་ནི་མི་ལྡན་ཏེ། ཁོང་ཁྲོ་ནི་མི་དགའ་བའི་རྣམ་པ་ཅན་ཡིན་ཅིང་། ཡིད་ནི་བདག་ལ་ཆགས་པའི་དགའ་བའི་རྣམ་པར་འབྱུང་བ་དང་། ཐེ་ཚོམ་ནི་གཞན་དུ་དོགས་པ་དང་། ཡིད་ངོ་བོ་གཅིག་ཏུ་འཇུག་པས་རྣམ་པ་མི་མཚུངས་པའི་ཕྱིར། ལྟ་བ་གཞན་བཞི་ནི་མི་ལྡན་ཏེ། བདག་ཏུ་ལྟ་བ་དང་རྟག་ཏུ་ལྡན་པས་ཤེས་རབ་ཀྱི་རྫས་གཉིས་མི་ལྡན་པའི་ཕྱིར་རོ། །ལྟ་བ་ཀུན་བཏགས་གསུམ་ནི་མཐོང་སྤང་དང་ཡིད་ནི་སྒོམ་སྤང་ཡིན་པའི་ཕྱིར་རོ། །ཉེ་ཉོན་ཉི་ཤུའི་ལྡན་ཚུལ་ལ། བཅུ་པ་དང་པོའི་ཁྲོ་བ་དང་། འཁོན་འཛིན་དང་། འཚིག་པ་དང་། ཕྲག་དོག་དང་། རྣམ་འཚེ་ནི་མི་དགའི་རྣམ་པས་ཞུགས་པ་དང་། གཞན་ལྔ་དང་ཤེས་བཞིན་མ་ཡིན་པ་ནི་ཁ་ཕྱིར་བལྟས་པས་མི་འབྱུང་། མཁས་པ་ཁ་ཅིག ཡང་ཉོན་མོངས་པའི་རླབས་ཅུང་ཟད་བྲི་བ་ཉེ་བའི་ཉོན་མོངས་པ་ཡིན་ན། ཉོན་ཡིད་ལ་དེ་མེད་པས་ཉི་ཤུ་པོ་མི་འབྱུང་ཞེས་གསུངས། ངའོ་སྙམ་པའི་ང་རྒྱལ་ལ་བཏགས་པའི་གཡེང་བ་དང་། འདོད་ཆགས་དང་གཏི་མུག་ལ་བཏགས་པའི་བག་མེད་དང་། འདོད་ཆགས་ལ་བཏགས་པའི་རྒོད་པ་དང་། གཏི་མུག་གི་ཆ་མ་དད་པ་དང་། ལེ་ལོ་དང་། རྨུགས་པ་རྣམས་འབྱུང་སྟེ། བག་མེད་སོགས་ལྔ་འབྱུང་བ་མངོན་པ་གོང་མ་ལས་ཀྱང་བཤད་ཅིང་། མཛོད་དུ། རྨོངས་དང་བག་མེད་ལེ་ལོ་དང་། །མ་དད་པ་དང་རྨུགས་དང་རྒོད། །ཉོན་མོངས་ཅན་ལ་རྟག་ཏུ་འབྱུང་། །ཞེས་གསུངས་པས་སོ། །འོ་ན་དོན་གསང་དུ། འདིའི་སེམས་ལས་བྱུང་བ་ནི་དགུ་ཁོ་ནའོ་ཞེས་དང་། སུམ་ཅུ་པར། བསྒྲིབས་ལ་ལུང་དུ་མ་བསྟན་པའི། །ཉོན་མོངས་བཞི་དང་རྟག་ཏུ་འགྲོགས། །ཞེས་བཤད་པ་དང་འགལ་ལོ་སྙམ་ན། དེ་དག་ནི་ཐུན་མོང་བ་ཀུན་འགྲོ་ལྔའི་སྟེང་དུ་ཐུན་མོང་མ་ཡིན་པ་རྩ་ཉོན་གྱི་ལྡན་ཚུལ་བགྲངས་པ་ཡིན་པས་མི་འགལ་ལ་གཞན་དུ་ན་ཤེས་རབ་ཀྱང་མི་འབྱུང་བར་འགྱུར་རོ། །དེ་ལྟར་ན་ཤེས་རབ་ཀྱི་ཆ་ལ་བཏགས་པའི་བདག་ཏུ་ལྟ་བ་འབྱུང་བ་འགལ་ལོ། །ངོ་ཚ་མེད་པ་དང་ཁྲེལ་མེད་ནི་གཅིག་ཏུ་མི་དགེ་བ་ཡིན་པས་མི་འབྱུང་ཞིང་། བརྗེད་ངེས་པ་ཡང་མི་འབྱུང་སྟེ། ཡིད་ནི་འདྲིས་པ་ལ་དམིགས་པ་ཡིན་པའི་ཕྱིར། གཉིད་ཀྱང་མི་འབྱུང་སྟེ། ཁམས་གོང་ན་མེད་ཅིང་། འདིའི་འཁོར་ལ་ཁམས་གསུམ་ན་མང་ཉུང་མེད་པའི་ཕྱིར་རོ། །འགྱོད་པ་ཡང་མི་འབྱུང་སྟེ། མི་དགའི་རྣམ་པ་ཅན་ཡིན་པའི་ཕྱིར་རོ། །རྟོག་དཔྱོད་ཀྱང་མི་འབྱུང་སྟེ། དེ་དག་ནི་ཚོལ་བ་དང་། སོ་སོར་རྟོག་པའི་རྣམ་པ་ཅན་ཡིན་པས་སོ། །ཞེས་དོན་གསང་དུ་བཤད་དོ། །འཇུག་ཤེས་ལ་བལྟ་འདོད་མེད་པར་གཟུགས་མཐོང་བ་ལྟ་བུ་རྐྱེན་ཉེར་གནས་དང་། བལྟ་འདོད་སྔོན་དུ་སོང་བས་གཟུགས་མཐོང་བ་ལྟ་བུ་ཡིད་སྔོན་སོང་གཉིས་ལས། དང་པོའི་འཁོར་དུ་ཀུན་འགྲོ་ལྔ་ལས་གཞན་མི་འབྱུང་སྟེ། འབྱུང་ལོང་མེད་པའི་ཕྱིར། གཉིས་པ་ལ་སྒོ་ལྔའི་རྣམ་ཤེས་དགེ་བའི་འཁོར་དུ་དང་པོ་ཉེར་གཅིག་དང་། རྟོག་དཔྱོད་གཉིས་ཏེ། སྤྱི་རིགས་ལ་ཉེར་གསུམ་འབྱུང་ངོ་། །ཉོན་མོངས་ཅན་གྱི་འཁོར་དུ་དང་པོ་བཅུ་དང་། དུག་གསུམ་དང་། བཅུ་པ་ཕྱི་མ་དང་། རྟོག་དཔྱོད་གཉིས་ཏེ་སྤྱི་རིགས་ལ་ཉེར་ལྔ་འབྱུང་གི་གཞན་མི་འབྱུང་སྟེ། ཉོན་མོངས་པ་གཞན་བཅུ་གསུམ་པོ་དང་འགྱོད་གཉིད་གཉིས་ཡིད་ཀྱི་ས་པ་ཡིན་པའི་ཕྱིར་རོ། །མ་བསྒྲིབས་པ་ལུང་མ་བསྟན་གྱི་འཁོར་དུ་དང་པོ་བཅུ་དང་། རྟོག་དཔྱོད་གཉིས་ཏེ་བཅུ་གཉིས་འབྱུང་ངོ་། །ཡིད་ཀྱི་རྣམ་ཤེས་དགེ་བའི་འཁོར་དུ་འདོད་ཁམས་སུ་དང་པོ་ཉེར་གཅིག་དང་། གཞན་འགྱུར་བཞི་འབྱུང་ངོ་། །ཉོན་མོངས་པ་ཅན་གྱི་འཁོར་དུ་ཡང་སྤྱི་རིགས་ལ་དགེ་བ་བཅུ་གཅིག་ལས་གཞན་བཞི་བཅུ་འབྱུང་ངོ་། །མ་བསྒྲིབས་པའི་འཁོར་དུ་དང་པོ་བཅུ་དང་ཕྱི་མ་བཞི་འབྱུང་ངོ་། །སྤྱིའི་ལྔ་པ་ནི། སྤྱིར་རྫས་ཡོད་ལ་དོན་བྱེད་ནུས་པ་དང་། བརྟན་པ་དང་། རིགས་པས་གྲུབ་པ་དང་། རང་རྐྱ་ཐུབ་པ་ལ་རྫས་ཡོད་དུ་བྱས་པ་བཞི་ལས། འདིར་ནི་དང་པོ་མ་ཡིན་ཏེ། སེམས་བྱུང་ཀུན་གྱིས་དོན་བྱེད་ནུས་པའི་ཕྱིར། གཉིས་པའང་མ་ཡིན་ཏེ། ཉོན་ཡིད་ཀྱིས་འཁོར་གྱི་འཇིག་ཚོགས་སུ་ལྟ་བ་ཡང་བརྟན་པས་རྫས་ཡོད་དུ་ཐལ་པའི་ཕྱིར་རོ། །གསུམ་པའང་མ་ཡིན་ཏེ། སེམས་བྱུང་ཐམས་ཅད་ཀྱང་རིགས་པས་འགྲུབ་པའི་ཕྱིར། དེས་ན་བཞི་པའོ། །དེ་བཞིན་དུ་བཏགས་ཡོད་ཀྱང་ལྡན་མིན་འདུ་བྱེད་ལྟ་བུ་གནས་སྐབས་ལ་བཏགས་པ་དང་། བདག་མེད་ལྟ་བུ་བློས་བཏགས་པ་ལྟ་བུ་སྒྲོ་བཏགས་པ་དང་། བུམ་པ་ལྟ་བུ་དེ་ལས་གཞན་པ་ལ་བཏགས་པ་དང་། གདགས་གཞིའི་ཆོས་ཀྱི་ཆ་ཤས་མ་དོར་བའི་ཆ་ལ་བཏགས་པའི་བཏགས་ཡོད་བཞི་ལས། འདིར་ནི་ཕྱི་མ་སྟེ། སློབ་དཔོན་བློ་བརྟན་གྱིས། གང་ཟག་གི་རང་གི་རྒྱུད་ལོགས་སུ་གྲུབ་པ་སོགས་དང་། རང་གི་རྒྱུད་ལོགས་སུ་མ་གྲུབ་པ་བཏགས་ཡོད་དུ་བཤད་པའི་དོན་ནོ། །དེ་ལ་རྫས་ཡོད་ནི་ཉེར་གཉིས་ཏེ་དང་པོ་བཅུ་དང་། དགེ་བ་ལས་གཏི་མུག་མེད་པ་དང་། ཕྱི་མ་གསུམ་མ་གཏོགས་པ་གཞན་བདུན་དང་། ལྟ་བ་མ་གཏོགས་པ་རྩ་བའི་ཉོན་མོངས་པ་ལྔ་པོ་རྣམས་སོ། །ལྷག་མ་ཉི་ཤུ་རྩ་དགུ་ནི་བཏགས་ཡོད་དེ། བསྡུ་བར་ངོ་ཚ་མེད་པ་དང་། ཁྲེལ་མེད་པ་དང་། མ་དད་པ་དང་། ལེ་ལོ་རྫས་ཡོད་དུ་གསུངས་པ་ནི་རང་དབང་དུ་འབྱུང་བ་ལ་དགོངས་ཞེས་དཔངས་ལོ་ཆེན་པོས་གསུངས་སོ། །སྤྱིའི་དྲུག་པ་ནི། ཁ་ཅིག འདོད་ཁམས་ན་ཤིན་ཏུ་སྦྱངས་པ་མེད་པས་གཞན་ལྔ་བཅུའོ་ཞེས་གསུངས་པ་མི་འཐད་དེ། སེམས་གནས་པའི་ཐབས་དགུ་པ་འདོད་སེམས་རྩེ་གཅིག་པ་ཡོད་པའི་ཕྱིར་དང་། ཡིད་ཀྱི་སར། དད་པ་ནས་རྣམ་པར་མི་འཚེ་བའི་བར་ས་ཐམས་ཅད་པར་གསུངས་པའི་ཕྱིར་དང་། མཛོད་དུ། འདོད་པའི་དགེ་བའི་སེམས་ལ་དགེ་བའི་སེམས་བྱུང་ཀུན་ཡོད་པར་གསུངས་པའི་ཕྱིར། དེས་ན་ཅི་རིགས་པའི་སེམས་བྱུང་ཀུན་འབྱུང་ངོ་། །འོ་ན་མདོ་སྡེ་ལས། དེ་ནས་དེ་ཡི་ལུས་དང་སེམས། །ཤིན་ཏུ་སྦྱངས་པ་ཆེ་ཐོབ་ནས། །ཡིད་ལ་བྱེད་དང་བཅས་ཞེས་བྱ། །ཞེས་གསུངས་པ་དང་འགལ་ལོ་སྙམ་ན། དེ་ཉིད་ཀྱིས་ཤིན་ཏུ་སྦྱངས་པ་ཡོད་པར་གྲུབ་སྟེ། ཐབས་དགུ་པ་ལ་ཤིན་ཏུ་སྦྱངས་པ་ཆུང་ངུ་དང་། འབྲིང་དང་། ཆེན་པོ་གསུམ་ཡོད་པ་ལས། ཆེན་པོ་ཐོབ་ནས་བསམ་གཏན་དང་པོའི་ཉེར་བསྡོགས་ཞི་གནས་སུ་འཇོག་པའི་དོན་ཡིན་པའི་ཕྱིར་རོ། །བསམ་གཏན་དང་པོ་ན་སོ་དགུ་ཡོད་དེ། དེ་ན་རྒྱུད་ཞི་གནས་ཀྱིས་བརླན་པ་དང་། ཀུན་ནས་མནར་སེམས་མེད་པས་གདགས་གཞི་ཁོང་ཁྲོ་དང་། དེ་ལ་བཏགས་པའི་ཁྲོ་བ། འཁོན་འཛིན། འཚིག་པ། ཕྲག་དོག རྣམ་འཚེ་མེད་པའི་ཕྱིར་དང་། ཡོ་བྱད་ལ་བདག་གིར་འཛིན་པ་དང་བྲལ་བས་སེར་སྣ་མེད་ཅིང་། མི་དགེ་བ་མེད་པས་ངོ་ཚ་མེད་པ་དང་ཁྲེལ་མེད་པ་མེད་ལ། དེ་ཉིད་ཀྱི་ཕྱིར་མི་དགེ་བ་བྱས་ནས་སྦེད་པའི་འཆབ་པ་ཡང་མེད་པའི་ཕྱིར་དང་། ཏིང་ངེ་འཛིན་དང་ཤིན་ཏུ་མི་མཐུན་པས་འགྱོད་གཉིད་གཉིས་ཀྱང་མེད་པའི་ཕྱིར། འོ་ན་རྨུགས་པ་དང་། རྒོད་པ་ལ་ཡང་ཐལ་བར་འགྱུར་རོ་ཞེ་ན་མ་ཡིན་ཏེ། མ་རིག་པ་དང་སྲེད་པ་ཤས་ཆེ་བའི་བསམ་གཏན་པ་ལ་ཡོད་པས་སོ། །བསམ་གཏན་ཁྱད་པར་ཅན་ན་བཅུ་གཉིས་པོ་དེའི་སྟེང་དུ་རྟོག་པ་ཡང་མེད་ལ། བསམ་གཏན་གཉིས་པ་ཡན་ཆད་ན་བཅུ་གསུམ་པོ་དེའི་སྟེང་དུ་དཔྱོད་པ་དང་། གཡོ་དང་། སྒྱུ་ཡང་མེད་པའི་ཕྱིར་ཏེ། འཁོར་གྱི་ཀུན་ཏུ་འཛིན་པ་དང་བྲལ་བའི་ཕྱིར་རོ། །བསམ་གཏན་དང་པོ་ན་གཡོ་སྒྱུ་གཉིས་ཅིའི་ཕྱིར་ཡོད་ཅེ་ན། འདོད་དང་བསམ་གཏན་དང་པོ་ན། །གཡོ་སྒྱུ་ཚངས་པས་འབྲིད་ཕྱིར་རོ། །ཞེས་གསུངས་སོ། །གལ་ཏེ་དེ་རྣམས་ན་རྟོགས་དཔྱོད་ཡོད་པར་འགྱུར་ཏེ། ངག་བརྗོད་པ་དང་། ཐོས་བྱུང་དང་། ཞི་རགས་སུ་སྒོམ་པ་ཡོད་པའི་ཕྱིར་སྙམ་ན། མཛོད་ལས། གཉིས་པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །ཞེས་གསུངས་སོ། །བསམ་གཏན་དང་པོའི་རྟོག་དཔྱོད་གཉིས་དྲངས་ཏེ་བྱེད་པར་འདོད་དོ། །དེའང་རྟོག་དཔྱོད་ཀྱི་སར་རྟོག་དཔྱོད་ལ་འདོད་ཆགས་དང་བྲལ་བས་དེ་དག་མེད་པའི་ས་ཞེས་བྱའི་ཀུན་ཏུ་འབྱུང་བ་མེད་པ་ནི་མ་ཡིན་ནོ་ཞེས་གསུངས་སོ། །སྤྱིའི་བདུན་པ་ནི། སུམ་ཅུ་པར། ཀུན་ཏུ་འགྲོ་དང་བྱེ་བྲག་ངེས། །སེམས་ལས་བྱུང་བ་དགེ་བ་དང་། །དེ་བཞིན་ཉོན་མོངས་ཉེ་ཉོན་མོངས། །ཞེས་དང་། པན་ཀན་དུ། འགྱོད་པ་ལ་སོགས་པ་བཞི་ནི་གཞན་དུ་ཡང་ངོ་ཞེས་གསུངས་པས། ཚོར་བ་སོགས་ལྔ་ནི་ཀུན་འགྲོ་སྟེ་ཁམས་གསུམ་དང་། གཟུགས་མེད་ཀྱི་སེམས་ཐམས་ཅད་ལ་ལྡན་པའི་ཕྱིར་ཏེ། སེམས་ཀུན་མྱོང་བ་དང་། མཚན་མར་འཛིན་པ་དང་། ཡུལ་ལ་གཡོ་བ་དང་། དམིགས་པ་ལ་འཇུག་པ་དང་། གསུམ་འདུས་པ་མེད་ན་མི་འབྱུང་བའི་ཕྱིར་དང་། གསུམ་འདུས་པ་ཡང་རེག་པ་ལ་མི་འཁྲུལ་པའི་ཕྱིར་རོ། །འདུན་སོགས་ལྔ་ནི་ཡུལ་སོ་སོར་ངེས་པ་སྟེ། རིམ་པ་ལྟར། བསམ་པ་དང་། ངེས་པ་དང་། འདྲིས་པ་དང་། བརྟག་བྱ་ཁོ་ན་ལས་འབྱུང་བས་སོ། །དད་པ་སོགས་བཅུ་གཅིག་ནི་དགེ་བ་སྟེ། མི་དགེ་བའི་གཉེན་པོ་བྱེད་ཅིང་འབྲས་བུ་འདོད་བྱ་བསྐྱེད་པས་སོ། །འདོད་ཆགས་སོགས་དྲུག་གམ་བཅུ་ནི་ཉོན་མོངས་པ་སྟེ། སེམས་རབ་ཏུ་མ་ཞི་བར་བྱེད་པས་སོ། །ཁྲོ་བ་སོགས་ཉི་ཤུ་ནི་ཉེ་བའི་ཉོན་མོངས་པ་སྟེ། ཉོན་མོངས་པའི་ཆར་གཏོགས་པ་དང་། སེམས་ཉོན་མོངས་པར་བྱེད་པ་དང་ཉེ་བའི་ཕྱིར་རོ། །གཉིད་སོགས་བཞི་ནི་གཞན་འགྱུར་ཏེ། དགེ་བ་ལ་སོགས་པ་གསུམ་དུ་འགྱུར་དུ་རུང་བའི་ཕྱིར་རོ། །སྤྱིའི་བརྒྱད་པ་ནི། སྔ་རབས་པ་ཁ་ཅིག སེམས་བྱུང་ཐམས་ཅད་ལྔ་བཅུ་རྩ་གཅིག་ཏུ་དངོས་པོ་ལ་གྲངས་ངེས་པར་འདོད་པ་ལ། དཔངས་ལོ་ཆེན་པོས། ཆོས་ཀྱི་རྒྱལ་པོའི་རྒྱལ་ཚབ་ལྟ་བུའི་འཕགས་པ་གཉིས་ཀྱིས། གཞི་བསྡུ་བ་དང་། དབུ་མ་རིན་ཆེན་ཕྲེང་བར། ལུང་ཕྲན་ཚེགས་ལས་བྱུང་བའི་ཉེས་རྩོམ་ཁོང་ཁྲོས་བསླད་པ་དང་། སྐྱོན་གཉིས་བརྗོད་པ་དང་། འཕྱ་སྐྱེན་པ། སྤུངས་མེད་པ། སེམས་རྙོག་པ། མི་འཆི་བའི་རྟོག་པ་སོགས་མང་པོ་གསུངས་པ་དང་། ཀླུ་སྒྲུབ་ཡབ་སྲས་ཀྱིས། སྔགས་ཀྱི་གཞུང་དུ། རང་བཞིན་བརྒྱད་ཅུའི་རྣམ་རྟོག་གསུངས་པ་རྣམས་འགའ་ཞིག་འདི་རྣམས་སུ་འདུ་ཡང་ལ་ལ་མི་འདུ་བར་སྣང་བ་དང་། བསྡུ་བར། ལོག་པར་འདུན་པ་དང་། ལོག་པར་མོས་པ་དང་། ལོག་པར་དྲན་པ་ཞེས་བྱ་བའི་སེམས་བྱུང་ཡང་གསུངས་པས་བརྗོད་འདོད་ཀྱིས་བྱས་ཀྱི་དངོས་པོ་ལ་གྲངས་ངེས་པ་ཉིད་མ་ཡིན་ནོ་ཞེས་བཞེད་པ་ཉིད་ལེགས་པ་ཡིན་ནོ། །སྡེ་ཚན་དྲུག་གི་གོ་རིམ་ལ། སྔ་རབས་པ་རྣམས་ཀུན་འགྲོ་ལྔ་ནི་སེམས་བྱུང་འོག་མ་ཐམས་ཅད་དང་མཚུངས་པར་ལྡན་པས་དང་པོར་བཤད། ཡུལ་ངེས་ལ་འདུན་པ་དང་ཤེས་རབ་ནི་འོག་མ་རྣམས་ཀྱི་གདགས་གཞི་ཡིན་པ་དང་། གཞན་གསུམ་ནི་དེ་གཉིས་དང་ཡུལ་ངེས་སུ་མཚུངས་པས་དེའི་རྗེས་ལ་བཤད། དགེ་བ་ནི་མཆོད་པར་འོས་པ་ཡིན་པས་ཉོན་མོངས་ཅན་གྱི་དང་པོར་བཤད། རྩ་ཉོན་ནི་ཉེ་ཉོན་རྣམས་ཀྱི་གདགས་གཞི་ཡིན་པ་དང་། ཉེ་ཉོན་ནི་དེའི་གདགས་ཆོས་ཡིན་པས་དེའི་འོག་ཏུ་རིམ་བཞིན་བཤད། གཞན་འགྱུར་བཞི་ནི་དགེ་སོགས་གསུམ་ཆར་དུ་རུང་བས་དེའི་འོག་ཏུ་བཤད། ཅེས་གསུངས་པ་ལ་དཔངས་ལོས་འདིའང་བརྗོད་འདོད་ཀྱིས་བྱས་ཀྱི་གོ་རིམ་དེ་ལྟར་ངེས་པ་མེད་དོ། །ཞེས་བཞེད་ཀྱང་གོ་རིམ་གྱི་འབྱུང་ཚུལ་ལ་བལྟས་ན་སྔ་མ་ཉིད་ཤིན་ཏུ་འཐད་པར་སྣང་ངོ་། །སྤྱིའི་དགུ་པ་ནི། སེམས་ལ་རག་ལས་ཤིང་སེམས་ལ་བརྟེན་ཏེ་འབྱུང་བས་ན་སེམས་བྱུང་ངོ་། །གལ་ཏེ་དེ་གཉིས་མཚུངས་ལྡན་གྱི་རྒྱུ་འབྲས་ཡིན་པས་སེམས་ཀྱང་སེམས་བྱུང་ལས་བྱུང་བས་ན་སྒྲ་དོན་མི་འཐད་དོ་ཞེ་ན། དེའི་ལན་དུ་ཁ་ཅིག སེམས་ལ་རྒྱུན་ཡོད་པས་རང་གི་རིགས་འདྲ་སྔ་མ་ལས་བྱུང་བས་ན་སེམས་བྱུང་ལ་རག་མ་ལས་ཤིང་། སེམས་བྱུང་ལ་རྒྱུན་མེད་པས་རང་གི་རིགས་འདྲ་སྔ་མ་ལས་མ་བྱུང་བས་སེམས་ལ་རག་ལས་སོ་ཞེས་གསུངས་པ་མི་འཐད་དེ། སེམས་བྱུང་ལ་རྒྱུན་མེད་པ་ནི་སེམས་སེམས་བྱུང་རྫས་གཞན་པ་དག་གི་ལུགས་ཡིན་གྱི་རྫས་གཅིག་པའི་ལུགས་ལ་རྒྱུན་ཡོད་པར་མཚུངས་པའི་ཕྱིར། དད་པ་དང་ཤེས་རབ་སོགས་ལ་རིགས་འདྲ་སྔ་མ་ལས་ཕྱི་མ་འབྱུང་བའི་རྒྱུན་མེད་ན་རིགས་རྒྱུན་སྔ་མ་གོམས་པ་ལས་ཕྱི་མ་ཇེ་ཆེར་འགྱུར་བ་མེད་པ་ཧ་ཅང་ཐལ་བས་སོ། །དེས་ན་སྔ་མའི་ལན་ནི་ངེས་ཚིག་ཙམ་ནི་གཉིས་ཀ་ལ་ཡང་བཤད་དུ་ཡོད་དེ། གླང་ཆེན་ལ་ལག་ལྡན་གྱི་སྒྲ་བཤད་པའི་ཚེ་ལག་པ་དང་ལྡན་པའི་ཆ་ནས་བཤད་དགོས་ཤིང་། དེ་ཉིད་ལག་པ་དང་ལྡན་པ་ཐམས་ཅད་ལ་བཤད་དུ་ཡོད་པའི་ཕྱིར། འོན་ཀྱང་འཇུག་ཏུ་མེད་པ་ནི་བཤད་འཇུག་མུ་གསུམ་པའི་རྣམ་གཞག་ཤེས་དགོས་སོ། །ཡང་ན་ཆུ་བོའི་རླབས་ལྟར་སེམས་ཀྱི་རྣམ་འགྱུར་ཡིན་པས་ན་སེམས་བྱུང་ངོ་། །སྤྱིའི་བཅུ་པ་ནི། ཀུན་འགྲོ་ལྔ་ལ། ཚོར་བ་དང་འདུ་ཤེས་ཀྱི་ངོ་བོ་ནི་སྔར་བཤད་ཟིན་ལ། སེམས་པའི་ངོ་བོ་ནི་སེམས་ཡུལ་ལ་གཡོ་བར་བྱེད་པའི་སེམས་བྱུང་། ཡིད་ལ་བྱེད་པ་ནི་སེམས་དམིགས་པ་ལ་འཇུག་པར་བྱེད་པའི་སེམས་བྱུང་སྟེ། འདི་དང་སེམས་པའི་ཁྱད་པར་ནི་རྒྱལ་པོ་གདན་ལས་བཞེངས་པར་བྱེད་པ་དང་། སྐྱེད་མོས་ཚལ་དུ་འཁྲིད་པར་བྱེད་པ་ལྟ་བུར་བཞེད་དོ། །རེག་པ་ནི་གསུམ་འདུས་ནས་ཡུལ་གྱི་འགྱུར་བ་ཡོངས་སུ་གཅོད་པར་བྱེད་པའི་སེམས་བྱུང་ངོ་། །ཡུལ་ངེས་ལྔ་ནི། འདུན་པ་ནི་འདོད་པའི་དངོས་པོ་ལ་དེ་དང་ལྡན་པར་བྱེད་འདོད་པའི་སེམས་བྱུང་ངོ་། །མོས་པ་ནི་ངེས་པའི་དངོས་པོ་ལ་ཇི་ལྟར་ངེས་པ་བཞིན་དུ་འཛིན་པའི་སེམས་བྱུང་། དྲན་པ་ནི་འདྲིས་པའི་དངོས་པོ་ལ་སེམས་ཀྱིས་བརྗེད་པ་མེད་པའི་སེམས་བྱུང་། ཏིང་ངེ་འཛིན་ནི་བརྟག་པའི་དངོས་པོ་ལ་རྩེ་གཅིག་པའི་སེམས་བྱུང་། ཤེས་རབ་ནི་བརྟགས་པ་རྣམས་ཀྱི་ཆོས་རྣམས་ལ་རབ་ཏུ་རྣམ་པར་འབྱེད་པའི་སེམས་བྱུང་། དགེ་བ་བཅུ་གཅིག་ལ། དད་པ་ནི་ཡུལ་ཁྱད་པར་ཅན་ལ་མངོན་པར་ཡིད་ཆེས་པའམ་དང་བའམ་འདོད་པའི་སེམས་བྱུང་། ངོ་ཚ་ཡོད་པ་ནི་བདག་ཉིད་ལས་ཁ་ན་མ་ཐོ་བ་ལ་འཛེམ་པའི་སེམས་བྱུང་། ཁྲེལ་ཡོད་པ་ནི་གཞན་ལས་ཁ་ན་མ་ཐོ་བ་ལ་འཛེམ་པའི་སེམས་བྱུང་། མ་ཆགས་པ་ནི་སྲིད་པ་དང་སྲིད་པའི་ཡོ་བྱད་རྣམས་ལ་ཆགས་པ་མེད་པའི་སེམས་བྱུང་། ཞེ་སྡང་མེད་པ་ནི་ཀུན་ནས་མནར་སེམས་ཀྱིས་གཞིའི་ཆོས་རྣམས་ལ་ཀུན་ནས་མནར་སེམས་པ་མེད་པའི་སེམས་བྱུང་། གཏི་མུག་མེད་པ་ནི་སྐྱེས་ཐོབ་དང་སྦྱོར་བྱུང་གི་སྒོ་ནས་གནས་ལུགས་ཤེས་ཤིང་སོ་སོར་རྟོགས་པའི་སེམས་བྱུང་། བརྩོན་འགྲུས་ནི་དགེ་བ་ལ་སེམས་མངོན་པར་སྤྲོ་བའི་སེམས་བྱུང་། ཤིན་ཏུ་སྦྱངས་པ་ནི་ལུས་དང་སེམས་ཀྱི་གནས་ངན་ལེན་རྒྱུན་གཅོད་པ་ལ་ལུས་སེམས་ལས་སུ་རུང་བའི་སེམས་བྱུང་། བག་ཡོད་པ་ནི་དུག་གསུམ་མེད་པ་བརྩོན་འགྲུས་དང་བཅས་པ་ལ་གནས་ནས་དགེ་བའི་ཆོས་རྣམས་སྒོམ་པ་དང་། ཟག་པ་དང་བཅས་པའི་ཆོས་རྣམས་ལས་སེམས་བསྲུང་བའི་སེམས་བྱུང་། བཏང་སྙོམས་ནི་དུག་གསུམ་མེད་པ་བརྩོན་འགྲུས་དང་བཅས་པ་ལ་གནས་ནས་སེམས་རྣལ་དུ་འདུག་པའི་སེམས་བྱུང་། རྣམ་པར་མི་འཚེ་བ་ནི་ཞེ་སྡང་མེད་པའི་ཆར་གཏོགས་པ་སྙིང་རྗེ་བའི་སེམས་བྱུང་། རྩ་ཉོན་དྲུག་ལ། འདོད་ཆགས་ནི་ཁམས་གསུམ་པའི་རྗེས་སུ་ཆགས་པའོ། །ཁོང་ཁྲོ་བ་ནི་ཀུན་ནས་མནར་སེམས་ཀྱི་གཞིའི་ཆོས་རྣམས་ལ་ཀུན་ནས་མནར་སེམས་པའི་སེམས་བྱུང་། ང་རྒྱལ་ནི་འཇིག་ལྟ་ལ་བརྟེན་ནས་སེམས་ཁེངས་པའི་སེམས་བྱུང་། མ་རིག་པ་ནི་ཁམས་གསུམ་པའི་མི་ཤེས་པའི་སེམས་བྱུང་། ཐེ་ཚོམ་ནི་བདེན་པ་རྣམས་ལ་ཡིད་གཉིས་ཟ་བའི་སེམས་བྱུང་། འདི་གཉིས་ལ་ཉོན་མོངས་ཅན་ཡིན་མིན་གཉིས་སུ་ཡོད་པ་ལས། འདིར་ནི་ཉོན་མོངས་ཅན་གྱི་དབང་དུ་བྱས་ལ་མ་རིག་པ་ལ་ཉོན་མོངས་ཅན་མ་ཡིན་པ་ཡོད་པ་ནི་གྲུབ་མཐའ་སྨྲ་བ་བཞི་ཆར་མཐུན་ཅིང་། ཐེ་ཚོམ་ལ་ཉོན་མོངས་ཅན་མ་ཡིན་པ་ནི་ཉན་ཐོས་དགྲ་བཅོམ་པའི་རྒྱུད་ལ་ཡང་ལྐོག་གྱུར་གྱི་གཞལ་བྱ་ལ་ཐེ་ཚོམ་ཡོད་པ་དང་། སོ་སྐྱེའི་རྒྱུད་ལ་ཡང་ལ་རྒྱབ་ན་མེ་ཡོད་མེད་ཐེ་ཚོམ་ཟ་བ་སོགས་དཔག་ཏུ་མེད་པ་རྣམས་སོ། །དེས་ན་ཐེ་ཚོམ་ལ་སྤྱིར་ཉོན་མོངས་པ་དང་། བྱེ་བྲག་མཐོང་སྤང་གིས་ཁྱབ་པར་འདོད་པ་ནི་ལུང་རིག་གང་ལ་ཡང་མ་དཔྱད་པར་ཟད་དོ། །ལྟ་བ་ནི་ཤེས་རབ་ཀྱི་ཆར་གཏོགས་པ་ཡུལ་གྱི་གནས་ཚུལ་དང་མི་མཐུན་པར་རབ་ཏུ་རྣམ་པར་འབྱེད་པའི་སེམས་བྱུང་ངོ་། །དབྱེ་ན་ལྔ་ལས། འཇིག་ཚོགས་ལ་ལྟ་བ་ནི་ཉེར་ལེན་གྱི་ཕུང་པོ་ལ་བདག་དང་བདག་གིར་ཡང་དག་པར་རྗེས་སུ་ལྟ་བའི་སེམས་བྱུང་། མཐར་འཛིན་གྱི་ལྟ་བ་ནི། ཉེར་ལེན་གྱི་ཕུང་པོ་ལ་རྟག་པའམ་ཆད་པར་ཡང་དག་པར་རྗེས་སུ་ལྟ་བའི་སེམས་བྱུང་། ལྟ་བ་མཆོག་ཏུ་འཛིན་པ་ནི། ལྟ་བ་དང་ལྟ་བའི་གནས་ལ་མཆོག་ཏུ་ཡང་དག་པར་རྗེས་སུ་ལྟ་བའི་སེམས་བྱུང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་ཚུལ་ཁྲིམས་དང་བརྟུལ་ཞུགས་དང་། དེའི་གནས་ལ་འདག་གྲོལ་དུ་ཡང་དག་པར་རྗེས་སུ་ལྟ་བའི་སེམས་བྱུང་། ལོག་པར་ལྟ་བ་ནི་ཕལ་ཆེར་ལས་རྒྱུ་འབྲས་ལ་བསྐུར་བ་འདེབས་པའི་སེམས་བྱུང་ངོ་། །ཉེ་ཉོན་ལ་བཅུ་ཚན་གཉིས་ལས། བཅུ་ཚན་དང་པོ་ལ། ཁྲོ་བ་ནི་ཁོང་ཁྲོ་བའི་ཆར་གཏོགས་པའི་སེམས་ཀྱིས་ཀུན་ནས་མནར་སེམས་པའི་སེམས་བྱུང་། འཁོན་དུ་འཛིན་པ་ནི་ཁྲོ་བའི་འོག་ཏུ་ཤར་གཉེར་བའི་བསམ་པ་མི་བཏང་བའི་སེམས་བྱུང་། འཆབ་པ་ནི་གཏི་མུག་གི་ཆར་གཏོགས་པ་ཁ་ན་མ་ཐོ་བ་མཁྱུད་པའི་སེམས་བྱུང་། འཚིག་པ་ནི་ཁོང་ཁྲོ་བའི་ཆར་གཏོགས་པ་ཁྲོ་བ་དང་འཁོན་དུ་འཛིན་པ་སྔོན་དུ་འགྲོ་བའི་སེམས་ཀྱིས་ཀུན་ནས་མནར་སེམས་པའི་སེམས་བྱུང་། ཕྲག་དོག་ནི་ཞེ་སྡང་གི་ཆར་གཏོགས་པ་གཞན་གྱི་ཕུན་སུམ་ཚོགས་པའི་ཁྱད་པར་ལ་མི་བཟོད་པའི་སེམས་བྱུང་། སེར་སྣ་ནི་འདོད་ཆགས་ཀྱི་ཆར་གཏོགས་པ་ཡོ་བྱད་རྣམས་ལ་སེམས་ཀྱིས་ཀུན་ཏུ་འཛིན་པའི་སེམས་བྱུང་ངོ་། །སྒྱུ་ནི་འདོད་ཆགས་དང་གཏི་མུག་གང་རུང་གི་ཆར་གཏོགས་པ་ཡོན་ཏན་མ་ཡིན་པ་ཀུན་ཏུ་སྟོན་པའི་སེམས་བྱུང་། གཡོ་ནི་འདོད་ཆགས་དང་གཏི་མུག་གང་རུང་གི་ཆར་གཏོགས་པ་ཉེས་པ་ཡང་དག་པར་སྐྱོང་བའི་སེམས་བྱུང་། རྒྱགས་པ་ནི་འདོད་ཆགས་ཀྱི་ཆར་གཏོགས་པ་ཟག་པ་དང་བཅས་པའི་ཕུན་སུམ་ཚོགས་པ་མཐོང་ནས་ཡིད་བདེ་བའི་སེམས་བྱུང་། རྣམ་པར་འཚེ་བ་ནི་ཁོང་ཁྲོ་བའི་ཆར་གཏོགས་པ་སྙིང་བརྩེ་བ་མེད་པའི་སེམས་བྱུང་ངོ་། །བཅུ་ཚན་གཉིས་པ་ལ། ངོ་ཚ་མེད་པ་ནི་དུག་གསུམ་གང་རུང་གི་ཆར་གཏོགས་པ་ཁ་ན་མ་ཐོ་བ་ལ་བདག་ཉིད་ལས་མི་འཛེམ་པའི་སེམས་བྱུང་ངོ་། །ཁྲེལ་མེད་པ་ནི་དུག་གསུམ་གང་རུང་གི་ཆར་གཏོགས་པ་ཁ་ན་མ་ཐོ་བ་ལ་གཞན་ལས་མི་འཛེམ་པའི་སེམས་བྱུང་ངོ་། །རྨུགས་པ་ནི་གཏི་མུག་གི་ཆར་གཏོགས་པ་སེམས་ལས་སུ་མི་རུང་བའི་སེམས་བྱུང་ངོ་། །རྒོད་པ་ནི་འདོད་ཆགས་ཀྱི་ཆར་གཏོགས་པ་སྡུག་པའི་མཚན་མའི་རྗེས་སུ་རྒྱུག་པའི་སེམས་རྣམ་པར་མ་ཞི་བའི་སེམས་བྱུང་ངོ་། །མ་དད་པ་ནི་གཏི་མུག་གི་ཆར་གཏོགས་པ་དགེ་བའི་ཆོས་རྣམས་ལ་ཡིད་མི་ཆེས་པའམ་མ་དང་བའམ་མི་འདོད་པའི་སེམས་བྱུང་ངོ་། །ལེ་ལོ་ནི་གཏི་མུག་གི་ཆར་གཏོགས་པ་དགེ་བའི་ཆོས་རྣམས་ལ་སེམས་མི་སྤྲོ་བའི་སེམས་བྱུང་ངོ་། །བག་མེད་པ་ནི་དུག་གསུམ་གང་རུང་ལེ་ལོ་དང་བཅས་པ་ལ་གནས་ནས་དགེ་ཆོས་རྣམས་མི་སྒོམ་ཞིང་ཟག་པ་དང་བཅས་པའི་ཆོས་རྣམས་ལས་སེམས་མི་བསྲུང་བའི་སེམས་བྱུང་ངོ་། །བརྗེད་ངས་པ་ནི་ཉོན་མོངས་པ་དང་མཚུངས་པར་ལྡན་པའི་དྲན་པའོ། །ཤེས་བཞིན་མ་ཡིན་པ་ནི་ཉོན་མོངས་པ་དང་མཚུངས་པར་ལྡན་པའི་ཤེས་རབ་བོ། །རྣམ་པར་གཡེང་བ་ནི་དུག་གསུམ་གང་རུང་གི་ཆར་གཏོགས་པ་སེམས་རྣམ་པར་འཕྲོ་བའི་སེམས་བྱུང་ངོ་། །གཞན་འགྱུར་བཞི་ལས་གཉིད་ནི་གཏི་མུག་གི་ཆར་གཏོགས་པ་ལ་གཉིད་ཀྱི་རྒྱུ་ལ་བརྟེན་ནས་སེམས་སྡུད་པའི་སེམས་བྱུང་ངོ་། །འགྱོད་པ་ནི་གཏི་མུག་གི་ཆར་གཏོགས་པ་དགེ་མི་དགེ་ལུང་མ་བསྟན་གང་རུང་བྱས་པ་ལ་སེམས་ཀྱིས་ཡིད་གཅགས་པའི་སེམས་བྱུང་ངོ་། །རྟོག་པ་ནི་སེམས་པའམ་ཤེས་རབ་ལ་བརྟེན་ནས་རྩིང་པོར་ཀུན་ཏུ་ཚོལ་བའི་སེམས་བྱུང་ངོ་། །དཔྱོད་པ་ནི་སེམས་པའམ་ཤེས་རབ་ལ་བརྟེན་ནས་ཞིབ་མོར་སོ་སོར་རྟོག་པའི་སེམས་བྱུང་ངོ་། །དེས་ན་གཞུང་ལུགས་འདིར་ཆུ་ལ་ཆུ་རླབས་ལྟར་སེམས་ཉིད་ཀྱིས་འཛིན་སྟངས་མི་འདྲ་བའི་ཁྱད་པར་རྣམས་ལ་སེམས་བྱུང་སོ་སོར་འཇོག་པར་སྣང་བས་སེམས་ལས་རྫས་གཞན་དུ་མེད་པའི་སྒྲུབ་བྱེད་ཀྱི་གཙོ་བོ་ཡིན་ནོ། །གཉིས་པ་མཛོད་ལས་གསུངས་ཚུལ་ནི། སྡོམ་ལ། སྡེ་ཚན་སྒོ་ནས་དབྱེ་བ་དང་། །ཁམས་དང་ས་ལ་བརྟེན་པ་ཡི། །གང་གི་འཁོར་དུ་སུ་འབྱུང་དང་། །མཚུངས་པ་འདྲ་བའི་ཐ་དད་དང་། །ཐ་དད་འདྲ་བའི་མཚུངས་པ་སྟེ། །རྣམ་པ་བཞི་ཡིས་དོན་འདི་བསྡུས། །ཞེས་པ་སྟེ། དང་པོ་སྡེ་ཚན་གྱི་སྒོ་ནས་དབྱེ་བ་ལ། ངེས་པའི་སྡེ་ཚན་ལྔ། མ་ངེས་པའི་སྡེ་ཚན་གཅིག་དང་དྲུག་ལས། དང་པོ་ངེས་པའི་སྡེ་ཚན་ལ་ཀུན་བཏུས་ལས་གསུངས་པའི་ཐ་སྙད་ཀྱི་སྟེང་ནས་རྩིས་ན་རྟོགས་སླ་བས་ཀུན་འགྲོ་ལྔ་དང་། ཡུལ་ངེས་ལྔ་སྟེ་བཅུ་ནི་གཙོ་བོར་སེམས་ཐམས་ཅད་ཀྱི་འཁོར་དུ་འབྱུང་བས་སེམས་ཀྱི་ས་མང་པོ་བ་ཞེས་བྱ་སྟེ། མཛོད་ལས། ཚོར་དང་སེམས་པ་འདུ་ཤེས་དང་། །འདུན་དང་རེག་དང་བློ་གྲོས་དྲན། །ཡིད་ལ་བྱེད་དང་མོས་པ་དང་། །ཏིང་ངེ་འཛིན་སེམས་ཐམས་ཅད་ལ། །ཞེས་གསུངས་སོ། །དགེ་བ་བཅུ་གཅིག་ལས་གཏི་མུག་མེད་པ་མ་གཏོགས་པ་གཞན་བཅུ་ནི་དགེ་བའི་སེམས་ཐམས་ཅད་ལ་འབྱུང་བས་དགེ་བའི་ས་མང་པོ་པ་ཞེས་བྱ་སྟེ། དད་དང་བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །རྩ་བ་གཉིས་རྣམ་མི་འཚེ་དང་། །བརྩོན་འགྲུས་རྟག་ཏུ་དགེ་ལ་འབྱུང་། །ཞེས་སོ། །རྩ་ཉོན་གྱི་ནང་ནས་མ་རིག་པ་དང་། ཉེ་ཉོན་བཅུ་ཚན་འོག་མའི་ནང་ནས་རྨུགས་པ་སོགས་ལྔ་སྟེ་དྲུག་ནི་ཉོན་མོངས་ཅན་གྱི་སེམས་ཐམས་ཅད་ལ་འབྱུང་བས་ཉོན་མོངས་པའི་ས་མང་པོ་བ་ཞེས་བྱ་སྟེ། རྨོངས་དང་བག་མེད་ལེ་ལོ་དང་། །མ་དད་པ་དང་རྨུགས་དང་རྒོད། །ཉོན་མོངས་ཅན་ལ་རྟག་ཏུ་འབྱུང་། །ཞེས་སོ། །བཅུ་ཚན་འོག་མའི་དང་པོ་གཉིས་ནི་མི་དགེ་བའི་སེམས་ཐམས་ཅད་ལ་འབྱུང་བས་མི་དགེ་བའི་ས་མང་པོ་པ་ཞེས་བྱ་སྟེ། མི་དགེ་ལ་ནི་ཁྲེལ་མེད་དང་། །ངོ་ཚ་མེད་པའོ། །ཞེས་སོ། །ཉེ་ཉོན་བཅུ་ཚན་དང་པོ་ནི། མ་རིག་པ་ཙམ་དང་མཚུངས་པར་ལྡན་པ་དང་། སྒོམ་པས་སྤང་བར་བྱ་བ་ཁོ་ན་ཡིན་པ་དང་། ཡིད་ཀྱི་ས་པ་ཁོ་ཡིན་པས་ཉོན་མོངས་ཆུང་ངུའི་ས་མང་པོ་བ་ཞེས་བྱ་སྟེ། ཁྲོ་བ་དང་། །འཁོན་དུ་འཛིན་དང་གཡོ་དང་ནི། །ཕྲག་དོག་འཚིག་འཆབ་སེར་སྣ་དང་། །སྒྱུ་དང་རྒྱགས་དང་རྣམ་འཚེ་ནི། །ཉོན་མོངས་ཆུང་ངུའི་ས་པ་རྣམས། །ཞེས་སོ། །འོ་ན་ཀུན་བཏུས་སུ། ཁོང་ཁྲོ་སོགས་ཀྱི་ཆར་གཏོགས་སུ་བཤད་པ་དང་འགལ་ཏེ་མ་རིག་པ་ཙམ་དང་མཚུངས་པར་ལྡན་ན་ཁོང་ཁྲོ་སོགས་དང་མཚུངས་པར་མི་ལྡན་དགོས་པའི་ཕྱིར་སྙམ་ན། ལུགས་འདི་ལ་སྡེ་ཚན་དྲུག་གི་ཁོངས་སུ་གཏོགས་པ་རྣམས་རྫས་སོ་སོ་བ་ཁོ་ན་ཡིན་པས་གཞན་གྱི་ཆར་གཏོགས་སུ་མི་བཞེད་དེ། ཆར་གཏོགས་ཡིན་ན་ཆ་ཅན་དེ་ལས་རྫས་གཞན་དུ་མེད་པས་འདིར་མི་བགྲང་བའི་ཕྱིར་ཏེ། དཔེར་ན་གཏི་མུག་མེད་པ་ཤེས་རབ་ཀྱི་ཆར་གཏོགས་ཡིན་པས་ལོགས་སུ་མི་བགྲང་བ་བཞིན་ཏེ། གཞུང་ལུགས་སོ་སོའི་དགོངས་པ་མ་འདྲེས་པར་འཆད་ཤེས་དགོས་སོ། །གཉིས་པ་མ་ངེས་པའི་སྡེ་ཚན་ནི། མ་རིག་པ་དང་། ལྟ་བ་མ་གཏོགས་པའི་རྩ་ཉོན་གཞན་བཞི་དང་གཞན་འགྱུར་བཞི་སྟེ་བརྒྱད་དོ། །དེ་ལྟར་ན་སེམས་བྱུང་རྫས་ཡོད་བཞི་བཅུ་ཞེ་དྲུག་ཡིན་ལ། གཏི་མུག་མེད་པ་དང་། རྩ་ཉོན་གྱི་ནང་ནས་ལྟ་བ་དང་། ཉེ་ཉོན་བཅུ་ཚན་འོག་མའི་ནང་ནས་ཤེས་བཞིན་མ་ཡིན་པ་སྟེ་གསུམ་ནི་ཤེས་རབ་ཉོན་མོངས་ཅན་ཡིན་པས་ཤེས་རབ་ཀྱི་རྫས་སུ་འདུ། བརྗེད་ངས་པ་ནི་དྲན་པ་ཉོན་མོངས་ཅན་ཡིན་པས་དྲན་པའི་རྫས་སུ་འདུ། རྣམ་གཡེང་ནི་ཏིང་ངེ་འཛིན་ཉོན་མོངས་ཅན་ཡིན་པས་ཏིང་ངེ་འཛིན་གྱི་རྫས་སུ་འདུ་བས་གཙོ་སེམས་གང་གི་འཁོར་དུ་དེ་དག་སྐྱེས་པའི་ཚེ་སེམས་ཀྱི་ས་མང་པོ་བའི་ཁོངས་སུ་གཏོགས་ཞེས་པ་ནི་གནད་ཀྱི་དོན་ནོ། །འདིར་ཡང་གོ་རིམ་ནི་ཐམས་ཅད་ལ་ཁྱབ་པས་སེམས་ཀྱི་ས་མང་པོ་བ་དང་པོར་བསྟན། དེ་ནས་མཆོད་པར་འོས་པ་ཡིན་པས་དགེ་བའི་ས་མང་པོ་བ་བསྟན། དེ་ནས་ཉོན་མོངས་ཅན་ཐམས་ཅད་ལ་ཁྱབ་པས་ཉོན་མོངས་པའི་ས་མང་པོ་བ་བསྟན། དེ་ནས་ཉོན་མོངས་ཅན་གྱི་གཙོ་བོ་ཡིན་པས་མི་དགེ་བའི་ས་མང་པོ་བ་བསྟན། དེ་ནས་ཉོན་མོངས་ཅན་ཆུང་ངུ་ཡིན་པས་ཉོན་མོངས་ཆུང་ངུའི་ས་པ་བསྟན། དེ་ལྟར་ངེས་པའི་སྡེ་ཚན་བསྟན་ཟིན་ནས། མ་ངེས་པའི་སྡེ་ཚན་འོག་ཏུ་སྟོན་པས་ན་གོ་རིམ་ལེགས་པར་གྲུབ་ཅིང་སྔར་གྱི་ཀུན་ལས་བཏུས་ཀྱི་གོ་རིམ་ལ་ཡང་ཤིན་ཏུ་ཕན་ནོ། །གཉིས་པ་ཁམས་དང་ས་ལ་བརྟེན་པའི་གང་གི་འཁོར་དུ་གང་འབྱུང་བ་ལ་གཉིས་ཏེ། འདོད་པའི་དབང་དུ་བྱས་པ་དང་། ཁམས་གོང་མའི་དབང་དུ་བྱས་པའོ། །དང་པོ་ལ། དགེ་མི་དགེ་ལུང་མ་བསྟན་གྱི་སེམས་གསུམ་ལས། དགེ་སེམས་ཀྱི་འཁོར་དུ་བཅུ་ཚན་དང་པོ་གཉིས། རྟོག་དཔྱོད་གཉིས་ཏེ་ཉི་ཤུ་རྩ་གཉིས་ངེས་པར་འབྱུང་བ་ལ། གནས་སྐབས་ལ་ལར་མི་དགེ་བ་བྱས་པ་ལ་འགྱོད་པ་དང་། དགེ་བ་མ་བྱས་པ་ལ་འགྱོད་པའི་ཚེ་འགྱོད་པ་བསྣན་པས་ཉི་ཤུ་རྩ་གསུམ་འབྱུང་སྟེ། འདོད་པའི་དགེ་བའི་སེམས་ལ་ནི། །རྟོག་དང་དཔྱོད་དང་བཅས་པའི་ཕྱིར། །སེམས་ལས་བྱུང་བ་ཉི་ཤུ་གཉིས། །ལ་ལ་དག་ཏུ་འགྱོད་པ་བསྣན། །ཞེས་སོ། །མི་དགེ་བའི་སེམས་ཉོན་མོངས་གཞན་དང་མ་འདྲེས་པ་མ་རིག་པ་ཙམ་དང་མཚུངས་པར་ལྡན་པ་ལ་བཅུ་ཚན་དང་པོ། ཉོན་མོངས་པའི་ས་མང་དྲུག མི་དགེ་བའི་ས་མང་གཉིས། རྟོགས་དཔྱོད་གཉིས་ཏེ་ཉི་ཤུ་འབྱུང་ལ། ལྟ་བ་ཕྱི་མ་གསུམ་པོ་གང་རུང་དང་ལྡན་པ་ལ་ཉི་ཤུ་པོ་དེ་ཉིད་འབྱུང་ངོ་། །ལྟ་བ་ལྷག་པས་ཉི་ཤུ་རྩ་གཅིག་ཏུ་འགྱུར་རོ་སྙམ་ན་མ་ཡིན་ཏེ། སེམས་ཀྱི་ས་མང་པོ་པའི་ཤེས་རབ་ཀྱི་རྫས་སུ་འདུ་བའི་ཕྱིར་རོ། །ཡང་མི་དགེ་བའི་སེམས་འདོད་ཆགས་དང་། ཁོང་ཁྲོ། ང་རྒྱལ། ཐེ་ཚོམ་བཞི་གང་རུང་དང་ལྡན་པ་དང་། ཁྲོ་བ་སོགས་ཉེ་ཉོན་བཅུ་ཚན་དང་པོ་གང་རུང་དང་ལྡན་པ་དང་། མི་དགེ་བ་མ་བྱས་པ་དང་། དགེ་བ་བྱས་པ་ལ་འགྱོད་པའི་འགྱོད་པ་དང་ལྡན་པའི་ཚེ་སྔར་གྱི་ཉི་ཤུ་དང་། རང་རང་བསྣན་པས་ཉི་ཤུ་རྩ་གཅིག་དང་ལྡན་ཏེ། མི་དགེ་བ་ནི་མ་འདྲེས་དང་། །ལྟ་དང་ལྡན་ལ་ཉི་ཤུ་འབྱུང་། །ཉོན་མོངས་བཞི་དང་ཁྲོ་སོགས་དང་། །འགྱོད་པ་དང་ནི་ཉི་ཤུ་གཅིག །ཅེས་སོ། །འདོད་པའི་བསྒྲིབས་ལུང་མ་བསྟན་གྱི་སེམས་ནི་འཇིག་མཐར་གཉིས་དང་མཚུངས་པར་ལྡན་པའི་སེམས་ཡིན་ལ། དེ་ལ་ནི་སེམས་ཀྱི་ས་མང་བཅུ། ཉོན་མོངས་པའི་ས་མང་དྲུག རྟོག་དཔྱོད་གཉིས་ཏེ་བཅོ་བརྒྱད་འབྱུང་ཞིང་། ལྟ་བ་ལྷག་པར་མི་འགྱུར་བའི་ཚུལ་ནི་སྔར་བཞིན་ནོ། །མ་བསྒྲིབས་ལུང་མ་བསྟན་གྱི་སེམས་ལ་སེམས་ཀྱི་ས་མང་བཅུ། རྟོག་དཔྱོད་གཉིས་དང་བཅུ་གཉིས་འབྱུང་སྟེ། བསྒྲིབས་ལ་བཅོ་བརྒྱད་ལུང་མ་བསྟན། །གཞན་ལ་བཅུ་གཉིས་དག་ཏུ་འདོད། །ཅེས་སོ། །གཉིད་ནི་དགེ་སོགས་གསུམ་ཆར་ལ་མི་འགལ་བས་གང་ལ་ཡོད་པའི་ཚེ་དེ་ཉིད་ལྷག་པོར་ལྡན་ཏེ། གཉིད་ནི་ཀུན་ལ་མི་འགལ་ཕྱིར། །གང་ལ་ཡོད་པ་དེ་བསྣན་ནོ། །ཞེས་སོ། །གཉིས་པ་ཁམས་གོང་མའི་དབང་དུ་བྱས་པ་ནི། བསམ་གཏན་དང་པོ་ན་ཇི་སྐད་བཤད་པ་དེ་དག་ལས་འགྱོད་གཉིད་གཉིས་དང་། ཁྲོ་སོགས་བཅུ་ལ་གཡོ་སྒྱུ་རྒྱགས་གསུམ་མ་གཏོགས་གཞན་བདུན་དང་། ཁོང་ཁྲོ་དང་། མི་དགེ་བའི་རྩ་བ་གཉིས་པོ་རྣམས་མེད་ཅིང་གཞན་སྔ་མ་དང་འདྲ་ལ། བསམ་གཏན་ཁྱད་པར་ཅན་དེའི་སྟེང་དུ་རྟོག་པ་ཡང་མེད། གཉིས་པ་ན་དཔྱོད་པ་དང་གཡོ་སྒྱུ་གཉིས་ཀྱང་མེད་ཅིང་གཞན་རྣམས་ནི་སྔ་མ་དང་འདྲ་སྟེ། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །རྟོག་པའང་བསམ་གཏན་ཁྱད་པར་ཅན། །དེ་ཡི་གོང་ན་དཔྱོད་པ་ཡང་། །ཞེས་སོ། །གསུམ་པ་མཚུངས་པ་འདྲ་བའི་ཐ་དད་ནི། ངོ་ཚ་མེད་པ་དང་ཁྲེལ་མེད་པའི་ཁྱད་པར་སྔ་མ་ནི་ཡོན་ཏན་དང་ཡོན་ཏན་ཅན་ལ་མ་གུས་པ་ཡིན་ལ། ཕྱི་མ་ནི་ཁ་ན་མ་ཐོ་བ་ལ་འཇིགས་པར་མི་ལྟ་བ་སྟེ། ཀུན་བཏུས་སུ་གསུངས་པའི་གཉིས་ཀ་ཡང་འདིའི་ཕྱི་མའི་ཁོངས་སུ་འདུའོ། །དགའ་བ་དང་གུས་པའི་ཁྱད་པར་ནི་སྔ་མ་ནི་དད་པ་དང་ཕྱི་མ་ནི་ངོ་ཚ་ཤེས་པ་ཉིད་དོ། །འགྲེལ་པར་དགའ་བ་དང་དད་པ་ལ་མུ་བཞི་བཤད་དོ། །རྟོག་དང་དཔྱོད་པའི་ཁྱད་པར་ནི་སེམས་རྩིང་བ་དང་། སེམས་ཞིབ་པའོ། །ང་རྒྱལ་དང་རྒྱགས་པའི་ཁྱད་པར་ནི་ཕ་རོལ་ལ་ལྟོས་ནས་སེམས་ཁེངས་པ་དང་། ཕ་རོལ་ལ་མ་ལྟོས་པར་རང་གི་ཆོས་ལ་ཆགས་པའི་སྒོ་ནས་སེམས་ཡོངས་སུ་གཏུགས་པའོ། །བཞི་པ་ཐ་དད་འདྲ་བའི་མཚུངས་པ་ནི། གསུང་རབ་ལས། སེམས་དང་ཡིད་དང་རྣམ་པར་ཤེས། །ཞེས་གསུངས་པ་ནི་དོན་གཅིག་སྟེ། རྣམ་ཤེས་དྲུག་ཆར་འབྱེད་པས་ན་སེམས། ཤེས་པས་ན་ཡིད། རྣམ་པར་ཤེས་པས་ན་རྣམ་པར་ཤེས་པའོ་ཞེས་འཇོག་པའི་ཕྱིར། དེ་བཞིན་དུ། སེམས་དང་སེམས་བྱུང་ཞེས་པ་དང་། རྟེན་བཅས་དང་། དམིགས་བཅས་དང་། རྣམ་བཅས་དང་། མཚུངས་པར་ལྡན་པ་ལྔ་པོ་ཡང་དོན་གཅིག་སྟེ། སེམས་སེམས་བྱུང་སྤྱིའི་མིང་ཡིན་པའི་ཕྱིར་རོ། །མཚུངས་པར་ལྡན་པའི་ཚུལ་ནི་རྣམ་པ་ལྔ་སྟེ། རྟེན་དང་། དམིགས་པ་དང་། རྣམ་པ་དང་། དུས་དང་། རྫས་མཚུངས་པར་ལྡན་པ་ཡིན་ལ་དང་པོ་བཞི་པོ་ནི་མངོན་པ་གོང་མར་གསུངས་པ་དང་ཕལ་ཆེར་མཚུངས་ཤིང་། ཕྱི་མ་ནི་གཏན་མི་འདྲ་སྟེ། འདིར་ནི་གཙོ་བོ་སེམས་རྫས་གཅིག་ཡིན་པ་ལྟར་སེམས་བྱུང་རྣམས་ཀྱང་རྫས་རེ་རེ་བར་མཚུངས་པར་རྫས་མཚུངས་པའི་དོན་དུ་འདོད་ལ། མདོ་སྡེ་པས་ནི་སེམས་དང་རྫས་གཅིག་ཡིན་པ་ཉིད་ལ་རྫས་མཚུངས་སུ་འདོད་པའི་ཕྱིར་རོ། །འདི་ཉིད་དོན་ལ་གནས་ཏེ། རྟེན་མཚུངས་ཀྱི་དོན་རྟེན་གཅིག་ལ་བརྟེན་པ་སོགས་མཚུངས་པ་བཞི་པོ་གཅིག་པའི་དོན་ལ་བཤད་ན་རྫས་མཚུངས་ཀྱི་དོན་ཡང་རྫས་གཅིག་པ་ལས་འོས་མེད་པའི་ཕྱིར་རོ། །མཚུངས་ལྡན་གྱི་འདུ་བྱེད་བཤད་ཟིན་ཏོ། །གཉིས་པ་ལྡན་པ་མ་ཡིན་པའི་འདུ་བྱེད་ལ་སྡོམ་ནི། བཏགས་པར་ཡོད་པའི་འདོད་ཚུལ་དང་། །རྫས་སུ་ཡོད་པའི་འདོད་ཚུལ་དང་། །རིགས་པའི་གཞུང་ལ་དོགས་གཅོད་པ། །རྣམ་པ་གསུམ་གྱིས་དོན་འདི་བསྡུས། །ཞེས་པ་སྟེ། དང་པོ་བཏགས་པར་ཡོད་པའི་འདོད་ཚུལ་ནི་ཀུན་ལས་བཏུས་ཀྱི་ལུགས་ཏེ། འདི་ལ་ངོ་བོ་དང་། གྲངས་དང་གོ་རིམ་དཔྱད་པ་དང་། དབྱེ་བའི་སྡོམ་ཚིག་དང་། སོ་སོའི་ངོ་བོ་དང་བཞི་ལས། དང་པོ་ནི། བྱེ་བྲག་སྨྲ་བས་གཟུགས་སེམས་སེམས་བྱུང་དེ་གསུམ་ལས་རྫས་གཞན་པ་རྒྱུ་རྐྱེན་གྱིས་བསྐྱེད་པའི་རྫས་གྲུབ་ཏུ་འདོད་པ་ནི་མི་འཐད་དེ། གསུམ་ལས་རྫས་གཞན་དུ་ཚད་མས་མ་དམིགས་པའི་ཕྱིར་དང་། འདུས་བྱས་དང་དེའི་མི་རྟག་པ་རྫས་གཞན་ཡིན་ན། འདུས་བྱས་རྟག་པར་ཐལ་བའི་ཕྱིར་དང་། རྫས་ཡོད་ཡིན་ན་ཆོས་གཞན་ལ་མ་ལྟོས་པར་དེ་ཉིད་བློ་ཡུལ་དུ་འཆར་བ་གཅིག་དགོས་པ་ལས་གནས་སྐབས་ཀྱི་ཆོས་གསུམ་པོ་བློ་ཡུལ་དུ་མ་བྱས་པར་འདི་བློ་ཡུལ་དུ་འཆར་མི་ནུས་པའི་ཕྱིར། ཡང་མདོ་སྡེ་པ་དང་། སེམས་ཙམ་པ་གཞན་ཁ་ཅིག མེད་དགག་ཏུ་འདོད་དེ། ལུང་ནི་ས་བཅོ་ལྔ་པ་ནས། ལྡན་པ་མ་ཡིན་པའི་འདུ་བྱེད་འདི་དག་ནི། གཟུགས། སེམས། སེམས་ལས་བྱུང་བ་གསུམ་གྱི་མཚན་ཉིད་དང་མི་ལྡན་ལ་ཆོས་དེ་དག་ལ་བཏགས་པར་ཡོད་པའོ། །ཞེས་དང་། རིག་པ་ནི། གནས་སྐབས་ཅན་དེ་དག་ལས་དེ་ཉིད་དང་གཞན་ཉིད་དུ་བརྗོད་དུ་མེད་པའི་ཕྱིར། ཞེས་སྨྲའོ། །དེ་ལ་ལུང་གི་སྒྲུབ་བྱེད་མི་འཐད་དེ། ཆ་ལ་བཏགས་པའི་བཏགས་ཡོད་ཡིན་ན་མེད་དགག་ཡིན་མི་དགོས་པའི་ཕྱིར་རོ། །རིག་པའི་སྒྲུབ་བྱེད་ཀྱི་དོན་རྫས་དེ་ཉིད་དང་གཞན་ཉིད་དུ་བརྗོད་དུ་མེད་པའི་ཕྱིར་ཟེར་རམ། མཚན་ཉིད་དེ་ཉིད་དང་གཞན་ཉིད་དུ་བརྗོད་དུ་མེད་པའི་ཕྱིར་ཟེར། དང་པོ་ལྟར་ན། ཀུན་གཞིའི་རྣམ་སྨིན་གྱི་ཆ་ཡང་མེད་དགག་ཏུ་འགྱུར་ཏེ། ཀུན་གཞིའི་ས་བོན་གྱི་ཆ་ལས་རྫས་དེ་ཉིད་དང་གཞན་ཉིད་དུ་བརྗོད་དུ་མེད་པའི་ཕྱིར། ཕྱི་མ་ལྟར་ན་རྟགས་མ་གྲུབ་སྟེ། གནས་སྐབས་དང་གནས་སྐབས་ཅན་མཚན་ཉིད་སོ་སོར་འཇོག་པ་གསུང་རབ་སྤྱིའི་ལུགས་ཡིན་པའི་ཕྱིར་རོ། །རང་གི་ལུགས་ནི། འདུས་བྱས་ཀྱི་གནས་སྐབས་གང་ཞིག གཟུགས། སེམས། སེམས་བྱུང་གསུམ་གྱི་མཚན་ཉིད་མི་ལྡན་པ་སྟེ། རིམ་པ་ལྟར་འདུས་མ་བྱས་དང་། ཕུང་པོ་གཞན་རྣམས་གཅོད་པའོ། །རྫས་ཡོད་དང་། བཏགས་ཡོད་གཉིས་ཀྱི་ནང་ནས་བཏགས་ཡོད་ཡིན་ཏེ། གནས་སྐབས་ཅན་གྱི་ཆོས་དེ་ཉིད་བློ་ཡུལ་དུ་བྱས་པའི་སྒོ་ནས་འདི་བློ་ཡུལ་དུ་འཆར་དགོས་པའི་ཕྱིར་རོ། །འོན་ཀྱང་འདུས་མ་བྱས་སུ་མི་འགྱུར་ཏེ། གནས་སྐབས་ཅན་དེ་རྒྱུ་རྐྱེན་གྱིས་སྐྱེད་པའི་ཚེ། གནས་སྐབས་དེ་ཡང་དེས་བསྐྱེད་པའི་ཕྱིར་རོ། །གཉིས་པ་ནི། གཞུང་འདིར་ཐོབ་པ་ནས་སོ་སོ་སྐྱེ་བོ་ཉིད་ཀྱི་བར་བཅུ་བཞི་དང་། འཇུག་པ་སོགས་ཆ་མཐུན་དགུ་སྟེ་ཉི་ཤུ་རྩ་གསུམ་གསུངས་པ་ལ། དཔངས་ལོ་ཆེན་པོས། འདི་དག་གི་གྲངས་དང་གོ་རིམ་ནི་བརྗོད་འདོད་ཙམ་ལས་མེད་དེ། ཡུལ་སོ་སོར་ཐོབ་པ་དང་། ཕུང་པོ་ལ་དམིགས་པ་དང་། སྐྱེ་མཆེད་སོ་སོར་དམིགས་པ་དང་། མ་ཚོགས་པ་དང་། མ་ཐོབ་པ་སོགས་མང་དུ་བཤད་པ་མཐོང་ཞིང་། གནས་བཅུ་གཉིས་བསྟན་པའི་མདོར། མི་ལྡན་པའི་འདུ་བྱེད་བརྒྱ་བཀའ་སྩལ་པ་དང་། ཕུང་པོ་ལྔ་པ་དང་། མཛོད་འགྲེལ་སོགས་སུ་གྲངས་དང་གོ་རིམ་འདི་ལས་གཞན་དུ་བསྟན་པས་སོ་ཞེས་བཞེད་དོ། །འོན་ཀྱང་གཞུང་འདིར་འབྱུང་བའི་ཉེར་གསུམ་ལ་སྔ་རབས་པ་རྣམས་གདགས་གཞིའི་ངོས་ནས་རྣམ་པ་བརྒྱད་དུ་གྲངས་ངེས་པར་བཞེད་དེ། འཕེལ་འགྲིབ་ལ་བཏགས་པའི་ཐོབ་པ། འགགས་པ་ལ་བཏགས་པའི་སྙོམས་འཇུག་གཉིས་དང་འདུ་ཤེས་མེད་པ་ལ། གནས་པ་ལ་བཏགས་པའི་སྲོག འདྲ་བ་ལ་བཏགས་པའི་རིས་མཐུན། མཚན་ཉིད་ལ་བཏགས་པའི་སྐྱེ་སོགས་བཞི། ཐ་སྙད་ལ་བཏགས་པའི་ཚོགས་གསུམ། མ་ཐོབ་པ་ལ་བཏགས་པའི་སོ་སོའི་སྐྱེ་བོ་ཉིད། རྒྱུ་འབྲས་ཀྱི་གནས་སྐབས་ལ་བཏགས་པའི་ཆ་མཐུན་དགུ་ཞེས་བཞེད་དོ། །གསུམ་པ་ནི། ཐོབ་དང་སྙོམས་འཇུག་རྣམ་གཉིས་དང་། །འདུ་ཤེས་མེད་པ་སྲོག་རིས་མཐུན། །མཚན་ཉིད་བཞི་དང་མིང་སོགས་གསུམ། །སོ་སྐྱེ་འཇུག་དང་སོ་སོར་ངེས། །འབྱོར་འབྲེལ་མགྱོགས་དང་གོ་རིམ་དུས། །ཡུལ་དང་གྲངས་དང་ཚོགས་པའོ། །བཞི་པ་ལ། ཐོབ་པ་ནི་དགེ་སོགས་གསུམ་གྱི་འཕེལ་འགྲིབ་ཀྱི་གནས་སྐབས་ལ་བཏགས་པའི་འདུ་བྱེད། དབྱེ་ན་སྤྱིར་ཐོབ་པ་དང་། སྔར་མེད་གསར་དུ་རྙེད་པ་དང་། རྒྱུན་ལྡན་པ་སྟེ་རྣམ་གྲངས་ཀྱི་སྒོ་ནས་གསུམ་མོ། །འགྲིབ་པའི་གནས་སྐབས་ཐོབ་པར་ཇི་ལྟར་འགྱུར་སྙམ་ན། འཕེལ་བའི་ཚེ་ཆེན་པོ་ལྡན་ཅིང་འགྲིབ་པའི་ཚེ་ཆུང་ངུ་ལྡན་པས་སྐྱོན་མེད་ཅེས་འགྲེལ་བར་བཤད་དོ། །འདུ་ཤེས་མེད་པའི་སྙོམས་འཇུག་ནི་འཁོར་བ་ལས་ངེས་པར་འབྱུང་བའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པའི་བསམ་གཏན་གསུམ་པ་ལ་འདོད་ཆགས་དང་བྲལ་ལ་བཞི་པ་ལ་འདོད་ཆགས་དང་མ་བྲལ་བའི་ཚོགས་དྲུག་འཁོར་དང་བཅས་བཀག་པའི་གནས་སྐབས་ལ་བཏགས་པའི་འདུ་བྱེད་དོ། །འགོག་པའི་སྙོམས་འཇུག་ནི་ཞི་བར་གནས་པའི་འདུ་ཤེས་སྔོན་དུ་བཏང་བ་ཡིད་ལ་བྱེད་པས་ཚོགས་བདུན་འཁོར་བཅས་བཀག་པའི་གནས་སྐབས་ལ་བཏགས་པའི་འདུ་བྱེད་དོ། །འདུ་ཤེས་མེད་པ་པ་ནི་འདུ་ཤེས་མེད་པའི་ལྷའི་རྒྱུད་ཀྱི་ཚོགས་དྲུག་འཁོར་བཅས་བཀག་པའི་གནས་སྐབས་ལ་བཏགས་པའི་འདུ་བྱེད་དོ། །སྲོག་གི་དབང་པོ་ནི་རིས་མཐུན་པར་སྔོན་གྱི་ལས་ཀྱིས་འཕངས་པ་གནས་པའི་དུས་ངེས་པ་ལ་བཏགས་པའི་འདུ་བྱེད་དོ། །རིས་མཐུན་པ་ནི་སེམས་ཅན་གྱི་རིས་དེ་དང་དེར་སེམས་ཅན་དེ་དང་དེ་དག་གི་ལུས་འདྲ་བ་ལ་བཏགས་པའི་འདུ་བྱེད་དོ། །སྐྱེ་བ་ནི་རིས་མཐུན་པར་འདུ་བྱེད་རྣམས་སྔར་མ་བྱུང་བ་ལ་གསར་དུ་བྱུང་བ་ལ་བཏགས་པའི་འདུ་བྱེད་དོ། །རྒ་བ་ནི་རིས་མཐུན་པར་འདུ་བྱེད་རྣམས་ཀྱི་རྒྱུན་གཞན་དུ་འགྱུར་བ་ལ་བཏགས་པའི་འདུ་བྱེད་དོ། །གནས་པ་ནི་རིས་མཐུན་པར་འདུ་བྱེད་རྣམས་ཀྱི་རྒྱུན་མི་འཇིག་པ་ལ་བཏགས་པའི་འདུ་བྱེད་དོ། །མི་རྟག་པ་ཉིད་ནི་རིས་མཐུན་པར་འདུ་བྱེད་རྣམས་ཀྱི་རྒྱུན་འཇིག་པ་ལ་བཏགས་པའི་འདུ་བྱེད་དེ། གཞུང་འདིའི་ལུགས་ཀྱི་འདུས་བྱས་ཀྱི་མཚན་ཉིད་བཞི་པོ་ཡང་སེམས་ཅན་གྱི་རྒྱུད་ཀྱིས་བསྡུས་པའི་འདུས་བྱས་ཁོ་ན་ལ་བཞག་པར་སྣང་ཞིང་། མི་རྟག་པ་ཡང་སྐད་ཅིག་གིས་འཇིག་པ་ལ་མི་འདོད་པར་རྒྱུན་འཇིག་པ་ལ་འདོད་དོ། །མིང་གི་ཚོགས་ནི་ཆོས་རྣམས་ཀྱི་ངོ་བོ་ཉིད་ཀྱི་ཚིག་བླ་དྭགས་ལ་བཏགས་པའི་འདུ་བྱེད་དོ། །ཚིག་གི་ཚོགས་ནི་ཆོས་རྣམས་ཀྱི་ཁྱད་པར་གྱི་ཚིག་བླ་དྭགས་ལ་བཏགས་པའི་འདུ་བྱེད་དོ། །ཡི་གེའི་ཚོགས་ནི་དེ་གཉིས་ཀའི་གནས་ཡི་གེ་རྣམས་ལ་བཏགས་པའི་འདུ་བྱེད་དོ། །སོ་སོའི་སྐྱེ་བོ་ཉིད་ནི་འཕགས་པའི་ཆོས་མ་ཐོབ་པའི་གནས་སྐབས་ལ་བཏགས་པའི་འདུ་བྱེད་དོ། །འདི་ནི་མཛོད་ལས་མ་ཐོབ་པའི་ནང་ཚན་དུ་བྱས་ནས་འཕགས་ཆོས་མ་ཐོབ་པའི་གནས་སྐབས་ཀྱི་རྫས་གྲུབ་པ་ལ་འདོད་ལ། སོ་སྐྱེའི་གང་ཟག་ལ་འཁྲུལ་པར་མི་བྱ་སྟེ། མངོན་པ་གོང་འོག་གཉིས་ཆར་གྱི་ལུགས་ལ་འདི་ཕུང་པོའི་ཁོངས་སུ་གཏོགས་པའི་ཕྱིར་རོ། །འཇུག་པ་ནི། རྒྱུ་དང་འབྲས་བུ་རྒྱུན་མི་ཆད་པ་ལ་བཏགས་པའི་འདུ་བྱེད་དོ། །སོ་སོར་ངེས་པ་ནི་རྒྱུ་དང་འབྲས་བུ་ཐ་དད་པ་ལ་བཏགས་པའི་འདུ་བྱེད་དོ། །འབྱོར་འབྲེལ་པ་ནི་རྒྱུ་དང་འབྲས་བུ་རྗེས་སུ་མཐུན་པ་ལ་བཏགས་པའི་འདུ་བྱེད་དོ། །མགྱོགས་པ་ནི་རྒྱུ་དང་འབྲས་བུ་མྱུར་བར་བྱུང་བ་ལ་བཏགས་པའི་འདུ་བྱེད་དོ། །གོ་རིམ་ནི་རྒྱུ་དང་འབྲས་བུ་རེ་རེ་ནས་འབྱུང་བ་ལ་བཏགས་པའི་འདུ་བྱེད་དོ། །དུས་ནི་རྒྱུ་དང་འབྲས་བུ་རྒྱུན་དུ་འབྱུང་བ་ལ་བཏགས་པའི་འདུ་བྱེད་དོ། །ཡུལ་ནི་ཤར་ལ་སོགས་པའི་ཕྱོགས་རྣམས་ན་རྒྱུ་དང་འབྲས་བུ་ཡོད་པ་ཉིད་ལ་བཏགས་པའི་འདུ་བྱེད་དོ། །གྲངས་ནི་འདུ་བྱེད་རྣམས་ཀྱི་སོ་སོ་ཐ་དད་པ་ལ་བཏགས་པའི་འདུ་བྱེད་དོ། །ཚོགས་པ་ནི། རྒྱུ་དང་འབྲས་བུའི་རྐྱེན་འདུས་པ་ལ་བཏགས་པའི་འདུ་བྱེད་དོ། །གཉིས་པ་རྫས་སུ་ཡོད་པའི་འདོད་ཚུལ་ནི། མཛོད་ལས། ཐོབ་དང་མ་ཐོབ་སྐལ་མཉམ་དང་། །འདུ་ཤེས་མེད་སྙོམས་འཇུག་དག་དང་། །སྲོག་དང་མཚན་ཉིད་རྣམས་དང་ནི། །མིང་གི་ཚོགས་ལ་སོགས་པ་ཡང་། །ཞེས་མི་ལྡན་པའི་འདུ་བྱེད་བཅུ་བཞི་གསུངས་པ་ལས། དང་པོ་ཐོབ་པ་ནི། རང་གི་རྒྱུད་དུ་གཏོགས་པའམ་རྒྱུད་ཀྱིས་མ་བསྡུས་པའི་འགོག་པ་གཉིས་གང་རུང་གང་ཟག་དེ་ལ་ལྡན་པར་བྱེད་པའི་རྫས་ཏེ་དཔེར་ན་བ་གླང་ལ་ཁལ་ལྡན་པར་བྱེད་པའི་ཐག་པ་ལྟ་བུའོ། །དབྱེ་ན་མ་ཐོབ་པ་དང་རྣམ་པར་ཉམས་པ་ལས་གསར་དུ་རྙེད་པ་དང་། ཐོབ་ཟིན་རྒྱུན་ལྡན་པའི་ཐོབ་པ་གཉིས་སོ། །ཐོབ་པ་ལས་བཟློག་པ་ནི་མ་ཐོབ་པ་སྟེ། ཆོས་གང་ལ་ཐོབ་པ་ཡོད་པ་དེ་མི་ལྡན་པའི་ཚེ་མ་ཐོབ་པ་རྫས་གྲུབ་ཏུ་འཇོག་པ་ནི་བྱེ་བྲག་ཏུ་སྨྲ་བའི་གྲུབ་པའི་མཐའ་ཡིན་པའི་ཕྱིར་རོ། །དེ་ལ་མདོ་སྡེ་པ་ན་རེ། ཐོབ་པ་རྫས་གྲུབ་ཡོད་པའི་རྒྱུ་མཚན་ཅི་ཡིན་ཞེས་དྲིས་པས་བྱེ་བྲག་སྨྲ་བ་ན་རེ། མདོ་ལས། དེ་མི་སློབ་པའི་ཆོས་བཅུ་པོ་འདི་དག་སྐྱེད་ཅིང་སོ་སོར་ཐོབ་ལ་ཀུན་ཏུ་ལྡན་པས་ན་ཡན་ལག་ལྔ་རྣམ་པར་སྤངས་པའི་འཕགས་པར་འགྱུར་རོ་ཞེས་གསུངས་པས་སོ་ཞེ་ན། འོ་ན་སེམས་ཅན་གྱི་རྒྱུད་ཀྱིས་མ་བསྡུས་པ་དང་། གཞན་རྒྱུད་ཀྱིས་བསྡུས་པ་ལ་ཡང་ཐོབ་པ་རྫས་གྲུབ་ཡོད་པར་འགྱུར་ཏེ། མདོ་ལས། དགེ་སློང་དག་འཁོར་ལོས་བསྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ། ཞེས་རྒྱས་པར་འབྱུང་བའི་ཕྱིར་རོ། །གལ་ཏེ་དེར་ནི་དབང་བ་ཉིད་ལ་ལྡན་པའི་སྒྲར་གསུངས་སོ་ཞེ་ན། འོ་ན་མི་སློབ་པའི་ཆོས་ཀུན་ཏུ་ལྡན་པ་ལ་ལྡན་པ་རྫས་གྲུབ་པ་ཡོད་ཅིང་། རིན་པོ་ཆེ་སྣ་བདུན་དང་ལྡན་པ་ལ་ལྡན་པ་རྫས་གྲུབ་པ་མེད་ཅེས་པའི་ཁྱད་པར་གང་གིས་འབྱེད་དེ། དེ་གཉིས་ཀ་ལ་ལྡན་པ་རྫས་གཞན་པ་གཟུགས་ལ་སོགས་པ་ལྟར་རང་གི་ངོ་བོའི་སྒོ་ནས་མ་དམིགས་ཤིང་། མིག་ལ་སོགས་པ་ལྟར་བྱ་བའི་སྒོ་ནས་ཀྱང་མ་དམིགས་པར་མཚུངས་པའི་ཕྱིར་རོ། །གལ་ཏེ་ཆོས་རྣམས་སྐྱེ་བའི་རྒྱུ་ལ་ཐོབ་པའོ་ཞེས་བྱའོ་ཞེ་ན། འོ་ན་འདུས་མ་བྱས་འགོག་པ་གཉིས་ཀྱི་ཐོབ་པ་ཡོད་པར་མི་འགྱུར་རོ་ཞེས་སོགས་ཀྱི་དགག་སྒྲུབ་མཛོད་འགྲེལ་ལས་རྒྱས་པར་གསུངས་ཤིང་མཇུག་ཏུ། དེ་ལྟར་ན་ལྡན་པ་འདི་དང་དེ་འགོག་པ་མི་ལྡན་པ་ནི་རྣམ་པ་ཐམས་ཅད་དུ་བཏགས་པའི་ཆོས་ཡིན་གྱི་རྫས་ཀྱི་ཆོས་ནི་མ་ཡིན་ནོ། །བྱེ་བྲག་ཏུ་སྨྲ་བ་རྣམས་ན་རེ། འདི་གཉིས་ཀ་རྫས་ཁོ་ན་ཡིན་ནོ་ཞེས་བརྗོད་དོ། །ཅིའི་ཕྱིར་ན་འདི་ནི་ཁོ་བོ་ཅག་གི་གྲུབ་པའི་མཐའ་ཡིན་ནོ་ཞེས་ཟེར་རོ། །ཞེས་གསུངས་སོ། །གསུམ་པ་སྐལ་མཉམ་ནི་སྔར་གྱི་རིས་མཐུན་པ་དང་། རྫས་སུ་གྲུབ་མ་གྲུབ་ཀྱི་ཁྱད་པར་མ་གཏོགས་པ་འདྲ་སྟེ། མཛོད་འགྲེལ་ལས། སྐལ་བ་མཉམ་པ་ཉིད་ཅེས་བྱ་བའི་རྫས་ནི་སེམས་ཅན་རྣམས་ཀྱི་འདྲ་བ་ཡིན་ཏེ། བསྟན་བཅོས་ལས་ནི་འདིའི་མིང་རིས་མཐུན་པ་ཞེས་འབྱུང་ངོ་། །ཞེས་གསུངས་པས་སོ། །ལྷག་མ་བཅུ་པོའི་ངོ་བོ་ནི་གནས་སྐབས་ལ་བཏགས་པའི་འདུ་བྱེད་ཅེས་པའི་ཚབ་ཏུ་གནས་སྐབས་ཀྱི་རྫས་ཞེས་སྦྱར་བ་མ་གཏོགས་པ་སྔ་མ་དང་འདྲའོ། །གསུམ་པ་རིག་པའི་གཞུང་ལུགས་ལ་དོགས་པ་གཅོད་པ་ནི། འོ་ན་ཚད་མ་སྨྲ་བའི་མདོ་སེམས་གཉིས་ཀྱིས་ལྡན་མིན་འདུ་བྱེད་ཇི་ལྟར་ཁས་བླངས་སྙམ་ན། བྱེ་བྲག་སྨྲ་བའི་ལུགས་ཀྱི་རྫས་གྲུབ་དང་། མངོན་པ་སྨྲ་བའི་མདོ་སྡེ་པའི་ལུགས་ཀྱི་བཏགས་ཡོད་གཉིས་ཀ་ཁས་མི་ལེན་ཏེ། ཚད་མ་སྨྲ་བའི་མདོ་སྡེ་པའི་ལུགས་ལ་འདུས་བྱས་ཐམས་ཅད་དོན་ཤེས་གཉིས་ཀྱི་རྫས་སུ་ངེས་པའི་ཕྱིར་དང་། སེམས་ཙམ་པའི་ལུགས་ལ་འདུས་བྱས་ཐམས་ཅད་ཤེས་པའི་རྫས་སུ་ངེས་པའི་ཕྱིར་རོ། །འོ་ན་སྔོན་པོའི་བྱས་མི་རྟག་ལྟ་བུ་གང་དུ་ཁས་ལེན་ཅེ་ན། བྱེ་བྲག་སྨྲ་བས་སྔོན་པོ་ལས་རྫས་གཞན་དང་། མངོན་པ་སྨྲ་བའི་མདོ་སེམས་གཉིས་ཀྱིས་བཏགས་ཡོད་ཀྱི་འདུས་བྱས་སུ་ཁས་ལེན་ཀྱང་། ཚད་མ་སྨྲ་བའི་མདོ་སྡེ་པ་དོན་ལ་ཡོད་པའི་སྔོན་པོའི་བྱས་མི་རྟག་ནི་སྔོན་པོ་ཉིད་ཀྱི་རྫས་དང་། སེལ་ངོའི་བྱས་མི་རྟག་ནི་སྤྱི་མཚན་ཡིན་པས་འདུས་བྱས་སུ་ཡང་ཁས་མི་ལེན་པ་ནི་ཁྱད་པར་རོ། །གལ་ཏེ་ཚད་མ་སྨྲ་བའི་སེམས་ཙམ་པས་གཟུང་འཛིན་གཉིས་སྟོང་གི་ཆོས་ཉིད་དེ་རྫས་སུ་གྲུབ་ཅིང་། དོན་ཤེས་གང་གི་ཡང་རྫས་སུ་མི་འདོད་པས་ལྡན་མིན་འདུ་བྱེད་དུ་ཁས་ལེན་ནོ་སྙམ་ན་མ་ཡིན་ཏེ། ཆོས་དབྱིངས་འདུས་མ་བྱས་ཡིན་ལ། ལྡན་མིན་འདུ་བྱེད་ཡིན་ན་ཕུང་པོའི་ཁོངས་སུ་གཏོགས་པའི་འདུས་བྱས་སུ་ཁས་ལེན་དགོས་པའི་ཕྱིར་རོ། །གཉིས་པ་རྣམ་པར་ཤེས་པའི་ཕུང་པོ་བྱེ་བྲག་ཏུ་བཤད་པ་ལ་གཉིས་ཏེ། རྣམ་གྲངས་ཀྱི་སྒོ་ནས་མདོར་བསྟན་པ་དང་། རྣམ་གྲངས་ཀྱི་དོན་སོ་སོར་བཤད་པའོ། །དང་པོ་ནི། གསུང་རབ་ལས། སེམས་དང་། ཡིད་དང་། རྣམ་པར་ཤེས་པ་ཞེས་འབྱུང་བའི་དོན་ལ་དོན་གསང་ལས། ཉན་ཐོས་ཀྱི་ཐེག་པར་འདི་གསུམ་ཆར་རྣམ་ཤེས་དྲུག་པོ་ཁོ་ནའི་མིང་དུ་བྱས་ནས་ངེས་ཚིག་གི་དབྱེ་བས། འབྱེད་པས་སམ་བསགས་པས་ན་སེམས་དང་། ཤེས་པས་ན་ཡིད་དང་། རྣམ་པར་ཤེས་པས་ན་རྣམ་ཤེས་སོ། །དུས་ཀྱི་དབྱེ་བས། མ་འོངས་པ་སེམས་དང་འདས་པ་ཡིད་དང་། ད་ལྟར་བྱུང་བ་རྣམ་ཤེས་སོ། །བསྟན་ཚུལ་གྱི་དབྱེ་བས་ཁམས་བསྟན་པ་ན་སེམས་ཀྱི་ཁམས་བདུན་ཞེས་དང་། སྐྱེ་མཆེད་བསྟན་པ་ན་ཡིད་ཀྱི་སྐྱེ་མཆེད་ཅེས་དང་། ཕུང་པོ་བསྟན་པ་ན་རྣམ་ཤེས་ཀྱི་ཕུང་པོ་ཞེས་སོ། །བྱེད་པའི་བྲེ་བྲག་གིས། རིང་དུ་འགྲོ་ཞིང་གཅིག་པུར་རྒྱུ། །གདུལ་བར་དཀའ་བའི་སེམས་འདུལ་བྱེད། །ཅེས་པ་ལྟར། རིང་དུ་འགྲོ་བས་ན་སེམས་དང་། ཆོས་རྣམས་སྔོན་དུ་ཡིད་འགྲོ་འོ། །ཞེས་པ་ལྟར་སྔོན་དུ་འགྲོ་བས་ཡིད་དང་། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་པ་ལྟར་ཉིང་མཚམས་སྦྱོར་བས་རྣམ་ཤེས་སོ་ཞེས་བཤད་དོ། །ཐེག་ཆེན་པས་ནི་གཙོ་བོ་མ་ཡིན་པ་ལ་བརྟེན་པའི་རྣམ་གྲངས་དང་། གཙོ་བོ་ལ་བརྟེན་པའི་རྣམ་གྲངས་གཉིས་ལས། དང་པོ་ནི། གསུམ་ཆར་ཡང་རྣམ་ཤེས་ཚོགས་བརྒྱད་ཅར་གྱི་རྣམ་གྲངས་ཡིན་ཏེ། འདི་ལྟར་སེམས་ཞེས་བྱ་བ་བག་ཆགས་བསགས་པས་སེམས། དོན་ལ་སེམས་པས་སེམས། དམིགས་པ་སྣ་ཚོགས་པ་རིག་པས་སེམས་ཞེས་བྱ་སྟེ། དང་པོ་ཀུན་གཞི། གཉིས་པ་ཉོན་ཡིད། གསུམ་པ་ཚོགས་དྲུག་གི་རྣམ་གྲངས་སོ། །ཡིད་ནི་དེ་མ་ཐག་པའི་རྟེན་བྱེད་པས་ཡིད་དང་། རང་གི་དམིགས་པ་རྟོགས་པས་ཡིད་ཅེས་བྱ་སྟེ། རྣམ་ཤེས་བརྒྱད་ཅར་གྱི་རྣམ་གྲངས་སོ། །རྣམ་པར་ཤེས་པ་ནི་ཡུལ་སོ་སོར་རིག་པས་རྣམ་པར་ཤེས་པ་སྟེ་བརྒྱད་ཅར་གྱི་རྣམ་གྲངས་སོ། །གཉིས་པ་གཙོ་བོ་ལ་བརྟེན་པའི་རྣམ་གྲངས་ཀྱི་དོན་ནི། སེམས་ནི་ཀུན་གཞི་སྟེ་བག་ཆགས་བསགས་པ་དང་། སྣ་ཚོགས་པ་དང་། དོན་ལ་དམིགས་པའི་ཕྱིར་རོ། །སེམས་ཞེས་བྱ་བ་ཡིན་པས་འདི་གསུམ་ཆར་ཀུན་གཞི་ཁོ་ན་ལ་ཚང་གི་གཞན་ལ་མ་ཡིན་པའི་ཕྱིར་ཏེ། ཉོན་ཡིད་ལ་དོན་ལ་སེམས་པ་ཡོད་ཀྱང་སྣ་ཚོགས་པ་དང་། བག་ཆགས་བསགས་པ་མེད། ཚོགས་དྲུག་ལ་སྣ་ཚོགས་པ་དང་། དོན་ལ་སེམས་པ་ཡོད་ཀྱང་བག་ཆགས་བསགས་པ་མེད་པའི་ཕྱིར། ཡིད་ནི་ཉོན་མོངས་པ་ཅན་གྱི་ཡིད་དེ། དུས་རྟག་ཏུ་བདག་གི་རྣམ་པར་རློམ་སེམས་པས་ཡིད་ཅེས་བྱ་བ་ཡིན་ལ། དེ་ནི་ཉོན་ཡིད་ཁོ་ན་ལ་ཡོད་ཀྱི་གཞན་ལ་མེད་པའི་ཕྱིར་ཏེ། ཀུན་གཞི་དང་། སྒོ་ལྔའི་རྣམ་ཤེས་ལ་བདག་ཏུ་རློམ་པ་ཙམ་ཡང་མེད། ཡིད་ཀྱི་རྣམ་ཤེས་ལ་བདག་ཏུ་རློམ་པ་ཙམ་ཡོད་ཀྱང་དུས་རྟག་ཏུ་བདག་ཏུ་རློམ་པ་མེད་པའི་ཕྱིར། རྣམ་པར་ཤེས་པ་ནི་ཚོགས་དྲུག་སྟེ། དམིགས་པ་སྣ་ཚོགས་གསལ་བར་རིག་པས་རྣམ་པར་ཤེས་པ་ཞེས་བྱ་བ་ཡིན་ལ། དེ་ནི་ཚོགས་དྲུག་ཁོ་ན་ལ་ཡོད་ཀྱི་གཞན་ལ་ནི་མེད་པའི་ཕྱིར་ཏེ། ཀུན་གཞི་ལ་དམིགས་པ་སྣ་ཚོགས་རིག་པ་ཡོད་ཀྱང་གསལ་བ་མེད། ཉོན་ཡིད་ལ་གསལ་བར་རིག་པ་ཡོད་ཀྱང་དམིགས་པ་སྣ་ཚོགས་པ་མེད་པའི་ཕྱིར། དེས་ན་འདིར་ནི་གཙོ་བོ་ལ་བརྟེན་པའི་རྣམ་གྲངས་ཀྱི་དོན་གཟུང་བར་བྱའོ། །གཉིས་པ་རྣམ་གྲངས་ཀྱི་དོན་སོ་སོར་བཤད་པ་ལ་གསུམ་སྟེ། སེམས་ཀུན་གཞི་བཤད་པ། ཡིད་ཉོན་མོངས་ཅན་བཤད་པ། རྣམ་ཤེས་ཚོགས་དྲུག་བཤད་པའོ། །དང་པོ་ལ་སྡོམ་ནི། རང་བཞིན་མཚན་ཉིད་དམིགས་རྣམ་དང་། །མཚུངས་ལྡན་འཇུག་ལྡོག་དབྱེ་བ་དང་། །རྣམ་གྲངས་སྒྲ་དོན་སྒྲུབ་བྱེད་དེ། །བཅུ་གཅིག་སྒོ་ནས་ལེགས་པར་བཤད། །ཅེས་པ་ལྟར་བཅུ་གཅིག་ལས། དང་པོ་རང་བཞིན་ནི། གསུང་རབ་ལས་ཆོས་དགེ་བ་དང་། མི་དགེ་བ་དང་། བསྒྲིབས་ལ་ལུང་དུ་མ་བསྟན་པ་དང་། མ་བསྒྲིབས་ལུང་དུ་མ་བསྟན་པ་བཞི་གསུངས་ལས། འདི་ནི་མ་བསྒྲིབས་ལ་ལུང་དུ་མ་བསྟན་པ་སྟེ། སུམ་ཅུ་པ་ལས། དེ་ཉེ་བའི་ཉོན་མོངས་པ་གློ་བུར་བ་རྣམས་ཀྱི་རྙོག་མ་ཅན་དུ་མ་བསྒྲིབས་པ་ཡིན་ལ། ལུང་དུ་མ་བསྟན་པ་ནི་དགེ་མི་དགེའི་ལུང་དུ་མ་བསྟན་པའོ། །གཉིས་པ་མཚན་ཉིད་ནི། ཐེག་བསྡུས་ལས། འདིའི་མཚན་ཉིད་རྣམ་པར་གཞག་པ་ཇི་ལྟར་བལྟ་ཞེ་ན། དེ་ནི་མདོར་བསྡུས་ན་རྣམ་པ་གསུམ་སྟེ། རང་གི་མཚན་ཉིད་རྣམ་པར་གཞག་པ་དང་། རྒྱུ་ཉིད་དུ་རྣམ་པར་གཞག་པ་དང་། འབྲས་བུ་ཉིད་དུ་རྣམ་པར་གཞག་པའོ། །དེ་ལ་ཀུན་གཞིའི་རྣམ་པར་ཤེས་པའི་རང་གི་མཚན་ཉིད་ནི། གང་ཀུན་ནས་ཉོན་མོངས་པའི་ཆོས་ཐམས་ཅད་ཀྱི་བག་ཆགས་ལ་བརྟེན་ནས་ས་བོན་ཡོངས་སུ་འཛིན་པ་དང་ལྡན་པས་དེས་སྐྱེ་བའི་རྒྱུ་རྐྱེན་ཉིད་དོ། །དེ་ལ་རྒྱུ་ཉིད་ཀྱི་མཚན་ཉིད་ནི། དེ་ལྟར་ཀུན་གཞིའི་རྣམ་པར་ཤེས་པ་ས་བོན་ཐམས་ཅད་པ་དེ་ཀུན་ནས་ཉོན་མོངས་པའི་ཆོས་དེ་དག་ཉིད་ཀྱི་རྒྱུ་ཉིད་དུ་གནས་པ་ཡིན་ནོ། །དེ་ལ་འབྲས་བུ་ཉིད་དུ་རྣམ་པར་བཞག་པ་ནི། ཀུན་གཞིའི་རྣམ་པར་ཤེས་པ་ཀུན་ནས་ཉོན་མོངས་པའི་ཆོས་དེ་དག་ཉིད་ཀྱི་ཐོག་མ་མེད་པའི་བག་ཆགས་ལ་བརྟེན་ནས་འབྱུང་བའོ། །ཞེས་གསུངས་ལ། འདིའི་དོན་གཏན་ལ་དབབ་པ་ལ་གསུམ་སྟེ། མཚན་ཉིད་གསུམ་གྱིས་བསྟན་ཚུལ་བཤད་པ། མཚན་ཉིད་རང་གི་ངོ་བོ་བཤད་པ། མཚན་གཞི་གཏན་ལ་དབབ་པའོ། །དང་པོ་ནི། དོན་གསང་དུ། མཚན་ཉིད་གསུམ་པོ་རིམ་པ་ལྟར་ཀུན་གཞི་སྤྱི་ཡི་དང་། ས་བོན་གྱི་ཆ་ཡི་དང་། རྣམ་སྨིན་གྱི་ཆ་ཡི་མཚན་ཉིད་དུ་བཤད་དོ། །བཤད་སྦྱར་དུ་ས་བོན་ཙམ་བྱེད་པའི་ནུས་པ་མ་བྱུང་བ་དང་པོ་དང་། ནུས་པ་བྱུང་བ་གཉིས་པ་དང་། ཐེག་བསྡུས་ཉིད་དུ། འཇུག་པའི་རྣམ་ཤེས་རྣམས་ཀྱི་བག་ཆགས་སྐྱེད་པ་དེ་མཚན་ཉིད་གསུམ་པར་བཤད་དེ། ཆོས་རྣམས་བརྗོད་པའི་བག་ཆགས་ལས། །བྱུང་སྟེ་དེ་དག་ཉིད་ལས་དེ། །ཞེས་སོ། །གཉིས་པ་ནི། ཀུན་གཞིའི་རྣམ་ཤེས་ཙམ་དུ་མཚོན་པའི་མཚན་ཉིད། དེ་ཉིད་རྣམ་པར་སྨིན་པར་མཚོན་པར་བྱེད་པའི་མཚན་ཉིད། དེ་ཉིད་ས་བོན་ཐམས་ཅད་པར་མཚོན་པར་བྱེད་པའི་མཚན་ཉིད་གསུམ་ལས། དང་པོ་ནི། རྣམ་སྨིན་གྱི་ངོ་བོར་གྱུར་པའི་རྣམ་ཤེས་ས་བོན་ཐམས་ཅད་ཇི་ལྟར་རིག་པར་ལྡན་པ་སྟེ། ཐེག་བསྡུས་སུ། མདོར་བསྡུ་ན་ཀུན་གཞིའི་རྣམ་པར་ཤེས་པའི་ངོ་བོ་ཉིད་ནི་རྣམ་པར་སྨིན་པའི་རྣམ་པར་ཤེས་པ་ས་བོན་ཐམས་ཅད་པ་སྟེ། ཞེས་དང་། སུམ་ཅུ་པར། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །ཞེས་གསུངས་སོ། །ཡང་བག་ཆགས་བསྒོ་རུང་གི་རྣམ་ཤེས་ཞེས་པས་ཀྱང་མཚོན་ནུས་ལ། འཁོར་བ་དང་མྱ་ངན་ལས་འདས་པའི་རྟེན་དོན་གྱི་ངོ་བོ་རིག་པ་ཞེས་པས་ཀྱང་མཚོན་ནུས་སོ། །གཉིས་པ་ནི། ཀུན་གཞི་དེ་ཉིད་སྔོན་གྱི་ཟག་བཅས་ཀྱི་ལས་ཀྱིས་འཕངས་ཤིང་། རྣམ་སྨིན་གྱི་ཆོས་དང་ལྡན་པའི་ལྡོག་པ་ནས་རྣམ་སྨིན་གྱི་ཆར་འཇོག་གོ །དེའི་ཆོས་ནི། རྣམ་སྨིན་ལུང་དུ་མ་བསྟན་ཆོས། །སེམས་ཅན་བརྗོད་ལུང་བསྟན་ཕྱིས་འབྱུང་། །ཞེས་པ་ལྟར་མ་བསྒྲིབས་ལ་ལུང་དུ་མ་བསྟན་པ་ཞིག་དགོས་ཏེ། ཐེག་བསྡུས་ལས། རྣམ་པར་སྨིན་པ་ཡང་དགེ་བ་དང་མི་དགེ་བར་འགྱུར་ན་ནི་ཀུན་ནས་ཉོན་མོངས་པ་ལྡོག་པར་མི་འགྱུར་རོ། །ཞེས་སོ། །རྒྱུ་ལུང་དུ་བསྟན་པ་ལས་ཕྱིས་འབྱུང་བ་ཞིག་དགོས་ཏེ། ལས་དགེ་མི་དགེ་ཚེ་འདི་ཉིད་ལ་སྤྱད་པ་ལས་རྣམ་སྨིན་ཡང་ཚེ་འདི་ཉིད་ལ་འབྱུང་ན་རྒྱུད་གཅིག་ལ་འགྲོ་བ་དུ་མར་འགྱུར་བའི་སྐྱོན་ཡོད་པའི་ཕྱིར། འོ་ན་ཀུན་ལས་བཏུས་ལས། མཐོང་བའི་ཆོས་ལ་མྱོང་བར་འགྱུར་བའི་ལས་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་ལྟར་བཤད་པ་ནི་སྤྱིར་རྣམ་སྨིན་གྱི་གཙོ་བོ་ཚོར་བ་ཡིན་པས་ཚོར་བ་བདེ་སྡུག་མཐོང་བའི་ཆོས་ལ་འབྱུང་བ་ལ་དགོངས་པའི་ཕྱིར་རོ། །དེ་ཉིད་ཀུན་གཞིའི་འཁོར་གྱི་ཚོར་བ་མ་ཡིན་ནམ་སྙམ་ན་མ་ཡིན་ཏེ། ཀུན་གཞིའི་འཁོར་གྱི་ཚོར་བ་ནི་བཏང་སྙོམས་ཁོ་ན་ཡིན་པའི་ཕྱིར་རོ། །དེ་ཡང་སེམས་ཅན་དུ་བརྗོད་པ་སྟེ་སེམས་ཅན་གྱི་རྒྱུད་ཀྱིས་བསྡུས་པ་ཞིག་དགོས་ཏེ། ལས་དགེ་མི་དགེ་བྱས་པའི་རྣམ་སྨིན་གྱི་འབྲས་བུ་ཕྱི་རོལ་གྱི་རྟེན་ལ་སྨིན་ན་གང་ཟག་གཞན་དང་ཐུན་མོང་བར་ཐལ་བ་ལས་རྣམ་སྨིན་གྱི་འབྲས་བུ་ནི་ཐུན་མོང་མ་ཡིན་པ་ཡིན་པའི་ཕྱིར། དེ་ཡང་རྒྱུད་གཅིག་གིས་བསྡུས་པ་ཞིག་དགོས་ཏེ། རང་གི་བྱས་པའི་ལས་ཀྱི་རྣམ་སྨིན་གྱི་འབྲས་བུ་རྒྱུད་གཞན་ལ་སྨིན་ན་ལས་བྱས་པ་ཆུད་ཟོས་པ་དང་མ་བྱས་པ་དང་འཕྲད་པར་འགྱུར་བའི་ཕྱིར། འོ་ན་གང་ཟག་འགའ་ཞིག་ཤི་བའི་ཚེ་རྗེས་ན་ཡོད་པའི་གསོན་པོ་རྣམས་ཀྱིས་ལས་དགེ་མི་དགེ་བྱས་པའི་རྣམ་སྨིན་གཤིན་པོ་དེ་ལ་སྨིན་ནམ་མི་སྨིན། སྨིན་ན་བྱས་པ་ཆུད་ཟོས་པ་དང་། མ་བྱས་པ་དང་འཕྲད་པའི་སྐྱོན་དུ་འགྱུར། མི་སྨིན་ན་ཐེག་པ་ཆེ་ཆུང་གི་མདོ་དང་བསྟན་བཅོས་ནས་བཤད་པ་དང་འགལ་ལོ་ཞེ་ན། འདིའི་ལན་ལ་སྔ་རབས་པ་ཁ་ཅིག་སྨིན་པས་སྐྱོན་ཕྱི་མ་མེད་ལ། སྐྱོན་དང་པོ་ཡང་མེད་དེ། གསོན་པོ་རྣམས་ཀྱིས་རང་གི་རྣམ་སྨིན་འཐོབ་པའི་ཆེད་དུ་བྱས་པ་མིན་གྱི་གཤིན་པོ་དེས་འཐོབ་པར་བྱ་བའི་ཆེད་དུ་བྱས་པས་ཆུད་ཟོས་པར་ཡང་མི་འགྱུར། བར་དོ་ན་གནས་པའི་སེམས་ཅན་གྱིས་སྔོན་གྱི་གྲོགས་ལ་སོགས་པ་རྣམས་དང་ལྷན་ཅིག་ཏུ་འདུག་པར་རྨི་ལམ་གྱི་ཚོད་ཙམ་དུ་ཤེས་པས་གསོན་པོ་རྣམས་ཀྱིས་དགེ་བ་བྱས་པའི་ལན་པོ་རྨི་ལམ་གྱི་ཚོད་ཙམ་དུ་བྱས་པས་མ་བྱས་པ་དང་འཕྲད་པའི་སྐྱོན་མེད་པའི་ཕྱིར། ཞེས་གསུངས་མོད། འོན་ཀྱང་འདིས་གསོན་པོའི་ལས་ཀྱི་འབྲས་བུ་གཤིན་པོས་མི་མྱོང་བའི་ལན་དུ་སྣང་བས་མདོ་བསྟན་བཅོས་དང་འགལ་བ་སྤོང་མི་ནུས་སོ། །འོ་ན་ཇི་ལྟར་ཞེ་ན། རྒྱུད་གཅིག་གིས་བསྡུས་པ་དགོས་པ་ནི། འཕེན་བྱེད་ཀྱི་ལས་ལ་དགོངས་ལ། གསོན་པོས་གཤིན་པོའི་དོན་དུ་བྱས་པ་ནི་འགྲུབ་བྱེད་ཀྱི་ལས་སུ་འགྱུར་གྱི་འཕེན་བྱེད་ཀྱི་ལས་སུ་འགྱུར་བ་མི་སྲིད་པས་སྐྱོན་གཉིས་ཀ་ལས་གྲོལ་ལོ། །གསུམ་པ་ལ་གཉིས་ཏེ། ས་བོན་གྱི་ཆ་ངོས་བཟུང་བ་དང་། དེའི་རང་བཞིན་གཏན་ལ་དབབ་པའོ། །དང་པོ་ནི། ཀུན་གཞི་དེ་ཉིད་ཆོས་རྣམས་སྐྱེད་པའི་ནུས་པའི་བག་ཆགས་དང་ལྡན་པའི་ལྡོག་པ་ནས་ས་བོན་གྱི་ཆའོ། །འདིར་རེད་མདའ་བས། ས་བོན་གྱི་རང་བཞིན་གྱི་ཀུན་གཞི་ནི་ནུས་པ་ཙམ་གྱི་ངོ་བོར་གནས་ཀྱི་ཤེས་རིག་གི་རྫས་སུ་མ་གྲུབ་པས་དམིགས་པ་དང་རྣམ་པ་མེད་པ་རྣམ་སྨིན་གྱི་ཆ་ལས་རྫས་དེ་ཉིད་དང་གཞན་ཉིད་དུ་བརྗོད་པར་བྱ་བ་མ་ཡིན་པ་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུའི་རྐྱེན་བྱེད་པའི་རང་བཞིན་ཅན་ནོ། །དེ་བས་ན་འདི་གཉིས་ཀྱི་རྫས་སོ་སོར་དམིགས་སུ་མེད་ཀྱང་། མཚན་ཉིད་ཤིན་ཏུ་ཐ་དད་པ་ཁོ་ན་ཡིན་པས་སྔ་རབས་པ་དག་གིས་འདི་གཉིས་ངོ་བོ་གཅིག་ལ་ལྡོག་པ་ཐ་དད་པར་བཤད་པ་གང་ཡིན་པ་དེ་དག་ནི་ལེགས་པར་བཤད་པ་མ་ཡིན་པར་ཁོང་དུ་ཆུད་པར་བྱའོ། །དེ་ལ་ཀུན་གཞིའི་རྣམ་སྨིན་གྱི་ཆ་ནི་བྱིས་པ་རྣམས་ཀྱིས་བདག་ཏུ་སྦྱོར་བའི་གཞི་ཡིན་པའི་ཕྱིར་ཀུན་གཞི་ཡང་ཡིན་ལ། དམིགས་རྣམ་འཛིན་པས་རྣམ་པར་ཤེས་པ་ཡང་ཡིན། ལས་ཀྱི་བག་ཆགས་ཡོངས་སུ་སྨིན་པའི་ངོ་བོར་གྱུར་པས་རྣམ་པར་སྨིན་པ་ཡང་ཡིན་ནོ། །དེའི་ཕྱིར་དེ་ལ་ནི་ཀུན་གཞི་ཞེས་ཀྱང་བྱ། ཀུན་གཞིའི་རྣམ་པར་སྨིན་པའི་རྣམ་ཤེས་ཞེས་ཀྱང་བྱའོ། །ཀུན་གཞིའི་ས་བོན་གྱི་ཆ་ནི་ཀུན་ནས་ཉོན་མོངས་པའི་ཆོས་རྣམས་འབྲས་བུའི་དངོས་པོར་སྦྱོར་བར་བྱེད་པའམ། འདི་ཡང་དེ་དག་གི་རྒྱུའི་དངོས་པོར་སྦྱོར་ཞིང་འདུ་བས་ཀུན་གཞི་ཉིད་ཡིན་གྱི་ཤེས་རིག་མ་ཡིན་པས་ཀུན་གཞིའི་རྣམ་ཤེས་དང་། རྣམ་པར་སྨིན་པའི་རྣམ་ཤེས་ནི་མ་ཡིན་ནོ་ཞེས་བཞེད་དོ། །འདི་ལ་འདི་འདྲི་སྟེ། ཤེས་རིག་གི་རྫས་སུ་མ་གྲུབ་ཅེས་པའི་དོན་སྤྱིར་རྫས་སུ་མ་གྲུབ་པ་ལ་བྱེད་དམ། ཤེས་རིག་ལས་གཞན་གྱི་རྫས་སུ་གྲུབ་པ་ལ་བྱེད། དང་པོ་ལྟར་ན་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུའི་རྐྱེན་བྱེད་པའི་རང་བཞིན་ཅན་དུ་ཁས་བླངས་པ་དང་འགལ་སྟེ། རྫས་སུ་མ་གྲུབ་ན་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུའི་རྐྱེན་དུ་འགལ་བའི་ཕྱིར་རོ། །ཕྱི་མ་ལྟར་ན། བེམ་པོའི་རྫས་སུ་གྲུབ་པའམ། ལྡན་མིན་འདུ་བྱེད་ཀྱི་རྫས་སུ་གྲུབ། དང་པོ་ལྟར་ན། རྣམ་སྨིན་གྱི་ཆ་ལས་རྫས་གཞན་དུ་ཐལ་བ་བཟློག་ཏུ་མེད་ཅིང་། ཕྱི་མ་ལྟར་ན་བྱེ་བྲག་ཏུ་སྨྲ་བ་མ་གཏོགས་པ་ལྡན་མིན་འདུ་བྱེད་རྫས་སུ་གྲུབ་པ་ཁན་ལེན་པ་མེད་པས་མི་འཐད་དོ། །ས་བོན་གྱི་ཆ་དེ་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུ་ཡིན་ཅིང་། ཀུན་གཞིའི་རྣམ་ཤེས་མ་ཡིན་པར་འདོད་པ་ནི་ཐེག་བསྡུས་དང་འགལ་ཏེ། དེ་ཉིད་ལས། ཇི་ལྟར་ཀུན་གཞིའི་རྣམ་པར་ཤེས་པ་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུ་ཡིན་པ་དེ་ལྟར་ཀུན་ནས་ཉོན་མོངས་པའི་ཆོས་རྣམས་ཀྱང་ཀུན་གཞིའི་རྣམ་པར་ཤེས་པའི་རྒྱུའི་རྐྱེན་དུ་རྣམ་པར་བཞག་སྟེ། རྒྱུའི་རྐྱེན་གཞན་མི་དམིགས་པའི་ཕྱིར་རོ། །ཞེས་གསུངས་ཤིང་། སྔ་མས་ཀུན་གཞི་ས་བོན་གྱི་ཆ་དང་། ཕྱི་མས་རྣམ་སྨིན་གྱི་ཆ་བསྟན་པར་ཁྱེད་རང་གིས་ཀྱང་ཁས་བླངས་པའི་ཕྱིར་རོ། །དེས་ན་ཀུན་གཞིའི་རྣམ་པར་ཤེས་པ་གཅིག་ཉིད་རྒྱུ་ཉོན་མོངས་པ་ཅན་གྱི་ཆོས་ལས་བྱུང་བའི་ཆ་ནས་རྣམ་སྨིན་གྱི་ཆ་དང་། འབྲས་བུ་ཉོན་མོངས་པའི་ཆོས་རྣམས་སྐྱེད་པའི་ནུས་པ་དང་ལྡན་པའི་ཆ་ནས་ས་བོན་གྱི་ཆར་འཇོག་པར་དཔངས་ལོ་ཆེན་པོས་བཞེད་པ་འདི་ཉིད་གཞུང་གི་དོན་དུ་སྣང་བས་སྔ་རབས་པ་དག་འདི་གཉིས་ངོ་བོ་གཅིག་ལ་ལྡོག་པ་ཐ་དད་པར་བཞེད་པ་ནི་འཐད་པ་ཁོ་ན་ཡིན་ཅིང་། ཐེག་བསྡུས་ལས། དེ་ཉིད་དང་གཞན་ཉིད་དུ་བརྗོད་དུ་མེད་པའི་དོན་ནི་འཆད་པར་འགྱུར་རོ། །གཉིས་པ་དེའི་རང་བཞིན་གཏན་ལ་དབབ་པ་ནི། འོ་ན་བག་ཆགས་བསྒོ་བའི་ཚུལ་ཇི་ལྟར་སྙམ་ན། འདི་ལ་ལྔ་སྟེ། བསྒོ་བའི་གཞི་དང་། སྒོ་བྱེད་དང་། བསྒོས་པའི་རྣམ་པ་དང་། རབ་ཏུ་དབྱེ་བ་དང་། བསྒོས་པ་གཏན་ལ་དབབ་པའོ། །དང་པོ་ནི། ཐེག་བསྡུས་ལས། བརྟན་ལུང་མ་བསྟན་བསྒོ་བྱ་བ། །སྒོ་བར་བྱེད་དང་འབྲེལ་བ་ལ། །སྒོ་བྱེད་དེ་ལས་གཞན་དུ་མིན། །འདི་ནི་བག་ཆགས་མཚན་ཉིད་དོ། །ཞེས་གསུངས་པའི་སྒོ་བྱེད་ཅེས་པ་སྔ་མ་བཞི་ཆར་གྱི་གསལ་བྱེད་དུ་སྦྱར་ཏེ་བརྟན་པ་ལ་སྒོ་བར་བྱེད། ལུང་དུ་མ་བསྟན་པ་ལ་སྒོ་བར་བྱེད། བསྒོ་བར་བྱ་བའམ་འོས་པ་ལ་སྒོ་བར་བྱེད། སྒོ་བར་བྱེད་པ་དང་རྒྱུད་གཅིག་ལ་དུས་གཅིག་ཏུ་འབྲེལ་བ་ལ་སྒོ་བར་བྱེད། ཅེས་པ་སྟེ། བསྒོ་བའི་གཞི་ཁྱད་ཆོས་བཞི་ལྡན་དུ་གསུངས་ལ། དོན་གསང་ལས་དེའི་སྟེང་དུ། གཙོ་བོའམ་རྟེན་དུ་གྱུར་པ་སྟེ་ཁྱད་ཆོས་ལྔ་ལྡན་དུ་བཤད་དོ། །དེ་ལས་གཞན་དུ་མིན། །ཞེས་པ་ནི། བག་ཆགས་རང་གི་མཚན་ཉིད་དེ། དེ་ལྟར་ཁྱད་ཆོས་བཞི་ལྡན་གྱི་བསྒོ་གཞི་ལ་བསྒོས་པས་བསྒོ་གཞི་དེ་ལས་གཞན་དུ་མིན། ཞེས་པ་ཡིན་གྱི་སྒོ་བྱེད་ཅེས་པའི་ཚིག་དང་འབྲེལ་པ་ནི་མ་ཡིན་ནོ། །དེ་ལ་བག་ཆགས་བསྒོ་བར་བྱ་བའི་གཞི་ལ་བརྟན་པ་ཞིག་དགོས་སྟེ། བག་ཆགས་བསྒོས་པའི་དགོས་པ་ནི་དུས་ཕྱིས་རང་གི་འབྲས་བུ་སྐྱེད་པར་བྱེད་པ་ཡིན་ལ། གཞི་དེ་རླུང་བཞིན་དུ་གཡོ་བ་དང་། སྒྲ་བཞིན་ཏུ་རྒྱུན་མེད་པ་ཡིན་ན། བསྒོས་པ་ཆུད་ཟོས་པའི་ཉེས་པར་འགྱུར་བའི་ཕྱིར་རོ། །དཔེར་ན་མེ་ཏོག་དྲི་ཞིམ་པོའི་དྲི་སྒོ་བ་ན་ཏིལ་ལྟ་བུ་རྒྱུན་བརྟན་པ་ཞིག་ལ་སྒོ་ཡི། རླུང་ལ་མི་སྒོ་བ་བཞིན་ནོ། །འདིས་ཚོགས་བདུན་དང་། གཟུགས་བསྒོ་གཞི་ཡིན་པ་བསལ་ཏེ། ཚོགས་དྲུག་ནི་གནས་སྐབས་ལྔར་རྒྱུན་ཆད་པའི་ཕྱིར་དང་། ཉོན་ཡིད་ནི་འགོག་སྙོམས་དང་། འདས་ལམ་མངོན་དུ་གྱུར་པ་ན་རྒྱུན་མེད་པའི་ཕྱིར་དང་། གཟུགས་ནི་གཟུགས་མེད་ཁམས་ན་རྒྱུན་མེད་པའི་ཕྱིར། འོ་ན་ཀུན་གཞི་ཡང་ཕུང་པོ་ལྷག་མེད་དུ་རྒྱུན་ཆད་པས་བསྒོ་བྱ་མ་ཡིན་པར་ཐལ་ལོ་ཞེ་ན། ཇི་སྲིད་སྒོ་བྱེད་ཡོད་པ་དེ་སྲིད་དུ་རྒྱུན་བརྟན་པ་ལ་བསྒོས་པས་མི་འགལ་ལོ། །ཡང་བསྒོ་བའི་གཞི་དེ་མཐའ་གཅིག་ཏུ་ལུང་དུ་མ་བསྟན་པ་དགོས་ཏེ། དཔེར་ན་མེ་ཏོག་གི་དྲི་སྒོ་བ་ན་ཏིལ་ལྟ་བུ་དྲི་མཉམ་པ་ཁོ་ན་བསྒོ་བར་བྱ་བའི་གཞི་འཐད་ཀྱི་སྒོག་སྐྱ་དང་གླ་རྩི་ལྟ་བུ་ཤིན་ཏུ་གསལ་བ་ལ་མི་འཆགས་པ་ལྟར་འཇུག་ཤེས་དྲུག་པོ་དགེ་མི་དགེར་འགྱུར་བས་དེ་ལ་མི་བསྒོ་ཡི་ཀུན་གཞི་མཐའ་གཅིག་ཏུ་ལུང་དུ་མ་བསྟན་པ་ཡིན་པས་དེ་ལ་བསྒོའོ། །འོ་ན་མེ་ལོང་ལྟ་བུའི་ཡེ་ཤེས་ལ་བག་ཆགས་འཇོག་ན་དགེ་བ་ལ་ཡང་འཇོག་པར་འགྱུར་བ་དང་། སྔོན་གྱི་སངས་རྒྱས་དུས་རིང་པོར་བག་ཆགས་བསྒོས་པ་རྣམས་ལས། ད་ལྟར་གྱི་སངས་རྒྱས་བག་ཆགས་ཉུང་བས་ཡོན་ཏན་དམན་པར་འགྱུར་ལ། མི་འཇོག་ན་མཉམ་པ་ཉིད་ཀྱི་ཡེ་ཤེས་སོགས་རྒྱུ་མེད་དུ་འགྱུར་རོ་ཞེ་ན། མི་འཇོག་པས་སྐྱོན་དང་པོ་མེད་ལ། མཉམ་ཉིད་ཡེ་ཤེས་སོགས་རྒྱུ་མེད་དུ་ཡང་མི་འགྱུར་ཏེ། ཟག་མེད་ཀྱི་ས་བོན་གྱི་རྒྱུན་རྡོ་རྗེ་ལྟ་བུའི་དུས་སུ་ཅིག་ཅར་ཡོངས་སུ་རྒྱས་པ་ལས་འབྱུང་བའི་ཕྱིར་རོ། །ཡང་བསྒོ་བར་བྱ་བའམ། སྒོ་བར་ནུས་པ་ཞིག་དགོས་ཏེ་མཁྲེགས་པ་རྡོ་བ་ལ་སོགས་པ་ལ་དྲི་མི་བསྒོ་བ་ལྟར་མི་རྟག་པ་ལ་སྒོ་ཡི། རྟག་པ་ནམ་མཁའ་ལྟ་བུ་སོགས་ལ་མ་ཡིན་པའི་ཕྱིར་ཏེ། སྔར་བག་ཆགས་བསྒོ་བར་བྱ་བའི་གཞི་དེ་འབྲས་བུ་དེ་དང་དེ་སྐྱེད་པའི་ནུས་པ་དང་མི་ལྡན་པའམ་ནུས་པ་མཐུ་ཆུང་ངུར་འདུག་པ་ལ་ཕྱིས་ནུས་པ་དང་ལྡན་པའམ་ནུས་པ་མཐུ་ཅན་དུ་གྱུར་པ་དགོས་པའི་ཕྱིར་རོ། །ཡང་སྒོ་བྱེད་རྒྱུད་གཅིག་ལ་དུས་མཉམ་དུ་འབྲེལ་པ་དགོས་ཏེ། རྒྱུད་གཞན་ལ་སྒོ་ན་གང་ཟག་གང་ཞིག་གིས་མི་དགེ་བའི་ལས་མི་སྤྱད་ཀྱང་གཞན་གྱི་མི་དགེ་བ་བསྒོས་པས་ངན་སོང་དུ་སྐྱེ་བར་ཐལ་བའི་ཕྱིར་དང་། རྒྱུད་གཅིག་ལ་ཡང་དུས་ཐ་དད་པ་ནི་གང་རུང་གཅིག་དངོས་པོར་ཡོད་པའི་ཚེ་གཅིག་ཤོས་དངོས་པོར་མེད་པས་བསྒོ་བྱ་སྒོ་བྱེད་དུ་མི་རུང་བའི་ཕྱིར། འོ་ན་མཁན་པོ་དང་སློབ་དཔོན་གྱིས་སློབ་མ་ལ་སྡོམ་པ་འབོགས་པའི་དུས་སུ་སློབ་མའི་རྒྱུད་ལ་སྡོམ་པའི་བག་ཆགས་སྒོའམ་མི་སྒོ་མི་སྒོ་ན་སྡོམ་པ་བླངས་པ་དོན་མེད་པར་འགྱུར་ཞིང་། སྒོ་ན་རྒྱུད་ཐ་དད་པ་གཉིས་ཀྱང་བསྒོ་བར་བྱ་བའི་གཞིར་རུང་བར་ཐལ་བ་དང་། གཞན་ཡང་སློབ་དཔོན་གྱིས་སློབ་མ་ལ་ཆོས་བཤད་པ་དག་ལ་ཡང་མཚུངས་སོ་ཞེ་ན། དངོས་སུ་སྡོམ་པ་དང་། ཐོས་པའི་བག་ཆགས་མི་སྒོ་སྟེ། མཁན་སློབ་ཀྱི་ཆོ་ག་དང་། སློབ་དཔོན་གྱིས་ཆོས་བཤད་པ་རྒྱུར་བྱས་ནས་དེའི་རྗེས་སུ་བག་ཆགས་བསྒོ་དགོས་ལ། དངོས་སུ་སྒོ་ན་བསྒོ་བྱ་སྒོ་བྱེད་དུས་མཉམ་པ་དགོས་པའི་ཕྱིར། འོན་ཀྱང་སྡོམ་པ་བླངས་པ་དང་། ཐོས་པ་བྱས་པ་དོན་མེད་དུ་མི་འགྱུར་ཏེ། མཁན་སློབ་ཀྱི་ཆོ་ག་དང་། བཤད་པས་རྐྱེན་བྱས་ནས་སློབ་མ་རང་གི་རྒྱུད་ཀྱི་དེ་ཐོས་པའི་ཉན་ཤེས་དང་། དེ་སེམས་པའི་ཡིད་ཤེས་ཀྱི་རང་དང་དུས་མཉམ་པའི་ཀུན་གཞི་ལ་བག་ཆགས་དངོས་སུ་སྒོ་བའི་ཕྱིར། དོན་གསང་ལས། བསྒོ་བར་བྱ་བའི་གཞི་ལ་གཙོ་བོའམ་རྟེན་དུ་རུང་བ་ཞིག་དགོས་ཀྱི། འཁོར་རམ་བརྟེན་པ་ནི་ས་བོན་བསྒོ་བར་བྱ་བའི་གཞིར་མི་འཐད་པས་ཀུན་གཞི་གཙོ་བོ་དང་རྟེན་ཡིན་པས་བསྒོ་བའི་གཞིར་འཐད་ཀྱི་དེའི་འཁོར་གྱི་རེག་པ་ལ་སོགས་པ་ནི་དེ་ལྟར་མ་ཡིན་པས་བསྒོ་གཞིར་མི་འཐད་དོ། །ཞེས་ཀྱང་བཤད་དོ། །གཉིས་པ་ནི། བསྒོ་བྱ་དང་འབྲེལ་བ་གཉིས་དང་ལྡན་ཅིང་། བསྒོ་བྱ་ལས་ནུས་པ་རྗེས་སུ་བཞག་ཏུ་རུང་བ་སྟེ། ཚོགས་བདུན་མཚུངས་ལྡན་དང་བཅས་པའོ། །འོ་ན་ཀུན་གཞིའི་འཁོར་གྱི་ཀུན་འགྲོ་ལྔས་རང་ཉིད་བསྐྱེད་པའི་བག་ཆགས་འགོད་དམ་མི་འགོད་ཅེ་ན། དོན་གསང་དུ་སློབ་དཔོན་ཁ་ཅིག དེ་རྣམས་དང་ཀུན་གཞི་ཕན་ཚུན་རྒྱུ་ཡིན་པས་འགོད་པའོ། །ཞེས་པ་དང་། ཁ་ཅིག་དེ་རྣམས་རྣམ་སྨིན་ལུང་བསྟན་དུ་མེད་པས་མི་གསལ་བའི་ཕྱིར་བག་ཆགས་སྐྱེད་མི་ནུས་ཀྱི་ལས་ཀྱི་འཕེན་བྱེད་ཁོ་ནས་མ་ཤིའི་བར་དུ་འབྱུང་ངོ་། །ཞེས་ཟེར་རོ། །ཞེས་འབྱུང་ངོ་། །གསུམ་པ་ནི། ཏིལ་དང་མེ་ཏོག་དྲི་ཞིམ་པོ་ལྷན་ཅིག་བཞག་སྟེ་དྲི་བསྒོས་པས་ཏིལ་ལ་མེ་ཏོག་གི་དྲིའི་རྒྱུན་ཆགས་པ་ལྟར་ཀུན་གཞི་དང་ཚོགས་བདུན་དགེ་མི་དགེ་ལུང་མ་བསྟན་དུ་སྐྱེས་པ་རྣམས་སྐྱེ་འགགས་ལྷན་ཅིག་བྱས་པས་སྒོ་བྱེད་འགགས་ཀྱང་། དེ་དང་རིགས་འདྲའམ་རིགས་མི་འདྲའི་བག་ཆགས་ཀྱི་རྒྱུན་ཀུན་གཞི་ལ་རྗེས་སུ་བཞག་པ་སྟེ། ཐེག་བསྡུས་སུ། བག་ཆགས་ཞེས་བྱ་བ་འདི་ཅི་ཞིག བག་ཆགས་ཞེས་བྱ་བ་འདིའི་བརྗོད་བྱ་ནི་ཅི་ཞེ་ན། ཆོས་དེ་ལྷན་ཅིག་འབྱུང་བ་དང་འགགས་པ་ལ་བརྟེན་ནས་དེ་འབྱུང་བའི་རྒྱུ་རྐྱེན་ཉིད་གང་ཡིན་པ་དེ་ནི་བརྗོད་པར་བྱ་བ་སྟེ། དཔེར་ན་ཏིལ་དག་ལ་མེ་ཏོག་གིས་བསྒོས་པ་ཏིལ་དང་མེ་ཏོག་ལྷན་ཅིག་འབྱུང་ཞིང་འགགས་ཀྱང་ཏིལ་རྣམས་དེའི་དྲི་གཞན་འབྱུང་བའི་རྒྱུ་རྐྱེན་ཉིད་དུ་འབྱུང་བ་དང་། འདོད་ཆགས་ལ་སོགས་པ་ལ་སྤྱོད་པ་རྣམས་ཀྱི་འདོད་ཆགས་ལ་སོགས་པའི་བག་ཆགས་ལ་སོགས་པ་དང་ལྷན་ཅིག་འབྱུང་ཞིང་འགགས་ཀྱང་སེམས་ནི་དེའི་རྒྱུ་རྐྱེན་ཉིད་དུ་འབྱུང་བ་དང་། མང་དུ་ཐོས་པ་རྣམས་ཀྱི་མང་དུ་ཐོས་པའི་བག་ཆགས་ཀྱང་ཐོས་པ་དེ་ཡིད་ལ་བྱེད་པ་དང་ལྷན་ཅིག་འབྱུང་ཞིང་འགགས་ཀྱང་སེམས་ནི་དེ་རྗོད་པའི་རྒྱུ་རྐྱེན་ཉིད་དུ་འབྱུང་སྟེ། བག་ཆགས་དེས་ཡོངས་སུ་ཟིན་པས་ཆོས་འཛིན་པ་ཞེས་བྱ་བ་ལྟར་ཀུན་གཞིའི་རྣམ་པར་ཤེས་པ་ལ་ཡང་ཚུལ་དེ་བཞིན་དུ་བལྟ་བར་བྱའོ། །ཞེས་གསུངས་སོ། །བཞི་པ་ནི་ཐེག་བསྡུས་སུ་གསུངས་པ། ཕྱི་དང་ནང་དང་མི་གསལ་བ། །གཉིས་དང་ཀུན་རྫོབ་ཉིད་དང་ནི། །དམ་པའི་དོན་ཏེ་དེ་རྣམ་ཀུན། །ས་བོན་རྣམ་པ་དྲུག་ཏུ་འདོད། །སྐད་ཅིག་པ་དང་ལྷན་ཅིག་འབྱུང་། །དེ་ནི་རྒྱུན་ཆགས་འབྱུང་བར་འདོད། །ངེས་དང་རྐྱེན་ལ་ལྟོས་པ་དང་། །རང་གི་འབྲས་བུ་སྒྲུབ་པ་འོ། །ཞེས་ཏེ། ཕྱིའི་ནི་སཱ་ལུ་དང་ཨུཏྤ་ལའི་རྩ་བ་སོགས་སོ། །ནང་གི་ནི་ཀུན་གཞི་ལ་ཡོད་པའོ། །མི་གསལ་བ་གཉིས་ནི་དགེ་མི་དགེའམ་ཉོན་མོངས་དང་རྣམ་བྱང་དུ་མི་གསལ་བ་སྟེ། མ་བསྒྲིབས་ལ་ལུང་དུ་མ་བསྟན་པའོ། །ཀུན་རྫོབ་ནི་ཕྱིའི་སྟེ་ཐ་སྙད་པའི་ཤེས་པའི་ཡུལ་ཡིན་པས་སོ། །དོན་དམ་པ་ནི་ནང་གི་སྟེ་བརྟགས་བཟོད་པས་ཡོངས་སུ་གྲུབ་པའི་ཕྱིར་རོ། །སྐད་ཅིག་པ་ནི་ཕྱི་ནང་གི་ས་བོན་གཉིས་ཀ་སྟེ། རྟག་པ་ལ་འབྲས་བུ་མི་འབྱུང་བས་སོ། །ལྷན་ཅིག་འབྱུང་བ་ནི་ས་བོན་དང་འབྲས་བུ་དུས་མཉམ་དུ་གནས་པ་ལ་བཤད་དེ། སྐད་ཅིག་གཞན་གྱི་བར་མ་ཆོད་པ་ལ་དགོངས་པར་མངོན་ནོ། །རྒྱུན་ཆགས་སུ་འབྱུང་བ་ནི་འགལ་རྐྱེན་དང་མ་འཕྲད་པ་དང་འབྲས་བུ་མ་བྱུང་གི་བར་དུའོ། །ཅི་སྟེ་རྒྱུན་ཆགས་སུ་འབྱུང་ན་ཀུན་ལས་ཅིས་མི་འབྱུང་ཞེ་ན། ནུས་པ་ངེས་པ་ལས་འགའ་ཁོ་ན་ལས་འགའ་འབྱུང་ངོ་། །ངེས་ཀྱང་རྟག་ཏུ་མི་འབྱིན་པ་ཅི་ཞེ་ན། རྐྱེན་ལ་ལྟོས་པས་ཏེ། རྟག་ཏུ་རྐྱེན་ཉེ་བར་མ་ངེས་པས་སོ། །ས་བོན་དེའི་ས་བོན་ཅི་ཞེ་ན། རང་གི་འབྲས་བུ་སྒྲུབ་པ་སྟེ། ས་བོན་དང་ས་བོན་ཅན་ཐོག་མ་མེད་པས་སྔ་མས་ཕྱི་མ་བསྐྱེད་པའོ། །ཡང་མངོན་པར་བརྗོད་པའི་བག་ཆགས་དང་། བདག་ཏུ་ལྟ་བའི་དང་། སྲིད་པའི་ཡན་ལག་གི་བག་ཆགས་ཏེ་རིམ་པ་ལྟར། ལྷ་དང་མི་དང་འགྲོ་བའོ་ཞེས་སོགས་བརྗོད་པ་སྣ་ཚོགས་འབྱུང་བའི་ས་བོན་དང་། ཉོན་ཡིད་འཇིག་ཚོགས་ལ་ལྟ་བའི་དབང་གི་ཀུན་གཞི་ལ་བདག་གོ་སྙམ་པའི་རྒྱུ་དང་། བསོད་ནམས་སོགས་ཀྱི་འདུ་བྱེད་ཀྱི་དབང་གིས་འགྲོ་བ་དྲུག་ཏུ་མ་རིག་པ་ནས་རྒ་ཤིའི་བར་སྐྱེ་བའི་རྒྱུའོ། །ཡང་ལས་ཀྱི་བག་ཆགས་སྲིད་པའི་ཡན་ལག་གི་བག་ཆགས་དེ་ཉིད་དང་། འཛིན་པ་གཉིས་ཀྱི་བག་ཆགས་ཞེས་བྱ་བ་ཤེས་པ་ལས་གུད་ན་རང་རྒྱུད་པའི་གཟུང་བ་ཡོད་པར་ཞེན་ཅིང་། དེ་ཤེས་པས་རྟོགས་པར་ཞེན་པ་སྟེ་གཟུང་བར་འཛིན་པ་དང་འཛིན་པར་འཛིན་པ་དག་སྐྱེད་པའི་ས་བོན་དང་། དེ་སུམ་ཅུ་པར་གསུངས་པ། ལས་ཀྱི་བག་ཆགས་འཛིན་གཉིས་ཀྱི། །བག་ཆགས་བཅས་པ་སྔ་མ་ཡི། །ཞེས་སོ། །ཡང་རྣམ་སྨིན་གྱི་བག་ཆགས་དང་། རྒྱུ་རྐྱེན་གྱི་བག་ཆགས་གཉིས་ཏེ། རིམ་པས་མི་དགེ་བ་དང་དགེ་བ་ཟག་བཅས་ཀྱིས་སྐྱེ་བ་གཞན་དུ་ཀུན་གཞི་ཉིད་སྐྱེད་པའི་ས་བོན་དང་། དགེ་མི་དགེ་ལུང་མ་བསྟན་རྣམས་ཀྱིས་རང་དང་རིགས་འདྲ་སྐྱེད་པའི་ས་བོན་བཞག་པའོ། །ཡང་འདི་ཉིད་དུ་གནས་ངན་ལེན་ཉེར་བཞིར་ཡང་ཕྱེ་སྟེ་ཕྱིས་འཆད་དོ། །ལྔ་པ་ལ་གསུམ་སྟེ། བག་ཆགས་ཀྱི་ངོ་བོ་དཔྱད་པ། གཅིག་དང་ཐ་དད་དཔྱད་པ། འཇོག་ཚུལ་དཔྱད་པའོ། །དང་པོ་ལ་མི་འཐད་པ་དགག་པ། འཐད་པ་འགོད་པ། རྩོད་པ་སྤོང་བའོ། །དང་པོ་ནི། སློབ་དཔོན་རོག་སོགས། སྒོ་བྱེད་དགེ་མི་དགེ་ལུང་མ་བསྟན་གྱིས་བསྒོས་པའི་བག་ཆགས་རང་དང་འདྲ་བར་ཡོད་དེ། འདི་ཉིད་དུ་རྗེས་སུ་འབྲེལ་བའི་དགེ་མི་དགེ་བག་ཆགས་ལ་བཤད་པའི་ཕྱིར་དང་། ཡང་དགེ་བས་བཞག་པའི་བག་ཆགས་དེ་དགེ་བ་ཉིད་ཡིན་ཏེ། འབྲས་བུ་སྡུག་པ་འཛིན་པའི་ཕྱིར་རོ། །དེ་བཞིན་དུ་མི་དགེ་བ་ལ་ཡང་བཟློག་སྟེ་སྦྱར་རོ། །ཀུན་གཞི་དགེ་མི་དགེར་འགྱུར་ཏེ། དགེ་མི་དགེ་དང་བག་ཆགས་བདག་གཅིག་པས་སོ་ཞེ་ན་ནི། དགེ་མི་དགེ་མངོན་གྱུར་དང་གཅིག་པར་ནི་མ་གྲུབ་ཅིང་། དགེ་མི་དགེའི་ས་བོན་དང་བདག་གཅིག་པ་ནི་མ་ངེས་ཏེ། མེ་དུ་བ་སྐྱེད་པའི་ནུས་པ་དང་གཅིག་ཀྱང་དུ་བར་མི་འགྱུར་བ་བཞིན་ནོ། །ཞེས་གསུངས་སོ། །སློབ་དཔོན་འབེན་སོགས་དེ་མི་འཐད་དེ། རྗེས་སུ་འབྲེལ་བའི་དགེ་མི་དགེ་བཏགས་པ་བ་ནི། རྗེས་སུ་འབྲེལ་བའི་གཟུགས་བརྙན་ལྟར་རོ། །སྡུག་པའི་འབྲས་བུ་འཛིན་པས་དགེ་བ་ཡིན་ཞེས་པ་ཡང་གཉིས་ལས། འཕེན་པས་འཛིན་པ་ནི་བག་ཆགས་ཀྱིས་མི་ནུས་ཏེ། དགྲ་བཅོམ་པ་ལ་ཡང་འཕེན་པ་ཡོད་པར་ཐལ་བའི་ཕྱིར་རོ། །སྐྱེད་པས་འཛིན་པ་ཡིན་ན་མ་ངེས་ཏེ། བདེ་འགྲོའི་མིག་གི་དབང་པོ་སྔ་མས་ཀྱང་རང་རང་རིགས་འདྲ་སྐྱེད་པས་དགེ་བར་འགྱུར་རོ། །གནོད་བྱེད་ཀྱང་ཡོད་དེ། ཐེག་བསྡུས་ཀྱི་མི་གསལ་དང་ཞེས་པའི་འགྲེལ་པ་གཉི་གར། དགེ་མི་དགེ་གཉི་གར་མི་གསལ་བ་སྟེ། ལུང་དུ་མ་བསྟན་པའོ་ཞེས་པའི་དོན་ནོ། །ཞེས་བཤད་ཅིང་། དགེ་མི་དགེ་མཚན་ཉིད་པ་གཉིས་ངོ་བོ་གཅིག་ཏུ་འགྱུར་ཏེ། དེ་དག་གི་བར་ཆགས་ཀུན་གཞི་དང་རྫས་གཅིག་པས་སོ། །འདོད་ན། དེ་དག་འགལ་བ་མ་ཡིན་པར་ཐལ་ལོ། །ཡང་བག་ཆགས་ནི་ཀུན་གཞི་དང་ཐ་དད་དུ་ཐལ་ཏེ། ཀུན་གཞི་དང་ངོ་བོ་འགལ་བའི་ཕྱིར་སྔོ་སེར་བཞིན་ནོ། །ཡང་བསམ་གཏན་དང་པོ་ཡན་ཆད་པའི་རྒྱུད་ལ་མི་དགེ་བ་ཡོད་པར་ཐལ་ཏེ། དེའི་བག་ཆགས་ཡོད་པའི་ཕྱིར་རོ། །ཞེས་གསུངས་སོ། །གཉིས་པ་ནི། འཇོག་བྱེད་དགེ་མི་དགེ་ལུང་མ་བསྟན་གང་གིས་བཞག་ཀྱང་བག་ཆགས་ལུང་མ་བསྟན་ཉིད་དེ། ཀུན་གཞི་ལུང་མ་བསྟན་དང་རྫས་གཅིག་པས་སོ། །ཐེགས་བསྡུས་སོགས་སུ། བག་ཆགས་སྣ་ཚོགས་མ་ཡིན་པ་ཆོས་ཐ་དད་སྣ་ཚོགས་ཀྱི་རྒྱུར་འགྱུར་བ་ཚིག་གུའི་རྩི་སྣ་ཚོགས་ཀྱིས་སྒྱུར་བའི་རས་སྣ་ཚོགས་སུ་མི་སྣང་ཡང་ཚོན་གྱི་སྣོད་དུ་བཅུག་པ་ན་སྣ་ཚོགས་སྟོན་པའི་དཔེས་གསུངས་པའི་ཕྱིར་ཏེ། རས་ལྟ་བུ་ཀུན་གཞི་དང་ཚོན་ལྟ་བུ་ཚོས་སྣ་ཚོགས་སྟོན་པའོ། །གསུམ་པ་ལ་གསུམ་སྟེ། རྒྱུ་མཐུན་གྱི་བག་ཆགས་མི་སྲིད་པ་སྤང་བ་དང་། ལུང་མ་བསྟན་ལ་རྣམ་སྨིན་ཡོད་པ་སྤང་བ་དང་། དགེ་བ་རྒྱུན་ཆགས་པའི་ལུང་དང་འགལ་བ་སྤང་བའོ། །དང་པོ་ནི། དགེ་མི་དགེའི་བག་ཆགས་ལུང་མ་བསྟན་ལས་འབྲས་བུ་དགེ་མི་དགེ་འབྱུང་ན། རྒྱུ་མཐུན་རྒྱུ་དང་འདྲ་བའོ། །ཞེས་པ་མེད་པས་བག་ཆགས་ལས་རྒྱུ་མཐུན་གྱི་འབྲས་བུ་དགེ་མི་དགེ་འབྱུང་བར་མི་སྲིད་པར་ཐལ་ལོ་ཞེ་ན། བག་ཆགས་འཇོག་བྱེད་དང་། བག་ཆགས་ཀྱི་འབྲས་བུ་འདྲ་བ་ལ་དགེ་མི་དགེའི་རྒྱུ་མཐུན་གྱི་བག་ཆགས་སུ་འཇོག་པས་སྐྱོན་མེད་དོ། །གཉིས་པ་ནི། བག་ཆགས་ལུང་མ་བསྟན་གྱིས་བདེ་འགྲོ་དང་ངན་འགྲོ་སྐྱེད་པས་ན་ལུང་མ་བསྟན་ལ་རྣམ་སྨིན་ཡོད་པར་ཐལ་ལོ་ཞེ་ན། དེས་བདེ་འགྲོའམ་ངན་འགྲོ་སྐྱེད་མོད་ཀྱི་དེ་ཙམ་གྱིས་རྣམ་སྨིན་གྱི་རྒྱུར་མི་འགྱུར་ཏེ། ཀུན་གཞི་དང་ལུས་ཀྱི་དབང་པོ་དག་གི་སྐད་ཅིག་སྔ་མ་བཞིན་ནོ། །བག་ཆགས་ཀྱིས་རྣམ་སྨིན་འཕེན་པ་ནི་མིན་ཏེ། འཕངས་ཟིན་པས་སོ། །གསུམ་པ་ནི། སྡོམ་པ་གསུམ་དང་ཅི་རིགས་པར་ལྡན་པའི་གང་ཟག་གཉིད་འཐུག་པོར་ལོག་པ་ན་དགེ་བ་མེད་པར་ཐལ། དགེ་བའི་བག་ཆགས་ཙམ་ལས། གཞན་པའི་དགེ་བ་མེད་པའི་ཕྱིར། འདོད་ན་བྱེ་བཤད་སོགས་སུ་སྡོམ་པ་རྒྱུན་ཆགས་སུ་འབྱུང་བར་བཤད་པ་དང་། སྤྱོད་འཇུག་ཏུ། སེམས་དེ་ཡང་དག་བླངས་གྱུར་པ། །དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་པ་དང་འགལ་ལོ་ཞེ་ན། དེ་དུས་ན་དགེ་བའི་ནུས་པ་ཡོད་པ་ཙམ་ལ་དགོངས་པས་མི་འགལ་ཏེ། ཐེག་བསྡུས་བཤད་སྦྱར་དུའང་། ནུས་པའི་རང་བཞིན་གྱི་ཁྱད་པར་གྱི་ཕྱིར། ཞེས་བཤད་དོ། །གཞན་དུ་ན་མི་དགེ་བའི་བག་ཆགས་ཅན་གྱི་རྒྱུད་ལ་དགེ་བ་མངོན་གྱུར་དྲག་པོ་སྐྱེས་པ་ན་རྒྱུད་གཅིག་ལ་དགེ་མི་དགེ་མཚན་ཉིད་པ་གཉིས་ཅིག་ཅར་དུ་སྐྱེ་བར་འགྱུར་ཞིང་། འདོད་ན། དགེ་མི་དགེ་ལྷན་ཅིག་མི་གནས་པའི་འགལ་བ་མ་ཡིན་པར་ཐལ་ལོ། །གཉིས་པ་ནི། བག་ཆགས་དང་ཀུན་གཞི་རྫས་གཅིག་ན་དེ་འདྲ་བར་ས་བོན་ཡང་མ་བསྒྲིབས་ལུང་མ་བསྟན་དུ་འགྱུར་བས། དེ་ལས་དེ་འདྲ་བ་འབྱུང་གི་དགེ་མི་དགེ་མི་འབྱུང་བར་འགྱུར་རོ། །འོན་ཏེ་ཐ་དད་ན། ས་བོན་དེ་རྣམས་སེམས་དང་སེམས་བྱུང་ཡིན་པས་རྟེན་གཅིག་ལ་སེམས་ཅན་གྱི་རྒྱུད་མང་པོར་འགྱུར་རོ། །དེ་ནི་སེམས་བྱུང་མང་པོ་ཅིག་ཅར་འབྱུང་ཡང་རྒྱུད་མང་པོར་མི་འགྱུར་བ་ལྟར་ཡིན་ནོ་སྙམ་ན། མི་འདྲ་སྟེ་སེམས་བྱུང་རྣམས་ནི་སེམས་ལ་རག་ལས་ནས་འབྱུང་བས་སོ། །ཡང་འཇུག་པའི་རྣམ་ཤེས་བདུན་ཅིག་ཅར་དུ་འབྱུང་ཡང་རྒྱུད་དུ་མར་མི་འགྱུར་བ་ལྟར་ཡིན་ནོ་སྙམ་ན་དེ་རྣམས་ནི་ཀུན་གཞི་ལ་རག་ལས་ཏེ་འབྱུང་བས་སོ། །ས་བོན་རྣམས་ནི་སེམས་དང་སེམས་བྱུང་ཡིན་ཞིང་། ཀུན་གཞི་ལས་ཐ་དད་པར་རང་དབང་དུ་གནས་པའི་ཕྱིར། རྒྱུད་དུ་མར་གནས་པ་སོ་ན་གནས་སོ་ཞེ་ན། འདིའི་ལན་ལ། ཐེག་བསྡུས་སུ། ཀུན་གཞིའི་རྣམ་པར་ཤེས་པ་དང་། ཀུན་ནས་ཉོན་མོངས་པའི་ཆོས་ཀྱི་ས་བོན་དེ་དག་ཅི་སོ་སོར་ཐ་དད་པའི་ཆོས་གཅིག་ཡིན་ནམ་འོན་ཏེ་ཐ་དད་པ་མ་ཡིན་པར་གནས་ཞེ་ན། དེ་ལ་གནས་པ་དེ་དག་དང་རྫས་སུ་ཐ་དད་པ་ཡང་མ་ཡིན་ལ་ཐ་མི་དད་པ་ཡང་མ་ཡིན་གྱི་ཞེས་གསུངས་པ་འདིའི་དོན་ལ། དོན་གསང་དུ་བཤད་པའི་ཚུལ་དང་། བོད་ཀྱི་བཤད་པའི་ཚུལ་དང་། འཐད་པའི་ཕྱོགས་ངོས་བཟུང་བ་གསུམ་ལས། དང་པོ་ནི། དོན་གསང་ལས། དེ་ལྟར་གྲགས་པ་གཞན་ཡང་ཡོད་དམ་ཞེ་ན་ཡོད་དེ། བྱེ་བྲག་སྨྲ་བས། འབྲས་བུ་འཛིན་པ་ནི་རྫས་ལས་གཞན་མ་ཡིན་ཏེ། རྫས་བྱེད་པས་སྟོང་པས་ད་ལྟ་བ་མ་ཡིན་པར་ཐལ་བར་འགྱུར་བས་སོ། །རྫས་ཉིད་ཀྱང་མ་ཡིན་ཏེ། འདས་པ་ལ་ཡང་རྫས་ཡོད་པས་འབྲས་བུ་འཛིན་པའི་བྱེད་པ་ཡོད་པའི་ཕྱིར། ད་ལྟ་བར་ཐལ་བས་སོ། །ཡང་མདོ་སྡེ་པའི་ལུགས་ལ་གཟུགས་མེད་དུ་འཕགས་པས་ལམ་མངོན་དུ་བྱས་པ་ན་སེམས་དང་ཉོན་མོངས་པའི་ས་བོན་རྣམས་དེ་ཉིད་མ་ཡིན་ཏེ། ས་བོན་རྣམས་ཟག་མེད་དུ་འགྱུར་བས་སོ། །ཐ་དད་ཀྱང་མ་ཡིན་ཏེ། རྒྱུད་དུ་མར་འགྱུར་བས་སོ། །ཞེས་བཤད་དོ། །འོན་ཀྱང་སྡེ་པ་དེ་དག་གི་འདོད་པ་ནི་ཀུན་གཞི་ཁས་མི་ལེན་པའི་ཉེས་པ་ཡིན་པས་ནང་འགལ་ཡང་ཡིན་ཅིང་། འདིར་ནི་ས་བོན་དངོས་པོ་ཡིན་པས་དེ་ཉིད་དང་གཞན་ཉིད་དུ་བརྗོད་དུ་མེད་པ་མི་འཐད་པའི་ཕྱིར་རོ། །ཅི་སྟེ་དབུ་མ་པས་བདེན་གཉིས་དེ་ཉིད་དང་གཞན་ཉིད་དུ་བརྗོད་དུ་མེད་པ་བཞིན་དུ་ཡིན་ནོ་ཞེ་ན་དེ་ཡང་མ་ཡིན་ཏེ། དབུ་མ་པས་ནི་སྤྲོས་པའི་མཐའ་གང་དུ་ཡང་མ་གྲུབ་པ་ལ་དོན་དམ་པ་ཞེས་ཐ་སྙད་བཏགས་པ་ཙམ་ཡིན་གྱི་དངོས་པོར་གྲུབ་པ་མི་འཐད་པའི་ཕྱིར་རོ། །གཉིས་པ་ནི། རེད་མདའ་བས། ཀུན་ནས་ཉོན་མོངས་པའི་ས་བོན་གང་ཡིན་པ་དེ་ཀུན་གཞི་རྣམ་ཤེས་ལས་རྫས་གཞན་དུ་ཡོད་པ་མ་ཡིན་ཏེ། དེ་གཟུགས་ཡིན་པ་མི་རིགས་པས་སེམས་དང་སེམས་བྱུང་གི་རང་བཞིན་དུ་འགྱུར་ལ། དེ་ལྟར་ན་སེམས་ཅན་རྣམས་ཀྱི་རྒྱུད་དུ་མར་ཐལ་བར་འགྱུར་བའི་ཕྱིར་རོ། །ཀུན་གཞིའི་རྣམ་ཤེས་དང་རྫས་གཅིག་པ་ཡང་མ་ཡིན་ཏེ། ཀུན་གཞིའི་རྣམ་པར་ཤེས་པ་ནི་ཀུན་ནས་ཉོན་མོངས་པའི་བག་ཆགས་ཡོངས་སུ་སྨིན་པ་མཐར་ཐུག་པའི་ངོ་བོ་ཡིན་པས་སླར་རྣམ་པར་སྨིན་པ་གཞན་འབྱིན་པའི་ནུས་པ་མེད་པ་ལྟར་ལས་ཀྱི་བག་ཆགས་དག་ལ་ཡང་རྣམ་སྨིན་འབྱིན་པའི་ནུས་པ་མེད་པར་ཐལ་བའི་ཕྱིར་དང་། ཀུན་གཞི་ལྟར་དུ་བག་ཆགས་རྣམས་ཀྱང་སྐྱེ་བ་སྔ་མའི་ལས་ཀྱི་འཕེན་པ་ལས་བྱུང་བའི་རྣམ་པར་སྨིན་པར་འགྱུར་གྱི། ཚེ་འདིའི་སྒོ་བྱེད་ཀྱི་རྐྱེན་ལ་མི་ལྟོས་པར་ཐལ་བར་འགྱུར་བའི་ཕྱིར་རོ། །དེ་ལྟར་ན་རྫས་གཅིག་པ་དང་། ཐ་དད་པའི་ཕྱོགས་གཉིས་ཀ་ལ་ཡང་རིག་པས་གནོད་པས་མི་འཐད་ལ། མཚན་ཉིད་ནི་ཐ་དད་པ་ལ་རིག་པས་བརྟག་པར་ནུས་པའི་ཕྱིར་ཐ་དད་པ་ཁོ་ན་ཡིན་ནོ། །ཞེས་བཞེད་དོ། །དེ་ལ་བག་ཆགས་རྫས་སུ་མ་གྲུབ་པ་ནི་སྔར་བཀག་ཟིན་ཅིང་། རྫས་གཅིག་ཡིན་པའི་ཕྱོགས་ལ་གནོད་བྱེད་བརྗོད་པ་ཡང་མི་འཐད་དེ། ལས་ཀྱི་བག་ཆགས་ལ་རྣམ་སྨིན་འབྱིན་པའི་ནུས་པ་མེད་པར་ཐལ། ཞེས་པའི་དོན་རྣམ་སྨིན་འཕེན་བྱེད་མ་ཡིན་པར་ཐལ་བའི་དོན་ཡིན་ན་ནི། ཤིན་ཏུ་འདོད་དེ། བག་ཆགས་དེ་དགེ་བ་ཟག་བཅས་དང་མི་དགེ་བ་གང་དུ་ཡང་མི་རུང་བའི་ཕྱིར། མ་གྲུབ་ན། ཁམས་གོང་གི་གང་ཟག་གི་རྒྱུད་ལ་མི་དགེ་བའི་བག་ཆགས་མེད་པར་འགྱུར་ཞིང་དགེ་རྩ་ཆད་པའི་གང་ཟག་གི་རྒྱུད་ལ་དགེ་བའི་བག་ཆགས་མེད་པར་འགྱུར་རོ། །སྤྱིར་རྣམ་སྨིན་འབྲས་བུར་བྱས་ནས་དེའི་རྒྱུ་མ་ཡིན་པར་ཐལ་བའི་དོན་ཡིན་ན་ནི་མ་ངེས་ཏེ། ཀུན་གཞི་རྣམ་སྨིན་ཡིན་ཀྱང་སྐད་ཅིག་སྔ་མས་ཕྱི་མ་བསྐྱེད་པའི་ཕྱིར་རོ། །གསུམ་པ་ནི། བཤད་སྦྱར་དུ་མདོ་སྡེ་པའི་ལྟར་ན་དོན་གྱི་རྣམ་པ་འཛིན་པའི་བློ་དང་། རྣམ་པ་དག་དེ་ཉིད་དང་གཞན་ཉིད་མ་ཡིན་པ་དཔེར་བྱས་ནས་བཤད་པ་ལྟར་ན། ཀུན་གཞི་དང་བག་ཆགས་རྫས་གཞན་དུ་བརྗོད་དུ་མེད། བཟློག་པ་དེ་ཉིད་དུ་བརྗོད་དུ་མེད་པར་མངོན་ཏེ། མདོ་སྡེ་པའི་ལུགས་ལ་དོན་གྱི་རྣམ་པ་འཛིན་པའི་བློ་དེ་དང་རྣམ་པ་རྫས་གཅིག་ཡིན་པའི་ཕྱིར་རོ། །དེས་ན་ཐེག་བསྡུས་སུ། ཟག་མེད་ཀྱི་ས་བོན་ཐོས་པའི་བག་ཆགས་ནི་ཀུན་གཞིའི་རྣམ་ཤེས་མ་ཡིན་པར་ཆུ་དང་འོ་མ་དཔེར་བྱས་ནས་གསུངས་པ་ཡང་ཀུན་གཞིའི་ལྡོག་པ་མ་ཡིན་པ་ལ་དགོངས་ཏེ། དེ་ལྟར་མ་ཡིན་པར་དེ་ཀུན་གཞིའི་རྫས་མ་ཡིན་པའི་དངོས་པོ་ཞིག་ཡིན་ན། བེམ་པོ་དང་རིག་པ་ཅི་ཡིན་བརྟགས་ན་མི་འཐད་པས་སོ། །རྩ་བའི་རྩོད་པའི་ལན་ནི། ཀུན་གཞི་མ་བསྒྲིབས་ལུང་མ་བསྟན་ལས་དགེ་མི་དགེ་སྣ་ཚོགས་འབྱུང་བ་སེམས་ཙམ་པའི་གཞུང་ལས་ཡང་ཡང་བཤད་པས་བསལ་ལོ། །གསུམ་པ་འཇོག་ཚུལ་དཔྱད་པ་ལ་གསུམ་སྟེ། སྔོན་གྱི་སློབ་དཔོན་རྣམས་ཀྱི་ལུགས་འགོད་པ་དང་། ཕན་ཚུན་བརྒལ་ལན་གྱི་ཚུལ་བརྗོད་པ་དང་། འཐད་པའི་ལུགས་བཤད་པའོ། །དང་པོ་ལ་གྲུབ་མཐའ་གསུམ་སྟེ། རྙིང་ཁོ་ན་གསོ་བ་དང་། གསར་ཁོ་ན་སྐྱེད་པ་དང་། རྙིང་ཡང་གསོ་ལ་གསར་ཡང་སྐྱེད་པའོ། །དང་པོ་ནི། བཙུན་པ་ཡང་དག་བདེན་ཕུལ་དང་། ཟླ་བ་སྐྱོང་ལ་སོགས་པ་ན་རེ། བག་ཆགས་ནི་སྒོ་བྱེད་ལ་མི་ལྟོས་པར་ཆོས་ཉིད་ཀྱི་གནས་པ་སྒོ་བྱེད་ཀྱིས་གསོ་བར་ཟད་ཀྱི་སྔོན་མེད་སྐྱེད་པ་ནི་མ་ཡིན་ནོ། །ཞེས་གསུངས་སོ། །གཉིས་པ་ནི། སློབ་དཔོན་ཟླ་འོད་དང་། བཙུན་པ་དགའ་བོ་དང་། མཆོག་གི་སྡེ་དང་། རྟོག་གེའི་སྡེ་དང་། ཀླུའི་སྡེ་ལ་སོགས་པ་ན་རེ། ཏིལ་ལ་སོགས་པ་ལ་མེ་ཏོག་གི་དྲི་གསར་དུ་སྒོ་བར་བྱེད་པ་མཐོང་ནས་སྒོ་བར་བྱེད་པས་ཀྱང་སྔོན་མེད་པ་ཁོ་ན་སྐྱེད། གསོ་བར་བྱེད་པས་ཀྱང་སྔོན་མེད་པ་ཁོ་ན་གསོ་བར་བྱེད་ཀྱི། སྔོན་གྱི་རྙིང་པ་ནི་གསོ་བ་མ་ཡིན་ནོ་ཞེས་གསུངས་སོ། །གསུམ་པ་ནི། སློབ་དཔོན་ཐོགས་མེད་དང་། ཆོས་སྐྱོང་ལ་སོགས་པ་ན་རེ། ས་བོན་རྙིང་པ་ཡང་གསོ་ལ་གསར་པ་ཡང་སྐྱེད་དེ། དེ་ཡང་ཟག་པ་མེད་པའི་ས་བོན་དང་། རྒྱུ་མཐུན་པའི་བག་ཆགས་ཐམས་ཅད་ནི་རྙིང་པ་གསོ་ལ། ལས་ཀྱི་བག་ཆགས་ནི་གསར་པ་ཡང་སྐྱེད་ལ་རྙིང་པ་ཡང་གསོའོ། །དེ་ཡང་སྔོན་མེད་པའི་བག་ཆགས་ཐམས་ཅད་ཆོས་ཉིད་ཀྱིས་གནས་པའི་བག་ཆགས་ཀྱིས་བདག་རྐྱེན་བྱེད་ལ་དེ་གཉིས་ཀས་ཀྱང་སྐད་ཅིག་སྔ་མའི་འབྲས་བུ་སྐྱེད་པར་བྱེད་པའི་ཆ་ནས་སྔ་མ་ཕྱི་མའི་རྒྱུའི་རྐྱེན་ཉིད་དུ་སེམས་སོ། །གཉིས་པ་ནི། དང་པོ་ལ་འདོད་ཆགས་སོགས་སྒོ་བྱེད་རྣམས་ཀུན་གཞིའི་རྒྱུའི་རྐྱེན་མིན་པར་འགྱུར་ཏེ། གྲུབ་ཟིན་གསོ་བ་ཙམ་ཡིན་པའི་ཕྱིར་རོ། །དེ་ནི་སྔར་མེད་སྐྱེད་བྱེད་ཡིན་པས་སོ། །འདོད་ན། ཐེག་བསྡུས་སུ། ཀུན་གཞིའི་རྣམ་ཤེས་ཇི་ལྟ་བ་དེ་ལྟར་ཀུན་ནས་ཉོན་མོངས་པའི་ཆོས་རྣམས་ཀྱང་ཀུན་གཞིའི་རྣམ་ཤེས་ཀྱི་རྒྱུའི་རྐྱེན་དུ་བཞག་སྟེ། ཞེས་གསུངས་པ་འདི་དང་འགལ་ལོ། །ཡང་ཏིལ་སོགས་ལ་དྲི་ཆོས་ཉིད་ཀྱིས་གནས་པ་མ་མཐོང་བས་དེས་མཚོན་པའི་དོན་མེད་དོ་ཞེས་གསུངས་སོ། །དེ་ལ་དོན་གསང་དུ་ལན་བཏབ་པ་སྐྱོན་དང་པོ་མེད་དེ། བྱེ་བྲག་ཏུ་སྨྲ་བས་འདྲ་བའི་ཕྱིར་རྫས་གཞན་གྱི་སྐལ་མཉམ་གྱི་རྒྱུ་ཡིན་པ་ལྟར། སྒོ་བྱེད་རྣམས་རིགས་འདྲ་བའི་ངོས་ནས་རྒྱུའི་རྐྱེན་དང་མི་འདྲ་བའི་བག་ཆགས་འཇོག་པའི་བདག་རྐྱེན་དུ་འཇོག་པས་སོ། །སྐྱོན་ཕྱི་མ་ཡང་མེད་དེ། སྒོག་སྐྱ་དང་རྡོ་བ་སོགས་མེ་ཏོག་དང་འཕྲད་ཀྱང་དྲི་མི་འཛིན་པས་ཏིལ་སོགས་ལ་ཆོས་ཉིད་ཀྱི་དྲི་འཛིན་པ་ཡོད་པར་ཤེས་སོ། །ཞེས་དང་། གཞན་ཡང་སེམས་ཙམ་པ་ལ་ཤེས་པ་ལས་ཐ་དད་པའི་ཏིལ་སོགས་མེད་ཀྱི་འཇིག་རྟེན་ན་གྲགས་པའི་དཔེ་ཙམ་དུ་བྱས་པར་ཟད་དོ། །ཞེས་དང་། ཕྱོགས་གཉིས་པ་ལ་ཡང་བག་ཆགས་ཀུན་གཞིའི་རྣམ་ཤེས་ཕྱི་མ་རྒྱུ་མེད་དུ་འགྱུར་ཏེ། ཀུན་གཞི་དང་ཕྲད་ནས་དེ་སྐྱེད་པའི་བག་ཆགས་གསར་པ་བཞག་པ་མེད་པའི་ཕྱིར་དང་། འཕགས་པའི་ལམ་ཡང་ཆོས་མཆོག་ཡན་ཆད་དུ་སྐྱེ་མ་མྱོང་བའི་དེའི་བག་ཆགས་གསར་པ་བཞག་པ་མེད་པས་རྒྱུ་མེད་དུ་འགྱུར་རོ། །བག་ཆགས་ཆོས་ཉིད་ཀྱིས་ཡོད་ན་ཀུན་གཞི་དང་། ཟག་མེད་ཀྱི་བག་ཆགས་རྙིང་པ་ལས་དེ་དག་སྐྱེའོ་ཞེས་གླེང་ངོ་། །དེ་ལ་ཡང་སྐྱོན་དང་པོ་མེད་དེ། ནང་གི་སྐྱེ་མཆེད་ལ་དམིགས་པའི་ཡིད་ཀྱི་སྐྱེ་མཆེད་དུ་གྱུར་པའི་ཀུན་གཞི་ལ་ཡང་དམིགས་པས་ན་དེས་ཀུན་གཞི་ལ་ཀུན་གཞི་ཕྱི་མ་སྐྱེད་པའི་བག་ཆགས་འཇོག་པས་སོ། །ཕྱི་མ་ཡང་མེད་དེ། འཕགས་པའི་ལམ་གྱི་རིགས་ནི་ཟག་མེད་མ་ཡིན་གྱི་སྒྲིབ་པ་ཡིན་ཏེ། རྣམ་པར་ངེས་པ་བསྡུ་བར། རྒྱུ་གང་ལ་སྒྲིབ་པ་གཉིས་ཀའི་ས་བོན་བསྲབས་པའི་ཕྱིར་སྤང་དུ་རུང་བ་དེ་བྱང་ཆུབ་སེམས་པའི་རིགས་དང་། གང་ལ་ཉོན་མོངས་པའི་ས་བོན་སྲབ་པ་ཡོད་པ་དེ་ཉན་ཐོས་དང་རང་སངས་རྒྱས་ཀྱི་རིགས་དང་། གང་ལ་དེ་གཉིས་ཀའི་ས་བོན་ཆེ་བས་སྤང་དུ་མི་རུང་བ་ཡོད་པ་དེ་ནི་རིགས་ཆད་དུ་གསུངས་སོ། །ཟག་མེད་ཀྱི་སྐད་ཅིག་དང་པོ་ལ་ནི་རྒྱུའི་རྐྱེན་མེད་ཅིང་། རྐྱེན་ནི་བཞི་ཞེས་པ་ནི་ཁྱབ་པའི་དོན་མིན་གྱི་སྲིད་པ་ལ་བསམ་པའོ། །ཞེས་ལན་འདེབས་སོ། །དེའི་ལན་དང་པོ་མི་རིགས་ཏེ། སེམས་ཙམ་པའི་ལུགས་ལ་དམིགས་པ་དང་རྣམ་པ་མ་གྲུབ་པའི་ཕྱིར་དང་། ཅི་སྟེ་དངོས་དམིགས་པ་གཟུང་བའི་རྣམ་པ་དང་། བརྒྱུད་པའི་དམིགས་པ་ཀུན་གཞི་ཡིན་པས་ཡིད་ཤེས་དེས་ཀུན་གཞི་སྐྱེད་པའི་བག་ཆགས་འཇོག་པར་རྟོག་ན་གཞན་གྱི་སེམས་དང་སེམས་བྱུང་ལ་དམིགས་པའི་ཡིད་ཤེས་ཀྱིས་ཀུན་གཞི་ལ་བཞག་པའི་བག་ཆགས་ཀྱང་གཞན་གྱི་ཤེས་པའི་རྒྱུའི་རྐྱེན་དུ་འགྱུར་བས་ན་འགྲོ་བ་ཀུན་གྱི་རྒྱུད་གཅིག་ཏུ་འགྱུར་རོ། །ཡང་རང་བཞིན་གྱི་རིགས་སྒྲིབ་པ་ཡིན་ན་བྱང་ཆུབ་སེམས་དཔའི་སར། རང་བཞིན་གྱི་རིགས་ནི་སྐྱེ་མཆེད་དྲུག་གི་ཁྱད་པར་རོ་ཞེས་གསུངས་པ་དང་འགལ་ཞིང་། བསྡུ་བར་གསུངས་པ་ནི། སྒྲིབ་པའི་ས་བོན་སྲབ་པ་ཉིད་ཀྱིས་ཆོས་ཉིད་ཀྱི་ས་བོན་ཟག་མེད་ཡོད་པར་སྟོན་པ་ལ་དགོངས་པའོ། །ཟག་མེད་དང་པོ་ལ་རྒྱུའི་རྐྱེན་མེད་པའང་མི་རིགས་ཏེ། སྒྲིབ་པ་ཐམས་ཅད་དུ་སེམས་དང་སེམས་བྱུང་ཀུན་རྐྱེན་བཞི་ལས་སྐྱེ་བར་བཤད་པས་སོ། །གསུམ་པ་ནི། དོན་གསང་དུ། དེ་ནི་དེ་ལྟར་ཡིན་ཏེ། ཞེས་ཕྱོགས་དང་པོ་བཞག་ལ། འོན་ཀྱང་བག་ཆགས་ཐམས་ཅད་ཆོས་ཉིད་ཀྱིས་གནས་པ་ཡིན་པ་ནི་ཤེས་དཀའ་བས་ཕྱོགས་གསུམ་པ་རྙིང་པ་བརྟས་པར་བྱེད་པ་དང་། གསར་བ་སྐྱེད་པ་གཉིས་ཀ་ཡོད་པ་བཞག་བདེའོ། །འདི་ལ་དཔངས་ལོ་ཆེན་པོས་རྒྱུ་མཐུན་གྱི་དང་ཟག་མེད་ཀྱི་ས་བོན་རྙིང་པ་བརྟས་པར་བྱེད་ཅིང་། རྣམ་སྨིན་གྱི་བག་ཆགས་ནི་གསར་པ་འཇོག་པའོ་ཞེས་པ་ནི་མ་ངེས་པ་སྟེ། དེ་གཉིས་ལས་བཟློག་པ་དུ་མ་ཡོད་པའི་ཕྱིར། ཞེས་གསུངས་ཤིང་། དེའི་ཤེས་བྱེད་དུ་ཐོས་པའི་བག་ཆགས་ཆུང་ངུ་དང་། འབྲིང་དང་ཆེན་པོ་གསར་དུ་བཞག་པ་ཕྱིས་ཐོས་པས་གསོ་བ་ན་རྒྱུ་མཐུན་དང་ཟག་མེད་ཀྱི་ས་བོན་ལ་གསར་པ་གསོ་བར་གྲུབ་ཅིང་། ཐོས་པའི་བག་ཆགས་དེ་ཆོས་ཉིད་ཀྱིས་གནས་ན་འགྲོ་བ་ཀུན་ཐར་པའི་རིགས་སད་པར་ཐལ་པའི་ཕྱིར་རོ། །ཞེས་གསུངས་པ་ནི་གནད་འདི་ལ་ཤིན་ཏུ་ཆེན་པོ་དག་ཀྱང་འཁྲུལ་པར་མངོན་ཏེ། ཐེག་བསྡུས་ལས། ཐོས་པའི་བག་ཆགས་ཆུང་ངུ་དང་འབྲིང་དང་ཆེན་པོ་ལྔ་ཆོས་ཀྱི་སྐུའི་ས་བོན་དུ་བལྟ་སྟེ། ཞེས་གསུངས་པའི་དོན་ནི། ཟག་མེད་ཀྱི་ས་བོན་ཆོས་ཉིད་ཀྱིས་གནས་པ་དེ་ཉིད་ཐོས་པའི་རྐྱེན་གྱི་གསོ་བར་བྱ་བ་ཡིན་པས་ན། ཐོས་པའི་བག་ཆགས་ཞེས་བཤད་པ་ཡིན་གྱི། ཐོས་པའི་རྐྱེན་གྱིས་གསར་དུ་བཞག་པའི་དོན་མ་ཡིན་པའི་ཕྱིར་རོ། །གཞན་དུ་ན་མདོ་སྡེ་པའི་ལུགས་ཀྱི་ཟག་མེད་ཀྱི་ས་བོན་དང་འདོད་ཚུལ་ཁྱད་པར་མེད་པར་ཐལ་བའི་ཕྱིར་རོ། །གསུམ་པ་མཚན་གཞི་གཏན་ལ་དབབ་པ་ནི། མདོར་ན་ཀུན་གཞིའི་རྣམ་པར་ཤེས་པ་ནི་དམིགས་པ་དང་རྣམ་པ་ཡོངས་སུ་མ་ཆད་པས་མི་གསལ་ཞིང་ཡུལ་སྣང་བར་ནུས་ཙམ་པ། འཁོར་ཀུན་འགྲོ་ལྔ་ཁོ་ན་དང་ལྡན་པ། ཚོར་བ་བཏང་སྙོམས་ཁོ་ན་ཅན། ངོ་བོ་མ་བསྒྲིབས་ལ་ལུང་དུ་མ་བསྟན་པ། དུས་འཁོར་བ་ཇི་སྲིད་བར་མ་ཆད་པར་རྒྱུན་མ་ཆད་པར་འབྱུང་བ་སྟེ། སུམ་ཅུ་པར། དེ་ནི་ལེན་པ་དག་དང་གནས། །རྟག་ཏུ་རེག་དང་ཡིད་བྱེད་དང་། །རིགས་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་བསྒྲིབས་ལུང་མ་བསྟན། །རེག་ལ་སོགས་པ་དེ་བཞིན་དུ། །དེ་ནི་རྒྱུན་འབབ་ཆུ་བོ་བཞིན། །ཞེས་གསུངས་པས་སོ། །གསུམ་པ་དམིགས་པ་ནི། བསྡུ་བ་ལས། དེ་ལ་དམིགས་པས་འཇུག་པ་རྣམ་པར་བཞག་པ་གང་ཞེ་ན། མདོར་བསྡུ་ན་ཀུན་གཞིའི་རྣམ་པར་ཤེས་པ་ནི་དམིགས་པ་དང་རྣམ་པ་གཉིས་ཀྱིས་འཇུག་སྟེ། ནང་གི་ལེན་པ་རྣམ་པར་རིག་པ་དང་། ཕྱི་རོལ་གྱི་སྣོད་རྣམས་ཡོངས་སུ་མ་ཆད་པ་རྣམ་པར་རིག་པའོ། །དེ་ལ་ནང་གི་ལེན་པ་ནི་ཀུན་བཏགས་པའི་ངོ་བོ་ཉིད་ལ་མངོན་པར་ཞེན་པའི་བག་ཆགས་དང་། རྟེན་གཞི་བཅས་པའི་དབང་པོའི་གཟུགས་སོ། །དེ་ཡང་གཟུགས་ཅན་གྱི་ཁམས་ནའོ། །གཟུགས་ཅན་མ་ཡིན་པ་ན་ནི་བག་ཆགས་ལེན་པ་ཁོ་ནར་ཟད་དོ། །དེ་ལ་ཕྱི་རོལ་གྱི་སྣོད་རྣམས་ཡོངས་སུ་མ་ཆད་པ་རྣམ་པར་རིག་པ་ནི་ཀུན་གཞིའི་རྣམ་པར་ཤེས་པ་ནི་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས་རྟག་ཏུ་རྒྱུན་མི་ཆད་པར་འཇིག་རྟེན་དང་། སྣོད་ཀྱི་རྒྱུན་རྣམ་པར་རིག་པ་སྟེ་འདི་ལྟར་དཔེར་ན་མར་མེ་འབར་བ་ནི་སྙིང་པོ་དང་། སྣུམ་གྱི་རྒྱུས་ནི་ནང་དུ་འཇུག་པར་འགྱུར་ལ། ཕྱི་རོལ་དུ་ནི་འོད་འབྱུང་བར་བྱེད་པ་བཞིན་དུ་ནང་གི་ལེན་པའི་དམིགས་པ་དང་། ཕྱི་རོལ་གྱི་དམིགས་པ་འདི་ལ་ཡང་ཀུན་གཞིའི་རྣམ་པར་ཤེས་པའི་ཚུལ་འདི་དང་འདྲ་བ་བལྟ་བར་བྱ་སྟེ། དམིགས་པ་དེ་ནི་འཇིག་རྟེན་གྱི་མཁས་པ་དག་གིས་ཀྱང་ཡོངས་སུ་བཅད་པར་དཀའ་བའི་ཕྱིར་ཕྲ་བ་ཡིན་ནོ། །དམིགས་པ་དེ་ནི་རྟག་ཏུ་ཡོད་པ་ཡིན་ཏེ། ལན་འགའ་གཞན་དུ་འགྱུར་བ་མ་ཡིན་ནོ། །འོན་ཀྱང་དང་པོའི་སྐད་ཅིག་ལ་བརྟེན་ནས་ཇི་སྲིད་འཚོའི་བར་དུ་རྣམ་པར་རིག་པ་རོ་གཅིག་པ་འཇུག་པར་འགྱུར་རོ། །ཀུན་གཞིའི་རྣམ་པར་ཤེས་པ་དེ་ནི་དམིགས་པ་ལ་སྐད་ཅིག་པ་ཡིན་པར་བལྟ་བར་བྱ་སྟེ། སྐད་ཅིག་པའི་རྒྱུན་གྱིས་འཇུག་པ་ཡིན་གྱི་གཅིག་པ་ཉིད་ནི་མ་ཡིན་ནོ། །ཀུན་གཞིའི་རྣམ་པར་ཤེས་པ་དེ་ཡང་འདོད་པའི་ཁམས་ན་ནི་རྒྱུ་ཆུང་ངུའི་དམིགས་པ་ཅན་དུ་བརྗོད་པར་བྱའོ། །གཟུགས་ཀྱི་ཁམས་ན་ནི་རྒྱུ་ཆེན་པོར་གྱུར་པའི་དམིགས་པ་ཅན་དུ་བརྗོད་པར་བྱའོ། །གཟུགས་མེད་པའི་ཁམས་ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་ན་ནི་རྒྱུ་ཚད་མེད་པའི་དམིགས་པ་ཅན་ནོ། །ཅི་ཡང་མེད་པའི་སྐྱེ་མཆེད་ན་ནི་རྒྱུ་ཕྲ་བའི་དམིགས་པ་ཅན་ནོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ན་ནི་རྒྱུ་ཤིན་ཏུ་ཕྲ་བའི་དམིགས་པ་ཅན་དུ་བལྟ་བར་བྱའོ། །ཞེས་གསུངས་ཤིང་། དེའི་དོན་དབུས་མཐར། སེམས་སུ་སྣང་བའི་རྣམ་པར་ཤེས་པ་དང་། དོན་དུ་སྣང་བའི་རྣམ་པར་ཤེས་པ་ཞེས་གསུངས་ཤིང་། སུམ་ཅུ་པར། དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །ཞེས་གསུངས་སོ། །མདོར་བསྡུ་ན་ཀུན་གཞིའི་དམིགས་པ་ལ་ནང་གི་ཉེ་བར་ལེན་པ་དང་། ཕྱི་རོལ་གྱི་སྣོད་གཉིས། དང་པོ་ལ། བདག་དང་ཆོས་སུ་ཀུན་བཏགས་པའི་ངོ་བོ་ཉིད་ལ་མངོན་པར་ཞེན་པའི་བག་ཆགས་དང་། གནས་དང་བཅས་པའི་དབང་པོའི་གཟུགས་དང་། མིང་གཞིའི་ཕུང་པོ་དང་། དབང་པོའང་རང་དང་གཞན་གྱི་དབང་པོ་གཉིས་ཀ་ལ་དམིགས་ཏེ། དབུས་མཐའི་འགྲེལ་པར། སེམས་ཅན་དུ་སྣང་བ་ནི་དབང་པོ་ལྔར་བདག་དང་གཞན་གྱི་རྒྱུད་ལ་གང་ཡོད་པའོ་ཞེས་པས་སོ། །དེ་ཉིད་ནི་དོན་གསང་དུ། འདིའི་དམིགས་པ་ཅི་ཞེ་ན། ས་བོན་དང་མིག་ལ་སོགས་པ་དང་། གཟུགས་ལ་སོགས་པའོ། །ཞེས་གསུངས་ཤིང་། དེ་ཡང་གཟུགས་ཀྱི་ཁམས་སུ་སྟེ། གཟུགས་མེད་དུ་ནི་ས་བོན་དང་མིང་གཞིའི་ཕུང་པོ་ཙམ་ལ་དམིགས་པས་སོ། །སྣོད་ཀྱི་འཇིག་རྟེན་ལ་དམིགས་ཚུལ་རྒྱ་ཆེ་ཆུང་ལ་སོགས་པ་སྔ་རབས་པ་རྣམས་ཀྱིས་བཤད་པ་ནི་ཤེས་བྱེད་མེད་དེ། བསྡུ་བ་ལས། སྣོད་ཀྱི་འཇིག་རྟེན་ཡོངས་སུ་མ་ཆད་པ་ལ་དམིགས་པར་གསུངས་པའི་ཕྱིར་རོ། །འདིར་སྣོད་ཀྱི་འཇིག་རྟེན་དང་དབང་པོ་ལ་དམིགས་པར་གསུངས་པའི་དོན་ཡང་། ལས་ཀྱི་བག་ཆགས་ཀུན་གཞི་ལ་གནས་པས་བསྐྱེད་ནས་ཀུན་གཞི་ཉིད་སྣོད་དོན་དུ་སྣང་བ་སྟེ། བྷ་ར་ཏྲིའི་བྷ་རའི་བཤད་པ་བཤད་སྦྱར་དུ་དྲངས་པ། ནམ་མཁའ་ས་རླུང་ཉི་མ་དང་། །རྒྱ་མཚོ་རླུང་དང་ཕྱོགས་རྣམས་ནི། །ནང་གི་ཤེས་པའི་ངོ་བོ་ཡི། །ཆ་ལས་ཕྱི་རོལ་ལྟ་བུར་འདུག །ཅེས་གསུངས་སོ། །བཞི་པ་རྣམ་པ་ནི་བསྡུ་བར་སྔར་གྱི་དམིགས་པ་གཉིས་པོ་དེ་རྣམ་པར་རིག་པ་ཙམ་ལས་མ་གསུངས་ལ། སུམ་ཅུ་པར། དེའི་སྟེང་དུ་མི་རིག་པ་ཞེས་གསུངས་པ་ནི་མི་གསལ་བའི་རྣམ་པ་ཅན་ཞེས་བྱ་བའི་དོན་ནོ། །འདི་ལ་སྔ་རབས་པ་རྣམས་ཀྱིས་རྣམ་པ་ཁྲ་བོར་སྣང་བ་དང་། ཁྲ་བོ་མ་ཡིན་པར་སྣང་བ་གཉིས་ལས། དང་པོ་ནི། མིའི་འཇིག་རྟེན་ན་སྒོ་ལྔའི་རྣམ་ཤེས་ལ་ས་དང་ཆུ་ལ་སོགས་པར་སྣང་བ་བཞིན་དུ་ཀུན་གཞི་ལ་ཡང་དེ་ལྟར་སྣང་བ་དང་། དེ་བཞིན་དུ་ལྷའི་སྒོ་ལྔ་ལ། སྣོད་ཀྱི་འཇིག་རྟེན་གསེར་གྱི་ས་གཞི་དང་། དུད་འགྲོ་ལ་མུན་པའི་སྨག་རུམ་ལ་སོགས་པ་དང་། དམྱལ་བ་ལ་ལྕགས་བསྲེགས་ཀྱིས་ས་གཞི་ལ་སོགས་པ་དང་། ཡི་དྭགས་ལ་རྣག་ཁྲག་ལ་སོགས་པར་སྣང་བ་བཞིན་དུ། མིའི་ཀུན་གཞི་ལ་དེ་དག་ཐམས་ཅད་སྣང་ལ། དེ་བཞིན་དུ་འགྲོ་བ་རེ་རེའི་ཀུན་གཞི་ལ་ཡང་དེ་དག་ཐམས་ཅད་སྣང་བའོ། །གཉིས་པ་ནི། མིའི་ཀུན་གཞི་ལ་ངམ་གྲོག་དང་གཡང་ས་ལ་སོགས་པར་སྣང་བ་ནས། དམྱལ་བའི་ཀུན་གཞི་ལ་ལྕགས་བསྲེགས་ཀྱི་ས་གཞི་ཁོ་ནར་སྣང་གི་གཞན་མི་སྣང་བར་འདོད་པའོ། །དེ་གཉིས་གང་བདེ་ཞེ་ན། ཁ་ཅིག་ཁྲ་བོར་སྣང་བ་བདེ་སྟེ། དམིགས་རྣམ་ཡོངས་སུ་མ་ཆད་པ་དང་། གཟུང་བྱ་བརྟན་པར་གསལ་བའི་ཕྱིར་ཞེས་འདོད་དོ། །ལྔ་པ་མཚུངས་ལྡན་འཁོར་ནི། ཀུན་འགྲོ་ལྔ་ཁོ་ན་དང་མཚུངས་པར་ལྡན་པ་སྟེ། བསྡུ་བ་ལས། དེ་ལ་མཚུངས་པར་ལྡན་པས་འཇུག་པ་རྣམ་པར་གཞག་པ་གང་ཞེ་ན། འདི་ལ་ཀུན་གཞིའི་རྣམ་པར་ཤེས་པ་དང་མཚུངས་པར་ལྡན་པ་ནི་སེམས་དང་མཚུངས་པར་ལྡན་པ་ཀུན་འགྲོ་ལྔ་པོ་ཡིད་ལ་བྱེད་པ་དང་། ཚོར་བ་དང་། རེག་པ་དང་། འདུ་ཤེས་དང་། སེམས་པ་རྣམས་དང་མཚུངས་པར་ལྡན་ནོ། །ཆོས་དེ་དག་ཀྱང་རྣམ་པར་སྨིན་པས་བསྡུས་པ་དང་། འཇིག་རྟེན་གྱི་མཁས་པ་རྣམས་ཀྱིས་ཀྱང་རྟོགས་པར་དཀའ་བའི་ཕྲ་བ་དང་། གཏན་དུ་དམིགས་པ་གཅིག་ལ་མཚུངས་པར་འཇུག་པ་ཡིན་ནོ། །སེམས་ལས་བྱུང་བ་དེ་དག་ལས་ཀུན་གཞིའི་རྣམ་པར་ཤེས་པ་དང་མཚུངས་པར་ལྡན་པའི་ཚོར་བ་གང་ཡིན་པ་དེ་ནི་གཅིག་ཏུ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་དང་། ལུང་དུ་མ་བསྟན་པ་ཡིན་ནོ། །དེ་ཉིད་ཀྱིས་དེ་ལས་གཞན་པའི་སེམས་ལས་བྱུང་བའི་ཆོས་རྣམས་ཀྱང་རྣམ་པར་བཤད་པ་ཡིན་ནོ། །ཞེས་དང་། དེ་དག་གི་དོན་བསྡུས་ནས་སུམ་ཅུ་པར། རྟག་ཏུ་དེ་དག་དང་ཡིད་བྱེད། །ཅེས་སོགས་གསུངས་པ་ཡིན་ནོ། །སེམས་བྱུང་གཞན་རྣམས་དང་མཚུངས་པར་མི་ལྡན་པའི་ཚུལ་ནི་མཚུངས་ལྡན་གྱི་འདུ་བྱེད་ཀྱི་སྐབས་སུ་བཤད་ཟིན་ཏོ། །དྲུག་པ་འཇུག་པའི་ཚུལ་ནི། ཀུན་གཞི་ཇི་སྲིད་འཁོར་བའི་བར་དུ་གཅིག་པུ་ཐ་དད་མེད་པའི་ཚུལ་གྱིས་འཇུག་གམ། མི་རྟག་པ་རྒྱུན་གྱི་ཚུལ་གྱིས་འཇུག་ཅེ་ན། དེ་ནི་རྒྱུན་འབབ་ཆུ་བོ་བཞིན། །ཅེས་གསུངས་པས། མི་རྟག་པ་རྒྱུན་གྱི་ཚུལ་གྱིས་འཇུག་གོ །འདི་ལ་འཇུག་ཚུལ་གསུམ་སྟེ། སྐད་ཅིག་མའི་འཇུག་ཚུལ་དང་། སྐྱེ་བ་བརྒྱུད་མར་འཇུག་ཚུལ་དང་། ཚེ་གཅིག་གི་འཇུག་ཚུལ་ལོ། །དང་པོ་ནི། བསྡུ་བར། དམིགས་དང་མཚུངས་པར་ལྡན་པ་དང་། །གཅིག་གི་རྐྱེན་ནི་གཅིག་ཡིན་དང་། །ལྷན་ཅིག་དངོས་པོ་འཇུག་པ་དང་། །ཀུན་ནས་ཉོན་མོངས་ལྡོག་པ་ཡིན། །ཞེས་འཇུག་ཚུལ་བཞི་དང་། ལྡོག་ཚུལ་གཅིག་གསུངས་པའི། དང་པོ་དམིགས་པས་འཇུག་པ་ནི། ད་ལྟར་གྱི་ཀུན་གཞི་ནང་ཉེ་བར་ལེན་པ་དང་། ཕྱི་སྣོད་ཀྱི་འཇིག་རྟེན་ལ་དམིགས་ཏེ་འཇུག་པ་ལྟར་སྐད་ཅིག་གཉིས་པ་ཕན་ཆད་ཀྱང་དེ་གཉིས་ལ་དམིགས་ཏེ་འཇུག་པའོ། །གཉིས་པ་མཚུངས་པར་ལྡན་པས་འཇུག་པ་ནི། ད་ལྟར་གྱི་ཀུན་གཞི་ཀུན་འགྲོ་ཁོ་ན་དང་མཚུངས་པར་ལྡན་པ་ལྟར། སྐད་ཅིག་གཉིས་པ་ཕན་ཆད་ཀྱང་དེ་དང་མཚུངས་པར་ལྡན་པས་འཇུག་པའོ། །གསུམ་པ་གཅིག་གི་རྐྱེན་གཅིག་ཡིན་པས་འཇུག་པ་ནི། ད་ལྟར་གྱི་ཀུན་གཞིས་འཇུག་པའི་རྣམ་ཤེས་ལ་དགེ་མི་དགེ་ལུང་མ་བསྟན་དུ་འབྱུང་བའི་ས་བོན་གྱི་གཞི་བྱེད་པས་རྒྱུའི་རྐྱེན་དང་། ཀུན་གཞིས་ཟིན་པའི་དབང་པོ་གཟུགས་ཅན་པ་ལ་བརྟེན་ནས་རྣམ་ཤེས་ལྔ་སྐྱེ་བའི་རྟེན་བྱེད་པ་དང་། ཡིད་དང་། ཡིད་ཤེས་ཀྱི་གནས་བྱེད་པས་བདག་རྐྱེན་བྱེད་དོ། །ཡང་འཇུག་པའི་རྣམ་ཤེས་ཀྱིས་ཀྱང་ཀུན་གཞི་ལ་ཚེ་འདིར་འཇུག་པའི་རྣམ་ཤེས་དགེ་མི་དགེ་ལུང་མ་བསྟན་ཕྱི་མ་འབྱུང་བའི་རྒྱུ་མཐུན་གྱི་ས་བོན་གསོ་ཞིང་བརྟས་པར་བྱེད་པས་བདག་རྐྱེན་དང་། ཕྱི་མ་ལ་ཀུན་གཞི་ཉིད་འབྱུང་བའི་རྣམ་སྨིན་གྱི་ས་བོན་འཇོག་པའི་རྒྱུའི་རྐྱེན་བྱེད་པ་ལྟར་སྐད་ཅིག་གཉིས་པ་ཕན་ཆད་ཀྱང་འཇུག་པའི་རྣམ་ཤེས་དང་ཕན་ཚུན་རྐྱེན་གཉིས་བྱེད་པའི་ཚུལ་གྱིས་འཇུག་པ་སྟེ། ཆོས་མངོན་པའི་མདོར། ཆོས་ཀུན་རྣམ་པར་ཤེས་ལ་སྦྱོར། །དེ་རྣམས་ལ་ཡང་དེ་དེ་བཞིན། །ཕན་ཚུན་འབྲས་བུའི་དངོས་པོ་དང་། །རྒྱུ་ཡི་དངོས་པོར་རྟག་ཏུ་སྦྱོར། །ཞེས་དང་། བསྡུ་བ་ལས། ཀུན་གཞིའི་རྣམ་པར་ཤེས་པ་ནི་ས་བོན་དང་ལྡན་པ་ཡིན་ནོ། །དེ་ལ་རྟེན་བྱེད་པ་ནི་ཀུན་གཞིའི་རྣམ་པར་ཤེས་པས་ཟིན་པའི་དབང་པོ་གཟུགས་ཅན་རྣམས་ལ་བརྟེན་ནས་རྣམ་པར་ཤེས་པའི་ཚོགས་ལྔ་པོ་དག་འབྱུང་བར་འགྱུར་གྱི་མ་ཟིན་པ་དག་ལ་ནི་མ་ཡིན་ནོ། །རྣམ་པར་ཤེས་པའི་ཚོགས་ལྔ་པོ་དག་གི་རྟེན་མིག་ལ་སོགས་པ་དང་འདྲ་བར་ཡིད་དང་། ཡིད་ཀྱི་རྣམ་པར་ཤེས་པའི་རྟེན་ཀུན་གཞིའི་རྣམ་པར་ཤེས་པ་ཡོད་ན། ཡིད་དང་ཡིད་ཀྱི་རྣམ་པར་ཤེས་པ་ཡང་འབྱུང་བར་འགྱུར་ལ་མེད་ན་མ་ཡིན་ནོ། །དེ་ལ་འཇུག་པའི་རྣམ་པར་ཤེས་པ་ནི་རྣམ་པ་གཉིས་ལས་ཀུན་གཞིའི་རྣམ་པར་ཤེས་པའི་རྐྱེན་གྱི་བྱ་བ་བྱེད་པའི་ཚེ་འདི་ལ་ས་བོན་ཡོངས་སུ་རྟས་པར་བྱེད་པ་དང་། ཕྱི་མ་ལ་དེ་འགྲུབ་པའི་ས་བོན་ཡོངས་སུ་འཛིན་པ་སྐྱེད་པར་བྱེད་པས་སོ། །དེ་ལ་ཚེ་འདི་ལ་ས་བོན་ཡོངས་སུ་རྟས་པར་བྱེད་པ་ནི་ཇི་ལྟར་ཀུན་གཞིའི་རྣམ་པར་ཤེས་པ་ལ་བརྟེན་ནས་འཇུག་པའི་རྣམ་པར་ཤེས་པ་དགེ་བ་དང་མི་དགེ་བ་དང་། ལུང་དུ་མ་བསྟན་པ་འབྱུང་བར་འགྱུར་བ་དེ་ལྟར་རང་གི་རྟེན་ལ་དེ་དང་ལྷན་ཅིག་སྐྱེ་བ་དང་འགགས་པས་བག་ཆགས་སྒོ་བར་བྱེད་དོ། །རྒྱུ་དེ་དང་རྐྱེན་དེས་ན་འཇུག་པའི་རྣམ་པར་ཤེས་པ་རྣམས་ཀྱང་ཕྱིར་ཞིང་ཕྱིར་ཞིང་དགེ་བ་ལ་སོགས་པའི་དངོས་པོ་ཤིན་ཏུ་འདྲིས་པ་དང་། ཤིན་ཏུ་སྦྱངས་པ་དང་། ཤིན་ཏུ་འོད་གསལ་བ་དག་ཏུ་འབྱུང་ངོ་། །དེའི་བག་ཆགས་ཀྱི་རིགས་གཞན་ནི་ཕྱི་མ་ལ་ཀུན་གཞིའི་རྣམ་པར་ཤེས་པ་དེ་ཉིད་ཀྱི་རྣམ་པར་སྨིན་པ་ཡོངས་སུ་འཛིན་པའི་ཕྱིར་འཇུག་པར་འགྱུར་རོ། །ཞེས་གསུངས་སོ། །བཞི་པ་ལྷན་ཅིག་དངོས་པོ་འཇུག་པའི་ཚུལ་ལ་གསུམ་ལས། འདུ་ཤེས་མེད་པ་ལ་སྙོམས་པར་འཇུག་པའི་དུས་སུ་ཡིད་དང་འཇུག གཟུགས་མེད་ཁམས་སུ་ཡིད་དང་ཡིད་ཀྱི་རྣམ་ཤེས་གཉིས་དང་འཇུག དེ་བཞིན་ཏུ་རྐྱེན་ཇི་ལྟ་བ་བཞིན་དུ་བདུན་གྱི་བར་དང་ལྷན་ཅིག་འཇུག་གོ །ཚོར་བ་གང་དང་ལྷན་ཅིག་འཇུག་པ་ནི་ཐམས་ཅད་དུ་ལྷན་ཅིག་སྐྱེས་པའི་ཚོར་བ་བཏང་སྙོམས་དང་། འགྲོ་བ་དང་ས་ཇི་ལྟ་བ་བཞིན་དུ་འཇུག་པའི་རྣམ་ཤེས་དང་མཚུངས་ལྡན་གྱི་བདེ་སྡུག་བཏང་སྙོམས་ཇི་ལྟར་རིགས་པ་དང་ལྷན་ཅིག་འཇུག་གོ །ཆོས་གང་དང་ལྷན་ཅིག་འཇུག་པ་ནི་སེམས་བྱུང་དགེ་མི་དགེ་ལུང་མ་བསྟན་ཅི་རིགས་པ་དང་ལྷན་ཅིག་འཇུག་ཅིང་། འདིར་ལྷན་ཅིག་འཇུག་པའི་དོན་ནི་ཅིག་ཅར་འབྱུང་བའི་དོན་ཡིན་གྱི་མཚུངས་པར་ལྡན་པའི་དོན་ནི་མ་ཡིན་ནོ། །བསྡུ་བ་ལས། འཇུག་པའི་རྣམ་པར་ཤེས་པ་དང་ལྷག་ཅིག་པའི་དངོས་པོ་དང་། ཚོར་བ་དང་ལྷན་ཅིག་པའི་དངོས་པོ་དང་། དགེ་བ་ལ་སོགས་པ་དང་ལྷན་ཅིག་པའི་དངོས་པོས་ཀྱང་རིག་པར་བྱའོ། །དེ་ལ་དང་པོ་ནི། ཀུན་གཞིའི་རྣམ་པར་ཤེས་པ་ནི་རེས་འགའ་འཇུག་པའི་རྣམ་པར་ཤེས་པ་གཅིག་ཁོ་ན་དང་ལྷན་ཅིག་འཇུག་སྟེ། འདི་ལྟ་སྟེ་ཡིད་དོ། །འདི་ལྟར་ངར་འཛིན་པ་དང་། ངའོ་སྙམ་པའི་ང་རྒྱལ་དང་། རློམ་སེམས་པའི་རྣམ་པ་ཅན་གྱི་ཡིད་གང་ཡིན་པ་དེ་ནི་སེམས་ཡོད་པ་དང་། སེམས་མེད་པའི་གནས་སྐབས་དག་ན་ཡང་རྟག་ཏུ་ཀུན་གཞིའི་རྣམ་པར་ཤེས་པ་དང་ལྷན་ཅིག་འབྱུང་ཞིང་འཇུག་སྟེ་དེ་ནི་ཀུན་གཞིའི་རྣམ་པར་ཤེས་པ་ལ་ངའོ་སྙམ་པ་དང་། བདག་གོ་སྙམ་དུ་དམིགས་ཤིང་རློམ་པའི་རྣམ་པར་ཅན་ཡིན་ནོ། །རེས་འགའ་ནི་ཡིད་དང་ཡིད་ཀྱི་རྣམ་པར་ཤེས་པ་གཉིས་དང་ལྷན་ཅིག་འབྱུང་ཞིང་འཇུག་གོ །རེས་འགའ་ནི་རྣམ་པར་ཤེས་པའི་ཚོགས་ལྔ་པོ་དག་ལ་ཡང་གང་ཡང་རུང་བ་གཅིག་དང་གསུམ་དང་ངོ་། །རེས་འགའ་ནི་རྣམ་པར་ཤེས་པའི་ཚོགས་ལྔ་པོ་དག་དང་ལྷན་ཅིག་འབྱུང་བ་དང་བདུན་གྱི་བར་དག་དང་ལྷན་ཅིག་འབྱུང་ཞིང་འཇུག་གོ །ཀུན་གཞིའི་རྣམ་པར་ཤེས་པ་དེ་ཡང་རེས་འགའ་ནི་བདེ་བ་དང་སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་རྣམས་དང་འདྲེས་མར་འཇུག་སྟེ། འཇུག་པའི་རྣམ་པར་ཤེས་པ་ལ་བརྟེན་ནས་ཚོར་བ་གང་ཡིན་པ་དག་དེ་ལ་བརྟེན་ནས་འབྱུང་བའི་ཕྱིར་རོ། །དེ་ལ་མི་རྣམས་དང་། འདོད་པ་ན་སྤྱོད་པའི་ལྷ་རྣམས་དང་། དུད་འགྲོ་དང་ཡི་དྭགས་ཁ་ཅིག་གི་ནང་ན་ནི་ལྷན་ཅིག་སྐྱེས་པའི་ཚོར་བ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་དང་། འཇུག་པའི་རྣམ་པར་ཤེས་པའི་ཚོགས་ཀྱི་བདེ་བའམ་སྡུག་བསྔལ་བའམ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་དེ་དག་གི་རྒྱུན་འདྲེས་མར་ལྷན་ཅིག་ཏུ་འབྱུང་ཞིང་འཇུག་གོ །སེམས་ཅན་དམྱལ་བ་པ་དག་གི་ནི་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ཟིལ་གྱིས་མནན་ཏེ་སྡུག་བསྔལ་གྱི་རྒྱུན་འབའ་ཞིག་མ་འདྲེས་པ་དེ་ཉིད་དང་ལྷན་ཅིག་འབྱུང་ཞིང་འཇུག་སྟེ། དེ་ཡང་ཟིལ་གྱིས་མནན་པའི་ཕྱིར། རྟོགས་པར་དཀའ་བ་ཡིན་པར་བལྟའོ། །སེམས་ཅན་དམྱལ་བ་པ་དག་ན་སྡུག་བསྔལ་དང་ཇི་ལྟ་བ་དེ་བཞིན་ཏུ་བསམ་གཏན་གྱི་ས་པའི་ལྷ་རྣམས་ནི་བདེ་བ་དང་ངོ་། །བསམ་གཏན་བཞི་པ་ཡན་ཆད་སྲིད་པའི་རྩེ་མོའི་བར་དག་ལ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་དང་ངོ་། །ཀུན་གཞིའི་རྣམ་པར་ཤེས་པ་ནི་རེས་འགའ་འཇུག་པའི་རྣམ་པར་ཤེས་པར་གཏོགས་པའི་སེམས་དང་སེམས་ལས་བྱུང་བའི་ཆོས་དགེ་བ་དང་། མི་དགེ་བ་དང་། ལུང་དུ་མ་བསྟན་པ་རྣམས་དང་། ལྷན་ཅིག་འབྱུང་ཞིང་འཇུག་སྟེ། ཞེས་གསུངས་པ་ལྟར་རོ། །གཉིས་པ་སྐྱེ་བ་བརྒྱུད་མར་འཇུག་པའི་ཚུལ་ནི། ཚེ་འདིའི་ཀུན་གཞི་ལས་ཀྱི་བག་ཆགས་ཀྱི་བག་ཆགས་གྲོགས་འཛིན་པ་གཉིས་དང་བཅས་པའི་ལས་ཀྱི་རྣམ་པར་སྨིན་པ་དེ་ཟད་ནས་ལས་ཀྱི་བག་ཆགས་གཟུང་འཛིན་གྱི་བག་ཆགས་ཀྱིས་བརྟས་ནས་ཚེ་ཕྱི་མའི་ཀུན་གཞི་འཇུག་ཅིང་། དེ་ཉིད་ཟད་ནས་ཡང་ཕྱི་མ་ལ་སོགས་པ་འཇུག་པ་སྟེ། སུམ་ཅུ་པར། ལས་ཀྱི་བག་ཆགས་འཛིན་གཉིས་ཀྱི། །བག་ཆགས་བཅས་པ་སྔ་མ་ཡི། །རྣམ་པར་སྨིན་པ་ཟད་ནས་གཞན། །རྣམ་སྨིན་སྐྱེད་པ་དེ་ཡིན་ནོ། །ཞེས་གསུངས་སོ། །གསུམ་པ་ཚེ་གཅིག་གི་འཇུག་ཚུལ་ནི། དེ་ནི་རྒྱུན་འབབ་ཆུ་བོ་བཞིན། །ཞེས་པ་སྟེ། འདོད་གཟུགས་སུ་བར་དོའི་ལུས་བླངས་པའི་སྐད་ཅིག་དང་པོ་དང་། གཟུགས་མེད་དུ་མིང་གཞིའི་ཕུང་པོ་གྲུབ་པའི་སྐད་ཅིག་དང་པོ་ནས་བཟུང་སྟེ། ཇི་སྲིད་མ་ཤིའི་བར་དུ་སྐད་ཅིག་ཀྱང་རྒྱུན་མི་ཆད་པར་འཇུག་པའོ། །བར་དོར་ཞག་བདུན་བདུན་ནས་འཆི་ཐེབས་རེ་རེ་བྱེད་པའི་ཚེ་ན། བར་དོར་རིགས་མི་མཐུན་ལེན་ན་ཚེ་དེ་ཉིད་ཀྱི་ཀུན་གཞི་འགགས་ཤིང་། བར་དོར་རིགས་མི་མཐུན་མི་ལེན་ན་ནི་ཚེ་དེ་ཉིད་ཀྱི་ཀུན་གཞིའི་རྒྱུན་མི་འགགས་ཏེ། ལས་ཀྱི་འཕེན་པ་གཅིག་གིས་བསྡུས་པའི་རྣམ་སྨིན་གྱི་རྒྱུ་ཡིན་པའི་ཕྱིར། དཔེར་ན་བར་དོར་ཤི་ནས་སྐྱེ་སྲིད་བླངས་ཀྱང་ཀུན་གཞི་མི་འགགས་པ་བཞིན་ནོ། །བདུན་པ་ལྡོག་པའི་ཚུལ་ལ་གཉིས་ཏེ། དངོས་དང་། རྩོད་པ་སྤང་བའོ། །དང་པོ་ལ་རྣམ་སྨིན་གྱི་ཆའི་ལྡོག་ཚུལ་དང་། ས་བོན་གྱི་ཆའི་ལྡོག་ཚུལ་གཉིས། དང་པོ་ནི། དངོས་སྨྲ་བ་རྣམས་ཕུང་པོ་ལྷག་མེད་ཀྱི་མྱང་འདས་ཀྱི་སྐབས་སུ་ལྡོག་པ་འདོད་ཅིང་། ཐེག་ཆེན་པ་ལ་ལ་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་རྗེས་ལ་མེ་ལོང་ཡེ་ཤེས་སུ་གནས་གྱུར་པ་ན་ལྡོག་སྟེ། སློབ་དཔོན་ཙནྡྲ་གོ་མིས། གང་ཡང་ཀུན་གཞིའི་རྣམ་པར་ཤེས། །མེ་ལོང་ཡེ་ཤེས་ཉིད་གྱུར་པ། །ཞེས་གསུངས་སོ། །གཉིས་པ་ལ་མི་དགེ་བའི་ས་བོན་འགའ་ཞིག་ལས་སྒྲིབ་ཟད་བྱེད་ཀྱི་གཉེན་པོ་གོམས་པ་ན་ལྡོག རྣམ་སྨིན་གྱི་ས་བོན་འགའ་ཞིག་དེའི་འབྲས་བུ་ཕྱུང་བ་ན་ལྡོག མཐོང་སྤང་གི་ས་བོན་མཐོང་ལམ་སྐྱེས་པ་ན་ལྡོག སྒོམ་སྤང་གི་ས་བོན་སྒོམ་ལམ་སྐྱེས་པ་ན་ལྡོག་གོ །དགེ་བའི་ས་བོན་དང་། ལུང་མ་བསྟན་གྱི་ས་བོན་ནི་ལྷག་མེད་ཀྱི་མྱང་འདས་སུ་ལྡོག་པར་འདོད་ཅིང་། བྱང་ཆུབ་སེམས་དཔའ་ནི་གནས་གྱུར་པ་ན་ལྡོག་གོ །ཟག་མེད་ཀྱི་ས་བོན་ཕུང་པོ་ལྷག་མེད་དུ་ལྡོག་པར་འདོད་ཅིང་། ལང་གཤེགས་ལས། དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ལྡན་པ་ཡང་། །འཛིན་པ་གཉིས་ཀྱི་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་དང་། བསྡུ་བ་ལས། ཀུན་གཞིའི་རྣམ་པར་ཤེས་པ་དེ་དགེ་བའི་ཆོས་རྣམས་ཀྱི་སྒོམ་པས་རྣམ་པར་ལྡོག་པར་རིག་པར་བྱའོ། །ཞེས་དང་། གནས་གྱུར་མ་ཐག་ཏུ་ཀུན་གཞིའི་རྣམ་པར་ཤེས་པ་སྤངས་པར་རིགས་པར་བྱ་སྟེ། ཞེས་དང་། སུམ་ཅུ་པར། དགྲ་བཅོམ་ཉིད་ན་དེ་ལྡོག་གོ །ཞེས་གསུངས་སོ། །དེས་ན་བསྡུ་བ་ལས་མུ་བཞི་གསུངས་ཏེ། ཀུན་གཞི་ཡོད་ཅིང་འཇུག་པའི་རྣམ་ཤེས་མེད་པ་ནི་སེམས་མེད་པའི་གནས་སྐབས་ལྔའོ། །ལྡོག་པ་ནི་སེམས་ཡོད་པའི་གནས་སྐབས་ཀྱི་མི་སློབ་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའོ། །གཉིས་ཀ་ཡོད་པ་ནི་དེ་ལས་གཞན་པའི་སེམས་ཡོད་པའི་གནས་སྐབས་སོ། །གཉིས་ཀ་མེད་པ་ནི་མི་སློབ་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའ་འགོག་པ་ལ་བཞུགས་པ་དང་། ཕུང་པོ་ལྷག་མེད་ཀྱི་མྱང་འདས་སོ། །གཉིས་པ་རྩོད་པ་སྤང་བ་ནི། འོ་ན་ཐེག་ཆེན་ལ་རྡོ་རྗེ་ལྟ་བུའི་ཏིང་ངེ་འཛིན་གྱི་རྗེས་དང་། ཐེག་དམན་ལ་ཕུང་པོ་ལྷག་མེད་དུ་ཀུན་གཞི་ལྡོག་གི་དེ་ལས་སྔར་མི་ལྡོག་ན་བསྡུ་བ་དང་། སུམ་ཅུ་པའི་ལུང་དེ་དང་། དོན་གསང་དུ། ས་བརྒྱད་པ་ཡན་ཆད་དང་། ཉན་རང་དགྲ་བཅོམ་ལ་ཀུན་གཞི་མེད་པར་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་དག་གི་དོན་ནི་ཉོན་ཡིད་མེད་པས་ཉོན་མོངས་པའི་ས་བོན་ཡོད་ཀྱང་མངོན་གྱུར་མི་སྐྱེ་བ་དང་། ཉོན་མོངས་པའི་ས་བོན་གཏན་ལོགས་པ་ལ་དགོངས་པའི་ཕྱིར་རོ། །ཡང་ས་བོན་གྱི་ཆ་ལོག་ན་དེ་དང་ངོ་བོ་གཅིག་པའི་རྣམ་སྨིན་གྱི་ཆ་ལྡོག་གམ་མི་ལྡོག ལྡོག་ན་ས་བོན་གྱི་ཆ་ལྡོག་ནས་རྣམ་སྨིན་གྱི་ཆ་ཡོད་པའི་རྣམ་གཞག་དང་འགལ་ལ། མི་ལྡོག་ན་ངོ་བོ་གཅིག་པར་འགལ་ལོ་ཞེ་ན། འདིའི་ལན་ལ་སྔ་རབས་པ་རྣམས་དེ་གཉིས་རང་བཞིན་ངོ་བོ་གཅིག་པ་མ་ཡིན་ལ་གནས་སྐབས་ངོ་བོ་གཅིག་ཀྱང་ལྡོག་མི་ལྡོག་གི་ཆ་གཉིས་ཡོད་པ་མི་འགལ་ལོ། །ཞེས་པ་དང་། ས་བོན་གྱི་ཆ་ལྡོག་པའི་ཚེ་དེ་དང་ངོ་བོ་གཅིག་པའི་རྣམ་སྨིན་གྱི་ཆ་ལྡོག་ཀྱང་དེའི་རྒྱུན་ཡོད་པ་མི་འགལ་ཞེས་པའི་ལུགས་གཉིས་ལས། དང་པོ་མི་འཐད་དེ། རང་བཞིན་ངོ་བོ་མི་གཅིག་ཀྱང་གནས་སྐབས་ངོ་བོ་གཅིག་པའི་དོན་རང་བཞིན་རྒྱུན་དང་། གནས་སྐབས་སྐད་ཅིག་ལ་འཇོག་པ་འཐད་ན་རུང་བ་ཙམ་སྣང་ཡང་དེའི་ཁྱད་པར་མི་འཐད་པའི་ཕྱིར་རོ། །གཉིས་པ་ལ་ཡང་། ས་བོན་གྱི་ཆ་ལྡོག་པའི་ཚེ་ཆ་མེད་དང་ངོ་བོ་གཅིག་པའི་རྣམ་སྨིན་གྱི་ཆ་ལྡོག་ཅེས་པ་ཡང་ཅུང་མི་འཐད་དེ། ལྡོག་པའི་དོན་འགགས་པ་ལ་བྱེད་ན་སྐད་ཅིག་རེ་རེ་བཞིན་ཏུ་ལྡོག་པར་ཐལ་བའི་སྐྱོན་ཡོད་པའི་ཕྱིར་དང་། རྒྱུན་འགགས་པ་ལ་བྱེད་ན་ས་བོན་གྱི་ཆ་དང་ངོ་བོ་གཅིག་པའི་རྣམ་སྨིན་གྱི་ཆའི་རྒྱུན་མེད་པ་མི་གྲུབ་པའི་ཕྱིར། འོ་ན་ཇི་ལྟར་ཞེ་ན། ངོ་བོ་གཅིག་པ་སྐད་ཅིག་གི་ཆ་ལ་འཇོག་ཅིང་ལྡོག་པ་རྒྱུན་གྱི་ཆ་ལ་འཇོག་པས་རྒྱུན་རིང་ཐུང་བྱུང་བ་ཙམ་གྱིས་ད་ལྟར་གྱི་སྐད་ཅིག་ངོ་བོ་གཅིག་པ་ཙམ་ལ་ཅུང་ཟད་ཀྱང་མི་གནོད་དེ། ལྕགས་གོང་མེར་འབར་བར་གྱུར་པའི་ཚེ་ད་ལྟར་ངོ་བོ་གཅིག་ཀྱང་མེ་དང་ལྕགས་གཉིས་ལ་རྒྱུན་རིང་ཐུང་གི་ཁྱད་པར་ཡོད་པས་མེ་ལྡོག་ནས་ལྕགས་གནས་པ་བཞིན་ནོ། །བརྒྱད་པ་རབ་ཏུ་དབྱེ་བ་ལ། ས་བོན་གྱི་ཆ་དང་། རྣམ་སྨིན་གྱི་ཆ་གཉིས། དང་པོ་ལ་གསུམ་སྟེ། མངོན་པར་བརྗོད་པའི་བག་ཆགས། བདག་ཏུ་ལྟ་བའི་བག་ཆགས། སྲིད་པའི་ཡན་ལག་གི་བག་ཆགས་སོ། །གཉིས་པ་ལ་ཁམས་ཀྱི་སྒོ་ནས་དབྱེ་ན། འདོད་པ། གཟུགས། གཟུགས་མེད་ཀྱི་ཀུན་གཞི་དང་གསུམ། སའི་སྒོ་ནས་དབྱེ་ན། འདོད་པའི་ཀུན་གཞི་ནས་སྲིད་རྩེའི་ཀུན་གཞིའི་བར་དགུའོ། །ཡང་ཀུན་གཞི་ལ་དབྱེ་ན་བཞི་སྟེ། འཕེན་པས་དབྱེ་བ་དང་། རྣམ་པར་སྨིན་པས་དབྱེ་བ་དང་། རྒྱུ་ཉིད་ཀྱིས་དབྱེ་བ་དང་། མཚན་ཉིད་ཀྱིས་དབྱེ་བའོ། །དང་པོ་ནི་ས་བོན་གྱི་ཆ་དང་། གཉིས་པ་ནི་རྣམ་སྨིན་གྱི་ཆ་དང་། གསུམ་པ་ནི་ཉོན་ཡིད་ཀྱིས་བདག་ཏུ་འཛིན་པའི་རྒྱུ་བྱེད་པའི་ཆ་དང་། བཞི་པ་ནི་སྔར་བཤད་པའི་མཚན་ཉིད་གསུམ་མོ། །དགུ་པ་རྣམ་གྲངས་ལ་གཉིས་ཏེ། ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ལ་རྣམ་བཤད་གཞན་དང་ཐུན་མོང་བ་དང་། ཐེག་པ་གཞན་དང་ཐུན་མོང་བ་གཉིས་ལས། དང་པོ་ནི། སེམས་དང་། ཡིད་དང་། རྣམ་པར་ཤེས་པ་ཞེས་པ་སྟེ། དགེ་སློང་བློ་གྲོས་སྐྱེས་ལས་བརྩམས་པའི་མདོ་ལས། སེམས་དང་ཡིད་དང་རྣམ་པར་ཤེས། །ཞེས་བཀའ་སྩལ་པ་ལྟ་བུའོ། །གཉིས་པ་ནི། འཁོར་འདས་ཀུན་གྱི་གཞི་བྱེད་པས་ན་ཀུན་གཞི་ཞེས་པའོ། །གཉིས་པ་ཐུན་མོང་མ་ཡིན་པ་ལ། ཐེག་ཆེན་གྱི་ལུང་ལ་གྲགས་པ་དང་། ཉན་ཐོས་ཀྱི་ལུང་ལ་གྲགས་པའོ། །དང་པོ་ནི། ཤེས་བྱའི་གནས། ལེན་པའི་རྣམ་པར་ཤེས་པ། ས་བོན་ཐམས་ཅད་པའི་རྣམ་པར་ཤེས་པ། རྣམ་པར་སྨིན་པའི་རྣམ་པར་ཤེས་པ། ཀུན་གཞིའི་རྣམ་པར་ཤེས་པ་རྣམས་སོ། །གཉིས་པ་ནི། རྩ་བའི་རྣམ་ཤེས་དང་། སྲིད་པའི་ཡན་ལག་གི་རྣམ་ཤེས་དང་། འཁོར་བ་ཇི་སྲིད་པའི་ཕུང་པོ་རྣམས་སོ། །བཅུ་པ་སྒྲ་དོན་ནི། ཐུན་མོང་བའི་རྣམ་གྲངས་ཀྱི་སྒྲ་དོན་བཤད་ཟིན་ལ། ཐུན་མོང་མ་ཡིན་པའི་རྣམ་གྲངས་ཀྱི་སྒྲ་དོན་ནི་ཤེས་བྱ་ངོ་བོ་ཉིད་གསུམ་གྱི་གནས་ཡིན་པས་ན་ཤེས་བྱའི་གནས། ལུས་མ་གྲུབ་པ་གྲུབ་པ་དང་། གྲུབ་པ་གནས་པར་བྱེད་པའི་ཚུལ་གྱིས་ལེན་པས་ན་ལེན་པའི་རྣམ་ཤེས། བག་ཆགས་བསྒོ་བའི་གཞི་ཡིན་པས་ན་ས་བོན་ཐམས་ཅད་པའི་རྣམ་ཤེས། ཚེ་སྔ་མའི་ལས་ཀྱི་རྣམ་པར་སྨིན་པ་ཡིན་པས་ན་རྣམ་པར་སྨིན་པའི་རྣམ་ཤེས། ཀུན་ནས་ཉོན་མོངས་པ་དང་རྣམ་པར་བྱང་བ་ཀུན་གྱི་གཞི་བྱེད་པས་ན་ཀུན་གཞིའི་རྣམ་ཤེས། ཤིང་གི་རྩ་བ་ལྟར་རྣམ་ཤེས་གཞན་གྱི་རྒྱུ་བྱེད་པས་ན་རྩ་བའི་རྣམ་ཤེས། སྲིད་པའི་རྒྱུ་ཡིན་པས་སྲིད་པའི་ཡན་ལག་གི་རྣམ་ཤེས། འཁོར་བ་ཇི་སྲིད་པའི་བར་དུ་རྒྱུན་མི་ཆད་པས་ན་འཁོར་བ་ཇི་སྲིད་པའི་ཕུང་པོའོ། །བཅུ་གཅིག་པ་སྒྲུབ་པར་བྱེད་པའི་ཚད་མ་ལ་གཉིས་ཏེ། ལུང་དང་། རིག་པའོ། །དང་པོ་ནི། ཐེག་པ་ཆེན་པོ་ཐུན་མོང་མ་ཡིན་པའི་ལུང་ནི་རྒྱན་སྟུག་པོ་བཀོད་པ་ལས། ཇི་ལྟར་ཟླ་བ་སྐར་ཚོགས་དང་། །ལྷན་ཅིག་མཁའ་ལ་གནས་པ་ལྟར། །དེ་བཞིན་ཀུན་གཞིའི་རྣམ་ཤེས་ཀྱང་། །རླབས་བདུན་རྣམས་དང་ལྷན་ཅིག་གནས། །ཞེས་དང་། ཆོས་མངོན་པའི་མདོར། ཐོག་མ་མེད་པའི་དུས་ཅན་ཁམས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང་། །མྱ་ངན་འདས་པ་འཐོབ་པར་འགྱུར། །ཞེས་དང་། ཡང་དེ་ཉིད་ལས། ཆོས་ཀུན་ས་བོན་ཐམས་ཅད་པའི། །རྣམ་པར་ཤེས་པ་ཀུན་གཞི་སྟེ། །དེ་བས་ཀུན་གཞིའི་རྣམ་ཤེས་ནི། །དམ་པ་རྣམས་ལ་ངས་བཤད་དོ། །ཞེས་དང་། མདོ་དགོངས་པ་ངེས་པར་འགྲེལ་པར། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོགས་པར་གྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། །ཞེས་དང་། དེ་ཉིད་ལས། རེས་འགའ་ནི་རྣམ་པར་ཤེས་པ་གཅིག་དང་སྟེ་ཡིད་དོ། །རེས་འགའ་ནི་གཉིས་དང་སྟེ་ཡིད་དང་ཡིད་ཀྱི་རྣམ་པར་ཤེས་པ་དང་ངོ་། །རེས་འགའ་ནི་འཇུག་པའི་རྣམ་ཤེས་ཚོགས་བདུན་དང་ལྷན་ཅིག་འཇུག་གོ །ཞེས་དང་། ལང་ཀར་གཤེགས་པར། སེམས་དང་ཡིད་དང་རྣམ་པར་ཤེས། །མཚན་ཉིད་དོན་དུ་རབ་ཏུ་བརྟག །བརྒྱད་པ་མཚན་ཉིད་ཐ་དད་མེད། །མཚན་གཞི་མེད་ཅིང་མཚན་ཉིད་མེད། །ཅེས་དང་། ཡང་དེ་ཉིད་དུ། དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ཡང་དག་ལྡན། །འཛིན་པ་གཉིས་ཀྱིས་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་དང་། ཡང་དེ་ཉིད་ལས། བློ་གྲོས་ཆེན་པོ་ཀུན་གཞིའི་རྣམ་པར་ཤེས་པ་ཆུ་ཀླུང་ལྟ་བུ་ལས་འཇུག་པའི་རྣམ་པར་ཤེས་པའི་རླབས་འབྱུང་ངོ་། །ཞེས་བཀའ་སྩལ་ཏོ། །ཉན་ཐོས་ཀྱི་ཐེག་པ་ཐུན་མོང་མ་ཡིན་པའི་ལུང་ནི། གཅིག་ལས་འཕྲོས་པའི་ལུང་། དེ་བཞིན་གཤེགས་པ་འབྱུང་བའི་ཕན་ཡོན་རྣམ་པ་བཞིའི་མདོ་ལས། སྐྱེ་རྒུ་ཀུན་གཞི་ལ་ཀུན་ཏུ་དགའ་བ། ཀུན་གཞི་ལས་ཡང་དག་པར་འབྱུང་བ། ཀུན་གཞི་ལ་མངོན་པར་དགའ་བ་ཅན་དག་ལ་ཀུན་གཞི་སྤང་བའི་ཕྱིར་ཆོས་བསྟན་ན་ཉན་འདོད་ལ་རྣ་བ་ཀུན་གཏོད་ཤེས་པར་བྱེད་པའི་སེམས་ཉེ་བར་འཇོག་ཅིང་ཆོས་ཀྱི་རྗེས་སུ་མཐུན་པའི་ཆོས་སྒྲུབ་སྟེ་དེ་བཞིན་གཤེགས་པ་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འདིའང་འཇིག་རྟེན་དུ་འབྱུང་ཞེས་བཀའ་སྩལ་ཏེ། དེ་ལ་བཙུན་པ་དབྱིག་བཤེས་ན་རེ། ཉེར་ལེན་གྱི་ཕུང་པོ་ལ་ཀུན་གཞི་ཡིན་ནོ་ཞེས་ཟེར་རོ། །དེ་ནི་མིན་ཏེ་དེ་ལ་ནི་ཤིན་ཏུ་སྡུག་བསྔལ་བའི་ངན་སོང་བའི་འགྲོ་བ་རྣམས་དགའ་ཞིང་སྦྱོར་བ་མེད་པའི་ཕྱིར་ཏེ། དེ་རྣམས་དེ་དང་འབྲལ་བར་འདོད་པའི་ཕྱིར་རོ། །བཙུན་པ་མིའུ་ཐུང་ན་རེ། བདེ་བའི་ཚོར་བ་འདོད་ཆགས་དང་བཅས་པ་ཀུན་གཞི་ཡིན་ནོ་ཞེས་ཟེར་ཏེ། དེ་ཡང་མི་འཐད་དེ། དེ་བསམ་གཏན་བཞི་པ་ཡན་ཆད་ན་མེད་པའི་ཕྱིར། བཙུན་པ་དབྱངས་སྒྲོགས་ན་རེ། འཇིག་ཚོགས་ལ་ལྟ་བ་ཀུན་གཞི་ཡིན་ནོ་ཞེས་ཟེར་ཏེ། དེ་ཡང་མ་ཡིན་ཏེ། ཆོས་འདི་པ་བདག་མེད་པ་ལ་མོས་པ་རྣམས་དང་མི་མཐུན་པས་དེ་རྣམས་ཀུན་ཏུ་དགའ་བ་མེད་པས་སོ། །ཡང་དགེ་འདུན་ཕལ་ཆེན་པའི་ལུང་ལས་ཀྱང་། རྩ་བའི་རྣམ་པར་ཤེས་པ་ཞེས་འབྱུང་བ་དང་། ས་སྟོན་སྡེ་པའི་ལུང་ལས་ཀྱང་། འཁོར་བ་ཇི་སྲིད་པའི་ཕུང་པོ་ཞེས་འབྱུང་། འཕགས་པ་གནས་བརྟན་པ་རྣམས་ཀྱི་ལུང་ལས་ཀྱང་། སྲིད་པའི་ཡན་ལག་ལྟ་བ་དང་། །ཤེས་པ་དང་ནི་གཏོད་པ་དང་། །གཡོ་བ་དང་ནི་རྟོགས་པ་དང་། །བདུན་པ་འཇུག་པར་བྱེད་པ་ཡིན། །ཞེས་འབྱུང་ལ། དེ་ལ་སྲིད་པའི་ཡན་ལག་ནི་ཀུན་གཞི་ལས་གཞན་དུ་མི་འཐད་དེ། དེ་ལས་གཞན་དག་གིས་ནི་ལུས་ལེན་པ་སོགས་བྱེད་པར་མི་ནུས་པའི་ཕྱིར་རོ། །གཉིས་པ་རིག་པ་ནི། རིག་པ་དང་བྲལ་བའི་ལུང་ལ་ནི་དད་པས་རྗེས་སུ་འབྲང་བ་རྣམས་ཀྱང་ཡིད་ཆེས་པར་མི་འགྱུར་ན་ཆོས་ཀྱི་རྗེས་སུ་འབྲང་བ་རྣམས་ལྟ་སྨོས་ཀྱང་ཅི་དགོས། དེའི་ཕྱིར་རིག་པ་བརྗོད་དགོས་ཤེ་ན་འདི་ལ་གསུམ་སྟེ། བསྡུ་བར་འབྱུང་བའི་རིག་པ་བརྒྱད། ཐེག་བསྡུས་སུ་འབྱུང་བའི་རིག་པ་ལྔ། པན་ཀན་དུ་འབྱུང་བའི་རིག་པ་བཞི་བཤད་པའོ། །དང་པོ་ནི། རྣམ་པར་ངེས་པ་བསྡུ་བར། ལེན་དང་དོགས་པ་བསལ་བ་དང་། །ས་བོན་ལས་དང་ལུས་ཚོར་དང་། །སེམས་མེད་སྙོམས་པར་འཇུག་པ་དང་། །དེ་བཞིན་འཆི་འཕོ་མི་རུང་འགྱུར། །ཞེས་གསུངས་ཏེ། དེ་ལ་དང་པོར། སེམས་ཅན་གྱི་རྒྱུད་ཆོས་ཅན། ལུས་ལེན་པ་མེད་པར་ཐལ། ཀུན་གཞིའི་རྣམ་པར་ཤེས་པ་མེད་པའི་ཕྱིར། ཅི་སྟེ་མ་ངེས་ཏེ། འཇུག་པའི་རྣམ་ཤེས་ཚོགས་དྲུག་གིས་ལེན་ཞེ་ན། དེ་ནི་རྒྱུ་ལྔས་མི་རུང་སྟེ། ཀུན་གཞི་སྔོན་སྐྱེ་བ་སྔ་མའི་འདུ་བྱེད་ཀྱི་རྒྱུ་ལས་བྱུང་ཞིང་། འཇུག་ཤེས་རྣམས་ནི་ད་ལྟ་བ་ཚེ་དེ་པའི་རྐྱེན་ལས་འབྱུང་བས་ན་ལུས་དེ་ལེན་དུས་ན་མ་སྐྱེས་ནས་མེད་པའི་ཕྱིར་ཏེ། ཇི་སྐད་དུ། དབང་པོ་དང་ཡུལ་དང་ཡིད་ལ་བྱེད་པའི་དབང་གིས་རྣམ་པར་ཤེས་པ་རྣམས་འཇུག་པར་འགྱུར་རོ་ཞེས་སྡེ་པ་ལ་གྲགས་པའི་ལུང་དུ་མར་བཀའ་སྩལ་པ་ལྟ་བུའོ། །འོ་ན་རྣམ་ཤེས་ཀྱི་ཡན་ལག་རྣམ་པར་འབྱེད་པ་ན། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཅི་ཞེ་ན། རྣམ་པར་ཤེས་པ་ཚོགས་དྲུག་རྣམས་སོ་ཞེས་བཀའ་སྩལ་པ་ཇི་ལྟར་ཞེ་ན། འཇུག་ཤེས་དྲུག་རྣམས་ཀྱི་ས་བོན་གྱི་རྣམ་པར་ཤེས་པ་ལ་དགོངས་ནས་རྗེས་སུ་ཞུགས་པའི་ཚུལ་གྱིས་འབྲས་བུས་རྒྱུ་སྟོན་པ་བཀྲེས་སྐོམ་གྱི་རེག་བྱ་ལྟ་བུའོ། །ཞེས་སོ། །དང་པོའོ། །ཡང་འཇུག་ཤེས་དྲུག་ནི་དགེ་མི་དགེར་དམིགས་པས་སྔོན་གྱི་འདུ་བྱེད་ཀྱི་རྒྱུ་ལས་མ་བྱུང་སྟེ་འབྱུང་ན་ནི་རྣམ་སྨིན་ཡིན་པར་ལུང་མ་བསྟན་ཁོ་ནར་འགྱུར་དགོས་སོ་ཞེས་སོ། །གཉིས་པའོ། །ཡང་འཇུག་ཤེས་དྲུག་ལ་མཐའ་གཅིག་ཏུ་ལུང་དུ་མ་བསྟན་པ་རྣམ་སྨིན་གྱིས་བསྡུས་པ་མེད་དེ། དེ་ལྟ་བུ་སྣང་དུ་རུང་བ་ལས་མ་དམིགས་པའི་ཕྱིར། དེས་ན་སྔོན་གྱི་ལས་ཀྱི་རྒྱུ་ལས་མ་བྱུང་བས་ལུས་ལེན་བྱེད་དུ་མི་འཐད་དོ། །གསུམ་པའོ། །ཡང་འཇུག་ཤེས་དྲུག་ནི་གནས་སོ་སོར་ངེས་པས་ན་ལུས་ལེན་ཅིང་འཛིན་པར་མི་རུང་སྟེ། གནས་གང་དང་གང་ལས་མིག་ཤེས་སོགས་འབྱུང་བ་དེ་དང་དེ་ཤེས་པས་ཟིན་གྱིས་གཞན་མ་ཟིན་པས་རོ་ལྟར་འགྱུར་རོ། །མི་འགྱུར་ཏེ། ལུས་ཀྱི་དབང་པོས་ཀུན་ལ་ཁྱབ་པ་ལས་དབང་པོས་འཛིན་སྙམ་ན། ལུས་དབང་དེ་ལུས་གཞན་འཛིན་བྱེད་དུ་མི་རུང་སྟེ། རང་ཉིད་ཀྱང་ཤེས་པ་དང་བྲལ་བས་ན་མ་ཟིན་པའི་ཕྱིར་རོ། །དེ་ལྟར་ན་ལུས་ཀྱིས་གང་རེག་བྱ་འཇལ་བ་དེ་ལུས་ཤེས་ཀྱིས་ཟིན་དུ་ཆུག་ཀྱང་གཞན་མ་ཟིན་པར་འགྱུར་བས་སོ། །བཞི་པའོ། །ཡང་དང་ཡང་དུ་ལུས་འཛིན་པའི་ཉེས་པར་ཡང་འགྱུར་ཏེ། མིག་ཤེས་སོགས་གཉིད་དང་བརྒྱལ་བ་སོགས་ན་མི་འབྱུང་བས་དེའི་ཚེ་མ་ཟིན་པའི་ཕྱིར་ཤི་བ་ལྟར་རུལ་པར་འགྱུར་ཞིང་སད་པ་དང་སངས་པ་སོགས་ན་ཡང་ལེན་པར་ཐལ་བས་སོ། །དེ་ལྟར་ཡང་མི་རུང་སྟེ། ཚེ་གཅིག་ལ་ལུས་ལན་གཅིག་ཁོ་ན་འཛིན་པར་ཁས་བླངས་པའི་ཕྱིར། ཞེས་པའོ། །ལྔ་པའོ། །གཉིས་པ་ནི། ཀུན་གཞི་ཡོད་པར་སྨྲ་བ་ལའང་སྐྱོན་ཡོད་དེ། དེ་ཡོད་ན་རེས་འགའ་འཇུག་ཤེས་ཀྱང་འབྱུང་བས་རྣམ་ཤེས་གཉིས་ཅིག་ཅར་འབྱུང་བར་འགྱུར་རོ་ཞེ་ན། འདོད་དེ། འདི་ལྟར་ཁ་ཅིག་མཐོང་བར་འདོད་པ་ནས་རྣམ་པར་ཤེས་པའི་བར་དུ་འདོད་ཅིང་། དེ་རྣམས་ཀྱི་ཡིད་ལ་བྱེད་པ་དང་དབང་པོ་དྲུག་དང་ཡུལ་དྲུག་ཚོགས་པར་ཁྱད་པར་མེད་པ་ན་རྣམ་ཤེས་གང་རུང་གཅིག་དང་པོར་འབྱུང་བ་མི་རུང་སྟེ། ཤེས་པ་ཀུན་གྱི་རྒྱུ་ཚོགས་པར་ཁྱད་པར་མེད་པས་སོ། །རྣམ་འགྲེལ་དུ། འདིར་དོན་ཀུན་དང་གཅིག་ཅར་དུ། །འདུས་ཅན་དབང་རྣམས་ཡོད་པ་ན། །ཞེས་གསུངས་སོ། །འདིས་ནི་རང་གི་སྡེ་བ་དག་དང་། མུ་སྟེགས་པ་ཁ་ཅིག རྒྱུད་གཅིག་ལ་ཤེས་པ་དུ་མ་ཅིག་ཅར་མི་སྐྱེའི་མྱུར་དུ་སྐྱེ་འགགས་བྱེད་པ་ཅིག་ཅར་དུ་འཁྲུལ་པས་སོ་ཞེས་སྨྲ་བའང་བསལ་ཅིང་། དེ་དག་ཀྱང་རྒྱས་པར་རྣམ་འགྲེལ་དུ་ཤེས་པར་བྱའོ། །འོ་ན་རྣམ་པར་ཤེས་པ་གཉིས་དུས་གཅིག་ཏུ་འབྱུང་བ་དེ་ནི་གནས་མེད་ཅིང་གོ་སྐབས་མེད་དོ་ཞེས་བཀའ་སྩལ་པ་དང་འགལ་ལོ་ཞེ་ན། དེ་ནི་རིགས་མཐུན་པའི་ཤེས་པ་གཉིས་ཅིག་ཅར་དུ་མི་འབྱུང་བ་ལ་དགོངས་ཏེ། རྣལ་འགྲེལ་དུ། དེ་རྣམས་རིགས་མཐུན་པ་ཉིད་ལས། །ནུས་པ་ངེས་པར་འགྱུར་བ་ཡིན། །ཞེས་སོ། །གསུམ་པ་ནི། རྣམ་ཤེས་ཅིག་ཅར་དུ་མི་འབྱུང་ན་ཡིད་ཀྱི་རྣམ་ཤེས་ཀྱི་མཐོང་བ་ལ་ཡང་གསལ་བར་ཡུལ་འཛིན་པར་མི་རུང་ངོ་། །དེ་ཅིས་ཞེ་ན། འདི་ལྟར་མིག་ཤེས་སོགས་གཅིག་སྐྱེས་ན་དེའི་སྐད་ཅིག་གཉིས་པ་ལ་དེའི་རྗེས་སུ་རྟོག་པའི་ཡིད་ཤེས་སྐྱེ་ཞིང་། འཇུག་ཤེས་ཀུན་ཅིག་ཅར་སྐྱེ་བ་དེ་ཡི་ཚེ་ཡང་རྣམ་པ་སྣ་ཚོགས་རྣམ་པར་རིག་པའི་ཡིད་ཤེས་གཅིག་གིས་རྗེས་སུ་རྟོག་པར་བྱེད་དོ། །དེ་ལ་འདས་པའི་ཡུལ་འགགས་ནས་རིང་དུ་ལོན་པ་སྔར་མྱོང་བ་དྲན་པའི་ཡིད་ཤེས་ཀྱི་རྒྱུ་བ་ནི་མི་གསལ་བ་སྟེ། ད་ལྟར་གྱི་ཡུལ་ཅན་གྱི་ཡིད་ཤེས་ཀྱི་རྒྱུ་བ་རྣམ་ཤེས་ལྔ་དང་དུས་མཉམ་པ་ནི་གསལ་བ་ཡིན་པས་སོ། །བཞི་པ་ནི། སེམས་ཅན་གྱི་རྒྱུད་ལ་དགེ་བ་ལ་སོགས་པའི་ས་བོན་མེད་པར་ཐལ་ཏེ། ས་བོན་གྱི་རྟེན་ཀུན་གཞིའི་རྣམ་ཤེས་མེད་པའི་ཕྱིར། ཅི་སྟེ་འཇུག་པའི་རྣམ་ཤེས་རྣམས་ས་བོན་གྱི་རྟེན་ཡིན་ནོ་ཞེ་ན། དེ་རྣམས་ཕན་ཚུན་ས་བོན་མིན་ཏེ། དགེ་བའི་འོག་ཏུ་མི་དགེ་བ་སོགས་དང་ཁམས་ངན་པ་འདོད་པ་ན་སྤྱོད་པའི་འོག་ཏུ་བར་མ་གཟུགས་ན་སྤྱོད་པ་དང་། དེ་ལས་བཟང་པོ་གཟུགས་མེད་ན་སྤྱོད་པ་དང་། ཟག་བཅས་ཟག་མེད། འཇིག་རྟེན་དང་དེ་ལས་འདས་པ་སོགས་ཕན་ཚུན་གཅིག་གི་རྗེས་ལ་གཅིག་འབྱུང་བས་ན་ལྷན་ཅིག་མི་འབྱུང་བས་བསྒོས་པ་མེད་པའི་ཕྱིར་དང་། དྲི་ཤས་ཆེ་བ་ལ་མི་བསྒོ་བ་ལྟར་དགེ་བ་སོགས་བསྒོ་བྱར་མི་རུང་བའི་ཕྱིར་རོ། །འདིར་ཟག་མེད་མ་ཡིན་པའི་འཇིག་རྟེན་ལས་འདས་པའི་རྗེས་ཐོབ་ཀྱང་འཇིག་རྟེན་ལས་འདས་པའི་སར་བཞག་པའི་ཆེད་དུ་ལྟོས་པ་ལྟ་བུར་གསུངས་སོ། །ཞེས་སོ། །ཡང་དེ་རྣམས་ནི་སེམས་མེད་གནས་སྐབས་སུ་རྒྱུན་ཆད་ནས་ཡུན་རིང་པོ་ནས་འབྱུང་བའི་ཕྱིར་ཡང་ས་བོན་དུ་མི་རུང་ངོ་། །ས་བོན་མེད་ན་རྒྱུ་མེད་པས་ཉོན་མོངས་པ་དང་རྣམ་བྱང་གི་ཆོས་མེད་པར་འགྱུར་ཞིང་། མདོ་སྡེ་པས་ནི་ས་བོན་འདོད་པས་ཁས་བླངས་དང་འགལ་ལོ། །ཞེའོ། །ལྔ་པ་ནི། རྣམ་ཤེས་དུ་མ་ཅིག་ཅར་མི་འབྱུང་ན་སྣོད་ལམ་འཕྲང་གི་རྣམ་རིག་གནས་ལུས་རྐང་པ་འདེགས་འཇོག་གི་རྣམ་རིག་དང་། ངའོ་སྙམ་པའི་རྣམ་པ་ཅན་གྱི་རྣམ་རིག་དང་། ཡུལ་ལམ་གྱི་དྲུང་གི་ས་རྡོ་སོགས་ཀྱི་རྣམ་རིག་རྣམས་ཅིག་ཅར་དུ་འབྱུང་མི་སྲིད་པར་ཐལ་ལོ། །འདོད་མི་ནུས་ཏེ། མགྱོགས་པར་འགྲོ་བ་སོགས་ཀྱི་གནས་སྐབས་སུ་འདི་བཞི་ཅིག་ཅར་དམིགས་པས་སོ། །འདི་བཞི་རྣམ་ཤེས་གཅིག་གི་སྐད་ཅིག་ལ་མི་འབྱུང་སྟེ། ཡུལ་སྐྱེ་མཆེད་ཐ་དད་པའི་རྣམ་པ་ཅན་ཉིད་ཀྱི་ཕྱིར་རོ། །དྲུག་པ་ནི། ཀུན་གཞི་མེད་ན་རྒྱུ་ས་བོན་མེད་པའི་ཕྱིར་ཚུལ་བཞིན་དུ་སེམས་པའམ། རྗེས་སུ་རྣམ་པར་རྟོག་པ་དང་། ཚུལ་བཞིན་མ་ཡིན་པའམ་མཉམ་པར་བཞག་པའི་རྣམ་ཤེས་དང་ལྷན་ཅིག་འབྱུང་བའི་ལུས་ཀྱི་རྣམ་ཤེས་དང་མཚུངས་པར་ལྡན་པའི་མྱོང་བ་བདེ་བ་སོགས་མེད་པར་འགྱུར་ན། དེ་ནི་དམིགས་ཤིང་ཕ་རོལ་པོས་ཁས་བླངས་པས་སོ། །ཅིག་ཅར་རྣམ་པར་ཤེས་པ་དུ་མ་འབྱུང་བའི་སྒྲུབ་བྱེད་ཀྱི་སྒོ་ནས་ཀྱང་གཞུང་འདི་བཤད་པར་བྱའོ། །ཞེའོ། །བདུན་པ་ནི། ༼སྙོམས་འཇུག་གཉིས་ལ་ཞུགས་པ་དེ་འཆི་བར་འགྱུར་ཏེ། རྣམ་ཤེས་ཀུན་ལུས་ལས་འདས་པའི་ཕྱིར་རོ། །འདོད་མི་ནུས་ཏེ། འགོག་པའི་སྙོམས་འཇུག་དང་ཤི་བའི་ཁྱད་པར་སྟོན་པ་ན། བཅོམ་ལྡན་འདས་ཀྱིས་དྲོད་དང་མ་བྲལ་ཞིང་སྲོག་གི་དབང་པོ་དང་མ་བྲལ་ལ་དེའི་རྣམ་པར་ཤེས་པ་ལུས་ལས་མ་འདས་པར་འགྱུར་རོ་ཞེས་བཀའ་སྩལ་པས་སོ། །བརྒྱད་པ་ནི།༽་་་་་གུག་རྟགས་ནང་ཡོད་པ་འདི་ཆད་འདུག་པས་དཔང་ལོའི་མངོན་པ་ཀུན་བཏུས་ཀྱི་འགྲེལ་པ་ནས་ལེན་ཏེ་འདིར་བཅུག་པ་ཡིན། སེམས་ཅན་གྱི་རྒྱུད་ཆོས་ཅན། འཆི་ཕོ་བ་དང་རིམ་གྱིས་དྲོད་ཡལ་བ་མེད་པར་ཐལ། འདོར་བྱེད་ཀུན་གཞི་མེད་པའི་ཕྱིར། འདོད་མི་ནུས་ཏེ། ལུས་ཀྱི་སྟོད་དམ་སྨད་ནས་རིམ་གྱིས་དྲོད་ཡལ་བ་མཐོང་བས་སོ། །དེ་སྟེ་ཡིད་ཤེས་ཀྱིས་ལུས་འདོར་བས་དེ་ལྟར་འབྱུང་བའོ་སྙམ་ན། ཡིད་ཤེས་ནི་སྲོག་ཐ་མ་ཆད་ཀྱི་བར་དུ་གསལ་པོ་ཡོད་ཀྱང་དེའི་སྔོན་དུ་དྲོད་ཡལ་བ་མཐོང་བས་སོ། །དེས་ན་ལུས་འཛིན་བྱེད་ཀུན་གཞི་ཉིད་དང་བྲལ་བས་དྲོད་འདོར་བ་དང་ཚོར་བ་མེད་པའི་ཕྱིར། ལས་ཀྱི་མཐུ་ལས་དེ་ལྟར་བྱེད་པའི་ཀུན་གཞི་གྲུབ་བོ། །གཉིས་པ་ནི། ཐེག་བསྡུས་ལས། དེ་ལྟར་རྣམ་པར་གཞག་པའི་ཀུན་གཞིའི་རྣམ་པར་ཤེས་པ་མེད་པར་འདི་ལྟར་ཀུན་ནས་ཉོན་མོངས་པ་དང་རྣམ་པར་བྱང་བ་མི་རུང་སྟེ། ཉོན་མོངས་པའི་ཀུན་ནས་ཉོན་མོངས་པ་དང་། ལས་ཀྱི་ཀུན་ནས་ཉོན་མོངས་པ་དང་། ཚེའི་ཀུན་ནས་ཉོན་མོངས་པ་ཡང་མི་རུང་ངོ་། །འཇིག་རྟེན་དང་འཇིག་རྟེན་ལས་འདས་པའི་རྣམ་པར་བྱང་བ་ཡང་མི་རུང་ངོ་། །ཞེས་གསུངས་པ་ལྟར་ཀུན་ནས་ཉོན་མོངས་པ་གསུམ་མི་འཐད་པ་དང་། རྣམ་པར་བྱང་བ་གཉིས་མི་འཐད་པར་རིག་པར་བྱའོ། །དང་པོ་ཉོན་མོངས་པའི་ཀུན་ནས་ཉོན་མོངས་པ་མི་འཐད་པ་ལ་ཡང་ཆགས་སོགས་ཀུན་ནས་ཉོན་མོངས་ཀྱི་རྟེན་མེད་པར་འགྱུར་བར་ཐལ་བ་དང་། འདུ་ཤེས་མེད་པ་ནས་ཤི་འཕོས་མ་ཐག་པའི་ཉོན་མོངས་དང་པོ་ལ་ས་བོན་མེད་པར་འགྱུར་བ་དང་། འཇིག་རྟེན་ལས་འདས་པའི་ལམ་ལས་ལངས་མ་ཐག་པའི་འཇིག་རྟེན་པའི་སེམས་ལ་ས་བོན་མེད་པར་ཐལ་བ་གསུམ་ལས། དང་པོ་ནི། ཀུན་གཞིའི་རྣམ་ཤེས་མེད་ན་ཆགས་སོགས་ཉོན་མོངས་གཏན་ནས་མི་སྐྱེ་བར་འགྱུར་ཏེ། དེ་དག་གི་ས་བོན་ལ་རྟེན་མེད་པས་རྒྱུ་མེད་པའི་ཕྱིར་རོ། །གལ་ཏེ་འཇུག་པའི་རྣམ་པར་ཤེས་པ་རྟེན་ཡིན་ནོ་ཞེ་ན། རེ་ཞིག་མིག་གི་རྣམ་པར་ཤེས་པ་ནི་དེ་དག་གི་རྟེན་དུ་མི་རུང་སྟེ། འདི་ལྟར་འདོད་ཆགས་ལ་སོགས་པས་རང་དང་ལྷན་ཅིག་སྐྱེས་པའི་མིག་གི་རྣམ་པར་ཤེས་པ་ལ་རང་གི་ས་བོན་སྒོའམ། འོན་ཏེ་རང་ཉིད་ལ་སྒོ་བར་བྱེད་དམ། ཡང་ན་དེ་དག་དང་ལྷན་ཅིག་སྐྱེས་པའི་མིག་གི་རྣམ་པར་ཤེས་པ་དེས་ཆགས་སོགས་ལ་དེ་དག་གི་ས་བོན་སྒོ་བར་བྱེད་དམ། འོན་ཏེ་དེས་འཇུག་ཤེས་གཞན་རྣམས་ལ་ཆགས་སོགས་ཀྱི་ས་བོན་སྒོ་བར་བྱེད་དམ། འོན་ཏེ་མིག་ཤེས་རང་གི་རིགས་འདྲ་ཕྱི་མ་ལ་སྒོ་བར་བྱེད་ཅེས་བརྟག་དྲང་། དང་པོ་ལྟར་ན་ཆགས་སོགས་དང་ལྷན་ཅིག་སྐྱེས་པའི་མིག་གི་རྣམ་ཤེས་ནི་ཆོས་ཅན། ཆགས་སོགས་ཕྱི་མ་སྐྱེད་པའི་ས་བོན་གྱི་གནས་སུ་རིགས་པ་མ་ཡིན་ཏེ། ཆགས་སོགས་ཕྱི་མའི་དུས་ན་འདས་པས་དངོས་པོ་མེད་པའི་ཕྱིར་རོ། །གཉིས་པ་ལྟར་ཡང་མི་རིགས་ཏེ། སེམས་ཀྱིས་ས་བོན་གྱི་རྟེན་མི་བྱེད་པར་སེམས་བྱུང་གིས་ས་བོན་གྱི་རྟེན་བྱེད་པ་མི་འཐད་པའི་ཕྱིར། རིག་པ་དེ་ཉིད་ཀྱིས་ཕྱོགས་གསུམ་པ་ཡང་ཁེགས་སོ། །བཞི་པ་ཡང་མི་འཐད་དེ། འཇུག་པའི་རྣམ་པར་ཤེས་པ་རྣམས་ཀྱིས་ནི་ལྷན་ཅིག་སྐྱེ་བ་དང་འགགས་པ་མ་ཡིན་ཏེ། ཡུལ་དང་དབང་པོ་དང་ཡིད་ལ་བྱེད་པ་རྣམས་ཐ་དད་པ་ཉིད་ཀྱིས་ཕན་ཚུན་འབྲེལ་པ་མེད་པའི་ཕྱིར་རོ། །ལྔ་པ་ཡང་མི་འཐད་དེ། མིག་ཤེས་རིགས་འདྲ་སྔ་མ་དེ་རིགས་འདྲ་ཕྱི་མ་དང་ལྷན་ཅིག་སྐྱེ་བ་དང་འགགས་པ་མི་འཐད་པའི་ཕྱིར་རོ། །མིག་གི་རྣམ་པར་ཤེས་པ་ཇི་ལྟར་བར་འཇུག་པའི་རྣམ་པར་ཤེས་པ་གཞན་ལ་ཡང་རིག་པར་བྱའོ། །གཉིས་པ་ནི། ཀུན་གཞིའི་རྣམ་ཤེས་མེད་ན་འདུ་ཤེས་མེད་པ་ནས་ཤི་འཕོས་ཏེ་འདོད་པར་སྐྱེ་བའི་ཉིང་མཚམས་སྦྱོར་བའི་ཚེ་སྐྱེ་བའི་སྲིད་པ་ཉོན་མོངས་ཅན་གྱི་རྣམ་པར་ཤེས་པ་ལ་ས་བོན་མེད་པར་འགྱུར་ཏེ། སྔར་གྱི་འདོད་པའི་ཉོན་མོངས་པའི་ས་བོན་གང་ཡིན་པ་དེ་ནི་གནས་དང་བཅས་པ་འགགས་ནས་མེད་པའི་ཕྱིར་དང་། རང་གི་རིགས་འདྲ་སྔ་མའི་བར་སྲིད་ཀྱི་སེམས་དགེ་བའམ་མ་བསྒྲིབས་ལུང་མ་བསྟན་གང་ཡིན་པ་དེ་དག་ནི་ཉོན་མོངས་པ་དང་ལྷན་ཅིག་སྐྱེ་འགགས་མ་བྱས་པས་དེ་དག་ལ་དེའི་ས་བོན་ཡོད་པར་མི་རིག་པའི་ཕྱིར་རོ། །གསུམ་པ་ནི། གལ་ཏེ་ཀུན་གཞིའི་རྣམ་ཤེས་མེད་ན་འཕགས་པའི་ལམ་ལས་ལངས་པའི་རྗེས་ལས་སྐྱེས་པའི་སེམས་ཉོན་མོངས་ཅན་ཐོག་མར་སྐྱེ་བ་གང་ཡིན་པ་དེ་ལ་ས་བོན་མེད་པར་འགྱུར་ཏེ། འཕགས་པའི་ལམ་མངོན་དུ་གྱུར་པ་ན་དེ་ལས་གཞན་པའི་འཇུག་པའི་རྣམ་པར་ཤེས་པ་འཇིག་རྟེན་པ་རྣམས་ནི་འགགས་པས་ཉོན་མོངས་པའི་ས་བོན་གྱི་རྟེན་དུ་མི་རུང་ལ། འཕགས་པའི་ལམ་དེ་ཉིད་ནི་ཉོན་མོངས་ཀྱི་ས་བོན་གྱི་གནས་སུ་རིག་པ་མ་ཡིན་ཏེ། ངོ་བོ་ཉིད་ཀྱིས་རྣམ་པར་གྲོལ་བའི་ཕྱིར་དང་། ཉོན་མོངས་པའི་གཉེན་པོར་གྱུར་པའི་ཕྱིར་རོ། །དེ་བས་ན་ཀུན་གཞིའི་རྣམ་པར་ཤེས་པ་མེད་ན་མཐོང་ལམ་སྐྱེས་པ་ན་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ཀྱི་ས་བོན་རྒྱུན་ཆད་པས་དེའི་འོག་ཏུ་དགྲ་བཅོམ་པ་བཞིན་དུ་ཉོན་མོངས་པ་རྣམས་གཏན་མི་སྐྱེ་བར་འགྱུར་རོ། །དེ་ལྟར་ན་མཐོང་བའི་ལམ་ཉིད་ཀྱིས་རྣམ་པར་གྲོལ་བའི་ཕྱིར་སྒོམ་པའི་ལམ་དོན་མེད་པ་ཡིན་ནོ། །གཉིས་པ་ལས་ཀྱི་ཀུན་ནས་ཉོན་མོངས་པ་མི་རུང་བ་ལ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་མི་རུང་བ་དང་། ལེན་པའི་རྐྱེན་གྱིས་སྲིད་པ་མི་རུང་བ་གཉིས་ལས། དང་པོ་ནི། འདི་ལྟར་རྣམ་པར་ཤེས་པ་ལ་བསོད་ནམས་དང་བསོད་ནམས་མ་ཡིན་པ། མི་གཡོ་བའི་ལས་རྣམས་ཀྱིས་རང་དང་རྗེས་སུ་མཐུན་པའི་བག་ཆགས་བསྒོས་པ་གང་ཡིན་པ་དེ་ཉིད་ལ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་ན་བག་ཆགས་བསྒོ་བའི་གཞིར་གྱུར་པའི་རྣམ་ཤེས་མེད་པའི་ཕྱིར་རོ། །གཉིས་པ་ནི། འདི་ལྟར་འདུ་བྱེད་ཀྱིས་བསྒོས་པའི་བག་ཆགས་གང་ཡིན་པ་དེ་ཉིད་ལེན་པས་གསོས་བཏབ་སྟེ་ཡང་སྲིད་པར་སྐྱེ་བ་ལ་མངོན་པར་ཕྱོགས་པ་གང་ཡིན་པ་དེ་ཉིད་ལ་ལེན་པའི་རྐྱེན་གྱིས་སྲིད་པ་ཞེས་བརྗོད་ན། འདུ་བྱེད་ཀྱིས་བསྒོས་པའི་བག་ཆགས་མེད་པའི་ཕྱིར་རོ། །གསུམ་པ་ཚེའི་ཀུན་ནས་ཉོན་མོངས་པ་མི་རུང་བ་ལ་གཉིས་ཏེ། སྐྱེ་བ་ལེན་པ་མི་རུང་བ་དང་། འཆི་འཕོ་བ་མི་རུང་བའོ། །དང་པོ་ལ་གསུམ་སྟེ། མཉམ་པར་མ་བཞག་པའི་སར་ཉིང་མཚམས་སྦྱོར་བར་མི་རུང་བ་དང་། མཉམ་པར་བཞག་པའི་སར་ཉིང་མཚམས་སྦྱོར་བར་མི་རུང་བ་དང་། གཟུགས་མེད་ཁམས་ལ་ཁྱད་པར་དུ་དཔྱད་པའོ། །དང་པོ་ལ་བཞི་སྟེ། ཉིང་མཚམས་སྦྱོར་བར་མི་རུང་། སྦྱར་ཟིན་གྱི་དབང་པོ་རྣམས་གནས་པར་མི་རུང་། རྣམ་པར་ཤེས་པ་དང་མིང་གཟུགས་ཕན་ཚུན་བརྟེན་པར་མི་རུང་། རྣམ་པར་ཤེས་པའི་ཟས་མི་རུང་བའོ། །དང་པོ་ནི། མཉམ་པར་མ་བཞག་པའི་བར་མའི་མངལ་དུ་ཉིང་མཚམས་སྦྱོར་བར་མི་རིག་སྟེ། འཇུག་པའི་རྣམ་པར་ཤེས་པ་རྣམས་ཀྱིས་ཉིང་མཚམས་སྦྱོར་བར་མི་ནུས་པའི་ཕྱིར་དང་། རྣམ་པར་ཤེས་པ་གཞན་ཡང་ཁས་མི་ལེན་པའི་ཕྱིར་རོ། །གཉིས་པ་ནི། ཉིང་མཚམས་སྦྱར་ཟིན་པའི་དབང་པོ་རྣམས་མི་འདྲུལ་བ་ལ་སོགས་པའི་སྒོ་ནས་ཇི་སྲིད་འཚོ་བའི་བར་དུ་གནས་པར་མི་རིག་སྟེ། དེ་དག་ཡོངས་སུ་འཛིན་པར་བྱེད་པའི་རྣམ་ཤེས་མེད་པའི་ཕྱིར་ཏེ། དཔེར་ན་ཤི་བའི་ལུས་བཞིན་ནོ། །གསུམ་པ་ནི། མདོ་ལས། རྣམ་པར་ཤེས་པ་དང་། མིང་དང་གཟུགས་མདུང་ཁྱིམ་ལྟར་གཅིག་ལ་གཅིག་བརྟེན་པའི་ཚུལ་གྱིས་འདུག་པར་གསུངས་པ་གང་ཡིན་པ་དེའང་མི་རུང་སྟེ། ཀུན་གཞི་ལས་གཞན་པའི་མིང་གཟུགས་ཀྱི་རྟེན་དུ་རུང་བའི་རྣམ་པར་ཤེས་པ་གཞན་མེད་པའི་ཕྱིར། བཞི་པ་ནི། ཁམས་གསུམ་གྱི་སེམས་ཅན་གནས་པར་བྱེད་པའི་རྣམ་ཤེས་ཀྱི་ཟས་མེད་པར་འགྱུར་ཏེ། དབང་པོའི་རྣམ་པར་ཤེས་པ་ནི་གཟུགས་མེད་ཁམས་ན་མེད་པའི་ཕྱིར་དང་། ཡིད་ཀྱི་རྣམ་པར་ཤེས་པ་ཡང་སེམས་མེད་པའི་གནས་སྐབས་ལྔ་ན་རྒྱུན་ཆད་པས་རྣམ་པར་ཤེས་པའི་ཟས་སུ་མི་རུང་བའི་ཕྱིར་རོ། །གཉིས་པ་མཉམ་པར་བཞག་པའི་སར་ཉིང་མཚམས་སྦྱོར་བར་མི་རུང་བ་ནི་འདི་ནས་ཤི་འཕོས་ནས་མཉམ་པར་བཞག་པའི་སར་སྐྱེ་བ་ལེན་པའི་ཉིང་མཚམས་སྦྱོར་བ་སྦྲེལ་བར་བྱེད་པ་མི་འཐད་དེ། མཉམ་པར་བཞག་པའི་སར་ཉིང་མཚམས་སྦྱོར་བ་སྦྲེལ་བ་ནི་དེའི་ས་པའི་ཡིད་ཀྱི་རྣམ་པར་ཤེས་པ་མཉམ་པར་མ་བཞག་པའི་ཉོན་མོངས་ཅན་གྱི་བྱེད་པ་ཡིན་ན། ཀུན་གཞི་མེད་ན་དེ་ལྟ་བུའི་རྣམ་པར་ཤེས་པ་སྐྱེ་བའི་རྒྱུར་གྱུར་པའི་ས་བོན་མེད་པའི་ཕྱིར་རོ། །གསུམ་པ་གཟུགས་མེད་ཁམས་ལ་ཁྱད་པར་དུ་དཔྱད་པ་ནི། གཟུགས་མེད་བཞིར་སྐྱེས་པའི་སེམས་ཅན་རྣམས་ཀྱི་རྒྱུད་ལ་སྐྱེས་པའི་དགེ་བ་དང་ཉོན་མོངས་ཅན་གྱི་སེམས་སྐྱེས་པ་གང་ཡིན་པ་དེ་དག་རྒྱུ་མེད་པར་སྐྱེ་བར་འགྱུར་ཏེ། དད་སོགས་དགེ་བ་དང་། ཆགས་སོགས་ཉོན་མོངས་པ་ཅན་གྱི་ས་བོན་བསྒོ་བའི་གཞིར་གྱུར་པའི་རྣམ་པར་ཤེས་པ་མེད་པའི་ཕྱིར་རོ། །གཉིས་པ་འཆི་འཕོ་བ་མི་རུང་བ་ནི། ལེགས་པར་བྱེད་པ་དང་ཉེས་པར་བྱེད་པ་དག་འཆི་འཕོ་བའི་ཚེ་གོ་རིམ་བཞིན་དུ་ཐོག་མ་ཉིད་དུ་རྐང་པའི་མཐིལ་དང་། སྤྱི་བོ་ནས་དྲོད་རིམ་གྱིས་འདོར་བར་བྱེད་པ་དེ་མི་རུང་བར་འགྱུར་ཏེ། དེ་ལྟར་བྱེད་པའི་རྣམ་པར་ཤེས་པ་གཞན་མེད་པའི་ཕྱིར། ཀུན་ནས་ཉོན་མོངས་པ་གསུམ་མི་རུང་བར་ཐལ་བ་བཤད་ཟིན་ཏོ། །ད་ནི་རྣམ་པར་བྱང་བ་མི་རུང་བ་ལ་གཉིས་ལས། དང་པོ་འཇིག་རྟེན་པའི་རྣམ་པར་བྱང་བ་མི་རུང་སྟེ། འདོད་པ་སོགས་ལ་འདོད་ཆགས་དང་བྲལ་བ་མི་འཐད་པའི་ཕྱིར། དེ་ཡང་འདི་ལྟར་འདོད་པ་ལ་འདོད་ཆགས་དང་མ་བྲལ་བར་གཟུགས་ཀྱི་སེམས་མི་ཐོབ་པས་འདོད་པ་ན་སྤྱོད་པའི་སྦྱོར་བ་ལས་བྱུང་བའི་དགེ་བའི་སེམས་ཀྱིས་འདོད་པ་ལ་འདོད་ཆགས་དང་བྲལ་བར་བྱ་བའི་ཕྱིར་རྩོམ་པ་ན་སེམས་དེ་ཡང་གཟུགས་ན་སྤྱོད་པའི་སེམས་དང་ལྷན་ཅིག་འབྱུང་བ་དང་འགག་པ་མེད་པའི་ཕྱིར་དེས་བག་ཆགས་བསྒོས་པ་མེད་པས་དེའི་ས་བོན་ཅན་དུ་མི་རུང་ལ་གཟུགས་ན་སྤྱོད་པའི་སེམས་འདས་པ་ཚེ་རབས་དུ་མའི་སེམས་རིགས་མི་མཐུན་པ་དུ་མས་བར་དུ་ཆོད་པ་དེ་ཡང་འདས་ནས་མེད་པའི་ཕྱིར་ད་ལྟར་གྱི་མཉམ་པར་བཞག་པའི་སེམས་ཀྱི་ས་བོན་དུ་མི་རུང་བའི་ཕྱིར་རོ། །ཀུན་གཞིའི་རྣམ་ཤེས་མེད་ན་འཇིག་རྟེན་ལས་འདས་པའི་རྣམ་པར་བྱང་བ་ཡང་མི་རུང་སྟེ། ཇི་སྐད་དུ། གཞན་གྱི་སྒྲ་ལ་རྟོག་པ་དང་། སོ་སོ་རང་གི་ཚུལ་བཞིན་ཡིད་ལ་བྱེད་པ་དེའི་རྒྱུ་ལས་ཡང་དག་པའི་ལྟ་བ་འབྱུང་ངོ་། །ཞེས་བཀའ་སྩལ་པ་དེ་ཡང་མི་རུང་བའི་ཕྱིར་རོ། །ཡང་དག་པའི་ལྟ་བའི་མིང་ཅན་ཟག་མེད་སྐད་ཅིག་དང་པོ་དེའི་བདག་པོའི་རྐྱེན་དང་། རྒྱུའི་རྐྱེན་གཉིས་ཀ་མི་རུང་བའི་ཕྱིར་རོ། །ཐེག་བསྡུས་ལས་འབྱུང་བའི་རིགས་པ་ལྔ་བཤད་ཟིན་ཏོ། །གསུམ་པ་ནི། ཡང་ཕུང་པོ་ལྔའི་རབ་ཏུ་བྱེད་པར་སྒྲུབ་བྱེད་བཞི་གསུངས་ཏེ། སྙོམས་འཇུག་གཉིས་དང་། འདུ་ཤེས་མེད་པ་ལས་ལངས་པའི་ཚེ་འཇུག་ཤེས་འབྱུང་བས་དེ་ལ་རྒྱུའི་རྐྱེན་གཞན་མེད་པའི་ཕྱིར་ཀུན་གཞི་ལས་འབྱུང་ངོ་ཞེས་དང་། དམིགས་པའི་རྐྱེན་ལ་ལྟོས་ནས་རྣམ་པ་གཞན་དུ་འཇུག་པའི་ཕྱིར་ཞེས་པ། རྣམ་པ་དེ་དམིགས་རྐྱེན་ལ་ལྟོས་པ་ལྟར་རྒྱུའི་རྐྱེན་ལ་ཡང་ལྟོས་ཤིང་དེ་ཡང་ཀུན་གཞིའི་ས་བོན་ཡིན་ནོ། །ཞེས་དང་། ཆད་ནས་འབྱུང་བའི་ཕྱིར་ཞེས་པ་གཉིད་དང་བརྒྱལ་བ་སངས་པ་ན་འཇུག་པའི་རྣམ་ཤེས་ཀུན་གཞི་ལས་འབྱུང་ངོ་། །ཞེས་པའོ། །འཁོར་བར་འཇུག་པ་དང་ལྡོག་པའི་ཡང་ཕྱིར་རོ་ཞེས་པ་ཀུན་གཞི་ཡོད་དོ་ཞེས་པ་ཀུན་ལ་སྦྱར་རོ། །ཀུན་གཞི་མེད་ན་འཇུག་པ་མི་འབྱུང་སྟེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་མི་འབྱུང་བ་ལ་སོགས་པའི་ཕྱིར་རོ། །ལྡོག་པ་ཡང་མི་རུང་སྟེ། ཉོན་མོངས་པའི་ས་བོན་སྤངས་པའི་ལྡོག་པ་དེ་གཉེན་པོའི་སེམས་སྐྱེས་པ་ན་རྟེན་མེད་པས་སྤང་རྒྱུའི་ས་བོན་མེད་པའི་ཕྱིར་རོ། །གཉེན་པོའི་སེམས་ཉིད་ཉོན་མོངས་པའི་ས་བོན་དང་འདྲེ་བར་ནི་མི་རུང་སྟེ། རང་བཞིན་གྱིས་རྣམ་པར་བྱང་བའི་ཕྱིར་དང་། གཉེན་པོ་ཉིད་དུ་མི་རུང་བར་ཐལ་བའི་ཕྱིར་རོ། །དེ་དང་རིགས་མཐུན་པས་གནས་གྱུར་མི་རུང་བར་ཐེག་བསྡུས་སུ་གསུངས་ཏེ། བྱང་ཆུབ་སེམས་དཔའ་བཟང་པོའི་སེམས། །རྣམ་པར་ཤེས་པ་ལྔ་སྤངས་པ། །དེ་ལས་གཞན་པ་གསལ་བ་ལ། །སེམས་ནི་ཇི་ལྟར་འགྱུར་བར་བྱེད། །གཉེན་པོར་གྱུར་པ་ཡིན་ཞེས་བྱར། །སྤངས་པ་མིན་ཕྱིར་མི་རུང་ངོ་། །ཞེས་སོ། །དེ་བཞིའི་སྤྲོས་པ་ནི་དེ་ཉིད་ཀྱི་འགྲེལ་པ་རྣམས་སུ་ཤེས་པར་བྱའོ། །ཡང་རྟེན་འབྲེལ་གྱི་མདོ་འགྲེལ་དུ་ཡང་ཐེག་བསྡུས་ཀྱི་རིག་པ་ཁ་ཅིག་བཀོལ་ཏེ་གསུངས་ཤིང་། སའི་བསྟོད་འགྲེལ་དུའང་ལུང་གི་སྒྲུབ་བྱེད་བཅུ་བདུན་དང་རིག་པའི་སྒྲུབ་བྱེད་ཀྱང་བཀོད། དེ་ལྟར་ན་དོན་ཚན་བཅུ་གཅིག་གིས་ཀུན་གཞི་ཚངས་པ་ཆེན་པོའི་རྣམ་པར་གཞག་པ་བཤད་ཟིན་ཏོ། །གཉིས་པ་ཡིད་ཉོན་མོངས་པ་ཅན་བཤད་པ་ལ་གཉིས་ཏེ། དོན་དམ་པའི་ཡིད་དང་། ཀུན་རྫོབ་པའི་ཡིད་དོ། །དང་པོ་ལ་སྡོམ་ནི། ངོ་བོ་མཚན་ཉིད་གནས་དང་ནི། །དམིགས་པ་རྣམ་པ་མཚུངས་ལྡན་དང་། །འཇུག་ལྡོག་ངེས་ཚིག་སྒྲུབ་བྱེད་དེ། །དོན་ཚན་བཅུ་ཡི་སྒོ་ནས་བཤད། །ཅེས་པ་ལྟར་བཅུ་ལས། དང་པོ་ངོ་བོ་ནི། བསྒྲིབས་ལ་ལུང་མ་བསྟན་གྱི་ཤེས་པ་རྒྱུན་མ་ཆད་པ་སྟེ་ཐར་པ་ཐོབ་པ་ལ་སྒྲིབ་ཅིང་ཟག་མེད་ཀྱི་ལམ་དང་ལྷན་ཅིག་མངོན་དུ་མི་འབྱུང་བས་ན་སྒྲིབ་པ་དང་། དགེ་མི་དགེ་གང་རུང་དུ་མ་གྲུབ་པས་ན་ལུང་དུ་མ་བསྟན་པའོ། །གཉིས་པ་མཚན་ཉིད་ནི། ཀུན་གཞིའི་དོན་གྱི་ངོ་བོ་རིག་ཅིང་ཡིད་ཤེས་ཀྱི་བདག་རྐྱེན་བྱེད་ནུས་པའི་རབ་ཏུ་མ་ཞི་བའི་ཤེས་པ་ཞེས་པའམ། ཀུན་གཞིའི་དོན་ཙམ་རིག་ཅིང་འཕགས་པའི་ལམ་མ་ཐོབ་ཀྱི་བར་དུ་རྟག་ཏུ་ངར་རློམ་པའི་རྣམ་པས་འཇུག་པ་སྟེ། ཀུན་གཞིའི་དོན་ཙམ་རིག་པས་སེམས་བྱུང་སེལ། ངར་རློམ་པའི་རྣམ་པས་འཇུག་པ་ཞེས་པས་སྒོ་ལྔའི་རྣམ་ཤེས་དང་ཀུན་གཞི་སེལ། འཕགས་པའི་ལམ་མ་ཐོབ་ཀྱི་བར་དུ་རྟག་ཏུ་ཞེས་པས་ཡིད་ཀྱི་ས་པའི་འཇིག་ལྟ་མཚུངས་ལྡན་དང་བཅས་པ་སེལ་ཏེ། དེ་དག་སེམས་མེད་པའི་གནས་སྐབས་ལྔར་རྒྱུན་དེ་ཆད་མེད་པའི་ཕྱིར་རོ། །དེ་ཡང་སུམ་ཅུ་པ་ལས། རྣམ་ཤེས་ངར་སེམས་བདག་ཉིད་ཅན། །ཞེས་དང་། ཀུན་ལས་བཏུས་ལས། ཡིད་གང་ཞེ་ན་དུས་རྟག་ཏུ་རློམ་སེམས་པའི་བདག་ཉིད་དང་། ཀུན་གཞིའི་རྣམ་པར་ཤེས་པ་ལ་དམིགས་པ་དང་། ཞེས་པས་བསྟན་ནོ། །གསུམ་པ་གནས་ནི་ཀུན་གཞིའི་རྣམ་པར་ཤེས་པ་སྟེ། ཀུན་གཞིའི་ས་བོན་གྱི་ཆ་ལ་བརྟེན་ནས་ཉོན་མོངས་པ་ཅན་གྱི་ཡིད་འབྱུང་བའི་ཕྱིར་ཏེ། སུམ་ཅུ་པ་ལས། དེ་ལ་གནས་ཏེ་རབ་འབྱུང་ཞིང་། །ཞེས་སོ། །དེ་ནི་ས་བོན་གྱི་གནས་ཀྱི་དབང་དུ་བྱས་ལ་དེ་ཉིད་ལྷན་ཅིག་འབྱུང་བའི་གནས་ཀྱང་ཡིན་ཏེ། ཀུན་གཞི་ཁམས་དང་ས་གང་དུ་རྣམ་པར་སྨིན་པ་གྲུབ་པ་དེར་ཉོན་མོངས་པ་ཅན་གྱི་ཡིད་ཀྱང་ས་དེ་པ་ཡིན་པའི་ཕྱིར་རོ། །བཞི་པ་དམིགས་པ་ནི། ཀུན་གཞིའི་རྣམ་པར་ཤེས་པ་ལ་དམིགས་པ་སྟེ། སུམ་ཅུ་པར། དེ་ལ་དམིགས་པ་ཡིད་ཅེས་བྱ། །ཞེས་སོ། །འོ་ན་གནས་དང་ཁྱད་པར་ཅི་ཡོད་ཅེ་ན། གནས་ལ་ས་བོན་གྱི་གནས་ནི་སྐྱེད་བྱེད་ཀྱི་རྒྱུ་ཡིན་ལ། འབྱུང་བའི་གནས་ནི་ཁམས་དང་ས་མཚུངས་པ་ཙམ་ཡིན་ཅིང་། དམིགས་པ་ནི་ཀུན་གཞིའི་རྣམ་སྨིན་གྱི་ཆ་དེས་བདག་མེད་པ་ལ་རྟག་ཏུ་འཁྲུལ་པའི་གཞི་བྱས་པ་ཙམ་ལ་འཇོག་པས་ཁྱད་པར་ཆེའོ། །ལྔ་པ་རྣམ་པ་ནི། ཀུན་གཞི་ལ་ཁ་ནང་དུ་བལྟས་ནས་བདག་ཏུ་འཛིན་པའོ། །འོ་ན་དེའི་དུས་དེའི་འཁོར་གྱི་རེག་པས་བདག་ཏུ་འཛིན་ནམ་མི་འཛིན། དང་པོ་ལྟར་ན་འཇིག་ཚོགས་ལ་ལྟ་བ་དང་ཁྱད་པར་མེད་པར་འགྱུར་ལ། གཉིས་པ་ལྟར་ན། སེམས་དང་སེམས་བྱུང་མཐུན་པར་གཏོགས་པའི་རྒྱུར་བཤད་པ་དང་འགལ་ཞེ་ན། དཀོན་ཤེ་ན་རེ། རེག་པས་བདག་ཏུ་མི་འཛིན་པར་འདོད་ལ། སེམས་སེམས་བྱུང་རྣམ་པ་མཐུན་པར་གཏོགས་པའི་རྒྱུར་བཤད་པ་མིན་གྱི། དམིགས་པ་མཐུན་པར་གཏོགས་པའི་རྒྱུར་བཤད་པ་ཡིན་པས་མི་འགལ་ཟེར། འོ་ན་ཉོན་ཡིད་ཀྱིས་ཀུན་གཞི་ལ་བདག་ཏུ་འཛིན་པ་དང་། འཇིག་ཚོགས་ལ་ལྟ་བས་འཛིན་པ་ལ་ཁྱད་པར་ཅི་ཡོད་ཅེ་ན། མདོ་སྡེ་རྒྱན་གྱི་ཊཱིཀྐར། མི་གསལ་བ་དང་གསལ་བའི་ཁྱད་པར་ཡོད་ཟེར་ཡང་། དོན་ཙམ་རིག་པའི་ཚུལ་གྱིས་འཛིན་པ་དང་། དོན་གྱི་ཁྱད་པར་འཛིན་པའི་ཚུལ་གྱིས་བདག་ཏུ་འཛིན་པའི་ཁྱད་པར་ཡོད་པར་ཁ་ཅིག་བཞེད་དོ། །འདི་ནི་ཉོན་ཡིད་ཀྱི་འཁོར་གྱི་བདག་ཏུ་འཛིན་པའི་ཁྱད་པར་འབྱེད་བྱེད་དུ་སྣང་གི་སྔ་མ་གཉིས་ཁྱད་པར་འབྱེད་མི་ནུས་པར་སེམས་སོ། །རོག་གིས་མི་འཛིན་པར་འདོད་པ་དེ་ཡང་ཅུང་མི་འཐད་དེ། སུམ་ཅུ་པ་ལས། ཐུན་མོང་མ་ཡིན་པའི་འཁོར་བཞི་པོ་བདག་ཏུ་ལྟ་བ་དང་། བདག་ལ་ཆགས་པ་དང་། བདག་ཏུ་ང་རྒྱལ་བ་དང་། བདག་ཏུ་རྨོངས་པར་བཤད་པས་ཐུན་མོང་བའི་འཁོར་ལྔ་པོ་ཡང་བདག་ཏུ་འཛིན་པར་གསལ་བའི་ཕྱིར་རོ། །འོ་ན་ཁྱད་པར་ཅི་ཞེ་ན། ཉོན་ཡིད་ནི། ཀུན་གཞི་ཁོ་ན་ལ་དམིགས་ནས་བདག་ཏུ་འཛིན་པ་ཡིན་ལ། འཇིག་ལྟ་ནི་ཕུང་པོ་ལྔ་ཆར་ལ་དམིགས་ནས་བདག་ཏུ་འཛིན་པ་ནི་ཁྱད་པར་ཏེ། མདོ་ལས་འཇིག་ལྟ་ཉི་ཤུར་གསུངས་པ་དེ་གྲུབ་མཐའ་སྨྲ་བ་ཀུན་གྱིས་ཐུན་མོང་དུ་ཁས་ལེན་དགོས་པའི་ཕྱིར། དྲུག་པ་མཚུངས་པར་ལྡན་པའི་འཁོར་ལ། རྩ་བའི་འཁོར་དགུ་ཆར་གཏོགས་དང་བཅས་ན་བཅུ་དྲུག་འབྱུང་སྲིད་པ་ནི་སྔར་བཤད་ཟིན་ཏོ། །སུམ་ཅུ་པ་ལས། བསྒྲིབས་ལ་ལུང་དུ་མ་བསྟན་པའི། །ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་མཆོག་འདུ་ཤེས་པ། །ཞེས་སོ། །འོ་ན་ཉོན་ཡིད་འཁོར་བཅས་གང་དུ་གཏོགས་སྙམ་ན་རྟེན་གང་དང་གང་དུ་སྐྱེས་པའི་ས་དེར་གཏོགས་ཏེ། རྟེན་ནི་གང་ཟག་དེའི་ཚེ་སྔ་མའི་རྣམ་སྨིན་གྱི་ངོ་བོར་གྱུར་པའི་ཕུང་པོ་ནི་དེའི་རྒྱུད་ཀྱི་ཀུན་གཞིའི་རྣམ་ཤེས་ཡིན་ལ། ས་གཞན་གྱི་ཉོན་ཡིད་ཀྱིས་ས་གཞན་གྱི་ཀུན་གཞི་ལ་བདག་ཏུ་འཛིན་པ་མི་སྲིད་པའི་ཕྱིར་རོ། །འདི་ལ་དགོངས་ནས་སུམ་ཅུ་པར། ཉོན་ཡིད་ས་གང་དུ་གཏོགས་པའི་གསལ་ཁ་མ་གསུངས་ཤིང་དེའི་འཁོར་ཐུན་མོང་མ་ཡིན་པ་བཞི་པོ་ཉོན་ཡིད་དང་ས་མཚུངས་པ་དང་། དེར་མ་ཟད་ཐུན་མོང་བ་རེག་སོགས་ལྔ་པོ་ཡང་ས་མཚུངས་ཞེས་པ་ཙམ་ཞིག་ལས་མ་བསྟན་ཏོ། །གང་དག་སུམ་ཅུ་པ་རྩ་འགྲེལ་གྱིས་ཉོན་ཡིད་རང་ས་གང་དུ་གཏོགས་པའི་གསལ་ཁ་མ་གསུངས་པ་ལ་བརྟེན་ནས་འདོད་པའི་རྟེན་ཅན་གྱི་ཕྱིར་མི་འོང་གིས་འདོད་པའི་སས་བསྡུས་ཀྱི་ཉོན་ཡིད་སྤངས་པའི་རྣམ་གཞག་མང་དུ་སྨྲ་བ་རྣམས་ནི། བསྡུ་བ་ལས། ཉོན་ཡིད་རྟེན་གང་དུ་སྐྱེས་པའི་སར་གཏོགས་པ་དང་གནས་སྐབས་གང་དུ་མངོན་དུ་འགྱུར་བ་དང་། སྲིད་ཉོན་དགུ་པ་སྤང་བའི་བར་ཆད་མེད་ལམ་གྱིས་ཅིག་ཅར་དུ་སྤང་བ་དང་། ཆེ་འབྲིང་དགུའི་རྣམ་གཞག་མེད་པར་གསུངས་པ་རྣམས་མ་མཐོང་བར་རང་བཟོའི་བླ་བཅོལ་རང་དབང་དུ་སྨྲ་བར་སྣང་བས་སྐྱེས་བུ་མཆོག་གི་གསལ་བྱེད་དུ་རྒྱས་པར་བཀག་ཟིན་པས་དེར་བལྟ་བར་བྱའོ། །བདུན་པ་འཇུག་པའི་ཚུལ་ནི། གནས་སྐབས་གསུམ་མ་གཏོགས་པ་སེམས་དགེ་བ་དང་མི་དགེ་བ་དང་ལུང་དུ་མ་བསྟན་པ་སྐྱེས་པའི་དུས་ཐམས་ཅད་དུ་འཇུག་སྟེ། བསྡུ་བར། ཉོན་མོངས་པ་དེ་དག་ཀྱང་དགེ་བ་དང་། མི་དགེ་བ་དང་། ལུང་དུ་མ་བསྟན་པའི་རྣམ་པར་ཤེས་པ་ལ་འགལ་བ་མེད་པ་དང་། ཞེས་གསུངས་སོ། །བརྒྱད་པ་ལྡོག་པའི་དུས་ནི། ཐེག་དམན་གྱི་མི་སློབ་ལམ་ཐོབ་པ་ན་ལྡོག ཐེག་ཆེན་གྱི་ས་བརྒྱད་པ་ཐོབ་པ་ན་ལྡོག་ཅིང་། དེ་མན་ཆད་དུ་འཇིག་རྟེན་ལས་འདས་པའི་ལམ་མངོན་དུ་གྱུར་པ་དང་། འགོག་པ་ལ་སྙོམས་པར་འཇུག་པའི་དུས་ན་རེ་ཞིག་ལྡོག་ཅིང་། དེ་གཉིས་ལས་ལངས་པ་ན་ཀུན་ཏུ་འབྱུང་སྟེ། བསྡུ་བར། དེ་དག་ནི་འཇིག་རྟེན་པའི་འདོད་ཆགས་དང་བྲལ་བ་ན་ནི་མངོན་དུ་གྱུར་ཀྱང་རུང་། མ་གྱུར་ཀྱང་རུང་ཀུན་ཏུ་འབྱུང་ངོ་། །སློབ་པ་བཞི་མཐོང་བ་ལ་ནི་འཇིག་རྟེན་ལས་འདས་པའི་ལམ་མངོན་དུ་གྱུར་ན་མི་འབྱུང་ངོ་། །དེ་ལས་ལངས་པ་ལ་ནི་ཀུན་ཏུ་འབྱུང་སྟེ། ཤིན་ཏུ་རྟོག་པའི་ཕྱིར་དང་། མ་སྤངས་པའི་ཕྱིར་རོ། །མི་སློབ་པ་ལ་ནི་རྣམ་པ་ཐམས་ཅད་དུ་ཀུན་ཏུ་མི་འབྱུང་ངོ་། །ཞེས་དང་། མདོ་སྡེ་རྒྱན་དུ། ཡིད་དང་འཛིན་དང་རྣམ་པར་རྟོག །གྱུར་ཕྱིར་རྣམ་པར་མི་རྟོག་པ། །ཞེས་དང་། སུམ་ཅུ་པར། དགྲ་བཅོམ་མེད། །འགོག་པའི་སྙོམས་པར་འཇུག་ན་མེད། །འཇིག་རྟེན་འདས་པའི་ལམ་ལ་མེད། །ཅེས་གསུངས་སོ། །སངས་རྒྱས་ཀྱི་ས་ན་མཉམ་ཉིད་ཡེ་ཤེས་སུ་གནས་གྱུར་ཏེ། ཙནྡྲ་གོ་མིས། ཉོན་མོངས་ཅན་ཡིད་གནས་གྱུར་པ། །མཉམ་ཉིད་ཡེ་ཤེས་བརྗོད་པར་བྱ། །ཞེས་གསུངས་སོ། །དགུ་པ་ངེས་པའི་ཚིག་ནི། དུས་ཐམས་ཅད་དུ་རློམ་སེམས་པས་ན་ཡིད་ཅེས་བྱ་སྟེ། རྒྱན་སྟུག་པོ་བཀོད་པར། ངར་སེམས་བདག་ཉིད་ཡིད་ཡིན་ནོ། །ཞེས་དང་། སུམ་ཅུ་པར། རྣམ་ཤེས་ངར་སེམས་བདག་ཉིད་ཅན། །ཞེས་སོ། །བཅུ་པ་སྒྲུབ་པར་བྱེད་པའི་ཚད་མ་ལ་གཉིས་ཏེ། ལུང་དང་། རིག་པའོ། །དང་པོ་ནི། སྔར་ཀུན་གཞིའི་གནས་སྐབས་སུ་དྲངས་པའི་ལང་གཤེགས་དང་། དགོངས་པ་ངེས་འགྲེལ་གྱི་མདོ་སྡེ་དུ་མར། རྣམ་ཤེས་ཚོགས་བརྒྱད་བཀའ་སྩལ་པ་རྣམས་དང་། ཡང་ལང་གཤེགས་ལས། སེམས་ནི་རང་བཞིན་དང་བ་སྟེ། །རྙོག་པར་བྱེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཅེས་དང་། རྒྱན་སྟུག་པོ་བཀོད་པར། སེམས་ནི་ཀུན་གཞིའི་རྣམ་པར་ཤེས། །ངར་སེམས་བདག་ཉིད་ཡིད་ཡིན་ནོ། །གང་ཞིག་ཡུལ་ལ་འཛིན་བྱེད་པ། །དེ་ནི་རྣམ་པར་ཤེས་ཞེས་བྱ། །ཞེས་དང་། ལུང་སིལ་བུར། ཉོན་མོངས་ཅན་ཡིད་རྟག་ཏུ་ནི། །ཉོན་མོངས་ལྷན་ཅིག་སྐྱེ་ཞིང་འགག །དེ་ནི་ཉོན་མོངས་པ་རྣམས་ལས། །མ་གྲོལ་གྲོལ་བར་མི་འགྱུར་རོ། །ཞེས་བཀའ་སྩལ་ཏོ། །གཉིས་པ་ནི། ཐེག་བསྡུས་སུ། མ་འདྲེས་པ་ཡི་མ་རིག་དང་། །ལྔ་པོ་རྣམས་དང་འདྲ་བ་དང་། །སྙོམས་པར་འཇུག་པའི་བྱེ་བྲག་དང་། །ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེ་བའི་རྒྱུ། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི། །རྣམ་པ་ཀུན་ཏུ་མི་འཐད་དོ། །ཉོན་མོངས་ཅན་གྱི་ཡིད་མེད་ན། །གཉིས་མེད་གསུམ་པོ་འགལ་བར་འགྱུར། །ཞེས་གསུངས་པའི་དྲུག་གི་དང་པོ་ནི། ཆོས་མངོན་པའི་མདོར། ཡང་དག་དོན་ལ་འཇུག་པ་ཡི། །སེམས་ཀྱི་གེགས་སུ་རྟག་གྱུར་པ། །དུས་རྣམས་ཀུན་ཏུ་འབྱུང་བ་དེ། །མ་འདྲེས་པ་ཡི་མ་རིག་འདོད། །ཅེས་བཀའ་སྩལ་པ་ལ། དོན་གསང་དུ། དེ་ནི་རང་དབང་ཅན་རྫས་མ་འདྲེས་པ་སྟེ། དེའི་སྟོབས་ཀྱིས་འདོད་ཆགས་སོགས་འདྲེན་པའོ། །དེ་ཡང་ཉན་ཐོས་སྡེ་པས་འཇུག་ཤེས་ཁོ་ན་དང་མཚུངས་པར་ལྡན་ཞིང་མཐོང་སྤང་དུ་འདོད་དོ། །ཐེག་ཆེན་པས་མི་བརྟན་པ་འཇུག་ཤེས་དང་མཚུངས་ལྡན་ཏེ་བརྟན་པ་དུས་རྒྱུན་ལྡན་དུ་འབྱུང་བ། སྐབས་དོན་གྱི་སྒྲུབ་བྱེད་དོ། །ཞེས་བཤད་དོ། །བཤད་སྦྱར་དུ། རྟེན་མ་འདྲེས་པ་སངས་རྒྱས་ཀྱི་ཆོས་མ་འདྲེས་པ་ལྟ་བུར་བཤད་དོ། །དེས་ན་སེམས་ཅན་གྱི་རྒྱུད་ཆོས་ཅན། དེ་འདྲའི་མ་འདྲེས་པའི་མ་རིག་པ་མེད་པར་ཐལ་ཏེ། ཉོན་ཡིད་མེད་པའི་ཕྱིར། དེ་ཡང་རྟེན་མེད་ན་བརྟེན་པ་མེད་ཅིང་། འཇུག་པའི་རྣམ་ཤེས་ཀྱི་འཁོར་དུ་ནི་དེ་མི་འབྱུང་སྟེ། དེ་རྒྱུན་ཆད་པའི་ཕྱིར་དང་། འདི་ནི་དུས་ཀུན་ཏུ་འབྱུང་བས་སོ། །གང་ཡང་ཉན་ཐོས་སྡེ་པས་གང་སྤང་བྱ་ཡོད་པ་དེ་ལ་གཉེན་པོ་ཡོད་པར་འདོད་ན། སྒོ་ལྔ་ལ་གཉེན་པོ་ལམ་མེད་པ་སྟེ། ཁ་ཕྱིར་བལྟས་ཡིན་པའི་ཕྱིར། ཡིད་ཤེས་ལ་ཡང་མ་ཡིན་ཏེ། རེ་ཞིག་ཉོན་མོངས་ཅན་མ་ཡིན་པ་ལ་མི་རུང་སྟེ། དེ་དང་མཚུངས་པར་ལྡན་ན་དེ་ཉིད་མི་རུང་བས་སོ། །ཉོན་མོངས་ཅན་ལའང་མི་རུང་སྟེ། དེ་ལས་གཞན་པའི་ཉོན་མོངས་དང་ལྡན་པས་མཚུངས་ལྡན་འདྲེས་པར་འགྱུར་ན། ཁྱེད་མཚུངས་ལྡན་མ་འདྲེས་པར་འདོད་པས་སོ། །ཅི་སྟེ་མ་འདྲེས་པ་དེ་ཉིད་ཀྱིས་ཉོན་མོངས་ཅན་དུ་བྱས་པ་ལས་འབྱུང་ན་ནི་ཡིད་ཤེས་རྟག་ཏུ་ཉོན་མོངས་པ་ཅན་དུ་འགྱུར་ཏེ། དུས་རྟག་ཏུ་འབྱུང་བ་དེ་དང་ལྡན་པས་སོ། །དེས་ན་མ་འདྲེས་པའི་མ་རིག་པའི་རྟེན་ཉོན་ཡིད་ཡོད་པར་གྲུབ་བོ། །གཉིས་པ་ནི། ཡིད་ཤེས་ནི་སྒོ་ལྔའི་རྣམ་ཤེས་དང་བདག་རྐྱེན་ལ་བརྟེན་པར་འདྲ་བ་མེད་པར་ཐལ་ཏེ། དེའི་ལྷན་ཅིག་འབྱུང་བའི་གནས་ཉོན་ཡིད་མེད་ཅིང་གཞན་ཡང་མེད་པའི་ཕྱིར་རོ། །མ་གྲུབ་སྟེ། དྲུག་པོ་འགགས་མ་ཐག་པའི་ཡིད་ཡོད་དོ་ཞེ་ན། དེ་ནི་ཡིད་ཤེས་དང་དུས་མཉམ་པས་ཡིད་ཤེས་ཀྱི་ལྷན་ཅིག་འབྱུང་བའི་གནས་མ་ཡིན་ཏེ། འཇུག་ཤེས་སུ་འདྲ་བ་ལ་དྲུག་པའི་རྟེན་འདས་པ་དང་། གཞན་ནི་ད་ལྟར་བའི་ཁྱར་པར་མི་རུང་བའི་ཕྱིར་རོ། །ཀུན་གཞི་ཡང་མ་ཡིན་ཏེ། དེ་ནི་རྒྱུའི་རྐྱེན་ཡིན་ཅིང་། རྟེན་ནི་བདག་རྐྱེན་དུ་བརྗོད་པར་འདོད་པའི་ཕྱིར་རོ། །གནས་བརྟན་པ་ན་རེ། སྙིང་གའི་བུ་ག་གཅིག་ནས་དགུའི་བར་ཡིན་ཞེས་ཟེར་བའང་མི་འཐད་དེ། གཟུགས་མེད་ན་ཡིད་ཤེས་མེད་པ་དང་། ཚོར་བ་ཀུན་ལུས་ཀྱི་ཚོར་བ་དང་དབང་པོ་གཟུགས་ཅན་ལ་དངོས་སུ་བརྟེན་པས་ན་ཡིད་ཤེས་སྒྲ་དོན་འཛིན་པའི་རྟོག་པ་ཡིན་མི་སྲིད་པར་ཐལ་བའི་ཕྱིར་རོ། །དེ་ཉིད་ཡིད་ཡིན་པར་ཡང་མི་རུང་སྟེ། དགེ་སློང་དག་ཡིད་ནི་ནང་གི་སྐྱེ་མཆེད་དེ། གཟུགས་ཅན་མ་ཡིན་པར་བསྟན་དུ་མེད་པ་ཐོགས་པ་མེད་པའོ། །ཞེས་བཀའ་སྩལ་པ་དང་འགལ་བས་སོ། །སྡེ་པས་རྩ་བའི་རྣམ་ཤེས་དང་འཁོར་བ་ཇི་སྲིད་པའི་ཕུང་པོ་ཡིད་ཤེས་ཀྱི་རྟེན་དུ་འདོད་པ་ཡང་མི་རུང་སྟེ། ཀུན་གཞི་ལྟར་འཇུག་ཤེས་དྲུག་ཅར་གྱི་ཐུན་མོང་གི་རྒྱུའི་རྐྱེན་ཡིན་པས་སོ། །གསུམ་པ་ནི། དེ་མེད་ན་ཤེས་བྱ་འདིར་འགོག་པ་དང་འདུ་ཤེས་མེད་པའི་སྙོམས་འཇུག་ལ་ཞི་མ་ཞི་ཁྱད་པར་མེད་པར་འགྱུར་ཏེ། ཚོགས་དྲུག་བཀག་ཙམ་དུ་འདྲ་བས་སོ། །ས་དང་ཡིད་ལ་བྱེད་པའི་ཁྱད་པར་ཡོད་དོ་ཞེ་ན། ངོ་བོ་ལ་ཁྱད་པར་མེད་པས་ཏེ། ཉོན་ཡིད་མེད་ན་འགོག་པ་ལ་ངར་འཛིན་མེད་པས་ཞི་བ་དང་། གཞན་ལ་དེ་ཡོད་པས་མ་ཞི་བའི་ཕྱིར་རོ། །བཞི་པ་ནི། རྟག་ཏུ་ངར་སེམས་པས་ན་ཡིད་ཅེས་པའི་ངེས་ཚིག་མེད་པར་འགྱུར་ཏེ། སྒོ་ལྔ་དང་། ཀུན་གཞི་ལ་ཡང་ངར་སེམས་པ་མེད་ཅིང་། ཡིད་ཤེས་ལ་རྟག་ཏུ་སེམས་པ་མེད་པས་སོ། །འདོད་མི་ནུས་ཏེ། ངེས་ཚིག་ཡང་དག་ཏུ་ཁས་ལེན་པས་སོ། །ལྔ་པ་ནི། འདུ་ཤེས་མེད་པར་སྐྱེ་བའི་རྒྱུ་མཐུན་ལ་རྟེན་མེད་པས་ངར་འཛིན་མེད་པར་འགྱུར་ཞིང་། འདོད་ན། དེ་ལ་འཕགས་པ་རྣམས་ཀྱི་མི་ཁོམ་པའི་གནས་ཉིད་ཀྱིས་སྤང་བར་མི་འགྱུར་རོ། །འཇུག་ཤེས་དང་བྲལ་བས་སྤོང་ན་འགོག་པའི་སྙོམས་འཇུག་ཀྱང་སྤང་བར་འགྱུར་རོ། །དྲུག་པ་ནི། དེ་མེད་ན་དགེ་བའི་གནས་སྐབས་ལ་བརྟེན་པའི་ངར་འཛིན་མེད་པར་འགྱུར་ཏེ། ཡིད་ཤེས་དགེ་བ་དེ་ཉིད་ནི་ངར་འཛིན་གྱི་གནས་མ་རིག་པའི་རྟེན་དུ་མི་རུང་བས་སོ། །འདོད་ན། ཟག་མེད་ཀྱི་དགེ་བར་འགྱུར་ཏེ། ངར་འཛིན་གྱིས་མ་བཅིངས་པའི་དགེ་བ་ཡིན་པའི་ཕྱིར། དེས་ན་དུས་རྟག་ཏུ་ངར་འཛིན་འབྱུང་བས་དེའི་རྟེན་ཉོན་ཡིད་གྲུབ་བོ། །འདིར་དཔངས་ལོས། ངར་འཛིན་མངོན་གྱུར་གཉིད་འཐུག་པོ་ལ་མེད་པར་སྣང་རུང་མ་དམིགས་པས་གྲུབ་བམ་སྙམ་སྟེ་དཔྱད་དོ། །ཞེས་གསུངས་པ་ཤིན་ཏུ་དཔྱད་དགོས་པའི་རིགས་སུ་སྣང་ངོ་། །གཉིས་པ་ཡིད་ཀུན་རྫོབ་པ་ནི། ཀུན་བཏུས་ལས། གང་ཡང་རྣམ་པར་ཤེས་པ་དྲུག་པོ་དག་འགགས་མ་ཐག་པའི་རྣམ་པར་ཤེས་པའོ། །ཞེས་དང་། མཛོད་དུ། དྲུག་པོ་འགགས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་རྣམ་པར་ཤེས་པ་དྲུག་པ་ཉིད་ཡིད་ཤེས་ཕྱི་མའི་རྟེན་བྱེད་པས་ཡིད་དེ། ཐེག་བསྡུས་སུ། དེ་མ་ཐག་པའི་རྐྱེན་བྱེད་པས་གནས་སུ་གྱུར་པའི་ཕྱིར་རྣམ་པར་ཤེས་པ་འགགས་མ་ཐག་པའི་ཡིད་རྣམ་ཤེས་སྐྱེ་བའི་གནས་དང་། ཞེས་གསུངས་སོ། །འོ་ན་འདས་པ་ཁོ་ན་ཡིད་དུ་འགྱུར་རོ་སྙམ་ན་མ་ཡིན་ཏེ། འདས་པ་ནི་དངོས་པོར་མེད་པས་ཡིད་ཤེས་ཀྱི་བདག་རྐྱེན་བྱེད་པའི་ནུས་པ་མེད་པའི་ཕྱིར། ཁ་ཅིག རང་གི་བདག་འབྲས་ཀྱི་དུས་སུ་འགགས་མ་ཐག་པ་ཞེས་པ་ཡང་མི་འཐད་དེ། བདག་འབྲས་མ་སྐྱེས་ཀྱང་རང་དུས་སུ་ཡིད་དབང་དུ་འཇོག་དགོས་པའི་ཕྱིར་རོ། །འོ་ན་ཅིའི་ཕྱིར་འགགས་མ་ཐག་པ་སྨོས་སྙམ་ན། མཛོད་དུ། རྒྱུ་འབྲས་དུས་མཉམ་དོན་ལ་ཡོད་པར་གསུངས་པ་དང་། གོང་མར་ཐ་སྙད་དུ་རྒྱུ་འབྲས་དུས་མཉམ་གསུངས་པས་དེ་ལས་ཁྱད་པར་དུ་བྱ་བའི་ཕྱིར་ཡིན་ཏེ། རང་འགགས་པའི་སྟོབས་ཀྱིས་བདག་འབྲས་སྐྱེ་བའི་སྒོ་འབྱེད་དགོས་པའི་ཕྱིར་དང་། དེ་ཡང་སྐད་ཅིག་གཞན་གྱིས་བར་མ་ཆོད་པ་དགོས་པས་ན་འགགས་མ་ཐག་པ་ཞེས་སྨོས་སོ། །གསུམ་པ་རྣམ་པར་ཤེས་པ་དྲུག་བཤད་པ་ནི། སའི་དངོས་གཞིར། ངོ་བོ་ཉིད་དང་གནས་དང་ནི། །དམིགས་པ་དག་དང་གྲོགས་དང་ནི། །ལས་ཏེ་སྒོ་ནི་ལྔ་པོ་ཡི། །སེམས་ནི་ཡུལ་ལ་འཇུག་པར་བྱེད། །ཅེས་པ་ལྟར་ལྔ་ལས། དང་པོ་ལ། མིག་གི་རྣམ་པར་ཤེས་པ་ནི་གནས་མིག་ལ་བརྟེན་ཅིང་། དམིགས་པ་གཟུགས་ཀྱི་ངོ་བོའམ་རྣམ་པར་རིག་པའི་རྣམ་པར་ཤེས་པ་སྟེ། དེས་ཡིད་ཀྱི་རྣམ་པར་ཤེས་པའི་བར་འགྲེའོ། །གཉིས་པ་གནས་ནི་ས་བོན་གྱི་གནས་ཀུན་གཞི་དང་། ལྷན་ཅིག་འབྱུང་བའི་གནས་རང་རང་གི་དབང་པོ་དང་། དེ་མ་ཐག་པའི་གནས་འགགས་མ་ཐག་པའི་ཡིད་དེ། ཐེག་བསྡུས་སུ། ཀུན་ནས་ཉོན་མོངས་པའི་གནས་ཉོན་ཡིད་དོ། །ཞེས་གསུངས་སོ། །གསུམ་པ་དམིགས་པ་ནི། གཟུགས་ལ་སོགས་པའི་ཡུལ་དྲུག་གོ །བཞི་པ་གྲོགས་ལ། སྒོ་ལྔའི་རྣམ་པར་ཤེས་པའི་འཁོར་དང་། ཡིད་ཀྱི་རྣམ་པར་ཤེས་པའི་འཁོར་ཏེ། སྔར་མཚུངས་ལྡན་འདུ་བྱེད་ཀྱི་སྐབས་སུ་བཤད་ཟིན་ཏོ། །ལྔ་པ་ལས་ལ། དྲུག་ཅར་གྱིས་ཡུལ་འཛིན་པར་བྱེད། དེ་ཡང་སྒོ་ལྔའི་རྣམ་ཤེས་ཀྱིས་ནི་སྐད་ཅིག་དང་། རྒྱུན་གཉིས་ལས་སྐད་ཅིག་རིག་པར་བྱེད། རང་དང་སྤྱིའི་མཚན་ཉིད་གཉིས་ལས་རང་གི་མཚན་ཉིད་རིག་པར་བྱེད། དུས་གསུམ་ལས་ད་ལྟ་བ་རིག་པར་བྱེད་དོ། །ཡིད་ཀྱི་རྣམ་ཤེས་ཀྱི་ལས་ལ། སྒོ་ལྔ་དང་ཐུན་མོང་བ་དང་། ཐུན་མོང་མ་ཡིན་པའི་ལས་གཉིས་ལས། དང་པོ་ནི། སྐད་ཅིག་དང་རྒྱུན་གཉིས་ཀ་རིག་པར་བྱེད། རང་དང་སྤྱིའི་མཚན་ཉིད་གཉིས་ཀ་རིག་པར་བྱེད། དུས་གསུམ་ཀ་རིག་པར་བྱེད་དོ། །གཉིས་པ་ནི། དམིགས་པ་ལ་རྟོག་པ་དང་། དམིགས་པ་ལ་ཉེ་བར་སེམས་པ་དང་། ར་རོ་བར་བྱེད་པ་དང་། སྨྱོ་བར་བྱེད་པ་དང་། གཉིད་ལོག་པར་བྱེད་པ་དང་། སད་པར་བྱེད་པ་དང་། བརྒྱལ་བར་བྱེད་པ་དང་། བརྒྱལ་བ་ལས་སངས་པར་བྱེད་པ་དང་། ལུས་དང་ངག་གི་ལས་འཇུག་པར་བྱེད་པ་དང་། འདོད་ཆགས་དང་བྲལ་བར་བྱེད་པ་དང་། འདོད་ཆགས་ལས་ཉམས་པར་བྱེད་པ་དང་། དགེ་རྩ་རྒྱུན་ཆད་པར་བྱེད་པ་དང་། དགེ་བའི་རྩ་བ་རྣམས་མཚམས་སྦྱོར་བར་བྱེད་པ་དང་། འཆི་འཕོ་བ་དང་། སྐྱེ་བར་བྱེད་དེ། དེ་དག་ནི་རྒྱུའི་དུས་ཀྱི་དབང་དུ་བྱས་ལ། ལམ་གྱི་དུས་སུ་ཚོགས་ལམ་ནས་ས་བཅུའི་བར་ལམ་གོང་ནས་གོང་དུ་བགྲོད་པར་བྱེད། འབྲས་བུའི་དུས་སུ་རང་དོན་མཐོང་ཆོས་ལ་བདེ་བར་གནས་པར་བྱེད། གཞན་དོན་ནམ་མཁའི་ཁམས་ཀྱི་མཐས་གཏུགས་པའི་སེམས་ཅན་གྱི་དོན་འབད་མེད་ལྷུན་གྱིས་གྲུབ་པར་བྱེད་དོ། །ཇི་སྙེད་ཤེས་བྱའི་སྒོ་འབྱེད་ལྡེའུ་མིག་སྟེ། །བློ་གྲོས་བང་མཛོད་འགེངས་པ་ནོར་གྱི་མཆོག །མཐའ་ཡས་ཤེས་བྱ་གསལ་བའི་ཉི་འོད་འདི། །བློ་ཆེན་རིག་སྨྲ་བསོད་ནམས་སེང་གེས་སྦྱར། །ལྐོག་གྱུར་གནས་རྣམས་འཆད་པར་དཀའ་འོ་ཞེས། །རིགས་པའི་རྒྱལ་པོས་གསུངས་མོད་དེ་ལྟ་ནའང་། །མངོན་སུམ་གཟུགས་ལ་མིག་བཞིན་ཁོ་བོའི་བློ། །གསུང་རབ་དོན་ལ་མཚན་མ་ཡིན་ནམ་སྙམ། །འོན་ཀྱང་སྙིགས་མ་ལྔ་པོ་བདོ་དུས་འདིར། །ཕལ་ཆེར་རྨོངས་པས་ཁྱབ་ཅིང་ལ་ལ་དག །རང་ལྟ་ལ་ཆགས་གཞན་གྱི་ལྟ་ལ་འཁྲུགས། །དེ་སླད་གཟུ་བོའི་བློ་ཡིས་དཔྱོད་པ་དཀོན། །དེ་ལྟ་ན་ཡང་བརྙེད་བཀུར་གྲགས་པ་སོགས། །ཟང་ཟིང་དོན་དུ་གཉེན་བའི་བློ་མེད་པར། །གཞན་ཕན་སེམས་ཀྱིས་སྦྱར་བའི་ལེགས་བཤད་འདི། །དོན་གཉེར་ཡིད་ཀྱི་ནམ་མཁར་ཁྱབ་གྱུར་ཅིག །ཕུང་པོ་དང་ཁམས་དང་སྐྱེ་མཆེད་ཀྱི་རྣམ་གཞག་ཇི་སྙེད་ཤེས་བྱའི་སྒོ་འབྱེད་ཅེས་བྱ་བ་འདི་ནི་བདེ་བར་གཤེགས་པའི་གསུང་རབ་ཀྱི་རིང་ལུགས་པ་ཆེན་པོ་མཁས་མཆོག་སངས་རྒྱས་འཕེལ་ལ་སོགས་པའི་ཡོངས་སུ་འཛིན་པ་དུ་མའི་ཞབས་རྡུལ་སྤྱི་བོར་བླངས་པ་དམ་ཆོས་མངོན་པའི་གཞུང་ལུགས་ལ་བློ་གྲོས་ཀྱི་འཇུག་པ་གསལ་བ་མང་དུ་ཐོས་པའི་དགེ་སློང་བསོད་ནམས་སེང་གེས་ཆུ་ཕོ་འབྲུག་གི་ལོ་རྒྱལ་གྱི་ཟླ་བ་ལ་རྟ་ནག་གསེར་གླིང་གི་དགོན་པར་སྦྱར་བའོ།། ༈ །།ཨོཾ་སྭ་སྟི། རྒྱལ་ཀུན་མཁྱེན་པའི་ཡེ་ཤེས་ནི། །ཇི་ལྟ་ཇི་སྙེད་སྣང་མཛད་པ། །མཁའ་ལ་ཉིན་བྱེད་བཞིན་གཡོ་བ། །འཇམ་པའི་དབྱངས་དེས་བདག་སྲུངས་ཤིག །ཤེས་བྱ་ཤེས་པའི་བློ་གྲོས་དཀོན། །དེ་བས་དོན་དུ་གཉེར་བ་ཉུང་། །དེས་ན་མཁས་པའི་ལེགས་བཤད་ཀྱང་། །སྤྱོད་པའི་སྐལ་བཟང་མི་ལྡན་མོད། །ཉུང་ངུའི་ངག་གི་ཉིན་བྱེད་ཀྱིས། །ཇི་སྙེད་ཤེས་བྱར་ལོངས་སྤྱོད་པ། །ཀུན་མཁྱེན་གཉིས་པ་ཀླུ་ཐོགས་ཀྱི། །མཁྱེན་པའི་མཁའ་ལས་ཕྱུང་བ་བཞིན། །ལུང་དང་རིག་པའི་སེང་གེའི་སྒྲ། །ཆོས་ཀྱི་གྲགས་པའི་རིགས་མཐུན་ཉིད། །ཡི་གེའི་གཟུགས་ཀྱི་པད་དཀར་མིག །བསྟན་པའི་ས་ཆེན་འདེགས་བཟོད་བསྐྲུན། །བསོད་ནམས་ཀུ་མུད་ལྟར་དཀར་བས། །འགྲོ་ཀུན་བསྟན་པའི་སྒོར་བཞུགས་ནས། །ཤེས་རབ་གསུམ་གྱི་ཟླ་ཤེལ་གྱིས། །བསྟན་པའི་གངས་རི་མཛེས་གྱུར་ཅིག །ཅེས་པའང་རྗེ་བླ་མ་འཇམ་དབྱངས་མཁྱེན་བརྩེའི་དབང་པོའི་དགོངས་བཞེད་ལྟར་རྣམ་དཀར་གྱི་ལས་འདུ་བགྱིས་པའི་སྐབས། གང་དེའི་བཀའ་དྲིན་གྱིས་འཚོ་བ་འཇམ་དབྱངས་ཡོན་ཏན་གྱིས་བྲིས་པ་ཨརྠ་སིདྡྷི་རསྟུ། དགེའོ།། །།

དབུ་མ་རྩ་བ་ཤེས་རབ་ཀྱི་རྣམ་པར་བཤད་པ་ཡང་དག་ལྟ་བའི་འོད་ཟེར།

དབུ་མ་རྩ་བ་ཤེས་རབ་ཀྱི་རྣམ་པར་བཤད་པ་ཡང་དག་ལྟ་བའི་འོད་ཟེར་ཞེས་བྱ་བ་བཞུགས་སོ།། དབུ་མ་རྩ་བ་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །རབ་འབྱམས་ཞིང་གི་རྒྱལ་བ་ཐམས་ཅད་ལ། །ཐུགས་སྐྱེད་རྒྱ་མཚོ་འདོམས་པའི་ཡབ་གྱུར་ཀྱང་། །རྒྱལ་སྲས་གཞོན་ནུའི་ཚུལ་འཛིན་འཇམ་པའི་དབྱངས། །སྙིང་གི་པདྨོར་བཞུགས་ནས་བདག་ཡིད་སྐྱོབས། །ཡེ་ཤེས་མེ་ཡིས་ཤེས་བྱའི་བུད་ཤིང་མ་ལུས་བསྲེགས་པས་ཞི། །ཞི་སྐུ་དཔག་བསམ་ཤིང་ལྟར་གསལ་བ་འཇིག་རྟེན་འབྱོར་པའི་རྒྱུ། །རྒྱུ་མཐུན་སྐུ་ནི་བ་སྤུའི་ཁུང་བུར་དུས་གཅིག་བགྲང་ཡས་སྤྲུལ། །སྤྲུལ་པ་མཆོག་གིས་ཞི་ལམ་སྟོན་མཛད་ཐུབ་དབང་དེ་ལ་འདུད། །བློ་གྲོས་རྒྱ་མཚོའི་དབུས་གནས་ཡང་དག་ལྟ་བའི་འོད་ཟེར་གྱིས། །ཀུན་བཏགས་ལྷན་སྐྱེས་ཡིད་ཀྱི་མུན་པ་མ་ལུས་རབ་བསལ་སྟེ། །གསུང་གི་མདའ་ཚོགས་སྲིད་པ་གསུམ་ལས་རྒྱལ་ཐབས་ལེགས་མཛད་པ། །ཀླུ་སྒྲུབ་སངས་རྒྱས་གཉིས་པ་དེ་ལ་སྤྱི་བོས་ཕྱག་བགྱིད་དོ། །གང་གི་ལེགས་གསུང་ཟླ་བའི་འོད་ཟེར་གྱིས། །ཀླུ་སྒྲུབ་དགོངས་པ་དྲི་མེད་ཀུནྡའི་ཚལ། །གསལ་བར་མཛད་པའི་གྲགས་པ་ལྷམ་མེ་བ། །དོན་དམ་གཟིགས་པ་དེ་ལ་མགོས་ཕྱག་འཚལ། །བློ་གྲོས་པདྨོའི་འདབ་བརྒྱ་ཁ་ཕྱེ་ནས། །ཟབ་དོན་སྦྲང་རྩིས་སྐལ་བཟང་བུང་བའི་ཚོགས། །ཚིམ་པར་མཛད་པའི་རྣམ་དཀར་ཕྲིན་ལས་ཅན། །ཡོངས་འཛིན་མཁས་པའི་ཚོགས་ལའང་ཕྱག་འཚལ་ནས། །གང་ཞིག་རྟོགས་ན་སྲིད་པ་འཇིག་བྱེད་ཅིང་། །ངེས་ལེགས་བྱང་ཆུབ་གསུམ་གྱི་སྒོ་འབྱེད་པའི། །དབུ་མའི་བསྟན་བཅོས་ཀུན་གྱི་གཞིར་གྱུར་པ། །ཤེས་རབ་ཅེས་བྱའི་རྣམ་བཤད་འབྲི་བར་སྤྲོ། །འདིར་མཐོ་རིས་ཀྱི་ཐེམ་སྐས་ལ་བརྟེན་ནས་ཐར་པའི་གྲོང་ཁྱེར་དུ་འཇུག་པར་འདོད་པ་དག་གིས་གཞི་ངེས་འབྱུང་གི་བསམ་པས་བསྐུལ་བའི་ཚུལ་ཁྲིམས་ལ་གནས་ཤིང་། ལྟ་བ་ཐོས་བསམ་གྱིས་གཏན་ལ་ཕབ་པའི་དོན་རྩེ་གཅིག་ཏུ་བསྒོམ་པའི་བསམ་གཏན་དང་ལྡན་པས་བདེན་པ་བཞིའི་གནས་ཚུལ་ལ་འབད་པར་བྱ་བ་ཡིན་ཏེ། ཅི་སྐད་དུ། སློབ་དཔོན་ཉིད་ཀྱི་ཞལ་སྔ་ནས། །ཐར་པ་བདག་ལ་རག་ལས་འདི་ལ་ནི། །གཞན་གྱིས་གྲོགས་བགྱིར་ཅི་ཡང་མ་མཆིས་སོ། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ཅེས་གསུངས་སོ། །ལྟ་བ་དེ་ལ་ཡང་འཇིག་རྟེན་པའི་ལྷན་སྐྱེས་ཀྱི་བློས་ཆོས་དང་གང་ཟག་རང་བཞིན་གྱིས་ཡོད་པར་ལྟ་བ་དང་། ཕྱི་རོལ་པས་ཕུང་པོ་ལས་དོན་གཞན་པའི་གང་ཟག་ཡོད་པར་ལྟ་བ་ནས་རྣམ་རིག་པས་གཉིས་མེད་ཀྱི་ཤེས་པའམ་དེ་བཞིན་ཉིད་ཡོད་པར་ལྟ་བའི་བར་ནི་འདིར་དགག་པར་བྱ་བའམ་སྤང་བར་བྱ་བ་ཡིན་ཏེ། བྱང་ཆུབ་སེམས་འགྲེལ་ལས། སངས་རྒྱས་རྣམས་ཀྱིས་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །ཅེས་དང་། གཞུང་འདིར། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུང་། །ཞེས་དང་། ལྟ་བ་ཐམས་ཅད་སྤང་བའི་ཕྱིར། །དམ་པའི་ཆོས་ནི་སྟོན་མཛད་པ། །ཞེས་གསུངས་པས་སོ། །དེས་ན་བླང་བྱ་མ་ནོར་བའི་ལྟ་བ་ནི། གང་ཞིག་མ་རྟོགས་ན་འཁོར་བའི་ཆོས་ཀྱི་གཞི་བྱེད། ཚུལ་བཞིན་རྟོགས་ན་མྱ་ངན་ལས་འདས་པའི་ཆོས་ཀྱི་གཞི་བྱེད་ལ། ཤེས་བྱ་ཤེས་བྱེད་ལ་སོགས་པའི་སྤྲོས་པ་ཞི་ཞིང་སྣང་ཙམ་རྒྱུན་མི་ཆད་པས་མེད་བཞིན་དུ་སྣང་བ་སྒྱུ་མ་དང་མཚུངས་པར་དཔྱད་ན་གཞིའམ་རྩ་བ་གང་ཡང་མི་རྙེད་ཅིང་། བྱེད་ལས་སྲིད་པ་འཇིག་པར་བྱེད་པ་ལ་གདུལ་བྱའི་ངོར་སྟོང་པ་ཉིད་ཀྱི་ཐ་སྙད་དུ་བཞག་པ་དེ་ཉིད་ཡིན་ཏེ། ཇི་སྐད་དུ། དེ་ཕྱིར་ཆོས་རྣམས་ཀུན་གྱི་གཞི། །ཞི་ཞིང་སྒྱུ་མ་དང་མཚུངས་པ། །གཞི་མེད་སྲིད་པ་འཇིག་བྱེད་པའི། །སྟོང་ཉིད་འདི་ནི་རྟག་ཏུ་བསྒོམ། །ཅེས་གསུངས་པས་སོ། །འདི་ལ་ཡང་། དགག་བྱ་སྐྱེ་སོགས་བཀག་ནས་སྐྱེ་བ་མེད་དོ། །སྟོང་པ་ཉིད་དོ། །ཞེས་དང་། བདག་མེད་དོ་ཞེས་དགག་པའི་རྣམ་པ་ཅན་བསྒོམ་པ་ནི་མཐར་འཛིན་པ་ཡིན་པས་ཤིན་ཏུ་སྨད་དེ། ཇི་སྐད་དུ། སྐྱེ་མེད་དང་ནི་སྟོང་ཉིད་དང་། །བདག་མེད་ཞེས་བྱར་སྟོང་པ་ཉིད། །བདག་ཉིད་དམན་པ་གང་བསྒོམ་པ། །དེ་དེ་སྒོམ་པར་བྱེད་པ་མིན། །ཞེས་གསུངས་པས་སོ། །དེས་ན་སྟོང་ཉིད་ཚུལ་བཞིན་དུ་བསྒོམ་པ་ལ་དབུ་མའི་བཀའ་དང་། བསྟན་བཅོས་ཐོས་བསམ་གྱིས་གཏན་ལ་ཕབ་དགོས་ཤིང་། སོ་སོ་སྐྱེ་བོས་བསྟན་བཅོས་ལ་མ་ལྟོས་པར་བཀའི་དགོངས་པ་རང་དབང་དུ་མི་རྟོགས་པས་བསྟན་བཅོས་ལ་བརྟེན་དགོས་ལ་དེ་ཡང་། མཁའ་འགྲོས་བྱིན་གྱིས་བརླབས་པའི་གྲུབ་ཐོབ་ཁྱད་པར་ཅན་དང་། རྒྱལ་བས་ལུང་བསྟན་པའི་པཎྜི་ཏ་ཁྱད་པར་ཅན་གྱིས་མཛད་པའི་བསྟན་བཅོས་ལ་བརྟེན་ནས་བཀའི་དགོངས་པ་རྟོགས་པར་འགྱུར་ཏེ། དཔལ་བརྩེ་བ་ཆེན་པོའི་ཞལ་ནས། ལུང་བསྟན་གྱུར་པ་ཀླུ་སྒྲུབ་ལ་སོགས་སམ། །མཁའ་འགྲོས་བྱིན་བརླབས་བིརྺ་པ་ལ་སོགས། །གྲུབ་ཐོབ་རྣམས་ཀྱི་མན་ངག་ལ་བརྟེན་ནས། །རྗེས་འཇུག་སྐྱེ་བོས་བཀའ་རྣམས་རྟོགས་པར་འགྱུར། །ཞེས་གསུངས་སོ། །འདིར་ནི་ཡོད་པ་དང་། མེད་པའི་ཕྱོགས་འཇིག་ཅིང་བླ་ན་མེད་པའི་ཐེག་པ་འཇིག་རྟེན་དུ་རྒྱས་པར་མཛད་པར་རྒྱལ་བས་ལུང་བསྟན་པ་ནི་མགོན་པོ་ཀླུ་སྒྲུབ་ཡིན་ཏེ། སྤྲིན་ཆེན་པོའི་མདོ་ལས། ཀུན་དགའ་བོ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི་ང་ཡོངས་སུ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱིས་དང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་མངོན་པར་རྫོགས་པར་སངས་རྒྱས་པར་འགྱུར་རོ། །ཞེས་དང་། ལང་ཀར་གཤེགས་པ་ལས། བློ་གྲོས་ཆེན་པོས། བདེ་གཤེགས་མྱ་ངན་འདས་གྱུར་ནས། །བསྟན་པ་སུ་ཡིས་འཛིན་འགྱུར་ལགས། །ཞེས་ཞུས་པའི་ལན་དུ། བདེ་གཤེགས་མྱ་ངན་འདས་གྱུར་ནས། །བསྟན་པ་འཛིན་པར་འགྱུར་བ་ནི། །དུས་དག་འདས་ཏེ་བྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ང་ཡི་བསྟན་པ་འཇིག་རྟེན་ན། །ཡོད་དང་མེད་པའི་ཕྱོགས་འཇིག་པ། །བླ་མེད་ཐེག་པ་རབ་བསྟན་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་དང་། འཇམ་དཔལ་རྩ་བའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཞི་བརྒྱ་ལོན་པ་ན། །བསྟན་པ་འདི་ལ་ཕན་བརྩོན་པ། །དགེ་སློང་ཀླུ་སྒྲུབ་ཞེས་བྱ་འབྱུང་། །རྨ་བྱ་ཞེས་པའི་རིག་པ་བསྒྲུབས། །ཁམས་དོན་བསྟན་བཅོས་དུ་མ་དང་། །དངོས་མེད་དོན་གྱི་དེ་ཉིད་རིག །ལོ་ནི་དྲུག་བརྒྱ་འཚོ་བར་འགྱུར། །ལུས་དེ་བོར་བར་གྱུར་ནས་ནི། །བདེ་བ་ཅན་དུ་འགྲོ་བར་འགྱུར། །དེ་ཡི་རྗེས་ཐོགས་ཉིད་དུ་ནི། །སངས་རྒྱས་ཉིད་དུ་ངེས་པར་འགྲུབ། །ཅེས་དང་། རྔ་བོ་ཆེའི་མདོ་ལས། ཀུན་དགའ་བོ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ང་ཡོངས་སུ་མྱ་ངན་ལས་འདས་ནས་ལོ་བརྒྱད་ཅུ་ལོན་པ་ན་དགེ་སློང་བློ་འཆང་ཞེས་བྱ་བར་འགྱུར་ཏེ། རྔ་བོ་ཆེའི་མདོ་འདི་འཛིན་པར་འགྱུར། ཞེས་པ་དང་། ཡང་ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་དགེ་སློང་འཚོ་བྱེད་ཅེས་བྱ་བར་གྱུར་ནས་ངའི་བསྟན་པ་རབ་ཏུ་རྒྱས་པར་འགྱུར་ཞེས་པ་ལ་སོགས་པ་མང་དུ་གསུངས་སོ། །དེ་ལྟར་རྒྱལ་བས་ལུང་བསྟན་ཅིང་ས་དང་པོ་རབ་ཏུ་དགའ་བ་བརྙེས་པའི་སློབ་དཔོན་དེས་བསྟན་བཅོས་ཇི་ལྟར་མཛད་པའི་ཚུལ་ལ་སྔ་རབས་པ་དག རྒྱུ་ཕ་རོལ་ཏུ་ཕྱིན་པའི་ཐེག་པ་གསལ་བར་བྱེད་པ་དང་། འབྲས་བུ་རྡོ་རྗེའི་ཐེག་པ་གསལ་བར་བྱེད་པ་དང་། དེ་གཉིས་དོན་གཅིག་ཏུ་སྟོན་པ་གསུམ་ལས། དང་པོ་ལ་ཡང་གསུམ་སྟེ། ལྟ་བ་གཙོ་བོར་སྟོན་པ་དབུ་མ་རིག་པའི་ཚོགས་དྲུག་དང་། སྤྱོད་པ་གཙོ་བོར་སྟོན་པ་ལ་རྒྱས་པར་བྱང་ཆུབ་ཀྱི་ཚོགས། འབྲིང་མདོ་ཀུན་ལས་བཏུས་པ། བསྡུས་པ་བཤེས་པའི་སྤྲིང་ཡིག་སྟེ་གསུམ་དང་། ལྟ་སྤྱོད་ཆ་མཉམ་པར་སྟོན་པ་རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བའོ། །ཞེས་ཀྱང་འཆད་མོད་ཀྱི། སྟོང་ཉིད་རིག་པས་བསྒྲུབ་པ་དབུ་མ་རིག་པའི་ཚོགས་ལྔ་དང་། དེ་ཉིད་གསུངས་པའི་སྒོ་ནས་སྟོན་པ་ལ་བསྟོད་པ་བསྟོད་པའི་ཚོགས་དང་། རང་གི་བཤེས་རྒྱལ་པོ་བདེ་སྤྱོད་བཟང་པོ་ལ་གཏམ་དུ་བྱ་བ་བཤེས་པའི་སྤྲིང་ཡིག་དང་། རིན་ཆེན་ཕྲེང་བ་སྟེ། སའི་སྟེང་དུ་སེང་གེའི་སྒྲ་ལན་གསུམ་བསྒྲགས་པར་གྲགས་པའི་བསྟན་བཅོས་ཐམས་ཅད་ཀྱི་རྩ་བའམ། གཞིའམ། ལུས་ལྟ་བུར་གྱུར་པ་ནི་དབུ་མ་རྩ་བའི་ཚིག་ལེའུར་བྱས་པ་ཤེས་རབ་ཅེས་བྱ་བ་འདི་ཉིད་ཡིན་ལ། འདི་འཆད་པ་ལ་དོན་གསུམ་སྟེ། སྒྱུར་བྱེད་དམ་པའི་ཀླད་ཀྱི་དོན། རྩོམ་བྱེད་དམ་པའི་གཞུང་གི་དོན། བསྒྱུར་བ་མཐར་ཕྱིན་མཇུག་གི་དོན་ནོ། །དང་པོ་ལ་གཉིས་ཏེ། མཚན་གྱི་དོན། འགྱུར་གྱི་ཕྱག་གོ །དང་པོ་ལ་གཉིས་ཏེ། མཚན་བསྒྱུར་བ་དང་། མཚན་བཤད་པའོ། །དང་པོ་ནི། སྤྱིར་རྒྱ་གར་ན། པྲ་ཀྲྀ་ཏ་སྟེ་ཡུལ་སོ་སོའམ། རང་བཞིན་ནམ། ཕལ་པའི་སྐད་དང་། དེ་ཉིད་ཟུར་ཆག་པ་ཨ་བ་བྷྲཾ་ཤ་སྟེ་ཟུར་ཆག་གི་སྐད་གཉིས་ནི་རྒྱ་གར་རང་གི་སྐད་ཡིན་ལ། པི་ཤ་ཙི་ནི་ཤ་ཟའི་སྐད་དང་། སཾ་སྐྲྀ་ཏ་ནི་བྱིངས་དང་རྐྱེན་ལེགས་པར་སྦྱར་བས་ན་ལེགས་སྦྱར་ཏེ་ལྷའི་སྐད་ཡིན་ཀྱང་འཕགས་ཡུལ་དུ་དར་བས་རྒྱ་གར་གྱི་སྐད་ཀྱི་མིང་གིས་བཏགས་པའོ། །དེ་ལྟར་བཞི་ལས། འདིར་སཾ་སྐྲྀ་ཏའི་སྐད་དུ། པྲཛྙཱ་ནི་ཤེས་རབ། ན་མ་ནི་ཅེས་བྱ་བའམ་མིང་། མཱུ་ལ་ནི་རྩ་བ། མ་དྷྱེ་མ་ཀ་ནི་དབུ་མ། ཀཱ་རི་ཀཱ་ནི་ཚིག་ལེའུར་བྱས་པའོ། །གཉིས་པ་ནི། མཐའ་གཉིས་སྤངས་པའི་དབུ་མ་སྟོན་པས་ན་དབུ་མ་སྟེ། བརྗོད་བྱ་ལས་བཏགས་པའོ། །སློབ་དཔོན་རང་ཉིད་ཀྱི་དབུ་མའི་བསྟན་བཅོས་རྣམས་སམ། རྗེས་འཇུག་གི་དབུ་མའི་བསྟན་བཅོས་རྣམས་ཀྱི་རྩ་བར་གྱུར་པས་ན་རྩ་བ་སྟེ། ཡོན་ཏན་ལས་བཏགས་པའོ། །གཞུང་ཚིགས་བཅད་དུ་ཡོད་པས་ན་ཚིག་ལེའུ་བྱས་པ་སྟེ། རྗོད་བྱེད་ལས་བཏགས་པའོ། །བདག་མེད་རྟོགས་པའི་ཤེས་རབ་བསྐྱེད་པས་ན་ཤེས་རབ་སྟེ། བྱེད་ལས་ལས་བཏགས་པའོ། །གཉིས་པ་ནི། དཀོན་མཆོག་གསུམ་ལ་ཕྱག་འཚལ་ལོ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སློབ་དཔོན་འཕགས་པ་ཀླུ་སྒྲུབ་ལ་ཕྱག་འཚལ་ལོ། །ཞེས་འབྱུང་བའི་པ་ར་མ་ནི་འདི་ལ་དོན་དམ་པའི་ཆོས་མངོན་པ་རྣམ་པར་གཞག་པ་ཞེས་འབྱུང་ཞིང་། ལྷག་པ་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་སྟོན་པས་ན་ལོ་པཎ་བཀས་བཅད་ཀྱི་ཕྱག་ཡིན་ཅིང་སྔ་ཕྱི་གཉིས་ནི་འདོད་པའི་ལྷ་ལ་ཕྱག་འཚལ་བ་ཡིན་པས་གང་འདོད་ཡིན་ནོ། །གཉིས་པ་རྩོམ་བྱེད་དམ་པའི་གཞུང་གི་དོན་ལ་གསུམ་སྟེ། ལྟ་བ་སྟོན་པའི་སྒོ་ནས་མཆོད་པར་བརྗོད། བསྟན་བྱའི་ལྟ་བ་དེ་ཉིད་གཏན་ལ་དབབ། བཀའ་དྲིན་རྗེས་སུ་དྲན་པའི་སྒོ་ནས་ཕྱག་བྱ་བའོ། །དང་པོ་ལ་གཉིས་ཏེ། དངོས་སུ་བརྗོད་པ་མཆོད་བརྗོད་ཀྱི་དོན་དུ་བཤད་པ། ཤུགས་ལས་བསྟན་པ་དགོས་འབྲེལ་གྱི་དོན་དུ་བཤད་པའོ། །དང་པོ་ལ་གསུམ་སྟེ། དགོས་པའི་དོན། བསྡུས་པའི་དོན། ཚིག་གི་དོན་ནོ། །དང་པོ་ལ་གསུམ་སྟེ། སྤྱིར་ཡུལ་ཁྱད་པར་ཅན་ལ་མཆོད་བརྗོད་བྱས་པའི་དང་། བསྟན་བཅོས་རྩོམ་པའི་སླད་དུ་བྱས་པའི་དང་། གཞུང་ཡི་གེར་བཀོད་པའི་དགོས་པའོ། །དང་པོ་ནི། སྤྱིར་སྟོན་པ་ལ་མཆོད་བརྗོད་བྱས་པས་ཚོགས་གཉིས་རྫོགས་ནས་བྱང་ཆུབ་ཀྱི་རྒྱུ་ཡོངས་སུ་བཟུང་བའོ། །གཉིས་པ་ནི། ཕྱི་ནང་གི་བར་ཆད་ཞི་བས་རྩོམ་པ་མཐར་ཕྱིན་པའོ། །གསུམ་པ་ནི། སྐྱེ་བོ་དམ་པ་རྣམས་ཀྱི་མཛད་སྤྱོད་སྐྱོང་བར་འགྱུར་བའོ། །འདི་ལ་ཉིད་ཀྱིས་དམ་པའི་སྤྱོད་པ་མཛད་པས་རྩོམ་པ་པོ་བདག་ཉིད་དམ་པར་ཤེས་ནས་དེས་བརྩམས་པའི་བསྟན་བཅོས་ལ་གཞན་དག་འཇུག་པར་འགྱུར་བ་དང་། རྩོམ་པའི་སྔོན་དུ་རང་དད་པའི་ལྷ་ལ་མཆོད་པར་བརྗོད་པས་བསྟན་བཅོས་འདི་ཉིད་དགོས་པ་གྱ་ནོམ་པ་དང་ལྡན་པར་ཤེས་ནས་གཞན་དག་འཇུག་པར་འགྱུར་བ་དང་། བསྟན་བཅོས་ཉན་བཤད་བྱེད་པ་རྣམས་ཀྱིས་མཆོད་བརྗོད་ཉན་འཆད་བྱས་པས་དེ་མཐར་ཕྱིན་པར་འགྱུར་བ་དང་། གཞན་དག་ལ་ཡང་བྱ་བ་ཁྱད་པར་ཅན་གྱི་སྔོན་དུ་དཀོན་མཆོག་ལ་མཆོད་བརྗོད་བྱས་ནས་འཇུག་པ་བསླབ་པར་འགྱུར་བ་དང་། མཆོད་བརྗོད་ཉིད་མཐོང་བ་དང་། འདོན་པ་ལ་སོགས་པ་བྱས་པས་བསོད་ནམས་ཐོབ་པའི་སྒོ་ནས་གདུལ་བྱ་གཞན་རྗེས་སུ་འཛིན་པ་དང་གསུམ་ཡོད་དོ། །དེ་ལྟར་ཡང་སློབ་དཔོན་ཉིད་ཀྱིས། བསྟན་བཅོས་བྱེད་པས་སྟོན་པ་ལ། །མཆོད་པར་བརྗོད་པ་འབྲས་མེད་མིན། །བསྟན་བཅོས་དང་ནི་སྟོན་པ་ལ། །གུས་པ་བསྐྱེད་ཕྱིར་གཞན་དུ་མིན། །ཞེས་གསུངས་སོ། །གཉིས་པ་བསྡུས་དོན་ནི། གང་གིས་དང་། གང་ལ་དང་། ཅི་ལྟར་མཆོད་པར་བརྗོད་པ་དང་གསུམ་མོ། །གསུམ་པ་ཚིག་གི་དོན་ནི་ཕྱག་འཚལ་ཞེས་པ་བཤད་པའི་གཞིར་བླངས་ཏེ། དེ་ལ་གང་གིས་དང་། གང་ལ་དང་། ཅི་ལྟར་ཕྱག་འཚལ་བ་གསུམ་ལས། དང་པོ་ནི། རྩོམ་པ་པོ་སློབ་དཔོན་ཀླུ་སྒྲུབ་བདག་གིས་ཞེས་པ་དོན་གྱིས་ཐོབ་བོ། །གཉིས་པ་ལ་གསུམ་སྟེ། ངོ་བོ་དང་། མཆོག་ཏུ་གྱུར་པ་དང་། དེའི་རྒྱུ་མཚན་ནོ། །དང་པོ་ནི། སྐྱབས་འོས་དཀོན་མཆོག་གི་གཙོ་བོ་རྫོགས་པའི་སངས་རྒྱས་དེ་ལ་ཞེས་པ་སྟེ། སྤྱིར་སངས་རྒྱས་ཀྱི་སྒྲ་ཐེག་པ་གསུམ་གྱི་དགྲ་བཅོམ་གསུམ་ཀ་ལ་འཇུག་ཀྱང་། རྫོགས་པའི་ཞེས་སྨོས་པས་སྤངས་རྟོགས་མ་རྫོགས་པ་ཉན་རང་ལས་ཁྱད་པར་དུ་འཕགས་པ་བཅུ་གཅིག་ཀུན་ཏུ་འོད་ལ་གནས་པའོ། །གཉིས་པ་ནི། དེ་ཁྱད་པར་གྱི་ཆོས་གང་དང་ལྡན་སྙམ་པ་ལ་སྨྲ་རྣམས་ཀྱི་དམ་པ་ཞེས་པ་སྟེ། དེ་ལ་སྨྲ་བ་ནི་རང་གིས་རྟོགས་པའི་དོན་གཞན་ལ་སྟོན་པ་ཡིན་ལ། དེ་ཡང་སྨྲ་བ་པོ་འཇིག་རྟེན་པ་དང་། ཕྱི་རོལ་དང་། སངས་རྒྱས་པའི་སྟོན་པ་གཞན་ལས་ཀུན་སློང་ཐུགས་རྗེ་ཉིད་དང་། ངོ་བོ་སྙན་ཞིང་འཇམ་པ་ཉིད་དང་། བརྗོད་བྱ་བདེན་པ་ཉིད་དང་། འབྲས་བུ་ཕན་པ་ཉིད་དང་། གདུལ་བྱ་ལ་མཚམས་པ་ཉིད་དང་། དུས་སུ་འབྱུང་བ་ཉིད་དང་། དྲི་བོ་ཅོག་ལུང་སྟོན་པ་ཉིད་དེ། ཁྱད་པར་བདུན་གྱིས་ཁྱད་པར་དུ་འཕགས་པས་དམ་པར་གྱུར་པའོ། །དེ་ཉིད་ཀྱིས་ན་སྨྲ་བའི་སེང་གེ་དང་། སྨྲ་བའི་ཟླ་བ་དང་། སྨྲ་བའི་ཁྱུ་མཆོག་དང་། སྨྲ་བའི་རྒྱལ་པོ་ཞེས་ཀྱང་གསུངས་སོ། །གསུམ་པ་ནི་གང་བསྟན་པས་སྨྲ་བ་རྣམས་ཀྱི་དམ་པར་གྱུར་ཅེ་ན། གང་གིས་རྟེན་ཅིང་འབྲེལ་བར་འབྱུང་བ་བསྟན་པས་སྨྲ་བ་རྣམས་ཀྱི་དམ་པར་གྱུར་ཅེས་སྦྱར་ཏེ། འདི་ལ་བསྟན་བྱ་རྟེན་འབྲེལ་གྱི་རང་བཞིན་དང་། དེ་བསྟན་པས་སྨྲ་བ་རྣམས་ཀྱི་དམ་པར་འགྱུར་བའི་ཚུལ་དང་། དེ་བསྟན་པའི་དགོས་པ་དང་གསུམ་ལས། དང་པོ་ལ་ཡང་གསུམ་སྟེ། ཁྱད་པར་གྱི་གཞི། ཁྱད་པར་གྱི་ཆོས་གཞི་དང་། ཆོས་ཀྱི་གཅིག་དང་ཐ་དད་བསམ་པའོ། །དང་པོ་ནི། རྟེན་ཅིང་འབྲེལ་བར་འབྱུང་བའི་སྐད་དོད་ལ་ལེགས་སྦྱར་གྱི་སྐད་ལ། པྲ་ཏཱི་ཏྱ། ས་མུཏྤཱ་ད་ཞེས་པ་ཡོད་ལ། འདི་ལ་སྒྲ་བསྒྲུབ་པ་དང་། སྒྲ་བཤད་པ་དང་། ལུགས་གཞན་དགག་པ་དང་གསུམ་ལས། དང་པོ་ནི། ཨིཎ་འགྲོ་བ་ལའོ་ཞེས་པའི་བྱིངས་བཞག ཎ་ཡིག་ནི། པན་ལ་ཨིཎ་ཨིང་དག་གི་ག་མིའོ། །ཞེས་པའི་ཁྱད་པར་གྱི་དོན་ཡིན་པས་དབྱི། ཉེར་བསྒྱུར་པྲ་ཏི་སྔོན་དུ་བཞག ཨ་ལམ་ཁ་ལུ་དག་ལ་དགག་པ་ལ་ཀྟྭཱ་ཡང་ནའོ། །མིང་ལས་སོ། །བྱེད་པ་པོ་གཅིག་དག་གི་སྔ་མའི་དུས་ལའོ། །ཞེས་པས་ཀྟྭཱའི་རྐྱེན་བྱིན། ཀ་ཡིག་ནི་ཀ་ལ་ཡཎ་བཞིན་ཡང་སྟེ། ཞེས་པའི་དོན། བསྡུས་བ་ལ་འབྱུང་བ་ལ་ན་གཉིས་མིན་པའི་ཀྟྭཱའི་ཡབ་བོ། །ཞེས་པས་ཏྭ་ཡབ་ཏུ་བཏང་། བ་ཡིག་ནི་བྱིངས་ཀྱི་མཐའ་ས་རྗེས་སུ་འབྲེལ་བ་ལ་ཏའོ། །ཞེས་པའི་དོན་ཡིན་པས་དབྱི། དེ་ཉིད་ཀྱི་ཕྱིར་ཏ་ཨཱ་ག་མ། ཏིའི་ཨི་ཡིག་རིམ་པ་ལས་མ་འདས་པར་འཕྲལ། མཚུངས་པ་འདྲ་བའི་ཡི་གེ་ལ་རིང་པོར་འགྱུར་ཏེ་ཕ་རོལ་ལའང་དབྱིའོ། །ཞེས་པས་ཨི་སྔ་མ་རིང་པོ། ཕྱི་མ་དབྱི། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་རྣམ་དབྱེ་དང་པོའི་གཅིག་ཚིག་སི་བྱིན། གཞན་ལས་འཇིག་གོ །མི་ཟད་པ་ལས་ཀྱང་ངོ་། །ཞེས་པས་སི་འཇིག་སྟེ། ཀྟྭཱའི་རྐྱེན་ནི་མི་ཟད་པ་ཡིན་པའི་ཕྱིར་རོ། །གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲངས་པས། པྲ་ཏཱི་ཏྱ་ཞེས་པའོ། །ཡང་། པ་ར་འགྲོ་བ་ལའོ་ཞེས་པའི་ཁམས་ལ་ཉེར་བསྒྱུར་ས་མ་དང་ཨུཏ་སྔོན་དུ་བཞག ཁམས་མཐའི་ཨ་ཡིག་བརྗོད་པའི་དོན་ཡིན་པས་དབྱི། པད། བཙ། བིཤ། པྲྀཤ། ཨུཙ་རྣམས་ལས་གྷཉའོ། །ཞེས་པས་གྷཉ་རྐྱེན་དུ་བྱིན། ཉ་ཡིག་ནི། གྲུབ་པ་ཉ་ཎ་རྗེས་སུ་འབྲེལ་པ་ལ་ཨི་ཙ་གཞན་དུའོ། །ཞེས་པའི་ཁྱད་པར་གྱི་དོན་ཡིན་པས་དབྱི། དེ་ཉིད་ཀྱི་ཕྱིར་ཨིན་ཨིཙ་ཨཊ་རྣམས་ཀྱི་ཨའི་ཨུ་པ་དྷཱ་རིང་པོ་ཏེ་ནཱ་མི་རྣམས་ཀྱིའང་འཕེལ་བའོ། །ཞེས་པས་པའི་ཨ་རིང་པོར་སོང་། གྷའི་ཨ་ཡིག་རིམ་པ་ལས་མ་འདས་པར་འཕྲལ། གྷ་ཡིག་ནི་ཙ་ཛ་དག་གི་དྷུ་ཊ་གྷ་རྗེས་སུ་འབྲེལ་བ་ལ་ཀ་གདག་གོ །ཞེས་པའི་ཁྱད་པར་གྱི་དོན་ཡིན་པས་དབྱི། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་སི་བྱིན། སིའི་ཨི་ཡིག་ནི་སི་ལ་ནུའོ། །ཞེས་པའི་ཁྱད་པར་གྱི་དོན་ཡིན་པས་དབྱི། རེ་ཕ་དང་ས་དག་གི་རྣམ་པར་བཅད་པའོ་ཞེས་པས། ས་རྣམ་བཅད། གསལ་བྱེད་དབྱངས་མེད་ཕ་རོལ་གྱི་ཡི་གེར་དྲངས་པས། ས་མུཏྤཱ་དཿཞེས་པའོ། །གཉིས་པ་ནི། པྲ་ཏཱི་ཏྱ་ས་མུཏྤཱ་དཿཞེས་པའི། པྲ་ཏི་ཕྲད་པའི་དོན་དང་། ཨི་ཏི་འགྲོ་བའི་དོན་ལ་འཇུག་པ་ལས། འདིར་ཉེར་བསྒྱུར་གྱི་བྱིངས་ཟིལ་གྱིས་མནན་ནས། པྲ་ཏཱི་ཏྱ། ཞེས་པས་ཕྲད་པ་ཉིད་ལ་འཇུག་སྟེ། སྐད་ཀྱི་བྱིངས་ནི་སྟོབས་ལྡན་ཡང་། །ཉེ་བར་བསྒྱུར་བས་ཟིལ་མནན་འགྱུར། །གངྒཱའི་ཆུ་ནི་མངར་མོད་ཀྱི། །རྒྱ་མཚོའི་ཆུ་ཡིས་ཇི་བཞིན་ནོ། །ཞེས་གསུངས་པ་ལྟར་རོ། །ཀྟྭཱའི་ལུས་འགྱུར་ཡ་ནི། ཅིང་ངམ། ཏེའམ། ནས་ཞེས་པའི་ཚིག་ཕྲད་ཀྱི་དོན་ནོ། །སཾ་ནི་ཡང་དག་པ་སོགས་དང་། ཨུ་ཏ་ནི་ཤིན་ཏུ་སོགས་དང་། པཱ་ད་འགྲོ་བ་སོགས་དོན་དུ་མ་ལ་འཇུག་ཀྱང་། ས་མུཏྤཱ་ད། ཞེས་པ། ས་མུཏ་གང་ན་ཡོད་པའི་པཱ་དའི་སྒྲ་ནི་འབྱུང་བ་ཉིད་ལ་འཇུག་སྟེ། དེ་ལྟར་ན་ཕྲད་ཅིང་འབྱུང་བའམ། ཕྲད་དེ་འབྱུང་བའམ། ཕྲད་ནས་འབྱུང་བ་ཞེས་བྱ་བའི་དོན་ཏོ། །གལ་ཏེ་བྱིངས་ལ་ཨིཎ་བཞག་པ་དང་། ཨི་ཏི་འགྲོ་བའི་དོན་ནོ་ཞེས་པ་ལ་འབྲེལ་མེད་དོ་སྙམ་ན། སྐྱོན་མེད་དེ། ཨི་ཏི་ཞེས་པ་ཨི་ཎ་འགྲོ་བ་ལའོ། །ཞེས་པའི་བྱིངས་ཀྱི་མིང་ཡིན་པའི་ཕྱིར། དཔེར་ན། ཛུ་ཧོ་ཏི། ཞེས་པ་ནི་ཧུ་སྦྱིན་པ་དང་། ལེན་པ་དག་ལའོ། །ཞེས་པའི་བྱིངས་ཀྱི་མིང་ཡིན་པ་དང་། ཨིརྟི་ཞེས་པ་རྀ་འགྲོ་བ་དང་། པརྟི་ཞེས་པ་བྲྀ་འགྲོ་བ་ལའོ། །ཞེས་པའི་བྱིངས་ཀྱི་མིང་ཡིན་པ་བཞིན་ནོ། །གསུམ་པ་ལ་གཉིས་ཏེ། འགྲེལ་མཛད་གཞན་གྱི་ལུགས་དགག་པ་དང་། ལེགས་ལྡན་བྱེད་ཀྱི་ལུགས་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ་དང་། དེ་སུན་འབྱིན་པའོ། །དང་པོ་ནི་ཁ་ཅིག ཨི་ཎ་འགྲོ་བའི་བྱིངས་ལ་པྲ་ཏི་སྔོན་དུ་བཞག ཎ་རྗེས་སུ་འབྲེལ། གཞན་ལས་ཀྱང་མཐོང་ངོ་། །ཀྭི་པའིའོ། །ཞེས་པས་ཀྭི་པའི་རྐྱེན་བྱིན། ཀ་ཡིག་ནི་ཀ་ལ་ཡ་ཎ་གཞན་ཡང་སྟེ་ཡ་ལ་བརྗོད་པ་བོར་བའོ། །ཞེས་པའི་དོན་པ་ཡིག་ནི། བྱིངས་ཀྱི་མཐའ་པ་རྗེས་སུ་འབྲེལ་པ་ལ་ཏའོ། །ཞེས་པའི་དོན་དེ་ཉིད་ཀྱི་ཕྱིར། ཏ་ཨཱ་ག་མ་བྱིན། བི་ཡིག་ནི་སྦྱར་བ་མིན་པའི་ཝིའི་དབྱིའོ། །ཞེས་པས་དབྱི། ཨུཏ་དང་གོ་སོགས་ལས་ཡ་ཏའོ། །ཞེས་པས་དེ་ཕན་གྱི་ཡཏ་རྐྱེན་དུ་བྱིན། ཏ་ཡིག་ནི་ཏའི་དེའི་དུས་ཀྱིའོ། །ཞེས་པའི་ཁྱད་པར་གྱི་དོན་ཡིན་པས་དབྱི། ཡང་ན། དེར་ལེགས་པ་ལའང་ཡའོ། །ཞེས་པས། དེ་ཕན་གྱི་ཡ་རྐྱེན་དུ་བྱིན། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་སི་བྱིན། སིའི་ཡིག་རྗེས་འབྲེལ། ས་རྣམ་བཅད་དུ་བཏང་། སྔར་བཞིན་མཚམས་སྦྱར་བས། པྲ་ཏཱི་ཏྱཿ ས་མུཏྤཱ་ད་སྔར་ལྟར་སྦྱིན། མིང་རྣམས་ཀྱི་སྦྱོར་བའི་དོན་ནི་བསྡུ་བའོ། །དེར་གནས་རྣམ་དབྱེ་རྣམས་དབྱི་བར་བྱའོ། །ཞེས་པས་ཚིག་སྡུད་བྱས་ནས་རྣམ་དབྱེ་ཕྱིས་པས། པྲ་ཏཱི་ཏྱ་ས་མུཏྤཱ་ད། ཞེས་པ་སྟེ་པྲ་ཏི་ནི་ཟློས་པ་སྟེ། སོ་སོ་སོ་སོ་དང་། ཨི་ཏི་ནི་འགྲོ་བ་དང་། ཆས་པ་དང་། འཇིག་པའི་དོན་དང་། ཡ་ནི་རུང་བའམ། འོས་པ་སྟེ་སོ་སོ་སོ་སོར་འགྲོ་ཞིང་འཇིག་པ་དང་ལྡན་པ་རྣམས་ཀྱི་འབྱུང་བ་ཞེས་བྱ་བའི་དོན་ཏོ། །ཞེས་འཆད་པར་བྱེད་དོ། །གཉིས་པ་ལ་གཉིས་ཏེ། སྒྲ་བཤད་ཚུལ་མི་འཐད་པ་དང་། སྒྲ་སྒྲུབ་ཚུལ་མི་འཐད་པའོ། །དང་པོ་ནི། པྲ་ཏཱི་ཏྱ། ས་མུཏྤཱ་ད་ཞེས་པའི་སྒྲའི་དོན་དེ་ལྟར་ཡིན་པ་མི་འཐད་དེ། དགེ་སློང་དག་ངས་ཁྱེད་ལ་རྟེན་ཅིང་འབྲེལ་པར་འབྱུང་བ་བསྟན་པར་བྱའོ། །སུས་རྟེན་ཅིང་འབྲེལ་བར་འབྱུང་བ་མཐོང་བ་དེས་ཆོས་མཐོང་ངོ་། །ཞེས་རྟེན་འབྲེལ་གྱི་སྒྲ་སྤྱིར་འཇུག་པའི་སྐབས་དེར། རྒྱུ་དེ་དང་དེ་ལ་བརྟེན་ནས་འབྲས་བུ་དེ་དང་དེ་འབྱུང་ཞེས་པའི་ཚུལ་གྱིས་རྟེན་འབྲེལ་གྱི་སྒྲ་ཟློས་པ་ལ་འཆད་པ་རིག་ནའང་། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་བྱེ་བྲག་ཏུ་བཀར་ནས་འཆད་པའི་སྐབས་དེར། ཟློས་པའི་དོན་དུ་མི་འཐད་པའི་ཕྱིར་ཏེ། རྒྱུ་མིག་དང་། འབྲས་བུ་རྣམ་པར་ཤེས་པ་གཅིག་བྱེ་བྲག་ཏུ་བཀར་ནས་བསྟན་པའི་ཕྱིར་རོ། །གལ་ཏེ་སེམས་ཅན་མང་པོ་ཡོད་པ་བཞིན་དུ་དེའི་མིག་དང་མིག་གི་རྣམ་པར་ཤེས་པ་ཡང་མང་པོ་ཡོད་པས་སྐབས་དེར་ཡང་ཟློས་པའི་དོན་དུ་འཐད་དོ་ཞེ་ན། དེས་ཀྱང་སྐྱོན་སྤོང་མི་ནུས་ཏེ། མིག་གཅིག་ལ་བརྟེན་ནས་མིག་གི་རྣམ་པར་ཤེས་པ་གཅིག་སྐྱེ་བ་ཁས་ལེན་དགོས་ལ། དེའི་ཚེ་ཟློས་པའི་དོན་དུ་མི་རུང་བའི་ཕྱིར་རོ། །གཉིས་པ་ནི། ཙཀྵུ་པྲ་ཏཱི་ཏྱ་རཱུ་པན་ཞེས་པ་ལ། རྣམ་དབྱེ་བདུན་པའི་གཅིག་ཚིག་ངི་བྱིན། ངིའི་ཨི་ཡིག་རིམ་པ་ལས་མ་འདས་པར་འཕྲལ། ང་རྗེས་འབྲེལ། ར་ཥི་རའི་ཡི་གེ་རྣམས་ལས་མཐའ་མིན་པའི་ནའི་ཎ་སྟེ། ཞེས་པས་ན་ཎར་སོང་། གསལ་བྱེད་དབྱངས་མེད་ཕ་རོལ་གྱི་ཡི་གེར་དྲངས་པས་ཎི། དེའི་ཚིག་གྲོགས་མི་ཟད་པའི་ཙ་དང་། ཙཀྵུརྦི་ཛྙཱ་ན་ཞེས་པ་ལ། རྣམ་དབྱེ་དང་པོའི་གཅིག་ཚིག་སི་བྱིན། མ་ནིང་ལས་སི་ཨཾ་དག་གི་དབྱི་སྟེ་དེ་ལ་བརྗོད་པའང་མ་ཡིན་ནོ། །ཞེས་པས་སི་དབྱི། ཨ་ཡིག་ལས་སམ་བུ་དྷི་མིན་པ་ལ་མུའང་ངོ་། །ཞེས་པས་མུ་ཨཱ་ག་མ་བྱིན། ཨུ་ཡིག་ནི་ཨཱ་ག་མ་ཨུཏ་རྗེས་སུ་འབྲེལ་པ་དབྱངས་མཐའ་ལས་ཕ་རོལ་ཏུའོ། །ཞེས་པའི་དོན་ཡིན་པས་དབྱི། འཇིག་རྟེན་པའི་ཉེ་བར་སྤྱོད་པ་ལས་འཛིན་པ་གྲུབ་བོ། །ཞེས་པས་མ་རྗེས་སུ་ང་རོར་བཏང་། དེའི་ཚིག་གྲོགས་ཨུཏྤཱ་ད་ཞེས་པ་སྦྱར་བས། ཙཀྵུ་པྲ་ཏཱི་ཏྱ་རཱུ་པ་ཎི་ཙ་ཙཀྵུརྦི་ཛྙཱ་ནཾ་ཨུཏྤཱ་ད། ཞེས་པ་ནི། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པ་ཡིན་ལ། དེ་ལ་ཁྱེད་ལྟར་ན་ཏྱ་ཞེས་པའི་ཕ་རོལ་ན་སི་བྱིན་པའི་རྣམ་དབྱེ་མངོན་པར་ཐལ་ཏེ། དེ་མི་ཟད་པ་ལས་འཇིག་པ་ཡང་མ་ཡིན། ཚིག་སྡུད་བྱས་ནས་ཕྱིས་པ་ཡང་མིན་པའི་ཕྱིར་ཏེ། རྟགས་དང་པོ་ཁས་བླངས་ཏེ། ཏྱའི་ཡ་ཡིག་དེ་ཕན་གྱི་རྐྱེན་དུ་འདོད་པའི་ཕྱིར་རོ། །གཉིས་པ་གྲུབ་སྟེ། རཱུ་པ་ནི་ཞེས་པའི་ཚིག་གིས་བར་ཆོད་པའི་ཕྱིར་དང་། བདུན་པའི་རྣམ་དབྱེ་དང་། མ་ནིང་ལ་སི་མུ་བྱས་པའི་རྣམ་དབྱེ་མངོན་པའི་ཕྱིར་རོ། །དེས་ན་ཁྱེད་ལྟར་ན་པྲ་ཏཱི་ཏྱཾ་རཱུ་པ་ཎི་ཞེས་མ་ནིང་ལ་སི་མུ་བྱས་པའི་རྣམ་དབྱེའི་རྗེས་མངོན་པར་ཁས་ལེན་དགོས་སོ། །གཉིས་པ་ལ་འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། སློབ་དཔོན་ལེགས་ལྡན་བྱེད་ན་རེ། ཁ་ཅིག་པྲ་ཏཱི་ཟློས་པའི་དོན་ནོ། །ཨི་ཏི་ཕྲད་པའི་དོན་ནོ། །ཞེས་ཟེར་རོ། །ཞེས་པའི་སངས་རྒྱས་བསྐྱངས་ཀྱི་འདོད་པ་བརྗོད་ནས། དེ་ནི་མི་འཐད་དེ། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པའི་སྐབས་དེར་ཕྲད་པའི་དོན་བཤད་དུ་མེད་པའི་ཕྱིར་རོ། །དེས་ན་འདི་ཡོད་ན་འདི་འབྱུང་། འདི་སྐྱེས་པའི་ཕྱིར་འདི་སྐྱེས་ཏེ། ཞེས་པའི་ཚུལ་གྱིས་རྐྱེན་འདི་ཙམ་དང་ལྡན་པ་ནི་རྟེན་ཅིང་འབྲེལ་བར་འབྱུང་བའོ། །ཞེས་འཆད་པར་བྱེད་དོ། །གཉིས་པ་ལ་གཉིས་ཏེ། གཞན་གྱི་ཕྱོགས་སྔ་བསུ་བ་ལ་མི་མཁས་པ་དང་། རང་ལུགས་བཞག་པ་ལ་མི་མཁས་པའོ། །དང་པོ་ནི། སློབ་དཔོན་སངས་རྒྱས་བསྐྱངས་ཀྱི་བཞེད་པ་དེ་ལྟར་མིན་ཏེ། པྲ་ཏི་ཕྲད་པའམ། བརྟེན་པའམ། ལྟོས་པའི་དོན་དང་། ཨི་ཏི་འགྲོ་བའི་དོན་དང་། དེ་གཉིས་སྡོམ་ནས་མི་ཟད་པའི་རྐྱེན་ལྱས་ཀྱི་མཐའ་ཅན་དུ་བྱས་པའི། པྲ་ཏཱི་ཏྱ་ཞེས་པ་ནི། ཕྲད་ནས་སམ། བརྟེན་ནས་སམ། ལྟོས་ནས་ཞེས་པའི་དོན་དུ་བཞེད་པའི་ཕྱིར། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པ་དེར་ཕྲད་པའི་དོན་མེད། ཞེས་པ་དེར་ལུང་དང་རིགས་པའི་སྒྲུབ་བྱེད་མ་བསྟན་པས་དམ་བཅའ་ཙམ་དུ་ཟད་དོ། །གལ་ཏེ་རྣམ་པར་ཤེས་པ་ནི་མིག་དང་ཕྲད་པ་ཡོད་པ་མ་ཡིན་ཏེ། གཟུགས་ཅན་མ་ཡིན་པའི་ཕྱིར། ཁྱབ་སྟེ། གཟུགས་ཅན་རྣམས་ཁོ་ན་ལ་ཕྲད་པ་མཐོང་བའི་ཕྱིར་རོ། །ཞེ་ན་དེ་ཡང་མི་འཐད་དེ། དགེ་སློང་འདིས་ནི་རྒྱུན་དུ་ཞུགས་པའི་འབྲས་བུ་ཐོབ་ཅེས་གཟུགས་ཅན་མིན་པ་ལའང་ཕྲད་པ་བཤད་པའི་ཕྱིར་རོ། །གཉིས་པ་ནི། ཁྱེད་རང་གི་ལུགས་བཞག་པ་དེ་ཡང་མི་འཐད་དེ། པྲ་ཏཱི་ཏྱ་དང་། ས་མུཏྤཱ་དའི་སྒྲའི་དོན་སོ་སོར་མ་བཤད་པའི་ཕྱིར་རོ། །གལ་ཏེ་པྲ་ཏཱི་ཏྱ་ས་མུཏྤཱ་ད་ཞེས་པ་ནི་བཤད་པ་རྒྱུ་མཚན་ཅན་གྱི་སྒྲ་མ་ཡིན་ཏེ། འཇུག་པ་རྒྱུ་མཚན་ཅན་གྱི་འདོད་པའི་རྒྱལ་བའི་སྒྲ་ཡིན་པའི་ཕྱིར། སློབ་དཔོན་གྱིས། འདི་ཡོད་པས་ནི་འདི་འབྱུང་དཔེར། །ཐུང་དུ་ཡོད་ན་རིང་པོ་བཞིན། །ཞེས་གསུངས་པའི་ཕྱིར་ཞེ་ན། ལུང་དེ་ལས་ངེད་ཀྱི་ལུགས་གྲུབ་པ་ཡིན་ཏེ། ཐུང་དུ་དང་ཕྲད་ཐུང་ངུ་ལ་བརྟེན། ཐུང་དུ་ལ་ལྟོས་ནས་རིང་པོར་འབྱུང་བར་བསྟན་པའི་ཕྱིར། བཤད་པ་རྒྱུ་མཚན་ཅན་གྱི་སྒྲ་མིན། ཞེས་པའང་མི་འཐད་དེ། སློབ་དཔོན་གྱིས། དེ་དང་དེ་བརྟེན་གང་འབྱུང་བ། །རང་གི་ངོ་བོ་དེ་མ་སྐྱེས། །ཞེས་བཤད་པ་རྒྱུ་མཚན་ཅན་དུ་གསལ་བར་གསུངས་པའི་ཕྱིར་རོ། །གཉིས་པ་ཁྱད་པར་གྱི་ཆོས་ལ་གསུམ་སྟེ། ཁྱད་ཆོས་བརྒྱད་པོ་སོ་སོའི་ངོ་བོ་ངོས་བཟུང་། བརྒྱད་དུ་གྲངས་ངེས་པའི་ཚུལ། གོ་རིམ་མི་འཐད་པ་སྤང་བའོ། །དང་པོ་ནི། ཤུགས་ལ་ཀུན་རྫོབ་ཏུ་འགག་པ་སོགས་སྒྲུབ་པ་བརྒྱད་པོ་ཁྱད་པར་གྱི་ཆོས་སུ་བསྟན་མོད། འདིར་དངོས་སུ་བསྟན་པ་ནི་འགག་པ་མེད་པ་ལ་སོགས་པ་བཀག་ཆོས་ཀྱི་ཁྱད་པར་བརྒྱད་དོ། །དེ་ལ་བཀག་ཆོས་ཐམས་ཅད་དགག་བྱ་ངོས་བཟུང་བ་ལ་རགས་ལས་པས་འདི་འགག་པ་ནི་བྱེད་པ་དང་ལས་སུ་བསྒྲུབ་པ་མ་ཡིན་གྱི་འགག་པས་ན་འགག་པ་སྟེ། རྫས་སྐད་ཅིག་མར་འཇིག་པའི་བྱ་བའོ། །སྐྱེ་བས་ན་སྐྱེ་བ་ཏེ་སྔར་མེད་གསར་དུ་སྐྱེ་བའོ། །ཆད་པས་ན་ཆད་པ་སྟེ། དངོས་པོའི་རྒྱུན་ཆད་པའོ། །རྟག་པ་ནི་རྒྱུན་མི་འཇིག་པར་གནས་པའོ། །འོང་བ་ནི་ཡུལ་ཐག་རིང་བ་ན་གནས་པ་རྣམས་ཉེ་བར་འོང་བའོ། །འགྲོ་བ་ནི་ཡུལ་ཐག་ཉེ་བ་ན་གནས་པ་རྣམས་རིང་བར་འགྲོ་བའོ། །ཐ་དད་པའི་དོན་ནི་དོན་ངོ་བོའམ་དངོས་པོ་ཐ་དད་པའོ། །དོན་གཅིག་པ་ནི་དོན་ངོ་བོའམ། དངོས་པོ་ཐ་མི་དད་ཅིང་གཅིག་པའོ། །འདི་དག་དོན་དམ་པར་མེད་པ་ཡིན་ནམ། འོན་ཏེ་ཀུན་རྫོབ་ཏུ་ཡང་མེད་པ་ཡིན་ཞེ་ན། འགྲེལ་བྱེད་ཁ་ཅིག རྟག་ཆད་གཉིས་ནི་ཐ་སྙད་དུ་ཡང་མེད་ལ། གཞན་རྣམས་ནི་དོན་དམ་པར་མེད་པ་ཡིན་ཅེས་འཆད་ཀྱང་ཟླ་བའི་བཞེད་པ་ནི་སྐྱེ་འགག་སོགས་བརྒྱད་ཆར་འཇིག་རྟེན་ལྷན་སྐྱེས་ཀྱི་བློ་ལ་སྣང་བ་ནི་ཐ་སྙད་བདེན་པ་ཡིན་ལ། དེ་ཉིད་ལ་རིག་པས་དཔྱད་པའི་ཚེ་མ་རྙེད་པ་ནི་འདིར་དངོས་སུ་བསྟན་པའི་ཁྱད་ཆོས་ཡིན་ཞིང་། དེའི་འོག་ཏུ་སྐྱེ་འགག་སོགས་སུ་སྣང་བ་ནི་སྒྱུ་མ་ལ་སོགས་པ་དང་མཚུངས་པ་མེད་བཞིན་དུ་འཁྲུལ་ངོར་སྣང་བར་བཞེད་དོ། །གལ་ཏེ་དགག་བྱ་བདེན་པའི་སྐྱེ་འགག་སོགས་མ་གྲུབ་མོད། དེ་དག་བཀག་པའི་དགག་ཆོས་ཙམ་ཞིག་ཡོད་དམ་མེད། ཡོད་ན་དོན་དམ་པར་བཀག་པའི་སྤྲོས་པ་གྲུབ་པར་འགྱུར་ལ། མེད་ན་རྟེན་འབྲེལ་ལ་བདེན་པའི་སྐྱེ་འགག་སོགས་གྲུབ་པར་འགྱུར་རོ་ཞེ་ན། འདི་ལ་བློའི་རིམ་པ་གཉིས་ལས། སྐྱེ་འགག་སོགས་དགག་བྱའི་གཙོ་བོར་བྱེད་པའི་ཚེ་བཀག་པ་ཙམ་ཞིག་གྲུབ་པ་ལ་འགལ་བ་མེད་དེ། སྐྱེ་སོགས་དགག་བྱར་བྱས་ནས་སྐྱེ་མེད་སོགས་ལ་ངེས་ཤེས་དྲངས་པའི་སྐབས་ཡིན་པའི་ཕྱིར་རོ། །འོ་ན་བཀག་པ་དེ་ཉིད་གནས་ལུགས་སུ་གྲུབ་བམ་སྙམ་པ་ལ། འདིར་ནི་ཡོད་ཉིད་འགོག་ཡིན་གྱི། །མེད་ཉིད་བསྒྲུབ་པ་མ་ཡིན་ནོ། །ཞེས་དང་། དགག་བྱ་ཡོད་པ་མ་ཡིན་པས། །ཡང་དག་ཏུ་ནི་བཀག་མེད་གསལ། །ཞེས་པའི་ཚུལ་གྱིས་དེ་ཉིད་ལ་དཔྱད་པའི་ཚེ་བཀག་པ་ཉིད་ཀྱང་མ་གྲུབ་སྟེ། དེ་དགག་བྱར་བྱེད་པའི་ཕྱིར་དང་། དཔྱད་པའི་ཚེ་མི་རྙེད་པའི་ཕྱིར་རོ། །གཉིས་པ་ནི། འདིར་བཀག་ཆོས་ཀྱི་ཁྱད་པར་བརྒྱད་ཁོ་ན་སྨོས་པ་ནི། འགྲེལ་པར་མཚོན་པའམ་སྲིད་པ་ཙམ་བགྲངས་པ་མ་ཡིན་གྱི་འདི་དག་ཁོ་ན་གཙོ་བོར་རྩོད་པའི་གནས་སུ་འགྱུར་བའི་ཕྱིར་རོ། །ཞེས་བཤད་པ་ལ། ཁ་ཅིག དེའི་དགོངས་པ་དགག་བྱ་བརྒྱད་པོ་འདི་དག་རྣམ་པ་གསལ་བས་ན་འདི་དག་ལ་མངོན་ཞེན་ཆེ་བའི་ཕྱིར་རྩོད་པའི་གཞིར་གྱུར་ཞེས་འཆད། ཁ་ཅིག་རང་གི་སྡེ་པ་ལ་གྲགས་པའི་སྐྱེ་འགག་གཉིས། གཞན་གྱི་སྡེ་པ་ལ་གྲགས་པའི་རྟག་ཆད་གཉིས། འཇིག་རྟེན་ལ་གྲགས་པའི་ཕྱི་མ་བཞི་གཙོ་ཆེ་བས་དགག་བྱ་བརྒྱད་སྨོས་པ་ཡིན་ནོ། །ཞེས་འཆད་དོ། །གསུམ་པ་ནི། ཆོས་གཅིག་གི་སྐྱེ་གནས་འགག་པ་རིམ་པ་བཞིན་འབྱུང་བས་སྐྱེ་བ་སྔོན་དུ་སྨོས་པར་རིག་གོ་ཞེ་ན། འགག་པ་ལ་སྐྱེ་བ་སྔོན་དུ་འགྲོ་དགོས་མོད་ཀྱི་འབྲས་བུ་སྐྱེ་བ་ལ་ཡང་རྒྱུ་འགག་པ་སྔོན་དུ་འགྲོ་དགོས་པས། སྐྱེ་འགག་ལ་སྔ་ཕྱིའི་གོ་རིམ་ངེས་པ་མེད་པར་བསྟན་པའི་དོན་ཡིན་ཏེ། གལ་ཏེ་སྐྱེ་བ་སྔ་གྱུར་ལ། །རྒ་ཤི་ཕྱི་བ་ཡིན་ཡིན་ན། །སྐྱེ་བ་རྒ་ཤི་མེད་པ་དང་། །མ་ཤི་བར་ཡང་སྐྱེ་བར་འགྱུར། །ཞེས་གསུངས་པ་ལྟར་རོ། །གསུམ་པ་གཞི་དང་ཆོས་ཀྱི་གཅིག་དང་ཐ་དད་བསམ་པ་ནི་སྔ་རབས་པ་དག རྣམ་གྲངས་པ་མ་ཡིན་པའི་དོན་དམ་བདེན་པ་དང་། ཆོས་ཅན་རྟེན་འབྲེལ་ནི་ངོ་བོ་དེ་ཉིད་དང་གཞན་ཉིད་དུ་བརྗོད་དུ་མེད་ལ། རིག་ངོར་སྐྱེ་སོགས་བཀག་པའི་རྣམ་གྲངས་ཀྱི་དོན་དམ་པ་དང་། ངོ་བོ་གཅིག་ལ་ལྡོག་པ་ཐ་དད་ཡིན་ཞེས་གསུངས་ཀྱང་ས་བོན་ལས་མྱུ་གུ་སྐྱེ་བ་ལ་མཐའ་བཞིར་རིག་པས་དཔྱད་པའི་ཚེ་ཆོས་ཅན་རྟེན་འབྲེལ་ཉིད་ཀྱང་མི་རྙེད་པས། འདི་ལ་ཡང་དེ་ཉིད་དང་གཞན་ཉིད་དུ་བརྗོད་དུ་མེད་པ་ཡང་ལེགས་སོ། །གཉིས་པ་དེ་བསྟན་པས་སྨྲ་བ་རྣམས་ཀྱི་དམ་པར་འགྱུར་བའི་ཚུལ་ནི། རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་དེ་ཉིད་ཤེས་བྱ་ལ་ཁྱབ་པའི་ལུས་ཡིན་པས་བདེན་པར་སྨྲ་བ་དང་། དེ་བསྟན་པས་རྟག་ཆད་ལ་སོགས་པའི་ལྟ་བ་ངན་པ་སེལ་བས་གདུལ་བྱ་ལོག་རྟོག་ཅན་ཚར་གཅོད་པ་དང་། ཉེས་པ་ཐམས་ཅད་ཀྱི་རྩ་བ་གཏི་མུག་གི་གཉེན་པོ་ཡིན་པས་གདུལ་བྱ་མ་རྟོགས་པ་རྗེས་སུ་འཛིན་པར་བྱེད་པ་ཡིན་ལ། དེའི་རྣམ་པ་མ་ལུས་པ་སོ་སོ་རང་གིས་རིག་པའི་ཡེ་ཤེས་ཀྱིས་རིག་ནས་གསུངས་པ་དེ་བཞིན་གཤེགས་པ་ཉག་གཅིག་ཡིན་པའི་ཕྱིར། ཞེས་སྔ་རབས་པ་དག་འཆད་པ་ནི་ཤིན་ཏུ་ལེགས་སོ། །གསུམ་པ་དེ་བསྟན་པའི་དགོས་པ་ནི། དེ་བསྟན་པ་ལ་བརྟེན་ནས་གདུལ་བྱ་རྣམས་ཀྱིས་ཐོས་བསམ་སྒོམ་གསུམ་གྱི་ཤེས་རབ་ཀྱིས་ཉམས་སུ་བླངས་པས་མཉམ་བཞག་སྣང་བ་མེད་པའི་ཤེས་རབ་ཀྱིས་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་མཐོང་བ་མེད་པའི་ཚུལ་གྱིས་མཐོང་བ་དང་། རྗེས་ཐོབ་སྣང་བཅས་ཀྱི་ཡེ་ཤེས་ཀྱིས་སྒྱུ་མ་ལྟ་བུའི་ཆོས་ཅན་རྟེན་ཅིང་འབྲེལ་བར་འབྱུང་བ་ཅི་ལྟར་གནས་པ་བཞིན་མངོན་སུམ་དུ་གཟིགས་པས། རྒྱུ་ཤེས་པ་ཤེས་བྱ་དང་། བརྗོད་བྱ་རྗོད་བྱེད་ལ་སོགས་པའི་གཉིས་འཛིན་ཉེ་བར་ཞི་བའི་ས་བཅུའི་ཡེ་ཤེས་ཐོབ་པ་ནི་གནས་སྐབས་ཀྱི་དགོས་པ་ཡིན་ལ། བློ་དེའི་ངོ་ན་རྟེན་འབྲེལ་སྤྲོས་པ་ཉེར་ཞིའི་རང་བཞིན་དུ་འདུག་པས་རྟེན་འབྲེལ་དེ་ཉིད་ལ་ཡང་སྤྲོས་པ་ཉེར་ཞི་ཞེས་བྱའོ། །དེ་ལྟར་གོམས་པས། སངས་རྒྱས་ཀྱི་སར་སེམས་དང་སེམས་ལས་བྱུང་བའི་འཁྲུལ་པ་མ་ལུས་པ་ལོག་པའི་སྒོ་ནས་སྐྱེ་རྒ་ན་འཆི་ལ་སོགས་པ་འབྲས་བུ་མ་ལུས་པ་ཉེ་བར་ཞི་བའི་ཆོས་སྐུ་ཐོབ་པ་ནི་མཐར་ཐུག་གི་དགོས་པའོ། །བློ་དེའི་ངོ་ན་རྟེན་འབྲེལ་དེ་ཉིད་དགག་བྱ་དེ་དག་ཞི་བའི་རང་བཞིན་དུ་གནས་པས་རྟེན་འབྲེལ་དེ་ཉིད་ལ་ཡང་ཞི་བ་ཞེས་བྱའོ། །གསུམ་པ་དེ་ལ་ཇི་ལྟར་ཕྱག་འཚལ་བའི་ཚུལ་ནི། ཕྱག་འཚལ་ལོ་ཞེས་པ་སྟེ་སྒོ་གསུམ་འདུད་པའོ། །གཉིས་པ་ཤུགས་ལས་བསྟན་པ་དགོས་འབྲེལ་གྱི་ངག་བཤད་པ་ལ་དགོས་འབྲེལ་བཞི་ངོས་བཟུང་བ། དེ་ངག་འདིས་ཅི་ལྟར་བསྟན་པའི་ཚུལ། བཞི་ཉིད་དུ་གྲངས་ངེས་པའི་རྒྱུ་མཚན་དང་གསུམ་ལས། དང་པོ་ནི། སྤྱིར་བསྟན་བཅོས་ཀྱི་བརྗོད་བྱ་དང་། དགོས་པ་དང་། དགོས་པའི་དགོས་པ་དང་། འབྲེལ་པ་དང་བཞི་ནི། གཞུང་དེས་གཙོ་བོར་གཏན་ལ་དབབ་བྱ་དང་། གཞུང་དེ་ལ་བརྟེན་ནས་དེ་རྟོག་པ་དང་། དེ་ལས་མཐར་དམིགས་ཡུལ་གྱི་འབྲས་བུ་ཐོབ་པ་དང་། དེ་བསྟན་བཅོས་ལ་རག་ལས་པ་དང་བཞི་ཡིན་ལ། བྱེ་བྲག་ཏུ་བསྟན་བཅོས་འདིའི་དེ་བཞི་ནི་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་དང་། གཞུང་འདི་ཙམ་གྱིས་དེ་རྟོགས་པ་དང་། དེ་བསྒོམ་པ་ལས་གནས་སྐབས་ས་བཅུ་དང་། མཐར་ཐུག་སངས་རྒྱས་ཐོབ་པ་དང་། དེ་རིམ་གྱིས་བསྟན་བཅོས་ལ་རག་ལས་པ་རྣམས་ཡིན་ནོ། །གཉིས་པ་ནི། དོན་གཅིག་མིན་ཞེས་པ་ཡན་ཆད་ཀྱིས་བརྗོད་བྱ་དང་། བསྟན་ཞེས་པ་བསྟན་པའི་འབྲས་བུ་རྟོགས་པ་འཕེན་པས་དགོས་པ་དང་། སྤྲོས་པ་ཉེར་ཞི་ཞི་ཞེས་པས་དགོས་པའི་དགོས་པ་དང་། འབྲེལ་པ་ཤུགས་ལ་བསྟན་ཏེ། བཞི་ཀ་ཡང་སྟོན་པ་ལ་བསྟོད་པའི་ངག་གིས་ཤུགས་ལ་བསྟན་པ་ཡིན་ནོ། །གསུམ་པ་ནི། ཅིའི་ཕྱིར་བཞིར་གྲངས་ངེས་ཤེ་ན། བསྟན་བཅོས་ལ་འཇུག་པའི་གེགས་ལོག་རྟོག་ལ་བརྗོད་བྱ་མེད་དམ་སྙམ་པ་དང་། ཡོད་ཀྱང་འདོད་བྱ་མིན་ནམ་སྙམ་པ་དང་། འདོད་བྱ་ཡིན་ཀྱང་འདིས་སྒྲུབ་མི་ནུས་སམ་སྙམ་པ་དང་། སྒྲུབ་ནུས་ཀྱང་འདི་ཉིད་དང་འབྲེལ་པ་མེད་དམ་སྙམ་པའི་ལོག་རྟོག་བཞི་ཡོད་པས་དེ་སེལ་བ་ལ་རྣམ་པ་བཞིར་གྲངས་ངེས་སོ། །གཉིས་པ་བསྟན་བྱའི་ལྟ་བ་དེ་ཉིད་གཏན་ལ་དབབ་པ་ལ་གསུམ་སྟེ། རྟེན་འབྲེལ་ཀྱི་ཁྱད་ཆོས་བཤད་པ། ཁྱད་གཞི་རྟེན་འབྲེལ་བཤད་པ། རྟེན་འབྲེལ་ཁྱད་པར་ཅན་རྟོགས་པའི་ཕན་ཡོན་བཤད་པའོ། །དང་པོ་ལ་གསུམ་སྟེ། ཁྱད་ཆོས་གཙོ་བོ་བཤད་པ། ཁྱད་ཆོས་གཞན་བཤད་པ། དེ་ལ་ཧ་ཅང་ཐལ་བ་སྤང་བའོ། །དང་པོ་ལ་གཉིས་ཏེ། སྐྱེ་བ་དགག་པ། འགྲོ་འོང་དགག་པའོ། །དང་པོ་ལ་གསུམ་སྟེ། རབ་བྱེད་ཀྱི་འབྲེལ། རབ་བྱེད་ཀྱི་གཞུང་། རབ་བྱེད་ཀྱི་མཚན་བསྟན་པའོ། །དང་པོ་ལ་ཟབ་མོ་མདོའི་འབྲེལ་ནི། བཅོམ་ལྡན་འདས་ཉིད་ཀྱི་སློབ་དཔོན་ཀླུ་སྒྲུབ་ཐེག་པ་ཆེན་པོའི་ཚུལ་གསལ་བར་བྱེད་པར་ལུང་བསྟན་པས། འདིའི་རབ་ཏུ་བྱེད་པ་ཐམས་ཅད་ཀྱིས་ཀྱང་ཡུམ་རྒྱས་འབྲིང་བསྡུས་གསུམ་གྱི་སྙིང་པོའི་དོན། ཆོས་ཐམས་ཅད་རང་བཞིན་གྱིས་སྟོང་པ་ཉིད་རིག་པའི་སྒོ་ནས་གཏན་ལ་འབེབས་པར་བྱེད་པ་ཡིན་ལ། བསྟན་བཅོས་ཀྱི་འབྲེལ་ནི་མ་སྐྱེས་པ་ལ་ཁྱད་པར་གྱི་ཆོས་འགག་པ་ལ་སོགས་པ་མི་འཐད་པས། འགག་པ་དང་། ཆད་པ་དང་། རྟག་པ་ཤུགས་ལ་དགག་པར་བྱ་བའི་ཕྱིར་སྐྱེ་བ་འགོག་པ་ཐོག་མར་གསུངས་པ་ཡིན་ནོ། །དེ་ལྟར་རབ་ཏུ་བྱེད་པ་འདིས་རིག་ངོར་སྤྲོས་པའི་མཐའ་བཞི་ཁེགས་པས་ཆོས་ཉིད་དོན་དམ་ནམ་མཁའ་ལྟར་རྟོགས་པ་སྣང་མེད་ཀྱི་ཤེས་རབ་དང་། སྐྱེ་འགག་ལ་སོགས་པར་སྣང་བའི་ཆོས་ཐམས་ཅད་དཔྱད་ན་མི་འཐད་བཞིན་དུ་སྣང་བ་ཀུན་རྫོབ་ཏུ་གྲུབ་པས་ཆོས་ཅན་ཀུན་རྫོབ་སྒྱུ་མ་ལྟར་རྟོགས་པ་སྣང་བཅས་ཀྱི་ཤེས་རབ་བསྐྱེད་པར་བྱེད་པ་ཡིན་ནོ། །ཡང་ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་པའི་རིམ་པ་ལྟར་ན་ཐོག་མར་སྐྱེ་བ་ཐ་སྙད་བདེན་པ་ཁས་བླངས་ནས་དེ་ཉིད་ལ་རིག་པས་དཔྱད་པའི་ཚེ་སྐྱེ་བ་ཉིད་ཀྱང་མ་རྙེད་པའི་དོན་དམ་བདེན་པ་རྟོགས་པའི་བློ་སྐྱེ་བ་སྟེ། ཚུལ་འདི་དག་ནི་རབ་བྱེད་འོག་མ་ཐམས་ཅད་ལ་ཡང་སྦྱར་བར་བྱའོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་སྒྲུབ་པ་ལ་གཉིས་ཏེ། མཐའ་བཞིའི་སྐྱེ་བ་སྤྱིར་དགག གཞན་ལས་སྐྱེ་བ་བྱེ་བྲག་ཏུ་དགག་པའོ། །དང་པོ་ལ་གསུམ་སྟེ། དམ་བཅའ་བ་སྤྱིར་བསྟན། དེ་རིགས་པས་བསྒྲུབ། བཀག་པ་ལ་སྐྱོན་སྤང་བའོ། །དང་པོ་ནི། བདག་ལས་མ་ཡིན་ཅེས་སོགས་ཚིགས་བཅད་གཅིག་སྟེ། འདི་ལ་དམ་བཅའ་བ་བཞི་པོའི་ཚིག་བཤད་པ། སྐྱེ་བ་འགོག་པའི་དམ་བཅའ་བཞིར་གྲངས་ངེས་པར་བསམ་པ། དབུ་མ་པ་ལ་དམ་བཅའ་མེད་པ་དང་འགལ་བ་སྤང་བ་གསུམ་ལས། དང་པོ་ནི། གཞན་དག་ཕྱེད་ཕྱི་མས་བསྒྲུབ་བྱ་དང་། སྔ་མས་གཏན་ཚིགས་བསྟན་པས་བསྒྲུབ་བྱ་སྒྲུབ་བྱེད་དུ་འཆད་པ་ལྟར་ནི་མ་ཡིན་ཏེ། མཐའ་བཞིའི་སྐྱེ་བ་མེད་པར་གྲུབ་པའི་ཚེ་སྤྱིར་སྐྱེ་བ་ཙམ་ཡང་མེད་པར་གྲུབ་པས་བསྒྲུབ་བྱ་སྒྲུབ་བྱེད་དུ་སྦྱར་པ་དོན་མེད་པའི་ཕྱིར་དང་། ཕྱེད་སྔ་མ་ལ་རྟགས་སུ་སྟོན་པའི་བྱེད་ཚིག་མེད་པས་ཡི་གེའི་དོན་མ་ཡིན་པའི་ཕྱིར་རོ། །དེས་ན་འདིར་ཕྱི་ནང་གི་དངོས་པོ་གང་དག ཡུལ་དང་གྲུབ་མཐའ་གང་ན་ཡང་བདག་ལས་སྐྱེ་བ་ནམ་ཡང་ཡོད་པ་མ་ཡིན་ཞེས་སོགས་ཀྱིས་དམ་བཅའ་བཞི་སྟོན་ཏེ། གང་དག་ནི་བརྟེན་པ་ཕྱི་ནང་གི་དངོས་པོ་བརྗོད་པའི་ཚིག་སྟེ། སུ་དག་ཅེས་པའི་རྣམ་གྲངས་སོ། །གང་ན་ཡང་ནི་རྟེན་གྱི་ཚིག་སྟེ། ཡུལ་ལ་མ་གྲུབ་པའི་མཐའ་འགའ་ཞིག་ན་ཞེས་པའི་དོན་ཏོ། །ནམ་ཡང་ནི་དུས་ཀྱི་ཚིག་སྟེ། གཞར་ཡང་ཞེས་པའི་དོན་ཏོ། །འོ་ན་དགག་ཚིག་སྔ་མ་བཞི་ལས་ལོགས་སུ་ཐ་མའི་དགག་ཚིག་ཅིའི་ཕྱིར་སྟོན་སྙམ་ན། འདི་ལ་རྨ་བྱས་མཐར་གནས་ཀྱི་མ་ཡིན་མི་མངོན་པར་བྱས་ལ་གཞུང་འགའ་ཞིག་ལས། དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་པ་ལྟ། །བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །ཞེས་འདོན་པ་ལྟར་འདོན་པ་བསྒྱུར་བར་བྱ་ཞེས་གསུངས་ཀྱང་། གཞུང་དེ་ལྟར་འདོན་པ་འགའ་ཡང་མི་སྣང་བས། ཕྱེད་ཕྱི་མས་ཕྱེད་སྔ་མ་ལ་མ་ལྟོས་པའི་ཚེ། སྐྱེ་བ་ཙམ་བཀག་པའི་དམ་བཅའ་སྟོན་པའི་ཆེད་དུ་གཞུང་དེ་ལྟར་བཀོད་པ་ཡིན་པར་མངོན་ནོ། །གཉིས་པ་ནི། གྲངས་ཅན་དང་། རང་སྡེ་དངོས་པོར་སྨྲ་བ་དང་། གཅེར་བུ་པ་དང་། རྒྱང་འཕེན་པ་ལ་མཐའ་བཞིའི་སྐྱེ་བ་གྲགས་ཤིང་སྐྱེ་བ་ལ་དངོས་སུ་གྲགས་པའི་ལོག་རྟོག་ལྔ་པ་མེད་པས་དངོས་སུ་གྲགས་པའི་ལོག་རྟོག་འགོག་པ་ལ་བཞི་འཚམས་པས་སམ། གྲུབ་མཐའ་ལ་མ་ཞུགས་པ་ལ་སྐྱེ་བའི་དོགས་པའི་མཐའ་བཞི་ཁོ་ན་མཚམས་པས་དེ་དགག་པའི་དམ་བཅའ་ཡང་བཞིར་མཛད་པ་ཡིན་ཏེ། སྐྱེ་བ་ཙམ་ལ་རྒྱུ་ལ་ལྟོས་མི་ལྟོས་གཉིས། ལྟོས་པ་ལ་རྒྱུ་ཙམ་ལ་འབྲས་བུ་དང་། རྫས་ཐ་དད་དང་། རྫས་གཅིག་པ་གཉིས་སུ་ངེས་པས་འབྲས་བུ་དང་རྫས་གཅིག་པ་ཁོ་ནའི་དང་། ཐ་དད་པ་ཁོ་ནའི་དང་། དེ་གཉིས་ཀ་ལས་སྐྱེ་བའི་དོགས་པ་གསུམ་སྲིད་ཅིང་། དོགས་པ་གཞན་མི་སྲིད་པའི་ཕྱིར་རོ། །གསུམ་པ་ནི་དེ་ལྟར་དམ་བཅའ་བཞི་སྟོན་ན་རྩོད་བཟློག་ལས་དབུ་མ་པ་ལ་དམ་བཅའ་མེད་པར་གསུངས་པ་དང་འགལ་ལོ་སྙམ་ན། འདིའི་ལན་ལ། པ་ལོས། དམ་བཅའ་མེད་པར་གསུངས་པ་ནི་ཡོངས་གཅོད་སྒྲུབ་པའི་དམ་བཅའ་མེད་པ་ཡིན་གྱི། རྣམ་བཅད་དགག་པའི་དམ་བཅའ་ཙམ་ཡང་མེད་པ་མ་ཡིན་པས། མི་འགལ་ལོ་ཞེས་དང་། བྱང་ཡེས་རྣམ་བཅད་དགག་པའི་དམ་བཅའ་ཡང་ཕ་རོལ་གྱི་ལོག་རྟོག་དགག་པར་འདོད་ནས་དེའི་ངོར་བྱས་པ་ཡིན་གྱི་དབུ་མ་པ་རང་ལ་དགག་པའི་དམ་བཅའ་ཙམ་ཡང་མེད་དོ་ཞེས་པ་དང་། བྱང་བརྩོན་གྱིས། དོན་དམ་པར་དགག་སྒྲུབ་ཀྱི་དམ་བཅའ་གང་ཡང་མེད་ལ། ཀུན་རྫོབ་ཙམ་དུ་འདིར་སྐབས་སུ་བབ་པ་རྣམ་བཅད་དགག་པའི་དམ་བཅའ་ཙམ་དང་། སྤྱིར་ཡོངས་གཅོད་སྒྲུབ་པའི་དམ་བཅའ་ཡང་ཡོད་པ་མི་འགལ་ལོ་ཞེས་པའི་སྨྲ་བ་གསུམ་སྣང་བ་ལས། དང་པོ་ལ་ནི། མ་རིག་ནས་བརྩམས་རྒ་ཤི་ཡི། །མཐར་ཐུག་ཡན་ལག་བཅུ་གཉིས་ཀྱི། །རྟེན་ནས་འབྱུང་བའི་སྐྱེ་བ་ཡང་། །ཁོ་བོས་རྨི་ལམ་སྒྱུ་འདྲར་འདོད། །ཅེས་སོགས་གཞི་དང་། གང་ཞིག་བདག་དང་གཞན་རྣམས་ནི། །མྱུར་དུ་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །ཞེས་སོགས་ལམ་དང་། ཉེས་པ་ཀུན་ལས་རྣམ་གྲོལ་ཞིང་། །ཡོན་ཏན་ཐམས་ཅད་ལྡན་པ་པོ། །སེམས་ཅན་ཀུན་གྱི་གཉེན་གཅིག་པུ། །ཞེས་སོགས་འབྲས་བུའི་སྐབས་སུ་ཡང་ཡོངས་གཅོད་སྒྲུབ་པའི་དམ་བཅའ་མང་དུ་གསུངས་པས་གནོད་དོ། །གཉིས་པ་ལ་ནི། ཅི་སྐད་བཤད་པ་རྣམས་དང་། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །ཞེས་སོགས་རྣམ་བཅད་དགག་པའི་དམ་བཅའ་མང་དུ་གསུངས་པས་གནོད་ཅིང་། སྐབས་འདིར་མཐའ་བཞིའི་སྐྱེ་བ་དགག་པའི་དམ་བཅའ་མ་བསྟན་ན། སྒྲུབ་བྱེད་ཀྱང་མ་བསྟན་པས་བརྗོད་བྱ་ཅིའང་མེད་པར་འགྱུར་ལ། བསྟན་ན་བཞི་པོ་གྲུབ་མཐའ་སྨྲ་བ་སུ་ཞིག་གིས་ཁས་བླངས་པ་ཡིན་སྨྲ་དགོས་སོ། །ལུགས་གསུམ་པ་ཡང་དམ་བཅའི་རང་ལྡོག་ནས་དོན་དམ་པར་མེད་ཅིང་ཀུན་རྫོབ་ཏུ་ཡོད་པའི་དོན་དུ་སྣང་བས་ཕྱོགས་སྔ་མའི་དོགས་པ་མི་ཁེགས་ཏེ། མཐའ་བཞིའི་སྐྱེ་བ་དགག་པའི་དམ་བཅའ་ཀུན་རྫོབ་ཙམ་དུ་ཁས་བླངས་པ་གཞིར་བཞག་ནས་དོགས་པ་བཀོད་པ་ཡིན་གྱི་ཀུན་རྫོབ་དང་དོན་དམ་མ་ཕྱེད་ནས་བཀོད་པ་མ་ཡིན་པས་ད་དུང་ཀུན་རྫོབ་ཙམ་དུ་དམ་བཅའ་ཡོད་མེད་གཉིས་གསུངས་པའི་དོགས་པ་སྤོང་དགོས་པའི་ཕྱིར། གནད་ཀྱི་དོན་ནི་སྤྱིར་དབུ་མ་པ་ལ་ཐ་སྙད་བདེན་པ་རྣམ་པར་གཞག་པའི་ཚེ་དགག་སྒྲུབ་ཀྱི་དམ་བཅའ་གཉིས་ཀ་ཡོད་ཅིང་། དེ་དག་རང་རྒྱུད་དུ་ཡང་ཁས་ལེན་ཏེ། ཆོས་ཅན་མཐུན་སྣང་དུ་གྲུབ་པའི་སྟེང་དུ་དགག་སྒྲུབ་ཀྱི་ཆོས་ཁས་བླངས་པའི་ཕྱིར་རོ། །དོན་དམ་པ་སྐྱེ་མེད་གཏན་ལ་དབབ་པའི་ཚེ་རང་རྒྱུད་ཀྱི་དམ་བཅའ་གཏན་མེད་དེ། ཆོས་ཅན་མཐུན་སྣང་དུ་གྲུབ་པ་མེད་པས་དེ་ལ་དགག་སྒྲུབ་ཀྱི་ཆོས་གང་ཡང་ཁས་མི་ལེན་པའི་ཕྱིར་ཏེ། རྩོད་བཟློག་ལས། གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །བསྒྲུབ་པའམ་བཟློག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་གསུངས་པས་སོ། །འདིར་མཐའ་བཞིའི་སྐྱེ་བ་དགག་པའི་དམ་བཅའ་ཁས་ལེན་པ་ནི། དོན་དམ་བདེན་པ་རྣམ་པར་གཞག་པའི་ཚེ། ཐལ་འགྱུར་གྱི་དམ་བཅའ་ཡིན་པས་མི་འགལ་ཏེ། ཐལ་འགྱུར་གྱི་རིག་པས་ལོགས་ཕྱོགས་ཀྱི་ལོག་རྟོག་བཀག་པའི་སྒོ་ནས་བསྒྲུབ་པར་བྱ་བ་ཡིན་གྱི། སྒྲུབ་བྱེད་རང་རྒྱུད་མེད་པའི་ཕྱིར་རོ། །གཉིས་པ་དེ་རིག་པས་བསྒྲུབ་པ་ནི། དམ་བཅའ་བཞི་པོ་རེ་རེ་ལ་ཡང་ཐོག་མར་སངས་རྒྱས་བསྐྱངས་ཀྱིས་ཐལ་འགྱུར་གྱི་རིག་པ་འབའ་ཞིག་གིས་བསྒྲུབས། དེའི་རྗེས་སུ་ལེགས་ལྡན་བྱེད་ཀྱིས་དེ་བཀག་ནས། རང་རྒྱུད་དགོས་པའི་སྒྲུབ་བྱེད་དང་། དེའི་རྗེས་སུ་ཟླ་བས་དེ་བཀག་ནས་སྔར་གྱི་ཐལ་འགྱུར་གྱི་གཞུང་བསྲང་བར་མཛད་པའི་རིག་པ་གསུམ་གསུམ་ཡོད་པ་ནི་གཞན་དུ་རྒྱས་པར་བཤད་ཟིན་ལ། འདིར་སྐབས་སུ་བབ་པ་ཐལ་འགྱུར་གྱི་རིག་པའི་རྣམ་གྲངས་ཙམ་བརྗོད་ན་བཞི་ལས། དང་པོ་བདག་སྐྱེ་འགོག་པ་ལ། གྲངས་ཅན་པ་དག་སྒྲ་ལ་སོགས་པའི་རྣམ་འགྱུར་རྣམས་དེའི་བདག་ཉིད་དུ་གྱུར་པའི་གཙོ་བོ་ལས་སྐྱེ་བར་སྨྲ་བས། དེ་དགག་པ་ལ་གཉིས་ཏེ། རིག་ངོར་བདག་སྐྱེ་དགག་པ་དང་། འཇིག་རྟེན་གྱི་ངོར་བདག་སྐྱེ་དགག་པའོ། །དང་པོ་ལ་གཉིས་ཏེ། རང་ལས་སྐྱེ་བ་དོན་མེད་པ་དང་། རང་ལས་སྐྱེ་ན་ཧ་ཅང་ཐལ་བའོ། །དང་པོ་ནི། གྲུབ་ཟིན་ན་སྐྱེ་མི་དགོས་པ་སྟེ། སངས་རྒྱས་བསྐྱངས་དང་། ཟླ་བ་གཉིས་ཀྱི་ཐུན་མོང་བའོ། །གཉིས་པ་ལ་བཞི་སྟེ། མ་གྲགས་པའི་དོན་ཐོབ་པ། གྲགས་པའི་དོན་མ་ཐོབ་པ། རྒྱུ་འབྲས་ངོ་བོ་འཆོལ་བར་འགྱུར་བ། རྒྱུ་འབྲས་བློ་ལ་སྣང་ཚུལ་མཚུངས་པར་འགྱུར་བ་རྣམས་ནི་འཇུག་པའི་གཞུང་ཉིད་ལས་ཤེས་པར་བྱའོ། །གཉིས་པ་ནི་འཇིག་རྟེན་གྱི་ཐ་སྙད་དུ་ཡང་བདག་ལས་སྐྱེ་བ་མེད་དེ། རྒྱུ་འགགས་ནས་མ་མཐོང་ཡང་། དེའི་འབྲས་བུ་མཐོང་བས་ན་མ་དཔྱད་པ་འཇིག་རྟེན་པའི་བློས་ཀྱང་དེ་དག་རྫས་གཅིག་ཏུ་མི་འཛིན་པའི་ཕྱིར་རོ། །གཉིས་པ་གཞན་ལས་སྐྱེ་བ་དགག་པ་ལ་རང་གི་སྡེ་པ་ཉན་ཐོས་སྡེ་གཉིས་ཀྱིས་དོན་དམ་པ་གཟུང་འཛིན་གཉིས་ཀྱིས་བསྡུས་པའི་དངོས་པོ་དང་། རྣམ་རིག་པས་གཉིས་མེད་ཀྱི་དངོས་པོ་གཞན་དུ་གྱུར་པའི་རྐྱེན་བཞི་ལས་སྐྱེ་བར་འདོད་ཅིང་། རང་རྒྱུད་པ་དག ཡང་དག་ཀུན་རྫོབ་ཀྱི་བསྡུས་པའི་གཟུང་འཛིན་གཉིས་ཀའམ། གཉིས་མེད་ཀྱི་ཤེས་པ་གཞན་དུ་གྱུར་པའི་རྒྱུ་ལས་སྐྱེ་བར་སྨྲའོ། །འདི་དག་དགག་པ་ལ་ཡང་རིག་ངོར་གཞན་སྐྱེ་དགག་པ་དང་། ཐ་སྙད་དུ་གཞན་སྐྱེ་དགག་པ་གཉིས་ལས། དང་པོ་ལ་གཉིས་ཏེ། རྒྱུ་འབྲས་ལ་རྫས་གཞན་དགག རྫས་གཞན་ལ་སྐྱེ་བ་དགག་པའོ། །དང་པོ་ནི། རྒྱུའི་དུས་ན་ལྟོས་ས་འབྲས་བུའི་བདག་ཉིད་ཀྱི་དངོས་པོ་མ་སྐྱེས་ཤིང་མེད་པས། དེ་ལ་ལྟོས་པའི་གཞན་དུ་གྲུབ་པར་མི་འགྱུར་ཏེ། གཞན་ནི་བྱམས་པ་དང་། ཉེར་སྦས་ལྟར་ཕན་ཚུན་ལྟོས་ནས་འདི་འདི་ལས་གཞན་ཞེས་འཇོག་དགོས་པའི་ཕྱིར་རོ། །གལ་ཏེ་རྒྱུའི་དུས་ན་འབྲས་བུ་མེད་ཀྱང་ཕྱིས་འབྱུང་བའི་འབྲས་བུ་ལ་ལྟོས་ནས་རྒྱུ་གཞན་དུ་འཇོག་གོ་ཞེ་ན། དེ་ལྟར་ན་ལྟོས་ས་བཏགས་པ་བར་གྲུབ་པས། དེ་ལ་ལྟོས་པའི་གཞན་བཏགས་པ་བར་འགྱུར་གྱི་དངོས་པོ་ལས་གཞན་དུ་གྲུབ་པར་མི་འགྱུར་རོ། །གཉིས་པ་ལ་གཉིས་ཏེ། ཧ་ཅང་ཐལ་བས་དགག རྣམ་པར་བརྟགས་ནས་དགག་པའོ། །དང་པོ་ལ་གཉིས་ཏེ། ཐལ་བ་བརྗོད་པ་དང་། དེའི་ལན་དགག་པའོ། །དང་པོ་ནི། འབྲས་བུ་མྱུ་གུ་འདི་གཞན་དུ་གྱུར་པའི་ས་བོན་ལས་སྐྱེ་བ་ལྟར། རྒྱུ་མ་ཡིན་པ་མེ་དང་། སོལ་བ་ལས་ཀྱང་སྐྱེ་བར་འགྱུར་ཏེ། གཞན་ཉིད་དུ་མཚུངས་པའི་ཕྱིར་རོ། །གཉིས་པ་ནི། ཁ་ཅིག་གཞན་དུ་མཚུངས་ཀྱང་རྒྱུར་མ་གྱུར་པའི་གཞན་ལས་མི་འབྱུང་བས་མ་ངེས་སོ་སྙམ་ན། འདིའི་ལན་ལ་རྒྱུ་མཚན་མཚུངས་པའི་མགོ་སྙོམས་དང་། ལྡོག་པ་གཅིག་པའི་དཔུང་འཕུལ་གཉིས་ལས། དང་པོ་ནི། གཞན་དུ་མཚུངས་བཞིན་དུ་གཅིག་ལས་ཡང་དག་པར་སྐྱེ་ལ། གཅིག་ལས་མི་སྐྱེ་བའི་ཁྱད་པར་གྱི་རྒྱུ་མཚན་གང་ཡིན་ཞེས་དྲིས་པས། སྣང་བ་དང་། ནུས་པ་དང་། ཆོས་ཉིད་ཀྱི་ལན་གསུམ་ལས། དང་པོ་ལན་དུ་མི་རུང་བ་ནི། དེ་ལྟར་མངོན་སུམ་གྱིས་མཐོང་བའི་ཕྱིར་རོ་སྙམ་ན། མ་དཔྱད་པའི་བློ་འཁྲུལ་པས་དེ་ལྟར་མཐོང་མོད། དེས་འཕགས་པའི་མཉམ་བཞག་གི་གཟིགས་པ་གཏན་ལ་དབབ་པར་འདོད་ནས། རིག་པས་དཔྱད་པའི་ཚེ་དེ་ལན་དུ་མི་རུང་སྟེ། སྐྱེ་བར་སྣང་ཡང་དངོས་པོ་ལ་སྐྱེ་བར་མི་གྲུབ་པ་ཁྱེད་ཅག་གཉིས་ལ་གྲུབ་པའི་རྨི་ལམ་ལ་སོགས་པ་དང་བརྟགས་པ་མཚུངས་པའི་ཕྱིར་རོ། །གཉིས་པ་ལན་དུ་མི་རུང་བ་ནི། ནུས་པ་ཡོད་པ་དང་། མེད་པས་སྐྱེ་བ་དང་མི་སྐྱེ་བ་དེ་ལྟར་ངེས་པ་ཡིན་ནམ་སྙམ་ན། དེ་ཡང་ལན་དུ་མི་རུང་སྟེ། བློ་འཁྲུལ་པ་ལ་སྣང་བ་ནི་རྨི་ལམ་ལ་སོགས་པ་དང་བརྟགས་པ་མཚུངས་པའི་ཕྱིར་ཏེ། བྱང་ཆུབ་སེམས་འགྲེལ་ལས། རྟེན་མཚུངས་པ་ཡིས་དོན་བྱེད་པ། །རྨི་ལམ་གནོད་པ་བཞིན་མིན་ནམ། །རྨི་ལམ་སད་པའི་གནས་སྐབས་ལ། །དོན་བྱེད་པ་ལ་ཁྱད་པར་མེད། །ཅེས་གསུངས་སོ། །གསུམ་པ་ལན་དུ་མི་རུང་བ་ནི་གཞན་དུ་མཚུངས་ཀྱང་སྐྱེ་མི་སྐྱེ་དངོས་པོའི་ཆོས་ཉིད་དམ། རྟེན་འབྲེལ་གྱི་ཆེ་བ་ཡིན་ནོ་ཞེ་ན། དེ་ཡང་ལན་དུ་མི་རུང་བ་སྟེ། ཆོས་ཉིད་ཡིན་པ་ལ་གནོད་བྱེད་མེད་ཅིང་། སྒྲུབ་བྱེད་ཡོད་པ་ཅིག་དགོས་པ་ལས། བློ་འཁྲུལ་པས་སྐྱེ་བ་དང་མི་སྐྱེ་བར་མཐོང་བས། དངོས་པོ་ལ་སྐྱེ་བ་དང་། མི་སྐྱེ་བ་ཆོས་ཉིད་དུ་མི་འགྲུབ་ཅིང་། དེ་ལས་གཞན་པའི་སྒྲུབ་བྱེད་ཀྱང་མེད་པའི་ཕྱིར་རོ། །དེའི་ཕྱིར་གཞན་དུ་མཚུངས་པ་ལ་ཡང་དག་པར་སྐྱེ་མི་སྐྱེའི་རྒྱུ་མཚན་དཔྱད་ན་སུས་ཀྱང་རྙེད་པ་མ་ཡིན་པས་གཞན་དུ་མཚུངས་པ་རྟགས་སུ་བཀོད་ནས་སྐྱེ་མི་སྐྱེ་མགོ་སྙོམས་པའོ། །གལ་ཏེ་དེ་ལྟར་ན་ལས་ཡིན་པར་མཚུངས་པ་ལ། རྣམ་པར་སྨིན་པ་ངེས་པ་ལ་སོགས་པ་དབུ་མ་པ་ཁྱོད་ཉིད་ཀྱིས་འདོད་པའི་ཀུན་རྫོབ་ཀྱི་ངེས་པ་ཐམས་ཅད་ཀྱང་མི་འཐད་པར་འགྱུར་རོ། །ཞེ་ན། ཁོ་བོ་ཅག་ལ་དཔྱད་ན་རང་གི་མཚན་ཉིད་དུ་ངེས་པ་ཀུན་རྫོབ་ཏུའང་མེད་མོད་ཀྱི། མ་དཔྱད་པ་བློ་འཁྲུལ་པའི་ངོར་ལས་འབྲས་ལ་སོགས་པ་མ་འཆོལ་བར་སྣང་བ་ཙམ་ལ། ཀུན་རྫོབ་ཏུ་ལས་འབྲས་ལ་སོགས་པ་ངེས་པར་བརྗོད་པ་ཡིན་པས་ག་ལ་མཚུངས་ཞེས་པ་ནི། ཅི་ལྟར་ཁྱོད་ཀྱིས་གཞན་དབང་དངོས་འདོད་ལྟར་ཞེས་སོགས་ཀྱི་སྟོན་ཏོ། །གཉིས་པ་ལྡོག་པ་གཅིག་པའི་དཔུང་འཕུལ་ནི་མྱུ་གུ་དེ་གཉིས་ཀ་ལས་གཞན་དུ་མཚུངས་ཀྱང་ས་བོན་ལས་སྐྱེ། མེ་དང་སོལ་བ་ལས་མི་སྐྱེ་བས་ཁྱབ་པ་མ་གྲུབ་བོ་ཞེས་སྨྲ་ན། ཁྱོད་ལ་ཁྱབ་ལྡན་གྱི་རྟགས་མེད་ན། རང་རྒྱུད་ཀྱི་རྟགས་ནུབ་པར་འགྱུར་ཞིང་། ཡོད་ན་གང་ཡིན་ཞེས་དྲི་བར་བྱའོ། །དེ་ལ་གང་དུ་བ་ཙམ་ཡོད་ན་མེ་ཡོད་པས་ཁྱབ། དཔེར་ན་ཚང་བང་བཞིན། ལ་ལའང་དུ་བ་ཙམ་ཡོད་དོ་ཞེས་པ་ལྟ་བུ་ཡིན་ནོ་ཞེ་ན། དེ་ལ་ཡང་དུ་བ་ཙམ་དུ་མཚུངས་པའི་ཚང་བང་གི་དུ་བ་ལ་མེས་ཁྱབ་པ་གྲུབ་ཀྱང་། ལའི་དུ་བ་ལ་མེས་མ་ཁྱབ་པར་དོགས་པས་མ་ངེས་པར་ཅི་ལྟར་མི་འགྱུར། གལ་ཏེ་ཚང་བང་གི་དུ་བ་ཙམ་ལ་མེས་ཁྱབ་པ་གྲུབ་པས། དེ་དང་དུ་བ་ཙམ་དུ་ལྡོག་པ་གཅིག་པའི་དུ་བ་ཙམ་ལ་ཡང་མེས་ཁྱབ་པ་གྲུབ་པར་བརྗོད་ན། འདིར་ཡང་ས་བོན་གྱི་གཞན་ཙམ་ལས། མྱུ་གུ་སྐྱེ་བས་ཁྱབ་པས། དེ་དང་གཞན་ཙམ་དུ་ལྡོག་པ་གཅིག་པའི་མེ་དང་སོལ་བའི་གཞན་ཙམ་ལ་ཡང་མྱུ་གུ་སྐྱེ་བས་ཁྱབ་པར་བརྗོད་པ་ཡིན་པས་ཅིའི་ཕྱིར་མི་འགྲུབ། དེ་ལ་གལ་ཏེ་བ་ལང་གི་སྲོག་ཆགས་ཙམ་ལ་ནོག་ལྐོག་ཤལ་གྱིས་ཁྱབ་པས། དེ་དང་སྲོག་ཆགས་ཙམ་དུ་ལྡོག་པ་གཅིག་པའི་མིའི་སྲོག་ཆགས་ཙམ་ལ་ཡང་ནོག་ལྐོག་ཤལ་གྱིས་ཁྱབ་པར་འགྱུར་བས་ཀུན་རྫོབ་ཀྱི་རྣམ་གཞག་ཐམས་ཅད་མི་རུང་ལ། དེ་ཁྱབ་པ་མ་གྲུབ་པར་བརྗོད་ན་འདིར་ཡང་མཚུངས་སོ་སྙམ་ན། རྒྱུ་མཚན་མཚུངས་པའི་མགོ་སྙོམས་བརྗོད་པ་ནི་རིག་པས་དཔྱད་པའི་སྐབས་ཡིན་ལ། དེའི་ཚེ་གཏན་ཚིགས་ཐམས་ཅད་གཞན་ལ་གྲགས་པ་ཡིན་གྱི་རང་རྒྱུད་དུ་ཁས་མི་ལེན་པས་སྐྱོན་ཐམས་ཅད་ལས་གྲོལ་ལོ། །གཉིས་པ་རྣམ་པར་བརྟགས་ནས་གཞན་སྐྱེ་དགག་པ་ནི། གཞན་དུ་གྱུར་པའི་རྒྱུ་འགགས་པ་ལས་སྐྱེ་ན་རྒྱུ་མེད་དུ་འགྱུར་ལ། མ་འགགས་པ་ལས་སྐྱེ་ན་རྒྱུ་འབྲས་དུས་མཉམ་པར་འགྱུར་རོ། །དེ་བཞིན་དུ་གཞན་ཕྲད་པ་ལས་སྐྱེ་ན་རྒྱུ་འབྲས་དུས་མཉམ་པར་འགྱུར་ལ། མ་ཕྲད་པར་སྐྱེ་ན་འབྲས་བུ་སྐྱེ་བའི་དུས་ན་རྒྱུ་མེད་པས་འབྲས་བུ་རྒྱུ་མེད་ལས་སྐྱེ་བར་འགྱུར་རོ། །གཉིས་པ་ཐ་སྙད་དུ་གཞན་སྐྱེ་དགག་པ་ནི། མ་དཔྱད་པ་འཇིག་རྟེན་པའི་ངོར་ཡང་གཞན་ལས་སྐྱེ་བ་མེད་དེ། འཇིག་རྟེན་གྱིས་རྒྱུ་ལས་འབྲས་བུ་སྐྱེས་པ་ཙམ་ཞིག་མཐོང་གི དེ་དག་རྫས་གཞན་དུ་མཐོང་བ་མེད་པའི་ཕྱིར་ཏེ། དེ་ལས་གཞན་དུ་ན། རྒྱུ་བུའི་ས་བོན་ཙམ་བཏབ་པས། བུ་འདི་བདག་གིས་བསྐྱེད་དོ། །ཞེས་དང་། རྒྱུ་ལྗོན་ཤིང་གི་ས་བོན་ཙམ་བཙུགས་ནས་ཤིང་འདི་ངས་བཙུགས་སོ་ཞེས་མི་རྟོགས་པར་འགྱུར་ཏེ། གང་ཟག་དང་ལྗོན་ཤིང་གཞན་ལྟར། རང་གིས་བསྐྱེད་པ་དང་བཙུགས་པ་དེ་ལས་གཞན་དུ་འཛིན་པའི་ཕྱིར་རོ། །བུ་འདི་བདག་གིས་བསྐྱེད་དོ་ཞེས་དང་། ལྗོན་ཤིང་འདི་བདག་གིས་བཙུགས་སོ་ཞེས་པས། རྒྱུ་འབྲས་གཅིག་ཏུ་ཁས་ལེན་པ་ཡང་མ་ཡིན་ཏེ། བུ་དང་ལྗོན་ཤིང་གི་ས་བོན་ཙམ་ལ་བསམ་ནས་དེ་ལྟར་སྨྲས་ཀྱི་ཕྱིས་ཀྱི་བུ་ཆེན་པོ་དང་། ལྗོན་ཤིང་ཆེན་པོ་དང་པོ་ནས་བསྐྱེད་པར་ཁས་མི་ལེན་པའི་ཕྱིར་རོ། །གསུམ་པ་གཉིས་ཀ་ལས་སྐྱེ་བ་དགག་པ་ནི། གཙོ་བོ་དབང་ཕྱུག་དང་བཅས་པར་སྨྲ་བའི་གྲངས་ཅན་དང་། གཅེར་བུ་པ་དག་འབྲས་བུའི་དངོས་པོ་རྣམས་རང་ལས་སྐྱེ་ཞིང་གཞན་ལས་ཀྱང་སྐྱེ་བས་སྔར་བཤད་པའི་ཉེས་པར་མི་འགྱུར་ཏེ། རང་ཁོ་ན་དང་། གཞན་ཁོ་ན་ལས་སྐྱེ་བར་ཁས་མ་བླངས་པའི་ཕྱིར་རོ། །ཞེས་སྨྲའོ། །དེ་དགག་པ་ལ་སྔར་བཤད་ཀྱི་རིག་པ་དང་། མ་བཤད་པའི་རིག་པ་གཉིས་ལས། དང་པོ་ནི། གཉིས་ལས་སྐྱེ་བའང་རིག་པའི་ངོ་བོ་མ་ཡིན་གང་གི་ཕྱིར། །བཤད་ཟིན་ཉེས་པ་དེ་དག་ཐོག་ཏུ་འབབ་པ་ཡིན་ཕྱིར་རོ། །ཞེས་གསུངས་པ་ལྟར་རོ། །གཉིས་པ་ནི། གལ་ཏེ་རེ་རེས་བྱས་གྱུར་ན། །སྡུག་བསྔལ་གཉིས་ཀས་བྱས་པར་འགྱུར། །ཞེས་འཆད་པར་འགྱུར་བའི་ཚུལ་གྱིས་རང་གཞན་རེ་རེ་ལ་བསྐྱེད་པར་བྱེད་པའི་ནུས་པ་ཡོད་ན་གཉིས་ཀ་ཚོགས་པས་ཀྱང་སྐྱེ་བར་འགྱུར་བ་ཞིག་ན་སྔར་བཤད་པའི་ཚུལ་གྱིས་རང་གཞན་རེ་རེ་ལ་སྐྱེད་པར་བྱེད་པའི་ནུས་པ་མེད་པའི་ཕྱིར། གཉིས་ཀ་ཚོགས་པས་ཀྱང་བསྐྱེད་པ་མི་འཐད་དེ། བྱེ་མ་དག་ལ་ཏིལ་མར་བཞིན་ནོ། །གལ་ཏེ་མིག་དང་གཟུགས་ལ་སོགས་པ་རེ་རེ་ལ་དངོས་སུ་མིག་ཤེས་བསྐྱེད་པའི་ནུས་པ་མེད་ཀྱང་། ཚོགས་པ་ལ་ཡོད་པས་མ་ངེས་སོ་ཞེ་ན། མ་ཡིན་ཏེ། རྒྱུད་དང་ཚོགས་ཞེས་བྱ་བ་ནི། །ཕྲེང་བ་དག་ལ་སོགས་བཞིན་རྫུན། །ཞེས་པའི་ཚུལ་གྱིས་ཚོགས་པ་ཉིད་རྫས་སུ་མེད་པས་ན། དེ་ཁོ་ན་ཉིད་དུ་ནུས་པ་མེད་པའི་མཐུན་ཕྱོགས་ཉིད་ཡིན་པའི་ཕྱིར་དང་། ཐ་སྙད་དུ་ཚོགས་པ་ལ་ནུས་པ་ཡོད་པ་ནི་འདིར་མི་འགོག་པའི་ཕྱིར་རོ། །བཞི་པ་རྒྱུ་མེད་པ་ལས་སྐྱེ་བ་དགག་པ་ནི། ཚུ་རོལ་མཛེས་པ་བ་དག་ད་ལྟར་གྱི་རིག་པ་ཙམ་དང་། བདེ་སྡུག་སྐྱེ་བ་སྔ་མའི་རིག་པ་ཙམ་དང་། དགེ་མི་དགེའི་ལས་ལས་བྱུང་བ་མ་ཡིན་གྱི། འཇིག་རྟེན་འདིའི་འབྱུང་བ་འདུས་ཙམ་དང་། མཐུན་རྐྱེན་གྱི་ཚོགས་པ་ཙམ་ལས་བྱུང་བ་ཡིན་ནོ་ཞེས་མ་མཐོང་བའི་རྒྱུ་མེད་པར་སྨྲ་ལ། དཔྱོད་པ་པ་དག ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟིངས་རིང་རྣོ་བ་དང་། །རྨ་བྱའི་མདོག་དབྱིབས་ལ་སོགས་ཆོས་རྣམས་ཀུན། །སུས་ཀྱང་མ་བཀོད་རང་གི་ངང་གིས་འབྱུང་། །ཞེས་མཐོང་བའི་རྒྱུ་ཡང་མེད་པར་སྨྲའོ། །འདི་དགག་པ་ལ། སངས་རྒྱས་བསྐྱངས་ཀྱིས་དངོས་པོ་རྣམས་རྒྱུ་མེད་པར་སྐྱེ་བར་མི་འཐད་དེ། རྟག་ཏུ་ཐམས་ཅད་ལས་ཐམས་ཅད་སྐྱེ་བར་ཐལ་བའི་ཕྱིར་རོ། །ཞེས་རེས་འགའ་བ་མ་ཡིན་པར་ཐལ་བའི་རིག་པ་གསུངས་ལ། སློབ་དཔོན་ཟླ་བས་དེའི་སྟེང་དུ། འབྲས་བུའི་ཆེད་དུ་རྒྱུ་ལ་འབད་པ་དོན་མེད་པར་ཐལ་བ་དང་། ཤེས་པའི་གཟུང་ཡུལ་དུ་མི་སྣང་བར་ཐལ་བ་གཉིས་བསྣན་ཏེ་གསུམ་དུ་མཛད་དོ། །གསུམ་པ་བཀག་པ་ལ་སྐྱོན་སྤང་བ་ལ་གཉིས་ཏེ། ལུང་དང་འགལ་བ་སྤང་བ་དང་། མཐའ་བཞིའི་སྐྱེ་བ་བཀག་པས་ཀུན་རྫོབ་ཏུ་སྐྱེ་བ་མི་འཐད་པའི་རྩོད་པ་སྤང་བའོ། །དང་པོ་ནི། དེ་ལྟར་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བར་རྣམ་པར་གཞག་ན། མདོ་ལས། མ་རིག་པའི་རྐྱེན་གྱིས་འདུ་བྱེད་རྣམས་སོ། །ཞེས་པ་ལ་སོགས་པ་རྟེན་ཅིང་འབྲེལ་བར་འབྱུང་བ་ལ་དགག་བྱ་སྐྱེ་བ་ལ་སོགས་པ་ཡོད་པར་གསུངས་པ་དང་འགལ་ལོ་ཞེ་ན་མི་འགལ་ཏེ། མདོ་གཞན་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །ཞེས་སྐྱེ་བ་མེད་པར་གསུངས་པ་གཉིས་ཀྱི་དགོངས་པ་བཙལ་དགོས་ལ། དེའི་ཚེ་སྐྱེ་སོགས་མེད་པ་ངེས་དོན་དང་། སྐྱེ་སོགས་ཡོད་པ་དྲང་དོན་དུ་གྲུབ་པའི་ཕྱིར་ཏེ། བློ་གྲོས་མི་ཟད་པའི་མདོ་ལས་དྲང་ངེས་ཀྱི་ཁྱད་པར་བརྒྱད་གསུངས་པའི་གཙོ་བོ་བདེན་པ་གཉིས་ཀྱི་སྒོ་ནས་འཇོག་པ་དེ་ཉིད་འདིར་ཁས་ལེན་པའི་སྐབས་ཡིན་པའི་ཕྱིར་རོ། དེ་ལྟར་བྱས་ན་མཆོད་བརྗོད་ཀྱི་དངོས་བསྟན་སྤྲོས་པའི་མཐའ་བརྒྱད་དང་བྲལ་བ་ངེས་དོན་དང་། འགག་པ་ཡོད་པ་སྐྱེ་བ་ཡོད་པ་ཞེས་སོགས་དགག་བྱ་བརྒྱད་པོ་ཐ་སྙད་དུ་ཡོད་པ་དྲང་དོན་དུ་གྲུབ་ལ། རབ་བྱེད་ཉི་ཤུ་རྩ་བདུན་གྱི་བརྗོད་བྱ་སྐྱེ་བ་ནས་ལྟ་བའི་བར་ཉི་ཤུ་རྩ་བདུན་རིག་པས་དཔྱད་པའི་ཚེ་མ་རྙེད་པ་ནི་ངེས་དོན་དང་། ཐ་སྙད་ཙམ་དུ་ཐམས་ཅད་ཀྱང་ཡོད་པ་ནི་དྲང་དོན་དུ་གྲུབ་བོ། །གཉིས་པ་ནི། ཁྱོད་ཀྱིས་བདེན་པ་གཉིས་ཆར་དུ་ཡང་མཐའ་བཞིའི་སྐྱེ་བ་བཀག་ཅིང་། སྐྱེ་བའི་མཐའ་ལྔ་པ་ཡང་མི་སྲིད་པས་ཀུན་རྫོབ་ཏུ་ཡང་སྐྱེ་བ་མི་འཐད་པར་འགྱུར་རོ་ཞེ་ན། སྔར་བཤད་པའི་ཚུལ་གྱིས་མཐའ་བཞིར་དཔྱད་ན། ཀུན་རྫོབ་ཏུ་ཡང་སྐྱེ་བ་མི་འཐད་པས། རང་གི་མཚན་ཉིད་ཀྱིས་གྲུབ་པའི་སྐྱེ་བ་མེད་ཀྱང་མ་དཔྱད་པའི་བློ་ངོར་རྒྱུ་དང་རྐྱེན་ལ་བརྟེན་ནས་སྐྱེ་བར་སྣང་བ་ཙམ་ལ་ཐ་སྙད་རྒྱུན་མི་བཅད་པའི་ཕྱིར་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་ཞེས་རྣམ་པར་གཞག་སྟེ། ཇི་སྐད་དུ། སློབ་དཔོན་ཉིད་ཀྱིས་སྡུག་བསྔལ་བདག་གིས་བྱས་པ་དང་། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་པར་ནི་རྟོག་གེ་འདོད། །ཁྱོད་ཀྱིས་བརྟེན་ནས་འབྱུང་བར་འདོད། །ཅེས་གསུངས་སོ། །བོད་ཁ་ཅིག མྱུ་གུ་མཐའ་བཞིར་སྐྱེ་བ་བདེན་པ་གཉིས་ཆར་དུ་ཡང་མི་འཐད་ཅིང་། སྐྱེ་བ་ཙམ་ནི་འདོད་དགོས་པས། སྐྱེ་བའི་དོགས་པ་མཐའ་བཞིར་མ་ངེས་སོ་ཞེས་སྨྲ་བ་ནི་དོན་དམ་རྣམ་པར་གཞག་པའི་གནས་སྐབས་དང་། ཀུན་རྫོབ་རྣམ་པར་གཞག་པའི་གནས་སྐབས་མ་ཕྱེད་པའི་གཏམ་མོ། །གཉིས་པ་གཞན་སྐྱེ་བྱེ་བྲག་ཏུ་དགག་པ་ལ་གཉིས་ཏེ། བསྟན་བཅོས་ལ་གྲགས་པའི་གཞན་སྐྱེ་དགག འཇིག་རྟེན་ལ་གྲགས་པའི་གཞན་སྐྱེ་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ། སུན་འབྱིན་བཤད་པའོ། །དང་པོ་ནི། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པའི་ཚུལ་གྱིས། གཞན་སྡེའི་འདོད་པ་རྣམས་རང་སྡེ་དངོས་པོར་སྨྲ་བ་དག་གིས་ཀྱང་བཀག་ཟིན་པ་དང་། སྐབས་གཞན་དུ་འཕྲོས་ནས་བཀག་པ་ཉིད་ཀྱི་གོ་ཆོད་པར་དགོངས་ནས་འདིར་མ་གསུངས་ལ། འདིར་རང་གི་སྡེ་པ་དག་འདི་སྐད་དུ་མཐའ་གསུམ་ལས་སྐྱེ་བ་བཀག་པ་ནི་རིག་མོད་ཀྱི་གཞན་ལས་སྐྱེ་བ་དགག་པ་ཤིན་ཏུ་ཆེས་མི་རིག་སྟེ། བཅོམ་ལྡན་འདས་ཉིད་ཀྱིས་ཆོས་མངོན་པའི་མདོ་ལས། འབྲས་བུའི་དངོས་པོ་རྣམས་བསྐྱེད་པར་བྱེད་པ་འབྲས་བུ་ལས་གཞན་དུ་གྱུར་པའི་རྐྱེན་རྣམས་ནི་བཞི་གསུངས་པའི་ཕྱིར་ཏེ། འབྲས་བུའི་ངོ་བོ་བསྒྲུབ་པར་བྱེད་པ་མྱུ་གུའི་ས་བོན་དང་། མིག་ཤེས་ཀྱི་རྒྱུ་ཀུན་གཞི་ལ་ཡོད་པ་དེའི་ས་བོན་ལྟ་བུ་རྒྱུའི་རྐྱེན་དང་། གང་ལ་དམིགས་ནས་སེམས་སེམས་བྱུང་དེའི་རྣམ་པ་ཅན་དུ་བསྐྱེད་པའི་ཡུལ་དམིགས་པའི་རྐྱེན་དང་། རྒྱུ་འགགས་མ་ཐག་པ་འབྲས་བུ་ཕྱི་མའི་གོ་འབྱེད་པ་དེ་མ་ཐག་པའི་རྐྱེན་དང་། རྐྱེན་གསུམ་ལས་གཞན་པའི་དངོས་པོ་གང་ཞིག་ཡོད་ན་དེ་འབྱུང་དུ་རུང་བ་བདག་པོ་ཡང་ནི་སྔ་མ་དེ་དག་བཞིན་འབྲས་བུ་ལ་ཕན་འདོགས་པའི་རྐྱེན་ཡིན་ནོ། །བཞི་པོ་འདི་དག་ཏུ་མ་འདུས་པའི་དབང་ཕྱུག་ལ་སོགས་པ་ནི་རྐྱེན་མ་ཡིན་པས་རྐྱེན་ལྔ་པ་ནི་ཡོད་པ་མ་ཡིན་ནོ། །འདིར་རྐྱེན་ཞེས་པ་ཡང་རྒྱུ་དང་རྐྱེན་གཉིས་ཀྱི་ཟླས་ཕྱེ་བའི་རྐྱེན་ཁོ་ན་མ་ཡིན་གྱི་རྒྱུ་ཐམས་ཅད་རྐྱེན་བཞིར་བསྡུས་པ་སྟེ། གྲུབ་པའི་མཐའ་ལས། རྒྱུ་ཞེས་བྱ་བ་རྒྱུ་ལྔ་ཡིན། །སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །དམིགས་པ་ཆོས་རྣམས་ཐམས་ཅད་དེ། །བྱེད་རྒྱུ་ཞེས་བྱ་བདག་པོར་བཤད། །ཅེས་འབྱུང་བ་ལྟར་རོ། །དེས་ན་ཕྱི་ནང་གི་དངོས་པོ་ཐམས་ཅད་གཞན་དུ་གྱུར་པའི་རྐྱེན་བཞི་ལས་སྐྱེ་བ་ཡིན་ནོ་ཞེས་ཟེར་རོ། །གཉིས་པ་ལ་བཞི་སྟེ། རྐྱེན་དོན་གཞན་ལས་སྐྱེ་བ་དགག བྱ་བ་དོན་གཞན་ལས་སྐྱེ་བ་དགག རྒྱུ་རྐྱེན་གྱི་མཚན་ཉིད་སྤྱིར་དགག རྐྱེན་བཞི་སོ་སོའི་མཚན་ཉིད་བྱེ་བྲག་ཏུ་དགག་པའོ། །དང་པོ་ནི། འགྲེལ་པར་སྐྱེ་བའི་སྔོན་རོལ་དུ་ཡོད་པར་གྱུར་ན་ནི་ཞེས་དུས་ཀྱིས་བདུན་པ་ལ་བཤད་པ་ལྟར་ན། མྱུ་གུ་ལ་སོགས་པ་འབྲས་བུའི་དངོས་པོ་རྣམས་ཀྱི་རང་བཞིན་ནི་ཆོས་ཅན། རྐྱེན་ལ་སོགས་པ་སྟེ། རྒྱུ་ས་བོན་དང་། རྐྱེན་ཆུ་ལུད་ལ་སོགས་པ་སོ་སོ་བ་དང་འདུས་པ་དག་མ་འགྱུར་བར་ཡོད་པའི་དུས་ན། ཡོད་པ་མ་ཡིན་ཏེ། མ་སྐྱེས་པའི་ཕྱིར་རོ། །དེས་ན་རྐྱེན་གྱི་ཆོས་འབྲས་བུའི་བདག་གི་དངོས་པོ་ཡོད་པ་ཙམ་མ་ཡིན་ན། རྐྱེན་དག་གཞན་གྱི་དངོས་པོར་ག་ལ་འགྱུར་ཏེ། ལྟོས་ས་མེད་པའི་ཕྱིར། དཔེར་ན་རིང་པོ་མེད་པའི་ཐུང་ངུའམ། ཕ་རོལ་མེད་པའི་ཚུ་རོལ་བཞིན་ནོ། །རྩ་བར་ལ་ཞེས་པ་དངོས་པོའི་བདུན་པ་ལ་བཤད་པ་ལྟར་ན། མྱུ་གུ་ལ་སོགས་པ་འབྲས་བུའི་དངོས་པོ་རྣམས་ཀྱི་རང་བཞིན་ཆོས་ཅན། རྐྱེན་ལ་སོགས་པ་སྟེ། རྒྱུ་རྐྱེན་སོ་སོ་བ་དང་། འདུས་པ་དག་གམ། དེ་ལས་གཞན་འགའ་ཞིག་ལ་ཡང་རུང་སྟེ། འཁར་གཞོང་ལ་རྒྱ་ཤུག་ལྟར་ཡོད་པ་མ་ཡིན་ཏེ། དེ་དག་ལ་སྣང་རུང་མ་དམིགས་པའི་ཕྱིར་རོ། །དེས་ན་རྐྱེན་ལ་སོགས་པ་ལ་འབྲས་བུའི་བདག་གི་དངོས་པོ་ཡོད་པ་མ་ཡིན་ན། དེ་རྐྱེན་ལ་སོགས་པ་གཞན་ལས་འབྱུང་ཞིང་སྐྱེ་བར་ག་ལ་འགྱུར་ཏེ། བྱེ་མ་དག་ལས་ཏིལ་མར་བཞིན་ནོ། །འདི་ལ་སློབ་དཔོན་ལེགས་ལྡན་འབྱེད་ཀྱིས་ཕྱེད་སྔ་མས་བདག་སྐྱེ་འགོག་པ་དང་། ཕྱེད་ཕྱི་མས་གཞན་སྐྱེ་འགོག་པར་བཤད་པ་ནི་ཕྱོགས་སྔའི་སྐབས་དང་མི་འགྲིག་ཅིང་། བདག་གི་དངོས་པོ་ཡོད་མིན་ན་ཞེས་པའི་ཚིག་དོན་དང་ཡང་མ་འབྲེལ་ལོ། །གཉིས་པ་ནི་བྱེ་བྲག་སྨྲ་བ་དག་གཞན་དུ་གྱུར་པའི་རྐྱེན་ཉིད་ལས་སྐྱེ་བ་མ་ཡིན་གྱི། འོན་ཀྱང་རྐྱེན་གྱིས་བསྒྲུབས་པའི་བྱ་བ་དོན་གཞན་ལས་སྐྱེ་བ་ཡིན་ནོ་སྙམ་ན། དེ་ལྟར་ན་བྱ་བ་རྐྱེན་རྒྱུར་ལྡན་པའམ། མི་ལྡན་པ་ལས་སྐྱེ། དང་པོ་ལྟར་ན་འབྲས་བུའི་དངོས་པོ་ཆོས་ཅན། བྱ་བ་རྐྱེན་དང་ལྡན་པ་ལས་སྐྱེ་བ་མ་ཡིན་ཏེ། ཁྱོད་སྐྱེས་པ་ལ་བྱ་བ་དོན་མེད་ཅིང་། མ་སྐྱེས་པ་ལ་རྟེན་མེད་པས་བྱ་བ་མེད་ལ། སྐྱེས་མ་སྐྱེས་ལས་མ་གཏོགས་པའི་སྐྱེ་བཞིན་པ་ལ་ཡང་བྱ་བ་མེད་པའི་ཕྱིར་དུས་གསུམ་དུ་དཔྱད་ན་བྱ་བ་རྐྱེན་དང་ལྡན་པ་མེད་པའི་ཕྱིར་རོ། །གཉིས་པ་ལྟར་ན། དེ་ཆོས་ཅན་བྱ་བ་རྐྱེན་དང་མི་ལྡན་པ་ལས་སྐྱེ་བ་མ་ཡིན་ཏེ། མ་དཔྱད་པའི་སྣང་ངོ་ཙམ་དུ་ཡང་རྐྱེན་དང་མི་ལྡན་པའི་བྱ་བ་མེད་པའི་ཕྱིར་རོ། །འོ་ན་རྐྱེན་ཉིད་ཀྱིས་བསྐྱེད་པར་བྱེད་དོ་སྙམ་ན། འབྲས་བུའི་དངོས་པོ་ཆོས་ཅན། བྱ་བ་དང་ལྡན་མི་ལྡན་དཔྱད་ན་རྐྱེན་ཉིད་ཀྱིས་བསྐྱེད་པ་མ་ཡིན་ཏེ། འབྲས་བུ་བསྐྱེད་པའི་བྱ་བ་དང་མི་ལྡན་ན་རྐྱེན་གྱི་རྣམ་འཇོག་གི་རྒྱུ་མེད་པས་རྐྱེན་ཉིད་མ་ཡིན་ལ། འོན་ཏེ་ན་བྱ་བ་དང་ལྡན་པའི་རྐྱེན་ཡོད་ན། དེས་བསྐྱེད་པར་འགྱུར་བ་ཞིག་ན་ཡང་། བྱ་བ་རྐྱེན་དང་ལྡན་པ་འབྲས་བུའི་དུས་གསུམ་ལ་དཔྱད་ནས་བཀག་ཟིན་པའི་ཕྱིར་རོ། །གསུམ་པ་ནི། དེ་ལྟར་དཔྱད་པས་ཅི་ཞིག་བྱ། ཅི་སྐད་བཤད་པའི་མིག་དང་གཟུགས་ལ་སོགས་པའི་རྐྱེན་བཞི་པོ་འདི་དག་ལ་བརྟེན་ནས། རྣམ་ཤེས་དང་མྱུ་གུ་ལ་སོགས་པ་སྐྱེ་བས་ན། དེའི་ཕྱིར་འདི་དག་འདིའི་རྐྱེན་དུ་བརྗོད་ཅིང་གྲགས་སོ་ཞེ་ན། རྐྱེན་བཞི་པོ་ཆོས་ཅན། ཇི་སྲིད་མཐུན་རྐྱེན་གྱི་ཚོགས་པ་མ་ཚང་བས་སམ། འགལ་རྐྱེན་གྱིས་ཆོད་པའི་ཚེ་འབྲས་བུ་མི་སྐྱེ་བ་དེ་སྲིད་དུ་འདི་དག་འབྲས་བུའི་རྐྱེན་མིན་པ་ཅི་ལྟར་མ་ཡིན་ཏེ་རྐྱེན་མ་ཡིན་པར་ཐལ། རྐྱེན་གྱི་རྣམ་འཇོག་གི་རྒྱུ་བསྐྱེད་པའི་བྱ་བ་དང་མི་ལྡན་པའི་ཕྱིར། དོན་དེ་ཉིད་འབྲས་ཕྱོགས་ནས་དཔྱད་པ་ནི་ཡང་རྐྱེན་དེ་དག་གིས་འབྲས་བུ་སྐྱེད་པར་བྱེད་ན་འབྲས་བུ་སྔར་མེད་པའམ་ཡོད་པ་ཞིག་བསྐྱེད་དྲང་། དེ་ལས་འབྲས་བུ་མེད་པའི་དོན་ལ་ཡང་རྐྱེན་ནི་རུང་བ་མ་ཡིན་ཏེ། འབྲས་བུ་མེད་ན་བུ་མེད་པའི་ཕ་ལྟར་གང་གི་རྐྱེན་དུ་འགྱུར་ཏེ། རྟེན་མེད་པའི་ཕྱིར་རོ། །འབྲས་བུ་སྔར་ཡོད་པའི་དོན་ལ་ཡང་རྐྱེན་ནི་རུང་བ་མ་ཡིན་ཏེ། འཁར་གཞོང་ལ་རྒྱ་ཤུག་ལྟར་གྲུབ་ཟིན་པ་བསྒྲུབ་མི་དགོས་པས་རྐྱེན་གྱིས་ཅི་ཞིག་བྱ་སྟེ་དོན་མེད་པའི་ཕྱིར་རོ། །བཞི་པ་ལ་བཞི་སྟེ། རྒྱུ་རྐྱེན་ཀྱི་མཚན་ཉིད་དགག དམིགས་རྐྱེན་གྱི་མཚན་ཉིད་དགག དེ་མ་ཐག་རྐྱེན་གྱི་མཚན་ཉིད་དགག བདག་རྐྱེན་གྱི་མཚན་ཉིད་དགག་པའོ། །དང་པོ་ནི། དེ་ལྟ་ནའང་བཅོམ་ལྡན་འདས་ཀྱིས་སྒྲུབ་པར་བྱེད་པ་ནི་རྒྱུའོ། །ཞེས་པ་ལ་སོགས་པ་རྐྱེན་བཞི་པོ་སོ་སོའི་མཚན་ཉིད་གསུངས་པས་དེ་དག་རང་བཞིན་གྱིས་ཡོད་པས་ཡིན་ནོ། །ཞེ་ན། གལ་ཏེ་བསྒྲུབ་བྱ་འབྲས་བུ་འགའ་ཞིག་གྲུབ་ན། དེའི་ངོ་བོ་སྒྲུབ་པར་བྱེད་པ་རྒྱུའི་རྐྱེན་ཡོད་པར་འགྱུར་བ་ཞིག་ན་ཡང་གང་གི་ཚེ་བསྒྲུབས་བྱ་འབྲས་བུའི་ཆོས་ནི་སྔ་ནས་ཡོད་པའི་གྲུབ་པ་ལ་ཅི་ལྟར་འབྲས་བུའི་ངོ་བོ་སྒྲུབ་པར་བྱེད་པའི་རྒྱུའི་རྐྱེན་ཞེས་བྱ་སྟེ། གྲུབ་ཟིན་པའི་ཕྱིར་རོ། །དེ་བཞིན་དུ་མེད་པ་དང་ཡོད་མེད་གཉིས་ཀ་མི་འགྲུབ་པ་དེའི་ཚེ་ཅི་ལྟར་འབྲས་བུའི་ངོ་བོ་སྒྲུབ་པར་བྱེད་པའི་རྒྱུ་ཞེས་བྱ་སྟེ་བསྒྲུབ་པར་མི་ནུས་པ་དང་འགལ་ཞིང་གཉིས་ཀ་ལ་བཀོད་པའི་སྐྱོན་དུ་འགྱུར་བའི་ཕྱིར་རོ། །འབྲས་བུ་སྒྲུབ་བྱེད་ཀྱི་རྒྱུར་མ་གྲུབ་པ་དེ་ལྟ་ཡིན་ན། རྒྱུའི་རྐྱེན་གྱི་མཚན་ཉིད་ཡོད་པས་རྒྱུ་ཡིན་ནོ་ཞེས་སྨྲ་བ་དེ་མི་རིག་གོ་ཞེས་པའོ། །གཉིས་པ་ནི། ཅི་དམིགས་བྱེད་ཡོད་པའམ། མེད་པ་ལ་དམིགས་བྱའི་རྐྱེན་རྟོགས། དང་པོ་འགོག་པ་ནི། ཕྱེད་སྔ་ཕྱི་གོ་བཟློག་སྟེ། ཅི་སྟེ་འབྲས་བུ་སེམས་དང་སེམས་ལས་བྱུང་བ་ཡོད་པའི་ཆོས་ནི་ཆོས་ཅན། དམིགས་པའི་རྐྱེན་ལ་ལྟོས་པའི་ཡོད་པར་ག་ལ་འགྱུར་ཏེ་དམིགས་བྱ་མེད་ན་སྟེ་དེའི་སྔ་རོལ་ན་ཡོད་ཟིན་པའི་ཕྱིར་རོ། །དེས་ན་དམིགས་བྱེད་ཡེ་ནས་ཡོད་པའི་ཆོས་འདི་དམིགས་པའི་རྐྱེན་མེད་པ་ཁོ་ན་ལ་ཁྱོད་ཀྱིས་རང་དགས་དམིགས་བྱའི་རྐྱེན་དང་བཅས་པར་ཉེ་བར་བསྟན་པར་ཟད་དོ། །ཞེས་པའོ། །དམིགས་བྱེད་མེད་པའི་དམིགས་རྐྱེན་འགོག་པ་ནི། འབྲས་བུ་དམིགས་བྱེད་མེད་པའི་ཆོས་འདི་དམིགས་བྱའི་རྐྱེན་མེད་པ་ཁོ་ན་ཡིན་པར་གྱུར་པ་ལ། ཁྱོད་ཀྱིས་དམིགས་བྱའི་རྐྱེན་དང་བཅས་པ་ཁོ་ནར་བསྟན་པ་ཡིན་ནོ། །དེ་ཉིད་ཅི་སྟེ་ཞེ་ན། ཆོས་འདི་དམིགས་མེད་ན་སྟེ་དམིགས་པར་བྱེད་པའི་ཆོས་མེད་པའི་ཕྱིར། དེའི་དམིགས་བྱ་ཡོད་པར་ག་ལ་འགྱུར་ཞེས་པའོ། །གསུམ་པ་ནི། རྒྱུ་འགགས་མ་ཐག་པ་འབྲས་བུ་འབྱུང་བའི་དེ་མ་ཐག་པའི་རྐྱེན་ཡིན་པ་མི་རིག་སྟེ། མྱུ་གུ་ལ་སོགས་པ་འབྲས་བུའི་ཆོས་རྣམས་སྐྱེས་པ་མ་ཡིན་ན་སྟེ། མ་སྐྱེས་པ་དེ་སྲིད་དུ་ས་བོན་ལ་སོགས་པ་རྒྱུའི་ཆོས་རྣམས་འགག་པ་འཐད་པར་མི་འགྱུར་བས་འབྲས་བུ་མ་སྐྱེས་པར་རྒྱུ་མི་འགག་པ་དེའི་ཕྱིར། འོན་ཏེ་འབྲས་བུ་མ་སྐྱེས་པར་རྒྱུ་འགག་ན་ཡང་འབྲས་བུ་ཕྱི་མ་སྐྱེ་བའི་རྐྱེན་ཡང་གང་ཞིག་ཡིན་ཏེ། མ་ཡིན་པར་ཐལ། འགགས་པ་ནི་མེད་པ་ཡིན་པའི་ཕྱིར་རོ། །བཞི་པ་ནི། རྐྱེན་གསུམ་ལས་གཞན་པའི་དངོས་པོ་འདི་ཡོད་ན་འབྲས་བུ་འདི་འབྱུང་བ་ཞེས་བྱ་བ་དེ་བདག་རྐྱེན་གྱི་མཚན་ཉིད་ནི་འཐད་པ་མ་ཡིན་ཏེ། གང་གི་ཕྱིར་ཡོད་པ་ཉིད་གྲུབ་པའམ་ཡོད་པ་མ་ཡིན་ན་སྟེ། འདི་ཡོད་པས་ཞེས་པ་རྒྱུའི་ཡོད་པ་དང་། འདི་འབྱུང་ཞེས་པ་འབྲས་བུའི་ཡོད་པས་བསྡུས་པའི་དངོས་པོ་རྣམས་རྟེན་ཅིང་འབྲེལ་བར་འབྱུང་བ་ཡིན་པས་གཟུགས་བརྙན་ལྟར་རང་བཞིན་མེད་པའི་ཕྱིར་རོ། །གཉིས་པ་འཇིག་རྟེན་ལ་གྲགས་པའི་གཞན་སྐྱེ་དགག་པ་ལ་འཇིག་རྟེན་པ་དང་། རྟོག་གེ་བ་ཁ་ཅིག གཞན་སྐྱེའི་སྒྲུབ་བྱེད་ཀྱི་རིག་པས་ཅི་ཞིག་བྱ། མྱུ་གུ་དང་སྣམ་བུ་ལ་སོགས་པ་རང་ལས་གཞན་པའི་ས་བོན་དང་། སྣལ་མ་དང་། ཐགས་ཟངས་ལ་སོགས་པ་ལས་སྐྱེ་བ་མཐོང་བས་གཞན་ལས་སྐྱེ་བ་ཡོད་དོ་ཞེས་སྨྲའོ། །འདིའི་ལན་ལ་འཇུག་པར་ཐོག་མར་བདེན་པ་གཉིས་ཀྱི་རྣམ་དབྱེ་བཤད་ནས། འཇིག་རྟེན་པའི་གཞན་ལས་སྐྱེ་བ་མཐོང་བ་ཉིད་ཀྱང་མི་འགྲུབ་ལ། མཐོང་ན་ཡང་དེ་ནི་ཀུན་རྫོབ་བདེན་པའི་རྣམ་གཞག་ཡིན་པས་གཞན་སྐྱེ་མེད་པ་དོན་དམ་བདེན་པའི་རྣམ་གཞག་ལ་མི་གནོད་ཅེས་རྒྱས་པར་འཆད་ཅིང་། འདིར་ནི་དོན་དམ་བདེན་པའི་རྣམ་གཞག་དེ་ཉིད་རིག་པས་བསྒྲུབས་པ་ལ་གསུམ་སྟེ། འབྲས་བུ་རྐྱེན་ལ་ཡོད་མེད་བརྟགས་ནས་དགག འབྲས་བུ་རྐྱེན་གྱི་རང་བཞིན་ཡིན་མིན་བརྟགས་ནས་དགག དེ་གཉིས་ཀའི་གྲུབ་དོན་བསྡུ་བའོ། །དང་པོ་ནི། འབྲས་བུ་དེ་དག་རྐྱེན་ལ་ཡོད་པའམ་མེད་པ་ཞིག་སྐྱེ། དང་པོ་ལྟར་ན་རྐྱེན་དེ་དག་ལ་འབྲས་བུ་དེ་ཡོད་ན་དེ་ལས་སྐྱེ་བར་འགྱུར་བ་ཞིག་ན་ཡང་། རྐྱེན་དེ་རྣམས་ཉིད་སོ་སོ་བ་ལ་འབྲས་བུར་འདོད་པ་དེ་དག་ནི་མེད་པ་ཉིད་དེ། འབྲས་བུ་གཅིག་རྐྱེན་དུ་མ་ལ་ཡོད་ན་འབྲས་བུ་དུ་མར་འགྱུར་བའི་ཕྱིར་དང་། སྣང་རུང་མ་དམིགས་པའི་ཕྱིར་རོ། །རྐྱེན་དེ་དག་རྣམས་འདུས་པ་ལ་ཡང་འབྲས་བུ་མེད་པ་ཉིད་དེ། རེ་རེ་བ་ལ་མེད་པའི་ཕྱིར། གཉིས་པ་ལྟར་ན། འབྲས་བུ་མྱུ་གུའམ་སྣམ་བུ་དེ་ནི་རྐྱེན་སྣལ་མ་དང་། ས་བོན་ལ་སོགས་པ་ལས་ཅི་ལྟར་སྐྱེ་སྟེ། སྐྱེ་བ་མེད་པར་ཐལ། རྐྱེན་རྣམས་ལ་ནི་གང་མེད་པ་སྟེ། རྐྱེན་དེ་རྣམས་ལ་མེད་པའི་ཕྱིར་རོ། །ཁྱབ་པ་མ་གྲུབ་ཅེས་ནི་བརྗོད་པར་མི་ནུས་ཏེ། ཅི་སྟེ་འབྲས་བུ་མྱུ་གུ་དང་། སྣམ་བུ་དེ་ནི་རྐྱེན་ས་བོན་དང་སྣལ་མ་ལ་སོགས་པ་མེད་པར་ཡང་རྐྱེན་དེ་དག་ལས་སྐྱེ་བར་འགྱུར་ན། རྐྱེན་མ་ཡིན་པ་མེ་དང་འཇག་མ་ལ་སོགས་པ་ལས་ཀྱང་འབྲས་བུ་དེ་དག་རྒྱུ་མཚན་ཅིའི་ཕྱིར་སྐྱེ་བར་མི་འགྱུར་ཏེ། འབྲས་བུ་མེད་པ་ཉིད་དུ་མཚུངས་པའི་ཕྱིར་རོ། །གཉིས་པ་ནི། ཡང་འབྲས་བུ་རྐྱེན་གྱི་རང་བཞིན་ཡིན་པའམ་མ་ཡིན་པ་ཞིག་སྐྱེ། དེ་ལ་གྲངས་ཅན་པ་དག་མྱུ་གུ་དང་སྣམ་བུ་ལ་སོགས་པ་ས་བོན་དང་། སྣལ་མ་ལ་སོགས་པའི་རང་བཞིན་ཡིན་པ་སྐྱེ་བས་འབྲས་བུ་རྐྱེན་ལ་ཡོད་དམ་མེད་སྙམ་པའི་བསམ་པ་ཡང་མི་འཇུག་གོ་སྙམ་ན། རྐྱེན་དེ་རྣམས་ལ་བདག་གི་ངོ་བོའམ་རང་བཞིན་ཡོད་པ་མིན་ཏེ། ཡུལ་དུས་ཀྱི་ཆ་ཤས་དུ་མ་ཡོད་དགོས་པའི་རང་གི་ཆ་ཤས་ལ་བརྟེན་ནས་བཏགས་པ་ཙམ་ཡིན་པའི་ཕྱིར་རོ། །དེས་ན་རྐྱེན་རྣམས་ཆོས་ཅན། འབྲས་བུ་གང་ཡིན་པ་དེ་ནི་ཅི་ལྟར་ན་རྐྱེན་གྱི་རང་བཞིན་ཡིན་ཏེ་མ་ཡིན་པར་ཐལ། རྐྱེན་རྣམས་ཉིད་བདག་ཉིད་དངོས་མིན་ལས་ཏེ་རང་བཞིན་དུ་མ་གྲུབ་པའི་ཕྱིར། མོ་གཤམ་གྱི་བུ་བཞིན་ནོ། །ཡང་གཉིས་པ་ལྟར་རྐྱེན་དེ་དག་གི་རང་བཞིན་མ་ཡིན་པ་ཞིག རྐྱེན་དེ་དག་ལས་སྐྱེའོ་སྙམ་ན། རྐྱེན་མིན་རང་བཞིན་འབྲས་བུ་ནི། ཡོད་པ་མིན་ཏེ་མྱུ་གུ་དང་སྣམ་བུ་ལ་སོགས་པ་རྐྱེན་ས་བོན་དང་། སྣལ་མའི་རང་བཞིན་དུ་མེད་ན། རྐྱེན་མ་ཡིན་པས་མེ་དང་འཇག་མ་ལ་སོགས་པའི་རང་བཞིན་དུ་འགལ་བའི་ཕྱིར་རོ། །གསུམ་པ་ནི། གལ་ཏེ་འབྲས་བུ་མེད་པ་རྐྱེན་ལས་སྐྱེ་ན། རྐྱེན་མ་ཡིན་པ་ལས་ཀྱང་སྐྱེ་བར་འགྱུར་རོ། །ཞེས་ཁྱོད་ཀྱི་སྨྲས་པ་ཡིན་ཏེ། དེས་ན་རྐྱེན་དང་རྐྱེན་མིན་གྱི་ངེས་པ་ཡོད་པས། དེའི་ལྟོས་ས་འབྲས་བུ་ཡང་ཡོད་དོ་སྙམ་ན། འབྲས་བུ་དེ་ལ་ལྟོས་པའི་རྐྱེན་མིན་དང་། རྐྱེན་ཡོད་པར་ག་ལ་འགྱུར་ཏེ་མེད་པར་ཐལ། ཁོ་བོ་ཅག་གིས་དེ་སྐད་དུ་བརྗོད་པ་ནི་འཇིག་རྟེན་ལ་གྲགས་པ་ཙམ་གྱི་དབང་དུ་བྱས་པ་ཡིན་གྱི། རྣམ་པར་དཔྱད་ན་འབྲས་བུ་རྐྱེན་ལ་ཡོད་མེད་དང་། འབྲས་བུ་རྐྱེན་གྱི་རང་བཞིན་ཡིན་མིན་གྱི་སྐྱེ་བ་བཀག་པའི་ཚུལ་གྱིས་འབྲས་བུ་མེད་པས་ནའོ། །གཉིས་པ་ལུང་དང་སྦྱར་བ་ནི། ཅི་སྐད་དུ། འཕགས་པ་དཀོན་མཆོག་འབྱུང་གནས་ཀྱི་མདོ་ལས། གང་ནའང་སྟོང་པ་རིག་པ་མེད་པ་ནི། །ནམ་མཁའ་བར་སྣང་བྱ་ཡི་རྗེས་དང་མཚུངས། །གང་ནའང་ངོ་བོ་ཉིད་འགའ་ཡོད་མིན་པ། །དེ་ནི་ནམ་ཡང་གཞན་གྱི་རྒྱུར་མི་འགྱུར། །གང་གི་ངོ་བོ་ཉིད་ནི་མི་རྙེད་པ། །རང་བཞིན་མེད་དེ་ཇི་ལྟར་གཞན་གྱི་རྐྱེན། །རང་བཞིན་མེད་པར་གཞན་གྱིས་ཅི་ཞིག་བསྐྱེད། །རྒྱུ་དེ་བདེ་བར་གཤེགས་པས་བསྟན་པ་འོ། །ཐམས་ཅད་ཆོས་ཀྱང་མི་གཡོ་བརྟན་པར་གནས། །མི་འགྱུར་འཚེ་བ་མེད་ཅིང་ཞི་བ་སྟེ། །ཇི་ལྟར་ནམ་མཁའ་ཤེས་པ་མེད་པ་སྟེ། །དེ་ལ་མི་ཤེས་འགྲོ་བ་རྨོངས་པར་འགྱུར། །ཇི་ལྟར་རི་བོ་དག་ནི་མི་སྒུལ་བ། །དེ་བཞིན་ཆོས་རྣམས་རྟག་ཏུ་སྐྱོད་མི་ནུས། །འཆི་འཕོ་མེད་ཅིང་སྐྱེ་བ་མེད་པ་ཡི། །ཆོས་རྣམས་དེ་ལྟར་རྒྱལ་བས་རབ་ཏུ་བསྟན། །ཞེས་བྱ་བ་ལ་སོགས་པ་དང་། དེ་བཞིན་དུ། ཆོས་གང་སྐྱེ་བ་མེད་ཅིང་འབྱུང་བ་མེད། །འཆི་འཕོ་མེད་ཅིང་རྒ་བར་འགྱུར་བ་མེད། །མི་ཡི་སེང་གེ་ཡིས་ནི་དེར་སྟོན་ཅིང་། །སེམས་ཅན་བརྒྱ་ཕྲག་དག་ནི་དེ་ལ་བཀོད། །གང་ལ་ངོ་བོ་ཉིད་ནི་གང་ཡང་མེད། །གཞན་ཡང་མ་ཡིན་དུས་ཀྱང་མ་རྙེད་པ། །ནང་ན་མ་ཡིན་ཕྱི་རོལ་དག་ན་ཡང་། །མི་རྙེད་དེ་དག་ལ་ནི་མགོན་པོས་བཀོད། །བདེ་བར་གཤེགས་པས་ཞི་བའི་འགྲོ་གསུངས་ཀྱང་། །འགྲོ་བ་གང་ཡང་རྙེད་པར་མི་འགྱུར་ཏེ། །དེ་དག་འགྲོ་ལ་གྲོལ་བར་རྣམ་པར་གསུངས། །གྲོལ་ནས་སེམས་ཅན་མང་པོ་གྲོལ་བར་མཛད། །ཞེས་གསུངས་པ་རྣམས་ཀྱི་དོན་རིགས་པས་བསྒྲུབ་པའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་རྐྱེན་བརྟག་པ་ཞེས་བྱ་བ་སྟེ་རབ་ཏུ་བྱེད་པ་དང་པོའི་རྣམ་པར་བཤད་པའོ།། ༈ །།གཉིས་པ་འགྲོ་འོང་དགག་པ་ལ་གསུམ་ལས། དང་པོ་ལ་རབ་བྱེད་ཀྱི་འབྲེལ་ནི། དེ་ལྟར་རྐྱེན་བརྟག་པར་རྟེན་ཅིང་འབྲེལ་བར་འབྱུང་བ་སྐྱེ་བ་མེད་པར་བསྟན་པ་ཉིད་ཀྱིས་འགྲོ་བ་མེད་པ་ལ་སོགས་པ་ཤུགས་ལ་གྲུབ་ཀྱང་འཇིག་རྟེན་ན་གྲགས་པ་གཙོ་ཆེ་བའི་འགྲོ་འོང་མེད་པ་དངོས་སུ་གྲུབ་པར་བྱ་བའི་ཕྱིར་ཕ་རོལ་ལ་རབ་ཏུ་གྲགས་པའི་འཐད་པ་བརྗོད་དགོས་སོ་སྙམ་པ་ལ་འགྲོ་འོང་རང་ལྡོག་ནས་དངོས་སུ་དགག་པར་བྱ་བའི་ཕྱིར་རབ་ཏུ་བྱེད་པ་འདི་གསུངས་སོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། འགྲོ་འོང་འགོག་པའི་རིག་པ་རྒྱས་པར་བཤད། རིག་པ་བསྡུས་སྟེ་བསྟན་པའོ། །དང་པོ་ལ་ལྔ་སྟེ། ལས་ལ་དུས་གསུམ་དུ་བརྟགས་ནས་དགག བྱེད་པ་པོ་ལ་རྣམ་གྲངས་གསུམ་དུ་བརྟགས་ནས་དགག འགྲོ་འོང་ཡོད་པའི་སྒྲུབ་བྱེད་དགག འགྲོ་བའི་བྱ་བ་དང་འགྲོ་བ་པོ་གཅིག་དང་ཐ་དད་བརྟགས་ནས་དགག འགྲོ་བའི་བྱ་བ་གཅིག་དང་ཐ་དད་བརྟགས་ནས་དགག་པའོ། །དང་པོ་ལ་གཉིས་ཏེ། ལམ་གསུམ་ལ་འགྲོ་བ་སྤྱིར་དགག་པ། བགོམ་བཞིན་པའི་ལམ་ལ་འགྲོ་བ་བྱེ་བྲག་ཏུ་དགག་པའོ། །དང་པོ་ནི། འགྲོ་བའི་བྱ་བ་ནི་ལས་དང་བྱེད་པ་པོས་བསྒྲུབ་པ་ཡིན་པས་དེ་ལ་ལས་དང་བྱེད་པ་པོ་གཉིས་ཀྱིས་ཁྱབ་དགོས་ལ། དེ་ཡང་ལམ་ནི་བྱ་བའམ། འགྲོ་བ་འཇུག་པའི་གཞི་ལས་ཉིད་ཡིན་ཏེ། དེ་ལ་འགྲོ་བའི་བྱ་བ་འགགས་པ་སོང་བ་དང་། མ་སྐྱེས་པ་མ་སོང་བ་དང་། སྐྱེས་ལ་མ་འགགས་པ་བགོམ་བཞིན་པའི་ལམ་དང་གསུམ་ལས་མེད་པས། དེ་ལ་རེ་ཞིག་སོང་བའི་ལམ་ལ་ནི་མི་འགྲོ་སྟེ། འགྲོ་བའི་བྱ་བ་འགགས་ནས་མེད་པའི་ཕྱིར་རོ། །མ་སོང་བའི་ལམ་ལ་ཡང་འགྲོ་བ་མེད་དེ། འགྲོ་བའི་བྱ་བ་མ་སྐྱེས་ནས་མེད་པའི་ཕྱིར་རོ། །བགོམ་བཞིན་པའི་ལམ་ལ་ཡང་མེད་དེ། སོང་དང་མ་སོང་ལས་མ་གཏོགས་པའི་བགོམ་བཞིན་པར་ཤེས་པའམ་དམིགས་པར་མི་འགྱུར་བའི་ཕྱིར་རོ། །གཉིས་པ་ལ་གཉིས་ཏེ། འདོད་པ་བརྗོད། དེ་དགག་པའོ། །དང་པོ་ནི། སོང་བ་དང་མ་སོང་བ་ལ་འགྲོ་བ་མེད་ཀྱི་བགོམ་པ་ལ་ནི་འགྲོ་བ་ཡོད་པ་ཉིད་དེ། གང་གི་ཕྱིར་གཡོ་བ་དེ་ཡང་བགོམ་པ་ལ་ཡོད་པ་དེའི་ཕྱིར་རོ། །དེའི་ཁྱབ་པ་བསྒྲུབ་པ་ནི་འགྲོ་བ་པོ་ཡུལ་གང་ན་སྔར་གྱི་མཚན་ཉིད་ཅན་གྱི་གཡོ་བ་ཡོད་པ་དེ་ན་འགྲོ་བ་ཡང་དམིགས་པའི་ཕྱིར། ཕྱོགས་ཆོས་བསྒྲུབ་པ་ནི་སྤྱིར་གཡོ་བ་ཙམ་མངོན་སུམ་གྱིས་དམིགས་ཤིང་དེ་འགག་པས་སོང་བ་ལ་ཡང་ཡོད་པ་མིན། མ་སྐྱེས་པས་མ་སོང་བ་ལ་ཡང་ཡོད་པ་མིན་པའི་ཕྱིར། གཞན་འོས་མེད་པས་བགོམ་པ་ཁོ་ན་ལ་ཡོད་པར་གྲུབ་བོ་སྙམ་ན། གཉིས་པ་ལ་གསུམ་སྟེ། ལས་ཚིག་དོན་དང་བཅས་ན་བྱ་ཚིག་དོན་གྱིས་སྟོང་། བྱ་ཚིག་དོན་དང་བཅས་ན་ལས་ཚིག་དོན་གྱིས་སྟོང་། གཉིས་ཀ་དོན་དང་བཅས་ན་ཧ་ཅང་ཐལ་བར་འགྱུར་བའོ། །དང་པོ་ནི། འགྲོ་བ་པོ་ལྷ་བྱིན་ལྟ་བུ་གཅིག་ཡུལ་གཞན་དུ་འགྲོ་བ་ན་འགྲོ་བའི་བྱ་བ་གཅིག་ལས་མེད་པས་བྱ་བ་གཅིག་པོ་དེ་བགོམ་པ་ཞེས་པའི་ལས་ཀྱི་ཚིག་དང་འབྲེལ་ན་བགོམ་པ་ལ་འགྲོ་ཞེས་པའི་ངག་བརྗོད་བྱའི་དོན་དང་ལྡན་པ་ཡིན་པར་ནི་ཅི་ལྟ་བུར་ན་འཐད་པར་འགྱུར་ཏེ་མི་འགྱུར་བར་ཐལ། འགྲོ་བའི་བྱ་བ་གཅིག་པོ་དེ་ནི་བགོམ་པ་ཞེས་པའི་ཚིག་གི་དོན་དུ་སོང་ཞིང་བྱ་བ་གཉིས་པ་ཡང་མེད་པའི་ཕྱིར་རོ། །འགྲོ་བའི་བྱ་བ་བགོམ་པ་ཞེས་པའི་ལས་ཚིག་དང་འབྲེལ་དགོས་པ་ཅི་སྟེ་སྙམ་ན། གང་གི་ཚེ་སྟེ་གང་གི་ཕྱིར་ན་འགྲོ་བའི་བྱ་བ་མེད་པའི་བགོམ་པ་ཞེས་པ་ལས་ཀྱི་ཚིག་ལ་བརྗོད་བྱའི་དོན་དང་ལྡན་པ་འཐད་པ་མེད་པའི་ཕྱིར་རོ། །གཉིས་པ་ནི། འགྲོ་ཞེས་པའི་ཚིག་འགྲོ་བའི་བྱ་བ་དང་འབྲེལ་བས་ཉེས་པ་དེར་མི་འགྱུར་རོ་སྙམ་ན། རྒོལ་བ་གང་གིས་འགྲོ་བའི་བྱ་བ་དང་མི་ལྡན་པས་བགོམ་པ་མིང་ཙམ་དུ་གྱུར་པ་ལ་འགྲོ་བ་ཞེས་པའི་བྱ་ཚིག་ལ་འགྲོ་བའི་བྱ་བ་ཡོད་པར་འདོད་པའི་ཕྱོགས་དེ་ལ་བགོམ་པ་ཞེས་པའི་ལས་ཀྱི་ཚིག་ལ་འགྲོ་ཞེས་པའི་ཚིག་གི་དོན་མེད་པར་ཐལ་བར་འགྱུར་ཏེ། གང་གི་ཕྱིར་འགྲོ་བའི་བྱ་བ་ནི་གཅིག་ལས་མེད་ལ། དེ་བགོམ་པ་མིང་ཙམ་དུ་གྱུར་པ་ལ་འགྲོ་ཞེས་པའི་བྱ་ཚིག་དང་འབྲེལ་བ་ཡིན་པའི་ཕྱིར། གསུམ་པ་ནི། བགོམ་པ་ཞེས་པའི་ལས་ཚིག་དང་། འགྲོ་ཞེས་པའི་བྱ་ཚིག་གཉིས་ཀ་ལ་འགྲོ་བའི་བྱ་བ་ཡོད་པས་ཉེས་པ་དེ་གཉིས་ཀར་མི་འགྱུར་རོ་སྙམ་ན། དེ་ལྟར་བགོམ་པ་ཞེས་པའི་ལས་ཀྱི་ཚིག་དང་། འགྲོ་ཞེས་པའི་བྱ་ཚིག་གཉིས་ཀ་ལ་དོན་ཡོད་ན་ནི། འགྲོ་བ་པོ་གཅིག་ལ་འགྲོ་བའི་བྱ་བ་གཉིས་སུ་ཐལ་བར་འགྱུར་ཏེ། འགྲོ་བའི་བྱ་བ་གང་གིས་བགོམ་པའི་ཐ་སྙད་དུ་འཇོག་པ་དེ་དང་ནི་བགོམ་པར་གྱུར་པ་དེ་ལ་ཡུལ་གཞན་དུ་ཕྱིན་པའི་འགྲོ་བའི་བྱ་བ་གང་ཡིན་པ་གཉིས་སུ་འགྱུར་བའི་ཕྱིར། འགྲོ་བའི་བྱ་བ་གཉིས་པོ་འདིར་ཐལ་བར་འགྱུར་བར་འདོད་ན། དེ་འདོད་པ་མི་ནུས་ཏེ། དེ་ལྟར་ན་འགྲོ་བ་པོའང་གཉིས་སུ་ཐལ་བར་འགྱུར་བའི་ཕྱིར་རོ། །འགྲོ་བའི་བྱ་བ་གཉིས་ཡོད་ཀྱང་འགྲོ་བ་པོ་གཉིས་མེད་ཞེས་ཀྱང་བརྗོད་པར་མི་ནུས་ཏེ། སྤྱིར་བྱ་བ་ཐམས་ཅད་ལས་དང་། བྱེད་པ་པོ་གཉིས་ཀྱིས་བསྒྲུབ་པ་ཡིན་པས་གང་གི་ཕྱིར། འགྲོ་བ་པོའམ་བྱེད་པ་པོ་མེད་པ་ནི་འགྲོ་བའི་བྱ་བ་ཡོད་པ་འཐད་པར་མི་འགྱུར་བའི་ཕྱིར་རོ། །གལ་ཏེ་འགྲོ་བ་པོ་གཅིག་ལ་དུས་གཅིག་གི་ཚེ་འགྲོ་བའི་བྱ་བ་གཉིས་ཡོད་པར་མི་འགལ་ཏེ། བྱེད་པ་པོ་ལྷ་བྱིན་ལྟ་བུ་གཅིག་ལ་དུས་གཅིག་གི་ཚེ་ལྟ་བ་དང་། སྨྲ་བ་དང་། འཇུག་པ་ལ་སོགས་པའི་བྱ་བ་དུ་མ་དང་ལྡན་པ་མཐོང་བའི་ཕྱིར་རོ་སྙམ་ན། དེའི་ལན་དུ་འགྲེལ་པར། མ་ཡིན་ཏེ། གང་གི་ཕྱིར་ནུས་པ་བྱེད་པ་པོ་ཡིན་གྱི་རྫས་ནི་མ་ཡིན་ལ། བྱ་བ་ཐ་དད་པས་དེའི་སྒྲུབ་བྱེད་ནུས་པ་ཡང་ཐ་དད་པར་གྲུབ་པ་ཡིན་ཏེ། འཇུག་པའི་བྱ་བས་སྨྲ་བ་པོར་འགྱུར་བ་ནི་མ་ཡིན་ནོ། །ཞེས་པ་དང་། གཞན་ཡང་གཅིག་དུས་གཅིག་ཏུ་བྱ་བ་འདྲ་བ་གཉིས་ཀྱི་བྱེད་པ་པོ་ཉིད་ཡིན་པར་ཡང་མ་མཐོང་སྟེ། དེའི་ཕྱིར་འགྲོ་བ་པོ་གཅིག་ལ་འགྲོ་བ་གཉིས་པ་མེད་དོ་ཞེས་པའི་ལན་གཉིས་མཛད་པ་ལ། རྨ་བྱས། སྔ་མ་ལྟར་ན་འགྲོ་བ་པོ་གང་ཟག་གི་རྫས་གཅིག་ལ་ཡང་འགྲོ་བའི་ནུས་པ་གཉིས་ཡོད་པས་འགྲོ་བའི་བྱ་བ་གཉིས་ཀྱང་མི་འགལ་བས་སྐབས་དོན་འགྲོ་བ་པོ་གང་ཟག་གི་རྫས་གཅིག་ལ་དུས་གཅིག་གི་ཚེ་འགྲོ་བའི་བྱ་བ་གཉིས་དགག་པར་མི་ནུས་པས་ལན་ཕྱི་མ་ཉིད་ལེགས་པར་སེམས་སོ་ཞེས་གསུངས་ཀྱང་། འགྲེལ་ཚིག་སྔ་མའི་དོན་བསྟན་བཅོས་རྩ་བར་འགྲོ་བ་པོ་ཞེས་པ་བྱེད་པ་པོ་ལ་འཇོག་དགོས་པས། བྱེད་པ་པོ་གཅིག་ལ་བྱ་བ་གཉིས་པ་མེད་པའི་ཕྱིར་ན་ལྟ་བ་དང་། སྨྲ་བ་ལ་སོགས་པའི་བྱ་བ་རིགས་མི་འདྲ་བ་དུ་མ་བྱེད་པའི་ཚེ་རྫས་གང་ཟག་བྱེད་པ་པོ་མ་ཡིན་གྱི་ནུས་པ་བྱེད་པ་པོ་ཡིན་པས་ལྟ་བའི་ནུས་པས་ལྟ་བའི་བྱ་བ་ཁོ་ན་བྱེད། སྨྲ་བའི་ནུས་པས་སྨྲ་བའི་བྱ་བ་ཁོ་ན་བྱེད་ཞེས་པའི་དོན་ཡིན་གྱི་གང་ཟག་གི་རྫས་གཅིག་ལ་ཡང་འགྲོ་བའི་ནུས་པ་གཉིས་ཡོད་པས་འགྲོ་བའི་བྱ་བ་གཉིས་ཀྱང་མི་འགལ་བ་དོན་མ་ཡིན་པས། སྐབས་དོན་ལས་ཉམས་པར་ག་ལ་འགྱུར། འགྲེལ་ཚིག་ཕྱི་མའི་དོན། བྱེད་པ་པོ་གང་ཟག་ལ་འཇོག་པའི་ཚེ་བྱེད་པ་པོ་གཅིག་ལ་བྱ་བ་རིགས་འདྲ་གཉིས་མེད་པས། རྩ་བར། འགྲོ་བ་གཉིས་སུ་ཐལ་འགྱུར་ན། །འགྲོ་བ་པོ་ཡང་གཉིས་སུ་འགྱུར། །ཞེས་པ་དང་མི་འགལ་ལ། བྱེད་པ་པོ་གཅིག་ལ་བྱ་བ་རིགས་མི་འདྲ་བ་དུ་མ་ཡོད་པ་ནི་མ་བཀག་ཅེས་པའི་དོན་ཏོ། །གཉིས་པ་བྱེད་པ་པོ་ལ་རྣམ་གྲངས་གསུམ་དུ་བརྟགས་ནས་དགག་པ་ལ་གསུམ་སྟེ། འགྲོ་བའི་བྱ་བ་དང་འགྲོ་བ་པོ་ཕན་ཚུན་ལྟོས་གྲུབ་ཏུ་བསྟན། རྣམ་གྲངས་གསུམ་གྱི་གང་ཟག་འགྲོ་བ་སྤྱིར་དགག འགྲོ་བཞིན་པ་འགྲོ་བ་བྱེ་བྲག་ཏུ་དགག་པའོ། །དང་པོ་ནི། གལ་ཏེ་འགྲོ་བའི་བྱ་བ་བྱེད་པ་པོ་འགྲོ་བ་པོ་མེད་པར་གྱུར་ན་འགྲོ་བའི་བྱ་བ་འཐད་པར་མི་འགྱུར་ཏེ་བྱ་བ་བྱེད་པ་པོ་ལ་ལྟོས་པའི་ཕྱིར། འགྲོ་བའི་བྱ་བ་མེད་ན་ཡང་འགྲོ་བ་པོའམ་བྱེད་པ་པོ་ཡོད་པ་ཉིད་དུ་ག་ལ་འགྱུར་ཏེ། བྱེད་པ་པོ་བྱ་བ་ལ་ལྟོས་པའི་ཕྱིར་རོ། །གཉིས་པ་ནི། དེ་ལྟར་འགྲོ་བའི་བྱ་བ་ལ་འགྲོ་བ་པོས་ཁྱབ་པ་དེ་འགྲོ་བའི་བྱ་བ་དང་ལྡན་པ་འགྲོ་བ་པོར་གྱུར་པ་ཞིག་འགྲོའམ། འགྲོ་བའི་བྱ་བ་དང་མི་ལྡན་པ་འགྲོ་བ་པོ་མ་ཡིན་པ་ཞིག་འགྲོའམ། དེ་གཉིས་ལས་མ་གཏོགས་པའི་གཞན་ཞིག་འགྲོ། དང་པོ་ལྟར་ན་དེ་ལ་རེ་ཤིག་འགྲོ་བ་པོར་གྱུར་པ་ནི་མི་འགྲོ་སྟེ་དེ་ལྟར་ན་འགྲོ་བའི་བྱ་བ་གཉིས་དགོས་པ་ལས་འགྲོ་བའི་བྱ་བ་གཉིས་མེད་པའི་ཕྱིར་རོ། །འགྲོ་བ་པོ་མིན་པ་ཡང་མི་འགྲོ་སྟེ། འགྲོ་བའི་བྱ་བ་དང་བྲལ་བའི་ཕྱིར་རོ། །འགྲོ་བ་པོ་ལས་ཀྱང་གཞན། འགྲོ་བ་པོ་མིན་པ་ལས་ཀྱང་གཞན་པའི་གསུམ་པ་གང་ཞིག་འགྲོ་བར་འགྱུར་ཏེ། གཉིས་པོ་དངོས་འགལ་ཡིན་པས་ཕུང་པོ་གསུམ་པ་མི་སྲིད་པའི་ཕྱིར་རོ། །གསུམ་པ་ལ་གསུམ་སྟེ། བྱ་ཚིག་དོན་དང་བཅས་ན་བྱེད་ཚིག་དོན་གྱིས་སྟོང་། བྱེད་ཚིག་དོན་དང་བཅས་ན་བྱ་ཚིག་དོན་གྱིས་སྟོང་། གཉིས་ཀ་དོན་དང་བཅས་ན་ཧ་ཅང་ཐལ་བར་འགྱུར་བའོ། །དང་པོ་ནི། འགྲོ་བ་པོ་ཡིན་མ་ཡིན་གཉིས་ཀ་ལས་ཀྱང་གཞན་པ་མི་འགྲོ་བ་བདེན་མོད་ཀྱི་འགྲོ་བ་པོ་ཉིད་འགྲོའོ་སྙམ་ན། རེ་ཤིག་འགྲོ་བ་པོ་འགྲོ་ཞེས་པའི་ངག་དོན་ལྡན་ཡིན་པར་ནི་ཅི་ལྟར་འཐད་པ་ཉིད་དུ་འགྱུར་ཏེ། གང་གི་ཚེ་སྟེ་གང་གི་ཕྱིར་འགྲོ་བ་པོ་ལྷ་བྱིན་གཅིག་ལ་འགྲོ་བའི་བྱ་བ་གཅིག་ལས་མེད་ལ་དེ་འགྲོ་ཞེས་པའི་ཚིག་གི་དོན་དུ་སོང་བས་འགྲོ་བའི་བྱ་བ་མེད་པར་ནི་འགྲོ་བ་པོའི་ཚིག་དོན་ལྡན་དུ་འཐད་པར་མི་འགྱུར་བའི་ཕྱིར། གཉིས་པ་ནི། འགྲོ་བའི་བྱ་བ་དེ་འགྲོ་བ་པོ་ཞེས་པའི་ཚིག་གི་དོན་དུ་སོང་བས་ཉེས་པ་དེར་མི་འགྱུར་རོ་སྙམ་ན། རྒོལ་བ་གང་གི་ཕྱོགས་ལ་འགྲོ་བ་པོ་འགྲོ་བའི་བྱ་བ་དང་འབྲེལ་བར་འདོད་པ་དེ་ལ་འགྲོ་བ་མེད་པའི་འགྲོ་བ་པོ་ཞེས་པའི་འགྲོ་བ་པོའི་སྒྲ་ནི་བྱ་བའི་དོན་ལ་འཇུག་པས་འགྲོ་ཞེས་པ་བྱ་བའི་སྒྲ་ལ་འགྲོ་བའི་བྱ་བ་མེད་པར་ཐལ་བར་འགྱུར་ཏེ། འགྲོ་བ་པོ་ཞེས་པ་བྱེད་པ་པོའི་སྒྲ་བརྗོད་བྱའི་དོན་འགྲོ་བའི་བྱ་བ་གཅིག་པོ་དེ་དང་འབྲེལ་བར་འདོད་པའི་ཕྱིར་རོ། །གསུམ་པ་ནི། འགྲོ་བའི་བྱ་བ་དེ་འགྲོ་བ་པོ་ཞེས་པའི་ཚིག་དང་། འགྲོ་བ་ཞེས་པའི་ཚིག་གཉིས་ཀ་དང་འབྲེལ་བས་ཉེས་པ་དེར་མི་འགྱུར་རོ་སྙམ་ན། དེ་ལྟར་ན་གལ་ཏེ་འགྲོ་བའི་བྱ་བ་དེ་འགྲོ་བ་པོ་ཞེས་པ་དང་། འགྲོ་ཞེས་པའི་ཚིག་གཉིས་ཀ་དང་འབྲེལ་བར་འགྱུར་ན་འགྲོ་བའི་བྱ་བ་གཉིས་སུ་ཐལ་བར་འགྱུར་ཏེ། འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོའི་ཐ་སྙད་དུ་འཇོག་ཅིང་མངོན་པ་དང་། འགྲོ་བའི་བྱ་བ་དེ་དང་ལྡན་པས་འགྲོ་བ་པོར་གྱུར་ནས་གང་འགྲོ་བའི་བྱ་བ་གཉིས་ཡོད་པའི་ཕྱིར། འདོད་པར་མི་ནུས་པ་ནི་སྔར་བཞིན་ནོ། །གསུམ་པ་འགྲོ་འོང་ཡོད་པའི་སྒྲུབ་བྱེད་དགག་པ་ལ་ལྔ་སྟེ། རྒྱུ་རྩོམ་པ་དགག ལས་ལམ་དགག གཉེན་པོ་གནས་པ་དགག འབྲས་བུ་ལྡོག་པ་དགག གནས་པ་ཡོད་པའི་སྒྲུབ་བྱེད་དགག་པའོ། །དང་པོ་ལ་གཉིས་ཏེ། ལས་ཁས་བླངས་ཀྱང་རྩོམ་པ་མ་གྲུབ་པ། ལས་ཁས་མ་བླངས་པས་རྩོམ་པ་མ་གྲུབ་པའོ། །དང་པོ་ནི། གལ་ཏེ་འགྲོ་བའི་བྱ་བ་ནི་རང་བཞིན་གྱི་ཡོད་དེ། དེའི་རྩོམ་པ་ཡོད་པའི་ཕྱིར་རོ་སྙམ་ན། དེ་ལ་སོང་བའི་ལམ་ལ་ནི་འགྲོ་བའི་རྩོམ་པ་མེད་དེ། འགྲོ་བའི་རྩོམ་པ་འགག་ཟིན་པའི་ཕྱིར་རོ། །མ་སོང་བའི་ལམ་ལ་ཡང་འགྲོ་བའི་རྩོམ་པ་མེད་དེ། འགྲོ་བ་རྩོམ་ན་མ་སོང་བར་འགལ་བའི་ཕྱིར་རོ། །བགོམ་བཞིན་པའི་ལམ་ལ་ཡང་འགྲོ་བའི་རྩོམ་པ་ཡོད་པ་མ་ཡིན་ཏེ། སོང་མ་སོང་ལས་མ་གཏོགས་པའི་བགོམ་བཞིན་པ་མ་དམིགས་པའི་ཕྱིར། དེས་ན་ལམ་གང་དུ་འགྲོ་བ་རྩོམ་པར་བྱེད་དེ་མི་འཐད་པར་ཐལ། ལམ་གསུམ་ཆར་དུ་ཡང་འགྲོ་བའི་རྩོམ་པ་མེད་པའི་ཕྱིར། གཉིས་པ་ནི། འགྲོ་བ་རྩོམ་པ་ལ་མངོན་དུ་བརྩམ་བྱའི་ལས་གྲུབ་དགོས་པ་ལས་འགྲོ་བ་རྩོམ་པའི་སྔ་རོལ་ན་ལམ་གང་དུ་འགྲོ་བ་རྩོམ་པར་འགྱུར་བ་འགྲོ་བའི་བྱ་བ་འགག་པ་སོང་བའི་ལམ་མེད་ཅིང་། བྱ་བ་ད་ལྟར་བ་དང་ལྡན་པ་བགོམ་བཞིན་པའི་ལམ་ཡང་མེད་ལ། མ་སོང་བའི་ལམ་ཡང་འགྲོ་བ་རྩོམ་པ་ག་ལ་ཡོད་དེ། འགྲོ་བའི་བྱ་བ་མ་བརྩམས་ཤིང་མ་སྐྱེས་པའི་ཕྱིར་རོ། །གཉིས་པ་ནི། འགྲོ་བའི་བྱ་བ་ནི་རང་བཞིན་དུ་ཡོད་པ་ཉིད་དེ། དེའི་ལས་ལམ་གསུམ་པོ་སྔར་དངོས་སུ་མ་བཀག་པས་རང་བཞིན་དུ་ཡོད་པའི་ཕྱིར་རོ་སྙམ་ན། སྔར་བཤད་པའི་ཚུལ་གྱིས་འགྲོ་བའི་རྩོམ་པ་རྣམ་པ་ཐམས་ཅད་དུ་རིགས་ངོར་སྣང་ཞིང་མངོན་པ་མེད་པ་ཉིད་ཡིན་པའི་ཕྱིར་ན་འགྲོ་བའི་རྩོམ་པ་འགགས་པ་སོང་བའི་ལམ་ཅི་ཞིག་དང་། སྐྱེས་ལ་མ་འགག་པ་བགོམ་བཞིན་པའི་ལམ་ཅི་ཞིག་དང་། མ་སྐྱེས་པ་མ་སོང་བའི་ལམ་ཅི་ཞིག་རྣམ་པར་བརྟག་པར་བྱ་སྟེ། འབྲེལ་ཡུལ་འགྲོ་རྩོམ་མེད་ན་དེ་ལ་ལྟོས་པའི་ལམ་གསུམ་མི་རུང་བའི་ཕྱིར་རོ། །གསུམ་པ་ནི། འགྲོ་བའི་བྱ་བ་ནི་རང་བཞིན་གྱི་ཡོད་པ་ཉིད་དེ། དེའི་གཉེན་པོ་གནས་པ་རང་བཞིན་གྱིས་ཡོད་པའི་ཕྱིར་སྙམ་ན། རེ་ཤིག་འགྲོ་བ་པོ་མི་སྡོད་དེ། ཕན་ཚུན་འགལ་བའི་ཕྱིར་རོ། །འགྲོ་བ་པོ་ཡིན་པ་ཡང་སྡོད་པ་མིན་ཏེ། འགྲོ་བ་པོ་མིན་པ་ནི་གནས་པ་ཉིད་ཡིན་པས་དེ་ལ་གནས་པའི་བྱ་བ་གཉིས་མེད་པའི་ཕྱིར་རོ། །འགྲོ་བ་པོ་དང་འགྲོ་བ་པོ་མིན་པ་ལས་གཞན་པའི་གང་ཟག་གསུམ་པ་གང་ཞིག་སྡོད་པར་འགྱུར་ཏེ། དེ་གཉིས་དངོས་འགལ་ཡིན་པས་དགག་ཕྱོགས་ཀྱི་ཕུང་གསུམ་མི་སྲིད་པའི་ཕྱིར་རོ། །གལ་ཏེ་མཐའ་ཕྱི་མ་གཉིས་པོ་མི་སྡོད་ཀྱང་འགྲོ་བ་པོ་ཉིད་སྡོད་དོ་སྙམ་ན། རེ་ཤིག་འགྲོ་བ་པོ་སྡོད་དོ་ཞེས་ཅི་ལྟར་འཐད་པ་ཉིད་དུ་འགྱུར་ཏེ་མི་འཐད་པར་ཐལ། གང་གི་ཚེ་འགྲོ་བའི་བྱ་བ་མེད་པར་ནི་འགྲོ་བ་པོའི་ཚིག་དོན་ལྡན་དུ་འཐད་པར་མི་འགྱུར་བ་དེས་ན་སྡོད་ཚིག་དོན་དང་ལྡན་ཡང་འགྲོ་བ་པོའི་ཚིག་དོན་གྱིས་སྟོང་པའི་ཕྱིར་རོ། །བཞི་པ་ནི། འགྲོ་བའི་བྱ་བ་རང་བཞིན་གྱིས་ཡོད་པ་ཉིད་དེ། འབྲས་བུ་དེ་ལས་ལྡོག་པ་ཡོད་པའི་ཕྱིར་རོ་སྙམ་ན། སོང་དང་མ་སོང་ལས་མ་གཏོགས་པའི་བགོམ་བཞིན་པའི་ལམ་ལ་འགྲོ་བ་ལས་ལྡོག་པར་མི་འགྱུར་ཏེ། དེ་མ་དམིགས་པའི་ཕྱིར། སོང་བའི་ལམ་དང་མ་སོང་བའི་ལམ་ལ་འགྲོ་བ་ལས་ཀྱང་ལྡོག་པར་འགྱུར་བ་མིན་ཏེ། གང་ལས་ལྡོག་པར་འགྱུར་བའི་འགྲོ་བའི་བྱ་བ་འགགས་པ་དང་། མ་སྐྱེས་ནས་མེད་པའི་ཕྱིར། ལྔ་པ་ནི། འགྲོ་བའི་གཉེན་པོ་གནས་པ་ཉིད་རང་བཞིན་གྱི་ཡོད་དེ། དེའི་འགྲན་ཟླ་འགྲོ་བ་ཡོད་པའི་ཕྱིར་དང་། རྒྱུ་རྩོམ་པ་ཡོད་པའི་ཕྱིར་དང་། འབྲས་བུ་དེ་ལས་བཟློག་པ་ཡོད་པའི་ཕྱིར་རོ་སྙམ་ན། གནས་པའི་སྒྲུབ་བྱེད་དུ་བཀོད་པའི་གནས་པའི་གཉེན་པོ་འགྲོ་བ་དགག་པ་ཡང་ནི་སྔར་འགྲོ་བའི་གཉེན་པོ་གནས་པ་དགག་པ་དང་མཚུངས་ཏེ། སྔར་རེ་ཤིག་འགྲོ་བ་པོ་མི་སྡོད་དེ་ཞེས་སོགས་བཤད་པ་དེ་ཉིད་འདིར་རེ་ཤིག་གནས་པོ་མི་འགྲོ་སྟེ། གནས་པ་པོ་མིན་འགྲོ་བ་མིན། །ཞེས་སོགས་སུ་འདོན་པ་བསྒྱུར་བས་དགག་ནུས་པའི་ཕྱིར་རོ། །གནས་པའི་རྒྱུ་རྩོམ་པའམ་འཇུག་པ་དགག་པ་ཡང་ནི་སྔར་འགྲོ་བའི་རྒྱུ་རྩོམ་པ་དགག་པ་དང་མཚུངས་ཏེ། སྔར་སོང་ལ་འགྲོ་བའི་རྩོམ་མེད་དེ་ཞེས་སོགས་བཤད་པ་དེ་ཉིད། འདིར་གནས་ལ་གནས་པའི་རྩོམ་མེད་དེ་ཞེས་སོགས་སུ་འདོན་པ་བསྒྱུར་བས་དགག་ནུས་པའི་ཕྱིར། གནས་པའི་སྒྲུབ་བྱེད་དུ་བཀོད་པའི་ལྡོག་པ་དགག་པ་ཡང་ནི་སྔར་འགྲོ་བ་ལས་ལྡོག་པ་དགག་པ་དང་མཚུངས་ཏེ། སྔར་བགོམ་ལས་ལྡོག་པར་མི་འགྱུར་ཏེ། སོང་དང་མ་སོང་ལས་ཀྱང་མིན། །ཞེས་བཤད་པ་དེ་ཉིད་འདིར། གནས་བཞིན་པ་ལས་མི་ལྡོག་ཏེ། །གནས་དང་མི་གནས་ལས་ཀྱང་མིན། །ཞེས་འདོན་པ་བསྒྱུར་བས་དགག་ནུས་པའི་ཕྱིར་རོ། །བཞི་པ་འགྲོ་བའི་བྱ་བ་དང་། འགྲོ་བ་པོ་གཅིག་དང་ཐ་དད་བརྟགས་ནས་དགག་པ་ལ་གསུམ་སྟེ། དམ་བཅའ་མདོར་བསྟན། འཐད་པ་རྒྱས་པར་བཤད། གྲུབ་པའི་དོན་བསྡུ་བའོ། །དང་པོ་ནི། འགྲོ་བའི་བྱ་བ་དེ་དང་རྟེན་འགྲོ་བ་པོ་གཉིས་དེ་ཉིད་ཡིན་ནོ་ཞེས་ཀྱང་བྱར་མི་རུང་ལ། འགྲོ་བའི་བྱ་བ་དང་ནི་རྟེན་འགྲོ་བ་པོ་ངོ་བོ་གཞན་ཉིད་ཅེས་ཀྱང་བྱར་མི་རུང་ངོ་། །གཉིས་པ་ནི་ཅི་ལྟར་མི་རུང་ཞེ་ན། དེ་ཉིད་ཡིན་ཞེས་བྱ་བར་མི་རུང་སྟེ། གལ་ཏེ་འགྲོ་བའི་བྱ་བ་གང་ཡིན་པ་དེ་ཉིད་འགྲོ་བ་པོ་ཡིན་པར་གྱུར་ན། སྤྱིར་བྱེད་པ་པོ་དང་ལས་ཉིད་ཀྱང་གཅིག་པ་ཉིད་དུ་ཐལ་བར་འགྱུར་བའི་ཕྱིར་རོ། །གཞན་ཉིད་ཡིན་ཞེས་ཀྱང་བྱར་མི་རུང་སྟེ། གལ་ཏེ་འགྲོ་བའི་བྱ་བ་དང་། འགྲོ་བ་པོ་ངོ་བོ་གཞན་པ་ཉིད་དུ་རྣམ་པར་བརྟགས་ན་རྟེན་འགྲོ་བ་པོ་མེད་པའི་འགྲོ་བའི་བྱ་བ་དང་། འགྲོ་བའི་བྱ་བ་མེད་པའི་འགྲོ་བ་པོ་ཡོད་པར་འགྱུར་ན་དེ་དག་མི་རུང་བའི་ཕྱིར་རོ། །གསུམ་པ་ནི། དེ་ཉིད་དང་གཞན་ཉིད་དུ་བརྗོད་དུ་མེད་ཀྱང་རང་བཞིན་གྱིས་ཡོད་དོ་ཞེས་ཀྱང་བརྗོད་པར་མི་ནུས་ཏེ། སྔར་བཤད་པའི་ཚུལ་གྱིས་འགྲོ་བ་དང་། འགྲོ་བ་པོ་གང་དག་དངོས་པོ་གཅིག་པ་དང་། དངོས་པོ་གཞན་པ་ཉིད་དུ་ནི། གྲུབ་པར་འགྱུར་བ་ཡོད་མིན་ན། །དེ་གཉིས་རང་བཞིན་གྱིས་གྲུབ་པ་ཅི་ལྟར་ཡོད་དེ་དེ་མི་འཐད་པར་ཐལ། དངོས་འགལ་ལ་དགག་ཕྱོགས་དང་སྒྲུབ་ཕྱོགས་ཀྱི་ཕུང་པོ་གསུམ་པ་མི་འཐད་པའི་ཕྱིར་རོ། །ལྔ་པ་འགྲོ་བའི་བྱ་བ་གཅིག་དང་ཐ་དད་བརྟགས་ནས་དགག་པ་ནི་གལ་ཏེ་སྨྲ་བ་པོ་ཚིག་སྨྲའོ། །བྱེད་པ་པོ་བྱ་བ་བྱེད་དོ་ཞེས་པ་ལྟར། འགྲོ་བའི་བྱ་བ་ཡང་འགྲོ་བ་པོའི་བྱ་བའི་ལས་སུ་ཡོད་པ་ཡིན་ནོ་སྙམ་ན། དེ་ལྟར་འགྲོ་བ་པོས་འགྲོ་བའི་བྱ་བ་བྱེད་ན་རང་ཉིད་འགྲོ་བ་པོར་མཚོན་པའི་བྱ་བ་བྱེད་དམ། དེ་ལས་གཞན་པའི་འགྲོ་བའི་བྱ་བ་བྱེད། དེ་ལ་དང་པོ་འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོར་མངོན་ཞིང་མཚོན་པའི་འགྲོ་བའི་བྱ་བ་དེ་ནི། དེས་འགྲོ་ཞིང་བྱེད་པ་མིན་ཏེ། གང་གི་ཕྱིར་ན་རང་ཉིད་འགྲོ་བ་པོར་མཚོན་པའི་འགྲོ་བའི་བྱ་བའི་སྔ་རོལ་དུ་འགྲོ་བ་པོ་གྲུབ་པར་གྱུར་ན་སྔར་གྲུབ་པའི་འགྲོ་བ་པོ་གང་ཞིག ཡུལ་གྲོང་དང་གྲོང་ཁྱེར་ལ་སོགས་པ་གང་དུ་འགྲོ་བའི་བྱ་བ་བྱེད་པར་འགྱུར་བ་ཞིག་རིགས་པར་འགྱུར་ན་ཡང་རང་ཉིད་འགྲོ་བ་པོར་མཚོན་པའི་འགྲོ་བའི་བྱ་བ་དེའི་སྔ་རོལ་དུ་འགྲོ་བ་པོ་ཉིད་མེད་པའི་ཕྱིར་ཏེ། འགྲོ་བའི་བྱ་བ་ལ་མ་ལྟོས་པའི་འགྲོ་བ་པོ་མེད་པས་སོ། །གཉིས་པ་འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོར་མངོན་ཞིང་མཚོན་པའི་འགྲོ་བའི་བྱ་བ་དེ་ལས་གཞན་པ་ཡང་འགྲོ་བ་པོ་དེས་འགྲོ་ཞིང་བྱེད་པ་མིན་ཏེ། གང་གི་ཕྱིར་ལྷ་བྱིན་ལྟ་བུ་འགྲོ་བ་པོ་གཅིག་པུ་ལ་རང་ཉིད་འགྲོ་བ་པོར་མཚོན་པའི་བྱ་བ་དང་། དེ་ལས་གཞན་པའི་འགྲོ་བའི་བྱ་བ་གཉིས་མི་འཐད་པའི་ཕྱིར་རོ། །གཉིས་པ་རིག་པ་བསྡུས་སྟེ་བསྟན་པ་ནི། འགྲོ་བ་པོ་ཡིན་པར་གྱུར་པ་ནི་འགྲོ་བའི་ལམ་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། བྱེད་པ་པོ་དང་ལས་དང་བྱ་བ་གསུམ་ཆར་གྱི་སྒོ་ནས་བཀག་ཟིན་པའི་ཕྱིར་རོ། །འགྲོ་བ་པོ་མ་ཡིན་པར་ནི་གྱུར་ཏེ་ཡང་འགྲོ་བའི་ལས་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། གསུམ་ཆར་བཀག་ཟིན་པའི་ཕྱིར་རོ། །འགྲོ་བ་པོ་ཡིན་པ་དང་མ་ཡིན་པར་གྱུར་པ་དེ་ཡང་འགྲོ་བའི་ལམ་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། བཀག་ཟིན་པའི་ཕྱིར་རོ། །དེའི་ཕྱིར་འགྲོ་བའི་བྱ་བ་དང་། འགྲོ་བ་པོ་དང་། བགྲོད་པར་བྱ་བའི་ལས་ལམ་གསུམ་ཀ་ཡང་རང་བཞིན་གྱིས་ཡོད་པ་མ་ཡིན་ནོ། །གཉིས་པ་ནི། ཇི་སྐད་དུ་འཕགས་པ་བློ་གྲོས་མི་བཟད་པས་བསྟན་པའི་མདོ་ལས། བཙུན་པ་ཤ་ར་དྭ་ཏིའི་བུ་འོང་བ་ཞེས་བྱ་བ་དེ་ནི་བསྡུ་བའི་ཚིག་གོ །བཙུན་པ་ཤ་ར་དྭ་ཏིའི་བུ་འགྲོ་བ་ཞེས་བྱ་བ་དེ་ནི་བསལ་བའི་ཚིག་གོ །གང་ལ་བསྡུ་བའི་ཚིག་མེད་པ་དང་། བསལ་བའི་ཚིག་མེད་པ་དེ་ལ་འོང་བ་ཡང་མེད་འགྲོ་བ་ཡང་མེད་དོ། །འོང་བ་དང་འགྲོ་བ་མེད་པ་ནི་འཕགས་པ་རྣམས་འགྲོ་བའོ་ཞེས་དང་། ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །ཞེས་བྱ་བ་དང་། རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པར་དམིགས་པ་ཡང་ཡོད་མིན། །དེ་ལ་དེ་མེད་གཞན་ལ་མ་ཡིན་ཏེ། །དེ་ལྟར་འདུས་བྱས་རྟགས་མིན་ཆད་པ་མེད། །ཞེས་བྱ་བ་དང་། མེ་ལོང་ངོས་དང་འབྲུ་མར་སྣོད་རྣམས་ལ། །བུད་མེད་ཁ་བཞིན་བརྒྱན་པས་བལྟས་པ་ན། །བྱིས་པ་དེ་ནི་དེ་ལ་ཆགས་སྐྱེད་ནས། །འདོད་པ་ཚོལ་བའི་ཕྱིར་ཡང་ཤིན་ཏུ་རྒྱུག །བཞིན་ནི་དེ་ཡང་འཕོ་བ་མ་ཡིན་ཏེ། །གཟུགས་བརྙན་ལ་ནི་ནམ་ཡང་བཞིན་མི་རྙེད། །རྨོངས་པ་དེ་དག་འདོད་ཆགས་བསྐྱེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་གསུངས་སོ། །ཇི་སྐད་དུ། འཕགས་པ་ཏིང་ངེ་འཛིན་གྱི་རྒྱལ་པོ་ལས་ཀྱང་། དེ་ཚེ་སྡིག་མེད་སྟོབས་བཅུ་ལྡན་པ་ཡི། །རྒྱལ་བ་དེ་ནི་ཏིང་འཛིན་མཆོག་འདི་འཆད། །སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་སུ་ཡང་མི་སྐྱེ་འཆི་བ་མེད། །སེམས་ཅན་མི་དང་སྲོག་ཀྱང་མི་རྙེད་དེ། །ཆོས་འདི་རྣམས་ནི་དབུ་བ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་ཡིན། །མི་འགའ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་ཆུད་མི་ཟ། །འཁོར་བ་ན་ཡང་དཀར་ནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་མེད་ཅིང་གནས་པ་དག་ཀྱང་མེད། །དེ་ཡང་བྱས་ནས་རེག་པ་མི་འགྱུར་མིན། །གཞན་གྱིས་བྱས་པ་མྱོང་བར་འགྱུར་བའང་མེད། །ཐམས་ཅད་ཡོད་པའང་མ་ཡིན་མེད་པ་མིན། །འདི་ན་ལྟ་གནས་འཇུག་པ་དག་པ་མིན། །སེམས་ཅན་སྤྱོད་པ་རབ་ཞི་འཇུག་པ་མེད། །སྲིད་གསུམ་རྨི་ལམ་དང་འདྲ་སྙིང་པོ་མེད། །མྱུར་དུ་འཇིག་ཅིང་མི་རྟག་སྒྱུ་མ་བཞིན། །འོང་བ་མེད་ཅིང་འདི་ན་འགྲོ་བའང་མེད། །རྒྱུན་རྣམས་རྟག་ཏུ་སྟོང་ཞིང་མཚན་མ་མེད། །བདེ་གཤེགས་སྤྱོད་ཡུལ་རྒྱལ་བའི་ཡོན་ཏན་ནི། །སྐྱེ་མེད་ཞི་བ་མཚན་མ་མེད་པའི་གནས། །སྟོབས་དང་གཟུངས་རྣམས་དང་ནི་སྟོབས་བཅུའི་སྟོབས། །འདི་ནི་སངས་རྒྱས་ཁྱུ་མཆོག་གྱུར་པའི་མཆོག །དཀར་པོའི་ཆོས་མཆོག་ཡོན་ཏན་བསགས་པ་སྟེ། །ཡོན་ཏན་ཡེ་ཤེས་སྟོབས་དང་གཟུགས་མཆོག་དང་། །རྫུ་འཕྲུལ་རྣམ་པར་འཕྲུལ་བ་བྱ་བའི་མཆོག །མངོན་ཤེས་མཆོག་ལྔ་ཐོབ་པ་དམ་པའི་ཚུལ། །ཞེས་སོགས་རྒྱ་ཆེར་གསུངས་པ་ལྟ་བུའོ། །དེ་བཞིན་དུ་ཚེ་དང་ལྡན་པ་དག་གར་དོང་། གང་ནས་ལྷགས། དེ་དག་གིས་སྨྲས་པ། བཙུན་པ་རབ་འབྱོར་གང་དུ་ཡང་འགྲོ་བ་མེད་པ་དང་། གང་ནས་ཀྱང་འོང་བ་མེད་པའི་ཕྱིར། བཅོམ་ལྡན་འདས་ཀྱིས་ཆོས་བསྟན་ཏོ། །ཞེས་སོགས་གསུངས་པ་རྣམས་ཀྱི་དོན་དངོས་སུ་འགྲོ་འོང་དོན་དམ་པ་བཀག་པ་དང་། ཤུགས་ལ་ཀུན་རྫོབ་སྒྱུ་མ་ཙམ་དུ་འགྲོ་འོང་ཐ་སྙད་དུ་ཡོད་པའི་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་འགྲོ་འོང་བརྟགས་པ་ཞེས་བྱ་བ་རབ་ཏུ་བྱེད་པ་གཉིས་པའི་རྣམ་པར་བཤད་པའོ།། ༈ །།གཉིས་པ་ཁྱད་ཆོས་གཞན་བཤད་པ་ལ་ལྔ་སྟེ། རྟེན་འབྲེལ་ཆོས་ཀྱི་བདག་གིས་སྟོང་པ། གང་ཟག་གི་བདག་གིས་སྟོང་པ། དངོས་པོའི་རང་བཞིན་གྱིས་སྟོང་པ། དུས་ཀྱིས་སྟོང་པ། སྲིད་པའི་རྒྱུན་གྱིས་སྟོང་པའོ། །དང་པོ་ལ་གཉིས་ཏེ། ཆོས་བདག་གི་ངོ་བོ་དགག དེའི་སྒྲུབ་བྱེད་དགག་པའོ། །དང་པོ་ལ་གསུམ་སྟེ། སྐྱེ་མཆེད་རང་བཞིན་གྱིས་གྲུབ་པ་དགག ཕུང་པོ་རང་བཞིན་གྱིས་གྲུབ་པ་དགག ཁམས་རང་བཞིན་གྱིས་གྲུབ་པ་དགག་པའོ། །དང་པོ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་འགྲོ་བ་དང་། འགྲོ་བ་པོ་དང་། བགྲོད་པར་བྱ་བ་བཀག་མོད་ཀྱི་དེ་ལྟ་ན་ཡང་ལྟ་བ་དང་། ལྟ་བ་པོ་དང་། བལྟ་བྱ་ལ་སོགས་པ་ཕྱི་ནང་གི་སྐྱེ་མཆེད་རྣམས་ནི་ཆོས་མངོན་པ་ལས་གསུངས་པས་རང་བཞིན་གྱིས་ཡོད་པ་ཡིན་ནོ་སྙམ་ན། དེ་དག་རང་བཞིན་གྱིས་གྲུབ་པ་དགག་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་དཔྱད་པ་ལ་ཡང་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཉན་ཐོས་སྡེ་པ་དག་ལྟ་བ་དང་། བལྟ་བྱ་ལ་སོགས་པ་ཕྱི་ནང་གི་སྐྱེ་མཆེད་རྣམས་ནི་རང་བཞིན་གྱིས་ཡོད་པ་ཡིན་ཏེ། ཆོས་མངོན་པའི་མདོ་ལས། ལྟ་བ་མིག་དང་། ཉན་པ་རྣ་བ་དང་། སྣོམ་པ་སྣ་དང་། མྱོང་བར་བྱེད་པ་ལྕེ་དང་། རེག་པར་བྱེད་པ་ལུས་དང་། སེམས་པར་བྱེད་པ་ཡིད་ཅེས་པ་ནི་བྱེ་བྲག་ཏུ་སྨྲ་བ་འདོད་ལ། མདོ་སྡེ་པ་ནི་ལྟ་བ་མིག་གི་རྣམ་ཤེས་སོགས་སུ་འདོད་དེ། ནང་གི་སྐྱེ་མཆེད་དབང་པོ་དྲུག་སྟེ། དེ་དག་གི་སྤྱོད་ཡུལ་ལྟ་བར་བྱ་བའི་གཟུགས་ལ་སོགས་པ་ཕྱིའི་སྐྱེ་མཆེད་དྲུག་གསུངས་པའི་ཕྱིར་ཞེས་འདོད་དོ། །གཉིས་པ་ལ་གཉིས་ཏེ། ལྟ་བ་འགོག་བྱེད་ཀྱི་རིག་པ་རྒྱས་པར་བཤད། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གཉིས་ཏེ། མིག་ལྟ་བ་ཡིན་པ་དགག་པ། ཤེས་པ་ལྟ་བ་ཡིན་པ་དགག་པའོ། །དང་པོ་ལ་གཉིས་ཏེ། རང་མ་མཐོང་བའི་རྟགས་ཀྱིས་དགག ལྟ་བའི་རང་བཞིན་ཡིན་མིན་བརྟགས་ཏེ་དགག་པའོ། །དང་པོ་ལ་བཞི་སྟེ། ཕྱོགས་ཆོས་བསྒྲུབ། གཏན་ཚིགས་འགོད། མ་ངེས་པ་སྤོང་། དོན་བསྡུ་བའོ། །དང་པོ་ནི། བྱེ་བྲག་ཏུ་སྨྲ་བ་འདོད་པའི་ལྟ་བ་མིག་གི་དབང་པོ་དེ་རང་གི་བདག་ཉིད་ནི་དེ་ལ་ལྟ་བ་མ་ཡིན་པ་ཉིད་དེ། རང་ལ་རང་གི་ལྟ་བའི་བྱ་བ་འགལ་བའི་ཕྱིར་དང་། དེ་མ་དམིགས་པའི་ཕྱིར་རོ། །གཉིས་པ་ནི། གང་ཞིག་མིག་གི་དབང་པོ་དེ་ཆོས་ཅན། གཞན་གཟུགས་དག་ལ་ཅི་ལྟར་ལྟ་སྟེ་མི་ལྟ་བར་ཐལ། བདག་ཉིད་ལ་མི་ལྟ་བའི་ཕྱིར། བུམ་པ་བཞིན། གསུམ་པ་ནི། རང་ལ་མི་ལྟ་ཡང་གཞན་ལ་ལྟ་བ་མི་འགལ་ཏེ། མེས་རང་མི་བསྲེག་ཀྱང་གཞན་བུད་ཤིང་བསྲེག་པ་བཞིན་ནོ་སྙམ་ན། རང་ལ་མི་ལྟ་ཡང་གཞན་ལ་ལྟ་བ་རབ་ཏུ་བསྒྲུབ་པའི་ཕྱིར། མེས་རང་མི་བསྲེག་ཀྱང་། གཞན་བསྲེག་པའི་དཔེས་ནི་དོན་དེ་སྒྲུབ་པར་ནུས་པ་མ་ཡིན་ཏེ། སྔར་སོང་བ་དང་། མ་སོང་བ་དང་། བགོམ་པ་ལ་འགྲོ་བའི་བྱ་བ་བཀག་པའི་རིག་པ་ཡིས། དཔེ་དེ་དང་ནི་དོན་ལྟ་བ་དང་བཅས་པ་ལ་ལན་བཏབ་ཅིང་སུན་དབྱུང་བ་ཡིན་པའི་ཕྱིར་ཏེ། རེ་ཞིག་བསྲེག་པ་མི་བསྲེག་ཏེ་ཞེས་སོགས་བསྲེག་བྱའི་ལས་བུད་ཤིང་དང་། རེ་ཤིག་བལྟ་བ་མི་བལྟ་སྟེ་ཞེས་སོགས་བལྟ་བྱའི་ཡུལ་གཟུགས་ལ་དུས་གསུམ་དུ་དཔྱད་པ་དང་། རེ་ཤིག་བསྲེག་པོ་མི་བསྲེག་སྟེ་ཞེས་སོགས་སྲེག་པར་བྱེད་པ་པོའི་མེ་དང་། རེ་ཤིག་ལྟ་པོ་མི་བལྟ་སྟེ་ཞེས་སོགས་ལྟ་བར་བྱེད་པ་པོ་མིག་ལ་རྣམ་གྲངས་གསུམ་དུ་བརྟགས་ན་དཔེ་དང་དོན་གཉིས་ཀ་མི་འགྲུབ་པའི་ཕྱིར་རོ། །བཞི་པ་ནི། དེའི་ཕྱིར་མིག་དེ་ནི་གཟུགས་ལ་བལྟ་བས་བལྟ་བར་བྱེད་པ་པོ་ཡིན་ཞེས་བྱ་བ་དེ་ནི་ཅི་ལྟར་རིགས་པར་འགྱུར་ཏེ། གང་གི་ཚེ་རང་གཞན་གཉིས་ཀ་ལ་ཅུང་ཟད་མི་ལྟ་བ་དེ་ནི་ལྟ་བར་བྱེད་པ་མ་ཡིན་པའི་ཕྱིར་རོ། །གཉིས་པ་ནི། གཞན་ཡང་མིག་གཟུགས་ལ་བལྟ་བར་རྟོག་ན་ལྟ་བའི་བྱ་བ་དང་བཅས་པ་ལྟ་བའི་རང་བཞིན་ཞིག་གམ། དེ་དང་བྲལ་བ་ལྟ་བའི་རང་བཞིན་མ་ཡིན་པ་ཞིག་བལྟ་ཞེས་རྟོག་དྲང་། དེ་ལ་མིག་ལྟ་བའི་རང་བཞིན་ཅན་ནི་གཟུགས་ལ་བལྟ་བ་ཉིད་མ་ཡིན་ཏེ། དེ་ལ་བལྟ་བའི་བྱ་བ་གཉིས་མེད་པའི་ཕྱིར་རོ། །གཉིས་པ་ལྟར་མིག་བལྟ་བའི་རང་བཞིན་ཅན་མིན་པ་ཡང་མི་བལྟ་བ་ཉིད་དེ་ལྟ་བའི་བྱ་བ་དང་བྲལ་བའི་ཕྱིར་སོར་མོའི་རྩེ་མོ་བཞིན་ནོ། །གཉིས་པ་ཤེས་པ་བལྟ་བ་ཡིན་པ་དགག་པ་ལ་གསུམ་སྟེ། སྔར་བཤད་རིག་པས་དགག རིག་པ་གཞན་གྱིས་དགག དོན་བསྡུ་བའོ། །དང་པོ་ནི། མདོ་སྡེ་པ་ལ་སོགས་པ་དག་མིག་ལྟ་བའི་བྱེད་པ་པོ་མ་ཡིན་མོད་ཀྱི་ལྟ་བའི་བྱེད་པ་ཡིན་ལ། བྱེད་པ་དེས་གཟུགས་ལ་ལྟ་བ་པོ་ནི་རྣམ་པར་ཤེས་པའམ་བདག་ཡིན་ནོ་ཞེ་ན། སྔར་མིག་གི་དབང་པོ་གཟུགས་ལ་བལྟ་བའི་བྱེད་པ་པོར་འདོད་པ་དགག་པ་ཉིད་ཀྱིས་རྣམ་པར་ཤེས་པའམ་བདག་གཟུགས་ལ་ལྟ་བ་པོར་འདོད་པ་ལ་ཡང་སྐྱོན་རྣམ་པར་བཤད་པར་ཤེས་པར་བྱ་སྟེ། ལྟ་པོ་རང་གི་བདག་ཉིད་ནི། །ཞེས་སོགས་འདོན་པ་བསྒྱུར་བས་དགག་ནུས་པའི་ཕྱིར་རོ། །གཉིས་པ་ནི། གཞན་ཡང་ལྟ་བ་པོ་རྣམ་ཤེས་ལ་སོགས་པ་ཡོད་ན་ལྟ་བའི་བྱ་བ་ལ་ལྟོས་པའམ་མ་ལྟོས་པ་ཞིག་ཡོད་དྲང་། དེ་ལ་ལྟ་བའི་བྱ་བ་མ་སྤངས་པ་སྟེ། བྱ་བ་ལ་ལྟོས་པ་དང་བཅས་པ་ལྟ་བ་པོ་ཉིད་ཡོད་པ་མིན་ཏེ། ལྟོས་པ་པོ་ཉིད་མེད་པ་དང་། ཡོད་ན་ལྟོས་པ་དོན་མེད་པས་ལྟ་བ་པོ་མ་གྲུབ་པ་དང་། གྲུབ་ན་ལྟ་བ་ལ་ལྟོས་པར་མི་འཐད་པའི་ཕྱིར་རོ། །གཉིས་པ་ལྟར་བལྟ་བའི་བྱ་བ་སྤངས་པ་སྟེ། བལྟ་བ་ལ་མ་ལྟོས་པར་གྱུར་ཀྱང་ལྟ་བ་པོར་མི་རུང་སྟེ། ལྟ་བ་པོ་རྣམ་འཇོག་གི་རྒྱུ་མེད་པའི་ཕྱིར་རོ། །དེ་ལྟར་ལྟ་བ་པོ་བཀག་ཀྱང་བལྟ་བྱའི་ལས་དང་། བལྟ་བའི་བྱེད་པ་གཉིས་ཡོད་དོ་སྙམ་ན་སྔར་བཤད་པའི་ཚུལ་གྱིས་ལྟ་བ་པོ་མེད་པའི་ཕྱིར་ན་དེ་ལ་ལྟོས་པའི་བལྟ་བྱའི་ལས་གཟུགས་དང་། བལྟ་བའི་བྱེད་པ་མིག་གི་དབང་པོ་དེ་དག་ག་ལ་ཡོད་དེ་དེ་དག་ཕན་ཚུན་ལྟོས་ནས་གྲུབ་པ་ཡིན་པའི་ཕྱིར་རོ། །གསུམ་པ་ནི། དེ་ལྟ་ན་ཡང་། ཅི་ལྟར་ཕ་དང་མ་དག་ལ། །བརྟེན་ནས་བུ་ནི་འབྱུང་བཤད་པ། །དེ་བཞིན་མིག་དང་གཟུགས་བརྟེན་ནས། །རྣམ་པར་ཤེས་པ་འབྱུང་བར་རྟེན་འབྲེལ་གྱི་མདོ་ལས་བཤད་པས་མིག་གི་རྣམ་པར་ཤེས་པ་དང་། རེག་པ་དང་། ཚོར་བ་དང་། སྲེད་པ་བཞི་ཡོད་པས་བལྟ་བའི་བྱ་བ་དང་། བྱེད་པ་གཉིས་ཀྱང་ཡོད་དོ་སྙམ་ན། བལྟ་བའི་བྱ་བ་དང་། བྱེད་པ་གཉིས་ཀྱི་རྣམ་པར་ཤེས་པ་ལ་སོགས་པ་བཞི་རང་བཞིན་དུ་ཡོད་པ་མ་ཡིན་ཏེ། སྔར་བཤད་པའི་ཚུལ་གྱིས་བལྟ་བྱ་གཟུགས་དང་། བལྟ་བའི་བྱེད་པ་མིག་གི་དབང་པོ་གཉིས་མེད་པའི་ཕྱིར། དེས་ན་དེ་དག་གི་འབྲས་བུ་ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་བཞི་པོ་ཅི་ལྟ་བུར་ན་ཡོད་པར་འགྱུར་ཏེ། རྒྱུ་རྣམ་ཤེས་ལ་སོགས་པ་བཀག་ཟིན་པའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། ལྟ་བས་ཉན་དང་སྣོམ་པ་དང་། །མྱོང་བར་བྱེད་དང་རིག་བྱེད་ཡིན། །ཉན་པ་པོ་དང་མཉན་ལ་སོགས་རང་བཞིན་གྱིས་གྲུབ་པ་ལ་ཡང་སྐྱོན་རྣམ་པར་བཤད་པར་ཤེས་པར་བྱ་སྟེ། ཉན་དེ་རང་གི་བདག་ཉིད་ནི། །དེ་ལ་ཉན་པ་མ་ཡིན་ཉིད། །ཞེས་སོགས་ཐམས་ཅད་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས། མིག་གིས་གཟུགས་རྣམས་མི་མཐོང་ཞིང་། །ཡིད་ཀྱིས་ཆོས་རྣམས་མི་ཤེས་ཏེ། །གང་དུ་འཇིག་རྟེན་མི་འཇུག་པ། །འདི་ནི་བདེན་པའི་མཆོག་ཡིན་ནོ། །གང་དུ་རྐྱེན་འཚོགས་པས་མཐོང་བར། །འདྲེན་པ་རབ་ཏུ་སྟོན་མཛད་པའི། །ས་དེ་དོན་དམ་འཛིན་པ་ནི། །ཉེ་བར་བཏགས་པར་ཆུད་པར་འགྱུར། །ཞེས་བྱ་བ་དང་། དེ་བཞིན་དུ། མིག་དང་གཟུགས་ལ་བརྟེན་ནས་ནི། །མིག་གི་རྣམ་ཤེས་འདི་སྐྱེ་ཡང་། །གཟུགས་ནི་མིག་ལ་བརྟེན་མ་ཡིན། །གཟུགས་ནི་མིག་ལ་འཕོ་བ་མིན། །བདག་མེད་མི་སྡུག་ཆོས་འདི་དག །སླར་ཡང་སྡུག་དང་བདག་ཅེས་བརྟགས། །མེད་ལ་ལོག་པར་བརྟགས་པ་སྟེ། །དེ་ལས་མིག་གི་རྣམ་ཤེས་འབྱུང་། །རྣམ་ཤེས་འགག་དང་འབྱུང་བ་ལས། །རྣམ་ཤེས་ཟད་དང་འཕེལ་བར་མཐོང་། །འགའ་ཡང་འགྲོ་འོང་མེད་སྟོང་དང་། །རྒྱུ་འདྲར་རྣལ་འབྱོར་པ་ཡིས་མཐོང་། །ཞེས་གསུངས་སོ། །དེ་བཞིན་དུ། འཕགས་པ་ཉེ་བར་འཁོར་གྱི་ཞུས་པ་ལས་ཀྱང་། མིག་ནི་ཐམས་ཅད་ལྡན་ན་མཐོང་འགྱུར་ཏེ། །མིག་གིས་གཟུགས་རྣམས་མཐོང་བ་གང་ཡིན་པའང་། །མཚན་མོ་རྐྱེན་རྣམས་མེད་ན་མཐོང་མི་འགྱུར། །དེ་ཕྱིར་ལྡན་དང་བྲལ་བ་རྣམ་རྟོག་ཡིན། །མིག་ནི་སྣང་ལ་བརྟེན་ཏེ་ཡིད་འོང་དང་། །ཡིད་དུ་མི་འོང་སྣ་ཚོགས་གཟུགས་མཐོང་བས། །དེ་ལྟར་ལྡན་ལས་བརྟེན་ཏེ་མཐོང་བས་ན། །དེ་ཕྱིར་མིག་གིས་ནམ་ཡང་མཐོང་བ་མེད། །ཡིད་དུ་འོང་བའི་སྒྲ་གྲག་གང་ཡིན་པ། །དེ་ཡང་ནམ་ཡང་ནང་དུ་ཞུགས་པ་མེད། །དེ་འགྲོ་དམིགས་སུ་ཡོད་པ་མ་ཡིན་ཏེ། །རྟོག་པའི་དབང་གིས་སྒྲ་རྣམས་འབྱུང་བ་ཡིན། །ཞེས་གསུངས་སོ། །དེ་བཞིན་དུ། གླུ་དང་གར་དང་རོལ་མོའི་སྒྲ་ཡང་གཟུང་བྱ་མིན། །རྨི་ལམ་ལྟ་བུར་མི་མཁས་རྨོངས་དང་ཆགས་པའི་རྒྱུ། །མི་མཁས་ཀུན་ཏུ་རྟོག་ལ་ཞེན་རྣམས་བརླག་འགྱུར་ཞིང་། །སྐྱེ་བོ་བྱིས་པ་ཉོན་མོངས་བྲན་བཞིན་བདག་གྱུར་ཏམ། །ཞེས་གསུངས་པ་རྣམས་ཀྱི་དོན་རིག་པས་དཔྱད་ན་ཕྱི་ནང་གི་སྐྱེ་མཆེད་མི་རྙེད་པའི་དོན་དམ་བདེན་པ་དང་། ཀུན་རྫོབ་སྒྱུ་མ་ཙམ་དུ་སྐྱེ་མཆེད་ཐ་སྙད་དུ་ཁས་ལེན་པའི་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །གསུམ་པ་ནི་དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་དབང་པོ་བརྟགས་པ་ཞེས་བྱ་བ་སྟེ་རབ་ཏུ་བྱེད་པ་གསུམ་པའི་རྣམ་པར་བཤད་པའོ།། ༈ །།གཉིས་པ་ཕུང་པོ་རང་བཞིན་གྱིས་གྲུབ་པ་དགག་པ་ལ་གསུམ་ལས། དང་པོ་རབ་བྱེད་ཀྱི་འགྲེལ་ནི། དེ་ལྟར་ཕྱི་ནང་གི་སྐྱེ་མཆེད་རྣམས་བཀག་མོད་ཀྱི་ཆོས་མངོན་པ་ལས། འདུས་བྱས་གང་ཞེ་ན་ཕུང་པོ་ལྔའོ། །ཞེས་གསུངས་པའི་ཕུང་པོ་ལྔ་རང་བཞིན་གྱིས་ཡོད་ལ། དེ་ན་དེའི་ཁོངས་སུ་འདུས་པས་སྐྱེ་མཆེད་རྣམས་ཀྱང་རང་བཞིན་གྱིས་ཡོད་དོ་སྙམ་ན། ཕུང་པོ་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། གཟུགས་ཀྱི་ཕུང་པོ་འགོག་བྱེད་རྒྱས་པར་བཤད། རིག་པ་དེ་ཆོས་གཞན་ལ་བསྒྲེ། རྩོད་ལན་གྱི་གནད་ཁྱད་པར་ཅན་བསྟན་པའོ། །དང་པོ་ལ་གསུམ་སྟེ། རྒྱུ་འབྲས་ཀྱི་གཟུགས་ཕན་ཚུན་ལྟོས་གྲུབ་ཏུ་བསྟན་པ། དེ་གཉིས་ཕན་ཚུན་ཡོད་མེད་བརྟགས་ཏེ་དགག ཕན་ཚུན་འདྲ་མི་འདྲ་བརྟགས་ཏེ་དགག་པའོ། །དང་པོ་ལ་གཉིས་ཏེ། དམ་བཅའ་མདོར་བསྟན། འཐད་པ་རྒྱས་པར་བཤད་པའོ། །དང་པོ་ནི། འདིར་གཟུགས་ཀྱི་རྒྱུ་ནི་འབྱུང་བ་དང་། གཟུགས་ནི་འབྲས་བུའི་གཟུགས་ལ་བྱ་སྟེ། གཟུགས་ཀྱི་རྒྱུ་འབྱུང་བ་ནི་མ་གཏོགས་པར་དེ་ལས་ངོ་བོ་ཐ་དད་པའི་འབྲས་བུའི་གཟུགས་དབང་པོ་ལྔ་དང་། དོན་ལྔ་སྟེ་བཅུའམ། ཆོས་ཀྱི་སྐྱེ་མཆེད་པའམ། རྣམ་པར་རིག་བྱེད་མ་ཡིན་པ་དང་བཅས་པ་ནི་དམིགས་པར་མི་འགྱུར་རོ། །དེ་བཞིན་དུ་འབྲས་བུའི་གཟུགས་ཞེས་བྱ་བ་མ་གཏོགས་པར་དེ་ལས་ངོ་བོ་ཐ་དད་པའི་གཟུགས་ཀྱི་རྒྱུ་འབྱུང་བ་ཡང་མི་སྣང་ངོ་ཞེས་པ་གཉིས་ནི་དམ་བཅའ་སྟེ། སྒྲུབ་བྱེད་འོག་ནས་སྟོན་ནོ། །གཉིས་པ་ནི། གལ་ཏེ་གཟུགས་ཀྱི་རྒྱུ་ནི་མ་གཏོགས་པར་འབྲས་བུའི་གཟུགས་ཡོད་ན་འབྲས་བུའི་གཟུགས་ནི་རྒྱུ་མེད་པར་ཐལ་བར་འགྱུར་ཏེ། རང་གི་རྒྱུ་ལས་གཞན་དུ་གྲུབ་ཟིན་པའི་ཕྱིར་བུམ་པ་དང་སྣམ་བུ་བཞིན་ནོ། །འདོད་པར་མི་ནུས་ཏེ། གཟུགས་ལ་སོགས་པའི་དོན་གང་ཡང་རྒྱུ་མེད་པ་ནི་ཡུལ་དུས་གང་ན་ཡང་མེད་པའི་ཕྱིར་རོ། །གལ་ཏེ་འབྲས་བུའི་གཟུགས་ནི་མ་གཏོགས་པར་གཟུགས་ཀྱི་རྒྱུ་ཞིག་ཡོད་པར་འདོད་ན་ནི། རྒྱུ་དེ་འབྲས་བུ་ལ་ལྟོས་པ་མེད་པར་འགྱུར་ཏེ། དེ་ལས་ངོ་བོ་ཐ་དད་ཡིན་པའི་ཕྱིར། འདོད་པར་མི་ནུས་ཏེ། འབྲས་བུ་ལ་ལྟོས་པ་མེད་པའི་རྒྱུ་མེད་པའི་ཕྱིར་ཏེ། འདི་ནི་འདིའི་རྒྱུ་ཡིན་ནོ་ཞེས་རྒྱུའི་ཐ་སྙད་དུ་འཇོག་པ་འབྲས་བུ་ལ་ལྟོས་དགོས་པའི་ཕྱིར་རོ། །གཉིས་པ་ལ་གསུམ་སྟེ། འབྲས་བུ་ཡོད་མེད་ཀྱི་རྒྱུ་དགག རྒྱུ་ཡོད་མེད་ཀྱི་འབྲས་བུ་དགག གྲུབ་པའི་དོན་བསྡུ་བའོ། །དང་པོ་ནི། ཡང་གཟུགས་ཀྱི་རྒྱུ་ཞིག་ཡོད་ན་འབྲས་བུའི་གཟུགས་ཡོད་པའམ། མེད་པ་ལ་རྒྱུ་ཞིག་ཡོད་རྟོག་དྲང་། དེ་ལ་འབྲས་བུའི་གཟུགས་ཡོད་ན་ཡང་གཟུགས་ཀྱི་ནི་རྒྱུ་ཡང་འཐད་པར་མི་འགྱུར་བ་ཉིད་དེ། འབྲས་བུ་གྲུབ་ཟིན་ན་དེ་ལ་རྒྱུ་དོན་མེད་པའི་ཕྱིར་རོ། །འབྲས་བུའི་གཟུགས་མེད་ན་ཡང་གཟུགས་ཀྱི་ནི་རྒྱུ་ཡང་འཐད་པར་མི་འགྱུར་བ་ཉིད་དེ། རྟེན་མེད་པས་སྐྱེ་བའི་བྱ་བ་མི་འཇུག་པའི་ཕྱིར་རོ། །གཉིས་པ་ནི། དེ་བཞིན་དུ་འབྲས་བུའི་གཟུགས་ཀྱང་རྒྱུ་ཡོད་པའམ་མེད་པ་ཞིག་ལ་འབྲས་བུར་འགྱུར་རྟོག་དྲང་། དང་པོ་ནི་མི་རུང་སྟེ། སྔར་དེ་ལ་རྒྱུ་མེད་པ་ཉིད་དུ་བཤད་ཟིན་པའི་ཕྱིར་རོ། །གཉིས་པ་དེ་ལ་རྒྱུ་མེད་པ་ཡི་གཟུགས་དག་དཔྱད་ན་འཐད་པར་མི་རུང་ཞིང་། མ་དཔྱད་པ་སྣང་ངོར་ཡང་རུང་མིན་ཉིད་དེ། གཟུགས་དེ་རེས་འགའ་བར་མཐོང་བའི་ཕྱིར་རོ། །གསུམ་པ་ནི། དེ་ཁོ་ན་ཉིད་རྟོགས་པར་འདོད་པའི་རྣལ་འབྱོར་པས། གཟུགས་ཀྱི་ཁྱད་པར་གྱི་ཆོས་ཀྱི་རྣམ་པར་རྟོག་པར་སྡུག་མི་སྡུག་དང་། ཐོགས་བཅས་ཐོགས་མེད་དང་། བསྟན་ཡོད་བསྟན་མེད་དང་། དུས་གསུམ་དང་སྔོ་སེར་ལ་སོགས་པ་འགའ་ཡང་རྣམ་པར་བརྟགས་པར་མི་བྱ་སྟེ། རྒྱུ་འབྲས་ཀྱི་གཟུགས་རིག་པས་དཔྱད་ན་མེད་པས་ཁྱད་པར་གྱི་གཞི་མ་གྲུབ་པའི་ཕྱིར་རོ། །གསུམ་པ་ནི། གཞན་ཡང་གཟུགས་ཀྱི་རྒྱུ་འདིས་འབྲས་བུ་འདྲ་བའམ། མི་འདྲ་བ་ཞིག་སྒྲུབ་པར་བྱེད་དྲང་། དེ་ལ་འབྲས་བུ་དང་འདྲ་བ་ཞེས་བྱ་བ་ཡང་འཐད་པ་མ་ཡིན་ཏེ། རྒྱུ་འབྲས་ཀྱི་གཟུགས་མཚན་ཉིད་ཐ་དད་པའི་ཕྱིར་རོ། །འབྲས་བུའི་གཟུགས་རྒྱུའི་གཟུགས་དང་མི་འདྲ་བ་ཞིག་བསྐྱེད་དོ་ཞེས་བྱ་བ་ཡང་འཐད་པ་མ་ཡིན་ཏེ། དེ་ལྟར་ན་སྲིད་པས་ཞི་བ་བསྐྱེད་པར་ཐལ་བའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི་ཚོར་བ་དང་ཚོར་བའི་རྒྱུ་རིག་པ་དང་། འདུ་ཤེས་དང་དེ་དང་ལྷན་ཅིག་འབྱུང་བའི་རྣམ་པར་ཤེས་པ་དང་། འདུ་བྱེད་དང་དེའི་རྒྱུ་མ་རིག་པ་དང་། སེམས་རྣམ་པར་ཤེས་པ་དང་། དེ་དང་ལྷན་ཅིག་འབྱུང་བའི་འདུ་བྱེད་ལ་སོགས་པའི་རྒྱུ་འབྲས་རྣམས་གཅིག་དང་ཐ་དད་དུ་དཔྱད་ན་མི་འཐད་པ་ལ་སོགས་པ་རྣམ་པ་དག་ནི་ཐམས་ཅད་དུ། གཟུགས་ཉིད་ཀྱིས་ནི་རིམ་པ་དང་མཚུངས་ཏེ། ཚོར་བའི་རྒྱུ་ནི་མ་གཏོགས་པར། །ཚོར་བ་དམིགས་པར་མི་འགྱུར་རོ། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར་རོ། །དེ་བཞིན་དུ་མཚན་ཉིད་དང་མཚན་གཞི་དང་། ཡན་ལག་དང་ཡན་ལག་ཅན་ལ་སོགས་པའི་དངོས་པོ་ཐམས་ཅད་ཀྱང་གཟུགས་ཉིད་ཀྱིས་ནི་རིམ་པ་དང་མཚུངས་ཏེ། མཚན་ཉིད་གཞི་ནི་མ་གཏོགས་པར། །མཚན་ཉིད་དམིགས་པར་མི་འགྱུར་རོ། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར། གསུམ་པ་རྩོད་ལན་གྱི་གནད་ཁྱད་པར་ཅན་བསྟན་པ་ནི། རེ་ཤིག་གཞན་ཕྱོགས་སུན་འབྱིན་པའི་ཐབས་ཁྱད་པར་ཅན་ལ་དངོས་པོར་སྨྲ་བའི་སྒྲུབ་བྱེད་ཐམས་ཅད་བསྒྲུབ་བྱ་དང་མཚུངས་པས་འགོག་པ་སྟེ། འདི་ལྟར་སྟོང་པ་ཉིད་དུ་སྨྲ་བའི་དབུ་མ་པས། གཟུགས་རང་བཞིན་གྱིས་ཡོད་པ་ཅི་ཕྱིར་ཞེས་སྒྲུབ་བྱེད་བརྩད་པ་བྱས་པའི་ཚེ་དངོས་པོར་སྨྲ་བ་གང་ཞིག ཚོར་བ་ལ་སོགས་པ་རང་བཞིན་གྱིས་ཡོད་པའི་ཕྱིར། ཞེས་ལན་འདེབས་སྨྲ་བར་བྱེད་པ་དེ་ཡིས་ལན་དེ་དག་ཐམས་ཅད་ལེགས་པར་བཏབ་པ་མིན་ཏེ། ཚོར་བ་ལ་སོགས་པ་རང་བཞིན་གྱིས་ཡོད་པ་ཡང་བསྒྲུབ་བྱ་གཟུགས་རང་བཞིན་གྱིས་ཡོད་པ་དང་། གཅིག་དང་ཐ་དད་ལ་སོགས་པའི་དཔྱད་པ་མཚུངས་པའི་ཕྱིར། རང་ཕྱོགས་ལ་སྐྱོན་སྤོང་བའི་ཐབས་ཁྱད་པར་ཅན་ལ་དབུ་མ་པས་སྟོང་པ་ཉིད་ཀྱི་སྒོ་ནས་བཤད་པ་བྱས་པའི་ཚེ་རང་གི་སློབ་མའམ། དངོས་པོར་སྨྲ་བ་གང་ཞིག་རང་བཞིན་གྱིས་མེད་ན་ཐ་སྙད་དུའང་མེད་པར་འགྱུར་རོ་ཞེས་སོགས་སྐྱོན་འདོགས་སྨྲ་བར་བྱེད་པ་དེ་ཡིས་དེ་དག་ཐམས་ཅད་སྐྱོན་བརྟགས་པ་མིན་ཏེ། སྒྱུ་མ་དང་། སྨིག་རྒྱུ་ལ་སོགས་པའི་དཔེས་ཐ་སྙད་དུ་ཡོད་ཀྱང་རང་བཞིན་གྱིས་མེད་པ་བསྒྲུབ་པར་བྱ་བ་དང་མཚུངས་པར་འགྱུར་བའི་ཕྱིར་རོ། །འདིར་འགྲེལ་པར། ཚོར་བ་ལ་སོགས་པ་རྣམས་ཀྱི་ཡོད་པ་ཡང་བསྒྲུབ་བྱ་གཟུགས་ཀྱི་ཡོད་པ་དང་མཚུངས་པར་རིག་པར་བྱའོ། །ཞེས་གསུངས་པ་ལ་བརྟེན་ནས་གཟུགས་ཀྱི་གནས་ཚུལ་ལ་དཔྱད་པའི་ཚེ། གཟུགས་ཉིད་བདེན་པ་གཉིས་ཆར་དུ་མེད་པར་མཁས་ལེན་པ་བཞིན་དུ། དེའི་ཚེ་ཚོར་བ་སོགས་ཀྱང་བདེན་པ་གཉིས་ཆར་དུ་མེད་པར་ཁས་བླངས་པར་བྱ་བ་ནི་མ་ཡིན་ཏེ། གཟུགས་ཀྱི་གནས་ཚུལ་ལ་དཔྱད་པའི་རིག་པ་དེ་ཉིད་ཚོར་བ་སོགས་ལ་ཡང་བསྒྲེ་དགོས་པའི་དོན་ཡིན་ཞིང་། ཚོར་བའི་གནས་ཚུལ་ལ་དཔྱད་པའི་སྔོན་དུ་ཐ་སྙད་བདེན་པ་ཐབས་སུ་གྱུར་པའི་ཚོར་བ་ཁས་ལེན་དགོས་པའི་ཕྱིར་རོ། །དེ་བཞིན་དུ་རྩོད་བཟློག་ལས། གལ་ཏེ་ཆོས་རྣམས་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །གལ་ཏེ་ཁྱོད་ཚིག་རང་བཞིན་བཅས། །ཁྱོད་ཀྱི་དམ་བཅའ་སྔ་མ་ཉམས། །མི་འདྲ་ཉིད་དེ་དེ་ཡིན་ན། །གཏན་ཚིགས་ཁྱད་པར་བརྗོད་པར་བྱོས། །ཞེས་པའི་ལན་དུ་མྱུ་གུ་རང་བཞིན་གྱིས་མེད་པར་ཁས་བླངས་པའི་ཚེ་དེ་ལྟར་བརྗོད་པའི་ཚིག་ཀྱང་རང་བཞིན་མེད་པར་གསུངས་པ་ལ་ཡང་བློ་ཞིབ་མོས་སྦྱར་བ་བྱ་སྟེ། རིགས་པས་དཔྱད་ནས་མྱུ་གུ་མ་རྙེད་པའི་ཚེ་ཚིག་རང་བཞིན་གྱིས་མེད་པར་ཁས་བླངས་པ་ཡིན་གྱི། ཚིག་ཐ་སྙད་ཏུ་མེད་པར་ཁས་ལེན་པ་མ་ཡིན་པའི་ཕྱིར་ཏེ། རིགས་པ་དེ་ཚིག་གི་གནས་ཚུལ་ལ་བསྒྲེ་བའི་ཚེ་དེའི་སྔོན་དུ་ཐ་སྙད་བདེན་པའི་ཚིག་ཁས་ལེན་དགོས་པའི་ཕྱིར་རོ། །མདོར་ན་མྱུ་གུ་ལ་སོགས་པའི་དངོས་པོ་གང་དང་གང་ལ་དེའི་གནས་ཚུལ་ལ་དཔྱད་པའི་སྔོན་དུ་འཇིག་རྟེན་ཉིད་ལྟོས་བདེན་པའི་ཀུན་རྫོབ་ཁས་བླངས་ནས་དཔྱད་པ་ཞུགས་ནས་མ་རྙེད་པའི་ཚེ་བདེན་པ་གཉིས་ཆར་དུ་ཡང་ཁས་མི་ལེན་ལ། དེའི་འོག་ཏུ་སྣང་ཙམ་བློ་ལ་ཤར་བའི་ཚེ། འཇིག་རྟེན་ཉིད་ལྟོས་ལོག་པའི་ཀུན་རྫོབ་དང་། བདེན་རྫུན་གྱི་ཁྱད་པར་མེད་པས་ཁས་ལེན་པའི་རིམ་པ་གསུམ་འབྱུང་བ་ནི་ཆོས་གཅིག་གི་སྟེང་དུ་བདེན་གཉིས་ཁས་ལེན་ཚུལ་གྱི་གནད་དམ་པ་ཡིན་པས་གཟུ་བོས་དཔྱོད་ཅིག གཉིས་པ་ལུང་དང་སྦྱར་བ་ནི། ཅི་སྐད་དུ། དངོས་པོ་གཅིག་གི་ལྟ་པོ་གང་། །དེ་ནི་ཀུན་གྱི་ལྟ་པོར་བརྗོད། །གཅིག་གི་སྟོང་ཉིད་གང་ཡིན་པ། །དེ་ནི་ཀུན་གྱི་སྟོང་ཉིད་ཡིན། །ཞེས་དང་། འཕགས་པ་ནམ་མཁའ་མཛོད་ཀྱི་ཏིང་ངེ་འཛིན་གྱི་མདོ་ལས་ཀྱང་། ཆོས་གཅིག་གི་ནི་ཆོས་རྣམས་ཐམས་ཅད་སྒྱུ་མ་དང་། །སྨིག་རྒྱུ་དང་འདྲ་གཟུང་བྱར་མེད་ཅིང་གསོག་དང་ནི། །བརྫུན་ཞིང་ཐེར་ཟུག་མེད་པར་རྗེས་སུ་རྟོགས་གྱུར་པ། །དེ་ནི་རིང་པོར་མི་ཐོགས་བྱང་ཆུབ་སྙིང་པོར་འགྲོ། །ཞེས་གསུངས་སོ། །དེ་བཞིན་དུ་ཏིང་ངེ་འཛིན་གྱི་རྒྱལ་པོའི་མདོ་ལས་ཀྱང་། ཇི་ལྟར་ཁྱོད་ཀྱིས་བདག་གི་འདུ་ཤེས་ནི། །ཤེས་པ་དེ་བཞིན་ཀུན་ལ་བློས་སྦྱར་བྱ། །ཆོས་རྣམས་ཐམས་ཅད་དེ་ཡི་ངོ་བོ་ཉིད། །རྣམ་པར་དག་པ་ནམ་མཁའ་ལྟ་བུ་ཡིན། །གཅིག་གིས་ཀྱང་ནི་ཐམས་ཅད་ཤེས། །གཅིག་གིས་ཀྱང་ནི་ཐམས་ཅད་མཐོང་། །ཇི་སྙེད་མང་པོ་བཤད་བྱས་ཀྱང་། །དེ་ལ་དྲེགས་པ་སྐྱེ་བ་མེད། །ཞེས་གསུངས་སོ། །འདི་དག་ནི་གཟུགས་ཕུང་གི་གནས་ཚུལ་ལ་དཔྱད་པའི་རིགས་པ་དེ་ཉིད་ཕུང་པོ་གཞན་རྣམས་ལ་ཡང་བསྒྲེ་བའི་ལུང་དུ་སྣང་སྟེ། བསྟན་ཚུལ་ནི་སྔ་མ་དང་འདྲའོ། །གསུམ་པ་ནི་དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་ཕུང་པོ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཞི་པའི་རྣམ་པར་བཤད་པའོ།། །།གསུམ་པ་ཁམས་རང་བཞིན་གྱིས་གྲུབ་པ་དགག་པ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་སྐྱེ་མཆེད་ཕུང་པོ་རྣམས་བཀག་མོད་ཀྱི་རྒྱལ་པོ་ཆེན་པོ་སྐྱེས་བུ་གང་ཟག་འདི་ནི་ཁམས་དྲུག་པའོ། །ཞེས་གང་ཟག་གི་གདགས་གཞིར་གསུངས་པ་དང་། སྔར་དངོས་སུ་མ་བཀག་པས་ཁམས་དྲུག་རང་བཞིན་གྱིས་ཡོད་ལ་སྐྱེ་མཆེད་དང་ཕུང་པོ་ཡང་དེའི་ཁོངས་སུ་འདུས་པས་རང་བཞིན་གྱིས་ཡོད་དོ་སྙམ་པ་ལ་ཁམས་དྲུག་དཔྱད་ན་རང་བཞིན་མེད་པར་བསྟན་པའི་ཕྱིར་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ནམ་མཁའི་ཁམས་རང་བཞིན་གྱིས་གྲུབ་པ་དགག རིག་པ་དེ་གཞན་ལ་བསྒྲེ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གསུམ་སྟེ། མཚན་གཞི་དང་མཚན་ཉིད་དུ་མ་གྲུབ་པ། དངོས་པོ་དང་དངོས་མེད་དུ་མ་གྲུབ་པ། དེ་གཉིས་ཀའི་དོན་བསྡུ་བའོ། །དང་པོ་ལ་གསུམ་སྟེ། མཚན་གཞིར་མ་གྲུབ་པ། མཚན་ཉིད་དུ་མ་གྲུབ་པ། དོན་བསྡུ་བའོ། །དང་པོ་ལ་གཉིས་ཏེ། མཚན་ཉིད་འཇུག་པ་མེད་པ། དེ་མེད་པས་མཚན་གཞི་མི་འཐད་པའོ། །དང་པོ་ལ་གཉིས་ཏེ། མཚན་ཉིད་ཀྱི་སྔོན་རོལ་ན་མཚན་གཞི་མེད་པས་མཚན་གཞི་མི་འཐད། མཚན་ཉིད་དང་བཅས་མ་བཅས་ལ་མཚན་གཞི་མི་འཐད་པའོ། །དང་པོ་ནི། སྔར་མཚན་གཞི་གྲུབ་ན། དེ་ལ་མཚན་ཉིད་འཇུག་པར་འགྱུར་བ་ཞིག་ན། འདིར་ནམ་མཁའི་མཚན་ཉིད་སྒྲིབ་པ་མེད་པའི་སྔོན་རོལ་ན་མཚན་གཞི་ནམ་མཁའ་ཅུང་ཟད་ཀྱང་གྲུབ་པ་ཡོད་པ་མ་ཡིན་ཏེ། གལ་ཏེ་མཚན་ཉིད་སྒྲིབ་པ་མེད་པ་ལས། མཚན་གཞི་ནམ་མཁའ་སྔ་བར་གྱུར་ན། སྔར་གྲུབ་པའི་ནམ་མཁའ་དེ་མཚན་ཉིད་མེད་པར་ཐལ་བར་འགྱུར་བའི་ཕྱིར་རོ། །དེ་ལྟར་ཐལ་བར་འདོད་པ་ནི་མི་ནུས་ཏེ། མཚན་ཉིད་མེད་པའི་ཆོས་སམ་དངོས་པོ་ནི་ཡུལ་དུས་གང་ན་ཡང་ཡོད་པ་མ་ཡིན་པའི་ཕྱིར་ཏེ། རང་རང་གི་ཐ་སྙད་དུ་འཇོག་པའི་རྒྱུ་མཚན་ཐུན་མོང་མ་ཡིན་པའི་ངོ་བོ་མེད་པའི་ཕྱིར་རོ། །དེ་ལྟར་མཚན་ཉིད་མི་སྒྲིབ་པ་མེད་པའི་མཚན་གཞི་ནམ་མཁའི་དངོས་པོ་སྔར་མེད་ན་མཚན་ཉིད་དེ་མཚན་གཞི་གང་དུ་འཇུག་པར་འགྱུར་ཏེ་རྟེན་མེད་པའི་ཕྱིར་རོ། །གཉིས་པ་ནི། གཞན་ཡང་མཚན་ཉིད་འཇུག་ན་སྔར་ནས་མཚན་ཉིད་དེ་མེད་པའམ། དེ་དང་བཅས་པའམ། དེ་གཉིས་ལས་གཞན་པ་ཞིག་ལ་འཇུག་དྲང་། དེ་ལ་མཚན་ཉིད་དེ་སྔར་མེད་པ་ལ་མཚན་ཉིད་ནི་མི་འཇུག་སྟེ། མཚན་ཉིད་མེད་ན་མཚན་ཉིད་འཇུག་པ་འགལ་བའི་ཕྱིར་རོ། །སྔར་ནས་མཚན་ཉིད་དང་བཅས་པ་ལ་ཡང་འཇུག་པ་མ་ཡིན་ཏེ། དོན་མེད་པ་དང་ཐུག་པ་མེད་པར་འགྱུར་བའི་ཕྱིར་རོ། །མཚན་ཉིད་དང་བཅས་པ་དང་མཚན་ཉིད་མེད་པ་ལས་གཞན་ལ་ཡང་འཇུག་པར་མི་འགྱུར་ཏེ། དེ་གཉིས་དངོས་འགལ་ཡིན་པས་ཕུང་པོ་གསུམ་པ་མི་སྲིད་པའི་ཕྱིར་རོ། །གཉིས་པ་ནི། དེ་ལྟར་མཚན་ཉིད་འཇུག་པ་མེད་མོད། མཚན་གཞི་ནམ་མཁའ་ཡོད་དོ་སྙམ་ན་སྔར་བཤད་པའི་ཚུལ་གྱིས་མཚན་ཉིད་འཇུག་པ་མ་ཡིན་ན། མཚན་གཞི་འཐད་པར་མི་འགྱུར་ཏེ། མཚན་གཞི་ནི་མཚན་ཉིད་ཀྱི་རྟེན་བྱེད་པ་ཡིན་པའི་ཕྱིར་རོ། །གཉིས་པ་ནི། གལ་ཏེ་ཁྱོད་ཀྱིས་མཚན་ཉིད་མཚན་གཞི་ལ་འཇུག་པ་བཀག་པ་ཡིན་གྱི་མཚན་ཉིད་དེ་ཉིད་མ་བཀག་པས་ཡོད་དོ་སྙམ་ན་སྔར་བཤད་པའི་ཚུལ་གྱིས་མཚན་གཞི་ནམ་མཁའ་འཐད་པ་མ་ཡིན་པའི་ཕྱིར་ན། བརྟེན་པ་དེའི་མཚན་ཉིད་ཀྱང་ནི་ཡོད་པ་མ་ཡིན་ཏེ། རྟེན་མེད་པའི་ཕྱིར། གསུམ་པ་ནི། མཚན་ཉིད་འཇུག་པ་མི་འཐད་པ་དེའི་ཕྱིར། མཚན་གཞི་ནམ་མཁའ་ཡོད་པ་མིན་ཏེ། རྟེན་མཚན་གཞི་མེད་པས་དེའི་མཚན་ཉིད་ཡོད་པ་ཉིད་མ་ཡིན་ཞེས་པའོ། །གཉིས་པ་དངོས་པོ་དང་དངོས་མེད་དུ་མ་གྲུབ་པ་ནི། བྱེ་བྲག་ཏུ་སྨྲ་བ་དག་ནམ་མཁའ་འདུས་མ་བྱས་པའི་དངོས་པོར་སྨྲ་བ་ལ་ནམ་མཁའ་ནི་དངོས་པོར་མི་རུང་སྟེ། མཚན་གཞི་མཚན་ཉིད་གཉིས་དང་བྲལ་བའི་ཕྱིར། ཁྱབ་སྟེ། མཚན་གཞི་དང་། མཚན་ཉིད་ལས་མ་གཏོགས་པའི་དངོས་པོ་ཡང་ནི་ཡོད་པ་མ་ཡིན་པའི་ཕྱིར། མདོ་སྡེ་པ་དག ནམ་མཁའ་ནི་དོན་བྱེད་མི་ནུས་པས་དངོས་པོར་མེད་པ་ཉིད་དུ་སྨྲ་བ་ལ་ནམ་མཁའ་ནི་ཆོས་ཅན། དེ་ཁོ་ནར་དངོས་པོར་མེད་པའི་རང་བཞིན་དུ་ཡང་མི་རུང་སྟེ། དགག་བྱ་དངོས་པོར་མེད་པའི་ཕྱིར། ཁྱབ་སྟེ་དགག་བྱ་དངོས་པོ་ཉིད་ཡོད་པ་མ་ཡིན་ན། དེ་བཀག་པའི་བཀག་ཆོས་དངོས་མེད་དེ་དགག་བྱ་གང་གི་བཀག་ཆོས་ཡིན་པར་འགྱུར་ཏེ། དགག་བྱ་མེད་པའི་ཕྱིར། རྨི་ལམ་གྱི་བུ་མེད་པས་དེ་ཤི་བ་མི་བདེན་པ་བཞིན་ནོ། །གལ་ཏེ་དེ་ལྟར་དངོས་པོ་དང་དངོས་མེད་ལ་དཔྱད་པ་པོའི་གང་ཟག་ཡོད་པས་དེའི་དཔྱད་བྱ་དངོས་པོ་དང་དངོས་མེད་གཉིས་ཀྱང་ཡོད་པ་ཡིན་ནོ་ཞེ་ན། དེ་གཉིས་ཀྱི་དཔྱོད་པ་པོ་ཉིད་ཀྱང་ཡོད་པ་མ་ཡིན་ཏེ། གལ་ཏེ་ཡོད་ན་དངོས་པོ་དང་དངོས་མེད་དང་། དེ་གཉིས་ཀའི་མི་མཐུན་ཕྱོགས་སུ་གྱུར་པའི་གང་ཟག་གང་གིས་དཔྱད་བྱ་དངོས་པོ་དང་དངོས་མེད་ཤེས་པའམ་དཔྱད་པར་བྱེད་དྲང་། གསུམ་ཀ་ལྟར་ཡང་མི་འཐད་དེ། སྔར་དངོས་པོ་ཙམ་དང་དངོས་མེད་ཙམ་སྤྱིར་བཀག་པའི་ཕྱིར་དང་། དངོས་འགལ་ལ་དགག་ཕྱོགས་ཀྱི་ཕུང་གསུམ་མི་སྲིད་པའི་ཕྱིར་རོ། །གསུམ་པ་དེ་གཉིས་ཀའི་དོན་བསྡུ་བ་ནི། མཚན་ཉིད་འཇུག་པ་མི་འཐད་པ་དེའི་ཕྱིར་ནམ་མཁའ་མཚན་གཞི་མིན་ལ། མཚན་གཞི་མེད་པ་དེའི་ཕྱིར་དེའི་མཚན་ཉིད་ཡོད་པ་མིན་ཅིང་། དེ་གཉིས་མེད་པའི་ཕྱིར་དེ་དངོས་པོ་མིན་ལ་དགག་བྱ་དངོས་པོ་མེད་པ་དེའི་ཕྱིར་དེ་དངོས་མེད་མ་ཡིན་ཞེས་སྦྱར་བར་བྱའོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི་ས་ལ་སོགས་པ་ཁམས་ལྔ་པོ་དག་ཀྱང་ནམ་མཁའ་ལ་དཔྱད་པ་དང་མཚུངས་ཏེ། ས་ཡི་མཚན་ཉིད་སྔ་རོལ་ན། །ས་ནི་ཅུང་ཟད་ཡོད་མ་ཡིན། །ཞེས་སོགས་ཐམས་ཅད་སྔ་མ་ལྟར་སྦྱར་བར་བྱ་བ་ཡིན་པའི་ཕྱིར་རོ། །གསུམ་པ་བཀག་པའི་དོན་དུ་ལྟ་བ་སྨད་པ་ནི་མ་རིག་པའི་རབ་རིབ་ཀྱིས་བློའི་མིག་ཉམས་པའི་བློ་ཆུང་གང་དག་ཕྱི་ནང་གི་དངོས་པོ་ཀུན་རྫོབ་པ་རྣམས་ལ་ཡང་དག་པར་ཡོད་པ་ཉིད་དང་། དེ་བཀག་པའི་མེད་པ་ཉིད་དུ་ལྟ་བའི་གང་ཟག་དེ་ཡིས་ནི་ལྟ་བར་བྱ་བ་དོན་དམ་པ་རང་བཞིན་གྱིས་མྱ་ངན་ལས་འདས་པ་སྤྲོས་པ་ཐམས་ཅད་ཉེ་བར་ཞི་བ་དང་། ཞི་བ་མཐར་ཐུག་པ་མི་མཐོང་སྟེ། དགག་བྱ་སྤྲོས་པའི་མཐའ་ལ་བལྟས་པས་སྤྲོས་བྲལ་ལྟ་བའི་མིག་དང་མི་ལྡན་པའི་ཕྱིར། དམུས་ལོང་བཞིན་ནོ། །གཉིས་པ་ལུང་དང་སྦྱར་བ་ནི། ཏིང་ངེ་འཛིན་གྱི་རྒྱལ་པོའི་མདོ་ལས། ཡོད་དང་མེད་ཅེས་བྱ་བ་གཉིས་ཀ་མཐའ། །དག་དང་མ་དག་འདི་ཡང་མཐའ་ཡིན་ཏེ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་ཡོང་མི་བྱེད། །ཡོད་དང་མེད་ཅེས་བྱ་བར་རྩོད་པ་སྟེ། །དག་དང་མ་དག་འདི་ཡང་རྩོད་པ་ཡིན། །རྩོད་པར་གྱུར་པས་སྡུག་བསྔལ་ཞི་མི་འགྱུར། །རྩོད་པ་མེད་པར་གྱུར་པས་སྡུག་བསྔལ་འགག །ཞེས་གསུངས་ཏེ། འདིས་དངོས་པོ་དང་དངོས་མེད་དུ་གྲུབ་པ་དགག་བྱའི་མཐར་ཐུག་ཏུ་བྱས་ནས་བདེན་གཉིས་ཟུང་འཇུག་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་ཁམས་བརྟག་པ་ཞེས་བྱ་བ་རབ་ཏུ་བྱེད་པ་ལྔ་པའི་རྣམ་པར་བཤད་པའོ།། །།གཉིས་པ་ཆོས་བདག་གི་སྒྲུབ་བྱེད་དགག་པ་ལ་གསུམ་སྟེ། འདོད་ཆགས་དང་ཆགས་པ་དགག འདུས་བྱས་ཀྱི་མཚན་ཉིད་དགག བྱེད་པ་པོ་དང་ལས་དགག་པའོ། །དང་པོ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་སྐྱེ་མཆེད་དང་། ཕུང་པོ་དང་། ཁམས་དག་བཀག་མོད་ཀྱི་དེ་དག་ནི་རང་བཞིན་གྱིས་ཡོད་པ་ཉིད་དེ། དེའི་རྟེན་ཅན་གྱི་ཀུན་ནས་ཉོན་མོངས་པ་དམིགས་པའི་ཕྱིར་རོ། །རྟེན་མེད་ན་བརྟེན་པ་མེད་དེ། མོ་གཤམ་གྱི་བུ་དང་བུ་མོའི་ཉོན་མོངས་པ་བཞིན་ནོ། །ཡང་འདོད་ཆགས་ལ་སོགས་པ་ཀུན་ནས་ཉོན་མོངས་པ་གང་ལ་དམིགས་ནས་སྐྱེ་བའི་རྒྱུ་ནི་ཡོད་པ་ཡིན་ཏེ། མདོ་ལས། དགེ་སློང་དག་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྟག་པར་ལྟུང་བ་ནི་མིག་གིས་གཟུགས་རྣམས་མཐོང་ནས་ཡིད་བདེ་བའི་གནས་སུ་མངོན་པར་ཞེན་པར་འགྱུར་རོ། །དེ་མངོན་པར་ཞེན་པར་གྱུར་ནས་འདོད་ཆགས་བསྐྱེད་པར་བྱེད་དོ། །ཆགས་པར་གྱུར་ནས་ལུས་དང་ངག་དང་ཡིད་ཀྱིས་འདོད་ཆགས་ལས་བྱུང་བའི་ལས་མངོན་པར་འདུ་བྱེད་པར་འགྱུར་རོ་ཞེས་སོགས་རྒྱ་ཆེར་གསུངས་པས་སོ་སྙམ་ན། དེ་དག་ནི་དྲང་བའི་དོན་ཡིན་གྱི་རྣམ་པར་དཔྱད་ན་འདོད་ཆགས་ལ་སོགས་པ་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། འདོད་ཆགས་དང་ཆགས་པ་རང་བཞིན་གྱིས་གྲུབ་པ་དགག རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གསུམ་སྟེ། འདོད་ཆགས་དང་ཆགས་པ་སྔ་ཕྱིར་གྲུབ་པ་དགག ལྷན་ཅིག་ཏུ་གྲུབ་པ་དགག དོན་བསྡུ་བའོ། །དང་པོ་ལ་གཉིས་ཏེ། ཆགས་པ་སྔར་ཡོད་ཀྱི་འདོད་ཆགས་དགག འདོད་ཆགས་སྔར་ཡོད་ཀྱི་ཆགས་པ་དགག་པའོ། །དང་པོ་ནི། འདིར་འདོད་ཆགས་ནི་སེམས་ལས་བྱུང་བའི་ཉོན་མོངས་པ་ཡིན་ལ་ཆགས་པ་ནི་ཆོས་མངོན་པ་ལས་འདོད་ཆགས་ཀྱི་མིང་གི་རྣམ་གྲངས་དང་། བྱམས་ཆོས་དག་ལས་མངོན་པར་ཞེན་པའི་བློ་ཙམ་ལ་བཤད་ཀྱང་། འདིར་ནི་འདོད་ཆགས་དང་མཚུངས་ལྡན་གྱི་གཙོ་སེམས་སུ་བྱས་ནས་བརྟག་པ་སྟེ། འདོད་ཆགས་རང་བཞིན་གྱིས་ཡོད་ན་ཆགས་པ་སྔར་ཡོད་པའམ་མེད་པ་ཞིག་ལ་རྟོག་དྲང་། དང་པོ་ལྟར་ན། གལ་ཏེ་འདོད་ཆགས་ཀྱི་སྔ་རོལ་ན་འདོད་ཆགས་མེད་པའི་ཆགས་པ་ཞིག་ཡོད་ན། རྟེན་ཆགས་པ་གཙོ་སེམས་དེ་ལ་བརྟེན་ནས་བརྟེན་པ་སེམས་བྱུང་འདོད་ཆགས་ཡོད་དུ་རུང་བས་ཆགས་པ་སྔར་ཡོད་པའི་ཕྱིས་འདོད་ཆགས་ཡོད་པར་འགྱུར་བ་ཞིག་ན་ཡང་། འདོད་ཆགས་མེད་པའི་ཆགས་པ་ནི་སྲིད་པ་ཡང་མ་ཡིན་ཏེ། འཕགས་པ་དགྲ་བཅོམ་པ་རྣམས་ལ་ཡང་ཆགས་པ་ཡོད་པར་འགྱུར་བའི་ཕྱིར་རོ། །གཉིས་པ་ལྟར་ན་རྟེན་ཆགས་པ་སྔར་ཡོད་པར་མ་གྱུར་ན་ཡང་བརྟེན་པ་འདོད་ཆགས་ཡོད་པར་ག་ལ་འགྱུར་ཏེ། རྟེན་མེད་པའི་ཕྱིར། ཤིང་ཐོག་མེད་ན་དེའི་སྨིན་པ་མེད་པ་བཞིན་ནོ། །གཉིས་པ་ནི། དེ་ལྟར་འདོད་ཆགས་མེད་མོད་ཆགས་པ་ཡོད་དོ་ཞེས་ཀྱང་བརྟག་པར་མི་ནུས་ཏེ། ཆགས་པ་སྔར་ཡོད་མེད་ཀྱི་འདོད་ཆགས་མི་འཐད་པའི་རིམ་པ་འདི་ཉིད་རྟེན་ཆགས་པ་ལ་ཡང་བརྟེན་པ་འདོད་ཆགས་ནི་སྔར་ཡོད་པ་ལ་འདོད་དམ། འོན་ཏེ་མེད་ཀྱང་འདོད་ཅེས་དཔྱད་ན་གལ་ཏེ་ཆགས་པའི་སྔ་རོལ་ན་ཞེས་སོགས་འདོན་པ་བསྒྱུར་བས་མི་འཐད་པར་མཚུངས་པའི་ཕྱིར་རོ། །གཉིས་པ་ལྷན་ཅིག་ཏུ་གྲུབ་པ་དགག་པ་ལ་གཉིས་ཏེ། ཕན་ཚུན་ལྟོས་མེད་དུ་ཐལ་བས་དགག་པ། གཅིག་དང་ཐ་དད་ལ་ལྟོས་ནས་དགག་པའོ། །དང་པོ་ནི་བྱེ་བྲག་སྨྲ་བ་ནི་དེ་གཉིས་སྔ་ཕྱིར་འབྱུང་བ་མ་ཡིན་གྱི། ལྷན་ཅིག་འབྱུང་གང་ཕན་ཚུན་འབྲས། །ཞེས་པའི་ཚུལ་གྱིས་ལྷན་ཅིག་ཏུ་འབྱུང་བའི་རྒྱུ་འབྲས་ཡིན་པས་རང་བཞིན་གྱིས་ཡོད་དོ་ཞེ་ན། འདོད་ཆགས་དང་ནི་ཆགས་པ་དག ལྷན་ཅིག་ཉིད་དུ་སྐྱེ་མི་སྲིད་དེ། རྒྱུ་མཚན་འདི་ལྟར་ལྷན་ཅིག་ཏུ་འབྱུང་ན་རྭ་གཡས་གཡོན་ལྟར་འདོད་ཆགས་དང་ཆགས་པ་དག་ཕན་ཚུན་ལྟོས་པ་མེད་པར་འགྱུར་བའི་ཕྱིར་རོ། །གཉིས་པ་ལ་གཉིས་ཏེ། གཅིག་དང་ཐ་དད་ལ་ལྷན་ཅིག་སྤྱིར་དགག ཐ་དད་ལ་ལྷན་ཅིག་བྱེ་བྲག་ཏུ་དགག་པའོ། །དང་པོ་ནི། རེ་ཤིག་འདོད་ཆགས་དང་ཆགས་པ་གཉིས་ངོ་བོ་གཅིག་པའམ། ཐ་དད་པ་ཞིག་ལ་ལྷན་ཅིག་རྟོག་དྲང་། དང་པོ་ལྟར་ན་དེ་གཉིས་ལ་ལྷན་ཅིག་ཉིད་མེད་དེ། ངོ་བོ་གཅིག་པ་ཉིད་ཀྱི་ཕྱིར་རོ། །ཁྱབ་སྟེ། ལྷན་ཅིག་པ་ལ་འདི་ཉིད་འདི་དང་ལྷན་ཅིག་ཞེས་ཐ་དད་པས་ཁྱབ་པས་ན་དེ་ཉིད་དེ་དང་ལྷན་ཅིག་ཏུ་རུང་བ་མིན་པའི་ཕྱིར་རོ། །གཉིས་པ་ལྟར་ན་ཅི་སྟེ་ངོ་བོ་ཐ་དད་པ་ཉིད་ཡིན་ན་ཡང་ལྷན་ཅིག་ཉིད་དུ་ཅི་ལྟར་འགྱུར་ཏེ། ལྷན་ཅིག་ལ་དངོས་པོ་ཐ་དད་ཡུལ་དུས་གཅིག་ཏུ་ཚོགས་པ་དགོས་པས་དངོས་པོ་ཐ་དད་ཡུལ་དུས་གཅིག་པར་འགལ་བའི་ཕྱིར་རོ། །གཞན་ཡང་དེ་གཉིས་ཧ་ཅང་ཐལ་བས་དགག་པ་ནི་གལ་ཏེ་ངོ་བོ་གཅིག་པོ་ཞིག་ལ་ལྷན་ཅིག་འདོད་ན། གྲོགས་གཞན་མེད་པར་ལྷ་བྱིན་གཅིག་པོ་གནས་པ་ཡང་ལྷན་ཅིག་པ་དེར་འགྱུར་རོ། །ཡང་གལ་ཏེ་ངོ་བོ་ཐ་དད་པ་ལ་ལྷན་ཅིག་འདོད་ན་ཤར་ནུབ་ཀྱི་རིའི་རྟ་དང་བ་ལང་ལྟར་ཕན་ཚུན་གྲོགས་སུ་གནས་པ་མེད་པར་ཡང་ལྷན་ཅིག་པར་དེར་འགྱུར་རོ། །གཉིས་པ་ལ་གསུམ་སྟེ། ཐ་དད་མ་གྲུབ་པས་ལྷན་ཅིག་མི་གྲུབ་པ། ཐ་དད་གྲུབ་ན་ལྷན་ཅིག་བརྟག་པ་དོན་མེད་པ། བསྒྲུབ་བྱ་སྒྲུབ་བྱེད་དུ་བྱས་ན་རྟོགས་པ་ཕན་ཚུན་བརྟེན་པར་ཐལ་བའོ། །དང་པོ་ནི། གལ་ཏེ་ངོ་བོ་ཐ་དད་ལ་ལྷན་ཅིག་འདོད་ན་དེ་ཡང་མི་འཐད་དེ། འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་དུ་གྲུབ་པ་དེས་ན་དེ་གཉིས་ལྷན་ཅིག་ཏུ་འགྱུར་བ་ཞིག་ན་ཡང་གཅིག་གོ་འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་དུ་འགྱུར་རམ་སྟེ་མ་གྲུབ་པའི་ཕྱིར་རོ། །གཉིས་པ་ནི། གལ་ཏེ་ཐ་དད་པ་མ་གྲུབ་པ་ལ་ལྷན་ཅིག་མི་རུང་བས་འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་ཉིད་དུ་གྲུབ་པར་འདོད་པར་གྱུར་ན་དེ་གཉིས་རང་བཞིན་གྱིས་ཡོད་པར་བསྒྲུབ་པའི་ཕྱིར་དུ་ལྷན་ཅིག་ཉིད་དུ་ནི་ཅིའི་ཕྱིར་ན་ཡོངས་སུ་རྟོག་པར་བྱེད་དེ། སྔར་དེ་གཉིས་སྔ་ཕྱིར་མི་རུང་བས་རང་བཞིན་མེད་དོ་ཞེས་བསྟན་པ་ལ་དེ་གཉིས་ལྷན་ཅིག་ཏུ་ཡོད་པས་རང་བཞིན་དུ་ཡོད་དོ་ཞེས་ཀྱང་སྨྲས། ཕྱིས་ཕན་ཚུན་ལྟོས་མེད་ཀྱི་ཐ་དད་དུ་མ་གྲུབ་པ་ལ་ལྷན་ཅིག་མི་རུང་ཞེས་བསྟན་པ་ལ་ཕན་ཚུན་ལྟོས་མེད་ཀྱི་ཐ་དད་དུ་གྲུབ་པར་ཡང་སྨྲས་པའི་ཕྱིར་རོ། །གསུམ་པ་ནི་ལྷན་ཅིག་དོན་མེད་པར་མི་འགྱུར་ཏེ། དེ་ལ་མ་ལྟོས་པར་ཐ་དད་ཉིད་གྲུབ་པར་མ་གྱུར་པས་ཐ་དད་དུ་བསྒྲུབ་པ་དེའི་ཕྱིར་ལྷན་ཅིག་དེའི་སྒྲུབ་བྱེད་དུ་འདོད་ན་ནི། ལྷན་ཅིག་རབ་ཏུ་སྒྲུབ་པར་བྱེད་པའི་ཕྱིར། ཐ་དད་པ་ཉིད་དེའི་སྒྲུབ་བྱེད་དུ་ཡང་འདོད་དམ་སྟེ། འདོད་རིག་པར་ཐལ། གཅིག་ཉིད་ལྷན་ཅིག་ཉིད་མེད་དེ། །ཞེས་པའི་ཚུལ་གྱིས་ཐ་དད་པར་མ་གྲུབ་པ་ལ་ལྷན་ཅིག་ཉིད་མི་རུང་བས་སོ། །འདོད་ན། ཐ་དད་དངོས་པོ་གང་ཡོད་ན་ལྷན་ཅིག་དངོས་པོ་འདོད་པར་བྱེད་དེ། ཐ་དད་ལ་ལྟོས་ནས་ལྷན་ཅིག་མི་འགྲུབ་སྟེ། སྒྲུབ་བྱེད་ཐ་དད་ཉིད་ཀྱང་བསྒྲུབ་བྱ་ལྷན་ཅིག་ལ་ལྟོས་པས་ན་སྒྲུབ་བྱེད་ཐ་དད་ཀྱི་དངོས་པོར་སྔར་མ་གྲུབ་པས་བསྒྲུབ་བྱ་ལྷན་ཅིག་པའི་དངོས་པོར་འགྲུབ་པར་མི་འགྱུར་བའི་ཕྱིར། གསུམ་པ་དོན་བསྡུ་བ་ནི། འདོད་ཆགས་དང་ནི་ཆགས་པ་དག ལྷན་ཅིག་དང་ལྷན་ཅིག་མ་ཡིན་པར་མི་འགྲུབ་སྟེ། སྔར་བཤད་པའི་ཚུལ་དེ་ལྟར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། འདོད་ཆགས་དེ་རྟེན་ཆགས་པ་དང་ལྷན་ཅིག་དང་། ལྷན་ཅིག་མ་ཡིན་པར་མ་གྲུབ་པ་དེ་བཞིན་དུ་ཞེ་སྡང་ལ་སོགས་པ་ལྟོས་བཅས་ཀྱི་ཆོས་རྣམས་ཀུན་རྟེན་སྡང་བ་ལ་སོགས་པ་རང་རང་གི་ལྟོས་ས་དང་ལྷན་ཅིག་དང་། ལྷན་ཅིག་མ་ཡིན་པར་མི་འགྲུབ་པས་བརྟེན་ནས་འབྱུང་བའི་ཆོས་ཐམས་ཅད་རང་བཞིན་སྟོང་པ་ཉིད་དུ་གྲུབ་སྟེ། གལ་ཏེ་ཞེ་སྡང་སྔ་རོལ་ན། །ཞེ་སྡང་མེད་པའི་སྡང་ཡོད་ན། །ཞེས་སོགས་ཐམས་ཅད་ལ་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། དེ་ཉིད་ཀྱི་ཕྱིར་བཅོམ་ལྡན་འདས་ཀྱིས། གང་འདོད་ཆགས་པ་དང་། གང་ལ་འདོད་ཆགས་པ་དང་། གང་གིས་འདོད་ཆགས་པ་དང་། གང་ཞེ་སྡང་བ་དང་། གང་ལ་ཞེ་སྡང་བ་དང་། གང་གིས་ཞེ་སྡང་བ་དང་། གང་གཏི་མུག་པ་དང་། གང་ལ་གཏི་མུག་པ་དང་། གང་གིས་གཏི་མུག་པར་འགྱུར་བའི་ཆོས་དེ་དེས་ཡང་དག་པར་རྗེས་སུ་མི་མཐོང་ཞིང་ཆོས་དེ་མི་དམིགས་སོ། །དེས་ཆོས་དེ་ཡང་དག་པར་རྗེས་སུ་མ་མཐོང་ཞིང་མ་དམིགས་པས་འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། སེམས་ཕྱིན་ཅི་མ་ལོག་པ། མཉམ་པར་བཞག་པ་ཞེས་བྱའོ། །བརྒལ་བ་ཕ་རོལ་ཏུ་ཕྱིན་པ་ཞེས་བྱའོ། །བདེ་བར་སོན་པ་ཞེས་བྱའོ། །མི་འཇིགས་པ་ཐོབ་པ་ཞེས་བྱ་བ་ནས་ཟག་པ་ཟད་པ་ཞེས་བྱའོ། །ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པའི་དགེ་སྦྱོང་ཞེས་བྱའོ། །ཞེས་བྱ་བའི་བར་དུ་རྒྱ་ཆེར་གསུངས་སོ། །དེ་བཞིན་དུ། གང་དག་འདོད་ཆགས་ཞེ་སྡང་རྒྱགས་དང་གཏི་མུག་གི །ངོ་བོ་ཀུན་རྟོག་གིས་སྐྱེད་ལོག་པར་ཞུགས་ཤེས་ནས། །རྣམ་པར་རྟོག་པ་མི་བྱེད་ཆགས་བྲལ་མི་འགྱུར་བའི། །བགོམ་པ་དེ་དག་གནས་ནི་དངོས་པོ་ཐམས་ཅད་ཡིན། །ཞེས་གསུངས་ཏེ། བསྟན་ཚུལ་ནི་སྔ་མ་ལྟར་ཤེས་བར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་འདོད་ཆགས་དང་ཆགས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་དྲུག་པའི་རྣམ་པར་བཤད་པའོ།། །།གཉིས་པ་འདུས་བྱས་ཀྱི་མཚན་ཉིད་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི་ཕུང་ཁམས་སྐྱེ་མཆེད་འདུས་བྱས་ཀྱི་རང་བཞིན་ཅན་དག་ནི་ཡོད་པ་ཉིད་དེ། སྤྲིན་ཆེན་པོའི་མདོ་ལས། དགེ་སློང་དག་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དག་སྟེ། འདུས་བྱས་ནི་སྐྱེ་བ་དང་། འཇིག་པ་དང་། གནས་པ་ལས་གཞན་དུ་འགྱུར་བ་ཡང་མངོན་ནོ། །ཞེས་གསུངས་པས་དེ་དག་འདུས་བྱས་སུ་མཚོན་པའི་མཚན་ཉིད་སྐྱེ་གནས་འཇིག་པ་རང་བཞིན་གྱིས་ཡོད་པས་སོ་སྙམ་པ་ལ། དེ་དག་རང་བཞིན་གྱིས་གྲུབ་པ་དགག་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། འདུས་བྱས་རང་བཞིན་གྱིས་གྲུབ་པ་དགག དེས་འདུས་མ་བྱས་ཁེགས་པར་བསྟན་པ། བཀག་པའི་དོན་ལ་ལུང་འགལ་སྤང་བའོ། །དང་པོ་ལ་གཉིས་ཏེ། མཚན་ཉིད་སྐྱེ་གནས་འཇིག་གསུམ་དགག དེས་མཚན་གཞི་འདུས་བྱས་ཁེགས་པར་བསྟན་པའོ། །དང་པོ་ལ་གཉིས་ཏེ། ཐུན་མོང་དུ་དགག སོ་སོར་དགག་པའོ། །དང་པོ་ལ་གསུམ་སྟེ། འདུས་བྱས་ཡིན་མིན་བརྟགས་ནས་དགག རེ་རེ་བ་དང་ཚོགས་པ་གང་གིས་མཚོན་བརྟགས་ནས་དགག མཚན་ཉིད་གཞན་ཡོད་མེད་བརྟགས་ནས་དགག་པའོ། །དང་པོ་ནི། བྱེ་བྲག་ཏུ་སྨྲ་བ་དག བུམ་པ་ལྟ་བུ་འདུས་བྱས་སུ་མཚོན་པ་ལ་སྐྱེ་བ་དང་། གནས་པ་དང་། འཇིག་པ་གསུམ་དེའི་མཚན་ཉིད་དུ་གནས་ཤིང་། མཚན་གཞི་ལས་ངོ་བོ་གཞན་དུ་གྱུར་པའི་སྐྱེ་སོགས་ཡིན་པར་ཡང་སྨྲའོ། །དེ་ལྟར་ན་སྐྱེ་བ་འདུས་བྱས་སམ་འདུས་མ་བྱས་གང་དེའི་མཚན་ཉིད་དུ་རྟོག་དྲང་། དེ་ལ་གལ་ཏེ་སྐྱེ་བ་འདུས་བྱས་ཡིན་ན། བུམ་པ་ལྟར་དེ་ལ་ཡང་སྐྱེ་བ་ལ་སོགས་པའི་མཚན་ཉིད་གསུམ་དང་ལྡན་པར་འགྱུར་ཏེ། དེ་འདུས་བྱས་ཡིན་པའི་ཕྱིར། འདོད་མི་ནུས་ཏེ། དེ་ལྟར་ན་འདུས་བྱས་ཀྱི་མཚན་གཞིར་འགྱུར་བས་དེ་མཚན་ཉིད་ཡིན་པ་ཉམས་པའི་ཕྱིར་རོ། །ཅི་སྟེ་སྐྱེ་བ་འདུས་མ་བྱས་ཡིན་ན། དེ་ཅི་ལྟར་འདུས་བྱས་ཀྱི་མཚན་ཉིད་ཡིན་ཏེ། ནམ་མཁའ་ལྟར་མཚན་གཞི་འདུས་བྱས་ལ་མི་སྲིད་པའི་ཕྱིར་རོ། །ལྷག་མ་གཉིས་པོ་ལའང་གལ་ཏེ་གནས་པ་འདུས་བྱས་ན་ཞེས་སོགས་སྦྱར་བར་བྱའོ། །གཉིས་པ་ནི། ཆོས་གསུམ་པོ་རེ་རེ་བའམ་འདུས་པ་ཞིག་དེའི་མཚན་ཉིད་དུ་རྟོག་དྲང་། དང་པོ་ལྟར་ན་སྐྱེ་བ་ལ་སོགས་པ་གསུམ་པོ་སོ་སོ་སྟེ་རེ་རེ་བ་ཡིས་འདུས་བྱས་ཀྱི་མཚན་ཉིད་བྱ་བར་ནི་ནུས་པ་མ་ཡིན་སྟེ། ཆོས་གཉིས་དང་བྲལ་བས་འདུས་མ་བྱས་སུ་འགྱུར་བའི་ཕྱིར་དང་། མ་སྐྱེས་པ་དང་། རང་དུས་སུ་མི་གནས་པ་དང་། རྟག་པ་འདུས་བྱས་སུ་མི་རུང་བའི་ཕྱིར་རོ། །གཉིས་པ་ལྟར་ན་དངོས་པོ་གཅིག་ལ་དུས་གཅིག་ཏུ་དེ་གསུམ་འདུས་པར་ཡང་ནི་ཅི་ལྟར་རུང་བར་འགྱུར་ཏེ། བྱ་བ་འགལ་བའི་ཕྱིར་སྣང་མུན་བཞིན་ནོ། །གསུམ་པ་ལ་གཉིས་ཏེ་ཧ་ཅང་ཐལ་བར་འགོད། དེའི་ཉེས་སྤོང་དགག་པའོ། །དང་པོ་ནི། གཞན་ཡང་གལ་ཏེ་སྐྱེ་བ་དང་། གནས་པ་དང་། འཇིག་པ་རྣམས་ལ་ཡང་འདུས་བྱས་ཀྱི་མཚན་ཉིད་སྐྱེ་གནས་འཇིག་པ་གཞན་ཞིག་ནི་ཡོད་ན་འདུས་བྱས་ཀྱི་མཚན་ཉིད་ཐུག་པ་མེད་པར་འགྱུར་ཏེ། དེ་ལ་ཡང་འདུས་བྱས་ཀྱི་མཚན་ཉིད་གཞན་ཡོད་དགོས་པའི་ཕྱིར་རོ། །གལ་ཏེ་སྐྱེ་སོགས་གསུམ་ལ་མཚན་ཉིད་གཞན་མེད་ན་དེ་དག་འདུས་བྱས་མིན་པར་འགྱུར་ཏེ། འདུས་བྱས་ཀྱི་མཚན་ཉིད་དང་བྲལ་བའི་ཕྱིར། འདོད་ན་འདུས་བྱས་མཚོན་མི་ནུས་པར་འགྱུར་རོ། །གཉིས་པ་ལ་གཉིས་ཏེ། ཐལ་བ་དང་པོའི་ཉེས་སྤོང་དགག་པ། ཐལ་པ་གཉིས་པའི་ཉེས་སྤོང་དགག་པའོ། །དང་པོ་ལ་གཉིས་ཏེ། ཉེས་སྤོང་བརྗོད། དེ་དགག་པའོ། །དང་པོ་ནི། ཁ་ཆེ་བྱེ་བྲག་ཏུ་སྨྲ་བ་ན་རེ། མཚན་ཉིད་སྐྱེ་གནས་འཇིག་པ་ལ་སྐྱེ་བའི་སྐྱེ་བ་སོགས་མཚན་ཉིད་གཞན་གསུམ་ཡོད་པས་ཉེས་པ་གཉིས་པ་མེད་ལ་ཐུག་མེད་དུ་ཡང་མི་འགྱུར་ཏེ། མཚན་ཉིད་སྐྱེ་སོགས་དང་། རྗེས་མཐུན་གྱི་མཚན་ཉིད་རྣམས་ཕན་ཚུན་བསྒྲུབ་པར་བྱེད་པའི་ཕྱིར། འདི་ལྟར་མཚན་གཞི་འདུས་བྱས་དེ་ཉིད་དང་། མཚན་ཉིད་སྐྱེ་སོགས་གསུམ་དང་རྗེས་མཐུན་གྱི་མཚན་ཉིད་སྐྱེ་བའི་སྐྱེ་བ་སོགས་གསུམ་སྟེ་ཆོས་བདུན་ཡོད་པ་ལས་སྐྱེ་བའི་སྐྱེ་བས་རྩ་བའི་སྐྱེ་བ་འབའ་ཞིག་བསྐྱེད་པར་བྱེད་ལ། རྩ་བའི་སྐྱེ་བས་སྐྱེ་བའི་སྐྱེ་བ་ལ་སོགས་པ་རང་ཉིད་ལས་གཞན་པའི་ཆོས་དྲུག་སྐྱེད་པར་བྱེད་པ་ཡིན་ནོ། །དེ་བཞིན་དུ་གནས་པའི་གནས་པས་རྩ་བའི་གནས་པ་ཉིད་དང་། རྩ་བའི་གནས་པས་ཆོས་གཞན་དྲུག་གནས་པར་བྱེད་ལ། འཇིག་པའི་འཇིག་པས་རྩ་བའི་འཇིག་པ་ཉིད་དང་། རྩ་བའི་འཇིག་པས་ཆོས་གཞན་དྲུག་འཇིག་པར་བྱེད་པས་མཚན་ཉིད་གསུམ་དང་། རྗེས་མཐུན་གྱི་མཚན་ཉིད་གསུམ་གྱིས་ཆོས་བདུན་པོ་རེ་རེ་ཡང་དང་པོ་བསྐྱེད། བར་དུ་གནས། ཐ་མར་འཇིག་པར་བྱེད་པས་དེ་དག་འདུས་བྱས་སུ་མཚོན་ཞིང་། གཞི་མཚན་གཉིས་རྫས་ཐ་དད་དང་བྱ་བྱེད་རང་དབང་བར་འདོད་པ་ཡིན་ནོ། །མཛོད་ལས། དེ་དག་སྐྱེ་བའི་སྐྱེ་ལ་སོགས། །དེ་ཆོས་བརྒྱད་དང་གཅིག་ལ་འཇུག །ཅེས་བཤད་པ་ནི་གནས་པ་ལས་གཞན་དུ་འགྱུར་བ་རྒ་བ་ཡིན་པས་དང་། འདིར་གནས་པའི་ཡན་ལག་ཏུ་བསྡུས་ཏེ་མཚན་ཉིད་གསུམ་དུ་བྱས་པ་ཡིན་པས་དོན་གཅིག་གོ །འདིར་འགྲེལ་པར། མཚན་ཉིད་བདུན། རྗེས་མཐུན་པའི་མཚན་ཉིད་བདུན། མཚན་གཞི་དང་ཆོས་བཅོ་ལྔར་ཕྱེ་ནས་དེ་ཆོས་བཅུ་བཞི་དང་གཅིག་ལ་འཇུག་ཅེས་པའི་དོན་དུ་འཆད་པ་ནི་རྩ་བར་མི་སྣང་ངོ་ཞེས་རྨ་བྱ་གསུང་ཡང་འགྲེལ་པར། མང་པོས་བཀུར་བའི་སྡེ་པའི་འདོད་པར་བྱས་ནས། མཚན་གཞི་ཆོས་དེ་ཉིད་དང་། དེའི་མཚན་ཉིད་སྐྱེ་བ་དང་། ལྡན་པ་དང་། གནས་པ་དང་། རྒ་བ་དང་། མི་རྟག་པ་དང་ལྔ། གལ་ཏེ་ཆོས་དེ་ཉོན་མོངས་ཅན་ཞིག་ཡིན་ན། ཉོན་མོངས་ཅན་དེ་ཉིད་དང་། དེའི་ལོག་པའི་རྣམ་པར་གྲོལ་བ་དང་བདུན། འོན་ཏེ་དགེ་བ་ཞིག་ཡིན་ན། དགེ་བ་དེ་ཉིད་དང་། དེའི་ཡང་དག་པའི་རྣམ་པར་གྲོལ་བ་དང་བདུན། གལ་ཏེ་ངེས་པར་འབྱུང་བ་ཞིག་ཡིན་ན། ངེས་འབྱུང་དེ་ཉིད་དང་། དེའི་ངེས་པར་འབྱུང་བ་ཉིད་དང་བདུན། གལ་ཏེ་ངེས་པར་འབྱུང་བ་མ་ཡིན་པ་ཞིག་ཡིན་ན་ནི། ངེས་འབྱུང་མིན་པ་དེ་ཉིད་དང་། དེའི་ངེས་པར་འབྱུང་བ་མ་ཡིན་པ་ཉིད་དང་བདུན་སྟེ། དེ་དག་ནི་མཚན་གཞི་འདུས་བྱས་གང་ཡིན་པ་དེའི་འཁོར་ཡིན་ལ། སྐྱེ་བའི་སྐྱེ་བ་སོགས་ནི་འཁོར་གྱི་འཁོར་ཡིན་པས་འཁོར་དང་བཅས་པའི་དབང་དུ་བྱས་པ་ཡིན་ལ། དེ་དག་བསྡུ་ན། མཛོད་ལས་གསུངས་པ་ལྟར་ཆོས་དགུར་འགྱུར་ཞིང་། དེ་ཡང་བསྡུ་ན་འདིར་བཤད་པ་ལྟར་ཆོས་བདུན་དུ་འགྱུར་བའི་དོན་ཡིན་པས་འགྲེལ་པས་རང་གི་བྱ་བ་བྱས་པ་ཡིན་ནོ། །གཉིས་པ་ལ་གསུམ་སྟེ། སྐྱེ་བའི་སྐྱེ་བས་རྩ་བའི་སྐྱེ་བ་བསྐྱེད་པ་དགག རྩ་བའི་སྐྱེ་བས་སྐྱེ་བའི་སྐྱེ་བ་བསྐྱེད་པ་དགག དེ་གཉིས་ཀའི་ལན་དགག་པའོ། །དང་པོ་ནི། གལ་ཏེ་ཁྱོད་ཀྱི་ལྟར་ན་སྐྱེ་བའི་སྐྱེ་བས་རྩ་བའི་སྐྱེ་བ་བསྐྱེད་པར་བྱེད་ན། ཁྱེད་འདོད་པའི་སྐྱེ་བའི་སྐྱེ་བ་དེས་ཆོས་ཅན། རྩ་བའི་སྐྱེ་བ་དེ་ནི་ཅི་ལྟར་བསྐྱེད་པར་བྱེད་དེ་མི་བྱེད་པར་ཐལ། དེའི་སྔར་མ་གྲུབ་པའི་ཕྱིར། རྟགས་ཁས་བླངས་ཏེ། དེ་རྩ་བའི་སྐྱེ་བ་ལ་ལྟོས་པས། དེའི་སྔར་རྩ་བའི་སྐྱེ་བས་མ་བསྐྱེད་པའི་ཕྱིར་རོ། །གཉིས་པ་ནི། གལ་ཏེ་ཁྱོད་ཀྱི་ལྟར་ན་རྩ་བའི་སྐྱེ་བ་ཡིས་བསྐྱེད་པའི་སྐྱེ་བའི་སྐྱེ་བ་དེ་ཡིས་རྩ་བའི་སྐྱེ་བ་བསྐྱེད་པའི་ཕྱིར་ཉེས་པ་དེ་མེད་དོ་སྙམ་ན། སྐྱེ་བའི་སྐྱེ་བ་དེའི་སྔར་མ་གྲུབ་པའི་རྩ་བའི་སྐྱེ་བ་དེས་ཆོས་ཅན། སྐྱེ་བའི་སྐྱེ་བ་དེ་ནི་ཅི་ལྟར་སྐྱེད་པར་བྱེད་དེ། དེའི་སྔར་མ་གྲུབ་པའི་ཕྱིར་རོ། །གཏན་ཚིགས་ཁས་བླངས་ཏེ། དེ་སྐྱེ་བའི་སྐྱེ་བ་ལ་ལྟོས་པས་སྔར་སྐྱེ་བའི་སྐྱེ་བ་དེས་མ་བསྐྱེད་པའི་ཕྱིར་རོ། །གསུམ་པ་ནི། གལ་ཏེ་ཁོ་བོ་ཅག་དུས་གསུམ་རྫས་སུ་འདོད་པས་མ་འོངས་པ་ན་རྩ་བའི་སྐྱེ་བ་སྐྱེ་བཞིན་པ་ཡོད་པ་དེས་སྐྱེ་བའི་སྐྱེ་བ་བསྐྱེད་པར་བྱེད་ལ། སྐྱེ་བའི་སྐྱེ་བ་དེས་རྩ་བའི་སྐྱེ་བ་མ་འོངས་པ་ན་ཡོད་པ་དེ་ཉིད་སྐྱེད་པར་བྱེད་དེ། ཕན་ཚུན་དབུལ་བ་དང་འདྲེན་པར་བྱེད་པས་ཕ་བུ་ཐོག་ཁར་འགྲོ་བ་བཞིན་ནོ་སྙམ་ན། རྩ་བའི་སྐྱེ་བ་སྐྱེ་བཞིན་པས་སྐྱེ་བའི་སྐྱེ་བ་བསྐྱེད་པར་མི་རིགས་ཏེ། གལ་ཏེ་རང་ཉིད་མ་སྐྱེས་ཤིང་མེད་པ་དེ་ཡིས་མ་སྐྱེས་པ་གཞན་དེ་སྐྱེད་པར་ནི་བྱེད་ནུས་ན་ཁྱོད་ཀྱི་རྩ་བའི་སྐྱེ་བ་སྐྱེ་བཞིན་པ་མ་སྐྱེས་ཤིང་། མེད་པ་དེ་ཡིས་སྐྱེ་བའི་སྐྱེ་བ་དེ་བསྐྱེད་པར་ནི་འདོད་ལ་རག་ན་ཡང་རང་ཉིད་མ་སྐྱེས་ཤིང་མེད་པས་མ་སྐྱེས་པ་གཞན་སྐྱེད་པར་ཡང་མི་ནུས་པའི་ཕྱིར། སྐྱེ་བའི་སྐྱེ་བ་སྐྱེ་བཞིན་པས་རྩ་བའི་སྐྱེ་བ་བསྐྱེད་པ་ལ་ཡང་དེ་བཞིན་དུ་བརྗོད་པར་བྱ་ཞིང་། ལྷག་མ་གཉིས་པོ་ལ་ཡང་གལ་ཏེ་ཁྱོད་ཀྱི་གནས་པའི་གནས། རྩ་བའི་གནས་པ་གནས་བྱེད་ན་ཞེས་སོགས་སྦྱར་བར་བྱའོ། །གཉིས་པ་ལ་གཉིས་ཏེ། ཉེས་སྤོང་བརྗོད། དེ་དགག་པའོ། །དང་པོ་ནི། མདོ་སྡེ་པ་ན་རེ། འདུས་བྱས་ཀྱི་མཚན་ཉིད་སྐྱེ་གནས་འཇིག་པ་ལ། མཚན་ཉིད་སྐྱེ་གནས་འཇིག་པ་གཞན་མེད་པས་ཐུག་མེད་དུ་མི་འགྱུར་ལ། འདུས་མ་བྱས་སུ་ཡང་མི་འགྱུར་ཏེ། ཇི་ལྟར་མར་མེ་སྣང་བའི་རང་བཞིན་ཡིན་པས་རང་དང་གཞན་གཉིས་ཀ་སྣང་བར་བྱེད་པ་དེ་བཞིན་དུ་སྐྱེ་བའི་བྱ་བ་ཡང་སྐྱེ་བའི་རང་བཞིན་ཡིན་པའི་ཕྱིར། རང་དང་གཞན་གྱི་དངོས་པོ་གཉིས་ཀ་བསྐྱེད་པར་བྱེད་པར་ཡིན་པའི་ཕྱིར་རོ། །དེ་བཞིན་དུ་གནས་པས་རང་དང་གཞན་གཉིས་ཀ་གནས་པ་དང་། འཇིག་པས་རང་དང་གཞན་གཉིས་ཀ་འཇིག་པ་ཡང་སྦྱར་བར་བྱའོ་ཞེས་ཟེར་རོ། །གཉིས་པ་ལ་གཉིས་ཏེ། དཔེ་མ་གྲུབ་པ་དང་། དོན་མི་འཐད་པའོ། །དང་པོ་ལ་གཉིས་ཏེ། ཁྱབ་བྱེད་མ་དམིགས་པས་དགག ཧ་ཅང་ཐལ་བས་དགག་པའོ། །དང་པོ་ནི། རྣམ་པར་དཔྱད་ན་མར་མེས་རང་དང་གཞན་སྣང་བར་བྱེད་པའི་དཔེ་མ་གྲུབ་སྟེ། འདི་ལྟར་མར་མེས་ཆོས་ཅན། རང་དང་གཞན་ཅི་ཞིག་སྣང་བར་བྱེད་དེ། རང་དང་གཞན་ལ་མུན་པ་མ་བསལ་བའི་ཕྱིར་ཏེ། སྣང་མུན་ཡུལ་གཅིག་ཏུ་འགལ་བས་མར་མེ་དང་ནི་ཡུལ་གཞན་གང་དག་ལ་མར་མེ་དེ་འདུག་པ་ན་བསལ་བྱའི་མུན་པ་མེད་པའི་ཕྱིར་རོ། །མུན་པ་མ་བསལ་ཡང་སྣང་བྱེད་ཡིན་པ་ཅི་འགལ་སྙམ་ན་དེ་ཡང་མི་འཐད་དེ། འཇིག་རྟེན་དུ་མུན་པ་སེལ་བས་སྣང་བྱེད་དུ་བརྗོད་པ་ཡིན་པའི་ཕྱིར་རོ། །གལ་ཏེ་སྐྱེས་ཟིན་པའི་མར་མེས་མུན་པ་མི་སེལ་ཡང་སྐྱེ་བཞིན་པའི་མར་མེས་རང་དང་གཞན་ལ་མུན་པ་སེལ་བ་ཡིན་ནོ་ཞེ་ན། མར་མེ་སྐྱེ་བཞིན་པས་ཅི་ལྟར་མུན་པ་སེལ་བར་བྱེད་པ་ཡིན་ཏེ། གང་གི་ཚེ་སྟེ་གང་གི་ཕྱིར་ན་མར་མེ་སྐྱེ་བཞིན་པ་མུན་པ་དང་ཕྲད་པ་མེད་པའི་ཕྱིར། གལ་ཏེ་མར་མེས་ཕྲད་པ་མེད་པར་ཡང་མུན་པ་སེལ་བར་བྱེད་པས་ཁྱབ་པ་མ་ངེས་སོ་སྙམ་ན། དེ་ལྟར་ན་འདི་ན་འདུག་པའི་མར་མེ་དེས་ཆོས་ཅན། གླིང་བར་ལ་སོགས་པ་འཇིག་རྟེན་ཀུན་ན་གནས་པའི་མུན་པ་ཐམས་ཅད་བསལ་བར་འགྱུར་ཏེ། མ་ཕྲད་པར་མཚུངས་པའི་ཕྱིར། གཉིས་པ་ནི། གལ་ཏེ་མར་མེ་སྣང་བྱེད་ཡིན་པས་རང་དང་གཞན་གྱི་དངོས་པོ་གཉིས་ཀ་སྣང་བར་བྱེད་པར་འགྱུར་ན་མུན་པའང་ཆོས་ཅན། རང་དང་གཞན་གྱི་དངོས་པོ་གཉིས་ཀ་སྒྲིབ་པར་འགྱུར་བར་ཐེ་ཚོམ་མེད་པར་ཐལ། སྒྲིབ་བྱེད་ཡིན་པའི་ཕྱིར། འདོད་ན་མུན་པས་བདག་ཉིད་སྒྲིབ་པའི་ཕྱིར་དེ་མི་མཐོང་བར་འགྱུར་རོ། །གཉིས་པ་ལ་གཉིས་ཏེ། སྐྱེ་བས་རང་བསྐྱེད་པ་དགག སྐྱེ་བས་གཞན་བསྐྱེད་པ་དགག་པའོ། །དང་པོ་ནི་སྐྱེ་བས་རང་བསྐྱེད་པར་བྱེད་ན་རང་མ་སྐྱེས་པའམ་སྐྱེས་པ་ཞིག་གིས་བསྐྱེད་པར་བྱེད་དྲང་། དང་པོ་ལྟར་ན་སྐྱེ་བ་འདིས་ནི་ཆོས་ཅན། རང་གི་བདག་ཉིད་ཇི་ལྟར་སྐྱེད་པར་བྱེད་དེ་རང་ཉིད་མ་སྐྱེས་པའི་ཕྱིར། ཅི་སྟེ་རང་སྐྱེས་པས་བསྐྱེད་པར་བྱེད་དོ་སྙམ་ན་སྐྱེ་བ་དེ་ཆོས་ཅན། ཅི་ཞིག་སྐྱེད་དུ་ཡོད་དེ་མེད་པར་ཐལ། སྐྱེས་ཟིན་པའི་ཕྱིར་རོ། །གཉིས་པ་ལ་གཉིས་ཏེ། ལས་ལ་དུས་གསུམ་དུ་བརྟག་སྟེ་དགག སྐྱེ་བ་ལ་སྐྱེ་བ་གཞན་ཡོད་མེད་དཔྱད་དེ་དགག་པའོ། །དང་པོ་ལ་གསུམ་སྟེ། དུས་གསུམ་གྱི་ལས་ལ་སྐྱེ་བ་སྤྱིར་དགག སྐྱེ་བཞིན་པ་སྐྱེ་བ་བྱེ་བྲག་ཏུ་དགག དེ་ལ་རྟེན་འབྱུང་མི་རུང་བའི་སྐྱོན་སྤོང་བའོ། །དང་པོ་ནི། སྐྱེ་བའི་བྱ་བ་དེས་འདུས་བྱས་ཀྱི་ཆོས་བུམ་པ་ལྟ་བུ་གཞན་སྐྱེད་ན་དེ་སྐྱེས་པའམ། མ་སྐྱེས་པའམ། སྐྱེ་བཞིན་པ་གཅིག་བསྐྱེད་དྲང་། དེ་ལ་སྐྱེས་དང་མ་སྐྱེས་སྐྱེད་བཞིན་པ། ཅི་ལྟ་བུར་ཡང་མི་སྐྱེད་པ། དེ་ནི་སོང་དང་མ་སོང་དང་། བགོམ་པས་རྣམ་པར་བཤད་པ་ཡིན་ཏེ། དུས་གསུམ་གྱི་དཔྱད་པ་འདིར་ཡང་མཚུངས་པའི་ཕྱིར་རོ། །གཉིས་པ་ནི། གལ་ཏེ་སྐྱེས་མ་སྐྱེས་ལས་གཞན་པའི་བུམ་པ་སྐྱེ་བཞིན་པ་བརྗོད་དེ། སྐྱེ་བའི་བྱ་བ་དང་ལྡན་པའི་ཕྱིར། དེས་ན་དེ་སྐྱེ་བ་དོན་གཞན་གྱིས་བསྐྱེད་པར་བྱེད་དོ་སྙམ་ན། རྟེན་བུམ་པ་མ་སྐྱེས་པས་དེ་ལ་བརྟེན་པའི་བུམ་པ་སྐྱེ་བའི་བྱ་བ་མེད་པ་དེའི་ཚེ་སྐྱེ་བའི་བྱ་བ་ལ་བརྟེན་ནས་ནི་བུམ་པ་སྐྱེ་བཞིན་པ་འདི་ཞེས་ནི་ཅི་ལྟར་བརྗོད་པར་བྱ་སྟེ། གང་གི་ཚེ་སྐྱེ་བའི་བྱ་བ་འགའ་ཞིག་ཡོད་ན་དེ་དང་ལྡན་པས་བུམ་པ་སྐྱེ་བཞིན་པ་འདི་ཞེས་འབྱུང་བར་རིགས་ན་ཡང་སྐྱེ་བ་འདི་ནི་བྱེད་པོ་མེད་པར་རིགས་པའི་ངོ་བོའང་མིན་ཞེས་པའི་ཚུལ་གྱིས་རྟེན་བུམ་པ་མེད་པས་དེ་སྐྱེ་བའི་བྱ་བ་མེད་པའི་ཕྱིར་རོ། །གསུམ་པ་ནི། རང་གི་སྡེ་པ་དག་བཅོམ་ལྡན་འདས་ཀྱིས། འདི་ན་བདག་གམ་སེམས་ཅན་མེད། །ཆོས་འདི་དག་ནི་རྒྱུ་དང་བཅས། །ཞེས་གསུངས་པའི་ཚུལ་གྱིས། མུ་སྟེགས་པས་བརྟགས་པའི་རྟག་གཅིག་རང་དབང་ཅན་གྱི་གང་ཟག་གིས་སྟོང་པའི་རྟེན་ཅིང་འབྲེལ་པར་འབྱུང་བ་མི་རྟག་པར་ཆོས་ཙམ་ཁོ་ནར་བསྟན་པ་ཡིན་ལ། ཁྱོད་ཀྱིས་དེ་བཀག་པས་མེད་པར་སྨྲ་བར་འགྱུར་རོ་ཞེ་ན། ཁོ་བོ་ཅག་གིས་ཁྱོད་འདོད་པའི་རྟེན་འབྲེལ་ངོ་བོ་ཉིད་ཀྱིས་གྲུབ་པ་བཀག་པས་དེ་བཞིན་གཤེགས་པའི་གསུང་བཀག་པ་མ་ཡིན་ཏེ། འདི་ལྟར་རྟེན་ཅིང་འབྲེལ་པར་འབྱུང་བ་གང་ཡིན་པ་དེ་ནི་ངོ་བོ་ཉིད་ཀྱིས་ཞི་བའི་སྟོང་པ་ཉིད་ཡིན་ཏེ། ཅི་སྐད་དུ་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །ཅེས་གསུངས་པས་སོ། །དེ་ཉིད་ཀྱི་ཕྱིར་སྐྱེ་བྱ་སྐྱེ་བཞིན་པ་ཉིད་དང་ནི་སྐྱེད་བྱེད་སྐྱེ་བ་ཡང་ནི་རང་བཞིན་གྱིས་ཞི་བ་ཉིད་ཡིན་ཏེ། རྟེན་འབྲེལ་ཡིན་པའི་ཕྱིར། གལ་ཏེ་དུས་གསུམ་རྫས་སུ་ཡོད་པས་སྐྱེ་བཞིན་པའི་བུམ་པའང་མ་འོངས་པ་ན་ཡོད་ལ། དེའི་ཕྱིར་དེ་ལ་སྐྱེ་བའི་བྱ་བ་བརྟེན་པའི་སྒོ་ནས་ད་ལྟར་སྐྱེ་བར་འགྱུར་རོ་སྙམ་ན། གལ་ཏེ་བུམ་པ་ལྟ་བུའི་དངོས་པོ་མ་སྐྱེས་པ་འགའ་ཞིག མ་འོངས་པའི་གནས་སྐབས་གང་ན་ཡོད་པར་འགྱུར་ན། དེ་ལ་སྐྱེ་བའི་བྱ་བ་རྟེན་དུ་རུང་བས་དེ་ནི་སྐྱེ་བར་འགྱུར་བ་ཞིག་ན་མ་འོངས་པའི་དངོས་པོ་དེ་ཅི་ཞིག་སྐྱེ་བར་འགྱུར་ཏེ། རྟེན་མེད་པས་སྐྱེ་བའི་བྱ་བ་འཇུག་པར་འགལ་བའི་ཕྱིར་རོ། །གཉིས་པ་ནི། གལ་ཏེ་ཁྱོད་ཉིད་སྐྱེ་བའི་བྱ་བ་དོན་གཞན་དེ་ཡིས་ནི་བུམ་པ་སྐྱེ་བཞིན་པ་ནི་བསྐྱེད་པར་བྱེད་ན་སྐྱེ་བ་དོན་གཞན་དེ་ནི་སྐྱེ་བ་ལྟར་རང་ངམ་གཞན་གང་ཞིག་གིས་ནི་སྐྱེད་པར་བྱེད། གལ་ཏེ་སྐྱེ་བ་དེ་སྐྱེ་བ་གཞན་ཞིག་གིས་བསྐྱེད་པར་འདོད་ན་ཐུག་པ་མེད་པར་འགྱུར་ཏེ། དེ་བསྐྱེད་པ་ལ་སྐྱེ་བ་གཞན་དགོས་པས་སོ། །ཅི་སྟེ་སྐྱེ་བ་ལ་སྐྱེ་བ་གཞན་མེད་པར་སྐྱེ་ན་དངོས་པོ་གཞན་ཐམས་ཅད་ཀྱང་དེ་བཞིན་དུ་སྐྱེ་བ་དོན་གཞན་མེད་པར་སྐྱེ་བར་འགྱུར་ཏེ། དངོས་པོ་ཡིན་པའི་ཕྱིར། སྐྱེ་བ་བཞིན་ནོ་སྙམ་དུ་དགོངས་སོ། །གཉིས་པ་སོ་སོར་དགག་པ་ལ་གསུམ་སྟེ། སྐྱེ་བ་དགག གནས་པ་དགག འཇིག་པ་དགག་པའོ། །དང་པོ་ལ་གཉིས་ཏེ། རིགས་པ་སྔ་མས་ཁེགས་པ། འགག་བཞིན་པ་ཡིན་མིན་བརྟགས་ནས་དགག་པའོ། །དང་པོ་ནི། རེ་ཞིག་དངོས་པོ་ཡོད་དམ་མེད་པ་ཡང་། །སྐྱེ་བར་རིག་པ་མ་ཡིན་ཞིང་། །ཡོད་མེད་གཉིས་ཀྱང་མ་ཡིན་ཞེས། །གོང་དུ་རྐྱེན་བརྟགས་པར་བསྟན་པ་ཉིད་ཡིན་ཏེ། མེད་དམ་ཡོད་པའི་དོན་ལ་ཡང་། །རྐྱེན་ནི་རུང་བ་མ་ཡིན་ཏེ། །ཞེས་དང་། གང་ཚེ་ཆོས་ནི་ཡོད་པ་དང་། །མེད་དང་ཡོད་མེད་མི་འགྲུབ་པ། །ཞེས་བཤད་ཟིན་པའི་ཕྱིར་རོ། །གཉིས་པ་ནི། སྐྱེ་བ་འདི་དངོས་པོ་དུས་གཉིས་པར་འགག་བཞིན་པའམ། དེ་མ་ཡིན་པ་ཞིག་ལ་རྟོག་དྲང་། དང་པོ་ལྟར་ན། དངོས་པོ་འགག་བཞིན་ཉིད་ལ་ནི། །སྐྱེ་བ་འཐད་པར་མི་འགྱུར་ཏེ། །སྐྱེ་བའི་བྱ་བ་དང་འགལ་བ། །འགག་པའི་བྱ་བ་ཡོད་པའི་ཕྱིར། །གཉིས་པ་ལྟར་ཡང་མི་རུང་སྟེ། གང་ཞིག་དུས་གཉིས་པར་འགག་བཞིན་མ་ཡིན་པ་དེ་ནི་དངོས་པོར་མི་འཐད་པའི་ཕྱིར་རོ། །གཉིས་པ་གནས་པ་དགག་པ་ལ་གསུམ་སྟེ། དུས་གསུམ་དུ་བརྟགས་ནས་དགག འགག་བཞིན་པ་ཡིན་མིན་བརྟགས་ནས་དགག རང་དང་གཞན་གང་གིས་གནས་བརྟགས་ནས་དགག་པའོ། །དང་པོ་ནི། གནས་པའི་བྱ་བ་དོན་གཞན་དེས་འདུས་བྱས་ཀྱི་དངོས་པོ་གནས་པར་བྱེད་ན། དེ་གནས་པའམ། མི་གནས་པའམ། གནས་བཞིན་པ་ཞིག་གནས་པར་བྱེད་དྲང་། དེ་ལ་དངོས་པོ་གནས་པ་ནི་མི་གནས་ཏེ། གནས་པའི་བྱ་བ་འགག་པའི་ཕྱིར་རོ། །དངོས་པོ་མི་གནས་པ་ཡང་གནས་པ་མིན་ཏེ་གནས་པའི་བྱ་བ་མ་སྐྱེས་པའི་ཕྱིར་རོ། །གནས་བཞིན་པ་ཡང་མི་གནས་ཏེ། དེ་གཉིས་ལས་ཐ་དད་པའི་གནས་བཞིན་མེད་པའི་ཕྱིར། གཞན་ཡང་དངོས་པོ་གང་ཞིག་གནས་པར་འགྱུར་ཏེ། མཐའ་བཞིར་དཔྱད་ན་མ་སྐྱེས་པའི་ཕྱིར་རོ། །གཉིས་པ་ནི། དངོས་པོ་འགག་བཞིན་པ་ཉིད་ལ་ནི་གནས་པ་འཐད་པར་མི་འགྱུར་ཏེ། གནས་པ་དང་འགལ་བ་འགག་པའི་བྱ་བ་ཡོད་པའི་ཕྱིར། གང་ཞིག་འགག་བཞིན་པ་མ་ཡིན་པ་ཡང་གནས་པ་མི་རུང་སྟེ། དེ་ནི་དངོས་པོ་མི་འཐད་པའི་ཕྱིར་རོ། །དེས་ན་དངོས་པོ་ཐམས་ཅད་དུས་ཀུན་ཏུ། །རྒ་དང་འཆི་བའི་ཆོས་ཡིན་ན། །གང་དག་རྒ་དང་འཆི་མེད་པར། །གནས་པའི་དངོས་པོ་གང་ཞིག་ཡིན་ཏེ། སྐྱེས་དུས་ཉིད་ན་སྐད་ཅིག་གཉིས་པར་སྡོད་པའི་གནས་པ་གཏན་མི་སྲིད་པའི་ཕྱིར་རོ། །གསུམ་པ་ནི། འདུས་བྱས་ཀྱི་དངོས་པོ་རྣམས་གནས་པ་དོན་གཞན་གྱིས་གནས་པར་བྱེད་ན། གནས་པ་དེ་ཉིད་རང་ངམ་གཞན་གང་གིས་གནས་པར་བྱེད། དེ་ལ་གནས་པ་དེ་གནས་པ་གཞན་དང་ནི་དེ་ཉིད་ཀྱིས་ཀྱང་གནས་པར་བྱེད་མི་རིགས་ཏེ་ཐུག་མེད་དུ་འགྱུར་བ་དང་། རང་ལ་བྱ་བྱེད་འགལ་བའི་ཕྱིར། །ཅི་ལྟར་སྐྱེ་བ་རང་དང་ནི། །གཞན་གྱིས་བསྐྱེད་པ་མ་ཡིན་བཞིན། །ཞེས་པ་སྟེ། གལ་ཏེ་གནས་པ་གཞན་ཞིག་གིས། །དེ་གནས་ཐུག་པ་མེད་པར་འགྱུར། །ཞེས་སོགས། འདོན་པ་བསྒྱུར་བས་མཚུངས་པའོ། །གསུམ་པ་འཇིག་པ་དགག་པ་ལ་དྲུག་སྟེ། དུས་གསུམ་དུ་བརྟགས་ནས་དགག གནས་བཞིན་པ་ཡིན་མིན་བརྟག་སྟེ་དགག གནས་སྐབས་དེ་ཉིད་དང་གཞན་ཉིད་གང་གིས་འགག བརྟགས་སྟེ་དགག ཁྱབ་བྱེད་མ་དམིགས་པས་དགག དངོས་པོར་ཡོད་མེད་བརྟག་སྟེ་དགག རང་དང་གཞན་གང་གིས་འགག་བརྟག་སྟེ་དགག་པའོ། །དང་པོ་ནི། དུས་གསུམ་དུ་དཔྱད་ན་འགག་པ་ནི་འགག་པར་མི་འགྱུར་ཏེ། འགག་པའི་བྱ་བ་འགགས་ནས་མེད་པའི་ཕྱིར་རོ། །མ་འགགས་པ་ཡང་འགག་པར་མི་འགྱུར་ཏེ། འགག་པའི་བྱ་བ་མ་སྐྱེས་པའི་ཕྱིར། འགག་བཞིན་པ་ཡང་སྔ་མ་གཉིས་པོ་དེ་བཞིན་དུ་འགག་པར་འགྱུར་བ་མིན་ཏེ། གཉིས་པོ་ལས་གཞན་པའི་འགག་བཞིན་པ་མི་སྲིད་པའི་ཕྱིར་དང་། འགག་པའི་བྱ་བ་གཉིས་སུ་ཐལ་བའི་ཕྱིར་རོ། །ཡང་མ་སྐྱེས་གང་ཞིག་འགག་པར་འགྱུར་ཞེས་ཏེ་སྔ་མ་བཞིན་དུ་སྦྱར་བར་བྱའོ། །གཉིས་པ་ནི། རེ་ཤིག་དངོས་པོ་གནས་བཞིན་པ་ལ་ནི་འགག་པ་འཐད་པར་མི་འགྱུར་ཏེ། དེ་དང་འགལ་བ་གནས་པའི་བྱ་བ་ཡོད་པའི་ཕྱིར། དངོས་པོ་མི་གནས་པ་ལ་ཡང་འགག་པ་འཐད་པར་མི་འགྱུར་ཏེ། གནས་པ་དང་བྲལ་བ་ཡིན་པའི་ཕྱིར་རོ། །གསུམ་པ་ནི། རྒྱུ་འགག་ནས་འབྲས་བུ་འབྱུང་བར་འདོད་ན། རྒྱུའི་གནས་སྐབས་དེ་ཉིད་ཀྱིས་སམ་གཞན་འབྲས་བུའི་གནས་སྐབས་ཀྱིས་རྒྱུ་འགག་པར་བྱེད་དྲང་། དང་པོ་ལྟར་རྒྱུ་འོ་མ་ལྟ་བུའི་གནས་སྐབས་དེ་ཡིས་ནི་གནས་སྐབས་དེ་ཉིད་འགག་པར་མི་འགྱུར་ཏེ། རང་ལ་བྱ་བྱེད་འགལ་བའི་ཕྱིར་རོ། །གཉིས་པ་ལྟར་འབྲས་བུ་ཞོ་ལྟ་བུའི་གནས་སྐབས་གཞན་གྱིས་ཀྱང་ནི་རྒྱུ་འོ་མའི་གནས་སྐབས་འགག་པར་མི་འགྱུར་ཏེ། ཕན་ཚུན་མ་ཕྲད་པའི་ཕྱིར་རོ། །བཞི་པ་ནི། རྒྱུ་འོ་མ་ལྟ་བུ་ལ་ནི་འགག་པ་ཡོད་པ་ཉིད་དེ། དེའི་འབྲས་བུ་ཞོ་སྐྱེ་བའི་ཕྱིར་རོ་སྙམ་ན། རྒྱུ་འོ་མ་ལ་སོགས་པའི་ཆོས་རྣམས་ཐམས་ཅད་ཀྱི་འགག་པ་ཡང་འཐད་པར་མི་འགྱུར་བར་གསལ་བར་བསྟན་ཏེ། གང་གི་ཚེ་ན་སྔར་འབྲས་བུ་ཞོ་ལ་སོགས་པའི་ཆོས་རྣམས་ཐམས་ཅད་ཀྱི་སྐྱེ་བ་འཐད་པར་མི་འགྱུར་བར་བཤད་ཟིན་པ་དེའི་ཚེའོ། །ལྔ་པ་ནི། ཡང་འགག་པ་དེ་དངོས་པོ་ཡོད་པའམ་མེད་པ་ཞིག་ལ་རྟོག་དྲང་། དེ་ལ་རེ་ཞིག་དངོས་པོ་ཡོད་པ་ལ་འགག་པ་འཐད་པར་མི་འགྱུར་ཏེ། རྟེན་དངོས་པོ་དེ་དགག་པ་དངོས་མེད་དང་གཅིག་ཡིན་ན། དངོས་པོར་མི་འཐད་ཅིང་། ཆོས་འགག་པ་དངོས་མེད་དེ་རྟེན་དངོས་པོ་དང་གཅིག་ཡིན་ན། དངོས་པོ་མེད་པར་མི་འཐད་པའི་ཕྱིར་རོ། །གཉིས་པ་ལྟར་ན་དངོས་པོ་མེད་པར་གྱུར་པ་ལའང་འགག་པར་འཐད་པར་མི་འགྱུར་ཏེ། རྟེན་མེད་པའི་ཕྱིར། དཔེར་ན་མགོ་གཅིག་པའི་གང་ཟག་ལ། མགོ་གཉིས་པ་ལ་ཅི་ལྟར་ནི། བཅད་དུ་མེད་པ་དེ་བཞིན་ནོ། །དྲུག་པ་ནི། ཡང་འགག་པ་དོན་གཞན་དེ་འདུས་བྱས་ཀྱི་ཆོས་རྣམས་ཀྱི་འགག་བྱེད་དུ་འདོད་ན། འགག་པ་དེ་རང་གི་བདག་ཉིད་ཀྱིས་སམ། འགག་པ་གཞན་གྱིས་འགག་པར་བྱེད། དེ་ལ་འགག་པ་རང་གི་བདག་ཉིད་ཀྱིས་འགག་པ་ཡོད་པ་མིན་ཞིང་། འགག་པ་གཞན་གྱིས་ཀྱང་མིན་ཏེ། རང་ལ་བྱ་བྱེད་འགལ་བའི་ཕྱིར་དང་། ཐུག་པ་མེད་པར་ཐལ་བར་འགྱུར་བའི་ཕྱིར། ཅི་ལྟར་སྐྱེ་བ་རང་དང་ནི། །གཞན་གྱིས་བསྐྱེད་པ་མ་ཡིན་པ་བཞིན་ནོ། །གཉིས་པ་དེས་མཚན་གཞི་འདུས་བྱས་ཁེགས་པར་བསྟན་པ་ནི། དེ་ལྟར་འདུས་བྱས་ཀྱིས་མཚན་ཉིད་གསུམ་བཀག་ཀྱང་མཚན་གཞི་གཟུགས་དང་ཚོར་བ་ལ་སོགས་པ་ཕྱི་ནང་གི་དངོས་པོ་རྣམས་ཡོད་དོ་སྙམ་ན་མ་ཡིན་ཏེ། སྔར་བཤད་པའི་ཚུལ་གྱིས། མཚན་ཉིད་སྐྱེ་དང་གནས་དང་འཇིག་པ་རྣམས་རང་བཞིན་གྱིས་མ་གྲུབ་པའི་ཕྱིར་ན་འདུས་བྱས་ཀྱི་མཚན་གཞི་གཟུགས་སོགས་རྣམས་ཀྱང་རང་བཞིན་མེད་པར་གྲུབ་པའི་ཕྱིར་རོ། །གསུམ་པ་དེས་འདུས་མ་བྱས་ཁེགས་པར་བསྟན་པ་ནི། ཅི་སྐད་བཤད་པའི་ཚུལ་གྱིས་དཔྱད་ན། འདུས་བྱས་ཡོད་པ་མ་ཡིན་ལ་དེ་རབ་ཏུ་མ་གྲུབ་པས་འདུས་མ་བྱས་ནི་ཅི་ལྟར་འགྲུབ་སྟེ། དགག་བྱ་བཀག་པའི་བཀག་པ་མི་གྲུབ་པའི་ཕྱིར་ཏེ། ཏིང་ངེ་འཛིན་རྒྱལ་པོའི་མདོ་ལས། འདུས་མ་བྱས་པ་ཀུན་ཏུ་དབེན་པ་སྟེ། །དྲང་སྲོང་དེ་དག་ལ་ནི་རྣམ་རྟོག་མེད། །འགྲོ་བ་ཀུན་ཏུ་འདུས་མ་བྱས་ཐོབ་པས། །ལྟ་བ་དག་པ་འཁོར་མོར་རྣམ་པར་དབེན། །ཞེས་གསུངས་པས་སོ། །དེང་སང་བོད་འདིར་སེམས་ཙམ་པའི་གཞུང་ལུགས་རྣམས་དབུ་མའི་གཞུང་ལུགས་སུ་སྨྲས་ནས་འདུས་མ་བྱས་ཆོས་དབྱིངས་བདེན་པར་གྲུབ་པ་དབུ་མའི་ལྟ་བ་མཐར་ཐུག་ཡིན་ནོ་ཞེས་འཆལ་གཏམ་སྨྲ་བ་དག་གིས་ནི། བཀའ་དང་བསྟན་བཅོས་ཀྱི་གཞུང་འདི་དག་བསམ་པར་བྱ་དགོས་སོ། །གསུམ་པ་བཀག་པའི་དོན་ལ་ལུང་འགལ་སྤང་བ་ནི། དེ་ལྟར་ན་སྤྲིན་ཆེན་པོའི་མདོ་ལས། དགེ་སློང་དག་འདུས་བྱས་ནི་སྐྱེ་བར་ཡང་མངོན། འཇིག་པ་དང་གནས་པ་ལས་གཞན་དུ་འགྱུར་བར་ཡང་མངོན་ནོ། །ཞེས་གསུངས་པ་དང་འགལ་ལོ་སྙམ་ན། དེ་ནི་ངེས་པའི་དོན་དུ་གསུངས་པ་མ་ཡིན་གྱི། རྨི་ལམ་ཅི་ལྟ་བ་བཞིན་དང་། སྒྱུ་མ་བཞིན་དང་། དྲི་ཟའི་གྲོང་ཁྱེར་ལ་སྐྱེ་གནས་འཇིག་པ་མེད་ཀྱང་དེར་སྣང་བ་ཅི་ལྟ་བ་བཞིན་དུ་འདུས་བྱས་ཀྱི་ཆོས་རྣམས་དེ་བཞིན་དུ་ནི་སྐྱེ་བ་དང་། དེ་བཞིན་དུ་གནས་པ་དང་། དེ་བཞིན་དུ་ནི་འཇིག་པ་འཁྲུལ་ངོར་སྣང་བ་ཙམ་ལ་དགོངས་ནས་དྲང་དོན་དུ་གསུངས་པ་ཡིན་པས་མི་འགལ་ལོ། །ཡང་ན་རྨི་ལམ་ཅི་ལྟ་བ་བཞིན་སྐྱེ་བ་དང་ཞེས་སོགས་སོ་སོར་སྦྱར་རོ། །གཉིས་པ་ལུང་དང་སྦྱར་བ་ནི་མདོ་ལས། སྤགས་རྒྱུས་ཤ་རུས་འདུས་པ་འདི་བདག་གི །ཆུང་མ་ཡིན་སྙམ་འདུ་ཤེས་བསྐྱེད་ནས་ནི། །བྱིས་པ་རྨོངས་རྣམས་འདོད་ཆགས་སྐྱེད་བྱེད་ཅིང་། །སྒྱུ་མ་ཇི་བཞིན་བུད་མེད་མི་ཤེས་སོ། །ཅི་ལྟར་བུ་མོ་གཞོན་ནུའི་རྨི་ལམ་ན། །བུ་ཕོ་བྱུང་ཞིང་ཤི་བ་དེ་མཐོང་ནས། །བྱུང་ནས་དགའ་ཞིང་ཤི་ནས་མི་དགའ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཅི་ལྟར་དྲི་ཟའི་གྲོང་ཁྱེར་སྨིག་རྒྱུ་དང་། །སྒྱུ་མ་ཇི་བཞིན་རྨི་ལམ་ཅི་འདྲ་བར། །ཆོས་རྣམས་ཐམས་ཅད་དེ་བཞིན་ཤེས་བྱ་སྟེ། །མཚན་མ་སྒོམ་དང་ངོ་བོ་ཉིད་ཀྱིས་སྟོང་། །ཞེས་གསུངས་ཏེ། དབུ་མ་པ་རང་ལུགས་ཀྱི་ཀུན་རྫོབ་ཁས་ལེན་ཚུལ་དང་། དེ་ཉིད་ལ་ཡང་རིག་པས་དཔྱད་པ་སྔོན་དུ་འགྲོ་དགོས་པས་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྐྱེ་བ་དང་གནས་པ་དང་འཇིག་པ་བརྟག་པ་ཞེས་བྱ་བ་སྟེ། རབ་ཏུ་བྱེད་པ་བདུན་པའི་རྣམ་པར་བཤད་པའོ།། །།གསུམ་པ་བྱེད་པ་པོ་དང་ལས་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། ཕུང་ཁམས་སྐྱེ་མཆེད་དག་ནི་རང་བཞིན་གྱིས་ཡོད་པ་ཉིད་དེ། མདོ་ལས། མ་རིག་པ་དང་འབྲེལ་བའི་སྐྱེས་བུ་གང་ཟག་འདི་ནི་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བ་མངོན་པར་འདུ་བྱ་བ་འདུ་བྱེད་དོ། །ཞེས་གསུངས་པས། དེའི་རྒྱུ་ལས་དང་། དེའི་བྱེད་པ་པོ་ཡོད་པའི་ཕྱིར་རོ་སྙམ་པ་ལ། དཔྱད་ན་ལས་དང་བྱེད་པ་པོ་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ལས་དང་བྱེད་པ་པོ་རང་བཞིན་གྱིས་གྲུབ་པ་དགག་པ། དེ་གཉིས་ཕན་ཚུན་ལྟོས་གྲུབ་ཏུ་བསྟན་པ། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གཉིས་ཏེ། ཕྱོགས་མཐུན་གྱི་བྱ་བྱེད་དགག་པ། ཕྱོགས་མི་མཐུན་གྱི་བྱ་བྱེད་དགག་པའོ། །དང་པོ་ལ་གཉིས་ཏེ། སོ་སོའི་ཕྱོགས་མཐུན་གྱི་བྱ་བྱེད་དགག་པ། གཉིས་ཀའི་ཕྱོགས་མཐུན་གྱི་བྱ་བྱེད་དགག་པའོ། །དང་པོ་ལ་གཉིས་ཏེ། དམ་བཅའ་འགོད་པ། འཐད་པ་བཤད་པའོ། །དང་པོ་ནི། སྤྱིར་ལས་འགའ་ཞིག་བྱེད་པ་ན་བྱེད་པ་པོ་ལ་བྱེད་པའི་བྱ་བ་དང་ལྡན་པས་བྱེད་པ་པོ་ཡིན་པ་དང་། མི་ལྡན་པས་མ་ཡིན་པ་དང་། གཉིས་ཀའི་བྱེ་བྲག་གིས་གཉིས་ཀར་གྱུར་པ་གསུམ་ལས་གཞན་མི་སྲིད་ལ། ལས་ལ་ཡང་བྱེད་པ་པོའི་བྱ་བ་དང་ལྡན་པས་ལས་ཡིན་པ་དང་། མི་ལྡན་པས་མ་ཡིན་པ་དང་། གཉིས་ཀའི་བྱེ་བྲག་གིས་གཉིས་ཀ་ལས་གཞན་མི་སྲིད་པས་དེ་གསུམ་ལ་བརྟགས་ནས་འགོག་པ་སྟེ། བྱ་བ་དང་ལྡན་པས་བྱེད་པ་པོ་ཡིན་པར་གྱུར་པ་དེ་བྱ་བ་དང་ལྡན་པའི་ལས་སུ་གྱུར་པ་མི་བྱེད་དོ། །བྱ་བ་དང་མི་ལྡན་པས་བྱེད་པ་པོ་མ་ཡིན་པར་གྱུར་པ་ཡང་ལས་སུ་མ་གྱུར་པ་མི་བྱེད་དོ། །ཞེས་པ་གཉིས་ནི་བརྒལ་བའི་དམ་བཅའ་ཡིན་ལ། སྒྲུབ་བྱེད་གཞུང་འོག་མས་སྟོན་ནོ། །གཉིས་པ་ལ་གཉིས་ཏེ། སྒྲུབ་ཕྱོགས་ནས་དགག དགག་ཕྱོགས་ནས་དགག་པའོ། །དང་པོ་ནི། བྱེད་པ་པོ་ཡིན་པར་གྱུར་པ་ཆོས་ཅན། ལས་མི་བྱེད་དེ། རང་ཉིད་བྱེད་པ་པོར་འཇོག་པ་ལས་གཞན་པའི་བྱ་བ་མེད་པའི་ཕྱིར་ཏེ། གལ་ཏེ་ཡོད་ན་དེའི་ལས་དེ་ཡང་བྱེད་པ་པོ་ལ་ལྟོས་པ་མེད་ཅིང་། བྱེད་པ་པོས་མ་བྱས་པའི་ལས་སུ་འགྱུར་ན་དེ་མི་སྲིད་པའི་ཕྱིར་རོ། །ལས་ཡིན་པར་གྱུར་པ་ལ་ཆོས་ཅན། བྱེད་པ་པོས་བྱས་པ་མ་ཡིན་ཏེ། རང་ཉིད་ལས་སུ་འཇོག་པའི་བྱ་བ་ལས་གཞན་པའི་བྱ་བ་མེད་པའི་ཕྱིར་ཏེ། གལ་ཏེ་ཡོད་ན་བྱེད་པ་པོའང་ལས་ལ་ལྟོས་པ་མེད་པར་བྱེད་པ་པོར་ཡང་འགྱུར་ན་དེ་མི་སྲིད་པའི་ཕྱིར། གཉིས་པ་ནི། གལ་ཏེ་བྱ་བ་དང་མི་ལྡན་པའི་བྱེད་པ་པོར་མ་གྱུར་པས་ལས་སུ་མ་གྱུར་པ་བྱེད་ན་ནི་དེ་ཡང་མི་འཐད་དེ། བྱེད་པ་པོའི་ངོས་ནས་བྱེད་པ་པོ་ཡང་རྣམ་འཇོག་གི་རྒྱུ་མེད་པར་འགྱུར་བའི་ཕྱིར་དང་། ལས་ཀྱི་ངོས་ནས་ལས་ལ་རྣམ་འཇོག་གི་རྒྱུ་མེད་པར་འགྱུར་བའི་ཕྱིར། ཐལ་བ་དེ་གཉིས་ཀ་ལ་འདོད་ན། དེ་ལྟར་ལས་དང་བྱེད་པ་པོ་ལ་རྒྱུ་རྐྱེན་མེད་པར་འདོད་ན་ནི། སྤྱིར་རྒྱུས་སྐྱེད་པར་བྱ་བའི་འབྲས་བུ་དང་། འབྲས་བུ་དེ་སྐྱེད་པར་བྱེད་པའི་རྒྱུ་ཡང་འཐད་པར་མི་འགྱུར་ཏེ། རྒྱུ་མཚན་མཚུངས་པའི་ཕྱིར། དེ་ཡང་འདོད་ན། འབྲས་བུ་དང་། དེའི་བྱེད་རྒྱུ་དེ་མེད་ན་ནི་འབྲས་བུ་འབྱུང་བའི་བྱ་བ་དང་། དེ་ལ་དབང་དུ་གྱུར་པའི་བྱེད་པ་པོ་དང་། བྱེད་པ་པོ་འགའ་ཞིག་གིས་འབྲས་བུ་བྱེད་པར་མི་རིག་སྟེ། འབྲས་བུ་དང་རྒྱུ་མེད་པའི་ཕྱིར། དེ་ཡང་འདོད་ན། བྱ་བ་དང་སོགས་ཀྱིས་བསྡུས་པ་བྱེད་པ་པོ་དང་། ལས་དང་བྱེད་པ་མི་རིག་ན་མངོན་པར་མཐོ་བ་དང་། ངེས་པར་ལེགས་པའི་ཆོས་དང་། དེ་ལས་བཟློག་པ་ཆོས་མ་ཡིན་པ་ཡོད་པ་མ་ཡིན་པར་འགྱུར་ལ། ཆོས་དང་ཆོས་མིན་མེད་ན་ནི། དེ་གཉིས་ལས་བྱུང་བའི་འབྲས་བུ་བདེ་བ་དང་སྡུག་བསྔལ་མེད་པར་འགྱུར་རོ། །དེ་ལྟར་ཡང་འདོད་ན། ཆོས་ཀྱི་འབྲས་བུ་དེ་གཉིས་ཀ་མེད་ན། དེ་དག་ཐོབ་པའི་དོན་དུ་ཐར་པ་དང་མཐོ་རིས་སུ་འགྱུར་བའི་འཇིག་རྟེན་ལས་འདས་པ་དང་། འཇིག་རྟེན་པའི་ལམ་བསྒོམ་པ་མི་འཐད་པར་འགྱུར་ཏེ། ཐོབ་བྱའི་འབྲས་བུ་མེད་པའི་ཕྱིར། གཞན་ཡང་རྒྱུ་དང་འབྲས་བུ་མེད་ན། འཇིག་རྟེན་པའི་ཞིང་ལས་ལ་སོགས་པའི་བྱ་བ་དེ་དག་ནི་ཐམས་ཅད་ཀྱང་དོན་མེད་པ་ཉིད་དུ་འགྱུར་ན་དེ་ལྟར་ཡང་མ་ཡིན་པས། འབྲས་བུ་དང་། རྒྱུ་མེད་པར་ཐལ་བ་འདོད་པ་མི་འཐད་དོ་ཞེས་པའོ། །ཐལ་བ་འདི་དག་དང་། འོག་ཏུ། འཕགས་པའི་བདེན་པ་བཞི་པོ་ནི། །ཁྱོད་ལ་མེད་པར་ཐལ་བར་འགྱུར། །ཞེས་སོགས་རྣམས་ནི་བརྗོད་པའི་ཚེ་ཀུན་རྫོབ་དང་དོན་དམ་སོ་སོར་མ་ཕྱེ་བར་བརྗོད་པ་ཡིན་ལ། ཕྱིར་རྒོལ་གྱི་ངོར་ནི་ཡོད་ན་དོན་དམ་པར་ཡོད་པས་ཁྱབ་པས་ཐ་སྙད་དུའང་མེད་པར་ཐལ་བ་འཕེན་ནུས་ཤིང་། སྔར་རྒོལ་གྱི་ངོར་ནི་ཕྱིར་རྒོལ་གྱི་ལོག་རྟོག་གཞོམ་པ་ཙམ་ཡིན་གྱི། ཐལ་བས་འཕངས་པའི་ལོག་ཕྱོགས་ཁས་ལེན་པ་ནི་མ་ཡིན་པར་ཤེས་པར་བྱའོ། །གཉིས་པ་ནི། བྱ་བ་དང་ལྡན་མི་ལྡན་གཉིས་ཀ་ཡིན་པའི་བྱེད་པ་པོར་གྱུར་མ་གྱུར་གཉིས་ཀ་ཡིན་པ་ནི་ཆོས་ཅན། ལས་སུ་གྱུར་མ་གྱུར་གཉིས་ཀ་མི་བྱེད་དེ། བྱེད་པ་པོ་དང་ལས་གཉིས་ཀའི་ཆ་ནས་ཡིན་པར་གྱུར་པ་དང་། མ་ཡིན་པར་གྱུར་པ་བྱེད་པ་པོ་གཅིག་དང་། ལས་གཅིག་ལ་ག་ལ་ཡོད་དེ་ཕན་ཚུན་འགལ་བས་སོ། །གཉིས་པ་ལ་གཉིས་ཏེ། བྱེད་པ་པོ་རེ་རེས་ཕྱོགས་མི་མཐུན་རེ་རེ་བྱེད་པ་དགག་པ། བྱེད་པ་པོ་རེ་རེས་ཕྱོགས་མི་མཐུན་གཉིས་གཉིས་བྱེད་པ་དགག་པའོ། །དང་པོ་ནི། བྱེད་པ་པོར་ནི་གྱུར་པ་ཡིས། ལས་སུ་མ་གྱུར་པ་ནི་མི་བྱེད་དེ། བྱེད་པ་པོར་མ་གྱུར་པས་ཀྱང་ལས་སུ་གྱུར་པ་མི་བྱེད་དེ། ཞེས་པ་ནི་དམ་བཅའ་ཡིན་ལ། དེའི་འཐད་པ་ནི་འདིར་ཡང་སྐྱོན་དེར་ཐལ་བར་འགྱུར་ཞེས་པ་སྟེ། བྱེད་པ་པོར་གྱུར་པ་དང་། ལས་སུ་མ་གྱུར་པ་དང་། བྱེད་པ་པོར་མ་གྱུར་པ་དང་། ལས་སུ་གྱུར་པ་བཞི་ལ་རིམ་པ་ལྟར། ཡིན་པར་གྱུར་ལ་བྱ་བ་མེད། །བྱེད་པོ་མེད་པའི་ལས་སུ་འགྱུར། །ཞེས་དང་། ལས་སུ་མ་གྱུར་བྱེད་ན་ནི། །ལས་ལ་རྒྱུ་ནི་མེད་པར་འགྱུར། །ཞེས་དང་། བྱེད་པོར་མ་གྱུར་བྱེད་ན་ནི། །བྱེད་པ་པོ་ཡང་རྒྱུ་མེད་འགྱུར། །ཞེས་དང་། ཡིན་པར་གྱུར་ལ་བྱ་བ་མེད། །ལས་མེད་བྱེད་པ་པོར་ཡང་འགྱུར། །ཞེས་བཤད་ཟིན་པའི་ཕྱིར་རོ། །གཉིས་པ་ལ་གསུམ་སྟེ། བྱེད་པ་པོར་གྱུར་པས་ཕྱོགས་མི་མཐུན་གཉིས་བྱེད་པ་དགག བྱེད་པ་པོར་མ་གྱུར་པས་ཕྱོགས་མི་མཐུན་གཉིས་བྱེད་པ་དགག གཉིས་ཀས་ཕྱོགས་མི་མཐུན་གཉིས་བྱེད་པ་དགག་པའོ། །དང་པོ་ནི། བྱེད་པ་པོར་ནི་གྱུར་པ་ཡིས། །ལས་ནི་མ་གྱུར་བཅས་པ་དང་། །གྱུར་པ་དང་མ་གྱུར་པ་གཉིས་ཀ་མི་བྱེད་དེ། དེའི་གཏན་ཚིགས་ནི་གོང་དུ་བསྟན་པའི་ཕྱིར་ཏེ། བྱེད་པ་པོར་གྱུར་པའི་ངོས་ནས། ཡིན་པར་གྱུར་ལ་བྱ་བ་མེད། །བྱེད་པོ་མེད་པའི་ལས་སུ་འགྱུར། །ཞེས་སོགས་དཔྱད་དེ་སྦྱར་བར་བྱའོ། །གཉིས་པ་ནི། བྱེད་པ་པོར་ནི་མ་གྱུར་པས། ལས་ནི་མ་གྱུར་པ་དང་བཅས་པ་དང་། གྱུར་པ་དང་མ་གྱུར་པ་གཉིས་ཀ་ཡིན་པ་ནི་མི་བྱེད་དེ། དེའི་གཏན་ཚིགས་ནི་གོང་དུ་བསྟན་པའི་ཕྱིར་ཏེ། བྱེད་པ་པོར་མ་གྱུར་པའི་ངོས་ནས། བྱེད་པོར་མ་གྱུར་བྱེད་ན་ནི། །བྱེད་པ་པོ་ཡང་རྒྱུ་མེད་འགྱུར། །ཞེས་སོགས་དཔྱད་དེ་སྦྱར་བར་བྱའོ། །གསུམ་པ་ནི། བྱེད་པ་པོར་གྱུར་པ་དང་མ་གྱུར་པ་གཉིས་ཀ་ཡིན་པ་ནི་ཆོས་ཅན། ལས་སུ་གྱུར་པ་དང་། མ་གྱུར་པ་གང་ཡང་རུང་བ་སོ་སོར་མི་བྱེད་དེ། འདིར་ཡང་གཏན་ཚིགས་གཉིས་གོང་དུ་བསྟན་པར་ཤེས་པར་བྱ་བ་ཡིན་པའི་ཕྱིར་ཏེ། བྱེད་པ་པོ་གཉིས་ཀ་ཡིན་པ་དང་། ལས་སུ་གྱུར་པ་དང་། ལས་སུ་མ་གྱུར་པ་གསུམ་ལ་རིམ་པ་ལྟར། ཡིན་དང་མ་ཡིན་གྱུར་ཅིག་ལ། །ཕན་ཚུན་འགལ་བས་ག་ལ་ཡོད། །ཞེས་དང་། ཡིན་པར་གྱུར་ལ་བྱ་བ་མེད། །ལས་མེད་བྱེད་པ་པོར་ཡང་འགྱུར། །ཞེས་དང་། ལས་སུ་མ་གྱུར་བྱེད་ན་ནི། །ལས་ལ་རྒྱུ་ནི་མེད་པར་འགྱུར། །ཞེས་བཤད་ཟིན་པའི་ཕྱིར་རོ། །གཉིས་པ་དེ་གཉིས་ཕན་ཚུན་ལྟོས་གྲུབ་ཏུ་བསྟན་པ་ནི། གལ་ཏེ་དེ་ལྟར་ན། ཐུབ་པས། བདག་གིས་བྱས་པའི་ལས་རྣམས་ནི། །བདག་གིས་སོ་སོར་མྱོང་བར་འགྱུར། །ཞེས་སོགས་གསུངས་པ་ཚུལ་འདིས་བཀག་པས། ལས་འབྲས་མེད་པར་ལྟ་བའི་ལོག་པར་ལྟ་བར་འགྱུར་རོ་ཞེ་ན། དེ་ནི་མ་ཡིན་ཏེ། ལས་ལས་འབྲས་བུ་འབྱུང་བའི་ཚུལ་ལ་རིག་པས་དཔྱད་ནས་དོན་དམ་བདེན་པ་རྣམ་པར་གཞག་པའི་སྐབས་དང་། མ་དཔྱད་པར་ཀུན་རྫོབ་ཏུ་ལས་འབྲས་རྣམ་པར་གཞག་པའི་སྐབས་གཉིས་ལས། ཅི་སྐད་བཤད་པ་རྣམས་ནི་དང་པོའི་དབང་དུ་བྱས་ལ། གནས་སྐབས་ཕྱི་མའི་ཚེ་སྒྱུ་མ་ལྟ་བུའི་རྐྱེན་ཉིད་འདི་པ་ཙམ་གྱིས་རྟེན་ཅིང་འབྲེལ་པར་འབྱུང་བ་ཁས་བླངས་པའི་ཕྱིར་ཏེ། ལས་འདིའི་བྱེད་པ་པོ་ཡིན་ནོ་ཞེས་བྱེད་པ་པོ་རྣམ་པར་འཇོག་པ་ལས་ལ་བརྟེན་ནས་བྱས་ཤིང་། བྱེད་པ་པོས་བྱས་བཞིན་པ་ཉིད་ལས་ཡིན་པས། ལས་ཀྱང་བྱེད་པ་པོ་དེ་ཉིད་ལ་བརྟེན་ནས་འབྱུང་བ་ཙམ་ལས་མ་གཏོགས་པ་འགྲུབ་པའི་རྒྱུ་རིག་པས་དཔྱད་ན་འགའ་ཡང་ནི་མ་མཐོང་བའི་ཕྱིར་རོ། །དེས་ན་ཐ་སྙད་དུ་ལས་འབྲས་རྣམ་པར་འཇོག་པའི་ཚེ་རིག་པས་དཔྱད་པར་མི་བྱ་སྟེ། རིག་པས་དཔྱད་ན་ལས་འབྲས་མི་རྙེད་ཅིང་། འདི་ནི་ལས་འབྲས་རྣམ་པར་འཇོག་པའི་གནས་སྐབས་ཡིན་པའི་ཕྱིར་ཞེས་པ་ནི། བདེན་པ་གཉིས་ཀྱི་འཇོག་མཚམས་ཀྱི་གནད་དམ་པར་སྣང་སྟེ། བྱང་ཆུབ་སེམས་འགྲེལ་ལས། ལས་འབྲས་དཔྱད་པར་འདོད་པ་མེད་ཅེས་དང་། སྤྱོད་འཇུག་ལས། འབྲས་བུའི་དོན་དུ་མ་དཔྱད་ཕྱིར། །ཞེས་དང་། འཇུག་པ་ལས། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་དུ། །གནས་རྙེད་མ་ཡིན་དེ་ཕྱིར་འཇིག་རྟེན་གྱི། །ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་དང་། ལས་འབྲས་རྣམས་ལ་སེམས་པའང་དགག་པར་མཛད། །ཅེས་གསུངས་པ་རྣམས་ཀྱི་དགོངས་པའོ། །གསུམ་པ་རིག་པ་དེ་ཆོས་གཞན་ལ་བསྒྲེ་བ་ནི། ལས་དང་བྱེད་པ་པོ་ཐ་སྙད་ཙམ་དུ་ཕན་ཚུན་ལྟོས་ནས་གྲུབ་པ་ཡིན་གྱི། རང་བཞིན་གྱིས་གྲུབ་པ་མེད་པ་དེ་བཞིན་དུ་ཉེ་བར་ལེན་པས་ན་ཉེ་བར་ལེན་པ་སྟེ། ཉེ་བར་ལེན་པའི་བྱ་བ་བསྟན་ལ། དེས་ཀྱང་རང་གི་སྒྲུབ་བྱེད་ཉེ་བར་ལེན་པ་བྱེད་པ་པོ་དང་། ཉེ་བར་བླང་བྱའི་ལས་འཛིན་པར་བྱེད་པས། དེ་གཉིས་ཀྱང་ཕན་ཚུན་ལྟོས་ནས་གྲུབ་པ་ཡིན་གྱི་རང་བཞིན་གྱིས་མ་གྲུབ་པར་ཤེས་པར་བྱ་སྟེ། ཁྱབ་བྱེད་སྤྱིར་ལས་དང་བྱེད་པ་པོ་རང་བཞིན་གྱིས་གྲུབ་པ་བསལ་བའི་ཕྱིར་རོ། །དེ་གཉིས་ཁོ་ནར་མ་ཟད་ཀྱི་ལས་དང་བྱེད་པ་པོ་དག་གིས་དངོས་པོ་ལྷག་མ་བསྐྱེད་བྱ་སྐྱེད་བྱེད་དང་། འགྲོ་བ་དང་། འགྲོ་བ་པོ་དང་། བལྟ་བྱ་ལྟ་བྱེད་དང་། མཚན་ཉིད་དང་། མཚན་གཞི་དང་། འབྱུང་བར་བྱ་བ་དང་། འབྱུང་བར་བྱེད་པ་དང་། ཡན་ལག་དང་ཡན་ལག་ཅན་ལ་སོགས་པ་གང་དག་ཀྱང་ཕན་ཚུན་ལྟོས་ནས་གྲུབ་པ་ཡིན་གྱི་རང་བཞིན་གྱིས་མ་གྲུབ་པར་ཤེས་པར་བྱ་སྟེ། རིག་པ་མཚུངས་པའི་ཕྱིར་རོ། །གལ་ཏེ་དངོས་པོ་ལྷག་མ་ཞེས་པའི་ཚིག་གིས་ཉེ་བར་བླང་བྱ་དང་ལེན་པ་པོ་རྟོགས་པར་ནུས་པའི་ཕྱིར། ལོགས་སུ་བཀོད་པ་མི་རིགས་སོ་སྙམ་ན། དེ་ནི་བདེན་མོད་ཀྱི་འོན་ཀྱང་རྣམ་པར་བཅད་པར་བྱ་བ་ལ་གཙོ་བོར་གྱུར་པར་ཤེས་པར་བྱ་བའི་ཕྱིར་ལོགས་སུ་བཀོད་དེ། རབ་བྱེད་ཕྱི་མ་དག་ཏུ་ཡང་འདི་གཉིས་ཁོ་ནའི་བརྟགས་པ་ཕལ་ཆེར་འབྱུང་བར་འགྱུར་རོ། །ཞེས་འགྲེལ་པར་བཤད་དོ། །གཉིས་པ་ལུང་དང་སྦྱར་བ་ནི་བཅོམ་ལྡན་འདས་ཀྱི། སེམས་དམྱལ་འཇིགས་པ་ང་ཡིས་བསྟན་བྱ་སྟེ། །སེམས་ཅན་སྟོང་ཕྲག་དུ་མ་སྐྱོ་བྱས་ཀྱང་། །གང་དག་ཤི་འཕོས་ངན་སོང་རྟག་འགྲོ་བའི། །འགྲོ་བ་དེ་དག་ནམ་ཡང་ཡོད་མ་ཡིན། །གང་དག་རལ་གྲི་མདའ་ཆེན་མཚོན་འབྱིན་པའི། །གནོད་པར་བྱེད་པ་ཡོད་པ་མ་ཡིན་ཏེ། །རྟོག་པའི་དབང་གིས་ངན་སོང་དེ་དག་ན། །ལུས་ལ་འབབ་མཐོང་དེ་ན་མཚོན་ཆ་མེད། །སྣ་ཚོགས་ཡིད་དགའ་མེ་ཏོག་ཁ་བྱེ་ཞིང་། །གསེར་གྱི་ཁང་མཆོག་འབར་བ་ཡིད་འོང་བ། །འདི་ན་དེ་ལ་བྱེད་པོ་འགའ་ཡང་མེད། །དེ་དག་རྟོག་པའི་དབང་གིས་བཞག་པ་ཡིན། །རྟོག་པའི་དབང་གི་འཇིག་རྟེན་རྣམ་བརྟགས་ཏེ། །འདུ་ཤེས་འཛིན་པས་བྱིས་པ་རྣམ་པར་ཕྱེ། །འཛིན་དང་འཛིན་མེད་དེ་ཡང་འབྱུང་བ་མིན། །ཡོངས་སུ་རྟོག་པ་སྒྱུ་མ་སྨིག་རྒྱུ་བཞིན། །ཞེས་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། བྱེད་པ་པོ་དང་ལས་བརྟག་པ་ཞེས་བྱ་བ་སྟེ། རབ་ཏུ་བྱེད་པ་བརྒྱད་པའི་རྣམ་པར་བཤད་པའོ།། །།གཉིས་པ་རྟེན་འབྲེལ་གང་ཟག་གི་བདག་གིས་སྟོང་པ་ལ་གཉིས་ཏེ། གང་ཟག་གི་བདག་གི་ངོ་བོ་དགག་པ། དེའི་སྒྲུབ་བྱེད་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཉེ་བར་བླང་བྱ་དང་ལེན་པ་པོ་རང་བཞིན་མེད་པར་བསྟན་པ་ནི་མི་རིགས་ཏེ། བླང་བྱའི་སྔར་གྲུབ་པའི་ལེན་པ་པོས་དེ་ཉེ་བར་ལེན་པ་ཡིན་པས་དེ་གཉིས་རང་བཞིན་གྱིས་ཡོད་དོ་སྙམ་པ་ལ་དེ་བཀག་པའི་ཕྱིར་རབ་ཏུ་བྱེད་པ་འདི་སྨོས་སོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ཉེ་བར་ལེན་པ་པོ་རང་བཞིན་གྱིས་གྲུབ་པ་དགག དེ་ལས་ཉེ་བར་བླང་བྱ་ཁེགས་པར་བསྟན། དེ་གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། ཕྱོགས་སྔ་མ་བརྗོད། དེ་དགག་པའོ། །དང་པོ་ནི། རང་གི་སྡེ་པ་མང་པོས་བཀུར་བ་ཁ་ཅིག ལས་དང་བྱེད་པོ་བསལ་ཕྱིར་རོ་ཞེས་པ་དེ་མི་རིགས་ཏེ། འདི་ལྟར་ཉེ་བར་བླང་བྱ་ལྟ་བ་དང་ཉན་པ་ལ་སོགས་པ་ནང་གི་སྐྱེ་མཆེད་དྲུག་དང་། ཚོར་བ་དང་། རེག་པ་དང་། སེམས་པ་ལ་སོགས་པ་དབང་དུ་བྱེད་པ་པོའམ། དབང་དུ་བྱས་པའི་བདག་གང་གི་ཡིན་པའི་བདག་དེ། ཉེ་བར་བླང་བྱ་དེ་དག་གི་སྔོན་རོལ་ན་ཡོད་ཅེས་སྨྲའོ། །རྒྱུ་མཚན་ཅི་སྟེ་སྙམ་ན། འདི་ལྟར་བླང་བྱའི་སྔོན་རོལ་ན་ལེན་པ་པོ་བདག་གི་དངོས་པོ་ཡོད་པ་མ་ཡིན་ན། དེས་རྒྱུ་ལས་མ་བསགས་པས་འབྲས་བུ་ལྟ་བ་ལ་སོགས་པ་ཉེ་བར་ལེན་པར་ཅི་ལྟར་འགྱུར་ཏེ། མོ་གཤམ་གྱི་བུས་བསགས་པའི་ནོར་ལེན་པ་བཞིན་ནོ། །དེའི་ཕྱིར་ཉེ་བར་བླང་བྱ་དེ་དག་གི་སྔ་རོལ་ན་དེ་དག་ཉེ་བར་ལེན་པར་བྱེད་པའི་བདག་གི་དངོས་པོ་གནས་པ་དེ་ཡོད་དོ་ཞེས་ཟེར་རོ། །གཉིས་པ་ལ་གསུམ་སྟེ། བླང་བྱ་ཐམས་ཅད་ཀྱི་སྔ་རོལ་ན་ལེན་པ་པོ་ཡོད་པ་དགག བླང་བྱ་རེ་རེའི་སྔ་རོལ་ན་ལེན་པ་པོ་ཡོད་པ་དགག ལྟ་སོགས་ཀྱི་རྒྱུའི་ལེན་པ་པོ་ཡོད་པ་དགག་པའོ། །དང་པོ་ལ་གཉིས་ཏེ། བདག་ཏུ་གདགས་པའི་རྒྱུ་མེད་པས་དགག་པ། བདག་ཏུ་གདགས་པ་རྒྱུ་ལ་མི་ལྟོས་ན་ཧ་ཅང་ཐལ་བས་དགག་པའོ། །དང་པོ་ནི། སྤྱིར་གང་ཟག་ཕུང་པོ་ལ་བརྟེན་པ་དང་། བྱེ་བྲག་ཏུ་ལྟ་བ་པོ་ལ་སོགས་པའི་གང་ཟག་ལྟ་བ་ལ་སོགས་པ་ལ་བརྟེན་ནས་འདོགས་པ་ཡིན་པས། ལྟ་བ་དང་། ཉན་པ་དང་། ལ་སོགས་པ་སྣོམ་པ་དང་། མྱོང་བ་དང་། རེག་པ་དང་། འཛིན་པ་དང་། ཚོར་བ་དང་། ལ་སོགས་པ་རྣམ་པར་ཤེས་པ་དང་། རེག་པ་དང་། སེམས་པ་ལ་སོགས་པ་ཉིད་ཀྱི་ནི་སྔ་རོལ་ནས་དེ་དག་ཉེ་བར་ལེན་པ་པོ་བདག་གི་དངོས་པོ་གང་ན་གནས་པ་དེ་ནི་ལྟ་བ་ལ་སོགས་པའི་ཆོས་གང་གི་ལྟ་བ་པོ་ལ་སོགས་པར་གདགས་པར་བྱ་སྟེ། གདགས་པའི་རྒྱུ་ལྟ་བ་ལ་སོགས་པ་མེད་པའི་ཕྱིར། གཉིས་པ་ལ་གཉིས་ཏེ། ཧ་ཅང་ཐལ་བ་འགོད་པ། འདོད་པ་ལ་གནོད་པ་བསྟན་པའོ། །དང་པོ་ནི། གལ་ཏེ་ཉེ་བར་ལེན་པ་ལྟ་བ་ལ་སོགས་པ་མེད་པར་ཡང་ལེན་པ་པོའི་བདག་དེ་ནི་གནས་པར་གྱུར་ན། ལེན་པ་པོའི་བདག་དེ་མེད་པར་ཡང་ཉེ་བར་ལེན་པ་ལྟ་བ་ལ་སོགས་པའི་ཕུང་པོ་དེ་དག་ནི་ཡོད་པར་འགྱུར་བ་ཐེ་ཚོམ་མེད་དེ། རྒྱུ་མཚན་མཚུངས་པའི་ཕྱིར། ནོར་ལ་མ་ལྟོས་པར་ནོར་གསོག་པ་པོ་སྔར་ཡོད་ན། གསོག་པ་པོ་ལ་མ་ལྟོས་པར་ནོར་ཡང་སྔར་ཡོད་དགོས་པ་བཞིན་ནོ། །གཉིས་པ་ནི། དེ་ལྟར་ཡང་འདོད་པ་ཡིན་ནོ་སྙམ་ན། འདི་ནི་འདིའི་ལེན་པ་པོའོ། །ཞེས་བླང་བྱ་ལྟ་བ་ལ་སོགས་པ་ཅི་ཡིས་ལེན་པ་པོའི་བདག་གང་ཞིག་ཏུ་གསལ་ཞིང་འདོགས་པར་བྱེད་ལ། འདི་ནི་འདིའི་བླང་བྱ་ཡིན་ནོ་ཞེས་ཉེ་བར་ལེན་པ་པོའི་བདག་གང་གིས་བླང་བྱ་ལྟ་བ་ལ་སོགས་པ་ཅི་ཞིག་ཏུ་གསལ་ཞིང་འདོགས་པར་བྱེད་དེ། མི་འཐད་པར་ཐལ། རང་གི་ལྟོས་ས་བླང་བྱ་ལྟ་བ་ལ་སོགས་པ་ཅི་ཡང་མེད་པའི་ལེན་པ་པོའི་བདག་གང་ཞིག་ག་ལ་ཡོད་ཅིང་། ཡང་རང་གི་ལྟོས་ས་ལེན་པ་པོའི་བདག་གང་མེད་པའི་བླང་བྱ་ལྟ་བ་ལ་སོགས་པ་ཅི་ཞིག་ག་ལ་ཡོད་དེ་གཅིག་མེད་པར་ཅིག་ཤོས་ཡོད་པ་མི་སྲིད་པའི་ཕྱིར་རོ། །གཉིས་པ་ལ་གཉིས་ཏེ། འདོད་པ་བརྗོད། སུན་འབྱིན་བསྟན་པའོ། །དང་པོ་ནི། གལ་ཏེ་བདག་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་ན་ཉེས་པ་དེར་འགྱུར་བ་ཞིག་ན་ཡང་བདག་གང་ཞིག་དེ་ལྟར་ཡོད་པ་མ་ཡིན་གྱི་ལྟ་བ་ལ་སོགས་པ་རྣམས་ཀྱི་ནང་ནས་གཞན་ལྟ་བ་མེད་པའི་ཚེ་ན་གཞན་ཉན་པ་ཞིག་གིས་བདག་ཏུ་གསལ་ཞིང་འདོགས་པར་བྱེད་པས་བདག་ཏུ་གདགས་པའི་རྒྱུ་མེད་པའི་ཉེས་པ་མེད་དོ་ཞེ་ན། གཉིས་པ་ལ་གཉིས་ཏེ། རིག་པ་སྔ་མས་ཁེགས་པ། རྣམ་པར་བརྟགས་ནས་དགག་པའོ། །དང་པོ་ནི། བདག་དེ་ནི་ལྟ་བ་ལ་སོགས་པ་རེ་རེའི་སྔ་རོལ་ན་ཅི་ལྟར་ཡོད་དེ། གལ་ཏེ་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་པ་མིན་པའི་ཕྱིར། ཁྱབ་སྟེ། རེ་རེ་བས་སྔ་བ་ལ་མཐར་ཐམས་ཅད་ལས་སྔ་བས་ཁྱབ་པའི་ཕྱིར་རོ། །གཉིས་པ་ནི། བདག་དེ་ནི་རང་གི་བླང་བྱ་རེ་རེའི་སྔར་ཡོད་པ་མི་རིགས་ཏེ། འདི་ལྟར་གལ་ཏེ་ལྟ་བ་པོའི་བདག་དེ་ཉིད། ཉན་པ་པོའང་དེ་ཡིན་ཅིང་། ཚོར་བ་པོའང་དེ་ཉིད་ཡིན་ན། བླང་བྱ་ལྟ་བ་ལྟ་བུ་རེ་རེའི་སྔ་རོལ་ན་རང་གི་ཉེ་བར་ལེན་པ་པོ་ཡོད་པར་འགྱུར་བ་ཞིག་ན་ཡང་བྱ་བ་ཐ་དད་རིམ་ཅན་གྱི་བྱེད་པ་པོ་གཅིག་ཡིན་པ་དེ་ནི་དེ་ལྟར་མི་རིགས་པས། ལྟ་བའི་སྔར་ཉན་པ་པོ་ཡོད་ཀྱང་ལྟ་བ་པོ་ཡོད་པ་སོགས་མི་རིགས་པའི་ཕྱིར་རོ། །གལ་ཏེ་བྱ་བ་ཐ་དད་རིམ་ཅན་གྱི་བྱེད་པ་པོ་གཅིག་ཉིད་དུ་འགལ་བའི་ཉེས་པ་དེ་སྤོང་བར་འདོད་ནས། ལྟ་བ་པོ་གཞན་ཉིད་ལ་ཉན་པ་པོའང་གཞན། ཚོར་བ་པོའང་གཞན་དུ་འདོད་ན། དེ་དག་ཕན་ཚུན་མི་ལྟོས་པས་ལྟ་བ་པོ་ཡོད་པའི་ཚེ་ཉན་པ་པོ་ལ་སོགས་པ་ཡང་གཞན་དུ་ཡོད་པར་འགྱུར་བ་ཞིག་ན་ཡང་དེ་ནི་མི་རུང་སྟེ། གང་ཟག་གཅིག་ལ་ལྟ་བ་པོ་དང་ཉན་པ་པོ་ལ་སོགས་པའི་བདག་ཀྱང་མང་པོ་ཉིད་དུ་འགྱུར་བའི་ཕྱིར་དང་། དེ་ལྟར་འདོད་ན། འཇིག་རྟེན་སྐྱེ་བ་ན་གང་ཟག་ཉག་གཅིག་སྐྱེའོ། །ཞེས་པའི་ལུང་དང་འགལ་བའི་ཕྱིར་རོ། །གསུམ་པ་ནི། བདག་ནི་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་ལ་དེར་གདགས་པ་རྒྱུ་མེད་པ་ཡང་མ་ཡིན་ཏེ། འབྱུང་བ་བཞིའི་གཟུགས་ཡོད་པས་དེ་ལ་གདགས་པའི་ཕྱིར་རོ་ཞེ་ན། ལྟ་དང་ཉན་ལ་སོགས་པ་དང་། །ཚོར་བ་དག་ལ་སོགས་པ་ཡང་། །གང་ལས་འབྱུང་བར་འགྱུར་བའི་རྒྱུ། །མེར་མེར་པོར་ལ་སོགས་པའི་འབྱུང་བ་ཆེན་པོ་དེ་ལ་ཡང་ཉེ་བར་ལེན་པ་པོའི་བདག་དེ་ནི་ཡོད་པ་མ་ཡིན་ཏེ། སྔ་མ་ལྟར་བླང་བྱ་འབྱུང་བ་ཆེན་པོའི་སྔར། ལེན་པ་པོའི་བདག་མེད་པ་དེས་ཉེ་བར་ལེན་པ་མི་འཐད་པའི་ཕྱིར་རོ། །གཉིས་པ་དེས་ཉེ་བར་བླང་བྱ་ཁེགས་པར་བསྟན་པ་ནི། མདོ་སྡེ་པ་ལ་སོགས་པ་དག དེ་ལྟར་ཉེ་བར་ལེན་པ་པོའི་བདག་མེད་ཀྱང་། ལྟ་བ་ལ་སོགས་པ་ཉེ་བར་ལེན་པ་ཙམ་ཞིག་ཡོད་དོ་སྙམ་ན། ཉེ་བར་ལེན་པ་པོ་དེ་ལ་ལྟོས་པའི་བླང་བྱ་ལ་སོགས་པ་དེ་དག་ཀྱང་ནི་ཡོད་པ་མིན་ཏེ། གལ་ཏེ་དེ་དག་གི་ཉེ་བར་ལེན་པ་པོ་ཡོད་ན་ཉེ་བར་ལེན་པ་དེ་དག་ཀྱང་ཡོད་པར་འགྱུར་བ་ཞིག་ན་སྔར་བཤད་པའི་ཚུལ་གྱིས་ཉེ་བར་ལེན་པ་ལྟ་བ་དང་། ཉན་པ་ལ་སོགས་པ་དང་། ཚོར་བ་དག་ལ་སོགས་པ་ཡང་ལེན་པ་པོ་གང་གི་ཡིན་པ་སྟེ་ལེན་པ་པོའི་བདག་མེད་པའི་ཕྱིར། གསུམ་པ་དེ་གཉིས་ཀའི་དོན་བསྡུ་བ་ནི། དེ་ལྟར་ན་བླང་བྱ་དང་ལེན་པ་པོ་ཕན་ཚུན་ལྟོས་པ་ཉིད་ཀྱི་ཕྱིར་ལེན་པ་པོའི་བདག་གང་ཞིག་ལྟ་བ་ལ་སོགས་པའི་སྔ་རོལ་ན་མེད་དེ། བདག་ཏུ་གདགས་པའི་རྒྱུ་མེད་པའི་ཕྱིར་རོ། །ད་ལྟ་ལྷན་ཅིག་ཏུ་ཡང་མེད་དེ། སོ་སོར་མ་གྲུབ་པའི་ཕྱིར་དང་། ཕན་ཚུན་ལྟོས་མེད་དུ་འགྱུར་བའི་ཕྱིར་རོ། །ཕྱི་ནའང་མེད་དེ། ལེན་པ་པོ་མེད་པའི་བླང་བྱ་སྔར་གྲུབ་ན། དེ་རྒྱུ་མེད་དུ་འགྱུར་བའི་ཕྱིར་རོ། །དེ་བཞིན་དུ་བླང་བྱ་དང་། ལེན་པ་པོ་སྔ་ཕྱི་དང་། ལྷན་ཅིག་ཏུ་མ་གྲུབ་པའི་ལེན་པ་པོའི་བདག་དང་། བླང་བྱ་ལྟ་སོགས་དེ་ལ་རང་བཞིན་དུ་ཡོད་དོ་ཞེས་ཤེས་རབ་ཅན་སུ་ཞིག་རྟོག་པར་བྱེད། འོ་ན་མེད་པར་འདོད་དམ་ཞེ་ན། དེ་དག་རང་བཞིན་དུ་ཡོད་པར་བརྟགས་པ་བཀག་པ་ཙམ་ཡིན་གྱི་མེད་དོ་ཞེས་ཀྱང་སུ་ཞིག་རྟོགས་པར་བྱེད་དེ། རིག་པས་དཔྱད་ན་མ་རྙེད་པ་དེ་ལ་ཡོད་མེད་ཀྱི་རྟོག་པ་དག་ནི་ཐམས་ཅད་ལྡོག་པར་འགྱུར་བའི་ཕྱིར་རོ། །གཉིས་པ་ལུང་དང་སྦྱར་བ་ནི། འཕགས་པ་ཏིང་ངེ་འཛིན་གྱི་རྒྱལ་པོའི་མདོ་ལས། དེ་ཚེ་སྡིག་མེད་སྟོབས་བཅུ་ལྡན་པ་ཡི། །རྒྱལ་བ་དེ་ནི་ཏིང་འཛིན་མཆོག་འདི་འཆད། །སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་སུ་ཡང་མི་སྐྱེ་འཆི་བ་མེད། །སེམས་ཅན་མི་དང་སྲོག་ཀྱང་མི་རྙེད་དེ། །ཆོས་འདི་རྣམས་ནི་དབུ་བ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་བཞིན། །མི་འགའ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་ཆུད་མི་ཟ། །འཁོར་བ་ན་ཡང་དཀར་ནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་མེད་ཅིང་གནས་པ་དག་ཀྱང་མེད། །དེ་ཡང་བྱས་ན་རེག་པར་མི་འགྱུར་མིན། །གཞན་གྱི་བྱས་པ་ཚོར་བར་འགྱུར་བའང་མེད། །འཕོ་བ་མེད་ཅིང་ཕྱིར་ཡང་འོང་བ་མེད། །ཐམས་ཅད་ཡོད་པའང་མ་ཡིན་མེད་པའང་མིན། །འདི་ནི་ལྟ་གནས་འཇུག་པ་དག་པ་མིན། །སེམས་ཅན་སྤྱོད་པ་རབ་ཞི་འཇུག་པ་མེད། །བདེ་གཤེགས་སྤྱོད་ཡུལ་རྒྱལ་བའི་ཡོན་ཏན་ནི། །སྐྱེ་མེད་ཞི་བ་མཚན་མ་མེད་པའི་གནས། །སྟོབས་དང་གཟུངས་རྣམས་དང་ནི་སྟོབས་བཅུའི་སྟོབས། །འདི་ནི་སངས་རྒྱས་ཁྱུ་མཆོག་དམ་པའི་མཆོག །ཅེས་སོགས་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྔ་རོལ་ན་གནས་པ་བརྟག་པ་ཞེས་བྱ་བ་སྟེ། རབ་ཏུ་བྱེད་པ་དགུ་པའི་རྣམ་པར་བཤད་པའོ།། །།གཉིས་པ་དེའི་སྒྲུབ་བྱེད་དགག་པ་ལ་གསུམ་སྟེ། དཔེ་མེ་དང་བུད་ཤིང་དགག བྱ་བ་འཁོར་བ་དགག རྟེན་སྡུག་བསྔལ་དགག་པའོ། །དང་པོ་ལ་གསུམ་ལས། རབ་ཏུ་བྱེད་པའི་འབྲེལ་ནི་དེ་ལྟར་ཉེ་བར་ལེན་པའི་ཕུང་པོ་དང་། ཉེ་བར་ལེན་པ་པོའི་བདག་གཉིས་ཕན་ཚུན་ལྟོས་ཀྱང་རང་བཞིན་གྱིས་ཡོད་པ་མི་འགལ་ཏེ། མེ་དང་བུད་ཤིང་ཕན་ཚུན་ལྟོས་ཀྱང་བསྲེག་བྱ་དང་སྲེག་པར་བྱེད་པ་རང་བཞིན་གྱིས་ཡོད་པ་བཞིན་ནོ་སྙམ་ན། དཔེ་མེ་དང་བུད་ཤིང་ཉིད་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གསུམ་སྟེ། མེ་དང་བུད་ཤིང་རང་བཞིན་གྱིས་གྲུབ་པ་དགག རིག་པ་དེ་ཆོས་གཞན་ལ་བསྒྲེ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གསུམ་སྟེ། མེ་དང་བུད་ཤིང་གི་ངོ་བོ་དགག་པ། དེའི་སྒྲུབ་བྱེད་དགག་པ། དེ་གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། གཅིག་ཏུ་གྲུབ་པ་དགག གཞན་དུ་གྲུབ་པ་དགག་པའོ། །དང་པོ་ནི། གལ་ཏེ་མེ་དང་བུད་ཤིང་རང་བཞིན་གྱིས་ཡོད་ན་ངོ་བོ་གཅིག་གམ་ཐ་དད་དུ་ཡོད་དྲང་། གལ་ཏེ་བསྲེག་བྱའི་བུད་ཤིང་གང་ཡིན་པ་དེ་ཉིད། སྲེག་པར་བྱེད་པའི་མེ་ཡིན་པས་གཅིག་ཏུ་གྲུབ་ན་བྱེད་པ་པོ་དང་ལས་ངོ་བོ་གཅིག་ཏུ་འགྱུར་ཏེ། རྒྱུ་མཚན་མཚུངས་པའི་ཕྱིར། འདོད་མི་ནུས་ཏེ། རང་ལ་བྱ་བྱེད་འགལ་བའི་ཕྱིར་དང་། རྫ་མཁན་དང་བུམ་པ་ཡང་ངོ་བོ་གཅིག་ཏུ་ཐལ་བའི་ཕྱིར་རོ། །གཉིས་པ་ལ་གཉིས་ཏེ། མ་ལྟོས་པར་ཐལ་བས་དགག་པ། མ་ཕྲད་པར་ཐལ་བས་དགག་པའོ། །དང་པོ་ལ་གཉིས་ཏེ། ཐལ་བ་འགོད། ཉེས་སྤོང་དགག་པའོ། །དང་པོ་ནི། གལ་ཏེ་མེ་བུད་ཤིང་ལས་ངོ་བོ་གཞན་ཡིན་ན་ནི་ཤིང་ལ་ལྟོས་པ་མེད་པར་ཡང་འབྱུང་བར་འགྱུར་ཏེ། ཤིང་ལས་གཞན་ཡིན་པའི་ཕྱིར། གཞན་ཡང་ཤིང་ཡོད་མེད་ཀྱི་དུས་རྟག་ཏུ་མེ་ནི་འབར་བ་ཉིད་དུ་འགྱུར་ལ། འབར་བྱེད་རྒྱུ་ལས་མི་འབྱུང་ཞིང་། །རྩོམ་པ་དོན་མེད་ཉིད་དུ་འགྱུར། །དེ་ལྟ་ཡིན་ན་ལས་ཀྱང་མེད་པར་ཐལ་ལོ། །དེ་ཉིད་སྟོན་པ་ནི་འབར་བྱེད་ཀྱི་རྒྱུ་བུད་ཤིང་ལས་མི་འབྱུང་བར་འགྱུར་ཏེ། གཞན་ཡིན་པའི་ཕྱིར་ཁྱབ་སྟེ། རྒྱུ་བུད་ཤིང་ལས་གཞན་ཡིན་པའི་ཕྱིར་ན། བུད་ཤིང་ལ་ལྟོས་པ་མེད་པར་འགྱུར་ལ། ལྟོས་པ་མེད་པའི་ཕྱིར་ན་འབར་བ་དེ་འབར་བྱེད་ཀྱི་རྒྱུ་བུད་ཤིང་ལས་མི་འབྱུང་བར་འགྱུར་དགོས་པའི་ཕྱིར་རོ། །གཞན་ཡང་བུད་ཤིང་བསྐུལ་བ་ལ་སོགས་པའི་རྩོམ་པ་དོན་མེད་ཉིད་དུ་འགྱུར་ཏེ། བུད་ཤིང་ཡོད་མེད་ཀྱི་དུས་རྟག་ཏུ་འབར་བ་ཡིན་པའི་ཕྱིར་ནའོ། །གཉིས་པ་ནི། དེ་ལ་གལ་ཏེ་གཞན་དག་འདི་སྙམ་དུ་མེ་བུད་ཤིང་ལས་གཞན་ཡིན་ཡང་དེ་ལ་ལྟོས་པ་མི་འགལ་ཏེ་མེས་བསྲེག་བཞིན་པ་ཉིད་བུད་ཤིང་ཡིན་པས་བུད་ཤིང་མེ་ལ་ལྟོས་ལ་བུད་ཤིང་སྲེག་པ་པོ་ཉིད་མེ་ཡིན་པས་མེ་ཡང་བུད་ཤིང་ལ་ལྟོས་པས་དེ་གཉིས་ཕན་ཚུན་ལྟོས་བཅས་ཀྱི་གཞན་ཡིན་གྱི། བུམ་སྣམ་ལྟར་ལྟོས་མེད་ཀྱི་གཞན་མ་ཡིན་པས་ཐལ་བ་གཉིས་པོ་དེར་མི་འགྱུར་རོ་སྙམ་དུ་སེམས་ན། མེས་བུད་ཤིང་བསྲེག་ན་དེ་ལྟར་རིགས་པ་ཤིག་ཡིན་ན་ཡང་། འདི་ལྟར་བུད་ཤིང་ཆོས་ཅན། མེ་གང་གིས་ཁྱོད་བསྲེག་པར་བྱེད་དེ། མི་བྱེད་པར་ཐལ། གང་གི་ཚེ་སྟེ་གང་གི་ཕྱིར་ན་བསྲེག་བཞིན་པ་དེ་ཙམ་ཁྱོད་དེ་ཡིན་པའི་ཕྱིར། གཉིས་པ་མ་ཕྲད་པར་ཐལ་བས་དགག་པ་ལ་གཉིས་ཏེ། ཐལ་བ་འགོད། ཉེས་སྤོང་དགག་པའོ། །དང་པོ་ནི། མེ་དང་བུད་ཤིང་སྣང་བ་དང་མུན་པ་ལྟར་ཡུལ་དུས་གཅིག་ཏུ་མི་ཕྲད་པར་འགྱུར་ཏེ། རྫས་གཞན་ཡིན་པའི་ཕྱིར། ཕྲད་པ་མེད་པར་འདོད་ན། མེས་བུད་ཤིང་བསྲེགས་པར་མི་འགྱུར་ཞིང་། མེས་བུད་ཤིང་མི་བསྲེག་པའི་ཕྱིར་ན། བུད་ཤིང་རྒྱུན་ཆད་པས་ཀྱང་འཆི་བར་མི་འགྱུར་ལ། མི་འཆི་བའི་ཕྱིར་ན་བུད་ཤིང་རྒྱུན་ཆད་པ་ན་རང་གི་རྟགས་ཏེ། ཚ་ཞིང་བསྲེག་པ་དང་ལྡན་པར་གནས་པར་འགྱུར་རོ། །དེ་འདོད་པར་ནི་མི་ནུས་སྟེ་བུད་ཤིང་རྒྱུན་ཆད་པའི་ཚེ་ཚ་ཞིང་བསྲེག་པ་མ་དམིགས་པའི་ཕྱིར་རོ། །གཉིས་པ་ནི། གལ་ཏེ་མེ་དང་བུད་ཤིང་གཞན་ཡིན་ཡང་ཕྲད་པ་མི་འགལ་ཏེ། སྐྱེས་པ་དང་བུད་མེད་བཞིན་ནོ་སྙམ་ན། དཔེ་དེས་དོན་དེ་མི་འགྲུབ་སྟེ། ཅི་ལྟར་བུད་མེད་སྐྱེས་པ་དང་། སྐྱེས་པའང་ལྟོས་མེད་ཀྱི་གཞན་ཡིན་པས་བུད་མེད་དང་ཕྲད་པ་བཞིན། གལ་ཏེ་ཤིང་ལས་མེ་ལྟོས་མེད་ཀྱི་གཞན་ཡིན་ན་ཤིང་དང་ཕྲད་དུ་རུང་བར་འགྱུར་བར་ཞིག་ན། དེ་གཉིས་ལྟོས་མེད་ཀྱི་གཞན་དུ་མ་གྲུབ་པས་སོ། །དེ་ཉིད་བཤད་པ་ནི་སྐྱེས་པ་དང་། བུད་མེད་ཕྲད་པས་བུད་ཤིང་མེ་དང་ཕྲད་པར་བསྒྲུབ་མི་ནུས་ཏེ། གལ་ཏེ་མེ་དང་ཤིང་དག་ནི། སྐྱེས་པ་དང་བུད་མེད་ལྟར་གཅིག་གིས་གཅིག་བསལ་བ་སྟེ་ཕན་ཚུན་མི་ལྟོས་པར་གྱུར་ན་དུས་གཅིག་གི་ཚེ་ཕྲད་དུ་རུང་བས་ཤིང་ལས་མེ་གཞན་ཉིད་ཡིན་ན་ཡང་ཤིང་དང་མེ་ཕྲད་པར་འདོད་ལ་རེག་ན་དེ་གཉིས་སྐྱེས་པ་དང་བུད་མེད་ལྟར་ཕན་ཚུན་ལྟོས་མེད་ཀྱི་གཞན་དུ་མ་གྲུབ་པའི་ཕྱིར་རོ། །གཉིས་པ་སྒྲུབ་བྱེད་དགག་པ་ལ་གཉིས་ཏེ། སྒྲུབ་བྱེད་ལྟོས་པ་དགག སྒྲུབ་བྱེད་མངོན་སུམ་དགག་པའོ། །དང་པོ་ལ་བཞི་སྟེ། སྔ་ཕྱི་ལ་ལྟོས་པ་དགག དུས་མཉམ་ལ་ལྟོས་པ་དགག གྲུབ་མ་གྲུབ་ལ་ལྟོས་པ་དགག དོན་བསྡུ་བའོ། །དང་པོ་ནི། གལ་ཏེ་མེ་དང་བུད་ཤིང་ཕན་ཚུན་ལྟོས་མེད་ཀྱི་གཞན་དུ་མ་གྲུབ་མོད། ལྟོས་བཅས་ཡིན་པའི་ཕྱིར་ན། རང་བཞིན་གྱིས་ཡོད་པ་ཉིད་དེ། མོ་གཤམ་གྱི་བུ་ལྟར་མེད་པ་ནི་ལྟོས་པར་ཡང་མི་རུང་བས་སོ་སྙམ་ན། ལྟོས་པ་ཉིད་ཀྱང་རང་བཞིན་གྱི་མ་གྲུབ་སྟེ། གལ་ཏེ་མེ་འདི་ནི་བུད་ཤིང་འདིའི་བསྲེག་པར་བྱེད་པ་པོ་ཡིན་ནོ་ཞེས་བུད་ཤིང་ལ་ལྟོས་ནས་མེར་འཇོག་པ་ཡིན་ལ། གལ་ཏེ་བུད་ཤིང་འདི་ནི་མེ་འདིའི་བསྲེག་བྱའི་ལས་ཡིན་ནོ་ཞེས་མེ་ལ་ལྟོས་ནས་བུད་ཤིང་དུ་རྣམ་པར་འཇོག་པ་ཡིན་པས། དེའི་ཚེ་དང་པོ་བུད་ཤིང་གང་ལ་ལྟོས་ནས་མེ་གྲུབ་པར་འགྱུར་བ་ལ་བུད་ཤིང་སྔར་གྲུབ་པས་ཁྱབ་པ་ལས། བུད་ཤིང་དང་པོར་གྲུབ་པ་གང་ཞིག་ཡིན་ཏེ་མ་ཡིན་པའི་ཕྱིར་ཏེ་མེས་བསྲེག་བཞིན་པ་མ་ཡིན་པ་བུད་ཤིང་ཉིད་མ་ཡིན་པའི་ཕྱིར་རོ། །ཡང་མེ་གང་ལ་ལྟོས་ནས་བུད་ཤིང་གང་ཞིག་གྲུབ་པར་འགྱུར་བ་ལ་མེ་སྔར་གྲུབ་པས་ཁྱབ་པ་ལས་མེ་དང་པོར་གྲུབ་པ་གང་ཞིག་ཡིན་ཏེ། དང་པོར་གྲུབ་ན་རྒྱུ་མེད་དུ་འགྱུར་བའི་ཕྱིར་རོ། །གལ་ཏེ་བུད་ཤིང་ལ་ལྟོས་ནས་མེ་གྲུབ་པ་ཡིན་ན། མེ་གྲུབ་པ་ལ་བསྒྲུབ་པར་འགྱུར་ཏེ། མེ་མ་གྲུབ་ན་ལྟོས་ས་མེད་པས་ལྟོས་པར་མི་འཐད་པའི་ཕྱིར་རོ། །དེས་ན་གྲུབ་ཟིན་ན་ལྟོས་པ་དོན་མེད་པས་ཤིང་ལ་ལྟོས་ནས་མ་གྲུབ་པ་མེ་ཡིན་ན། མ་གྲུབ་པ་བསྒྲུབ་པར་འགྱུར་ཏེ། མེ་མ་གྲུབ་པ་ལྟོས་པའི་ཕྱིར། ཞེས་པའང་ཐོབ་བོ། །གཞན་ཡང་བུད་ཤིང་ལ་ལྟོས་ནས་མེ་གྲུབ་པ་ཡིན་ན། བུད་པར་བྱ་བའི་ཤིང་ལ་ཡང་། མེ་མེད་པར་ནི་འགྱུར་བ་ཡིན་ཏེ། བུད་ཤིང་མ་གྲུབ་ན་ལྟོས་པར་འགལ་ཞིང་མེ་གྲུབ་ན་ལྟོས་མི་དགོས་པས་སོ། །གཉིས་པ་ནི། དེ་གཉིས་སྔ་ཕྱིར་མ་གྲུབ་ཀྱང་དུས་མཉམ་ཁོ་ན་ཕན་ཚུན་ལྟོས་ནས་གྲུབ་པས་ཉེས་པ་དེར་མི་འགྱུར་རོ་སྙམ་ན། དེའང་མི་རུང་སྟེ། གལ་ཏེ་མེའི་དངོས་པོ་གང་ཞིག་བུད་ཤིང་ལ་ལྟོས་ནས་གྲུབ་ལ། མེའི་ལྟོས་བྱ་བུད་ཤིང་གང་ཡིན་པ་དེའང་མེ་དེ་ཉིད་ལ་ལྟོས་ནས་ནི་འགྲུབ་ན། བུད་ཤིང་གང་ལ་ལྟོས་ནས་མེ་གང་ཞིག་འགྲུབ་སྟེ། མེ་གྲུབ་ན་བུད་ཤིང་ལ་ལྟོས་མི་དགོས་ཤིང་། མ་གྲུབ་ན་ལྟོས་ས་བུད་ཤིང་ཡང་དེ་ཉིད་ལ་ལྟོས་པས་མི་འགྲུབ་པའི་ཕྱིར་རོ། །དེ་བཞིན་དུ་གལ་ཏེ་བུད་ཤིང་གི་དངོས་པོ་གང་མེ་ལ་ལྟོས་ནས་འགྲུབ་ལ། བུད་ཤིང་གི་ལྟོས་བྱ་མེ་གང་ཡིན་པ་དེ་ཡང་བུད་ཤིང་དེ་ཉིད་ལ་ལྟོས་ནས་ནི་འགྲུབ་ན། མེ་གང་ལ་ལྟོས་ནས་བུད་ཤིང་གང་ཞིག་འགྲུབ་སྟེ། བུད་ཤིང་གྲུབ་ན་མེ་ལ་ལྟོས་མི་དགོས་ལ། མ་གྲུབ་ན་ལྟོས་ས་མེ་དེ་ཡང་བུད་ཤིང་དེ་ཉིད་ལ་ལྟོས་པས་མི་འགྲུབ་པའི་ཕྱིར་རོ། །གསུམ་པ་ནི། གཞན་ཡང་མེའི་དངོས་པོ་བུད་ཤིང་ལ་ལྟོས་ནས་གྲུབ་པ་གང་ཡིན་པ་དེ་མེ་མ་གྲུབ་པའམ་གྲུབ་པ་ཞིག་ལྟོས་དྲང་། དང་པོ་ལྟར་ན་མེ་དེ་བུད་ཤིང་ལ་ཅི་ལྟར་ལྟོས་ཏེ། རང་ཉིད་མ་གྲུབ་པའི་ཕྱིར། ཅི་སྟེ་གཉིས་པ་ལྟར་མེ་གྲུབ་པ་ཞིག་བུད་ཤིང་ལ་ལྟོས་སོ་ཞེ་ན། མེ་དེ་ནི་བུད་ཤིང་ལ་ལྟོས་པར་མི་རིགས་ཏེ་གྲུབ་ཟིན་པའི་ཕྱིར་རོ། །བཞི་པ་ནི། ཤིང་ལ་ལྟོས་པའི་མེ་མེད་དེ། རྣམ་པར་དཔྱད་ན་ལྟོས་པ་ཉིད་མི་འཐད་པ་དེའི་ཕྱིར། འོ་ན་མ་ལྟོས་པ་ཡོད་དམ་སྙམ་ན། ཤིང་ལ་མ་ལྟོས་པའི་མེའང་མི་འཐད་དེ། རྒྱུ་མེད་དུ་འགྱུར་བའི་ཕྱིར་རོ། །དེ་བཞིན་དུ་རྣམ་པར་དཔྱད་ན་མེ་ལ་ལྟོས་པའི་ཤིང་ཡང་མེད་ཅིང་། མེ་ལ་མ་ལྟོས་པའི་ཤིང་ཡང་མི་འཐད་དེ། སྒྲུབ་བྱེད་བསྟན་ཟིན་ཏོ། །གཉིས་པ་ནི། གལ་ཏེ་མེ་དང་བུད་ཤིང་གཅིག་དང་ཐ་དད་དཔྱད་པས་ཅི་ཞིག་བྱ། མེས་བུད་ཤིང་བསྲེག་པ་མངོན་སུམ་གྱིས་མཐོང་བས་དེ་དག་རང་བཞིན་གྱིས་ཡོད་དོ་ཞེ་ན། དེ་ལྟར་མཐོང་བའི་མངོན་སུམ་ནི་བློ་འཁྲུལ་པ་ཡིན་པས། མེས་བུད་ཤིང་བསྲེག་པ་མི་འགྲུབ་ལ། རྣམ་པར་དཔྱད་པའི་ཚེ་བསྲེག་ན་གཞན་ནས་འོངས་པའི་མེའམ་སྔར་ནས་བུད་ཤིང་ལ་ཡོད་པའི་མེས་བུད་ཤིང་དེ་བསྲེག་དྲང་། དང་པོ་ལྟར་ན་མེ་ནི་བུད་ཤིང་ལས་མ་གཏོགས་པ་གཞན་ལས་མི་འོང་སྟེ། དེ་ལྟར་མ་དམིགས་པའི་ཕྱིར་རོ། །གཉིས་པ་ལྟར་ན། བུད་ཤིང་ལའང་མེ་ནི་སྔར་ནས་ཡོད་པ་མ་ཡིན་ཏེ། སྣང་རུང་མ་དམིགས་པའི་ཕྱིར་རོ། །གཞན་ཡང་དེ་བཞིན་དུ་མེས་བུད་ཤིང་བསྲེག་པ་སུན་འབྱིན་པའི་ལྷག་མ་ནི་སྔར་སོང་བ་དང་། མ་སོང་བ་དང་། བགོམ་པ་ལ་འགྲོ་བ་བཀག་པ་ཉིད་ཀྱིས་བསྟན་པ་ཡིན་ཏེ། རེ་ཤིག་བསྲེག་ལ་མི་བསྲེག་སྟེ་ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར་རོ། །གསུམ་པ་དེ་གཉིས་ཀའི་དོན་བསྡུ་བ་ནི་ཤིང་ཉིད་མེ་ནི་མ་ཡིན་ཏེ། ཤིང་ལས་གཞན་ལ་མེའང་མེད་དེ། གཉིས་ཀ་སྔར་བཀག་པའི་ཕྱིར། རིག་པ་དེ་ཉིད་ཀྱིས་མེ་ནི་ཤིང་དང་ལྡན་པ་མ་ཡིན་ཞིང་། རྟེན་མེ་ལ་བརྟེན་པ་ཤིང་བརྟེན་པར་མེད་ལ། ཤིང་དེར་མེ་དེ་བརྟེན་པར་ཡང་མེད་དེ། ལྡན་པ་ལ་ཐ་དད་དང་ཐ་མི་དད་ཀྱིས་ཁྱབ་ཅིང་། རྟེན་དང་བརྟེན་པ་ལ་ཐ་དད་ཀྱིས་ཁྱབ་པས་སོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། དེ་ལྟར་མེ་དང་ཤིང་རྣམ་པ་ལྔར་དཔྱད་ན་མེད་པ་དེ་ཉིད་ཀྱིས་ཉེ་བར་ལེན་པ་པོའི་བདག་དང་ནི། ཉེ་བར་བླང་བྱ་ཕུང་པོ་ལ་སོགས་པ་ཡང་རྣམ་པ་ལྔའི་རིམ་པ་ཀུན་མཚུངས་པ་རྣམ་པར་བཤད་དེ། དེ་གཉིས་ཀྱང་རྣམ་པ་ལྔར་དཔྱད་ན་མ་གྲུབ་པའི་ཕྱིར། མཚན་ཉིད་དང་མཚན་གཞི་དང་། ཡན་ལག་དང་ཡན་ལག་ཅན་དང་། རྒྱུ་དང་འབྲས་བུས་ཁྱབ་པའི་བུམ་སྣམ་སོགས་དང་ལྷན་ཅིག་ཏུ་མ་ལུས་པར་ནི་རྣམ་པ་ལྔ་པོའི་རིམ་པ་ཀུན་མཚུངས་པ་རྣམ་པར་བཤད་པ་ཡིན་ཏེ། ཡན་ལག་དང་ཡན་ལག་ཅན་ལ་སོགས་པ་རྣམ་པ་ལྔར་དཔྱད་ན་མི་རྙེད་ཀྱང་མ་དཔྱད་པར་ཕན་ཚུན་ལྟོས་ནས་ཐ་སྙད་དུ་གྲུབ་པ་ཙམ་ཡིན་པའི་ཕྱིར་རོ། །དབུ་མ་ལ་འཇུག་པར། བུམ་པ་སྣམ་བུ་རེ་ལྡེ་དམག་དང་ནགས་ཚལ་ཕྲེང་བ་ལྗོན་ཤིང་དང་། །ཞེས་སོགས་ཀྱི་ཚིགས་སུ་བཅད་པ་གཉིས་གསུངས་པ་ནི་ཚིགས་སུ་བཅད་པ་འདིའི་དོན་ལྟོས་བཅས་ཀྱི་དངོས་པོ་ཀུན་ལ་སྦྱར་ནས་རྣམ་པ་ལྔའམ་བདུན་དུ་བཙལ་ན་མི་རྙེད་ཀྱང་མ་དཔྱད་པར་ཕན་ཚུན་ལྟོས་ནས་གྲུབ་པའི་ཐུན་མོང་མ་ཡིན་པའི་བདེན་གཉིས་ཀྱི་འཇོག་ཚུལ་མཛད་པར་སྣང་བས་སྐལ་བ་དང་ལྡན་པ་དག་གིས་བླང་བར་བྱ་བ་ཡིན་ནོ། །གསུམ་པ་བཀག་པའི་དོན་དུ་ལྟ་བ་སྨད་པ་ནི། རང་གི་སྡེ་པ་གང་དག་ཉེ་བར་ལེན་པ་པོའི་བདག་དང་། འབྲས་བུ་དང་། ཡན་ལག་ཅན་དང་། མཚན་ཉིད་ལ་སོགས་པ་ལྟོས་བཅས་ཀྱི་དངོས་པོ་རྣམས་རང་གི་ལྟོས་ས་ཉེ་བར་ལེན་པའི་ཕུང་པོ་དང་། རྒྱུ་དང་། ཡན་ལག་དང་། མཚན་གཞི་ལ་སོགས་པ་ལས་དེ་བཅས་ཏེ་ངོ་བོ་གཅིག་པ་ཉིད་དང་། ངོ་བོ་ཐ་དད་པར་སྟོན་པ་དེ་དག་ཐུབ་པས་བསྟན་པ་རྟེན་ཅིང་འབྲེལ་པར་འབྱུང་བ་ཟབ་མོའི་དོན་ལ་མཁས་སོ་སྙམ་དུ་འཕགས་པ་ཀླུ་སྒྲུབ་བདག་མི་སེམས་སོ་ཞེས་པ་སྟེ། བསྟོད་པ་ལས། འགྲོ་བ་སྒྲ་བརྙན་དང་འདྲ་བར། །གཅིག་ཉིད་གཞན་ཉིད་དང་བྲལ་ཞིང་། །འཕོ་དང་འཇིག་པ་དང་བྲལ་བར། །སྨད་མེད་ཁྱོད་ཀྱིས་ཐུགས་སུ་ཆུད། །ཅེས་བཤད་པ་ལྟར་རོ། །གཉིས་པ་ལུང་དང་སྦྱར་བ་ནི། དེ་ལྟར་རྣལ་འབྱོར་པས་མེ་དང་བུད་ཤིང་བརྟགས་པས་ཆོས་ཀྱི་དེ་ཁོ་ན་ཉིད་ཁོང་དུ་ཆུད་པའི་ལུས་ནི་དུས་མཐའི་མེ་མདག་ལྟ་བུའམ་ཉོན་མོངས་པ་འདོད་ཆགས་སམ། ཞེ་སྡང་དང་། གཏི་མུག་གི་མེ་དག་གིས་འཚིག་པ་མ་ཡིན་ནོ། །ཇི་སྐད་དུ་བཅོམ་ལྡན་འདས་ཀྱིས། བསྐལ་པ་བརྒྱ་ཕྲག་མང་པོར་རབ་བསྲེགས་ཀྱང་། །ནམ་མཁའ་སྔོན་ཆད་ནམ་ཡང་མི་འཚིག་བཞིན། །ཆོས་རྣམས་ནམ་མཁའ་མཚུངས་པར་རྣམ་རིག་པས། །དེ་ནི་གཞར་ཡང་མེད་ནའང་ཡོང་མི་འཚིག །གལ་ཏེ་སངས་རྒྱས་ཞིང་རྣམས་འབར་འགྱུར་ལ། །འབར་བ་འདི་དག་མ་ལུས་ཞི་ཤོག་ཅེས། །ཏིང་འཛིན་གནས་ནས་སྨོན་ལམ་འདི་བཏབ་ན། །ས་རྣམས་ཞིག་ཀྱང་དེ་ལ་འགྱུར་བ་མེད། །ཞེས་གསུངས་པ་ལྟ་བུའོ། །དེ་བཞིན་དུ། ཇི་ལྟར་གཙུབ་ཤིང་དང་ནི་གཙུབ་གཏན་དང་། །ལག་པའི་རྩོལ་བ་འདི་གསུམ་འདུས་པ་ཡི། །རྐྱེན་འདི་དག་ལས་མེ་ནི་འབྱུང་འགྱུར་ཞིང་། །བྱུང་སྟེ་བྱ་བ་བྱས་ནས་མྱུར་དུ་འགག །དེ་ནས་འདི་ནི་གང་ནས་འོངས་ནས་གར། །སོང་ཞེས་མཁས་པ་གང་ཞིག་འཚོལ་བ་བྱེད། །ཕྱོགས་དང་ཕྱོགས་མཚམས་ཀུན་ཏུ་བཙལ་བ་ན། །འདི་ཡི་འགྲོ་དང་འོང་བ་རྙེད་མིན་བཞིན། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གི་དབེན་ཞིང་གནས་མེད་ལ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པར་རྟོགས་པར་གྱིས། །ལོག་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དུག་གིས་འགྲོ་བ་གདུངས། །ཐུགས་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩིའི་རྒྱུན་ནི་རབ་ཏུ་ཕོབ། །ཞེས་བྱ་བ་ལ་སོགས་པ་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། མེ་དང་བུད་ཤིང་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་པའི་རྣམ་པར་བཤད་པའོ།། །།གཉིས་པ་བྱ་བ་འཁོར་བ་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་གང་ཟག་གི་བདག་གི་ངོ་བོ་དང་། དཔེ་མེ་དང་བུད་ཤིང་དག་བཀག་མོད་ཀྱི་མདོ་ལས། དགེ་སློང་དག སྐྱེ་བ་དང་རྒ་ཤིའི་འཁོར་བ་ལ་ནི་ཐོག་མ་དང་ཐ་མ་མེད་དོ་ཞེས་པའི་ཚུལ་གྱིས་འཁོར་བ་ཡོད་པས་འཁོར་བ་པོའི་བདག་ཀྱང་ཡོད་དོ་སྙམ་པ་ལ་འཁོར་བ་ཉིད་དཔྱད་ན་མ་གྲུབ་པས། འཁོར་བ་པོའི་བདག་ཀྱང་མ་གྲུབ་བོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གཉིས་ཏེ། འཁོར་བ་རང་བཞིན་གྱིས་གྲུབ་པ་དགག་པ། རིག་པ་དེ་གཞན་ལ་སྦྱར་བའོ། །དང་པོ་ལ་གཉིས་ཏེ། འཁོར་བ་ལ་ཐོག་མཐའ་དབུས་གསུམ་མ་གྲུབ་པ། སྐྱེ་རྒ་ལ་སྔ་ཕྱི་དང་ལྷན་ཅིག་མ་གྲུབ་པའོ། །དང་པོ་ནི། འཁོར་བ་རང་བཞིན་གྱིས་ཡོད་ན་དེའི་ཐོག་མཐའ་དབུས་གསུམ་ཡོད་དགོས་པ་ལས་འཁོར་བ་ལ་ཐོག་མ་དང་མཐའ་མེད་དེ། དེ་ལ་སྔོན་གྱི་ཆ་མེད་ཅིང་། ཕྱི་མའི་ཆ་མེད་པའི་ཕྱིར། གཏན་ཚིག་རང་སྡེ་ལ་ལུང་གི་བསྒྲུབ་པ་ནི། འཁོར་བའི་སྔོན་གྱི་མཐའ་མངོན་ནམ་ཞེས་ཞུས་པའི་ཚེ་ཐུབ་པ་ཆེན་པོས་སེམས་ཅན་མ་རིག་པའི་སྒྲིབ་པ་དང་ལྡན་པ་སྲིད་པའི་ཀུན་ཏུ་སྦྱོར་བ་ཅན། སྲེད་པའི་ལུ་གུ་རྒྱུད་ཀྱིས་བཅིངས་པ་འཁོར་ཞིང་རྒྱུག་པ་རྣམས་ཀྱི་སྔོན་གྱི་མཐའ་མི་མངོན་ནོ་ཞེས་དེའི་སྔོན་གྱི་མཐའ་ཡོད་པ་མིན་པར་གསུངས་པའི་ཕྱིར་རོ། །འདིར་འགྲེལ་པར་འཁོར་བའི་སྔོན་དང་ཕྱི་མ་གཉིས་ཀ་བཀག་ན། དགེ་སློང་དག་དེ་ལྟ་བས་ན་འཁོར་བ་ཟད་པར་བྱ་བའི་ཕྱིར། ནན་ཏན་དུ་བྱའོ་སྙམ་དུ་དེ་ལྟར་ཁྱོད་ཀྱིས་བསླབ་པར་བྱའོ། །ཞེས་པ་འདི་ཇི་ལྟར་གསུང་ཞེ་ན། སེམས་ཅན་མ་རིག་པའི་སྒྲིབ་པ་དང་ལྡན་པ་ཞེས་བྱ་བ་ལ་སོགས་པའི་ཁྱད་པར་ཉེ་བར་བཀོད་པས་དེ་དག་ཁོ་ནའི་འཁོར་བ་ལ་ཐོག་མ་དང་ཐ་མ་གཉིས་ཀའང་མེད་པ་ཡིན་གྱི། དེ་ཁོ་ན་ཉིད་ཀྱི་ཡེ་ཤེས་ཀྱི་རླུང་གི་ཤུགས་ཀྱིས་མ་རིགས་པའི་ལྗོན་ཤིང་དྲུང་ནས་ཕྱུང་བ་རྣམས་ཀྱི་འཁོར་བ་ལ་ནི་ཐ་མ་ཡོད་པ་དང་། དེ་བསྟན་པའི་དགོས་པ་དང་བཅས་པ་སྤྲོས་ནས་གསུངས་སོ། །དེ་ལྟ་ནའང་དེའི་དབུས་མ་བཀག་པས་ཡོད་དོ་སྙམ་ན། གང་ལ་ཐོག་མ་དང་ཐ་མ་མེད་པའི་འཁོར་བ་དེ་ལ་དབུས་ནི་ག་ལ་ཡོད་དེ། དེ་གཉིས་མེད་པས་དེ་གཉིས་ཀྱི་བར་ན་གནས་པ་མེད་པའི་ཕྱིར་རོ། །གཉིས་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། འཁོར་བ་ལ་ཐོག་མཐའ་དབུས་གསུམ་མེད་པ་དེའི་ཕྱིར་འཁོར་བའི་རང་བཞིན་སྐྱེ་བ་དང་རྒ་ཤི་དེ་ལ་སྔ་ཕྱི་དང་ལྷན་ཅིག་གི་རིམ་པ་མི་འཐད་དེ། སྒྲུབ་བྱེད་གཞུང་འོག་མས་སྟོན་ནོ། །གཉིས་པ་ལ་གཉིས་ཏེ། སྔ་ཕྱིར་གྲུབ་པ་དགག ལྷན་ཅིག་ཏུ་གྲུབ་པ་དགག་པའོ། །དང་པོ་ནི། གལ་ཏེ་སྐྱེ་བ་སྔ་བར་གྱུར་ལ། རང་ཉིད་དང་གཞན་གྱི་རྒ་ཤི་ཕྱི་བ་ཡིན་ན་ནི་སྐྱེ་བ་ཆོས་ཅན། རང་གི་རྒ་ཤི་མེད་པ་དང་། གཞན་དུ་མ་ཤི་བ་ཡང་འདིར་སྐྱེ་བར་འགྱུར་ཏེ། རང་ཉིད་སྔ་ཞིང་རང་དང་གཞན་གྱི་རྒ་ཤི་ཕྱི་བ་ཡིན་པའི་ཕྱིར། ཡང་གལ་ཏེ་སྐྱེ་བ་ཕྱི་བར་གྱུར་ལ། རྒ་ཤི་སྔ་བ་ཡིན་ན་ནི། སྐྱེ་བ་སྔར་མེད་པའི་རྒ་ཤི་ནི་ཆོས་ཅན། ཅི་ལྟར་ཡོད་པ་ཉིད་དུ་འགྱུར་ཏེ། རྒྱུ་མེད་པའི་ཕྱིར་རོ། །གཉིས་པ་ནི། སྐྱེ་བ་དང་ནི་རྒ་ཤི་དག་ཡུལ་གཅིག་ཏུ་དུས་གཅིག་གི་ཚེ་ལྷན་ཅིག་རུང་བ་མ་ཡིན་ཏེ། དེ་ལྟར་ན་སྐྱེ་བཞིན་པ་ན་འཆི་བར་འགྱུར་ཞིང་། ཕན་ཚུན་མི་ལྟོས་པས་གཉིས་ཀའང་རྒྱུ་མེད་པ་ཅན་དུ་འགྱུར་བའི་ཕྱིར་རོ། །གསུམ་པ་ནི། གང་ལ་སྔ་ཕྱི་དང་ལྷན་ཅིག་གི་རིམ་པ་དེ་དག་མི་སྲིད་པའི་སྐྱེ་བ་དེ་དང་རྒ་ཤི་དེ་ཆོས་ཅན། འཕགས་པ་རྣམས་ཡང་དག་པར་ཡོད་པ་དང་མེད་ཅེས་སྒྲ་རྟོག་གིས་ཅིའི་ཕྱིར་ན་སྤྲོ་བར་བྱེད་དེ་སྤྲོ་བར་མི་མཛད་དེ། ཡང་དག་པ་ཅི་ལྟ་བ་བཞིན་གཟིགས་པའི་ཕྱིར། བྱིས་པ་ལ་སྦྱར་ན་སྤྲོ་བར་མི་རིགས་ཏེ། རྣམ་པ་ཐམས་ཅད་དུ་མ་དམིགས་པའི་ཕྱིར་ཞེས་པའང་འགྲེལ་པར་བཤད་དོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། འཁོར་བའི་རང་བཞིན་སྐྱེ་བ་དང་རྒ་ཤི་འབའ་ཞིག་སྔོན་གྱི་མཐའ་ཡོད་པ་མ་ཡིན་པར་མ་ཟད་ཀྱི། རྒྱུ་དང་འབྲས་བུ་ཉིད་དང་ནི། །མཚན་ཉིད་དང་ནི་མཚན་གཞི་ཉིད། །ཚོར་དང་ཚོར་པོ་ཉིད་དང་ནི། །ཤེས་དང་ཤེས་བྱ་ལ་སོགས་པ། །དོན་ཡོད་གང་དག་ཅི་ཡང་རུང་། །ཕན་ཚུན་ལྟོས་པ་དང་བཅས་པའི་དངོས་པོ་ཐམས་ཅད་ཉིད་ལ་ཡང་ཆོས་ཅན། གཅིག་སྔོན་དུ་གྲུབ་པའི་སྔོན་གྱི་མཐའ་དང་། ལྷན་ཅིག་ཏུ་ནི་ཡོད་པ་མ་ཡིན་པས་དོན་དམ་པར་རང་བཞིན་མེད་པར་གྲུབ་སྟེ། སྐྱེ་བ་དང་རྒ་ཤི་ལ་སྔ་ཕྱི་དང་ལྷན་ཅིག་འགོག་པའི་རིག་པ་ཐམས་ཅད་མཚུངས་པའི་ཕྱིར། གཉིས་པ་ལུང་དང་སྦྱར་བ་ནི་འཕགས་པ་དཀོན་མཆོག་སྤྲིན་གྱི་མདོ་ལས། ཆོས་ཀྱི་འཁོར་ལོ་བསྐོར་བ་ན། །གཟོད་ནས་ཞི་ཞིང་མ་སྐྱེས་པ། །རང་བཞིན་མྱ་ངན་འདས་པ་ཡི། །ཆོས་རྣམས་མགོན་པོ་ཁྱོད་ཀྱིས་བསྟན། །ཞེས་འཕགས་པ་བྱང་ཆུབ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བཅོམ་ལྡན་འདས་ལ་བསྟོད་པ་ཡིན་ནོ། །དེ་བཞིན་དུ་གཟོད་མ་ནས་ནི་སྟོང་ཞིང་མ་འོངས་ཆོས། །སོང་བ་མེད་ཅིང་གནས་མེད་གནས་ཀྱིས་དབེན། །སྒྱུ་མའི་རང་བཞིན་རྟག་ཏུ་སྙིང་པོ་མེད། །ཐམས་ཅད་དག་ཅིང་རྣམ་དག་ནམ་མཁའ་བཞིན། །རྒྱལ་བའི་ཆོས་ནི་གང་དག་རབ་སྟོན་པ། །དེ་ཡང་མི་ཟད་པས་ན་མི་མཐོང་སྟེ། །ཆོས་འདི་སྔ་ནས་བདག་མེད་སེམས་ཅན་མེད། །དེ་དག་རབ་ཏུ་སྟོན་ཀྱང་ཟད་མི་འགྱུར། །བཏག་པ་ཙམ་དུ་བརྟགས་ནས་བརྗོད་པ་ཡིན། །འཁོར་བ་ལ་ནི་མཐའ་མ་མི་རྙེད་དེ། །གང་དག་སྔོན་བྱུང་མཐའ་ནི་མཚན་ཉིད་མེད། །མ་འོངས་དུས་ཀྱང་ཤེས་པར་བྱ་བའི་ཕྱིར། །འདི་ཡི་འགྲོ་དང་འོང་བ་རྙེད་མིན་བཞིན། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གིས་དབེན་ཞིང་གནས་མེད་པ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པར་རྟོགས་པར་གྱིས། །ལོག་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དུག་གིས་འགྲོ་བ་གདུངས། །ཐུགས་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩིའི་རྒྱུན་ནི་རབ་ཏུ་ཕོབ། །ཞེས་གསུངས་ཏེ་བསྟན་ཚུལ་ནི་སྔ་མ་དང་འདྲའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྔོན་དང་ཕྱི་མའི་མཐའ་བརྟགས་པ་ཞེས་བྱ་བ་སྟེ་རབ་ཏུ་བྱེད་པ་བཅུ་གཅིག་པའི་རྣམ་པར་བཤད་པའོ།། །།གསུམ་པ་བརྟན་པ་སྡུག་བསྔལ་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་གང་ཟག་གི་བདག་བཀག་མོད་ཀྱི་འོན་ཀྱང་མདོ་ལས་སྐྱེ་བ་ནི་སྡུག་བསྔལ་ལོ། །རྒ་བ་དང་། ན་བ་དང་། འཆི་བ་ནི་སྡུག་བསྔལ་ལོ་ཞེས་བརྟེན་པ་སྡུག་བསྔལ་ཡོད་པར་གསུངས་པས། དེའི་རྟེན་གང་ཟག་གི་བདག་ཀྱང་ཡོད་དོ་ཞེ་ན། སྡུག་བསྔལ་ཉིད་མཐའ་བཞིར་སྐྱེ་བ་མེད་པས་དེའི་རྟེན་གང་ཟག་གི་བདག་ཀྱང་མེད་དོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས་དང་པོ་རིགས་པས་བསྒྲུབ་པ་ལ་ཡང་གཉིས་ཏེ། སྡུག་བསྔལ་མཐའ་བཞིར་གྲུབ་པ་དགག རིགས་པ་དེ་ཆོས་གཞན་ལའང་སྦྱར་བའོ། །དང་པོ་ལ་གཉིས་ཏེ། རྟོག་གེ་པའི་འདོད་པ་འགོད། དེ་ཉིད་སུན་དབྱུང་བའོ། །དང་པོ་ནི། སྡུག་བསྔལ་རང་བཞིན་གྱི་ཡོད་ན་མཐའ་བཞི་གང་རུང་ལས་སྐྱེ་དགོས་པས་གང་ལས་སྐྱེ་རྟོག་དྲང་། དེ་ལ་གྲངས་ཅན་པ་ཁ་ཅིག སྡུག་བསྔལ་བདག་གིས་བྱས་པ་དང་། རང་གི་སྡེ་པ་དག་སྡུག་བསྔལ་གཞན་གྱིས་བྱས་པ་དང་། གཅེར་བུ་པ་དག་གཉིས་ཀས་བྱས་པ་དང་། རྒྱང་འཕེན་པ་དག་རྒྱུ་མེད་ལས་བྱུང་བར་འདོད་དོ། །གཉིས་པ་ལ་གཉིས་ཏེ། དམ་བཅའ་མདོར་བསྟན། འཐད་པ་རྒྱས་པར་བཤད་པའོ། །དང་པོ་ནི། སྡུག་བསྔལ་མཐའ་བཞི་ལས་བྱུང་བ་དེ་ནི་བྱ་བར་མི་རུང་ངོ་ཞེས་པ་སྟེ་འཐད་པ་འོག་ནས་འཆད་དོ། །གཉིས་པ་ལ་གསུམ་སྟེ། བདག་གཞན་རེ་རེ་བས་བྱས་པ་དགག གཉིས་ཀས་བྱས་པ་དགག རྒྱུ་མེད་ལས་བྱུང་བ་དགག་པའོ། །དང་པོ་ལ་གསུམ་སྟེ། ཕུང་པོ་ལ་ལྟོས་པའི་བདག་བྱས་དང་གཞན་བྱས་དགག གང་ཟག་ལ་ལྟོས་པའི་བདག་བྱས་དང་གཞན་བྱས་དགག བདག་བྱས་མ་གྲུབ་པས་གཞན་བྱས་མི་འགྲུབ་པར་བསྟན་པའོ། །དང་པོ་ལ་གཉིས་ཏེ། བདག་བྱས་དགག་པ་དང་། གཞན་བྱས་དགག་པའོ། །དང་པོ་ནི། གལ་ཏེ་སྡུག་བསྔལ་ཉེར་ལེན་གྱི་ཕུང་པོ་འདི་ཕུང་པོ་བདག་ཉིད་ཀྱིས་བྱས་པར་གྱུར་ན་ཕུང་པོ་འདི་རྒྱུ་རྐྱེན་ལ་བརྟེན་ནས་འབྱུང་བར་མི་འགྱུར་ཏེ། རང་གྲུབ་ན་སྐྱེ་བ་དོན་མེད་ཅིང་། མ་གྲུབ་ན་སྐྱེ་བྱེད་མེད་པའི་ཕྱིར་རོ། །འདོད་པར་ནི་མི་ནུས་ཏེ། གང་གི་ཕྱིར་འགག་པའི་ཆར་གཏོགས་པའི་ཕུང་པོ་སྔ་མ་འདི་དག་ལ་བརྟེན་ནས་སྐྱེ་བའི་ཆར་གཏོགས་པའི་ཕུང་པོ་ཕྱི་མ་དེ་དག་འབྱུང་བར་མཐོང་བས་སོ། །གཉིས་པ་ནི། གལ་ཏེ་འབྲས་བུ་ཕུང་པོ་ཕྱི་མ་དེ་ལས་རྒྱུ་ཕུང་པོ་སྔ་མ་འདི་རྫས་གཞན་དུ་འགྱུར་ན་དེས་སྡུག་བསྔལ་བྱས་པ་རྒྱུ་གཞན་གྱིས་བྱས་པར་འགྱུར་ཞིང་། གལ་ཏེ་རྒྱུ་ཕུང་པོ་སྔ་མ་འདི་ལས་འབྲས་བུ་ཕུང་པོ་ཕྱི་མ་འདི་རྫས་གཞན་ཡིན་ན། རྒྱུ་གཞན་དེ་དག་གིས་སྡུག་བསྔལ་དེ་བྱས་པས་འབྲས་བུ་གཞན་བྱས་པར་འགྱུར་ན་ཡང་རྒྱུ་འབྲས་རྫས་གཞན་ཡིན་པ་ཉིད་མ་གྲུབ་སྟེ། ཅིག་ཆར་དུ་མེད་པའི་ཕྱིར་དང་། ཡོད་ན་ཕན་ཚུན་ལྟོས་པ་དོན་མེད་པས་རྒྱུ་འབྲས་ཉིད་མ་ཡིན་པར་ཐལ་བའི་ཕྱིར་རོ། །གཉིས་པ་ལ་གཉིས་ཏེ། བདག་བྱས་དགག་པ་དང་། གཞན་བྱས་དགག་པའོ། །དང་པོ་ནི། གལ་ཏེ་སྡུག་བསྔལ་དེ་སྡུག་བསྔལ་རང་གིས་བྱས་ནས་འདི་ལ་བྱིན་པ་མ་ཡིན་གྱི། སྡུག་བསྔལ་གང་གིས་གང་ཟག་དེར་བཏགས་པའི་གང་ཟག་དེ་ཉིད་ཀྱིས་སྡུག་བསྔལ་དེ་བྱས་པས་སྡུག་བསྔལ་བདག་གིས་ནི་བྱས་པ་ཡིན་ནོ་སྙམ་ན། དེ་ཡང་མི་རུང་སྟེ། སྡུག་བསྔལ་དེ་ཉིད་ལ་བཏགས་པའི་གང་ཟག་བདག་གིས་ནི་སྡུག་བསྔལ་དེ་བྱས་ན་མིའི་སྡུག་བསྔལ་བྱེད་པ་པོའི་གང་ཟག་བདག་གིས་མིའི་སྡུག་བསྔལ་བྱས་པའི་གང་ཟག་དེ་ཆོས་ཅན། མིའི་སྡུག་བསྔལ་ལས་མ་གཏོགས་པ་གང་ཞིག་ཡིན་ཏེ། ལོགས་སུ་ཡོད་པ་མི་འཐད་པར་ཐལ། དེ་ལས་ཐ་དད་དུ་མ་དམིགས་པའི་ཕྱིར། གཉིས་པ་ནི། གལ་ཏེ་ཚེ་སྔ་མའི་མི་དང་། ཕྱི་མའི་ལྷའི་གང་ཟག་གཉིས་གཅིག་པ་མ་ཡིན་གྱི་རྫས་གཞན་ཡིན་པས་མིའི་གང་ཟག་གིས་ལྷར་སྐྱེ་བའི་ལས་བསགས་པའི་སྒོ་ནས་ཕྱི་མའི་ལྷའི་སྡུག་བསྔལ་བྱས་ནས་ལྷའི་གང་ཟག་ལ་བྱིན་པས་སྡུག་བསྔལ་དེ་ལ་ལྷའི་གང་ཟག་ཏུ་འདོགས་པའི་ཕྱིར། སྡུག་བསྔལ་གང་ཟག་གཞན་གྱི་བྱས་པ་ཡིན་ནོ་ཞེ་ན། དེ་དགག་པ་ལ་གཉིས་ཏེ། ལེན་པ་པོའི་ངོས་ནས་དགག་པ། སྦྱིན་པ་པོའི་ངོས་ནས་དགག་པའོ། །དང་པོ་ནི། གལ་ཏེ་སྐྱེ་བ་སྔ་མའི་མིའི་གང་ཟག་གཞན་ལས་ནི་ཕྱི་མའི་ལྷའི་སྡུག་བསྔལ་འབྱུང་ན་མིའི་གང་ཟག་གཞན་ཞིག་གིས་ལྷའི་སྡུག་བསྔལ་དེ་བྱས་ནས་གང་ལ་སྦྱིན་པར་བྱ་བའི་ཡུལ་ལྷའི་གང་ཟག་དེ་ཆོས་ཅན། ལྷའི་སྡུག་བསྔལ་ལས་མ་གཏོགས་པ་ཅི་ལྟར་རུང་སྟེ། དེ་ལས་ཐ་དད་དུ་མ་དམིགས་པའི་ཕྱིར་རོ། །གཉིས་པ་ནི། གལ་ཏེ་དེ་ལྟར་མིའི་གང་ཟག་གཞན་ལས་ཕྱི་མའི་ལྷའི་སྡུག་བསྔལ་འབྱུང་ན་མིའི་གང་ཟག་གང་གིས་སྡུག་བསྔལ་དེ་བྱས་ནས་གཞན་ལྷའི་གང་ཟག་ལ་སྟེར་བ་པོའི་མིའི་གང་ཟག་གཞན་དེ་ཆོས་ཅན། མིའི་སྡུག་བསྔལ་ལས་མ་གཏོགས་པ་གང་ཞིག་ཡིན་ཏེ། དེ་ལས་ཐ་དད་དུ་མ་དམིགས་པའི་ཕྱིར་རོ། །གསུམ་པ་ལ་གཉིས་ཏེ། གང་ཟག་ལ་ལྟོས་པའི་བདག་བྱས་མ་གྲུབ་པས་གཞན་བྱས་མི་གྲུབ་པར་བསྟན་པ། ཕུང་པོ་ལ་ལྟོས་པའི་བདག་བྱས་མ་གྲུབ་པས་གཞན་བྱས་མི་གྲུབ་པའོ། །དང་པོ་ནི། སྡུག་བསྔལ་གཞན་གྱིས་བྱས་ཞེས་པའི་བྱེད་པ་པོའི་མིའི་གང་ཟག་ཆོས་ཅན། ལྷའི་སྡུག་བསྔལ་རང་ལས་གཞན་པ་ག་ལ་བྱེད་དེ། མིའི་སྡུག་བསྔལ་ལ་ལྟོས་ནས་གང་ཟག་བདག་གིས་བྱས་པར་མ་གྲུབ་པའི་ཕྱིར་རོ། །ཁྱབ་སྟེ། གང་ཟག་གཞན་གྱིས་སྡུག་བསྔལ་གང་བྱེད་པའི་གང་ཟག་དེ་ནི་གང་ཟག་དེའི་སྡུག་བསྔལ་གང་ཟག་བདག་གིས་བྱས་པར་འགྱུར་དགོས་པའི་ཕྱིར་རོ། །གཉིས་པ་ནི། རེ་ཞིག་སྡུག་བསྔལ་གཞན་བྱེད་པ་པོའི་མིའི་སྡུག་བསྔལ་གྱི་ཕུང་པོ་དེ་བདག་གིས་བྱས་པ་མ་ཡིན་ཏེ། རང་ལ་བྱ་བྱེད་འགལ་བས་དེ་ཉིད་ཀྱིས་ནི་དེ་མ་བྱས་པས་སོ། །སྡུག་བསྔལ་གཞན་བྱས་ག་ལ་འགྱུར་ཞེས་པ་དང་གྲུབ་པ་དེ་གཅིག་པ་མིའི་སྡུག་བསྔལ་ཆོས་ཅན། ལྷའི་སྡུག་བསྔལ་བྱེད་པར་ག་ལ་འགྱུར་ཏེ། དེའི་བྱེད་པ་པོ་གཞན་མིའི་སྡུག་བསྔལ་དེ་ཉིད་བདག་གིས་མ་བྱས་པའི་ཕྱིར་རོ། །གཉིས་པ་གཉིས་ཀས་བྱས་པ་དགག་པ་ནི། གལ་ཏེ་རང་གཞན་རེ་རེས་བྱས་པར་གྱུར་ན་སྡུག་བསྔལ་གཉིས་ཀས་བྱས་པར་འགྱུར་ན་ཡང་། གཉིས་ཀ་ཚོགས་པས་ཀྱང་མི་བྱེད་དེ། སྔར་རེ་རེ་བས་བྱས་པ་བཀག་ཟིན་པའི་ཕྱིར་རོ། །གསུམ་པ་རྒྱུ་མེད་ལས་བྱུང་བ་དགག་པ་ནི། སྡུག་བསྔལ་ཆོས་ཅན། གཞན་གྱིས་ཀྱང་མ་བྱས། བདག་གིས་ཀྱང་མ་བྱས། གཉིས་ཀས་ཀྱང་མ་བྱས་པས་རྒྱུ་མེད་དུ་ག་ལ་འགྱུར་ཏེ། རྒྱུ་མེད་ཡིན་ན་ཤེས་པའི་གཟུང་ཡུལ་དུ་མི་སྣང་བ་དང་། རེས་འགལ་བ་མ་ཡིན་པར་ཐལ་བའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་སྦྱར་བ་ནི། ཟིན་པའི་ཕུང་པོ་ལྔས་བསྡུས་པའི་སྡུག་བསྔལ་འབའ་ཞིག་རྣམ་པ་བཞི་ཡོད་པ་མ་ཡིན་པར་མ་ཟད་ཀྱི། དེ་བཞིན་དུ་ཕྱི་རོལ་བུམ་པ་ལ་སོགས་པའི་དངོས་པོ་རྣམས་ལ་ཡང་མཐའ་རྣམ་པ་བཞི་པོ་དག་ལས་སྐྱེ་བ་ཡོད་པ་མ་ཡིན་ཏེ། གལ་ཏེ་བདག་གིས་བྱས་གྱུར་ན་ཞེས་སོགས་ཀྱི་རིག་པ་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས་ཀྱང་། ཀུན་རྫོབ་ཏུ་ནི་རྒྱལ་བས་ཆོས་བཤད་དེ། །འདུས་བྱས་འདུས་མ་བྱས་ཡིན་དེ་ལྟར་ལྟོས། །ཡང་དག་ཉིད་དུ་བདག་དང་མི་མེད་དེ། །འགྲོ་བ་ཀུན་གྱི་མཚན་ཉིད་འདི་འདྲའོ། །དགེ་དང་ནག་པོའི་ལས་རྣམས་མི་འཇིག་སྟེ། །བདག་གིས་བྱས་པ་བདག་གིས་མྱོང་བར་འགྱུར། །ལས་ཀྱི་འབྲས་བུ་འཕོ་བར་མི་འགྱུར་ཏེ། །རྒྱུ་མེད་པར་ཡང་མྱོང་བར་མི་འགྱུར་རོ། །སྲིད་པ་ཐམས་ཅད་སྒྱུ་མ་དབང་མེད་པ། །གསོག་དང་གསོབ་ཏུ་གྱུར་པ་དབུ་བ་བཞིན། །སྒྱུ་མ་སྨིག་རྒྱུ་ལྟ་བུར་རྟག་ཏུ་སྟོང་། །སྒྲ་ཡིས་བཤད་ཀྱང་དེ་དག་དབེན་པ་ཡིན། །བྲག་ཕུག་རི་དང་གཅོང་རོང་ཀླུང་རྣམས་སུ། །རྐྱེན་གྱིས་ཇི་ལྟར་བྲག་ཆ་འབྱུང་བ་ལྟར། །དེ་བཞིན་འདུས་བྱས་འདི་ཀུན་རིག་པར་གྱིས། །འགྲོ་བ་ཐམས་ཅད་སྒྱུ་མ་སྨིག་རྒྱུ་བཞིན། །ཞེས་བྱ་བ་ལ་སོགས་པ་གསུངས་ཏེ། བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་རྣམ་བཤད་ཡང་དག་ལྟ་བའི་འོད་ཟེར་ལས། བདག་གིས་བྱས་པ་དང་གཞན་གྱིས་བྱས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་གཉིས་པའི་རྣམ་པར་བཤད་པའོ།། །།གསུམ་པ་རྟེན་འབྲེལ་དངོས་པོ་ཙམ་གྱི་རང་བཞིན་གྱིས་སྟོང་པ་ལ་གཉིས་ཏེ། དངོས་པོ་ཙམ་གྱི་ངོ་བོ་དགག་པ། དེའི་སྒྲུབ་བྱེད་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཕྱི་ནང་གི་ཆོས་རྣམས་མཐའ་བཞི་ལས་སྐྱེ་བ་བཀག་པས་ཡང་དག་པར་མ་སྐྱེས་པར་གྲུབ་བཞིན་དུ་མ་རིག་པའི་རབ་རིབ་ཅན་ལ་སྐྱེ་བ་ལ་སོགས་པར་སྣང་བས་འདུ་བྱེད་བསླུ་བའི་ཆོས་ཅན་དུ་གྲུབ་ལ། དེ་ལ་བརྫུན་པས་ཁྱབ་པ་ཉིད་དུ་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གཉིས་ཏེ། ལུང་ལས་རང་བཞིན་མེད་པར་གྲུབ་པ། ལུང་དོན་གཞན་དུ་རྟོག་པ་དགག་པའོ། །དང་པོ་ནི། འདུ་བྱེད་ཕྱི་ནང་གི་དངོས་པོ་དེ་དག་སྒྱུ་མའི་སྐྱེས་བུ་ལྟར་བརྫུན་པ་རང་བཞིན་མེད་པ་ཡིན་ཏེ། འདུ་བྱེད་ཕྱི་ནང་གི་ཆོས་ཐམས་ཅད་སྔར་བཤད་པའི་རིག་པས་སྐྱེ་བ་མེད་པར་གྲུབ་བཞིན་དུ་མ་རིག་པའི་རབ་རིབ་ཅན་ལ་སྐྱེ་བའི་དངོས་པོར་སྣང་བས་བསླུ་བའི་ཆོས་ཅན་དུ་གྲུབ་པ་དེས་ན་སྟེ་དེའི་ཕྱིར། གཏན་ཚིགས་དང་ཁྱབ་པ་གཉིས་ཀ་གྲུབ་སྟེ། བཅོམ་ལྡན་འདས་ཀྱིས་དགེ་སློང་དག་འདུས་བྱས་བསླུ་བའི་ཆོས་ཅན་གང་ཡིན་པ་དེ་ནི་བརྫུན་པ་ཡིན་ལ། མི་བསླུ་བའི་ཆོས་ཅན་མྱ་ངན་ལས་འདས་པ་གང་ཡིན་པ་དེ་ནི་བདེན་པ་དམ་པའོ། །ཞེས་དང་། དེ་བཞིན་དུ་ནི་འདི་ནི་བསླུ་བར་བྱེད་པའི་ཆོས་ཅན་ནོ། །འདི་ནི་འཇིག་པའི་ཆོས་ཅན་ནོ་ཞེས་འདུས་བྱས་བསླུ་བར་ཡང་གསུངས་ཤིང་། ཆོས་གང་ཞིག་བསླུ་བ་དེ་ནི་བརྫུན་ཞེས་ཀྱང་གསུངས་པའི་ཕྱིར་རོ། །ལུང་འདི་དག་གི་དོན། མདོ་སེམས་གཉིས་ཀྱིས་སྲེད་པས་འཕངས་པའི་འདུས་བྱས་རྣམས་བདེ་བར་སྣང་ཡང་དོན་ལ་སྡུག་བསྔལ་ཡིན་པས། དེའི་ཆ་ནས་བསླུ་བ་དང་། བརྫུན་པར་འཇོག་ལ། མི་རྟག་པ་ཐམས་ཅད་སྡུག་བསྔལ་དུ་གསུངས་པའི་དོན་ཡང་མཚན་གཞི་དེ་ཉིད་ལ་འདོད་ཀྱི་འདུས་བྱས་ཐམས་ཅད་ལ་མི་འདོད་དོ། །དབུ་མ་པས་འདུས་བྱས་ཐམས་ཅད་ལ་མི་རྟག་པ་དང་། སྡུག་བསྔལ་དང་། བསླུ་བ་དང་། བརྫུན་པས་ཁྱབ་པས་ས་བཅུའི་མཉམ་བཞག་རང་ངོར་འདུས་བྱས་སྐད་ཅིག་གིས་སྐྱེ་འཇིག་མེད་པས་སྡུག་བསྔལ་མེད་ཀྱང་རྗེས་ཐོབ་ཏུ་འགག་དང་བཅས་པའི་སྐྱེ་བ་དང་། །ཞེས་པའི་ཚུལ་གྱིས་སྐྱེ་འགག་ཏུ་སྣང་བ་ཡོད་པས་མ་རིག་བག་ཆགས་ཀྱིས་དང་། ཟག་མེད་ཀྱི་ལས་ལ་བརྟེན་ནས་བྱུང་བའི་མི་རྟག་པ་ལ་སྡུག་བསྔལ་དུ་བྱས་པ་ས་བཅུ་པའི་རྗེས་ཐོབ་ཀྱི་བར་དུ་ཡོད་པར་བཞེད་ཅིང་། སངས་རྒྱས་རང་སྣང་ལ། གང་གིས་སྐྱེ་དང་འཇིག་པ་དག །ཚུལ་འདི་ཡིས་ནི་སྤངས་གྱུར་པ། །ཞེས་པའི་ཚུལ་གྱིས་སྐྱེ་འགག་མི་སྣང་བས། འདུས་བྱས་དང་། མི་རྟག་པ་སོགས་མེད་ཅིང་། གདུལ་བྱའི་གཞན་ངོར་ནི། དགེ་བ་སྐྱེ་དང་འཇིག་པས་ན། །སངས་རྒྱས་སྐུ་ནི་སྐྱེ་དང་འཇིག །ཞེས་པའི་ཚུལ་གྱིས་སྐྱེ་འགག་ཡོད་ཀྱང་། དེས་སངས་རྒྱས་ཀྱི་ཡེ་ཤེས་ལ་སྐྱེ་འགག་ཡོད་པར་མི་གྲུབ་སྟེ། གདུལ་བྱའི་སེམས་ལ་སྣང་ཚུལ་ཡིན་པའི་ཕྱིར་རོ། །དེ་ལྟར་བྱས་ན། འདིར་འདུས་བྱས་ལ་བསླུ་བས་ཁྱབ་པ་དང་། རྒྱུད་བླ་མར། བསླུ་བའི་ཆོས་ཅན་ཡིན་ན། མཐར་ཐུག་གི་སྐྱབས་མ་ཡིན་པས་ཁྱབ་པ་དང་། སངས་རྒྱས་ཀྱི་སར་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལ་བརྟེན་ནས་བྱུང་བའི་སྐྱེ་རྒ་ན་འཆི་བཞི་ཆར་སྤངས་ཟིན་པས། འདུས་མ་བྱས་སུ་གསུངས་པ་རྣམས་ཀྱི་དོན་ཕྱོགས་གཅིག་ཏུ་རྟོག་པར་འགྱུར་བས། ཟབ་དོན་རྟོགས་པར་འདོད་པ་དག་གིས་འདི་ལ་དཔྱོད་ཅིག མི་ཤེས་པ་དག་གིས་ཅིའང་མ་སྨྲ་ཤིག གཉིས་པ་ལུང་དོན་གཞན་དུ་རྟོག་པ་དགག་པ་ལ་གཉིས་ཏེ། དངོས་མེད་ལུང་དོན་ཡིན་པ་དགག་པ། མི་རྟག་པ་ལུང་དོན་ཡིན་པ་དགག་པའོ། །དང་པོ་ནི། གལ་ཏེ་དེ་ལྟར་ན། འདུ་བྱེད་ཐམས་ཅད་མེད་པར་ལྟ་བའི་ཆད་པར་ལྟ་བར་འགྱུར་རོ་ཞེ་ན། དེ་ནི་མ་ཡིན་ཏེ། གལ་ཏེ་འདི་ལྟར་འདུ་བྱེད་བསླུ་བའི་ཆོས་ཅན་གང་ཡིན་པ་དེ། བརྫུན་ཞིང་རང་བཞིན་མེད་པ་ཡིན་པས། དེ་ལ་ཅི་ཞིག་བསླུ་བ་སྟེ། དངོས་པོ་མེད་པའམ་ཆད་པར་འགྱུར་ཏེ་མི་འགྱུར་བར་ཐལ། དགག་བྱ་དང་ཆད་རྒྱུ་མ་དམིགས་པའི་ཕྱིར་ཏེ། མ་སྐྱེས་ངོ་བོ་ཉིད་ལ་ནི། །རྟག་དང་ཆད་ཉིད་ག་ལ་ཞིག །ཅེས་གསུངས་པ་ལྟ་བུའོ། །ལུང་དེས་དངོས་པོ་མེད་པར་ཡང་མི་སྟོན་ན། འོ་ན་ཅི་ཞིག་སྟོན་ཅེ་ན། བཅོམ་ལྡན་འདས་ཀྱིས་འདུ་བྱེད་བསླུ་བའི་ཆོས་ཅན་གང་ཡིན་པ་དེ་ནི་བརྫུན་ནོ། །ཞེས་དེ་སྐད་གསུངས་པ་ནི་ཆོས་ཅན། དངོས་པོའམ་དངོས་པོ་མེད་པར་གནས་ལུགས་སུ་སྟོན་པ་མིན་ཏེ། དགག་སྒྲུབ་ལ་སོགས་པ་སྤྲོས་པའི་མཚན་མ་ཅིའང་མེད་པའི་རང་བཞིན་སྟོང་པ་ཉིད་ཡོངས་སུ་བསྟན་པ་ཡིན་པའི་ཕྱིར། གཉིས་པ་ལ་གཉིས་ཏེ། ཕྱོགས་སྔ་མ་འགོད་པ་དང་། དེ་དགག་པའོ། །དང་པོ་ནི། རང་གི་སྡེ་པ་དག་ལུང་གི་དགོངས་པ་དངོས་པོ་རང་བཞིན་མེད་པར་སྟོན་པ་ནི་མ་ཡིན་ཏེ། གཞན་སྡེ་དང་། འཇིག་རྟེན་པ་རྣམས་ཀྱིས་བརྟག་པའི་རྟག་པའི་དངོས་པོས་སྟོང་བའི་འདུ་བྱེད་སྐད་ཅིག་གིས་འཇིག་པ་དང་། རྒྱུན་གྱི་མཐར་མི་གནས་པའི་མི་རྟག་པའི་ཆོས་ཙམ་སྟོན་པར་བྱེད་པ་ཡིན་ཏེ། འདི་ལྟར་ཕྱི་རོལ་པ་ལྟར། འདུ་བྱེད་ཕྱི་ནང་གི་དངོས་པོ་རྣམས་རང་བཞིན་འཇིག་མེད་དང་། རྫས་སྐད་ཅིག་གཉིས་པར་སྡོད་པའི་རྟག་པའི་ངོ་བོ་ཉིད་མེད་དེ། སྒྲུབ་བྱེད་རིམ་པ་ལྟར་གནས་སྐབས་གཞན་དུ་འགྱུར་བ་དང་། རྒྱུན་ཆད་པ་མངོན་སུམ་དུ་སྣང་བའི་ཕྱིར་རོ། །ཡང་དབུ་མ་པ་ལྟར་དངོས་པོ་རྣམས་ངོ་བོ་ཉིད་ཡེ་མེད་པ་ཡང་མ་ཡིན་ཏེ། གང་གི་ཕྱིར་ན་དངོས་པོ་རྣམས་ལ་སྟོང་པ་ཉིད་ཅེས་བྱ་བའི་ཆོས་ཁས་ལེན་པས། རྟེན་ཆོས་ཅན་ཡང་ཁས་ལེན་དགོས་པའི་ཕྱིར་རོ། །ཡང་དངོས་པོ་ངོ་བོ་ཉིད་མེད་པ་མ་ཡིན་ཏེ། གལ་ཏེ་ངོ་བོ་ཉིད་མེད་ན། ནམ་མཁའི་མེ་ཏོག་ལྟར། ཆོས་གཞན་དུ་འགྱུར་བ་དེ་ཆོས་ཅན་གང་གི་ཡིན་ཏེ། དེ་མེད་པར་ཐལ་བ་ལས་ཆོས་གཞན་དུ་འགྱུར་བ་ཡོད་པའི་ཕྱིར་ཞེས་འཛེར་རོ། །གཉིས་པ་ལ་གཉིས་ཏེ། དངོས་པོ་རང་བཞིན་ཡོད་པའི་སྒྲུབ་བྱེད་གཞན་འགྱུར་མི་འཐད་པ། སྟོང་ཉིད་ཡོངས་གཅོད་དུ་གྲུབ་པ་མི་འཐད་པའོ། །དང་པོ་ལ་གཉིས་ཏེ། རང་བཞིན་གྲུབ་ན་གཞན་འགྱུར་འགལ་བར་བསྟན་པ། གཞན་གྱུར་ཉིད་མ་གྲུབ་པར་བསྟན་པའོ། །དང་པོ་ནི། གལ་ཏེ་དངོས་པོ་རྣམས་ཆོས་ཅན། ཅི་ལྟ་བུར་ན་གཞན་དུ་འགྱུར་ཏེ། གཞན་དུ་འགྱུར་བ་མེད་པར་ཐལ། ངོ་བོ་ཉིད་ཀྱིས་ཡོད་པའི་ཕྱིར། གཉིས་པ་ནི། གཞན་དུ་འགྱུར་བ་དེ་ཡང་རྣམ་པར་དཔྱད་ན་མི་འཐད་དེ། འདི་ལྟར་སྔར་གྱི་གནས་སྐབས་དེ་ཉིད་ལ་ནི་གཞན་དུ་འགྱུར་བ་མེད་དེ། གནས་སྐབས་སྔ་མ་མ་བཏང་བར་གཞན་དུ་འགྱུར་བ་འགལ་བའི་ཕྱིར་རོ། །སྔར་གྱི་གནས་སྐབས་ལས་གཞན་ཉིད་ལ་ཡང་གཞན་དུ་འགྱུར་བ་ཡོད་པ་མ་ཡིན་ཏེ། གནས་སྐབས་གཞན་ཐོབ་པ་དེ་ཉིད་གཞན་དུ་གྱུར་ཟིན་པ་ཡིན་པས་གཞན་དུ་འགྱུར་བ་དོན་མེད་པའི་ཕྱིར་རོ། །དེ་ཉིད་དཔེས་བསྟན་པ་ནི། གང་གི་ཕྱིར་གཞོན་ནུའི་གནས་སྐབས་མདོར་བ་མི་རྒ་སྟེ། གནས་སྐབས་ཕན་ཚུན་འགལ་བའི་ཕྱིར་རོ། །གལ་ཏེ་གཞོན་ནུའི་གནས་སྐབས་དོར་ནས་རྒ་བར་འགྱུར་རོ་སྙམ་ན། གཞོན་ནུའི་གནས་སྐབས་དོར་བ་ཉིད་རྒས་པ་ཡིན་པས། གང་གི་ཕྱིར་རྒས་པ་ཡང་མི་རྒ་སྟེ་དོན་མེད་པའི་ཕྱིར། གཞན་ཡང་དཔྱད་ན་གཞན་འགྱུར་མི་འཐད་དེ། སྔར་གྱི་གནས་སྐབས་དེ་ཉིད་གཞན་དུ་འགྱུར་ན། འོ་མ་ཉིད་ནི་མ་དོར་བར་ཞོར་འགྱུར་ལ། སྔར་གྱི་གནས་སྐབས་དེ་ཉིད་ལས་གཞན་གཞན་དུ་འགྱུར་ན་ཡང་འོ་མ་ལས་གཞན་ཆུ་ལ་སོགས་པ་གང་ཞིག་ནི་ཞོའི་དངོས་པོ་ཡིན་པར་འགྱུར་ཏེ་མི་སྲིད་པའི་ཕྱིར་རོ། །གཉིས་པ་ལ་གཉིས་ཏེ། དགག་པ་དངོས། དེ་ལ་ལུང་འགལ་སྤོང་བའོ། །དང་པོ་ནི། དངོས་པོ་རྣམས་ལ་སྟོང་པ་ཉིད་ཀྱི་ཆོས་ཡང་དག་པར་ཡོད་པ་མི་འཐད་དེ། མི་སྟོང་པ་མེད་པའི་ཕྱིར་རོ། །ཁྱབ་སྟེ། གལ་ཏེ་དགག་བྱ་གང་ཟག་དང་ཆོས་བདེན་པའི་དངོས་པོས་མི་སྟོང་པ་ཅུང་ཟད་ཅིག་ཡོད་ན་དེ་བཀག་པའི་གང་ཟག་དང་ཆོས་བདེན་པའི་དངོས་པོས་སྟོང་པ་ཅུང་ཟད་ཡོད་པར་འགྱུར་ན་ཡང་། ལྟོས་ས་གང་ཟག་དང་ཆོས། བདེན་པའི་དངོས་པོས་མི་སྟོང་པ་ཅུང་ཟད་ཀྱང་ཡོད་པ་མ་ཡིན་པའི་ཕྱིར་ན། དེ་ལ་ལྟོས་པའི་གང་ཟག་དང་ཆོས་བདེན་པའི་དངོས་པོས་སྟོང་པ་ག་ལ་ཡོད་པར་འགྱུར་ཏེ། དཔེར་ན་རྨི་ལམ་གྱི་སྐྱེས་བུ་མི་བདེན་པས་དེ་ཤི་བ་མི་བདེན་པ་བཞིན་ནོ། །འདི་ནི་དབུས་མཐའ་དང་། བརྒྱད་སྟོང་དོན་བསྡུ་སོགས་ལས། གཟུང་འཛིན་གཉིས་ཀྱི་དངོས་པོ་མེད་པའི་གཉིས་སྟོང་གི་དངོས་པོ་ཡོད་པ་སྟོང་པ་ཉིད་ཀྱི་མཚན་ཉིད་དང་། གང་ཟག་དང་ཆོས་ཀྱི་བདག་བཀག་པའི་སྟོང་ཉིད་ཀྱི་དངོས་པོ་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་སྟོང་གཞིའི་ཆོས་ཅན་དུ་འདོད་པའི་རྣམ་རིག་པའི་ལྟ་བ་དགག་བྱའི་གཙོ་བོར་བྱས་ནས་འགོག་པ་ཡིན་ཀྱང་། བོད་འདིར་དེའི་མིང་འདོགས་གཞན་སྟོང་དུ་བསྒྱུར་ནས་དབུ་མའི་ལྟ་བ་མཐར་ཐུག་ཏུ་འདོད་པ་ནི་ཀླུ་སྒྲུབ་ཡབ་སྲས་ཀྱི་དབུ་མའི་གཞུང་ལུགས་རྣམས་དང་འགལ་བ་འབའ་ཞིག་ཡིན་པས་རང་གི་རྗེས་འབྲང་རྣམས་བསླུ་བར་མ་བྱེད་ཅིག གཉིས་པ་ནི། དེ་ལྟར་ན་ཐུབ་པས་མདོ་ལས་རྣམ་པར་ཐར་པའི་སྒོ་གསུམ་གསུངས་པ་ཚུལ་འདིས་བསལ་བས་ལུང་དང་འགལ་ཞིང་། ལུང་དང་རིག་པས་གྲུབ་པའི་ཆོས་ཉིད་སྟོང་པ་ཉིད་ལ་སྐུར་པ་བཏབ་པས། ལོག་པར་ལྟ་བར་འགྱུར་རོ་ཞེ་ན། དེ་ནི་མ་ཡིན་ཏེ། ཟབ་མོའི་མདོ་ལས་གསུངས་པའི་སྟོང་པ་ཉིད་ཀྱི་དོན་ནི་སྟོང་མི་སྟོང་ལ་སོགས་པ་ཐོག་མའི་དགག་བྱ་དང་། དེ་བཀག་པའི་སྤྲོས་པ་ཐམས་ཅད་དང་བྲལ་བ་ཡིན་གྱི་ཁྱོད་ཀྱིས་བཟུང་བའི་གང་ཟག་དང་། ཆོས་ཀྱི་བདག་བཀག་ཟིན་ནས་དེས་སྟོང་པའི་སྟོང་ཉིད་ཡོངས་གཅོད་དུ་གྲུབ་པ་མདོའི་དགོངས་པ་མ་ཡིན་པའི་ཕྱིར་ཏེ། སྤང་བྱའི་དགྲ་ལས་རྒྱལ་བ་སངས་རྒྱས་བཅོམ་ལྡན་འདས་རྣམས་ཀྱིས་དཀོན་མཆོག་བརྩེགས་པ་ལས། འོད་སྲུང་ལྟ་བར་གྱུར་པ་ཐམས་ཅད་ལས་ངེས་པར་འབྱུང་བ་ནི་སྟོང་པ་ཉིད་ཁོ་ན་ཡིན་ལ། ཞེས་དང་། རྒྱལ་བའི་ཡུམ་ལས་གཟུགས་སྟོང་པའམ་མི་སྟོང་པ་ཞེས་བྱ་བར་སྤྱོད་ན་མཚན་མ་ལ་སྤྱོད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་སྤྱོད་དོ། །འོན་ཀྱང་ཅི་ལ་ཡང་མི་སྤྱོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ་ཞེས་སྟོང་ཉིད་ཡོད་མེད་ལ་སོགས་པའི་ཆོས་འགའ་ཞིག་ཏུ་ལྟ་བ་ཀུན་ངེས་པར་འབྱིན་པར་གསུངས་པའི་ཕྱིར་རོ། །དེ་ལ་གང་ཟག་མི་མཁས་པ་གང་དག་སྟོང་པ་ཉིད་ཅེས་པ་རང་གི་ངོ་བོས་གྲུབ་པར་ལྟ་བ་དེ་དག་སྲིད་པ་ལས་ཐར་པའམ། སྲིད་ཞི་གཉིས་ཀ་ལ་མི་གནས་པའི་མྱ་ངན་ལས་འདས་པ་བསྒྲུབ་ཏུ་མེད་པ་མདོ་ལས་གསུངས་ཏེ་འོག་ཏུ་སྟོན་ནོ། །གཉིས་པ་ལུང་དང་སྦྱར་བ་ནི། དཀོན་མཆོག་བརྩེགས་པའི་མདོ་ལས། གང་སྟོང་པ་ཉིད་ཀྱིས་ཆོས་རྣམས་སྟོང་པར་མི་བྱེད་དེ། ཆོས་རྣམས་ཉིད་སྟོང་པ་དང་། གང་མཚན་མ་མེད་པས་ཆོས་རྣམས་མཚན་མ་མེད་པར་མི་བྱེད་དེ། ཆོས་རྣམས་ཉིད་མཚན་མ་མེད་པ་དང་། གང་སྨོན་པ་མེད་པས་ཆོས་རྣམས་སྨོན་པ་མེད་པར་མི་བྱེད་དེ། ཆོས་རྣམས་ཉིད་སྨོན་པ་མེད་པར་གང་དེ་ལྟར་སོ་སོར་རྟོག་པ་དེ་ནི་འོད་སྲུང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་གང་དག་སྟོང་པ་ཉིད་དུ་དམིགས་པས་སྟོང་པ་ཉིད་ལ་རྟོག་པ་དེ་དག་ནི་ངའི་གསུང་རབ་འདི་ལས་ཉམས། རབ་ཏུ་ཉམས་ཞེས་དང་། འོད་སྲུང་གང་ཟག་ཏུ་ལྟ་བ་རི་རབ་ཙམ་ལ་གནས་པ་བླའི། མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན་འོད་སྲུང་ལྟ་བར་གྱུར་པ་ཐམས་ཅད་ལས་འབྱུང་བ་ནི་སྟོང་པ་ཉིད་ཡིན་ན། འོད་སྲུང་གང་སྟོང་པ་ཉིད་ཁོ་ན་ལྟ་བ་དེ་ནི་གསོར་མི་རུང་ངོ་ཞེས་ངས་བཤད་དོ། །འོད་སྲུང་འདི་ལྟ་སྟེ། དཔེར་ན་མི་ནད་པ་ཞིག་ཡོད་ལ། སྨན་པས་དེ་ལ་སྨན་བཏང་ནས། སྨན་དེས་དེའི་ནད་ཐམས་ཅད་སྐྱོད་དེ་སྨན་ལྟོ་ན་འདུག་པ་ཉིད་མི་འབྱུང་ན། འོད་སྲུང་འདི་ཇི་སྙམ་དུ་སེམས། མི་དེ་ནད་དེ་ལས་ཐར་བར་འགྱུར་རམ། གསོལ་བ་བཅོམ་ལྡན་འདས་དེ་ནི་མི་འགྱུར་ལགས་ཏེ། གང་སྨན་དེས་ནད་ཐམས་ཅད་སྐྱོད་ནས་སྨན་ལྟོར་མཆིས་པ་ཉིད་མ་བྱུང་ན་མི་དེའི་བྲོ་ནད་ཤིན་ཏུ་ཚབས་ཆེ་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ལྟ་བར་གྱུར་པ་ཐམས་ཅད་ལས་འབྱུང་བ་ནི་སྟོང་པ་ཉིད་ཁོ་ན་ཡིན་ན་འོད་སྲུང་གང་སྟོང་པ་ཉིད་ཁོ་ནར་ལྟ་བ་དེ་ནི་གསོར་མི་རུང་ངོ་། །ཞེས་ངས་བཤད་དོ། །ཞེས་གསུངས་ཏེ། གཞུང་ལས་བཤད་པའི་རིག་པ་རྣམས་ཀྱིས་བཙལ་བའི་ཚེ་ཡོད་མེད་དང་། སྟོང་མི་སྟོང་ལ་སོགས་པའི་མཐའ་གང་ཡང་མ་རྙེད་པ་ཞིག་ལ་ཐ་སྙད་དུ་དབུ་མའི་ལྟ་བ་ཞེས་གསུངས་ཀྱི། ལྟ་བ་ཞེས་བྱ་བར་གྲུབ་པ་གཅིག་ཀྱང་མེད་པར་ཤེས་པར་བྱའོ། །བོད་ཁ་ཅིག དགག་བྱ་བདེན་པ་བཀག་ནས་བདེན་པར་མེད་དོ་སྙམ་པའི་ཞེན་པ་འགོག་ཏུ་མི་རུང་བར་འདོད་པ་ནི་བྱང་ཆུབ་སེམས་འགྲེལ་ལས་གསལ་བར་བཀག་ལ། གཞན་དག་ཆོས་ཉིད་བདེན་པར་གྲུབ་ཀྱང་བདེན་པར་ཞེན་པའི་བློ་སྤང་བྱར་འདོད་པའི་དཔེར་གཉེན་པོ་ཉིད་ལ་ཞེན་པ་སྤང་བྱར་བྱེད་པ་བཀོད་པ་ནི་ཞེན་ཡུལ་སུན་མ་ཕྱུང་བར་ཞེན་བྱེད་ཀྱི་བློ་སྤོང་མི་ནུས་པའི་དབུ་ཚད་ཀྱི་རིག་པའི་སྙིང་པོ་མ་ཤེས་པའི་སྐྱོན་ཡིན་ཞིང་། གཉེན་པོ་བཙལ་ན་མ་རྙེད་པ་ཞིག་མ་བྱུང་ན་གཉེན་པོ་ལ་ཞེན་པའི་བློ་ཡང་སྤོང་བའི་ཐབས་མེད་པས། དཔེ་ཉིད་ཀྱིས་ཀྱང་ཞེན་བྱེད་ཀྱི་བློ་སྤོང་བ་ལ་ཞེན་ཡུལ་བཙལ་ནས་མ་རྙེད་པ་དགོས་པར་གྲུབ་བོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། འདུ་བྱེད་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་གསུམ་པའི་རྣམ་པར་བཤད་པའོ།། །།གཉིས་པ་དེའི་སྒྲུབ་བྱེད་དགག་པ་ལ་གསུམ་སྟེ། བྱ་བ་ཕྲད་པ་དགག་པ། སྐྱེད་བྱེད་རྒྱུ་རྐྱེན་དགག་པ། གནས་སྐབས་བཅིང་ཐར་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། འདུ་བྱེད་བརྟག་པར་དངོས་པོ་རང་བཞིན་གྱིས་གྲུབ་པ་བཀག་མོད་ཀྱི། དེ་ལྟ་ན་ཡང་དེ་ཡོད་པ་ཉིད་དེ། མདོ་ལས། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ངོ་ཞེས་དང་། གསུམ་འདུས་པ་ལས་རེག་པའོ། །རེག་པ་དང་ལྷན་ཅིག་འབྱུང་བ་ནི་ཚོར་བའོ། །ཞེས་དང་། ཚོར་བ་དང་འདུ་ཤེས་ཞེས་བྱ་བའི་ཆོས་འདི་གཉིས་ནི་ཕྲད་པས་ཡིན་གྱི། མ་ཕྲད་པས་ནི་མ་ཡིན་ནོ་ཞེས་གསུངས་པས་འདུ་བྱེད་རྣམས་ལ་ཕྲད་པ་ཡོད་པའི་ཕྱིར་རོ་སྙམ་པ་ལ། ལུང་དེ་དག་དྲང་དོན་ཡིན་པས་ཕྲད་པ་རང་བཞིན་མེད་པར་བསྟན་པའི་ཕྱིར་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། དམ་བཅའ་མདོར་བསྟན། འཐད་པ་རྒྱས་པར་བཤད། སྐབས་ཀྱི་དོན་བསྡུ་བའོ། །དང་པོ་ནི། བལྟ་བྱ་གཟུགས་དང་། ལྟ་བ་མིག་དང་། ལྟ་བ་པོ་མིག་གི་རྣམ་པར་ཤེས་པ་གསུམ་པོ་དེ་དག་གཉིས་གཉིས་ཏེ། མིག་དང་གཟུགས་སམ། མིག་དང་རྣམ་པར་ཤེས་པའམ། རྣམ་པར་ཤེས་པ་དང་། གཟུགས་ལ་ཕན་ཚུན་ཕྲད་པ་ཡོད་པ་མ་ཡིན་ཞིང་། གསུམ་པོ་ཐམས་ཅད་ཀྱང་ནི་གཅིག་ཆར་ཕན་ཚུན་དུ་ཕྲད་པར་འགྱུར་བ་ཡོད་པ་མ་ཡིན་ནོ། །དེ་བཞིན་དུ་འདོད་ཆགས་དང་། དེའི་རྟེན་ཆགས་པ་གཙོ་སེམས་དང་། ཆགས་པར་བྱ་བའི་ཡུལ་ཡིད་དུ་འོང་བ་ཡང་གཉིས་གཉིས་དང་ཐམས་ཅད་ཕན་ཚུན་དུ་ཕྲད་པ་ཡོད་པ་མ་ཡིན་ལ་ཉོན་མོངས་པ་ལྷག་མ་ཞེ་སྡང་ལ་སོགས་པའི་ཆོས་གསུམ་པོ་རྣམས་དང་། སྐྱེ་མཆེད་ཀྱི་ལྷག་མ་རྣ་བ་ལ་སོགས་པའང་རྣམ་པ་གསུམ་གྱིས་དཔྱད་ནས་གཉིས་གཉིས་དང་། ཐམས་ཅད་ཕན་ཚུན་དུ་ཕྲད་པ་ཡོད་པ་མ་ཡིན་ནོ། །གཉིས་པ་ལ་གཉིས་ཏེ། གཞན་དུ་མ་གྲུབ་པས་ཕྲད་པ་མེད་པ། དེ་ཉིད་དང་གཞན་ཉིད་དུ་ཕྲད་པ་མེད་པའོ། །དང་པོ་ལ་གསུམ་སྟེ། ལྡོག་ཁྱབ་བསྟན་ནས་རྟགས་འགོད། རིག་པ་དེ་གཞན་ལའང་བསྒྲེ། ཕྱོགས་ཆོས་བསྒྲུབ་པའོ། །དང་པོ་ནི། འཕྲད་པ་ལ་རྫས་གཞན་གྱིས་ཁྱབ་པས་གང་གི་ཕྱིར་བལྟ་བྱ་དང་། བལྟ་བ་དང་། ལྟ་བ་པོ་ལ་སོགས་པ་དེ་དག་རྣམས་ལ་ཁྱབ་བྱེད་རྫས་གཞན་དེ་ཡོད་པ་མ་ཡིན་པའི་ཕྱིར། ཁྱབ་བྱ་ཕྲད་པར་མི་འགྱུར་ཏེ། ཕྲད་པར་གྱུར་ན་གཞན་དང་གཞན་དུ་གྲུབ་དགོས་པའི་ཕྱིར་རོ། །གཉིས་པ་ནི། དེ་ལྟར་བལྟ་བྱ་དང་། བལྟ་བ་ལ་སོགས་པ་ཕན་ཚུན་ལྟོས་པའི་ཆོས་རྣམས་འབའ་ཞིག་ལ་གཞན་ཉིད་མེད་པས་ཕྲད་པ་མེད་པར་མ་ཟད་ཀྱི་དཔྱད་ན་ཕྱི་རོལ་གྱི་དངོས་པོ་བུམ་པ་ལ་སོགས་པ་གང་ཡང་། སྣམ་བུ་ལ་སོགས་པ་གང་དང་ལྷན་ཅིག་ཏུ་ཕྲད་པ་མེད་དེ། རྫས་གཞན་ཉིད་དུ་མི་འཐད་པས་སོ། །གསུམ་པ་ལ་གཉིས་ཏེ། ཕན་ཚུན་ལྟོས་པས་གཞན་དུ་མི་འཐད་པ། གཞན་ཉིད་ཀྱི་སྤྱི་མེད་པས་གཞན་དུ་མི་འཐད་པའོ། །དང་པོ་ནི། འཇིག་རྟེན་ན་གཞན་བུམ་པ་ལ་སོགས་པ་ནི་གཞན་སྣམ་བུ་ལ་སོགས་པ་ལ་བརྟེན་ཏེ། གཞན་གྱི་ཐ་སྙད་དུ་འཇོག་ཅིང་ལྟོས་ས་སྣམ་བུ་སོགས་མེད་ན་གཞན་བུམ་པ་ལ་སོགས་པ་གཞན་གྱི་ཐ་སྙད་་འགྲུབ་པར་མི་འགྱུར་བར་མཐོང་བ་དེའི་ཕྱིར། བུམ་པ་ནི་ཆོས་ཅན། སྣམ་བུ་ལས་གཞན་དུ་མི་འཐད་དེ། སྣམ་བུ་ལ་ལྟོས་པའི་ཕྱིར། ཁྱབ་སྟེ། གང་ལ་བརྟེན་ཏེ་གཞན་གང་ཞིག་ཡིན་པ་དེ་ནི་ཡང་དག་པར་དེ་ལས་གཞན་དུ་མི་འཐད་པའི་ཕྱིར། ས་བོན་ལས་མྱུ་གུ་གཞན་དུ་མི་འཐད་པ་བཞིན་ནོ། །གལ་ཏེ་སྣམ་བུ་ལ་སོགས་པ་ལ་མ་ལྟོས་པར་བུམ་པ་གཞན་དུ་མ་གྲུབ་ཀྱང་། དེ་ལ་ལྟོས་ནས་གཞན་དུ་གྲུབ་པས་ཉེས་པ་མེད་དོ་སྙམ་ན། བུམ་པའི་གཞན་དེ་ཆོས་ཅན། སྣམ་བུ་ལ་སོགས་པའི་གཞན་མེད་པར་ཡང་གཞན་དུ་འགྱུར་ཏེ། གཞན་སྣམ་བུ་ལས་རང་བཞིན་གྱིས་གཞན་དུ་གྲུབ་པ་དེའི་ཚེ་སྟེ་དེའི་ཕྱིར་རོ། །འདོད་མི་ནུས་ཏེ། སྣམ་བུ་ལ་སོགས་པ་གཞན་མེད་པར་ནི། བུམ་པ་གཞན་དུ་འགྱུར་བ་ཡོད་པ་མིན་པར་འཇིག་རྟེན་ན་མཐོང་བ་དེའི་ཕྱིར་ན་རང་བཞིན་གྱིས་གཞན་དུ་གྲུབ་པ་མེད་དོ། །གཉིས་པ་ནི། གཞན་གྱི་སྡེ་པ་དག་གཞན་ཉིད་ཅེས་པའི་སྤྱི་དང་འབྲེལ་བས་གཞན་གྱི་ཐ་སྙད་དུ་འཇོག་པ་ཡིན་ནོ་ཞེ་ན། གཞན་ཉིད་ཀྱི་སྤྱི་དེ་གསལ་བ་གཞན་དུ་གྲུབ་པ་ལ་ཡོད་པ་མ་ཡིན་ཏེ། དེར་མ་དམིགས་པའི་ཕྱིར། གསལ་བ་གཞན་མ་ཡིན་པ་ལ་ཡང་ཡོད་པ་མིན་ཏེ། དེ་དང་འགལ་བ་གཅིག་ཉིད་ཀྱི་སྤྱི་ཡོད་པའི་ཕྱིར་རོ། །དེ་ལྟར་གསལ་བ་གཞན་དུ་འཇོག་པའི་རྒྱུ་མཚན་གཞན་ཉིད་ཀྱི་སྤྱི་ཡོད་པ་མ་ཡིན་ན། གསལ་བ་གཞན་ནམ་གཞན་མ་ཡིན་པ་དེ་ཉིད་ཀྱང་ཡོད་པ་མ་ཡིན་ཏེ། དེ་དང་དེར་འཇོག་བྱེད་མེད་པའི་ཕྱིར་རོ། །གཉིས་པ་དེ་ཉིད་དང་གཞན་ཉིད་དུ་ཕྲད་པ་མེད་པ་ནི། ཕྲད་པ་རང་བཞིན་གྱིས་ཡོད་ན། ངོ་བོ་གཅིག་པའམ་གཞན་པ་ཞིག་ལ་རྟོག་དྲང་། དང་པོ་ལྟར་ན་དེ་ཉིད་དེ་ནི་དེ་དང་ཕྲད་པ་མེད་དེ། རང་ལ་ཕྲད་བྱ་ཕྲད་བྱེད་གཉིས་མེད་པའི་ཕྱིར་རོ། །གཉིས་པ་ལྟར་ན་གཞན་དང་གཞན་ཡང་ཕྲད་པར་མི་འགྱུར་ཏེ། དངོས་པོ་ཐ་དད་ན་ཡུལ་དུས་གཅིག་ཏུ་འདུས་པར་མི་རུང་བའི་ཕྱིར། གསུམ་པ་སྐབས་ཀྱི་དོན་བསྡུ་བ་ནི། ཕྲད་པའི་བྱ་བ་བྱེད་བཞིན་པ་དང་། བྱ་བ་རྫོགས་པས་ཕྲད་པ་དང་། བྱ་བ་ལ་དབང་དུ་གྱུར་པ་ཕྲད་པ་པོ་ཡང་ཡོད་པ་མ་ཡིན་ཏེ། ཕྲད་པ་རིག་པས་དཔྱད་ནས་བཀག་ཟིན་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས། མིག་ནི་ལྡན་པ་ཐམས་ཅད་མཐོང་འགྱུར་ཏེ། །མིག་གིས་གཟུགས་རྣམས་མཐོང་བ་གང་ཡིན་པའང་། །མཚན་མོ་རྐྱེན་རྣམས་མེད་ན་མཐོང་མི་འགྱུར། །དེ་ཕྱིར་ལྡན་དང་བྲལ་བ་རྣམ་རྟོག་ཡིན། །མིག་ནི་སྣང་ལ་བརྟེན་ཏེ་ཡིད་འོང་དང་། །ཡིད་དུ་མི་འོང་སྣ་ཚོགས་གཟུགས་མཐོང་བས། །དེ་ལྟར་ལྡན་ལས་བརྟེན་ཏེ་མཐོང་བས་ན། །དེ་ཕྱིར་མིག་གིས་ནམ་ཡང་མཐོང་བ་མེད། །གང་དག་རང་བཞིན་མེད་ཆོས་འདི་ཤེས་པ། །དཔའ་བོ་དེ་དག་འཇིག་རྟེན་མྱ་ངན་འདའ། །འདོད་པའི་ཡོན་ཏན་སྤྱད་ཀྱང་ཆགས་མེད་ཅིང་། །ཆགས་པ་རྣམས་སྤངས་སེམས་ཅན་འདུལ་བར་བྱེད། །འདི་ན་སེམས་ཅན་འགའ་མེད་སྲོག་མེད་ཀྱང་། །མི་དབང་རྣམས་ནི་སེམས་ཅན་ཕན་པ་མཛད། །སེམས་ཅན་ཡོད་པ་མིན་ཡང་དོན་མཛད་པ། །དེ་དག་རྣམས་ཀྱི་དེ་ནི་དཀའ་བ་ཆེ། །ཞེས་བྱ་བ་ནས། དེ་ལ་ནམ་ཡང་ཆགས་པ་ཡོད་མ་ཡིན། །གང་དག་ཆོས་ཉིད་འདི་ལ་མོས་གྱུར་པ། །དེ་དག་ཡིད་ནི་སྲིད་ལ་ཆགས་མི་འགྱུར། །ཞེས་བྱ་བའི་བར་དང་། དེ་བཞིན་དུ་གང་གིས་ལམ་བསྒོམ་ཆོས་ཀུན་སྟོང་པ་དང་། །བདག་མེད་ཡེ་ཤེས་རབ་ཏུ་བསྐྱེད་བྱས་ནས། །ཆོས་འདི་དག་ནི་རྣམ་པར་བསྒོམ་གྱུར་པ། །དེ་ཡི་སྤོབས་པ་ཐོགས་པ་མེད་པར་འགྱུར། །ཞེས་བྱ་བ་གསུངས་ཏེ་དུས་མཉམ་པའི་རྒྱུ་རྐྱེན་རང་བཞིན་གྱིས་ཕྲད་པ་དངོས་སུ་བཀག་ནས་ཤུགས་ལ་ཐ་སྙད་དུ་ཕྲད་པ་ཁས་ལེན་པའི་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། ཕྲད་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་བཞི་པའི་རྣམ་པར་བཤད་པའོ།། །།གཉིས་པ་སྐྱེད་བྱེད་རྒྱུ་རྐྱེན་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་དངོས་པོའི་རང་གི་ངོ་བོ་དང་། དེའི་སྒྲུབ་བྱེད་བཀག་པ་དེ་ལྟ་ནའང་མྱུ་གུ་དང་འདུ་བྱེད་ལ་སོགས་པ་ཕྱི་ནང་གི་དངོས་པོ་རྣམས་ནི་རང་བཞིན་གྱིས་ཡོད་པ་ཉིད་དེ། ས་བོན་དང་། མ་རིག་པ་ལ་སོགས་པའི་རྒྱུ་རྐྱེན་ལ་བརྟེན་ནས་འབྱུང་བའི་ཕྱིར་རོ་སྙམ་ན། དེ་ཁོ་ན་ཉིད་དུ་ནི་རྒྱུ་རྐྱེན་མ་གྲུབ་ཅིང་། ཐ་སྙད་དུ་རྒྱུ་རྐྱེན་ལ་བརྟེན་ནས་འབྱུང་བ་ཉིད་ཀྱི་སྒྱུ་མ་ལྟར་རང་བཞིན་མེད་པ་ཡིན་ནོ། །ཞེས་བསྟན་པའི་ཕྱིར་རབ་ཏུ་བྱེད་པ་འདི་བསྟན་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས་དང་པོ་རིགས་པས་བསྒྲུབ་པ་ལ་བཞི་སྟེ། རང་བཞིན་མཐའ་བཞིར་གྲུབ་པ་དགག རང་བཞིན་ལ་གཞན་འགྱུར་བྱེ་བྲག་ཏུ་དགག མཐའ་བྲལ་གྱི་དབུ་མ་ལ་བློ་སྦྱར་བ། བྲལ་བྱའི་མཐའ་གཉིས་ངོས་བཟུང་བའོ། །དང་པོ་ལ་བཞི་སྟེ། རང་བཞིན་དང་གཞན་དངོས་སུ་གྲུབ་པ་དགག དངོས་པོ་དང་དངོས་མེད་དུ་གྲུབ་པ་དགག བཀག་པའི་དོན་དུ་ལྟ་བ་སྨད། བཀག་པ་དེ་ཉིད་ལུང་དང་སྦྱར་བའོ། །དང་པོ་ལ་གཉིས་ཏེ། རང་བཞིན་དུ་གྲུབ་པ་དགག གཞན་དངོས་སུ་གྲུབ་པ་དགག་པའོ། །དང་པོ་ལ་གསུམ་སྟེ། རང་བཞིན་རྒྱུ་རྐྱེན་ལས་འབྱུང་བ་དོན་མེད་པ། རང་བཞིན་རྒྱུ་རྐྱེན་ལས་འབྱུང་བར་འགལ་བ། ཐ་སྙད་དུ་རང་གི་ལུགས་བརྗོད་པའོ། །དང་པོ་ནི། བྱེ་བྲག་ཏུ་སྨྲ་བ་དག་མ་འོངས་པ་ན་ཡོད་པའི་དངོས་པོའི་རང་བཞིན། རྒྱུ་རྐྱེན་ལས་འབྱུང་བར་འདོད་པ་ནི་རིག་པ་མ་ཡིན་ཏེ། དེ་གྲུབ་ཟིན་པའི་ཕྱིར་ད་ལྟར་གྱི་དངོས་པོ་བཞིན། གཉིས་པ་ནི། མདོ་སེམས་གཉིས་པོ་དག སྔར་མ་གྲུབ་ཀྱང་ཕྱིས་རྒྱུ་རྐྱེན་ལ་བརྟེན་ནས་རང་བཞིན་དུ་འབྱུང་བས་ཉེས་པ་དེར་མི་འགྱུར་རོ་སྙམ་ན། ཁྱོད་འདོད་པའི་རང་བཞིན་ནི་ཆོས་ཅན། བྱས་པ་ཅན་དུ་འགྱུར་ཏེ། རྒྱུ་རྐྱེན་ལས་བྱུང་བའི་ཕྱིར། དེ་ལྟར་འདོད་དོ་སྙམ་ན། རང་བཞིན་བྱས་པ་ཅན་ཞེས་བྱ་བར་ཅི་ལྟ་བུར་ན་རུང་བར་འགྱུར་ཏེ། འཇིག་རྟེན་ན་མེའི་ཚ་བ་ལྟར་དེའི་ངོ་བོ་མི་འདོར་ཞིང་། དེ་བདག་གིར་བྱེད་པས་དེ་ལས་མི་འཁྲུལ་བ་ལ་རང་བཞིན་ཅེས་བརྗོད་པའི་ཕྱིར་རོ། །མེའི་ཚ་བ་རང་བཞིན་ཡིན་པ་ཡང་འཇིག་རྟེན་ན་གྲགས་པ་ཙམ་ཡིན་གྱི་དོན་ལ་མ་ཡིན་ཏེ། རྒྱུ་རྐྱེན་གྱིས་བྱས་པའི་ཕྱིར་རོ། །གསུམ་པ་ནི། འོ་ན་དངོས་པོ་རྣམས་ཀྱི་དེ་ཁོ་ནའི་རང་བཞིན་ཅི་ལྟ་བུ་ཞིག་ཡིན་ཞེ་ན། རང་གི་ངོ་བོ་ཅི་ལྟ་བ་བཞིན་བསྟན་པར་མི་ནུས་མོད། གདུལ་བྱ་རྣམས་ཀྱི་རྟོག་པར་བྱ་བའི་ཕྱིར། ཟག་པ་མེད་པའི་ཡེ་ཤེས་ཀྱི་སྤྱོད་ཡུལ་ཆོས་རྣམས་ཀྱི་དེ་ཁོ་ནའི་རང་བཞིན་དག་གི་མཚན་ཉིད་ནི། ངོ་བོ་རྒྱུ་རྐྱེན་གྱིས་བཅོས་པ་མིན་པ་དང་། ཐ་སྙད་རྣམ་འཇོག་ཆོས་གཞན་ལ་ལྟོས་པ་མེད་པ་དང་། གཞན་དུ་མི་འགྱུར་བ་སྟེ། ཆོས་གསུམ་ལྡན་ཡིན་ལ། དེའི་མཚན་གཞི་ནི་སྤྲོས་བྲལ་གྱི་ཆོས་ཉིད་ཡིན་ཏེ། དེ་བཞིན་གཤེགས་པ་རྣམས་བྱོན་ཡང་རུང་མ་བྱོན་ཡང་རུང་སྟེ། ཆོས་རྣམས་ཀྱི་ཆོས་ཉིད་འདི་ནི་གནས་པ་ཁོ་ནའོ། །ཞེས་བཤད་པས་སོ། །གཉིས་པ་ནི། དངོས་པོ་རྣམས་ལ་རང་བཞིན་ཡོད་པ་མ་ཡིན་པའི་ཕྱིར་ན་ནི། གཞན་གྱི་དངོས་པོ་ཡང་ག་ལ་ཡོད་དེ། གཞན་གྱི་དངོས་པོའི་རང་བཞིན་ནི་རང་གི་དངོས་པོ་ལ་ལྟོས་ནས་གཞན་གྱི་དངོས་པོའི་རང་བཞིན་ཡིན་ནོ། །ཞེས་བརྗོད་པས་རང་བཞིན་གྱིས་ཁྱབ་དགོས་པས་སོ། །གཉིས་པ་དངོས་པོ་དང་དངོས་མེད་དུ་གྲུབ་པ་དགག་པ་ལ་གཉིས་ཏེ། དངོས་པོར་གྲུབ་པ་དགག དངོས་མེད་དུ་གྲུབ་པ་དགག་པའོ། །དང་པོ་ནི། དེ་ལྟར་རང་བཞིན་དང་གཞན་དངོས་བཀག་ཀྱང་དངོས་པོ་ཙམ་ནི་མ་བཀག་པས་ཡོད་དོ་སྙམ་ན། མྱུ་གུ་དང་འདུ་བྱེད་ལ་སོགས་པ་ཕྱི་ནང་གི་དངོས་པོ་རྣམས་ཆོས་ཅན། དངོས་པོ་ཙམ་དུ་རང་བཞིན་གྱིས་གྲུབ་པ་མིན་ཏེ། ཁྱབ་བྱེད་རང་བཞིན་དང་ནི་གཞན་དངོས་དག་ཡོད་ན་དངོས་པོ་གྲུབ་པར་འགྱུར་ན་ཡང་རང་བཞིན་དང་གཞན་དངོས་མ་གྲུབ་པའི་ཕྱིར། ཁྱབ་སྟེ། རང་བཞིན་དང་ནི་གཞན་དངོས་དག་མ་གཏོགས་པའི་དངོས་པོ་ག་ལ་ཡོད་དེ་མེད་པའི་ཕྱིར། གཉིས་པ་ནི། དངོས་པོར་མ་གྲུབ་མོད། དངོས་པོར་མེད་པ་ཙམ་ཞིག་ཏུ་གྲུབ་བོ་སྙམ་ན། ཕྱི་ནང་གི་ཆོས་རྣམས་ཆོས་ཅན། དངོས་པོར་མེད་པ་ཙམ་དུ་ཡང་འགྲུབ་པར་མི་འགྱུར་ཏེ། གལ་ཏེ་དངོས་པོ་སྔར་བཀག་པས་མ་གྲུབ་པའི་ཕྱིར་ནའོ། །ཁྱབ་སྟེ། འཇིག་རྟེན་ན་དགག་བྱ་དངོས་པོ་གཞན་དུ་གྱུར་པ་སྟེ། དེ་ཞིག་པའམ་བཀག་པ་ལ་དངོས་མེད་ཡིན་ཞེས་བྱ་བར་སྐྱེ་བོ་སྨྲ་བའི་ཕྱིར་རོ། །གསུམ་པ་བཀག་པའི་དོན་དུ་ལྟ་བ་སྨད་པ་ནི། རང་གི་སྡེ་པ་དངོས་པོར་སྨྲ་བ་གང་དག་གཟུགས་ནི་གཟུགས་སུ་རུང་བ་དང་། ཚོར་བ་ནི་ཉམས་སུ་མྱོང་བ་ལ་སོགས་པའི་རང་བཞིན་དང་། གཟུགས་སེམས་སེམས་བྱུང་ལས་གཞན་པ་དང་། སེམས་སེམས་བྱུང་ཡང་གཟུགས་ལས་གཞན་པའི་དངོས་པོ་དང་། དེ་གསུམ་ཀའམ་སེམས་སེམས་བྱུང་ཙམ་དངོས་པོར་ཡོད་ཅེས་པ་དང་། འདས་མ་འོངས་དང་། མི་ལྡན་པའི་འདུ་བྱེད་དངོས་པོར་མེད་ཅེས་པའམ། གཟུང་འཛིན་གཉིས་དངོས་པོར་མེད་པ་ཉིད་དུ་ལྟ་བ་དེ་དག་སངས་རྒྱས་ཀྱི་བསྟན་པ་ལ་རྟེན་འབྲེལ་ཟབ་མོའི་དེ་ཁོ་ན་ཉིད་ཅི་ལྟ་བ་བཞིན་དུ་མཐོང་བ་མ་ཡིན་ཏེ། མཐའ་བཞི་པོ་དེ་དག་ཏུ་གྲུབ་པ་སྔར་བཀག་ཟིན་པའི་ཕྱིར་རོ། །བཞི་པ་བཀག་པ་དེ་ཉིད་ལུང་དང་སྦྱར་བ་ནི། མཐའ་བཞི་པོ་དེ་གྲུབ་པ་མ་ཡིན་པ་ནི། བཅོམ་ལྡན་འདས་དངོས་པོ་དང་། དངོས་པོ་མེད་པའི་རང་བཞིན་ཅི་ལྟར་གནས་པ་བཞིན་ཕྱིན་ཅི་མ་ལོག་པར་མཁྱེན་པས་ཚད་མའི་སྐྱེས་བུར་གྱུར་པ་དེའི་དགོངས་པ་ཡིན་ཏེ། དེའི་སྡེ་པ་ཀུན་གྱིས་ལུང་དུ་ཁས་ལེན་པའི་ཀ་ཏ་ཡ་ནྱའི་གདམས་ངག་ལས་ནི། ཡོད་པ་དང་མེད་པར་ལྟ་བ་གཉིས་ཀའང་ཐར་པ་འདོད་པ་རྣམས་ལ་དགག་པར་མཛད་པ་ཡིན་པའི་ཕྱིར། ཀ་ཏ་ཡ་ན་གང་གི་ཕྱིར། འཇིག་རྟེན་འདི་ནི་ཕལ་ཆེར་ཡོད་པ་ཉིད་དང་། མེད་པ་ཉིད་ལ་མངོན་པར་ཞེན་ཏེ། དེས་གང་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་གྲོལ་བར་མི་འགྱུར་ཞེས་གསུངས་པས་སོ། །གཉིས་པ་རང་བཞིན་ལ་གཞན་འགྱུར་བྱེ་བྲག་ཏུ་དགག་པ་ལ་གཉིས་ཏེ། དགག་པ་དངོས་དང་། བཀག་པ་ལ་སྐྱོན་སྤོང་བའོ། །དང་པོ་ནི། གལ་ཏེ་མེའི་ཚ་བ་ལ་སོགས་པ་དངོས་པོ་རྣམས་རང་བཞིན་གྱིས་ཡོད་ན། དངོས་པོ་དེ་ནི་ཆོས་ཅན། དུས་ནམ་ཡང་མེད་པ་ཉིད་དུ་མི་འགྱུར་བར་ཐལ། རང་བཞིན་གྱིས་ཡོད་པའི་ཕྱིར། ཁྱབ་སྟེ། རང་བཞིན་གཞན་དུ་འགྱུར་བ་ནི་འགལ་བས་ནམ་ཡང་འཐད་པར་མི་འགྱུར་བའི་ཕྱིར་རོ། །གཉིས་པ་ནི། དངོས་པོ་རྣམས་ཆོས་ཅན། གཞན་དུ་འགྱུར་བ་གང་གིས་ཡིན་ཏེ། གཞན་འགྱུར་ཉིད་མེད་པར་ཐལ། རང་བཞིན་འགའ་ཞིག་ཀྱང་ཡོད་པ་མ་ཡིན་པའི་ཕྱིར། ནམ་མཁའི་མེ་ཏོག་ལྟར་རོ་ཞེ་ན། ཁྱོད་ལྟར་ན་དངོས་པོ་རྣམས་ཆོས་ཅན། གཞན་དུ་འགྱུར་བར་ཅི་ལྟར་རུང་སྟེ་མི་རུང་བར་ཐལ། རང་བཞིན་གྱི་ཡོད་པ་ཡིན་པའི་ཕྱིར་ན་ཡང་ནམ་མཁའི་མི་སྒྲིབ་པ་ལྟར་རོ། །གསུམ་པ་མཐའ་བྲལ་གྱི་དབུ་མ་ལ་བློ་སྦྱར་བ་ནི། མཁས་པ་སྟོན་པ་ལ་ཚད་མར་བྱེད་པ་རང་གི་སྡེ་པ་དག་གིས་རྣམ་པར་དཔྱད་པའི་ཚེ་ཡོད་པ་དང་། མེད་པའི་ལྟ་བ་ལ་གནས་པར་མི་བྱ་སྟེ། རྣམ་པར་དཔྱད་པའི་ཚེ་ཡོད་མེད་གཉིས་དང་བྲལ་བར་གྲུབ་པས། ཡོད་ཅེས་བྱ་བར་འཛིན་པ་རྟག་པར་འཛིན་པ་དང་། མེད་ཅེས་བྱ་བ་འཛིན་པ་ཆད་པར་ལྟ་བར་ཐལ་བར་འགྱུར་ལ། དེ་གཉིས་ནི་བདེ་འགྲོ་དང་། ངན་འགྲོའི་རྒྱུ་ཡིན་པས་འཁོར་བའི་རྒྱུ་བྱེད་པ་དེའི་ཕྱིར། བཞི་པ་བྲལ་བྱའི་མཐའ་གཉིས་ངོས་བཟུང་བ་ནི། རྟག་ཆད་ཀྱི་མཐའ་གཉིས་པོ་ཉིད་གང་ཞེ་ན། ཁྱོད་ལྟར་ཕྱི་ནང་གི་དངོས་པོ་གང་ཞིག རང་བཞིན་གྱིས་ཡོད་པ་དེ་ནི་རྟག་པར་ཐལ་བར་འགྱུར་ཏེ། དུས་ནམ་ཡང་མེད་པ་མ་ཡིན་པའི་ཕྱིར་རོ། །རང་བཞིན་གྱིས་ཡོད་པའི་དངོས་པོ་དེ་ཉིད་རྫས་སྐད་ཅིག་གཉིས་པར་མི་གནས་པའམ། རྒྱུན་ཆད་པ་དེ་ནི་ཆད་པར་ཐལ་བར་འགྱུར་ཏེ། སྔོན་རང་བཞིན་དུ་བྱུང་ནས་ད་ལྟར་ཏེ་ཕྱིས་མེད་ཅེས་པ་དེས་ན་སྟེ་དེའི་ཕྱིར་རོ། །འདི་ནི་གྲུབ་མཐས་བརྟགས་པའི་རྟག་ཆད་ཡིན་པས་ཐ་སྙད་དུ་ཡང་ཁས་མི་ལེན་ལ། མཆོད་བརྗོད་དུ་བཤད་པ་ནི་འཇིག་རྟེན་ན་གྲགས་པའི་རྟག་ཆད་ཡིན་པས་ཐ་སྙད་དུ་ཁས་ལེན་པའི་ཁྱད་པར་ཤེས་པར་བྱའོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས། ཐམས་ཅད་བསམ་ཡས་ཐམས་ཅད་འབྱུང་མིན་པས། །དངོས་དང་དངོས་མེད་ཤེས་པས་རྣམ་པར་ཤིག །བྱིས་པ་གང་དག་སེམས་ཀྱི་དབང་སོང་བ། །དེ་དག་སྲིད་པ་བྱེ་བ་བརྒྱར་སྡུག་བསྔལ། །ཞེས་བྱ་བ་དང་། དེ་བཞིན་དུ། སྔོན་འདས་དུས་ཀྱི་བསྐལ་པ་བསམ་ཡས་ན། །མི་ཡི་གཙོ་བོ་བྱུང་བ་ངས་དྲན་ཏེ། །དྲང་སྲོང་ཆེན་པོའི་གཟིངས་ཀྱི་དོན་མཛད་པ། །མིང་ནི་དངོས་པོ་མེད་ལས་བྱུང་ཞེས་བྱ། །སྐྱེས་མ་ཐག་ཏུ་མཁའ་ལ་རབ་ཏུ་གནས། །ཆོས་རྣམས་ཐམས་ཅད་དངོས་པོ་མེད་པར་བསྟན། །དེ་ཚེ་དེ་དང་མཐུན་པར་མཚན་བཏགས་ཏེ། །སྒྲས་ནི་འཇིག་རྟེན་ཀུན་ཏུ་གྲགས་པར་བྱས། །ལྷ་རྣམས་ཐམས་ཅད་རབ་ཏུ་སྒྲ་འབྱིན་པ། །དངོས་པོ་མེད་ཅེས་བྱ་བའི་རྒྱལ་བར་འགྱུར། །སྐྱེས་མ་ཐག་ཏུ་གོམ་པ་བདུན་བོར་ཏེ། །རྒྱལ་བས་ཆོས་རྣམས་དངོས་པོར་མེད་པར་བཤད། །ཐུབ་པ་ཆོས་རྣམས་ཐམས་ཅད་སྟོན་པ་ཡི། །སངས་རྒྱས་ཆོས་ཀྱི་རྒྱལ་པོར་ནམ་གྱུར་ཚེ། །རྩྭ་ཤིང་གེལ་པ་སྨན་རི་བྲག་རྣམས་ལས། །ཆོས་རྣམས་དངོས་པོ་མེད་ཅེས་སྒྲ་ཡང་འབྱུང་། །འཇིག་རྟེན་དེ་ན་ཇི་སྙེད་སྒྲ་ཡོད་པ། །ཐམས་ཅད་དངོས་མེད་ཅི་ཡང་མེད་པ་ཞེས། །དེ་ལྟ་བུ་ནི་འཇིག་རྟེན་འདྲེན་པ་ཡི། །སྒྲ་དབྱངས་རྣམ་པ་ཤིན་ཏུ་བྱུང་བར་གྱུར། །ཞེས་གསུངས་ཏེ། ཐམས་ཅད་དངོས་མེད་ཅི་ཡང་མེད་པ་ཞེས། །ཞེས་གསུངས་པའི་དོན། མེད་པར་དགག་པ་བརྗོད་པར་འདོད་པའི་ཕྱིར། དངོས་པོ་མེད་པའི་དོན་ནི་རང་བཞིན་མེད་པའི་དོན་ཡིན་ནོ། །ཞེས་འགྲེལ་པས་བཤད་དོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། རང་བཞིན་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅོ་ལྔ་པའི་རྣམ་པར་བཤད་པའོ།། །།གསུམ་པ་གནས་སྐབས་བཅིང་ཐར་དགག་པ་ལ་གསུམ་སྟེ། འཁོར་བ་རང་གི་ངོ་བོ་དགག དེའི་སྒྲུབ་བྱེད་ལས་འབྲས་དགག དེ་ཁོ་ན་ཉིད་ལ་འཇུག་པའི་ཐབས་བསྟན་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་དངོས་པོའི་རང་བཞིན་བཀག་ཀྱང་ཡོད་པ་ཉིད་དེ། འཁོར་བ་ཡོད་པའི་ཕྱིར་དང་། བཅིང་བ་དང་། ཐར་པའི་གནས་སྐབས་མེད་ན་འཁོར་བ་ཉིད་ཀྱང་མི་རུང་བའི་ཕྱིར་སྙམ་པ་ལ། འཁོར་འདས་དང་བཅིང་ཐར་རང་བཞིན་མེད་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། འཁོར་འདས་རང་བཞིན་གྱིས་གྲུབ་པ་དགག བཅིང་ཐར་རང་བཞིན་གྱིས་གྲུབ་པ་དགག བཀག་པ་ལ་ཧ་ཅང་ཐལ་བ་སྤང་བའོ། །དང་པོ་ལ་གཉིས་ཏེ། འཁོར་བ་རང་བཞིན་གྱིས་གྲུབ་པ་དགག མྱང་འདས་རང་བཞིན་གྱིས་གྲུབ་པ་དགག་པའོ། །དང་པོ་ལ་གཉིས་ཏེ། འདུ་བྱེད་འཁོར་བ་དགག གང་ཟག་འཁོར་བ་དགག་པའོ། །དང་པོ་ནི། གལ་ཏེ་འཁོར་བ་རང་བཞིན་གྱིས་ཡོད་ན། ཕུང་པོའམ་གང་ཟག་འཁོར་དྲང་། དེ་ལ་གལ་ཏེ་རང་གི་སྡེ་པ་དག འདུ་བྱེད་ཕུང་པོ་འཁོར་ཞེ་ན། ཕུང་པོ་རྟག་པའམ་མི་རྟག་པ་ཞིག་འཁོར། དང་པོ་ལྟར་ཕུང་པོ་དེ་དག་རྟག་པ་ཡིན་ན་མི་འཁོར་ཏེ། འཁོར་བའི་བྱ་བ་གནས་སྐབས་སྔ་ཕྱི་གཏོང་ལེན་མི་རུང་བའི་ཕྱིར་རོ། །གཉིས་པ་ལྟར་མི་རྟག་པ་ཡིན་ན་ཡང་འཁོར་བར་མི་འགྱུར་ཏེ། སྔ་མར་འོངས་པ་དེ་ཕྱི་མར་འགྲོ་བ་མེད་པའི་ཕྱིར་རོ། །གཉིས་པ་ནི། གལ་ཏེ་གང་ཟག་འཁོར་ན་རྫས་སུ་ཡོད་པའམ་བརྟག་པར་ཡོད་པ་ཞིག་འཁོར་དྲང་། གཞན་གྱི་སྡེ་པ་དག་ཕུང་པོ་ལ་མ་ལྟོས་པའི་རྫས་སུ་ཡོད་པའི་སེམས་ཅན་འཁོར་བར་འདོད་པ་མི་འཐད་དེ། དེ་ལ་ཡང་རྟག་མི་རྟག་དཔྱད་པའི་རིམ་པ་འདི་མཚུངས་པའི་ཕྱིར་རོ། །གཉིས་པ་ལྟར་རང་གི་སྡེ་པ་ཁ་ཅིག་གལ་ཏེ་རྫས་སུ་ཡོད་པའི་བདག་འཁོར་བ་ལ་དེ་མཚུངས་ཀྱང་། ཕུང་པོ་ལས་དེ་ཉིད་དང་། གཞན་ཉིད་རྟག་མི་རྟག་བརྗོད་དུ་མེད་པའི་གང་ཟག་འཁོར་བས་སྔར་གྱི་ཉེས་པ་མི་མཚུངས་སོ་ཞེ་ན། བརྗོད་དུ་མེད་པའི་གང་ཟག་གང་ཞིག་འཁོར་བར་འགྱུར་ཏེ། མི་འཐད་པར་ཐལ། ཕུང་པོ་དང་ཁམས་དང་སྐྱེ་མཆེད་རྣམས་ལ་བདག་དེ་ནི་ངོ་བོ་གཅིག་དང་ཐ་དད་དང་ལྡན་པ་དང་། རྟེན་དང་བརྟེན་པ་རྣམ་པ་ལྔས་བཙལ་ན་མེད་པའི་ཕྱིར་རོ། །གཞན་ཡང་བདག་དེ་ཡོད་དུ་ཆུག་ན་ཡང་། དེ་མིའི་ཉེ་བར་ལེན་པ་ནས་ལྷའི་ཉེ་བར་ལེན་པར་འཁོར་ན། མིའི་ཉེར་ལེན་བཏང་ནས་ལྷའི་ཉེར་ལེན་མ་བླངས་པའི་བར་དུ་སྲིད་པ་ཕུང་པོ་མེད་པར་འགྱུར་ཏེ། མིའི་ཉེར་ལེན་འགག་ནས་ལྷའི་ཉེར་ལེན་མ་སྐྱེས་པའི་ཕྱིར་རོ། །བར་དེར་སྲིད་པ་མེད་ཅིང་ཉེ་བར་ལེན་པའི་ཕུང་པོ་མེད་ན་བདག་དེ་གང་ཅི་ཞིག་འཁོར་བར་འགྱུར་ཏེ། བར་དེར་བདག་ཏུ་གདགས་པའི་གཞི་མེད་པས་འཁོར་བ་པོའི་བདག་མེད་པའི་ཕྱིར་རོ། །གཉིས་པ་མྱང་འདས་རང་བཞིན་གྱིས་གྲུབ་པ་དགག་པ་ལ་གཉིས་ཏེ། ཕུང་པོ་མྱ་ངན་ལས་འདས་པ་དགག གང་ཟག་མྱ་ངན་ལས་འདའ་བ་དགག་པའོ། །དང་པོ་ནི། གལ་ཏེ་མྱང་འདས་རང་བཞིན་གྱིས་ཡོད་ན་ཕུང་པོའམ། བདག་ལ་ཡོད་དྲང་། དང་པོ་ལྟར་ན། འདུ་བྱེད་ཕུང་པོ་མྱ་ངན་ལས་འདའ་བར་ནི་རྟག་པའམ། མི་རྟག་པ་ཅི་ལྟ་བུར་ཡང་མི་འཐད་དེ། རྟག་པ་འགྱུར་མེད་ལ་སྐྱོན་ཡོན་སྤོང་ལེན་མི་རུང་ཞིང་། མི་རྟག་པ་སྐད་ཅིག་མར་འགགས་པས་སྐྱོན་ཡོན་སྤོང་ལེན་མི་ནུས་པའི་ཕྱིར་རོ། །གཉིས་པ་ནི། བརྟག་པ་གཉིས་པ་ལྟར་སེམས་ཅན་མྱ་ངན་ལས་འདའ་བ་ཡང་རྫས་ཡོད་དང་བཏགས་ཡོད་ཅི་ལྟ་བུར་ཡང་མི་འཐད་དེ། རྫས་ཡོད་ཡིན་ན་རྟག་མི་རྟག་དཔྱད་པའི་རིག་པ་མཚུངས་པའི་ཕྱིར་དང་། བཏགས་ཡོད་ཡིན་ན་ཕུང་པོ་ལ་རྣམ་པ་ལྔས་བཙལ་བའི་ཚེ་ན་མི་རྙེད་པའི་ཕྱིར་རོ། །གཉིས་པ་བཅིང་ཐར་རང་བཞིན་གྱིས་གྲུབ་པ་དགག་པ་ལ་གཉིས་ཏེ། ཐུན་མོང་དུ་དགག སོ་སོར་དགག་པའོ། །དང་པོ་ནི། དེ་ལྟར་འཁོར་འདས་བཀག་མོད་ཀྱི་དེ་ལ་དངོས་པོའི་རང་བཞིན་ཡོད་དེ། ཉོན་མོངས་པའི་ལྕགས་སྒྲོག་གིས་བཅིངས་པ་དང་། དེ་ལས་ཐར་པ་ཡོད་པའི་ཕྱིར་སྙམ་ན། དེ་ལ་ཡང་སྔ་མ་ལྟར་བླང་བྱ་དང་། ལེན་པ་པོ་ལ་དཔྱད་ན་མཚུངས་ཏེ། རེ་ཤིག་བླང་བྱ་འདུ་བྱེད་རྣམས་ནི་ཆོས་ཅན། ལས་དང་ཉོན་མོངས་པས་མི་འཆིང་ཞིང་དེ་ལས་གྲོལ་བར་མི་འགྱུར་ཏེ། སྐད་ཅིག་དང་པོར་སྐྱེས་པ་གཉིས་པར་འཇིག་པའི་ཆོས་ཅན་ཡིན་པའི་ཕྱིར་རོ། །ཉེ་བར་ལེན་པ་པོའི་སེམས་ཅན་ཡང་ཆོས་ཅན། མི་འཆིང་ཞིང་གྲོལ་བར་མི་འགྱུར་ཏེ། མི་རྟག་པ་ཡིན་ན། སྔ་མ་འདུ་བྱེད་བཞིན་དུ་ཉེས་པ་མཚུངས་ལ། རྟག་པ་ཡིན་ན་བཅིང་ཐར་གྱི་བྱ་བ་མི་འཐད་པའི་ཕྱིར་རོ། །གཉིས་པ་ལ་གཉིས་ཏེ། བཅིང་པ་དགག་པ། གྲོལ་བ་དགག་པའོ། །དང་པོ་ལ་གསུམ་སྟེ། ཉེར་ལེན་དང་བཅས་མ་བཅས་ལ་བརྟག་སྟེ་དགག བཅིང་བྱ་བཅིང་བྱེད་ཀྱི་དུས་ལ་བརྟག་སྟེ་དགག ལས་ལ་དུས་གསུམ་དུ་དཔྱད་དེ་དགག་པའོ། །དང་པོ་ནི། གལ་ཏེ་ཉེ་བར་ལེན་པ་འདོད་ཆགས་ལ་སོགས་པས་འདུ་བྱེད་དམ་གང་ཟག་འགའ་ཞིག་འཆིང་ན། བཅིང་བྱ་ཉེར་ལེན་སྔར་ཡོད་པའམ་མེད་པ་ཞིག་འཆིང་དྲང་། དེ་ལ་ཉེ་བར་ལེན་པ་དང་བཅས་པ་འཆིང་བར་མི་འགྱུར་ཏེ། དོན་མེད་པའི་ཕྱིར་རོ། །ཉེ་བར་ལེན་པ་མེད་པ་ཡང་མི་འཆིང་སྟེ། ཕན་ཚུན་འགལ་བས་བཅིང་བར་མི་ནུས་པའི་ཕྱིར་རོ། །དེ་གཉིས་ལས་གཞན་པའི་གནས་སྐབས་གང་ཞིག་འཆིང་བར་འགྱུར་ཏེ། ཉེར་ལེན་ཡོད་མེད་དངོས་འགལ་ཡིན་པས་ཕུང་པོ་གསུམ་པ་མེད་པའི་ཕྱིར། གཉིས་པ་ནི། གལ་ཏེ་ལྕགས་སྒྲོག་སྔར་གྲུབ་པས་ལྷ་བྱིན་འཆིང་བ་ལྟར། བཅིང་བྱ་འདུ་བྱེད་དམ་གང་ཟག་གི་སྔ་རོལ་ན་འཆིང་བར་བྱེད་པ་འདོད་ཆགས་ལ་སོགས་པ་ཡོད་ན། དེས་དེ་དག་འཆིང་ལ་རག་ན་འཆིང་བྱེད་སྔར་གྲུབ་པ་དེ་ཡང་མེད་དེ། རྟེན་མེད་པའི་ཕྱིར་དང་། བཅིང་བྱའི་སྔར་གྲུབ་ན་བཅིང་བྱ་དང་འབྲེལ་བ་དགོས་པ་མེད་པའི་ཕྱིར་རོ། །གསུམ་པ་ནི། བཅིངས་པ་སུན་འབྱིན་པའི་ལྷག་མ་ནི་སྔར་སོང་བ་དང་མ་སོང་བ་དང་བགོམ་པ་ལ་འགྲོ་བའི་བྱ་བ་བཀག་པས་བསྟན་པར་ཤེས་པར་བྱ་སྟེ། རེ་ཤིག་བཅིངས་པ་མི་བཅིང་སྟེ་ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར། གཉིས་པ་ནི། གལ་ཏེ་མདོ་ལས་གྲོལ་བའི་ཐབས་གསུངས་ལས་གྲོལ་བ་ཡོད་ལ། དེ་ཡོད་པས་བཅིངས་པ་ཡང་ཡོད་དོ་ཞེ་ན། གྲོལ་བ་ཉིད་དཔྱད་ན་བཅིང་བའམ་མ་བཅིངས་པ་ཞིག་ལ་ཡོད་དྲང་། དེ་ལ་རེ་ཤིག་བཅིངས་པ་ནི་མི་གྲོལ་ཏེ། བྱ་བ་གཉིས་ཕན་ཚུན་འགལ་བའི་ཕྱིར་རོ། །མ་བཅིངས་པ་ཡང་གྲོལ་བར་མི་འགྱུར་ཏེ། གྲོལ་བར་འགྱུར་བ་དོན་མེད་པའི་ཕྱིར་རོ། །གལ་ཏེ་བཅིངས་པ་ལ་གྲོལ་བ་མི་རུང་བས་བཅིངས་པ་དེ་གྲོལ་བཞིན་པ་ཡིན་པར་རྟོག་ན། དེ་ཡང་མི་འཐད་དེ། དེ་ལྟར་ན་བཅིངས་དང་གྲོལ་བ་དུས་གཅིག་ཏུ་འགྱུར་ན། དེ་གཉིས་བྱ་བ་འགལ་བ་ལ་དུས་གཅིག་ཏུ་སྲིད་པ་མ་ཡིན་པའི་ཕྱིར་སྣང་མུན་བཞིན། གསུམ་པ་བཀག་པ་ལ་ཧ་ཅང་ཐལ་བ་སྤང་བ་ནི། ཉན་ཐོས་སྡེ་པ་དག་དེ་ལྟར་འཁོར་བ་དང་མྱང་འདས་གཉིས་མེད་ན་བདག་འཁོར་བའི་འབྲོག་དགོན་པ་ལས་བརྒལ་ནས་ནམ་ཞིག་མྱ་ངན་ལས་འདས་པར་འགྱུར། ནམ་ཞིག་མྱང་འདས་བདག་གིར་འགྱུར་ཞེས་སྲིད་ཞི་ལ་སྤང་བླང་དུ་འདུན་པ་ཆེན་པོ་དང་། དེས་ཀུན་ནས་སླང་བའི་བཤེས་གཉེན་བསྟེན་པ་དང་། ཚུལ་ཁྲིམས་དང་། ཐོས་བསམ་བསྒོམ་པ་ལ་སོགས་པ་སྲིད་པ་སྤངས་ཤིང་ཞི་བ་ཐོབ་པའི་དོན་དུ་འཇུག་པའི་བྱ་བ་ཐམས་ཅད་དོན་མེད་པར་འགྱུར་རོ་ཞེ་ན། བདག་ནི་ལེན་པ་མེད་པར་མྱ་ངན་ལས་འདའོ། །མྱ་ངན་ལས་འདས་པ་ནི་བདག་གིར་འགྱུར་རོ། །ཞེས་དེ་ལྟར་གང་དག་འཛིན་པ་ཆོས་ཅན། དེས་ཀུན་ནས་བསླངས་པའི་རྩོམ་པ་ཅི་སྙེད་པ་ཐམས་ཅད་ཀྱིས་ཀུན་རྫོབ་ཏུ་ཡང་མྱ་ངན་ལས་མི་འདའ་བ་ཁོ་ན་ཡིན་ཏེ། འཇིག་ཚོགས་ལ་ལྟ་བས་ཉེར་ལེན་ལ་འཛིན་པ་ཆེན་པོ་ཡིན་པའི་ཕྱིར་ཏེ། སྤང་བླང་གཉིས་སམ། བདག་དང་བདག་གི་བ་མ་གྲུབ་པ་ཡིན་པ་ལ་དེ་ལས་ཕྱིན་ཅི་ལོག་ཏུ་ལྟ་བ་ཡིན་པའི་ཕྱིར་རོ། །འོ་ན་ཚུལ་ཅི་ལྟ་བུས་མྱ་ངན་ལས་འདའ་བར་འགྱུར་ཞེ་ན། ཆོས་ཀྱི་དབྱིངས་དོན་དམ་པའི་བདེན་པ་གང་ལ་མྱ་ངན་ལས་འདས་པ་ཞེས་བྱ་བའི་ཡོན་ཏན་གསར་དུ་སྐྱེ་བ་མེད་ཅིང་འཁོར་བ་ཞེས་བྱ་བའི་སྐྱོན་རྙིང་པ་བསལ་བར་བྱ་བའང་ཡོད་པ་མ་ཡིན་པར་མངོན་སུམ་དུ་རྟོགས་པ་དེ་ཆོས་ཅན། ཐ་སྙད་དུ་མྱ་ངན་ལས་འདས་པ་ཞེས་བརྗོད་དེ། སྲིད་ཞི་གདོད་མ་ནས་མ་གྲུབ་པར་མཉམ་པ་ཉིད་ཡིན་པ་དེ་ལ་སྤང་བྱ་འཁོར་བ་ཅི་ཞིག་ཡིན་ཞིང་། བླང་བྱ་མྱ་ངན་ལས་འདས་པར་ཅི་ཞིག་ཡིན་པར་བརྟགས་ཏེ། གདོད་མ་ནས་མ་གྲུབ་པ་ལ་དེ་ལྟར་དུ་རྟོག་པ་ཡིན་པའི་ཕྱིར། འདིས་དབུ་མ་པའི་ལུགས་ཀྱི་ཟད་མི་སྐྱེ་ཤེས་པ་གསལ་བར་བྱས་ཏེ། ནམ་མཁའ་རིན་པོ་ཆེའི་མདོ་ལས། འདི་ལ་བསལ་བྱ་ཅི་ཡང་མེད། །ཅེས་སོགས་གསུངས་པ་དང་། མངོན་རྟོགས་རྒྱན་ལས། དྲི་མ་ཟད་དང་མི་སྐྱེ་བའི། །ཡེ་ཤེས་བྱང་ཆུབ་ཅེས་བརྗོད་དེ། །ཞེས་སོགས་གསུངས་པ་དང་དོན་གཅིག་པས་དངོས་པོར་སྨྲ་བའི་ལུགས་ལས་ཁྱད་པར་དུ་བྱས་པའོ། །གཉིས་པ་ལུང་དང་སྦྱར་བ་ནི། འཕགས་པ་བདུད་འདུལ་བའི་མདོ་ལས། དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཏོ་ཅན་ལ་འདི་སྐད་ཅེས་སྨྲས་སོ། །སྡིག་ཅན་གང་ཞིག་བཏང་བ། ཁྱོད་སུས་བཅིངས་སྨྲས་པ། འཇམ་དཔལ་བདག་སུས་བཅིངས་པ་མི་ཤེས་སོ། །སྨྲས་པ། སྡིག་ཏོ་ཅན་ཁྱོད་ཇི་ལྟར་མ་བཅིངས་པར་འདུ་ཤེས་པ་དེ་བཞིན་དུ་བྱིས་པ་སོ་སོའི་སྐྱེ་བོ་ཐམས་ཅད་མི་རྟག་པ་ལ་རྟག་པར་འདུ་ཤེས་པ། སྡུག་བསྔལ་བ་ལ་བདེ་བར་འདུ་ཤེས་པ། བདག་མེད་པ་ལ་བདག་ཏུ་འདུ་ཤེས་པ། མི་གཙང་བ་ལ་གཙང་བར་འདུ་ཤེས་པ། གཟུགས་མེད་པ་ལ་གཟུགས་སུ་འདུ་ཤེས་པ། ཚོར་བ་དག་མེད་པ་དང་། འདུ་ཤེས་དག་མེད་པ་དང་། འདུ་བྱེད་དག་མེད་པ་དང་། རྣམ་པར་ཤེས་པ་དག་མེད་པ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་འདུ་ཤེས་པ་ཡིན་ནོ། །གཞན་ཡང་སྡིག་ཅན་ཁྱོད་གྲོལ་བར་འགྱུར་ན་གང་ལས་གྲོལ་བར་འགྱུར། སྨྲས་པ། བདག་ནི་བདག་ལས་ཀྱང་གྲོལ་བར་མི་འགྱུར་རོ། །སྨྲས་པ་དེ་བཞིན་དུ་སྡིག་ཅན་གང་དག་གྲོལ་བར་འགྱུར་བ་དེ་དག་ཀྱང་ཡང་དག་པ་མ་ཡིན་པའི་འདུ་ཤེས་གང་ཡིན་པ་དེ་ཡོངས་སུ་ཤེས་པ་མ་གཏོགས་པར་གང་ལས་ཀྱང་གྲོལ་བར་འགྱུར་བ་མེད་དེ། དེ་ཡོངས་སུ་ཤེས་ནས་གྲོལ་བ་ཞེས་བྱའོ། །ཞེས་གསུངས་ཏེ། ལུང་འདི་ལས་ན་ཡང་དག་པ་མ་ཡིན་པའི་ཕྱིན་ཅི་ལོག་ཏུ་རྟོག་པ་ཙམ་གྱིས་འཆིང་བའི་འཁྲི་ཤིང་རྣམ་པར་ཆད་པ་ལ་ཐར་པ་མྱ་ངན་ལས་འདས་པ་ཞེས་བྱ་སྟེ། རྨི་ལམ་དུ་རྨིས་པའི་མེ་འབར་བ་ཆུ་དག་གིས་བསད་པ་བཞིན་ནོ། །ཞེས་བཤད་དོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། བཅིངས་པ་དང་ཐར་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་དྲུག་པའི་རྣམ་པར་བཤད་པའོ།། །།གཉིས་པ་དེའི་སྒྲུབ་བྱེད་ལས་འབྲས་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་འཁོར་བ་བཀག་ཀྱང་ཡོད་པ་ཉིད་དེ། མདོ་ལས། བདག་གིས་བྱས་པའི་ལས་རྣམས་ནི། །བདག་གིས་སོ་སོར་མྱོང་བར་འགྱུར། །ཞེས་པའི་ཚུལ་གྱིས་ལས་དང་འབྲས་བུ་ཡོད་པའི་ཕྱིར་དང་། གལ་ཏེ་འདུ་བྱེད་དམ་གང་ཟག་སྔ་མ་ནི་འདིར་འོངས་པ་དང་། འདི་ནས་ཕྱི་མར་འགྲོ་བའི་འཁོར་བ་ཡོད་པར་མ་གྱུར་ན་ལས་དང་ལས་ཀྱི་འབྲས་བུ་སྔ་ཕྱིར་འབྱུང་བ་མི་རུང་བའི་ཕྱིར། ཞེས་རྒོལ་བ་ལ་ལས་དང་འབྲས་བུ་རང་བཞིན་མེད་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། ལས་འབྲས་རང་བཞིན་གྱིས་གྲུབ་པའི་ཕྱོགས་འགོད། དེ་ཉིད་རྣམ་པར་དཔྱད་ནས་དགག་པའོ། །དང་པོ་ལ་གཉིས་ཏེ། ལས་ཀྱི་རྣམ་པར་གཞག་པ། དེ་ལ་རྟག་ཆད་སྤོང་བའི་ཚུལ་ལོ། །དང་པོ་ལ་གསུམ་སྟེ། དགེ་བའི་ལས་བཤད་པ། ལས་གསུམ་དུ་དབྱེ་བ། ལས་བདུན་དུ་དབྱེ་བའོ། །དང་པོ་ནི། ཕུང་པོ་ལ་བརྟེན་ནས་བརྟགས་པའི་གང་ཟག་བདག་ཉིད་སྲོག་གཅོད་ལ་སོགས་པ་སྒོ་གསུམ་གྱི་ཉེས་སྤྱོད་ལེགས་པར་སྡོམ་པའི་སེམས་དང་། བསྡུ་དངོས་བཞི་དང་། འཇིགས་པ་ལས་སྐྱོབ་པ་ལ་སོགས་པ་གཞན་ལ་སྦྱོར་བས་ཕན་འདོགས་པའི་སེམས་དང་། གཞན་བདེ་བ་དང་ཕྲད་པར་འདོད་པའི་བྱམས་པའི་སེམས་གང་ཡིན་པ་དེ་ངན་འགྲོར་ལྟུང་བ་ལས་འཛིན་པའི་ཆོས་ཡིན་ལ་དེ་ནི་ཚེ་འདི་དང་ཚེ་གཞན་དུ་རྣམ་པར་སྨིན་པའི་འབྲས་བུ་ཡིད་དུ་འོང་བ་འགྲུབ་པར་བྱེད་པའི་ས་བོན་ཡིན་ཏེ། འབྲས་བུ་ཐུན་མོང་མ་ཡིན་པ་ལ་ཕན་འདོགས་པར་བྱེད་པའི་ཕྱིར། འདིར་སྔ་རབས་པ་དག་ཤུགས་བསྟན་མི་དགེ་བ་ལ་ཡང་སྦྱར་མོད་ཀྱི་འགྲེལ་པར། དེ་ལྟར་རེ་ཤིག་སེམས་ཀྱི་བདག་ཉིད་ཅན་གྱི་ཆོས་གཅིག་ཉིད་རྣམ་པར་བཞག་ནས་སླར་ཡང་བཅོམ་ལྡན་འདས། དྲང་སྲོང་མཆོག་གིས་ལས་རྣམས་ནི། །ཞེས་སྦྲེལ་བས་ཆོས་གཅིག་པོ་བསྟན་པར་བཤད་དོ། །གཉིས་པ་ནི། དོན་དམ་རྟོགས་ཤིང་འཕགས་པ་གཞན་ལས་མཆོག་ཏུ་གྱུར་པ་དྲང་སྲོང་མཆོག་སངས་རྒྱས་ཀྱི་སྤྱིར་ལས་རྣམས་ནི་སེམས་པའི་ལས་དང་། བསམ་པའི་ལས་གཉིས་སུ་གསུངས་ལ། ལས་གཉིས་པོ་དེ་དག་གི་བྱེ་བྲག་ནི་རྣམ་པ་དུ་མ་ཡོངས་སུ་བསྒྲགས་ཏེ། གཉིས་པོ་དེ་ལ་ལས་གང་སེམས་པ་ཞེས་གསུངས་པ་དེ་ནི་ཡིད་ཀྱིས་འདོད་དེ། ཡིད་ལ་ཡོད་པའམ་ཡིད་དང་མཚུངས་ལྡན་གྱི་སེམས་པ་ཡིན་པའི་ཕྱིར་རོ། །བསམ་པ་ཞེས་ནི་གང་གསུངས་པ་དེ་ནི་ལུས་དང་ངག་གི་ཡིན་པར་འདོད་དེ། ལུས་དང་ངག་ལ་ཡོད་པའམ། ལུས་ངག་དང་དུས་མཉམ་དུ་རྒྱུ་བའི་སེམས་པ་ཡིན་པའི་ཕྱིར་རོ། །གསུམ་པ་ནི། དེ་དག་རྒྱས་པར་དབྱེ་ན་བདུན་དུ་ཡང་འགྱུར་ཏེ། ངག་སྨྲ་བ་དང་། ལུས་སྐྱོད་པ་སྟེ་དགེ་བ་དང་། མི་དགེ་བའི་རྣམ་པར་རིག་བྱེད་གཉིས་དང་། སྲོག་གཅོད་ལ་སོགས་པ་མི་དགེ་བ་མི་སྤོང་བའི་རྣམ་པར་རིག་བྱེད་མ་ཡིན་པ་ཞེས་བྱ་བ་གང་ཡིན་པ་སྡོམ་པ་མ་ཡིན་པ་དང་། སྲོག་གཅོད་ལ་སོགས་པ་ཉེས་སྤྱོད་སྤོང་བའི་རྣམ་པར་རིག་བྱེད་མ་ཡིན་པ་སྡོམ་པ་སྟེ་གཞན་རིག་བྱེད་མ་ཡིན་པ་དག་ཀྱང་ནི་སྔ་མ་དེ་བཞིན་དུ་དགེ་བ་དང་མི་དགེ་བ་གཉིས་སུ་འདོད་དོ། །ལོངས་སྤྱོད་ཕུལ་བས་དགེ་འདུན་ལ་སོགས་པས་ལོངས་སྤྱོད་པ་ལས་སྦྱིན་པ་པོའི་རྒྱུད་ལ་འབྱུང་བའི་བསོད་ནམས་དང་། སྲོག་ཆགས་གསོད་པའི་ལྷ་ཁང་ལ་སོགས་པ་བརྩིགས་པས་ཕྱིས་དེར་སྲོག་ཆགས་ཅི་ཙམ་བསད་པ་ན་རྩིག་པ་པོའི་རྒྱུད་ལ་བསོད་ནམས་མ་ཡིན་པ་འབྱུང་བའང་ཚུལ་དེ་བཞིན་དུ་གཉིས་ཏེ། དེ་ལྟར་ན་རིག་བྱེད་ལ་དགེ་མི་དགེ་གཉིས། རིག་བྱེད་མ་ཡིན་པ་ལ་སྡོམ་པ་དང་། སྡོམ་མིན་གཉིས། ལོངས་སྤྱོད་ལས་བྱུང་བ་ལ་བསོད་ནམས་དང་བསོད་ནམས་མ་ཡིན་པ་གཉིས་ཏེ། བསམ་པའི་ལས་དྲུག་དང་། སྔར་བཤད་པའི་སེམས་པའི་ལས་དང་ཆོས་དེ་བདུན་ལས་ཀྱི་མཚན་གཞིར་མངོན་པར་འདོད་པ་ཡིན་ཞེས་པ་ནི་གྲངས་ཀྱི་དབྱེ་བའོ། །གཉིས་པ་དེ་ལ་རྟག་ཆད་སྤོང་བའི་ཚུལ་ལ་གཉིས་ཏེ། རྟག་ཆད་དུ་ཐལ་བའི་རྩོད་པ་འགོད་པ། སྐྱོན་སྤོང་གི་ལན་བརྗོད་པའི་ཚུལ་ལོ། །དང་པོ་ནི། གལ་ཏེ་ལས་དེ་དག་འབྲས་བུ་སྨིན་པའི་དུས་ཀྱི་བར་དུ་གནས་ན་རྟག་པར་འགྱུར་ལ། གལ་ཏེ་མི་གནས་པར་སྐད་ཅིག་གཉིས་པར་འགག་ནའང་། ས་བོན་ཚིག་པ་ལས་མྱུ་གུ་ལྟར་འགག་པར་གྱུར་པའི་ལས་ཀྱིས་ཅི་ལྟར་འབྲས་བུ་བསྐྱེད་པར་འགྱུར་ཏེ། སྐྱེད་པར་མི་ནུས་པས་ལས་ཆད་པར་འགྱུར་རོ་ཞེ་ན་ཞེས་པ་སྟེ། འདི་ནི་རྒོལ་བ་རྟོག་དཔྱོད་དང་ལྡན་པ་ཐམས་ཅད་ཀྱི་དོགས་པ་ཡིན་གྱི་གྲུབ་མཐའ་སྨྲ་བ་ངོས་བཟུང་ཅན་ནི་མི་དགོས་ལ། ལན་ནི་ལས་འབྲས་ཁས་བླངས་པའི་རང་བཞིན་གྱི་སྡེ་པ་ཐམས་ཅད་ཀྱིས་བཏབ་པར་བྱ་བ་ཡིན་པ་ལས། འདིར་ནི་རང་སྡེ་དངོས་པོར་སྨྲ་བ་དག་གིས་ལན་གདབ་པའི་ཕྱིར་དོགས་པ་བསླང་བའོ། །གཉིས་པ་ལ་གསུམ་སྟེ། རྒྱུན་ཁས་བླངས་ནས་རྟག་ཆད་ཀྱི་སྐྱོན་སྤོང་ཚུལ། དེ་ཉིད་རིགས་པས་དགག་པ། ཆུད་མི་ཟ་ཁས་བླངས་པའི་རྟག་ཆད་ཀྱི་སྐྱོན་སྤོང་བའི་ཚུལ་ལོ། །དང་པོ་ལ་གསུམ་སྟེ། དཔེ་བསྟན་པ། དོན་ལ་སྦྱར་བ། སྐབས་ཀྱི་ལས་འབྲས་ངོས་བཟུང་བའོ། །དང་པོ་ནི། མདོ་སྡེ་པ་དག ཅི་ལྟར་ཕྱི་རོལ་གྱི་མྱུ་གུ་དང་། ལྗང་བུ་ལ་སོགས་པའི་རྒྱུན་གང་ནི་ས་བོན་ལས་ནི་མངོན་པར་འབྱུང་ཞིང་། རྒྱུན་དེ་ལས་འབྲས་བུ་ལོ་ཐོག་འབྱུང་ལ། སྔར་གྱི་ས་བོན་ནི་མེད་ན། མྱུ་གུ་ལ་སོགས་པའི་རྒྱུན་དང་། འབྲས་བུ་ལོ་ཐོག་དེའང་འབྱུང་བར་མི་འགྱུར་བས་རྗེས་སུ་འགྲོ་ལྡོག་གི་སྒོ་ནས་རྒྱུ་འབྲས་སུ་གྲུབ་བོ། །འདི་ལ་ས་བོན་མི་འགག་པའམ། རྒྱུན་བསྐྱེད་པའི་རྒྱུར་མ་གྱུར་པར་འགགས་ན་རྟག་ཆད་ཀྱི་ཉེས་པར་འགྱུར་བ་ཞིག་ན། གང་གི་ཕྱིར་ས་བོན་འབྲས་བུའི་སྔོན་དུ་འགྲོ་ཞིང་འགགས་པ་དེའི་ཕྱིར་རྟག་པ་མ་ཡིན་ལ། རྒྱུན་བསྐྱེད་པའི་རྒྱུར་གྱུར་ནས་འགགས་པས་ས་བོན་ལས་མྱུ་གུ་ལ་སོགས་པའི་རྒྱུན་དང་། རྒྱུན་ལས་འབྲས་བུ་ལོ་ཐོག་འབྱུང་བར་འགྱུར་བ་དེའི་ཕྱིར་ཆད་པ་མ་ཡིན་ཞེས་སྦྱར་རོ། །གཉིས་པ་ནི། འདུ་བྱེད་སེམས་པ་དགེ་མི་དགེ་དང་མཚུངས་པར་ལྡན་པའི་སེམས་ཀྱི་རྒྱུན་ནི་དང་པོ་གང་ཡིན་པ་དེ་དང་པོའི་དགེ་མི་དགེའི་མཚུངས་ལྡན་གྱི་སེམས་ལས་མངོན་པར་འབྱུང་བར་འགྱུར་ཞིང་རྒྱུན་དེ་ལས་རྣམ་པར་སྨིན་པའི་འབྲས་བུ་ཡིད་དུ་འོང་མི་འོང་འབྱུང་ལ། དང་པོའི་དགེ་མི་དགེ་དང་མཚུངས་ལྡན་གྱི་སེམས་ལྟ་ཞིག་མེད་ན་དེའི་རྒྱུན་དང་འབྲས་བུ་དེའང་འབྱུང་བར་མི་འགྱུར་བས་རྗེས་སུ་འགྲོ་ལྡོག་གི་སྒོ་ནས་རྒྱུ་འབྲས་སུ་བསྒྲུབ་པའོ། །འདི་ལ་ཡང་གང་གི་ཕྱིར་སྔར་བཤད་པ་ལྟར་ལས་འདུ་བྱེད་སེམས་པ་དགེ་མི་དགེ་ནི་འབྲས་བུའི་སྔོན་དུ་འགྲོ་ཞིང་འགགས་པ་དེའི་ཕྱིར་རྟག་པ་མ་ཡིན་ཞིང་། དེའང་རྒྱུན་སྐྱེད་པའི་རྒྱུར་གྱུར་ནས་འགགས་པས་དང་པོའི་སེམས་པ་དགེ་མི་དགེ་དང་མཚུངས་ལྡན་གྱི་སེམས་ལས་དེའི་རྒྱུན་དང་ནི་རྒྱུན་ལས་འབྲས་བུ་ཡིད་དུ་འོང་མི་འོང་འབྱུང་བ་དེའི་ཕྱིར་ཆད་པ་མ་ཡིན་ཞེས་པའོ། །གསུམ་པ་ནི། སྔར་བཤད་པའི་ལས་རྣམས་ཀྱི་ནང་ནས་དཀར་པོའི་ལས་ཀྱི་ལམ་བཅུ་པོ་ཉིད་བྱ་བ་ཡོངས་སུ་རྫོགས་པའི་ཆོས་སྒྲུབ་པའི་ཐབས་ཡིན་ཏེ། དེས་བསྒྲུབས་པའི་ཆོས་ཀྱི་འབྲས་བུ་ཚེ་འདི་དང་གཞན་དུ་གཟུགས་སྡུག་པ་ལ་སོགས་པ་འདོད་པའི་ཡོན་ཏན་ལྔ་པོའོ། །རྣམ་བཤད་མཛད་པ་དག་འདི་རྒྱུན་གྱི་སྒོ་ནས་རྟག་ཆད་སྤོང་བའི་གོང་དུ་དྲངས་ཏེ་ལས་ཀྱི་རྣམ་གཞག་དང་། འབྲས་བུའི་རྣམ་གཞག་ཅེས་པའི་ས་བཅད་མཛད་པ་ནི་སྐབས་དོན་མ་ལོངས་པར་སྣང་སྟེ། འདིར་ལས་འབྲས་ཀྱི་རྒྱུན་གྱི་མཚན་གཞི་ངོས་བཟུང་བར་འདོད་ནས་སྐབས་འདིར་བཤད་པར་སྣང་བའི་ཕྱིར་ཏེ། འགྲེལ་པར། འདིའི་མཇུག་ཏུ། དེ་ལྟར་རེ་ཤིག་ཁ་ཅིག་གིས་བརྩད་པའི་ལན་བཏབ་པ་ཡིན་དང་། གཞན་དག་གིས་དེ་ལ་སྐྱོན་བརྗོད་ནས་བརྩད་པའི་ལན་གདབ་པའི་ཕྱིར་སྨྲས་པ་ཞེས་གཞུང་འོག་མ་དང་སྦྱར་བར་མཛད་པའི་ཕྱིར་རོ། །གཉིས་པ་ནི། བྱེ་བྲག་ཏུ་སྨྲ་བས་དེ་སུན་དབྱུང་བར་འདོད་ནས་གལ་ཏེ་མྱུ་གུ་ལ་སོགས་པ་དང་ཆོས་མཚུངས་པར་དགེ་མི་དགེ་བསྒོས་པའི་སེམས་ལས་དེ་དང་མཚུངས་པའི་རྒྱུན་དང་། རྒྱུན་ལས་འབྲས་བུ་འབྱུང་བའི་བརྟག་པ་དེར་འགྱུར་ན། ཉེས་པ་ཆེན་པོ་དང་། གྲངས་མང་པོར་འགྱུར་རོ། །ཅི་ལྟར་ན་དགེ་མི་དགེ་ལུང་མ་བསྟན་དང་། འདོད་པ་དང་གཟུགས་དང་གཟུགས་མེད་དང་ཟག་བཅས་ཟག་མེད་དང་། མི་དང་ལྷའི་སེམས་ལས་རིམ་པ་ལྟར་དགེ་བ་ལ་སོགས་པའི་སེམས་ཁོ་ན་རྒྱུན་ཆགས་སུ་འབྱུང་ཞིང་གཞན་མི་དགེ་བ་སོགས་ཀྱི་རྒྱུན་མི་འབྱུང་བར་འགྱུར་བས་མཐོང་བ་དང་འགལ་བས་སོ། །དེ་ལྟ་བས་ན་ལས་ཀྱི་ངོ་བོ་འགགས་ཀྱང་རིགས་འདྲའི་རྒྱུན་བསྐྱེད་པས་རྟག་ཆད་སྤོང་བའི་བརྟག་པ་དེ་ལས་དང་འབྲས་བུའི་སྐབས་འདིར་འཐད་པ་མ་ཡིན་ནོ། །ཞེས་པའོ། །གསུམ་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། འོ་ན་རྟག་ཆད་དུ་འགྱུར་བའི་ལན་ཅི་ལྟར་ཞེ་ན། སངས་རྒྱས་རྣམས་དང་། རང་རྒྱལ་དང་། ཉན་ཐོས་རྣམས་ཀྱི་ལུང་ལས་གང་གསུངས་པའི་བརྟག་པ་གང་ཞིག དགེ་མི་དགེའི་ལས་འབྲས་ཀྱི་སྐབས་འདིར་རིག་པས་འཐད་པ་དེ་ནི་རབ་ཏུ་བརྗོད་པར་བྱའོ། །གཉིས་པ་ལ་གཉིས་ཏེ། དཔེའི་སྒོ་ནས་ཆུད་མི་ཟ་བ་སྒྲུབ་པ། ཆུད་མི་ཟའི་རང་བཞིན་གཏན་ལ་དབབ་པའོ། །དང་པོ་ནི། རིག་པས་འཐད་པ་དེ་གང་ཞེ་ན། ཅི་ལྟར་བུ་ལོན་ནམ་ནོར་བསྐྱེད་པས་ཟད་ཀྱང་དཔང་རྒྱས་དུས་ནམ་ཞིག་གི་ཚེ་དེའི་འབྲས་བུ་སྐྱེད་དང་བཅས་པ་དགུག་པས་ནོར་བདག་གི་ནོར་ཆུད་ཟ་བར་མི་འགྱུར་བ་ལྟར། དགེ་མི་དགེའི་ལས་སྐྱེས་པའི་ཚེ་དེའི་རྒྱུད་ལ་མི་ལྡན་པའི་འདུ་བྱེད་ཀྱི་ཁོངས་སུ་གཏོགས་པའི་ཆོས་དེའི་ཆུད་མི་ཟ་བ་ཞེས་བྱ་བའི་ཆོས་གཞན་ཞིག་ཉེ་བར་སྐྱེ་ལ། དེས་ན་ལས་ནི་བུ་ལོན་བཞིན་དུ་སྐྱེས་མ་ཐག་ཏུ་རྫས་འགགས་པས་རྟག་པར་མི་འགྱུར་ཞིང་དཔང་རྒྱ་དང་འདྲ་བའི་ཆུད་མི་ཟ་བས་དུས་ནམ་ཞིག་གི་ཚེ་དེའི་འབྲས་བུ་སྐྱེད་དང་བཅས་པ་འབྱིན་པས་ཆད་པར་ཡང་མི་འགྱུར་རོ། །གཉིས་པ་ལ་བདུན་ཏེ། རབ་ཏུ་དབྱེ་བ། ངོ་བོ་ངོས་བཟུང་བ། སྤང་བྱ་གར་གཏོགས་པ། དེའི་འཐད་པ། སྐྱེ་བའི་ཚུལ། འགག་པའི་ཚུལ། མདོར་བསྡུས་པའི་དབྱེ་བའོ། །དང་པོ་ནི། ཆུད་མི་ཟ་བ་དེ་ནི་ཁམས་ལས་དབྱེ་ན་རྣམ་པ་བཞི་སྟེ། ཟག་བཅས་ཁམས་གསུམ་དུ་གཏོགས་པ་གསུམ་དང་། ཟག་མེད་དོ། །གཉིས་པ་ནི། ཆུད་མི་ཟ་དེ་ཡང་རང་བཞིན་ལུང་དུ་མ་བསྟན་པ་སྟེ། གལ་ཏེ་དགེ་བའི་ཆུད་མི་ཟ་དགེ་བ་ཡིན་ན་ནི་དགེ་རྩ་ཆད་པ་ལ་དགེ་བའི་ཆུད་མི་ཟ་མེད་པར་འགྱུར་བའི་ཕྱིར་དང་། མི་དགེ་བའི་ཆུད་མི་ཟ་མི་དགེ་བ་ཡིན་ན་ནི། འདོད་པ་ལས་འདོད་ཆགས་དང་བྲལ་བ་ལ། མི་དགེ་བའི་ལས་ཀྱི་ཆུད་མི་ཟ་མེད་པར་འགྱུར་བའི་ཕྱིར་རོ། །གསུམ་པ་ནི། ཆུད་མི་ཟ་དེ་སོ་སོ་སྐྱེ་བོའི་ལས་སྤོང་བ་མཐོང་བའི་ལམ་གྱིས་སྤོང་བར་བྱ་བ་མ་ཡིན་ཏེ། གལ་ཏེ་སྤོང་ན་སོ་སྐྱེའི་དུས་སུ་འཕེན་བྱེད་ཀྱི་ལས་བསགས་པའི་འབྲས་བུ་འཕགས་པས་མྱོང་བ་མེད་པར་ཐལ་བའི་ཕྱིར་རོ། །དེས་ན་སྒོམ་པས་སྤོང་བར་བྱ་བ་ཉིད་ཡིན་ཏེ། སྒོམ་པའི་ལམ་ཆུང་ངུའི་ཆུང་ངུ་ནས་ཆེན་པོའི་ཆེན་པོའི་བར་གྱིས་ཁམས་གསུམ་དུ་རྣམ་སྨིན་གྱི་འབྲས་བུ་མྱོང་འགྱུར་གྱི་ལས་ཀྱི་ཆུད་མི་ཟ་བ་ཆེན་པོའི་ཆེན་པོ་ནས་ཆུང་ངུའི་ཆུང་ངུའི་བར་ཅི་རིགས་སུ་སྤོང་བས་སོ། །ཀྱང་གི་སྒྲས་ནི། ཉོན་མོངས་མེད་ཀྱང་དེ་དག་ལ། །ལས་ཀྱི་འབྲས་བུ་མཐོང་བ་ཡིན། །ཞེས་པའི་ཚུལ་གྱིས་ཁམས་གསུམ་གྱི་སྒོམ་སྤོངས་ཀྱི་ཉོན་མོངས་པ་ཐམས་ཅད་སྤངས་པའི་འཕགས་པ་དགྲ་བཅོམ་པ་ལ་ཡང་ཅི་སྲིད་ཁམས་གསུམ་ལས་མ་འདས་པར་རྟེན་ཕུང་པོ་ཡོད་པ་དེ་སྲིད་དུ། སྔོན་བྱས་པའི་དགེ་མི་དགེའི་འབྲས་བུ་མྱོང་བས་ན་དེ་གཉིས་ཀའི་ཆུད་མི་ཟ་བ་ཡོད་པས། དེ་ཁམས་གསུམ་ལས་ཤིན་ཏུ་འདས་པས་སྤོང་ཞེས་པའོ། །མཐོང་སྤོང་སྤངས་ཀྱང་སྔོན་གྱི་ལས་ཀྱི་ཆུད་མི་ཟ་མི་སྤོང་བ་དང་། ལས་འགགས་ཀྱང་དེའི་ཆུད་མི་ཟ་བའི་རྒྱུན་མི་འཇིག་པའི་ཕྱིར། རིམ་པ་ལྟར་འཕགས་པ་དང་བྱིས་པ་ལ་སྔར་བྱས་པའི་ལས་ཀྱི་དགེ་མི་དགེའི་ཆུད་མི་ཟ་བ་ཡིས་ལས་ཀྱི་འབྲས་བུ་ཡིད་དུ་འོང་མི་འོང་བསྐྱེད་པར་འགྱུར་རོ། །བཞི་པ་ནི། གལ་ཏེ་ལས་སྤོང་བ་མཐོང་བའི་ལམ་གྱིས་དེའི་ཆུད་མི་ཟ་སྤོང་བ་དང་། ལས་འཕོ་བ་སྟེ་ལས་རིགས་མི་མཐུན་སྔོན་དུ་བྱས་པས་སྔ་མའི་ཆུད་མི་ཟ་བའི་རྒྱུན་འཇིག་པར་གྱུར་ན་དེ་ལ་ལས་ཀྱི་འབྲས་བུ་འཇིག་པ་དང་། མ་བྱས་པ་དང་ཕྲད་པ་དང་། བྱས་པ་ཆུད་ཟོས་པ་ལ་སོགས་པའི་སྐྱོན་རྣམས་སུ་ནི་ཐལ་བར་འགྱུར་ཏེ། ལས་ཀྱི་འབྲས་བུ་མྱོང་བའི་རྒྱུ་མེད་པའི་ཕྱིར་རོ། །ལྔ་པ་ལ་གཉིས་ཏེ། ཉིང་མཚམས་སྦྱོར་བའི་ཚེ་སྐྱེ་ཚུལ། མཐོང་བའི་ཆོས་ལ་སྐྱེ་ཚུལ་ལོ། །དང་པོ་ནི། ཁམས་མཚུངས་པ་ལས་ནི་འབྲས་བུ་མྱོང་བར་འགྱུར་བའི་ལས་ཀྱི་ཆ་མཚུངས་པ་དགེ་བ་དང་མི་དགེ་བ་ནང་དང་། ཆ་མི་མཚུངས་པ་དགེ་མི་དགེ་ཐམས་ཅད་ཀྱི་ཆུད་མི་ཟ་བ་ནི་ཁམས་གསུམ་གང་རུང་དང་ཉིང་མཚམས་སྦྱོར་བའི་ཚེ་རྫས་དུ་མར་གནས་པ་དེ་ཐམས་ཅད་ཆུད་མི་ཟ་བའི་རྫས་གཅིག་པུ་ཁོ་ནར་སྐྱེ་བར་འགྱུར་ལ། ཁམས་མི་མཚུངས་པར་མྱོང་འགྱུར་ཡིན་ན། ལས་མཚུངས་ཀྱང་ཆུད་མི་ཟ་གཅིག་ཏུ་མི་འགྱུར་རོ། །གཉིས་པ་ནི། མཐོང་བའི་ཆོས་ཚེ་འདི་ལ་ཟག་བཅས་ཟག་མེད་རྣམ་པ་གཉིས་པོ་ཀུན་གྱི་ལས་དང་། ལས་ཀྱི་ཆུད་མི་ཟ་བ་དེ་ལས་རེ་རེ་ཞིང་ཐ་དད་པར་ནི་སྐྱེ་བར་འགྱུར་ཞིང་། འབྲས་བུ་རྣམ་པར་སྨིན་པ་ཕྱུང་ནས་ཀྱང་གནས་པ་ཡིན་མོད་ཀྱི་སླར་རྣམ་སྨིན་བསྐྱེད་མི་ནུས་ཏེ། བུ་ལོན་ཁྱེར་བའི་དཔང་རྒྱ་ལྟ་བུའོ། །དྲུག་པ་ནི། ཆུད་མི་ཟ་དེ་ནི་དགེ་སྦྱོང་ཚུལ་གྱིས་འབྲས་བུ་བཞི་པོ་གོང་ནས་གོང་དུ་འཕོ་བ་ན་འགག་པར་འགྱུར་བ་ནི་སྔར་སྒོམ་པས་སྤོང་བ་ཉིད་ཡིན་ཞེས་དང་། ཤི་བར་གྱུར་ན་འགག་པར་འགྱུར་བ་ནི་སྔར་ཁམས་མཚུངས་པར་མྱོང་ན་ཉིང་མཚམས་སྦྱོར་བའི་ཚེ་སོ་སོ་བ་འགགས་ནས་གཅིག་པུ་ཁོ་ན་སྐྱེ་བར་འགྱུར་ཞེས་བཤད་པ་ལྟ་བུའོ། །བདུན་པ་ནི། ཆུད་མི་ཟ་བ་དེའི་རྣམ་པར་དབྱེ་བ་སྔར་བཞིར་ཕྱེ་བ་དེ་ཉིད་མདོར་བསྡུས་ན། ཟག་པ་མེད་པ་དང་། ཟག་པ་དང་བཅས་པར་ཤེས་པར་བྱའོ། །གསུམ་པ་དོན་བསྡུ་བ་ནི། ལས་སྐྱེས་མ་ཐག་ཏུ་འགག་པས་རྟག་པའི་དངོས་པོས་སྟོང་པ་ཉིད་ཡིན་པས་ན་རྟག་པ་ཉིད་མིན་ལ། ཆད་པ་ཡང་མིན་ཏེ། ལུས་ཅན་དག་གིས་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཞེས་ལས་རྣམས་ཀྱི་ཆུད་མི་ཟ་བའི་ཆོས་སངས་རྒྱས་ཀྱིས་ནི་བསྟན་པ་ཡིན་པས། ལས་འགགས་ཀྱང་ཆུད་མི་ཟ་བ་ཡིས་རིགས་སྣ་ཚོགས་པས་བཀྲ་བའི་འཁོར་བ་རུང་བའི་ཕྱིར་ཞེས་འཛེར་ཏོ། །གཉིས་པ་དེ་ཉིད་རྣམ་པར་དཔྱད་ནས་དགག་པ་ལ་གསུམ་སྟེ། རང་བཞིན་མེད་པས་ཆུད་མི་ཟ་བར་བསྟན་པ། རང་བཞིན་གྱིས་མ་གྲུབ་པར་བསྟན་པ། རང་བཞིན་མེད་ཀྱང་ཐ་སྙད་དུ་འཇོག་ཚུལ་དཔེས་བསྟན་པའོ། །དང་པོ་ནི། རྟག་ཆད་སྤོང་བའི་འབད་པ་དེ་ཐམས་ཅད་ནི་དྲི་ཟའི་གྲོང་ཁྱེར་གྱི་རྭ་བ་བགྱེལ་གྱིས་དོགས་པའི་འབད་པ་ལྟར་དོན་མེད་པ་ཡིན་ཏེ། ལས་རང་བཞིན་གྱིས་སྐྱེས་ན་རྟག་ཆད་ཀྱི་ཉེས་པར་འགྱུར་བ་ཞིག་ན་ཡང་། གང་གི་ཕྱིར། ལས་རང་བཞིན་གྱིས་སྐྱེ་བ་མེད་པ་དེའི་ཕྱིར། རྟག་པ་དང་ཆད་པར་མི་འགྱུར་ཏེ། མོ་གཤམ་གྱི་བུ་བཞིན་ནོ། །དེ་ཉིད་ཅི་སྟེ་སྙམ་ན་འདི་ལྟར་ལས་ལ་རང་བཞིན་མེད་པ་དེའི་ཕྱིར་རོ། །འོ་ན་མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་དང་འགལ་ལོ་སྙམ་ན་མི་འགལ་ཏེ། གང་གི་ཕྱིར་མདོ་དེའི་དགོངས་པ། ལས་དེ་ནི་ཡང་དག་པར་མ་སྐྱེས་པ་དེའི་ཕྱིར་ཆུད་ཟ་རྒྱུ་མེད་པས་ཆུད་ཟ་བར་མི་འགྱུར་བ་ལ་དགོངས་ནས་གསུངས་པ་ཡིན་པའི་ཕྱིར་རོ། །སྐབས་ཀྱི་དོན་ནི་ལས་རང་བཞིན་གྱིས་སྐྱེས་ན་རང་བཞིན་གྱིས་འགག་དགོས་ལ། རང་བཞིན་གྱིས་འགགས་པའི་དོན་ལས་སྐྱེས་པའི་སྐད་ཅིག་གཉིས་པ་ནས་ཇི་སྲིད་འབྲས་བུ་འབྱིན་གྱི་བར་དུ་ལས་གཏན་མེད་པ་ཡིན་པས་བར་སྐབས་དེར་དངོས་པོར་སྨྲ་བ་དག་གིས་རྒྱུན་དང་། ཆུད་མི་ཟ་དང་། ཀུན་གཞིའི་སྟེང་གི་བག་ཆགས་ཡོད་པས་ལས་མེད་ཀྱང་ལས་ཀྱི་འབྲས་བུ་འབྱིན་པར་སྨྲ་བ་ལས། དང་པོ་གཉིས་པོ་འདིར་བཀག་ཟིན་པ་ལ་དགོངས་ནས། དཔལ་ལྡན་ཟླ་བས་འཇུག་པར་ཕྱི་མ་དགག་པར་མཛད་དེ། རིག་པའི་ངོ་བོ་ནི་འདིར་རང་བཞིན་གྱིས་མ་སྐྱེས་པ་ཞེས་དང་། འཇུག་པར་རང་བཞིན་གྱིས་མི་འགག་པ་ཞེས་གསུངས་ཏེ་གནད་གཅིག་གོ །དེས་ན་ལས་ཐ་སྙད་དུ་འགགས་ཀྱང་རང་བཞིན་གྱིས་མི་འགག་པའི་དོན་ནི། འབྲས་བུ་འབྱིན་གྱི་བར་དུ་ལས་དེ་མེད་པ་མ་ཡིན་ཏེ། མེད་ན་ཆད་པར་འགྱུར་བའི་ཕྱིར། ཡོད་པ་ཡང་མ་ཡིན་ཏེ། ཡོད་ན་རྟག་པར་འགྱུར་བའི་ཕྱིར། དེས་ན་ལས་དང་འབྲས་བུའི་བར་སྐབས་དེར་སྦྲེལ་བྱེད་གཞན་དོན་མེད་དེ། བར་དེར་ལས་མེད་པར་ཁས་མི་ལེན་པའི་ཕྱིར། དོན་འདི་མ་རྟོགས་པར་བོད་ཀྱི་དབུ་མ་པར་རློམ་པ་དག་བར་སྐབས་དེར་ཞིག་པ་དངོས་པོ་བས་སྦྲེལ་བར་འདོད་པ་ནི་སྔར་གྱི་གསུམ་པོ་ལས་ཆེས་ཤིན་ཏུ་དམན་ཏེ། དགག་སྒྲུབ་རྒྱས་པར་འཇུག་པའི་དཀའ་འགྲེལ་དུ་བཤད་ཟིན་ཏོ། །གཉིས་པ་ལ་གཉིས་ཏེ། རང་བཞིན་ཡོད་པའི་ཕྱོགས་ལ་གནོད་བྱེད་བསྟན། རང་བཞིན་གྲུབ་པའི་ཕྱོགས་ཀྱི་སྒྲུབ་བྱེད་དགག་པའོ། །དང་པོ་ལ་གཉིས་ཏེ། མ་བྱས་པར་ཐལ་བས་དགག་པ། རྣམ་སྨིན་ཐུག་མེད་དུ་ཐལ་བས་དགག་པའོ། །དང་པོ་ནི། གལ་ཏེ་ལས་རང་བཞིན་མེད་པའི་གཏན་ཚིགས་མ་གྲུབ་སྟེ། ལས་ལ་རང་བཞིན་ཡོད་དོ་ཞེ་ན། འོ་ན་ལས་དེ་རྟག་པར་འགྱུར་བར་ཐེ་ཚོམ་མེད་དེ། ལས་རང་བཞིན་གྱིས་ཡོད་པའི་ཕྱིར། འདོད་ན། ལས་ནི་བྱས་པ་མ་ཡིན་པར་འགྱུར་ཏེ། རྟག་པ་ལ་སྔར་མེད་ཀྱི་ཁྱད་པར་བྱ་བ་མེད་པའི་ཕྱིར་རོ། །ཅི་སྟེ་ལས་ནི་མ་བྱས་པར་ཐལ་བར་འདོད་ན་མཚམས་མེད་ལ་སོགས་པའི་ལས་མ་བྱས་ཀྱང་། དེའི་འབྲས་བུ་དང་ཕྲད་པའི་འཇིགས་པར་འགྱུར་ལ། དགེ་སྦྱོང་གི་མི་ཚངས་སྤྱོད་མ་བྱས་ཀྱང་དེ་དགོས་པས་ཚངས་སྤྱོད་ལ་གནས་པ་མ་ཡིན་པའང་ལས་མ་བྱས་པར་འདོད་པ་དེ་ལ་སྐྱོན་དུ་ཐལ་བར་འགྱུར་ཞིང་། བུམ་པ་གྱིས་ཤིག་ཅེས་པ་ལ་སོགས་པ་འཇིག་རྟེན་གྱི་ཐ་སྙད་ཐམས་ཅད་དང་ཡང་འགལ་བར་འགྱུར་བར་ཐེ་ཚོམ་མེད་དེ། འབྲས་བུ་དེ་དག་ཐམས་ཅད་མ་བྱས་ཀྱང་ཡོད་པའི་ཕྱིར་རོ། །བསོད་ནམས་ཁོ་ན་དང་། སྡིག་པ་ཁོ་ན་བྱེད་པའི་གང་ཟག་དག་ལ་རིམ་པ་ལྟར། བསོད་ནམས་ཅན་དང་། སྡིག་ཅན་ཞེས་བཟང་ངན་ཅན་དུ་རྣམ་པར་དབྱེ་བའང་འཐད་པར་མི་འགྱུར་ཏེ། མ་བྱས་པའི་སྡིག་པ་དང་། བསོད་ནམས་ཡོད་པའི་ཕྱིར་རོ། །གཉིས་པ་ནི། གལ་ཏེ་ལས་ལ་རང་བཞིན་ཡོད་ན་ནི་ལས་དེ་ནི་རྣམ་པར་སྨིན་པ་སྨིན་པར་གྱུར་པའི་འོག་ཏུ་ཡང་དང་ཡང་དུ་རྣམ་སྨིན་སྐྱེད་པར་འགྱུར་ཏེ། གང་གི་ཕྱིར་ན་ལས་སྔ་རོལ་ན་ཡོད་པ་རྒྱུན་དུ་གནས་པ་དེའི་ཕྱིར། གཉིས་པ་ལ་གསུམ་སྟེ། རྒྱུ་ཉོན་མོངས་པ་དགག འབྲས་བུ་ལུས་དགག རྣམ་སྨིན་ཟ་བ་པོ་དགག་པའོ། །དང་པོ་ནི། ལས་རང་བཞིན་གྱིས་ཡོད་དེ། མ་རིག་པའི་རྐྱེན་གྱིས་འདུ་བྱེད་ཅེས་པ་དང་། ལེན་པའི་རྐྱེན་གྱིས་སྲིད་པ་ཞེས་གསུངས་པས་དེའི་རྒྱུ་ཉོན་མོངས་པ་ཡོད་པའི་ཕྱིར་རོ་ཞེ་ན། ཉོན་མོངས་པ་དེ་དག་ཡང་དག་པར་ཡོད་པ་མིན་ཏེ། རྟེན་ནས་འབྱུང་བའི་ཕྱིར། གལ་ཏེ་ཉོན་མོངས་པ་དེ་དག་ཡང་དག་པར་ཡོད་པ་མིན་ན། ལས་ནི་ཡང་དག་པར་ཡོད་པ་ཅི་ལྟར་ཡིན་ཏེ། ལས་འདི་ཉོན་མོངས་བདག་ཉིད་ལ་སྟེ། དེ་ལ་བརྟེན་ནས་འབྱུང་བའི་ཕྱིར་རོ། །གཉིས་པ་ནི། གལ་ཏེ་ལས་དང་ཉོན་མོངས་པ་རང་བཞིན་གྱིས་ཡོད་དེ། དེའི་འབྲས་བུ་ལུས་ཡོད་པའི་ཕྱིར་ཞེ་ན། ལུས་ལ་ཆོས་ཅན། རང་བཞིན་ཡོད་པར་ཅི་ལྟར་བརྗོད་དེ། ལས་དང་ཉོན་མོངས་པ་དེས་སྟོང་པའི་ཕྱིར་རོ། །ཁྱབ་སྟེ། ལས་དང་ཉོན་མོངས་པ་དག་ནི་ལུས་རྣམས་ཀྱི་རྐྱེན་དུ་མདོ་ལས་བསྟན་པས་སོ། །གསུམ་པ་ནི། ལས་དང་ཉོན་མོངས་པ་རང་བཞིན་གྱིས་ཡོད་དེ། རྣམ་པར་སྨིན་པ་ཟ་བ་པོ་ཡོད་པའི་ཕྱིར་རོ་སྙམ་ན། རྣམ་སྨིན་ཟ་བ་པོ་རང་བཞིན་གྱིས་མ་གྲུབ་སྟེ། མ་རིག་པས་ཡང་དག་པས་ཤེས་རབ་ཀྱིས་མིག་བསྒྲིབས་པའི་སྐྱེ་བོ་གང་ཞིག་སྲེད་པ་དང་ལྡན་པ་དེ་ནི་ཟ་བ་པོ་ཡིན་ལ། ཟ་བ་པོ་དེ་ཡང་སྔར་གྱི་ལས་བྱེད་པ་པོ་དེ་ལས་རྫས་གཞན་མ་ཡིན་ཅིང་། ལས་བྱེད་པ་པོ་དེ་ཉིད་དེ་ཡང་མ་ཡིན་པས་སོ། །གལ་ཏེ་དེ་ཉིད་དང་གཞན་ཉིད་དུ་བརྗོད་དུ་མེད་པའི་ཟ་བ་པོ་ཡོད་པས་ལས་ཡོད་དོ་ཞེ་ན། ཟ་བ་པོ་དེ་ཡང་རང་བཞིན་གྱི་མ་གྲུབ་སྟེ། གང་གི་ཕྱིར་ལས་འདི་ནི་རྐྱེན་བརྟག་པར་བཀག་པས་རྐྱེན་ལས་བྱུང་བ་མ་ཡིན་ཅིང་། རྒྱུ་མེད་པར་ཐལ་བས་རྐྱེན་མིན་ལས་བྱུང་བ་ཡང་ཡོད་པ་མ་ཡིན་པ་དེའི་ཕྱིར་ན་ལས་བྱེད་པ་པོ་ཡང་མེད་ལ། གལ་ཏེ་ལས་དང་བྱེད་པ་པོ་མེད་ན་ལས་དེ་ལས་སྐྱེས་པའི་འབྲས་བུ་ག་ལ་ཡོད་ཅིང་། ཅི་སྟེ་འབྲས་བུ་ཡོད་པ་མིན་ན། འབྲས་བུ་དེ་ལ་སྤྱོད་པ་པོའམ་ཟ་བ་པོ་ལྟ་ག་ལ་ཡོད་དེ་མ་གྲུབ་པའི་ཕྱིར་རོ། །གསུམ་པ་རང་བཞིན་མེད་ཀྱང་ཐ་སྙད་དུ་འཇོག་ཚུལ་དཔེས་བསྟན་པ་ལ་གཉིས་ཏེ། བསྟན་བཅོས་ལ་གྲགས་པའི་དཔེ། འཇིག་རྟེན་ལ་གྲགས་པའི་དཔེའོ། །དང་པོ་ནི། གལ་ཏེ་དེ་ལྟར་ན། བདག་གིས་བྱས་པའི་ལས་རྣམས་ནི། །བདག་གིས་སོ་སོར་མྱོང་བར་འགྱུར། །ཞེས་ལས་དང་འབྲས་བུའི་འབྲེལ་པ་མདོ་ལས་གསུངས་པ་དེ་ཐམས་ཅད་བཀག་པས་འབྲས་བུ་ལ་སྐུར་བ་འདེབས་པའི་ལོག་པར་ལྟ་བར་འགྱུར་རོ་ཞེ་ན། རང་བཞིན་གྱིས་གྲུབ་པ་བཀག་ཀྱང་ཐ་སྙད་དུ་བྱ་བྱེད་མི་འཐད་པ་མ་ཡིན་ཏེ། དཔེ་ཇི་ལྟར་སྟོན་པ་རྫོགས་པའི་སངས་རྒྱས་ཀྱི་སྤྲུལ་པ་ནི། རྫུ་འཕྲུལ་ཕུན་ཚོགས་ཀྱིས་སྤྲུལ་ཞིང་སྤྲུལ་པ་དེ་ཡང་སྤྲུལ་པ་ནི་སླར་ཡང་ཉིང་སྤྲུལ་གཞན་དག་སྤྲུལ་པར་མཛད་པ་ལྟར། དེ་བཞིན་དུ་ལས་བྱེད་པ་པོ་རང་བཞིན་གྱིས་མེད་ཀྱང་ཐ་སྙད་དུ་ལས་བྱེད་པར་ནུས་པ་སྤྲུལ་པའི་རྣམ་པ་བཞིན་དང་། དེས་ལས་གང་བྱས་པ་དེ་རང་བཞིན་མེད་ཀྱང་ཐ་སྙད་དུ་འབྲས་བུ་བྱེད་པ་དཔེར་ན་སྤྲུལ་པས་སྤྲུལ་པ་གཞན་ཞིག་སྤྲུལ་པར་མཛད་པ་དེ་བཞིན་ནོ། །གཉིས་པ་ནི། དེ་ཉིད་འཇིག་རྟེན་ན་གྲགས་པའི་དཔེའི་སྒོ་ནས་ཀྱང་འགྲུབ་སྟེ་འདོད་ཆགས་ལ་སོགས་པའི་ཉོན་མོངས་པ་དང་། དེས་ཀུན་ནས་སློང་བའི་ལས་དང་། དེའི་འབྲས་བུ་ལུས་རྣམས་དང་། ལས་ཀྱི་བྱེད་པ་པོ་བརྗོད་དུ་མེད་པའི་བདག་དང་། རྣམ་པར་སྨིན་པ་དང་། བདག་པོ་དང་། རྒྱུ་མཐུན་པའི་འབྲས་བུ་དག་རང་བཞིན་མེད་ཀྱང་ཐ་སྙད་དུ་རྟེན་ནས་འབྱུང་བར་སྣང་བ་དྲི་ཟའི་གྲོང་ཁྱེར་ལྟ་བུ་དང་། སྨིག་རྒྱུ་ལྟ་བུ་དང་། རྨི་ལམ་ལྟ་བུ་ཡིན་པའི་ཕྱིར་རོ། །གཉིས་པ་ལུང་དང་སྦྱར་བ་ནི། ཅི་སྐད་དུ་མདོ་ལས། གང་ཕྱིར་བདེར་གཤེགས་གཏམ་རྣམས་སྟོན་པ་ན། །མགོན་པོ་སྲང་བཞུང་མི་ལ་ཐུགས་བརྩེའི་ཕྱིར། །རྒྱལ་བས་དེར་ནི་སྤྲུལ་པ་རྣམ་སྤྲུལ་ཏེ། །དེ་དག་ལ་ཡང་སངས་རྒྱས་ཆོས་བཟང་སྟོན། །སྲོག་ཆགས་བརྒྱ་སྟོང་དག་གིས་དེ་ཐོས་ནས། །སངས་རྒྱས་ཡེ་ཤེས་མཆོག་ལ་སྨོན་ལམ་འདེབས། །ནམ་བདག་འདི་འདྲའི་ཡེ་ཤེས་ཐོབ་སྙམ་སྟེ། །བསམ་པ་མཁྱེན་ནས་རྒྱལ་བ་དེས་ལུང་སྟོན། །གང་གིས་རྒྱལ་བ་མི་དབང་སྤྱན་དྲངས་པ། །དེ་ཡི་སྦྱིན་པ་མུ་མཐའ་མེད་གྱུར་ཏེ། །རྙེད་མཆོག་བསམ་གྱིས་མི་ཁྱབ་དེ་རྙེད་ཅེས། །ལ་ལ་དག་ནི་དེ་ལ་མོས་པ་བསྐྱེད། །ཅེས་རྒྱས་པར་གསུངས་ཏེ། བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། ལས་དང་འབྲས་བུ་བརྟགས་པ་ཞེས་བྱ་བ་སྟེ་རབ་ཏུ་བྱེད་པ་བཅུ་བདུན་པའི་རྣམ་པར་བཤད་པའོ།། །།གསུམ་པ་དེ་ཁོ་ན་ཉིད་ལ་འཇུག་པའི་ཚུལ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཉོན་མོངས་པ་དང་། ལས་དང་ལུས་ལ་སོགས་པ་ཅི་ལྟར་སྣང་བ་འདི་དེ་ཁོ་ན་ཉིད་མ་ཡིན་གྱི། དྲི་ཟའི་གྲོང་ཁྱེར་ལ་སོགས་པ་ལྟར། དེ་ཁོ་ན་ཉིད་མ་ཡིན་བཞིན་དུ་དེ་ཁོ་ན་ཉིད་ཀྱི་རྣམ་པར་སྣང་བ་བརྫུན་པ་ཡིན་ན། འདིར་དེ་ཁོ་ན་ཉིད་ཀྱི་རང་བཞིན་ནི་གང་ཞིག་ཡིན། དེ་ཁོ་ན་ཉིད་ལ་འཇུག་པའི་ཐབས་ཅི་ལྟར་ཡིན་ཅེ་ན། འཇུག་པའི་ཐབས་ནི་འཁོར་བའི་ཉོན་མོངས་པ་དང་། སྐྱོན་སྡུག་བསྔལ་རྣམས་འཇིག་ཚོགས་ལ་ལྟ་བ་ལས་འབྱུང་བར་ཤེས་རབ་ཀྱིས་མཐོང་ཞིང་། བདག་ནི་འཇིག་ཚོགས་ལ་ལྟ་བའི་ཡུལ་དུ་རྟོགས་པར་བྱས་ནས་བདག་འགོག་པར་འདོད་པ་ཉིད་ཡིན་པ་དབུ་མ་ལ་འཇུག་པར་བཤད་ཟིན་པས་འདིར་ནི་དེ་ཁོ་ན་ཉིད་ཀྱི་རང་བཞིན་དང་། དེ་ཇི་ལྟར་བསྟན་པའི་ཚུལ་དང་། དེའི་འབྲས་བུ་རྣམས་འཆད་ཅེས་པའོ། །རྣམ་བཤད་མཛད་པ་དག དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་པ་ཡན་ཆད། དེ་ཁོ་ན་ཉིད་ལ་འཇུག་པའི་ཚུལ་དང་། །བརྗོད་པར་བྱ་བ་བཟློག་པ་སྟེ། །ཞེས་པ་མན་ཆད་དེ་ཁོ་ན་ཉིད་ཀྱི་རང་བཞིན་སྟོན་པར་འཆད་པ་ནི་ཅུང་ཟད་མི་ལེགས་ཏེ། འགྲེལ་པར། ནང་དང་ཕྱི་ཡི་དངོས་པོ་མ་དམིགས་པས། ནང་དང་ཕྱི་ལ་བདག་ཏུ་འཛིན་པ་དང་བདག་གིར་འཛིན་པ་རྣམ་པ་ཐམས་ཅད་དུ་ཟད་པ་འདི་ནི་འདིར་དེ་ཁོ་ན་ཉིད་དོ། །འདིར་དེ་ཁོ་ན་ཉིད་ལ་འཇུག་པ་ནི། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ཞེས་བྱ་བ་ལ་སོགས་པས་རྒྱས་པར་དབུ་མ་ལ་འཇུག་པ་ལས་བཙལ་བར་བྱའོ། །འདིར་ནི་གནས་པའི་ཕྱོགས་ཉིད་བཤད་པར་བྱ་སྟེ། ཞེས་གསུངས་པས་སོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། དེ་ཁོ་ན་ཉིད་ཀྱི་རང་བཞིན། དེ་ཅི་ལྟར་བསྟན་པའི་ཚུལ། དེ་ལྟར་བསྟན་པའི་འབྲས་བུའོ། །དང་པོ་ལ་གསུམ་སྟེ། བདག་དང་བདག་གི་བ་དགག་པ། དེ་བཀག་པའི་འབྲས་བུ། བཀག་པ་ལ་ལུང་དང་འགལ་བ་སྤང་བའོ། །དང་པོ་ལ་གཉིས་ཏེ། བདག་རང་བཞིན་གྱིས་གྲུབ་པ་དགག དེས་བདག་གི་བ་ཁེགས་པར་བསྟན་པའོ། །དང་པོ་ནི། ཉེ་བར་ལེན་པ་པོའི་བདག་དེ་བླང་བྱ་ཕུང་པོའི་ངོ་བོའམ། དེ་ལས་ཐ་དད་དུ་ཡོད་དྲང་། དེ་ལ་གལ་ཏེ་ཕུང་པོ་ཉིད་བདག་ཡིན་ན། བདག་དེ་སྐྱེ་འཇིག་ཅན་དང་དུ་མར་འགྱུར་ཏེ། ཕུང་པོ་མི་རྟག་པ་དུ་མ་དང་ངོ་བོ་དབྱེར་མེད་ཡིན་པའི་ཕྱིར་རོ། །འདོད་ནུས་པ་ཡང་མ་ཡིན་ཏེ། གཞན་སྡེ་ལྟར་ན་བདག་རྟག་པ་གཅིག་པུར་འདོད་པ་དང་འགལ་ལ། རང་གི་སྡེ་པ་ལྟར་ན་སྐད་ཅིག་མ་ལ་ལས་བྱེད་པ་པོ་དང་། འབྲས་བུ་ལོངས་སྤྱོད་པ་པོ་གཞི་མཐུན་མི་རུང་བའི་ཕྱིར་དང་། དུ་མ་ཡིན་ན། འཇིག་རྟེན་སྐྱེ་བ་ན་གང་ཟག་ཉག་ཅིག་སྐྱེ་ཞེས་པའི་ལུང་དང་འགལ་བའི་ཕྱིར་རོ། །གལ་ཏེ་གཉིས་པ་ལྟར་བདག་ཕུང་པོ་རྣམས་ལས་ངོ་བོ་གཞན་ཡིན་ན། ཕུང་པོ་ལྔ་འདུས་བྱས་ཡིན་པས་དེ་དག་འདུས་བྱས་སུ་མཚོན་པའི་མཚན་ཉིད་སྐྱེ་གནས་འཇིག་པ་མེད་པར་འགྱུར་བས་བདག་དེ་དངོས་པོར་མི་རུང་ཞེས་པའམ། ཡང་ན་བདག་དེ་གཟུགས་སུ་རུང་བ་ལ་སོགས་པ་ཕུང་པོ་ལྔ་སོ་སོའི་མཚན་ཉིད་མེད་པར་དེ་ལས་ངོ་བོ་ཐ་དད་དུ་དམིགས་པར་འགྱུར་ཏེ་ཕུང་པོ་ལས་གཞན་ཡིན་པའི་ཕྱིར། འདོད་མི་ནུས་ཏེ། དེ་དག་ལས་ངོ་བོ་ཐ་དད་དུ་སྣང་རུང་མ་དམིགས་པའི་ཕྱིར་རོ། །གཉིས་པ་ནི། དེ་ལྟར་ན་ཉེ་བར་བླང་བྱའི་ཕུང་པོ་བདག་གི་བ་ཡང་ཡོད་པར་ག་ལ་འགྱུར་ཏེ། ཉེ་བར་ལེན་པ་པོའི་བདག་ཉིད་ཡོད་པ་མིན་པའི་ཕྱིར་ནའོ། །གཉིས་པ་ལ་གསུམ་སྟེ། དེས་ཡུལ་ཅན་འཛིན་པ་སྤོང་བ། དེ་ལ་རྩོད་པ་སྤོང་བ། འཛིན་པ་ཟད་པས་གྲོལ་བ་ཐོབ་པའི་ཚུལ་ལོ། །དང་པོ་ནི། དེ་ལྟར་རྣལ་འབྱོར་པས། ལེན་པ་པོའི་བདག་དང་། བླང་བྱ་བདག་གི་བ་མ་དམིགས་ཤིང་། རང་བཞིན་གྱིས་ཞི་བར་ཤེས་པའི་ཕྱིར་ན། ངར་འཛིན་པ་དང་། ང་ཡིར་འཛིན་པ་མེད་པའམ་མི་འབྱུང་བར་འགྱུར་ཏེ། ཞེན་ཡུལ་མ་རྙེད་པས་ཞེན་བྱེད་ཀྱི་བློ་ལྡོག་པ་རིག་པའི་ཚུལ་ཡིན་པའི་ཕྱིར་རོ། །གཉིས་པ་ནི། དེ་ལྟར་ན་ང་དང་ང་ཡིར་འཛིན་པ་མེད་པའི་རྣལ་འབྱོར་པ་དེ་ཡོད་པས་བདག་དང་བདག་གི་བ་ཡང་ཡོད་དོ་ཞེ་ན། ངར་འཛིན་པ་དང་ང་ཡིར་འཛིན་པ་མེད་པའི་རྣལ་འབྱོར་པ་གང་ཡིན་པ་དེ་ཡང་ཡོད་པ་མ་ཡིན་ཏེ། སྔར་བདག་དང་། ཕུང་པོ་ལ་དེ་ཉིད་དང་། གཞན་ཉིད་བཀག་པའི་རིག་པ་དེས་རྣལ་འབྱོར་པ་ཡང་མི་རྙེད་པའི་ཕྱིར་རོ། །དེ་ལྟར་འཛིན་པ་གཉིས་དང་བྲལ་བའི་རྣལ་འབྱོར་པ་ཉིད་མ་གྲུབ་པ་ལ་ངར་འཛིན་པ་དང་། ང་ཡིར་འཛིན་པ་མེད་པའི་རྣལ་འབྱོར་པའི་དངོས་པོ་ཡོད་པར་གང་ཟག་གང་གིས་མཐོང་ཞིང་ལྟ་བ་དེས་དེ་ཁོ་ན་ཉིད་མི་མཐོང་ཞེས་ཤེས་པར་བྱ་སྟེ། ཏིང་ངེ་འཛིན་རྒྱལ་པོ་མདོ་ལས། ནང་གི་བདག་ཉིད་སྟོང་པར་བལྟོས། །ཕྱི་རོལ་གྱུར་པ་སྟོང་པར་ལྟོས། །གང་ཞིག་དེ་ཉིད་སྒོམ་བྱེད་པ། །དེ་འགའ་ཞིག་ཀྱང་ཡོད་མ་ཡིན། །ཞེས་གསུངས་པས་སོ། །གསུམ་པ་ནི། དེ་ལྟར་ན་ནང་ཟིན་པའི་ཕུང་པོ་དང་། ཕྱི་རོལ་མ་ཟིན་པ་ཉིད་དག་ལ་རིམ་པ་ལྟར་བདག་དང་བདག་གི་སྙམ་དུ་འཛིན་པ་ཟད་ན་ལས་དང་ཉོན་མོངས་པ་ཟད། དེ་ཟད་པས་ཐར་པ་མྱ་ངན་ལས་འདས་པ་ཐོབ་པར་འགྱུར་ཏེ། དེ་ཟད་ན་འདོད་པ་དང་། ལྟ་བ་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་དང་། བདག་ཏུ་སྨྲ་བ་ཉེ་བར་ལེན་པ་བཞི་པོ་འགག་པར་འགྱུར་ཞིང་། རྒྱུ་ཉེ་བར་ལེན་པ་བཞི་པོ་དེ་ཟད་པས་ན་སྲིད་པའི་དབང་གིས་སྐྱེ་བ་ཟད་པར་འགྱུར་བའི་ཕྱིར་རོ། །འོ་ན་ལས་དང་ཉོན་མོངས་པ་དེ་དག་གང་གིས་འཛད་པར་འགྱུར་ཞེ་ན། དེའང་རྒྱུ་ཟད་པའི་སྒོ་ནས་འཛད་དེ། འདི་ལྟར་ལས་དང་ཉོན་མོངས་པ་ནི་སྔར་བཤད་པ་ལྟར་བདག་དང་བདག་གིར་འཛིན་པ་ལ་སོགས་པའི་རྒྱུར་གྱུར་པའི་མཚན་མར་འཛིན་པའི་རྣམ་པར་རྟོག་པ་ལས་བྱུང་ལ། རྣམ་རྟོག་དེ་དག་མཚན་མར་འཛིན་པའི་སྤྲོས་པ་སྣ་ཚོགས་ལས་འབྱུང་ཞིང་། མཚན་མའི་སྤྲོས་པ་ནི། ཤེས་བྱ་དང་ཤེས་བྱེད། བརྗོད་བྱ་དང་རྗོད་བྱེད་ལ་སོགས་པ་ཆོས་ཐམས་ཅད་རང་བཞིན་སྟོང་པ་ཉིད་དུ་ལྟ་བ་གོམས་པ་ཉིད་ཀྱིས་འགག་པར་འགྱུར་བའི་ཕྱིར་རོ། །གསུམ་པ་བཀག་པ་ལ་ལུང་དང་འགལ་བ་སྤོང་བ་ནི། དེ་ལྟར་བདག་དང་བདག་གི་བ་མེད་ན། བདག་ཉིད་བདག་གིས་མགོན་ཡིན་གྱི། །གཞན་ནི་སུ་ཞིག་མགོན་དུ་འགྱུར། །བདག་ཉིད་ལེགས་པར་དུལ་བ་ནི། །མཁས་པས་མཐོ་རིས་ཐོབ་པར་འགྱུར། །ཞེས་དང་། གནག་དང་དཀར་བའི་ལས་ནི་འཇིག་མི་འགྱུར། །བདག་གིས་བྱས་པ་མྱོང་བར་འགྱུར་བ་ཡིན། །ཞེས་གསུངས་པ་དང་མི་འགལ་ལམ་ཞེ་ན། དེ་སྐད་གསུངས་མོད་ཀྱི། འདི་ན་བདག་གམ་སེམས་ཅན་མེད། །ཆོས་འདི་དག་ནི་རྒྱུ་དང་བཅས། །ཞེས་དང་། ཆོས་ཐམས་ཅད་ནི་བདག་མེད་པའོ། །ཞེས་ཀྱང་གསུངས་པས། མདོའི་དགོངས་པ་བཙལ་དགོས་ཏེ། འདི་ལྟར། སྤྱིར་སངས་རྒྱས་རྣམས་ཀྱིས་ནི་གདུལ་བྱ་དམན་པ་རྒྱང་འཕེན་པ་ལྟ་བུ་ལས་རྒྱུ་འབྲས་མེད་དོ་ཞེས་སྐུར་པ་བཏབ་པས། ངན་སོང་དུ་སྐྱེ་བར་འགྱུར་བ་དེ་དག་རྗེས་སུ་གཟུང་བར་བྱ་བའི་ཕྱིར་ཀུན་རྫོབ་ཆོས་ཙམ་ལ་བཏགས་པའི་བདག་ཡོད་པ་ལ་དགོངས་ནས་བདག་གོ་ཞེས་ཀྱང་བརྟག་པར་འགྱུར་ཞིང་། གདུལ་བྱ་བར་མ་ལས་འབྲས་ལ་ཡིད་ཆེས་ཀྱང་བདག་ཏུ་ལྟ་བ་མ་ཁེགས་པས་འཁོར་བར་ལྟུང་བ་རྣམས་རྗེས་སུ་གཟུང་བར་བྱ་བའི་ཕྱིར། བདག་རྫས་ཡོད་བཀག་པའི་ཆོས་ཀུན་རྫོབ་ཏུ་ཡོད་པ་ལ་དགོངས་ནས་བདག་མེད་དོ་ཞེས་ཀྱང་བསྟན་པར་གྱུར་ལ། གདུལ་བྱ་མཆོག་ཏུ་གྱུར་པ་ཀུན་རྫོབ་ཏུ་ལས་རྒྱུ་འབྲས་ལ་ཡིད་ཆེས་ཤིང་བདེན་པའི་བདག་མེད་པར་ལྟ་བ་དེ་དག་བཀག ཆོས་ཀྱི་མཚན་མར་འཛིན་པ་སྤོང་བའི་ཕྱིར། དེ་ཁོ་ན་ཉིད་དུ་དགག་བྱ་བདག་དང་ནི་དེ་བཀག་པའི་བདག་མེད་འགའ་ཡང་མེད་ཅེས་བསྟན་པ་ཡིན་པས་ཁོ་བོ་ཅག་གི་ཕྱོགས་ལ་ལུང་དང་འགལ་བའི་ཉེས་པ་ཅུང་ཟད་ཀྱང་མེད་དེ། དཀོན་མཆོག་བརྩེགས་པ་ལས། འོད་སྲུང་བདག་ཅེས་བྱ་བ་འདི་ནི་མཐའ་གཅིག་གོ །བདག་མེད་ཅེས་བྱ་བ་འདི་ནི་མཐའ་གཉིས་པའོ། །མཐའ་དེ་གཉིས་ཀྱི་དབུས་གང་ཡིན་པ་དེ་ནི་བསྟན་དུ་མེད་པའོ། །ཞེས་གསུངས་པས་སོ། །གཉིས་པ་དེ་ཇི་ལྟར་བསྟན་པའི་ཚུལ་ལ་གསུམ་སྟེ། རང་གི་ངོ་བོ་བསྟན་དུ་མེད་པ། སྒྲོ་བཏགས་ནས་བསྟན་པའི་ཚུལ། བསྟན་བྱ་དེ་ཁོ་ན་ཉིད་ཀྱི་མཚན་ཉིད་དོ། །དང་པོ་ནི། འདི་ལ་སངས་རྒྱས་བཅོམ་ལྡན་འདས་ཀྱིས་བདག་དང་བདག་མེད་པ་གཉིས་ཀ་མེད་པར་བསྟན་ན། དེ་གཉིས་མ་བསྟན་པས་འོ་ན་ཅི་བསྟན་ཅེ་ན་ཞེས་པའི་ལན་དུ་སྦྱོར་བ་དང་། སྤྲོས་པ་ནི། སྟོང་པ་ཉིད་ཀྱིས་འགག་པར་འགྱུར། །ཞེས་གང་སྨྲས་ན་ཅི་ལྟར་སྤྲོས་པ་སྟོང་པ་ཉིད་ཀྱིས་འགག་པར་འགྱུར་ཞེ་ན་ཞེས་པའི་ལན་དུ་སྦྱོར་བ་དང་། སྔར་ནང་དང་ཕྱིའི་དངོས་པོ་མ་དམིགས་པས། ནང་དང་ཕྱི་རོལ་ལ་ངར་འཛིན་པ་དང་། ང་ཡིར་འཛིན་པ་ཟད་པ་གང་ཡིན་པ་དེ་ནི་འདིར་དེ་ཁོ་ན་ཉིད་དོ། །ཞེས་བཤད་ན། དེ་ཅི་ཞིག་ཡིན་ཅིང་། ཅི་དེ་བརྗོད་པའམ་ཤེས་པར་བྱ་བར་ནུས་སམ་ཞེ་ན་ཞེས་པའི་ལན་དུ་སྦྱོར་བའི་ཚུལ་དང་གསུམ་སྣང་ཡང་གཞུང་གི་དོན་ནི་འདྲ་བར་སྣང་སྟེ། བརྗོད་པར་བྱ་བའི་ཆོས་འགའ་ཞིག་ཡོད་ན་སྟོན་པར་འགྱུར་བ་ཞིག་ན་དེ་ཁོ་ན་ཉིད་ལ་ནི་སྒྲས་ཞེན་ནས་བརྗོད་པར་བྱ་བ་ལྡོག་པས་འགའ་ཡང་མ་བསྟན་ཏོ། །དེ་ཉིད་ཅི་སྟེ་སྙམ་ན་དེ་བློའི་ཡུལ་དུ་འགྱུར་ན་བརྗོད་པར་འགྱུར་བ་ཞིག་ན། དེ་ལ་སེམས་ཀྱི་སྤྱོད་ཡུལ་ལ་མ་དམིགས་པ་ཐམས་ཅད་ལྡོག་པས་མིང་གང་ཡང་སྒྲོ་བཏགས་པར་མི་ནུས་པའི་ཕྱིར་རོ། །ཅིའི་ཕྱིར་སེམས་ཀྱི་སྤྱོད་ཡུལ་ལྡོག་ཅེ་ན། ཆོས་རྣམས་ཀྱི་ཆོས་ཉིད་དེ་བཞིན་ཉིད་གདོད་མ་ནས་མ་སྐྱེས་པ་དང་། མ་འགགས་པས་གློ་བུར་གྱི་དྲི་མ་དང་བྲལ་བའི་མྱ་ངན་ལས་འདས་པ་དང་མཚུངས་པས། གཉིས་སྣང་དང་བཅས་པའི་བློ་ལ་རྣམ་པར་འཆར་རྒྱུ་མེད་པའི་ཕྱིར་རོ། །གཉིས་པ་ནི། གལ་ཏེ་དེ་ལྟར་དོན་དམ་པའི་བདེན་པ་སྒྲ་བློའི་ཡུལ་ལས་འདས་པས་བསྟན་པར་མི་ནུས་ན་གདུལ་བྱ་རྣམས་ཀྱིས་ཅི་ལྟར་རྟོགས་པར་བྱ་ཞེ་ན། ཀུན་རྫོབ་ཏུ་སྒྲོ་བཏགས་ནས་བསྟན་པའི་ཚུལ་དུ་མ་ཡོད་དེ། སྤྱིར་སངས་རྒྱས་ཀྱིས་གདུལ་བྱ་ལས་དང་པོ་པ་དད་པར་བྱ་བའི་ཕྱིར་འཇིག་རྟེན་པའི་བློ་ལ་ལྟོས་ནས་སྣོད་བཅུད་ཀྱིས་བསྡུས་པའི་དངོས་པོ་ཐམས་ཅད་ཡང་དག་ཏུ་ཡང་བསྟན། ཕྱིས་དེ་ལ་ཞེན་པ་སྤང་བའི་ཕྱིར་འཕགས་པའི་བློ་ལ་ལྟོས་ནས་ཡང་དག་མིན་པར་ཡང་བསྟན། དེ་གཉིས་འགལ་བ་སྤང་བའི་ཕྱིར་ཐ་སྙད་དུ་ཡང་དག་དང་། དེ་ཁོ་ནར་ཡང་དག་མ་ཡིན་པ་ཉིད་དོ་ཞེས་གཉིས་ཀར་ཡང་བསྟན། གདུལ་བྱ་མཆོག་ལ་དགག་བྱ་བཀག་པའི་བཀག་ཆོས་ཙམ་དུ་འཛིན་པ་སྤོང་བའི་ཕྱིར། འཕགས་པའི་མཉམ་གཞག་ལ་ལྟོས་ནས་འདི་ཐམས་ཅད་ཡང་དག་མིན་ཞིང་། ཡང་དག་མིན་པའང་མིན་ནོ་ཞེས་དགག་བསྒྲུབ་ཀྱི་སྤྲོས་པ་ཐམས་ཅད་དང་བྲལ་བར་བསྟན་པའི་ཕྱིར་རོ། །དེ་ལྟར་ན་གདུལ་བྱ་དང་འཚམས་པའི་ལམ་སྟོན་པ་དེ་ནི་སངས་རྒྱས་རྣམས་ཀྱི་རྗེས་སུ་བསྟན་པའི་ཚུལ་ལོ། །གསུམ་པ་བསྟན་བྱ་དེ་ཁོ་ན་ཉིད་ཀྱི་མཚན་ཉིད་ལ་གསུམ་སྟེ། དོན་དམ་པའི་དེ་ཁོ་ན་ཉིད་ཀྱི་མཚན་ཉིད། ཀུན་རྫོབ་ཀྱི་དེ་ཁོ་ན་ཉིད་ཀྱི་མཚན་ཉིད། དེ་གཉིས་ཀའི་དོན་བསྡུ་བའོ། །དང་པོ་ནི། དོན་དམ་པའི་དེ་ཁོ་ན་ཉིད་རང་གི་ངོ་བོའི་སྒོ་ནས་བསྟན་པར་མི་ནུས་ཀྱང་ཀུན་རྫོབ་ཏུ་སྒྲོ་བཏགས་ནས་བསྟན་པ་ལྟར་མཚན་ཉིད་ཀྱང་སྒྲོ་བཏགས་ནས་བསྟན་དགོས་པས། ལོག་རྟོག་སེལ་བའི་མཚན་ཉིད་ནི། འཕགས་པའི་མཉམ་གཞག་སོ་སོ་རང་གིས་རིག་པའི་ཡེ་ཤེས་ཀྱིས་འགའ་ཡང་མཐོང་བ་མེད་པའི་ཚུལ་གྱིས་རིག་པར་བྱ་བ་ཡིན་གྱི། བྱིས་པ་རྣམས་ཀྱིས་གཞན་སྒྲ་དང་། གཏན་ཚིགས་ལ་སོགས་པ་ལས་ངོ་བོ་ཇི་ལྟ་བ་བཞིན་ཤེས་པར་བྱ་བ་མ་ཡིན་པ་དང་། གཟོད་མ་ནས་ཅིར་ཡང་མ་གྲུབ་པས་ཞི་བ་དང་། ངག་གི་སྤྲོས་པ་རྣམས་ཀྱིས་ཞེན་ནས་བརྗོད་པར་བྱ་བ་མ་ཡིན་པས་མ་སྤྲོས་པ་དང་། སེམས་སེམས་བྱུང་གི་སྤྱོད་ཡུལ་ལས་འདས་པས་རྣམ་པར་རྟོག་པས་འགར་ཡང་བརྟག་ཏུ་མེད་པ་དང་། མི་འདྲ་བའི་བྱེ་བྲག་མེད་པས་དོན་ཐ་དད་མིན་པ་སྟེ། ཆོས་ལྔ་པོ་དེ་ནི་དོན་དམ་པའི་དེ་ཁོ་ན་ཉིད་ཀྱི་མཚན་ཉིད་དོ། །གཉིས་པ་ནི། ཆོས་ཐམས་ཅད་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་ཡིན་ཏེ། འདི་ལྟར་རྒྱུ་གང་ལ་རྟེན་ནས་འབྲས་བུ་གང་ཞིག་འབྱུང་བ་དེ་ནི་རེ་ཤིག་རྒྱུ་དེ་ཉིད་མིན་ཏེ། རང་ལ་བྱ་བྱེད་འགལ་བའི་ཕྱིར། དེའི་ཕྱིར་འབྲས་བུའི་དུས་ན་རྒྱུ་ཡོད་པའི་རྟག་པ་མ་ཡིན་ཞིང་། རྒྱུ་དེ་ལས་གཞན་པའང་མ་ཡིན་ཏེ། དེ་ལ་མི་ལྟོས་པར་ཐལ་བས་སོ། །དེའི་ཕྱིར་འབྲས་བུའི་དུས་ན་རྒྱུ་མེད་པའི་ཆད་པར་ཡང་མ་ཡིན་ནོ། །གསུམ་པ་ནི། དེ་ལྟར་ན་སངས་རྒྱས་སྲིད་ཞི་ལས་སྐྱོབ་པར་བྱེད་པའི་འཇིག་རྟེན་མགོན་རྣམས་ཀྱི་བསྟན་པ་སྐྱེ་རྒ་ན་འཆི་གཏན་ནས་གཅོད་པའི་བདུད་རྩིར་གྱུར་པ་བདེན་པ་གཉིས་ཀྱི་དེ་ཁོ་ན་ཉིད་དེ། སྔར་བཤད་པ་ལྟར། དོན་གཅིག་མ་ཡིན་ཐ་དད་མིན། །ཆད་པ་མ་ཡིན་རྟག་མ་ཡིན། །ཞེས་པའི་སྒོ་ནས་དབུ་མར་ཐ་སྙད་འཇོག་པ་གྲུབ་བོ། །གསུམ་པ་དེ་བསྟན་པའི་འབྲས་བུ་ནི། དེ་ལྟར་བསྟན་པས་བདེན་པ་གཉིས་ཅི་ལྟ་བ་བཞིན་དུ་རྟོགས་པ་ལ་འབྲས་བུ་ཅི་འབྱུང་ཞེ་ན། རེ་ཤིག་ཉན་ཐོས་ཀྱི་རིགས་ཅན་གྱིས་ཆོས་ཐམས་ཅད་དོན་དམ་པར་མ་གྲུབ་པ་དང་། ཀུན་རྫོབ་ཏུ་རྟེན་འབྱུང་སྒྱུ་མ་ལྟ་བུར་རྟོགས་པའི་རྒྱུན་གོམས་པས་ཁམས་གསུམ་གྱི་ཉོན་མོངས་པ་སྤངས་པའི་མྱ་ངན་ལས་འདས་པ་ཚེ་འདི་ཉིད་ལའམ། འདིར་མ་ཐོབ་ཀྱང་ཚེ་རབས་གཞན་དུ་འབད་པ་མེད་པར་ཐོབ་པར་འགྱུར་ཏེ། འཕགས་པ་ལྷས། དེ་ཉིད་ཤེས་པས་གལ་ཏེ་འདིར། །མྱ་ངན་འདས་པ་མ་ཐོབ་ཀྱང་། །སྐྱེ་བ་གཞན་དུ་འབད་མེད་པར། །ངེས་པར་ཐོབ་འགྱུར་ལས་བཞིན་ནོ། །ཞེས་བཤད་པར་ལྟར་རོ། །དེ་ཉིད་རང་སངས་རྒྱས་ཀྱི་རིགས་ཅན་རྣམས་ཀྱིས་ཐོས་བསམ་སྒོམ་པའི་རིམ་གྱིས་ཅི་རིགས་སུ་སྤྱད་པས་རྫོགས་པའི་སངས་རྒྱས་རྣམས་ནི་མ་བྱུང་ཞིང་། ཉན་ཐོས་རྣམས་ནི་ཟད་པར་གྱུར་ཀྱང་ཞིང་སྟོང་པར་སྐྱེས་ཏེ་དྲོད་ཀྱི་ཡེ་ཤེས་ནས་སམ། བཟོད་པ་འབྲིང་གི་ཡེ་ཤེས་ནས་སམ། སྒོམ་པའི་ལམ་གྱི་ཡེ་ཤེས་ནི་རྐྱེན་ཚེ་འདིའི་དགེ་བའི་བཤེས་གཉེན་བསྟེན་པ་མེད་པར་སྔོན་གྱི་བསོད་ནམས་དང་། སྨོན་ལམ་གྱི་མཐུས་རབ་ཏུ་སྐྱེ་བས་ན་ཚེ་དེ་ཉིད་ལ་རང་སངས་རྒྱས་ཀྱི་ཡེ་ཤེས་ནི་སྐྱེའོ། །གཉིས་པ་ལུང་དང་སྦྱར་བ་ནི། རྒྱལ་བའི་ཡུམ་ལས། བྱང་ཆུབ་སེམས་དཔའ་རྟག་ཏུ་ངུས། རང་གི་ལུས་དང་སྲོག་ཀྱང་བཏང་ནས་རྒྱལ་བའི་ཡུམ་ཅི་ལྟར་བཙལ་བའི་ཚུལ་རྒྱས་པར་གསུངས་ཏེ་ཚུལ་དེ་ལྟར་བཙལ་བར་བྱའོ་ཞེས་པའི་དོན་ཏོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། བདག་དང་ཆོས་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅོ་བརྒྱད་པའི་རྣམ་པར་བཤད་པའོ། །འགྲེལ་པར་ནི་བདག་བརྟགས་པ་ཞེས་པ་ཙམ་ལས་མི་སྣང་ངོ་།། །།བཞི་པ་རྟེན་འབྲེལ་དུས་ཀྱི་སྟོང་པ་ལ་གཉིས་ཏེ། དུས་ཀྱི་ངོ་བོ་དགག་པ་དང་། དེའི་སྒྲུབ་བྱེད་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་དངོས་པོའི་རང་བཞིན་བཀག་མོད་ཀྱི་དུས་སྔར་མ་བཀག་པས་ཡོད་ལ། དེ་ཡོད་པས་དེ་དག་ཏུ་འཇོག་པའི་རྒྱུ་དངོས་པོ་ཡང་ཡོད་པ་ཉིད་དོ་ཞེ་ན། དུས་གསུམ་ཉིད་རང་བཞིན་དུ་མེད་པས་དེ་རྣམ་འཇོག་གི་རྒྱུ་དངོས་པོ་ཡང་མེད་དོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིགས་པས་བསྒྲུབ་པ་ལ་གཉིས་ཏེ། དུས་གསུམ་རང་བཞིན་གྱིས་གྲུབ་པ་དགག རང་བཞིན་གྱིས་གྲུབ་པའི་སྒྲུབ་བྱེད་དགག་པའོ། །དང་པོ་ལ་གསུམ་སྟེ། ད་ལྟར་བ་དང་མ་འོངས་པ་རང་བཞིན་གྱིས་གྲུབ་པ་དགག རིམ་པ་དེ་གཞན་ལ་བསྣོར་བ། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གསུམ་སྟེ། དུས་གཉིས་འདས་པ་ལ་ལྟོས་པ་དགག མ་ལྟོས་པ་དགག དོན་བསྡུ་བའོ། །དང་པོ་ནི། ད་ལྟར་དང་མ་འོངས་པ་རང་བཞིན་དུ་ཡོད་ན་འདས་པ་ལ་ལྟོས་པའམ་མ་ལྟོས་པར་ཡོད་དྲང་། གལ་ཏེ་ད་ལྟར་བྱུང་བ་དང་མ་འོངས་པ་འདས་པ་ལ་ལྟོས་པར་འགྱུར་ན། ད་ལྟར་བྱུང་བ་དང་མ་འོངས་པ་ཆོས་ཅན། འདས་པའི་དུས་ན་ཡོད་པར་འགྱུར་ཏེ། འདས་པ་ལ་རང་བཞིན་གྱིས་ལྟོས་པའི་ཕྱིར། གལ་ཏེ་མ་ངེས་པའི་སྐྱོན་སྤོང་བར་འདོད་པས་ད་ལྟར་བྱུང་དང་མ་འོངས་པ་གཉིས་འདས་པའི་དུས་དེ་ན་མེད་པར་གྱུར་ན། ད་ལྟར་བྱུང་དང་མ་འོངས་པ་ཅི་ལྟར་འདས་པ་དེ་ལ་ལྟོས་པར་འགྱུར་ཏེ་ལྟོས་ཆོས་ཡོད་པའི་ཚེ་ན་ལྟོས་ས་མེད་ལ། ལྟོས་ས་ཡོད་པའི་ཚེ་ལྟོས་ཆོས་མེད་པའི་ཕྱིར་རོ། །གཉིས་པ་ནི། གཞན་གྱི་སྡེ་པ་དག དུས་ཀྱིས་འབྱུང་བ་སྨིན་པར་བྱེད། །དུས་ཀྱིས་སྐྱེ་རྒུ་སྡུད་པར་བྱེད། །དུས་ཀྱིས་གཉིད་ལོག་སད་པར་བྱེད། །དུས་ལས་འདའ་བ་ཤིན་ཏུ་དཀའ། །ཞེས་པའི་ཚུལ་གྱིས་དུས་རྟག་པ་རྫས་སུ་ཡོད་པས། དེ་གཉིས་འདས་པ་ལ་མ་ལྟོས་པར་ཡོད་དོ་ཞེ་ན། འདས་པ་ལ་ནི་མ་ལྟོས་པར་ད་ལྟར་བ་དང་མ་འོངས་པ་དེ་གཉིས་འགྲུབ་པ་ཡོད་པ་མ་ཡིན་ཏེ། འདས་པ་དངོས་སུ་མ་འོངས་པ་ལ་ད་ལྟར་བ་དང་། བརྒྱུད་ནས་མ་འོངས་པ་ལ་མ་འོངས་པ་བསྙད་པའི་ཕྱིར་རོ། །གསུམ་པ་ནི། འདས་པ་ལ་ལྟོས་པ་དང་མ་ལྟོས་པར་མ་གྲུབ་པ་དེའི་ཕྱིར་ད་ལྟར་བྱུང་བ་དང་མ་འོངས་པའི་དུས་ཀྱང་རང་བཞིན་གྱིས་ཡོད་པ་མ་ཡིན་ནོ་ཞེས་པའོ། །གཉིས་པ་ནི། ད་ལྟར་དང་མ་འོངས་པ་འདས་པ་ལ་ལྟོས་པ་དང་མ་ལྟོས་པར་མ་གྲུབ་པའི་རིམ་པའི་ཚུལ་ནི་འདི་ཉིད་ཀྱིས་དུས་ལྷག་མ་འདས་མ་འོངས་ད་ལྟར་བ་ལ་ལྟོས་པ་དང་མ་ལྟོས་པར་མ་གྲུབ་པ་དང་། ད་ལྟར་དང་འདས་པ་མ་འོངས་པ་ལ་ལྟོས་པ་དང་མ་ལྟོས་པ་གཉིས་པོ་བསྣོར་བར་ཤེས་པར་བྱ་སྟེ། འདས་པ་དང་ནི་མ་འོངས་པ། །གལ་ཏེ་ད་ལྟར་བྱུང་ལྟོས་ན། །ཞེས་སོགས་དང་། འདས་དང་ད་ལྟར་བྱུང་བ་ནི། །གལ་ཏེ་མ་འོངས་ལྟོས་འགྱུར་ན། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར། གསུམ་པ་ནི། ཇི་ལྟར་དུས་གསུམ་ཕན་ཚུན་ལྟོས་པ་དང་མ་ལྟོས་པར་དཔྱད་ན་མེད་པ་དེ་བཞིན་དུ་མཆོག་དང་ཐ་མ་དང་འབྲིང་དང་། སོགས་ཀྱིས་བསྡུས་པ་སྐྱེ་གནས་འཇིག་པ་དང་། འདོད་པ་དང་གཟུགས་དང་གཟུགས་མེད་པ་དང་། སློབ་པ་དང་མི་སློབ་པ་དང་། གཉིས་ཀ་མ་ཡིན་པ་དང་། རྒན་གཞོན་བར་མ་ལ་སོགས་པ་ཕན་ཚུན་ལྟོས་པའི་དངོས་པོ་གསུམ་དང་འབྲེལ་བ་ཕན་ཆད་གཅིག་དང་། སོགས་ཀྱིས་བསྡུས་པ་གཉིས་དང་། གསུམ་ལ་སོགས་པའང་ལྟོས་པ་དང་མ་ལྟོས་པར་དཔྱད་ན་རང་བཞིན་གྱིས་མེད་པར་ཤེས་པར་བྱ་སྟེ། མཆོག་དང་ཐ་མ་གཉིས་དག་ནི། །གལ་ཏེ་འབྲིང་ལ་ལྟོས་འགྱུར་ན། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར། གཉིས་པ་རང་བཞིན་གྱིས་གྲུབ་པའི་སྒྲུབ་བྱེད་དགག་པ་ལ་གཉིས་ཏེ། སྒྲུབ་བྱེད་ཚད་དགག་པ་དང་། སྒྲུབ་བྱེད་དངོས་པོ་དགག་པའོ། །དང་པོ་ནི། གལ་ཏེ་དུས་ནི་རང་བཞིན་གྱིས་ཡོད་དེ། དེའི་ཚད་སྐད་ཅིག་དང་ཐང་ཅིག་དང་། ཡུད་ཙམ་ནས་བསྐལ་པའི་བར་དུ་གསུངས་པས་དེའི་ཚད་ཡོད་པའི་ཕྱིར་རོ་ཞེ་ན། ཚད་རང་བཞིན་གྱིས་གྲུབ་ན་འདི་ལྟར་དུས་སྐད་ཅིག་གཉིས་པར་མི་གནས་པའམ་གནས་པ་ཞིག་ཚད་ཀྱིས་འཛིན་པར་བྱེད་དྲང་། དང་པོ་ལྟར་ན་དུས་ནི་སྐད་ཅིག་ལ་སོགས་པའི་ཚད་ཀྱིས་འཛིན་པར་མི་བྱེད་དེ། སྐད་ཅིག་གཉིས་པར་མི་གནས་པའི་ཕྱིར་རོ། །ཁྱབ་སྟེ་སྐྱེས་པའི་སྐད་ཅིག་དེ་ཉིད་ལ་བྱ་བྱེད་འགལ་ཞིང་དུས་གཉིས་པར་མེད་པས་ཚད་ཀྱིས་གཟུང་མི་ནུས་པའི་ཕྱིར་རོ། །གཉིས་པ་ལྟར་ན་དུས་དེ་སྐད་ཅིག་ལ་སོགས་པའི་ཚད་ཀྱིས་ཅི་ལྟར་བཟུང་ཞིང་གདགས་པར་བྱ་སྟེ། མི་འཐད་པར་ཐལ། གལ་ཏེ་དུས་གནས་པ་ཞིག་ཡོད་ན་སྐད་ཅིག་ལ་སོགས་པའི་ཚད་ཀྱིས་འཛིན་པར་འགྱུར་བ་ཞིག་ན་གང་ཞིག་ཚད་ཀྱིས་གཟུང་བར་བྱ་བའི་དུས་གནས་པ་ཉིད་ཡོད་པ་མ་ཡིན་པས་སོ། །ཅི་སྟེ་སྙམ་ན་དངོས་པོ་ལས་ཐ་དད་པའི་དུས་ཡོད་ན་འཇིག་རྟེན་པའི་མངོན་སུམ་ལ་སྣང་དུ་རུང་བ་ཡིན་པས་དེས་ཐ་དད་དུ་མ་དམིགས་པ་ཉིད་ཀྱིས་ཁེགས་ལ། དངོས་པོ་སྐད་ཅིག་མར་སྔ་ཕྱི་ཐ་དད་པའི་རྗེས་དཔག་གིས་གྲུབ་པས། སྐད་ཅིག་གི་རང་བཞིན་གྱི་དངོས་པོ་ལས་ཐ་དད་པའི་དུས་ནི་མ་བཟུང་བའི་ཕྱིར་རོ། །གཉིས་པ་ནི་གལ་ཏེ་རང་གི་སྡེ་པ་དག་སྐད་ཅིག་མའི་བདག་ཉིད་ཀྱིས་དངོས་པོ་ལས་ཐ་དད་པའི་དུས་གནས་པ་མེད་པ་དེ་ལྟ་ན་ཡང་དངོས་པོ་ཡོད་པས་དེ་ལ་བརྟེན་ནས་བཏགས་པའི་དུས་ནི་རང་བཞིན་གྱིས་ཡོད་པར་སྨྲའི་དངོས་མེད་ཀྱི་དུས་ནི་ག་ལ་ཡོད་དེ་མེད་དོ་ཞེ་ན། སྔར་བཀག་པའི་ཚུལ་གྱིས་རྟེན་དངོས་པོ་འགའ་ཡང་ཡོད་པ་མིན་ན། དེ་ལ་བརྟེན་པའི་དུས་ལྟ་ཡོད་པར་ག་ལ་འགྱུར་ཏེ། རྟེན་མེད་པའི་ཕྱིར། རི་བོང་གི་རྭའི་རྣོ་བ་བཞིན་ནོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས་ཀྱང་འཕགས་པ་གླང་པོ་རྩལ་གྱི་མདོ་ལས། གལ་ཏེ་ཆོས་རྣམས་རང་བཞིན་འགའ་ཡོད་ན། །རྒྱལ་བ་ཉན་ཐོས་བཅས་པས་དེ་མཁྱེན་འགྱུར། །ཐེར་ཟུག་ཆོས་རྣམས་མྱ་ངན་འདས་མི་འགྱུར། །མཁས་རྣམས་ནམ་ཡང་སྤྲོས་པ་མེད་མི་འགྱུར། །ཞེས་གསུངས་ལ། དེ་བཞིན་དུ། ཆོས་ནི་སྟོང་ཕྲག་བརྒྱ་དག་བསྟན་གྱུར་ནས། །སངས་རྒྱས་འབུམ་ཕྲག་གང་དག་འདས་གྱུར་ཀྱང་། །ཆོས་དང་ཡི་གེ་དག་ལ་ཟད་མེད་དེ། །སྐྱེ་བ་ཡོད་མིན་དེས་ན་ཟད་མེད་དེ། །ཞེས་བྱ་བ་དང་། དེ་བཞིན་དུ། དེ་བཞིན་གཤེགས་པ་འབྱུང་བའི་དུས་ཀྱི་ཚེ། །བྱམས་པ་ཞེས་བྱའི་རྒྱལ་བ་འབྱུང་འགྱུར་ཞིང་། །ས་འདི་གསེར་གྱིས་བརྡལ་བ་འབྱུང་འགྱུར་བ། །དེ་ཚེ་དེ་ཡི་འབྱུང་དེ་ག་ལ་ཡོད། །ཞེས་བྱ་བ་ལ་སོགས་པ་གསུངས་ཏེ་བསྟན་ཚུལ་ནི་སྔ་མས་འགྲེའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། དུས་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་དགུ་པའི་རྣམ་པར་བཤད་པའོ།། །།གཉིས་པ་དུས་ཀྱི་སྒྲུབ་བྱེད་དགག་པ་ལ་གཉིས་ཏེ། དུས་འབྲས་བུ་སྐྱེ་བའི་ལྷན་ཅིག་བྱེད་རྐྱེན་དུ་འདོད་པ་དགག་པ། དུས་འབྲས་བུ་འབྱུང་འཇིག་གི་རྒྱུར་འདོད་པ་དགག་པའོ། །དང་པོ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། རང་གི་སྡེ་པ་དག་དུས་བཀག་མོད་ཀྱི་དེ་ལྟ་ན་ཡང་རང་བཞིན་གྱིས་ཡོད་པ་ཉིད་དེ། ཕྱིའི་མྱུ་གུ་ལ་སོགས་པ་ཡང་དཔྱིད་ལ་སོགས་པའི་དུས་ཀྱི་ཁྱད་པར་མི་ཉེ་བར་མི་སྐྱེད་ལ། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཞིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་ནང་ལུས་ཀྱི་འབྲས་བུ་བསྐྱེད་པ་ཡང་དུས་ལ་ལྟོས་པར་གསུངས་པས་ཕྱི་ནང་གི་འབྲས་བུ་བསྐྱེད་པའི་ལྷན་ཅིག་བྱེད་རྐྱེན་ཡིན་པའི་ཕྱིར་རོ། །གང་མེད་པ་དེ་ནི་རྐྱེན་དུ་མི་རུང་སྟེ། ནམ་མཁའི་མེ་ཏོག་བཞིན་ནོ་ཞེ་ན། དཔྱད་ན་འབྲས་བུ་སྐྱེ་བ་ཉིད་མེད་པས་དུས་འབྲས་བུ་སྐྱེ་བའི་རྐྱེན་དུ་མི་འཐད་དོ། །ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་བཞི་སྟེ། རྒྱུ་འབྲས་གཉིས་ཀ་ལ་བརྟག་སྟེ་དགག འབྲས་བུའི་ངོ་བོ་ལ་བརྟག་སྟེ་དགག རྒྱུའི་ངོ་བོ་ལ་བརྟག་སྟེ་དགག དེ་དག་གིས་གྲུབ་པའི་དོན་བསྡུ་བའོ། །དང་པོ་ལ་བཞི་སྟེ། རྒྱུ་ལ་འབྲས་བུ་ཡོད་མེད་བརྟག་སྟེ་དགག ནུས་པ་ལ་བརྟག་སྟེ་དགག དུས་ལ་བརྟག་སྟེ་དགག བྱ་བ་ལ་བརྟག་སྟེ་དགག་པའོ། །དང་པོ་ནི། རྒྱུ་རྐྱེན་གྱི་ཚོགས་པ་སྔ་མ་ལས་འབྲས་བུ་སྐྱེ་ན་འབྲས་བུ་ཚོགས་པ་དེ་ལ་ཡོད་པའམ་མེད་པ་ཞིག་སྐྱེ་དྲང་། དང་པོ་ལྟར་གལ་ཏེ་རྒྱུ་དང་རྐྱེན་རྣམས་ཀྱི་ཚོགས་པ་ཉིད་ལས་འབྲས་བུ་སྐྱེ་བར་འགྱུར་ཞིང་། ཚོགས་པ་ལ་འབྲས་བུ་ཡོད་ན་ནི་ཅི་ལྟར་ཚོགས་པ་ཉིད་ལས་སྐྱེ་སྟེ་ཡོད་པ་སྐྱེ་བ་དོན་མེད་པའི་ཕྱིར་རོ། །གཉིས་པ་ལྟར་གལ་ཏེ་རྒྱུ་དང་རྐྱེན་རྣམས་ཀྱི་ཚོགས་པ་ཉིད་ལས་སྐྱེ་འགྱུར་ཞིང་། རྒྱུ་རྐྱེན་གྱི་ཚོགས་པ་ལ་འབྲས་བུ་མེད་ན་ནི་ཅི་ལྟར་ཚོགས་པ་ཉིད་ལས་སྐྱེ་སྟེ། མེད་པ་བསྐྱེད་པར་མི་ནུས་པའི་ཕྱིར་རོ། །གཞན་ཡང་གལ་ཏེ་སྔ་མ་ལྟར་རྒྱུ་དང་རྐྱེན་རྣམས་ཀྱི་ཚོགས་པ་ལ་འབྲས་བུ་ཡོད་ན་ནི་དེ་ལྟར་རུང་བ་ཡིན་པས་ཚོགས་པ་ལ་བཟུང་དུ་ཡོད་པར་རིགས་ན་ཚོགས་པ་ཉིད་ལ་བཟུང་དུ་མེད་པས་ཡོད་པ་མི་འཐད་དེ། སྣང་རུང་མ་དམིགས་པའི་ཕྱིར་རོ། །གལ་ཏེ་ཕྱི་མ་ལྟར་རྒྱུ་དང་རྐྱེན་རྣམས་ཀྱི་ཚོགས་པ་ལ་འབྲས་བུ་མེད་ན་ནི། རྒྱུ་རྣམས་དང་ནི་རྐྱེན་དག་ཀྱང་ཆོས་ཅན། རྒྱུ་རྐྱེན་མ་ཡིན་པ་དང་མཚུངས་པ་ལ་འབྲས་བུ་མི་སྐྱེད་པར་འགྱུར་ཏེ། འབྲས་བུ་མེད་པར་ཁྱད་པར་མེད་པའི་ཕྱིར། གཉིས་པ་ནི། འབྲས་བུ་སྐྱེ་བ་ལ་རྒྱུ་འགག་པ་སྔོན་དུ་འགྲོ་དགོས་པས་རྒྱུས་འབྲས་བུ་ལ་འབྲས་བུ་སྐྱེ་རུང་གི་ཆོས་བྱེད་རྒྱུ་བྱིན་ནས་འགག་གམ་མ་བྱིན་པར་འགག གལ་ཏེ་སྔ་མ་ལྟར་རྒྱུས་ནི་འབྲས་བུ་ལ་བྱེད་རྒྱུ་བྱིན་ནས་ནི་འགག་པར་འགྱུར་ན། དེ་ཡང་མི་རིགས་ཏེ། འབྲས་བུ་ལ་སྐྱེ་རུང་གི་ཆོས་གང་བྱིན་པའི་རྒྱུའི་བདག་ཉིད་དང་། རང་ཉིད་གང་འགགས་པའི་རྒྱུའི་བདག་ཉིད་གཉིས་སུ་འགྱུར་བས་ཕྱེད་རྟག་པ་དང་ཕྱེད་མི་རྟག་པར་འགྱུར་ན་དེ་ཡང་རྫས་གཅིག་ལ་མི་སྲིད་པའི་ཕྱིར་རོ། །གལ་ཏེ་ཕྱི་མ་ལྟར་རྒྱུས་འབྲས་བུ་ལ་བྱེད་རྒྱུ་མ་བྱིན་པར་བདག་ཉིད་ཐམས་ཅད་ཀྱིས་འགག་པར་འགྱུར་ན་འབྲས་བུ་དེ་ནི་རྒྱུ་མེད་པར་འགྱུར་ཏེ། རྒྱུ་འགགས་ནས་ནི་སྐྱེས་པའི་ཕྱིར་རོ། །གསུམ་པ་ནི། བྱེ་བྲག་ཏུ་སྨྲ་བ་ཁ་ཅིག འབྲས་བུ་རྒྱུ་རྐྱེན་གྱི་ཚོགས་པ་དང་དུས་མཉམ་དུ་སྐྱེ་སྟེ། སྒྲོན་མེ་ལས་འོད་སྐྱེ་བ་བཞིན་ནོ་ཞེ་ན། གལ་ཏེ་དེ་ལྟར་རྒྱུ་དང་རྐྱེན་གྱི་ཚོགས་པ་དང་ལྷན་ཅིག་ཏུ་འབྲས་བུ་ཡང་ནི་སྐྱེ་བར་འགྱུར་ན། དེའི་དོན་བསྐྱེད་པར་བྱེད་པ་དང་། བསྐྱེད་བྱ་གང་ཡིན་པ་དེ་དུས་གཅིག་པར་ནི་ཐལ་བར་འགྱུར་ན་དེ་ཡང་མི་རིགས་ཏེ། དུས་མཉམ་པ་ནི་མ་གྲུབ་ན་སྐྱེད་བྱེད་དང་། གྲུབ་ན་བསྐྱེད་བྱར་འགལ་བའི་ཕྱིར་རོ། །དེའི་སྐྱོན་སྤོང་བར་འདོད་ནས་བྱེ་བྲག་ཏུ་སྨྲ་བ་ཁ་ཅིག རྒྱུ་དང་རྐྱེན་གྱི་ཚོགས་པའི་སྔ་རོལ་དུ་མ་འོངས་པ་ན་ཡོད་པ་ཞིག་ཚོགས་པ་ད་ལྟར་བས་བསྐྱེད་པ་ཡིན་ནོ་ཞེ་ན། གལ་ཏེ་དེ་ལྟར་རྒྱུ་དང་རྐྱེན་ཚོགས་པའི་སྔོན་རོལ་དུ་འབྲས་བུའི་ངོ་བོ་བསྐྱེད་པར་གྱུར་ན་ནི་མ་འོངས་པ་ན་ཡོད་པའི་འབྲས་བུ་དེ་ཆོས་ཅན། རྒྱུ་མེད་དུ་འབྱུང་བར་འགྱུར་ཏེ། རྒྱུ་དང་རྐྱེན་རྣམས་ལ་ལྟོས་པ་མེད་པ་ཡི་ཕྱིར་རོ། །བཞི་པ་བྱ་བ་ལ་བརྟག་སྟེ་དགག་པ་ལ་དྲུག་སྟེ། རང་བཞིན་དང་གནས་སྐབས་ལ་བརྟག་སྟེ་དགག རྒྱུ་འབྲས་མུ་བཞིར་བརྟག་སྟེ་དགག མཐོང་མ་མཐོང་བརྟག་སྟེ་དགག ཕྲད་མ་ཕྲད་བརྟག་སྟེ་དགག སྟོང་མི་སྟོང་བརྟག་སྟེ་དགག གཅིག་དང་ཐ་དད་བརྟག་སྟེ་དགག་པའོ། །དང་པོ་ནི། གལ་ཏེ་རྒྱུ་རྐྱེན་ཚོགས་པས་འབྲས་བུ་བསྐྱེད་པ་མ་ཡིན་གྱི། རྒྱུ་ཁོ་ནས་འབྲས་བུ་བསྐྱེད་ལ་དེ་ཡང་རྫས་གཞན་ཡིན་ན་བརྟག་པ་དེར་འགྱུར་བ་ཞིག་ན་ཡང་རྫས་གཞན་ནི་མ་ཡིན་གྱི། རྒྱུའི་གནས་སྐབས་འགགས་ནས་འབྲས་བུའི་བདག་ཉིད་དུ་གནས་པ་ཡིན་ནོ་ཞེ་ན། རྒྱུའི་རང་བཞིན་ནི་ཆོས་ཅན། ཟློས་གར་མཁན་ཆ་ལུགས་འདོར་ལེན་བྱེད་པ་ལྟར། རྒྱུ་དང་འབྲས་བུའི་གནས་སྐབས་ཀུན་ཏུ་འཕོ་བར་འགྱུར་ཏེ། རྫས་གཅིག་ཡིན་ཀྱང་རྒྱུའི་གནས་སྐབས་དོར་ནས་འབྲས་བུའི་བདག་ཉིད་དུ་འགྱུར་བའི་ཕྱིར། སྔོན་སྐྱེས་ཟིན་པའི་རྒྱུ་ཡང་ནི་ཡང་སྐྱེ་བར་ནི་ཐལ་བར་འགྱུར་ཏེ། རྒྱུ་དེ་ཉིད་འབྲས་བུའི་ངོ་བོ་སྐྱེ་བ་ཡིན་པའི་ཕྱིར་རོ། །གཉིས་པ་ནི། རྒྱུས་འབྲས་བུ་སྐྱེས་པའམ་མ་སྐྱེས་པ་ཞིག་བསྐྱེད། དང་པོ་ལྟར་ན་རྒྱུ་འགགས་པའམ། མ་འགགས་པ་ཞིག་གིས་བསྐྱེད། སྔ་མ་ལྟར་ན་རྒྱུ་འགགས་པ་དེ་ཆོས་ཅན། ཁྱོད་དེ་ཡིས་འབྲས་བུ་སྐྱེས་པ་ཅི་ལྟར་བསྐྱེད་དེ་མི་སྐྱེད་པར་ཐལ། རྒྱུའི་ངོས་ནས་ནུབ་པར་གྱུར་པ་སྟེ་མེད་པའི་ཕྱིར་དང་། འབྲས་བུ་སྐྱེས་པ་སྐྱེ་བ་དོན་མེད་པའི་ཕྱིར་རོ། །ཕྱི་མ་ལྟར་ན་འབྲས་བུ་སྐྱེས་པ་ད་ལྟ་བ་དང་ནི་འབྲེལ་བའི་རྒྱུ་མ་འགགས་ཤིང་གནས་པས་ཀྱང་ནི་འབྲས་བུ་སྐྱེས་པ་ཅི་ལྟར་བསྐྱེད་དེ། རྒྱུ་རྣམ་པར་མི་འགྱུར་བས་རྒྱུའི་མཚན་ཉིད་འབྲས་བུ་ལ་ཕན་ཐོགས་པ་མེད་པའི་ཕྱིར་དང་། འབྲས་བུ་སྐྱེས་པ་སྐྱེ་བ་དོན་མེད་པའི་ཕྱིར་རོ། །བརྟག་པ་གཉིས་པ་ལྟར་ཅི་སྟེ་འབྲས་བུ་མ་སྐྱེས་པས། རྒྱུ་འབྲས་མ་འབྲེལ་བའི་ཕྱིར་ན་རྒྱུས་ནི་འབྲས་བུ་གང་ཞིག་སྐྱེད་པར་བྱེད་དེ་གཏན་སྐྱེད་པར་མི་བྱེད་པའམ། ཡང་ན་ཐམས་ཅད་བསྐྱེད་པར་འགྱུར་བའི་ཕྱིར་རོ། །གསུམ་པ་ནི། ཡང་རྒྱུས་འབྲས་བུ་མཐོང་ནས་བསྐྱེད་དམ་མ་མཐོང་བར་བསྐྱེད། སྔ་མ་ལྟར་རྒྱུས་ནི་འབྲས་བུ་མཐོང་ནས་བསྐྱེད་པར་ཡང་མི་བྱེད་དེ། འབྲས་བུ་མེད་ན་མཐོང་བར་མི་ནུས་ལ། ཡོད་ན་སྐྱེ་བ་དོན་མེད་པའི་ཕྱིར་རོ། །ཕྱི་མ་ལྟར་རྒྱུས་ནི་འབྲས་བུ་མ་མཐོང་བར་སྐྱེད་པར་མི་བྱེད་དེ། དེ་ལྟར་ན་མ་མཐོང་བ་ཐམས་ཅད་སྐྱེད་པར་ཧ་ཅང་ཐལ་བའི་ཕྱིར་རོ། །བཞི་པ་ལ་གཉིས་ཏེ། དུས་གསུམ་ལ་བརྟག་སྟེ་ཕྲད་པ་ཉིད་མི་འཐད་པ། ཕྲད་པ་ཡོད་མེད་ལ་དཔྱད་པ་མི་འཐད་པའོ། །དང་པོ་ནི། རྒྱུ་འབྲས་གཉིས་ལ་ཕྲད་པ་ཡོད་ན་བསྐྱེད་བྱ་སྐྱེད་བྱེད་དུ་རུང་བ་ཞིག་ན་ཡང་དེ་མེད་དེ། འབྲས་བུ་དུས་གསུམ་པོ་རེ་རེ་ཞིང་རྒྱུའི་དུས་གསུམ་པོ་རེ་རེ་དང་ཕྲད་པ་མི་རུང་བའི་ཕྱིར་རོ། །དེ་ཡང་འདི་ལྟར་འབྲས་བུ་འདས་པ་ནི་རྒྱུ་འདས་པ་དང་། རྒྱུ་མ་སྐྱེས་པ་དང་། རྒྱུ་སྐྱེས་པ་ད་ལྟར་བ་དང་ལྷན་ཅིག་ཕྲད་པར་འགྱུར་བ་ནི་ནམ་ཡང་ཡོད་པ་མ་ཡིན་ཏེ་རིམ་པ་ལྟར་རྒྱུ་འབྲས་གཉིས་ཀ་འདས་ནས་མེད་པའི་ཕྱིར་དང་། འབྲས་བུ་འདས་ཤིང་རྒྱུ་མ་སྐྱེས་ནས་མེད་པའི་ཕྱིར་དང་། རྒྱུ་འབྲས་དུས་མི་མཚུངས་པའི་ཕྱིར་རོ། །འབྲས་བུ་སྐྱེས་པ་ད་ལྟར་བ་ནི་རྒྱུ་མ་སྐྱེས་པ་དང་། འདས་པ་དང་། སྐྱེས་པ་ད་ལྟར་བ་དང་ལྷན་ཅིག་ཕྲད་པར་འགྱུར་བ་ནི་ནམ་ཡང་ཡོད་པ་མ་ཡིན་ཏེ། རིམ་པ་ལྟར་རྒྱུ་མ་སྐྱེས་ནས་མེད་པའི་ཕྱིར་དང་། རྒྱུ་འདས་ནས་མེད་པའི་ཕྱིར་དང་། དུས་མཉམ་ན་ཕྲད་ཅིང་ལྟོས་པ་དོན་མེད་པའི་ཕྱིར་རོ། །འབྲས་བུ་མ་སྐྱེས་པ་མ་འོངས་པ་ནི་རྒྱུ་སྐྱེས་པདང་། རྒྱུ་མ་སྐྱེས་པ་དང་། རྒྱུ་འདས་པ་དང་ལྷན་ཅིག་ཕྲད་པར་འབྱུང་བ་ནི་ནམ་ཡང་ཡོད་པ་མ་ཡིན་ཏེ། རིམ་པ་ལྟར་དུས་མི་མཚུངས་ཤིང་འབྲས་བུ་མ་སྐྱེས་ནས་མེད་པའི་ཕྱིར་དང་། གཉིས་ཀ་མ་སྐྱེས་ནས་མེད་པའི་ཕྱིར་དང་། འབྲས་བུ་མ་སྐྱེས་པ་དང་རྒྱུ་འདས་ནས་མེད་པའི་ཕྱིར་རོ། །གཉིས་པ་ནི། དེ་ལྟར་དཔྱད་ན་མེད་པས་རྒྱུས་ནི་འབྲས་བུ་ཅི་ཞིག་སྐྱེད་དེ། ཕྲད་པ་ཡོད་པ་མ་ཡིན་པའི་ཕྱིར་རོ། །གལ་ཏེ་ཕྲད་པ་ཡོད་པ་ཡིན་ན་ཡང་རྒྱུས་ནི་འབྲས་བུ་ཅི་ལྟར་བསྐྱེད་དེ། དུས་མཉམ་པ་ལ་བསྐྱེད་བྱ་སྐྱེད་བྱེད་མི་འཐད་པའི་ཕྱིར་རོ། །ལྔ་པ་ལ་གཉིས་ཏེ། འབྲས་བུས་སྟོང་མི་སྟོང་གི་རྒྱུས་མི་སྐྱེད་པ། འབྲས་བུ་ཉིད་སྟོང་མི་སྟོང་མི་སྐྱེད་པའོ། །དང་པོ་ནི། གལ་ཏེ་འབྲས་བུས་སྟོང་པའི་རྒྱུས་ཅི་ལྟར་འབྲས་བུ་སྐྱེད་པར་བྱེད་དེ། འབྲས་བུ་རང་ལ་མེད་པས་རྒྱུ་མ་ཡིན་པ་དང་ཁྱད་པར་མེད་པའི་ཕྱིར་རོ། །གལ་ཏེ་འབྲས་བུས་མི་སྟོང་པའི་རྒྱུས་ཅི་ལྟར་འབྲས་བུ་སྐྱེད་པར་བྱེད་དེ། འཁར་གཞོང་ན་ཡོད་པའི་རྒྱ་ཤུག་ལྟར་རང་ལ་ཡོད་པ་སྐྱེ་བ་དོན་མེད་པའི་ཕྱིར་རོ། །གཉིས་པ་ནི། འབྲས་བུ་དེ་ཡང་རང་བཞིན་གྱིས་སྟོང་པའམ། མི་སྟོང་པ་ཞིག་སྟེ། ཕྱི་མ་ལྟར་ན་འབྲས་བུ་རང་བཞིན་གྱིས་མི་སྟོང་པ། རང་བཞིན་གྱིས་ཡོད་པ་ནི་སྐྱེ་བར་མི་འགྱུར་ཞིང་། མི་སྟོང་པ་རང་བཞིན་གྱིས་ཡོད་པ་འགག་པར་ཡང་མི་འགྱུར་ཏེ། རང་བཞིན་རྒྱུ་དང་རྐྱེན་དག་ལས། །འབྱུང་བར་རིག་པ་མ་ཡིན་ནོ། །ཞེས་དང་། རང་བཞིན་གཞན་དུ་འགྱུར་བ་ནི། །ནམ་ཡང་འཐད་པ་མ་ཡིན་ནོ། །ཞེས་སྔར་བཤད་ཟིན་པའི་ཕྱིར་རོ། །འོ་ན་ཅིར་འགྱུར་ཞེ་ན། རང་བཞིན་གྱིས་མི་སྟོང་པ་དེ་ནི་མ་འགགས་པ་དང་། མ་སྐྱེས་པར་ཡང་འགྱུར་བ་ཡིན་ཏེ། རང་བཞིན་ལ་བྱ་བྱེད་མི་རུང་བའི་ཕྱིར་རོ། །དང་པོ་ལྟར་རང་བཞིན་གྱིས་སྟོང་པ་ཡིན་ན་ཡང་དག་པར་ཅི་ལྟར་སྐྱེ་བར་འགྱུར་ཞིང་། སྟོང་པ་ཡང་དག་པར་ཅི་ལྟར་འགག་པར་འགྱུར་ཏེ། རྟེན་མེད་པའི་ཕྱིར། འོན་ཀྱང་འབྲས་བུ་རང་བཞིན་གྱིས་སྟོང་པ་དེ་ཡང་ཡང་དག་པར་མ་འགགས་པ་དང་། མ་སྐྱེས་པར་ཡང་ཐལ་བར་འགྱུར་ཏེ། རྟེན་མེད་པའི་ཕྱིར་རོ། །དྲུག་པ་ནི། གལ་ཏེ་རྒྱུས་འབྲས་བུ་བསྐྱེད་ན་འབྲས་བུ་དང་ངོ་བོ་ཐ་མི་དད་པའི་རྒྱུས་བསྐྱེད་དམ། ངོ་བོ་ཐ་དད་པའི་རྒྱུས་བསྐྱེད། དང་པོ་ལྟར་ན། རྒྱུ་དང་འབྲས་བུ་གཅིག་ཉིད་དུ། །ནམ་ཡང་འཐད་པར་མི་འགྱུར་རོ། །ཞེས་པ་ནི་དམ་བཅའ་བའོ། །གཉིས་པ་ལྟར་ན། རྒྱུ་དང་འབྲས་བུ་གཞན་ཉིད་དུ། །ནམ་ཡང་འཐད་པར་མི་འགྱུར་རོ། །ཞེས་པ་ནི་དམ་བཅའ་བའོ། །དམ་བཅའ་དང་པོའི་འཐད་པ་ནི། རྒྱུ་དང་འབྲས་བུ་རྫས་གཅིག་ཉིད་ཡིན་ན་བསྐྱེད་པར་བྱ་བ་དང་། བསྐྱེད་པར་བྱེད་པ་ཡང་གཅིག་ཏུ་འགྱུར་ན་དེ་ཡང་འཐད་པ་མ་ཡིན་ཏེ། རང་ལ་བྱ་བྱེད་འགལ་བའི་ཕྱིར་དང་། རྒྱུ་ཉིད་ཡང་ནས་ཡང་དུ་སྐྱེ་བར་ཐལ་བའི་ཕྱིར་རོ། །དམ་བཅའ་གཉིས་པའི་འཐད་པ་ནི། རྒྱུ་དང་འབྲས་བུ་རྫས་གཞན་ཡིན་ན། དེ་ཡང་འཐད་པ་མ་ཡིན་ཏེ། རྒྱུས་འབྲས་བུ་བསྐྱེད་པ་ལྟར་རྒྱུ་མིན་གྱིས་ཀྱང་བསྐྱེད་པའམ་ཡང་ན་རྒྱུས་ཀྱང་མི་སྐྱེད་པར་མཚུངས་པར་འགྱུར་ཏེ། གཞན་ཙམ་དུ་ལྡོག་པ་གཅིག་པ་ལ་ཡང་དག་པར་སྐྱེ་མི་སྐྱེའི་ཁྱད་པར་མི་འཐད་པའི་ཕྱིར་རོ། །གཉིས་པ་འབྲས་བུའི་ངོ་བོ་ལ་བརྟག་སྟེ་དགག་པ་ནི། ཡང་རྒྱུས་འབྲས་བུ་རང་བཞིན་གྱིས་བསྐྱེད་ན། འབྲས་བུ་ངོ་བོ་ཉིད་ཡོད་པའམ། མེད་པ་ཞིག་བསྐྱེད། དེ་ལ་འབྲས་བུའི་ངོ་བོ་ཉིད་ཡོད་ན་རྒྱུས་ནི་ཅི་ཞིག་བསྐྱེད་པར་འགྱུར་ཏེ། རང་བཞིན་རྒྱུས་སྐྱེད་པ་འགལ་བའི་ཕྱིར་རོ། །འབྲས་བུའི་ངོ་བོ་ཉིད་མེད་ན་དེ་ཁོ་ན་ཉིད་དུ་རྒྱུས་ནི་ཅི་ཞིག་བསྐྱེད་པར་འགྱུར་ཏེ། བསྐྱེད་བྱའི་རྟེན་མེད་པའི་ཕྱིར། ནམ་མཁའི་མེ་ཏོག་བཞིན་ནོ། །གསུམ་པ་རྒྱུའི་ངོ་བོ་ལ་བརྟག་སྟེ་དགག་པ་ནི། དེ་ལྟར་ན་འབྲས་བུ་སྐྱེད་པར་བྱེད་པ་མ་ཡིན་ན། རྒྱུ་ཉིད་འཐད་པར་མི་འགྱུར་ཏེ། རྒྱུའི་རྣམ་འཇོག་གི་རྒྱུ་འབྲས་བུ་སྐྱེད་བྱེད་མེད་པའི་ཕྱིར་རོ། །གལ་ཏེ་རྒྱུ་མེད་ཀྱང་འབྲས་བུ་ཡོད་དོ་ཞེས་ཀྱང་བསམ་པར་མི་བྱ་སྟེ། སྔར་བཤད་པའི་ཚུལ་གྱིས་རྒྱུ་ཉིད་འཐད་པ་ཡོད་མིན་ན། འབྲས་བུ་རྒྱུ་གང་གི་འབྲས་བུ་ཡིན་པར་འགྱུར་ཏེ། རྒྱུ་མེད་ཀྱི་འབྲས་བུ་མི་སྲིད་པའི་ཕྱིར་རོ། །བཞི་པ་དེ་དག་གིས་གྲུབ་པའི་དོན་བསྡུ་བ་ནི། རྒྱུ་རྐྱེན་ཚོགས་པས་བྱས་པའི་འབྲས་བུ་མེད་དེ། སྔར་བཀག་པས་རྒྱུ་རྣམས་དང་ནི་རྐྱེན་དག་གི །ཚོགས་པ་གང་ཡིན་པ་དེ་ཡིས་ནི། །བདག་གི་བདག་ཉིད་མི་སྐྱེད་ལ། །དེ་མི་སྐྱེད་ན་འབྲས་བུ་ཇི་ལྟར་སྐྱེད་པར་བྱེད་དེ། མི་བྱེད་པ་དེའི་ཕྱིར། རྒྱུ་རྐྱེན་ཚོགས་པ་མིན་པ་རྒྱུ་ཙམ་གྱི་བྱས་པའི་འབྲས་བུ་ཡང་མེད་དེ། རྒྱུ་རྐྱེན་མ་ཚོགས་ན་འབྲས་བུ་བསྐྱེད་མི་ནུས་པའི་ཕྱིར། འབྲས་བུ་མེད་ཀྱང་རྒྱུ་ཡོད་དོ་སྙམ་ན་དེ་ལྟར་འབྲས་བུ་ཡོད་པ་མ་ཡིན་པའི་ཕྱིར་ན། རྐྱེན་གྱི་ཚོགས་པ་དང་རྒྱུ་ཉིད་ག་ལ་ཡོད་དེ། དེ་དག་གི་རྣམ་འཇོག་གི་རྒྱུ་མེད་པའི་ཕྱིར་རོ། །གཉིས་པ་ལུང་དང་སྦྱར་བ་ནི། འཕགས་པ་རྒྱ་ཆེ་རོལ་པའི་མདོ་ལས། མཆུ་དང་ལྐོག་མ་རྐན་ལ་བརྟེན་ནས་ནི། །ལྕེ་བསྒྱུར་བ་ལས་ཡི་གེའི་སྒྲ་འབྱུང་ཀྱང་། །ལྐོག་མར་བརྟེན་ནས་མ་ཡིན་རྐན་ལས་མ་ཡིན་ཏེ། །རེ་རེ་ལ་ནི་ཡི་གེ་དམིགས་སུ་མེད། །ཚོགས་པ་དེ་དག་ཉིད་ལ་བརྟེན་ནས་ངག་དེ་ནི། །ཡིད་ཀྱི་བློ་ཡི་དབང་གིས་འབྱུང་མོད་ཀྱི། །ཡིད་དང་ངག་ནི་མི་སྣང་གཟུགས་མེད་དེ། །ནང་དང་ཕྱི་རོལ་དག་ལའང་དམིགས་སུ་མེད། །མཁས་པས་ངག་སྐད་སྒྲ་དང་དབྱངས་རྣམས་ཀྱི། །སྐྱེ་དང་འཇིག་པ་རྣམ་པར་བརྟག་བྱས་ན། །དེ་ཚེ་ངག་ཀུན་བྲག་ཆ་ལྟ་བུ་དང་། །སྐད་ཅིག་པ་དང་སྙིང་པོ་མེད་པར་མཐོང་། །ཞེས་དང་། ཉེ་བར་འཁོར་གྱིས་ཞུས་པ་ལས་ཀྱང་། ཁྱིམ་པའི་རྟགས་སྤངས་རབ་ཏུ་བྱུང་གྱུར་ནས། །འབྲས་བུ་ཐམས་ཅད་ཐོབ་པར་གྱུར་ཡང་ནི། །ཆོས་ཀྱི་རང་བཞིན་དག་ལ་གཞལ་བྱས་ན། །འབྲས་བུ་ཀུན་མེད་འབྲས་བུ་ཐོབ་པའང་མེད། །ཅེས་སོགས་དང་། ཤེར་ཕྱིན་ལས་ཀྱང་། ཀཽའུ་ཤི་ཀ་བྱང་སེམས་ཆེན་པོ་གོ་ཆ་ཆེན་པོ་བགོས་པ་དེས་གཟུགས་ལ་གནས་པར་མི་བྱའོ། །ཞེས་པ་ནས་ཡང་དག་པར་རྫོགས་པའི་སངས་རྒྱས་ཉིད་ལ་གནས་པར་མི་བྱའོ། །ཞེས་པའི་བར་གསུངས་ཏེ། བསྟན་ཚུལ་ནི་སྔ་མས་འགྲེའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། ཚོགས་པ་བརྟག་པར་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་པའི་རྣམ་པར་བཤད་པའོ།། །།གཉིས་པ་དུས་འབྲས་བུ་འབྱུང་འཇིག་གི་རྒྱུར་འདོད་པ་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། གཞན་གྱི་སྡེ་པ་དག་དེ་ལྟར་དུས་བཀག་ཀྱང་རང་བཞིན་གྱིས་ཡོད་དེ། དུས་དེ་ཕྱི་ནང་གི་འབྲས་བུ་འབྱུང་བ་དང་འཇིག་པའི་རྒྱུ་ཡིན་པའི་ཕྱིར་ཏེ། འདི་ལྟར་རྐྱེན་གྱི་ཚོགས་པ་གཞན་ཡོད་ཀྱང་། དུས་ཀྱི་ཁྱད་པར་འགའ་ཞིག་མི་ཉེ་བར་འབྱུང་བ་དང་འཇིག་པ་མ་དམིགས་པའི་ཕྱིར་ཞེ་ན། འབྱུང་འཇིག་ཉིད་རང་བཞིན་གྱིས་མེད་པས་དེ་དག་གིས་རྒྱུར་མ་གྲུབ་ཅེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། འབྱུང་འཇིག་རང་བཞིན་གྱིས་གྲུབ་པ་ལ་གནོད་བྱེད་བརྗོད་པ། རང་བཞིན་གྱིས་གྲུབ་པའི་སྒྲུབ་བྱེད་དགག་པའོ། །དང་པོ་ལ་ལྔ་སྟེ། ལྷན་ཅིག་ཡིན་མིན་དཔྱད་དེ་དགག ཟད་མ་ཟད་དཔྱད་དེ་དགག རྟེན་མེད་པའི་རིགས་པས་དགག སྟོང་མི་སྟོང་ལ་དཔྱད་དེ་དགག གཅིག་དང་ཐ་དད་ལ་དཔྱད་དེ་དགག་པའོ། །དང་པོ་ལ་གསུམ་སྟེ། དམ་བཅའ་བརྗོད་པ། འཐད་པ་འགོད་པ། དོན་བསྡུ་བའོ། །དང་པོ་ནི། འབྱུང་འཇིག་རང་བཞིན་གྱིས་ཡོད་ན་ཕན་ཚུན་མེད་པར་རམ། ལྷན་ཅིག་ཏུ་ཡོད་རྣམ་པར་དཔྱད་ན་འཇིག་པ་དེ་འབྱུང་བ་མེད་པར་རམ། འབྱུང་བ་དང་ལྷན་ཅིག་ཡོད་པ་ནི་མ་ཡིན་ལ་འབྱུང་བ་ཡང་འཇིག་པ་མེད་པར་རམ། འཇིག་པ་དང་ལྷན་ཅིག་ཏུ་ཡོད་པ་ཉིད་མ་ཡིན་ནོ། །ཞེས་པ་ནི་དམ་བཅའ་བའོ། །གཉིས་པ་ལ་བཞི་ལས། དང་པོ་འཇིག་པ་འབྱུང་བ་མེད་པ་དགག་པ་ནི། འཇིག་པ་འབྱུང་བ་མེད་པར་ནི་ཅི་ལྟར་དུ་ཡོད་པར་འགྱུར་ཏེ། གལ་ཏེ་ཡོད་ན་དེ་གཉིས་ཀྱི་བྱེ་བྲག་སེམས་ཅན་གྱི་སྐྱེ་བ་མེད་པར་འཆི་བར་འགྱུར་ན་དེ་ལྟར་མ་མཐོང་ཞིང་། རྒྱུ་མེད་པར་འགྱུར་བའི་ཕྱིར་རོ། །དེས་ན་འཇིག་པ་འབྱུང་བ་མེད་པ་མེད་ཅེས་པ་ནི་ཐལ་བ་ལས་བཟློག་པའི་དོན་བསྡུ་བའོ། །གཉིས་པ་འཇིག་པ་འབྱུང་བ་དང་ལྷན་ཅིག་ཏུ་འདོད་པ་དགག་པ་ནི། འཇིག་པ་འབྱུང་བ་དང་ལྷན་ཅིག་ཏུ་ཅི་ལྟར་ཡོད་པ་ཉིད་དུ་འགྱུར་ཏེ། གལ་ཏེ་ཡོད་ན་སེམས་ཅན་གཅིག་ལ་འཆི་བ་སྐྱེ་དང་ལྷན་ཅིག་ཏུ་ཡོད་དགོས་པ་ལས་དེ་ལྟར་ཡོད་པ་ཉིད་ནི་མ་ཡིན་ཏེ། དེ་ལྟར་མ་མཐོང་ཞིང་རྒྱུ་མེད་པར་འགྱུར་བའི་ཕྱིར་རོ། །གསུམ་པ་འབྱུང་བ་འཇིག་པ་མེད་པར་འདོད་པ་དགག་པ་ནི། འབྱུང་བ་ཆོས་ཅན། འཇིག་པ་མེད་པར་ནི་ཅི་ལྟར་ཡོད་པ་ཉིད་དུ་འགྱུར་ཏེ། དངོས་པོ་ཡིན་པའི་ཕྱིར། ཁྱབ་སྟེ། དངོས་པོ་རྣམས་ལ་མི་རྟག་པ་ཉིད་དུས་ནམ་ཡང་མེད་པ་མིན་པའི་ཕྱིར་ཏེ། མཐར་འཇིག་པ་མཐོང་བའི་ཕྱིར་རོ། །བཞི་པ་འབྱུང་བ་འཇིག་པ་དང་ལྷན་ཅིག་ཏུ་འདོད་པ་དགག་པ་ནི། འབྱུང་བ་ནི་འཇིག་པ་དང་ལྷན་ཅིག་ཏུ་ཅི་ལྟར་ཡོད་པ་ཉིད་དུ་འགྱུར་ཏེ། གལ་ཏེ་ཡོད་ན་གང་ཟག་གཅིག་གི་སྐྱེ་བ་འཆི་བ་དང་དུས་གཅིག་ཏུ་ཡོད་པར་འགྱུར་བ་ལས། དེ་ལྟར་ཡོད་པ་ཉིད་ནི་མ་ཡིན་ཏེ། སྣང་མུན་ལྟར་དེ་གཉིས་ཀྱི་བྱ་བ་འགལ་བའི་ཕྱིར་རོ། །གསུམ་པ་དོན་བསྡུ་བ་ནི། དེ་ལྟར་འབྱུང་འཇིག་རང་བཞིན་གྱིས་གྲུབ་པ་ཅི་ལྟར་ཡོད་དེ། འབྱུང་འཇིག་གང་དག་ཕན་ཚུན་ལྷན་ཅིག་གམ། ཕན་ཚུན་ལྷན་ཅིག་མ་ཡིན་པར་གྲུབ་པ་ཡོད་པ་མ་ཡིན་པའི་ཕྱིར། གཉིས་པ་ཟད་མ་ཟད་ལ་དཔྱད་དེ་དགག་པ་ནི། གཞན་ཡང་འབྱུང་འཇིག་དེ་དག་ཡོད་ན་དངོས་པོ་ཟད་པའམ་མ་ཟད་པ་ལ་ཡོད། དེ་ལ་དངོས་པོ་སྔར་ཡོད་ཟད་པ་ལ་འབྱུང་བ་ཡོད་པ་མ་ཡིན་ཏེ། དེ་དང་འགལ་བའི་ཆོས་ཟད་པ་ཡོད་པའི་ཕྱིར། དངོས་པོ་མ་ཟད་པ་མེད་དགག་དང་། མ་ཡིན་དགག་ལ་ཡང་འབྱུང་བ་མེད་དེ། རིམ་པ་ལྟར་ངོ་བོ་མེད་པ་དང་། གྲུབ་ཟིན་པའི་ཕྱིར་རོ། །དེ་བཞིན་དུ་སྔར་ཡོད་ཟད་པ་ལ་ཡང་འཇིག་པ་ཡོད་པ་མ་ཡིན་ཏེ། ཞིག་ཟིན་པ་དང་རྟེན་མེད་པའི་ཕྱིར་རོ། །མ་ཟད་པ་མེད་དགག་དང་མ་ཡིན་དགག་ལ་ཡང་འཇིག་པ་མེད་དེ། རིམ་པ་ལྟར་ངོ་བོ་མེད་པ་དང་འཇིག་པར་འགལ་བའི་ཕྱིར་རོ། །གསུམ་པ་རྟེན་མེད་པའི་རིག་པས་དགག་པ་ནི། རྟེན་དངོས་པོ་ཡོད་པ་མ་ཡིན་པར་དེའི་ཆོས་འབྱུང་བ་དང་འཇིག་པ་ཡོད་པ་མ་ཡིན་ཏེ། རྟེན་མེད་པའི་བརྟེན་པ་མི་སྲིད་པའི་ཕྱིར། དངོས་པོ་ཅི་ལྟར་མེད་ཅེ་ན་ཁྱབ་བྱེད་འབྱུང་བ་དང་འཇིག་པ་མེད་པར་ནི་ཁྱབ་བྱ་དངོས་པོ་ཡོད་པ་མ་ཡིན་ཏེ། འབྱུང་འཇིག་སྔར་བཀག་པའི་ཕྱིར། བཞི་པ་སྟོང་མི་སྟོང་དཔྱད་དེ་དགག་པ་ནི། འབྱུང་འཇིག་དེ་དག་རང་བཞིན་གྱིས་སྟོང་པའམ་མི་སྟོང་པ་ཞིག་ལ་ཡོད་དྲང་། དང་པོ་ལྟར་ན་རང་བཞིན་གྱིས་སྟོང་པ་ལ་དེ་ཁོ་ནར་འབྱུང་བ་དང་འཇིག་པ་དག་འཐད་པ་ཉིད་ནི་མ་ཡིན་ཏེ། རྟེན་མེད་པའི་ཕྱིར། ནམ་མཁའི་མེ་ཏོག་བཞིན་ནོ། །གཉིས་པ་ལྟར་ན་རང་བཞིན་གྱིས་མི་སྟོང་པ་ལ་ཡང་འབྱུང་འཇིག་དག་འཐད་པ་ཉིད་ནི་མ་ཡིན་ཏེ། རང་བཞིན་རྒྱུ་རྐྱེན་གྱི་བཅོས་མ་དང་གཞན་དུ་འགྱུར་བ་མི་འཐད་པར་བཤད་ཟིན་པའི་ཕྱིར་རོ། །ལྔ་པ་གཅིག་དང་ཐ་དད་དགག་པ་ནི། འབྱུང་འཇིག་རང་བཞིན་གྱིས་ཡོད་ན་ངོ་བོ་གཅིག་པའམ་གཞན་དུ་ཡོད། དང་པོ་ལྟར་ན། འབྱུང་བ་དང་ནི་འཇིག་པ་དག གཅིག་པ་ཉིད་ནི་མི་འཐད་དེ། ཕན་ཚུན་འགལ་བའི་ཕྱིར་སྣང་མུན་བཞིན། ཕྱི་མ་ལྟར་ན་འབྱུང་བ་དང་ནི་འཇིག་པ་དག གཞན་ཉིད་དུ་ཡང་མི་འཐད་དེ། གཞན་ཡིན་ན་འབྱུང་བ་རྟག་པ་དང་། འཇིག་པ་རྒྱུ་མེད་དུ་འགྱུར་བའི་ཕྱིར་དང་། གཉིས་ཀ་ཕན་ཚུན་མི་འཁྲུལ་བས་ལྟོས་བཅས་ཡིན་པའི་ཕྱིར་རོ། །གཉིས་པ་རང་བཞིན་གྱིས་གྲུབ་པའི་སྒྲུབ་བྱེད་དགག་པ་ལ་གཉིས་ཏེ། སྒྲུབ་བྱེད་མངོན་གསུམ་དགག་པ། སྒྲུབ་བྱེད་རྗེས་དཔག་དགག་པའོ། །དང་པོ་ནི། འབྱུང་འཇིག་ཡོད་པའི་ཚུལ་ཞིབ་མོར་དཔྱད་པས་ཅི་ཞིག་བྱ་སྟེ། འབྱུང་བ་དང་ནི་འཇིག་པ་དག བ་ལང་རྫི་ཡན་ཆད་ཀྱི་མངོན་སུམ་གྱིས་མཐོང་བས་རང་བཞིན་གྱིས་ཡོད་དོ་སྙམ་དུ་ཁྱོད་སེམས་ན། དེས་འབྱུང་འཇིག་བདེན་པར་མི་གྲུབ་སྟེ། བ་ལང་རྫི་ཡན་ཆད་ཀྱིས་འབྱུང་བ་དང་ནི་འཇིག་པ་དག་མཐོང་བ་དེ་ནི་དྲི་ཟའི་གྲོང་ཁྱེར་ལ་སོགས་པ་མཐོང་བ་ལྟར་རྒྱུ་བདེན་འཛིན་གྱི་གཏི་མུག་ཉིད་ཀྱིས་བདེན་པར་མེད་ཀྱང་བདེན་པར་འཁྲུལ་ནས་མཐོང་བ་ཡིན་པའི་ཕྱིར། འདི་ནི་བཞི་བརྒྱ་པར། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་འགྱུར་ཏེ། །དེ་ཕྱིར་ཉོན་མོངས་ཐམས་ཅད་ནི། །གཏི་མུག་བཅོམ་པས་བཅོམ་པར་འགྱུར། །ཞེས་གསུངས་པ་ལྟར། དབུ་མའི་ལྟ་བའི་མ་ཟིན་པའི་སོ་སྐྱེའི་རྒྱུད་ཀྱི་ཤེས་པས་ཡུལ་གང་བཟུང་ཐམས་ཅད་བདེན་པར་བཟུང་བ་ཡིན་པས་ཀུན་རྫོབ་བདེན་པར་འཇོག་ལ། དེའི་ཡུལ་བུམ་སྣམ་སོགས་ཐ་སྙད་བདེན་པར་འཇོག་པའི་ཚེ་སོ་སྐྱེས་བདེན་པའི་བུམ་སྣམ་སོགས་དང་། དབུ་མ་པས་བདེན་མེད་ཀྱི་བུམ་སྣམ་སོགས་སུ་ཁས་ལེན་ཡང་བདེན་པར་ཡོད་མེད་ཀྱིས་ཁྱད་པར་དུ་མ་བྱས་པའི་བུམ་སྣམ་སོགས་གཉིས་ཀ་ལ་མཐུན་སྣང་དུ་གྲུབ་པ་ནི་ཐ་སྙད་བདེན་པར་འཇོག་པའོ། །གཉིས་པ་སྒྲུབ་བྱེད་རྗེས་དཔག་དགག་པ་ལ་གཉིས་ཏེ། ཁས་བླངས་བརྗོད་པ་དང་། དེ་དགག་པའོ། །དང་པོ་ནི། གལ་ཏེ་འབྱུང་འཇིག་རང་བཞིན་གྱིས་ཡོད་དེ། དེའི་རྟེན་དངོས་པོ་ཡོད་པའི་ཕྱིར་ཞེ་ན། གཉིས་པ་ལ་གཉིས་ཏེ། སྐྱེ་བ་མེད་པས་དགག ཧ་ཅང་ཐལ་བས་དགག་པའོ། །དང་པོ་ནི། དངོས་པོ་རང་བཞིན་གྱིས་ཡོད་ན་དེ་དངོས་པོའམ་དངོས་མེད་ལས་སྐྱེ། དེ་ལ་དངོས་པོ་དངོས་ལས་མི་སྐྱེ་སྟེ། དུས་མཉམ་པའི་རྒྱུས་འབྲས་བུ་ལ་ཕན་འདོགས་པ་མེད་པའི་ཕྱིར་དང་། འབྲས་བུ་དངོས་པོར་ཡོད་པ་སྐྱེ་བ་དོན་མེད་པའི་ཕྱིར་རོ། །དངོས་པོ་དངོས་མེད་ལས་མི་སྐྱེ་སྟེ། དེ་ལ་འབྲས་བུ་བསྐྱེད་པའི་ནུས་པ་མེད་པའི་ཕྱིར་རོ། །དེ་བཞིན་དུ་དངོས་མེད་འགའ་ཞིག་ཡོད་ན། དེ་དངོས་མེད་དམ་དངོས་པོ་ལས་སྐྱེ། དེ་ལ་དངོས་མེད་ནི་དངོས་མེད་ལས་མི་སྐྱེ་སྟེ། འབྲས་བུ་མེད་པ་ལ་ཁྱད་པར་བྱར་མེད་པའི་ཕྱིར་དང་། རྒྱུ་དངོས་མེད་ལ་ནུས་པ་མེད་པའི་ཕྱིར་རོ། །དངོས་མེད་དངོས་པོ་ལས་མི་སྐྱེ་སྟེ། དངོས་འགལ་ཡིན་པའི་ཕྱིར་རོ། །དེ་བཞིན་དུ་དངོས་པོ་བདག་ལས་མི་སྐྱེ་སྟེ། རང་མ་གྲུབ་ན་སྐྱེད་བྱེད་དུ་འགལ། གྲུབ་ན་བསྐྱེད་བྱར་འགལ་བའི་ཕྱིར་རོ། །གཞན་ལས་སྐྱེ་བ་ཉིད་ཀྱང་མ་ཡིན་ཏེ། ཐམས་ཅད་ལས་ཐམས་ཅད་སྐྱེ་བར་ཐལ་བའི་ཕྱིར་རོ། །བདག་དང་གཞན་གཉིས་ཀ་ལས་སྐྱེ་བ་ཉིད་ནི་ཡོད་པ་མིན་ཏེ། སོ་སོ་ལས་མི་སྐྱེ་བའི་ཕྱིར་རོ། །དེས་ན་དངོས་པོ་ཅི་ལྟར་སྐྱེ་བར་འགྱུར་ཏེ། ཁྱབ་བྱེད་སྐྱེ་བ་མ་གྲུབ་པས་ཁྱབ་བྱ་དངོས་པོ་མ་གྲུབ་ལ། དེ་མ་གྲུབ་པས་འབྱུང་འཇིག་ཡོད་པར་བསྒྲུབ་མི་ནུས་ཞེས་པའོ། །གཉིས་པ་ལ་གཉིས་ཏེ། ཧ་ཅང་ཐལ་བས་དགག དེའི་ཉེས་སྤོང་དགག་པའོ། །དང་པོ་ནི། གལ་ཏེ་རང་གི་སྡེ་པ་དག་གིས་དངོས་པོ་ཡོད་པར་ཁས་བླངས་ན་ཐུབ་པའི་བཀའ་དང་འགལ་ཞིང་། ཉེས་པ་ཀུན་གྱི་འབྱུང་གནས་རྟག་པ་དང་ཆད་པ་ལྟ་བ་ནི་ཐལ་བར་འགྱུར་ཏེ། དངོས་པོ་དེ་ནི་དུས་གཉིས་པར་གནས་ན་རྟག་པ་དང་། མི་གནས་པའི་མི་རྟག་པ་ཡིན་ན། ཆད་པར་འགྱུར་བའི་ཕྱིར་རོ། །གཉིས་པ་ལ་གཉིས་ཏེ། རྒྱུན་ཁས་བླངས་ཀྱང་རྟག་ཆད་ཀྱི་ཉེས་པར་ཐལ་བ། རྒྱུན་ཉིད་མ་གྲུབ་པས་རྟག་ཆད་ཀྱི་ཉེས་པ་ལས་མི་འདའ་བའོ། །དང་པོ་ལ་གཉིས་ཏེ། སྲིད་པའི་ཚེ་ན་རྟག་ཆད་གཉིས་ཀ་ཐལ་བ། མྱང་འདས་ཀྱི་ཚེ་ན་ཆད་པར་ཐལ་བའོ། །དང་པོ་ལ་གཉིས་ཏེ། ཆད་པར་ཐལ་བ་དང་། རྟག་པར་ཐལ་བའོ། །དང་པོ་ནི། གལ་ཏེ་རྒྱུ་འཇིག་པ་དང་འབྲས་བུ་བར་མ་ཆད་དུ་འབྱུང་བའི་རྒྱུན་དེ་སྲིད་པ་ཡིན་པར་གྱུར་ན་ཡང་རྒྱུའི་རྫས་ནི་ཆད་པར་ཐལ་བར་འགྱུར་ཏེ། རྒྱུའི་རྫས་འཇིག་པ་ལ་སླར་ཡང་སྐྱེ་བ་མེད་པའི་ཕྱིར། གཉིས་པ་ནི། གལ་ཏེ་རྒྱུའི་དངོས་པོ་ངོ་བོ་ཉིད་དུ་ཡོད་ན་རྟག་པར་འགྱུར་ཏེ། དེ་འཇིག་ཅིང་དངོས་མེད་དུ་འགྱུར་བར་མི་རིགས་པའི་ཕྱིར་རོ། །གཉིས་པ་ནི། དངོས་པོ་དེ་མྱ་ངན་ལས་འདས་པའི་དུས་ན་ངེས་པར་ཆད་པར་འགྱུར་ཏེ། སྔར་གྱི་སྲིད་པའི་རྒྱུན་དེ་རབ་ཏུ་ཞི་བའི་ཕྱིར་རོ། །གཉིས་པ་ནི། གལ་ཏེ་སྲིད་པའི་རྒྱུན་རང་བཞིན་གྱིས་ཡོད་ན། འབྲས་བུ་སྐྱེ་བ་གཞན་དུ་ཉིང་མཚམས་སྦྱོར་བའི་སྲིད་པའི་དང་པོ་དེ་རྒྱུ་ཚེ་འདིའི་སྲིད་པ་ཐ་མ་འགགས་པའམ་མ་འགགས་པའམ་འགག་བཞིན་པ་ལས་སྐྱེ། དང་པོ་ལྟར་རྒྱུ་སྲིད་པ་ཐ་མ་འགགས་པར་གྱུར་པ་ན་སྲིད་པ་དང་པོ་སྐྱེ་བར་རིགས་པར་མི་འགྱུར་ཏེ། རྒྱུ་མེད་པའི་ཉེས་པར་འགྱུར་བའི་ཕྱིར་རོ། །གཉིས་པ་ལྟར་ན་རྒྱུ་སྲིད་པ་ཐ་མ་འགག་པར་མ་གྱུར་པའི་ཚེ་ཡང་འབྲས་བུ་སྲིད་པ་དང་པོ་སྐྱེ་བར་རིགས་པར་མི་འགྱུར་ཏེ། དེ་ལྟར་ན་གང་ཟག་གཅིག་ལ་སྲིད་པ་གཉིས་གཅིག་ཆར་དུ་ཡོད་དགོས་པས་སྔ་མ་རྟག་པ་དང་། ཕྱི་མ་རྒྱུ་མེད་པའི་ཉེས་པར་ཐལ་བའི་ཕྱིར་རོ། །གལ་ཏེ་གསུམ་པ་ལྟར་ན་རྒྱུ་སྲིད་པ་ཐ་མ་འགག་བཞིན་པ་ན་འབྲས་བུ་སྲིད་པ་དང་པོ་སྐྱེ་བར་འགྱུར་ན་ནི། རྒྱུ་འགག་བཞིན་པ་ནི་འགག་པའི་བྱ་བ་བྱེད་བཞིན་པའི་སྲིད་པ་གཅིག་ཏུ་འགྱུར་ཞིང་འབྲས་བུ་སྐྱེ་བཞིན་པ་ཡང་སྐྱེ་བའི་བྱ་བ་བྱེད་བཞིན་པའི་སྲིད་པ་གཞན་དུ་འགྱུར་བས་གང་ཟག་གཅིག་ལ་སྲིད་པ་གཉིས་སུ་འགྱུར་བའི་ཕྱིར་རོ། །གལ་ཏེ་འགག་བཞིན་པ་དང་སྐྱེ་བཞིན་པའི་སྲིད་པ་གཉིས་ངོ་བོ་གཅིག་ཡིན་པས་ཉེས་པ་དེར་མི་འགྱུར་རོ་སྙམ་ན། གལ་ཏེ་དེ་ལྟར་འགག་བཞིན་སྐྱེ་བཞིན་གྱི་སྲིད་པ་གཉིས་དག་ལྷན་ཅིག་ཏུ་ཡང་རིག་པ་མ་ཡིན་ན། ཕུང་པོ་གང་ལའང་འཆི་བར་འགྱུར་བའི་རྫས་དེ་ཉིད་ལ་སྐྱེ་བ་ཡང་ནི་འབྱུང་འགྱུར་རམ་སྟེ་མི་འཐད་པར་ཐལ། དེ་གཉིས་ཤིན་ཏུ་འགལ་བའི་ཕྱིར་རོ། །དེ་ལྟར་རྒྱུ་སྲིད་པ་ཐ་མ་འགགས་པ་དང་མ་འགགས་པ་དང་། འགག་བཞིན་པའི་དུས་གསུམ་དག་ཏུ་ཡང་འབྲས་བུ་སྲིད་པ་དང་པོ་སྐྱེ་བ་མེད་པས་སྲིད་པའི་རྒྱུན་ནི་མི་རིག་ན། དེ་ནི་ཅི་ལྟར་སྲིད་པའི་རྒྱུན་ཡིན་ཏེ། དུས་གསུམ་དག་ཏུ་དཔྱད་ན་གང་མེད་པ་ཡིན་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས་ཀྱང་། སྲིད་གསུམ་རྨི་ལམ་དང་འདྲ་སྙིང་པོ་མེད། །མྱུར་དུ་འཇིག་ཅིང་མི་རྟག་སྒྱུ་མ་བཞིན། །འོང་བ་མེད་ཅིང་འདི་ན་འགྲོ་བའང་མེད། །རྒྱུན་རྣམས་རྟག་ཏུ་སྟོང་ཞིང་མཚན་མ་མེད། །ཞེས་བྱ་བ་དང་། དེ་བཞིན་དུ། སྐྱེ་བ་དང་ནི་འཆི་འགྱུར་ཡང་། །སྐྱེ་བ་མེད་ཅིང་འཆི་མེད་པར། །གང་གིས་ཤེས་པར་གྱུར་པ་ཡིས། །ཏིང་འཛིན་འདི་ནི་རྙེད་མི་དཀའ། །ཞེས་གསུངས་པ་དང་། དེ་བཞིན་དུ་གང་དག་བསམ་ཡས་ཆོས་རྣམས་འདི་ཤེས་པ། །མི་རྣམས་དེ་དག་རྟག་ཏུ་བདེ་བ་ཡིན། །ཆོས་དང་ཆོས་མིན་རྣམ་རྟོག་མེད་པ་སྟེ། །ཐམས་ཅད་སེམས་ཀྱིས་སྤྲོས་པས་ཕྱེ་བ་ཡིན། །ཐམས་ཅད་བསམ་ཡས་ཐམས་ཅད་འབྱུང་མེད་པས། །དངོས་དང་དངོས་མེད་ཤེས་ལ་རྣམ་པར་ཤིག །བྱིས་པ་གང་དག་སེམས་ཀྱི་དབང་སོང་བ། །དེ་དག་སྲིད་པ་བྱེ་བ་བརྒྱར་སྡུག་བསྔལ། །ཞེས་གསུངས་ཏེ་བསྟན་ཚུལ་ནི་སྔ་མ་དང་འདྲའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། འབྱུང་བ་དང་འཇིག་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་གཅིག་པའི་རྣམ་པར་བཤད་པའོ།། །།ལྔ་པ་རྟེན་འབྲེལ་སྲིད་པའི་རྒྱུན་གྱིས་སྟོང་པ་ལ་གཉིས་ཏེ། དེའི་འབྲས་བུ་དེ་བཞིན་གཤེགས་པ་རང་བཞིན་གྱིས་གྲུབ་པ་དགག རྒྱུ་ཕྱིན་ཅི་ལོག་རང་བཞིན་གྱིས་གྲུབ་པ་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་སྲིད་པའི་རྒྱུན་བཀག་མོད་ཀྱི་དེ་ཡོད་པ་ཉིད་དེ། དེའི་འབྲས་བུ་བསྐལ་པ་གྲངས་མེད་གསུམ་ལ་སོགས་པར་ཚོགས་བསགས་པ་ལས། རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་པས་ཆོས་རྣམས་ཀྱི་དེ་ཁོ་ན་ཉིད་ཅི་ལྟ་བ་བཞིན་དུ་རྟོགས་པའི་དེ་བཞིན་གཤེགས་པ་ཡོད་པའི་ཕྱིར་དང་། སྲིད་པའི་རྒྱུན་མེད་ན་བསྐལ་པ་གྲངས་མེད་གསུམ་དུ་ཚོགས་བསགས་པ་མེད་པས་དེའི་འབྲས་བུ་དེ་བཞིན་གཤེགས་པ་མི་འཐད་པའི་ཕྱིར་རོ་ཞེ་ན། དེ་བཞིན་གཤེགས་པ་ཉིད་ཁྱེད་ཅག་གིས་བརྟག་པ་ལྟར་རང་བཞིན་དུ་གྲུབ་པ་མེད་པས་དེའི་རྒྱུ་སྲིད་པའི་རྒྱུན་ཡང་རང་བཞིན་གྱིས་མ་གྲུབ་བོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། དེ་བཞིན་གཤེགས་པ་རང་བཞིན་གྱིས་གྲུབ་པ་དགག དེས་ལྟ་བར་གྱུར་པ་ཐམས་ཅད་སྤངས་པར་བསྟན། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གསུམ་སྟེ། ཉེ་བར་ལེན་པ་པོའི་དེ་བཞིན་གཤེགས་པའི་གང་ཟག་མ་གྲུབ་པ། ཉེ་བར་བླང་བྱ་དེའི་ཕུང་པོ་མ་གྲུབ་པ། དེ་གཉིས་ཀྱི་དོན་བསྡུ་བའོ། །དང་པོ་ལ་གཉིས་ཏེ། གང་ཟག་རྫས་ཡོད་དགག་པ། བརྟག་ཡོད་དགག་པའོ། །དང་པོ་ནི། ཉེ་བར་ལེན་པ་པོ་དེ་བཞིན་གཤེགས་པའི་གང་ཟག་འགའ་ཞིག་རང་བཞིན་གྱིས་ཡོད་ན། དེའི་བླང་བྱ་གཟུགས་ལ་སོགས་པའི་ཕུང་པོ་ལྔའམ། སངས་རྒྱས་ཀྱི་སས་བསྡུས་པའི་ཚུལ་ཁྲིམས་ལ་སོགས་པའི་ཕུང་པོ་ལྔ་ལས། དེ་ཉིད་དང་གཞན་ཉིད་སོགས་རྣམ་པ་ལྔ་གང་རུང་དུ་གྲུབ་དགོས་ན་རེ་ཤིག་དེ་བཞིན་གཤེགས་པའི་གང་ཟག་ནི་ཕུང་པོའི་ངོ་བོ་མ་ཡིན་ཏེ། སྐྱེ་འཇིག་ཅན་དང་། དུ་མར་ཐལ་བ་དང་། ལས་དང་བྱེད་པ་པོ་གཅིག་ཏུ་འགྱུར་བའི་ཕྱིར་རོ། །ཕུང་པོ་ལས་ངོ་བོ་གཞན་ཡང་མིན་ཏེ། དེ་ལས་ཐ་དད་དུ་མ་དམིགས་པའི་ཕྱིར། དེ་བཞིན་གཤེགས་པ་དེ་ལ་ཕུང་པོ་བརྟེན་པར་མེད་ཅིང་། ཕུང་པོ་དེར་དེ་བཞིན་གཤེགས་པ་དེ་བརྟེན་པར་ཡང་མེད་དེ། གཞན་དུ་མ་གྲུབ་པའི་ཕྱིར་རོ། །དེ་བཞིན་གཤེགས་པ་ཕུང་པོ་དང་ལྡན་པ་ཡང་མ་ཡིན་ཏེ། དེ་ཉིད་དང་གཞན་ཉིད་དུ་མ་གྲུབ་པའི་ཕྱིར་རོ། །དེས་ན་དེ་བཞིན་གཤེགས་པ་རང་བཞིན་གྱིས་གྲུབ་པ་གང་ཞིག་ཡིན་ཏེ། རང་གི་ཉེ་བར་བླང་བྱ་ལ་རྣམ་པ་ལྔས་བཙལ་བའི་ཚེ་མི་རྙེད་པའི་ཕྱིར་རོ། །གཉིས་པ་ལ་གསུམ་སྟེ། རང་དངོས་དང་གཞན་དངོས་སུ་མ་གྲུབ་པ། ཉེ་བར་ལེན་པས་བརྟག་པར་མ་གྲུབ་པ། གཞི་གདགས་བྱ་མེད་པས་མ་གྲུབ་པའོ། །དང་པོ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། མང་པོས་བཀུར་བའི་སྡེ་པ་དག ཅི་སྐད་བཤད་པའི་ཉེས་པར་ཐལ་བས། ཕུང་པོ་ལས་རྣམ་པ་ལྔར་མ་གྲུབ་མོད་ཀྱི། ཕུང་པོ་ལས་དེ་ཉིད་དང་གཞན་ཉིད་དུ་བརྗོད་དུ་མེད་པའི་དེ་བཞིན་གཤེགས་པའི་གང་ཟག་ཞིག་ཕུང་པོ་ལ་བརྟེན་ནས་དེ་ཁོ་ན་ཉིད་དུ་འདོགས་པ་ཡིན་ནོ་ཞེ་ན། གལ་ཏེ་དེ་ལྟར་ན་སངས་རྒྱས་དེ་རང་བཞིན་ལས་ཡོད་པ་མིན་པར་འགྱུར་ཏེ། ཕུང་པོ་ལ་བརྟེན་ནས་འདོགས་པའི་ཕྱིར། གཟུགས་བརྙན་བཞིན་ནོ། །དེས་ན་དེ་བཞིན་གཤེགས་པ་དེ་གཞན་ཕུང་པོའི་དངོས་པོ་ལ་ལྟོས་ནས་རང་བཞིན་གྱིས་ག་ལ་ཡོད་དེ། རང་ཉིད་རང་བཞིན་ལས་ནི་གང་མེད་པ་ཡིན་པའི་ཕྱིར། གཉིས་པ་ལ་གསུམ་སྟེ། རང་དངོས་སུ་མ་གྲུབ། གཞན་དངོས་སུ་མ་གྲུབ། དོན་བསྡུ་བའོ། །དང་པོ་ནི། གང་ཞིག་གཞན་གྱི་དངོས་པོ་ལ་བརྟེན་ནས་བརྟག་པ་དེ་རང་གི་བདག་ཉིད་དུ་རང་བཞིན་གྱིས་གྲུབ་པ་མི་འཐད་དེ། རང་བཞིན་གྱིས་གྲུབ་ན་གཞན་ལ་ལྟོས་པར་འགལ་བའི་ཕྱིར། གང་ཞིག་རང་གི་བདག་ཉིད་རང་བཞིན་གྱིས་མེད་པ་དེ་ཅི་ལྟར་ན་དེ་ཁོ་ན་ཉིད་དུ་དེ་བཞིན་གཤེགས་པར་འགྱུར་ཏེ། རང་གི་བདག་ཉིད་མ་གྲུབ་པའི་ཕྱིར། གཉིས་པ་ནི། གལ་ཏེ་དེ་ལྟར་དེ་བཞིན་གཤེགས་པ་ཉིད་རང་བཞིན་གྱིས་ཡོད་པ་མ་ཡིན་ན། ཕུང་པོ་དེ་ལ་ལྟོས་ནས་གཞན་གྱི་དངོས་པོར་ཅི་ལྟར་ཡོད་པར་འགྱུར་ཏེ། གཞན་ལ་ལྟོས་ནས་གཞན་དངོས་སུ་འགྱུར་བ་དེ་རང་གི་ངོ་བོ་གྲུབ་པ་ལ་རག་ལས་པའི་ཕྱིར་རོ། །གསུམ་པ་ནི། རང་བཞིན་དང་ནི་གཞན་དངོས་ལ་ལྟོས་པ་དག་ལས་མ་གཏོགས་པའི་དེ་བཞིན་གཤེགས་པ་དེ་གང་ཞིག་ཡིན་ཏེ། རང་བཞིན་དང་གཞན་དངོས་ལ་ལྟོས་པ་ཉིད་མ་གྲུབ་པའི་ཕྱིར། གཉིས་པ་ལ་བཞི་སྟེ། བླང་བྱའི་སྔར་ལེན་པ་པོ་མེད་པ། ལེན་པ་པོ་སྔར་མེད་པའི་བླང་བྱ་མེད་པ། ཉེ་བར་མ་བླང་པ་བླང་བྱར་མི་རུང་བ། བླང་བྱ་མེད་པའི་ལེན་པ་པོ་མེད་པའོ། །དང་པོ་ནི། ལྷས་བྱིན་སྔར་ཡོད་ན་དེས་ནོར་ལེན་པ་ལྟར། གལ་ཏེ་སངས་རྒྱས་ཀྱི་སས་བསྡུས་པའི་ཕུང་པོ་ལ་མ་བརྟེན་པར། དེ་ལེན་པ་པོའི་དེ་བཞིན་གཤེགས་པ་འགའ་ཞིག་སྔར་ཡོད་ན་དེ་ནི་ད་གདོད་ཕུང་པོ་ལ་བརྟེན་པའམ་ལེན་པར་འགྱུར་ཞིང་། དེ་ལ་བརྟེན་ནས་དེ་ནས་དེ་བཞིན་གཤེགས་པ་འགྱུར་ལ་རག་ན་ཡང་སངས་རྒྱས་ཀྱི་སའི་ཕུང་པོ་རྣམས་ལ་མ་བརྟེན་པར་སྔར་དེ་བཞིན་གཤེགས་པ་འགའ་ཡང་མེད་དེ། དེར་གདགས་པའི་གཞི་མེད་པའི་ཕྱིར་རོ། །གཉིས་པ་ནི། དེ་ལྟར་དེ་བཞིན་གཤེགས་པ་གང་ཞིག་ཕུང་པོ་ལ་མ་བརྟེན་པ་སྔར་ཡོད་པ་མ་ཡིན་པ་དེའི་ཕྱིར་ན། དེ་ནི་ཅི་ལྟར་ཕུང་པོ་ཉེ་བར་ལེན་པར་འགྱུར་ཏེ། ཕུང་པོ་དང་འབྲེལ་པ་མེད་པའི་ཕྱིར་རོ། །གསུམ་པ་ནི། ཕུང་པོ་རྣམས་ཉེ་བར་ཉེ་བར་ལེན་པར་རྒྱུ་མཚན་ཅིས་ཀྱང་མི་འགྱུར་ཏེ། ལེན་པ་པོ་སྔར་མེད་པས་ཉེ་བར་བླངས་པ་མིན་པའི་ཕྱིར་རོ། །བཞི་པ་ནི། དེ་ལྟར་ཉེ་བར་ལེན་པའི་ཕུང་པོ་མེད་པའི་ལེན་པ་པོ་དེ་བཞིན་གཤེགས་པ་ཅི་ཡང་མེད་དེ། ལེན་པ་པོར་འཇོག་པའི་རྒྱུ་མེད་པའི་ཕྱིར་རོ། །གསུམ་པ་ནི། དེ་བཞིན་གཤེགས་པ་དེ་ཅི་ལྟར་ན་ཉེ་བར་ལེན་པས་དེ་ཁོ་ན་ཉིད་དུ་གདགས་ཏེ་མི་རིགས་པར་ཐལ། གང་ཞིག་ཕུང་པོ་ལས་དེ་ཉིད་དང་། གཞན་ཉིད་དང་། རྟེན་དང་། བརྟེན་པ་དང་། ལྡན་པ་རྣམ་པ་ལྔས་ནི་བཙལ་བར་བྱས་ན་མེད་པའི་ཕྱིར་རོ། །གཉིས་པ་ཉེ་བར་བླངས་པ་དེའི་ཕུང་པོ་མ་གྲུབ་པ་ནི་ཉེ་བར་ལེན་པ་པོའི་གང་ཟག་མེད་པར་མ་ཟད་ཀྱི། གང་ཞིག་ཉེ་བར་བླངས་པའི་སངས་རྒྱས་ཀྱི་སའི་ཕུང་པོ་དེ་ཡང་རང་བཞིན་ལས་ཡོད་པ་མིན་ཏེ། རྒྱུ་རྐྱེན་ལ་བརྟེན་ནས་འབྱུང་བའི་ཕྱིར། དེས་ན་ཉེ་བར་ལེན་པའི་ཕུང་པོ་དེ། ལེན་པ་པོ་གཞན་གྱི་དངོས་པོ་ལ་ལྟོས་པ་ལས་རང་བཞིན་གྱིས་ཡོད་རེ་ཀན་ཏེ། བདག་གི་དངོས་པོ་ལས་གང་མེད་པ་ཡིན་པའི་ཕྱིར། གསུམ་པ་དེ་གཉིས་ཀའི་དོན་བསྡུ་བ་ནི། ཉེ་བར་བླང་བྱ་སྟོང་པས་ལེན་པ་པོ་དེ་བཞིན་གཤེགས་པ་སྟོང་པ་དེ་ཁོ་ན་ཉིད་དུ་ཅི་ལྟ་བུར་ན་འདོགས་པར་འགྱུར་ཏེ། ཅི་སྐད་བཤད་པ་དེ་ལྟར་ཉེ་བར་བླང་བྱ་དང་། ཉེ་བར་ལེན་པ་པོ་རྣམ་པ་ཀུན་གྱིས་སྟོང་པ་ཡིན་པའི་ཕྱིར་རོ། །གཉིས་པ་དེས་ལྟ་བར་གྱུར་པ་ཐམས་ཅད་སྤངས་པར་བསྟན་པ་ལ་གཉིས་ཏེ། དེ་བཞིན་གཤེགས་པའི་དེ་ཁོ་ན་ཉིད་སྤྲོས་པ་ལས་འདས་པར་བསྟན་པ། དེ་ལ་སྤྲོས་བཅས་སུ་འཛིན་པའི་ཉེས་པ་བསྟན་པའོ། །དང་པོ་ནི། གལ་ཏེ་ཁོ་བོ་ཅག་ནི་སྟོན་པ་གཞན་སྤངས་ནས་དེ་བཞིན་གཤེགས་པ་ལ་སྐྱབས་སུ་སོང་ཞིང་ཐར་པ་དོན་དུ་གཉེར་བ་ཡིན་ན། ཁྱོད་ཀྱིས་སྐྱབས་གནས་ཀྱི་གཙོ་བོ་དེ་བཀག་པས་ཐར་པའི་རེ་ཐག་བཅད་ཅིང་། དེ་ལ་སྐུར་པའི་ལོག་པར་ལྟ་བར་འགྱུར་རོ་ཞེ་ན། འདིར་ཆོས་དབྱིངས་གློ་བུར་གྱི་དྲི་མ་མཐའ་དག་དང་བྲལ་བའི་ཆོས་སྐུ་དང་། གདུལ་བྱ་དག་པའི་བློ་ངོར་གཟུགས་སྐུ་སྒྱུ་མ་ལྟ་བུས་དོན་མཛད་པའི་སངས་རྒྱས་ལ་སྙོན་ཅིང་སྐུར་བ་མ་ཡིན་གྱི། འོན་ཀྱང་ཁྱེད་ཅག་གིས་བརྟགས་པའི་དེ་བཞིན་གཤེགས་པའི་བདག་དང་ཕུང་པོ་རང་བཞིན་མེད་པར་སྟོན་པ་ཡིན་པས་དེ་བཞིན་གཤེགས་པ་དེ་ཁོ་ན་ཉིད་དུ་སྟོང་ངོ་ཞེས་ཀྱང་མི་བརྗོད་དེ། མི་སྟོང་ཞེས་ཀྱང་མི་བྱ་ཞིང་། སྟོང་མི་སྟོང་གཉིས་ཀ་དང་གཉིས་ཀ་མ་ཡིན་ཞེས་ཀྱང་མི་བྱ་སྟེ། དེ་ཁོ་ན་ཉིད་དུ་མཐའ་བཞི་ཆར་གྱི་སྤྲོས་པ་དང་བྲལ་བའི་ཕྱིར། འོན་ཀྱང་གདུལ་བྱ་དེ་ཁོ་ན་ཉིད་ལ་བློ་དྲང་བའི་ཆེད་དུ་ཐ་སྙད་གདགས་པའི་དོན་དུ་གདུལ་བྱ་རྣམས་ལ་དེ་བཞི་ཀ་ཡང་བརྗོད་པར་བྱ་སྟེ། དེའི་དགོས་པ་དང་དགོངས་ཞིང་། ཐམས་ཅད་ཡང་དག་ཡང་དག་མིན་ཅེས་པའི་སྐབས་སུ་བཤད་ཟིན་པ་ལྟར་རོ། །དེ་ལྟར་དེ་བཞིན་གཤེགས་པའི་གང་ཟག་དང་ཕུང་པོ་བརྟག་པའི་ཐབས་ཀྱིས་སེམས་ཅན་གྱི་བདག་དང་ཕུང་པོ་ཡང་བཀག་པ་ཡིན་པས་ལུང་དུ་མ་བསྟན་པའི་ལྟ་བ་བཅུ་བཞི་ཡང་མི་འཐད་པར་གྲུབ་སྟེ། འདི་ལྟར་འཇིག་རྟེན་རྟག་པ་དང་མི་རྟག་པ་དང་། ལ་སོགས་པ་དེ་གཉིས་ཀ་དང་། གཉིས་ཀ་མ་ཡིན་པ་བཞི། རང་བཞིན་གྱི་ཞི་བ་འདི་ལ་ག་ལ་ཡོད་དེ། དེ་དག་གདོད་མ་ནས་ཉེ་བར་ཞི་བའི་ཕྱིར་རོ། །འཇིག་རྟེན་མཐའ་ཡོད་པ་དང་། མཐའ་མེད་པ་དང་། ལ་སོགས་པ་དེ་གཉིས་ཀ་དང་གཉིས་ཀ་མ་ཡིན་པ་བཞི་ཡང་བདག་དང་ཕུང་པོ་རང་བཞིན་གྱིས་ཞི་བ་འདི་ལ་ག་ལ་ཡོད་དེ། དེ་བཞི་ཆར་གདོད་མ་ནས་ཉེ་བར་ཞི་བའི་ཕྱིར། འདིར་མདོའི་འགྱུར་འགའ་ཞིག་དང་། བོད་ཀྱི་མཁས་པ་སྔ་མ་རྣམས་བདག་དང་འཇིག་རྟེན་རྟག་པ་དང་མི་རྟག་པ་སོགས་ལུང་མ་བསྟན་གྱི་ལྟ་བ་བཅུ་བཞི་འདྲེན་པའི་ཚེ་མཚན་གཞི་བདག་དང་འཇིག་རྟེན་གཉིས་ཀ་སྨོས་པར་སྣང་ཡང་། ཚིག་གསལ་ལས་མདོ་དྲངས་པར་མཚན་གཞི་འཇིག་རྟེན་ཁོ་ན་སྨོས་པ་དང་། རིན་ཆེན་ཕྲེང་བར། འཇིག་རྟེན་མཐའ་དང་ལྡན་ནམ་ཞེས། །ཞུས་ནས་རྒྱལ་བ་མི་གསུང་བཞུགས། །ཞེས་དང་། འཇུག་པར། འཇིག་རྟེན་མཐའ་ལྡན་ལ་སོགས་མེད་ཕྱིར་རོ། །ཞེས་དང་། རྩ་འཇུག་བཞི་གསུམ་གྱིས་འགྲེལ་པ་རྣམས་སུ་ཡང་། འཇིག་རྟེན་ཁོ་ན་སྨོས་པར་མཛད་པ་ནི། སློབ་དཔོན་ཟླ་བས། འཇིག་རྟེན་ཕུང་པོར་གང་གྲགས་པ། །དེ་ལ་འཇིག་རྟེན་རྣམ་པར་བརྟེན། །ཞེས་པའི་འཇིག་རྟེན་ཕྱི་མ་གང་ཟག་ལ་འཇུག་པར་གསུངས་པ་ལྟར། འདིར་ཡང་འཇིག་རྟེན་བདག་གམ་གང་ཟག་ལ་འཇུག་པས་མཚན་གཞི་འཇིག་རྟེན་སྨོས་པར་རིགས་ཏེ། ཕྱི་རོལ་པ་རྣམས་ཀྱིས་གང་ཟག་གི་བདག་ཁྱད་གཞིར་བཟུང་ནས། ཁྱད་ཆོས་བཅུ་བཞི་དྲིས་པའི་སྐབས་ཡིན་པའི་ཕྱིར་རོ། །དེ་བཞིན་དུ་ལྟ་བ་བཞི་ཚན་གསུམ་པ་དེ་བཞིན་གཤེགས་པ་གྲོངས་ཕན་ཆད་ཡོད་པ་དང་། མེད་པ་དང་། གཉིས་ཀ་དང་། གཉིས་ཀ་མ་ཡིན་པ་བཞིའང་མི་མངའ་སྟེ། གང་གིས་དེ་བཞིན་གཤེགས་པ་སྣང་དུས་ནས་རང་བཞིན་གྱིས་ཡོད་དོ་ཞེས་འཛིན་པ་སྟུག་པོས་བཟུང་བར་གྱུར་པ་དེ་ནི་དེ་བཞིན་གཤེགས་པ་མྱ་ངན་ལས་འདས་པ་ལ་སྔར་གྱི་དེ་བཞིན་གཤེགས་པ་དེ་རྒྱུན་ཆད་ནས་མེད་ཅེས་ཕྱིན་ཅི་ལོག་གི་རྣམ་རྟོག་གིས་རྟོག་པར་བྱེད་པ་ཡིན་གྱིས་སྔར་བཤད་པ་ལྟར་སངས་རྒྱས་སྣང་དུས་ནས་རང་བཞིན་གྱིས་ནི་སྟོང་པ་དེ་ལ་སངས་རྒྱས་མྱ་ངན་ལས་འདས་ནས་ནི་སངས་རྒྱས་དངོས་པོར་ཡོད་དོ་ཞེའམ། ཞིག་ནས་དངོས་པོར་མེད་དོ་ཞེའམ། དེ་གཉིས་ཀ་དང་གཉིས་ཀ་མ་ཡིན་ནོ་ཞེས་བསམ་པ་འཐད་པ་ཉིད་དུ་མི་འགྱུར་བའི་ཕྱིར། དེས་ལུས་སྲོག་གཅིག་དང་ཐ་དད་ཀྱང་མི་འཐད་པར་གྲུབ་པས་ལུང་མ་བསྟན་གྱི་ལྟ་བ་བཅུ་བཞི་པོ་ཐམས་ཅད་མི་འཐད་པར་གྲུབ་བོ། །གཉིས་པ་ནི། གང་དག་དེ་ལྟར་སངས་རྒྱས་སྤྲོས་པ་སྒྲ་བློའི་ཡུལ་ལས་འདས་ཤིང་། སྤྲོས་པ་སྔར་ཡོད་གསར་དུ་བཀག་པ་མེད་པར་གྲུབ་པ་ལ་ཕྱིན་ཅི་ལོག་གི་རྣམ་རྟོག་གིས་སྟོང་མི་སྟོང་དང་། རྟག་མི་རྟག་དང་། ཐམས་ཅད་མཁྱེན་མི་མཁྱེན་ལ་སོགས་པའི་སྤྲོས་པ་སྣ་ཚོགས་པས་སྤྲོ་བར་བྱེད་པའི་གང་ཟག་དེ་ཀུན་གྱིས་ཆོས་ཅན། དེ་བཞིན་གཤེགས་པའི་ཡོན་ཏན་ཕུན་སུམ་ཚོགས་པ་ཟབ་པ་དང་རྒྱ་ཆེ་བ་མཐོང་ཞིང་ཐོབ་པར་མི་འགྱུར་ཏེ། དེ་བཞིན་གཤེགས་པ་སྤྲོས་པ་དང་བྲལ་བ་ལ་ཤེས་བརྗོད་ཀྱི་སྤྲོས་པར་བཟུང་བས་དེ་བཞིན་གཤེགས་པའི་གནས་ཚུལ་མཐོང་བའི་བློ་གྲོས་ཀྱི་མིག་ཉམས་པ་ཡིན་པའི་ཕྱིར་རོ། །གསུམ་པ་རིག་པ་དེ་ཆོས་གཞན་ལ་བསྒྲེ་བ་ནི། དེ་ལྟར་དེ་བཞིན་གཤེགས་པའི་གང་ཟག་རང་བཞིན་མེད་པར་བསྟན་པས་སྣོད་བཅུད་ཀྱི་འགྲོ་བ་རང་བཞིན་མེད་པར་བསྟན་པ་ཡིན་ཏེ། དེ་བཞིན་གཤེགས་པའི་དོན་དམ་པའི་རང་བཞིན་གང་ཡིན་པ་དེ་ནི་སྣོད་བཅུད་ཀྱི་འགྲོ་བ་འདིའི་དོན་དམ་པའི་རང་བཞིན་ཡིན་ལ། དེ་བཞིན་གཤེགས་པ་དོན་དམ་པར་རང་བཞིན་ཅིར་ཡང་གྲུབ་པ་མེད་ཅིང་གདུལ་བྱ་ལས་དག་པའི་འཁྲུལ་ངོ་ན་ཅི་ལྟར་སྣང་བ་བརྫུན་པ་སྒྱུ་མ་ལྟ་བུར་གྲུབ་པ་ཉིད་ཀྱིས་སྣོད་བཅུད་ཀྱི་འགྲོ་བ་འདིའི་དོན་དམ་པའི་རང་བཞིན་ཅིར་ཡང་གྲུབ་པ་མེད་པ་དང་། འཁྲུལ་ངོར་དེ་ལྟར་སྣང་བ་བརྫུན་པ་སྒྱུ་མ་ལྟ་བུར་གྲུབ་པའི་ཕྱིར་རོ། །གཉིས་པ་ལུང་དང་སྦྱར་བ་ནི། མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཀུན་ཀྱང་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་ན་ནི་མེད་པའི་ཆོས་ལ་སྤྱོད། །དེ་བཞིན་གཤེགས་པ་ཟག་པ་མེད་པ་ཡི། །དགེ་བའི་ཆོས་ཀྱི་གཟུགས་བརྙན་ལྟ་བུ་ཡིན། །འདི་ན་དེ་བཞིན་ཉིད་དང་དེ་བཞིན་གཤེགས་པ་མེད། །འཇིག་རྟེན་ཐམས་ཅད་ཀྱིས་ནི་གཟུགས་བརྙན་མཐོང་། །ཞེས་དང་། བཅོམ་ལྡན་འདས་མ་ལས། དེ་ནས་ལྷའི་བུ་དེ་དག་གིས་གནས་བརྟན་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར་ཡང་དག་པར་རྫོགས་པའི་སངས་རྒྱས་ཀྱང་སྒྱུ་མ་ལྟ་བུ་ཞེས་སྨྲའམ། ཡང་དག་པར་རྫོགས་པའི་སངས་རྒྱས་ཉིད་ཀྱང་སྒྱུ་མ་ལྟ་བུ་རྨི་ལམ་ལྟ་བུ་ཞེས་སྨྲའམ། རབ་འབྱོར་གྱིས་སྨྲས་པ། ལྷའི་བུ་དག་མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུར་སྨྲས་ན། ཆོས་གཞན་ལྟ་ཅི་སྨོས། ལྷའི་བུ་དག་གིས་སྨྲས་པ། འཕགས་པ་རབ་འབྱོར་མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུའོ་ཞེས་སྨྲའམ། རབ་འབྱོར་གྱིས་སྨྲས་པ་ལྷའི་བུ་དག་ཁོ་བོ་ནི་གལ་ཏེ་མྱ་ངན་འདས་པ་བས་ཆེས་ཁྱད་པར་དུ་འཕགས་པའི་ཆོས་འགའ་ཞིག་ཡོད་ན་ཡང་དེ་ཡང་བདག་སྒྱུ་མ་ལྟ་བུ་རྨི་ལམ་ལྟ་བུའོ། །ཞེས་སྨྲའོ། །དེ་ལྟར་ན་རྨི་ལམ་དང་མྱ་ངན་ལས་འདས་པ་འདི་དག་ནི་གཉིས་སུ་མེད་དེ་གཉིས་སུ་བྱར་མེད་དོ། །ཞེས་གསུངས་ཏེ། བསྟན་ཚུལ་ནི་སྔ་མ་དང་འདྲའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། དེ་བཞིན་གཤེགས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་གཉིས་པའི་རྣམ་པར་བཤད་པའོ།། །།གཉིས་པ་རྒྱུ་ཕྱིན་ཅི་ལོག་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། འདིར་སྲིད་པའི་རྒྱུན་གྱི་འབྲས་བུ་དེ་བཞིན་གཤེགས་པ་བཀག་ཀྱང་སྲིད་པའི་རྒྱུན་ནི་ཡོད་པ་ཉིད་དེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་དང་། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ་ཞེས་གསུངས་པའི་ཚུལ་གྱིས་དེའི་གཙོ་བོའི་རྒྱུ་ཉོན་མོངས་པ་ཡོད་པའི་ཕྱིར་རོ་ཞེ་ན། རྒྱུ་ཉོན་མོངས་པ་ནི་རང་བཞིན་མེད་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གཉིས་ཏེ། ཉོན་མོངས་པ་ཉིད་དགག་པ། དེའི་སྒྲུབ་བྱེད་སྤོང་བའི་ཐབས་ཚོལ་བ་དགག་པའོ། །དང་པོ་ལ་གཉིས་ཏེ། དུག་གསུམ་ཐུན་མོང་དུ་དགག་པ། བྱེ་བྲག་ཏུ་དགག་པའོ། །དང་པོ་ལ་བཞི་སྟེ། བརྟེན་ནས་འབྱུང་བའི་རྟགས་ཀྱིས་དགག རྟེན་མེད་པའི་རྟགས་ཀྱིས་དགག རྒྱུ་མེད་པའི་རྟགས་ཀྱིས་དགག དམིགས་པ་མེད་པའི་རྟགས་ཀྱིས་དགག་པའོ། །དང་པོ་ནི། རེ་ཤིག་རང་གི་སྡེ་པ་ལ་ཐུབ་པའི་ལུང་གིས་དགག་ན། མདོ་ལས་ཉོན་མོངས་པའི་གཙོ་བོ་འདོད་ཆགས་ཞེ་སྡང་གཏི་མུག་རྣམས་ཐུན་མོང་དུ་དངོས་པོར་འཛིན་པའི་ཀུན་ཏུ་རྟོག་པ་ལས་འབྱུང་བར་གསུངས་ཏེ། ཅི་སྐད་དུ། འདོད་པ་ཁྱོད་ཀྱི་རྩ་བ་ནི། །ཤེས་ཏེ་ཀུན་ཏུ་རྟོག་ལས་བྱུང་། །ཁྱོད་ལ་རྟོག་པར་མི་འགྱུར་བ། །དེ་ཕྱིར་ང་ལ་མི་འབྱུང་ངོ་། །ཞེས་གསུངས་ཤིང་། བྱེ་བྲག་ཏུ་དེ་དག་རིམ་པ་ལྟར། ཡུལ་སྡུག་པ་དང་མི་སྡུག་པ་དང་། གནས་ལུགས་ལས་བཟློག་པས་ཕྱིན་ཅི་ལོག་སྟེ། རྣམ་གྲངས་གསུམ་བསྟན་པ་ཉིད་ལས་ཀུན་ཏུ་འབྱུང་བའི་ཕྱིར་རོ། །དེས་ན་ཉོན་མོངས་པ་དེ་དག་ཆོས་ཅན། ཡང་དག་པར་མེད་དེ། རང་གི་རང་བཞིན་ལས་མེད་པའི་ཕྱིར་ཏེ། ཁྱོད་གང་དག་སྡུག་པ་དང་མི་སྡུག་པ་དང་། ཕྱིན་ཅི་ལོག་གི་རྣམ་པ་གསུམ་ཀའམ་ཡུལ་ཅན་དེ་དག་ཏུ་འཛིན་པ་ལ་བརྟེན་ནས་འབྱུང་བ་ཡིན་པའི་ཕྱིར། གཉིས་པ་ལ་གཉིས་ཏེ། རྟེན་བདག་དགག་པ། རྟེན་སེམས་དགག་པའོ། །དང་པོ་ནི། གང་ཟག་གི་བདག་གི་ཡོད་པ་ཉིད་དང་། དེ་བཀག་པའི་མེད་པ་ཉིད་ནི་རྣམ་པར་དཔྱད་ན་ཅི་ལྟ་བུར་ཡང་འགྲུབ་པ་མེད་དེ། དེ་ལ་ཡོད་དོ་མེད་དོ་ཞེས། །རྟོག་པ་དག་ནི་ལྡོག་པར་འགྱུར། །ཞེས་སྔར་བཀག་ཟིན་པའི་ཕྱིར། དེའི་ཕྱིར་རྟེན་དེ་མེད་ན། དེ་ལ་བརྟེན་པའི་ཉོན་མོངས་རྣམས་ཀྱི་ནི་རང་བཞིན་ཡོད་པ་ཉིད་དང་། དེ་བཀག་པའི་མེད་པ་ཉིད་ཅི་ལྟར་འགྲུབ་སྟེ། རྟེན་མེད་པའི་ཕྱིར། དེ་ཉིད་བསྒྲུབ་པ་ནི་རྟེན་འགའ་མེད་པ་ནི་རྟེན་གང་གི་ཡང་བརྟེན་པ་ཉོན་མོངས་པ་དག་ཡོད་པ་མ་ཡིན་ཏེ། ཉོན་མོངས་པ་དེ་དག་གང་གི་ཡིན་པའི་རྟེན་བདག་དེ་ཡང་རང་བཞིན་གྱིས་གྲུབ་པ་ཡོད་པ་མ་ཡིན་པའི་ཕྱིར། གཉིས་པ་ནི་མདོ་སྡེ་པ་དང་། སེམས་ཙམ་པ་དག་རྟེན་བདག་མེད་པ་ནི་བདེན་མོད་ཀྱི། འོན་ཀྱང་ཉོན་མོངས་ཅན་གྱི་སེམས་ལ་བརྟེན་ནས་ཉོན་མོངས་པ་སྐྱེ་བར་འགྱུར་བས་རྟེན་མེད་པ་མ་གྲུབ་བོ་ཞེ་ན། ཉོན་མོངས་པ་རྣམས་ཆོས་ཅན། ཉོན་མོངས་པ་ཅན་གྱི་སེམས་ལ་རྣམ་པ་ལྔར་བཙལ་ན་མེད་དེ། དེ་ཉིད་ཡིན་ན་བྱེད་པ་པོ་དང་ལས་གཅིག་ཏུ་འགྱུར་བ་དང་། གཞན་ཉིད་ཡིན་ན་ཉོན་མོངས་ཅན་ལ་མ་ལྟོས་པར་འགྱུར་བ་དང་། རྟེན་དང་བརྟེན་པ་ཡིན་ན་ངོ་བོ་གཞན་དུ་འགྱུར་བ་དང་། ལྡན་པ་ཡིན་ན། དེ་ཉིད་དང་གཞན་ཉིད་གང་རུང་དུ་འགྱུར་བའི་ཕྱིར་རོ། །དཔེར་ན་རང་ལུས་ཕུང་པོ་ལ་བརྟེན་ནས་ལྟ་བའི་བདག་དེ་ཕུང་པོ་ལས་རྣམ་ལྔར་མེད་པ་བཞིན་ནོ། །ཉོན་མོངས་ཅན་གྱི་སེམས་དེ་ཆོས་ཅན། ཉོན་མོངས་པ་ལས་རྣམ་པ་ལྔར་བཙལ་ན་མེད་དེ། རྒྱུ་མཚན་གཞན་འདྲ་བ་ལས་གཉིས་པ་གཞན་ཡིན་ན་ཉོན་མོངས་པ་ལ་མ་ལྟོས་པའི་ཉོན་མོངས་ཅན་ཡོད་པར་འགྱུར་བས་དགྲ་བཅོམ་པ་ལ་ཡང་དེ་ཡོད་པར་འགྱུར་བའི་ཕྱིར། དཔེར་ན་རང་ལུས་ཕུང་པོ་ལ་བརྟེན་ནས་བདག་ཏུ་ལྟ་བའི་བདག་དེ་ཕུང་པོ་ལ་རྣམ་པ་ལྔར་བཙལ་ན་མེད་པ་བཞིན་ནོ། །གསུམ་པ་ནི། སྔར་བཤད་པ་ལྟར་ཉོན་མོངས་པ་དེ་དག་སྡུག་མི་སྡུག་ཕྱིན་ཅི་ལོག་ལ་བརྟེན་ནས་འབྱུང་བ་ཡིན་ལ། རྒྱུ་སྡུག་པ་དང་། མི་སྡུག་པ་དང་། ཕྱིན་ཅི་ལོག་ལ་བརྟེན་ནས་ཉོན་མོངས་པ་རང་བཞིན་གྱིས་གྲུབ་པ་གང་དག་ཡིན་ཏེ། རྒྱུ་སྡུག་པ་དང་མི་སྡུག་པ་དང་ཕྱིན་ཅི་ལོག་ངོ་བོ་ཉིད་ལས་ཡོད་པ་མ་ཡིན་པའི་ཕྱིར། བཞི་པ་ནི། ཉོན་མོངས་པ་དེ་དག་རང་བཞིན་གྱིས་ཡོད་དེ། དེ་དག་གི་གཞིའམ་དམིགས་པ་རང་བཞིན་གྱིས་ཡོད་པའི་ཕྱིར་ཞེ་ན། གཟུགས་སྒྲ་རོ་དང་རེག་པ་དང་། དྲི་དང་ཆོས་དག་རྣམ་དྲུག་ནི་འདོད་ཆགས་དང་ཞེ་སྡང་དང་གཏི་མུག་གི་ནི་གཞི་སྟེ་དམིགས་པ་ཡིན་པར་ཁྱོད་ཀྱིས་བརྟགས་མོད་ཀྱི། འོན་ཀྱང་དེ་ལ་དམིགས་པའི་ཉོན་མོངས་པ་རང་བཞིན་གྱིས་མ་གྲུབ་སྟེ། གཟུགས་སྒྲ་རོ་དང་རེག་པ་དང་། དྲི་དང་ཆོས་དག་ནི་བློས་བརྟགས་པ་ཙམ་འབའ་ཞིག་སྟེ་བདེན་པས་སྟོང་པའི་ཕྱིར། གལ་ཏེ་ཡུལ་དེ་དག་རང་བཞིན་མེད་ན་ཅི་ལྟར་སྣང་ཞེ་ན། རང་བཞིན་མེད་ཀྱང་སྣང་བ་མི་འགལ་ཏེ། སྣང་བ་དེ་ནི་དྲི་ཟའི་གྲོང་ཁྱེར་ལྟ་བུ་དང་། སྨིག་རྒྱུའི་ཆུ་ལྟ་བུ་དང་རྨི་ལམ་དང་འདྲ་བར་བློ་འཁྲུལ་པ་ལ་དེ་ལྟར་སྣང་བ་ཙམ་ཡིན་པའི་ཕྱིར་རོ། །གཉིས་པ་བྱེ་བྲག་ཏུ་དགག་པ་ལ་གཉིས་ཏེ། འདོད་ཆགས་དང་ཞེ་སྡང་དགག གཏི་མུག་དགག་པའོ། །དང་པོ་ལ་གཉིས་ཏེ། རྒྱུ་སྡུག་མི་སྡུག་དགག དེས་འབྲས་བུ་ཁེགས་པར་བསྟན་པའོ། །དང་པོ་ལ་གཉིས་ཏེ། རྟེན་བརྫུན་པས་དགག ཕན་ཚུན་བརྟེན་པས་དགག་པའོ། །དང་པོ་ནི། རྟེན་གཟུགས་ལ་སོགས་པ་སྒྱུ་མའི་སྐྱེས་བུ་ལྟ་བུ་དང་། གཟུགས་བརྙན་དང་འདྲ་བའི་བརྫུན་པ་རང་བཞིན་མེད་པ་དེ་དག་ལ་སྡུག་པ་དང་མི་སྡུག་པ་འབྱུང་བར་ཡང་ནི་ག་ལ་འགྱུར་ཏེ། རྟེན་སྡུག་མི་སྡུག་གི་རྣམ་པ་བདེན་པར་མེད་པའི་ཕྱིར། གཉིས་པ་ནི། གལ་ཏེ་དངུལ་བུམ་ལྟ་བུ་སྡུག་པ་འགའ་ཞིག་ཡོད་ན་ནི་མི་སྡུག་པ་ལ་མ་ལྟོས་པར་ཡོད་དམ་ལྟོས་ནས་ཡོད། དང་པོ་ལྟར་ན། གསེར་བུམ་ལས་ཀྱང་སྡུག་པར་འགྱུར་ལ། གཉིས་པ་ལྟར་ན་སྡུག་པར་འཐད་པ་མ་ཡིན་ཏེ། ཟངས་བུམ་ལྟ་བུའི་མི་སྡུག་པ་གང་ལ་བརྟེན་ནས་དེ་སྡུག་པ་ཞེས་གདགས་པར་བྱ་བའི་ལྟོས་ས་ཟངས་བུམ་མི་སྡུག་པ་དེ་ཉིད་ཀྱང་དངུལ་བུམ་སྡུག་པ་རང་ལ་མ་ལྟོས་པར་ཡོད་པ་མ་ཡིན་པ་དེའི་ཕྱིར། ཡང་ཟངས་བུམ་ལྟ་བུ་མི་སྡུག་པ་འགའ་ཞིག་ཡོད་ན་སྡུག་པ་ལ་མ་ལྟོས་པར་ཡོད་དམ། ལྟོས་ནས་ཡོད། དང་པོ་ལྟར་ན་རྫ་བུམ་ལས་ཀྱང་མི་སྡུག་པར་འགྱུར་ལ། གཉིས་པ་ལྟར་ན་དེ་མི་སྡུག་པར་འཐད་པ་མ་ཡིན་ཏེ། དངུལ་བུམ་ལྟ་བུ་སྡུག་པ་གང་ལ་བརྟེན་ནས་མི་སྡུག་པ་གདགས་པར་བྱ་བའི་ལྟོས་ས་དངུལ་བུམ་ལྟ་བུ་སྡུག་པ་དེ་ཉིད་ཀྱང་ནི་ཟངས་བུམ་མི་སྡུག་པ་རང་ལ་མི་ལྟོས་པར་གྲུབ་པ་ཡོད་པ་མ་ཡིན་པའི་ཕྱིར། གཉིས་པ་ནི། དེ་ལྟར་ཡུལ་སྡུག་པ་ཡོད་པ་མ་ཡིན་ན། དེའི་འབྲས་བུ་འདོད་ཆགས་རང་བཞིན་གྱིས་ཡོད་པར་ག་ལ་འགྱུར་ཞིང་། ཡུལ་མི་སྡུག་པ་ཡོད་པ་མ་ཡིན་ན། འབྲས་བུ་ཞེ་སྡང་རང་བཞིན་གྱིས་ཡོད་པར་ག་ལ་འགྱུར་ཏེ། གང་གི་ས་བོན་བརྫུན་པ་དེའི། །འབྲས་བུ་བདེན་པ་ག་ལ་ཞིག །ཞེས་པའི་ཚུལ་གྱིས་རྒྱུ་བརྫུན་པ་ལས་འབྲས་བུ་བདེན་པ་མི་སྲིད་པའི་ཕྱིར། གཉིས་པ་གཏི་མུག་དགག་པ་ལ་གཉིས་ཏེ། རྒྱུ་ཕྱིན་ཅི་ལོག་དགག་པ། དེ་བཀག་པའི་འབྲས་བུའོ། །དང་པོ་ལ་གཉིས་ཏེ། ཕྱིན་ཅི་ལོག་མ་ལོག་གི་ཁྱད་པར་དགག་པ། དེ་དག་ཏུ་འཛིན་པ་པོའི་གང་ཟག་དགག་པའོ། །དང་པོ་ལ་གཉིས་ཏེ། ཡུལ་ཅིར་ཡང་མ་གྲུབ་པར་མཚུངས་པ། འཛིན་པ་ཙམ་མ་གྲུབ་པའོ། །དང་པོ་ལ་གཉིས་ཏེ། རྟག་སོགས་འཛིན་པ་ལོག་པར་མི་གྲུབ་པ། མི་རྟག་སོགས་འཛིན་པ་མ་ལོག་པར་མི་གྲུབ་པའོ། །དང་པོ་ནི། སྤྱིར་ཕུང་པོ་ལྔ་མི་རྟག་པ་དང་། སྡུག་བསྔལ་བ་དང་། མི་གཙང་བ་དང་། བདག་མེད་པ་ལ་རྟག་པ་དང་། བདེ་བ་དང་། གཙང་བ་དང་། བདག་ཏུ་འཛིན་པ་ཕྱིན་ཅི་ལོག་ཡིན་ནོ་ཞེས་རྣམ་པར་འཇོག་པ་ཡིན་ན། ཅི་ཕུང་པོ་མི་རྟག་པ་ལ་སོགས་པར་གནས་པ་ལ་རྟག་སོགས་སུ་འཛིན་པས་ཕྱིན་ཅི་ལོག་ཡིན་ནམ། རྟག་སོགས་སུ་མི་གནས་པ་ལ་རྟག་སོགས་སུ་འཛིན་པས་ཕྱིན་ཅི་ལོག་ཡིན། སྔ་མ་ལྟར་གལ་ཏེ་ཕུང་པོ་མི་རྟག་པར་གནས་པ་ལ་རྟག་པ་ཞེས་འཛིན་པས་ལོག་པར་འཇོག་པ་ཡིན་ན། ཕུང་པོ་ཆོས་ཅན། རྟག་པར་འཛིན་པ་ཅི་ལྟར་ལོག་པ་ཡིན་ཏེ། མ་ཡིན་པར་ཐལ། ཕུང་པོ་རང་བཞིན་གྱིས་སྟོང་པ་ལ་མི་རྟག་པ་ཡང་ཡོད་པ་མིན་པའི་ཕྱིར་རོ། །དེ་བཞིན་དུ། གལ་ཏེ་སྡུག་བསྔལ་བདེའོ་ཞེས། །དེ་ལྟར་འཛིན་པ་ལོག་ཡིན་ན། །སྟོང་ལ་སྡུག་བསྔལ་ཡོད་མིན་པས། །འཛིན་པ་ཅི་ལྟར་ལོག་པ་ཡིན། །ཞེས་ལྷག་མ་གསུམ་ལ་ཡང་སྦྱར་བར་བྱའོ། །གཉིས་པ་ནི། གལ་ཏེ་བརྟག་པ་ཕྱི་མ་ལྟར་མི་རྟག་པའི་དོན་རྟག་པ་ཤེས་བྱ་ལ་མེད་པ་ལ་རྟག་གོ་ཞེས་དེ་ལྟར་འཛིན་པ་ལོག་པ་ཡིན་ནོ་ཞེས་རྣམ་པར་འཇོག་པ་ཡིན་ན། ཕུང་པོ་ཆོས་ཅན། དེ་ལ་མི་རྟག་པའོ། །ཞེས་འཛིན་པ་ཡང་ཅི་ལྟར་ལོག་པ་མ་ཡིན་ཏེ། ཡིན་པར་ཐལ། ཕུང་པོ་རང་བཞིན་གྱིས་སྟོང་པ་ལ་ཅི་ལྟར་བཟུང་བ་ལྟར་གྱི་མི་རྟག་པ་ཡང་ཡོད་མ་ཡིན་པའི་ཕྱིར་རོ། །དེ་བཞིན་དུ། གལ་ཏེ་སྡུག་བསྔལ་བདེའོ་ཞེས། །དེ་ལྟར་འཛིན་པ་ལོག་ཡིན་ན། །སྟོང་ལ་སྡུག་བསྔལ་ཡོད་མིན་པས། །འཛིན་པའང་ཇི་ལྟར་ལོག་མ་ཡིན། །ཞེས་སོགས་ལྷག་མ་གསུམ་ལ་ཡང་སྦྱར་བར་བྱའོ། །གཉིས་པ་ནི། དེ་ལྟར་ལོག་མ་ལོག་ཏུ་འཛིན་པ་བཀག་ཀྱང་འཛིན་པའི་བྱ་བ་ཙམ་མ་བཀག་པས་ཡོད་ལ། དེ་ཡོད་པས་དེའི་སྒྲུབ་བྱེད་བྱེད་པ་དང་། བྱེད་པ་པོ་དང་། ལས་ཀྱང་ཡོད་དོ་ཞེ་ན། མ་ཡིན་ཏེ། བྱེད་པ་རྟག་པ་ལ་སོགས་པ་གང་གིས་འཛིན་པ་དང་། འཛིན་པའི་བྱ་བ་གང་ཡིན་པ་དང་། འཛིན་པ་པོ་བདག་གམ་སེམས་དང་། གཟུང་བར་བྱ་བའི་ཡུལ་གཟུགས་ལ་སོགས་པ་ཐམས་ཅད་རྐྱེན་བརྟག་པ་སྤྱི་ལྡོག་ནས་བཀག་པས་ཐམས་ཅད་ཉེ་བར་ཞི་བ་སྟེ། དེའི་ཕྱིར་འཛིན་པ་ཙམ་ཡོད་པ་མ་ཡིན་ལ། དེ་མེད་པས་ཕྱིན་ཅི་ལོག་དང་མ་ལོག་པར་འཛིན་པ་ཡང་མ་གྲུབ་པའི་ཕྱིར་རོ། །གཉིས་པ་དེ་དག་ཏུ་འཛིན་པ་པོའི་གང་ཟག་དགག་པ་ལ་གཉིས་ཏེ། ལོག་པ་དང་མ་ལོག་པར་འཛིན་པའི་གང་ཟག་སྤྱིར་དགག་པ། བྱེ་བྲག་ཏུ་ཕྱིན་ཅི་ལོག་འཛིན་པ་པོ་དགག་པའོ། །དང་པོ་ནི། ཕྱིན་ཅི་ལོག་མ་ལོག་ནི་རང་བཞིན་གྱིས་ཡོད་དེ། དེ་དག་དང་ལྡན་པའི་འཛིན་པ་པོའི་གང་ཟག་ཡོད་པའི་ཕྱིར་རོ་སྙམ་ན། གང་ཟག་གང་ལ་ཕྱིན་ཅི་ལོག་ཡོད་ཅིང་། གང་ཟག་གང་ལ་ཕྱིན་ཅི་མ་ལོག་ཡོད་དེ། དེ་གཉིས་དང་ལྡན་པ་ཡང་མེད་དེ། ཅི་སྐད་བཤད་པ་དེ་ལྟར་འཛིན་པ་ཙམ་མེད་པས་ཕྱིན་ཅི་ལོག་པའམ། དེ་ལ་ལྟོས་པའི་ཡང་དག་ཉིད་དུ་ནི་འཛིན་པ་ཡོད་པ་མིན་པའི་ཕྱིར་རོ། །གཉིས་པ་ལ་གསུམ་སྟེ། རྟེན་གསུམ་ལ་མི་སྲིད་པ། མཐའ་གསུམ་ལས་མ་སྐྱེས་པ། ཡུལ་ཡོད་མེད་ལ་མཚུངས་པའོ། །དང་པོ་ནི། ཡུལ་ལམ་རྟེན་ཕྱིན་ཅི་ལོག་ཏུ་གྱུར་པ་ལ་ནི་ཕྱིན་ཅི་ལོག་དག་མི་སྲིད་དེ། དེའི་བྱ་བ་འགག་པའི་ཕྱིར་དང་། དོན་མེད་པའི་ཕྱིར་རོ། །ཕྱིན་ཅི་ལོག་ཏུ་མ་གྱུར་པ་དག་ལའང་ཕྱིན་ཅི་ལོག་དག་མི་སྲིད་དེ། དེའི་བྱ་བ་མ་སྐྱེས་པའི་ཕྱིར་དང་། ཕན་ཚུན་འགལ་བའི་ཕྱིར་རོ། །ཕྱིན་ཅི་ལོག་ཏུ་གྱུར་བཞིན་པ་ལ་ནི་ཕྱིན་ཅི་ལོག་དག་མི་སྲིད་དེ། གྱུར་མ་གྱུར་ལས་གཞན་པའི་གྱུར་བཞིན་པ་མེད་པའི་ཕྱིར་རོ། །དེའི་ཕྱིར་ཡུལ་ལམ་རྟེན་གྱི་གང་ཟག་གང་ལ་ཕྱིན་ཅི་ལོག་སྲིད་ཅེས་བདག་ཉིད་གཟུ་བོར་གྱུར་པའི་ཤེས་རབ་ཀྱིས་ནི་རྣམ་པར་དཔྱོད་དེ། དེ་ལྟར་དཔྱད་པ་ན་ཕྱིན་ཅི་ལོག་དང་ལྡན་པ་མི་རྙེད་དོ། །གཞན་ཡང་ཕྱིན་ཅི་ལོག་རྣམས་མ་སྐྱེས་ན་དེ་དང་ལྡན་པ་ཅན་ཅི་ལྟ་བུར་ན་ཡོད་པར་འགྱུར་ཏེ། དེ་ལྟར་ཕྱིན་ཅི་ལོག་རྣམས་སྐྱེ་བ་མེད་པས་མེད་ན་ཕྱིན་ཅི་ལོག་ཅན་ག་ལ་ཡོད་དེ། དེ་ཡང་མ་སྐྱེས་པས་མེད་པར་གྲུབ་པའི་ཕྱིར་རོ། །གཉིས་པ་ནི། ཕྱིན་ཅི་ལོག་གི་དངོས་པོ་རྣམས་བདག་ལས་མི་སྐྱེ་སྟེ། གཞན་ལས་སྐྱེ་བ་ཉིད་མ་ཡིན། བདག་དང་གཞན་གཉིས་ཀ་ལས་ཀྱང་སྐྱེ་བ་མིན་ན། ཕྱིན་ཅི་ལོག་ཅན་ག་ལ་ཡོད་དེ། མ་སྐྱེ་པས་མེད་ན་དེ་དང་ལྡན་པ་ཅན་མི་གྲུབ་པར་བཤད་ཟིན་པའི་ཕྱིར། གསུམ་པ་ནི། གལ་ཏེ་ཉེ་བར་ལེན་པའི་ཕུང་པོ་ལ་བདག་དང་། གཙང་བ་དང་། རྟག་པ་དང་། བདེ་བ་ཡོད་ན་ནི་བདག་དང་གཙང་བ་དང་། རྟག་པ་དང་། བདེ་བར་འཛིན་པ་ཕྱིན་ཅི་ལོག་མ་ཡིན་ཏེ། ཡུལ་ཡོད་པ་ལ་ཡོད་པར་འཛིན་པའི་ཕྱིར་རོ། །གལ་ཏེ་ཉེ་བར་བླང་བྱའི་ཕུང་པོ་ལ་བདག་དང་། གཙང་བ་དང་། རྟག་པ་དང་། བདེ་བ་མེད་ན་ནི། བདག་མེད་དང་། མི་གཙང་བ་དང་། རྟག་མེད་དེ་མི་རྟག་པ་དང་། སྡུག་བསྔལ་བར་འཛིན་པ་ཡང་ཕྱིན་ཅི་མ་ལོག་པ་མ་ཡིན་ཏེ། དགག་བྱ་བདག་སོགས་མེད་པས་དེ་བཀག་པའི་བདག་མེད་སོགས་ཀྱང་ཡོད་པ་མ་ཡིན་པའི་ཕྱིར་རོ། །གཉིས་པ་དེ་བཀག་པའི་འབྲས་བུ་ནི། དེ་ལྟར་ཕྱིན་ཅི་ལོག་དཔྱད་ན་མ་རྙེད་པས་ཕྱིན་ཅི་ལོག་ཏུ་འཛིན་པ་འགག་པར་འགྱུར་ཏེ། ཞེན་ཡུལ་མ་རྙེད་པས་ཞེན་བྱེད་ཀྱི་བློ་ལྡོག་པ་རིག་པའི་ཚུལ་ཡིན་པའི་ཕྱིར་རོ། །ཕྱིན་ཅི་ལོག་འགགས་པས་མ་རིག་པ་ནི་འགགས་པར་འགྱུར་ཏེ། དེ་ཕྱིན་ཅི་ལོག་ལ་བརྟེན་པའི་ཕྱིར་རོ། །རྒྱུ་མ་རིག་པ་འགགས་པར་གྱུར་ན་ནི་དེའི་འབྲས་བུ་འདུ་བྱེད་ལ་སོགས་པ་སྟེ་རྒ་ཤིའི་མཐར་ཐུག་པ་སྡུག་བསྔལ་གྱི་ཚོགས་མ་ལུས་པ་འགགས་པར་འགྱུར་ཏེ། རྒྱུ་མེད་ན་འབྲས་བུ་མི་འབྱུང་བའི་ཕྱིར་རོ། །དེ་ལྟར་ན་ཕྱིན་ཅི་ལོག་ལ་དཔྱད་ན་ནི་དོན་ཆེན་པོ་ཅན་ཡིན་ཏེ། དེ་ལ་དཔྱད་པས་འཁོར་བ་རྒྱུ་འབྲས་འགག་པར་འགྱུར་བའི་ཕྱིར་རོ། །གཉིས་པ་དེའི་སྒྲུབ་བྱེད་གཉེན་པོས་སྤོང་བ་དགག་པ་ནི། གལ་ཏེ་དེ་ལྟར་མ་རིག་པ་ལ་སོགས་པ་སྤོང་བའི་གཉེན་པོ་ཡོད་པའི་ཕྱིར་དེ་དག་ཀྱང་ཡོད་པ་ཉིད་དེ། མེད་པ་ནི་ནམ་མཁའི་ཆུ་སྐྱེས་ལྟར་སྤོང་མི་ནུས་པའི་ཕྱིར་ཞེ་ན། གཉེན་པོས་སྤོང་ན་རང་བཞིན་གྱིས་ཡོད་པ་ཞིག་སྤོང་ངམ་མེད་པ་ཞིག་སྤོང་། གལ་ཏེ་གང་ཟག་ལ་ལའི་ཉོན་མོངས་པ་འདོད་ཆགས་ལ་སོགས་པ་གང་དག་རང་བཞིན་གྱིས་ཡོད་ན་ཅི་ལྟ་བུར་ན་སྤོང་བར་འགྱུར་ཏེ། རང་བཞིན་གྱིས་ཡོད་པའི་ཕྱིར། ཁྱབ་པ་ནི་རང་བཞིན་གྱིས་ཡོད་པ་སུ་ཞིག་སྤོང་བར་བྱེད་ཅེས་པའོ། །གལ་ཏེ་གང་ཟག་ལ་ལའི་ཉོན་མོངས་པ་འདོད་ཆགས་ལ་སོགས་པ་གང་དག་རང་བཞིན་གྱིས་མེད་ན་ནི་ཅི་ལྟ་བུར་ན་རང་བཞིན་གྱིས་སྤོང་བར་འགྱུར་ཏེ། རང་བཞིན་གྱིས་མེད་པའི་ཕྱིར། ཁྱབ་པ་ནི་མེད་པ་སུ་ཞིག་སྤོང་བར་བྱེད་ཅེས་པའོ། །གཉིས་པ་ལུང་དང་སྦྱར་བ་ནི། ཇི་སྐད་དུ། འཕགས་པ་ཏིང་ངེ་འཛིན་གྱི་རྒྱལ་པོ་ལས་ཀྱང་། གཟུགས་ཀྱིས་ཀྱང་ནི་བྱང་ཆུབ་བསྟན། །བྱང་ཆུབ་ཀྱིས་ཀྱང་གཟུགས་བསྟན་ཏེ། །མི་མཚུངས་པ་ཡི་སྒྲ་རྣམས་ཀྱིས། །ཆོས་ཀྱི་བླ་མ་རབ་ཏུ་བསྟན། །སྒྲ་ཡི་གཟུགས་ཀྱི་བླ་མ་སྟེ། །ངོ་བོ་ཉིད་ཀྱིས་ཟབ་པ་དག །གཟུགས་དང་བྱང་ཆུབ་མཉམ་པ་སྟེ། །ཐ་དད་བྱ་བ་དེ་མི་རྙེད། །མྱ་ངན་འདས་པ་ཟབ་པར་ཡང་། །སྒྲ་ཡིས་རབ་ཏུ་བསྟན་པ་ལྟར། །མྱ་ངན་འདས་པ་མི་རྙེད་དེ། །དེ་ཡི་སྒྲ་ཡང་མི་རྙེད་དོ། །སྒྲ་དང་མྱ་ངན་འདས་པ་ནི། །གཉིས་ཀའང་རྙེད་པར་མི་འགྱུར་ཏེ། །དེ་བཞིན་སྟོང་པའི་ཆོས་རྣམས་ལ། །མྱ་ངན་འདས་པ་རབ་ཏུ་བསྟན། །མྱ་ངན་འདས་དང་འདའ་བ་ནི། །མྱ་ངན་འདས་པ་མི་རྙེད་དེ། །འདི་ནི་ཆོས་རྣམས་འཇུག་པ་མེད། །ཕྱིས་ནི་ཅི་འདྲ་དེ་བཞིན་སྔོན། །ཆོས་རྣམས་ཐམས་ཅད་རང་བཞིན་གྱིས། །མྱ་ངན་འདས་དང་མཚུངས་མཉམ་པར། །སངས་རྒྱས་བསྟན་ལ་བརྩོན་པ་ཡི། །འབྱུང་བ་དེ་དག་རྣམས་ཀྱིས་རིག །ཞེས་གསུངས་པ་དང་། དེ་བཞིན་དུ། ཡེ་ཤེས་ཀྱིས་ནི་ཕུང་པོ་སྟོང་ཉིད་མཁྱེན། །མཁྱེན་ནས་ཉོན་མོངས་རྣམས་དང་མི་འགྲོགས་ཏེ། །བརྗོད་པ་ཙམ་གྱི་སྒོ་ནས་བརྗོད་བྱ་ཞིང་། །མྱ་ངན་འདས་བཞིན་འཇིག་རྟེན་འདིར་དཔྱད་བྱ། །ཞེས་གསུངས་ཏེ་བསྟན་ཚུལ་ནི་སྔ་མ་དང་འདྲའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེད་ལས། ཕྱིན་ཅི་ལོག་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉེར་གསུམ་པའི་རྣམ་པར་བཤད་པའོ།། །།གསུམ་པ་དེ་ལ་ཧ་ཅང་ཐལ་བ་སྤང་པ་ལ་གཉིས་ཏེ། འཕགས་པའི་བདེན་པ་སོགས་མེད་པར་ཐལ་བ་སྤོང་བ། མྱ་ངན་ལས་འདས་པ་མེད་པར་ཐལ་བ་སྤོང་བའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཆོས་ཐམས་ཅད་སྟོང་པ་ཉིད་ཡིན་ན། འཕགས་པའི་བདེན་པ་སོགས་མེད་པར་ཐལ་ལོ། །ཞེས་པའི་རྩོད་པ་སྤོང་བའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་ལ་གཉིས་ལས། དང་པོ་རིག་པས་བསྟན་པ་ལ་གཉིས་ཏེ། རྒོལ་བ་དང་། ལན་ནོ། །དང་པོ་ལ་ལྔ་སྟེ། ཤེས་བྱ་འཕགས་པའི་བདེན་བཞི་མེད་པར་ཐལ་བ། ཡུལ་ཅན་ལམ་གྱི་ཡེ་ཤེས་མེད་པར་ཐལ་བ། འབྲས་བུ་དཀོན་མཆོག་གསུམ་མེད་པར་ཐལ་བ། ལས་དང་འབྲས་བུ་མེད་པར་ཐལ་བ། འཇིག་རྟེན་པའི་ཐ་སྙད་མི་འཐད་པར་ཐལ་བའོ། །དང་པོ་ནི། གལ་ཏེ་ཆོས་འདི་དག་ཀུན་རང་བཞིན་གྱིས་སྟོང་ན། རང་བཞིན་གྱིས་སྟོང་པ་ནི་མེད་པའི་དོན་ཡིན་ཏེ། འབྱུང་བ་མེད་ཅིང་འཇིག་པ་མེད་པར་འགྱུར་རོ། །དེ་འདོད་ན་འཕགས་པའི་བདེན་པ་བཞི་པོ་རྣམས་ཁྱོད་ཀྱི་ལུགས་ལ་མེད་པར་ཐལ་བར་འགྱུར་རོ། །གཉིས་པ་ནི། སྔ་མ་ལ་འདོད་ན། འཕགས་པའི་བདེན་པ་བཞི་མེད་པས་སྡུག་བསྔལ་ཡོངས་སུ་ཤེས་པ་དང་། ཀུན་འབྱུང་སྤོང་བ་དང་། ལམ་བསྒོམ་པ་དང་། འགོག་པ་མངོན་དུ་བྱ་བ་དག་འཐད་པར་འགྱུར་བ་མིན་ནོ། །གསུམ་པ་ནི། སྡུག་བསྔལ་ཡོངས་སུ་ཤེས་པ་ལ་སོགས་པ་དེ་དག་ཡོད་པ་མ་ཡིན་པས་རྒྱུན་ཏུ་ཞུགས་པའི་འབྲས་བུ་ལ་སོགས་པ་འབྲས་བུ་བཞི་ཡང་ཡོད་པ་མ་ཡིན་པར་འགྱུར་རོ། །འདོད་ན། འབྲས་བུ་བཞི་མེད་པའི་ཕྱིར་ན་འབྲས་གནས་མེད་པར་འགྱུར་ལ། དེ་མེད་པས་ཞུགས་པ་དག་ཀྱང་ཡོད་པ་མ་ཡིན་པར་འགྱུར་རོ། །གལ་ཏེ་ཞུགས་གནས་ཀྱི་སྐྱེས་བུ་གང་ཟག་བརྒྱད་པོ་དེ་དག་མེད་ན་དགེ་འདུན་མེད་པར་འགྱུར་རོ། །གཞན་ཡང་འཕགས་པའི་བདེན་པ་བཞི་པོ་རྣམས་མེད་པའི་ཕྱིར་ན་དམ་པའི་ཆོས་ཀྱང་ཡོད་པ་མ་ཡིན་པར་འགྱུར་ལ། ཆོས་དང་དགེ་འདུན་ཡོད་པ་མ་ཡིན་ན་སངས་རྒྱས་ཅི་ལྟར་ཡོད་དེ་མེད་པར་འགྱུར་རོ། །དེས་ན་སངས་རྒྱས་སོགས་དེ་སྐད་དུ་སྟོང་པ་ཉིད་དུ་སྨྲ་ན་དཀོན་མཆོག་གསུམ་ལ་གནོད་པ་ནི་བྱེད་པ་ཡིན་ནོ། །ཅིང་ནི་འོག་མ་སྡུད་པའོ། །བཞི་པ་ནི། གཞན་ཡང་སྟོང་པ་ཉིད་དུ་བཟུང་ན་དགེ་སྡིག་གི་འབྲས་བུ་ཡོད་པ་དང་རྒྱུ་ཆོས་མ་ཡིན་མི་དགེ་བ་དང་། ཆོས་དགེ་བ་ཉིད་ཡོད་པ་ལ་གནོད་པ་བྱེད་པར་འགྱུར་རོ། །ལྔ་པ་ནི། འཇིག་རྟེན་པའི་ཐ་སྙད་ཟོ་ཤིག་འདུག་ཤིག་ཅེས་སོགས་ནི་ཀུན་ལའང་གནོད་པ་བྱེད་པ་ཡིན་ནོ། །གཉིས་པ་ལན་ལ་གསུམ་སྟེ། གཞན་གྱིས་རྩོད་པའི་རྒྱུ་མཚན། རང་ལ་སྐྱོན་མི་འཇུག་པའི་འཐད་པ། རྟེན་འབྲེལ་རྟོགས་པའི་ཆེ་བའོ། །དང་པོ་ལ་གཉིས་ཏེ། སྟོང་ཉིད་ཀྱི་དོན་མ་རྟོགས་པས་རྩོད་པ་དང་། བདེན་གཉིས་ཀྱི་དོན་མ་རྟོགས་པས་རྩོད་པའོ། །དང་པོ་ནི། རྒོལ་བ་དེ་ལ་ལན་བཤད་པ། དངོས་སྨྲ་བ་ཁྱོད་ཀྱིས་ནི་བཅོམ་ལྡན་འདས་ཀྱིས་སྟོང་ཉིད་གསུངས་པའི་དགོས་པ་དང་། སྟོང་ཉིད་ཀྱི་མཚན་ཉིད་དང་། སྟོང་ཉིད་ཀྱི་སྒྲ་འཇུག་པའི་དོན་ཏེ་ཡུལ་ནི་མ་རྟོགས་པས་དེའི་ཕྱིར་གོང་དུ་དབུ་མ་པ་ལ་སྐྱོན་དེ་ལྟར་བརྗོད་པ་ནི་དངོས་སྨྲ་བ་རང་ཉིད་ལ་གནོད་པ་ཡིན་ནོ། །དེ་ལ་སྟོང་ཉིད་གསུངས་པའི་དགོས་པ་ནི། ལས་དང་ཉོན་མོངས་ཟད་པས་ཐར། །ཞེས་པ་དང་། མཚན་ཉིད་ནི། གཞན་ལས་ཤེས་མིན་ཞི་བ་དང་། །ཞེས་སོགས་དང་། སྒྲ་འཇུག་པའི་ཡུལ་ནི། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །ཅེས་པ་ལྟ་བུའོ། །གཉིས་པ་ལ་ལྔ་སྟེ། རྟོགས་བྱ་བདེན་གཉིས་ཀྱི་ངོ་བོ། དེ་མ་རྟོགས་པའི་སྐྱོན། བདེན་གཉིས་བསྟན་པའི་དགོས་པ། སྟོང་ཉིད་ལ་ལོག་པར་བཟུང་བའི་ཉེས་དམིགས། དེས་ན་སྟོང་ཉིད་དང་པོར་མ་གསུངས་པར་བསྟན་པའོ། །དང་པོ་ནི། སངས་རྒྱས་རྣམས་ཀྱི་ཆོས་བསྟན་པ་ནི་བརྗོད་བྱ་བདེན་པ་གཉིས་ལ་ཡང་དག་པར་བརྟེན་པ་ཡིན་ལ། གཉིས་པོ་ནི་འཇིག་རྟེན་ཀུན་རྫོབ་བདེན་པ་དང་། དམ་པའི་དོན་གྱི་བདེན་པའོ། །གཉིས་པ་ནི། གང་དག་བདེན་པ་དེ་གཉིས་ཀྱི་རྣམ་དབྱེ་རྣམ་པར་མི་ཤེས་པ་དེ་དག་གིས་སངས་རྒྱས་ཀྱིས་བསྟན་པ་ནི་རྟེན་འབྱུང་ཟབ་མོའི་དེ་ཁོ་ན་ཉིད་རྣམ་པར་མི་ཤེས་པ་ཡིན་ཏེ། རྟེན་ཅིང་འབྲེལ་བར་འབྱུང་བ་ནི་བདེན་གཉིས་ཟུང་འཇུག་ལ་འཇོག་པའི་ཕྱིར་རོ། །གསུམ་པ་ནི། གལ་ཏེ་དོན་དམ་པའི་བདེན་པ་བསྟན་པས་ཐར་པ་འགྲུབ་པའི་ཕྱིར་ན་བདེན་པ་གཉིས་ཀ་བསྟན་མི་དགོས་སོ་ཞེ་ན། ཐ་སྙད་ཀྱི་བདེན་པ་ཡང་བསྟན་དགོས་ཏེ། ཐ་སྙད་ཀྱི་བདེན་པ་ལ་ནི་མ་བརྟེན་པར་དམ་པའི་དོན་ནི་བསྟན་པར་མི་ནུས་ལ། དམ་པའི་དོན་ནི་མ་རྟོགས་པར་མྱ་ངན་ལས་འདས་པ་ཐོབ་པར་མི་འགྱུར་བའི་ཕྱིར་རོ། །བཞི་པ་ནི། སྟོང་པ་ཉིད་ལ་བལྟ་ཉེས་པ་སྟེ་ལོག་པར་བཟུང་ན་ཤེས་རབ་ཆུང་ངུ་དང་ལྡན་པ་རྣམས་ཕུང་བར་འགྱུར་ཏེ། དཔེ་ཇི་ལྟར་ན་སྔགས་སོགས་དང་བྲལ་བས་དུག་སྦྲུལ་ལ་བཟུང་ཉེས་པ་དང་། རིགས་སྔགས་ཀྱི་ཆོ་ག་ཉམས་པས་ཉེས་པར་བསྒྲུབ་པས་ཕུང་བ་བཞིན་ནོ། །ལྔ་པ་ནི། བློ་གྲོས་ཞན་པས་ཆོས་འདིའི་གཏིང་རྟོགས་པར་དཀའ་བར་མཁྱེན་པར་གྱུར་ནས་ཐུབ་པའི་ཐུགས་ནི་དེ་དག་གི་ཆོས་བསྟན་པ་ལས་རབ་ཏུ་ལྡོག་པར་འགྱུར་བ་ཡིན་ཏེ། སྟོང་པ་ཉིད་རྟོགས་དཀའ་ཞིང་མ་རྟོགས་ན་གནོད་པར་འགྱུར་བ་དེའི་ཕྱིར་རོ། །གཉིས་པ་རང་ལ་སྐྱོན་མི་འཇུག་པའི་འཐད་པ་ལ་བཞི་སྟེ། སྐྱོན་འཇུག་པའི་གཞི་མེད་པ། སྐྱོན་ཡོན་གྱི་གནས་བསྟན་པ། སྐྱོན་མེད་ལ་སྐྱོན་བསྒྱུར་བར་མི་རིགས་པ། ཉེས་པ་བཟློག་སྟེ་བསྟན་པའོ། །དང་པོ་ནི། དངོས་སྨྲ་བ་ཁྱོད་ནི་སྟོང་ཉིད་ལ་ཉེས་པ་བརྗོད་ནས་སྤོང་བར་བྱེད་པ་གང་ཡིན་པ་དེ་ང་ལ་འཇུག་པ་མི་འཐད་དེ། གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །ཞེས་སོགས་སྐྱོན་དུ་ཐལ་བར་འགྱུར་བ་ནི་སྟོང་པ་ཉིད་སྨྲ་བ་ལ་འཇུག་པ་འཐད་པ་མ་ཡིན་པའི་ཕྱིར་ཏེ། སྐྱོན་བརྗོད་དེ་ནི་སྟོང་ཉིད་ཀྱི་དོན་མེད་པར་བཟུང་ནས་བརྗོད་པ་ཡིན་ལ། ངེད་ཀྱིས་སྟོང་ཉིད་ཀྱི་དོན་རྟེན་ཅིང་འབྲེལ་བར་འབྱུང་བ་ལ་འདོད་པ་ཡིན་གྱི་མེད་པའི་དོན་ཏུ་མི་འདོད་པའི་ཕྱིར་རོ། །གཉིས་པ་ནི། གང་ལ་སྟོང་པ་ཉིད་རུང་བ་དེ་ལ་བདེན་བཞི་ལ་སོགས་པ་ཐམས་ཅད་རུང་བར་འགྱུར་ལ། གང་ལ་སྟོང་པ་ཉིད་མི་རུང་བ་དེ་ལ་བདེན་བཞི་ལ་སོགས་པ་ཐམས་ཅད་རུང་བར་མི་འགྱུར་ཏེ། ངོ་བོ་ཉིད་ལ་འགྱུར་བ་མེད་ཕྱིར་རོ། །གསུམ་པ་ནི། དངོས་སྨྲ་བ་ཁྱོད་ནི་རང་བཞིན་གྱིས་སྟོང་པའི་རྟེན་འབྱུང་གི་རྟ་ལ་ཞོན་བཞིན་དུ་དངོས་འཛིན་གྱིས་གཡེངས་ནས་རང་བཞིན་གྱིས་སྟོང་པ་ཉིད་དེ་མ་དམིགས་པས་བདེན་བཞི་སོགས་མི་རུང་བའི་རང་གི་སྐྱོན་རྣམས་ནི་དབུ་མ་པ་ང་ལ་ཡོངས་སུ་བསྒྱུར་ནས་རྩོད་པ་བྱེད་པ་ཡིན་ཏེ། མི་འགའ་ཞིག་རྟ་ལ་མངོན་པར་ཞོན་བཞིན་ཏུ་རྟ་ཉིད་བརྗེད་པར་གྱུར་ནས་རྟ་གཞན་གྱིས་ཕྲོགས་ཞེས་ཀླན་ཀ་ཚོལ་བ་བཞིན་ནོ། །བཞི་པ་ལ་གསུམ་སྟེ། གཞན་ལ་ཉེས་པ་འཇུག་པ། ཉེས་པ་དེ་རང་ལ་མི་འཇུག་པ། གཞན་ལ་ཉེས་པ་འཇུག་ཚུལ་རྒྱས་པར་བཤད་པའོ། །དང་པོ་ནི། གལ་ཏེ་དངོས་སྨྲ་བ་ཁྱོད་ཀྱིས་དངོས་པོ་རྣམས་རང་བཞིན་ལས་ཡོད་པར་རྗེས་སུ་ལྟ་བར་བྱེད་ན་དེ་ལྟ་ཡིན་ན་དངོས་པོ་རྣམས་ལ་རྒྱུ་རྐྱེན་མེད་པར་བལྟ་སྟེ། ངོ་བོ་ཉིད་ཀྱིས་གྲུབ་པ་ནི་རྒྱུ་རྐྱེན་ལ་མི་ལྟོས་པའི་ཕྱིར། འདོད་ན་འབྲས་བུ་དང་ནི་རྒྱུ་ཉིད་དང་། བྱེད་པ་པོ་དང་། བྱེད་པ་དང་། བྱ་བ་དང་། སྐྱེ་བ་དང་ནི་འགག་པ་དང་། འབྲས་བུ་ཡོད་པ་ལ་ཡང་གནོད་པ་བྱེད་པར་འགྱུར་ཏེ། དངོས་པོ་རྣམས་རྒྱུ་རྐྱེན་ལ་མི་ལྟོས་པའི་ཕྱིར་རོ། །གཉིས་པ་ནི། སྟོང་ཉིད་སྨྲ་བ་ལ་རྒྱུ་འབྲས་ལ་སོགས་པའི་རྣམ་གཞག་འཐད་དེ། རྟེན་ཅིང་འབྲེལ་བར་འབྱུང་བ་གང་ཡིན་པ་དེ་ནི་རང་བཞིན་གྱིས་སྟོང་པ་ཉིད་དུ་མདོ་ལས་བཤད་པའི་ཕྱིར་ཏེ། མ་དྲོས་པས་ཞུས་པ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རགས་ལས་གང་དེ་སྟོང་པར་བཤད། །གང་གིས་སྟོང་ཉིད་ཤེས་ཏེ་བག་ཡོད་ཡིན། །ཞེས་གསུངས་པའི་ཕྱིར། རྟེན་འབྱུང་རང་བཞིན་གྱིས་སྟོང་པ་དེ་ནི་བརྟེན་ནས་གདགས་པ་ཡིན་ཏེ། འཇིག་རྟེན་དང་འཇིག་རྟེན་ལས་འདས་པའི་ཐ་སྙད་གདགས་པའི་ཡུལ་ཡིན་པའི་ཕྱིར། དེ་ཉིད་དབུ་མའི་ལམ་སྟེ་ཤུལ་ཡིན་ཏེ། རྟག་ཆད་ཀྱི་ལྟ་བ་སེལ་བས་དབུ་མའི་རྟོགས་པ་འདྲེན་པར་བྱེད་པའི་ཕྱིར། དེས་ན་རང་བཞིན་གྱིས་སྟོང་པ་མ་ཡིན་པའི་ཆོས་འགའ་ཡོད་པ་མ་ཡིན་ཏེ། གང་གི་ཕྱིར་ན་རྟེན་འབྱུང་མ་ཡིན་པའི་ཆོས་འགའ་ཞིག་ཡོད་པ་མ་ཡིན་པ་དེའི་ཕྱིར། གསུམ་པ་ལ་དྲུག་སྟེ། བདེན་བཞི་མི་འཐད་པར་ཐལ་བ། ཡོངས་ཤེས་སོགས་བཞི་མི་འཐད་པར་ཐལ་བ། འབྲས་བུ་བཞི་མི་འཐད་པར་ཐལ་བ། དཀོན་མཆོག་གསུམ་མི་འཐད་པར་ཐལ་བ། ལས་འབྲས་མི་འཐད་པར་ཐལ་བ། ཐ་སྙད་མི་འཐད་པར་ཐལ་བའོ། །དང་པོ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། དོན་བསྡུ་བའོ། །དང་པོ་ནི། གལ་ཏེ་ཕྱི་ནང་གི་དངོས་པོ་འདི་ཀུན་རང་བཞིན་གྱིས་མི་སྟོང་ན། འབྱུང་བ་མེད་ཅིང་འཇིག་པ་མེད་པར་འགྱུར་ལ། འདོད་ན། འཕགས་པའི་བདེན་པ་བཞི་པོ་རྣམས་ཁྱོད་ལ་མེད་པར་ཐལ་བར་འགྱུར་རོ། །གཉིས་པ་ལ་བཞི་སྟེ། སྡུག་བསྔལ་མེད་པར་ཐལ་བ། ཀུན་འབྱུང་མེད་པར་ཐལ་བ། འགོག་པ་མེད་པར་ཐལ་བ། ལམ་མེད་པར་ཐལ་བའོ། །དང་པོ་ནི། རང་བཞིན་གྱིས་སྟོང་པའི་རྟེན་ཅིང་འབྲེལ་འབྱུང་མ་ཡིན་ན། སྡུག་བསྔལ་ཡོད་པར་ག་ལ་འགྱུར་ཏེ། མི་རྟག་སྡུག་བསྔལ་གྱི་མཚན་ཉིད་ཅན་དུ་གསུངས་པ་དེ་རང་བཞིན་གྱིས་གྲུབ་པ་ཉིད་ལ་ཡོད་པ་མ་ཡིན་པའི་ཕྱིར། གཉིས་པ་ནི། སྡུག་བསྔལ་རང་བཞིན་ཉིད་ལས་ནི་ཡོད་པ་ཡིན་ན་རྒྱུ་ལས་ཉོན་ལས་ཅི་ཞིག་ཀུན་ཏུ་འབྱུང་བར་འགྱུར་ཏེ་མི་འགྱུར་ལ། དེའི་ཕྱིར་སྟོང་ཉིད་མི་འཐད་ཅེས་གནོད་པ་བྱེད་པ་ལ་ཀུན་འབྱུང་ཡོད་པ་མ་ཡིན་ནོ། །གསུམ་པ་ནི། སྡུག་བསྔལ་རང་བཞིན་གྱིས་ཡོད་པ་ལ་དེ་འགག་པའི་འགོག་པ་ཡོད་པ་མ་ཡིན་པར་ཐལ། རང་བཞིན་གྱིས་གྲུབ་པ་ནི་མི་འཇིག་པར་ཡོངས་སུ་གནས་པའི་ཕྱིར། དེས་ན་རང་བཞིན་གྱིས་གྲུབ་པའི་ཆོས་ཁས་ལེན་པ་ནི། འགོག་པ་ལ་གནོད་པ་བྱེད་པ་ཡིན་ནོ། །བཞི་པ་ནི། ལམ་ལ་རང་བཞིན་གྱིས་གྲུབ་པ་ཡོད་ན་ནི། དེ་བསྒོམ་པ་འཐད་པར་མི་འགྱུར་ཏེ། རང་བཞིན་གྱིས་གྲུབ་པ་ནི་བསྒོམ་ཞིང་བསྒྲུབ་པར་བྱར་མེད་པའི་ཕྱིར། ཅི་སྟེ་ལམ་དེ་བསྒོམ་བྱ་ཡིན་ན་ཁྱོད་ཀྱི་ལུགས་ལ་དེ་རང་བཞིན་གྱིས་ཡོད་པ་མ་ཡིན་པར་འགྱུར་རོ། །གསུམ་པ་ནི། གང་གི་ཚེ་སྡུག་བསྔལ་དང་ཀུན་འབྱུང་དང་འགོག་པ་ཡོད་པ་མ་ཡིན་ན་ལམ་གྱིས་སྡུག་བསྔལ་འགོག་པ་ནི་གང་ཞིག་ཐོབ་པར་འགྱུར་བར་འདོད་དེ་མི་རུང་ངོ་། །གཉིས་པ་ནི། སྡུག་བསྔལ་གྱི་བདེན་པ་དེ་ནི་ཆོས་ཅན་ཕྱིས་ཀྱང་ཅི་ལྟར་ཡོངས་སུ་ཤེས་པར་འགྱུར་ཏེ་མི་འགྱུར་བར་ཐལ། གལ་ཏེ་སྔར་རང་བཞིན་ཉིད་ཀྱིས་ནི་ཡོངས་སུ་ཤེས་པར་འགྱུར་བ་མ་ཡིན་པའི་ཕྱིར། ཁྱབ་སྟེ། རང་བཞིན་གྱིས་མི་འགྱུར་བར་གནས་པ་མ་ཡིན་ནམ་སྟེ་ཡིན་པའི་ཕྱིར། སྡུག་བསྔལ་ཡོངས་སུ་ཤེས་པ་མི་འཐད་པ་དེ་བཞིན་དུ་ནི་ཁྱོད་ཉིད་ཀྱི་ལུགས་ལ་ཀུན་འབྱུང་སྤོང་བ་དང་། འགོག་པ་མངོན་དུ་བྱ་བ་དང་། ལམ་བསྒོམ་པ་དག་ཀྱང་སྡུག་བསྔལ་ཡོངས་སུ་ཤེས་པ་བཞིན་དུ་མི་རུང་སྟེ། སྔར་མ་སྤོང་བ་དང་། སྔར་མངོན་དུ་མ་བྱས་པ་དང་། སྔར་མ་བསྒོམ་པའི་ངོ་བོ་ཉིད་དུ་གནས་པའི་ཕྱིར་རོ། །གསུམ་པ་ནི། རྒྱུན་དུ་ཞུགས་པ་ལ་སོགས་པའི་འབྲས་བུ་བཞི་དག་ཀྱང་སྡུག་བསྔལ་ཡོངས་སུ་ཤེས་པ་བཞིན་དུ་མི་རུང་བར་འགྱུར་ཏེ། སྡུག་བསྔལ་ཤེས་པ་དང་། ཀུན་འབྱུང་སྤོང་བ་སོགས་མེད་པའི་ཕྱིར་རོ། །གཞན་ཡང་འབྲས་བུ་བཞི་པོ་སྔར་རང་བཞིན་ཉིད་ཀྱིས་ནི་ཐོབ་པ་མིན་པ་གང་ཡིན་པ་དེ་ཕྱིས་ཀྱང་ཇི་ལྟར་ཐོབ་པར་ནུས་པར་འགྱུར་ཏེ་མི་འགྱུར་བར་ཐལ། རང་བཞིན་ནི་ལྡོག་པ་མེད་པར་ཡོངས་སུ་འཛིན་པ་ཡིན་པའི་ཕྱིར་རོ། །བཞི་པ་ལ་གསུམ་སྟེ། དགེ་འདུན་དཀོན་མཆོག་མེད་པར་ཐལ་བ། ཆོས་དཀོན་མཆོག་མེད་པར་ཐལ་བ། སངས་རྒྱས་དཀོན་མཆོག་མེད་པར་ཐལ་བའོ། །དང་པོ་ནི། འབྲས་བུ་མེད་ན་འབྲས་གནས་མེད། །ཞུགས་པ་དག་ཀྱང་ཡོད་མ་ཡིན། །གལ་ཏེ་སྐྱེས་བུ་གང་ཟག་བརྒྱད། །དེ་དག་མེད་ན་དགེ་འདུན་མེད། །ཅེས་སོ། །གཉིས་པ་ནི། འཕགས་པའི་བདེན་པ་རྣམས་མེད་པའི་ཕྱིར། །དམ་པའི་ཆོས་ཀྱང་ཡོད་མ་ཡིན། །ཞེས་སོ། །གསུམ་པ་ནི། ཆོས་དང་དགེ་འདུན་ཡོད་མིན་ན། །སངས་རྒྱས་ཅི་ལྟར་ཡོད་པར་འགྱུར། །ཞེས་སོ། །གཞན་ཡང་སངས་རྒྱས་ངོ་བོ་ཉིད་ཀྱིས་ཡོད་པར་འདོད་ན། ཁྱོད་ཀྱི་ལུགས་ལ་རྫོགས་པའི་སངས་རྒྱས་དེ་བྱང་ཆུབ་སྟེ་ཐམས་ཅད་མཁྱེན་པའི་ཡེ་ཤེས་ལ་མ་བརྟེན་པར་ཡང་ཐལ་བར་འགྱུར་ལ། ཁྱོད་ཀྱི་ལུགས་ལ་བྱང་ཆུབ་དེ་ཡང་སངས་རྒྱས་ལ་མ་བརྟེན་པར་ཡང་ཐལ་བར་འགྱུར་ཏེ། ངོ་བོ་ཉིད་ཀྱིས་གྲུབ་པ་ནི་གཞན་ལ་མི་ལྟོས་པའི་ཕྱིར་རོ། །གཞན་ཡང་སྔར་སངས་རྒྱས་མིན་པའི་ངོ་བོ་ཉིད་དུ་གྲུབ་པ་གང་ཡིན་པ་དེས་ཕྱིས་བྱང་ཆུབ་ཀྱི་ཕྱིར་དུ་བྱང་ཆུབ་ཀྱི་སྤྱོད་པ་ལ་བཙལ་བ་སྟེ་འབད་པ་བྱས་ཀྱང་བྱང་ཆུབ་ཐོབ་པར་མི་འགྱུར་བར་ཐལ། ཁྱོད་ཀྱི་ལྟར་ན་སྔར་སངས་རྒྱས་མིན་པའི་རང་བཞིན་ཉིད་ཀྱིས་ནི་གནས་པའི་ཕྱིར། ལྔ་པ་ལ་གསུམ་སྟེ། དགེ་སྡིག་བྱེད་པ་མེད་པར་ཐལ་བ། དགེ་སྡིག་མེད་པར་བདེ་སྡུག་ཡོད་པར་ཐལ་བ། དགེ་སྡིག་གི་འབྲས་བུ་ཡོད་ན་སྟོང་པར་གྲུབ་པའོ། །དང་པོ་ནི། གང་ཟག་འགའ་ཡང་ཆོས་དང་ཆོས་མིན་པ་ནམ་ཡང་བྱེད་པར་མི་འགྱུར་ཏེ། མི་སྟོང་པར་རང་བཞིན་གྱིས་གྲུབ་པ་ལ་ཅི་ཞིག་བྱ་སྟེ་བྱར་མེད་པའི་ཕྱིར་ཏེ། རང་བཞིན་གྱིས་གྲུབ་པ་ལ་ནི་བྱ་བ་འཇུག་པ་མེད་པའི་ཕྱིར། གཉིས་པ་ནི། ཆོས་དང་ཆོས་མིན་མེད་པར་ཡང་དེ་གཉིས་ཀྱི་འབྲས་བུ་ཁྱོད་ཀྱི་ལུགས་ལ་ཡོད་པར་འགྱུར་བར་ཐལ། འབྲས་བུ་རང་བཞིན་གྱིས་ཡོད་པའི་ཕྱིར། འདོད་ན། ཆོས་དང་ཆོས་མིན་པའི་རྒྱུ་ལས་བྱུང་བའི་འབྲས་བུ་གཉིས་པོ་དེ་ཁྱོད་ཀྱི་ལུགས་ལ་ཡོད་པ་མ་ཡིན་པར་ཐལ། འབྲས་བུ་གཉིས་པོ་དེ་རྒྱུ་མེད་པར་ཡང་ཡོད་པའི་ཕྱིར། གསུམ་པ་ནི། གལ་ཏེ་ཆོས་དང་ཆོས་མིན་པའི་རྒྱུ་ལས་བྱུང་བའི་འབྲས་བུ་དེ་གལ་ཏེ་ཁྱོད་ཀྱི་ལུགས་ལ་ཡོད་པར་འདོད་ན། ཆོས་དང་ཆོས་མིན་པའི་རྒྱུ་ལས་བྱུང་བའི་འབྲས་བུ་བདེ་སྡུག་གཉིས་པོ་དེ་ཅིའི་ཕྱིར་རང་བཞིན་གྱིས་སྟོང་པ་མ་ཡིན་ཏེ་ཡིན་པར་ཐལ། རང་གི་རྒྱུ་རྐྱེན་ལ་བརྟེན་ནས་འབྱུང་བ་ཡིན་པའི་ཕྱིར་རོ། །དྲུག་པ་ལ་གཉིས་ཏེ། འཇིག་རྟེན་པའི་ཐ་སྙད་མི་འཐད་པར་ཐལ་བ་དང་། འཇིག་རྟེན་ལས་འདས་པའི་ཐ་སྙད་མི་འཐད་པར་ཐལ་བའོ། །དང་པོ་ནི། རྟེན་ཅིང་འབྲེལ་བར་འབྱུང་བ་ཡི་སྟོང་པ་ཉིད་ལ་གནོད་པ་བྱེད་པ་གང་ཡིན་པ་དེ་ནི་འཇིག་རྟེན་པའི་ཐ་སྙད་བུམ་པ་གྱིས་ཤིག་ཅེས་སོགས་ནི་ཀུན་ལ་གནོད་པ་བྱེད་པ་ཡིན་ཏེ། འཇིག་རྟེན་པའི་ཐ་སྙད་ཐམས་ཅད་ནི་རྟེན་ཅིང་འབྲེལ་བར་འབྱུང་བར་ཡིན་པའི་ཕྱིར། གཞན་ཡང་དངོས་པོ་རྣམས་རང་བཞིན་གྱིས་སྟོང་པ་ཉིད་ལ་གནོད་པ་བྱེད་ན་བུམ་པ་ལ་སོགས་པ་བྱེད་པའི་བྱ་བ་ཅི་ཡང་མེད་པར་འགྱུར་ཞིང་། བྱ་བ་ཡང་རྩོམ་པ་མེད་པའི་བྱ་བར་འགྱུར་ལ། བྱ་བ་ཅི་ཡང་མི་བྱེད་པ་ཡང་བྱེད་པ་པོར་འགྱུར་ཏེ། དངོས་པོ་རྣམས་རང་བཞིན་གྱིས་གྲུབ་པའི་ཕྱིར། གཞན་ཡང་དངོས་པོ་རྣམས་རང་བཞིན་གྱིས་ཡོད་ན་འགྲོ་བ་རྣམས་མ་སྐྱེས་པ་དང་མ་འགག་པ་དང་ཐེར་ཟུག་ཏུ་ཡང་གནས་པར་འགྱུར་ཞིང་། བོང་ཚོད་ཆེ་ཆུང་དང་། ལྷ་ནས་མིར་སྐྱེ་བ་སོགས་གནས་སྐབས་སྣ་ཚོགས་དང་བྲལ་བར་འགྱུར་བར་ཐལ། ངོ་བོ་ཉིད་ཀྱིས་ཡོད་པའི་ཕྱིར་རོ། །གཉིས་པ་ནི། གཞན་ཡང་གལ་ཏེ་དངོས་པོ་རྣམས་རང་བཞིན་གྱིས་སྟོང་པ་ཉིད་དུ་ཡོད་པ་མིན་ན། འཇིག་རྟེན་དང་འཇིག་རྟེན་ལས་འདས་པའི་ཁྱད་པར་སྔར་མ་ཐོབ་པ་ཐོབ་པར་བྱ་བ་དང་། གཉེན་པོས་སྡུག་བསྔལ་མཐར་འབྱིན་པར་བྱེད་པ་དང་། ལས་དང་ནི་ཉོན་མོངས་ཐམས་ཅད་སྤོང་བར་བྱེད་པའང་མེད་པར་འགྱུར་ཏེ། རང་བཞིན་གྱིས་གྲུབ་པ་ལ་བྱ་བྱེད་མི་འཐད་པའི་ཕྱིར་རོ། །གསུམ་པ་རྟེན་འབྲེལ་རྟོགས་པའི་ཆེ་བ་ནི། འཕགས་པ་གང་གིས་རྟེན་ཅིང་འབྲེལ་བར་འབྱུང་བའི་དེ་ཁོ་ན་ཉིད་མཐོང་བ་དེས་ནི་སྡུག་བསྔལ་དང་། ཀུན་འབྱུང་དང་ནི་འགོག་པ་དང་ལམ་གྱི་དེ་ཁོ་ན་ཉིད་དེ་དག་མཐོང་བ་ཡིན་ཏེ། བླང་དོར་གྱིས་བསྡུས་པའི་རྟེན་འབྲེལ་ཐམས་ཅད་རང་བཞིན་སྐྱེ་མེད་དུ་རྟོགས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། འཕགས་པ་ཆོས་ཐམས་ཅད་འཇུག་པ་མེད་པར་བསྟན་པའི་མདོ་ལས། འཇམ་དཔལ་གང་གིས་ཆོས་ཐམས་ཅད་སྐྱེ་བ་མེད་པ་མཐོང་བ་དེས་ནི་སྡུག་བསྔལ་ཡོངས་སུ་ཤེས་པ་མཐོང་བ་ཡིན་ནོ། །གང་གིས་ཆོས་ཐམས་ཅད་འབྱུང་བ་མེད་པ་ཉིད་དུ་མཐོང་བ་དེས་ནི་ཀུན་འབྱུང་སྤོངས་པ་ཡིན་ནོ། །གང་གིས་ཆོས་ཐམས་ཅད་ཤིན་ཏུ་མྱ་ངན་ལས་འདས་པར་མཐོང་བ་དེས་ནི་འགོག་པ་མངོན་དུ་བྱས་པ་ཡིན་ནོ། །འཇམ་དཔལ་གང་གིས་ཆོས་ཐམས་ཅད་དངོས་པོ་མེད་པར་མཐོང་བ་དེས་ནི་ལམ་བསྒོམས་པ་ཡིན་ནོ་ཞེས་སོགས་རྒྱ་ཆེར་གསུངས་སོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། འཕགས་པའི་བདེན་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་བཞི་པའི་རྣམ་པར་བཤད་པའོ།། །།གཉིས་པ་མྱང་འདས་མི་འཐད་པར་ཐལ་བ་སྤོང་བར་གསུམ་ལས། དང་པོ་རབ་བྱེད་ཀྱི་འབྲེལ་ནི། གལ་ཏེ་ཆོས་ཐམས་ཅད་རང་བཞིན་གྱིས་སྟོང་པ་ཉིད་ཡིན་ན་མྱ་ངན་ལས་འདས་པ་མི་འཐད་པར་འགྱུར་ཞེས་པའི་རྩོད་པ་སྤོང་བའི་ཕྱིར་དུ་རབ་བྱེད་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ་རྒོལ་བ་དང་། ལན་ནོ། །དང་པོ་ནི། གལ་ཏེ་ཕྱི་ནང་གི་དངོས་པོ་འདི་དག་ཀུན་རང་བཞིན་གྱིས་སྟོང་པ་ཉིད་དུ་འདོད་ན་འབྱུང་བ་མེད་ཅིང་འཇིག་པའང་མེད་པར་འགྱུར་རོ། །འདོད་ན་ཉོན་མོངས་གང་ཞིག་སྤོང་བ་ལས་ལྷག་བཅས་དང་། སྡུག་བསྔལ་གང་ཞིག་འགག་པ་ལས་ལྷག་མེད་དུ་མྱ་ངན་ལས་འདའ་བར་འགྱུར་བར་འདོད་དེ་འདོད་མི་རིགས་པར་འགྱུར་རོཞེས་པའོ། །གཉིས་པ་ལ་གསུམ་སྟེ། གཞན་ལ་ཉེས་པ་བཟློག་སྟེ་བསྟན་པ། རང་ལ་ཉེས་པ་མེད་པའི་ཚུལ། གཞན་གྱི་སྨྲས་པའི་ཉེས་པ་སྤོང་བའོ། །དང་པོ་ནི། གལ་ཏེ་འདི་ཀུན་མི་སྟོང་ན། །འབྱུང་བ་མེད་ཅིང་འཇིག་པ་མེད། །གང་ཞིག་སྤོང་དང་འགག་པ་ལས། །མྱ་ངན་འདའ་བར་འགྱུར་བར་འདོད་པ་མི་འཐད་པར་ཐལ། ཉོན་མོངས་སྤོང་བས་སྡུག་བསྔལ་འགག་པ་མི་འཐད་པའི་ཕྱིར་ཏེ། དེ་རང་བཞིན་གྱིས་གྲུབ་པའི་ཕྱིར། གཉིས་པ་ལ་གཉིས་ཏེ། མྱང་འདས་མཐའ་བྲལ་དུ་བསྟན་པ་དང་། མཐའ་བཞིའི་སྤྲོས་པ་བཀག་པའོ། །དང་པོ་ནི། ཐ་སྙད་ཙམ་དུ་ཉོན་མོངས་པ་དང་སྡུག་བསྔལ་འགག་པ་ལ་མྱང་འདས་ཐོབ་པར་བཞག་པ་ཡིན་གྱི། དོན་དམ་པར་ཉོན་མོངས་པ་སྤོང་བ་མེད་པས་སྡུག་བསྔལ་འགག་པའི་བྲལ་བ་ཐོབ་པ་མེད་པ། ངོ་བོ་ཉིད་མེད་པས་ཆད་པ་མེད་པ་དང་རྟག་པ་མེད་པ། རང་བཞིན་གྱིས་སྤང་བྱ་འགག་པ་མེད་པ་གཉེན་པོ་སྐྱེ་བ་མེད་པ་དེ་ལ་ནི་མྱ་ངན་ལས་འདས་པར་བརྗོད་དོ། །གཉིས་པ་ལ་གཉིས་ཏེ། རྟེན་པ་མྱང་འདས་མཐའ་བཞིར་གྲུབ་པ་དགག་པ་དང་། རྟེན་བཅོམ་ལྡན་འདས་མཐའ་བཞིར་གྲུབ་པ་དགག་པའོ། །དང་པོ་ལ་གསུམ་སྟེ། དངོས་དང་དངོས་མེད་སོ་སོར་གྲུབ་པ་དགག གཉིས་ཀར་གྲུབ་པ་དགག གཉིས་མིན་དུ་གྲུབ་པ་དགག་པའོ། །དང་པོ་ལ་བཞི་སྟེ། དངོས་པོར་གྲུབ་པ་དགག དངོས་མེད་དུ་གྲུབ་པ་དགག དེ་ལ་མྱང་འདས་མེད་པར་ཐལ་བ་སྤོང་། གཉིས་པོ་བཀག་པའི་དོན་བསྡུ་བའོ། །དང་པོ་ནི། བྱེ་བྲག་ཏུ་སྨྲ་བས་མྱང་འདས་རྫས་སུ་གྲུབ་པར་འདོད་དོ། །དེ་བཀག་པ་ནི། རེ་ཤིག་མྱ་ངན་ལས་འདས་པ་དངོས་པོ་མ་ཡིན་ཏེ། གལ་ཏེ་ཡིན་ན་རྒ་ཤིའི་མཚན་ཉིད་ཅན་དུ་ཐལ་བར་འགྱུར་རོ། །ཁྱབ་སྟེ། རྒ་དང་འཆི་བ་མེད་པ་ཡི་དངོས་པོ་ཡོད་པ་མ་ཡིན་པའི་ཕྱིར་རོ། །འདིར་འཆི་བ་ནི་འཇིག་པ་ལ་བྱའོ། །གཞན་ཡང་གལ་ཏེ་མྱ་ངན་ལས་འདས་པ་དངོས་པོ་ཡིན་ན་མྱ་ངན་ལས་འདས་པ་འདུས་བྱས་སུ་འགྱུར་ཏེ། དངོས་པོ་འདུས་བྱས་མ་ཡིན་པ་འགའ་ཡང་གང་ནའང་ཡོད་པ་མ་ཡིན་པའི་ཕྱིར་རོ། །གཞན་ཡང་གལ་ཏེ་མྱ་ངན་ལས་འདས་པ་དངོས་པོ་ཡིན་ན། མྱ་ངན་ལས་འདས་པ་དེ་རྒྱུ་རྐྱེན་འཚོགས་པ་ལ་ཅི་ལྟར་བརྟེན་པ་མ་ཡིན་ཏེ་ཡིན་པར་ཐལ། དངོས་པོ་རྒྱུ་རྐྱེན་འཚོགས་པ་ལ་བརྟེན་ནས་འབྱུང་བ་མ་ཡིན་པ་འགའ་ཡང་ཡོད་པ་མ་ཡིན་པའི་ཕྱིར་རོ། །གཉིས་པ་ནི། གོས་དམར་ཅན་གྱི་སྡེ་པ་དག་མྱ་ངན་ལས་འདས་པ་མར་མེ་ཤི་བ་བཞིན་ནོ་ཞེས་པ་དང་། མདོ་སྡེ་པ་དག་ཉོན་མོངས་པ་དང་སྐྱེ་བ་མེད་པ་ཙམ་ལ་མྱ་ངན་ལས་འདས་པར་འཇོག་ཅེ་ན། དེ་འགོག་པ་ནི། གལ་ཏེ་མྱ་ངན་ལས་འདས་པ་དངོས་པོ་མིན་ན་དངོས་མེད་དུ་རང་གི་ངོ་བོས་ཡོད་པ་ཅི་ལྟར་དུ་རུང་བར་འགྱུར་ཏེ་མི་འགྱུར་བར་ཐལ། ཕྱོགས་གང་ལ་མྱ་ངན་ལས་འདས་པ་དངོས་པོ་མིན་པ་དེ་ལ་མྱ་ངན་ལས་འདས་པ་དངོས་པོ་མེད་པར་རང་གི་ངོ་བོས་ཡོད་པར་ཁས་བླངས་པར་རིག་པ་མ་ཡིན་པའི་ཕྱིར་ཏེ། དངོས་པོ་གཞན་འགྱུར་ལ་དངོས་མེད་དུ་སྨྲ་ལ་དངོས་པོ་རང་བཞིན་གྱིས་ཡོད་པ་གཞན་དུ་འགྱུར་བ་མི་རིག་པའི་ཕྱིར། གལ་ཏེ་མྱ་ངན་ལས་འདས་པ་དེ་སྔར་ཡོད་ཀྱི་དངོས་པོ་ཞིག་པའི་དངོས་མེད་མ་ཡིན་པར་རང་གི་ངོ་བོས་གྲུབ་པར་འདོད་ན། ཅི་ལྟར་མྱ་ངན་ལས་འདས་པ་དེ་དངོས་པོ་ལ་བརྟེན་པ་མིན་ཏེ་ཡིན་པར་ཐལ། གང་ཞིག་དངོས་པོ་ལ་བརྟེན་ནས་འབྱུང་མ་ཡིན་པའི་སྔར་ཡོད་ཀྱི་དངོས་པོ་ཞིག་པའི་དངོས་མེད་རང་གི་ངོ་བོས་ཡོད་པ་མ་ཡིན་པའི་ཕྱིར། གསུམ་པ་ནི། འོ་ན་མྱང་འདས་དངོས་པོ་དང་དངོས་མེད་གང་ཡང་མ་ཡིན་ན་མྱང་འདས་མེད་པར་འགྱུར་རོ་ཞེ་ན། ཐ་སྙད་དུ་མྱང་འདས་མེད་པའི་སྐྱོན་མེད་དེ། ཕུང་པོ་འོང་བ་དང་ནི་འགྲོ་བའི་དངོས་པོ་ལ་བརྟེན་ནས་གཅིག་ནས་གཅིག་ཏུ་སྐྱེ་བ་འབྱུང་བ་ལ་འཁོར་བར་གདགས་པའམ། ཕུང་པོ་འགྲོ་འོང་བྱེད་པ་རྒྱུར་བྱས་ནས་འཁོར་བར་གདགས་པ་གང་ཡིན་པ་དེ་ནི་སྔ་མ་ལ་བརྟེན་པ་མིན་པ་དང་། ཕྱི་མ་ལ་རྒྱུར་བྱས་པ་མིན་པ་ཙམ་ལ་མྱ་ངན་ལས་འདས་པ་ཡིན་པར་བསྟན་པའི་ཕྱིར་རོ། །འདིའི་དོན་ནི་འཁོར་བར་གདགས་པའི་རྒྱུ་མཚན་གཉིས་ཏེ། ཕུང་པོ་འགྲོ་འོང་བྱེད་པ་ལ་བརྟེན་ནས་འཁོར་བ་གདགས་པ་དང་། ཕུང་པོ་འགྲོ་འོང་བྱེད་པ་རྒྱུར་བྱས་པ་ལ་འཁོར་བར་གདགས་པའོ། །དེ་ལྟ་བུའི་རྒྱུ་མཚན་གཉིས་པོ་གང་གིས་ཀྱང་འཁོར་བར་མ་གྱུར་པ་ལ་མྱང་འདས་སུ་བརྗོད་ཅེས་པའི་དོན་ནོ། །བཞི་པ་ནི། མྱ་ངན་ལས་འདས་པ་ནི་དངོས་པོ་མ་ཡིན་ཞིང་དངོས་མེད་དུ་ཡང་ངོ་བོས་གྲུབ་པ་མིན་པར་རིགས་ཏེ་འབྱུང་བ་དངོས་པོ་དང་ནི་འཇིགས་པ་དངོས་མེད་ལ་ངོ་བོས་གྲུབ་པར་ཞེན་པ་དག་ནི་སྤང་བར་བྱ་བ་ཡིན་པར་སྟོན་པས་བཀའ་སྩལ་ལ། མྱང་འདས་ནི་སྤང་བྱ་མ་ཡིན་པ་དེའི་ཕྱིར་རོ། །གཉིས་པ་གཉིས་ཀར་གྲུབ་པ་དགག་པ་ནི། མུ་སྟེགས་པ་ཁ་ཅིག ཐར་པ་མྱང་འདས་ནི་ངོ་བོའི་ཆ་ནས་དངོས་པོ་དང་། དགག་བྱའི་དངོས་པོ་ལྡོག་པའི་ཆ་ནས་དངོས་མེད་ཡིན་པས་དངོས་པོ་དང་དངོས་མེད་གཉིས་ཀ་ཡིན་ནོ་ཞེ་ན། དེ་དགག་པ་ནི། གལ་ཏེ་མྱ་ངན་ལས་འདས་པ་ནི་དངོས་པོ་དང་དངོས་མེད་གཉིས་ཀར་རང་བཞིན་གྱིས་གནས་པ་ཡིན་ན། དངོས་པོ་དང་དངོས་པོ་མེད་པ་དག་ཐར་པར་འགྱུར་ན་དེ་ནི་མི་རིགས་སོ། །འདིའི་དོན་ནི་དངོས་པོ་དང་དངོས་མེད་དུ་གྲུབ་པའི་ཁྱད་པར་ལ་རང་བཞིན་གྱིས་གྲུབ་པའི་ཐར་པ་འདོད་ན་དངོས་པོ་དང་དངོས་མེད་ཐམས་ཅད་ཐར་པར་འགྱུར་ཞེས་རྒྱུ་མཚན་མཚུངས་པའི་མགོ་སྙོམས་བྱེད་པའོ། །གཞན་ཡང་གལ་ཏེ་མྱ་ངན་ལས་འདས་པ་ནི་དངོས་པོ་དང་དངོས་མེད་གཉིས་སུ་རང་བཞིན་གྱིས་གྲུབ་པ་ཡིན་ན། མྱ་ངན་ལས་འདས་པ་དེ་རྒྱུ་རྐྱེན་ལ་མ་བརྟེན་པ་མ་ཡིན་པར་བརྟེན་པར་ཐལ། དངོས་པོ་དང་དངོས་མེད་གཉིས་རང་བཞིན་གྱིས་གྲུབ་པ་ཡིན་ན་རྒྱུ་རྐྱེན་ལ་བརྟེན་ནས་འབྱུང་བ་ཡིན་དགོས་པའི་ཕྱིར་རོ། །གཞན་ཡང་ཅི་ལྟར་མྱ་ངན་ལས་འདས་པ་ནི་དངོས་པོ་དང་དངོས་མེད་གཉིས་ཀར་རང་བཞིན་གྱིས་གྲུབ་པ་ཡིན་ཏེ་མ་ཡིན་པར་ཐལ། མྱ་ངན་ལས་འདས་པ་ནི་འདུས་མ་བྱས་ཡིན་ལ། དངོས་པོ་དང་དངོས་མེད་རང་བཞིན་གྱིས་གྲུབ་པ་དེ་ཡིན་ན་འདུས་བྱས་ཡིན་དགོས་པའི་ཕྱིར་རོ། །འདིའི་དོན་ནི་དངོས་པོ་དང་དངོས་མེད་རང་བཞིན་གྱིས་གྲུབ་པ་དེ་ཡིན་ན་འདུས་བྱས་ཡིན་དགོས་ཞེས་པའི་དོན་ཡང་ཡིན་ལ། ཡང་ཤིང་ཞིག་པའི་དངོས་མེད་དེ་སྔར་ཡོད་ཀྱི་ཤིང་ཞིག་པར་སོང་བ་ལ་འཇོག་པ་ཡིན་པས་ཤིང་གི་འདུས་བྱས་པར་བཏགས་པ་མིན་གྱིས། དངོས་མེད་འདུས་བྱས་སུ་བསྟན་པ་ནི་མ་ཡིན་ནོ། །གལ་ཏེ་མྱ་ངན་ལས་འདས་པ་ནི་དངོས་པོ་དང་དངོས་མེད་གཉིས་ཀ་མིན་གྱི། དེ་ལ་དེ་གཉིས་ཀ་ཡོད་པར་འདོད་པ་ཡིན་ནོ་ཞེ་ན། རིག་པས་དཔྱད་ན་ཅི་ལྟར་ན་མྱ་ངན་ལས་འདས་པ་ལ་དངོས་པོ་དང་དངོས་མེད་གཉིས་ཀ་ཡོད་དེ་མེད་པར་ཐལ། རིག་པས་དཔྱད་ན་དངོས་པོ་དང་དངོས་མེད་དེ་གཉིས་གཅིག་ལ་ཡོད་པ་མིན་པའི་ཕྱིར་ཏེ། ཕན་ཚུན་འགལ་བའི་ཕྱིར། དཔེར་ན་སྣང་བ་དང་ནི་མུན་པ་བཞིན་ནོ། །གསུམ་པ་གཉིས་མིན་དུ་གྲུབ་པ་དགག་པ་ནི། གལ་ཏེ་མྱ་ངན་ལས་འདས་པ་དངོས་པོ་དང་དངོས་མེད་གཉིས་ཀ་ལས་བཟློག་པའི་ཕུང་པོ་གསུམ་པར་བདེན་ནོ་ཞེ་ན། མྱ་ངན་ལས་འདས་པ་དངོས་པོ་ཡང་མ་ཡིན་དངོས་པོ་མེད་པ་ཡང་མིན་པར་རང་བཞིན་གྱིས་གྲུབ་པར་གང་སྟོན་པ་དེ་ནི་མི་རིགས་ཏེ། དངོས་པོ་མེད་པ་དང་དངོས་པོ་དག་རང་བཞིན་གྱིས་གྲུབ་ན་གཉིས་ཀ་ལས་བཟློག་པའི་ཕུང་པོ་གསུམ་པ་དེ་ནི་གྲུབ་པར་འགྱུར་བ་ལས་གཉིས་པོ་དེ་རང་བཞིན་གྱིས་མ་གྲུབ་པའི་ཕྱིར། གལ་ཏེ་མྱ་ངན་ལས་འདས་པ་ནི་དངོས་པོ་ཡང་མ་ཡིན་དངོས་པོ་མེད་པ་ཡང་མ་ཡིན་པའི་ཕུང་པོ་གསུམ་པར་བདེན་ན་དངོས་པོ་ཡང་མ་ཡིན་དངོས་པོ་མེད་པ་ཡང་མ་ཡིན་པར་རང་བཞིན་གྱིས་གྲུབ་པ་ཡིན་ནོ་ཞེས་རྟོག་པ་པོ་གང་ཞིག་གིས་ནི་མྱང་འདས་དེ་མངོན་དུ་བྱེད་དེ་བྱེད་པ་མི་འཐད་པར་ཐལ། དེ་ལྟར་མངོན་དུ་བྱེད་པ་ནི་འཁོར་འདས་གང་གི་ཚེ་ཡང་མེད་པའི་ཕྱིར། གཉིས་པ་རྟེན་བཅོམ་ལྡན་འདས་མཐའ་བཞིར་གྲུབ་པ་དགག་པ་ལ་གཉིས་ཏེ། དངོས་དང་། དེས་གྲུབ་པའི་དོན་ནོ། །དང་པོ་ནི། མྱང་འདས་ཡོད་དེ། དེ་ཐུགས་སུ་ཆུད་པ་པོའི་བཅོམ་ལྡན་འདས་ཡོད་པའི་ཕྱིར་ཞེ་ན། བཅོམ་ལྡན་འདས་མྱ་ངན་ལས་འདས་པར་གྱུར་ནས་རང་བཞིན་གྱིས་ཡོད་པར་མི་མངོན་པ་དེ་བཞིན་དུ་མེད་དོ་ཞེའམ་གཉིས་ཀ་དང་གཉིས་ཀ་མ་ཡིན་པར་རང་བཞིན་གྱིས་ཡོད་དོ་ཞེས་ཀྱང་མི་མངོན་ཏེ། ཁྱད་གཞི་བཅོམ་ལྡན་འདས་རང་བཞིན་གྱིས་མེད་པས་དེའི་ཁྱད་ཆོས་མེད་པའི་ཕྱིར། དེ་བཞིན་དུ་བཅོམ་ལྡན་འདས་བཞུགས་པར་གྱུར་ནའང་རང་བཞིན་གྱིས་ཡོད་པར་མི་མངོན་པ་དེ་བཞིན་དུ་མེད་དོ་ཞེའམ་གཉིས་ཀ་དང་གཉིས་ཀ་མིན་པར་རང་བཞིན་གྱིས་ཡོད་ཞེས་ཀྱང་མི་མངོན་ཏེ། རྟགས་སྔ་མ་ལྟར་རོ། །གཉིས་པ་ལ་གཉིས་ཏེ། འཁོར་འདས་གཉིས་མེད་དུ་གྲུབ་པ་དང་། དེས་ལུང་མ་བསྟན་གྱི་ལྟ་བ་ཡང་མི་འཐད་པར་གྲུབ་པའོ། །དང་པོ་ནི། བཅོམ་ལྡན་འདས་བཞུགས་པ་དང་མྱ་ངན་ལས་འདས་པ་གཉིས་ལ་སྤྲོས་པའི་མཐའ་བཞི་དང་བྲལ་མ་བྲལ་གྱི་ཁྱད་པར་མེད་པའི་ཕྱིར་ན། འཁོར་བ་མྱ་ངན་ལས་འདས་པ་ལས་རང་བཞིན་གྱིས་ཁྱད་པར་ཅུང་ཟད་ཡོད་པ་མ་ཡིན་ལ། མྱ་ངན་ལས་འདས་པ་ཡང་འཁོར་བ་ལས་རང་བཞིན་གྱིས་ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། འཁོར་འདས་དེ་གཉིས་རང་བཞིན་ཡོད་མེད་ཀྱི་ཁྱད་པར་ཤིན་ཏུ་ཕྲ་བ་ཅུང་ཟད་ཙམ་ཡང་ཡོད་པ་མ་ཡིན་པའི་ཕྱིར་ཏེ། མྱ་ངན་ལས་འདས་པའི་ཡང་དག་པའི་མཐའ་སྟོང་ཉིད་ཀྱི་སྟོང་ཚུལ་གང་ཡིན་པ་དེ་ནི་འཁོར་བའི་ཡང་དག་པའི་མཐའ་སྟོང་ཉིད་ཀྱི་ཚུལ་ཡིན་པའི་ཕྱིར་རོ། །གཉིས་པ་ལ་གཉིས་ཏེ། ལྟ་བ་གང་ལ་བརྟེན་པ་དང་། དེ་དགག་པའོ། །དང་པོ་ནི། དེ་བཞིན་གཤེགས་པ་གང་ཡིན་པ་དེ་མྱ་ངན་ལས་འདས་ཕན་ཆད་ཡོད་པ་དང་མེད་པ་དེ་གཉིས་ཀ་དང་གཉིས་ཀ་མིན་པར་ལྟ་བ་བཞི་ནི་མྱ་ངན་ལས་འདས་པ་ལ་བརྟེན་པའོ། །འཇིག་རྟེན་མཐའ་ཡོད་པ་དང་སོགས་པ་མཐའ་མེད་པ་དང་གཉིས་ཀ་དང་གཉིས་ཀ་མིན་པར་ལྟ་བ་བཞི་ནི་ཕྱི་མའི་མཐའ་ལ་བརྟེན་པའོ། །འཇིག་རྟེན་རྟག་པ་དང་ལ་སོགས་པ་མི་རྟག་པ་དང་གཉིས་ཀ་དང་གཉིས་ཀ་མིན་པར་ལྟ་བ་བཞི་ནི་སྔོན་གྱི་མཐའ་ལ་བརྟེན་པ་ཡིན་ནོ། །ལུས་སྲོག་ལ་བརྟེན་པ་གཉིས་ནི་ཤུགས་ལ་བསྟན་པ་ཡིན་ཏེ། འོག་ཏུ་དེ་འགོག་པའི་སྐབས་སུ་དེ་ཉིད་ཅི་ཞིག་གཞན་ཅི་ཞིག་ཞེས་འབྱུང་བས་གསལ་ལོ། །གཉིས་པ་ནི། དངོས་པོ་ཐམས་ཅད་རང་བཞིན་གྱིས་སྟོང་པ་ཡིན་པ་ལ་མཐའ་ཡོད་ཅི་ཞིག་ཡིན་མཐའ་མེད་ཅི་ཞིག་ཡིན། མཐའ་ཡོད་དང་མཐའ་མེད་གཉིས་ཀ་ཡིན་པ་ཅི་ཞིག་ཡིན་མཐའ་ཡོད་དང་མཐའ་མེད་གཉིས་ཀ་མིན་པ་ཅི་ཞིག་ཡིན་ཏེ་མིན་པར་ཐལ། རང་བཞིན་གྱིས་སྟོང་པའི་ཕྱིར། གཞན་ཡང་ལུས་སྲོག་གཉིས་དེ་ཉིད་དེ་གཅིག་ཅི་ཞིག་ཡིན་དེ་གཉིས་གཞན་ཅི་ཞིག་ཡིན་ཏེ་མིན་པར་ཐལ། རང་བཞིན་གྱིས་སྟོང་པའི་ཕྱིར། གཞན་ཡང་རྟག་པ་ཅི་ཞིག་ཡིན་མི་རྟག་པ་ཅི་ཞིག་ཡིན། རྟག་པ་དང་མི་རྟག་པ་གཉིས་ཀ་ཅི་ཞིག་ཡིན། རྟག་མི་རྟག་གཉིས་ཀ་མ་ཡིན་པ་ཅི་ཞིག་ཡིན་ཏེ་མིན་པར་ཐལ། རང་བཞིན་གྱིས་སྟོང་པའི་ཕྱིར། གསུམ་པ་གཞན་གྱིས་སྨྲས་པའི་ཉེས་པ་སྤོང་བ་ལ་གལ་ཏེ་མྱང་འདས་མེད་ན་མྱང་འདས་ཐོབ་པའི་ཕྱིར་དུ་ཆོས་སྟོན་པ་དོན་མེད་པར་འགྱུར་རོ་ཞེ་ན། དེ་ནི་ཐ་སྙད་ཙམ་ཡིན་གྱིས་དོན་དམ་པར་ན་སངས་རྒྱས་ཀྱིས་ནི་གནས་གང་དུ་ཡང་གང་ཟག་སུ་ལ་ཡང་ཆོས་འགའ་མ་བསྟན་ཏེ། དོན་དམ་པར་དམིགས་པ་ཐམས་ཅད་ཉེ་བར་ཞི་ཞིང་ཚིག་གི་སྤྲོས་པ་ཉེ་བར་ཞི་ལ་སེམས་ཀྱི་རྒྱུ་བ་ཞི་བ་སྟེ་དེའི་ཕྱིར་རོ། །གཉིས་པ་ལུང་དང་སྦྱར་བ་ནི། ཐེག་ཆེན་གྱི་མདོ་སྡེའི་མཐའ་ལས། མྱ་ངན་འདས་མེད་མྱང་འདས་སུ། །འཇིག་རྟེན་མགོན་གྱིས་བསྟན་པ་སྟེ། །ནམ་མཁའ་མདུད་པ་བོར་པ་ནི། །ནམ་མཁའ་ཉིད་ཀྱིས་བཀྲོལ་བ་ཡིན། །ཞེས་དང་། ཚངས་པས་ཞུས་པ་ལས་ཀྱང་། བཅོམ་ལྡན་འདས་གང་དག་ཆོས་འགའ་ཞིག་སྐྱེ་བའམ་འགག་པར་འཚལ་བ་དེ་དག་ལ་ནི་སངས་རྒྱས་འབྱུང་བ་མ་ལགས་སོ། །བཅོམ་ལྡན་འདས་གང་དག་འཁོར་བ་དངོས་པོར་འཚལ་བ་དེ་དག་ནི་འཁོར་བ་ལས་འདའ་བ་མ་ལགས་སོ། །ཅིའི་སླད་དུ་ཞེ་ན་བཅོམ་ལྡན་འདས་མྱ་ངན་ལས་འདས་པ་ཞེས་བགྱི་བ་ནི་གང་མཚན་མ་ཐམས་ཅད་རབ་ཏུ་ཞི་བ་རྣམ་པར་རྟོག་པ་ཐམས་ཅད་འགག་པ་ལགས་ན་བཅོམ་ལྡན་འདས་སྐྱེས་བུ་བླུན་པོ་ལེགས་པར་གསུངས་པའི་ཆོས་འདུལ་བ་ལས་རབ་ཏུ་བྱུང་ནས། མུ་སྟེགས་ཀྱི་ལྟ་བར་ལྟུང་བ་དེ་དག་ནི་འདི་ལྟ་སྟེ་ཏིལ་དང་ཏིལ་མར་དང་འོ་མ་ལས་མར་སར་ལྟར་མྱ་ངན་ལས་འདས་པ་དངོས་པོ་ལས་ཚོལ་བར་བགྱིད་དོ། །བཅོམ་ལྡན་འདས་གང་དག་ཆོས་ཐམས་ཅད་ཤིན་ཏུ་མྱ་ངན་འདས་པ་ལ་མྱ་ངན་ལས་འདས་པ་ཚོལ་བ་མངོན་པའི་ང་རྒྱལ་ཅན་དེ་དག་ནི་མུ་སྟེགས་ཅན་ཡིན་ནོ་ཞེས་ཁོ་བོས་གླེང་སྟེ། བཅོམ་ལྡན་འདས་རྣལ་འབྱོར་སྤྱོད་པ་ཡང་དག་པར་ཞུགས་པ་ནི་ཆོས་གང་ཡང་སྐྱེ་བའམ་འགག་པར་མི་བགྱིད་ལ་ཆོས་གང་ཡང་ཐོབ་པ་དང་མངོན་པར་རྟོགས་པར་མི་འཚལ་ལོ། །ཞེས་གསུངས་སོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། མྱ་ངན་ལས་འདས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་ལྔ་པའི་རྣམ་པར་བཤད་པའོ།། །།གཉིས་པ་ཁྱད་གཞི་རྟེན་འབྲེལ་བཤད་པ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། གོང་དུ། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །ཅེས་སོགས་དང་། རྟེན་ཅིང་འབྲེལ་བར་འབྱུང་བ་གང་། །མཐོང་བ་དེས་ནི་སྡུག་བསྔལ་དང་། །ཀུན་འབྱུང་དང་ནི་འགོག་པ་དང་། །ལམ་ཉིད་དེ་དག་མཐོང་བ་ཡིན། །ཞེས་རྟེན་འབྱུང་མཐོང་ན་བདེན་བཞིའི་དེ་ཉིད་མཐོང་བར་གསུངས་པའི་རྟེན་འབྱུང་དེ་གང་ཞེ་ན། དེའི་ལན་དུ་རྟེན་འབྱུང་གི་རྣམ་གཞག་སྟོན་ནོ། །གཉིས་པར་འབྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། རྟེན་འབྲེལ་ལུགས་འབྱུང་རྒྱས་པར་བཤད། དེ་ལ་འཇུག་ལྡོག་བྱེད་པའི་ཚུལ། རྟེན་འབྲེལ་ལུགས་བཟློག་བསྡུས་ཏེ་བསྟན་པའོ། །དང་པོ་ལ་གཉིས་ཏེ། འཕེན་བྱེད་རྒྱུ་འབྲས་དང་། འགྲུབ་བྱེད་རྒྱུ་འབྲས་སོ། །དང་པོ་ལ་གཉིས་ཏེ། འཕེན་བྱེད་ཀྱི་རྒྱུ་དང་། འཕོངས་པའི་འབྲས་བུའོ། །དང་པོ་ནི། བྱིས་པ་རྣམས་མ་རིག་པས་བསྒྲིབས་པས་ཡང་སྲིད་པ་ལེན་པར་བྱེད་པའི་ཕྱིར། བསོད་ནམས་དང་། བསོད་ནམས་མིན་པ་དང་། མི་གཡོ་བའི་འདུ་བྱེད་རྣམ་པ་གསུམ་པོ་དག་ལུས་དང་ངག་དང་ཡིད་ཀྱིས་མངོན་པར་འདུ་བྱེད་དོ། །མངོན་པར་འདུས་བྱས་པའི་ལས་བཟང་ངན་དེ་དག་གིས་རིགས་དྲུག་གི་འགྲོ་བར་འགྲོ་ཞིང་དེ་ནས་འདུ་བྱེད་ཀྱི་རྐྱེན་ཅན་གྱིས་རྣམ་པར་ཤེས་པར་འགྲོ་བ་རྣམས་སུ་འཇུག་པར་འགྱུར་རོ། །གཉིས་པ་ནི། མངལ་དུ་རྣམ་པར་ཤེས་པ་ཞུགས་པར་གྱུར་ནས་མིང་གཞིའི་ཕུང་པོ་དང་གཟུགས་ཀྱི་ཕུང་པོ་ཆགས་པར་འགྱུར་རོ། །དེ་ལྟར་མིང་དང་གཟུགས་ནི་ཆགས་པར་གྱུར་ནས་དེ་ལས་མིག་ལ་སོགས་པའི་སྐྱེ་མཆེད་དྲུག་ནི་འབྱུང་བར་འགྱུར་རོ། །སྐྱེ་མཆེད་དྲུག་ལ་རྟེན་ནས་ནི་དེ་ལས་རེག་པ་ཡང་དག་འབྱུང་བར་འགྱུར་རོ། །འོ་ན་རེག་པ་དེ་ཚུལ་ཇི་ལྟར་སྐྱེ། ངོ་བོ་དེ་གང་ཡིན་ཞེ་ན། བདག་རྐྱེན་མིག་དང་། དམིགས་རྐྱེན་གཟུགས་དང་། དེ་མ་ཐག་རྐྱེན་དྲན་བྱེད་དེ་ཡིད་ལ་བྱེད་པ་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བ་ཁོ་ན་སྟེ་ཚུལ་དེ་ལྟར་ན་དེ་མ་ཐག་རྐྱེན་མིང་གཞིའི་ཕུང་པོ་དང་། བདག་རྐྱེན་དང་དམིགས་རྐྱེན་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བར་འགྱུར་བ་ནི་སྐྱེ་ཚུལ་ཡིན་ལ། ངོ་བོ་ནི་མིག་དང་གཟུགས་དང་རྣམ་པར་ཤེས་པ་གསུམ་པོ་འདུས་ནས་ཡུལ་གྱི་འགྱུར་བ་ཡོངས་སུ་གཅོད་པ་གང་ཡིན་པ་དེ་ནི་རེག་པའོ། །རེག་པ་དེ་ལས་བདེ་སྡུག་སོགས་ཀྱི་ཚོར་བ་ཀུན་ཏུ་འབྱུང་བར་འགྱུར་རོ། །གསུམ་པ་ནི། ཚོར་བའི་རྐྱེན་གྱིས་སྲེད་པ་འབྱུང་སྟེ། ཚོར་བའི་དོན་དུ་སྲེད་པར་འགྱུར་བའི་ཕྱིར་རོ། །དེ་ཡང་ཚོར་བ་བདེ་བ་ལ་ནི་མི་འབྲལ་བ་དང་། སྡུག་བསྔལ་ལ་ནི་འབྲལ་བ་དང་། བཏང་སྙོམས་ལ་ནི་མི་ཉམས་པའི་ཕྱིར་སྲེད་དོ། །སྲེད་པར་གྱུར་ན་འདོད་པ་ཉེ་བར་ལེན་པ་དང་། ལྟ་བ་ཉེ་བར་ལེན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཉེ་བར་ལེན་པ་དང་། བདག་ཏུ་སྨྲ་བ་ཉེ་བར་ལེན་པ་རྣམ་པ་བཞི་པོ་ཉེ་བར་ལེན་པར་འགྱུར་རོ། །ཉེར་ལེན་དེ་བཞི་ཡོད་ན་དེ་བཞི་ཉེ་བར་ལེན་པ་པོ་དེའི་རྐྱེན་གྱིས་སྲིད་པ་རབ་ཏུ་འབྱུང་བར་འགྱུར་ཏེ། གལ་ཏེ་སོ་སོར་རྟོག་པའི་ཤེས་རབ་ཀྱི་སྟོབས་ཀྱིས་ཉེ་བར་ལེན་པ་རྣམས་སྤོངས་ནས་མེད་ན་འཁོར་བ་ལས་གྲོལ་བར་འགྱུར་བས་སྲིད་པ་འབྱུང་བར་མི་འགྱུར་བའི་ཕྱིར། འོ་ན་སྲིད་པ་གང་ཞེ་ན་སྲིད་པ་དེ་ཡང་ཕུང་པོ་ལྔ་སྟེ་འདིའི་སྐབས་ཀྱི་སྲིད་པ་ནི་ལས་ཀྱི་སྲིད་པ་ཡིན་ལ་དེ་ལ་ལུས་ངག་ཡིད་ཀྱི་ལས་གསུམ་ལས་ལུས་ངག་གིས་ལས་གཉིས་ནི་གཟུགས་ཀྱི་ཕུང་པོ་དང་། ཡིད་ཀྱི་ལས་ནི་ཕུང་པོ་གཞན་བཞིས་བསྡུས་པའི་ཕྱིར་རོ། །དེ་ཡང་མདོ་སྡེ་པས་ལུས་ངག་གི་ལས་གཟུགས་ཡིན་པ་བཀག་ནས་ཤེས་པར་འདོད་ཀྱང་། གཞུང་འདི་དང་སློབ་དཔོན་ཟླ་བས་ལུས་ངག་གི་ལས་གཉིས་པོ་གཟུགས་སུ་བཤད་དེ། འདིར་འགྲེལ་པ་ཚིག་གསལ་ལས། དེ་ལ་ལུས་དང་ངག་གི་ལས་ནི་གཟུགས་ཀྱི་ཕུང་པོའི་རང་བཞིན་ཡིན་ལ་ཡིད་ཀྱི་ལས་ནི་ཕུང་པོ་བཞིའི་རང་བཞིན་ཡིན་ཏེ། དེ་ལྟར་ན་སྲིད་པ་དེ་ཕུང་པོ་ལྔ་ཡིན་ནོ་ཞེས་ཤེས་པར་བྱའོ་ཞེས་གསུངས་པའི་ཕྱིར་རོ། །བཞི་པ་ནི། སྲིད་པ་ལས་ནི་ཚེ་ཕྱི་མའི་ཕུང་པོ་་་་་འབྱུང་ལ། ཕུང་པོ་སྨིན་པའི་རྒ་བ་དང་། ཕུང་པོ་འཇིག་པའི་ཤི་བ་དང་ནི་འཆི་བཞིན་པའི་དུས་སུ་ཆགས་པ་དང་བཅས་པའི་སྙིང་གི་གདུང་བ་མྱ་ངན་དང་། མྱ་ངན་དེས་ཀུན་ནས་བསློངས་པའི་ངག་གི་སྨྲེ་སྔགས་འདོན་པ་དང་བཅས་པ་དང་། དབང་པོ་ལྔ་ལ་གནོད་པའི་སྡུག་བསྔལ་དང་། ཡིད་ཀྱི་ཤེས་པ་ལ་གནོད་པའི་ཡིད་མི་བདེ་བ་དང་། སྡུག་བསྔལ་དང་ཡིད་མི་བདེ་བ་ལས་བྱུང་བའི་ལུས་དང་སེམས་ཀྱི་འཁྲུག་པ་རྣམས་ཏེ་དེ་དག་ནི་སྐྱེ་བ་ལས་རབ་ཏུ་འབྱུང་བར་འགྱུར་རོ། །ཚུལ་དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་ནི་བདེ་བ་དང་མ་འདྲེས་པ་འབའ་ཞིག་པ་འདི་འབྱུང་བར་འགྱུར་རོ། །གཉིས་པ་དེ་ལ་འཇུག་ལྡོག་བྱེད་པའི་ཚུལ་ནི། འཁོར་བའི་སྡུག་བསྔལ་གྱི་རྩ་བ་ནི་ལས་མངོན་པར་འདུ་བྱེད་པའི་འདུ་བྱེད་ཡིན་ཏེ། རྒྱུ་མཚན་དེའི་ཕྱིར་མཁས་པ་རྟེན་འབྱུང་གི་དེ་ཁོ་ན་ཉིད་མངོན་སུམ་དུ་མཐོང་བ་རྣམས་འཕེན་བྱེད་ཀྱི་ལས་མངོན་དུ་འདུ་མི་བྱེད་དོ། །རྒྱུ་མཚན་དེའི་ཕྱིར་མི་མཁས་པ་ནི་འདུ་བྱེད་བྱེད་པ་པོ་ཡིན་ལ། མཁས་པ་དེ་ཁོ་ན་ཉིད་མཐོང་བ་མ་རིག་པ་སྤོང་བ་ནི་འདུ་བྱེད་བྱེད་པ་པོ་མིན་ཏེ། དེ་ཁོ་ན་ཉིད་མངོན་སུམ་དུ་མཐོང་བའི་ཕྱིར་རོ། །གཉིས་པ་ལུགས་བཟློག་བསྡུས་ཏེ་བསྟན་པ་ནི། མ་རིག་པ་འགག་པ་སྟེ་སྤོངས་པར་གྱུར་ན་ནི་འདུ་བྱེད་རྣམས་ཀྱང་འབྱུང་བར་མི་འགྱུར་ཏེ། རྒྱུ་མཚན་མ་ཚང་བའི་ཕྱིར་རོ། །འོ་ན་མ་རིག་པ་གང་གིས་འགག་པར་འགྱུར་ཞེ་ན། མ་རིག་པ་འགག་པར་འགྱུར་བ་ནི་རྟེན་འབྱུང་གི་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས་དེ་ཁོ་ན་ཉིད་བསྒོམ་པས་འགག་པ་ཡིན་ནོ། །མ་རིག་པ་འགག་པས་འདུ་བྱེད་འགག་པར་འགྱུར་ལ། དེ་བཞིན་དུ་འདུ་བྱེད་ལ་སོགས་ཡན་ལག་སྔ་མ་དེ་དང་དེ་ནི་འགགས་པར་གྱུར་པས་ཡན་ལག་ཕྱི་མ་དེ་དང་དེ་ནི་མངོན་པར་མི་འབྱུང་སྟེ། རྐྱེན་མེད་པའི་ཕྱིར་རོ། །དེ་ལྟར་སྲིད་པའི་ཡན་ལག་འགག་པས་སྡུག་བསྔལ་གྱི་ཕུང་པོ་འབའ་ཞིག་པ་དེ་ནི་ཡན་ལག་དེ་ལྟར་དུ་ཡང་དག་པར་འགགས་སོ། །གཉིས་པ་ལུང་དང་སྦྱར་བ་ནི། སཱ་ལུ་ལྗང་པའི་མདོ་ལས། ནང་གི་རྟེན་ཅིང་འབྲེལ་བར་འབྱུང་བ་གཉིས་ཀྱི་ཕྱིར་འབྱུང་སྟེ། གཉིས་གང་ཞེ་ན་འདི་ལྟ་སྟེ་རྒྱུ་དང་འབྲེལ་བ་དང་། རྐྱེན་དང་འབྲེལ་བའོ། །དེ་ལ་ནང་གི་རྟེན་ཅིང་འབྲེལ་བར་འབྱུང་བ་རྒྱུ་འབྱུང་བ་དང་འབྲེལ་བར་འབྱུང་བ་གང་ཞེ་ན། གང་འདི་ལ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱི་ཚོར་བ། ཚོར་བའི་རྐྱེན་གྱི་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འབྱུང་བར་འགྱུར་རོ། །གལ་ཏེ་མ་རིག་པ་མ་བྱུང་ན་འདུ་བྱེད་རྣམས་ཀྱང་མི་མངོན་པ་ཞིག དེ་བཞིན་དུ་སྐྱེ་བ་མ་བྱུང་དུ་ཟིན་ན་རྒ་ཤིའི་བར་དུ་མི་མངོན་པ་ཞིག་ན། ཞེས་སོགས་རྒྱ་ཆེར་གསུངས་སོ། །གསུམ་པ་རབ་བྱེད་ཀྱི་མཚན་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྲིད་པའི་ཡན་ལག་བཅུ་གཉིས་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་དྲུག་པའི་རྣམ་པར་བཤད་པའོ།། །།གསུམ་པ་རྟེན་འབྲེལ་ཁྱད་པར་ཅན་རྟོག་པའི་ཕན་ཡོན་བཤད་པ་ནི། རྟེན་འབྲེལ་གྱི་གནས་ཚུལ་ཕྱིན་ཅི་མ་ལོག་པར་རྟོགས་ན་ཕྱིན་ཅི་ལོག་གི་ལྟ་བ་མཐའ་དག་ཁེགས་པར་འགྱུར་བས་དེ་ནི་རབ་བྱེད་ཉེར་བདུན་པས་སྟོན་ཏེ། འདི་ལ་གསུམ་ལས་དང་པོ་རབ་བྱེད་ཀྱི་འབྲེལ་ནི། སཱ་ལུ་ལྗང་པའི་མདོ་ལས། གང་གིས་དེ་ལྟ་བུའི་རྟེན་ཅིང་འབྲེལ་བར་འབྱུང་བ་ཅི་ལྟ་བུར་གྱུར་པ་ཡང་དག་པར་མཐོང་བ་དེ་ནི་སྔོན་གྱི་མཐའ་ལ་བརྟེན་པར་མི་བྱེད། ཕྱི་མའི་མཐའ་ལ་བརྟེན་པར་མི་བྱེད་དོ། །ཞེས་གསུངས་ན་དེ་ལ་སྔོན་གྱི་མཐའ་ནི་གང་ཡིན་ཞིང་། ཕྱི་མའི་མཐའ་ཡང་གང་ཡིན་ལ། ཅི་ལྟར་ན་བརྟེན་པར་མི་བྱེད་པ་ཡིན་ཞེ་ན། དེ་དག་བསྟན་པའི་ཕྱིར་རབ་བྱེད་འདི་གསུངས་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས་དང་པོ་རིག་པས་བསྒྲུབ་པ་ལ་གཉིས་ཏེ། དགག་བྱའི་ལྟ་བ་ངོས་བཟུང་བ་དང་། དེ་འགོག་བྱེད་ཀྱི་རིག་པ་བཤད་པའོ། །དང་པོ་ནི། བདག་འདས་པའི་དུས་ན་བྱུང་ཞེས་པ་དང་། མ་བྱུང་ཞེས་པ་དང་། གཉིས་ཀ་དང་གཉིས་ཀ་མིན་པ་ཞེས་པ་དང་། འཇིག་རྟེན་རྟག་པ་བ་དང་ལ་སོགས་པ་མི་རྟག་པ་དང་གཉིས་ཀ་དང་གཉིས་ཀ་མ་ཡིན་པར་ལྟ་བ་སྟེ་བརྒྱད་པོ་གང་ཡིན་པ་དེ་དག་ནི་སྔོན་གྱི་མཐའ་ལ་བརྟེན་པ་ཡིན་ནོ། །འདི་ལ་སྔོན་ནི་ད་ལྟར་གྱི་ལུས་ལ་ལྟོས་ནས་འདས་པའི་ལུས་སོ། །མཐའ་ནི་སྐྱེ་བ་གཅིག་ནས་གཅིག་ཏུ་བརྒྱུད་པའི་ཆ་སྔ་མའོ། །བརྟེན་པ་ནི་དེ་ལ་དམིགས་པའོ། །བདག་མ་འོངས་པའི་དུས་གཞན་དུ་འབྱུང་བར་འགྱུར་ཞེས་པ་དང་། མི་འབྱུང་ཞེས་པ་དང་། གཉིས་ཀ་དང་གཉིས་ཀ་མིན་ཞེས་པ་དང་། འཇིག་རྟེན་མཐའ་ཡོད་པ་དང་སོགས་པ་མེད་པ་དང་གཉིས་ཀ་དང་གཉིས་ཀ་མ་ཡིན་པར་ལྟ་བ་སྟེ་བརྒྱད་པོ་གང་ཡིན་པ་དེ་དག་ནི་ཕྱི་མའི་མཐའ་ལ་བརྟེན་པ་ཡིན་ནོ། །འདི་ལ་ཕྱི་མ་ནི་ད་ལྟར་གྱིས་ལུས་ལ་ལྟོས་ནས་འབྱུང་འགྱུར་གྱི་ལུས་སོ། །མཐའ་ནི་སྐྱེ་བ་གཅིག་ནས་གཅིག་ཏུ་བརྒྱུད་པའི་ཆ་ཕྱི་མའོ། །བརྟེན་པ་ནི་དེ་ལ་དམིགས་པའོ། །གཉིས་པ་ལ་གཉིས་ཏེ། རིག་པ་རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་བཞི་སྟེ། སྔོན་གྱིས་མཐའ་ལ་བརྟེན་པའི་འབྱུང་སོགས་བཞི་དགག ཕྱི་མའི་མཐའ་ལ་བརྟེན་པའི་འབྱུང་སོགས་བཞི་དགག སྔོན་གྱིས་མཐའ་ལ་བརྟེན་པའི་རྟག་སོགས་བཞི་དགག ཕྱི་མའི་མཐའ་ལ་བརྟེན་པའི་རྟག་སོགས་བཞི་དགག་པའོ། །དང་པོ་ལ་གསུམ་སྟེ། བདག་སྔོན་གྱི་དུས་སུ་བྱུང་བ་དགག དེར་མ་བྱུང་བ་དགག དེར་བྱུང་མ་བྱུང་གཉིས་ཀ་དང་གཉིས་མིན་ཕྱོགས་གཅིག་ཏུ་དགག་པའོ། །དང་པོ་ལ་གསུམ་སྟེ། ལེན་པ་པོའི་བདག་བྱུང་བ་དགག དེ་བླང་བྱ་དང་གཅིག་དང་གཞན་དུ་གྲུབ་པ་དགག དེ་གཉིས་ཀའི་དོན་བསྡུ་བའོ། །དང་པོ་ནི། བདག་འདས་པའི་དུས་ན་བྱུང་བར་གྱུར་ཏེ་ཞེས་བྱ་བ་དེ་ནི་མི་འཐད་དེ། སྔོན་གྱི་ཚེ་རབས་སྔ་མ་རྣམས་སུ་གང་བྱུང་བར་གྱུར་པ་དེ་ཉིད་ད་ལྟར་གྱི་བདག་འདི་ནི་མ་ཡིན་པའི་ཕྱིར་རོ། །གལ་ཏེ་སྔར་གྱིས་བདག་དེ་ཉིད་ད་ལྟར་གྱི་བདག་ཏུ་འགྱུར་རོ་སྙམ་ན། དེ་ནི་མི་འཐད་དེ། དེ་ལྟར་ན་སྔར་གྱི་ཉེར་ལེན་གྱི་ཕུང་པོ་དང་ད་ལྟར་གྱི་ཉེར་ལེན་གྱི་ཕུང་པོ་གཅིག་ཏུ་ཐལ་བར་འགྱུར་བ་ལས་གཅིག་པ་ཡང་མི་འཐད་དེ། སྔ་ཕྱིའི་ཉེར་ལེན་གཉིས་པོ་ཐ་དད་པར་འགྱུར་བའི་ཕྱིར་རོ། །ཉེ་བར་ལེན་པ་ཐ་དད་ཀྱང་བདག་གཅིག་ཡིན་ནོ་ཞེ་ན་མི་འཐད་དེ། ཉེ་བར་ལེན་པ་མ་གཏོགས་པར་ཁྱོད་ཀྱི་བདག་ནི་གང་ཞིག་ཡིན་ཏེ་མེད་པའི་ཕྱིར་རོ། །གཉིས་པ་ལ་གཉིས་ཏེ། དེ་བླང་བྱ་དང་གཅིག་ཏུ་གྲུབ་པ་དགག་པ་དང་། གཞན་དུ་གྲུབ་པ་དགག་པའོ། །དང་པོ་ནི། ཉེ་བར་ལེན་པ་མ་གཏོགས་པའི་བདག་ཡོད་པ་མ་ཡིན་ཞེས་བྱས་པའི་ཚེ་རང་སྡེ་ཁ་ཅིག་ཉེ་བར་ལེན་པ་ཉིད་བདག་ཏུ་རྟོག་པར་བྱེད་པ་ཡིན་ན། འོ་ན་དངོས་སྨྲ་བ་ཁྱོད་ཀྱིས་འདོད་པའི་བདག་ནི་མེད་པར་ཐལ། ཁྱོད་ཀྱིས་ཉེར་ལེན་གྱི་ཕུང་པོ་ཉིད་བདག་ཏུ་འདོད་པ་ཡིན་ལ་དེ་བདག་མ་ཡིན་པའི་ཕྱིར་ཏེ། ཉེར་ལེན་གྱི་ཕུང་པོ་དེ་ནི་འབྱུང་བ་དང་འཇིག་པ་ཡིན་པས་ཁྱོད་ཀྱིས་འདོད་པའི་བདག་གི་མཚན་ཉིད་མ་ཚང་བའི་ཕྱིར་རོ། །གཞན་ཡང་ཉེ་བར་བླང་བ་ཇི་ལྟ་བུར་ཉེ་བར་ལེན་པ་པོ་ཡིན་པར་འགྱུར་ཏེ་མི་འགྱུར་བར་ཐལ། དེ་ལྟར་ན་བྱ་བྱེད་གཅིག་ཏུ་འགྱུར་བ་ལ་སོགས་པའི་སྐྱོན་དུ་མ་ཡོད་པའི་ཕྱིར་རོ། །གཉིས་པ་ནི། གཞན་སྡེ་ཁ་ཅིག་བདག་ཉེ་བར་ལེན་པ་ལས་གཞན་དུ་ཡོད་དོ་ཞེ་ན། བདག་ནི་ཉེ་བར་ལེན་པ་ལས་གཞན་དུ་འཐད་པ་ཉིད་མ་ཡིན་པར་ཐལ། གལ་ཏེ་བདག་ཉེ་བར་ལེན་པ་ལས་གཞན་ཡིན་ན་ཉེ་བར་ལེན་པ་མེད་པར་ཡང་བཟུང་དུ་ཡོད་པར་རིགས་ན་བཟུང་དུ་མེད་པའི་ཕྱིར། གསུམ་པ་དེ་གཉིས་ཀའི་དོན་བསྡུ་བ་ནི། གོང་དུ་བཤད་པ་དེ་ལྟར་བདག་དེ་ནི་ཉེ་བར་ལེན་པའི་ཕུང་པོ་ལས་གཞན་ཡང་མ་ཡིན་ལ་དེ་ནི་ཉེ་བར་ལེན་པའི་ཕུང་པོ་ཉིད་ཀྱང་མ་ཡིན་ཞིང་། བདག་ནི་ཉེ་བར་ལེན་པའི་ཕུང་པོ་མེད་པར་ཡང་གདགས་སུ་ཡོད་པ་མ་ཡིན་ལ། བདག་དེ་ཐ་སྙད་ཙམ་དུ་མེད་པ་ཉིད་དུ་ཡང་མ་ངེས་ཏེ། ཕུང་པོ་ལ་བརྟེན་ནས་འདོགས་པའི་ཕྱིར། གཉིས་པ་དེར་མ་བྱུང་བ་དགག་པ་ལ་གཉིས་ཏེ། ད་ལྟར་གྱི་བདག་གཞན་མ་ཡིན་པའི་རྟགས་ཀྱིས་དགག་པ་བ་དང་། ད་ལྟར་གྱིས་བདག་གསར་བྱུང་མ་ཡིན་པའི་རྟགས་ཀྱིས་དགག་པའོ། །དང་པོ་ནི། བདག་འདས་པའི་དུས་ན་མ་བྱུང་བའི་ངོ་བོར་རང་བཞིན་གྱིས་གནས་སོ་ཞེས་བྱ་བ་དེ་ཡང་མི་འཐད་དེ། སྔོན་ཚེ་རྣམས་སུ་གང་བྱུང་བའི་བདག་དེ་ལས་ད་ལྟར་གྱི་བདག་འདི་གཞན་མ་ཡིན་པའི་ཕྱིར། གལ་ཏེ་སྔར་གྱིས་བདག་དེ་ལས་ད་ལྟར་གྱི་བདག་འདི་ནི་གཞན་དུ་གྲུབ་པར་གྱུར་ན་ད་ལྟར་གྱི་བདག་འདི་སྔར་གྱི་བདག་དེ་ལ་ལྟོས་པ་མེད་པར་ཡང་འབྱུང་བར་འགྱུར་ལ། བདག་སྔ་མ་དེ་ནི་རང་གི་དུས་དེ་བཞིན་དུ་ཕྱི་མ་སྐྱེས་པ་ན་ཡང་མ་འགག་པར་གནས་པར་འགྱུར་ཞིང་། ཚེ་སྔ་མ་དེར་མ་ཤི་བར་ཡང་ཚེ་འདིར་སྐྱེ་བར་འགྱུར་བའི་སྐྱོན་ཡོད་པའི་ཕྱིར་རོ། །གཞན་ཡང་སྔ་མའི་བདག་ཆད་པར་ཐལ། སྔ་མའི་བདག་ཞིག་ནས་ཕྱི་མ་དོན་གཞན་སྐྱེས་པའི་ཕྱིར། སྔར་བྱས་པའི་ལས་རྣམས་ཆུད་ཟ་བར་ཡང་འགྱུར་ཏེ། རྣམ་སྨིན་གྱི་དུས་སུ་བྱེད་པ་པོའི་བདག་ཞིག་ནས་རྣམ་སྨིན་མྱོང་བ་པོའི་བདག་དོན་གཞན་ཞིག་སྐྱེས་པའི་ཕྱིར། གཞན་ཡང་གང་ཟག་གཞན་གྱིས་བྱས་པའི་ལས་རྣམས་ཀྱི་རྣམ་པར་སྨིན་པ་གཞན་གྱིས་སོ་སོར་མྱོང་བར་འགྱུར་ཏེ། སྔ་མའི་བདག་གཞན་གྱིས་བྱས་པ་ཕྱི་མའི་བདག་དོན་གཞན་གྱིས་མྱོང་བའི་ཕྱིར་དང་། དེ་ལ་སོགས་པ་མ་བྱསཔའི་ལས་ཀྱིས་འབྲས་བུ་དང་ཕྲད་པ་ལ་སོགས་པར་ཐལ་བར་འགྱུར་ཏེ། ལས་བྱེད་པ་པོ་ལས་དོན་གཞན་པའི་ཕྱི་མས་རྣམ་སྨིན་མྱོང་བའི་ཕྱིར། གཉིས་པ་ནི། སྔར་གྱིས་བདག་ལས་གཞན་པའི་ད་ལྟར་གྱི་བདག་ཞིག་འདིར་སྐྱེས་པ་ཡིན་ནོ་ཞེ་ན། སྔར་མ་བྱུང་བ་ལས་ཕྱིས་བདག་གཞན་ཞིག་གསར་དུ་འབྱུང་བ་མིན་ཏེ། འདི་ལ་སྐྱོན་དུ་མར་ཐལ་བར་འགྱུར་བའི་ཕྱིར། ཅི་ལྟར་ཞེ་ན། བདག་ནི་རྒྱུས་བྱས་པར་འགྱུར་ཏེ། སྔར་མ་བྱུང་བ་ལས་གསར་དུ་བྱུང་བའི་ཕྱིར། འདོད་ན་ཁས་བླང་འགལ་ཏེ། བདག་རྫས་ཡོད་དུ་འདོད་པ་ཁ་ཅིག་གིས་རྟག་པར་འདོད་ལ། ཁ་ཅིག་གིས་ནི་རྟག་མི་རྟག་གང་དུ་ཡང་བརྗོད་དུ་མེད་པར་ཁས་བླངས་པའི་ཕྱིར། བདག་ཕྱིས་འབྱུང་བ་དེ་རྒྱུ་མེད་ཅན་དུ་ཡང་འགྱུར་ཏེ། དེ་བྱེད་པ་པོའི་བདག་དོན་གཞན་དང་དུས་མཉམ་པས་བྱེད་པ་པོ་སྔ་མ་སྔོན་དུ་མ་སོང་བའི་ཕྱིར། འང་ཞེས་པ་ནི་རྣམ་པར་བརྟག་པའི་དོན་དུ་འགྲེལ་བར་བཤད་དོ། །ཁ་ཅིག་གིས་འང་གི་འབྲུ་ནོན་བྱས་པ་ནི་འགྲེལ་པ་དང་མི་མཐུན་ནོ། །གསུམ་པ་བདག་འདས་པའི་དུས་ན་བྱུང་མ་བྱུང་གཉིས་ཀ་དང་གཉིས་མིན་ཕྱོགས་གཅིག་ཏུ་དགག་པ་ནི། འདས་པའི་དུས་ན་བདག་བྱུང་མ་བྱུང་གཉིས་ཀ་དང་། གཉིས་ཀ་མ་ཡིན་པར་འདས་པ་ལ་ལྟ་བ་གང་ཡིན་པ་དེ་དག་འཐད་པ་མ་ཡིན་ཏེ། གོང་དུ་བསྟན་པ་དེ་ལྟར་བདག་འདས་པའི་དུས་སུ་བྱུང་མ་བྱུང་སོ་སོ་བ་མེད་པས་གཉིས་ཀ་མི་འཐད་ལ། དགག་བྱ་གཉིས་ཀ་མེད་པས་གཉིས་མིན་ཡང་མི་འཐད་པའི་ཕྱིར་རོ། །གཉིས་པ་ཕྱི་མའི་མཐའ་ལ་བརྟེན་པའི་འབྱུང་སོགས་བཞི་དགག་པ་ནི། བདག་མ་འོངས་པའི་དུས་གཞན་དུ་འབྱུང་བར་འགྱུར་བ་དང་། འབྱུང་བར་མི་འགྱུར་བ་དང་། གཉིས་ཀ་དང་གཉིས་ཀ་མ་ཡིན་ཞེས་བྱ་བར་ལྟ་བ་གང་ཡིན་པ་དེ་དག་ནི་མི་འཐད་དེ། འདས་པའི་དུས་ན་འབྱུང་སོགས་བཞི་འགོག་བྱེད་ཀྱི་རིག་པ་དང་མཚུངས་པ་ཡིན་པའི་ཕྱིར། ཅི་ལྟར་མཚུངས་ཞེ་ན། མ་འོངས་དུས་ན་འབྱུང་འགྱུར་ཞེས། །བྱ་བ་དེ་ཡང་མི་འཐད་དོ། །མ་འོངས་རྣམས་སུ་གང་བྱུང་བ། །དེ་ཉིད་འདི་ནི་མ་ཡིན་ནོ། །ཞེས་དང་། མ་འོངས་དུས་ན་མི་འབྱུང་ཞེས། །བྱ་བ་དེ་ཡང་མི་འཐད་དོ། །མ་འོངས་དུས་སུ་གང་བྱུང་བ། །དེ་ལས་འདི་གཞན་མ་ཡིན་ནོ། །ཞེས་སོགས་སྦྱར་བ་བྱ་བ་ཡིན་ནོ། །གསུམ་པ་སྔོན་གྱི་མཐའ་ལ་བརྟེན་པའི་རྟག་སོགས་བཞི་དགག་པ་ལ་གཉིས་ཏེ། དགག་པ་རྒྱས་པར་བཤད་པ་དང་། དགག་པ་བསྡུས་ཏེ་བསྟན་པའོ། །དང་པོ་ལ་བཞི་སྟེ། རྟག་པ་དགག མི་རྟག་པ་དགག གཉིས་ཀ་དགག གཉིས་ཀ་མིན་པ་དགག་པའོ། །དང་པོ་ནི། མིའི་འགྲོ་བས་དགེ་བའི་ལས་བྱས་ནས་ལྷར་སྐྱེ་བའི་ཚེ་ན། གལ་ཏེ་ལྷ་དེ་ནི་སྔར་གྱི་མི་དེ་ཡིན་པར་གྱུར་ན་དེ་ལྟ་ན་ནི་ལྷ་དེ་རྟག་པར་འགྱུར་བ་ཡིན་ན་ཡང་སྔ་མ་དེ་མ་ཡིན་པས་འཇིག་རྟེན་རྟག་པར་འཐད་པ་མ་ཡིན་ནོ། །གཞན་ཡང་ལྷ་ནི་རྟག་པ་ཡིན་ན་མ་སྐྱེས་པར་ཉིད་དུ་འགྱུར་ཏེ། རྟག་པ་ལ་སྐྱེ་བ་མེད་པའི་ཕྱིར་རོ། །གཉིས་པ་ནི། གལ་ཏེ་ཕྱིས་ཀྱི་ལྷ་དེ་ལས་སྔར་གྱི་མི་དེ་གཞན་ཡིན་ན་དེ་ལྟ་ན་ནི་སྔར་གྱི་མིའི་རྒྱུན་དེ་མི་རྟག་པ་སྟེ་ཆད་པར་གྱུར་ཅིང་། གལ་ཏེ་ལྷ་མི་གཞན་ཡིན་ན་རྒྱུད་གཅིག་ཏུ་ནི་འཐད་པར་མི་འགྱུར་བ་ལས་དེ་ཡང་མ་ཡིན་པའི་ཕྱིར་ན་འཇིག་རྟེན་མི་རྟག་པར་འདོད་པ་ཡང་འཐད་པ་མ་ཡིན་ནོ། །གསུམ་པ་ནི། གལ་ཏེ་ལྷ་འདི་ཕྱོགས་གཅིག་སྟེ་ལུས་ཀྱི་ངོས་ནས་ལྷ་ཡིན་ལ། ཕྱོགས་གཅིག་སྟེ་བདག་གི་ངོས་ནས་མི་ནི་ཡིན་པར་གྱུར་ན་དེའི་ཚེ་སྔར་གྱི་མིའི་ཕྱོགས་གཅིག་ཕྱིས་ཀྱི་ལྷའི་དུས་སུ་ཡང་གནས་པས་རྟག་པ་དང་། མིའི་ཕྱོགས་གཅིག་ལྷའི་དུས་སུ་ཞིག་པས་མི་རྟག་པར་འགྱུར་བ་ཡིན་ན་སྔ་མ་དེ་ཡང་རིག་པ་མ་ཡིན་པས་འཇིག་རྟེན་རྟག་མི་རྟག་གཉིས་ཀར་ལྟ་བ་འཐད་པ་མ་ཡིན་ནོ། །བཞི་པ་ནི། གལ་ཏེ་དགག་བྱ་རྟག་པ་དང་མི་རྟག་པ་གཉིས་ཀ་གྲུབ་པར་འགྱུར་ན་ནི་རྟག་པ་ཡང་མ་ཡིན་མི་རྟག་པ་ཡང་མ་ཡིན་པའི་ཕུང་པོ་གསུམ་པ་ནི་གྲུབ་པར་འགྱུར་བར་འདོད་ལ་རག་པ་ལས་སྔ་མ་མ་གྲུབ་པས་འཇིག་རྟེན་རྟག་མི་རྟག་གཉིས་ཀ་མ་ཡིན་པར་ལྟ་བ་ཡང་མི་འཐད་པ་ཡིན་ནོ། །གཉིས་པ་དགག་པ་བསྡུས་ཏེ་བསྟན་པ་ལ་བཞི་སྟེ། རྟག་པ་དགག མི་རྟག་པ་དགག གཉིས་ཀ་དགག གཉིས་མིན་དགག་པའོ། །དང་པོ་ནི། གལ་ཏེ་བདག་གམ་ཕུང་པོ་གང་ཞིག ཚེ་སྔ་མའི་འགྲོ་བ་གང་ནས་འགྲོ་བ་གར་འོང་བར་འགྱུར་ཞིང་སླར་ཡང་འགྲོ་བ་གཞན་དུ་ཡང་འགྲོ་བར་འགྱུར་བ་རང་བཞིན་གྱིས་ཡོད་ན་དེའི་ཕྱིར་འཁོར་བ་པོ་དེ་ཐོག་མ་མེད་པ་ནས་གནས་པས་རྟག་པར་འགྱུར་བ་ཞིག་ན་ཐོག་མེད་ནས་གནས་པ་དེ་ཡང་རང་བཞིན་གྱིས་ཡོད་པ་མ་ཡིན་པས་འཁོར་བ་པོ་རྟག་པར་འདོད་པ་འཐད་པ་མ་ཡིན་ནོ། །གཉིས་པ་ནི། འཇིག་རྟེན་མི་རྟག་པ་ཡིན་ནོ་སྙམ་ན་དེ་ཡང་མི་འཐད་དེ། གལ་ཏེ་ལྟས་པའི་རྟག་པ་རང་བཞིན་གྱིས་གྲུབ་པ་འགའ་ཡང་མེད་ན་མི་རྟག་པ་རང་བཞིན་གྱིས་གྲུབ་པ་གང་ཞིག་ཡིན་པར་འགྱུར་ཏེ་དེ་མེད་པའི་ཕྱིར་རོ། །གསུམ་པ་ནི། འཇིག་རྟེན་རྟག་པ་དང་ནི་མི་རྟག་པ་གཉིས་ཀ་ཡིན་པའང་མི་འཐད་དེ། གཉིས་ཀའི་སྐྱོན་དུ་འགྱུར་བའི་ཕྱིར་རོ། །བཞི་པ་ནི། འཇིག་རྟེན་རྟག་མི་རྟག་དེ་གཉིས་བསལ་བར་ཏེ་བཀག་པར་གྱུར་པའི་ཕུང་པོ་གསུམ་པ་ཡང་མ་ཡིན་ཏེ། དགག་བྱ་རྟག་མི་རྟག་གཉིས་མེད་པའི་ཕྱིར་རོ། །བཞི་པ་ཕྱི་མའི་མཐའ་ལ་བརྟེན་པའི་མཐའ་སོགས་བཞི་དགག་པ་ལ་གསུམ་སྟེ། མཐའ་ཡོད་མེད་སོ་སོར་དགག གཉིས་ཀ་དགག གཉིས་མིན་དགག་པའོ། །དང་པོ་ལ་གཉིས་ཏེ། འཇིག་རྟེན་ཕ་རོལ་མེད་པར་ཐལ་བས་དགག་པ་དང་། འབྱུང་འཇིག་བྱེད་པའི་རྟགས་ཀྱིས་དགག་པའོ། །དང་པོ་ནི། གལ་ཏེ་སེམས་ཅན་གྱི་འཇིག་རྟེན་ཚེ་འདིའི་མཇུག་ཏུ་མཐའ་ཡོད་པ་སྟེ་ཞིག་ནས་ཕྱིས་སེམས་ཅན་འབྱུང་བ་མེད་ན་སེམས་ཅན་གྱི་འཇིག་རྟེན་ཕ་རོལ་ཡོད་པར་ཇི་ལྟར་འགྱུར་ཏེ་མི་འགྱུར་བ་ལས་འཇིག་རྟེན་ཕ་རོལ་ཡོད་པས་འཇིག་རྟེན་མཐའ་དང་ལྡན་པར་མི་འཐད་དོ། །གལ་ཏེ་སེམས་ཅན་གྱི་འཇིག་རྟེན་ཚེ་འདིའི་མཇུག་ཏུ་མཐའ་སྟེ་ཞིག་པ་མེད་ན། སེམས་ཅན་གྱི་འཇིག་རྟེན་ཕ་རོལ་ཡོད་པར་ཇི་ལྟར་འགྱུར་ཏེ། ཚེ་འདིར་སེམས་ཅན་མ་ཤི་བར་སྐྱེ་བ་ཕྱི་མ་ལེན་པ་མེད་པའི་ཕྱིར་རོ། །དེའི་ཕྱིར་འཇིག་རྟེན་མཐའ་མེད་པ་ཡང་མི་འཐད་དོ། །གཉིས་པ་ལ་གཉིས་ཏེ། རྟགས་བཀོད་པ་དང་། དེ་བསྒྲུབ་པའོ། །དང་པོ་ནི། སེམས་ཅན་གྱི་འཇིག་རྟེན་ཚེ་འདིའི་མཐར་ཞིག་ནས་ཕྱིས་མི་སྐྱེ་བའི་མཐའ་ཡོད་པ་ཉིད་དང་ནི་ཚེ་འདིའི་མཇུག་ཏུ་ཞིག་པའི་མཐའ་མེད་པ་ཉིད་ཀྱང་མི་རིགས་ཏེ། གང་གི་ཕྱིར་ན་ཕུང་པོ་རྣམས་ཀྱི་རྒྱུན་འདི་ནི་རྒྱུ་རྐྱེན་འཚོགས་པའི་དབང་གིས་སྔ་མ་འགག་པ་ན་ཕྱི་མ་འབྱུང་བ་མར་མེའི་འོད་དང་མཚུངས་པར་འགྱུར་བ་དེའི་ཕྱིར། དེ་ཡང་སྔ་མ་འགག་པས་མཐའ་མེད་སེལ་ལ། ཕྱི་མ་འབྱུང་བས་མཐའ་ཡོད་སེལ་ལོ། །གཉིས་པ་ནི། གལ་ཏེ་སྔ་མ་མིའི་ཕུང་པོ་འཇིག་པར་འགྱུར་ཞིང་མིའི་ཕུང་པོ་འདི་ལ་བརྟེན་པར་བྱས་ནས་ལྷའི་ཕུང་པོ་ཕྱི་མ་དེ་ནི་མི་འབྱུང་ན་རྒྱུ་མཚན་དེས་ན་སེམས་ཅན་གྱི་འཇིག་རྟེན་མཐའ་ཡོད་པར་འགྱུར་ན་ལུས་ཕྱི་མ་འབྱུང་བའི་ཕྱིར་མཐའ་ཡོད་པ་མ་ཡིན་ནོ། །གལ་ཏེ་མིའི་ཕུང་པོ་སྔ་མ་ཚེ་འདིའི་མཐར་མི་འཇིག་ཅིང་མིའི་ཕུང་པོ་འདི་ལ་བརྟེན་པར་བྱས་ནས་ལྷའི་ཕུང་པོ་ཕྱི་མ་དེ་ནི་མི་འབྱུང་ན་རྒྱུ་མཚན་དེས་ན་སྔ་མ་དེ་ཉིད་རྟག་ཏུ་གནས་པས་འཇིག་རྟེན་ཞིག་པའི་མཐའ་མེད་པར་འགྱུར་ན་འཇིག་རྟེན་སྔ་མ་འཇིག་ཅིང་ཕུང་པོ་ཕྱི་མ་སྐྱེ་བས་འཇིག་རྟེན་མཐའ་མེད་པ་ཡང་མི་འཐད་དོ། །གཉིས་པ་གཉིས་ཀ་དགག་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གལ་ཏེ་སེམས་ཅན་གྱི་འཇིག་རྟེན་འདིའི་ཕྱོགས་གཅིག་མཐའ་ཡོད་པ་སྟེ་འཇིག་ལ། ཕྱོགས་གཅིག་མཐའ་ནི་མེད་པ་སྟེ་སྐྱེ་བ་ཕྱི་མར་འགྲོ་བར་འགྱུར་ན་འཇིག་རྟེན་མཐའ་ཡོད་པ་དང་མཐའ་མེད་པ་གཉིས་ཀར་འགྱུར་ན་ཕྱོགས་གཅིག་གི་མཐའ་ཡོད་མེད་དེ་ཡང་རིག་པ་མ་ཡིན་ནོ། །གཉིས་པ་ནི། གལ་ཏེ་འཇིག་རྟེན་ཕྱོགས་གཅིག་འཇིག་ཕྱོགས་གཅིག་མི་འཇིག་པ་གཉིས་ཀ་ཡིན་ན་ཉེ་བར་ལེན་པ་པོ་ཕྱོགས་གཉིས་ཀར་འགྱུར་རམ། ཉེ་བར་བླང་བྱ་ཕྱོགས་གཉིས་ཀར་འགྱུར། དང་པོ་ལྟར་ན། འཐད་པ་གང་གིས་ཅི་ལྟ་བུར་ན་ཉེ་བར་ལེན་པ་པོ་བདག་གི་ཕྱོགས་གཅིག་རྣམ་པར་འཇིག་པར་འགྱུར་ལ་དེའི་ཕྱོགས་གཅིག་རྣམ་པར་འཇིག་པར་མི་འགྱུར་བ་དེ་ལྟར་འདོད་པ་དེ་ནི་མི་རིག་སྟེ། དེ་དམིགས་རུང་མ་དམིགས་པའི་ཕྱིར་དང་། ཕུང་པོ་དག་ལ་རྣམ་པ་ལྔས་བཙལ་ན་བདག་ཡོད་པ་མིན་པའི་ཕྱིར་དང་། དེའི་ཕྱོགས་གཅིག་འཇིག་ཕྱོགས་གཅིག་མི་འཇིག་ན་ཆ་གཅིག་གིས་ལྷར་འགྱུར་ཆ་གཅིག་གིས་མིར་འགྱུར་བའི་སྐྱོན་ཡོད་པའི་ཕྱིར་རོ། །གཉིས་པ་ལྟར་ན། ཅི་ལྟ་བུར་ན་ཉེ་བར་བླང་བར་བྱ་བ་ཕུང་པོའི་ཕྱོགས་གཅིག་རྣམ་པར་འཇིག་པར་འགྱུར་ལ་ཕྱོགས་གཅིག་རྣམ་པར་འཇིག་པར་མི་འགྱུར་བ་དེ་ལྟར་འདོད་པ་དེ་ཡང་མི་རིག་སྟེ། དེ་དམིགས་རུང་མ་དམིགས་པའི་ཕྱིར་དང་། ཆ་གཅིག་གིས་ལྷའི་ཕུང་པོ་དང་ཆ་གཅིག་གིས་མིའི་ཕུང་པོར་ཐལ་བའི་སྐྱོན་ཡོད་པའི་ཕྱིར་རོ། །གསུམ་པ་གཉིས་མིན་དགག་པ་ནི། འཇིག་རྟེན་མཐའ་ཡོད་མེད་གཉིས་མིན་དུ་མ་གྲུབ་སྟེ། གལ་ཏེ་འཇིག་རྟེན་མཐའ་ཡོད་དང་མཐའ་མེད་པ་གཉིས་ཀ་གྲུབ་པར་གྱུར་ན་ནི་དེ་གཉིས་རེ་རེ་ནས་བཀག་པའི་མཐའ་ཡོད་པ་མ་ཡིན་པ་དང་མཐའ་མེད་ཀྱང་མ་ཡིན་པར་འགྲུབ་པར་འགྱུར་བ་འདོད་ལ་རག་ན། དགག་བྱ་ངོ་བོས་མ་གྲུབ་པས་དེ་བཀག་པ་ཡང་ངོ་བོས་མ་གྲུབ་པའི་ཕྱིར་རོ། །གཉིས་པ་རིག་པ་བསྡུས་སྟེ་བསྟན་པ་ནི། འགྲེལ་པ་ཚིག་གསལ་ལས་དེ་ལྟར་ན་རེ་ཤིག་ཉེ་བར་ལེན་པ་པོ་དང་ཉེ་བར་ལེན་པ་ཀུན་རྫོབ་པ་གཟུགས་བརྙན་ལྟ་བུའི་རྣམ་པ་ཅན་ཞལ་གྱིས་བཞེས་ནས་ཀྱང་རྟག་པ་ལ་སོགས་པར་ལྟ་བ་མི་སྲིད་པར་བསྟན་ནས། ད་ནི་རྣམ་པ་ཐམས་ཅད་དུ་དངོས་པོའི་རང་བཞིན་མ་དམིགས་པས་མོ་གཤམ་གྱི་བུའི་སྔོ་བསང་དང་དཀར་ཤམ་ཉིད་ལྟར་རྟག་པ་ལ་སོགས་པར་ལྟ་བ་རྣམས་མི་སྲིད་པར་བསྟན་པར་བཞེད་ནས་ཞེས་གསུངས་པའི་དོན། གོང་དུ་ཁྱད་གཞི་ཀུན་རྫོབ་ཏུ་ཞལ་གྱིས་བཞེས་ནས་ཁྱད་ཆོས་རྟག་སོགས་སུ་ལྟ་བ་བཀག་པ་ལས་ཡང་ན་དོན་དམ་དུ་ཁྱད་གཞི་ཉིད་མ་གྲུབ་པས་ཁྱད་ཆོས་རྟག་པ་ལ་སོགས་པར་ལྟ་བ་གང་དག་ནི་ཡུལ་གང་དུ་གང་ཟག་གང་ལ་ནི་རྒྱུ་ཅི་ལས་ཀུན་ཏུ་འབྱུང་བར་འགྱུར་ཏེ་མི་འགྱུར་བར་ཐལ། དངོས་པོ་ཐམས་ཅད་དག་རང་བཞིན་གྱིས་སྟོང་པའི་ཕྱིར་རོ། །གཉིས་པ་ལུང་དང་སྦྱར་བ་ནི། སཱ་ལུ་ལྗང་པའི་མདོ་ལས། གང་ལ་ལ་ཞིག་གིས་ཡང་དག་པའི་ཤེས་རབ་ཀྱིས་དེ་ལྟར་རྟེན་ཅིང་འབྲེལ་བར་འབྱུང་བ་ཡང་དག་པ་ཇི་ལྟ་བ་བཞིན་དུ་རྟག་པར་རྒྱུན་དུ་སྲོག་མེད་པར་ཇི་ལྟ་བུ་ཉིད་དང་། མ་ནོར་བ་ཉིད་དང་། མ་སྐྱེས་པ་དང་། མ་བྱུང་བ་དང་། མ་བྱས་པ་དང་། འདུ་མ་བྱས་པ་དང་། ཐོགས་པ་མེད་པ་དང་། སྒྲིབ་པ་མེད་པ་དང་། ཞི་བ་དང་། འཇིག་པ་མེད་པ་དང་། མི་འཕྲོག་པ་དང་། ཟག་པ་མེད་པ་དང་། རྣམ་པར་ཞི་བའི་རང་བཞིན་དུ་མཐོང་བ་དང་། མེད་པ་དང་། གསོག་དང་། གསོབ་དང་། སྙིང་པོ་མེད་པ་དང་། ནད་དང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་དེ་ནི། བདག་འདས་པའི་དུས་ན་བྱུང་བ་ཞིག་གམ། འོན་ཏེ་བདག་འདས་པའི་དུས་ན་མ་བྱུང་བ་ཞིག་གམ། བདག་འདས་པའི་དུས་ན་ཅིར་གྱུར་པ་ཞིག བདག་འདས་པའི་དུས་ན་ཅི་ལྟ་བུར་གྱུར་པ་ཞིག་སྙམ་དུ་སྔོན་གྱི་མཐའ་ལ་བརྟེན་པར་མི་བྱེད་དོ། །ཅི་བདག་མ་འོངས་པའི་དུས་ན་འབྱུང་བར་འགྱུར་རམ། འོན་ཏེ་མ་འོངས་པའི་དུས་ན་འབྱུང་བར་མི་འགྱུར། མ་འོངས་པའི་དུས་ན་ཅིར་འགྱུར། མ་འོངས་པའི་དུས་ན་ཅི་ལྟ་བུ་ཞིག་འབྱུང་བར་འགྱུར་སྙམ་དུ་ཕྱི་མའི་མཐའ་ལ་བརྟེན་པར་མི་བྱེད་དོ། །འདི་ཅི་ཞིག་འདི་ཇི་ལྟ་བུ་ཞིག ཅི་ཞིག་ཅིར་འགྱུར། སེམས་ཅན་འདི་དག་གང་ནས་འོང་། དེ་འདི་ནས་ཤི་འཕོས་ནས་གང་དུ་འགྲོ་བར་འགྱུར་ཞེས་ད་ལྟར་བྱུང་བ་ལ་བརྟེན་པར་མི་བྱེད་དོ་ཞེས་སོགས་རྒྱ་ཆེར་གསུངས་སོ། །གསུམ་པ་རབ་བྱེད་ཀྱི་མཚན་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། ལྟ་བ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་ཉི་ཤུ་རྩ་བདུན་པའི་རྣམ་པར་བཤད་པའོ།། །།གསུམ་པ་བཀའ་དྲིན་རྗེས་སུ་དྲན་པའི་ཕྱག་ནི། གང་གིས་འགྲོ་བ་རྣམས་ཐུགས་བརྩེས་ཉེ་བར་བཟུང་ནས་མཐར་འཛིན་གྱི་ལྟ་བ་ཐམས་ཅད་སྤང་བའི་ཕྱིར་དམ་པའི་ཆོས་ནི་སྟོན་པར་མཛད་པའི་དྲང་སྲོང་གོའུ་ཏ་མའི་རིགས་སུ་འཁྲུངས་པ་དེ་ལ་ཕྱག་འཚལ་ལོ། །གསུམ་པ་བསྒྱུར་བ་མཐར་ཕྱིན་མཇུག་གི་དོན་ལ་གཉིས་ཏེ། རྩོམ་པའི་བཀའ་དྲིན་དྲན་པའི་ཆེད་དུ་རྩོམ་བྱེད་སྨོས། བསྒྱུར་བའི་བཀའ་དྲིན་དྲན་པའི་ཆེད་དུ་སྒྱུར་བྱེད་སྨོས་པའོ། །དང་པོ་ནི། དབུ་མ་རྩ་བའི་ཚིག་ལེའུར་བྱས་པ་ཤེས་རབ་ཅེས་བྱ་བ་ནི་མཚན་དོན་གྱི་སྐབས་སུ་བཤད་པ་ལྟར་ཡིན་ལ། ཐེག་པ་ཆེན་པོའི་ཆོས་མངོན་པ་རྣམ་པར་བཞག་པ་ནི། ཆོས་བདག་མེད་པ་རྒྱས་པར་སྟོན་པའི་ཐེག་པ་ཆེན་པོའི་ཆོས་མངོན་པ་གསལ་བར་བྱེད་པའོ། །དམ་པའི་དེ་ཁོ་ན་ཡང་དག་པར་སྟོན་པ་ནི་ཆོས་ཐམས་ཅད་ཀྱི་གནས་ལུགས་སྟོན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གསལ་བར་བྱེད་པ་ནི་ཤེར་ཕྱིན་འབུམ་པ་ལ་སོགས་པའི་དོན་གསལ་བར་སྟོན་པའོ། །དེ་ལྟ་བུའི་བསྟན་བཅོས་མཛད་པ་པོ་ནི་སློབ་དཔོན་བདག་ཉིད་ཆེན་པོ་འཕགས་པ་ཀླུ་སྒྲུབ་མི་འཕྲོག་པའི་མཁྱེན་རབ་དང་ཐུགས་རྗེར་ལྡན་པ། དེ་བཞིན་གཤེགས་པའི་ཐེག་པ་བླ་ན་མེད་པའི་ཚུལ་གསལ་བར་བྱེད་པ་དང་པོར་རབ་ཏུ་དགའ་བའི་ས་བསྒྲུབས་ནས་ཕྱིས་བདེ་བ་ཅན་གྱི་ཞིང་དུ་གཤེགས་པ། མ་འོངས་པ་ན་འཇིག་རྟེན་གྱི་ཁམས་དྭང་བའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་བས་མཛད་པ་རྫོགས་སོ།། །།གཉིས་པ་ནི། དབང་ཕྱུག་དམ་པའི་མངའ་བདག་རྒྱལ་པོ་ཆེན་པོ་དཔལ་ལྷ་བཙན་པོའི་བཀའ་ལུང་གིས། རྒྱ་གར་གྱི་མཁན་པོ་དབུ་མ་པ་ཛྙཱ་ན་གརྦྷ་སྟེ་ཡེ་ཤེས་སྙིང་པོ་དང་། ཞུ་ཆེན་གྱི་ལོ་ཙཱ་བ་དགེ་སློང་ཅོག་རོ་ཀླུའི་རྒྱལ་མཚན་གྱིས་རྒྱ་སྐད་ལས་བོད་སྐད་དུ་བསྒྱུར་ཞིང་ཚིག་དང་དོན་ལ་དག་པར་ཞུས་ཏེ་ཐོས་བསམ་གྱིས་གཏན་ལ་ཕབ་པའོ། །འདི་ལ་རབ་ཏུ་བྱེད་པ་ཉི་ཤུ་རྩ་བདུན་ཤླཽ་ཀ་བཞི་བརྒྱ་དང་བཞི་བཅུ་ཞེ་དགུ་ཡོད་ལ་བམ་པོ་ནི་ཕྱེད་དང་གཉིས་སུ་བྱས་སོ། །སླད་ཀྱི་ཁ་ཆེའི་གྲོང་ཁྱེར་དཔེ་མེད་ཀྱི་དབུས་གཙུག་ལག་ཁང་རི་ན་སྦས་པའི་དབུས་སུ་ཁ་ཆེའི་མཁན་པོ་ཧ་སུ་མ་ཏི་དང་། བོད་ཀྱི་སྒྲ་བསྒྱུར་གྱི་ལོ་ཙཱ་བ་པ་ཚབ་ཉི་མ་གྲགས་ཀྱིས་མིའི་བདག་པོ་འཕགས་པ་ལྷའི་སྐུ་རིང་ལ་འགྲེལ་པ་ཚིག་གསལ་བ་དང་བསྟུན་ནས་བཅོས་པའོ། །སླད་ཀྱི་ར་ས་འཕྲུལ་སྣང་གི་གཙུག་ལག་ཁང་དུ་རྒྱ་གར་གྱི་མཁན་པོ་ཀ་ན་ཀ་ཝར་མ་དང་། ལོ་ཙཱ་བ་དེ་ཉིད་ཀྱིས་ཞུས་ཆེན་བགྱིས་པའོ།། །།རབ་འབྱམས་གསུངས་རབ་ཀུན་གྱི་སྙིང་པོའི་དོན། །དུས་གསུམ་རྒྱལ་བ་སྲས་བཅས་བསྒྲོད་གཅིག་པུ། །མཐའ་བྲལ་རྟེན་ཅིང་འབྲེལ་འབྱུང་དབུ་མའི་ལམ། །ཚུལ་བཞིན་སྟོན་པ་འཕགས་མཆོག་ཀླུ་སྒྲུབ་གཞུང་། །དེ་ཡི་དགོངས་པ་རྒྱ་གར་མཁས་རྣམས་དང་། །གངས་ཅན་ལྗོངས་འདིར་ཉི་མ་གྲགས་ལ་སོགས། །མཁས་ཤིང་གྲུབ་པ་བརྙེས་པ་རྣམས་མང་པོས། །ཚུལ་བཞིན་ཕྱེ་ནས་སྐལ་ལྡན་འགྲོ་ལ་བསྟན། །འོན་ཀྱང་དེ་དོན་ཟབ་ཅིང་རྟོགས་དཀའ་བས། །ཕྱིས་དུས་མཁས་རློམས་མངོན་པའི་ང་རྒྱལ་ཅན། །འགའ་ཡིས་མཐར་འཛིན་ལྟ་བ་མཐའ་བྲལ་དུ། །བྱས་ནས་དབུ་མའི་ལམ་རྣམས་ལོག་པར་སྟོན། །དེ་ཚེ་འཇམ་པའི་དབྱངས་ཀྱི་ཡེ་ཤེས་ཉིད། །རྒྱལ་བའི་བསྟན་པ་སྤེལ་ཕྱིར་བཤེས་གཉེན་སྐུར། །སྤྲུལ་ནས་མཐའ་བྲལ་དབུ་མའི་གཞུང་ལུགས་ལ། །ལོག་རྟོགས་དྲི་མ་མཐའ་དག་སེལ་བར་མཛད། །དེ་སླད་རྣམ་གྲོལ་དོན་གཉེར་སྐྱེ་བོ་རྣམས། །ལོག་སྨྲའི་གྲུབ་མཐའ་ངན་པ་རྒྱང་བསྲིང་ནས། །ཀུན་མཁྱེན་ཆེན་པོས་ལེགས་པར་བཤད་པ་ཡི། །ཡང་དག་ལྟ་བའི་རྗེས་སུ་འབྲང་ན་ལེགས། །དོན་མེད་ཚེ་འདིའི་རྣམ་གཡེང་ཀུན་སྤངས་ནས། །གུས་དང་རྟག་སྦྱོར་བརྩོན་འགྲུས་དྲག་པོ་ཡིས། །ཀླུ་སྒྲུབ་ཡབ་སྲས་གཞུང་བཟང་བླ་མེད་ལ། །ཐོས་བསམ་བསྒོམ་པས་བྱི་དོར་བྱས་ན་ལེགས། །ཁམས་གསུམ་འཁོར་བ་སྡུག་བསྔལ་རང་བཞིན་ཅན། །དེ་ཡི་རྩ་བ་འཇིག་ཚོགས་ལྟ་བ་སོགས། །དྲུང་ནས་འབྱིན་བྱེད་མཐའ་བྲལ་དབུ་མའི་ལམ། །རྩེ་གཅིག་བསྒོམ་པས་རང་རྒྱུད་གྲོལ་ན་ལེགས། །སྔོན་བསགས་དགེ་བས་དལ་འབྱོར་ལུས་ཐོབ་ཅིང་། །སྨོན་ལམ་དག་པས་སངས་རྒྱས་བསྟན་དང་ཕྲད། །དམ་ཆོས་སྒྲུབ་པའི་མཐུན་རྐྱེན་འཛོམས་དུས་འདིར། །འགྲོ་བའི་དོན་དུ་སངས་རྒྱས་བསྒྲུབ་ན་ལེགས། །འདི་སྦྱར་རྣམ་དཀར་དགེ་ཚོགས་ཅི་བསགས་པ། །སྲས་བཅས་རྒྱལ་བའི་ཚོགས་གཉིས་རྒྱ་མཚོ་དང་། །མ་ལུས་བློ་ཡིས་གཅིག་ཏུ་བསྡོམ་བྱས་ནས། །མཁའ་མཉམ་འགྲོ་བས་བྱང་ཆུབ་ཐོབ་ཕྱིར་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །དལ་འབྱོར་ལུས་བཟང་ཚུལ་ཁྲིམས་རྒྱན་གྱིས་སྤྲས། །ལུང་རྟོགས་ཡོན་ཏན་ཀུན་ལ་དབང་འབྱོར་ཞིང་། །རྒྱལ་བའི་དམ་ཆོས་མ་ལུས་འཛིན་པར་ཤོག །ཟབ་མོའི་དེ་ཉིད་བྱིས་བློའི་སྤྱོད་ཡུལ་མིན། །དེ་ཕྱིར་འདི་ལ་ཉེས་པ་ཡོད་སྲིད་ན། །ཕྱོགས་བཅུའི་རྒྱལ་བ་སྲས་བཅས་རྣམས་ལ་བཤགས། །འདི་འབད་བསམ་སྦྱོར་དོན་ལྡན་མྱུར་བར་མཛོད། །གཞུང་འདིའི་རབ་བྱེད་ཉེར་གསུམ་པ་ཡན་ཆད་ཀྱི་ཊཱི་ཀ་ཀུན་མཁྱེན་ཆེན་པོས་མཛད་ཅིང་། རབ་བྱེད་ལྷག་མ་བཞིའི་ཊཱི་ཀ་འགྲེལ་པ་ཚིག་གསལ་གཞིར་བཞག་བྱས་ནས་ཤཱཀྱ་བློ་གྲོས་ཀྱིས་བྲིས་པ་དགེ་ལེགས་འཕེལ། འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །དགེའོ།། །