ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་དཀའ་བའི་གནས་རྣམ་པར་བཤད་པ་ཡུམ་དོན་རབ་གསལ།
སྐབས་དང་པོ་རྣམ་མཁྱེན་གྱི་དཀའ་བའི་གནས་རྣམ་པར་བཤད་པ།
ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་དཀའ་བའི་གནས་རྣམ་པར་བཤད་པ་ཡུམ་དོན་རབ་གསལ་ཞེས་བྱ་བ་བཞུགས་སོ།། མངོན་པར་རྟོགས་པའི་རྒྱན་གྱི་འགྲེལ་པའི་དཀའ་བའི་གནས་རྣམ་པར་བཤད་པ་ཡུམ་དོན་རབ་གསལ་ཞེས་བྱ་བ། རྒྱལ་བ་ཐམས་ཅད་ཀྱི་མཁྱེན་བརྩེ་གཅིག་ཏུ་བསྡུས་པ་རྗེ་བཙུན་བླ་མ་མགོན་པོ་འཇམ་པའི་དབྱངས་དང་དབྱེར་མ་མཆིས་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། ཕུན་ཚོགས་མཁྱེན་པའི་གཏིང་མཐའ་རབ་ཡངས་པར། །དམིགས་མེད་ཐུགས་རྗེའི་རིན་ཆེན་དུ་མས་གཏམས། །སྐྱོན་བྲལ་མཛད་པའི་རྦ་རླབས་གཡོ་བ་ཅན། །འཇམ་མགོན་བླ་མའི་ཞབས་ལ་མགོས་ཕྱག་འཚལ། །ཟབ་ཅིང་རྒྱ་ཆེའི་ཀུན་མཁྱེན་གསུམ་གྱི་རྒྱ་མཚོར་དཔག་ཡས་ཐོས་བསམ་གྲུ་གཟིངས་རབ་བསྡམས་ནས། །རྣམ་པ་ཀུན་རྫོགས་བཅུ་ཕྲག་གཉིས་ཀྱི་སྦྱོར་བའི་བ་དན་རྩེ་མོར་ཕྱིན་པའི་རླུང་གིས་བསྐྱོད། །བསམ་སྦྱོར་དག་བྱེད་མཐར་གྱིས་བསྒྲོད་ནས་སྐད་ཅིག་གཅིག་ལ་སྐུ་གསུམ་ནོར་བུའི་དཔལ་གྱིས་འབྱོར། །ཕྲིན་ལས་འདོད་དགུས་གདུལ་བྱ་ཚིམ་མཛད་འགྲོ་བའི་དེད་དཔོན་ཤཱཀྱའི་རྒྱལ་པོ་ལ་ཕྱག་འཚལ། །གྲངས་མེད་འགྲོ་ལ་བརྩེ་བའི་ཁུར་ཁྱེར་ནས། །ཐེག་པ་བདེ་ཞིང་འཇུག་པ་བདེ་བ་ཡིས། །ཕུལ་བྱུང་གཏམ་གྱིས་ཚིམ་པ་སྐྱེད་མཛད་པ། །མི་ཕམ་ཆོས་ཀྱི་རྗེ་ལ་གུས་ཕྱག་འཚལ། །གང་གསུང་བདུད་རྩིའི་བཅུད་འཐུངས་ཐོགས་མེད་ཞབས། །རབ་འབྱམས་གཞུང་གི་གཏེར་གྱུར་དབྱིག་གི་གཉེན། །ཡང་དག་ལྟ་བས་རྒྱུད་ཕྱུག་རྣམ་གྲོལ་སྡེ། །ཐེག་མཆོག་ཚོགས་ཀྱི་སར་གནས་ཞབས་ལ་འདུད། །མང་ཐོས་གསུང་རབ་ནགས་ཀྱི་སྨན་ལྗོངས་སུ། །ལྷག་བསམ་རྣམ་དག་རལ་པའི་ཁུར་འཛིན་ཞིང་། །ལམ་བཟང་སྟོན་པའི་གད་རྒྱངས་ཆེར་སྒྲོག་པ། །སྨྲ་བའི་སེང་གེ་བཟང་པོའི་ཞབས་པད་མཆོད། །སྙན་གྲགས་ཀུན་གྱི་རྣ་བའི་རྒྱན་གྱུར་མཁས་གྲུབ་སངས་རྒྱས་དཔལ། །ཟབ་དོན་ཀུན་ལ་བལྟ་བའི་མིག་གཅིག་རོང་སྟོན་ཆོས་ཀྱི་རྗེ། །ལེགས་བཤད་ཀུན་དུ་སྨྲ་བའི་ལྕེ་འཛིན་ཀུན་མཁྱེན་སངས་རྒྱས་འཕེལ། །རྣམ་པ་ཀུན་ཏུ་བདག་བློས་སྙིང་ནས་འདུད་དོ་བློ་གྲོས་སྤེལ། །ཞི་བ་ཚོལ་རྣམས་ཉེར་བཞིའི་གླིང་དུ་ཁྲིད། །བརྩེ་ལྡན་རྣམས་ཀྱིས་གཞན་དོན་ཐབས་བཟང་སྒྲུབ། །གང་དང་ལྡན་པས་ཐུབ་རྣམས་ཆོས་སྟོན་པ། །དེ་སླད་འཕགས་པ་ཀུན་གྱི་ཡུམ་མཆོག་འདི། །བློ་གྲོས་དཀྱིལ་འཁོར་སྤོབས་པའི་འོད་སྟོང་ཅན། །དམ་པའི་མན་ངག་རྟ་བདུན་གྱིས་དྲངས་ནས། །བདག་བློ་སྤེལ་ཞིང་བློ་ལྡན་དོན་གཉེར་བ། །གཞན་ལ་ཕན་ཕྱིར་རབ་ཏུ་གསལ་བར་བྱ། །ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་འབྲིང་བསྡུས་པ་ཀུན་གྱི་སྦས་དོན་མངོན་རྟོགས་ཀྱི་རིམ་པ་སྟོན་པའི་བསྟན་བཅོས་མངོན་པར་རྟོགས་པའི་རྒྱན་འདི་འཕགས་པ་ཐོགས་མེད་ཀྱིས་རྒྱལ་བ་མི་ཕམ་པ་ལས་དངོས་སུ་གསན་ནས། འཕགས་པའི་ཡུལ་དུ་ཀུན་མཁྱེན་དབྱིག་གཉེན། གྲོལ་སྡེ་རྣམ་གཉིས། སྨྲ་བའི་སེང་གེ་བཟང་པོའི་ཞབས་ལ་སོགས་པ་རྣམས་ལ་རིམ་པར་བརྒྱུད་དེ་དར་ཞིང་རྒྱས་པར་མཛད་དོ། །དེ་ནས་གངས་རིའི་ཁྲོད་འདིར་བདག་ཉིད་ཆེན་པོ་རྔོག་ལོ་ཙཱ་བ་ཡབ་སྲས་རྣམས་ཀྱིས་ཕྱོགས་ཀུན་ཏུ་ཁྱབ་པར་མཛད་ཅིང་། དེ་དག་གི་བྱིན་རླབས་ཀྱི་བཀའ་བབས་གཅིག་ཏུ་བསྡུས་ནས། གཡག་མི་ཕམ་ཆོས་ཀྱི་བླ་མ་དང་། རོང་སྟོན་ཤེས་བྱ་ཀུན་རིག སྨྲ་བའི་དབང་པོ་བྱམས་ཆེན་རབ་འབྱམས་པ་རྣམས་ལ་རིམ་པར་བབས་པའི་བདུད་རྩིའི་རྒྱུན་དྲན་པའི་དབང་པོས་ལེགས་པར་འཐུངས་ཤིང་བློ་གྲོས་ཀྱི་ལུས་སྟོབས་མི་དམན་པའི་ཕྱིར་ན། ཁོས་བོས་ཀྱང་ལུགས་འདི་ལ། རིགས་པ་དང་མི་རིགས་པའི་ཚུལ་ཅུང་ཟད་དབྱེ་བར་ནུས་ཤིང་། གཞན་དག་གིས་རྟོགས་པར་མ་ནུས་པའི་ཟབ་མོའི་གནད་རྣམས་ལ་ངེས་པའི་ཤེས་པ་གཏིང་ནས་སྐྱེས་པ་རྣམས། ལྷག་བསམ་གྱིས་གཞན་ལ་ཡང་སྟོན་པར་འདོད་དོ། །དེའི་ཕྱིར་བློ་གྲོས་གསར་བུ་པ་དག་ཐོག་མར་འཇུག་པའི་ཐེམ་སྐས་ལྟ་བུར་གྱུར་པ་ནས། གཞུང་ལུགས་ལ་བློ་བྱང་བ་དག་གི་ཐེ་ཚོམ་དང་སྒྲོ་འདོགས་ཀྱི་འཁྲི་ཤིང་གཅོད་པའི་རལ་གྲི་ལྟ་བུར་གྱུར་པའི་སླད་དུ། གཞུང་གི་དཀའ་བའི་གནད་ཆེ་ཆུང་ཐམས་ཅད་ལ་གཞན་ལུགས་འགོག་པ་རྣམས་ཐལ་འགྱུར་གྱི་ངག་ཏུ་དྲིལ་ནས་འགོད། རང་ལུགས་རྣམས་ཀུན་མཁྱེན་རོང་སྟོན་ཆེན་པོའི་དགོངས་པ་ནུས་པ་ཐོན་པར་འགོད་ཅིང་། དེ་ལ་གཞན་དག་གིས་རྩོད་པ་ལྟར་སྣང་མང་དུ་སྨྲ་བ་རྣམས་དྲི་མ་མེད་པའི་ལུང་རིགས་ཀྱིས་ཇི་ལྟར་བསལ་བའི་ཚུལ་རྣམས་འདིར་བརྗོད་པས། ལུགས་འདི་ལ་མོས་པ་ཡོད་པ་དག་གིས་ཕྱོགས་འཛིན་སྤངས་ནས་གུས་པས་བླང་བར་གྱིས་ཤིག བསྟན་བཅོས་ཆེན་པོའི་རྣམ་བཤད་མཛད། །ཅེས་པའི་སྐབས་སུ། ཤེར་ཕྱིན་གྱི་དགོངས་འགྲེལ་གྱི་ཤིང་རྟའི་སྲོལ་འབྱེད་ཀྱི་གྲངས་ངེས་ལ་དཔྱད། བསྟན་བཅོས་སྤྱིའི་མཚན་ཉིད་ལ་དཔྱད། འདིར་བསྟན་བསྟན་བཅོས་ཆེན་པོ་ངོས་གཟུང་བ་གསུམ་ལས། དང་པོ་ལ་ཁོ་ན་རེ། ཤེར་ཕྱིན་གྱི་དགོངས་འགྲེལ་དུ་གྱུར་པའི་ཤིང་རྟའི་སྲོལ་འབྱེད་ལ། མགོན་པོ་ཀླུ་སྒྲུབ་ཀྱིས་མཛད་པའི་དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པ་དབུ་མ་རིགས་པའི་ཚོགས་དྲུག མགོན་པོ་བྱམས་པས་མཛད་པའི་སྦས་དོན་མངོན་རྟོགས་ཀྱི་རིམ་པ་གཏན་ལ་འབེབས་པ་མངོན་པར་རྟོགས་པའི་རྒྱན། སློབ་དཔོན་དཔའ་བོས་མཛད་པའི་སྟོང་ཕྲག་བརྒྱ་པའི་བཤད་པ། ཕྱོགས་ཀྱི་གླང་པོས་མཛད་པའི་བརྒྱད་སྟོང་དོན་བསྡུ་དང་བཞིར་གྲངས་ངེས་ཞེས་ཟེར་རོ། །འོ་ན་ཤེས་བྱ་ཆོས་ཅན། དཔའ་བོའི་འབུམ་ཊཱིཀ་དང་། ཕྱོགས་གླང་གི་བརྒྱད་སྟོང་དོན་བསྡུ་གཉིས། བྱམས་པ་དང་ཀླུ་སྒྲུབ་གང་ལ་ཡང་མ་བརྟེན་པར་ཤེར་ཕྱིན་གྱི་དགོངས་པ་འགྲེལ་པའི་ཤིང་རྟའི་སྲོལ་འབྱེད་དུ་ཐལ། དེ་ལ་བཞི་པོ་དེར་གྲངས་ངེས་པའི་ཕྱིར། འདི་མན་ཆད་ཆོས་ཅན་གསལ་ཁ་མེད་པ་ཐམས་ཅད་ལ་ཤེས་བྱ་ཆོས་ཅན་དུ་ཤེས་པར་བྱའོ། །འདོད་ན། དཔའ་བོའི་འབུམ་ཊཱིཀ་ཆོས་ཅན། དེ་མིན་པར་ཐལ། ཀླུ་སྒྲུབ་ཀྱིས་བཀྲལ་བའི་ཤེར་ཕྱིན་གྱི་མན་ངག་འཕགས་པ་ལྷ་ལས་ཐོས་པའི་རྗེས་སུ་འབྲང་བའི་འགྲེལ་པ་ཡིན་པའི་ཕྱིར། ཕྱོགས་གླང་གི་བརྒྱད་སྟོང་དོན་བསྡུ་ཆོས་ཅན། དེ་མ་ཡིན་པར་ཐལ། བྱམས་པས་བཀྲལ་བའི་ཤེར་ཕྱིན་གྱི་མན་ངག་དབྱིག་གཉེན་ལས་ཐོས་པའི་རྗེས་སུ་འབྲང་བའི་འགྲེལ་པ་ཡིན་པའི་ཕྱིར། དེ་ལ་ཁོ་ན་རེ། དཔའ་བོའི་འབུམ་ཊཱིཀ་ཆོས་ཅན། ཀླུ་སྒྲུབ་ཀྱི་རྗེས་སུ་འབྲང་བའི་ཤེར་ཕྱིན་གྱི་དགོངས་འགྲེལ་མ་ཡིན་པར་ཐལ། ཡུམ་གྱི་བརྗོད་དོན་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་བཤད་པའི་ཕྱིར་ཞེ་ན། དབུ་མ་འཇུག་པ་ཆོས་ཅན། ཀླུ་སྒྲུབ་ཀྱི་རྗེས་སུ་འབྲང་བའི་དེ་མ་ཡིན་པར་ཐལ། ཡུམ་གྱི་དགོངས་པ་ས་བཅུ་དང་ཕྱིན་བཅུ་སྦྱར་ནས་བཤད་པའི་ཕྱིར། ཕྱོགས་གླང་གི་བརྒྱད་སྟོང་དོན་བསྡུ་ཆོས་ཅན། བྱམས་པའི་རྗེས་སུ་འབྲང་བའི་ཤེར་ཕྱིན་གྱི་དགོངས་འགྲེལ་མིན་པར་ཐལ། ཡུམ་གྱི་དགོངས་པ་རྣམ་རིག་ཏུ་བཀྲལ་བའི་ཕྱིར་ཞེ་ན། ཉི་ཁྲི་གཞུང་འགྲེལ་ཆོས་ཅན། དེར་ཐལ། དེའི་ཕྱིར། གཞན་ཡང་འགྲེལ་པར་བྱ་བ་ཤེར་ཕྱིན་གྱི་དགོངས་པ་དེ་ལ། དངོས་བསྟན་སྟོང་ཉིད་ཀྱི་རིམ་པ་དང་། སྦས་དོན་མངོན་རྟོགས་ཀྱི་རིམ་པ་གཉིས་སུ་གྲངས་མ་ངེས་པར་ཐལ། འགྲེལ་བྱེད་དགོངས་འགྲེལ་དེ་ལ་གཉིས་སུ་གྲངས་མ་ངེས་པའི་ཕྱིར། དེས་ན་བྱམས་མགོན་གྱིས་གཞན་ངོར་སངས་རྒྱས་པས་ཤེར་ཕྱིན་དངོས་སུ་ཐོས་ཤིང་། ཀླུ་སྒྲུབ་ཀྱིས་ཆོས་ཉིད་དོན་དམ་པའི་བདེན་པ་མངོན་སུམ་རྟོགས་ནས་གཞན་ལ་རག་མ་ལས་པར་འགྲེལ་བས་ན་ཤིང་རྟའི་སྲོལ་འབྱེད་གཉིས་སུ་གྲགས་པ་ཡིན་ལ། གཞན་ནི་དེ་དག་གི་བཤད་པའི་རྗེས་སུ་འབྲངས་ནས་འགྲེལ་བས་ན་ཤིང་རྟའི་སྲོལ་འབྱེད་ལོགས་པ་མིན་པས་འགྲེལ་ལུགས་མི་གཅིག་པ་ཙམ་གྱིས་ཤིང་རྟའི་སྲོལ་འབྱེད་ལོགས་སུ་འཇོག་པ་ནི་མ་ཡིན་ནོ། །གཉིས་པ་ལ་ཁ་ཅིག རྩོམ་པ་པོ་རྣམ་གཡེང་མེད་པའི་ཡིད་ཅན་གྱིས་བཀའི་དོན་བཤད་པའི་ངག་གང་ཞིག ཐར་པ་ཐོབ་པའི་ལམ་དང་རྗེས་སུ་མཐུན་པ་ཞེས་དང་། ཁ་ཅིག རྩོམ་པ་པོ་གཙོ་བོར་གསུང་རབ་ཀྱི་དོན་ལ་ཐུགས་གཞོལ་བའི་ཡིད་ཅན་གྱིས་བཀའི་དོན་བཤད་པའི་ངག་གང་ཞིག་ཐར་པ་ཞེས་སོགས་དང་། ཡང་རྩོམ་པ་པོ་ཚད་ལྡན་གྱིས་བཀའི་དོན་བཤད་པའི་ངག་གང་ཞིག་ཐར་པ་ཐོབ་པའི་ལམ་དང་རྗེས་སུ་མཐུན་པ་ཞེས་དང་། ཡང་ཆོས་སྐྱོབས་ཀྱི་ཡོན་ཏན་གཉིས་དང་ལྡན་པའི་ངག་རྣམ་དག་ཅེས་དང་། ཡང་རང་གི་ཞེ་འདོད་གཞན་ལ་བསྟན་པའི་ཕྱིར་དུ་སྡེབས་པའི་ངག་རྒྱུན་ཆགས་རྣམས་བསྟན་བཅོས་ཀྱི་མཚན་ཉིད་དུ་འཇོག་ན། དང་པོ་བཞི་ལ་ཕྱི་རོལ་པའི་བསྟན་བཅོས་ཆོས་ཅན། དེར་ཐལ། མཚོན་བྱ་དེའི་ཕྱིར། གལ་ཏེ་དེ་རྣམས་བསྟན་བཅོས་རྣམ་དག་གི་མཚན་ཉིད་ཡིན་ཟེར་ན། དང་པོ་ལ་འགྲེལ་པ་དོན་གསལ་ཆོས་ཅན། ཟུར་དང་པོ་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རྩོམ་པ་པོ་རྣམ་གཡེང་མེད་པའི་ཡིད་ཅན་མིན་པའི་ཕྱིར་ཏེ། ཁྱོད་རྩོམ་པ་པོ་སོ་སྐྱེ་ཡིན་པའི་ཕྱིར་ཞེས་སྐྱོན་བརྗོད་པ་ཡོད་ཀྱང་། ཕྱི་མ་ལ་མ་ཁྱབ་སྟེ། རྒྱུད་བླར། རྣམ་གཡེང་མེད་ཡིད་ཅན་ཞེས་པའི་དོན། ཀུན་ལས་བཏུས་ལས། མཚན་མའི་རྣམ་པར་གཡེང་བ་གང་ཞེ་ན། གཞན་ཡིད་ཆེས་པར་བྱ་བར་སྔོན་དུ་བཏང་སྟེ། དགེ་བ་ལ་སྦྱོར་བའོ་ཞེས་བཤད་པའི་རྣམ་གཡེང་ཡིན་པས། སོ་སྐྱེ་ཡིན་ན་དེ་ཡིན་པས་མ་ཁྱབ་པའི་ཕྱིར། འོན་ཀྱང་མཚན་ཉིད་དང་པོ་ལ། མདོ་སྡེ་དགོངས་པ་ངེས་འགྲེལ་ཆོས་ཅན། དེར་ཐལ། མཚན་ཉིད་དེའི་ཕྱིར། མཚན་ཉིད་གསུམ་པ་ལ། རྩོམ་པ་པོ་ཚད་ལྡན་ཡིན་ན། རང་གིས་གང་བརྩམས་པའི་བསྟན་བཅོས་དེའི་བརྗོད་བྱ་འཁྲུལ་མེད་དུ་རྩོམ་ནུས་པས་ཁྱབ་པར་ཐལ། དེ་བསྟན་བཅོས་རྣམ་དག་གི་མཚན་ཉིད་ཡིན་པའི་ཕྱིར། འདོད་ན། ཟླ་བ་གྲགས་པ་ཆོས་ཅན། དེར་ཐལ། དེའི་ཕྱིར། འདོད་ན། རེ་ཞིག་ཁས་བླངས། སློབ་དཔོན་སེང་གེ་བཟང་པོ་ཆོས་ཅན། དེར་ཐལ། དེའི་ཕྱིར། འདོད་ན། རེ་ཞིག་ཁས་བླངས། ཉན་རང་གི་ཆོས་ཀྱི་བདག་མེད་རྟོགས་པར་ཐལ། ཐལ་འགྱུར་སྔ་མའི་འདོད་པ་གང་ཞིག ཟླ་གྲགས་ཀྱིས་ཉན་རང་གི་ཆོས་ཀྱི་བདག་མེད་རྟོགས་པའི་བསྟན་བཅོས་བརྩམས་པའི་ཕྱིར། འདོད་ན་མ་རྟོགས་པར་ཐལ། ཐལ་འགྱུར་ཕྱི་མའི་འདོད་པ་གང་ཞིག སློབ་དཔོན་སེང་བཟང་གིས་ཉན་རང་གི་ཆོས་ཀྱི་བདག་མེད་མ་རྟོགས་པའི་བསྟན་བཅོས་བརྩམས་པའི་ཕྱིར། མཚན་ཉིད་བཞི་པ་ལ་བཀའ་བརྒྱད་སྟོང་པ་ཆོས་ཅན། དེར་ཐལ། མཚན་ཉིད་དེའི་ཕྱིར། ལྔ་པ་ལ་ངག་ལ་རྒྱུན་ཡོད་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། ངག་ཆོས་ཅན། ཁྱོད་ལ་རྒྱུན་མེད་པར་ཐལ། ཁྱོད་སྒྲ་ཡིན་པའི་ཕྱིར། དེ་ལ་ཁོ་ན་རེ། སྒྲ་ལ་རྒྱུན་ཡོད་པར་ཐལ། ཡི་གེ་རིང་པོ་དང་ཤིན་ཏུ་རིང་པོ་སོགས་ཡོད་པའི་ཕྱིར་རོ། །དེ་ན་སྒྲ་ལ་རྒྱུན་མེད་པར་བཤད་པ་ནི་རྒྱུན་ཐུང་བ་ཙམ་ལ་དགོངས་པ་ཡིན་ཟེར་རོ། །འོ་ན་སྒྲ་ཡིན་ན། རྒྱུན་ཐུང་བས་མ་ཁྱབ་པར་ཐལ། ཡི་གེ་ཤིན་ཏུ་རིང་པོ་ཡོད་པའི་ཕྱིར། སྒྲ་ལ་རྒྱུན་རིང་པོ་ཡོད་པར་ཐལ། ཆུ་ཇི་སྲིད་ཡོད་པ་དེ་སྲིད་དུ་ཆུ་སྒྲ་ཡོད་པའི་ཕྱིར། ཁྱབ་པ་གཉིས་ཀ་ཁས། གལ་ཏེ་ཁྱབ་པ་ཕྱི་མ་མི་མཚུངས་ཏེ། ཆུ་སྒྲ་སྐད་ཅིག་རེ་རེ་ཡང་རང་གི་ཉེར་ལེན་ཆུ་ལས་བྱུང་བ་ཡིན་པའི་ཕྱིར་ཟེར་ན། འོ་ན་ཡི་གེ་རིང་པོ་དང་། ཤིན་ཏུ་རིང་པོ་ཡོད་ན་སྒྲ་ལ་རྒྱུན་ཡོད་པས་མ་ཁྱབ་པར་ཐལ། ཡི་གེའི་སྐད་ཅིག་རེ་རེ་ཡང་རང་གི་ཉེར་ལེན་བྱེད་པ་ལྕེ་རྐན་ལས་བྱུང་བའི་ཕྱིར། དེས་ན་སྒྲ་ལ་རྒྱུན་མེད་པའི་དོན་ནི་སྒྲ་སྐད་ཅིག་སྔ་མས་ཕྱི་མ་མི་སྐྱེད་པར་སྐད་ཅིག་རེ་རེ་ཡང་རང་རྒྱུ་རྔ་ལྟ་བུ་ལས་བྱུང་བའི་དོན་ནོ། །རང་ལུགས་ནི་གྲུབ་མཐའ་བསྟན་པའི་ཕྱིར་བསྡེབས་པའི་མིང་ཚིག་ཡི་གེའི་ཚོགས་དུ་མ་འདུས་པ་དེ་བསྟན་བཅོས་སྤྱིའི་མཚན་ཉིད་ཡིན་ལ། དེ་རྣམ་དག་གི་མཚན་ཉིད་ནི། སངས་རྒྱས་མྱ་ངན་ལས་འདས་པའི་རྗེས་སུ་རྩོམ་པ་པོ་རྣམ་གཡེང་མེད་པའི་ཡིད་ཅན་གྱིས་ཐར་པ་ཐོབ་པའི་ཐབས་སུ་བཀའི་དོན་བཤད་པའི་ངག་གོ །གསུམ་པ་ལ་ཁ་ཅིག འདིར་བསྟན་གྱི་བསྟན་བཅོས་ཆེན་པོ་དེ་མདོ་ཁོ་ན་ལ་བྱེད་རིགས་ཏེ། དེ་ཉིད་རྣམ་ངེས་དེ་རྒྱན་དང་མ་སྦྱར་བར་མདོ་ཁོ་ནའི་འགྲེལ་པ་ཡིན་པའི་ཕྱིར་ཞེས་དང་། ཁ་ཅིག མདོ་དང་བསྟན་བཅོས་གཉིས་ཀ་ལ་བྱེད་རིགས་ཏེ། དེ་ཉིད་རྣམ་ངེས་དེ་མདོ་དང་བསྟན་བཅོས་གཉིས་ཀའི་འགྲེལ་པ་ཡིན་པའི་ཕྱིར་ཞེས་དང་། ཁ་ཅིག ཊཱི་ཀའི་དགོངས་པ་ཡང་མདོ་དང་བསྟན་བཅོས་གཉིས་ཀ་ལ་བྱེད་རིགས་ཏེ། ཊཱི་ཀ་ལས། གང་གིས་མཛད་ཅེ་ན་བསྟན་བཅོས་ཆེན་པོ་མངོན་པར་རྟོགས་པའི་རྒྱན་མདོ་དང་བཅས་པའི་འོ་ཞེས་གསུངས་པའི་ཕྱིར་ཟེར་རོ། །དང་པོ་ལ་བསྟན་བཅོས་མཐའ་དག་མ་རྙེད་པར་ཞེས་པའི་བསྟན་བཅོས་དང་། བསྟན་བཅོས་མཐའ་དག་འདི་དེ་ལྟར་ཞེས་པའི་བསྟན་བཅོས་དེ་མདོ་ཁོ་ན་ལ་བྱེད་རིགས་པར་ཐལ། དམ་བཅའ་དེའི་ཕྱིར། འགྲོ་ལ་ཆགས་པ་ཞེས་པའི་ཚིགས་བཅད་བཞི་པོ་དེ་མདོ་ཁོ་ནའི་འགྲེལ་པ་མཛད་ཚུལ་སྨོས་པའི་སྐབས་ཡིན་པར་ཐལ། དམ་བཅའི་གཏན་ཚིགས་དེའི་ཕྱིར། འདོད་ན། སྤྲོ་བ་སྐྱེས་ཞེས་པའི་གཞུང་འདིས་རྒྱན་དང་མ་སྦྱར་བར་མདོ་ཁོ་ནའི་འགྲེལ་པ་མཛད་པ་ལ་སྤྲོ་བ་སྐྱེས་པ་ཅིག་བསྟན་པར་ཐལ་ལོ། །གཉིས་པ་ལ། བརྒྱད་སྟོང་འགྲེལ་ཆེན་ཞེས་པའི་བརྒྱད་སྟོང་པ་དང་། ཉི་ཁྲི་སྣང་བ་ཞེས་པའི་ཉི་ཁྲི་དེ་མདོ་བསྟན་བཅོས་གཉིས་ཀ་ལ་བྱེད་རིགས་པར་ཐལ། དེ་གཉིས་མདོ་བསྟན་བཅོས་གཉིས་ཀའི་འགྲེལ་པ་ཡིན་པའི་ཕྱིར། ཁྱབ་པ་ཁས། གསུམ་པ་ལ། འོག་གི་བསྟན་བཅོས་ཞེས་འབྱུང་བ་ཡང་མངོན་རྟོགས་རྒྱན་མིན་པར་ཐལ། བསྟན་བཅོས་ཆེན་པོའི་རྣམ་བཤད་མཛད་ཅེས་པའི་བསྟན་བཅོས་དེ་མངོན་རྟོགས་རྒྱན་མིན་པའི་ཕྱིར། རྟགས་ཁས། ཁྱབ་ཅིང་འདོད་མི་ནུས་ཏེ། ཊཱི་ཀ་ལས། གང་དག་འདིའི་བསྟན་བཅོས་མདོ་ཉིད་ལ་འདོད་པ་ནི་དགོངས་པ་མིན་ཏེ། འོག་གི་བསྟན་བཅོས་ཞེས་འབྱུང་བ་མངོན་རྟོགས་རྒྱན་ཡིན་པས་འདི་དང་དོན་གཅིག་པའི་ཕྱིར་རོ་ཞེས་གསུངས་པས་སོ། །ཊཱི་ཀའི་ལུང་སྔ་མའི་དོན་ནི་བསྟན་བཅོས་ཆེན་པོ་མངོན་པར་རྟོགས་པའི་རྒྱན་གྱི་རྣམ་བཤད་མཛད་ན་རྩ་རྐྱང་གི་བཤད་པ་མཛད་པ་ཡིན་ནམ་ཞེ་ན། མདོ་དང་བཅས་པའིའོ་ཞེས་པའི་དོན་ཏེ། དཔེར་ན་བརྒྱད་སྟོང་འགྲེལ་ཆེན་ཞེས་པའི་འབྲུ་མནན་པའི་ཚེ་བརྒྱད་སྟོང་པ་མངོན་པར་རྟོགས་པའི་རྒྱན་དང་བཅས་པའི་འགྲེལ་ཆེན་ནོ་ཞེས་པ་བཞིན་ནོ། །དེས་ན་རང་ལུགས་ཊཱི་ཀའི་དགོངས་པ་བསྟན་བཅོས་ཆེན་པོ་རྒྱན་ཉིད་ལ་བྱེད་དོ། །འཕགས་པ་བྱམས་པ་རང་ཉིད་དམ་པའི་སྤྱོད་པ་དང་ཞེས་པའི་སྐབས་སུ། སྔ་རབས་པ་རྣམས་བྱམས་མགོན་གྱིས་ཉན་ཐོས་ཞི་བ་ཚོལ་རྣམས་ཞེས་པའི་ཚིགས་བཅད་གསུངས་པ་ཆོས་ཅན། དགོས་པ་ཡོད་དེ། རང་ཉིད་དམ་པའི་སྤྱོད་པ་དང་མཐུན་པར་སྟོན་པའི་རང་དོན་གྱི་དགོས་པ་དང་། མཆོད་བརྗོད་ངག་གི་གདུལ་བྱ་ཡུམ་ལ་འཇུག་པའི་གཞན་དོན་གྱིས་དགོས་པ་གཉིས་ཡོད་པའི་ཕྱིར་ཞེ་ན། རང་ཉིད་དམ་པའི་སྤྱོད་པ་དང་མཐུན་པར་རབ་ཏུ་སྟོན་པ་དེ་མཆོད་བརྗོད་ངག་གི་རང་དོན་གྱི་དགོས་པ་མིན་པར་ཐལ། བྱམས་པ་ལ་རང་ཉིད་དམ་པའི་སྤྱོད་པ་དང་མཐུན་པར་རབ་ཏུ་སྟོན་པའི་རང་དོན་དོན་གཉེར་གྱི་བློ་མེད་པའི་ཕྱིར་ཏེ། རང་ཉིད་དམ་པའི་སྤྱོད་པ་དང་མཐུན་པར་རབ་ཏུ་སྟོན་པ་ཡང་གཞན་བསྟན་བཅོས་ལ་འཇུག་པའི་ཆེད་ཁོ་ན་ཡིན་པའི་ཕྱིར་ཏེ། རབ་ཏུ་སྟོན་པས་ཞེས་བྱེད་ཚིག་འབྱུང་བའི་ཕྱིར་རོ། །དེ་ལ་ཁ་ཅིག བྱམས་པ་ལ་རང་དོན་དོན་གཉེར་གྱི་བློ་མེད་ན། བྱམས་པ་སངས་རྒྱས་ཡིན་ནམ། བྱང་སེམས་ཡིན། དང་པོ་ལྟར་ན། ཕར་ཕྱིན་ཐེག་པའི་སྐབས་སུ་བྱམས་པ་སངས་རྒྱས་སུ་ཁས་ལེན་པ་པོ་ཆོས་ཅན། ཐུན་མོང་དང་ཐུན་མོང་མ་ཡིན་པའི་མདོའི་རྣམ་དབྱེ་མ་ངེས་པར་ཐལ། ཕར་ཕྱིན་ཐེག་པའི་སྐབས་སུ་བྱམས་པ་སངས་རྒྱས་སུ་ཁས་ལེན་པའི་ཕྱིར། གཉིས་པ་ལྟར་ན། བྱམས་པ་ཆོས་ཅན། རང་དོན་ཡོངས་སུ་རྫོགས་པ་ལ་ཆོས་སྐུ་དགོས་པ་མ་མཐོང་བར་ཐལ། རང་དོན་དོན་གཉེར་གྱི་བློ་མེད་པའི་ཕྱིར། འདོད་ན། དེ་ཆོས་ཅན། རང་དོན་དུ་ཞི་བ་རྐྱང་པས་ཆོག་པར་འཛིན་པ་ལྡོག་མི་ནུས་པར་ཐལ། འདོད་པ་དེའི་ཕྱིར། འདོད་ན། ཁྱོད་ཀྱི་རྒྱུད་ལ་ཐེག་ཆེན་སེམས་བསྐྱེད་ཀྱི་མཚན་ཉིད་ཡོངས་སུ་རྫོགས་པ་ཞིག་མེད་པར་ཐལ་ལོ་ཞེས་སྨྲའོ། །ཐལ་འགྱུར་དང་པོ་ལ་ཕར་ཕྱིན་ཐེག་པའི་སྐབས་སུ་སྐུ་གསུམ་གྱི་རྣམ་གཞག་ཁས་ལེན་པ་པོ་ཆོས་ཅན། དེར་ཐལ། ཕར་ཕྱིན་ཐེག་པའི་སྐབས་སུ་ལོངས་སྐུ་བརྙེས་པའི་རྗེས་སུ་མཛད་པ་བཅུ་གཉིས་ཀྱི་ཚུལ་སྟོན་དགོས་པར་ཁས་བླངས་པའི་ཕྱིར། ཁྱབ་པ་ཁས། སེང་གེ་བཟང་པོ་ཆོས་ཅན། དེར་ཐལ། དེའི་ཕྱིར། མ་གྲུབ་ན་དེར་ཐལ། བཅོམ་ལྡན་འདས་འཕགས་པ་མ་རྒྱལ་བ་ལས་རྒྱལ་བས་ཞེས་གསུངས་པའི་ཕྱིར། དེ་ལ་ཁོ་ན་རེ། སེང་གེ་བཟང་པོས་མཆོད་ཡུམ་འབྲས་ཡུམ་དུ་ཁས་བླངས་པར་ཐལ། དེའི་ཕྱིར་བཅོམ་ལྡན་འདས་མ་ལ་རབ་ཏུ་དྭང་བ་ནི་ཞེས་བཤད་པའི་ཕྱིར། ཁྱབ་པ་བསྒྲིགས་ཟེར་བ་ན་མི་མཚུངས་ཏེ། བཅོམ་ལྡན་འདས་འཕགས་པ་མ་རྒྱལ་བ་ལས་རྒྱལ་བ་ཞེས་བཤད་ན། བྱམས་པ་འཕགས་པ་ཡིན་པས་མ་ཁྱབ་པར་ཐལ། འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་བརྒྱད་སྟོང་པ་ཞེས་བཤད་ན། བརྒྱད་སྟོང་པ་འཕགས་པ་ཡིན་པས་མ་ཁྱབ་པའི་ཕྱིར། ཡང་ཐུན་མོང་བ་ཕར་ཕྱིན་ཐེག་པའི་སྐབས་སུ་བྱམས་པ་བྱང་སེམས་དང་། ཐུན་མོང་མ་ཡིན་པ་སྔགས་ཀྱི་ཐེག་པའི་སྐབས་སུ་བྱམས་པ་སངས་རྒྱས་ཡིན་པའི་ཁྱད་པར་མི་འཐད་པར་ཐལ། བྱམས་པ་སངས་རྒྱས་ཡིན་པའི་དོན་མདོ་སྔགས་གཉིས་ཀ་ལས་གསུངས་ཤིང་། བྱང་སེམས་ཞེས་པའི་ཐ་སྙད་ཀྱང་མདོ་སྔགས་གཉིས་ཀ་ལས་གསུངས་པར་མཚུངས་པའི་ཕྱིར་ཏེ། བླ་མེད་ཀྱི་སྐབས་སུ་ཡང་བྱང་ཆུབ་སེམས་དཔའ་བརྒྱད་ཅེས་པའི་ཐ་སྙད་གསུངས་པའི་ཕྱིར། ཐལ་འགྱུར་གཉིས་པ་ལ། སངས་རྒྱས་འཕགས་པ་ཆོས་ཅན། དེར་ཐལ། དེའི་ཕྱིར། འདོད་ན། སྔ་མ་བཞིན་བསྒྲེའོ། །གཞན་ཡང་མཛད་པ་བཅུ་གཉིས་ཀྱི་ཚུལ་སྟོན་པར་བྱེད་པའི་བསྐལ་བཟང་གི་སངས་རྒྱས་ཡིན་ན། ལོངས་སྐུ་བརྙེས་པས་མ་ཁྱབ་པར་ཐལ། མཛད་པ་བཅུ་གཉིས་ཀྱི་ཐོག་མར་དགའ་ལྡན་དུ་སྐྱེ་བ་བཞེས་པའི་གང་ཟག་དེས་ལོངས་སྐུ་མ་ཐོབ་པའི་ཕྱིར། རྟགས་ཁས། འདོད་མི་ནུས་ཏེ། ལང་གཤེགས་ལས། ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་འཚང་རྒྱ། །ཞེས་བཤད་པའི་ཕྱིར། ལྷའི་བུ་དམ་པ་ཏོག་དཀར་པོ་དེ་སངས་རྒྱས་མ་ཡིན་པར་ཐལ། བྱམས་པ་སངས་རྒྱས་མིན་པའི་ཕྱིར། འདོད་ན། རྒྱལ་བུ་དོན་གྲུབ་སངས་རྒྱས་མིན་པར་ཐལ་ལོ། །འདོད་ན། དེས་དཀའ་བ་སྤྱད་པའི་རྗེས་སུ་སངས་རྒྱས་གསར་དུ་ཐོབ་པར་ཐལ་ལོ། །འདོད་ན། ཐོག་མར་རང་དོན་ཆོས་སྐུ་མངོན་དུ་བྱས་ནས། དེའི་རྗེས་སུ་མཛད་པ་བཅུ་གཉིས་ཀྱི་ཚུལ་སྟོན་པའི་གང་ཟག་ཅིག་མེད་པར་ཐལ། འདོད་པའི་ཕྱིར། འདོད་ན། རྒྱུད་བླར། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ཞེས་སོགས་གསུངས་པ་དང་འགལ་ལོ། །ཡང་བྱམས་པས་འཛམ་གླིང་དུ་སངས་རྒྱས་པའི་ཚུལ་སྟོན་པ་དེ་གསར་དུ་སངས་རྒྱ་བའི་མཛད་པ་ཡིན་པར་ཐལ། བྱམས་པས་སངས་རྒྱས་གསར་དུ་ཐོབ་དགོས་པའི་ཕྱིར། འདོད་ན། དེས་འཇིག་རྟེན་གྱི་ཁམས་གཞན་དུ་འཚང་རྒྱ་བའི་ཚུལ་སྟོན་པ་དེ་ཡང་གསར་དུ་འཚང་རྒྱ་བའི་མཛད་པ་ཡིན་པར་ཐལ་ལོ། །ཡང་བྱམས་པ་སངས་རྒྱས་སུ་ཁས་བླངས་པ་ལ་ཁ་ཅིག བྱམས་པ་ཆོས་ཅན། འགྲོ་ལ་ཕན་པར་བྱེད་རྣམས་ཞེས་པའི་སྐབས་ཀྱི་རྟེན་གྱི་གང་ཟག་མིན་པར་ཐལ། བྱང་སེམས་མིན་པའི་ཕྱིར། ཡང་ཐུབ་རྣམས་ཞེས་པའི་སྐབས་ཀྱི་རྟེན་གྱི་གང་ཟག་ཏུ་ཐལ། སངས་རྒྱས་འཕགས་པ་ཡིན་པའི་ཕྱིར། འདོད་ན། ཆོས་འཁོར་རིམ་པ་གསུམ་དངོས་སུ་བསྐོར་བར་ཐལ་ལོ། །ཡང་བྱམས་ཆོས་ལྔ་པོ་བཀར་ཐལ་བ་དང་། བསྟན་པ་གཅིག་ལ་སྟོན་པ་གཉིས་ཡོད་པར་ཐལ་བ་དང་། བྱང་སེམས་ཉེ་བའི་སྲས་བརྒྱད་གྲངས་མ་ཚང་བར་ཐལ། བྱམས་པ་སངས་རྒྱས་ཡིན་པའི་ཕྱིར། བྱམས་པ་བྱང་སེམས་སུ་ཐལ། ཤེར་ཕྱིན་གྱི་མདོར་བྱང་ཆུབ་སེམས་དཔའ་བྱམས་པ་དང་ཞེས་བཤད་པའི་ཕྱིར། ཞེས་པའི་ཐལ་འགྱུར་དྲུག་ལས། དང་པོ་ལ་རང་སངས་རྒྱས་ཆོས་ཅན། ཉན་ཐོས་ཞི་བ་ཚོལ་རྣམས་ཞེས་པའི་སྐབས་ཀྱི་རྟེན་གྱི་གང་ཟག་མིན་པར་ཐལ། ཉན་ཐོས་མིན་པའི་ཕྱིར། འདོད་ན། ཉན་ཐོས་དང་དེའི་ཕྱོགས་སུ་བསླན་པ་ཞེས་པའི་ལུང་དང་འགལ་ལོ། །གཉིས་པ་ལ། ལོངས་སྐུ་ཆོས་ཅན། དེར་ཐལ། དེའི་ཕྱིར། འདོད་ན། ཁས་བླངས་ཏེ་སྔ་མ་བཞིན་འཕེན་ནོ། །གསུམ་པ་ལ། ཀཽ་ཤི་ཀས་སྨྲས་པའི་ཤེར་ཕྱིན་གྱི་མདོ་ཚིག་དེ་བསྟན་བཅོས་སུ་ཐལ། ཀཽ་ཤི་ཀ་དེ་སེམས་ཅན་ཡིན་པའི་ཕྱིར། བཞི་པ་ལ། བསྟན་པ་གཅིག་ལ་སྟོན་པ་ལྔ་ཡོད་པར་ཐལ། རྒྱལ་བ་རིགས་ལྔ་སངས་རྒྱས་ཡིན་པའི་ཕྱིར། ལྔ་པ་ལ། བསྐལ་བཟང་གི་སངས་རྒྱས་སྟོང་གྲངས་མ་ཚང་བར་ཐལ། བྱམས་པ་སངས་རྒྱས་མིན་པའི་ཕྱིར། དྲུག་པ་ལ། ཀུན་དགའ་བོ་དེ་རྒྱུན་ཞུགས་སུ་ཐལ། ཤེར་ཕྱིན་གྱི་མདོར། གང་ཟག་གཅིག་མ་གཏོགས་པ་འདི་ལྟ་སྟེ། སློབ་པ་རྒྱུན་དུ་ཞུགས་པ་ཚེ་དང་ལྡན་པ་ཀུན་དགའ་བོ་དང་ཞེས་གསུངས་པའི་ཕྱིར། རང་ལུགས་ནི། གོང་གི་ཐལ་འགྱུར་གྱི་ནུས་པ་ལས་ཀྱང་ཤེས་ཤིང་། བྱམས་ཆོས་འདིར་ནི། སྤྱིར་ས་བཅུ་པའི་བྱང་སེམས་ཀྱིས་མཛད་པ་བཅུ་གཉིས་ཀྱིས་ཚུལ་སྟོན་པ་ཡོད་པར་བཞེད་ཀྱང་། བསྐལ་བཟང་གི་སངས་རྒྱས་སྟོང་གིས་མཛད་པ་བཅུ་གཉིས་ཀྱི་ཚུལ་སྟོན་པ་ནི། ཐོག་མར་ཆོས་སྐུ་མངོན་དུ་བྱས་ནས་སྤྲུལ་སྐུའི་མཛད་པར་བཞེད་དོ། །ཉན་ཐོས་ཞི་བ་ཚོལ་རྣམས་ཀུན་ཤེས། །ཞེས་པའི་སྐབས་སུ། མཆོད་ཡུམ་གྱི་མཐའ་དཔྱད་པ་ལ། མཚན་གཞི་ལ་དཔྱད། མཚན་ཉིད་དབྱེ་བ་དང་བཅས་པ་ལ་དཔྱད། ཡུམ་སྲས་ཀྱི་དོན་ལ་དཔྱད། གོ་རིམ་ལ་དཔྱད་པ་དང་བཞི་ལས། དང་པོ་ལ། འབྲས་བུ་ཤེར་ཕྱིན་ཁོ་ན་ལ་འདོད་པ་དགག འཕགས་རྒྱུད་ཀྱི་མཁྱེན་པ་ཁོ་ན་ལ་འདོད་པ་དགག གཞུང་ལམ་འབྲས་བུ་ཤེར་ཕྱིན་གསུམ་ཀ་ལ་འདོད་པ་དགག་པའོ། །དང་པོ་ནི་ཨར་ན་རེ། སྤྱིར་མཆོད་བརྗོད་ཡུལ་དུ་གྱུར་པའི་ཡུམ་ལ་མཚན་བཏགས་མ་ཕྱེ་བར་དབྱེ་ན། གཞུང་ལམ་འབྲས་བུའི་ཤེར་ཕྱིན་གསུམ་ཀ་ཡོད་ཀྱང་། མཆོད་ཡུམ་མཚན་ཉིད་པ་ཡིན་ན། འབྲས་བུ་ཡུམ་ཡིན་དགོས་ཏེ། ཤེར་ཕྱིན་ཡིན་ན་འབྲས་བུ་ཤེར་ཕྱིན་ཡིན་དགོས་པའི་ཕྱིར། ཞེས་ཟེར་རོ། །བུ་སྟོན་ཡང་མཆོད་ཡུམ་ཡིན་ན་འབྲས་ཡུམ་ཡིན་དགོས་ཏེ། འགྲེལ་པར། ཐམས་ཅད་མཁྱེན་པ་ཉིད་གསུམ་གྱི་བདག་ཉིད་ཚུལ་གསུམ་པ་ཅན་ཞེས་དང་། དེའི་ཕྱིར་བཅོམ་ལྡན་འདས་མ་ལ་རབ་ཏུ་དྭང་བ་ནི་ཞེས་དང་། བཅོམ་ལྡན་འདས་མ་ཡོན་ཏན་རིན་པོ་ཆེ་ཕུལ་དུ་དབྱུང་དུ་མེད་ཅིང་ཞེས་བཅོམ་ལྡན་འདས་མའི་སྒྲས་གསུངས་པའི་ཕྱིར་ཞེས་ཟེར་རོ། །འོ་ན་ཡུམ་དེ་ལ་ཕྱག་འཚལ་ཞེས་པའི་དངོས་བསྟན་གྱི་ཡུམ་དེ་ཆོས་ཅན། འབྲས་ཡུམ་དུ་ཐལ། མཆོད་ཡུམ་ཡིན་པའི་ཕྱིར། འདོད་ན། དངོས་པོ་བརྒྱད་ཀྱི་སྒོ་ནས་བཤད་པའི་གཞིར་གྱུར་པའི་ཤེར་ཕྱིན་དེ་འབྲས་བུ་ཤེར་ཕྱིན་དུ་ཐལ། འདོད་པ་དེའི་ཕྱིར། ཁྱབ་སྟེ། བྱམས་པས་མཆོད་ཡུམ་དེ་ལ་མཁྱེན་པ་གསུམ་གྱིས་སྒོ་ནས་བསྟོད་ཅིང་། དེ་ཉིད་མངོན་པར་རྟོགས་པ་བརྒྱད་ཀྱི་སྒོ་ནས་བཤད་པའི་ཕྱིར། ཡང་མཁྱེན་གསུམ་ཆོས་ཅན། མཆོད་ཡུམ་དུ་ཐལ། རྒྱན་གྱི་མཆོད་བརྗོད་ཀྱི་ཡུལ་གང་ཞིག ཡུམ་ཡིན་པའི་ཕྱིར། ཕྱི་ཟུར་མ་གྲུབ་ན་དེར་ཐལ། འཕགས་པ་བཞི་པོ་དེ་སྲས་ཡིན་པའི་ཕྱིར། ཡང་འཕགས་པ་འོག་མ་གསུམ་ལ་ཡུམ་གཏན་ནས་མེད་པ་ཡིན་ནམ། རྣམ་མཁྱེན་གཅིག་པུས་དེ་རྣམས་ཀྱི་ཡུམ་བྱེད་པ་གང་ཡིན། དང་པོ་ལྟར་ན། ཉན་རང་འཕགས་པ་ཉེར་ཞི་གཉིས་སུ་ཁྲིད་པར་བྱེད་པའི་མཁྱེན་པ་དང་། བྱང་སེམས་འཕགས་པས་གཞན་དོན་སྒྲུབ་པའི་ཐབས་སུ་གྱུར་པའི་མཁྱེན་པ་མེད་པར་ཐལ། དེ་དག་ལ་ཡུམ་མེད་པའི་ཕྱིར། གཉིས་པ་ལྟར་ན། འོག་ཏུ་འགོག་གོ །བུ་སྟོན་གྱི་ལུང་ཁྱབ་གཉིས་ལ་རིམ་བཞིན་ཐེག་པ་ཡིན་ན་ཐེག་ཆེན་གྱི་ཐེག་པ་ཡིན་དགོས་པར་ཐལ། བསམ་གྱིས་མི་ཁྱབ་པར་བསྟོད་པར། ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོའི་ཐེག་པར་དབྱེར་མ་མཆིས། །ཞེས་སོ། །ས་བཅུ་པའི་ཡེ་ཤེས་ཡིན་ན། སངས་རྒྱས་ཀྱི་ཡེ་ཤེས་ཡིན་དགོས་པར་ཐལ། ས་དགུ་འདས་ནས་ཡེ་ཤེས་ནི། །གང་གིས་སངས་རྒྱས་སར་གནས་པ། །ཞེས་གསུངས་པའི་ཕྱིར། གཉིས་པ་ནི། ཁ་ཅིག མཆོད་ཡུམ་ཡིན་ན་འཕགས་རྒྱུད་ཀྱི་མཁྱེན་པ་ཡིན་དགོས་ཏེ། མཆོད་བརྗོད་ཡུལ་དུ་གྱུར་པའི་ཐེག་དམན་གྱི་ཡུམ་དང་། བྱང་སེམས་ཀྱི་ཡུམ་ཡིན་ན་ཐེག་དམན་འཕགས་པ་དང་བྱང་སེམས་འཕགས་པའི་མཁྱེན་པ་ཡིན་དགོས་པའི་ཕྱིར་ཏེ། དེ་དང་དེ་ཡིན་ན་གཞི་ཤེས་དང་ལམ་ཤེས་ཡིན་དགོས་པའི་ཕྱིར་ཏེ། ཉིར་སྣང་དུ། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས། ཐམས་ཅད་མཁྱེན་པ་ཉིད་གསུམ་གྱི་ཐུན་མོང་མ་ཡིན་པའི་ཡོན་ཏན་ཉེ་བར་དགོད་པ་སྔོན་དུ་འགྲོ་བས་ཤེས་རབ་ཀྱི་ཕ་རོལ་དུ་ཕྱིན་པ་ལ་ཕྱག་འཚལ་ལོ་ཞེས་གསུངས་པའི་ཕྱིར་ཞེས་ཟེར་རོ། །དེ་ལ་ཁ་ཅིག་བྱང་སེམས་མཐོང་ལམ་པ་ཆོས་ཅན། སྲས་བྱང་སེམས་མ་ཡིན་པར་ཐལ། རང་རྒྱུ་ཡུམ་ལས་མ་བྱུང་བའི་ཕྱིར། ཞེས་ཟེར་བ་ནི་ཅུང་ཟད་རྩིངས་ཏེ། འཇུག་པ་སེམས་བསྐྱེད་རྒྱུད་ལ་སྐྱེས་མ་ཐག་པའི་བྱང་སེམས་ཆོས་ཅན། དེར་ཐལ། དེའི་ཕྱིར་མ་གྲུབ་ན་ལམ་མ་ཞུགས་ཀྱི་གནས་སྐབས་ན་བྱང་སེམས་ཀྱི་ཡུམ་ཡོད་པར་ཐལ་ལོ། །རྩ་བར་འདོད་ན། དེ་སྲས་བྱང་སེམས་སུ་ཐལ། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པའི་ཕྱིར་རོ། །རང་ལུགས་ནི་འདི་ལྟར་འཕེན་ཏེ། བྱང་སེམས་མཐོང་ལམ་པ་ཆོས་ཅན། སྲས་འཕགས་པ་མ་ཡིན་པར་ཐལ། རང་རྒྱུ་ཡུམ་ལས་མ་བྱུང་བའི་ཕྱིར། ཁྱབ་སྟེ། མདོ་ལས། འཕགས་པའི་གང་ཟག་ཐམས་ཅད་ནི་འདུས་མ་བྱས་ཀྱི་རབ་ཏུ་ཕྱེ་བའོ་ཞེས་གསུངས་པའི་ཕྱིར། ཡང་ཐེག་ཆེན་འཕགས་པ་ཡིན་ན། རང་རྒྱུ་ཐེག་ཆེན་གྱི་ཆོས་ལ་མོས་པ་སོགས་རྒྱུ་བཞི་ལས་སྐྱེས་པས་མ་ཁྱབ་པར་ཐལ། བྱང་སེམས་འཕགས་པ་ཡིན་ན། རང་རྒྱུ་ཡུམ་ལས་སྐྱེས་པས་མ་ཁྱབ་པའི་ཕྱིར། འདོད་ན། མངལ་སྐྱེས་ཀྱི་འཁོར་ལོས་སྒྱུར་བའི་རྒྱལ་པོའི་སྲས་ཡིན་ན། རང་རྒྱུ་ཡབ་འཁོར་ལོས་སྒྱུར་བའི་རྒྱལ་པོའི་ས་བོན་སོགས་ཆོས་བཞི་ལས་སྐྱེས་པས་མ་ཁྱབ་པར་ཐལ། འདོད་པ་དེའི་ཕྱིར། ཁྱབ་སྟེ། རྒྱུད་བླར། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་སྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེ་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་གསུངས་པའི་ཕྱིར། བྱང་སེམས་ཚོགས་ལམ་པའི་རྒྱུད་ཀྱི་གཅིག་དུ་བྲལ་གྱི་རྟགས་ལས་གཞི་ལམ་རྣམ་གསུམ་སྐྱེ་མེད་དུ་རྟོགས་པའི་མཁྱེན་པ་དེ་མཆོད་ཡུམ་མིན་པར་ཐལ། རྩ་བའི་དམ་བཅའ་དེའི་ཕྱིར། འདོད་ན། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར། ཞེས་བྱ་བ་ལ་སོགས་པའི་ཚད་མས་ཞེས་པའི་གཞུང་དེས། མཆོད་བརྗོད་ངག་གི་བསྟན་བྱར་གྱུར་པའི་མཆོད་ཡུམ་དེ་མ་བསྟན་པར་ཐལ། འདོད་པ་དེའི་ཕྱིར། འདོད་ན། མཆོད་བརྗོད་ངག་གི་གདུལ་བྱ་དབང་རྣོན་གྱིས་གཅིག་དུ་བྲལ་གྱི་རྟགས་ལས་གཞི་ལམ་རྣམ་གསུམ་སྐྱེ་མེད་དུ་རྟོགས་པའི་བློ་དེ་ལ་ཚད་མས་གནོད་པ་མ་མཐོང་བས་མཆོད་བརྗོད་ངག་གི་བསྟན་བྱར་གྱུར་པའི་ཡུམ་དེ་ལ་ཚད་མས་གནོད་པ་མ་མཐོང་བར་མི་གྲུབ་པར་ཐལ། འདོད་པ་དེའི་ཕྱིར། འདོད་ན་གཞུང་དེས་མཆོད་བརྗོད་ངག་གི་གདུལ་བྱ་དབང་རྣོན་ཡུམ་ལ་དྭང་བ་སྐྱེ་ཚུལ་བསྟན་པ་ལ་དགོས་པ་མེད་པར་ཐལ་ལོ། །ཡང་བྱང་སེམས་ཚོགས་ལམ་པའི་རྒྱུད་ཀྱི་གཅིག་དུ་བྲལ་གྱི་རྟགས་ལས་གཞི་ལམ་རྣམ་གསུམ་སྐྱེ་མེད་དུ་རྟོགས་པའི་ཤེས་རབ་ཆོས་ཅན། མཆོད་ཡུམ་དུ་ཐལ། རྣམ་རྫོགས་སྦྱོར་བས་བསྡུས་པའི་ཤེས་པ་ཡིན་པའི་ཕྱིར། ཁྱབ་སྟེ། ཡུམ་མཁྱེན་པ་གསུམ་ལ་བསྟོད་པས་མངོན་པར་རྟོགས་པ་བརྒྱད་ཀ་ལ་བསྟོད་པར་འགྱུར་བའི་ཕྱིར། ཡང་སངས་རྒྱས་འཕགས་པའི་ཡུམ་ཡིན་ན། དེའི་མཁྱེན་པ་ཡིན་དགོས་པར་ཐལ། མཆོད་ཡུམ་ཡིན་ན་འཕགས་རྒྱུད་ཀྱི་མཁྱེན་པ་ཡིན་དགོས་པའི་ཕྱིར། འདོད་ན། ཐེག་ཆེན་སློབ་པའི་རྒྱུད་ཀྱི་ཆོས་རང་བཞིན་མེད་པར་རྟོགས་པའི་ཤེས་རབ་ཆོས་ཅན། དེར་ཐལ། དེའི་ཕྱིར། མ་གྲུབ་ན་དེ་དེར་ཐལ། སྡུད་པ་ལས། རྒྱལ་བ་འདས་དང་མ་བྱོན་ཕྱོགས་བཅུ་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་གསུངས་པའི་ཕྱིར་རོ། །ཉིར་སྣང་གི་ལུང་གི་དོན་ནི་བཞེད་དོན་སྒྲུབ་བྱེད་ཀྱི་ཡུམ་གྱི་དབང་དུ་བྱས་པ་ཡིན་ལ། གཞན་དུ་ན་བྱང་ཕྱོགས་སོ་བདུན་པོ་གང་རུང་ཡིན་ན། འཕགས་རྒྱུད་ཀྱི་མཁྱེན་པ་ཡིན་དགོས་པར་ཐལ། བྱང་ཕྱོགས་སོ་བདུན་གྱི་སྐབས་སུ་ཉིར་སྣང་ལས། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས། ཐམས་ཅད་མཁྱེན་པ་ཉིད་གསུམ་གྱི་རྣམ་པ་རྣམས་བསྡུས་པར་འགྱུར་བ་ཡིན་ཏེ། ཞེས་གསུངས་པའི་ཕྱིར། གསུམ་པ་ནི། ཁ་ཅིག མཆོད་ཡུམ་གྱི་མཚན་གཞི་ནི། གཞུང་ཤེར་ཕྱིན་དང་དངོས་བརྒྱད་འདུས་བྱས་ཀྱི་ཆ་རྣམས་ཡིན་ལ། གཞུང་ཤེར་ཕྱིན་ཆོས་ཅན། མཆོད་ཡུམ་ཡིན་ཏེ། མཆོད་བརྗོད་ངག་གི་གདུལ་བྱ་ཡུམ་ལ་གུས་པ་སྐྱེ་བའི་གུས་ཡུལ་ཡིན་པའི་ཕྱིར་ཏེ། དེ་ལ་རབ་ཏུ་དྭང་བས་ཀྱང་དེའི་ཡོན་ཏན་མངོན་པར་འདོད་པའི་གང་ཟག་ཅེས་སོགས་གསུངས་པའི་ཕྱིར། ཡང་གཞུང་ཤེར་ཕྱིན་དེ་ཡུམ་ཡིན་པར་ཐལ། འདི་ལྟར་རྒྱལ་བའི་ཡུམ་བར་མ་ལས་ཞེས་པ་དང་། རྒྱལ་བའི་ཡུམ་རྣམ་པ་གསུམ་ཆར་ལས་གསུངས་ཞེས་དང་། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །ཞེས་དང་། སྡུད་པ་ལས། གང་དག་འདས་དང་ཕྱོགས་བཅུའི་འཇིག་རྟེན་མགོན་གང་དང་། །མ་འོངས་དུས་ན་འབྱུང་འགྱུར་དེ་དག་འདི་ལས་འབྱུང་། །ཞེས་གསུངས་པའི་ཕྱིར་ཟེར་རོ། །རིམ་པ་བཞིན། རྫོགས་པའི་སངས་རྒྱས་ཀྱིས་སྤྱོད་ལམ་རྣམ་བཞི་མཛད་པའི་གནས་དེ་ཆོས་ཅན། རྫོགས་པའི་སངས་རྒྱས་སུ་ཐལ། རྫོགས་པའི་སངས་རྒྱས་ལ་ཕྱག་འཚལ་བའི་ཡུལ་ཡིན་པའི་ཕྱིར། བདེ་གཤེགས་གང་དུ་བཞུགས་པ་དང་། །འཆགས་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །ཞེས་གསུངས་པའི་ཕྱིར་འཁོར་གསུམ་མོ། །མཆོད་ཡུམ་བཅོམ་ལྡན་འདས་མར་ཐལ། བཅོམ་ལྡན་འདས་མ་ཡོན་ཏན་རིན་པོ་ཆེ། །ཞེས་དང་། དེའི་ཕྱིར་བཅོམ་ལྡན་འདས་མ་ལ་རབ་ཏུ་དྭང་བ་ནི། ཞེས་གསུངས་པའི་ཕྱིར། གཞུང་ཤེར་ཕྱིན་དེ་ཤེར་ཕྱིན་དུ་ཐལ། ཉན་ཐོས་ཀྱི་ས་ལ་སློབ་པར་འདོད་པས་ཞེས་སོགས་གསུངས་པའི་ཕྱིར། གང་དག་འདས་དང་ཞེས་སོགས་ཀྱི་མདོ་དེས། དུས་གསུམ་གྱི་སངས་རྒྱས་ཐམས་ཅད་གཞུང་ཤེར་ཕྱིན་ལས་བྱུང་བར་བསྟན་པར་ཐལ། མདོ་དེས་གཞུང་ཤེར་ཕྱིན་མཆོད་ཡུམ་དུ་བསྟན་པའི་ཕྱིར། འདོད་ན། རྒྱལ་བ་འདས་དང་མ་བྱོན་ཕྱོགས་བཅུར་ཞེས་སོགས་ཚིགས་རྐང་གཉིས་པོ་དེས་གཞུང་ཤེར་ཕྱིན་དེ་དུས་གསུམ་སངས་རྒྱས་ཐམས་ཅད་ཀྱི་བསྒྲོད་པ་གཅིག་པའི་ལམ་དུ་བསྟན་པར་ཐལ་ལོ། །རང་ལུགས་འོག་ཏུ་འབྱུང་ངོ་། །གཉིས་པ་ལ། མཁན་ཆེན་པ་ན་རེ། རང་སྲས་འཕགས་པའི་བཞེད་དོན་སྒྲུབ་ནུས་དེ་མཆོད་ཡུམ་གྱི་མཚན་ཉིད། དབྱེ་ན་གཞུང་ལམ་འབྲས་བུ་རང་བཞིན་གྱི་ཤེར་ཕྱིན་དང་བཞིར་ཡོད་ཟེར། དེའི་རྗེས་འབྲང་ཁ་ཅིག རང་སྲས་འཕགས་པ་ལ་ཕན་འདོགས་པའི་ཆར་གྱུར་པ་དེ་དེའི་མཚན་ཉིད། དབྱེ་ན་སྐྱེད་བྱེད་དང་། བཞེད་དོན་སྒྲུབ་བྱེད་ཀྱི་ཡུམ་གཉིས། དང་པོ་ལ་ཉེར་ལེན་གྱི་རྒྱུ། ལྷན་ཅིག་བྱེད་རྐྱེན་གཉིས། སྔ་མ་ནི་ཐེག་ཆེན་གྱི་ཆོས་ལ་མོས་པའི་ས་བོན་ཡིན་ཞིང་། ཕྱི་མ་ནི་བསམ་གཏན་སོགས་རྒྱུ་གཞན་བཞི་པོ་ཡིན་ནོ། །གཉིས་པ་ལ་དབྱེ་ན། མཆོད་བརྗོད་ཡུལ་དུ་གྱུར་པའི་ཡུམ་གཞི་ཤེས་ལམ་ཤེས་རྣམ་མཁྱེན་གསུམ་གྱི་མཚན་ཉིད་རིམ་པ་བཞིན། གནས་སྐབས་ཐེག་དམན་དུ་རིགས་ངེས་པའི་ཐེག་དམན་སློབ་པ་འཕགས་པ་ཉེར་ཞི་གཉིས་སུ་འཁྲིད་པར་བྱེད་པའི་མཁྱེན་པ་དང་། བྱང་སེམས་འཕགས་པས་གཞན་དོན་སྒྲུབ་པའི་ཐབས་སུ་གྱུར་པའི་མཁྱེན་པ་དང་། སངས་རྒྱས་འཕགས་པས་ཆོས་འཁོར་བསྐོར་བའི་བདག་རྐྱེན་དུ་གྱུར་པའི་མཁྱེན་པའོ་ཞེས་ཟེར་རོ། །ཁ་ཅིག རང་སྲས་ཀྱི་བཞེད་དོན་ཕུན་ཚོགས་སྒྲུབ་ནུས་ཀྱི་མཁྱེན་པ་མཆོད་ཡུམ་གྱི་མཚན་ཉིད། དབྱེ་ན་ཉན་ཐོས་རང་རྒྱལ་བྱང་སེམས་ཀྱི་ཡུམ་གསུམ་མོ། །མཚན་གཞི་དངོས་པོ་བརྒྱད་ཀ་ཡིན་ཟེར། ཁ་ཅིག རང་སྲས་འཕགས་པ་སྐྱེད་པའི་ཡོན་ཏན་དང་ལྡན་པའི་ཆ་ནས་རྒྱན་མཛད་པའི་བསྟོད་ཕྱག་གི་ཡུལ་དུ་ཚད་མས་དམིགས་པ་མཆོད་ཡུམ་གྱི་མཚན་ཉིད་ཡིན་ཟེར། དེ་ལྟར་ལུགས་བཞི་ལས་དང་པོ་འགོག་པ་ལ་ཁ་ཅིག་ན་རེ། རང་བཞིན་གྱི་མྱང་འདས་དེ་མྱང་འདས་སུ་ཐལ་རང་བཞིན་གྱི་ཤེར་ཕྱིན་དེ་ཤེར་ཕྱིན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་མྱང་འདས་མིན་པར་ཐལ། གཞི་གྲུབ་ན་ཁྱོད་ཡིན་དགོས་པའི་ཕྱིར། ཟེར་བ་ནི་མི་འཐད་དེ། དོན་དམ་པར་རང་བཞིན་གྱི་མྱང་འདས་ཡིན་ན། རང་བཞིན་གྱི་མྱང་འདས་ཡིན་དགོས་པར་ཐལ། གཞི་གྲུབ་ན་རང་བཞིན་མྱང་འདས་ཡིན་དགོས་པའི་ཕྱིར། འདོད་ན། ཆོས་ཐམས་ཅད་ཆོས་ཅན། ཆོས་ཀྱི་དབྱིངས་སུ་ཐལ། དོན་དམ་པར་ཆོས་ཀྱི་དབྱིངས་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ཆོས་ཀྱི་དབྱིངས་ལས་མ་གཏོགས་པའི། །འདི་ལྟར་ཆོས་ཡོད་མ་ཡིན་ཏེ། །ཞེས་གསུངས་པའི་ཕྱིར་རོ། །ཡང་ཁ་ཅིག རང་བཞིན་ཤེར་ཕྱིན་ཆོས་ཅན། མཆོད་ཡུམ་མིན་པར་ཐལ། བསྟོད་ཕྱག་གི་ཡུལ་དེ་མི་འཐད་པའི་ཕྱིར་ཏེ། རང་བཞིན་རྣམ་དག་གི་ཆོས་ཉིད་ཡིན་པའི་ཕྱིར། ཞེ་ན། ཆོས་ཐམས་ཅད་ཀྱི་ཆོས་ཉིད་དེ་བསྟོད་ཕྱག་གི་ཡུལ་མ་ཡིན་པར་ཐལ། རང་བཞིན་གྱི་ཤེར་ཕྱིན་དེ་དེ་མིན་པའི་ཕྱིར། འདོད་ན། དེ་ཡིན་པར་ཐལ། ཆོས་དབྱིངས་བསྟོད་པར། གང་ཞིག་ཡོངས་སུ་མ་ཤེས་པས། །སྲིད་པ་གསུམ་ན་འཁོར་འགྱུར་ཞིང་། །སེམས་ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་ལོ། །ཞེས་གསུངས་པའི་ཕྱིར། རང་ལུགས་ནི། རང་བཞིན་གྱི་ཤེར་ཕྱིན་ཆོས་ཅན། མཆོད་ཡུམ་མིན་པར་ཐལ། རང་སྲས་འཕགས་པ་སྐྱེད་བྱེད་དང་། བཞེད་དོན་སྒྲུབ་བྱེད་གང་རུང་མ་ཡིན་པའི་ཕྱིར། མཚན་ཉིད་ལ་རྒྱལ་བ་ཆོས་ཅན། དེར་ཐལ། མཚན་ཉིད་དེའི་ཕྱིར། འདོད་ན། ཡུམ་མིན་པར་ཐལ། ཡབ་ཡིན་པའི་ཕྱིར་རོ། །གཉིས་པ་ལ་འཁོར་ལོས་སྒྱུར་བའི་རྒྱལ་པོའི་ས་བོན་དེ། འཁོར་ལོས་སྒྱུར་བའི་རྒྱལ་པོའི་སྲས་ཀྱི་ཡུམ་ཡིན་པར་ཐལ། ཐེག་ཆེན་གྱི་ཆོས་ལ་མོས་པའི་ས་བོན་དེ་བྱང་འཕགས་ཀྱི་ཡུམ་ཡིན་པའི་ཕྱིར། ཁྱབ་པ་ནི་སྔར་གྱི་རྒྱུ་བླའི་ལུང་གིས་གྲུབ་བོ། །འདིའི་མཆོད་ཡུམ་གཞི་ཤེས་ཀྱི་མཚན་ཉིད་ལ། ཉན་ཐོས་ཀྱི་སྒོམ་ལམ་ནས་ཐེག་ཆེན་ལམ་དུ་འཇུག་པར་ངེས་པའི་ཉན་ཐོས་ཀྱི་མཐོང་ལམ་ཆོས་ཅན། དེར་ཐལ། མཚན་ཉིད་དེའི་ཕྱིར་ཏེ། ཉན་ཐོས་ཀྱི་མཐོང་ལམ་ཡིན་པའི་ཕྱིར། འདོད་ན། དེ་ཆོས་ཅན། གནས་སྐབས་ཐེག་དམན་དུ་རིགས་ངེས་པའི་ཐེག་དམན་སློབ་པ་འཕགས་པ་དམན་པའི་ལྷག་མེད་མྱང་འདས་སུ་ཁྲིད་པར་བྱེད་པའི་མཁྱེན་པ་ཡིན་པར་ཐལ་ལོ། །ལུགས་གསུམ་པ་ལ། དངོས་པོ་བརྒྱད་ཀ་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་ན། འབྲས་བུ་ཆོས་སྐུ་དེ་དངོས་པོ་བརྒྱད་གང་རུང་མིན་པར་ཐལ་ལོ། །ཡང་མཆོད་ཡུམ་ཡིན་ན། འཕགས་རྒྱུད་ཀྱི་མཁྱེན་པ་ཡིན་དགོས་པར་ཐལ། དེ་ཡིན་ན་བཞེད་དོན་སྒྲུབ་བྱེད་ཀྱི་ཡུམ་ཡིན་དགོས་པའི་ཕྱིར། མ་གྲུབ་ན་མཚན་ཉིད་དང་འགལ། འདོད་ན། མཚན་གཞི་དང་འགལ་ལོ། །ལུགས་བཞི་པ་ལ། སངས་རྒྱས་འཕགས་པ་ཆོས་ཅན། དེར་ཐལ། མཚན་ཉིད་དེའི་ཕྱིར། རང་ལུགས་འོག་ཏུ་འཆད་དོ། །གསུམ་པ་ཡུམ་སྲས་ཀྱི་དོན་ལ། དགག་གཞག་གཉིས་ལས། དང་པོ་ལ་ཨར་ན་རེ། མཁྱེན་གསུམ་དང་འཕགས་བཞི་ཡུམ་སྲས་སུ་བཞག་པ་ནི་རྣམ་པར་བཞག་འཇོག་གི་ཡུམ་སྲས་ཡིན་གསུངས་སོ། །རེད་མདའ་བ་ན་རེ། སངས་རྒྱས་ཀྱི་གཉིས་སུ་མེད་པའི་ཡེ་ཤེས་དེ་ཉིད་ཡུམ་གྱི་གཙོ་བོ་ཡིན་ཏེ། དེས་བདག་རྐྱེན་བྱས་ནས་རིགས་ཅན་གསུམ་ལ་ཆོས་འཁོར་བསྐོར་བས་རང་རང་གི་རིགས་དང་མཐུན་པའི་གཞི་ཤེས་ཀྱི་རྟོགས་པ་སྐྱེས་ནས་ཉེར་ཞི་གཉིས་སུ་ཁྲིད་པར་བྱེད། ལམ་ཤེས་ཀྱི་རྟོགས་པ་སྐྱེས་ནས་འཇིག་རྟེན་གྱི་དོན་སྒྲུབ་པར་བྱེད་ཅིང་། མཐར་ཐུག་དེ་གཉིས་ཀྱང་རྣམ་མཁྱེན་གྱི་རྟོགས་པ་ཐོབ་ནས་ཆོས་ཀྱི་འཁོར་ལོ་བསྐོར་བ་དེ་འབྱུང་བའི་ཕྱིར། དེས་ན་ཡུམ་སྲས་ནི་རྒྱུད་ཐ་དད་པ་སྔ་ཕྱི་བ་ཁོ་ན་ལ་འཇོག་སྟེ། སངས་རྒྱས་སྔ་མའི་རྣམ་མཁྱེན་དེས་འཕགས་པ་ཕྱི་མ་བཞིའི་ཡུམ་བྱེད་པའི་ཕྱིར། གལ་ཏེ་རྒྱུད་ཐ་དད་པ་སྔ་ཕྱི་བ་ལ་ཡུམ་སྲས་མི་རུང་ན། སངས་རྒྱས་དང་བྱང་སེམས་ལྟ་བུའི་ཡབ་སྲས་ཀྱང་མི་རུང་བར་འགྱུར་ཞེས་གསུངས་སོ། །ཁ་ཅིག་ཡུམ་སྲས་ཀྱི་དོན་བསྐྱེད་བྱ་སྐྱེད་བྱེད་ཡིན་པས་གཞུང་ཤེར་ཕྱིན་དང་དངོས་བརྒྱད་མངོན་རྟོགས་ཀྱི་ཆར་གྱུར་པ་རྣམས་ཀྱིས་རང་སྲས་འཕགས་པ་སྐྱེས་པར་བྱེད་དེ། མོས་སྤྱོད་ཀྱི་གནས་སྐབས་སུ་གཞུང་ཤེར་ཕྱིན་དམིགས་པ། མཁྱེན་གསུམ་ཤེས་བྱ། སྦྱོར་བཞི་སྦྱོར་བ། ཆོས་སྐུ་འདུས་བྱས་ཀྱི་ཆ་རྣམས་འབྲས་བུར་གཞག་ནས་སྦྱོར་བས་ཉམས་སུ་བླངས་པ་ལས་རང་སྲས་འཕགས་པ་འབྱུང་། དེ་ལས་རང་སྲས་ཉན་ཐོས་རང་རྒྱལ་བྱང་སེམས་རྣམས་འབྱུང་བའི་ཕྱིར། སངས་རྒྱས་འཕགས་པའི་ཡུམ་ལ་སྐྱེད་བྱེད་ཀྱི་ཡུམ་དང་། བཞེད་དོན་སྒྲུབ་བྱེད་ཀྱི་ཡུམ་གཉིས་ཡོད་པའི་དང་པོ་སྔར་བཤད་པ་ལྟར་ཡིན་ཞིང་། ཕྱི་མ་ནི་རྣམ་མཁྱེན་ལྟ་བུ་ཡིན་ཀྱང་། དེ་ཡུམ་བརྟགས་པ་བ་ཡིན་ལ། དེས་མཁྱེན་པ་གཞན་གཉིས་ལ་འགྲེའོ་ཞེས་ཟེར་རོ། །དེ་ལྟར་ལུགས་གསུམ་ལས། དང་པོ་ལ་གཞི་ཤེས་ཆོས་ཅན། ཐེག་དམན་འཕགས་པའི་རྣམ་པར་འཇོག་བྱེད་ཀྱི་རྒྱུ་མ་ཡིན་པར་ཐལ། དེའི་མཚན་ཉིད་མ་ཡིན་པའི་ཕྱིར། གལ་ཏེ་རྣམ་མཁྱེན་དེ་སངས་རྒྱས་འཕགས་པའི་རྣམ་པར་འཇོག་བྱེད་ཀྱི་རྒྱུ་ཡིན་ཏེ། དེ་རྒྱུད་ལ་ལྡན་པའི་རྟེན་གྱི་གང་ཟག་དེ་སངས་རྒྱས་འཕགས་པར་འཇོག་ནུས་པའི་ཕྱིར་ཞེ་ན། དག་སའི་ཡེ་ཤེས་དེ་ཐེག་ཆེན་འཕགས་པའི་རྣམ་པར་འཇོག་བྱེད་ཀྱི་རྒྱུ་ཡིན་པར་ཐལ། དེ་རྒྱུད་ལ་ལྡན་པའི་རྟེན་གྱི་གང་ཟག་དེ་དེར་འཇོག་ནུས་པའི་ཕྱིར། གཉིས་པ་ལ། ས་བཅུའི་ཡེ་ཤེས་དེ་ཡུམ་གྱི་གཙོ་བོ་ཡིན་པར་ཐལ། དེས་བདག་རྐྱེན་བྱས་ནས་ཆོས་འཁོར་བསྐོར་བས་སྔར་ལྟར་འབྱུང་བའི་ཕྱིར། མ་གྲུབ་ན་དེར་ཐལ། ས་བཅུའི་བྱང་སེམས་དེ་གཞན་ངོར་གཞན་དོན་བྱེད་ཚུལ་སངས་རྒྱས་དང་མཚུངས་པའི་ཕྱིར། རྩ་བར་འདོད་ན། ཁས་བླངས་དང་འགལ་ལོ། །ཡང་མཆོད་བརྗོད་ཀྱི་ཚིག་རྐང་དང་པོ་གསུམ་པོ་དེས་འཕགས་བཞིའི་ཡུམ་མཚན་ཉིད་པ་མ་བསྟན་པར་ཐལ། ཐེག་དམན་འཕགས་པའི་རྒྱུད་ཀྱི་གཞི་ཤེས་ཡིན་ན། དེའི་ཡུམ་མིན་དགོས། བྱང་སེམས་འཕགས་པའི་རྒྱུད་ཀྱི་ལམ་ཤེས་ཡིན་ན། དེའི་ཡུམ་མིན་དགོས། སངས་རྒྱས་འཕགས་པའི་རྒྱུད་ཀྱི་རྣམ་མཁྱེན་ཡིན་ན། དེའི་ཡུམ་མིན་དགོས་པའི་ཕྱིར། འདོད་ན་འཕགས་བཞིའི་ཡུམ་མཚན་ཉིད་པ་སྟོན་བྱེད་ཀྱི་རྒྱན་གཞུང་མེད་པར་ཐལ་ལོ། །གལ་ཏེ་སྐྱོན་མེད་དེ། མཆོད་བརྗོད་ཀྱི་ཚིག་རྐང་ཐ་མ་དེས་དེ་བསྟན་པའི་ཕྱིར་ཞེ་ན། ཚིག་རྐང་དང་པོ་གསུམ་པོ་དེས་དེ་བསྟན་པར་ཐལ། ཐ་མ་དེས་དེ་བསྟན་པ་གང་ཞིག དེ་དེ་གསུམ་གྱི་དོན་བསྡུ་ཡིན་པའི་ཕྱིར། ཡང་ཉན་ཐོས་མཐོང་ལམ་པ་ཆོས་ཅན། སངས་རྒྱས་ཀྱི་སྲས་སུ་ཐལ། རྣམ་མཁྱེན་གྱི་སྲས་སུ་གྱུར་པའི་སློབ་པ་ཡིན་པའི་ཕྱིར། ཡང་སྲས་འཕགས་པ་ཐོབ་པའི་ཆེད་དུ་རང་རྒྱུད་ཀྱི་ཡུམ་ཉམས་སུ་ལེན་པ་མེད་པར་ཐལ། ཡུམ་སྲས་ཡིན་ན་རྒྱུད་ཐ་དད་པ་ཁོ་ན་ཡིན་དགོས་པའི་ཕྱིར། འདོད་ན། ཉམས་སུ་ལེན་པའི་ཆེད་དུ་ཡུམ་བརྗོད་བྱར་སྟོན་པའི་བསྟན་བཅོས་རྩོམ་པ་ལ་དགོས་པ་མེད་པར་ཐལ་ལོ། །ཡང་བྱང་སེམས་སྦྱོར་ལམ་པ་དང་རྒྱུད་ཐ་དད་པ་ལ་བྱང་སེམས་སྦྱོར་ལམ་པའི་ཕྱིའི་ཡོངས་འཛིན་མི་རུང་བར་ཐལ། དེ་དང་རྒྱུད་ཐ་དད་པ་ལ་དེའི་ནང་གི་ཡོངས་འཛིན་མི་རུང་བའི་ཕྱིར། མ་ཁྱབ་ན། རྒྱུད་ཐ་དད་པ་ལ་ཡུམ་སྲས་མི་རུང་ན། རྒྱུད་ཐ་དད་པ་ལ་ཡབ་སྲས་མི་རུང་བས་ཁྱབ་པ་བུད། གསུམ་པ་ལ། ཆོས་ཐམས་ཅད་ཀྱི་རང་སྲས་འཕགས་བཞི་བསྐྱེད་པར་ཐལ། མོས་སྤྱོད་ཀྱི་གནས་སྐབས་སུ་ཆོས་ཐམས་ཅད་དམིགས་པ་མཁྱེན་གསུམ་ཤེས་བྱ་སོགས་སྔར་བཤད་པ་ལྟར་འབྱུང་བའི་ཕྱིར། རྟགས་ཁྱབ་ཁས་བླངས། ཡང་དངོས་པོ་བརྒྱད་ཀྱི་རང་སྲས་འཕགས་བཞི་སྐྱེད་པར་ཐལ། མོས་སྤྱོད་ཀྱི་གནས་སྐབས་སུ་དམིགས་པ་སོགས་གསུམ་པོ་སྔར་བཞིན་ལ། ཆོས་སྐུ་འབྲས་བུར་བཞག་ནས་སྦྱོར་བ་ཉམས་སུ་བླངས་པ་ལས་སྔར་ལྟར་འབྱུང་བའི་ཕྱིར། གཞན་ཡང་མོས་སྤྱོད་ཀྱི་གནས་སྐབས་སུ་སྦྱོར་བཞི་སྦྱོར་བར་བཞག་པའི་དོན་དེ་སྦྱོར་བཞི་སྦྱོར་བ་ཡིན་པར་ཤེས་པ་ལ་བྱེད་དམ། སྐབས་དེར་སྦྱོར་བཞི་སྦྱོར་བ་ཡིན་པ་ལ་བྱེད། དང་པོ་ལྟར་ན། མོས་སྤྱོད་ཀྱི་གནས་སྐབས་སུ་མཁྱེན་གསུམ་ཤེས་བྱར་བཞག་པ་ལས་ལོགས་སུ་སྦྱོར་བཞི་སྦྱོར་བར་གཞག་པ་ལ་དགོས་པ་མེད་པར་ཐལ། དེའི་ཕྱིར། གཉིས་པ་ལྟར་ན། སྐབས་དེར་སྦྱོར་བཞི་ཡོད་པར་ཐལ། སྐབས་དེར་སྦྱོར་བཞི་སྦྱོར་བ་ཡིན་པའི་ཕྱིར། ཡང་སངས་རྒྱས་འཕགས་པ་ཆོས་ཅན། ཁྱོད་ལ་རང་སྲས་ཉན་ཐོས་འཕགས་པ་དང་། རང་རྒྱལ་འཕགས་པ་འབྱུང་བ་མེད་པར་ཐལ། ཁྱོད་ཀྱིས་སྲས་སུ་གྱུར་པའི་ཉན་རང་འཕགས་པ་མེད་པའི་ཕྱིར། མ་གྲུབ་ན། སངས་རྒྱས་འཕགས་པའི་སྲས་སུ་གྱུར་པའི་ཉན་རང་འཕགས་པ་ཆོས་ཅན། རྒྱལ་བའི་སྲས་ཡིན་པར་ཐལ། སངས་རྒྱས་འཕགས་པའི་སྲས་ཡིན་པའི་ཕྱིར། རྟགས་ཁས། གཞན་ཡང་། ཉན་ཐོས་སློབ་པའི་རྒྱུད་ཀྱི་གཞི་ཤེས་དེས་དེ་ཉེར་ཞི་གཉིས་སུ་ཁྲིད་པར་མི་བྱེད་པར་ཐལ། དེ་དེའི་ཡུམ་བཏགས་པ་བ་ཡིན་པའི་ཕྱིར། རྟགས་ཁས། དེས་མཁྱེན་པ་གཞན་གཉིས་ལ་འགྲེའོ། །གཉིས་པ་རང་ལུགས་ནི། སྤྱིར་ཡུམ་ཡིན་ན། བདག་མེད་རྟོགས་པའི་མཁྱེན་པ་ཡིན་དགོས་ཏེ། རྒྱུད་བླར་ཤེས་རབ་ནི། སངས་རྒྱས་ཆོས་སྐྱེད་མ་དང་ཞེས་དང་། འཇུག་པར་ཤེས་རབ་ཡུམ་གྱིས་བསྐྱེད་པ་ཞེས་དང་། འདིར་ཡང་ཀུན་མཁྱེན་གསུམ་པོ་ཉིད་ཡུམ་དུ་བཤད་པ་དང་། ལུང་ལས་ཀྱང་། བདག་མེད་བརྗོད་བྱའི་གཙོ་བོར་སྟོན་པའི་གསུང་རབ་རྣམས་ལ་ཡུམ་གྱི་ཐ་སྙད་གསུངས་པའི་ཕྱིར། དེ་ཡང་རང་སྲས་དང་རྒྱུད་གཅིག་པ་ཞིག་དགོས་ཏེ། སྤྱིར་ཡུམ་ལ་སྐྱེད་བྱེད་ཀྱི་ཡུམ་དང་། བཞེད་དོན་སྒྲུབ་བྱེད་ཀྱི་ཡུམ་གཉིས་ལས། དང་པོ་ནི། སྔར་རང་རྒྱུད་ལ་སྔར་ཉམས་སུ་མྱོང་བའི་བདག་མེད་རྟོགས་པའི་མཁྱེན་པ་ཡིན་དགོས་པའི་ཕྱིར་དང་། ཕྱི་མ་ནི་རང་དང་དུས་མཉམ་པའི་རང་རྒྱུད་ཀྱི་བདག་མེད་རྟོགས་པའི་མཁྱེན་པ་ཡིན་དགོས་པའི་ཕྱིར། ཡབ་ལ་ནི་རང་རྒྱུད་ཀྱི་ནང་གི་ཐབས་མཁས་ལ་ཡབ་ཏུ་བཞག་པ་ཡོད་དེ། མདོ་ལས། བྱང་ཆུབ་སེམས་དཔའ་རྣམས་ཀྱི་ཡབ་ནི་ཐབས་ལ་མཁས་པ་སྟེ། ཞེས་སོ། །འདི་ནི་བྱང་སེམས་སྦྱོར་ལམ་པའི་ནང་གི་ཡོངས་འཛིན་ཐབས་མཁས་གསུངས་པ་དང་དོན་གཅིག་གོ །རང་དང་རྒྱུད་ཐ་དད་པའི་གང་ཟག་ལ་ཡབ་ཏུ་བཞག་པ་ཡང་ཡོད་དེ། རྗེས་དྲན་ལས། བྱང་ཆུབ་སེམས་དཔའ་རྣམས་ཀྱི་ཡབ། །ཅེས་གསུངས་པའི་ཕྱིར། །འདི་ནི་བྱང་སེམས་སྦྱོར་ལམ་པའི་ཕྱིའི་ཡོངས་འཛིན་དགེ་བཤེས་གསུངས་པ་དང་དོན་གཅིག་གོ །སྲས་ལ་ཡུམ་གྱི་སྒོ་ནས་སྲས་སུ་བཞག་པ་ནི། འཕགས་པ་བཞི་ཆར་ལ་ཡོད་དེ། འཕགས་པ་ཡིན་ན་རང་རྒྱུ་བདག་མེད་རྟོགས་པའི་མཁྱེན་པ་ལས་བྱུང་དགོས་པའི་ཕྱིར། ཡབ་ཀྱི་སྒོ་ནས་སྲས་སུ་བཞག་པ་ནི། བྱང་སེམས་ཁོ་ན་ལ་ཡོད་དེ། བྱང་ཆུབ་ཀྱི་སེམས་རྒྱུད་ལ་མ་སྐྱེས་ན་ཡབ་དེ་བཞིན་གཤེགས་པའི་སྲས་སུ་མི་འགྱུར་བའི་ཕྱིར་ཏེ། རྗེས་དྲན་ལས། འཕགས་པའི་གང་ཟག་རྣམས་ཀྱི་རྒྱལ་པོ། ཞེས་ཟུང་བཞི་ཡ་བརྒྱད་ཀྱི་འཕགས་པ་རྣམས་སངས་རྒྱས་ཀྱི་བྲན་དུ་བཤད་ཀྱིས། སྲས་སུ་མ་བཤད་པའི་གནད་ཀྱང་འདི་ཡིན་ནོ། །དེས་ན་མཆོད་ཡུམ་གྱི་མཚན་ཉིད། རང་སྲས་འཕགས་པའི་སྐྱེད་བྱེད་དང་རང་སྲས་འཕགས་པའི་བཞེད་དོན་སྒྲུབ་བྱེད་གང་རུང་དུ་གྱུར་པའི་བདག་མེད་རྟོགས་པའི་མཁྱེན་པ། དེ་ལ་དབྱེ་ན་སྐྱེད་བྱེད་ཀྱི་ཡུམ་དང་། བཞེད་དོན་སྒྲུབ་བྱེད་ཀྱི་ཡུམ་གཉིས། དང་པོ་ལ་མཚན་ཉིད་དང་དབྱེ་བ་གཉིས། དང་པོ་ནི། བདག་མེད་གསུམ་གང་རུང་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་རང་སྲས་འཕགས་པ་སྐྱེད་པར་བྱེད་པའི་མཁྱེན་པ། གཉིས་པ་ལ་རང་སྲས་ཉན་ཐོས་འཕགས་པ་དང་། རང་སྲས་རང་རྒྱལ་འཕགས་པ། རང་སྲས་བྱང་སེམས་འཕགས་པ། རང་སྲས་སངས་རྒྱས་འཕགས་པའི་སྐྱེད་བྱེད་ཀྱི་ཡུམ་དང་བཞི་ལས། དང་པོའི་མཚན་ཉིད། གཞི་གང་ཟག་གི་བདག་གི་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་ཉན་ཐོས་འཕགས་པ་སྐྱེད་པར་བྱེད་པའི་མཁྱེན་པ། དེ་ལ་དབྱེ་ན། གཞི་གང་ཟག་གི་བདག་གི་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པ་དང་། མངོན་སུམ་རྟོགས་པའི་སྐྱེད་བྱེད་ཀྱི་ཡུམ་གཉིས་ལས། སྔ་མ་ནི་ཉན་ཐོས་ཀྱི་ཚོགས་སྦྱོར་ན་ཡོད། ཕྱི་མ་ནི་ཉན་ཐོས་ཀྱི་མཐོང་ལམ་ནས་ཐེག་ཆེན་ལམ་དུ་འཇུག་ཁའི་སྔ་ལོགས་ན་ཡོད། གཉིས་པའི་མཚན་ཉིད། གཞི་གཟུང་བ་ཆོས་ཀྱི་བདག་གི་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་རང་རྒྱལ་འཕགས་པ་སྐྱེད་བྱེད་ཀྱི་མཁྱེན་པ། དབྱེ་བ་ས་མཚམས་སྔོན་མས་དཔགས་ཏེ་ཤེས་སོ། །གསུམ་པའི་མཚན་ཉིད། ལམ་འཛིན་པ་ཆོས་ཀྱི་བདག་གི་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་བྱང་སེམས་འཕགས་པ་སྐྱེད་བྱེད་ཀྱི་མཁྱེན་པ། དབྱེ་ན། ལམ་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པ་དང་། མངོན་སུམ་རྟོགས་པའི་སྐྱེད་བྱེད་ཀྱི་ཡུམ་གཉིས། དང་པོ་ནི། ཐེག་ཆེན་གྱི་ཚོགས་སྦྱོར་ན་ཡོད། གཉིས་པ་ས་དང་པོ་ནས་རྒྱུན་མཐའི་སྔ་ལོགས་ཀྱི་བར་ན་ཡོད། ཉན་རང་ཐེག་ཆེན་ལམ་དུ་འཇུག་ཁ་མ་དང་། བྱང་སེམས་ཀྱི་རྒྱུན་མཐའི་གནས་སྐབས་སུ་དེ་དང་དེའི་སྐྱེད་བྱེད་ཀྱི་ཡུམ་མེད་དེ། དེའི་སྐད་ཅིག་ཕྱི་ལོགས་ནས་དེ་དང་དེའི་འཕགས་པ་མི་འགྱུར་བའི་ཕྱིར། བཞི་པའི་མཚན་ཉིད། རྣམ་པ་སྐྱེ་མེད་དུ་རྟོགས་པའི་སྒོ་ནས་རང་གིས་རྟོགས་པའི་རྒྱུན་ཕྱི་མ་ལ་གནས་པའི་སངས་རྒྱས་འཕགས་པ་སྐྱེད་བྱེད་ཀྱི་མཁྱེན་པ། དབྱེ་ན་རྣམ་པ་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པ་དང་། མངོན་སུམ་དུ་རྟོགས་པའི་སྐྱེད་བྱེད་ཀྱི་ཡུམ་གཉིས། སྔ་མ་ནི་ཐེག་ཆེན་གྱི་ཚོགས་སྦྱོར་ན་ཡོད། ཕྱི་མ་ནི་ས་དང་པོ་ནས་སངས་རྒྱས་ཀྱི་སའི་བར་ན་ཡོད་དོ། །དེས་ན་རྗེ་བཙུན་ཤེས་བྱ་ཀུན་རིག་གིས། ཚོགས་སྦྱོར་ན་ཡུམ་འཇོག་པ་ནི་ཁོ་བོས་ཀྱང་གསུང་རབ་མཐའ་དག་གི་གནད་དུ་མཐོང་ཞིང་། འོན་ཀྱང་ཡུམ་གྱི་སྒོ་ནས་སྲས་སུ་གཞག་པ་ནི་འཕགས་པ་ཁོ་ན་ལ་འཇོག་ལ། ཡབ་ཀྱི་སྒོ་ནས་སྲས་སུ་འཇོག་པ་ནི་ཐེག་ཆེན་གྱི་ཚོགས་སྦྱོར་ནའང་ཡོད་དོ། །གཉིས་པ་བཞེད་དོན་སྒྲུབ་བྱེད་ཀྱི་ཡུམ་གྱི་མཚན་ཉིད། བདག་མེད་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་འཕགས་པའི་བཞེད་དོན་གྱི་གཙོ་བོ་སྒྲུབ་པའི་རིགས་སུ་གནས་པའི་མཁྱེན་པ། དབྱེ་ན། མཆོད་བརྗོད་ཡུལ་དུ་གྱུར་པའི་ཡུམ་གཞི་ཤེས། ལམ་ཤེས། རྣམ་མཁྱེན་གསུམ། དང་པོའི་མཚན་ཉིད། གཞི་གང་ཟག་གི་བདག་གི་སྐྱེ་མེད་དང་། གཟུང་བ་ཆོས་ཀྱི་བདག་གི་སྐྱེ་མེད་གང་རུང་དུ་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་ཐེག་དམན་འཕགས་པ་ཉེར་ཞི་གཉིས་སུ་ཁྲིད་པར་བྱེད་པའི་རིགས་སུ་གནས་པའི་མཁྱེན་པ། ས་མཚམས་ཐེག་དམན་གྱི་མཐོང་ལམ་ནས་ཐེག་ཆེན་གྱི་ལམ་དུ་འཇུག་ཁ་མའི་བར་ན་ཡོད། གཉིས་པའི་མཚན་ཉིད། ལམ་སྐྱེ་མེད་དུ་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་བྱང་སེམས་འཕགས་པའི་འཇིག་རྟེན་གྱི་དོན་སྒྲུབ་པར་བྱེད་པའི་མཁྱེན་པ། ས་མཚམས་ས་དང་པོ་ནས་རྒྱུན་མཐའི་བར་ན་ཡོད། གསུམ་པའི་མཚན་ཉིད། རྣམ་པ་སྐྱེ་མེད་དུ་མངོན་སུམ་དུ་རྟོགས་པ་མཐར་ཐུག་པའི་སྒོ་ནས་རང་རྒྱུད་ལ་ལྡན་པའི་སངས་རྒྱས་འཕགས་པས་ཆོས་འཁོར་བསྐོར་བའི་བདག་རྐྱེན་དུ་གྱུར་པའི་མཁྱེན་པ། ས་མཚམས་སངས་རྒྱས་ཀྱི་ས་ཁོ་ནར་ཡོད་དོ། །དེས་ན་བསྟན་བཅོས་རྩ་བ་ལས་ཀུན་ཤེས་ཉིད། ཅེས་སོགས་ཐབས་སྟོན་པའི་གཞུང་གསུམ་གྱིས། སྐྱེད་བྱེད་དང་། བཞེད་དོན་སྒྲུབ་བྱེད་ཀྱི་ཡུམ་གཉིས་ཀ་བསྟན་ཞིང་། ཉེར་ཞི་ཁྲིད་མཛད་ཅེས་སོགས་འབྲས་བུ་སྟོན་པའི་གཞུང་གསུམ་གྱིས། བཞེད་དོན་སྒྲུབ་བྱེད་ཀྱི་ཡུམ་བསྟན་སྟེ། སློབ་དཔོན་གྱིས་དགོས་དོན་གྱི་སྐབས་སུ་སྐྱེད་བྱེད་ཀྱི་ཡུམ་དང་། བཞེད་དོན་སྒྲུབ་བྱེད་ཀྱི་ཡུམ་གཉིས་ཀ་བསྟན་ཅིང་ཚིག་དོན་གྱི་སྐབས་སུ་བཞེད་དོན་སྒྲུབ་བྱེད་ཀྱི་ཡུམ་གསུངས་པའི་ཕྱིར། གནད་འདི་དག་ནི་གཞན་གྱི་སྤྱོད་ཡུལ་དུ་མ་གྱུར་པར་སྣང་ངོ་། །བཞི་པ་གོ་རིམ་ལ་མཁས་པའི་ལུགས་དགོད། དེ་ལ་ལོག་རྟོག་དགག རང་ལུགས་གཞག་པ་དང་གསུམ། དང་པོ་ནི། ཨར་ན་རེ། མཆོད་བརྗོད་ཀྱི་སྐབས་སུ་གཞི་ཤེས་དང་། ལམ་ཤེས་དང་། རྣམ་མཁྱེན་གསུམ་གོ་རིམ་བཞིན་དུ་བསྟན་པ་ལ་རྒྱུ་མཚན་ཡོད་དེ། མཆོད་བརྗོད་གླེང་གཞིའི་འགྲེལ་པ་ཡིན་ཞིང་། གླེང་གཞི་ལས་གོ་རིམ་དེ་ལྟར་དུ་བཤད་པའི་ཕྱིར་ཏེ། དགེ་སློང་གི་དགེ་འདུན་སྟོང་ཉིས་བརྒྱ་ལྔ་བཅུ་ཞེས་སོགས་ཀྱིས་གཞི་ཤེས་ཀྱི་རྟེན་གྱི་གང་ཟག་དང་། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཞེས་སོགས་ཀྱིས་འབྲས་བུ་ཉེར་ཞི་དངོས་སུ་བསྟན་ཞིང་། དེ་ཉིད་བསྟན་བཅོས་ལས་ཉན་ཐོས་ཞེས་སོགས་དང་། ཉེར་ཞི་ཞེས་པས་བསྟན་པའི་ཕྱིར་དང་། དེའི་རྗེས་སུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་དུ་མ་དང་། ཞེས་སོགས་ཀྱིས་ལམ་ཤེས་ཀྱི་རྟེན་གྱི་གང་ཟག་དང་། ཐམས་ཅད་ཀྱང་གཟུངས་རབ་ཏུ་ཐོབ་པ་ཞེས་སོགས་ཀྱིས་འབྲས་བུས་འཇིག་རྟེན་གྱི་དོན་སྒྲུབ་པ་དངོས་སུ་བསྟན་ཞིང་། དེ་ཉིད་བསྟན་བཅོས་ལས། འགྲོ་ལ་ཕན་པར་བྱེད་རྣམས་ཞེས་དང་། འཇིག་རྟེན་དོན་སྒྲུབ་ཅེས་པས་བསྟན་པའི་ཕྱིར་དང་། དེའི་རྗེས་སུ་བཅོམ་ལྡན་འདས་ཉིད་ཀྱིས་གདན་སེང་གེའི་ཁྲི་བཤམས་ཞེས་སོགས་སྐུའི་སྣང་བ་བྱུང་བ་རྣམས་ཀྱིས་རྣམ་མཁྱེན་གྱི་རྟེན་གྱི་གང་ཟག་དང་། ཆོས་སྟོན་པའི་སྣང་བ་བྱུང་བ་རྣམས་ཀྱིས་འབྲས་བུ་ཆོས་འཁོར་བསྐོར་བ་དངོས་སུ་བསྟན་ཅིང་། དེ་ཉིད་བསྟན་བཅོས་ལས། ཐུབ་རྣམས་ཞེས་པ་དང་། སྣ་ཚོགས་འདི་གསུངས་པ་ཞེས་པས་བསྟན་པའི་ཕྱིར་དང་། གསུམ་ཀའི་ཐབས་མཁྱེན་པ་གསུམ་པོ་དེ་མདོའི་སྦས་དོན་དུ་ཡོད་པར་བསྟན་བཅོས་ལས། ཀུན་ཤེས་ཉིད་ཀྱིས་ཞེས་སོགས་གསུམ་གྱིས་བསྟན་པའི་ཕྱིན་ཞེས་བཞེད་དོ། །གཉིས་པ་ལ། ཁ་ཅིག མཆོད་བརྗོད་གླེང་གཞིའི་འགྲེལ་པ་མིན་པར་ཐལ། འཕགས་སེང་གཉིས་ཀྱིས་དེ་གཉིས་རྩ་འགྲེལ་དུ་མ་སྦྱར་ཞིང་། སློབ་དཔོན་གྱིས་གླེང་གཞིའི་བཤད་པ་གཞན་དུ་མཛད་པའི་ཕྱིར་ཞེ་ན། མཆོད་བརྗོད་ཤེར་ཕྱིན་གྱི་མདོའི་འགྲེལ་པ་མིན་པར་ཐལ། འཕགས་སེང་གཉིས་ཀྱིས་དེ་གཉིས་རྩ་འགྲེལ་དུ་མ་སྦྱར་ཞིང་། སློབ་དཔོན་གྱིས་མདོའི་བཤད་པ་གཞན་དུ་མཛད་པའི་ཕྱིར། རྟགས་ཁྱབ་ཁས། གཞན་ཡང་། ཡུལ་ནི་རྣམ་པ་གསུམ་པོ་རྒྱུ། །ཞེས་སོགས་ཀྱི་ཚིགས་བཅད་དེ་ཡང་ཤེར་ཕྱིན་གྱི་མདོའི་འགྲེལ་པ་མིན་པར་ཐལ་ལོ། །ཁ་ཅིག འོ་ན་མཆོད་བརྗོད་ཀྱི་ཚིགས་བཅད་གསུངས་པ་དེ། དེ་ལ་ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ་ཞེས་སོགས་ཀྱི་མདོ་ཚིག་གསུམ་པོ་དེའི་འགྲེལ་པ་ཡིན་པར་ཐལ། མདོ་ཚིག་གསུམ་པོ་དེས་ཐབས་མཁྱེན་པ་གསུམ་དང་རྟེན་གྱི་གང་ཟག་གསུམ་དངོས་སུ་བསྟན་ཞིང་། འབྲས་བུ་གསུམ་སྦས་དོན་དུ་ཡོད་པར་མཆོད་བརྗོད་ཀྱི་ངག་གིས་དངོས་བསྟན་ལ་སྦྱོར་དུ་རུང་བའི་ཕྱིར། རྟགས་ཁྱབ་ཁས། འདོད་ན། དེ་ལྟ་བུའི་མདོ་ཚིག་གསུམ་པོ་ཆོས་ཅན། མཆོད་བརྗོད་ཀྱི་ཚིགས་བཅད་དེ་ཁྱོད་ཀྱི་འགྲེལ་པ་མིན་པར་ཐལ། ཁྱོད་བདག་ཉིད་ཇི་བཞིན་ཀུན་མཁྱེན་ཉིད། །གསུམ་གྱི་སྒྲིབ་པ་རྣམ་གསུམ་དག །ཅེས་པའི་སྐབས་ཀྱི་མདོ་ཡིན་པའི་ཕྱིར། དེས་ན་རང་ལུགས་ནི། ཐེག་ཆེན་གྱི་རིགས་ཅན་དབང་པོ་རྣོན་པོས་རགས་པའི་གང་ཟག་གི་བདག་མེད་རྟོགས་པའི་ཤེས་རབ་དང་པོར་སྐྱེས་ནས་དེའི་རྗེས་སུ་ཆོས་ཀྱི་བདག་མེད་ཕྲ་མོ་བསྐྱེད་དེ་ལམ་ལ་འཇུག་པའི་རིམ་པ་གོ་བའི་ཕྱིར་དུ་དེ་ལྟར་སྟོན་པའི་ཕྱིར་ཞེས་སྨྲའོ། །འོ་ན་ཐེག་ཆེན་གྱི་རིགས་ཅན་དབང་པོ་རྣོན་པོས་དང་པོར་ཆོས་ཀྱི་བདག་མེད་རྟོགས་པའི་ཤེས་རབ་ཕྲ་མོ་སྐྱེད་ནས། དེའི་རྗེས་ལ་རགས་པའི་གང་ཟག་གི་བདག་མེད་རྟོགས་པའི་ཤེས་རབ་བསྐྱེད་དེ་ལམ་ལ་འཇུག་པའི་རིམ་པ་གོ་བའི་ཕྱིར་དུ་བསྟན་བཅོས་ལུས་ལས། དང་པོར་རྣམ་མཁྱེན་ལམ་ཤེས་གཞི་ཤེས་གསུམ་རིམ་པ་བཞིན་བསྟན་པར་ཐལ། རང་ལུགས་ཀྱི་རྟགས་དེའི་ཕྱིར། འདིའི་ཁྱབ་པ་བསྒྲིགས་མཚམས་སྔར་གྱི་རྟགས་དང་ཁྱད་པར་མེད་དེ། ནམ་མེད་དུ་མཚུངས་པའི་ཕྱིར། ཡང་དེ་ལ་ཐམས་ཅད་ཤེས་པ་ཞེས་སོགས་ཀྱི་མདོ་ཚིག་གསུམ་པ་ཆོས་ཅན། དེ་རབ་ཅེས་པའི་གཞུང་དེ་ཁྱོད་ཀྱི་འགྲེལ་པ་མིན་པར་ཐལ། ཁྱོད་བདག་ཉིད་ཇི་བཞིན་ཀུན་མཁྱེན་ཉིད། ཅེས་པའི་ཐད་ཀྱི་མདོ་ཡིན་པའི་ཕྱིར། ཁྱབ་པ་ཁས། གལ་ཏེ་མི་མཚུངས་ཏེ། དེ་རབ་ཅེས་པའི་གཞུང་དེ་རྩེ་སྦྱོར་གྱི་གཞུང་རྒྱས་པ་དེའི་དོན་བསྡུས་ཡིན་པའི་ཕྱིར་ཞེས་ཟེར་ན། འོ་ན་སྔོན་མ་ལ་མ་ཁྱབ་པར་ཐལ། མཆོད་བརྗོད་ཀྱི་ཚིག་བཅད་དེ་བསྟན་བཅོས་ལུས་ཀྱི་མདོར་བསྟན་ཡིན་པའི་ཕྱིར། རེད་མདའ་བ་ན་རེ། གདུལ་བྱ་ཐེག་པ་གསུམ་ལ་རིམ་གྱིས་འཇུག་པའི་དབང་དུ་བྱས་ནས་གོ་རིམ་དེ་ལྟར་དུ་བསྟན་ཞེས་ཟེར་བ་ལ། ཁ་ཅིག་མི་འཐད་དེ། མཆོད་བརྗོད་ངག་གི་གདུལ་བྱའི་གཙོ་བོ་དེ་ཐེག་ཆེན་གྱི་རིགས་ཅན་ཡིན་པའི་ཕྱིར་ཞེ་ན། འོ་ན་རྒྱན་ལ་དགོས་སོགས་ཆོས་བཞི་མེད་དམ་སྙམ་པའི་དོན་མི་འགྱུར་གྱི་ཐེ་ཚོམ་བསལ་ནས་ཡོད་དམ་སྙམ་པའི་དོན་འགྱུར་གྱི་ཐེ་ཚོམ་བསྐྱེད་པའི་ཕྱིར་དུ་དགོས་འབྲེལ་གྱི་ངག་གསུངས་པ་མིན་པར་ཐལ། དགོས་འབྲེལ་ངག་གི་གདུལ་བྱའི་གཙོ་བོ་དེ་ཐེག་ཆེན་གྱི་རིགས་ཅན་ཡིན་པའི་ཕྱིར། རྟགས་ཁྱབ་ཁས་བླངས། གསུམ་པ་ནི། སྤྱིར་མཆོད་བརྗོད་གླེང་གཞིའི་འགྲེལ་པ་ཡིན་པ་འཐད་དེ། རྒྱུད་བླ་མདོ་སྡེ་དུ་མའི་དགོངས་འགྲེལ་དུ་བརྩམས་པའི་ཚེ་ན་ཡང་རྡོ་རྗེའི་གནས་དང་པོ་གསུམ་གཟུངས་ཀྱི་དབང་ཕྱུག་རྒྱལ་པོའི་མདོའི་གླེང་གཞི་དང་སྦྱར་ན་འདི་མདོ་སྡེ་གཅིག་གི་དགོངས་འགྲེལ་དུ་བརྩམས་པའི་ཚེ་ཤིན་ཏུ་ཡང་འཐད་པའི་ཕྱིར། འོན་ཀྱང་གོ་རིམ་ནི་མདོའི་དངོས་བསྟན་ལ་མཁྱེན་གསུམ་སྨོས་པ་ཐམས་ཅད་ལ་གོ་རིམ་དེ་ལྟར་འབྱུང་བས་དེའི་དབང་དུ་བྱས་པ་ཡིན་ལ། དེ་ཡང་ཐེག་པ་གསུམ་དང་ཕར་ཕྱིན་དྲུག་གི་གོ་རིམ་ལྟར་དམན་མཆོག་གི་གོ་རིམ་མོ། །འོ་ན་བསྟན་བཅོས་ལུས་ལས་དང་པོར་རྣམ་མཁྱེན་སྟོན་པའི་རྒྱུ་མཚན་ཅི་ཡིན་ཞེས་དོགས་པ་གསར་དུ་སྐྱེ་རིགས་པ་ལས། དེའི་རྒྱུ་མཚན་སློབ་དཔོན་གྱི་འགྲེལ་པའི་མཚམས་སྦྱར་དུ་བཀོད་དོ། །གཞན་དུ་ན་རྣམ་པ་དང་ལམ་ཤེས་སྟོན་པའི་སྐབས་ལ་སོགས་པ་ཐམས་ཅད་དུ་གོ་རིམ་འདི་ལྟར་བསྟན་པ་ལ་དོགས་པ་མི་གཅོད་པར་འདི་ཁོ་ན་ལ་གཅོད་དགོས་པའི་རྒྱུ་མཚན་གང་ཡང་མེད་དོ། །འདི་ཡང་གཞན་གྱིས་མ་རྟོགས་པར་སྣང་ངོ་། །དེ་ལ་ཐམས་ཅད་མཁྱེན་པ་ཉིད་གསུམ་གྱིས་དོན་བརྒྱད་བསྡུས་ལ་ཞེས་པའི་སྐབས་སུ། དགག་གཞག་གཉིས་ལས། དང་པོ་ལ་གསུམ་གྱིས་ལྔ་བསྡུས་པ་དགག གཅིག་གིས་བརྒྱད་བསྡུས་པ་དགག གསུམ་གྱིས་བརྒྱད་བསྡུས་ཚུལ་གཞན་དགག་པའོ། །དང་པོ་ལ། ལོ་ཙཱ་བ་ན་རེ། མཁྱེན་གསུམ་རྒྱ་ཆེ་བ་དང་། སྦྱོར་བཞི་དང་ཆོས་སྐུ་རྒྱ་ཆུང་བས་རྒྱ་ཆེ་བས་རྒྱ་ཆུང་བ་བསྡུས་པའི་ཚུལ་ཡིན་ཞེས་གསུངས་པ་ལ། འབྲེ་ན་རེ། མཁྱེན་གསུམ་དང་སྦྱོར་བཞི་ལ་རྒྱ་ཆེ་ཆུང་གི་ཁྱད་པར་མི་འཐད་པར་ཐལ། མཁྱེན་གསུམ་དུས་གསུམ་ཆར་དང་གང་ཟག་རང་གཞན་གཉིས་ཀས་བསྡུས་པ་ལ་འཇོག་ན། སྦྱོར་བཞི་ཡང་དེ་ལྟར་འཇོག་དགོས་པར་མཚུངས། སྦྱོར་བཞི་དུས་ད་ལྟར་བ་དང་གང་ཟག་རང་རྒྱུད་ཁོ་ནས་བསྡུས་པ་ལ་འཇོག་ན། མཁྱེན་གསུམ་ཡང་དེ་ལྟར་འཇོག་དགོས་པའི་ཕྱིར་ཞེས་བགག་ནས། འབྲེ་རང་ལུགས་ལ། མཁྱེན་གསུམ་རང་བཞིན་དང་སྦྱོར་བཞི་དང་ཆོས་སྐུ་གནས་སྐབས་ཡིན་པས། རང་བཞིན་གྱིས་གནས་སྐབས་བསྡུས་པའི་ཚུལ་གྱིས་བསྡུས་ཟེར། དེ་ལ་ཁ་ཅིག སྔར་གྱི་སྐྱོན་དེ་ལོ་ཙཱ་བ་ལ་མི་འཇུག་སྟེ། ལོ་ཙཱ་བས་མཁྱེན་གསུམ་དང་སྦྱོར་བཞི་ལ་རྒྱ་ཆེ་ཆུང་ཁས་མ་བླངས་པའི་ཕྱིར། དེས་ན་ལོ་ཆེན་གྱི་དགོངས་པ་ནི། མངོན་པར་རྟོགས་པ་བརྒྱད་གང་ཟག་གཅིག་སངས་རྒྱ་བའི་ཆ་རྐྱེན་དུ་བཞག་པའི་ཚེ། ཤེས་བྱའི་མཁྱེན་པ་གསུམ་ནི་ཤེས་བྱ་ལ་སྲིད་ཚད་ཀྱི་མཁྱེན་གསུམ་དང་། ཉམས་ལེན་གྱི་སྦྱོར་བ་ནི། གང་ཟག་རང་རྒྱུད་ཀྱིས་སྦྱོར་བ་དང་། ཆོས་སྐུ་ནི་རང་རྒྱུད་ལ་འབྱུང་རུང་གི་ཆོས་སྐུ་ལ་འཇོག་པ་ཡིན་ཏེ། ཊཱིཀ་ཆུང་ལས། ཇི་ལྟར་གསུམ་དུ་བརྒྱད་འདུ་ཞེ་ན་སོ་སོར་ངེས་པའི་གང་ཟག་གཅིག་ལ་ལྟོས་ཏེ། ཤེས་པར་བྱ་བའི་རང་བཞིན་ཀུན་མཁྱེན་གསུམ་ཡིན་ལ། སྦྱོར་བ་བཞི་དང་ཆོས་སྐུ་ནི་རང་རྒྱུད་ལ། སྐྱེད་པར་ཡིན་པས་སྤྱི་དང་ཁྱད་པར་རམ། ཐུན་མོང་དང་ཐུན་མོང་མིན་པའི་ཁྱད་པར་ཡོད་ཀྱང་། སྤྱིར་བྱེ་བྲག་འདུས་པ་འཐད་པས་དེ་སྐད་བརྗོད་དོ་ཞེས་གསུངས་པའི་ཕྱིར་ཞེ་ན། དེ་ཡང་མི་འཐད་དེ། མངོན་པར་རྟོགས་པ་བརྒྱད་བྱང་སེམས་ཚོགས་ལམ་པ་སངས་རྒྱ་བའི་ཆ་རྐྱེན་དུ་བཞག་པའི་ཚེ་ཤེས་བྱའི་མཁྱེན་གསུམ་དང་ཉམས་ལེན་གྱི་སྦྱོར་བ་ལ་ཐུན་མོང་དང་ཐུན་མོང་མིན་པའི་ཁྱད་པར་མི་འཐད་པར་ཐལ། དེའི་ཚེ་ཤེས་བྱའི་མཁྱེན་གསུམ་དེ་གང་ཟག་གཞན་རྒྱུད་ཀྱིས་བསྡུས་པ་ཁོ་ན་ཡིན་པའི་ཕྱིར། ཡང་དེ་གཉིས་ལ་སྤྱི་དང་བྱེ་བྲག་གི་ཁྱད་པར་མི་འཐད་པར་ཐལ། དེའི་ཚེ་སྦྱོར་བ་བཞི་པོ་མཁྱེན་གསུམ་གང་རུང་གི་བྱེ་བྲག་མིན་པའི་ཕྱིར། ཡང་དེའི་ཚེ་འབྱུང་རུང་གི་སྐད་ཅིག་མའི་སྦྱོར་བ་དེ་ལམ་ཤེས་ཡིན་ན་ཐུན་མོང་བར་འགྱུར་ཞིང་། མིན་ན་འབྱུང་རུང་གི་ཆོས་སྐུ་དེ་ཡང་ཆོས་སྐུ་མིན་པར་འགྱུར་རོ། །འབྲེའི་བཞེད་པ་ལ་ཨར་གྱིས། ཐེག་ཆེན་སྦྱོར་ལམ་པའི་རྒྱུད་ལ་རང་བཞིན་མཁྱེན་གསུམ་ཡོད་པར་ཐལ། དེའི་རྒྱུད་ལ་གནས་སྐབས་ཀྱི་སྦྱོར་བ་དང་པོ་གསུམ་ཡོད་པའི་ཕྱིར་ཞེས་བཀག་ནས། རང་ལུགས་ལ་སྡུད་བྱེད་མཁྱེན་པ་གསུམ་ནི་སེམས་སྐྱེད་ལ་སོགས་པའི་མཁྱེན་གསུམ་མཚོན་བྱེད་ཀྱི་ཆོས་སུམ་ཅུ་ཡིན་ལ། དེས་སྦྱོར་བཞི་དང་འབྲས་བུ་ཆོས་སྐུ་བསྡུ་ཞེས་ཟེར། འོ་ན་རྣམ་མཁྱེན་མཚོན་བྱེད་ཀྱི་ཆོས་བཅུ་པོ་ཆོས་ཅན། བྱམས་པའི་བསྟོད་ཕྱག་གི་ཡུལ་དུ་ཐལ་བ་དང་། མཆོད་ཡུམ་ཡིན་པར་ཐལ། འདིར་བསྟན་སྡུད་བྱེད་ཀྱི་རྣམ་མཁྱེན་ཡིན་པའི་ཕྱིར། འདོད་མི་ནུས་ཏེ། གཞི་གྲུབ་ན་ཁྱོད་ཀྱི་ནང་ཚན་ཡིན་དགོས་པའི་ཕྱིར། གསུམ་ཆར་ལ་ཐུན་མོང་དུ་དེ་ལ་ཐམས་ཅད་མཁྱེན་པ་ཉིད་གསུམ་གྱིས་དོན་བརྒྱད་བསྡུས་ལ། ཞེས་སོགས་ཀྱི་གཞུང་དེ་ཆོས་ཅན། གསུམ་གྱིས་བརྒྱད་བསྡུས་པའི་ཚུལ་མ་བསྟན་པར་ཐལ། གསུམ་གྱིས་ལྔ་བསྡུས་པའི་ཚུལ་ཁོ་ན་བསྟན་པའི་ཕྱིར། རྟགས་ཁས། གཉིས་པ་ནི། རེ་མདའ་བ་ན་རེ། ངོ་བོ་སངས་རྒྱས་སའི་ཤེར་ཕྱིན་ལ་གནས་སྐབས་མཁྱེན་པ་གསུམ་དུ་ཕྱེ་བའི་མཁྱེན་གསུམ་དེས་དོན་བརྒྱད་བསྡུས་པ་ཡིན་ཞེས་སྨྲའོ། །འོ་ན་མཆོད་བརྗོད་ངག་གི་དངོས་བསྟན་དུ་གྱུར་པའི་མཁྱེན་པ་གསུམ་པོ་དེ་ཆོས་ཅན། སངས་རྒྱས་ཀྱི་ཡེ་ཤེས་སུ་ཐལ། འདིར་བསྟན་སྡུད་བྱེད་མཁྱེན་གསུམ་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྐབས་དོན་ལས་ཉམས་སོ། །འདོད་ན། མཆོད་ཡུམ་འབྲས་ཡུམ་ཡིན་པ་འགོག་པའི་རིགས་པ་རྣམས་སྦྱར་རོ། །གསུམ་པ་ནི་ཁ་ཅིག ཐེག་པ་གསུམ་གང་རུང་གི་མངོན་རྟོགས་ཡིན་ན། མཁྱེན་གསུམ་གང་རུང་ཡིན་པས་ཁྱབ་པ་ལ་དགོངས་ནས་མཁྱེན་གསུམ་གྱིས་དངོས་བརྒྱད་བསྡུས་པར་གསུངས་པ་ཡིན་ལ། དེའི་ཕྱིར་ཚོགས་སྦྱོར་ན་གཞི་ཤེས་དང་ལམ་ཤེས་ཀྱང་ཡོད་པ་ཡིན་ནོ་ཞེས་ཟེར། འོ་ན། ང་རྒྱལ་མངོན་གྱུར་བ་དང་ལྡན་པའི་གང་ཟག་གི་རྒྱུད་ལ་ལམ་ཤེས་ཡོད་པར་ཐལ་ལོ། །འདོད་ན། ལམ་ཤེས་དངོས་སུ་བསྐྱེད་པའི་རྟེན་གྱི་གང་ཟག་ལ། གེགས་ང་རྒྱལ་མངོན་གྱུར་བ་དང་བྲལ་བ་གཅིག་མི་དགོས་པར་ཐལ་ལོ། །ཡང་ལམ་གསུམ་རང་བཞིན་མེད་པར་དོན་སྤྱིའི་ཚུལ་གྱིས་རྟོགས་པའི་མཁྱེན་པ་དེ་ལམ་ཤེས་ཡིན་པར་ཐལ། བྱང་སེམས་ཚོགས་ལམ་པའི་རྒྱུད་ལ་ལམ་ཤེས་ཡོད་པའི་ཕྱིར། འདོད་ན། མདོར། ཐམས་ཅད་ཤེས་པ་ཉིད་ལ་ཤེས་པ་དང་མཐོང་བས་བལྟས་ནས་འདའ་ཞེས་པའི་འགྲེལ་པར། ཉིར་སྣང་ལས། རྗེས་སུ་དཔག་པའི་ཤེས་པ་བསལ་བའི་ཕྱིར་དུ་མཐོང་བ་སྨོས་ལ། འཁྲུལ་པའི་མཐོང་བ་བསལ་བའི་ཕྱིར་དུ་ཤེས་པ་སྨོས་པའི་ཕྱིར་ཞེས་པ་དང་འགལ་ལོ། །ཁ་ཅིག མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པ་ཡིན་ཏེ། མཁྱེན་གསུམ་རྫོགས་པར་ཉམས་སུ་བླངས་པས་མངོན་རྟོགས་བརྒྱད་རྫོགས་པར་ཉམས་སུ་བླངས་པར་འགྱུར་བའི་ཕྱིར་དང་། མཁྱེན་གསུམ་ལ་བསྟོད་པར་བཞེད་ནས་མངོན་པར་རྟོགས་པ་བརྒྱད་ལ་བསྟོད་པར་མི་བཞེད་པའི་མཁས་པ་མེད་པའི་ཕྱིར་དང་། མཁྱེན་གསུམ་བསྟོད་བྱའི་ཡོན་ཏན་ཅན་དུ་མཐོང་ནས་མངོན་པར་རྟོགས་པ་བརྒྱད་དེར་མ་མཐོང་བས་གང་ཟག་མི་སྲིད་པའི་ཕྱིར་ཞེས་སྨྲའོ། །འོ་ན་ཐེག་ཆེན་གྱི་སྒོམ་ལམ་གཅིག་པུས་མངོན་པར་རྟོགས་པ་བརྒྱད་ཀ་བསྡུས་པར་ཐལ། ཐེག་ཆེན་གྱི་སྒོམ་ལམ་རྫོགས་པར་ཉམས་སུ་བླངས་ན་སོགས་རྟགས་རིགས་འགྲེའོ། །ཁ་ཅིག སྡུད་བྱེད་མཁྱེན་གསུམ་ནི། ཐེག་དམན་བྱང་སེམས་སངས་རྒྱས་ཀྱི་མཁྱེན་པ་ཙམ་ཡིན་ལ། བསྡུ་བྱ་བརྒྱད་ནི་མངོན་པར་རྟོགས་པ་བརྒྱད་མཚན་ཉིད་པའོ་ཞེས་ཟེར་རོ། །འོ་ན་སྡུད་བྱེད་རྣམ་མཁྱེན་དེ་ཚོགས་ལམ་ནས་སངས་རྒྱས་སའི་བར་ན་ཡོད་པར་ཐལ། སྡུད་བྱེད་གཞི་ཤེས་དང་ལམ་ཤེས་གཉིས་པོ་ཚོགས་ལམ་ནས་སངས་རྒྱས་སའི་བར་ན་ཡོད་པའི་ཕྱིར། རྟགས་ཁས། འདོད་ན། དེ་སངས་རྒྱས་ཀྱི་མཁྱེན་པ་ཙམ་ལ་འཇོག་པ་དང་འགལ་ལོ། །ཊཱི་ཀ་ལས། འཕགས་བཞིའི་མངོན་རྟོགས་ལ་མཁྱེན་གསུམ་དུ་བཞག་པ་ནི་མཁྱེན་གསུམ་སྤྱིས་བསྡུས། སྦྱོར་བཞི་ལམ་ཤེས་ཀྱིས་བསྡུས། ཆོས་སྐུ་རྣམ་མཁྱེན་གྱིས་བསྡུས་ཞེས་པའི་དགོངས་པ་ལ། ཁ་ཅིག་སྦྱོར་བཞི་ལམ་ཤེས་ཀྱིས་བསྡུས་ཚུལ་ནི། བྱང་སེམས་སོ་སྐྱེའི་སྦྱོར་བ་རྣམས་རྒྱུ་ཡིན་པའི་ཚུལ་གྱིས་བསྡུས། བྱང་སེམས་འཕགས་པའི་སྦྱོར་བ་རྣམས་ངོ་བོ་ཡིན་པའི་ཚུལ་གྱིས་བསྡུས། ཆོས་སྐུ་རྣམ་མཁྱེན་གྱིས་བསྡུས་པའི་ཚུལ་ནི། རྟོགས་པ་ཡེ་ཤེས་ཆོས་སྐུ་ངོ་བོ་ཡིན་པའི་ཚུལ་གྱིས་བསྡུས། ངོ་བོ་ཉིད་སྐུ་དེ་ཆོས་ཅན་གྱིས་ཆོས་ཉིད་བསྡུས་པའི་ཚུལ་གྱིས་བསྡུས། གཟུགས་སྐུ་གཉིས་རྟེན་གྱིས་བརྟེན་པ་བསྡུས་པའི་ཚུལ་གྱིས་བསྡུས་ཞེས་ཟེར་བ་ལ་ཡང་། ཐེག་ཆེན་གྱི་མཐོང་ལམ་གཅིག་པུས་མངོན་པར་རྟོགས་པ་བརྒྱད་ཀ་བསྡུས་པའི་སྐྱོན་ཡོད་དོ། །གཉིས་པ་རང་ལུགས་ལ། ཊཱི་ཀའི་དགོངས་པ་ནི། འདིར་བསྟན་སྡུད་བྱེད་མཁྱེན་པ་གསུམ་ནི། གཞི་གང་ཟག་བདག་གི་སྐྱེ་མེད་དུ་རྟོགས་པའི་མཁྱེན་པ་དང་། ལམ་སྐྱེ་མེད་དུ་རྟོགས་པའི་མཁྱེན་པ་དང་། རྣམ་པ་སྐྱེ་མེད་དུ་རྟོགས་པའི་མཁྱེན་པ་གསུམ་ལ་བྱེད་དེ། སྡུད་བྱེད་ཀྱི་མཁྱེན་གསུམ་ནི་མཆོད་བརྗོད་ཀྱི་དངོས་བསྟན་གྱི་མཁྱེན་གསུམ་ལ་འཇོག་པ་སྐབས་ཀྱི་དོན་ཡིན་ལ། དེའི་མ་མཐའི་ས་མཚམས་སློབ་དཔོན་གྱིས་གཅིག་དུ་བྲལ་གྱི་རྟགས་ལས་གཞི་ལམ་རྣམ་གསུམ་སྐྱེ་མེད་དུ་རྟོགས་པའི་མཁྱེན་པ་ལ་བཞག་ཅིང་། དེ་ཉིད་རྒྱུ་མཚན་དུ་བྱས་ནས་ཊཱི་ཀ་ལས་ཚོགས་སྦྱོར་ན་ཡུམ་ཡོད་པར་གསུངས་པའི་ཕྱིར། བསྡུ་བྱའི་མཁྱེན་གསུམ་ནི་འཕགས་རྒྱུད་ཀྱི་མཁྱེན་གསུམ་སོ་སོ་དང་། བསྡུ་བྱའི་ཆོས་སྐུ་ནི་ཡེ་ཤེས་ཆོས་སྐུ་ལ་འཇོག་པས། སྤྱི་དང་བྱེ་བྲག་གི་ཚུལ་གྱིས་བསྡུས་པ་ཡིན་གྱི། གཞན་དུ་ན་བསྡུ་བྱའི་རྣམ་མཁྱེན་དང་། སྡུད་བྱེད་ཀྱི་རྣམ་མཁྱེན་ལ་ཁྱད་པར་མེད་པའི་སྐྱོན་གནས་སོ། །དཀའ་འགྲེལ་དུ་གསུངས་པ་ནི་འདི་དང་མི་གཅིག་སྟེ། དེར་བསྡུ་བྱའི་མཁྱེན་གསུམ་ནི་སྐྱེ་འཕགས་གཉིས་ཀ་ལ་བཞག་པའི་ཕྱིར་རོ། །ཉན་ཐོས་དང་དེའི་ཕྱོགས་སུ་བསླན་པ། ཞེས་པའི་སྐབས་སུ། མྱང་འདས་ཀྱི་མཚན་ཉིད་ལ་དཔྱད། ཐེག་དམན་ལ་མྱང་འདས་མཚན་ཉིད་པ་ཡོད་མེད་ལ་དཔྱད་པ་གཉིས། དང་པོ་ལ། དགག་གཞག་གཉིས་ལས་དང་པོ་ནི། དམན་པའི་ལྷག་བཅས་མྱང་འདས་དང་ལྷག་མེད་མྱང་འདས་ཀྱི་མཚན་ཉིད་ལ་ཁ་ཅིག ཀུན་འབྱུང་ཟད་པར་སྤངས་ཤིང་སྡུག་བསྔལ་གྱི་ཕུང་པོ་ལྷག་མ་དང་བཅས་པའི་དམན་པའི་སོ་སོར་བརྟགས་འགོག་དང་། སྡུག་ཀུན་གཉིས་ཀ་ཟད་པར་སྤངས་པའི་དམན་པའི་སོ་སོར་བརྟགས་འགོག་ཅེས་ཟེར། འོ་ན་ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྒྱུད་ཀྱི་སོ་སོར་བརྟགས་འགོག་ཆོས་ཅན། ཀུན་འབྱུང་ཟད་པར་སྤངས་པར་ཐལ། ལྷག་བཅས་མྱང་འདས་ཡིན་པའི་ཕྱིར། འདོད་ན་མིན་པར་ཐལ། ལས་ཀྱི་ཀུན་འབྱུང་ཟད་པར་མ་སྤངས་པའི་ཕྱིར། མ་གྲུབ་ན། དེར་ཐལ། རྣམ་འགྲེལ་ལས། འདོད་ཆགས་བྲལ་བའི་གནས་པ་ནི། །བརྩེ་བའམ་ཡང་ན་ལས་ཀྱིས་ཡིན། །ཞེས་དང་། སྤྱོད་འཇུག་ལས། ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །ཞེས་གསུངས་པའི་ཕྱིར། མཚན་ཉིད་ཕྱི་མ་ལ་ཁ་ཅིག དམན་པའི་ལྷག་བཅས་མྱང་འདས་ཆོས་ཅན། དེར་ཐལ། མཚན་ཉིད་དེའི་ཕྱིར་ཏེ། འཁོར་བ་ཟད་པར་སྤངས་པའི་དམན་པའི་སོ་སོར་བརྟགས་འགོག་ཡིན་པའི་ཕྱིར་ཏེ། ཐེག་དམན་དགྲ་བཅོམ་པའི་རྒྱུད་ཀྱི་སོ་སོར་བརྟགས་འགོག་ཡིན་པའི་ཕྱིར་རོ་ཞེ་ན། འདོད་པའི་རྟེན་གྱི་ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པ་ཆོས་ཅན། འདོད་ཁམས་ཟད་པར་སྤངས་པར་ཐལ། འཁོར་བ་ཟད་པར་སྤངས་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། འདོད་པ་ཁམས་སུ་ལས་ཉོན་གྱིས་སྐྱེ་བ་བླངས་ནས་ཤི་མ་འཕོས་པའི་གང་ཟག་ཡིན་པའི་ཕྱིར། ཡང་ཁ་ཅིག ལས་ཀྱི་ཀུན་འབྱུང་ཟད་པར་སྤངས་ཤིང་ལས་ཉོན་གྱི་འབྲས་བུར་གྱུར་པའི་སྡུག་བསྔལ་གྱི་ཕུང་པོ་ལྷག་མ་དང་བཅས་པའི་དམན་པའི་སོ་སོར་བརྟག་འགོག་དེ་དང་པོའི་མཚན་ཉིད་ཡིན་ཟེར། ཁ་ཅིག འདུས་བྱས་ཀྱི་འཇུག་པ་རྒྱུན་ཆད་པའི་དམན་པའི་སོ་སོར་བརྟག་འགོག་དེ་ཕྱི་མའི་མཚན་ཉིད་ཡིན་ཟེར་ན། དང་པོ་ལ་ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པ་དེས་ལས་ཀྱི་ཀུན་འབྱུང་ཟད་པར་སྤངས་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་མི་ནུས་ཏེ། དེས་ཟག་བཅས་ཀྱི་ལས་ཀྱི་ནུས་པ་མ་སྤངས་པའི་ཕྱིར་ཏེ། རྟགས་སྔར་གྱི་སྤྱོད་འཇུག་གི་ལུང་གིས་གྲུབ་བོ། །ཕྱི་མ་ལ། དམན་པའི་ལྷག་མེད་མྱང་འདས་ལ་གནས་པའི་ཉན་ཐོས་དགྲ་བཅོམ་པ་དེ་ཐེག་ཆེན་ལམ་དུ་འཇུག་པ་མི་སྲིད་པར་ཐལ། དེའི་སྐབས་སུ་འདུས་བྱས་ཀྱི་འཇུག་པ་རྒྱུན་ཆད་པའི་ཕྱིར། རྟགས་ཁས། འདོད་ན། མཐར་ཐུག་ཐེག་པ་གསུམ་གྲུབ་པར་ཐལ་ལོ། །ཡང་གང་ཟག་དེ་དག་པའི་ཞིང་དུ་ཡིད་ཀྱི་རང་བཞིན་གྱི་ལུས་བླངས་ནས། ཕྱིས་དེ་པའི་གསུང་གི་འོད་ཟེར་གྱིས་སད་པར་བྱེད་པ་མི་སྲིད་པར་ཐལ། དེའི་སྐབས་སུ་འདུས་བྱས་ཀྱི་འཇུག་པ་རྒྱུན་ཆད་པའི་ཕྱིར། འདོད་མི་ནུས་ཏེ། དམ་ཆོས་པད་དཀར་ལས། ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །དཔེར་ན་སྐྱེས་བུ་མྱོས་པ་ནི། །མྱོས་འགྱུར་མེད་ན་སངས་པ་ལྟར། །དེ་བཞིན་དེ་དག་ང་ཡི་སྐུ། །སངས་རྒྱས་ཆོས་ཤེས་བྱ་བ་ཐོབ། །ཅེས་གསུངས་པས་སོ། །ཡང་ཁ་ཅིག ཉོན་མོངས་པའི་ཀུན་འབྱུང་མ་ལུས་པར་སྤངས་ཤིང་སྔ་མའི་ལས་ཉོན་གྱིས་འཕངས་པའི་གཟུགས་ཕུང་རགས་པ་དང་བཅས་པའི་ཐེག་དམན་དགྲ་བཅོམ་སྐུ་ཚེའི་འདུ་བྱེད་མ་བཏང་བའི་སོ་སོར་བརྟགས་འགོག་དང་། སྔ་མའི་ལས་ཉོན་གྱི་འབྲས་བུ་གཟུགས་ཕུང་རགས་པ་དང་བྲལ་བའི་ཐེག་དམན་དགྲ་བཅོམ་སྐུ་ཚེའི་འདུ་བྱེད་བཏང་བའི་རྒྱུད་ཀྱི་སོ་སོར་བརྟགས་འགོག་དེ་གཉིས་ཀྱི་མཚན་ཉིད་རིམ་བཞིན་ཡིན་ཟེར་ན། བར་སྲིད་ཀྱི་རྟེན་ཅན་གྱི་ཉན་ཐོས་དགྲ་བཅོམ་པའི་རྒྱུད་ཀྱི་སོ་སོར་བརྟགས་འགོག་ཆོས་ཅན། དེར་ཐལ། ལྷག་བཅས་མྱང་འདས་ཡིན་པའི་ཕྱིར་ཏེ། སྐུ་ཚེའི་འདུ་བྱེད་མ་བཏང་བའི་ཉན་ཐོས་དགྲ་བཅོམ་པའི་རྒྱུད་ཀྱི་སོ་སོར་བརྟགས་འགོག་ཡིན་པའི་ཕྱིར། རྩ་བར་འདོད་ན། བར་སྲིད་ཀྱི་རྟེན་ཅན་གྱི་ཉན་ཐོས་དགྲ་བཅོམ་པ་དེ་ལ་གཟུགས་ཕུང་རགས་པ་ཡོད་པར་ཐལ། འདོད་པ་དེའི་ཕྱིར། འདོད་ན། དེ་མེད་པར་ཐལ། བར་སྲིད་ཀྱི་གཟུགས་ཕུང་དེ་གཟུགས་ཕུང་ཕྲ་བ་ཡིན་པའི་ཕྱིར་ཏེ། རྣམ་འགྲེལ་ལས། ལུས་ཅན་ཡིན་ཡང་ཕྲ་བའི་ཕྱིར། །འགའ་ཞིག་ལ་ལར་ཐོགས་མེད་དེ། །ཅེས་གསུངས་པའི་ཕྱིར། མཚན་ཉིད་ཕྱི་མ་ལ། གཟུགས་མེད་ཀྱི་རྟེན་གྱི་ཉན་ཐོས་དགྲ་བཅོམ་པ་ཡིན་ན། ལྷག་མེད་མྱང་འདས་ལ་གནས་པའི་ཉན་ཐོས་དགྲ་བཅོམ་པ་ཡིན་དགོས་པར་ཐལ། དེ་ཡིན་ན་གཟུགས་ཕུང་རགས་པ་དང་བྲལ་བས་ཁྱབ་པའི་ཕྱིར། ཁྱབ་པ་ཁས། གཉིས་པ་རང་ལུགས་ནི། ཉོན་མོངས་པའི་ཀུན་འབྱུང་སྤངས་ཤིང་དགྲ་བཅོམ་དང་པོར་ཐོབ་པའི་ལུས་རྟེན་དང་བཅས་པ་དང་། དེ་དང་བྲལ་བའི་དམན་པའི་སོ་སོར་བརྟགས་འགོག་དེ་དེ་གཉིས་ཀྱི་མཚན་ཉིད་ཡིན་ནོ། །གཉིས་པ་ལ་དགག་གཞག་གཉིས། དང་པོ་ལ་ཁ་ཅིག ཐེག་དམན་ལ་མྱང་འདས་མཚན་ཉིད་པ་མེད་དེ། ཐེག་དམན་ལ་སྤངས་པ་མཐར་ཐུག་མེད་པ་གང་ཞིག འཁོར་བའི་སྡུག་བསྔལ་སྤངས་པ་ཙམ་གྱིས་མྱང་འདས་ཀྱི་གོ་མི་ཆོད་པའི་ཕྱིར་ཏེ། དམ་ཆོས་པད་དཀར་ལས། འཁོར་བའི་སྡུག་བསྔལ་དག་ལས་ཁྱོད་ཐར་ཡང་། །ཁྱོད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་འདི་དག་བཙལ་བར་བྱ། །ཞེས་གསུངས་པའི་ཕྱིར། ཡང་ཉན་ཐོས་དགྲ་བཅོམ་པ་ཆོས་ཅན། ཁྱོད་ཀྱིས་མྱང་འདས་མ་ཐོབ་པར་ཐལ། ཁྱོད་ཀྱིས་སངས་རྒྱས་མ་ཐོབ་པའི་ཕྱིར། ཁྱབ་སྟེ། རྒྱུད་བླར། དེས་ན་སངས་རྒྱས་མ་ཐོབ་བར། །མྱ་ངན་འདས་པ་མི་ཐོབ་སྟེ། །ཞེས་གསུངས་པའི་ཕྱིར་ཞེ་ན། མཆོད་བརྗོད་ཀྱི་ཚིག་བཅད་དེས་ཡུམ་གྱི་ཡོན་ཏན་ཇི་ལྟར་ཡོད་པ་བཞིན་མ་བརྗོད་པར་ཐལ། དེས་གཞི་ཤེས་ཀྱི་ཉན་རང་གི་རིགས་ཅན་མྱང་འདས་སུ་ཁྲིད་པའི་ཡོན་ཏན་བརྗོད་པ་གང་ཞིག གཞི་ཤེས་ལ་ཉན་རང་གི་རིགས་ཅན་མྱང་འདས་སུ་ཁྲིད་པའི་ཡོན་ཏན་མེད་པའི་ཕྱིར། རྟགས་ཕྱི་མ་ཁས། འདོད་ན། དེ་དག་གིས་དང་པོར་ཡུམ་ལ་ཡོན་ཏན་ཇི་ལྟ་བ་བཞིན་དུ་བརྗོད་པ་ཞེས་པ་དང་འགལ་ལོ། །ཡང་ཐེག་དམན་གྱི་མི་སློབ་ལམ་དེ་མི་སློབ་ལམ་མིན་པར་ཐལ། དེའི་མྱང་འདས་དེ་མྱང་འདས་མིན་པའི་ཕྱིར། འདོད་ན། དེ་སློབ་ལམ་དུ་ཐལ་ལོ། །ཡང་ཉན་ཐོས་དགྲ་བཅོམ་པ་དེ་དགྲ་བཅོམ་འབྲས་གནས་མིན་པར་ཐལ། ཐེག་དམན་གྱི་མྱང་འདས་དེ་མྱང་འདས་མིན་པའི་ཕྱིར། འདོད་ན། ཉན་ཐོས་ལ་གང་ཟག་ཟུང་བཞི་མེད་པར་ཐལ་བ་དང་། དགྲ་བཅོམ་བསད་པའི་མཚམས་མེད་ཀྱི་ལས་མི་སྲིད་པར་ཐལ་ལོ། །དེ་ལ་ཁོ་ན་རེ། ཐེག་དམན་དགྲ་བཅོམ་པ་དེ་དགྲ་བཅོམ་མཚན་ཉིད་པ་མ་ཡིན་ཏེ། ཐེག་དམན་དགྲ་བཅོམ་པ་དེ་འཇིགས་པ་དང་བཅས་པའི་སྒོ་ནས་ལྷ་གཞན་ལ་སྐྱབས་སུ་འགྲོ་དགོས་པའི་ཕྱིར་དང་། དེས་བྱང་ཆུབ་སེམས་དཔའ་ལ་ཕྱག་བྱ་དགོས་པའི་ཕྱིར་ཏེ། དཔལ་ཕྲེང་གིས་ཞུས་པའི་མདོ་ལས། དགྲ་བཅོམ་པ་རྣམས་ལ་འཇིགས་པ་མཆིས་ཏེ། གང་གིས་འཇིགས་པའི་དགྲ་བཅོམ་པ་དེ་རྣམས་ཀྱང་བཅོམ་ལྡན་འདས་ཉིད་ལ་སྐྱབས་སུ་མཆིའོ། །ཞེས་དང་། སྐྱབས་གསུམ་བདུན་ཅུ་པ་ལས། ཤཱ་རིའི་ལུང་ལས་དགྲ་བཅོམ་གྱིས། །བྱང་ཆུབ་སེམས་དཔར་ཕྱག་བྱས་ཕྱིར། །ཞེས་གསུངས་པའི་ཕྱིར་ཞེ་ན། འཇིགས་པ་དང་བཅས་པའི་སྒོ་ནས་དེ་པ་ལ་སྐྱབས་སུ་འགྲོ་བའི་དགྲ་བཅོམ་པ་དང་། བྱང་ཆུབ་སེམས་དཔའ་ལ་ཕྱག་བྱ་དགོས་པའི་དགྲ་བཅོམ་པ་མེད་པར་ཐལ། ཐེག་དམན་དགྲ་བཅོམ་པ་དེ་དགྲ་བཅོམ་པ་མིན་པའི་ཕྱིར། འདོད་ན། སྔར་གྱི་ལུང་དང་འགལ་ལོ། །གཉིས་པ་རང་ལུགས་ལ། ཐེག་དམན་ལ་མྱང་འདས་མཚན་ཉིད་པ་ཡོད་དེ། ཐེག་པ་གསུམ་པོ་རེ་རེ་ལ་རྒྱུའི་ཐེག་པ་དང་། འབྲས་བུའི་ཐེག་པ་མཚན་ཉིད་པ་གཉིས་གཉིས་ཡོད་པའི་ཕྱིར་རོ། །རྣམ་པ་ཐམས་ཅད་སྐྱེ་བ་མེད་པར་ཐུགས་སུ་ཆུད་པ། ཞེས་པའི་སྐབས་སུ། ཆོས་འཁོར་གྱི་མཚན་གཞི་ལ་དཔྱད། མཚན་ཉིད་ལ་དཔྱད། རིམ་ཅན་དང་ཅིག་ཆར་གང་དུ་བསྐོར་བ་ལ་དཔྱད་པ་གསུམ་ལས་དང་པོ་ནི། ངོ་བོ་ཉིད་སྐུ་ཆོས་ཅན། ཆོས་འཁོར་ཡིན་ཏེ། རྟོགས་པའི་ཆོས་འཁོར་ཡིན་པའི་ཕྱིར་ཏེ། ཟག་མེད་རྣམ་བྱང་གི་བདེན་པ་ཡིན་པའི་ཕྱིར། བཀའ་བརྒྱད་སྟོང་པ་ཆོས་ཅན། ཆོས་འཁོར་ཡིན་ཏེ་ལུང་གི་ཆོས་འཁོར་ཡིན་པའི་ཕྱིར། དེ་ལ་ཁོ་ན་རེ། ངོ་བོ་ཉིད་སྐུ་ཆོས་ཅན། མི་མཐུན་ཕྱོགས་འཇོམས་ནུས་ཡིན་པར་ཐལ། ཆོས་འཁོར་ཡིན་པའི་ཕྱིར། ཁྱབ་སྟེ། སྤྱོད་པའི་གཉེན་པོར་ཆོས་ཀྱི་འཁོར་ལོ་མ་ལུས་པ་ཞེས་གསུངས་པའི་ཕྱིར། ཡང་འཁོར་ལོ་རིན་པོ་ཆེ་དང་ཆོས་མཚུངས་སུ་ཐལ། ཆོས་འཁོར་ཡིན་པའི་ཕྱིར། བཀའ་བརྒྱད་སྟོང་པ་ཆོས་ཅན། ཤེར་ཕྱིན་དུ་ཐལ། ལུང་གི་ཤེར་ཕྱིན་ཡིན་པའི་ཕྱིར། ཁྱབ་པ་བསྒྲིག་ཟེར་ན། ངོ་བོ་ཉིད་སྐུ་ཆོས་ཅན། མི་མཐུན་ཕྱོགས་འཇོམས་པའི་མཐུ་དང་ལྡན་པར་ཐལ། དཀོན་མཆོག་ཡིན་པའི་ཕྱིར་ཁྱབ་པ་ཁས་བླངས་ཏེ། དཀོན་མཆོག་གི་སྒྲ་དོན་འཆད་པའི་སྐབས་སུ། མཐུ་ལྡན་ཕྱིར་ཞེས་གསུངས་པའི་ཕྱིར། ཡང་དེ་ཆོས་ཅན། ནོར་བུ་རིན་པོ་ཆེ་དང་ཆོས་མཚུངས་པར་ཐལ། དཀོན་མཆོག་ཡིན་པའི་ཕྱིར། ལུང་གི་དམ་ཆོས་ཡིན་ན། དམ་ཆོས་ཡིན་པས་མ་ཁྱབ་པར་ཐལ། ལུང་གི་ཤེར་ཕྱིན་ཡིན་ན། ཤེར་ཕྱིན་ཡིན་པས་མ་ཁྱབ་པའི་ཕྱིར། གཉིས་པ་ལ་དགག་གཞག་སྤང་གསུམ་ལས། དང་པོ་ནི། ཆོས་འཁོར་གྱི་མཚན་ཉིད་ཁ་ཅིག སྟོན་པས་གསུངས་པའི་དམ་ཆོས་གང་ཞིག བཤད་པ་གདུལ་བྱའི་རྒྱུད་ལ་འཕོ་བ་ཞེས་དང་། དེ་གང་ཞིག བཤད་པས་གདུལ་བྱའི་རྒྱུད་ལ་འཕོ་བའམ་འཕོ་བྱེད་གང་རུང་དུ་སྣང་བ་ཞེས་དང་། དེ་གང་ཞིག མི་མཐུན་ཕྱོགས་འཇོམས་པར་བྱེད་པ་ཞེས་དང་། མི་མཐུན་ཕྱོགས་གཅོད་བྱེད་དང་། མི་མཐུན་ཕྱོགས་འཇོམས་ནུས་དང་། མི་མཐུན་ཕྱོགས་གཅོད་ནུས་ཞེས་པ་དང་དྲུག་ལས། དང་པོ་ལ་ཤཱཀྱ་ཐུབ་པའི་རྒྱུད་ཀྱི་རྣམ་མཁྱེན་ཆོས་ཅན། མཚན་ཉིད་ཀྱི་ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། འདོད་ན་དེའི་གདུལ་བྱས་མ་འོངས་པ་ན་ཐོབ་པར་འགྱུར་བའི་རྣམ་མཁྱེན་དེ་དེའི་རྒྱུད་ཀྱི་རྣམ་མཁྱེན་ཡིན་པར་ཐལ་ལོ། །དེ་ལ་ཁོ་ན་རེ། དེའི་རྒྱུད་ཀྱི་རྣམ་མཁྱེན་དེ་བཤད་པས་གདུལ་བྱའི་རྒྱུད་ལ་འཕོ་བར་ཐལ། དེས་རང་གི་གདུལ་བྱ་ལ་རྣམ་མཁྱེན་ཐོབ་པའི་ཐབས་བཤད་པས། གདུལ་བྱ་དེས་རྣམ་མཁྱེན་ཐོབ་པ་ཡོད་པའི་ཕྱིར་ཞེ་ན། གཟུགས་སྐུ་གཉིས་པོ་དེ་བཤད་པས་གདུལ་བྱའི་རྒྱུད་ལ་འཕོ་བར་ཐལ། རྟགས་རིགས་འགྲེ། འདོད་ན། གཟུགས་སྐུ་གཉིས་པོ་དེ་གཞན་རྒྱུད་ཀྱིས་བསྡུས་པར་ཐལ་ལོ། །གཉིས་པ་ལ། སྟོན་པ་ཐུབ་པའི་རྒྱུད་ཀྱི་རྣམ་མཁྱེན་ཆོས་ཅན། མཚན་ཉིད་ཀྱི་ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། འདོད་ན། བཤད་པས་གདུལ་བྱའི་རྒྱུད་ལ་འཕོ་བ་ཡིན་པར་ཐལ། འདོད་པ་གང་ཞིག བཤད་པས་གདུལ་བྱའི་རྒྱུད་ལ་འཕོ་བྱེད་ཡིན་པའི་ཕྱིར། འདོད་ན། ཤཱཀྱ་ཐུབ་པས་རང་རྒྱུད་ཀྱི་རྣམ་མཁྱེན་དེ་བཤད་པས་གདུལ་བྱའི་རྒྱུད་ལ་སྤོ་ནུས་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། མདོ་ལས། ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མི་ནུས། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་གསུངས་པའི་ཕྱིར། ཤཱཀྱ་ཐུབ་པའི་རྒྱུད་ཀྱི་འགོག་བདེན་ཆོས་ཅན། ཟུར་ཕྱི་མར་ཐལ། ཆོས་འཁོར་ཡིན་པའི་ཕྱིར། འདོད་ན། བཤད་པས་གདུལ་བྱའི་རྒྱུད་ལ་འཕོ་བ་ཡིན་པར་ཐལ། འདོད་པ་གང་ཞིག བཤད་པས་གདུལ་བྱའི་རྒྱུད་ལ་འཕོ་བྱེད་ཡིན་པའི་ཕྱིར། འདོད་ན། དེ་ཚིག་ཏུ་བརྗོད་པའི་སྒོ་ནས་རྒྱུད་གཞན་ལ་སྦྱིན་དུ་ཡོད་པར་ཐལ་ལོ། །འདོད་མི་ནུས་ཏེ། རྒྱན་ལས། གཞན་ལ་སྦྱིན་དུ་མེད་པ་དང་། །ཞེས་དང་། དེའི་འགྲེལ་པར། གང་གི་ཕྱིར་འགོག་པའི་བདེན་པའི་དོན་ཚིག་ཏུ་བརྗོད་པས་རྒྱུད་གཞན་ལ་སྦྱིན་དུ་མེད་པ་དང་ཞེས་སོ། །གཉིས་ཀའི་རྟགས་ཟུར་ཕྱི་མ་སྒྲུབ་པ་ལ། དེ་གཉིས་ཆོས་ཅན། བཤད་པས་གདུལ་བྱའི་རྒྱུད་ལ་འཕོ་བྱེད་མིན་པར་ཐལ། ལུང་གི་དམ་ཆོས་མིན་པའི་ཕྱིར། བར་པ་གཉིས་ལ་རྣམ་མཁྱེན་ཆོས་ཅན། ཟུར་ཕྱི་མར་ཐལ། ཆོས་འཁོར་ཡིན་པའི་ཕྱིར། འདོད་མི་ནུས་ཏེ། མི་མཐུན་ཕྱོགས་མ་ལུས་པར་སྤངས་ཟིན་པའི་ཕྱིར། ཐ་མ་གཉིས་ལ་ངོ་བོ་ཉིད་སྐུ་ཆོས་ཅན། ཟུར་ཕྱི་མར་ཐལ། ཆོས་འཁོར་ཡིན་པའི་ཕྱིར། འདོད་མི་ནུས་ཏེ། རྟག་པ་ཡིན་པའི་ཕྱིར། གཉིས་པ་རང་ལུགས་ནི། ལུང་རྟོགས་གང་རུང་གིས་བསྡུས་པའི་སྟོན་པའི་དམ་ཆོས་དེ་ཆོས་འཁོར་གྱི་མཚན་ཉིད། དབྱེ་ན། ལུང་གི་ཆོས་འཁོར་དང་རྟོགས་པའི་ཆོས་འཁོར་གཉིས། དང་པོ་ལ། བཀའ་དང་པོ་བདེན་པ་བཞིའི་ཆོས་འཁོར་སོགས་གསུམ་ཡོད་ཅིང་། དེ་རེ་རེ་ལ་ཡང་དང་པོའི་དང་པོ་སོགས་གསུམ་གསུམ་ཡོད་དོ། །གཉིས་པ་ལ་འགོག་པ་དང་ལམ་གཉིས་ལས། ཕྱི་མ་ལ་ཐེག་པ་གསུམ་གྱི་ལམ་ལྔ་གསུམ་བཅོ་ལྔ་ཡོད་དོ། །གསུམ་པ་ནི། ལུང་རྟོགས་གཉིས་ཀས་བསྡུས་པའི་བསྟན་པའི་དམ་ཆོས་ཆོས་ཅན། དེར་ཐལ། ཆོས་འཁོར་ཡིན་པའི་ཕྱིར། འདོད་ན། མིན་པར་ཐལ། ལུང་གིས་ཀྱང་བསྡུས་པའི་དམ་ཆོས་མིན། རྟོགས་པས་བསྡུས་པའི་དམ་ཆོས་ཀྱང་མིན་པའི་ཕྱིར་ཞེ་ན། ལུང་ཆོས་ཅན། ལུང་རྟོགས་གང་རུང་གིས་མ་བསྡུས་པར་ཐལ། ལུང་གིས་ཀྱང་མ་བསྡུས། རྟོགས་པས་ཀྱང་མ་བསྡུས་པའི་ཕྱིར། གསུམ་པ་ནི། ཁ་ཅིག སངས་རྒྱས་ཀྱིས་ཆོས་འཁོར་ཅིག་ཆར་དུ་བསྐོར་ཏེ། གསུང་གཅིག་ཉིད་དུ་གསུངས་མོད་ཀྱང་། །དུ་མ་ཉིད་དུ་སོ་སོར་གོ །ཞེས་གསུངས་པའི་ཕྱིར་ཞེ་ན། ཐེག་པ་གསུམ་ཅིག་ཆར་དུ་གྲུབ་པར་ཐལ། རྒྱན་ལས། སྔར་ལུང་མ་བསྟན་ལྷན་ཅིག་འབྱུང་། །ཞེས་གསུངས་པའི་ཕྱིར། འདོད་ན། སངས་རྒྱས་སྔོན་དུ་མ་སོང་བའི་ཉན་ཐོས་ཀྱི་ཐེག་པ་ཡོད་པར་ཐལ་ལོ། །ཡང་ཆོས་འཁོར་བསྐོར་བའི་གདུལ་བྱ་ཅིག་ཆར་དུ་གྲུབ་པར་ཐལ། ཆོས་འཁོར་ཅིག་ཆར་དུ་བསྐོར་བའི་ཕྱིར་རོ། །ཁ་ཅིག གདུལ་བྱ་དབང་རྣོན་གྱི་ངོར་ཅིག་ཅར་དུ་བསྐོར། དབང་རྟུལ་གྱི་ངོར་རིམ་ཅན་དུ་བསྐོར་ཞེ་ན། སངས་རྒྱས་ཀྱི་ཆོས་འཁོར་དང་པོའི་གདུལ་བྱ་དབང་རྣོན་དང་། བར་པའི་གདུལ་བྱ་དབང་རྣོན་དང་། ཐ་མའི་གདུལ་བྱ་དབང་རྣོན་གྱི་ངོར་ཅིག་ཆར་དུ་བསྐོར་བར་ཐལ། དམ་བཅའ་དེའི་ཕྱིར། འདོད་ན། སྟོན་པས་ཆོས་འཁོར་ཅིག་ཆར་དུ་བསྐོར་བར་ཐལ། འདོད་པ་དེའི་ཕྱིར། ཁ་ཅིག སངས་རྒྱས་རང་སྣང་ལ་ཅིག་ཆར་དུ་བསྐོར། གདུལ་བྱ་གཞན་སྣང་ལ་རིམ་ཅན་དུ་བསྐོར་ཞེ་ན། སངས་རྒྱས་རང་སྣང་ལ་ཆོས་འཁོར་གསུམ་གྱི་གདུལ་བྱ་ཅིག་ཆར་དུ་སྣང་བར་ཐལ། སངས་རྒྱས་རང་སྣང་ལ་ཆོས་འཁོར་གསུམ་གྱི་གདུལ་བྱ་སྣང་བ་གང་ཞིག དམ་བཅའ་སྔོན་མ་དེའི་ཕྱིར། རྟགས་དང་པོ་མ་གྲུབ་ན། སངས་རྒྱས་རང་སྣང་ལ་ཆོས་འཁོར་ཅིག་ཆར་དུ་བསྐོར་བ་བུད། ཁ་ཅིག བདེན་བཞིའི་ཆོས་འཁོར་ཡིན་ན། སྟོན་པས་སྐུ་ཚེའི་སྟོད་དང་། མཚན་ཉིད་མེད་པའི་ཆོས་འཁོར་ཡིན་ན། དེའི་བར་དང་། ལེགས་པར་རྣམ་པར་ཕྱེ་བའི་ཆོས་འཁོར་ཡིན་ན། སྐུ་ཚེའི་མཇུག་ལ་བསྐོར་བས་ཁྱབ་ཅེ་ན། དེ་གསུམ་ལ་ཁྱབ་པ་མེད་པར་ཐལ། རིམ་པ་བཞིན་དུ་སྟོན་པ་མྱ་ངན་ལས་འདའ་ཁར་དྲི་ཟའི་རྒྱལ་པོ་རབ་དགའ་ལ་བདེན་བཞིའི་ཆོས་འཁོར་བསྐོར་བའི་ཕྱིར་དང་། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཁོངས་སུ་གནས་པར་བྱ། །ཞེས་པའི་མཚན་ཉིད་མེད་པའི་ཆོས་འཁོར་འདི་སྟོན་པ་སངས་རྒྱས་མ་ཐག་གསུངས་པའི་ཕྱིར། འཁོར་ལོ་ཐ་མར་གཏོགས་པའི་བྱམས་པ་གཟུགས་ཀྱི་དབྱེ་བ་ནི་གསུམ་སྟེ། ཀུན་བཏགས་པའི་གཟུགས་དང་། རྣམ་པར་བརྟགས་པའི་གཟུགས་དང་། ཆོས་ཉིད་ཀྱི་གཟུགས་སོ། །ཞེས་པ་འདི་སྟོན་པའི་སྐུ་ཚེའི་བར་ལ་གསུངས་པའི་ཕྱིར་རོ། །ཡང་ཁོ་ན་རེ། བཀའ་རྒྱས་འབྲིང་བསྡུས་གསུམ་འདི་འཁོར་ལོ་ཐ་མའི་མཚན་གཞི་ཡིན་ཏེ། ངེས་དོན་གྱིས་མདོ་ཡིན་པའི་ཕྱིར། ཁྱབ་སྟེ། འཁོར་ལོ་དང་པོ་གཉིས་དྲང་དོན་གྱི་མདོ་དང་། ཐ་མ་ངེས་དོན་གྱི་མདོ་ཡིན་པར་དགོངས་འགྲེལ་ལས་གསུངས་པའི་ཕྱིར་ཞེ་ན། གཞན་དབང་དང་ཡོངས་གྲུབ་བདེན་པར་གྲུབ་པར་ཐལ། དེ་ལྟར་དུ་དགོངས་འགྲེལ་ལས་གསུངས་པའི་ཕྱིར། ཡང་ཁ་ཅིག སྟོན་པའི་སྐུ་ཚེའི་སྟོད་ལ་གསུངས་པའི་མདོ་ཡིན་ན། བདེན་བཞིའི་ཆོས་འཁོར་ཡིན་པས་ཁྱབ། བདེན་བཞིའི་ཆོས་འཁོར་ཡིན་ན་རྟག་ཅིག་རང་དབང་ཅན་གྱི་གང་ཟག་གི་བདག་མེད་ཙམ་སྟོན་པ་དང་། མཚན་ཉིད་གསུམ་ཆར་ཕྱོགས་གཅིག་ཏུ་བདེན་གྲུབ་ཏུ་སྟོན་པའི་མདོ་ཡིན་པས་ཁྱབ། དེས་ན་འདུལ་བ་ལུང་སྡེ་བཞི་ཡང་བདེན་བཞིའི་ཆོས་འཁོར་མིན་ནོ། །བར་པ་མཚན་ཉིད་མེད་པའི་ཆོས་འཁོར་ཡིན་ན། མཚན་ཉིད་གསུམ་ཀ་ཕྱོགས་གཅིག་ཏུ་བདེན་མེད་དུ་སྟོན་པས་ཁྱབ། མཚན་གཞི་རྒྱས་འབྲིང་བསྡུས་གསུམ་ལྟ་བུ་ཡིན། འཁོར་ལོ་ཐ་མ་ཡིན་ན། གཞན་དབང་དང་ཡོངས་གྲུབ་བདེན་པར་གྲུབ་པ་དང་། ཀུན་བཏགས་བདེན་མེད་དུ་སྟོན་པའི་མདོ་ཡིན་པས་ཁྱབ། མཚན་གཞི་ནི་མདོ་སྡེ་དགོངས་འགྲེལ་ལྟ་བུའོ་ཞེས་སྨྲའོ། །ཐ་མ་འདི་ལ་ཤེས་བྱེད་ཅི་ཡོད་དྲིས་པས། དགོངས་འགྲེལ་ལས་དེ་ལྟར་བཤད་པའི་ཕྱིར་ཞེ་ན། འོ་ན་གཞན་དབང་དང་ཡོངས་གྲུབ་བདེན་པར་གྲུབ་པར་ཐལ། དགོངས་འགྲེལ་ལས་དེ་ལྟར་བཤད་པའི་ཕྱིར། སྟོན་པས་ལྔ་སྡེ་བཟང་པོ་ལ་དང་པོར་གསུངས་པའི་སྡུག་བསྔལ་འཕགས་པའི་བདེན་པའོ་ཞེས་པའི་མདོ་ཆོས་ཅན། མཚན་ཉིད་གསུམ་ཀ་བདེན་གྲུབ་ཏུ་ཕྱོགས་གཅིག་ཏུ་སྟོན་པར་ཐལ། འཁོར་ལོ་དང་པོ་ཡིན་པའི་ཕྱིར། འདོད་ན། བདེན་བཞི་དངོས་སུ་སྟོན་པའི་མདོ་ཡིན་ན། མཚན་ཉིད་གསུམ་ཀ་བདེན་གྲུབ་ཏུ་ཕྱོགས་གཅིག་ཏུ་སྟོན་པའི་མདོ་ཡིན་པས་ཁྱབ་པར་ཐལ་ལོ། །ཡང་བདེན་བཞིའི་ཆོས་འཁོར་དེ་ཆོས་ཅན། མཚན་ཉིད་གསུམ་ཀ་བདེན་གྲུབ་ཏུ་སྟོན་པའི་མདོ་ཡིན་པར་ཐལ། རྟག་གཅིག་རང་དབང་ཅན་གྱི་གང་ཟག་གི་བདག་མེད་པ་ཙམ་སྟོན་པའི་མདོ་ཡིན་པའི་ཕྱིར། རྟགས་གསལ་དངོས། ཡང་རྒྱས་འབྲིང་བསྡུས་གསུམ་པོ་དེ་འཁོར་ལོ་བར་པའི་མཚན་གཞི་མིན་པར་ཐལ། གདུལ་བ་ལུང་སྡེ་བཞི་པོ་དེ་འཁོར་ལོ་དང་པོའི་མཚན་གཞི་མིན་པའི་ཕྱིར། རྟགས་གསལ་དངོས། འཁོར་ལོ་དང་པོ་ཆོས་ཅན། ཁྱོད་ཀྱི་བརྗོད་བྱ་གཞི་མ་གྲུབ་པར་ཐལ། ཁྱོད་ཡིན་ན་མཚན་ཉིད་གསུམ་ཀ་ཕྱོགས་གཅིག་ཏུ་བདེན་གྲུབ་ཏུ་སྟོན་པས་ཁྱབ་པ་གང་ཞིག དེ་གཞི་མ་གྲུབ་པའི་ཕྱིར། དེས་ན་རང་ལུགས་ལ། གདུལ་བྱ་ཅིག་ཆར་ཉན་འདོད་ཡོད་པའི་ཚེ་ཆོས་ཅིག་ཆར་དུ་གསུངས་པ་ཡིན་ཏེ། སྟོན་པའི་གསུང་གཅིག་ཉིད་གདུལ་བྱ་དུ་མས་ཅིག་ཆར་དུ་ཐོས་པའི་ཚེ། རང་ཉིད་ཉན་པར་འདོད་པར་དེ་ཉིད་གསུང་བར་སྣང་བའི་ཕྱིར། གདུལ་བྱའི་རིམ་གྱིས་འབྱུང་བའི་ཚེ་ཆོས་རིམ་གྱིས་གསུངས་པ་ཡིན་ཏེ། གདུལ་བྱ་ཡོད་པའི་ཚེ་ཆོས་གསུང་དགོས་པའི་ཕྱིར། གཉིས་ཀ་ཡང་གདུལ་བྱའི་ངོར་ཡིན་ཏེ། སྟོན་པའི་གཞན་དོན་གྱི་མཛད་པ་ཐམས་ཅད་གདུལ་བྱའི་ངོར་མཛད་པའི་ཕྱིར། དེ་ལྟར་ཕྱག་འཚལ་བ་དང་བསྟོད་པ་སྔོན་དུ་འགྲོ་བའི། ཞེས་པའི་སྐབས་སུ། དགག་གཞག་གཉིས། དང་པོ་ནི། དར་ཊཱིཀ་པ་ན་རེ། ཁ་ཅིག་ཉན་ཐོས་ཞི་བ་ཚོལ་རྣམས་ཤེས་པའི་སྐབས་སུ། མཁྱེན་གསུམ་བརྗོད་བྱར་བྱས་པའི་བསྟན་བཅོས་བརྩམ་པར་ཤུགས་ལ་དམ་བཅས་པ་ལས་འཕྲོས་ཞེས་འདོད་པ་ནི་མི་འཐད་དེ། མཁྱེན་གསུམ་བརྗོད་བྱར་བྱས་པར་ངེས་ནས་གཞི་གཉེན་རྣམ་པ་གང་བརྗོད་བྱར་བྱེད་ཅེས་པའི་དྲི་བ་དེ་བྱིས་པའི་དྲི་བ་ཡིན་པའི་ཕྱིར་ཞེས་བཀག་ནས། རང་ལུགས་ལ། མཆོད་བརྗོད་ཀྱི་གཞུང་ལས་འཕྲོས་ནས། མཁྱེན་གསུམ་བརྗོད་བྱར་བྱས་པར་ཡིད་དཔྱོད་ཀྱིས་ངེས་པའི་གང་ཟག་གིས་མཁྱེན་གསུམ་བརྗོད་བྱར་བྱེད་ན་དེའི་ཡུལ་གཞི་གཉེན་རྣམ་པ་གསུམ་ཀ་ཡང་གཏན་ལ་འབེབས་དགོས་ལ། དེ་ལྟར་ན་ཤེར་ཕྱིན་གྱི་མདོ་དང་ཟློས་པའི་སྐྱོན་ཡོད་པས། རྒྱན་རྩོམ་པ་ལ་དགོས་པ་མེད་པར་འགྱུར་ཞེས་དགོས་འབྲེལ་གྱི་མཚམས་སྦྱར་དུ་བྱུང་བ་འདི་ཉིད་དོགས་པའི་གཙོ་བོ་ཡིན་ཞིང་། འདིའི་མཐའ་དཔྱད་པའི་ཡན་ལག་ཏུ་སློབ་དཔོན་གྱིས་གཞི་གཉེན་རྣམ་གསུམ་གང་རུང་རེ་རེ་ཁོ་ན་བརྗོད་བྱར་བྱེད་དམ་སྙམ་པའི་དོགས་པ་ཁོང་ལ་ཡོད་པ་བསུ་བ་ཡིན་ཟེར་རོ། །འོ་ན་མཁྱེན་གསུམ་བརྗོད་བྱར་བྱས་པར་ཡིད་དཔྱོད་ཀྱིས་ངེས་ནས། གཞི་གཉེན་རྣམ་གསུམ་གང་རུང་རེ་རེ་ཁོ་ན་ཡོད་པ་བརྗོད་བྱར་བྱེད་དམ་སྙམ་པའི་དོགས་པ་ཁོང་ན་ཡོད་པ་བསུ་བ་མིན་པར་ཐལ། དེ་ལྟ་བུའི་དོགས་པ་དེ་བྱིས་པའི་དོགས་པ་ཡིན་པའི་ཕྱིར། འཁོར་གསུམ། ཁ་ཅིག བརྒལ་ལན་གྱི་གཞུང་འདི་རྣམས་མདོ་ལས་དངོས་སུ་འཕྲོས་པའི་བརྒལ་ལན་ཡིན་སྟེ། ཉིར་སྣང་དང་ཉི་ཁྲིའི་རྣམ་འགྲེལ་གཉིས་ལས་དགོས་འབྲེལ་གྱི་གཞུང་གི་མཇུག་ཏུ་བཀོད་པའི་ཕྱིར་དང་། འགྲེལ་ཆེན་ལས། རྣམ་པ་ཐམས་ཅད་མཁྱེན་ཉིད་ལམ། །ཞེས་པའི་སྐབས་ཀྱི་དགོས་སོགས་ཆོས་བཞིའི་ནང་ཚན་དུ་གྱུར་པའི་བརྗོད་བྱ་ངོས་འཛིན་པའི་གཞུང་དུ་མཛད་པའི་ཕྱིར་ཞེས་སྨྲའོ། །འོ་ན་དེ་ཐོས་ནས་ཞེས་སོགས་ཀྱི་གཞུང་དེ་མདོའི་དགོས་པ་སྟོན་བྱེད་ཀྱི་གཞུང་དུ་ཐལ། དེ་མཆོད་བརྗོད་ཀྱི་ཚིགས་བཅད་ཀྱི་མཇུག་ཏུ་བཀོད་པའི་ཕྱིར། ཁྱབ་པ་ཁས། རྣམ་པ་ཐམས་ཅད་མཁྱེན་ཉིད་ལམ། །ཞེས་སོགས་ཀྱི་གཞུང་འདི་མདོའི་དགོས་སོགས་ཆོས་བཞི་ངོས་འཛིན་གྱི་གཞུང་མིན་པར་ཐལ། འགྲེལ་ཆེན་ལས། དེ་ལྟར་དུ་བཤད་ན་བརྒལ་ལན་གྱི་གཞུང་འདི་རྣམས་མདོ་ལས་དངོས་སུ་འཕྲོས་པའི་གཞུང་ཡིན་པས་ཁྱབ་པའི་ཕྱིར། ཉན་ཐོས་ཞི་བ་ཚོལ་རྣམས་ཞེས་སོགས་ཀྱི་ཚིགས་བཅད་འདི་མདོའི་མཆོད་བརྗོད་ཡིན་པར་ཐལ། རྩ་བའི་དམ་བཅའ་དེའི་ཕྱིར། ཁྱབ་སྟེ། དེ་ལྟར་ཕྱག་འཚལ་བ་དང་བསྟོད་པ་སྔོན་དུ་འགྲོ་བ་ཞེས་གསུངས་པའི་ཕྱིར། གཉིས་པ་ནི། མཆོད་བརྗོད་ཀྱི་སྐབས་སུ་མཁྱེན་གསུམ་བརྗོད་བྱར་བྱས་པའི་བསྟན་བཅོས་རྩམ་པ་ཤུགས་ལ་དམ་བཅས་པ་མཁྱེན་གསུམ་གཏན་ལ་འབེབས་པ་ལ་དེའི་ཡུལ་གཏན་ལ་འབེབས་དགོས་པས་གང་རུང་རེ་རེ་ཁོ་ན་ལ་བརྗོད་བྱར་བྱེད་དམ། གསུམ་ཀ་བརྗོད་བྱར་བྱེད། དང་པོ་ལྟར་ན། གཞུང་ལས་དངོས་སུ་བཀོད་པའི་སྐྱོན་ཡོད། ཕྱི་མ་ལྟར་ན། མདོ་དང་ཟློས་པའི་སྐྱོན་ཡོད་ཅེས་པའི་བརྒལ་བ་གཉིས་ལས། དང་པོ་མཆོད་བརྗོད་ལས་འཕྲོས་པའི་བརྒལ་བ་ཡིན་ལ། དེའི་ལན་དུ་དེ་མིན་ཏེ་ཞེས་སོགས་ཀྱི་གཞུང་འདི་མཆོད་བརྗོད་ལས་འཕྲོས་པའི་བརྒལ་ལན་ཡིན་ནོ། །གཉིས་པ་ནི་དགོས་འབྲེལ་གྱི་མཚམས་སྦྱར་ཡིན་ལ། དེའི་ལན་དུ། རྣམ་པ་ཐམས་ཅད་མཁྱེན་ཉིད་ལམ། །ཞེས་སོགས་ཀྱི་དགོས་པ་ལས་འཕྲོས་ནས་དགོས་སོགས་ཆོས་བཞིར་ངོས་བཟུང་བ་ཡིན་ནོ། །དེས་ན་བརྒལ་ལན་གྱི་གཞུང་འདི་རྣམས་ཀྱིས་མཆོད་བརྗོད་ཀྱི་བརྒལ་ལན་དང་། དགོས་འབྲེལ་གྱི་མཚམས་སྦྱོར་ཕྱོགས་གཅིག་ཏུ་འགྲོ་བ་ལ་དགོངས་ནས་འགྲེལ་ཆེན་གཉིས་ལས། དགོས་འབྲེལ་གྱི་མཇུག་ཏུ་གསུངས་པ་ཡིན་ལ། འདིར་ནི་མཆོད་བརྗོད་ཀྱི་མཇུག་དུ་གསུངས་པར་མངོན་ནོ། །དེ་ནི་མ་ཡིན་ཏེ། གང་གི་ཕྱིར། ཞེས་པའི་སྐབས་སུ། རྒྱན་གྱི་གཞི་གཉེན་རྣམ་པ་གང་རུང་རེ་རེ་ཁོ་ན་བརྗོད་བྱར་བསྡུས་ན་གཞུང་ལས་དངོས་སུ་བཀོད་པའི་སྐྱོན་གསུམ་པོ་ཡོད་ཀྱང་། གསུམ་ཀ་བརྗོད་བྱར་བསྡུས་པའི་ཕྱིར་སྐྱོན་མེད་ཅེས་ཁས་བླངས་པ་ལ། ཁ་ཅིག ཆོས་མངོན་པའི་མདོ་དེ་ཡུམ་བར་མ་ལ་ཟློས་པའི་སྐྱོན་ཡོད་པར་ཐལ། དེས་གཞི་ཁོ་ན་བརྗོད་བྱར་བསྡུས་པའི་ཕྱིར། རྟགས་གསལ་ཁས། མངོན་རྟོགས་རྒྱན་འདི་ཡུམ་བར་མ་དང་ཟློས་པའི་སྐྱོན་ཡོད་པར་ཐལ། དེས་གཞི་གཉེན་རྣམ་པའི་ཕྱོགས་གསུམ་ཆར་བརྗོད་བྱར་བསྡུས་པའི་ཕྱིར། ཡང་མངོན་རྟོགས་རྒྱན་ཆོས་ཅན། ཁྱོད་ཀྱིས་གཞི་ཁོ་ན་བརྗོད་བྱར་བསྡུས་པར་ཐལ། གཞི་ཁོ་ན་ཁྱོད་ཀྱི་བརྗོད་བྱ་ཡིན་པའི་ཕྱིར། མ་གྲུབ་ན། གཞི་ཁོ་ན་ཆོས་ཅན། རྒྱན་གྱི་བརྗོད་བྱ་ཡིན་པར་ཐལ། གཞི་གྲུབ་པའི་ཕྱིར། གལ་ཏེ་རྒྱན་ཆོས་ཅན། ལམ་དང་རྣམ་པ་བརྗོད་བྱར་མ་བསྡུས་པར་ཐལ། གཞི་ཁོ་ན་བརྗོད་བྱར་བསྡུས་པའི་ཕྱིར་ཞེ་ན། རྣམ་པ་དང་ལམ་མ་གྲུབ་པར་ཐལ། གཞི་ཁོ་ན་གཞི་གྲུབ་པའི་ཕྱིར། མ་གྲུབ་ན། དེར་ཐལ། གཞི་གྲུབ་ན་གཞི་ཡིན་དགོས་པའི་ཕྱིར་རོ། །ཡང་མངོན་པ་ཆོས་ཅན། རྣམ་པ་བརྗོད་བྱར་མ་བསྡུས་པར་ཐལ། གཞི་ཁོ་ན་བརྗོད་བྱར་བསྡུས་པའི་ཕྱིར་ཞེས་བཀག་ནས། རང་ལུགས་ལ། ཆོས་རབ་ཏུ་རྣམ་འབྱེད་ཀྱི་ཤེས་རབ་བཤད་པའི་ཕྱིར་དུ་གཞི་ཕུང་ཁམས་སྐྱེ་མཆེད་ཀྱི་མཚན་ཉིད་རབ་དབྱེ་ཙམ་དང་། མི་མཐུན་ཕྱོགས་སྤོང་བའི་ཆེད་དུ་གཉེན་པོའི་ལམ་ཙམ་དང་། ཤེས་བྱ་ཐམས་ཅད་ཤེས་པར་བྱ་བའི་ཕྱིར་དུ་རྫས་ཡོད་དང་བརྟགས་ཡོད་ལ་སོགས་པའི་རྣམ་པའི་རབ་དབྱེ་ཙམ་ཞིག་བརྗོད་བྱར་བསྡུས་ནས་རྩོམ་ཞེས་དྲི་བ་གསུམ་བྱས་ནས། གསུམ་པོ་གང་ཁས་བླངས་ཀྱང་གཞུང་དུ་བཀོད་པའི་སྐྱོན་ཡོད་ཅེས་སྨྲའོ། །འོ་ན་ཆོས་མངོན་པའི་མདོ་དེ་ཡུམ་བར་མ་དང་ཟློས་པར་ཐལ། དེས་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་པའི་ཕྱིར་དུ་གཞི་ཕུང་ཁམས་སྐྱེ་མཆེད་ཀྱི་མཚན་ཉིད་དང་། རབ་དབྱེ་ཙམ་ཞིག་བརྗོད་བྱར་བསྡུས་པའི་ཕྱིར། མངོན་རྟོགས་རྒྱན་དེ་ཡུམ་བར་མ་དང་ཟློས་སྐྱོན་ཡོད་པར་ཐལ། དེའི་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་པའི་ཕྱིར་དུ་གཞི་ཕུང་ཁམས་སྐྱེ་མཆེད་ཀྱི་རབ་དབྱེ་ཙམ་དང་། མི་མཐུན་ཕྱོགས་སྤོང་བའི་ཆེད་དུ་གཉེན་པོ་ལམ་ཙམ་དང་། ཤེས་བྱ་ཐམས་ཅད་ཤེས་པར་བྱ་བའི་ཆེད་དུ་རྫས་ཡོད་དང་། བརྟགས་ཡོད་ལ་སོགས་པའི་རྣམ་པའི་རབ་དབྱེ་ཙམ་ཞིག་བརྗོད་བྱར་བསྡུས་པའི་ཕྱིར། གཉིས་ཆར་གྱི་འཁོར་གསུམ་བསྒྲིགས་མཚམས་དང་བཅས་པ་ཁས་བླངས། ད་དུང་མ་གྲུབ་ན། རྒྱན་ཆོས་ཅན། རྟགས་དང་པོ་དེར་ཐལ། ཁྱོད་ཀྱིས་དེ་བརྗོད་བྱར་བསྡུས་པ་གང་ཞིག ཁྱོད་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་པའི་ཕྱིར་རྩོམ་པ་ཡིན་པའི་ཕྱིར། དང་པོ་ཁས་བླངས་ཏེ། དེ་ཆོས་ཅན། ཁྱོད་ཀྱིས་དེ་བརྗོད་བྱར་བསྡུས་པར་ཐལ། དེ་ཁྱོད་ཀྱི་བརྗོད་བྱ་ཡིན་པའི་ཕྱིར། མ་གྲུབ་ན། ཁས་བླངས་ཏེ། དེ་ཆོས་ཅན། རྒྱན་གྱི་བརྗོད་བྱ་ཡིན་པར་ཐལ། གཞི་གྲུབ་པའི་ཕྱིར། གལ་ཏེ་རྒྱན་ཆོས་ཅན། ལམ་དང་རྣམ་པ་བརྗོད་བྱར་མ་བསྡུས་པར་ཐལ། གཞི་ཕུང་ཁམས་སྐྱེ་མཆེད་ཀྱི་མཚན་ཉིད་དང་། རབ་དབྱེ་ཙམ་ཞིག་བརྗོད་བྱར་བསྡུས་པའི་ཕྱིར་ཞེ་ན། ལམ་དང་རྣམ་པ་གཞི་མ་གྲུབ་པར་ཐལ། གཞི་ཕུང་ཁམས་སྐྱེ་མཆེད་ཀྱི་མཚན་ཉིད་དང་རབ་དབྱེ་ཙམ་ཞིག་གཞི་གྲུབ་པའི་ཕྱིར་ཏེ། གཞི་གྲུབ་ན་ཕུང་ཁམས་སྐྱེ་མཆེད་གང་རུང་ཡིན་དགོས་པའི་ཕྱིར་རོ། །རབ་འབྱོར་བྱང་ཆུབ་སེམས་དཔའ་རྣམས་ཀྱིས་ནི་ཉན་ཐོས་ཀྱི་ལམ་གང་ཡིན་པ་དང་། ཞེས་པའི་སྐབས་སུ། ལམ་ཐམས་ཅད་བསྐྱེད་པར་བྱ་ཞིང་། ལམ་ཐམས་ཅད་ཤེས་པར་བྱའོ་ཞེས་པ་ལ་བརྟེན་ནས། བྱང་སེམས་ཀྱི་བསྐྱེད་བྱ་དང་ཤེས་བྱའི་ལམ་ངོས་གཟུང་། དེ་དག་ཀྱང་ཡོངས་སུ་རྫོགས་པར་བྱ་ཞིང་། དེ་དག་གིས་ལམ་གྱི་བྱ་བ་ཡང་བྱ་ལ་ཞེས་པ་ལ་བརྟེན་ནས། ཉན་རང་གི་ལམ་གྱི་སྤང་རྟོགས་རྫོགས་པའི་ཚད་ལ་དཔྱད། སྨོན་ལམ་ཡོངས་སུ་རྫོགས་པར་མ་བྱས་པ་དང་ཞེས་སོགས་ལ་བརྟེན་ནས་རྫོགས་སྨིན་སྦྱངས་གསུམ་གྱི་ཚད་ལ་དཔྱད་པ། དེ་དག་གིས་ཡང་དག་པའི་མཐའ་མངོན་དུ་མི་བྱའོ་ཞེས་པ་ལ་བརྟེན་ནས། ཡང་དག་མཐའ་ངོས་གཟུང་ནས་དེ་མངོན་དུ་བྱས་པའི་ཚད་ལ་དཔྱད་པ་དང་བཞིའོ། །དང་པོ་ནི། སྐབས་གཉིས་པར་འཆད། གཉིས་པ་ལ་དགག་གཞག་གཉིས་ལས། དང་པོ་ལ། ཉ། གསེར། ཨར་གསུམ་ན་རེ། ཉན་རང་གི་རྟོགས་པ་ས་དང་པོ་ནས་རྫོགས་ཏེ། དེར་གང་ཟག་གི་བདག་མེད་རྟོགས་པར་མཐར་ཐུག་པའི་ཕྱིར། སྤངས་པ་ས་བརྒྱད་པ་ནས་རྫོགས་པ་ཡིན་གྱི་སྔ་རོལ་དུ་ནི་མིན་ཏེ། དེར་ཉོན་ཡིད་གནས་མ་གྱུར་པའི་ཕྱིར་ཞེས་ཟེར། འོ་ན་ཉོན་ཡིད་དེ་བག་ལ་ཉལ་གྱི་ཉོན་སྒྲིབ་ལ་བྱེད་དམ། འཁོར་བ་འཆིང་བྱེད་ཀྱི་ཉོན་སྒྲིབ་ལ་བྱེད། དང་པོ་ལྟར་ན། ཉན་རང་དགྲ་བཅོམ་པས་ཉན་རང་གི་སྤངས་རྟོགས་མ་རྫོགས་པར་ཐལ། དེས་བག་ལ་ཉལ་གྱི་ཉོན་སྒྲིབ་མ་སྤངས་པའི་ཕྱིར་ཏེ། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་ལེན་པ་མ་སྤངས་པའི་ཕྱིར། ཕྱི་མ་ལྟར་ན་ས་དང་པོ་ལ་གནས་པའི་བྱང་སེམས་དེས་ཉན་རང་གི་སྤངས་རྟོགས་རྫོགས་པར་ཐལ། དེས་འཁོར་བར་འཆིང་བྱེད་ཀྱི་ཉོན་སྒྲིབ་ཟད་པར་སྤངས་པའི་ཕྱིར། ཡང་བྱང་སེམས་ཀྱི་བདག་མེད་བསྒོམས་པའི་ནུས་པ་ལས། ཉན་ཐོས་ཀྱི་བདག་མེད་བསྒོམས་པའི་ནུས་པ་ལྷག་པར་ཐལ། བྱང་སེམས་དེས་གང་ཟག་གི་བདག་མེད་མངོན་སུམ་དུ་རྟོགས་པའི་ཤེས་རབ་བསྐལ་པ་གྲངས་མེད་གཅིག་ཏུ་བསྒོམས་ཀྱང་ཉོན་སྒྲིབ་སྤོང་མ་ནུས་པ་གང་ཞིག ཉན་ཐོས་ཀྱིས་གང་ཟག་གི་བདག་མེད་མངོན་སུམ་དུ་རྟོགས་པའི་ཤེས་རབ་ཚེ་གཅིག་ལ་བསྒོམས་པས་ཉོན་སྒྲིབ་སྤོང་ནུས་པའི་ཕྱིར། འདིའི་དོན་ཕྱོགས་སྔ་དང་བསྟུན་ནས་འདི་ལྟར་འཆད་དགོས་པ་ཡིན་གྱི། བདག་མེད་རྟོགས་པའི་བློ་ཙམ་གྱི་ཡུན་རིང་ཐུང་ལ་བྱེད་ན། སྦྱོར་ལམ་ཆོས་མཆོག་ཆེན་པོ་ལ་གནས་པའི་བྱང་སེམས་ཀྱིས་བསྐལ་པ་གྲངས་མེད་གཅིག་ཏུ་བདག་མེད་བསྒོམས་ཀྱང་ཉོན་སྒྲིབ་སྤོང་མ་ནུས་པས། སྔར་གྱི་ཐལ་བ་དེ་རང་ལ་བཟློག་པར་འགྱུར་རོ། །བྱང་སེམས་སོ་སྐྱེའི་བདག་མེད་བསྒོམ་པའི་ནུས་པ་ལས་ཉན་རང་འཕགས་པའི་བདག་མེད་བསྒོམས་པའི་ནུས་པ་ལྷག་པར་ཐལ་བ་ནི་འདོད་དེ། སྔོན་མས་མངོན་སུམ་མ་རྟོགས་ཤིང་། ཕྱི་མས་མངོན་སུམ་རྟོགས་པའི་ཕྱིར། གནད་འདི་ནི་ཁོ་བོ་འབའ་ཞིག་གིས་རྟོགས་པས་ཕྱིན་ཆད་གཞན་གྱིས་སྨྲ་བ་རྣམས་ནི་རྐུས་པའམ། བླངས་པ་འབའ་ཞིག་ཏུ་ཟད་དོ། །ཊཱི་ཀའི་ལུགས་དེ་ལྟར་ཡིན་པ་ལ། དར་ཊཱིཀ་པ་ན་རེ། ཉན་རང་དགྲ་བཅོམ་པས་བག་ལ་ཉལ་གྱི་ཉོན་སྒྲིབ་མ་སྤངས་པ་མི་འཐད་དེ། དེས་ཉོན་སྒྲིབ་ཀྱི་ས་བོན་སྤངས་པར་ཤིང་རྟ་ཆེན་པོ་དག་གིས་བཤད་པའི་ཕྱིར། གཞན་དུ་ན། ཉོན་སྒྲིབ་ཀྱི་ས་བོན་ཟད་པར་མ་སྤངས་ན། ཉན་ཐོས་ཀྱི་མཐོང་ལམ་དེས་ཉོན་སྒྲིབ་ཀུན་བཏགས་ཀྱི་ས་བོན་ཟད་པར་མ་སྤངས་པར་འགྱུར་ཞིང་། འདོད་ན། ཉན་ཐོས་སློབ་པ་འཕགས་པ་རྣམས་དགེ་འདུན་དཀོན་མཆོག་མིན་པར་འགྱུར་རོ། །ཉན་རང་དགྲ་བཅོམ་པས་བག་ལ་ཉལ་གྱི་ཉོན་སྒྲིབ་མ་སྤངས་པའི་ཤེས་བྱེད་དུ། དེས་མ་རིག་བག་ཆགས་ཀྱིས་མ་སྤངས་པ་བཀོད་པ་ལ་འབྲེལ་མེད་དེ། མ་རིག་བག་ཆགས་ཀྱིས་དེ་བག་ལ་ཉལ་གྱི་ཉོན་སྒྲིབ་མིན་པའི་ཕྱིར་ཏེ། དེ་ཤེས་སྒྲིབ་ཡིན་པའི་ཕྱིར་ཞེས་བཀག་ནས། རང་ལུགས་ལ། དེས་བག་ལ་ཉལ་གྱི་ཉོན་སྒྲིབ་ཟད་པར་སྤངས་ཤིང་། བྱང་སེམས་འཕགས་པས་དེ་མ་སྤངས་པས། དམན་ལམ་སྔོན་དུ་མ་སོང་བའི་བྱང་སེམས་ཀྱིས་ཉན་རང་གི་སྤངས་རྟོགས་རྫོགས་པ་དང་། རྣམ་མཁྱེན་ཐོབ་པ་དུས་མཉམ་ཟེར་རོ། །འོ་ན་ཉན་རང་དགྲ་བཅོམ་པས་བག་ལ་ཉལ་གྱི་ཉོན་སྒྲིབ་ཟད་པར་སྤངས་པ་འཐད་པའི་ཤེས་བྱེད་དུ། ཉོན་སྒྲིབ་ཀྱི་ས་བོན་ཟད་པར་སྤངས་པ་བཀོད་པ་ལ་ཡང་འབྲེལ་མེད་དེ། བག་ལ་ཉལ་གྱི་ཉོན་སྒྲིབ་དེ་ཉོན་སྒྲིབ་ཀྱི་ས་བོན་མ་ཡིན་པའི་ཕྱིར་ཏེ། ཉོན་སྒྲིབ་ཀྱི་བག་ཆགས་དེ་ཉོན་སྒྲིབ་མིན་པའི་ཕྱིར། མ་གྲུབ་ན། མ་རིག་བག་ཆགས་ཀྱི་ས་དེ་མ་རིག་པའི་ས་བོན་ཡིན་པར་ཐལ། མ་གྲུབ་པ་དེའི་ཕྱིར། འདོད་ན། དེ་ཆོས་ཅན། མ་རིག་པའི་ས་བོན་མིན་པར་ཐལ། ཉོན་སྒྲིབ་ཀྱི་ས་བོན་མིན་པའི་ཕྱིར་ཏེ། ཤེས་སྒྲིབ་ཡིན་པའི་ཕྱིར། རྟག་ཁྱབ་ཁས། ཉན་ཐོས་སློབ་པ་འཕགས་པ་རྣམས་དགེ་འདུན་དཀོན་མཆོག་མིན་པར་ཐལ། ཉན་ཐོས་ཀྱི་མཐོང་ལམ་དེས་ཉོན་སྒྲིབ་ཀུན་བརྟགས་ཀྱི་ས་བོན་ཟད་པར་མ་སྤངས་པའི་ཕྱིར། མ་གྲུབ་ན། དེར་ཐལ། ཉན་ཐོས་མཐོང་ལམ་པ་དེས་དེ་མ་སྤངས་པའི་ཕྱིར་ཏེ། ཉན་ཐོས་མཐོང་ལམ་པ་དེ་དེའི་དངོས་གཉེན་རྒྱུད་ལྡན་གྱི་གང་ཟག་ཡིན་པའི་ཕྱིར། མ་རིག་བག་ཆགས་ཀྱི་ས་བོན་བག་ལ་ཉལ་གྱི་ཉོན་སྒྲིབ་ཡིན་པར་ཐལ། བྱང་སེམས་འཕགས་པས་ཆེད་དུ་གཉེར་ནས་མི་སྤོང་རྒྱུའི་སྒྲིབ་པའི་བག་ཆགས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། བྱང་སེམས་འཕགས་པ་གཞན་དོན་དུ་སྐྱེ་བ་ལེན་པའི་རྒྱུར་གྱུར་པའི་སྒྲིབ་པའི་བག་ཆགས་ཡིན་པའི་ཕྱིར། ཡང་མ་རིག་བག་ཆགས་ཀྱི་ས་དེ་ཤེས་སྒྲིབ་ཡིན་པར་ཐལ། འཇུག་འགྲེལ་ལས། དེ་ལ་མ་རིགས་པའི་བག་ཆགས་ནི་ཤེས་བྱ་ཡོངས་སུ་གཅོད་པའི་གེགས་སུ་གྱུར་པའོ་ཞེས་གསུངས་པའི་ཕྱིར་ཞེ་ན་བདེན་མོད། བག་ལ་ཉལ་གྱི་ཉོན་སྒྲིབ་དེ་ཡང་ཤེས་སྒྲིབ་ཏུ་ཐལ། རྒྱུད་བླར། ཤེས་སྒྲིབ་ངོས་འཛིན་དུས། ཉེ་བའི་ཉོན་མོངས་བག་ཆགས་སོ། །ཞེས་གསུངས་པའི་ཕྱིར། ཁ་ཅིག དམན་ལམ་སྔོན་དུ་མ་སོང་བའི་དབང་དུ་བྱས་ན་ཉན་རང་དགྲ་བཅོམ་གྱི་སྤངས་རྟོགས་ཀྱི་རིགས་རྫོགས་པ་དང་། རྣམ་མཁྱེན་ཐོབ་པ་དུས་མཉམ་པ་ཡིན་ཏེ། ཉན་རང་དགྲ་བཅོམ་པས་ཉོན་སྒྲིབ་ཟད་པར་སྤངས་ཤིང་། དམན་ལམ་སྔོན་དུ་མ་སོང་བའི་བྱང་སེམས་འཕགས་པས་རྣམ་མཁྱེན་མ་ཐོབ་ཀྱི་བར་ཉོན་སྒྲིབ་མ་སྤངས་པའི་ཕྱིར་ཏེ། ཀུན་ལས་བཏུས་ལས། ཅིག་ཆར་ཉོན་མོངས་པ་དང་ཤེས་བྱའི་སྒྲིབ་པ་སྤོང་། ཅིག་ཆར་དགྲ་བཅོམ་པ་དང་དེ་པར་འགྱུར་རོ་ཞེས་གསུངས་པའི་ཕྱིར་ཞེ་ན། འཁོར་བར་འཆིང་བྱེད་ཀྱི་ཉོན་སྒྲིབ་སྤངས་ན། ཉོན་སྒྲིབ་ཟད་པར་སྤངས་པས་ཁྱབ་པར་ཐལ། ཉན་ཐོས་དགྲ་བཅོམ་པས་ཉོན་སྒྲིབ་ཟད་པར་སྤངས་པ་གང་ཞིག དེས་བག་ལ་ཉལ་གྱི་ཉོན་སྒྲིབ་ཟད་པར་མ་སྤངས་པའི་ཕྱིར། འདོད་ན། ཁས་བླངས་ཏེ། དམན་ལམ་སྔོན་དུ་མ་སོང་བའི་བྱང་འཕགས་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། རྒྱུད་བླར། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཅེས་གསུངས་པའི་ཕྱིར། གཞན་ཡང་། བྱང་འཕགས་ཀྱི་རྒྱུད་ཀྱི་འཁོར་བར་འཆིང་བྱེད་ཀྱི་ཉོན་མོངས་པ་ཆོས་ཅན། བྱང་འཕགས་ཀྱིས་ཆེད་དུ་གཉེར་ནས་མི་སྤོང་རྒྱུའི་ཉོན་མོངས་པ་ཡིན་པར་ཐལ། བྱང་འཕགས་ཀྱི་རྒྱུད་ཀྱི་ཉོན་སྒྲིབ་ཡིན་པའི་ཕྱིར། རྟགས་དང་ཆོས་ཅན་ཁས། འདོད་ན། བྱང་འཕགས་གཞན་དོན་དུ་འཁོར་བར་སྐྱེ་བའི་རྒྱུར་གྱུར་པའི་ཉོན་མོངས་པ་ཡིན་པར་ཐལ། འདོད་པའི་ཕྱིར། འདོད་ན། བྱང་འཕགས་ཆོས་ཅན། ལས་ཉོན་གྱིས་དབང་གིས་འཁོར་བར་སྐྱེ་བ་ཡིན་པར་ཐལ། ཁྱོད་ཀྱི་རྒྱུད་ཀྱི་འཁོར་བར་འཆིང་བྱེད་ཀྱི་ཉོན་མོངས་པ་དེ་ཁྱོད་གཞན་དོན་དུ་འཁོར་བར་སྐྱེ་བ་ལེན་པའི་རྒྱུར་གྱུར་པའི་ཉོན་མོངས་པ་ཡིན་པའི་ཕྱིར་རོ། །ཁ་ཅིག ཉན་རང་དགྲ་བཅོམ་གྱི་སྤངས་རྟོགས་ཀྱི་རིགས་ས་དང་པོ་ནས་རྫོགས་ཀྱང་། དེ་དང་བྱང་སེམས་འཕགས་པ་གཉིས་ཆར་གྱི་ཉོན་སྒྲིབ་ཟད་པར་མ་སྤངས་ཏེ། བག་ལ་ཉལ་གྱི་ཉོན་སྒྲིབ་ཟད་པར་མ་སྤངས་པའི་ཕྱིར་ཞེ་ན། ཉན་རང་དགྲ་བཅོམ་པ་ཆོས་ཅན། དགྲ་བཅོམ་གྱི་འབྲས་བུ་མ་ཐོབ་པར་ཐལ། ཉོན་སྒྲིབ་མ་སྤངས་པའི་ཕྱིར། ཁྱབ་སྟེ། ཤེས་སྒྲིབ་མ་སྤངས་ན་ཐམས་ཅད་མཁྱེན་པ་མ་ཐོབ་པས་ཁྱབ་པའི་ཕྱིར། གཉིས་པ་ནི། ཤེར་ཕྱིན་གྱི་མདོའི་དངོས་བསྟན་ལ་རྣམ་ཤེས་ཚོགས་དྲུག་ལས་མ་གསུངས་ཤིང་། དེ་ཉིད་དབུ་མར་འགྲེལ་པ་མངོན་རྟོགས་རྒྱན་གྱིས་སྤངས་རྟོགས་འཆད་པའི་ཚེ་ཉན་རང་གི་སྤངས་རྟོགས་རིགས་ས་དང་པོ་ནས་རྫོགས་ཏེ། དེའི་ཚེ་ཉོན་ཡིད་ཁས་མི་ལེན་ཅིང་། གཉིས་ཀས་ཀྱང་འཁོར་བར་འཆིང་བྱེད་ཀྱི་ཉོན་སྒྲིབ་སྤངས། བག་ལ་ཉལ་གྱི་ཉོན་སྒྲིབ་མ་སྤངས་པར་མཚུངས་པའི་ཕྱིར་དང་། གང་ཟག་གི་བདག་མེད་རྟོགས་པའི་དགོས་པ་མཐར་ཐུག་པ་ནི་འཁོར་བར་འཆིང་བྱེད་ཀྱི་ཉོན་སྒྲིབ་སྤོང་བ་དང་། གཞན་དོན་དུ་རྟོགས་རིགས་མངོན་སུམ་དུ་ཤེས་པ་གཉིས་སུ་འདུས་ཤིང་། དེ་གཉིས་ཀ་ཡང་ས་དང་པོ་ནས་ཐོབ་པའི་ཕྱིར། ཉོན་ཡིད་ཀྱི་རྣམ་གཞག་ནི། མདོ་སྡེ་རྒྱན་དང་སུམ་ཅུ་པའི་རབ་བྱེད་སོགས་སེམས་ཙམ་པའི་གཞུང་རྣམས་ལས་བཤད་པ་ཡིན་ལ། དེ་ཁས་ལེན་པའི་ཚེ་ས་དང་པོ་ནས་ཉན་རང་གི་སྤངས་རྟོགས་མ་རྫོགས་ཏེ། གཞུང་དེ་དག་ལས་དགྲ་བཅོམ་ཐོབ་པའི་ཚེ་ཉོན་ཡིད་སྤངས་པར་གསུང་ཞིང་། ཐེག་ཆེན་གྱིས་ས་བརྒྱད་པ་མ་ཐོབ་བར་དུ་མ་སྤངས་པ་གསུངས་པའི་ཕྱིར། ཤེར་ཕྱིན་གྱི་དགོངས་པ་དབུ་མར་འགྲེལ་བའི་ཚེ་ས་དང་པོ་ནས་ཉན་རང་གི་སྤངས་རྟོགས་རྫོགས་པའི་ཤེས་བྱེད་གང་ཞེ་ན། རྒྱུད་བླར། ས་དང་པོ་ནས་འཁོར་བར་འཆིང་བྱེད་ཀྱི་ཉོན་སྒྲིབ་སྤངས་པར་གསུངས་པ་དང་། མདོ་ལས། རྒྱུན་དུ་ཞུགས་པ་ནས་རང་སངས་རྒྱས་ཀྱི་ཤེས་པ་དང་སྤོང་བ་གང་ཡིན་པ་དེ་ནི། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའི་བཟོད་པ་ཡིན་ཏེ། ཞེས་པའི་འགྲེལ་པར། ཉིར་སྣང་ལས། བཟོད་པ་དེ་ཡང་གང་ཞེ་ན། སྡུག་བསྔལ་ལ་ཆོས་ཤེས་པའི་བཟོད་པའོ། །འདི་གང་ལས་ཤེས་ཞེ་ན། ལམ་གཞན་ཁྱད་པར་ཡོད་པ་ཡིན་ན། རིགས་དང་། དབང་པོ་དང་། ཚོགས་ཁྱད་ཞུགས་པར་འགྱུར་བའི་ཕྱིར། བྱང་ཆུབ་སེམས་དཔའི་བཟོད་པའི་བྱེད་པར་གཞན་རྣམས་ཀྱི་རྟོགས་པའི་བྱེད་པ་མ་ལུས་པར་འདུས་པར་འགྱུར་བའི་ཕྱིར། དེ་དག་གི་ཤེས་པ་དང་སྤངས་པ་གང་ཡིན་པ་དེའི་བཟོད་པ་ཡིན་གྱི། རྟོགས་པའི་ཚད་འདི་ཙམ་མིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ། །ཞེས་གསུངས་པ་འདི། མངོན་རྟོགས་རྒྱན་གྱི་དགོངས་པ་འགྲེལ་པ་ལ་ཚད་མ་ཡིན་པའི་ཕྱིར་རོ། །འདིའི་དོན་ལ། དར་ཊཱིཀ་པ་ན་རེ། བྱང་ཆུབ་སེམས་དཔའི་བཟོད་པའི་བྱེད་པར་ཞེས་པའི་དོན་ནི། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཀྱི་བྱེད་པར་ཉན་རང་གི་གང་ཟག་གི་བདག་མེད་རྟོགས་པའི་བྱེད་པ་མ་ལུས་པར་འདུས་པའི་དོན་ཡིན་ལ། རྟོགས་པའི་ཚད་འདི་ཙམ་མིན་ནོ་ཞེས་པའི་དོན་ནི་གང་ཟག་གི་བདག་མེད་རྟོགས་པའི་ནུས་པ་མ་ལུས་པ་མཐོང་ལམ་དུ་མ་རྫོགས་ཞེས་པའི་དོན་ཡིན་ནོ་ཞེས་སྨྲ་བ་ནི་ཁས་བླངས་འགལ་ཏེ། བྱང་སེམས་ཀྱི་མཐོང་ལམ་རྣམ་གྲོལ་ལམ་གྱི་གནས་སྐབས་སུ་བག་ལ་ཉལ་གྱི་ཉོན་སྒྲིབ་སྤངས་པར་ཐལ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཀྱི་བྱེད་པར་ཉན་རང་གི་གང་ཟག་གི་བདག་མེད་རྟོགས་པའི་བྱེད་པ་མ་ལུས་པ་འདུས་པ་གང་ཞིག དེའི་བྱེད་པ་དེས་བག་ལ་ཉལ་གྱི་ཉོན་སྒྲིབ་སྤོང་ནུས་པའི་ཕྱིར། རྟགས་གཉིས་ཁས་སོ། །དེས་ན་ལུང་དེའི་དོན། གང་ཟག་གི་བདག་མེད་རྟོགས་པའི་དགོས་པ་མཐར་ཐུག་པ་ནི། སྔར་བཤད་པ་ལྟར་གྱི་གཉིས་པོ་དེ་ཡིན་པས། དེ་བྱང་སེམས་ཀྱི་ས་མཐོང་ལམ་དུ་ཐོབ་ཞེས་པའི་དོན་ཡིན་ལ། ས་དང་པོའི་རྟོགས་པའི་ཚད་ནི་དེ་ཙམ་མིན་ཏེ། ཐེག་ཆེན་གྱི་རྟོགས་རིགས་ཀྱི་ཁྱད་པར་འཕགས་པའི་ཕྱིར་ཞེས་པའི་དོན་ནོ། །གསུམ་པ་ལ་གསུམ་ལས། དང་པོ་སྨོན་ལམ་རྫོགས་པའི་ཚད་ལ། དགག་གཞག་གཉིས། དང་པོ་ནི། མཁན་ཆེན་པ་ན་རེ། ཆོས་དབྱིངས་ལས་རྟག་ཏུ་མཉམ་པར་གཞག་པ་ལས་མ་གཡོས་བཞིན་དུ་གཞན་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག་ཅེས་པའི་སྨོན་ལམ་གྲུབ་པ་ལ་བྱེད་གསུངས་པ་ལ་དར་ཊཱིཀ་པ་ན་རེ། རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་དུ་མ་བྱེད་ཅིག་ཅེས་གདམས་པ་དེ་ཆོས་སྐུ་མངོན་དུ་མ་བྱས་ཀྱི་གོང་དུ་ཆོས་སྐུ་མངོན་དུ་མ་བྱེད་ཅིག་ཅེས་པའི་དོན་ཡིན་པར་ཐལ། སྨོན་ལམ་རྫོགས་པའི་ཚད་དེ་ལ་འཇོག་པ་འཐད་པའི་ཕྱིར་ཞེས་བཀག་ནས། རང་ལུགས་བདག་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་མངོན་ཤེས་དང་མི་ལྡན་པའི་སེམས་ཅན་མེད་པ་ལྟ་བུ་སྤྲུལ་སྐུའི་ཞིང་ཁྱད་པར་ཅན་དུ་དམ་བཅས་པའི་སྨོན་ལམ་ཡོངས་སུ་རྫོགས་པ་དང་། བདག་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་འཁོར་དུ་ཐེག་པ་ཆེན་པོའི་འཕགས་པ་ཤ་སྟག་འབྱུང་བའི་ནུས་པ་ཐོབ་པ་ལྟ་བུ་ལོངས་སྐུའི་ཞིང་ཁྱད་པར་ཅན་གྱི་ཆེད་དུ་དམ་བཅས་པའི་སྨོན་ལམ་ཡོངས་སུ་རྫོགས་པ་ལ་བྱེད་ཟེར་བ་ལ་ནི་སྔ་མ་བཞིན་འཕངས་པས་འཁོར་གསུམ་དུ་འགྱུར་རོ། །ཡང་ཤཱཀྱ་ཐུབ་པས་སྤྲུལ་སྐུའི་ཞིང་ཁྱད་པར་ཅན་གྱི་ཆེད་དུ་དམ་བཅས་པའི་སྨོན་ལམ་ཡོངས་སུ་མ་རྫོགས་པར་ཐལ། དེ་སངས་རྒྱས་པའི་ཞིང་ན་མངོན་ཤེས་དང་མི་ལྡན་པའི་སེམས་ཅན་ཡོད་པའི་ཕྱིར། འདོད་ན། དེ་སྨོན་ལམ་ཡོངས་སུ་མ་རྫོགས་པར་ཐལ་ལོ། །ཡང་ཁ་ཅིག སྨོན་ལམ་ཐམས་ཅད་རྫོགས་པ་ལ་བྱེད་ཟེར་ན། ཤཱཀྱ་ཐུབ་པ་ཆོས་ཅན། སེམས་ཅན་ཐམས་ཅད་སངས་རྒྱས་ཟིན་པར་ཐལ། ཁྱོད་ཀྱིས་སེམས་ཅན་ཐམས་ཅད་སངས་རྒྱ་བར་གྱུར་ཅིག་ཅེས་པའི་སྨོན་ལམ་བཏབ་པ་ནི་གང་ཞིག ཁྱོད་ཀྱི་སྨོན་ལམ་ཐམས་ཅད་ཡོངས་སུ་རྫོགས་པ་ཡིན་པའི་ཕྱིར། དེ་ལ་ཁ་ཅིག ཤཱཀྱ་ཐུབ་པའི་སྨོན་ལམ་ཐམས་ཅད་ཡོངས་སུ་རྫོགས་པར་ཐལ། དེའི་རྒྱུད་ཀྱི་སྨོན་ལམ་ཐམས་ཅད་ཡོངས་སུ་རྫོགས་པ་ཡིན་པའི་ཕྱིར་ཏེ། དེའི་རྒྱུད་ཀྱི་སྨོན་ལམ་ཐམས་ཅད་ཡོངས་སུ་རྫོགས་པའི་སྨོན་ལམ་ཡིན་པའི་ཕྱིར། མ་གྲུབ་ན། ཤཱཀྱ་ཐུབ་པའི་རྒྱུད་ཀྱི་སྨོན་ལམ་ཐམས་ཅད་ཆོས་ཅན། ཡོངས་སུ་རྫོགས་པའི་སྨོན་ལམ་ཡིན་པར་ཐལ། མཐར་ཐུག་པའི་སྨོན་ལམ་ཡིན་པའི་ཕྱིར་ཞེ་ན། ཤཱཀྱ་ཐུབ་པའི་མཛད་པ་ཐམས་ཅད་ཡོངས་སུ་རྫོགས་པར་ཐལ། དེའི་རྒྱུད་ཀྱི་མཛད་པ་ཐམས་ཅད་ཡོངས་སུ་རྫོགས་པའི་ཕྱིར། འདོད་ན། རྒྱུད་བླར། མཛད་པ་ཡོངས་སུ་མ་རྫོགས་དང་། །ཞེས་པ་དང་འགལ་ལོ། །མ་གྲུབ་ན་སྔ་མ་བཞིན་བསྒྲེའོ། །གཉིས་པ་ནི། སྨོན་ལམ་གྱི་གཙོ་བོ་ནི་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་གྱུར་ཅིག་ཅེས་པའི་སྨོན་ལམ་ཡིན་པས་དེ་རྫོགས་པ་ལ་བྱེད་དེ། སྨོན་ལམ་གྱི་མཆོག་ཡོངས་སུ་རྫོགས་པ་ཉིད་ཀྱི་དབུ་ཤིན་ཏུ་རྒྱས་པ་ཉིད་དང་ཞེས་སོ། །གཉིས་པ་སེམས་ཅན་སྨིན་པའི་ཚད་ལ། དགག་གཞག་གཉིས། དང་པོ་ནི། ཁ་ཅིག སེམས་ཅན་ཐམས་ཅད་སྒྲིབ་པ་སྤོང་རུང་དང་གཉེན་པོ་སྐྱེ་རུང་དུ་བྱས་པ་ལ་བྱེད་ཟེར། འོ་ན་སེམས་ཅན་ཐམས་ཅད་སྨིན་ཟིན་པར་ཐལ། སེམས་ཅན་ཐམས་ཅད་སྒྲིབ་པ་སྤོང་རུང་དང་དེ་སྐྱེ་རུང་ཡིན་པའི་ཕྱིར། ཁ་ཅིག སེམས་ཅན་ཐམས་ཅད་སྒྲིབ་པ་དངོས་སུ་སྤོང་རུང་དང་གཉེན་པོ་དངོས་སུ་སྐྱེ་རུང་དུ་བྱས་པ་ལ་བྱེད་ཟེར། འོ་ན་སེམས་ཅན་ཐམས་ཅད་སྨིན་པར་བྱས་པ་མི་སྲིད་པར་ཐལ། དེ་ལྟ་བུ་བྱས་པ་མི་སྲིད་པའི་ཕྱིར། ཁ་ཅིག རང་གི་སྐུ་དངོས་ཀྱི་གདུལ་བྱ་ཐམས་ཅད་སྒྲིབ་པ་དངོས་སུ་སྤོང་རུང་དང་གཉེན་པོ་དངོས་སུ་སྐྱེ་རུང་དུ་བྱས་པ་ལ་བྱེད་ཟེར་ན། ཤཱཀྱ་ཐུབ་པ་ཆོས་ཅན། སེམས་ཅན་སྨིན་པར་མ་བྱས་པར་ཐལ། དེ་ལྟ་བུ་མ་བྱས་པའི་ཕྱིར། མ་གྲུབ་ན་དེར་ཐལ། ཁྱོད་ཀྱི་སྐུ་དངོས་ཀྱི་གདུལ་བྱ་ཡང་ཡིན། ལམ་མ་ཞུགས་ཀྱི་གང་ཟག་ཡང་ཡིན་པའི་གཞི་མཐུན་ཡོད་པའི་ཕྱིར། ཁ་ཅིག རང་གི་སྐུ་དངོས་ཀྱི་གདུལ་བྱ་འགའ་ཞིག་སྒྲིབ་པ་དངོས་སུ་སྤོང་རུང་དང་གཉེན་པོ་དངོས་སུ་སྐྱེ་རུང་དུ་བྱས་པ་ལ་བྱེད་ཟེར་ན། ས་བཅུ་པ་ལ་གནས་པའི་བྱང་སེམས་ཆོས་ཅན། སེམས་ཅན་སྨིན་པར་བྱས་པར་ཐལ། དེ་ལྟར་བྱས་པའི་ཕྱིར་ཏེ། རྗེས་ཐོབ་ཏུ་གཞན་དོན་བྱེད་ཚུལ་སངས་རྒྱས་དང་མཚུངས་པའི་ཕྱིར། དར་ཊཱིཀ་པ་ན་རེ། དུས་སྐད་ཅིག་མ་གཅིག་ལ་ཞིང་བྱེ་བ་ཕྲག་བརྒྱར་སྐུའི་བཀོད་པ་གྲངས་དེ་སྙེད་སྟོན་ཞིང་། སྐུའི་བཀོད་པ་རེ་རེའི་འཁོར་དུ་སེམས་ཅན་ཚད་མེད་པ་ཚིགས་སུ་བཅད་པ་རེ་རེས་འཕགས་པའི་གོ་འཕང་ལ་འགོད་ནུས་པའི་ནུས་པ་ཐོབ་པ་ལ་བྱེད་ཟེར། འོ་ན་ས་བཅུའི་བྱང་སེམས་དེས་དེ་འདྲའི་ནུས་པ་ཐོབ་བམ་མ་ཐོབ། ཐོབ་ན་དེས་སེམས་ཅན་སྨིན་པར་བྱས་པར་ཐལ་ཅིང་། མ་ཐོབ་ན་དེའི་ནུས་པ་ཐོབ་ན་རྫོགས་པའི་སངས་རྒྱས་ཡིན་དགོས་པར་ཐལ། ས་བཅུའི་བྱང་སེམས་ཀྱི་ཀྱང་དེའི་ནུས་པ་མ་ཐོབ་པའི་ཕྱིར། འདོད་ན། གོང་དུ་སྨོན་ལམ་རྫོགས་པའི་ཚད་ལ་མཁན་ཆེན་པ་ལ་འཕངས་པའི་སྐྱོན་དེ་བརྗོད་པས་འཁོར་གསུམ་ཡིན་ནོ། །ཡང་ས་བཅུ་པ་ལ་གནས་པའི་བྱང་སེམས་དེས་དེ་ཐོབ་པར་ཐལ། འཇུག་པ་ལས། རེ་ཞིག་བཅུ་པ་འདིར་དེའི་ཡོན་ཏན་དག །ངག་གི་སྤྱོད་ཡུལ་ལས་ཆེས་འདས་གྱུར་ཞིང་། །ངག་གི་སྤྱོད་ཡུལ་མ་ཡིན་སྡོམས་རྣམས་ན། །རྡུལ་དག་ཇི་སྙེད་ཡོད་པ་དེ་སྙེད་འགྱུར། །ཞེས་གསུངས་པའི་ཕྱིར། གཉིས་པ་ལ། སེམས་ཅན་སྨིན་པའི་ཚད་དང་། སྨིན་པར་བྱས་པའི་ཚད་གཉིས་ལས། དང་པོ་ནི། སེམས་ཅན་གང་དང་གང་གི་རྒྱུད་ལ་སྤང་བྱ་མཐོང་སྤངས་སུ་གྱུར་པའི་སྒྲིབ་པ་དངོས་སུ་སྤོངས་རུང་དང་། གཉེན་པོ་མཐོང་ལམ་དངོས་སུ་སྐྱེ་རུང་བ་ལ་བྱེད་ཅིང་། ཕྱི་མ་ནི་རང་ཉིད་སྤྲུལ་སྐུར་སངས་རྒྱས་ནས་ཆོས་འཁོར་བསྐོར་བའི་ཐོག་མའི་གདུལ་བྱ་དེ་ཉིད་སློབ་པ་ལམ་གྱི་གནས་སྐབས་སུ་ཆོས་བསྟན་པས་སྔ་མ་ལྟར་བྱས་པའོ། །གསུམ་པ་སངས་རྒྱས་ཀྱི་ཞིང་སྦྱང་བའི་ཚད་ལ། དགག་གཞག་སྤང་གསུམ་ལས། དང་པོ་ནི། དར་ཊཱིཀ་པ་ན་རེ། སྤྲུལ་སྐུའི་ཞིང་ཁྱད་པར་ཅན་དང་། ལོངས་སྐུའི་ཞིང་ཁྱད་པར་ཅན་འགྲུབ་པའི་རྒྱུར་གྱུར་པའི་དགེ་རྩ་ཡོངས་སུ་རྫོགས་པ་ལ་འདོད་པ་ནི། སྔར་སྨོན་ལམ་རྫོགས་པའི་ཚད་ཀྱི་སྐབས་བཞིན་དུ་འཕངས་པས་འཁོར་གསུམ་ཡིན་ནོ། །ཁ་ཅིག ཞིང་སྦྱང་བའི་ཚད་འདི་གཙོ་བོར་ལོངས་སྐུའི་དབང་དུ་བྱས་ནས་བཤད་རིགས་ཏེ། ཞིང་དག་སྦྱོར་བ་དེ་ལོངས་སྐུའི་ཐུན་མོང་མིན་པའི་རྒྱུ་ཡིན་པའི་ཕྱིར་ཞེ་ན། སངས་རྒྱས་ཀྱི་ཕྲིན་ལས་དེ་གཙོ་བོར་སྤྲུལ་སྐུའི་དབང་དུ་བྱས་ནས་འཆད་རིགས་པར་ཐལ། ཐབས་མཁས་སྦྱོར་བ་དེ་སྤྲུལ་སྐུའི་ཐུན་མོང་མིན་པའི་རྒྱུ་ཡིན་པའི་ཕྱིར། ཁ་ཅིག རྫོགས་སྨིན་སྦྱངས་པ་གསུམ་ཀ་ལོངས་སྐུ་ཁོ་ནའི་དབང་དུ་བྱས་པ་ཡིན་ཟེར་ན། སྤྲུལ་སྐུས་རྫོགས་སྨིན་སྦྱངས་པ་གསུམ་མ་བྱས་པར་ཐལ་ལོ། །གཉིས་པ་ནི། སངས་རྒྱས་རང་སྣང་ལ་སྣོད་བཅུད་ཀྱི་ཞིང་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བ་ནི་སངས་རྒྱས་ཀྱི་ཞིང་སྦྱངས་པའི་ཚད་ལགས་སོ། །གསུམ་པ་ནི། དར་ཊཱིཀ་པ་ན་རེ། མ་དག་པའི་སྣང་བ་དེ་ཆོས་ཅན། རྫོགས་པའི་སངས་རྒྱས་ཀྱིས་མངོན་སུམ་མ་གཟིགས་པར་ཐལ། སངས་རྒྱས་རང་སྣང་ལ་ཁྱོད་མ་ཤར་བའི་ཕྱིར། འདོད་ན། དེ་ཆོས་ཅན། ཁྱོད་མེད་པར་ཐལ། འདོད་པ་གང་ཞིག རྫོགས་པའི་སངས་རྒྱས་ཀྱིས་ཤུགས་ལ་མ་རྟོགས་པའི་ཕྱིར་ཞེས་དང་། ཁ་ཅིག སྣོད་བཅུད་ཀྱི་འཇིག་རྟེན་ཐམས་ཅད་དག་པ་ཡིན་པར་ཐལ། སངས་རྒྱས་ལ་དེ་དག་པར་སྣང་བའི་ཕྱིར། ཞེས་དང་། མ་དག་པའི་སྣོད་བཅུད་ཀྱི་འཇིག་རྟེན་ཆོས་ཅན། སངས་རྒྱས་ལ་ཁྱོད་སྣང་བར་ཐལ། དེ་ལ་ཁྱོད་དག་པར་སྣང་བའི་ཕྱིར། འདོད་ན། སངས་རྒྱས་རང་སྣང་ལ་སྣོད་བཅུད་ཀྱི་འཇིག་རྟེན་ཐམས་ཅད་དག་པ་རབ་འབྱམས་འབའ་ཞིག་ཏུ་སྣང་བ་བུད་དོ་ཞེས་ཟེར། དང་པོ་དེ་ལ་འཁྲུལ་པའི་སྣང་བ་ཆོས་ཅན། རྫོགས་པའི་སངས་རྒྱས་ཀྱིས་མངོན་སུམ་མ་གཟིགས་པར་ཐལ། སངས་རྒྱས་རང་སྣང་ལ་ཁྱོད་མ་ཤར་བའི་ཕྱིར། མ་གྲུབ་ན། དེར་ཐལ། དེས་དེ་ཟད་པར་སྤངས་པའི་ཕྱིར། རྩ་བར་འདོད་ན། དེ་མེད་པར་ཐལ་ལོ། །གཉིས་པ་ལ། ཤེས་བྱ་ཐམས་ཅད་མངོན་སུམ་ཡིན་པར་ཐལ། སངས་རྒྱས་ལ་ཤེས་བྱ་ཐམས་ཅད་མངོན་སུམ་དུ་སྣང་བའི་ཕྱིར་རོ། །གསུམ་པ་ལ། རོ་མི་ཞིམ་པ་ཆོས་ཅན། ལོངས་སྐུ་ལ་ཁྱོད་སྣང་བར་ཐལ། དེ་ལ་ཁྱོད་རོའི་མཆོག་ཏུ་སྣང་བའི་ཕྱིར། འདོད་ན། ལོངས་སྐུ་ལ་རོ་ཐམས་ཅད་ཞིམ་པའི་མཆོག་ཏུ་སྣང་བ་མིན་པར་ཐལ། འདོད་པ་དེའི་ཕྱིར། ཁྱབ་པ་ཁས། རྩ་བའི་རྟགས་མ་གྲུབ་པ་དང་། འདིར་འདོད་པ་གཉིས་ཀ་ལ། འདི་ལ་རོ་མི་ཞིམ་པ་རོ་མཆོག་སྣང་། །ཞེས་པའི་དོན་དྲི་བར་བྱའོ། །བཞི་པ་ལ། ཡང་དག་མཐའ་ངོས་གཟུང་བ་དང་། དེ་མངོན་སུམ་བྱས་པའི་ཚད་གཉིས། དང་པོ་ལ་དགག་གཞག་གཉིས། དང་པོ་ནི་ཁ་ཅིག འདིར་བསྟན་ཡང་དག་མཐའ་ལ་འདུས་བྱས་ཡང་དག་མཐའ་དང་། འདུས་མ་བྱས་ཡང་དག་མཐའ་གཉིས་ལས། དང་པོ་ནི། ཡེ་ཤེས་ཆོས་སྐུ། ཕྱི་མ་གློ་བུར་དྲི་བྲལ་གྱི་ཆོས་དབྱིངས་ཡིན་ཟེར་ན། བྱང་འཕགས་ཀྱིས་རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་སུམ་བྱས་པ་མི་སྲིད་པར་ཐལ། དེས་དེ་མ་བྱས་པར་དེ་གཉིས་མངོན་དུ་བྱས་པ་མི་སྲིད་པའི་ཕྱིར། འདོད་ན། རྫོགས་པའི་སངས་རྒྱས་ཀྱིས་བྱང་སེམས་འཕགས་པ་རྣམས་ལ་རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་དུ་མ་བྱེད་ཅིག་ཅེས་གདམས་པ་དགོས་མེད་དུ་ཐལ་ལོ། །ཡང་ཡེ་ཤེས་ཆོས་སྐུ་ཆོས་ཅན། འདུས་བྱས་མིན་པར་ཐལ། ཡང་དག་མཐའ་ཡིན་པའི་ཕྱིར། ཁྱབ་སྟེ། རྒྱུད་བླར། ཡང་དག་མཐའ་ནི་འདུས་བྱས་ཀྱིས། །རྣམ་པ་ཐམས་ཅད་དབེན་པ་སྟེ། །ཞེས་གསུངས་པའི་ཕྱིར། ཁ་ཅིག་ཡང་དག་མཐའ་དེ་དམན་པའི་མྱང་འདས་ལ་བྱེད་དེ། སྐྱོན་གྱི་སྐབས་སུ། འགྲེལ་ཆེན་ལས་ཡང་དག་པའི་མཐའ་མངོན་དུ་བྱེད་ཅིང་ཞེས་པ་ནི་ཉན་ཐོས་ཀྱི་མྱ་ངན་ལས་འདས་པ་ཐོབ་པར་བྱེད་པའོ་ཞེས་དང་། གནོད་འཇོམས་ལས། ཐམས་ཅད་ཤེས་པ་ཉིད་ཀྱི་ཡུལ་ཉན་ཐོས་དང་རང་རྒྱལ་གྱིས་མྱ་ངན་ལས་འདས་པ་ནི་ཡང་དག་པའི་མཐའ་སྟེ་ཞེས་གསུངས་པའི་ཕྱིར་ཞེས་ཟེར། དེ་ལ་གཞན་དག་ན་རེ། ཉན་ཐོས་དགྲ་བཅོམ་པ་ཆོས་ཅན། རྫོགས་སྨིན་སྦྱངས་གསུམ་བྱས་པར་ཐལ། ཡང་དག་མཐའ་མངོན་དུ་བྱས་པའི་ཕྱིར། རྟགས་ཁས། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ས་བརྒྱད་པའི་བྱང་སེམས་ཆོས་ཅན། གཞན་དོན་རྒྱུན་ཆད་པར་འགྱུར་བར་ཐལ། རྫོགས་སྨིན་སྦྱངས་གསུམ་མ་བྱས་པ་ཡང་དག་མཐའ་མངོན་དུ་བྱས་པའི་ཕྱིར། རྟགས་ཁྱབ་ཁས། ཞེས་སུན་འབྱིན་སྨྲའོ། །མི་འཐད་དེ་སྔར་ལྟར་གདམས་པ་ལ་དགོས་པ་མེད་པར་ཐལ། ཐལ་འགྱུར་དང་པོ་ལ་ཁྱབ་པ་ཡོད་པའི་ཕྱིར། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ས་བརྒྱད་པའི་བྱང་སེམས་ཆོས་ཅན། གཞན་དོན་རྒྱུན་ཆད་པར་འགྱུར་བར་ཐལ། ཆོས་གསུམ་མ་བྱས་པར་དམན་པའི་མྱང་འདས་མངོན་དུ་བྱས་པའི་ཕྱིར། ཁྱབ་པ་ཁས། ལུགས་སྔ་མ་ཡང་མི་འཐད་དེ། བྱང་སེམས་འཕགས་པས་ཆོས་གསུམ་བྱས་ནས་དམན་པའི་མྱང་འདས་མངོན་དུ་བྱེད་པར་ཐལ། དམན་པའི་མྱང་འདས་དེ་འདིར་བསྟན་ཡང་དག་མཐའ་ཡིན་པའི་ཕྱིར། ཁྱབ་སྟེ། ཡང་དག་པ་ཉིད་ཀྱི་མཐའ་རྟོགས་པ་དང་ཞེས་གསུངས་པའི་ཕྱིར། ཁ་ཅིག ཡང་དག་མཐའ་དེ་ཐེག་པ་ཆེ་ཆུང་གི་མྱང་འདས་ཙམ་ལ་བྱེད་དེ། མདོ་ལས། ཡང་དག་པའི་མཐའ་ཞེས་བྱ་བ་ནི་མྱ་ངན་ལས་འདས་པའི་ཚིག་བླ་དྭགས་སོ་ཞེས་དང་། ཆོས་བཤེས་ཀྱི་ཡང་དག་པའི་མཐའ་མངོན་དུ་བྱེད་ཅིང་ཞེས་པ་ནི་གང་ཟག་གི་བདག་མེད་པའི་མཐའ་ཞི་བ་ཉིད་དེ་ཞེས་གསུངས་པའི་ཕྱིར་ཞེས་ཟེར་རོ། །འོ་ན་ས་བརྒྱད་པའི་བྱང་སེམས་དེས་ཆོས་གསུམ་མ་བྱས་པར་ཡང་དག་མཐའ་མངོན་དུ་བྱས་པ་མི་སྲིད་པར་ཐལ། དེས་དེ་མ་བྱས་པར་དམན་པའི་མྱང་འདས་མངོན་དུ་བྱས་པ་ཡང་མེད། ཐེག་ཆེན་གྱི་མྱང་འདས་མངོན་དུ་བྱས་པ་ཡང་མི་སྲིད་པའི་ཕྱིར། གལ་ཏེ་ཕྱི་མ་མ་གྲུབ་སྟེ། དེའི་རྒྱུད་ཀྱི་འགོག་བདེན་དེ་ཐེག་ཆེན་གྱི་མྱང་འདས་ཡིན་པའི་ཕྱིར་ཞེ་ན། འོ་ན་ས་བརྒྱད་པའི་བྱང་སེམས་ཡིན་ན། ཆོས་གསུམ་མ་བྱས་པར་ཡང་དག་མཐའ་མངོན་དུ་བྱས་པས་ཁྱབ་པར་ཐལ། དེ་ཡིན་ན་ཆོས་གསུམ་མ་བྱས་པར་ཐེག་ཆེན་གྱི་མྱང་འདས་མངོན་དུ་བྱས་པས་ཁྱབ་པའི་ཕྱིར། རྟགས་ཁྱབ་ཁས། གཉིས་པ་ནི། ཡང་དག་མཐའ་ནི་སྤྲོས་བྲལ་གྱི་ཆོས་དབྱིངས་ཙམ་ལ་བྱེད་པ་ཡིན་ཏེ། འདིར་བཤད་པའི་ཡང་དག་པའི་མཐའ་དང་། མདོ་སྡེ་ས་བཅུ་པ་ནས་བཤད་པའི་འགོག་པ་དང་། གཞན་ཡང་དེ་བཞིན་ཉིད་དང་། ཆོས་དབྱིངས་དང་། མཚན་མ་མེད་པ། དོན་དམ་པ་རྣམས་རྣམ་གྲངས་ཡིན་པའི་ཕྱིར་ཏེ། ཡང་དག་པའི་མཐའ་མངོན་དུ་མི་བྱའོ་ཞེས་པའི་མདོ་འཆད་པའི་ཚེ། དེ་ཁོ་ན་ཉིད་མངོན་སུམ་དུ་མི་བྱེད་པའི་རྟེན་ཅན་ཞེས་དང་། སྦྱོར་བའི་སྐབས་སུ་འགྲེལ་ཆེན་ལས། ཡང་དག་པའི་མཐའ་ནི་ཆོས་ཀྱི་དབྱིངས་ཡིན་ལ། ཞེས་དང་། འཇུག་པར། དེ་བཞིན་ཉིད་དང་ཡང་དག་མཐའ། །དེ་བཞིན་དངོས་པོའི་སྟོང་ཉིད་དོ། །ཞེས་དང་། དབུས་མཐར། སྟོང་པ་ཉིད་དེ་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་དང་། འཇུག་འགྲེལ་ལས། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས། དེ་བཞིན་ཉིད་ལ་འགོག་པ་ཞེས་བྱ་སྟེ། འདིར་སྤྲོས་པ་ཐམས་ཅད་འགག་པར་འགྱུར་བའི་ཕྱིར་ཞེས་སོ། །མདོར་ན། བྱམས་ཆོས་འདིར་ཆོས་ཀྱི་བདག་མེད་ཀྱི་ཐ་སྙད་མཛད་པའི་བྱང་སེམས་རང་གི་རྟོགས་བྱའི་ཡུལ་ཐུན་མོང་མིན་པ་སྤྲོས་པ་མཐའ་དག་དང་བྲལ་བའི་དེ་བཞིན་ཉིད་ལ་གཟུང་བར་བྱ་བ་ཡིན་གྱི། བདེན་པ་བཀག་ཙམ་གྱི་མེད་དགག་ལ་ཆོས་ཉིད་དུ་བྱས་པ་འདི་མིན་ནོ། །གཉིས་པ་ལ་དགག་གཞག་སྤང་གསུམ་ལས། དང་པོ་ནི། ཁ་ཅིག ཆོས་དབྱིངས་ལ་དུས་རྟག་ཏུ་མཉམ་པར་བཞག་པ་ལ་བྱེད་ཟེར། འོ་ན་ས་བརྒྱད་པའི་བྱང་སེམས་ཀྱིས་འདིར་བསྟན་ཡང་དག་མཐའ་མངོན་དུ་བྱས་པ་མི་སྲིད་པར་ཐལ། དེས་ཆོས་དབྱིངས་ལ་དུས་རྟག་ཏུ་མཉམ་པར་བཞག་པ་མི་སྲིད་པའི་ཕྱིར་ཏེ། དེ་ལྟ་བུའི་དེ་སངས་རྒྱས་ཀྱི་ཐུན་མོང་མ་ཡིན་པའི་ཡོན་ཏན་ཡིན་པའི་ཕྱིར། གལ་ཏེ་མ་གྲུབ་སྟེ། རྒྱུན་མཐའི་བྱང་སེམས་དེས་ཆོས་དབྱིངས་ལ་དུས་རྟག་ཏུ་མཉམ་པར་བཞག་པའི་ཕྱིར་ཞེ་ན། རྒྱུན་མཐའི་བྱང་སེམས་ཆོས་ཅན། རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་དུ་བྱས་པར་ཐལ། ཆོས་གསུམ་མ་བྱས་པར་ཆོས་དབྱིངས་ལ་དུས་རྟག་ཏུ་མཉམ་པར་བཞག་པའི་ཕྱིར། ཁྱབ་པ་ཁས། ཁ་ཅིག ཆོས་དབྱིངས་ལས་ལྡང་བ་མེད་པའི་ཚུལ་གྱིས་མཉམ་པར་གཞག་པ་ལ་བྱེད་ཟེར། འོ་ན་རྒྱུན་མཐའི་བྱང་སེམས་དེས་ཆོས་དབྱིངས་ལས་ལྡང་བ་མེད་པའི་ཚུལ་གྱིས་མཉམ་པར་བཞག་གམ་མ་གཞག དང་པོ་ལྟར་ན་དེ་ཆོས་ཅན། ཆོས་གསུམ་མངོན་དུ་མ་བྱས་པར་ཡང་དག་མཐའ་མངོན་དུ་བྱས་པར་ཐལ། ཆོས་གསུམ་མ་བྱས་པར་ཆོས་ཉིད་ལས་ལྡང་བ་མེད་པའི་ཚུལ་གྱིས་མཉམ་པར་བཞག་པའི་ཕྱིར། གཉིས་པ་ལྟར་ན་དེ་ཆོས་ཅན། ཆོས་ཉིད་ལ་མཉམ་པར་བཞག་པའི་མཉམ་བཞག་དེ་ལས་ལངས་སྲིད་པར་ཐལ། ཆོས་ཉིད་ལ་མཉམ་པར་བཞག་པའི་མཉམ་བཞག་ལ་གནས་བཞིན་པ་གང་ཞིག ཁས་བླངས་ཕྱི་མ་དེའི་ཕྱིར། ཁ་ཅིག ཡང་དག་མཐའ་ལ་མཉམ་པར་བཞག་པ་དེ་ཡང་དག་མཐའ་མངོན་དུ་བྱས་པའི་ཚད་ཡིན་ཞེས་པའི་འདོད་པ་འོག་རྩོད་སྤོང་གི་སྐབས་སུ་འགོག་གོ །གཉིས་པ་ལ། ཆོས་གསུམ་བྱས་ནས་ཡང་དག་མཐའ་མངོན་དུ་བྱས་པའི་ཚད་དང་། དེ་མ་བྱས་པར་ཡང་དག་མཐའ་མངོན་དུ་བྱས་པའི་ཚད་གཉིས། དང་པོ་ནི། གཞན་དོན་འབད་མེད་ལྷུན་གྲུབ་ཏུ་འབྱུང་བཞིན་དུ་ཆོས་ཉིད་ལ་དུས་རྟག་ཏུ་མཉམ་པར་བཞག་པའོ། །གཉིས་པ་ནི། ཆོས་ཉིད་ལ་རྩོལ་མེད་དུ་ཡུན་རིང་དུ་མཉམ་པར་བཞག་པའི་སྒོ་ནས་རེ་ཞིག་གཞན་དོན་རྒྱུན་ཆད་པར་འགྱུར་བའོ། །ཕྱི་མ་འདི་ལ་ས་བདུན་པ་མན་ན་མེད་དེ། དེ་མན་ཆད་ན་ཆོས་དབྱིངས་ལ་འབད་རྩོལ་མེད་པར་མཉམ་པར་བཞག་མི་ནུས་པའི་ཕྱིར། ས་བརྒྱད་པ་ཡན་ཆད་ན་ཡོད་དེ། ས་བརྒྱད་པའི་བྱང་སེམས་ཡུན་རིང་དུ་འགོག་པ་ལ་མཉམ་པར་བཞག་པ་ལས་རྒྱལ་བ་རྣམས་ཀྱིས་སློང་བ་ཡོད་པའི་ཕྱིར། དེས་ན་མངོན་དུ་མ་བྱེད་ཅིག་ཅེས་པའི་གདམས་པ་ཡང་ས་བདུན་པ་མན་ཆད་ཀྱི་བྱང་སེམས་ལ་མཛད་པ་མིན་ཏེ། དེ་མན་ཆད་དུ་མཚན་འཛིན་སྤང་དགོས་པས་རྒྱུན་རིང་དུ་མཉམ་པར་བཞག་ན་དགོས་པ་ཁྱད་པར་ཅན་ཡོད་པ་དང་། འབད་རྩོལ་དང་བཅས་པས་གདམས་པ་མ་མཛད་ཀྱང་། རྩོལ་མེད་དུ་མཉམ་པར་བཞག་མི་ནུས་པ་དང་། ཕལ་ཆེར་དོན་ཡོད་པའི་སྐབས་ཡིན་པས་ཚོགས་གཉིས་ཀྱི་ནང་ནས་ཡེ་ཤེས་ཀྱི་ཚོགས་ལ་གཙོ་བོར་འབད་པའི་སྐབས་ཡིན་པའི་ཕྱིར་དང་། གལ་ཏེ་དེའི་ཚེ་གདམས་པ་མཛད་ན་ཡང་ནམ་ཞིག་ས་བརྒྱད་པ་ཐོབ་པའི་ཚེ་མངོན་སུམ་མ་བྱེད་ཅིག་ཅེས་པའི་ཚུལ་གྱིས་མཛད་པ་ཡིན་ཞེས་གསུངས་སོ། །དེས་ན་དེ་ལྟ་བུའི་གདམས་པ་དེ་དག་སའི་བྱང་སེམས་ལ་མཛད་པ་ཡིན་ཏེ། དག་སར་མཚན་འཛིན་སྤངས་ཟིན་པས་ཡུན་རིང་དུ་མཉམ་པར་བཞག་པ་ལ་དགོས་པ་མེད་པ་དང་། ཤེས་སྒྲིབ་ཀྱི་བག་ཆགས་སྤོང་བ་ལ་རྗེས་ཐོབ་ཏུ་རྫོགས་སྨིན་སྦྱངས་གསུམ་བྱ་དགོས་པ་དང་། དེར་འབད་རྩོལ་མེད་པས་རྩོལ་མེད་དུ་མཉམ་པར་བཞག་ནུས་པ་དང་། རྣམ་ཀུན་དོན་ཡོད་པའི་སྐབས་ཡིན་པས་ཚོགས་གཉིས་ཀྱི་ནང་ནས་བསོད་ནམས་ཀྱི་ཚོགས་ལ་གཙོ་བོར་འབད་པའི་སྐབས་ཡིན་པའི་ཕྱིར་རོ། །གསུམ་པ་ནི། ཁ་ཅིག མ་དག་སར་ཡང་དག་མཐའ་མངོན་དུ་བྱས་པ་ཡོད་པར་ཐལ། ས་དྲུག་པའི་སྐབས་སུ་སྤྲོས་པ་མཐའ་དག་དང་བྲལ་བའི་འགོག་པ་ལ་མཉམ་པར་གཞག་པ་དང་། ས་བདུན་པར་སྐད་ཅིག་རེ་རེ་ལ་འཇུག་ལྡང་བྱེད་ནུས་པའི་ཕྱིར་ཞེ་ན། མ་ཁྱབ་སྟེ། མདོ་སྡེ་ས་བཅུ་པ་ལས། བྱང་ཆུབ་སེམས་དཔའ་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་སེམས་ཀྱི་སྐད་ཅིག་དང་སྐད་ཅིག་ལ་ཡང་འགོག་པ་ལ་སྙོམས་པར་འཇུག་ཅིང་ལྡང་སྟེ། འགོག་པ་མངོན་དུ་བྱས་ཞེས་ནི་མི་བྱའོ་ཞེས་རྒྱས་པར་གསུངས་པའི་ཕྱིར་རོ། །ཁ་ཅིག བྱང་སེམས་ཀྱི་མཐོང་ལམ་ཆོས་ཅན། ཡང་དག་མཐའ་མངོན་དུ་བྱས་པར་ཐལ། ཆོས་དབྱིངས་མངོན་དུ་བྱས་པའི་ཕྱིར། ཁྱབ་པ་ཁས། མ་གྲུབ་ན་དེར་ཐལ། ཆོས་དབྱིངས་མངོན་སུམ་དུ་རྟོགས་པའི་ཕྱིར་ཞེ་ན། དེ་ཆོས་ཅན། དེ་བཞིན་ཉིད་མངོན་དུ་བྱས་པར་ཐལ། དེ་བཞིན་ཉིད་མངོན་སུམ་དུ་རྟོགས་པའི་ཕྱིར། འདོད་ན། གནས་སྐབས་ཐམས་ཅད་དུ་དེ་བཞིན་ཉིད་གོམས་པར་བྱས་ཀྱང་དེ་མངོན་དུ་མི་བྱེད་ཅེས་པ་དང་འགལ་ལོ། །ཡང་བྱང་འཕགས་ཆོས་ཅན། ལོངས་སྐུ་མངོན་དུ་བྱས་པར་ཐལ། དེ་མངོན་སུམ་དུ་རྟོགས་པའི་ཕྱིར། གཞན་ཡང་ས་བརྒྱད་པའི་བྱང་སེམས་ཡང་དག་མཐའ་ལ་མཉམ་པར་བཞག་པ་རྫོགས་པའི་སངས་རྒྱས་ཀྱིས་བཀག་པར་ཐལ། དེས་ཡང་དག་མཐའ་མངོན་དུ་བྱས་པ་རྫོགས་པའི་སངས་རྒྱས་ཀྱིས་བཀག་པའི་ཕྱིར། འདོད་ན། དེས་སྒོམ་སྤང་ཆུང་ངུའི་ཆེན་པོ་སོགས་ཀྱི་དངོས་གཉེན་བསྒོམ་པ་རྫོགས་པའི་སངས་རྒྱས་ཀྱིས་བཀག་པར་ཐལ་ལོ། །རྣམ་པ་ཐམས་ཅད་མཁྱེན་ཉིད་ལམ། །ཞེས་པའི་སྐབས་སུ། དགོས་འབྲེལ་གྱི་ངག་བཀོད་པའི་དགོས་པ་ལ་དཔྱད། དགོས་སོགས་ཆོས་བཞིའི་ངོ་བོ་ལ་དཔྱད། ཆོས་སྤྱོད་བཅུ་ངོས་གཟུང་བ་དང་གསུམ། དང་པོ་ནི། སེང་གེ་བཟང་པོ་དང་། ཆོས་མཆོག་གཉིས་ན་རེ། བསྟན་བཅོས་ཀྱི་གདུལ་བྱ་དབང་རྣོན་བསྟན་བཅོས་ལ་དགོས་སོགས་ཆོས་བཞི་མེད་དམ་སྙམ་པའི་དོན་མིན་འགྱུར་གྱི་ཐེ་ཚོམ་བསལ་ནས། ཡོད་དམ་སྙམ་པའི་དོན་འགྱུར་གྱི་ཐེ་ཚོམ་བསྐྱེད་པའི་ཕྱིར་བཀོད་པར་བཞེད་དེ། འགྲེལ་པར། དོན་ལ་ཐེ་ཚོམ་བསྐྱེད་པ་ཉིད་ཀྱིས་འཇུག་པའི་ཡན་ལག་ཅེས་དང་། ཆོས་མཆོག་གིས། གང་ཕྱིར་འཇིག་རྟེན་དོན་གཉེར་བ། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་གསུངས་པའི་ཕྱིར། ལོ་ཆེན་ན་རེ། དམ་བཅའ་དེ་མི་འཐད་པར་ཐལ། བསྟན་བཅོས་ཀྱི་མཆོད་བརྗོད་ཀྱི་ངག་ལ་བརྟེན་ནས་ཀྱང་བསྟན་བཅོས་ཀྱི་གདུལ་བྱ་དབང་རྣོན་བསྟན་བཅོས་ལ་འཇུག་པར་འགྱུར་བའི་ཕྱིར་ཞེས་བཀག་ནས་རང་ལུགས་ལ། བསྟན་བཅོས་ཀྱི་ལུས་མཛེས་པའི་ཆེད་དུ་བསྟན་བཅོས་ཀྱི་དགོས་འབྲེལ་གྱི་ངག་བཀོད་པ་ཡིན་ནོ་ཞེས་བཞེད་དོ། །དེ་ཡང་མི་འཐད་པར་ཐལ། བསྟན་བཅོས་ཀྱི་མཆོད་བརྗོད་ཀྱི་ངག་ལ་བརྟེན་ནས་ཀྱང་བསྟན་བཅོས་ཀྱི་ལུས་མཛེས་པར་འགྱུར་བའི་ཕྱིར། འཁོར་གསུམ། ཁ་ཅིག ལུགས་སྔ་མ་དེ་མི་འཐད་དེ། དགོས་འབྲེལ་གྱི་ངག་མ་བཀོད་པའི་རིགས་པ་དྲུག་ཅུ་པ་ལྟ་བུ་ལ་ཡང་དེའི་གདུལ་བྱ་འགའ་ཞིག་དགོས་སོགས་ཆོས་བཞི་ཡོད་དམ་སྙམ་པའི་དོན་འགྱུར་གྱི་ཐེ་ཚོམ་སྐྱེ་བ་ཡོད་པའི་ཕྱིར། ཁ་ཅིག དེ་ཡང་མི་འཐད་དེ། བསྟན་བཅོས་ཀྱི་གདུལ་བྱ་དབང་རྣོན་དོན་འགྱུར་གྱི་ཐེ་ཚོམ་གྱི་སྒོ་ནས་བསྟན་བཅོས་ལ་འཇུག་པར་འགྱུར་བ་མི་འཐད་དེ། གདུལ་བྱ་དབང་རྣོན་བླང་དོར་གྱི་གནས་ལ་འཇུག་པ་ནི་བླང་དོར་གྱི་གནས་ཚད་མར་ངེས་པའི་སྒོ་ནས་འཇུག་དགོས་པའི་ཕྱིར་ཞེས་ཟེར། དང་པོ་ལ། བསྟན་བཅོས་ཀྱི་ལུས་རྣམ་བཞག་འདི་ཉན་པ་པོ་ཉན་སླ་བ་དང་། འཆད་པ་པོ་འཆད་སླ་བའི་ཕྱིར་བཀོད་པ་མིན་པར་ཐལ། ལུས་རྣམ་བཞག་མེད་པའི་རིགས་པ་དྲུག་ཅུ་པ་ལྟ་བུ་ལ་ཡང་ཉན་པ་པོ་ཉན་སླ་བ་དང་། འཆད་པ་པོ་འཆད་སླ་བ་ཡོད་པའི་ཕྱིར། གཉིས་པ་ལ། རྒྱན་གྱི་མཆོད་བརྗོད་ཀྱི་ངག་འདི་གདུལ་བྱ་དབང་རྣོན་རྒྱན་ལ་འཇུག་པའི་ཕྱིར་བཀོད་པ་མིན་པར་ཐལ། གདུལ་བྱ་དབང་རྣོན་དེ་ངག་ཙམ་ལ་བརྟེན་ནས་བསྟན་བཅོས་ལ་འཇུག་པ་མིན་པའི་ཕྱིར་ཏེ། དེ་བླང་དོར་གྱི་གནས་ལ་འཇུག་པ་ནི། བླང་དོར་གྱི་གནས་ཚད་མས་ངེས་པའི་སྒོ་ནས་འཇུག་དགོས་པའི་ཕྱིར། རིམ་བཞིན་ཁས་བླངས་སོ། །རྩ་བར་འདོད་ན། ཆོས་ཀྱི་རྗེས་སུ་འབྲང་བ་རྣམས་ཀྱང་ཞེས་སོགས་ལ་སོམས་ཤིག་གོ །གཉིས་པ་ནི། ཁ་ཅིག བསྟན་བཅོས་མངོན་རྟོགས་རྒྱན་གྱིས་གཏན་ལ་དབབ་པར་བྱ་བ་དེ་རྒྱན་གྱི་བརྗོད་བྱའི་མཚན་ཉིད་དུ་བཞག་པ་ལ། ཁ་ཅིག ཐེག་ཆེན་སེམས་བསྐྱེད་ཆོས་ཅན། དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་སྒྲུབ་པའི་དམིགས་པ་ཡིན་པའི་ཕྱིར། འདོད་ན། སེམས་བསྐྱེད་པ་ནི་གཞན་དོན་ཕྱིར། །ཞེས་པའི་གཞུང་འདི་མངོན་རྟོགས་རྒྱན་ཡིན་པར་ཐལ། འདོད་པ་དེའི་ཕྱིར་ཟེར་རོ། །འོ་ན་ལྷ་སྦྱིན་གྱི་རྣ་བ་དེ་ལྷ་སྦྱིན་དུ་ཐལ། ལྷ་སྦྱིན་གྱི་རྣ་རྒྱན་དེ་ལྷ་སྦྱིན་གྱི་རྒྱན་ཡིན་པའི་ཕྱིར། ཁ་ཅིག རྒྱན་གྱི་དགོས་པའི་མཚན་ཉིད། རྒྱན་ལ་ཐོས་བསམ་བྱས་པ་ལ་བརྟེན་ནས་མདོ་དོན་བདེ་བླག་ཏུ་རྟོགས་པ་ཞེས་དང་། དེ་རྟོགས་པའི་རྟོགས་པ་ཞེས་དང་། རྒྱན་ལ་བརྟེན་ནས་གནས་སྐབས་སུ་ཐོབ་པའི་ཡོན་ཏན་ཞེས་ཟེར་ན། དང་པོ་ལ། སློབ་དཔོན་སེང་གེ་བཟང་པོ་ཆོས་ཅན། དེར་ཐལ། མཚན་ཉིད་དེའི་ཕྱིར། གཉིས་པ་ལ་རྒྱན་ལ་ཐོས་བསམ་བྱས་པ་ལ་བརྟེན་ནས་ཐོབ་པའི་འགོག་བདེན་ཆོས་ཅན། དེར་ཐལ། མཚོན་བྱ་དེའི་ཕྱིར། གསུམ་པ་ལ། རྒྱན་ལ་ཐོས་བསམ་བྱས་པ་ལ་བརྟེན་ནས་ཐོབ་པའི་རྣམ་མཁྱེན་ཆོས་ཅན། དེར་ཐལ། མཚོན་བྱ་དེའི་ཕྱིར། མ་གྲུབ་ན་དེ་ཆོས་ཅན། དེར་ཐལ། རྒྱན་གྱིས་མཐར་ཐུག་གི་དགོས་པ་ཡིན་པའི་ཕྱིར། ཁོ་ན་རེ། མ་ཁྱབ་སྟེ། རྒྱན་གྱིས་དགོས་པ་དང་ཉིང་དགོས་འགལ་བའི་ཕྱིར་ཞེ་ན། རྒྱན་ལ་བརྟེན་ནས་ཐོབ་པའི་རྣམ་མཁྱེན་གྱི་སྦྱོར་ལམ་ཆོས་ཅན། རྒྱན་གྱི་དགོས་པ་མིན་པར་ཐལ། དེའི་དགོས་པའི་དགོས་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན་དེར་ཐལ། རྒྱན་ལ་བརྟེན་ནས་ཐོབ་པའི་རྣམ་མཁྱེན་གྱི་ཚོགས་ལམ་དེ་རྒྱན་གྱི་དགོས་པ་ཡིན་པའི་ཕྱིར། རྒྱན་གྱི་ཉིང་དགོས་ཀྱི་མཚན་ཉིད་ལ་ཁ་ཅིག རྒྱན་ལ་བརྟེན་ནས་མངོན་པར་རྟོགས་པ་བརྒྱད་མངོན་སུམ་བྱེད་པར་འགྱུར་བ་ཞེ་ན། སློབ་དཔོན་སེང་གེ་བཟང་པོ་ཆོས་ཅན། དེར་ཐལ། མཚན་ཉིད་དེའི་ཕྱིར། རང་ལུགས་ལ། རྒྱན་གྱི་བརྗོད་བྱ་དགོས་པ་ཉིང་དགོས་གསུམ་གྱི་མཚན་ཉིད་རིམ་བཞིན། རྒྱན་གྱི་བཤད་པར་བྱ་བ་དང་། རྒྱན་ལ་བརྟེན་ནས་ཐོབ་པའི་བདེ་ལེགས་དང་། རྒྱན་ལ་བརྟེན་ནས་ཐོབ་པའི་འབྲས་བུ་ཆོས་སྐུ་རྣམས་སོ། །འབྲེལ་པ་ནི་རྒྱན་ལ་བརྟེན་ནས་གནས་སྐབས་ཀྱི་དགོས་པ་འབྱུང་ཞིང་། དེ་ལས་མཐར་ཐུག་གི་དགོས་པ་འབྱུང་བའོ། །གསུམ་པ་འདི་བསྟན་ཆོས་སྤྱོད་བཅུ་ནི། ལོ་ཙཱ་བ་དཔོན་སློབ་གསུམ་ནི་ཕར་ཕྱིན་བཅུ་ལ་བཞེད་དེ། འགྲེལ་པར་བྱང་ཆུབ་ཀྱི་སེམས་དང་སྦྱིན་པ་ལ་སོགས་པ་སྒྲུབ་པའི་སྤྱོད་པ་ཞེས་གསུངས་པའི་ཕྱིར་ཞེས་ཟེར། སློབ་དཔོན་ཤཱནྟི་པས། ཡི་གེ་འབྲི་མཆོད་སྦྱིན་པ་སོགས་བཅུ་ལ་བཞེད། ཨར་ནི། རྣམ་མཁྱེན་མཚོན་བྱེད་ཀྱི་ཆོས་བཅུ་ལ་བཞེད་པ་དང་གསུམ་ལས། དང་པོ་ལ་བྱང་ཆུབ་ཀྱི་སེམས་དེ་ཆོས་སྤྱོད་བཅུའི་དང་པོ་ཡིན་པར་ཐལ། འགྲེལ་པར། བྱང་ཆུབ་ཀྱི་སེམས་ཞེས་སོགས་གསུངས་པའི་ཕྱིར། གསུམ་ཆར་ཁས་བླངས། གཉིས་པ་ལ་ཡི་གེ་འབྲི་མཆོད་སྦྱིན་པ་སོགས་བཅུ་པོ་དེས་ཤེར་ཕྱིན་གྱི་མདོའི་དོན་མ་ལུས་པར་བསྡུས་པར་ཐལ། དམ་བཅའ་དེའི་ཕྱིར། ཁྱབ་སྟེ། རྩ་བར། ཆོས་སྤྱོད་བཅུ་ཡི་བདག་ཉིད་ཀྱི། །མདོ་དོན་ཞེས་དང་། འགྲེལ་པར། ཤེས་རབ་ཀྱི་ཕ་རོལ་དུ་ཕྱིན་པའི་མདོའི་དོན་མ་ལུས་པ་མངོན་པར་རྟོགས་པ་བརྒྱད་ཀྱི་བདག་ཉིད་བྱང་ཆུབ་ཀྱི་སེམས་དང་ཞེས་གསུངས་པའི་ཕྱིར། དེས་ན་གསུམ་པ་འཐད་དེ། འགྲེལ་ཆེན་ལས། སྟོང་ཕྲག་བརྒྱ་པ་ལ་སོགས་པའི་མདོའི་དོན་བྱང་ཆུབ་ཀྱི་སེམས་དང་གདམས་ངག་ལ་སོགས་པ་སྒྲུབ་པའི་རང་བཞིན་གནས་སྐབས་བརྒྱད་ཀྱི་དབྱེ་བས་ཕྱེ་བ་ཐམས་ཅད་ཅེས་གསུངས་པའི་ཕྱིར། ཡང་དམ་བཅའ་དེ་ཡིན་པར་ཐལ། རྣམ་པ་ཐམས་ཅད་མཁྱེན་ཉིད་ལམ། །ཞེས་པའི་ལམ་དེ་རྣམ་མཁྱེན་མཚོན་བྱེད་ཀྱི་ཆོས་བཅུ་ལ་འཇོག་པ་འཐད་པའི་ཕྱིར། ཁྱབ་སྟེ། རྒྱན་གྱི་བརྗོད་བྱར་བྱས་པ་དེ་ཉིད་དྲན་པའི་ཤེས་པ་ལ་གཞག་པའི་རིམ་གྱིས་ཉིང་དགོས་ཐོབ་པར་འགྱུར་ཞེས་འགྲེལ་པའི་ཕྱིར། ཁོ་ན་རེ། རྣམ་མཁྱེན་མཚོན་བྱེད་ཀྱི་ཆོས་བཅུ་པོ་དེ་སྒྲུབ་པའི་སྤྱོད་པ་ཡིན་པར་ཐལ། སྦྱིན་པ་ལ་སོགས་སྒྲུབ་པའི་སྤྱོད་པ་ཞེས་གསུངས་པའི་ཕྱིར་ཞེ་ན། དེར་ཐལ། འགྲེལ་ཆེན་ལས། བྱང་ཆུབ་ཀྱི་སེམས་དང་གདམས་ངག་ལ་སོགས་པ་སྒྲུབ་པའི་རང་བཞིན་ཞེས་གསུངས་པའི་ཕྱིར། ཁྱབ་པ་ཁས་སོ། །ཤེས་རབ་ཕ་རོལ་ཕྱིན་པ་ནི། །ཞེས་པའི་སྐབས་སུ། ཤེར་ཕྱིན་གྱི་ས་མཚམས་དང་། མཚན་ཉིད་གཉིས། དང་པོ་ནི། གསེར་ཕྲེང་པ་ན་རེ། སློབ་ལམ་ན་ཤེར་ཕྱིན་མེད་ན་སྦྱིན་པའི་ཕར་ཕྱིན་ཡིན་ན་སྦྱིན་པ་རབ་ཀྱི་མཐར་ཕྱིན་པ་ཡིན་དགོས་པར་ཐལ། ཤེར་ཕྱིན་ཡིན་ན་ཤེས་པ་རབ་ཀྱི་མཐར་ཕྱིན་པ་ཡིན་དགོས་པའི་ཕྱིར། ཁྱབ་སྟེ། འཇུག་འགྲེལ་ལས། དེ་ལ་ཕ་རོལ་ཞེས་བྱ་བ་ན། གང་འཁོར་བའི་རྒྱ་མཚོའི་ཕར་འགྲམ་དང་ངོགས་ཏེ། ཉོན་མོངས་པ་དང་ཤེས་བྱའི་སྒྲིབ་པ་མ་ལུས་པར་སྤངས་པའི་རང་བཞིན་མངའ་བའི་སངས་རྒྱས་ཉིད་དོ། །ཕ་རོལ་ཏུ་སོན་པ་ནི་ཕ་རོལ་ཏུ་ཕྱིན་པའོ་ཞེས་པ་ནས་ཚུལ་ཁྲིམས་ལ་སོགས་པ་ནས་འཆད་པར་འགྱུར་བ་དག་ཀྱང་དེ་བཞིན་ནོ་ཞེས་གསུངས་པའི་ཕྱིར་ཞེས་དང་། དེའི་རྗེས་འབྲང་དག་ཐེག་པ་གསུམ་གྱི་ལམ་ལྔ་ཆར་ཤེར་ཕྱིན་མཚན་ཉིད་པ་ཡིན་ཅིང་། ཕྱོགས་གླང་དང་། སློབ་དཔོན་གྱི་དགོངས་པ་གཙོ་བོ་དང་ཕལ་པ་ལ་དགོངས་པ་སྟེ། བརྒྱད་སྟོང་དོན་བསྡུའི་འགྲེལ་པར། སློབ་དཔོན་གྱིས། ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲའི་དོན་ནི་གཉིས་ཏེ། གཙོ་བོ་དང་ཕལ་པའོ། །དེ་ལ་གཙོ་བོ་ནི་གཉིས་སུ་མེད་པའི་ཡེ་ཤེས་སོ། །ཕལ་པ་ནི་གཞུང་དང་ལམ་གྱི་རང་བཞིན་ནོ་ཞེས་གསུངས་པའི་ཕྱིར། གཞུང་ཤེར་ཕྱིན་ཤེས་པ་ཙམ་ཡང་མིན་པས་ཤེར་ཕྱིན་ཏུ་མི་རུང་ལ། ལམ་ཤེར་ཕྱིན་ཤེར་ཕྱིན་ཕལ་པ་ཡིན་པས་ཤེར་ཕྱིན་དུ་འགྲུབ་སྟེ། མི་ཕལ་པས་མིའི་གོ་ཆོད་པ་བཞིན་ནོ་ཟེར་རོ། །ལུགས་དང་པོ་ལ། ཤེར་ཕྱིན་ཡིན་ན་ཤེས་པ་རབ་ཀྱི་མཐར་ཕྱིན་པ་ཡིན་དགོས་པར་ཐལ། འཇུག་འགྲེལ་གྱི་ལུང་དེ་ཉིད་ཀྱི་ཕྱིར། གསུམ་ཆར་ཁས་བླངས་སོ། །ཡང་ལུང་དེ་ཉིད་ཀྱིས་སྦྱིན་པའི་ཕར་ཕྱིན་དང་ཤེར་ཕྱིན་གཉིས་རབ་ཀྱི་མཐར་ཕྱིན་པ་ཡིན་མིན་མཚུངས་པར་བསྟན་པ་མིན་པར་ཐལ། འཇུག་འགྲེལ་གྱི་ལུང་དེ་ཉིད་ཀྱི་བར་ཏུ་ཤེས་རབ་གཟུང་ནས་བྱེ་བྲག་ཏུ་བཤད་པ་ཡིན་ཏེ། སྦྱིན་པ་ལ་སོགས་པ་རྣམས་ནི་ཕ་རོལ་ཏུ་ཕྱིན་པ་དང་འདྲ་བས་ན་ཕ་རོལ་ཏུ་ཕྱིན་པའོ་ཞེས་གསུངས་པའི་ཕྱིར། ལུགས་གཉིས་པ་ལ། བྲམ་ཟེའི་ཁྱེའུ་ཆོས་ཅན། སེང་གེ་ཞེས་པའི་སྒྲ་དེ་ཁྱོད་ལ་ཕལ་པའི་ཚུལ་གྱིས་མི་འཇུག་པར་ཐལ། དེ་ཁྱོད་ལ་བཏགས་མིང་དུ་འཇུག་པའི་ཕྱིར། ཁྱབ་པ་ཁས། འདོད་ན། རྣམ་འགྲེལ་ལས། ཇི་ལྟར་གྲགས་ལས་གྲུབ་གང་ཡིན། །དངོས་དང་དེ་དང་མཚུངས་པའི་ཕྱིར། །གང་ལ་དེ་སྐད་བརྗོད་ཕལ་པ། །ཞེས་པ་དང་འགལ་ལོ། །ཡང་ལམ་ཤེར་ཕྱིན་ཤེར་ཕྱིན་ཕལ་པ་ཡིན་པ་ལ་ཤེས་བྱེད་ཅི་ཡོད། ཕལ་པ་ནི་གཞུང་དང་ལམ་གྱི་རང་བཞིན་ནོ་ཞེས་གསུངས་པའི་ཕྱིར་ཟེར་ན། གཞུང་ཤེར་ཕྱིན་དེ་ཡང་དེར་ཐལ། ལུང་དེ་ཉིད་ཀྱི་ཕྱིར། གསུམ་ཆར་ཁས་སོ། །ཐེག་ཆེན་གྱི་སྦྱོར་ལམ་དེ་ལམ་ཤེར་ཕྱིན་ཡིན་པར་ཐལ། དེ་ཤེར་ཕྱིན་ཡིན་པའི་ཕྱིར། འདོད་ན། འགྲེལ་ཆེན་ལས། མཐོང་བ་ལ་སོགས་པའི་ལམ་ལ་ཡང་ཞེས་ལམ་ཤེར་ཕྱིན་གྱི་མ་མཐའ་ས་དང་པོ་ནས་བཤད་པ་དང་འགལ་ལོ། །ཐེག་དམན་ལ་ཤེར་ཕྱིན་ཡོད་པ་ཡང་མི་འཐད་པར་ཐལ། བཤད་སྦྱར་ལས། བསེ་རུ་ལྟ་བུ་རྣམས་ལ་ནི། །ཕ་རོལ་ཕྱིན་དྲུག་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལགས། །ཞེས་གསུངས་པའི་ཕྱིར། ཡང་ཁ་ཅིག སློབ་ལམ་ན་ཤེར་ཕྱིན་ཡོད་པར་ཐལ། དེར་ཕར་ཕྱིན་དྲུག་ཡོད་པའི་ཕྱིར་ཞེས་དང་། དེར་ས་བཅུ་པོ་རེ་རེའི་སྐབས་སུ་ཡང་ཕྱིན་དྲུག་རེ་རེ་ལ་གཙོ་བོར་སྤྱོད་པའི་ཁྱད་པར་འཐད་པའི་ཕྱིར་ཞེས་དང་། དེར་ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་ཉམས་ལེན་ཡོད་པའི་ཕྱིར་ཞེས་དང་། དེར་ཕར་ཕྱིན་དང་པོ་ལྔ་སངས་རྒྱས་ཀྱི་སར་ཁྲིད་པར་བྱེད་པའི་ལམ་ཡོད་པའི་ཕྱིར་ཏེ། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རབ་རྫོགས་པས། །ཞེས་དང་། དབུས་མཐར། ཁྱད་པར་ཅན་དང་ཁྱད་མེད་ནི། །ས་བཅུ་དག་ཏུ་ཤེས་པར་བྱ། །ཞེས་དང་། དེ་དག་སོ་སོར་སྦྱིན་ལ་སོགས། །ཞེས་དང་། སྡུད་པ་ལས། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་ནི། །དམིགས་བུ་མེད་པས་བྱང་ཆུབ་རེག་པ་ནུས་མ་ཡིན། །གང་ཚེ་ཤེས་རབ་ཀྱིས་ནི་ཡོངས་སུ་ཟིན་གྱུར་པ། །དེ་ཚེ་མིག་རྙེད་འགྱུར་ཞིང་འདི་ཡི་མིང་འཐོབ་བོ། །ཞེས་གསུངས་པའི་ཕྱིར་ཞེ་ན། དང་པོ་ལ། སངས་རྒྱས་ཀྱི་ས་ན་རྟོགས་པ་ཡོད་པར་ཐལ། དེ་ན་འཕགས་ལམ་ཡན་ལག་བརྒྱད་ཡོད་པའི་ཕྱིར། གཉིས་པ་ལ་ཡང་དེར་ཐལ། དེར་བསམ་གཏན་དང་པོའི་དངོས་གཞི་དང་གཉིས་པའི་དངོས་གཞི་གཉིས་ལ་རྟོག་དཔྱོད་གཉེན་པོའི་ཡན་ལག་དུ་ལྡན་མི་ལྡན་གྱིས་ཁྱད་པར་ཡོད་པའི་ཕྱིར། གསུམ་པ་ལ། སློབ་ལམ་ན་རྣམ་མཁྱེན་ཡོད་པར་ཐལ། དེར་རྣམ་མཁྱེན་ཀྱི་རྣམ་པ་བརྒྱ་དང་བཅུ་ཉམས་སུ་ལེན་པའི་ཉམས་ལེན་ཡོད་པའི་ཕྱིར། བཞི་པ་ལ། སློབ་ལམ་དུ་མཆོག་གི་སྤྲུལ་སྐུ་ཡོད་པར་ཐལ། དེར་བྱང་སེམས་སྦྱོར་ལམ་པ་གནས་སྐབས་ཐེག་དམན་དུ་མི་ལྷུང་བར་ཐེག་ཆེན་དུ་ཡོངས་སུ་འཛིན་པའི་ཡོངས་འཛིན་ཡོད་པའི་ཕྱིར། རང་ལུགས་འོག་ཏུ་ཤེས་སོ། །གཉིས་པ་ལ་དགག་གཞག་སྤང་གསུམ་ལས། དང་པོ་ལ། ཁ་ཅིག ཤེར་ཕྱིན་གྱི་མཚན་ཉིད་ཆོས་རབ་ཏུ་རྣམ་འབྱེད་ཀྱི་བློ་གང་ཞིག སྲིད་ཞིའི་ཕ་རོལ་ཏུ་སོན་པའམ་སོན་བྱེད་གང་རུང་ཞེས་དང་། ཁ་ཅིག དེ་གང་ཞིག སྲིད་ཞིའི་ཕ་རོལ་ཏུ་སོན་པ་མཐར་ཐུག་པའི་ཡེ་ཤེས་ཞེས་ཟེར་ན། དང་པོ་ནི། སློབ་ལམ་ན་ཤེར་ཕྱིན་ཡོད་པའི་ལུགས་ཡིན་པས་བཀག་ཟིན་ལ། གཉིས་པ་ཡང་མི་འཐད་དེ། བློ་དང་ཡེ་ཤེས་ལ་ཟློས་སྐྱོན་ཡོད་པའི་ཕྱིར་དང་། མཐར་ཐུག་ལ་རྣམ་བཅད་མེད་པའི་ཕྱིར་རོ། །གཉིས་པ་ནི། ཤེས་རབ་ཕ་རོལ་ཕྱིན་པ་ནི། །ཞེས་པའི་སྐབས་ནས་དངོས་བསྟན་གྱི་ཤེར་ཕྱིན་ནི་དངོས་བརྟགས་མ་ཕྱེ་བའི་དབང་དུ་བྱས་པ་ཡིན་ཏེ། མངོན་པར་རྟོགས་པ་བརྒྱད་ཀ་འདིའི་སྐབས་ཀྱི་ཤེར་ཕྱིན་ཡིན་པའི་ཕྱིར་ཏེ། མངོན་པར་རྟོགས་པ་བརྒྱད་ཆར་ཡུམ་དེ་ལ་ཕྱག་འཚལ་ཞེས་པའི་སྐབས་ཀྱི་ཡུམ་ཡིན་པའི་ཕྱིར། ཁྱབ་སྟེ། ཡུམ་དེ་ལ་མཁྱེན་པ་གསུམ་གྱི་སྒོ་ནས་བསྟོད་ཅིང་། དེ་ཉིད་མངོན་པར་རྟོགས་པ་བརྒྱད་ཀྱི་སྒོ་ནས་བཤད་ཅེས་འགྲེལ་པའི་ཕྱིར། སྤྱིར་ཡུམ་དང་ཤེར་ཕྱིན་གཅིག་པ་ནི་མིན་ཏེ། སྔ་མ་རང་སྲས་འཕགས་པའི་བཞེད་དོན་སྒྲུབ་པ་དང་། བསྐྱེད་པའི་ཆ་ནས་སློབ་ལམ་ན་ཡང་མཚན་ཉིད་པ་ཡོད་ཅིང་། ཕྱི་མ་ནི་རབ་ཀྱི་མཐར་ཕྱིན་པའི་ཆ་ནས་འཇོག་པས་སངས་རྒྱས་ཀྱི་ས་ཁོ་ན་ན་ཡོད་པའི་ཕྱིར། དེ་གཉིས་སྒྲ་འཇུག་པའི་གཞི་ནི་གཅིག་སྟེ། གཞུང་ལམ་འབྲས་བུའི་ཤེར་ཕྱིན་གསུམ་ཆར་ལ་ཡང་དེ་གཉིས་ཆར་གྱི་སྒྲ་འཇུག་པའི་ཕྱིར། དེས་ན། སྐབས་འདིའི་ཤེར་ཕྱིན་ལ་ཤེར་ཕྱིན་མཚན་ཉིད་པ་དང་བཏགས་པ་བ་གཉིས་ལས། དང་པོ་ནི། རྣམ་མཁྱེན་དང་འབྲས་བུ་ཆོས་སྐུས་བསྡུས་པའི་མངོན་པར་རྟོགས་པ་རྣམས་ཡིན་ལ། ཕྱི་མ་ནི་མངོན་པར་རྟོགས་པ་གཞན་དྲུག་དང་གཞུང་ཤེར་ཕྱིན་ནོ། །དེ་གཉིས་ལ་འདོགས་པའི་རྒྱུ་མཚན་ནི། སྔ་མ་ནི་ཤེར་ཕྱིན་ཐོབ་བྱེད་ཀྱི་རྒྱུ་དང་། ཕྱི་མ་ནི་དེ་བརྗོད་བྱར་སྟོན་པའི་ཕྱིར་ཏེ། བཏགས་པའི་དགོས་པ་ནི་ཤེར་ཕྱིན་དོན་དུ་གཉེར་བས་སྔ་མ་ཉམས་སུ་ལེན་པ་དང་། ཕྱི་མ་ལ་ཐོས་བསམ་བྱེད་དགོས་པ་ཤེས་པའི་ཆེད་ཡོད་པའི་ཕྱིར། དངོས་ལ་གནོད་བྱེད་ནི་མཚན་ཉིད་མ་ཚང་བའི་ཕྱིར། ཚོགས་སྦྱོར་གྱི་གནས་སྐབས་ཀྱི་རྣམ་རྫོགས་སྦྱོར་བ་སོགས་ནི་ཤེར་ཕྱིན་བཏགས་པ་བ་ཡིན་ཡང་ལམ་ཤེར་ཕྱིན་དུ་མི་བཞེད་དོ། །དེས་ན་ཤེར་ཕྱིན་གྱི་མཚན་ཉིད། ཆོས་རབ་རྣམ་འབྱེད་ཀྱི་བློ་གང་ཞིག སྲིད་བཞིའི་ཕ་རོལ་ཏུ་སོན་པ་སྟེ། འགྲེལ་ཆེན་ལས། སངས་རྒྱས་བཅོམ་ལྡན་འདས་ཀྱི་གཉིས་སུ་མེད་པའི་ཡེ་ཤེས་སྒྱུ་མ་ལྟ་བུ་ནི་དངོས་ཡིན་ལ། དེ་ཐོབ་པ་དང་རྗེས་སུ་མཐུན་པ་ཉིད་ཀྱིས་ན་ཚིག་དང་ངག་གི་ཚོགས་ཀྱི་གཞུང་དང་། མཐོང་བ་ལ་སོགས་པ་མཚན་ཉིད་ཅན་གྱི་ལམ་ལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི་བཏགས་པའོ། །དེ་ཡང་སློབ་དཔོན་ཕྱོགས་ཀྱི་གླང་པོའི་ཞལ་སྔ་ནས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་ལམ་དག་ལས་དེ་སྒྲ་ཡིན། །ཞེས་བཤད་པ་ཡིན་ནོ། །དེའི་ཕྱིར་དེ་དང་འབྲེལ་བ་གཟུགས་ཅན་དང་བྲལ་བ་རྣམ་པ་གསུམ་ཀ་ལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དོ་ཞེས་ངེས་པར་གཟུང་བ་སྟེ། གཙོ་བོ་ལས་དབང་དུ་བྱས་པའོ། །དེ་རྣམས་ཉིད་ཀྱིས་ནི་མིན་ཏེ། འདི་མེད་ན་མི་འབྱུང་བས་བྱང་ཆུབ་གསུམ་ཀའི་དབང་དུ་བྱས་པའི་ཕྱིར་ཞེས་གསུངས་པའི་ཕྱིར། གསུམ་པ་ནི་ཁ་ཅིག བྱང་སེམས་ཀྱི་མཐོང་ལམ་ཆོས་ཅན། དེར་ཐལ། མཚན་ཉིད་དེའི་ཕྱིར། ཕྱི་མ་མ་གྲུབ་ན། དེར་ཐལ། སྲིད་ཞི་ལ་མི་གནས་པའི་གཞི་ཤེས་ཡིན་པའི་ཕྱིར་ཞེ་ན། སྙིང་རྗེའི་སྟོབས་ཀྱིས་ཞི་མཐའ་གནོན་ནུས་ཀྱི་གཞི་ཤེས་ཡིན་ན་ཞི་བ་མཐར་ཐུག་ཐོབ་པས་ཁྱབ་པར་ཐལ། སྲིད་ཞི་ལ་མི་གནས་པའི་གཞི་ཤེས་ཡིན་ན། སྲིད་གཞིའི་ཕ་རོལ་ཏུ་སོན་པས་ཁྱབ་པའི་ཕྱིར། འདོད་ན། བྱང་སེམས་ཀྱི་མཐོང་ལམ་ཆོས་ཅན། དེར་ཐལ། དེའི་ཕྱིར། འདོད་ན། མྱང་འདས་མཐར་ཐུག་ཐོབ་པར་ཐལ་ལོ། །རྣམ་ཀུན་མཁྱེན་ཉིད་ལམ་ཤེས་ཉིད། །ཅེས་པའི་སྐབས་སུ། མཁྱེན་གསུམ་གྱི་ས་མཚམས་ལ་དཔྱད་པ་དང་། མཚན་ཉིད་ལ་དཔྱད་པ་གཉིས། དང་པོ་ལ་དགག་གཞག་སྤང་གསུམ་ལས། དང་པོ་ལ། སློབ་ལམ་ན་རྣམ་མཁྱེན་ཡོད་པ་དགག ཚོགས་སྦྱོར་ན་ལམ་ཤེས་ཡོད་པ་དགག མཁྱེན་གསུམ་གང་ཟག་སོ་སོ་ལ་འཇོག་པ་དགག སངས་རྒྱས་ཀྱི་སར་མཁྱེན་གསུམ་འཇོག་ཚུལ་གཞན་དགག་པ་དང་བཞིའོ། །དང་པོ་ནི། ཁ་ཅིག་ཐེག་ཆེན་གྱི་མཐོང་ལམ་ཆོས་ཅན། རྣམ་མཁྱེན་ཡིན་ཏེ། རྣམ་པ་རང་བཞིན་མེད་པར་མངོན་སུམ་རྟོགས་པའི་མཁྱེན་པ་ཡིན་པའི་ཕྱིར། ཡང་ཐེག་ཆེན་མཐོང་ལམ་པའི་རྒྱུད་ལ་རྣམ་མཁྱེན་ཡོད་པར་ཐལ། ཐེག་ཆེན་མཐོང་ལམ་པ་དེས་རང་རྣམ་མཁྱེན་ལ་གནས་ནས་གདུལ་བྱ་གཞན་དེ་ལ་དགོད་པར་མཛད་པའི་ཕྱིར་ཏེ། ཐེག་ཆེན་མཐོང་ལམ་གྱི་རྣམ་པ་འཆད་པའི་སྐབས་སུ། རྣམ་ཀུན་མཁྱེན་པའི་ཚུལ་ལ་ནི། །བདག་ཉིད་གནས་ཏེ་སེམས་ཅན་དག །འགོད་དང་། ཞེས་གསུངས་པའི་ཕྱིར་ཞེས་ཟེར་ན། རིམ་བཞིན་ཐེག་ཆེན་གྱི་མཐོང་ལམ་ཆོས་ཅན། འཁྲུལ་ཤེས་སུ་ཐལ། འཁྲུལ་པ་རང་བཞིན་མེད་པར་མངོན་སུམ་རྟོགས་པའི་ཤེས་པ་ཡིན་པའི་ཕྱིར། ཐེག་ཆེན་སྦྱོར་ལམ་གྱི་གནས་སྐབས་ན་སྒྲིབ་པའི་བག་ལ་ཉལ་མ་ལུས་པར་འཇོམས་པ་ཡོད་པར་ཐལ། སྦྱོར་ལམ་པ་ཕྱིར་མི་ལྡོག་པའི་གནས་སྐབས་སུ་བག་ལ་ཉལ་ཀུན་འཇོམས་པ་དང་། ཞེས་གསུངས་པའི་ཕྱིར། གཉིས་པ་ལ། ཁ་ཅིག ལམ་ཤེས་ཀྱི་མ་མཐའི་ས་མཚམས་ཐེག་ཆེན་གྱི་ཚོགས་ལམ་འབྲིང་ནས་ཡོད་དེ། ཐེག་ཆེན་གྱི་ཚོགས་ལམ་ཆུང་ངུ་ལ་གནས་པའི་བྱང་སེམས་དེ་ལམ་ཤེས་དངོས་སུ་སྐྱེ་རུང་གི་གང་ཟག་ཡིན་པའི་ཕྱིར། མ་གྲུབ་ན་དེ་ཆོས་ཅན། དེར་ཐལ། གེགས་ང་རྒྱལ་མངོན་གྱུར་བ་དང་བྲལ། མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད། རྒྱུ་རང་བཞིན་གནས་རིགས་དང་ལྡན་པའི་རྟེན་གྱི་གང་ཟག་ཡིན་པའི་ཕྱིར། མ་ཁྱབ་ན། ལམ་ཤེས་ཀྱི་ཡན་ལག་དང་པོ་གསུམ་ལམ་ཤེས་དངོས་སུ་སྐྱེ་བའི་ཡན་ལག་མིན་པར་ལམ་ཤེས་སྐྱེ་རུང་ཙམ་གྱི་ཡན་ལག་ཏུ་ཐལ། མ་ཁྱབ་པ་དེའི་ཕྱིར། འདོད་ན། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པ་ཆོས་ཅན། བྱང་ཆུབ་མཆོག་ཏུ་སེམས་བསྐྱེད་པར་ཐལ། ལམ་ཤེས་སྐྱེ་རུང་གི་རྟེན་གྱི་གང་ཟག་ཡིན་པའི་ཕྱིར་ཞེས་ཟེར་རོ། །འོ་ན་ས་གཉིས་པའི་བྱང་སེམས་ཆོས་ཅན། རྣམ་མཁྱེན་དངོས་སུ་སྐྱེ་བའི་རྟེན་གྱི་གང་ཟག་ཏུ་ཐལ། འགལ་རྐྱེན་མཐོང་སྤངས་ཀྱི་སྒྲིབ་པ་དང་བྲལ། མཐུན་རྐྱེན་རྣམ་པར་མི་རྟོགས་པའི་ཡེ་ཤེས་སྐྱེས། རྒྱུ་རང་བཞིན་གནས་རིགས་རྒྱུད་ལྡན་གྱི་གང་ཟག་ཡིན་པའི་ཕྱིར། ཁྱབ་པ་ཁས། ཡང་ལམ་ཤེས་ཀྱི་སྦྱོར་བ་ཡིན་ན་ལམ་ཤེས་ཡིན་དགོས་པར་ཐལ། ཐེག་ཆེན་གྱི་ཚོགས་ལམ་ན་ལམ་ཤེས་ཡོད་པའི་ཕྱིར། འདོད་ན། ཐེག་ཆེན་གྱི་ཚོགས་ལམ་ཆུང་ངུ་ན་ལམ་ཤེས་ཡོད་པར་ཐལ། དེ་ན་ལམ་ཤེས་ཀྱི་སྦྱོར་བ་ཡོད་པའི་ཕྱིར། ཁ་ཅིག ཐེག་ཆེན་ཚོགས་ལམ་ཆུང་ངུ་ན་ལམ་ཤེས་ཡོད་དོ་ཞེ་ན། ཐེག་ཆེན་གྱི་ཚོགས་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པ་ཆོས་ཅན། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཏུ་ཐལ། ཐེག་ཆེན་གྱི་ཚོགས་ལམ་ཆུང་ངུ་དངོས་སུ་སྐྱེ་བའི་རྟེན་གྱི་གང་ཟག་ཡིན་པའི་ཕྱིར། ཁྱབ་པ་ཁས། ཡང་ཐེག་ཆེན་གྱི་ཚོགས་ལམ་ན་ལམ་གསུམ་རྟོག་བྲལ་མ་འཁྲུལ་པའི་ཚུལ་གྱིས་རྟོགས་པའི་མཁྱེན་པ་ཡོད་པར་ཐལ། དེར་ལམ་ཤེས་ཡོད་པའི་ཕྱིར། ཁྱབ་སྟེ། སློབ་དཔོན་གྱི་འགྲེལ་ཆེན་ལས། ཐབས་བྱུང་དེ་རྒྱུ་ལྐོག་གྱུར་པ། །དེ་འཆད་པ་ནི་བཀའ་བ་ཡིན། །ཞེས་པའི་ལུང་ཁུངས་སུ་མཛད་ནས། ལམ་ཤེས་ཡིན་ན་ལམ་གསུམ་རྟོག་བྲལ་མ་འཁྲུལ་བའི་ཚུལ་གྱིས་ཤེས་དགོས་པར་གསུངས་པའི་ཕྱིར། གསུམ་པ་ལ་བུ་དགེ་གཉིས་ན་རེ། གཞི་ཤེས་ཡིན་ན་ཐེག་དམན་གྱི་མཁྱེན་པ་ཡིན་པས་ཁྱབ། ལམ་ཤེས་ཡིན་ན་བྱང་སེམས་ཀྱི་མཁྱེན་པ་ཡིན་པས་ཁྱབ། རྣམ་མཁྱེན་ཡིན་ན་སངས་རྒྱས་ཀྱི་མཁྱེན་པ་ཡིན་པས་ཁྱབ་སྟེ། མཆོད་བརྗོད་ཀྱི་སྐབས་སུ། མཁྱེན་གསུམ་གྱི་རྟེན་གྱི་གང་ཟག་སོ་སོར་གསུངས་པ་དང་། ལུས་རྣམ་གཞག་ཏུ། ཐུབ་པའི་རྣམ་ཀུན་མཁྱེན་པ་ཉིད། །ཅེས་དང་། བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་དང་། ཉན་ཐོས་ལ་སོགས་མཐོང་བའི་ལམ། །ཞེས་དང་། མདོ་ལས་ཀྱང་། ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ་ཞེས་སོགས་གསུངས་པའི་ཕྱིར། གཞན་དུ་ན། རྣམ་མཁྱེན་ཆོས་ཅན། རྫོགས་སྨིན་སྦྱངས་གསུམ་མ་བྱས་པར་ཐལ་བ་དང་། ཡང་དག་མཐའ་མངོན་དུ་མ་བྱས་པར་ཐལ། ལམ་ཤེས་ཡིན་པའི་ཕྱིར། ཁྱབ་སྟེ། ལམ་ཤེས་པ་ཉིད་ནི་ཐེག་པ་ཐམས་ཅད་ཀྱི་ངེས་པར་འབྱུང་བ་དང་། དེ་ཁོ་ན་ཉིད་མངོན་སུམ་མི་བྱེད་པའི་རྟེན་ཅན་ཞེས་དང་། སྨོན་ལམ་ཡོངས་སུ་རྫོགས་པར་མ་བྱས་པ་དང་ཞེས་གསུངས་པའི་ཕྱིར་ཟེར། འོ་ན་བྱང་ཕྱོགས་སོ་བདུན་པོ་དེ་ཉན་ཐོས་ཁོ་ནའི་རྟོགས་པ་དང་། གཉེན་པོའི་ལམ་ལ་སོགས་པ་སོ་བཞི་པོ་དེ་བྱང་སེམས་ཁོ་ནའི་རྟོགས་པ་ཡིན་པར་ཐལ། སློབ་མ་བྱང་ཆུབ་སེམས་དཔའ་དང་། །སངས་རྒྱས་རྣམས་ལ་རིམ་བཞིན་ཏེ། །སུམ་ཅུ་བདུན་དང་སུམ་ཅུ་བཞི། །སུམ་ཅུ་རྩ་དགུ་དག་ཏུ་བཞེད། །ཅེས་གསུངས་པའི་ཕྱིར། ཉན་ཐོས་དགྲ་བཅོམ་པའི་མངོན་པར་རྟོགས་པ་ཆོས་ཅན། ཉན་རང་གི་རིགས་ཅན་ཉེར་ཞི་གཉིས་སུ་ཁྲིད་པར་བྱེད་པ་ཡིན་པར་ཐལ། གཞི་ཤེས་ཡིན་པའི་ཕྱིར། ཁྱབ་སྟེ། མྱ་ངན་ལས་འདའ་བར་འདོད་པ་རྣམས་གཞི་ཐམས་ཅད་སྐྱེ་བ་མེད་པར་ཡོངས་སུ་ཤེས་པ་ཉིད་ཀྱི་ཕུང་པོ་དང་བཅས་པ་དང་། ཕུང་པོ་མེད་པའི་ཞེས་སོགས་གསུངས་པའི་ཕྱིར་རོ། །ཡང་གཞི་ཤེས་ཡིན་ན་འབྲས་ཡུམ་ལ་རིང་བའི་གཞི་ཤེས་ཡིན་དགོས་པར་ཐལ། དེ་ཡིན་ན་ཐེག་དམན་གྱི་རྒྱུད་ཀྱི་གཞི་ཤེས་ཡིན་དགོས་པའི་ཕྱིར། འདོད་ན། ཚུ་རོལ་ཕ་རོལ་ཞེས་པ་འདི་གཞི་ཤེས་སྟོན་བྱེད་མིན་པར་ཐལ་ལོ། །བཞི་པ་ལ། ལོ་ཆེན་ན་རེ། གང་ཟག་སོ་སོའི་རྒྱུད་ཀྱི་མཁྱེན་གསུམ་ཐ་དད་ཡིན་པ་ལ་རྩོད་པ་མེད་ཅིང་། སངས་རྒྱས་སའི་མཁྱེན་པ་གསུམ་པོ་དེ་ཡང་ངོ་བོ་ཐ་དད་ཡིན་ཏེ། སངས་རྒྱས་སའི་གཞི་ཤེས་དེས་གཞི་ཁོ་ན་ཤེས་ལམ་དང་རྣམ་པར་མི་ཤེས། སངས་རྒྱས་སའི་ལམ་ཤེས་དེས་གཞི་དང་རྣམ་པར་མི་ཤེས་ཞེས་ཟེར། དེ་ལ་ཨར་ལ་སོགས་པ་རྣམས་ན་རེ། རྣམ་མཁྱེན་དེས་གཞི་ཤེས་སམ་མི་ཤེས་ཤེས་ན་གཞི་ཤེས་སུ་འགྱུར། མི་ཤེས་ན་དེ་ཆོས་ཅན། བརྟེན་པ་རྣམ་པ་མི་ཤེས་པར་ཐལ། རྟེན་གཞི་མི་ཤེས་པའི་ཕྱིར། སངས་རྒྱས་ཀྱི་ཡེ་ཤེས་གཅིག་ཉིད་ལ་མཁྱེན་གསུམ་གྱི་རྣམ་པ་གསུམ་དུ་འབྱེད་པ་མིན་པར་ཐལ། དམ་བཅའ་དེའི་ཕྱིར། འདོད་ན། ཀུན་མཁྱེན་གསུམ་དུ་ཕྱེ་བས་ན། །ཞེས་པ་དང་འགལ། སངས་རྒྱས་སའི་གཞི་ཤེས་དེ་རྟོག་པ་ཡིན་ནམ་རྟོག་མེད་ཡིན། དང་པོ་ལྟར་ན་མི་འཐད་དེ། དེས་རྟོག་པ་ཟད་པར་སྤངས་པའི་ཕྱིར། ཕྱི་མ་ལྟར་ན། རྟོག་མེད་འཁྲུལ་ཤེས་ཡིན་ནམ། མ་འཁྲུལ་ཤེས་ཡིན། དང་པོ་མི་འཐད་དེ། དེས་འཁྲུལ་པའི་དྲི་མ་ཟད་པར་སྤངས་པའི་ཕྱིར། ཕྱི་མ་ལྟར་ན། སངས་རྒྱས་འཕགས་པའི་རྒྱུད་ཀྱི་གཞི་ཤེས་ཆོས་ཅན། གཞི་དང་བདག་གཅིག་ཏུ་གྱུར་པའི་ལམ་དང་རྣམ་པ་སྣང་བར་ཐལ། གཞི་ལ་སྒྲུབ་པས་འཇུག་པའི་མངོན་སུམ་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། དོན་གྱི་རང་བཞིན་ངོ་བོ་གཅིག །བདག་ཉིད་མངོན་སུམ་ཡིན་པ་ལ། །ཚད་མ་གཞན་གྱི་བརྟག་བྱ་གང་། །ཞེས་གསུངས་པའི་ཕྱིར། འདོད་ན། གཞི་དང་བདག་གཅིག་པའི་ལམ་དང་རྣམ་པར་ཤེས་པར་ཐལ། དེ་སྣང་བའི་ཕྱིར། ཁོ་ན་རེ། མ་ཁྱབ་སྟེ། སྣང་ཡང་མི་ངེས་པའི་ཕྱིར་རོ་ཟེར་ན། རྟགས་མ་གྲུབ་སྟེ། སངས་རྒྱས་ལ་རང་ཡུལ་སྣང་ལ་མ་ངེས་པའི་བློ་མེད་པའི་ཕྱིར་ཏེ། རྣམ་འགྲེལ་ལས། བློ་གྲོས་ཆེན་པོས་མཐོང་ཉིད་ལས། །རྣམ་པ་ཐམས་ཅད་ངེས་པར་བྱེད། །ཅེས་གསུངས་པའི་ཕྱིར། ཞེས་པའི་སྐྱོན་བརྗོད་པར་མཛད་དོ། །དེ་ལ་སྐྱོན་སྤོང་བར་མཛད་པ་ཁ་ཅིག སངས་རྒྱས་འཕགས་པ་དེ་ཉན་ཐོས་སུ་ཐལ། དེས་གང་ཟག་གི་བདག་མེད་མངོན་སུམ་རྟོགས་པའི་ཕྱིར། མ་ཁྱབ་ན། རྣམ་མཁྱེན་གྱིས་གཞི་ཤེས་ན། དེ་གཞི་ཤེས་ཡིན་པས་ཁྱབ་པ་བུད་ཟེར། སངས་རྒྱས་འཕགས་པའི་མཁྱེན་པ་ཡིན་ན་གཞི་ཤེས་མིན་དགོས་པར་ཐལ། དེ་ཡིན་ན་ཉན་ཐོས་མིན་དགོས་པའི་ཕྱིར། གཉིས་པ་ནི། སངས་རྒྱས་ཀྱི་སར་མཁྱེན་པ་གསུམ་ཀ་ཡོད་དེ། ཀུན་མཁྱེན་གསུམ་དུ་ཕྱེ་བས་ན། །ཞེས་དང་། དེའི་འགྲེལ་པར། ཐམས་ཅད་མཁྱེན་པ་ཉིད་གསུམ་གྱིས་བསྡུས་པའི་ལམ་ཡིན་པའི་སྒོ་ནས་འཕགས་པའི་གང་ཟག་ཐམས་ཅད་བསྡུས་པའི་ཕྱིར། ཞེས་གསུངས་པའི་ཕྱིར། སློབ་ལམ་དུ་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་ཉམས་སུ་བླངས་པ་ལ་བརྟེན་ནས་མི་སློབ་ལམ་གྱི་གནས་སྐབས་སུ་མཁྱེན་གསུམ་གྱི་རྟོགས་པ་མཐར་ཐུག་པ་ཐོབ་པ་ཡིན་པའི་ཕྱིར། མཁྱེན་གསུམ་ངོ་བོ་གཅིག་ཡིན་ཏེ། བྱང་སེམས་འཕགས་པའི་མཁྱེན་པ་ངོ་བོ་གཅིག་ཉིད་ལ་ཡུལ་གྱི་སྒོ་ནས་གཞི་ཤེས་དང་། ལམ་ཤེས་གཉིས་སུ་ཕྱེ་བ་ཡིན་པའི་ཕྱིར་དང་། སངས་རྒྱས་ཀྱི་ཡེ་ཤེས་གཅིག་ཉིད་ལ་ཡུལ་གྱི་སྒོ་ནས་མཁྱེན་པ་གསུམ་དུ་ཕྱེ་བ་ཡིན་པའི་ཕྱིར། གསུམ་པ་ལ། ཁ་ཅིག སངས་རྒྱས་ཀྱི་ས་ན་དངོས་པོ་ལ་ཡོངས་སུ་རྟོག་པའི་ལམ་ཡོད་པར་ཐལ། དྲན་པ་ཉེ་བར་གཞག་པ་ལ་སོགས་པ་བྱང་ཆུབ་ཀྱི་ཕྱོགས་དང་མཐུན་པའི་ལམ་རྣམས་དང་ཞེས་གསུངས་པའི་ཕྱིར། ཁྱབ་པ་ནི་གོང་གི་ལུང་གི་སྒྲུབ་བྱེད་ལ་ཁས་བླངས། ཡང་རྣམ་མཁྱེན་ཆོས་ཅན། གཞི་ཤེས་ཀྱི་རྣམ་པ་ཡིན་པར་ཐལ། གཞི་ཤེས་ཡིན་པའི་ཕྱིར། འདོད་ན། མིན་པར་ཐལ། རྣམ་མཁྱེན་གྱི་རྣམ་པ་ཡིན་པའི་ཕྱིར་ཞེ་ན། དང་པོ་ལ་གཞི་ཤེས་ཡིན་ན། མཁྱེན་གསུམ་གང་རུང་ཡིན་པས་མ་ཁྱབ་པར་ཐལ། དྲན་པ་ཉེར་གཞག་ཡིན་ན། དངོས་པོ་ལ་ཡོངས་སུ་རྟོགས་པའི་ལམ་ཡིན་པས་མ་ཁྱབ་པའི་ཕྱིར། གཉིས་པ་ལ། སངས་རྒྱས་སའི་བྱང་ཕྱོགས་སོ་བདུན་ཆོས་ཅན། གཞི་ཤེས་ཀྱི་རྣམ་པ་མིན་པར་ཐལ། རྣམ་མཁྱེན་གྱི་རྣམ་པ་ཡིན་པའི་ཕྱིར། གཉིས་པ་མཚན་ཉིད་ལ་དགག་གཞག་གཉིས། དང་པོ་ནི། ལོ་ཆེན་གྱི་བཞེད་པ་ལ། རྣམ་མཁྱེན། ལམ་ཤེས། གཞི་ཤེས་གསུམ་གྱི་མཚན་ཉིད་རིམ་བཞིན། དམིགས་པ་ཤེས་པ་དང་ཤེས་བྱ་མ་ལུས་པ་རྣམ་པ་རང་སྤྱིའི་མཚན་ཉིད་མཐའ་དག་མངོན་སུམ་དུ་རྟོགས་པའི་ཡེ་ཤེས་དང་། དམིགས་པ་ལམ་གསུམ་ཡུལ་དང་བཅས་པ་རྣམ་པ་ཆོས་ཀྱི་བདག་མེད་པ་ཁོ་ནར་མངོན་སུམ་དུ་རྟོགས་པའི་ཡེ་ཤེས། དམིགས་པ་བཞིའི་རིགས་མ་ལུས་པ། རྣམ་པ་སྤྱིའི་མཚན་ཉིད་གང་ཟག་གི་བདག་མེད་པ་ཁོ་ནར་མངོན་སུམ་དུ་རྟོགས་པའི་ཡེ་ཤེས་ཞེས་ཟེར། འོ་ན་སངས་རྒྱས་སའི་བྱང་ཕྱོགས་སོ་བདུན་ཆོས་ཅན། མཚན་ཉིད་དེར་ཐལ། རྣམ་མཁྱེན་ཡིན་པའི་ཕྱིར། འདོད་ན། སངས་རྒྱས་སའི་གཞི་ཤེས་དེ་ཡང་རྣམ་མཁྱེན་གྱི་མཚན་ཉིད་དུ་ཐལ་ལོ། །འདོད་ན། ཁས་བླངས་དང་འགལ་ལོ། །རྩ་རྟགས་མ་གྲུབ་ན་དེར་ཐལ། རྣམ་མཁྱེན་གྱི་རྣམ་པ་དེ་ལ་བརྒྱ་དང་བཅུ་ཡོད་པའི་ཕྱིར། བྱང་འཕགས་ཀྱི་རྒྱུད་ཀྱི་ལམ་ཤེས་པ་ཆོས་ཅན། དེར་ཐལ། ལམ་ཤེས་ཡིན་པའི་ཕྱིར། གཞི་ཤེས་ཆོས་ཅན། དེར་ཐལ། གཞི་ཤེས་ཡིན་པའི་ཕྱིར། གཉིས་ཀར་འདོད་ན། གཉིས་ཀ་ཆོས་ཅན། རྣམ་པ་མངོན་སུམ་རྟོགས་པར་ཐལ། འདོད་པ་དེའི་ཕྱིར། འདོད་ན་ཁས་བླངས་དང་འགལ་ལོ། །བུ་ན་རེ། དེ་གསུམ་གྱི་མཚན་ཉིད་རིམ་བཞིན་ཏེ། རྣམ་པ་སྐྱེ་མེད་དུ་མངོན་སུམ་རྟོགས་པའི་དོན་གཉིས་མཐར་ཐུག་པ། ལམ་གསུམ་རང་བཞིན་མེད་པར་མངོན་སུམ་རྟོགས་ཤིང་རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་དུ་མི་བྱེད་པར་གཞན་དོན་བྱེད་པ། གཞི་བདག་མེད་པར་མངོན་སུམ་དུ་རྟོགས་ཤིང་སྤངས་རྟོགས་ཉི་ཚེ་བར་གྱུར་པ་ཞེས་བཞག་ནས། འབྲས་བུ་ཆོས་སྐུ་ཆོས་ཅན། རྣམ་མཁྱེན་དུ་ཐལ། དེའི་མཚན་ཉིད་དེའི་ཕྱིར། ཞེས་དང་། སྦྱོར་གཞི་དང་གཉེན་པོ་གཞི་ཤེས་ཆོས་ཅན། ལམ་ཤེས་སུ་ཐལ། མཚན་ཉིད་དེའི་ཕྱིར། ཞེས་པ་ལ་ནི་འདོད་ལན་འདེབས་པ་ཡིན་གསུང་ངོ་། །མི་འཐད་དེ། འབྲས་བུ་ཆོས་སྐུ་ཆོས་ཅན། རྣམ་མཁྱེན་མིན་པར་ཐལ། ཁྱོད་དང་རྟག་པའི་གཞི་མཐུན་ཡོད་པའི་ཕྱིར། སྦྱོར་གཞི་དེ་ལམ་ཤེས་མིན་པར་ཐལ། རྣམ་རྫོགས་སྦྱོར་བ་ལམ་ཤེས་མིན་པའི་ཕྱིར། ཉན་ཐོས་འཕགས་པ་ཆོས་ཅན། གཞི་ཤེས་སུ་ཐལ། དེའི་མཚན་ཉིད་དེའི་ཕྱིར། གལ་ཏེ་མཚན་ཉིད་རྣམས་ལ་མཁྱེན་པ་སྦྱོར་བའི་དབང་དུ་བྱས་པ་ཡིན་ཟེར་ན་ཡང་། མཁྱེན་གསུམ་གང་ཟག་སོ་སོ་ལ་འཇོག་པ་བཀག་ཟིན་ཏོ། །དར་ཊཱིཀ་པ་ན་རེ། སེམས་བསྐྱེད་ལ་སོགས་པ་ཆོས་བཅུ་མངོན་སུམ་མ་རྟོགས་པ་མཐར་ཐུག་པའི་ཡེ་ཤེས་རྣམ་མཁྱེན་གྱི་མཚན་ཉིད་ཡིན་ལ། ཁ་ཅིག བདེན་གཉིས་ཀྱི་རྣམ་པ་མ་ལུས་པར་མཁྱེན་པའི་ཡེ་ཤེས་རྣམ་མཁྱེན་གྱི་མཚན་ཉིད་དུ་འདོད་པ་ནི་མི་འཐད་དེ། རང་གི་ཐོབ་བྱ་རྣམ་མཁྱེན་གྱི་རྟོགས་བྱའི་ཡུལ་བསྟན་པས་ཐེག་ཆེན་གྱི་ལམ་གྱི་ལུས་མ་ལུས་པ་བློ་ཡུལ་དུ་འཆར་ནུས་པ་ཞིག་དགོས་པའི་ཕྱིར། ཡང་རང་རྒྱུད་ལྡན་གྱི་གང་ཟག་གི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་པའི་ཐེག་ཆེན་སྐྱེས་བུའི་མངོན་པར་རྟོགས་པ་དེ་ལམ་ཤེས་ཀྱི་མཚན་ཉིད། ཁ་ཅིག་ལམ་གསུམ་རང་བཞིན་མེད་པར་མངོན་སུམ་རྟོགས་པའི་ཡེ་ཤེས་ལམ་ཤེས་ཀྱི་མཚན་ཉིད་དུ་འཇོག་པ་མི་འཐད་དེ། ཉན་ཐོས་ཀྱི་ལམ་ཤེས་པའི་ལམ་ཤེས་དེས་བདེན་གཞི་མི་རྟག་ལ་སོགས་བཅུ་དྲུག་མངོན་སུམ་དུ་མ་རྟོགས་པར་ཐལ། དེས་ལམ་གསུམ་རང་བཞིན་མེད་པར་མངོན་སུམ་དུ་རྟོགས་པའི་ཕྱིར། འདོད་ན། བྱང་ཆུབ་སེམས་དཔས་ཤེས་མཐོང་གིས་བལྟས་ནས་འདའ་བར་བྱ་བའི་གཞི་ཤེས་དེ་ས་དང་པོ་ནས་སྐྱེ་བ་མིན་པར་ཐལ། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཆེད་དུ་བྱང་ཆུབ་སེམས་དཔས་ལམ་ཤེས་གསུམ་གྱི་དང་པོ་སྒོམ་པ་དོན་མེད་པའི་ཕྱིར། གལ་ཏེ་མི་རྟག་ལ་སོགས་བཅུ་དྲུག་མངོན་སུམ་རྟོགས་པའི་ལམ་ཤེས་དེས་ལམ་གསུམ་རང་བཞིན་མེད་པར་མངོན་སུམ་རྟོགས་ན། སློབ་ལམ་ན་བདེན་གཉིས་ངོ་བོ་ཐ་དད་དུ་འཛིན་པའི་དྲི་མ་ཟད་པར་སྤངས་པ་ཡོད་པར་ཐལ་བ་དང་། སློབ་ལམ་ན་མཉམ་རྗེས་ངོ་བོ་གཅིག་པ་ཡོད་པར་ཐལ་ལོ། །ཡང་ལམ་ཤེས་ལ་ཞི་མཐའ་གནོན་ནུས་པའི་སྙིང་རྗེ་ཆེན་པོ་ལམ་ཤེས་ཀྱིས་བསྡུས་པ་མེད་པར་ཐལ། ལམ་ཤེས་མིན་ན་ལམ་གསུམ་རང་བཞིན་མེད་པར་རྟོགས་པས་ཁྱབ་པའི་ཕྱིར། ཡང་རྟགས་དེ་ལ་ཁྱབ་པ་མེད་པར་ཐལ། བྱང་འཕགས་ཀྱི་རྒྱུད་ཀྱི་དམིགས་པ་མེད་པའི་སྙིང་རྗེ་ཆེན་པོ་ལ་ཡང་སྟོང་ཉིད་མངོན་སུམ་དུ་རྟོགས་པ་མེད་པའི་ཕྱིར། ཡང་གཞི་གང་ཟག་གི་བདག་མེད་པར་མངོན་སུམ་རྟོགས་པའི་ཡེ་ཤེས་གང་ཞིག་ཉན་ཐོས་ཀྱི་རྟོགས་རིགས་སུ་གནས་པ་གཞི་ཤེས་ཀྱི་མཚན་ཉིད་ཡིན་ལ། ཁ་ཅིག གཞི་བདེན་སྟོང་སྤྲོས་བྲལ་མངོན་སུམ་དུ་རྟོགས་པའི་ཡེ་ཤེས་ལ་གཉེན་པོ་གཞི་ཤེས་ཀྱི་ཐ་སྙད་བྱེད་པ་ནི། སློབ་དཔོན་གྱི་འགྲེལ་པ་ཆེ་ཆུང་གང་ལས་ཀྱང་མ་བཤད་པས་མི་འཐད་དོ་ཞེས་སྐད་ངར་ཆེན་པོ་དང་བཅས་ཏེ་སྨྲའོ། །འོ་ན་སེམས་གཟུ་བོར་གནས་པར་གྱིས་ལ་ཉོན་ཅིག ཁྱེད་རང་གི་རྣམ་མཁྱེན་གྱི་མཚན་ཉིད་དེ་མི་འཐད་པར་ཐལ། རང་གི་ཐོབ་བྱ་རྣམ་མཁྱེན་གྱིས་རྟོགས་བྱའི་ཡུལ་བསྟན་ནས་ཐེག་ཆེན་ལམ་གྱི་ལུས་མ་ལུས་པ་བློ་ཡུལ་དུ་འཆར་ནུས་པ་ཞིག་དགོས་པའི་ཕྱིར། ཁོ་ན་རེ། མ་ཁྱབ་སྟེ། སེམས་བསྐྱེད་སོགས་ཆོས་བཅུ་ཞེས་བརྗོད་པས་ཐེག་ཆེན་ལམ་གྱི་ལུས་མ་ལུས་པ་བློ་ཡུལ་དུ་འཆར་ནུས་པའི་ཕྱིར་ཞེ་ན། སྔ་མ་ཡང་མི་འཐད་པར་ཐལ། བདེན་གཉིས་ཀྱི་རྣམ་པར་ཞེས་བརྗོད་པས་ཀྱང་དེ་ནུས་པའི་ཕྱིར། མ་གྲུབ་ན། སྔ་མའི་གཏན་ཚིགས་སྒྲུབས་ཤིག་བྱས་པས་སྔ་མའི་རྟགས་དེར་ཐལ། སེམས་བསྐྱེད་ལ་སོགས་པའི་ཆོས་བཅུ་པོ་དེས་ཐེག་ཆེན་གྱི་ལམ་གྱི་ལུས་མ་ལུས་པ་བསྡུས་པའི་ཕྱིར་ཞེ་ན། ཕྱི་མ་ཡང་དེར་ཐལ། བདེན་གཉིས་ཀྱི་རྣམ་པས་ཐེག་ཆེན་ལམ་གྱི་ལུས་མ་ལུས་པ་བསྡུས་པའི་ཕྱིར། ཡང་སྔ་མའི་རྟགས་དེར་ཐལ། སེམས་བསྐྱེད་ལ་སོགས་པའི་ཆོས་བཅུ་པོ་དེ་ཐེག་ཆེན་ལམ་གྱི་ལུས་ཡིན་པའི་ཕྱིར་ཞེ་ན། རྟགས་མ་གྲུབ་སྟེ། ཐེག་ཆེན་སྒྲུབ་པའི་དམིགས་པ་དེ་ཐེག་ཆེན་གྱི་ལམ་མིན་པའི་ཕྱིར། རྣམ་རྟགས་མཚན་མས་བསྡུས་པའི་ཆོས་མ་ལུས་པ་དེ་མཁྱེན་པ་གསུམ་གྱི་ནང་ནས་རྣམ་མཁྱེན་གྱི་ཡུལ་དུ་བསྟན་པ་དེ་མི་འཐད་པར་ཐལ། རང་གི་ཐོབ་བྱ་རྣམ་མཁྱེན་གྱི་རྟོགས་བྱའི་ཡུལ་བསྟན་པས་ཐེག་ཆེན་ལམ་གྱི་ལུས་མ་ལུས་པ་བློ་ཡུལ་དུ་འཆར་ནུས་པ་ཞིག་དགོས་པའི་ཕྱིར། རྟགས་ཁས། འདོད་ན། རབ་འབྱོར་རྣམ་པ་གང་དག་དང་ཞེས་སོགས་དང་འགལ་ལོ། །ཡང་ཉན་ཐོས་ཀྱི་ལམ་ཤེས་པའི་ལམ་ཤེས་དེས་མི་རྟག་ལ་སོགས་བཅུ་དྲུག་མངོན་སུམ་མ་རྟོགས་པར་ཐལ། དེས་དེ་མི་དམིགས་པར་མངོན་སུམ་དུ་རྟོགས་པའི་ཕྱིར། ཁྱབ་གསལ་ཁས། མ་གྲུབ་ན། དེར་ཐལ། དེས་དེ་མི་དམིགས་པར་རྟོགས་པ་གང་ཞིག དེས་དེ་མི་དམིགས་པར་དོན་སྤྱིའི་ཚུལ་གྱིས་མ་རྟོགས་པའི་ཕྱིར། རྟགས་སྔ་མ་དེར་ཐལ། འཕགས་པའི་བདེན་པ་བཞི་དག་གི །རྣམ་པ་མི་དམིགས་སྒོ་ནས་ནི། །ཞེས་གསུངས་པའི་ཕྱིར། རྟགས་ཕྱི་མ་དེར་ཐལ། ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར། གཞན་ཡང་མི་རྟག་ལ་སོགས་བཅུ་དྲུག་ལ་དམིགས་པའི་བྱང་འཕགས་ཀྱི་མཁྱེན་པ་ཡིན་ན། མི་རྟག་ལ་སོགས་བཅུ་དྲུག་རང་བཞིན་མེད་པར་མངོན་སུམ་མ་རྟོགས་པས་ཁྱབ་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་དེས་མི་རྟག་ལ་སོགས་བཅུ་དྲུག་མི་དམིགས་པར་མ་རྟོགས་པའི་ཕྱིར། རྟགས་ཁས། འདོད་ན། དེ་ལ་དམིགས་པའི་བྱང་སེམས་ཀྱི་སྦྱོར་ལམ་ཡིན་ན། དེ་རང་བཞིན་མེད་པར་དོན་སྤྱིའི་ཚུལ་གྱིས་མ་རྟོགས་པས་ཁྱབ་པར་ཐལ། འདོད་པ་དེའི་ཕྱིར། འདོད་ན། དམིགས་པའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་འཕགས་པའི་སྦྱོར་ལམ་ཡིན་ན། རྣམ་པའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་འཕགས་པའི་སྦྱོར་ལམ་མིན་དགོས་པར་ཐལ། འདོད་པ་དེའི་ཕྱིར། ཡང་སློབ་ལམ་ན་བདེན་གཉིས་ངོ་བོ་ཐ་དད་དུ་འཛིན་པའི་དྲི་མ་ཟད་པར་སྤངས་པ་ཡོད་པར་ཐལ། དེ་ན་སྦྱིན་པའི་འཁོར་གསུམ་མི་དམིགས་པར་མངོན་སུམ་རྟོགས་པའི་སྦྱིན་པའི་ཕར་ཕྱིན་ཡོད་པའི་ཕྱིར་ཏེ། འཇུག་པ་ལས། སྦྱིན་པ་སྦྱིན་བྱ་ལེན་པོ་གཏོང་པོས་སྟོང་། །འཇིག་རྟེན་འདས་པའི་ཕ་རོལ་ཕྱིན་ཞེས་བཤད། །ཅེས་སོ། །ཡང་སློབ་ལམ་ན་མཉམ་རྗེས་ངོ་བོ་གཅིག་པ་ཡིན་པ་ཡོད་པར་ཐལ། སློབ་ལམ་ན་སྦྱིན་པའི་ཕར་ཕྱིན་ཕར་ཕྱིན་དྲུག་ལྡན་དུ་ཉམས་སུ་ལེན་པ་ཡོད་པའི་ཕྱིར། ཡང་ཉན་ཐོས་ཀྱི་ལམ་ཤེས་པའི་ལམ་ཤེས་དེ་ལ་སྲིད་མཐའ་འགོག་ནུས་ཀྱི་ཤེས་རབ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱིས་བསྡུས་པ་མེད་པར་ཐལ། དེས་བདེན་སྟོང་མངོན་སུམ་མ་རྟོགས་པའི་ཕྱིར། རྟགས་ཁས། འདོད་ན། ལམ་ཤེས་ལ་ཞི་མཐའ་འགོག་ནུས་ཀྱི་སྙིང་རྗེ་ཆེན་པོ་ཡོད་པ་དང་འགལ་ལོ། །ཡང་བྱང་འཕགས་ཀྱི་རྒྱུད་ཀྱི་དམིགས་མེད་ཀྱི་སྙིང་རྗེ་ཆེན་པོ་དེས་སྟོང་ཉིད་དོན་སྤྱིའི་ཚུལ་གྱིས་རྟོགས་པར་ཐལ། དེས་སྟོང་ཉིད་རྟོགས་པ་གང་ཞིག དེས་སྟོང་ཉིད་མངོན་སུམ་མ་རྟོགས་པའི་ཕྱིར། རྟགས་སྔ་མ་དེར་ཐལ། འཇུག་པར། འགྲོ་བ་གཡོ་བ་ཆུ་ཡི་ནང་གི་ཟླ་བ་ལྟར། །གཡོ་དང་རང་བཞིན་ཉིད་ཀྱིས་སྟོང་པར་མཐོང་བ་ཡིས། །ཞེས་གསུངས་པའི་ཕྱིར། ཡང་རང་རྒྱལ་དགྲ་བཅོམ་པའི་རྒྱུད་ཀྱི་གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་ཆོས་ཅན། གཞི་ཤེས་ཀྱི་མཚན་ཉིད་ཀྱི་ཟུར་ཕྱི་མར་ཐལ། གཞི་ཤེས་ཡིན་པའི་ཕྱིར། ལན་ཅི་སྨྲ། ཡང་གཞི་བདེན་སྟོང་སྤྲོས་བྲལ་དུ་མངོན་སུམ་རྟོགས་པའི་གཞི་ཤེས་ལ་གཉེན་པོ་གཞི་ཤེས་ཀྱི་ཐ་སྙད་འཐད་པར་ཐལ། སྦྱིན་ལ་སོགས་ལ་ངར་འཛིན་མེད། །ཅེས་པའི་མཚམས་སྦྱར་དུ། བྱང་ཆུབ་སེམས་དཔའ་རྣམས་ཀྱི་བཟློག་སྟེ་གཉེན་པོ་ཡིན་པའི་ཕྱིར། ཞེས་དང་། དེ་ལྟར་ཀུན་ཤེས་ཉིད་ལུགས་ལ། །མི་མཐུན་གཉེན་པོ་ཕྱོགས་དག་གིས། །ཞེས་གསུངས་པའི་ཕྱིར། གཉིས་པ་ལ། རྣམ་མཁྱེན་ཀྱི་མཚན་ཉིད། བདེན་གཉིས་ཀྱི་རྣམ་པ་མ་ལུས་པར་མངོན་སུམ་རྟོགས་པའི་ཡེ་ཤེས་མཐར་ཐུག ཡུལ་གྱི་སྒོ་ནས་དབྱེ་ན། ཇི་ལྟ་བ་མཁྱེན་པའི་རྣམ་མཁྱེན་དང་། ཇི་སྙེད་པ་མཁྱེན་པའི་རྣམ་མཁྱེན་གཉིས། བསྟན་ཚུལ་གྱི་སྒོ་ནས་དབྱེ་ན། རྒྱུ་འབྲས་ཀྱི་གཙོ་བོ་མཁྱེན་པའི་རྣམ་མཁྱེན་དང་། ཤེས་བྱ་མ་ལུས་པ་མཁྱེན་པའི་རྣམ་མཁྱེན་གཉིས། དང་པོ་ནི། ཐུབ་པའི་རྣམ་ཀུན་མཁྱེན་པ་ཉིད། །ཅེས་པའི་སྐབས་ནས་བསྟན་པ་ལྟ་བུའོ། །ཕྱི་མ་ནི། རབ་འབྱོར་རྣམ་པ་གང་དག་དང་། །ཞེས་སོགས་ཀྱི་སྐབས་ནས་བསྟན་པ་ལྟ་བུའོ། །ལམ་ཤེས་ཀྱི་མཚན་ཉིད་ལམ་གསུམ་རང་བཞིན་མེད་པར་མངོན་སུམ་རྟོགས་པའི་ཐེག་ཆེན་འཕགས་པའི་མཁྱེན་པ། དབྱེ་ན་འབྲས་བུའི་ལམ་ཤེས་དང་། རྒྱུའི་ལམ་ཤེས་གཉིས། དང་པོ་ནི། སངས་རྒྱས་འཕགས་པའི་ལམ་ཤེས་ལྟ་བུའོ། །གཉིས་པ་ནི་སྐབས་གཉིས་པར་བསྟན་པའི་ལམ་ཤེས་གསུམ་ཡོད་དོ། །གཞི་ཤེས་ཀྱི་མཚན་ཉིད་གཞི་བདག་མེད་པར་མངོན་སུམ་དུ་རྟོགས་པའི་འཕགས་རྒྱུད་ཀྱི་མཁྱེན་པ། དབྱེ་ན་འབྲས་བུའི་གཞི་ཤེས་དང་། རྒྱུའི་གཞི་ཤེས་གཉིས། དང་པོ་ནི། སངས་རྒྱས་སའི་གཞི་ཤེས་ལྟ་བུའོ། །ཕྱི་མ་ལ། མི་མཐུན་ཕྱོགས་ཀྱི་གཞི་ཤེས་དང་། གཉེན་པོ་གཞི་ཤེས་གཉིས། དང་པོ་ཐེག་དམན་འཕགས་པའི་རྒྱུད་ཀྱི་གཞི་ཤེས་ལྟ་བུའོ། །གཉིས་པ་ནི། བྱང་སེམས་འཕགས་པའི་རྒྱུད་ཀྱི་གཞི་ཤེས་ལྟ་བུའོ། །གང་དག་སངས་རྒྱས་སའི་ལམ་ཤེས་ཉན་ཐོས་ཀྱི་ལམ་ཤེས་པའི་ལམ་ཤེས་སོགས་གསུམ་དུ་འདོད་པ་དང་། སངས་རྒྱས་སའི་གཞི་ཤེས་གཉེན་པོ་གཞི་ཤེས་སུ་འདོད་པ་དེ་དག་གིས་སྐབས་གཉིས་པ་དང་། གསུམ་པའི་བརྗོད་དོན་ངོས་མ་ཟིན་པར་ཟད་དོ། །སེམས་བསྐྱེད་པ་ནི་གཞན་དོན་ཕྱིར། །ཞེས་པའི་སྐབས་སུ། ཐེག་ཆེན་སེམས་བསྐྱེད་ཀྱི་མཚན་གཞི། མཚན་ཉིད། དབྱེ་བ། ས་མཚམས་དང་བཞི། དང་པོ་ལ་འཕགས་སེང་གཉིས་ཀྱི་གཙོ་བོ་སེམས་སུ་བཞེད་དེ། ཉིར་སྣང་ལས་སེམས་བསྐྱེད་པ་ཞེས་བྱ་བ་ལ་ནི། སེམས་ནི་རྣམ་པར་རིགས་པ་སྟེ་རྣམ་པར་ཤེས་པའོ། །རྣམ་པར་ཤེས་པ་དེ་ཡང་གང་ཞེ་ན། ཡིད་ཀྱི་རྣམ་པར་ཤེས་པ་སྟེ་དཀར་པོའི་ཆོས་ཐམས་ཅད་ལ་དམིགས་པ་དེ་ལ་སྲིད་པའི་ཕྱིར་ཞེས་དང་། དོན་གསལ་ལས། སེམས་བྱུང་མིན་པར་ཐལ། སེམས་བསྐྱེད་ཡིན་པའི་ཕྱིར། ཞེས་པའི་ཐལ་བ་བཀོད་ནས་བདེན་མོད་ཀྱི་ཞེས་པའི་ལན་བཏབ་པའི་ཕྱིར། ཐོགས་མེད་སྐུ་མཆེད་སེམས་བྱུང་ལ་བཞེད་དེ། བྱང་ས་ལས། བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ་ཞེས་དང་། དོན་གཉིས་ལྡན་པའི་སེམས་བྱུང་བ་ཞེས་པའི་འགྲེལ་པར། དབྱིག་གཉེན་གྱིས། ཡོན་ཏན་གཅིག་དང་གཉིས་ལ་དམིགས་པ་དང་ལྡན་པའི་སེམས་པ་ནི་སེམས་བསྐྱེད་པའོ་ཞེས་སོ། །ཤཱནྟི་པས། སེམས་སེམས་བྱུང་གཉིས་ཀ་ལ་འདོད་དེ། དག་ལྡན་ལས། སེམས་བསྐྱེད་པའི་དངོས་པོ་ཞེས་བྱ་བ་ལ་སེམས་ནི་འདོད་པ་དང་ཡིད་དོ་ཞེས་སོ། །དེ་ཡང་བསྐྱེད་པར་བྱ་བས་ན་སེམས་བསྐྱེད་ཅེས་བྱ་བ་ལས་ལ་བཤད་ན་གཙོ་བོ་སེམས་དང་། སེམས་བསྐྱེད་པར་བྱས་པས་ན་སེམས་བསྐྱེད་ཅེས་བྱེད་པ་ལ་བཤད་ན། སེམས་བྱུང་ལ་འཇུག་པ་ཡིན་པས། གཉིས་ཀས་སེམས་བསྐྱེད་ཀྱི་སྒྲ་དོན་མི་འདོར་བ་ཡིན་ནོ། །དེ་ལ་ཁ་ཅིག སེམས་བྱུང་སེམས་པ་ཡིན་ན་སེམས་བསྐྱེད་མིན་དགོས་པར་ཐལ། སེམས་བྱུང་ཡིན་ན་སེམས་བསྐྱེད་མིན་དགོས་པའི་ཕྱིར། རྟགས་བདེན་མོད་ཀྱི་ཞེས་པའི་སྐབས་སུ་ཁས་བླངས། བསལ་བ་ད་ལྟ་ཁས་བླངས་ཟེར་རོ། །བསལ་བ་ད་ལྟ་ཁས་བླངས་པའི་དོན་དེ་སེམས་བྱུང་སེམས་པ་ཡིན་ན། སེམས་བསྐྱེད་མིན་དགོས་ན། སེམས་བྱུང་སེམས་པ་དེས་སེམས་བསྐྱེད་ཀྱི་སྒྲ་དོན་མི་འདོར་བ་བུད་ཅེས་འབུད་དམ། ཐོགས་མེད་སྐུ་མཆེད་ཀྱི་ལུགས་ལ་སེམས་བྱུང་སེམས་པ་ཡིན་ན་སེམས་བསྐྱེད་མིན་དགོས་པ་བུད་ཅེས་འབུད། དང་པོ་ལྟར་ན་གཞན་དོན་རྗེས་དཔག་གིས་རྗེས་དཔག་གི་སྒྲ་དོན་འདོར་བར་ཐལ། དེ་ཡིན་ན་རྗེས་དཔག་མིན་དགོས་པའི་ཕྱིར། གཉིས་པ་ལྟར་ན། དབྱིག་གཉེན་གྱི་ལུགས་ལ་མཐར་ཐུག་ཐེག་པ་གསུམ་གྲུབ་པར་སྟོན་པའི་མདོ་ཡིན་ན། ངེས་དོན་གྱི་མདོ་ཡིན་དགོས་པར་ཐལ། མཐར་ཐུག་ཐེག་པ་གསུམ་གྲུབ་པར་སྟོན་པའི་མདོ་ཡིན་ན། ངེས་དོན་གྱི་མདོ་ཡིན་དགོས་པའི་ཕྱིར། གཉིས་པ་ལ་དགག་གཞག་སྤང་གསུམ་ལས། དང་པོ་ནི། ཁ་ཅིག གཞན་དོན་ཕུན་ཚོགས་དང་རྫོགས་པའི་བྱང་ཆུབ་ཀྱི་ངོ་བོར་སྣང་ཞིང་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་བྱུང་བའི་གཙོ་བོ་རྣམ་རིག་དེ་ཐེག་ཆེན་སེམས་བསྐྱེད་ཀྱི་མཚན་ཉིད་ཡིན་ཟེར་བ་ལ། བུ་ན་རེ། སོ་སོ་སྐྱེ་བོ་ཆོས་ཅན། ཁྱོད་ཀྱི་རྒྱུད་ལ་ཐེག་ཆེན་སེམས་བསྐྱེད་མེད་པར་ཐལ། ཁྱོད་ལ་རྫོགས་པའི་བྱང་ཆུབ་ཀྱི་ངོ་བོ་མི་སྣང་བའི་ཕྱིར། ཞེས་བཀག་ནས་རང་ལུགས་ལ། གཙོ་བོ་རྣམ་རིག་གང་ཞིག གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་བྱུང་བའོ། །སངས་རྒྱས་ཀྱི་སེམས་བསྐྱེད་ལ་མ་ཁྱབ་པ་མིན་ཏེ། གཞན་དོན་དུ་རྫོགས་བྱང་འདོད་པར་བྱས་ཟིན་པའི་ཕྱིར། ཞེས་གསུངས། དེ་ལ་ཁ་ཅིག ས་དང་པོའི་བྱང་སེམས་ཀྱི་རྒྱུད་ཀྱི་རྣམ་པར་མི་རྟོག་པའི་ཡེ་ཤེས་ཆོས་ཅན། ཟུར་ཕྱི་མར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་གྱི་དོན་དམ་སེམས་བསྐྱེད་ཡིན་པའི་ཕྱིར། མ་གྲུབ་ན་དེར་ཐལ། རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཅེས་གསུངས་པའི་ཕྱིར་ཟེར། འོ་ན་ཐེག་ཆེན་སེམས་བསྐྱེད་ཡིན་ན་སེམས་བྱུང་ཡིན་དགོས་པར་ཐལ། རྒྱན་ལས། དོན་གཉིས་ལྡན་པའི་སེམས་བྱུང་པ། །ཞེས་གསུངས་པའི་ཕྱིར། ཡང་ཁ་ཅིག ས་དང་པོའི་དོན་དམ་སེམས་བསྐྱེད་ཆོས་ཅན། ཟུར་ཕྱི་མར་ཐལ། མཚོན་བྱ་དེའི་ཕྱིར། འདོད་ན། གཞན་དོན་དང་རྫོགས་བྱང་དངོས་ཡུལ་དུ་བྱེད་པར་ཐལ་ལོ། །འདོད་ན། དེའི་རྣམ་པ་སྣང་བར་ཐལ། འདོད་ན། མཐར་ཐུག་དཔྱད་པའི་སློབ་པའི་ཡེ་ཤེས་མིན་པར་ཐལ་ལོ་ཟེར་ན། སྦྱིན་པའི་ཕར་ཕྱིན་དང་མཚུངས་པར་ལྡན་པའི་ས་དང་པོའི་དོན་དམ་སེམས་བསྐྱེད་ཆོས་ཅན། སྦྱིན་པ་དངོས་ཡུལ་དུ་བྱེད་པར་ཐལ། སྦྱིན་པའི་ཕར་ཕྱིན་དང་མཚུངས་པར་ལྡན་པའི་སེམས་བསྐྱེད་ཡིན་པའི་ཕྱིར། ཁྱབ་པ་ཁས། འདོད་ན། སྔ་མ་བཞིན་བསྒྲེའོ། །མ་གྲུབ་ན་དེར་ཐལ་ཏེ། དེ་འདྲ་ཡོད་པའི་ཕྱིར། སྦྱིན་པའི་ཕར་ཕྱིན་དང་མཚུངས་པར་ལྡན་པའི་སྡུག་བསྔལ་ཆོས་བཟོད་ཀྱིས་བསྡུས་པའི་ཡིད་ཀྱི་རྣམ་པར་ཤེས་པ་ཡོད་པའི་ཕྱིར་ཏེ། ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་དེ་ཕར་ཕྱིན་རེ་རེའི་ནང་དུ་ཕར་ཕྱིན་ལྔ་ལྔ་ཚང་བར་བསྡུས་ནས་ཉམས་སུ་ལེན་པའི་ཉམས་ལེན་ཁྱད་པར་ཅན་ཡིན་པའི་ཕྱིར། ཡང་གཞན་དོན་དུ་རྫོགས་བྱང་ལ་དམིགས་པའི་གཙོ་བོ་རྣམ་རིག་གཞག་པ་ལ། ཁ་ཅིག ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་རྒྱུད་ལ་ཐེག་ཆེན་སེམས་བསྐྱེད་ཡོད་པར་ཐལ། དེའི་རྒྱུད་ལ་མཚན་ཉིད་དེ་ཡོད་པའི་ཕྱིར་ཞེས་བཀག་ནས་རང་ལུགས་ལ། གཞན་དོན་དུ་རྫོགས་བྱང་ལ་མྱོང་བ་ཐོན་པའི་ཚུལ་གྱིས་དམིགས་པའི་འདོད་པ་དང་མཚུངས་ལྡན་གྱི་གཙོ་བོ་རྣམ་རིག་ཟེར། འོ་ན་མྱང་བ་ཐོན་པའི་དོན་དེ་གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་བློ་དེ་རྒྱུན་རིང་དུ་གོམས་པ་ལ་བྱེད་དམ། བློ་དེ་ལས་སླར་ལྡོག་མི་སྲིད་པ་ལ་བྱེད། དང་པོ་ལྟར་ན། ཉན་ཐོས་དགྲ་བཅོམ་ཐེག་ཆེན་ལམ་དུ་ཞུགས་མ་ཐག་པའི་རྒྱུད་ཀྱི་ཐེག་ཆེན་སེམས་བསྐྱེད་དེ་ཆོས་ཅན། གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་བློ་རྒྱུན་རིང་དུ་གོམས་པར་བྱས་པར་ཐལ། མཚན་ཉིད་དེའི་ཕྱིར་འདོད་ན། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་རྒྱུད་ལ་བློ་དེ་རྒྱུན་རིང་དུ་གོམས་པར་བྱས་པ་ཡོད་པར་ཐལ། འདོད་པ་དེའི་ཕྱིར། འདོད་ན། དེའི་རྒྱུད་ལ་ཐེག་ཆེན་སེམས་བསྐྱེད་ཡོད་པར་ཐལ་ལོ། །ཕྱི་མ་ལྟར་ན། གནས་སྐབས་ཐེག་དམན་ལམ་དུ་འཇུག་པར་ངེས་པའི་ཐེག་ཆེན་ཚོགས་ལམ་པའི་རྒྱུད་ཀྱི་ཐེག་ཆེན་སེམས་བསྐྱེད་ཆོས་ཅན། གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་བློ་དེ་ལས་སླར་ལྡོག་མི་སྲིད་པར་ཐལ། མཚན་ཉིད་དེའི་ཕྱིར། སྔ་ཕྱི་གཉིས་ཀའི་རྟགས་ཁྱབ་ཁས་སོ། །འདོད་ན། དེ་འདྲའི་ཐེག་ཆེན་ཚོགས་ལམ་པ་དེ་ཐེག་དམན་ལམ་དུ་འཇུག་པ་མི་སྲིད་པར་ཐལ་ལོ། །གཞན་ཡང་ཐེག་ཆེན་སེམས་བསྐྱེད་ཡིན་ན་མྱོང་བ་ཐོན་པའི་སེམས་བསྐྱེད་ཡིན་དགོས་པར་ཐལ། དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། འདོད་ན། གཞན་དོན་དུ་རྫོགས་བྱང་ལ་དམིགས་པའི་བློ་ཡིན་ན་གཞན་དོན་དུ་རྫོགས་བྱང་ལ་མྱོང་བ་ཐོན་པའི་ཚུལ་གྱིས་དམིགས་པའི་བློ་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་བློ་ཆོས་ཅན་དེར་ཐལ་དེའི་ཕྱིར། གསུམ་ཆར་འཁོར་གསུམ་ཁ་ཅིག ཐེག་ཆེན་སྐྱེས་བུའི་རྒྱུད་ཀྱི་དཀར་པོ་ཡིད་ཀྱི་རྣམ་པར་ཤེས་པ་དེ་དེའི་མཚན་ཉིད་དུ་གཞག་པ་ལ་གཞན་དག་ན་རེ། བྱང་སེམས་སྦྱོར་ལམ་པའི་རྒྱུད་ཀྱི་ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་གཙོ་བོ་རྣམ་རིག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། ཀུན་རྫོབ་སེམས་བསྐྱེད་ཡིན་པར་ཐལ། འདོད་པ་གང་ཞིག་བྱང་སེམས་སོ་སྐྱེའི་རྒྱུད་ཀྱི་མཁྱེན་པ་ཡིན་པའི་ཕྱིར། འདོད་མི་ནུས་ཏེ། ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་སློབ་པའི་ཡེ་ཤེས་ཡིན་པའི་ཕྱིར་ཞེ་ན། དེ་ཆོས་ཅན། ཐེག་ཆེན་སེམས་བསྐྱེད་ཡིན་པར་ཐལ། ཐེག་ཆེན་གྱི་བསླབ་པའི་གྲོགས་ཀྱིས་ཟིན་པའི་ཐེག་ཆེན་གྱི་གཙོ་བོ་རྣམ་རིག་ཡིན་པའི་ཕྱིར། ལུགས་སྔ་མ་ཡང་མི་འཐད་དེ། ཐེག་ཆེན་ལམ་དུ་འཇུག་ཁ་མའི་ལམ་མ་ཞུགས་ཀྱི་གང་ཟག་གི་རྒྱུད་ལ་ཐེག་ཆེན་སེམས་བསྐྱེད་མེད་པར་ཐལ། དེའི་རྒྱུད་ལ་མཚན་ཉིད་དེ་མེད་པའི་ཕྱིར་ཏེ། དེ་ཐེག་ཆེན་གྱི་ལམ་ཞུགས་སྐྱེས་བུ་མིན་པའི་ཕྱིར། རྩ་བར་འདོད་ན། འོག་ས་མཚམས་སྐབས་སུ་འཆད་དོ། །གཉིས་པ་ལ་མཚན་ཉིད་སྔར་ལྟར་གཞག་ནས། སངས་རྒྱས་ཀྱི་སར་མ་ཁྱབ་པ་ལ་བུ་སྟོན་གྱི་བཞེད་པ་ལྟར་སྐྱོན་སྤོང་བྱེད་པའམ། ཡང་ན་གཞན་དོན་དུ་རང་གཞན་གང་རུང་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་དང་མཚུངས་ལྡན་དུ་བྱུང་བའི་གཙོ་བོ་རྣམ་རིག་གོ །གསུམ་པ་ནི། ཁ་ཅིག ཐེག་ཆེན་ཚོགས་ལམ་པའི་རྒྱུད་ཀྱི་ཐེག་ཆེན་སེམས་བསྐྱེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། གཞན་དོན་དུ་རྫོགས་བྱང་ལ་དམིགས་པའི་འདོད་པ་དེ་ཁྱོད་ཀྱི་འཁོར་དུ་བྱུང་བའི་སེམས་བྱུང་ཡིན་པར་ཐལ། ཁྱོད་དེ་དང་མཚུངས་ལྡན་དུ་བྱུང་བའི་གཙོ་བོར་རྣམ་རིག་ཡིན་པའི་ཕྱིར། འདོད་ན། དེ་འདྲའི་འདོད་པ་ཆོས་ཅན། ཐེག་ཆེན་ཚོགས་ལམ་པའི་རྒྱུད་ཀྱི་ཤེས་པ་ཡིན་པར་ཐལ། འདོད་པ་དེའི་ཕྱིར། འདོད་ན། དེ་ཆོས་ཅན། དེ་མིན་པར་ཐལ། བྱང་སེམས་སྦྱོར་ལམ་པའི་ཤེས་པ་ཡིན་པའི་ཕྱིར། མ་གྲུབ་ན། སྔར་བཞིན་བསྒྲེའོ་ཞེ་ན། ལོངས་སྐུ་ཡིན་ན་ངེས་པ་ལྔ་ལྡན་གྱི་གཟུགས་སྐུ་ཡིན་པས་མ་ཁྱབ་པར་ཐལ། དེ་ཡིན་ན་འཁོར་ངེས་པ་བྱང་སེམས་འཕགས་པ་ཁོ་ནས་བསྐོར་བས་མ་ཁྱབ་པའི་ཕྱིར། མ་གྲུབ་ན། རེ་ཞིག་ཁས་བླངས། ཤར་ཕྱོགས་ཀྱི་ལོངས་སྐུ་ཆོས་ཅན། དེར་ཐལ། དེའི་ཕྱིར། འདོད་ན། རེ་ཞིག་ཁས་བླངས། དེ་ཆོས་ཅན། འཁོར་ངེས་པ་བྱང་སེམས་འཕགས་པ་དེ་ཁྱོད་ཀྱི་འཁོར་དུ་བྱུང་བའི་གང་ཟག་དུ་ཐལ། འདོད་པ་དེའི་ཕྱིར། འདོད་ན་འཁོར་ངེས་པ་བྱང་སེམས་འཕགས་པ་ཆོས་ཅན། དེ་མིན་པར་ཐལ། ནུབ་ཕྱོགས་ཀྱི་ལོངས་སྐུའི་འཁོར་དུ་བྱུང་བའི་བྱང་སེམས་ཡིན་པའི་ཕྱིར། ཁྱབ་པ་ཁས། མ་གྲུབ་ན་སྔ་མ་ལྟར་བསྒྲེའོ། །གསུམ་པ་དབྱེ་བ་ལ་གཉིས་ཏེ། སྤྱིར་བསྟན་པ་དང་། རྟོགས་དཀའ་བྱེ་བྲག་ཏུ་བཤད་པ་གཉིས། དང་པོ་ནི། ཐེག་ཆེན་སེམས་བསྐྱེད་ལ་ས་མཚམས་ཀྱི་སྒོ་ནས་དབྱེ་ན། མོས་པས་སྤྱོད་པ། ལྷག་བསམ་དག་པ། རྣམ་པར་སྨིན་པ། སྒྲིབ་པ་སྤངས་པའི་སེམས་བསྐྱེད་དང་བཞིའོ། །དཔེའི་སྒོ་ནས་དབྱེ་ན་ས་ལྟ་བུ་ནས་སྤྲིན་ལྟ་བུའི་བར་ཉེར་གཉིས། གྲོགས་ཀྱི་སྒོ་ནས་དབྱེ་ན་འདུན་པ་དང་མཚུངས་ལྡན་ནས་ཆོས་སྐུ་དང་མཚུངས་ལྡན་གྱི་སེམས་བསྐྱེད་ཀྱི་བར་ཉེར་གཉིས། ཆོས་མཐུན་གྱི་སྒོ་ནས་དབྱེ་ན་ཆོས་དཀར་པོ་ཐམས་ཅད་ཀྱི་རྟེན་བྱེད་པའི་སེམས་བསྐྱེད་སོགས་ཉེར་གཉིས། བྱེད་ལས་ཀྱི་སྒོ་ནས་དབྱེ་ན། སྨོན་འཇུག་གཉིས། ངོ་བོའི་སྒོ་ནས་དབྱེ་ན་དོན་དམ་དང་ཀུན་རྫོབ་སེམས་བསྐྱེད་གཉིས་སོ། །གཉིས་པ་ལ་སྨོན་འཇུག་གཉིས་ཀྱི་ངོ་བོ་བཤད་པ་དང་། དོན་དམ་སེམས་བསྐྱེད་དང་ཀུན་རྫོབ་སེམས་བསྐྱེད་ཀྱི་ངོ་བོ་བཤད་པ་གཉིས། དང་པོ་ལ་དགག་གཞག་སྤང་གསུམ། དང་པོ་ལ་སངས་རྒྱས་ཡེ་ཤེས་ཞབས་ཀྱིས། བྱང་སེམས་སོ་སྐྱེའི་སེམས་བསྐྱེད་ཐམས་ཅད་སྨོན་པ་སེམས་བསྐྱེད་དང་། བྱང་འཕགས་ཀྱི་སེམས་བསྐྱེད་ཐམས་ཅད་འཇུག་པ་སེམས་བསྐྱེད་དུ་བཞེད་དེ། དེས་མཛད་པའི་འགྲེལ་པར། སྨོན་པ་བྱང་ཆུབ་ཀྱི་སེམས་ནི་འཇིག་རྟེན་པ་ཐམས་ཅད་ཀྱི་ཡིན་ལ། འཇུག་པ་བྱང་ཆུབ་ཀྱི་སེམས་ནི་ས་དང་པོ་རབ་ཏུ་དགའ་བ་ནས་བརྩམས་ཏེ་ཞེས་གསུངས་པའི་ཕྱིར། མི་འཐད་དེ། བྱང་སེམས་ཚོགས་ལམ་པའི་རྒྱུད་ལ་བྱང་སེམས་ཀྱི་སྡོམ་པས་ཟིན་པའི་སེམས་བསྐྱེད་མེད་པར་ཐལ། དེའི་རྒྱུད་ལ་འཇུག་པ་སེམས་བསྐྱེད་མེད་པའི་ཕྱིར། འདོད་ན། དེ་བྱང་སེམས་ཀྱི་སྡོམ་པའི་རྩ་ལྟུང་གི་དབང་གིས་ངན་སོང་དུ་སྐྱེ་བ་མེད་པར་ཐལ། འདོད་པ་དེའི་ཕྱིར། འདོད་ན། སྤྱོད་འཇུག་ལས། དེ་ལྟར་ལྟུང་བ་སྟོབས་ལྡན་དང་། །བྱང་ཆུབ་སེམས་སྟོབས་ལྡན་པ་དག །འཁོར་བར་རེས་ཀྱིས་འདྲིས་བྱེད་ན། །ས་ཐོབ་པ་ལ་ཡུན་རིང་ཐོགས། །ཞེས་པ་དང་འགལ་ལོ། །པཎྜི་ཏ་ཡེ་ཤེས་གྲགས་ན་རེ། སྨོན་སེམས་བྱང་སེམས་ཀྱི་ཚོགས་ལམ་ཁོ་ན་དང་། འཇུག་སེམས་བྱང་སེམས་ཀྱི་སྦྱོར་ལམ་ཡན་ཆད་ན་ཡོད་པར་བཞེད་དེ། འདུན་སོགས་གསུམ་གྱི་དབྱེ་བ་ཡིས། །སྨོན་པའི་སེམས་ནི་རྣམ་པ་གསུམ། །འཇུག་པ་ཞེས་བྱའི་སེམས་དག་ནི། །བཅུ་དགུ་དག་ཏུ་བཞེད་པ་ཡིན། །ཞེས་གསུངས་པའི་ཕྱིར། འོ་ན་སངས་རྒྱས་ཀྱི་ས་ན་འཇུག་སེམས་ཡོད་པར་ཐལ། དེ་ན་ཆོས་སྐུ་དང་མཚུངས་ལྡན་གྱི་སེམས་བསྐྱེད་ཡོད་པའི་ཕྱིར། ཁྱབ་པ་ཁས། འདོད་ན། དེར་ཐེག་ཆེན་གྱི་བསླབ་པས་ཟིན་པའི་སེམས་བསྐྱེད་ཡོད་པར་འགྱུར་རོ། །ཁ་ཅིག ཆོས་བཤེས་ཀྱི་ཚིག་གསལ་ལས། ཆོ་གས་མ་བླངས་པའི་སེམས་བསྐྱེད་ཐམས་ཅད་སྨོན་སེམས་དང་། ཆོ་གས་བླངས་པའི་ཐེག་ཆེན་སེམས་བསྐྱེད་ཐམས་ཅད་འཇུག་པ་སེམས་བསྐྱེད་དུ་བཤད་པ་ཡང་མི་འཐད་དེ། སྨོན་སེམས་ལ་ཆོ་ག་མེད་པའི་ཤེས་བྱེད་མེད་པའི་ཕྱིར་དང་། སློབ་དཔོན་ནག་པོ་པས། སྨོན་འཇུག་གཉིས་ཀྱི་ཆོ་ག་སོ་སོར་བཤད་པའི་ཕྱིར་དང་། དེའི་ཕྱག་ལེན་སྔ་རབས་ཀྱི་མཁས་པ་རྣམས་ཀྱིས་མཛད་པའི་ཕྱིར་ཞེས་བཀག་ནས་རང་ལུགས་ལ། དེ་གཉིས་ཀྱི་མཚན་ཉིད་རིམ་བཞིན། ཐེག་ཆེན་སེམས་བསྐྱེད་གང་ཞིག བྱང་ཆུབ་སྒྲུབ་པའི་གྲོགས་ཀྱིས་མ་ཟིན་པ་དང་། ཟིན་པ་ཡིན་ལ། ས་མཚམས་ལ་དང་པོ་ཐེག་ཆེན་གྱི་ཚོགས་ལམ་ཆུང་ངུ་ཁོ་ན་དང་། ཕྱི་མ་ཐེག་ཆེན་གྱི་ཚོགས་ལམ་འབྲིང་ནས་ཡོད་དེ། ལྷ་དབང་བློས་མཛད་པའི་ཤེར་ཕྱིན་གྱི་མདོའི་འགྲེལ་པར། སྨོན་པ་བྱང་ཆུབ་ཀྱི་སེམས་ནི་ས་ལྟ་བུ་ཡིན་ལ། འཇུག་པ་བྱང་ཆུབ་ཀྱི་སེམས་ནི་གསེར་ལྟ་བུ་ནས་སྤྲིན་ལྟ་བུའི་བར་ཉི་ཤུ་རྩ་གཅིག་ཡིན་ཏེ། ཞེས་གསུངས་པའི་ཕྱིར་ཞེས་ཟེར་རོ། །འོ་ན་ཐེག་ཆེན་ཚོགས་ལམ་ཆུང་ངུའི་གནས་སྐབས་ན་ཐེག་ཆེན་གྱི་སྒྲུབ་པས་ཟིན་པའི་སེམས་བསྐྱེད་མེད་པར་ཐལ། དེ་ན་བྱང་ཆུབ་སྒྲུབ་པའི་བྱ་བས་ཟིན་པའི་སེམས་བསྐྱེད་མེད་པའི་ཕྱིར། འདོད་ན། དེ་ན་ཐེག་ཆེན་གྱི་སྒྲུབ་པ་མེད་པར་ཐལ་ལོ། །ཡང་བྱང་ཆུབ་སྒྲུབ་པའི་བྱ་བས་ཟིན་པའི་སྨོན་སེམས་ཡོད་པར་ཐལ། ཐེག་ཆེན་གྱི་བསླབ་པས་ཟིན་པའི་སྨོན་སེམས་ཡོད་པའི་ཕྱིར། མ་གྲུབ་ན། ཆོ་ག་ལ་བརྟེན་ནས་སྐྱེས་པའི་སྨོན་སེམས་ཡོད་པ་བུད། ཡང་སངས་རྒྱས་ས་ན་འཇུག་སེམས་ཡོད་པར་ཐལ། དེ་ན་སྤྲིན་ལྟ་བུའི་སེམས་བསྐྱེད་ཡོད་པའི་ཕྱིར། ཁྱབ་པ་ཁས། ཁ་ཅིག དེ་གཉིས་ཀྱི་མཚན་ཉིད་རིམ་བཞིན། འབྲས་བུ་བྱང་ཆུབ་ལ་དམིགས་པའི་ཐེག་ཆེན་སེམས་བསྐྱེད་དང་། བྱང་ཆུབ་ཀྱི་ཆེད་དུ་ཕ་རོལ་ཏུ་ཕྱིན་པའི་སྤྱོད་པ་ལ་དམིགས་པའི་ཐེག་ཆེན་སེམས་བསྐྱེད་ཡིན་ཞིང་དེ་གཉིས་འགལ་བར་བཞེད་དོ། །འོ་ན་འཇུག་སེམས་ཀྱི་མཚན་ཉིད་དེ་ཆོས་ཅན། སྨོན་སེམས་ཡིན་པར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། གཞན་དོན་དུ་བྱང་ཆུབ་ལ་དམིགས་པའི་ཐེག་ཆེན་སེམས་བསྐྱེད་དེ་གཞན་དོན་ལ་དམིགས་པའི་སེམས་བསྐྱེད་ཡིན་པའི་ཕྱིར། མ་གྲུབ་ན། གཞན་དོན་དེ་ཐེག་ཆེན་སེམས་བསྐྱེད་ཀྱི་དམིགས་པ་མིན་པར་ཐལ་ལོ། །གཞན་ཡང་ཕ་རོལ་ཏུ་ཕྱིན་པའི་སྤྱོད་པ་ལ་དམིགས་པའི་ཐེག་ཆེན་སེམས་བསྐྱེད་ཡིན་ན། ཕ་རོལ་ཏུ་ཕྱིན་པའི་སྤྱོད་པས་ཟིན་པའི་ཐེག་ཆེན་སེམས་བསྐྱེད་ཡིན་དགོས་པར་ཐལ། འཇུག་པ་སེམས་བསྐྱེད་ཀྱི་མཚན་ཉིད་དེ་ཡིན་ན། འཇུག་པ་སེམས་བསྐྱེད་ཡིན་དགོས་པའི་ཕྱིར། འདོད་ན། བྱང་སེམས་སོ་སྐྱེའི་རྒྱུད་ཀྱི་ཐེག་ཆེན་སེམས་བསྐྱེད་དེ་ཆོས་ཅན། སྟོང་ཉིད་མངོན་སུམ་རྟོགས་པའི་ཤེས་རབ་ཀྱིས་ཟིན་པའི་སེམས་བསྐྱེད་ཡིན་པར་ཐལ། དེ་ལ་དམིགས་པའི་སེམས་བསྐྱེད་ཡིན་པའི་ཕྱིར་ཏེ། དོན་དམ་སེམས་བསྐྱེད་ལ་དམིགས་པའི་སེམས་བསྐྱེད་ཡིན་པའི་ཕྱིར། གཞན་ཡང་། སེམས་བསྐྱེད་པ་ནི་གཞན་དོན་ཕྱིར། །ཞེས་པའི་གཞུང་འདིས་སྨོན་སེམས་ཁོ་ནར་བསྟན་པར་ཐལ། སྨོན་སེམས་ཀྱི་མཚན་ཉིད་དེ་འཐད་པའི་ཕྱིར། ཁ་ཅིག ཐེག་ཆེན་གྱི་འཇུག་པ་སེམས་བསྐྱེད་ཀྱི་མཚན་ཉིད་ཀྱི་ཟུར་དུ་ཐེག་ཆེན་ཀུན་རྫོབ་སེམས་བསྐྱེད་ཅེས་སྦྱོར་ན། ས་དང་པོའི་དོན་དམ་སེམས་བསྐྱེད་ཆོས་ཅན། དེར་ཐལ། འཇུག་སེམས་ཡིན་པའི་ཕྱིར་ཏེ། ཐེག་ཆེན་གྱི་བསླབ་པའི་གྲོགས་ཀྱིས་ཟིན་པའི་སེམས་བསྐྱེད་ཡིན་པའི་ཕྱིར། ཡང་དེ་ཆོས་ཅན། འཇུག་སེམས་ཡིན་པར་ཐལ། བྱང་ཆུབ་སེམས་པའི་རྒྱུད་ཀྱི་དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་བསྡུས་པའི་ཐེག་ཆེན་སེམས་བསྐྱེད་ཡིན་པའི་ཕྱིར་ཏེ། བྱང་འཕགས་ཀྱི་རྒྱུད་ཀྱི་ཕར་ཕྱིན་དྲུག་པོ་གང་རུང་གིས་བསྡུས་པའི་ཐེག་ཆེན་སེམས་བསྐྱེད་ཡིན་པའི་ཕྱིར། ྎ མདོར་ན། ཉེས་སྤྱོད་སྤོང་བ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་གྱིས་མ་བསྡུས་པའི་བྱང་སེམས་བསླབ་པ་མེད་ཅིང་། དེས་ཟིན་པའི་སེམས་བསྐྱེད་ཐམས་ཅད་འཇུག་པ་སེམས་བསྐྱེད་དུ་འཇོག་དགོས་པས། བྱང་སེམས་ཀྱི་སྦྱོར་ལམ་ནས་ས་བཅུ་རྒྱུན་མཐའི་བར་དུ་འཇུག་པ་སེམས་བསྐྱེད་མིན་པའི་ཐེག་ཆེན་སེམས་བསྐྱེད་གཏན་ནས་མེད་པར་ཤེས་པར་བྱའོ། །དེས་ན་སྨོན་འཇུག་གཉིས་པོ་ཀུན་རྫོབ་སེམས་བསྐྱེད་ཁོ་ནའི་དབྱེ་བར་བྱེད་པ་ནི་རི་བོང་གི་ཅལ་གྱི་རྗེས་སུ་འབྲང་བའོ། །ཁ་ཅིག ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་མ་ཟིན་པ་སྨོན་པ་སེམས་བསྐྱེད་ཀྱི་མཚན་ཉིད་དུ་འཇོག་ན། སངས་རྒྱས་སའི་སེམས་བསྐྱེད་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། རྟགས་གོང་དུ་བསྒྲུབས་ཟིན་ནོ། །གཉིས་པ་ནི། དེ་གཉིས་ཀྱི་མཚན་ཉིད་རིམ་བཞིན། སོ་སྐྱེའི་རྒྱུད་ཀྱི་ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་མ་ཟིན་པ་དང་། ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་ཟིན་པའོ། །འདི་གཉིས་ཀྱི་ཁྱད་པར་ཐེག་ཆེན་གྱི་བསླབ་པའི་གྲོགས་ཀྱིས་ཟིན་མ་ཟིན་གྱི་སྒོ་ནས་འཇོག་པ་ནི། གསུང་རབ་ཀྱི་དགོངས་པ་བླ་ན་མེད་པ་སྟེ་ཆོས་བཤེས་ཀྱི་ཚིགས་གསལ་ལས། དེ་ལ་སྨོན་པ་ཞེས་བྱ་བ་ནི་སྨོན་པ་ཙམ་སྟེ། སེམས་བསྐྱེད་པའི་ཆོ་གས་བླང་བ་མ་བྱས་སོ་ཞེས་དང་། བསླབ་བཏུས་ལས། བྱང་ཆུབ་ཀྱི་སེམས་དེ་ནི་རྣམ་པ་གཉིས་ཏེ། བྱང་ཆུབ་ཏུ་སྨོན་པའི་སེམས་དང་། བྱང་ཆུབ་ཏུ་ཆས་པའི་སེམས་སོ། །ཞེས་དང་། སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་དང་། སྒོམ་རིམ་ལས། དང་པོར་ཁོ་ན་འགྲོ་བ་མཐའ་དག་ལ་ཕན་པའི་ཕྱིར་སངས་རྒྱས་སུ་གྱུར་ཅིག་ཅེས་གང་ཐོག་མར་དོན་དུ་གཉེར་བ་དེ་ནི་སྨོན་པའི་སེམས་སོ། །གང་ཕན་ཆད་སྡོམ་པ་བླངས་པ་ནས་བཟུང་སྟེ། ཚོགས་གཉིས་ལ་ཞུགས་པ་དེ་ནི་འཇུག་པའི་སེམས་སོ་ཞེས་སོ། །གསུམ་པ་ལ། འཁྲི་ཆུང་བ་ཁ་ཅིག ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་ཟིན་པ་ཆོས་ཅན། ཆོས་དེ་ཁྱོད་ཡིན་ན། ཆོས་དེ་ཐེག་ཆེན་འཇུག་པ་སེམས་བསྐྱེད་ཡིན་དགོས་པར་ཐལ། ཁྱོད་དེའི་མཚན་ཉིད་ཡིན་པའི་ཕྱིར། འདོད་ན། བྱང་སེམས་སྦྱོར་ལམ་པའི་རྒྱུད་ཀྱི་འཇུག་པ་སེམས་བསྐྱེད་ཆོས་ཅན། ཐེག་ཆེན་གྱི་སྨོན་པ་སེམས་བསྐྱེད་དེ་ཐེག་ཆེན་གྱི་འཇུག་པ་སེམས་བསྐྱེད་ཡིན་པར་ཐལ། ཐེག་ཆེན་གྱི་སྨོན་པ་སེམས་བསྐྱེད་དེ་ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་ཟིན་པའི་ཕྱིར། མ་གྲུབ་ན། གང་མ་གྲུབ་དྲིས་ནས། ཕྱི་མ་ཆོས་ཅན་གྱི་སྟེང་དུ་བསྒྲུབ་བོ། །རིགས་པ་འདིས་གང་ཞིག་ཡོད་པའི་མཚན་ཉིད་ཐམས་ཅད་སུན་འབྱིན་པ་ཡིན་ཞེས་སྨྲའོ། །འོ་ན་ཁྱོད་རང་གིས་དང་པོར་གཟུང་བའི་ཆོས་ཅན་དེ་ཆོས་ཅན། ཐེག་ཆེན་གྱི་སྨོན་པ་སེམས་བསྐྱེད་དེ་ཁྱོད་ཡིན་པར་ཐལ། དེ་ཁྱོད་ཡིན་པའི་ཕྱིར། འདོད་ན། རི་བོང་རྭ་ཆོས་ཅན་དུ་བཟུང་ནས། བསལ་བ་དེ་མིན་པར་ཐལ། མིན་པའི་ཕྱིར། མ་གྲུབ་ན་གང་མ་གྲུབ་དྲིས་ནས། དང་པོ་དངོས་འགལ། ཕྱི་མ་ཆོས་ཅན་གྱི་སྟེང་དུ་སྒྲུབ་བོ། །རྩ་རྟགས་མ་གྲུབ་ན། བྱང་སེམས་སྦྱོར་ལམ་པའི་རྒྱུད་ཀྱི་འཇུག་པ་སེམས་བསྐྱེད་ཆོས་ཅན་དུ་གཟུང་ནས་རྟགས་དེར་ཐལ། དེའི་ཕྱིར། འཁོར་གསུམ། རིགས་པ་འདིས་འདི་འདྲའི་རིགས་ཅན་སྨྲ་བ་ཐམས་ཅད་སུན་འབྱིན་པ་ཡིན་ནོ། །གཉིས་པ་ལ་དགག་གཞག་གཉིས། དང་པོ་ནི། ཁ་ཅིག དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་གཉིས་ཀྱི་མཚན་ཉིད་རིམ་བཞིན། ཆོས་ཀྱི་བདག་མེད་མངོན་སུམ་རྟོགས་པའི་ཐེག་ཆེན་སེམས་བསྐྱེད་དང་། རགས་པ་བརྡ་ལས་བྱུང་བའི་ཐེག་ཆེན་སེམས་བསྐྱེད་ཟེར་ན། ས་གཉིས་པའི་རྗེས་ཐོབ་ཀྱིས་བསྡུས་པའི་ཐེག་ཆེན་སེམས་བསྐྱེད་ཆོས་ཅན། དོན་དམ་སེམས་བསྐྱེད་དུ་ཐལ། མཚན་ཉིད་དེའི་ཕྱིར་ཏེ། ཐེག་ཆེན་སེམས་བསྐྱེད་དང་ལམ་ཤེས་ཀྱི་གཞི་མཐུན་ཡིན་པའི་ཕྱིར། ཐེག་ཆེན་གྱི་རིགས་སད་པའི་སྟོབས་ལས་བྱུང་བའི་ཐེག་ཆེན་སྨོན་པ་སེམས་བསྐྱེད་ཆོས་ཅན། དེར་ཐལ། ཀུན་རྫོབ་སེམས་བསྐྱེད་ཡིན་པའི་ཕྱིར། ཁ་ཅིག དེ་གཉིས་ཀྱི་མཚན་ཉིད་རིམ་བཞིན། དོན་དམ་བདེན་པ་འཛིན་སྟངས་ཀྱིས་གཙོ་བོར་བྱེད་པ་དང་མི་བྱེད་པའི་ཐེག་ཆེན་སེམས་བསྐྱེད་ཟེར་ན། བྱང་སེམས་སྦྱོར་ལམ་པའི་རྒྱུད་ཀྱི་ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་གཙོ་བོ་རྣམ་རིག་ཆོས་ཅན། དོན་དམ་སེམས་བསྐྱེད་དུ་ཐལ། མཚན་ཉིད་དེའི་ཕྱིར། སངས་རྒྱས་ཀྱི་ཇི་སྙེད་མཁྱེན་པའི་ཡེ་ཤེས་ཆོས་ཅན། ཀུན་རྫོབ་སེམས་བསྐྱེད་དུ་ཐལ། མཚན་ཉིད་དེའི་ཕྱིར། གཉིས་པ་ནི། དེ་གཉིས་ཀྱི་མཚན་ཉིད་རིམ་བཞིན། རྣམ་པར་མི་རྟོག་པའི་ཡེ་ཤེས་སུ་གྱུར་པའི་གཙོ་བོ་རྣམ་རིག་དང་། རྣམ་པར་མི་རྟོག་པའི་ཡེ་ཤེས་ཀྱིས་མ་བསྡུས་པའི་ཐེག་ཆེན་སེམས་བསྐྱེད་དོ། །བཞི་པ་ས་མཚམས་ལ། དགག་གཞག་གཉིས། དང་པོ་ལ་གསུམ་སྟེ། མ་མཐའ་ལ་འཁྲུལ་པ་དགག ཡ་མཐའ་ལ་འཁྲུལ་པ་དགག བར་ལ་འཁྲུལ་པ་དགག་པའོ། །དང་པོ་ནི། ཁ་ཅིག ལམ་མ་ཞུགས་ཀྱི་གནས་སྐབས་ན་ཐེག་ཆེན་སེམས་བསྐྱེད་མེད་དེ། འདུན་ལྡན་སེམས་བསྐྱེད་ཀྱི་མ་མཐའི་ས་མཚམས་ཐེག་ཆེན་གྱི་ཚོགས་ལམ་ཆུང་ངུ་ནས་གཞག་པ་དང་། ཐེག་ཆེན་གྱི་སྨོན་པ་སེམས་བསྐྱེད་རྒྱུད་ལ་སྐྱེས་པ་དང་ཐེག་ཆེན་གྱི་ཚོགས་ལམ་དུ་ཞུགས་པ་དུས་མཉམ་པའི་ཕྱིར། གཞན་དུ་ན། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་རྒྱུད་ལ་ཐེག་ཆེན་སེམས་བསྐྱེད་ཡོད་པར་འགྱུར་ཞིང་། འདོད་ན་དེ་ཐེག་ཆེན་གྱི་སྐྱེས་བུ་ཡིན་པར་འགྱུར་རོ་ཞེས་ཟེར་ཏེ། ཊཱི་ཀའི་དགོངས་པ་ཡང་འདི་ཡིན་པར་སྨྲའོ། །འོ་ན་འགྲོ་བར་འདོད་པའི་བློ་སྐྱེས་ན། འགྲོ་བའི་བྱ་བས་ཟིན་པའི་ཁྱབ་པ་ཡོད་པར་ཐལ། ཐེག་ཆེན་གྱི་སྨོན་པ་སེམས་བསྐྱེད་སྐྱེས་ན་ཐེག་ཆེན་གྱི་ལམ་དུ་ཞུགས་པས་ཁྱབ་པའི་ཕྱིར། མ་ཁྱབ་ན། འགྲོ་བར་འདོད་དང་འགྲོ་བ་ཡི། །ཞེས་པའི་གཞུང་འདི་སྨོན་འཇུག་གཉིས་ཀྱི་ཁྱད་པར་འཆད་པའི་གཞུང་དུ་ཁས་བླངས་པ་དང་འགལ་ལོ། །ཡང་སྨོན་སེམས་རྒྱུད་ལྡན་གྱི་གང་ཟག་ཡིན་ན། བྱང་སེམས་ཀྱི་བསླབ་པ་ཉམས་པའི་གང་ཟག་ཡིན་དགོས་པར་ཐལ། དེ་རྒྱུད་ལྡན་གྱི་ལམ་ཞུགས་ཀྱི་གང་ཟག་ཡིན་ན་དེ་ཡིན་པས་ཁྱབ་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། ཊཱི་ཀ་ལས། དེ་རྒྱུད་ལྡན་གྱི་ལམ་ཞུགས་ཀྱི་གང་ཟག་གི་མཚན་གཞི་ལ་བྱང་སེམས་ཀྱི་བསླབ་པ་ལས་ཉམས་ནས་སྨོན་སེམས་རྐྱང་པ་ལ་གནས་པ་དེ་ཁོ་ན་གཟུང་བའི་ཕྱིར་རོ། །གཉིས་པ་ནི། རེད་མདའ་བ་ན་རེ། སངས་རྒྱས་ཀྱི་ས་ན་སེམས་བསྐྱེད་མེད་དེ། དེ་ན་སྨོན་འཇུག་གང་ཡང་མེད་པའི་ཕྱིར་དང་། དེ་གཉིས་ལས་མ་གཏོགས་པའི་སེམས་བསྐྱེད་མཚན་ཉིད་པ་གཞུང་གང་ལས་ཀྱང་མ་བཤད་པའི་ཕྱིར། འདིར་སེམས་བསྐྱེད་ཐ་མ་གསུམ་སངས་རྒྱས་ཀྱི་སར་ཡོད་པར་བཤད་པ་ནི་སེམས་བསྐྱེད་དངོས་མིན་ཏེ། སེམས་བསྐྱེད་ཀྱི་འབྲས་བུ་ཡིན་པའི་ཕྱིར་ཞེས་གསུང་ངོ་། །འོ་ན་སངས་རྒྱས་ཀྱི་ས་ན་སྒྲིབ་པ་སྤང་བའི་སེམས་བསྐྱེད་མེད་པར་ཐལ་བ་དང་། ཆོས་སྐུ་དང་མཚུངས་ལྡན་གྱི་སེམས་བསྐྱེད་མེད་པར་ཐལ། དམ་བཅའ་དེའི་ཕྱིར། སེམས་བསྐྱེད་དང་པོ་བཅུ་དགུ་པོ་དེ་ཡང་སེམས་བསྐྱེད་མིན་པར་ཐལ། དེ་སེམས་བསྐྱེད་ཀྱི་རྒྱུ་ཡིན་པའི་ཕྱིར། རྟགས་ཁྱབ་གཉིས་ཀ་སྔ་མ་དང་མཚུངས་ཏེ། འགྲེལ་ཆེན་དུ། འདིར་ངེས་པར་སོ་སོ་སྐྱེ་བོའི་བྱང་ཆུབ་སེམས་དཔའ་ནས་དེ་བཞིན་གཤེགས་པའི་རབ་ཏུ་དབྱེ་བས་རྒྱུ་དང་འབྲས་བུའི་བདག་ཉིད་ཅན་གྱི་དབྱེ་བ་ཡིན་པར་ཤེས་པར་བྱའོ་ཞེས་གསུངས་པའི་ཕྱིར། གསུམ་པ་ནི། ཕྱྭ་པ་ན་རེ། སློབ་དཔོན་གྱིས་བསྒྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་པ་སངས་རྒྱས་ཀྱི་ས་ཁོ་ནར་འཇོག་པ་མི་འཐད་པར་ཐལ། བསྒྲོད་པ་གཅིག་པའི་ལམ་ས་བརྒྱད་པ་ནས་ཐོབ་པའི་ཕྱིར། སྤྲིན་ལྟ་བུའི་སེམས་བསྐྱེད་ཀྱང་སངས་རྒྱས་ཀྱིས་ས་ཁོ་ནར་འཇོག་པ་མི་འཐད་པར་ཐལ། དེ་ས་བཅུ་པ་ནས་ཀྱང་ཐོབ་པའི་ཕྱིར་ཞེས་བཀག་ནས་རང་ལུགས་ལ། ཤེར་ཕྱིན་དང་ལྡན་པ་མན་ཆད་ས་དྲུག་པར་འཇོག་པ་མན་ཆད་སློབ་དཔོན་དང་འདྲ་ལ། བཤེས་གཉེན་ལྟ་བུ་ནས་རྒྱལ་པོ་ལྟ་བུའི་བར་ལྔ་ནི་ས་བདུན་པ་དང་། བང་མཛོད་ལྟ་བུ་སོགས་གསུམ་ནི་ས་བརྒྱད་པ་དང་། བཀོད་མའི་ཆུ་དང་སྒྲ་སྙན་ལྟ་བུ་གཉིས་ནི་ས་དགུ་པ་དང་། སྤྲིན་ལྟ་བུ་ས་བཅུ་པ་དང་སངས་རྒྱས་ཀྱི་སར་འཇོག་པ་ཡིན་ནོ། །ཞེས་གསུངས་སོ། །འོ་ན་སྦྱོར་བ་དང་ལྡན་པའི་སེམས་བསྐྱེད་བྱང་སེམས་ཀྱི་སྦྱོར་ལམ་ཁོ་ནར་འཇོག་པ་མི་འཐད་པར་ཐལ། བྱང་སེམས་ཀྱི་ཚོགས་ལམ་ན་ཡང་སྦྱོར་བ་ཡོད་པའི་ཕྱིར། སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་ས་དང་པོ་ཁོ་ནར་འཇོག་པ་མི་འཐད་པར་ཐལ། ས་གཉིས་པ་ན་ཡང་སྦྱིན་པའི་ཕར་ཕྱིན་ཡོད་པའི་ཕྱིར་ཞེས་སོགས་ཐམས་ཅད་ལ་རིགས་བསྒྲེས་ནས་བརྗོད་པར་བྱའོ། །གཉིས་པ་ནི། སྨོན་སེམས་ནི་གཙོ་བོར་ཐེག་ཆེན་གྱི་ལམ་མ་ཞུགས་ཀྱི་གང་ཟག་གི་རྒྱུད་ལ་ཡོད། ལམ་དུ་ཞུགས་ནས་བསླབ་པ་ཉམས་པའི་ཚེ་ལྡན་སྲིད་པ་ཙམ་ཡིན། ཐེག་ཆེན་གྱི་འཇུག་སེམས་རྒྱུད་ལ་སྐྱེས་པ་དང་ཐེག་ཆེན་གྱི་ཚོགས་ལམ་དུ་ཞུགས་པ་དུས་མཉམ་ཞིང་། དེ་ནས་རྒྱུན་མཐའི་བར་དུ་ཡོད་ལ་ཚོགས་ལམ་དུ་བསླབ་པ་ཉམས་པའི་ཚེ་མི་ལྡན་པ་སྲིད་པ་ཙམ་ཡིན་ནོ། །དོན་དམ་སེམས་བསྐྱེད་ས་དང་པོ་ནས་སངས་རྒྱས་སའི་བར་ན་ཡོད། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་རྒྱུད་ལ་སྨོན་སེམས་མེད་དེ། དེ་ལྟ་བུའི་རྒྱུད་ལ་ཐེག་ཆེན་སེམས་བསྐྱེད་ནམ་སྐྱེས་པའི་ཚེ་ན་བསླབ་པས་ཟིན་པ་ཁོ་ན་སྐྱེ་བ་ཡིན་པའི་ཕྱིར། དཔེར་ན་དགེ་སློང་གི་རྒྱུད་ལ་ཐེག་ཆེན་སེམས་བསྐྱེད་སྐྱེས་པ་བཞིན་ནོ། །ཊཱི་ཀའི་དགོངས་པ་འདི་ཁོ་ན་ཡིན་ཡང་གཞན་དག་གིས་མ་རྟོགས་པར་སྣང་ངོ་། །སྒྲུབ་དང་བདེན་པ་རྣམས་དང་ནི། །ཞེས་པའི་སྐབས་སུ། གདམས་ངག་གི་མཚན་གཞི། མཚན་ཉིད། ཉན་པའི་ས་མཚམས་དང་གསུམ་མོ། །དང་པོ་ལ་ཁ་ཅིག གདམས་ངག་ཡིན་ན་ངག་ཡིན་པས་མ་ཁྱབ་སྟེ། བརྗོད་བྱ་དོན་གྱི་གདམས་ངག་དེ་གདམས་ངག་ཡིན་པའི་ཕྱིར་ཏེ། ཐེག་ཆེན་གྱི་སྦྱོར་ལམ་དེ་གདམས་ངག་ཡིན་པའི་ཕྱིར་ཏེ། དེ་ཐེག་ཆེན་གྱི་སྒྲུབ་པ་ཡིན་པའི་ཕྱིར། གཞན་དུ། གདམས་ངག་སྟོན་ན་སྒྲ་བཅས་ཀྱི་སྒོ་ནས་སྟོན་དགོས་པར་ཐལ། གདམས་ངག་ཡིན་ན་ངག་ཡིན་དགོས་པའི་ཕྱིར། འདོད་ན། ཆོས་སྟོན་ན་སྒྲ་བཅས་ཀྱིས་ཆོས་སྟོན་དགོས་པར་ཐལ། འདོད་པ་དེའི་ཕྱིར། འདོད་ན། སྒྲ་མེད་ལུས་ཀྱི་སྒོ་ནས་ཆོས་སྟོན་པ་མེད་པར་ཐལ། འདོད་པའི་ཕྱིར། འདོད་ན། སྒྲ་མེད་ཀྱང་དེ་དེ་ལྟར་སྣང་ཞེས་པ་དང་འགལ་ལོ། །ཁ་ཅིག་ཐེག་ཆེན་ཐུན་མོང་མ་ཡིན་པའི་གདམས་ངག་ཡིན་ན། སངས་རྒྱས་ཀྱི་བཀའ་ཡིན་དགོས་ཏེ། སྐབས་འདིར་དངོས་བསྟན་གྱི་གདམས་ངག་བཅུ་པོ་གང་རུང་ཡིན་ན་སངས་རྒྱས་ཀྱི་བཀའ་ཡིན་དགོས་པའི་ཕྱིར་ཟེར་རོ། །དང་པོ་ལ། སྒྲུབ་པ་རང་གི་ངོ་བོ་ཡིན་ན། སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་ཡིན་དགོས་པར་ཐལ། ཐེག་ཆེན་གྱི་སྒྲུབ་པ་ཡིན་ན་གདམས་ངག་ཡིན་དགོས་པའི་ཕྱིར། ཆོས་སྟོན་ན་སྒྲ་བཅས་ཀྱིས་ཆོས་སྟོན་དགོས་པར་ཐལ། ལུང་འབོགས་ན་སྒྲ་བཅས་ཀྱི་སྒོ་ནས་ལུང་འབོགས་དགོས་པའི་ཕྱིར། ཁྱབ་པ་ཁས། གཉིས་པ་ལ། ཐེག་ཆེན་ཐུན་མོང་མིན་པའི་གདམས་ངག་ཡིན་ན། སྐབས་འདིར་དངོས་བསྟན་གྱི་གདམས་ངག་བཅུ་པོ་གང་རུང་ཡིན་དགོས་པར་ཐལ། དེ་ལ་ཁྱབ་པ་ཡོད་པའི་ཕྱིར། འདོད་ན་མངོན་རྟོགས་རྒྱན་ཆོས་ཅན། དེར་ཐལ། དེའི་ཕྱིར། ཁ་ཅིག སྐབས་འདིར་དངོས་བསྟན་གྱི་གདམས་ངག་བཅུ་པོ་གང་རུང་ཡིན་ན། སངས་རྒྱས་ཀྱི་བཀའ་ཡིན་མི་དགོས་ཏེ། སྒྲུབ་དང་ཞེས་པའི་རྒྱན་ཚིག་དེ་འདིར་དངོས་བསྟན་གྱི་གདམས་ངག་ཡིན་པའི་ཕྱིར་ཞེ་ན། སྒྲུབ་དང་ཞེས་པའི་རྒྱན་ཚིག་དེ་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་ཡིན་པར་ཐལ། སྔ་མའི་རྟགས་དེའི་ཕྱིར། འདོད་ན། སེམས་བསྐྱེད་པ་ནི་གཞན་དོན་ཕྱིར། །ཞེས་པའི་གཞུང་འདི་ཐེག་ཆེན་སེམས་བསྐྱེད་ཡིན་པར་ཐལ་ལོ། །དེས་ན་གདམས་ངག་ཡིན་ན་ངག་ཡིན་དགོས་ཏེ། ཆོས་བཤེས་ཀྱིས་འདོམས་པ་ཡང་དག་འདི་ཡིན་ལ། གདམས་པ་ལྟར་ཉམས་སུ་ལེན་པར་བྱེད་པའང་འདི་གཙོ་བོར་གྱུར་པའི་གདམས་ངག་གོ་ཞེས་གསུངས་པའི་ཕྱིར་དང་། འཇུག་པའི་འགྲེལ་བཤད་ལས། ཁོང་དུ་ཆུད་པའི་ཕྱིར་ཆོས་སྟོན་པ་ནི་གདམས་ངག་གོ་ཞེས་དང་། འདིར་ཡང་ལུང་འབོགས་པ་དཀོན་མཆོག་གསུམ་ལ་འདོམས་པ་དང་ཞེས་སོ། །ཡང་གདམས་ངག་གི་བརྗོད་བྱ་ཡིན་ན་གདམས་ངག་ཡིན་དགོས་པར་ཐལ། བརྗོད་བྱ་དོན་གྱི་གདམས་ངག་ཡིན་ན་གདམས་ངག་ཡིན་དགོས་པའི་ཕྱིར། འདོད་ན། ལུང་གི་བརྗོད་བྱ་ཡིན་ན་ལུང་ཡིན་དགོས་པར་ཐལ་ལོ། །གཉིས་པ་ལ་དགག་གཞག་གཉིས། དང་པོ་ནི། ཐེག་ཆེན་གྱི་གདམས་ངག་གི་མཚན་ཉིད་ལ། ཁ་ཅིག རྫོགས་པའི་བྱང་ཆུབ་ཐོབ་པའི་ཐབས་སུ་གྱུར་པ་ཞེས་དང་། རྫོགས་པའི་བྱང་ཆུབ་ཐོབ་པར་བྱེད་པའི་ངག་རྣམ་དག་ཅེས་དང་། གདུལ་བྱ་ཐེག་ཆེན་གྱི་རིགས་ཅན་གཙོ་བོར་བྱས་ནས་དེ་ལ་རྫོགས་པའི་བྱང་ཆུབ་ཐོབ་པའི་ཐབས་སྟོན་པར་བྱེད་པའི་ངག་རྣམ་དག་ཅེས་པ་རྣམས་འཇོག་ན། དང་པོ་ལ་ཐེག་ཆེན་གྱི་སྦྱོར་ལམ་ཆོས་ཅན། དེར་ཐལ། མཚན་ཉིད་དེའི་ཕྱིར། གཉིས་པ་ལ་ཐེག་དམན་གྱི་གདམས་ངག་ཆོས་ཅན། དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། ཐེག་དམན་གྱི་ཐེག་པ་དེ་རྫོགས་པའི་བྱང་ཆུབ་ཐོབ་པའི་ཐབས་སུ་གྱུར་པ་ཡིན་པའི་ཕྱིར་ཏེ། མཐར་ཐུག་ཐེག་པ་གཅིག་ཏུ་གྲུབ་པའི་ཕྱིར། གསུམ་པ་ལ། མ་ངེས་པའི་རིགས་ཅན་གཙོ་བོར་བྱས་ནས་དེ་ལ་མཐར་ཐུག་ཐེག་པ་གཅིག་ཏུ་སྟོན་པའི་མདོ་ཆོས་ཅན། དེར་ཐལ། མཚོན་བྱ་དེའི་ཕྱིར། དེ་དེར་ཐལ། དེ་འདྲ་ཡོད་པའི་ཕྱིར་ཏེ། རྒྱན་ལས། རྫོགས་པའི་སངས་རྒྱས་རྣམས་ཀྱིས་ནི། །མ་ངེས་རྣམས་ལ་ཐེག་གཅིག་བསྟན། །ཞེས་སོ། །རྩ་བར་འདོད་ན། མ་ངེས་པའི་རིགས་ཅན་དེ་ཐེག་ཆེན་གྱི་རིགས་ཅན་དུ་ཐལ་ལོ། །གཉིས་པ་ནི། བྱང་ཆུབ་གསུམ་གྱི་ནང་ནས་གཙོ་བོར་རྫོགས་པའི་བྱང་ཆུབ་ཐོབ་པར་བྱེད་པའི་ངག་རྣམ་དག དེ་ལ་ངོ་བོའི་སྒོ་ནས་དབྱེ་ན། ཐེག་ཆེན་གྱི་བཀའ་དང་བསྟན་བཅོས་གཉིས། ཡུལ་གྱི་སྒོ་ནས་དབྱེ་ན་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་སོགས་བཅུ། བསྟན་ཚུལ་གྱི་སྒོ་ནས་དབྱེ་ན་གདམས་པའི་གདམས་ངག་དང་རྗེས་བསྟན་གྱི་གདམས་ངག་གཉིས། འདི་གཉིས་ཀྱི་ཁྱད་པར་ལ་ཉི་སྣང་ལས། ཡང་དག་པར་ཐོབ་པའི་ཡོན་ཏན་ཡོངས་སུ་བསྐྱང་བར་བྱ་བའི་ཕྱིར་ཡོངས་སུ་མི་ཉམས་པར་འཛིན་པ་ནི་ཡོངས་སུ་གདམས་པ་ཡིན་ལ། དེའི་རྗེས་ལ་ཡོན་ཏན་མ་ཐོབ་པ་ཐོབ་པར་བྱ་བའི་ཕྱིར་ཉེ་བར་འཛིན་པ་ནི་རྗེས་སུ་བསྟན་པ་ཡིན་ནོ་ཞེས་དང་། འགྲེལ་ཆེན་ལས། ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་ལ་སོགས་པ་རྣམ་པ་བཅུ་པོ་གང་ལ་ཐོབ་པའི་ཡོན་ཏན་ཡོངས་སུ་བསྲུང་བའི་དོན་གྱིས་མི་ཉམས་པར་བྱ་བའི་ཕྱིར་བསླབ་པས་བསྡམ་པར་བགྱི་ཞིང་། དེ་ནས་ཕྱིས་མ་ཐོབ་པའི་ཡོན་ཏན་ཐོབ་པར་བྱ་བའི་ཕྱིར་རྗེས་སུ་བསྟན་པར་བགྱིས་ཏེ་ཞེས་གསུངས། གསུམ་པ་ནི། ཁ་ཅིག ཐེག་ཆེན་གྱི་གདམས་ངག་ཁྱད་པར་ཅན་ཉན་པ་ལ་ཐེག་ཆེན་གྱི་ཚོགས་ལམ་ཆེན་པོ་ཐོབ་དགོས་ཏེ། དེ་ལ་ཆོས་རྒྱུན་གྱི་ཏིང་ངེ་འཛིན་ཐོབ་དགོས་པའི་ཕྱིར་ཏེ། རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེ་རྙེད་པར་འགྱུར། །ཞེས་ཟེར་རོ། །འོ་ན་ཐེག་ཆེན་ལམ་དུ་མ་ཞུགས་པའི་གང་ཟག་གིས་ལམ་ཤེས་ཀྱི་མདོ་ཉན་པ་མེད་པར་ཐལ། དེས་ཐེག་ཆེན་ཐུན་མོང་མིན་པའི་གདམས་ངག་ཉན་པ་མེད་པའི་ཕྱིར། འདོད་ན། བྱང་ཆུབ་མཆོག་ཏུ་སེམས་མ་བསྐྱེད་པའི་གང་ཟག་གིས་ལམ་ཤེས་ཀྱི་མདོ་ཉན་པ་མེད་པར་ཐལ། འདོད་པ་དེའི་ཕྱིར། འདོད་ན། མདོ་ལས། ལྷའི་བུ་གང་དག་བྱང་ཆུབ་ཏུ་སེམས་མ་བསྐྱེད་པ་དེ་དག་ནི་བྱང་ཆུབ་དུ་སེམས་བསྐྱེད་དོ་ཞེས་པ་དང་འགལ་ལོ། །ཡང་ཐེག་ཆེན་གྱི་ཚོགས་ལམ་ཆུང་ངུ་ལ་གནས་པའི་བྱང་སེམས་དེས་ཐེག་ཆེན་ཐུན་མོང་མིན་པའི་གདམས་ངག་ཉན་པ་མེད་པར་ཐལ། རྩ་བའི་དམ་བཅའ་དེའི་ཕྱིར། འདོད་ན། དེ་ལྟར་བྱང་ཆུབ་ཀྱི་སེམས་དང་པོ་ལ་སོགས་པ་བསྐྱེད་པའི་བྱང་ཆུབ་སེམས་དཔའ་ཞེས་སོགས་དང་འགལ་ལོ། །རང་ལུགས་ནི། མ་མཐའ་ལམ་མ་ཞུགས་ནས་ས་བཅུའི་བར་དུ་གདམས་ངག་ཉན་པ་ཡོད་ལ། ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་གནས་སྐབས་ན་མེད་དེ། སློབ་ལམ་ན་མཉམ་གཞག་ལས་མ་གཡོས་བཞིན་དུ་གདམས་ངག་ཉན་པ་ཡོད་ན། འཆད་པ་ཡང་ཡོད་དགོས་པས། དེས་གཞན་དོན་དངོས་སུ་བྱེད་པར་ཐལ་ལོ། །ཁ་ཅིག སྲིད་པ་ཐ་མ་པའི་བྱང་སེམས་གདམས་ངག་ཉན་པ་མེད་དེ། དེ་སློབ་དཔོན་གཞན་གྱི་གདམས་ངག་ལ་མ་ལྟོས་པར་རང་བྱུང་གི་བྱང་ཆུབ་མངོན་དུ་བྱེད་ནུས་པའི་ཕྱིར་ཞེས་སྨྲ་བ་ནི། བྱང་སེམས་དེ་དང་པོ་སྤྲུལ་སྐུར་སངས་རྒྱ་བ་ཡིན་ནམ་སྙམ་པའི་བློ་ཆུང་བ་འབའ་ཞིག་སྟེ། དང་པོར་ལོངས་སྐུར་སངས་རྒྱ་བ་ཡིན་ན་སྲིད་པ་ཐ་མ་པའི་རྟེན་ལ་འོད་ཟེར་ཆེན་པོའི་དབང་བསྐུར་དགོས་པའི་ཕྱིར་རོ། །བྱང་ཆུབ་ཀྱི་སེམས་ཀྱི་རབ་ཏུ་དབྱེ་བ། ཞེས་པའི་སྐབས་སུ། བདེན་གཉིས་ཀྱི་མཐའ་དཔྱད་པ་ལ། དབྱེ་གཞི། དབྱེ་ངོ་། ཕྱེ་བའི་དོན། སོ་སོའི་རྣམ་གཞག་དང་བཞི་ལས། དང་པོ་ནི། ཁ་ཅིག དབྱེ་གཞི་མེད་དེ། བདེན་པ་མི་སྲིད་པའི་ཕྱིར་ཞེས་སྨྲ་བ་ནི་མི་འཐད་དེ། དབྱེ་གཞི་མེད་པའི་དབྱེ་བ་མི་སྲིད་པའི་ཕྱིར་རོ། །ཁ་ཅིག ཤེས་བྱ་དབྱེ་གཞི་མིན་ཏེ། དོན་དམ་བདེན་པ་ཤེས་བྱ་མིན་པའི་ཕྱིར་ཞེས་ཟེར་བ་ནི་མི་འཐད་དེ། ཤེས་བྱ་མིན་ན་ཐོས་བསམ་གྱི་གཏན་ལ་ཕབ་ནས་རྟོགས་པར་བྱ་བ་མིན་པར་ཐལ་ལོ། །ཁ་ཅིག བདེན་པ་དབྱེ་གཞི་ཡིན་ཟེར་བ་མི་འཐད་དེ། ཀུན་རྫོབ་ཡིན་ན་བདེན་པ་ཡིན་པས་མ་ཁྱབ་པའི་ཕྱིར་རོ། །དེས་ན་རྟེན་འབྲེལ་ཙམ་མམ། ཆོས་ཙམ་ཤེས་བྱ་ཙམ་དབྱེ་གཞིར་རིགས་ཏེ། དེ་ལ་མཐོང་ཚུལ་ཐ་དད་པ་གཉིས་ཡོད་པའི་ཕྱིར། གཉིས་པ་ནི། ཀུན་རྫོབ་བདེན་པ་དང་། དོན་དམ་བདེན་པའོ། །གསུམ་པ་ནི། བདེན་གཉིས་གཅིག་དང་ཐ་དད་གང་ཡིན་ཞེ་ན། དགོངས་འགྲེལ་ལས། ཐ་དད་པ་ལ་སྐྱོན་བཞི། གཅིག་པ་ལ་སྐྱོན་བཞི་གསུངས་པའི། དང་པོ་ནི། དོན་དམ་སྣང་བའི་ཆོས་ཉིད་མིན་པར་ཐལ་བ་དང་། དོན་དམ་རྟོགས་པས་སྣང་བ་ལ་བདེན་འཛིན་གྱི་སྒྲོ་འདོགས་མི་ཆོད་པར་ཐལ་བ་དང་། ཀུན་རྫོབ་རིགས་པས་མ་རྙེད་པ་དེ་ཉིད་དོན་དམ་མིན་པར་ཐལ་བ་དང་། ཀུན་ནས་ཉོན་མོངས་དང་རྣམ་པར་བྱང་བ་གཉིས་དུས་གཅིག་ཏུ་འགྱུར་བར་ཐལ་བའོ། །དང་པོ་གསུམ་རྟོགས་སླ་ལ། ཕྱི་མའི་དོན་བདེན་གཉིས་སོ་སོ་ཡིན་ན། དོན་དམ་རྟོགས་ཀྱང་ཀུན་རྫོབ་ལ་སྒྲོ་འདོགས་མི་ཆོད་པས། ཀུན་རྫོབ་ལ་དམིགས་ནས་ཀུན་ནས་ཉོན་མོངས་པ་འཕེལ། དོན་དམ་ལ་དམིགས་ནས་རྣམ་བྱང་འཕེལ་བར་འགྱུར་བས། དེ་གཉིས་དུས་གཅིག་ཏུ་འཕེལ་བར་འགྱུར་ཞེས་པའི་དོན་ནོ། །གཅིག་པ་ལ་སྐྱོན་བཞི་ནི། ཀུན་རྫོབ་མཐོང་བས་དོན་དམ་མཐོང་བར་འགྱུར་བ་དང་། ཀུན་རྫོབ་ལ་དམིགས་ནས་ཀུན་ནས་ཉོན་མོངས་པ་འཕེལ་བ་ལྟར། དོན་དམ་ལ་དམིགས་ནས་ཀྱང་ཀུན་ནས་ཉོན་མོངས་པ་འཕེལ་བར་འགྱུར་བ་དང་། ཀུན་རྫོབ་ལས་ལོགས་སུ་དོན་དམ་ཐོས་བསམ་གྱི་བཙལ་དུ་མེད་པར་འགྱུར་བ་དང་། ཀུན་རྫོབ་རྣམ་པ་སྣ་ཚོགས་ཀྱི་སྤྲོས་བཅས་ཡིན་པ་བཞིན་དུ། དོན་དམ་ཡང་རྣམ་པ་སྣ་ཚོགས་ཀྱི་སྤྲོས་བཅས་སུ་འགྱུར་རོ། །འདི་དག་གི་དོན་ལ་བོད་ཁ་ཅིག ངོ་བོ་ཐ་དད་པ་དང་། ལྡོག་པ་གཅིག་ལ་སྐྱོན་བརྗོད་པ་ཡིན་པས། བདེན་གཉིས་ངོ་བོ་གཅིག་ལ་ལྡོག་པ་ཐ་དད་ཡིན་ཏེ། སེམས་འགྲེལ་ལས། ཀུན་རྫོབ་ལས་ནི་ཐ་དད་པ། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་པ་བཞིན་ནོ། །ཞེས་གསུངས་པའི་ཕྱིར་ཟེར་ན། མི་འཐད་དེ། ངོ་བོ་གཅིག་ལ་ལྡོག་པ་ཐ་དད་པ་རྟོག་གེ་བའི་བརྡ་ཆད་ཡིན་གྱི། ལུགས་འདིར་མི་རུང་ལ། བྱས་མི་རྟག་ལྟར་ངོ་བོ་གཅིག་པ་ཡིན་ན། ཀུན་རྫོབ་སྐྱེ་འགག་བྱེད་པའི་ཚེ། དོན་དམ་ཡང་སྐྱེ་འགག་བྱེད་པར་འགྱུར་བའི་ཕྱིར། དོན་དམ་ལ་ངོ་བོ་ཡོད་པ་ཡང་མིན་ཏེ། ཀུན་རྫོབ་རིགས་པས་བཙལ་ན་མི་རྙེད་པ་ཙམ། དོན་དམ་བདེན་པར་འཇོག་པའི་ཕྱིར། དེས་ན་དགོངས་འགྲེལ་གྱི་དགོངས་པ་ནི་གནས་ཚུལ་སེམས་པའི་རིགས་ངོར་གཅིག་པ་དང་ཐ་དད་པ་བཀག་པ་ཡིན་ལ། ཐ་སྙད་དུ་གཅིག་པ་བཀག་པའི་ཐ་དད་ཡིན་ཏེ། སྣང་བའི་དངོས་པོ་རེ་རེའི་སྟེང་དུ་ཡང་སྣང་ཙམ་གྱི་ངོ་བོ་དང་། དེ་ཉིད་རིགས་པས་བཙལ་བ་ན་མི་རྙེད་པ་ཉིད་དེར་གཞག་པའི་ཕྱིར་རོ། །བཞི་པ་ལ། མཚན་ཉིད། དབྱེ་བ། སྒྲ་བཤད་པ་གསུམ། དང་པོ་ལ་དགག་གཞག་གཉིས། དང་པོ་ནི། ཀུན་རྫོབ་བདེན་པ་དང་དོན་དམ་བདེན་པའི་མཚན་ཉིད་རིམ་བཞིན། ཐ་སྙད་པའི་ཚད་མས་རྙེད་པའི་རྙེད་དོན་གང་ཞིག ཐ་སྙད་པའི་ཚད་མ་དེ་ཁྱོད་ལ་ལྟོས་ཏེ་ཐ་སྙད་པའི་ཚད་མར་སོང་བ་དང་། རིག་ཤེས་ཚད་མས་རྙེད་པའི་རྙེད་དོན་གང་ཞིག རིག་ཤེས་ཚད་མ་དེ་ཁྱོད་ལ་ལྟོས་ཏེ་རིག་ཤེས་ཚད་མར་སོང་བར་འཇོག་ཅིང་། ཐ་སྙད་པའི་ཚད་མས་རྙེད་པའི་རྙེད་དོན་ཀུན་རྫོབ་བདེན་པའི་མཚན་ཉིད་མིན་ཏེ། བུམ་པ་བདེན་པས་སྟོང་པའི་སྟོང་ཉིད་དེ་ཤཱཀྱ་ཐུབ་པའི་ཐ་སྙད་པའི་ཚད་མས་རྙེད་པའི་རྙེད་དོན་ཡིན་པའི་ཕྱིར་ཏེ། དེའི་གཞལ་བྱ་ཡིན་པའི་ཕྱིར་ཞེས་སྨྲའོ། །འོ་ན་བུམ་པ་བདེན་པས་སྟོང་པའི་སྟོང་ཉིད་དེ་ཆོས་ཅན། ཀུན་རྫོབ་བདེན་པ་ཡིན་པར་ཐལ། དེའི་མཚན་ཉིད་དེའི་ཕྱིར། ཕྱི་མ་མ་གྲུབ་ན། རེ་ཞིག་ཁས་བླངས་སོ། །འདོད་ན། དེ་ཆོས་ཅན། ཐ་སྙད་པའི་ཚད་མ་དེ་ཁྱོད་ལ་ལྟོས་ཏེ་ཚད་མར་སོང་བར་ཐལ། དེ་དེ་ཡིན་ན་དེ་ཁྱོད་ལ་ལྟོས་ཏེ་རིག་ཤེས་ཚད་མར་སོང་བ་གང་རུང་གང་ཞིག ཕྱི་མ་མིན་པའི་ཕྱིར། གང་ཞིག་ཁས་བླངས་ཏེ། དེར་ཐལ། ཁྱོད་དེའི་གཞལ་བྱ་ཡིན་པའི་ཕྱིར། ཐ་སྙད་པའི་ཚད་མ་ཆོས་ཅན། དོན་དམ་བདེན་པ་ཡིན་པར་ཐལ། དེའི་མཚན་ཉིད་དེའི་ཕྱིར། དང་པོ་ཁས་བླངས་ཏེ། བུམ་པ་བདེན་པས་སྟོང་པའི་སྟོང་ཉིད་དེ་ཐ་སྙད་པའི་ཚད་མས་རྙེད་པའི་རྙེད་དོན་ཡིན་པའི་ཕྱིར། ཕྱི་མ་མ་གྲུབ་ན། དེར་ཐལ། མངོན་སུམ་དེ་རྗེས་དཔག་ལ་ལྟོས་ཏེ་མངོན་སུམ་སོང་བའི་ཕྱིར། ཡང་རིག་ཤེས་ཚད་མ་དེ་ཡང་དག་མཐོང་ཡུལ་གང་ཡིན་དེ་ཉིད་དེ་ཞེས་པའི་སྐབས་ཀྱི་མཐོང་བ་ཡང་དག་པ་དེ་ཡིན་པར་ཐལ། དོན་དམ་བདེན་པའི་མཚན་ཉིད་དེ་འཐད་པའི་ཕྱིར། འདོད་ན། དེ་ཆོས་ཅན། དེ་མིན་པར་ཐལ། ཁྱོད་རྟགས་ལ་བརྟེན་པའི་ཤེས་པ་གང་ཞིག དེའི་སྐབས་ཀྱི་མཐོང་བ་ཡང་དག་པ་དེ་འཕགས་རྒྱུད་ཀྱི་མཉམ་གཞག་ཡིན་པའི་ཕྱིར། ཡང་ཁ་ཅིག དེ་གཉིས་ཀྱི་མཚན་ཉིད་རིམ་བཞིན། རང་དངོས་རྟོགས་ཀྱི་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བའི་རིགས་སུ་གནས་པ་དང་། རང་དངོས་སུམ་རྟོགས་པའི་མངོན་སུམ་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་བྱ་གང་ཞིག་སྒྲུབ་པའི་རྣམ་པས་རྟོགས་བྱ་མིན་པ་ཞེ་ན། རྣམ་མཁྱེན་ཆོས་ཅན། མཚན་ཉིད་དེར་ཐལ། ཀུན་རྫོབ་བདེན་པ་ཡིན་པའི་ཕྱིར། འདོད་ན། རྣམ་མཁྱེན་དེས་རྣམ་མཁྱེན་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བ་ཡིན་པར་ཐལ་ལོ། །དོན་དམ་བདེན་པ་ཆོས་ཅན། ཟུར་ཕྱི་མར་ཐལ། དོན་དམ་བདེན་པ་ཡིན་པའི་ཕྱིར། འདོད་ན། དེ་ཆོས་ཅན། སྒྲུབ་པ་མིན་པར་ཐལ། འདོད་པའི་ཕྱིར། ཁ་ཅིག རང་དངོས་རྟོགས་ཀྱི་ཚད་མས་སྣང་རུང་གི་སྤྲོས་པ་དང་བཅས་པའི་ཚུལ་གྱིས་རྙེད་པའི་རྙེད་དོན་དང་། རང་དངོས་རྟོགས་ཀྱི་ཚད་མས་སྣང་རུང་གི་སྤྲོས་པ་འགའ་ཡང་མ་མཐོང་བའི་ཚུལ་གྱིས་རྙེད་པའི་རྙེད་དོན་ཞེས་ཟེར་ན། རི་བོང་རྭ་ཆོས་ཅན། དོན་དམ་བདེན་པར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། དེ་རང་དངོས་རྟོགས་ཀྱི་ཚད་མས་སྣང་རུང་གི་སྤྲོས་པ་རི་བོང་གི་རྭ་འགའ་ཡང་མ་མཐོང་བའི་ཚུལ་གྱིས་རྙེད་པའི་རྙེད་དོན་ཡིན་པའི་ཕྱིར། མ་གྲུབ་ན། བུམ་པ་བདེན་པས་སྟོང་པའི་སྟོང་ཉིད་མཚན་ཉིད་དེ་ཡིན་པར་སྒྲུབས་ཤིག ཁ་ཅིག དེ་གཉིས་ཀྱི་མཚན་ཉིད་རིམ་བཞིན། ཆོས་ཅན་གང་ཞིག ཀུན་རྫོབ་སེམས་པའི་རིགས་ངོར་མི་བསླུ་བ། ཆོས་ཉིད་གང་ཞིག དོན་དམ་སེམས་པའི་རིག་ངོར་མི་བསླུ་བ་ཞེས་ཟེར་ན། ལོག་པའི་ཀུན་རྫོབ་བདེན་པ་ཆོས་ཅན། ཟུར་ཕྱི་མར་ཐལ། ཀུན་རྫོབ་བདེན་པ་ཡིན་པའི་ཕྱིར། འདོད་ན། དེ་མིན་པར་ཐལ། དེ་འཇིག་རྟེན་པའི་བློའི་ངོར་སླུ་བ་ཡིན་པའི་ཕྱིར། འཇུག་པ་ལས། ལྷག་མ་ནི། འཇིག་རྟེན་ཉིད་ལས་ལོགས་ཤིག་རྣམ་པར་གཞག །ཅེས་གསུངས་པའི་ཕྱིར། ཆོས་ཉིད་ཆོས་ཅན། ཟུར་ཕྱི་མར་ཐལ། དོན་དམ་བདེན་པ་ཡིན་པའི་ཕྱིར། འདོད་མི་ནུས་ཏེ། དེའི་ངོ་བོར་མ་གྲུབ་པའི་ཕྱིར་ཏེ། དེས་དཔྱད་བཟོད་དུ་མ་གྲུབ་པའི་ཕྱིར་རོ། །གཉིས་པ་ལ། སློབ་དཔོན་ཟླ་བའི་བཞེད་པ་ནི། མཐོང་བ་ཡང་དག་པའི་འཛིན་སྟངས་ཀྱི་གཟུང་བྱ་དང་། མཐོང་བ་རྫུན་པའི་འཛིན་སྟངས་ཀྱི་གཟུང་བྱ་དེ། འཇུག་པར། དངོས་ཀུན་ཡང་དག་རྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་ཡིན་དེ་ཉིད་དེ། །མཐོང་བ་རྫུན་པ་ཀུན་རྫོབ་བདེན་པར་གསུངས། །ཞེས་གསུངས་པའི་ཕྱིར། འདིའི་མཐོང་བ་ཡང་དག་པ་བོད་ཁ་ཅིག རིག་ཤེས་ཚད་མ་ལ་འདོད་པ་ནི་ཤིན་ཏུ་འཁྲུལ་ཏེ། རིག་ཤེས་ཚད་མ་ནི་རང་རྒྱུད་པའི་བརྡ་ཆད་ཡིན་གྱི་ཐལ་འགྱུར་བའི་གཞུང་ལས་མ་བཤད་ཅིང་། ཁས་ལེན་ན་ཡང་དེ་ནི་རྟགས་ལ་བརྟེན་པའི་ཤེས་པ་ཡིན་ལ། འདི་ནི་འཕགས་པའི་མཉམ་གཞག་ཡིན་པའི་ཕྱིར་ཏེ། འཇུག་འགྲེལ་ལས། ཟག་པ་མེད་པའི་ཡེ་ཤེས་དང་བྲལ་བ་སོ་སོ་སྐྱེ་བོ་རྣམས་ཀྱི་ཤེས་པས་ཀྱང་གཟིགས་པ་ཟག་པ་མེད་པ་ལ་གནོད་པ་མིན་པས་ཞེས་གསུངས་པའི་ཕྱིར། ཞི་བ་ལྷའི་བཞེད་པ་ནི། འཇིག་རྟེན་པའི་བློའི་དངོས་ཀྱི་སྤྱོད་ཡུལ་དང་། དེ་ལས་འདས་པའི་དེ་བཞིན་ཉིད་དེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །སློབ་དཔོན་ཡེ་ཤེས་སྙིང་པོས་བཞེད་པ་ནི། འཇིག་རྟེན་པའི་ཐ་སྙད་ཀྱི་ཡུལ་དང་། དེ་ལས་འདས་པའི་དེ་བཞིན་ཉིད་དེ། མདོ་ལས། ཀུན་རྫོབ་ཀྱི་བདེན་པ་གང་ཞེ་ན། ཇི་སྙེད་འཇིག་རྟེན་གྱི་ཐ་སྙད་བཏགས་པ་དང་། ཡི་གེ་དང་། སྐད་དང་། བརྡ་བསྟན་པ་དག་གོ །དོན་དམ་པའི་བདེན་པ་ནི་གང་ལ་སེམས་ཀྱི་རྒྱུ་བ་ཡང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ཁུངས་སུ་མཛད་ནས་བདེན་གཉིས་ཀྱི་རྣམ་གཞག་མཛད་པའི་ཕྱིར་རོ། །གཉིས་པ་ལ། ཀུན་རྫོབ་བདེན་པའི་དབྱེ་བ་དང་། དོན་དམ་བདེན་པའི་དབྱེ་བ་གཉིས། དང་པོ་ལ། སློབ་དཔོན་ཟླ་བས་ཡང་དག་ཀུན་རྫོབ་དང་། ལོག་པའི་ཀུན་རྫོབ་གཉིས། དེ་གཉིས་རེ་རེ་ལ་ཡུལ་ཡུལ་ཅན་གཉིས་ལས། གློ་བུར་གྱི་འཁྲུལ་རྒྱུས་མ་བསླད་པའི་འཇུག་ཤེས་དྲུག་ནི་ཡུལ་ཅན་ཡང་དག་ཀུན་རྫོབ་དང་། དེའི་དངོས་ཀྱི་གཟུང་བྱ་ནི་ཡུལ་ཡང་དག་ཀུན་རྫོབ་ཡིན་ཅིང་། གློ་བུར་གྱི་འཁྲུལ་རྒྱུས་བསླད་པའི་འཇུག་ཤེས་དྲུག་ནི་ཡུལ་ཅན་ལོག་པའི་ཀུན་རྫོབ་དང་། དེའི་དངོས་ཀྱི་གཟུང་བྱ་ནི་ཡུལ་ལོག་པའི་ཀུན་རྫོབ་ཏུ་བཞེད་དོ། །འདི་ལ་སྣང་ལོག་ཀུན་རྫོབ་དང་། རྟགས་ལོག་ཀུན་རྫོབ་གཉིས་ལས། དང་པོ་ནི། སྨིག་རྒྱུ་ལ་ཆུར་བཏགས་པ་དང་། གཉིས་པ་ནི། བདག་དང་གཙོ་བོ་ལ་སོགས་པར་བཏགས་པའོ། །ཡེ་ཤེས་སྙིང་པོ་ནི། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མིན་པ་ཡི། །ཀུན་རྫོབ་ཀྱི་ནི་དབྱེ་བ་བྱས། །ཞེས་པའི་སྒོ་ནས་དེ་གཉིས་ཀྱི་ཁྱད་པར་འཇོག་པར་མཛད་དོ། །གཉིས་པ་དོན་དམ་བདེན་པ་ནི། ནམ་མཁའ་ལྟ་བུར་ཀུན་ཏུ་རོ་གཅིག་པའི་རང་བཞིན་ཡིན་པས་རང་གི་ངོ་བོའི་སྒོ་ནས་དབྱེ་བ་མི་འཐད་ཀྱང་། ཆོས་ཅན་གྱི་སྒོ་ནས་སྟོང་ཉིད་ཉི་ཤུ་དང་དེ་ལས་བསྡུས་ཏེ་བཅུ་དྲུག་དང་། དེ་ལས་བསྡུས་ཏེ་རྣམ་པ་བཞིར་གསུངས་པ་ཡིན་ནོ། །གསུམ་པ་ལ། ཀུན་རྫོབ་བདེན་པ་ལ་ཡུལ་ཅན་གྱི་ཀུན་རྫོབ་ནི་གནས་ལུགས་ཀྱི་དོན་མཐོང་བ་ལ་སྒྲིབ་པས་ན་ཀུན་རྫོབ་སྟེ། གཏི་མུག་རང་བཞིན་སྒྲིབ་ཕྱིར་ཀུན་རྫོབ་ནི། །ཞེས་གསུངས་པའི་ཕྱིར། བློ་དེའི་ངོར་བདེན་པར་སྣང་བས་ན་བདེན་པ་སྟེ། དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུང་སྟེ། །ཞེས་པ་ལྟར་རོ། །དོན་དམ་བདེན་པའི་སྒྲ་དོན་ནི། དོན་དང་། དམ་པ་དང་། བདེན་པ་གསུམ་ནི་གཞི་མཐུན་ཡིན་པས་ན་དོན་དམ་བདེན་པ་སྟེ། འཇུག་འགྲེལ་ལས། སངས་རྒྱས་རྣམས་ཀྱི་དོན་དམ་བདེན་པ་ནི་རང་བཞིན་ཉིད་ཡིན་ཅིང་། དེ་ཡང་སླུ་བ་མེད་པ་ཉིད་ཀྱིས་དོན་དམ་པའི་བདེན་པ་ཡིན་ལ། དེ་ནི་དེ་རྣམས་ཀྱི་སོ་སོར་རང་གིས་རིག་པར་བྱ་བ་ཡིན་ནོ། །ཞེས་གསུངས་པའི་ཕྱིར། ཅིའི་ཕྱིར་དེ་བཞིན་ཉིད་ལ་བདེན་པ་ཞེས་བྱ་ཞེ་ན། བདེན་པའི་སྒྲ་ནི་མི་སླུ་བ་ལ་འཇུག་པ་དང་། གནས་ཚུལ་ལ་གྲུབ་པ་ལ་འཇུག་པ་གཉིས་ལས། འདི་ནི་དང་པོའི་དབང་དུ་བྱས་པ་ཡིན་ཏེ། མདོ་ལས། བདེན་པ་དམ་པ་ནི་གཅིག་ཁོ་ན་སྟེ། འདི་ལྟ་སྟེ། མི་སླུ་བའི་ཆོས་ཅན་གྱི་མྱ་ངན་ལས་འདས་པ་སྟེ་ཞེས་གསུངས་སོ། །ཡུལ་ཅན་གྱི་སྒོ་ནས་སྒྲ་བཤད་པ་ནི། རང་རྒྱུད་པའི་གཞུང་ལས་བཤད་དེ། མཐར་ཐུག་སྤྱོད་པའི་རིག་ཤེས་ཚད་མ་ནི་དོན་དམ་པ་ཡིན་ལ། དེས་ཇི་ལྟར་ངེས་པ་ལྟར་ཡིད་ལ་བྱས་པ་མཐར་ཐུག་པའི་ཡོན་ཏན་ཐོབ་པ་ལ་མི་སླུ་བའི་ཕྱིར་ན་བདེན་པར་བཞག་གོ །སྡུག་བསྔལ་ལ་གཟུགས་ལ་སོགས་པའི་འབྲས་བུར་གྱུར་པ། ཞེས་པའི་སྐབས་སུ། བདེན་བཞིའི་སྒྲ་བཤད་པ། མཚན་ཉིད། མཚན་གཞི་དང་གསུམ་ལས། དང་པོ་ནི། ཅིའི་ཕྱིར་བདེན་པ་བཞི་ལ་འཕགས་པའི་བདེན་པ་ཞེས་བྱ་ཞེ་ན། གསུང་རབ་ལས། མི་རྟག་པ་དང་། སྡུག་བསྔལ་ལ་སོགས་པ་གསུངས་པ་ལྟར། དེ་ལ་དམིགས་ཤིང་བསྒོམས་པས་རྣམ་པར་དག་པ་ཐོབ་པར་བྱེད་པའི་རྒྱུར་འགྱུར་བའི་ཕྱིར་དང་། འཕགས་པ་རྣམས་ཀྱིས་མི་རྟག་པ་སྡུག་བསྔལ་ལ་སོགས་པར་གཟིགས་པ་ལྟར་ཚད་མས་གྲུབ་ཅིང་། བྱིས་པ་རྣམས་ཀྱིས་གཙང་བ་དང་། བདེ་བ་ལ་སོགས་པར་འཛིན་པ་ལྟར་ཚད་མས་མ་གྲུབ་པའི་ཕྱིར་རོ། །གཉིས་པ་ལ། དགག་གཞག་གཉིས་ལས། དང་པོ་ནི། སྡུག་བསྔལ་བདེན་པའི་མཚན་ཉིད་ལ། ཟག་བཅས་འབྲས་བསྡུས་ཀྱི་དངོས་པོ་ཞེས་དང་། རང་རྒྱུ་ཀུན་འབྱུང་གི་འབྲས་བུར་གྱུར་པའི་ཟག་བཅས་ཀྱི་དངོས་པོ་ཞེས་དང་། རང་རྒྱུ་ལས་ཉོན་གང་རུང་གི་འབྲས་བུར་གྱུར་པའི་ཟག་བཅས་ཀྱི་དངོས་པོ་ཞེས་དང་། མི་རྟག་པ་དང་། འདུ་བྱེད་ཀྱི་སྡུག་བསྔལ་དང་། དོན་གཞན་གྱི་བདག་གིས་སྟོང་པ་དང་། ངོ་བོར་གྱུར་པའི་བདག་མེད་པ་བཞིའི་ཚོགས་པ་ཞེས་ཟེར་ན། དང་པོ་གསུམ་ལ། སོ་སོ་སྐྱེ་བོའི་ལུས་རྟེན་མ་དོར་བའི་བྱང་སེམས་མཐོང་ལམ་པའི་གཟུགས་ཕུང་ཆོས་ཅན། མཚོན་བྱ་དེར་ཐལ། མཚན་ཉིད་གསུམ་པོ་དེའི་ཕྱིར། མ་གྲུབ་ན། དང་པོ་དེར་ཐལ། ཟག་བཅས་གང་ཞིག འབྲས་བུས་བསྡུས་པ་ཡིན་པའི་ཕྱིར། ཕྱི་མ་གཉིས་པོ་དེར་ཐལ། རང་རྒྱུ་ཀུན་འབྱུང་གི་འབྲས་བུ་གང་ཞིག་ཟག་བཅས་ཀྱི་དངོས་པོ་ཡིན་པའི་ཕྱིར། དང་པོ་མ་གྲུབ་ན། དེར་ཐལ། དེ་འཕེན་བྱེད་ཀྱི་ལས་ཉོན་དེ་ཀུན་འབྱུང་བདེན་པ་ཡིན་པའི་ཕྱིར། རྩ་བར་འདོད་ན། དེ་མིན་པར་ཐལ། བྱང་སེམས་མཐོང་ལམ་པས་སྡུག་ཀུན་གཉིས་ཀ་ཟད་པར་སྤངས་པའི་ཕྱིར་ཏེ། དེས་འཁོར་བ་ཟད་པར་སྤངས་པའི་ཕྱིར། བཞི་པ་དེ་ཆོས་ཅན། དེའི་མཚན་ཉིད་མི་འཐད་པར་ཐལ། རྟག་པ་ཡིན་པའི་ཕྱིར། མ་གྲུབ་ན། དེ་དེར་ཐལ། དོན་གཞན་གྱིས་བདག་གིས་སྟོང་པ་དང་། ངོ་བོར་གྱུར་པའི་བདག་མེད་པ་རྟག་པ་ཡིན་པའི་ཕྱིར་རོ། །ཀུན་འབྱུང་བདེན་པའི་མཚན་ཉིད་ལ་ཟག་བཅས་རྒྱུས་བསྡུས་ཀྱི་དངོས་པོ་ཞེས་དང་། རང་འབྲས་སྡུག་བསྔལ་གྱི་རྒྱུར་གྱུར་པའི་ཟག་བཅས་ཀྱི་ལས་ཞེས་དང་། རང་འབྲས་སྡུག་བསྔལ་བདེན་པའི་རྒྱུར་གྱུར་པའི་ཟག་བཅས་ཀྱི་དངོས་པོ་ཞེས་དང་། རྒྱུ་ཀུན་འབྱུང་རབ་སྐྱེ་རྐྱེན་བཞིའི་ཚོགས་དོན་ཞེས་ཟེར་ན། དང་པོ་དང་གསུམ་པ་ལ། མ་དག་པའི་སྣོད་ཀྱི་འཇིག་རྟེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཕྱི་མ་དེར་ཐལ། རང་འབྲས་སུ་གྱུར་པའི་སྣོད་ཀྱི་འཇིག་རྟེན་སྐད་ཅིག་གཉིས་པ་དེ་སྡུག་བསྔལ་བདེན་པ་ཡིན་པའི་ཕྱིར། གཉིས་པ་ལ། སོ་སོ་སྐྱེ་བོའི་རྒྱུད་ཀྱི་ཁམས་གོང་དུ་འཕེན་བྱེད་ཀྱི་ལས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། དེ་ཟག་བཅས་ཀྱི་ལས་ཡིན་པའི་ཕྱིར། འདོད་ན། དེ་མིན་པར་ཐལ། རང་འབྲས་བདེ་བའི་རྒྱུར་གྱུར་པའི་ཟག་བཅས་ཀྱི་ལས་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། གཞན་ཡང་དེའི་རྒྱུད་ཀྱི་བསམ་གཏན་བཞི་པར་འཕེན་བྱེད་ཀྱི་ལས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཟག་བཅས་ཀྱི་ལས་ཡིན་པའི་ཕྱིར། འདོད་ན། མིན་པར་ཐལ། རང་འབྲས་བཏང་སྙོམས་ཀྱི་རྒྱུར་གྱུར་པའི་ཟག་བཅས་ཀྱི་ལས་ཡིན་པའི་ཕྱིར་ཏེ་ཆོས་ཅན་དེ་ཡིན་པའི་ཕྱིར་རོ། །བཞི་པ་ལ། དེ་ཆོས་ཅན། དེའི་མཚན་ཉིད་མིན་པར་ཐལ། རྟག་པ་ཡིན་པའི་ཕྱིར། མ་གྲུབ་ན། དེར་ཐལ། དེའི་གཞི་མཐུན་རྟག་པ་ཡིན་པའི་ཕྱིར་རོ། །འགོག་བདེན་གྱི་མཚན་ཉིད་ལ། ཟག་མེད་འབྲས་བསྡུས་དང་། རང་རྒྱུ་ཟག་མེད་བར་ཆད་མེད་ལམ་གྱི་བྲལ་འབྲས་སུ་གྱུར་པའི་སོ་སོར་བརྟགས་འགོག་ཞེས་དང་། འགོག་པ། ཞི་བ། གྱ་ནོམ། ངེས་འབྱུང་བཞིའི་ཚོགས་དོན་ཞེས་གཞག་ནས། འགོག་པའི་སྒྲ་དོན་སྡུག་བསྔལ་སྤངས་པ། ཞི་བའི་དོན་ཉོན་མོངས་སྤངས་པ། གྱ་ནོམ་གྱི་དོན་འདི་ལས་ལྷག་པའི་འདོད་བྱ་གཞན་མེད་པ་ལ་བྱེད་ཟེར་རོ། །དང་པོ་ལ། རྟོགས་པ་ཡེ་ཤེས་ཆོས་སྐུ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཉིས་པ་ལ། དམན་ལམ་སྔོན་དུ་མ་སོང་བའི་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་ཐོབ་མ་ཐག་པའི་བྱང་སེམས་ཀྱི་རྒྱུད་ཀྱི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་དེ་བར་ཆད་མེད་ལམ་དུ་ཐལ། འདོད་པ་དེའི་ཕྱིར། རྩ་བར་མ་གྲུབ་ན་དེར་ཐལ། དེའི་རྒྱུད་ལ་འགོག་བདེན་ཡོད་པའི་ཕྱིར་ཏེ། དེའི་རྒྱུད་ལ་ཉོན་སྒྲིབ་སྤངས་པའི་སྤངས་པ་ཡོད་པའི་ཕྱིར། གཞན་ཡང་དེའི་རྒྱུད་ལ་དེ་ཡོད་པར་ཐལ། དམན་ལམ་སྔོན་དུ་མ་སོང་བའི་བྱང་སེམས་ཀྱི་རྒྱུད་ཀྱི་ཉོན་སྒྲིབ་སྤངས་པའི་སྤངས་པ་ཡིན་ན། རང་རྒྱུ་བདག་མེད་སྔོན་དུ་འགྲོ་མི་དགོས་པའི་ཕྱིར་ཏེ། དེ་འདྲའི་བྱང་སེམས་ཀྱི་རྒྱུད་ལ་ཉོན་སྒྲིབ་སྤོང་བའི་བདག་མེད་གཞི་མ་གྲུབ་པའི་ཕྱིར། གསུམ་པ་ལ། ཉན་ཐོས་སྒོམ་ལམ་པའི་རྒྱུད་ཀྱི་འགོག་བདེན་དེ་ཆོས་ཅན། མཚོན་བྱ་དེ་མིན་པར་ཐལ། མཚན་ཉིད་དེ་མིན་པའི་ཕྱིར་ཏེ། འགོག་པ་ཡང་མིན། ཞི་བ་ཡང་མིན། གྱ་ནོམ་ཡང་མིན་པའི་ཕྱིར། རྟགས་ཁས་བླངས་ཏེ། སྡུག་བསྔལ་སྤངས་པ་ཡང་མིན། ཉོན་མོངས་སྤངས་པ་ཡང་མིན། འདི་ལས་ལྷག་པའི་འདོད་བྱ་གཞན་མེད་པ་ཡང་མིན་པའི་ཕྱིར། ཁྱབ་པ་ཁས་སོ། །ལམ་བདེན་གྱི་མཚན་ཉིད་ལ། ཁ་ཅིག བདག་མེད་རྟོགས་པའི་ཤེས་རབ་མཚུངས་ལྡན་དང་བཅས་པ་ཞེས་དང་། ཟག་མེད་རྒྱུད་བསྡུ། ཞེས་དང་། འཕགས་རྒྱུད་ཀྱི་ལམ་རིགས་པ་བསྒྲུབ་པ་ངེས་འབྱིན་བཞིའི་ཚོགས་དོན་ཞེས་བཞག་ནས། ལམ་གྱི་དོན་ཐར་པའི་གྲོང་ཁྱེར་དུ་ཁྲིད་པར་བྱེད་པ་དང་། རིགས་པའི་དོན་མི་རིགས་པ་ཉོན་མོངས་པའི་གཉེན་པོ་བྱེད་པ་ལ་བྱེད་ཅེས་པའི་ལུགས་འདི་ལ། དང་པོ་ལ། བྱང་སེམས་ཚོགས་ལམ་པའི་རྒྱུད་ཀྱི་བདག་མེད་རྟོགས་པའི་ཤེས་རབ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཉིས་པ་ལ། ཤཱཀྱ་ཐུབ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གསུམ་པ་ལ། རྣམ་མཁྱེན་ཆོས་ཅན། མཚོན་བྱ་དེ་མིན་པར་ཐལ། མཚན་ཉིད་དེ་མི་འཐད་པའི་ཕྱིར་ཏེ། ལམ་ཡང་མིན་རིགས་པ་ཡང་མིན་པའི་ཕྱིར། རྟགས་ཁས་བླངས་ཏེ། ཐར་པའི་གྲོང་ཁྱེར་དུ་འཁྲིད་པར་བྱེད་པ་ཡང་མིན། མ་རིག་པ་ཉོན་མོངས་པའི་གཉེན་པོ་བྱེད་པ་ཡང་མིན་པའི་ཕྱིར། ཁྱབ་པ་ཁས་སོ། །གཉིས་པ་ནི། དེ་བཞིའི་མཚན་ཉིད་རིམ་བཞིན། རང་རྒྱུ་ལས་ཉོན་གང་རུང་གི་འབྲས་བུར་གྱུར་པའི་འཁོར་བས་བསྡུས་པའི་ཕུང་པོ་དང་། རང་འབྲས་སྡུག་བདེན་གྱི་རྒྱུའི་རིགས་སུ་གནས་པའི་ལས་ཉོན་གང་རུང་གིས་བསྡུས་པའི་ཟག་བཅས། བདག་མེད་རྟོགས་པའི་ཤེས་རབ་ཀྱིས་རང་གི་ངོས་སྐལ་གྱི་སྤང་བྱ་སྤངས་པའི་སྟོབས་ཀྱིས་ཐོབ་པའི་སོ་སོར་བརྟགས་འགོག་དང་། བདག་མེད་མངོན་སུམ་རྟོགས་པའི་ཤེས་རབ་མཚུངས་ལྡན་དང་བཅས་པའོ། །གསུམ་པ་མཚན་གཞི་ལ། མ་དག་པའི་སྣོད་ཀྱི་འཇིག་རྟེན་ནི་སྡུག་བསྔལ་བདེན་པའི་མཚན་གཞི་ཡིན་ཏེ། ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱི་ཀྱང་རིགས་པར་བྱའོ་ཞེས་སོ། །ཟག་བཅས་ཉེར་ལེན་གྱི་ཕུང་པོ་ལྔ་ཡང་སྡུག་བསྔལ་བདེན་པ་ཡིན་ཏེ། རྣམ་འགྲེལ་ལས། སྡུག་བསྔལ་འཁོར་བ་ཅན་ཕུང་པོ། །ཞེས་སོ། །བདེ་བ་ཅན་ལ་སོགས་པའི་འཇིག་རྟེན་གྱི་ཁམས་རྣམས་ནི་སྡུག་བསྔལ་བདེན་པ་མིན་ཏེ། རྫོགས་པའི་སངས་རྒྱས་ཀྱི་ཐུགས་རྗེ་དང་སྨོན་ལམ་གྱི་དབང་གིས་བྱུང་བའི་དག་པའི་འཇིག་རྟེན་གྱི་ཁམས་ཡིན་པའི་ཕྱིར་རོ། །འོན་ཀྱང་དེར་གནས་པའི་སོ་སོ་སྐྱེ་བོ་རྣམས་ཀྱི་ཟག་བཅས་ཉེར་ལེན་གྱི་ཕུང་པོ་ལྔ་ནི་དེ་ཡིན་ཏེ། གང་ཟག་དེས་སྡུག་བདེན་མ་སྤངས་ཤིང་། ཕུང་པོ་དེ་འཕེན་བྱེད་ཀྱི་ལས་དེ་ཟག་བཅས་ཀྱི་ལས་ཡིན་པའི་ཕྱིར་རོ། །ཟག་བཅས་ཀྱི་ལས་དང་ཉོན་མོངས་པ་གཉིས་ནི་ཀུན་འབྱུང་བདེན་པའི་མཚན་གཞི་ཡིན་ཏེ། ཀུན་བཏུས་ལས། ཀུན་འབྱུང་གི་བདེན་པ་གང་ཞེ་ན། ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ་ཞེས་སོ། །རྣམ་འགྲེལ་ལས། སྲེད་པ་དེའི་མཚན་གཞི་བཤད་པ་དང་འགལ་ལོ་ཞེ་ན། སྐྱོན་མེད་དེ། ལས་ཉོན་གཉིས་ཀྱི་ནང་ནས་ཉོན་མོངས་གཙོ་ཆེ། ཉོན་མོངས་ལ་ཡང་སྲེད་ལེན་གཉིས་ཀྱི་ནང་ནས་སྲེད་པ་གཙོ་ཆེ་བའི་ཕྱིར། སོ་སོར་རྟོགས་པའི་ཤེས་རབ་ཀྱིས་སྤང་བྱ་སྤངས་པའི་སྟོབས་ཀྱིས་ཐོབ་པའི་སོ་སོར་བརྟགས་འགོག་དེ་འགོག་བདེན་གྱི་མཚན་གཞི་ཡིན་ཏེ། མཛོད་ལས། སོ་སོར་བརྟགས་པའི་འགོག་པ་གང་། །བྲལ་བའོ་སོ་སོ་ཡིན། །ཞེས་གསུངས་པའི་ཕྱིར། ཀུན་བཏུས་ལས། བརྡའི་འགོག་པ་དང་། དོན་དམ་གྱི་འགོག་པ་གཉིས་དེའི་མཚན་གཞིར་བཤད་པ་དང་འགལ་ལོ་སྙམ་ན་སྐྱོན་མེད་དེ། དེ་ནི་དངོས་བརྟགས་མ་ཕྱེ་བའི་དབང་དུ་བྱས་པའི་ཕྱིར་རོ། །ཐེག་པ་གསུམ་གྱི་མཐོང་ལམ་སྒོམ་ལམ་མི་སློབ་ལམ་གསུམ་ནི་ལམ་བདེན་གྱི་མཚན་གཞི་ཡིན་ཏེ། ཀུན་བཏུས་ལས། ལམ་གྱི་བདེན་པ་གང་ཞེ་ན། ལམ་གང་གིས་སྡུག་བསྔལ་ཡོངས་སུ་ཤེས་པ་དང་། ཀུན་འབྱུང་སྤོང་བ་དང་། འགོག་པ་མངོན་དུ་བྱེད་པ་དང་། ལམ་བསྒོམ་པ་དེ་ནི་ལམ་གྱི་མཚན་གཞི་མདོར་བསྡུས་པའོ་ཞེས་གསུངས་པའི་ཕྱིར་རོ། །འོ་ན། དེ་ཉིད་ལས། ལམ་ལྔ་སྟེ། ཚོགས་ཀྱི་ལམ་དང་། སྦྱོར་བའི་ལམ་དང་། མཐོང་བའི་ལམ་དང་། སྒོམ་པའི་ལམ་དང་། མཐར་ཕྱིན་པའི་ལམ་མོ་ཞེས་གསུངས་པ་དང་འགལ་ལོ་སྙམ་ན། དེ་ནི་ལམ་བདེན་འཁོར་དང་བཅས་པའི་དབང་དུ་བྱས་པ་སྟེ། དེའི་འགྲེལ་པ་རྒྱལ་སྲས་མ་ལས། རབ་ཏུ་དབྱེ་བ་འདི་ཡང་ལམ་གྱི་བདེན་པ་འཁོར་དང་བཅས་པའི་སྐབས་ཀྱི་རིགས་པར་བྱའོ་ཞེས་གསུངས་པའི་ཕྱིར་རོ། །སངས་རྒྱས་ལ་སངས་རྒྱས་དང་བྱང་ཆུབ་དག །ཅེས་པའི་སྐབས་སུ། དཀོན་མཆོག་གསུམ་གྱི་མཐའ་དཔྱད་པ་ལ། སྐྱབས་གསུམ་གྱི་ངོ་བོ་ངོས་གཟུང་བ། གནས་སྐབས་སྐྱབས་གསུམ་དུ་གཞག་པ། མཐར་ཐུག་སྐྱབས་གཅིག་ཏུ་སྒྲུབ་པའོ། །དང་པོ་ལ་ཉན་ཐོས་སྡེ་པའི་ལུགས། ཐེག་པ་ཐུན་མོང་བའི་ལུགས། ཐེག་ཆེན་ཐུན་མོང་མིན་པའི་ལུགས་གསུམ་ལས། དང་པོ་ནི་སྐྱབས་འགྲོའི་ཡུལ་དུ་གྱུར་པའི་སངས་རྒྱས་དང་། སྤྱིར་སངས་རྒྱས་ལ་ཁྱད་པར་ཡོད་དེ། དང་པོ་ནི། ཐེག་དམན་མི་སློབ་པའི་ལམ་བདེན་ཁོ་ན་ལ་འཇོག་ལ། ཕྱི་མ་ལ་ཆོས་སྐུ་དང་གཟུགས་སྐུ་གཉིས་སུ་ཡོད་པའི་ཕྱིར། སྐྱབས་འགྲོའི་ཡུལ་དུ་གྱུར་པའི་ཆོས་དང་། ཆོས་ལ་ཁྱད་པར་ཡོད་དེ། སྔ་མ་ནི་མྱང་འདས་སོ་སོར་བརྟགས་འགོག་ཁོ་ན་ཡིན་ཞིང་། ཕྱི་མ་ནི་གསུང་རབ་ཡན་ལག་བཅུ་གཉིས་ལ་ཡང་འཇོག་པའི་ཕྱིར། ཡང་དེའི་ཡུལ་དུ་གྱུར་པའི་དགེ་འདུན་དང་། དགེ་འདུན་ལ་ཡང་ཁྱད་པར་ཡོད་དེ། སྔ་མ་ནི་ཐེག་དམན་སློབ་པ་འཕགས་པ་དང་། མི་སློབ་པའི་ལམ་བདེན་ཁོ་ན་ཡིན་ལ། ཕྱི་མ་ནི་ཟུང་བཞི་ཡ་བརྒྱད་ལ་ཡང་འདོད་པའི་ཕྱིར་ཏེ། མཛོད་ལས། གང་ཞིག་གསུམ་ལ་སྐྱབས་འགྲོ་སྟེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་གསུངས་སོ། །གཉིས་པ་ནི། སྐྱབས་འགྲོའི་ཡུལ་དུ་གྱུར་པའི་སངས་རྒྱས་དཀོན་མཆོག་ནི་སྐུ་གསུམ་དང་། ཆོས་ནི་སོ་སོར་བརྟགས་འགོག་དང་། དགེ་འདུན་ནི་ཟུང་བཞི་ཡ་བརྒྱད་ལ་འཇོག་སྟེ། སྐྱབས་གསུམ་བདུན་ཅུ་པ་ལས། ཐུབ་དབང་དག་གི་སྐུ་གསུམ་དང་། །མྱ་ངན་འདས་དང་གང་ཟག་བརྒྱད། །ཅེས་གསུངས་པའི་ཕྱིར། འོ་ན་བྱང་འཕགས་གང་དུ་གཏོགས་ཤེ་ན། སངས་རྒྱས་དཀོན་མཆོག་གི་ཁོངས་སུ་གཏོགས་ཏེ། དཀོན་མཆོག་གསུམ་པོ་གང་རུང་གི་ཁོངས་སུ་གཏོགས་པ་གང་ཞིག ཆོས་དང་དགེ་འདུན་གྱི་ཁོངས་སུ་མ་གཏོགས་པའི་ཕྱིར། ཟུང་བཞི་ཡ་བརྒྱད་ཀྱི་མཐར་ཐུག་པ་ཉན་ཐོས་དགྲ་བཅོམ་པས་ཀྱང་དེ་ལ་ཕྱག་བྱ་དགོས་པའི་ཕྱིར། དེ་ཉིད་ལས། ཤཱ་རིའི་ལུང་ལས་དགྲ་བཅོམ་གྱིས། །བྱང་ཆུབ་སེམས་དཔར་ཕྱག་བྱས་ཕྱིར། །འདི་དག་དཀོན་མཆོག་གསུམ་གཞན་མིན། །སངས་རྒྱས་ཁོངས་སུ་གཏོགས་པར་འདོད། །ཅེས་གསུངས་པའི་ཕྱིར། གསུམ་པ་ལ། སངས་རྒྱས་དཀོན་མཆོག་གི་མཚན་ཉིད། བོད་ཕལ་ཆེར་ནི། ཡོན་ཏན་བརྒྱད་དང་ལྡན་པའི་མཐར་ཐུག་གི་སྐྱབས་གནས་ཞེས་འཇོག་ཅིང་། ཡོན་ཏན་བརྒྱད་ནི། རྒྱུད་བླར། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་རང་དོན་གྱི་ཡོན་ཏན་གསུམ་དང་། གཞན་དོན་གྱི་ཡོན་ཏན་གསུམ་དབྱེ་གཞི་རང་དོན་དང་གཞན་དོན་གྱི་ཡོན་ཏན་གཉིས་དང་བརྒྱད་དོ་ཞེས་གསུངས། ཁོ་བོའི་རྟོག་པ་ལ། གཞུང་འདིའི་སྐབས་ནས་དངོས་སུ་བསྟན་པའི་སངས་རྒྱས་དཀོན་མཆོག་དང་། མངོན་རྟོགས་རྒྱན་ནས་བཤད་པའི་ངོ་བོ་ཉིད་སྐུ་དོན་གཅིག་པ་ཡིན་པས། དག་པ་གཉིས་ལྡན་གྱི་དབྱིངས་མཐར་ཐུག་དང་། མཁྱེན་བརྩེ་ནུས་པའི་ཡོན་ཏན་དབྱེར་མེད་པའི་འདུས་མ་བྱས་ཀྱི་སྐུ་དེ་འདིར་དངོས་བསྟན་གྱི་སངས་རྒྱས་དཀོན་མཆོག་གི་མཚན་ཉིད་དོ། །འོ་ན་དེ་དང་ཇི་ལྟར་དོན་གཅིག་ཞེ་ན། འདུས་མ་བྱས་ནི་རང་བཞིན་རྣམ་དག་ཡིན་ལ། དེ་ནི། དེ་དག་རང་བཞིན་མཚན་ཉིད་ཅན། །ཞེས་པའི་དོན་ནོ། །ལྷུན་གྱི་གྲུབ་པ་ནི་གློ་བུར་རྣམ་དག་ཡིན་ལ། དེ་ནི་རྣམ་ཀུན་རྣམ་དག་པ་ཞེས་པའི་དོན་ནོ། །གཞན་གྱི་རྐྱེན་གྱིས་རྟོགས་པ་མིན་པ་ནི། དེ་ཉིད་རང་བྱུང་གི་ཡེ་ཤེས་ཀྱིས་མངོན་དུ་གྱུར་པ་ཙམ་མོ། །མཁྱེན་བརྩེ་ནུས་པ་གསུམ་ནི་ཟག་མེད་ཀྱི་ཡེ་ཤེས་ཡིན་ལ། དེ་ནི། ཟག་པ་མེད་པའི་ཆོས་གང་དག །ཅེས་པའི་དོན་ནོ། །དེ་དབྱེར་མེད་དུ་ལྡན་པའི་རྒྱུ་མཚན་གྱིས། རྒྱུད་བླར། ལྡན་ཞེས་དང་། རྒྱན་ལས་ཐོབ་གྱུར་ཅེས་པའི་སྒྲས་བསྟན་ནོ། །མདོར་ན། སངས་རྒྱས་ཀྱི་སར་འགོག་ལམ་དབྱེར་མེད་ལ་སངས་རྒྱས་དཀོན་མཆོག་ཏུ་གཞག་ཅིང་། ཐེག་ཆེན་གྱི་སློབ་ལམ་དུ་འགོག་ལམ་སོ་སོར་ཕྱེ་ནས་ཆོས་དཀོན་མཆོག་ཏུ་གཞག་པ་ནི། དབྱིངས་རིག་དབྱེར་མེད་མངོན་དུ་གྱུར་པ་དང་མ་གྱུར་པའི་གནད་ཀྱིས་ཡིན་ནོ། །ཆོས་དཀོན་མཆོག་གི་མཚན་ཉིད་ལ་ཁ་ཅིག བསམ་དུ་མེད་པ་ལ་སོགས་པའི་ཡོན་ཏན་བརྒྱད་དང་ལྡན་པའི་འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེ་ན། བྱང་འཕགས་ཀྱི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། དག་གསལ་གཉེན་པོ་གསུམ་གྱི་ཡོན་ཏན་དང་མི་ལྡན་པའི་ཕྱིར་ཏེ། སློབ་པའི་འགོག་བདེན་ཡིན་པའི་ཕྱིར། ཁ་ཅིག འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེ་ན། རྣམ་མཁྱེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། སྐབས་འདིར་བསྟན་གྱི་ཆོས་དཀོན་མཆོག་མིན་པར་ཐལ། མཐར་ཐུག་གི་སྐྱབས་གནས་ཡིན་པའི་ཕྱིར་ཏེ། འགོག་བདེན་དང་དབྱེར་མེད་པའི་ལམ་བདེན་ཡིན་པའི་ཕྱིར་རོ། །རང་ལུགས་ནི། འགོག་ལམ་གང་རུང་གིས་བསྡུས་པའི་བྱང་འཕགས་ཀྱི་རྒྱུད་ཀྱི་ཟག་མེད་རྣམ་བྱང་གི་བདེན་པ་སྟེ། རྒྱུད་བླར། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཞེས་སོ། །དེ་ལ་ཆོས་ཉིད་རྟོག་གེའི་བློས་མུ་བཞིར་རྟོག་པར་མི་ནུས་པས་ན། བསམ་དུ་མེད་པ་དང་། ལས་ཉོན་གཉིས་མེད་པ་དང་། དེའི་རྒྱུ་ཚུལ་བཞིན་མིན་པའི་ཡིད་བྱེད་ཀྱི་རྣམ་རྟོག་མེད་པ་སྟེ་འགོག་བདེན་གྱི་ཡོན་ཏན་གསུམ་དང་། རང་བཞིན་གྱིས་དག་པ། ཡུལ་གྱི་གནས་ཚུལ་གསལ་བ། སྒྲིབ་པའི་གཉེན་པོ་བྱེད་པ་སྟེ་ལམ་བདེན་གྱི་ཡོན་ཏན་གསུམ་དང་དབྱེ་གཞི་འགོག་ལམ་གཉིས་ཏེ་བརྒྱད་དོ། །དགེ་འདུན་དཀོན་མཆོག་གིས་མཚན་ཉིད། རིག་གྲོལ་གྱི་ཡོན་ཏན་བརྒྱད་དང་ལྡན་པའི་རྒྱལ་སྲས་འཕགས་པ་སྟེ། རྒྱུད་བླར། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་སོ། །ཡོན་ཏན་བརྒྱད་ནི། ཇི་ལྟ་བ་རིག་པ། ཇི་སྙེད་པ་རིག་པ། སོ་སོ་རང་གིས་རིག་པ་སྟེ། རིག་པའི་ཡོན་ཏན་གསུམ་དང་། ཆགས་པའི་སྒྲིབ་པ། ཐོགས་པའི་སྒྲིབ་པ། དམན་པའི་སྒྲིབ་པ་ལས་གྲོལ་བ་སྟེ། གྲོལ་བའི་ཡོན་ཏན་གསུམ་དང་། དབྱེ་གཞི་རིག་གྲོལ་གཉིས་ཏེ་བརྒྱད་དོ། །ཅིའི་ཕྱིར། ཟུང་བཞི་ཡ་བརྒྱད་དགེ་འདུན་དཀོན་མཆོག་ཏུ་མི་འཆད་ཅེ་ན། འདི་ནི་ཐེག་ཆེན་ཐུན་མོང་མིན་པའི་དཀོན་མཆོག་འཆད་པའི་སྐབས་ཡིན་པའི་ཕྱིར། ཅིའི་ཕྱིར། ཐེག་ཆེན་དགྲ་བཅོམ་པ་དགེ་འདུན་དཀོན་མཆོག་ཏུ་མི་འཆད་ཅེ་ན། དེ་ནི་སྐྱབས་འགྲོའི་ཡུལ་དུ་གཞག་པའི་སངས་རྒྱས་དཀོན་མཆོག་གི་སྐབས་སུ་གཏོགས་པའི་ཕྱིར། དེའི་ཁོངས་སུ་གཏོགས་པ་ཙམ་གྱིས་དེ་ཡིན་པས་མ་ཁྱབ་སྟེ། ཡེ་ཤེས་ཆོས་སྐུ་དེ་ངོ་བོ་ཉིད་སྐུའི་ཁོངས་སུ་གཏོགས་པའི་ཕྱིར། འོ་ན་མངོན་རྟོགས་རྒྱན་ལས། བྱང་སེམས་སྦྱོར་ལམ་པ་ཡང་དགེ་འདུན་དུ་བཤད་ནས། རྒྱུད་བླར་ཅིའི་ཕྱིར་མི་འཆད་ཅེ་ན། རྒྱན་ལས་ནི། ཕྱིར་མི་ལྡོག་པའི་དགེ་འདུན་སྒྲུབ་པ་ཙམ་ཞིག་ཡིན་ལ། རྒྱུད་བླར་ནི། སྐྱབས་འགྲོའི་ཡུལ་དུ་གྱུར་པའི་དཀོན་མཆོག་འཆད་པའི་སྐབས་ཡིན་པས། དེ་མ་བཤད་དོ། །ཁ་ཅིག་ཤཱཀྱ་ཐུབ་པ་ཆོས་ཅན། འདིར་དངོས་བསྟན་གྱི་དགེ་འདུན་དཀོན་མཆོག་ཡིན་པར་ཐལ། རིག་གྲོལ་གྱི་ཡོན་ཏན་བརྒྱད་དང་ལྡན་པའི་ཐེག་ཆེན་འཕགས་པ་ཡིན་པའི་ཕྱིར་ཞེ་ན། དེ་ཆོས་ཅན། གནས་སྐབས་སྐྱབས་གསུམ་དུ་གཞག་པའི་དགེ་འདུན་དཀོན་མཆོག་ཡིན་པར་ཐལ། དེའི་ཕྱིར། གཉིས་པ་གནས་སྐབས་སྐྱབས་གསུམ་དུ་གཞག་པ་ལ། ངེས་ལེགས་དོན་དུ་གཉེར་བའི་གང་ཟག་གི་དབང་དུ་བྱས་པ་དང་། མངོན་མཐོ་དོན་དུ་གཉེར་བའི་གང་ཟག་གི་དབང་དུ་བྱས་པ་གཉིས་ལས། དང་པོ་ནི། ཅིའི་ཕྱིར་སྐྱབས་འགྲོའི་ཡུལ་དེ་ལ་གསུམ་དུ་གཞག་ཅེ་ན། དེ་ལ་དེར་ངེས་ཏེ། ངེས་ལེགས་དོན་གཉེར་གྱི་གང་ཟག་གིས་ཐོབ་བྱའི་འབྲས་བུ་དེ་ལ་གསུམ་དུ་ངེས་ལ་གསུམ་པོ་དེ་སྐྱབས་གནས་སུ་གཞག་པའི་ཕྱིར། འདི་ཇི་ལྟར་ཤེས་ཞེ་ན། སངས་རྒྱས་ཀྱི་ཐེག་པའི་དབང་དུ་བྱས་ནས་སངས་རྒྱས་དཀོན་མཆོག་སྐྱབས་སུ་གཞག་སྟེ། དེ་དག་ནི་སངས་རྒྱས་ཀྱི་དངོས་པོ་དོན་དུ་གཉེར་བ་ཡིན་པའི་ཕྱིར། རང་སངས་རྒྱས་ཀྱི་ཐེག་པའི་དབང་དུ་བྱས་ནས་ཆོས་དཀོན་མཆོག་སྐྱབས་སུ་གཞག་སྟེ། དེ་དག་ནི་རྟེན་འབྲེལ་ཟབ་མོའི་ཆོས་རྟོག་པ་དོན་དུ་གཉེར་བའི་ཕྱིར་རོ། །ཉན་ཐོས་ཀྱི་ཐེག་པའི་དབང་དུ་བྱས་ནས་དགེ་འདུན་དཀོན་མཆོག་སྐྱབས་སུ་གཞག་སྟེ། དེ་དག་ནི་དགེ་འདུན་གྱི་དངོས་པོ་དགྲ་བཅོམ་འབྲས་གནས་དོན་དུ་གཉེར་བའི་ཕྱིར། གང་ཟག་གསུམ་པོས་རང་གི་ཐོབ་བྱའི་འབྲས་བུ་དེ་ཐོབ་པ་ན། ཐོབ་བྱའི་འབྲས་བུ་དེ་ཉིད་སྐྱབས་སུ་གཞག་པས་འདི་ལ་འབྲས་བུའི་སྐྱབས་འགྲོ་ཞེས་བྱའོ། །སྐྱབས་འགྲོའི་དོན་མི་གནས་པ་ཡང་མིན་ཏེ། དེའི་དོན་ནི་འཇིགས་པ་ལས་སྐྱོབ་པ་ཡིན་ལ། དེ་ཐོབ་པ་ན་རང་རང་གི་འཇིགས་པ་ལས་གྲོལ་བར་འགྱུར་བའི་ཕྱིར་རོ། །གཉིས་པ་ནི། གང་ཟག་རེ་རེ་ཡང་གསུམ་ཀ་ལ་སྐྱབས་སུ་འགྲོ་བ་མིན་ནམ། ཅིའི་ཕྱིར་སོ་སོར་གཞག་ཅེ་ན། སངས་རྒྱས་ལ་བྱ་བ་བྱེད་པར་མོས་པའི་དབང་དུ་བྱས་ནས་སངས་རྒྱས་དཀོན་མཆོག་སྐྱབས་སུ་གཞག་སྟེ། རྐང་གཉིས་རྣམས་ཀྱི་མཆོག་དེ་སངས་རྒྱས་ཡིན་པའི་ཕྱིར། ཆོས་ལ་བྱ་བ་བྱེད་པར་མོས་པའི་དབང་དུ་བྱས་ནས་ཆོས་དཀོན་མཆོག་སྐྱབས་སུ་གཞག་སྟེ། འདོད་ཆགས་དང་བྲལ་བ་རྣམས་ཀྱི་མཆོག་དེ་ཆོས་དཀོན་མཆོག་ཡིན་པའི་ཕྱིར། དགེ་འདུན་ལ་བྱ་བ་བྱེད་པར་མོས་པའི་དབང་དུ་བྱས་ནས་དེ་སྐྱབས་སུ་གཞག་སྟེ། ཚོགས་རྣམས་ཀྱི་མཆོག་དེ་དགེ་འདུན་དུ་རྣམ་པར་གཞག་པའི་ཕྱིར། འདི་ནི་རང་ཉིད་འཇིག་པ་ལས་སྐྱོབ་པའི་ཕྱིར་དུ། གང་ཟག་གཞན་རྒྱུད་ལ་གྲུབ་ཟིན་པའི་དཀོན་མཆོག་གསུམ་ལ་སྐྱབས་སུ་འགྲོ་བས་རྒྱུའི་སྐྱབས་འགྲོ་ཞེས་བྱའོ། །འདི་ནི་མངོན་མཐོ་དོན་གཉེར་ཁོ་ནར་མ་ངེས་ཏེ། ངེས་ལེགས་དོན་དུ་གཉེར་བས་ཀྱང་དེ་ལྟར་བྱེད་པ་ཡོད་པའི་ཕྱིར། གསུམ་པ་མཐར་ཐུག་སྐྱབས་གཅིག་ཏུ་གཞག་པ་ལ། རྒྱུད་བླར། སྤངས་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་གསུངས་པའི་དོན་ནི། སྤངས་ཕྱིར་ཞེས་པ་ནི་གདུལ་བྱའི་སེམས་རྒྱུད་ལ་མིང་ཚིག་ཡི་གེའི་རྣམ་པར་སྣང་བའི་ལུང་གི་ཆོས་གསུང་རབ་ཡན་ལག་བཅུ་གཉིས་ཆོས་ཅན། མཐར་ཐུག་གི་སྐྱབས་གནས་མ་ཡིན་ཏེ། མཐར་ཐུག་གི་རྟོགས་པ་ཐོབ་པའི་ཐབས་ཙམ་ཡིན་པའི་ཕྱིར་ཏེ། དེ་ཐོབ་ཟིན་ནས་ཆུ་བརྒལ་ཟིན་པའི་གཟིངས་ལྟར་སྤང་བྱ་ཡིན་པའི་ཕྱིར། བསླུ་བའི་ཆོས་ཅན་ཕྱིར་ཞེས་པའི་དོན་ལ་ཁ་ཅིག སློབ་པའི་ལམ་བདེན་ཆོས་ཅན། དེ་མ་ཡིན་ཏེ། རང་གི་གཟིགས་ངོར་དྲི་མ་མཐའ་དག་དང་བྲལ་བར་སྣང་ཡང་། དོན་ལ་དྲི་མ་མཐའ་དག་དང་མ་བྲལ་བས། དེར་སྣང་དང་དེར་སྟོང་ཚོགས་པ་བརྫུན་པ་བསླུ་བའི་ཆོས་ཅན་ཡིན་པའི་ཕྱིར་ཟེར། འོ་ན་དེའི་དོན་སློབ་པའི་མཉམ་བཞག་ལ་དེར་སྣང་བ་ལ་བྱེད་དམ། རྗེས་ཐོབ་ལ་དེར་སྣང་བ་ལ་བྱེད། དང་པོ་ལྟར་ན། དེ་ཆོས་ཅན། དེ་མིན་པར་ཐལ། ཀུན་རྫོབ་བདེན་པ་སྣང་བ་མིན་པའི་ཕྱིར། རྟགས་ཁས། གཉིས་པ་ལྟར་ན། སློབ་པའི་རྗེས་ཐོབ་དེ་ཆོས་ཅན། དེ་ལྟར་སྣང་བ་མིན་པར་ཐལ། རང་ཉིད་དྲི་མ་དང་བཅས་པར་ཤེས་པའི་སྒོ་ནས་དྲི་མ་སྤོང་བ་ལ་འབད་པ་བྱེད་པའི་ལམ་ཡིན་པའི་ཕྱིར། ཡང་སངས་རྒྱས་ཀྱི་གཟིགས་ངོར་ཤིན་ཏུ་ལྐོག་གྱུར་དེ་ཤིན་ཏུ་ལྐོག་གྱུར་ཡིན་ནམ་མིན། དང་པོ་ལྟར་ན། དེ་མིན་པར་ཐལ། དེའི་ངོར་དེ་ཡིན་པ་མེད་པའི་ཕྱིར། ཕྱི་མ་ལྟར་ན་སངས་རྒྱས་ཀྱི་ཡེ་ཤེས་ཆོས་ཅན། མཐར་ཐུག་གི་སྐྱབས་གནས་མིན་པར་ཐལ། རང་གི་གཟིགས་ངོར་ཤིན་དུ་ལྐོག་གྱུར་ཤིན་ཏུ་ལྐོག་གྱུར་མིན་པར་སྣང་ཡང་། དོན་ལ་དེ་དེ་ཡིན་པས་དེར་སྣང་དང་དེར་སྟོང་ཚོགས་པ་བརྫུན་པ་བསླུ་བའི་ཆོས་ཅན་ཡིན་པའི་ཕྱིར། རྟགས་ཁྱབ་ཁས། གཞན་ཡང་། བསླུ་བའི་ཆོས་ཅན་ཕྱིར་ཞེས་པའི་དོན་དེ་ལྟར་འཆད་པ་ནི། ཐོགས་མེད་ཀྱི་འགྲེལ་པ་དང་འགལ་ཏེ། འགྲེལ་པར། དེ་ལ་ལམ་ནི་འདུས་བྱས་ཀྱི་མཚན་ཉིད་དུ་གཏོགས་ལ། འདུས་བྱས་ཀྱི་མཚན་ཉིད་དུ་གཏོགས་པ་གང་ཡིན་པ་དེ་ནི་བརྫུན་པ་བསླུ་བའི་ཆོས་ཅན། གང་བརྫུན་པ་བསླུ་བའི་ཆོས་ཅན་དེ་ནི་མི་བདེན་པ། གང་མི་བདེན་པ་དེ་ནི་མི་རྟག་པ། གང་མི་རྟག་པ་དེ་ནི་སྐྱབས་མིན་ནོ། །ཞེས་གསུངས་པའི་ཕྱིར། ཊཱི་ཀ་ལས། སློབ་པའི་ལམ་བདེན་ཆོས་ཅན། དེ་མིན་ཏེ། འདུས་བྱས་བསླུ་བའི་ཆོས་ཅན་ཡིན་པའི་ཕྱིར་ཏེ། རྩ་ཤེར་ལས། འདུས་བྱས་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཞེས་གསུངས་པ་ལ་ཁ་ཅིག གཟུགས་སྐུ་གཉིས་དང་ཡེ་ཤེས་ཆོས་སྐུ་ཆོས་ཅན། དེར་ཐལ། དེའི་ཕྱིར་ཞེས་བཀག་ནས། རང་ལུགས་ལ་སློབ་པའི་ལམ་བདེན་ཆོས་ཅན། དེ་མིན་ཏེ། མཐར་ཐུག་གི་དུས་སུ་མེད་པས། མཐར་ཐུག་གི་དུས་སུ་བསླུ་བ་ཡིན་པའི་ཕྱིར། མ་གྲུབ་ན། དེ་དེའི་དུས་ན་མེད་པར་ཐལ། དེ་རང་གྲུབ་དུས་ཀྱི་སྐད་ཅིག་གཉིས་པར་མི་སྡོད་པའི་མི་རྟག་པ་ཡིན་པའི་ཕྱིར་ཞེས་སྨྲའོ། །འོ་ན་རྣམ་མཁྱེན་སྐད་ཅིག་དང་པོ་དེ་ཡང་མཐར་ཐུག་གི་སྐྱབས་མིན་པར་ཐལ། དེ་རྣམ་མཁྱེན་སྐད་ཅིག་གཉིས་པའི་དུས་སུ་མེད་པས་མཐར་ཐུག་གི་དུས་སུ་བསླུ་བ་ཡིན་པའི་ཕྱིར། མ་གྲུབ་ན། སྔ་མ་བཞིན་བསྒྲེའོ། །དེས་ན་རང་ལུགས་ནི། སློབ་པའི་ལམ་བདེན་ཆོས་ཅན། དེ་མིན་ཏེ། དག་པ་གཉིས་ལྡན་གྱི་འགོག་བདེན་དང་དབྱེར་མེད་པའི་ཡོན་ཏན་མ་ཐོབ་པས་འདུས་བྱས་བསླུ་བའི་ཆོས་ཅན་ཡིན་པའི་ཕྱིར། ཡང་རྒྱུད་བླར། འདིར་འདུས་བྱས་མཚོན་པར་བྱེད་པའི་མཚན་ཉིད་སྐྱེ་རྒ་ན་འཆི་བཞི་ལ་གསུངས་པ་དེ་ལ་ཡང་། སོ་སོ་སྐྱེ་བོའི་རྒྱུད་ལ་ཡོད་པ་དང་། བྱང་འཕགས་ཀྱི་རྒྱུད་ལ་ཡོད་པ་གཉིས་ལས། དང་པོ་ནི། བྱང་སེམས་འཕགས་པས་སྤངས་ལ། ཕྱི་མ་ནི་སངས་རྒྱས་ཀྱིས་སྤངས་པས་དེ་ལྟ་བུའི་འདུས་བྱས་མིན་པའི་དོན་དེ་རྟོགས་པར་འདོད་ན་ཁོ་བོ་ལ་དྲི་བར་བྱའོ། །མེད་ཕྱིར་ཞེས་པའི་དོན་ལ། སློབ་པའི་འགོག་བདེན་ཆོས་ཅན། དེ་མིན་ཏེ། ལམ་བདེན་དང་དབྱེར་མེད་པའི་ཡོན་ཏན་མ་ཐོབ་པས། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་དྲི་མ་མེད་པས་རབ་ཏུ་ཕྱེ་བ་ཙམ་ཡིན་པའི་ཕྱིར། འཇིགས་དང་བཅས་པའི་ཕྱིར། ཞེས་པའི་དོན་ལ། བྱང་སེམས་འཕགས་པ་ཆོས་ཅན། མཐར་ཐུག་གི་སྐྱབས་གནས་མིན་ཏེ། ཤེས་སྒྲིབ་ཀྱི་འཇིགས་པ་དང་བཅས་པའི་ཕྱིར་རོ། །ཚིགས་སུ་བཅད་པ་ཕྱི་མའི་དོན་ནི་རྟོགས་པར་སླའོ། །ཤའི་དང་། རྣམ་པར་སྨིན་པ་ལས་བྱུང་བ་ལྷའི་དང་། ཞེས་པའི་སྐབས་སུ། སྤྱན་ལྔའི་རྒྱུ། ངོ་བོ། ས་མཚམས་གསུམ། དང་པོ་ལ་ཐུན་མོང་གི་རྒྱུ་ནི་ཕར་ཕྱིན་དྲུག་སྟེ། མདོ་ལས། མིག་ལྔ་ཐོབ་པར་འདོད་པ་དང་སྦྱང་བར་འདོད་པས་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱའོ་ཞེས་སོ། །སོ་སོའི་རྒྱུ་ལ། བསམ་གཏན་གྱི་རང་བཞིན་གྱིས་སྦྱངས་པའི་དབང་པོ་གཟུགས་ཅན་པ་ནི་ཤའི་སྤྱན་གྱི་རྒྱུ་དང་། མར་མེ་སོགས་སྦྱིན་པའི་དགེ་བའི་ལས་ནི་ལྷའི་སྤྱན་གྱི་རྒྱུ་དང་། རང་བཞིན་མེད་པར་རྟོགས་པའི་ཐོས་བསམ་སྒོམ་གསུམ་གྱི་ཤེས་རབ་ནི་ཤེས་རབ་ཀྱི་སྤྱན་གྱི་རྒྱུ་དང་ཆོས་ཀྱི་སྤྱན་གྱི་རྒྱུའོ། །ཡེ་ཤེས་ཀྱི་ཚོགས་ནི་སངས་རྒྱས་ཀྱི་སྤྱན་གྱི་རྒྱུའོ། །གཉིས་པ་ལ་དགག་གཞག་གཉིས་ལས། དང་པོ་ལ་ཁ་ཅིག བདག་རྐྱེན་དབང་པོ་གཟུགས་ཅན་པ་ལ་བརྟེན་ནས་དཔག་ཚད་བརྒྱ་ནས་སྟོང་གསུམ་ཚུན་ཆད་མཐོང་བའི་ཡུལ་ཅན། བདག་རྐྱེན་བསམ་གཏན་ལ་བརྟེན་ནས་སེམས་ཅན་ཐམས་ཅད་ཀྱི་འཆི་འཕོ་བ་དང་སྐྱེ་བ་མཐོང་བའི་ཡུལ་ཅན་དང་། ཆོས་ཐམས་ཅད་ལ་བདག་གཉིས་ཀྱིས་མཚན་མར་རྣམ་པར་མི་རྟོག་པའི་ཡུལ་ཅན་དང་རང་དང་རྒྱུད་ཚོད་མཉམ་པ་མན་ཆད་ཀྱི་འཕགས་པའི་གང་ཟག་ཐམས་ཅད་ཀྱི་རྟོགས་རིགས་ཇི་ལྟ་བ་བཞིན་རྟོགས་པའི་ཡུལ་ཅན་དང་། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་ཞེ་ན། དང་པོ་གཉིས་ལ། ལམ་མ་ཞུགས་ཀྱི་གང་ཟག་གི་ལྷའི་མིག་གི་མངོན་ཤེས་ཆོས་ཅན། མཚོན་བྱ་དེ་གཉིས་སུ་ཐལ། མཚན་ཉིད་དེའི་གཉིས་ཀྱི་ཕྱིར། མ་གྲུབ་ན། བྱང་སེམས་ཚོགས་ལམ་པའི་རྒྱུད་ཀྱི་ཤའི་སྤྱན་དང་། སྦྱོར་ལམ་པའི་རྒྱུད་ཀྱི་ལྷའི་སྤྱན་གཉིས་ཀྱིས་དེ་གཉིས་མི་མཐོང་བར་ཐལ་ལོ། །རྩ་བར་འདོད་ན། མིན་པར་ཐལ། ལམ་མ་ཞུགས་པའི་གང་ཟག་རྒྱུད་ཀྱི་ཤེས་པ་ཡིན་པའི་ཕྱིར། གསུམ་པ་ལ། ས་གཉིས་པའི་མོས་པ་སྒོམ་ལམ་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར་ཏེ། ཆོས་ཀྱི་བདག་མེད་མངོན་སུམ་རྟོགས་པའི་རྣལ་འབྱོར་མངོན་སུམ་ཡིན་པའི་ཕྱིར། རྩ་བར་འདོད་མི་ནུས་ཏེ། སློབ་པའི་རྗེས་ཐོབ་ཡེ་ཤེས་ཡིན་པའི་ཕྱིར་རོ། །བཞི་པ་ལ་ཕྱིར་མི་འོང་བའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར་ཏེ། འཕགས་རྒྱུད་ཀྱི་གཞན་སེམས་ཤེས་པའི་མངོན་ཤེས་ཡིན་པའི་ཕྱིར། རྩ་བར་འདོད་མི་ནུས་ཏེ། ཐེག་དམན་གྱི་རྒྱུད་ལ་ཆོས་ཀྱི་སྤྱན་མེད་པའི་ཕྱིར་ཏེ། དེའི་རྒྱུད་ལ་ཤེས་རབ་ཀྱི་སྤྱན་མེད་པའི་ཕྱིར་ཏེ། དེའི་རྒྱུད་ལ་ཆོས་ཐམས་ཅད་བདག་གཉིས་སུ་རྣམ་པར་མི་རྟོག་པའི་ཡེ་ཤེས་མེད་པའི་ཕྱིར་རོ། །ལྔ་པ་ལ་ལོངས་སྐུ་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར་ཏེ། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པ་མངོན་སུམ་དུ་རྟོགས་པའི་ཕྱིར། གཉིས་པ་ནི། ལྔ་པོ་སོ་སོའི་མཚན་ཉིད་རིམ་བཞིན། བདག་རྐྱེན་ཚེ་འདིར་བསམ་གཏན་གྱི་རང་བཞིན་གྱིས་སྦྱངས་པའི་དབང་པོ་གཟུགས་ཅན་པ་ལ་བརྟེན་ནས་དཔག་ཚད་བརྒྱ་ལ་སོགས་པ་མངོན་སུམ་མཐོང་བའི་ཐེག་ཆེན་སྐྱེས་བུའི་རྒྱུད་ཀྱི་ཡོན་ཏན། བདག་རྐྱེན་སྔོན་གྱི་ལས་ཀྱི་དགེ་བའི་རྣམ་པར་སྨིན་པ་ལས་བྱུང་བའི་བསམ་གཏན་གྱི་སས་བསྡུས་ཀྱི་དབང་པོ་གཟུགས་ཅན་པ་ལ་བརྟེན་ནས་སེམས་ཅན་གཞན་གྱི་འཆི་འཕོ་བ་དང་། སྐྱེ་བ་མཐོང་བའི་ཐེག་ཆེན་སྐྱེས་བུའི་རྒྱུད་ཀྱི་སྦྱོར་ལམ་ཡན་ཆད་ཀྱི་ཡོན་ཏན་དང་། ཆོས་ཐམས་ཅད་ལ་བདག་གཉིས་ཀྱི་མཚན་མར་རྣམ་པར་མི་ཏོག་པའི་འཕགས་རྒྱུད་ཀྱི་མཉམ་གཞག་གིས་བསྡུས་པའི་ཡོན་ཏན་དང་། རང་དང་རྒྱུད་ཚོད་མཉམ་པ་མན་ཆད་ཀྱི་འཕགས་པའི་གང་ཟག་ཐམས་ཅད་ཀྱི་རྟོགས་པའི་བྱེ་བྲག་མངོན་སུམ་དུ་རྟོགས་པའི་ཐེག་ཆེན་འཕགས་པའི་རྗེས་ཐོབ་ཀྱིས་བསྡུས་པའི་ཡོན་ཏན་དང་། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡེ་ཤེས་སོ། །དེ་ལ་ཤའི་སྤྱན་ནི་ཤེར་ཕྱིན་གྱི་མདོ་ལས། བྱང་ཆུབ་སེམས་དཔའ་ཆེན་པོའི་ཤའི་མིག་གིས་དཔག་ཚད་བརྒྱ་མཐོང་བ་ཡོད་དོ། །དེ་བཞིན་དུ་དཔག་ཚད་ཉིས་བརྒྱ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐོང་བ་ཡོད་དོ་ཞེས་གསུངས་པའི་དོན། ཉི་ཁྲི་སྣང་བ་ལས། དེ་ནི་རྣམ་པར་སྨིན་པ་ལས་བྱུང་བ་ཉིད་ཀྱིས་ཡུལ་སོ་སོར་ངེས་པ་ཡིན་པའི་ཕྱིར། ཤའི་མིག་གི་བདག་པོའི་འབྲས་བུའི་ཡུལ་ཅན་ཡིན་པ་དེ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱིས་བསྡུས་པའི་ཕྱིར་ཞེས་གསུངས་སོ། །དེའི་དོན་སྟོང་གསུམ་གྱི་སེམས་ཅན་རྣམས་ཀྱི་ཐུན་མོང་གི་བདག་འབྲས་ལ། སྟོང་གསུམ་གྱི་འཇིག་རྟེན་གྱི་ཁམས་ལས་ལྷག་པ་མི་འགྲུབ་ཅིང་། ཤའི་སྤྱན་ནི་བདག་པོའི་འབྲས་བུའི་ཡུལ་ཅན་ཡིན་པས་བྱང་སེམས་ཀྱི་ཤའི་སྤྱན་གྱིས་སྟོང་གསུམ་ལས་ལྷག་པ་མི་མཐོང་ཞེས་པའི་དོན་ཡིན་གྱི་སངས་རྒྱས་ལ་ནི་མི་མཚུངས་སོ། །ལྷའི་སྤྱན་ནི་བདག་རྐྱེན་བསམ་གཏན་གྱི་སས་བསྡུས་པའི་དབང་པོ་ལ་འཇོག་པ་ནི་ཊཱི་ཀ་ལྟར་བྲིས་པ་ཡིན་གྱི། འདི་ནི་དགེ་བའི་ལས་ཀྱི་རྣམ་པར་སྨིན་པར་གསུངས་པས་གཟུགས་ཀྱི་སས་བསྡུས་ཀྱི་དགེ་བའི་རྣམ་སྨིན་འདོད་པར་མི་སྨིན་ཅིང་། འདོད་པའི་སས་བསྡུས་ཀྱི་རྣམ་སྨིན་ལས་བསམ་གཏན་གྱི་སས་བསྡུས་པའི་དབང་པོ་གཟུགས་ཅན་མི་འབྱུང་བས་ན་ཤིན་ཏུ་དཔྱད་པའི་གཞིའོ། །ཁོ་བོ་ལ་ནི་གཞན་ཞིག་ཡོད་དོ། །གསུམ་པ་ལ། མངོན་པ་གོང་འོག་ལས་མངོན་ཤེས་དྲུག་བཤད་ཀྱི་སྤྱན་ལྔ་མ་བཤད་ལ། འདི་ནི་ཤེར་ཕྱིན་གྱི་མདོ་དང་མངོན་རྟོགས་རྒྱན་ཁོ་ན་ལས་བཤད་ཅིང་། རྟེན་གྱི་གང་ཟག་ཀྱང་ཐེག་ཆེན་ཁོ་ན་ལ་ཡོད་པས། དང་པོ་ནི། ཐེག་ཆེན་གྱི་ཚོགས་ལམ་ནས་དང་། གཉིས་པ་ཐེག་ཆེན་གྱི་སྦྱོར་ལམ་ནས་དང་། གསུམ་པ་ཐེག་ཆེན་འཕགས་པའི་མཉམ་གཞག་ཁོ་ན་དང་། བཞི་པ་ཐེག་ཆེན་འཕགས་པའི་རྗེས་ཐོབ་ཁོ་ན་དང་། ལྔ་པ་རྗེས་མཐུན་པ་ས་བདུན་པ་ནས་ཐོབ་ཅིང་མཚན་ཉིད་པ་སངས་རྒྱས་ཀྱི་ས་ཁོ་ན་ན་ཡོད་དོ། །ཐུབ་པ་དགོངས་རྒྱན་ལས། ཇི་ལྟར་རིགས་པར་ཚོགས་ཀྱི་ས་དང་། གོང་མ་གོང་མའི་སེམས་ཀྱི་གནས་སྐབས་སུ་ཡང་མཆོག་དང་། རབ་མཆོག་ལ་སོགས་པའི་བྱེ་བྲག་གིས་སྤྱན་ལྔ་རྣམས་སོ་སོར་ཐོབ་ལ། མངོན་པར་ཤེས་པ་དྲུག་ཀྱང་སྟེ་ཞེས་གསུངས་པ་ཡིན་ནོ། །རྫུ་འཕྲུལ་དང་། ལྷའི་རྣ་བ་དང་། ཞེས་པའི་སྐབས་སུ། མངོན་ཤེས་དྲུག་གི་རྟེན་དང་། ངོ་བོ་ས་མཚམས་གསུམ། དང་པོ་ནི། མངོན་ཤེས་དང་པོ་ལྔ་བསམ་གཏན་གྱི་དངོས་གཞི་དང་། དྲུག་པ་ཀུན་བཏུས་ལྟར་ན། བསམ་གཏན་བཞི་པའི་དངོས་གཞི་དང་། མཛོད་ལྟར་ན་འདོད་པ་ནས་སྲིད་རྩེའི་བར་གྱི་ས་བཅུ་གཅིག་ལ་བརྟེན་ཏེ། ཀུན་བཏུས་ལས། དག་པའི་བསམ་གཏན་བཞི་ལ་བསྟེན་ནས་ཚད་མེད་པ་རྣམས་མངོན་པར་འགྲུབ་བོ། །ཚད་མེད་པ་ཇི་ལྟ་བར་མངོན་པར་ཤེས་པ་ལྔ་ཡང་དེ་བཞིན་ནོ། །ཡོན་ཏན་ལྷག་མ་རྣམས་ནི། ཉན་ཐོས་སམ་བྱང་ཆུབ་སེམས་དཔའ་འམ་དེ་བཞིན་གཤེགས་པ་ཡང་རུང་སྟེ་རབ་ཀྱི་མཐར་ཕྱིན་པའི་བསམ་གཏན་བཞི་པ་ལ་བརྟེན་ནས་མངོན་པར་འགྲུབ་བོ་ཞེས་དང་། མཛོད་ལས། ཟག་ཟད་མངོན་ཤེས་སྟོབས་བཞིན་ནོ། །ཞེས་པའི་འགྲེལ་པར། དེ་བཞིན་དུ་འདི་ནི་ས་ཐམས་ཅད་པ་ཡིན་པར་ཡང་ཤེས་པར་ཡང་བྱའོ། །ཞེས་སོ། །རྒྱན་ལས། བསམ་གཏན་བཞི་པ་ཤིན་ཏུ་དག་ཐོབ་ནས། །ཞེས་པ་ནི། འཕགས་ལམ་ཡན་ལག་བརྒྱད་པ་ཞེས་པ་ལྟར། བསམ་གཏན་བཞི་པོ་ལ་འཇུག་པ་ཡིན་གྱི་བཞི་པ་ཁོ་ན་ལ་འཇུག་པ་ནི་མིན་ནོ། །ཊཱི་ཀ་ལས། ཐ་མ་བསམ་གཏན་ས་དྲུག་ལ་བརྟེན་པར་བཤད་པ་ནི་ཟག་པ་ཟད་པའི་ཐབས་ཤེས་པ་ལ་ཟག་ཟད་མངོན་ཤེས་སུ་གཞག་པའི་དབང་དུ་བྱས་སོ། །གཉིས་པ་ནི། རྫུ་འཕྲུལ་གྱི་མངོན་ཤེས་དང་། ལྷའི་རྣ་བའི་དང་། གཞན་སེམས་ཤེས་པའི་དང་། སྔོན་གནས་རྗེས་སུ་དྲན་པའི་དང་། ལྷའི་མིག་དང་། ཟག་པ་ཟད་པའི་མངོན་ཤེས་དྲུག་གི་མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞི་ལ་བརྟེན་ནས་ས་གཡོ་བ་ལ་སོགས་པའི་རྫུ་འཕྲུལ་དུ་མ་ཡང་དག་པར་འབྱོར་བར་བྱེད་པའི་སྒོམ་བྱུང་གི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། བདག་རྐྱེན་སྔར་བཞིན་ལ་སྟོང་གསུམ་གྱི་སྒྲ་ཕྲ་རགས་ཀུན་ཐོས་པ་ཡང་དག་པར་འབྱོར་པར་ཞེས་སོགས་དང་། གཞན་གྱི་སེམས་འདོད་ཆགས་དང་བཅས་པ་སོགས་མངོན་སུམ་དུ་ཤེས་པ་ཡང་དག་པར་ཞེས་སོགས་དང་། སྟོང་གསུམ་གྱིས་བསྐལ་པ་དང་མ་བསྐལ་པའི་གཟུགས་ཕྲ་རགས་ཐམས་ཅད་མཐོང་བ་དང་། རང་དང་གཞན་གྱི་ཚེ་རབས་སྔ་མ་དུ་མ་རྗེས་སུ་དྲན་པའི་སྒོམ་བྱུང་གི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་དང་། བདག་རྐྱེན་བསམ་གཏན་བཞི་པ་ལ་བརྟེན་ནས་ཟག་པ་ཟད་པ་མངོན་སུམ་དུ་ཤེས་པ་ཡང་དག་པར་འབྱོར་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པའམ་ཟག་པ་ཟད་པའི་ཐབས་ཤེས་པ་འཇོག་ན་བདག་རྐྱེན་བསམ་གཏན་ས་དྲུག་གང་རུང་ལ་བརྟེན་ནས་ཟག་པ་ཟད་པའི་ངོ་བོའམ་ཟག་པ་ཟད་པའི་ཐབས་གང་རུང་མངོན་སུམ་ཤེས་པ་ལ་སོགས་པའོ། །འདི་དག་ལ་སྐྱེས་ཐོབ་དང་ལས་ལས་སྐྱེས་པ་དང་སྔགས་དང་སྨན་གྱི་མཐུ་ལས་བྱུང་བ་དང་། སྒོམ་པ་ལས་བྱུང་བ་དུ་མ་ཡོད་པའི་ནང་ནས་མངོན་ཤེས་སུ་བགྲང་བ་ནི་ཕྱི་མ་ཁོ་ནའོ། །གསུམ་པ་ནི། དང་པོ་ལྔ་བསམ་གཏན་གྱི་དངོས་གཞི་ཐོབ་པའི་ལམ་མ་ཞུགས་ནས་སངས་རྒྱས་སའི་བར་དུ་ཡོད་ལ། ཐ་མ་ནི་ཟག་པ་ཟད་པའི་ཐབས་ཤེས་པ་ལ་འཇོག་ན་འཕགས་པ་ཐམས་ཅད་ལ་ཡོད་དེ། མཛོད་ལས། སློབ་ལ་འདོད་དེ་མ་རིག་དང་། །བཅས་རྒྱུད་ཕྱིར་ན་རིག་མ་བཤད། །ཅེས་སོ། །ཟག་པ་ཟད་པའི་ངོ་བོ་ཤེས་པ་ལ་འཇོག་ན། ཐེག་དམན་དགྲ་བཅོམ་པ་དང་ཐེག་ཆེན་གྱི་ས་དང་པོ་ནས་ཡོད་དེ། དེ་ནས་ཉོན་སྒྲིབ་སྤངས་པའི་ཕྱིར། ཁ་ཅིག མཛོད་ཀྱི་གཞུང་དེས་སློབ་པའི་རྒྱུད་ལ་ཟག་ཟད་མངོན་ཤེས་ཡོད་པར་མ་བསྟན་ཏེ། གཞུང་དེས་མི་སློབ་པའི་རྒྱུད་གྱི་མངོན་ཤེས་ཕྱི་མ་གསུམ་རིག་པ་གསུམ་དུ་གཞག་ན་སློབ་པ་ལ་རིག་པ་དང་པོ་ཡོད་པ་ཐལ། སྔོན་གནས་རྗེས་སུ་དྲན་པ་དང་ལྷའི་མིག་གི་མངོན་ཤེས་ཡོད་པའི་ཕྱིར་ཞེ་ན་མ་ཁྱབ་སྟེ། སློབ་པ་རྣམས་ནི་རྒྱུད་ཉོན་མོངས་པ་ཅན་གྱི་མ་རིག་པ་དང་བཅས་པའི་ཕྱིར་ཞེས་བསྟན་པ་ཡིན་ནོ་ཞེས་ཟེར། མི་འཐད་དེ། མཛོད་འགྲེལ་ལས། མངོན་པར་ཤེས་པ་འདི་དག་སློབ་པ་ལ་ཡོད་པར་མི་འདོད་དམ། གང་གི་ཕྱིར་སློབ་པའི་རིག་པ་དག་མི་བྱ་ཞེ་ན། སློབ་ལ་འདོད་དེ་མ་རིག་དང་། །བཅས་རྒྱུད་ཕྱིར་ན་རིག་མ་བཤད། །ཅེས་རྒྱུད་མ་རིག་པ་དང་བཅས་བཞིན་དུ་རིག་པར་གཞག་ཏུ་མི་རུང་སྟེ། མ་རིག་པས་ཟིལ་གྱིས་ནོན་པའི་ཕྱིར་རོ་ཞེས་སོ། །དམིགས་པ་དང་ནི་རྣམ་པ་དང་། །ཞེས་པའི་སྐབས་སུ། སྦྱོར་ལམ་གྱི་རྟེན། ངོ་བོ། བློ་རིག་ལ་དཔྱད་པ། གྲངས་ངེས་ལ་དཔྱད་པ་དང་བཞིའོ། །དང་པོ་ནི་སྐབས་གཉིས་པར་འཆད་དོ། །གཉིས་པ་ལ་མཚན་ཉིད། དབྱེ་བ། སོ་སོའི་དོན་དང་གསུམ། དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག སྦྱོར་ལམ་གྱི་མཚན་ཉིད་ཚོགས་ལམ་རྫོགས་རྗེས་སུ་བྱུང་ཞིང་མཐོང་ལམ་མ་སྐྱེས་གོང་གི་མངོན་རྟོགས་ཞེས་དང་། ཡང་ཐེག་པ་རང་ལུགས་ཀྱི་ཚོགས་ལམ་རྫོགས་རྗེས་སུ་བྱུང་ཞིང་སྔར་བཞིན་དང་གཉིས་ལས། དང་པོ་ལ། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་གྱི་སྦྱོར་ལམ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། མཐོང་ལམ་མ་སྐྱེས་གོང་གི་དེ་མིན་པའི་ཕྱིར་ཏེ། དེ་སྔོན་དུ་སོང་བའི་ཕྱིར། གཉིས་པ་ལ། ཉན་ཐོས་སྦྱོར་ལམ་པ་རང་རྒྱལ་གྱི་སྦྱོར་ལམ་དུ་ཞུགས་པའི་རང་རྒྱལ་གྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རང་རྒྱལ་གྱི་སྦྱོར་ལམ་གང་ཞིག རང་རྒྱལ་གྱི་ཚོགས་ལམ་རྫོགས་རྗེས་སུ་བྱུང་བ་མ་ཡིན་པའི་ཕྱིར། དང་པོ་མ་གྲུབ་ན། དེར་ཐལ། དེ་འདྲ་ཡོད་པའི་ཕྱིར་ཏེ། ཉན་ཐོས་སྦྱོར་ལམ་པ་རང་རྒྱལ་གྱི་ལམ་དུ་འཇུག་པ་ཡོད་པ་གང་ཞིག དེར་འཇུག་ན། དེའི་ཚོགས་ལམ་ནས་འཇུག་པས་མ་ཁྱབ་པའི་ཕྱིར། ཕྱི་མ་མ་གྲུབ་ན། ཅིག་ཆར་བའི་ཉན་ཐོས་སྔོན་སོང་གི་རང་རྒྱལ་མེད་པར་ཐལ་ལོ། །ཊཱི་ཀ་ལས། ཐར་པ་ཆ་མཐུན་རྫོགས་རྗེས་ཀྱི་བདེན་པ་མངོན་པར་རྟོགས་པ་དང་རྗེས་སུ་མཐུན་པའི་འཇིག་རྟེན་པའི་སྒོམ་བྱུང་གཙོ་བོར་གྱུར་པ་ཞེས་པ་ནི། ཐེག་པ་རང་ལུགས་ཀྱི་རྟོགས་རིགས་སྒོམ་པའི་སྦྱོར་ལམ་ལ་དགོངས་པ་ཡིན་གྱི། དེ་ཡིན་ན་དེ་ཡིན་པས་མ་ཁྱབ་སྟེ། སྦྱོར་ལམ་པའི་རྒྱུད་ཀྱི་རྗེས་ཐོབ་ཀྱི་མཁྱེན་པ་དང་། རྒྱུན་ཞུགས་ཀྱི་རྟོགས་པ་སྔོན་སོང་གི་བྱང་སེམས་སྦྱོར་ལམ་པའི་རྒྱུད་ཀྱི་རྣལ་འབྱོར་མངོན་སུམ་གྱིས་མ་ངེས་སོ། །ཐེག་ཆེན་སྦྱོར་ལམ་གྱི་མཚན་ཉིད་ལ་ཁ་ཅིག ཐེག་ཆེན་གྱི་ཚོགས་ལམ་རྫོགས་རྗེས་སུ་བྱུང་ཞིང་ཐེག་ཆེན་མཐོང་ལམ་མ་སྐྱེས་གོང་གི་མངོན་རྟོགས་ཞེས་དང་། ཁ་ཅིག དེ་རྫོགས་རྗེས་སུ་བྱུང་བའི་ཐེག་ཆེན་གྱི་མངོན་རྟོགས་གང་ཞིག འཇིག་རྟེན་པའི་སྒོམ་བྱུང་གཙོ་བོར་གྱུར་པ་ཞེས་དང་། ཡང་སྟོང་ཉིད་རྟོགས་པའི་ཐེག་ཆེན་གྱི་དོན་མངོན་རྟོགས་ཞེས་དང་། ཁ་ཅིག་དེ་ལ་རང་ལྡོག་རྫས་མ་གྲུབ་ཀྱི་སྐྱོན་བརྗོད་ནས། དམིགས་རྣམ་སོགས་ཀྱིས་ཁྱད་ཆོས་ལྔ་དང་ལྡན་པའི་ཐེག་ཆེན་གྱི་ངེས་འབྱེད་ཆ་མཐུན་དུ་ཚད་མས་དམིགས་པ་ཞེས་དང་། ཁ་ཅིག་དེ་ལ་ཐེག་དམན་གྱི་སྦྱོར་ལམ་ལ་ཡང་དམིགས་རྣམ་སོགས་ཡོད་པས་མ་ངེས་པའི་སྐྱོན་བཏགས་ནས། དམིགས་པ་དམིགས་ཚུལ་སོགས་ཁྱད་ཆོས་ལྔའི་སྒོ་ནས་ཐེག་དམན་སྦྱོར་ལམ་ལས་ཁྱད་པར་འཕགས་པའི་ཐེག་ཆེན་ངེས་འབྱེད་ཆ་མཐུན་ཞེས་པ་ལྔ་ལས། དང་པོ་ལ་ཐེག་ཆེན་གྱི་ཚོགས་ལམ་ཆེན་པོ་ཐོབ་ནས་ཉན་ཐོས་ཀྱི་ལམ་དུ་ཞུགས་པའི་ཉན་ཐོས་ཀྱི་སྦྱོར་ལམ་ཆོས་ཅན། དེར་ཐལ། མཚན་ཉིད་དེའི་ཕྱིར་ཏེ། ཐེག་ཆེན་གྱི་ཚོགས་ལམ་རྫོགས་རྗེས་སུ་བྱུང་བ་གང་ཞིག ཐེག་ཆེན་མཐོང་ལམ་མ་སྐྱེས་གོང་གི་མངོན་རྟོགས་ཡིན་པའི་ཕྱིར། དང་པོ་དེར་ཐལ། ཐེག་ཆེན་ཚོགས་ལམ་ཆེན་པོ་རྫོགས་རྗེས་སུ་བྱུང་བའི་སྦྱོར་ལམ་ཡིན་པའི་ཕྱིར་རོ། །གལ་ཏེ་མཚན་ཉིད་ལ་བྱང་སེམས་ཀྱི་མངོན་རྟོགས་ཞེས་སྦྱོར་ན། སྔར་གྱི་ཉན་ཐོས་དེ་ཐེག་ཆེན་ལམ་དུ་ཞུགས་པའི་ཐེག་ཆེན་གྱི་ཚོགས་ལམ་ཆེན་པོ་ཆོས་ཅན། དེར་ཐལ། མཚན་ཉིད་དེའི་ཕྱིར། རྟགས་སྒྲུབ་ཚུལ་སྔར་བཞིན་ཤེས་པར་བྱའོ། །གཉིས་པ་ལ། རྒྱུན་ཞུགས་ཀྱི་རྟོགས་པ་སྔོན་དུ་སོང་བའི་བྱང་སེམས་སྦྱོར་ལམ་པའི་རྒྱུད་ཀྱི་གང་ཟག་གི་བདག་མེད་མངོན་སུམ་རྟོགས་པའི་རྣལ་འབྱོར་མངོན་སུམ་ཆོས་ཅན། མཚན་ཉིད་ཀྱི་ཕྱིར་ཟུར་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རྣལ་འབྱོར་མངོན་སུམ་ཡིན་པའི་ཕྱིར་རོ། །གསུམ་པ་ལ། བྱང་སེམས་སྦྱོར་ལམ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། སྟོང་ཉིད་མ་རྟོགས་པའི་ཕྱིར། མ་གྲུབ་ན། དེ་ཆོས་ཅན། སྟོང་ཉིད་མངོན་སུམ་རྟོགས་པར་ཐལ། དེ་རྟོགས་པའི་མངོན་སུམ་ཡིན་པའི་ཕྱིར། བཞི་པ་ལ་དེ་ཆོས་ཅན། དེའི་མཚན་ཉིད་མིན་པར་ཐལ། དེ་ལ་ལྟོས་ཏེ་དོན་ལྡོག་གཞན་འགྱུར་ཡིན་པའི་ཕྱིར། རྟགས་ཁྱབ་ཁས་ཏེ། དམིགས་རྣམ་སོགས་ཁྱད་ཆོས་ལྔ་དང་ལྡན་པའི་ཐེག་ཆེན་གྱི་ངེས་འབྱེད་ཆ་མཐུན་དུ་ཡོད་པའི་མཚན་ཉིད་ཡིན་པའི་ཕྱིར། རྟགས་ཁྱབ་གཞན་ལུགས་འགོག་པ་ལ་ཡང་སོང་ངོ་། །གཞན་ཡང་། བྱང་སེམས་སྦྱོར་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་ན། མངོན་ཞེན་མེད་པའི་རྣམ་པ་ཅན་ཡིན་པར་ཐལ་ལོ། །ལྔ་པ་ལ། དེ་དེའི་མཚན་ཉིད་མིན་པར་ཐལ། ཐེག་དམན་གྱི་སྦྱོར་ལམ་ལ་ཡང་དམིགས་པ་དམིགས་ཚུལ་སོགས་ཁྱད་ཆོས་ལྔ་པོ་དེ་ཡོད་པའི་ཕྱིར། ཁྱབ་པ་ཁས་བླངས་ཤིང་མ་གྲུབ་ན། ཐེག་དམན་གྱི་སྦྱོར་ལམ་ལ་དམིགས་རྣམ་སོགས་ཁྱད་ཆོས་ལྔ་ཡོད་པའི་སྒྲུབ་བྱེད་ཇི་སྙེད་བཀོད་པའི་མཚུངས་པ་ཤེས་པར་བྱའོ། །ཡང་བྱང་སེམས་ཀྱི་སྦྱོར་ལམ་ཡིན་ན། མཉམ་གཞག་ཡིན་དགོས་པར་ཐལ། དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། གཉིས་པ་ནི། སོ་སོ་སྐྱེ་བོའི་རྒྱུད་ཀྱི་ཐར་ལམ་གང་ཞིག ཐར་པ་ཆ་མཐུན་གྱི་གནས་སྐབས་ལས་འདས་པའོ། །གཉིས་པ་དབྱེ་བ་ལ། ཐེག་པའི་སྒོ་ནས་དབྱེ་ན། ཉན་ཐོས་རང་རྒྱལ་ཐེག་ཆེན་གྱི་སྦྱོར་ལམ་གསུམ། དེ་རེ་རེ་ལ་ཡང་། ངོ་བོའི་སྒོ་ནས་དྲོད། རྩེ་མོ། བཟོད་པ། ཆོས་མཆོག་བཞི་བཞིའོ། །བསྟན་ཚུལ་གྱི་སྒོ་ནས་སྐབས་དང་པོ་ལྔ་ནས་བསྟན་པའི་སྦྱོར་ལམ་ལྔའོ། །དེ་རེ་རེ་ལ་ཡང་དངོས་བསྟན་བྱང་སེམས་ཀྱི་སྦྱོར་ལམ་དང་ཤུགས་བསྟན་ཐེག་དམན་གྱི་སྦྱོར་ལམ་གཉིས་གཉིས་སུ་ཡོད་དོ། །གསུམ་པ་དབྱེ་བ་སོ་སོའི་དོན་ལ། ཉན་ཐོས་རང་རྒྱལ་ཐེག་ཆེན་གྱི་སྦྱོར་ལམ་གསུམ་གྱི་མཚན་ཉིད་རིམ་བཞིན། ཉན་ཐོས་སོ་སྐྱེ་རང་རྒྱལ་གྱི་རིགས་ཅན་སོ་སྐྱེ་ཐེག་ཆེན་སོ་སྐྱེའི་རྒྱུད་ཀྱི་མངོན་རྟོགས་གང་ཞིག ཐར་པ་ཆ་མཐུན་གྱི་གནས་སྐབས་ལས་འདས་པའོ། །སྐབས་དང་པོ་ལྔ་ནས་བསྟན་པའི་ཐེག་ཆེན་གྱི་སྦྱོར་ལམ་ལྔའི་མཚན་ཉིད་རིམ་བཞིན། དམིགས་རྣམ་སོགས་ཁྱད་ཆོས་ལྔའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་འཕགས་པའི་མཉམ་གཞག་གིས་བསྡུས་པའི་ཐེག་ཆེན་ངེས་འབྱེད་ཆ་མཐུན་དང་། ཐེག་དམན་གྱི་རྟོགས་རིགས་རང་བཞིན་མེད་པར་བསྒོམ་པའི་མཉམ་གཞག་གིས་བསྡུས་པའི་ཐེག་ཆེན་ངེས་འབྱེད་ཆ་མཐུན་དང་། གཞི་ལམ་འབྲས་གསུམ་ལ་ཞེན་སྤྱོད་མངོན་འགྱུར་བ་བཀག་པར་བྱེད་པའི་ཐེག་ཆེན་ངེས་འབྱེད་ཆ་མཐུན་དང་། སེམས་ཅན་ལ་དམིགས་པའི་བསམ་སྦྱོར་དང་། ཕྱིར་མི་ལྡོག་པའི་རྟགས་གང་རུང་གིས་ཁྱད་པར་དུ་བྱས་པའི་ངེས་འབྱེད་ཆ་མཐུན་དང་། རྩེ་སྦྱོར་ཐོབ་པའི་རྟགས་ལ་སོགས་པ་བཞི་པོ་གང་རུང་གིས་མཚོན་ནས་བསྟན་པའི་ངེས་འབྱེད་ཆ་མཐུན་ནོ། །དེས་ན་ཐེག་ཆེན་གྱི་སྦྱོར་ལམ་དྲོད་རྩེ་མོ་སོགས་བཞི་པོ་ལ་སྐབས་སོ་སོ་ནས་བསྟན་པའི་མཚན་ཉིད་སོ་སོར་འཇོག་དགོས་ཏེ། རྣམ་མཁྱེན་དང་གཞི་ཤེས་ཀྱི་སྐབས་སུ་ཐེག་ཆེན་རང་གི་རྟོགས་རིགས་སྒོམ་པའི་སྒོ་ནས་བསྟན། ལམ་ཤེས་སྐབས་སུ་ཐེག་དམན་གྱི་རྟོག་རིགས་མི་དམིགས་པར་བསྒོམ་པའི་ལྡོག་པ་ནས་བསྟན། སྦྱོར་བ་དང་པོ་གཉིས་ཀྱི་སྐབས་སུ་གཙོ་བོར་རྗེས་ཐོབ་ཀྱི་སྒོ་ནས་བསྟན་པའི་ཕྱིར། འགྲེལ་ཆེན་ལས། གཟུང་བ་རང་བཞིན་མེད་པ་ལ་ཡེ་ཤེས་ཀྱི་གསལ་སྣང་ཅུང་ཟད་ཐོབ་པ་ལ་སོགས་པ་བཞིའི་སྒོ་ནས་དྲོད་སོགས་བཞིའི་ཁྱད་པར་འབྱེད་པ་ནི། མདོ་སྡེ་རྒྱན་དང་ཀུན་བཏུས་ཤེས་བྱེད་དུ་མཛད་པར་སྣང་མོད་ཀྱི་དེ་དག་ནི་སེམས་ཙམ་པའི་ལུགས་ཡིན་ནོ། །གསུམ་པ་བློ་རིགས་ལ་དཔྱད་པ་ནི། དགག་གཞག་གཉིས། དང་པོ་ལ་ཁ་ཅིག འདི་རྣལ་འབྱོར་མངོན་སུམ་ཡིན་ཏེ། ཡེ་ཤེས་ཀྱི་སྣང་བ་གསལ་བར་བཤད་པས་རྟོག་མེད་དང་། ཆོས་ཉིད་དོན་དམ་པ་སྣང་བས་མ་འཁྲུལ་པ་ཡིན་པའི་ཕྱིར་ཞེས་ཟེར་རོ། །འོ་ན་ཐེག་ཆེན་གྱི་སྦྱོར་ལམ་དེ་ཆོས་ཉིད་ལ་མོས་སྤྱོད་ཀྱི་ས་མིན་པར་ཐལ་བ་དང་། མཐོང་སྤངས་ཀྱི་ས་བོན་སྤོང་ནུས་པར་ཐལ་བ་དང་། ཐེག་ཆེན་གྱི་མཐོང་ལམ་དེས་ཆོས་ཉིད་མངོན་སུམ་མཐོང་ཟིན་གོམས་པར་བྱས་པར་ཐལ། ཐེག་ཆེན་གྱི་སྦྱོར་ལམ་དེས་ཆོས་ཉིད་མངོན་སུམ་དུ་མཐོང་བའི་ཕྱིར། ཁ་ཅིག དེ་སྒྲ་དོན་འདྲེས་འཛིན་གྱི་རྟོག་མེད་ཡིན་ཏེ། གསལ་སྣང་ཅན་དུ་བཤད་པའི་ཕྱིར། འོན་ཀྱང་རྣལ་འབྱོར་མངོན་སུམ་མ་ཡིན་ཏེ། གཟུང་འཛིན་གཉིས་སྣང་གི་རྟོག་བཅས་ཡིན་པའི་ཕྱིར་ཞེ་ན། དེ་ཆོས་ཅན། རྣལ་འབྱོར་མངོན་སུམ་དུ་ཐལ། ཆོས་ཉིད་སྒྲ་དོན་འདྲེས་འཛིན་གྱི་རྟོག་པ་དང་བྲལ་བའི་ཚུལ་གྱིས་རྟོགས་པའི་བློ་ཡིན་པའི་ཕྱིར། གཞན་ཡང་མངོན་སུམ་གྱི་བྲལ་བྱར་གྱུར་པའི་རྟོག་པ་དེ་གཟུང་འཛིན་གཉིས་སུ་སྣང་བ་ཙམ་གྱི་རྟོག་པ་ལ་འཇོག་རིགས་པར་ཐལ། གཟུང་འཛིན་གཉིས་སྣང་གི་རྟོག་བཅས་ཡིན་ན་རྣལ་འབྱོར་མངོན་སུམ་མིན་དགོས་པའི་ཕྱིར་རོ། །འདོད་ན། སོ་སོ་སྐྱེ་བོའི་མངོན་སུམ་ཆོས་ཅན། མངོན་སུམ་མ་ཡིན་པར་ཐལ། གཟུང་འཛིན་གཉིས་སྣང་གི་རྟོག་བཅས་ཡིན་པའི་ཕྱིར་ཏེ། ཆོས་ཅན་ཡིན་པའི་ཕྱིར། ཁ་ཅིག དེ་ཡིད་ཀྱི་མངོན་སུམ་དང་། ཁ་ཅིག རང་རིག་མངོན་སུམ་དང་། ཁ་ཅིག རྗེས་དཔག་ཏུ་འདོད་པ་དང་། ཁ་ཅིག་འཁྲུལ་ཤེས་སུ་འདོད་པ་དང་བཞི་ལས། དང་པོ་གཉིས་ནི། སྔར་བཀག་ཟིན་པ་ལས་ཤེས་ལ། གསུམ་པ་ཡང་མི་འཐད་དེ། རྟགས་ལ་བརྟེན་ནས་བསྒྲུབ་བྱ་དང་པོར་རྟོགས་པའི་བློ་རྗེས་དཔག་ཡིན་ལ། དེ་སྐད་ཅིག་གཉིས་པ་ཕན་ཆད་ནས་བཅད་ཤེས་ཡིན་པའི་ཕྱིར། བཞི་པ་ཡང་མི་འཐད་དེ། བྱང་སེམས་ཀྱི་སྦྱོར་ལམ་མཉམ་གཞག་ནི་མཐོང་ལམ་དང་དམིགས་རྣམ་རྗེས་སུ་མཐུན་པ་ཡིན་པའི་ཕྱིར། གཉིས་པ་ནི། ཐེག་ཆེན་རང་གི་རྟོགས་རིགས་སྒོམ་པའི་སྦྱོར་ལམ་མཉམ་གཞག་ནི་བཅད་ཤེས་ཡིན་ཏེ། གཅིག་དུ་བྲལ་ལ་སོགས་པའི་རྟགས་ལས་སྣང་བ་བདེན་མེད་དུ་རྟོགས་པའི་རིགས་རྒྱུན་སྒོམ་པར་བྱེད་པའི་བློ་ཡིན་ཅིང་། ཐེག་དམན་གྱི་རྟོགས་རིགས་སྒོམ་པར་བྱེད་པའི་བྱང་སེམས་ཀྱི་སྦྱོར་ལམ་དམན་ལམ་སྔོན་དུ་མ་སོང་བ་ནི་སྔར་དང་འདྲ་ལ། རྒྱུན་ཞུགས་སོགས་ཀྱི་རྟོག་པ་སྔོན་སོང་ནི། དེའི་རྟོགས་རིགས་ནམ་ཞིག་སྐྱེས་པའི་ཚེ་རྣལ་འབྱོར་མངོན་སུམ་དུ་སྐྱེའོ། །རྗེས་ཐོབ་ཀྱིས་བསྡུས་པ་ལ་མངོན་སུམ་ཡིན་པ་ཡང་ཡོད་དེ། དེ་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་སྦྱོར་ལམ་དུ་ཁས་ལེན་དགོས་པའི་ཕྱིར། འོན་ཀྱང་རྣལ་འབྱོར་མངོན་སུམ་མི་རུང་བར་ནི་གོང་དུ་བཤད་ཟིན་ཏོ། །གལ་ཏེ་རྟོག་པ་ཡིན་ན་རང་ཡུལ་གསལ་སྣང་ཅན་དུ་འགལ་ཏེ། རྣམ་འགྲེལ་ལས། རྣམ་པར་རྟོག་དང་རྗེས་འབྲེལ་ནི། །དོན་གསལ་སྣང་བ་ཅན་མ་ཡིན། །ཞེས་གསུངས་སོ་སྙམ་ན། བདག་མེད་གོམས་པ་ཤས་ཆེ་ཆུང་གི་ཁྱད་པར་ལས། བདག་མེད་གསལ་མི་གསལ་གྱི་ཁྱད་པར་མིན་པར་ཐལ། གོམས་པའི་དབང་གིས་རྟོག་པ་ལ་གསལ་སྣང་འབྱུང་བ་མེད་པའི་ཕྱིར། འདོད་ན། གོམས་པའི་དབང་གིས་འདོད་ཆགས་སོགས་གསལ་མི་གསལ་གྱི་ཁྱད་པར་མེད་པར་ཐལ་ལོ། །འདོད་ན། རྣམ་འགྲེལ་ལས། གོམས་པས་འདོད་ཆགས་སོགས་གསལ་བ། །ཞེས་པ་དང་འགལ་ལོ། །མདོར་ན་རྒྱུན་ཞུགས་སོགས་ཀྱི་རྟོག་པ་སྔོན་སོང་ལ་ནི། གང་ཟག་གི་བདག་མེད་མངོན་སུམ་དུ་རྟོགས་པའི་རྣལ་འབྱོར་མངོན་སུམ་དང་། གཞན་སེམས་ཤེས་པའི་མངོན་ཤེས་སུ་གྱུར་པའི་སྦྱོར་ལམ་ཡང་ཡོད་དོ། །འོན་ཀྱང་དེས་ཆོས་ཉིད་མ་རྟོགས་ལ། ཆོས་ཉིད་རྟོགས་པའི་སྦྱོར་ལམ་མཉམ་གཞག་དང་། རྗེས་ཐོབ་ལ་མངོན་སུམ་མིན་པའི་ཁྱབ་པ་ཡོད་དོ། །བཞི་པ་གྲངས་ངེས་ནི། ཐེག་ཆེན་གྱི་སྦྱོར་ལམ་མཉམ་གཞག་དེ་ལ་དྲོད་སོགས་བཞི་བཞིར་ངེས་པ་ཡིན་ཏེ། སྤང་བྱ་གཟུང་འཛིན་གྱི་རྣམ་པར་རྟོག་པ་དེ་ལ་བཞིར་ངེས་པའི་ཕྱིར་དང་། ཡུལ་གཟུང་བ་རང་བཞིན་མེད་པ་ལ་ངེས་པ་འདྲེན་ཚུལ་བཞིར་ངེས་པའི་ཕྱིར། ཡང་ཐེག་ཆེན་གྱི་སྦྱོར་ལམ་རྗེས་ཐོབ་དེ་ལ་ཡང་བཞིར་ངེས་ཏེ། སེམས་ཅན་ལ་དམིགས་པའི་བསམ་སྦྱོར་མི་འདྲ་བ་བཞིར་ངེས་པའི་ཕྱིར་དང་། ཕྱིར་མི་ལྡོག་པའི་རྟགས་ཐོབ་ཚུལ་བཞིར་ངེས་པའི་ཕྱིར་དང་། རྩེ་སྦྱོར་ཐོབ་ཚུལ་མི་འདྲ་བ་བཞིར་ངེས་པའི་ཕྱིར་རོ། །སེམས་མི་འགོད་པ་ཉིད་ལ་སོགས། །ཞེས་པའི་སྐབས་སུ། གཞུང་གི་བསྟན་ཚུལ་དང་། ངག་དོན་གཉིས། དང་པོ་ནི། འཕགས་པའི་ལུགས་ལ་ཚིགས་གི་རྐང་པ་དང་པོ་དང་། གསུམ་པ་གཉིས་ཀྱི་ནང་གི་ཡོངས་འཛིན་དང་། གཉིས་པ་དང་གསུམ་པ་གཉིས་ཀྱིས་ཕྱིའི་ཡོངས་འཛིན་དང་། བཞི་པས་ཐུན་མོང་གི་མིང་གི་ཐ་སྙད་བསྟན་པ་ཡིན་ནོ་ཞེས་བཞེད་དོ། །སློབ་དཔོན་གྱི་གཞུང་འདིས་ནི་ཕྱིའི་ཡོངས་འཛིན་ཁོ་ན་བསྟན་པ་ལས། ཚིག་རྐང་པ་དང་པོ་གསུམ་གྱིས་ཁྱད་པར་གྱི་ཆོས་གསུམ་བསྟན་པར་བཞེད་དོ། །གཉིས་པ་ལ་ཁ་ཅིག ཁྱད་པར་གསུམ་ལྡན་གྱི་མཆོག་གི་སྤྲུལ་སྐུ་ཆོས་ཅན། བྱང་སེམས་སྦྱོར་ལམ་པའི་ཡོངས་འཛིན་ཡིན་ཏེ། དེ་ལ་ཐེག་ཆེན་གྱི་ཆོས་བསྟན་པའི་སྒོ་ནས་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པར་བྱེད་པའི་དགེ་བའི་བཤེས་གཉེན་ཡིན་པའི་ཕྱིར་ཞེ་ན། དེའི་ཡོངས་འཛིན་ཡིན་ན་དེའི་ཕྱིའི་ཡོངས་འཛིན་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། དེའི་ཐབས་སྙིང་རྗེ་ཆེན་པོ་དེས་མ་ངེས་སོ། །རང་ལུགས་ལ། བྱང་སེམས་སྦྱོར་ལམ་པ་ཆོས་ཅན། ཐེག་དམན་སྦྱོར་ལམ་པ་ལས་ཡོངས་འཛིན་གྱི་སྒོ་ནས་ཁྱད་པར་འཕགས་པ་ཡིན་ཏེ། མཆོག་གི་སྤྲུལ་པའི་སྐུ་དང་རང་རྒྱུད་ཀྱི་ཐབས་མཁས་ཁྱད་པར་ཅན་གཉིས་ཀྱིས་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པའི་སྦྱོར་ལམ་པ་ཡིན་པའི་ཕྱིར་རོ། །གཞི་དང་དེ་ཡི་གཉེན་པོ་ཡི། །ཞེས་པའི་སྐབས་སུ། རྟོག་པ་སྤྱིའི་རྣམ་གཞག་དང་། དེ་ལས་འདིར་བསྟན་རྟོགས་པ་ངོས་གཟུང་བ། ངོས་ཟིན་པའི་རྟོག་པ་གཏན་ལ་དབབ་པའོ། །དང་པོ་ནི། མདོ་སྡེ་རྒྱན་ལས། ཡོད་པར་འཛིན་པའི་རྟོག་པ་དང་མེད་པར་འཛིན་པའི་རྟོག་པ་ལ་སོགས་པ་རྣམ་གཡེང་གི་རྣམ་རྟོག་བཅུ་བཤད་པ་དང་། ཀུན་བཏུས་ལས། རྩ་བའི་རྣམ་པར་རྟོག་པ་བཅུ་བཤད་པ་དང་། མཛོད་ལས། ངེས་པར་རྟོག་པའི་རྣམ་པར་རྟོག་པ་དང་། རྗེས་སུ་དྲན་པའི་རྣམ་པར་རྟོག་པ་གཉིས་བཤད་པ་ལས། འདིར་གཟུང་འཛིན་གྱི་རྣམ་པར་རྟོག་པ་བཞི་ལ་སོགས་པ་གསུང་རབ་ལས་རྟོག་པ་ཇི་སྙེད་གསུངས་པ་ཐམས་ཅད་ཡང་དག་པ་མ་ཡིན་པའི་ཀུན་རྟོག་ཏུ་འདུས་ཏེ། བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བའི་ཁམས་གསུམ་པའི་རྣམ་པ་ཅན་གྱི་སེམས་དང་སེམས་ལས་བྱུང་བས་བསྡུས་པའི་ཕྱིར། དེའི་མཚན་གཞི་སོ་སོ་སྐྱེ་བོའི་རྒྱུད་ཀྱི་ཤེས་པ་ཐམས་ཅད་དང་། ཐེག་དམན་སློབ་མི་སློབ་ཀྱི་རྒྱུད་ཀྱི་རྗེས་ཐོབ་ཤེས་པ་དང་། ཐེག་ཆེན་སློབ་པའི་རྗེས་ཐོབ་ཀྱི་ཤེས་པ་རྣམས་སོ། །དེ་ལ་དབྱེ་ན། གཟུང་འཛིན་གཉིས་སུ་སྣང་བ་ཙམ་གྱི་རྟོག་པ་དང་། སེམས་རྩིང་བའི་རྣམ་པ་ཅན་གྱི་རྟོག་པ་དང་། སྒྲ་དོན་འདྲེས་འཛིན་གྱི་རྟོག་པ་གསུམ་ལས། དང་པོ་ནི། མངོན་ཞེན་མེད་པར་གཟུང་འཛིན་གཉིས་སུ་སྣང་བ་ཙམ་སྟེ། སོ་སྐྱེའི་རྒྱུད་ཀྱི་རྟོག་མེད་ཤེས་པ་ཐམས་ཅད་དང་། ཐེག་ཆེན་སློབ་པ་དང་། ཐེག་དམན་སློབ་མི་སློབ་ཀྱི་རྒྱུད་ཀྱི་རྗེས་ཐོབ་ཀྱི་ཤེས་པ་ཐམས་ཅད་དོ། །གཉིས་པ་ནི། ཡུལ་ལ་རྩིང་པོར་འཚོལ་བའི་རྣམ་པར་ཅན་གྱི་སེམས་བྱུང་སྟེ། ཀུན་བཏུས་ལས། རྟོག་པ་གང་ཞེ་ན། སེམས་དཔའི་ཤེས་སྒྲིབ་ལ་བརྟེན་ནས་ཀུན་དུ་འཚོལ་བའི་ཡིད་ཀྱི་བརྗོད་པ་སྟེ། དེ་ནི་སེམས་རྩིང་བའི་རྣམ་པར་ཅན་ནོ། །ཞེས་སོ། །གསུམ་པ་ནི། མིང་ལ་བརྟེན་ནས་དོན་ལ་མངོན་པར་ཞེན་པའི་བློ་སྟེ། རྣམ་འགྲེལ་ལས། ཤེས་གང་གང་ལ་སྒྲ་དོན་འཛིན། །དེ་ནི་དེ་ལ་རྟོག་པ་ཡིན། །ཞེས་སོ། །དེ་ལྟར་གསུམ་ལས། དང་པོ་ནི། བྱང་སེམས་ལམ་གྱི་སྤང་བྱའི་གཙོ་བོ་མ་ཡིན་ཏེ། མངོན་པར་ཞེན་པ་མེད་པར་གཉིས་སུ་སྣང་བ་ཙམ་གྱི་ཉེས་པ་མི་སྐྱེད་པས་ཆེད་དུ་གཉེར་ནས་སྤོང་མི་དགོས་པའི་ཕྱིར་དང་། ཇི་སྲིད་གཉིས་སྣང་གི་བག་ཆགས་མ་སྤངས་པ་དེ་སྲིད་དུ་རང་གི་ངང་གིས་འབྱུང་བས་སྤོང་མི་ནུས་པའི་ཕྱིར་དང་། དེ་སྤངས་ན་རང་གི་ངང་གིས་ལྡོག་པས་ལོགས་སུ་སྤོང་མི་དགོས་པའི་ཕྱིར་དང་། མོས་བསྔོ་རྗེས་སུ་ཡི་རངས་གསུམ་པོ་དེ་དང་བཅས་པའི་ཕྱིར་རོ། །གཉིས་པ་ཡང་མིན་ཏེ། ཡང་དག་པའི་རྟོག་པ་དེ་ཡང་སེམས་རྩིང་བའི་རྣམ་པ་ཅན་དུ་དབྱིག་གཉེན་གྱིས་གསུངས་པའི་ཕྱིར། དེས་ན་བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་རྟོག་པ་དེ་རྟོག་པ་གསུམ་པ་ལ་འཇོག་སྟེ། མངོན་པར་ཞེན་པའི་བློ་དེ་ལ་གང་ཟག་གི་བདག་ཏུ་མངོན་པར་ཞེན་པའི་བློ་དང་། ཆོས་ཀྱི་བདག་ཏུ་མངོན་པར་ཞེན་པའི་བློ་དང་། བདག་གཉིས་ཀ་མེད་པར་མངོན་པར་ཞེན་པའི་བློ་དང་གསུམ་ཡོད་པ་ལས། དང་པོ་ཉན་རང་ལམ་གྱི་སྤང་བྱའི་གཙོ་བོ་དང་། གཉིས་པ་བྱང་སེམས་ལམ་གྱི་སྤང་བྱའི་གཙོ་བོ་དང་། ཐ་མ་སྤང་བྱ་མ་ཡིན་པའི་ཕྱིར་རོ། །རྟོག་པ་གསུམ་པ་དེ་ཡིན་ན་བྱང་སེམས་ལམ་གྱི་སྤང་བྱའི་གཙོ་བོ་ཡིན་པས་མ་ཁྱབ་སྟེ། བྱང་སེམས་ཀྱི་སྦྱོར་ལམ་མཉམ་གཞག་ཡེ་ཤེས་དང་། ཉོན་མོངས་མངོན་གྱུར་པ་རྣམས་ཀྱང་རྟོག་པ་གསུམ་པ་དེ་ཡིན་པའི་ཕྱིར། བྱང་སེམས་ལམ་གྱི་སྤང་བྱའི་གཙོ་བོ་དེ་ཡིན་ན་རྟོག་པ་གསུམ་པ་དེ་ཡིན་པས་མ་ཁྱབ་སྟེ། ཤེས་སྒྲིབ་ཀྱི་ས་བོན་དེ་ཡང་དེའི་སྤང་བྱའི་གཙོ་བོ་ཡིན་པའི་ཕྱིར། དེས་ན། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་རྟོག་པ་དེ་ཡིན་ན་སྒྲ་དོན་འདྲེས་འཛིན་གྱི་ཞེན་བློ་ཡིན་པས་ཁྱབ་སྟེ། དེ་ཡིན་ན་མངོན་ཞེན་ཅན་གྱི་བློ་ཡིན་པས་ཁྱབ་པའི་ཕྱིར། གསུམ་པ་ལ་ལྔ་སྟེ། ངོ་བོ། དབྱེ་བ། ཕྱེ་བ་སོ་སོའི་དོན། གྲངས་ངེས། ལྡན་ཚུལ་ལོ། །དང་པོ་ལ། སྒྲུབ་རྟོག་དང་དགག་རྟོག་གང་ཡིན་དཔྱད། ངོ་བོ་དང་སྤང་བྱ་གང་ལྡན་དཔྱད། རང་བཞིན་གཏན་ལ་དབབ་པ་དང་གསུམ་མོ། །དང་པོ་ལ། དགག་རྟོག་ཁོ་ནར་འདོད་པ་དགག དགག་རྟོག་དང་སྒྲུབ་རྟོག་གཉིས་ཀ་ཡོད་པར་འདོད་པ་དགག རང་ལུགས་དང་གསུམ་མོ། །དང་པོ་ལ། བུ་ན་རེ། འདིར་བསྟན་རྟོག་པ་ཡིན་ན་དགག་རྟོག་ཡིན་པས་ཁྱབ་སྟེ། སངས་རྒྱས་ཡེ་ཤེས་ཞབས་ཀྱིས་དགག་རྟོག་ཏུ་བཤད་པའི་ཕྱིར་དང་། སྒྲུབ་རྟོག་ཡིན་ན་ཐེག་ཆེན་སྦྱོར་ལམ་གྱི་ཁྱད་ཆོས་སུ་མི་རུང་བའི་ཕྱིར་ཞེས་ཟེར་རོ། །འོ་ན་ཐེག་ཆེན་སྦྱོར་ལམ་མཉམ་གཞག་ཡེ་ཤེས་དང་འདིར་བསྟན་རྟོག་པ་གཉིས་འཛིན་སྟངས་དངོས་སུ་འགལ་བ་མིན་པར་ཐལ། འཛིན་སྟངས་དེ་གཉིས་ཀ་དགག་པའི་རྣམ་པ་ཅན་ཡིན་པའི་ཕྱིར། འདོད་ན། དེ་གཉིས་སྤང་གཉིས་མིན་པར་ཐལ། འདོད་པ་དེའི་ཕྱིར། ཁྱབ་སྟེ། གཉིས་ཀ་འཛིན་སྟངས་ཅན་གྱི་ཤེས་པ་ཡིན་པའི་ཕྱིར། དེ་ལ་ཁོ་ན་རེ། རྒྱུན་མཐའི་ཡེ་ཤེས་དང་། གནས་ངན་ལེན་གྱི་དྲི་མ་གཉིས་སྤང་གཉེན་མིན་པར་ཐལ། དེ་གཉིས་འཛིན་སྟངས་མི་འགལ་བའི་ཕྱིར། ཁྱབ་པ་བསྒྲིག་ཟེར་ན་སྒྲ་མི་རྟག་པར་རྟོག་པའི་རྗེས་དཔག་དང་། སྒྲ་རྟག་འཛིན་གྱི་སྒྲོ་འདོགས་གཉིས་འཛིན་སྟངས་མི་འགལ་ན། དེ་གཉིས་གནོད་བྱ་གནོད་བྱེད་མིན་པས་མ་ཁྱབ་པར་ཐལ། ཚ་རེག་དང་གྲང་རེག་གཉིས་འཛིན་སྟངས་མི་འགལ་ན། དེ་གཉིས་གནོད་བྱ་གནོད་བྱེད་མིན་པས་མ་ཁྱབ་པའི་ཕྱིར། ཁྱབ་པ་ཁས། གཞན་ཡང་། ཐེག་ཆེན་སྦྱོར་ལམ་པའི་རྣམ་པའི་ཁྱད་ཆོས་དང་། རྟོག་པའི་ཁྱད་ཆོས་དོན་གཅིག་པར་ཐལ། འདིར་བསྟན་རྟོག་པ་དེ་དགག་པའི་རྣམ་པ་ཅན་གྱི་སྒོ་ནས་ཐེག་ཆེན་གྱི་སྦྱོར་ལམ་གྱི་ཁྱད་ཆོས་སུ་ལྡན་པའི་ཕྱིར་རོ། །གཉིས་པ་ནི། དར་ཊཱིཀ་པ་ན་རེ། འདིར་བསྟན་རྟོག་པ་ཡིན་ན་སྒྲུབ་རྟོག་ཡིན་པས་མ་ཁྱབ་སྟེ། གཟུང་འཛིན་བདེན་སྟོང་བདེན་པར་མངོན་པར་ཞེན་པའི་བློ་དེ་སྒྲུབ་རྟོག་མིན་པའི་ཕྱིར། གཟུང་བར་མངོན་པར་ཞེན་པ་དང་འཛིན་པར་མངོན་པར་ཞེན་པ་ཞེས་གསུངས་པ་ནི་མཚོན་བྱེད་ཡིན་གྱི། འཛིན་པ་ཐམས་ཅད་དེར་ངེས་པ་ནི་མ་ཡིན་ཏེ། ཐེག་དམན་གྱི་ལམ་འབྲས་བུ་དང་བཅས་པ་ལ་དམིགས་ནས་ལྡོག་བྱར་མངོན་པར་ཞེན་པའི་བློ་དེ་འདིར་བསྟན་རྟོག་པ་ཡིན་པའི་ཕྱིར་ཏེ། འདིར་མངོན་པར་བསྡུས་པ་ཙམ་ཡིན་པས་སྐབས་ལྔ་པར་བཤད་པའི་རྟོག་པ་དང་དོན་གཅིག་པའི་ཕྱིར། དེས་ན་འདིར་བསྟན་རྟོག་པ་ལ་དགག་རྟོག་དང་སྒྲུབ་རྟོག་གཉིས་སུ་ཡོད་དེ། ཕུང་པོ་ལ་བདེན་པར་མངོན་པར་ཞེན་པའི་བློ་དང་། དེའི་ཞེན་ཡུལ་བཀག་པའི་བཀག་པ་ལ་མངོན་པར་ཞེན་པའི་བློ་གཉིས་ཀ་ཡང་འདིར་བསྟན་རྟོག་པ་ཡིན་པའི་ཕྱིར། གཟུང་རྟོག་དང་འཛིན་རྟོག་གི་མཚན་ཉིད་རིམ་བཞིན། ལོངས་སྤྱད་བྱར་བདེན་པར་མངོན་པར་ཞེན་པའི་བློ་དང་། ལོངས་སྤྱོད་བྱེད་དུ་བདེན་པར་མངོན་པར་ཞེན་པའི་བློ་ཟེར་བ་མི་འཐད་དེ། གཟུང་འཛིན་གྱི་བདེན་སྟོང་བདེན་པར་མངོན་པར་ཞེན་པའི་བློ་ཆོས་ཅན། སྒྲུབ་རྟོག་ཏུ་ཐལ། འཛིན་སྟངས་སྒྲུབ་པའི་རྣམ་པ་ཅན་གྱི་རྟོག་པ་ཡིན་པའི་ཕྱིར་ཏེ། འཛིན་སྟངས་བདེན་པའི་རྣམ་པ་ཅན་གྱི་རྟོག་པ་ཡིན་པའི་ཕྱིར། གཞན་ཡང་དམིགས་ཡུལ་དགག་པ་ལ་དམིགས་པའི་རྟོག་པ་ཡིན་ན་དགག་རྟོག་ཡིན་དགོས་པར་ཐལ། དེ་དགག་རྟོག་ཡིན་པའི་ཕྱིར། འདོད་ན། བུམ་མེད་ཤེས་བྱར་མངོན་པར་ཞེན་པའི་བློ་ཆོས་ཅན། དེར་ཐལ། དེའི་ཕྱིར། འདོད་ན། བུམ་མེད་ཤེས་བྱ་ཡིན་པ་དགག་པར་ཐལ་ལོ། །ཐེག་དམན་གྱི་ལམ་འབྲས་བུ་དང་བཅས་པ་ལ་དམིགས་ནས་ལྡོག་བྱར་མངོན་པར་ཞེན་པའི་བློ་ཆོས་ཅན། མཚན་ཉིད་དེར་ཐལ། གཟུང་རྟོག་ཡིན་པའི་ཕྱིར། འདོད་ན། གཟུང་བར་མངོན་པར་ཞེན་པའི་བློ་ཡིན་པར་ཐལ། འདོད་པ་དེའི་ཕྱིར། ཁྱབ་པ་ཡང་ཁས་བླངས་ཏེ། གཟུང་འཛིན་གྱི་དོན་ལོངས་སྤྱད་བྱ་སྤྱོད་བྱེད་དུ་ཁས་བླངས་པའི་ཕྱིར། ཡང་དེ་ཆོས་ཅན། སྒྲུབ་རྟོག་ཏུ་ཐལ། ལོངས་སྤྱད་བྱར་མངོན་པར་ཞེན་པའི་བློ་ཡིན་པའི་ཕྱིར། གསལ་བ་ཁས། ཡང་ཕུང་པོ་ལ་བདེན་པར་ཞེན་པའི་བློ་དང་དེའི་ཞེན་ཡུལ་བཀག་པའི་བཀག་པ་ལ་བདེན་པར་མངོན་པར་ཞེན་པའི་བློ་གཉིས་ལ། སྒྲུབ་རྟོག་དང་དགག་རྟོག་གི་ཁྱད་པར་མི་འཐད་པར་ཐལ། དེ་གཉིས་ཀ་ཡང་སྒྲུབ་པའི་རྣམ་པ་ཅན་དུ་མཚུངས་པའི་ཕྱིར། ཡང་ཁ་ཅིག གཟུང་འཛིན་བདེན་སྟོང་དུ་མངོན་པར་ཞེན་པའི་བློ་ཆོས་ཅན། སྒྲུབ་རྟོག་ཏུ་ཐལ། འདིར་བསྟན་རྟོག་པ་ཡིན་པའི་ཕྱིར། མ་གྲུབ་ན། བྱང་སེམས་ལམ་གྱི་སྤང་བྱའི་གཙོ་བོ་མ་ཡིན་པར་ཐལ་ལོ་ཟེར་ན། ཤིན་ཏུ་འདོད་དེ། ཁྱོད་དང་བྱང་སེམས་སྦྱོར་ལམ་མཉམ་གཞག་གི་གཞི་མཐུན་ཡོད་པའི་ཕྱིར། གསུམ་པ་ནི། འདིར་བསྟན་རྟོག་པ་ཡིན་ན་སྒྲུབ་རྟོག་ཡིན་པས་ཁྱབ་སྟེ། འཛིན་སྟངས་དགག་པའི་རྣམ་པ་ཅན་གྱི་རྟོག་པ་ལ། ཀུན་རྫོབ་ཏུ་མེད་པར་འཛིན་པའི་རྣམ་པ་ཅན་དང་། དོན་དམ་པར་མེད་པར་འཛིན་པའི་རྣམ་པ་ཅན་གཉིས་ལས། དང་པོ་ནི། ལོག་ལྟ་ལྟ་བུ་ཡིན་པས་འདིར་བསྟན་རྟོག་པ་མ་ཡིན། གཉིས་པ་ནི། བྱང་སེམས་ལམ་གྱི་སྤང་བྱའི་གཙོ་བོ་མ་ཡིན་པའི་ཕྱིར། ཡང་དེ་ལ་ཁྱབ་སྟེ། གཟུང་རྟོག་དང་པོ་དེ་ཡིན་ན་ཡུལ་གཟུང་བ་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ་ཡིན་པས་ཁྱབ། གཉིས་པ་དེ་ཡིན་ན་ཡུལ་གཟུང་བ་ལ་དམིགས་ནས་བླང་བྱའི་གཟུང་བར་མངོན་པར་ཞེན་པའི་བློ་ཡིན་པས་ཁྱབ། རྫས་འཛིན་རྟོག་པ་ཡིན་ན་ཡུལ་རྫས་ཡོད་ལ་དམིགས་ནས་བདེན་པར་མངོན་པར་ཞེན་པའི་བློ་ཡིན་པས་ཁྱབ། བཏགས་འཛིན་རྟོག་པ་ཡིན་ན་ཡུལ་བཏགས་ཡོད་ལ་དམིགས་ནས་བཏགས་པའི་དངོས་པོར་མངོན་པར་ཞེན་པའི་བློ་ཡིན་པས་ཁྱབ་པའི་ཕྱིར་རོ། །རྩ་བར། གཟུང་བར་རྟོག་པ་རྣམ་པ་གཉིས། །ཞེས་དང་། འཛིན་པའང་རྣམ་པ་གཉིས་སུ་འདོད། །ཅེས་དང་། དེའི་འགྲེལ་བ་དང་འགྲེལ་ཆེན་གཉིས་ལས་ཀྱང་འཛིན་སྟངས་དེ་ལྟར་གསུངས་པའི་ཕྱིར་དང་། དམིགས་ཡུལ་གྱི་སྒོ་ནས་དགག་རྟོག་གི་ཁྱད་པར་མི་འབྱེད་པའི་ཕྱིར་རོ། །མདོར་ན། རྟོག་པ་དང་པོ་གསུམ་ལ་དགག་རྟོག་ཡོད་སྙམ་པའི་དོགས་པའི་གཞི་མེད་ཅིང་། བཏགས་འཛིན་རྟོག་པ་ལ་དེའི་དོགས་པ་ཡོད་ཀྱང་དཔྱད་ན་དགག་རྟོག་ཡོད་པ་མི་སྲིད་པའི་ཕྱིར་ཏེ། ཡུལ་དེ་ལ་བདེན་འཛིན་གྱི་སྒྲོ་འདོགས་མ་ཆོད་པར་ཡུལ་དེ་བཏགས་འཛིན་རྟོག་པ་མི་རུང་ཞིང་། སྒྲོ་འདོགས་ཆོད་ནས་གང་ཟག་བདེན་མེད་དུ་མངོན་པར་ཞེན་པ་དང་། ཆོས་ལ་བདེན་མེད་དུ་མངོན་པར་ཞེན་པ་གཉིས་ལས། དེ་གཉིས་སོ་སོ་སྐྱེ་བོའི་རྒྱུད་ལ་ཡོད་པ་ནི་ཐར་ལམ་གྱི་ངོ་བོ་ཡིན་པས་སྤང་བྱ་མིན་ལ། འཕགས་པའི་རྒྱུད་ལ་དེ་གཉིས་འབྱུང་མི་སྲིད་དེ། དེའི་རྒྱུད་ལ་འཛིན་སྟངས་དེ་གཉིས་ནམ་བྱུང་བའི་ཚེ་མངོན་སུམ་རྟོགས་པ་ཁོ་ན་ཡིན་པའི་ཕྱིར། འོ་ན་བཏགས་འཛིན་རྟོག་པའི་ཚུལ་ཇི་ལྟར་སྙམ་ན། བུམ་པ་ལྟ་བུ་གཅིག་ལ་ཐོག་མར་བདེན་འཛིན་གྱི་སྒྲོ་འདོགས་ཆོད་པའི་བློ་སྔོན་དུ་སོང་ནས་ད་ལྟར་བདེན་པར་ཡོད་མེད་ཀྱི་བློའི་འཛིན་སྟངས་གང་ཡང་མེད་པར་འདི་ནི་བུམ་པའོ་སྙམ་དུ་མངོན་པར་ཞེན་པའི་བློ་ཡིན་ལ། དེ་རྫས་འཛིན་རྟོག་པར་མི་སྲིད་དེ། བདེན་པར་འཛིན་པའི་འཛིན་པ་མེད་པའི་ཕྱིར། གནད་འདི་ཤེས་ན་བཏགས་འཛིན་རྟོག་པ་ལ་བཏགས་པའི་དངོས་པོར་མངོན་པར་ཞེན་པ་ཞེས་གསུངས་པའི་བཏགས་པ་དང་དངོས་པོ་གཉིས་ཆར་གྱི་ནུས་པ་ཐོན་ཞིང་། སྐབས་གསུམ་པ་ནས་བཤད་པའི་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་དང་། རྒྱུད་བླ་དང་། འཇུག་པ་ནས་བཤད་པའི་འཁོར་གསུམ་དུ་རྣམ་པར་རྟོག་པའི་བློ་རྣམས་འདི་དང་དོན་གཅིག་ཏུ་ཤེས་པར་འགྱུར་ལ། དེས་ན་ཉན་རང་གི་ཆོས་ཀྱི་བདག་མེད་རྟོགས་མ་རྟོགས་ཀྱི་དོན་ལ་ཡང་། བྱམས་པ་དང་ཀླུ་སྒྲུབ་དགོངས་པ་མི་མཐུན་པ་མེད་པའི་དོན་ཡང་རྟོགས་པར་འགྱུར་ཏེ། ཤེས་པར་འདོད་ན་འབད་པའི་སྒོ་ནས་རོང་སྟོན་ཆེན་པོ་དང་ཁོ་བོ་ཅག་ལ་དྲི་བར་བྱའོ། །གཉིས་པ་ལ་ཁ་ཅིག བྱང་སེམས་ཀྱི་སྦྱོར་ལམ་འདིར་བསྟན་རྟོག་པའི་ངོ་བོ་ཡིན་ཏེ། ཉི་ཁྲི་སྣང་བར་ངེས་པར་འབྱེད་པའི་ཆ་དང་མཐུན་པ་དང་པོ་དང་གཉིས་པ་དག་ནི་གོ་རིམ་བཞིན་དུ་གཟུང་བའི་རྣམ་པར་རྟོག་པ་གཉིས་སུ་འགྱུར་ལ། གསུམ་པ་དང་བཞི་པ་དག་ཀྱང་གོ་རིམ་བཞིན་དུ་འཛིན་པའི་རྣམ་པར་རྟོག་པ་གཉིས་ཡིན་ནོ་ཞེས་གསུངས་པས་སོ་ཞེ་ན། བྱང་སེམས་ཀྱི་སྦྱོར་ལམ་ཆོས་ཅན། འདི་བསྟན་རྟོག་པ་མིན་པར་ཐལ། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་མ་ཡིན་པའི་ཕྱིར། ཁ་ཅིག འདིར་བསྟན་རྟོག་པ་བཞི་པོ་བྱང་སེམས་ཀྱི་སྦྱོར་ལམ་བཞིའི་ངོ་བོ་ཡིན་ནོ་ཞེ་ན། དེ་ཆོས་ཅན། རྣམ་མཁྱེན་ཐོབ་པའི་གེགས་ཀྱི་གཙོ་བོ་མིན་པར་ཐལ་བ་དང་། ལམ་མ་ཞུགས་ཀྱི་སོ་སྐྱེ་དང་ཉན་རང་གི་རྒྱུད་ལ་ཁྱོད་མེད་པར་ཐལ། ཁྱོད་བྱང་སེམས་ཀྱི་སྦྱོར་ལམ་གྱི་ངོ་བོ་ཡིན་པའི་ཕྱིར། དེས་ན་རང་ལུགས་ལ། འདིར་བསྟན་རྟོག་པ་བཞི་བྱང་སེམས་ཀྱི་སྦྱོར་ལམ་ལ་སྤང་བྱར་ལྡན་པ་ཡིན་ཏེ། མངོན་གྱུར་པ་བཞི་པོ་བྱང་སེམས་ཀྱི་སྦྱོར་ལམ་རང་ཉིད་ཀྱི་སྤོང་ནུས་ཤིང་། ས་བོན་བཞི་པོ་སྦྱོར་ལམ་དེས་དྲངས་པའི་མཐོང་སྒོམ་ལམ་གྱིས་སྤོང་ནུས་པའི་ཕྱིར་ཏེ། ཉི་ཁྲི་རྣམ་འགྲེལ་དང་། འཕགས་པའི་དགོངས་པ་སློབ་དཔོན་གྱིས་སྤང་བྱར་ལྡན་པའི་དོན་དུ་བཤད་པའི་ཕྱིར། ཁོ་བོའི་རྟོག་པ་ལ་ནི། མདོའི་དངོས་བསྟན་ལ་རྟོག་པ་རྒྱས་བཤད་ཀྱི་གོ་རིམ་ལྟར་ཡོངས་འཛིན་གྱི་སྔར་གསུངས་ཀྱང་། མདོར་བསྟན་གྱི་སྐབས་སུ། དམིགས་པ་དང་རྣམ་པ་དང་རྒྱུ་དང་ཡོངས་འཛིན་བཞི་པོ་ལ། ཡིས་ཞེས་བྱེད་ཚིག་དང་བཅས་ཏེ་ཁྱད་ཆོས་སུ་གསུངས་ཤིང་། རྣམ་རྟོག་བཞི་པོ་ལྡན་བརྟེན་པ། །ཞེས་ཁྱད་གཞིའི་ཁོངས་སུ་གསུངས་པའི་དོན་ནི། ཁྱད་ཆོས་ལ་སྔར་གྱི་བཞི་པོ་དེར་གྲངས་ངེས་པས་རྟོག་པ་ཁྱད་ཆོས་མིན་ནོ་ཞེས་པའི་དོན་ཡིན་ལ། འོ་ན་རྟོག་པ་ཅིའི་ཕྱིར་སྟོན་སྙམ་ན། ཁྱད་ཆོས་བཞིའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་འཕགས་པར་བསྟན་པ་ལ། ཐེག་ཆེན་གྱི་མཐོང་ལམ་དང་སྒོམ་ལམ་དང་ཁྱད་པར་མེད་པར་འགྱུར་རོ་སྙམ་ན། ཁྱད་ཡོད་དེ། འདིར་བསྟན་རྟོག་པ་བཞི་པོ་དངོས་སུ་སྤོང་མི་ནུས་ཤིང་། རང་ཉིད་ཀྱང་རྣམ་པར་རྟོག་པའི་རང་བཞིན་ཡིན་པའི་ཕྱིར། ཞེས་པའི་དོན་ཏེ། ལྡན་བརྟེན་པ་ཞེས་པའི་ནུས་པ་ཐོན་ནོ། །འདི་ནི་རྒྱ་གར་གྱི་སྨ་ར་ཅན་དང་། བོད་ཀྱི་གདོང་དམར་བ་སུ་དང་ཡང་མི་མཐུན་ཡང་། དགའ་ལྡན་གྱི་ཁྲི་ཐོག་ན་བཞུགས་པའི་ལྷ་རྒན་པོ་གཅིག་དང་མཐུན་པས་དེས་མཆོག་སྙམ་མོ། །གསུམ་པ་རང་བཞིན་གཏན་ལ་དབབ་པ་ལ། གང་ལ་རྟོག་པའི་ཡུལ། གང་གིས་རྟོག་པའི་ངོ་བོ། ཇི་ལྟར་རྟོག་པའི་ཚུལ། དེ་ལྟར་རྟོག་པའི་མཚན་ཉིད། ཞར་བྱུང་ཐ་སྙད་བཤད་པ་དང་ལྔའོ། །དང་པོ་ནི། གཟུང་འཛིན་གཉིས་ཡིན། འདི་གཉིས་ཀྱི་ཁྱད་པར་ལོ་ཆེན་ན་རེ། སྐྱེ་མཆེད་ཀྱི་དབང་དུ་བྱས་ན་གཟུགས་སོགས་ཕྱིའི་སྐྱེ་མཆེད་གཟུང་བ། མིག་སོགས་ནང་གིས་སྐྱེ་མཆེད་འཛིན་པར་འདོད། ཡུལ་ཡུལ་ཅན་གྱི་དབང་དུ་བྱས་ན་བེམ་པོ་གཟུང་བ། ཤེས་པ་འཛིན་པར་འདོད། བདག་དང་བདག་གི་བའི་དབང་དུ་བྱས་ན་བདག་གི་བའི་ཡུལ་གཟུང་བ། བདག་འཛིན་པར་འདོད་ཅེས་གསུངས། འོན་ཀྱང་འདིར་བསྟན་གྱི་གཟུང་འཛིན་གཉིས་ནི། དང་པོའི་དབང་དུ་བྱས་པ་མ་ཡིན་ཏེ། རྣམ་པར་ཤེས་པ་ཡང་གཟུང་བར་བཤད་པའི་ཕྱིར། གཉིས་པའི་དབང་དུ་བྱས་པ་ཡང་མ་ཡིན་ཏེ། མ་རིག་པ་ཡང་གཟུང་བར་བཤད་པའི་ཕྱིར། གསུམ་པའི་དབང་དུ་བྱས་པ་ཡང་མིན་ཏེ། མཐོང་ལམ་སྒོམ་ལམ་མི་སློབ་ལམ་གསུམ་ཡང་འཛིན་པར་བཤད་པའི་ཕྱིར་རོ། །རང་ལུགས་ནི། འདིའི་གཟུང་འཛིན་ཡུལ་རང་ངོས་ནས་འཇོག་པ་མིན་ལ། ཡུལ་ཅན་གྱི་བློའི་འཛིན་ཚུལ་གྱི་སྒོ་ནས་འཇོག་སྟེ། ཆོས་གཅིག་ཉིད་ཀྱང་ཡུལ་ཅན་གྱི་བློས་ལོངས་སྤྱད་བྱར་གཟུང་བའི་ཚེ་གཟུང་བ་དང་། ལོངས་སྤྱོད་བྱེད་དུ་གཟུང་བའི་ཚེ་འཛིན་པར་འགྱུར་བ་ཡིན་ཏེ། མཐོང་སྒོམ་མི་སློབ་ལམ་གསུམ་པོ་དེ་གཟུང་རྟོག་གི་སྐབས་སུ་གཟུང་བ་དང་། འཛིན་རྟོག་གི་སྐབས་སུ་འཛིན་པར་བཤད་པའི་ཕྱིར། གནད་འདི་ཤེས་ན་ཊཱི་ཀ་ལས། འདིར་བསྟན་གཟུང་བ་ལ་ཉོན་མོངས་ཀྱི་ཕྱོགས་དང་རྣམ་བྱང་གི་ཕྱོགས་གཉིས། འཛིན་པ་ལ་ཆོས་དང་གང་ཟག་གཉིས། ཆོས་ནི་སེམས་སེམས་བྱུང་ཡིན་ལ། གང་ཟག་ནི་བྱམས་པས་ཕུང་པོ་ལ་རིལ་པོའི་བདག་ཏུ་གཟུང་བས་གང་ཟག་རྫས་ཡོད་དང་། འཕགས་པས་བཏགས་པ་ཙམ་དུ་གཟུང་བས་སྐྱེས་བུ་བཏགས་ཡོད་དོ་ཞེས་གསུངས་པའི་དོན་ཡང་རྟོགས་པར་འགྱུར་ཞིང་། གཞན་དུ་ན་འདིའི་གཟུང་འཛིན་གྱི་ཁྱད་པར་ལན་བརྒྱར་བཙལ་ཡང་ངལ་བ་ཁོ་ནའོ། །གཉིས་པ་ནི། གཟུང་རྟོག་དང་འཛིན་རྟོག་ཡོད་དེ། ལོངས་སྤྱད་བྱའི་ཕྱོགས་སུ་མངོན་པར་ཞེན་པའི་ཤེས་སྒྲིབ་དང་། ལོངས་སྤྱོད་བྱེད་ཀྱི་ཕྱོགས་སུ་མངོན་པར་ཞེན་པའི་ཤེས་སྒྲིབ་བོ། །དང་པོ་ལ་བླང་བྱའི་ཕྱོགས་སུ་མངོན་པར་ཞེན་པ་དང་། དོར་བྱའི་ཕྱོགས་སུ་མངོན་པར་ཞེན་པ་གཉིས། ཕྱི་མ་ལ་བདེན་འཛིན་ཡོད་པ་དང་མེད་པ་གཉིས་སོ། །གསུམ་པ་ལ། གཟུང་བ་ལ་དམིགས་པ་ཙམ་གྱིས་གཟུང་རྟོག་ཏུ་འགྱུར་བ་མ་ཡིན་ཏེ། དེ་ལ་དམིགས་ནས་ལོངས་སྤྱོད་བྱར་མངོན་པར་ཞེན་པའི་ཚེ་དེར་འགྱུར་བའི་ཕྱིར། འཛིན་པ་ལ་དམིགས་པ་ཙམ་གྱིས་འཛིན་རྟོག་ཏུ་མི་འགྱུར་ཏེ། དེ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་ཚེ་དེར་འགྱུར་བའི་ཕྱིར་རོ། །གཟུང་རྟོག་ཡིན་ན་འདི་ནི་གཟུང་བའོ་སྙམ་པའི་འཛིན་སྟངས་ཅན་ཡིན་པས་མ་ཁྱབ་སྟེ། བུམ་པ་ཤེས་བྱར་མངོན་པར་ཞེན་པའི་བློ་དེ་ལ། བུམ་པ་འདི་ནི་གཟུང་བའོ་སྙམ་པའི་འཛིན་སྟངས་མེད་པའི་ཕྱིར། འཛིན་རྟོག་ཡིན་ན་འདི་ནི་འཛིན་པའོ་སྙམ་པའི་འཛིན་སྟངས་ཅན་ཡིན་པས་མ་ཁྱབ་སྟེ། སྐྱེས་བུ་ལོངས་སྤྱོད་པ་པོར་མངོན་པར་ཞེན་པའི་བློ་དེ་ལ་སྐྱེས་བུ་འདི་ནི་ལོངས་སྤྱོད་པ་པོའོ་སྙམ་པའི་འཛིན་སྟངས་མེད་པའི་ཕྱིར། དེས་ན་རང་ལུགས་ནི། གང་ལ་རྟོག་པའི་ཡུལ་དེ་ཉིད་ཡུལ་ཡུལ་ཅན་གཉིས་སུ་ཕྱེ་བའི་ཚེ། ཡུལ་གྱི་ཕྱོགས་སུ་འཛིན་པའི་འཛིན་སྟངས་ཅན་ནི་གཟུང་རྟོག་གི་རྟོག་ཚུལ་ཏེ་རང་ཡུལ་དེ་ཉིད་གཟུང་བའོ་སྙམ་པ་དང་ལོངས་སྤྱད་བྱ་དང་ཡུལ་དང་ཤེས་བྱར་འཛིན་པ་ལ་སོགས་པ་རྣམས་སོ། །གང་ལ་རྟོག་པའི་ཡུལ་དེ་ཉིད་ཡུལ་ཡུལ་ཅན་གཉིས་སུ་ཕྱེ་བའི་ཚེ་ཡུལ་ཅན་གྱི་ཕྱོགས་སུ་འཛིན་པའི་འཛིན་སྟངས་ཅན་ནི་འཛིན་རྟོག་གི་རྟོག་ཚུལ་ཏེ། རང་ཡུལ་དེ་ཉིད་འཛིན་པ་དང་ལོངས་སྤྱོད་བྱེད་དང་ཡུལ་ཅན་དང་ཤེས་བྱེད་དུ་འཛིན་པ་ལ་སོགས་པ་རྣམས་སོ། །གཟུང་རྟོག་ལ་ཡང་གཉིས་ཏེ། དང་པོས་རང་ཡུལ་དེ་དོར་བྱའི་གཟུང་བར་འཛིན་ལ། གཉིས་པས་བླང་བྱའི་གཟུང་བར་འཛིན་པའི་ཕྱིར། འཛིན་རྟོག་ལ་ཡང་གཉིས་ལས། དང་པོས་རང་ཡུལ་དེ་ཉིད་ལོངས་སྤྱོད་པ་པོར་བདེན་པར་འཛིན་ལ། གཉིས་པས་རང་ཡུལ་དེ་ཉིད་བདེན་འཛིན་མེད་པར་ལོངས་སྤྱོད་པ་པོ་ཙམ་དུ་འཛིན་པ་སྟེ། མདོར་ན་བཞི་ཀ་ཡང་འཛིན་སྟངས་ཀྱི་སྒོ་ནས་ཕྱེ་བ་ནི་གནད་ཀྱི་དོན་ཏོ། །བཞི་པ་ལ་འདིར་བསྟན་རྟོག་པའི་མཚན་ཉིད། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག འཛིན་སྟངས་སྒྲུབ་པའི་རྣམ་པ་ཅན་གྱི་ཞེན་བློའོ། །ལྔ་པ་ལ། ཡུལ་གཟུང་བ་ལ་རྟོག་པས་ན་གཟུང་རྟོག་དང་། ཡུལ་འཛིན་པ་ལ་རྟོག་པས་ན་འཛིན་རྟོག་གོ་ཞེས་ཡུལ་གྱི་སྒོ་ནས་འཇོག་གམ། བློས་བཟུང་བར་རྟོག་པས་ན་གཟུང་རྟོག་དང་། བློས་འཛིན་པར་རྟོག་པས་ན་འཛིན་རྟོག་གོ །ཞེས་འཛིན་སྟངས་ཀྱི་སྒོ་ནས་འཇོག་ཅེ་ན། ཊཱི་ཀ་ལས། ཡུལ་གཟུང་བ་ལ་དམིགས་ནས་བློས་ཀྱང་དེར་རྟོག་པས་ན་གཟུང་རྟོག་དང་། ཡུལ་འཛིན་པ་ལ་དམིགས་ནས་བློས་ཀྱང་དེར་རྟོག་པས་ན་འཛིན་རྟོག་གོ་ཞེས་དམིགས་ཡུལ་དང་འཛིན་སྟངས་གཉིས་ཀའི་སྒོ་ནས་འཇོག་པར་གསུངས་པ་ནི། བརྟགས་ཤིང་དཔྱད་པ་ན་ཤིན་ཏུ་འཐད་དེ། གཙོ་བོར་འཛིན་སྟངས་ཀྱི་སྒོ་ནས་འཇོག་པ་ཡིན་ཡང་། འདིའི་གཟུང་འཛིན་གྱི་ཁྱད་པར་ཉིད་ཀྱང་། བློའི་འཛིན་ཚུལ་གྱི་སྒོ་ནས་ཡིན་པར་བསྟན་ཟིན་པའི་ཕྱིར་རོ། །དར་ཊཱིཀ་པ་ན་རེ། ལོངས་སྤྱད་བྱར་བདེན་པར་མངོན་པར་ཞེས་པས་ན་གཟུང་རྟོག་དང་། ལོངས་སྤྱོད་པ་པོར་བདེན་པར་མངོན་པར་ཞེན་པས་ན་འཛིན་རྟོག་ཅེས་འཇོག་པ་ནི་རུལ་ཏེ། བཏགས་འཛིན་རྟོག་པ་དེ་བདེན་འཛིན་གྱི་འཛིན་སྟངས་ཅན་མིན་པའི་ཕྱིར། སྐབས་ཀྱི་དོན་ནི་འདི་ཡིན་ཏེ། གཙོ་བོར་འཛིན་སྟངས་ཀྱི་སྒོ་ནས་གཟུང་རྟོག་དང་འཛིན་རྟོག་གི་ཁྱད་པར་གསུངས་ཤིང་། དང་པོ་ལ་བསྟན་བཅོས་རྩ་བར། གཞིའི་རྟེན་ཅན་དང་དེའི་གཉེན་པོའི་རྟེན་ཅན་ཞེས་དངོས་སུ་གསུངས་པའི་དོན་ལ། འཕགས་པས་དངོས་པོ་ཙམ་གྱི་རྟེན་ཅན་དང་། རྣམ་པར་སྣང་བའི་རྟེན་ཅན་གྱི་རྟོག་པ་ཞེས་དང་། སློབ་དཔོན་གྱིས་ཀུན་ནས་ཉོན་མོངས་གཟུང་རྟོག་དང་རྣམ་བྱང་གཟུང་རྟོག་ཅེས་པའི་ཐ་སྙད་མཛད་དོ། །སྐབས་ལྔ་པར་ནི། འཇུག་པ་གཟུང་རྟོག་དང་། ལྡོག་པ་གཟུང་རྟོག་གཉིས་སུ་གསུངས་ཤིང་། འདི་གཉིས་འབུམ་ཕྲག་གསུམ་པས་རྣམ་བྱང་གཟུང་རྟོག་གི་དབྱེ་བར་འདོད་པ་སྒྲུབ་བྱེད་དང་བཅས་པ་མི་འཐད་པའི་ཚུལ་ནི་སྐབས་ལྔ་པར་འཆད་དོ། །རྩ་བའི་དགོངས་པ་དེའི་གཉེན་པོ་ཞེས་པའི་ཚིག་གི་ནུས་པས་གཞི་དང་ཞེས་པ་མི་མཐུན་ཕྱོགས་སུ་བསྟན་ཞིང་། མི་མཐུན་ཕྱོགས་ལ་ཀུན་ནས་ཉོན་མོངས་ཀྱི་ཕྱོགས་དང་། ཐེག་དམན་གྱི་ལམ་འབྲས་བུ་དང་བཅས་པ་གཉིས་ལས། དང་པོ་ལ་སྦྱོར་བའི་ཚེ་དེའི་གཉེན་པོ་རྣམ་བྱང་ཙམ་ལ་སྦྱར་ན། སློབ་དཔོན་གྱི་ཐ་སྙད་ལྟར་འབྱུང་ལ། གཉིས་པ་ལ་སྦྱར་བའི་ཚེ་དེའི་གཉེན་པོ་ཐེག་ཆེན་གྱི་ལམ་འབྲས་བུ་དང་བཅས་པ་ལ་སྦྱར་ན། ལྡོག་པ་གཟུང་རྟོག་དང་འཇུག་པ་གཟུང་རྟོག་གི་ཐ་སྙད་འབྱུང་ངོ་། དེ་ན་ཀུན་ནས་ཉོན་མོངས་གཟུང་རྟོག་དང་ལྡོག་པ་གཟུང་རྟོག་གཉིས་ཀ་ཡང་འདིའི་གཟུང་རྟོག་དང་པོ་ཡིན་ཅིང་། འཇུག་པ་གཟུང་རྟོག་དང་རྣམ་བྱང་གཟུང་རྟོག་གཉིས་ཀ་ཡང་གཉིས་པར་ཤེས་པར་བྱ་སྟེ། ཐེག་དམན་གྱི་ལམ་ལ་མི་མཐུན་ཕྱོགས་དང་བྱང་སེམས་ཀྱི་ལམ་ལ་གཉེན་པོའི་ཐ་སྙད་བྱེད་པ་ལ་ནི་སྐབས་གསུམ་པ་དཔང་པོར་ཡོད་དོ། །སྒོམ་སྤང་རྟོག་པའི་སྐབས་སུ་ནི་སྦྱོར་བའི་ཡུལ་ཅན་གྱི་རྟོག་པ་དང་འཇུག་པའི་ཡུལ་ཅན་གྱི་རྟོག་པ་ཞེས་པའི་ཐ་སྙད་གསུངས་ཏེ། འཛིན་རྟོག་ལ་འདི་དང་མཐོང་སྤང་རྟོག་པ་གཉིས་ཀའི་སྐབས་སུ་རྫས་འཛིན་རྟོག་པ་དང་བཏགས་འཛིན་རྟོག་པའི་ཐ་སྙད་གསུངས་ལ། སྒོམ་སྤང་རྟོག་པའི་སྐབས་སུ་ནི། འཛིན་རྟོག་དང་པོ་དང་ཐ་མ་ཞེས་པ་ཙམ་མ་གཏོགས་རྫས་འཛིན་རྟོག་པ་དང་། བཏགས་འཛིན་རྟོག་པའི་ཐ་སྙད་མ་གསུངས་པའི་ཕྱིར། ཊཱི་ཀ་ལས། དེ་གཉིས་ཆར་ཡང་འདིའི་བཏགས་འཛིན་རྟོག་པའི་དབྱེ་བར་བཞེད་དོ། །གཉིས་པ་དབྱེ་བ་ལ། འཛིན་སྟངས་ཀྱི་སྒོ་ནས་དབྱེ་ན་གཟུང་རྟོག་དང་འཛིན་རྟོག་གཉིས། དེ་རེ་རེ་ལ་སྔར་ལྟར་གཉིས་གཉིས་ཏེ་བཞིའོ། །ཡུལ་གྱི་སྒོ་ནས་བཞི་པོ་རེ་རེ་ལ་ཡང་དགུ་དགུ་སྟེ་སོ་དྲུག་གོ །ཁམས་ཀྱི་སྒོ་ནས་དབྱེ་ན་ཁམས་གསུམ་རེ་རེ་ལ་ཡང་སོ་དྲུག་སོ་དྲུག་སྟེ་བརྒྱ་དང་བརྒྱད་དོ། །གཉེན་པོའི་སྒོ་ནས་དབྱེ་ན་མཐོང་སྤང་དང་སྒོམ་སྤང་རྟོག་པ་གཉིས། དེ་རེ་རེ་ལ་ཡང་དབྱེ་བ་སྔར་བཞིན་ནོ། །རྒྱུའི་སྒོ་ནས་དབྱེ་ན་ཀུན་བཏགས་དང་ལྷན་སྐྱེས་གཉིས་ཏེ་གོང་གི་དེ་གཉིས་དང་དོན་གཅིག་གོ །གསུམ་པ་ཕྱེ་བ་སོ་སོའི་དོན་ལ། སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས། དང་པོ་ལ་དགག་གཞག་གཉིས་ལས། དང་པོ་ལ་ཁ་ཅིག འདིར་བསྟན་རྟོག་པ་ནི་བདེན་འཛིན་རྟོག་པ་ཡིན་ལ། སྤྱིར་བདེན་འཛིན་ལ་གང་ཟག་དང་ཆོས་ལ་བདེན་པར་འཛིན་པ་གཉིས། དང་པོ་ནི། འདིར་བསྟན་རྟོག་པ་མིན་ནོ། །ཕྱི་མ་ལ་གཟུང་བ་ཕྱི་རོལ་དོན་ལ་བདེན་པར་འཛིན་པ་ལྟ་བུ་གཞི་མ་གྲུབ་པའི་ཆོས་ལ་བདེན་པར་འཛིན་པའི་བློ་དང་། གཞི་གྲུབ་པའི་ཆོས་ལ་བདེན་པར་འཛིན་པ་གཉིས་ལས། དང་པོ་འདིར་བསྟན་རྟོག་པ་མ་ཡིན་ཏེ། གཟུང་བ་ཆོས་ཀྱི་བདག་འཛིན་ཡིན་པའི་ཕྱིར། ཕྱི་མ་ལ་ལོངས་སྤྱད་བྱ་དང་། བཟའ་བྱར་བདེན་པར་འཛིན་པའི་བློ་གཟུང་རྟོག་དང་། ལོངས་སྤྱོད་བྱེད་དང་བཟའ་བ་པོར་བདེན་པར་འཛིན་པའི་བློ་འཛིན་རྟོག་ཡིན་ལ། འཛིན་རྟོག་ལ་ཡང་གདགས་གཞི་ཕུང་པོའི་སྟེང་དུ་དགག་བྱ་གཅིག་པུ་དང་རྒྱུ་དང་ལྟ་བ་པོ་ལ་སོགས་པའི་བདག་བཀག་པའི་བཀག་པ་ལ་བདེན་པར་མངོན་པར་འཛིན་པའི་བློ་ལྟ་བུ་རྫས་འཛིན་རྟོག་པ་དང་། བདག་བཏགས་པ་ཙམ་དུ་བདེན་པར་འཛིན་པའི་བློ་ལྟ་བུ་བཏགས་འཛིན་རྟོག་པ་ཡིན་ནོ། །འོ་ན་གང་ཟག་ལ་བདེན་པར་འཛིན་པའི་བློ་ཆོས་ཅན། འཛིན་རྟོག་མ་ཡིན་པར་ཐལ། འདིར་བསྟན་རྟོག་པ་མ་ཡིན་པའི་ཕྱིར། བསལ་བ་དངོས། རྟགས་ཁས། དེར་ཐལ། གང་ཟག་གི་བདེན་འཛིན་ཡིན་པས་ཉོན་སྒྲིབ་ཡིན་པའི་ཕྱིར། འཁོར་གསུམ། ཡང་རྫས་འཛིན་རྟོག་པ་ཆོས་ཅན། གདགས་གཞི་ཕུང་པོའི་སྟེང་དུ་དགག་བྱ་གཅིག་པུ་ལ་སོགས་པ་བཀག་པའི་བཀག་པ་ལ་བདེན་འཛིན་གྱི་བློ་མིན་པར་ཐལ། གང་ཟག་རྫས་ཡོད་འཛིན་པའི་གདགས་གཞི་བདེན་པར་འཛིན་པའི་འཛིན་སྟངས་ཡིན་པའི་ཕྱིར། རྟགས་གསལ་དངོས་སོ། །གང་ཟག་བཏགས་པ་བ་ཙམ་དུ་བདེན་པར་འཛིན་པའི་བློ་དེ་བཏགས་འཛིན་རྟོག་པ་ཡིན་ཞེས་པ་རང་ཚིག་དང་འགལ་ཏེ། གང་ཟག་བཏགས་པ་ཙམ་དུ་འཛིན་ན་དེ་བདེན་པར་འཛིན་པ་འགལ་བའི་ཕྱིར། འདི་ལྟ་བུའི་རྟུལ་གཏམ་ལ་རིགས་པ་ཞིབ་མོར་གྲགས་པ་ནི། ཀྱེ་མ་འཇིག་རྟེན་འདི་ན་འཁྲུལ་ལོ། །ཁ་ཅིག འདིར་བསྟན་གཟུང་རྟོག་དང་འཛིན་རྟོག་གི་མཚན་ཉིད་རིམ་བཞིན། དམིགས་ཡུལ་གཟུང་བ་ལ་དམིགས་ནས་དང་། དམིགས་ཡུལ་འཛིན་པ་ལ་དམིགས་ནས་འཛིན་སྟངས་དགག་སྒྲུབ་གང་རུང་གི་རྣམ་པ་ཅན་གྱི་ཞེན་བློ་ཞེས་དང་། ཀུན་ནས་ཉོན་མོངས་གཟུང་རྟོག་སོགས་བཞིའི་མཚན་ཉིད། ཀུན་ནས་ཉོན་མོངས་ཀྱི་གཟུང་བ་ལ་དམིགས་ནས་སོགས་རིགས་བསྒྲེའོ་ཟེར་རོ། །འོ་ན་གཟུང་བ་རང་བཞིན་མེད་པར་རྟོགས་པའི་སྦྱོར་ལམ་ཆོས་ཅན། འདིར་བསྟན་གཟུང་རྟོག་ཏུ་ཐལ། མཚན་ཉིད་དེའི་ཕྱིར་ཏེ། དམིགས་ཡུལ་གཟུང་བ་ལ་དམིགས་ནས་འཛིན་སྟངས་དགག་པའི་རྣམ་པ་ཅན་གྱི་ཞེན་བློ་ཡིན་པའི་ཕྱིར་ཏེ། དེ་ལ་དམིགས་ནས་རང་བཞིན་མེད་པར་རྟོགས་པའི་རྣམ་པ་ཅན་གྱི་ཞེན་བློ་ཡིན་པའི་ཕྱིར་རོ། །འཛིན་པ་རང་བཞིན་མེད་པར་རྟོགས་པའི་སྦྱོར་ལམ་ཆོས་ཅན། འཛིན་རྟོག་ཏུ་ཐལ། ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པར་རྟོག་པའི་སྦྱོར་ལམ་ལ་སོགས་པ་ཆོས་ཅན་དུ་གཟུང་ནས་མཚན་ཉིད་ཕྱི་མ་བཞི་ལ་རིགས་འགྲེའོ། །ཁ་ཅིག གཟུང་རྟོག་དང་འཛིན་རྟོག་གི་མཚན་ཉིད་རིམ་བཞིན། དམིགས་ཡུལ་གཟུང་བ་ལ་དམིགས་ནས་དང་དམིགས་ཡུལ་འཛིན་པ་ལ་དམིགས་ནས་འཛིན་སྟངས་སྒྲུབ་པའི་རྣམ་པར་ཅན་གྱི་ཞེན་བློ། ཀུན་ནས་ཉོན་མོངས་གཟུང་རྟོག་ལ་སོགས་པ་རིགས་བསྒྲེའོ་ཟེར་རོ། །མཐོང་ལམ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་ཆོས་ཅན། གཟུང་རྟོག་ཏུ་ཐལ། མཚན་ཉིད་དེའི་ཕྱིར་ཏེ། དམིགས་ཡུལ་གཟུང་བ་ལ་དམིགས་པ་གང་ཞིག ཕྱི་མ་དེའི་ཕྱིར། དང་པོ་དེར་ཐལ། མཐོང་ལམ་ལ་དམིགས་ནས་རྣམ་བྱང་གི་གཟུང་བར་མངོན་པར་ཞེན་པའི་བློ་དེས་དམིགས་ཡུལ་གཟུང་བ་ལ་དམིགས་པའི་ཕྱིར་ཏེ། མཐོང་ལམ་དེ་རྣམ་བྱང་གཟུང་རྟོག་གི་སྐབས་སུ་གཟུང་བར་བཤད་པའི་ཕྱིར་རོ། །ཡང་མཐོང་ལམ་ལ་དམིགས་ནས་རྣམ་བྱང་གི་གཟུང་བར་མངོན་པར་ཞེན་པའི་བློ་ཆོས་ཅན། འཛིན་རྟོག་ཏུ་ཐལ། མཚན་ཉིད་དེའི་ཕྱིར། རྟགས་སྒྲུབ་སྔ་མས་ཤེས་སོ། །གཉིས་པ་ནི། འདིར་བསྟན་རྟོག་པ་གཉིས་ཀྱི་མཚན་ཉིད་རིམ་བཞིན། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག གཟུང་བ་ལ་དམིགས་ནས་ཡུལ་དང་ཡུལ་ཅན་གཉིས་སུ་ཕྱེ་བའི་ཡུལ་གྱི་ཕྱོགས་ཀྱི་འཛིན་སྟངས་ཅན་དང་། དེ་གང་ཞིག འཛིན་པ་ལ་དམིགས་ནས་དེ་གཉིས་སུ་ཕྱེ་བའི་ཡུལ་ཅན་གྱི་ཕྱོགས་སུ་གཏོགས་པའི་འཛིན་སྟངས་ཅན་ནོ། །དང་པོ་ལ་གཞིའི་རྟེན་ཅན་གྱི་རྟོག་པ་དང་དེའི་གཉེན་པོའི་རྟེན་ཅན་གྱི་རྟོག་པ་གཉིས་ཀྱི་མཚན་ཉིད་རིམ་བཞིན། དེ་གང་ཞིག གཟུང་བ་ལ་དམིགས་ནས་བླང་དོར་གཉིས་སུ་ཕྱེ་བའི་དོར་བྱའི་ཕྱོགས་སུ་གཏོགས་པའི་འཛིན་སྟངས་ཅན་དང་། དེ་གང་ཞིག དེ་ལ་དམིགས་ནས་དེ་གཉིས་སུ་ཕྱེ་བའི་བླང་བྱའི་ཕྱོགས་སུ་གཏོགས་པའི་འཛིན་སྟངས་ཅན་ནོ། །དང་པོ་ལ། ཀུན་ནས་ཉོན་མོངས་གཟུང་རྟོག་དང་ལྡོག་པ་གཟུང་རྟོག་གཉིས། ཕྱི་མ་ལ་རྣམ་བྱང་གཟུང་རྟོག་དང་འཇུག་པ་གཟུང་རྟོག་གཉིས་ཡོད་དོ། །འཛིན་རྟོག་ལ་རྫས་འཛིན་རྟོག་པ་དང་བཏགས་འཛིན་རྟོག་པ་གཉིས་ཀྱི་མཚན་ཉིད་རིམ་བཞིན། དེ་གང་ཞིག གང་ཟག་རྫས་ཡོད་ལ་དམིགས་ནས་བདེན་པར་འཛིན་པའི་འཛིན་སྟངས་ཅན་དང་། དེ་གང་ཞིག སྐྱེས་བུ་བཏགས་ཡོད་ལ་དམིགས་ནས་བཏགས་པ་ཙམ་དུ་མངོན་པར་ཞེན་པའི་འཛིན་སྟངས་ཅན་ནོ། །གཉིས་པ་བྱེ་བྲག་ཏུ་བཤད་པ་ལ་གཟུང་རྟོགས་གཉིས་དང་། འཛིན་རྟོག་གཉིས་བྱེ་བྲག་ཏུ་བཤད་པ་གཉིས་ལས། དང་པོ་ནི། འགྲེལ་ཆེན་ལས། ཁ་ཅིག གཟུང་བའི་རྣམ་པར་རྟོག་པ་དང་པོ་ནི་གཞི་ཐམས་ཅད་པ་ཁོ་ན་ཡིན་ལ། གཉིས་པ་ནི་རྣམ་པར་བྱང་བ་ཁོ་ནའི་གཞི་ཅན་ཡིན་ཏེ། འདི་ནི་གཟུང་བའི་རྣམ་པར་རྟོག་པ་འདི་གཉིས་ཀྱི་ཁྱད་པར་རོ། །དེ་ལྟར་བྱས་ནས་བརྗོད་པ་ནི། རེ་ཞིག་གཟུང་བའི་རྣམ་པར་རྟོག་པ་དང་པོ་གང་ཡིན་པ་དེ་ནི་གཉིས་པ་ཡང་ཡིན་ཏེ། དཔེར་ན་གཟུང་བའི་རྣམ་པར་རྟོག་པ་གཞི་ཐམས་ཅད་པ་ཁོ་ན་བཞིན་ནོ། །གཉིས་པར་འགྱུར་གྱི་དང་པོ་མིན་པ་ནི། དཔེར་ན་རྣམ་པར་བྱང་བ་ཁོ་ནའི་རྟེན་ཅན་གྱི་གཟུང་བའི་རྣམ་པར་རྟོག་པ་གཉིས་པ་བཞིན་ནོ། །གཞན་དག་ན་རེ། ཀུན་ནས་ཉོན་མོངས་ཀྱི་གཞི་ལ་བརྟེན་པ་ནི་དང་པོ་ཡིན་ལ། རྣམ་པར་བྱང་བའི་གཞི་ལ་བརྟེན་པ་ནི་གཉིས་པ་ཡིན་པས་འདི་ནི་ཕན་ཚུན་རྣམ་པར་ཆད་པ་ཁོ་ན་ཡིན་པའི་ཕྱིར། འདི་ནི་ཐ་དད་པ་ཁོ་ན་ཡིན་ནོ་ཞེས་ལུགས་གཉིས་ལས། དང་པོ་ནི། འཕགས་གྲོལ་གྱི་བཞེད་པ་བཀོད་པ་ཡིན་ལ། ཕྱི་མ་ནི་སློབ་དཔོན་རང་གི་བཞེད་པའོ། །དེ་གཉིས་དོན་ལ་གང་གནས་སྙམ་ན། སེམས་རྣལ་དུ་མི་གནས་པ་ཁ་ཅིག་ན་རེ། འཕགས་པའི་དགོངས་པ་གཟུང་རྟོག་དང་པོ་ཡིན་ན་ཀུན་བྱང་ཐམས་ཅད་ལ་དམིགས་པས་ཁྱབ་པ་དང་། གཟུང་རྟོག་གཉིས་པ་ཡིན་ན་རྣམ་བྱང་ཙམ་ལ་དམིགས་པས་ཁྱབ་པ་དང་། ཡང་གཟུང་རྟོག་དང་པོ་ཡིན་ན་གཟུང་རྟོག་གཉིས་པ་ཡིན་པས་ཁྱབ་པ་དང་། དེ་གཉིས་པ་ཡིན་ན་དེ་དང་པོ་ཡིན་པས་ཁྱབ་པ་ལ་བསམས་ནས། ཀུན་བྱང་ཐམས་ཅད་ལ་དམིགས་པའི་གཟུང་རྟོག་དང་པོ་ཆོས་ཅན། ཀུན་བྱང་ཐམས་ཅད་ལ་དམིགས་པར་ཐལ། གཟུང་རྟོག་དང་པོ་ཡིན་པའི་ཕྱིར། འདོད་ན། མ་ཡིན་པར་ཐལ། གཟུང་རྟོག་གཉིས་པ་ཡིན་པའི་ཕྱིར། འཁོར་གསུམ། མ་གྲུབ་ན། དེར་ཐལ། གཟུང་རྟོག་དང་པོ་ཡིན་པའི་ཕྱིར། ཡང་འཁོར་གསུམ། འཕགས་པ་ཡིན་ཡང་ཤེས་སྒྲིབ་མ་སྤངས་པས་ལེན་ནོ་ཞེས་སྨྲ་ནུས་པ་ཡང་འདུག་གོ །འོ་ན་གཞི་དང་དེ་ཡི་གཉེན་པོ་ཡིས་ཞེས་པའི་གཞུང་དེས་ཀུན་ནས་ཉོན་མོངས་རྣམ་རྟོག་ཡིན་ན་མ་རིག་པ་ལ་སོགས་པའི་ཡུལ་དགུ་ཆར་ལ་དམིགས་པས་ཁྱབ་པ་དང་། རྣམ་བྱང་གཟུང་རྟོག་ཡིན་ན། ཕུང་པོ་ལ་སོགས་པའི་ཡུལ་དགུ་ཆར་དམིགས་པས་ཁྱབ་པར་བསྟན་པར་ཐལ། འཕགས་པའི་ལུགས་དེས་སྨྱོན་པ་ཁྱོད་འདོད་པ་ལྟར་བསྟན་པའི་ཕྱིར། འདོད་ན། མ་རིག་པ་ཁོ་ན་ལ་དམིགས་པའི་ཀུན་ནས་ཉོན་མོངས་གཟུང་རྟོག་ཆོས་ཅན། དེར་ཐལ། དེའི་ཕྱིར། མཁས་པར་རློམ་ཡང་སྙིང་ལ་གཞན་ཞིག་གཞུག་པས་ལེན་གདའོ། །དེས་ན་འཕགས་པའི་དགོངས་པ་ནི། སྤྱིར་གཟུང་རྟོག་དང་པོ་དེས་གཟུང་རྟོག་གཉིས་པ་དེའི་ཡུལ་ལ་དམིགས་པ་ཡང་ཡིན་ལ། གཉིས་པས་ནི་དང་པོའི་ཡུལ་ལ་དམིགས་པ་མ་ཡིན་ཞེས་པའི་དོན་ནོ། །ཡང་ཁ་ཅིག འཕགས་པའི་ལུགས་ལྟར་འཐད་དེ། དམིགས་པ་དང་བདག་ལ་སོགས་པ་དང་། རྣམ་པར་དག་པ་བསྐྱེད་པ་ལ་སོགས་པ་དམིགས་པ་ཕྱི་མ་གསུམ་པོ་ཀུན་ནས་ཉོན་མོངས་ཀྱི་ཆོས་མིན་ནོ་ཟེར་རོ། །ཡང་ཁ་ཅིག སློབ་དཔོན་གྱི་ལུགས་ལྟར་འཐད་པ་ཡིན་ཏེ། རྩ་བར། དེའི་གཉེན་པོ་ཞེས་པའི་ཤུགས་ལ་གཞི་དེ་ཀུན་ནས་ཉོན་མོངས་ཀྱི་ཆོས་སུ་བསྟན་པའི་ཕྱིར་ཞེས་ཟེར་རོ། །འོ་ན་དམིགས་པ་ཕྱི་མ་གསུམ་པོ་ཀུན་ནས་ཉོན་མོངས་ཀྱི་ཆོས་སུ་ཇི་ལྟར་འཐད་ཅེ་ན། ལོ་ཆེན་ན་རེ། ཕྱི་མ་གསུམ་པོ་དེ་སྡུག་བསྔལ་གྱི་ཁྱད་པར་གྱི་ཆོས་ཡིན་པས། ཀུན་ནས་ཉོན་མོངས་ཀྱི་ཆོས་སུ་འགྱུར་ཏེ། ཚོར་བའི་ཡུལ་དམིགས་པ་དང་། རྟེན་བདག་དང་། རང་བཞིན་རྣམ་དག་སྐྱེད་བྱེད་ཡིན་པས་ཟག་བཅས་ཀྱི་ཚོར་བ་གང་ཅི་རུང་བ་ཐམས་ཅད་སྡུག་བསྔལ་ལོ་ཞེས་གསུངས་སོ། །ཊཱི་ཀ་ལས། ཀུན་ནས་ཉོན་མོངས་ཀྱི་ཆོས་གཙོ་ཆེ་བའམ། ཡང་ན་རང་བཞིན་རྣམ་དག་སྐྱེད་བྱེད་ནི་དྲི་མ་དང་བཅས་པའི་རིགས་ཡིན་ལ། དེ་གློ་བུར་གྱི་དྲི་མ་དང་བཅས་པས་ཀུན་ནས་ཉོན་མོངས་ཀྱི་རིགས་ཡིན་ནོ་ཞེས་གསུངས་སོ། །གཉིས་པ་ལ་ཁ་ཅིག་ན་རེ། རྫས་སུ་མངོན་པར་ཞེན་པའི་སྒྲུབ་རྟོག་རྫས་འཛིན་ཡིན་ལ། དེ་ལ་དམིགས་ནས་འཛིན་པ་པོར་མངོན་པར་ཞེན་པའི་བློ་རྫས་འཛིན་རྟོག་པ་དང་། བཏགས་པ་ཙམ་དུ་མངོན་པར་ཞེན་པའི་བློ་བཏགས་འཛིན་ཡིན་ལ། དེ་ལ་དམིགས་ནས་འཛིན་པ་པོར་མངོན་པར་ཞེན་པའི་བློ་བཏགས་འཛིན་རྟོག་པ་ཡིན་ཟེར་རོ། །རྫས་འཛིན་རྟོག་པའི་ཡུལ་ཡིན་ན་རྫས་སུ་མངོན་པར་ཞེན་པའི་སྒྲུབ་རྟོག་ཡིན་པས་ཁྱབ་པ་དང་། བཏགས་འཛིན་རྟོག་པའི་ཡུལ་ཡིན་ན་བཏགས་པ་ཙམ་དུ་མངོན་པར་ཞེན་པའི་སྒྲུབ་རྟོག་ཡིན་པས་ཁྱབ་པར་ཐལ། དམ་བཅའ་དེའི་ཕྱིར། འདོད་ན། བདག་རང་དབང་ཅན་ཆོས་ཅན། དང་པོ་དེར་ཐལ། དེའི་ཕྱིར། མཐོང་ལམ་དང་སྒོམ་ལམ་ཆོས་ཅན། ཕྱི་མ་དེར་ཐལ། དེའི་ཕྱིར། གལ་ཏེ་རྟོག་པ་འཕར་མ་བྱེད་དགོས་ཏེ། གཞན་དུ་ན་རྫས་འཛིན་རྟོག་པ་དང་། བཏགས་འཛིན་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པར་ཐལ། རྫས་འཛིན་དང་རྫས་འཛིན་རྟོག་པ་ལ་ཁྱད་པར་མེད་པ་གང་ཞིག སོ་སོ་སྐྱེ་བོ་འཕགས་དབྱེ་བས་ཞེས་པའི་གཞུང་དེས་རྫས་འཛིན་དང་བཏགས་འཛིན་གཉིས་སྐྱེ་འཕགས་གཉིས་ལ་སོ་སོར་ངེས་པར་བསྟན་པའི་ཕྱིར་ཞེས་ཟེར་ཀྱང་། གཞུང་འདིའི་དོན་དཔྱིས་ཕྱིན་པར་སྐབས་ལྔ་པར་འཆད་དོ། །རང་ལུགས་རྟོག་པ་འཕར་མ་བྱེད་པ་ནི་གཞུང་གི་དགོངས་པ་མིན་ཏེ། རྫས་འཛིན་དང་རྟོག་པའི་གཞི་མཐུན་ཡིན་པས་རྫས་འཛིན་རྟོག་པར་འཇོག་གི རྫས་འཛིན་ཡུལ་དུ་བྱས་ནས་དེ་ལ་རྟོག་པའི་རྟོག་པ་ཡིན་པས་རྫས་འཛིན་རྟོག་པར་མི་འཇོག་པའི་ཕྱིར་དང་། དེས་བཏགས་འཛིན་རྟོག་པ་ལ་ཡང་འགྲེ། གཞན་དུ་ན་རྟོག་པ་འཕར་མ་འཐད་ན། རྟོག་པ་འདི་དག་གི་ཡུལ་ཡིན་ན་རྟོག་པ་ཡིན་དགོས་པར་ཐལ་ལོ། །འདོད་ན། ཤེས་སྒྲིབ་རྟོག་པའི་ཡུལ་ཡིན་ན་རྟོག་པ་ཡིན་དགོས་པས་ཧ་ཅང་ཐལ་ལོ། །བཞི་པ་གྲངས་ངེས་ལ། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་རྟོག་པ་དེ་ལ་ཡུལ་དུ་བདེན་པར་ཞེན་པའི་བློ་དང་། ཡུལ་ཅན་དུ་དེར་ཞེན་པའི་བློ་དང་། ཡུལ་དུ་བཏགས་པ་ཙམ་དུ་མངོན་པར་ཞེན་པའི་བློ་དང་། ཡུལ་ཅན་དུ་དེར་ཞེན་པའི་བློ་གཉིས་ཏེ་བཞི་ཡོད་པ་ལས། དང་པོ་ལ་དོར་བྱའི་ཕྱོགས་སུ་མངོན་པར་ཞེན་པའི་བློ་དང་བླང་བྱའི་ཕྱོགས་སུ་མངོན་པར་ཞེན་པའི་བློ་གཉིས། གཉིས་པ་ལ་ཡང་དེ་ལྟར་གཉིས། གསུམ་པ་དང་བཞི་པ་ལ་ཡང་དེ་ལྟར་གཉིས་གཉིས་ཏེ་བརྒྱད་དུ་འདུས་སོ། །དང་པོ་ནི། བདེན་འཛིན་གྱི་དབང་དུ་བྱས་པའི་གཟུང་རྟོག་གཉིས་སུ་འདུས། གཉིས་པ་གཉིས་རྫས་འཛིན་རྟོག་པར་འདུས། གསུམ་པ་གཉིས་བདེན་འཛིན་མིན་པའི་གཟུང་རྟོག་གཉིས་སུ་འདུས། བཞི་པ་གཉིས་ནི་བཏགས་འཛིན་རྟོག་པར་འདུས་སོ། །དེས་ན་གཟུང་རྟོག་ལ་བདེན་འཛིན་ཡིན་པ་དང་མིན་པ་གཉིས་སུ་ཡོད་དེ། ཡུལ་དུ་བདེན་པར་མངོན་པར་ཞེན་པའི་བློ་དང་བཏགས་པ་ཙམ་དུ་མངོན་པར་ཞེན་པའི་བློ་གཉིས་སུ་ཡོད་པའི་ཕྱིར། འཛིན་རྟོག་ལ་ཡང་དོར་བྱའི་ཕྱོགས་སུ་འཛིན་པ་དང་བླང་བྱའི་ཕྱོགས་སུ་འཛིན་པ་གཉིས་སུ་ཡོད་དེ། དོར་བྱ་དང་བླང་བྱ་གཉིས་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་གཉིས་སུ་ཡོད་པའི་ཕྱིར། དེས་ན་གཟུང་རྟོག་གཉིས་བདེན་འཛིན་གྱི་འཛིན་སྟངས་ཡོད་མེད་ཀྱི་སྒོ་ནས་མ་ཕྱེ་བར་དོར་བྱ་དང་བླང་བྱར་འཛིན་པའི་སྒོ་ནས་ཕྱེ་བ་ལ་དགོས་པ་ཡོད་དེ། འཛིན་རྟོག་གཉིས་ལ་ཡང་དོར་བྱ་དང་བླང་བྱར་འཛིན་པ་གཉིས་གཉིས་ཡོད་དོ་ཞེས་ཤེས་པའི་ཆེད་ཡིན་པའི་ཕྱིར། འཛིན་རྟོག་གཉིས་དོར་བླང་དུ་འཛིན་པའི་སྒོ་ནས་མ་ཕྱེ་བར་བདེན་འཛིན་ཡོད་མེད་ཀྱི་སྒོ་ནས་ཕྱེ་བ་ལ་དགོས་པ་ཡོད་དེ། གཟུང་རྟོག་གཉིས་པོ་རེ་རེ་ལ་ཡང་བདེན་པར་འཛིན་པའི་འཛིན་སྟངས་ཅན་ཡིན་མིན་གཉིས་གཉིས་སུ་ཡོད་དོ་ཞེས་ཤེས་པའི་ཆེད་ཡོད་པའི་ཕྱིར། ལྔ་པ་ལྡན་ཚུལ་ལ། སོ་སྐྱེ་ལ་ལྡན་ཚུལ་དང་། ཐེག་ཆེན་འཕགས་པ་ལ་ལྡན་ཚུལ་དང་། ཐེག་དམན་འཕགས་པ་ལ་ལྡན་ཚུལ་གསུམ་ལས། དང་པོ་ནི། སོ་སྐྱེ་ལ་མངོན་གྱུར་དུ་ལྡན་ཏེ་ས་བོན་རྒྱུད་ལ་ཡོད་པས་རྐྱེན་དང་ཕྲད་པའི་ཚེ་མངོན་གྱུར་དུ་འབྱུང་སྲིད་པའི་ཕྱིར། བྱང་སེམས་ཀྱི་སྦྱོར་ལམ་མཉམ་གཞག་གི་གནས་སྐབས་ན་མངོན་གྱུར་དུ་མེད་དེ་འགལ་ཟླ་རང་བཞིན་མེད་པར་རྟོགས་པའི་ཤེས་རབ་སྐྱེས་པའི་ཕྱིར། ཁ་ཅིག དེའི་གནས་སྐབས་ན་འདིར་བསྟན་རྟོག་པའི་ས་བོན་ཡང་མེད་པར་ཐལ། དེ་གཉིས་འཛིན་སྟངས་དངོས་སུ་འགལ་བའི་ཕྱིར་ཞེས་ཟེར་ན། མ་གྲུབ་སྟེ། ས་བོན་དེས་དམིགས་རྣམ་མི་འཛིན་པའི་ཕྱིར། གཞན་ཡང་། རྟོག་དཔྱོད་རྗེས་ཐོབ་ཀྱི་སྐབས་ན་འདིར་བསྟན་རྟོག་པ་མེད་པར་ཐལ། དེའི་མཉམ་གཞག་གི་སྐབས་ན་ས་བོན་མེད་པའི་ཕྱིར། རྟགས་ཁས། ཡང་འདིར་བསྟན་རྟོག་པ་མངོན་གྱུར་པའི་གཉེན་པོ་དང་། དེའི་ས་བོན་གྱི་གཉེན་པོ་ལ་ཁྱད་པར་མེད་པར་ཐལ། དེའི་མཉམ་གཞག་གི་སྐབས་ན་དེའི་ས་བོན་མེད་པའི་ཕྱིར། མདོར་ན་བདག་མེད་མ་རྟོགས་པའི་སོ་སྐྱེ་རྣམས་ལ་རྫས་འཛིན་རྟོག་པ་དང་། གང་ཟག་གི་བདག་མེད་རྟོགས་པའི་སོ་སོ་སྐྱེ་བོ་རྣམས་ལ་གང་ཟག་གི་དབང་དུ་བྱས་པའི་མོས་པ་ཡིད་བྱེད་ཀྱི་བཏགས་འཛིན་རྟོག་པ་ལྡན་ནོ། །ཆོས་ཀྱི་བདག་མེད་རྟོགས་པའི་སོ་སྐྱེ་རྣམས་ལ་ཆོས་ཀྱི་དབང་དུ་བྱས་པའི་མོས་པ་ཡིད་བྱེད་ཀྱི་བཏགས་འཛིན་རྟོག་པ་ལྡན་ཞིང་། གཟུང་རྟོག་གཉིས་པོ་ཐུན་མོང་དུ་ལྡན་ནོ། །གཉིས་པ་ནི། མཐོང་སྤང་རྟོག་པ་བཞི་པོ་ནི་དེའི་རྒྱུད་ལ་མངོན་གྱུར་དུ་མི་ལྡན་ཏེ། ཐེག་ཆེན་གྱི་མཐོང་ལམ་རྒྱུད་ལ་སྐྱེས་པའི་ཕྱིར། ཐེག་ཆེན་མཐོང་ལམ་བར་ཆད་མེད་ལམ་གྱི་སྐབས་ན་དེའི་ས་བོན་ལྡན་ཏེ། བར་ཆད་མེད་ལམ་དང་དེའི་ངོས་སྐལ་གྱི་ས་བོན་གཉིས། གང་ཟག་གཅིག་གི་རྒྱུད་ལ་ཅིག་ཅར་དུ་འབྱུང་བའི་ཕྱིར། སྒོམ་སྤང་རྟོག་པ་ལ་རྫས་འཛིན་རྟོག་པ་ཡོད་ན་དེ་ཐེག་ཆེན་འཕགས་པ་ལ་མི་ལྡན་ཅིང་། འདིའི་འཛིན་རྟོག་བཏགས་འཛིན་རྟོག་པའི་དབྱེ་བར་བཞེད་པ་ལྟར་ན་བཞི་ཀ་ཡང་ལྡན་ནོ། །དེ་ཡང་མ་དག་ས་བདུན་གྱི་སྐབས་སུ་མངོན་གྱུར་དུ་འབྱུང་ཞིང་། དེའི་ཚེ་ལམ་གྱི་དངོས་པོའི་རྒྱུན་དང་མི་ལྡན་པ་ལ་ཡིན་ལ། དག་ས་ལ་ནི་སྒོམ་སྤང་རྟོག་པ་བཞི་པོ་གང་ཡང་མངོན་གྱུར་དུ་མེད་དེ། ལམ་གྱི་དངོས་པོའི་རྒྱུན་དང་ལྡན་པའི་ཕྱིར་ཏེ། རྟོག་པ་འདི་དག་ནི་སྒྲ་དོན་འདྲེས་འཛིན་གྱི་རྟོག་པ་ཁོ་ན་ཡིན་པའི་ཕྱིར། ཟག་བཅས་སྒོམ་ལམ་གྱི་སྐབས་སུ་གཟུང་འཛིན་གཉིས་སུ་སྣང་བའི་ཤེས་སྒྲིབ་ཀྱི་རྣམ་རྟོག་ཅེས་བཤད་པ་ནི་འདིར་བསྟན་རྟོག་པ་མིན་ཏེ། གཟུང་འཛིན་གཉིས་སུ་སྣང་བ་ཙམ་ཡིན་གྱི་མངོན་ཞེན་མེད་པའི་ཕྱིར། གནད་འདི་ནི་སྐབས་གཉིས་པར་རྒྱས་པར་འབྱུང་ངོ་། །གསུམ་པ་ཐེག་དམན་འཕགས་པ་ལ་གཟུང་འཛིན་གྱི་རྣམ་པར་རྟོག་པ་བཞི་ཀ་ཡང་མངོན་གྱུར་དུ་ལྡན་ཏེ། དོར་བྱའི་གཟུང་བ་ལ་དམིགས་ནས་གཟུང་བར་མངོན་པར་ཞེན་པའི་བློ་དང་། བླང་བྱའི་གཟུང་བ་ལ་དམིགས་ནས་མངོན་པར་ཞེན་པའི་བློ་གཉིས་ལྡན་པའི་ཕྱིར་དང་། གང་ཟག་གི་དབང་དུ་བྱས་པའི་བཏགས་འཛིན་རྟོག་པ་དང་། ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་གཉིས་ཀ་ལྡན་པའི་ཕྱིར། གང་ཟག་གི་དབང་དུ་བྱས་པའི་རྫས་འཛིན་རྟོག་པ་མི་ལྡན་ཏེ། གང་ཟག་བདག་མེད་དུ་མངོན་སུམ་རྟོགས་པའི་ཕྱིར། ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་མི་ལྡན་ཏེ། ཆོས་ཀྱི་བདག་མེད་མ་རྟོགས་པའི་ཕྱིར། དེ་དག་ཀྱང་རྗེས་ཐོབ་ཀྱི་དབང་དུ་བྱས་པ་ཡིན་གྱི་བདག་མེད་མངོན་སུམ་རྟོགས་པའི་མཉམ་གཞག་གི་སྐབས་ན་རྟོག་པ་གང་ཡང་མི་ལྡན་ཏེ། དེ་ན་སྒྲ་དོན་འདྲེས་འཛིན་གྱི་རྟོག་པ་མེད་པའི་ཕྱིར། མདོར་ན་གཟུང་རྟོག་གཉིས་ལ་བདེན་འཛིན་གྱི་དབང་དུ་བྱས་པའི་གཟུང་རྟོག་གཉིས་དང་། དེ་མ་ཡིན་པའི་དབང་དུ་བྱས་པའི་གཟུང་རྟོག་གཉིས་ཏེ་བཞི། རྫས་འཛིན་རྟོག་པ་ལ་གང་ཟག་དང་ཆོས་ཀྱི་དབང་དུ་བྱས་པའི་གཉིས། བཏགས་འཛིན་རྟོག་པ་ལ་གང་ཟག་དང་ཆོས་ཀྱི་དབང་དུ་བྱས་པ་གཉིས། དེ་རེ་རེ་ལ་ཡང་མོས་པ་ཡིད་བྱེད་དང་དེ་ཁོ་ན་ཉིད་ཡིད་བྱེད་གཉིས་གཉིས་ལས་བཅུ་སྟེ། སོ་སོ་སྐྱེ་བོ་ལ་གང་ཟག་དང་ཆོས་ཀྱི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་མ་གཏོགས་གཞན་བརྒྱད་ལྡན་ནོ། །ཐེག་ཆེན་འཕགས་པ་ལ་བདེན་འཛིན་མ་ཡིན་པའི་དབང་དུ་བྱས་པའི་གཟུང་རྟོག་གཉིས་དང་། ཆོས་དང་གང་ཟག་གི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་གཉིས་ཏེ་བཞི་ལྡན་གྱི་གཞན་དྲུག་མི་ལྡན་ནོ། །ཐེག་དམན་འཕགས་པ་ལ་བདེན་འཛིན་གྱིས་དབང་དུ་བྱས་པའི་གཟུང་རྟོག་གཉིས་དང་། ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་དང་། གང་ཟག་གི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་དང་བཞི་ལྡན། གཞན་དྲུག་མི་ལྡན་ནོ། །འདི་དག་ནི་ཊཱི་ཀའི་དགོངས་པ་གཞིར་བཞག་ནས་རང་གི་བློ་གྲོས་ཀྱི་ནུས་པས་རྩལ་ཐོན་པ་མང་དུ་ཡོད་པ་རྣམས་མ་སྦས་པར་བྲིས་པ་ཡིན་པས་སྐལ་ལྡན་གཅིག་དང་ཕྲད་པར་གྱུར་ཅིག་ཅེས་སོ། །རྟོག་པ་ཡི་ནི་ཆོས་དྲུག་དང་། །ཞེས་པའི་སྐབས་སུ་རིགས་ལ་བྱེ་བྲག་སྨྲ་བའི་ལུགས། མདོ་སྡེ་པའི་ལུགས། སེམས་ཙམ་པའི་ལུགས། དབུ་མ་པའི་ལུགས་དང་བཞིའོ། །དང་པོ་ནི། རིགས་ནི་སེམས་བྱུང་མ་ཆགས་པའི་རང་བཞིན་འདོད་པ་ཆུང་ཞིང་ཆོག་ཤེས་པ་ལ་འདོད་དེ། མཛོད་ལས། མ་ཆགས་འཕགས་རིགས་ཞེས་སོ། །དེ་ཡང་བསོད་སྙོམས། ཆོས་གོས། གནས་མལ་ངན་ངོན་ཙམ་གྱིས་ཆོག་ཤེས་པ་གསུམ་དང་། སྤོང་བ་དང་སྒྲུབ་པ་ལ་མངོན་པར་དགའ་བ་བཞི་ཡོད་ཅིང་། དང་པོ་གསུམ་གྱིས་ཚུལ་བསྟན། ཐ་མས་ལས་བསྟན་ཏེ། ཚུལ་འདི་ལ་བརྟེན་ནས་ལས་འདི་བྱས་ན་འཕགས་པའི་ཆོས་འཐོབ་པར་འགྱུར་བས་འཕགས་པའི་རིགས་ཞེས་བྱ་སྟེ། དེ་ཉིད་ལས། གསུམ་གྱིས་ཚུལ་བསྟན་ཐ་མས་ལས། །ཞེས་གསུངས་པའི་ཕྱིར། འོ་ན་འཕགས་པའི་རིགས་དེ་ལ་གསུམ་དུ་གྲངས་ངེས་པའི་རྒྱུ་མཚན་ཅི་ཡིན་ཞེ་ན། དེར་ངེས་ཏེ། སྲེད་པ་དེ་ལ་ལོངས་སྤྱོད་ལ་སྲེད་པ་དང་། ལུས་ལ་སྲེད་པ་གཉིས་ལས། དང་པོ་ཞི་བའི་ཕྱིར་རིགས་དང་པོ་གསུམ་དང་། ཕྱི་མ་ཞི་བའི་ཕྱིར་དུ་བཞི་པ་ལ་འཇོག་སྟེ། མཛོད་ལས། སྲེད་པ་སྐྱེ་བའི་གཉེན་པོའི་ཕྱིར། །ཞེས་གསུངས། བྱེད་ལས་ནི་དང་པོ་གསུམ་གྱིས་བདག་གིར་འཛིན་པ་དེའི་དུས་ཞི་བར་བྱེད། ཕྱི་མས་ནི་བདག་གིར་འཛིན་པ་དང་། བདག་ཏུ་འཛིན་པ་གཉིས་ཀ་གཏན་དུ་ཞི་བར་བྱེད་དེ། མཛོད་ལས། བདག་གིར་བདག་འཛིན་དངོས་འདོད་པ། །དེ་ཡི་དུས་དང་གཏན་ཞིའི་ཕྱིར། །ཞེས་གསུངས། ཁ་ཅིག གཞུང་འདིས་འཕགས་པའི་རིགས་ཙམ་ཞིག་བསྟན་གྱི། རང་བཞིན་གནས་རིགས་མ་བསྟན་ཏེ། རྩ་འགྲེལ་གཉིས་ཆར་ལས། འཕགས་པའི་རིགས་ཞེས་འབྱུང་གི རང་བཞིན་གནས་རིགས་ཞེས་མི་འབྱུང་བའི་ཕྱིར་ཞེས་ཟེར། འོ་ན་བྱེ་བྲག་སྨྲ་བའི་ལུགས་ཀྱིས་རང་བཞིན་གནས་རིགས་སྟོན་བྱེད་ཀྱི་གཞུང་མེད་པར་ཐལ། དེས་དེ་མ་བསྟན་པ་གང་ཞིག དེ་ལས་གཞན་མེད་པའི་ཕྱིར། འདོད་ན། དེའི་ལུགས་ཀྱིས་སངས་རྒྱས་ཀྱི་རིགས་སྟོན་བྱེད་ཀྱི་གཞུང་མེད་པར་ཐལ་ལོ། །གཉིས་པ་ནི། ཟག་མེད་ཀྱི་ས་བོན་རྐྱེན་དང་ཕྲད་ན་འབྲས་བུ་འབྱུང་རུང་གི་ནུས་པ་ལ་འདོད་དེ། རྒྱལ་པོ་སྲས་ལས་མདོ་སྡེ་པ་དག་གིས་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ། སོ་སོ་སྐྱེ་བོ་དང་སློབ་པའི་གནས་སྐབས་ནའང་ཡོངས་སུ་ཉམས་པའི་ཆོས་ཅན་གྱི་ས་བོན་ལ་རིགས་ཞེས་བརྗོད་དོ་ཞེས་གསུངས་པའི་ཕྱིར། གསུམ་པ་ལ། ཕྱོགས་གླང་གི་ལུགས་དང་། ཐོགས་མེད་སྐུ་མཆེད་ཀྱི་ལུགས། དེ་ཉིད་རྒྱན་ལས་གཏན་ལ་ཕབ་པའི་ཚུལ་དང་གསུམ་ལས། དང་པོ་ནི། རང་བཞིན་གནས་རིགས་ནི་ཐབས་ཤེས་མཚུངས་པར་ལྡན་པའི་རྣམ་པར་ཤེས་པའི་རང་བཞིན་ལ་འདོད་དེ། བརྒྱད་སྟོང་དོན་བསྡུས་ལས། འདི་ལྟར་རྣམ་ཤེས་རང་བཞིན་རིགས། །བརྩེ་དང་ཤེས་རབ་བདག་ཉིད་དོ། །ཞེས་གསུངས་པའི་ཕྱིར། གལ་ཏེ། འདིས་རྒྱས་འགྱུར་གྱི་རིགས་བསྟན་གྱི། རང་བཞིན་གནས་རིགས་ནི་སེམས་ཀྱི་རང་བཞིན་འོད་གསལ་ལ་འདོད་དོ་ཟེར་བ་ནི་མི་འཐད་དེ། སེམས་ཙམ་པའི་ལུགས་ལ་སེམས་ཅན་ཐམས་ཅད་ལ་རང་བཞིན་གནས་རིགས་ཀྱིས་མ་ཁྱབ་ལ། སེམས་རིག་ཅིང་གསལ་ཙམ་གྱིས་ཁྱབ་པའི་ཕྱིར། ཁ་ཅིག དེའི་ལུགས་ཀྱིས་རང་བཞིན་གནས་རིགས་འདུས་མ་བྱས་སུ་འདོད་དོ་ཞེས་ཟེར་བ་མི་འཐད་དེ། དེའི་ལུགས་ལ་རང་བཞིན་གནས་རིགས་དེ་རྐྱེན་གྱིས་སྒྱུར་དུ་རུང་བར་འདོད་དེ། ཆོས་དབྱིངས་འདུས་མ་བྱས་རྐྱེན་གྱིས་སྒྱུར་དུ་མི་རུང་བའི་ཕྱིར། གཉིས་པ་ལ། ངོ་བོ། མིང་གི་རྣམ་གྲངས། དབྱེ་བ་གསུམ་ལས། དང་པོ་ནི། བྱང་ས་ལས། དེ་ལ་རིགས་གང་ཞེ་ན། མདོར་བསྡུས་ན་རྣམ་པ་གཉིས་ཏེ། རང་བཞིན་གྱིས་གནས་པ་དང་། ཡང་དག་པར་སྒྲུབ་པའོ། །དེ་ལ་རང་བཞིན་དུ་གནས་པའི་རིགས་ནི་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འོངས་པ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དེ་ལྟ་བུ་ཡིན་ཏེ། དེ་ལ་ཡང་དག་པར་སྒྲུབ་པའི་རིགས་ནི་སྔོན་དགེ་བའི་རྩ་བ་གོམས་པར་བྱས་པ་ལས་ཐོབ་པ་གང་ཡིན་པ་སྟེ། ཞེས་ཐོག་མ་མེད་པ་ནས་སེམས་དང་ལྷན་ཅིག་འོངས་པ་རྟེན་འབྲེལ་གྱི་ཆོས་ཉིད་ཀྱིས་ཐོབ་པ་སྐྱེ་མཆེད་དྲུག་ལ་གདགས་པའི་གང་ཟག་རྣམས་ཐེག་པ་གསུམ་གྱི་རིགས་ཅན་གསུམ་དུ་སོ་སོར་འབྱེད་པའི་ཟག་མེད་ཀྱི་ས་བོན་རྐྱེན་དང་ཕྲད་ན་ཡེ་ཤེས་སྐྱེ་རུང་གི་ནུས་པ་ལ་བྱེད་དོ། །གཉིས་པ་ནི། སྐྱེ་མཆེད་དྲུག་གི་ཁྱད་པར། ཟག་མེད་ཀྱི་ས་བོན། སྒྲིབ་པ་སྤང་རུང་། ཐོས་པའི་བག་ཆགས་རྣམས་མིང་གི་རྣམ་གྲངས་ཡིན་ཏེ། དེ་ལ་སྐྱེ་མཆེད་དྲུག་གི་ཁྱད་པར་ཞེས་བརྗོད་པའི་རྒྱུ་མཚན་ཡོད་དེ། སྐྱེ་མཆེད་དྲུག་ལ་གདགས་པའི་གང་ཟག་རྣམས་རང་བཞིན་སོ་སོར་འབྱེད་པར་བྱེད་པའི་ཕྱིར། ཟག་མེད་ཀྱི་ས་བོན་ཞེས་བརྗོད་པའི་རྒྱུ་མཚན་ཡོད་དེ། ཟག་མེད་ཀྱི་ཡེ་ཤེས་སྐྱེ་རུང་ཡིན་པའི་ཕྱིར། སྒྲིབ་པ་སྤང་རུང་ཞེས་བརྗོད་པའི་རྒྱུ་མཚན་ཡོད་དེ། རྐྱེན་དང་འཕྲད་ན་དྲི་མ་དང་འབྲལ་དུ་རུང་བའི་ཕྱིར། ཐོས་པའི་བག་ཆགས་ཞེས་བརྗོད་པའི་རྒྱུ་མཚན་ཡོད་དེ། གསུང་རབ་ཐོས་པའི་རྐྱེན་གྱིས་གོམས་པར་བྱ་བ་ཡིན་པའི་ཕྱིར། རྐྱེན་ཐོས་པས་གཞག་པས་ཐོས་པའི་བག་ཆགས་ཞེས་བརྗོད་པ་ནི་མིན་ཏེ། ཆོས་ཉིད་ཀྱིས་ཐོབ་པ་ཡིན་གྱི། ཐོས་པའི་རྐྱེན་གྱིས་མ་གཞག་པའི་ཕྱིར། གསུམ་པ་ལ། རིགས་ངེས་པ་དང་། མ་ངེས་པ་གཉིས་ལས། དང་པོ་ལ་ཉན་ཐོས། རང་རྒྱལ། ཐེག་ཆེན་དུ་རིགས་ངེས་པ་དང་གསུམ། དེ་དག་ཀྱང་རྐྱེན་དབང་གིས་བྱང་ཆུབ་གཞན་དུ་སྒྱུར་མི་ནུས་པ་སྟེ། དཔེར་ན་རིའི་ཕྱོགས་འགའ་ཞིག་ནས་ཟངས་འབའ་ཞིག་འབྱུང་། འགའ་ཞིག་ནས་དངུལ་འབའ་ཞིག་འབྱུང་། འགའ་ཞིག་ནས་གསེར་འབའ་ཞིག་འབྱུང་བ་ལྟ་བུའོ། །རིགས་མ་ངེས་པ་ནི་རྐྱེན་དབང་གིས་བྱང་ཆུབ་གསུམ་པོ་གང་རུང་དུ་སྒྱུར་ནུས་པ་སྟེ། དཔེར་ན་རིའི་ཕྱོགས་འགའ་ཞིག་ནས་ལ་ལ་ཟངས་ལ་ལ་དངུལ། ལ་ལ་གསེར་འབྱུང་བ་ལྟ་བུའོ། །རིགས་ཆད་པ་ནི་རིགས་མེད་པ་ཡིན་པས་རིགས་ཀྱི་དབྱེ་བར་མ་བཀོད་དོ། །དེས་ན་སེམས་ཅན་གྱི་རིགས་ལ་རིགས་ཡོད་པ་དང་མེད་པ་གཉིས། དང་པོ་ལའང་ངེས་པ་དང་མ་ངེས་པ་གཉིས་ལས། ངེས་པ་ལ་གསུམ་དུ་དབྱེ་བས་ལྔར་འགྱུར་རོ། །འོ་ན་རིགས་ཆད་པའི་སེམས་ཅན་ཡོད་པར་གང་གིས་འགྲུབ་ཅེ་ན། དཀར་པོ་དམན་པ་ཡོད་པ་རྒྱུ་དང་བྲལ། །ཞེས་པའི་འགྲེལ་པར། གཏན་ཡོངས་སུ་མྱ་ངན་ལས་མི་འདའ་བའི་ཆོས་ཅན་ནི་རྒྱུ་དང་བྲལ་བའོ། །གང་ཡང་ཡོངས་སུ་མྱ་ངན་ལས་འདའ་བའི་རིགས་ཉིད་མེད་པའོ་ཞེས་པས་འགྲུབ་བོ། །དེ་རྒྱས་འགྱུར་གྱི་རིགས་ཆད་པ་ལ་དགོངས་སོ་སྙམ་ན། མིན་ཏེ། ལ་ལ་ཐར་པ་ཆ་མཐུན་དགེ་བ་མེད་ཅེས་པ་དང་ཟློས་པའི་ཕྱིར་རོ། །གསུམ་པ་ནི། ཡོད་དང་མཆོག་དང་མཚན་ཉིད་དང་། །རྟག་དང་རིགས་རབ་དབྱེ་བ་དང་། །ཉེས་དམིགས་དང་ནི་ཕན་ཡོན་དང་། །དཔེ་རྣམ་གཉིས་ཏེ་རྣམ་པ་བཅུ། །ཞེས་གསུངས་པ་ལྟར། ཐེག་པ་གསུམ་གྱི་རིགས་ཐ་དད་པ་ཡོད་པར་བསྟན་པ། ཐེག་པ་ཆེན་པོའི་རིགས་མཆོག་ཏུ་སྒྲུབ་པ། རིགས་ཀྱི་མཚན་ཉིད། རིགས་སད་པའི་རྟགས། རིགས་ཀྱི་རབ་དབྱེ། རིགས་ཁྱད་པར་དུ་འགྱུར་བ་ལ་བར་དུ་གཅོད་པའི་ཉེས་དམིགས། རིགས་སད་པའི་ཕན་ཡོན། ཐུན་མོང་གི་ཡོན་ཏན་སྐྱེད་པར་གསེར་གྱི་དཔེས་བསྟན་པ། ཐུན་མོང་མིན་པའི་ཡོན་ཏན་སྐྱེད་པ་རིན་པོ་ཆེའི་དཔེས་བསྟན་པ་དང་དགུ་ལས། དེ་རེ་རེའང་དོན་ཚན་བཞི་བཞིའི་སྒོ་ནས་གཏན་ལ་དབབ་པའོ། །དེ་ལ་དང་པོ་ནི། སེམས་ཅན་རྣམས་ལ་ཐེག་པ་གསུམ་གྱི་རིགས་ཐ་དད་པ་སོ་སོར་ཡོད་དེ། སེམས་ཅན་རྣམས་ཁམས་སྣ་ཚོགས་པ་ཅན་དུ་གསུངས་པའི་ཕྱིར་དང་། དང་པོར་ཐེག་པ་གསུམ་གྱི་མོས་པ་ཐ་དད། བར་དུ་སྒྲུབ་པ་ཐ་དད། ཐ་མར་འབྲས་བུ་ཐ་དད་དུ་དམིགས་པའི་ཕྱིར། གཉིས་པ་ནི། དེ་རྣམས་ཀྱི་ནང་ནས་ཐེག་པ་ཆེན་པོའི་རིགས་མཆོག་ཡིན་ཏེ། སྒྲིབ་གཉིས་སྤོང་བའི་དགེ་བའི་རྒྱུ་བྱེད་པ་དང་། སྟོབས་སོགས་ཡོན་ཏན་ཐམས་ཅད་ཀྱི་རྒྱུ་བྱེད་པའི་ཕྱིར་དང་། རང་བཞིན་གྱི་དོན་ཆེན་པོའི་རྒྱུ་བྱེད་པ་དང་། ལྷག་མེད་ཀྱི་སྐབས་སུའང་དགེ་བའི་རྩ་བ་མི་ཟད་པའི་རྒྱུ་བྱེད་པའི་ཕྱིར། གསུམ་པ་ནི། རང་བཞིན་དང་ནི་རྒྱས་པ་དང་། །ཞེས་པས་མཚོན་བྱ་བསྟན། དེ་ནི་རྟེན་དང་བརྟེན་པ་དང་། །ཡོད་མེད་ཉིད། །ཅེས་པས་མཚན་ཉིད་བསྟན། ཡོན་ཏན་ནི། སྒྲོལ་བའི་དོན་དུ་ཤེས་པར་བྱ། །ཞེས་པའི་སྒྲ་དོན་བསྟན་ནོ། །རང་བཞིན་གནས་རིགས་ཀྱི་མཚན་ཉིད། རང་ལ་བརྟེན་པའི་ཡོན་ཏན་གྱི་རྟེན་བྱེད་ཅིང་། རྒྱུའི་ངོ་བོར་ཡོད། འབྲས་བུའི་ངོ་བོར་མེད་པའི་རིགས། རྒྱས་འགྱུར་གྱི་རིགས་ཀྱི་མཚན་ཉིད། རང་བཞིན་གནས་རིགས་ལ་བརྟེན་ནས་རྒྱུ་འབྲས་གཉིས་ཀའི་ངོ་བོར་ཡོད་པའི་རིགས། སྒྲ་དོན་ནི། རིགས་ཀྱི་སྐད་དོད་དུ་གུ་ཏྲ་ཞེས་འབྱུང་ལ། གུ་ལ་ཎ་སྦྱར་བས་གུ་ཎ་སྟེ་ཡོན་ཏན་དང་། །ཏ་དང་ར་ཕྲལ་བས་ཏ་ར་སྟེ་སྒྲོལ་བ་ལ་འཇུག་གོ །དེའང་ཡོན་ཏན་ལ་བརྟེན་ནས་སྲིད་པ་ལས་སྒྲོལ་བས་ན་ཡོན་ཏན་སྒྲོལ་ཞེས་བྱའོ། །བཞི་པ་ནི། ཐེག་ཆེན་གྱི་ལམ་ལ་སྦྱོར་བའི་སྔ་རོལ་དུ་ཡང་བསམ་པའི་ཡོན་ཏན་རང་བཞིན་གྱིས་སྙིང་རྗེ་ཆེ་བ། ཐེག་ཆེན་གྱི་ཆོས་ལ་མོས་པ། སྦྱོར་བའི་ཡོན་ཏན་གཞན་དོན་གྱི་དཀའ་སྤྱད་ལ་བསྲན་བཟོད་པ། སྦྱིན་སོགས་ཀྱི་དགེ་བ་ལ་ཡང་དག་པར་སྤྱོད་པའོ། །ལྔ་པ་ལ། རིགས་ངེས་པ་དང་མ་ངེས་པ་གཉིས། རྐྱེན་གྱིས་འཕྲོག་ནུས་པ་དང་མི་ནུས་པ་གཉིས་ཏེ། ཕྱི་མ་གཉིས་སྔ་མ་གཉིས་ཀྱི་དོན་ནོ། །དྲུག་པ་ནི། ཉོན་མོངས་པ་རྒྱུན་དུ་གོམས་པ་དང་། གྲོགས་ངན་པ་དང་འགྲོགས་པ་དང་། ལོངས་སྤྱོད་ཀྱིས་ཕོངས་པ་དང་། གཞན་གྱི་དབང་དུ་སོང་བའོ། །བདུན་པ་ནི། མི་དགེ་བ་ཅུང་ཟད་བྱས་པའི་སྟོབས་ཀྱི་ངན་སོང་དུ་འགྲོ་ནའང་རིང་མོ་ཞིག་ནས་འགྲོ་བ་དང་། དེ་ལས་མྱུར་དུ་ཐར་པ་དང་། དེར་སྡུག་བསྔལ་ཆུང་ངུ་མྱོང་བ་དང་། སྐྱོ་བ་དང་བཅས་པའི་སྒོ་ནས་སེམས་ཅན་སྨིན་པར་བྱེད་པའོ། །བརྒྱད་པ་ནི། ཐེག་ཆེན་གྱི་རིགས་དེ་གསེར་གྱི་འབྱུང་ཁུངས་དང་ཆོས་མཚུངས་ཏེ། དེ་ལས་གསེར་མང་པོ་དང་། འོད་གསལ་བ་དང་། གཡའ་ལ་སོགས་པའི་དྲི་མ་མེད་པ་དང་། ལས་སུ་རུང་བ་འབྱུང་བ་བཞིན་དུ། སྦྱིན་སོགས་ཀྱི་དགེ་བ་དཔག་དུ་མེད་པ་དང་། ཡེ་ཤེས་ཀྱི་རྟོག་པ་དང་། དྲི་མ་མེད་པའི་སྤངས་པ་དང་། མངོན་ཤེས་ལ་སོགས་པ་མཐུ་དཔག་ཏུ་མེད་པ་འབྱུང་བའི་གནས་ཡིན་པའི་ཕྱིར་རོ། །དགུ་པ་ནི། དེ་རིན་པོ་ཆེའི་འབྱུང་ཁུངས་དང་ཆོས་མཚུངས་ཏེ། དེ་ལས་རིན་པོ་ཆེའི་རིགས་དང་ལྡན་པ། ཁ་དོག་ཕུན་སུམ་ཚོགས་པ། དབྱིབས་ཕུན་སུམ་ཚོགས་པ། མཐུ་ཕུན་སུམ་ཚོགས་པ་འབྱུང་བ་བཞིན་དུ། བྱང་ཆུབ་ཆེན་པོ་དང་། མེ་ལོང་ལྟ་བུའི་ཡེ་ཤེས་ཆེན་པོ་དང་། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་ཆེན་པོ་དང་། སེམས་ཅན་གྱི་དོན་མང་པོ་འབྱུང་བའི་གནས་ཡིན་པའི་ཕྱིར་རོ། །བཞི་པ་དབུ་མ་པའི་ལུགས་ལ། མཚན་གཞི། མཚན་ཉིད། དབྱེ་བ། རིགས་སུ་འགྱུར་ཚུལ་དང་བཞིའོ། །དང་པོ་ལ། ཁ་རག་པ་བྱང་ཆུབ་གཞོན་ནུ་ན་རེ། དྲི་མ་དང་བཅས་པའི་སེམས་རིག་ཅིང་གསལ་ཙམ་ཁོ་ན་རང་བཞིན་གནས་རིགས་ཡིན་གྱི། དེའི་ཆོས་ཉིད་ནི་དེ་མིན་ཏེ། གཞན་དུ་ན་ཆོས་ཉིད་ལ་རིགས་མི་འདྲ་བའི་དབྱེ་བ་མེད་པས། བུམ་སྣམ་སོགས་ཀྱི་ཆོས་ཉིད་ཀྱང་རང་བཞིན་གནས་རིགས་སུ་ཐལ་ལོ་ཞེས་གསུངས་སོ། །དེའི་སློབ་མ་བློ་གྲོས་མཚུངས་མེད་ན་རེ། དྲི་བཅས་ཀྱི་སེམས་དེ་རང་བཞིན་གནས་རིགས་ཡིན་ཏེ། ཀླུ་སྒྲུབ་ཀྱིས། དགེ་ལེགས་སེམས་ལས་སངས་རྒྱས་འབྱུང་། །རང་སེམས་དེ་ལ་ཕྱག་འཚལ་ལོ། །ཞེས་དང་། བྲམ་ཟེ་ཆེན་པོ་ས་ར་ཧས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་སོ། །དེའི་ཆོས་ཉིད་ཀྱང་རང་བཞིན་གནས་རིགས་ཡིན་ཏེ། ཆོས་དབྱིངས་བསྟོད་པ་ལས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པར་བྱས་པ་ལས། །དག་པ་དེ་ཉིད་མྱང་ངན་འདས། །ཞེས་གསུངས་པའི་ཕྱིར། ཊཱི་ཀའི་བཞེད་པའང་འདི་དང་མཐུན་ཏེ། རིགས་པ་ནི། དྲི་བཅས་ཀྱི་སེམས་དེ་རང་བཞིན་གནས་རིགས་མིན་ན། དེའི་ཆོས་ཉིད་ཀྱང་རང་བཞིན་གནས་རིགས་མིན་པར་མཚུངས་ཏེ། དེ་གཉིས་དྲི་མེད་དུ་གནས་གྱུར་པ་ན། རང་དོན་ཆོས་སྐུར་འགྱུར་རུང་དུ་མཚུངས་པའི་ཕྱིར། ལུང་ནི། རྒྱུད་བླར། རིགས་ཁམས་སྦྲང་རྩི་དང་འདྲ་འདི་གཟིགས་ནས། །ཞེས་དང་། དེའི་རྒྱས་བཤད་དུ། ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་གསུངས་པའི་ཕྱིར་ཞེས་བཞེད་དོ། །ཡང་ཁ་ཅིག དྲི་བཅས་སེམས་ཀྱི་ཆོས་ཉིད་ཁོ་ན་དེ་ཡིན་ཏེ། མདོ་ལས། རབ་འབྱོར་ནམ་མཁའ་ལ་བྱའི་རྗེས་མེད་ཅིང་མི་དམིགས་སོ། །དེ་བཞིན་དུ་བྱང་ཆུབ་སེམས་དཔའི་ཚིག་གི་དོན་མེད་ཅིང་མི་དམིགས་སོ་ཞེས་དང་། རྩ་བར། ཆོས་ཀྱི་དབྱིངས་ཀྱི་རང་བཞིན་དང་། །ཞེས་དང་། འགྲེལ་པར། ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ལ་རིགས་ཞེས་བསྟན་ཏོ་ཞེས་གསུངས་པའི་ཕྱིར་རོ། །ཞེས་ཟེར་རོ། །གཞོན་ནུ་བློ་གྲོས་ན་རེ། རྒྱུའི་དུས་སུ་རང་བཞིན་གནས་རིགས་རིགས་བཏགས་པ་བ་དང་། འབྲས་བུའི་དུས་སུ་ངོ་བོ་ཉིད་སྐུ་སྐུ་བཏགས་པ་བ་ཡིན་ཟེར། དེ་ལྟར་ལུགས་ལྔ་ལས། དང་པོ་ནི། རང་བཞིན་གནས་རིགས་སྟོན་པའི་གཞུང་ཕལ་ཆེར་ཆོས་དབྱིངས་ལ་བཤད་པས་དགག་སླ། གཉིས་པ་དང་གསུམ་པ་ནི་རང་ལུགས་ལའང་ཡིན་ལ། བཞི་པ་ནི་དེའི་སྟོབས་ཀྱིས་ཁེགས། ལྔ་པ་ཤིན་ཏུ་ཐ་ཆད་པར་གོ་སླ་བས། འདིར་འདི་འགོག་པའི་རྩོལ་བ་མ་བྱས་སོ། །དེ་ལ་ཁ་ཅིག་ན་རེ། དྲི་བཅས་ཀྱི་སེམས་རང་བཞིན་གནས་རིགས་མིན་ཏེ། དེ་ཡིན་པ་ལ་སེམས་ཙམ་པའི་རིགས་ཀྱི་འདོད་ཚུལ་ལ་འཕགས་གྲོལ་གྱི་སྐྱོན་བརྗོད་པ་རྣམས་མཚུངས་པའི་ཕྱིར། ཇི་ལྟར་མཚུངས་ཞེ་ན། ཉི་ཁྲི་སྣང་བ་ལས། གཞན་དག་ནི་སྐྱེ་མཆེད་དྲུག་གི་ཁྱད་པར་ཡིན་ཏེ། དེའང་རྣམ་པ་གཉིས་ཏེ། རྐྱེན་གྱིས་ཡང་དག་པར་བླངས་པ་དང་། རང་བཞིན་དུ་གནས་པའོ་ཞེས་ཟེར་རོ། །དེ་དག་གིས་ནི་རང་བཞིན་དུ་གནས་པའི་རིགས་ལ་རང་བཞིན་དུ་བརྗོད་པའི་དོན་བརྗོད་དགོས་སོ། །རྒྱུའི་རྣམ་གྲངས་གཞན་ཡིན་ནོ་ཞེ་ན། རྐྱེན་གྱི་ཡང་དག་པར་བླངས་པ་ཡང་དེ་ཡིན་པས་དེ་ན་དོན་གྱི་ཁྱད་པར་ཅི་ཞིག་ཡོད། ཆོས་ཉིད་རྣམ་གྲངས་ཡིན་པ་ལ་ནི་ཉེས་པ་འདི་མེད་དོ། །ཡང་ན་དེ་དག་གི་རིགས་ནི་བཏགས་པ་བ་ཡིན་ལ། འདི་ནི་མཚན་ཉིད་པ་ཡིན་པས་དེས་ན་འདི་དང་དེ་འགྲིགས་པ་མིན་ནོ་ཞེས་གསུངས་ལ། དེའི་དོན། སྐྱེ་མཆེད་དྲུག་གི་ཁྱད་པར་ཟག་མེད་ཀྱི་ས་བོན་ཆོས་ཅན། རང་བཞིན་གནས་རིགས་མིན་པར་ཐལ། རང་བཞིན་དུ་གནས་པའི་དོན་མ་ཚང་བའི་ཕྱིར་ཏེ། རྒྱུ་རྐྱེན་གྱིས་གསར་དུ་བཅོས་མ་ཡིན་པའི་ཕྱིར་ཏེ། འདུས་བྱས་ཡིན་པའི་ཕྱིར་ཞེས་སྐྱོན་བརྗོད་པ་བཞིན་ནོ། །དྲི་བཅས་ཀྱི་སེམས་རིག་གསལ་ཆོས་ཅན། རང་བཞིན་གནས་རིགས་མིན་པར་ཐལ། ཞེས་སོགས་འདི་ལའང་མཚུངས་སོ་ཞེས་ཟེར་རོ། །འོ་ན། ཚ་བ་མེའི་རང་བཞིན་མ་ཡིན་པར་ཐལ། ཚ་བ་ལ་རང་བཞིན་གྱི་དོན་མ་ཚང་བའི་ཕྱིར་ཏེ། རྟགས་སྔ་མ་བཞིན་བསྒྲེའོ། །འོ་ན་ལུང་དེའི་དོན་གང་ཞེ་ན། སེམས་ཙམ་པ་ཆོས་དབྱིངས་རང་བཞིན་གནས་རིགས་སུ་མི་འདོད་པར་སྐྱེ་མཆེད་དྲུག་གི་ཁྱད་པར་ཁོ་ན་དེར་འདོད་པ་ལ་སྐྱོན་བརྗོད་པ་ཡིན་ལ། བརྗོད་ཚུལ་ནི། དེ་ལ་རང་བཞིན་དུ་གནས་པའི་དོན་མ་ཚང་བར་ཐལ། དེ་ལ་ཆོས་ཉིད་མེད་པའི་ཕྱིར་བྱས་པ་ལ་སྐྱོན་མེད་དེ། ཟག་མེད་ཀྱི་ཡེ་ཤེས་ཀྱི་རྒྱུ་དང་རང་བཞིན་དོན་གཅིག་པས་དེ་རྒྱུ་བྱེད་པའི་ཕྱིར་ཞེ་ན། སྐྱེ་མཆེད་དྲུག་གི་ཁྱད་པར་ལ་གཉིས་ཡོད་པའི་རྒྱས་འགྱུར་གྱི་རིགས་ཆོས་ཅན། རང་བཞིན་དུ་གནས་པའི་དོན་ཚང་བར་ཐལ། ཟག་མེད་ཀྱི་ཡེ་ཤེས་ཀྱི་རྒྱུ་བྱེད་པའི་ཕྱིར། འདོད་ན། རྒྱས་འགྱུར་གྱི་རིགས་དང་། རང་བཞིན་གནས་རིགས་ལ་ཁྱད་པར་མེད་པར་ཐལ་ལོ། །ངེད་ལ་ནི་སྐྱོན་འདི་དག་མེད་དེ། རང་བཞིན་གནས་རིགས་ལ་ཆོས་ཉིད་ཀྱི་རྣམ་གྲངས་ཡོད་པའི་ཕྱིར། དེས་ན་སེམས་ཙམ་པ་འདོད་པའི་རང་བཞིན་གནས་རིགས་དེ་ནི་བཏགས་པ་བ་དང་། དབུ་མ་པ་འདོད་པའི་རང་བཞིན་གནས་རིགས་དེ་ནི་དེ་མཚན་ཉིད་པ་ཡིན་པས་དེ་དང་འགྲིགས་པ་མིན་ནོ་ཞེས་པའི་དོན་ནོ། །ཁ་ཅིག དྲི་མ་དང་བཅས་པའི་སེམས་རིག་གསལ་ཆོས་ཅན། རང་བཞིན་གནས་རིགས་མིན་པར་ཐལ། རང་བཞིན་གྱི་དོན་མ་ཚང་བའི་ཕྱིར་ཏེ། རྒྱུ་རྐྱེན་གྱིས་བཅོས་མ་ཡིན་པའི་ཕྱིར། ཁྱབ་སྟེ། འཇུག་པ་ལས། རང་བཞིན་དང་ནི་བཅོས་མིན་དང་། །ཞེས་གསུངས་པའི་ཕྱིར་ཞེས་ཟེར་ན། དེའི་ཆོས་ཉིད་ཆོས་ཅན། རང་བཞིན་གྱི་དོན་མ་ཚང་བར་ཐལ། གཞན་ལ་ལྟོས་པ་དང་བཅས་པ་ཡིན་པའི་ཕྱིར། ཁྱབ་སྟེ། གཞན་ལ་ལྟོས་པ་མེད་པ་ཡིན་ཞེས་གསུངས་པའི་ཕྱིར། རྩ་བའི་རྟགས་གྲུབ་སྟེ། རྟེན་འབྲེལ་ཡིན་པའི་ཕྱིར། ཁ་ཅིག དྲི་མ་དང་བཅས་པའི་སྐྱེས་བུ་དེའང་རང་བཞིན་གནས་རིགས་ཡིན་པར་ཐལ། དྲི་མ་དང་བཅས་པའི་སེམས་རིག་གསལ་དེ་དེ་ཡིན་པའི་ཕྱིར། རྟགས་ཁས་ཞེ་ན། དྲི་བཅས་ཀྱི་སྐྱེས་བུའི་གཟུགས་ཕུང་ཡིན་ན་རང་གི་རྒྱུན་སངས་རྒྱས་ཀྱི་གཟུགས་སུ་འགྱུར་བས་ཁྱབ་པར་ཐལ། དྲི་བཅས་ཀྱི་སེམས་ཡིན་ན། རང་གི་རྒྱུན་སངས་རྒྱས་ཀྱི་ཡེ་ཤེས་སུ་འགྱུར་བས་ཁྱབ་པའི་ཕྱིར། ཁྱབ་པ་ཁས། འདོད་ན། ལམ་མ་ཞུགས་ཀྱི་སོ་སྐྱེའི་གཟུགས་ཀྱི་ཕུང་པོ་དེ་ཆོས་ཅན། དེར་ཐལ། དེའི་ཕྱིར། འདོད་ན། དེ་འཆི་བ་མི་སྲིད་པར་ཐལ་ལོ། །འོ་ན་བྱང་སེམས་མཐོང་ལམ་པའི་ཆོས་ཅན། རང་བཞིན་གནས་རིགས་ཇི་ལྟ་བུ་ཞེ་ན། ཁ་ཅིག དེའི་རྒྱུད་ཀྱི་ཟག་མེད་ཀྱི་ཡིད་ཀྱི་རྣམ་པར་ཤེས་པ་རང་བཞིན་གནས་རིགས་དང་རྒྱས་འགྱུར་གྱི་རིགས་ཀྱི་གཞི་མཐུན་ཡིན་ཏེ། རང་བཞིན་གནས་རིགས་ཡིན་པར་རིགས་པས་གྲུབ་ཅིང་། དྲི་མེད་དུ་གནས་གྱུར་པ་ན་རང་དོན་ཆོས་སྐུར་འགྱུར་རུང་གི་འདུས་བྱས་ཀྱི་དགེ་རྩ་ཡིན་པས་རྒྱས་འགྱུར་གྱི་རིགས་ཀྱང་ཡིན་པའི་ཕྱིར་ཞེས་ཟེར་རོ། །འོ་ན་དེ་ཆོས་ཅན། རང་གི་རིགས་རྒྱུན་སྔོན་དུ་སོང་བར་ཐལ། འདུས་བྱས་རང་བཞིན་གནས་རིགས་ཡིན་པའི་ཕྱིར། འདོད་ན། སོ་སྐྱེའི་རྒྱུད་ལ་ཟག་མེད་ཀྱི་ཡིད་ཀྱི་རྣམ་པར་ཤེས་པ་ཡོད་པར་ཐལ་ལོ། །རང་ལུགས་ནི། ཀུན་གཞི་རྣམ་པར་གཞག་པའི་ཚེ་དེ་རང་བཞིན་གནས་རིགས་ཡིན་ཏེ། དེ་ཐོག་མ་མེད་པ་ནས་ཡོད་པ་གང་ཞིག དེའི་ཚེ་སོ་སྐྱེའི་གནས་སྐབས་སུ་ཚོགས་དྲུག་རྒྱུན་ཆད་པར་སྲིད་པའི་ཕྱིར། ཀུན་གཞི་མ་གཞག་པའི་ཚེ་དེའི་རྒྱུད་ཀྱི་ཡིད་ཀྱི་རྣམ་པར་ཤེས་པའི་གསལ་རིག་གི་ཆ་དེ་རང་བཞིན་གནས་རིགས་ཡིན་ཏེ། དེ་ཐོག་མ་མེད་པ་ནས་རང་གི་རིགས་འདྲ་རྒྱུན་མ་ཆད་པའི་ཕྱིར། གཉིས་པ་མཚན་ཉིད་ལ། དགག་གཞག་གཉིས་ལས། དང་པོ་ལ། རེད་མདའ་བ་ན་རེ། ཐེག་ཆེན་སྒྲུབ་པའི་རྟེན་རིགས་ཀྱི་མཚན་ཉིད། ཐེག་ཆེན་སྒྲུབ་པའི་རྟེན་གཞིར་གྱུར་པའི་ནང་གི་སྐྱེ་མཆེད་དྲུག་གི་ཆོས་ཉིད་ཅེས་གསུངས། འོ་ན་ཐེག་ཆེན་སྒྲུབ་པའི་རྟེན་གཞིར་གྱུར་པའི་མིག་གི་ཆོས་ཉིད་ཡོད་པར་ཐལ། མཚན་ཉིད་དེ་ཡོད་པའི་ཕྱིར། འདོད་ན། ཐེག་ཆེན་མཐོང་ལམ་པའི་མིག་གི་ཆོས་ཉིད་དེ་ཐེག་ཆེན་སྒྲུབ་པའི་རྟེན་གཞི་ཡིན་པར་ཐལ་ལོ། །འདོད་མི་ནུས་ཏེ། བེམ་པོའི་ཆོས་ཉིད་ཡིན་པའི་ཕྱིར། ཡང་དེའི་རྒྱུད་ཀྱི་ཡིད་ཀྱི་རྣམ་པར་ཤེས་པའི་ཆོས་ཉིད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། མིག་གི་ཆོས་ཉིད་མིན་པའི་ཕྱིར་ཏེ། བེམ་པོའི་ཆོས་ཉིད་མིན་པའི་ཕྱིར། གཉིས་པ་ནི། ཐེག་ཆེན་སྒྲུབ་པའི་རྟེན་གཞི་གང་ཞིག ཐོག་མ་མེད་པ་ནས་རྒྱུན་མ་ཆད་པར་ཡོད་པའི་སེམས་ཀྱི་ཆོས་ཉིད་དམ་ཆོས་ཅན་གང་རུང་གིས་བསྡུས་པའོ། །རྒྱས་འགྱུར་གྱི་རིགས་ནི་ཐེག་ཆེན་སྒྲུབ་པའི་རྟེན་གཞི་མིན་ཏེ། སྒྲུབ་པ་དངོས་ཡིན་པའི་ཕྱིར། གསུམ་པ་དབྱེ་བ་ནི། སངས་རྒྱས་ཀྱི་རིགས་དེ་ལ་ཡོན་ཏན་གྱི་སྒོ་ནས་དབྱེ་ན། རང་བཞིན་གནས་རིགས་དང་རྒྱས་འགྱུར་གྱི་རིགས་གཉིས། རྐྱེན་གྱིས་འགྱུར་མི་འགྱུར་གྱི་སྒོ་ནས་རིགས་ངེས་པ་དང་མ་ངེས་པ་གཉིས། ཐེག་པའི་སྒོ་ནས་ཐེག་པ་གསུམ་གྱི་རིགས་གསུམ། རྟེན་ཆོས་སྒྲུབ་པའི་སྒོ་ནས་བཅུ་གསུམ་མོ། །དེས་ན་རང་བཞིན་གནས་རིགས་ཀྱི་མཚན་ཉིད། ཐོག་མ་མེད་པ་ནས་རྒྱུན་མ་ཆད་པར་ཡོད་པའི་སེམས་ཀྱི་ཆོས་ཉིད་དང་ཆོས་ཅན་གང་རུང་གིས་བསྡུས་པ་གང་ཞིག དྲི་མ་དང་བྲལ་བའི་ཚེ་རང་དོན་ཆོས་སྐུར་འགྱུར་རུང་། དབྱེ་ན་འདུས་བྱས་རང་བཞིན་གནས་རིགས་དང་འདུས་མ་བྱས་རང་བཞིན་གནས་རིགས་དང་གཉིས་ཀྱི་མཚན་ཉིད་རིམ་བཞིན། ཐོག་མ་མེད་པ་ནས་རྒྱུན་མ་ཆད་པར་ཡོད་པའི་སེམས་ཀྱི་ཆོས་ཅན་གྱིས་བསྡུས་པ་གང་ཞིག དྲི་མ་དང་བྲལ་བའི་ཚེ་རྟོགས་པ་ཡེ་ཤེས་ཆོས་སྐུར་འགྱུར་རུང་དང་། གཞན་འདྲ་བ་ལས་སེམས་ཀྱི་ཆོས་ཉིད་ཀྱིས་བསྡུས་པ་གང་ཞིག དྲི་མ་དང་བྲལ་བའི་ཚེ་དག་པ་གཉིས་ལྡན་གྱི་ཆོས་དབྱིངས་མཐར་ཐུག་ཏུ་འགྱུར་རུང་ངོ་། །རྒྱས་འགྱུར་གྱི་རིགས་ཀྱི་མཚན་ཉིད། རྐྱེན་གྱིས་ཡང་དག་པར་བླངས་པ་ལས་བྱུང་བའི་སངས་རྒྱས་ཀྱི་རིག་གང་ཞིག དྲི་མ་དང་བྲལ་བའི་ཚེ། གཟུགས་སྐུར་བསྟན་ནས་སེམས་ཅན་གྱི་དོན་བྱེད་པར་འགྱུར་བའོ། །དེའི་མཚན་གཞི་ལ་དར་ཊཱིཀ་པ་ན་རེ། སེམས་ཀྱི་སྟེང་ན་དྲི་མ་དང་བྲལ་རུང་དང་། ཟག་མེད་ཀྱི་ཡེ་ཤེས་སྐྱེ་རུང་གང་ནུས་པ་ཡོད་པར་རིགས་པས་འགྲུབ་ཅིང་། དེ་གཉིས་ཐོས་པའི་རྐྱེན་གྱིས་གཞག་ལ་ཐོས་པའི་རྐྱེན་གྱིས་གསོ་རུང་བ་ཡིན་པས་ན། རྐྱེན་གྱི་ཡང་དག་པར་བླངས་པ་ལས་བྱུང་བའི་རིགས་ཞེས་བྱའོ། །དེ་ནི་སེམས་ཙམ་པས་རང་བཞིན་གནས་རིགས་མཚན་ཉིད་པར་འདོད་ཅིང་། དབུ་མ་པས་རང་བཞིན་གནས་རིགས་བཏགས་པ་བ་དང་། རྒྱས་འགྱུར་གྱི་རིགས་མཚན་ཉིད་པར་འདོད་པར་འཕགས་གྲོལ་བཞེད་དོ་ཟེར་རོ། །འོ་ན་ཟག་མེད་ཀྱི་ཡེ་ཤེས་སྐྱེ་རུང་གི་ནུས་པ་དེ་སེམས་ཅན་ཐམས་ཅད་ཀྱི་རྒྱུད་ལ་ཡོད་དམ། འགའ་ཞིག་གི་རྒྱུད་ལ་ཡོད། འགའ་ཞིག་གི་རྒྱུད་ལ་མེད་པ་གང་ཡིན། དང་པོ་ལྟར་ན་དེ་ཆོས་ཅན། འཁོར་བ་ཐོག་མེད་ནས་ཡོད་པར་ཐལ། སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་ཕྱིར། འདོད་ན། ཐོས་པའི་རྐྱེན་གྱིས་བཞག་པར་བྱས་པ་མིན་པར་ཐལ་ལོ། །ཡང་དེ་ཆོས་ཅན། གནས་སྐབས་དགེ་རྩ་ཆད་པའི་གང་ཟག་གི་རྒྱུད་ལ་ཁྱོད་མེད་པར་ཐལ། ཁྱོད་རྒྱས་འགྱུར་གྱི་རིགས་ཡིན་པའི་ཕྱིར། རྟགས་བསལ་ཁས། གཉིས་པ་ལྟར་ན། དེ་རྒྱུད་ལ་མི་ལྡན་པའི་གང་ཟག་ཆོས་ཅན། ཁྱོད་ཀྱི་རྒྱུད་ལ་ཟག་མེད་ཀྱི་ཡེ་ཤེས་སྐྱེ་མི་རུང་བར་ཐལ། ཁྱོད་ཀྱི་རྒྱུད་ལ་དེ་སྐྱེ་རུང་གི་ནུས་པ་མེད་པའི་ཕྱིར། འདོད་ན། དེ་འདྲའི་གང་ཟག་དེ་མེད་པར་ཐལ་ལོ། །གཞན་ཡང་། ཉི་ཁྲི་སྣང་བར། དེའི་རིགས་ནི་བཏགས་པ་བ་ཡིན་ལ། འདི་ནི་མཚན་ཉིད་པ་ཡིན་པས་ཞེས་པ་དེས་ཟག་མེད་ཀྱི་ཡེ་ཤེས་སྐྱེ་རུང་གི་ནུས་པ་དེ་རང་བཞིན་གནས་རིགས་བཏགས་པ་བ་དང་། རྒྱས་འགྱུར་གྱི་རིགས་མཚན་ཉིད་པར་བསྟན་པར་ཐལ། འཕགས་པ་གྲོལ་སྡེས་དེ་ལྟར་འདོད་པའི་ཕྱིར། རྟགས་ཁས། འདོད་ན། འདི་ནི་མཚན་ཉིད་པ་ཡིན་པས་ཞེས་པ་དེས། སྒྲུབ་པ་ཡི་ནི་རྟེན་གྱུར་པ། །ཞེས་པའི་སྐབས་ཀྱི་རང་བཞིན་གནས་རིགས་མ་བསྟན་པར་ཐལ་ལོ། །འདོད་ན་ཆོས་དབྱིངས་རྣམ་གྲངས་སུ་འདོད་པ་ལ་ནི་ཉེས་པ་འདི་མེད་དོ་ཞེས་པ་དེས་དེ་མ་བསྟན་པར་ཐལ་ལོ། །བཞི་པ་རིགས་སུ་འགྱུར་ཚུལ་ནི། རྟེན་གྱི་སྒོ་ནས་རིགས་སུ་འགྱུར་ཚུལ་དང་། རྒྱུའི་སྒོ་ནས་དེར་འགྱུར་ཚུལ་གཉིས། དང་པོ་ནི། འཁོར་བའི་གནས་སྐབས་ཀྱི་ཕུང་ཁམས་སྐྱེ་མཆེད་རྣམས་ལས་དང་ཉོན་མོངས་པ་ལ་བརྟེན། དེ་ཚུལ་མིན་ཡིད་བྱེད་ཀྱི་རྣམ་རྟོག་ལ་བརྟེན། དེ་སེམས་ཀྱི་ཆོས་ཉིད་ལ་བརྟེན་པ་ལྟར་དུ། ཐེག་ཆེན་སྒྲུབ་པ་བྱང་ཆུབ་སེམས་དཔའ་ལ་བརྟེན། དེ་ནང་གི་སྐྱེ་མཆེད་ལ་བརྟེན། སྐྱེ་མཆེད་གཞན་ལྔ་ཡིད་ཀྱི་སྐྱེ་མཆེད་ལ་བརྟེན། དེ་སེམས་ཀྱི་ཆོས་ཉིད་ལ་བརྟེན་ནས། སེམས་ཀྱི་ཆོས་ཉིད་རྟེན་གྱི་སྒོ་ནས་རིགས་སུ་འཇོག་སྟེ། རྒྱུད་བླར། ཕུང་པོ་སྐྱེ་མཆེད་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་པར་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །ཞེས་དང་། རྩ་བར། རྟེན་ལ་རིགས་ཞེས་བྱ། ཞེས་དང་། འགྲེལ་པར། བྱང་ཆུབ་སེམས་དཔའ་རྣམ་པ་བཅུ་གསུམ་པོ་ཇི་སྐད་བཤད་པའི་ཆོས་ཀྱི་གཞིར་གྱུར་པའི་ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ལ་རིགས་ཞེས་བསྟན་ཏོ་ཞེས་སོ། །གཉིས་པ་ནི། རང་གི་སེམས་ཀྱི་ཆོས་ཉིད་ལ་དམིགས་ཏེ་བསྒོམ་པས་གནས་སྐབས་སུ་དྲི་མ་སེལ་བར་བྱེད་པའི་སྒྲུབ་པ་འབྱུང་། མཐར་ཐུག་དྲི་མ་དག་པ་ན་དབྱིངས་རིག་དབྱེར་མེད་ཀྱི་རང་དོན་ཆོས་སྐུར་འགྱུར་བས། ཆོས་ཉིད་རྒྱུའི་སྒོ་ནས་རིགས་སུ་འཇོག་སྟེ། ཇི་ལྟར་ཉན་ཐོས་ཀྱི་ཐེག་པ་ལ་སོགས་པ་རྟོགས་པའི་རིམ་གྱིས་དམིགས་པ་དེ་བཞིན་དུ་འཕགས་པའི་ཆོས་རྟོགས་པར་འགྱུར་བའི་རྒྱུ་ཡིན་པའི་ཕྱིར། ཆོས་དབྱིངས་རྒྱུའི་ངོ་བོར་རྣམ་པར་རྟོག་པའི་སྒོ་ནས་རིགས་ཉིད་དུ་ཐ་སྙད་འདོགས་ཞེས་གསུངས་སོ། །དེ་གཉིས་ཀའང་སེམས་བདེན་པས་སྟོང་པས་སྤང་བྱ་སྤོང་བ་དང་། གཉེན་པོ་སྐྱེད་པའི་བྱ་བྱེད་རུང་བའི་སྟོབས་ཀྱིས་ཡིན་ཏེ། ཀླུ་སྒྲུབ་ཀྱིས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །ཅེས་སོ། །འདི་དག་ནི་ཀུན་མཁྱེན་ཆོས་རྗེའི་ལེགས་བཤད་གཞིར་བཞག་ནས་ལུང་རིགས་ཀྱིས་དཔྱད་པ་ཅུང་ཟད་རྒྱས་པ་དང་བཅས་པ་ཡིན་ལ། ཟབ་མོའི་དོན་འདི་ལ་ཁོ་བོའི་འདོད་པ་ནི་སྡོམ་གསུམ་རབ་དབྱེའི་རྣམ་བཤད་གསུང་རབ་དགོངས་གསལ་ན་ཡོད་པས་དེར་བལྟ་བར་བྱའོ། །དེའི་འོག་ཏུ་བསམ་པ་ཇི་ལྟ་བ་བཞིན། ཞེས་པའི་སྐབས་སུ། ལྡེམ་དགོངས་དང་། དགོངས་པ་དང་། དེ་གཉིས་ཀྱི་ཁྱད་པར་དང་། ཞར་ལ་དྲང་ངེས་ཀྱི་ཁྱད་པར་དཔྱད་པ་དང་བཞིའོ། །དང་པོ་ནི། རྒྱན་ལས། གཞུག་པ་ལྡེམ་པོར་དགོངས་པ་དང་། །མཚན་ཉིད་ལྡེམ་པོར་དགོངས་པ་དང་། །གཉེན་པོ་ལྡེམ་པོར་དགོངས་པ་དང་། །བསྒྱུར་བ་ལྡེམ་པོར་དགོངས་པ་སྟེ། །ཉོན་མོངས་དང་ནི་ངོ་བོ་ཉིད། །དེ་བཞིན་ཉེས་པ་འདུལ་བ་དང་། །བརྗོད་པ་ཟབ་པ་ཉིད་ལ་ནི། །ལྡེམ་པོར་དགོངས་པ་འདི་རྣམ་བཞི། །ཞེས་གསུངས་ཏེ། གཞུག་པ་ལྡེམ་པོར་དགོངས་པ་ནི། ཉན་ཐོས་རིགས་ཅན་འགའ་ཞིག་བསྟན་པ་ལ་གཞུག་པའི་དོན་དུ་བདག་ཡོད་པར་གསུངས་པ་ལྟ་བུའོ། །མཚན་ཉིད་ལྡེམ་པོར་དགོངས་པ་ནི། སེམས་ཙམ་པས་ཀུན་བརྟགས་རང་གི་མཚན་ཉིད་ཀྱིས་གྲུབ་པའི་ངོ་བོ་ཉིད་མེད་པ། གཞན་དབང་བདག་ལས་སྐྱེས་པའི་ངོ་བོ་ཉིད་མེད་པ། ཡོངས་གྲུབ་དོན་གཞན་པའི་བདག་གི་ངོ་བོ་ཉིད་མེད་པ་ལ་དགོངས་ནས། ཆོས་ཉིད་ངོ་བོ་ཉིད་མེད་པར་སྟོན་པའི་མདོ་ལྟ་བུ་ལ་འདོད་ལ། དབུ་མ་པ་ནི་མངོན་པའི་མདོ་རྣམས་ལས་རང་སྤྱིའི་མཚན་ཉིད་གསུངས་པ་ལ་འདོད་དོ། །གཉེན་པོ་ལ་ལྡེམ་པོར་དགོངས་པ་ནི། སངས་རྒྱས་ལ་བརྙས་པ་སོགས་ཀྱི་གཉེན་པོར་འོག་ནས་འཆད་པའི་དགོངས་པ་ཅན་བཞིའོ། །བསྒྱུར་བ་ལྡེམ་པོར་དགོངས་པ་ནི། དངོས་སུ་བསྟན་པའི་དོན་དེ་ཉིད་གཞན་དུ་བསྒྱུར་ནས་འཆད་དགོས་པ་སྟེ་དཔེར་ན། སྙིང་པོ་མེད་ལ་སྙིང་པོ་ཤེས། །ཕྱིན་ཅི་ལོག་ལ་ལེགས་པར་གནས། །ཉོན་མོངས་པས་ནི་རབ་ཉོན་མོངས། །བྱང་ཆུབ་དམ་པ་འཐོབ་པར་འགྱུར། །ཞེས་པ་ལྟ་བུའོ། །དེ་ཇི་ལྟར་བསྒྱུར་ཞེ་ན། སྙིང་པོ་རྣམ་གཡེང་། དེ་མེད་པ་ནི་ལྷག་པ་ཏིང་ངེ་འཛིན་གྱི་བསླབ་པ། ཕྱིན་ཅི་ལོག་ནི་རྟག་པ་སོགས་ལས་ཕྱིན་ཅི་ལོག་མི་རྟག་པ་སོགས་ལ་གནས་པ་སྟེ། ལྷག་པ་ཤེས་རབ་ཀྱི་བསླབ་པ། ཉོན་མོངས་པ་དཀའ་སྤྱད་དེ། དེས་ཉོན་མོངས་པ་ལྷག་པ་ཚུལ་ཁྲིམས་ཀྱི་བསླབ་པའོ། །དེས་ན་བསླབ་པ་གསུམ་ལ་གནས་ན་བྱང་ཆུབ་དམ་པ་འཐོབ་ཅེས་པར་འགྱུར་རོ། །གཉིས་པ་ནི། རྒྱན་ལས། མཉམ་པ་ཉིད་དང་དོན་གཞན་དང་། །དེ་བཞིན་དུ་ནི་དུས་གཞན་དང་། །གང་ཟག་གི་ནི་བསམ་པ་ལ། །དགོངས་པ་རྣམ་པ་བཞི་ཞེས་བྱ། །སངས་རྒྱས་ཆོས་ལ་བརྙས་པ་དང་། །ལེ་ལོ་ཅུང་ཟད་ཆོག་འཛིན་དང་། །ང་རྒྱལ་འདོད་ཆགས་སྤྱོད་པ་དང་། །འགྱོད་དང་མ་ངེས་ལྡོག་པ་དང་། །སེམས་ཅན་རྣམས་ཀྱི་ཉེས་པ་སྟེ། །དེ་ཡི་གཉེན་པོར་ཐེག་མཆོག་གསུངས། །ཞེས་ཏེ། མཉམ་པ་ཉིད་ལ་དགོངས་པ་ནི། །མཉམ་པ་ཉིད་གསུམ་ལ་དགོངས་ནས། །ང་ཉིད་སངས་རྒྱས་རྣམ་གཟིགས་སོ། །ཞེས་པ་ལྟ་བུའོ། །མཉམ་པ་ཉིད་གསུམ་ནི། མཛོད་ལས། སངས་རྒྱས་ཐམས་ཅད་ཚོགས་དང་ནི། །ཆོས་སྐུ་འགྲོ་བའི་དོན་སྤྱོད་པ། །མཉམ་པ་ཉིད་དེ་སྐུ་ཚེ་དང་། །རིགས་དང་སྐུ་བོང་ཚད་ཀྱིས་མིན། །ཞེས་པ་ལྟར་རོ། །དགོས་པ་ནི། སངས་རྒྱས་ཤཱཀྱ་ཐུབ་པ་ལྟ་བུ་སངས་རྒྱས་རྣམ་གཟིགས་ལས་དམན་ནོ་སྙམ་དུ་བརྙས་པའི་གཉེན་པོའོ། །དོན་གཞན་ལ་དགོངས་པ་ནི། དངོས་སུ་གསུངས་པའི་སྒྲ་དེ་ཉིད་དོན་གཞན་ལ་དགོངས་ནས་གསུངས་པ་སྟེ། ཕ་དང་མ་ནི་གསད་བྱ་ཞིང་། །རྒྱལ་པོ་གཙང་སྦྲ་ཅན་གཉིས་དང་། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་གསུངས་པ་ལྟ་བུའོ། །དོན་གང་ལ་དགོངས་ཞེ་ན། ལས་དང་སྲེད་པ་སྤང་བྱ་ཞིང་། །སྦྱོར་བའི་རྣམ་ཤེས་མཆོག་འཛིན་གཉིས། །སྐྱེ་མཆེད་སྤྱོད་ཡུལ་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་པ་ལ་དགོངས་སོ། །དགོས་པ་ནི། ཆོས་ནི་རྟོགས་པར་སླ་བས་དམན་པ་ཡིན་ནོ་ཞེས་པའི་གཉེན་པོའོ། །དུས་གཞན་ལ་དགོངས་པ་ནི། དུས་གཞན་མ་འོངས་པ་ལས་སྐྱེ་བ་ལ་དགོངས་ནས། བདེ་བ་ཅན་དུ་སྐྱེ་བའི་སྨོན་ལམ་བཏབ་ན་དེར་སྐྱེའོ་ཞེས་པ་ལྟ་བུ་ཡིན། དགོས་པ་ནི་ལེ་ལོའི་གཉེན་པོའོ། །གང་ཟག་གི་བསམ་པ་ལ་དགོངས་པ་ནི། སྦྱིན་པ་ལ་མཆོག་འཛིན་གྱི་གཉེན་པོར། དེ་ལ་སྨད་ནས་ཚུལ་ཁྲིམས་ལ་བསྔགས་པ་ལྟ་བུའོ། །དགོས་པ་ནི། སྦྱིན་པ་སོགས་ཅུང་ཟད་ཙམ་གྱིས་ཆོག་པར་འཛིན་པའི་གཉེན་པོའོ། །འགྱོད་དང་མ་ངེས་ལྡོག་པ་ནི། །ཞེས་སོགས་ཀྱི་དགོངས་ལྡེམ་དགོངས་སྤྱིའི་དགོས་པ་བསྟན་ཏོ། །གསུམ་པ་དགོངས་ལྡེམ་དགོངས་ཀྱི་ཁྱད་པར་གང་ཞེ་ན། ལོ་ཙཱ་བ་ན་རེ། འཆད་པ་པོས་དོན་གང་ལ་དགོངས་ནས་བཤད་པའི་དགོངས་གཞི་ཉན་པ་པོས་མ་གོ་བའི་མདོ་སྡེ་དེ་དགོངས་པ་ཅན་གྱི་མདོ་དང་། དེ་ཉན་པ་པོས་ཀྱང་མདོ་དེའི་དགོངས་གཞིར་ཤེས་པའི་མདོ་དེ་ལྡེམ་དགོངས་ཀྱི་མདོ་ཡིན་ཞེས་གསུངས། འོ་ན། ཉན་ཐོས་ཀྱི་རིགས་ཅན་ཁ་ཅིག་བསྟན་པ་ལ་གཞུག་པའི་དོན་དུ་ཕྱི་དོན་བདེན་གྲུབ་དུ་ཡོད་པར་སྟོན་པའི་མདོ་དེ་ཆོས་ཅན། ལྡེམ་དགོངས་ཀྱི་མདོའི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ལྟ་བུའི་ཉན་ཐོས་ཀྱི་རིགས་ཅན་དེས་མདོ་དེའི་དགོངས་གཞི་གཟུགས་སྒྲ་སོགས་ཚད་མས་གྲུབ་པ་ཡོད་པ་ལ་གོ་བར་ཐལ་ལོ། །གཞན་ཡང་། དགོངས་པ་ཅན་གྱི་མདོ་དང་ལྡེམ་དགོངས་ཀྱི་མདོ་གཉིས་འགལ་བར་ཐལ། དེ་གཉིས་ཀྱི་ཁྱད་པར་ཁྱེད་ཀྱིས་སྨྲས་པ་དེ་འཐད་པའི་ཕྱིར། འདོད་མི་ནུས་ཏེ། དགོངས་པ་ཅན་གཞིའང་གཉེན་པོ་ལ་ལྡེམ་དགོངས་ཡིན་པའི་ཕྱིར། ཕྱྭ་པ་ན་རེ། དགོངས་ལྡེམ་དགོངས་འཇོག་པའི་ཉན་པ་པོའི་གང་ཟག་དེ་ནི་འགལ་བ་ཞིག་དགོས་ཏེ། ཉན་པ་པོ་གང་ལ་དགོངས་ནས་མདོ་དེ་ལྡེམ་དགོངས་སུ་འཇོག་པའི་གང་ཟག་དེ་མདོ་དེའི་དགོངས་གཞི་མ་རྙེད་པར་མདོ་དེ་སྒྲ་ཇི་བཞིན་པར་འཛིན་པས་ཁྱབ། ཉན་པ་པོ་གང་ལ་ལྟོས་ནས་མདོ་དེ་དགོངས་པ་ཅན་དུ་འཇོག་དགོས་པའི་གང་ཟག་ཡིན་ན། མདོ་དེའི་དགོངས་གཞི་ཟབ་མོ་མ་རྙེད་པའི་སྒོ་ནས་མདོ་སྡེ་སྒྲ་ཇི་བཞིན་དུ་མི་འཛིན་པས་ཁྱབ་པའི་ཕྱིར་ཞེས་གསུངས། འོ་ན་སངས་རྒྱས་ཤཱཀྱ་ཐུབ་པ་ལ་བརྙས་པའི་གང་ཟག་ཆོས་ཅན། ང་ཉིད་སངས་རྒྱས་རྣམ་གཟིགས་སོ་ཞེས་པའི་མདོ་དེ་ཁྱོད་ལ་ལྟོས་ཏེ་ལྡེམ་དགོངས་ཀྱི་མདོ་མིན་པར་ཐལ། དེ་ཁྱོད་ལ་ལྟོས་ཏེ་དགོངས་པ་ཅན་གྱི་མདོ་ཡིན་པའི་ཕྱིར་ཏེ། མཉམ་པ་ཉིད་ལ་དགོངས་པའི་མདོ་ཡིན་པའི་ཕྱིར། རྩ་བར་འདོད་མི་ནུས་ཏེ། དེ་ཁྱོད་ལ་ལྟོས་ཏེ་གཉེན་པོ་ལ་ལྡེམ་དགོངས་ཀྱི་མདོ་ཡིན་པའི་ཕྱིར། ཁ་ཅིག དེ་གཉིས་ཀྱི་ཁྱད་པར་དགོངས་གཞི་གཙོ་བོར་སྟོན་པའི་མདོ་དེ་དགོངས་པ་ཅན་དང་དགོས་པ་གཙོ་བོར་སྟོན་པའི་མདོ་དེ་ལྡེམ་དགོངས་ཀྱི་མདོ་ཡིན་ཞེས་སྨྲའོ། །འོ་ན་དགོངས་གཞི་གཙོ་བོར་སྟོན་ན་དགོས་པ་གཙོ་བོར་མི་སྟོན་པས་ཁྱབ་བམ་མ་ཁྱབ། དང་པོ་ལྟར་ན་དགོངས་ལྡེམ་དགོངས་ཀྱི་མདོ་གཉིས་འགལ་བར་ཐལ། དེའི་ཁྱད་པར་འཐད་པ་གང་ཞིག ཁས་བླངས་སྔ་མ་དེའི་ཕྱིར། གཉིས་པ་ལྟར་ན། གཙོ་བོར་ཞེས་སྨོས་པ་ལ་དགོས་པ་མེད་པར་ཐལ་ལོ། །རང་ལུགས་ནི། དགོངས་གཞི་ལ་ལྟོས་ནས་དགོངས་པ་ཅན་དང་། དགོས་པ་ལ་ལྟོས་ནས་ལྡེམ་དགོངས་སུ་བཤད་པ་ཡིན་གྱི། དེ་གཉིས་འགལ་བ་ནི་མིན་ཏེ། ང་ཉིད་སངས་རྒྱས་རྣམ་གཟིགས་སོ་ཞེས་པའི་མདོ་དེ་དགོངས་གཞི་མཉམ་པ་ཉིད་ལ་དགོངས་ནས་དགོངས་པ་ཅན་གྱི་མདོ་དང་། དགོས་པ་སངས་རྒྱས་ལ་བརྙས་པའི་གཉེན་པོ་ལ་ལྟོས་ནས་ལྡེམ་དགོངས་ཀྱི་མདོ་ཡིན་པའི་ཕྱིར་རོ། །བཞི་པ་ལ། དགག་གཞག་སྤང་གསུམ་ལས། དང་པོ་ལ་ཁ་ཅིག ངེས་དོན་དང་དྲང་དོན་གྱི་མདོའི་མཚན་ཉིད་རིམ་བཞིན། རང་གི་བརྗོད་དོན་སྒྲ་ཇི་བཞིན་དུ་ཁས་ལེན་དུ་རུང་བའི་མདོ་དང་། དེ་མི་རུང་བའི་མདོ་ཞེས་དང་། ཁ་ཅིག ངེས་དོན་གྱི་མདོར་ཁས་བླངས་པ་ལ་ལུང་རིགས་ཀྱིས་གནོད་པ་མེད་པའི་མདོ་དང་། དྲང་དོན་གྱི་མདོར་ཁས་བླངས་པ་ལ་དེས་གནོད་པ་མེད་པའི་མདོ་ཞེས་དང་། ཁ་ཅིག དོན་དམ་བདེན་པ་དང་ཀུན་རྫོབ་བདེན་པ་བརྗོད་བྱའི་གཙོ་བོ་སྟོན་པའི་མདོ་དེ་དེ་གཉིས་ཀྱི་མཚན་ཉིད་ཡིན་ཟེར། དང་པོ་ལ་གཟུགས་མེད། སྒྲ་མེད་ཅེས་པའི་ཤེར་ཕྱིན་གྱི་མདོ་ཆོས་ཅན། དེར་ཐལ། ངེས་དོན་གྱི་མདོ་ཡིན་པའི་ཕྱིར། འདོད་ན། གཟུགས་མེད་པར་ཐལ་ལོ། །གཟུགས་ཡོད་པར་སྟོན་པའི་མདོ་ཆོས་ཅན། དེར་ཐལ། དྲང་དོན་གྱི་མདོ་ཡིན་པའི་ཕྱིར་ཏེ། ཉི་ཤུ་པར། གཟུགས་སོགས་སྐྱེ་མཆེད་ཡོད་པར་ནི། །དེས་འདུལ་བ་ཡི་སྐྱེ་བོ་ལ། །དགོངས་པའི་དབང་གིས་གསུངས་པ་སྟེ། །རྫུས་ཏེ་སྐྱེ་བའི་སེམས་ཅན་བཞིན། །ཞེས་གསུངས་པའི་ཕྱིར། གཉིས་པ་ལ། མཐར་ཐུག་ཐེག་གསུམ་སྟོན་པའི་མདོ་ཆོས་ཅན། ངེས་དོན་གྱི་མདོར་ཐལ། མཚན་ཉིད་དེའི་ཕྱིར། མ་གྲུབ་ན། དེ་ངེས་དོན་གྱི་མདོར་ཁས་བླངས་པ་ཆོས་ཅན། ཁྱོད་ལ་ལུང་རིགས་ཀྱི་གནོད་པ་མི་འབབ་པར་ཐལ། ཁྱོད་དེས་གྲུབ་པའི་ཕྱིར་ཏེ། བྱེ་བྲག་ཏུ་སྨྲ་བ་དེ་ཁྱོད་ཡིན་པའི་ཕྱིར། ཆོས་ཐམས་ཅད་རང་བཞིན་མེད་པར་སྟོན་པའི་མདོ་ཆོས་ཅན། དྲང་དོན་གྱི་མདོར་ཐལ། མཚན་ཉིད་དེའི་ཕྱིར། རྟགས་སྒྲུབ་ཚུལ་སྔ་མས་ཤེས་སོ། །གསུམ་པ་ལ། སངས་རྒྱས་ཀྱི་བཀའ་ཡིན་ན་ངེས་དོན་གྱི་མདོ་ཡིན་དགོས་པར་ཐལ། དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། མ་གྲུབ་ན། དེར་ཐལ། གསང་བ་བསམ་གྱི་མི་ཁྱབ་པའི་མདོ་ཏིང་ངེ་འཛིན་རྒྱལ་པོར། འཇིག་རྟེན་ཁམས་ནི་སྟོང་ཕྲག་ཏུ། །ང་ཡིས་མདོ་རྣམས་གང་གསུངས་པ། །ཡི་གེ་ཐ་དད་དོན་གཅིག་སྟེ། །ཡོངས་སུ་བསྒྲག་པར་ནུས་པ་མིན། །ཞེས་གསུངས་པའི་ཕྱིར། གཉིས་པ་ལ། དེ་གཉིས་ཀྱི་མཚན་ཉིད་རིམ་བཞིན། དོན་དམ་བདེན་པ་དངོས་བསྟན་གྱི་བརྗོད་བྱའི་གཙོ་བོར་སྟོན་པའི་མདོ་དང་། དོན་དམ་མ་རྟོགས་པའི་ཐབས་སུ་གྱུར་པའི་ཀུན་རྫོབ་ཀྱི་རྣམ་གཞག་དངོས་བསྟན་གྱི་བརྗོད་བྱའི་གཙོ་བོར་སྟོན་པའི་མདོ་སྟེ། ཏིང་ངེ་འཛིན་རྒྱལ་པོ་ལས། སྟོང་པ་བདེ་བར་གཤེགས་པས་བསྟན་པར་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལ་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་གསུངས་པའི་ཕྱིར། དེས་ན་གྲུབ་མཐའ་སྨྲ་བ་བཞི་ཆར་གྱི་ལུགས་ལ། རང་རང་གི་དོན་དམ་བདེན་པ་ངེས་དོན་དང་། ཀུན་རྫོབ་བདེན་པ་དྲང་དོན་དུ་འདོད་པར་མཚུངས། དེ་གཉིས་མཚན་གཞི་ལ་མི་མཐུན་པས་མདོ་གཉིས་ཀྱི་མཚན་གཞི་ཡང་མི་མཐུན་ནོ། །དཔེར་ན་རྡུལ་ཕྲན་བདེན་གྲུབ་ཡོད་པར་སྟོན་པའི་མདོ་དེ་གྲུབ་མཐའ་གོང་མ་གཉིས་ཀྱིས་དྲང་དོན་གྱི་མདོ་དང་། འོག་མ་གཉིས་ཀྱིས་ངེས་དོན་གྱི་མདོར་འདོད་པ་བཞིན་ནོ། །གསུམ་པ་ནི། ཁ་ཅིག ཀུན་རྫོབ་བདེན་པ་དང་དོན་དམ་བདེན་པ་གཉིས་ཀ་དངོས་བསྟན་གྱི་བརྗོད་བྱའི་གཙོ་བོར་སྟོན་པའི་མདོ་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། དེ་གཉིས་ཀ་བརྗོད་བྱའི་གཙོ་བོར་སྟོན་པའི་མདོ་ཡིན་པའི་ཕྱིར། མ་གྲུབ་ན། དེ་གཉིས་ཀ་ཆོས་ཅན། ཁྱོད་དངོས་བསྟན་གྱི་བརྗོད་བྱའི་གཙོ་བོར་བྱས་ནས་སྟོན་པའི་མདོ་དེ། ཁྱོད་དངོས་བསྟན་གྱི་བརྗོད་བྱའི་གཙོ་བོར་བྱས་ནས་སྟོན་པའི་མདོ་ཡིན་པར་ཐལ། ཁྱོད་ཡོད་པའི་ཕྱིར་ཟེར་ན། ཉོན་སྒྲིབ་དང་ཤེས་སྒྲིབ་གཉིས་ཀ་གཙོ་བོར་སྤོང་བའི་བར་ཆད་མེད་ལམ་ཆོས་ཅན། ཉོན་སྒྲིབ་གཙོ་བོར་སྤོང་བའི་བར་ཆད་མེད་ལམ་ཡིན་པར་ཐལ། དེ་གཉིས་ཀ་གཙོ་བོར་སྤོང་བའི་བར་ཆད་མེད་ལམ་ཡིན་པའི་ཕྱིར། མ་གྲུབ་ན། དེ་གཉིས་ཀ་ཆོས་ཅན། ཁྱོད་གཙོ་བོར་སྤོང་བའི་བར་ཆད་མེད་ལམ་དེ་ཁྱོད་གཙོ་བོར་སྤོང་བའི་བར་ཆད་མེད་ལམ་ཡིན་པར་ཐལ། ཁྱོད་སྒྲིབ་པ་ཡིན་པའི་ཕྱིར། རིམ་བཞིན་ཁས་བླངས་སོ། །རྩ་བར་འདོད་ན། དེ་ཆོས་ཅན། ཐེག་དམན་གྱི་བར་ཆད་མེད་ལམ་དུ་ཐལ་ལོ། །ཁ་ཅིག མཐར་ཐུག་ཐེག་པ་གཅིག་ཏུ་སྟོན་པའི་མདོ་ཆོས་ཅན། དེར་ཐལ། ངེས་དོན་གྱི་མདོ་ཡིན་པའི་ཕྱིར། འདོད་ན། མཐར་ཐུག་ཐེག་པ་གཅིག་ཡིན་པ་དེ་དོན་དམ་བདེན་པར་ཐལ་ལོ་ཞེ་ན། འོ་ན་གཟུགས་མེད་པ་དེ་དོན་དམ་བདེན་པ་ཡིན་པར་ཐལ། གཟུགས་མེད་ཅེས་པའི་ཤེར་ཕྱིན་གྱི་མདོ་དེ་དོན་དམ་བདེན་པ་དངོས་བསྟན་གྱི་བརྗོད་བྱའི་གཙོ་བོར་བྱས་ནས་སྟོན་པའི་མདོ་ཡིན་པའི་ཕྱིར། དྲང་ངེས་ཀྱི་རྣམ་གཞག་འདི་དག་ནི་ཞིབ་པར་ལོགས་སུ་བཤད་པར་འདོད་པས་འདིར་རྒྱས་པར་མ་སྤྲོས་སོ། །ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་པ་དང་། བརྟེན་པའི་ཆོས་ཀྱི་བྱེ་བྲག་གིས། །ཞེས་པའི་སྐབས་སུ། གང་ལ་རྩོད་པའི་ཡུལ། ཇི་ལྟར་རྩོད་པའི་ཚུལ། དེ་ལ་ལན་འདེབས་པའི་ཚུལ་དང་གསུམ་ལས། དང་པོ་ནི། ལུས་རྣམ་གཞག་ཏུ། ཆོས་ཀྱི་དབྱིངས་ཀྱི་རང་བཞིན་དང་། །ཞེས་སེམས་ཅན་གྱི་སེམས་ཀྱི་ཆོས་དབྱིངས་སངས་རྒྱས་ཀྱི་རིགས་སུ་བསྟན་པ་ལ་རྩོད་དོ། །གཉིས་པ་ནི། སེམས་ཅན་ཐམས་ཅད་སངས་རྒྱས་ཀྱི་རིགས་ཅན་དུ་ཐལ། སེམས་ཅན་ཐམས་ཅད་ལ་ཆོས་དབྱིངས་ཀྱིས་ཁྱབ་པའི་ཕྱིར། འདོད་ན། ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེ་མི་རུང་བར་ཐལ་ལོ་ཞེས་པའོ། །གསུམ་པ་ལ། ཆོས་དབྱིངས་རིགས་སུ་སྒྲུབ་པ་དང་། དེ་ལྟར་ནའང་རིགས་ཅན་གསུམ་དུ་དབྱེ་བ་འཐད་པའི་ཚུལ་གཉིས་ལས། དང་པོ་ནི། ཇི་ལྟར་ཞེས་སོགས་ཀྱི་བསྟན་ཏོ། །གཉིས་པ་ནི། བརྟེན་པའི་ཞེས་སོགས་ཀྱི་བསྟན་ཏོ། །ལུང་དང་པོའི་དོན་ནི། སེམས་ཅན་གྱི་སེམས་ཀྱི་ཆོས་དབྱིངས་རིགས་སུ་འཐད་དེ། ཐེག་པ་གསུམ་གྱི་སྒྲུབ་པ་ཇི་ལྟར་ཉམས་སུ་ལེན་པ་ལྟར་དུ་བྱང་ཆུབ་གསུམ་པོ་སོ་སོར་ཐོབ་པའི་རྒྱུ་བྱེད་པའི་ཕྱིར་ཏེ། ཉན་ཐོས་སློབ་པའི་སེམས་ཀྱི་ཆོས་དབྱིངས་དེ་གང་ཟག་གི་བདག་མེད་ལ་དམིགས་པའི་ཉན་ཐོས་ཀྱི་སྒྲུབ་པའི་རྟེན་གཞི་བྱེད་པའི་སྒོ་ནས་ཉན་ཐོས་ཀྱི་བྱང་ཆུབ་ཐོབ་པའི་རྒྱུ་ཡིན་པའི་ཕྱིར་དང་། དེ་བཞིན་དུ་རང་རྒྱལ་དང་། ཐེག་ཆེན་ལའང་འགྲེའོ། །ཁ་ཅིག ཇི་ལྟར་ཉན་ཐོས་ཀྱི་ཐེག་པ་ལ་སོགས་པའི་བདག་མེད་གསུམ་རྟོགས་པའི་སེམས་ཀྱི་ཆོས་དབྱིངས་ལ་རིམ་གྱིས་དམིགས་པ་དེ་བཞིན་དུ་ཞེས་འཆད་པ་མི་འཐད་དེ། ཉན་ཐོས་ཀྱི་རྒྱུད་ཀྱི་སྒྲུབ་པ་དེས་དེའི་རྒྱུད་ཀྱི་ཆོས་དབྱིངས་ལ་མ་དམིགས་པའི་ཕྱིར་ཏེ། དེས་དེ་མ་རྟོགས་པའི་ཕྱིར། དེ་ལ་ཁོ་ན་རེ། དེས་དེ་ལ་དམིགས་པར་ཐལ། ཉན་ཐོས་ཀྱི་རྒྱུད་ཀྱི་སེམས་ཀྱི་ཆོས་དབྱིངས་དེས་ཉན་ཐོས་ཀྱི་སྒྲུབ་པའི་རྟེན་གཞི་བྱེད་པའི་ཕྱིར་ཟེར་རོ། །འོ་ན་སོ་སོ་སྐྱེ་བོའི་ལས་དང་ཉོན་མོངས་དེས་སོ་སྐྱེའི་རྒྱུད་ཀྱི་སེམས་ཀྱི་ཆོས་དབྱིངས་ལ་དམིགས་པར་ཐལ། དེའི་སེམས་ཀྱི་ཆོས་དབྱིངས་དེས་དེའི་ལས་དང་ཉོན་མོངས་པའི་རྟེན་གཞི་བྱེད་པའི་ཕྱིར་ཏེ། རྒྱུད་བླར། དེ་བཞིན་ཕུང་པོ་ཁམས་དབང་རྣམས། །ཞེས་སོགས་གསུངས་པའི་ཕྱིར། རྩོད་ལན་གཉིས་པའི་དོན་ལ། ལོ་ཆེན་ན་རེ། ལུས་རྣམ་གཞག་ཏུ་རང་བཞིན་གནས་རིགས་ཆོས་དབྱིངས་སུ་བཤད་པ་དང་། རྟོགས་པ་ཡི་ནི་ཆོས་དྲུག་དང་། །ཞེས་པའི་སྐབས་སུ། རྟེན་ཆོས་སྒྲུབ་པ་ལ་བཅུ་གསུམ་གྱི་སྒོ་ནས་རྟེན་རིགས་དེ་ལ་བཅུ་གསུམ་དུ་དབྱེ་བ་མི་འཐད་པར་ཐལ། རང་བཞིན་གནས་རིགས་དེ་ཆོས་དབྱིངས་གང་ཞིག ཆོས་དབྱིངས་ལ་རིགས་མི་འདྲ་བའི་དབྱེ་བ་མེད་པའི་ཕྱིར་ཞེས་པའི་ལན་སྟོན་པར་བྱེད་པ་ལ། རྟེན་པའི་ཆོས་ཀྱི་བྱེ་བྲག་གིས། །ཞེས་པའི་གཞུང་བྱུང་བའི་ཕྱིར་ཞེས་གསུངས་སོ། །མི་འཐད་དེ། གཞུང་འདིས་རྟེན་ཆོས་སྒྲུབ་པ་ལ་བཅུ་གསུམ་ཡོད་པའི་རྒྱུ་མཚན་གྱི་རིགས་དེ་ལ་བཅུ་གསུམ་དུ་དབྱེ་རུང་བར་མ་བསྟན་པར་ཐལ། དེས་རྟེན་ཆོས་སྒྲུབ་པ་ལ་ཐེག་པ་གསུམ་གྱི་སྒྲུབ་པ་གསུམ་ཡོད་པའི་རྒྱུ་མཚན་གྱིས་རིགས་དེ་ལ་གསུམ་དུ་དབྱེ་རུང་བར་བསྟན་པའི་ཕྱིར་ཏེ། འགྲེལ་པར། རྟེན་པའི་ཆོས་ཐེག་པ་གསུམ་གྱིས་བསྡུས་པ་རྟོགས་པར་བྱ་བ་ཐ་དད་པ་ཉིད་ཀྱིས་རྟེན་ཐ་དད་པ་ཉིད་དོ་ཞེས་གསུངས་པའི་ཕྱིར། གལ་ཏེ་རྩ་བའི་དགོངས་པ་ཡིན་ནོ་སྙམ་ན། དེའང་མིན་པར་ཐལ། རྟེན་ཆོས་སྒྲུབ་པའི་སྒོ་ནས་བཅུ་གསུམ་དུ་དབྱེ་བར་མི་རུང་བ་མི་འཐད་པའི་སྒྲུབ་བྱེད་དུ། རྟེན་ཆོས་སྒྲུབ་པའི་སྒོ་ནས་བཅུ་གསུམ་དུ་དབྱེ་རུང་བ་བཀོད་པ་ནི། བསྒྲུབ་བྱ་སྒྲུབ་བྱེད་མཚུངས་པས་མ་གྲུབ་པར་འགྱུར་བའི་ཕྱིར། དེས་ན་རིགས་དེ་ལ་རང་གི་ངོ་བོའི་སྒོ་ནས་དབྱེ་བ་མི་འཐད་ཀྱང་། ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེ་རུང་སྟེ། རྟེན་ཆོས་སྒྲུབ་པའི་སྒོ་ནས་དེ་ལྟར་རུང་བའི་ཕྱིར་ཞེས་པའོ། །ཁ་ཅིག དཔེའི་སྐབས་སུ། སྣོད་གཅིག་ཉིད་སྔ་ཕྱི་རིམ་བཞིན། བཅུད་ཀྱིས་བཀང་བའི་བྱེ་བྲག་གིས་ཐ་དད་པར་གཞག་པ་དེ་བཞིན་དུ། གང་ཟག་གཅིག་ཉིད་ཐེག་པ་གསུམ་ལ་རིམ་གྱིས་འཇུག་པའི་ཚེ་དེའི་ཆོས་ཉིད་ཐེག་པ་གསུམ་གྱི་བྱེ་བྲག་གིས་ཐ་དད་དུ་འབྱེད་པ་ཡིན་ནོ་ཞེས་ཟེར་རོ། །འོ་ན་འདིར་བསྟན་བྱང་སེམས་ཀྱི་རིགས་ཡིན་ན། ཐེག་དམན་གྱི་རིགས་སྔོན་སོང་ཡིན་དགོས་པར་ཐལ། དམ་བཅའ་བྱ་དེའི་ཕྱིར། འདོད་ན། དང་པོ་ཉིད་ནས་ཐེག་ཆེན་ལམ་དུ་ཞུགས་པའི་ཐེག་ཆེན་སྦྱོར་ལམ་པའི་རིགས་ཆོས་ཅན། དེར་ཐལ། དེའི་ཕྱིར། ཁ་ཅིག དཔེ་དེ་ལྟར་ཡིན་ཡང་དོན་དེ་ལྟར་མི་འཐད་དོ་ཞེ་ན། མི་འཐད་དེ། དཔེ་དེ་ལྟར་འདོད་ན། དོན་ཡང་དེ་ལྟར་འདོད་དགོས་པའི་ཕྱིར་རོ། །ཁ་ཅིག འཇིམ་གོང་གཅིག་ལས་གྲུབ་པའི་རྫ་བུམ་གསུམ་ནང་བཅུད་ཀྱིས་བཀང་བའི་བྱེ་བྲག་གིས་ཐ་དད་དུ་འབྱེད་པ་དེ་བཞིན་དུ་ཞེས་བརྗོད་རིགས་ཀྱི། རྫའི་བུམ་པ། ལྷུང་བཟེད། ཁམ་པོར་གསུམ་ནང་བཅུད་ཀྱིས་བཀང་བའི་བྱེ་བྲག་གིས་ཐ་དད་དུ་འབྱེད་པ་མི་འཐད་པར་ཐལ། དེ་གསུམ་ག་ནང་བཅུད་ཀྱིས་མ་ཕྱེ་ཡང་རང་གི་ངོ་བོའི་སྒོ་ནས་ཐ་དད་དུ་དབྱེ་རིགས་པའི་ཕྱིར་ཏེ། གཅིག་རྫ་བུམ། གཅིག་ལྷུང་བཟེད། གཅིག་ཁམ་པོར་ཡིན་པའི་ཕྱིར་ཞེས་ཟེར་རོ། །འོ་ན་འཇིམ་གོང་གཅིག་ལས་གྲུབ་ཅིང་རྫ་བུམ་གསུམ་གཡས་གཡོན་དབུས་དང་གསུམ་དུ་བསྒྲིགས་པའི་ཚེ་ནང་བཅུད་ཀྱི་སྒོ་ནས་མ་ཕྱེ་ཡང་རང་གི་ངོ་བོའི་སྒོ་ནས་དབྱེར་ཡོད་པར་ཐལ། གཅིག་གཡས་མ། གཅིག་གཡོན་མ། གཅིག་དབུ་མ་ཡིན་པའི་ཕྱིར། དེ་ལ་ཁོ་ན་རེ། སྐྱོན་མེད་དེ། དེ་གསུམ་ཀ་རྫ་བུམ་དུ་གཅིག་ཀྱང་ནང་བཅུད་ཀྱིས་བཀང་བའི་བྱེ་བྲག་གིས་ཞོའི་བུམ་པ་སོགས་ཀྱི་སྒོ་ནས་འབྱེད་པ་དཔེར་བྱས་པའི་ཕྱིར་ཞེ་ན། སྔ་མ་ལའང་སྐྱོན་མེད་དེ། དེ་གསུམ་རྫའི་སྣོད་དུ་གཅིག་ཀྱང་། ནང་བཅུད་ཀྱི་བྱེ་བྲག་གིས་ཞོའི་སྣོད་ཞེས་སོགས་སྣོད་ཀྱི་སྒོ་ནས་འབྱེད་པ་དཔེར་བྱས་པའི་ཕྱིར། འཁོར་གསུམ། མདོར་ན། འཇིམ་པ་གཅིག་ལས་གྲུབ་ཅིང་། མེ་ལྕེ་གཅིག་གིས་སོ་བཏང་བ་ཡིན་ན། བུམ་པ་གསུམ་ལྟ་བུ་དབྱིབས་འདྲ་བའམ། བུམ་པ་དང་ལྷུང་བཟེད་ལྟ་བུ་དབྱིབས་མི་འདྲའང་རུང་སྟེ། ནང་བཅུད་མ་བླུགས་པའི་ཚེ་ཞོའི་སྣོད་ལ་སོགས་པའི་དབྱེ་བ་མེད་ཀྱང་། བཅུད་བླུགས་པའི་ཚེ་དབྱེ་བ་ཡོད་པ་དཔེར་བྱས་པ་ཡིན་པས། གཉིས་ཀར་ཡང་འགལ་བ་མེད་པར་རྟོགས་པར་གྱིས་ཤིག་གོ །དམིགས་པ་ཆོས་རྣམས་ཐམས་ཅད་དེ། །ཞེས་པའི་སྐབས་སུ། ཐེག་ཆེན་སྒྲུབ་པའི་དམིགས་པའི་མཚན་ཉིད་ལ་དཔྱད་པ་དང་། མཚན་གཞི་ལ་དཔྱད་པ་གཉིས་ལས་དང་པོ་ལ་དགག་གཞག་སྤང་གསུམ་ལས། དང་པོ་ནི། དེའི་མཚན་ཉིད། ཁ་ཅིག དེའི་སྒྲོ་འདོགས་གཅོད་པར་བྱ་བ་ཞེ་ན། གང་ཟག་གི་བདག་ཆོས་ཅན། དེར་ཐལ། མཚན་ཉིད་དེའི་ཕྱིར་ཏེ། ཐེག་ཆེན་སྒྲུབ་པས་ཁྱོད་དུ་འཛིན་པའི་སྒྲོ་འདོགས་གཅོད་པར་བྱ་བ་ཡིན་པའི་ཕྱིར། མ་གྲུབ་ན། དེར་ཐལ། གང་ཟག་གི་བདག་ཏུ་འཛིན་པའི་སྒྲོ་འདོགས་དེ་ཐེག་ཆེན་སྒྲུབ་པའི་སྤང་བྱ་ཡིན་པའི་ཕྱིར། ཁ་ཅིག ཐེག་ཆེན་སྒྲུབ་པས་རྟོགས་པར་བྱ་བ་ཟེར་ན། དེ་དེའི་མཚན་ཉིད་མིན་པར་ཐལ། དེ་དེའི་གཞལ་བྱའི་མཚན་ཉིད་ཡིན་པའི་ཕྱིར། གཉིས་པ་ནི། ཐེག་ཆེན་སྒྲུབ་པས་སྒྲོ་འདོགས་གཅོད་པར་བྱ་བའི་གཞིའོ། །གསུམ་པ་ལ། ཁ་ཅིག དེ་ཆོས་ཅན། ཆོས་དེ་ཁྱོད་ཡིན་པ་ཡོད་ན། ཆོས་དེ་ཐེག་ཆེན་སྒྲུབ་པའི་དམིགས་པ་ཡིན་པ་ཡོད་པར་ཐལ། ཁྱོད་དེའི་མཚན་ཉིད་ཡིན་པའི་ཕྱིར། འདོད་ན། གང་ཟག་གི་བདག་དེ་ཐེག་ཆེན་སྒྲུབ་པའི་དམིགས་པ་ཡིན་པ་ཡོད་པར་ཐལ། དེ་དེའི་མཚན་ཉིད་ཡིན་པ་ཡོད་པའི་ཕྱིར། མ་གྲུབ་ན། གང་ཟག་གི་བདག་ཐེག་ཆེན་སྒྲུབ་པས་སྒྲོ་འདོགས་གཅད་པར་བྱ་བ་ཆོས་ཅན། ཁྱོད་ཀྱི་གཞི་ཡོད་པར་ཐལ། ཁྱོད་ཡོད་པའི་ཕྱིར་ཞེ་ན། དོན་དམ་པར་དོན་བྱེད་མི་ནུས་པའི་ཆོས་ཆོས་ཅན། གང་ཟག་གི་བདག་དེ་ཁྱོད་ཡིན་པ་ཡོད་ན། དེ་སྤྱི་མཚན་ཡིན་པ་ཡོད་དགོས་པར་ཐལ། ཁྱོད་སྤྱི་མཚན་གྱི་མཚན་ཉིད་ཡིན་པའི་ཕྱིར། འདོད་ན། གང་ཟག་གི་བདག་དེ་ཡིན་པ་ཡོད་པར་ཐལ། དེ་དེའི་མཚན་ཉིད་ཡིན་པ་ཡོད་པའི་ཕྱིར། མ་གྲུབ་ན། གང་ཟག་གི་བདག་དོན་དམ་པར་དོན་བྱེད་མི་ནུས་པ་ཆོས་ཅན། ཁྱོད་ཀྱི་ཆོས་ཡོད་པར་ཐལ། ཁྱོད་ཆོས་ཡིན་པའི་ཕྱིར། འཁོར་གསུམ། གལ་ཏེ་སྤྱི་མཚན་གྱི་མཚན་ཉིད་དུ་ཆོས་གང་དག་གི་དོན་དམ་པར་དོན་བྱེད་མི་ནུས་པར་འཇོག་པས་སྐྱོན་མེད་ཅེས་ཟེར་ན། དེ་ཆོས་ཅན། ཆོས་དེ་ཁྱོད་ཡིན་པ་ཡོད་ན། ཆོས་དེ་ཆོས་དེའི་སྤྱི་མཚན་ཡིན་པ་ཡོད་པར་ཐལ། ཁྱོད་སྤྱི་མཚན་གྱི་མཚན་ཉིད་ཡིན་པའི་ཕྱིར། འདོད་ན། རྟག་པ་ཆོས་ཅན། བུམ་པ་སྤྱི་མཚན་ཡིན་པ་ཡོད་པར་ཐལ། བུམ་པ་ཆོས་གང་དག་གི་དོན་དམ་པར་དོན་བྱེད་མི་ནུས་པ་ཡིན་པ་ཡོད་པའི་ཕྱིར། རྟགས་སོ་སོར་སྒྲུབ་བོ། །གཉིས་པ་མཚན་གཞི་ལ། སེམས་ཙམ་པ་ན་རེ། ཐེག་ཆེན་སྒྲུབ་པས་ཟག་བཅས་ཟག་མེད་ཀྱི་ཆོས་སྣ་ཚོགས་ལ་དམིགས་པ་མེད་དེ། ཆོས་ཉིད་ཡོངས་གྲུབ་གཟུང་འཛིན་གཉིས་མེད་ཀྱི་དེ་བཞིན་ཉིད་ཁོ་ན་ལ་དམིགས་པའི་ཕྱིར་ཟེར་རོ། །འོ་ན། སྒྲོ་འདོགས་གཅིག་ཆོད་ན་སྒྲོ་འདོགས་ཐམས་ཅད་ཅིག་ཅར་དུ་ཆོད་པས་ཁྱབ་པར་ཐལ། ཐེག་ཆེན་སྒྲུབ་པས་ཆོས་ཉིད་ཁོ་ན་ལ་དམིགས་པ་གང་ཞིག ཆོས་ཉིད་ལ་རིགས་མི་འདྲ་བའི་དབྱེ་བ་མེད་པའི་ཕྱིར། འདོད་ན། སྒྲོ་འདོགས་རིམ་གྱིས་གཅད་པའི་སྒོ་ནས་དམིགས་པ་དག་པ་གོང་ནས་གོང་དུ་ཁྱད་པར་དུ་འགྱུར་བ་མེད་པར་ཐལ། འདོད་པ་དེའི་ཕྱིར། གལ་ཏེ་ཡུལ་སྟོང་ཉིད་རང་བཞིན་གྱི་དྲི་མས་རྣམ་པར་དག་ཀྱང་། ཆོས་ལ་དྲི་མ་རིམ་བཞིན་དུ་བསལ་བའི་སྒོ་ནས་དམིགས་པ་དག་པ་གོང་ནས་གོང་དུ་ཁྱད་པར་དུ་འགྱུར་བ་ཡོད་དེ། དབུས་མཐའ་ལས། ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །ཅེས་གསུངས་པའི་ཕྱིར་ཞེ་ན། འོ་ན་གཉེན་པོའི་ཕྱོགས་ལ་མངོན་ཞེན་གྱི་དྲི་མ་སྤང་དུ་མེད་པར་ཐལ། གཉེན་པོ་བདེན་པར་གྲུབ་པའི་ཕྱིར། འདོད་ན། མི་མཐུན་ཕྱོགས་ལ་མངོན་ཞེན་གྱི་དྲི་མ་སྤང་དུ་མེད་པར་ཐལ་ལོ། །ཁྱབ་སྟེ། གཉེན་པོ་ལ་མངོན་ཞེན་གྱི་དྲི་མ་ཡོད་ན། གཉེན་པོ་འདི་སྤང་བྱ་འདིའི་གཉེན་པོའོ་སྙམ་དུ་མི་མཐུན་ཕྱོགས་ལའང་མངོན་པར་ཞེན་པ་འབྱུང་བའི་ཕྱིར། གཞན་ཡང་སངས་རྒྱས་སའི་དག་པ་དེ་དག་པ་ཕྱོགས་གཅིག་ཡིན་པར་ཐལ། དེ་མི་མཐུན་ཕྱོགས་ལ་མངོན་པར་ཞེན་པའི་དྲི་མ་ཁོ་ན་སྤངས་པའི་རབ་ཏུ་ཕྱེ་བའི་དག་པ་ཡིན་པའི་ཕྱིར། དེ་ཡང་དགེ་ལ་སོགས་པ་ཡིན། །ཞེས་པའི་སྐབས་སུ། དགེ་སོགས་གསུམ་གྱི་མཚན་ཉིད་ལ་དཔྱད། མཚན་གཞི་ལ་དཔྱད་པ་གཉིས་ལས། དང་པོ་ལ། དགག་གཞག་སྤང་གསུམ་ལས། དང་པོ་ལ་ཁ་ཅིག རིམ་བཞིན་དུ་ལུང་དུ་བསྟན་པ་གང་ཞིག རང་གི་རྣམ་སྨིན་གྱི་འབྲས་བུ་ཡིད་དུ་འོང་བ་འབྱིན་བྱེད་དང་། ཡིད་དུ་མི་འོང་བ་འབྱིན་བྱེད་དང་། དགེ་མི་དགེ་གང་རུང་དུ་མ་གྲུབ་པའི་ཆོས་ཟེར་རོ། །རང་གི་སྐད་ཅིག་གཉིས་པར་ཁོང་ཁྲོས་འཇོམས་པར་ངེས་པའི་དགེ་བ་ཆོས་ཅན། ཕྱི་ཟུར་དེར་ཐལ། དགེ་བ་ཡིན་པའི་ཕྱིར། འདོད་ན། དེ་མིན་པར་ཐལ། ཆོས་ཅན་དེའི་ཕྱིར། ཡང་རང་གི་སྐད་ཅིག་གཉིས་པར་བཤགས་པས་འདག་པར་ངེས་པའི་མི་དགེ་བ་ཆོས་ཅན། ཕྱི་ཟུར་དེར་ཐལ། མི་དགེ་བ་ཡིན་པའི་ཕྱིར། འདོད་ན། མི་དགེ་བ་བཤགས་པ་ལ་དགོས་པ་མེད་པར་ཐལ་ལོ། །ཁ་ཅིག དང་པོ་གཉིས་ཀྱི་མཚན་ཉིད་རིམ་བཞིན། སྐྱེས་བུ་དམ་པས་བླང་བར་བྱ་བ་དང་། དེས་དོར་བར་བྱ་བ་ཞེས་ཟེར་ན། སངས་རྒྱས་འཕགས་པ་ཆོས་ཅན། དགེ་བར་ཐལ། མཚན་ཉིད་དེའི་ཕྱིར་ཏེ། བྱང་སེམས་འཕགས་པ་རྣམས་ཀྱིས་བླང་བར་བྱ་བ་ཡིན་པའི་ཕྱིར་ཏེ། དེའི་ཐོབ་བྱ་མཐར་ཐུག་ཡིན་པའི་ཕྱིར། བྱང་སེམས་འཕགས་པའི་རྒྱུད་ཀྱི་ཤེས་སྒྲིབ་ཆོས་ཅན། མི་དགེ་བར་ཐལ། མཚན་ཉིད་དེའི་ཕྱིར་ཏེ། བྱང་འཕགས་རྣམས་ཀྱི་དོར་བྱ་ཡིན་པའི་ཕྱིར། ཁ་ཅིག སྐྱེས་བུ་དམ་པ་རྣམས་ཀྱིས་བསྔགས་པར་འོས་པ་དང་། དེས་སྨད་པར་འོས་པ་ཞེ་ན། མོས་པ་སྒོམ་ལམ་ལ་གནས་པའི་བྱང་སེམས་ཆོས་ཅན། དགེ་བར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། སངས་རྒྱས་འཕགས་པས་དེ་ལ་བསྟོད་བཀུར་བསྔགས་གསུམ་མཛད་པའི་ཕྱིར། ཕམ་པ་ཕོག་པའི་གང་ཟག་ཆོས་ཅན། མི་དགེ་བར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། སངས་རྒྱས་འཕགས་པས་དེ་ལ་རྣམ་གྲངས་དུ་མའི་སྒོ་ནས་སྨད་པའི་ཕྱིར། ཁ་ཅིག ལུང་དུ་བསྟན་པ་གང་ཞིག་ཅེས་པ་མཚན་ཉིད་ལ་བསྣོན་པ་ཡིན་ནོ་ཞེ་ན། ཐེག་དམན་གྱི་བསམས་པས་ཀུན་ནས་བསླངས་པའི་དགེ་བ་ཆོས་ཅན། མི་དགེ་བར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། མདོ་སྡུད་པ་ལས། གལ་ཏེ་བསྐལ་བ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་དགྲ་བཅོམ་རང་རྒྱལ་ཉིད་དུ་སེམས་བསྐྱེད་ན། །དེ་ནི་ཚུལ་ཁྲིམས་སྐྱོན་འབྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་གསུངས་པའི་ཕྱིར། གཉིས་པ་ནི། རིམ་བཞིན་ལུང་དུ་བསྟན་པ་གང་ཞིག རྣམ་པར་དཀར་བའི་ངོ་བོར་གནས་པ་དང་། དེ་གང་ཞིག་རྣམ་པར་གནག་པའི་ངོ་བོར་གནས་པ་དང་། དགེ་མི་དགེ་གང་རུང་དུ་མ་གྲུབ་པའི་ཆོས། གསུམ་པ་ལ། ཁ་ཅིག སངས་རྒྱས་འཕགས་པ་ཆོས་ཅན། དགེ་བར་ཐལ། མཚན་ཉིད་དེའི་ཕྱིར། དང་པོ་དེར་ཐལ། ལུང་རྣམ་དག་ཏུ་བསྟན་པའི་ཕྱིར་ཏེ། དེའི་བསྟན་དོན་ཡིན་པའི་ཕྱིར་ཞེ་ན། རྟགས་སྒྲུབ་སྔ་མ་ལ་ཟག་མེད་བར་ཆད་མེད་ལམ་གྱི་འབྲས་བུར་གྱུར་པའི་གང་ཟག་ཆོས་ཅན། དེ་དགེ་སྦྱོང་ཚུལ་གྱི་འབྲས་བུ་ཡིན་པར་ཐལ། ཟག་མེད་བར་ཆད་མེད་ལམ་གྱི་འབྲས་བུ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། གང་ཟག་ཡིན་པའི་ཕྱིར། གཉིས་པ་མཚན་གཞི་ལ། ཀུན་བཏུས་ལས། དགེ་བ་ལ་ངོ་བོ་ཉིད་ཀྱི་དགེ་བ་སོགས་བཅུ་གསུམ། མི་དགེ་བ་ལ་ངོ་བོ་ཉིད་ཀྱི་མི་དགེ་བ་སོགས་བཅུ་གཉིས། ལུང་མ་བསྟན་ལ་ངོ་བོ་ཉིད་ཀྱི་ལུང་མ་བསྟན་སོགས་བཅུར་ཡོད་དེ། མཛོད་ལས། གསུམ་པོ་དེ་རེ་རེ་ལའང་བཞི་བཞི་ཡོད་དེ། ཐར་པ་མྱ་ངན་ལས་འདས་པ་དོན་དམ་པའི་དགེ་བ། དགེ་བའི་རྩ་བ་གསུམ། ངོ་ཚ་ཤེས་པ། ཁྲེལ་ཡོད་པ་ལྔ་ནི། བདག་ཉིད་ཀྱི་དགེ་བ། དེ་དག་དང་མཚུངས་ལྡན་གྱི་སེམས་སེམས་བྱུང་རྣམས་ནི་མཚུངས་ལྡན་གྱི་དགེ་བ། དེ་དག་གིས་ཀུན་ནས་བསླངས་པའི་ལུས་ངག་གི་ལས་རྣམས་ནི་ཀུན་སློང་གི་དགེ་བའོ། །འཁོར་བ་ཐམས་ཅད་དོན་དམ་པའི་མི་དགེ་བ། མི་དགེ་བའི་རྩ་བ་གསུམ། ངོ་ཚ་མེད་པ། ཁྲེལ་མེད་པ་ལྔ་ནི་བདག་ཉིད་ཀྱི་མི་དགེ་བ། གཞན་གཉིས་འགྲེ། ནམ་མཁའ་དང་། སོ་སོར་བཏགས་མིན་གྱི་འགོག་པ་གཉིས་དོན་དམ་པའི་ལུང་མ་བསྟན། འཇིག་ལྟ་དང་། མཐར་འཛིན་གྱི་ལྟ་བ་གཉིས་ནི་བདག་ཉིད་ཀྱི་ལུང་མ་བསྟན་ཏོ། །གཞན་གཉིས་ལའང་འགྲེའོ། །དེ་དག་དངོས་བཏགས་གང་ཡིན་དཔྱད་ན། དོན་དམ་པའི་དགེ་མི་དགེ་གཉིས་བཏགས་པ་བ། གཞན་རྣམས་མཚན་ཉིད་པར་འདོད་དོ། །ཀུན་བཏུས་ལས་གསུངས་པའི་མཚན་ཉིད་ནི་འདིར་མ་སྤྲོས་སོ། །སེམས་ཅན་ཀུན་མཆོག་ཉིད་སེམས་དང་། །ཞེས་པའི་སྐབས་སུ། མཚན་ཉིད། དབྱེ་བ། ས་མཚམས་དང་གསུམ་ལས། དང་པོ་ལ་དགག་གཞག་གཉིས། དང་པོ་ནི། ཁ་ཅིག ཐེག་ཆེན་སྒྲུབ་པའི་ཐོབ་བྱ་མཐར་ཐུག་ཅེ་ན། ལོངས་སྐུ་ཆོས་ཅན། དེར་ཐལ། མཚན་ཉིད་དེའི་ཕྱིར། རྟགས་ཁྱབ་ཁས་བླངས། འདོད་ན། དེ་མིན་པར་ཐལ། ཆེན་པོ་གསུམ་གང་རུང་མིན་པའི་ཕྱིར། ཁ་ཅིག ཐེག་ཆེན་སྒྲུབ་པ་ཉམས་སུ་ལེན་པའི་གང་ཟག་གི་རྒྱུད་ལ་འབྱུང་བར་འགྱུར་བའི་ཐོབ་བྱ་མཐར་ཐུག་ཅེ་ན། ཐེག་ཆེན་སྒྲུབ་པ་ཉམས་སུ་བླངས་པ་ལ་སྐྱེས་ཟིན་པའི་སེམས་ཆེན་པོ་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཆོས་ཅན་ཡིན་པའི་ཕྱིར། གཉིས་པ་ནི། གང་གི་དབང་དུ་བྱས་ནས་ཐེག་ཆེན་གྱི་སྒྲུབ་པ་བྱེད་པར་འགྱུར་བའི་མཐར་ཐུག་གི་སྤངས་རྟོགས་གང་རུང་གིས་བསྡུས་པའོ། །གཉིས་པ་ལ། མཚན་ཉིད་དང་། མཚན་གཞི་གཉིས་ལས། དང་པོ་ལ་སེམས་ཆེན་པོ་སོགས་གསུམ་གྱི་མཚན་ཉིད་རིམ་བཞིན། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སེམས་བསྐྱེད། དེ་ལྟར་བྱེད་པའི་སྤངས་པ་དང་། དེ་ལྟར་བྱེད་པའི་རྟོགས་པའོ། །དེ་ལ་ཁ་ཅིག སངས་རྒྱས་སའི་སེམས་བསྐྱེད་ཆོས་ཅན། མཚན་ཉིད་སྔ་མ་དེར་ཐལ། མཚོན་བྱ་དེའི་ཕྱིར། འདོད་ན། དེ་རྒྱུད་ལ་ལྡན་པའི་གང་ཟག་ཆོས་ཅན། ཁྱོད་སེམས་ཅན་ཡིན་པར་ཐལ། ཁྱོད་སེམས་ཅན་ཀུན་གྱི་ནང་ནས་མཆོག་ཡིན་པའི་ཕྱིར་ཞེ་ན། དེ་ཆོས་ཅན། རྐང་གཉིས་ཡིན་པར་ཐལ། རྐང་གཉིས་ཀྱི་ནང་ནས་མཆོག་ཡིན་པའི་ཕྱིར། ཁོ་ན་རེ། སངས་རྒྱས་སའི་སེམས་བསྐྱེད་ཆོས་ཅན། ཁྱོད་རྒྱུད་ལྡན་གྱི་གང་ཟག་ཡིན་ན། དེ་ཀུན་གྱི་ནང་ནས་མཆོག་ཡིན་དགོས་པར་ཐལ། ཁྱོད་སེམས་ཆེན་པོའི་མཚན་ཉིད་ཡིན་པའི་ཕྱིར། འདོད་ན། གང་ཟག་ཆོས་ཅན། དེར་ཐལ། དེའི་ཕྱིར་ཏེ། ཁྱོད་གང་ཟག་གང་ཞིག དེ་ཁྱོད་ཀྱི་ཤེས་པ་ཡིན་པའི་ཕྱིར་ཞེ་ན། རྩ་བ་ལ་མ་ཁྱབ་སྟེ། ཐེག་ཆེན་སྒྲུབ་པ་དེ་སངས་རྒྱས་འཐོབ་པར་བྱེད་པའི་ཐབས་མ་ཡིན་པར་ཐལ། དེ་རང་རྒྱུད་ལྡན་གྱི་གང་ཟག་སངས་རྒྱས་འཐོབ་པར་བྱེད་པའི་ཐབས་མིན་པའི་ཕྱིར། མ་གྲུབ་ན། རེ་ཞིག་ཁས་བླངས། ཐེག་ཆེན་སྒྲུབ་པ་ཆོས་ཅན། ཁྱོད་རྒྱུད་ལྡན་གྱི་གང་ཟག་ཡིན་ན། སངས་རྒྱས་འཐོབ་པར་བྱེད་དགོས་པར་ཐལ། མ་གྲུབ་པ་དེའི་ཕྱིར། འདོད་ན། གང་ཟག་ཆོས་ཅན། དེར་ཐལ། དེའི་ཕྱིར། རིམ་བཞིན་འཁོར་གསུམ་ཨེ་བྱུང་། གཉིས་པ་ནི། སངས་རྒྱས་སའི་སེམས་བསྐྱེད་དེ་སེམས་ཆེན་པོ་ཡིན་ཏེ། མདོ་ལས། རྡོ་རྗེ་ལྟ་བུའི་སེམས། རླབས་པོ་ཆེའི་སེམས། མི་སྒུལ་བའི་སེམས། ཕན་བདེའི། ཆོས་ལ་ཀུན་དགའ་བའི། རྣལ་འབྱོར་ལ་བརྩོན་པའི། རྣམ་པར་བྱང་བ་ཐམས་ཅད་ལ་དམིགས་ཏེ་སེམས་ཅན་ཀུན་གྱི་མཆོག་ཉིད་དུ་བྱེད་པའི་སེམས་བསྐྱེད་ཅེས་གསུངས་པའི་ཕྱིར། སངས་རྒྱས་སའི་སྒྲིབ་པ་སྤངས་པའི་སྤངས་པ་དེ་སྤོང་བ་ཆེན་པོ་ཡིན་ཏེ། མདོ་ལས། བདག་ཏུ་ལྟ་བ་དང་ཞེས་པ་ནས། ལྟ་བའི་རྣམ་པ་དེ་དག་སྤངས་པའི་ཕྱིར་ཆོས་སྟོན་ཏོ་ཞེས་དང་། དེའི་བདག་མེད་གཉིས་རྟོགས་པ་དེ་རྟོགས་པ་ཆེན་པོ་ཡིན་ཏེ། མདོར། ཐམས་ཅད་མཁྱེན་པའི་སེམས། བྱང་ཆུབ་ཀྱི་སེམས། ཟག་པ་མེད་པའི་སེམས། མཉམ་པ་མེད་པའི་སེམས། མི་མཉམ་པ་དང་མཉམ་པའི་སེམས། ཉན་ཐོས་དང་། རང་སངས་རྒྱས་དང་ཐུན་མོང་མིན་པའི་སེམས་ཞེས་གསུངས་པའི་ཕྱིར། དེ་ལ་དང་པོ་བྱང་ཆུབ་ཀྱི་རང་བཞིན། བར་པ་བཞི་ཡེ་ཤེས་བཞི། ཐ་མ་ཐམས་ཅད་ཀྱི་ཐུན་མོང་མིན་པར་འགྲེལ་ཆེན་ནས་གསུངས་སོ། །དེ་ལ་ཁ་ཅིག མདོ་ལས་དངོས་སུ་གསུངས་པའི་སེམས་བསྐྱེད་དྲུག་པོ་དེ། སེམས་ཆེན་པོའི་མཚན་གཞི་མིན་པར་ཐལ། དེ་བྱང་ཆུབ་སེམས་དཔའི་རྒྱུད་ལ་ཡོད་པའི་ཕྱིར་ཏེ། མདོ་ལས། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་རྡོ་རྗེ་ལྟ་བུའི་སེམས་བསྐྱེད་དེ་སེམས་ཅན་གྱི་ཕུང་པོ་ཆེན་པོ་དང་། སེམས་ཅན་གྱི་སྡེ་ཆེན་པོའི་མཆོག་ཏུ་འགྱུར་རོ་ཞེས་དང་། དེའི་འགྲེལ་པར། ཉིར་སྣང་ལས། གང་དག་གི་སེམས་ཅན་ཐམས་ཅད་ཀྱི་མཆོག་ཉིད་དུ་བྱེད་པར་འགྱུར་བའི་ཆོས་དེ་དག་ཀྱང་གང་ཞེ་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་རྡོ་རྗེ་ལྟ་བུའི་སེམས་བསྐྱེད་དེ་སེམས་ཅན་ཐམས་ཅད་ཀྱི་མཆོག་ཉིད་དུ་འགྱུར་བར་བྱའོ་ཞེས་གསུངས་པ་ཡིན་ནོ་ཞེས་ཟེར་རོ། །འོ་ན་རྡོ་རྗེ་ལྟ་བུའི་སེམས་བསྐྱེད་པར་བྱེད་པ་ཡིན་ན་དེ་རྒྱུད་ལྡན་ཡིན་དགོས་པར་ཐལ། མདོའི་བསྟན་དོན་གྲུབ་ན། བྱང་སེམས་ཀྱི་རྒྱུད་ལ་རྡོ་རྗེ་ལྟ་བུའི་སེམས་ཡོད་དགོས་པའི་ཕྱིར། འདོད་ན། བྱང་སེམས་སྦྱོར་ལམ་པ་ཆོས་ཅན། དོན་དམ་བྱང་ཆུབ་ཀྱི་སེམས་རྒྱུད་ལྡན་ཡིན་པར་ཐལ། དེ་སེམས་བསྐྱེད་པར་བྱེད་པ་ཡིན་པའི་ཕྱིར། ཡང་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པར་འགྱུར་བའི་སེམས་བསྐྱེད་ཡིན་ན་བྱང་ཆུབ་སེམས་དཔའི་རྒྱུད་ལ་ཡོད་དགོས་པར་ཐལ། ཉིར་སྣང་གི་ལུང་དེའི་བསྟན་དོན་གྲུབ་ན། བྱང་སེམས་ཀྱི་རྒྱུད་ལ་རྡོ་རྗེ་ལྟ་བུའི་སེམས་བསྐྱེད་ཡོད་དགོས་པའི་ཕྱིར། འདོད་ན། སེམས་ཆེན་པོ་ཆོས་ཅན། དེར་ཐལ། དེའི་ཕྱིར། དེས་ན་མདོ་འགྲེལ་དེ་དག་གི་དོན་ནི། བྱང་སེམས་ཀྱི་རྡོ་རྗེ་ལྟ་བུའི་སེམས་བསྐྱེད་ལ་སོགས་པ་དྲུག་པོ་དེ་བསྐྱེད་དེ་ནམ་ཞིག་སྐྱེས་པ་ན་སེམས་དེ་དག་རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཏུ་བྱེད་པ་ཡིན་ནོ་ཞེས་པའི་དོན་ཏེ། རྩ་བར། སེམས་ཅན་ཀུན་མཆོག་ཉིད་སེམས་དང་། །ཞེས་པས་བསྟན་ཏོ། །གསུམ་པ་ས་མཚམས་ལ། འཕགས་གྲོལ་གྱིས། ཆེན་པོ་གསུམ་རེ་རེ་ལའང་གནས་སྐབས་དང་མཐར་ཐུག་གི་དབང་དུ་བྱས་པ་གཉིས་གཉིས་ཡོད་པའི་དང་པོ་ཐེག་ཆེན་གྱི་ཚོགས་ལམ་ན་ཡོད་ལ། ཕྱི་མ་སངས་རྒྱས་ཀྱི་ས་ཁོ་ནར་ཡོད་དོ་ཞེས་གསུངས་སོ། །ཆེད་དུ་བྱ་བ་མཚན་ཉིད་པ་ནི་ཕྱི་མ་ཁོ་ན་སྟེ། ཆེན་པོ་གསུམ་གང་རུང་ཡིན་ན། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་ཆོས་ཡིན་དགོས་པའི་ཕྱིར་རོ། །དེ་ལ་ཁ་ཅིག གཞན་དོན་ཆོས་ཅན། སངས་རྒྱས་ས་ཁོ་ནར་ཡོད་པར་ཐལ། ཐེག་ཆེན་སྒྲུབ་པའི་ཆེད་དུ་བྱ་བ་ཡིན་པའི་ཕྱིར་ཏེ། ཐེག་ཆེན་སེམས་བསྐྱེད་ཀྱི་ཆེད་དུ་བྱ་བ་ཡིན་པའི་ཕྱིར་ཏེ། དེའི་ཆེད་དུ་བྱ་བའི་དམིགས་པ་ཡིན་པའི་ཕྱིར་ཞེ་ན། རྟགས་སྒྲུབ་སྔ་མ་ལ། རྣམ་མཁྱེན་ཆོས་ཅན། ཚོགས་སྒྲུབ་ཀྱིས་བསྒྲུབ་པར་བྱ་བའི་ཚོགས་ཡིན་པར་ཐལ། འཇུག་སྒྲུབ་ཀྱིས་འཇུག་པར་བྱ་བའི་ཐེག་ཆེན་ཡིན་པའི་ཕྱིར། ཁྱབ་པ་ཁས། ཡང་རྣམ་མཁྱེན་རྗེས་མཐུན་པ་ཡིན་ན། རྣམ་མཁྱེན་ཡིན་དགོས་པར་ཐལ། ཐེག་ཆེན་སྒྲུབ་པའི་གནས་སྐབས་ཀྱི་ཆེད་དུ་བྱ་བ་ཡིན་ན། ཐེག་ཆེན་སྒྲུབ་པའི་ཆེད་དུ་བྱ་བ་ཡིན་དགོས་པའི་ཕྱིར། དེ་ལྟར་སྒྲུབ་པའི་རྟེན་དུ་གྱུར་པ། ཞེས་པའི་སྐབས་སུ། ཐེག་ཆེན་སྒྲུབ་པའི་མཐའ་དཔྱད་པ་ལ་མཚན་ཉིད། དབྱེ་བ། གྲངས་ངེས། སྒྲ་བཤད་པ་དང་བཞིའོ། །དང་པོ་ནི། ཐེག་ཆེན་སེམས་བསྐྱེད་ལ་གནས་ནས་རང་བཞིན་གྱི་དོན་ལ་བརྩོན་ཞིང་། རང་འབྲས་བྱང་ཆུབ་ཆེན་པོ་སྒྲུབ་པར་བྱེད་པའི་སེམས་དཔའི་ཉམས་ལེན་ཏེ། རྒྱན་ལས། གནས་རྩོམ་འབྲས་བུའི་འབྱུང་བ་ཆེ་བདག་ཉིད། །རྒྱལ་སྲས་རྣམས་ཀྱི་སྒྲུབ་པ་ཡིན་པར་འདོད། །རྟག་ཏུ་ལེན་པ་ཆེ་དང་བཟོད་པ་ཆེ། །དོན་ཆེན་ཡང་དག་སྒྲུབ་པའི་བྱ་བ་བྱེད། །ཅེས་སོ། །གཉིས་པ་ལ་གཉིས་སུ་ཕྱེ་བ་དང་། བཞིར་ཕྱེ་བ་གཉིས། དང་པོ་ནི། སྤྱིའི་སྒྲུབ་པ་དང་། བྱེ་བྲག་གི་སྒྲུབ་པ་ཞེས་པའམ། མཁྱེན་གསུམ་ཡུལ་གྱི་སྒྲུབ་པ་དང་། ཡུལ་ཅན་སྦྱོར་བཞིའི་སྒྲུབ་པ་གཉིས་སོ། །འདི་གཉིས་ཀྱི་ཁྱད་པར་ལ། ཨར་ན་རེ། རིམ་བཞིན་ཐེག་ཆེན་སྒྲུབ་པ་གང་ཞིག ཕྱིན་དྲུག་ལ་སྤྱོད་པའི་ཉམས་ལེན་གྱིས་མ་ཟིན་པ་དང་ཟིན་པ་དེ། སྤྱིའི་སྒྲུབ་པ་དང་བྱེ་བྲག་གི་སྒྲུབ་པའི་མཚན་ཉིད་ཡིན་ཟེར་རོ། །འོ་ན་ཚོགས་ལམ་པའི་རྒྱུད་ཀྱི་མཁྱེན་གསུམ་ཡུལ་གྱི་སྒྲུབ་པ་དེ་ཆོས་ཅན། ཟུར་ཕྱི་མར་ཐལ། སྤྱིའི་སྒྲུབ་པ་ཡིན་པའི་ཕྱིར། འདོད་མི་ནུས་ཏེ། གོ་སྒྲུབ་ཡིན་པའི་ཕྱིར་ཏེ། ཐེག་ཆེན་སྒྲུབ་པ་ཡིན་པའི་ཕྱིར། དར་ཊཱིཀ་པ་ན་རེ། འདི་གཉིས་ངོ་བོ་གཅིག་ལ་བསྟན་ཚུལ་གྱི་སྒོ་ནས་ཕྱེ་བ་ཙམ་ཡིན་ཏེ། སྐབས་དང་པོ་གསུམ་དུ་བསྟན་པའི་ཐེག་ཆེན་སྒྲུབ་པ་ལ། སྤྱིའི་སྒྲུབ་པ་ཞེས་བྱ་སྟེ། དེ་ལ་ཕྱིན་དྲུག་ལ་སྤྱོད་པའི་ཉམས་ལེན་གྱི་ལྡོག་པ་ནས་མ་བསྟན་པར་སྤྱིའི་དགེ་བའི་ཆོས་ཀྱི་རྟེན་ཙམ་དུ་བསྟན་པའི་ཕྱིར་དང་། སྐབས་བར་པ་བཞི་ནས་བསྟན་པའི་སྒྲུབ་པ་ལ་བྱེ་བྲག་སྒྲུབ་པ་ཞེས་བྱ་སྟེ། དེ་ཕྱིན་དྲུག་ལ་སྤྱོད་པའི་ཉམས་ལེན་གྱི་ལྡོག་པ་ནས་བསྟན་པའི་ཕྱིར་ཏེ། སྐབས་བཞི་པར། སྦྱིན་དང་ཚུལ་ཁྲིམས་སོགས་སྤྱོད་པས། །ཞེས་དང་། ལྔ་པར། སྦྱིན་པ་ལ་སོགས་རེ་རེས་ནི། །ཞེས་དང་། དྲུག་པར། སྦྱིན་པ་ཤེས་རབ་བར་དག་དང་། །ཞེས་དང་། བདུན་པར། སྦྱིན་པ་ལ་སོགས་རེ་རེས་ཀྱང་། །ཞེས་གསུངས་པའི་ཕྱིར་ཞེས་ཟེར་རོ། །འོ་ན་སྐབས་དང་པོ་གསུམ་ནས་བསྟན་པའི་ཐེག་ཆེན་གྱི་སྒྲུབ་པ་དེ་ཡང་ཕྱིན་དྲུག་ཉམས་སུ་ལེན་པའི་ལྡོག་པ་ནས་བསྟན་པར་ཐལ། སྐབས་དང་པོར། དེ་དག་སོ་སོར་སྦྱིན་ལ་སོགས། །ཞེས་དང་། སྦྱིན་དང་ཚུལ་ཁྲིམས་བཟོད་བརྩོན་འགྲུས། །ཞེས་དང་། གཉིས་པར། སངས་རྒྱས་བསྟན་དང་སྦྱིན་སོགས་དང་། །ཞེས་དང་། གསུམ་པར། སྦྱིན་ལ་སོགས་པ་ངར་འཛིན་མེད། །ཅེས་གསུངས་པའི་ཕྱིར་རོ། །དེས་ན་རང་ལུགས་ནི་སྐབས་དང་པོ་གསུམ་ནས་བསྟན་པའི་བསྒྲུབ་པ་ལ་སྤྱིའི་སྒྲུབ་པ་དང་ཡུལ་གྱི་སྒྲུབ་པ་ཞེས་བྱ་སྟེ། དེ་ཐོས་བསམ་གྱིས་གཏན་ལ་ཕབ་པར་བྱ་བའི་ཡུལ་གྱི་ལྡོག་པ་ནས་བསྟན་པའི་ཕྱིར། སྐབས་བར་པ་གསུམ་ནས་བསྟན་པའི་སྒྲུབ་པ་ལ་བྱེ་བྲག་གི་སྒྲུབ་པ་དང་། ཡུལ་ཅན་གྱི་སྒྲུབ་པ་ཞེས་བྱ་སྟེ། དེ་ཉམས་ལེན་གྱི་སྦྱོར་བའི་ལྡོག་པ་ནས་བསྟན་པའི་ཕྱིར་ཏེ། ཡུལ་ནི་རྣམ་པ་གསུམ་པོ་རྒྱུ། །སྦྱོར་བ་བཞི་ཡི་བདག་ཉིད་དང་། །ཞེས་གསུངས་པའི་ཕྱིར། ཆོས་སྐུ་ལས་ནི་སྒྲུབ་པ་མ་བསྟན་ཏེ། དེ་འབྲས་བུའི་ལྡོག་པ་ནས་བསྟན་པའི་ཕྱིར། གཉིས་པ་ནི། གོ་སྒྲུབ་སོགས་བཞིའོ། །གསུམ་པ་ནི། དེ་ལ་བཞིར་གྲངས་ངེས་ཏེ། ངོ་བོ་བསམ་སྦྱོར་གཉིས་སུ་ངེས་པས་སྒྲུབ་པ་དང་པོ་གཉིས་གཞག ཐོབ་བྱ་གནས་སྐབས་མཐར་ཐུག་གཉིས་སུ་ངེས་པས་དེ་སྒྲུབ་པ་ལ་གཙོ་ཆེ་བའི་དབང་དུ་བྱས་ཏེ། ཕྱི་མ་གཉིས་གཞག་པའི་ཕྱིར། བཞི་པ་ནི། མི་མཐུན་ཕྱོགས་ལས་རྒྱལ་བའི་ཕྱིར་དུ་ཕར་ཕྱིན་དྲུག་ཉམས་སུ་ལེན་པའི་གོ་གྱོན་པའི་སྒྲུབ་པ་ཡིན་པས་ན་གོ་སྒྲུབ་བོ། །རྒྱུ་དང་འབྲས་བུའི་ཐེག་པ་ལ་འཇུག་པར་བྱེད་པའི་སྒྲུབ་པ་ཡིན་པས་ན་འཇུག་སྒྲུབ་བོ། །ཚོགས་གཉིས་ཀྱི་དཔུང་གསོག་པར་བྱེད་པས་ན་ཚོགས་སྒྲུབ་བོ། །འབྲས་བུ་མཐར་ཐུག་གི་གནས་སུ་ངེས་པར་འབྱིན་པར་བྱེད་པའི་སྒྲུབ་པ་ཡིན་པས་ན་ངེས་འབྱུང་སྒྲུབ་པའོ། །དེ་ལྟར་ཇི་ལྟ་བ་བཞིན་དུ། ཞེས་པའི་སྐབས་སུ། སྒྲུབ་པ་བཞིའི་ས་མཚམས་ལ། དགག་གཞག་གཉིས་ལས། དང་པོ་ནི། སྔ་རབས་པ་ཁ་ཅིག སྒྲུབ་པ་བཞིའི་མ་མཐའི་ས་མཚམས་ཐེག་ཆེན་སྦྱོར་ལམ། མཐོང་ལམ། སྒོམ་ལམ། ཁྱད་པར་ཅན་གྱི་ལམ་ནས་རིམ་བཞིན་འཇོག་ཟེར་རོ། །མི་འཐད་དེ། ཐེག་ཆེན་གྱི་ཚོགས་ལམ་ན་གོ་སྒྲུབ་ཡོད་པའི་ཕྱིར་དང་། སྦྱོར་ལམ་ན་འཇུག་སྒྲུབ་ཡོད་པའི་ཕྱིར་དང་། མཐོང་ལམ་ན་ཚོགས་སྒྲུབ་ཡོད་པའི་ཕྱིར་རོ། །གལ་ཏེ་རྟགས་དང་པོ་མ་གྲུབ་སྟེ། ཐེག་ཆེན་གྱི་ཚོགས་ལམ་ན་ཐེག་ཆེན་གྱི་སྦྱོར་ལམ་དུ་ཐོབ་པ་ཙམ་གྱི་གོ་སྒྲུབ་མེད་པའི་ཕྱིར་ཞེ་ན། འོ་ན་སྦྱོར་ལམ་ནའང་དེ་མེད་པར་ཐལ། མཐོང་ལམ་དུ་ཐོབ་པ་ལྟར་གྱི་གོ་སྒྲུབ་མེད་པའི་ཕྱིར། དར་ཊཱིཀ་པ་ན་རེ། གཞུང་འདིས་སྒྲུབ་པ་བཞིའི་ས་མཚམས་མ་བསྟན་ཏེ། དེ་བསྟན་ན་སྒྲུབ་པ་བཞི་དང་ལམ་བཞི་རིམ་བཞིན་སྦྱར་དགོས་པ་གང་ཞིག དེ་སྦྱོར་བ་མི་འཐད་པའི་ཕྱིར་ཞེ་ན། འོ་ན་རྣམ་པ་ཀུན་མངོན་པར་རྟོག་པ་ཞེས་སོགས་ཀྱི་གཞུང་དེས་སྒྲུབ་པ་བཞིའི་ངོ་བོ་མ་བསྟན་པར་ཐལ། དེས་དེ་བསྟན་ན། སྒྲུབ་པ་བཞི་དང་སྦྱོར་བ་བཞི་རིམ་བཞིན་སྦྱར་དགོས་པ་གང་ཞིག དེ་སྦྱོར་བ་མི་འཐད་པའི་ཕྱིར། ཁྱབ་བསལ་རྟགས་སྔ་ཟུར་རྣམས་ཁས་སོ། །ཕྱི་མ་མ་གྲུབ་ན། བྱང་སེམས་སྦྱོར་ལམ་རྩེ་མོའི་ཡེ་ཤེས་ཆོས་ཅན། ཚོགས་སྒྲུབ་ཡིན་པར་ཐལ། མཐར་གྱིས་པའི་སྦྱོར་བ་ཡིན་པའི་ཕྱིར། ཁྱབ་པ་ཁས། གཉིས་པ་ནི། སྦྱོར་བ་དང་ཞེས་པས་གོ་སྒྲུབ། འཇུག་སྒྲུབ། ཚོགས་སྒྲུབ་དང་པོ་བཅོ་ལྔའི་ས་མཚམས་བསྟན་ཏེ། གོ་སྒྲུབ་དེ་ཐེག་ཆེན་མཐོང་ལམ་ལ་བརྒྱུད་ནས་སྦྱོར་བ་ཚོགས་ལམ་ནས་ཡོད། འཇུག་སྒྲུབ་དེ་ལ་དངོས་སུ་སྦྱོར་བ་སྦྱོར་ལམ་ནས་ཡོད། ཚོགས་སྒྲུབ་དང་པོ་བཅོ་ལྔ་དེ་ལ་མངོན་སུམ་སྦྱོར་བ་ཆོས་མཆོག་ཆེན་པོ་ནས་ཡོད་པའི་ཕྱིར། མཐོང་བ་དང་སྒོམ་པ་ཞེས་པས་ས་དང་གཉེན་པོའི་ཚོགས་ཀྱི་ས་མཚམས་བསྟན་ཏེ། སའི་ཚོགས་ལ་བཅུ་ཡོད་པའི་དང་པོ་མཐོང་བའི་ལམ་གྱི་རང་བཞིན་དང་། ཕྱི་མ་དགུ་སྒོམ་ལམ་གྱི་རང་བཞིན། གཉེན་པོ་ཚོགས་སྒྲུབ་ལ་མཐོང་སྤང་གཉེན་པོ་ཚོགས་སྒྲུབ་མཐོང་ལམ་གྱི་རང་བཞིན་དང་། སྒོམ་སྤང་གཉེན་པོ་ཚོགས་སྒྲུབ་ནི་སྒོམ་ལམ་གྱི་རང་བཞིན་ཡིན་པའི་ཕྱིར། ཁྱད་པར་གྱི་ལམ་དང་ཞེས་པས་ངེས་འབྱུང་སྒྲུབ་པའི་ས་མཚམས་བསྟན་ཏེ། དེ་ས་བཅུ་རྒྱུན་མཐའི་སྔ་ལོགས་ནས་འཇོག་པའི་ཕྱིར་ཏེ། འགྲེལ་ཆེན་ལས། དེ་ལ་འཕགས་པ་ཐོགས་མེད་ཀྱི་གོ་ཆ་དང་འཇུག་པ་དག་ནི་གོ་རིམ་བཞིན་དུ། བརྒྱུད་པ་དང་དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ། གཟུངས་ཀྱི་བར་ནི་མངོན་དུ་སྦྱོར་བའི་ལམ་གྱི་རང་བཞིན་ཆོས་ཀྱི་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་པའི་ཚོགས་ཀྱི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། ས་གཉིས་པ་ལ་སོགས་པའི་རང་བཞིན་སྒོམ་པའི་ལམ་གྱི་ངོ་བོ་ཉིད་ཡིན་ཅིང་། གཉེན་པོའི་ཕྱོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ཏེ། ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་སོ། །དེ་དག་སོ་སོར་སྦྱིན་ལ་སོགས། །ཞེས་པའི་སྐབས་སུ། གོ་སྒྲུབ་ཀྱི་མཚན་ཉིད་དང་། ཕར་ཕྱིན་དྲུག་གི་མཐའ་དཔྱད་པ་གཉིས། དང་པོ་ལ་དགག་གཞག་སྤང་གསུམ་ལས། དང་པོ་ནི། ཁ་ཅིག ཕར་ཕྱིན་རེ་རེའི་ནང་དུ་ཕར་ཕྱིན་དྲུག་དྲུག་ཚང་བར་བསྡུས་ནས་ཉམས་སུ་ལེན་པའི་སེམས་དཔའི་བྱ་བ་ཞེས་དང་། ཡང་དེ་ལྟར་ཉམས་སུ་ལེན་པའི་བསམ་པའི་བརྩོན་འགྲུས་གཙོ་བོར་གྱུར་པའི་སེམས་དཔའི་བྱ་བ་ཞེས་དང་། ཡང་སྒྲུབ་པའི་ཁྱད་པར་བཞི་ལྡན་གང་ཞིག གོ་ཆའི་བརྩོན་འགྲུས་ཀྱིས་ཀུན་ནས་བསླངས་པའི་བྱ་བ་ཞེས་དང་། ཡང་དེ་གང་ཞིག གོ་ཆའི་བརྩོན་འགྲུས་གཙོ་བོར་གྱུར་པ་དང་། ཡང་སྦྱིན་སོགས་ཕར་ཕྱིན་དྲུག་ལྡན་དུ་ཉམས་སུ་ལེན་པའི་གོ་ཆའི་བརྩོན་འགྲུས་གཙོ་བོར་གྱུར་པ་ཞེས་ཟེར་རོ། །དང་པོ་ལ། ཕར་ཕྱིན་རེ་རེའི་ནང་དུ་དྲུག་དྲུག་ཚང་བར་བསྡུས་ནས་ཉམས་སུ་ལེན་པའི་སེམས་དཔའི་ལུས་ཀྱི་བྱ་བ་ཆོས་ཅན། དེར་ཐལ། མཚན་ཉིད་དེའི་ཕྱིར། རྟགས་གསལ་ཆོས་ཅན་གྱིས་བསྒྲུབ་བོ། །དེས་གཉིས་པའང་ཁེགས། གསུམ་པ་ལ། ཐེག་ཆེན་གྱི་ཚོགས་ལམ་ཐོབ་མ་ཐག་པའི་གོ་ཆའི་བརྩོན་འགྲུས་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་ན། ཁྱོད་ཀྱི་སྔ་རོལ་དུ་གོ་ཆའི་བརྩོན་འགྲུས་སོང་བར་ཐལ། འདོད་པ་དེའི་ཕྱིར། འདོད་ན། ཆོས་ཅན་དེ་མིན་པར་ཐལ་ལོ། །ཕྱི་མ་གཉིས་ལ། སྦྱོར་བའི་བརྩོན་འགྲུས་གཙོ་བོར་གྱུར་པའི་བྱང་སེམས་ཀྱི་སྦྱོར་ལམ་ཆོས་ཅན། གཉིས་པོ་དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་སྒྲུབ་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ཆོས་ཅན་དེ་ཉིད་ཡིན་པའི་ཕྱིར། གཉིས་པ་ནི། ཕར་ཕྱིར་རེ་རེའང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་གོ་ཆས་ཟིན་པའི་སེམས་དཔའི་རྣལ་འབྱོར་རོ། །གསུམ་པ་ལ། ཁ་ཅིག ཐེག་ཆེན་གྱི་ཚོགས་ལམ་ན་གོ་སྒྲུབ་མེད་པར་ཐལ། དེ་ལ་མཚན་ཉིད་དེ་མེད་པའི་ཕྱིར་ཏེ། དེ་ན་ཕར་ཕྱིན་དྲུག་ལྡན་དུ་ཉམས་སུ་ལེན་པ་མེད་པའི་ཕྱིར་ཏེ། དེ་ན་ཕར་ཕྱིན་དྲུག་མེད་པའི་ཕྱིར་ཟེར་ན། འོ་ན་དེ་ན་རྣམ་མཁྱེན་གྱི་རྣམ་པ་ཉམས་སུ་ལེན་པ་མེད་པར་ཐལ། དེ་ན་རྣམ་མཁྱེན་མེད་པའི་ཕྱིར། ཁ་ཅིག འཇུག་སྒྲུབ་ཡིན་ན་བསམ་གཏན་གཟུགས་མེད་ནས་རྣམ་མཁྱེན་གྱི་བར་དགུ་ཆར་ཉམས་སུ་ལེན་པའི་རྣལ་འབྱོར་ཡིན་དགོས་པར་ཐལ། གོ་སྒྲུབ་ཡིན་ན། མཚན་ཉིད་དེ་ཡིན་དགོས་པའི་ཕྱིར་ཞེ་ན། འོ་ན་འཇུག་སྒྲུབ་དེ་འཇུག་ཡུལ་ཐེག་ཆེན་དགུ་པོ་རེ་རེའང་དགུ་ལྡན་དུ་ཉམས་སུ་ལེན་པའི་སྒོ་ནས་བསྟན་པར་ཐལ། གོ་སྒྲུབ་དེ་ཕར་ཕྱིན་རེ་རེའང་དྲུག་ལྡན་དུ་ཉམས་སུ་ལེན་པའི་སྒོ་ནས་བསྟན་པའི་ཕྱིར་ཏེ། འདིའི་གཞུང་རྩ་འགྲེལ་གཉིས་པོ་ཞལ་མ་ཡོལ་བར་བཞུགས་པའི་ཕྱིར། གཉིས་པ་ནི། མདོ་སྡེ་རྒྱན་ལས། གྲངས་དང་དེ་ཡི་མཚན་ཉིད་གོ་རིམ་དང་། །ངེས་པའི་ཚིག་དང་ཡོན་ཏན་གོམས་བྱ་དང་། །དེ་དག་རབ་དབྱེ་བསྡུ་དང་མི་མཐུན་ཕྱོགས། །ཡོན་ཏན་ཕན་ཚུན་རྣམ་ངེས་ཡིན་ཞེས་བྱ། །ཞེས་གསུངས་པ་ལྟར་དོན་ཚན་རྣམ་པ་བཅུ་ལས། དང་པོ་གྲངས་ངེས་ལ་ལྔ་ལས། དང་པོ་མངོན་མཐོ་དང་ངེས་ལེགས་སྒྲུབ་པའི་དབང་དུ་བྱས་ནས་ཕར་ཕྱིན་དེ་ལ་དྲུག་ཏུ་ངེས་ཏེ། དང་པོ་བཞིས་མངོན་མཐོ་བསྒྲུབ། ཕྱི་མ་གཉིས་ཀྱི་ངེས་ལེགས་སྒྲུབ་པའི་ཕྱིར། གཉིས་པ་དོན་གཉིས་སྒྲུབ་པའི་དབང་དུ་བྱས་ནས་ཀྱང་དྲུག་ཏུ་ངེས་ཏེ། དང་པོ་གསུམ་གྱིས་གཞན་དོན་སྒྲུབ། ཕྱི་མ་གསུམ་གྱིས་རང་དོན་སྒྲུབ་པའི་ཕྱིར་དང་། དྲུག་ཆར་གྱིས་གཞན་དོན་སྒྲུབ་ཅིང་དེ་ཉིད་རང་དོན་ཡིན་པའི་ཕྱིར། གསུམ་པ་ཐེག་ཆེན་གྱི་ལམ་ཐམས་ཅད་སྒྲུབ་པའི་དབང་དུ་བྱས་ནས་དེར་ངེས་ཏེ། ཐེག་ཆེན་གྱི་ལམ་དེ་ལ་ལོངས་སྤྱོད་ལ་མངོན་པར་མི་དགའ་བ་དང་། བསླབ་པ་ལ་རབ་ཏུ་གུས་པ་དང་། སྡུག་བསྔལ་དང་དགེ་བ་གཉིས་ལ་མི་སྐྱོ་བ་དང་། ཞི་གནས་ཀྱི་རྣལ་འབྱོར་དང་། ལྷག་མཐོང་གི་རྣམ་པར་མི་རྟོག་པ་དྲུག་ཏུ་ངེས་པའི་ཕྱིར། བཞི་པ་ཐབས་མཁས་ཀྱི་རྣམ་པ་ཐམས་ཅད་སྒྲུབ་པའི་དབང་དུ་བྱས་ནས་དྲུག་ཏུ་ངེས་ཏེ། ཐབས་མཁས་ཀྱི་རྣམ་པ་དེ་ལ། འདོད་པའི་ཡུལ་ལ་མ་ཆགས་པ་དང་། ཡུལ་དེ་ཐོབ་པར་འདོད་པའི་རྣམ་གཡེང་སྡོམ་པ་དང་། སེམས་ཅན་མི་གཏོང་བར་རྗེས་སུ་འཛིན་པ་དང་། དགེ་བ་འཕེལ་བར་བྱེད་པ་དང་། ཉོན་སྒྲིབ་མགོ་གནོན་པ་དང་། ཤེས་སྒྲིབ་རྩ་བ་ནས་སྤོང་བ་རྣམས་སུ་ངེས་པའི་ཕྱིར། ལྔ་པ་བསླབ་པ་གསུམ་སྒྲུབ་པའི་དབང་དུ་བྱས་ནས་དྲུག་ཏུ་ངེས་ཏེ། དང་པོ་གསུམ་གྱིས་ཚུལ་ཁྲིམས་ཀྱི་བསླབ་པ་སྒྲུབ། ཕྱི་མ་གཉིས་ཀྱིས་སེམས་དང་ཤེས་རབ་གཉིས་ཀྱི་བསླབ་པ་སྒྲུབ། བརྩོན་འགྲུས་ཀྱིས་གསུམ་ཆར་སྒྲུབ་པའི་ཕྱིར། གཉིས་པ་མཚན་ཉིད་ལ་རིམ་བཞིན་དུ། གཏོང་བའི་སེམས་པ་ཆོས་བཞི་ལྡན་དང་། དེ་བཞིན་དུ་སྤོང་བའི་དང་། མི་འཁྲུགས་པའི་དང་། དགེ་བ་ལ་སྤྲོས་བའི་དང་། དགེ་བའི་དམིགས་པ་ལ་སེམས་རྩེ་གཅིག་པའི་དང་། ཆོས་རབ་ཏུ་རྣམ་འབྱེད་ཀྱི་སེམས་པ་ཆོས་བཞི་ལྡན་ནོ། །ཆོས་བཞི་ནི། མི་མཐུན་ཕྱོགས་སེར་སྣ་སོགས་ཉམས་པ། གྲོགས་རྣམ་པར་མི་རྟོག་པའི་ཡེ་ཤེས་དང་ལྡན་པ། དངོས་སུ་སེམས་ཅན་གྱི་འདོད་པའི་དོན་ཡོངས་སུ་རྫོགས་པར་བྱེད་པ། དེས་འཁོར་དུ་བསྡུས་ནས་ཐེག་པ་གསུམ་གྱིས་སྐལ་བ་ཇི་ལྟ་བ་བཞིན་སྨིན་པར་བྱེད་པའོ། །གསུམ་པ་གོ་རིམ་ནི། སྔ་མ་ལ་བརྟེན་ཕྱི་མ་སྐྱེ་བའི་རིམ་པ་དང་། དམན་པ་དང་མཆོག་ཏུ་གནས་པའི་གོ་རིམ་དང་། རགས་པ་དང་ཕྲ་བའི་གོ་རིམ་མོ། །རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་སོ། །བཞི་པ་ངེས་པའི་ཚིག་ནི། དཱ་ན་འདོར་བ་ལ་འཇུག་པས་དབུལ་བ་འདོར་བས་ན་སྦྱིན་པ། ཤཱི་ལ་བསིལ་བ་ལ་འཇུག་ཅིང་ཉོན་མོངས་པའི་ཚ་གདུང་ལས་བསིལ་བར་བྱེད་པས་ཚུལ་ཁྲིམས། ཁྲོ་བ་བཟོད་པས་ན་བཟོད་པ། དགེ་བ་མཆོག་ལ་སྦྱོར་བས་བརྩོན་འགྲུས། ཡིད་དམིགས་པ་ལ་འཛིན་པས་བསམ་གཏན། དོན་དམ་པའི་ཡུལ་གྱི་གནས་ལུགས་ཤེས་པས་ན་ཤེས་རབ་བོ། །དེ་ཉིད་ལས། དབུལ་བ་འདོར་བར་བྱེད་པ་དང་། །བསིལ་བ་ཐོབ་དང་ཁྲོ་བཟོད་དང་། །མཆོག་སྦྱོར་བ་དང་ཡིད་འཛིན་དང་། །དོན་དམ་ཤེས་པའི་ཕྱིར་ཤེས་རབ། །ཅེས་སོ། །ལྔ་པ་ཡོན་ཏན་གོམས་པར་བྱ་བ་ལ། དངོས་པོ་ལ་བརྟེན་པ། ཡིད་ལ་བྱེད་པ་ལ། བསམ་པ་ལ། ཐབས་ལ། དབང་འབྱོར་བ་ལ་བསྟན་ནས་སྒོམ་པ་དང་ལྔ་ལས། དང་པོ་ལ་རྒྱུ་རིགས་ཀྱི་སྟོབས་ཀྱིས་ཕ་རོལ་ཏུ་ཕྱིན་པ་རྣམས་སྒྲུབ་པ་རྒྱུ་ལ་བརྟེན་པ། ལུས་ཕུན་སུམ་ཚོགས་པའི་སྟོབས་ཀྱིས་སྒྲུབ་པ་རྣམ་སྨིན་ལ་བརྟེན་པ། སྨོན་ལམ་གྱི་སྟོབས་ཀྱིས་སྒྲུབ་པ་སྨོན་ལམ་ལ་བརྟེན་པ། མི་མཐུན་ཕྱོགས་དང་གཉེན་པོའི་སྐྱོན་ཡོན་སོ་སོར་བརྟགས་ནས་སྒྲུབ་པ་སོ་སོར་བརྟགས་པའི་སྟོབས་ལ་བརྟེན་པ་དང་བཞིའོ། །གཉིས་པ་ཡིད་ལ་བྱེད་པ་ལ། མོས་པ་དང་། རོ་མྱོང་བ་དང་། རྗེས་སུ་ཡི་རང་བ་དང་། མངོན་པར་དགའ་བ་ཡིད་ལ་བྱེད་པ་དང་བཞིའོ། །གསུམ་པ་བསམ་པ་ལ། ངོམ་མི་ཤེས་པའི་བསམ་པ་དང་། རྒྱ་ཆེ་བའི་བསམ་པ་དང་། དགའ་བའི་བསམ་པ་དང་། ཕན་པའི་བསམ་པ་དང་། མ་གོས་པའི་བསམ་པ་དང་། དགེ་བའི་བསམ་པ་སྟེ་ཕར་ཕྱིན་རེ་རེའང་བསམ་པ་དྲུག་དྲུག་གི་སྒོ་ནས་བསྒོམ་པའོ། །བཞི་པ་ཐབས་ལ། རྣམ་པར་མི་རྟོག་པའི་ཡེ་ཤེས་ཀྱིས་སྦྱིན་སོགས་རེ་རེའང་འཁོར་གསུམ་ཡོངས་སུ་དག་པར་སོ་སོར་རྟོགས་པར་བྱེད་པའོ། །ལྔ་པ་དབང་འབྱོར་པ་ལ། སྐུ་ལ་དབང་འབྱོར་པ་ནི་ཆོས་སྐུ་དང་ལོངས་སྐུ་ཐོབ་པ་དང་། སྤྱོད་པ་ལ་དབང་འབྱོར་པ་ནི་སྤྲུལ་སྐུ་ཐོབ་པ། སྟོན་པ་ལ་དབང་འབྱོར་པ་ནི་ཕར་ཕྱིན་དྲུག་ཐོབ་བྱེད་དུ་སྟོན་པའི་སྒོ་ནས་སྒྲུབ་པའོ། །དྲུག་པ་རབ་ཏུ་དབྱེ་བ་ནི། རེ་རེའང་ངོ་བོ། རྒྱུ། འབྲས་བུ། ལས། ལྡན་པ། འཇུག་པ་དྲུག་དྲུག་གི་སྒོ་ནས་གཏན་ལ་དབབ་པའོ། །བདུན་པ་བསྡུ་བ་ནི། སྦྱིན་སོགས་དྲུག་པོ་དེས་དཀར་པོའི་ཆོས་ཐམས་ཅད་བསྡུས་ཏེ། མཉམ་པར་མ་གཞག་པའི་དཀར་ཆོས་ཐམས་ཅད་ནི་དང་པོ་གཉིས་ཀྱིས་བསྡུས། གཞག་པ་དེ་རྣམས་ཕྱི་མ་གཉིས་ཀྱིས་བསྡུས། བར་པ་གཉིས་ཀྱིས་གཉིས་ཀ་བསྡུས་པའི་ཕྱིར། བརྒྱད་པ་མི་མཐུན་ཕྱོགས་སྤང་བའི་ཁྱད་པར་ནི། རེ་རེའང་ཆགས་པ་བདུན་བདུན་སྤང་བ་སྟེ། སྦྱིན་པ་ལ་མཚོན་ན་ལོངས་སྤྱོད་ལ་ཆགས་པ། ཕྱི་བཤོལ་ལ་ཆགས་པ། དེ་ཙམ་གྱིས་ཆོག་པར་འཛིན་པ་ལ་ཆགས་པ། ལན་ལ་ཆགས་པ། རྣམ་སྨིན་ལ་ཆགས་པ། སེར་སྣའི་བག་ཉལ་མ་སྤངས་པའི་ཕྱིར་མི་མཐུན་ཕྱོགས་ལ་ཆགས་པ། རྣམ་གཡེང་ལ་ཆགས་པ་སྤོང་བ་ཡིན་ལ། གཞན་རྣམས་ལའང་འགྲེ། དགུ་པ་ཡོན་ཏན་བསྔགས་པ་ལ། རྒྱ་ཆེ་བའི་ཡོན་ཏན། རྣམ་པར་དག་པའི་ཡོན་ཏན། མཆོག་ཏུ་གྱུར་པའི་ཡོན་ཏན་གསུམ་ལས། དེ་དག་རེ་རེའང་དངོས་པོ་རྒྱ་ཆེ་བ། ཀུན་སློང་ཟང་ཟིང་མེད་པ། འབྲས་བུ་དོན་ཆེ་བ། དུས་ཟད་མི་ཤེས་པ་བཞི་བཞི་ལས། དངོས་པོ་ལ་སྦྱིན་པ་ལ་ཟང་ཟིང་གི་ནང་ནས་རང་གི་སྲོག་གཏོང་བ་ལྟ་བུ་དང་། ཚུལ་ཁྲིམས་ལ་བྱང་ཆུབ་སེམས་པའི་ཚུལ་ཁྲིམས་རྣམ་པ་གསུམ་དང་། བཟོད་པ་ལ་སྡུག་བསྔལ་ལ་ཇི་མི་སྙམ་པའི་བཟོད་པ་དང་། བརྩོན་འགྲུས་ལ་འཇིག་རྟེན་པ་དང་ཉན་རང་ལས་ལྷག་པའི་བརྩོན་འགྲུས་དང་། བསམ་གཏན་ལ་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་དང་ལྡན་པའི་བསམ་གཏན་དང་། ཤེས་རབ་ལ་དེ་ཁོ་ན་ཉིད་རྟོགས་པའི་ཤེས་རབ་སྟེ་དངོས་པོ་རྒྱ་ཆེ་བའོ། །ཀུན་སློང་ཟང་ཟིང་མེད་པ་ནི་ཚེ་འདིར་ལན་དང་། ཕྱི་མར་རྣམ་པར་སྨིན་པ་ལ་མི་རེ་བ་ཡིན་ནོ། །འབྲས་བུ་དོན་ཆེ་བ་ནི། དེ་དག་གིས་སྐྱེ་བོ་བྱང་ཆུབ་གསུམ་ལ་དགོད་པའོ། །དུས་ཟད་མི་ཤེས་པ་ནི་ཕར་ཕྱིན་དང་པོ་ལྔ་རྣམ་པར་མི་རྟོག་པའི་ཡེ་ཤེས་དང་ལྡན་པ་དང་། ཕྱི་མ་ཐབས་སྙིང་རྗེ་ཆེན་པོ་དང་ལྡན་པས་ལྷག་མེད་དུའང་མི་ཟད་པའོ། །གཉིས་པ་ལ། སྦྱིན་པ་རྣམ་པར་དག་པ་ནི། སློང་བ་པོའི་འདོད་པ་ཐམས་ཅད་ཚིམས་པ་ལས། བྱང་ཆུབ་སེམས་དཔས་སློང་བ་པོ་ཚིམས་པ་མཐོང་བའི་དགའ་བ་ཁྱད་པར་དུ་འཕགས་པ་ལྟ་བུའོ། །ཚུལ་ཁྲིམས་རྣམ་པར་དག་པ་ནི་སྙིང་རྗེ་ཆེན་པོ་དང་ལྡན་པས་མི་དགེ་བ་བཅུ་ལ་ངང་གིས་མི་འཇུག་པའོ། །བཟོད་པ་རྣམ་པར་དག་པ་ནི། གནོད་བྱེད་བྱང་ཆུབ་སྒྲུབ་པའི་གྲོགས་ཡིན་པས་ཕན་འདོགས་བྱེད་དུ་མཐོང་ནས་བཟོད་པར་བྱ་བའི་གཞི་མེད་པའོ། །བརྩོན་འགྲུས་རྣམ་པར་དག་པ་ནི། བདག་གཞན་མཉམ་པར་རྟོགས་པ་རྣམ་པར་དག་པས་གཞན་གཅེས་པར་རྟོགས་པའི་སྟོབས་ཀྱིས་གཞན་དོན་དུ་དཀའ་བ་སྤྱད་པའི་བརྩོན་འགྲུས་མི་དཀའ་བའོ། །བསམ་གཏན་རྣམ་པར་དག་པ་ནི། ཟག་མེད་ཀྱི་བདེ་བ་ཆེན་པོ་དང་ལྡན་པ་སོགས་ཀྱིས་འཇིག་རྟེན་པ་དང་ཉན་རང་གི་བསམ་གཏན་ལས་ལྷག་པའོ། །ཤེས་རབ་རྣམ་པར་དག་པ་ནི། ཡུལ་ཐམས་ཅད་མངོན་སུམ་རྟོགས་པ་དང་། ཤིན་ཏུ་གསལ་བར་རྟོགས་པས་ན་འཇིག་རྟེན་པ་དང་ཉན་རང་གི་ཤེས་རབ་ལས་ལྷག་པའོ། །གསུམ་པ་ལ། སྦྱིན་པ་ནི་དོན་བརྒྱད་ཀྱི་སྒོ་ནས་མཆོག་ཏུ་གྱུར་པ་ཡིན་ཏེ། རྟེན་བྱང་སེམས། གཞི་ཟང་ཟིང་གི་ནང་ནས་ལུས་སྲོག་དང་། མི་འཇིག་པ་སྦྱིན་པའི་ནང་ནས་འཁོར་བའི་འཇིག་པ་ལས་སྐྱོབ་པ། ཆོས་ཀྱི་སྦྱིན་པའི་ནང་ནས་ཐེག་ཆེན་གྱི་ཆོས་ཀྱི་སྦྱིན་པ། གང་གིས་སྦྱིན་པའི་རྒྱུ་མཚན་སྙིང་རྗེས་ཀུན་ནས་སློང་བ། ཡོངས་སུ་བསྔོ་བ་བྱང་ཆུབ་ཆེན་པོ་དོན་དུ་གཉེར་བ་དང་། རྒྱུ་སྔོན་སྦྱིན་པ་གོམས་པར་བྱས་པའི་སྟོབས་ཀྱིས་སྦྱིན་པ་དང་། ཡེ་ཤེས་འཁོར་གསུམ་དུ་རྣམ་པར་མི་རྟོག་པའི་ཤེས་རབ་ཀྱིས་ཟིན་པ་དང་། ཞིང་སློང་བ་དང་། སྡུག་བསྔལ་བ་དང་། རྟེན་མེད་པ་དང་། ཉེས་པར་སྤྱད་པ་སྤྱོད་པ་རྣམས་སྔ་མ་སྔ་མ་ལས་ཕྱི་མ་ཕྱི་མ་མཆོག་ཡིན་ལ། དེ་དག་མེད་ན་ཡོན་ཏན་དང་ལྡན་པ་ལ་སྦྱིན་པ་དང་། གནས་མོས་པ་དང་། ཡིད་ལ་བྱེད་པ་དང་། ཏིང་འཛིན་ལ་གནས་ནས་སྦྱིན་པའོ། །ཕྱི་མ་ལྔ་ལའང་དོན་ཚན་དྲུག་པོ་སྔ་མ་བཞིན་དུ་སྦྱར་ཞིང་། གཞིའི་ཁྱད་པར་ནི། ཚུལ་ཁྲིམས་ལ་བྱང་ཆུབ་སེམས་དཔའི་ཚུལ་ཁྲིམས་དང་། བཟོད་པ་ལ་ང་རྒྱལ་སྟོབས་ཆུང་ངུས་ཞི་བར་བྱེད་པ་དང་། བརྩོན་འགྲུས་ལ་ཕ་རོལ་ཏུ་ཕྱིན་པ་རྣམས་སྒོམ་པ། བསམ་གཏན་ལ་བྱང་ཆུབ་སེམས་དཔའི་ཏིང་ངེ་འཛིན། ཤེས་རབ་ལ་ཆོས་ཐམས་ཅད་ཀྱི་དེ་ཁོ་ན་ཉིད་རྟོག་པས་གཞི་མཆོག་ཏུ་གྱུར་པ་ཡིན་ལ། ལྔ་ཀའི་ཞིང་མཆོག་ནི་ཐེག་ཆེན་གྱི་ཆོས་ཡིན་ནོ། །བཅུ་པ་ཕན་ཚུན་རྣམ་པར་ངེས་པ་ལ་བཞི་སྟེ། ཕན་ཚུན་བསྡུས་པའི་ཕྱིར་རྣམ་པར་ངེས་པ་ནི་དེ་རེ་རེས་ཀྱང་དྲུག་དྲུག་བསྡུས་པའོ། །རྣམ་པར་དབྱེ་བའི་རྣམ་པར་ངེས་པ་ནི་རེ་རེ་ལའང་དྲུག་དྲུག་ཏུ་ཕྱེ་བའོ། །ཆོས་ཉིད་ཀྱི་ཕྱིར་རྣམ་པར་ངེས་པ་ནི་བརྗོད་བྱ་ཕྱིན་དྲུག་གིས་རྗོད་བྱེད་དེ་སྟོན་པའི་མདོ་སྡེ་ལ་སོགས་པ་བསྡུས་པ་དང་། རྗོད་བྱེད་དེ་དག་གིས་ཀྱང་བརྗོད་བྱ་ཕར་ཕྱིན་དྲུག་བསྡུས་པའོ། །རྒྱུ་མཚན་གྱི་ཕྱིར་རྣམ་པར་ངེས་པ་ནི་ཕར་ཕྱིན་རེ་རེའང་གཞན་ལྔ་ལ་འཇུག་པའི་རྒྱུ་མཚན་དུ་གྱུར་པའོ། །འདི་དག་ནི་མདོ་སྡེ་རྒྱན་གྱི་དོན་ཤིན་ཏུ་བསྡུས་ནས་གསལ་བར་བཀོད་པ་ཡིན་པས་རྒྱས་པར་བལྟར་འདོད་ན་དེར་བལྟའོ། །བསམ་གཏན་གཟུགས་མེད་སྦྱིན་སོགས་དང་། །ཞེས་པའི་སྐབས་སུ། འཇུག་སྒྲུབ་ཀྱི་མཚན་ཉིད་ལ་དགག་གཞག་གཉིས་ལས། དང་པོ་ལ། ཁ་ཅིག ཕར་ཕྱིན་དྲུག་ལ་འཇུག་པའི་སྦྱོར་བའི་བརྩོན་འགྲུས་གཙོ་བོར་གྱུར་པའི་བྱང་སེམས་ཀྱི་རྣལ་འབྱོར་ཞེས་དང་། ཡང་སྦྱོར་བའི་བརྩོན་འགྲུས་གཙོ་བོར་གྱུར་པའི་དྲོད་ཡན་ཆད་ཀྱི་སེམས་དཔའི་བྱ་བ་ཞེས་དང་། སྟོང་ཉིད་ལ་དམིགས་པའི་སྒོམ་བྱུང་གི་ཤེས་རབ་ཀྱིས་ཟིན་པའི་སྒོ་ནས་ཐེག་ཆེན་གྱི་རྒྱུ་འབྲས་ཀྱི་ཆོས་ཅི་རིགས་པ་ལ་སྦྱོར་བའི་བརྩོན་འགྲུས་གཙོ་བོར་གྱུར་པའི་སེམས་དཔའི་ཡེ་ཤེས་དང་། སྒྲུབ་པ་ཁྱད་པར་བཞི་ལྡན་གང་ཞིག སྦྱོར་བའི་བརྩོན་འགྲུས་གཙོ་བོར་གྱུར་པ་ཞེས་དང་། དེ་གང་ཞིག དྲོད་ཡན་ཆད་ཀྱི་སྦྱོར་བའི་བརྩོན་འགྲུས་ཀྱིས་ཀུན་ནས་བསླངས་པའི་སེམས་དཔའི་བྱ་བ་ཞེས་ཟེར་རོ། །དང་པོ་ལ། འཇུག་སྒྲུབ་ཀྱི་འཇུག་ཡུལ་དེ་ཡིན་ན་ཡུལ་དགུའི་ནང་ནས་གཉིས་པ་དེ་ཡིན་དགོས་པར་ཐལ། དེ་དེའི་མཚན་ཉིད་དེའི་ཕྱིར། གཉིས་པ་ལ། བསམ་པའི་བརྩོན་འགྲུས་གཙོ་བོར་གྱུར་པའི་བྱང་སེམས་ཀྱི་རྣལ་འབྱོར་ཆོས་ཅན། དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་གྱི་སྦྱོར་བ་ཡིན་པའི་ཕྱིར། འདོད་མི་ནུས་ཏེ། བསམ་པའི་བརྩོན་འགྲུས་གཙོ་བོར་གྱུར་པ་ཡིན་པའི་ཕྱིར། གསུམ་པ་དང་བཞི་པའང་དེས་ཁེགས་སོ། །ལྔ་པ་ལ། ཐེག་ཆེན་གྱི་སྦྱོར་ལམ་དྲོད་ཐོབ་མ་ཐག་པའི་སྦྱོར་བའི་བརྩོན་འགྲུས་དེ་ཆོས་ཅན། ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། འདོད་ན། ཁྱོད་ཀྱི་སྔ་རོལ་དུ་དྲོད་ཡན་ཆད་ཀྱི་སེམས་དཔའི་ཡེ་ཤེས་གཅིག་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་ཡིན་པའི་ཕྱིར་རོ། །གཉིས་པ་ནི། རྒྱུ་དང་འབྲས་བུའི་ཐེག་ཆེན་གང་རུང་ལ་ཉམས་ལེན་གྱི་སྒོ་ནས་འཇུག་པའི་ཐེག་ཆེན་གྱི་སྦྱོར་ལམ་དྲོད་ཡན་ཆད་ཀྱི་སེམས་དཔའི་རྣལ་འབྱོར་རོ། །དབྱེ་ན་བསམ་གཏན་དང་གཟུགས་མེད་ལ་འཇུག་པའི་སྒྲུབ་པ་སོགས་དགུའོ། །བརྩེ་དང་སྦྱིན་ལ་སོགས་པ་དྲུག །ཅེས་པའི་སྐབས་སུ། ཚོགས་སྒྲུབ་ཀྱི་མཚན་ཉིད་ལ་དགག་གཞག་གཉིས། དང་པོ་ནི། ཁ་ཅིག རང་འབྲས་མཐར་ཐུག་དང་། གནས་སྐབས་ཀྱི་བྱང་ཆེན་གང་རུང་དངོས་སུ་འབྱིན་པའི་སེམས་དཔའི་རྣལ་འབྱོར་དང་། ཡང་ཁ་ཅིག རང་འབྲས་གནས་སྐབས་ཀྱི་བྱང་ཆེན་དངོས་སུ་འབྱིན་པའམ། རང་འབྲས་མཐར་ཐུག་གི་བྱང་ཆེན་དངོས་སུ་འབྱིན་པ་གང་རུང་གི་ཆོས་མཆོག་སྐད་ཅིག་གཉིས་པ་ཡན་ཆད་ཀྱི་སེམས་དཔའི་བྱ་བ་ཞེས་ཟེར་བ་དང་། ཁ་ཅིག སྒྲུབ་པ་ཁྱད་པར་བཞི་ལྡན་གང་ཞིག་རང་འབྲས་བྱང་ཆེན་དངོས་སུ་འབྱིན་བྱེད་ཅེས་ཟེར་རོ། །དང་པོ་ལ། ཚོགས་སྒྲུབ་ཆོས་ཅན། དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རང་འབྲས་གནས་སྐབས་ཀྱི་བྱང་ཆེན་དངོས་སུ་འབྱིན་བྱེད་ཀྱང་མིན། རང་འབྲས་མཐར་ཐུག་གི་དེ་ལྟར་ཡང་མིན་པའི་ཕྱིར། དང་པོ་དེར་ཐལ། རྒྱུན་མཐའི་ཡེ་ཤེས་དེ་ཁྱོད་ཡིན་པའི་ཕྱིར། གཉིས་པ་མ་གྲུབ་ན། ཐེག་ཆེན་གྱི་སློབ་ལམ་དེར་ཐལ། མ་གྲུབ་པ་དེའི་ཕྱིར། འདོད་ན་དེ་ཆོས་ཅན། ཁྱོད་ཚོགས་སྒྲུབ་ཏུ་ཐལ། མཚན་ཉིད་དེའི་ཕྱིར། རྟགས་ཁས། གཉིས་པའང་དེས་ཁེགས་ཤིང་། གཞན་ཡང་ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་ཀྱི་སྦྱོར་ལམ་ཆོས་ཅན། དེར་ཐལ། མཚན་ཉིད་དེའི་ཕྱིར། རྟག་ཁྱབ་ཁས་ཏེ། རང་འབྲས་གནས་སྐབས་ཀྱི་བྱང་ཆེན་དངོས་སུ་འབྱིན་བྱེད་གང་ཞིག ཆོས་མཆོག་སྐད་ཅིག་ཐ་མ་ཡན་ཆད་ཀྱི་སེམས་དཔའི་བྱ་བ་ཡིན་པའི་ཕྱིར། དང་པོ་མ་གྲུབ་ན། ཁས་བླངས་ཏེ། དེར་ཐལ། དེའི་མཚན་ཉིད་ཀྱི་ཟུར་དུ་ཆོས་མཆོག་སྐད་ཅིག་ཐ་མ་ཡན་ཆད་ཀྱི་ཞེས་སྨོས་པ་ལ་རྣམ་བཅད་ཡོད་པའི་ཕྱིར། གསུམ་པ་ལ། བྱང་སེམས་ཀྱི་སྦྱོར་ལམ་གྱི་གནས་སྐབས་ན་ཚོགས་སྒྲུབ་མེད་པར་ཐལ། དེའི་དེ་ན་བྱང་ཆེན་མེད་པའི་ཕྱིར། ཁྱབ་པ་ཁས། མ་གྲུབ་ན་དེར་ཐལ། དེ་ན་སྐུ་གསུམ་མེད་པའི་ཕྱིར། ཁ་ཅིག རང་འབྲས་རྣམ་པར་མི་རྟོག་པའི་ཡེ་ཤེས་ཀྱི་དངོས་རྒྱུར་གྱུར་པའི་བྱང་སེམས་ཀྱི་རྣལ་འབྱོར་དེ་དེའི་མཚན་ཉིད་ཟེར་ན། མོས་པ་སྒོམ་ལམ་སྐད་ཅིག་མ་གསུམ་རྒྱུན་ཆགས་སྐྱེ་བའི་སྐད་ཅིག་མ་དང་པོའི་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་གྱི་སྒོམ་ལམ་ཡིན་པའི་ཕྱིར། འདོད་ན། དེ་སྐད་ཅིག་མ་གཉིས་པ་དེ་རྣམ་པར་མི་རྟོག་པའི་ཡེ་ཤེས་སུ་ཐལ། འདོད་པའི་ཕྱིར། འདོད་མི་ནུས་ཏེ། སློབ་པའི་རྗེས་ཐོབ་ཀྱི་མཁྱེན་པ་ཡིན་པའི་ཕྱིར། ཁ་ཅིག རང་འབྲས་ཐེག་ཆེན་གྱི་འཕགས་ལམ་དངོས་སུ་བསྐྱེད་པའི་སེམས་དཔའི་རྣལ་འབྱོར་དེ་དེའི་མཚན་ཉིད་ཡིན་ཟེར་ན། རང་གི་སྐད་ཅིག་གཉིས་པར་མཚན་འཛིན་གྱིས་བར་དུ་གཅོད་ངེས་པའི་ཐེག་ཆེན་གྱི་སྒོམ་ལམ་རྗེས་ཐོབ་ཡེ་ཤེས་ཆོས་ཅན། དེར་ཐལ། མཚོན་བྱ་དེའི་ཕྱིར། ཐེག་ཆེན་གྱི་སྒོམ་ལམ་ཡིན་པའི་ཕྱིར། མ་གྲུབ་ན་དེར་ཐལ། དེ་འདྲ་ཡོད་པའི་ཕྱིར་ཏེ། དངོས་པོ་ལྡན་དང་མི་ལྡན་དང་། །ཞེས་གསུངས་པའི་ཕྱིར། རྩ་བར་འདོད་ན། དེ་ཆོས་ཅན། དེ་མིན་པར་ཐལ། ཁྱོད་དང་ཁྱོད་ཀྱི་འབྲས་བུར་གྱུར་པའི་འཕགས་ལམ་གྱི་བར་དུ་མཚན་འཛིན་གྱིས་ཆོད་པའི་ཕྱིར། གཉིས་པ་ནི། མཐར་ཐུག་གི་བྱང་ཆེན་སྒྲུབ་པ་ལ་ནུས་པ་མཐུ་ཅན་དུ་གྱུར་པའི་ཐེག་ཆེན་གྱི་སྦྱོར་ལམ་ཆོས་མཆོག་སྐད་ཅིག་ཐ་མ་ཡན་ཆད་ཀྱི་སེམས་དཔའི་རྣལ་འབྱོར་ཏེ། དོན་གསལ་ལས། སྙིང་རྗེ་ལ་སོགས་པ་འདི་དག་གིས་ཡང་དག་པར་སྒྲུབ་པའི་ངོ་བོས་བྱང་ཆུབ་ཆེན་པོ་འབྱིན་པར་བྱེད་པའི་ཕྱིར་ན་སྙིང་རྗེ་ལ་སོགས་པ་འདི་དག་ནི་ཚོགས་ཡིན་པས་ཞེས་གསུངས་པའི་ཕྱིར། དབྱེ་ན་སྙིང་རྗེ་ཆེན་པོའི་ཚོགས་སྒྲུབ་ནས་གཉེན་པོ་ཚོགས་སྒྲུབ་ཀྱི་བར་བཅུ་བདུན་ནོ། །ཁོ་བོའི་ལེགས་བཤད་དོ། །ཚིག་ལ་སོགས་པའི་གཟུངས་དང་། ཞེས་པའི་སྐབས་སུ། གཟུངས་བཞིའི་མཐའ་དཔྱད་པ་ལ་མཚན་ཉིད། དབྱེ་བ། ས་མཚམས་གསུམ་ལས། དང་པོ་ལ། ཚིག་གཟུངས། དོན་གཟུངས། སྔགས་གཟུངས། བཟོད་པའི་གཟུངས་བཞིའི་མཚན་ཉིད་རིམ་བཞིན། གསུང་རབ་ཡན་ལག་བཅུ་གཉིས་ཀྱི་ཚིག་མི་བརྗེད་པར་འཛིན་ནུས་པའི་དྲན་པ་ཤེས་རབ་མཚུངས་ལྡན་དང་བཅས་པ་དང་། དེའི་དོན་མི་བརྗེད་པར་འཛིན་ནུས་པའི་དྲན་པ་སོགས་དང་། གཞན་ལ་ཕན་པའི་དོན་དུ་སྔགས་དང་སྦྱར་ནས་རང་རང་གི་འབྲས་བུ་འགྲུབ་པར་བྱིན་གྱིས་རློབ་ནུས་པའི་དྲན་པ་སོགས་དང་། ཆོས་ཉིད་མངོན་སུམ་དུ་མཐོང་བའི་དྲན་པ་ཤེས་རབ་མཚུངས་ལྡན་དང་བཅས་པའོ། །གཉིས་པ་ནི། གཟུངས་ཆུང་ངུ་དང་ཆེན་པོ་གཉིས། དང་པོ་ནི། ཚེ་རབས་སྔ་མའི་ལས་ཀྱི་རྣམ་པར་སྨིན་པ་ལས་སྐྱེས་པའི་གཟུངས་དང་། ཚེ་འདིར་མང་དུ་ཐོས་པ་གོམས་པ་ལས་སྐྱེས་པའི་གཟུངས་གཉིས་ལ་འཇོག ཆེན་པོ་ནི་ཏིང་ངེ་འཛིན་བསྒོམ་པ་ལས་སྐྱེས་པའི་གཟུངས་ཏེ། དེ་ལའང་ཆུང་ངུ་། འབྲིང་། ཆེན་པོ་དང་གསུམ་ལས། དང་པོ་ནི། སོ་སྐྱེའི་གཟུངས། གཉིས་པ་མ་དག་ས་བདུན། གསུམ་པ་དག་པ་ས་གསུམ་གྱི་གཟུངས་ཡིན་པར་རྒྱན་ལས་གསུངས་སོ། །གསུམ་པ་ནི། གཟུངས་སྔ་མ་གསུམ་པོ་ལམ་མ་ཞུགས་ནས་སངས་རྒྱས་ཀྱི་སའི་བར་ན་ཡོད། བཟོད་པའི་གཟུངས་ལ། བཟོད་པའི་རྒྱུར་གྱུར་གྱི་གཟུངས་ནི་བྱང་སེམས་ཀྱི་སྦྱོར་ལམ་བཟོད་པ་ནས་ཡོད་ཅིང་། བཟོད་པ་དངོས་ཀྱི་གཟུངས་ནི་ས་དང་པོ་ནས་ཡོད་དོ། །དེ་ལ་ཡེ་ཤེས་ཀྱི་ཚོགས་ནི། ཞེས་པའི་སྐབས་སུ། ཡེ་ཤེས་ཀྱི་ཚོགས་ཀྱི་ས་མཚམས་ལ་འགྲེལ་ཆེན་ལས་གསུངས་ཚུལ། སྔ་རབས་པ་རྣམས་ཀྱིས་བཀྲལ་ཚུལ། འཐད་པའི་ཕྱོགས་ངོས་གཟུང་བ་གསུམ་ལས། དང་པོ་ནི། འགྲེལ་ཆེན་ལས། སྟོང་ཉིད་དང་པོ་གསུམ་གྱི་སྐབས་སུ་སྟོང་པ་ཉིད་འདི་གསུམ་ནི་མོས་པས་སྤྱོད་པའི་ས་ལ་ཡིན་ནོ་ཞེས་དང་། བཞི་པའི་སྐབས་སུ་འདི་ནི་སྦྱོར་བའི་ལམ་ལའོ་ཞེས་དང་། ལྔ་པའི་སྐབས་སུ་འདི་ནི་ཀུན་ཏུ་འགྲོ་བའི་དོན་གྱིས་ན་ས་དང་པོ་ལའོ་ཞེས་དང་། སྟོང་ཉིད་ཐ་མ་གསུམ་གྱི་སྐབས་སུ། སྟོང་པ་ཉིད་འདི་གསུམ་ནི་གོ་རིམ་བཞིན་དུ་ཉོན་མོངས་པའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཀྱི་ཕྱིར་དང་། ཤེས་བྱའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཡིན་པའི་ཕྱིར་དང་། རང་བྱུང་ཉིད་ཡིན་པའི་དོན་གྱིས་ན་སངས་རྒྱས་ཀྱི་ས་ལ་ཡིན་པར་ཤེས་པར་བྱའོ་ཞེས་གསུངས་སོ། །གཉིས་པ་ནི། དྭགས་པོ་དབང་ཕྱུག་སེང་གེ་ན་རེ། ཡེ་ཤེས་དང་པོ་གསུམ་ཚོགས་ལམ། བཞི་པ་སྦྱོར་ལམ། དེ་ནས་བདུན་ས་དང་པོ་ནས་བདུན་པའི་བར་ལ་རེ་རེ། དེ་ནས་དག་པ་ས་གསུམ་ལ་གཉིས་གཉིས་དང་། སྟོང་ཉིད་ཐ་མ་གསུམ་རྟོགས་པའི་ཡེ་ཤེས་སངས་རྒྱས་ཀྱི་ས་ཁོ་ནར་འཇོག་པར་བཞེད་དོ། །ཨར་ན་རེ། ཡེ་ཤེས་གཞན་རྣམས་ཀྱི་ས་མཚམས་དེ་ལྟར་ཡིན་ཀྱང་། དང་པོ་གསུམ་ཚོགས་ལམ་དུ་འཇོག་པ་མི་འཐད་དེ། འགྲེལ་ཆེན་ལས། ཡེ་ཤེས་དང་པོ་གསུམ་མོས་སྤྱོད་ཀྱི་ས་ལ་གཞག་ཅིང་། མོས་སྤྱོད་ཀྱི་ས་ནི་སྦྱོར་ལམ་ལ་བཞེད་པའི་ཕྱིར་ཏེ། མཚན་ཉིད་ཀྱི་སྐབས་སུ། ཚོགས་དང་མོས་པས་སྤྱོད་པ་དང་། །ཞེས་དང་། རྟག་ཏུ་ངུའི་སྐབས་སུའང་། ཚོགས་ཀྱི་ས་དང་། མོས་པས་སྤྱོད་པའི་ས་དང་། བྱང་ཆུབ་སེམས་དཔའི་ས་དང་། དེ་བཞིན་གཤེགས་པའི་ས་ཞེས་གསུངས་པའི་ཕྱིར། དེ་ན་སྟོང་ཉིད་དང་པོ་གསུམ་འཇོག་པའི་མོས་སྤྱོད་ཀྱི་ས་ནི་སྦྱོར་ལམ་བཞི་ཀ་དང་། བཞི་པ་འཇོག་པའི་སྦྱོར་ལམ་ནི་ཆོས་མཆོག་ཡིན་ཞེས་བཞེད་དོ། །དེ་ལ་ཁ་ཅིག ཡེ་ཤེས་ཀྱི་ཚོགས་ཉི་ཤུའི་ས་མཚམས་དེ་ལྟར་མི་འཐད་པར་ཐལ། དེ་ཉི་ཤུ་དོན་སྤྱིའི་ཚུལ་གྱིས་རྟོགས་པ་ཚོགས་སྦྱོར་ནས་ཀྱང་ཡོད་ལ། མངོན་སུམ་རྟོགས་པ་ས་དང་པོའི་བར་དུ་མེད་པའི་ཕྱིར་ཟེར་ན། འོ་ན་ས་བཅུ་ལ་ཆོས་དབྱིངས་ཀུན་ཏུ་འགྲོ་བའི་དོན་དུ་རྟོགས་པ་དང་། མཆོག་གི་དོན་དུ་རྟོགས་པ་སོགས་ཀྱི་ཁྱད་པར་མི་འཐད་པར་ཐལ། རང་བཞིན་རྣམ་དག་གི་ཆོས་དབྱིངས་མཐའ་དག་ས་དང་པོ་ནས་རྟོགས་ཤིང་། གློ་བུར་དྲི་བྲལ་གྱི་ཆོས་དབྱིངས་མཐའ་དག་སངས་རྒྱས་མ་ཐོབ་བར་མ་རྟོགས་པའི་ཕྱིར། ཁོ་ན་རེ། མ་ཁྱབ་སྟེ། ས་བཅུའི་མཉམ་གཞག་གི་རྟོག་པ་ལ་ཁྱད་མེད་ཀྱང་། རྗེས་ཐོབ་ཏུ་ངེས་ཤེས་འདྲེན་ཚུལ་གྱི་སྒོ་ནས་ཆོས་དབྱིངས་ཀུན་ཏུ་འགྲོ་བའི་དོན་ལ་ངེས་ཤེས་འདྲེན་པ་སོགས་ཀྱི་ཁྱད་པར་ཡོད་པའི་ཕྱིར་ཞེ་ན། བདེན་མོད། སྔ་མ་ལའང་ཁྱབ་པ་མེད་པར་ཐལ། ཚོགས་སྦྱོར་གྱི་གནས་སྐབས་སུ་སྟོང་ཉིད་ཉི་ཤུ་དོན་སྤྱིའི་ཚུལ་གྱིས་རྟོགས་པ་དང་། ས་དང་པོ་ནས་མངོན་སུམ་རྟོགས་པ་ལ་ཁྱད་པར་མེད་ཀྱང་། རྗེས་ཐོབ་ཏུ་ཆོས་ཅན་དེ་དང་དེའི་སྟོང་ཉིད་ལ་ངེས་ཤེས་འདྲེན་ཚུལ་མི་འདྲ་བའི་སྒོ་ནས་དེ་ལྟར་གཞག་པའི་ཕྱིར། ཁ་ཅིག དེ་ལྟ་བུའི་ངེས་ཤེས་འདྲེན་ཚུལ་གྱི་ཁྱད་པར་ཡོད་པ་ལའང་སྒྲུབ་བྱེད་མེད་དོ་ཟེར་རོ། །འོ་ན་ས་བཅུའི་རྗེས་ཐོབ་ཀྱི་གནས་སྐབས་སུ་ཆོས་དབྱིངས་ཀུན་ཏུ་འགྲོ་བའི་དོན་ལ་ངེས་ཤེས་འདྲེན་པ་སོགས་ཀྱི་ཁྱད་པར་མེད་པར་ཐལ། དམ་བཅའ་དེའི་ཕྱིར། ཁྱབ་སྟེ། འདི་ནི་ཀུན་ཏུ་འགྲོ་བའི་དོན་གྱིས་ན་ས་དང་པོ་ལའོ་ཞེས་པ་ནས། སྟོང་ཉིད་གཉིས་པོ་འདི་དག་ནི་ལས་ལ་དབང་བའི་རྟེན་དུ་གྱུར་པ་ཉིད་ཀྱིས་ན་སྔ་མ་བཞིན་ས་བཅུ་པ་ལའོ་ཞེས་པ་དང་། ཀུན་ཏུ་འགྲོ་བའི་དོན་སོགས་བཅུ་པོ་ལ་ངེས་ཤེས་འདྲེན་པའི་ཚུལ་གྱིས་ཁྱད་པར་དང་། སྟོང་ཉིད་དེ་དག་ལ་ངེས་ཤེས་འདྲེན་ཚུལ་གྱི་ཁྱད་པར་སྦྱར་ནས་གསུངས་པའི་ཕྱིར། གསུམ་པ་ནི། ཊཱི་ཀ་ལས་ཀྱང་ཨར་གྱི་བཞེད་པར་ལྟར་འདིའི་ཡེ་ཤེས་ལ་དགོངས་ནས་སྦྱོར་ལམ་ནས་འཇོག་ལ། ཁྱད་པར་ནི་ཡེ་ཤེས་དང་པོ་གསུམ་སྦྱོར་ལམ་དང་པོ་གསུམ་དང་། བཞི་པ་ཆོས་མཆོག་ནས་འཇོག་པར་མཛད་ཅིང་། གང་གི་སྐྱོན་སྤོང་འདིའི་དབང་དུ་བྱས་ནས་ཁོ་བོས་སྨྲས་སོ། །འདི་དག་བདག་གི་རྟོག་པ་ལ་ནི་སློབ་དཔོན་གྱི་བཞེད་པ་སྟོང་ཉིད་དང་པོ་གསུམ་རྟོགས་པའི་ཡེ་ཤེས་ཚོགས་ལམ་ནས་འཇོག་སྟེ། སྤྱིར་ཚོགས་བཅུ་བདུན་གྱི་ནང་ཚན་དུ་གྱུར་པའི་ཡེ་ཤེས་ཀྱི་ཚོགས་ཚོགས་ལམ་ནས་ཡོད་པ་ལ་འགལ་བ་མེད་པའི་ཕྱིར་དང་། ཚོགས་སྒྲུབ་ཀྱི་ནང་ཚན་གྱི་ཡེ་ཤེས་ཀྱི་ཚོགས་ནི་ཆོས་མཆོག་མན་ཆད་ན་མེད་པའི་ཕྱིར་དང་། འདིར་སྟོང་ཉིད་ཉི་ཤུ་སྟོན་པའི་མདོ་རྣམས་ཀྱིས་སྟོང་ཉིད་མེད་དགག་ཁོ་ན་སྟོན་པ་མིན་པར་ལས་དང་པོ་པའི་ས་ནས་སངས་རྒྱས་ཀྱི་སའི་བར་གྱི་མངོན་པར་རྟོགས་པའི་རིམ་པ་སྟོན་པར་བཞེད་པ་ཡིན་གྱི། སྒོམ་བྱུང་གཙོ་བོར་གྱུར་པའི་ཡེ་ཤེས་ལ་བཞེད་པའི་གསལ་ཁ་མི་སྣང་བའི་ཕྱིར་ཏེ། འགྲེལ་ཆེན་ལས། འཕགས་པ་རྣམ་གྲོལ་སྡེས་སྐབས་གོ་རིམ་དང་བྲལ་བ་རྣམས་ཀྱི་སྐབས་དོན་ཡང་སྐབས་འདིས་བརྗོད་པར་བྱའོ། །གང་དག་གཞན་དགག་པའི་སྒོ་ནས་སྟོང་ཉིད་ཁོ་ན་བརྗོད་པར་བྱ་བ་ཡིན་གྱི། དེ་དག་ལ་མངོན་པར་རྟོགས་པའི་རིམ་པ་ནི་ཅུང་ཟད་ཀྱང་ཡོད་པ་མ་ཡིན་ནོ་ཞེས་ཟེར་བ་དེ་དག་གི་ལྟར་ན་སྐབས་ཀྱི་དོན་ཁོ་ན་བརྗོད་པར་བྱ་བ་ཡིན་གྱི་བསྟན་བཅོས་ཀྱི་དོན་ནི་གཙོ་བོ་མིན་ནོ། །དེས་ན་སྟོང་པ་ཉིད་ཀྱི་བྱེ་བྲག་གིས་རྣམ་པ་ངོས་ཟིན་པ་དང་། བགྲོད་པར་བྱ་བའི་གོ་རིམ་དང་བྲལ་བའི་ཕྱིར་ན་ཆེད་དུ་བྱ་བ་ཉམས་པར་འགྱུར་རོ་ཞེས་གསུངས་པས་སོ། །མོས་སྤྱོད་ཀྱི་ས་ཞེས་པས་སྦྱོར་ལམ་དུ་མ་གྲུབ་སྟེ། སྤྱིར་མོས་སྤྱོད་ཀྱི་ས་ནི་ཚོགས་སྦྱོར་གཉིས་ཀ་ལ་འཇུག་པས་ཚོགས་ལམ་གྱི་ཟླས་དྲངས་པའི་ཚེ་སྦྱོར་ལམ་དང་། སྦྱོར་ལམ་གྱི་ཟླས་དྲངས་པའི་ཚེ་ཚོགས་ལམ་ལ་འཇུག་པའི་ཕྱིར། དེས་ན་སྟོང་ཉིད་ཉི་ཤུ་པོ་འདིས་ཚོགས་ལམ་ནས་སངས་རྒྱས་ཀྱི་སའི་བར་གྱི་མངོན་པར་རྟོགས་པའི་རིམ་པ་སྟོན་པའི་ཚུལ་ནི་སེམས་བསྐྱེད་ཉི་ཤུ་རྩ་གཉིས་ཀྱི་ས་མཚམས་དང་འདྲའོ། །སའི་ཚོགས་ལ། ཞེས་པའི་སྐབས་སུ། བྱང་སེམས་ཀྱི་སའི་མཐའི་དཔྱད་པ་ལ། ཁྱད་གཞི་སའི་མཚན་ཉིད། ཁྱད་ཆོས་ཞིབ་མོར་བཤད་པ་གཉིས། དང་པོ་ནི། སྟོང་ཉིད་མངོན་སུམ་རྟོགས་པའི་ཤེས་རབ་དང་། སྙིང་རྗེ་ཆེན་པོ་ཟུང་དུ་འབྲེལ་བའི་སྒོ་ནས་རྟོགས་པ་ཕྱི་མ་དང་། ཡོན་ཏན་གྱི་རྟེན་བྱེད་པའི་ཉམས་ལེན་ཁྱད་པར་ཅན་ཏེ། འཇུག་འགྲེལ་ལས། བྱང་ཆུབ་སེམས་དཔའ་རྣམས་ཀྱི་ཟག་པ་མེད་པའི་ཡེ་ཤེས་སྙིང་རྗེ་ལ་སོགས་པས་ཟིན་པ་ཉིད་ཆར་རྣམ་པར་ཕྱེ་བ་ན་ས་ཞེས་བྱ་བའི་མིང་ཐོབ་སྟེ། ཡོན་ཏན་གྱི་འབྱུང་གནས་སུ་གྱུར་པའི་ཕྱིར་རོ་ཞེས་གསུངས་ཤིང་། མོས་སྤྱོད་ཀྱི་ས་ནི་སའི་མིང་གིས་བཏགས་པ་ཡིན་ཅིང་། བྱང་འཕགས་ཀྱི་རྗེས་ཐོབ་ཀྱི་མཁྱེན་པས་སྟོང་ཉིད་མངོན་སུམ་དུ་མ་རྟོགས་པས་ན། ཀླན་ཀའི་གནས་གང་ཡང་མེད་དོ། །གཉིས་པ་ལ། ཕར་ཕྱིན་ལྷག་པའི་ཁྱད་པར། བསླབ་གསུམ་སྦྱོང་བའི་ཁྱད་པར། ཟག་མེད་ཀྱི་ཕུང་པོ་ལྔ་སྦྱོང་བའི་ཁྱད་པར། རྣམ་སྨིན་གྱི་སྐྱེ་བ་འཛིན་པའི་ཁྱད་པར། ངེས་ཤེས་ཀྱི་རྟོགས་པ་དྲང་ཚུལ་གྱི་ཁྱད་པར། སྤང་བྱ་སྤང་བའི་ཁྱད་པར། ཡོངས་སྦྱོང་གི་ཁྱད་པར། ཡོན་ཏན་གྱི་གྲངས་ཀྱི་ཁྱད་པར། ངེས་ཚིག་གི་ཁྱད་པར་དང་དགུ་ལས། དང་པོ་ནི། ས་དང་པོར་སྦྱིན་པའི་ཕར་ཕྱིན་ལ་ལྷག་པར་སྤྱོད་པ་ནས། ས་བཅུ་པར་ཡེ་ཤེས་ཀྱི་ཕར་ཕྱིན་ལ་ལྷག་པར་སྤྱོད་པའི་བར་ཏེ། དབུས་མཐར། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་ལམ་སྟོབས་དང་ཡེ་ཤེས་ཏེ། །འདི་དག་ཕ་རོལ་ཕྱིན་བཅུའོ། །ཁྱད་པར་དང་ནི་ཁྱད་མེད་ནི། །ས་བཅུ་རྣམས་སུ་ཤེས་པར་བྱ། །ཞེས་སོ། །གཉིས་པ་ནི། ས་དང་པོར་བསླབ་པ་གསུམ་གྱི། གཉིས་པར་ཚུལ་ཁྲིམས་ཀྱི་བསླབ་པ་དང་། གསུམ་པར་སེམས་ཀྱི་བསླབ་པ་དང་། བཞི་པ་ནས་དྲུག་པའི་བར་ཤེས་རབ་ཀྱི་བསླབ་པ་སྦྱོང་ཞིང་། བདུན་པ་ནས་བཅུ་པའི་བར་དུ་བསླབ་གསུམ་གྱི་འབྲས་བུ་ལ་གནས་པར་རྒྱན་ལས་བཤད་དོ། །གསུམ་པ་ནི་ས་དང་པོ་ཟག་མེད་ཀྱི་ཕུང་པོའི་རྟེན་ཡིན་ལ། གཉིས་པ་ཚུལ་ཁྲིམས་ཀྱི་ཕུང་པོ་སྦྱོང་། གསུམ་པར་ཏིང་ངེ་འཛིན་གྱི། བཞི་པ་ནས་དྲུག་པའི་བར་དུ་ཤེས་རབ་ཀྱི། བདུན་པ་མན་ཆད་དུ་རྣམ་པར་གྲོལ་བའི་ཕུང་པོ་དང་། དེ་ཡན་ཆད་དུ་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྦྱོང་བར་རྒྱན་ལས་བཤད་དོ། །བཞི་པ་ནི། ས་བཅུ་རྣམས་སུ་རིམ་བཞིན། འཛམ་གླིང་གི་རྒྱལ་པོ་དང་། འཁོར་ལོས་བསྒྱུར་བའི་རྒྱལ་པོ་དང་། བརྒྱ་བྱིན་དང་། མཐའ་བྲལ་གྱི་དང་། དགའ་ལྡན་གྱི་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་བདག་པོ་དང་། སྟོང་གི་བདག་པོ་ཚངས་པ་དང་། སྟོང་གསུམ་གྱི་བདག་པོ་ཚངས་ཆེན་དང་། འོག་མིན་གྱི་ལྷའི་བུ་དབང་ཕྱུག་ཆེན་པོ་རྣམས་སུ་སྐྱེ་བ་འཛིན་པར་རིན་ཆེན་ཕྲེང་བ་ལས་བཤད་དོ། །ལྔ་པ་ནི། ས་བཅུའི་མཉམ་གཞག་གི་གནས་སྐབས་སུ་རང་བཞིན་རྣམ་དག་གི་ཆོས་ཉིད་མཐོང་ཚུལ་ལ་ཁྱད་པར་མེད་དེ། ཆོས་དབྱིངས་ལ་ཆ་ཤས་མེད་པས་མཐོང་མ་མཐོང་གི་ཆ་གཉིས་མེད་པའི་ཕྱིར། གློ་བུར་དྲི་བྲལ་གྱི་ཆོས་ཉིད་མཐོང་ཚུལ་ལ་ཁྱད་པར་ཡོད་དེ། ས་ཕྱི་མ་རྣམས་སུ་སྔ་མ་རྣམས་ཀྱི་ངོས་སྐལ་གྱི་དྲི་མ་ལས་གྲོལ་བའི་བྲལ་བ་གསར་ཐོབ་རེ་རེ་ཡོད་པའི་ཕྱིར། དེའི་དོན་ཡང་ཆོས་དབྱིངས་རྟོགས་པའི་ཚེ་རང་གི་སེམས་ཀྱི་ཆོས་ཉིད་དེ་ཉིད་རྟོགས་པ་ཡིན་པས། ས་གཉིས་པའི་ཡེ་ཤེས་ཀྱི་རྟོགས་བྱར་གྱུར་པའི་སེམས་ཀྱི་ཆོས་དབྱིངས་དེ་མཐོང་སྤངས་ཀྱི་དྲི་མ་དང་མ་བྲལ་ལ། མཐོང་ལམ་བར་ཆད་མེད་ལམ་གྱི་རྟོགས་པར་གྱུར་པའི་སེམས་ཀྱི་ཆོས་དབྱིངས་དེ་མཐོང་སྤངས་ཀྱི་དྲི་མ་དང་བྲལ་ཞེས་པ་ལྟ་བུ་ཡིན་གྱི། འཛིན་སྟངས་མི་འདྲ་བའི་ཁྱད་པར་ནི་གློ་བུར་དྲི་བྲལ་གྱི་ཆོས་ཉིད་མཐོང་ཚུལ་ལའང་ཁྱད་པར་མེད་དོ། །གནད་འདི་འདྲའི་རིགས་ལ་ཁོ་བོ་ཅིས་ཀྱང་དྲན་པར་བྱེད་དགོས་སོ། །འོ་ན་ས་བཅུའི་མཉམ་གཞག་རྣམས་ཁྱད་མེད་དུ་འགྱུར་རོ་ཞེ་ན། ཁྱད་པར་ཤིན་ཏུ་ཆེ་སྟེ། བསོད་ནམས་ཀྱི་ཚོགས་རྫོགས་མ་རྫོགས་དང་། གོམས་པ་ཆེ་ཆུང་གི་དབང་གིས་སྒྲིབ་པ་སྤོང་ནུས་པ་དང་མི་ནུས་པའི་ཁྱད་པར་དང་། རྗེས་ཐོབ་ཏུ་ངེས་ཤེས་འདྲེན་ཚུལ་ལ་སོགས་པའི་ཁྱད་པར་ཡོད་པའི་ཕྱིར། དང་པོ་ནི་འོག་ནས་འཆད་ལ། ངེས་ཤེས་འདྲེན་ཚུལ་གྱི་ཁྱད་པར་ནི། དབུས་མཐར། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་དོན་དང་། །ཉོན་མོངས་རྣམ་དག་མེད་དོན་དང་། །ཐ་དད་མེད་པའི་དོན་ཉིད་དང་། །དྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་གནས། །ཞེས་པ་ལྟར། ས་དང་པོའི་རྗེས་ཐོབ་ཀྱི་གནས་སྐབས་སུ་ཆོས་དབྱིངས་ཀུན་ཏུ་འགྲོ་བའི་དོན་ལ་ངེས་ཤེས་འདྲེན་པ་སོགས་ཀྱི་ཁྱད་པར་ཡོད་པའི་ཕྱིར། དྲུག་པ་ལ་ཉོན་སྒྲིབ་སྤོང་བའི་ཁྱད་པར་དང་། ཤེས་སྒྲིབ་སྤོང་བའི་ཁྱད་པར་གཉིས་ལས། དང་པོ་ནི། ས་དང་པོར་མཐོང་སྤང་དུ་གྱུར་པའི་ཉོན་མོངས་བརྒྱ་དང་བཅུ་གཉིས་སྤོང་ཞིང་། གཉིས་པ་ནས་བཅུ་པའི་བར་དགུ་ལ་སྒོམ་སྤང་དུ་གྱུར་པའི་ཉོན་མོངས་བཅུ་དྲུག་རིམ་བཞིན་སྤོང་ངོ་། །ཇི་ལྟར་མཐོང་སྤོང་དུ་གྱུར་པའི་ཉོན་མོངས་བརྒྱ་དང་བཅུ་གཉིས་སུ་འགྱུར་ཞེ་ན། འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ། ལྟ་བ་ལ། འཇིག་ལྟ། མཐར་ལྟ། ལྟ་བ་མཆོག་འཛིན། ཚུལ་ཁྲིམས་དང་། བརྟུལ་ཞུགས་མཆོག་འཛིན། ལོག་པར་ལྟ་བ་སྟེ། ཉོན་མོངས་པ་བཅུ་པོ་དེ་ཉིད་བདེན་པ་བཞིའི་བྱེ་བྲག་གིས་འདོད་ཁམས་ན་བཞི་བཅུ། གཟུགས་གཟུགས་མེད་གཉིས་ན་ཁོང་ཁྲོ་བཞི་བཞི་བོར་བས་སོ་དྲུག་རེ་རེ་སྟེ། དེ་ལྟར་བྱས་ན་བརྒྱ་དང་བཅུ་གཉིས་སུ་འགྱུར་རོ། །ཇི་ལྟར་ན་སྒོམ་སྤང་དུ་གྱུར་པའི་ཉོན་མོངས་པ་བཅུ་དྲུག་ཏུ་འགྱུར་ཞེ་ན། ཐེ་ཚོམ་དང་། ལྟ་བ་ཕྱི་མ་གསུམ་སྟེ། བཞི་ནི་མཐོང་སྤང་ཁོ་ན་ཡིན་པས་སྒོམ་སྤང་མེད་ལ། ཉོན་མོངས་པ་གཞན་དྲུག་པོ་འདོད་ཁམས་ན་སྒོམ་སྤང་དྲུག་ཅར་ཡོད་ཅིང་། གཟུགས་གཟུགས་མེད་གཉིས་ན་ཁོང་ཁྲོ་གཉིས་གཉིས་བཏོན་པས་ལྔ་ལྔ་སྟེ་དེ་ལྟར་བྱས་ན་སྒོམ་སྤང་བཅུ་དྲུག་ཏུ་འགྱུར་རོ། །འདི་ནི་མངོན་པ་གོང་མ་ནས་གསུངས་པའི་ཚུལ་ལོ། །མཛོད་ལས། མཐོང་སྤང་བརྒྱད་ཅུ་རྩ་བརྒྱད། སྒོམ་སྤང་བཅུ་སྟེ། དགུ་བཅུ་གོ་བརྒྱད་དུ་གསུངས་སོ། །ཉོན་མོངས་པ་དེ་དག་ས་བཅུ་པོ་རྣམས་སུ་རིམ་བཞིན་སྤོང་ཚུལ་ནི། མངོན་གྱུར་པ་ནི་ས་དང་པོར་མ་ལུས་པར་སྤངས་ཟིན་ལ། བག་ལ་ཉལ་ལ་མཐོང་སྤངས་ཉོན་མོངས་པའི་བག་ཉལ་རྣམས་མཐོང་ལམ་བར་ཆད་མེད་ལམ་གྱིས་ཅིག་ཆར་སྤོང་ཞིང་། སྒོམ་སྤང་ཉོན་མོངས་པའི་བག་ལ་ཉལ་ལ་འདོད་པའི་སས་བསྡུས་པའི་ཆེན་པོ། འབྲིང་། ཆུང་ངུ་གསུམ་དུ་བསྡུས་ནས། ས་གཉིས་པ། གསུམ་པ། བཞི་པའི་བར་ཆད་མེད་ལམ་གྱིས་རིམ་བཞིན་སྤོང་། དེ་ནས་གསུམ་གྱིས་གཟུགས་ཀྱི་སས་བསྡུས་དང་། དེ་ནས་གསུམ་གྱིས་གཟུགས་མེད་ཀྱི་སས་བསྡུས་རྣམས་སྔ་མ་བཞི་སྤོང་སྟེ། ས་དེ་དང་དེའི་ཤེས་སྒྲིབ་སྤོང་བ་དང་། ཉོན་སྒྲིབ་ཀྱི་བག་ཆགས་སྤོང་བ་དུས་མཉམ་པའི་ཕྱིར། གཉིས་པ་ནི་ས་དང་པོའི་བར་ཆད་མེད་ལམ་གྱིས་མཐོང་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་ཀྱི་ས་བོན་ཅིག་ཆར་སྤོང་ཞིང་། ས་གཉིས་པ་ནས་བཅུ་པའི་བར་གྱི་བར་ཆད་མེད་ལམ་རྣམས་ཀྱིས་སྒོམ་སྤང་ཤེས་སྒྲིབ་ཀྱི་ས་བོན་དེ་དག་ཆེན་པོའི་ཆེན་པོ་ལ་སོགས་པ་དགུར་བྱས་ནས་རིམ་བཞིན་སྤང་ངོ་། །འོ་ན་སྒོམ་ལམ་བར་ཆད་མེད་ལམ་གྱིས་སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་ཀྱི་ས་བོན་སྤོང་བར་བཤད་པ་ཇི་ལྟར་ཡིན་སྙམ་ན། འདོད་པའི་སས་བསྡུས་ཀྱི་གཟུང་འཛིན་གྱི་རྣམ་པར་རྟོག་པ་སོ་དྲུག་ཆེན་པོ་དང་། འབྲིང་། ཆུང་ངུར་བསྡུས་ནས། ས་གཉིས་པ། གསུམ་པ། བཞི་པའི་བར་ཆད་མེད་ལམ་གྱིས་རིམ་བཞིན་སྤོང་ངོ་། །དེ་ནས་གསུམ་གྱིས་གཟུགས་ཀྱི་སས་བསྡུས་སོ་དྲུག དེ་ནས་གསུམ་གྱིས་གཟུགས་མེད་ཀྱི་སས་བསྡུས་ཀྱི་སོ་དྲུག་པོ་དེ་དག་སྔ་མ་ལྟར་སྤོང་བས་དོན་གཅིག་པར་ཤེས་པར་བྱའོ། །འོ་ན་མཐོང་ལམ་གྱིས་མཐོང་སྤང་ཉོན་མོངས་བརྒྱ་རྩ་བརྒྱད་དང་། སྒོམ་ལམ་གྱིས་སྒོམ་སྤང་ཉོན་སྒྲིབ་བརྒྱ་རྩ་བརྒྱད་སྤོང་བར་འགྲེལ་པ་ལས་གསུངས་པ་དང་། གོང་གི་མཐོང་སྤང་སྒོམ་སྤངས་ཀྱི་ཉོན་མོངས་ཀྱི་གྲངས་རྣམས་མི་མཐུན་པ་ཇི་ལྟར་སྙམ་ན། སྐྱོན་མེད་དེ། བརྒྱ་རྩ་བརྒྱད་གསུངས་པ་ནི་ཤེས་སྒྲིབ་ལ་དེ་ལྟར་ཡོད་པས་དེ་དག་གི་རྒྱུར་གྱུར་པའི་ཉོན་མོངས་པའི་བག་ཆག་དེ་ལྟར་ཡོད་པ་ལ་དགོངས་ལ། སྔ་མ་ནི། ཉོན་མོངས་པ་རང་གི་ངོ་བོ་དང་། ཁམས་ཀྱི་སྒོ་ནས་དེ་ལྟར་ཕྱེ་བའི་ཕྱིར། བདུན་པ་ནི། ས་དང་པོ་ལ་ཡོངས་སྦྱོང་བཅུ། གཉིས་པ་ལ་བརྒྱད། གསུམ་པ་ལ་ལྔ། བཞི་པ་ལ་བཅུ། ལྔ་པ་ལ་བཅུ། དྲུག་པ་ལ་བཅུ་གཉིས། བདུན་པ་ལ་ཉི་ཤུ། བརྒྱད་པ་ལ་བརྒྱད། དགུ་པ་ལ་བཅུ་གཉིས་ཏེ། མདོར་ན་ཡོངས་སྦྱོང་གོ་ལྔའོ། །ས་བཅུ་པ་ལ་ཡོངས་སྦྱོང་ལོགས་སུ་མི་འཆད་པའི་རྒྱུ་མཚན་སྤྲོ་བ་བསྐྱེད་པའི་ཕྱིར་འབྲས་བུའི་སྒོ་ནས་འཆད་པའི་སྐབས་ཡིན་པའི་ཕྱིར་མེད་པ་མིན་ཏེ། ས་དགུ་པའི་ཡོངས་སྦྱོང་གི་ནང་དུ་འདུས་པའི་ཕྱིར། བརྒྱད་པ་ནི། ས་དང་པོ་ལ་སངས་རྒྱས་བརྒྱ་མཐོང་བ་དང་། དེས་བྱིན་གྱིས་བརླབས་པ་དང་། ཏིང་ངེ་འཛིན་བརྒྱ་ལ་འཇུག་པ་དང་། འཇིག་རྟེན་གྱི་ཁམས་བརྒྱ་གཡོ། ཞིང་བརྒྱར་འགྲོ། འཇིག་རྟེན་གྱི་ཁམས་བརྒྱ་སྣང་བར་བྱེད། སེམས་ཅན་བརྒྱ་སྨིན། བསྐལ་པ་བརྒྱར་གནས། དེ་དག་གི་སྔོན་དང་ཕྱི་མཐའ་ལ་འཇུག ཆོས་ཀྱི་སྒོ་བརྒྱ་འབྱེད། ལུས་བརྒྱ་སྟོན། ལུས་རེ་རེ་ལ་འཁོར་བརྒྱ་ཕྲག་རེ་རེས་བསྐོར་བ་སྟོན་པས་ཡོན་ཏན་བརྒྱ་ཕྲག་བཅུ་གཉིས་སྟོན། དེ་བཞིན་དུ་ས་གཉིས་པ་ལ་སྟོང་འགྱུར། གསུམ་པ་ལ་བརྒྱ་སྟོང་འགྱུར། བཞི་པ་ལ་ཁྲི་ཕྲག ལྔ་པ་ལ་ཕྲག་ཁྲིག་ཕྲག་སྟོང་། དྲུག་པ་ལ་ཕྲག་ཁྲིག་ཕྲག་བརྒྱ་སྟོང་། བདུན་པ་ལ་བྱེ་བ་ཕྲག་ཁྲིག་བརྒྱ་སྟོང་། བརྒྱད་པ་ལ་སྟོང་གསུམ་འབུམ་ཕྲག་བཅུའི་རྡུལ་སྙེད་དང་། ས་དགུ་པ་ལ་སངས་རྒྱས་ཀྱི་ཞིང་གྲངས་མེད་འབུམ་ཕྲག་བཅུའི་རྡུལ་སྙེད་དང་། ས་བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་སྙེད་ཐོབ་པར་མདོ་སྡེ་ས་བཅུ་པ་དང་འཇུག་པ་ལས་བཤད་དོ། །དགུ་པ་ནི་རྒྱན་ལས། བྱང་ཆུབ་ལ་ནི་ཉེ་བ་དང་། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེག་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱངས་དཀའ་བ། །དེ་ཕྱིར་སྦྱང་དཀའ་ཞེས་བརྗོད་དོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདི་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བྱ། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་མངོན་པར་འདོད། །སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སོ། ས་དགུ་འདས་ནས་ཡེ་ཤེས་ནི། །ཞེས་པའི་སྐབས་སུ། དམན་པ་ས་བརྒྱད་ཀྱི་མཚན་གཞི་ལ་རིགས་ཀྱི་ས་ནི་བྱེ་བྲག་སྨྲ་བས་རང་སངས་རྒྱས་དང་། བྱང་སེམས་ཀྱི་སྦྱོར་ལམ་བཞི་ཆར་དང་། ཉན་ཐོས་ཀྱི་བཟོད་ཆེན་དང་། ཆོས་མཆོག་གཉིས་ཁོ་ན་ལ་འདོད་དེ། དེ་ཐོབ་ནས་བྱང་ཆུབ་གཞན་དུ་འགྱུར་བ་མི་སྲིད་པའི་ཕྱིར་རོ། །ཐེག་ཆེན་པའི་ལུགས་ལ། ཐེག་དམན་གྱི་རིགས་མ་ངེས་པས་རིགས་ཀྱི་སར་གཞག་དུ་མེད་ཅིང་། རིགས་ངེས་པའི་ཐེག་དམན་གྱི་སྦྱོར་ལམ་བཞི་ཆར་ཡང་རིགས་ཀྱི་སར་འདོད་དེ། དེ་ཐོབ་ནས་རང་གི་བྱང་ཆུབ་མ་ཐོབ་བར་དུ་ཐེག་པ་གཞན་དུ་མི་འགྱུར་བའི་ཕྱིར། བརྒྱད་པའི་ས་ནི་མཛོད་ལས་གསུངས་པའི་རྒྱུན་ཞུགས་ཞུགས་པའི་མངོན་པར་རྟོགས་པའོ། །གོང་མར་གསུངས་པ་ལྟར་གྱི་སྦྱོར་ལམ་སྟན་གཅིག་པའི་རྟོགས་པ་ནི་བརྒྱད་པའི་ས་མིན་ཏེ། རིགས་ཀྱི་ས་ཡིན་པའི་ཕྱིར། མཐོང་བའི་ས་ནི་རྒྱུན་ཞུགས་འབྲས་གནས་ཙམ་པོའི་མངོན་པར་རྟོགས་པའོ། །བསྲབས་པའི་ས་ནི་ཕྱིར་འོང་འབྲས་གནས་ཙམ་པོའི་མངོན་པར་རྟོགས་པའོ། །འདོད་ཆགས་དང་བྲལ་བའི་ས་ནི་ཕྱིར་མི་འོང་འབྲས་གནས་ཙམ་པོའི་དེའོ། །འདི་གསུམ་གྱི་ཁྱད་པར་ཅན་གྱི་མངོན་པར་རྟོགས་པ་ནི་དེ་དང་དེར་མི་འཇོག་སྟེ། དེ་ཞུགས་པ་ལྷག་མ་གསུམ་གྱི་མངོན་པར་རྟོགས་པ་ཡིན་པས་ཉན་ཐོས་ཀྱི་སར་འཇོག་པའི་ཕྱིར། བྱས་པ་རྟོགས་པའི་ས་ནི་ཉན་ཐོས་དགྲ་བཅོམ་པའི་མངོན་རྟོགས་ཡིན་ནོ། །ཉན་ཐོས་ཀྱི་ས་ནི་སྔར་གྱི་ཁྱད་པར་ཅན་གསུམ་གྱི་མངོན་རྟོགས་ཏེ། གཞན་རྣམས་ལ་མིང་གི་ཐ་སྙད་རེ་རེ་ཡོད་པ་ལྟར། འདི་གསུམ་ལ་མིང་གི་ཁྱད་པར་གཞན་མེད་པས་ཉན་ཐོས་ཀྱི་ས་ཞེས་པའི་མིང་གིས་གཞག་དགོས་པའི་ཕྱིར། འོ་ན་དེ་ལ་དེར་འཇོག་པའི་རྒྱུ་མཚན་ཅི་ཞེ་ན། འོག་ཏུ་རང་སངས་རྒྱས་ཀྱི་ས་དང་བྱང་སེམས་ཀྱི་ས་ཞེས་འབྱུང་བའི་ཟླར་ཉན་ཐོས་ཀྱི་ས་གཞག་པས་ཐེག་པ་གསུམ་གྱི་ཚུལ་གསུམ་གྲུབ་པར་བསྟན་པའི་ཆེད་ཡོད་པའི་ཕྱིར། དེ་ལ་དགོས་པ་ཡོད་དེ། ས་བཅུ་པའི་སྐབས་འདིར་ཐེག་པ་གསུམ་གྱི་རྟོགས་རིགས་ཡོན་ཏན་ཡར་ལྡན་དུ་ཡོད་པར་ཤེས་པའི་ཆེད་ཡོད་པའི་ཕྱིར། གཡག་རོང་གཉིས་ཀྱི་ལེགས་བཤད་ཁོ་བོའི་སྙིང་ལ་འབབ་བོ། །མཐའ་དང་སྒོམ་པའི་ལམ་དག་ལ། །ཞེས་པའི་སྐབས་སུ། གཉེན་པོ་ཚོགས་སྒྲུབ་ཀྱི་མཚན་ཉིད་ལ་དགག་གཞག་གཉིས། དང་པོ་ལ། ཁ་ཅིག རང་གི་ངོས་སྐལ་གྱི་སྤང་བྱའི་ས་བོན་གྱི་དངོས་གཉེན་བྱེད་པའི་བྱང་འཕགས་ཀྱི་མཁྱེན་པ་ཞེས་དང་། དེ་ལྟར་བྱེད་པའི་དེའི་རྒྱུད་ཀྱི་བར་ཆད་མེད་ལམ་ཟེར་རོ། །དང་པོ་ལ་མཐོང་སྤངས་ཀྱི་དངོས་གཉེན་དུ་གྱུར་པའི་སྦྱོར་བ་ཉེར་བསྡོགས་ཀྱི་ལམ་དེ་ཡིན་ན། བྱང་འཕགས་ཀྱི་མཁྱེན་པ་ཡིན་དགོས་པར་ཐལ། མཚོན་བྱ་དེ་ཡིན་ན་དེ་ཡིན་དགོས་པའི་ཕྱིར། འདོད་ན། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོས་མ་ངེས། གཉིས་པ་ལ་ས་གཉིས་པའི་སྦྱོར་བ་ཉེར་བསྡོགས་ཀྱི་ལམ་དེ་ཆོས་ཅན། དེར་ཐལ། མཚོན་བྱ་དེའི་ཕྱིར་ཏེ། སྒོམ་སྤང་ཤེས་སྒྲིབ་ཀྱི་སྤོང་གཉེན་ཡིན་པའི་ཕྱིར། གཉིས་པ་ལ། སློབ་དཔོན་ལྟར་ན། ཤེས་སྒྲིབ་ཀྱི་ས་བོན་གྱི་སྤོང་བ་གཉེན་པོ་དེ་གཉེན་པོ་ཚོགས་སྒྲུབ་ཡིན་ལ། དབྱེ་ན་མཐོང་སྤང་དང་སྒོམ་སྤང་གཉེན་པོའི་ཚོགས་སྒྲུབ་གཉིས། མཚན་ཉིད་རིམ་བཞིན། མཐོང་སྤང་ཤེས་སྒྲིབ་ཀྱི་ས་བོན་གྱི་སྤང་གཉེན་དང་། སྒོམ་སྤང་སོགས་དེས་འགྲེའོ། །དབྱེ་ན་རེ་རེ་ལའང་སྦྱོར་བ་ཉེར་བསྡོགས་དང་འཇུག་པ་བར་ཆད་མེད་ལམ་གཉིས་གཉིས་ཡོད་པས་བཞིའོ། །དེ་རེ་རེ་ལའང་གཟུང་རྟོགས་དང་འཛིན་རྟོག་གི་གཉེན་པོའི་དབྱེ་བས་གཉིས་གཉིས་ཏེ་བརྒྱད་དུ་བཞེད་དོ། །རྩ་བའི་དགོངས་པ་ནི། རང་གི་ངོས་སྐལ་གྱི་ཤེས་སྒྲིབ་ཀྱི་དངོས་གཉེན་དུ་གྱུར་པའི་བར་ཆད་མེད་ལམ་གཉེན་པོ་ཚོགས་སྒྲུབ་ཀྱི་མཚན་ཉིད་ཡིན་ལ། དབྱེ་ན་སྔར་ལྟར་གཉིས་ལས། མཚན་ཉིད་རིམ་བཞིན། རང་གི་ངོས་སྐལ་གྱི་མཐོང་སྤང་ཤེས་སྒྲིབ་དང་། སྒོམ་སྤང་དེའི་ས་བོན་གྱི་དངོས་གཉེན་དུ་གྱུར་པའི་བར་ཆད་མེད་ལམ་མོ། །དེ་རེ་རེ་ལའང་སྤང་བྱ་གཟུང་འཛིན་གྱི་རྣམ་པར་རྟོགས་པའི་དབྱེ་བས་ལྡོག་པའི་སྒོ་ནས་བཞི་བཞི་སྟེ་བརྒྱད་དོ། །གཞན་གྱི་སྐྱོན་བརྗོད་ནི་སློབ་དཔོན་གྱི་དགོངས་པའོ། །ཆེད་དུ་བྱ་དང་མཉམ་ཉིད་དང་། །ཞེས་པའི་སྐབས་སུ། ངེས་འབྱུང་སྒྲུབ་པའི་མཚན་ཉིད་ལ་དགག་གཞག་གཉིས་ལས་དང་པོ་ནི། ཁ་ཅིག སྒྲུབ་པ་ཁྱད་པར་བཞི་ལྡན་གང་ཞིག རང་གི་འབྱུང་ས་མཐར་ཐུག་ཏུ་གདོན་མི་ཟ་བར་འབྱུང་བའི་རྟོགས་པ་ཟེར་ན། དྲོད་ལ་གནས་པའི་སེམས་དཔའ་དབང་རྣོན་གྱི་ཡེ་ཤེས་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར། སངས་རྒྱས་ཀྱི་སར་གདོན་མི་ཟ་བར་འབྱུང་བའི་རྟོགས་པ་ཡིན་པའི་ཕྱིར་ཏེ། ཕྱིར་མི་ལྡོག་པའི་རྟགས་ཐོབ་པའི་སེམས་དཔའི་རྣལ་འབྱོར་ཡིན་པའི་ཕྱིར། རྩ་བར་འདོད་མི་ནུས་ཏེ། སོ་སོ་སྐྱེ་བོའི་མངོན་རྟོགས་ཡིན་པའི་ཕྱིར། ཡང་ཁ་ཅིག རང་གི་འབྱུང་ས་མཐར་ཐུག་ཏུ་དངོས་སུ་འབྱུང་བའི་རྟོགས་པ་ཟེར་ན། རྒྱུན་མཐའི་སྔ་ལོགས་ཀྱི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེ་དེར་ཐལ། དེའི་སྔ་ལོགས་ན་ངེས་འབྱུང་སྒྲུབ་པ་ཡོད་པའི་ཕྱིར། རྩ་བར་འདོད་ན། རྒྱུན་མཐའི་སྐབས་ན་འབྱུང་ས་མཐར་ཐུག་ཡོད་པར་ཐལ་ལོ། །ས་མཚམས་ལ་ཁ་ཅིག་ས་བརྒྱད་པ་ནས་འཇོག་པ་མི་འཐད་དེ། རང་གི་ངེས་པར་འབྱུང་སར་དངོས་སུ་འབྱིན་པ་དེ་ནས་མེད་པའི་ཕྱིར་ཏེ། འབྱིན་པ་ཙམ་ནི་སྦྱོར་ལམ་ནས་ཀྱང་ཡོད་པའི་ཕྱིར་རོ། །ཁ་ཅིག རྒྱུན་མཐའི་སྔ་ལོགས་ནས་སངས་རྒྱས་སའི་བར་འཇོག་པ་མི་འཐད་དེ། སངས་རྒྱས་ཀྱི་སར་སྒྲུབ་པ་འཇོག་པ་མི་སྲིད་པའི་ཕྱིར་རོ། །གཉིས་པ་ནི། ངེས་འབྱུང་སྒྲུབ་པའི་ངེས་པར་འབྱུང་སར་དངོས་སུ་འབྱིན་པར་བྱེད་པའི་སེམས་དཔའི་རྣལ་འབྱོར། དབྱེ་ན་བརྒྱད་ཡོད་པ་ལས། ལམ་གྱི་ཡུལ་ཅན་གྱི་ངེས་འབྱུང་སྒྲུབ་པ་ནི་རྒྱུན་མཐའི་སྔ་ལོགས་ཁོ་ནར་ཡོད་དེ། དེའི་ངེས་པར་འབྱུང་སའི་ལམ་དེ་རྒྱུན་མཐའི་ཡེ་ཤེས་ཁོ་ན་ལ་འཇོག་པའི་ཕྱིར། གཞན་བདུན་ནི་རྒྱུན་མཐའི་གནས་སྐབས་སུ་ཡོད་དེ། དེའི་ངེས་པར་འབྱུང་ས་བདུན་པོ་དེ་སངས་རྒྱས་ཀྱི་ས་ཁོ་ནར་ཡོད་པའི་ཕྱིར། ཡུམ་དོན་རབ་གསལ་ལས་སྐབས་དང་པོའི་དཀའ་བའི་གནས་རྣམ་པར་བཤད་པའོ།། །།
སྐབས་གཉིས་པ་ལམ་ཤེས་ཀྱི་དཀའ་བའི་གནས་རྣམ་པར་བཤད་པ།
ཐེག་གསུམ་ལམ་གྱི་དམིགས་རྣམ་མ་ལུས་པ། །ཐབས་ལྡན་དམིགས་མེད་བློ་ཡིས་ལེགས་རྟོགས་ནས། །རྣམ་མཁྱེན་འབྲས་བཟང་སྒྲུབ་པའི་དཔལ་ཡོན་ཅན། །ལམ་ཀུན་ཤེས་པའི་རྒྱལ་ཡུམ་དེ་ལ་འདུད། །རྣམ་པ་ཐམས་ཅད་མཁྱེན་པ་ཉིད་རྟོགས་པ་ནི་ལམ་ཤེས་ཉིད། ཅེས་པའི་སྐབས་སུ། ལོ་ཙཱ་བ་དཔོན་སློབ་ཀྱི་བཞེད་པ་ལ། སྐབས་འདིའི་ཆོས་ལྔ་ཀའང་ལམ་ཤེས་སྐྱེ་བའི་རྟེན་གྱི་གང་ཟག་གི་ཁྱད་པར་ཡིན་ཏེ། དེའི་རྟེན་གྱི་གང་ཟག་ཡིན་ན། གེགས་ང་རྒྱལ་མངོན་གྱུར་པ་དང་བྲལ་བ། རྒྱུའི་རྐྱེན་སེམས་བསྐྱེད་པ། བདག་པོའི་རྐྱེན་རིགས་དང་ལྡན་པ། འཁོར་བ་ཆེད་དུ་གཉེར་ནས་མི་འདོར་བའི་རང་བཞིན། གཞན་དོན་བྱེད་པའི་བྱེད་ལས་ཀྱི་ཁྱད་པར་ལྔ་དང་ལྡན་པ་ཞིག་དགོས་པའི་ཕྱིར་ཞེས་བཞེད་དོ། །འོ་ན་ལམ་ཤེས་སྐྱེ་བ་ཙམ་གྱི་རྟེན་གྱི་གང་ཟག་ཡིན་ན། ཁྱད་ཆོས་ལྔ་པོ་དེ་དང་ལྡན་པས་ཁྱབ་པ་ལ་བྱེད་དམ། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་ན། ཁྱད་ཆོས་ལྔ་པོ་དེ་དང་ལྡན་པས་ཁྱབ་པ་ལ་བྱེད། དང་པོ་ལྟར་ན་ལམ་མ་ཞུགས་པའི་གང་ཟག་ཆོས་ཅན། དེར་ཐལ། དེའི་ཕྱིར། ཕྱི་མ་ལྟར་ན། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་ན། ཉོན་སྒྲིབ་ཆེད་དུ་གཉེར་ནས་མི་སྤོང་བས་ཁྱབ་པར་ཐལ། དེ་ཡིན་ན་རང་བཞིན་དང་ནི་ཞེས་པའི་སྐབས་ཀྱི་རང་བཞིན་དེ་དང་ལྡན་པས་ཁྱབ་པའི་ཕྱིར། རྟགས་ཁས། ཁྱབ་སྟེ། ཉོན་མོངས་པ་རྣམ་པ་ཐམས་ཅད་དུ་སྤངས་པ་མིན་པ་ཞེས་བྱ་བ་ནི་རང་བཞིན་ཡིན་ནོ་ཞེས་གསུངས་པའི་ཕྱིར། རྩ་བར་འདོད་ན། བྱང་སེམས་ཀྱི་སྦྱོར་ལམ་ཆོས་མཆོག་ཆེན་པོ་ལ་གནས་པའི་བྱང་སེམས་ཆོས་ཅན། དེར་ཐལ། དེའི་ཕྱིར། འདོད་ན། དེས་དེ་ཆེད་དུ་གཉེར་ནས་སྤོང་བར་ཐལ། དེས་གང་ཟག་གི་བདག་མེད་རྟོགས་པའི་རྟོགས་རིགས་ཆེད་དུ་གཉེར་ནས་སྒོམ་པའི་ཕྱིར། མ་གྲུབ་ན། དེར་ཐལ། དེས་ས་དང་པོར་གང་ཟག་གི་བདག་མེད་མངོན་སུམ་དུ་རྟོགས་དགོས་པའི་ཕྱིར། ཡང་དེས་དེ་ཆེད་དུ་གཉེར་ནས་སྤོང་བར་ཐལ། བྱང་ས་ལས། ཉན་ཐོས་ལས་བྱང་ཆུབ་སེམས་དཔའ་ཉོན་མོངས་པ་སྤོང་བ་ལ་བྱེ་བ་བརྒྱ་འགྱུར་གྱིས་བརྩོན་པར་བཤད་པའི་ཕྱིར། གཞན་ཡང་སྐབས་དང་པོར་འབྲས་བུས་སེམས་ཅན་མ་བསྡུས་པ་བསྡུས་པ་ལ་སོགས་པ་བྱེད་པ་ཅན་ཡིན་ནོ་ཞེས་པའི་སྐབས་ཀྱི་བྱེད་ལས་དེ་ལམ་ཤེས་ཀྱི་བྱེད་ལས་མ་ཡིན་པར་ཐལ། སྐབས་གཉིས་པར། སེམས་ཅན་མ་བསྡུས་པ་བསྡུས་པ་ལ་སོགས་པ་ཡིན་པས་བྱེད་པ་ཡིན་ནོ་ཞེས་པའི་སྐབས་ཀྱི་བྱེད་ལས་དེ་ལམ་ཤེས་ཀྱི་བྱེད་ལས་མིན་པའི་ཕྱིར། རྟགས་ཁས། དེས་ན་ཉི་སྣང་ལས། དང་པོ་གསུམ་ལམ་ཤེས་སྐྱེ་བའི་རྟེན་གྱི་གང་ཟག་གི་ཁྱད་པར། ཕྱི་མ་གཉིས་ལམ་ཤེས་ཀྱི་ཁྱད་པར་དུ་བྱེད་པ་ཉིད་ལེགས་སོ། །དེ་ལ་ཁོ་ན་རེ། རང་བཞིན་དང་ནི་ཞེས་པའི་སྐབས་ནས་བསྟན་པའི་རང་བཞིན་དེ་ཆོས་ཅན། ཁྱོད་ལམ་ཤེས་ཀྱི་ཡན་ལག་མིན་པར་ཐལ། ཁྱོད་ལམ་ཤེས་ཀྱི་ངོ་བོ་ཡིན་པའི་ཕྱིར་ཞེས་ཟེར་ན། འཕགས་ལམ་ཡན་ལག་བརྒྱད་ཆོས་ཅན། འཕགས་པའི་ལམ་གྱི་ཡན་ལག་མིན་པར་ཐལ། དེའི་ངོ་བོ་ཡིན་པའི་ཕྱིར། ཡང་ཁ་ཅིག འོད་ཀྱིས་མོག་མོག་པོར་མཛད་དང་། །ཞེས་སོགས། རྩ་འགྲེལ་ལས། དེ་བཞིན་གཤེགས་པའི་རང་བཞིན་གྱི་འོད་ཀྱིས་ལྷ་ལ་སོགས་པའི་རྣམ་པར་སྨིན་པའི་འོད་མོག་མོག་པོར་མཛད་པ་ཆོས་ཅན། དགོས་པ་ཡོད་དེ། ང་རྒྱལ་མངོན་གྱུར་བ་དང་བྲལ་བའི་གང་ཟག་ཁོ་ནའི་རྒྱུད་ལ་ལམ་ཤེས་ཀྱི་རྟོགས་པ་སྐྱེའོ་ཞེས་ཤེས་པའི་ཆེད་ཡོད་པའི་ཕྱིར་ཞེས་དང་། ཡུལ་ངེས་པ་དང་། ཞེས་སོགས་རྩ་འགྲེལ་ལས། ལམ་ཤེས་ཆོས་ཅན། ཁྱོད་དངོས་སུ་སྐྱེ་བའི་ཡུལ་སོ་སོར་ངེས་པ་ཡིན་ཏེ། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་གི་རྒྱུད་ལ་ཁྱོད་དངོས་སུ་སྐྱེ། དེ་མ་བསྐྱེད་པའི་གང་ཟག་གི་རྒྱུད་ལ་ཁྱོད་དངོས་སུ་མི་སྐྱེ་བའི་ཕྱིར་ཞེས་འགོད་ན། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་ན། གེགས་ང་རྒྱལ་མངོན་གྱུར་བ་བཅོམ་པས་ཁྱབ་པར་ཐལ། སྦྱོར་བ་སྔ་མ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་ཆོས་ཅན། དེར་ཐལ། དེའི་ཕྱིར། འདོད་ན། དེ་མིན་པར་ཐལ། ཁྱོད་དང་དེ་མ་བཅོམ་པའི་གཞི་མཐུན་ཡོད་པའི་ཕྱིར་ཏེ། བྱང་སེམས་ཚོགས་ལམ་པ་དེ་ཁྱོད་དང་དེ་མ་བཅོམ་པའི་གཞི་མཐུན་ཡིན་པའི་ཕྱིར། ཁ་ཅིག སྦྱོར་བ་ཕྱི་མ་ལ། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་དེ་ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་པར་ཐལ། ངག་དོན་གྱི་རྟགས་སྔ་མ་དེའི་ཕྱིར། འདོད་ན། དེ་ཆོས་ཅན། དེ་མིན་པར་ཐལ། ཁྱོད་དང་དེ་མིན་པའི་གཞི་མཐུན་ཡོད་པའི་ཕྱིར་ཏེ། ཐེག་ཆེན་ཚོགས་ལམ་པ་དེ་ཁྱོད་དང་དེ་མིན་པའི་གཞི་མཐུན་ཡིན་པའི་ཕྱིར་ཞེས་བཀག་ནས། རང་ལུགས་ལ་ལམ་ཤེས་དངོས་སུ་སྐྱེ་བའི་ཡུལ་སོ་སོར་ངེས་པ་ཡིན་ཏེ། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་ན། བྱང་ཆུབ་མཆོག་ཏུ་སེམས་བསྐྱེད་པ་ཞིག་དགོས་པའི་ཕྱིར་ཞེས་ཟེར་རོ། །འོ་ན་ཡུལ་སོ་སོར་ངེས་པ་ཡིན་ནོ་ཞེས་པའི་གཞུང་དེ་ལམ་ཤེས་དངོས་སུ་སྐྱེ་བའི་ཡུལ་སོ་སོར་ངེས་པར་སྒྲུབ་པའི་གཞུང་མ་ཡིན་པར་ཐལ། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་དང་བྱང་ཆུབ་མཆོག་ཏུ་སེམས་མ་བསྐྱེད་པའི་གང་ཟག་གཉིས་པོ་དེ་ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཡིན་མིན་ཁྱད་པར་མེད་པའི་ཕྱིར། རྟགས་ཁས། ཐེག་ཆེན་ཚོགས་ལམ་པ་ཆོས་ཅན། ཁྱོད་ཐེག་ཆེན་གྱི་སྦྱོར་ལམ་དངོས་སུ་སྐྱེ་བའི་རྟེན་གྱི་གང་ཟག་མིན་པར་ཐལ། ཁྱོད་དང་དེ་དངོས་སུ་མི་སྐྱེ་བའི་གཞི་མཐུན་ཡོད་པའི་ཕྱིར། རྟགས་ཁྱབ་ཁས། གཞན་ཡང་རྣམ་མཁྱེན་དངོས་སུ་སྐྱེད་པའི་སྒོམ་ལམ་ཡིན་ན་སྐད་ཅིག་མའི་སྦྱོར་བ་ཡིན་དགོས་པར་ཐལ། རྣམ་མཁྱེན་དངོས་སུ་སྐྱེད་པའི་རྟེན་གྱི་གང་ཟག་ཡིན་ན། རྒྱུན་མཐའི་བྱང་སེམས་ཡིན་དགོས་པའི་ཕྱིར། རྟགས་ངག་དོན་གྱི་རྟགས་ལ་བསྒྲིག འདོད་ན། རིགས་མཐུན་སྦྱོར་བ་དང་། རིགས་མི་མཐུན་སྒྲིབ་པ་གང་གིས་ཀྱང་བར་མ་ཆོད་པར་རྣམ་མཁྱེན་སྐྱེད་པའི་སྒོམ་ལམ་ཡིན་ན་སྐད་ཅིག་མའི་སྦྱོར་བ་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། ཐེག་ཆེན་གྱི་སྒོམ་ལམ་ཆོས་ཅན། དེར་ཐལ། དེའི་ཕྱིར། ཐེག་པ་གསུམ་རྣམ་པར་གཞག་པ་ནི་དགོངས་པ་ཅན། ཞེས་པའི་སྐབས་སུ། གཞུང་གི་བསྟན་ཚུལ་ལ་དཔྱད་པ་དང་། དཀའ་གནས་སོ་སོའི་དོན་ལ་དཔྱད་པ་གཉིས་ལས། དང་པོ་ལ་དགག་གཞག་གཉིས་ལས། དང་པོ་ལ་སྔ་རབས་པ་ཁ་ཅིག ཕྱི་རོལ་མུ་སྟེགས་བྱེད་དང་ཅིག་ཤོས་འདོད་ཆགས་དང་བྲལ་བའི་བྱང་སེམས་རྣམས་ཆོས་ཅན་དུ་འཛིན་པར་བྱེད་པ་མི་འཐད་དེ། དེའང་ཡུལ་སོ་སོར་ངེས་པ་ཡིན་ནོ་ཞེས་པའི་སྐབས་སུ་བྱང་སེམས་ཀྱི་རྒྱུད་ལ་ལམ་ཤེས་དངོས་སུ་སྐྱེ་བར་བསྟན་ཟིན་པའི་ཕྱིར། དར་ཊཱིཀ་པ་ན་རེ། ཕྱི་རོལ་མུ་སྟེགས་བྱེད་དང་། དེ་ལས་ཅིག་ཤོས་ཉན་རང་དགྲ་བཅོམ་པ་རྣམས་ཆོས་ཅན། རང་བཞིན་གནས་རིགས་ཀྱིས་ཁྱབ་པ་ཡིན་ཏེ། མཐར་ཐུག་སངས་རྒྱས་ཐོབ་ཕྱིར་དུ་གནས་སྐབས་ལམ་ཤེས་བསྒོམ་པར་བྱ་བ་ཡིན་པའི་ཕྱིར་ཞེས་ཟེར་རོ། །སྦྱོར་བ་དེ་གཞུང་དེའི་དོན་སྦྱོར་མིན་པར་ཐལ། སེམས་ཅན་ཐམས་ཅད་ཀྱི་ལམ་ཤེས་སྒོམ་དགོས་པའི་སྒྲུབ་བྱེད་དུ་རང་བཞིན་གནས་རིག་ཡོད་པས་སངས་རྒྱ་བ་སྒྲུབ་བྱེད་དུ་འགོད་དགོས་པ་ཡིན་གྱི། རང་བཞིན་གནས་རིགས་ཀྱིས་ཁྱབ་པའི་སྒྲུབ་བྱེད་དུ་ལམ་ཤེས་བསྒོམ་པར་བྱ་བ་བཀོད་པ་ལ་དགོས་པ་མེད་པའི་ཕྱིར། གཞན་ཡང་། ཡུལ་ངེས་པ་དང་ཞེས་པའི་གཞུང་དེས་རང་བཞིན་གནས་རིགས་དངོས་སུ་སྐྱེ་བའི་ཡུལ་སོ་སོར་ངེས་པར་བསྟན་པར་ཐལ། ཁྱབ་པ་དང་། ཞེས་པའི་གཞུང་དེས་སེམས་ཅན་ཐམས་ཅད་ཀྱི་རྒྱུད་ལ་རང་བཞིན་གནས་རིགས་ཀྱིས་ཁྱབ་པ་ལ་འཆད་རིགས་པའི་ཕྱིར། རྟགས་ཁས། གཉིས་པ་ནི། ཁྱབ་པ་དང་ཞེས་པའི་གཞུང་གི་དོན་སེམས་ཅན་ཐམས་ཅད་ཀྱིས་ལམ་ཤེས་བསྒོམ་པར་བྱ་བས་ཁྱབ་པའི་དོན་ཡིན་ཏེ། རྟེན་སྣོད་རུང་དུ་སྒྲུབ་པ་སོགས་ལྔ་པོ་དེ་ཐམས་ཅད་ཀྱང་ལམ་ཤེས་ཀྱི་ཡན་ལག་འཆད་པའི་སྐབས་ཡིན་པའི་ཕྱིར། དེའང་ཡུལ་ངེས་པ་དང་ཞེས་པའི་གཞུང་གིས་ལམ་ཤེས་དངོས་སུ་སྐྱེ་བའི་ཡུལ་སོ་སོར་ངེས་པར་བསྟན་པ་ན། བྱང་ཆུབ་མཆོག་ཏུ་སེམས་མ་སྐྱེད་པའི་གང་ཟག་གི་རྒྱུད་ལ་ལམ་ཤེས་གཏན་མི་སྐྱེའམ་སྙམ་ན། དེ་དག་གིས་ཀྱང་ལམ་ཤེས་བསྒོམ་པར་བྱ་བས་ཁྱབ་པ་ཡིན་ཏེ། མཐར་ཐུག་སེམས་ཅན་ཐམས་ཅད་སངས་རྒྱ་བ་གང་ཞིག སངས་རྒྱ་བའི་རྒྱུ་དེ་ལ་ལམ་ཤེས་སྒོམ་དགོས་པའི་ཕྱིར་ཞེས་པ་ནི་སྐྱེ་བོ་ཐམས་ཅད་ཅེས་སོགས་ཀྱི་གཞུང་གི་དོན་ནོ། །མཐར་ཐུག་སེམས་ཅན་ཐམས་ཅད་སངས་རྒྱ་ན་མཐར་ཐུག་ཐེག་པ་གསུམ་དུ་གྲུབ་པར་བཤད་པའི་མདོ་དང་འགལ་ལོ་ཞེ་ན། དེ་ནི་དྲང་དོན་དགོངས་པ་ཅན་གྱི་མདོ་ཡིན་གྱི། ངེས་དོན་གྱི་མདོ་མ་ཡིན་པས་སྐྱོན་མེད་དོ་ཞེས་པ་ནི་ཐེག་པ་གསུམ་རྣམ་པར་གཞག་པ་ནི་དགོངས་པ་ཅན་ཡིན་གྱི་ཞེས་སོགས་ཀྱི་དོན་ནོ། །གཉིས་པ་ལ། ཐེག་པ་གསུམ་རྣམ་པར་གཞག་པ་ནི་ཞེས་སོགས་ཀྱི་གཞུང་ལ་བརྟེན་ནས་མཐར་ཐུག་ཐེག་པ་གཅིག་ཏུ་སྒྲུབ་པ། དེ་ལས་འཕྲོས་ནས་ཉན་རང་དགྲ་བཅོམ་པ་ཐེག་ཆེན་ལམ་དུ་འཇུག་པའི་ཚེ་མ་མཐའ་གང་ནས་འཇུག་དཔྱད་པ། སྐྱེ་བོ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཞེས་སོགས་ཀྱི་གཞུང་ལ་བརྟེན་ནས་སེམས་ཅན་ཐམས་ཅད་སངས་རྒྱ་མི་རྒྱ་ལ་དཔྱད་པ། དེ་ལས་འཕྲོས་ནས་འཁོར་བ་ལ་མཐའ་ཡོད་མེད་ལ་དཔྱད་པ་དང་བཞི་ལས། དང་པོ་ལ་གཉིས། མཐར་ཐུག་ཐེག་པ་གསུམ་དུ་གྲུབ་པར་འདོད་པའི་སེམས་ཙམ་པ་སོགས་ཀྱི་འདོད་པ་བརྗོད་པ་དང་། དེ་བཀག་ནས་མཐར་ཐུག་ཐེག་པ་གཅིག་ཏུ་སྒྲུབ་པའོ། །དང་པོ་ལ་གཉིས་ཏེ། མཐར་ཐུག་ཐེག་པ་གཅིག་ཏུ་སྒྲུབ་པའི་མདོ་དྲང་དོན་དུ་བསྟན་པ། རྒྱུ་མཚན་དེས་མཐར་ཐུག་ཐེག་པ་གསུམ་དུ་གྲུབ་པར་བསྟན་པའོ། །དང་པོ་ལ་དགོངས་གཞི། དགོས་པ། དངོས་ལ་གནོད་བྱེད་དང་གསུམ་ལས། དང་པོ་ནི། སེམས་ཙམ་པ་སོགས་ན་རེ། དམ་ཆོས་པད་དཀར་གྱི་མདོ་ལས། ཐེག་པ་གཅིག་སྟེ་གཉིས་པ་ཡོད་མ་ཡིན། །ཞེས་གསུངས་པའི་དགོངས་གཞི་ནི། ཐེག་པ་གསུམ་གྱི་རྟོགས་བྱའི་ཆོས་དབྱིངས་ལ་ཐ་དད་མེད་པ་དང་། བགྲོད་པ་པོ་ཉན་ཐོས་ལ་སོགས་པ་གསུམ་གྱིས་བདག་མེད་རྟོགས་པར་མཚུངས་པ་དང་། འབྲས་བུ་ཉོན་མོངས་ལས་རྣམ་པར་གྲོལ་བར་མཚུངས་པ་དང་། ཉན་ཐོས་རིགས་མ་ངེས་པ་འགའ་ཞིག་ཕྱིས་ཐེག་ཆེན་ལམ་དུ་ཞུགས་ནས་འབྲས་བུ་ཐོབ་པ་ཡོད་པས་རིགས་ཐ་དད་པས་འབྲས་བུ་ཐ་དད་པ་གཉིས་ཐོབ་པ་དང་། སངས་རྒྱས་རྣམས་ཀྱིས་བདག་གིས་སྔོན་བྱང་ཆུབ་སེམས་དཔའི་སྤྱོད་པ་སྤྱད་པས་སངས་རྒྱས་སོ་སྙམ་དུ་དགོངས་པ་ལྟར་ཉན་ཐོས་རིགས་མ་ངེས་པ་འགའ་ཞིག་སྔར་ཐེག་ཆེན་གྱི་ལམ་ལ་བསླབས་ནས་ཕྱིས་རང་གི་བྱང་ཆུབ་ཐོབ་པ་ན། བདག་གིས་སྔོན་བྱང་ཆུབ་སེམས་དཔའི་སྤྱོད་པ་སྤྱད་པས་སངས་རྒྱ་བར་འགྱུར་རོ་སྙམ་པའི་བསམ་པ་ཅུང་ཟད་ཅིག་ཐོབ་པ་དང་། ཉན་ཐོས་ཀྱི་དོན་དུ་སངས་རྒྱས་ཉིད་ཉན་ཐོས་སུ་སྤྲུལ་པ་དང་། བགྲོད་བྱ་མཐར་ཐུག་གི་ཐེག་པ་ལ་དགོངས་ནས་ཐེག་པ་གཅིག་ཏུ་གསུངས་ཞེས་ཏེ། རྒྱན་ལས། ཆོས་དང་བདག་མེད་གྲོལ་བ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །བསམ་གཉིས་ཐོབ་ཕྱིར་སྤྲུལ་པའི་ཕྱིར། །མཐར་ཐུག་ཕྱིར་ན་ཐེག་གཅིག་ཉིད། །ཅེས་སོ། །གཉིས་པ་ནི། ཐེག་དམན་རིགས་མ་ངེས་པ་རྣམས་ཐེག་ཆེན་དུ་ཁ་དྲང་བ་དང་། བྱང་སེམས་རིགས་མ་ངེས་པ་རྣམས་ཐེག་ཆེན་གྱི་ལམ་དུ་ཡང་དག་པར་གཟུད་པའི་ཕྱིར་དུ་ཐེག་པ་གཅིག་གསུངས་ཏེ། རྒྱན་ལས། ཁ་ཅིག་དག་ནི་དྲང་ཕྱིར་དང་། །གཞན་ཡང་ཀུན་ཏུ་གཟུད་པའི་ཕྱིར། །རྫོགས་པའི་སངས་རྒྱས་རྣམས་ཀྱིས་ནི། །མ་ངེས་རྣམས་ལ་ཐེག་གཅིག་བསྟན། །ཞེས་གསུངས་སོ། །གསུམ་པ་ནི། ཐེག་དམན་གྱི་ལྷག་མེད་མྱང་འདས་ཐོབ་ནས་ཐེག་ཆེན་གྱི་ལམ་དུ་མི་འཇུག་སྟེ། དེར་འདུས་བྱས་ཀྱི་འཇུག་པ་རྒྱུན་ཆད་པའི་ཕྱིར་དང་། འཁོར་བར་སྐྱེ་བའི་རྒྱུ་ཉོན་མོངས་པ་ཟད་པའི་ཕྱིར། དགོངས་འགྲེལ་ལས། ཉན་ཐོས་ཀྱི་རིགས་གང་ཟག་ཞི་བ་བགྲོད་པ་གཅིག་པུ་པ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་ཀྱི་སྙིང་པོ་ལ་གཞག་སྟེ་བླ་མེད་རྫོགས་པའི་བྱང་ཆུབ་ཐོབ་པར་བྱ་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་སྙིང་རྗེ་ཤིན་ཏུ་ཆུང་བ་དང་སྡུག་བསྔལ་གྱིས་ཤིན་ཏུ་འཇིགས་པའི་ཕྱིར་དང་། རང་བཞིན་གྱིས་རིགས་དམན་པ་ཁོ་ན་ཡིན་པའི་ཕྱིར། ཞེས་གསུངས་སོ། །གཉིས་པ་ནི། མཐར་ཐུག་ཐེག་པ་གསུམ་དུ་གྲུབ་སྟེ། ཁམས་སྣ་ཚོགས་པའི་མདོ་ལས། སེམས་ཅན་རྣམས་ཁམས་སྣ་ཚོགས་པ་ཅན་དུ་བསྟན་པའི་ཕྱིར་དང་། ཁམས་ཐ་དད་པས་དང་པོར་མོས་པ་ཐ་དད། དེས་བར་དུ་སྒྲུབ་པ་ཐ་དད། དེས་ཐ་མར་འབྲས་བུ་ཐ་དད་དམིགས་པའི་ཕྱིར་ཏེ། རྒྱན་ལས། ཁམས་རྣམས་དང་ནི་མོས་པ་དང་། །སྒྲུབ་པ་ཐ་དད་དབྱེ་བ་དང་། །འབྲས་བུ་ཐ་དད་དམིགས་པའི་ཕྱིར། །རིགས་ཡོད་ཉིད་ཅེས་བསྟན་པ་ཡིན། །ཞེས་གསུངས་སོ། །གཉིས་པ་དེ་བཀག་ནས་མཐར་ཐུག་ཐེག་པ་གཅིག་ཏུ་བསྒྲུབ་པ་ལ། ལུང་གིས་སྒྲུབ་པ་དང་། རིགས་པས་སྒྲུབ་པ་གཉིས་ལས། དང་པོ་ནི། ལང་གཤེགས་ལས། བློ་གྲོས་ཆེན་པོ་ཉན་ཐོས་ཀྱི་ཐེག་པ་རྣམས་ནི་ཉན་ཐོས་ཀྱི་ཐེག་པས་རྣམ་པར་གྲོལ་བ་མིན་གྱི། འོན་ཀྱང་དེ་དག་ནི་ཐེག་པ་ཆེན་པོའི་མཐར་ཐུག་པ་ཡིན་ནོ་ཞེས་པ་དང་། སྙིང་རྗེ་པད་དཀར་ལས། དྲང་སྲོང་ཆེན་པོས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱིས་ཐབས་ལ་མཁས་པ་སྟེ། །ཐེག་པ་གཅིག་སྟེ་གཉིས་པ་ཡོད་མ་ཡིན། །དཀྲི་བའི་དོན་དུ་ཐེག་པ་གསུམ་བསྟན་ཏོ། །ཞེས་གསུངས་སོ། །གཉིས་པ་ལ་གསུམ་སྟེ། གཅིག་ཏུ་ངེས་པའི་སྒྲུབ་བྱེད་འགོད། གསུམ་དུ་ངེས་པའི་སྒྲུབ་བྱེད་དགག གསུམ་དུ་གསུངས་པའི་ལུང་དང་འགལ་བ་སྤང་བའོ། །དང་པོ་ནི། མཐར་ཐུག་ཐེག་པ་གཅིག་ཏུ་གྲུབ་སྟེ། ཉན་རང་ལ་མཐར་ཐུག་གི་སྤངས་པ་མེད་པའི་ཕྱིར་ཏེ། མཐར་ཐུག་གི་སྤངས་རྟོགས་མ་ཐོབ་པར་མཐར་ཐུག་གི་མྱང་འདས་མི་ཐོབ་པའི་ཕྱིར་ཏེ། རྒྱུད་བླ་ལས། དེས་ན་སངས་རྒྱས་མ་ཐོབ་བར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་བལྟ་བར་མི་ནུས་བཞིན། །ཞེས་གསུངས་སོ། །ཡང་མཐར་ཐུག་ཐེག་པ་གཅིག་ཏུ་གྲུབ་སྟེ། ཆོས་དབྱིངས་རྟོགས་པ་མཐར་མ་ཐུག་བར་མཐར་ཐུག་གི་མྱང་འདས་མི་འཐོབ་ལ། རྟོགས་བྱའི་ཆོས་དབྱིངས་ལ་རིགས་མི་འདྲ་བའི་དབྱེ་བ་མེད་པའི་ཕྱིར་ཏེ། ཀླུ་སྒྲུབ་ཀྱིས། ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོའི་ཐེག་པ་དབྱེར་མ་མཆིས། །ཁྱོད་ཀྱིས་ཐེག་པ་གསུམ་བསྟན་པ། །སེམས་ཅན་གཞུག་པའི་ཆེད་དུ་ལགས། །ཞེས་གསུངས་སོ། །ཁ་ཅིག ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་པའི་གཞུང་འདིས། ཉན་རང་གིས་ཆོས་དབྱིངས་རྟོགས་པར་བསྟན་ཞེས་ཟེར་བ་ནི་མི་འཐད་དེ། འོ་ན་གཞུང་དེས་ཐེག་པ་གསུམ་གྱིས་ཆོས་དབྱིངས་རྟོགས་མ་རྟོགས་ཁྱད་པར་མེད་པར་བསྟན་པར་ཐལ། ཁས་བླངས་དེའི་ཕྱིར། འདོད་ན། གཙོ་བོའི་ཐེག་པ་དབྱེར་མ་མཆིས། །ཞེས་པའི་གཞུང་འདིས་ཐེག་པ་གསུམ་པོ་དེ་མཐར་ཐུག་གི་ཐེག་པ་ཡིན་མ་ཡིན་གྱི་ཁྱད་པར་མེད་པར་བསྟན་པར་ཐལ། འདོད་པ་དེའི་ཕྱིར། དེས་ན་གཞུང་འདིས་ཉན་རང་གི་ཆོས་དབྱིངས་མ་རྟོགས་པར་བསྟན་ཏེ། ཆོས་དབྱིངས་རྟོགས་པ་ནི་གཙོ་བོའི་ཐེག་པ་ཁོ་ནར་བསྟན་པའི་ཕྱིར། གཉིས་པ་ནི། དམན་པའི་ལྷག་མེད་མྱང་འདས་ཀྱི་གནས་སྐབས་སུ་འདུས་བྱས་ཀྱི་འཇུག་པ་རྒྱུན་ཆད་པའང་མི་འཐད་དེ། དེ་ལ་གནས་པའི་གང་ཟག་ལ་སངས་རྒྱས་ཀྱི་ཕྲིན་ལས་འཇུག་ཏུ་རུང་བའི་ཕྱིར་ཏེ། དམ་ཆོས་པད་དཀར་ལས། ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །དཔེར་ན་སྐྱེ་བུ་མྱོས་པ་ནི། །མྱོས་འགྱུར་མེད་ན་སངས་པ་ལྟར། །དེ་བཞིན་དེ་དག་ང་ཡི་སྐུ། །སངས་རྒྱས་ཆོས་ཞེས་བྱ་བ་འཐོབ། །ཡང་དང་པོར་མོས་པ་ཐ་དད་སོགས་ཡོད་པས་མཐར་ཐུག་ཐེག་པ་གསུམ་ཡོད་པ་མ་གྲུབ་སྟེ། གཞན་དུ་ན། མོས་པའི་རིགས་མི་འདྲ་བ་དཔག་ཏུ་མེད་པ་ཡོད་པས། མཐར་ཐུག་གི་ཐེག་པའང་རིགས་མི་འདྲ་བ་དཔག་ཏུ་མེད་པ་ཡོད་པར་ཐལ་བའི་སྐྱོན་ཡོད་པའི་ཕྱིར། གསུམ་པ་ནི། འོ་ན། བློ་གྲོས་མི་ཟད་པའི་མདོ་ལས། གསུམ་པོ་འདི་དག་ནི་ངེས་པར་འབྱིན་པའི་ཐེག་པ་སྟེ། གསུམ་གང་ཞེ་ན། འདི་ལྟ་སྟེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའོ་ཞེས་པའི་དོན་ཇི་ལྟར་འཆད་ཅེ་ན། དེ་ནི་དྲང་དོན་དགོངས་པ་ཅན་ཏེ། དགོངས་གཞི་ནི་གནས་སྐབས་ཐེག་དམན་དུ་རིགས་ངེས་པ་ལ་དགོངས། དགོས་པ་ནི། དང་པོ་ཉིད་ནས་ཐེག་ཆེན་གྱི་ལམ་དུ་འཇུག་པར་མི་ནུས་པའི་སེམས་ཅན་འགའ་ཞིག་འཁོར་བའི་སྡུག་བསྔལ་ལས་ངལ་བསོ་བའི་ཆེད་དུ་གནས་སྐབས་ཀྱི་ཐེག་པ་བསྟན་པ་ཡིན་ཏེ། འཇུག་པ་ལས། དེ་ཕྱིར་མཁས་པ་རིན་པོ་ཆེ་ཡི་གླིང་དུ་ཆས་པའི་སྐྱེས་ཚོགས་ཀྱིས། །ངལ་བ་ཉེར་སེལ་གྲོང་ཁྱེར་ཡིད་འོང་བར་དུ་རྣམ་པར་བཀོད་པ་ལྟར། །ཁྱོད་ཀྱིས་ཐེག་པ་འདི་ནི་སློབ་མ་ཉེ་བར་ཞི་བའི་ཚུལ་ལ་ཡིད། །སྦྱར་ཞིང་རྣམ་པར་དབེན་ལ་བློ་སྦྱངས་རྣམས་ལ་ལོགས་སུ་བཤད། །ཅེས་གསུངས་སོ། །དངོས་ལ་གནོད་བྱེད་ནི། དམ་ཆོས་པད་དཀར་ལས། ཐེག་པ་གཅིག་སྟེ་གཉིས་པ་ཡོད་མ་ཡིན། །གསུམ་པ་ནམ་ཡང་ཡོད་མིན་འཇིག་རྟེན་ན། །སྐྱེས་བུ་མཆོག་རྣམས་ཐབས་ཀྱི་ཐེག་པ་གང་། །སྣ་ཚོགས་ཉེ་བར་སྟོན་པར་མཛད་མ་གཏོགས། །ཞེས་གསུངས་སོ། །གཉིས་པ་དེ་ལས་འཕྲོས་ནས། ཉན་རང་དགྲ་བཅོམ་ཐེག་ཆེན་ལམ་དུ་འཇུག་པའི་ཚེ་མ་མཐའ་གང་ནས་འཇུག་དཔྱད་པ་ལ་དགག་གཞག་སྤང་གསུམ་ལས། དང་པོ་ནི། རེད་མདའ་བ་ན་རེ། ཉན་རང་གིས་ཆོས་ཀྱི་བདག་མེད་མ་རྟོགས་པ་ལྟར་ན་དང་པོ་ཚོགས་ལམ་ནས་འཇུག་སྟེ། ཆོས་ཀྱི་བདག་མེད་རྟོགས་པའི་ཐེག་ཆེན་གྱི་ལམ་རྒྱུད་ལ་སྐྱེད་དགོས་པའི་ཕྱིར། ཉན་རང་གི་ཆོས་ཀྱི་བདག་མེད་རྟོགས་པའི་ཐལ་འགྱུར་བ་ལྟར་ན། དང་པོར་ས་བདུན་པ་ནས་འཇུག་རིགས་ཏེ། དེའི་ལྟར་ན། ས་དྲུག་པ་མན་ཆད་དུ་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་མི་ནུས་པའི་ཕྱིར་ཞེས་སྨྲའོ། །འོ་ན་ཉན་རང་གིས་ཆོས་ཀྱི་བདག་མེད་རྟོགས་པ་ལྟར་ནའང་ཐེག་ཆེན་གྱི་ཚོགས་ལམ་ནས་འཇུག་རིགས་པར་ཐལ། དེའི་ལྟར་ནའང་ཉན་རང་གིས་ཐེག་ཆེན་སེམས་བསྐྱེད་ཀྱིས་ཟིན་པའི་ཐེག་ཆེན་གྱི་ལྟ་བ་རྒྱུད་ལ་བསྐྱེད་དགོས་པའི་ཕྱིར། གཞན་ཡང་ཉན་རང་གིས་ཆོས་ཀྱི་བདག་མེད་རྟོགས་པ་ལྟར་ན། དགྲ་བཅོམ་གྱི་རྟོགས་པ་སྔོན་སོང་གིས་སངས་རྒྱས་སྒྲུབ་པ་ལ་བསྐལ་པ་གྲངས་མེད་གསུམ་མི་དགོས་པར་ཐལ། དེ་ཐེག་ཆེན་ལམ་དུ་འཇུག་པའི་ཚེ་ཚོགས་སྦྱོར་གཉིས་དང་མ་དག་ས་བདུན་དུ་བསྐལ་པ་གྲངས་མེད་གཉིས་མི་དགོས་པའི་ཕྱིར། གཞན་ཡང་དེ་ཐེག་ཆེན་ལམ་དུ་ཞུགས་མ་ཐག་པའི་རྟོགས་པ་དེ་ཆོས་ཅན། ཁྱོད་ས་བདུན་པ་མིན་པར་ཐལ། ཁྱོད་ཀྱི་སྔ་རོལ་དུ་ས་དྲུག་པ་མ་སོང་བའི་ཕྱིར། རྟགས་བསལ་ཁས། མ་ཁྱབ་ན། ནམ་མཁའ་ལྟ་བུའི་གྲུབ་མཐའ་འདི་ལ་ཅི་ཞིག་བྱར་ཡོད། ཡང་ཁ་ཅིག དང་པོར་ས་དང་པོ་ནས་འཇུག་པ་ཡིན་ནོ་ཞེ་ན། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པ་ཆོས་ཅན། ལམ་ཤེས་དངོས་སུ་སྐྱེ་བའི་རྟེན་གྱི་གང་ཟག་ཏུ་ཐལ། ཐེག་ཆེན་གྱི་མཐོང་ལམ་དངོས་སུ་སྐྱེ་བའི་རྟེན་གྱི་གང་ཟག་ཡིན་པའི་ཕྱིར། རྟགས་ཁས། འདོད་ན། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་ཏུ་ཐལ། གཞན་ཡང་རྫོགས་པའི་སངས་རྒྱས་སྒྲུབ་པ་ལ་དང་པོ་ནས་ཐེག་ཆེན་ལམ་དུ་ཞུགས་པའི་གང་ཟག་ལས་ཉན་ཐོས་དགྲ་བཅོམ་པ་མྱུར་བ་ཡིན་པར་ཐལ། དང་པོ་དེ་ཐེག་ཆེན་གྱི་ལམ་ལྔ་ཆར་བགྲོད་དགོས། ཕྱི་མ་དེས་ཐེག་ཆེན་གྱི་ཚོགས་སྦྱོར་གཉིས་བགྲོད་མི་དགོས་པའི་ཕྱིར། འདོད་ན། རྒྱན་ལས། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་ལ་མངོན་དགའི་ཕྱིར། །རྟོགས་པ་བུལ་པ་ཡིན་པར་འདོད། །ཅེས་གསུངས་པ་དང་འགལ་ལོ། །ཡང་ཁ་ཅིག དང་པོར་ས་བརྒྱད་པ་ནས་འཇུག་སྟེ། ས་བདུན་པ་མན་ཆད་དེ་ལྟ་བུ་དེ་ཉོན་སྒྲིབ་མ་སྤངས་པ་སྤོང་བའི་ཆེད་དུའང་མི་འཇུག ཆོས་ཀྱི་བདག་མེད་མ་རྟོགས་པ་རྟོགས་པའི་ཆེད་དུའང་མི་འཇུག ཤེས་སྒྲིབ་མ་སྤངས་པ་སྤོང་བའི་ཆེད་དུའང་མི་འཇུག་པའི་ཕྱིར་ཏེ། ཉོན་སྒྲིབ་སྤངས་ཟིན་པའི་ཕྱིར་དང་། ཆོས་ཀྱི་བདག་མེད་རྟོགས་ཟིན་པའི་ཕྱིར་དང་། ས་བདུན་པ་མན་ཆད་དུ་ཤེས་སྒྲིབ་སྤོང་བ་མི་སྲིད་པའི་ཕྱིར། ཞེས་ཟེར་རོ། །འདི་ལ་ནི་གོང་མ་གཉིས་ལ་བརྗོད་པའི་ཉེས་པ་ཐམས་ཅད་འཇུག་ཅིང་། ས་བདུན་པ་མན་ཆད་དུ་ཤེས་སྒྲིབ་སྤོང་མི་སྲིད་པ་ནི་སྐབས་གསུམ་པར་གདན་དྲངས་ནས་ཞུ་བ་མང་དུ་འབུལ་བ་ཡོད་དོ། །གཞན་ཡང་ཐེག་ཆེན་གྱི་རིགས་ཅན་ལམ་མ་ཞུགས་པའི་གང་ཟག་དེ་ཤེས་སྒྲིབ་མ་སྤངས་པ་སྤང་བའི་ཆེད་དུ་ས་བདུན་པ་མན་ཆད་དུ་འཇུག་པ་མེད་པར་ཐལ། ས་བདུན་པ་མན་ཆད་དུ་ཤེས་སྒྲིབ་སྤོང་བ་མི་སྲིད་པའི་ཕྱིར། འདོད་ན། དེ་འདྲའི་གང་ཟག་དེ་དང་པོ་ཉིད་ནས་ས་བརྒྱད་པ་ནས་འཇུག་རིགས་པར་ཐལ། འདོད་པ་དེའི་ཕྱིར། དེ་ལ་ཁོ་ན་རེ། མ་ཁྱབ་སྟེ། དེས་ཉོན་སྒྲིབ་མ་སྤངས་པ་སྤོང་བའི་ཆེད་དང་། ཆོས་ཀྱི་བདག་མེད་མ་རྟོགས་པ་རྟོགས་པའི་ཆེད་དུ་ཐེག་ཆེན་གྱི་ཚོགས་ལམ་ནས་འཇུག་དགོས་པའི་ཕྱིར་ཞེ་ན། ཁྱོད་ཀྱི་སྒྲུབ་བྱེད་དེ་ལའང་ཁྱབ་པ་མེད་པར་ཐལ། དེས་བསོད་ནམས་ཀྱི་ཚོགས་མ་རྫོགས་པ་རྫོགས་པའི་ཆེད་དང་། དོན་དམ་སེམས་བསྐྱེད་མ་བསྐྱེད་པ་བསྐྱེད་པའི་ཆེད་དུ་ཐེག་ཆེན་གྱི་ཚོགས་ལམ་ནས་འཇུག་དགོས་པའི་ཕྱིར། གཉིས་པ་ནི། མ་མཐའ་ཐེག་ཆེན་གྱི་ཚོགས་ལམ་ནས་འཇུག་སྟེ། ཐེག་ཆེན་ལམ་དུ་དང་པོར་འཇུག་པའི་སྒོ་ནས་འདུན་ལྡན་སེམས་བསྐྱེད་ཡིན་ལ། དེ་ཐེག་ཆེན་གྱི་ཚོགས་ལམ་ཆུང་ངུས་བསྡུས་པའི་ཕྱིར་དང་། ཐེག་ཆེན་རང་གི་རྟོགས་རིགས་ཐུན་མོང་མིན་པ་ཞིག་མེད་ན་ལམ་གསུམ་གྱི་རྟོགས་བྱའི་ལམ་ལ་ཁྱད་པར་མེད་པར་འགྱུར་ཅིང་། ཡོད་ན་དེ་ཚོགས་ལམ་དུ་ཐོས་བསམ་གྱིས་གཏན་ལ་ཕབ། སྦྱོར་ལམ་དུ་སྒོམ་པའི་སྟོབས་ཀྱིས་མཐོང་ལམ་དུ་མངོན་སུམ་རྟོགས་དགོས་པའི་ཕྱིར། གསུམ་པ་ལ་ཁ་ཅིག འཕགས་པ་སོ་སྐྱེར་འགྱུར་བ་ཡོད་པར་ཐལ། དམ་བཅའ་དེའི་ཕྱིར། འདོད་ན། འཕགས་པའི་ཟག་མེད་ཀྱི་སྤངས་རྟོགས་ཉམས་སྲིད་པར་ཐལ་ལོ། །གཞན་ཡང་ཐེག་ཆེན་གྱི་ཚོགས་སྦྱོར་ཡིན་ན་མོས་སྤྱོད་ཀྱི་ས་ཡིན་མི་དགོས་པར་ཐལ། ཉན་རང་དགྲ་བཅོམ་ཐེག་ཆེན་གྱི་ཚོགས་ལམ་དུ་འཇུག་པ་ཡོད་པའི་ཕྱིར། འདོད་ན། ཐེག་ཆེན་གྱི་མཐོང་ལམ་སྒོམ་ལམ་གང་རུང་ཡིན་ན་དེ་ཁོ་ན་ཉིད་ཡིད་བྱེད་ཀྱི་ས་ཡིན་མི་དགོས་པར་ཐལ་ལོ། །གཞན་ཡང་འཕགས་པ་མཐོང་ལམ་མ་ཐོབ་པའི་གང་ཟག་ཏུ་འགྱུར་བ་ཡོད་པར་ཐལ། དེ་སོ་སྐྱེར་འགྱུར་བ་ཡོད་པའི་ཕྱིར། ཁྱབ་སྟེ། སོ་སོ་སྐྱེ་བོ་ཡིན་ན་འཕགས་ཆོས་མ་ཐོབ་པས་ཁྱབ་པའི་ཕྱིར། དེས་ན་འཕགས་ལམ་ནས་འཇུག་པའི་ཚུལ་གསུམ་པོ་གང་རུང་ཞིག་ཐད་པ་ཡིན་ནོ་ཞེས་ཟེར་རོ། །དང་པོ་ལ། མི་སློབ་པ་སློབ་པའི་གང་ཟག་ཏུ་འགྱུར་སྲིད་པར་ཐལ། ཉན་རང་དགྲ་བཅོམ་ཐེག་ཆེན་གྱི་སློབ་ལམ་དུ་འཇུག་པའི་ཕྱིར། ཁྱབ་པ་ཁས། འདོད་ན། རེ་ཞིག་ཁས་བླང་སྟེ། མི་སློབ་པའི་ཟག་མེད་ཀྱི་སྤང་རྟོགས་ཉམས་སྲིད་པར་ཐལ་ལོ། །གཉིས་པ་ལ། ཐེག་ཆེན་གྱི་མཐོང་ལམ་སྒོམ་ལམ་གང་རུང་ཡིན་ན། སློབ་ལམ་ཡིན་མི་དགོས་པར་ཐལ། ཉན་རང་དགྲ་བཅོམ་ཐེག་ཆེན་གྱི་མཐོང་ལམ་སྒོམ་ལམ་གང་རུང་དུ་འཇུག་པ་ཡོད་པའི་ཕྱིར། རྟགས་ཁྱབ་ཁས། གསུམ་པ་ལ་སློབ་པ་ཡིན་ན། མི་སློབ་པའི་ཆོས་མ་ཐོབ་པས་ཁྱབ་པ་ཡོད་པར་ཐལ། སོ་སྐྱེ་ཡིན་ན་འཕགས་ཆོས་མ་ཐོབ་པས་ཁྱབ་པའི་ཕྱིར། འོ་ན་དེ་ལྟ་བུའི་ཐེག་ཆེན་ཚོགས་ལམ་པ་དེ་སོ་སྐྱེ་ཡིན་ནམ་འཕགས་པ་ཡིན་ཞེ་ན། ཁ་ཅིག འཕགས་པ་ཡིན་ཏེ། གལ་ཏེ་སོ་སྐྱེ་ཡིན་ན། དེ་ཆོས་ཅན། འཕགས་ལམ་རྒྱུད་ལ་མ་ཐོབ་པའི་གང་ཟག་ཏུ་ཐལ། སོ་སྐྱེ་ཡིན་པའི་ཕྱིར། ཁྱབ་སྟེ། མཛོད་ལས། ལམ་མ་ཐོབ་པ་སོ་སོ་ཡི། །སྐྱེ་བོར་འདོད་དོ་ཞེས་དང་། ཀུན་ལས་བཏུས་ལས། སོ་སོ་སྐྱེ་བོ་ཉིད་གང་ཞེ་ན། འཕགས་པའི་ཆོས་རྣམས་ཀྱི་མ་རྙེད་པའོ་ཞེས་གསུངས་པའི་ཕྱིར། འོན་ཀྱང་ཐེག་ཆེན་འཕགས་པ་དང་། ཐེག་དམན་འཕགས་པ་གང་ཡང་མིན་པའི་འཕགས་པ་ཕུང་པོ་གསུམ་པོ་ཡིན་ནོ་ཞེས་ཟེར་རོ། །འོ་ན་ལུས་ཚོར་བཏང་སྙོམས་ཆོས་ཅན། སྡུག་བསྔལ་གྱི་དབང་པོ་ཡིན་པར་ཐལ། ལུས་ཚོར་གང་ཞིག སིམ་པར་ཉམས་སུ་མྱོང་བ་མ་ཡིན་པའི་ཕྱིར། ཁྱབ་སྟེ། མཛོད་ལས། ལུས་ཚོར་སིམ་པ་མ་ཡིན་གང་། །སྡུག་བསྔལ་དབང་པོའོ་ཞེས་གསུངས་པའི་ཕྱིར། ཡང་དེ་ཆོས་ཅན། ཐེག་པ་རང་ལུགས་ཀྱི་རྟོགས་རིགས་དོན་སྤྱིའི་ཚུལ་གྱིས་རྟོགས་པའི་གང་ཟག་མ་ཡིན་པར་ཐལ། འཕགས་པ་ཡིན་པའི་ཕྱིར། དེས་ན་དེ་སོ་སོ་སྐྱེ་བོ་ཡིན་ཏེ། དེ་ཐེག་ཆེན་སོ་སྐྱེ་ཡིན་པ་གང་ཞིག དེ་ཐེག་ཆེན་སོ་སྐྱེ་ཡིན་ན་སོ་སྐྱེ་ཡིན་པས་ཁྱབ་པའི་ཕྱིར། ཕྱི་མ་མ་གྲུབ་ན། དེར་ཐལ། ཐེག་ཆེན་སྦྱོར་ལམ་པ་ཡིན་ན་སྦྱོར་ལམ་པ་ཡིན་དགོས་པའི་ཕྱིར། མ་གྲུབ་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་མཐོང་ལམ་སྡུག་བསྔལ་ཆོས་བཟོད་ལ་གནས་པའི་བྱང་སེམས་ཆོས་ཅན། མཐོང་ལམ་སྐད་ཅིག་དང་པོ་ལ་གནས་པའི་གང་ཟག་མིན་པར་ཐལ། རང་རྒྱུ་སྦྱོར་ལམ་ལས་དངོས་སུ་མ་སྐྱེས་པའི་ཕྱིར། རྟགས་ཁས། འོ་ན་དེའི་རྟོགས་པ་སྔོན་སོང་གི་བྱང་སེམས་ཚོགས་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་དེ་ཐེག་ཆེན་གྱི་ཚོགས་ལམ་ཡིན་ནམ་ཞེ་ན། ཡིན་ཏེ། ཐེག་ཆེན་ཚོགས་ལམ་པའི་རྒྱུད་ཀྱི་རྣམ་རྫོགས་སྦྱོར་བ་ཡིན་པའི་ཕྱིར་ཏེ། དེའི་རྒྱུད་ཀྱི་གཞི་ཤེས་ཀྱི་རྣམ་པ་སྒོམ་པའི་བློ་ཡིན་པའི་ཕྱིར། འོན་ཀྱང་དེ་དང་ཆོས་ཀྱི་བདག་མེད་རྟོགས་པའི་ཐར་པ་ཆ་མཐུན་གྱི་གཞི་མཐུན་ནི་མེད་དེ། དེ་ནི་ཆོས་ཀྱི་བདག་མེད་དོན་སྤྱིའི་ཚུལ་གྱིས་རྟོགས་པའི་བློ་ཡིན་པའི་ཕྱིར། ཊཱི་ཀའི་དགོངས་པའང་འདི་ཁོ་ནའོ། །གལ་ཏེ་དེ་ཆོས་ཅན། གཞི་ཤེས་སུ་ཐལ། རྣལ་འབྱོར་མངོན་སུམ་ཡིན་པའི་ཕྱིར་ཞེ་ན། ལམ་འོག་མའི་སྐབས་སུ་མ་ཁྱབ་སྟེ། གང་ཟག་དེ་སོ་སྐྱེར་འདོད་པ་ལྟར་ན། ཉོན་སྒྲིབ་སྤངས་པའི་གང་ཟག་ཡིན་ན་འཕགས་པ་ཡིན་པས་མ་ཁྱབ་པ་དང་། དེ་འཕགས་པར་འདོད་པ་ལྟར་ནའང་། ཉོན་སྒྲིབ་སྤངས་པའི་གང་ཟག་ཡིན་ན་འཕགས་པ་བཞི་པོ་གང་རུང་ཞིག་ཡིན་པས་མ་ཁྱབ་པ་བཞིན་ནོ། །གསུམ་པ་སྐྱེ་བོ་ཐམས་ཅད་ཅེས་པའི་གཞུང་ལ་བརྟེན་ནས་སེམས་ཅན་ཐམས་ཅད་སངས་རྒྱ་མི་རྒྱ་ལ་དཔྱད་པ་ལ་དགག་གཞག་སྤང་གསུམ་ལས། དང་པོ་ནི། རེད་མདའ་བ་ན་རེ། སེམས་ཅན་ཐམས་ཅད་སངས་མི་རྒྱ་སྟེ། རྒྱ་ན་སེམས་ཅན་ཐམས་ཅད་སངས་རྒྱས་ཟིན་པའི་དུས་སྲིད་པར་ཐལ། དེ་ཐམས་ཅད་སངས་རྒྱ་བའི་ཕྱིར། འདོད་ན། སངས་རྒྱས་ཀྱི་ཕྲིན་ལས་རྒྱུན་ཆད་པའི་དུས་སྲིད་པར་ཐལ་བ་དང་། སངས་རྒྱས་ཀྱི་ཐུགས་རྗེའི་དམིགས་ཡུལ་མེད་པའི་དུས་སྲིད་པར་ཐལ་བ་དང་། འཁོར་བྱང་སེམས་འཕགས་པ་དང་མི་ལྡན་པའི་ལོངས་སྐུ་སྲིད་པར་ཐལ། འདོད་པ་དེའི་ཕྱིར། ཞེས་བཀག་ནས་རང་ལུགས་ལ་དེ་སངས་རྒྱ་བར་མ་ངེས་ཏེ། དེའི་རྒྱུད་ལ་སངས་རྒྱས་ཀྱི་ཡེ་ཤེས་འབྱུང་བར་མ་ངེས་པའི་ཕྱིར་ཏེ། དེའི་རྒྱུ་ཚོགས་གྲངས་མ་ཚང་བའི་ཕྱིར་ཏེ། ལོགས་སྲེད་ཅན་གྱི་གང་ཟག་ཡོད་པའི་ཕྱིར་ཞེས་ཟེར་རོ། །འོ་ན་སེམས་ཅན་དེ་ལ་སངས་རྒྱ་མི་རྒྱ་གཉིས་སུ་ངེས་པར་ཐལ། སངས་རྒྱ་བའི་སེམས་ཅན་ཡོད་པ་གང་ཞིག སེམས་ཅན་ཡིན་ན་སངས་རྒྱ་བས་མ་ཁྱབ་པའི་ཕྱིར། འདོད་ན་སངས་རྒྱ་བའི་སེམས་ཅན་ཐམས་ཅད་སངས་རྒྱས་ཟིན་པའི་དུས་སྲིད་པར་ཐལ། དེ་སངས་རྒྱ་བ་ཡིན་པའི་ཕྱིར། ཁྱབ་པ་ཁས། འདོད་ན། སངས་རྒྱས་ཀྱི་ཕྲིན་ལས་རྒྱུན་ཆད་པའི་དུས་སྲིད་པར་ཐལ། འདོད་པ་གང་ཞིག སངས་མི་རྒྱ་བའི་སེམས་ཅན་ལ་སངས་རྒྱས་ཀྱི་ཕྲིན་ལས་མི་འཇུག་པའི་ཕྱིར། ཁྱབ་པ་ཁས། བྱང་སེམས་འཕགས་པ་ཐམས་ཅད་སངས་རྒྱས་ཟིན་པའི་དུས་སྲིད་པར་ཐལ། དེ་ཐམས་ཅད་སངས་རྒྱ་བའི་ཕྱིར། འདོད་ན། འཁོར་བྱང་སེམས་འཕགས་པ་དང་མི་ལྡན་པའི་ལོངས་སྐུ་སྲིད་པར་ཐལ་ལོ། །གཞན་ཡང་རྒྱུ་ཚོགས་གྲངས་ཚང་བའི་དོན་དེ་ཐེག་ཆེན་སེམས་བསྐྱེད་རྒྱུད་ལ་ཡོད་པ་ལ་བྱེད་དམ། ཉེར་ལེན་གྱི་རྒྱུའི་གཙོ་བོ་སེམས་རིག་ཅིང་གསལ་ཙམ་དང་། ལྷན་ཅིག་བྱེད་རྐྱེན་གྱི་གཙོ་བོ་སངས་རྒྱས་ཀྱི་ཕྲིན་ལས་འཇུག་ཏུ་རུང་བ་ལ་བྱེད། དང་པོ་ལྟར་ན། ཉན་རང་དགྲ་བཅོམ་པ་དེ་སངས་མི་རྒྱ་བར་ཐལ། དེའི་རྒྱུད་ལ་ཐེག་ཆེན་སེམས་བསྐྱེད་མེད་པའི་ཕྱིར། འདོད་ན་མཐར་ཐུག་ཐེག་པ་གསུམ་གྲུབ་པར་ཐལ་བ་དང་། ཅིག་ཤོས་ཀྱི་རྣལ་འབྱོར་པས་ཀྱང་སངས་རྒྱས་ཉིད་ཐོབ་པར་བྱ་བའི་ཕྱིར་ཞེས་སོགས་ཀྱི་གཞུང་དོན་མ་གྲུབ་པར་ཐལ་ལོ། །ཕྱི་མ་ལྟར་ན་སེམས་ཅན་ཐམས་ཅད་ཀྱི་རྒྱུད་ལ་སངས་རྒྱས་ཀྱི་ཡེ་ཤེས་ཀྱི་རྒྱུ་ཚོགས་གྲངས་ཚང་བར་ཐལ། དེའི་རྒྱུད་ལ་གཉིས་པོ་དེ་ཡོད་པའི་ཕྱིར། དེས་ན་རྒྱུ་ཚོགས་གྲངས་ཚང་གི་དོན་ནི་རྒྱུ་ཚོགས་ཀྱི་སྐད་ཅིག་སྔ་ཕྱི་ཚང་བ་ལ་བྱེད་པ་ནི་མ་ཡིན་ཏེ། དེ་ལྟར་ན་རྒྱུ་ཚོགས་གྲངས་ཚང་མི་སྲིད་པའི་ཕྱིར་རོ། །གཉིས་པ་ནི། སེམས་ཅན་ཐམས་ཅད་སངས་རྒྱ་བ་ཡིན་ཏེ། སེམས་ཅན་ཐམས་ཅད་ཀྱི་རྒྱུད་ལ་རྒྱུ་སངས་རྒྱས་ཀྱི་རིགས་ཡོད། མཐུན་རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་། འགལ་རྐྱེན་སྒྲིབ་པ་སྤང་དུ་རུང་བའི་ཕྱིར། རྟགས་དང་པོ་གྲུབ་སྟེ། རྒྱུད་བླ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་པའི་ཕྱིར། རྟགས་གཉིས་པ་གྲུབ་སྟེ། རྫོགས་པའི་སངས་རྒྱས་དེ་འཁོར་བ་ཇི་སྲིད་མ་སྟོངས་ཀྱི་བར་དུ་སེམས་ཅན་གྱི་དོན་མཛད་པ་ལ་དགོས་པ་ཡོད་པའི་ཕྱིར། རྟགས་གསུམ་པ་གྲུབ་སྟེ། གལ་ཏེ་དེ་སྤང་རུང་མ་ཡིན་ན། རྟག་པ་ཡིན་པས་སྤང་དུ་མི་རུང་བ་ཡིན་ནམ། མི་རྟག་པ་ཡིན་ཀྱང་སྤོང་བྱེད་ཀྱི་གཉེན་པོ་མེད་པས་སྤང་དུ་མི་རུང་བ་ཡིན་ནམ། གཉེན་པོ་ཡོད་ཀྱང་དེ་མི་ཤེས་པས་སྤང་དུ་མི་རུང་བ་ཡིན། དང་པོ་ལྟར་ན་མི་འཐད་དེ། དེ་སྐྱེད་བྱེད་ཀྱི་རྒྱུ་ཡོད་པའི་ཕྱིར། གཉིས་པ་མིན་ཏེ། སྒྲིབ་པའི་རྩ་བ་བདག་འཛིན་ཡིན་པས་དེའི་གཉེན་པོ་བདག་མེད་རྟོགས་པའི་ཤེས་རབ་ཡོད་པའི་ཕྱིར། གསུམ་པ་མ་ཡིན་ཏེ། སྒྲིབ་པའི་རྩ་བ་བདག་འཛིན་ཡིན་པར་ཤེས་པས་དེའི་གཉེན་པོ་བདག་མེད་རྟོགས་པའི་ཤེས་རབ་ཡིན་པར་ཤེས་ནུས་པའི་ཕྱིར། དེ་སྐད་དུའང་། རྣམ་འགྲེལ་ལས། རྟག་ཉིད་ཕྱིར་རམ་ཐབས་མེད་ཕྱིར། །ཡང་ན་ཐབས་ནི་མི་ཤེས་ཕྱིར། །སྐྱོན་རྣམས་མི་ཟད་པ་ཉིད་ཅེས། །བྱ་བར་ཡོངས་སུ་རྟོག་གྲང་ན། །རྒྱུ་ཡོད་ཕྱིར་དང་རྒྱུ་ཡི་ནི། །གཉེན་པོ་གོམས་པས་ཟད་ཕྱིར་རོ། །ཞེས་གསུངས་པའི་ཕྱིར། གསུམ་པ་ནི། ཊཱི་ཀ་ལས། སེམས་ཅན་སངས་རྒྱ་ན་སེམས་ཅན་སངས་རྒྱས་ཟིན་པའི་དུས་སྲིད་པས་མ་ཁྱབ་སྟེ། དངོས་པོ་ཐམས་ཅད་འཇིག་པ་ཡིན་ཀྱང་དེ་ཐམས་ཅད་ཞིག་ཟིན་པའི་དུས་མི་སྲིད་པ་བཞིན་ནོ་ཞེས་གསུངས་པ་ལ། དར་ཊཱིཀ་པ་ན་རེ། དངོས་པོ་ཐམས་ཅད་ཞིག་ཟིན་པའི་དུས་སྲིད་པ་ཤིན་ཏུ་ཡང་འདོད་དེ། དངོས་པོ་ཐམས་ཅད་མེད་པའི་དུས་སྲིད་པའི་ཕྱིར་ཏེ། དངོས་པོ་མེད་པ་སྲིད་པའི་ཕྱིར། གལ་ཏེ་འདི་ཚུན་ཆད་དུ་དངོས་པོ་ཡོད་ལ་ཕན་ཆད་དུ་དངོས་པོ་མེད་དོ་སྙམ་པའི་ཁྱད་པར་འཐད་པར་ཐལ། དངོས་པོ་ཐམས་ཅད་ཞིག་ཟིན་པ་སྲིད་པའི་ཕྱིར་ཞེ་ན། འདི་ཚུན་ཆད་དུ་སྔོན་པོ་ཡོད་ལ་ཕན་ཆད་དུ་སྔོན་པོ་མེད་དོ་སྙམ་པའི་ཁྱད་པར་འཐད་པར་ཐལ། སྔོན་པོ་ཐམས་ཅད་ཞིག་ཟིན་པ་སྲིད་པའི་ཕྱིར། མ་གྲུབ་ན། སྔོན་པོ་ཆོས་ཅན། ཁྱོད་རྟག་དངོས་སུ་ཐལ། ཁྱོད་རང་རྒྱུ་ལས་སྐྱེ་པ་གང་ཞིག ཁྱོད་ཞིག་ཟིན་པ་མི་སྲིད་པའི་ཕྱིར་ཞེས་ཟེར་རོ། །འོ་ན་དངོས་པོ་མེད་པའི་དུས་སྲིད་པར་ཐལ། དངོས་པོའི་འབྲས་བུའི་དུས་ན་དངོས་པོ་མེད་པའི་ཕྱིར། རྟགས་ཁས། འདོད་ན། དུས་དེ་དངོས་པོ་མིན་པར་ཐལ་ལོ། །ཡང་དུས་ཆོས་ཅན། ཁྱོད་རྟག་དངོས་སུ་ཐལ། ཁྱོད་རང་རྒྱུ་ལས་སྐྱེས་པ་གང་ཞིག ཁྱོད་ཞིག་ཟིན་པའི་དུས་མི་སྲིད་པའི་ཕྱིར། ཡང་དར་ཊཱིཀ་པ་ན་རེ། ཊཱི་ཀ་ལས་སེམས་ཅན་ཐམས་ཅད་སངས་རྒྱ་ན། སེམས་ཅན་ཐམས་ཅད་སངས་རྒྱས་ཟིན་པའི་དུས་སྲིད་པས་ཁྱབ་པ་ལ། སེམས་ཅན་ཐམས་ཅད་ཤི་ཟིན་པས་ཁྱབ་པར་ཐལ། དེ་ཐམས་ཅད་འཆི་བས་ཁྱབ་པའི་ཕྱིར་ཞེས་པ་ནི། སྐྱོན་དུ་མི་འཇུག་སྟེ། སྔ་མ་དེ་སེམས་ཅན་སངས་རྒྱས་ཟིན་པའི་དུས་སྲིད་པར་ཐལ་ཞེས་བརྗོད་ཀྱི། སེམས་ཅན་ཐམས་ཅད་སངས་རྒྱས་ཟིན་པས་ཁྱབ་པར་ཐལ་ཞེས་མ་བརྗོད་པའི་ཕྱིར་ཞེ་ན། འོ་ན་ངེད་ཀྱིས་ཀྱང་དེ་ལྟ་བུའི་སྐྱོན་བརྗོད་པ་མེད་དེ་ཐམས་ཅད་ཤི་ཟིན་པའི་དུས་སྲིད་པར་ཐལ་ཞེས་བརྗོད་ཀྱི། ཤི་ཟིན་པས་ཁྱབ་པར་ཐལ་ཞེས་མ་བརྗོད་པའི་ཕྱིར། ཡང་དར་ཊཱིཀ་པ་ན་རེ། ཁ་ཅིག སེམས་ཅན་ཐམས་ཅད་སངས་རྒྱ། དེ་ཐམས་ཅད་སངས་རྒྱ་ངེས་མིན་ཞེས་པ་ནི་ཁས་བླངས་འགལ་ཏེ། ཁྱོད་ཀྱིས་སེམས་ཅན་ཐམས་ཅད་སངས་རྒྱའོ་སྙམ་པའི་ངེས་པ་དེ་ཚད་མའི་སྟོབས་ཀྱིས་དྲངས་སམ་མ་དྲངས། དྲངས་ན་སེམས་ཅན་ཐམས་ཅད་སངས་རྒྱ་ངེས་སུ་ཐལ་ཞིང་། མ་དྲངས་ན་ཚད་མས་མ་ངེས་པའི་དོན་དམ་བཅའ་བཞད་གད་ཀྱི་གནས་ཡིན་ནོ་ཞེས་ཟེར་རོ། །དེ་ཁས་བླངས་ན་སྐྱོན་དེ་འཇུག་ཀྱང་སངས་རྒྱ་ངེས་མིན་པར་ཁས་མ་བླངས་ཏེ། སངས་རྒྱ་བ་དང་རྒྱ་བར་ངེས་པ་དོན་གཅིག་པའི་ཕྱིར། བཞི་པ་དེ་ལས་འཕྲོས་ནས་འཁོར་བ་ལ་མཐའ་ཡོད་མེད་དཔྱད་པ་ལ་དགག་གཞག་སྤོངས་གསུམ་ལས། དང་པོ་ནི། དར་ཊཱིཀ་པ་ན་རེ། རང་ལུགས་ནི་སེམས་ཅན་ཐམས་ཅད་སངས་རྒྱ། འཁོར་བ་ལ་མཐའ་ཡོད་པར་དམ་བཅས་པ་ལ། སེམས་ཅན་ཐམས་ཅད་སངས་རྒྱས་ཟིན་པའི་དུས་སྲིད་པར་ཐལ། སེམས་ཅན་ཐམས་ཅད་སངས་རྒྱ་བའི་ཕྱིར་ཞེས་དང་། སེམས་ཅན་ཐམས་ཅད་གཏན་ནས་མེད་པའི་དུས་སྲིད་པར་ཐལ། འཁོར་བ་ལ་མཐའ་ཡོད་པའི་ཕྱིར་ཞེས་པ་ལ་ནི་ཤིན་ཏུ་འདོད་དེ། སེམས་ཅན་མེད་པའི་དུས་སྲིད་པའི་ཕྱིར་ཏེ། དེའི་སྐད་ཅིག་གཉིས་པའི་དུས་ན་དེ་མེད་པའི་ཕྱིར། མ་གྲུབ་ན། སེམས་ཅན་ཐམས་ཅད་ཆོས་ཅན། ཁྱོད་རྟག་དངོས་སུ་ཐལ། ཁྱོད་རང་རྒྱུ་ལས་སྐྱེས་པ་གང་ཞིག ཁྱོད་ཀྱི་སྐད་ཅིག་གཉིས་པའི་དུས་ན་ཁྱོད་ཡོད་པའི་ཕྱིར། སེམས་ཅན་ཐམས་ཅད་ནམ་ཡང་མེད་པའི་དུས་སྲིད་པར་ཐལ་བ་དང་། དེ་ཐམས་ཅད་རྒྱུན་ཆད་པའི་དུས་སྲིད་པར་ཐལ། འཁོར་བ་ལ་མཐའ་ཡོད་པའི་ཕྱིར་ཞེས་ཟེར་བ་ལ་ནི། ཁྱབ་པ་མ་གྲུབ་པའི་ལན་འདེབས་སོ་ཞེས་ཟེར་རོ། །འོ་ན་བྱང་སེམས་འཕགས་པ་ཐམས་ཅད་མེད་པའི་དུས་སྲིད་པར་ཐལ། སེམས་ཅན་ཐམས་ཅད་མེད་པའི་དུས་སྲིད་པའི་ཕྱིར། འདོད་ན། བྱང་འཕགས་མེད་པའི་དུས་ཀྱི་ལོངས་སྐུ་ཡོད་པར་ཐལ། དེའི་དུས་དེ་ལོངས་སྐུའི་ཡིན་པའི་ཕྱིར། རྟགས་ཁས། འདོད་ན། དེའི་དུས་ཀྱི་ལོངས་སྐུ་ཆོས་ཅན། འཁོར་ངེས་པ་བྱང་འཕགས་ཁོ་ནས་བསྐོར་བར་ཐལ། ལོངས་སྐུ་ཡིན་པའི་ཕྱིར། འདོད་ན། ལོངས་སྐུ་ཡིན་ན་འཁོར་བྱང་འཕགས་ཁོ་ནས་བསྐོར་བས་ཁྱབ་པར་ཐལ། འདོད་པ་དེའི་ཕྱིར། འདོད་ན། བྱང་འཕགས་མེད་པའི་དུས་ཀྱི་ལོངས་སྐུ་མེད་པར་ཐལ། འདོད་པ་དེའི་ཕྱིར། རྟགས་བསལ་དངོས། ཡང་སེམས་ཅན་ཐམས་ཅད་ནམ་ཡང་མེད་པའི་དུས་སྲིད་པར་ཐལ། དེའི་སྐད་ཅིག་གཉིས་པར་དེ་ཐམས་ཅད་ནམ་ཡང་མེད་པའི་ཕྱིར། མ་གྲུབ་ན། སེམས་ཅན་ཐམས་ཅད་ཆོས་ཅན། རྟག་དངོས་སུ་ཐལ། རང་རྒྱུད་ལས་སྐྱེས་པ་གང་ཞིག ཁྱོད་ཀྱི་སྐད་ཅིག་གཉིས་པར་ཁྱོད་ནམ་ཡང་ཡོད་པའི་ཕྱིར། ཡང་སེམས་ཅན་མེད་པའི་དུས་སྲིད་པར་ཐལ། དེ་ཐམས་ཅད་སངས་རྒྱས་ཟིན་པའི་དུས་སྲིད་པའི་ཕྱིར། སེམས་ཅན་ཐམས་ཅད་ཟད་པ་མི་སྲིད་པར་ཐལ། དེ་རྒྱུན་ཆད་པ་ནི་མི་སྲིད་པའི་ཕྱིར། འདོད་ན། འཁོར་བ་ལ་མཐའ་མེད་པར་ཐལ་ལོ། །གཉིས་པ་ནི། སྤྱིར་འཁོར་བ་ལ་མཐའ་མེད་དེ། སེམས་ཅན་ཐམས་ཅད་ཟད་པ་མི་སྲིད་པའི་ཕྱིར་ཏེ། རྫོགས་པའི་སངས་རྒྱས་ཀྱིས་གཞན་དོན་མི་མཛད་པའི་དུས་མི་སྲིད་པའི་ཕྱིར་ཏེ། ནམ་མཁའ་མ་ཟད་ཀྱི་བར་སེམས་ཅན་མི་ཟད་པ་གང་ཞིག ནམ་མཁའ་ཟད་པ་མི་སྲིད་པའི་ཕྱིར་རོ། །རེ་ཞིག་དེ་ཙམ་གྱི་ཆོག་སྟེ་གསུང་རབ་དཔང་པོར་བྱས་པའི་གོ་བ་ཅན་ཞིག་གིས་འདི་མི་གོ་བའི་དོན་མེད་དོ། །གསུམ་པ་ལ། ཁ་ཅིག འཁོར་བ་ལ་མཐའ་མེད་པར་མི་འཐད་དེ། བཞི་བརྒྱ་པ་ལས། ཇི་ལྟར་ས་བོན་མཐའ་མཐོང་ཞིང་། །དེ་ལ་ཐོག་མ་ཡོད་མིན་ལྟར། །དེ་བཞིན་རྒྱུ་ནི་མ་ཚང་ཕྱིར། །སྐྱེ་བའང་འབྱུང་བར་མི་འགྱུར་རོ། །ཞེས་དང་། རིགས་གཏེར་ལས། ས་བོན་ཐོག་མ་ཡོད་མིན་ཡང་། །མེར་བསྲེགས་པ་ན་ཕྱི་མཐའ་མཐོང་། །དེ་བཞིན་འཁོར་བ་ཐོག་མེད་ཀྱང་། །བདག་མེད་མཐོང་བས་ཕྱི་མཐའ་མཐོང་། །ཞེས་གསུངས་པའི་ཕྱིར་ཞེས་ཟེར་ན། ཁ་ཅིག ལུང་དེ་གཉིས་ཀྱི་དོན་བདག་མེད་མཐོང་བའི་སློབ་པ་རྣམས་ཀྱི་འཁོར་བ་ལ་ཕྱི་མཐའ་ཡོད་པ་ལ་དགོངས་ཏེ། དེ་རྣམས་ཀྱིས་ཐར་པ་ཐོབ་པའི་གནས་སྐབས་དེ་དེ་རྣམས་ཀྱི་འཁོར་བའི་ཕྱི་མཐའ་ཡིན་པའི་ཕྱིར། སེམས་ཅན་ཐམས་ཅད་ཀྱི་འཁོར་བ་ལ་ཕྱི་མཐའ་ཡོད་པ་ལ་དགོངས་པ་མིན་ནོ་ཞེ་ན། མི་འཐད་དེ། བདག་མེད་མཐོང་བའི་སློབ་པ་རྣམས་ཀྱི་འཁོར་བ་ལ་ཕྱི་མཐའ་ཡོད་མེད་དང་། སེམས་ཅན་ཐམས་ཅད་ཀྱི་འཁོར་བ་ལ་ཕྱི་མཐའ་ཡོད་མེད་ཁྱད་པར་མེད་པའི་ཕྱིར་རོ། །ལུགས་སྔ་མའང་མི་འཐད་དེ། འཁོར་བ་ལ་ཕྱི་མཐའ་མེད་པར་བསྒྲུབས་ཟིན་པའི་ཕྱིར། འོ་ན་ལུང་དེའི་དོན་གང་ཞེ་ན། སེམས་ཅན་གང་གིས་ལམ་སྒོམ་ན་གོམས་པ་མཐར་ཕྱིན་པའི་ཚེ་དེ་ཉིད་ཀྱི་ཕྱི་མ་ལ་ཕྱི་མཐའ་ཡོད་ཅེས་པའི་དོན་ཡིན་ལ། འཁོར་བ་ལ་མཐའ་མེད་པའི་དོན་ནི་འཁོར་བ་ལ་ཟད་པ་མེད་ཅེས་པའི་དོན་ཡིན་ནོ། །ཟད་པ་ཡོད་ན་གྲངས་ཀྱི་མཐའ་གཟུང་དུ་ཡོད་དགོས་པ་ལས། སེམས་ཅན་གྱི་གྲངས་ཀྱི་མཐའ་རྫོགས་པའི་སངས་རྒྱས་ཀྱིས་ཀྱང་མ་དམིགས་པའི་ཕྱིར་རོ། །བྱང་ཆུབ་ཏུ་སེམས་བསྐྱེད་པ་ནི་འཁོར་བ་ཞེས་པའི་སྐབས་སུ། འདིར་བསྟན་ཆེད་དུ་གཉེར་ནས་མི་སྤོང་རྒྱུའི་ཉོན་མོངས་ངོས་གཟུང་བ་ལ་དགག་གཞག་སྤང་གསུམ་ལས། དང་པོ་ལ། ཉོན་མོངས་མཚན་ཉིད་པ་ལ་འདོད་པ་དགག སྙིང་རྗེ་དང་སེམས་བསྐྱེད་སོགས་ལ་འདོད་པ་དགག འཁོར་བའི་སྐྱེ་བ་ལ་འདོད་པ་དགག་པ་དང་གསུམ་ལས། དང་པོ་ནི། ཁ་ཅིག དེ་ཉོན་མོངས་མཚན་ཉིད་པ་ཡིན་ཏེ། དེ་ཉན་ཐོས་ཀྱིས་ཆེད་དུ་གཉེར་ནས་སྤོང་རྒྱུའི་ཉོན་མོངས་ཡིན་པའི་ཕྱིར་ཏེ། ལམ་ཤེས་དེ་འདིར་བསྟན་ཉོན་མོངས་ཆེད་དུ་གཉེར་ནས་མི་སྤོང་བའི་སྒོ་ནས་ཉན་ཐོས་ཀྱི་ལམ་ལས་ཁྱད་པར་འཕགས་པའི་ཕྱིར། ཡང་དེ་དེ་ཡིན་ཏེ། བྱང་འཕགས་ཀྱི་རྒྱུད་ཀྱི་ཤེས་རབ་ཀྱིས་ཟིན་པའི་ཉོན་མོངས་དེ་ཉོན་མོངས་མཚན་ཉིད་པ་ཡིན་པའི་ཕྱིར་ཏེ། སྨན་དང་སྔགས་ཀྱིས་ཟིན་པའི་དུག་དེ་དུག་མཚན་ཉིད་པ་ཡིན་པའི་ཕྱིར། ཁྱབ་སྟེ། དཀོན་བརྩེགས་ལས། འོད་སྲུང་འདི་ལྟ་སྟེ། སྔགས་དང་སྨན་གྱིས་ཟིན་པའི་དུག་གིས་ནི་ལོག་པར་འཆི་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའི་ཤེས་རབ་ཀྱིས་ཟིན་པའི་ཉོན་མོངས་པས་ཀྱང་ལོག་པར་ལྟུང་བར་མི་ནུས་སོ་ཞེས་གསུངས་པའི་ཕྱིར། ཡང་དེ་དེ་ཡིན་ཏེ། ལམ་ཤེས་དེ་ཉོན་མོངས་པ་མཚན་ཉིད་པ་ཆེད་དུ་གཉེར་ནས་མི་སྤོང་བའི་སྒོ་ནས་རྣམ་པ་འཆད་པའི་སྐབས་སུ་ཟག་བཅས་སུ་བསྟན་པའི་ཕྱིར་ཞེས་པ་དང་གསུམ་ལས། དང་པོ་ལ། བྱང་འཕགས་འཁོར་བར་སྐྱེ་བ་བླངས་པའི་སྐྱེ་བ་དེ་འཁོར་བའི་སྐྱེ་བ་མཚན་ཉིད་པ་ཡིན་པར་ཐལ། དེ་ཉན་ཐོས་ཀྱིས་ཆེད་དུ་གཉེར་ནས་སྤོང་བའི་སྐྱེ་བ་ཡིན་པའི་ཕྱིར། རྟགས་ཁས་བླངས་སྟེ། བྱང་འཕགས་དེས་འཁོར་བར་སྐྱེ་བ་བླངས་པའི་སྒོ་ནས་ཉན་ཐོས་ལས་ཁྱད་པར་ཡོད་པའི་ཕྱིར་རོ། །གཉིས་པ་ལ། སྔགས་དང་སྨན་གྱིས་ཟིན་པའི་དུག་ཆོས་ཅན། དུག་མཚན་ཉིད་པ་མིན་པར་ཐལ། ཁྱོད་ཀྱིས་དུག་གི་དོན་བྱེད་མི་ནུས་པའི་ཕྱིར་ཏེ། ཁྱོད་ཀྱིས་དུག་གི་བྱ་བ་མི་བྱེད་པའི་ཕྱིར། མ་གྲུབ་ན། བྱང་འཕགས་ཀྱི་ཤེས་རབ་ཀྱིས་ཟིན་པའི་ཉོན་མོངས་པ་དེས་ཉོན་མོངས་པའི་བྱ་བ་བྱེད་པར་ཐལ། མ་གྲུབ་པ་དེའི་ཕྱིར། ཁྱབ་པ་ཁས། འདོད་ན། སྔར་གྱི་དཀོན་བརྩེགས་ཀྱི་ལུང་དང་འགལ་ལོ། །གསུམ་པ་ལ། ལམ་ཤེས་དེ་ཉོན་མོངས་མཚན་ཉིད་པའི་ཟག་བཅས་ཡིན་པར་ཐལ། དེས་ཉོན་མོངས་མཚན་ཉིད་པ་ཆེད་དུ་གཉེར་ནས་མི་སྤོང་བའི་སྒོ་ནས་རྣམ་པའི་སྐབས་སུ་ཟག་བཅས་སུ་བསྟན་པའི་ཕྱིར། རྟགས་ཁྱབ་ཁས། གཉིས་པ་ནི། ཨར་དང་བུ་ན་རེ། བྱང་འཕགས་ཀྱི་རྒྱུད་ཀྱི་སྙིང་རྗེ། སྨོན་ལམ། སེམས་བསྐྱེད་སོགས་ལ་འདིར་བསྟན་ཉོན་མོངས་པའི་མིང་གིས་བཏགས་པ་ཡིན་ཞེས་གསུངས། ཁ་ཅིག འདིར་བསྟན་ཉོན་མོངས་པ་དེ། བློ་གྲོས་རྒྱ་མཚོས་ཞུས་པའི་མདོ་ལས་གསུངས་པའི་དགེ་རྩ་དང་མཚུངས་ལྡན་གྱི་ཉོན་མོངས་པ་བརྒྱད་ལ་བྱེད་ཅིང་། བརྒྱད་པོ་གང་ཞེ་ན། དེ་ཉིད་ལས། དེ་དག་གི་འཁོར་བའི་རྒྱུར་གྱུར་པའི་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་གང་ཞེ་ན། འདི་ལྟ་སྟེ། བསོད་ནམས་ཀྱི་ཚོགས་ཡོངས་སུ་ཚོལ་བས་མི་ངོམ་པ་དང་། བསམ་བཞིན་དུ་སྲིད་པར་སྐྱེ་བ་ཡོངས་སུ་འཛིན་པ་དང་། སངས་རྒྱས་དང་འཕྲད་པ་དོན་དུ་གཉེར་བ་དང་། སེམས་ཅན་ཡོངས་སུ་སྨིན་པར་བྱེད་པའི་ཕྱིར་མི་སྐྱོ་བ་དང་། དམ་པའི་ཆོས་འཛིན་པ་ལ་བརྩོན་པ་དང་། སེམས་ཅན་གྱི་བྱ་བ་ཅི་ཡོད་པ་ལ་འགྲུས་པ་དང་། ཆོས་ལ་ཆགས་པའི་བསམ་པ་དང་མ་བྲལ་བ་དང་། ཕ་རོལ་ཏུ་ཕྱིན་པའི་ཀུན་ཏུ་སྤྱོད་པ་མི་འདོར་བ་སྟེ་ཞེས་གསུངས་པའི་ཕྱིར། མི་འཐད་དེ། བྱང་སེམས་ཀྱི་རྒྱུད་ཀྱི་སྙིང་རྗེ་དང་སྨོན་ལམ་སོགས་ལམ་ཤེས་ཀྱི་ཆེད་དུ་གཉེར་ནས་སྤོང་ངམ་མི་སྤོང་སྙམ་པའི་དོགས་པ་རྒོལ་བ་རྟོགས་ལྡན་ལ་མི་སྐྱེ་བའི་ཕྱིར་དང་། ལམ་ཤེས་དེས་ལམ་ཤེས་ཆེད་དུ་གཉེར་ནས་མི་སྤོང་བ་དེ་ལམ་ཤེས་ཀྱི་རང་བཞིན་དུ་འཆད་རིགས་པར་ཐལ་བའི་ཕྱིར་རོ། །གསུམ་པ་ནི། གསེར་ཕྲེང་མཁན་ཆེན་པ་ན་རེ། ཁ་ཅིག མ་རིག་པ་དང་ལྟ་བའི་བག་ལ་ཉལ་ཆེད་དུ་གཉེར་ནས་སྤོང་། འདོད་པ་དང་སྲིད་པའི་བག་ལ་ཉལ་ཆེད་དུ་གཉེར་ནས་མི་སྤོང་བ་དེ་འདིར་བསྟན་ཉོན་མོངས་ཆེད་དུ་གཉེར་ནས་མི་སྤོང་བའི་དོན་ཡིན་ཟེར་བ་མི་འཐད་དེ། དང་པོ་གཉིས་པོ་ཕྱི་མ་གཉིས་པོའི་རྒྱུ་ཡིན་པ་གང་ཞིག རྒྱུ་ཆེད་དུ་གཉེར་ནས་སྤོང་། འབྲས་བུ་ཆེད་དུ་གཉེར་ནས་མི་སྤོང་བའི་ཁྱད་པར་མེད་པའི་ཕྱིར་ཞེས་བཀག་ནས། རང་ལུགས་ལ་སྲིད་པའི་སྐྱེ་བ་ལ་ཉོན་མོངས་པའི་མིང་གིས་བཏགས་ནས། དེ་ཆེད་དུ་གཉེར་ནས་མི་སྤོང་བ་ཡིན་གསུངས། དེ་ལ་གཞན་ལུགས་འགོག་པ་དེ་མི་འཐད་དེ། ཉི་སྣང་ལས། བག་ལ་ཉལ་ཐམས་ཅད་ནས་ཐམས་ཅད་དུ་མེད་པ་ནི་མ་རིག་པ་དང་ལྟ་བས་བསྡུས་པའི་བག་ལ་ཉལ་ཡིན་གྱི། བྱང་ཆུབ་སེམས་དཔའ་རྣམས་ནི་བསམ་བཞིན་སྲིད་པར་སྐྱེ་བ་ལེན་པའི་ཕྱིར་འདོད་པ་དང་སྲིད་པའི་ཟག་པས་བསྡུས་པ་ནི་མ་ཡིན་ནོ་ཞེས་པ་དང་འགལ་བའི་ཕྱིར་རོ། །ཡང་ཀུན་འབྱུང་བདེན་པ་ལ་སྤང་བྱ་དང་སྡུག་བདེན་ལ་ཤེས་བྱར་གཞག་པའི་ཁྱད་པར་མི་འཐད་པར་ཐལ། གཞན་ལུགས་འགོག་པའི་རྟགས་དེའི་ཕྱིར། རང་ལུགས་ཡང་མི་འཐད་དེ། ཉན་ཐོས་དགྲ་བཅོམ་པའི་གཞི་ཤེས་དེ་ལ་འདིར་བསྟན་ཉོན་མོངས་པ་མི་སྤོང་བའི་ཁྱད་ཆོས་དེ་ལྡན་པར་ཐལ། དེ་སྲིད་པའི་སྐྱེ་བ་ཆེད་དུ་གཉེར་ནས་མི་སྤོང་བའི་ཕྱིར། ཁྱབ་པ་ཁས། ཁོ་ན་རེ། སྐྱོན་མེད་དེ། དེས་དེ་ཆེད་དུ་གཉེར་ནས་སྤངས་ཟིན་པའི་ཕྱིར་ཞེ་ན། འོ་ན་ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་མཐོང་ལམ་པ་དེ་ལ་ཁྱད་ཆོས་དེ་མི་ལྡན་པར་ཐལ། དེས་དེ་ཆེད་དུ་གཉེར་ནས་སྤངས་ཟིན་པའི་ཕྱིར། གཉིས་པ་ནི། འདིར་བསྟན་ཉོན་མོངས་པ་ནི་བག་ལ་ཉལ་ཡིན་ཅིང་། དེ་བྱང་འཕགས་ཀྱིས་ཆེད་དུ་གཉེར་ནས་མི་སྤོང་བ་ཡིན་ཏེ། དེ་བྱང་འཕགས་སྐྱེ་བ་ལེན་པའི་རྒྱུར་དགོས་པའི་ཕྱིར་རོ། །ཉོན་མོངས་མངོན་གྱུར་པས་ཐེག་དམན་འཕགས་པ་རྣམས་དང་སོ་སོ་སྐྱེ་བོ་རྣམས་སྐྱེ་བ་ལེན་པའི་རྒྱུ་བྱེད་པ་ལྟར་བྱང་འཕགས་རྣམས་དང་ཐེག་དམན་དགྲ་བཅོམ་པ་རྣམས་བག་ལ་ཉལ་གྱི་ཉོན་སྒྲིབ་ཀྱིས་འཁོར་བར་སྐྱེ་བ་ལེན་པའི་རྒྱུ་བྱེད་པའི་ཕྱིར་རོ། །སོ་སོ་སྐྱེ་བོ་དང་ཐེག་དམན་སློབ་པ་རྣམས་ཉོན་མོངས་པའི་དབང་གིས་འཁོར་བར་སྐྱེ་བ་ལེན་པ་བཞིན་དུ། ཕྱི་མ་གཉིས་པོ་དེའང་མ་རིག་བག་ཆགས་ཀྱི་ས་དང་ཟག་མེད་ལས་ལ་བརྟེན་ནས་འཁོར་བར་སྐྱེ་བ་ལེན་པའི་ཕྱིར། དེའང་ཇོ་བོའི་ཨ་དུ་ལས། ཉོན་མོངས་པ་ལ་སྡུག་བསྔལ་སྐྱེད་པ་དང་། གཉེན་པོ་ལ་གེགས་བྱེད་པ་དང་། འཁོར་བར་སྐྱེ་བ་ལེན་པ་དང་། རིགས་འདྲ་ཕྱི་མ་སྐྱེད་པའི་ནུས་པ་བཞི་ཡོད་པའི་དང་པོ་གཉིས་ཆེད་དུ་གཉེར་ནས་སྤོང་ཞིང་། ཕྱི་མ་གཉིས་ཆེད་དུ་གཉེར་ནས་མི་སྤོང་བར་གསུངས་པ་དང་། སྔར་གྱི་ཉི་སྣང་གི་དོན་དང་རྒྱུད་བླ་རྩ་འགྲེལ་གྱི་དགོངས་པ་ཕྱོགས་གཅིག་པ་ཡིན་ཞིང་། ཞིབ་པར་ངག་ལས་ཤེས་སོ། །གསུམ་པ་ནི། ཁ་ཅིག བྱང་འཕགས་ཀྱི་རྒྱུད་ཀྱི་ཉོན་མོངས་པའི་བག་ལ་ཉལ་ཆོས་ཅན། ཁྱོད་ཉན་ཐོས་ཀྱིས་ཆེད་དུ་གཉེར་ནས་སྤོང་བའི་ཉོན་མོངས་སུ་ཐལ། ཁྱོད་བྱང་འཕགས་ཀྱིས་ཆེད་དུ་གཉེར་ནས་མི་སྤོང་བའི་སྐབས་འདིའི་ཉོན་མོངས་པ་ཡིན་པའི་ཕྱིར་ཞེ་ན། ཁྱོད་རང་ཉོན་མོངས་མཚན་ཉིད་པར་འདོད་པ་ལྟར་ན་ཡང་། བྱང་འཕགས་ཀྱི་རྒྱུད་ཀྱི་ཉོན་མོངས་པ་ཆོས་ཅན། དེར་ཐལ། དེའི་ཕྱིར། ཁ་ཅིག སྔ་མ་དེ་ཆོས་ཅན། བྱང་འཕགས་ཀྱིས་ཆེད་དུ་གཉེར་ནས་སྤོང་བར་ཐལ། དེའི་རྒྱུད་ཀྱི་ཤེས་སྒྲིབ་ཡིན་པའི་ཕྱིར་ཞེ་ན། བྱང་འཕགས་ཀྱི་རྒྱུད་ཀྱི་གང་ཟག་བདག་མེད་རྟོགས་པའི་རྟོགས་རིགས་ཆོས་ཅན། དེས་ཆེད་དུ་གཉེར་ནས་སྒོམ་པར་ཐལ། དེའི་རྒྱུད་ཀྱི་ཆོས་ཀྱི་བདག་མེད་རྟོགས་པའི་མཁྱེན་པ་ཡིན་པའི་ཕྱིར་རོ། །ལམ་ཤེས་ཉིད་ཀྱི་ཚུལ་ལ་ནི། །ཞེས་པའི་སྐབས་སུ། འདིར་བསྟན་ཤེས་བྱའི་ལམ་ངོས་གཟུང་བ་ལ་དགག་གཞག་སྤང་གསུམ་ལས། དང་པོ་ལ་ཤེས་བྱ་ཉན་ཐོས་ཀྱི་ལམ་ཡིན་ན་ཉན་ཐོས་ཀྱི་ལམ་ཡིན་པས་ཁྱབ་པར་དགག དེ་ཡིན་ན་ཉན་ཐོས་རང་རྒྱུད་པའི་ལམ་ཡིན་པས་ཁྱབ་པ་དགག དེ་ཡིན་ན་བྱང་སེམས་རང་རྒྱུད་པའི་ལམ་ཡིན་པས་ཁྱབ་པ་དགག་པ་དང་གསུམ་ལས། དང་པོ་ནི། རེད་མདའ་བ་ན་རེ། གཞི་གང་ཟག་གི་བདག་མེད་རྟོགས་པའི་རྟོགས་རིགས་དེ་གང་ཟག་སུའི་རྒྱུད་ལ་ཡོད་ཀྱང་ཉན་ཐོས་ཀྱི་ལམ་ཡིན་ཏེ། དེ་ཉོན་སྒྲིབ་ཀྱི་གཉེན་པོའི་རིགས་ཡིན་པའི་ཕྱིར། དེས་རྟོགས་རིགས་གཞན་གཉིས་ལའང་འགྲེའོ་ཟེར། མི་འཐད་དེ། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཉན་ཐོས་ཀྱི་ལམ་མིན་པར་ཐལ། དེ་དེའི་བགྲོད་བྱའི་ལམ་ཡང་མིན། དེའི་བགྲོད་བྱེད་ཀྱི་ལམ་ཡང་མིན་པའི་ཕྱིར། དང་པོ་མ་གྲུབ་ན། བྱང་འཕགས་ཀྱིས་ཉན་ཐོས་ལམ་གྱི་འབྲས་བུ་མངོན་དུ་བྱས་པར་ཐལ་ལོ། །གཉིས་པ་མ་གྲུབ་ན། དེ་རང་རྒྱུད་ལྡན་གྱི་གང་ཟག་ཉེར་ཞི་གཉིས་སུ་འཁྲིད་པར་བྱེད་པའི་མཁྱེན་པ་ཡིན་པར་ཐལ་ལོ། །ཡང་བྱང་སེམས་མཐོང་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། ཉན་ཐོས་ཀྱི་མཐོང་ལམ་དུ་ཐལ། དེའི་ལམ་དང་མཐོང་ལམ་གྱི་གཞི་མཐུན་ཡིན་པའི་ཕྱིར། འདོད་མི་ནུས་ཏེ། ཐེག་ཆེན་གྱི་མཐོང་ལམ་ཡིན་པའི་ཕྱིར། དེ་ལ་ཁོ་ན་རེ། དེ་བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ལམ་མིན་པར་ཐལ། དེས་དེ་ཤེས་པར་བྱ་བའི་ཉན་ཐོས་ཀྱི་བགྲོད་བྱའི་ལམ་ཡང་མིན། དེ་ལྟ་བུའི་བགྲོད་བྱེད་ཀྱི་ལམ་ཡང་མ་ཡིན་པའི་ཕྱིར། ཁྱབ་པ་ཁས་བླངས་སོ་ཞེ་ན། དེ་ཉན་ཐོས་ཀྱི་བགྲོད་བྱའི་ཐེག་པའང་མིན། དེ་ཉན་ཐོས་ཀྱི་བགྲོད་བྱེད་ཀྱི་ཐེག་པའང་མ་ཡིན་ན། དེ་ཉན་ཐོས་ཀྱི་ཐེག་པ་མིན་པའི་ཁྱབ་པ་མེད་པར་ཐལ། དེ་བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་བགྲོད་བྱའི་ཐེག་པའང་མིན། དེའི་བགྲོད་བྱེད་ཀྱི་ཐེག་པའང་མིན། དེ་བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ཐེག་པ་མིན་པས་མ་ཁྱབ་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། དེའི་ཕྱིར། འདོད་ན། བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ཐེག་པ་ཡིན་ན་ཉན་ཐོས་རང་རྒྱུད་པའི་ཐེག་པ་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། ཉན་ཐོས་རང་རྒྱུད་པའི་ལམ་ཡིན་པར་ཐལ། བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ལམ་ཡིན་པའི་ཕྱིར། ཡང་ཁོ་ན་རེ། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་མངོན་སུམ་དུ་རྟོགས་པས་ཉན་ཐོས་ཀྱི་ལམ་རྟོགས་པའི་གོ་མི་ཆོད་པར་ཐལ། དེ་ཉན་ཐོས་ཀྱི་ལམ་མ་ཡིན་པའི་ཕྱིར། འདོད་ན། དེས་དེ་མངོན་སུམ་རྟོགས་པའི་སྒོ་ནས་ཉན་ཐོས་ཀྱི་ལམ་ཇི་ལྟ་བ་བཞིན་སྟོན་མི་ནུས་པར་ཐལ། འདོད་པ་དེའི་ཕྱིར་ཞེས་ཟེར་ན། ཉན་ཐོས་ཀྱི་ལམ་གྱི་ཚབ་ཏུ་ཉན་ཐོས་ཀྱི་མངོན་པར་རྟོགས་པ་སྦྱར་ནས་ཇི་ལྟ་བ་བཞིན་དུ་མཚུངས་པར་ཤེས་པར་བྱའོ། །ཡང་སྤངས་རྟོགས་མཐར་ཐུག་པའི་ཉན་ཐོས་ཀྱི་ཐེག་པ་ཡོད་པར་ཐལ། སངས་རྒྱས་ཀྱི་ས་ན་ཉན་ཐོས་ཀྱི་ལམ་ཡོད་པའི་ཕྱིར། འདོད་ན། མཐར་ཐུག་ཐེག་པ་གསུམ་གྲུབ་པར་ཐལ་ལོ། །གཉིས་པ་ནི། ཁ་ཅིག ཤེས་བྱ་ཉན་ཐོས་ཀྱི་ལམ་ཡིན་ན་ཉན་ཐོས་རང་རྒྱུད་པའི་ལམ་ཡིན་དགོས་ཏེ། བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ལམ་དེ་ཡིན་ན་དེ་ཡིན་དགོས་པའི་ཕྱིར་ཏེ། བྱང་ཆུབ་སེམས་དཔས་ཉན་ཐོས་ཀྱི་ལམ་དུ་ཤེས་པར་བྱ་བ་ཡིན་ན་དེ་ཡིན་དགོས་པའི་ཕྱིར་ཏེ། དེས་དེ་རྟོགས་པར་བྱ་བ་ཡིན་ན་དེ་ཡིན་དགོས་པའི་ཕྱིར་ཞེ་ན། ལམ་ཤེས་ཉིད་ཀྱི་ཚུལ་ལ་ནི། །ཞེས་པའི་སྐབས་ནས་བསྟན་པའི་ཉན་ཐོས་ཀྱི་ལམ་དེ་ཆོས་ཅན། དེར་ཐལ། དེའི་ཕྱིར། འདོད་ན། མེད་པའི་རྣམ་པ་ནས་གཟུང་སྟེ། །ཞེས་པའི་སྐབས་ནས་བསྟན་པའི་ཤེས་རྣམ་དེ་ཉན་ཐོས་རང་རྒྱུད་པའི་ལམ་དུ་ཐལ། འདོད་པ་དེའི་ཕྱིར། འདོད་ན། བྱང་སེམས་འཕགས་པའི་རྒྱུད་ཀྱི་མི་རྟག་ལ་སོགས་བཅུ་དྲུག་རྟོགས་པའི་རྟོགས་རིགས་དེ་ཉན་ཐོས་རང་རྒྱུད་པའི་ལམ་དུ་ཐལ། འདོད་པ་དེའི་ཕྱིར། གཞན་ཡང་། བྱང་སེམས་ཀྱིས་རང་རྒྱུད་ལ་བསྐྱེད་ནས་ཤེས་པར་བྱ་བའི་ཉན་ཐོས་ཀྱི་ལམ་མེད་པར་ཐལ། རྩ་བའི་དམ་བཅའ་དེའི་ཕྱིར། འདོད་ན། ལམ་ཐམས་ཅད་བསྐྱེད་པར་བྱ་ཞིང་ཞེས་སོགས་དང་འགལ་ལོ། །གཞན་ཡང་བྱང་སེམས་སྦྱོར་ལམ་པས་ཉན་ཐོས་ཀྱི་ལམ་མངོན་སུམ་དུ་ཤེས་པའི་ཆེད་དུ་གང་ཟག་གི་བདག་མེད་རྟོགས་པའི་རྟོགས་རིགས་སྒོམ་པ་ལ་དགོས་པ་མེད་པར་ཐལ། བྱང་སེམས་མཐོང་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་བྱང་ཆུབ་སེམས་དཔས་ཤེས་པར་བྱ་བའི་ཉན་ཐོས་ཀྱི་ལམ་མ་ཡིན་པའི་ཕྱིར། གསུམ་པ་ནི། ཁ་ཅིག ཤེས་བྱ་ཉན་ཐོས་ཀྱི་ལམ་ཡིན་ན་བྱང་སེམས་རང་རྒྱུད་པའི་ལམ་ཡིན་དགོས་ཏེ། ལམ་ཤེས་ཉིད་ཀྱི་ཚུལ་ལ་ནི། །ཞེས་པའི་སྐབས་ནས་དངོས་སུ་བསྟན་པའི་ཤེས་བྱ་ཉན་ཐོས་ཀྱི་ལམ་དེ་མདོ་ལས་སྦྱོར་བ་རྣམ་མཁྱེན་ཡིད་བྱེད་དང་། དངོས་གཞི་མི་དམིགས་པར་རྟོགས་པའི་ཤེས་རབ་དང་། རྗེས་བསྔོ་བ་གསུམ་གྱིས་ཟིན་པར་ནི་བཤད་པའི་ཕྱིར་ཏེ། མདོ་ལས། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས་གཟུགས་མི་རྟག་ཅེས་བྱ་བ་དེ་མི་དམིགས་པའི་ཚུལ་གྱིས་ཡིད་ལ་བྱའོ་ཞེས་སོགས་གསུངས་པའི་ཕྱིར། ཡང་དེའི་དངོས་སུ་བསྟན་པའི་ཤེས་བྱ་ཉན་ཐོས་ཀྱི་ལམ་ཡིན་ན་བྱང་སེམས་རང་རྒྱུད་པའི་ལམ་ཡིན་དགོས་ཏེ། འཕགས་པ་ཉན་ཐོས་ལམ་ལ་ནི། །ཞེས་པའི་སྐབས་ནས་དངོས་བསྟན་གྱི་སྦྱོར་བ་ཡིན་ན་བྱང་སེམས་རང་རྒྱུད་པའི་སྦྱོར་ལམ་ཡིན་དགོས་པའི་ཕྱིར། ཡང་རྩ་བའི་དམ་བཅའ་དེར་ཐལ། ཤེས་བྱ་ཉན་ཐོས་ཀྱི་ལམ་ཡིན་ན་བྱང་ཆུབ་སེམས་དཔས་རང་རྒྱུད་ལ་བསྐྱེད་པར་བྱ་བའི་ལམ་ཡིན་དགོས་པའི་ཕྱིར་ཏེ། ལམ་ཐམས་ཅད་བསྐྱེད་པར་བྱ་ཞིང་ཞེས་སོགས་གསུངས་པའི་ཕྱིར་ཞེས་པ་དང་གསུམ་ལས། དང་པོ་ལ། གཞི་ཤེས་ཀྱི་ཤེས་རྣམ་ཡིན་ན་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་ནས་སྒོམ་པའི་མཁྱེན་པ་ཡིན་དགོས་པར་ཐལ། མེད་པའི་རྣམ་པ་ནས་གཟུང་སྟེ། །ཞེས་པའི་སྐབས་ནས་དངོས་བསྟན་གྱི་མཁྱེན་པ་དེ་ལྟར་དུ་བཤད་པའི་ཕྱིར། ཁྱབ་པ་ཁས། རྟགས་ཀྱང་ཁས་བླངས་ཏེ། ཐམས་ཅད་མཁྱེན་པ་ཉིད་གསུམ་ཡོངས་སུ་ཤེས་པ་ནི་དབང་དུ་བྱ་བའི་ཕྱིར་ཞེས་སོགས་གསུངས་པའི་ཕྱིར། རྩ་བར་འདོད་ན། ཉན་ཐོས་ཀྱི་མཐོང་ལམ་ཆོས་ཅན། དེར་ཐལ། དེའི་ཕྱིར། གཉིས་པ་ལ། འཕགས་པ་ཉན་ཐོས་ལམ་ལ་ནི། །ཞེས་པའི་སྐབས་ནས་དངོས་བསྟན་གྱི་སྦྱོར་ལམ་དེ། ཉན་ཐོས་ལམ་འདི་ཤེས་པར་བྱ། །ཞེས་པའི་སྐབས་ནས་དངོས་བསྟན་གྱི་ཤེས་བྱ་ཉན་ཐོས་ལམ་གྱི་རྒྱུར་གྱུར་པའི་སྦྱོར་ལམ་དུ་ཐལ། ཁྱོད་ཀྱི་སྒྲུབ་བྱེད་དེ་ལ་ཁྱབ་པ་ཡོད་པའི་ཕྱིར། འདོད་ན། དེ་ཆོས་ཅན། གང་ཟག་གི་བདག་མེད་རྟོགས་པའི་རྟོགས་རིགས་ཡིན་པར་ཐལ། འདོད་པ་དེའི་ཕྱིར། འདོད་ན། དེ་དག་མི་དམིགས་པས། རྩེ་མོར་གྱུར་པ་དག་ཏུ་འདོད། །ཅེས་པའི་གཞུང་དང་འགལ་ལོ། །གསུམ་པ་ལ། ཉན་ཐོས་ཀྱི་ལམ་ཡིན་ན་བྱང་སེམས་ཀྱི་རང་རྒྱུད་ལ་བསྐྱེད་པར་བྱ་བའི་ལམ་ཡིན་དགོས་པར་ཐལ། བྱང་སེམས་ཀྱིས་རང་རྒྱུད་ལ་བསྐྱེད་པར་བྱ་བའི་ཉན་ཐོས་ཀྱི་ལམ་རང་རྒྱུད་ལ་ཡོད་པའི་ཕྱིར། ཁྱབ་པ་རྟགས་སྒྲུབ་ཀྱི་ཁྱབ་པ་ལ་བསྒྲིག ཡང་ཉན་ཐོས་ཀྱི་ལམ་ཤེས་པའི་བྱང་འཕགས་ཀྱི་མཁྱེན་པ་ཡིན་ན་ཉན་ཐོས་ཀྱི་ལམ་རང་རྒྱུད་ལ་ཉམས་སུ་མྱོང་བའི་ཚུལ་གྱིས་ཤེས་པའི་མཁྱེན་པ་ཡིན་དགོས་པར་ཐལ། རྩ་བའི་དམ་བཅའ་དེའི་ཕྱིར། འདོད་ན། བྱང་སེམས་འཕགས་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། སོ་སོ་སྐྱེ་བོའི་རྒྱུད་ཀྱི་འདོད་ཆགས་རང་རྒྱུད་ལ་ཉམས་སུ་མྱོང་བའི་ཚུལ་གྱིས་ཤེས་པའི་མཁྱེན་པར་ཐལ། དེ་ཤེས་པའི་བྱང་འཕགས་ཀྱི་མཁྱེན་པ་ཡིན་པའི་ཕྱིར། གཉིས་པ་ནི། ལམ་ཐམས་ཅད་ཤེས་པར་བྱའོ་ཞེས་པ་ལ་བརྟེན་ནས་བྱང་སེམས་ཀྱིས་ཤེས་པར་བྱ་བའི་ཉན་ཐོས་ཀྱི་ལམ། བསྐྱེད་པར་བྱ་ཞིང་ཞེས་པ་ལ་བརྟེན་ནས་དེས་བསྐྱེད་པར་བྱ་བའི་ཉན་ཐོས་ཀྱི་ལམ། དེ་དག་ཀྱང་ཡོངས་སུ་རྫོགས་པར་བྱ་ཞིང་ཞེས་པ་ལ་བརྟེན་ནས་དེས་རྟོགས་པ་རྫོགས་པར་བྱ་བའི་ཉན་ཐོས་ཀྱི་ལམ། དེ་དག་གི་ལམ་གྱི་བྱ་བ་ཡང་བྱ་ལ་ཞེས་པ་ལ་བརྟེན་ནས་དེས་སྤངས་པ་རྫོགས་པར་བྱ་བའི་ཉན་ཐོས་ཀྱི་ལམ་དང་བཞི་བཤད་ཅིང་། བཞི་པོ་ཐམས་ཅད་ཀྱང་བྱང་ཆུབ་སེམས་པས་ཤེས་པར་བྱ་བའི་ཉན་ཐོས་ཀྱི་ལམ་ཡིན་ཏེ། ཕྱི་མ་གསུམ་པོ་དེ་རང་རྒྱུད་ལ་ཉམས་སུ་མྱོང་བའི་ཚུལ་གྱིས་ཤེས་པར་བྱ་བ་ཡིན་ཞིང་། དང་པོ་ལ་རང་རྒྱུད་ལ་ཉམས་སུ་མྱོང་བའི་ཚུལ་གྱིས་ཤེས་པར་བྱ་བ་དང་། གཞན་རྒྱུད་ལ་ཡོད་པ་གཞན་རིག་གི་ཚུལ་གྱིས་ཤེས་པར་བྱ་བའི་ཉན་ཐོས་ཀྱི་ལམ་གཉིས་སུ་ཡོད་པའི་ཕྱིར། དེ་ལ་ལམ་ཕྱི་མ་གསུམ་པོ་ཉན་ཐོས་ཀྱི་ལམ་ཡིན་པ་མི་སྲིད་དེ། དེ་བྱང་སེམས་ཀྱིས་རང་རྒྱུད་ལ་ཉམས་སུ་མྱོང་བའི་ཚུལ་གྱིས་ཤེས་པར་བྱ་བ་ཁོ་ན་ཡིན་པའི་ཕྱིར། ལམ་དང་པོ་ལ་གཉིས་སུ་ཡོད་པའི་སྔ་མ་དེ་འདིར་བསྟན་པའི་བསྐྱེད་བྱའི་ལམ་ལ་སོགས་པ་ཕྱི་མ་གསུམ་པོ་དང་། རྣམ་རྫོགས་སྦྱོར་བའི་བསྒོམ་བྱར་གྱུར་པའི་གཞི་ཤེས་ཀྱི་རྣམ་པ་ཉེར་བདུན་དང་། ཐེག་པ་གསུམ་ཆར་འཐོབ་པའི་རྒྱུ། །ཞེས་བསྟན་པའི་ཉན་རང་གི་ཐེག་པ་རྣམས་དང་དོན་གཅིག་པ་ཡིན་ནོ། །ལམ་དང་པོ་ལ་གཉིས་སུ་ཕྱེ་བའི་ཕྱི་མ་ནི། མཛོད་ལས། ཉན་ཐོས་མཐོང་བའི་སྐད་ཅིག་གཉིས། །རིགས་ཏེ་བསེ་རུ་ལྟ་བུས་གསུམ། །སངས་རྒྱས་སྦྱོར་བ་མེད་པར་ཀུན། །ཞེས་གསུངས་པ་ལྟར། གཞན་སེམས་ཤེས་པའི་མངོན་ཤེས་ཀྱིས་གཞན་རྒྱུད་ཀྱི་ལམ་མངོན་སུམ་རྟོགས་པར་བཤད་པ་དང་། མདོ་ལས་ཀྱང་། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཡང་དག་པར་ཇི་ལྟ་བ་བཞིན་རབ་ཏུ་ཤེས་སོ་ཞེས་སོགས་གསུངས་པ་ལ་བརྟེན་ནས་ཉན་ཐོས་རང་རྒྱུད་པའི་ལམ་དེའང་ཤེས་བྱ་བྱང་སེམས་ཀྱི་ལམ་ཡིན་པར་གྲུབ་བོ། །གསུམ་པ་ནི། ཁ་ཅིག་ན་རེ། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། ཤེས་བྱ་བྱང་སེམས་ཀྱི་ལམ་དུ་ཐལ། བྱང་སེམས་ཀྱི་ལམ་ཡིན་པའི་ཕྱིར། འདོད་ན། མིན་པར་ཐལ། ཤེས་བྱ་ཉན་ཐོས་ཀྱི་ལམ་ཡིན་པའི་ཕྱིར་ཟེར་ན། དེ་ཆོས་ཅན། གདུལ་བྱ་བྱང་སེམས་ཀྱི་རིགས་ཅན་རྗེས་སུ་གཟུང་བའི་ཆེད་དུ་བསླབ་པར་བྱ་བའི་ཉན་ཐོས་ཀྱི་ལམ་མིན་པར་ཐལ། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཆེད་དུ་བསླབ་པར་བྱ་བའི་ལམ་ཡིན་པའི་ཕྱིར། ཁྱབ་པ་ཁས། འདོད་ན། དེ་དེར་ཐལ། དེ་སངས་རྒྱས་འཕགས་པས་གདུལ་བྱ་བྱང་སེམས་ཀྱི་རིགས་ཅན་ལ་བསྟན་པར་བྱ་བའི་ལམ་ཡིན་པའི་ཕྱིར་ཏེ། དེས་དེ་ལ་རྟོགས་རིགས་གསུམ་ཀ་བསྟན་དགོས་པའི་ཕྱིར། ཡང་ཁ་ཅིག་ན་རེ། གདུལ་བྱ་ཉན་ཐོས་ཀྱི་རིགས་ཅན་དེ་དང་པོ་ཉིད་ནས་ཐེག་ཆེན་ལམ་གྱིས་རྗེས་སུ་འཛིན་ནུས་པར་ཐལ། བྱང་སེམས་འཕགས་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་གདུལ་བྱ་ཉན་ཐོས་ཀྱི་རིགས་ཅན་ལ་བསྟན་པར་བྱ་བའི་ལམ་གང་ཞིག དེ་ཐེག་ཆེན་གྱི་ལམ་ཡིན་པའི་ཕྱིར་ཞེས་ཟེར་ན། འོ་ན་དེ་དང་པོ་ཉིད་ནས་ཐེག་ཆེན་སེམས་བསྐྱེད་ཀྱིས་ཟིན་པའི་ལམ་གྱིས་རྗེས་སུ་འཛིན་ནུས་པར་ཐལ། གང་ཞིག དེ་ཐེག་ཆེན་སེམས་བསྐྱེད་ཀྱི་ཟིན་པའི་ལམ་ཡིན་པའི་ཕྱིར། རང་བྱུང་བདག་ཉིད་རྟོགས་པའི་ཕྱིར། །ཞེས་པའི་སྐབས་སུ། རང་རྒྱལ་གྱི་ལམ་གྱི་རྣམ་གཞག་དང་། ངག་དོན་ལ་དཔྱད་པ་གཉིས་ལས། དང་པོ་ལ་ལམ་བགྲོད་ཚུལ་གྱི་ཁྱད་པར། འབྲས་བུ་འགྲུབ་ཚུལ་གྱི་ཁྱད་པར། ཚོགས་གསག་པའི་དུས་ཀྱི་ཁྱད་པར། ཁམས་གསུམ་གང་གི་རྟེན་ཅན་ཡིན་དཔྱད་པ། སྤངས་རྟོགས་ཀྱི་ཁྱད་པར་ལ་དཔྱད་པ། འབྲས་བུ་བཞི་པོ་གཞག་ཏུ་རུང་མི་རུང་དཔྱད་པ། སློབ་པ་ཡོད་མེད་དཔྱད་པ། སྒྲ་བཤད་པ་དང་བརྒྱད་ལས། དང་པོ་ནི། རང་ས་ལས་ལམ་བསྒྲོད་ཚུལ་གསུམ་གསུངས་པ་ལས། སྐྱེ་བ་གཅིག་གིས་ཐོགས་པ་མན་ཆད་དུ་བསྐལ་པ་བརྒྱར་ཚོགས་བསགས་པ་སྔོན་དུ་འགྲོ་བར་བྱས་ཏེ། ཚེ་འདིར་དྲོད་ཙམ་ཡང་སྐྱེད་མ་ནུས་པས། ཕྱི་མ་ལ་དྲོད་ནས་མི་སློབ་ལམ་གྱི་བར་གྱི་རྟོགས་པ་རྣམས་བསྐྱེད་པའི་ཕྱིར་དུ་མཁས་པར་བྱ་བའི་དངོས་པོ་དྲུག་ལ་མཁས་པར་བྱེད་ཅིང་། འཆི་འཕོ་ཁར་སྨོན་ལམ་གསུམ་འདེབས་པ་ནི་ལམ་བགྲོད་ཚུལ་དང་པོ་ཡིན་ནོ། །ཡང་སྐྱེ་བ་གཅིག་ཐོགས་མན་ཆད་དུ་བསྐལ་པ་བརྒྱར་ཚོགས་བསགས་པ་སྔོན་དུ་འགྲོ་བར་བྱས་ཏེ། ཚེ་འདིར་དྲོད་འབྲིང་མན་ཆད་རྒྱུད་ལ་བསྐྱེད་ནས། བཟོད་ཆེན་སྐྱེད་མ་ནུས་པས། ཕྱི་མ་ལ་བཟོད་ཆེན་ནས་མི་སློབ་ལམ་གྱི་བར་གྱི་རྟོགས་པ་བསྐྱེད་པའི་ཕྱིར་དུ་སྔར་ལྟར་བྱེད་པ་ནི་བགྲོད་ཚུལ་གཉིས་པའོ། །ཡང་སྐྱེ་བ་གཅིག་ཐོགས་མན་ཆད་དུ་བསྐལ་པ་བརྒྱར་ཚོགས་བསགས་པ་སྔོན་དུ་འགྲོ་བར་བྱས་ཏེ། ཚེ་འདིར་དགེ་སྦྱོང་ཚུལ་གྱི་འབྲས་བུ་དང་པོ་གཉིས་གང་རུང་མངོན་དུ་བྱས་ནས་འབྲས་བུ་གོང་མ་གཉིས་སྐྱེད་པར་མ་ནུས་པས། ཕྱི་མ་ལ་འབྲས་བུ་གོང་མ་གཉིས་བསྐྱེད་པའི་ཆེད་དུ་སྔར་ལྟར་བྱེད་པ་ནི་ལམ་བགྲོད་ཚུལ་གསུམ་པའོ། །དེ་ལྟ་བུའི་ལམ་བགྲོད་ཚུལ་གསུམ་པོ་དེའང་དང་པོ་ཉིད་ནས་རང་རྒྱལ་གྱི་རིགས་ཅན་གྱི་ལམ་བགྲོད་ཚུལ་གྱི་དབང་དུ་བྱས་པ་སྟེ། གསུམ་གའང་བསྐལ་པ་བརྒྱར་ཚོགས་བསགས་པར་མཚུངས་པའི་ཕྱིར། ཀུན་བཏུས་ལས། གསུམ་པོ་དེའི་སྟེང་དུ་ཅིག་ཆར་བའི་རྒྱུན་ཞུགས་འབྲས་གནས་ཚེ་འདིར་དགྲ་བཅོམ་འབྲས་གནས་མ་ཐོབ་པར་ཕྱི་མར་རང་རྒྱལ་གྱི་བྱང་ཆུབ་མངོན་དུ་བྱེད་པའི་རྣམ་གཞག་དང་བཞི་གསུངས་ལ། མཛོད་ལས། བསེ་རུ་ལྟ་བུའི་ལམ་བགྲོད་ཚུལ་དང་། ཚོགས་ན་སྤྱོད་པའི་ལམ་བགྲོད་ཚུལ་གྱི་རྣམ་གཞག་དང་གཉིས་གསུངས་པ་ལས། དང་པོ་ནི། རང་ས་ནས་བཤད་པའི་ལམ་བགྲོད་ཚུལ་དང་པོ་དང་ཆོས་མཚུངས་ལ། ཕྱི་མ་ལ་ཉན་ཐོས་སྔོན་འགྲོའི་ཚོགས་ན་སྤྱོད་པ་དང་། སོ་སྐྱེ་སྔོན་འགྲོའི་ཚོགས་ན་སྤྱོད་པའི་ལམ་བགྲོད་ཚུལ་གཉིས་ལས། དང་པོ་ནི། སྐྱེ་བ་གཅིག་གིས་ཐོགས་པ་མན་ཆད་དུ་དགེ་སྦྱོང་ཚུལ་གྱི་འབྲས་བུ་གཉིས་གང་རུང་ཉན་ཐོས་ཀྱི་ལམ་གྱི་བགྲོད་པར་བྱས་ནས། འབྲས་བུ་གོང་མ་གཉིས་སྲིད་པ་ཐ་མ་པའི་རྟེན་ལ་སངས་རྒྱས་དང་ཉན་ཐོས་མི་བཞུགས་པའི་ཞིང་ཁམས་སུ་མངོན་དུ་བྱེད་པའོ། །ཕྱི་མ་ནི་སྐྱེ་བ་གཅིག་གིས་ཐོགས་པ་མན་ཆད་དུ་བཟོད་པ་འབྲིང་མན་ཆད་ཉན་ཐོས་ཀྱི་ལམ་གྱིས་བགྲོད་པར་བྱས་ནས། བཟོད་ཆེན་ནས་མི་སློབ་ལམ་གྱི་བར་གྱི་རྟོགས་པ་རྣམས་ཚེ་ཕྱི་མ་ལ་སྲིད་པ་ཐ་མ་པའི་རྟེན་ལ་སངས་རྒྱས་དང་ཉན་ཐོས་མི་བཞུགས་པའི་རྟེན་ལ་མངོན་དུ་བྱེད་པའོ། །མཛོད་ལས་གསུངས་པའི་ཕྱི་མ་འདི་གཉིས་དང་། ཀུན་བཏུས་ལས་གསུངས་པའི་ཅིག་ཆར་བ་གཉིས་ནི་དང་པོ་ཉིད་ནས་རང་རྒྱལ་གྱི་རིགས་ཅན་མིན་ཏེ། སྐྱེ་བ་གཅིག་གིས་ཐོགས་པ་མན་ཆད་དུ་ཉན་ཐོས་ཀྱི་རིགས་ཅན་ཡིན་པའི་ཕྱིར། གཉིས་པ་ནི་རང་ས་དང་། མཛོད་ནས་བཤད་པའི་དང་པོ་ལ་བརྟེན་ནས་བསེ་རུ་ལྟ་བུའི་རང་སངས་རྒྱས་སུ་འགྱུར་ལ། རང་ས་ནས་བཤད་པའི་ཕྱི་མ་གཉིས་དང་། ཀུན་བཏུས་ལས་བཤད་པའི་ཐུན་མོང་མ་ཡིན་པ་དང་། མཛོད་ལས་བཤད་པའི་ཕྱི་མ་གཉིས་ལ་བརྟེན་ནས་ཚོགས་ན་སྤྱོད་པའི་རང་སངས་རྒྱས་སུ་འགྱུར་རོ། །ཁ་ཅིག མཛོད་ནས་བཤད་པའི་ཕྱི་མ་གཉིས་ཀའང་ཉན་ཐོས་སྔོན་འགྲོ་ཡིན་ཏེ། མཛོད་འགྲེལ་ལས། རང་སངས་རྒྱས་རྣམས་ནི་རྣམ་པ་གཉིས་ཏེ། ཚོགས་ཞིང་སྤྱོད་པ་དང་། བསེ་རུ་ལྟ་བུ་རྣམས་སོ། །དེ་ལ་ཚོགས་ཞིང་སྤྱོད་པ་ནི། ཉན་ཐོས་ཀྱི་རིགས་ཅན་དུ་གྱུར་པ་སྔོན་དུ་འགྲོ་བའི་རང་རྒྱལ་བའོ་ཞེས་གསུངས་པའི་ཕྱིར་ཞེས་ཟེར་རོ། །འོ་ན་སྲིད་པ་ཐ་མ་པའི་རྟེན་ལ་བཟོད་ཆེན་ནས་མི་སློབ་ལམ་གྱི་རྟོགས་པ་རྣམས་བསྐྱེད་པར་བྱ་བའི་རང་སངས་རྒྱས་ཆོས་ཅན། ཉན་ཐོས་སྔོན་འགྲོ་ཡིན་པར་ཐལ། མཛོད་ནས་བཤད་པའི་ཚོགས་ན་སྤྱོད་པའི་རང་རྒྱལ་ཡིན་པའི་ཕྱིར། འདོད་ན། སྐྱེ་བ་གཅིག་གིས་ཐོགས་པའི་རྟེན་ལ། དགེ་སྦྱོང་ཚུལ་གྱི་འབྲས་བུ་དང་པོ་གཉིས་གང་རུང་མངོན་དུ་བྱས་པར་ཐལ་ལོ། །དེ་ལ་ཁོ་ན་རེ། དེ་ཆོས་ཅན། ཉན་ཐོས་སྔོན་སོང་ཡིན་ཏེ། སྐྱེ་བ་གཅིག་གིས་ཐོགས་པ་མན་ཆད་དུ་ཉན་ཐོས་ཀྱི་རིགས་ཅན་སྔོན་དུ་སོང་བར་བྱེད་པའི་རང་སངས་རྒྱས་ཡིན་པའི་ཕྱིར་ཞེ་ན། འོ་ན་རང་སངས་རྒྱས་ཡིན་ན་སོ་སྐྱེ་སྔོན་སོང་ཡིན་དགོས་པར་ཐལ་ལོ། །དེས་ན་ཉན་ཐོས་ཞེས་པ་ཉན་ཐོས་འཕགས་པ་དང་། སྔོན་གྱི་སྐྱེ་བ་གཅིག་གིས་ཐོགས་པའི་རྟེན་ལ་འཇུག་པ་གསུང་རབ་ཀྱི་དགོངས་པ་ཡིན་པས་དེ་མི་བཤིག་པར་ཞུ། གསུམ་པ་ནི། བསེ་རུ་བསྐལ་པ་བརྒྱ་ཡི་རྒྱུས། །ཞེས་བསེ་རུ་ལྟ་བུའི་ཚོགས་གསག་པའི་དུས་ཀྱི་ཁྱད་པར་དངོས་སུ་གསུངས་ནས། ཚོགས་སྤྱོད་གཉིས་ཀྱི་ཚོགས་གསག་པའི་དུས་ཀྱི་ཁྱད་པར་དངོས་སུ་མ་གསུངས་པ་དང་། རང་ས་ནས་ཀྱང་དེ་ལྟར་གསུངས་པས་ཚོགས་སྤྱོད་གཉིས་ཀྱི་ཚོགས་གསག་པའི་དུས་ཀྱི་ཁྱད་པར་གང་ཞེ་ན། རང་ས་ནས་བཤད་པའི་ཕྱི་མ་གཉིས་པོ་དེས་ཀྱང་བསྐལ་པ་བརྒྱར་ཚོགས་བསགས་པར་བྱས་པ་ཡིན་ཏེ། དེ་གཉིས་དང་པོ་ནས་རང་སངས་རྒྱས་ཀྱི་རིགས་ཅན་ཡིན་པའི་ཕྱིར། མཛོད་ནས་བཤད་པའི་ཕྱི་མ་གཉིས་པོ་དེས་བསྐལ་པ་བརྒྱར་ཚོགས་བསགས་པས་མ་ཁྱབ་པ་ཡིན་ཏེ། དེ་གཉིས་དང་པོ་ནས་རང་སངས་རྒྱས་ཀྱི་རིགས་ཅན་མ་ཡིན་པར་ཉན་ཐོས་ཀྱི་རིགས་ཅན་ཡིན་པའི་ཕྱིར། གསེར་ཕྲེང་མཁན་པོ་ན་རེ། ཚོགས་ན་སྤྱོད་པའི་རང་སངས་རྒྱས་ཡིན་ན་བསྐལ་པ་བརྒྱར་ཚོགས་བསགས་པ་སྔོན་དུ་སོང་བས་ཁྱབ་ཅེས་གསུངས་སོ། །འོ་ན་ཅིག་ཆར་བའི་རྒྱུན་ཞུགས་འབྲས་གནས་རང་སངས་རྒྱས་སུ་གྱུར་པའི་རང་སངས་རྒྱས་ཆོས་ཅན། དེར་ཐལ། དེའི་ཕྱིར་ཏེ། ཚོགས་སྤྱོད་དང་བསེ་རུ་ལྟ་བུ་གང་རུང་གང་ཞིག བསེ་རུ་ལྟ་བུ་མིན་པའི་ཕྱིར་ཏེ། ཉན་ཐོས་སྔོན་སོང་ཡིན་པའི་ཕྱིར། རྩ་བར་འདོད་ན། ཅིག་ཆར་བའི་རྒྱུན་ཞུགས་འབྲས་གནས་ཀྱང་ཡིན། བསྐལ་པ་བརྒྱར་ཚོགས་བསགས་པའང་ཡིན་པའི་གཞི་མཐུན་ཡོད་པར་ཐལ་ལོ། །བཞི་པ་ལ། རང་སངས་རྒྱས་ཀྱི་རྣམ་གཞག་སྟོན་པའི་གསུང་རབ་རྣམས་ལས་རང་སངས་རྒྱས་འདོད་པའི་རྟེན་ཅན་ཁོ་ནར་བཤད་པའི་དོན་གང་ཞེ་ན། དེ་ལ་ཁ་ཅིག རང་སངས་རྒྱས་ཡིན་ན་འདོད་པའི་རྟེན་ཅན་ཡིན་པས་ཁྱབ་སྟེ། དེ་ཡིན་ན་རྟེན་འབྲེལ་ལུགས་འབྱུང་དང་ལུགས་ལྡོག་ཏུ་སྒོམ་པས་ཁྱབ་ཅིང་། དེ་ལ་དམིགས་རྟེན་རུས་པ་ཞིག་དགོས་པའི་ཕྱིར་ཞེ་ན། འོ་ན་ཉན་ཐོས་སློབ་པ་ཡིན་ན་འདོད་པའི་རྟེན་ཅན་ཡིན་པས་ཁྱབ་པར་ཐལ། དེ་ཡིན་ན་འཁོར་བའི་ཉེས་དམིགས་སྒོམ་པས་ཁྱབ་པ་གང་ཞིག དེ་ལ་དམིགས་རྟེན་རུས་པ་ཞིག་དགོས་པའི་ཕྱིར། རྟགས་ཁྱབ་ཁས། རང་ལུགས་ལ་རང་སངས་རྒྱས་ཡིན་ན་འདོད་པའི་རྟེན་ཅན་ཡིན་པས་ཁྱབ་སྟེ། དེ་ཡིན་ན་སྐྱེ་བ་གཅིག་གིས་ཐོགས་པའི་རྟེན་ལ་འདོད་པ་ལ་འདོད་ཆགས་དང་མ་བྲལ་བས་ཁྱབ་པ་གང་ཞིག དེའི་རྟེན་ལ་འདོད་པ་ལ་འདོད་ཆགས་དང་མ་བྲལ་བས་སྲིད་པ་ཐ་མའི་རྟེན་ལ་ཁམས་གོང་མར་སྐྱེ་བ་མི་སྲིད་པའི་ཕྱིར། རྟགས་སྔ་མ་གྲུབ་སྟེ། བསེ་རུ་ལྟ་བུའི་རང་སངས་རྒྱས་ཡིན་ན་སྐྱེ་བ་གཅིག་གིས་ཐོགས་པའི་རྟེན་ལ་སྦྱོར་ལམ་ཙམ་ཡང་མ་ཐོབ་པས་ཁྱབ་ཅིང་། སོ་སྐྱེ་སྔོན་སོང་གི་རང་སངས་རྒྱས་ཡིན་ན་མཐོང་ལམ་མ་ཐོབ་པས་ཁྱབ། ཉན་ཐོས་སྔོན་སོང་གི་རང་སངས་རྒྱས་ཡིན་ན་དེའི་རྟེན་ལ་འབྲས་བུ་གོང་མ་གཉིས་མ་ཐོབ་པས་ཁྱབ་པའི་ཕྱིར། དེ་ལ་ཁོ་ན་རེ། མ་ཁྱབ་སྟེ། སྦྱོར་ལམ་མ་ཐོབ་པའི་འདོད་པ་ལ་འདོད་ཆགས་དང་བྲལ་བ་དུ་མ་ཡོད་པའི་ཕྱིར་ཞེ་ན། སྐྱོན་མེད་དེ། སྤྱིར་དེ་ལྟར་ཡོད་ཀྱང་འདོད་པ་ལ་འདོད་ཆགས་དང་བྲལ་བའི་སོ་སྐྱེ་ཡིན་ན་ཚེ་དེ་ཉིད་ལ་ཕྱིར་མི་འོང་གི་འབྲས་བུ་མངོན་དུ་བྱེད་པས་ཁྱབ་ཅིང་། དེའི་ཕྱི་མར་རང་སངས་རྒྱས་སུ་འགྱུར་བ་མི་སྲིད་པའི་ཕྱིར་རོ། །ལྔ་པ་ལ་ཁ་ཅིག ཉན་རང་གི་སྤངས་རྟོགས་ལ་ཁྱད་པར་མེད་དེ། རྟོག་གེ་འབར་བ་ལས། རང་སངས་རྒྱས་རྣམས་ཉན་ཐོས་ཇི་ལྟ་བ་བཞིན་རིག་པར་བྱ་སྟེ། དེ་དག་དང་ལམ་གྱི་རྣམ་པ་མཚུངས་པའི་ཕྱིར། ཞེས་དང་། བྱང་ས་ལས། གང་ཟག་གི་བདག་མེད་པ་ཙམ་གོམས་པར་བྱས་པས་འབྲས་བུ་དམན་པ་འདོད་པས་དམན་པའི་ཁྱད་པར་ཐོབ་པ་ཡོད་དེ། ཉན་ཐོས་དང་རང་སངས་རྒྱས་བཞིན་ནོ་ཞེས་གསུངས་པའི་ཕྱིར་ཞེས་ཟེར་རོ། །འོ་ན་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དེ་བདེན་གྲུབ་ཏུ་ཐལ། ཡེ་ཤེས་སྙིང་པོ་ཀུན་བཏུས་ལས། གཟུང་དང་འཛིན་པ་ལས་གྲོལ་བའི། །རྣམ་པར་ཤེས་པ་དོན་དམ་ཡོད། །བློ་མཚོའི་ཕ་རོལ་ཕྱིན་པ་ཡི། །རྣལ་འབྱོར་སྤྱོད་པའི་གཞུང་དུ་བསྒྲག །ཞེས་གསུངས་པའི་ཕྱིར། ཁོ་ན་རེ། མ་ཁྱབ་སྟེ། དེ་སེམས་ཙམ་པའི་སྐབས་ཡིན་པའི་ཕྱིར་ཞེ་ན། སྔ་མའང་མ་ཁྱབ་པར་ཐལ། བྱང་ས་ལས་དེ་ལྟར་བཤད་པ་སེམས་ཙམ་པའི་སྐབས་ཡིན་པའི་ཕྱིར། ཁ་ཅིག ཉན་རང་གི་སྤངས་རྟོགས་ལ་ཁྱད་པར་མེད་དེ། དེ་གཉིས་ཀས་འཛིན་པ་ཆོས་ཀྱི་བདག་མེད་རྟོགས་པར་མཚུངས་པའི་ཕྱིར། རྟགས་སྒྲུབ་པ་ལ། རིགས་པའི་སྒྲུབ་བྱེད་གསུམ་དང་། ལུང་གི་སྒྲུབ་བྱེད་བཞི་ལས། དང་པོ་ནི། ཉན་རང་དགྲ་བཅོམ་པས་ཁམས་གསུམ་ན་སྤྱོད་པའི་ཉོན་མོངས་མ་སྤངས་པར་ཐལ་བ་དང་། ས་དང་པོའི་བྱང་སེམས་ཀྱིས་ཉན་རང་དགྲ་བཅོམ་པ་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ། དེས་དེ་དངོས་སུམ་མ་རྟོགས་པའི་ཕྱིར། དེས་གང་ཟག་གི་བདག་མེད་མངོན་སུམ་དུ་མ་རྟོགས་པར་ཐལ། དེས་གདགས་གཞི་ཕུང་པོ་རང་བཞིན་མེད་པར་མ་རྟོགས་པའི་ཕྱིར། གཉིས་པ་ནི། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་དེ། །དེ་ལས་ཡང་ནི་སྐྱེ་བར་འགྱུར། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །འཁོར་ལོ་ལྟ་བུ་ཕན་ཚུན་དུ། །རྒྱུ་ཅན་དེ་ནི་འཁོར་བར་འགྱུར། །ཞེས་དང་། ཉན་ཐོས་རང་ཉིད་ལ་གྲགས་པའི་མདོ་ལས། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་འདྲ། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པར་ཤེས་པ་སྒྱུ་མ་བཞིན། །ཉི་མའི་གཉེན་གྱིས་བཀའ་སྩལ་ཏོ། །ཞེས་དང་། རྩ་ཤེར་ལས། བཅོམ་ལྡན་དངོས་དང་དངོས་མེད་པ། །ཞེས་སོགས་དང་། རིན་ཆེན་ཕྲེང་བར། ཐེག་པ་ཆེ་ལས་སྐྱེ་མེད་བསྟན། །གཞན་གྱིས་ཟད་པ་སྟོང་པ་ཉིད། །ཟད་དང་མི་སྐྱེ་དོན་དུ་ན། །གཅིག་པས་དེ་ཕྱིར་བཟོད་པར་གྱིས། །ཞེས་གསུངས་པའི་ཕྱིར། ཞེས་ཟེར་རོ། །མི་འཐད་དེ། འདི་དགག་པ་ལ་བསྒྲུབ་བྱ་དགག་པ་དང་། སྒྲུབ་བྱེད་དགག་པ་གཉིས། དང་པོ་ནི། རང་རྒྱལ་དགྲ་བཅོམ་པ་དེ་ཉན་ཐོས་དགྲ་བཅོམ་པ་ལས་རྣམ་པར་ཐར་པ་ཅུང་ཟད་ཙམ་གྱིས་ལྷག་པ་མ་ཡིན་པར་ཐལ་བ་དང་། རང་རྒྱལ་དགྲ་བཅོམ་པ་དང་། ཉན་ཐོས་དགྲ་བཅོམ་པའི་རྣམ་གྲོལ་གཉིས་ཀྱི་སྤངས་པ་ལ་ཁྱད་པར་མེད་པར་ཐལ། དེ་གཉིས་ཀྱི་སྤངས་པ་ལ་ཁྱད་པར་མེད་པའི་ཕྱིར། འདོད་ན། རྣམ་པར་ཐར་པ་ཅུང་ཟད་ཙམ་གྱིས་ལྷག་པ་ཞེས་དང་། ཉོན་མོངས་ཤེས་བྱ་ལམ་གསུམ་དང་། །ཉམས་ཕྱིར་སློབ་མ་བསེ་རུ་དང་། །ཞེས་པའི་གཞུང་དང་འགལ་ལོ། །ཡང་བྱང་སེམས་ཀྱི་རྟོགས་རིགས་ལས་ལོགས་སུ་རང་སངས་རྒྱས་ཀྱི་ལམ་ཤེས་པར་བྱེད་པ་ལ་དགོས་པ་མེད་པར་ཐལ། དེ་གཉིས་ཀྱི་སྤངས་རྟོགས་ལ་ཁྱད་པར་མེད་པའི་ཕྱིར། འདོད་ན། ལམ་ཤེས་དེ་ལ་རྣམ་པ་གསུམ་གསུངས་པ་དང་འགལ་ལོ། །གཉིས་པ་ནི། འཛིན་པ་ཆོས་ཀྱི་བདག་མེད་རྟོགས་པའི་རྟོགས་པ་དེ་སྒྲིབ་པ་གཉིས་ཀྱི་ནང་ནས་ཉོན་སྒྲིབ་ཀྱི་གཉེན་པོའི་རིགས་ཡིན་པར་ཐལ། རིགས་པའི་སྒྲུབ་བྱེད་དང་པོ་ལ་ཁྱབ་པ་ཡོད་པའི་ཕྱིར། ས་དང་པོའི་བྱང་སེམས་དེས་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ། སྔ་མས་ཆོས་དབྱིངས་ཀུན་འགྲོའི་ཚུལ་གྱིས་རྟོགས། ཕྱི་མས་དེ་མ་རྟོགས་པའི་ཕྱིར་དང་། སྔ་མས་སྦྱིན་པའི་ཕར་ཕྱིན་འཁོར་གསུམ་མི་དམིགས་པར་རྟོགས། ཕྱི་མས་དེ་མ་རྟོགས་པའི་ཕྱིར། ཡང་ཐག་ཁྲ་ལ་ཐག་ཁྲར་བདེན་པར་ཞེན་པའི་སོ་སྐྱེའི་རྟོགས་པ་ཆོས་ཅན། ཐག་ཁྲའི་སྟེང་གི་སྦྲུལ་བདེན་མེད་དུ་མ་རྟོགས་པར་ཐལ། ཐག་ཁྲ་བདེན་མེད་དུ་མ་རྟོགས་པའི་ཕྱིར། ཁྱབ་པ་རིགས་པའི་སྒྲུབ་བྱེད་གསུམ་ལ་ཁས། ཡང་ཉན་ཐོས་ཀྱི་གཞི་ཤེས་དེ་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་དང་འཛིན་སྟངས་འགལ་བར་ཐལ། དེས་འཛིན་པ་ཆོས་ཀྱི་བདག་མེད་རྟོགས་པའི་ཕྱིར། འདོད་ན། ཉན་ཐོས་ཀྱི་གཞི་ཤེས་དང་བྱང་སེམས་ཀྱི་གཞི་ཤེས་ལ་འབྲས་ཡུམ་ལ་ཉེ་རིང་གི་ཁྱད་པར་མེད་པར་ཐལ་ལོ། །ཁ་ཅིག རང་སངས་རྒྱས་ཡིན་ན་གཟུང་བ་ཆོས་ཀྱི་བདག་མེད་རྟོགས་པས་ཁྱབ་པ་ཡིན་ཏེ། གཟུང་དོན་རྟོག་པ་སྤོང་ཕྱིར་དང་། །ཞེས་པའི་གཞུང་དེས་རང་སངས་རྒྱས་ཀྱི་ལམ་གྱི་རྟོགས་རིགས་བསྟན་པའི་ཕྱིར་ཞེ་ན། ཉན་ཐོས་ཅིག་ཆར་བ་སྔོན་སོང་གི་རང་སངས་རྒྱས་ཆོས་ཅན། དེར་ཐལ། དེའི་ཕྱིར། འདོད་ན། གཟུང་བ་ཆོས་ཀྱི་བདག་མེད་རྟོགས་པའི་མཐོང་ལམ་སྔོན་དུ་སོང་བར་ཐལ། འདོད་པ་གང་ཞིག དགྲ་བཅོམ་ཡིན་པའི་ཕྱིར། འདོད་ན། ཅིག་ཆར་བའི་རྒྱུན་ཞུགས་འབྲས་གནས་དེས་གཟུང་བ་ཆོས་ཀྱི་བདག་མེད་མངོན་སུམ་དུ་རྟོགས་པར་ཐལ་ལོ། །རང་ལུགས་ནི། སྤྱིར་རང་སངས་རྒྱས་ལ་བསེ་རུ་ལྟ་བུ་དང་། ཚོགས་ན་སྤྱོད་པ་གཉིས་ལས། དང་པོ་དེ་ཡིན་ན་གཟུང་བ་ཆོས་ཀྱི་བདག་མེད་རྟོགས་པས་ཁྱབ་སྟེ། དེ་ཡིན་ན་དང་པོ་ཉིད་ནས་རང་སངས་རྒྱས་ཀྱི་ཚོགས་ལམ་དུ་ཞུགས་པས་ཁྱབ་པ་གང་ཞིག རང་སངས་རྒྱས་ཀྱི་ལམ་དེ་ལ་རྟོགས་རིགས་དེ་ཁྱད་ཆོས་སུ་ལྡན་པའི་ཕྱིར། དེས་ན། གཟུང་དོན་རྟོགས་པ་སྤོང་ཕྱིར་དང་། །ཞེས་པའི་དོན་ནི་འདི་ལ་དགོངས་སོ། །མཛོད་ནས་བཤད་པའི་ཚོགས་སྤྱོད་ཕྱི་མ་གཉིས་དང་། ཀུན་བཏུས་ནས་བཤད་པའི་ཅིག་ཆར་བ་སྔོན་སོང་རྣམས་ཀྱིས་ནི་དེ་མ་རྟོགས་ཏེ། དེས་ཚོགས་ལམ་གྱི་གནས་སྐབས་སུ་གཟུང་བ་ཆོས་ཀྱི་བདག་མེད་ལ་ཐོས་བསམ་མ་བྱས་པས་མཐོང་ལམ་གྱི་གནས་སྐབས་སུ་དེ་མངོན་སུམ་དུ་མཐོང་བ་མེད་ལ། དེ་མེད་པར་སྒོམ་ལམ་དུ་རྟོགས་ཟིན་སྒོམ་པར་བྱེད་པ་མི་འབྱུང་བའི་ཕྱིར། འོ་ན་དེ་གསུམ་རང་སངས་རྒྱས་མ་ཡིན་པར་འགྱུར་རོ་ཞེ་ན། སྐྱོན་མེད་དེ། སྲིད་པ་ཐ་མ་པའི་རྟེན་ལ་སངས་རྒྱས་དང་ཉན་ཐོས་མེད་པའི་འདོད་པ་ཁམས་སུ་རང་ཉིད་ཀྱིས་བྱང་ཆུབ་མངོན་དུ་བྱས་པའི་ཐེག་དམན་དགྲ་བཅོམ་ཡིན་པའི་ཕྱིར། རང་ས་ནས་བཤད་པའི་ཕྱི་མ་གཉིས་པོ་དེས་ཀྱང་། གཟུང་བ་ཆོས་ཀྱི་བདག་མེད་རྟོགས་ཏེ། སྒྲུབ་བྱེད་སྔར་བཞིན། སེམས་ཙམ་པ་རྣམས་ཀྱིས་གཟུང་བ་ཆོས་ཀྱི་བདག་མེད་གཏན་མ་རྟོགས་པར་འདོད་པ་ནི། གཟུང་བ་ཆོས་ཀྱི་བདག་མེད་རྟོགས་པའི་རྟོགས་པ་དེ་ཐེག་ཆེན་གྱི་རྟོགས་རིགས་ཁོ་ནའི་དབང་དུ་བྱས་སོ། །དྲུག་པ་ལ་དགག་གཞག་གཉིས་ལས། དང་པོ་ནི། ཁ་ཅིག རང་སངས་རྒྱས་ལ་འབྲས་བུ་ཐོག་མཐའ་གཉིས་གཞག་པ་ཡིན་གྱི། བར་པ་གཉིས་གཞག་ཏུ་མི་རུང་སྟེ། རང་སངས་རྒྱས་ཡིན་ན་སྤང་བྱ་ཅིག་ཅར་བ་ཡིན་པའི་ཕྱིར་ཞེ་ན། གཏན་ཚིགས་དེ་མ་གྲུབ་སྟེ། བསེ་རུ་ལྟ་བུའི་རང་སངས་རྒྱས་དེའང་སྤང་བྱ་ཅིག་ཅར་བ་མ་ཡིན། སོ་སྐྱེ་སྔོན་སོང་གི་ཚོགས་སྤྱོད་དེའང་ཅིག་ཅར་བ་མ་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། ཁྱོད་ཀྱིས་མཐོང་ལམ་གྱི་སྔ་རོལ་དུ་སྲིད་ཉོན་དགུ་པ་སྤངས་པར་ཐལ། ཁྱོད་ཀྱིས་དེར་འདོད་ཉོན་དགུ་པ་སྤངས་པ་གང་ཞིག མ་གྲུབ་པ་དེའི་ཕྱིར། གཏན་ཚིག་དང་པོ་དེར་ཐལ། ཁྱོད་ཀྱིས་དེར་བསམ་གཏན་བཞི་པའི་དངོས་གཞི་ཐོབ་པའི་ཕྱིར་ཏེ། མཛོད་ལས། སྟོན་དང་བསེ་རུ་བྱང་ཆུབ་པར། །བསམ་གཏན་མཐའ་སྟན་གཅིག་ལ་ཀུན། །ཞེས་གསུངས་པའི་ཕྱིར། རྩ་བའི་གཏན་ཚིགས་ཕྱི་མ་མ་གྲུབ་ན། སོ་སྐྱེ་སྔོན་སོང་གི་ཚོགས་སྤྱོད་དེ་ཆོས་ཅན། ཉན་ཐོས་སུ་ཐལ། མཐོང་ལམ་ཐོབ་པའི་ལུས་རྟེན་ལ་དགྲ་བཅོམ་པའི་འབྲས་བུ་མངོན་དུ་བྱས་པ་གང་ཞིག མ་གྲུབ་པ་དེའི་ཕྱིར། ཁྱབ་སྟེ། ཀུན་བཏུས་ལས། ཕལ་ཆེར་ནི་མཐོང་བའི་ཆོས་སམ་འཆི་བའི་དུས་ཀྱི་ཚེ་ཀུན་ཤེས་པ་ཉིད་འཐོབ་པར་བྱེད་ལ། གལ་ཏེ་མི་བྱེད་ནའང་སྨོན་ལམ་གྱི་སྟོབས་ཅན་ཡིན་ཏེ། སངས་རྒྱས་འབྱུང་བ་མེད་པ་ན་རང་རྒྱལ་བར་འགྱུར་རོ་ཞེས་གསུངས་པས་སོ། །རྟགས་ཕྱི་མ་དངོས། སྔ་ཐུར་དེར་ཐལ། དེས་སྐྱེ་བ་གཅིག་གིས་ཐོགས་པའི་རྟེན་ལ་མཐོང་ལམ་མ་ཐོབ་པའི་ཕྱིར། གཞན་ཡང་རང་སངས་རྒྱས་ལ་འབྲས་བུ་ཐོག་མཐའ་གཉིས་འཇོག བར་པ་མི་འཇོག་པ་དེ་རང་སངས་རྒྱས་ཉིད་ལ་བྱེད་དམ། དེའི་རིགས་ཅན་སློབ་པ་ལ་བྱེད། དང་པོ་ལྟར་ན། དེ་ཆོས་ཅན། ཁྱོད་དང་རྒྱུན་ཞུགས་ཀྱི་གཞི་མཐུན་མེད་པར་ཐལ། ཁྱོད་དགྲ་བཅོམ་པ་ཡིན་པའི་ཕྱིར། ཕྱི་མ་ལྟར་ན་རང་སངས་རྒྱས་ཀྱི་རིགས་ཅན་སློབ་པ་ལ་འབྲས་བུ་བར་པ་གཉིས་གཞག་ཏུ་རུང་བ་ཐལ། དེ་སྤང་བྱ་རིམ་གྱིས་པ་ཡིན་པ་གང་ཞིག དེ་ཉན་ཐོས་ཡིན་པའི་ཕྱིར། དེའི་སྒྲུབ་བྱེད་འོག་ཏུ་འབྱུང་ངོ་། །གཉིས་པ་ནི། རང་སངས་རྒྱས་ཉིད་ལ་འབྲས་བུ་བར་པ་གཉིས་གཞག་དུ་མེད་དེ། དེ་ཡིན་ན་དགྲ་བཅོམ་པ་ཡིན་པའི་ཕྱིར། དེའི་རིགས་ཅན་སློབ་པ་ལ་འབྲས་བུ་བར་པ་གཉིས་གཞག་ཏུ་ཡོད་དེ། དེ་ལ་མཐོང་སྤང་ཀུན་སྦྱོར་གསུམ་སྤངས་ནས་འདོད་ཉོན་དྲུག་པ་མ་སྤངས་པ་དང་། དེ་སྤངས་ནས་འདོད་ཉོན་དགུ་པ་མ་སྤངས་པ་དང་། དེ་སྤངས་ནས་ཁམས་གོང་གི་ཉོན་མོངས་ཅུང་ཟད་ཙམ་ཡང་མ་སྤངས་པ་དང་། སྲིད་ཉོན་དགུ་པ་མ་སྤངས་པ་རྣམས་སུ་ཡོད་པའི་ཕྱིར། དེས་རང་ས་ནས་བཤད་པའི་རང་རྒྱལ་གྱི་རིགས་ཅན་གསུམ་པོ་ལའང་ཅི་རིགས་པར་ཤེས་པར་བྱའོ། །བདུན་པ་ནི། རང་རྒྱལ་ཡིན་ན་མི་སློབ་པ་ཡིན་པར་ལུང་གིས་སྒྲུབ། རིགས་པས་སྒྲུབ། རྩོད་པ་སྤང་བ་གསུམ་ལས། དང་པོ་ནི་ཤེར་ཕྱིན་གྱི་མདོ་ལས། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་ཞེས་ཉན་ཐོས་ལ་བཞིར་ཕྱེ་ནས་རང་སངས་རྒྱས་ལ་དབྱེ་བ་མ་མཛད་པ་དང་། བཟང་སྤྱོད་ལས། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །ཞེས་ཐེག་ཆེན་དང་ཉན་ཐོས་ལ་སློབ་མི་སློབ་གཉིས་སུ་ཕྱེ་ནས་རང་རྒྱལ་ལ་དབྱེ་བ་མ་མཛད་པ་དང་། མདོ་སྡེ་རྣམས་ཀྱི་གླེང་གཞི་ལས། འཁོར་ཕུན་སུམ་ཚོགས་པ་འཆད་པའི་སྐབས་སུ། ཉན་ཐོས་དང་བྱང་སེམས་ཀྱི་དགེ་འདུན་གྱི་དབྱེ་བ་མཛད་ནས་རང་སངས་རྒྱས་ཀྱི་རྣམ་གཞག་མ་མཛད་པ་དང་། མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང་། །ཞེས་བརྗོད་བྱའི་སྒོ་ནས་འདུལ་བའི་སྡེ་སྣོད་སོགས་གསུམ། གདུལ་བྱའི་སྒོ་ནས་ཉན་ཐོས་ཀྱི་སྡེ་སྣོད་དང་། ཐེག་ཆེན་གྱི་སྡེ་སྣོད་ཀྱི་རྣམ་གཞག་མཛད་ནས་རང་སངས་རྒྱས་ཀྱི་སྡེ་སྣོད་ཀྱི་རྣམ་གཞག་མ་མཛད་པ་དང་། རྩ་བར། བསེ་རུ་དང་ནི་ཉི་ཤུ་འོ། །ཞེས་ཉན་ཐོས་ཀྱི་དགེ་འདུན་ལ་བཅུ་དགུར་ཕྱེ་ནས་རང་སངས་རྒྱས་ལ་དབྱེ་བ་མ་མཛད་པ་དང་། རྩ་ཤེར་ལས་ཀྱང་། སངས་རྒྱས་རྣམས་ནི་མི་བཞུགས་ཤིང་། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །སྟོན་པ་མེད་ལས་རབ་ཏུ་སྐྱེ། །ཞེས་དང་། རིགས་གཏེར་ལས། འཕགས་པ་གསུམ་གྱི་མངོན་སུམ་གསུམ། །སློབ་དང་མི་སློབ་སྒོ་ནས་ལྔ། །ཞེས་ཐེག་ཆེན་དང་ཉན་ཐོས་ལ་སློབ་མི་སློབ་ཀྱི་རྣལ་འབྱོར་མངོན་སུམ་གཉིས་གཉིས་སུ་ཕྱེ་ནས། རང་སངས་རྒྱས་ལ་དབྱེ་བ་མ་མཛད་པ་རྣམས་ནི་རང་སངས་རྒྱས་སློབ་པ་མེད་པའི་ལུང་ཡིན་ལ། འདི་འདྲའི་རིགས་ཅན་མང་དུ་ཡོད་ཀྱང་ཡི་གེ་མང་དུ་དོགས་པས་འདིར་མ་བྲིས་སོ། །ཆུར་གནས་འོ་མ་རྣམ་པར་འབྱེད་པ་ལ། །འདབ་བཟང་ངང་པའི་མཆུ་ནི་ཇི་བཞིན་དུ། །དོན་ལྡན་གསུང་རབ་རྣམ་པར་འབྱེད་པ་ལ། །བསོད་ནམས་སེང་གེའི་བློ་གྲོས་དེ་བཞིན་ནོ། །བར་སྐབས་ཀྱི་ཚིགས་སུ་བཅད་པའོ། །གཉིས་པ་ནི། རང་རྒྱལ་སློབ་པ་ཡོད་པར་ཁས་ལེན་ན། བསེ་རུ་ལྟ་བུའི་རང་རྒྱལ་གྱི་རིགས་ཅན་ཚོགས་ལམ་པ་དེ་བསེ་རུའི་རང་རྒྱལ་དུ་ཁས་ལེན་དགོས་པས། དེ་ཆོས་ཅན། བསྐལ་པ་བརྒྱར་ཚོགས་བསགས་པ་ལས་བྱུང་བར་ཐལ། ཁས་བླངས་དེའི་ཕྱིར། ཁྱབ་སྟེ། བསེ་རུ་བསྐལ་པ་བརྒྱ་ཡི་རྒྱུས། །ཞེས་གསུངས་པའི་ཕྱིར། ཁོ་ན་རེ། ཉན་ཐོས་ཡིན་ན་ཚེ་གསུམ་ཚོགས་བསགས་པ་ལས་བྱུང་བས་ཁྱབ་པར་ཐལ། མྱུར་བ་སྲིད་པ་གསུམ་གྱི་མཐར། །ཞེས་གསུངས་པའི་ཕྱིར་ཞེ་ན། མི་མཚུངས་ཏེ། སྔ་མས་ནི་བསེ་རུ་ལྟ་བུའི་རང་རྒྱལ་དེ་བསྐལ་པ་བརྒྱར་ཚོགས་བསགས་པའི་རྒྱུ་ལས་བྱུང་བར་བསྟན་ལ། ཕྱི་མས་ནི་ཉན་ཐོས་བརྩོན་འགྲུས་མྱུར་བ་སྲིད་པ་གསུམ་གྱིས་ཐར་བར་བསྟན་པའི་ཕྱིར། གཞན་དུ་ན། དེ་གྲངས་མེད་གསུམ་ལ་སངས་རྒྱ་ཞེས་བཤད་ན། རྫོགས་པའི་སངས་རྒྱས་ཡིན་ན། བསྐལ་པ་གྲངས་མེད་གསུམ་ཚོགས་བསགས་པ་ལས་བྱུང་བའི་ཁྱབ་པར་ཐལ། ཁྱོད་ཀྱི་ཐལ་འགྱུར་དེ་ལ་ཁྱབ་པ་ཡོད་པའི་ཕྱིར། ཁྱབ་པ་སྒྲིགས་མཚམས་དང་བཅས་པ་ཁས་བླངས་སོ། །ཡང་དེ་ཆོས་ཅན། ཡེ་ཤེས་རྒྱ་ཆེ་བའི་གང་ཟག་ཏུ་ཐལ། རང་སངས་རྒྱས་ཡིན་པའི་ཕྱིར། ཁྱབ་སྟེ། མཛོད་ལས། འཁོར་ལོས་སྒྱུར་དང་རང་བྱུང་གཉིས། །ལས་སམ་ཡེ་ཤེས་སམ་གཉིས་ཀ །རྒྱ་ཆེའི་ཕྱིར་ན་གོ་རིམ་བཞིན། །ཞེས་གསུངས་པའི་ཕྱིར། རྩ་བར་འདོད་ན། མིན་པར་ཐལ། ཐེག་དམན་སོ་སྐྱེ་ཡིན་པའི་ཕྱིར། ཡང་དེ་ཆོས་ཅན། རང་བྱུང་གི་བསྙེན་པར་རྫོགས་པའི་གང་ཟག་ཏུ་ཐལ། རང་སངས་རྒྱས་ཡིན་པའི་ཕྱིར། ཁྱབ་སྟེ། མེ་ཏོག་ཕྲེང་རྒྱུད་ལས། འདྲེན་པ་རང་རྒྱལ་རང་བྱུང་གིའོ། །ཞེས་གསུངས་པའི་ཕྱིར། མཆོག་གི་སྤྲུལ་སྐུའི་སྐུ་དངོས་ཀྱི་འཁོར་དུ་གྱུར་པའི་བསེ་རུ་ལྟ་བུའི་རིགས་ཅན་གྱི་སློབ་པ་ཆོས་ཅན། བསེ་རུ་ལྟ་བུའི་རང་རྒྱལ་མ་ཡིན་པར་ཐལ། མཆོག་གི་སྤྲུལ་སྐུའི་དངོས་ཀྱི་འཁོར་ཡིན་པའི་ཕྱིར། བསལ་བ་ཁས། མ་གྲུབ་ན། དེར་ཐལ། དེ་འདྲ་ཡོད་པའི་ཕྱིར་ཏེ། མཆོག་གི་སྤྲུལ་སྐུ་དེ་རིགས་ཅན་གསུམ་པོ་དེ་ལ་ཆོས་འཁོར་བསྐོར་བ་པོ་ཡིན་པའི་ཕྱིར་དང་། བསེ་རུ་ལྟ་བུའི་རིགས་ཅན་གྱི་སློབ་པ་དེ་བསྐལ་པ་བརྒྱར་སངས་རྒྱས་འབྱུང་བ་མཉེས་པར་བྱེད་པ་སོགས་ཀྱི་སྒོ་ནས་བསྐལ་པ་བརྒྱར་ཚོགས་གསག་དགོས་པའི་ཕྱིར། གསུམ་པ་ནི། ཁ་ཅིག རང་རྒྱལ་སྒོམ་ལམ་པ་ཡོད་པར་ཐལ། དེའི་སྒོམ་ལམ་ལ་གནས་པའི་གང་ཟག་ཡོད་པའི་ཕྱིར་ཞེ་ན། སངས་རྒྱས་སྒོམ་ལམ་པ་ཡོད་པར་ཐལ། དེའི་སྒོམ་ལམ་ལ་གནས་པའི་གང་ཟག་ཡོད་པའི་ཕྱིར། དེ་འདྲའི་རིགས་ཅན་གཞན་ལའང་འགྲེའོ། །ཁ་ཅིག རང་སངས་རྒྱས་སློབ་པ་ཡོད་པར་ཐལ། བསེ་རུ་དང་ནི་ཉི་ཤུའོ། །ཞེས་པའི་སྐབས་ནས་བསྟན་པའི་བསེ་རུ་ལྟ་བུ་དེ་ཐེག་དམན་སློབ་པ་ཡིན་པའི་ཕྱིར། མ་གྲུབ་ན། དེ་དེར་ཐལ། སངས་རྒྱས་ལ་སོགས་དཀོན་མཆོག་གསུམ། །ཞེས་པའི་སྐབས་ནས་བསྟན་པའི་མཚོན་བྱེད་དཔེའི་དགེ་འདུན་ཡིན་པའི་ཕྱིར། ཁྱབ་སྟེ། དེའི་སྐབས་ནས་བསྟན་པའི་མཚོན་བྱ་དོན་གྱི་དགེ་འདུན་ཡིན་ན་ཐེག་ཆེན་སློབ་པ་ཡིན་དགོས་པའི་ཕྱིར། ཡང་དེའི་སྐབས་ནས་བསྟན་པའི་མཚོན་བྱ་དོན་གྱི་དགེ་འདུན་དང་། ཐེག་ཆེན་དགྲ་བཅོམ་པའི་གཞི་མཐུན་ཡོད་པར་ཐལ། དེའི་སྐབས་ནས་བསྟན་པའི་མཚོན་བྱེད་དཔེའི་དགེ་འདུན་དང་། ཐེག་དམན་དགྲ་བཅོམ་པའི་གཞི་མཐུན་ཡོད་པའི་ཕྱིར། སྔ་ཕྱི་གཉིས་ཀ་ལ་ཁྱབ་པ་ཡོད་དེ་དགེ་འདུན་ལ་སངས་རྒྱས་དཀོན་མཆོག་གི་ཁོངས་སུ་གཏོགས་པ་ཉིད་ཅེས་གསུངས་པའི་ཕྱིར་ཟེར་རོ། །འོ་ན་དེའི་སྐབས་ནས་བསྟན་པའི་མཚོན་བྱེད་དཔེའི་དགེ་འདུན་གྱི་ནང་ཚན་ཡིན་ན་ཐེག་དམན་སློབ་པ་ཡིན་དགོས་པར་ཐལ། དེའི་སྐབས་ནས་བསྟན་པའི་མཚོན་བྱ་དོན་གྱི་དགེ་འདུན་ཡིན་ན་སློབ་པ་ཡིན་དགོས་པའི་ཕྱིར། འདོད་ན། བསེ་རུ་དང་ནི་ཉི་ཤུའོ། །ཞེས་པའི་སྐབས་ནས་བསྟན་པའི་བསེ་རུ་ལྟ་བུ་དེ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཉན་ཐོས་སུ་ཐལ། གཞན་ཡང་དེའི་སྐབས་ནས་བསྟན་པའི་མཚོན་བྱེད་དཔེའི་དགེ་འདུན་དེ་ལ་དབང་པོ་རྟུལ་པོ་སོགས་ཉི་ཤུར་མེད་པར་ཐལ། དེ་ལ་སྐྱེས་བུ་ཆེན་པོ་བདུན་པོར་ངེས་པའི་ཕྱིར། ཁྱབ་པ་གྲུབ་ཅིང་། རྟགས་ཁས། འདོད་མི་ནུས་ཏེ། རང་སངས་རྒྱས་དང་ལྷན་ཅིག་བརྒྱད་པོ་དབང་པོ་རྟུལ་པོ་ལ་སོགས་པ་གྲངས་ཉི་ཤུར་ཆད་པ་ཞེས་གསུངས་པའི་ཕྱིར། གཞན་ཡང་དེའི་སྐབས་ཀྱི་མཚོན་བྱེད་དཔེའི་དགེ་འདུན་ཡིན་ན་ཐེག་དམན་འཕགས་པ་ཡིན་དགོས་པར་ཐལ། དེའི་སྐབས་ཀྱི་མཚོན་བྱ་དོན་གྱི་དགེ་འདུན་ཡིན་ན་ཐེག་ཆེན་འཕགས་པ་ཡིན་དགོས་པའི་ཕྱིར། ཁྱབ་པ་ཁས། འདོད་ན། སྦྱོར་ལམ་སྟན་གཅིག་པའི་རྟོགས་པ་ལ་གནས་པའི་རྒྱུན་ཞུགས་ཞུགས་པ་ཆོས་ཅན། དེར་ཐལ། དེའི་ཕྱིར་ཏེ། རྒྱུན་ཞུགས་ཞུགས་པ་ཡིན་པའི་ཕྱིར། ཐལ་འགྱུར་ཕྱི་མ་ལ་དེའི་སྐབས་ཀྱི་མཚོན་བྱ་དོན་གྱི་དགེ་འདུན་དང་སོ་སྐྱེའི་གཞི་མཐུན་ཡོད་པར་ཐལ། དེའི་སྐབས་ཀྱི་མཚོན་བྱེད་དཔེའི་དགེ་འདུན་དང་སོ་སྐྱེའི་གཞི་མཐུན་ཡོད་པའི་ཕྱིར། ཁྱབ་པ་ཁས། དེ་ན་གཞུང་དེའི་དོན་ནི། མཚོན་བྱེད་ཉན་ཐོས་ཀྱི་དགེ་འདུན་དེ་ལ་ཉན་ཐོས་དགྲ་བཅོམ་པ་མེད་དེ། དེས་མཚོན་བྱ་དོན་གྱི་དགེ་འདུན་དེ་སྤངས་རྟོགས་ཀྱི་སྒོ་ནས་མཚོན་པ་ཡིན་ཅིང་། དེ་དང་སྤངས་རྟོགས་ཆ་འདྲ་བ་ནི་ཐེག་ཆེན་དགྲ་བཅོམ་པ་ཡིན་པས། དགེ་འདུན་དཀོན་མཆོག་གི་ཁོངས་སུ་མ་གཏོགས་པའི་ཕྱིར། མཚོན་བྱེད་རང་རྒྱལ་གྱི་དགེ་འདུན་ནི་མི་སློབ་པ་ཁོ་ན་ཡིན་ཏེ། དེ་དང་ཆོས་སྟོན་ཚུལ་གྱིས་སྒོ་ནས་མཚོན་པ་ནི་གང་ཞིག ཆོས་སྟོན་ཚུལ་དེ་ནི་རང་རྒྱལ་མི་སློབ་པ་ལ་ལྡན་པའི་ཕྱིར་ཏེ། ཉི་སྣང་ལས། ཉན་ཐོས་དགེ་འདུན་བཅུ་དགུས་མཚོན་ཚུལ་བཤད་ཟིན་པའི་འོག་ཏུ་མཚོན་བྱེད་དཔེའི་དགེ་འདུན་ལ་དགྲ་བཅོམ་པ་མེད་པས་སྐྱེས་བུ་ཆེན་པོ་བདུན་པོ་དེར་ངེས་པར་བཤད་ཅིང་། དེའི་འོག་ཏུ་མཚོན་ཚུལ་ལོགས་སུ་བཤད་པའི་དོན་བསྡུས་ནས་སློབ་དཔོན་གྱིས་ཕྱོགས་གཅིག་ཏུ་མཛད་པ་ཡིན་པས་འཁྲུལ་པ་མེད་དོ། །གནད་འདི་ཇི་ལྟ་བ་བཞིན་རྟོགས་པ་ནི་ཁོ་བོ་འབའ་ཞིག་གོ །ཡང་ཁ་ཅིག རང་རྒྱལ་སྦྱོར་ལམ་པ་ཡོད་པར་ཐལ། ཉན་ཐོས་བསེ་རུ་ལྟ་བུ་དང་། །ཞེས་པའི་སྐབས་ནས་བསྟན་པའི་བསེ་རུ་ལྟ་བུའི་རང་རྒྱལ་སྦྱོར་ལམ་པ་ཡོད་པའི་ཕྱིར། བྱང་ཆུབ་སེམས་དཔའ་སྐྱོབ་པ་ཡི། །ཞེས་པའི་སྐབས་ནས་བསྟན་པའི་བྱང་ཆུབ་སེམས་དཔའ་དེ་བྱང་སེམས་སྦྱོར་ལམ་པ་ཡིན་པའི་ཕྱིར་ཞེ་ན། དེ་ལ་ཁྱབ་པ་མེད་པར་ཐལ། རང་སངས་རྒྱས་ཀྱི་སྦྱོར་ལམ་ཡོད་ན། རང་སངས་རྒྱས་སྦྱོར་ལམ་པ་ཡོད་པས་མ་ཁྱབ་པའི་ཕྱིར། ཡང་རང་སངས་རྒྱས་སྒོམ་ལམ་པ་ཡོད་པར་ཐལ། ཉན་ཐོས་སྒོམ་ལམ་པ་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པའི་རང་སངས་རྒྱས་ཡོད་པའི་ཕྱིར། ཁྱབ་སྟེ། རང་བྱུང་བདག་ཉིད་རྟོགས་པའི་ཕྱིར། །ཞེས་གསུངས་པའི་ཕྱིར་ཞེ་ན། གཞུང་དེས་རང་རྒྱལ་སློབ་པ་མ་བསྟན་པར་ཐལ། གཞུང་དེས་རང་རྒྱལ་མི་སློབ་པའི་ཡེ་ཤེས་བསྟན་པའི་ཕྱིར། ཡང་རང་སངས་རྒྱས་སློབ་པ་ཡོད་པར་ཐལ། རང་ལམ་དུ་ཤེས་སྒྲིབ་གཟུང་རྟོག་སྤང་། འཛིན་རྟོགས་མི་སྤོང་བའི་རང་རྒྱལ་གྱི་སྒྲུབ་པའི་རྟེན་རང་བཞིན་གནས་རིགས་དང་ལྡན་པའི་རང་སངས་རྒྱས་ཡོད་པའི་ཕྱིར་ཏེ། གཟུང་དོན་རྟོག་པ་སྤང་ཕྱིར་དང་། །ཞེས་གསུངས་པའི་ཕྱིར་ཞེ་ན། དེ་ལ་མ་ཁྱབ་པར་ཐལ། གཞུང་དེས་རང་སངས་རྒྱས་ཀྱི་ལམ་དེ་ཁྱད་པར་གསུམ་ལྡན་དུ་བསྟན་པ་ནི་གང་ཞིག རང་སངས་རྒྱས་ཀྱི་ལམ་ལ་གནས་པའི་གང་ཟག་ཡིན་ན་རང་སངས་རྒྱས་ཡིན་པས་མ་ཁྱབ་པའི་ཕྱིར། དེ་ལ་ཁོ་ན་རེ། མཆོག་གི་སྤྲུལ་སྐུའི་འཁོར་དུ་བྱུང་བའི་བསེ་རུ་ལྟ་བུའི་རིག་ཅན་གྱི་སློབ་པ་དེ་ཉན་ཐོས་ཡིན་ནམ་མིན་ཞེ་ན། དེའི་འཁོར་ན་ཡོད་པའི་དགེ་འདུན་ལ་བྱང་སེམས་ཀྱི་དགེ་འདུན་དང་ཉན་ཐོས་ཀྱི་དགེ་འདུན་གཉིས་སུ་ཕྱེ་བའི་ཚེ་ཉན་ཐོས་ཀྱི་དགེ་འདུན་ཡིན་ཅིང་། རིགས་ཅན་གསུམ་དུ་ཕྱེ་བའི་ཚེ་རང་རྒྱལ་གྱི་རིགས་ཅན་དང་། ཐེག་པ་གསུམ་དུ་ཕྱེ་བའི་ཚེ་རང་སངས་རྒྱས་ཀྱི་ཐེག་པ་དང་། ཐེག་པ་ཆེ་ཆུང་གཉིས་སུ་ཕྱེ་བའི་ཚེ་ཐེག་པ་ཆུང་ངུ་བ་ཡིན་ནོ། །ཡང་ཁོ་ན་རེ། བསེ་རུ་ལྟ་བུའི་རིགས་ཅན་གྱི་སྲིད་པ་ཐ་མ་པ་ཆོས་ཅན། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་སྐྱེ་བ་མིན་པར་ཐལ། ཁྱོད་གང་ན་ཡོད་པའི་ཞིང་དེར་ཉན་ཐོས་ཡོད་པའི་ཕྱིར། ཁྱོད་ཉན་ཐོས་ཡིན་པའི་ཕྱིར། རྩ་བར་འདོད་ན། བསེ་རུ་ལྟ་བའི་རང་སངས་རྒྱས་དེ་དེར་སྐྱེས་པ་མིན་པར་ཐལ། འདོད་པ་དེའི་ཕྱིར་ཞེས་ཟེར་ན། བསེ་རུ་ལྟ་བུའི་རང་སངས་རྒྱས་ཀྱི་རིགས་ཅན་སྲིད་པ་ཐ་མ་པ་དེ་ཆོས་ཅན། ཁྱོད་དེར་སྐྱེས་པ་མ་ཡིན་པར་ཐལ། ཁྱོད་གང་དུ་སྐྱེས་པའི་ཞིང་དེར་སངས་རྒྱས་ཡོད་པའི་ཕྱིར་ཏེ། ཁྱོད་སངས་རྒྱས་ཀྱི་གདུལ་བྱ་ཡིན་པའི་ཕྱིར། རིམ་བཞིན་ཁས་བླངས་སོ། །བརྒྱད་པ་ནི། ཁ་ཅིག རང་ཉིད་ཀྱི་དོན་དུ་བྱང་ཆུབ་མངོན་དུ་བྱས་པའི་དོན་གྱི་ན་རང་སངས་རྒྱས་ཞེས་འཇོག་པ་ཡིན་ནོ་ཞེ་ན། མི་འཐད་དེ། ཉན་ཐོས་དགྲ་བཅོམ་པས་ཀྱང་རང་ཉིད་ཀྱི་དོན་དུ་བྱང་ཆུབ་མངོན་དུ་བྱས་པའི་ཕྱིར། དེས་ན་སངས་རྒྱས་དང་ཉན་ཐོས་མེད་པའི་ཞིང་ཁམས་སུ་སློབ་དཔོན་གཞན་གྱིས་གདམས་ངག་བསྟན་པ་ལ་མ་ལྟོས་པར་འདོད་ཁམས་ཀྱི་སྲིད་པ་ཐ་མ་པའི་རྟེན་ལ་རང་ཉིད་ཀྱིས་བྱང་ཆུབ་མངོན་དུ་བྱས་པའི་དོན་གྱིས་ན་རང་སངས་རྒྱས་ཞེས་བཞག་པ་ཡིན་ནོ། །དབྱེ་ན་བསེ་རུ་ལྟ་བུའི་རང་སངས་རྒྱས་དང་། ཚོགས་ན་སྤྱོད་པའི་རང་སངས་རྒྱས་གཉིས་ལས། དང་པོ་ནི། བསེ་རུ་ལྟར་ཟླ་མེད་པར་གཅིག་པུར་གནས་པས་ན་དེ་སྐད་ཅེས་བརྗོད་དོ། །གཉིས་པ་ནི། རང་སངས་རྒྱས་ཟླའོ་གཞན་དང་ལྷན་ཅིག་སྤྱོད་པས་དེ་སྐད་ཅེས་བརྗོད་དོ། །གཉིས་པ་ངག་དོན་ལ་དཔྱད་པ་ལ་དགག་གཞག་གཉིས་ལས། དང་པོ་ནི། ཁ་ཅིག རང་རྒྱལ་སྒོམ་ལམ་པ་ཆོས་ཅན། ཉན་ཐོས་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པ་ཡིན་ཏེ། ཞེས་འགོད་ན། དེ་ཆོས་ཅན། དེ་མིན་པར་ཐལ། ཁྱོད་མེད་པའི་ཕྱིར། ཁ་ཅིག རང་རྒྱལ་གྱི་རིགས་ཅན་སྒོམ་ལམ་པ་ཆོས་ཅན། ཁྱོད་ཉན་ཐོས་ཀྱི་རིགས་ཅན་སྒོམ་ལམ་པ་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པ་ཡིན་ཏེ་ཞེས་དང་། བསེ་རུ་ལྟ་བུའི་རང་རྒྱལ་དགྲ་བཅོམ་པ་ཆོས་ཅན། ཉན་ཐོས་ལས་ཆོས་སྟོན་ཚུལ་གྱི་སྒོ་ནས་ཁྱད་པར་འཕགས་ཏེ་ཞེས་འགོད་ན། བསེ་རུ་ལྟ་བུའི་ཡེ་ཤེས་ནི། །ཞེས་པའི་གཞུང་དེ་བསེ་རུ་ལྟ་བུའི་རང་རྒྱལ་དགྲ་བཅོམ་པའི་ཡེ་ཤེས་དངོས་སུ་བསྟན་པར་ཐལ། སྦྱོར་བ་སྔ་མ་དེ་གཞུང་དེའི་དོན་སྦྱོར་ཡིན་པའི་ཕྱིར་རོ། །འདོད་ན། དངོས་སུ་མ་བསྟན་པར་ཐལ། སྦྱོར་བ་ཕྱི་མ་དེ་གཞུང་དེའི་དོན་སྦྱོར་ཡིན་པའི་ཕྱིར། ཡང་ཁ་ཅིག བསེ་རུ་ལྟ་བུའི་རང་སངས་རྒྱས་ཀྱི་རིགས་ཅན་སྒོམ་ལམ་པ་ཆོས་ཅན། ཉན་ཐོས་ཀྱི་རིགས་ཅན་སྒོམ་ལམ་པ་ལས་ཁྱད་པར་འཕགས་པ་ཡིན་ཏེ་ཞེས་པའམ། ཉན་ཐོས་འདོད་ཁམས་པ་སྲིད་པ་ཐ་མ་པ་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པ་ཡིན་ཏེ། སྲིད་པ་ཐ་མ་པའི་དུས་སུ་སློབ་དཔོན་གཞན་གྱི་གདམས་ངག་བསྟན་པ་ལ་མ་ལྟོས་པར་རང་བྱུང་གི་བྱང་ཆུབ་མངོན་དུ་བྱེད་པའི་ཐེག་དམན་འཕགས་པ་ཡིན་པའི་ཕྱིར་ཞེ་ན། གཟུགས་མེད་ཀྱི་རྟེན་ཅན་གྱི་ཕྱིར་མི་འོང་ཆོས་ཅན། གསལ་བ་གཉིས་པོ་དེར་ཐལ། རྟགས་དེའི་ཕྱིར། མ་གྲུབ་ན་དེར་ཐལ། དེ་སྲིད་པ་ཐ་མ་པའི་དུས་སུ་རང་བྱུང་གི་བྱང་ཆུབ་མངོན་དུ་བྱེད་པ་གང་ཞིག གཟུགས་མེད་ཀྱི་རྟེན་ལ་སློབ་དཔོན་གཞན་ལ་གདམས་ངག་སྟོན་པ་མེད་པའི་ཕྱིར་རོ། །ཁ་ཅིག བསེ་རུ་ལྟ་བུའི་རང་རྒྱལ་དགྲ་བཅོམ་པ་ཆོས་ཅན། ཉན་ཐོས་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པ་ཡིན་ནོ་ཞེས་དང་། ཆོས་སྟོན་ཚུལ་གྱི་སྒོ་ནས་ཁྱད་པར་དུ་འཕགས་པ་ཡིན་ནོ། །ཞེས་འགོད་པའང་ཅུང་ཟད་མི་འཐད་དེ། ཟབ་པ་ཉིད་དུ་མངོན་པར་བརྗོད། །ཅེས་པའི་ཡེ་ཤེས་དེ་ཟབ་པར་བཤད་ཀྱི། གང་ཟག་དེ་ཟབ་པར་མ་བཤད་པའི་ཕྱིར་རོ། །གཉིས་པ་ནི། བསེ་རུ་ལྟ་བུའི་རང་རྒྱལ་དགྲ་བཅོམ་པའི་ཡེ་ཤེས་ཆོས་ཅན། ཁྱོད་ཉན་ཐོས་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་པ་ཡིན་ཏེ། སྲིད་པ་ཐ་མ་པའི་དུས་སུ་སློབ་དཔོན་གཞན་གྱིས་གདམས་ངག་བསྟན་པ་ལ་མི་ལྟོས་པར་རང་བྱུང་གི་བྱང་ཆུབ་མངོན་དུ་བྱས་པའི་ཐེག་འབྲིང་གི་ཡེ་ཤེས་ཡིན་པའི་ཕྱིར་རོ། །ཡང་དེ་ཆོས་ཅན། ཉན་ཐོས་ལས་ཆོས་སྟོན་ཚུལ་གྱི་སྒོ་ནས་ཁྱད་པར་འཕགས་ཏེ། སངས་རྒྱས་དང་ཉན་ཐོས་མེད་པའི་ཞིང་དུ་རང་གི་གདུལ་བྱ་ལ་སྒྲ་མེད་དུ་ཆོས་སྟོན་པའི་བདག་རྐྱེན་བྱེད་པའི་ཡེ་ཤེས་ཡིན་པའི་ཕྱིར་རོ། །གཟུང་དོན་རྟོག་པ་སྤོང་ཕྱིར་དང་། །ཞེས་པའི་སྐབས་སུ། ཁ་ཅིག བསེ་རུ་ལྟ་བུའི་རང་རྒྱལ་གྱི་རིགས་ཅན་གྱི་སློབ་ལམ་ཆོས་ཅན། ཉན་ཐོས་ཀྱི་ལམ་ལས་ཁྱད་པར་འཕགས་ཏེ། གཟུང་རྟོགས་སྤོང་བ་དང་། འཛིན་རྟོག་མི་སྤོང་བ་དང་། གཟུང་བ་ཆོས་ཀྱི་བདག་མེད་རྟོགས་པའི་རྟེན་རིགས་ཀྱི་ཁྱད་པར་དང་ལྡན་པའི་ཕྱིར་ཞེ་ན། དེ་ཆོས་ཅན། ཁྱོད་ཀྱིས་གཟུང་རྟོག་སྤོང་བའི་སྒོ་ནས་ཉན་ཐོས་ཀྱི་ལམ་ལས་ཁྱད་པར་འཕགས་པ་མིན་པར་ཐལ། ཉན་ཐོས་ཀྱི་ལམ་དེས་ཀྱང་གཟུང་རྟོག་སྤོང་བའི་ཕྱིར་ཏེ། དེས་སྒྲིབ་པ་མཐའ་དག་སྤོང་བའི་ཕྱིར། བསེ་རུ་ལྟ་བུའི་རང་རྒྱལ་གྱི་སློབ་ལམ་ཆོས་ཅན། ཁྱོད་ཀྱིས་འཛིན་རྟོག་མི་སྤོང་བ་དེ་མིན་པར་ཐལ། ཁྱོད་ཀྱིས་སྒྲིབ་པ་མཐའ་དག་སྤོང་བའི་ཕྱིར། ཁ་ཅིག རང་རྒྱལ་གྱི་སློབ་ལམ་ཆོས་ཅན། ཉན་ཐོས་ཀྱི་ལམ་ལས་ཁྱད་པར་འཕགས་པ་ཡིན་ཏེ། རང་ལམ་དུ་གཟུང་རྟོག་སྤོང་བ་སོགས་ཁྱད་ཆོས་གསུམ་དང་ལྡན་པའི་ཕྱིར་ཞེ་ན། འོ་ན་སྐབས་འདིར་བསྟན་གྱི་ཁྱད་ཆོས་གསུམ་དང་ལྡན་པའི་རང་སངས་རྒྱས་ཀྱི་ལམ་ཡིན་ན་ཐེག་དམན་གྱི་རྒྱུད་ཀྱི་ལམ་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཤེས་བྱ་རང་སངས་རྒྱས་ཀྱི་ལམ་ཡིན་ན་ཐེག་དམན་གྱི་རྒྱུད་ཀྱི་ལམ་ཡིན་དགོས་པར་ཐལ། འདོད་པ་དེའི་ཕྱིར། གཞན་ཡང་རྟེན་གྱིས་ཞེས་པའི་སྐབས་ནས་བསྟན་པའི་རྟེན་གྱི་ཁྱད་པར་དེ་ཡིན་ན་ཆོས་ཉིད་རིགས་ཀྱི་རྟེན་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་རྣམ་དག་ཡིན་པའི་ཕྱིར། འདོད་ན། བྱང་སེམས་ཚོགས་ལམ་པ། སྦྱོར་ལམ་པ། མཐོང་ལམ་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། དེའི་སྐབས་ནས་བསྟན་པའི་ལམ་པའི་གང་ཟག་གི་རྟེན་ཡིན་པའི་ཕྱིར། མ་གྲུབ་ན་དེར་ཐལ། མདོ་ལས། ཡུམ་འདི་ལེན་པའི་གང་ཟག་སུ་དག་འབྱུང་བར་འགྱུར་ཞེས་པའི་ལན་དུ། ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་རྣམས་སམ། བདེན་པ་མཐོང་བའི་གང་ཟག་རྣམས་སམ། དགྲ་བཅོམ་པ་ཟག་པ་ཟད་པ་བསམ་པ་ཡོངས་སུ་རྫོགས་པའམ། སྔོན་གྱི་རྒྱལ་བ་ལ་བྱ་བ་བྱས་པའམ། སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་དག་གམ། དགེ་བའི་བཤེས་གཉེན་གྱི་ཡོངས་སུ་ཟིན་པ་དག་གིས་ལེན་པར་འགྱུར་རོ་ཞེས་གསུངས་པའི་ཕྱིར། དེ་ལ་ཁོ་ན་རེ། མ་ཁྱབ་སྟེ། མདོ་དེས་རང་རྒྱལ་གྱི་རིགས་ཅན་ཚོགས་ལམ་པ་དང་སྦྱོར་ལམ་པ་དང་། མཐོང་ལམ་པ་བསྟན་པའི་ཕྱིར་ཞེ་ན། འོ་ན་རང་རྒྱལ་གྱི་རིགས་ཅན་སྦྱོར་ལམ་པ་དེ་ཕྱིར་མི་ལྡོག་པའི་བྱང་སེམས་ཡིན་པར་ཐལ། ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་རྣམས་སམ་ཞེས་པའི་མདོ་དེས་རང་རྒྱལ་གྱི་རིགས་ཅན་སྦྱོར་ལམ་ལ་བསྟན་པའི་ཕྱིར། དེས་ན་རང་ལུགས་ལ་མདོ་འདིས་ལམ་པའི་གང་ཟག་གི་རྟེན་བསྟན་པ་ཡིན་ཅིང་། དེའང་རང་རྒྱལ་གྱི་རྟོགས་རིགས་རྒྱུད་ལྡན་གྱི་བྱང་སེམས་དངོས་སུ་བསྟན་ནས། རང་རྒྱལ་གྱི་ལམ་རྒྱུད་ལ་ལྡན་པའི་གང་ཟག་ཤུགས་ལ་བསྟན་པ་ཡིན་ནོ། །ཇི་ལྟར་སྙམ་ན། ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་ཞེས་པས་བྱང་སེམས་སྦྱོར་ལམ་པ་དང་། བདེན་པ་མཐོང་བ་ནས་བསམ་པ་ཡོངས་སུ་རྫོགས་པའི་བར་གྱིས་བྱང་སེམས་མཐོང་ལམ་པ་དང་། ལྷག་མས་བྱང་སེམས་ཚོགས་ལམ་པ་དངོས་སུ་བསྟན་ཏོ། །ཅིའི་ཕྱིར་བྱང་སེམས་སྒོམ་ལམ་པ་དངོས་སུ་མི་སྟོན་ཞེ་ན། རང་རྒྱལ་གྱི་ལམ་གྱི་རྟོགས་རིགས་རྒྱུད་ལྡན་དུ་གོམས་པར་མི་བྱེད་པ་སྟེ། སྐབས་གསུམ་པར་སྒོམ་ལམ་དངོས་སུ་མི་སྟོན་པ་དང་གནད་འདྲའོ། །འདིའང་ཁོ་བོའི་བློ་གྲོས་ལས་བྱུང་བའོ། །དེས་ན་རྩ་བའི་ངག་དོན་ནི་ཤེས་བྱ་རང་རྒྱལ་གྱི་ལམ་ཆོས་ཅན། ཁྱད་ཆོས་གསུམ་ལྡན་ཡིན་ཏེ། རྟོགས་རིགས་རང་ངོས་ནས་གཟུང་རྟོག་གཉེན་པོའི་རིགས་ཡིན་པའི་ཕྱིར་དང་། འཛིན་རྟོགས་གཉེན་པོའི་རིགས་མིན་པའི་ཕྱིར་དང་། རྟེན་གྱི་ཁྱད་པར་གསུམ་དང་ལྡན་པའི་ཕྱིར། དེའང་བྱང་སེམས་ཀྱི་རྒྱུད་ལ་ཡོད་པ་དང་། རང་རྒྱལ་གྱི་རིགས་ཅན་སློབ་པའི་རྒྱུད་ལ་ཡོད་པ་གཉིས་ལས། དང་པོ་ལ་བརྟེན་གྱི་ཁྱད་པར་ལམ་པའི་གང་ཟག་གི་རྟེན་དང་། ཕྱི་མ་ལ་ཆོས་ཉིད་རིགས་ཀྱི་རྟེན་ལ་སྦྱར་ཞིང་། ཁྱད་ཆོས་དང་པོ་གཉིས་ལ་ཁྱད་མེད་དེ། དེ་ལྟར་ཁྱད་ཆོས་གསུམ་ལྡན་གྱི་སྒོ་ནས་བསྟན་པའི་རྒྱུ་མཚན་ཡང་། འདིར་ལམ་ཤེས་ཀྱི་ལམ་གསུམ་གྱི་དམིགས་རྣམ་སོ་སོར་ཤེས་དགོས་པས་འདི་ལ་ཐེག་པ་གཞན་གཉིས་ལ་མེད་པའི་ཁྱད་ཆོས་བསྟན་དགོས་ལ། དེའང་ཁྱད་ཆོས་དང་པོ་གཉིས་ནི་རྟོགས་སླ་ཞིང་། རྟེན་གྱི་ཁྱད་པར་ལ་གཉིས་བྱུང་བའི་རྒྱུ་མཚན་ཤེས་བྱ་རང་རྒྱལ་གྱི་ལམ་དེ་ལ་བྱང་སེམས་ཀྱི་རྒྱུད་ལ་ཡོད་པ་དང་། ཐེག་དམན་གྱི་རྒྱུད་ལ་ཡོད་པ་གཉིས་ཡོད་པའི་གནད་ཀྱིས་ཡིན་ནོ། །བདེན་དང་བདེན་ལ་བཟོད་ཅེས་པའི་སྐབས་སུ། ཐེག་ཆེན་མཐོང་ལམ་གྱི་མཐའ་དཔྱད་པ་ལ། ལུས་རྟེན། སེམས་རྟེན། མཐོང་ལམ་གྱི་རང་བཞིན་བཤད་པ་དང་གསུམ། དང་པོ་ནི། ངན་སོང་སྒྲ་མི་སྙན་པ་རྣམས་ལ་མཐོང་ལམ་རང་སྟོབས་ཀྱིས་དངོས་སུ་མི་སྐྱེ་ཏེ། དེ་རྣམ་སྨིན་གྱི་སྒྲིབ་པ་ཤས་ཆེན་པོ་དང་ལྡན་པའི་ཕྱིར། མཚམས་མེད་ལྔ་བྱས་པའི་གང་ཟག་ལ་མེད་དེ། ལས་ཀྱི་སྒྲིབ་པ་ཤས་ཆེན་པོ་དང་ལྡན་པའི་ཕྱིར། ཟ་མ་དང་མ་ནིང་ལ་མེད་དེ། གཉེན་པོ་སོ་སོར་རྟོགས་པའི་ཤེས་རབ་མི་བཟོད་པའི་ཕྱིར། ཁམས་གོང་གི་རྟེན་ལ་མེད་དེ། ཁམས་གོང་གི་སོ་སོ་སྐྱེ་བོ་རྣམས་སྙོམས་འཇུག་གི་བདེ་བ་ལ་ཆགས་པས་འཁོར་བ་ལ་ཡིད་སྐྱོ་བ་མེད་པའི་ཕྱིར། དེས་ན་མཐོང་ལམ་རང་སྟོབས་ཀྱིས་དངོས་སུ་སྐྱེ་བའི་ལུས་རྟེན་ནི་གླིང་གསུམ་གྱི་སྐྱེས་པ་དང་བུད་མེད། འདོད་ལྷ་རིགས་དྲུག་གི་རྟེན་དུ་ངེས་སོ། །གཞན་སྟོབས་ཀྱིས་དངོས་སུ་སྐྱེ་བ་ནི་ཁམས་གོང་དང་། ངན་སོང་གི་རྟེན་ལ་ཡོད་དེ། ཟ་མ་ཏོག་བཀོད་པའི་མདོར། འཕགས་པ་འཇིག་རྟེན་དབང་ཕྱུག་གིས་ཡི་དྭགས་མང་པོ་བདེན་པ་མཐོང་བ་ལ་བཀོད་པར་བཤད་པའི་ཕྱིར་དང་། ལྷའི་བུ་རབ་གནས་ཀྱི་མདོར། འདོད་གཟུགས་ཀྱི་ལྷ་མང་པོ་ལ་མཐོང་ལམ་སྐྱེས་པར་གསུངས་པའི་ཕྱིར། དེ་ལ་ཁ་ཅིག མཐོང་ལམ་རང་སྟོབས་ཀྱིས་དངོས་སུ་མི་སྐྱེ་བའི་རྒྱུ་མཚན་རྣམས། གཞན་སྟོབས་ཀྱིས་དངོས་སུ་མི་སྐྱེ་བ་ལ་མཚུངས་པས་ན། རང་སྟོབས་ཀྱིས་སྐྱེ་བ་དང་། གཞན་སྟོབས་ཀྱིས་སྐྱེ་བ་གཉིས་ཀ་ལ་གླིང་གསུམ་གྱི་སྐྱེས་པ་དང་བུད་མེད། འདོད་ལྷ་རིགས་དྲུག་གི་རྟེན་དུ་ངེས་པ་ཡིན་ནོ་ཞེས་ཟེར། འོ་ན་བསྙེན་རྫོགས་ཀྱི་སྡོམ་པ་རང་སྟོབས་ཀྱིས་སྐྱེ་བའི་རྟེན་མ་ཡིན་ན། གཞན་སྟོབས་ཀྱིས་དངོས་སུ་སྐྱེ་བའི་རྟེན་མིན་དགོས་པར་ཐལ། མཐོང་ལམ་རང་སྟོབས་ཀྱིས་སྐྱེ་བའི་རྟེན་མིན་ན་དེ་གཞན་སྟོབས་ཀྱིས་དངོས་སུ་སྐྱེ་བའི་རྟེན་མིན་དགོས་པའི་ཕྱིར། འདོད་ན། གསོལ་བཞིའི་ཆོ་ག་ལ་བརྟེན་ནས་བསྙེན་རྫོགས་ཀྱི་སྡོམ་པ་དངོས་སུ་སྐྱེ་བའི་རྟེན་དུ་གྱུར་པའི་ཚོགས་ལམ་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། བསྙེན་རྫོགས་ཀྱི་སྡོམ་པ་རང་སྟོབས་ཀྱིས་སྐྱེ་བ་དེ་ལ་ཡེ་ཤེས་ཁོང་དུ་ཆུད་པའི་ཚུལ་གྱིས་སྐྱེས་པ་དང་། རང་བྱུང་གི་ཚུལ་གྱིས་སྐྱེས་པ་གཉིས་སུ་ངེས་པའི་ཕྱིར། གཞན་ཡང་གང་ཟག་གཞན་གྱི་རྫུ་འཕྲུལ་ལ་བརྟེན་ནས་གོང་མར་བགྲོད་པའི་སོ་སྐྱེ་ཆོས་ཅན། ཁམས་གོང་མར་གཞན་སྟོབས་ཀྱིས་བགྲོད་མི་ནུས་པར་ཐལ། དེར་རང་སྟོབས་ཀྱིས་དངོས་སུ་བགྲོད་མི་ནུས་པའི་ཕྱིར། མ་གྲུབ་ན། དེར་ཐལ། མཛོད་ལས། རྫུ་འཕྲུལ་གཞན་བརྟེན་མ་གཏོགས་པ། །དེ་དག་གོང་མ་མཐོང་བ་མེད། །ཅེས་གསུངས་པའི་ཕྱིར། གཞན་ཡང་གཟུགས་ཁམས་ཀྱི་སོ་སོ་སྐྱེ་བོ་རྣམས་ལམ་ཤེས་དངོས་སུ་སྐྱེ་རུང་གི་རྟེན་དུ་སྒྲུབ་པའི་ཆེད་དུ་དེ་བཞིན་གཤེགས་པའི་རང་བཞིན་གྱི་འོད་ཀྱིས་དེ་རྣམས་ཀྱི་འོད་མོག་མོག་པོར་མཛད་པ་ལ་དགོས་པ་མེད་པར་ཐལ། གཟུགས་ཁམས་པའི་སོ་སོ་སྐྱེ་བོའི་རྟེན་ལ་ལམ་ཤེས་དངོས་སུ་སྐྱེ་བ་མི་སྲིད་པའི་ཕྱིར། རྟགས་ཁས་ཏེ། དེའི་རྟེན་ལ་མཐོང་ལམ་སྐྱེ་བ་མི་སྲིད་པའི་ཕྱིར། ཁ་ཅིག ཐེག་ཆེན་མཐོང་ལམ་གྱི་ལུས་རྟེན་ལ་སྔར་མེད་གསར་དུ་སྐྱེ་བ་དང་། སྐྱེས་ཟིན་མངོན་དུ་བྱེད་པ་གཉིས་ལས། ཕྱི་མ་ནི་ངན་སོང་བའི་རྟེན་ལ་ཡོད་དེ། བྱང་སེམས་མཐོང་ལམ་པ་སེམས་ཅན་གྱི་དོན་དུ་ངན་སོང་དུ་སྐྱེ་བ་ལེན་པ་ཡོད་པའི་ཕྱིར་ཞེས་པ་ནི་གནད་མ་གོ་བ་སྟེ། ཐེག་ཆེན་གྱི་མཐོང་ལམ་ཐམས་ཅད་བར་མ་ཆད་དུ་སྐྱེ་བ་མིན་པར་ཐལ། དང་པོ་མིའི་རྟེན་ལ་ཐེག་ཆེན་གྱི་མཐོང་ལམ་སྐྱེས་པ་ཕྱིས་ངན་སོང་གི་རྟེན་ལ་ཐེག་ཆེན་གྱི་མཐོང་ལམ་མངོན་དུ་བྱེད་པ་ཡོད་པའི་ཕྱིར། རྟགས་ཁས། གཉིས་པ་ལ་དགག་གཞག་གཉིས་ལས། དང་པོ་ལ་ཁ་ཅིག ཁམས་གསུམ་ས་དགུ་ལ་བརྟེན་ཏེ། འགྲེལ་ཆེན་ལས། ཐེག་ཆེན་གྱི་སྒོམ་ལམ་དེ་ལ་བརྟེན་པར་བཤད་པ་ནི་གང་ཞིག རྒྱུ་མཚན་མཚུངས་པའི་ཕྱིར་ཞེ་ན། མི་མཚུངས་པར་ཐལ། ཐེག་ཆེན་གྱི་མཐོང་ལམ་ཡིན་ན་མཉམ་གཞག་ཡིན་དགོས་པ་གང་ཞིག འདོད་སེམས་ལ་བརྟེན་པའི་ཡོན་ཏན་ཡིན་ན་མཉམ་གཞག་མིན་དགོས་པའི་ཕྱིར། ཁ་ཅིག གཟུགས་མེད་ཀྱི་དངོས་གཞི་ལ་བརྟེན་པ་ཡོད་དེ། ཐེག་ཆེན་མཐོང་ལམ་པ་མཐར་གནས་ཀྱི་སྙོམས་འཇུག་དགུ་ལུགས་མཐུན་དང་། ལུགས་ལྡོག་ཏུ་སྒོམ་པ་ཡོད་པའི་ཕྱིར་ཏེ། དེས་སེང་གེ་རྣམ་བསྒྱིངས་ཀྱི་ཏིང་ངེ་འཛིན་སྒོམ་པ་ཡོད་པའི་ཕྱིར་ཞེ་ན། འདོད་སེམས་བསམ་གཏན་གྱི་དངོས་གཞི་ལ་བརྟེན་པ་ཡོད་པར་ཐལ། འདོད་པའི་རྟེན་ཅན་གྱི་གང་ཟག་གིས་བསམ་གཏན་གྱི་དངོས་གཞི་སྒོམ་པ་ཡོད་པའི་ཕྱིར། གཞན་ཡང་། བྱང་སེམས་མཐོང་ལམ་པའི་རྒྱུད་ཀྱི་སེང་གེ་རྣམ་བསྒྱིངས་ཀྱི་ཏིང་ངེ་འཛིན་དེ་ཐེག་ཆེན་གྱི་མཐོང་ལམ་དུ་ཐལ། སྒྲུབ་བྱེད་སྔ་མ་ལ་ཁྱབ་པ་ཡོད་པའི་ཕྱིར། འདོད་ན། དེ་ཆོས་ཅན། ཐེག་ཆེན་གྱི་མཐོང་ལམ་མིན་པར་ཐལ། ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་བཅུ་དྲུག་རྫོགས་རྗེས་སུ་བྱུང་བའི་ཤེས་པ་ཡིན་པའི་ཕྱིར། གཉིས་པ་ནི། སྤྱིར་མཐོང་ལམ་དེ་བསམ་གཏན་ས་དྲུག་གང་རུང་ལ་བརྟེན་ཏེ། རྒྱུན་ཞུགས་དང་ཆགས་བྲལ་སྔོན་སོང་གི་ཕྱིར་འོང་གིས་ནི་བསམ་གཏན་དང་པོའི་ཉེར་བསྡོགས་ལ་བརྟེན། ཆགས་བྲལ་སྔོན་སོང་གི་ཕྱིར་མི་འོང་གིས་ནི་བསམ་གཏན་གྱི་དངོས་གཞི་བཞི་པོ་གང་རུང་ལ་བརྟེན་པ་ཡིན་པའི་ཕྱིར། འོ་ན་དེས་མཐོང་ལམ་གྱི་སྔ་རོལ་དུ་བསམ་གཏན་བཞི་པ་ལ་འདོད་ཆགས་དང་བྲལ་ན་གཟུགས་མེད་ཀྱི་དངོས་གཞི་ལ་བརྟེན་པར་འགྱུར་རོ་ཞེ་ན། མིན་ཏེ། མཐོང་ལམ་གྱིས་འདོད་པའི་གཉེན་པོ་བྱེད་ལ། གཟུགས་མེད་ནི་འདོད་པ་ལས་རྣམ་པ་བཞིས་རིང་བ་ཡིན་པས་དེའི་གཉེན་པོར་མི་རུང་བའི་ཕྱིར། ཐེག་ཆེན་གྱི་མཐོང་ལམ་ནི་བསམ་གཏན་བཞི་པའི་དངོས་གཞི་ལ་བརྟེན་ཏེ། ཐེག་ཆེན་གྱི་སྦྱོར་ལམ་གྱི་གནས་སྐབས་སུ་མངོན་ཤེས་དང་པོ་ལྔ་པོ་ངེས་པར་ཐོབ་ཅིང་། ཐེག་ཆེན་ཐུན་མོང་མ་ཡིན་པའི་མངོན་ཤེས་ནི་བསམ་གཏན་བཞི་པའི་དངོས་གཞི་ལ་བརྟེན་པར་རྒྱན་ལས་བཤད་པའི་ཕྱིར་ཏེ། བསམ་གཏན་བཞི་པ་ཤིན་ཏུ་དག་ཐོབ་ནས། །ཞེས་གསུངས་སོ། །འོ་ན་དེའི་རྒྱུད་ལ་རྣམ་པར་མི་རྟོག་པའི་ཡེ་ཤེས་ཀྱང་དགོས་པར་འགྱུར་ཏེ། མི་རྟོག་ཡེ་ཤེས་ཡོངས་སུ་གཟུང་བ་དང་། །ཞེས་བཤད་པའི་ཕྱིར་ཞེ་ན། དེ་ནི་མ་བརྟགས་པ་ཡིན་ཏེ། མི་རྟོག་ཡེ་ཤེས་ཡོངས་སུ་གཟུང་བ་རྒྱུར་དགོས་ཞེས་བཤད་ཀྱི། ཐོབ་པ་རྒྱུར་མ་བཤད་པ་གང་ཞིག གཟུང་བ་ནི་ཚོགས་སྦྱོར་གྱི་གནས་སྐབས་ན་ཡོད་པའི་ཕྱིར། འོ་ན་བསམ་གཏན་ལ་བརྟེན་པའི་དོན་ཇི་ལྟར་ཡིན་སྙམ་ན། ཁ་ཅིག དེ་གཉིས་དུས་མཉམ་རྫས་ཐ་དད་པའི་ཚུལ་གྱིས་བརྟེན་པར་འདོད་པ་ནི་མི་འཐད་དེ། ཐེག་ཆེན་གྱི་མཐོང་ལམ་རྒྱུད་ལ་ལྡན་པའི་གང་ཟག་གི་རྒྱུད་ལ་གཙོ་བོ་ཡིད་ཀྱི་རྣམ་པར་ཤེས་པའི་འཁོར་དུ་ཏིང་ངེ་འཛིན་རྫས་ཐ་དད་པ་གཉིས་ཡོད་པར་ཐལ། དེའི་རྒྱུད་ལ་ཐེག་ཆེན་མཐོང་ལམ་གྱིས་བསྡུས་པའི་ཏིང་ངེ་འཛིན་དང་། བསམ་གཏན་གྱི་དངོས་གཞིས་བསྡུས་པའི་ཏིང་ངེ་འཛིན་རྫས་ཐ་དད་པ་གཉིས་ཡོད་པའི་ཕྱིར། ཁྱབ་པ་ཁས། འདོད་ན། དེའི་རྒྱུད་ལ་གཙོ་བོ་ཡིད་ཀྱི་རྣམ་པར་ཤེས་པ་རྫས་ཐ་དད་པ་གཉིས་ཡོད་པར་ཐལ་ལོ། །ཡང་བསམ་གཏན་གྱི་དངོས་གཞི་དང་ཟག་མེད་ཀྱི་གཞི་མཐུན་མེད་པར་ཐལ། དེ་དང་མཐོང་ལམ་གྱི་གཞི་མཐུན་མེད་པའི་ཕྱིར། འདོད་ན། བསམ་གཏན་གྱི་དངོས་གཞི་ཟག་མེད་མེད་པར་ཐལ་ལོ། །དེས་ན་རང་ལུགས་ནི། དང་པོར་བསམ་གཏན་གྱི་དངོས་གཞི་ཐོབ་པའི་ཚེ། དེའི་གཙོ་བོ་ནི་སེམས་བྱུང་ཏིང་ངེ་འཛིན་ཡིན་ལ། དེའི་སྟོབས་ཀྱི་དེ་དང་མཚུངས་ལྡན་གྱི་སེམས་བྱུང་རྣམས་ཀྱང་བསམ་གཏན་གྱི་དངོས་གཞིར་འགྱུར་བ་ཡིན་ཞིང་། དེ་ལ་བརྟེན་ནས་མཐོང་ལམ་སྐྱེ་བའི་དོན་ཡང་། དེ་དང་མཚུངས་ལྡན་གྱི་ཤེས་རབ་དེ་མཐོང་ལམ་གྱི་ངོ་བོར་སྐྱེ་བ་ཡིན་ལ། དེའི་སྟོབས་ཀྱིས་དེ་དང་མཚུངས་ལྡན་གྱི་སེམས་བྱུང་ཐམས་ཅད་མཐོང་ལམ་གྱི་ངོ་བོར་གྱུར་པ་ཡིན་པས་དེ་ལྟ་བུའི་སེམས་བྱུང་ཐམས་ཅད་བསམ་གཏན་གྱི་དངོས་གཞི་ཡང་ཡིན་ལ་མཐོང་ལམ་ཡང་ཡིན་པས་གཞི་མཐུན་ནོ། །གསུམ་པ་ལ། ཐེག་ཆེན་མཐོང་ལམ་གྱི་མཚན་ཉིད་ལ་དཔྱད་པ། དབྱེ་བ། སྐད་ཅིག་མའི་གྲངས། རྗེས་ཐོབ་ཡོད་མེད་ལ་དཔྱད་པ་དང་བཞི་ལས། དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག ཆོས་ཉིད་སྔར་མ་མཐོང་བ་གསར་དུ་མངོན་སུམ་དུ་མཐོང་བའི་མཁྱེན་པ་ཞེས་དང་། ཁ་ཅིག འཇིག་རྟེན་ལས་འདས་པའི་ཆོས་ཀྱི་རིགས་སྔར་མ་མཐོང་བ་གསར་དུ་མངོན་སུམ་མཐོང་བའི་མཁྱེན་པ་ཡིན་ལ། འཇིག་རྟེན་ལས་འདས་པའི་ཆོས་ཀྱི་རིགས་ནི་དེ་བཞིན་ཉིད་དང་ཡང་དག་པའི་ཡེ་ཤེས་སོ། །དེ་ལ་མཐོང་ལམ་ཆོས་བཟོད་དང་། ཆོས་ཤེས་གཉིས་ཀྱིས་ནི་དེ་བཞིན་ཉིད་སྔར་མ་མཐོང་བ་གསར་དུ་མཐོང་། རྗེས་བཟོད་དང་རྗེས་ཤེས་གཉིས་ཀྱིས་ནི་ཡང་དག་པའི་ཡེ་ཤེས་སྔར་མ་མཐོང་བ་གསར་དུ་མཐོང་བ་ཡིན་ཞེས་དང་། ཁ་ཅིག སྦྱོར་ལམ་རྫོགས་རྗེས་སུ་བྱུང་ཞིང་། སྒོམ་ལམ་མ་སྐྱེས་གོང་གི་ཐེག་ཆེན་སྐྱེས་བུའི་རྒྱུད་ཀྱི་མངོན་རྟོགས་ཞེས་དང་། ཡང་རང་བཞིན་རྣམ་དག་གི་ཆོས་ཉིད་སྔར་མ་མཐོང་བ་གསར་དུ་མངོན་སུམ་མཐོང་བའི་ཐེག་ཆེན་གྱི་བདེན་པ་མངོན་རྟོག་ཞེས་དང་། དར་ཊཱིཀ་པ་ན་རེ། སྦྱོར་ལམ་ཆོས་མཆོག་གི་མཇུག་ཐོག་དེ་མ་ཐག་ཏུ་བདེན་བཞི་མི་རྟག་ལ་སོགས་བཅུ་དྲུག་ལ་དམིགས་ནས་སྟོང་ཉིད་སྤྲོས་བྲལ་མངོན་སུམ་གྱིས་གསར་དུ་རྟོགས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་སྦྱིན་སོགས་སྤྱོད་པའི་གྲོགས་མཐའ་དག་གིས་ཟིན་པ་དེ་ཐེག་ཆེན་ཐུན་མོང་མིན་པའི་མཐོང་ལམ་གྱི་མཚན་ཉིད། རང་རྒྱུད་ལྡན་གྱི་གང་ཟག་གི་རྒྱུད་ཀྱི་སྟོང་ཉིད་མངོན་སུམ་རྟོགས་པའི་ཤེས་རབ་ཀྱིས་ཟིན་པའི་ཐེག་ཆེན་གྱི་བདེན་པ་མངོན་རྟོགས་དེ་སྤྱིར་ཐེག་ཆེན་མཐོང་ལམ་གྱི་མཚན་ཉིད་ཡིན་ཞེས་པ་དང་ལུགས་ལྔ་ལས། དང་པོ་ལ་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་ཤེས་ཆོས་ཅན། མཚན་ཉིད་དེར་ཐལ། དེའི་ཕྱིར། འདོད་ན། ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་ཤེས་དེ་མངོན་སུམ་གསར་དུ་མ་མཐོང་བར་ཐལ་ལོ། །གཉིས་པ་ལ། ཐེག་ཆེན་གྱི་མཐོང་ལམ་རྗེས་བཟོད་དང་རྗེས་ཤེས་གཉིས་ཆོས་ཅན། ཁྱོད་འཇིག་རྟེན་ལས་འདས་པའི་ཆོས་ཀྱི་རིགས་སྔར་མ་མཐོང་བ་གསར་དུ་མངོན་སུམ་མཐོང་བ་མིན་པར་ཐལ། ཁྱོད་ཀྱི་སྔ་རོལ་དུ་ཆོས་བཟོད་དང་ཆོས་ཤེས་གཉིས་ཀྱི་དེ་སྔར་མ་མཐོང་བ་གསར་དུ་མངོན་སུམ་མཐོང་ཟིན་པའི་ཕྱིར། རྟགས་ཁས། གསུམ་པ་ལ། ཁ་ཅིག ཉན་ཐོས་དགྲ་བཅོམ་པའི་རྟོགས་པ་སྔོན་སོང་གི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སྒོམ་ལམ་མ་སྐྱེས་གོང་གི་མཁྱེན་པ་ཡིན་པར་ཐལ་ལོ། །འདོད་མི་ནུས་ཏེ། སྒོམ་ལམ་རྫོགས་རྗེས་སུ་བྱུང་བའི་མཁྱེན་པ་ཡིན་པའི་ཕྱིར་ཏེ། ཉན་ཐོས་ཀྱི་སྒོམ་ལམ་རྫོགས་རྗེས་སུ་བྱུང་བའི་མཁྱེན་པ་ཡིན་པའི་ཕྱིར་ཞེས་ཟེར་རོ། །བཞི་པ་ལ་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་བཞིན་རྣམ་དག་གི་ཆོས་ཉིད་སྔར་མ་མཐོང་བར་ཐལ་ལོ། །འདོད་ན། ཐེག་ཆེན་གྱི་སྦྱོར་ལམ་དེས་དེ་མ་མཐོང་བར་ཐལ་ལོ། །འདོད་ན། དེ་མཐོང་ན་དེ་མངོན་སུམ་དུ་མཐོང་དགོས་པར་ཐལ་ལོ། །ལྔ་པ་ལ་ཐེག་ཆེན་གྱི་མཐོང་ལམ་ཡང་ཡིན་ཐེག་པ་ཐུན་མོང་གི་མཐོང་ལམ་ཡང་ཡིན་པའི་གཞི་མཐུན་ཡོད་པར་ཐལ། ཐེག་ཆེན་གྱི་མཐོང་ལམ་ཡིན་ན་ཐེག་ཆེན་ཐུན་མོང་མ་ཡིན་པའི་མཐོང་ལམ་ཡིན་པས་མ་ཁྱབ་པའི་ཕྱིར། རྟགས་ཁས། འདོད་ན། ཐེག་པ་གསུམ་པོ་རེ་རེ་ལའང་ཐེག་ཆེན་གྱི་མཐོང་ལམ་རེ་རེ་ཡོད་པར་ཐལ། འདོད་པ་དེའི་ཕྱིར། ཡང་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་ཀྱིས་བསྡུས་པའི་གཙོ་བོ་ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཤེས་རབ་རྫས་ཐ་དད་པ་གཉིས་ཡོད་པར་ཐལ། དེའི་འཁོར་དུ་བྱུང་བའི་སྟོང་ཉིད་མངོན་སུམ་རྟོགས་པའི་ཤེས་རབ་གཅིག་ཡོད་པ་གང་ཞིག དེའི་འཁོར་དུ་སྟོང་ཉིད་མངོན་སུམ་མ་རྟོགས་པའི་ཤེས་རབ་གཅིག་ཡོད་པའི་ཕྱིར། རྟགས་ཕྱི་མ་ཁས་བླངས་ཏེ། དེའི་འཁོར་དུ་བྱུང་བའི་བདེན་བཞི་མི་རྟག་ལ་སོགས་བཅུ་དྲུག་ལ་དམིགས་པའི་ཤེས་རབ་གཅིག་ཡོད་པའི་ཕྱིར། རྟགས་ཁས། ཡང་ཐེག་ཆེན་མཐོང་ལམ་རྣམ་གྲོལ་ལམ་གྱིས་བསྡུས་པའི་ཐེག་ཆེན་ཐུན་མོང་མིན་པའི་མཐོང་ལམ་ཆོས་ཅན། མཚན་ཉིད་སྔ་མ་དེར་ཐལ། མཚོན་བྱ་དེའི་ཕྱིར། འདོད་ན། སྦྱོར་ལམ་ཆོས་མཆོག་གི་མཇུག་ཐོག་དེ་མ་ཐག་ཏུ་བྱུང་བར་ཐལ་ལོ། །འདོད་ན། ཁྱོད་དང་དེ་གཉིས་ཀྱི་བར་དུ་ཐེག་ཆེན་གྱི་མཐོང་ལམ་བར་ཆད་མེད་ལམ་གྱིས་མཆོད་པར་ཐལ་ལོ། །གཉིས་པ་ནི་ཐེག་ཆེན་གྱི་སྦྱོར་ལམ་རྫོགས་རྗེས་སུ་བྱུང་ཞིང་། ཐེག་ཆེན་གྱི་སྒོམ་ལམ་མ་སྐྱེས་གོང་གི་ཆོས་ཉིད་མངོན་སུམ་རྟོགས་པའི་མཁྱེན་པ་དེ་དེའི་མཚན་ཉིད་ཡིན་ཏེ། ཀུན་བཏུས་ལས། མཐོང་བའི་ལམ་གང་ཞེ་ན། མདོར་བསྡུ་ན་འཇིག་རྟེན་པའི་ཆོས་མཆོག་གི་མཇུག་ཐོག་ཏུ་མི་དམིགས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་སྟེ་ཞེས་གསུངས་པས་སོ། །གཉིས་པ་ལ་ཐེག་པའི་སྒོ་ནས། སྐད་ཅིག་མའི་གྲངས་ཀྱི་སྒོ་ནས། ཡུལ་གྱི་སྒོ་ནས། མདོ་ལས་གསུངས་པའི་རྣམ་གྲངས་ཀྱི་སྒོ་ནས། ཕར་ཕྱིན་གྱི་སྒོ་ནས། སྤང་བྱའི་སྒོ་ནས་དབྱེ་བ་དང་དྲུག་གོ །དང་པོ་ནི། ཉན་ཐོས་རང་རྒྱལ། ཐེག་ཆེན་གྱི་མཐོང་ལམ་གསུམ་མོ། །གཉིས་པ་ནི། དེ་རེ་རེ་ལའང་ཤེས་བཟོད་སྐད་ཅིག་མ་བཅུ་དྲུག་གོ །གསུམ་པ་ནི། ཀུན་བཏུས་ལས་གཟུང་བ་རྟོགས་པ་དང་། འཛིན་པ་རྟོགས་པ་གཉིས་སུ་གསུངས་ཤིང་། དང་པོ་ནི། ཆོས་བཟོད་དང་ཆོས་ཤེས་གཉིས་སོ། །གཉིས་པ་ནི་རྗེས་བཟོད་དང་རྗེས་ཤེས་གཉིས་སོ། །བཞི་པ་ནི། མདོ་ལས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་སྐྱེས་སོ་ཞེས་གསུངས་པའང་མཐོང་ལམ་གྱི་དབང་དུ་མཛད་ནས་གསུངས་པ་སྟེ། ཆོས་བཟོད་དང་ཆོས་ཤེས་གཉིས་ཀྱི་ཆོས་རྣམས་ལ་ཆོས་ཀྱི་མིག་རྡུལ་མེད་པར་ཐོབ་ཅིང་། རྗེས་བཟོད་དང་རྗེས་ཤེས་གཉིས་ཀྱིས་དྲི་མ་དང་བྲལ་བ་ཐོབ་པའི་ཕྱིར་ཏེ། སྔ་མ་གཉིས་ནི་གནས་སྐབས་དེ་དང་དེའི་བདེན་བཞིའི་གནས་ཚུལ་རྟོགས་པའི་སྒོ་ནས་འཇོག་དགོས་པའི་ཕྱིར་དང་། ཕྱི་མ་གཉིས་ནི་གནས་སྐབས་དེ་དང་དེའི་སྤངས་བྱའི་དྲི་མ་དང་བྲལ་བ་ལ་འཇོག་པའི་ཕྱིར། ཡང་མདོ་ལས། ཆོས་མཐོང་བ། ཆོས་ཐོབ་པ། ཆོས་རིག་པ། ཆོས་རྟོགས་པ། སོམ་ཉི་ལས་བརྒལ་བ། ཐེ་ཚོམ་ལས་བརྒལ་བ། གཞན་གྱི་དྲིང་མི་འཇོག་པ། སྟོན་པའི་བསྟན་པ་ལས་གཞན་གྱིས་དཀྲིར་མི་བཏུབ་པའོ་ཞེས་པ་ཡང་མཐོང་ལམ་གྱི་དབང་དུ་བྱས་ནས་གསུངས་པ་སྟེ། ཆོས་བཟོད་རྣམས་ནི་ཆོས་མཐོང་བ། །ཆོས་ཤེས་རྣམས་ནི་ཆོས་ཐོབ་པ། །རྗེས་བཟོད་རྣམས་ནི་ཆོས་རིག་པ། །རྗེས་ཤེས་རྣམས་ནི་ཆོས་རྟོགས་པ་ཡིན་ལ། བཞི་པོ་ཐམས་ཅད་ཀྱང་རང་རང་གིས་ཐོབ་པ་ལ་སོམ་ཉི་ལས་བརྒལ་བ། གཞན་གྱིས་ཐོབ་པ་ལ་ཐེ་ཚོམ་ལས་བརྒལ་བ། ལམ་སྒོམ་པ་ལ་གཞན་གྱི་དྲིང་མི་འཇོག་པ། མུ་སྟེགས་བྱེད་སོགས་གཞན་གྱི་སྟོན་པའི་བསྟན་པ་ལ་གཞན་གྱིས་དཀྲིར་མི་བཏུབ་པའོ། །ལྔ་པ་ནི། ཐེག་ཆེན་གྱི་མཐོང་ལམ་ཡང་སྦྱིན་སོགས་ཕར་ཕྱིན་རེ་རེའང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་ཉམས་ལེན་ཁྱད་པར་ཅན་གྱི་ངོ་བོར་སྐྱེས་པའི་ཚེ་ལྡོག་པའི་སྒོ་ནས་སུམ་ཅུ་རྩ་དྲུག་ཡོད་དེ། དྲུག་ཚན་དྲུག་གི་རྣམ་པ་སུམ་ཅུ་རྩ་དྲུག་ཅན་སྐྱེས་པ་གང་ཡིན་པ་དེ་ནི་ཞེས་གསུངས་པའི་ཕྱིར། དྲུག་པ་ནི། སྤང་བྱ་གཟུང་འཛིན་གྱི་རྣམ་རྟོག་དེ་ལ་སུམ་ཅུ་རྩ་དྲུག་ཡོད་པས་དེ་སྤོང་བྱེད་ཀྱི་གཉེན་པོ་ཐེག་ཆེན་གྱི་མཐོང་ལམ་དེ་ལའང་སུམ་ཅུ་རྩ་དྲུག་ཡོད་དེ། དེ་དག་སྤོང་བ་ཉིད་དུ་གཉེན་པོ་རྣམ་པ་བཞི་ཡང་དེ་བཞིན་དུ་དབྱེ་བས་ཐ་དད་དོ་ཞེས་གསུངས་པའི་ཕྱིར་རོ། །གསུམ་པ་ལ། སྐད་ཅིག་མ་གཅིག་ཏུ་འདོད་པ། གཉིས་སུ་འདོད་པ། བཞིར་འདོད་པ། དགུར་འདོད་པ། བཅུ་དྲུག་ཏུ་འདོད་པ་དང་ལྔ་ལས། དང་པོ་ནི། ཀླུ་སྒྲུབ་ཀྱིས་ཆོས་ཉིད་མཐོང་བ་ལ་བལྟོས་ནས་སྐད་ཅིག་མ་གཅིག་ཡིན་ཏེ། རིག་པ་དྲུག་ཅུ་པར། ཆོས་ཤེས་པ་ཡི་འོག་ཏུ་ནི། །འདི་ལ་བྱེ་བྲག་དབྱེར་ཡོད་ན། །ཤིན་ཏུ་ཕྲ་བའི་དངོས་རྣམས་ལ། །གང་གིས་སྐྱེ་བར་རྣམ་བརྟགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་གསུངས་པའི་ཕྱིར། ཁ་ཅིག གཞུང་འདིས་སྐད་ཅིག་མ་གཉིས་སུ་བསྟན་ཏེ། ཆོས་བཟོད་ཀྱི་འོག་ཏུ་དབྱེ་བ་མེད་ཅེས་མ་བསྟན་པར། ཆོས་ཤེས་ཀྱི་འོག་ཏུ་དབྱེ་བ་མེད་པར་བསྟན་པའི་ཕྱིར། ཞེས་སྨྲ་བ་ནི་འགྲེལ་པ་མ་མཐོང་བར་མུ་ཅོར་དུ་སྨྲ་བ་སྟེ། འདིའི་ཆོས་ཤེས་དེ་ཆོས་བཟོད་ཆོས་ཤེས་གཉིས་སུ་ཕྱེ་བའི་ཆོས་ཤེས་དེ་མ་ཡིན་གྱི། ཆོས་ནི་རང་བཞིན་གྱིས་མྱ་ངན་ལས་འདས་པ་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པ་ཡིན་ལ། ཤེས་པ་ནི་དེ་མངོན་སུམ་རྟོགས་པའི་རྟོགས་པ་ཡིན་པའི་ཕྱིར་ཏེ། འགྲེལ་པར། དེ་ལ་ཆོས་ཞེས་བྱ་བའི་སྒྲ་ནི་མྱ་ངན་ལས་འདས་པ་ལ་བྱའོ། །དེ་ཡང་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ལས་གཞན་མིན་ཏེ་ཞེས་དང་། རྟེན་ཅིང་འབྲེལ་བར་འབྱུང་བ་དེ་དང་། མྱ་ངན་ལས་འདས་པ་ཐ་མི་དད་པའི་རང་བཞིན་དུ་གྱུར་པ་ཡོངས་སུ་སྤྱོད་པའི་ཤེས་པ་གང་ཡིན་པ་དེ་ནི་ཆོས་ཤེས་པ་སྟེ། ཆོས་ཀྱི་ཡུལ་ཤེས་པ་ནི་ཆོས་ཤེས་པ་ཞེས་བྱ་བ་ཡིན་པའི་ཕྱིར་ཞེས་དང་། དེ་ལྟར་ན། རྟེན་ཅིང་འབྲེལ་བར་འབྱུང་བ་སྐྱེ་བ་མེད་པ་དང་འགག་པ་མེད་པ་ལ་དམིགས་པའི་ཆོས་ཤེས་པ་བདེན་པ་གསུམ་པོ་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ཀྱིས་མ་སྐྱེས་པ་མྱ་ངན་ལས་འདས་པ་ཡང་དེའི་ངོ་བོ་ཉིད་ཡིན་པར་མཐོང་བས་མངོན་པར་རྟོགས་པ་གཅིག་ཏུ་ཟད་དོ་ཞེས་གསུངས་པའི་ཕྱིར། སྐད་ཅིག་མ་བཅོ་ལྔ་དང་བཅུ་དྲུག་ཏུ་གཞག་པ་རྣམས་ནི་དེ་ཉིད་ལ་ལྡོག་པའི་སྒོ་ནས་ཕྱེ་བ་སྟེ། གང་དག་སྐད་ཅིག་མ་བཅོ་ལྔར་འདོད་པ་དེ་དག་གི་ལྟར་ནའང་དེ་ལྟ་བུས་འདུལ་བའི་སྐྱེ་བོ་ལ་དེ་བསྟན་པས་ཕན་གདགས་པའི་ཕྱིར། ཤེས་པ་ངོ་བོ་གཅིག་ལ་ཆར་ཕྱེ་སྟེ་ཆ་བཅོ་ལྔར་རྣམ་པར་གཞག་གོ །གལ་ཏེ་དེ་ལྟར་ན་ལམ་སྒོམ་པ་རྣམ་པ་བཅུ་དྲུག་པོ་དེ་ཇི་ལྟ་བུར་ཐར་པར་འདོད་པ་རྣམས་ལམ་རྣམ་པར་གཞག་པ་དེ་ཁོ་ན་ཉིད་ལ་འཇུག་པ་གོམས་པར་བྱ་བའི་ཕྱིར་འདི་ཡོངས་སུ་བརྟགས་ནས་རྣམ་པར་གཞག་པ་ཉིད་དེ། དེ་ཁོ་ན་ནི་ངོ་བོ་གཅིག་ཏུ་ཟད་དོ་ཞེས་སོ། །གཉིས་པ་ལ་དར་ཊཱིཀ་པ་ན་རེ། ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་སྐྱེས་པའི་ཚེ། བཟོད་པ་བརྒྱད་པོ་ངོ་བོ་གཅིག་ཏུ་སྐྱེས་པ་ཡིན་ཏེ། བདེན་བཞིའི་ཆོས་ཉིད་ལ་མི་སྐྲག་པའི་ཆ་ནས་ཆོས་བཟོད་བཞི་དང་། དེ་མངོན་སུམ་རྟོགས་པའི་ཡེ་ཤེས་ལ་མི་སྐྲག་པའི་ཆ་ནས་རྗེས་བཟོད་བཞི་ལྡོག་པའི་སྒོ་ནས་དབྱེ་བ་ཡིན་པའི་ཕྱིར། དེས་ན་བཟོད་པའི་གནས་སྐབས་སུ་གློ་བུར་དྲི་བྲལ་གྱིས་འགོག་བདེན་དང་རྣམ་གྲོལ་ལམ་མ་ཐོབ་ཅིང་ནམ་ཞིག་དེ་རྒྱུད་ལ་སྐྱེས་པའི་ཚེ་ཡུལ་བདེན་བཞིའི་ཆོས་ཉིད་རྟོགས་པའི་ཆོས་ཤེས་བཞི་དང་། ཡུལ་ཅན་ཡེ་ཤེས་དེ་ཉིད་རྟོགས་པའི་རྗེས་ཤེས་བཞི་སྟེ། ཤེས་པ་བརྒྱད་པོ་ངོ་བོ་གཅིག་ཏུ་སྐྱེ་བ་ཡིན་ནོ། །དེ་ལ་བདེན་པ་མངོན་པར་རྟོགས་པའི་མཉམ་གཞག་ཐུན་གཅིག་གིས་སྐད་ཅིག་མ་གཅིག་པོ་དེ་ཉིད་ཤེས་བཟོད་སྐད་ཅིག་མ་བཅུ་དྲུག་གི་བདག་ཉིད་དུ་སྐྱེ་བ་ཡིན་གྱི། ཆོས་ཤེས་ཀྱི་འོག་ཏུ་རྗེས་བཟོད་སྐྱེ་བ་སོགས་ཀྱི་ཐ་སྙད་འདིར་ཁས་མི་ལེན་ནོ། །དེས་ན་ཐེག་ཆེན་མཐོང་ལམ་ལ་བཟོད་པ་དང་ཤེས་པ་གཉིས་སུ་ངེས་པས། བཟོད་པ་ལ་གནས་པའི་གང་ཟག་ལ་ཞུགས་པ་དང་། ཤེས་པ་ལ་གནས་པའི་གང་ཟག་ལ་འབྲས་གནས་ཀྱི་ཁྱད་པར་འཐད་པ་ཡིན་ནོ་ཟེར་རོ། །མི་འཐད་དེ། ཐེག་ཆེན་མཐོང་ལམ་ཤེས་པ་བརྒྱད་པོ་ཆོས་ཅན། གོང་དུ་བཤད་པའི་ཐེག་ཆེན་ཐུན་མོང་མ་ཡིན་པའི་མཐོང་ལམ་གྱི་མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། ཐེག་ཆེན་གྱི་བཟོད་པ་བརྒྱད་པོ་དེའང་ཐེག་ཆེན་ཐུན་མོང་མིན་པའི་མཐོང་ལམ་མིན་པར་འགྱུར་རོ། །རྩ་བར་འདོད་ན་སྔར་བཞིན་ནོ། །ཡང་ཐེག་ཆེན་མཐོང་ལམ་ཤེས་པ་བརྒྱད་པོ་ཆོས་ཅན། ཡུལ་བདེན་བཞིའི་ཆོས་ཉིད་རྟོགས་པའི་ཡུལ་ཅན་ཡེ་ཤེས་དེ་མངོན་སུམ་མ་རྟོགས་པར་ཐལ། ཡུལ་བདེན་བཞིའི་ཆོས་ཉིད་མངོན་སུམ་རྟོགས་པའི་སློབ་པའི་ཡེ་ཤེས་ཡིན་པའི་ཕྱིར། གསུམ་ཆར་ཁས་བླངས། ཡང་ཐེག་ཆེན་གྱི་མཐོང་ལམ་བདེན་པ་མངོན་པར་རྟོགས་པའི་མཉམ་གཞག་ཐུན་གཅིག་གིས་སྐད་ཅིག་མ་གཅིག་པོ་དེ་ཉིད་ཤེས་བཟོད་སྐད་ཅིག་མ་བཅུ་དྲུག་གི་ངོ་བོར་སྐྱེ་བ་མིན་པར་ཐལ། ཐེག་ཆེན་གྱི་མཐོང་ལམ་དེ་ལ་ཤེས་བཟོད་སྐད་ཅིག་མ་བཅུ་དྲུག་མེད་པའི་ཕྱིར། མ་གྲུབ་ན། དེ་ལ་སྐད་ཅིག་མ་གཉིས་སུ་གྲངས་ངེས་པ་དང་འགལ་ལོ། །གཞན་ཡང་ཐེག་ཆེན་གྱི་མཐོང་ལམ་ལམ་ཆོས་ཤེས་ལ་གནས་པའི་གང་ཟག་ལ་འབྲས་གནས་དང་། ལམ་རྗེས་བཟོད་ལ་གནས་པའི་གང་ཟག་ལ་ཞུགས་པའི་ཁྱད་པར་འཐད་པར་ཐལ། ཐེག་ཆེན་གྱི་མཐོང་ལམ་བཟོད་པ་བརྒྱད་ལ་གནས་པའི་གང་ཟག་ལ་ཞུགས་པ་དང་། ཤེས་པ་བརྒྱད་ལ་གནས་པའི་གང་ཟག་ལ་འབྲས་གནས་ཀྱི་ཁྱད་པར་འཐད་པའི་ཕྱིར་རོ། །འདོད་ན། ཉན་ཐོས་ཀྱི་མཐོང་ལམ་དེ་ལའང་དེ་ལྟར་འཐད་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། ཉན་ཐོས་ཀྱི་མཐོང་ལམ་སྐད་ཅིག་མ་དང་པོ་བཅོ་ལྔ་གང་རུང་ལ་གནས་པའི་གང་ཟག་ཡིན་ན། ཞུགས་པ་ཡིན་དགོས་པའི་ཕྱིར་རོ། །གཞན་ཡང་བདེན་བཞི་མི་རྟག་ལ་སོགས་བཅུ་དྲུག་མངོན་སུམ་རྟོགས་པའི་ཐེག་ཆེན་གྱི་མཐོང་ལམ་དེ་ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་བཅུ་དྲུག་རྫོགས་རྗེས་སུ་སྐྱེས་པ་ཡིན་ནམ། དེ་དང་དུས་མཉམ་དུ་སྐྱེས་པ་ཡིན། དང་པོ་ལྟར་ན་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་དེ་ལ་ཐེག་པ་གསུམ་གྱི་རྟོགས་རིགས་མ་ཚང་བར་ཐལ། དེ་ལ་ཉན་ཐོས་ཀྱི་རྟོགས་རིགས་མ་ཚང་བའི་ཕྱིར། རྟགས་ཁས། གཞན་ཡང་ཐེག་ཆེན་གྱི་སྦྱོར་ལམ་ཡིན་ན་ཐེག་པ་གསུམ་གྱི་རྟོགས་རིགས་ཚང་བའི་མཐོང་ལམ་གྱི་དངོས་རྒྱུ་མིན་དགོས་པར་ཐལ། འདོད་པ་དེའི་ཕྱིར། གཉིས་པ་ལྟར་ན། ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་བཅུ་དྲུག་གི་གནས་སྐབས་ན། ཀུན་རྫོབ་བདེན་པ་དངོས་ཡུལ་དུ་བྱེད་པའི་མཁྱེན་པ་ཡོད་པར་ཐལ། ཁས་བླངས་དེའི་ཕྱིར། གསལ་བ་གྲུབ་མཐའ་ལ་ཁས་བླངས་སོ། །གཞན་ཡང་ཐེག་པ་གསུམ་གྱི་རྟོགས་རིགས་ཚང་བའི་བྱང་འཕགས་ཀྱི་མཁྱེན་པ་མི་སྲིད་པར་ཐལ། སྟོང་ཉིད་མངོན་སུམ་རྟོགས་པའི་བྱང་འཕགས་ཀྱི་མཁྱེན་པ་ལ་ཉན་ཐོས་ཀྱི་རྟོགས་རིགས་མ་ཚང་། སྟོང་ཉིད་མངོན་སུམ་མ་རྟོགས་པའི་བྱང་འཕགས་ཀྱི་མཁྱེན་པ་ལ་ཐེག་ཆེན་གྱི་རྟོགས་རིགས་མ་ཚང་བའི་ཕྱིར། རྟགས་སྔ་མ་ཁས་བླངས་སོ། །ཡང་བྲང་ཏི་དང་ཁུ་སྟོན་ན་རེ། ཐེག་ཆེན་གྱི་མཐོང་ལམ་ཐམས་ཅད་སྡུག་བསྔལ་ལ་ཆོས་བཟོད་དང་ཆོས་ཤེས་གཉིས་སུ་འདུས་ཏེ། དང་པོར་ཆོས་བཟོད་བཞི་ངོ་བོ་གཅིག་ཏུ་སྐྱེ། དེ་རྗེས་ཆོས་ཤེས་བཞི་ངོ་བོ་གཅིག་ཏུ་སྐྱེ་ལ། རྗེས་བཟོད་དང་རྗེས་ཤེས་བཞི་ནི་སྔ་མ་བཞི་དང་ངོ་བོ་གཅིག་ཏུ་ཡོད་དེ། རྫས་གཞན་དུ་མེད་པའི་ཕྱིར། འོ་ན་དེ་གཉིས་ཀྱི་ངོ་བོ་ཇི་ལྟར་ཞེ་ན། ཆོས་བཟོད་བཞི་པོ་དེ་ལ་ཁ་ཕྱིར་བལྟས་གཞན་རིག་གི་ཆ། ནང་བལྟས་རང་རིག་གི་ཆ་གཉིས་ཡོད་པའི་དང་པོའི་ཆོས་ཉིད་ཆོས་བཟོད་རང་གིས་རིགས་པའི་ཆ་ནས་རྗེས་བཟོད་བཞིར་འཇོག་ཅིང་། གཉིས་པའི་ཆོས་ཉིད་ཆོས་བཟོད་རང་གིས་རིག་པའི་ཆ་ནས་རྗེས་ཤེས་བཞིར་འཇོག་པ་ཡིན་ནོ། །དེ་བཞིན་དུ་ཆོས་ཤེས་བཞི་ལའང་ཕྱི་བལྟས་གཞན་རིགས་གི་ཆ། ནང་བལྟས་རང་རིགས་གི་ཆ་གཉིས་ཡོད་པའི་དང་པོའི་ཆོས་ཉིད་ཆོས་ཤེས་རང་གིས་རིག་པའི་ཆ་ནས་རྗེས་བཟོད་བཞིར་འཇོག་ཅིང་། གཉིས་པའི་ཆོས་ཉིད་ཆོས་ཤེས་རང་གིས་རིག་པའི་ཆ་ནས་རྗེས་ཤེས་བཞིར་འཇོག་པ་ཡིན་ནོ་ཟེར་རོ། །ཡང་ཁ་ཅིག ཐེག་ཆེན་མཐོང་ལམ་ཐམས་ཅད་སྡུག་བསྔལ་ལ་ཆོས་བཟོད་དང་། སྡུག་བསྔལ་ལ་ཆོས་ཤེས་ཀྱི་རྫས་གཉིས་སུ་འདུས་པ་ཡིན་ཏེ། དང་པོ་བདེན་བཞིའི་ཆོས་ཉིད་ཅིག་ཅར་དུ་གསར་དུ་རྟོགས་པའི་ཚེ་ཆོས་བཟོད་བཞི་པོ་ངོ་བོ་གཅིག་ཏུ་སྐྱེ་ཞིང་། དེའི་རྗེས་སུ་མཐོང་སྤངས་ལས་གྲོལ་བའི་རྣམ་གྲོལ་ལམ་རྒྱུད་ལ་སྐྱེས་པ་དེའི་ཚེ་ཆོས་ཤེས་བཞི་པོ་ངོ་བོ་གཅིག་ཏུ་སྐྱེ་བ་ཡིན་པའི་ཕྱིར། འོ་ན་རྗེས་བཟོད་རྗེས་ཤེས་ཀྱི་ངོ་བོ་ཇི་ལྟར་འཇོག་ཅེ་ན། ཆོས་བཟོད་ཀྱི་སྐབས་སུ་དེའི་ཡུལ་ཅན་དུ་གྱུར་པའི་རང་གི་མངོན་སུམ་བཞི་རྗེས་བཟོད་བཞི་དང་། རྗེས་བཟོད་བཞིའི་ཡུལ་ཅན་དུ་གྱུར་པའི་རང་གི་མངོན་སུམ་བཞི་རྗེས་ཤེས་བཞི་ཡིན་པས། ཆོས་བཟོད་ཀྱི་གནས་སྐབས་སུ་ཤེས་པ་སྐད་ཅིག་མ་བཅུ་གཉིས་ངོ་བོ་གཅིག་ཏུ་སྐྱེ་བ་ཡིན། དེ་བཞིན་དུ་ཆོས་ཤེས་ཀྱི་སྐབས་སུ་ཤེས་པ་སྐད་ཅིག་མ་བཅུ་གཉིས་ངོ་བོ་གཅིག་ཏུ་སྐྱེ་བ་ཡིན་པས། ཆོས་བཟོད་ཀྱིས་བསྡུས་པའི་ཤེས་པ་བཅུ་གཉིས་བར་ཆད་མེད་ལམ་དང་། ཆོས་ཤེས་ཀྱིས་བསྡུས་པའི་ཤེས་པ་བཅུ་གཉིས་རྣམ་གྲོལ་ལམ་གྱིས་བསྡུས་པ་ཡིན་ནོ། །ཐེག་ཆེན་གྱི་མཐོང་ལམ་རྗེས་བཟོད་བཞི་དང་རྗེས་ཤེས་བཞི་པོ་དེས་ནི་ཆོས་ཉིད་མངོན་སུམ་མ་རྟོགས་པ་ཡིན་ཏེ། དེས་ཀུན་རྫོབ་བདེན་པ་མངོན་སུམ་རྟོགས་པ་གང་ཞིག སློབ་ལམ་ན་བདེན་གཉིས་ངོ་བོ་ཐ་དད་དུ་འཛིན་པའི་དྲི་མ་ཟད་པར་སྤངས་པ་མེད་པའི་ཕྱིར་ཞེས་ཟེར་རོ། །འོ་ན་ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་ཉི་ཤུ་རྩ་བཞིའི་རྣམ་གཞག་མི་འཐད་པར་ཐལ། དེ་སངས་རྒྱས་རབ་བདུན་གྱིས་མ་གསུངས་པའི་ཕྱིར། ཡང་སྔ་ཕྱི་གཉིས་ཆར་ལ་ཐེག་ཆེན་གྱི་མཐོང་ལམ་ཐམས་ཅད་སྐད་ཅིག་མ་གཅིག་ཏུ་འདུས་པར་ཐལ། ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་ཀྱི་གནས་སྐབས་སུ་ལམ་ལ་རྗེས་ཤེས་སྐྱེས་པའི་ཕྱིར། རྟགས་ཁས། ཡང་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་ཤེས་ཆོས་ཅན། ཁྱོད་ཤེས་བཟོད་སྐད་ཅིག་མ་བཅུ་དྲུག་གང་རུང་མིན་པར་ཐལ། ཁྱོད་ཐེག་ཆེན་གྱི་མཐོང་ལམ་ལ་རྗེས་ཤེས་ཀྱི་རྗེས་སུ་བྱུང་བའི་ཤེས་པ་ཡིན་པའི་ཕྱིར། རྟགས་ཁས་བླངས་ཏེ། ཁྱོད་ཀྱི་དངོས་རྒྱུ་སྡུག་བསྔལ་ཆོས་བཟོད་ཀྱི་དུས་སུ་དེ་སྐྱེས་ཟིན་པའི་ཕྱིར། རྟགས་ཁས། ཡང་ཐེག་ཆེན་གྱི་མཐོང་ལམ་ལམ་ལ་རྗེས་ཤེས་ཡིན་ན་རྣམ་གྲོལ་ལམ་ཡིན་དགོས་པར་ཐལ། ཐེག་ཆེན་གྱི་མཐོང་ལམ་དེ་ལ་བར་ཆད་མེད་ལམ་དང་རྣམ་གྲོལ་ལམ་གྱི་རྫས་གཉིས་སུ་ངེས་པའི་ཕྱིར། འདོད་ན། ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་དང་རྫས་གཅིག་ཏུ་གྱུར་པའི་མཐོང་ལམ་ལམ་རྗེས་ཤེས་ཆོས་ཅན། དེར་ཐལ། དེའི་ཕྱིར། རྟགས་ཆོས་ཅན་དང་བཅས་པ་ཁས་བླངས། འདོད་ན། ཕྱོགས་སྔ་སྔ་མ་ལྟར་ན། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་དེ་བར་ཆད་མེད་ལམ་མིན་པར་ཐལ། འདོད་པ་དེའི་ཕྱིར། ཕྱོགས་སྔ་ཕྱི་མ་ལྟར་ན། དེ་ཆོས་ཅན། བར་ཆད་མེད་ལམ་མིན་པར་ཐལ། རྣམ་གྲོལ་ལམ་ཡིན་པའི་ཕྱིར། རྟགས་གསལ་དངོས། ཡང་ཕྱོགས་སྔ་ཕྱི་མ་ལ་ཐེག་ཆེན་གྱི་མཐོང་ལམ་སྡུག་བསྔལ་ལ་ཆོས་བཟོད་དང་རྫས་གཅིག་ཏུ་གྱུར་པའི་རྗེས་བཟོད་བཞི་པོ་ཆོས་ཅན། མཐོང་སྤངས་ཤེས་སྒྲིབ་ཀྱི་དངོས་གཉེན་དུ་གྱུར་པའི་བར་ཆད་མེད་ལམ་མིན་པར་ཐལ། ཆོས་ཉིད་མངོན་སུམ་མ་རྟོགས་པའི་ཕྱིར། རྟགས་གསལ་ཁས། གསུམ་པ་ལ། མཁས་པ་འབྲེ་ཨར་ན་རེ། ཐེག་ཆེན་གྱི་མཐོང་ལམ་ཐམས་ཅད་སྐད་ཅིག་མ་བཞིར་འདུས་པ་ཡིན་ཏེ། དང་པོ་བདེན་བཞིའི་ཆོས་ཉིད་ཅིག་ཅར་དུ་མངོན་སུམ་མཐོང་བའི་ཆོས་བཟོད་བཞི་པོ་སྐད་ཅིག་མ་གཅིག་ཏུ་སྐྱེ། དེའི་རྗེས་སུ་ཆོས་ཤེས་བཞི་པོ་སྐད་ཅིག་ཏུ་སྐྱེ། དེའི་འོག་ཏུ་དེ་གཉིས་ཡུལ་དུ་བྱེད་པའི་རྗེས་བཟོད་བཞི་སྐད་ཅིག་གཅིག་ཏུ་སྐྱེ། དེའི་འོག་ཏུ་རྗེས་བཟོད་ཀྱི་ཡེ་ཤེས་དེ་ཉིད་ཡུལ་དུ་བྱེད་པའི་རྗེས་ཤེས་བཞི་སྐད་ཅིག་གཅིག་ཏུ་སྐྱེ་བའི་ཕྱིར་ཞེས་གསུངས་སོ། །མཐོང་ལམ་སྡུག་བསྔལ་རྗེས་ཤེས་ལ་གནས་པའི་བྱང་སེམས་ཆོས་ཅན། རྒྱུན་ཞུགས་འབྲས་གནས་ཀྱི་མཚོན་པར་བྱ་བའི་མཚོན་བྱ་དོན་གྱི་དགེ་འདུན་ཡིན་པར་ཐལ། ལམ་རྗེས་ཤེས་ལ་གནས་པའི་བྱང་སེམས་ཡིན་པའི་ཕྱིར། འདོད་ན། ཉན་ཐོས་ཀྱི་མཐོང་ལམ་སྡུག་བསྔལ་རྗེས་ཤེས་ལ་གནས་པའི་གང་ཟག་དེ་རྒྱུན་ཞུགས་འབྲས་གནས་ཡིན་པར་ཐལ་ལོ། །བཞི་པ་ལ། ཐོགས་མེད་ཀྱི་བསྡུ་བ་ལས། ཀུན་རྫོབ་སྤྲོས་པའི་རྣམ་གཞག་དང་། དོན་དམ་སྤྲོས་མེད་ཀྱི་རྣམ་གཞག་གཉིས་ལས། དང་པོ་ནི་ཆོས་ཤེས་ཕྱོགས་མཐུན་གྱི་སེམས་བཞི། རྗེས་ཤེས་ཕྱོགས་མཐུན་གྱི་སེམས་བཞི་སྟེ་བརྒྱད་དོ། །དེའི་རྗེས་སུ་ཞི་གནས་འབའ་ཞིག་པའི་སེམས་གཅིག་སྟེ་དགུ་པོ་འདིས་མཐོང་ལམ་ཡོངས་སུ་རྫོགས་པ་ཡིན་ནོ། །འདི་ནི་སྤྲོས་པ་ལ་དགའ་བའི་གདུལ་བྱ་བདེན་པ་མངོན་པར་རྟོགས་པ་ལ་གཞུག་པའི་ཕྱིར་དུ་མིང་ཚིག་ཡི་གེའི་ཚོགས་ཀྱིས་སྤྲོས་ཏེ་བསྟན་པའི་ཕྱིར་ན། ཀུན་རྫོབ་སྤྲོས་པའི་རྣམ་གཞག་ཅེས་གསུང་ངོ་། །གཉིས་པ་ནི། མཐོང་ལམ་ཐམས་ཅད་དེ་བཞིན་ཉིད་ཁོ་ནའི་ཡུལ་ཅན་དུ་ངེས་པའི་ཕྱིར་ན། དེ་བཞིན་ཉིད་ཁོ་ནའི་ཡུལ་ཅན་དུ་གྱུར་པའི་ཡེ་ཤེས་གཅིག་ཁོ་ནར་ཟད་དོ། །ལྔ་པ་ལ་ཀུན་བཏུས་ཀྱི་ལུགས་དང་། འགྲེལ་ཆེན་གྱི་ལུགས་གཉིས་ལས། དང་པོ་ནི། སྡུག་བདེན་གྱི་ཆོས་ཉིད་མངོན་སུམ་དུ་མཐོང་བའི་ཚེ་སྡུག་བསྔལ་མཐོང་སྤང་སྤོང་བར་བྱེད་པའི་བར་ཆད་མེད་ལམ་སྡུག་བསྔལ་ལ་ཆོས་བཟོད། དེའི་འོག་ཏུ་སྡུག་བསྔལ་མཐོང་སྤང་ལས་གྲོལ་བའི་རྣམ་གྲོལ་ལམ་སྡུག་བསྔལ་ཆོས་ཤེས། དེའི་འོག་ཏུ་དེ་གཉིས་འཕགས་ཆོས་རྣམས་ཀྱི་རྒྱུར་ངེས་པར་བྱེད་པའི་བློ་ལ་སྡུག་བསྔལ་རྗེས་བཟོད། དེའི་འོག་ཏུ་སྡུག་བསྔལ་རྗེས་བཟོད་དེ་ཉིད་ཡོངས་སུ་དཔྱོད་པར་བྱེད་པའི་བློ་ལ་སྡུག་བསྔལ་རྗེས་ཤེས་སུ་འཇོག་ཅིང་། བདེན་པ་ལྷག་མ་རྣམས་ལ་དེ་བཞིན་དུ་འབྱུང་ངོ་། །སྐད་ཅིག་མ་བཅུ་དྲུག་པོ་དེ་དག་ཀྱང་རྫས་ཀྱི་སྒོ་ནས་ཡིན་གྱི་ལྡོག་པའི་སྒོ་ནས་མིན་ཏེ། རྒྱལ་སྲས་མ་ལས། སྐད་ཅིག་མ་བཅུ་དྲུག་བར་མ་ཆད་དུ་འབྱུང་ཞེས་གསུངས་པའི་ཕྱིར། གཉིས་པ་ལ་ལུགས་གཉིས་ལས། ལུགས་དང་པོ་ནི། ཁ་ཅིག ཐེག་ཆེན་གྱི་མཐོང་ལམ་དེ་སྡུག་བསྔལ་བདེན་པའི་ཆོས་ཉིད་མངོན་སུམ་དུ་རྟོགས་པའི་ཚེ་ཀུན་འབྱུང་སྤོང་བ་དང་། འགོག་པ་མངོན་དུ་བྱེད་པ་དང་། འཐོབ་བྱེད་ཀྱི་ལམ་གོམས་པར་བྱས་ཟིན་པས། འབྲས་བུའི་མངོན་པར་རྟོག་པ་ལ་ལྟོས་ནས་སྐད་ཅིག་མ་གཅིག་ཡིན་ཏེ། ཡེ་ཤེས་སྐད་ཅིག་མ་གཅིག་པོ་དེས་བདེན་པ་བཞི་ཆར་ལ་བྱ་བ་ཅིག་ཅར་བྱས་པའི་ཕྱིར། མཐོང་བ་ལ་ལྟོས་ནས་ཀྱང་སྐད་ཅིག་མ་གཅིག་ཡིན་ཏེ། བདེན་བཞིའི་རང་བཞིན་རྣམ་དག་གིས་ཆོས་ཉིད་ལ་རིགས་མི་འདྲ་བའི་དབྱེ་བ་མེད་པས་མཐོང་མ་མཐོང་གི་ཆ་གཉིས་མེད་པའི་ཕྱིར། སོ་སོར་མངོན་པར་རྟོགས་པ་ལ་ལྟོས་ནས་སྐད་ཅིག་མ་བཅུ་དྲུག་ཡིན་ཏེ། བདེན་བཞིའི་ཆོས་ཉིད་ལ་ལོགས་ཕྱོགས་སུ་འཛིན་པའི་སྒྲོ་འདོགས་བཅུ་དྲུག་ཡོད་པས་དེ་སེལ་བྱེད་ཀྱི་ཡེ་ཤེས་ཀྱང་གྲངས་དེ་སྙེད་གཅིག་འཇུག་པའི་ཕྱིར། དེས་ན་ཞུགས་གནས་ཀྱི་རྣམ་གཞག་ཀྱང་ལེགས་པར་འཐད་པ་ཡིན་ནོ། །ལུགས་གཉིས་པ་ནི། རྣམ་འགྲེལ་ལས། དོན་གྱིས་རང་བཞིན་ངོ་བོ་གཅིག །བདག་ཉིད་མངོན་སུམ་ཡིན་པ་ལ། །ཚད་མ་གཞན་གྱིས་རྟོགས་བྱ་གང་། །མ་མཐོང་ཆ་གཞན་ཅི་ཞིག་ཡོད། །ཅེས་པའི་ཚུལ་གྱིས་ཡེ་ཤེས་སྐད་ཅིག་མ་གཅིག་པོ་དེས་བདེན་བཞིའི་ཆོས་ཉིད་ཅིག་ཅར་དུ་མངོན་སུམ་རྟོགས་པས་སོ་སོར་མངོན་པར་རྟོགས་པ་ལ་ལྟོས་ནས་ཀྱང་སྐད་ཅིག་མ་གཅིག་ཡིན་ནོ་ཞེས་ཟེར་རོ། །དེ་ལྟར་ལུགས་གཉིས་ལས། ཕྱི་མ་འདི་ལ་སློབ་དཔོན་གྱིས་མཐོང་ལམ་སྐད་ཅིག་མ་དང་པོ་བཅོ་ལྔ་ལ་གནས་པའི་གང་ཟག་ལ་བཞུགས་པ་དང་། བཅུ་དྲུག་པ་ལ་གནས་པའི་གང་ཟག་ལ་འབྲས་གནས་ཀྱི་ཁྱད་པར་མཛད་པ་མི་འཐད་པར་ཐལ། ཐེག་ཆེན་གྱི་མཐོང་ལམ་དེ་སོ་སོར་མངོན་པར་རྟོགས་པ་ལ་ལྟོས་ནས་ཀྱང་སྐད་ཅིག་མ་གཅིག་ཡིན་པའི་ཕྱིར་ཞེས་བཀག་ནས་སྔ་མ་ཉིད་རང་ལུགས་སུ་བཞེད་དོ། །འོ་ན་སོ་སོར་མངོན་པར་རྟོགས་པ་ལ་ལྟོས་ནས་སྐད་ཅིག་མ་བཅུ་དྲུག་ཡིན་པའི་དོན་གང་ཞེ་ན། བདེན་བཞིའི་ཆོས་ཉིད་ལ་ལོག་ཕྱོགས་སུ་འཛིན་པའི་སྒྲོ་འདོགས་བཅུ་དྲུག་སེལ་བར་བྱེད་པའི་ངེས་ཤེས་བཅུ་དྲུག་རིམ་བཞིན་རྗེས་ཐོབ་ཀྱི་གནས་སྐབས་སུ་ཐོབ་པས་དེ་སྐྱེད་པར་བྱེད་པའི་ནུས་པ་བཅུ་དྲུག་མཉམ་གཞག་གི་གནས་སྐབས་སུ་རིམ་བཞིན་དུ་འབྱུང་དགོས་ལ། ནུས་པ་བཅུ་དྲུག་ཐོབ་པའི་མཉམ་གཞག་སྐད་ཅིག་མ་བཅུ་དྲུག་ལ་ཤེས་བཟོད་སྐད་ཅིག་མ་བཅུ་དྲུག་ཏུ་འཇོག་པ་ཡིན་ནོ། །གལ་ཏེ་སྐད་ཅིག་མ་ཕྱི་མ་བཅོ་ལྔ་པོ་ཐམས་ཅད་མཐོང་ལམ་མིན་པར་འགྱུར་རོ་སྙམ་ན། སྐྱོན་མེད་དེ། སྔར་མ་མཐོང་བ་གསར་དུ་མཐོང་བར་བྱར་མེད་ཀྱང་། སྔར་མ་རྟོགས་པ་གསར་དུ་རྟོགས་པར་བྱར་ཡོད་པའི་ཕྱིར་ཏེ། ལོག་ཕྱོགས་སུ་འཛིན་པའི་སྒྲོ་འདོགས་སེལ་བར་བྱེད་པའི་ངེས་ཤེས་སྐྱེས་པའི་ནུས་པ་ཐོབ་པའི་ཚེ། གནས་སྐབས་དེར་དེའི་ཆོས་ཉིད་རྟོགས་པ་ལ་འཇོག་དགོས་ཤིང་། སྐད་ཅིག་མ་ཕྱི་མ་རྣམས་ལ་ནུས་པ་མ་ཐོབ་པ་ཐོབ་པར་བྱར་ཡོད་པའི་ཕྱིར། དེ་ལྟར་མཉམ་བཞག་སྐད་ཅིག་མ་བཅུ་དྲུག་ལས། སྐད་ཅིག་མ་དང་པོ་ཁོ་ན་བར་ཆད་མེད་ལམ་ཡིན་ཏེ། མཐོང་སྤང་དངོས་སུ་སྤོང་བར་བྱེད་པའི་མཐོང་ལམ་རྩེ་སྦྱོར་ཡིན་པའི་ཕྱིར། འདི་ལ་དགོངས་ནས་མཐོང་ལམ་རྩེ་སྦྱོར་རྩ་འགྲེལ་གཉིས་ཆར་ལས། སྐད་ཅིག་མ་དང་པོར་སྐྱེས་པའི་བཟོད་པ་ཁོ་ན་མཐོང་ལམ་རྩེ་སྦྱོར་དུ་གསུངས་པའི་ཕྱིར། ཁ་ཅིག སློབ་དཔོན་གྱི་དགོངས་པ་མཉམ་གཞག་སྐད་ཅིག་མ་གཅིག་ཡིན་ཞིང་། རྗེས་ཐོབ་ཀྱི་གནས་སྐབས་སུ་ངེས་ཤེས་བཅུ་དྲུག་རིམ་བཞིན་དུ་སྐྱེས་པས་དང་པོ་བཅོ་ལྔ་ལ་ཞུགས་པ་དང་། བཅུ་དྲུག་ལ་གནས་པ་ལ་འབྲས་གནས་ཀྱི་རྣམ་གཞག་བྱེད་པ་ཡིན་ཟེར་རོ། །འོ་ན་མཐོང་ལམ་ལ་གནས་པའི་གང་ཟག་ལ་ཞུགས་གནས་ཀྱི་རྣམ་གཞག་མི་འཐད་པར་ཐལ། ངེས་ཤེས་སྐད་ཅིག་མ་བཅུ་དྲུག་པོ་དེ་མཐོང་ལམ་མིན་པའི་ཕྱིར། ཁོ་ན་རེ། སྐྱོན་མེད་དེ། དེ་ལ་མཐོང་ལམ་གྱི་མིང་གིས་བཏགས་པའི་ཕྱིར་ཞེ་ན། འོ་ན་མཐོང་ལམ་མཉམ་གཞག་ལ་གནས་པའི་གང་ཟག་དེ་ཞུགས་པ་ཡིན་ནམ། འབྲས་གནས་ཡིན། དང་པོ་ལྟར་ན། ཞུགས་པའི་མངོན་པར་རྟོགས་པ་དེ་ལ་ཡེ་ཤེས་སྐད་ཅིག་མ་བཅུ་དྲུག་ཡོད་པར་ཐལ་ལོ། །ཕྱི་མ་ལྟར་ན་འབྲས་གནས་ཀྱི་འོག་ཏུ་ཞུགས་པ་འབྱུང་བར་ཐལ་ལོ། །བཞི་པ་རྗེས་ཐོབ་ཡོད་མེད་དཔྱད་པ་ལ། དར་ཊཱིཀ་པ་ན་རེ། ཐེག་ཆེན་གྱི་མཐོང་ལམ་དང་པོ་སྐྱེས་ཟིན་ནས་རང་བཞིན་རྣམ་དག་གི་ཆོས་ཉིད་མངོན་སུམ་དུ་མཐོང་ཟིན་རྒྱུན་ལྡན་དུ་གོམས་པར་བྱེད་པའི་མཉམ་གཞག་གི་མཁྱེན་པ་མ་སྐྱེས་གོང་གི་མཁྱེན་པ་ཐམས་ཅད་ཐེག་ཆེན་མཐོང་ལམ་གྱིས་བསྡུས་པ་ཡིན་ནོ་ཞེས་ཟེར། འོ་ན་ས་གཉིས་པའི་ཡེ་ཤེས་སྐད་ཅིག་དང་པོ་དེ་སྦྱོར་མཐོང་སྒོམ་གསུམ་གྱི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོག་གསུམ་བྱེད་པའི་མཁྱེན་པ་མིན་པར་ཐལ། ས་དང་པོའི་རྗེས་ཐོབ་ཡེ་ཤེས་དེ་ཐེག་ཆེན་གྱི་སྒོམ་ལམ་མིན་པའི་ཕྱིར། འདོད་ན། འཇལ་དང་ངེས་རྟོགས་སྒོམ་པའི་ལམ། །ཞེས་པའི་སྐབས་ནས་དངོས་བསྟན་གྱི་སྒོམ་ལམ་མིན་པར་ཐལ་ལོ། །གཞན་ཡང་ས་དང་པོའི་རྗེས་ཐོབ་ཀྱི་གནས་སྐབས་སུ་བདེན་པ་རྣམ་པར་འཇོག་པ་མཐའ་ལས་བྱུང་བའི་ཀུན་རྫོབ་ཀྱི་ཤེས་པ་མངོན་དུ་གྱུར་པ་མི་སྲིད་པར་ཐལ། དེ་ཐེག་ཆེན་གྱི་སྒོམ་ལམ་མ་ཡིན་པའི་ཕྱིར། ཁྱབ་སྟེ། ཀུན་བཏུས་ལས། མཐོང་བའི་ལམ་ལ་བདེན་པ་རྣམ་པར་འཇོག་པ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་ཐོབ་སྟེ། མངོན་དུ་བྱེད་པ་ནི་མིན་ནོ། །དེ་དག་ནི་སྒོམ་པའི་ལམ་ལ་མངོན་དུ་བྱེད་དོ་ཞེས་གསུངས་པས་སོ། །དེས་ན་ས་དང་པོའི་རྗེས་ཐོབ་ཀྱི་མཁྱེན་པ་ནི་སྒོམ་ལམ་ཡིན་ཞིང་། དེ་ལ་གནས་པ་ནི་མཐོང་ལམ་པར་འཇོག་དགོས་ཏེ། སྒྲུབ་བྱེད་སྐབས་བཞི་པར་ཤེས་པར་བྱའོ། །ཀུན་ནས་ཞི་དང་ཐམས་ཅད་ལ། །ཞེས་པའི་སྐབས་སུ། ཁ་ཅིག ཐེག་ཆེན་སྒོམ་ལམ་པའི་རྒྱུད་ཀྱི་ཉོན་མོངས་པ་སྤངས་པའི་རྣམ་དཀར་གྱི་ཡོན་ཏན་དེ་ཆོས་ཅན། ཐེག་ཆེན་གྱི་བྱེད་པ་ཡིན་ཏེ། དེ་སྒོམ་སྟོབས་ཀྱིས་ཐོབ་པའི་རྣམ་དཀར་གྱི་ཡོན་ཏན་ཡིན་པའི་ཕྱིར། དེ་དེའི་མཚན་ཉིད་ཀྱང་ཡིན་ནོ་ཟེར་རོ། །འོ་ན་ཐེག་ཆེན་སྦྱོར་ལམ་པས་ཐེག་ཆེན་གྱི་སྒོམ་ལམ་མཚན་ཉིད་རྗེས་སུ་དཔྱོད་པའི་རྣམ་པས་སྒོམ་སྟོབས་ཀྱིས་སྦྱོར་ལམ་གྱི་གནས་སྐབས་སུ་ཐོབ་པའི་རྣམ་དཀར་གྱི་ཡོན་ཏན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། ཐེག་ཆེན་སྦྱོར་ལམ་པའི་རྒྱུད་ཀྱི་ཡོན་ཏན་ཡིན་པའི་ཕྱིར། ཁ་ཅིག ཐེག་ཆེན་སྒོམ་ལམ་དེ་ཁོ་ན་ཉིད་ཡིད་བྱེད་ཀྱི་རྣམ་པའི་སྒོ་ནས་སྒོམ་སྟོབས་ཀྱིས་ཐོབ་པའི་རྣམ་དཀར་དེ་དེའི་མཚན་ཉིད་ཡིན་ཞེ་ན། ས་དང་པོའི་རྗེས་ཐོབ་ཀྱི་སྟོབས་ཀྱིས་ས་དང་པོའི་རྗེས་ཐོབ་ཏུ་ཐོབ་པའི་རྣམ་དཀར་གྱི་ཡོན་ཏན་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ས་དང་པོའི་རྗེས་ཐོབ་ཡེ་ཤེས་དེ་ཐེག་ཆེན་གྱི་སྒོམ་ལམ་ཡིན་པའི་ཕྱིར། རྩ་བར་འདོད་ན། ས་དང་པོའི་རྗེས་ཐོབ་ཀྱི་གནས་སྐབས་སུ་ཐེག་ཆེན་གྱི་སྒོམ་ལམ་དེ་ཁོ་ན་ཉིད་ཡིད་བྱེད་ཀྱི་རྣམ་པས་སྒོམ་པ་ཡོད་པར་ཐལ་ལོ། །ཁ་ཅིག ཐེག་ཆེན་གྱི་སྒོམ་ལམ་གྱི་གནས་སྐབས་ཀྱི་བྱེད་པས་དེའི་བྱེད་པའི་གོ་མི་ཆོད་དེ། དཔེར་ན་ཐེག་ཆེན་སྒྲུབ་པའི་ཆེད་དུ་བྱ་བ་བཞིན་ནོ་ཞེ་ན། ཐེག་ཆེན་གྱི་སྒོམ་ལམ་གྱི་གནས་སྐབས་ཀྱི་འབྲས་བུ་དེས་འབྲས་བུའི་གོ་མི་ཆོད་པར་ཐལ། དམ་བཅའ་དེའི་ཕྱིར། རང་ལུགས་ནི། ཐེག་ཆེན་གྱི་སྒོམ་ལམ་གྱིས་ཐོབ་པའི་རྣམ་དཀར་གྱི་ཡོན་ཏན་དེ་དེའི་མཚན་ཉིད་ཡིན་ནོ། །བྱེད་པའི་འོག་ཏུ་སྒོམ་པ་ཡི། །ཞེས་པའི་སྐབས་སུ། སྒོམ་ལམ་གྱི་མཚན་ཉིད་ལ་དཔྱད། ཟག་བཅས་ཟག་མེད་ཀྱི་དོན་ལ་དཔྱད། གཉེན་པོས་སྤང་བྱ་སྤོང་ཚུལ་ལ་དཔྱད་པ་དང་གསུམ་ལས། དང་པོ་ལ་དགག་གཞག་གཉིས་ལས། དང་པོ་ལ། མཐོང་ལམ་རྫོགས་རྗེས་སུ་བྱུང་ཞིང་། མི་སློབ་ལམ་མ་སྐྱེས་གོང་གི་མངོན་རྟོགས་ཞེས་དང་། ཐེག་པ་རང་ལུགས་ཀྱི་མཐོང་ལམ་རྫོགས་རྗེས་སུ་བྱུང་ཞིང་། ཐེག་པ་རང་ལུགས་ཀྱི་མི་སློབ་ལམ་མ་སྐྱེས་གོང་གི་མངོན་རྟོགས་ཞེས་དང་། བདག་མེད་མངོན་སུམ་རྟོགས་ཟིན་རྒྱུན་ལྡན་དུ་སྒོམ་པར་བྱེད་པའི་མངོན་རྟོགས་ཞེས་དང་། དེ་ལྟར་བྱེད་པའི་རྗེས་ལ་མངོན་རྟོགས་རྣམས་སྒོམ་ལམ་གྱི་མཚན་ཉིད་དུ་འཇོག་ན། དང་པོ་ལ། ཉན་ཐོས་དགྲ་བཅོམ་གྱི་རྟོགས་པ་སྔོན་དུ་སོང་བའི་ཐེག་ཆེན་ཚོགས་ལམ་པའི་མངོན་རྟོགས་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར་ཏེ། མཐོང་ལམ་སྔོན་དུ་སོང་ཞིང་མི་སློབ་ལམ་མ་ཐོབ་གོང་གི་མངོན་རྟོགས་ཡིན་པའི་ཕྱིར། དེ་ལ་ཁ་ཅིག ཐེག་པ་རང་ལུགས་ཀྱི་མཐོང་ལམ་རྫོགས་རྗེས་སུ་བྱུང་བར་ཐལ། མཐོང་ལམ་རྫོགས་རྗེས་སུ་བྱུང་བའི་ཕྱིར་ཞེ་ན། དེ་ཆོས་ཅན། ཐེག་པ་རང་ལུགས་ཀྱི་མཐོང་ལམ་སྔོན་དུ་སོང་བར་ཐལ། མཐོང་ལམ་སྔོན་དུ་སོང་བའི་ཕྱིར། ཡང་ཉན་ཐོས་ཀྱི་སྒོམ་ལམ་དེ་མཐོང་ལམ་རྫོགས་རྗེས་སུ་བྱུང་བ་མིན་པར་ཐལ། དེ་དེ་མིན་པའི་ཕྱིར། གཉིས་པ་ལ། ཅིག་ཅར་བའི་རྒྱུན་ཞུགས་ཀྱི་རྟོགས་པ་སྔོན་དུ་སོང་ཞིང་། རང་རྒྱལ་གྱི་བྱང་ཆུབ་མངོན་དུ་བྱེད་ངེས་ཀྱི་གང་ཟག་གི་རྒྱུད་ཀྱི་སྲིད་ཉོན་དགུ་པ་སྤོང་བའི་བར་ཆད་མེད་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་རྒྱལ་གྱི་མཐོང་ལམ་རྫོགས་རྗེས་སུ་བྱུང་བར་ཐལ། འདོད་པ་གང་ཞིག རང་རྒྱལ་གྱི་སྒོམ་ལམ་ཡིན་པའི་ཕྱིར། ཕྱི་མ་དེར་ཐལ། རང་རྒྱལ་གྱི་མི་སློབ་ལམ་གྱི་དངོས་རྒྱུར་གྱུར་པའི་མཁྱེན་པ་ཡིན་པའི་ཕྱིར། འདོད་ན། ཅིག་ཅར་བའི་རྒྱུན་ཞུགས་ཀྱི་མངོན་པར་རྟོགས་པ་དེ་རང་རྒྱལ་གྱི་མཐོང་ལམ་དུ་ཐལ་ལོ། །གསུམ་པ་ལ། ཉན་ཐོས་སྒོམ་ལམ་པ་ཐེག་ཆེན་ལམ་དུ་ཞུགས་པའི་ཐེག་ཆེན་ཚོགས་ལམ་པའི་རྒྱུད་ཀྱི་ཉོན་སྒྲིབ་ཀྱི་དངོས་གཉེན་དུ་གྱུར་པའི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། བདག་མེད་མངོན་སུམ་དུ་རྟོགས་པའི་མཁྱེན་པ་དང་སྒོམ་ལམ་སྔོན་སོང་གང་ཞིག རང་གི་ངོས་སྐལ་གྱི་སྒོམ་སྤངས་ཀྱི་སྒྲིབ་པའི་དངོས་གཉེན་ཡིན་པའི་ཕྱིར། བཞི་པ་ལ། ཐེག་ཆེན་སྒོམ་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་སྒོམ་ལམ་པའི་རྒྱུད་ཀྱི་བདག་མེད་རྟོགས་པའི་མཁྱེན་པ་ཡིན་པའི་ཕྱིར། རྩ་བར་འདོད་ན། ཐེག་ཆེན་སྒོམ་ལམ་པས་གང་ཟག་གི་བདག་མེད་མངོན་སུམ་རྟོགས་ཟིན་རྒྱུད་ལྡན་དུ་སྒོམ་པར་ཐལ་ལོ། །ཡང་ཐེག་ཆེན་སྒོམ་ལམ་གྱི་མཚན་ཉིད་ལ། ཁ་ཅིག སྟོང་ཉིད་མངོན་སུམ་རྟོགས་ཟིན་རྒྱུན་ལྡན་དུ་སྒོམ་པར་བྱེད་པའི་རྗེས་ལ་མངོན་རྟོགས་ཞེས་དང་། གཞན་དག་སྦྱོར་མཐོང་སྒོམ་གསུམ་གྱི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོག་གསུམ་བྱེད་པའི་ཐེག་ཆེན་མངོན་རྟོགས་ཞེས་ཟེར་ན། དང་པོ་ལ། ས་གཉིས་པའི་མོས་པ་སྒོམ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཉིས་པ་ལ། དམན་ལམ་སྔོན་དུ་མ་སོང་བའི་ཐེག་ཆེན་སྒོམ་ལམ་སྐད་ཅིག་མ་དང་པོ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཁྱོད་ཀྱི་སྔོན་དུ་སྒོམ་ལམ་སོང་བར་ཐལ། འདོད་པ་དེའི་ཕྱིར། འདོད་ན། ཁྱོད་ཀྱི་སྔོན་དུ་ཐེག་ཆེན་གྱི་སྒོམ་ལམ་སོང་བར་ཐལ། ཁྱོད་དམན་ལམ་སྔོན་དུ་མ་སོང་བའི་ཐེག་ཆེན་སྒོམ་ལམ་གང་ཞིག འདོད་པ་དེའི་ཕྱིར། གཉིས་པ་ནི། མཐོང་ལམ་རྫོགས་རྗེས་སུ་བྱུང་བའི་སློབ་པ་འཕགས་པའི་རྒྱུད་ཀྱི་བདག་མེད་རྟོགས་པའི་མཁྱེན་པ་སྒོམ་ལམ་གྱི་མཚན་ཉིད། ཐེག་ཆེན་གྱི་མཐོང་ལམ་རྫོགས་རྗེས་སུ་བྱུང་ཞིང་ཐེག་ཆེན་གྱི་མི་སློབ་ལམ་མ་སྐྱེས་གོང་གི་མངོན་པར་རྟོགས་པ་དེ་ཐེག་ཆེན་གྱི་སྒོམ་ལམ་གྱི་མཚན་ཉིད། གཉིས་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག ཐེག་ཆེན་གྱི་སྒོམ་ལམ་རྗེས་ཐོབ་ཐམས་ཅད་ནི་འཁྲུལ་པའི་སྣང་བ་དང་བཅས་པས་ཟག་བཅས་དང་། མཉམ་གཞག་ཐམས་ཅད་ནི་འཁྲུལ་པའི་སྣང་བ་མེད་པས་ཟག་མེད་ཡིན་ཟེར་རོ། །འོ་ན་ས་གཉིས་པའི་བསྔོ་བ་སྒོམ་ལམ་ཆོས་ཅན། འཁྲུལ་སྣང་ཅན་གྱི་ཤེས་པར་ཐལ། ཐེག་ཆེན་གྱི་སྒོམ་ལམ་རྗེས་ཐོབ་ཡིན་པའི་ཕྱིར། འདོད་ན། རྟོགས་མེད་ལོག་ཤེས་སུ་ཐལ། རྟོག་མེད་ཀྱི་ཤེས་པ་དང་འཁྲུལ་སྣང་ཅན་གྱི་གཞི་མཐུན་ཡིན་པའི་ཕྱིར་རོ། །གཞན་ཡང་ས་བཅུའི་རྗེས་ཐོབ་རྣམས་སུ་འཁྲུལ་པ་ཇེ་ཆེར་འགྱུར་བ་ཡིན་པར་ཐལ། ས་བཅུའི་རྗེས་ཐོབ་ཐམས་ཅད་འཁྲུལ་སྣང་དང་བཅས་པ་གང་ཞིག ས་བཅུའི་རྗེས་ཐོབ་ཀྱི་སྣང་བ་ཇེ་ཆེར་འབྱུང་བ་ཡིན་པའི་ཕྱིར་ཏེ། ས་དང་པོའི་རྗེས་ཐོབ་ཀྱི་གནས་སྐབས་སུ་སངས་རྒྱས་བརྒྱ་མཐོང་བ་དང་། ས་གཉིས་པའི་རྗེས་ཐོབ་ཀྱི་གནས་སྐབས་སུ་སངས་རྒྱས་སྟོང་མཐོང་བ་སོགས་ཀྱི་ཁྱད་པར་ཡོད་པའི་ཕྱིར། ཡང་ཁ་ཅིག ཉོན་མོངས་པའི་ཟག་པ་དང་བཅས་པ་དང་། ཉོན་མོངས་པའི་ཟག་པ་མེད་པ་དེ་སྐབས་འདིའི་ཟག་བཅས་ཟག་མེད་ཀྱི་ཁྱད་པར་ཡིན་ནོ་ཞེས་ཟེར་རོ། །འོ་ན་བྱང་སེམས་འཕགས་པས་ཉོན་སྒྲིབ་སྤངས་སམ་མ་སྤངས། དང་པོ་ལྟར་ན་ས་གཉིས་པའི་མོས་པ་སྒོམ་ལམ་ཆོས་ཅན། ཉོན་མོངས་པའི་ཟག་བཅས་མིན་པར་ཐལ། ཉོན་མོངས་པ་སྤངས་པའི་གང་ཟག་གི་རྒྱུད་ཀྱི་ཤེས་པ་ཡིན་པའི་ཕྱིར། ཕྱི་མ་ལྟར་ན། ས་གཉིས་པའི་མཉམ་གཞག་ཡེ་ཤེས་ཆོས་ཅན། ཉོན་མོངས་པའི་ཟག་མེད་མིན་པར་ཐལ། ཉོན་མོངས་པ་མ་སྤངས་པའི་ཤེས་པ་ཡིན་པའི་ཕྱིར། སྔ་ཕྱི་གཉིས་ཀའི་རྟགས་གསལ་ཁས། དར་ཊཱིཀ་པ་ན་རེ། འདིའི་ཟག་པ་དང་བཅས་པའི་དོན་ནི་སྒྲ་དོན་འདྲེས་འཛིན་གྱི་རྟོག་པ་དང་བཅས་པས་ཟག་བཅས་སུ་གཞག་པ་ཡིན་གྱི། སྤང་བྱས་བསྡུས་པའི་ཟག་བཅས་ནི་མིན་ཏེ། མོས་བསྔོ་རྗེས་སུ་ཡི་རང་གསུམ་པོ་དེ་བྱང་ཆུབ་སེམས་དཔས་རྗེས་ཐོབ་ཏུ་བསོད་ནམས་ཀྱི་ཚོགས་རྫོགས་པའི་ཡན་ལག་ཏུ་འབད་པས་བསྐྱེད་པར་བྱ་བ་ཡིན་པ་གང་ཞིག སྒོམ་སྤང་འབད་པས་བསྐྱེད་པའི་མཁས་པ་སུ་ཡང་མི་སྲིད་པའི་ཕྱིར་དང་། སྤང་བྱར་བྱེད་ན་སྒོམ་སྤང་སུ་བྱེད་དགོས་ཤིང་། ཐེག་ཆེན་འཕགས་པའི་རྒྱུད་ཀྱི་སྒོམ་སྤང་དང་སྒོམ་ལམ་གྱི་གཞི་མཐུན་སུ་གང་གིས་ཀྱང་བྱར་མེད་པའི་ཕྱིར། ས་བརྒྱད་པ་ཡན་ཆད་ན་སྒྲ་དོན་འདྲེས་འཛིན་གྱི་རྟོགས་པ་མེད་ན། ལྐོག་གྱུར་གྱི་གཞལ་བྱ་ཅུང་ཟད་ཀྱང་ཡུལ་དུ་མི་བྱེད་པར་འགྱུར་རོ་ཞེས་ཟེར་རོ། །འོ་ན། སྤང་བྱས་བསྡུས་པའི་ཟག་བཅས་མིན་ཞེས་པའི་དོན་དེ། ཟག་བཅས་སྒོམ་ལམ་ལ་བཅས་རྒྱུའི་ཟག་པ་དེ་སྤང་བྱས་བསྡུས་པའི་ཟག་བཅས་མིན་ཞེས་ཟེར་རམ། ཟག་བཅས་སྒོམ་ལམ་རང་གི་ངོ་བོ་སྤང་བྱས་བསྡུས་པ་མིན་ཞེས་ཟེར། དང་པོ་ལྟར་ན། ཐེག་ཆེན་གྱི་སྦྱོར་ལམ་ལ་ལྡན་རྒྱུའི་རྟོགས་པ་དེ་སྤང་བྱས་བསྡུས་པ་མིན་པར་ཐལ། ཐེག་ཆེན་སྦྱོར་ལམ་དེ་བྱང་ཆུབ་སེམས་དཔའ་རྣམ་མཁྱེན་ཐོབ་པའི་ཆེད་དུ་འབད་པས་བསྐྱེད་པར་བྱ་བ་ཡིན་པ་གང་ཞིག སྒོམ་སྤང་འབད་པས་བསྐྱེད་པའི་མཁས་པ་སུ་ཡང་མེད་པའི་ཕྱིར། ཕྱི་མ་ལྟར་ན་ཤིན་ཏུ་འདོད་དེ། ཟག་བཅས་སྒོམ་ལམ་དེ་ལ་སྤང་བྱས་བསྡུས་པའི་ཟག་བཅས་ལྡན་པར་ཁས་བླངས་ཀྱི། སྤང་བྱས་བསྡུས་པར་ཁས་མ་བླངས་པའི་ཕྱིར། དེ་བཞིན་དུ། སྤང་བྱར་བྱེད་ན་སྒོམ་སྤངས་སུ་བྱེད་དགོས་ཏེ་ཞེས་སོགས་ཀྱང་འབྲེལ་མེད་པར་སྨྲ་བ་ཙམ་དུ་ཟད་དེ། བཅས་རྒྱུའི་ཟག་པ་སྒོམ་སྤངས་སུ་ཁས་བླངས་ཀྱང་སྒོམ་ལམ་དུ་ཁས་མ་བླངས། ཟག་བཅས་སྒོམ་ལམ་སྒོམ་ལམ་དུ་ཁས་བླངས་ཀྱང་སྒོམ་སྤང་སུ་ཁས་མ་བླངས་པའི་ཕྱིར། ས་གཉིས་པའི་མོས་པ་སྒོམ་ལམ་ཆོས་ཅན། མངོན་ཞེན་ཅན་གྱི་བློ་ཡིན་པར་ཐལ། སྒྲ་དོན་འདྲེས་འཛིན་གྱི་རྟོགས་པ་དང་བཅས་པའི་བློ་ཡིན་པའི་ཕྱིར། འདོད་ན། མིན་པར་ཐལ། ཐེག་ཆེན་འཕགས་པའི་རྒྱུད་ཀྱི་རྗེས་ཐོབ་དག་པ་འཇིག་རྟེན་པའི་ཡེ་ཤེས་ཡིན་པའི་ཕྱིར། ཁྱབ་སྟེ། དག་པ་འཇིག་རྟེན་པ་གཟུང་བ་དང་འཛིན་པར་མངོན་པར་མ་ཞེན་པའི་རྣམ་པ་ཅན་རྗེས་ཀྱི་སེམས་ཀྱིས་བསྡུས་པ་ཞེས་གསུངས་པའི་ཕྱིར་རོ། །ཡང་སངས་རྒྱས་ཀྱི་སར་ལྐོག་གྱུར་གྱི་གཞལ་བྱ་ཅུང་ཟད་ཀྱང་ཡུལ་དུ་མི་བྱེད་པར་ཐལ། དེར་སྒྲ་དོན་འདྲེས་འཛིན་གྱི་རྟོག་པ་མེད་པའི་ཕྱིར། ཁྱབ་པ་ཁས། གལ་ཏེ་སངས་རྒྱས་རང་སྣང་ལ་ལྐོག་གྱུར་གྱི་གཞལ་བྱ་མི་སྣང་ཞིང་། ལྐོག་གྱུར་གྱི་གཞལ་བྱ་གདུལ་བྱའི་གཞན་སྣང་ལ་འཇོག་པ་ཡིན་ནོ་ཞེ་ན། ལྐོག་གྱུར་གྱི་གཞལ་བྱ་མེད་ངེས་སུ་ཐལ། དེ་རྫོགས་པའི་སངས་རྒྱས་ཀྱི་མངོན་སུམ་གྱིས་མ་གཟིགས་ཤིང་ཤུགས་ལ་རྟོགས་པའང་མེད་པའི་ཕྱིར། ཁྱབ་རྟགས་སྒྲིག་མཚམས་དང་བཅས་པ་སངས་རྒྱས་ཀྱི་ཞིང་སྦྱངས་པའི་ཐད་དུ་ཁས་བླངས་སོ། །ཁོ་ན་རེ། ས་བརྒྱད་པའི་མོས་པ་སྒོམ་ལམ་ཆོས་ཅན། རྣམ་མཁྱེན་མ་རྟོགས་པར་ཐལ། དེ་མངོན་སུམ་མ་རྟོགས། དོན་སྤྱིའི་ཚུལ་དུའང་མ་རྟོགས་པའི་ཕྱིར། རྟགས་ཕྱི་མ་ཁས་བླངས་སོ་ཞེ་ན། དེ་ཆོས་ཅན། སྟོང་ཉིད་མ་རྟོགས་པར་ཐལ། དེ་མངོན་སུམ་ཡང་མ་རྟོགས། དོན་སྤྱིའི་ཚུལ་དུའང་མ་རྟོགས་པའི་ཕྱིར། ཁྱབ་རྟགས་སྔ་མ་མཁས་བླངས་ཤིང་། ཕྱི་མ་དེར་ཐལ། སྟོང་ཉིད་མངོན་སུམ་རྟོགས་པའི་མཁྱེན་པ་སྔོན་སོང་གི་ཡེ་ཤེས་ཡིན་པའི་ཕྱིར། རྩ་བར་འདོད་ན། མི་དམིགས་པའི་རྣམ་པ་ཅན་མིན་པར་ཐལ་བ་དང་། ཐབས་ཤེས་ཁྱད་པར་ཅན་དང་ལྡན་པའི་སྦྱོར་བ་མིན་པར་ཐལ་ལོ། །ཡང་ཁོ་ན་རེ། ས་བརྒྱད་པའི་མོས་པ་སྒོམ་ལམ་ཆོས་ཅན། རྣམ་མཁྱེན་མངོན་སུམ་རྟོགས་པར་ཐལ། རྣམ་མཁྱེན་རྟོགས་པའི་མངོན་སུམ་ཡིན་པའི་ཕྱིར་ཞེ་ན། གཞན་རྒྱུད་ཀྱི་དགེ་རྩ་མངོན་སུམ་རྟོགས་ནས་དེ་ལ་རྗེས་སུ་ཡི་རང་བྱེད་པའི་ས་གཉིས་པའི་རྗེས་སུ་ཡི་རང་སྒོམ་ལམ་ཆོས་ཅན། རང་ཡུལ་དོན་སྤྱིའི་ཚུལ་དུ་རྟོགས་པར་ཐལ། རང་ཡུལ་རྟོགས་པའི་སྒྲ་དོན་འདྲེས་འཛིན་གྱི་རྟོགས་པ་ཡིན་པའི་ཕྱིར། རྟགས་ཁྱབ་ཁས། འདོད་ན། རང་ཡུལ་མངོན་སུམ་རྟོགས་པ་དང་། རང་ཡུལ་དོན་སྤྱིའི་ཚུལ་གྱིས་རྟོག་པའི་གཞི་མཐུན་ཡོད་པར་ཐལ་ལོ། །གཉིས་པ་ནི། འདིར་བསྟན་ཟག་པ་དེ་མངོན་ཞེན་མེད་པར་གཟུང་འཛིན་གཉིས་སུ་སྣང་བ་ཙམ་གྱི་ཤེས་སྒྲིབ་ཀྱི་རྣམ་རྟོག་ལ་འཇོག་པ་ཡིན་ཏེ། ཆོས་ཉིད་ལ་མཉམ་པར་གཞག་པའི་ཐེག་ཆེན་གྱི་མཉམ་གཞག་ཡིན་ན་དེ་དང་མི་ལྡན་པས་ཁྱབ་པ་གང་ཞིག ཐེག་ཆེན་གྱི་སྒོམ་ལམ་རྗེས་ཐོབ་ཡིན་ན་དེ་དང་ལྡན་པས་ཁྱབ་པའི་ཕྱིར། འོན་ཀྱང་སྒྲ་དོན་འདྲེས་འཛིན་གྱི་རྟོག་པ་ནི་མ་ཡིན་ཏེ། མངོན་ཞེན་ཅན་གྱི་བློ་མ་ཡིན་པའི་ཕྱིར། ཡང་སྒྲ་དོན་འདྲེས་འཛིན་གྱི་རྟོག་པ་མ་ཡིན་ཏེ། དེ་དང་རྟོག་མེད་ཤེས་པའི་གཞི་མཐུན་ཡོད་པའི་ཕྱིར་ཏེ། སོ་སོ་སྐྱེ་བོའི་རྒྱུད་ཀྱི་ཤེས་པ་ཐམས་ཅད་དེ་འདྲ་ཡིན་པའི་ཕྱིར། ཡང་དེ་བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་རྟོགས་པ་ཡང་མ་ཡིན་ཏེ། དེ་ཡིན་ན་གཟུང་འཛིན་གྱི་རྣམ་པར་རྟོག་པ་བཞི་པོ་གང་རུང་ཡིན་དགོས་ཤིང་། དེ་བཞི་པོ་གང་རུང་ཡིན་ན་སྒྲ་དོན་འདྲེས་འཛིན་གྱི་རྟོག་པ་ཡིན་དགོས་པའི་ཕྱིར། དེས་ན་གཟུང་འཛིན་གཉིས་སུ་ཞེན་པ་མེད་པར་གཟུང་འཛིན་གཉིས་སུ་སྣང་བ་ཙམ་ལ་རྣམ་རྟོག་གི་མིང་གིས་བཏགས་པ་སྟེ། ཡང་དག་པ་མིན་པའི་ཀུན་ཏུ་རྟོག་པ་ཙམ་ལ་རྣམ་རྟོག་ཏུ་བྱས་པ་ཡིན་པའི་ཕྱིར། གསུམ་པ་ནི། ཁ་ཅིག དེ་ཆོས་ཅན། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་ཏུ་ཐལ། བྱང་འཕགས་ཀྱི་རྒྱུད་ཀྱི་ཤེས་སྒྲིབ་ཡིན་པའི་ཕྱིར་ཞེ་ན། བྱང་འཕགས་ཀྱི་རྒྱུད་ཀྱི་ཉོན་མོངས་པའི་བག་ལ་ཉལ་དེ་ཆོས་ཅན། དེར་ཐལ། དེའི་ཕྱིར། ཁ་ཅིག ཊཱི་ཀ་ལས་ཤེས་སྒྲིབ་ཀྱི་རྣམ་པར་རྟོག་པ་ཞེས་གསུངས་པའི་ཚིག་ཙམ་ལ་བརྟེན་ནས་འདི་བཏགས་འཛིན་རྟོག་པར་བྱས་ནས། མོས་པ་སྒོམ་ལམ་ལ་གནས་པའི་བྱང་སེམས་ཀྱི་རྒྱུད་ལ་བཏགས་འཛིན་རྟོགས་པ་དང་། མོས་པ་སྒོམ་ལམ་གྱི་ངོ་བོར་གྱུར་པའི་ཡིད་ཀྱི་རྣམ་པར་ཤེས་པ་རྫས་ཐ་དད་པ་གཉིས་ཡོད་པར་འདོད་པ་ནི་ཤིན་ཏུ་འཁྲུལ་ཏེ། སེམས་ཅན་རྣམས་ནི་རྣམ་པར་ཤེས་པའི་རྒྱུད་རེ་རེ་བའོ་ཞེས་པ་དང་འགལ་ཞིང་། འདི་བཏགས་འཛིན་རྟོག་པར་བྱས་ན་ས་བརྒྱད་པ་ཡན་ཆད་ན་སྒྲ་དོན་འདྲེས་འཛིན་གྱི་རྟོག་པ་མེད་པའི་རང་ལུགས་དང་ཡང་འགལ་བའི་ཕྱིར་ཏེ། བཏགས་འཛིན་རྟོག་པ་ཡིན་ན་སྒྲ་དོན་འདྲེས་འཛིན་གྱི་རྟོག་པ་ཡིན་པས་ཁྱབ་པ་ཊཱི་ཀའི་བཞེད་པ་ཡིན་པའི་ཕྱིར། ཡང་ཁ་ཅིག ཊཱི་ཀ་ལས། ས་བརྒྱད་པ་ཡན་ཆད་ན་སྒྲ་དོན་འདྲེས་འཛིན་གྱི་རྟོག་པ་མེད་པ་དང་། འདིར་གཟུང་འཛིན་གཉིས་སུ་སྣང་བའི་ཤེས་སྒྲིབ་ཀྱི་རྣམ་རྟོག་ལ་འདོད་པ་ནི་ནང་འགལ་ཏེ། གཟུང་འཛིན་གྱི་རྣམ་པར་རྟོག་པ་བཞི་པོ་གང་རུང་ཡིན་ན་སྒྲ་དོན་འདྲེས་འཛིན་གྱི་རྟོག་པ་ཡིན་པས་ཁྱབ་པ་ཊཱི་ཀའི་ལུགས་ཡིན་པའི་ཕྱིར་ཞེས་སྨྲ་བ་ནི་འབྲེལ་མེད་དེ། འདི་གཟུང་འཛིན་གྱི་རྣམ་པར་རྟོགས་པ་བཞི་པོ་གང་རུང་དུ་མི་འདོད་པའི་ཕྱིར། གསུམ་པ་ལ། སྤྱིར་སྤོང་ཚུལ་དང་། གང་ཟག་སོ་སོའི་སྤོང་ཚུལ་གཉིས་ལས། དང་པོ་ལ་དགག་གཞག་སྤང་གསུམ་ལས། དང་པོ་ལ་ཁ་ཅིག་ན་རེ། མངོན་པ་གོང་མ་ལྟར་ན་གཉེན་པོ་སྐྱེ་བ་ལ་མངོན་དུ་ཕྱོགས་པ་དང་། སྤང་བྱ་འགག་པ་ལ་མངོན་དུ་ཕྱོགས་པ་གཉིས་དུས་མཉམ་པས་སྐྱེ་འགྱུར་མ་འོངས་པས་སྤང་བྱ་ད་ལྟར་བ་སྤོང་ཞིང་། འོག་མ་ལྟར་ན་སྤང་གཉེན་གཉིས་པོ་ལྷན་ཅིག་ཏུ་སྐྱེ་འགག་བྱེད་པས་འགག་འགྱུར་ད་ལྟར་བས་སྤང་བྱ་སྤོང་ངོ་ཞེས་ཟེར་རོ། །སྔ་མ་དེ་མི་འཐད་པར་ཐལ། གཉེན་པོ་མ་འོངས་པ་དེ་མ་སྐྱེས་པ་ཡིན་པས་སྤང་བྱ་སྤོང་བའི་བྱེད་པ་ཉེ་བར་མི་གནས་པའི་ཕྱིར། ཁ་ཅིག གཉེན་པོས་སྤང་བྱ་མངོན་གྱུར་བ་མི་སྤོང་སྟེ། དེ་འདས་པ་འགགས། མ་འོངས་པ་མ་སྐྱེས། ད་ལྟར་བ་ལམ་དང་ལྷན་ཅིག་ཏུ་མི་འཇུག་པའི་ཕྱིར་ཞེས་ཟེར་རོ། །འོ་ན་སྣང་བས་མུན་པ་མི་སེལ་བར་ཐལ། དེ་འདས་པ་འགགས། མ་འོངས་པ་མ་སྐྱེས། ད་ལྟར་བ་སྣང་བ་དང་ལྷན་ཅིག་ཏུ་མི་འཇུག་པའི་ཕྱིར། གཞན་ཡང་སྤང་བྱ་མངོན་གྱུར་བ་སྤོང་བར་ཐལ། དེས་དེའི་ས་བོན་ལ་དངོས་སུ་གནོད་པ་བྱེད་པའི་སྒོ་ནས་དེ་སླར་མི་སྐྱེ་བའི་ཆོས་ཅན་དུ་བྱེད་པའི་ཕྱིར། ཁ་ཅིག མཐོང་ལམ་བར་ཆད་མེད་ལམ་གྱི་དུས་ན་དེའི་ངོས་སྐལ་གྱི་མཐོང་སྤང་མེད་དེ། དེ་གཉིས་གང་ཟག་གཅིག་གི་རྒྱུད་ལ་ཅིག་ཅར་དུ་འཇུག་པ་མེད་པའི་ཕྱིར། དེ་བཞིན་དུ་བར་ཆད་མེད་པའི་རྩེ་སྦྱོར་གྱི་གནས་སྐབས་ནའང་དེའི་ངོས་སྐལ་གྱི་གནས་ངན་ལེན་གྱི་དྲི་མ་མེད་ཅེས་ཟེར་རོ། །འོ་ན་ཐེག་ཆེན་མཐོང་ལམ་བར་ཆད་མེད་ལམ་གྱི་ངོས་སྐལ་གྱི་སྤང་བྱ་དེ་ཐེག་ཆེན་སྦྱོར་ལམ་པའི་རྒྱུད་ལ་ཡོད་པར་ཐལ། དེ་འདྲ་ཡོད་པ་གང་ཞིག དེ་མཐོང་ལམ་པའི་རྒྱུད་ལ་མེད་པའི་ཕྱིར། འདོད་ན། དེའི་རྒྱུད་ཀྱི་དེ་ཆོས་ཅན། ཁྱོད་ཀྱི་སྐད་ཅིག་ཕྱི་ལོགས་དེ་མ་ཐག་ཏུ་ཁྱོད་སྤངས་པའི་སོ་སོར་བརྟགས་འགོག་འབྱུང་བར་ཐལ། ཁྱོད་བར་ཆད་མེད་ལམ་གྱི་ངོས་སྐལ་གྱི་སྤང་བྱ་ཡིན་པའི་ཕྱིར། རྟགས་ཁས། འདོད་ན། མཐོང་ལམ་བར་ཆད་མེད་ལམ་གྱི་གནས་སྐབས་སུ་དེ་སྤངས་པའི་སོ་སོར་བརྟགས་འགོག་ཡོད་པར་ཐལ་ལོ། །ཡང་རྒྱུན་མཐའི་བྱང་སེམས་ཀྱི་རྒྱུད་ཀྱི་སེམས་ཀྱི་ཆོས་ཉིད་དེ་དྲི་བཅས་དེ་བཞིན་ཉིད་མིན་པར་ཐལ། དེའི་སེམས་དེ་དྲི་བཅས་ཀྱི་ཤེས་པ་མ་ཡིན་པའི་ཕྱིར་ཏེ། དེའི་རྒྱུད་ལ་དྲི་མ་མེད་པའི་ཕྱིར། རྟགས་ཁས། རྩ་བར་འདོད་ན། དེ་དྲི་མེད་དེ་བཞིན་ཉིད་ཡིན་པར་ཐལ་ལོ། །གཉིས་པ་ནི། གཉེན་པོས་སྤང་བྱ་མངོན་གྱུར་བ་ལ་དངོས་སུ་གནོད་པ་བྱེད་པའི་སྒོ་ནས་སྤོང་བ་མེད་དེ། གཉེན་པོ་དང་སྤང་བྱ་མངོན་གྱུར་བ་དངོས་སུ་ཕྲད་པ་མེད་པའི་ཕྱིར་ཏེ། དེ་འདས་པ་འགགས། མ་འོངས་པ་མ་སྐྱེས། ད་ལྟར་བ་གཉེན་པོ་དང་མཉམ་དུ་མི་འཇུག་པའི་ཕྱིར། དེའི་ས་བོན་ལ་དངོས་སུ་གནོད་པ་བྱེད་པའི་སྒོ་ནས་སྤོང་བ་ཡོད་དེ། དེའི་ས་བོན་དང་གཉེན་པོ་གཉིས་རྒྱུད་གཅིག་ལ་ལྷན་ཅིག་ཏུ་འཇུག་པ་ཡོད་པའི་ཕྱིར་ཏེ། ས་བོན་གྱིས་དམིགས་རྣམ་མི་འཛིན་པའི་ཕྱིར། གསུམ་པ་ནི། ཁ་ཅིག་ན་རེ། ཐེག་ཆེན་མཐོང་སྤང་རྟོག་པ་མངོན་གྱུར་བ་ལ་དངོས་སུ་གནོད་པ་བྱེད་པའི་སྒོ་ནས་སྤོང་བར་བྱེད་པའི་གཉེན་པོ་ཡོད་དམ་མེད། ཡོད་ན་ཐེག་ཆེན་གྱི་སྦྱོར་ལམ་མཉམ་གཞག་ཡེ་ཤེས་ལས་མ་འདས་པས། དེས་དེ་ལ་དངོས་སུ་གནོད་པ་བྱེད་པའི་སྒོ་ནས་སྤོང་བ་མིན་པར་ཐལ། དེའི་དུས་ན་དེ་འདས་པ་འགགས་པ་སོགས་ཀྱི་ཕྱིར་རོ། །འཁོར་གསུམ། ཕྱི་མ་ལྟར་ན། དེ་ཆོས་ཅན། ཁྱོད་སྤང་བྱ་མིན་པར་ཐལ། ཁྱོད་ལ་དངོས་སུ་གནོད་པ་བྱེད་པའི་སྒོ་ནས་སྤོང་བའི་གཉེན་པོ་མེད་པའི་ཕྱིར་ཞེས་ཟེར་ན། སྔ་མ་ཁས་མི་ལེན་ཞིང་། ཕྱི་མ་ཁས་བླངས་ཀྱང་སྐྱོན་དེ་མི་འཇུག་སྟེ། ཐེག་ཆེན་གྱི་མཐོང་སྤང་རྟོག་པ་མངོན་གྱུར་བ་ཆོས་ཅན། སྤང་བྱ་མིན་པར་ཐལ། ཁྱོད་དང་དངོས་སུ་ཕྲད་པའི་གཉེན་པོ་མེད་པའི་ཕྱིར། ཁྱབ་པ་ཁས། མ་གྲུབ་ན་དེར་ཐལ། དཀོན་བརྩེགས་ལས། ཡེ་ཤེས་དང་ནི་ཉོན་མོངས་རྣམ་རྟོག་གང་། །དེ་དག་ལན་འགའ་ཙམ་ཡང་ཕྲད་པ་མེད། །ཅེས་གསུངས་པའི་ཕྱིར། གཉིས་པ་ལ་ཉན་ཐོས་ཀྱི་སྤོང་ཚུལ། རང་རྒྱལ་གྱི་སྤོང་ཚུལ། བྱང་སེམས་ཀྱི་སྤོང་ཚུལ་དང་གསུམ་ལས། དང་པོ་ལ་ཅིག་ཆར་བའི་སྤོང་ཚུལ་དང་། རིམ་གྱིས་པའི་སྤོང་ཚུལ་གཉིས་ལས། དང་པོ་ནི། འདོད་པ་ནས་སྲིད་རྩེའི་བར་གྱི་ཉོན་མོངས་པ་བརྒྱ་རྩ་གཅིག་སྤོང་ཐེབས་དགུར་དྲིལ་ནས་སྤོང་བར་བྱེད་དོ། །གཉིས་པ་ནི། དེ་རྣམས་ཐེབས་བརྒྱད་ཅུ་རྩ་གཅིག་ཏུ་བྱས་ཏེ་སོ་སོར་ཕྱེ་ནས་སྤོང་བར་བྱེད་དོ། །གཉིས་པ་ལ། དང་པོ་ཉིད་ནས་རང་སངས་རྒྱས་ཀྱི་ལམ་དུ་ཞུགས་པའི་རང་སངས་རྒྱས་ཀྱི་རིགས་ཅན་གསུམ་གྱིས་ནི་རིམ་གྱིས་པའི་སྤོང་ཚུལ་ལྟར་སྤོང་ལ། ཉན་ཐོས་ཅིག་ཆར་བ་རང་རྒྱལ་དུ་འགྱུར་བས་ནི་ཉོན་མོངས་པ་ལྷག་མ་རྣམས་ཅིག་ཆར་བའི་སྤོང་ཚུལ་ལྟར་སྤོང་ངོ་། །གསུམ་པ་ལ། ཉོན་སྒྲིབ་སྤོང་ཚུལ་དང་། ཤེས་སྒྲིབ་སྤོང་ཚུལ་གཉིས་ལས། དང་པོ་ལ་ཊཱི་ཀ་ལས། ཁ་ཅིག བྱང་ཆུབ་སེམས་དཔའ་ཉོན་སྒྲིབ་སྤོང་ཚུལ་ཅིག་ཆར་བ་ལྟར་འདོད་པ་མི་འཐད་དེ། གནད་ཀྱི་ཟླ་འོད་དུ་ཕྱིར་མི་འོང་དུ་གཞག་པའི་ཚེ་ས་དགུའི་སྒོམ་སྤང་མ་ལུས་པ་སྤངས་ཟིན་པས་དགྲ་བཅོམ་དུ་ཐལ་བ་སོགས་ཀྱི་དགག་པ་མཛད་པ་དང་། དགོངས་འགྲེལ་དང་བྱང་ས་ལས། ས་གསུམ་པ་ཉིད་དུ་འདོད་པ་ལ་འདོད་ཆགས་དང་བྲལ་བར་བཤད་པ་དང་། ཉི་སྣང་ལས། ཆགས་བྲལ་སྔོན་སོང་གི་རྣམ་གཞག་མཛད་ནས་འདོད་པ་ལ་འདོད་ཆགས་དང་མ་བྲལ་བ་དང་། ཅི་ཡང་མེད་མན་ཆད་ལ་འདོད་ཆགས་དང་བྲལ་བའི་བྱང་སེམས་མཐོང་ལམ་པ་ཡོད་པར་བཤད་པའི་ཕྱིར་ཞེས་གསུངས་ལ། དེའི་དོན་ཡང་དགོངས་འགྲེལ་དང་བྱང་ས་ལས་བཤད་པ་ནི་སེམས་ཙམ་པའི་སྐབས་སུ་ས་བདུན་པ་མན་ཆད་དུ་ཉོན་སྒྲིབ་མ་སྤངས་པ་ལ་དགོངས་ལ། གནད་ཀྱི་ཟླ་འོད་དང་ཉི་སྣང་གི་ལུགས་སྔ་མ་ནི་བག་ཆགས་ལ་དགོངས་པ་ཡིན་ཏེ། མངོན་གྱུར་བ་ལ་བྱས་ན་ས་དང་པོ་ནས་མཐར་གནས་ཀྱི་སྙོམས་འཇུག་དགུ་ཐོབ་པས་འདོད་ཉོན་མངོན་གྱུར་བ་མ་སྤངས་པ་མི་སྲིད་པའི་ཕྱིར། ཉི་སྣང་གི་ལུང་ཕྱི་མ་ནི་མཐོང་ལམ་གྱི་སྔ་རོལ་དུ་ཅི་ཡང་མེད་མན་ཆད་ལ་འདོད་ཆགས་དང་བྲལ་བར་བྱས་པས་མཐོང་ལམ་ཐོབ་པ་ལ་དགོངས་པ་ཡིན་ཏེ། ཆགས་བྲལ་སྔོན་སོང་གི་རྣམ་གཞག་ཏུ་མཛད་པའི་ཕྱིར། གཉིས་པ་ནི། འདོད་པའི་སས་བསྡུས་ཀྱི་གཟུང་འཛིན་གྱི་རྣམ་པར་རྟོག་པ་རྣམས་ཆེན་པོ་དང་། འབྲིང་དང་། ཆུང་ངུ་གསུམ་དུ་བསྡུས་ནས། ས་གཉིས་པ། ས་གསུམ་པ། ས་བཞི་པ་གསུམ་གྱིས་སྤོང་ངོ་། །དེ་བཞིན་དུ་གཟུགས་ཀྱི་སས་བསྡུས་རྣམས་གསུམ་དུ་བསྡུས་ནས་ས་ལྔ་པ། ས་དྲུག་པ། ས་བདུན་པ་གསུམ་གྱིས་སྤོང་ངོ་། །གཟུགས་མེད་ཀྱི་སས་བསྡུས་རྣམས་གསུམ་དུ་བསྡུས་ནས་དག་པ་ས་གསུམ་གྱིས་རིམ་བཞིན་སྤོང་ངོ་། །དེ་དག་ཀྱང་ས་བོན་གྱི་དབང་དུ་བྱས་པ་ཡིན་གྱི་མངོན་གྱུར་བ་སྦྱོར་ལམ་གྱི་སྤང་བྱར་འཕགས་སེང་གཉིས་བཞེད་དོ། །མོས་པ་རང་གི་དོན་དང་ནི། །ཞེས་པའི་སྐབས་སུ། མི་འཐད་པའི་ཆ་དགག་པ། ཊཱི་ཀའི་བཞེད་པ་བསྟན་པ། རང་གི་འདོད་པ་བརྗོད་པའོ། །དང་པོ་ལ་ལོ་ཙཱ་བ་ན་རེ། འདིར་བསྟན་གྱི་རང་དོན་མོས་པ་དགུ་ཚོགས་སྦྱོར་དང་། གཉིས་དོན་མོས་པ་དགུ་མ་དག་ས་བདུན་དང་། གཞན་དོན་མོས་པ་དགུ་དག་པ་ས་གསུམ་ན་ཡོད་གསུང་ངོ་། །འདིར་བསྟན་རང་དོན་མོས་པ་དགུ་པོ་ཆོས་ཅན། ཐེག་ཆེན་གྱི་སྒོམ་ལམ་མིན་པར་ཐལ། ཚོགས་སྦྱོར་གྱི་གནས་སྐབས་ཀྱི་རྟོགས་པ་ཡིན་པའི་ཕྱིར། རྟགས་ཁས། འདོད་ན། དེ་དེ་ཡིན་པར་ཐལ། འགྲེལ་པ་ལས། སྒོམ་པའི་ལམ་དང་པོ་མོས་པ་ཡིད་ལ་བྱེད་པ་ཞེས་གསུངས་པའི་ཕྱིར། གཞན་ཡང་། འདིར་བསྟན་སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས་པོ་དེ་ཐེག་ཆེན་གྱི་སྒོམ་ལམ་མིན་པར་ཐལ། འདིར་བསྟན་མོས་བསྔོ་རྗེས་སུ་ཡི་རང་གསུམ་པོ་དེ་དེ་མ་ཡིན་པའི་ཕྱིར། འདོད་མི་ནུས་ཏེ། བྱ་བ་འདི་ནི་སྒོམ་པའི་ལམ། །ཞེས་གསུངས་པའི་ཕྱིར། གཉིས་པ་ལ། ངོ་བོ། དམིགས་པ། དབྱེ་བ། ས་མཚམས་དང་བཞི་ལས། དང་པོ་ནི། ཐེག་ཆེན་གྱི་ཟག་བཅས་སྒོམ་ལམ་གང་ཞིག ལུང་རིགས་ཀྱི་རྒྱུ་ལས་ཤེར་ཕྱིན་དོན་གསུམ་གྱི་འབྱུང་གནས་སུ་མཐའ་ཅིག་ཏུ་ངེས་པར་འཛིན་པའི་དད་པ་མཚུངས་ལྡན་དང་བཅས་པ། གཉིས་པ་ལ། དངོས་ཀྱི་དམིགས་པ་དང་། ཆེད་དུ་བྱ་བའི་དམིགས་པ་གཉིས་ལས། དང་པོ་ནི། ཤེར་ཕྱིན་རྗོད་བྱེད་དང་བཅས་པའོ། །གཉིས་པ་ནི་རང་དོན་གཉིས་དོན་གཞན་དོན་གསུམ་མོ། །གསུམ་པ་ལ་མོས་པ་སྒོམ་ལམ་གསུམ་གྱི་མཚན་ཉིད་རིམ་བཞིན། ཐེག་ཆེན་གྱི་མོས་པ་སྒོམ་ལམ་གང་ཞིག བསམ་པས་གཞན་དོན་སྒྲུབ་ཅིང་། སྦྱོར་བས་རང་དོན་གཙོ་བོར་སྒྲུབ་པ་དང་། གང་ཞིག་བསམ་པས་གཞན་དོན་སྒྲུབ་ཅིང་། སྦྱོར་བས་རང་གཞན་གཉིས་ཀའི་དོན་མཉམ་པ་ཉིད་དུ་སྒྲུབ་པ་དང་། གང་ཞིག་བསམ་སྦྱོར་གཉིས་ཀས་གཞན་དོན་གཙོ་བོར་སྒྲུབ་པ་སྟེ། དེ་རེ་རེ་ལའང་ཆུང་ངུའི་ཆུང་ངུ་སོགས་དགུ་དགུར་ཡོད་དོ། །བཞི་པ་ནི། རང་དོན་མོས་པ་སྒོམ་ལམ་ནི་ས་གཉིས་པའི་རྗེས་ཐོབ་ནས་ས་བདུན་པའི་རྗེས་ཐོབ་ཀྱི་བར་ན་ཡོད་དེ། དེར་ཉོན་ཡིད་མ་སྤངས་པས་བདག་ཏུ་ང་རྒྱལ་བ་ཕྲ་མོ་འབྱུང་སྲིད་པའི་ཕྱིར། གཉིས་དོན་མོས་པ་སྒོམ་ལམ་ནི་ས་བརྒྱད་པ་དང་དགུ་པའི་རྗེས་ཐོབ་ན་ཡོད་དེ། དེར་ཉོན་ཡིད་གནས་གྱུར་པས་བདག་གཞན་མཉམ་པ་ཉིད་དུ་རྟོགས་པའི་ཕྱིར། གཞན་དོན་མོས་པ་སྒོམ་ལམ་ནི་ས་བཅུ་པའི་རྗེས་ཐོབ་ན་ཡོད་དེ། དེ་ལ་གནས་པའི་བྱང་སེམས་རྗེས་ཐོབ་ཏུ་གཞན་དོན་བྱེད་ཚུལ་སངས་རྒྱས་དང་མཚུངས་པའི་ཕྱིར། གསུམ་པ་རང་གི་འདོད་པ་བརྗོད་པ་ལ། ལམ་ཤེས་འཆད་པའི་སྐབས་འདིར་ཐེག་ཆེན་གྱི་སྒོམ་ལམ་འདི་བྱང་སེམས་ཀྱིས་ཤེས་པར་བྱ་བའི་ལྡོག་པ་ནས་བསྟན་པའི་ཕྱིར་ན། ངོ་བོ་མཉམ་རྗེས་གཉིས་སུ་ཕྱེ་ནས་བསྟན་ཚུལ་རབ་ཏུ་དབྱེ་བ་དང་། དམིགས་རྣམ་གྱི་སྒོ་ནས་བསྟན་དགོས་པས་ན་རྗེས་ཐོབ་ལ་མོས་པའི་གནས་སྐབས་སུ་དབྱེ་བ་གསུངས་པ་དེ་བསྔོ་བ་དང་རྗེས་སུ་ཡི་རང་གཉིས་ལའང་སྦྱར་བར་བྱ་བ་ཡིན་ཞིང་། དེ་གཉིས་ཀྱི་གནས་སྐབས་སུ། དེ་ནི་དམིགས་མེད་རྣམ་པ་ཅན། །ཞེས་དང་། ཐབས་དང་མི་དམིགས་པ་དག་གིས། །ཞེས་དམིགས་རྣམ་གསུངས་པ་དེ་མོས་པ་ལའང་སྦྱར་བར་བྱ་བ་ཡིན་ལ། མཉམ་གཞག་ལ་སྒྲུབ་པ་སྒོམ་ལམ་གྱི་སྐབས་སུ་དམིགས་རྣམ་གསུངས་པ་དེ་རྣམ་དག་སྒོམ་ལམ་ལའང་སྦྱར་བར་བྱ་བ་ཡིན་ཞིང་། རྣམ་དག་སྒོམ་ལམ་གྱི་གནས་སྐབས་སུ་རྣམ་པ་དགུར་དབྱེ་བ་གསུངས་པ་དེ་སྒྲུབ་པ་སྒོམ་ལམ་ལའང་སྦྱར་བར་བྱ་བ་ཡིན་ནོ། །དེས་ན་མཉམ་གཞག་ལ་ཆུང་ངུའི་ཆུང་ངུ་ལ་སོགས་པ་དགུར་ཕྱེ་བ་དེ་ས་གཉིས་པ་ནས་ས་བཅུ་པའི་བར་གྱི་མཉམ་གཞག་གི་དབྱེ་བ་ཡིན་པ་ལྟར། རྗེས་ཐོབ་ལ་ཆུང་ངུའི་ཆུང་ངུ་ལ་སོགས་པ་དགུར་ཕྱེ་བ་དེའང་ས་གཉིས་པའི་རྗེས་ཐོབ་ནས་ས་བཅུ་པའི་རྗེས་ཐོབ་ཀྱི་བར་གྱི་དབྱེ་བ་ཡིན་པས་ན། མོས་པ་གསུམ་པོ་རེ་རེའང་ས་གཉིས་པའི་རྗེས་ཐོབ་ནས་ས་བཅུ་པའི་རྗེས་ཐོབ་ཀྱི་བར་དུ་འཇོག་དགོས་ཏེ། དེ་རེ་རེ་ལའང་ཆུང་ངུའི་ཆུང་ངུ་ལ་སོགས་པ་དགུ་དགུར་གསུངས་པའི་ཕྱིར། གསུམ་དུ་ཕྱེ་བ་ནི། བྱེད་ལས་ཀྱི་སྒོ་ནས་ཕྱེ་བ་མ་ཡིན་གྱི་འཛིན་སྟངས་ཀྱི་སྒོ་ནས་ཕྱེ་བ་ཡིན་ཏེ། ཡུམ་ཤེར་ཕྱིན་རང་དོན་ཕུན་སུམ་ཚོགས་པའི་འབྱུང་གནས་སུ་མོས་པ་ལ་རང་དོན་མོས་པ་དང་། དེ་གཉིས་དོན་གྱི་འབྱུང་གནས་སུ་མོས་པ་ལ་གཉིས་དོན་མོས་པ་དང་། དེ་གཞན་དོན་གྱི་འབྱུང་གནས་སུ་མོས་པ་ལ་གཞན་དོན་མོས་པར་འཇོག་པས་ན་ལྡོག་པའི་སྒོ་ནས་ཕྱེ་བའོ། །རྩ་བའི་དགོངས་པ་ནི་འདི་ཁོ་ན་ལྟར་ཡིན་གྱི། གཞན་དུ་ན་གསུམ་པོ་རེ་རེ་ལ་ཆུང་ངུའི་ཆུང་ངུ་སོགས་དགུ་དགུར་ཕྱེ་བ་ལ་དགོས་པ་མེད་པར་འགྱུར་ཞིང་། མངོན་རྟོགས་རྒྱན་གྱི་སྐབས་སུ་ས་བདུན་པ་མན་ཆད་དུ་ཉོན་ཡིད་མ་སྤངས་པའི་རྣམ་གཞག་ཁས་ལེན་ན། ཉན་རང་གི་སྤངས་རྟོགས་ས་དང་པོ་ནས་རྫོགས་པ་དང་འགལ་བའི་ཕྱིར་ཏེ། ཉོན་ཡིད་ཀྱི་རྣམ་གཞག་བྱེད་པའི་ཚེ། ཉན་རང་དགྲ་བཅོམ་གྱིས་ཉོན་ཡིད་སྤངས་པར་བཤད་པའི་ཕྱིར། ཡོངས་སུ་བསྔོ་བ་ཁྱད་པར་ཅན། །ཞེས་པའི་སྐབས་སུ། བསྔོ་བ་སྒོམ་ལམ་གྱི་མཚན་ཉིད་ལ་དཔྱད་པ་དང་། བསྔོ་རྒྱུའི་དགེ་རྩ་ལ་དཔྱད་པ་གཉིས། དང་པོ་ནི། ཁ་ཅིག ཐེག་ཆེན་གྱི་ཟག་བཅས་སྒོམ་ལམ་གང་ཞིག མོས་པས་བསགས་པའི་དགེ་རྩ་རྫོགས་པའི་བྱང་ཆུབ་ཀྱི་རྒྱུར་བསྒྱུར་བའི་བདུན་པ་མཚུངས་ལྡན་དང་བཅས་པ་ཞེས་དང་། ཡང་དེ་གང་ཞིག རང་གཞན་གྱི་དགེ་རྩ་སོགས་འཇོག་ན། དང་པོ་ལ་ས་གཉིས་པའི་བྱང་སེམས་ཀྱི་མཉམ་གཞག་ལས་ལངས་མ་ཐག་ཏུ་མཉམ་གཞག་གི་དགེ་རྩ་རྫོགས་པའི་བྱང་ཆུབ་ཏུ་བསྔོ་བའི་བསྔོ་བ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ས་གཉིས་པའི་མཉམ་གཞག་གི་སྔོན་རོལ་ན་མོས་པ་སྒོམ་ལམ་ཡོད་པར་ཐལ་ལོ། །གཉིས་པ་ལ། ས་གཉིས་པའི་བྱང་སེམས་ཀྱི་རང་རྒྱུད་ཀྱི་དགེ་རྩ་ཁོ་ན་རྫོགས་པའི་བྱང་ཆུབ་ཀྱི་རྒྱུར་བསྔོ་བའི་བསྔོ་བ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེ་འདྲ་ཡོད་པའི་ཕྱིར་ཏེ། དེས་རང་རྒྱུད་ཀྱི་དགེ་རྩ་ཁོ་ན་ལ་རྗེས་སུ་ཡི་རང་བ་ཡོད་པའི་ཕྱིར། གཉིས་པ་ནི། ཐེག་ཆེན་གྱི་ཟག་བཅས་སྒོམ་ལམ་གང་ཞིག དགེ་རྩ་རྫོགས་བྱང་གི་རྒྱུར་བསྔོ་བའི་འདུན་པ་མཚུངས་ལྡན་དང་བཅས་པའོ། །གཉིས་པ་ལ་ཁ་ཅིག ཆོས་ཉིད་བསྔོ་རྒྱུའི་དགེ་བ་ཡིན་ཏེ། དེ་དགེ་བ་ཡིན་པའི་ཕྱིར་ཏེ། དེ་དོན་དམ་པའི་དགེ་བ་ཡིན་པའི་ཕྱིར་ཞེས་ཟེར་ན། མི་དགེ་བ་ལའང་བསྔོ་རྒྱུའི་དགེ་རྩ་ཡོད་པར་ཐལ། དེ་ལ་ཆོས་ཉིད་དེ་བཞིན་ཉིད་ཡོད་པའི་ཕྱིར། གཞན་ཡང་འཁོར་བ་ཡིན་ན་མི་དགེ་བ་ཡིན་དགོས་པར་ཐལ། དེ་ཡིན་ན་དོན་དམ་པའི་མི་དགེ་བ་ཡིན་དགོས་པའི་ཕྱིར། འདོད་ན། ཁམས་གོང་ན་མི་དགེ་བ་ཡོད་པར་ཐལ། དེ་ན་དོན་དམ་པའི་འཁོར་བ་ཡོད་པའི་ཕྱིར། གཞན་ཡང་ཀུན་གཞི་ལ་ཡོད་པའི་དགེ་བའི་བག་ཆགས་ཆོས་ཅན། དགེ་བར་ཐལ། རྗེས་འབྲེལ་གྱི་དགེ་བ་ཡིན་པའི་ཕྱིར། འདོད་ན། གནས་སྐབས་དགེ་རྩ་ཆད་པའི་གང་ཟག་གི་རྒྱུད་ལ་དགེ་བ་ཡོད་པར་ཐལ་ལོ། །ཁ་ཅིག དགེ་བ་ཡིན་ན་བསྔོ་རྒྱུའི་དགེ་བ་ཡིན་པས་མ་ཁྱབ་སྟེ། སངས་རྒྱས་ཀྱི་རྒྱུད་ཀྱི་སྟོབས་བཅུ་པོ་དེ་དེ་མ་ཡིན་པའི་ཕྱིར་ཏེ། དེ་སྔ་མ་ལས་ཕྱི་མ་ཁྱད་པར་དུ་འགྱུར་བ་མེད་པའི་ཕྱིར་ཞེ་ན། དེ་བསྔོ་རྒྱུའི་དགེ་རྩར་ཐལ། དེ་བྱང་འཕགས་ཀྱི་བསྔོ་རྒྱུའི་དགེ་རྩར་བྱེད་པའི་ཕྱིར་ཏེ། བྱང་སེམས་འཕགས་པས་སོ་སྐྱེ་ནས་སངས་རྒྱས་ཀྱི་བར་གྱི་དགེ་རྩ་ཐམས་ཅད་རྫོགས་པའི་བྱང་ཆུབ་ཀྱི་རྒྱུར་བསྔོ་བར་བྱེད་པའི་ཕྱིར་རོ། །ཐབས་དང་མི་དམིགས་པ་དག་གིས། །ཞེས་པའི་སྐབས་སུ། རྗེས་སུ་ཡི་རང་སྒོམ་ལམ་གྱི་མཚན་ཉིད་ལ་དཔྱད་པ་དང་། ས་མཚམས་གཉིས་ལས། དང་པོ་ལ་ཁ་ཅིག ཐེག་ཆེན་གྱི་ཟག་བཅས་སྒོམ་ལམ་གང་ཞིག རང་གཞན་གྱི་དགེ་རྩ་ལ་དགའ་བ་ཡང་དག་པར་སྒོམ་པ་ཟེར་ན། ས་གཉིས་པའི་བྱང་སེམས་ཀྱིས་གཞན་རྒྱུད་ཀྱི་དགེ་བ་ཁོ་ན་ལ་རྗེས་སུ་ཡི་རང་བའི་རྗེས་སུ་ཡི་རང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རང་ལུགས་ནི། དེ་གང་ཞིག ཐབས་ཤེས་ཁྱད་པར་ཅན་གྱིས་ཟིན་པའི་སྒོ་ནས་དགེ་བའི་རྩ་བ་ལ་དགའ་བ་ཡང་དག་པར་སྒོམ་པ། གཉིས་པ་ལ་ཁ་ཅིག རྗེས་སུ་ཡི་རང་སྒོམ་ལམ་ཡིན་ན་མོས་བསྔོ་གཉིས་སྔོན་དུ་འགྲོ་དགོས་སོ་ཞེ་ན། དེ་མིན་པར་ཐལ། ས་གཉིས་པའི་བྱང་སེམས་ཀྱི་མཉམ་གཞག་ལས་ལངས་མ་ཐག་ཏུ་མཉམ་གཞག་གི་དགེ་རྩ་ལ་རྗེས་སུ་ཡི་རང་བ་དེ་ཡོད་པའི་ཕྱིར། རྗེས་སུ་ཡི་རང་ཡིད་ལ། ཞེས་པའི་སྐབས་སུ། ཁ་ཅིག རྗེས་སུ་ཡི་རང་བྱེད་པ་པོའི་རྗེས་སུ་ཡི་རང་དང་། རྗེས་སུ་ཡི་རང་བྱ་བའི་ཡུལ་གྱི་དགེ་རྩ་གཉིས་པོ་དེ་བསོད་ནམས་རྣམ་པ་ཐམས་ཅད་དུ་མཉམ་པ་ཉིད་དུ་ཐོབ་པར་འདོད་པ་ནི་མིན་ཏེ། ས་དང་པོ་ལ་གནས་པའི་བྱང་སེམས་ཀྱིས་དུས་སྐད་ཅིག་མ་གཅིག་ལ་རྫོགས་པའི་བྱང་ཆུབ་མངོན་དུ་བྱེད་པ་ཡོད་པར་ཐལ། དེས་རྒྱུན་མཐའི་བྱང་སེམས་ཀྱི་དུས་སྐད་ཅིག་མ་གཅིག་ལ་རྫོགས་བྱང་མངོན་དུ་བྱེད་པ་ལ་རྗེས་སུ་ཡི་རང་བྱེད་པ་ཡོད་པའི་ཕྱིར། ཁྱབ་པ་ཁས། རང་ལུགས་ནི། བསོད་ནམས་ཐོབ་པར་མཉམ་པའམ། བསོད་ནམས་མཉམ་པ་ཉིད་དུ་ཐོབ་སྲིད་པ་ཙམ་ལ་དགོངས་ནས་ཕན་ཡོན་གྱི་ཚུལ་གྱིས་གསུངས་པ་ཡིན་ཏེ། ས་གཉིས་པ་ལ་གནས་པའི་བྱང་སེམས་ཀྱི་རྒྱུད་ཀྱི་དགེ་རྩ་དེ་དང་། རྟོགས་པ་མཉམ་པའི་བྱང་སེམས་གཞན་ཞིག་གི་རྗེས་སུ་ཡི་རང་བའི་ཚེ། དེ་གཉིས་མཉམ་པ་ཉིད་དུ་ཐོབ་པ་ཡོད་པའི་ཕྱིར། ཡང་ཡི་རང་བ་བྱེད་པ་པོའི་དགེ་རྩ་ལས་ཡུལ་གྱི་དགེ་རྩ་བསོད་ནམས་ལྷག་པ་ཡོད་དེ། ས་གཉིས་པ་ལ་གནས་པའི་བྱང་སེམས་ཀྱིས་རྒྱུན་མཐའི་བྱང་སེམས་ཀྱི་དགེ་རྩ་ལ་རྗེས་སུ་ཡི་རང་བ་ཡོད་པའི་ཕྱིར། ཡུལ་གྱི་དགེ་རྩ་ལས་བྱེད་པ་པོའི་དགེ་རྩ་བསོད་ནམས་མང་བ་ཡོད་དེ། བྱང་སེམས་སྒོམ་ལམ་པས་ཉན་རང་གི་རྒྱུད་ཀྱི་དགེ་རྩ་ལ་རྗེས་སུ་ཡི་རང་བ་ཡོད་པའི་ཕྱིར། ཁྱབ་སྟེ། བྱེད་པ་པོའི་དགེ་རྩ་ནི་ཐབས་ཤེས་ཁྱད་པར་ཅན་གྱིས་ཟིན་པ་ཡིན་ལ། ཡུལ་ནི་ཉན་རང་གི་རྒྱུད་ཀྱི་དགེ་རྩ་ཡིན་པའི་ཕྱིར། ཟག་པ་དང་བཅས་པའི། ཞེས་པའི་སྐབས་སུ། ཟག་མེད་སྒོམ་ལམ་གཉིས་ལ་དགག་གཞག་གཉིས་ལས། དང་པོ་ནི། ལོ་ཆེན་ན་རེ། སྒྲུབ་པ་སྒོམ་ལམ་དང་རྣམ་དག་སྒོམ་ལམ་གྱི་མཚན་ཉིད་རིམ་བཞིན། ཐེག་ཆེན་གྱི་སྒོམ་ལམ་གང་ཞིག གཞན་དབང་སྒྱུ་མ་ལྟ་བུ་དངོས་ཡུལ་དུ་བྱེད་པའི་རྗེས་ཐོབ་དག་པ་འཇིག་རྟེན་པའི་ཡེ་ཤེས་དང་། དེ་གང་ཞིག ཡོངས་གྲུབ་ནམ་མཁའ་ལྟ་བུ་དངོས་ཡུལ་དུ་བྱེད་པའི་མཉམ་གཞག་རྣམ་པར་མི་རྟོག་པའི་ཡེ་ཤེས་ཞེས་གསུངས། འོ་ན་ཐེག་ཆེན་གྱི་མོས་པ་སྒོམ་ལམ་ཆོས་ཅན། སྒྲུབ་པ་སྒོམ་ལམ་དུ་ཐལ། མཚན་ཉིད་དེའི་ཕྱིར་ཏེ། གཞན་དབང་སྒྱུ་མ་ལྟ་བུ་དངོས་ཡུལ་དུ་བྱེད་པ་གང་ཞིག རྗེས་ཐོབ་དག་པ་འཇིག་རྟེན་པའི་ཡེ་ཤེས་ཡིན་པའི་ཕྱིར། དང་པོ་དེར་ཐལ། ཀུན་རྫོབ་བདེན་པ་འཛིན་སྟངས་ཀྱི་ཡུལ་དུ་བྱས་ནས་དེ་བདེན་མེད་དུ་རྟོགས་པའི་མཁྱེན་པ་ཡིན་པའི་ཕྱིར། ཕྱི་མ་དེར་ཐལ། སྟོང་ཉིད་རྟོགས་པའི་རྗེས་ཐོབ་ཀྱི་མཁྱེན་པ་གང་ཞིག མངོན་ཞེན་མེད་པའི་བློ་ཡིན་པའི་ཕྱིར། ཡང་གཞན་དབང་སྒྱུ་མ་ལྟ་བུ་དངོས་ཡུལ་དུ་བྱེད་པའི་ཐེག་ཆེན་གྱི་སྒོམ་ལམ་རྗེས་ཐོབ་ཡེ་ཤེས་ཆོས་ཅན། ཟག་མེད་སྒོམ་ལམ་དུ་ཐལ། སྒྲུབ་པ་སྒོམ་ལམ་ཡིན་པའི་ཕྱིར། རྟགས་ཁས། འདོད་ན། ཟག་བཅས་སྒོམ་ལམ་དུ་ཐལ། ཐེག་ཆེན་གྱི་སྒོམ་ལམ་རྗེས་ཐོབ་ཀྱི་ཡེ་ཤེས་ཡིན་པའི་ཕྱིར། ཡང་ཁ་ཅིག དེ་གཉིས་ཀྱི་མཚན་ཉིད་རིམ་བཞིན། ཐེག་ཆེན་གྱི་སྒོམ་ལམ་མཉམ་གཞག་གང་ཞིག རྟོག་པ་མཐར་ཐུག་གི་རྒྱུར་གྱུར་པ་ཞེས་དང་། དེ་གང་ཞིག སྤངས་པ་མཐར་ཐུག་གི་རྒྱུར་གྱུར་པ་ཞེ་ན། ས་གཉིས་པའི་བར་ཆད་མེད་ལམ་ཆོས་ཅན། རྣམ་དག་སྒོམ་ལམ་དུ་ཐལ། མཚན་ཉིད་དེའི་ཕྱིར་ཏེ། ངོ་བོ་ཉིད་སྐུའི་རྒྱུར་གྱུར་པ་ཡིན་པའི་ཕྱིར། ས་གཉིས་པའི་རྣམ་གྲོལ་ལམ་ཆོས་ཅན། སྒྲུབ་པ་སྒོམ་ལམ་དུ་ཐལ། མཚན་ཉིད་དེའི་ཕྱིར་ཏེ། རྟོགས་པ་ཡེ་ཤེས་ཆོས་སྐུའི་རྒྱུར་གྱུར་པ་ཡིན་པའི་ཕྱིར། གཉིས་པ་ནི། དེ་གཉིས་ཀྱི་མཚན་ཉིད་རིམ་བཞིན། ཐེག་ཆེན་གྱི་ཟག་མེད་སྒོམ་ལམ་གང་ཞིག སྟོང་ཉིད་མངོན་སུམ་རྟོག་ཟིན་རྒྱུན་ལྡན་དུ་གོམས་པར་བྱེད་པའི་སྤོང་བ་གཉེན་པོས་བསྡུས་པ་དང་། དེ་གང་ཞིག རང་རྒྱུ་བར་ཆད་མེད་ལམ་གྱི་ངོས་སྐལ་གྱི་དྲི་མ་ལས་གྲོལ་བའི་རྣམ་གྲོལ་ལམ་གྱིས་བསྡུས་པའོ། །འབྲས་བུ་དག་པ་གཟུགས་ལ་སོགས། །ཞེས་པའི་སྐབས། གཞུང་གི་བསྟན་ཚུལ་ལ་དཔྱད་པ་དང་། ངག་དོན་ལ་དཔྱད་པ་གཉིས་ལས། དང་པོ་ལ་དགག་གཞག་གཉིས་ལས། དང་པོ་ནི། ལོ་ཆེན་ན་རེ། རྗེས་ཐོབ་དག་པ་འཇིག་རྟེན་པའི་སྒོམ་ལམ་ལ་སྒྲུབ་པ་སྒོམ་ལམ་དང་། མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱི་སྒོམ་ལམ་ལ་རྣམ་དག་སྒོམ་ལམ་དུ་འཇོག་དགོས་ཏེ། རྒྱུད་བླར། རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུ་ནི་ངེས་ཐོབ་པ། །དེ་ནི་རྗེས་ལ་ཐོབ་པ་ཡི། །ཡེ་ཤེས་འབྲས་བུ་ཡིན་པར་བསྟན། །ཞེས་དང་། ཆུ་མཚོ་སོགས་བཞིན་འདོད་ཆགས་སོགས། །གློ་བུར་ཉོན་མོངས་དག་པ་ནི། །མདོར་ན་མི་རྟོག་ཡེ་ཤེས་ཀྱི། །འབྲས་བུ་ཡིན་པར་རབ་ཏུ་བསྟན། །ཞེས་གསུངས་པའི་ཕྱིར། དེས་ན་ས་གཉིས་པ་ནས་ས་བཅུ་པའི་བར་གྱི་མཉམ་གཞག་རྣམ་པར་མི་རྟོགས་པའི་ཡེ་ཤེས་ནི་རྣམ་དག་སྒོམ་ལམ་དངོས་ཡིན་པས་སངས་རྒྱས་རྟེན་དང་ཞེས་སོགས་ཀྱིས་དེའི་རྒྱུ་བསྟན། འབྲས་བུ་དག་པ་ཞེས་སོགས་ཀྱིས་དེའི་ཡུལ་རང་བཞིན་རྣམ་དག་གི་ཆོས་ཉིད་བསྟན། ཉོན་མོངས་ཤེས་བྱ་ཞེས་སོགས་ཀྱིས་དེའི་འབྲས་བུ་བསྟན། ས་དགུ་ལ་ནི་ཞེས་སོགས་ཀྱིས་དེའི་དབྱེ་བ་བསྟན། དེ་ལ་ཀླན་ཀ་ཞེས་སོགས་ཀྱིས་དེའི་མཚན་ཉིད་བསྟན་པ་ཡིན་ནོ། །གསུང་ངོ་། །མི་འཐད་དེ། སྒྲུབ་པ་སྒོམ་ལམ་སྔོན་དུ་མ་སོང་བའི་རྣམ་དག་སྒོམ་ལམ་ཡོད་པར་ཐལ། ས་གཉིས་པའི་རྗེས་ཐོབ་སྔོན་དུ་མ་སོང་བའི་ས་གཉིས་པའི་མཉམ་གཞག་ཡོད་པའི་ཕྱིར། ཁྱབ་པ་ཁས། འདོད་ན། འབྲས་བུ་དག་པ་ཞེས་སོགས་ཀྱི་གཞུང་དེས་རྣམ་དག་སྒོམ་ལམ་མ་བསྟན་པར་ཐལ་ལོ། །གཞན་ཡང་། ཤེས་སྒྲིབ་སྤོང་བྱེད་ཀྱི་སྒོམ་ལམ་ཡིན་ན་རྗེས་ཐོབ་ཡིན་དགོས་པར་ཐལ། རྒྱུད་བླ་ལས། མཉམ་གཞག་གིས་ཉོན་སྒྲིབ་སྤོང་བ་དང་། རྗེས་ཐོབ་ཀྱིས་ཤེས་སྒྲིབ་སྤོང་བར་གསུང་བའི་ཕྱིར། ཁྱབ་པ་ཁས། གཞན་ཡང་ལམ་ཤེས་འཆད་པའི་སྐབས་ནས་བསྟན་པའི་ཐེག་ཆེན་གྱི་སྒོམ་ལམ་ལྔ་པོ་གང་གིས་ཀྱང་མ་བསྡུས་པའི་ས་གཉིས་པ་ཡན་ཆད་ཀྱི་སྒོམ་ལམ་གཅིག་ཡོད་པར་ཐལ། ས་གཉིས་པའི་རྣམ་གྲོལ་ལམ་དེ་དེ་ལྔ་པོ་གང་གིས་ཀྱང་མ་བསྡུས་པའི་ཕྱིར། རྟགས་ཁས་བླངས་ཏེ། མོས་བསྔོ་རྗེས་སུ་ཡི་རང་གསུམ་པོ་གང་རུང་མིན་པ་གང་ཞིག སྒྲུབ་པ་སྒོམ་ལམ་ཡང་མིན། རྣམ་དག་སྒོམ་ལམ་ཡང་མ་ཡིན་པའི་ཕྱིར། རྟགས་ཕྱི་མ་གཉིས་ཁས་བླངས་ཏེ། རིམ་བཞིན་རྗེས་ཐོབ་མིན་པའི་ཕྱིར་དང་། ངོས་སྐལ་གྱི་སྒྲིབ་པའི་དངོས་གཉེན་མ་ཡིན་པའི་ཕྱིར། ཁྱབ་པ་ཁས། རྣམ་དག་སྒོམ་ལམ་གྱི་འབྲས་བུ་ཉན་ཐོས་རང་རྒྱལ་བྱང་སེམས་སངས་རྒྱས་ཀྱི་རྣམ་དག་བཞིར་ངེས་པར་ཐལ། ཉོན་མོངས་ཤེས་བྱ་ལམ་གསུམ་གྱི། །ཞེས་པའི་གཞུང་དེས་རྣམ་དག་སྒོམ་ལམ་གྱི་འབྲས་བུ་བསྟན་པའི་ཕྱིར། དེས་ན་རྒྱུད་བླ་དང་རྒྱན་ལས། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གྱི་ཐ་སྙད་མ་གསུངས་ཤིང་། རྗེས་ཐོབ་ཀྱིས་ཡོན་ཏན་སྒྲུབ་པ་དང་། མཉམ་གཞག་གིས་ཉེས་པ་སེལ་བར་བྱེད་པ་ཙམ་གསུངས་ཀྱང་། དེ་དང་འདི་དོན་མི་གཅིག་སྟེ། དེར་ནི། ཐེག་ཆེན་གྱི་སྒོམ་ལམ་ཐམས་ཅད་མཉམ་རྗེས་གཉིས་སུ་ཕྱེ་བའི་སྐབས་ཡིན་ལ། འདིར་ནི་རྗེས་ཐོབ་ལ་མོས་བསྔོ་རྗེས་སུ་ཡི་རང་གསུམ་བསྟན་ཟིན་ནས་མཉམ་གཞག་ལ་སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས་སུ་ཕྱེ་བའི་སྐབས་ཡིན་པའི་ཕྱིར། ཨར་ན་རེ། འབྲས་བུ་དག་པ་ཞེས་སོགས་ཀྱི་གཞུང་གིས་རང་བཞིན་རྣམ་དག་བསྟན་པ་མ་ཡིན་པར་ཐལ། འགྲེལ་པར། བདག་ཏུ་མངོན་པར་ཞེན་པ་ལ་སོགས་པ་བྲལ་བས་རབ་ཏུ་ཕྱེ་བ་ཉིད་ཀྱིས་ཞེས་གསུངས་པའི་ཕྱིར་ཞེས་ལོ་ཙཱ་བའི་ལུགས་བཀག་ནས། རང་ལུགས་ལ། འབྲས་བུ་དག་པ་ཞེས་སོགས་ཀྱི་གློ་བུར་རྣམ་དག་དངོས་སུ་བསྟན། ཉོན་མོངས་ཤེས་བྱ་ཞེས་སོགས་ཀྱིས་གློ་བུར་རྣམ་དག་གི་དབྱེ་བ་བསྟན་པས་ན། འབྲས་བུ་དག་པ་ཞེས་སོགས་ཀྱི་སྐབས་ནས་བསྟན་པའི་རྣམ་གྲོལ་ལམ་དེ་ལ་ཉན་ཐོས་ལ་འབྲས་བུ་བཞིས་བསྡུས་པའི་རྣམ་གྲོལ་ལམ་བཞི། རང་རྒྱལ་ཅིག་ཆར་བར་ངེས་པས་རྒྱུན་ཞུགས་དང་དགྲ་བཅོམ་གྱི་རྣམ་གྲོལ་ལམ་གཉིས། བྱང་སེམས་ལ་ས་བཅུའི་རྣམ་གྲོལ་ལམ་བཅུ། སངས་རྒྱས་ཀྱི་རྣམ་གྲོལ་ལམ་གཅིག་སྟེ་བཅུ་བདུན་དུ་ཡོད་པ་ཡིན་ཞེས་གསུང་ངོ་། །འབྲས་བུ་དག་པ་ཞེས་སོགས་ཀྱི་སྐབས་སུ་རྣམ་གྲོལ་ལམ་བཅུ་བདུན་དངོས་སུ་བསྟན་པ་མིན་པར་ཐལ། དེའི་སྐབས་ནས་དངོས་བསྟན་གྱི་རྣམ་གྲོལ་ལམ་དེ་ཡིན་ན་རྣམ་དག་སྒོམ་ལམ་ཡིན་དགོས་པའི་ཕྱིར་ཏེ། དེ་ཡི་ངོ་བོ་ཉིད་མཆོག་ཉིད། །ཅེས་པའི་སྐབས་ནས་དངོས་བསྟན་གྱི་བར་ཆད་མེད་ལམ་ཡིན་ན་སྒྲུབ་པ་སྒོམ་ལམ་ཡིན་དགོས་པའི་ཕྱིར། དེ་ལ་ཁ་ཅིག་ན་རེ། དེའི་སྐབས་སུ་རྣམ་གྲོལ་ལམ་བཅུ་བདུན་དངོས་སུ་བསྟན་པར་ཐལ། ཉོན་མོངས་ཤེས་བྱ་ཞེས་སོགས་ཀྱི་སྐབས་སུ་རྣམ་གྲོལ་ལམ་བཅུ་བདུན་དངོས་སུ་བསྟན་པའི་ཕྱིར་ཞེ་ན། མ་ཁྱབ་སྟེ། ས་དགུ་ལ་ནི་ཞེས་པའི་སྐབས་སུ་འཕགས་རྒྱུད་ཀྱི་བར་ཆད་མེད་ལམ་ཐམས་ཅད་དངོས་སུ་བསྟན་པར་ཐལ། ཉོན་མོངས་ཤེས་བྱ་ཞེས་པའི་སྐབས་སུ་འཕགས་རྒྱུད་ཀྱི་རྣམ་གྲོལ་ལམ་ཐམས་ཅད་དངོས་སུ་བསྟན་པའི་ཕྱིར། རྟགས་ཁྱབ་ཁས། སྔ་མའི་གཏན་ཚིགས་ཀྱང་མ་གྲུབ་སྟེ། ཉན་ཐོས་ཀྱི་འབྲས་བུ་དང་པོ་གསུམ་གྱིས་བསྡུས་པའི་རྣམ་གྲོལ་ལམ་དེ་ཉོན་མོངས་ཉམས་ཕྱིར། ཉན་ཐོས་རྣམས་ཀྱི་དག །ཅེས་པའི་གཞུང་གིས་དངོས་སུ་བསྟན་པའི་རྣམ་གྲོལ་ལམ་མིན་པའི་ཕྱིར། མ་གྲུབ་ན། དེ་ཆོས་ཅན། ཉོན་སྒྲིབ་སྤངས་པའི་རྣམ་གྲོལ་ལམ་དུ་ཐལ། མ་གྲུབ་པ་དེའི་ཕྱིར། རང་རྒྱལ་ཅིག་ཅར་བར་ངེས་པའང་མི་འཐད་དེ། བསེ་རུ་ལྟ་བུའི་རང་རྒྱལ་གྱི་རིགས་ཅན་སྦྱོར་ལམ་པ་ཆོས་ཅན། སྲིད་རྩེ་ལ་འདོད་ཆགས་དང་བྲལ་བར་ཐལ། འདོད་པ་ལ་འདོད་ཆགས་དང་བྲལ་བ་གང་ཞིག ཅིག་ཅར་བ་ཡིན་པའི་ཕྱིར། གཉིས་པ་ནི། ས་གཉིས་པ་ནས་ས་བཅུ་པའི་བར་གྱི་རྣམ་གྲོལ་ལམ་རྣམས་རྣམ་དག་སྒོམ་ལམ་དངོས་ཡིན་པས། དེ་འཆད་པ་ལ། སངས་རྒྱས་རྟེན་དང་ཞེས་སོགས་ཀྱིས་དེའི་རྒྱུ་བསྟན། འབྲས་བུ་དག་པ་ཞེས་སོགས་ཀྱིས་དེའི་ངོ་བོ་བསྟན། ཉོན་མོངས་ཤེས་བྱ་ཞེས་སོགས་ཀྱིས་སྤྱིར་རྣམ་དག་ལ་འཕགས་བཞིའི་རྣམ་དག་བཞིར་ཡོད་དོ་ཞེས་ཞར་བྱུང་གི་ཚུལ་གྱིས་བསྟན་གྱི་སྔ་མའི་དབྱེ་བ་བསྟན་པ་ནི་མིན་ནོ། །གཞུང་དེས་རྣམ་དག་དང་པོ་གསུམ་གྱི་སྒྲུབ་བྱེད་དངོས་སུ་བསྟན་ནས། སངས་རྒྱས་ཀྱི་རྣམ་དག་ཤིན་ཏུ་བ་ཡིན་པའི་སྒྲུབ་བྱེད་དངོས་སུ་མ་བསྟན་པས་ས་དགུ་ལ་ནི་ཞེས་སོགས་ཀྱིས་དེའི་སྒྲུབ་བྱེད་དངོས་སུ་བསྟན། དེ་ལ་ཀླན་ཀ་ཞེས་སོགས་ཀྱིས་སྒྲུབ་བྱེད་ལ་ཀླན་ཀ་སྤོང་བ་དེ་བསྟན། འོ་ན་རྣམ་དག་སྒོམ་ལམ་འཆད་པའི་སྐབས་སུ་འཕགས་པ་བཞི་ཆར་གྱི་རྣམ་དག་ཞར་བྱུང་དུ་སྟོན་པའི་རྒྱུ་མཚན་ཅི་ཡིན་ཞེ་ན། སྤྱིར་རྣམ་དག་ཙམ་འཕགས་པ་བཞི་ཆར་ལ་ཡོད་ཀྱང་། མི་འདྲ་བའི་ཁྱད་པར་འདི་ལྟར་ཡིན་ནོ་ཞེས་བསྟན་པའི་ཆེད་ཡིན་ནོ། །གཉིས་པ་ལ། དགག་གཞག་གཉིས་ལས། དང་པོ་ནི། ཨར་ན་རེ། སྔར་བཤད་པའི་རྣམ་གྲོལ་ལམ་བཅུ་བདུན་ཆོས་ཅན། ཁྱོད་རང་གི་ངོས་སྐལ་གྱི་དྲི་མས་རྣམ་པར་དག་པ་ན། ཁྱོད་ཀྱི་ཡུལ་གཟུགས་སོགས་ཀྱང་རང་རང་གི་ངོས་སྐལ་གྱི་དྲི་མས་རྣམ་པར་དག་པ་ཡིན་ཏེ། དེ་ལྟ་བུའི་དག་པ་གཉིས་པོ་དེ་དོན་གྱི་སྟེང་དུ་ཐ་མི་དད་ཅིང་། ཚད་མས་ཀྱང་སོ་སོར་བཅད་དུ་མེད་པའི་ཕྱིར་ཞེ་ན། ཤེས་བྱ་ཐམས་ཅད་དྲི་མས་རྣམ་པར་དག་པར་ཐལ། རྣམ་མཁྱེན་དྲི་མས་རྣམ་པར་དག་པ་ཡིན་པའི་ཕྱིར། ཁྱབ་པ་ཁས། ཁ་ཅིག ས་གཉིས་པའི་རྣམ་གྲོལ་ལམ་ཆོས་ཅན། ཁྱོད་དྲི་མ་བདེན་གྲུབ་ཀྱིས་རྣམ་པར་དག་པ་ན། ཁྱོད་ཀྱི་ཡུལ་གཟུགས་སོགས་ཀྱང་དེས་རྣམ་པར་དག་པ་ཡིན་ཏེ། དེ་ལྟ་བུའི་དག་པ་གཉིས་པོ་དེ་ངོ་བོའི་སྒོ་ནས་ཐ་མི་དད་ཅིང་། ཚད་མས་ཀྱང་སོ་སོར་བཅད་དུ་མེད་པའི་ཕྱིར། ཞེས་དང་། དར་ཊཱིཀ་པ་ན་རེ། སངས་རྒྱས་ཀྱི་ཡེ་ཤེས་ཆོས་ཅན། ཁྱོད་རང་རྒྱུད་ལྡན་གྱི་གང་ཟག་གིས་སྤངས་པའི་དྲི་མས་རྣམ་པར་དག་པ་ན། ཁྱོད་ཀྱི་ཡུལ་གཟུགས་སོགས་ཀྱང་ཁྱོད་རྒྱུད་ལྡན་གྱི་གང་ཟག་གིས་སྤངས་པའི་དྲི་མས་རྣམ་པར་དག་པ་ཡིན་ཏེ། ཁྱོད་དེས་རྣམ་པར་དག་པ་གང་ཞིག ཁྱོད་དང་ཁྱོད་ཀྱི་ཡུལ་གཟུགས་སོགས་དེས་དག་མ་དག་གིས་ཐ་དད་པ་དོན་སྟེང་ན་ཡོད་པ་མིན་ཞིང་། ཚད་མས་ཀྱང་སོ་སོར་བཅད་དུ་མེད་པའི་ཕྱིར་ཞེས་ཟེར། དང་པོ་ལ་ས་གཉིས་པའི་རྣམ་གྲོལ་ལམ་ཆོས་ཅན། རྒྱལ་སྲས་ཀྱི་རྣམ་དག་ཡིན་ཏེ། ཐེག་པ་གསུམ་གྱི་ལམ་གྱི་དྲི་མ་བདེན་གྲུབ་ཀྱིས་དག་པའི་རྣམ་གྲོལ་ལམ་ཡིན་པའི་ཕྱིར་ཞེས་པའི་སྦྱོར་བ་དེ། རྒྱལ་སྲས་རྣམས་ཀྱི་དག་པ་སྟེ། །ཞེས་པའི་གཞུང་གི་དོན་སྦྱོར་ཡིན་པར་ཐལ། གང་གི་སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཉན་ཐོས་དགྲ་བཅོམ་པའི་རྣམ་གྲོལ་ལམ་ཆོས་ཅན། དེར་ཐལ། དེའི་ཕྱིར། སྦྱོར་བ་ཕྱི་མ་ལ་འབྲས་བུ་དག་པ་ཞེས་སོགས་ཀྱི་གཞུང་འདི་རྣམ་དག་སྒོམ་ལམ་གཙོ་བོར་སྟོན་བྱེད་ཀྱི་གཞུང་མིན་པར་ཐལ། སྐབས་འདིར་སངས་རྒྱས་ཀྱི་ཡེ་ཤེས་ཆོས་ཅན་དུ་འཛིན་རིགས་པའི་ཕྱིར། གཉིས་པ་ནི། ས་གཉིས་པའི་རྣམ་གྲོལ་ལམ་ཆོས་ཅན། རང་རྒྱུ་བར་ཆད་མེད་ལམ་གྱིས་བསལ་ཟིན་པའི་དྲི་མས་རྣམ་པར་དག་པ་ན། ཁྱོད་ཀྱི་ཡུལ་གཟུགས་སོགས་ཀྱི་ཆོས་ཉིད་མཐོང་བ་ལའང་དེས་རྣམ་པར་དག་པ་ཡིན་ཏེ། ཁྱོད་དང་ཁྱོད་ཀྱི་ཡུལ་གཟུགས་སོགས་ཀྱི་ཆོས་ཉིད་མཐོང་བ་ལ་དྲི་མས་དག་པའི་དག་པ་གཉིས་པོ་དེ་རང་མཚན་ལ་ངོ་བོའི་སྒོ་ནས་ཐ་མི་དད་ཅིང་། སྤྱི་མཚན་ལ་རང་གིས་སོ་སོར་བཅད་དུ་མེད་པའི་ཕྱིར། ཉོན་མོངས་ཤེས་བྱ་ལམ་གསུམ་གྱི། །ཞེས་པའི་སྐབས་སུ། ཁ་ཅིག ཉན་ཐོས་དགྲ་བཅོམ་པའི་རྣམ་གྲོལ་ལམ་ཆོས་ཅན། ཉན་ཐོས་ཀྱི་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་ལས་གྲོལ་བའི་ཉན་ཐོས་ཀྱི་རྣམ་གྲོལ་ལམ་ཡིན་པའི་ཕྱིར། རང་རྒྱལ་དགྲ་བཅོམ་པའི་རྒྱུད་ཀྱི་རྣམ་གྲོལ་ལམ་ཆོས་ཅན། རང་རྒྱལ་གྱི་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཤེས་སྒྲིབ་གཟུང་རྟོག་ལས་གྲོལ་བའི་རང་རྒྱལ་གྱི་རྣམ་གྲོལ་ལམ་ཡིན་པའི་ཕྱིར། ས་གཉིས་པའི་རྣམ་གྲོལ་ལམ་ཆོས་ཅན། བྱང་སེམས་ཀྱི་རྣམ་དག་ཡིན་ཏེ། ཐེག་པ་གསུམ་གྱི་ལམ་གྱི་སྒྲིབ་པ་གསུམ་ལས་གྲོལ་བའི་བྱང་སེམས་ཀྱི་རྣམ་གྲོལ་ལམ་ཡིན་པའི་ཕྱིར་ཞེ་ན། ཉན་ཐོས་ཀྱི་མཐོང་ལམ་རྣམ་གྲོལ་ལམ་ཆོས་ཅན། དེར་ཐལ། དེའི་ཕྱིར། འདོད་ན། ཉོན་སྒྲིབ་སྤངས་པའི་རྣམ་དག་ཏུ་ཐལ། སྐབས་འདིར་བསྟན་གྱི་ཉན་ཐོས་ཀྱི་རྣམ་དག་ཡིན་པའི་ཕྱིར། གཉིས་པ་ལ། རང་རྒྱལ་གྱི་རྣམ་དག་ཡིན་ན་རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཤེས་སྒྲིབ་གཟུང་རྟོག་ལས་གྲོལ་བས་ཁྱབ་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཅིག་ཆར་བའི་རྒྱུན་ཞུགས་རང་སངས་རྒྱས་སུ་གྱུར་པའི་རང་སངས་རྒྱས་ཀྱི་རྣམ་གྲོལ་ལམ་ཆོས་ཅན། དེར་ཐལ། དེའི་ཕྱིར། འདོད་ན། ཅིག་ཆར་བའི་རྒྱུན་ཞུགས་འབྲས་གནས་དེས་གཟུང་བ་ཆོས་ཀྱི་བདག་མེད་རྟོགས་པར་ཐལ་ལོ། །གསུམ་པ་ལ། དེ་ཆོས་ཅན། རྟགས་དེ་མི་འཐད་པར་ཐལ། ཐེག་ཆེན་གྱི་ལམ་གྱི་སྒྲིབ་པ་ལས་མ་གྲོལ་བའི་ཕྱིར། ཁ་ཅིག ས་གཉིས་པའི་རྣམ་གྲོལ་ལམ་ཆོས་ཅན། རྒྱལ་སྲས་ཀྱི་རྣམ་དག་ཡིན་ཏེ། ཐེག་པ་གསུམ་གྱི་ལམ་གྱི་སྒྲིབ་པ་རགས་པ་གསུམ་ལས་གྲོལ་བའི་བྱང་སེམས་ཀྱི་རྣམ་གྲོལ་ལམ་ཡིན་པའི་ཕྱིར་ཞེ་ན། ཐེག་ཆེན་གྱི་མཐོང་ལམ་རྣམ་གྲོལ་ལམ་ཆོས་ཅན། དེར་ཐལ། དེའི་ཕྱིར། འདོད་ན། རྣམ་དག་སྒོམ་ལམ་དུ་ཐལ། སྐབས་འདིར་བསྟན་གྱི་རྒྱལ་སྲས་ཀྱི་རྣམ་དག་གང་ཞིག རྣམ་གྲོལ་ལམ་ཡིན་པའི་ཕྱིར། ས་དགུ་ལ་ནི་དང་། དེ་ལ་ཀླན་ཀ་ཞེས་པའི་སྐབས་སུ་འཕགས་གྲོལ་གྱི་བཞེད་པ་དང་། སློབ་དཔོན་གྱི་བཞེད་པ་གཉིས་ལས། དང་པོ་ནི། གཞུང་སྔ་མས་ཐེག་ཆེན་སྒོམ་ལམ་དགུ་པོ་སྒོམ་སྤང་དགུའི་གཉེན་པོར་བསྟན་པ་ལ། སྤང་བྱ་སྒོམ་སྤང་དགུ་གྲུབ་ན་མ་དག་གཞན་དབང་བདེན་པར་གྲུབ་པར་འགྱུར་ཞིང་། གཉེན་པོ་སྒོམ་ལམ་དགུ་གྲུབ་ན་དག་པ་གཞན་དབང་བདེན་པར་གྲུབ་པར་འགྱུར་རོ་ཞེ་ན། སྐྱོན་མེད་དེ། དེ་ལྟ་བུའི་སྤང་གཉེན་གྱི་རིམ་པ་ཐ་སྙད་ཙམ་དུ་ཡིན་གྱི། དོན་དམ་པར་ནི་མིན་ཞེས་སྟོན་པ་ནི། མདོ་ལས། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྣམ་པ་ཐམས་ཅད་མཁྱེན་པ་ཉིད་ལ་གནོད་པར་མི་བགྱིད། དམན་པར་མི་བགྱིད་ལགས་སོ་ཞེས་གསུངས་སོ། །འོ་ན་སྤང་གཉེན་དོན་དམ་པར་མ་གྲུབ་ན། བྱང་ཆུབ་སེམས་དཔས་ཚོགས་གཉིས་ལ་འབད་པ་བྱས་པ་དོན་མེད་པར་འགྱུར་རོ་ཞེ་ན། དོན་དམ་དུ་འདོད་པ་དང་། ཐ་སྙད་དུ་མ་ཁྱབ་པ་ཞེས་སྟོན་པ་ནི། མདོ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་གང་འགའ་ཡང་ཡོངས་སུ་འཛིན་པར་མི་བགྱིད་ལགས་སོ་ཞེས་གསུངས་སོ། །ཡང་བྱང་ཆུབ་སེམས་དཔས་དོན་དམ་པར་ཚོགས་གཉིས་ལ་འབད་པ་བྱས་པ་དོན་མེད་ན། ཐོབ་པ་དང་མངོན་པར་རྟོགས་པ་གང་ཡང་མེད་པར་འགྱུར་རོ་ཞེ་ན། དོན་དམ་དུ་འདོད་པ་དང་། ཀུན་རྫོབ་ཏུ་མ་ཁྱབ་པའི་ལན་འདེབས་པ་ནི། མདོ་ལས། བཅོམ་ལྡན་འདས་གཉིས་རྣམ་པར་དག་པ་ནི་ཐོབ་པ་དང་མངོན་པར་རྟོགས་པ་མ་མཆིས་སོ། །ཞེས་དེ་ལྟར་ཀླན་ཀའི་རིམ་པ་གསུམ་དང་། ལན་རིམ་པ་གསུམ་ཚིགས་བཅད་དུ་བསྡེབས་པ་ནི། དེ་ལ་ཀླན་ཀ་སྤངས་པ་ཡིས། །ཞེས་སོགས་སོ། །གཉིས་པ་ནི། ས་དགུ་ལ་ནི་ཞེས་སོགས་ཀྱི་སྐབས་སུ་སྤང་བྱ་ཆེ་རིམ་ནས་འགག་པ་དང་། གཉེན་པོ་ཆུང་རིམ་ནས་སྐྱེ་བར་ཁས་བླངས་པ་ལ། སྤང་གཉེན་གྱི་རིམ་པ་དེ་མི་འཐད་པར་ཐལ། གཉེན་པོ་ཆུང་ངུས་སྤང་བྱ་ཆེན་པོ་སེལ་མི་ནུས་པའི་ཕྱིར་དང་། སྤང་བྱ་ཆུང་ངུ་སྤོང་བ་ལ་གཉེན་པོ་ཆེན་པོ་མི་དགོས་པའི་ཕྱིར་ཞེ་ན། སྐྱོན་མེད་དེ། གོས་ལ་ཆགས་པའི་དྲི་མ་རགས་པ་སེལ་བ་ལ་བཙོ་ལག་མཁན་གྱིས་འབད་པ་ཆུང་ངུས་ཆོག་ལ། ཕྲ་མོ་སེལ་བ་ལ་བཙོ་ལག་མཁན་ཆེ་ཐད་དུ་འབད་པར་དཔེས་འཐད་པར་གྲུབ་པའི་ཕྱིར། ཡུམ་དོན་རང་གསལ་ལས་སྐབས་གཉིས་པའི་དཀའ་བའི་གནས་རྣམ་པར་བཤད་ཟིན་ཏོ།། །།
སྐབས་གསུམ་པ་གཞི་ཤེས་ཀྱི་དཀའ་བའི་གནས་རྣམ་པར་བཤད་པ།
དམིགས་མེད་ཐུགས་རྗེས་འཁོར་བ་མི་གཏོང་ཞིང་། །གཞི་ལམ་འབྲས་བུའི་ཆོས་ལ་མཚན་འཛིན་གྱི། །དྲི་མ་བསལ་བས་འབྲས་ཡུམ་སྒྲུབ་མཛད་པའི། །གཞི་ཀུན་ཤེས་པའི་རྒྱལ་ཡུམ་དེ་ལ་འདུད། །གཞི་ཐམས་ཅད་ཡོངས་སུ་ཤེས་པ་མེད་པར་ལམ་ལེགས་པར། ཞེས་པའི་སྐབས་སུ། ཁ་ཅིག་ན་རེ། ལམ་ཤེས་ཀྱི་འོག་ཏུ་གཞི་ཤེས་འཆད་པའི་རྒྱུ་མཚན་ཡོད་དེ། ལམ་ཤེས་སྐྱེ་བ་ལ་སྐབས་གསུམ་པར་བསྟན་པའི་གཞི་ཤེས་དེ་ངེས་པར་སྔོན་དུ་འགྲོ་དགོས་པའི་ཕྱིར་ཏེ། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ན་ཐེག་ཆེན་སེམས་བསྐྱེད་ཀྱིས་ཟིན་དགོས་ཤིང་། དེ་ལ་སེམས་ཅན་ལ་དམིགས་པའི་སྙིང་རྗེ་ཆེན་པོ་སྔོན་དུ་འགྲོ་དགོས་ལ། དེ་ལ་འཁོར་བའི་ཉེས་དམིགས་མཐོང་བའི་སྐྱེས་བུ་འབྲིང་གི་ལམ་སྔོན་དུ་འགྲོ་དགོས་པའི་ཕྱིར་ཞེས་ཟེར་ན། རྩ་བའི་གཏན་ཚིགས་དེ་མི་འཐད་པར་ཐལ། ལམ་ཤེས་སྐྱེ་བ་ལ་གཉེན་པོ་གཞི་ཤེས་ཀྱང་ངེས་པར་སྔོན་དུ་འགྲོ་མི་དགོས། མི་མཐུན་ཕྱོགས་ཀྱི་གཞི་ཤེས་ཀྱང་ངེས་པར་སྔོན་དུ་འགྲོ་མི་དགོས་པའི་ཕྱིར། དང་པོ་མ་གྲུབ་ན། ཐེག་ཆེན་གྱི་སྦྱོར་ལམ་གྱི་གནས་སྐབས་ན་གཉེན་པོའི་གཞི་ཤེས་ཡོད་པར་ཐལ། མ་གྲུབ་པ་དེའི་ཕྱིར། གཞན་ཡང་ལམ་ཤེས་སྐྱེ་བ་ལ་ལམ་ཤེས་ངེས་པར་སྔོན་དུ་འགྲོ་དགོས་པར་ཐལ། མ་གྲུབ་པ་གང་ཞིག གཉེན་པོ་གཞི་ཤེས་ཡིན་ན་ལམ་ཤེས་ཡིན་དགོས་པའི་ཕྱིར་རོ། །གཉིས་པ་མ་གྲུབ་ན། ལམ་ཤེས་ཡིན་ན་དམན་ལམ་སྔོན་སོང་ཡིན་དགོས་པར་ཐལ་ལོ། །གཞན་ཡང་། འཁོར་བའི་ཉེས་དམིགས་མཐོང་བའི་སྐྱེས་བུ་འབྲིང་གི་ལམ་དེ་ཡིན་ན་ཐེག་དམན་གྱི་ལམ་ཡིན་དགོས་པར་ཐལ། རྩ་བའི་རྟགས་སྒྲུབ་ཀྱི་སྐབས་སུ་ཁྱབ་པ་ཡོད་པའི་ཕྱིར། འདོད་ན། བྱང་འཕགས་ཡིན་ན་དམན་ལམ་སྔོན་སོང་ཡིན་དགོས་པར་ཐལ། འདོད་པ་གང་ཞིག ལམ་ཤེས་སྐྱེ་བ་ལ་འཁོར་བའི་ཉེས་དམིགས་མཐོང་བའི་སྐྱེས་བུ་འབྲིང་གི་ལམ་དེ་ངེས་པར་སྔོན་དུ་འགྲོ་དགོས་པའི་ཕྱིར། རང་ལུགས་ནི། གཞི་ཐམས་ཅད་ཡོངས་སུ་ཤེས་པ་ནི། མཚན་འཛིན་མི་མཐུན་ཕྱོགས་དང་སྤྲོས་བྲལ་རྟོགས་པའི་ཡེ་ཤེས་གཉེན་པོ་ཡིན་མིན་གྱི་ཁྱད་པར་ཤེས་པ་ཡིན་ལ། དེ་མེད་པར་ལམ་ལེགས་པར་ཡོངས་སུ་ཤེས་པ་ནི་ལམ་གསུམ་སྐྱེ་མེད་ཙམ་དུ་ཤེས་པ་མིན་པར་ལམ་གསུམ་ལ་མཚན་མར་འཛིན་པའི་དྲི་མ་དང་བྲལ་བའི་སྒོ་ནས་ཤེས་པ་ཡིན་པས། དེ་མེད་ཅེས་པའི་དོན་ཏེ་ལམ་ལེགས་པར་ཡོངས་སུ་ཤེས་པ་ཞེས་པའི་ནུས་པའང་ཐོན་ཞིང་། གནད་འདི་ཤེས་ན་ཉན་རང་གིས་ཆོས་ཀྱི་བདག་མེད་རྟོགས་མ་རྟོགས་ཀྱི་ཁྱད་པར་དང་། སྐབས་གསུམ་པའི་གཞུང་གི་དོན་རྣམས་རང་གྲོལ་དུ་ཤེས་པར་འགྱུར་ཏེ། ཁོ་བོ་ལ་ནི་དེ་ཡོད་དོ། །ཚུ་རོལ་ཕ་རོལ་མཐའ་ལ་མིན། །ཞེས་པའི་སྐབས་སུ། དགག་གཞག་གཉིས་ཀྱི་དང་པོ་ལ། ཁ་ཅིག་ན་རེ། ཐེག་ཆེན་གྱི་མཐོང་ལམ་ཆོས་ཅན། སྲིད་ཞི་ལ་མི་གནས་པའི་གཞི་ཤེས་ཡིན་ཏེ། དུས་གསུམ་མཉམ་ཉིད་དུ་མངོན་སུམ་རྟོགས་པའི་བྱང་འཕགས་ཀྱི་མཁྱེན་པ་ཡིན་པའི་ཕྱིར་ཞེས་ཟེར་བ་ལ། གཞན་དག་ན་རེ། དེ་ཆོས་ཅན། དམ་བཅའ་དེ་མིན་པར་ཐལ། ཞི་བ་ལ་གནས་པའི་གཞི་ཤེས་ཡིན་པའི་ཕྱིར་ཏེ། མྱང་འདས་ལ་གནས་པའི་གཞི་ཤེས་ཡིན་པའི་ཕྱིར་ཏེ། ཉོན་སྒྲིབ་སྤངས་པའི་མྱང་འདས་ལ་གནས་པའི་གཞི་ཤེས་ཡིན་པའི་ཕྱིར། མ་གྲུབ་ན། དེར་ཐལ། བྱང་སེམས་མཐོང་ལམ་པ་དེ་ཉོན་སྒྲིབ་ཟད་པར་སྤངས་པའི་གང་ཟག་ཡིན་པའི་ཕྱིར། ཡང་རྩ་བའི་གཏན་ཚིགས་དེ་མི་འཐད་པར་ཐལ། དུས་གསུམ་མཉམ་ཉིད་ཡིན་པ་མི་སྲིད་པའི་ཕྱིར་ཏེ། དུས་གསུམ་པོ་དེ་སྔ་ཕྱི་རིམ་བཞིན་དུ་འབྱུང་བ་ཡིན་པའི་ཕྱིར་ཞེས་ཟེར། དང་པོ་ལ། ཐེག་ཆེན་མཐོང་ལམ་པ་དེ་ཉོན་སྒྲིབ་སྤངས་པའི་མྱང་འདས་ཀྱི་མཐའ་ལ་གནས་པའི་གང་ཟག་ཏུ་ཐལ། དེ་ཉོན་སྒྲིབ་ཟད་པར་སྤངས་པའི་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། ཞི་བའི་མཐའ་ལ་གནས་པའི་གང་ཟག་ཏུ་ཐལ། འདོད་པ་དེའི་ཕྱིར། འདོད་ན། སྙིང་རྗེས་ཞི་བའི་མཐའ་འགོག་པའི་གང་ཟག་མིན་པར་ཐལ། འདོད་པ་དེའི་ཕྱིར། གཞན་ཡང་། མི་གནས་པའི་མྱང་འདས་གཞི་མ་གྲུབ་པར་ཐལ། སངས་རྒྱས་ཀྱི་ཡེ་ཤེས་དེ་སྲིད་ཞི་གང་རུང་ལ་གནས་པའི་ཕྱིར། རྟགས་ཁས་བླངས་ཏེ། དེ་ཞི་བ་ལ་གནས་པའི་ཕྱིར། ཕྱི་མ་ལ། ས་བརྒྱད་པའི་ཡེ་ཤེས་དེ་སྲིད་ཞི་མཉམ་ཉིད་ཀྱི་སྦྱོར་བ་མིན་པར་ཐལ། སྲིད་ཞི་མཉམ་ཉིད་ཡིན་པ་མི་སྲིད་པའི་ཕྱིར་ཏེ། སྲིད་པ་དེ་སྐྱོན་གྱི་རང་བཞིན་དང་། ཞི་བ་དེ་ཡོན་ཏན་གྱི་རང་བཞིན་ཡིན་པའི་ཕྱིར། རིམ་བཞིན་ཁས་བླངས་སོ། །དར་ཊཱིཀ་པ་ན་རེ། སྐབས་འདིར་སྲིད་ཞི་ལ་མི་གནས་པའི་ལམ་ཤེས་ཞེས་པའི་ཐ་སྙད་འཐད་ལ། སྲིད་ཞི་ལ་མི་གནས་པའི་གཞི་ཤེས་ཞེས་པའི་ཐ་སྙད་མི་འཐད་དེ། གཞུང་འདི་སྐབས་གཉིས་པར་ཐེག་ཆེན་གྱི་མཐོང་ལམ་དང་སྒོམ་ལམ་གཉིས་པོ་སྲིད་ཞི་འགོག་བྱེད་དུ་བསྟན་པ་དེ་འཆད་བྱེད་ཡིན་པའི་ཕྱིར་ཞེས་ཟེར་རོ། །འོ་ན་ཐེག་དམན་གྱི་གཞི་ཤེས་ལ་ཀུན་ཤེས་པ་ཉིད་ཀྱི་སྐབས་ལས་ལྡོག་སྟེ་ཞེས་པའི་ཐ་སྙད་མི་འཐད་པར་ཐལ། སྐབས་འདིར་དངོས་བསྟན་གྱི་ཤེར་ཕྱིན་ལ་ཀུན་ཤེས་པ་ཉིད་ཅེས་པའི་ཐ་སྙད་མི་འཐད་པའི་ཕྱིར། འདོད་ན། ཀུན་ཤེས་པ་ཉིད་ཀྱི་སྐབས་ལས་ལྡོག་སྟེ་ཞེས་པའི་གཞུང་དང་འགལ་ལོ། །ཡང་། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཀྱི་གཞུང་འདི་སྐབས་གསུམ་གྱི་ནང་ནས་ལམ་ཤེས་སྟོན་བྱེད་ཀྱི་གཞུང་ཡིན་ལ། གཞི་ཤེས་སྟོན་བྱེད་ཀྱི་གཞུང་མིན་པའི་ཁྱད་པར་འཐད་པར་ཐལ། དམ་བཅའ་དེའི་ཕྱིར། གཞན་ཡང་། ལམ་ཤེས་ཡིན་ན་གཞི་ཤེས་ཀྱི་ཐ་སྙད་མི་འཐད་པས་ཁྱབ་པར་ཐལ། ཁྱོད་ཀྱི་དམ་བཅའ་སྒྲུབ་བྱེད་ལ་ཁྱབ་པ་ཡོད་པའི་ཕྱིར། འདོད་ན། བྱང་འཕགས་ཀྱི་རྒྱུད་ཀྱི་གཞི་ཤེས་ཆོས་ཅན། དེར་ཐལ། དེའི་ཕྱིར། འདོད་ན། ཁྱོད་ལ་དེ་འཐད་པར་ཐལ། ཁྱོད་དེ་དངོས་ཡིན་པའི་ཕྱིར། ཡང་ཕྱོགས་སྔ་སྨྲ་བ་པོ་ན་རེ། སྐབས་འདིར་བསྟན་གྱི་སྲིད་མཐའ་འགོག་པའི་ཤེས་རབ་དེས་སྟོང་ཉིད་མངོན་སུམ་མ་རྟོགས་ཏེ། དེས་སྙིང་རྗེ་སྒོམ་པར་འཕགས་སེང་གཉིས་ཀས་བཤད་པའི་ཕྱིར་ཟེར་ན། ཐེག་ཆེན་གྱི་མཉམ་གཞག་ཡེ་ཤེས་དེས་སྟོང་ཉིད་མངོན་སུམ་མ་རྟོགས་པར་ཐལ། དེས་བྱམས་སོགས་ཚད་མེད་སྒོམ་པར་རྒྱན་རྩ་འགྲེལ་ལས་བཤད་པའི་ཕྱིར། གཞན་ཡང་སྐབས་འདིར་བསྟན་གྱི་སྲིད་མཐའ་འགོག་བྱེད་ཀྱི་ཤེས་རབ་དེས་དུས་གསུམ་ཀུན་རྫོབ་ཏུ་མཉམ་ཉིད་དུ་མངོན་སུམ་རྟོགས་པར་ཐལ། དེས་དུས་གསུམ་རང་བཞིན་མེད་པར་མངོན་སུམ་དུ་མ་རྟོགས་པའི་ཕྱིར། འདོད་ན། མིན་པར་ཐལ། དུས་གསུམ་ཀུན་རྫོབ་ཏུ་མཉམ་པ་ཉིད་དུ་མངོན་སུམ་རྟོགས་པ་མེད་པའི་ཕྱིར། གཉིས་པ་ནི། གཞུང་འདིས་མཚན་འཛིན་དང་འཛིན་སྟངས་དངོས་སུ་འགལ་བའི་གཞི་ཤེས་དེ་དངོས་སུ་བསྟན་པ་ཡིན་ཏེ། འཁོར་འདས་བར་གསུམ་ལ་མི་གནས་ཤིང་དུས་གསུམ་ལ་དེ་དང་དེར་འཛིན་པའི་མཚན་འཛིན་མེད་པའི་གཞི་ཤེས་དེ་དངོས་སུ་བསྟན་པའི་ཕྱིར། ཤུགས་ལ་མཚན་འཛིན་དང་འཛིན་སྟངས་དངོས་སུ་མི་འགལ་བའི་ཐེག་དམན་གྱི་གཞི་ཤེས་བསྟན་པ་ཡིན་ནོ། །ཀུན་ཤེས་པ་ཉིད་ཀྱི་སྐབས་ལས། །ཞེས་པའི་སྐབས་སུ། ཁ་ཅིག་ན་རེ། ཉན་ཐོས་ཀྱི་མཐོང་ལམ་ཆོས་ཅན། སྲིད་ཞི་ལ་གནས་པའི་གཞི་ཤེས་ཡིན་ཏེ། དུས་གསུམ་མཉམ་ཉིད་དུ་མངོན་སུམ་མ་རྟོགས་པའི་ཐེག་དམན་འཕགས་པའི་མཁྱེན་པ་ཡིན་པའི་ཕྱིར། ཡང་དེ་ཆོས་ཅན། དེ་ཡིན་ཏེ། སྲིད་པ་ལ་དོར་བྱ་དང་ཞི་བ་ལ་བླང་བྱར་འཛིན་པའི་གཞི་ཤེས་ཡིན་པའི་ཕྱིར་ཞེས་ཟེར་རོ། །དང་པོ་ལ་ཉན་ཐོས་ཀྱི་མཐོང་ལམ་ཆོས་ཅན། ཞི་བ་ལ་གནས་པར་ཐལ། དམ་བཅའ་དེའི་ཕྱིར། འདོད་ན། མྱང་འདས་ལ་གནས་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། ཁྱོད་ཀྱིས་མྱང་འདས་མ་ཐོབ་པའི་ཕྱིར་ཏེ། ཐེག་དམན་སློབ་པའི་མཁྱེན་པ་ཡིན་པའི་ཕྱིར། ཕྱི་མ་ལ། ཉན་ཐོས་དགྲ་བཅོམ་པའི་རྒྱུད་ཀྱི་གཞི་ཤེས་ཆོས་ཅན། སྲིད་པ་ལ་གནས་པར་ཐལ། དམ་བཅའ་དེའི་ཕྱིར། འདོད་མི་ནུས་ཏེ། སྲིད་པ་ཟད་པར་སྤངས་པའི་ཐེག་དམན་གྱི་མཁྱེན་པ་ཡིན་པའི་ཕྱིར། སྐབས་འདིར་ཉན་རང་གིས་ཆོས་ཀྱི་བདག་མེད་རྟོགས་མ་རྟོགས་དཔྱད་པ་ལ། རྟོགས་པའི་ལུགས་དགག དེ་ཡི་ཡན་ལག་ཏུ་ལོག་རྟོག་གཞན་དགག འགལ་མེད་ཀྱི་གནད་ངོས་གཟུང་བ་དང་གསུམ་ལས། དང་པོ་ལ། ཕྱོགས་སྔ་མ་བརྗོད་པ་དང་། དེ་དགག་པ་གཉིས་ལས། དང་པོ་ནི། ཙོང་ཁ་པ་ན་རེ། ཉན་རང་གིས་ཆོས་ཀྱི་བདག་མེད་རྟོགས་ཏེ། གཞན་དུ་ན། ཉན་རང་དགྲ་བཅོམ་པ་ཆོས་ཅན། ཁམས་གསུམ་ན་སྤྱོད་པའི་ཉོན་མོངས་པ་མ་སྤངས་པར་ཐལ། ཆོས་ཀྱི་བདག་མེད་མ་རྟོགས་པའི་ཕྱིར། ཡང་ས་དང་པོ་ལ་གནས་པའི་བྱང་སེམས་ཀྱིས་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ། སྔ་མས་དེ་མངོན་སུམ་རྟོགས། ཕྱི་མས་དེ་མངོན་སུམ་མ་རྟོགས་པའི་ཕྱིར། འདོད་ན། སྐྱེས་མ་ཐག་པའི་རྒྱལ་བུ་གཞོན་ནུ་དེས་རང་གི་བློན་པོའི་ཚོགས་རྒན་པོ་རྣམས་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ་ལོ། །གཞན་ཡང་། ཉན་རང་དགྲ་བཅོམ་པ་ཆོས་ཅན། རང་རྒྱུད་ཀྱི་ཕུང་པོ་ལ་དམིགས་ནས་ངར་འཛིན་སྐྱེ་བར་ཐལ། རང་རྒྱུད་ཀྱི་ཕུང་པོ་ལ་བདེན་པར་འཛིན་པའི་བདེན་འཛིན་མ་སྤངས་པའི་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། ངར་འཛིན་གྱི་དབང་གིས་ལས་བསགས། དེའི་དབང་གིས་འཁོར་བར་སྐྱེ་བ་ཡིན་པར་ཐལ། འདོད་པ་དེའི་ཕྱིར། སྔ་ཕྱི་གཉིས་ཀ་ལ་ཁྱབ་པ་ཡོད་དེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །ཞེས་སོགས་གསུངས་པའི་ཕྱིར། གཞན་ཡང་དེ་ཆོས་ཅན། གང་ཟག་གི་བདག་མེད་མཚན་ཉིད་ཡོངས་སུ་རྫོགས་པའི་ཚུལ་གྱིས་མ་རྟོགས་པར་ཐལ། གདགས་གཞི་ཕུང་པོ་བདེན་མེད་དུ་མ་རྟོགས་པའི་ཕྱིར། ཡང་དེ་ཆོས་ཅན། ཕུང་པོ་ལ་བདེན་པར་འཛིན་པའི་བདེན་འཛིན་མ་སྤངས་པར་ཐལ། ཕུང་པོ་བདེན་མེད་དུ་མ་རྟོགས་པའི་ཕྱིར། འདོད་ན། དེ་སྤངས་པར་ཐལ། ཉོན་སྒྲིབ་སྤངས་པའི་ཕྱིར་ཞེས་གསུངས་སོ། །གཉིས་པ་ནི། དང་པོ་ལ། ཁམས་གསུམ་ན་སྤྱོད་པའི་ཉོན་མོངས་པ་དེ་ཆོས་ཀྱི་བདག་འཛིན་གྱི་རྩ་བ་ཅན་ཡིན་པར་ཐལ། ཐལ་བ་དང་པོ་ལ་ཁྱབ་འགྲེལ་ཡོད་པའི་ཕྱིར། འདོད་ན། དེ་ཆོས་ཅན། ཤེས་སྒྲིབ་ཏུ་ཐལ། རང་གི་བསྒྲིབ་བྱ་ལྷག་མཐོང་ལ་སྒྲིབ་པའི་སྒྲིབ་པ་གང་ཞིག ཆོས་ཀྱི་བདག་འཛིན་གྱི་རྩ་བ་ཅན་ཡིན་པའི་ཕྱིར། ཁྱབ་སྟེ། ལང་གཤེགས་ལས། ཉོན་མོངས་པའི་སྒྲིབ་པ་ནི་གང་ཟག་གི་བདག་ཏུ་འཛིན་པའི་རྩ་བ་ཅན་ཡིན་ལ། ཤེས་བྱའི་སྒྲིབ་པ་ནི་ཆོས་ཀྱི་བདག་ཏུ་འཛིན་པའི་རྩ་བ་ཅན་ཡིན་ནོ་ཞེས་གསུངས་པའི་ཕྱིར། གཉིས་པ་ལ། ས་དྲུག་པའི་བྱང་སེམས་དེས་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ། ས་དྲུག་པ་ལ་གནས་པའི་བྱང་སེམས་ཀྱིས་སྤྲོས་པ་མཐའ་དག་བཀག་པའི་འགོག་པ་ལ་སྙོམས་པར་འཇུག་ནུས། ཉན་རང་དགྲ་བཅོམ་པས་དེ་མི་ནུས་པའི་ཕྱིར། ཡང་ས་དང་པོའི་བྱང་སེམས་དེས་ཀྱང་དེ་བློའི་སྟོབས་ཀྱིས་ཟིན་གྱིས་གནོན་ནུས་པར་ཐལ། སྔ་མ་དེས་མཐོང་སྤང་གཟུང་འཛིན་གྱི་རྣམ་པར་རྟོགས་པ་བརྒྱ་རྩ་བརྒྱད་ཀྱི་ས་བོན་གྱི་དངོས་གཉེན་ཐོབ་ལ། ཕྱི་མས་དེ་མ་ཐོབ་པའི་ཕྱིར། གཉིས་ཆར་གྱི་ཁྱབ་པ་ཁས། མདོ་སྡེ་ས་བཅུ་པ་ལས། ཟིལ་གྱིས་གནོན་མི་ནུས་པར་གསུངས་པ་ནི་སྐད་ཅིག་རེ་རེ་ལ་འགོག་པ་ལ་འཇུག་ལྡང་བྱེད་མི་ནུས་པས་ས་དང་པོ་ནས་ཉན་རང་གི་ས་ལས་འདས་པ་ཡིན་ཀྱང་། མཚན་འཛིན་མཐའ་དག་དངོས་སུ་སྤོང་བའི་གཉེན་པོ་མ་ཐོབ་པས་ཤིན་ཏུ་འདས་པ་མིན་ཞེས་པའི་དོན་ཏོ། །གསུམ་པ་ལ། ཉན་རང་དགྲ་བཅོམ་པ་ཆོས་ཅན། རང་རྒྱུད་ཀྱི་ཚོར་བའི་དབང་གིས་སྲེད་པ་སྐྱེ་བ་ཡིན་པར་ཐལ། ཚོར་བ་མ་སྤངས་པའི་གང་ཟག་ཡིན་པའི་ཕྱིར། ཁྱབ་སྟེ། སྤྱོད་འཇུག་ལས། ཚོར་བའི་དབང་གིས་སྲེད་པ་སྐྱེ། །ཞེས་གསུངས་པའི་ཕྱིར། ཡང་དེ་ཆོས་ཅན། རང་རྒྱུད་ཀྱི་རྣམ་རྟོག་གི་དབང་གིས་ལས་ཉོན་སྐྱེ་བ་ཡིན་པར་ཐལ། རྣམ་རྟོག་རྒྱུད་ལྡན་གྱི་གང་ཟག་ཡིན་པའི་ཕྱིར། ཁྱབ་སྟེ། རྩ་ཤེར་ལས། ལས་དང་ཉོན་མོངས་རྣམ་རྟོག་ལས། །ཞེས་གསུངས་པའི་ཕྱིར། ཁྱབ་པ་རིམ་པ་ལྟར་སོང་། ཐལ་འགྱུར་བཞི་པའི་ལན་ནི། སྐབས་གཉིས་པར་བསྟན་ཟིན་ཞིང་། གཞན་ཡང་ཉན་ཐོས་ཀྱི་མཐོང་ལམ་དེ་ཐེག་པ་གསུམ་ཆར་གྱི་རྟོགས་རིགས་ཚང་བའི་མཐོང་ལམ་དུ་ཐལ། དེས་འཛིན་པ་ཆོས་ཀྱི་བདག་མེད་རྟོགས་པའི་ཕྱིར། རྟགས་ཁས། འདོད་ན། ཐེག་ཆེན་གྱི་སྦྱོར་ལམ་དེ་ཐེག་པ་གསུམ་ཆར་གྱི་རྟོགས་རིགས་ཚང་བའི་མཐོང་ལམ་གྱི་རྒྱུ་བྱེད་པའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་དུ་འཕགས་པ་མིན་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། ཐེག་པ་གསུམ་ཆར་འཐོབ་པའི་རྒྱུ་ཞེས་གསུངས་པའི་ཕྱིར། ཡང་ཉན་ཐོས་འཕགས་པ་དེས་བདེ་གཤེགས་སྙིང་པོ་མངོན་སུམ་མཐོང་བར་ཐལ། དེས་འཛིན་པ་ཆོས་ཀྱི་བདག་མེད་རྟོགས་པའི་ཕྱིར། འདོད་ན། དེ་དེ་བཞིན་གཤེགས་པའི་སྙིང་པོ་ལྟ་བ་ལ་མིག་དང་མི་ལྡན་པའི་གང་ཟག་བཞིའི་ནང་ཚན་མིན་པར་ཐལ། འདོད་པ་དེའི་ཕྱིར། འདོད་ན། རྒྱུད་བླའི་འགྲེལ་པར། གང་ཟག་བཞི་པོ་འདི་དག་ནི་དེ་བཞིན་གཤེགས་པའི་སྙིང་པོ་ལྟ་བ་ལ་མིག་དང་མི་ལྡན་པར་ཤེས་པར་བྱ་སྟེ། སོ་སོ་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའོ་ཞེས་པའི་གཞུང་དང་འགལ་ལོ། །དེ་ལ་ཁོ་ན་རེ། ཉན་ཐོས་དང་རང་སངས་རྒྱས་སོ་སོ་སྐྱེ་བོ་ལ་དགོངས་པ་ཡིན་གྱི། དེའི་འཕགས་པ་རྣམས་ཀྱིས་དེ་བཞིན་གཤེགས་པའི་སྙིང་པོ་མངོན་སུམ་དུ་རྟོགས་པ་ཡིན་ནོ་ཞེ་ན། ཉན་ཐོས་མཐོང་ལམ་པ་ཆོས་ཅན། ལས་ཉོན་གྱི་དབང་གིས་འཁོར་བར་སྐྱེ་བ་མི་ལེན་པར་ཐལ། བདེ་གཤེགས་སྙིང་པོ་མངོན་སུམ་དུ་མཐོང་བའི་ཕྱིར། ཁྱབ་སྟེ། རྒྱུད་བླ་ལས། ཇི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། །ཞེས་གསུངས་པའི་ཕྱིར། ཡང་ཉན་ཐོས་ཀྱི་མཐོང་ལམ་ཆོས་ཅན། འཁོར་འདས་ལ་བླང་དོར་གྱི་མཚན་མར་གཟུང་བའི་མཚན་འཛིན་དང་འཛིན་སྟངས་དངོས་སུ་འགལ་བར་ཐལ། ཐེག་ཆེན་གྱི་མཐོང་ལམ་དེ་དང་འཛིན་སྟངས་དངོས་སུ་འགལ་བ་གང་ཞིག ཁྱོད་དང་དེ་གཉིས་འཛིན་པ་ཆོས་ཀྱི་བདག་མེད་རྟོགས་པའི་མཐོང་ལམ་དུ་མཚུངས་པའི་ཕྱིར། ཡང་དེ་ཆོས་ཅན། དུས་རྣམས་མཉམ་པ་ཉིད་ཤེས་ཕྱིར། །ཞེས་པའི་སྐབས་ནས་དངོས་བསྟན་གྱི་གཞི་ཤེས་སུ་ཐལ། བྱང་སེམས་ཀྱི་མཐོང་ལམ་དེ་དེ་ཡིན་པ་གང་ཞིག ཁྱོད་དང་དེ་གཉིས་འཛིན་པ་ཆོས་ཀྱི་བདག་མེད་རྟོགས་པའི་མཐོང་ལམ་དུ་མཚུངས་པའི་ཕྱིར། འདོད་ན། གཉེན་པོ་གཞི་ཤེས་སུ་ཐལ་ལོ། །ཡང་དེ་ཆོས་ཅན། རྟོག་པ་ཉི་ཚེ་བ་མིན་པར་ཐལ། བྱང་སེམས་འཕགས་པས་རྟོགས་པའི་འཛིན་པ་ཆོས་ཀྱི་བདག་མེད་དེ་ཁྱོད་ཀྱིས་ཀྱང་རྟོགས་པའི་ཕྱིར། འདོད་ན། ཉི་ཚེ་བ་དང་སྣ་ཚོགས་ཉིད། །ཅེས་པའི་གཞུང་དང་འགལ་ལོ། །ཡང་དེ་ཆོས་ཅན། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་སྐབས་ནས་དངོས་བསྟན་གྱི་གཞི་ཤེས་སུ་ཐལ། གཟུགས་སོགས་ཀྱི་ཆོས་ཉིད་དང་། དུས་གསུམ་གྱི་ཆོས་དང་། སྦྱིན་སོགས་ཀྱི་སྤྱོད་པ་རྣམས་ལ་ཞེན་སྤྱོད་དངོས་སུ་འགོག་ནུས་པའི་གཞི་ཤེས་ཡིན་པའི་ཕྱིར། མ་གྲུབ་ན། ཁས་བླངས་ཏེ། ས་དང་པོའི་བྱང་སེམས་དེས་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ། སྔ་མའི་རྒྱུད་ཀྱི་གཞི་ཤེས་དེས་དེ་དངོས་སུ་འགོག་ནུས་པ་གང་ཞིག ཕྱི་མའི་རྒྱུད་ཀྱི་གཞི་ཤེས་དེས་དེ་དངོས་སུ་འགོག་མི་ནུས་པའི་ཕྱིར། ལྔ་པ་ལ། རྫས་དང་བཏགས་པའི་རྟེན་ཅན་གྱི། །ཞེས་པའི་སྐབས་ནས་དངོས་བསྟན་གྱི་རྫས་འཛིན་རྟོགས་པ་ཆོས་ཅན། ཉོན་སྒྲིབ་ཏུ་ཐལ། བདེན་འཛིན་ཡིན་པའི་ཕྱིར། འདོད་ན། ཐེག་ཆེན་སྦྱོར་ལམ་གྱི་ཁྱད་པར་བྱེད་ཆོས་སུ་གྱུར་པའི་རྟོགས་པ་བཞི་པོ་དེ་བྱང་སེམས་ལམ་གྱི་སྤང་བྱའི་གཙོ་བོ་མིན་པར་ཐལ། འདོད་པ་དེའི་ཕྱིར། གཉིས་པ་ནི། ཁོ་ན་རེ། བདེན་འཛིན་ཡིན་ན་ཉོན་སྒྲིབ་ཡིན་པས་ཁྱབ་ཀྱང་། དབང་ཤེས་ལྔ་ལ་ཡུལ་རང་ངོས་ནས་བདེན་པར་སྣང་བའི་བདེན་སྣང་གི་ཆ་དེ་ཤེས་སྒྲིབ་ཡིན་པ་དེ་དབུ་མ་ཐལ་འགྱུར་བའི་ཐུན་མོང་མ་ཡིན་པའི་ལུགས་ཡིན་ཞིང་། ས་བདུན་པ་མན་ཆད་དུ་ཤེས་སྒྲིབ་ཅུང་ཟད་ཀྱང་མི་སྤོང་སྟེ། དེར་བདེན་འཛིན་གྱི་ས་བོན་བག་ཆགས་དང་བཅས་པ་ཡོད་པའི་ཕྱིར། དེས་ན་ཤེས་སྒྲིབ་སྤོང་བའི་མ་མཐའི་ས་མཚམས་ནི་ས་བརྒྱད་པ་ནས་འཇོག་ཅེས་ཟེར་རོ། །འདི་ལ་ལན་གྱིས་བཟློག་པར་མི་ནུས་པའི་ཐལ་འགྱུར་ཆེན་པོ་བཅོ་བརྒྱད་འབྱུང་བས་རིམ་པ་བཞིན་ཉོན་ཅིག བྱང་སེམས་མཐོང་ལམ་པ་ཆོས་ཅན། རང་རྒྱུད་ཀྱི་ཕུང་པོ་ལ་དམིགས་ནས་ངར་འཛིན་སྐྱེ་བར་ཐལ། རང་རྒྱུད་ཀྱི་ཕུང་པོ་ལ་བདེན་པར་འཛིན་པའི་བདེན་འཛིན་མ་སྤངས་པའི་གང་ཟག་ཡིན་པའི་ཕྱིར། རྟགས་ཁྱབ་ཁས། འདོད་ན། སྔར་ལྟར་རོ། ༡ ས་དགུ་ལ་ནི་ཆེན་པོ་ཡི། །ཞེས་པས་སྒོམ་སྤང་ཉོན་སྒྲིབ་ཀྱི་གཉེན་པོར་གྱུར་པའི་སྒོམ་ལམ་གྱི་དབྱེ་བ་བསྟན་པར་ཐལ། དེས་སྒོམ་སྤང་གི་དེ་བསྟན་པ་གང་ཞིག ཤེས་སྒྲིབ་ཀྱི་དེར་གྱུར་པའི་སྒོམ་ལམ་ཆུང་ངུའི་ཆུང་ངུ་སོགས་མི་སྲིད་པའི་ཕྱིར། ཕྱི་ཟུར་ཁས། འདོད་ན། སངས་རྒྱས་ཀྱི་རྣམ་དག་དེ་ཉོན་སྒྲིབ་སྤངས་པའི་ཆ་ནས་ཤིན་ཏུ་བར་འཇོག་རིགས་པར་ཐལ། གཞུང་དེས་དེ་ཤིན་ཏུ་བ་ཡིན་པའི་སྒྲུབ་བྱེད་བསྟན་པ་གང་ཞིག འདོད་པ་དེའི་ཕྱིར། ༢ ཡང་། དེ་ནི་རྒྱུན་ཞུགས་ཡིན་པའི་ཕྱིར། །ཞེས་པས་སྒོམ་སྤངས་ཉོན་སྒྲིབ་ཁོ་ནའི་གཉེན་པོར་གྱུར་པའི་སྒོམ་ལམ་གྱི་དབྱེ་བ་བསྟན་པར་ཐལ། རྟགས་སྔར་ལྟར་རོ། །འདོད་ན། བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི་རྣམ་པར་རྟོག་པའོ་ཞེས་པའི་སྐབས་ཀྱི་རྣམ་པར་རྟོག་པ་དེ་ཉོན་མོངས་པ་ལ་བྱེད་རིགས་པར་ཐལ། འདོད་པ་དེའི་ཕྱིར། ༣ ཡང་བྱང་སེམས་འཕགས་པས་ཉོན་སྒྲིབ་ཆེད་དུ་གཉེར་ནས་སྤོང་བར་ཐལ། ས་བདུན་པ་མན་ཆད་ཀྱི་བར་ཆད་མེད་ལམ་ཡིན་ན་ཉོན་སྒྲིབ་ཁོ་ནའི་གཉེན་པོ་ཡིན་དགོས་པའི་ཕྱིར། རྟགས་ཁས། ༤ ཡང་བྱང་སེམས་འཕགས་པས་ས་བཅུ་རྣམས་སུ་རང་རང་གི་ངོས་སྐལ་གྱི་ཤེས་སྒྲིབ་སྤོང་བ་མེད་པར་ཐལ། ས་བདུན་པ་མན་ཆད་དུ་རང་རང་གི་ངོས་སྐལ་གྱི་ཤེས་སྒྲིབ་སྤོང་བ་མེད་པའི་ཕྱིར། འདོད་ན། ཀུན་བཏུས་ལས། བྱང་ཆུབ་སེམས་དཔའ་རྣམས་ནི་ས་བཅུ་རྣམས་སུ་སྒོམ་པའི་ལམ་ལ་ཤེས་བྱའི་སྒྲིབ་པའི་གཉེན་པོར་ལམ་སྒོམ་གྱི་ཉོན་མོངས་པའི་སྒྲིབ་པའི་གཉེན་པོར་ནི་མ་ཡིན་ཞེས་གསུངས་པ་དང་འགལ་ལོ། ༥ །ཡང་ས་གཉིས་པའི་བར་ཆད་མེད་ལམ་ཆོས་ཅན། ཐེག་དམན་གྱི་བར་ཆད་མེད་ལམ་དུ་ཐལ། རང་གི་ངོས་སྐལ་གྱི་ཉོན་སྒྲིབ་ཁོ་ནའི་དངོས་གཉེན་དུ་གྱུར་པའི་བར་ཆད་མེད་ལམ་ཡིན་པའི་ཕྱིར། རྟགས་ཁས། ༦ ཡང་སྒོམ་སྤང་གཟུང་འཛིན་གྱི་རྣམ་པར་རྟོགས་པ་བཞི་པོ་དེ་ཤེས་སྒྲིབ་ཡིན་ནམ་ཉོན་སྒྲིབ་ཡིན། ཕྱི་མ་ལྟར་ན། ཉན་ཐོས་སྒོམ་ལམ་བར་ཆད་མེད་ལམ་དེས་དེའི་དངོས་གཉེན་བྱེད་ནུས་པར་ཐལ། དེ་ཉོན་སྒྲིབ་ཡིན་པའི་ཕྱིར། འདོད་ན། དེ་སྒོམ་ལམ་རྩེ་སྦྱོར་དུ་ཐལ་ལོ། ༧ །གཞན་ཡང་ཉན་ཐོས་དགྲ་བཅོམ་པས་དེ་བཞི་ཟད་པར་སྤངས་པར་ཐལ། དེ་བཞི་ཉོན་སྒྲིབ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ལ་ཐེག་པ་གསུམ་གྱིས་བསྡུས་པའི་ཡོན་ཏན་ཕུན་སུམ་ཚོགས་པ་ཐམས་ཅད་བརྟེན་པར་ཐལ། འདོད་པ་གང་ཞིག དགྲ་བཅོམ་པ་ཡིན་པའི་ཕྱིར། ཁྱབ་སྟེ། ཡམས་ནད་འདི་རྣམས་ཟད་ནས་ནི། །ཞེས་སོགས་གསུངས་པའི་ཕྱིར། ༨ སྔ་མ་ལྟར་ན། སྒོམ་ལམ་རྩེ་སྦྱོར་ཡིན་ན་དག་སའི་ཡེ་ཤེས་ཡིན་དགོས་པར་ཐལ། སྒོམ་སྤང་གཟུང་འཛིན་གྱི་རྣམ་པར་རྟོག་པ་ཡིན་ན། དག་སའི་ཡེ་ཤེས་ཀྱི་སྤངས་བྱ་ཡིན་དགོས་པའི་ཕྱིར། ཁྱབ་སྟེ། སྒོམ་པའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །ཞེས་པའི་གཞུང་འདི་སྒོམ་ལམ་རྩེ་སྦྱོར་སྟོན་བྱེད་ཀྱི་གཞུང་ཡིན་པའི་ཕྱིར། ༩ མཐོང་སྤང་གཟུང་འཛིན་གྱི་རྣམ་པར་རྟོག་པ་དེ་ཤེས་སྒྲིབ་ཡིན་ནམ་ཉོན་སྒྲིབ་ཡིན། དང་པོ་ལྟར་ན། དེ་ཆོས་ཅན། དག་སའི་ཡེ་ཤེས་ཀྱི་སྤང་བྱ་ཡིན་པར་ཐལ། ཤེས་སྒྲིབ་ཡིན་པའི་ཕྱིར། འདོད་ན། སྒོམ་སྤངས་སུ་ཐལ་ལོ། ༡༠ །གཞན་ཡང་། དེ་ཆོས་ཅན། ས་གཉིས་པའི་ཡེ་ཤེས་དེས་ཁྱོད་མ་སྤངས་པར་ཐལ། ཁྱོད་ཤེས་སྒྲིབ་ཡིན་པའི་ཕྱིར། ཁྱབ་པ་ཁས། འདོད་ན། ས་གཉིས་པའི་བྱང་སེམས་སྒོམ་ལམ་པ་ཆོས་ཅན། ཁྱོད་བྱང་སེམས་སྒོམ་ལམ་པ་མིན་པར་ཐལ། འདོད་པ་དེའི་ཕྱིར། ༡༡ ཕྱི་མ་ལྟར་ན། ཉན་ཐོས་ཀྱི་མཐོང་ལམ་བར་ཆད་མེད་ལམ་དེས་དེ་བཞིའི་ས་བོན་དངོས་སུ་སྤོང་ནུས་པར་ཐལ། དེ་བཞི་མཐོང་སྤངས་སུ་གྱུར་པའི་ཉོན་སྒྲིབ་ཡིན་པའི་ཕྱིར། འདོད་ན། དེ་མཐོང་ལམ་རྩེ་སྦྱོར་དུ་ཐལ་ལོ། ༡༢ །ཡང་མཐོང་སྤང་གཟུང་འཛིན་གྱི་རྣམ་པར་རྟོག་པ་རྒྱ་རྩ་བརྒྱད་ཆོས་ཅན། ཐེག་ཆེན་གྱི་མཐོང་ལམ་རྣམ་གྲོལ་ལམ་ལ་གནས་པའི་གང་ཟག་གིས་ཁྱོད་མ་སྤངས་པར་ཐལ། ཁྱོད་ཤེས་སྒྲིབ་ཡིན་པའི་ཕྱིར། ཁྱབ་པ་ཁས། འདོད་ན། དེ་སྐྱེས་ན་འདོད་པ་དང་། གཟུགས་དང་། གཟུགས་མེད་པའི་ཁམས་ཀྱི་དབྱེ་བས། ཞེས་སོགས་ཀྱི་གཞུང་དང་འགལ་ལོ། ༡༣ །ཡང་མཐོང་བའི་ལམ་ཐོབ་པའི་རྣལ་འབྱོར་པ་དེ་ཉོན་མོངས་པ་དང་ཤེས་བྱའི་སྒྲིབ་པའི་འཇིགས་པ་མེད་པའི་ཕྱིར་ཞེས་པའི་སྐབས་ནས་བསྟན་པའི་ཤེས་སྒྲིབ་དེ་ཆོས་ཅན། ཐེག་ཆེན་གྱི་མཐོང་ལམ་ཁྱད་པར་ལམ་ལ་གནས་པའི་བྱང་སེམས་ཀྱིས་ཁྱོད་མ་སྤངས་པར་ཐལ། ཁྱོད་ཤེས་སྒྲིབ་ཡིན་པའི་ཕྱིར། ཁྱབ་པ་ཁས། འདོད་ན། དེ་ལྟ་བུའི་བྱང་སེམས་དེས་སེང་གེ་རྣམ་བསྒྱིངས་ཀྱི་ཏིང་ངེ་འཛིན་མ་ཐོབ་པར་ཐལ། འདོད་པ་དེའི་ཕྱིར། ༡༤ རྒྱུན་ཞུགས་འབྲས་གནས་ཆོས་ཅན། མཐོང་སྤངས་མ་ལུས་པ་སྤངས་པར་ཐལ། མཐོང་སྤངས་སུ་གྱུར་པའི་ཉོན་སྒྲིབ་མ་ལུས་པ་སྤངས་པའི་ཕྱིར། ཁྱབ་པ་ཁས་བླངས་ཏེ། མཐོང་སྤངས་ཡིན་ན་ཉོན་སྒྲིབ་ཡིན་དགོས་པའི་ཕྱིར། རྩ་བར་འདོད་ན། དེ་ཆོས་ཅན། སེང་གེ་རྣམ་བསྒྱིངས་ཀྱི་ཏིང་ངེ་འཛིན་ཐོབ་པར་ཐལ། འདོད་པ་དེའི་ཕྱིར། ༡༥ ཡང་ཉན་ཐོས་དགྲ་བཅོམ་པའི་རྟོགས་པ་སྔོན་སོང་གི་ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། ཟག་མེད་བར་ཆད་མེད་ལམ་མིན་པར་ཐལ། རང་གི་ངོས་སྐལ་གྱི་སྒྲིབ་པ་ཅུང་ཟད་ཀྱང་མི་སྤོང་བའི་ཕྱིར། རྟགས་ཁས་བླངས་ཏེ། རང་གི་ངོས་སྐལ་གྱི་ཉོན་སྒྲིབ་ཅུང་ཟད་ཀྱང་མི་སྤོང་བ་གང་ཞིག རང་གི་ངོས་སྐལ་གྱི་ཤེས་སྒྲིབ་ཅུང་ཟད་ཀྱང་མི་སྤོང་བའི་ཕྱིར། ཕྱི་མ་ཁས་བླངས། ༡༦ ཡང་ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་གྱི་སྦྱོར་ལམ་ནས་ས་བདུན་པའི་བར་དུ་སྒྲིབ་པ་ཅུང་ཟད་ཀྱང་མི་སྤོང་བར་ཐལ། དེ་འདྲའི་སྦྱོར་ལམ་དེས་ཉོན་སྒྲིབ་ཅུང་ཟད་ཀྱང་མི་སྤོང་བ་གང་ཞིག ཤེས་སྒྲིབ་སྤོང་བའི་མ་མཐའི་ས་མཚམས་ས་བརྒྱད་པ་ནས་འཇོག་པའི་ཕྱིར། ༡༧ ཤེས་སྒྲིབ་ཀྱི་ངོས་འཛིན་དེ་ཡང་མི་འཐད་དེ། ཤེས་སྒྲིབ་ཡིན་ན་མངོན་ཞེན་ཅན་གྱི་བློ་མིན་དགོས་པར་ཐལ། དེ་ཡིན་ན་དབང་ཤེས་ལ་ཡུལ་རང་ངོས་ནས་བདེན་པར་སྣང་བ་ཙམ་ཡིན་དགོས་པ་གང་ཞིག དབང་ཤེས་ལ་རང་ཡུལ་ལ་ཞེན་པ་མེད་པའི་ཕྱིར། འདོད་ན། ཤེས་སྒྲིབ་ཡིན་ན་བྱང་སེམས་ལམ་གྱི་སྤང་བྱའི་གཙོ་བོ་མིན་དགོས་པར་ཐལ། འདོད་པ་དེའི་ཕྱིར། ༡༨ སྟོབས་ལྡན་བློ་གྲོས་ཁྲོ་ཆེན་ཁྲོས་ནས་ནི། །དངོས་སྟོབས་རིགས་པའི་ཧཱུྃ་སྒྲ་སྒྲོག་པའི་ཚེ། །ཕས་རྒོལ་ལོག་སྨྲའི་བགེགས་དཔུང་མ་ལུས་པ། །ཁོར་ཡུག་ཆེན་པོའི་ཕ་མཐར་ཅིས་མི་འབྲོས། །བར་སྐབས་ཀྱི་ཚིགས་སུ་བཅད་པའོ། །གསུམ་པ་ནི། བྱམས་པའི་གཞུང་ལས། ཉན་རང་གི་ཆོས་ཀྱི་བདག་མེད་མ་རྟོགས་པའི་རྣམ་གཞག་གསུང་ཞིང་། ཀླུ་སྒྲུབ་ཀྱི་གཞུང་ལས་རྟོགས་པ་ལྟར་གསུངས་པའི་དོན་ལ། ཁ་ཅིག་སྒྲ་ཇི་བཞིན་དུ་བཤད་ནས། དེ་གཉིས་དགོངས་པ་འགལ་བར་འདོད་པ་དང་། འགའ་ཞིག་གཉིས་ཆར་གྱི་ལུགས་ལ་ཆོས་ཀྱི་བདག་མེད་རྟོགས་པས་མི་འགལ་བར་འདོད་པ་དང་། ཊཱི་ཀ་ལས། གཉིས་ཆར་གྱི་ལུགས་ལ་མ་རྟོགས་པས་དགོངས་པ་མི་འགལ་བར་བཞེད་པ་དང་གསུམ་ལས། དང་པོ་ནི། གང་རུང་གཅིག་ལ་སྐུར་བ་འདེབས་པའི་གཞི་ཡིན་པས་རྒྱང་རིང་དུ་དོར་བར་བྱའོ། །གཉིས་པ་ནི། ཆོས་ཀྱི་བདག་དང་། ཆོས་ཀྱི་བདག་འཛིན་གྱི་ངོ་བོ་ངོས་མ་ཟིན་པའི་ནང་མཚན་ཕྱོགས་བཅུར་སྒྲོག་པའོ། །གསུམ་པ་ལའང་སྐྱོན་ཅུང་ཟད་ཅིག་གནས་ན་ཡང་རེ་ཞིག་སྦ་བར་བྱ་སྟེ། ཅིའི་ཕྱིར་ཞེ་ན། རྒྱུ་མཚན་མ་ངེས་པ་དག་གིས་ཀུ་ཅོ་མང་དུ་འདོན་པས་འཇིགས་པའི་ཕྱིར་རོ། །ཁོ་བོ་ནི་གསུང་རབ་ཀྱི་དོན་ལ་འདི་ལྟར་བལྟ་སྟེ། སྤྱིར་ཆོས་ཀྱི་བདག་ཉེར་ལེན་གྱི་ཕུང་པོ་ལྔ་བདེན་པར་གྲུབ་པ་ལ་བྱས་ནས་དེར་འཛིན་པའི་བློ་ཆོས་ཀྱི་བདག་འཛིན་དང་། དེ་སྟོང་པར་རྟོགས་པའི་བློ་ཆོས་ཀྱི་བདག་མེད་རྟོགས་པའི་བློ་ཡིན་པར་འཕགས་པ་ཀླུ་སྒྲུབ་ཡབ་སྲས་བཞེད་ཅིང་། དེའི་ཚེ་ཉན་རང་གིས་ཆོས་ཀྱི་བདག་མེད་རྟོགས་ཏེ། ཉན་རང་གིས་གདགས་གཞི་ཕུང་པོ་བདེན་མེད་དུ་རྟོགས་པའི་ཕྱིར། རིན་ཆེན་ཕྲེང་བ་དང་འཇུག་བ་རྩ་འགྲེལ་གྱི་ལུང་རིགས་རྣམས་ཀྱིས་འདི་ཙམ་ཞིག་སྒྲུབ་པ་ཡིན་གྱི། ཉན་རང་དང་བྱང་འཕགས་ཀྱི་རྟོགས་པ་ཁྱད་པར་མེད་པ་ནི་ཀླུ་སྒྲུབ་ཡབ་སྲས་ཀྱིས་གསུངས་པ་མ་མཐོང་ངོ་། །ཉན་རང་གི་རྟོགས་པ་དེ་ཙམ་ཞིག་ལ་བྱམས་ཆོས་ཀྱི་གནས་སྐབས་སུའང་འགལ་བ་མེད་དེ། ཉན་རང་གིས་བདེན་མེད་མ་རྟོགས་པའི་ལུང་མངོན་རྟོགས་རྒྱན་གྱི་དབུ་ཞབས་གང་དུ་བཙལ་ཡང་མི་རྙེད་པའི་ཕྱིར་དང་། སོ་སོ་སྐྱེ་བོ་འཕགས་དབྱེ་བས། །ཞེས་པའི་གཞུང་སྒྲ་ཇི་བཞིན་དུ་འཆད་ན་བདེན་མེད་རྟོགས་པར་འགྲུབ་པའི་ཕྱིར། འོན་ཀྱང་ཆོས་ཀྱི་བདག་མེད་རྟོགས་པའི་ཐ་སྙད་ནི་མི་བྱེད་དེ། ཆོས་ཀྱི་བདག་ངོས་འཛིན་ཚུལ་མི་འདྲ་བའི་ཕྱིར། འོ་ན་ཇི་ལྟར་ངོས་གཟུང་ཞེ་ན། བདེན་པར་གཟུང་མ་གཟུང་གང་ཡིན་ཀྱང་རུང་སྟེ། འཁོར་གསུམ་དུ་རྣམ་པར་རྟོག་པའི་བློའི་འཛིན་སྟངས་ཀྱི་གཟུང་བྱར་གྱུར་པའི་མཚན་མའི་སྤྲོས་པ་དེ་ལ་ཆོས་ཀྱི་བདག་དང་། དེ་མེད་པ་ལ་ཆོས་ཀྱི་བདག་མེད་པ་དང་། འཁོར་གསུམ་དུ་རྣམ་པར་རྟོག་པའི་བློ་ལ་ཆོས་ཀྱི་བདག་འཛིན་དང་། འཁོར་གསུམ་དུ་རྣམ་པར་མི་རྟོག་པའི་བློ་ལ་ཆོས་ཀྱི་བདག་མེད་རྟོགས་པའི་བློར་བྱེད་པ་ནི་མགོན་པོ་བྱམས་པའི་བཞེད་པ་སྟེ། རྒྱུད་བླར། འཁོར་གསུམ་རྣམ་པར་རྟོགས་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་དང་། སྐབས་དང་པོ་དང་ལྔ་པར་ཡང་ཡུལ་ལ་བཏགས་པ་ཙམ་དུ་མངོན་པར་ཞེན་པའི་བློ་དེ་བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་ཏུ་གསུངས་པའི་ཕྱིར་དང་། སྐབས་གསུམ་པར་ཡང་གཟུགས་སོགས་ཕུང་པོ་སྟོང་ཉིད་ལ་དེར་ཞེན་པའི་བློ་དང་། དུས་གསུམ་པོ་ལ་དེ་དང་དེར་ཞེན་པའི་བློ་དང་། སྦྱིན་སོགས་ལ་སྦྱིན་སོགས་སུ་ཞེན་པའི་བློ་དང་། བྱང་ཆུབ་ཕྱོགས་མཐུན་ལ་ཉམས་ལེན་དུ་ཞེན་པའི་བློ་དང་། དེ་བཞིན་གཤེགས་པ་ལ་སྐྱབས་གནས་སུ་མངོན་པར་ཞེན་པའི་བློ་རྣམས་ཆོས་ཀྱི་བདག་འཛིན་དུ་བྱས་ནས་བྱང་སེམས་ལམ་གྱི་ཐུན་མོང་མིན་པའི་སྤང་བྱར་བཤད་པའི་ཕྱིར། དེ་ལྟ་བུའི་ཆོས་ཀྱི་བདག་མེད་ཉན་རང་གིས་ཅུང་ཟད་ཀྱང་མ་རྟོགས་ཏེ། བྱང་སེམས་ཀྱི་སྦྱོར་མཐོང་སྒོམ་གསུམ་པོ་དེ་དེ་ལྟ་བུའི་ཆོས་ཀྱི་བདག་མེད་རྟོགས་པའི་སྒོ་ནས་ཐེག་དམན་གྱི་ལམ་གསུམ་ཆར་ལས་ཁྱད་པར་དུ་འཕགས་པར་མངོན་རྟོགས་རྒྱན་ལས་ཤིན་ཏུ་གསལ་བར་གསུངས་པའི་ཕྱིར་དང་། མི་མཐུན་ཕྱོགས་ཀྱི་གཞི་ཤེས་དང་། གཉེན་པོ་གཞི་ཤེས་ཀྱི་ཁྱད་པར་ཡང་འདིའི་སྒོ་ནས་འབྱེད་པའི་ཕྱིར་དང་། དེ་ནི་མཚན་མར་དམིགས་སྒོ་ནས། །ཞེས་པ་དང་། ཉི་ཚེ་བ་དང་སྣ་ཚོགས་ཉིད། །ཅེས་སོགས་ཀྱི་གཞུང་རྣམས་ཀྱིས་འདི་ཁོ་ན་སྟོན་པར་སྣང་བའི་ཕྱིར། དེ་ལྟ་བུའི་ཆོས་ཀྱི་བདག་མེད་ཉན་རང་གིས་མ་རྟོགས་པར་འཕགས་པ་ཀླུ་སྒྲུབ་ཡབ་སྲས་ཀྱང་བཞེད་པ་ཡིན་ཏེ། རིན་ཆེན་ཕྲེང་བ་ལས། ཟབ་མོའི་འཁུ་འཕྲིག་ཅན་འཇིགས་པ། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་དང་། སྡིག་དང་བསོད་ནམས་བྱ་བ་འདས། །ཟབ་མོ་བཀོལ་བའི་དོན་དང་ལྡན། །མུ་སྟེགས་གཞན་དང་རང་ཉིད་ཀྱི། །གནས་མིན་སྐྲག་པས་མ་མྱངས་པས། །ཞེས་དང་། འཇུག་པ་ལས། སྦྱིན་པ་སྦྱིན་བྱ་ལེན་པོ་གཏོང་པོས་སྟོང་། །ཞེས་པའི་འགྲེལ་པར། དེ་ནི་བྱང་ཆུབ་སེམས་དཔའ་གནས་སྐབས་མ་ཐོབ་པ་དག་གིས་ཤེས་པར་མི་ནུས་སོ་ཞེས་གསུངས་པའི་ཕྱིར་རོ། །ཀླུ་སྒྲུབ་ཀྱིས་ཕུང་པོ་བདེན་མེད་དུ་རྟོགས་པ་ལ་ཆོས་ཀྱི་བདག་མེད་རྟོགས་པར་བྱས་ནས་ཉན་རང་ལ་དེ་ཡོད་པར་བཤད་པ་དང་། བྱམས་པས་མཚན་མེད་རྟོགས་པ་ལ་ཆོས་ཀྱི་བདག་མེད་རྟོགས་པར་བྱས་ནས་ཉན་རང་ལ་དེ་མེད་པར་བཤད་པའི་རྒྱུ་མཚན་ཅི་ཡིན་ཞེ་ན། སྔ་མས་ནི་ཤེར་ཕྱིན་གྱི་མདོ་ལས། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ་ཞེས་སོགས་ཐེག་པ་གསུམ་ཆར་གྱི་བྱང་ཆུབ་ཀྱི་རྒྱུར་གྱུར་པའི་བདེན་མེད་རྟོགས་པའི་ཤེས་རབ་དེ་རིགས་ཚོགས་ལ་སོགས་པས་གཏན་ལ་འབེབས་པར་མཛད་ལ། དེའི་ཚེ་རང་གི་བསྟན་བཅོས་ལ་རིགས་ཅན་གསུམ་ཀ་འཇུག་པར་བྱ་བའི་ཕྱིར་དུ་རྟོགས་པ་མི་འདྲ་བའི་ཁྱད་པར་གསལ་བར་མ་བཤད་པ་ཡིན་ལ། ཕྱི་མས་ནི་ཤེར་ཕྱིན་གྱི་མདོའི་བརྗོད་བྱ་མངོན་པར་རྟོགས་པ་བརྒྱད་དུ་དྲིལ་ནས་ཐེག་ཆེན་ཐུན་མོང་མིན་པའི་ལམ་གྱི་རྣམ་གཞག་འཆད་པ་ཡིན་ལ། དེའི་ཚེ་རང་གིས་བསྟན་བཅོས་ཀྱིས་གདུལ་བྱ་ཐེག་ཆེན་གྱི་ལམ་ཁོ་ན་ལ་འཇུག་པའི་ཕྱིར་དུ་ལམ་རེ་རེའི་སྐབས་སུའང་ཐེག་དམན་ལས་ཁྱད་ཞུགས་པའི་རྟོགས་པ་རེ་རེ་བཤད་པ་ཡིན་ནོ། །མདོར་ན་ཉན་རང་གིས་ཕུང་པོ་བདེན་མེད་དུ་རྟོགས་པ་ནི་བྱམས་པ་དང་། ཀླུ་སྒྲུབ་གཉིས་ཀའང་བཞེད་ཅིང་། མཚན་མེད་དང་། དམིགས་མེད་དང་། སྤྲོས་བྲལ་མ་རྟོགས་པ་ནི་གཉིས་ཀའང་བཞེད་པ་ཡིན་ནོ། །ཐ་སྙད་མི་མཐུན་པ་ཙམ་གྱིས་དགོངས་པ་མི་མཐུན་པར་ནི་མི་འགྱུར་ཏེ། ཐ་སྙད་ནི་དགོས་པའི་དབང་གིས་བཏགས་པ་ཡིན་ལ། དགོས་པའང་བཤད་ཟིན་ཏོ། །གཞན་ལ་སྐྱོན་བརྗོད་པ་འགག་ཞིག་ནི་ཊཱི་ཀ་གཞིར་བཞག་ནས་བྱས་པ་ཡིན་པས་འདི་དང་འགལ་བར་སེམས་པར་མི་བྱ་སྟེ། འདི་ནི་འཇིག་རྟེན་འདི་ན་ཁོ་བོ་འབའ་ཞིག་གི་སྤྱོད་ཡུལ་ཡིན་པའི་ཕྱིར་རོ། །དེ་ནི་མཚན་མར་དམིགས་སྒོ་ནས། །ཞེས་པའི་སྐབས་སུ་ཁ་ཅིག ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། འབྲས་ཡུམ་ལ་རིང་བའི་གཞི་ཤེས་ཡིན་ཏེ། འབྲས་ཡུམ་སྒྲུབ་པའི་ཐབས་ལ་མི་མཁས་པའི་གཞི་ཤེས་ཡིན་པའི་ཕྱིར་ཏེ། གཞི་ལམ་འབྲས་གསུམ་ལ་མཚན་མར་འཛིན་པའི་གཞི་ཤེས་ཡིན་པའི་ཕྱིར་ཞེ་ན། དེ་ཆོས་ཅན། རང་གི་ངོས་སྐལ་གྱི་གང་ཟག་གི་བདག་འཛིན་གྱི་ས་བོན་དངོས་སུ་སྤོང་མི་ནུས་པར་ཐལ། གཞི་ལམ་འབྲས་གསུམ་ལ་མཚན་མར་འཛིན་པའི་བློ་ཡིན་པའི་ཕྱིར། འདོད་ན། དེ་དངོས་སུ་སྤོང་བའི་སྒོ་ནས་རང་རྒྱུད་ལྡན་གྱི་གང་ཟག་ཉེར་ཞི་གཉིས་སུ་འཁྲིད་པར་བྱེད་པ་མིན་པར་ཐལ། འདོད་པ་དེའི་ཕྱིར། ཡང་དེ་ཆོས་ཅན། སྒྲ་དོན་འདྲེས་འཛིན་གྱི་རྟོག་པར་ཐལ་བ་དང་། སྒྲུབ་པའི་རྣམ་པ་ཅན་དུ་ཐལ། གཞི་ལམ་འབྲས་གསུམ་ལ་མཚན་མར་འཛིན་པའི་བློ་ཡིན་པའི་ཕྱིར། འདོད་མི་ནུས་ཏེ། རྣལ་འབྱོར་མངོན་སུམ་ཡིན་པའི་ཕྱིར་དང་། གང་ཟག་གི་བདག་མེད་འཛིན་སྟངས་ཀྱི་ཡུལ་དུ་བྱེད་པའི་མཁྱེན་པ་ཡིན་པའི་ཕྱིར། རང་ལུགས་ནི། ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། མཚན་འཛིན་གྱིས་བཅིངས་པའི་གཞི་ཤེས་ཡིན་ཏེ། མཉམ་གཞག་ཏུ་མཚན་མེད་མ་རྟོགས་པས་རྗེས་ཐོབ་ཏུ་མཚན་འཛིན་གྱི་སྒྲོ་འདོགས་གཅོད་མི་ནུས་པའི་གཞི་ཤེས་ཡིན་པའི་ཕྱིར། མཚན་འཛིན་དང་ལྡན་བཞིན་པ་མིན་ཏེ། འདི་ནི་རྣལ་འབྱོར་མངོན་སུམ་ཡིན་ལ། མཚན་འཛིན་ནི་སྒྲ་དོན་འདྲེས་འཛིན་གྱི་རྟོག་པ་ཡིན་པའི་ཕྱིར། རྗེས་ཐོབ་ཏུ་མཚན་འཛིན་གྱི་སྒྲོ་འདོགས་གཅོད་མི་ནུས་པའི་དོན་ཡང་། རྗེས་ཐོབ་ཏུ་མཚན་འཛིན་འབྱུང་སྲིད་པ་ཙམ་ལ་བྱེད་པ་ནི་མིན་ཏེ། མ་དག་ས་བདུན་གྱི་རྗེས་ཐོབ་ཏུའང་མཚན་འཛིན་འབྱུང་སྲིད་པའི་ཕྱིར། དེས་ན་ཉན་ཐོས་ཀྱི་གཞི་ཤེས་ནི་མཉམ་གཞག་ཏུ་མཚན་འཛིན་དང་འཛིན་སྟངས་མི་འགལ་བས་རྗེས་ཐོབ་ཏུ་མཚན་མེད་ཀྱི་དོན་ལ་ངེས་ཤེས་འདྲེན་མི་ནུས་ཤིང་། གོམས་པ་མཐར་ཐུག་པའི་ཚེའང་སྤོང་མི་ནུས་པ་ལ་བྱའོ། །དེ་ནི་ཐབས་ལ་མཁས་པ་ཡིས། །ཞེས་པའི་སྐབས་སུ། ཁ་ཅིག ཐེག་ཆེན་མཐོང་ལམ་བར་ཆར་མེད་ལམ་ཆོས་ཅན། འབྲས་ཡུམ་ལ་ཉེ་བའི་གཞི་ཤེས་ཡིན་ཏེ། འབྲས་ཡུམ་སྒྲུབ་པའི་ཐབས་ལ་མཁས་པའི་བྱང་འཕགས་ཀྱི་མངོན་རྟོགས་ཡིན་པའི་ཕྱིར་ཏེ། གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་གྱིས་མ་བཅིངས་པའི་བྱང་འཕགས་ཀྱི་མངོན་རྟོགས་ཡིན་པའི་ཕྱིར་ཞེས་ཟེར། གཞན་དག་ན་རེ། ཐེག་ཆེན་སྒོམ་ལམ་པའི་རྒྱུད་ཀྱི་གང་ཟག་གི་བདག་མེད་མངོན་སུམ་རྟོགས་པའི་རྟོགས་རིགས་ཆོས་ཅན། སྒྲུབ་བྱེད་དང་པོ་དེར་ཐལ། དེའི་ཕྱིར་ཏེ། ཐབས་ཤེས་ཁྱད་པར་ཅན་གྱིས་ཟིན་པའི་བྱང་འཕགས་ཀྱི་མཁྱེན་པ་ཡིན་པའི་ཕྱིར། འདོད་ན། གཉེན་པོ་གཞི་ཤེས་སུ་ཐལ། འདོད་པ་དེའི་ཕྱིར། འདོད་ན། གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་གྱི་གཉེན་པོའི་རིགས་སུ་ཐལ། འདོད་པའི་ཕྱིར། འདོད་ན། ཆོས་ཀྱི་བདག་མེད་རྟོགས་པའི་རྟོགས་རིགས་སུ་ཐལ་ལོ། །ཞེས་པའི་སྐྱོན་བརྗོད་པའང་ཡོད་དོ། །དེ་ནི་ཁྱབ་པར་མེད་དེ། བྱང་སེམས་སྒོམ་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ཆོས་ཅན། ལམ་གསུམ་རང་བཞིན་མེད་པར་རྟོགས་པའི་རྟོགས་རིགས་སུ་ཐལ། ལམ་ཤེས་ཡིན་པའི་ཕྱིར། ཁྱབ་པ་ཁས། འདོད་ན། འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས་སུ་ཐལ་ལོ། །ལུགས་དང་པོའང་མི་འཐད་དེ། བྱང་ཆུབ་སྒྲུབ་པའི་ཐབས་ལ་མཁས་པའི་སྦྱོར་བ་ཡིན་ན་བྱང་ཆུབ་ལ་ཉེ་བའི་སྦྱོར་བ་ཡིན་དགོས་པར་ཐལ། ངག་དོན་ལ་ཁྱབ་པ་ཡོད་པའི་ཕྱིར། འདོད་ན། ཐེག་ཆེན་གྱི་སྦྱོར་ལམ་དྲོད་ཀྱི་ཡེ་ཤེས་ཆོས་ཅན། དེར་ཐལ། དེའི་ཕྱིར། འདོད་ན། འཕགས་རྒྱུད་ཀྱི་མཁྱེན་པ་ཡིན་པར་ཐལ། འདོད་པ་དེའི་ཕྱིར། ཁྱབ་སྟེ། བྱང་ཆུབ་ལ་ཉེ་བའི་སྦྱོར་བའི་མ་མཐའི་ས་མཚམས་ས་དང་པོ་ནས་འཇོག་པ་དེ་འཐད་པའི་ཕྱིར། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་སྐབས་སུ། གཞུང་སྤྱིའི་བསྟན་ཚུལ་དང་། སོ་སོའི་ངག་དོན་ལ་དཔྱད་པ་གཉིས། དང་པོ་ནི། གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་ནི་མི་མཐུན་ཕྱོགས་སུ་འཇོག་པར་བྱེད་པའི་མི་མཐུན་ཕྱོགས་དེ་ཡིན་པས་དེ་དང་བཅས་པའི་གཞི་ཤེས་ལ་མི་མཐུན་ཕྱོགས་ཀྱི་གཞི་ཤེས་དང་། དེ་སྤོང་ནུས་པའི་གཞི་ཤེས་ལ་གཉེན་པོ་གཞི་ཤེས་སུ་འཇོག་པ་ཡིན་ཅིང་། དེ་ལའང་། གཟུགས་སོགས་ཕུང་པོ་སྟོང་ཉིད་དང་། །ཞེས་པས་གཞིའི་ཆོས་ཉིད་ལ་མཚན་མར་འཛིན་པའི་མཚན་འཛིན་དེ་བསྟན། དུས་གསུམ་རྟོགས་པའི་ཆོས་རྣམས་དང་། །ཞེས་པས་གཞིའི་ཆོས་ཅན་ལ་མཚན་མར་འཛིན་པའི་མཚན་འཛིན་དེ་བསྟན། སྦྱིན་སོགས་བྱང་ཆུབ་ཕྱོགས་རྣམས་ལ། །ཞེས་པས་ལམ་ལ་མཚན་མར་འཛིན་པ་དང་། རྒྱལ་ལ་སོགས་ལ་ཆགས་པ་ཕྲ། །ཞེས་པས་འབྲས་བུ་ལ་མཚན་འཛིན་བསྟན། སྦྱིན་ལ་སོགས་ལ་ངར་འཛིན་མེད། །ཅེས་པས་ལམ་ལ་མཚན་མར་འཛིན་པའི་མཚན་འཛིན་གྱི་གཉེན་པོ་བསྟན། ཆོས་རྣམས་རང་བཞིན་གཅིག་པར་ནི། །ཞེས་སོགས་ཀྱིས་འབྲས་བུ་ལ་མཚན་འཛིན་གྱི་གཉེན་པོ་བསྟན་ནོ། །འོ་ན་གཞི་ལ་མཚན་མར་འཛིན་པའི་མཚན་འཛིན་གྱི་གཉེན་པོ་ཅིའི་ཕྱིར་མི་སྟོན་སྙམ་ན། དེ་ནི་གོང་དུ། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཀྱི་སྐབས་སུ། གཉེན་པོ་གཞི་ཤེས་ཀྱི་ངོ་བོ་འཆད་པའི་སྐབས་སུ་བསྟན་ཟིན་པ་ལ་དགོངས་སོ། །གཉིས་པ་ནི། གཞུང་དེའི་སྐབས་སུ། ཁ་ཅིག་ན་རེ། གཞི་ལམ་ལ་བདེན་པར་འཛིན་པའི་བདེན་འཛིན་ཆོས་ཅན། གཉེན་པོ་གཞི་ཤེས་ཀྱི་མི་མཐུན་ཕྱོགས་ཡིན་ཏེ། དེའི་སྤང་བྱ་ཡིན་པའི་ཕྱིར་ཞེ་ན། གཞི་ལམ་ལ་མཚན་མར་འཛིན་པའི་མཚན་འཛིན་ཡིན་ན་དེ་ལ་བདེན་པར་འཛིན་པའི་བདེན་འཛིན་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། བྱང་འཕགས་ཀྱི་རྒྱུད་ལ་གཞི་ལམ་ལ་བདེན་པར་འཛིན་པའི་བདེན་འཛིན་ཡོད་པར་ཐལ། དེའི་རྒྱུད་ལ་དེ་ལ་མཚན་མར་འཛིན་པའི་མཚན་འཛིན་ཡོད་པའི་ཕྱིར། འདོད་མི་ནུས་ཏེ། དེས་བདེན་མེད་མངོན་སུམ་དུ་རྟོགས་ཟིན་པའི་ཕྱིར། རྩར་རྟགས་མ་གྲུབ་ན། དེར་ཐལ། དེའི་རྒྱུད་ལ་གཉེན་པོ་གཞི་ཤེས་ཀྱི་སྤང་བྱར་གྱུར་པའི་མཚན་འཛིན་ཡོད་པའི་ཕྱིར། མ་གྲུབ་ན། གཉེན་པོ་གཞི་ཤེས་ཀྱི་དངོས་ཀྱི་སྤང་བྱར་གྱུར་པའི་མཚན་འཛིན་མ་གྲུབ་པར་ཐལ། བྱང་སེམས་འཕགས་པའི་རྒྱུད་ལའང་དེ་མེད། ཐེག་ཆེན་སོ་སོ་སྐྱེ་བོའི་རྒྱུད་ལའང་དེ་མེད། ཐེག་དམན་གྱི་རྒྱུད་ལའང་དེ་མེད་པའི་ཕྱིར། དང་པོ་དངོས། བར་པ་མ་གྲུབ་ན། དེའི་རྒྱུད་ལ་གཉེན་པོ་གཞི་ཤེས་ཡོད་པར་ཐལ། མ་གྲུབ་པ་དེའི་ཕྱིར། དེ་ལ་ཁོ་ན་རེ། དེའི་རྒྱུད་ལ་ཐེག་ཆེན་གྱི་མཐོང་ལམ་ཡོད་པར་ཐལ། དེའི་རྒྱུད་ལ་དེའི་དངོས་ཀྱི་སྤང་བྱར་གྱུར་པའི་མཐོང་སྤངས་ཀྱི་ས་བོན་ཡོད་པའི་ཕྱིར་ཞེ་ན། ཐེག་ཆེན་གྱི་མཐོང་ལམ་དེས་ཐེག་ཆེན་ཚོགས་ལམ་པའི་རྒྱུད་ཀྱི་མཐོང་སྤངས་ཀྱི་ས་བོན་དེ་དངོས་སུ་སྤོང་བར་ཐལ། དེའི་རྒྱུད་ལ་དེའི་དངོས་ཀྱི་སྤང་བྱར་གྱུར་པའི་མཐོང་སྤངས་ཀྱི་ས་བོན་ཡོད་པའི་ཕྱིར། འདོད་ན། ཐེག་ཆེན་སྦྱོར་ལམ་པའི་རྒྱུད་ལ་མཐོང་སྤངས་ཀྱི་ས་བོན་མེད་པར་ཐལ་ལོ། །རྟགས་ཕྱི་ཟུར་མ་གྲུབ་ན། གཉེན་པོ་གཞི་ཤེས་དེས་ཐེག་དམན་གྱི་རྒྱུད་ཀྱི་མཚན་འཛིན་དངོས་སུ་སྤོང་བར་ཐལ། མ་གྲུབ་པ་དེའི་ཕྱིར། འདོད་ན། དེ་འབད་མེད་དུ་གྲོལ་བར་འགྱུར་རོ། །སྦྱིན་ལ་སོགས་ལ་ངར་འཛིན་མེད། །ཅེས་པའི་ལམ་ལ་མཚན་འཛིན་གྱི་གཉེན་པོའི་སྐབས་སུ། ཁ་ཅིག་ན་རེ། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། ལམ་ལ་མཚན་འཛིན་གྱི་དངོས་གཉེན་ཡིན་ཏེ། ལམ་གྱི་གནས་ཚུལ་ལ་ཞུགས་པའི་བློ་གང་ཞིག དེ་དངོས་སུ་སྤོང་བྱེད་ཡིན་པའི་ཕྱིར། ཡང་དེ་ཆོས་ཅན། ལམ་ལ་མཚན་འཛིན་གྱི་ས་བོན་གྱི་དངོས་གཉེན་ཡིན་ཏེ། དེ་གང་ཞིག དེ་དངོས་སུ་སྤོང་བྱེད་ཡིན་པའི་ཕྱིར་ཞེ་ན། དང་པོ་ལ། དེ་ཆོས་ཅན། ལམ་ལ་མཚན་འཛིན་ལ་དངོས་སུ་གནོད་པ་བྱེད་པའི་སྒོ་ནས་སྤོང་བར་ཐལ། དེའི་དངོས་གཉེན་ཡིན་པའི་ཕྱིར། འདོད་ན། དེ་མིན་པར་ཐལ། ལམ་ལ་མཚན་འཛིན་འདས་པ་འགགས། མ་འོངས་པ་མ་སྐྱེས། ད་ལྟ་བ་ཁྱོད་དང་མཉམ་དུ་མི་འཇུག་པའི་ཕྱིར། ཕྱི་མ་མ་གྲུབ་ན། ཐེག་ཆེན་གྱི་བར་ཆད་མེད་ལམ་གྱི་དུས་ན་ལམ་ལ་མཚན་འཛིན་ཡོད་པར་ཐལ། མ་གྲུབ་པ་དེའི་ཕྱིར། འདོད་ན། དེའི་དུས་ན་སྒྲ་དོན་འདྲེས་འཛིན་གྱི་རྟོག་པ་ཡོད་པར་ཐལ་བ་དང་། མཐོང་སྤང་རྟོག་པ་ཡོད་པར་ཐལ། འདོད་པ་དེའི་ཕྱིར། ཐལ་བ་ཕྱི་མ་ལ་འདོད་ན། མཐོང་སྤང་རྟོག་པ་མ་སྤངས་པའི་གང་ཟག་ཡིན་ན་མཐོང་སྤང་རྟོག་པ་རྒྱུད་ལྡན་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། ཉན་ཐོས་ཀྱི་མཐོང་ལམ་བར་ཆད་མེད་ལམ་ལ་གནས་པའི་གང་ཟག་ཆོས་ཅན། ཉོན་ཡིད་རྒྱུད་ལྡན་གྱི་གང་ཟག་ཏུ་ཐལ། དེ་མ་སྤངས་པའི་གང་ཟག་ཡིན་པའི་ཕྱིར་ཏེ། ཐེག་དམན་སློབ་པ་ཡིན་པའི་ཕྱིར། རྩ་བར་འདོད་ན། སུམ་ཅུ་པ་ལས། འཇིག་རྟེན་འདས་པའི་ལམ་ན་མེད། །ཅེས་པ་དང་འགལ་ལོ། །ངག་དོན་གཉིས་པ་ལ། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། ལམ་ལ་མཚན་འཛིན་གྱི་ས་བོན་དེ་ཁྱོད་ཀྱི་ངོས་སྐལ་གྱི་སྤང་བྱ་ཡིན་པར་ཐལ། ཁྱོད་དེའི་དངོས་གཉེན་ཡིན་པའི་ཕྱིར། འདོད་ན། དེའི་ས་བོན་དེ་ཆོས་ཅན། ཐེག་ཆེན་གྱི་མཐོང་ལམ་རྣམ་གྲོལ་ལམ་དེས་ཁྱོད་ཟད་པར་སྤངས་པར་ཐལ། ཁྱོད་མཐོང་ལམ་རྩེ་སྦྱོར་གྱི་ངོས་སྐལ་གྱི་སྤང་བྱ་ཡིན་པའི་ཕྱིར། འདོད་ན། མ་དག་ས་བདུན་གྱི་རྗེས་ཐོབ་ཀྱི་གནས་སྐབས་ན་ལམ་ལ་མཚན་འཛིན་མེད་པར་ཐལ། འདོད་པ་དེའི་ཕྱིར། འདོད་ན། དེའི་སྐབས་སུ་རྣམ་པར་མི་རྟོག་པའི་ཡེ་ཤེས་རྒྱུན་མི་ཆད་དུ་ལྡན་པར་ཐལ། འདོད་པ་དེའི་ཕྱིར། འབྲས་བུ་ལ་མཚན་འཛིན་གྱི་སྐབས་སུ་དེ་བཞིན་གཤེགས་པ་ལ་སྐྱབས་གནས་སུ་བདེན་པར་གཟུང་བའི་སྒོ་ནས་ཕྱག་འཚལ་བའི་བློ་ཆོས་ཅན། གཉེན་པོ་གཞི་ཤེས་ཀྱི་མི་མཐུན་ཕྱོགས་ཡིན་ཏེ། དེའི་སྤང་བྱ་ཡིན་པའི་ཕྱིར་ཞེས་ཟེར་ན། འབྲས་བུ་ལ་མཚན་འཛིན་གྱི་བློ་དེ་བདེན་འཛིན་ཡིན་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་བྱང་འཕགས་ཀྱི་རྒྱུད་ལ་མེད་པར་ཐལ། ཁྱོད་བདེན་འཛིན་ཡིན་པའི་ཕྱིར། འདོད་ན། མ་དག་ས་བདུན་གྱི་གནས་སྐབས་ན་དེ་མེད་པར་ཐལ། འདོད་པ་དེའི་ཕྱིར། འདོད་ན་སྔར་ལྟར་རོ། །འབྲས་བུ་ལ་མཚན་འཛིན་གྱི་གཉེན་པོའི་སྐབས་སུ། ཁ་ཅིག ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། འབྲས་བུ་ལ་མཚན་འཛིན་གྱི་བློའི་དངོས་གཉེན་ཡིན་ཏེ། འབྲས་བུའི་གནས་ཚུལ་ལ་ཞུགས་པའི་བློ་གང་ཞིག དེ་དངོས་སུ་སྤོང་བྱེད་ཡིན་པའི་ཕྱིར་དང་། ཡང་དེ་ཆོས་ཅན། དེའི་ས་བོན་གྱི་དངོས་གཉེན་ཡིན་ཏེ། དེ་གང་ཞིག དངོས་སུ་སྤོང་བྱེད་ཡིན་པའི་ཕྱིར་ཞེས་ཟེར་ན། ལམ་ལ་མཚན་འཛིན་གྱི་གཉེན་པོའི་སྐབས་སུ་འཕངས་པ་རྣམས་དྲན་པར་བྱ་ཞིང་། ཁྱད་པར་དུ་ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། དེ་བཞིན་གཤེགས་པ་ལ་སྐྱབས་གནས་སུ་བདེན་པར་འཛིན་པའི་བློའི་དངོས་གཉེན་དུ་ཐལ། འབྲས་བུ་ལ་མཚན་འཛིན་གྱི་བློའི་དངོས་གཉེན་གང་ཞིག འབྲས་བུ་ལ་མཚན་འཛིན་གྱི་བློ་དེ་དེ་བཞིན་གཤེགས་པ་ལ་སྐྱབས་གནས་སུ་བདེན་པར་འཛིན་པའི་བློ་ཡིན་པའི་ཕྱིར། མ་གྲུབ་ན། རྒྱལ་ལ་སོགས་ལ་ཆགས་པ་ཕྲ། །ཞེས་པའི་སྦྱོར་བ་དེ་འཐད་པ་བུད། འདོད་ན། དེ་མིན་པར་ཐལ། ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར། དེ་ལྟར་ཀུན་ཤེས་ཉིད་ལུགས་ལ། །ཞེས་པའི་སྐབས་སུ། ཁ་ཅིག སྐབས་གསུམ་པ་གཞི་ཤེས་འཆད་པའི་སྐབས་འདིར་ཆོས་ཅན། མི་མཐུན་ཕྱོགས་དང་གཉེན་པོའི་རབ་དབྱེ་མ་ལུས་པ་ཤེས་པར་བྱ་བ་ཡིན་ཏེ། ཐེག་དམན་གྱི་གཞི་ཤེས་མི་མཐུན་ཕྱོགས་ཡིན་པ་དང་། བྱང་སེམས་ཀྱི་གཞི་ཤེས་དེའི་གཉེན་པོ་ཡིན་པའི་ཁྱད་པར་ཤེས་པར་བྱ་བ་ཡིན་པའི་ཕྱིར། དེ་ལྟ་བུའི་ཁྱད་པར་ཆོས་ཅན། གཞི་ཤེས་འཆད་པའི་སྐབས་འདིར་ཤེས་པར་བྱ་བ་ཡིན་ཏེ། དེར་རྟོགས་པར་བྱ་བ་ཡིན་པའི་ཕྱིར། ཡང་ཁ་ཅིག གཞི་ཤེས་འཆད་པའི་སྐབས་འདིར་ཆོས་ཅན་མི་མཐུན་ཕྱོགས་དང་གཉེན་པོའི་རབ་དབྱེ་མ་ལུས་པ་ཤེས་པར་བྱ་བ་ཡིན་ཏེ། ཐེག་དམན་གྱི་གཞི་ཤེས་དེ་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་གྱིས་བཅིངས་པའི་མི་མཐུན་ཕྱོགས་ཡིན་པ་དང་། བྱང་སེམས་ཀྱི་གཞི་ཤེས་དེའི་གཉེན་པོ་ཡིན་པའི་ཁྱད་པར་ཤེས་པར་བྱ་བ་ཡིན་པའི་ཕྱིར། དེ་ལྟ་བུའི་ཁྱད་པར་ཆོས་ཅན། སྐབས་གསུམ་པ་གཞི་ཤེས་འཆད་པའི་སྐབས་འདིར་ཤེས་པར་བྱ་བ་ཡིན་ཏེ། དེར་རྟོགས་པར་བྱ་བ་ཡིན་པའི་ཕྱིར་ཞེས་དང་། ཡང་ཁ་ཅིག སྐབས་གསུམ་པར་བསྟན་པའི་མི་མཐུན་ཕྱོགས་ཀྱི་རྟེན་གྱི་གང་ཟག་ཡིན་ན་ཐེག་དམན་ཡིན་དགོས་ཏེ། འགྲེལ་པ་དོན་གསལ་ལས། ཐམས་ཅད་ཤེས་པ་ཉིད་ཀྱི་སྐབས་སུ་དེ་ལྟར་བཤད་པའི་ཚུལ་གྱིས་གོ་རིམ་བཞིན་དུ་ཉན་ཐོས་དང་བྱང་ཆུབ་སེམས་དཔའ་ལ་སོགས་པའི་མི་མཐུན་ཕྱོགས་དང་། གཉེན་པོའི་རབ་ཏུ་དབྱེ་བ་ཤེས་པར་བྱའོ་ཞེས་གསུངས་པའི་ཕྱིར་ཞེས་ཟེར། དང་པོ་གཉིས་ལ་ཐེག་དམན་གྱི་གཞི་ཤེས་ཆོས་ཅན། མཚན་འཛིན་དུ་ཐལ། གཞི་ཤེས་འཆད་པའི་སྐབས་ནས་བསྟན་པའི་མི་མཐུན་ཕྱོགས་ཡིན་པའི་ཕྱིར། འདོད་ན། སྒྲ་དོན་འདྲེས་འཛིན་གྱི་རྟོག་པར་ཐལ་བ་དང་། རྣལ་འབྱོར་མངོན་སུམ་མིན་པར་ཐལ་ལོ། །བར་པ་གཉིས་ལ། ཐེག་དམན་གྱི་རྒྱུད་ཀྱི་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་གྱི་བློ་དེ་གཉེན་པོ་གཞི་ཤེས་ཀྱི་དངོས་ཀྱི་སྤང་བྱར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཐེག་དམན་འབད་མེད་དུ་གྲོལ་བར་ཐལ་ལོ། །གསུམ་པ་ལ། བདག་ལྟའི་རྟེན་གྱི་གང་ཟག་ཡིན་ན་ཕྱི་རོལ་མུ་སྟེགས་བྱེད་ཡིན་དགོས་པར་ཐལ། རྒྱུད་བླ་ལས། ཆོས་ལ་ཁོང་ཁྲོ་བདག་ལྟ་དང་། །འཁོར་བའི་སྡུག་བསྔལ་གྱིས་འཇིགས་དང་། །སེམས་ཅན་དོན་ལ་ལྟོས་མེད་ཉིད། །འདོད་ཆེན་མུ་སྟེགས་ཉན་ཐོས་དང་། །རང་བྱུང་རྣམས་ཀྱི་སྒྲིབ་རྣམ་བཞི། །ཞེས་བཤད་པའི་ཕྱིར། ཡང་གཞི་ཤེས་ཀྱི་རྟེན་གྱི་གང་ཟག་ཡིན་ན་ཐེག་དམན་ཡིན་དགོས་པར་ཐལ། ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ་ཞེས་གསུངས་པའི་ཕྱིར། ཁྱབ་པ་ཁས། རང་ལུགས་ནི། གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་མི་མཐུན་ཕྱོགས་ཡིན་པ་དང་། གཞི་ལམ་འབྲས་གསུམ་སྤྲོས་བྲལ་དུ་རྟོགས་པའི་ཤེས་རབ་གཉེན་པོ་ཡིན་པའི་ཁྱད་པར་དེ་ཆོས་ཅན། སྐབས་གསུམ་པ་གཞི་ཤེས་འཆད་པའི་སྐབས་འདིར་ཤེས་པར་བྱ་བ་ཡིན་ཏེ། དེར་རྟོགས་པར་བྱ་བ་ཡིན་པའི་ཕྱིར་རོ། །གཟུགས་སོགས་དེ་མི་རྟག་སོགས་དང་། །ཞེས་པའི་སྐབས་སུ་གཞི་ཤེས་སྦྱོར་བའི་མཚན་ཉིད་ལ་དཔྱད། ས་མཚམས་ལ་དཔྱད་པ་གཉིས། དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག གཞི་རང་བཞིན་མེད་པར་རྟོགས་པའི་ཤེས་རབ་མཚུངས་ལྡན་དང་བཅས་པ་ཞེས་དང་། གཞི་རང་བཞིན་མེད་པར་རྟོགས་ནས་སྒོམ་པའི་ཤེས་རབ་མཚུངས་ལྡན་དང་བཅས་པ་ཞེས་དང་། ཡང་མཚན་ཉིད་ཕྱི་མ་སྐབས་གསུམ་པར་བསྟན་པའི་གཞི་ཤེས་སྦྱོར་བའི་མཚན་ཉིད་ཡིན་ཞེས་ཟེར། དང་པོ་ལ་སངས་རྒྱས་ཀྱི་ཡེ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཉིས་པ་ལ། ཉན་ཐོས་ཀྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཉན་ཐོས་ཀྱི་མཐོང་ལམ་དེ་གཞི་ཤེས་ཡིན་པའི་ཕྱིར། གསུམ་པ་ལ། ཉན་ཐོས་ཀྱི་གཞི་ཤེས་སྦྱོར་བ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། དེའི་སྐབས་ནས་ཤུགས་ལ་བསྟན་པའི་གཞི་ཤེས་སྦྱོར་བ་ཡིན་པའི་ཕྱིར་ཏེ། ཉན་ཐོས་ཀྱི་གཞི་ཤེས་དེ། ཚུ་རོལ་ཕ་རོལ་མཐའ་ལ་མིན། །ཞེས་པའི་སྐབས་ནས་ཤུགས་ལ་བསྟན་པའི་གཞི་ཤེས་ཡིན་པའི་ཕྱིར། གཉིས་པ་ནི། གཞི་ལམ་འབྲས་གསུམ་སྤྲོས་བྲལ་དུ་རྟོགས་ནས་སྒོམ་པའི་ཐབས་ཤེས་ཟུང་འཇུག་གི་རྣལ་འབྱོར་དེ་སྐབས་འདིར་དངོས་སུ་བསྟན་པའི་གཞི་ཤེས་སྦྱོར་བའི་མཚན་ཉིད་ཡིན་ནོ། །གཉིས་པ་ལ་དགག་གཞག་གཉིས་ལས། དང་པོ་ནི། ཁ་ཅིག་ན་རེ། གཞི་ཤེས་སྦྱོར་བ་དེ་ས་དང་པོ་མན་ཆད་དུ་བསྒོམ་པར་བྱ་བ་ཡིན་ཏེ། དེ་ཐེག་དམན་གྱི་ས་ལས་འདའ་བའི་ཕྱིར་དུ་བསྒོམ་པར་བྱ་བ་ཡིན་པ་གང་ཞིག དེ་ལས་འདའ་བ་དེ་ས་དང་པོ་ནས་ཐོབ་པའི་ཕྱིར། ས་དང་པོ་ཡན་ཆད་དུ་མི་སྒོམ་སྟེ། དེར་ཐེག་དམན་གྱི་ས་ལས་འདས་ཟིན་པའི་ཕྱིར་ཏེ། དེར་གང་ཟག་གི་བདག་མེད་རྟོགས་ཟིན་རྒྱུན་ལྡན་དུ་བསྒོམ་པར་མི་བྱེད་པའི་ཕྱིར་ཟེར། ཁ་ཅིག་ན་རེ། དེ་ཐེག་ཆེན་གྱི་སྦྱོར་ལམ་ཁོ་ནར་བསྒོམ་པར་བྱ་བ་ཡིན་ཏེ། དེ་དག་རྣམ་པར་བསྒོམ་པའི་སྦྱོར་བ་གང་ཞེ་ན། སྦྱོར་བའི་ལམ་ནི་ཞེས་གསུངས་པའི་ཕྱིར་ཞེས་ཟེར་རོ། །དང་པོ་ལ་གཞི་རང་བཞིན་མེད་པར་རྟོགས་པའི་ཤེས་རབ་དེ་ས་དང་པོ་མན་ཆད་དུ་བསྒོམ་པར་བྱ་བ་ཡིན་པར་ཐལ། དེ་ཐེག་དམན་གྱི་ས་ལས་འདའ་བའི་ཕྱིར་དུ་བསྒོམ་པར་བྱ་བ་ཡིན་པ་གང་ཞིག དེ་ལས་འདའ་བ་དེ་ས་དང་པོ་ནས་ཐོབ་པའི་ཕྱིར། ཁྱབ་པ་ཁས། རྟགས་དང་པོ་མ་གྲུབ་ན། གཞི་ཤེས་སྦྱོར་བ་དེ་གང་ཟག་གི་བདག་མེད་རྟོགས་པའི་རྟོགས་རིགས་སུ་ཐལ། དེ་ཐེག་དམན་གྱི་ས་ལས་འདའ་བའི་ཕྱིར་དུ་བསྒོམ་པར་བྱ་བ་ཡིན་པ་གང་ཞིག མ་གྲུབ་པ་དེའི་ཕྱིར། འདོད་ན། གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་དེ་གང་ཟག་གི་བདག་འཛིན་དུ་ཐལ། འདོད་པ་དེའི་ཕྱིར། འདོད་ན། ཉན་ཐོས་དགྲ་བཅོམ་པའི་རྒྱུད་ཀྱི་གཞི་ཤེས་དེས་དེ་སྤང་བར་ཐལ་ལོ། །ཡང་ས་དང་པོ་ཡན་ཆད་དུ། སྤྱོད་པའི་འདུ་ཤེས་མི་མཐུན་ཕྱོགས། །ཞེས་པའི་སྐབས་ཀྱི་མི་མཐུན་ཕྱོགས་དེ་མེད་པར་ཐལ། དེ་ཡན་ཆད་དུ་གཞི་ཤེས་སྦྱོར་བ་མེད་པའི་ཕྱིར། ཁྱབ་སྟེ། མི་མཐུན་ཕྱོགས་འཆད་པའི་སྐབས་སུ། སྤྱོད་པའི་འདུ་ཤེས་མི་མཐུན་ཕྱོགས། །ཞེས་དང་། གཉེན་པོ་འཆད་པའི་སྐབས་སུ། སྤྱོད་པ་བཀག་པའི་སྦྱོར་བ་ཞེས་བཤད་པའི་ཕྱིར། གཉིས་པ་ལ། ཐེག་ཆེན་གྱི་སྒོམ་སྤང་འཇུག་པ་གཟུང་རྟོག་གི་གཉེན་པོར་གྱུར་པའི་ཐེག་ཆེན་གྱི་སྒོམ་ལམ་གྱི་སྦྱོར་བ་ཉེར་བསྡོགས་ཀྱི་ལམ་དེ་ཐེག་ཆེན་གྱི་སྦྱོར་ལམ་ཁོ་ནར་བསྒོམ་པར་བྱ་བ་ཡིན་པར་ཐལ། དེ་ལ་སྦྱོར་བའི་ལམ་གྱི་ཐ་སྙད་གསུངས་པའི་ཕྱིར། ཐེག་ཆེན་གྱི་གདམས་ངག་དེ་ཐེག་ཆེན་གྱི་ཚོགས་ལམ་ཁོ་ནར་ཉན་པར་ཐལ། དོན་གསལ་ལས། ལས་དང་པོ་པ་དེ་ལྟར་གདམས་ངག་ཐོབ་པ་ལ་ངེས་པར་འབྱེད་པའི་ཡན་ལག་འབྱུང་བས་ངེས་པར་འབྱེད་པའི་ཡན་ལག་ཞེས་གསུངས་པའི་ཕྱིར། གཉིས་ཆར་གྱི་ཁྱབ་པ་ཁས། གཉིས་པ་ནི། སྤྱིར་གཞི་ཤེས་སྦྱོར་བ་ཙམ་ནི་རྒྱུན་མཐའི་བར་ན་ཡོད་དེ། རྒྱུན་མཐའི་བར་དུ་གཞིའི་ཆོས་ལ་མངོན་ཞེན་གྱི་བག་ལ་ཉལ་ཡོད་པའི་ཕྱིར། མཚན་འཛིན་རགས་པའི་གཉེན་པོ་ནི་ས་བདུན་པའི་བར་དུ་སྒོམ་དགོས་ཏེ། ས་བདུན་པ་མན་ཆད་དུ་མཚན་འཛིན་མངོན་གྱུར་པ་འབྱུང་སྲིད་པའི་ཕྱིར། དེ་མ་རྫོགས་དང་རབ་རྫོགས་དང་། །ཞེས་པའི་སྐབས་སུ། མཚན་ཉིད་གསུམ་གྱི་མཚན་ཉིད་རིམ་བཞིན། དོན་ལ་མེད་བཞིན་དུ་རྟོགས་པས་སྒྲོ་བཏགས་པའི་ཆོས་དང་། རང་གི་རྒྱུ་རྐྱེན་གཞན་གྱི་དབང་གིས་བྱུང་བའི་རྟེན་འབྲེལ་དང་། མཐར་ཐུག་དཔྱོད་པའི་རིགས་ཤེས་ཚད་མས་རྙེད་པའི་རྙེད་དོན་གང་ཞིག ཡུལ་གྱི་གནས་ལུགས་མཐར་ཐུག་པ་ཞེས་ཟེར་རོ། །དང་པོ་ལ་དངོས་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། གཞི་གྲུབ་པའི་ཕྱིར། རྩ་བར་འདོད་ན། མིན་པར་ཐལ། གཞན་དབང་ཡིན་པའི་ཕྱིར། གཉིས་པ་ལ། ངོ་བོ་ཉིད་སྐུ་ཆོས་ཅན། གཞན་དབང་དུ་ཐལ། མཚན་ཉིད་དེའི་ཕྱིར་ཏེ། རང་གི་རྒྱུ་རྐྱེན་སྦྱོར་བཞི་སྒོམ་པ་ལས་བྱུང་བའི་རྟེན་འབྲེལ་ཡིན་པའི་ཕྱིར། རྩ་བར་འདོད་ན། མིན་པར་ཐལ། རྟག་པ་ཡིན་པའི་ཕྱིར། གསུམ་པ་ལ་བུམ་པའི་ཆོས་ཉིད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་མིན་པར་ཐལ། མཐར་ཐུག་དཔྱོད་པའི་རིགས་ཤེས་ཚད་མས་མ་རྙེད་པའི་ཕྱིར་ཏེ། དེའི་ངོ་བོ་མ་གྲུབ་པའི་ཕྱིར། འདི་དག་ནི་གཞན་དུ་འཆད་པར་འདོད་པས་འདིར་མ་སྤྲོས་སོ། །སྡུག་བསྔལ་ལ་སོགས་བདེན་པ་ལ། །ཞེས་པའི་སྐབས་སུ། ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་བཅུ་དྲུག་ཆོས་ཅན། གཞི་ཤེས་འཆད་པའི་སྐབས་ནས་བསྟན་པའི་ཐེག་ཆེན་གྱི་མཐོང་ལམ་ཡིན་ཏེ། སྒྲོ་འདོགས་སོ་གཉིས་དང་བྲལ་བའི་ཐེག་ཆེན་གྱི་བདེན་པ་མངོན་རྟོགས་ཡིན་པའི་ཕྱིར་བྱས་པ་ལ། ཁ་ཅིག་ན་རེ། དེ་ཆོས་ཅན། གཟུགས་སོགས་མི་རྟག་པར་སྒོམ་པར་ཐལ། གཟུགས་སོགས་རྟག་པ་བཀག་ནས་སྒོམ་པའི་ཕྱིར། འདོད་ན། སྒྲོ་འདོགས་སོ་གཉིས་དང་བྲལ་བ་མིན་པར་ཐལ་ལོ་ཟེར་ན། དེ་ཆོས་ཅན། ཆད་མཐའ་སྒོམ་པར་ཐལ། རྟག་པའི་མཐའ་བཀག་ནས་སྒོམ་པའི་ཕྱིར། གཞན་ཡང་མཐའ་བཞིའི་སྤྲོས་པ་དང་བྲལ་བའི་སྤྲོས་བྲལ་མངོན་སུམ་རྟོགས་པའི་ཡེ་ཤེས་ཆོས་ཅན། བདེན་འཛིན་སྒོམ་པར་ཐལ། ཡོད་འཛིན་བཀག་ནས་སྒོམ་པའི་ཕྱིར། ཁོ་ན་རེ། དེ་ཆོས་ཅན། ཁྱོད་ལ་རྟོགས་རིགས་གསུམ་མ་ཚང་བར་ཐལ། ཁྱོད་མི་རྟག་ལ་སོགས་བཅུ་དྲུག་གི་རྣམ་པ་ཅན་མིན་པའི་ཕྱིར་ཞེ་ན། བདག་མེད་གསུམ་མངོན་སུམ་རྟོགས་པའི་ཡེ་ཤེས་ཡིན་ན་མི་རྟག་ལ་སོགས་བཅུ་དྲུག་གི་རྣམ་པ་ཅན་ཡིན་དགོས་པར་ཐལ། རྟོགས་རིགས་གསུམ་དང་ལྡན་པའི་མཁྱེན་པ་ཡིན་ན་དེ་ཡིན་དགོས་པའི་ཕྱིར། འདོད་ན། ས་བརྒྱད་པའི་བྱང་སེམས་ཀྱི་རྒྱུད་ཀྱི་སྤྲོས་པ་མཐའ་དག་བཀག་པའི་འགོག་པའི་སྙོམས་འཇུག་ཆོས་ཅན། དེར་ཐལ། དེའི་ཕྱིར་ཏེ། གང་ཟག་གི་བདག་མེད་ཀྱང་མངོན་སུམ་རྟོགས། གཟུང་བ་ཆོས་ཀྱི་བདག་མེད་ཀྱང་མངོན་སུམ་རྟོགས། འཛིན་པ་ཆོས་ཀྱི་བདག་མེད་ཀྱང་མངོན་སུམ་རྟོགས་པའི་ཕྱིར་ཏེ། གང་ཟག་སོགས་རང་བཞིན་མེད་པར་མངོན་སུམ་དུ་རྟོགས་པའི་ཕྱིར། རྩ་བར་འདོད་ན། མི་ནུས་ཏེ། ཆོས་ཅན་ཡིན་པའི་ཕྱིར་རོ། །ཉན་ཐོས་ཀྱི་ལམ་ནི་བྱང་ཆུབ་སེམས་དཔས། ཞེས་པའི་སྐབས་སུ། དགག་གཞག་སྤང་གསུམ་ལས། དང་པོ་ནི། བུ་སྟོན་སོགས་ན་རེ། སྐབས་གསུམ་པ་གཞི་ཤེས་འཆད་པའི་སྐབས་འདིར་ཉན་ཐོས་ཀྱི་མཐོང་ལམ་དངོས་སུ་བསྟན་དགོས་ཏེ། བྱང་ཆུབ་སེམས་དཔས་ཉན་ཐོས་ཀྱི་ལམ་ཤེས་པར་བྱ་དགོས་པའི་ཕྱིར། འདིར་ཉན་ཐོས་ཀྱི་སྒོམ་ལམ་དངོས་སུ་བསྟན་མི་དགོས་ཏེ། བྱང་ཆུབ་སེམས་དཔའ་རྣམས་ཀྱིས་ཉན་ཐོས་ཀྱི་ལམ་རྣམ་པར་སྒོམ་པའི་འབྲས་བུ་མངོན་དུ་མི་བྱེད་པའི་ཕྱིར་ཞེས་དང་། རེད་མདའ་བ་སོགས་ན་རེ། སྐབས་གཉིས་པར་མཐོང་ལམ་བསྟན་པའི་རྗེས་སུ་སྒོམ་ལམ་བསྟན་པ་ལྟར་སྐབས་གསུམ་པར་ཡང་མཐོང་ལམ་བསྟན་པའི་རྗེས་སུ་སྒོམ་ལམ་ཅིའི་ཕྱིར་མི་སྟོན་ཞེ་ན། སྐབས་གསུམ་པར་ཐེག་ཆེན་གྱི་མཐོང་ལམ་བསྟན་པའི་རྗེས་སུ་ཐེག་ཆེན་གྱི་སྒོམ་ལམ་སྟོན་མི་དགོས་ཏེ། སྐབས་གཉིས་པར་བསྟན་ཟིན་པའི་ཕྱིར། ཡང་གཞི་ཤེས་འཆད་པའི་སྐབས་འདིར་ཐེག་ཆེན་གྱི་མཐོང་ལམ་དངོས་སུ་བསྟན་པའི་རྗེས་སུ་ཐེག་དམན་གྱི་སྒོམ་ལམ་ཤུགས་ལ་བསྟན་པའི་ཆེད་དུ་ཐེག་ཆེན་གྱི་སྒོམ་ལམ་དངོས་སུ་བསྟན་མི་དགོས་ཏེ། བྱང་ཆུབ་སེམས་དཔས་ཐེག་དམན་གྱི་ལམ་རྣམ་པར་སྒོམ་པའི་འབྲས་བུ་མངོན་དུ་མི་བྱེད་པའི་ཕྱིར། སྐབས་འདིར་ཐེག་དམན་གྱི་མཐོང་ལམ་ཤུགས་ལ་བསྟན་པའི་ཆེད་དུ་ཐེག་ཆེན་གྱི་མཐོང་ལམ་དངོས་སུ་བསྟན་དགོས་ཏེ། བྱང་ཆུབ་སེམས་དཔས་ཉན་ཐོས་ཀྱི་ལམ་ཤེས་པར་བྱ་དགོས་པའི་ཕྱིར་ཞེས་ཟེར་རོ། །དང་པོ་ལ། སྐབས་གསུམ་པ་འདིར་ཉན་ཐོས་ཀྱི་མཐོང་ལམ་དངོས་སུ་བསྟན། དེའི་སྒོམ་ལམ་དངོས་སུ་མ་བསྟན་པའི་ཁྱད་པར་མི་འཐད་པར་ཐལ། མི་མཐུན་ཕྱོགས་ཀྱི་གཞི་ཤེས་འཆད་པའི་སྐབས་སུ་གཉིས་ཀའང་དངོས་སུ་བསྟན་པར་མཚུངས། ཉན་ཐོས་ཀྱི་མཐོང་སྒོམ་རང་གི་ལྡོག་པ་ནས་གཉིས་ཀའང་དངོས་སུ་མ་བསྟན་པར་མཚུངས་པའི་ཕྱིར། ཡང་བྱང་ཆུབ་སེམས་དཔའ་ལ་ཉན་ཐོས་ཀྱི་སྒོམ་ལམ་བསྟན་མི་དགོས་པར་ཐལ། སྐབས་གསུམ་པ་འདིར་དེ་ལ་དེ་བསྟན་མི་དགོས་པའི་ཕྱིར། འདོད་ན། དེ་དགོས་པར་ཐལ། དེ་ལ་ཐེག་པ་གསུམ་གྱི་ལམ་ཐམས་ཅད་བསྟན་དགོས་པའི་ཕྱིར་ཏེ། དེས་ཐེག་པ་གསུམ་གྱི་ལམ་ཐམས་ཅད་ཤེས་པར་བྱ་དགོས་པའི་ཕྱིར། ཡང་སྐབས་གསུམ་པར་སྒོམ་ལམ་མི་སྟོན་ཞེས་པའི་སྒོམ་ལམ་གྱི་ཟླས་དྲངས་པའི་མཐོང་ལམ་དེ་ཉན་ཐོས་ཀྱི་མཐོང་ལམ་ཡིན་པར་ཐལ། སྦྱོར་བ་དེ་གཉིས་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཉན་ཐོས་ཀྱི་མཐོང་ལམ་ཆོས་ཅན། སྡུག་བསྔལ་ལ་སོགས་བདེན་པ་ལ། །ཞེས་པའི་སྐབས་ནས་དངོས་བསྟན་གྱི་མཐོང་ལམ་དུ་ཐལ། དེའི་ཟླས་དྲངས་པའི་མཐོང་ལམ་ཡིན་པའི་ཕྱིར། གཉིས་པ་ལ། བྱང་ཆུབ་སེམས་དཔས་ཉན་ཐོས་ཀྱི་ལམ་རྣམ་པར་སྒོམ་པའི་འབྲས་བུ་མངོན་དུ་མི་བྱེད་པ་དེ་སྐབས་གསུམ་པ་འདིར་ཐེག་ཆེན་གྱི་སྒོམ་ལམ་དངོས་སུ་མི་སྟོན་པའི་རྒྱུ་མཚན་ཡིན་ནམ། ཐེག་དམན་གྱི་སྒོམ་ལམ་ཤུགས་ལ་མི་སྟོན་པའི་རྒྱུ་མཚན་ཡིན། དང་པོ་ལྟར་ན། ཐེག་ཆེན་གྱི་སྒོམ་ལམ་ཆོས་ཅན། བྱང་ཆུབ་སེམས་དཔས་ཁྱོད་རྣམ་པར་སྒོམ་པའི་འབྲས་བུ་མངོན་སུམ་མི་བྱེད་པར་ཐལ། བྱང་ཆུབ་སེམས་དཔས་ཐེག་དམན་གྱི་ལམ་རྣམ་པར་སྒོམ་པའི་འབྲས་བུ་མངོན་སུམ་མི་བྱེད་པ་དེ་སྐབས་གསུམ་པ་འདིར་ཁྱོད་དངོས་སུ་མི་སྟོན་པའི་རྒྱུ་མཚན་ཡང་དག་ཡིན་པའི་ཕྱིར། གཉིས་པ་ལྟར་ན། བྱང་ཆུབ་སེམས་དཔས་ཐེག་དམན་གྱི་ལམ་ཤེས་པར་བྱ་བ་དེ་སྐབས་འདིར་ཐེག་དམན་གྱི་མཐོང་ལམ་ཤུགས་ལ་སྟོན་པའི་རྒྱུ་མཚན་རྣམ་དག་ཏུ་ཐལ། ཁས་བླངས་དེའི་ཕྱིར། འདོད་ན། བྱང་ཆུབ་སེམས་དཔས་ཉན་ཐོས་ཀྱི་ལམ་ཤེས་པར་བྱ་བ་དེ་སྐབས་འདིར་ཉན་ཐོས་ཀྱི་མཐོང་ལམ་སྟོན་པའི་རྒྱུ་མཚན་ཡང་དག་ཡིན་པར་ཐལ། འདོད་པ་དེའི་ཕྱིར། འདོད་ན། ཉན་ཐོས་ཀྱི་མཐོང་ལམ་ཆོས་ཅན། སྡུག་བསྔལ་ལ་སོགས་བདེན་པ་ལ། །ཞེས་པའི་སྐབས་ནས་དངོས་བསྟན་གྱི་མཐོང་ལམ་དུ་ཐལ། བྱང་ཆུབ་སེམས་དཔས་ཉན་ཐོས་ཀྱི་ལམ་ཤེས་པར་བྱ་བ་དེ་སྐབས་འདིར་ཁྱོད་སྟོན་པའི་རྒྱུ་མཚན་ཡང་དག་ཡིན་པའི་ཕྱིར། ཡང་བྱང་ཆུབ་སེམས་དཔས་ཉན་ཐོས་ཀྱི་ལམ་ཤེས་པར་བྱ་བ་དེ་སྐབས་འདིར་ཉན་ཐོས་ཀྱི་མཐོང་ལམ་སྟོན་པའི་རྒྱུ་མཚན་ཡང་དག་མིན་པར་ཐལ། དེ་སྐབས་འདིར་ཐེག་ཆེན་གྱི་མཐོང་ལམ་སྟོན་པའི་རྒྱུ་མཚན་ཡང་དག་ཡིན་པའི་ཕྱིར། རྟགས་ཁས་བླངས་ཏེ། དེ་སྐབས་འདིར་ཐེག་དམན་གྱི་མཐོང་ལམ་ཤུགས་ལ་བསྟན་པའི་ཆེད་དུ་ཐེག་ཆེན་གྱི་མཐོང་ལམ་དངོས་སུ་སྟོན་པའི་རྒྱུ་མཚན་ཡང་དག་ཡིན་པའི་ཕྱིར། གཉིས་པ་ནི། ལམ་ཤེས་འཆད་པའི་སྐབས་སུ་ཐེག་ཆེན་གྱི་མཐོང་ལམ་བསྟན་ནས། ཐེག་ཆེན་གྱི་སྒོམ་ལམ་བསྟན་པ་ལྟར་གཞི་ཤེས་འཆད་པའི་སྐབས་སུའང་དེ་ལྟར་དུ་ཅིའི་ཕྱིར་མི་སྟོན་ཞེ་ན། སྤྱིར་རྟོགས་རིགས་ལ་ཐེག་ཆེན་གྱི་རྟོགས་རིགས་དང་། ཐེག་དམན་གྱི་རྟོགས་རིགས་གཉིས་ཡོད་པ་ལས། སྐབས་གསུམ་པ་འདིར་ཐེག་ཆེན་གྱི་རྟོགས་རིགས་རྒྱུན་ལྡན་དུ་སྒོམ་པར་བྱེད་པའི་ཐེག་ཆེན་གྱི་སྒོམ་ལམ་དངོས་སུ་བསྟན་མི་དགོས་ཏེ། དེ་སྐབས་གཉིས་པར་བསྟན་ཟིན་ཅིང་། འདིར་ཡང་བསྟན་པ་ལ་དགོས་པ་ལྷག་པོ་མི་སྣང་བའི་ཕྱིར་དང་། སྐབས་འདིར་ཐེག་དམན་གྱི་རྟོགས་རིགས་རྒྱུན་ལྡན་དུ་སྒོམ་པར་བྱེད་པའི་ཐེག་ཆེན་གྱི་སྒོམ་ལམ་དངོས་སུ་བསྟན་མི་དགོས་ཏེ། བྱང་ཆུབ་སེམས་དཔའ་རྣམས་ཀྱིས་ཐེག་དམན་གྱི་ལམ་གྱི་རྟོགས་རིགས་མངོན་སུམ་རྟོགས་ཟིན་རྒྱུན་ལྡན་དུ་གོམས་པར་མི་བྱེད་པའི་ཕྱིར་ཏེ། དེས་དེ་སྒོམ་པའི་འབྲས་བུ་མངོན་སུམ་མི་བྱེད་པའི་ཕྱིར། སྐབས་འདིར་ཐེག་དམན་གྱི་རྟོགས་རིགས་མངོན་སུམ་མཐོང་བའི་ཐེག་ཆེན་གྱི་མཐོང་ལམ་དངོས་སུ་སྟོན་དགོས་ཏེ། བྱང་ཆུབ་སེམས་དཔས་ཐེག་དམན་གྱི་ལམ་ཤེས་པར་བྱ་དགོས་པའི་ཕྱིར། མདོར་ན་འདིར་མཐོང་ལམ་གྱི་རྗེས་སུ་སྒོམ་ལམ་དངོས་སུ་མི་སྟོན་པའི་རྒྱུ་མཚན་བཤད་པ་ཡིན་ལ། དེ་བསྟན་ན་ཐེག་དམན་གྱི་རྟོགས་རིགས་རྒྱུན་ལྡན་དུ་གོམས་པར་བྱེད་པའི་ཐེག་ཆེན་གྱི་སྒོམ་ལམ་བསྟན་དགོས་པ་ལས་དེ་ནི་གཞི་མ་གྲུབ་པ་ཁོ་ནའོ། །འོ་ན་དངོས་བསྟན་གྱི་མཐོང་ལམ་དེའང་ཐེག་དམན་གྱི་རྟོགས་རིགས་མངོན་སུམ་མཐོང་བའི་ཐེག་ཆེན་གྱི་མཐོང་ལམ་ཡིན་པར་འགྱུར་རོ་ཞེ་ན། ཤིན་ཏུ་འདོད་དེ། རྟག་སོགས་ཀྱི་སྒྲོ་འདོགས་བཅུ་དྲུག་དང་བྲལ་བ་ནི་ཉན་ཐོས་ཀྱི་རྟོགས་རིགས་ཡིན་ལ། མི་རྟག་ལ་སོགས་བཅུ་དྲུག་དང་བྲལ་བ་ནི་མི་དམིགས་པའི་ཤེས་རབ་སྟེ། རྣམ་པ་མི་དམིགས་སྒོ་ནས་ནི། །ཉན་ཐོས་ལམ་འདི་ཤེས་པར་བྱ། །ཞེས་པ་དང་དོན་གཅིག་གོ །འོ་ན་དེ་སྐབས་གཉིས་པར་བསྟན་ཟིན་པས་འདིར་བསྟན་མི་དགོས་སྙམ་ན། དེར་བསྟན་པ་ནི་བྱང་སེམས་ཀྱིས་ཤེས་པར་བྱ་དགོས་སོ་ཞེས་ཤེས་པའི་ཆེད་ཡིན་ལ། འདིར་མཐོང་ལམ་གྱི་ལྡོག་པ་ནས་བསྟན་པ་ནི་ཤེས་མཐོང་གིས་བལྟས་ནས་རྟོགས་རིགས་དེ་ལས་འདའ་བར་བྱེད་ཅེས་པའི་དོན་ཏེ། ནུས་པ་ཤིན་ཏུ་ཐོན་ནོ། །གསུམ་པ་ནི། ཁ་ཅིག་ན་རེ། སྡུག་བསྔལ་ལ་སོགས་བདེན་པ་ལ། །ཞེས་པའི་སྐབས་ནས་དངོས་བསྟན་གྱི་མཐོང་ལམ་ཆོས་ཅན། ཐེག་དམན་གྱི་རྟོགས་རིགས་མངོན་སུམ་དུ་མཐོང་བའི་མཐོང་ལམ་མ་ཡིན་པར་ཐལ། སྒྲོ་འདོགས་སོ་གཉིས་དང་བྲལ་བའི་མཐོང་ལམ་ཡིན་པའི་ཕྱིར་ཞེ་ན། ཐེག་ཆེན་གྱི་མཐོང་ལམ་ཆོས་ཅན། དེར་ཐལ། དེའི་ཕྱིར་རོ། །ཡུམ་དོན་རབ་གསལ་ལས་སྐབས་གསུམ་པའི་དཀའ་བའི་གནས་རྣམ་པར་བཤད་པའོ།། །།
སྐབས་བཞི་པ་རྣམ་རྫོགས་སྦྱོར་བའི་དཀའ་བའི་གནས་རྣམ་པར་བཤད་པ།
བླང་དོར་ཤེས་བྱའི་གནས་རྣམས་ལེགས་སྦྱངས་ནས། །ཀུན་མཁྱེན་གསུམ་གྱི་རྣམ་པ་མ་ལུས་ཀུན། །རྫོགས་པར་བསྒོམས་པས་མི་ལྡོག་རྟགས་ཐོབ་ཅིང་། །སྐུ་གསུམ་སྒྲུབ་པའི་རྒྱལ་ཡུམ་དེ་ལ་འདུད། །ཐམས་ཅད་མཁྱེན་པ་ཉིད་གསུམ་ཡོངས་སུ་ཤེས་པ་ནི། ཞེས་པའི་སྐབས་སུ། བྱམས་མགོན་ཆོས་ཅན། མཁྱེན་གསུམ་བཤད་ཟིན་པའི་འོག་ཏུ། རྣམ་རྫོགས་སྦྱོར་བ་འཆད་པ་ལ་རྒྱུ་མཚན་ཡོད་དེ། མཁྱེན་གསུམ་གྱི་རྣམ་པ་ལ་དབང་ཐོབ་པའི་ཆེད་དུ་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་ནས་སྒོམ་དགོས་པའི་ཕྱིར། དེ་ལ་ཁ་ཅིག འབྲས་བུ་ཆོས་སྐུའི་འོག་ཏུ་རྣམ་རྫོགས་སྦྱོར་བ་འཆད་པ་ལ་རྒྱུ་མཚན་ཡོད་པར་ཐལ། འབྲས་བུ་ཆོས་སྐུའི་རྣམ་པ་ལ་དབང་ཐོབ་པའི་ཆེད་དུ་ཞེས་སོགས་ཀྱི་ཕྱིར། འདོད་ན། དེའི་འོག་ཏུ་བཤད་པར་ཐལ། འདོད་པ་དེའི་ཕྱིར། འདོད་ན། རྒྱན་གྱི་སྐབས་བརྒྱད་ཀྱི་གོ་རིམ་དེ་འཆོལ་བའི་སྐྱོན་ཅན་དུ་ཐལ་ལོ་ཞེས་ཟེར་ན། ཕྱི་མ་ལ་མ་ཁྱབ་སྟེ། དེར་ཐལ། དེའི་ཕྱིར། མ་གྲུབ་ན། དེའི་འོག་ཏུ་སྦྱོར་གཞི་བཤད་པའི་ཕྱིར་ཏེ། དེའི་འོག་ཏུ་མངོན་པར་རྟོགས་པ་དྲུག་གི་ལམ་རིམ་བཤད་པའི་ཕྱིར། འདིའི་སྐབས་སུ་རྣམ་རྫོགས་སྦྱོར་བའི་མཚན་ཉིད་ལ། ཁ་ཅིག མཁྱེན་གསུམ་གྱི་རྣམ་པ་ལ་དབང་ཐོབ་པའི་ཆེད་དུ་མཁྱེན་གསུམ་གྱི་རྣམ་པ་བསྡུས་ནས་སྒོམ་པའི་སེམས་དཔའི་རྣལ་འབྱོར་དང་། ཡང་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་ནས་སྒོམ་པའི་སེམས་དཔའི་རྣལ་འབྱོར་རོ། །ཞེས་འཇོག་ཅིང་། ས་མཚམས་ཐེག་ཆེན་གྱི་ཚོགས་ལམ་ཆུང་ངུ་ནས་རྒྱུན་མཐའི་བར་དུ་ཡོད་དོ་ཞེས་པ་དང་། མཁྱེན་གསུམ་བསྡུས་ནས་སྒོམ་པའི་སེམས་དཔའི་རྣལ་འབྱོར་ཞེས་ཟེར་རོ། །དང་པོ་ལ། ས་བརྒྱད་པའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མིན་པར་ཐལ། དེའི་རྣམ་པ་ལ་དབང་ཐོབ་ཟིན་པའི་ཕྱིར་ཏེ། རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར་ཐོབ་ཟིན་པའི་ཕྱིར། གཉིས་པ་ལ། ཐེག་ཆེན་གྱི་ཚོགས་ལམ་ཆུང་ངུ་ཡིན་ན་མཚན་ཉིད་དེ་ཡིན་དགོས་པར་ཐལ། དེ་ཡིན་ན་མཚོན་བྱ་དེ་ཡིན་དགོས་པའི་ཕྱིར། རྟགས་ཁྱབ་ཁས། འདོད་ན། དེ་ཡིན་ན་མཁྱེན་གསུམ་ཐོས་བསམ་གྱིས་གཏན་ལ་ཕབ་པ་སྔོན་སོང་ཡིན་དགོས་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། མཁྱེན་གསུམ་ཐོས་བསམ་གྱིས་གཏན་ལ་མ་ཕབ་པར་ཐེག་ཆེན་གྱི་ཚོགས་ལམ་དུ་ཞུགས་པ་ཡོད་པའི་ཕྱིར་ཏེ། དེ་གཏན་ལ་མ་ཕབ་པར་འཇུག་པ་སེམས་བསྐྱེད་སྐྱེས་པ་ཡོད་པའི་ཕྱིར། གསུམ་པ་ལ། ཁ་ཅིག་ན་རེ། ཐེག་ཆེན་གྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། མཁྱེན་གསུམ་བསྡུས་པར་ཐལ། འདོད་པ་དེའི་ཕྱིར། འདོད་ན། ཁྱོད་ཀྱིས་མངོན་རྟོགས་བརྒྱད་ཀ་བསྡུས་པར་ཐལ། འདོད་པ་གང་ཞིག མཁྱེན་གསུམ་གྱིས་མངོན་རྟོགས་བརྒྱད་བསྡུས་པའི་ཕྱིར་ཟེར་ན། ཁྱབ་པ་གཉིས་པ་ལ། བྱམས་མགོན་ཆོས་ཅན། ཁྱོད་ཀྱིས་ཡུམ་དོན་བསྡུས་པར་ཐལ། ཁྱོད་ཡུམ་དོན་བསྡུས་ནས་སྟོན་པའི་མཁས་པ་ཡིན་པའི་ཕྱིར། འདོད་ན། ཁྱོད་ཀྱིས་མངོན་རྟོགས་བརྒྱད་ཀ་བསྡུས་པར་ཐལ། འདོད་པ་གང་ཞིག ཡུམ་དོན་དེས་དེ་བསྡུས་པའི་ཕྱིར། རང་ལུགས་མཚན་ཉིད་ཕྱི་མ་དེ་ཉིད་ལེགས་སོ། །གཞི་ཤེས་པ་ཡི་བྱེ་བྲག་རྣམས། །ཞེས་པའི་སྐབས་སུ། བསྒོམ་བྱ་རྣམ་པའི་མཐའ་དཔྱད་པ་ལ། རྣམ་པ་ཡིན་ན་བསྒོམ་བྱ་རྣམ་པ་ཡིན་པས་ཁྱབ་མ་ཁྱབ་ལ་དཔྱད་པ། བསྒོམ་བྱ་རྣམ་པ་ཡིན་ན་བྱང་སེམས་ཀྱི་བསྒོམ་བྱ་རྣམ་པ་ཡིན་པས་ཁྱབ་མ་ཁྱབ་ལ་དཔྱད་པ། བསྒོམ་བྱ་རྣམ་པ་དེ་དོན་རྣམ་དང་ཤེས་རྣམ་གང་ཡིན་ལ་དཔྱད་པ་དང་། འདིར་བསྟན་གྱི་རྣམ་པ་དེ་ཤེས་རྣམ་དང་དོན་རྣམ་གང་ཡིན་ལ་དཔྱད་པ་བཞི་ལས། དང་པོ་ལ་ཁ་ཅིག དེ་ལ་ཁྱབ་པ་ཡོད་པར་ཐལ། གཞི་ཡིན་ན་ཐོས་བསམ་གྱིས་སྒྲོ་འདོགས་གཅད་པར་བྱ་བའི་གཞི་ཡིན་དགོས་པའི་ཕྱིར་ཞེ་ན། ཞེ་སྡང་ཆོས་ཅན། བསྒོམ་བྱ་རྣམ་པར་ཐལ། རྣམ་པ་ཡིན་པའི་ཕྱིར་ཏེ། རྣམ་རྟགས་མཚན་མས་བསྡུས་པའི་ནང་ཚན་དུ་གྱུར་པའི་རྣམ་པ་ཡིན་པའི་ཕྱིར་ཏེ། གཞི་གྲུབ་པའི་ཕྱིར་ཏེ། རྩ་བར་འདོད་ན། མི་ནུས་ཏེ། བསྒོམ་བྱ་མིན་པའི་ཕྱིར་ཏེ། རྒྱུན་གཅད་པར་བྱ་བ་ཡིན་པའི་ཕྱིར། དེ་ལ་ཁོ་ན་རེ། བསྒོམ་བྱ་ཡིན་པར་ཐལ། བདག་མེད་དུ་བསྒོམ་པར་བྱ་བ་ཡིན་པའི་ཕྱིར་ཞེ་ན། དེ་ཆོས་ཅན། ཉམས་སུ་བླང་བྱ་ཡིན་པར་ཐལ། ཁྱོད་བདག་མེད་དུ་རྟོགས་པའི་བློ་དེ་ཉམས་སུ་བླང་བྱ་ཡིན་པའི་ཕྱིར། རང་ལུགས་ནི་རྣམ་པ་ལ་བསྒོམ་བྱ་རྣམ་པས་མ་ཁྱབ་སྟེ། སྤྱིར་རྣམ་པ་ལ་བླང་བྱའི་རྣམ་པ་དང་། དོར་བྱའི་རྣམ་པ་གཉིས་སུ་ཡོད་ཅིང་། དང་པོ་དེ་བསྒོམ་པར་བྱ་བ་ཡིན་ཀྱང་། ཕྱི་མ་དེ་དེ་མིན་པའི་ཕྱིར། གཉིས་པ་ནི། ཁ་ཅིག དེ་ལ་ཁྱབ་པ་ཡོད་པར་ཐལ། བྱང་སེམས་ཀྱིས་གདུལ་བྱ་རིགས་ཅན་གསུམ་རྗེས་སུ་གཟུང་བའི་ཆེད་དུ་རིགས་ཅན་གསུམ་གྱི་ལམ་མཐའ་དག་སྒོམ་དགོས་པའི་ཕྱིར་ཏེ། མདོ་ལས། བྱང་ཆུབ་སེམས་དཔའ་རྣམས་ཀྱིས་ཉན་ཐོས་ཀྱི་ལམ་གང་ཡིན་པ་དང་། རང་སངས་རྒྱས་ཀྱི་ལམ་གང་ཡིན་པ་ཞེས་སོགས་གསུངས་པའི་ཕྱིར། ཡང་དེ་ལ་ཁྱབ་པ་ཡོད་པར་ཐལ། བསླབ་པར་བྱ་བ་ཡིན་ན་བྱང་སེམས་ཀྱིས་བསླབ་པར་བྱ་བ་ཡིན་དགོས་པའི་ཕྱིར་ཏེ། སྤྱོད་འཇུག་ལས། རྒྱལ་སྲས་རྣམས་ཀྱིས་མི་སློབ་པའི། །དངོས་དེ་གང་ཡང་ཡོད་མ་ཡིན། །ཞེས་གསུངས་པའི་ཕྱིར་ཞེས་ཟེར་ན། དམ་བཅའ་དང་པོ་ལ། རང་ཉིད་གཅིག་པུ་ཞི་བདེ་དོན་གཉེར་གྱི་སེམས་བསྐྱེད་དེ་ཆོས་ཅན། དེར་ཐལ། དེའི་ཕྱིར་ཏེ། ཐེག་དམན་གྱིས་བསྒོམ་པར་བྱ་བའི་རྣམ་པ་ཡིན་པའི་ཕྱིར། རྩ་བར་འདོད་ན། དེ་མིན་པར་ཐལ། བྱང་སེམས་ཀྱི་རྒྱུད་ལ་ཁྱོད་སྒོམ་ན། དེའི་ཚུལ་ཁྲིམས་འཆལ་བར་འགྱུར་བའི་ཕྱིར་ཏེ། མདོ་སྡུད་པ་ལས། གལ་ཏེ་རང་རྒྱལ་དགྲ་བཅོམ་བྱང་ཆུབ་རེག་འདོད་ན། །ཚུལ་ཁྲིམས་འཆལ་ཞིང་མི་མཁས་དེ་ནི་སྤྱོད་པ་ཉམས། །ཞེས་གསུངས་པའི་ཕྱིར། གཉིས་པའི་སྒྲུབ་བྱེད་ཀྱི་ཁྱབ་པའང་མ་ངེས་ཏེ། ཉམས་སུ་བླང་བར་བྱ་བ་ཡིན་ན་བྱང་སེམས་ཀྱིས་ཉམས་སུ་བླང་བར་བྱ་བ་ཡིན་དགོས་པར་ཐལ། ཤེས་པར་བྱ་བ་ཡིན་ན་བྱང་སེམས་ཀྱིས་ཤེས་པར་བྱ་བ་ཡིན་དགོས་པའི་ཕྱིར། ཁྱབ་པ་ཁས། འདོད་ན། ཉན་ཐོས་ཀྱི་ཚོགས་ལམ་གྱིས་མ་ངེས་སོ། །གསུམ་པ་ལ་དགག་གཞག་གཉིས་ལས། དང་པོ་ལ། རེད་མདའ་བ་ན་རེ། བསྒོམ་བྱ་རྣམ་པ་ཡིན་ན་ཤེས་རྣམ་ཡིན་པས་ཁྱབ་ཅིང་། དོན་རྣམ་བསྒོམ་བྱ་རྣམ་པ་མ་ཡིན་ཏེ། རྣམ་པ་བསྒོམ་པའི་དགོས་པ་ནི་བསྒོམ་བྱའི་རྣམ་པ་ཕུལ་དུ་ཕྱིན་པར་བྱ་བའི་ཆེད་ཡིན་ལ། དོན་རྣམ་ཕུལ་དུ་ཕྱིན་པར་བྱར་མེད་པའི་ཕྱིར་ཡང་དོན་རྣམ་བསྒོམ་བྱ་རྣམ་པ་མིན་པར་ཐལ། དེའི་ཐ་སྙད་མདོ་བསྟན་བཅོས་གང་ལས་ཀྱང་མ་བཤད་པའི་ཕྱིར་ཞེས་གསུང་། འབྲེ་ཨར་ན་རེ། བྱང་སེམས་ཀྱི་བསྒོམ་བྱའི་རྣམ་པ་ལ་ཤེས་རྣམ་དང་དོན་རྣམ་གཉིས་ཡོད་པ་ལས། དོན་རྣམ་བསྒོམ་བྱའི་གཙོ་བོ་ཡིན་ཏེ། དེ་བསྒོམ་པས་ཤེས་རྣམ་བསྒོམ་པར་འགྱུར་བའི་ཕྱིར་ཏེ། དོན་རྣམ་ཡོད་ན་ཤེས་རྣམ་ཡོད་པས་ཁྱབ་པའི་ཕྱིར། ཤེས་རྣམ་བསྒོམ་བྱའི་གཙོ་བོ་མིན་ཏེ། དེ་བསྒོམས་པས་དོན་རྣམ་བསྒོམ་པར་མི་འགྱུར་བའི་ཕྱིར་ཏེ། དེ་ཡོད་ན་ཅིག་ཤོས་དེ་ཡོད་པས་མ་ཁྱབ་པའི་ཕྱིར་མ་གྲུབ་ན། ཟླ་གཉིས་ཡོད་པར་ཐལ། ཟླ་བ་གཉིས་སྣང་གི་དབང་ཤེས་ཡོད་པའི་ཕྱིར། ཁྱབ་པ་ཁས་ཞེས་གསུང་ངོ་། །ཡང་བོད་ཁ་ཅིག ཤེས་རྣམ་བསྒོམ་བྱའི་རྣམ་པ་མིན་ཏེ། དེས་སློབ་པའི་སྐབས་སུ་སྒོམ་བྱེད་ཀྱི་བློ་དང་། མི་སློབ་ལམ་གྱི་གནས་སྐབས་སུ་བསྒོམ་པའི་འབྲས་བུ་ཡིན་པའི་ཕྱིར་ཟེར་རོ། །དང་པོ་ལ། བྱང་སེམས་ཚོགས་ལམ་པས་ལམ་བསྒོམས་པས་རང་རྒྱུད་ཀྱི་བདེན་འཛིན་ལ་མི་གནོད་པར་ཐལ། དེས་བདག་མེད་མི་སྒོམ་པའི་ཕྱིར། རྟགས་ཁས། ཐེག་ཆེན་གྱི་མཐོང་ལམ་དུ་བདག་མེད་གཉིས་མངོན་སུམ་རྟོགས་པ་མེད་པར་ཐལ། ཐེག་ཆེན་གྱི་སྦྱོར་ལམ་གྱི་གནས་སྐབས་སུ་བདག་མེད་གཉིས་དོན་སྤྱིའི་ཚུལ་གྱིས་སྒོམ་པ་མི་སྲིད་པའི་ཕྱིར། རྟགས་ཁས། དོན་རྣམ་གྱི་ཐ་སྙད་མདོ་དང་བསྟན་བཅོས་ལས་བསྟན་པར་ཐལ། མདོ་ལས། རབ་འབྱོར་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་དང་ཅེས་པའི་རྣམ་པའི་སྒྲས་ཆོས་ཐམས་ཅད་བསྡུས་པའི་ཕྱིར་དང་། རྒྱུད་བླར། གཟུགས་ཀྱི་རྣམ་པ་དམན་པ་དང་། །ཞེས་དང་། སྤྱོད་འཇུག་ལས། སྨན་གྱི་རྣམ་པ་གང་དག་ཡོད་པ་དང་། །ཞེས་གསུངས་པའི་ཕྱིར། གཉིས་པ་ལ། ཡུལ་སྐྱེ་མེད་གསུམ་བསྒོམ་བྱའི་གཙོ་བོ་ཡིན་པ་དང་། ཡུལ་ཅན་མཁྱེན་གསུམ་གྱི་རྣམ་པ་དེ་བསྒོམ་བྱའི་གཙོ་བོ་མིན་པའི་ཁྱད་པར་འཐད་པར་ཐལ། དམ་བཅའ་དེའི་ཕྱིར། ཡང་མི་སྡུག་པའི་ཏིང་ངེ་འཛིན་གྱི་སྐབས་སུ་ཤེས་རྣམ་བསྒོམ་བྱའི་གཙོ་བོ་མིན་པ་དང་། དོན་རྣམ་དེ་ཡིན་པའི་ཁྱད་པར་འཐད་པར་ཐལ། དེའི་སྐབས་སུ་དོན་རྣམ་བསྒོམ་པས་ཅིག་ཤོས་དེ་བསྒོམ་པར་འགྱུར་བས་ཁྱབ་པ་གང་ཞིག དེའི་སྐབས་སུ་ཤེས་རྣམ་སྒོམ་ན་དོན་རྣམ་སྒོམ་པས་མ་ཁྱབ་པའི་ཕྱིར་ཏེ། དེའི་སྐབས་སུ་དེ་ཡོད་ན་དེ་ཡོད་པས་མ་ཁྱབ་པའི་ཕྱིར། མ་གྲུབ་ན། ས་གཞི་ཐམས་ཅད་ཀེང་རུས་ཡིན་པ་ཡོད་པར་ཐལ། དེའི་སྐབས་སུ་དེར་སྣང་བའི་ཤེས་པ་ཡོད་པའི་ཕྱིར། རིམ་བཞིན་ཁས་བླངས་སོ། །གསུམ་པ་ལ། ཐེག་ཆེན་གྱི་ཚོགས་ལམ་ན་མཁྱེན་གསུམ་གྱི་རྣམ་པ་སྒོམ་པ་མེད་པར་ཐལ། མཁྱེན་གསུམ་གྱི་དེ་བསྒོམ་བྱ་རྣམ་པ་མིན་པའི་ཕྱིར། རྟགས་ཁས། འདོད་ན། ཐམས་ཅད་མཁྱེན་པ་ཉིད་གསུམ་ཡོངས་སུ་ཤེས་པ་ནི། ཞེས་པའི་གཞུང་དང་འགལ་ལོ། །ཡང་བྱང་སེམས་ཀྱི་སྦྱོར་ལམ་ཆོས་ཅན། ཁྱོད་བསྒོམ་བྱ་མིན་པར་ཐལ། ཁྱོད་སྒོམ་བྱེད་ཀྱི་བློ་ཡིན་པའི་ཕྱིར། ཁྱབ་པ་ཁས། འདོད་ན། སྦྱོར་བ་སྒོམ་པ་པོའི་གང་ཟག་མི་སྲིད་པར་ཐལ་ལོ། །གཞན་ཡང་། རྟོགས་བྱེད་ཀྱི་བློ་ཡིན་ན་རྟོགས་བྱ་མིན་དགོས་པར་ཐལ། སྒོམ་བྱེད་ཀྱི་བློ་ཡིན་ན་བསྒོམ་བྱ་མིན་དགོས་པའི་ཕྱིར། གཉིས་པ་ནི། བྱང་སེམས་ཀྱི་བསྒོམ་བྱ་རྣམ་པ་ཡིན་ན་ཤེས་རྣམ་ཡིན་པས་མ་ཁྱབ་སྟེ། ཡུལ་བདག་མེད་གཉིས་པོ་དེའང་དེའི་བསྒོམ་བྱ་རྣམ་པ་ཡིན་པའི་ཕྱིར་དང་། དེ་རྟོགས་པའི་བློའི་རྒྱུན་དེའང་དེ་ཡིན་པའི་ཕྱིར། བཞི་པ་ལ་དགག་གཞག་སྤང་གསུམ་ལས། དང་པོ་ནི། མཁྱེན་རབ་ཀྱི་དབང་ཕྱུག་གྲགས་པ་བཟང་པོ་ན་རེ། རྣམ་པ་སྟོན་པའི་མདོ་བསྟན་བཅོས་གཉིས་ཀ་ལས་དོན་རྣམ་དང་ཤེས་རྣམ་གཉིས་ཀ་དངོས་སུ་སྟོན་ཏེ། མདོ་ལས། ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ་ཞེས་པས་ཤེས་རྣམ་དངོས་སུ་བསྟན། བཀའ་སྩལ་པ། ནམ་མཁའ་དམིགས་སུ་མེད་པའི་ཕྱིར། །ཞེས་པས་དོན་རྣམ་དངོས་སུ་བསྟན། བསྟན་བཅོས་ལས། གཞི་ཤེས་པ་ཡི་བྱེ་བྲག་གིས། །རྣམ་པ་ཞེས་བྱ་མཚན་ཉིད་དེ། །བདེན་པ་བཞི་ཡི་བྱེ་བྲག་གིས། །དེ་ནི་རྣམ་པ་བཞི་རུ་འདོད། །ཅེས་པས་དོན་རྣམ་དངོས་སུ་བསྟན། ཤེས་པའི་བྱེ་བྲག་གིས། །རྣམ་པ་ཤེས་བྱ་མཚན་ཉིད་དེ། །ཀུན་མཁྱེན་ཉིད་ནི་རྣམ་གསུམ་ཕྱིར། །དེ་ནི་རྣམ་པ་གསུམ་དུ་འདོད། །ཅེས་པས་ཤེས་རྣམ་དངོས་སུ་བསྟན་པའི་ཕྱིར་ཞེས་གསུངས་སོ། །འབྲེ་ཨར་ན་རེ། མདོར་བསྟན་གྱི་སྐབས་སུ་ཤེས་རྣམ་དངོས་སུ་བསྟན་ནས། དོན་རྣམ་ཤུགས་ལ་བསྟན། རྒྱས་བཤད་དུ་དེ་ལས་ལྡོག་སྟེ་བསྟན་གསུང་ངོ་། །དང་པོ་ལ། སེམས་བསྐྱེད་པ་ནི་གཞན་དོན་ཕྱིར། །ཞེས་པའི་སྐབས་སུ་ཐེག་ཆེན་གྱི་སེམས་བསྐྱེད་དང་། ཐེག་དམན་སེམས་བསྐྱེད་གཉིས་ཀ་དངོས་སུ་བསྟན་པར་ཐལ། གཞུང་དེ་ཉིད་ཀྱིས་ཐེག་ཆེན་སེམས་བསྐྱེད་དངོས་སུ་བསྟན་ཞིང་། སེམས་བསྐྱེད་པ་ནི་རང་དོན་ཕྱིར། །ཉི་ཚེ་བ་ཡི་བྱང་ཆུབ་འདོད། །ཅེས་པའི་གཞུང་གིས་ཐེག་དམན་སེམས་བསྐྱེད་དངོས་སུ་བསྟན་པའི་ཕྱིར། ཁྱབ་པ་ཁས། དེ་ལ་ཁོ་ན་རེ། འབྲེལ་མེད་དེ། དེ་འདྲའི་གཞུང་མེད་པའི་ཕྱིར་ཞེ་ན། འོ་ན། ཁྱེད་རང་གི་དེ་ལ་འབྲེལ་ཤིག་ཙམ་ཡང་མེད་པར་ཐལ། དེ་འདྲའི་གཞུང་མེད་པའི་ཕྱིར། དེ་བཞིན་དུ། ཚུ་རོལ་ཕ་རོལ་མཐའ་ལ་མིན། །ཞེས་པའི་སྐབས་སུ། སྲིད་ཞི་ལ་མི་གནས་པའི་གཞི་ཤེས་དང་། དེ་ལ་གནས་པའི་གཞི་ཤེས་གཉིས་ཀ་དངོས་སུ་བསྟན་པར་ཐལ། གཞུང་དེས་སྲིད་ཞི་ལ་མི་གནས་པའི་གཞི་ཤེས་དངོས་སུ་བསྟན་པ་གང་ཞིག ཚུ་རོལ་ཕ་རོལ་མཐའ་ལ་ནི། །དེ་དག་བར་ན་གནས་པ་དེ། །དུས་རྣམ་མཉམ་ཉིད་མི་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། །ཅེས་པས་སྲིད་ཞི་ལ་གནས་པའི་གཞི་ཤེས་དངོས་སུ་བསྟན་པའི་ཕྱིར། མདོར་ན་གཞུང་དེ་དག་དངོས་སུ་མེད་པས་དངོས་བསྟན་ལ་མི་འཐད་ཅིང་། དོན་ཐོབ་ལ་ཡོད་པ་ནི་ཐམས་ཅད་ལའང་མཚུངས་སོ། །གཉིས་པ་ལ། དམ་བཅའ་དེ་མི་འཐད་པར་ཐལ། རྣམ་པ་མདོར་བསྟན་གྱི་གཞུང་དང་། དེ་རྒྱས་བཤད་ཀྱི་གཞུང་གཉིས་བསྟན་ཚུལ་མཚུངས་པའི་ཕྱིར། དེ་ལ་ཁོ་ན་རེ། སྐབས་ལྔ་པར་རྟོགས་པ་མདོར་བསྟན་གྱི་སྐབས་སུ་གདགས་ཆོས་གང་ཟག་ལ་རྫས་ཡོད་དང་བཏགས་ཡོད་དུ་འཛིན་པ་དེ་དངོས་སུ་བསྟན། གདགས་གཞི་ཆོས་ལ་རྫས་ཡོད་བཏགས་ཡོད་དུ་འཛིན་པ་ཤུགས་ལ་བསྟན། རྒྱས་བཤད་དུ་དེ་ལས་བཟློག་སྟེ་བསྟན་པ་མི་འཐད་པར་ཐལ། སྐབས་ལྔ་པའི་རྟོག་པ་མདོར་བསྟན་གྱི་གཞུང་དང་། རྒྱས་བཤད་ཀྱི་གཞུང་གཉིས་པོ་བསྟན་ཚུལ་མཚུངས་པའི་ཕྱིར། རྟགས་སྔ་མ་ལ་བསྒྲིགས་སོ་ཞེ་ན། སྐབས་བཞི་པའི་གཞུང་གཉིས་པོ་དེ་རྣམ་པའི་གཞི་བསྟན་ཚུལ་མི་མཚུངས་པར་ཐལ། སྐབས་ལྔ་པའི་གཞུང་གཉིས་པོ་དེ་རྟོག་པའི་ཡུལ་བསྟན་ཚུལ་མི་མཚུངས་པའི་ཕྱིར། ཁྱབ་རྟགས་སྒྲིག་མཚམས་ལ་ཁས། མ་གྲུབ་ན། དེར་ཐལ། སྐབས་ལྔ་པའི་རྟོག་པ་མདོར་བསྟན་དུ་རྟོག་པའི་ཡུལ་གང་ཟག་ཏུ་བསྟན་ཞིང་། རྒྱས་བཤད་དུ་དེའི་ཡུལ་ཆོས་སུ་བསྟན་པའི་ཕྱིར། རྩ་བར་འདོད་ན། མི་ནུས་ཏེ། རྣམ་པ་མདོར་བསྟན་གྱི་གཞི་དེ་གཞི་ཡིན་པར་བསྟན། རྒྱས་བཤད་ཀྱི་སྐབས་སུའང་མདོར་བསྟན་གྱི་རྣམ་པའི་གཞི་དེ་བདེན་བཞིར་བསྟན་པའི་ཕྱིར། གཞན་ཡང་། མེད་པའི་རྣམ་པ་ནས་གཟུང་སྟེ། །ཞེས་པའི་སྐབས་ནས་དངོས་བསྟན་གྱི་རྣམ་པ་ཉེར་བདུན་པོ་དེ་དོན་རྣམ་དང་ཤེས་རྣམ་གཉིས་ཀྱི་ནང་ནས་དོན་རྣམ་ཁོ་ན་ཡིན་པར་ཐལ། གཞུང་དེས་དེ་གཉིས་ཀྱི་ནང་ནས་དོན་རྣམ་ཁོ་ན་དངོས་སུ་བསྟན་པའི་ཕྱིར། འདོད་ན། དེའི་སྐབས་ནས་དངོས་བསྟན་གྱི་རྣམ་པ་ཉེར་བདུན་པོ་དེ་གཞི་ཤེས་ཀྱི་རྣམ་པ་མིན་པར་ཐལ། འདོད་པ་དེའི་ཕྱིར། འདོད་ན། མཁྱེན་གསུམ་གྱི་རྣམ་པ་བརྒྱ་དང་བདུན་ཅུ་རྩ་གསུམ་མེད་པར་ཐལ་ལོ། །ཡང་རྣམ་པ་བརྒྱ་བདུན་ཅུ་རྩ་གསུམ་པོ་དོན་རྣམ་ཡིན་པ་དང་། མཁྱེན་གསུམ་གྱི་རྣམ་པ་ཤེས་རྣམ་ཡིན་པའི་ཁྱད་པར་འཐད་པར་ཐལ། རྣམ་པ་རྒྱས་བཤད་ཀྱི་དངོས་བསྟན་གྱི་རྣམ་པ་དོན་རྣམ་ཡིན་པ་དང་། ཀུན་མཁྱེན་ཉིད་ནི་རྣམ་གསུམ་ཕྱིར། །ཞེས་པའི་སྐབས་ཀྱི་རྣམ་པ་ཤེས་རྣམ་ཡིན་པའི་ཁྱད་པར་འཐད་པའི་ཕྱིར། རྟགས་ཁས། གཉིས་པ་ནི། རྣམ་པ་མདོར་བསྟན་དང་རྒྱས་བཤད་ཀྱི་གཞུང་གཉིས་ཀས་ཤེས་རྣམ་དངོས་སུ་བསྟན་ཏེ། རྣམ་པ་མདོར་བསྟན་གྱི་སྐབས་སུ་གཞི་ཤེས་པའི་ཡེ་ཤེས་ཀྱི་བྱེ་བྲག་དེ་རྣམ་པའི་མཚན་ཉིད་དུ་བསྟན་ཞིང་། དེའི་དབྱེ་བ་ལ་མཁྱེན་གསུམ་གྱི་རྣམ་པ་གསུམ་དུ་དབྱེ་བ་གང་ཞིག རྒྱས་བཤད་ཀྱི་གཞུང་གསུམ་གྱིས་མཁྱེན་གསུམ་སོ་སོའི་རྣམ་པ་དེ་ཉིད་རྒྱས་པར་བཤད་པའི་ཕྱིར། གསུམ་པ་ལ། ཁ་ཅིག མེད་པའི་རྣམ་པ་ནས་གཟུང་སྟེ། །ཞེས་པའི་སྐབས་ནས་དོན་རྣམ་དངོས་སུ་བསྟན་པར་ཐལ། དེར་མེད་པའི་རྣམ་པ་དངོས་སུ་བསྟན་པའི་ཕྱིར། ཡང་དེར་ཐལ། ལམ་བདེན་གྱི་རྣམ་པ་འཆད་པའི་སྐབས་སུ་རྨི་ལམ་གྱི་རྣམ་པ་དངོས་སུ་བསྟན་པའི་ཕྱིར། ཡང་། དྲན་པ་ཉེར་གཞག་ནས་གཟུང་སྟེ། །ཞེས་པའི་སྐབས་སུ་དོན་རྣམ་དངོས་སུ་བསྟན་པར་ཐལ། དེར་དེ་བཞིན་ཉིད་ཀྱི་རྣམ་པ་དངོས་སུ་བསྟན་པའི་ཕྱིར། གལ་ཏེ་དེ་དག་དེ་རྟོགས་པའི་ཡེ་ཤེས་ཀྱི་བྱེ་བྲག་ལ་འདོད་ན། དོན་གྱི་རྣམ་པ་དེ་དོན་རྟོགས་པའི་ཡེ་ཤེས་ཀྱི་བྱེ་བྲག་ཡིན་པར་ཐལ། མེད་པའི་རྣམ་པ་དེ་སྡུག་བསྔལ་བདེན་པ་རྟག་པར་མེད་པར་རྟོགས་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར་དང་། རྨི་ལམ་གྱི་རྣམ་པ་དེ་གཟུང་བ་ཕྱི་རོལ་གྱི་དོན་རྨི་ལམ་ལྟར་རྟོགས་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར་དང་། དེ་བཞིན་ཉིད་ཀྱི་རྣམ་པ་དེ་བཞིན་ཉིད་རྟོགས་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། ཡང་། རྒྱུ་དང་ལམ་དང་སྡུག་བསྔལ་དང་། །ཞེས་སོགས་ཀྱི་སྐབས་སུ་དོན་རྣམ་དངོས་སུ་བསྟན་པར་ཐལ། དེར་བདེན་བཞི་དངོས་སུ་བསྟན་པའི་ཕྱིར། ཡང་བདེན་པ་བཞི་པོ་ཆོས་ཅན། རྒྱུ་དང་ལམ་དང་སྡུག་བསྔལ་དང་། །ཞེས་པའི་སྐབས་ནས་དངོས་བསྟན་གྱི་རྣམ་པ་ཡིན་པར་ཐལ། དེའི་སྐབས་ནས་དངོས་སུ་བསྟན་པ་དང་རྣམ་པའི་གཞི་མཐུན་ཡིན་པའི་ཕྱིར། ཞེས་པ་དང་དྲུག་ལས། དང་པོ་ལ། འདིར་བསྟན་མེད་པའི་རྣམ་པ་དེ་སྡུག་བསྔལ་བདེན་པ་རྟག་པར་མེད་པར་རྟོགས་པའི་ཡེ་ཤེས་ཀྱི་བྱེ་བྲག་མིན་པར་ཐལ། ཐལ་བ་དང་པོ་ལ་ཁྱབ་འབྲེལ་ཡོད་པའི་ཕྱིར། འདོད་ན། དེ་གཞི་ཤེས་ཀྱི་རྣམ་པ་མིན་པར་ཐལ། འདོད་པ་དེའི་ཕྱིར། འདོད་ན། མེད་པའི་རྣམ་པ་ནས་གཟུང་སྟེ། །ཞེས་སོགས་ཀྱི་གཞུང་དེས་གཞི་ཤེས་ཀྱི་རྣམ་པ་ཉེར་བདུན་དངོས་སུ་མ་བསྟན་པར་ཐལ། འདོད་པ་དེའི་ཕྱིར། འདོད་ན། དེ་དངོས་སུ་སྟོན་བྱེད་ཀྱི་རྒྱན་གཞུང་མེད་པར་ཐལ་ལོ། །གཉིས་པ་ལ། རྨི་ལམ་དང་ཞེས་པའི་སྐབས་ནས་བསྟན་པའི་རྨི་ལམ་གྱི་རྣམ་པ་དེ་རྨི་ལམ་ཉིད་ལ་བྱེད་རིགས་པར་ཐལ། ཐལ་བ་གཉིས་པ་ལ་ཁྱབ་པ་ཡོད་པའི་ཕྱིར། འདོད་ན། མིན་པར་ཐལ། དེ་ཤེས་སྒྲིབ་གཟུང་རྟོག་གི་གཉེན་པོའི་རིགས་སུ་གནས་པའི་རྟོགས་རིགས་ཡིན་པའི་ཕྱིར་ཏེ། ལམ་གཉིས་པའི་རྣམ་པ་མདོར་བསྟན་གྱི་སྐབས་སུ། དེའི་ཕྱིར་དེ་དག་གི་ཤེས་བྱའི་སྒྲིབ་པའི་གཉེན་པོ་ཉིད་དུ་སྒོམ་པའི་ལམ་ཟག་པ་དང་བཅས་པ་དང་ཞེས་དང་། རྒྱས་བཤད་དུ་སྤྱིར་ཤེས་བྱའི་སྒྲིབ་པའི་གཉེན་པོར་གྱུར་པ་དག་ཡིན་ནོ་ཞེས་གསུངས་པའི་ཕྱིར། གསུམ་པ་ལ། སངས་རྒྱས་ཐམས་ཅད་ཀྱིས་བཤད་པའི་དེ་བཞིན་ཉིད་དང་། ཞེས་པའི་སྐབས་ནས་དངོས་བསྟན་གྱི་དེ་བཞིན་ཉིད་ཀྱི་རྣམ་པ་དེ་དེ་བཞིན་ཉིད་ཡིན་པར་ཐལ། ཐལ་བ་གསུམ་པ་ལ་ཁྱབ་པ་ཡོད་པའི་ཕྱིར། འདོད་ན། མིན་པར་ཐལ། ཐུན་མོང་མིན་པའི་ལམ་ཡིན་པའི་ཕྱིར། མ་གྲུབ་ན། དེར་ཐལ། རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་ནི་ཤིན་ཏུ་ཕུལ་དུ་བྱུང་བའི་ཕྱིར། ཐུན་མོང་མིན་པའི་ལམ་གཅིག་པོ་ཁོ་ན་སྟེ་ཞེས་གསུངས་པའི་ཕྱིར། བཞི་པ་ལ། མཚན་ཉིད་མེད་པའི་ཆོས་འཁོར་དེ་ཆོས་ཐམས་ཅད་བདེན་པའི་མཚན་ཉིད་མེད་པར་མངོན་སུམ་རྟོགས་པའི་ཆོས་འཁོར་ཡིན་པར་ཐལ། མཚན་ཉིད་མེད་པའི་སྐད་ཅིག་མའི་སྦྱོར་བ་དེ་ཆོས་ཐམས་ཅད་བདེན་པའི་མཚན་ཉིད་མེད་པར་མངོན་སུམ་རྟོགས་པའི་སྐད་ཅིག་མའི་སྦྱོར་བ་ཡིན་པའི་ཕྱིར། རྣམ་པར་སྨིན་པའི་འབྲས་བུ་དེ་དུས་སྐད་ཅིག་མ་གཅིག་ལ་རྣམ་པར་སྨིན་པའི་ཟག་མེད་ཀྱི་ཆོས་ཐམས་ཅད་མངོན་དུ་བྱེད་ནུས་པའི་འབྲས་བུ་ཡིན་པར་ཐལ། རྣམ་པར་སྨིན་པའི་སྐད་ཅིག་མའི་སྦྱོར་བ་དེ་དུས་སྐད་ཅིག་མ་གཅིག་ལ་དེ་མངོན་དུ་བྱེད་ནུས་པའི་སྐད་ཅིག་མའི་སྦྱོར་བ་ཡིན་པའི་ཕྱིར། འདི་འདྲའི་རིགས་ཀྱི་ཚིག་འདྲ་ཀུན། །དེ་འདྲའི་ཚིག་གིས་སུན་དབྱུང་ངོ་། །ཤིག་གསོད་པ་ལ་སཏྭ་གྲི་བཞིན། །དེ་འདྲའི་དགོས་པ་ཅི་ཞིག་ཡོད། །ལྔ་པ་ལ། དེ་ཡང་ས་གསེར་ཟླ་བ་མེ། །ཞེས་པའི་སྐབས་སུ། ས་དང་གསེར་དང་ཟླ་བ་ཡིན་པར་གྱུར་པའི་སེམས་བསྐྱེད་གཅིག་དངོས་སུ་བསྟན་པར་ཐལ། དེར་ས་དང་གསེར་སོགས་དངོས་སུ་བསྟན་པའི་ཕྱིར། དྲུག་པ་ལ་ཤཱཀྱ་ཐུབ་པ་ཆོས་ཅན། སངས་རྒྱས་ལ་སོགས་དཀོན་མཆོག་གསུམ། །ཞེས་པའི་སྐབས་སུ་དངོས་སུ་བསྟན་པའི་དགེ་འདུན་དཀོན་མཆོག་ཡིན་པར་ཐལ། དེའི་སྐབས་ནས་དངོས་སུ་བསྟན་པ་དང་དགེ་འདུན་དཀོན་མཆོག་གི་གཞི་མཐུན་ཡིན་པའི་ཕྱིར། ཁྱབ་པ་ཁས། མདོར་ན་རྣམ་པ་སྟོན་པའི་གཞུང་འདི་དག་གིས་རྣམ་པ་བརྒྱ་བདུན་ཅུ་རྩ་གསུམ་དངོས་སུ་བསྟན་ཅིང་། དེ་དག་གང་རུང་ཡིན་ན་ཤེས་རྣམ་ཡིན་དགོས་པའི་གནད་ཀྱི་དོན་འདི་ཡིན་པས་དེ་ཤེས་པར་གྱིས་ལ། གཞན་ཅལ་ཅོལ་མ་སྨྲ་ཞིག རྣམ་པ་བརྒྱ་དང་བདུན་ཅུ་གསུམ། །ཤེས་རྣམ་ཡིན་པར་བྱམས་པ་བཞེད། །ཤེས་བྱ་ཀུན་རིག་གསུང་གིས་བསྟན། །བསོད་ནམས་སེང་གེས་དེ་ལྟར་གོ །ཨེ་མ་ཧོའི་ཚིགས་སུ་བཅས་པའོ། །ཉོན་མོངས་པའི་སྒྲིབ་པའི་གཉེན་པོའོ། །ཞེས་པའི་སྐབས་སུ་ལམ་གསུམ་ངོས་གཟུང་། ཟག་བཅས་ཟག་མེད་ཀྱི་དོན་ལ་དཔྱད། སྤང་བྱའི་སྒྲིབ་པ་ལ་དཔྱད་པ་དང་གསུམ་ལས། དང་པོ་ལ། དགག་གཞག་གཉིས་ལས། དང་པོ་ལ། ཁ་ཅིག འདིར་བསྟན་ལམ་བདེན་གྱི་རྣམ་པ་ཆོས་ཅན། ཁྱོད་ལ་རྣམ་པ་གསུམ་དུ་ཡོད་དེ། ཁྱོད་ལ་ཉོན་སྒྲིབ་ཀྱི་གཉེན་པོར་གྱུར་པའི་ལམ་ཟག་མེད་གཅིག ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་སྒོམ་ལམ་ཟག་བཅས་གཅིག དེའི་གཉེན་པོར་གྱུར་པའི་ལམ་ཟག་མེད་གཅིག་རྣམས་སུ་ཡོད་པའི་ཕྱིར། ཞེས་བཀོད་ནས། ལམ་དང་པོ་ནི་ཐེག་དམན་གྱི་རྒྱུད་ཀྱི་ཉོན་སྒྲིབ་ཀྱི་གཉེན་པོར་གྱུར་པའི་ལམ་ཟག་མེད་དང་། གཉིས་པ་ནི་རང་རྒྱལ་གྱི་སྒོམ་ལམ་རྗེས་ཐོབ་དང་། གསུམ་པ་ནི་རང་རྒྱལ་གྱི་མཐོང་ལམ་དང་སྒོམ་ལམ་མཉམ་གཞག་ལ་བྱེད་ཟེར་རོ། །འོ་ན་འདིར་བསྟན་ལམ་བདེན་གྱི་རྣམ་པ་བཅོ་ལྔ་པོ་གང་རུང་ཡིན་ན་ཐེག་དམན་གྱི་མཁྱེན་པ་ཡིན་དགོས་པར་ཐལ། དེ་ཡིན་ན་ཁྱེད་རང་གིས་ངོས་གཟུང་བ་གསུམ་པོ་གང་རུང་ཡིན་དགོས་པའི་ཕྱིར། རྟགས་ཁས། འདོད་ན། བྱང་སེམས་ཀྱི་རྒྱུད་ལ་འདིར་བསྟན་གྱི་ལམ་བདེན་གྱི་རྣམ་པ་བཅོ་ལྔ་པོ་གང་རུང་མེད་པར་ཐལ། འདོད་པ་དེའི་ཕྱིར། འདོད་ན། དེའི་རྒྱུད་ལ་གཞི་ཤེས་ཀྱི་རྣམ་པ་ཉེར་བདུན་མེད་པར་ཐལ། འདོད་པ་དེའི་ཕྱིར། འདོད་ན། དེའི་རྒྱུད་ལ་གང་ཟག་གི་བདག་མེད་རྟོགས་པའི་རྟོགས་རིགས་མེད་པར་ཐལ་བ་དང་། གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་མེད་པར་ཐལ་ལོ། །དེ་ལ་ཁོ་ན་རེ། འདིར་བསྟན་ལམ་བདེན་གྱི་རྣམ་པ་ཡིན་ན་ཐེག་དམན་གྱི་མཁྱེན་པ་ཡིན་དགོས་པར་ཐལ། འདིར་བསྟན་ལམ་གཉིས་པའི་མཁྱེན་པ་ཡིན་ན་རང་རྒྱལ་གྱི་སྒོམ་ལམ་རྗེས་ཐོབ་ཡིན་དགོས་པའི་ཕྱིར་ཏེ། མདོར་བསྟན་དུ། ཐམས་ཅད་ཤེས་པ་ཉིད་ཀྱི་རང་སངས་རྒྱས་རྣམས་ཀྱང་བསྡུས་པ་དེའི་ཕྱིར་དེ་དག་གི་ཤེས་བྱའི་སྒྲིབ་པའི་གཉེན་པོ་ཉིད་དུ་སྒོམ་པའི་ལམ་ཟག་པ་དང་བཅས་པ་དང་ཞེས་དང་། རྒྱས་བཤད་དུ་སྤྱིར་ཤེས་བྱའི་སྒྲིབ་པའི་གཉེན་པོར་གྱུར་པ་དག་ཅེས་གསུངས་པའི་ཕྱིར་ཟེར་རོ། །འོ་ན་དྲན་པ་ཉེར་གཞག་ནས་གཟུང་སྟེ། །ཞེས་པའི་སྐབས་ནས་དངོས་བསྟན་གྱི་བྱང་ཕྱོགས་སོ་བདུན་པོ་གང་རུང་ཡིན་ན། ཉན་ཐོས་ཀྱི་མཁྱེན་པ་ཡིན་དགོས་པར་ཐལ། རྩ་བར། སློབ་མ་བྱང་ཆུབ་སེམས་དཔའ་དང་། །སངས་རྒྱས་རྣམས་ལ་རིམ་བཞིན་དེ། །ཞེས་དང་། འགྲེལ་པར། སློབ་མ་རྣམས་ལ་ཀུན་ཤེས་པ་ཉིད་ཀྱི་ཤེས་སོགས་གསུངས་པའི་ཕྱིར། ཁོ་ན་རེ། མ་ཁྱབ་སྟེ། གཞུང་དེ་སངས་རྒྱས་ཀྱི་བྱང་ཕྱོགས་སོ་བདུན་གྱི་མཐུན་ཡུལ་དུ་གྱུར་པའི་བྱང་ཕྱོགས་སོ་བདུན་ཉིད་ཉན་ཐོས་ཀྱི་རྒྱུད་ལ་ཡོད་པར་བསྟན་པ་ཙམ་ཡིན་པའི་ཕྱིར་ཞེ་ན། བདེན་མོད། འོ་ན་སྔ་མ་ལའང་མ་ཁྱབ་པར་ཐལ། གཞུང་དེས་བྱང་སེམས་ཀྱི་རྒྱུད་ཀྱི་ལམ་གཉིས་པའི་རྣམ་པ་ཐེག་པ་འབྲིང་པོའི་གང་ཟག་གི་བདག་མེད་རྟོགས་པའི་རྟོགས་རིགས་ཡིན་པ་དེ་རང་རྒྱལ་གྱི་སྒོམ་ལམ་རྗེས་ཐོབ་ཡིན་པར་བསྟན་པ་ཙམ་ཡིན་པའི་ཕྱིར། དར་ཊཱིཀ་པ་ན་རེ། འདིར་བསྟན་གྱི་ལམ་དང་པོ་ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས། བར་པ་ཐེག་ཆེན་གྱི་ཟག་བཅས་སྒོམ་ལམ། ཐ་མ་དེའི་ཟག་མེད་སྒོམ་ལམ་ལ་འཇོག་ཟེར། ཁ་ཅིག ལམ་དང་པོ་ཉན་ཐོས་སློབ་པའི་རྒྱུད་ཀྱི་མཉམ་གཞག་ཡེ་ཤེས། བར་པ་རང་རྒྱལ་གྱི་སྒོམ་ལམ་རྗེས་ཐོབ་ཡེ་ཤེས། ཐ་མ་དེའི་སྒོམ་ལམ་མཉམ་གཞག་ཡེ་ཤེས་ཡིན་ཟེར། ཁ་ཅིག ལམ་ཕྱི་མ་དེ་རང་རྒྱལ་གྱི་མཐོང་ལམ་མཉམ་གཞག་ཡེ་ཤེས་ལ་འཇོག་སྟེ། ཉི་ཁྲི་སྣང་བ་ལས། སྒོམ་ལམ་པའི་ཟག་པ་དང་བཅས་པ་དང་། མཐོང་བའི་ལམ་ཟག་པ་མེད་པ་གཉིས་ཡིན་པས་ལམ་རྣམ་པ་གསུམ་ཡིན་ནོ་ཞེས་གསུངས་པའི་ཕྱིར་ཞེས་ཟེར་རོ། །དང་པོ་ལ་འདིར་བསྟན་གྱི་ལམ་ཕྱི་མ་གཉིས་གང་རུང་ཡིན། རང་རྒྱལ་གྱི་སློབ་ལམ་ཡང་ཡིན་པའི་གཞི་མཐུན་མེད་པར་ཐལ། དེ་གཉིས་གང་རུང་ཡིན་ན་ཐེག་ཆེན་གྱི་སྒོམ་ལམ་ཡིན་དགོས་པའི་ཕྱིར། འདོད་ན། གཞི་ཤེས་ཀྱི་རྣམ་པའི་སྐབས་སུ་ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་བཅས་ཟག་མེད་འཆད་རིགས་པའི་སྒྲུབ་བྱེད་དུ་ཐམས་ཅད་ཤེས་པ་ཉིད་ཀྱི་རང་སངས་རྒྱས་རྣམས་ཀྱང་བསྡུས་ཞེས་བཤད་པ་འབྲེལ་མེད་པར་ཐལ། འདོད་པ་དེའི་ཕྱིར། ཁོ་ན་རེ། སྐྱོན་མེད་དེ། ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་རང་རྒྱལ་གྱི་ལམ་གྱི་རྟོགས་རིགས་དེ་ལ་འདིར་བསྟན་གྱི་ལམ་ཕྱི་མ་གཉིས་སུ་འཇོག་པའི་ཕྱིར་ཞེ་ན། བྱང་སེམས་ཚོགས་ལམ་པའི་རྒྱུད་ལ་འདིར་བསྟན་གྱི་ལམ་ཕྱི་མ་གཉིས་ཡོད་པར་ཐལ། དེའི་རྒྱུད་ལ་དེ་གཉིས་ཀྱི་རྟོགས་རིགས་ཡོད་པའི་ཕྱིར། འདོད་ན། ཁས་བླངས་འགལ་ལོ། །གྲུབ་མཐའ་གཉིས་པ་ལ། རང་རྒྱལ་གྱི་རིགས་ཅན་སློབ་པའི་རྒྱུད་ལ་ཉོན་སྒྲིབ་ཀྱི་གཉེན་པོར་གྱུར་པའི་ལམ་ཟག་མེད་མེད་པར་ཐལ། འདིར་བསྟན་ལམ་དང་པོ་དེ་ཡིན་ན་ཉན་ཐོས་ཀྱི་མཁྱེན་པ་ཡིན་དགོས་པའི་ཕྱིར། གཞན་ཡང་རང་རྒྱལ་གྱི་མཐོང་ལམ་དང་། ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་མེད་ཀྱི་གཞི་མཐུན་མེད་པར་ཐལ། འདིར་བསྟན་གྱི་ལམ་གསུམ་པ་ཡིན་ན་རང་རྒྱལ་གྱི་སྒོམ་ལམ་མཉམ་གཞག་དེ་ཡིན་དགོས་པའི་ཕྱིར། གསུམ་པ་ལ། རང་རྒྱལ་གྱི་སྒོམ་ལམ་མཉམ་གཞག་དང་། ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པར་རྟོགས་པའི་གཞི་མཐུན་མེད་པར་ཐལ། འདིར་བསྟན་གྱི་ལམ་ཕྱི་མ་དེ་ཡིན་ན་རང་རྒྱལ་གྱི་མཐོང་ལམ་མཉམ་གཞག་ཡེ་ཤེས་ཡིན་དགོས་པའི་ཕྱིར། གཉིས་པ་ནི། སྐབས་འདིར་བསྟན་གྱི་བསྟན་བྱའི་གཙོ་བོར་གྱུར་པའི་གཞི་ཤེས་ཀྱི་རྣམ་པ་ཉེར་བདུན་བྱང་སེམས་ཀྱི་མཁྱེན་པ་ཡིན་ཏེ། རྣམ་རྫོགས་སྦྱོར་བ་ཡིན་པའི་ཕྱིར། འོན་ཀྱང་དེ་བྱང་སེམས་རང་གི་རྟོགས་རིགས་མིན་པས་གང་གི་རྟོགས་རིགས་ཡིན་པའི་ཡུལ་ངོས་གཟུང་བའི་ཚེ། བདེན་པ་དང་པོ་གསུམ་གྱི་རྣམ་པར་བཅུ་གཉིས། ལམ་བདེན་གྱི་རྣམ་པ་ལ་ལམ་དང་པོའི་རྣམ་པ་བཞི་སྟེ། བཅུ་དྲུག་ནི་ཉན་ཐོས་ཀྱི་རྟོགས་རིགས་ཡིན་ལ། གཉིས་པ་དང་གསུམ་པའི་རྣམ་པ་བཅུ་གཅིག་ནི་རང་རྒྱལ་གྱི་རྟོགས་རིགས་ཡིན་ནོ། །དེས་ན་ཐེག་དམན་གྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་དང་། བྱང་སེམས་ཀྱི་རྒྱུད་ཀྱི་རྣམ་པ་ཉེར་བདུན་གཉིས་ཀ་སྐབས་འདིར་བསྟན་པར་འདྲ་ཡང་། སྔ་མ་བསྟན་བྱའི་གཙོ་བོ་མིན་ཞིང་། ཕྱི་མ་དེ་ཡིན་ནོ། །གཉིས་པ་ལ་དགག་གཞག་གཉིས་ལས། དང་པོ་ལ། འདིར་བསྟན་ཟག་བཅས་ཟག་མེད་ལ། །ཁ་ཅིག སྒྲ་དོན་འདྲེས་འཛིན་གྱི་རྟོག་པ་དང་བཅས་མ་བཅས་ལ་བཞེད། གཞན་དག་ཉོན་སྒྲིབ་ཀྱི་ཟག་པ་དང་བཅས་མ་བཅས་ལ་བཞེད་དོ། །དང་པོ་ལ། གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་པའི་རང་རྒྱལ་གྱི་སྒོམ་ལམ་རྗེས་ཐོབ་ཡེ་ཤེས་དེ་ཆོས་ཅན། སྒྲ་དོན་འདྲེས་འཛིན་གྱི་རྟོགས་པ་དང་བཅས་པ་ཡིན་པར་ཐལ། འདིར་བསྟན་ལམ་ཟག་བཅས་ཡིན་པའི་ཕྱིར། འདོད་མི་ནུས་ཏེ། རྣལ་འབྱོར་མངོན་སུམ་ཡིན་པའི་ཕྱིར་ཏེ། འཕགས་རྒྱུད་ཀྱི་བདག་མེད་རྟོགས་པའི་མཁྱེན་པ་ཡིན་པའི་ཕྱིར། གཉིས་པ་ལ། ཉོན་སྒྲིབ་དང་བཅས་མ་བཅས་ཀྱི་དོན་དེ་དེ་སྤངས་མ་སྤངས་ལ་བྱེད་དམ། རང་གི་ངོ་བོ་ལ་ཉོན་སྒྲིབ་ཡོད་མེད་ལ་བྱེད། དང་པོ་ལྟར་ན། ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། འདིར་བསྟན་གྱི་ལམ་ཟག་མེད་མིན་པར་ཐལ། ཉོན་སྒྲིབ་མ་སྤངས་པའི་ཕྱིར། ཕྱི་མ་ལྟར་ན། རང་རྒྱལ་གྱི་སྒོམ་ལམ་སྔ་མའི་དེ་ཆོས་ཅན། རང་གི་ངོ་བོ་ལ་ཉོན་སྒྲིབ་ཡོད་པར་ཐལ། འདིར་བསྟན་ལམ་ཟག་བཅས་ཡིན་པའི་ཕྱིར། འདོད་མི་ནུས་ཏེ། རྣལ་འབྱོར་མངོན་སུམ་ཡིན་པའི་ཕྱིར། གཉིས་པ་ནི། འཕགས་རྒྱུད་ཀྱི་མཉམ་གཞག་ལ་ཟག་མེད་དང་། དེའི་རྗེས་ཐོབ་ལ་ཟག་བཅས་སུ་འཇོག་དགོས་ཏེ། སློབ་དཔོན་གྱིས་སྐབས་གཉིས་པ་དང་། འདི་དང་འོག་གཞི་ཤེས་ཀྱི་རྣམ་པའི་དོན་བསྡུ་གསུམ་ཆར་གྱི་ཟག་བཅས་ཟག་མེད་ཀྱི་ཁྱད་པར་དོན་གཅིག་ཏུ་བཞེད་པའི་ཕྱིར། ལམ་ཤེས་དང་རྣམ་མཁྱེན་གྱི་རྣམ་པ་ལ་ནི་རྒྱུ་མཚན་དམིགས་གསལ་དུ་བཀོད་པ་འདི་དང་དོན་མི་གཅིག་སྟེ། གནད་གོ་དགོས་སོ། །དེས་ན་འདིའི་ཟག་བཅས་ཟག་མེད་ཀྱི་ཁྱད་པར་ཡང་ཐེག་དམན་གྱི་རྒྱུད་ལ་ཡིན་གྱི། བྱང་སེམས་ཀྱི་རྒྱུད་ལ་ནི་དེའི་རྟོགས་རིགས་ཙམ་ལ་འཇོག་གོ །གསུམ་པ་ལ་དགག་གཞག་གཉིས་ལས། དང་པོ་ལ་ཁ་ཅིག གང་ཟག་གི་བདག་འཛིན་གྱི་རྩ་བ་ཅན་གྱི་སྒྲིབ་པ་གང་ཞིག གཙོ་བོར་ཐར་པ་ཐོབ་པ་ལ་བར་དུ་གཅོད་བྱེད་དང་། ཆོས་ཀྱི་བདག་འཛིན་གྱི་རྩ་བ་ཅན་གྱི་སྒྲིབ་པ་གང་ཞིག གཙོ་བོར་ཐམས་ཅད་མཁྱེན་པ་ཐོབ་པ་ལ་བར་དུ་གཅོད་བྱེད་ཅེ་ན། ཁ་ཅིག ཉོན་སྒྲིབ་ཆོས་ཅན། ཤེས་སྒྲིབ་ཡིན་པར་ཐལ། མཚན་ཉིད་དེའི་ཕྱིར། དང་པོ་མ་གྲུབ་ན། དེ་དེར་ཐལ། དེ་ཆོས་ཀྱི་བདག་འཛིན་གྱི་རྒྱུད་ལས་བྱུང་བའི་སྒྲིབ་པ་ཡིན་པའི་ཕྱིར་ཏེ། འཁོར་གསུམ་དུ་རྣམ་པར་རྟོག་པའི་རྒྱུ་ལས་བྱུང་བའི་སྒྲིབ་པ་ཡིན་པའི་ཕྱིར། མ་གྲུབ་ན་དེ་དེར་ཐལ། རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །ཞེས་བཤད་པའི་ཕྱིར། རྟགས་ཟུར་ཕྱི་མ་དེར་ཐལ། དེ་ཐོབ་པ་ལ་ཁྱོད་གཙོ་བོར་སྤང་དགོས་པའི་ཕྱིར། མ་གྲུབ་ན། དེར་ཐལ། དེ་ཐོབ་པ་ལ་སྒྲིབ་པ་གཉིས་ཀ་གཙོ་བོར་སྤང་དགོས་པའི་ཕྱིར། གལ་ཏེ་དེ་ཆོས་ཅན། ཁྱོད་ཐམས་ཅད་མཁྱེན་པ་ཐོབ་པ་ལ་གཙོ་བོར་བར་དུ་གཅོད་བྱེད་མིན་པར་ཐལ། ཁྱོད་ཟད་པར་སྤངས་པའི་གང་ཟག་གིས་ཐམས་ཅད་མཁྱེན་པ་མ་ཐོབ་པ་ཡོད་པའི་ཕྱིར་ཟེར་ན། མཐོང་སྤང་ཤེས་སྒྲིབ་ཀྱིས་མ་ངེས། ཡང་གང་ཟག་གི་དབང་དུ་བྱས་པའི་མཐོང་སྤང་རྫས་འཛིན་རྟོག་པ་ཆོས་ཅན། ཉོན་སྒྲིབ་ཡིན་པར་ཐལ། མཚན་ཉིད་དེའི་ཕྱིར། དང་པོ་དེར་ཐལ། གང་ཟག་རྫས་ཡོད་ལ་དམིགས་ནས་བདེན་པར་ཞེན་པའི་བློ་དེ་ཕུང་པོ་ལ་དམིགས་ནས་གང་ཟག་ཏུ་འཛིན་པའི་བློ་ལས་བྱུང་བའི་ཕྱིར། ཕྱི་ཟུར་མ་གྲུབ་ན། དེ་ཆོས་ཅན། དེར་ཐལ། ཐེག་ཆེན་གྱི་ཐར་པ་ཐོབ་པ་ལ་གཙོ་བོར་བར་དུ་གཅོད་བྱེད་ཡིན་པའི་ཕྱིར་ཏེ། མཐོང་སྤང་རྟོག་པ་མངོན་གྱུར་པ་ཡིན་པའི་ཕྱིར་ཞེས་སྐྱོན་བརྗོད་པ་ཡང་ཡོད་མོད་ཀྱི། གོང་དུ་དྲངས་པའི་ལང་གཤེགས་ཀྱི་ལུང་དང་འགལ་བས་མི་འཐད་སྙམ་མོ། །ཡང་ཁ་ཅིག གང་ཟག་གི་བདག་འཛིན་ཆོས་ཅན། གང་ཟག་གི་བདག་ཏུ་འཛིན་པའི་རྩ་བ་ཅན་ཡིན་པར་ཐལ། ཉོན་སྒྲིབ་ཡིན་པའི་ཕྱིར། ཆོས་ཀྱི་བདག་འཛིན་ཆོས་ཅན། ཆོས་ཀྱི་བདག་ཏུ་འཛིན་པའི་རྩ་བ་ཅན་ཡིན་པར་ཐལ། ཤེས་སྒྲིབ་ཡིན་པའི་ཕྱིར། འདོད་ན། དེ་གཉིས་ཆོས་ཅན། ཁྱོད་ཁྱོད་དུ་འཛིན་པའི་རྩ་བ་ཅན་མིན་པར་ཐལ། ཁྱོད་ཁྱོད་དང་ཐ་དད་མིན་པའི་ཕྱིར་ཟེར་རོ། །མ་རིག་པ་ཆོས་ཅན། འཁོར་བའི་ཆོས་མིན་པར་ཐལ། མ་རིག་པའི་རྩ་བ་ཅན་མིན་པའི་ཕྱིར། རྟགས་ཁས་བླངས་ཏེ། ཁྱོད་ཁྱོད་གྱི་རྩ་བ་ཅན་མིན་པའི་ཕྱིར་ཏེ། ཁྱོད་ཁྱོད་དང་ཐ་དད་མ་ཡིན་པའི་ཕྱིར། འཁོར་གསུམ། སྔར་གྱི་མཚན་ཉིད་ལ་རང་གིས་སྐྱོན་བརྗོད་ན། བྱང་འཕགས་ཀྱི་རྒྱུད་ཀྱི་ཉོན་མོངས་པའི་བག་ཆགས་ཆོས་ཅན། གཙོ་བོར་ཐམས་ཅད་མཁྱེན་པ་ཐོབ་པ་ལ་བར་དུ་གཅོད་བྱེད་དུ་ཐལ། ཤེས་སྒྲིབ་ཡིན་པའི་ཕྱིར། འདོད་ན། བྱང་འཕགས་ཀྱིས་ཆེད་དུ་གཉེར་ནས་སྤང་བར་བྱ་བ་ཡིན་པར་ཐལ། འདོད་པ་གང་ཞིག དེའི་རྒྱུད་ཀྱི་ཤེས་སྒྲིབ་ཡིན་པའི་ཕྱིར། ཁ་ཅིག སྒྲིབ་གཉིས་ཀྱི་ནང་ཚན་གང་ཞིག ཉན་ཐོས་ཀྱི་སྤང་བར་བྱ་བ་དང་། དེ་གང་ཞིག་ཐེག་ཆེན་གྱིས་སྤང་བར་བྱ་བའི་རིགས་སུ་གནས་པ་ཟེར་ན། གཟུང་བ་ཆོས་ཀྱི་བདག་འཛིན་ཆོས་ཅན། ཤེས་སྒྲིབ་ཀྱི་མཚན་ཉིད་ཕྱི་ཟུར་དེར་ཐལ། ཤེས་སྒྲིབ་ཡིན་པའི་ཕྱིར། འདོད་མི་ནུས་ཏེ། རང་རྒྱལ་གྱིས་སྤང་བར་བྱ་བའི་རིགས་སུ་གནས་པའི་ཕྱིར། མ་ཁྱབ་ན། གང་ཟག་གི་བདག་འཛིན་དེའང་ཐེག་ཆེན་གྱི་སྤང་བྱའི་རིགས་གནས་སུ་ཐལ། མ་ཁྱབ་པ་དེའི་ཕྱིར། འདོད་ན། དེ་ཤེས་སྒྲིབ་ཡིན་པར་ཐལ། མཚན་ཉིད་དེའི་ཕྱིར། རྟགས་ཁྱབ་ཁས། ཁ་ཅིག སྒྲིབ་པ་ལ་གཉིས་སུ་གྲངས་ངེས་སོ་ཞེ་ན། མི་འཐད་དེ། སྙོམས་འཇུག་གི་སྒྲིབ་པ་དེ་དེ་གཉིས་གང་རུང་མིན་པའི་ཕྱིར། དང་པོ་ཉོན་སྒྲིབ་མ་ཡིན་ཏེ། ཤེས་རབ་རྐྱང་པའི་ཆ་ལས་རྣམ་གྲོལ་གྱི་དགྲ་བཅོམ་པས་དེ་ཟད་པར་མ་སྤངས་པའི་ཕྱིར། ཤེས་སྒྲིབ་ཡིན་ནོ་ཞེ་ན། དེ་ཆོས་ཅན། ཁྱོད་ཀྱང་ཡིན། གཉིས་ཀའི་ཆ་ལས་རྣམ་པར་གྲོལ་བའི་ཉན་ཐོས་དགྲ་བཅོམ་པ་དེས་སྤངས་པ་ཡང་ཡིན་པའི་གཞི་མཐུན་མེད་པར་ཐལ། ཁས་བླངས་པ་དེའི་ཕྱིར། དེ་ལ་ཁོ་ན་རེ། སྒྲིབ་པའི་གཉེན་པོ་བདག་མེད་རྟོགས་པའི་ཤེས་རབ་དེ་ལ་གང་ཟག་དང་ཆོས་ཀྱི་བདག་མེད་རྟོགས་པའི་ཤེས་རབ་གཉིས་སུ་གྲངས་ངེས་མེད་པར་ཐལ་བ་དང་། ཐོབ་བྱ་ཐར་པ་དེ་ལ་ཐེག་ཆེན་གྱི་ཐར་པ་དང་། ཐེག་དམན་གྱི་ཐར་པ་གཉིས་སུ་མ་ངེས་པར་ཐལ་བ་དང་། སྒྲིབ་པའི་རྩ་བ་བདག་འཛིན་དེ་ལ་ཆོས་དང་གང་ཟག་གི་བདག་འཛིན་གཉིས་སུ་མེད་པར་ཐལ། སྒྲིབ་པ་ལ་གཉིས་སུ་མ་ངེས་པའི་ཕྱིར་ཞེ་ན། དང་པོ་ལ། སྒྲིབ་པའི་གཉེན་པོ་མཐོང་ལམ་དེ་ལ་ཐེག་ཆེན་གྱི་མཐོང་ལམ་དང་། ཐེག་དམན་གྱི་མཐོང་ལམ་གཉིས་སུ་མ་ངེས་པར་ཐལ། སྒྲིབ་པ་ལ་ཐེག་ཆེན་གྱི་མཐོང་སྤང་དང་། ཐེག་དམན་གྱི་མཐོང་སྤང་གཉིས་སུ་མ་ངེས་པའི་ཕྱིར། གཉིས་པ་ལ། ཐེག་དམན་གྱི་ཐོབ་བྱ་མི་སློབ་ལམ་དེ་ལ་གང་ཟག་གི་བདག་འཛིན་སྤངས་པའི་དང་། གཟུང་བ་ཆོས་ཀྱི་བདག་འཛིན་སྤངས་པའི་མི་སློབ་ལམ་གཉིས་སུ་མ་ངེས་པར་ཐལ། བདག་འཛིན་དེ་ལ་གང་ཟག་གི་བདག་འཛིན་དང་གཟུང་བ་ཆོས་ཀྱི་བདག་འཛིན་གཉིས་སུ་མ་ངེས་པའི་ཕྱིར། གསུམ་པ་ལ། མི་དགེ་བའི་རྩ་བའི་འདོད་ཆགས་དེ་ལ་སེམས་ཅན་ལ་ཆགས་པའི་འདོད་ཆགས་དང་། ཕྱི་རོལ་ཡོ་བྱད་ལ་ཆགས་པའི་འདོད་ཆགས་གཉིས་སུ་མ་ངེས་པར་ཐལ། མི་དགེ་བ་ལ་དེ་གཉིས་ཀྱིས་ཀུན་ནས་བསླངས་པའི་མི་དགེ་བ་གཉིས་སུ་མ་ངེས་པའི་ཕྱིར། དེ་གསུམ་གྱི་ཁྱབ་པ་འགྲོ་བའི་རྒྱུ་མཚན་ཡང་སྤྱིར་སྒྲིབ་པའི་གཉེན་པོ་དང་། ཐོབ་བྱ་དང་། སྒྲིབ་པའི་རྩ་བ་ལ་གཉིས་སུ་མ་ངེས་པར་ཐལ་བ་ལ་འདོད་ལན་འདེབས་པའོ། །གཉིས་པ་ནི། དེ་གཉིས་ཀྱི་མཚན་ཉིད་རིམ་བཞིན། སྒྲིབ་གཉིས་ཀྱི་ནང་ཚན་གང་ཞིག ཉན་ཐོས་ཀྱི་སྤང་བྱའི་རིགས་སུ་གནས་པ་དང་། དེ་གང་ཞིག ཐེག་པ་གཉིས་པོ་གང་རུང་གི་སྤང་བྱའི་རིགས་སུ་གནས་པའོ། །རྒྱུ་དང་ལམ་དང་སྡུག་བསྔལ་དང་། །ཞེས་པའི་སྐབས་སུ། ཁ་ཅིག ལམ་གྱི་གནས་ལུགས་རྟོགས་པའི་ཡེ་ཤེས་ཀྱི་བྱེ་བྲག་དེ་ལམ་ཤེས་ཀྱི་ཤེས་རྣམ་གྱི་མཚན་ཉིད་ཡིན་ཞེས་ཟེར་རོ། །གཞིའི་གནས་ལུགས་རྟོགས་པའི་ཡེ་ཤེས་ཀྱི་བྱེ་བྲག་དེ་གཞི་ཤེས་ཀྱི་ཤེས་རྣམ་གྱི་མཚན་ཉིད་དུ་ཐལ། ཁས་བླངས་པ་དེའི་ཕྱིར། འདོད་ན། གཞི་ཤེས་པ་ཡི་བྱེ་བྲག་རྣམས། །ཞེས་པའི་གཞུང་གིས་གཞི་ཤེས་ཀྱི་ཤེས་རྣམ་ཁོ་ནའི་མཚན་ཉིད་བསྟན་པར་ཐལ་ལོ། །ཁ་ཅིག སྐབས་འདིར་བསྟན་གྱི་ལམ་ཤེས་ཀྱི་ཤེས་རྣམ་གྱི་མཚན་ཉིད་ཡིན་ཟེར། རྣམ་མཁྱེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ལམ་ཤེས་པ་ཉིད་ནི་བྱང་ཆུབ་སེམས་དཔའ་རྣམས་ཀྱིས་ཉོན་མོངས་པ་ཤིན་ཏུ་མ་སྤངས་པའི་ཕྱིར། ཞེས་པའི་སྐབས་ནས་དངོས་སུ་བསྟན་པའི་ཤེས་རྣམ་ཡིན་པར་ཐལ་ལོ། །འདོད་ན། བྱང་སེམས་ཀྱི་མཁྱེན་པར་ཐལ་བ་དང་། རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་ནི་ཡང་དག་པར་རྫོགས་པའི་སངས་རྒྱས་ཀྱི་ཞེས་པའི་སྐབས་ནས་དངོས་སུ་བསྟན་པའི་རྣམ་པ་མིན་པར་ཐལ། འདོད་པ་དེའི་ཕྱིར། ཁ་ཅིག འདིར་ཐར་པ་དོན་གཉེར་གྱི་ཤེས་བྱའི་གཙོ་བོ་ལ་བདེན་པ་བཞིར་གྲངས་ངེས་པ་ཡིན་ཟེར། དེ་མ་ངེས་པར་ཐལ། གཟུགས་སྐུ་གཉིས་པོ་དེ་དེའི་ཤེས་བྱའི་གཙོ་བོ་གང་ཞིག དེ་བདེན་བཞི་གང་རུང་མ་ཡིན་པའི་ཕྱིར། དང་པོ་དེར་ཐལ། དེའི་དམིགས་ཡུལ་གྱི་གཙོ་བོ་ཡིན་པའི་ཕྱིར། ཕྱི་མ་མ་གྲུབ་ན། ལམ་བདེན་དུ་ཐལ་ལོ། །ཁ་ཅིག ཐར་པ་དོན་གཉེར་གྱི་བླང་དོར་བྱ་བའི་ཡུལ་གྱི་གཙོ་བོ་ལ་བདེན་པ་བཞིར་གྲངས་ངེས་པ་ཡིན་ཏེ། དེའི་དོར་བྱ་ཡིན་ན་སྡུག་ཀུན་གང་རུང་ཡིན་པས་ཁྱབ། དེའི་བླང་བྱ་ཡིན་ན་འགོག་ལམ་གང་རུང་ཡིན་པས་ཁྱབ་པའི་ཕྱིར་ཞེ་ན། རྟགས་དང་པོ་ལ། རྒྱུན་མཐའི་གནས་ངན་ལེན་གྱི་དྲི་མས་མ་ངེས་སོ། །ཕྱི་མ་ལ་སངས་རྒྱས་ཀྱི་མཚན་དཔེས་མ་ངེས་སོ། །དྲན་པ་ཉེར་གཞག་ནས་གཟུང་སྟེ། །ཞེས་པའི་སྐབས་སུ། རྣམ་མཁྱེན་གྱི་རྣམ་པ་ཆོས་ཅན། ཁྱོད་ལ་བརྒྱ་དང་བཅུར་ཡོད་དེ། ཁྱོད་ལ་གཞི་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སོ་བདུན། ལམ་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སོ་བཞི། ཐུན་མོང་མིན་པའི་རྣམ་མཁྱེན་གྱི་རྣམ་པ་སོ་དགུ་རྣམས་སུ་ཡོད་པའི་ཕྱིར། དེ་ལ་ཁ་ཅིག རྣམ་མཁྱེན་གྱི་རྣམ་པ་ཡིན་ན་རྣམ་མཁྱེན་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། བྱང་ཕྱོགས་སོ་བདུན་ཆོས་ཅན། དེར་ཐལ། དེའི་ཕྱིར། མ་གྲུབ་ན་དེར་ཐལ། དྲན་པ་ཉེར་གཞག་ནས་གཟུང་སྟེ། །སངས་རྒྱས་རྣམ་པའི་མཐར་ཐུག་རྣམས། །ཞེས་པའི་གཞུང་དོན་གྲུབ་པའི་ཕྱིར། ཡང་བྱང་སེམས་ཚོགས་ལམ་པས་རྣམ་མཁྱེན་གྱི་རྣམ་པ་བརྒྱ་དང་བཅུ་པོ་དེ་མི་སྒོམ་པར་ཐལ་བ་དང་། ལམ་ཤེས་ཀྱི་རྣམ་པ་ཡིན་ན་ལམ་ཤེས་ཡིན་དགོས་པར་ཐལ་བ་དང་གཞི་ཤེས་ལ་རིགས་འགྲེ་བར་ཐལ། རྣམ་མཁྱེན་གྱི་རྣམ་པ་ཡིན་ན་དེའི་ཕྱིར་ཟེར་ན། དང་པོ་ལ། སློབ་མ་བྱང་ཆུབ་སེམས་དཔའ་དང་། །སངས་རྒྱས་རྣམས་ལ་རིམ་བཞིན་དེ། །ཞེས་པའི་ལུང་དོན་མ་གྲུབ་པར་ཐལ། ཉན་ཐོས་ཀྱི་རྒྱུད་ཀྱི་བྱང་ཕྱོགས་སོ་བདུན་པོ་དེ་རྣམ་མཁྱེན་གྱི་རྣམ་པ་མིན་པའི་ཕྱིར། ཁྱབ་པ་ཁས། བྱང་སེམས་ཚོགས་ལམ་པས་སྟོབས་བཅུ་མི་སྒོམ་པར་ཐལ། དེ་ཡིན་ན་རྣམ་མཁྱེན་ཡིན་དགོས་པའི་ཕྱིར། ཕྱི་མ་གཉིས་ལ་བྱང་ཆུབ་སེམས་དཔའ་གཞན་དོན་སྒྲུབ་པའི་ཐབས་སུ་གྱུར་པའི་མཁྱེན་པ་ཡིན་ན་ལམ་ཤེས་ཡིན་དགོས་པར་ཐལ་བ་དང་། ཉན་ཐོས་ཉེར་ཞི་གཉིས་སུ་འཁྲིད་པར་བྱེད་པའི་མཁྱེན་པ་ཡིན་ན་གཞི་ཤེས་ཡིན་དགོས་པར་ཐལ། སངས་རྒྱས་ཀྱིས་ཆོས་འཁོར་བསྐོར་བའི་བདག་རྐྱེན་དུ་གྱུར་པའི་མཁྱེན་པ་ཡིན་ན་རྣམ་མཁྱེན་ཡིན་དགོས་པའི་ཕྱིར། ཁྱབ་པ་ཁས། འདོད་ན། རང་རང་གི་ཚོགས་སྦྱོར་གྱིས་མ་ངེས་སོ། །དེ་ལ་ཐམས་ཅད་ཤེས་པ་ཉིད་ལ། །ཞེས་པའི་སྐབས་སུ། དྲན་པ་ཉེར་གཞག་གི་མཚན་ཉིད་ལ་དཔྱད་པ་ལ། ཁ་ཅིག དམིགས་པ་ལུས་སོགས་ལ་དམིགས་ནས་རྣམ་པ་རང་སྤྱིའི་མཚན་ཉིད་ཀྱི་སྒོ་ནས་སྒོམ་པར་བྱེད་པའི་དྲན་པ་ཤེས་རབ་མཚུངས་ལྡན་དང་བཅས་པ་ཞེས་དང་། ཡང་དམིགས་པ་ལུས་སོགས་ལ་དམིགས་ནས་རྣམ་པ་རང་སྤྱིའི་མཚན་ཉིད་ཀྱི་སྒོ་ནས་ཡོངས་སུ་བརྟགས་ཏེ་དཔྱོད་པར་བྱེད་པའི་དྲན་པ་ཤེས་རབ་མཚུངས་ལྡན་དང་བཅས་པའོ་ཞེ་ན། དང་པོ་ལ། ཤཱཀྱ་ཐུབ་པའི་རྒྱུད་ཀྱི་ལུས་དྲན་པ་ཉེར་གཞག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ལྟར་ཉམས་སུ་ལེན་པར་བྱེད་པའི་དྲན་པ་ཤེས་རབ་མཚུངས་ལྡན་དང་བཅས་པ་ཡིན་པར་ཐལ་ལོ། །གཉིས་པ་ལ། བྱང་སེམས་སྒོམ་ལམ་པའི་རྒྱུད་ཀྱི་ལུས་དྲན་པ་ཉེར་གཞག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ལ་དམིགས་ནས་བདག་མེད་པར་བརྟགས་ཏེ་དཔྱོད་པར་བྱེད་པའི་དྲན་པ་ཤེས་རབ་མཚུངས་ལྡན་དང་བཅས་པ་ཡིན་པར་ཐལ། འདོད་པ་དེའི་ཕྱིར། འདོད་ན། མིན་པར་ཐལ། དེ་ལ་དམིགས་ནས་བདག་མེད་པའི་རྣལ་འབྱོར་མངོན་སུམ་དུ་རྟོགས་པའི་མཁྱེན་པ་ཡིན་པའི་ཕྱིར། དེ་ལ་ཁ་ཅིག དེ་ལྟ་བུའི་དྲན་པ་ཤེས་རབ་མཚུངས་ལྡན་རྒྱུད་ལྡན་གྱི་གང་ཟག་ཆོས་ཅན། དྲན་པ་ཉེར་གཞག་ཡིན་པར་ཐལ། མཚན་ཉིད་དེའི་ཕྱིར། མ་གྲུབ་ན། དེ་ལྟ་བུའི་དྲན་པ་ཤེས་རབ་མཚུངས་ལྡན་ཆོས་ཅན། ཁྱོད་རྒྱུད་ལྡན་གྱི་གང་ཟག་དེ་ཁྱོད་དང་བཅས་པ་ཡིན་པར་ཐལ། ཁྱོད་རྒྱུད་ལྡན་གྱི་གང་ཟག་ཡོད་པའི་ཕྱིར་ཞེས་ཟེར། དེ་ནི་ཤིན་ཏུ་མི་འཐད་དེ། སེམས་ཆོས་ཅན། ཁྱོད་རྒྱུད་ལྡན་གྱི་གང་ཟག་དེ་ཁྱོད་ཅན་ཡིན་པར་ཐལ། ཁྱོད་རྒྱུད་ལྡན་གྱི་གང་ཟག་ཡོད་པའི་ཕྱིར། ཁྱབ་པ་ཁས། འདོད་ན། སེམས་རྒྱུད་ལྡན་གྱི་གང་ཟག་ཆོས་ཅན། སེམས་ཅན་མིན་པར་ཐལ། ཁྱོད་དང་སངས་རྒྱས་འཕགས་པའི་གཞི་མཐུན་ཡོད་པའི་ཕྱིར། རང་ལུགས་ནི་མཚན་ཉིད་ཕྱི་མ་ལ་དེའི་རིགས་སུ་གནས་པའི་དྲན་པ་ཤེས་རབ་མཚུངས་ལྡན་དང་བཅས་པ་སྦྱོར། དེ་ཡི་འོག་ཏུ་ཞུགས་པ་ལ། །ཞེས་པའི་སྐབས་སུ། ཡང་དག་སྤོང་བའི་མཚན་ཉིད། དགེ་སྡིག་ལ་བླང་དོར་ཚུལ་བཞིན་དུ་བྱེད་པའི་བརྩོན་འགྲུས་མཚུངས་ལྡན་བཅས་པ་གང་ཞིག ཚོགས་ལམ་འབྲིང་པོ་ཡན་ཆད་ཀྱི་མངོན་པར་རྟོགས་པས་བསྡུས་པ་ཞེས་དང་། ཡང་དགེ་སྡིག་ལ་བླང་དོར་ཚུལ་བཞིན་དུ་བྱེད་པའི་བརྩོན་འགྲུས་གང་ཞིག་ཤེས་རབ་མཚུངས་ལྡན་དང་བཅས་པ་ཟེར་ན། དང་པོ་ལ་ཁ་ཅིག ཤཱཀྱ་ཐུབ་པའི་ཡང་དག་སྤོང་བ་ཆོས་ཅན། མཚན་ཉིད་ཀྱི་སྔ་ཟུར་དེར་ཐལ། མཚོན་བྱ་དེའི་ཕྱིར། འདོད་ན། མི་དགེ་བ་འདོར་བར་བྱེད་པ་ཡིན་པར་ཐལ། འདོད་པ་དེའི་ཕྱིར། འདོད་ན། མིན་པར་ཐལ། དེ་ཟད་པར་སྤངས་ཟིན་པའི་ཕྱིར་ཞེ་ན། ཤཱཀྱ་ཐུབ་པའི་རྒྱུད་ཀྱི་མི་དགེ་བ་སྐྱེས་པ་ཡང་དག་པར་སྤོང་བའི་ཡང་དག་སྤོང་བ་ཆོས་ཅན། མི་དགེ་བ་སྐྱེས་པ་སྤོང་བར་བྱེད་པར་ཐལ། མི་དགེ་བ་སྐྱེས་པ་སྤོང་བའི་ཡང་དག་སྤོང་བ་ཡིན་པའི་ཕྱིར། ཁྱབ་པ་ཁས། འདོད་ན། མིན་པར་ཐལ། མི་དགེ་བ་སྤངས་ཟིན་པའི་ཕྱིར། ཁྱབ་པ་ཁས། མཚན་ཉིད་དེའང་མི་འཐད་དེ། ཚོགས་ལམ་འབྲིང་པོའི་རྒྱུད་ཀྱི་མི་དགེ་བ་སྐྱེས་པ་སྤོང་བའི་ཡང་དག་སྤོང་བ་ཆོས་ཅན། མཚན་ཉིད་ཀྱི་སྔ་ཟུར་དེར་ཐལ། མཚོན་བྱ་དེའི་ཕྱིར། འདོད་ན། མི་དགེ་བ་སྐྱེས་པ་འདོར་བར་བྱེད་པ་ཡིན་ན་དགེ་སྡིག་ལ་བླང་དོར་ཚུལ་བཞིན་དུ་བྱེད་དགོས་པར་ཐལ། འདོད་པ་དེའི་ཕྱིར། འདོད་ན། མི་དགེ་བ་སྐྱེས་པ་སྤོང་བའི་ཡང་དག་སྤོང་བ་ཡིན་ན་དེ་དང་དགེ་བ་མ་སྐྱེས་པ་སྐྱེད་པའི་ཡང་དག་སྤོང་བ་གཉིས་ཀ་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། ཚོགས་ལམ་འབྲིང་པོ་པའི་རྒྱུད་ཀྱི་ཡང་དག་སྤོང་བ་བཞི་མི་འགལ་བར་ཐལ། འདོད་པ་དེའི་ཕྱིར། མཚན་ཉིད་ཕྱི་མ་ལ། ཚོགས་ལམ་འབྲིང་པོ་པའི་རྒྱུད་ཀྱི་དགེ་སྡིག་ལ་བླང་དོར་ཚུལ་བཞིན་དུ་བྱེད་པའི་བརྩོན་འགྲུས་དང་མཚུངས་པར་ལྡན་པའི་ཤེས་རབ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། རང་གི་གྲོགས་ཡང་དག་སྤོང་བའི་ངོ་བོར་གྱུར་པའི་བརྩོན་འགྲུས་དང་མཚུངས་པར་ལྡན་པའི་ཤེས་རབ་ཡིན་པའི་ཕྱིར། རྩ་བར་འདོད་མི་ནུས་ཏེ། སློབ་པའི་རྒྱུད་ཀྱི་ཤེས་རབ་ཡིན་པའི་ཕྱིར། བརྩོན་འགྲུས་དང་ལྡན་པ་ནི། ཞེས་པའི་སྐབས་སུ། རྫུ་འཕྲུལ་རྐང་པའི་མཚན་ཉིད་ལ། ཁ་ཅིག རྫུ་འཕྲུལ་གྱི་བྱ་བ་ལ་དམིགས་ནས་ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་སྒོམ་པའི་སེམས་རྩེ་གཅིག་པ་མཚུངས་ལྡན་དང་བཅས་པ་ཞེས་དང་། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བསྟེན་པ་ལས་བྱུང་བའི་སེམས་གནས་པ་ལས་རུང་དུ་བྱེད་པའི་ཏིང་ངེ་འཛིན་གང་ཞིག ཤེས་རབ་དང་མཚུངས་པར་ལྡན་པ་ཞེས་དང་། ཡང་དེ་ལྟར་གྱུར་པའི་ཏིང་ངེ་འཛིན་མཚུངས་ལྡན་དང་བཅས་པ་གང་ཞིག ཚོགས་ལམ་ཆེན་པོ་ཡན་ཆད་ཀྱི་མངོན་པར་རྟོགས་པའོ། །ཞེས་ཟེར་ན། དང་པོ་ལ། ཤཱཀྱ་ཐུབ་པའི་རྒྱུད་ཀྱི་རྫུ་འཕྲུལ་གྱི་རྐང་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཉིས་པ་ལ་ཚོགས་ལམ་ཆེན་པོའི་རྒྱུད་ཀྱི་རྫུ་འཕྲུལ་རྐང་པའི་ངོ་བོར་གྱུར་པའི་ཏིང་ངེ་འཛིན་དང་མཚུངས་པར་ལྡན་པའི་ཤེས་རབ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མིན་པར་ཐལ། སློབ་པའི་རྒྱུད་ཀྱི་ཤེས་རབ་ཡིན་པའི་ཕྱིར། གསུམ་པ་ལ། ཉན་ཐོས་ཚོགས་ལམ་པའི་རྒྱུད་ཀྱི་རྫུ་འཕྲུལ་རྐང་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བསྟན་པ་དེ་ཁྱོད་ཀྱི་རྒྱུར་ཐལ། འདོད་པ་དེའི་ཕྱིར། སྤྲུལ་པའི་ལམ་ལ་གཟུགས་ཀྱི་འདུ་ཤེས། །ཞེས་པའི་སྐབས་སུ། དགག་གཞག་གཉིས་ལས། དང་པོ་ལ་ཁ་ཅིག སྤྲུལ་པའི་སྒྲིབ་པའི་གཉེན་པོ་བྱེད་པའི་ཤེས་རྣམ་དེ་སྤྲུལ་པའི་ལམ་གྱི་མཚན་ཉིད་ཡིན་ཟེར་ན། ཤཱཀྱ་ཐུབ་པའི་རྒྱུད་ཀྱི་གཟུགས་ཅན་གཟུགས་ལ་ལྟ་བའི་རྣམ་ཐར་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཞན་ཡང་མཐར་གནས་ཀྱི་སྙོམས་འཇུག་དགུ་པོ་གང་རུང་ཡིན་ན་སྙོམས་འཇུག་གི་སྒྲིབ་པའི་གཉེན་པོ་བྱེད་པའི་ཁྱབ་པར་ཐལ། མཚོན་བྱ་དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། འདོད་ན། བསམ་གཏན་དང་པོའི་དངོས་གཞི་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། བསམ་གཏན་དང་པོ་ལ་སྙོམས་པར་འཇུག་པའི་སྙོམས་འཇུག་གི་སྒྲིབ་པའི་གཉེན་པོའང་མི་བྱེད། དེ་ཡན་ཆད་ཀྱི་དེའི་གཉེན་པོའང་མི་བྱེད་པའི་ཕྱིར། དང་པོ་མ་གྲུབ་ན། དེར་ཐལ། བསམ་གཏན་དང་པོའི་དངོས་གཞི་ཐོབ་ཟིན་པའི་ཤེས་པ་ཡིན་པའི་ཕྱིར། ཕྱི་མ་མ་གྲུབ་ན། བསམ་གཏན་དང་པོའི་དངོས་གཞི་དེ་བསམ་གཏན་གྱི་ཉེར་བསྡོགས་ཡིན་པར་ཐལ་ལོ། །ཁ་ཅིག བསམ་གཏན་གྱི་དངོས་གཞིའི་སེམས་ལ་བརྟེན་ནས་ལྟ་བ་པོ་བདག་ཉིད་ལ་གཟུགས་ཀྱི་འདུ་ཤེས་རྣམ་པར་མ་བཤིག་པའི་སྒོ་ནས་ཕྱི་རོལ་གྱི་གཟུགས་རྣམས་སྡུག་མི་སྡུག་སྣ་ཚོགས་སུ་མོས་པའི་ཏིང་ངེ་འཛིན་མཚུངས་ལྡན་དང་བཅས་པ་དེ། གཟུགས་ཅན་གཟུགས་ལ་ལྟ་བའི་རྣམ་ཐར་གྱི་མཚན་ཉིད། ཡང་དེ་ལ་བརྟེན་ནས་ལྟ་བ་པོ་བདག་ཉིད་ལ་གཟུགས་ཀྱི་འདུ་ཤེས་རྣམ་པར་བཤིག་པའི་སྒོ་ནས་ཕྱི་རོལ་གྱི་གཟུགས་རྣམས་སྡུག་མི་སྡུག་སྣ་ཚོགས་སུ་མོས་པར་བྱེད་པའི་ཏིང་ངེ་འཛིན་མཚུངས་ལྡན་དང་བཅས་པ་དེ་གཟུགས་ཅན་མིན་པ་གཟུགས་ལ་ལྟ་བའི་རྣམ་ཐར་གྱི་མཚན་ཉིད། བསམ་གཏན་བཞི་པའི་དངོས་གཞིའི་སེམས་ལ་བརྟེན་ནས་ལྟ་བ་པོ་བདག་ཉིད་ལ་གཟུགས་ཀྱི་འདུ་ཤེས་རྣམ་པར་བཤིག་ནས་ཕྱི་རོལ་གྱི་གཟུགས་རྣམས་སྡུག་པར་རོ་གཅིག་པར་མོས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་དེ་སྡུག་པའི་རྣམ་ཐར་གྱི་མཚན་ཉིད་ཡིན་ཞེས་གསུངས་སོ། །དང་པོ་ལ་ཤཱཀྱ་ཐུབ་པའི་གཟུགས་ཅན་གཟུགས་ལ་ལྟ་བའི་རྣམ་ཐར་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ལྟ་བ་པོ་བདག་ཉིད་ལ་གཟུགས་སུ་འདུ་ཤེས་པར་ཐལ། འདོད་པ་དེའི་ཕྱིར། འདོད་ན། ཤཱཀྱ་ཐུབ་པ་ལ་གཟུགས་ཀྱི་འདུ་ཤེས་ཡོད་པར་ཐལ། ཆོས་ཅན་གང་ཞིག འདོད་པ་དེའི་ཕྱིར། འདོད་ན། ལོག་ཤེས་སུ་ཐལ། འདོད་པའི་ཕྱིར། ཁྱབ་སྟེ། རྡོ་རྗེ་གཅོད་པ་ལས། གང་དག་ང་ལ་གཟུགས་སུ་ཤེས། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་ཡི། །སྐྱེ་བོ་དེས་ནི་ང་མི་མཐོང་། །ཞེས་གསུངས་པའི་ཕྱིར། མཚན་ཉིད་གཉིས་པ་ལའང་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མིན་པར་ཐལ། ཁྱོད་ལ་ཕྱི་རོལ་གྱི་གཟུགས་མི་སྡུག་པ་མི་སྣང་བའི་ཕྱིར་ཏེ། ཁྱོད་ལ་ཤེས་བྱ་ཐམས་ཅད་དག་པ་རབ་འབྱམས་འབའ་ཞིག་ཏུ་སྣང་བའི་ཕྱིར། མཚན་ཉིད་གསུམ་པ་ལ། ཁ་ཅིག སྡུག་པའི་རྣམ་ཐར་ཆོས་ཅན། ཁྱོད་ལྟ་བ་པོ་བདག་ཉིད་ལ་གཟུགས་ཀྱི་འདུ་ཤེས་རྣམ་པར་བཤིག་པ་མིན་པར་ཐལ། ཁྱོད་བསམ་གཏན་བཞི་པའི་དངོས་གཞི་ལ་བརྟེན་པ་གང་ཞིག དེ་ལ་བརྟེན་ནས་གཟུགས་ཀྱི་འདུ་ཤེས་རྣམ་པར་བཤིག་པ་མི་སྲིད་པའི་ཕྱིར། ཕྱི་མ་དེར་ཐལ། དེ་ལ་བརྟེན་ནས་གཟུགས་ཀྱི་སྣང་བ་བཀག་པ་མི་སྲིད་པའི་ཕྱིར་ཏེ། དེ་དེའི་སྣང་བ་དང་བཅས་པའི་སྙོམས་འཇུག་ཡིན་པའི་ཕྱིར་ཞེ་ན། དེ་ལ་མ་ཁྱབ་སྟེ། སྲིད་རྩེའི་སེམས་ལ་བརྟེན་ནས་ཚོར་འདུ་རགས་པ་འགོག་པ་མི་སྲིད་པར་ཐལ། དེ་དེ་དང་བཅས་པའི་སྙོམས་འཇུག་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཟག་བཅས་ཀྱི་ཚོར་འདུ་དང་བཅས་པའི་སྙོམས་འཇུག་ཡིན་པའི་ཕྱིར། རྩ་བར་འདོད་ན། སྲིད་རྩེའི་སེམས་ལ་བརྟེན་ནས་འགོག་པ་ལ་སྙོམས་པར་འཇུག་པ་མི་སྲིད་པར་ཐལ་ལོ། །གཉིས་པ་ལ། ལུས་རྟེན། སེམས་རྟེན། ངོ་བོ་དང་གསུམ་ལས། དང་པོ་ནི། སའི་དངོས་གཞི་ལས། འདོད་པའི་རྟེན་ཅན་དུ་བཤད་ལ། མཛོད་ལས། དེའི་ནང་ནས་མིའི་རྟེན་ཅན་དུ་བཤད་དོ། །གཉིས་པ་ནི། མཛོད་ལས། རྣམ་ཐར་དང་པོ་འདོད་པའི་ཁ་དོག་གི་གཉེན་པོར་བསམ་གཏན་དང་པོའི་དངོས་གཞི་ལ་བརྟེན། གཉིས་པ་བསམ་གཏན་དང་པོའི་ཁ་དོག་གི་གཉེན་པོར་གཉིས་པའི་དངོས་གཞི་ལ་བརྟེན་པར་བཤད་དེ། མཛོད་ལས། རྣམ་པར་ཐར་བརྒྱད་དང་པོ་གཉིས། །མི་སྡུག་བསམ་གཏན་གཉིས་ན་ཡོད། །ཅེས་གསུང་ངོ་། །ཀུན་བཏུས་ལས། གསུམ་ཆར་ཡང་བཞི་པའི་དངོས་གཞི་ལ་བརྟེན་པར་བཤད་དེ། ཚད་མེད་པ་བཞི་དང་མངོན་ཤེས་དང་པོ་ལྔ་མ་རྟོགས་པའི་ཡོན་ཏན་གྱི་སྡེ་ཚན་ཐམས་ཅད་བསམ་གཏན་བཞི་པའི་དངོས་བཞི་ལ་བརྟེན་པར་བཤད་པའི་ཕྱིར། གསུམ་པ་སྤྲུལ་པའི་ལམ་གྱི་མཚན་ཉིད་ལ། བདག་རྐྱེན་བསམ་གཏན་གྱི་དངོས་གཞི་ལ་བརྟེན་ནས། གཞན་དོན་དུ་སྤྲུལ་པ་སྣ་ཚོགས་སྤྲུལ་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པའོ། །དབྱེ་ན། གཟུགས་ཅན་གཟུགས་ལ་ལྟ་བའི། གཟུགས་ཅན་མ་ཡིན་པ་གཟུགས་ལ་ལྟ་བའི། སྡུག་པའི་རྣམ་ཐར་དང་གསུམ་གྱི་མཚན་ཉིད་རིམ་བཞིན། བསམ་གཏན་བཞི་པའི་དངོས་གཞི་ལ་བརྟེན་ནས་སྤྲུལ་པ་སྟོན་པའི་ཡུལ་གྱི་ངོར་སྤྲུལ་པ་པོ་སྣང་ཞིང་སྤྲུལ་པ་སྣ་ཚོགས་སྤྲུལ་ནུས་པའི་ཏིང་ངེ་འཛིན་སོགས་དང་། དེ་ལ་བརྟེན་ནས་དེའི་ངོར་སྤྲུལ་པ་པོ་མི་སྣང་བར་སྤྲུལ་པ་སྣ་ཚོགས་སྤྲུལ་ནུས་པའི་ཏིང་ངེ་འཛིན་སོགས་དང་། དེ་ལ་བརྟེན་ནས་དེའི་ངོར་སྤྲུལ་པ་ཐམས་ཅད་སྡུག་པར་རོ་གཅིག་ཏུ་སྤྲུལ་ནུས་པའི་ཏིང་ངེ་འཛིན་སོགས་སོ། །མཛོད་ལྟར་ན། དང་པོ་གཉིས་ཀྱི་སེམས་རྟེན་བསམ་གཏན་དང་པོ་གཉིས་ལ་སྦྱོར། རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་ནི་ཤིན་ཏུ། ཞེས་པའི་སྐབས་སུ། ཁ་ཅིག སྟོབས་བཅུ་ནས་སངས་རྒྱས་ཉིད་ཀྱི་རྣམ་པའི་བར་སོར་དགུ་པོ་ཆོས་ཅན། ཐུན་མོང་མིན་པའི་རྣམ་མཁྱེན་གྱི་རྣམ་པ་ཡིན་ཏེ། ས་བཅུ་པ་མན་ཆད་ལས་སྤངས་རྟོགས་ཤིན་ཏུ་ཕུལ་དུ་བྱུང་བའི་མཐར་ཐུག་གི་མཁྱེན་པ་ཡིན་པའི་ཕྱིར་ཞེ་ན། སངས་རྒྱས་སའི་བྱང་ཕྱོགས་སོ་བདུན་པོ་ཆོས་ཅན། དེར་ཐལ། དེའི་ཕྱིར་ཏེ། སྒྲིབ་གཉིས་བག་ཆགས་དང་བཅས་པ་སྤངས་ཤིང་། ཤེས་བྱ་ཐམས་ཅད་མངོན་སུམ་དུ་རྟོགས་པའི་མཁྱེན་པ་ཡིན་པའི་ཕྱིར། དེས་ན་གཞུང་དེའི་དོན་ནི། དམ་བཅའ་སྔ་མ་དེ་ཆོས་ཅན། དེ་ཡིན་ཏེ། ས་བཅུ་པ་མན་ཆད་ལས་སྤངས་རྟོགས་ཀྱི་རིགས་ཤིན་ཏུ་ཕུལ་དུ་བྱུང་བའི་མཐར་ཐུག་གི་མཁྱེན་པ་ཡིན་པའི་ཕྱིར་ཞེས་བཀོད་པ་ལ། ཁ་ཅིག སོ་སོ་ཡང་དག་རིག་པ་དེ་རྟགས་དེ་ཡིན་པར་ཐལ། ཆོས་ཅན་དེའི་ཕྱིར། རྟགས་ཁས། འདོད་ན། ས་དགུ་པའི་གནས་སྐབས་ན་སོ་སོ་ཡང་དག་རིག་པ་མེད་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། རྒྱན་ལས། སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །ཞེས་གསུངས་པའི་ཕྱིར་ཞེ་ན། ས་བཅུ་པའི་རྗེས་ཐོབ་ལ་གནས་པའི་བྱང་སེམས་དེ་གཞན་དོན་བྱེད་ཚུལ་སངས་རྒྱས་དང་མཉམ་པར་ཐལ། རྒྱུད་བླར། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་ལ། །སེམས་ཅན་ཡང་དག་སྒྲོལ་བ་ལ། །འཇིག་རྟེན་དུ་ནི་མཉམ་པ་ཉིད། །ཅེས་གསུངས་པའི་ཕྱིར། ཁྱབ་པ་ཁས། འདོད་ན། དེས་རང་དོན་ཆོས་སྐུ་ལས་མ་གཡོས་བཞིན་དུ་གཞན་དོན་འབད་མེད་ལྷུན་གྲུབ་ཏུ་བྱེད་ནུས་པར་ཐལ་ལོ། །ཁ་ཅིག སངས་རྒྱས་འཕགས་པའི་བྱང་ཕྱོགས་སོ་བདུན་པོ་ཆོས་ཅན། ཐུན་མོང་བའི་རྣམ་མཁྱེན་གྱི་རྣམ་པ་མིན་པར་ཐལ། ཁྱོད་དེ་ཡིན་ན་ཁྱོད་ཉན་ཐོས་དང་ཐུན་མོང་བ་ཡིན་དགོས་པར་ལས། ཁྱོད་དེ་དང་ཐུན་མོང་བ་མ་ཡིན་པའི་ཕྱིར་ཏེ། ཁྱོད་སངས་རྒྱས་འཕགས་པ་ཁོ་ནའི་རྒྱུད་ལ་མངའ་བའི་ཡོན་ཏན་ཡིན་པའི་ཕྱིར། ཡང་དེ་ཆོས་ཅན། ཁྱོད་ཉན་ཐོས་དང་ཐུན་མོང་བ་མིན་པར་ཐལ། ཁྱོད་ཉན་ཐོས་ཀྱི་རྒྱུད་ལ་ཡོད་པ་མི་སྲིད་པའི་ཕྱིར་ཏེ། ཁྱོད་རྣམ་མཁྱེན་ཡིན་པའི་ཕྱིར་ཞེ་ན། སྔ་མ་ལ་དེའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཆོས་ཅན། ཉན་ཐོས་ཀྱི་རྟོགས་རིགས་མིན་པར་ཐལ། ཁྱོད་སངས་རྒྱས་འཕགས་པ་ཁོ་ནའི་རྒྱུད་ལ་མངའ་བའི་རྟོགས་རིགས་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེའི་རྒྱུད་ལ་ཐེག་པ་གསུམ་ཆར་གྱི་རྟོགས་རིགས་ཡོད་པའི་ཕྱིར་ཏེ། དེ་སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་སྤངས་པའི་སྐྱེས་བུ་ཡིན་པའི་ཕྱིར། ཕྱི་མ་ལ། བྱང་སེམས་མཐོང་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཆོས་ཅན། དེར་ཐལ། དེའི་ཕྱིར་ཏེ། ལམ་ཤེས་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཁྱོད་ཉན་ཐོས་ལ་བསྟན་པར་བྱ་བའི་བྱང་ཆུབ་སེམས་དཔའི་རྒྱུད་ཀྱི་ལམ་མིན་པར་ཐལ། འདོད་པ་དེའི་ཕྱིར། འདོད་ན། ཁྱོད་བྱང་ཆུབ་སེམས་དཔའི་རྒྱུད་ཀྱི་ཤེས་བྱ་ཉན་ཐོས་ཀྱི་ལམ་མིན་པར་ཐལ་ལོ། །ཡང་སངས་རྒྱས་འཕགས་པའི་ཐུགས་རྒྱུད་ཀྱི་ཡོན་ཏན་དེ་ལ་ཐུན་མོང་བའི་ཡོན་ཏན་དང་། ཐུན་མོང་མིན་པའི་ཡོན་ཏན་གཉིས་སུ་འབྱེད་མི་རིགས་པར་ཐལ། དེའི་རྒྱུད་ཀྱི་བྱང་ཕྱོགས་སོ་བདུན་དང་། དེའི་རྒྱུད་ཀྱི་སྟོབས་བཅུ་པོ་དེ་ཐུན་མོང་བའི་རྣམ་མཁྱེན་གྱི་རྣམ་པ་དང་། ཐུན་མོང་མིན་པའི་རྣམ་མཁྱེན་གྱི་རྣམ་པ་ཡིན་པའི་ཁྱད་པར་མི་འཐད་པའི་ཕྱིར། རྟགས་ཁས། འདོད་ན། འཕགས་པ་བཞི་ཆར་གྱི་རྒྱུད་ལ་ཚད་མེད་བཞི་ཡོད་པ་དང་། མི་འཇིགས་པ་བཞི་པོ་དེ་སངས་རྒྱས་འཕགས་པ་ཁོ་ནའི་རྒྱུད་ལ་ཡོད་པའི་ཁྱད་པར་མི་འཐད་པར་ཐལ་ལོ། །འདིར་རྣམ་མཁྱེན་གྱི་རྣམ་པ་གང་ཞིག རང་གི་རིགས་འདྲ་མཚན་ཉིད་པ་འཕགས་ཆུང་འོག་མའི་རྒྱུད་ལ་ཡོད་པ་དང་། དེ་གང་ཞིག དེ་མེད་པ་ཐུན་མོང་བའི་རྣམ་མཁྱེན་གྱི་རྣམ་པ་དང་། ཐུན་མོང་མ་ཡིན་པའི་རྣམ་མཁྱེན་གྱི་རྣམ་པའི་མཚན་ཉིད་དུ་གཞག་པ་ལ། ཁ་ཅིག སངས་རྒྱས་འཕགས་པའི་སྟོབས་བཅུ་ཆོས་ཅན། ཐུན་མོང་བའི་རྣམ་མཁྱེན་གྱི་རྣམ་པ་ཡིན་པར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། འཕགས་ཆུང་འོག་མའི་རྒྱུད་ལ་སྟོབས་མཚན་ཉིད་པ་ཡོད་པའི་ཕྱིར་ཏེ། དེའི་རྒྱུད་ལ་སྟོབས་ལྔ་མཚན་ཉིད་པ་ཡོད་པའི་ཕྱིར། ཡང་དེའི་རྒྱུད་ལ་དེའི་རིགས་འདྲ་མཚན་ཉིད་པ་ཡོད་པར་ཐལ། རྣམ་མཁྱེན་སྐད་ཅིག་དང་པོའི་གནས་སྐབས་ཀྱི་སྟོབས་བཅུ་པོ་དེ་རང་གི་རིགས་འདྲ་མཚན་ཉིད་པ་སྔོན་སོང་ཡིན་པའི་ཕྱིར། མ་གྲུབ་ན། དེར་ཐལ། ཤེས་པ་ཡིན་པའི་ཕྱིར་ཞེས་ཟེར་ན། དང་པོའི་རྟགས་སྒྲུབ་ཕྱི་མ་ལ་སྟོབས་རྒྱུད་ལྡན་གྱི་གང་ཟག་ཡིན་ན་སྟོབས་བཅུ་རྒྱུད་ལྡན་གྱི་གང་ཟག་ཡིན་དགོས་པར་ཐལ། དེ་ལ་ཁྱབ་འབྲེལ་ཡོད་པའི་ཕྱིར། ཕྱི་མ་ལ་ཉན་ཐོས་ཀྱི་མཐོང་ལམ་སྡུག་བསྔལ་ཆོས་བཟོད་ཆོས་ཅན། དེར་ཐལ། དེའི་ཕྱིར། འདོད་ན། འཇིག་རྟེན་པའི་ཡེ་ཤེས་དང་། འཇིག་རྟེན་ལས་འདས་པའི་ཡེ་ཤེས་གཉིས་པོ་རིགས་འདྲ་བར་ཐལ་ལོ། །གཞན་ཡང་མི་ནས་ཤི་འཕོས་ནས་ལྷར་སྐྱེས་མ་ཐག་པའི་ལྷ་ཆོས་ཅན། རང་གི་རིགས་འདྲ་འགྲོ་བ་སྔོན་དུ་སོང་མ་ཐག་པ་ཡིན་པར་ཐལ། འགྲོ་བ་ཡིན་པའི་ཕྱིར། ཁྱབ་པ་ཁས། འདོད་ན། མིའི་འགྲོ་བ་དང་ལྷའི་འགྲོ་བ་གཉིས་འགྲོ་བ་རིགས་འདྲ་བ་ཡིན་པར་ཐལ་ལོ། །དེ་ལ་ཐམས་ཅད་ཤེས་པ་ཉིད་ནི་ཉན་ཐོས་དང་། ཞེས་པའི་སྐབས་སུ། གཞུང་གསུམ་པོ་འདི་གང་གི་དོན་བསྡུ་ཡིན་དཔྱད་པ་དང་། ཟག་བཅས་ཟག་མེད་ཀྱི་དོན་ལ་དཔྱད་པ་གཉིས་ལས། དང་པོ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག གཞུང་དང་པོ་ནི་གཞི་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སོ་བདུན་གྱི་དོན་བསྡུ། གཉིས་པ་ནི་ལམ་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སོ་བཞིའི་དོན་བསྡུ། གཞུང་ཕྱི་མ་ནི་ཐུན་མོང་མིན་པའི་རྣམ་མཁྱེན་གྱི་རྣམ་པ་སོ་དགུའི་དོན་བསྡུ་ཡིན་ཞེས་གསུང་ངོ་། །འོ་ན་དོན་བསྡུའི་སྐབས་ནས་བསྟན་པའི་གཞི་ཤེས་ཀྱི་རྣམ་པ་དང་། ལམ་ཤེས་ཀྱི་རྣམ་པ་དེ་ལ་ལམ་བདེན་གྱི་རྣམ་པ་ཁོ་ན་ཡིན་པར་ཐལ། དམ་བཅའ་དེའི་ཕྱིར། ཁྱབ་སྟེ། རྣམ་མཁྱེན་གྱི་རྣམ་པ་བརྒྱ་དང་བཅུ་པོ་དེ་ལམ་བདེན་གྱི་རྣམ་པ་ཁོ་ན་ཡིན་པའི་ཕྱིར་ཏེ། ལམ་གྱི་བདེན་པའི་རྗེས་མཐུན་པར། །ཀུན་མཁྱེན་གསུམ་དུ་ཕྱེ་བས་ན། །ཞེས་གསུངས་པའི་ཕྱིར། རྩ་བར་འདོད་ན། དོན་བསྡུའི་སྐབས་སུ་གཞི་ཤེས་ཀྱི་རྣམ་པ་དང་། ལམ་ཤེས་ཀྱི་རྣམ་པ་ལས་ལོགས་སུ་རྣམ་མཁྱེན་གྱི་རྣམ་པ་ལམ་བདེན་གྱི་རྣམ་པར་བསྟན་པ་ལ་དགོས་པ་མེད་པར་ཐལ་ལོ། །ཡང་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་གྱི་རྣམ་པ་ནི་ཞེས་པའི་སྐབས་ནས་བསྟན་པའི་རྣམ་མཁྱེན་གྱི་རྣམ་པ་ཡིན་ན་ཐུན་མོང་མིན་པའི་རྣམ་མཁྱེན་གྱི་རྣམ་པ་ཡིན་དགོས་པར་ཐལ། གཞུང་དེ་ཐུན་མོང་མིན་པའི་རྣམ་མཁྱེན་གྱི་རྣམ་པ་ཁོ་ནའི་དོན་བསྡུ་ཡིན་པའི་ཕྱིར། འདོད་ན། སངས་རྒྱས་འཕགས་པའི་རྒྱུད་ཀྱི་བྱང་ཕྱོགས་སོ་བདུན་པོ་ཆོས་ཅན། དེར་ཐལ། དེའི་ཕྱིར་ཏེ། སྒྲིབ་གཉིས་བག་ཆགས་དང་བཅས་པ་ཟད་པར་སྤངས་པའི་མཁྱེན་པ་ཡིན་པའི་ཕྱིར། མ་ཁྱབ་ན། གཞུང་ལ་ལྟོས་ཤིག་གོ །ཡང་ཁ་ཅིག གཞུང་གསུམ་པོ་དེ་རིམ་པ་ལྟར་དུ། གཞི་ཤེས་ཀྱི་རྣམ་པ་ཉེར་བདུན། ལམ་ཤེས་ཀྱི་རྣམ་པ་སོ་དྲུག རྣམ་མཁྱེན་གྱི་རྣམ་པ་བརྒྱ་དང་བཅུའི་དོན་བསྡུར་སྦྱར་ཞིང་། ཉན་ཐོས་ལ་སོགས་ཁོངས་མཛད་ནས་ཉན་ཐོས་ལ་སོགས་པའི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་ཟག་མེད་དུ་སྒྲུབ་པ་དང་། འདིར་བསྟན་ཟག་བཅས་ཟག་མེད་ཀྱི་དོན་མཉམ་གཞག་དང་རྗེས་ཐོབ་ལ་མཛད་པ་ནི་ཅུང་ཟད་འགལ་ཏེ། ཐེག་དམན་གྱི་རྒྱུད་ཀྱི་ལམ་གཉིས་པའི་རྣམ་པ་ལྔ་པོ་ཆོས་ཅན། མཉམ་གཞག་ཏུ་ཐལ། འདིར་བསྟན་ལམ་ཟག་མེད་ཡིན་པའི་ཕྱིར། རྟགས་ཁྱབ་དངོས། འདོད་ན། རྗེས་ཐོབ་ཏུ་ཐལ། ཐེག་དམན་གྱི་རྒྱུད་ཀྱི་ལམ་གཉིས་པའི་རྣམ་པ་ཡིན་པའི་ཕྱིར། ཁྱབ་སྟེ། གོང་གི་ཟག་བཅས་ཟག་མེད་ཀྱི་དོན་མཉམ་གཞག་དང་རྗེས་ཐོབ་ལ་མཛད་པའི་ཕྱིར། ཡང་ཉན་ཐོས་ཀྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་ཆོས་ཅན་དུ་གཟུང་ནས་ཟག་མེད་དུ་སྒྲུབ་པ་ནི་ཅུང་ཟད་རྩིང་སྟེ། ཉན་ཐོས་སྦྱོར་ལམ་པའི་རྒྱུད་ཀྱི་བདེན་བཞི་མི་རྟག་ལ་སོགས་བཅུ་དྲུག་རྟོགས་པའི་རྟོགས་པ་དེ་ཟག་མེད་དུ་ཐལ། དམ་བཅའ་དེའི་ཕྱིར། འདོད་ན། དེ་ཆོས་ཅན། དེ་མིན་པར་ཐལ། ཐེག་དམན་སོ་སྐྱེའི་མཁྱེན་པ་ཡིན་པའི་ཕྱིར། བྱང་སེམས་སྦྱོར་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དང་། གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་དེ་འདིར་བསྟན་གྱི་ཟག་བཅས་སུ་ཐལ། དམ་བཅའ་ཕྱི་མ་དེའི་ཕྱིར། འདོད་ན། རྗེས་ཐོབ་ཏུ་ཐལ། འདོད་པ་དེའི་ཕྱིར། འདོད་མི་ནུས་ཏེ། རྟོགས་རིགས་གཉིས་པོ་དེ་བྱང་སེམས་སྦྱོར་ལམ་པས་མཉམ་གཞག་ཏུ་ཆེད་དུ་གཉེར་ནས་སྒོམ་དགོས་པའི་ཕྱིར། སྒྲུབ་བྱེད་མང་དུ་བཀོད་ཟིན་ནོ། །གཉིས་པ་ནི། སློབ་དཔོན་གྱི་བཞེད་པ་ལ། རྣམ་པ་བདུན་ཅུ་རྩ་གསུམ་པོ་ཐམས་ཅད་ཟག་བཅས་ཟག་མེད་ཀྱི་ཁྱད་པར་འབྱེད་པར་བཞེད་ཅིང་། ཐེག་དམན་གྱི་རྒྱུད་ཀྱི་ལམ་བདེན་གྱི་རྣམ་པ་བཅོ་ལྔ་པོ་ལ་ཟག་བཅས་ཟག་མེད་ཀྱི་ཁྱད་པར་གོང་དུ་ཕྱེ་ཟིན་པས་ན། འདིར་ཐེག་དམན་གྱི་བདེན་པ་དང་པོ་གསུམ་གྱི་རྣམ་པ་བཅུ་གཉིས་དང་། བྱང་འཕགས་ཀྱི་གཞི་ཤེས་ཀྱི་རྣམ་པ་ཉེར་བདུན་གྱི་དང་། ལམ་ཤེས་དང་རྣམ་མཁྱེན་གྱི་རྣམ་པ་རྣམས་ཀྱི་ཟག་བཅས་ཟག་མེད་ཀྱི་ཁྱད་པར་རྣམས་འདིར་འབྱེད་པར་མཛད་པ་ཡིན་ནོ། །དེས་ན་འདིར་ཉན་ཐོས་དང་བྱང་སེམས་གཉིས་པོའང་འཕགས་པ་ལ་འཇོག་པ་སྐབས་ཀྱི་དོན་ཡིན་ཞིང་། བདེན་པ་དང་པོ་གསུམ་གྱི་རྣམ་པ་བཅུ་གཉིས་པོ་ཉན་ཐོས་ཀྱི་རྟོགས་རིགས་ཡིན་པས་ན། ཉན་ཐོས་འཕགས་པའི་རྒྱུད་ཀྱི་བདེན་པ་དང་པོ་གསུམ་གྱི་རྣམ་པ་བཅུ་གཉིས་ཟག་མེད་དང་། བྱང་འཕགས་ཀྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་ཟག་བཅས་སུ་སྒྲུབ་པ་ཡིན་གྱི། ཉན་ཐོས་ལ་སོགས་ཁོངས་སུ་མཛད་ནས་ཐེག་དམན་གྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་འདིར་ཟག་མེད་དུ་བསྟན་པ་ནི་མིན་ཏེ། དེའི་རྒྱུད་ཀྱི་ལམ་བདེན་གྱི་རྣམ་པ་བཅོ་ལྔའི་ཟག་བཅས་ཟག་མེད་ཀྱི་ཁྱད་པར་གོང་དུ་ཕྱེ་ཟིན་པས་འདིར་མི་དགོས་པའི་ཕྱིར་དང་། དེའི་རྒྱུད་ཀྱི་ལམ་གཉིས་པའི་རྣམ་པ་ལྔ་པོ་དེ་འདིའི་ཟག་མེད་དུ་འགལ་བའི་ཕྱིར། དེས་ན་གཞུང་ལས། ཉན་ཐོས་དང་བྱང་ཆུབ་སེམས་དཔའི་བྱེ་བྲག་གིས། ཞེས་ཉན་ཐོས་ལ་སོགས་ཁོངས་སུ་མི་མཛད་པའི་གནས་ཀྱང་འདི་ཡིན་ནོ། །གངས་རིའི་ཁྲོད་འདིར་འདི་ཇི་ལྟ་བ་བཞིན་རྟོགས་པ་གཞན་མི་སྣང་ངོ་། །གསུམ་པ་ནི་ཁ་ཅིག འདིའི་གཞུང་དང་པོ་དེ་གཞི་ཤེས་ཀྱི་རྣམ་པ་ཉེར་བདུན་གྱི་དོན་བསྡུ་མིན་པར་ཐལ། ཐེག་དམན་གྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་དེ་དེའི་སྐབས་ཀྱི་ལམ་ཟག་མེད་མིན་པའི་ཕྱིར་ཟེར་ན། འོ་ན་ཁྱེད་རང་ལ་ཡང་དེར་ཐལ། དེའི་ཕྱིར། མ་གྲུབ་ན། ཐེག་དམན་གྱི་ལམ་གཉིས་པའི་རྣམ་པ་ལྔ་པོ་དེ་འདིའི་སྐབས་ཀྱི་ཟག་མེད་དུ་ཐལ། དེས་ན་འདིར་ཟག་བཅས་ཟག་མེད་ཀྱི་ཁྱད་པར་ཕྱེ་བའི་སྒོ་ནས་དོན་བསྡུ་བ་ཡིན་པས། སྔར་ཕྱེ་ཟིན་པ་རྣམས་ལ་འདིར་དོན་བསྡུ་བ་ལ་དགོས་པ་མེད་པས་དེ་དག་གི་དོན་བསྡུ་མིན་ལ། འོན་ཀྱང་ཉེར་བདུན་གྱི་དོན་བསྡུ་མིན་པའི་སྐྱོན་མེད་དེ། བྱང་འཕགས་ཀྱི་རྒྱུད་ཀྱི་ཉེར་བདུན་པོའི་དོན་བསྡུ་ཡིན་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག ཉོན་མོངས་པའི་ཟག་པ་དང་བཅས་མ་བཅས་སོགས་ལ་འདོད་པ་དང་། ཡང་ཁ་ཅིག སྒྲ་དོན་འདྲེས་འཛིན་གྱི་རྟོག་པ་དང་བཅས་མ་བཅས་སོགས་ལ་འདོད་པ་ནི་གོང་དུ་བཀག་ཟིན་པས་དྲན་པར་བྱའོ། །གཉིས་པ་ནི། སློབ་དཔོན་གྱིས་སྐབས་གཉིས་པར་བྱང་འཕགས་ཀྱི་རྗེས་ཐོབ་ལ་ཟག་བཅས་དང་མཉམ་གཞག་ལ་ཟག་མེད་དུ་གསུངས་པའི་རིགས་པས་སྒྲུབ་བྱེད་ཟུར་པ་མ་བཀོད་པས། ཟག་བཅས་ཟག་མེད་ཀྱི་ཁྱད་པར་རྣམས་དེ་ལྟར་དུ་རྗེས་ཐོབ་དང་མཉམ་གཞག་ལ་བྱེད་པར་གྲུབ་པས། འདིར་ཡང་དེ་ལྟར་དུ་འཐད་དོ། །འོན་ཀྱང་ཉན་ཐོས་ཙམ་དང་བྱང་སེམས་ཙམ་གྱི་རྒྱུད་ཀྱི་གཞི་ཤེས་ཀྱི་རྣམ་པ་རྣམས་དེ་ལྟར་དུ་འབྱེད་ནུས་པ་ནི་མིན་ཏེ། བྱང་སེམས་སོ་སྐྱེའི་རྒྱུད་ཀྱི་རྣམ་པ་ཉེར་བདུན་པོ་རྣམས་ཀྱང་། མཉམ་གཞག་ཏུ་བསྒོམ་པར་བྱ་བ་ཡིན་པའི་ཕྱིར། དེས་ན་ཉན་ཐོས་འཕགས་པ་དང་། བྱང་སེམས་འཕགས་པའི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་པོ་རྣམས་དེ་ལྟར་ཕྱེ་བ་ཡིན་ཏེ། སྔ་མ་ནི་རང་དོན་དུ་མཉམ་གཞག་ཏུ་བསྒོམ་པར་བྱ་བ་ཡིན་པའི་ཕྱིར་དང་། ཕྱི་མ་ནི་རྗེས་ཐོབ་ཏུ་གཞན་དོན་དུ་ཤེས་པར་བྱ་བ་ཙམ་ཡིན་པའི་ཕྱིར། ལམ་ཤེས་ཀྱི་རྣམ་པ་དང་རྣམ་མཁྱེན་གྱི་རྣམ་པ་རྣམས་ལ་ཟག་བཅས་ཟག་མེད་དུ་འཇོག་པ་ནི་གཞུང་ཉིད་ལས་སྒྲུབ་བྱེད་བཀོད་པའི་ཆ་ནས་དེ་ལྟར་འཇོག་པ་ཡིན་གྱི། སྔ་མ་ལྟར་ནི་མིན་ནོ། །དེས་ན་བྱང་འཕགས་ཀྱི་རྒྱུད་ཀྱི་གཞི་ཤེས་ཀྱི་རྣམ་པ་དང་། ལམ་ཤེས་ཀྱི་རྣམ་པ་ལ་ཟག་བཅས་ཞེས་བརྗོད་པའི་རྒྱུ་མཚན་ཡོད་དེ། སྒྲུབ་བྱེད་གཉིས་པོ་དེའི་ཕྱིར་ཞེས་འགོད་པར་བྱ་བ་ཡིན་གྱི། ཟག་བཅས་མཚན་ཉིད་པ་ནི་མ་ཡིན་ནོ། །གསུམ་པ་ལ། ཁ་ཅིག བྱང་འཕགས་ཀྱི་ལམ་ཤེས་ཀྱི་རྣམ་པ་སོ་དྲུག་ཆོས་ཅན། ཁྱོད་ལ་ཟག་བཅས་ཞེས་བརྗོད་པའི་རྒྱུ་མཚན་མེད་པར་ཐལ། ཁྱོད་ཟག་བཅས་མིན་པའི་ཕྱིར། ཡང་དེ་ཆོས་ཅན། ཁྱོད་ལ་ཟག་མེད་ཅེས་བརྗོད་པའི་རྒྱུ་མཚན་ཡོད་པར་ཐལ། ཁྱོད་རང་དོན་དུ་མཉམ་གཞག་ཏུ་བསྒོམ་པར་བྱ་བའི་མཁྱེན་པ་ཡིན་པའི་ཕྱིར། འདོད་ན། མིན་པར་ཐལ། ཁྱོད་ལ་ཟག་བཅས་ཞེས་བརྗོད་པའི་རྒྱུ་མཚན་ཡོད་པའི་ཕྱིར་ཞེས་ཟེར་ན། དང་པོ་ལ། གཞུང་ཤེར་ཕྱིན་ཆོས་ཅན། ཁྱོད་ལ་ཤེར་ཕྱིན་ཞེས་བརྗོད་པའི་རྒྱུ་མཚན་མེད་པར་ཐལ། ཁྱོད་དེ་མ་ཡིན་པའི་ཕྱིར། གཉིས་པ་ལ་ཐེག་ཆེན་སེམས་བསྐྱེད་ཆོས་ཅན། ཁྱོད་ལ་སེམས་བྱུང་འདུན་པ་ཞེས་བརྗོད་པའི་རྒྱུ་མཚན་མེད་པར་ཐལ། ཁྱོད་ལ་གཙོ་བོ་སེམས་ཞེས་བརྗོད་པའི་རྒྱུ་མཚན་ཡོད་པའི་ཕྱིར། བྲམ་ཟེའི་ཁྱེའུ་ཁ་ཆེ་སྣ་ཉག་ཆོས་ཅན། ཁྱོད་ལ་སེང་གེ་ཞེས་བརྗོད་པའི་རྒྱུ་མཚན་མེད་པར་ཐལ། ཁྱོད་ལ་མི་ཞེས་བརྗོད་པའི་རྒྱུ་མཚན་ཡོད་པའི་ཕྱིར། ཁྱབ་པ་རྣམས་ཁས། སངས་རྒྱས་རྣམས་ལ་ལྷག་པར་བྱས། །ཞེས་པའི་སྐབས་སུ། ངག་དོན་ལ་དགག་གཞག་གཉིས་ལས། དང་པོ་ལ། ཁ་ཅིག སྦྱོར་བ་སྒོམ་པ་པོའི་རྟེན་གྱི་གང་ཟག་ཆོས་ཅན། ཁྱོད་ལ་རྣམ་པ་བཞིར་ཡོད་དེ། ཁྱོད་ལ་ཤེར་ཕྱིན་གྱི་ཚིག་ཉན་པའི། དེའི་ཚིག་བློ་ལ་འཛིན་པའི། དེའི་དོན་མི་བརྗེད་པར་འཛིན་པའི། དེའི་དོན་ཚུལ་བཞིན་དུ་ཡིད་ལ་བྱེད་པའི་རྟེན་གྱི་གང་ཟག་རྣམས་སུ་ཡོད་པའི་ཕྱིར་ཟེར་ན། འོ་ན། གཞུང་ཤེར་ཕྱིན་ཉན་པ་པོའི་རྟེན་གྱི་གང་ཟག་ཡིན་ན་སྦྱོར་བ་སྒོམ་པ་པོའི་རྟེན་གྱི་གང་ཟག་ཡིན་དགོས་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཤེར་ཕྱིན་ལ་ཐོས་བསམ་བྱེད་པའི་རྟེན་གྱི་གང་ཟག་ཡིན་ན་དེ་སྒོམ་པ་པོའི་རྟེན་གྱི་གང་ཟག་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། དེ་ལ་ཐོས་བསམ་སྒོམ་གསུམ་རིམ་བཞིན་དུ་བྱེད་པའི་གང་ཟག་མ་གྲུབ་པར་ཐལ་ལོ། །ཁོ་ན་རེ། ཤེར་ཕྱིན་ཉན་པའི་བྱང་སེམས་ཚོགས་ལམ་པ་ཆོས་ཅན། དེ་སྒོམ་པའི་གང་ཟག་ཡིན་པར་ཐལ། དེ་རྒྱུད་ལྡན་གྱི་རྟེན་གྱི་གང་ཟག་ཡིན་པའི་ཕྱིར་ཞེ་ན། ཤཱཀྱ་ཐུབ་པ་ཆོས་ཅན། ཆོས་རང་བཞིན་མེད་པར་རྟོགས་པའི་ཤེས་རབ་སྒོམ་པ་པོའི་གང་ཟག་ཡིན་པར་ཐལ། དེ་རྒྱུད་ལྡན་གྱི་གང་ཟག་ཡིན་པའི་ཕྱིར། ཁྱབ་པ་ཁས། གཉིས་པ་ནི། ཐེག་ཆེན་གྱི་སྦྱོར་བ་སྒོམ་པ་པོའི་རྟེན་གྱི་གང་ཟག་དེ་ཆོས་ཅན། ཁྱོད་ལ་རྣམ་པ་བཞི་ཡོད་དེ། ཁྱོད་ལ་སྔར་གྱི་གཏན་ཚིགས་བཞི་པོ་དེར་ཡོད་པའི་ཕྱིར་ཞེས་འགོད་དོ། །གཟུགས་ལ་སོགས་ལ་མི་གནས་ཕྱིར། །ཞེས་པའི་སྐབས་སུ། ཐེག་ཆེན་གྱི་སྦྱོར་བའི་མཚན་ཉིད་དང་། ས་མཚམས་གཉིས་ལས། དང་པོ་ལ་དངོས་དང་རྩོད་པ་སྤང་བ་གཉིས། དང་པོ་ནི། ཐབས་ཤེས་ཁྱད་པར་ཅན་གྱིས་ཟིན་པའི་བྱང་སེམས་ཀྱི་རྣལ་འབྱོར་རོ། །གཉིས་པ་ལ། ཁ་ཅིག་ན་རེ། ཚེགས་ཆེན་ཡུན་རིང་རྟོགས་དཀའི་སྦྱོར་བ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཆོས་རང་བཞིན་མེད་པར་རྟོགས་པའི་ཤེས་རབ་དང་ལྡན་པའི་སྦྱོར་བ་ཡིན་པར་ཐལ། འདོད་པ་དེའི་ཕྱིར། འདོད་ན། ཆོས་རང་བཞིན་མེད་པ་ལ་མི་སྐྲག་པའི་སྦྱོར་བ་ཡིན་པར་ཐལ་ལོ། །འདོད་མི་ནུས་ཏེ། ཆོས་ཅན་དེའི་ཕྱིར་ཞེ་ན། འོ་ན་ཤེར་ཕྱིན་ལ་སྐྲག་པ་སྐྱེ་སྲིད་པའི་སྒྲུབ་པ་ཡིན་ན་ཤེར་ཕྱིན་ལ་སྐྲག་པའི་སྒྲུབ་པ་ཡིན་དགོས་པར་ཐལ། ཐལ་བ་ཕྱི་མ་ལ་ཁྱབ་འབྲེལ་ཡོད་པའི་ཕྱིར། འདོད་ན། གནས་སྐབས་ཐེག་དམན་དུ་ལྷུང་བར་ངེས་པའི་བྱང་སེམས་ཚོགས་ལམ་པའི་རྒྱུད་ཀྱི་སྙིང་རྗེ་ཆོས་ཅན། གཞན་དོན་རྒྱ་ཆེན་པོ་ལ་སྐྲག་པའི་སྦྱོར་བ་ཡིན་པར་ཐལ། དེ་ལ་སྐྲག་པ་སྐྱེ་སྲིད་པའི་སྦྱོར་བ་ཡིན་པའི་ཕྱིར། འདོད་མི་ནུས་ཏེ། ཆོས་ཅན་ཡིན་པའི་ཕྱིར། རྩ་བའི་གཏན་ཚིགས་གྲུབ་སྟེ། དེ་འདྲའི་བྱང་སེམས་གཞན་དོན་རྒྱ་ཆེན་པོས་སྐྲག་ནས་ཐེག་དམན་གྱི་ལམ་དུ་འཇུག་སྲིད་པའི་ཕྱིར། གཉིས་པ་ལ་ཁ་ཅིག་ན་རེ། ཐེག་ཆེན་གྱི་སྦྱོར་བ་ཡིན་ན་གནས་སྐབས་ཀྱི་སྦྱོར་བ་བཅོ་ལྔ་པོ་གང་རུང་ཡིན་དགོས་ཤིང་། ལུང་བསྟན་ཐོབ་པའི་སྦྱོར་བའི་མ་མཐའི་ས་མཚམས་ཐེག་ཆེན་གྱི་སྦྱོར་ལམ་དྲོད་ནས་ཡོད་ཅེ་ན། ཐེག་ཆེན་ཚོགས་ལམ་པའི་རྒྱུད་ཀྱི་སྦྱོར་བ་ཡིན་ན་ཚེགས་ཆེན་ཡུན་རིང་རྟོགས་དཀའི་སྦྱོར་བ་ཡིན་དགོས་པར་ཐལ། ཁས་བླངས་དེའི་ཕྱིར། འདོད་ན། བྱང་སེམས་ཚོགས་ལམ་པ་དབང་པོ་རྣོན་པོའི་སྦྱོར་བ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཤེར་ཕྱིན་ལ་སྐྲག་པ་སྐྱེ་སྲིད་པའི་སྦྱོར་བ་ཡིན་པར་ཐལ། འདོད་པ་དེའི་ཕྱིར། གཞན་ཡང་ཐེག་ཆེན་ཚོགས་ལམ་པ་དབང་རྣོན་དེ་གནས་སྐབས་ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་སླ་བ་དང་། དེ་དབང་རྟུལ་གྱི་དེས་དེ་ཐོབ་དཀའི་ཁྱད་པར་མི་འཐད་པར་ཐལ། དེ་གཉིས་ཀྱི་རྒྱུད་ཀྱི་སྦྱོར་ལམ་ཚེགས་ཆེན་ཡུན་རིང་རྟོགས་དཀའི་སྦྱོར་བ་ཡིན་མིན་གྱི་ཁྱད་པར་མེད་པའི་ཕྱིར། ཡང་ཁ་ཅིག ལུང་བསྟན་ཐོབ་པའི་སྦྱོར་བ། ཕྱིར་མི་ལྡོག་པའི་སྦྱོར་བ། ངེས་པར་འབྱུང་བའི་སྦྱོར་བ། བར་ཆད་མེད་པའི་སྦྱོར་བ་རྣམས་ཐེག་ཆེན་གྱི་སྦྱོར་ལམ་བཞི་ལ་རིམ་བཞིན་དུ་འཇོག བྱང་ཆུབ་ལ་ཉེ་བའི་སྦྱོར་བ་ས་དང་པོ་དང་མྱུར་བར་བྱང་ཆུབ་པའི་སྦྱོར་བ་ས་གཉིས་པ་ནས་བདུན་པའི་བར་ལ་འཇོག་པ་དེ་དང་དེར་ངེས་པ་ཡིན་ནམ། མ་མཐའི་ས་མཚམས་ཡིན། དང་པོ་ལྟར་ན་བྱང་འཕགས་ཀྱི་རྒྱུད་ལ་ལུང་བསྟན་ཐོབ་པའི་སྦྱོར་བ་མེད་པར་ཐལ། དེ་དྲོད་ཁོ་ནར་ངེས་པའི་ཕྱིར། འདོད་ན། དེའི་རྒྱུད་ལ་ཤེར་ཕྱིན་ལ་མི་སྐྲག་པའི་སྒྲུབ་པ་མེད་པར་ཐལ། འདོད་པ་དེའི་ཕྱིར། གཉིས་པ་ལྟར་ན་ས་གཉིས་པའི་བྱང་སེམས་ཀྱི་རྒྱུད་ལ་བྱང་ཆུབ་ལ་ཉེ་བའི་སྦྱོར་བ་ཡོད་པར་ཐལ། དེའི་ས་མཚམས་ས་དང་པོར་གཞག་པ་དེ་མ་མཐའི་ས་མཚམས་ཡིན་པའི་ཕྱིར། འདོད་ན། དེ་འདྲའི་རྒྱུད་ལ་ཟག་མེད་ཀྱི་ཆོས་གསར་དུ་སྐྱེ་བའི་སྒྲུབ་པ་ཡོད་པར་ཐལ་ལོ་ཞེ་ན། དང་པོའི་ཁྱབ་པ་ཕྱི་མ་ལ། བྱང་འཕགས་ཀྱི་རྒྱུད་ལ་རང་རྒྱུད་ཀྱི་བསོད་ནམས་རྣམ་པར་འཕེལ་བའི་རྩེ་སྦྱོར་མེད་པར་ཐལ། དེའི་རྒྱུད་ལ་རྩེ་མོའི་སྦྱོར་བ་མེད་པའི་ཕྱིར། བྱང་སེམས་ཚོགས་ལམ་པ་དབང་རྣོན་གྱི་རྒྱུད་ལ་ཤེར་ཕྱིན་ལ་མི་སྐྲག་པའི་སྒྲུབ་པ་མེད་པར་ཐལ། དེའི་རྒྱུད་ལ་ལུང་བསྟན་ཐོབ་པའི་སྦྱོར་བ་མེད་པའི་ཕྱིར། ཁྱབ་པ་གཉིས་ཁས། འདོད་ན། དེ་ཡོད་པར་ཐལ། དེའི་རྒྱུད་ལ་ཆོས་རང་བཞིན་མེད་པའི་དོན་ལ་ངེས་ཤེས་སྐྱེས་པའི་སྒྲུབ་པ་ཡོད་པའི་ཕྱིར། ཐལ་བ་གཉིས་པའི་ཁྱབ་པ་ཕྱི་མ་ལ། ཉན་ཐོས་མཐོང་ལམ་པའི་རྒྱུད་ལ་ཟག་མེད་ཀྱི་ཆོས་གསར་དུ་སྐྱེས་པའི་སྒྲུབ་པ་མེད་པར་ཐལ། དེའི་རྒྱུད་ལ་བྱང་ཆུབ་ལ་ཉེ་བའི་སྦྱོར་བ་མེད་པའི་ཕྱིར། འདོད་མི་ནུས་ཏེ། དེའི་རྒྱུད་ལ་ཟག་མེད་ཀྱི་ཆོས་གསར་དུ་སྐྱེས་པ་ཡོད་པའི་ཕྱིར། བདུད་ཀྱི་མཐུ་བཅོམ། ཞེས་པའི་སྐབས་སུ། ཐེག་ཆེན་གྱི་སྦྱོར་བའི་ཡོན་ཏན་གྱི་མཚན་ཉིད་ལ་དགག་གཞག་སྤང་གསུམ་ལས། དང་པོ་ལ། ཁ་ཅིག་ན་རེ། ཐེག་ཆེན་གྱི་སྦྱོར་བ་སྒོམ་སྟོབས་ཀྱིས་ཐོབ་པའི་དགེ་ལེགས་ཞེས་ཟེར་ན། རྣམ་མཁྱེན་ཆོས་ཅན། དེར་ཐལ། དེའི་ཕྱིར། འདོད་ན། མིན་པར་ཐལ། ཐེག་ཆེན་གྱི་སྦྱོར་བ་ལ་མི་ལྡན་པའི་ཕྱིར། གཞན་ཡང་ཐེག་ཆེན་གྱི་མཐོང་ལམ་དེ་ཐེག་ཆེན་གྱི་སྦྱོར་ལམ་གྱི་ཡོན་ཏན་ཡིན་པར་ཐལ། རྩ་བར་འདོད་པ་དེའི་ཕྱིར། འདོད་ན། ཐེག་ཆེན་སྦྱོར་ལམ་པའི་ཡོན་ཏན་ཡིན་པར་ཐལ། འདོད་པ་དེའི་ཕྱིར། འདོད་ན། ཐེག་ཆེན་སོ་སྐྱེའི་ཡོན་ཏན་ཡིན་པར་ཐལ། འདོད་པ་དེའི་ཕྱིར། གཉིས་པ་ནི། ཐེག་ཆེན་གྱི་སྦྱོར་བ་སྒོམ་སྟོབས་ཀྱི་ཐེག་ཆེན་སྦྱོར་བའི་གནས་སྐབས་སུ་ཐོབ་པའི་དགེ་ལེགས་སོ། །གསུམ་པ་ནི། ཁ་ཅིག ཟག་མེད་ཀྱི་ཆོས་ཐམས་ཅད་རྫོགས་པ་དེ་ཆོས་ཅན། ཐེག་ཆེན་སྦྱོར་བ་ལ་ལྡན་པར་ཐལ། དེའི་ཡོན་ཏན་ཡིན་པའི་ཕྱིར། འདོད་ན། དེ་ལ་མི་ལྡན་པར་ཐལ། ཐེག་ཆེན་གྱི་སྦྱོར་བ་ཡིན་ན་དེ་མ་རྫོགས་པ་ཞིག་དགོས་པའི་ཕྱིར་ཞེས་དང་། འབྲས་བུ་ཤེར་ཕྱིན་ངེས་པར་ཐོབ་པ་ཆོས་ཅན། ཐེག་ཆེན་སྦྱོར་བ་ལ་ལྡན་པར་ཐལ། དེའི་ཡོན་ཏན་ཡིན་པའི་ཕྱིར། འདོད་མི་ནུས་ཏེ། ཐེག་ཆེན་སྦྱོར་བ་ཡིན་ན་འབྲས་བུ་ཤེར་ཕྱིན་དང་མི་ལྡན་པ་ཞིག་དགོས་པའི་ཕྱིར་ཞེ་ན། དང་པོ་ལ། བག་ལ་ཉལ་ཀུན་འཇོམས་པ་དེ་ཐེག་ཆེན་སྦྱོར་ལམ་པ་དབང་རྣོན་ལ་ལྡན་པར་ཐལ། དེ་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པར་སྒྲུབ་པའི་རྟགས་ཡིན་པའི་ཕྱིར། ཁྱབ་པ་ཁས། འདོད་ན། དེ་ལ་དེ་མི་ལྡན་པར་ཐལ། དེ་ཡིན་ན་དེ་མ་ཐོབ་པས་ཁྱབ་པའི་ཕྱིར། ཕྱི་མ་ལ་འབྲས་བུ་ཤེར་ཕྱིན་ངེས་པར་འཐོབ་པ་དེ་དེ་ལ་ལྡན་པར་ཐལ། དེས་དེ་ངེས་པར་ཐོབ་པའི་ཕྱིར། གང་གིས་མཚོན་དེ་མཚན་ཉིད་དུ། །ཤེས་བྱ་ཞེས་པའི་སྐབས་སུ། ཐེག་ཆེན་གྱི་སྦྱོར་བའི་མཚན་ཉིད་ཀྱི་མཐའ་དཔྱད་པ་ལ། སྤྱིར་མཚན་མཚོན་འགལ་མི་འགལ་ལ་དཔྱད་པ། འདིར་བསྟན་གྱི་མཚོན་ཡུལ་ལ་དཔྱད་པ། མཚན་ཉིད་སོ་སོའི་ངོ་བོ་ལ་དཔྱད་པ། གཞུང་སོ་སོའི་དོན་ལ་དཔྱད་པ་དང་བཞི་ལས། དང་པོ་ལ་དགག་གཞག་སྤང་གསུམ་ལས། དང་པོ་ནི། ཁ་ཅིག དེ་གཉིས་འགལ་ཏེ། མཚན་ཉིད་ཡིན་ན་མཚོན་པར་བྱེད་པ་ཡིན་དགོས། མཚོན་བྱ་ཡིན་ན་མཚོན་པར་བྱ་བ་ཡིན་དགོས་པའི་ཕྱིར། དང་པོ་དེར་ཐལ། གང་གིས་མཚོན་དེ་མཚན་ཉིད་དུ། །ཤེས་བྱ་ཅེས་བཤད་པའི་ཕྱིར། ཕྱི་མ་དེར་ཐལ། ལས་སུ་སྒྲུབ་པས་དེ་རྣམས་མཚོན་པར་བྱ་བ་ཡིན་པས་ཞེས་བཤད་པའི་ཕྱིར། ཡང་ངོ་བོ་ཉིད་མཚན་དེ་འདིར་བསྟན་གྱི་མཚན་ཉིད་དུ་ཐལ། དེ་གཉིས་མི་འགལ་བའི་ཕྱིར། འདོད་ན། ཐེག་ཆེན་སྦྱོར་བ་དེ་ཐེག་ཆེན་སྦྱོར་བའི་མཚན་ཉིད་དུ་ཐལ། འདོད་པ་དེའི་ཕྱིར། ཁྱབ་སྟེ། ངོ་བོ་ཉིད་མཚན་དེ་མཚོན་པར་བྱ་བ་ཐེག་ཆེན་གྱི་སྦྱོར་བ་རང་གི་ངོ་བོ་ཡིན་པའི་ཕྱིར། ཡང་ངོ་བོ་ཉིད་མཚན་དེ་ཆོས་ཅན། མཚན་ཉིད་མིན་པར་ཐལ། མཚན་ཉིད་གཞན་གྱིས་མཚོན་པར་བྱ་དགོས་པའི་ཆོས་ཡིན་པའི་ཕྱིར་ཟེར་རོ། །ལུང་ཁྱབ་དང་པོ་གཉིས་ལ་ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་ན་མཚན་ཉིད་ཡིན་དགོས་པར་ཐལ། ལས་སུ་སྒྲུབ་པས་དེ་རྣམས་མཚོན་པར་བྱ་བ་ཡིན་པས་ངོ་བོ་ཉིད་ཀྱི་མཚན་ཉིད་དེ། ཞེས་གསུངས་པའི་ཕྱིར། གཉིས་པ་ལ། ཐེག་ཆེན་སྦྱོར་བ་དེ་ཐེག་ཆེན་སྦྱོར་བའི་མཚོན་བྱར་ཐལ། ངོ་བོ་ཉིད་མཚན་དེ་སྐབས་འདིར་བསྟན་གྱི་མཚོན་བྱ་ཡིན་པའི་ཕྱིར། ཁྱབ་པ་ཁས། གསུམ་པ་ལ། མཁྱེན་གསུམ་ཆོས་ཅན། དེར་ཐལ། དེའི་ཕྱིར། འདོད་ན། རྣམ་རྫོགས་སྦྱོར་བ་དེ་སྦྱོར་བ་མིན་པར་ཐལ། འདོད་པ་དེའི་ཕྱིར། ཁྱབ་སྟེ། མཚན་ཉིད་དེ་ཡི་སྦྱོར་བ་དང་། །ཞེས་བཤད་པའི་ཕྱིར། གཉིས་པ་ནི། སྐབས་འདིར་བསྟན་གྱི་ཐེག་ཆེན་སྦྱོར་བའི་མཚན་ཉིད་ཡིན་ན་དེ་དང་ཐེག་ཆེན་སྦྱོར་བ་གཉིས་ལ་མ་ཁྱབ་ཁྱབ་ཆེས་མི་སྲིད་གསུམ་གྱི་སྐྱོན་གཅོད་ནུས་པ་ཡིན་པས་མ་ཁྱབ་སྟེ། སྤྱིར་མཚན་ཉིད་ཀྱི་སྒྲ་བྱེད་སྒྲུབ་དང་། ལས་སྒྲུབ་གཉིས་ཀ་ལ་འཇུག་པ་ལས། ལས་སྒྲུབ་ཀྱི་དབང་དུ་བྱས་ན་མཚོན་བྱ་ཡང་མཚན་ཉིད་ཡིན་པའི་ཕྱིར་ཏེ། ངོ་བོ་ཉིད་གང་མཚོན་བྱ་ཡང་། །ཞེས་དང་། མཚན་ཉིད་བཞི་པར་བཞེད་པ་ཡིན། །ཞེས་གསུངས་པའི་ཕྱིར། མཚོན་སྦྱོར་བཀོད་པའི་ཚེ་ན་མཚན་མཚོན་གཉིས་ལ་མ་ཁྱབ་ཁྱབ་ཆེས་མི་སྲིད་གསུམ་གྱི་སྐྱོན་ཡོན་གཅོད་ནུས་པ་ཞིག་དགོས་ཏེ། དེའི་ཚེ་མཚན་གཞིའི་སྟེང་དུ་མཚན་ཉིད་དེས་མཚོན་བྱ་ཐུན་མོང་མ་ཡིན་པར་མཚོན་ནུས་པ་ཞིག་དགོས་པའི་ཕྱིར། དེའི་མཚན་མཚོན་གཞི་གསུམ་གྱི་ནང་ཚན་དུ་གྱུར་པའི་མཚན་མཚོན་གཉིས་པོ་དེ་འགལ་ཏེ། དེའི་གནས་སྐབས་ཀྱི་མཚན་ཉིད་དེ་ཡིན་ན་བྱེད་སྒྲུབ་ཡིན་དགོས། དེའི་གནས་སྐབས་ཀྱི་མཚོན་བྱ་དེ་ཡིན་ན་ལས་སྒྲུབ་ཡིན་དགོས་པའི་ཕྱིར། སྤྱིར་མཚན་མཚོན་མི་འགལ་ཡང་། མཚོན་བྱེད་དང་མཚོན་བྱ་འགལ་ཏེ། བྱེད་སྒྲུབ་དང་ལས་སྒྲུབ་འགལ་བའི་ཕྱིར། གསུམ་པ་ལ། ཁ་ཅིག མཚན་ཉིད་དང་མཚོན་བྱ་འགལ་བར་ཐལ། བྱེད་སྒྲུབ་དང་ལས་སྒྲུབ་འགལ་བའི་ཕྱིར། ཁྱབ་པ་བསྒྲིག་གོ་ཞེ་ན། མི་མཚུངས་ཏེ། མཚོན་བྱེད་ཡིན་ན་བྱེད་སྒྲུབ་ཡིན་དགོས་ཤིང་། མཚན་ཉིད་ཡིན་ན་བྱེད་སྒྲུབ་ཡིན་པས་མ་ཁྱབ་པའི་ཕྱིར་ཏེ། ངོ་བོ་ཉིད་མཚན་དེ་མཚན་ཉིད་ཡིན་པའི་ཕྱིར་ཏེ། མཚན་ཉིད་ནི་རྣམ་པ་བཞིར་ཤེས་པར་བྱའོ་ཞེས་གསུངས་པའི་ཕྱིར། དེ་ལ་ཁོ་ན་རེ། མཚོན་བྱེད་ཡིན་ནའང་བྱེད་སྒྲུབ་ཡིན་མི་དགོས་པར་ཐལ། ངོ་བོ་ཉིད་མཚན་དེ་མཚོན་བྱེད་ཡིན་པའི་ཕྱིར་ཏེ། དེ་ལྟར་ན་ངོ་བོ་ཉིད་བཅུ་དྲུག་གིས་ཇི་ལྟ་བ་བཞིན་དུ་ཐམས་ཅད་མཁྱེན་པ་ཉིད་གསུམ་གྱི་སྦྱོར་བ་དག་མཚོན་པས་ན་ཞེས་བཤད་པའི་ཕྱིར་ཟེར་ན། མ་ཁྱབ་སྟེ། ངོ་བོ་ཉིད་བཅུ་དྲུག་གིས་ཞེས་བྱེད་ཚིག་འབྱུང་བ་ནི་འགྱུར་མ་དག་པའི་ཕྱིར་ཏེ། འགྱུར་རྙིང་ལས་དེ་ལྟར་ན་ངོ་བོ་ཉིད་བཅུ་དྲུག་གི་བདག་ཉིད་ཇི་ལྟ་བ་བཞིན་ཞེས་བཤད་པའི་ཕྱིར་དང་། རྩ་བ་ལས་ཀྱང་། ངོ་བོ་ཉིད་བཅུ་དྲུག་བདག་ཉིད། །མཚོན་བྱ་ལྟ་བུར་མཚོན་པས་ན། །ཞེས་བྱེད་ཚིག་མ་བཤད་པའི་ཕྱིར། ཡང་ཤེས་མཚན། ཁྱད་མཚན། བྱེད་མཚན་གསུམ་ཐེག་ཆེན་སྦྱོར་བའི་མཚན་ཉིད་དུ་ཁས་བླངས་ཤིང་། གཞི་ཤེས་སྦྱོར་བས་ཡུམ་ལ་བརྟེན་ནས་དེ་པ་འབྱུང་བར་རྟོགས་པའི་རྟོགས་པ་དེ་གཞི་ཤེས་ཀྱི་སྦྱོར་བའི་ཤེས་མཚན་དུ་ཁས་བླངས་པ་ལ། ཁ་ཅིག ཐེག་ཆེན་སྦྱོར་བའི་བྱེད་མཚན་ཆོས་ཅན། ཐེག་ཆེན་སྦྱོར་བའི་ཤེས་མཚན་དུ་ཐལ། ཐེག་ཆེན་གྱི་སྦྱོར་བ་ཡིན་པའི་ཕྱིར། ཁྱབ་པ་དངོས། གཞི་ཤེས་སྦྱོར་བས་འཇིག་རྟེན་འཇིག་པ་མེད་པར་རྟོགས་པའི་སྦྱོར་བའང་ཆོས་ཅན། གཞི་ཤེས་སྦྱོར་བས་ཡུམ་ལ་བརྟེན་ནས་དེ་པ་འབྱུང་བར་རྟོགས་པའི་རྟོགས་པ་ཡིན་པར་ཐལ། གཞི་ཤེས་སྦྱོར་བའི་ཤེས་པ་ཡིན་པའི་ཕྱིར། ཁྱབ་པ་དངོས་ཞེས་ཟེར་ན། དེ་ནི་ཤེས་མཚན་གྱི་དོན་ཤེས་པའི་མཚན་ཉིད་ཀྱི་གཞི་མཐུན་ལ་འཇོག་པའི་ཚུལ་མ་ཤེས་པའི་ཕྱིར་ཏེ། བུམ་པ་རང་མཚན་ཡིན་ནམ་མིན། མིན་ན་ཧ་ཅང་ཐལ་ཞིང་། ཡིན་ན་ཀ་བ་ཆོས་ཅན། བུམ་པར་ཐལ། རང་ཡིན་པའི་ཕྱིར། ཁྱབ་པ་ཁྱོད་རང་ལྟར་ན་དངོས། ཁོ་ན་རེ། བུམ་པ་རང་མཚན་དུ་ཁས་བླངས་ཀྱི། རང་གི་མཚན་ཉིད་དུ་ཁས་མ་བླངས་སོ་སྙམ་ན། དེ་གཞི་ཤེས་སྦྱོར་བའི་ཤེས་མཚན་དུ་ཁས་བླངས་ཀྱི། དེ་དེའི་ཤེས་པའི་མཚན་ཉིད་དུ་ཁས་མ་བླངས་པའི་ཕྱིར། གཉིས་པ་ལ་དགག་གཞག་གཉིས་ལས། དང་པོ་ལ། རྒྱུས་འབྲས་བུ་མཚོན་པ་དགག འབྲས་བུས་རྒྱུ་མཚོན་པ་དགག་པ་གཉིས། དང་པོ་ལ་འབྲེ་ཆེན་པོ་ན་རེ། ཤེས་མཚན་ཞེས་པའི་ཤེས་པ་དེ་སངས་རྒྱས་སའི་མཁྱེན་གསུམ་གྱི་རྟོགས་པ་ཡིན་ལ། མཚན་ཉིད་ནི་དེ་སྐྱེས་པར་བྱེད་པའི་ཐེག་ཆེན་སྦྱོར་བའི་ནུས་པའོ། །དེའང་ཤེས་མཚན་གྱིས་མི་ལྡན་རྣམ་གཅོད་ཀྱི་ཚུལ་གྱིས་མཚོན། ཁྱད་མཚན་གྱིས་ནི་གཞན་ལྡན་རྣམ་གཅོད་ཀྱི་ཚུལ་གྱིས་མཚོན། བྱེད་མཚན་གྱིས་ནི་སངས་རྒྱས་སའི་གཞན་དོན་ཕྲིན་ལས་ཕུན་སུམ་ཚོགས་པ་སྐྱེད་བྱེད་དུ་མཚོན། ངོ་བོ་ཉིད་མཚན་མཚོན་པར་བྱ་བ་ཐེག་ཆེན་སྦྱོར་བ་རང་གི་ངོ་བོ་ཤེས་ཁྱད་བྱེད་གསུམ་གྱིས་མཚོན་ཚུལ་རིམ་བཞིན། རང་བཞིན་གྱི་སྦྱོར་བ་ལྔ་མཚན་གཞི་སངསརྒྱས་སྐྱེད་བྱེད་དུ་མཚོན། སངས་རྒྱས་སའི་མཁྱེན་གསུམ་གྱི་རྟོགས་པ་སྐྱེད་བྱེད་ཡིན་པ། ཡང་དེ་མཚན་གཞི། ཁྱོད་ཁོ་ན་སངས་རྒྱས་སྐྱེད་བྱེད་དུ་མཚོན། ཁྱོད་ཁོ་ན་སངས་རྒྱས་སའི་མཁྱེན་གསུམ་གྱི་རྟོགས་པ་སྐྱེད་བྱེད་ཡིན་པ། ཡང་དེ་མཚན་གཞི་སངས་རྒྱས་སའི་གཞན་དོན་ཕྲིན་ལས་ཕུན་སུམ་ཚོགས་པ་སྐྱེད་བྱེད་དུ་མཚོན། ད་ལྟ་ཐེག་ཆེན་གྱི་སྦྱོར་བ་རང་དང་མཐུན་པའི་རྟོགས་པ་ལ་གདུལ་བྱ་གཞན་འགོད་པའི་ནུས་པ་ཡིན་པ། གལ་ཏེ་ཤེས་པ་མཚན་ཉིད་དུ་བཤད་ཀྱི་སྐྱེ་བྱེད་མཚན་ཉིད་དུ་མ་བཤད་དོ་སྙམ་ན་སྐྱོན་མེད་དེ། སྐྱེད་བྱེད་ལ་ཤེས་པའི་མིང་གིས་བཏགས་པའི་ཕྱིར་ཞེས་གསུང་ངོ་། །འོ་ན་སངས་རྒྱས་སྐྱེད་བྱེད་དེ་སྐབས་འདིར་མཚོན་པར་བྱེད་པ་མིན་པར་ཐལ། སྐབས་འདིར་ཐེག་ཆེན་སྦྱོར་བ་མཚོན་པར་བྱེད་དགོས་པའི་ཕྱིར་ཏེ། འགྲེལ་པ་ལས། ཐམས་ཅད་ཤེས་པ་ཉིད་ཀྱི་སྦྱོར་བ་དག་མཚོན་པས་ན། ལམ་ཤེས་པ་ཉིད་ཀྱི་སྦྱོར་བ་དག་མཚོན་པས་ན། རྣམ་པ་ཐམས་ཅད་མཁྱེན་པ་ཉིད་ཀྱི་སྦྱོར་བ་དག་མཚོན་པས་ན་ཞེས་བཤད་པའི་ཕྱིར། ཡང་སངས་རྒྱས་སྐྱེད་བྱེད་སངས་རྒྱས་སའི་མཁྱེན་གསུམ་གྱི་རྟོགས་པ་སྐྱེད་བྱེད་གཉིས་མཚན་མཚོན་དུ་སྦྱོར་བ་མི་འཐད་པར་ཐལ། དེ་གཉིས་ཀ་མཚོན་བྱ་ཡིན་པར་མཚུངས་པའི་ཕྱིར། སྐབས་འདིར་བསྟན་གྱི་ཤེས་པ་དང་མཚན་ཉིད་གཉིས་པོ་རྒྱུ་འབྲས་མིན་པར་ཐལ། སྐབས་འདིར་བསྟན་གྱི་ཤེས་པ་གཉིས་དོན་གཅིག་པའི་ཕྱིར་ཏེ། དེ་ལྟར་ན་ངོ་བོ་ཉིད་བཅུ་དྲུག་གི་བདག་ཉིད་ཐམས་ཅད་མཁྱེན་པ་ཉིད་གསུམ་གྱི་སྦྱོར་བ་དག་ཇི་ལྟ་བ་བཞིན་དུ་མཚོན་པས་ན་ཞེས་བཤད་པའི་ཕྱིར། གཞན་ཡང་སྐབས་འདིར་བསྟན་གྱི་ངོ་བོ་ཉིད་བཅུ་དྲུག་པོ་དེ་ཐེག་ཆེན་སྦྱོར་བའི་ངོ་བོ་མིན་པར་ཐལ། སྐབས་འདིའི་ཤེས་པ་བཅུ་དྲུག་ཕྲག་གསུམ་པོ་དེ་ཐེག་ཆེན་སྦྱོར་བའི་རང་དོན་རྟོགས་པའི་ཆ་མིན། བྱེད་པ་བཅུ་གཅིག་པོ་དེ་གཞན་དོན་ཕྲིན་ལས་ཀྱི་ཆ་མིན་པའི་ཕྱིར། རྟགས་གསལ་ཁས། གཉིས་པ་ནི། བུ་ན་རེ། འདིར་བསྟན་གྱི་ཤེས་པ་བཅུ་དྲུག་ཕྲག་གསུམ་པོ་དེ་སངས་རྒྱས་ཀྱི་མངོན་རྟོགས་ཡིན་ཏེ། མདོ་ལས་ཐུབ་པའི་མངོན་རྟོགས་སུ་བཤད་པའི་ཕྱིར། དེ་ཉིད་ཐེག་ཆེན་སྦྱོར་བའི་མཚན་ཉིད་ཀྱང་ཡིན་ཏེ། བསྟན་བཅོས་ལས་ཐེག་ཆེན་སྦྱོར་བའི་མཚན་ཉིད་དུ་བཤད་པའི་ཕྱིར། མཚོན་ཚུལ་ནི་འབྲས་བུ་བྱང་ཆུབ་ཀྱི་མངོན་རྟོགས་ཀྱི་རྒྱུ་ཐེག་ཆེན་སྦྱོར་བ་རང་སྐྱེད་བྱེད་དུ་མཚོན་པ་ཡིན་ཏེ། སངས་རྒྱས་སའི་མཁྱེན་གསུམ་གྱི་རྟོགས་པ་མཚན་གཞི་མཁྱེན་གསུམ་གྱི་སྦྱོར་བ་རང་སྐྱེད་བྱེད་དུ་མཚོན། རང་རྒྱུ་མཁྱེན་གསུམ་གྱི་སྦྱོར་བ་སྒོམ་པ་ལས་བྱུང་བའི་མཐར་ཐུག་གི་རྟོགས་པ་ཡིན་པ་དེའང་སོ་སོར་ཕྱེ་ནས། སངས་རྒྱས་ཀྱི་གཞི་ཤེས་ཀྱི་རྟོགས་པ་མཚན་གཞི་ཞེས་སོགས་སྦྱོར་རོ། །དེ་དང་ཆ་འདྲ་བར། མཁན་ཆེན་པ་ན་རེ། ཐེག་ཆེན་སྦྱོར་བའི་མཚན་ཉིད་དུ་གྱུར་པའི་ཤེས་ཁྱད་བྱེད་གསུམ་གྱི་རང་རྒྱུ་རྣམ་རྫོགས་སྦྱོར་བའི་འབྲས་བུར་གྱུར་པའི་ཤེས་ཁྱད་བྱེད་གསུམ་ཡིན་ལ། ས་མཚམས་ནི་ཐེག་ཆེན་ཚོགས་ལམ་ནས་སངས་རྒྱས་སའི་བར་ན་ཡོད། མཚོན་ཚུལ་ནི་རང་རྒྱུ་རྣམ་རྫོགས་སྦྱོར་བའི་འབྲས་བུར་གྱུར་པའི་ཤེས་ཁྱད་བྱེད་གསུམ་མཚན་གཞི། རང་རྒྱུད་རྣམ་རྫོགས་སྦྱོར་བའི་བྱེད་སྒྲུབ་ཀྱི་དབང་དུ་བྱས་པའི་མཚན་ཉིད་དུ་མཚོན། རང་རྒྱུ་རྣམ་རྫོགས་སྦྱོར་བའི་ནུས་པ་མཚོན་པར་བྱེད་པའི་རྟོགས་པ་ཡིན་པ། སྐབས་འདིར་བསྟན་གྱི་ངོ་བོ་ཉིད་མཚན་བཅུ་དྲུག་ཆོས་ཅན། ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་ཏེ། རྣམ་རྫོགས་སྦྱོར་བ་མཚོན་བྱ་ལྟ་བུར་མཚོན་པར་བྱེད་པའི་རྟོགས་པ་ཡིན་པའི་ཕྱིར་ཞེས་གསུང་། དང་པོར་བུ་གསོན་ཅིག ཤཱཀྱ་ཐུབ་པའི་རྒྱུད་ཀྱི་མཁྱེན་གསུམ་གྱི་རྟོགས་པ་ཆོས་ཅན། མཁྱེན་གསུམ་གྱི་སྦྱོར་བ་རང་སྐྱེད་བྱེད་དུ་ཐལ། མཚན་ཉིད་དེའི་ཕྱིར། འདོད་ན། མཁྱེན་གསུམ་གྱི་སྦྱོར་བ་ཆོས་ཅན། དེ་སྐྱེད་བྱེད་མིན་པར་ཐལ། དེའི་རྗེས་སུ་བྱུང་བའི་སངས་རྒྱས་འཕགས་པའི་མཁྱེན་གསུམ་གྱི་རྟོགས་པ་སྐྱེད་བྱེད་ཡིན་པའི་ཕྱིར། མ་གྲུབ་ན། དེའི་རྒྱུད་ཀྱི་མཁྱེན་གསུམ་གྱི་རྟོགས་པ་ཆོས་ཅན། མཁྱེན་གསུམ་གྱི་སྦྱོར་བ་རང་སྐྱེད་བྱེད་ཡིན་པར་ཐལ། མཚན་ཉིད་དེའི་ཕྱིར། གཟུགས་སྐུ་གཉིས་ཀྱང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། མཁྱེན་གསུམ་གྱི་སྦྱོར་བའི་རྣམ་སྨིན་མཐར་ཐུག་ཡིན་པའི་ཕྱིར། རང་རྒྱུ་མཁྱེན་གསུམ་གྱི་སྦྱོར་བ་སྒོམ་པ་ལས་བྱུང་བའི་མཐར་ཐུག་གི་རྟོགས་པ་ཆོས་ཅན། ཁྱོད་མཁྱེན་གསུམ་གྱི་སྦྱོར་བའི་མཚན་ཉིད་མིན་པར་ཐལ། ཁྱོད་དེ་དང་རྫས་གཞན་ཡིན་པའི་ཕྱིར། དེར་ཐལ། ཁྱོད་དེར་འབྲས་བུར་གྱུར་པའི་རྟོགས་པ་ཡིན་པའི་ཕྱིར། གཞན་ཡང་བྱང་ཆུབ་སེམས་དཔའ་དེ་དེ་ཡིན་པར་ཐལ། མདོ་སྡུད་པ་ལས། དེ་ལྟར་བཤད་པའི་ཕྱིར་ཏེ། བྱང་ཆུབ་སེམས་དཔས་དེ་བཞིན་ཉིད་འདི་རྗེས་སུ་རྟོགས། །དེའི་ཕྱིར་དེ་བཞིན་གཤེགས་ཞེས་སངས་རྒྱས་མཚན་གསོལ་ཏོ། །ཞེས་གསུངས་པའི་ཕྱིར། ཆོས་རྗེ་གཡག་པ་གསོན་ཅིག རྣམ་རྫོགས་སྦྱོར་བའི་འབྲས་བུར་གྱུར་པའི་ཤེས་ཁྱད་བྱེད་གསུམ་ཆོས་ཅན། རང་རྒྱུ་རྣམ་རྫོགས་སྦྱོར་བའི་མཚན་ཉིད་མིན་པར་ཐལ། ཁྱོད་དང་དེ་གཉིས་མཚན་གཞི་གཅིག་གི་སྟེང་དུ་གཞི་མཐུན་དུ་འདུ་བ་མི་སྲིད་པའི་ཕྱིར། ཡང་དེ་ཆོས་ཅན། རང་རྒྱུ་རྣམ་རྫོགས་སྦྱོར་བའི་ནུས་པའི་མཚན་ཉིད་ཡིན་པར་ཐལ། དེ་མཚོན་བྱེད་ཡིན་པའི་ཕྱིར། རྟགས་ཁས། ཡང་རྣམ་རྫོགས་སྦྱོར་བ་རྒྱུད་ལྡན་ཡིན་ན་དེའི་མཚན་ཉིད་དུ་གྱུར་པའི་ཤེས་ཁྱད་བྱེད་གསུམ་པོ་རྒྱུད་ལྡན་ཡིན་དགོས་པར་ཐལ། རྣམ་རྫོགས་སྦྱོར་བའི་མཚན་ཉིད་དུ་གྱུར་པའི་ཤེས་ཁྱད་བྱེད་གསུམ་གྱི་ས་མཚམས་ཐེག་ཆེན་ཚོགས་ལམ་ནས་སངས་རྒྱས་སའི་བར་དུ་འཇོག་པ་འཐད་པའི་ཕྱིར། འདོད་ན། ཁས་བླངས་ཏེ། རྣམ་རྫོགས་སྦྱོར་བ་སྐད་ཅིག་མ་དང་པོ་ལ་གནས་པའི་བྱང་སེམས་ཆོས་ཅན། དེར་ཐལ། དེའི་ཕྱིར། འདོད་ན། དེའི་རྒྱུད་ཀྱི་དེའི་མཚན་ཉིད་དུ་གྱུར་པའི་ཤེས་ཁྱད་བྱེད་གསུམ་ཆོས་ཅན། རང་རྒྱུ་རྣམ་རྫོགས་སྦྱོར་བ་སྔོན་སོང་ཡིན་པར་ཐལ། དེའི་འབྲས་བུར་གྱུར་པའི་རྟོགས་པ་ཡིན་པའི་ཕྱིར། རྟགས་ཁས། གཉིས་པ་ལ། གཞུང་ལས་ཇི་ལྟར་བསྟན་པའི་ཚུལ། དེ་ལྟར་བསྟན་པའི་མཚོན་ཚུལ་གཉིས་ལས། དང་པོ་ནི། རྣམ་པ་སྦྱོར་བར་བཅས་རྣམས་དང་། །ཞེས་པའི་སྐབས་སུ། སྦྱོར་བ་དེ་མཁྱེན་གསུམ་ཐོས་བསམ་གྱི་གཏན་ལ་ཕབ་པའི་དོན་རྣམ་པར་བསྡུས་ནས་སྒོམ་པའི་སྦྱོར་བ་ཡིན་ཞེས་སྟོན་པ་ལ། བསྒོམ་བྱའི་རྣམ་པ་ནི་དུ། སྒོམ་པར་བྱེད་པའི་སྦྱོར་བ་དུ་ཡོད་ཅེ་ན། དང་པོ་ལ། བརྒྱ་བདུན་ཅུ་རྩ་གསུམ་དང་། ཕྱི་མ་ལ་ཉི་ཤུ་ཡོད་དོ་ཞེས་སྟོན་པ་ནི། གཞི་ཤེས་པ་ཡི་བྱེ་བྲག་རྣམས། །ཞེས་སོགས་རྣམ་པ་སྟོན་པར་བྱེད་པའི་གཞུང་རྣམས་དང་། གཟུགས་ལ་སོགས་ལ་མི་གནས་ཕྱིར། །ཞེས་སོགས་སྦྱོར་བ་སྟོན་པར་བྱེད་པའི་གཞུང་རྣམས་སོ། །འོ་ན་སྒོམ་བྱེད་སྦྱོར་བ་དེས་བསྒོམ་བྱ་རྣམ་པ་སྒོམ་པའི་གནས་སྐབས་སུ་ཐོབ་པའི་ཕན་ཡོན་ནི་གང་། དེ་སྒོམ་པ་ལ་བར་དུ་གཅོད་པར་བྱེད་པའི་སྐྱོན་ནི་གང་། སྦྱོར་བ་དེ་རྣམས་གཏན་ལ་འབེབས་པར་བྱེད་པའི་མཚན་ཉིད་གང་ཞེ་ན། དེ་རྣམས་རིམ་བཞིན་སྟོན་པ་ནི། ཡོན་ཏན་དང་། སྐྱོན་དང་། མཚན་ཉིད་ཀྱི་གཞུང་རྣམས་སོ། །འོ་ན་མཚན་ཉིད་སྟོན་པར་བྱེད་པའི་གཞུང་རྣམས་ཀྱིས་ཐེག་ཆེན་གྱི་སྦྱོར་བ་ཇི་ལྟར་གཏན་ལ་འབེབས་ཤེས་ན། སྤྱིར་ཐེག་ཆེན་གྱི་སྦྱོར་བ་ནི་ཐབས་ཤེས་ཟུང་འཇུག་ཡིན་པས། ཤེས་རབ་རྟོགས་པའི་ཆ་ནི་ཤེས་མཚན་གྱིས་སྟོན། ཐབས་ཕྲིན་ལས་ཀྱི་ཆ་བྱེད་མཚན་གྱི་སྟོན། མཚོན་བྱ་སྦྱོར་བ་རང་གི་ངོ་བོ་ནི་ངོ་བོ་ཉིད་མཚན་གྱིས་སྟོན། དེ་ལྟ་བུའི་སྦྱོར་བ་དེ་ཐེག་དམན་ལས་རྟོགས་རིགས་ཁྱད་པར་དུ་འཕགས་པ་ཡིན་པས་ཐེག་ཆེན་ཁོ་ན་ལ་ཡོད་དོ་ཞེས་པ་ནི་ཁྱད་མཚན་གྱིས་སྟོན། ཐེག་ཆེན་གྱི་སྦྱོར་བ་དེའང་སྔར་ཐོས་བསམ་གྱིས་གཏན་པ་ཕབ་པའི་ཚེ་ནའང་མཁྱེན་གསུམ་གཏན་ལ་ཕབ། དེ་རྣམ་པར་བསྡུ་བའི་ཚེ་ནའང་མཁྱེན་གསུམ་གྱི་རྣམ་པ་གསུམ་དུ་བསྡུས་པས། སྒོམ་བྱེད་ཀྱི་སྦྱོར་བ་ལའང་མཁྱེན་གསུམ་གྱི་རྣམ་པ་གསུམ་འབྱུང་བ་ནི་སྐབས་ཀྱི་དོན་ཡིན་ལ། དེ་རེ་རེ་ལའང་ཤེས་རབ་དང་། ཐབས་དང་། མཚོན་བྱ་སྦྱོར་བ་རང་གི་ངོ་བོ་གསུམ་གསུམ་དུ་གནས་པས་ཤེས་མཚན། བྱེད་མཚན། ངོ་བོ་ཉིད་མཚན་གསུམ་གྱི་སྐབས་སུ་མཁྱེན་པ་གསུམ་གསུམ་དུ་ས་མཚམས་སོ་སོར་བཅད་པའི་གནད་ཀྱང་འདི་ཡིན་ནོ། །ཁྱད་མཚན་གྱིས་ནི་ཐེག་དམན་ལས་ཁྱད་པར་དུ་འཕགས་པ་ཙམ་ཞིག་མཚོན་པར་བྱེད་པས་རྟོགས་རིགས་གཅིག་གིས་མཚོན་ནུས་པའི་ཕྱིར་ན། མཁྱེན་གསུམ་གྱི་སྦྱོར་བ་སོ་སོར་མ་བཅད་པའོ། །དེས་ན་ཤེས་མཚན་ཞེས་པའི་ཤེས་པ་དང་། མཚན་ཉིད་གཞི་མཐུན་བསྡུས་པ་ཡིན་གྱི། དེ་གཉིས་རྒྱུ་འབྲས་ཀྱང་མིན་ཞིང་། ཤེས་པ་མཚོན་བྱར་བྱས་ནས་དེའི་མཚན་ཉིད་ལ་ཤེས་མཚན་དུ་གཞག་པའང་མ་ཡིན་ནོ། །མདོར་ན་ཐེག་ཆེན་སྦྱོར་བའི་རྟོགས་པའི་ཆ་ལ་ཤེས་མཚན། ཐབས་ཀྱི་ཆ་ལ་བྱེད་མཚན་དུ་འཇོག་ཅིང་། དེ་གཉིས་ངོ་བོ་གཏན་ལ་འབེབས་པའི་མཚན་ཉིད་ཡིན་པས། སྔར་སྦྱོར་བ་ཉི་ཤུ་གསུངས་པ་དེ་རྣམས་ཀྱང་རང་བཞིན་གྱི་སྦྱོར་བ་ལྔར་འདུས། དེའང་ཟབ་པ་དང་། གཏིང་དཔག་དཀའ་བ་དང་། ཚད་མེད་པའི་སྦྱོར་བ་གསུམ་དུ་འདུས་པ་ནི་མཚན་གཞི་ཡིན་ལ། ཐེག་ཆེན་གྱི་སྦྱོར་བའི་བྱེ་བྲག་ཕྱེ་ན། གཞི་ཤེས་ཀྱི་སྦྱོར་བ་སོགས་གསུམ་ནི་མཚོན་བྱ་ཡིན་ཞིང་། དེ་ནི་ངོ་བོ་ཉིད་མཚན་གྱིས་སྟོན་ནོ། །ཐབས་ཤེས་ཟུང་འཇུག་གི་རྣལ་འབྱོར་གྱི་བྱེ་བྲག་ཕྱེ་ན། གཞིའི་གནས་ལུགས་རྟོགས་པའི་རྟོགས་པ་དང་། ཕན་བདེ་སྐྱོབ་པའི་བྱེད་པ་གསུམ་དང་ལྡན་པའི་སེམས་དཔའི་རྣལ་འབྱོར་ལ་སོགས་པ་གསུམ་ནི་དོན་ལྡོག་མཚན་ཉིད་ཡིན་ལ། དེ་ནི་ཤེས་མཚན་དང་བྱེད་མཚན་གྱི་གཞུང་རྣམས་ཀྱིས་སྟོན་ནོ། །ཆོས་ཀྱི་བདག་མེད་རྟོགས་པའི་རྟོགས་རིགས་ནི་ཐེག་དམན་ལས་ཁྱད་པར་དུ་འཕགས་པར་མཚོན་བྱེད་ཡིན་ལ། དེ་ནི་ཁྱད་མཚན་གྱི་གཞུང་རྣམས་ཀྱིས་སྟོན་ནོ། །གཉིས་པ་ནི། ཟབ་པ་དང་། གཏིང་དཔག་དཀའ་བ་དང་། ཚད་མེད་པའི་སྦྱོར་བ་གསུམ་མཚན་གཞི་ཐེག་ཆེན་གྱི་སྦྱོར་བ་ཡིན་པར་མཚོན། ཐབས་ཤེས་ཁྱད་པར་ཅན་དང་ལྡན་པའི་སེམས་དཔའི་རྣལ་འབྱོར་ཡིན་པ། སོ་སོར་ཕྱེ་ན། ཟབ་པའི་སྦྱོར་བ་མཚན་གཞི་ཐེག་ཆེན་གྱི་གཞི་ཤེས་སྦྱོར་བ་ཡིན་པར་མཚོན། ཡུམ་ལ་བརྟེན་ནས་དེ་བཞིན་གཤེགས་པ་འབྱུང་བར་ཤེས་པ་ལ་སོགས་པ་གཞིའི་གནས་ལུགས་རྟོགས་པའི་རྟོགས་པ་དང་ཕན་པ་ལ་སོགས་པའི་བྱེད་པ་གསུམ་དང་ལྡན་པའི་སེམས་དཔའི་རྣལ་འབྱོར་ཡིན་པ། གཏིང་དཔག་དཀའ་བའི་སྦྱོར་བ་མཚན་གཞི་ལམ་ཤེས་ཀྱི་སྦྱོར་བ་ཡིན་པར་མཚོན། རྣམ་ཐར་སྒོ་གསུམ་ལ་སོགས་པ་ལམ་གྱི་གནས་ལུགས་རྟོགས་པའི་རྟོགས་པ་དང་སྐྱབས་གནས་ལ་སོགས་པའི་བྱེད་པ་བདུན་དང་ལྡན་པའི་སེམས་དཔའི་རྣལ་འབྱོར་ཡིན་པ། ཚད་མེད་པའི་སྦྱོར་བ་མཚན་གཞི་རྣམ་མཁྱེན་གྱི་སྦྱོར་བ་ཡིན་པར་མཚོན། མཐོང་ཆོས་ལ་བདེ་གནས་སོགས་རྣམ་པའི་གནས་ལུགས་རྟོགས་པའི་རྟོགས་པ་དང་རྟེན་གྱི་མཛད་པ་གཅིག་དང་ལྡན་པའི་སེམས་དཔའི་རྣལ་འབྱོར་ཡིན་པ། མཁྱེན་གསུམ་གྱི་སྦྱོར་བ་མཚན་གཞི་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པའི་སྦྱོར་བ་ཡིན་པར་མཚོན། བསམ་གྱིས་མི་ཁྱབ་པ་སོགས་ཆོས་ཀྱི་བདག་མེད་རྟོགས་པའི་སེམས་དཔའི་རྣལ་འབྱོར་ཡིན་པ། གཞུང་འདི་དག་གི་དོན་འདི་བཞིན་དུ་བསྟན་ན་འབད་པ་ཆུང་ངུས་བདེ་བླག་ཏུ་རྟོགས་པར་འགྱུར་གྱི། ནོར་བུ་རྒྱ་མཚོར་ཡོད་པ་ལ་རི་སྐམ་གྱི་རྩེ་ལ་མ་ཚོལ་ཞིག གསུམ་པ་ལ་དགག་གཞག་སྤང་གསུམ་ལས། དང་པོ་ལ་ཁ་ཅིག ཐེག་ཆེན་སྦྱོར་བའི་མཚན་ཉིད་ཀྱི་མཚན་ཉིད་ལ་ཐེག་ཆེན་སྦྱོར་བའི་ནུས་པ་མཚོན་བྱར་བྱེད་པའི་རྟོགས་པ་ཞེས་དང་། ཡང་ཐེག་ཆེན་སྦྱོར་བའི་མཚན་གཞིའི་སྟེང་དུ་མིང་དང་མིང་ཅན་གྱི་འབྲེལ་བ་གྲུབ་ཟིན་དྲན་པར་བྱེད་པའི་ཐེག་ཆེན་སྦྱོར་བའི་ཁྱད་པར་བྱེད་ཆོས་ཟེར་རོ། །དང་པོ་ལ། ཐེག་ཆེན་སྦྱོར་བའི་ངོ་བོ་ཉིད་མཚན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་སྦྱོར་བའི་བྱེད་སྒྲུབ་ཀྱི་དབང་དུ་བྱས་པའི་མཚན་ཉིད་དུ་ཐལ་ལོ། །གཉིས་པ་ལ་གཞི་ཤེས་སྦྱོར་བའི་ཤེས་མཚན་བཅུ་དྲུག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཐེག་ཆེན་སྦྱོར་བའི་ཤེས་མཚན་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཐེག་ཆེན་གྱི་སྦྱོར་བའི་ཁྱད་པར་བྱེད་ཆོས་སུ་ཐལ། འདོད་པ་དེའི་ཕྱིར། འདོད་ན། ཐེག་ཆེན་གྱི་སྦྱོར་བས་གང་ཟག་གི་བདག་མེད་རྟོགས་པའི་རྟོགས་རིགས་དེ་དེའི་ཁྱད་ཆོས་སུ་ཐལ། འདོད་པ་དེའི་ཕྱིར། འདོད་ན། དེ་མིན་པར་ཐལ། ཐེག་དམན་གྱི་སྦྱོར་བ་ལའང་རྟོགས་རིགས་དེ་ལྡན་པའི་ཕྱིར། ཁོ་ན་རེ། ཐེག་ཆེན་སྦྱོར་བས་གང་ཟག་གི་བདག་མེད་རྟོགས་པའི་རྟོགས་རིགས་དེ་ཆོས་ཅན། དེའི་ཁྱད་ཆོས་སུ་ཐལ། དེ་ཁོ་ན་ལ་ལྡན་པའི་རྟོགས་པ་ཡིན་པའི་ཕྱིར་ཞེ་ན། སངས་རྒྱས་སའི་དྲན་པ་ཉེར་གཞག་དེ་ཆོས་ཅན། ཐུན་མོང་མིན་པའི་རྣམ་མཁྱེན་གྱི་རྣམ་པར་ཐལ། དེ་ཁོ་ན་ལ་ལྡན་པའི་རྟོགས་པ་ཡིན་པའི་ཕྱིར། མཁན་ཆེན་པ་ན་རེ། ཐེག་ཆེན་སྦྱོར་བའི་ནུས་པ་མཚོན་པར་བྱེད་པའི་འབྲས་བུ་དེ་ཐེག་ཆེན་སྦྱོར་བའི་མཚན་ཉིད་ཀྱི་མཚན་ཉིད། དེ་ལྟར་བྱེད་པའི་རྟོགས་པ་དེ་དེའི་ཤེས་མཚན་གྱི་མཚན་ཉིད། དེ་ལྟར་བྱེད་པའི་ཐེག་ཆེན་སྦྱོར་བའི་ཁྱད་པར་འཕགས་ཆོས་དེ་དེའི་ཁྱད་མཚན་གྱི་མཚན་ཉིད། དེ་ལྟར་བྱེད་པའི་ཕྲིན་ལས་དེ་དེའི་བྱེད་མཚན་གྱི་མཚན་ཉིད། དེའི་མཚན་ཉིད་དུ་གྱུར་པའི་ཤེས་ཁྱད་བྱེད་གསུམ་གྱིས་མཚོན་པར་བྱ་བའི་གཞིར་གྱུར་པའི་བྱེད་ཆོས་དེ་ངོ་བོ་ཉིད་མཚན་གྱི་མཚན་ཉིད་ཡིན་ཞེས་གསུངས་སོ། །མཚན་ཉིད་དང་པོ་ལ། ཐེག་ཆེན་སློབ་པའི་རྒྱུད་ལ་ཐེག་ཆེན་སྦྱོར་བའི་མཚན་ཉིད་མེད་པར་ཐལ། དེའི་མཚན་ཉིད་ཡིན་ན་དེའི་འབྲས་བུ་ཡིན་དགོས་པའི་ཕྱིར། གཉིས་པ་ལ། བྱང་སེམས་མཐོང་ལམ་པའི་རྒྱུད་ཀྱི་ལམ་ཤེས་སྦྱོར་བའི་ཤེས་མཚན་བཅུ་དྲུག་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་སྦྱོར་ལམ་པའི་རྒྱུད་ཀྱི་རྣམ་རྫོགས་སྦྱོར་བའི་ནུས་པ་མཚོན་པར་བྱེད་པའི་རྟོགས་པ་ཡིན་ན་རྣམ་རྫོགས་སྦྱོར་བའི་ནུས་པ་མཚོན་པར་བྱེད་པའི་རྟོགས་པ་ཡིན་དགོས་པར་ཐལ། འདོད་པ་དེའི་ཕྱིར། ཁྱབ་པ་ཁས་བླངས་ཏེ། དེའི་ནུས་པ་མཚོན་པར་བྱེད་པའི་རྟོགས་པ་ཡིན་ན་དེའི་འབྲས་བུ་ཡིན་པས་ཁྱབ་པར་ཁས་བླངས་པའི་ཕྱིར། འདོད་ན། བྱང་སེམས་སྦྱོར་ལམ་པའི་རྣམ་རྫོགས་སྦྱོར་བའི་འབྲས་བུ་ཡིན་ན་རྣམ་རྫོགས་སྦྱོར་བའི་འབྲས་བུ་ཡིན་དགོས་པར་ཐལ། འདོད་པ་དེའི་ཕྱིར། ཁྱབ་པ་ཁས། འདོད་ན། བྱང་སེམས་ཀྱི་མཐོང་ལམ་ཆོས་ཅན། དེར་ཐལ། དེའི་ཕྱིར། གསུམ་པ་ལ། རྣམ་རྫོགས་སྦྱོར་བའི་ནུས་པ་མཚོན་པར་བྱེད་པའི་ཐེག་ཆེན་སྦྱོར་བའི་ཁྱད་པར་འཕགས་ཆོས་ཡིན་ན་རྣམ་རྫོགས་སྦྱོར་བའི་འབྲས་བུ་ཡིན་དགོས་པར་ཐལ། རྣམ་རྫོགས་སྦྱོར་བའི་ཁྱད་མཚན་ཡིན་ན་དེ་ཡིན་དགོས་པའི་ཕྱིར། རྟགས་ཁྱབ་ཁས། འདོད་ན། ཐེག་ཆེན་སྦྱོར་བ་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པར་མཚོན་པར་བྱེད་པའི་ཁྱད་པར་འཕགས་ཆོས་ཡིན་ན་ཐེག་ཆེན་སྦྱོར་བའི་འབྲས་བུ་ཡིན་དགོས་པར་ཐལ་ལོ། །འདོད་ན། ཐེག་ཆེན་སྦྱོར་བའི་ངོ་བོར་གྱུར་པའི་ཆོས་ཀྱི་བདག་མེད་རྟོགས་པའི་རྟོགས་རིགས་དེ་ཆོས་ཅན། དེར་ཐལ། དེའི་ཕྱིར། བཞི་པ་ལ་ཡང་སྔ་མ་ལ་དཔག་སྟེ་ཤེས་པར་བྱའོ། །ལྔ་པ་ལ། ངོ་བོ་ཉིད་མཚན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། བྱེད་སྒྲུབ་ཏུ་ཐལ། འདོད་པ་དེའི་ཕྱིར། ཁྱབ་སྟེ། མཚོན་བྱེད་ཡིན་ན་བྱེད་སྒྲུབ་ཡིན་དགོས་པའི་ཕྱིར། གཉིས་པ་ལ། ཐེག་ཆེན་སྦྱོར་བའི་མཚན་ཉིད་ལ་མཚན་ཉིད་དང་། དབྱེ་བ་གཉིས། དང་པོ་ནི། ཐེག་ཆེན་གྱི་སྦྱོར་བ་མཚོན་པའི་ཆེད་དུ་བཀོད་པའི་བྱེད་སྒྲུབ་དང་ལས་སྒྲུབ་གང་རུང་གིས་བསྡུས་པའོ། །གཉིས་པ་ལ་ཐེག་ཆེན་སྦྱོར་བའི་ཤེས་མཚན། དེའི་ཁྱད་མཚན། དེའི་བྱེད་མཚན། དེའི་ངོ་བོ་ཉིད་མཚན་དང་བཞི། དང་པོའི་མཚན་ཉིད། ཐེག་ཆེན་སྦྱོར་བས་གཞི་ལམ་རྣམ་གསུམ་གང་རུང་གི་གནས་ལུགས་རྟོགས་པའི་ཁྱད་པར། དབྱེ་ན་གཞི་ཤེས་ཀྱི། ལམ་ཤེས་ཀྱི། རྣམ་མཁྱེན་གྱི་སྦྱོར་བའི་ཤེས་མཚན་གསུམ། དང་པོའི་མཚན་ཉིད། གཞི་ཤེས་སྦྱོར་བས་གཞིའི་གནས་ལུགས་རྟོགས་པའི་ཁྱད་པར། དབྱེ་ན་གཞི་ཤེས་སྦྱོར་བའི་ཡུམ་ལ་བརྟེན་ནས་དེ་བཞིན་གཤེགས་པ་འབྱུང་བར་ཤེས་པ་ལ་སོགས་པའི་ཤེས་པ་བཅུ་དྲུག གཉིས་པའི་མཚན་ཉིད། ལམ་ཤེས་སྦྱོར་བས་ལམ་གྱི་གནས་ལུགས་རྟོགས་པའི་ཁྱད་པར། དབྱེ་ན་ལམ་ཤེས་སྦྱོར་བས་རྣམ་ཐར་སྒོ་གསུམ་རྟོགས་པ་ལ་སོགས་པ་ཤེས་པ་བཅུ་དྲུག གསུམ་པའི་མཚན་ཉིད། རྣམ་མཁྱེན་སྦྱོར་བས་རྣམ་པའི་གནས་ལུགས་རྟོགས་པའི་ཁྱད་པར། དབྱེ་ན་རྣམ་མཁྱེན་སྦྱོར་བས་མཐོང་ཆོས་ལ་བདེར་གནས་ཤེས་པ་སོགས་ཤེས་པ་བཅུ་དྲུག ཁྱད་མཚན་གྱི་མཚན་ཉིད། རང་གང་ལ་ལྡན་པའི་ཐེག་ཆེན་སྦྱོར་བ་དེ་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པར་མཚོན་ནུས་པའི་ཐེག་ཆེན་སྦྱོར་བའི་ཁྱད་པར་བྱེད་ཆོས། དབྱེ་ན་ཆོས་ཀྱི་བདག་མེད་རྟོགས་པའི་བློ་བསམ་དུ་མེད་པ་སོགས་ཁྱད་པར་བཅུ་དྲུག བྱེད་མཚན་གྱི་མཚན་ཉིད། ཐེག་ཆེན་སྦྱོར་བས་གཞན་དོན་སྒྲུབ་པའི་ཆར་གྱུར་པའི་མཛད་པ་ཕྲིན་ལས། དབྱེ་ན་གཞི་ཤེས། ལམ་ཤེས། རྣམ་མཁྱེན་སྦྱོར་བའི་བྱེད་མཚན་དང་གསུམ། མཚན་ཉིད་རིམ་བཞིན། དེ་དང་དེས་གཞན་དོན་སྒྲུབ་པའི་ཆར་གྱུར་པའི་མཛད་པ་ཕྲིན་ལས། དབྱེ་ན་དང་པོ་ལ་གཞི་ཤེས་སྦྱོར་བས་གདུལ་བྱ་ལ་ཕན་པ་སྒྲུབ་པ་སོགས་བྱེད་པ་གསུམ། གཉིས་པ་ལ་ལམ་ཤེས་སྦྱོར་བས་གདུལ་བྱའི་སྐྱབས་མཛད་པ་སོགས་བྱེད་པ་བདུན། གསུམ་པ་ལ་རྣམ་མཁྱེན་སྦྱོར་བས་རྟེན་གྱི་མཛད་པ་གཅིག་ཏུ་ངེས་སོ། །ངོ་བོ་ཉིད་མཚན་གྱི་མཚན་ཉིད། ཤེས་ཁྱད་བྱེད་གསུམ་གྱི་མཚོན་པར་བྱ་བའི་གཞིར་གྱུར་པའི་ཐེག་ཆེན་སྦྱོར་བའི་ལས་སྒྲུབ། དབྱེ་ན་གཞི་ཤེས། ལམ་ཤེས། རྣམ་མཁྱེན་སྦྱོར་བའི་ངོ་བོ་ཉིད་མཚན་དང་གསུམ། མཚན་ཉིད་རིམ་བཞིན། དེ་དང་དེའི་ཤེས་ཁྱད་བྱེད་གསུམ་གྱིས་མཚོན་པར་བྱ་བའི་གཞིར་གྱུར་པའི་དེ་དང་དེའི་ལས་སྒྲུབ། དབྱེ་ན། དང་པོ་ལ་ཉོན་མོངས་པས་དབེན་པའི་ངོ་བོ་ཉིད་སོགས་བཞི། གཉིས་པ་ལ་བྱ་དཀའ་བའི་ངོ་བོ་ཉིད་སོགས་ལྔ། གསུམ་པ་ལ་དམིགས་པའི་ངོ་བོ་ཉིད་སོགས་བདུན་ཡོད་དོ། །གསུམ་པ་རྩོད་པ་སྤང་བ་ལ། ཁ་ཅིག ཤེས་མཚན་ཆོས་ཅན། བྱེད་སྒྲུབ་མིན་པར་ཐལ། ལས་སྒྲུབ་ཡིན་པའི་ཕྱིར། འདོད་ན། ཤེས་ཁྱད་བྱེད་གསུམ་པོ་བྱེད་སྒྲུབ་ཡིན་པར་བུད་ཟེར་ན། ཚུལ་གསུམ་པོ་དེ་བྱེད་སྒྲུབ་མིན་པར་ཐལ། ཕྱོགས་ཆོས་བྱེད་སྒྲུབ་མིན་པའི་ཕྱིར། ཁྱབ་པ་ཁས། ཡང་ཐེག་ཆེན་སྦྱོར་བའི་བྱེད་སྒྲུབ་ཀྱི་དབང་དུ་བྱས་པའི་མཚན་ཉིད་དེ་ལ་རྣམ་པ་གསུམ་དུ་མེད་པར་ཐལ། ཤེས་མཚན་བྱེད་སྒྲུབ་མིན་པའི་ཕྱིར་ཟེར་ན། མ་ཁྱབ་སྟེ། ཤེས་མཚན་གྱི་རང་ལྡོག་ལས་སྒྲུབ་ཡིན་ཞིང་། དོན་ལྡོག་བྱེད་སྒྲུབ་ཡིན་པའི་ཕྱིར། དེས་ཁྱད་མཚན་སོགས་ཀྱི་རྩོད་སྤང་ཡང་རྟོགས་པར་འགྱུར་རོ། །བཞི་པ་གཞུང་སོ་སོའི་དོན་ལ་དཔྱད་པ་ལ། དེ་བཞིན་གཤེགས་པ་འབྱུང་བ་དང་། །ཞེས་པའི་སྐབས་སུ། ཤེས་མཚན་མཚན་ཉིད་ཡིན་མིན་ལ་དཔྱད་པ་དང་། ཐེག་དམན་ལ་ཤེས་མཚན་ཡོད་མེད་ལ་དཔྱད་པ་གཉིས་ལས། དང་པོ་ལ། ཁ་ཅིག དེ་མཚན་ཉིད་མིན་ཏེ། དེའི་མཚན་ཉིད་ཡོད་པའི་ཕྱིར། ཡང་དེ་མཚན་ཉིད་ཡིན་ན། དེ་ཐེག་ཆེན་སྦྱོར་བའི་མཚན་ཉིད་དུ་འགྱུར་ཞིང་། འདོད་ན། ངོ་བོ་ཉིད་མཚན་ཆོས་ཅན། ཤེས་མཚན་དུ་ཐལ། ཐེག་ཆེན་སྦྱོར་བ་ཡིན་པའི་ཕྱིར། ཁྱབ་པ་དངོས་ཞེས་བཀག་ནས། རང་ལུགས་ལ། དེ་མཚོན་བྱ་ཁོ་ན་ཡིན་ཞིང་དེའི་མཚན་ཉིད་ནི་ཐེག་ཆེན་སྦྱོར་བ་རང་དོན་རྟོགས་པའི་ཡོན་ཏན་དང་ལྡན་པར་མཚོན་པར་བྱེད་པའི་རྟོགས་པ་ཞེས་ཟེར་རོ། །འོ་ན་ཁྱོད་རང་གིས་གཞག་པའི་མཚན་ཉིད་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རེ་ཞིག་སོང་། དེ་ཆོས་ཅན། ཐེག་ཆེན་སྦྱོར་བ་རང་དོན་རྟོགས་པའི་ཡོན་ཏན་དང་ལྡན་པར་མཚོན་པར་བྱེད་པར་ཐལ། འདོད་པ་དེའི་ཕྱིར། འདོད་ན། རི་རྭ་ཆོས་ཅན། ཐེག་ཆེན་སྦྱོར་བ་རང་དོན་རྟོགས་པའི་ཡོན་ཏན་དང་ལྡན་པར་མཚོན་པར་བྱེད་པའི་རྟོགས་པ་ཡིན་པར་ཐལ། ཐེག་ཆེན་སྦྱོར་བ་རང་དོན་རྟོགས་པའི་ཡོན་ཏན་དང་ལྡན་པའི་ཕྱིར། ཁྱབ་པ་ཁྱོད་རང་ལྟར་ན་དངོས་འགལ། ཡང་ཤེས་མཚན་དེ་ཐེག་ཆེན་སྦྱོར་བའི་མཚན་ཉིད་ཡིན་པར་ཐལ། ཐེག་ཆེན་སྦྱོར་བའི་ཤེས་པ་བཅུ་དྲུག་ཕྲག་གསུམ་པོ་དེ་ཤེས་མཚན་ཡིན་པའི་ཕྱིར། གཉིས་པ་ལ། ཁ་ཅིག ཐེག་དམན་ལ་ཤེས་མཚན་ཡོད་པར་ཐལ། དེ་ལ་གཞི་ཤེས་སྦྱོར་བའི་ཤེས་མཚན་ཡོད་པའི་ཕྱིར་ཏེ། དེ་ལ་གཞི་ཤེས་སྦྱོར་བ་ཡོད་པའི་ཕྱིར་ཏེ། དེ་ལ་གཞི་ཤེས་ཡོད་པའི་ཕྱིར་ཞེ་ན། ཐེག་དམན་ལ་གཞི་ཤེས་ཀྱི་རྣམ་པ་ཀུན་མངོན་པར་རྫོགས་པའི་སྦྱོར་བ་ཡོད་པར་ཐལ། དེ་ལ་གཞི་ཤེས་ཀྱི་སྦྱོར་བ་ཡོད་པའི་ཕྱིར། ཁྱབ་པ་ཁས། འདོད་ན། དེ་ལ་རྣམ་རྫོགས་སྦྱོར་བ་ཡོད་པར་ཐལ་ལོ། །བསམ་མི་ཁྱབ་སོགས་ཁྱད་པར་གྱིས། །ཞེས་པའི་སྐབས་སུ། གཞི་ཤེས་སྦྱོར་བ་ལ་ཁྱད་མཚན་ཡོད་མེད་དཔྱད། ཁྱད་མཚན་མཐོང་ལམ་ཁོ་ན་ལ་སྦྱོར་བའི་རྒྱུ་མཚན་ལ་དཔྱད་པ་དང་གཉིས་ལས། དང་པོ་ལ། འཕགས་པ་ལྟར་ན། མཁྱེན་པ་གསུམ་ཀའི་སྦྱོར་བ་ལ་ཁྱད་མཚན་ཡོད་པར་བཞེད། སློབ་དཔོན་གྱིས་ལམ་ཤེས་སྦྱོར་བ་དང་། རྣམ་མཁྱེན་སྦྱོར་བ་ལ་ཡོད་ཀྱི། གཞི་ཤེས་སྦྱོར་བ་ལ་ཁྱད་མཚན་མེད་པར་གསུངས་སོ། །དེ་ལ་ཁ་ཅིག འཕགས་སེང་གཉིས་དགོངས་པ་མི་འགལ་ཏེ། གཉིས་ཀས་ཀྱང་ཐེག་དམན་གྱི་གཞི་ཤེས་སྦྱོར་བ་ལ་ཁྱད་མཚན་མེད་པར་མཚུངས། ཐེག་ཆེན་གྱི་གཞི་ཤེས་སྦྱོར་བ་ལ་དེ་ཡོད་པར་འདོད་པར་མཚུངས་པའི་ཕྱིར་ཟེར་རོ། །མི་འཐད་དེ། སློབ་དཔོན་གྱི་ལུགས་ལ། ཤེས་མཚན་དང་ལྡན་པའི་སྦྱོར་བ་ཡིན་ན་ཁྱད་མཚན་དང་ལྡན་པའི་སྦྱོར་བ་ཡིན་དགོས་པར་ཐལ། དེའི་ལུགས་ལ་ཐེག་ཆེན་གྱི་སྦྱོར་བ་ཡིན་ན་ཁྱད་མཚན་དང་ལྡན་པས་ཁྱབ་པའི་ཕྱིར། འདོད་ན། དེའི་ལུགས་ལ། མཁྱེན་གསུམ་གྱི་སྦྱོར་བ་ལ་ཤེས་མཚན་ཡོད་མེད་ཀྱི་ཁྱད་པར་མེད་པ་དང་། ཁྱད་མཚན་ཡོད་མེད་ཀྱི་ཁྱད་པར་ཡོད་པ་དེ་མི་འཐད་པར་ཐལ། འདོད་པ་དེའི་ཕྱིར། འདོད་ན། འགྲེལ་པ་ལས། དེ་ལྟར་བར་སྐབས་ཀྱི་ཚིགས་སུ་བཅད་པ་དགུས་ཤེས་པའི་མཚན་ཉིད་སྤྱིའི་ངོ་བོ་ཉིད་དུ་བརྗོད་ནས། ཤེས་པའི་རྣམ་པས་ཡོངས་སུ་དཔྱད་པ་རྣམས་ཀྱི་ཁྱད་པར་ཤེས་པར་བྱ་བ་ཡིན་པས་ཞེས་གསུངས་པ་དང་འགལ་ལོ། །ཁ་ཅིག དེ་གཉིས་དགོངས་པ་འགལ་ཡང་འཕགས་པའི་བཞེད་པ་ལྟར་སྦྱོར་བ་གསུམ་ཀ་ལ་ཁྱད་མཚན་ཡོད་པར་མཚུངས་ཏེ། སྦྱོར་བ་གསུམ་ཀ་ཐེག་ཆེན་གྱི་སྦྱོར་བའི་ངོ་བོ་གཅིག་ཉིད་ལ་ལྡོག་པའི་སྒོ་ནས་ཐ་དད་དུ་ཕྱེ་བ་ཡིན་པའི་ཕྱིར་ཞེས་གསུངས། ཅུང་ཟད་དཔྱད་དུ་ཡོད་དེ། འོ་ན་ཐེག་ཆེན་གྱི་གཞི་ཤེས་སྦྱོར་བ་དང་ལམ་ཤེས་སྦྱོར་བ་གཉིས་ཀ་ལ་རྣམ་ཐར་སྒོ་གསུམ་རྟོགས་པ་སོགས་ལམ་གྱི་གནས་ལུགས་རྟོགས་པའི་རྟོགས་རིགས་ཡོད་པར་ཐལ། དེ་གཉིས་ཀ་ཐེག་ཆེན་གྱི་སྦྱོར་བའི་ངོ་བོ་གཅིག་ལ་ལྡོག་པའི་སྒོ་ནས་ཐ་དད་དུ་ཕྱེ་བ་ཡིན་པའི་ཕྱིར། འདོད་ན། དེ་ལྟ་བུའི་རྟོགས་རིགས་དེ་སྦྱོར་བ་གཉིས་ཀའི་ཤེས་མཚན་དུ་ཐལ་ལོ། །སློབ་དཔོན་གྱི་དགོངས་པ་གཞིར་གཞག་པ་ལ། ཁ་ཅིག གཞི་ཤེས་སྦྱོར་བ་ལ་ཁྱད་མཚན་མ་བཤད་པའི་རྒྱུ་མཚན་ཡོད་དེ། ཐེག་ཆེན་གྱི་གཞི་ཤེས་སྦྱོར་བ་ལམ་ཤེས་སྦྱོར་བར་འདུས་པ་གང་ཞིག ཐེག་དམན་གྱི་གཞི་ཤེས་སྦྱོར་བ་ལ་ཁྱད་མཚན་མེད་པའི་ཕྱིར་ཟེར་ན་འོ་ན་གཞི་ཤེས་སྦྱོར་བ་ལ་ཤེས་མཚན་བཤད་པའང་མི་འཐད་པར་ཐལ། གང་ཞིག ཐེག་དམན་གྱི་གཞི་ཤེས་སྦྱོར་བ་ལ་ཤེས་མཚན་མེད་པའི་ཕྱིར། གཞན་ཡང་། ལམ་ཤེས་སྦྱོར་བ་ལ་ཁྱད་མཚན་མ་བཤད་པ་ལ་རྒྱུ་མཚན་ཡོད་པར་ཐལ། ཐེག་ཆེན་གྱི་ལམ་ཤེས་སྦྱོར་བ་ནི་རྣམ་མཁྱེན་སྦྱོར་བར་འདུས། ཐེག་དམན་གྱི་ལམ་ཤེས་སྦྱོར་བ་ལ་ཁྱད་མཚན་མེད་པའི་ཕྱིར། ཁ་ཅིག དེ་མ་བཤད་པ་ལ་རྒྱུ་མཚན་ཡོད་དེ། ཐེག་དམན་ལ་གཞི་ཤེས་སྦྱོར་བ་ཡོད་པས། དེ་ལ་ཁྱད་མཚན་ཡོད་དམ་སྙམ་པའི་དོགས་པ་སྐྱེ་བར་འགྱུར་བའི་ཕྱིར་ཟེར། དེ་ལ་ཤེས་མཚན་གྱི་མཚུངས་པ་གཅིག་བྱའོ། །ཊཱི་ཀའི་དགོངས་པ་ནི། སྦྱོར་བ་ཕྱི་མ་གཉིས་ཁོ་ན་ལ་ཁྱད་མཚན་བཤད་པའི་རྒྱུ་མཚན་ཡོད་དེ། ཁྱད་མཚན་ནི་རང་གང་ལ་ལྡན་པའི་སྦྱོར་བ་དེ་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པར་མཚོན་པར་བྱེད་པ་གང་ཞིག དེ་ལས་ཁྱད་པར་དུ་འཕགས་པའི་སྦྱོར་བ་ཡིན་ན་ལམ་ཤེས་དང་རྣམ་མཁྱེན་གྱི་སྦྱོར་བ་གང་རུང་ཡིན་དགོས་སོ། །དེ་གཉིས་གང་རུང་ཡིན་ན་ཡང་དེ་ལས་ཁྱད་པར་དུ་འཕགས་པའི་སྦྱོར་བ་ཡིན་དགོས་པའི་ཕྱིར། གཞི་ཤེས་སྦྱོར་བ་ལ་ཁྱད་མཚན་མ་བཤད་པའི་རྒྱུ་མཚན་ཡོད་དེ། སྔ་མ་གང་ཞིག གཞི་ཤེས་སྦྱོར་བ་ཡིན་ན་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པས་མ་ཁྱབ་པའི་ཕྱིར་རོ་ཞེས་པ་སྟེ། མི་ལྡན་རྣམ་གཅོད་ཀྱི་དོན་དང་། གཞན་ལྡན་རྣམ་གཅོད་ཀྱི་དོན་ཏོ། །ཁོ་བོའི་རྟོག་པ་ལ་ནི། ཁྱད་མཚན་བཅུ་དྲུག་ནི་ཆོས་ཀྱི་བདག་མེད་རྟོགས་པའི་རྟོགས་རིགས་ཡིན་ཅིང་། ཐེག་ཆེན་གྱི་གཞི་ཤེས་སྦྱོར་བ་ནི་གང་ཟག་གི་བདག་མེད་རྟོགས་པའི་རྟོགས་རིགས་ཡིན་པས་རིགས་ཀྱི་ཆ་ནས་མ་བཤད་དམ་སྙམ་མོ། །གཉིས་པ་ནི། ཁ་ཅིག སྐབས་འདིར་ཐེག་ཆེན་གྱི་སྦྱོར་ལམ་གྱི་ཁྱད་མཚན་དངོས་སུ་མ་བསྟན་པ་ལ་རྒྱུ་མཚན་ཡོད་དེ། དེའི་ཁྱད་མཚན་སྐབས་དང་པོར་བསྟན་ཟིན་པའི་ཕྱིར་དང་། འོག་ནས། དྲོ་བ་རྣམས་ཀྱི་དམིགས་པ་འདིར། །ཞེས་པའི་སྐབས་སུའང་འཆད་པར་འགྱུར་བའི་ཕྱིར། ཐེག་ཆེན་གྱི་སྒོམ་ལམ་ཡང་དེར་མ་བཤད་པ་ལ་རྒྱུ་མཚན་ཡོད་དེ། དེ་འོག་ནས། སྒོམ་པའི་ལམ་ནི་ཟབ་པ་སྟེ། །ཞེས་དང་། སྐྱེ་བ་དང་ནི་འགག་པ་དང་། །ཞེས་སོགས་ཀྱི་སྐབས་སུ་འཆད་པར་འགྱུར་བའི་ཕྱིར་ཟེར་བ་མི་འཐད་དེ། མཐོང་ལམ་ལའང་མཚུངས་པའི་ཕྱིར། ཊཱི་ཀ་ལས། ཐེག་ཆེན་གྱི་མཐོང་ལམ་གྱི་ཁྱད་མཚན་དངོས་སུ་བསྟན་པས་ཐེག་ཆེན་གྱི་སྒོམ་ལམ་དང་། སྦྱོར་ལམ་གྱི་ཁྱད་མཚན་ཡང་དོན་གྱིས་གོ་བའི་ཆེད་ཡིན་ཏེ། འབྲས་བུ་ལ་ཁྱད་པར་ཡོད་ན་རྒྱུ་ལ་ཁྱད་པར་ཡོད་པ་རིགས་པའི་ཚུལ་ཡིན་པའི་ཕྱིར་དང་། རྒྱུ་ལ་ཁྱད་པར་ཡོད་ན་འབྲས་བུ་ལ་ཁྱད་པར་ཡོད་པ་རིགས་པའི་ཚུལ་ཡིན་པའི་ཕྱིར་ཞེས་གསུང་། འོ་ན་སྐབས་འདིར་ཐེག་ཆེན་གྱི་སྦྱོར་ལམ་གྱི་ཁྱད་མཚན་དངོས་སུ་བསྟན་རིགས་པར་ཐལ། རྒྱུ་ལ་ཁྱད་པར་ཡོད་ན་འབྲས་བུ་ལ་ཁྱད་པར་ཡོད་པ་རིགས་པའི་ཚུལ་ཡིན་པའི་ཕྱིར། དེས་ན་རང་ལུགས་མཐར་ཐུག་པ་ནི། སྐབས་འདིར་སྦྱོར་ལམ་དང་སྒོམ་ལམ་གཉིས་ཀྱི་ཁྱད་མཚན་དངོས་སུ་མ་བསྟན་པར་ཐེག་ཆེན་མཐོང་ལམ་གྱི་ཁྱད་མཚན་དངོས་སུ་བསྟན་པའི་རྒྱུ་མཚན་ཡོད་དེ། ཐེག་ཆེན་གྱི་སྦྱོར་ལམ་ནི་ཐེག་དམན་གྱི་སྦྱོར་ལམ་ལས་ཁྱད་པར་དུ་འཕགས་པར། དམིགས་པ་དང་ནི་རྣམ་པ་དང་། །ཞེས་པའི་སྐབས་སུ་བསྟན་ཅིང་། ཐེག་ཆེན་གྱི་སྒོམ་ལམ་ནི་དེ་ལས་ཁྱད་པར་དུ་འཕགས་པར། སྒོམ་པའི་ལམ་ནི་ཟབ་པ་སྟེ། །ཞེས་སོགས་སུ་དངོས་སུ་འཆད་པར་འགྱུར་བ་གང་ཞིག དེ་གཉིས་ཀྱི་བར་དུ་ཐེག་ཆེན་གྱི་མཐོང་ལམ་ཐེག་དམན་གྱི་མཐོང་ལམ་ལས་ཁྱད་པར་དུ་འཕགས་པར་གཞུང་འདིས་དངོས་སུ་བསྟན་པའི་ཕྱིར། གོང་དུ་གཞན་ལ་སྐྱོན་བརྗོད་པ་ནི་མི་མཚུངས་ཏེ། དེ་དག་ནི་སྤྱིར་སྦྱོར་ལམ་དང་སྒོམ་ལམ་གཉིས་པོ་བཤད་ཟིན་པ་དང་། འཆད་པར་འགྱུར་བ་ཙམ་རྒྱུ་མཚན་དུ་བྱས་པ་གང་ཞིག འདིར་ནི་ལམ་དེ་གསུམ་ཐེག་དམན་གྱི་ལམ་ལས་ཁྱད་པར་དུ་འཕགས་པར་དངོས་སུ་བསྟན་པའི་སྒོ་ནས་གཞག་པའི་ཕྱིར་ཏེ། ཉན་ཐོས་བསེ་རུ་ལྟ་བུ་དང་། །བཅས་པ་དག་ལས་ཁྱད་པར་འཕགས། །ཞེས་དང་། གང་གི་ལམ་ནི་གཞན་དག་ལས། །ཁྱད་དུ་འཕགས་པས་ཁྱད་པར་ལམ། །ཞེས་དང་། སྒོམ་པའི་ལམ་ནི་ཟབ་པ་སྟེ། །ཞེས་གསུང་ངོ་། །དེའང་གནད་ཀྱི་དོན་ནི་མངོན་པར་རྟོགས་པའི་རྒྱན་འདིར་ཐེག་ཆེན་གྱི་ལམ་ཐམས་ཅད་ཐེག་དམན་གྱི་ལམ་ལས་ཁྱད་པར་དུ་འཕགས་པར་བསྟན་དགོས་པ་ལས། ཐེག་ཆེན་གྱི་ཚོགས་ལམ་ཁྱད་པར་དུ་འཕགས་པར་དངོས་སུ་མ་བསྟན་པ་ནི་དེ་ལ་གནས་པའི་གང་ཟག་ཐེག་དམན་གྱི་ལམ་དུ་སྦྱོར་བའི་སྒོ་ནས་འཇུག་སྲིད་པ་ལ་དགོངས་ལ། ཐེག་ཆེན་གྱི་སྦྱོར་མཐོང་སྒོམ་གསུམ་ལ་ཁྱད་པར་འཕགས་ཆོས་རེ་རེ་དངོས་སུ་བསྟན་པའི་ཐེག་ཆེན་གྱི་མཐོང་ལམ་གྱི་ཁྱད་པར་འཕགས་ཆོས་རྟོགས་པའི་ཆེད་དུ་འདི་ལ་ཁྱད་མཚན་སྦྱར་བ་ཡིན་ནོ། །དོན་ལ་བརྟག་པའི་བློ་གྲོས་ཡོད་པ་དག་གིས་ཁོ་བོའི་རྗེས་སུ་འབྲང་བར་གྱིས་ཤིག ཕན་དང་བདེ་དང་སྐྱོབ་པ་དང་། །ཞེས་པའི་སྐབས་སུ། བྱེད་པ་བཅུ་གཅིག་པོ་འདི་སངས་རྒྱས་དང་བྱང་སེམས་གང་གི་བྱེད་པ་ཡིན་ཞེ་ན། ལེ་བརྒྱད་མ་དང་། བརྒྱད་སྟོང་པར་དང་པོ་གཉིས་བྱང་སེམས་ཀྱི་བྱེད་པ་དང་། ཕྱི་མ་དགུ་སངས་རྒྱས་ཀྱི་བྱེད་པར་བཤད། འབུམ་དང་ཉི་ཁྲི་ལེ་མང་ལས། དང་པོ་ལྔ་བྱང་སེམས་དང་། ཕྱི་མ་དྲུག་སངས་རྒྱས་ལ་སྦྱར། ཁྲི་བརྒྱད་སྟོང་པར་དང་པོ་དྲུག་སངས་རྒྱས་དང་། ཕྱི་མ་ལྔ་བྱང་སེམས་ལ་བཤད། ཤེས་རབ་ཁྲི་པར་ཐམས་ཅད་བྱང་སེམས་ལ་བཤད་དོ། །དེ་དག་གི་དགོངས་པ་ནི། སྤྱིར་ཤེས་པ་བཅུ་དྲུག་པོ་ཐམས་ཅད་ནི་སངས་རྒྱས་དང་བྱང་སེམས་གཉིས་ཀ་ལ་ཡོད་ཀྱང་ཐེག་ཆེན་སྦྱོར་བའི་མཚན་ཉིད་དུ་བཤད་པ་ནི་བྱང་སེམས་ཁོ་ན་ལའོ། །མཚན་མེད་རབ་ཏུ་སྦྱིན། ཞེས་པའི་སྐབས་སུ། ཐེག་ཆེན་གྱི་ཐར་པ་ཆ་མཐུན་གྱི་མཚན་ཉིད་ལ་དཔྱད། ལམ་མ་ཞུགས་ན་ཐར་པ་ཆ་མཐུན་ཡོད་མེད་དཔྱད། ཐར་པ་ཆ་མཐུན་དང་སྒོམ་བྱུང་གི་གཞི་མཐུན་ཡོད་མེད་དཔྱད་པ་དང་གསུམ་ལས། དང་པོ་ལ་དགག་གཞག་སྤང་གསུམ་ལས། དང་པོ་ལ་ཁ་ཅིག ཐེག་ཆེན་གྱི་ཐར་པ་ཆ་མཐུན་གྱི་མཚན་ཉིད། ཐོས་བསམ་གཙོ་བོར་གྱུར་པའི་ཐེག་ཆེན་ལས་དང་པོ་པའི་མངོན་རྟོགས་ཞེས་དང་། ཆོས་ཀྱི་བདག་མེད་དོན་སྤྱིའི་ཚུལ་གྱི་རྟོགས་པའི་ཐེག་ཆེན་ལས་དང་པོ་པའི་མངོན་རྟོགས་ཞེས་དང་། སངས་རྒྱས་ལ་སོགས་པའི་ཡུལ་རྣམ་པ་ལྔ་ལ་མཁས་པའི་ཐེག་ཆེན་ལས་དང་པོ་པའི་མངོན་རྟོགས་ཞེས་དང་། དེ་ལྔ་གང་རུང་ལ་མཁས་པའི་སོགས་ཟེར་ན། དང་པོ་གཉིས་ལ། རྒྱུན་ཞུགས་འབྲས་གནས་ཀྱི་རྟོགས་པ་སྔོན་དུ་སོང་བའི་ཐེག་ཆེན་ཚོགས་ལམ་པའི་རྒྱུད་ཀྱི་གང་ཟག་གི་བདག་མེད་མངོན་སུམ་རྟོགས་པའི་མཁྱེན་པ་ཆོས་ཅན། མཚན་ཉིད་གཉིས་པོ་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རྣལ་འབྱོར་མངོན་སུམ་ཡིན་པའི་ཕྱིར། རྩར་རྟགས་མ་གྲུབ་ན། དེར་ཐལ། བྱང་སེམས་ཚོགས་ལམ་པའི་རྒྱུད་ཀྱི་རྣམ་རྫོགས་སྦྱོར་བ་ཡིན་པའི་ཕྱིར་ཏེ། དེའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་སྒོམ་པའི་སྦྱོར་བ་ཡིན་པའི་ཕྱིར། དེ་ལ་ཁོ་ན་རེ། ཆོས་ཀྱི་བདག་མེད་དོན་སྤྱིའི་ཚུལ་གྱིས་རྟོགས་པ་ཡིན། གང་ཟག་གི་བདག་མེད་མངོན་སུམ་རྟོགས་པའི་མཁྱེན་པའང་ཡིན་པའི་གཞི་མཐུན་ཡོད་པར་ཐལ། དེ་ཐེག་ཆེན་གྱི་ཐར་པ་ཆ་མཐུན་ཡིན་པའི་ཕྱིར་ཞེ་ན། འོ་ན། ཆོས་ཀྱི་བདག་མེད་རྟོགས་པའི་རྟོགས་རིགས་ཡང་ཡིན། གང་ཟག་གི་བདག་མེད་རྟོགས་པའི་རྟོགས་རིགས་ཡང་ཡིན་པའི་གཞི་མཐུན་ཡོད་པར་ཐལ། བྱང་སེམས་ཚོགས་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཐེག་ཆེན་གྱི་ཐར་པ་ཆ་མཐུན་ཡིན་པའི་ཕྱིར། ཁྱབ་པ་ཁས། གསུམ་པ་ལ། ཐེག་ཆེན་ཚོགས་ལམ་པའི་རྒྱུད་ཀྱི་དད་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། དེའི་རྒྱུད་ཀྱི་དད་སོགས་ལྔ་པོ་གང་རུང་ཡིན་པའི་ཕྱིར། རྩ་བར་འདོད་ན། དེའི་རྒྱུད་ཀྱི་ལུས་དྲན་པ་ཉེར་གཞག་དེས་ལུས་ཚོར་སེམས་ཆོས་བཞི་ལ་དམིགས་པར་ཐལ། འདོད་པ་དེའི་ཕྱིར། བཞི་པ་ལ། ཐེག་ཆེན་ཚོགས་ལམ་པའི་རྒྱུད་ཀྱི་དད་སོགས་ལྔ་ཀར་ཡང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མིན་པར་ཐལ། སངས་རྒྱས་སོགས་ཀྱི་ཡུལ་རྣམ་པ་ལྔ་ལ་མཁས་པའང་མིན། སྦྱིན་སོགས་དང་བསམ་པ་ཕུན་སུམ་ཚོགས་པ་སེམས་བསྐྱེད་དང་། རྣམ་པར་མི་རྟོག་པ་ལ་ཆོས་རྣམས་རྣམ་པ་ཐམས་ཅད་དུ་ཤེས་པ་ལ་མཁས་པ་མིན་པའི་ཕྱིར། དང་པོ་མ་གྲུབ་ན། ཐེག་ཆེན་ཚོགས་ལམ་པའི་རྒྱུད་ཀྱི་དྲན་པ་དེ་སངས་རྒྱས་ལ་སོགས་པའི་ཡུལ་རྣམ་པ་ལྔ་ལ་མཁས་པ་ཡིན་པར་ཐལ། མ་གྲུབ་པ་དེའི་ཕྱིར། འདོད་ན། དེའི་རྒྱུད་ཀྱི་དད་སོགས་ལྔའི་མཁས་པར་བྱ་བའི་ཡུལ་ལ་ཁྱད་པར་མེད་པར་ཐལ་ལོ། །གཉིས་པ་ནི། ཐབས་ཤེས་ཁྱད་པར་ཅན་གྱི་ཟིན་པའི་སྒོ་ནས་བྱང་ཆུབ་ཆེན་པོའི་རྒྱུ་ཚོགས་སྒྲུབ་པར་བྱེད་པའི་ལམ་གང་ཞིག ཆོས་ཉིད་ལ་སྒོམ་བྱུང་གཙོ་བོར་གྱུར་པའི་དྲོད་སྐད་ཅིག་དང་པོ་སྐྱེད་དགོས་པའོ། །གསུམ་པ་ནི། ཁ་ཅིག རྒྱུན་ཞུགས་ཀྱི་རྟོགས་པ་སྔོན་སོང་གི་ཐེག་ཆེན་ཚོགས་ལམ་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་ཆོས་ཅན། ཐབས་ཤེས་ཁྱད་པར་ཅན་གཉིས་ཀྱིས་ཟིན་པར་ཐལ། མཚོན་བྱ་དེའི་ཕྱིར། འདོད་ན། ཆོས་ཀྱི་བདག་མེད་རྟོགས་པའི་ཤེས་རབ་ཀྱིས་ཟིན་པར་ཐལ། འདོད་པ་དེའི་ཕྱིར། འདོད་ན། ཆོས་ཀྱི་བདག་མེད་མངོན་སུམ་རྟོགས་པར་ཐལ། འདོད་པ་གང་ཞིག རྣལ་འབྱོར་མངོན་སུམ་ཡིན་པའི་ཕྱིར་ཟེར་ན། ཐེག་ཆེན་སྒོམ་ལམ་པའི་རྒྱུད་ཀྱི་ཀུན་རྫོབ་སེམས་བསྐྱེད་དེ་ཆོས་ཅན། རྣམ་མཁྱེན་མངོན་སུམ་རྟོགས་པར་ཐལ། རྣམ་མཁྱེན་ཡིད་བྱེད་ཀྱི་ཟིན་པ་གང་ཞིག རྣལ་འབྱོར་མངོན་སུམ་ཡིན་པའི་ཕྱིར། ཁྱབ་པ་ཁས། ཡང་ཁ་ཅིག གནས་སྐབས་ཐེག་དམན་དུ་ལྟུང་བར་ངེས་པའི་ཐེག་ཆེན་ཚོགས་ལམ་པ་དབང་རྟུལ་གྱི་རྒྱུད་ཀྱི་མཁྱེན་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ནང་གི་ཡོངས་འཛིན་ཐབས་མཁས་ཀྱི་ཟིན་པར་ཐལ། འདོད་པ་དེའི་ཕྱིར། འདོད་ན། དེ་འདྲའི་གང་ཟག་དེ་ཆོས་ཅན། ནང་གི་ཡོངས་འཛིན་ཐབས་མཁས་དེས་ཁྱོད་ཐེག་དམན་དུ་མི་ལྟུང་བར་ཡོངས་སུ་འཛིན་པར་ཐལ། ཁྱོད་དེས་ཟིན་པའི་བྱང་སེམས་ཡིན་པའི་ཕྱིར་ཞེ་ན་མཆོག་གི་སྤྲུལ་སྐུའི་དངོས་ཀྱི་འཁོར་ན་ཡོད་པའི་གནས་སྐབས་ཐེག་དམན་དུ་ལྟུང་བར་ངེས་པའི་བྱང་སེམས་ཚོགས་ལམ་པ་དབང་རྟུལ་དེ་ཆོས་ཅན། ཕྱིའི་ཡོངས་འཛིན་དགེ་བཤེས་དེ་ཁྱོད་ཐེག་དམན་དུ་མི་ལྟུང་བར་ཡོངས་སུ་འཛིན་པར་ཐལ། ཁྱོད་དེས་ཟིན་པའི་བྱང་སེམས་ཡིན་པའི་ཕྱིར། གཉིས་པ་ལ་ཁ་ཅིག ལམ་མ་ཞུགས་ན་ཐར་པ་ཆ་མཐུན་མཚན་ཉིད་པ་ཡོད་དེ། དེར་ཐར་པའི་རྒྱུར་གྱུར་པའི་དགེ་བ་མཚན་ཉིད་པ་ཡོད་པའི་ཕྱིར་ཟེར་ན། འོ་ན་ལམ་མ་ཞུགས་ན་ཚོགས་ལམ་མཚན་ཉིད་པ་ཡོད་པར་ཐལ། དེར་ཐར་པའི་རྒྱུར་གྱུར་པའི་ཚོགས་ལམ་མཚན་ཉིད་པ་ཡོད་པའི་ཕྱིར། ཡང་ཚོགས་ལམ་ན་ངེས་འབྱེད་ཆ་མཐུན་མཚན་ཉིད་པ་ཡོད་པར་ཐལ། དེར་ངེས་འབྱེད་ཀྱི་རྒྱུར་གྱུར་པའི་དགེ་བ་མཚན་ཉིད་པ་ཡོད་པའི་ཕྱིར་ཏེ། དེར་མཐོང་ལམ་གྱི་རྒྱུར་གྱུར་པའི་དགེ་བ་མཚན་ཉིད་པ་ཡོད་པའི་ཕྱིར། རང་ལུགས་ནི། དེ་ན་དེ་མེད་དོ། །གསུམ་པ་ལ་ཁ་ཅིག ཐར་པ་ཆ་མཐུན་དང་སྒོམ་བྱུང་གི་གཞི་མཐུན་མེད་དེ། ཐར་པ་ཆ་མཐུན་ཡིན་ན་ཐོས་བསམ་གཙོ་བོར་གྱུར་པའི་མཁྱེན་པ་ཡིན་དགོས་པའི་ཕྱིར། ཡང་དེ་མེད་པར་ཐལ། ཐེག་ཆེན་གྱི་ཐར་པ་ཆ་མཐུན་དང་དེའི་གཞི་མཐུན་མེད་པའི་ཕྱིར་ཏེ། དེ་ཡིན་ན་ཆོས་ཉིད་ལ་ཐོས་བསམ་གཙོ་བོར་གྱུར་པ་ཡིན་དགོས་པའི་ཕྱིར་ཏེ། ཐེག་ཆེན་གྱི་མཐོང་ལམ་ཡིན་ན་ཆོས་ཉིད་མངོན་སུམ་རྟོགས་དགོས་པའི་ཕྱིར་ཞེས་ཟེར། ཐེག་ཆེན་གྱི་སྦྱོར་ལམ་ཡིན་ན་སྒོམ་བྱུང་གཙོ་བོར་གྱུར་པའི་མཁྱེན་པ་ཡིན་དགོས་པར་ཐལ། སྔ་མའི་རྟགས་དེའི་ཕྱིར། འདོད་ན། ཐེག་ཆེན་སྦྱོར་ལམ་པའི་རྒྱུད་ཀྱི་ཐོས་བསམ་གྱིས་བསྡུས་པའི་མཁྱེན་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། ཐེག་ཆེན་ཚོགས་ལམ་པའི་རྒྱུད་ཀྱི་ཐོས་བསམ་གྱིས་བསྡུས་པའི་མཁྱེན་པ་དེ་ཐེག་ཆེན་གྱི་ཚོགས་ལམ་ཡིན་པའི་ཕྱིར་ཏེ། ཀུན་བཏུས་ལས། ཐོས་པ་དང་། བསམ་པ་དང་། སྒོམ་པ་ལས་བྱུང་བ་དག་ཀྱང་རུང་སྟེ་ཞེས་བཤད་པའི་ཕྱིར། ཡང་ཐེག་ཆེན་ཚོགས་ལམ་པའི་རྒྱུད་ཀྱི་རྫུ་འཕྲུལ་གྱི་རྐང་པ་ཆོས་ཅན། ཐོས་བསམ་གཙོ་བོར་གྱུར་པའི་མཁྱེན་པ་ཡིན་པར་ཐལ། ཐེག་ཆེན་གྱི་ཐར་པ་ཆ་མཐུན་ཡིན་པའི་ཕྱིར། འདོད་མི་ནུས་ཏེ། སྒོམ་བྱུང་གཙོ་བོར་གྱུར་པའི་མཁྱེན་པ་ཡིན་པའི་ཕྱིར་ཏེ། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བསྟེན་པ་ལས་བྱུང་བའི་སེམས་གནས་པ་ལས་རུང་དུ་བྱེད་པའི་ཏིང་ངེ་འཛིན་ཡིན་པའི་ཕྱིར། རང་ལུགས་ནི། ཚོགས་ལམ་གྱི་གནས་སྐབས་སུ་སྤྱིར་སྒོམ་བྱུང་གཙོ་བོར་གྱུར་པ་ནི་མེད་དོ། །རྫོགས་པའི་བྱང་ཆུབ། ཅེས་པའི་སྐབས་སུ། ངག་དོན་ལ་དཔྱད་པ་དང་། འདིར་བསྟན་རྣོ་རྟུལ་གྱི་མཚན་གཞི་ངོས་གཟུང་བ་གཉིས་ལས། དང་པོ་ལ་ཁ་ཅིག ཚོགས་ལམ་པའི་རྒྱུད་ཀྱི་དད་སོགས་ཡིན་ན་གནས་སྐབས་ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་པས་མ་ཁྱབ་སྟེ། དེའི་དད་སོགས་དབང་རྟུལ་གྱི་ཡང་ཡིན། གནས་སྐབས་ཐེག་ཆེན་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་པར་མ་ངེས་པའང་ཡིན་པའི་གཞི་མཐུན་ཡོད་པའི་ཕྱིར་ཞེ་ན། རྟགས་དེ་མེད་པར་ཐལ། དེའི་རྒྱུད་ཀྱི་དད་སོགས་དབང་རྟུལ་མེད་པའི་ཕྱིར་ཏེ། དེའི་རྒྱུད་ཀྱི་དད་སོགས་ཀྱི་དབང་པོ་མེད་པའི་ཕྱིར་ཏེ། དེའི་རྒྱུད་ཀྱི་དད་སོགས་ཡིན་ན་དབང་པོ་མིན་དགོས་པའི་ཕྱིར་ཏེ། འགྲེལ་པ་ལས། ཤེས་རབ་ཁྱད་པར་ཅན་དབང་པོའི་ངོ་བོ་ཉིད་མིན་པས་ཞེས་བཤད་པའི་ཕྱིར། དེ་ལ་ཁོ་ན་རེ། ཐེག་ཆེན་ཚོགས་ལམ་པའི་དབང་པོ་མེད་པར་ཐལ། དེའི་རྒྱུད་ཀྱི་དད་སོགས་དབང་རྣོན་མེད་པའི་ཕྱིར་ཞེ་ན། ལམ་མ་ཞུགས་ཀྱི་གང་ཟག་དབང་རྣོན་མེད་པར་ཐལ་ལོ། །གཉིས་པ་ལ། དགག་གཞག་སྤང་གསུམ་ལས། དང་པོ་ལ། འབྲེ་ཆེན་པོ་ན་རེ། ད་ལྟ་ཐེག་ཆེན་ཚོགས་ལམ་པ་ཡིན་པ་ལ་གནས་སྐབས་ཐེག་ཆེན་དུ་རིགས་ངེས་པ་དང་གཅིག གནས་སྐབས་ཐེག་དམན་དུ་རིགས་ངེས་པ་དང་། གང་དུའང་རིགས་མ་ངེས་པ་གཅིག་དང་གསུམ་ཡོད་པ་ལས། སྔ་མ་དབང་རྣོན། བར་མ་ལ་དབང་རྟུལ། ཐ་མ་ལ་དབང་འབྲིང་གི་སྒྲས་བསྟན་ཅིང་། རྩ་བར་རྣོ་རྟུལ་གཉིས་དངོས་སུ་བསྟན་ནས་དབང་འབྲིང་ཤུགས་ལ་བསྟན་ཞེས་གསུང་ངོ་། ཨར་ན་རེ། ད་ལྟ་ཐེག་ཆེན་ཚོགས་ལམ་པ་ཡིན་པ་ལ་གནས་སྐབས་ཐེག་ཆེན་དུ་རིགས་ངེས་པ་དང་། རང་རྒྱལ་དུ་རིགས་ངེས་པ་དང་། ཉན་ཐོས་སུ་རིགས་ངེས་པ་གཅིག་དང་གསུམ་ཡོད་དོ། །དང་པོ་ལ་དབང་རྣོན་གྱི་སྒྲས་བསྟན། ཕྱི་མ་གཉིས་ལ་དབང་རྟུལ་གྱི་སྒྲས་བསྟན་ཅིང་། རྩ་བར་རྫོགས་བྱང་ཐོབ་དཀའ་བར་དངོས་སུ་བསྟན་ནས། དེའི་ཤུགས་ལ་རང་རྒྱལ་དུ་རིགས་ངེས་པའི་ཐེག་ཆེན་ཚོགས་ལམ་པ། ཐེག་ཆེན་གྱི་ཚོགས་ལམ་ལས་ལོག་ནས་རང་རྒྱལ་གྱི་བྱང་ཆུབ་འཐོབ། ཉན་ཐོས་ཀྱི་རིགས་ཅན་དེ་ལས་ལོག་ནས་ཉན་ཐོས་ཀྱི་བྱང་ཆུབ་འཐོབ་པར་བསྟན་པ་ཡིན་ནོ་ཞེས་གསུངས་སོ། །འབྲེའི་བཞེད་པ་ལ། རྟུལ་པོས་རྟོགས་དཀར་བཞེད། །ཅེས་པའི་སྐབས་ནས་དངོས་བསྟན་གྱི་ཐེག་ཆེན་ཚོགས་ལམ་པ་ཡིན་ན་གནས་སྐབས་ཐེག་པ་གཞན་གྱི་བར་མ་ཆོད་པར་བླ་མེད་བྱང་ཆུབ་མི་འཐོབ་པའི་ཁྱབ་པ་ཡོད་པར་ཐལ། གནས་སྐབས་ཐེག་དམན་དུ་རིགས་ངེས་པའི་ཐེག་ཆེན་ཚོགས་ལམ་པ་དབང་རྟུལ་ཡིན་ན་དེ་མི་འཐོབ་པས་ཁྱབ་པའི་ཕྱིར། འདོད་ན་ཐེག་ཆེན་སྦྱོར་ལམ་པ་དབང་རྟུལ་ཡིན་ན་དམན་ལམ་སྔོན་སོང་ཡིན་དགོས་པར་ཐལ། འདོད་པ་གང་ཞིག ཐེག་ཆེན་ཚོགས་ལམ་པ་དབང་རྣོན་དེ་དབང་རྟུལ་དུ་འགྱུར་བ་མི་སྲིད་པའི་ཕྱིར། གཞན་ཡང་རིགས་མ་ངེས་པའི་ཐེག་ཆེན་ཚོགས་ལམ་པའི་དད་སོགས་ཆོས་ཅན། རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རྟུལ་པོས་རྟོགས་དཀར་བཞེད། །ཅེས་པའི་སྐབས་ནས་དངོས་སུ་བསྟན་པའི་དད་སོགས་ཡིན་པར་ཐལ། སངས་རྒྱས་སོགས་དམིགས་དད་པ་དང་། །ཞེས་པའི་སྐབས་ནས་དངོས་སུ་བསྟན་པའི་དད་སོགས་ཡིན་པའི་ཕྱིར། ཁྱབ་སྟེ། དེ་ལྟ་མོད་ཀྱི་ཐམས་ཅད་ཀྱིས་བླ་ན་མེད་པའི་བྱང་ཆུབ་ཐོབ་པ་ནི་མིན་ཏེ་ཞེས་བཤད་པའི་ཕྱིར། ཨར་གྱི་བཞེད་པའང་མི་འཐད་དེ། ཤུགས་ཀྱིས་ན་འབྲིང་པོ་རྣམས་ཀྱི་ནི་ཞེས་དང་། ཆུང་ངུ་རྣམས་ཀྱི་ནི་ཞེས་པའི་སྐབས་ནས་དངོས་བསྟན་གྱི་དད་སོགས་འབྲིང་པོ་དང་ཆུང་ངུ་ཆོས་ཅན། རྟོགས་སླ་རྟུལ་པོས་རྟོགས་དཀར་བཞེད། །ཅེས་པའི་སྐབས་སུ་དངོས་སུ་བསྟན་པར་ཐལ། དེའི་སྐབས་ནས་དངོས་སུ་བསྟན་པའི་དད་སོགས་རྟུལ་པོ་ཡིན་པའི་ཕྱིར། རྟགས་ཁས། འདོད་ན། མིན་པར་ཐལ། དེའི་སྐབས་སུ་ཤུགས་ལ་བསྟན་པའི་ཕྱིར་ཏེ། ཐེག་དམན་གྱི་ཐར་པ་ཆ་མཐུན་ཡིན་པའི་ཕྱིར་དང་། ཤུགས་ཀྱིས་ན་འབྲིང་པོ་རྣམས་ཀྱི་ནི་ཞེས་གསུངས་པའི་ཕྱིར། ཡང་དེ་གཉིས་དེའི་སྐབས་ནས་དངོས་སུ་བསྟན་པའི་དད་སོགས་རྟུལ་པོ་མིན་པར་ཐལ། དེའི་སྐབས་ནས་དངོས་སུ་བསྟན་པའི་དད་སོགས་རྣོ་རྟུལ་གཉིས་ཀའང་དད་སོགས་ཆེན་པོ་ཡིན་པའི་ཕྱིར་ཏེ། འདི་ལྟར་དད་པ་ལ་སོགས་པ་ཆེན་པོ་རྣོན་པོས་ནི་ཞེས་དང་། དེ་དག་ཉིད་རྟུལ་པོས་ནི་ཞེས་གསུངས་པའི་ཕྱིར། ཁ་ཅིག སྐབས་འདིར་དངོས་བསྟན་གྱི་དད་སོགས་རྟུལ་པོ་ནི་ཐེག་དམན་ཚོགས་ལམ་ལ་བྱེད་པ་ཡིན་ཟེར། མི་འཐད་དེ། དེའི་དད་སོགས་ཆོས་ཅན། སྐབས་འདིའི་རྩ་ཚིག་གིས་དངོས་བསྟན་གྱི་དད་སོགས་མིན་པར་ཐལ། མཚན་མེད་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་སངས་རྒྱས་ལ་སོགས་ཀྱི་ཡུལ་ལྔ་ལ་མཁས་པའི་དད་སོགས་མིན་པའི་ཕྱིར། ཁྱབ་སྟེ། དེ་ལྟ་མོད་ཀྱི་ཞེས་སོགས་གསུངས་པའི་ཕྱིར། ཡང་སྐབས་འདིར་དངོས་བསྟན་གྱི་རྟུལ་པོ་དེ་ཐེག་ཆེན་ཚོགས་ལམ་པའང་ཡིན་ལ། ཐེག་པ་གཞན་གྱིས་བར་མ་ཆོད་པར་ཐེག་ཆེན་གྱི་སྦྱོར་ལམ་དུ་འཇུག་པ་ཡང་མི་སྲིད་དེ། དེ་ཡིན་ན་གནས་སྐབས་ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་མི་འཐོབ་པས་ཁྱབ་པ་གང་ཞིག ཐེག་ཆེན་སྦྱོར་ལམ་པ་ཡིན་ན་ཕྱིར་མི་ལྡོག་པའི་རྟགས་ཐོབ་པས་ཁྱབ་ཅེས་ཟེར་རོ། །གོང་གི་དེ་ལ་ཁྱབ་པ་མེད་པར་ཐལ། ཐེག་ཆེན་ཚོགས་ལམ་པ་དབང་རྟུལ་དང་ཐེག་ཆེན་དུ་རིགས་ངེས་པའི་གཞི་མཐུན་ཡོད་པའི་ཕྱིར། རྟགས་ཕྱི་མ་ལ་ཁྱབ་པ་མེད་པར་ཐལ། ཕྱིར་མི་ལྡོག་པའི་རྟགས་ཀྱི་མ་མཐའི་ས་མཚམས་སྦྱོར་ལམ་མཐོང་ལམ་སྒོམ་ལམ་གསུམ་ལ་དབང་པོའི་རིམ་བཞིན་དུ་འཇོག་པ་འཐད་པའི་ཕྱིར། ཁ་ཅིག སྐབས་འདིར། དངོས་སུ་བསྟན་པའི་དབང་པོ་རྣོ་འབྲིང་རྟུལ་གསུམ་ཀའང་ཐེག་ཆེན་ཚོགས་ལམ་པ་ཡིན་ཏེ། དེ་གསུམ་ཀ་སངས་རྒྱས་སོགས་ཀྱི་ཡུལ་ལྔ་ལ་མཁས་པར་བཤད་པ་གང་ཞིག འགྲེལ་པར་ཡང་དེ་ལྟར་བཤད་པའི་ཕྱིར་ཞེས་ཟེར་བ་མི་འཐད་དེ། སྐབས་འདིར་རྣོ་རྟུལ་གཉིས་ལས་གཞན་དངོས་སུ་མ་བཤད་ཅིང་། འགྲེལ་པ་ལས་ཀྱང་རྩ་བའི་དངོས་བསྟན་དེ་གཉིས་ལས་གཞན་དངོས་སུ་མ་བཤད་པའི་ཕྱིར། གཉིས་པ་ནི། སྤྱིར་ཚོགས་ལམ་པའི་རྒྱུད་ཀྱི་དད་སོགས་ལ་ཆེ་འབྲིང་ཆུང་གསུམ་དུ་ཡོད་དེ། ཆེན་པོ་ནི་ཐེག་ཆེན་གྱི་ཚོགས་ལམ། འབྲིང་ནི་རང་རྒྱལ་གྱི་ཚོགས་ལམ། ཆུང་ངུ་ནི་ཉན་ཐོས་ཀྱི་ཚོགས་ལམ་ཡིན་ལ། ཆེན་པོ་དེ་ལའང་རྣོ་རྟུལ་གཉིས་ཡོད་ཅིང་། དེ་གཉིས་རྩ་བར་དངོས་སུ་བསྟན་ཏེ། རྩ་བར་དངོས་སུ་བསྟན་པའི་རྣོ་རྟུལ་གང་རུང་ཡིན་ན་ཐེག་ཆེན་གྱི་ཚོགས་ལམ་ཡིན་དགོས་པའི་ཕྱིར། དེའང་ཐེག་ཆེན་ཚོགས་ལམ་པའི་དད་སོགས་རྣོན་པོ་དེ་གནས་སྐབས་ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་སླ་བ་ཙམ་ཡིན་གྱི། དེ་ཡིན་ན་དེ་ལྟར་ཐོབ་པས་མ་ཁྱབ་སྟེ། དེ་ལའང་གནས་སྐབས་ཐེག་ཆེན་དུ་རིགས་ངེས་པ་དང་མ་ངེས་པ་གཉིས་སུ་ཡོད་པའི་ཕྱིར། ཐེག་ཆེན་ཚོགས་ལམ་པའི་དད་སོགས་རྟུལ་པོ་དེ་བར་མ་ཆོད་པར་དེ་ཐོབ་དཀའ་བ་ཙམ་ཡིན་གྱི། དེ་ཡིན་ན་དེ་མི་ཐོབ་པས་མ་ཁྱབ་སྟེ། དེ་ལའང་གནས་སྐབས་ཐེག་ཆེན་དུ་རིགས་ངེས་མ་ངེས་གཉིས་ཡོད་པའི་ཕྱིར། འབྲིང་པོ་རང་རྒྱལ་གྱི་ཚོགས་ལམ་དང་། ཆུང་ངུ་ཉན་ཐོས་ཀྱི་ཚོགས་ལམ་གཉིས་པོ་སྐབས་འདིར་ཤུགས་ལ་བསྟན་པ་ཡིན་ཏེ། གོང་དུ་ཐེག་ཆེན་གྱི་སྦྱོར་ལམ་དང་མཐོང་ལམ་དངོས་སུ་བསྟན་པའི་ཚེ། ཐེག་དམན་གྱི་མཐོང་ལམ་དང་སྦྱོར་ལམ་ཤུགས་ལ་བསྟན་པ་ལྟར། འདིར་ཡང་ཐེག་ཆེན་གྱི་ཐར་པ་ཆ་མཐུན་དངོས་སུ་བསྟན་ནས་ཐེག་དམན་གྱི་ཐར་པ་ཆ་མཐུན་ཤུགས་ལ་བསྟན་པར་སློབ་དཔོན་བཞེད་པའི་ཕྱིར། དེ་ལའང་སྤྱིར་མཐར་ཐུག་ལ་ལྟོས་ནས་སེམས་ཅན་ཐམས་ཅད་སངས་རྒྱས་ཀྱི་རིགས་ཅན་མིན་པ་ནི་མི་འཐད་དེ། རང་བཞིན་གནས་རིགས་རྒྱུད་ལ་མི་ལྡན་པའི་སེམས་ཅན་མེད་པའི་ཕྱིར། གནས་སྐབས་ལ་ལྟོས་ནས་ལམ་མ་ཞུགས་པ་ལའང་རིགས་ངེས་པ་དང་མ་ངེས་པ་གཉིས་སུ་ཡོད་ཅིང་། རིགས་ངེས་པ་དེ་ལའང་ཐེག་པ་གསུམ་དུ་ཡོད་པས། རིགས་ངེས་པ་དེ་ནི་རྐྱེན་དབང་གིས་ཐེག་པ་གཞན་དུ་སྒྱུར་མི་ནུས་པར་རང་གང་དུ་རིགས་ངེས་པའི་ཐེག་པ་དེར་ཞུགས་ནས་ཐེག་པ་དེའི་བྱང་ཆུབ་ཐོབ་པར་ངེས་པའོ། །རིགས་མ་ངེས་པ་དེ་ནི་རྐྱེན་དབང་གིས་ཐེག་པ་གསུམ་གང་རུང་དུ་འཇུག་ཏུ་རུང་ཞིང་། ཞུགས་ནས་ཀྱང་རྐྱེན་དབང་གིས་ཐེག་པ་གཞན་དུ་བསྒྱུར་དུ་རུང་བ་སྟེ། དེ་ལ་དབྱེ་ན། རྐྱེན་དབང་གིས་ཉན་ཐོས་ཐེག་པར་ཞུགས་ནས་དེའི་བྱང་ཆུབ་ཐོབ་ངེས་པ་གཅིག དེའི་ལམ་ལས་ལོག་ནས་ཐེག་པ་གཞན་དུ་བསྒྱུར་དུ་རུང་བ་གཅིག་དང་གཉིས་ཡོད། དེ་བཞིན་དུ་རང་རྒྱལ་ལ་གཉིས། ཐེག་ཆེན་ལ་གཉིས་ཡོད་པར་ཤེས་པར་བྱའོ། །མདོར་ན་ལམ་མ་ཞུགས་ལ་རིགས་ངེས་པ་གསུམ་མ་ངེས་པ་ལ་དྲུག་སྟེ་དགུ་ཡོད་དོ། །ལམ་ཞུགས་ལ་ཉན་ཐོས་རང་རྒྱལ་ཐེག་ཆེན་གྱི་ལམ་ཞུགས་གསུམ་ཡོད་ཅིང་། དེ་རེ་རེ་ལའང་རང་རང་གི་ཐེག་པ་དེར་རིགས་ངེས་པ་དང་ཐེག་པ་གང་དུའང་རིགས་མ་ངེས་པ་གཉིས་གཉིས་སུ་ཡོད་ཅིང་། རང་གི་ཐེག་པར་ཞུགས་ནས་ཐེག་པ་གཞན་དུ་ནི་རིགས་ངེས་པ་ནི་མེད་དོ། །གསུམ་པ་ནི། ཁ་ཅིག ཉན་ཐོས་སུ་རིགས་ངེས་པའི་ཐེག་ཆེན་ཚོགས་ལམ་པ་ཡོད་པར་ཐལ། ཉན་ཐོས་ཀྱི་ལམ་དུ་ཞུགས་ནས་ཉན་ཐོས་ཀྱི་བྱང་ཆུབ་ཐོབ་པར་ངེས་པའི་བྱང་སེམས་ཚོགས་ལམ་པ་ཡོད་པའི་ཕྱིར་ཞེས་ཟེར། འོ་ན། ཐེག་དམན་དུ་རིགས་ངེས་པའི་ལམ་མ་ཞུགས་ཀྱི་གང་ཟག་དེ་དང་པོ་ཉིད་ཐེག་ཆེན་ལམ་དུ་འཇུག་པར་ཡོད་པར་ཐལ། ཐེག་དམན་དུ་རིགས་ངེས་པའི་ཐེག་ཆེན་ཚོགས་ལམ་པ་ཡོད་པའི་ཕྱིར། འདོད་ན། ཐེག་དམན་དུ་རིགས་ངེས་པའི་ལམ་མ་ཞུགས་ཀྱི་གང་ཟག་ཆོས་ཅན། རྐྱེན་དབང་གིས་ཐེག་པ་གཞན་དུ་བསྒྱུར་རུང་བར་ཐལ། ཆོས་ཅན་དེ་གང་ཞིག ཁྱོད་དང་པོ་ཉིད་ནས་ཐེག་ཆེན་ལམ་དུ་འཇུག་པ་ཞིག་སྲིད་པའི་ཕྱིར། འདོད་ན། གནས་སྐབས་རིགས་ངེས་པའི་གང་ཟག་མིན་པར་ཐལ་ལོ། །གཞན་ཡང་རྐྱེན་དབང་གིས་ཉན་ཐོས་ཀྱི་ལམ་དུ་ཞུགས་ནས་དེའི་བྱང་ཆུབ་ཐོབ་པར་ངེས་པའི་རིགས་མ་ངེས་པའི་ལམ་མ་ཞུགས་ཀྱི་གང་ཟག་དེ་ཆོས་ཅན། ཉན་ཐོས་སུ་རིགས་ངེས་པའི་གང་ཟག་ཡིན་པར་ཐལ། ཉན་ཐོས་ཀྱི་ལམ་དུ་ཞུགས་ནས་དེའི་བྱང་ཆུབ་ཐོབ་པར་ངེས་པའི་གང་ཟག་ཡིན་པའི་ཕྱིར། ཁྱབ་པ་བསྒྲིག གནས་སྐབས་ཉན་ཐོས་སུ་འཇུག་པར་ངེས་པའི་བྱང་སེམས་ཚོགས་ལམ་པ་ཆོས་ཅན། ཁྱོད་ཀྱི་སེམས་ཀྱི་ཆོས་ཉིད་དེ་ཉན་ཐོས་ཀྱི་རིགས་སུ་ཐལ། ཁྱོད་གནས་སྐབས་ཉན་ཐོས་སུ་རིགས་ངེས་པའི་ལམ་ཞུགས་ཀྱི་གང་ཟག་ཡིན་པའི་ཕྱིར། རྟགས་ཁས། འདོད་ན། དེའི་སེམས་ཀྱི་ཆོས་ཉིད་དེ་ཆོས་ཅན། ཉན་ཐོས་ཀྱི་སྒྲུབ་པའི་རྟེན་གཞི་ཡིན་པར་ཐལ། འདོད་པ་གང་ཞིག སྒྲུབ་པའི་རྟེན་གཞི་ཡིན་པའི་ཕྱིར། འདོད་ན། དེ་ལྟ་བུའི་བྱང་སེམས་ཀྱི་རྒྱུད་ཀྱི་སྒྲུབ་པ་དེ་ཆོས་ཅན། ཉན་ཐོས་ཀྱི་སྒྲུབ་པ་ཡིན་པར་ཐལ་ལོ། །གནས་སྐབས་ཉན་ཐོས་སུ་རིགས་ངེས་པའི་བྱང་སེམས་ཚོགས་ལམ་པ་ཡོད་པར་འདོད་པའི་བོད་ཐམས་ཅད་ཕྱོགས་གཅིག་ཏུ་འདུས་ལ་ཐལ་འགྱུར་འདི་ལ་ལན་གང་འདེབས་བཀའ་གྲོས་མཛོད་ཅིག རྣམ་པ་དང་། ལམ་དང་གཞི་ཐམས་ཅད་ཅེས་པའི་སྐབས་སུ་མཐའ་དཔྱད་པ་ལ་དགག་གཞག་སྤང་གསུམ་ལས། དང་པོ་ལ། གཞུང་འདིའི་དོན་རྩ་བའི་དགོངས་པ་ཡིན་པ་དགག གཞུང་འདི་སློབ་དཔོན་གྱི་རང་གཞུང་ཡིན་པ་དགག གཞུང་གི་དོན་ཕྱིན་ཅི་ལོག་བཤད་པ་དགག་པ་གསུམ། དང་པོ་ལ། མཁས་པ་ཁ་ཅིག གཞུང་འདིས་སྦྱོར་བ་དང་པོ་གསུམ་གྱི་ལམ་གསུམ་བཏགས་པ་བར་བསྟན་ཞིང་། དེའང་ས་བརྒྱད་པ་དང་། དགུ་པ་དང་། བཅུ་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ལ་དེ་དང་དེའི་ལམ་གསུམ་གྱི་མིང་གིས་བཏགས་པ་ཡིན་ལ། སྐབས་དང་པོ་གསུམ་གྱི་ལམ་གསུམ་ནི་ལམ་གསུམ་མཚན་ཉིད་པ་ཡིན་པར་བསྟན་ཅིང་། དེ་བསྟན་བཅོས་རྩ་བའི་དགོངས་པའང་ཡིན་ནོ་ཞེས་གསུང་ངོ་། །ཁ་ཅིག སློབ་དཔོན་གྱི་འགྲེལ་པའི་དགོངས་པ་ཡིན་ཀྱང་། རྩ་བའི་དགོངས་པ་མིན་ནོ་ཞེས་གསུང་ངོ་། །འབྲེ་ཆེན་པོ་ནི། སློབ་དཔོན་གྱི་འགྲེལ་པ་དང་རྩ་བ་གཉིས་ཆར་གྱི་དགོངས་པ་ཡིན་ནོ་ཞེས་གསུང་ངོ་། །འོ་ན་གསན་མཛོད་ཅིག ཐེག་ཆེན་སྦྱོར་ལམ་པ་དབང་རྣོན་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་ཏུ་སྒྲུབ་པའི་གཏན་ཚིགས་གཅིག་རྒྱན་འདིར་མ་བསྟན་པར་ཐལ། གཟུགས་ལ་སོགས་ལ་ལྡོག་སོགས་རྟགས། །ཞེས་པའི་སྐབས་ཀྱི་སྦྱོར་ལམ་དེ་ཐེག་ཆེན་གྱི་སྦྱོར་ལམ་མིན་པའི་ཕྱིར། མ་གྲུབ་ན། དེ་ས་བརྒྱད་པའི་ཡེ་ཤེས་ཆུང་ངུ་ཡིན་པ་བུད། དེ་བཞིན་དུ་མཐོང་ལམ་པ་དང་སྒོམ་ལམ་པ་ཕྱིར་མི་ལྡོག་ཏུ་སྒྲུབ་པའི་གཏན་ཚིགས་ལའང་རིགས་འགྲེ། གཞན་ཡང་། མཚན་མེད་རབ་ཏུ་སྦྱིན་ལ་སོགས། །ཞེས་པའི་སྐབས་ནས་དངོས་བསྟན་གྱི་ཐར་པ་ཆ་མཐུན་དེ། དྲོ་བ་རྣམས་ཀྱི་དམིགས་པ་འདིར། །ཞེས་པའི་སྐབས་ནས་དངོས་བསྟན་གྱི་ངེས་འབྱེད་ཆ་མཐུན་གྱི་དངོས་རྒྱུ་མིན་པར་ཐལ། དེ་ལྟ་བུའི་ངེས་འབྱེད་ཆ་མཐུན་དེ་དག་སའི་ཡེ་ཤེས་ཡིན་པའི་ཕྱིར། རྟགས་ཁས། འདོད་མི་ནུས་ཏེ། ཐར་པའི་ཆ་དང་མཐུན་པ་སྐྱེས་པའི་སྤྲོ་བ་ཅན་ལ་ངེས་པར་འབྱེད་པའི་ཆ་དང་མཐུན་པ་འབྱུང་བས་ཞེས་གསུངས་པའི་ཕྱིར། གཞན་ཡང་སྐབས་ལྔ་པར་བསྟན་པའི་མཐོང་སྤང་གཟུང་འཛིན་གྱི་རྣམ་པར་རྟོག་པ་བཞི་པོ་དེས་མཐོང་སྤང་མིན་པར་ཐལ། དེར་བསྟན་པའི་མཐོང་ལམ་རྩེ་སྦྱོར་དེ་མཐོང་ལམ་མིན་པའི་ཕྱིར། རྟགས་ཁས། འདོད་ན། མཐོང་སྤང་གཉེན་པོའི་ཚོགས་སྒྲུབ་ཀྱི་སྤང་བྱར་གྱུར་པའི་གཟུང་འཛིན་གྱི་རྣམ་པར་རྟོག་པ་བཞི་པོ་དེ་མཐོང་སྤང་མ་ཡིན་པར་ཐལ། འདོད་པ་དེའི་ཕྱིར། འདོད་ན། མཐོང་སྤང་གཉེན་པོའི་ཚོགས་སྒྲུབ་དེ་མཐོང་ལམ་མིན་པར་ཐལ། འདོད་པ་དེའི་ཕྱིར། འདོད་ན། སྐབས་དང་པོ་གསུམ་ནས་བསྟན་པའི་མཐོང་ལམ་དེ་མཐོང་ལམ་མཚན་ཉིད་པ་ཡིན་པ་དང་འགལ་ལོ། །ཡང་སྦྱོར་བ་དང་པོ་གསུམ་གྱི་སྐབས་ནས་བསྟན་པའི་ལམ་གསུམ་དེ་མཚན་ཉིད་པ་ཡིན་པ་ལ་དངོས་ལ་གནོད་བྱེད་ཅི་ཡོད་བྱས་པ་ལ། སྦྱོར་བ་དང་པོ་གསུམ་གྱི་ལམ་གསུམ་བསྟན་པ་ལ་ཟློས་སྐྱོན་ཡོད་པར་ཐལ། དེ་མཚན་ཉིད་པ་ཡིན་པའི་ཕྱིར། ཡང་ཐེག་ཆེན་གྱི་སྦྱོར་ལམ་གྱི་སྐབས་སུ་རང་ཉིད་རྒྱུན་ཞུགས་ཀྱི་འབྲས་བུ་མངོན་དུ་བྱ་བའི་ཕྱིར་ཞུགས་པ་ཡོད་པར་ཐལ་བ་དང་། རང་ཉིད་བྱང་སེམས་ཀྱི་སྐྱོན་མེད་པ་ལ་ཞུགས་པ་ཡོད་པར་ཐལ་བ་དང་། རང་ཉིད་རྣམ་མཁྱེན་གྱི་ཡེ་ཤེས་སྐྱེད་པ་ལ་གནས་པ་ཡོད་པར་ཐལ། དྲོ་བ་རྣམས་ཀྱི་དམིགས་པ་འདིར། །ཞེས་པའི་སྐབས་ནས་བསྟན་པའི་སྦྱོར་ལམ་དེ་དེ་མཚན་ཉིད་པ་ཡིན་པའི་ཕྱིར། ཡང་ཐེག་ཆེན་སྦྱོར་ལམ་གྱི་གནས་སྐབས་ན་སྒྲིབ་པའི་བག་ལ་ཉལ་འཇོམས་པ་ཡོད་པར་ཐལ་བ་དང་། མཁྱེན་གསུམ་གྱི་ཆོས་ཡོངས་སུ་རྫོགས་པ་ཡོད་པར་ཐལ། བག་ལ་ཉལ་ཀུན་འཇོམས་པ་དང་། །ཞེས་དང་། ཀུན་མཁྱེན་ཉིད་གསུམ་ཆོས་རྣམས་ཀྱི། །ཡོངས་སུ་རྫོགས་བྱེད་དག །ཅེས་པའི་སྐབས་ཀྱི་སྦྱོར་ལམ་དེ་དེ་མཚན་ཉིད་པ་ཡིན་པའི་ཕྱིར། རྟགས་རྣམས་ཁས་ཞེས་ཟེར་རོ། །ཐལ་བ་དང་པོ་ལ་མཁྱེན་གསུམ་གྱི་སྐབས་སུ་ལམ་གསུམ་བསྟན་པ་ལ་ཟློས་སྐྱོན་ཡོད་པར་ཐལ། དེར་བསྟན་པའི་དེ་རྣམས་མཚན་ཉིད་པ་ཡིན་པའི་ཕྱིར། གལ་ཏེ་ཁྱབ་པ་མི་མཚུངས་ཏེ། དེར་བསྟན་པའི་ལམ་རྣམས་ཡུལ་རྣམ་པ་དང་ལམ་དང་གཞི་རྟོགས་པའི་སྒོ་ནས་མི་འདྲ་བའི་ཁྱད་པར་ཡོད་པའི་ཕྱིར་ཞེ་ན། འོ་ན་སྔ་མ་ལ་ཁྱབ་པ་མེད་པར་ཐལ། རྣམ་རྫོགས་སྦྱོར་བའི་སྐབས་སུ་ཕྱིར་མི་ལྡོག་པའི་རྟགས་ཀྱི་སྒོ་ནས་ལམ་གསུམ་བསྟན། རྩེ་སྦྱོར་དུ་རྩ་བར་སྦྱོར་ལམ་གྱི་ཐ་སྙད་མ་གསུངས་ཤིང་། མཐོང་ལམ་དང་སྒོམ་ལམ་གཉིས་ནི་མཐོང་སྤང་དང་སྒོམ་སྤང་གི་གཉེན་པོའི་ལྡོག་པ་ནས་བསྟན། མཐར་གྱིས་པའི་སྐབས་སུ་ལམ་གསུམ་གྱི་ཐ་སྙད་དངོས་སུ་མ་བསྟན་པའི་ཕྱིར། གཞན་ཡང་སྦྱོར་བ་དང་པོ་གསུམ་གྱི་སྐབས་ནས་བསྟན་པའི་སྒོམ་ལམ་དེ་སྒོམ་ལམ་མཚན་ཉིད་པ་ཡིན་ནམ་མིན། དང་པོ་ལྟར་ན། དེ་ལ་ཟློས་སྐྱོན་ཡོད་པར་ཐལ། དེའི་ཕྱིར། གཉིས་པ་ལྟར་ན། དེ་ཆོས་ཅན། དག་སའི་ཡེ་ཤེས་མིན་པར་ཐལ། སྒོམ་ལམ་མིན་པའི་ཕྱིར། གལ་ཏེ་ས་བདུན་པ་མན་ཆད་ཀྱི་སྒོམ་ལམ་དངོས་མ་ཡིན་ཏེ། ཞེས་དངོས་ལ་གནོད་བྱེད་བརྗོད་པ་ཡིན་ཟེར་བ་མི་འཐད་དེ། དངོས་ལ་གནོད་བྱེད་ནི་དོན་ལ་དེ་མིན་ཡང་། དེའི་མིང་གིས་དངོས་སུ་གསུངས་པ་ལ་བརྗོད་དགོས་པ་གང་ཞིག སྦྱོར་བ་དང་པོ་གསུམ་གྱི་སྐབས་ནས་བསྟན་པའི་སྒོམ་ལམ་དེ་ས་བདུན་པ་མན་ཆད་ཀྱི་སྒོམ་ལམ་མིན་པའི་ཐ་སྙད་གང་ལས་ཀྱང་མ་བཤད་པའི་ཕྱིར། ཐལ་བ་ཕྱི་མ་རྣམས་ལ་ཐེག་ཆེན་གྱི་སྦྱོར་ལམ་གྱི་གནས་སྐབས་ན་རློམ་པ་ཟད་པ་དང་། རྣམ་པར་མི་རྟོག་པའི་ཡེ་ཤེས་ཐོབ་པ་ཡོད་པར་ཐལ། ལུང་སྟོན་པ་དང་རློམ་པ་ཟད། །ཅེས་དང་། ཏིང་འཛིན་རྣམ་པར་མི་རྟོག་པ། །ཞེས་སོགས་ཀྱི་སྐབས་ནས་བསྟན་པའི་སྦྱོར་ལམ་དེ་སྦྱོར་ལམ་མཚན་ཉིད་པ་ཡིན་པའི་ཕྱིར། གལ་ཏེ་མ་ཁྱབ་སྟེ། དེ་གཉིས་ནི་མཉམ་གཞག་གི་གནས་སྐབས་སུ་རློམ་པ་མངོན་གྱུར་བ་མི་འབྱུང་བ་དང་། དེའི་སྐབས་སུ་གཟུང་འཛིན་གྱི་རྣམ་པར་རྟོག་པ་མངོན་གྱུར་བ་མི་འབྱུང་བ་ཙམ་ལ་དགོངས་པའི་ཕྱིར་ཞེས་ཟེར་ན། འོ་ན་ཁྱེད་རང་གིས་བརྗོད་པའི་ཐལ་བ་ལྔ་པོ་དེ་ལའང་ཁྱབ་པ་མེད་དེ། གཞུང་དེ་དག་གི་དོན་ནི། རང་ཉིད་ཀྱིས་རྒྱུན་ཞུགས་ཀྱི་རྟོགས་རིགས་སྐྱེད་པ་དང་། བྱང་སེམས་ཀྱི་སྐྱོན་མེད་པའི་རྟོགས་པ་སྐྱེད་པ་དང་། རྣམ་མཁྱེན་གྱི་ཡེ་ཤེས་རྒྱུད་ནས་སྐྱེད་པ་དང་། མཉམ་གཞག་གི་སྐབས་སུ་ཉོན་མོངས་པའི་བག་ལ་ཉལ་ལ་བརྟེན་ནས་ཉོན་མོངས་པ་མངོན་གྱུར་བ་མི་འབྱུང་བ་དང་། མཁྱེན་གསུམ་གྱི་ཆོས་ཡོངས་སུ་རྫོགས་པར་བསྔོ་བ་རྣམས་ལ་དགོངས་པའི་ཕྱིར། གཉིས་པ་ནི། སྦྱོར་བ་དང་པོ་གསུམ་གྱི་སྐབས་ནས་བསྟན་པའི་སྦྱོར་མཐོང་སྒོམ་གསུམ་བཏགས་པ་བ་ཡིན་པར་སློབ་དཔོན་གྱིས་བཞེད་པའང་མི་འཐད་དེ། རྩེ་སྦྱོར་གྱི་སྐབས་སུ་ངེས་འབྱེད་ཆ་མཐུན་གྱི་ཐ་སྙད་དངོས་སུ་མ་གསུངས་ཀྱང་། རྟགས་ཀྱིས་མཚོན་པའི་རྩེ་སྦྱོར་སོགས་བཞི་པོ་དེ་ངེས་འབྱེད་ཆ་མཐུན་བཞིའི་ངོ་བོ་ཡིན་པར་དངོས་སུ་གསུངས་པའི་ཕྱིར། གསུམ་པ་ལ། འཆད་ཚུལ་གསུམ་ལས། དང་པོ་ལ། མཁྱེན་རབ་ཅན་གྱི་བླ་མ་ཁ་ཅིག གཞུང་འདི་སློབ་དཔོན་གྱི་རང་གཞུང་ཡིན་ཀྱང་། སློབ་དཔོན་གྱི་ལུགས་ལ་ལམ་གསུམ་མཚན་ཉིད་པ་ཡིན་པ་མི་འགལ་ཏེ། གཞུང་འདིས་ལམ་གསུམ་བཏགས་པ་བར་མ་བསྟན་པའི་ཕྱིར། འོ་ན་གཞུང་གི་དོན་གང་ཞེ་ན། སྐབས་དང་པོ་དྲུག་ཏུ་ལམ་གསུམ་མཚན་ཉིད་པ་ལན་དྲུག་བསྟན་པ་ལ་ཟློས་པའི་སྐྱོན་མེད་དེ། མཁྱེན་གསུམ་གྱི་སྐབས་སུ་ལམ་གསུམ་མཚན་ཉིད་པ་ལན་གསུམ་བསྟན་པ་ནི་ཡུལ་མི་འདྲ་བའི་སྒོ་ནས་བསྟན། སྦྱོར་བ་དང་པོ་གསུམ་གྱི་སྐབས་སུ་དགོས་པ་མི་འདྲ་བའི་སྒོ་ནས་བསྟན་པའི་ཕྱིར། རྟགས་ཕྱི་མ་གྲུབ་སྟེ། རྣམ་རྫོགས་སྦྱོར་བའི་སྐབས་སུ་ས་བརྒྱད་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ཅིག་ཅར་དུ་སྐྱེའམ་སྙམ་པའི་དོགས་པ་དགག་པའི་ཕྱིར་དང་། རྩེ་སྦྱོར་གྱི་སྐབས་སུ་ས་དགུ་པའི་ཡེ་ཤེས་དང་། མཐར་གྱིས་པའི་སྐབས་སུ་ས་བཅུ་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ཅིག་ཆར་དུ་སྐྱེའམ་སྙམ་པའི་དོགས་པ་དགག་པའི་ཆེད་དུ་ལམ་གསུམ་མཚན་ཉིད་པ་བསྟན་པའི་ཕྱིར། དེའང་ས་བརྒྱད་པའི་ཡེ་ཤེས་གསུམ་པོ་དེ་ལ་སྦྱོར་མཐོང་སྒོམ་གསུམ་གྱི་མིང་གིས་བཏགས་ནས་བསྟན་པ་ནི་མིན་ཏེ། གཞུང་འདིར་ལམ་གསུམ་གསུངས་པའི་དགོས་པ་ཙམ་ཞིག་བསྟན་གྱི། འདོགས་པའི་རྒྱུ་མཚན་དང་དངོས་ལ་གནོད་བྱེད་གང་ཡང་མ་གསུངས་པའི་ཕྱིར་དང་། སློབ་དཔོན་གྱིས་སྡུད་འགྲེལ་ལས་ཀྱང་ས་བརྒྱད་པ་མི་གཡོ་བ་དེའི་དབྱེ་བ་རྟོགས་པར་བྱ་བའི་ཕྱིར་རྣམ་པ་ཀུན་མངོན་པར་རྫོགས་པར་བསྟན་ཏོ་ཞེས་གསུངས་པའི་ཕྱིར། འཆད་ཚུལ་གཉིས་པ་ནི། ལྷ་སའི་ཉེ་ལོགས་ན་གནས་པ་འགའ་ཞིག་ན་རེ། སྐབས་དང་པོ་དྲུག་ཏུ་སྦྱོར་མཐོང་སྒོམ་གསུམ་ལན་དྲུག་ཏུ་བསྟན་པ་ལ་ཟློས་སྐྱོན་མེད་དེ་སྐབས་དང་པོ་གསུམ་དུ་ལམ་གསུམ་ལན་གསུམ་བསྟན་པ་ནི་ཤེས་བྱ་གཏན་འབེབས་ཀྱི་སྒོ་ནས་བསྟན། སྦྱོར་བ་དང་པོ་གསུམ་གྱི་སྐབས་སུ་ནི་སྦྱོར་བ་ཉམས་ལེན་གྱི་སྒོ་ནས་བསྟན་པའི་ཕྱིར། དེའང་རྣམ་ཀུན་ལ་རྣམ་ཀུན་ཙམ་དང་ཁྱད་པར་ཅན་གཉིས། དེ་བཞིན་དུ་རྩེ་སྦྱོར་དང་མཐར་གྱིས་པའི་སྦྱོར་བ་ལའང་གཉིས་གཉིས་སུ་ཕྱེ་བ་དེ་བཞིན་དུ་སྦྱོར་བ་དང་པོ་གསུམ་གྱི་སྐབས་ནས་བསྟན་པའི་སྦྱོར་ལམ་མཐོང་ལམ་སྒོམ་ལམ་གསུམ་གྱི་མིང་ཅན་གྱི་མངོན་པར་རྟོགས་པ་རེ་རེ་ལའང་ཙམ་པོ་དང་ཁྱད་པར་ཅན་གཉིས་གཉིས་སུ་ཡོད་པས། ཙམ་པོ་ནི་སྦྱོར་ལམ་ལ་སོགས་པ་དངོས་ཡིན། ཁྱད་པར་ཅན་ནི་དག་སའི་ཡེ་ཤེས་ཡིན་ནོ། །འོ་ན་དག་སའི་ཡེ་ཤེས་ལ་སྦྱོར་མཐོང་སྒོམ་གསུམ་གྱི་མིང་གིས་བསྟན་པའི་རྒྱུ་མཚན་ཅི་ཡིན་ཞེ་ན། འདོགས་པའི་རྒྱུ་མཚན་ལམ་གསུམ་དང་རིམ་གྱིས་སྐྱེ་བར་ཆོས་མཐུན་པའི་ཕྱིར་དང་། བཏགས་པའི་དགོས་པ་ནི་དག་སར་འབད་རྩོལ་ཞི་བས་ཡེ་ཤེས་ཆུང་ངུ་། འབྲིང་། ཆེན་པོ་རྣམས་ཅིག་ཅར་སྐྱེའམ་སྙམ་པའི་དོགས་པ་དགག་པའི་ཕྱིར་ཡིན་ནོ། །དངོས་ལ་གནོད་བྱེད་ནི་འབད་རྩོལ་གྱི་མཚན་མ་དང་བཅས་པའི་སྦྱོར་མཐོང་སྒོམ་གསུམ་དངོས་མིན་ཏེ། དག་སའི་ཡེ་ཤེས་ཡིན་པའི་ཕྱིར། དེས་ན་གཞུང་འདི་སློབ་དཔོན་གྱི་རང་གཞུང་ཡིན་ཅིང་། གཞུང་འདིས་ལམ་གསུམ་བཏགས་པ་བར་བསྟན་ཀྱང་། སློབ་དཔོན་གྱི་ལུགས་ལ་སྦྱོར་བ་དང་པོ་གསུམ་གྱི་སྐབས་ནས་བསྟན་པའི་སྦྱོར་མཐོང་སྒོམ་གསུམ་དེ་དེ་མཚན་ཉིད་པ་ཡིན་པ་ལ་འགལ་བ་མེད་ཅེས་ཟེར་རོ། །འཆད་ཚུལ་གསུམ་པ་ནི། གདན་འབྲི་གཉིས་ཀྱི་བར་ན་གནས་པ་ཁ་ཅིག སློབ་དཔོན་གྱི་གཞུང་འདི་རྣམས་ལམ་གསུམ་བཏགས་པ་བར་སྟོན་པའི་ཆེད་དུ་བཀོད་པའང་མིན། སྐབས་དང་པོ་དྲུག་ཏུ་ལམ་གསུམ་ལན་དྲུག་བསྟན་པ་ནི་ཟློས་སྐྱོན་སྤོང་བའི་ཆེད་དུ་བཀོད་པའང་མིན་ཏེ། མངོན་པར་རྟོགས་པ་རྐྱང་པར་སྨྲ་བའི་དོགས་པ་ཟློག་པའི་ཆེད་དུ་བཀོད་པ་ཡིན་པའི་ཕྱིར། འོ་ན་མངོན་པར་རྟོགས་པ་རྐྱང་པར་སྨྲ་བའི་དོགས་པ་ཇི་ལྟ་བུ། དེ་ཇི་ལྟར་དུ་འགོག་ཅེ་ན། དང་པོ་ནི། རྒྱན་གྱི་བརྗོད་བྱར་གྱུར་པའི་མངོན་པར་རྟོགས་པ་བརྒྱད་པོ་འདི་ཚོགས་ལམ་ནས་སངས་རྒྱས་སའི་བར་རིམ་བཞིན་སྒོམ་སྟེ་རྣམ་མཁྱེན་མཚོན་བྱེད་ཀྱི་མངོན་པར་རྟོགས་པ་ཐམས་ཅད་ཚོགས་སྦྱོར་ཁོ་ན་དང་། ལམ་ཤེས་མཚོན་བྱེད་ཀྱི་མངོན་པར་རྟོགས་པ་ཐམས་ཅད་ས་དང་པོ་ནས་དྲུག་པའི་བར་ཁོ་ན་དང་། གཞི་ཤེས་མཚོན་བྱེད་ཀྱི་མངོན་པར་རྟོགས་པ་ཐམས་ཅད་ས་བདུན་པ་ཁོ་ན་དང་། རྣམ་རྫོགས་སྦྱོར་བ་མཚོན་བྱེད་ཀྱི་དེ་ཐམས་ཅད་ས་བརྒྱད་པ་ཁོ་ན་དང་། རྩེ་སྦྱོར་གྱི་དེ་ཐམས་ཅད་ས་དགུ་པ་དང་བཅུ་པའི་དཀྱིལ་སྟོད་ཁོ་ན་དང་། མཐར་གྱིས་པའི་དེ་ཐམས་ཅད་ས་བཅུ་པའི་དཀྱིལ་སྨད་ཁོ་ན་དང་། སྐད་ཅིག་མི་སྦྱོར་བའི་དེ་ཐམས་ཅད་རྒྱུན་མཐའ་ཁོ་ནར་སྒོམ། འབྲས་བུ་ཆོས་སྐུའི་དེ་ཐམས་ཅད་སངས་རྒྱས་ཀྱི་སར་འབྱུང་བའི་ཕྱིར་ཞེས་པའོ། །གཉིས་པ་དེ་ལྟ་བུའི་དོགས་པ་འགོག་པའི་ཚུལ་ནི། རྣམ་མཁྱེན་གྱི་སྐབས་སུ་སྦྱོར་མཐོང་སྒོམ་གསུམ་རང་མིང་ནས་སྨོས་པ་ཆོས་ཅན། དགོས་པ་ཡོད་དེ། རྣམ་མཁྱེན་མཚོན་བྱེད་ཀྱི་མངོན་པར་རྟོགས་པ་ཐམས་ཅད་ཚོགས་སྦྱོར་ཁོ་ནར་ཅིག་ཅར་སྐྱེའམ་སྙམ་པའི་དོགས་པ་དགག་པའི་ཆེད་ཡིན་པའི་ཕྱིར། དེ་ལྟར་དགག་ནུས་ཏེ། རྣམ་མཁྱེན་མཚོན་བྱེད་ཀྱི་སྐབས་སུ་རྣམ་པ་ཐམས་ཅད་དུ་ཉན་རང་གི་ལམ་ལས་ཁྱད་པར་དུ་འཕགས་པའི་ལམ་གྱིས་བསྡུས་པའི་ཡེ་ཤེས་རང་གི་ངོ་བོ་ལ་འདོད་ཆགས་ལ་སོགས་པའི་ཟག་པ་མེད་པ་ཆུང་ངུ་སྦྱོར་ལམ། འབྲིང་མཐོང་ལམ། ཆེན་པོ་སྒོམ་ལམ་གསུམ་རིམ་བཞིན་དུ་སྐྱེ་བ་ཡིན་པའི་ཕྱིར། དེས་གཞི་ཤེས་དང་ལམ་ཤེས་ལའང་རིགས་འགྲེ། རྣམ་རྫོགས་སྦྱོར་བའི་སྐབས་སུ་ལམ་གསུམ་རང་མིང་གིས་ཐ་སྙད་དུ་སྨོས་པ་ཆོས་ཅན། དགོས་པ་ཡོད་དེ། རྣམ་རྫོགས་སྦྱོར་བ་མཚོན་བྱེད་ཀྱི་མངོན་པར་རྟོགས་པ་རྣམས་ས་བརྒྱད་པ་ཁོ་ནར་ཅིག་ཆར་སྐྱེའམ་སྙམ་པའི་དོགས་པ་དགག་པའི་ཆེད་ཡིན་པའི་ཕྱིར། དེ་ལྟར་དགག་ནུས་ཏེ། དེ་མཚོན་བྱེད་ཀྱི་སྐབས་སུ་རྣམ་པ་ཐམས་ཅད་དུ་ཉན་རང་གི་ལམ་ལས་ཁྱད་པར་དུ་འཕགས་པའི་ལམ་གྱིས་བསྡུས་པའི་ཞེས་སོགས་སྔ་མ་བཞིན་སྦྱར། དེས་རྩེ་སྦྱོར་དང་མཐར་གྱིས་བའི་སྦྱོར་བ་གཉིས་ལའང་འགྲེ། དེས་ན་འདིར་བསྟན་གྱི་ཁྱད་པར་གྱི་ལམ་ནི་དག་སའི་ཡེ་ཤེས་ལ་མི་བྱེད་པར་ཉན་རང་གི་ལམ་ལས་ཁྱད་པར་དུ་འཕགས་པའི་སྦྱོར་མཐོང་སྒོམ་གསུམ་ཙམ་ལ་བྱེད་པ་དང་། རང་གི་ངོ་བོ་ལ་ཟག་པ་མེད་པའང་འདོད་ཆགས་ལ་སོགས་པའི་ཟག་པ་མེད་པ་ཙམ་དང་། རིམ་གྱིས་སྐྱེ་བའང་སྦྱོར་མཐོང་སྒོམ་གསུམ་རིམ་གྱིས་སྐྱེ་བ་ལ་བྱེད་པ་དང་། ཆུང་འབྲིང་ཆེན་པོ་གསུམ་ཡང་དག་སའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ལ་མི་བྱེད་པར་སྦྱོར་མཐོང་སྒོམ་གསུམ་ལ་བྱེད་ཅེས་ཟེར་རོ། །དེ་ལྟར་ལུགས་གསུམ་ལས། དང་པོ་ལ། འགྲེལ་ཆེན་ལས། སྐབས་ལྔ་པར་བསྟན་པའི་མཐོང་སྤང་རྟོགས་པ་རྣམས་ས་བཅུ་པ་དང་འབྲེལ་བའི་རྩེ་མོའི་མངོན་པར་རྟོགས་པས་སྤོང་བར་སྔོན་གྱི་སློབ་དཔོན་དག་བཞེད་དོ་ཞེས་པའི་གཞུང་འདི་སློབ་དཔོན་གྱི་རང་གཞུང་ཡིན་ནམ་མིན། མིན་ན་རྣམ་པ་ཀུན་མངོན་པར་རྫོགས་པར་རྟོགས་པ་ལ་སོགས་པ་མངོན་པར་རྟོགས་པ་རྣམ་པ་གསུམ་ལ་ཞེས་སོགས་ཐད་ཀྱི་འགྲེལ་ཆེན་གྱི་གཞུང་རྣམས་ཀྱང་སློབ་དཔོན་གྱི་རང་གཞུང་མིན་པར་ཐལ། ཁས་བླངས་པ་དེའི་ཕྱིར། ཡིན་ན་སློབ་དཔོན་གྱི་ལུགས་ལ་སྐབས་ལྔ་པར་བཤད་པའི་མཐོང་ལམ་རྩེ་སྦྱོར་དེ་མཐོང་ལམ་རྩེ་སྦྱོར་མིན་པར་ཐལ། དེའི་ལུགས་ལ་དེར་བཤད་པའི་མཐོང་སྤང་རྟོགས་པ་དེ་མཐོང་སྤང་མ་ཡིན་པའི་ཕྱིར། བསལ་བ་དངོས། རྟགས་ཁས་བླངས། དེར་ཐལ། དེའི་ལུགས་ལ་དེ་སྒོམ་སྤང་ཡིན་པའི་ཕྱིར་ཏེ། གཞུང་དེ་དེའི་རང་གཞུང་རྣམ་དག་ཡིན་པའི་ཕྱིར། གཞན་ཡང་རྣམ་རྫོགས་སྦྱོར་བའི་སྐབས་སུ་ལམ་གསུམ་བསྟན་པས་ས་བརྒྱད་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ཅིག་ཆར་དུ་སྐྱེའམ་སྙམ་པའི་དོགས་པ་འགོག་ནུས། རྩེ་སྦྱོར་གྱི་སྐབས་སུ་དེ་བསྟན་པས་དེ་འགོག་མི་ནུས་པའི་ཁྱད་པར་མི་འཐད་པར་ཐལ། དེ་གཉིས་ཀྱི་སྐབས་ནས་བསྟན་པའི་ལམ་གསུམ་པོ་དེ་ལམ་གསུམ་མཚན་ཉིད་པར་མཚུངས་པ་གང་ཞིག ས་བརྒྱད་པའི་ཡེ་ཤེས་ཆུང་འབྲིང་ཆེན་པོ་གསུམ་ལ་ལམ་གསུམ་གྱི་བཏགས་ནས་བསྟན་པ་མིན་པར་མཚུངས་པའི་ཕྱིར། ལུགས་གཉིས་པ་ལ། རྣམ་པ་ཐམས་ཅད་མཁྱེན་པ་ཉིད་ལ་སོགས་པ། མངོན་པར་རྟོགས་པ་རྣམ་པ་གསུམ་ལ། ཞེས་སོགས་ཀྱི་གཞུང་དེས་སྐབས་དང་པོ་དྲུག་ཏུ་བསྟན་པའི་སྦྱོར་མཐོང་སྒོམ་གསུམ་རྣམས་ལ་ཟློས་སྐྱོན་སྤོང་མི་ནུས་པར་ཐལ། གཞུང་དེ་དེ་དྲུག་ཏུ་ལམ་གསུམ་ལན་དྲུག་བསྟན་པ་ཁོ་ནའི་ཟློས་སྐྱོན་སྤོང་ནུས་ཀྱང་། དེར་སྦྱོར་མཐོང་སྒོམ་གསུམ་ལན་དགུ་བསྟན་པའི་ཕྱིར། རྟགས་ཕྱི་མ་ཁས་བླངས་ཏེ། མཁྱེན་གསུམ་གྱི་སྐབས་སུ་མཚན་ཉིད་པ་ལན་གསུམ་བསྟན། སྦྱོར་བ་དང་པོ་གསུམ་གྱི་སྐབས་སུ་མཚན་ཉིད་པ་ལན་གསུམ། བཏགས་པ་བ་ལན་གསུམ་བསྟན་པའི་ཕྱིར། གཞན་ཡང་མཐོང་ལམ་རྩེ་སྦྱོར་འཆད་པའི་སྐབས་ནས་བསྟན་པའི་མངོན་པར་རྟོགས་པ་ཁྱད་པར་ཅན་མཐོང་སྤང་གི་ས་བོན་གྱི་དངོས་གཉེན་མིན་པར་ཐལ། དེ་ས་དགུ་པའི་ཡེ་ཤེས་འབྲིང་པོ་ཡིན་པའི་ཕྱིར། རྟགས་ཁས། འདོད་ན། སྒོམ་ལམ་རྩེ་སྦྱོར་འཆད་པའི་སྐབས་ནས་བསྟན་པའི་མངོན་པར་རྟོགས་པ་ཁྱད་པར་ཅན་དེ་སྒོམ་སྤང་གི་དངོས་གཉེན་མིན་པར་ཐལ་ལོ། །གཞན་ཡང་། སློབ་དཔོན་གྱི་ལུགས་ལ་སྦྱོར་བ་དང་པོ་གསུམ་གྱི་སྐབས་ནས་བསྟན་པའི་ལམ་གསུམ་དེ་དེ་བཏགས་པ་བ་ཡིན་པར་ཐལ། རྣམ་པ་ཀུན་མངོན་པར་རྫོགས་པར་རྟོགས་པ་ཞེས་སོགས་ཀྱི་གཞུང་འདིས་དེས་བཏགས་པ་བར་བསྟན་པ་གང་ཞིག དེ་འདྲའི་གཞུང་དེ་སློབ་དཔོན་གྱི་རང་གཞུང་རྣམ་དག་ཡིན་པའི་ཕྱིར། རྟགས་གསལ་ཐམས་ཅད་ཁས་བླངས་སོ། །ལུགས་གསུམ་པ་ནི་ཧ་ཅང་མི་འཚམས་ཏེ། འདི་ལྟར་མངོན་པར་རྟོགས་པ་རྐྱང་པ་བར་སྨྲ་བའི་དོགས་པ་དེ་བྱམས་མགོན་གྱིས་རྒྱན་མ་བརྩམས་པའི་སྔ་རོལ་དུ་བྱུང་བར་ཐལ། བྱམས་མགོན་གྱིས་རྒྱན་གྱི་སྐབས་དང་པོ་དྲུག་ཏུ་སྦྱོར་མཐོང་སྒོམ་གསུམ་ལན་དྲུག་བསྟན་པ་དེ་དགག་པའི་ཆེད་དུ་བསྟན་པ་ཙམ་ཡིན་པའི་ཕྱིར། རྟགས་ཁས། གཞན་ཡང་མངོན་པར་རྟོགས་པ་རྐྱང་པར་སྨྲ་བའི་དོགས་པ་དགག་པའི་ཆེད་དུ་སློབ་དཔོན་གྱིས་རྣམ་པ་དང་། ལམ་དང་ཞེས་སོགས་ཀྱི་གཞུང་འདི་དག་བཀོད་མི་དགོས་པར་ཐལ། དོགས་པ་དེ་རྒྱན་གྱི་སྐབས་དང་པོ་དྲུག་ཏུ་སྦྱོར་མཐོང་སྒོམ་གསུམ་ལན་དྲུག་བསྟན་པ་དེས་འགོག་ནུས་པའི་ཕྱིར། རྟགས་ཁས་བླངས་ཏེ། དེར་ཐལ། རྣམ་མཁྱེན་མཚོན་བྱེད་ཀྱི་སྐབས་སུ་བསྟན་པའི་ལམ་གསུམ་རིམ་བཞིན་དུ་སྐྱེ་བ་ཡིན་པའི་ཕྱིར་རོ། །དེ་བཞིན་དུ་ལམ་ཤེས་ནས་མཐར་གྱིས་པའི་སྦྱོར་བའི་བར་ལ་རིགས་བསྒྲེས་ནས་འཁོར་གསུམ་དྲུག་བྱའོ། །གཞན་ཡང་། རིམ་གྱིས་སྐྱེ་བས་ཅིག་ཆར་སྐྱེ་བ་དགག་པའི་ཕྱིར་ཅེས་པའི་སྐབས་ཀྱི་རིམ་གྱིས་སྐྱེ་བའི་མངོན་པར་རྟོགས་པ་དེ་དང་ཅིག་ཅར་སྐྱེའམ་སྙམ་པའི་དོགས་པའི་གཞིར་གྱུར་པའི་མངོན་པར་རྟོགས་པ་དེ་གཉིས་གཞི་གཅིག་མིན་པར་ཐལ། རིམ་གྱིས་སྐྱེ་བའི་གཞིར་གྱུར་པའི་མངོན་པར་རྟོགས་པ་དེ་ཡིན་ན་སྦྱོར་མཐོང་སྒོམ་གསུམ་གང་རུང་ཡིན་དགོས། ཕྱི་མ་དེ་ཡིན་ན་སྐབས་དང་པོ་དྲུག་གི་མཚོན་བྱེད་ཀྱི་མངོན་པར་རྟོགས་པ་རྣམས་ཡིན་དགོས་པའི་ཕྱིར། རྟགས་ཁས། འདོད་ན། དེའི་སྐབས་ཀྱི་རིམ་གྱིས་སྐྱེ་བར་བསྟན་པ་དེས་ཅིག་ཅར་སྐྱེའམ་སྙམ་པའི་དོགས་པ་དེ་མི་ཁེགས་པར་ཐལ་ལོ། །གཞན་ཡང་རྣམ་མཁྱེན་མཚོན་བྱེད་ཀྱི་མངོན་པར་རྟོགས་པ་རྣམས་བསྟན་པས་དེ་ཐམས་ཅད་ཚོགས་སྦྱོར་ཁོ་ནར་ཅིག་ཅར་སྐྱེའམ་སྙམ་པའི་དོགས་པ་ཁེགས་སམ་མི་ཁེགས། ཁེགས་ན་དེ་རྣམས་བསྟན་པའི་རྗེས་སུ་དེའི་དོགས་པ་སྐྱེ་བ་མི་སྲིད་པར་ཐལ། དེས་དེ་ཁེགས་པའི་ཕྱིར། འདོད་ན། དེ་ལྟ་བུའི་དོགས་པ་དེ་རྒྱན་བརྩམས་རྗེས་སུ་བྱུང་བ་མིན་པར་ཐལ། འདོད་པ་དེའི་ཕྱིར། གལ་ཏེ་མི་ཁེགས་ན། རྣམ་མཁྱེན་མཚོན་བྱེད་ཀྱི་སྐབས་སུ་སྦྱོར་མཐོང་སྒོམ་གསུམ་བསྟན་པས་དེ་ལྟ་བུའི་དོགས་པ་མི་ཁེགས་པར་ཐལ། ཁས་བླངས་པ་དེའི་ཕྱིར། རྟགས་བསལ་དངོས། ཅི་སྙམ་དུ་སེམས། གཞན་ཡང་། སློབ་དཔོན་གྱི་སྡུད་འགྲེལ་ལས། འདིར་ཁྱད་པར་གྱི་ལམ་གྱི་རང་བཞིན་མིན་ནམ། ངེས་པར་འབྱེད་པ་ཆ་ལ་སོགས་པ་བསྟན་པ་ཇི་ལྟ་བུ་རིགས་ཞེ་ན། ཞེས་པའི་ཁྱད་པར་གྱི་ལམ་དེའང་རྣམ་པ་ཐམས་ཅད་དུ་ཉན་རང་གི་ལམ་ལས་ཁྱད་པར་དུ་འཕགས་པའི་སྦྱོར་མཐོང་སྒོམ་གསུམ་ཙམ་ལ་བྱེད་རིགས་པར་ཐལ། དོན་གསལ་ལས། རྣམ་པ་ཐམས་ཅད་དུ་ཁྱད་པར་གྱི་ལམ་གྱིས་བསྡུས་པའི་ཡེ་ཤེས་ཞེས་པའི་ཁྱད་པར་གྱི་ལམ་དེ་དེ་ལ་བྱེད་རིགས་པའི་ཕྱིར། འདོད་ན། སྡུད་འགྲེལ་ལས། སྔར་གྱི་དྲི་བའི་ལན་དུ། ས་བརྒྱད་པ་ལ་མཚན་མ་མེད་ཅིང་ལྷུན་གྱིས་གྲུབ་པས་དེ་དག་གི་དུས་སུ་སེམས་ཅན་གྱི་དོན་རྒྱུན་ཆད་པ་སྤངས་པའི་ཕྱིར་གང་སེམས་ཅན་སྙམ་པ་ལ་སོགས་པའི་རྣམ་པ་སྒྱུ་མ་ལྟ་བུ་དེས་སེམས་ཅན་ལ་དམིགས་པ་ལ་སོགས་པ་ཁྱད་པར་གྱི་ལམ་ཉིད་རྟུལ་པོ་ལ་སོགས་པ་རིམ་གྱིས་སྐྱེ་བ་ཡིན་གྱི། ཅིག་ཆར་ནི་མིན་ནོ་ཞེས་བསྟན་པའི་ཕྱིར། ངེས་པར་འབྱེད་པའི་ཆ་ལ་སོགས་པར་བཏགས་ནས་འདིར་བསྟན་པ་ཡིན་པར་གཟུང་བར་བྱའོ། །ཕྱི་མ་རྣམས་ལའང་ཇི་ལྟར་སྲིད་པ་བཞིན་རིགས་པར་བྱའོ་ཞེས་བྱ་བར་དགོངས་སོ་ཞེས་གསུངས་པ་དང་འགལ་མི་འགལ་སོམས་ཤིག གཞན་ཡང་རྣམ་མཁྱེན་མཚོན་བྱེད་ཀྱི་མངོན་པར་རྟོགས་པ་ཐམས་ཅད་ཚོགས་སྦྱོར་ཁོ་ནར་ཅིག་ཆར་སྐྱེའམ་སྙམ་པའི་མངོན་པར་རྟོགས་པ་རྐྱང་པར་སྨྲ་བའི་དོགས་པ་མི་སྲིད་པར་ཐལ། ཚོགས་སྦྱོར་གཉིས་ཅིག་ཅར་སྐྱེའམ་སྙམ་པའི་དོགས་པ་རྒོལ་བ་རྟོགས་ལྡན་ལ་སྐྱེ་བ་མི་སྲིད་པའི་ཕྱིར། དེ་བཞིན་དུ་ལམ་ཤེས་མཚོན་བྱེད་ཀྱི་མངོན་པར་རྟོགས་པ་ལའང་སྦྱོར་རོ། །རྣམ་དཔྱོད་ཉི་འོད་ལྷགས་པ་ཡིས། །ངེས་དོན་གསལ་བའི་རི་ངོས་སུ། །ལོགས་སྨྲའི་མུན་པ་འབྱུང་བ་ནི། །མི་སྲིད་སྲིད་པར་མི་འགྱུར་རོ། །བར་སྐབས་ཀྱི་ཚིགས་སུ་བཅད་པའོ། །གཉིས་པ་ནི། གཞུང་འདིའི་དོན་སྐབས་དང་པོ་དྲུག་ཏུ་སྦྱོར་མཐོང་སྒོམ་གསུམ་ལན་དྲུག་བསྟན་པ་ལ་ཟློས་སྐྱོན་མེད་དེ། མཁྱེན་གསུམ་གྱི་སྐབས་སུ་བསྟན་པ་དེ་གསུམ་ནི་དེ་གསུམ་མཚན་ཉིད་པ་ཡིན་ཞིང་། སྦྱོར་བ་དང་པོ་གསུམ་གྱི་སྐབས་ནས་བསྟན་པའི་དེ་གསུམ་ནི་དེ་གསུམ་བཏགས་པ་བ་ཡིན་པའི་ཕྱིར། དང་པོ་ལའང་ཟློས་སྐྱོན་མེད་དེ། རྣམ་པ་དང་། ལམ་དང་། གཞི་བདེན་པའི་སྐྱེ་མེད་དུ་རྟོགས་པའི་ལྡོག་པ་ནས་སོ་སོར་བསྟན་པའི་ཕྱིར་ཞེས་པ་ནི་རྣམ་པ་དང་། ལམ་དང་། གཞི་ཐམས་ཅད་རྣམ་པར་སྒོམ་པའི་དབྱེ་བས་ཞེས་སོགས་ཀྱིས་བསྟན་ནོ། །སྐབས་དང་པོ་གསུམ་གྱི་ལམ་གསུམ་མཚན་ཉིད་པ་ཡིན་པ་ནི་འཇིག་རྟེན་པའི་ངེས་པར་འབྱེད་པའི་ཆ་དང་མཐུན་པ་རྟོགས་པ་སྔོན་དུ་འགྲོ་བས་ཞེས་སོགས་ཀྱིས་བསྟན་ནོ། །ཕྱི་མ་ལའང་ཟློས་སྐྱོན་མེད་དེ། ས་བརྒྱད་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ཅིག་ཅར་སྐྱེའམ་སྙམ་པའི་དོགས་པ་དགག་པའི་ཆེད་དུ་རྣམ་རྫོགས་སྦྱོར་བའི་སྐབས་སུ་ས་བརྒྱད་པའི་ཡེ་ཤེས་ཆུང་ངུ་། འབྲིང་། ཆེན་པོ་གསུམ་ལ་སྦྱོར་མཐོང་སྒོམ་གསུམ་གྱི་མིང་གིས་བཏགས་ནས་བསྟན། ས་དགུ་པའི་ཡེ་ཤེས་དེ་གསུམ་ཅིག་ཅར་སྐྱེའམ་སྙམ་པའི་དོགས་པ་དགག་པའི་ཆེད་དུ་རྩེ་སྦྱོར་གྱི་སྐབས་སུ་དེ་ལྟར་བསྟན། ས་བཅུ་པའི་ཡེ་ཤེས་དེ་གསུམ་ཅིག་ཆར་སྐྱེའམ་སྙམ་པའི་དོགས་པ་དགག་པའི་ཆེད་དུ་མཐར་གྱིས་པའི་སྐབས་སུ་དེ་ལྟར་བསྟན་པའི་ཕྱིར་ཞེས་པ་ནི། རྣམ་པ་ཀུན་མངོན་པར་རྫོགས་པར་ཞེས་སོགས་ཀྱིས་བསྟན་ནོ། །སྦྱོར་བ་དང་པོ་གསུམ་གྱི་སྐབས་ཀྱི་ལམ་གསུམ་བཏགས་པ་བ་ཡིན་པ་ནི་ཟག་པ་མེད་པ་ཆུང་ངུ་དང་། འབྲིང་དང་། ཆེན་པོ་ཞེས་དང་། ངེས་པར་འབྱེད་པའི་ཆ་ལ་སོགས་པ་ཞེས་སོགས་ཀྱིས་བསྟན་ནོ། །འདོགས་པའི་རྒྱུ་མཚན་ནི་རིམ་གྱིས་སྐྱེ་བས་ཞེས་སོགས་ཀྱིས་བསྟན་ཏོ། །བཏགས་པའི་དགོས་པ་ནི་ཅིག་ཆར་སྐྱེ་བ་དགག་པར་བྱ་བའི་ཕྱིར་ཞེས་སོགས་ཀྱིས་བསྟན་ཏོ། །དངོས་ལ་གནོད་བྱེད་ནི་རྣམ་པ་ཐམས་ཅད་དུ་ཁྱད་པར་གྱི་ལམ་གྱིས་བསྡུས་པའི་ཞེས་པས་བསྟན་ཏོ། གཞུང་འདི་དག་ཀྱང་སློབ་དཔོན་སྔ་མའི་བཞེད་པ་བཀོད་པ་ཙམ་ཡིན་གྱི། སློབ་དཔོན་གྱི་རང་གཞུང་མིན་ཏེ། འགྲེལ་ཆེན་ལས། གཞུང་འདི་རྣམས་ཀྱི་མཇུག་ཏུ་ཁ་ཅིག་གིའོ་ཞེས་པ་དང་། རྣམ་པ་དེ་ལྟ་བུའི་རྣམ་པར་རྟོག་པ་རྣམས་ནི་ཞེས་སོགས་ཀྱི་མཇུག་ཏུ་སྔོན་གྱི་སློབ་དཔོན་དག་བཞེད་དོ་ཞེས་གསུངས་པའི་ཕྱིར་དང་། སློབ་དཔོན་རང་ལུགས་ཀྱི་ལམ་གསུམ་གྱི་རྣམ་གཞག་ཐམས་ཅད་ལམ་གསུམ་མཚན་ཉིད་པ་ཁོ་ནར་བཤད་པའི་ཕྱིར་རོ། །གསུམ་པ་ནི། ཁ་ཅིག སྐབས་གཉིས་པར་བཤད་པའི་མཐོང་ལམ་རྩོད་སྤོང་གི་གཞུང་དེའང་སློབ་དཔོན་གྱི་རང་གཞུང་མིན་པར་ཐལ། དེའི་སྐབས་སུ་གཞན་དག་ན་རེ་ཞེས་འབྱུང་བའི་ཕྱིར། ཁྱབ་པ་སྒྲིག་ཟེར་ན་མི་མཚུངས་ཏེ། སློབ་དཔོན་རང་ལུགས་ལ་ལམ་གསུམ་མཚན་ཉིད་པར་མ་བཤད་པར་ཐལ། སློབ་དཔོན་རང་ལུགས་ལ་མཐོང་ལམ་ལ་རྣམ་པ་མེད་པར་མ་བསྟན་པའི་ཕྱིར། ཁྱབ་པ་ཁས། ཡང་ཁ་ཅིག རང་གིས་བརྩམས་པའི་བསྟན་བཅོས་ཀྱི་ནང་དུ་གཞན་གྱི་འདོད་པ་བརྗོད་ནས་དགག་སྒྲུབ་གང་ཡང་མི་བྱེད་པ་ནི་མི་མཁས་པ་ཡིན་པས། འདི་གཞན་གྱི་འདོད་པ་བརྗོད་པ་ཡིན་ན་སློབ་དཔོན་མི་མཁས་པ་ཡིན་པར་འགྱུར་རོ་ཞེས་ཟེར་རོ། །འོ་ན་སློབ་དཔོན་དབྱིག་གཉེན་དེ་ཡང་མི་མཁས་པ་ཡིན་པར་ཐལ། དེས་རང་གིས་བརྩམས་པའི་བསྟན་བཅོས་མངོན་པ་མཛོད་ཀྱི་ནང་དུ་ཁ་ཅིག་ཤིན་དུ་སྦྱངས་པ་བཏང་སྙོམས་པ་ཞེས་བརྗོད་ནས་དགག་སྒྲུབ་གང་ཡང་མ་མཛད་འདུག་པའི་ཕྱིར། དགག་སྒྲུབ་དོན་ལ་མ་བྱས་པར་ནི་མི་འགྲུབ་སྟེ། ལམ་གསུམ་མཚན་ཉིད་པར་བཤད་པའི་ཕྱིར། ངེས་འབྱེད་ཡན་ལག་ནས་གཟུང་སྟེ། །ཞེས་པའི་སྐབས་སུ་མཐའ་དཔྱད་པ་ལ། ཕྱིར་མི་ལྡོག་པའི་རྟགས་ཀྱིས་མཚོན་པའི་གང་ཟག་ངོས་གཟུང་བ། ཕྱིར་མི་ལྡོག་པའི་རྟགས་ཀྱི་རང་བཞིན་གཏན་ལ་དབབ་པ་དང་གཉིས་ལས། དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག ཕྱིར་མི་ལྡོག་པའི་རྟགས་ཐོབ་པའི་མ་མཐའི་ས་མཚམས་ཐེག་ཆེན་སྦྱོར་ལམ་ནས་འཇོག་པ་མི་འཐད་པར་ཐལ། ཐེག་པ་གཞན་གྱིས་བར་མ་ཆོད་པར་རྫོགས་བྱང་ཐོབ་པར་ངེས་པའི་ཐེག་ཆེན་ཚོགས་ལམ་པ་དབང་རྣོན་དེས་ཕྱིར་མི་ལྡོག་པའི་རྟགས་ཐོབ་པའི་ཕྱིར་ཏེ། དེས་རིགས་ཀྱི་སྟོབས་ཀྱིས་ཕྱིར་མི་ལྡོག་པའི་རྟགས་ཐོབ་པའི་ཕྱིར། ཡང་ཐེག་ཆེན་ཚོགས་ལམ་གྱི་གནས་སྐབས་ན་གསེར་བཟང་པོ་ལྟ་བུའི་སེམས་བསྐྱེད་མེད་པར་ཐལ་བ་དང་། དེ་ན་ཐེག་པ་གཞན་གྱིས་བར་མ་ཆོད་པར་རྫོགས་བྱང་ཐོབ་པར་ངེས་པ་མེད་པར་ཐལ། དེ་ན་ཕྱིར་མི་ལྡོག་པའི་རྟགས་ཐོབ་པ་མེད་པའི་ཕྱིར། གཞན་ཡང་བྱང་སེམས་སྦྱོར་ལམ་པ་དབང་རྟུལ་དང་དབང་འབྲིང་གིས་ཕྱིར་མི་ལྡོག་པའི་རྟགས་མ་ཐོབ་པ་དེ་མི་འཐད་པར་ཐལ། བྱང་སེམས་སྦྱོར་ལམ་པ་ཡིན་ན་དེ་ཐོབ་པས་ཁྱབ་པའི་ཕྱིར་ཏེ། དེ་ཡིན་ན་ཕྱི་ནང་གི་ཡོངས་འཛིན་གཉིས་ཀྱིས་ཐེག་པ་གཞན་དུ་མི་ལྟུང་བར་ཡོངས་སུ་འཛིན་པས་ཁྱབ་པའི་ཕྱིར། ཡང་དེ་ཡིན་ན་ཕྱིར་མི་ལྡོག་པའི་རྟགས་ཐོབ་པས་ཁྱབ་པར་ཐལ། དེ་ཡིན་ན་ཐེག་པ་གཞན་གྱིས་བར་མ་ཆོད་པར་རྫོགས་བྱང་ཐོབ་པས་ཁྱབ་པའི་ཕྱིར་ཟེར་རོ། །ཐལ་བ་དང་པོ་ལ། རིགས་ཀྱི་སྟོབས་ཀྱིས་ཕྱིར་མི་ལྡོག་པའི་བྱང་སེམས་ཡིན་ན་ཕྱིར་མི་ལྡོག་པའི་བྱང་སེམས་ཡིན་དགོས་པར་ཐལ། དེའི་རྟགས་ཐོབ་ན་ཕྱིར་མི་ལྡོག་པའི་རྟགས་ཐོབ་པས་ཁྱབ་པའི་ཕྱིར། རྟགས་ཁས། འདོད་ན། རིགས་ཀྱི་སྟོབས་ཀྱིས་ཕྱིར་མི་ལྡོག་པའི་དགེ་འདུན་ཡིན་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། ཐེག་ཆེན་གྱི་སྦྱོར་ལམ་ཐོབ་མ་མྱོང་བའི་ཕྱིར། དེ་ལ་ཁ་ཅིག་ན་རེ། དེ་ཆོས་ཅན། ཕྱིར་མི་ལྡོག་པའི་བྱང་སེམས་སུ་ཐལ། གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པར་ངེས་པའང་ཡིན། བྱང་སེམས་ཡང་ཡིན་པའི་གཞི་མཐུན་པ་ཡིན་པའི་ཕྱིར་ཞེ་ན། བྱང་སེམས་ཀྱི་སྦྱོར་ལམ་ཆོས་ཅན། སྐད་ཅིག་མའི་སྦྱོར་བ་ཡིན་པར་ཐལ། སྐད་ཅིག་མའང་ཡིན། སྦྱོར་བའང་ཡིན་པའི་ཕྱིར། ཐལ་བ་གཉིས་པ་ལ། ཚོགས་ལམ་འབྲིང་པོ་ལ་གནས་པའི་བྱང་སེམས་ཡིན་ན་གསེར་བཟང་པོ་ལྟ་བུའི་སེམས་བསྐྱེད་ཐོབ་པས་མ་ཁྱབ་པར་ཐལ། དེ་ཡིན་ན་ཕྱིར་མི་ལྡོག་པའི་རྟགས་ཐོབ་པས་མ་ཁྱབ་པའི་ཕྱིར། འདོད་ན། ཚོགས་ལམ་ཆུང་ངུ་ལ་གནས་པའི་བྱང་སེམས་ཡིན་ན་ས་ལྟ་བུའི་སེམས་བསྐྱེད་ཐོབ་པས་མ་ཁྱབ་པར་ཐལ། འདོད་པ་དེའི་ཕྱིར། འདོད་ན། དེ་ཡིན་ན་འདུན་ལྡན་སེམས་བསྐྱེད་ཐོབ་པས་མ་ཁྱབ་པར་ཐལ་ལོ། །ཐལ་བ་གསུམ་པ་ལ། ལམ་མ་ཞུགས་ན་ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་པར་ངེས་པའི་གང་ཟག་མེད་པར་ཐལ། དེ་ན་ཕྱིར་མི་ལྡོག་པའི་རྟགས་ཐོབ་པ་མེད་པའི་ཕྱིར། འདོད་མི་ནུས་ཏེ། ཐེག་པ་གཞན་གྱིས་བར་མ་ཆོད་པར་བླ་མེད་བྱང་ཆུབ་ཐོབ་པར་ངེས་པའི་བྱང་སེམས་ཚོགས་ལམ་པའི་དངོས་རྒྱུར་གྱུར་པའི་ལམ་མ་ཞུགས་ཀྱི་གང་ཟག་ཡོད་པའི་ཕྱིར། ཐལ་བ་བཞི་པ་ལ། རྩེ་སྦྱོར་ཐོབ་ན་དེས་རྟགས་བཅུ་གཉིས་ཐོབ་པས་ཁྱབ་པར་ཐལ། དེ་ཐོབ་ན་མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་ཐོབ་པས་ཁྱབ་པའི་ཕྱིར། ཁྱབ་པ་ཁས། འདོད་ན། དེ་ཐོབ་ན་རྨི་ལམ་གྱི་གནས་སྐབས་ནའང་ཉན་ཐོས་དང་རང་སངས་རྒྱས་ཀྱི་ས་ལ་དགའ་བའི་སེམས་མི་སྐྱེད་པ་ཐོབ་པས་ཁྱབ་པར་ཐལ། འདོད་པ་དེའི་ཕྱིར། འདོད་ན། དེ་ཐོབ་ན་རང་དོན་ཡིད་བྱེད་ཀྱི་བསམ་པ་བསྐྱེད་མི་སྲིད་པས་ཁྱབ་པར་ཐལ་ལོ། །ཐལ་བ་ལྔ་པ་ལ། ཐེག་ཆེན་སྦྱོར་ལམ་པ་ཡིན་ན་བསོད་ནམས་རྣམ་པར་འཕེལ་བའི་རྩེ་སྦྱོར་ཐོབ་པས་ཁྱབ་པར་ཐལ། དེ་ཡིན་ན་རང་རྒྱུད་རྩེ་སྦྱོར་གྱིས་བསོད་ནམས་རྣམ་པར་འཕེལ་བས་ཁྱབ་པའི་ཕྱིར། ཡང་ཁ་ཅིག་གིས། ཐེག་ཆེན་སྦྱོར་ལམ་པ་ཡིན་ན་ཕྱིར་མི་ལྡོག་པའི་ཁྱད་པར་ཐོབ་པས་ཁྱབ་པར་ཁས་བླངས་པ་ལ། གཞན་དག་སྐྱོན་འདི་ལྟར་བརྗོད་དེ། གཟུགས་ལ་སོགས་ལ་ལྡོག་སོགས་རྟགས། །ཞེས་པའི་གཞུང་འདིས་ཐེག་ཆེན་སྦྱོར་ལམ་པ་དབང་པོ་རྣོ་འབྲིང་རྟུལ་གསུམ་ཐམས་ཅད་ཀྱིས་ཕྱིར་མི་ལྡོག་པའི་རྟགས་ཐོབ་པར་བསྟན་པར་ཐལ། རྟགས་ཁས་བླངས། འདོད་ན། ཐེག་ཆེན་མཐོང་ལམ་པ་དང་སྒོམ་ལམ་པ་ཕྱིར་མི་ལྡོག་པའི་རྟགས་ཐོབ་པར་ལོགས་སུ་བསྟན་པ་ལ་དགོས་པ་མེད་པར་ཐལ། འདོད་པ་དེའི་ཕྱིར། ཁྱབ་སྟེ། སྔ་མ་དེ་ཐམས་ཅད་ཕྱིར་མི་ལྡོག་པར་ངེས་ན་ཕྱི་མ་གཉིས་པོ་དེའང་དེར་ངེས་དགོས་པའི་ཕྱིར། ཞེས་བཀག་ནས། རང་ལུགས་ལ། ཕྱིར་མི་ལྡོག་པའི་རྟགས་ཀྱི་མ་མཐའི་ས་མཚམས་དབང་པོའི་རིམ་པ་དང་མཐུན་པར་ལམ་གསུམ་ལ་རིམ་བཞིན་དུ་འཇོག་གོ་ཟེར་རོ། །འོ་ན་གཟུགས་ལ་སོགས་ལ་ལྡོག་སོགས་རྟགས། །ཞེས་སོགས་ཀྱི་གཞུང་དེས་བྱང་སེམས་སྦྱོར་ལམ་པ་དབང་པོ་རྣོན་པོ་ཐམས་ཅད་ཀྱིས་ཕྱིར་མི་ལྡོག་པའི་རྟགས་ཐོབ་པར་བསྟན་པར་ཐལ། བྱང་སེམས་སྦྱོར་ལམ་པ་དབང་རྣོན་ཡིན་ན་ཕྱིར་མི་ལྡོག་པའི་རྟགས་ཐོབ་པས་ཁྱབ་པའི་ཕྱིར། རྟགས་ཁྱབ་ཁས། འདོད་ན། རེ་ཞིག་སོང་། གཞུང་དེས་དྲོད་ལ་གནས་པའི་སེམས་དཔའ་དབང་རྣོན་ཐམས་ཅད་ཀྱིས་ཕྱིར་མི་ལྡོག་པའི་རྟགས་ཐོབ་པར་བསྟན་པར་ཐལ། འདོད་པ་དེའི་ཕྱིར། འདོད་ན། ཁས་བླངས་ཏེ། སྦྱོར་ལམ་རྩེ་སྦྱོར་དང་། བཟོད་པ་དང་། ཆོས་མཆོག་ལ་གནས་པའི་བྱང་སེམས་དབང་རྣོན་ཐམས་ཅད་ཀྱི་ཕྱིར་མི་ལྡོག་པའི་རྟགས་ཐོབ་པར་ལོགས་སུ་བསྟན་པ་ལ་དགོས་པ་མེད་པར་ཐལ། འདོད་པ་དེའི་ཕྱིར། ཁྱབ་པ་ཁས་བླངས་ཏེ། དྲོད་ལ་གནས་པའི་སེམས་དཔའ་དབང་རྣོན་ཐམས་ཅད་ཕྱིར་མི་ལྡོག་པར་ངེས་ན། སྦྱོར་ལམ་ཕྱི་མ་གསུམ་ལ་གནས་པའི་གང་ཟག་དབང་རྣོན་རྣམས་ཀྱང་དེར་ངེས་དགོས་པའི་ཕྱིར། ཁ་ཅིག བྱང་སེམས་སྦྱོར་ལམ་པ་དབང་རྣོན་དེ་མཐོང་ལམ་པ་དབང་འབྲིང་། དེ་སྒོམ་ལམ་པ་དབང་པོ་རྟུལ་པོ་གསུམ་ལ་ཕྱིར་མི་ལྡོག་པའི་རྟགས་ཐོབ་པ་དང་མ་ཐོབ་པ་གཉིས་སུ་ཡོད་ཅིང་། ཐོབ་པ་དེ་རྣམས་འདིར་ཕྱིར་མི་ལྡོག་པའི་རྟགས་ཀྱིས་མཚོན་པའི་དགེ་འདུན་དུ་བསྒྲུབ་པར་བྱ་བ་ཡིན་ནོ་ཟེར་རོ། །འོ་ན་རིགས་མ་ངེས་པའི་བྱང་སེམས་སྦྱོར་ལམ་པ་དབང་པོ་རྣོན་པོ་དེས་ཕྱིར་མི་ལྡོག་པའི་རྟགས་མ་ཐོབ་པར་ཐལ། དེ་མ་ཐོབ་པའི་བྱང་སེམས་སྦྱོར་ལམ་པ་དབང་རྣོན་ཡོད་པའི་ཕྱིར། འདོད་མི་ནུས་ཏེ། འགྲེལ་ཆེན་ལས། ལ་ལར་རིགས་མ་ངེས་པ་ཡིན་ཀྱང་ངེས་པར་འབྱེད་པའི་ཆ་དང་མཐུན་པའི་གནས་སྐབས་སུ་ཐབས་ཀྱི་ཁྱད་པར་བསམ་གྱིས་མི་ཁྱབ་པ་དང་ལྡན་པས་ཕྱིར་མི་ལྡོག་པ་ཉིད་དུ་ངེས་པར་བྱའོ་ཞེས་གསུངས་པ་དང་འགལ་ལོ། །གཞན་ཡང་ཕྱིར་མི་ལྡོག་པའི་རྟགས་ཐོབ་པ་མི་སྲིད་པའི་བྱང་སེམས་ཤིག་ཡོད་པར་ཐལ། བྱང་སེམས་སྒོམ་ལམ་པ་ཡིན་ན་ཕྱིར་མི་ལྡོག་པའི་རྟགས་ཐོབ་པས་མ་ཁྱབ་པའི་ཕྱིར། འདོད་ན་ཕྱིར་མི་ལྡོག་པའི་རྟགས་ཐོབ་མ་མྱོང་བའི་སངས་རྒྱས་འཕགས་པ་ཡོད་པར་ཐལ་ལོ། །ཡང་ཁ་ཅིག སྐབས་འདིར་བསྟན་བྱའི་གཙོ་བོ་སྦྱོར་ལམ་པ་ཕྱིར་མི་ལྡོག་པའི་དགེ་འདུན། མཐོང་ལམ་པ་ཕྱིར་མི་ལྡོག་པའི་དགེ་འདུན། སྒོམ་ལམ་པ་ཕྱིར་མི་ལྡོག་པའི་དགེ་འདུན་ཡིན་པས། དེ་གསུམ་གྱི་མཚན་ཉིད་རིམ་བཞིན། རྟགས་གསུམ་ལ་ཚན་པ་བཞིར་བྱས་པའི་གང་རུང་གཅིག་རང་རྒྱུད་ལ་ཐོབ་ཅིང་ཐོབ་པ་ལྟར་ཡིད་ཆེས་པའི་ངེས་འབྱེད་ཆ་མཐུན་ལ་གནས་པའི་རྒྱལ་སྲས། གཟུགས་སོགས་འདུ་ཤེས་ལྡོག་པ་ལ་སོགས་པའི་གཏན་ཚིགས་བཅུ་དྲུག་གང་རུང་རང་རྒྱུད་ལ་ཐོབ་ཅིང་ཐོབ་པ་ལྟར་ཡིད་ཆེས་པའི་བདེན་པ་མངོན་རྟོགས་ལ་གནས་པའི་རྒྱལ་སྲས། མཉམ་གཞག་ཟབ་མོ་བརྒྱད་ཀྱིས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་རྗེས་ལ་མངོན་རྟོགས་ལ་གནས་པའི་རྒྱལ་སྲས་ཟེར་རོ། །འོ་ན་དྲོད་ལ་གནས་པའི་སེམས་དཔའ་དབང་རྟུལ་དེ་ཆོས་ཅན། མཚན་ཉིད་སྔ་མ་དེར་ཐལ། མཚོན་བྱ་དེའི་ཕྱིར་ཏེ། བྱང་སེམས་སྦྱོར་ལམ་པ་ཡིན་པའི་ཕྱིར། སྡུག་བསྔལ་ཆོས་བཟོད་ལ་གནས་པའི་སེམས་པ་དབང་རྣོན་དེ་ཆོས་ཅན། མཚན་ཉིད་གཉིས་པ་དེར་ཐལ། མཚོན་བྱ་དེའི་ཕྱིར། འདོད་ན། མཐོང་ལམ་སྐད་ཅིག་དང་པོ་ལ་གནས་པའི་གང་ཟག་མིན་པར་ཐལ། འདོད་པ་དེའི་ཕྱིར། རྒྱུན་མཐའི་བྱང་སེམས་དེ་ཆོས་ཅན། མཚན་ཉིད་ཕྱི་མ་དེར་ཐལ། མཚོན་བྱ་དེའི་ཕྱིར། རྟགས་གསལ་ཆོས་ཅན་གྱིས་གྲུབ་བོ། །གཉིས་པ་ནི། སྤྱིར་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པ་ཙམ་ནི་ཚོགས་ལམ་ནས་ཀྱང་ཡོད་ལ། དེ་ཕྱིར་མི་ལྡོག་པའི་དགེ་འདུན་དུ་ནི་མི་གཏོགས་ཏེ། དེར་གྱུར་པའི་མ་མཐའི་ས་མཚམས་སྦྱོར་ལམ་ནས་གསུངས་པའི་ཕྱིར་ཏེ། ཐེག་ཆེན་གྱི་སྦྱོར་ལམ་ཐོབ་ནས་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་མི་སྲིད་པའི་ཕྱིར་ཏེ། དེ་ཐོབ་ན་བསམ་སྦྱོར་གཉིས་ཀྱི་སྒོ་ནས་དམན་པའི་བྱང་ཆུབ་ཀྱི་ཆེད་དུ་མི་འཇུག་པས་ཁྱབ་པའི་ཕྱིར། ཕྱིར་མི་ལྡོག་པའི་དགེ་འདུན་ཡིན་ན་དེ་སྒྲུབ་ཀྱི་རྟགས་ཐོབ་པས་མ་ཁྱབ་སྟེ། ལམ་དེ་དང་དེ་ཐོབ་པ་ན། ལམ་དེ་དང་དེའི་རྟགས་ཐོབ་ན་ལམ་སྒོམ་པའི་བློའི་ནུས་པ་ལ་བཟང་ངན་གྱི་ཁྱད་པར་མེད་པར་ཐལ་བའི་ཕྱིར་རོ། །དེས་ན་ཕྱིར་མི་ལྡོག་པའི་དགེ་འདུན་ཐེག་ཆེན་གྱི་དྲོད་ཐོབ་པ་ཙམ་ནས་འཇོག་ཅིང་། དེའི་རྟགས་ཐོབ་པའི་མ་མཐའི་ས་མཚམས་དྲོད་ལ་གནས་པའི་སེམས་དཔའ་དབང་རྣོན་ནས་འཇོག་གོ །གཉིས་པ་ལ་མི་འཐད་པའི་ཕྱོགས་ལུང་རིགས་ཀྱིས་དགག འཐད་པའི་ཕྱོགས་གཞུང་ལས་བསྟན། དེ་ལྟར་བསྟན་པའི་རྟགས་ཆོས་དོན་གསུམ་ལ་དཔྱད། གནད་ཀྱི་དོན་བསྡུས་ཏེ་བསྟན་པ་དང་བཞི་ལས། དང་པོ་ལ། ཁ་ཅིག སྐབས་འདིར་སེམས་དཔའ་གསུམ་པོ་གང་རུང་ཆོས་ཅན་དུ་བྱས་ནས། ཕྱིར་མི་ལྡོག་པ་ཡིན་ཏེ་ཞེས་བསྒྲུབ་པར་བྱ་བ་མ་ཡིན་ཏེ། དེ་ལྟར་བྱས་ན་དགག་པ་རྟགས་སུ་འགྱུར་བ་ཡིན་པའི་ཕྱིར། སློབ་དཔོན་གྱི་སྐབས་འདིར་བསྟན་གྱི་གཏན་ཚིགས་ཐམས་ཅད་རྒྱུ་ཚོགས་གྲངས་ཚང་གི་རྟགས་ལས་འབྲས་བུ་འབྱུང་རུང་དུ་སྒྲུབ་པའི་རང་བཞིན་གྱི་རྟགས་སུ་གསུངས་པའི་ཕྱིར་ཏེ། འགྲེལ་ཆེན་ལས། གཟུང་བར་བྱའོ་ཞེས་པ་ནི། །ནུས་པའི་རྒྱུ་ཡིས་འབྲས་སྐྱེ་བར། །རྗེས་སུ་དཔག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་གསུངས་པའི་ཚུལ་རུང་བ་ཉིད་ཀྱི་རྗེས་སུ་དཔག་པའི་ངེས་པར་གཟུང་བར་བྱའོ་ཞེས་གསུངས་པའི་ཕྱིར། དེས་ན་སྐབས་འདིར་ཕྱིར་མི་ལྡོག་པའི་དགེ་འདུན་ཡིན་ཏེ་ཞེས་བསྒྲུབ་པར་བྱ་བ་ཡིན་ཏེ། རྩ་བ་ལས། དེ་འདིར་ཕྱིར་མི་ལྡོག་པའི་ཚོགས། །ཞེས་དང་། འགྲེལ་པ་ལས། ཕྱིར་མི་ལྡོག་པའི་དགེ་འདུན་ཡིན་ནོ་ཞེས་གསུངས་པའི་ཕྱིར། དེ་ལྟར་ན་འགྲེལ་ཆེན་ལས་གསུངས་པའི་སྦྱོར་བའི་དོན་ནི། དྲོད་ལ་གནས་པའི་སེམས་དཔའ་དབང་རྣོན་ཆོས་ཅན། ཕྱིར་མི་ལྡོག་པའི་དགེ་འདུན་ཡིན་ཏེ། གཟུགས་ལ་བདེན་ཞེན་མངོན་གྱུར་བ་ལྡོག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་སེམས་དཔའ་ཡིན་པའི་ཕྱིར། དེས་ལྷག་མ་རྣམས་ལ་རིགས་འགྲེ་ཟེར་རོ། །ཚིག་གི་སྙན་པས་དོན་ལ་སྙོགས་པར་འདོད་པ་ཁྱོད་ཉོན་ཅིག སེམས་ཀྱི་གནས་ལུགས་ནམ་མཁའི་ཆོས་ཉིད་ལ་མ་རིག་འཁྲུལ་པའི་དྲྭ་བ་ཁོ་བོས་བསལ་བར་བྱ་སྟེ། འདི་ལྟར་ངེད་ཀྱིས་དྲོད་ལ་གནས་པའི་སེམས་དཔའ་དབང་རྣོན་ཆོས་ཅན། ཐེག་ཆེན་སློབ་པའི་གང་ཟག་ཡིན་ཏེ། ཐབས་ཤེས་ཁྱད་པར་ཅན་དང་ལྡན་པའི་སེམས་དཔའ་ཡིན་པའི་ཕྱིར། ཞེས་པ་འདི་འགྲེལ་ཆེན་གྱི་སྦྱོར་བའི་དོན་ཡིན་པར་ཁས་བླངས་ན་ཅིས་འགོག ཁོ་ན་རེ། དེ་དེའི་དོན་མིན་པར་ཐལ། སྦྱོར་བ་དེའི་རྟགས་ལ་རྒྱུ་ཚོགས་གྲངས་ཚང་གི་དོན་མ་ཚང་བའི་ཕྱིར་དང་། བསྒྲུབ་བྱའི་ཆོས་ལ་འབྲས་བུ་འབྱུང་རུང་གི་དོན་མ་ཚང་བའི་ཕྱིར་ཞེ་ན། ད་གཟོད་གོ་འདུག འདོད་ན། ཁྱོད་ཀྱི་དེའང་དེའི་དོན་མིན་པར་ཐལ། དེ་དང་དེ་ལ་དེ་ཉིད་མ་ཚང་བའི་ཕྱིར། སྐྱོན་སྤོང་བྱས་ཀྱང་རྣམ་པ་ཐམས་ཅད་དུ་མཚུངས་སོ། །ཡང་ཁོ་ན་རེ། ཁྱོད་ཀྱི་སྦྱོར་བ་དེ་དེ་ལས་གསུངས་པའི་སྦྱོར་བ་དེའི་དོན་མིན་པར་ཐལ། སྐབས་འདིར་ཐེག་ཆེན་སློབ་པའི་གང་ཟག་ཏུ་སྒྲུབ་པ་སྐབས་ཀྱི་དོན་མིན་པའི་ཕྱིར་ཟེར་ན། ཁྱེད་རང་ལའང་མཚུངས་ཏེ། སྐབས་འདིར་ཕྱིར་མི་ལྡོག་པའི་དགེ་འདུན་དུ་སྒྲུབ་པ་སྐབས་ཀྱི་དོན་མིན་པའི་ཕྱིར། གཞན་ཡང་། སློབ་དཔོན་གྱི་ལུགས་ལ་གཞི་ལམ་རྣམ་གསུམ་བདེན་པའི་སྐྱེ་མེད་དུ་སྒྲུབ་པའི་གཏན་ཚིག་ཡིན་ན་གཅིག་དུ་བྲལ་གྱི་གཏན་ཚིགས་ཡིན་དགོས་པར་ཐལ། འགྲེལ་པ་ལས། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར་ཞེས་གསུངས་པའི་ཕྱིར། མ་ཁྱབ་ན། སྔར་གྱི་འགྲེལ་ཆེན་གྱི་ལུང་དོན་གྲུབ་ན། འདིར་བསྟན་ཕྱིར་མི་ལྡོག་པའི་གཏན་ཚིག་ཐམས་ཅད་རྒྱུ་ཚོགས་གྲངས་ཚང་བའི་རྟགས་ལས་འབྲས་བུ་འབྱུང་རུང་དུ་སྒྲུབ་པའི་རང་བཞིན་གྱི་གཏན་ཚིག་ཡིན་པའི་ཁྱབ་པ་ཡོད་པར་བུད་དོ། །ཁོ་ན་རེ། དེ་མི་མཚུངས་ཏེ། ཁྱོད་ཀྱི་དེ་ལ་ཁྱབ་པ་མེད་པར་ཐལ། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར་ཞེས་པའི་གཞུང་གི་དོན་ནི། གཅིག་དུ་བྲལ་གྱི་རྟགས་ལས་གཞི་ལམ་རྣམ་གསུམ་བདེན་པའི་སྐྱེ་མེད་དུ་རྟོགས་པའི་ཚད་མས་གཞི་ལམ་རྣམ་གསུམ་བདེན་པའི་སྐྱེ་མེད་དུ་ཤེས་པར་བྱའོ་ཞེས་པའི་དོན་ཡིན་པའི་ཕྱིར་ཞེས་ཟེར་རོ། །འོ་ན་ཁྱེད་ཀྱི་དེའང་ཁྱབ་པ་མེད་པར་ཐལ། འགྲེལ་ཆེན་གྱི་ལུང་གི་དོན་ནི་ཐེག་པ་གཞན་གྱིས་བར་མ་ཆོད་པར་རྫོགས་བྱང་འབྱུང་རུང་གི་རྟགས་ལས་ཐེག་ཆེན་སྦྱོར་ལམ་པ་དབང་རྣོན་རྫོགས་བྱང་ལས་ཕྱིར་མི་ལྡོག་པར་རྟོགས་པའི་ཚད་མས་དེ་རྫོགས་བྱང་ལས་ཕྱིར་མི་ལྡོག་པར་གཟུང་བར་བྱའོ་ཞེས་པའི་དོན་ཡིན་པའི་ཕྱིར། གཞན་ཡང་སྐབས་འདིར་སེམས་དཔའ་གསུམ་པོ་གང་རུང་ཆོས་ཅན་དུ་གཟུང་ནས་ཕྱིར་མི་ལྡོག་པའི་དགེ་འདུན་ཡིན་ཏེ་ཞེས་བསྒྲུབ་པར་བྱ་བ་མིན་པར་ཕྱིར་མི་ལྡོག་པ་ཡིན་ཏེ། ཞེས་བསྒྲུབ་པར་བྱ་བ་ཡིན་པར་ཐལ། རྩ་བར། ངེས་འབྱེད་ཡན་ལག་ལ་གནས་པའི། །ཕྱིར་མི་ལྡོག་པའི་མཚན་ཉིད་འདི། །ཞེས་དང་། འགྲེལ་པར་ཡང་ངེས་པར་འབྱེད་པའི་ཆ་དང་མཐུན་པ་ལ་གནས་པ་རྣམས་ཀྱི་ཕྱིར་མི་ལྡོག་པའི་མཚན་ཉིད་ཡིན་པར་ཤེས་པར་བྱའོ་ཞེས་གསུངས་པའི་ཕྱིར། འཁོར་གསུམ་གཞན་ཡང་ལུས་རྣམ་གཞག་ཏུ་སློབ་པ་ཕྱིར་མི་ལྡོག་པའི་ཚོགས་ཞེས་དང་། དེ་འདིར་ཕྱིར་མི་ལྡོག་པའི་ཚོགས། །ཞེས་དང་། འགྲེལ་པར་ཕྱིར་མི་ལྡོག་པའི་དགེ་འདུན་ཡིན་ཏེ་ཞེས་པ་ལ་བརྟེན་ནས་ཕྱིར་མི་ལྡོག་པའི་དགེ་འདུན་ཡིན་ཏེ་ཞེས་སྒྲུབ་དགོས་པར་འདོད་པ་ནི་གཞུང་གིས་བསྟན་ཚུལ་ཅུང་ཟད་ཀྱང་མ་རྟོགས་པ་ཡིན་ཏེ། ངེས་འབྱེད་ཡན་ལག་ནས་གཟུང་སྟེ། །ཞེས་པ་རྩ་འགྲེལ་འདིས། སློབ་པ་ཕྱིར་མི་ལྡོག་པའི་ཚོགས། །ཞེས་པའི་སློབ་པ་ཕྱིར་མི་ལྡོག་པའི་ཚོགས་དེ་ལམ་གྱི་ས་མཚམས་གང་ནས་འཇོག་གི་མཚན་གཞི་ཙམ་ཞིག་བསྟན་པ་ཡིན་གྱི། སྐབས་དེར་ཕྱིར་མི་ལྡོག་པའི་གཏན་ཚིགས་དངོས་སུ་མ་བསྟན་པའི་ཕྱིར། ཡང་ཁ་ཅིག དྲོད་ལ་གནས་པའི་སེམས་དཔའ་དབང་རྣོན་ཆོས་ཅན། ཕྱིར་མི་ལྡོག་པའི་སྦྱོར་ལམ་པ་ཡིན་ཏེ། དོན་མངོན་རྟོགས་ལ་གནས་པའི་སེམས་དཔའ་ཡིན་པའི་ཕྱིར་ཞེས་འགོད་པའང་མི་འཐད་པར་ཐལ། སྐབས་འདིར་ཕྱིར་མི་ལྡོག་པ་ཙམ་ཞིག་སྒྲུབ་པ་ཡིན་གྱི། ཕྱིར་མི་ལྡོག་པའི་སྦྱོར་ལམ་པ་ཡིན་པར་སྒྲུབ་པ་ཡི་གེའི་དོན་མིན་པའི་ཕྱིར། གཉིས་པ་ནི། ལུས་རྣམ་གཞག་ཏུ་རྣམ་རྫོགས་སྦྱོར་བ་མཚོན་བྱེད་ཀྱི་ཆོས་བཅུ་གཅིག་གི་ནང་དུ། སློབ་པ་ཕྱིར་མི་ལྡོག་པའི་ཚོགས། །ཞེས་ཕྱིར་མི་ལྡོག་པའི་དགེ་འདུན་གསུངས་པ་དེ་ཉིད་ལམ་གྱི་སྐབས་གང་ནས་འཇོག་ཅེ་ན། སྦྱོར་མཐོང་སྒོམ་གསུམ་ལ་གནས་པའི་སེམས་དཔའ་རྣམས་ལ་འཇོག་ཅེས་སྟོན་པ་ནི། ངེས་འབྱེད་ཡན་ལག་ནས་གཟུང་སྟེ། །ཞེས་སོགས་རྩ་འགྲེལ་གྱིས་བསྟན་ནོ། །དེས་ན་འདིར་ལུས་རྣམ་གཞག་གི་ཚོགས་ཞེས་པ་ངོས་གཟུང་བའི་སྐབས་ཡིན་པས། རྩ་བར་ཚོགས་ཞེས་དང་། འགྲེལ་པར་དགེ་འདུན་ཡིན་ནོ་ཞེས་འབྱུང་བའི་གནད་ཀྱང་འདི་ཡིན་ནོ། །འོ་ན་དེ་རྣམས་ཕྱིར་མི་ལྡོག་པའི་དགེ་འདུན་ཡིན་ན། ཕྱིར་མི་ལྡོག་པའི་གཏན་ཚིགས་གང་གིས་སྒྲུབ་ཅེ་ན། ཕྱིར་མི་ལྡོག་པ་ཙམ་གྱིས་དེའི་རྟགས་ཐོབ་པས་མ་ཁྱབ་ཅིང་། ཐོབ་པ་ལ་ནི་སྦྱོར་ལམ་པ་དབང་རྣོན་ཕྱིར་མི་ལྡོག་པར་གཏན་ཚིགས་ཉི་ཤུས་སྒྲུབ་པ་ནི། གཟུགས་ལ་སོགས་ལ་ལྡོག་སོགས་རྟགས། །ཞེས་སོགས་མདོར་བསྟན་རྒྱས་བཤད་གཉིས་ཀྱིས་བསྟན་ཏོ། །མཐོང་ལམ་པ་དེར་གཏན་ཚིགས་བཅུ་དྲུག་གི་སྒོ་ནས་སྒྲུབ་པ་ནི། མཐོང་བའི་ལམ་ལ་བཟོད་པ་དང་། །ཞེས་སོགས་མདོར་བསྟན་རྒྱས་བཤད་གཉིས་ཀྱིས་བསྟན་ཏོ། །སྒོམ་ལམ་པ་དེར་གཏན་ཚིགས་རྣམ་པ་བརྒྱད་ཀྱི་སྒོ་ནས་སྒྲུབ་པ་ནི། སྐྱེ་བ་དང་ནི་འགག་པ་དང་། །ཞེས་སོགས་ཀྱིས་བསྟན་ཏོ། །འོ་ན་གང་ཟག་དེ་རྣམས་གཏན་ཚིགས་དེ་རྣམས་ཀྱིས་ཕྱིར་མི་ལྡོག་ཏུ་སྒྲུབ་ན། རྟགས་ཆོས་དོན་གསུམ་གཞུང་གང་དང་གང་གིས་བསྟན་ཞེ་ན། སྦྱོར་ལམ་པའི་དབང་དུ་བྱས་ནས། གཟུགས་ལ་སོགས་ལ་ལྡོག་སོགས་རྟགས། །རྣམ་པ་ཉི་ཤུར་བརྗོད་པ་ཡིས། །ཞེས་པས་གཏན་ཚིགས། ངེས་འབྱེད་ཡན་ལག་ལ་གནས་པའི། །ཞེས་པས་ཆོས་ཅན། ཕྱིར་མི་ལྡོག་ཅེས་པས་བསྒྲུབ་བྱའི་ཆོས། མཚན་ཉིད་འདི་ཞེས་པས་ཁྱབ་པ་བསྟན་པ་ཡིན་ནོ། །རྒྱས་བཤད་དུ། རྟགས་ནི་ཉི་ཤུ་དེ་དག་གི །ཞེས་པས་གཏན་ཚིགས། དྲོད་དང་རྩེ་མོ་བཟོད་བཅས་དང་། །ཆོས་མཆོག་རྣམས་ལ་གནས་པ་ནི། །ཞེས་པས་ཤེས་འདོད་ཆོས་ཅན་བསྟན། རྫོགས་པའི་བྱང་ཆུབ་ལས་མི་ལྡོག །ཅེས་པས་བསྒྲུབ་བྱའི་ཆོས་བསྟན། མཐོང་ལམ་པའི་དབང་དུ་བྱས་ནས་མདོར་བསྟན་དུ། མཐོང་བའི་ལམ་ལ་བཟོད་པ་དང་། །ཤེས་པའི་སྐད་ཅིག་བཅུ་དྲུག་ནི། །ཞེས་པས་གཏན་ཚིགས། བྱང་ཆུབ་སེམས་དཔའ་ཞེས་པས་ཆོས་ཅན་དང་། མི་ལྡོག་པའི་ཞེས་པས་བསྒྲུབ་བྱའི་ཆོས། མཚན་ཉིད་ཡིན་པར་ཤེས་པར་བྱ། །ཞེས་པས་ཁྱབ་པ་བསྟན་ཏོ། །རྒྱས་བཤད་དུ། དེ་འདྲའི་སྐད་ཅིག་བཅུ་དྲུག་ནི། །ཞེས་པས་གཏན་ཚིགས། བློ་ལྡན་མཐོང་བའི་ལམ་གནས་ཀྱི། །ཞེས་པས་ཆོས་ཅན། ཕྱིར་མི་ལྡོག་པའི་ཞེས་པས་བསྒྲུབ་བྱའི་ཆོས། རྟགས་དག་ཡིན་ཞེས་པའི་ཁྱབ་པ་བསྟན་པ་ཡིན་ནོ། །སྒོམ་ལམ་པའི་དབང་དུ་བྱས་ནས། སྐྱེ་བ་དང་ནི་འགག་པ་དང་། །ཞེས་པའི་གཏན་ཚིགས། བློ་ལྡན་སྒོམ་པའི་ལམ་གནས་པའི། །ཕྱིར་མི་ལྡོག་པའི་རྟགས་དག་ཡིན། །ཞེས་པས་དངོས་སུ་བསྟན་པ་མེད་ཀྱང་དོན་གྱིས་ཐོབ་པས་ཆོས་ཅན་དང་། ཆོས་དང་། ཁྱབ་པ་གསུམ་ཀ་བསྟན་ཏོ། །འོ་ན་དངོས་སུ་མི་སྟོན་པའི་རྒྱུ་མཚན་ཅི་ཡིན་ཞེ་ན། སྦྱོར་མཐོང་གཉིས་སྟོན་པའི་གཞུང་ལས་དཔགས་ཏེ་ཤེས་ནུས་པའི་ཕྱིར་དང་། ཚིགས་བཅད་མང་ཉུང་གི་ལྷག་ཆད་སྤང་བའི་ཆེད་ཡོད་པའི་ཕྱིར། དཔེར་ན། གཞི་ཤེས་དང་རྣམ་མཁྱེན་གྱི་རྣམ་པའི་སྐབས་སུ་རྣམ་པ་ཐོག་མཐའ་གཉིས་དངོས་སུ་བསྟན་ནས། ལམ་ཤེས་ཀྱི་རྣམ་པའི་སྐབས་སུ་དངོས་སུ་མ་བསྟན་པར། རྒྱུ་དང་ལམ་དང་སྡུག་བསྔལ་དང་། །ཞེས་སོགས་གསུངས་པ་བཞིན་ནོ། །དེས་ན་བསྟན་བཅོས་རྩ་བར། སེམས་དཔའ་གསུམ་གང་རུང་ཆོས་ཅན་དུ་གཟུང་ནས་ཕྱིར་མི་ལྡོག་པར་སྒྲུབ་པ་ལ། གཏན་ཚིགས་བཞི་བཅུ་རྩ་བཞི་གང་རུང་རྟགས་སུ་འགོད་པ་ཙམ་ཞིག་དངོས་སུ་བསྟན་ཞིང་། དེའི་དགོངས་པ་སློབ་དཔོན་གྱིས་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་གྱི་རྟགས་ལས་མཉམ་གཞག་གི་རྟོགས་པ་སྔོན་སོང་དཔོག་པར་བྱེད་པ་འབྲས་བུའི་གཏན་ཚིགས། མཉམ་གཞག་གི་རྟོགས་པ་ཚང་བའི་རྟགས་ལས་ཐེག་པ་གཞན་གྱིས་བར་མ་ཆོད་པར་རྫོགས་བྱང་འབྱུང་རུང་དུ་སྒྲུབ་པའི་རང་བཞིན་གྱི་གཏན་ཚིགས། དེ་འབྱུང་རུང་གི་རྟགས་ལས་ཕྱིར་མི་ལྡོག་པར་སྒྲུབ་པ་མ་དམིགས་པའི་གཏན་ཚིགས་དང་གསུམ་གསུངས་པ་ལས། དང་པོ་ནི། དོན་གསལ་ལས། དེ་ལྟར་ན་བཟོད་དང་ཤེས་པའི་སྐད་ཅིག་མ་བཅུ་དྲུག་གིས་བསྡུས་པ་འདི་རྣམས་ཡང་དག་པར་ཐོབ་པ་ན་ཞེས་པས་བསྟན་ཏོ། །གཉིས་པ་ནི། སྔར་དྲངས་པ་ལྟར། འགྲེལ་ཆེན་ལས་རྣམ་འགྲེལ་གྱི་ལུང་དྲངས་པ་དེ་ཉིད་ཀྱིས་བསྟན། གསུམ་པ་ནི། ལུང་དེ་ཉིད་ཀྱི་འཇུག་གི་རུང་བ་ཉིད་རྗེས་སུ་དཔག་པས་གཟུང་བར་བྱའོ་ཞེས་པས་བསྟན་ཏེ། རུང་བ་ཉིད་རྟགས་སུ་བྱས་ནས་ཕྱིར་མི་ལྡོག་པར་གཟུང་བར་བསྟན་པའི་ཕྱིར་ཏེ། གཟུང་བར་བྱའོ་ཞེས་པ་ནི། མདོ་ལས་རྣམ་པ་དང་། རྟགས་དང་། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་པར་གཟུང་བར་བྱའོ་ཞེས་པའི་འགྲེལ་པ་ཡིན་པའི་ཕྱིར། མགོན་པོ་བྱམས་པ་དང་རྒྱས་སྲས་སེང་གེ་བཟང་པོ་གཉིས་ཐུགས་དགེས་པར་གྱུར་ཅིག གསུམ་པ་ལ། ཆོས་ཅན་གྱི་དོན། བསྒྲུབ་བྱའི་ཆོས་ཀྱི་དོན། གཏན་ཚིགས་ཀྱི་དོན་དང་གསུམ་ལས། དང་པོ་ལ་བྱང་སེམས་སྦྱོར་ལམ་པ་དབང་རྣོན་སོགས་གསུམ་སྟེ། གོང་དུ་བཤད་ཟིན། གཉིས་པ་ནི། གཏན་ཚིགས་བཞི་བཅུའི་མཐར་ཐུག་པའི་བསྒྲུབ་བྱའི་ཆོས་ནི་ཕྱིར་མི་ལྡོག་པ་ཡིན་པས། འདི་ལ་གང་གིས་ཕྱིར་མི་ལྡོག་པ། གང་ལས་ཕྱིར་མི་ལྡོག་པ། ཕྱིར་མི་ལྡོག་པ་དོན་བཤད་པ་དང་གསུམ་ལས། དང་པོ་ལ། ཁ་ཅིག སྤྱིར་ཕྱིར་མི་ལྡོག་པ་ལ་བསམ་པས་ཕྱིར་མི་ལྡོག་པ་དང་། སྦྱོར་བས་ཕྱིར་མི་ལྡོག་པ་གཉིས་ལས། འདིར་བསམ་པས་ཕྱིར་མི་ལྡོག་པ་ཡིན་ཏེ། ཐེག་ཆེན་གྱི་སྦྱོར་ལམ་ཐོབ་ནས་བསམ་པས་ཕྱིར་ལྡོག་པ་མི་སྲིད་དེ། དེ་ཐོབ་ནས་བསམ་པས་ཕྱིར་ལྡོག་ན་སྦྱོར་བས་ཀྱང་ཕྱིར་ལྡོག་དགོས་པའི་ཕྱིར། བསམ་པས་ཕྱིར་ལྡོག་ན་ཐེག་ཆེན་ཀུན་རྫོབ་སེམས་བསྐྱེད་རང་རྒྱུད་ལ་ཡོད་པ་གཏང་དགོས་ཤིང་། དེ་བཏང་ན་ཕྱིན་དྲུག་གི་སྤྱོད་པའང་འདོར་དགོས་པའི་ཕྱིར་ཟེར་རོ། །འོ་ན་ཐེག་ཆེན་སྦྱོར་ལམ་པ་ཡིན་ན་རང་དོན་ཡིད་བྱེད་ཀྱི་བསམ་པ་སྐྱེ་མི་སྲིད་པས་ཁྱབ་པར་ཐལ། དེ་ཡིན་ན་བསམ་པའི་སྒོ་ནས་ཕྱིར་མི་ལྡོག་པས་ཁྱབ་པའི་ཕྱིར། འདོད་ན་ཉན་ཐོས་འཕགས་པའི་རྟོགས་པ་སྔོན་དུ་སོང་བའི་ཐེག་ཆེན་སྦྱོར་ལམ་པ་དང་། དང་པོ་ཉིད་ནས་ཐེག་ཆེན་གྱི་ལམ་དུ་ཞུགས་པའི་དེ་གཉིས་ལ་རང་དོན་ཡིད་བྱེད་ཀྱི་བསམ་པ་ཡང་དང་ཡང་དུ་སྐྱེ་མི་སྐྱེའི་ཁྱད་པར་མེད་པར་ཐལ། འདོད་པ་དེའི་ཕྱིར། འདོད་ན། དེ་གཉིས་ཐེག་ཆེན་གྱི་རྟོགས་པ་ཐོབ་པ་ལ་མྱུར་མི་མྱུར་གྱི་ཁྱད་པར་མེད་པར་ཐལ། འདོད་པ་དེའི་ཕྱིར། ཁྱབ་ཅིང་། འདོད་མི་ནུས་ཏེ། རྒྱན་ལས། དེ་གཉིས་ཡང་དང་ཡང་དུ་ནི། །ཞེས་གསུངས་པའི་ཕྱིར། གཞན་ཡང་མ་དག་ས་བདུན་ལ་གནས་པའི་བྱང་སེམས་དབང་རྟུལ་གྱི་རྒྱུད་ལ་རང་དོན་ཡིད་བྱེད་ཀྱི་བསམ་པ་སྐྱེ་མི་སྲིད་པར་ཐལ། ཁས་བླངས་དེའི་ཕྱིར། འདོད་མི་ནུས་ཏེ། རྒྱུད་རྡོ་རྗེ་རྩེ་མོ་ལས། རྒྱལ་བའི་སྲས་པོས་ས་ཐོབ་ཀྱང་། །བློ་བརྟན་པ་ཉིད་མ་ཡིན་ཏེ། །ཇི་སྲིད་ས་བརྒྱད་མ་ཐོབ་པར། །དེ་སྲིད་ཐེག་པ་དམན་པས་འཇིགས། །ཞེས་གསུངས་པའི་ཕྱིར། གལ་ཏེ་ལུང་དེའི་དོན་ནི་མ་དག་ས་བདུན་གྱི་གནས་སྐབས་སུ་ཐེག་དམན་དུ་ལྟུང་བའི་འཇིགས་པ་ཡོད་པ་ལ་དགོངས་སོ་ཞེ་ན། དེའི་གནས་སྐབས་སུ་དེ་མེད་པར་ཐལ། དེའི་གནས་སྐབས་སུ་རང་དོན་ཡིད་བྱེད་ཀྱི་བསམ་པ་སྐྱེ་མི་སྲིད་པའི་ཕྱིར། རྟགས་བསལ་དངོས། དེས་ན་རང་ལུགས་ལ་སྤྱིར་ཕྱིར་མི་ལྡོག་པ་ལ་བསམ་པས་དང་སྦྱོར་བས་ཕྱིར་མི་ལྡོག་པར་བསྒྲུབ་པར་བྱ་བ་ལ་གཉིས་ལས། རྟགས་ཀྱིས་བསྒྲུབ་པར་བྱ་བ་ནི། བཀོད་ཚོད་ལ་བསམ་སྦྱོར་སོ་སོར་མ་ཕྱེ་བར་ཕྱིར་མི་ལྡོག་པ་ཙམ་བཀོད་ཅིང་། སོང་ཚོད་ལ་སྦྱོར་བའི་སྒོ་ནས་ཕྱིར་མི་ལྡོག་པར་སོང་སྟེ། གང་ཟག་འདི་རྣམས་གཏན་ཚིགས་དེ་རྣམས་ཀྱིས་གནས་སྐབས་ཐེག་དམན་ལམ་དུ་མི་འཇུག་པར་རྫོགས་བྱང་ཐོབ་པ་ཙམ་སྒྲུབ་པ་ཡིན་པའི་ཕྱིར། བསམ་པའི་སྟོབས་ཀྱིས་ཕྱིར་མི་ལྡོག་པ་ནི་འདིར་ཕྱིར་མི་ལྡོག་པའི་དོན་མིན་ཏེ། སྐབས་འདིར་མ་དག་སའི་བྱང་སེམས་དབང་རྟུལ་ཕྱིར་མི་ལྡོག་པར་བསྒྲུབ་པར་བྱ་བ་གང་ཞིག དེ་ཉིད་བསམ་པའི་སྟོབས་ཀྱིས་ཕྱིར་ལྡོག་པ་སྲིད་པའི་ཕྱིར། གཉིས་པ་ནི། སློབ་དཔོན་ཆོས་བཤེས་ཀྱིས། བྱང་ཆུབ་ཙམ་དང་། དེ་ཁྱད་པར་ཅན་དང་། འཇིག་རྟེན་ལས་འདས་པ་དང་། རྩོལ་མེད་ལས་ཕྱིར་མི་ལྡོག་པ་བཞི་གསུངས་ཀྱང་། སྐབས་འདིར་གཉིས་པ་དེ་གཟུང་བར་བྱ་བ་ཡིན་ནོ། །གསུམ་པ་ལ། དགག་གཞག་གཉིས་ལས། དང་པོ་ལ་ཁ་ཅིག འདིར་བསྟན་ཕྱིར་མི་ལྡོག་པའི་དོན་ནི། ད་ལྟ་ཐེག་ཆེན་གྱི་བསམ་སྦྱོར་ཕུན་སུམ་ཚོགས་པ་ལ་གནས་བཞིན་པ་ཡིན་པ་ལ། ཐེག་དམན་གྱི་བསམ་སྦྱོར་སྐད་ཅིག་གིས་ཀྱང་བར་མ་ཆོད་པར་སངས་རྒྱ་བ་ཡིན་ཞིང་། དེའི་ལྡོག་ཕྱོགས་ལ། བསམ་པས་དང་། སྦྱོར་བས་ཕྱིར་ལྡོག་པ་གཉིས་ལས། སྔ་མ་ནི་ད་ལྟ་རང་ཉིད་ཐེག་ཆེན་གྱི་བསམ་པ་ཕུན་སུམ་ཚོགས་པ་ལ་གནས་བཞིན་པ་ཡིན་པ་ལ། ཐེག་དམན་གྱི་བསམ་པས་བར་དུ་ཆོད་པ་དང་། ད་ལྟ་རང་ཉིད་ཐེག་ཆེན་གྱི་སྦྱོར་བ་ཕུན་སུམ་ཚོགས་པ་ལ་གནས་བཞིན་པ་ཡིན་པ་ལ། ཐེག་དམན་གྱི་ལམ་དུ་འཇུག་སྲིད་པ་ལྟ་བུའོ། །དེའང་སྐབས་འདིར་ནི་བསམ་པས་ཕྱིར་མི་ལྡོག་པར་སྒྲུབ་པ་ཡིན་གྱི། སྦྱོར་བའི་སྒོ་ནས་ནི་མིན་ཏེ། ཐེག་ཆེན་སྦྱོར་ལམ་པ་ཡིན་ན་སྦྱོར་བའི་སྒོ་ནས་ཕྱིར་མི་ལྡོག་པས་ཁྱབ་པ་གང་ཞིག འདིར་བསྟན་ནི་ཕྱིར་ལྡོག་པ་དེ་ས་བདུན་པ་མན་ཆད་དུ་འགྲོ་བའི་ཕྱིར་ཞེ་ན། རྟགས་ཕྱི་མ་དེ་མིན་པར་ཐལ། ཐེག་ཆེན་གྱི་སྦྱོར་ལམ་ཐོབ་པའི་བྱང་སེམས་ཡིན་ན་འདིར་བསྟན་ཕྱིར་མི་ལྡོག་པ་དེ་ཡིན་དགོས་པའི་ཕྱིར། མ་གྲུབ་ན། དེར་ཐལ། དེ་ཡིན་ན་ད་ལྟ་རང་ཉིད་ཐེག་ཆེན་གྱི་བསམ་སྦྱོར་ཕུན་སུམ་ཚོགས་པ་ལ་གནས་བཞིན་པ་ཡིན་པ་ལ། ཐེག་དམན་གྱི་བསམ་སྦྱོར་སྐད་ཅིག་གིས་ཀྱང་བར་མ་ཆོད་པར་སངས་རྒྱ་བས་ཁྱབ་པའི་ཕྱིར། ཁྱབ་པ་ཕྱིར་མི་ལྡོག་པའི་དོན་ངོས་འཛིན་ལ་སོང་། མ་གྲུབ་ན། དེར་ཐལ། དེ་ཡིན་ན་སྦྱོར་བའི་སྒོ་ནས་ཕྱིར་མི་ལྡོག་པས་ཁྱབ་པའི་ཕྱིར། དེ་ལ་ཁོ་ན་རེ། མ་ཁྱབ་སྟེ། དེ་ཐོབ་ནས་རང་དོན་ཡིད་བྱེད་ཀྱི་བསམ་པས་བར་དུ་ཆོད་པ་སྲིད་པའི་ཕྱིར་ཞེ་ན། ཐེག་ཆེན་སྦྱོར་ལམ་པ་ཡིན་ན་བསམ་སྦྱོར་གཉིས་ཀྱི་སྒོ་ནས་ཕྱིར་མི་ལྡོག་པས་མ་ཁྱབ་པར་ཐལ། བསམ་པའི་སྟོབས་ཀྱིས་ཕྱིར་ལྡོག་པའི་བྱང་སེམས་སྦྱོར་ལམ་པ་ཡོད་པའི་ཕྱིར། རྟགས་ཁྱབ་ཁས། འདོད་པར་མི་ནུས་ཏེ། བསམ་སྦྱོར་གཉིས་ཀས་ཕྱིར་ལྡོག་པའི་བྱང་སེམས་སྦྱོར་ལམ་པ་མེད་པའི་ཕྱིར། གཉིས་པ་ནི། རྟགས་ཀྱིས་བསྒྲུབ་པར་བྱ་བ་མིན་པའམ་ཡིན་ཀྱང་རུང་སྟེ། དེ་འདིར་ཕྱིར་མི་ལྡོག་པའི་ཚོགས། །ཞེས་པའི་སྐབས་ཀྱི་ཕྱིར་མི་ལྡོག་པ་ནི་བསམ་སྦྱོར་གཉིས་ཀྱིས་དམན་པའི་བྱང་ཆུབ་ཀྱི་ཆེད་དུ་མི་འཇུག་པ་སྟེ། གཙོ་བོ་ནི་སྦྱོར་བས་ཕྱིར་མི་ལྡོག་པ་ཡིན་ནོ། །གསུམ་པ་རྟགས་ཀྱི་དོན་ལ་དཔྱད་པ་ལ། ཁ་ཅིག སྤྱིར་མཉམ་གཞག་དང་རྗེས་ཐོབ་གཉིས་ཡོད་པ་ལས། སྔ་མ་ཕྱིར་མི་ལྡོག་པའི་རྟགས་སུ་འགྱུར་བ་མི་སྲིད་དེ། དེ་ལྟ་མིན་ན་རྣལ་འབྱོར་པའི་རྒྱུད་ལ་སོ་སོ་རང་གི་རིག་པའི་སྐད་ཅིག་མ་རྣམས་ཇི་ལྟར་གཞན་ཡིད་ཆེས་པར་བྱེད་པའི་མཚན་ཉིད་དག་ཡིན་ཞེས་ཆེད་དུ་གཏད་པའི་དགག་པ་འབྱུང་བའི་ཕྱིར། རྗེས་ཐོབ་ཀྱི་མཁྱེན་པ་རྣམས་ཀྱང་གཞན་ངོར་གཏན་ཚིགས་སུ་འགྱུར་བ་མི་སྲིད་དེ། མཉམ་གཞག་གི་རྟོགས་པ་དང་རྒྱུ་མཚན་མཚུངས་པའི་ཕྱིར་ཏེ། ཐམས་ཅད་དུ་རྟོགས་པ་དང་། མཐུན་པ་ཁོ་ན་ཞེས་གསུངས་པའི་ཕྱིར། དེས་ན་རྗེས་ཐོབ་ལུས་ངག་གི་སྤྱོད་པ་ཁོ་ན་གཏན་ཚིགས་སུ་འགྱུར་བ་ཡིན་ཏེ། དེ་མཉམ་གཞག་གི་རྟོགས་པ་ལ་མི་འཁྲུལ་དེ་རྫོགས་བྱང་ལས་ཕྱིར་མི་ལྡོག་པ་ལ་མི་འཁྲུལ་བ་ཡིན་པའི་ཕྱིར། འོ་ན་དྲོད་ཀྱི་རྟགས་བཅུ་གཅིག རྩེ་མོའི་རྟགས་དྲུག་ལ་སོགས་པ་རྣམས་ཕྱོགས་གཅིག་ཏུ་སྡོམ་པ་གཏན་ཚིགས་སུ་འགྱུར་བ་ཡིན་ནམ། རེ་རེ་བ་དེར་འགྱུར་བ་ཡིན་ཟེར་ན། སྔ་མ་ཡིན་གྱི་ཕྱི་མ་མིན་ཏེ། ཉན་ཐོས་དགྲ་བཅོམ་པ་ལའང་ཐེ་ཚོམ་ཟད་པ་དང་། མི་དལ་ཟད་པ་དང་། རྟག་ཏུ་ཚངས་པར་སྤྱོད་པ་དང་། འཚོ་བ་རྣམ་པར་དག་པ་སོགས་ཡོད་པའི་ཕྱིར་ཟེར་ན། འོ་ན་རྗེས་ཐོབ་ལུས་ངག་གི་སྤྱོད་པའི་རྟགས་ལས་མཉམ་གཞག་གི་རྟོགས་པ་དཔོག མཉམ་གཞག་གི་རྟོགས་པའི་རྟགས་ལས་རྫོགས་བྱང་ལས་ཕྱིར་མི་ལྡོག་པར་དཔོག་པ་ཞིག་མེད་པར་ཐལ། མཉམ་གཞག་གཞན་ངོར་གཏན་ཚིགས་སུ་འགྱུར་བ་ཞིག་མེད་པའི་ཕྱིར། འདོད་མི་ནུས་ཏེ། བྱང་སེམས་མཐོང་ལམ་པས་རྗེས་ཐོབ་ལུས་ངག་གི་སྤྱོད་པའི་རྟགས་ལས་རང་ལས་རྟོགས་པ་དམའ་བའི་གང་ཟག་གིས་ཐེག་ཆེན་གྱི་མཐོང་ལམ་མཉམ་གཞག་དཔོག་པ་ཡོད་པ་གང་ཞིག དེ་རང་ལས་རྟོགས་པ་དམའ་བའི་གང་ཟག་གི་རྒྱུད་ལ་ཐེག་ཆེན་གྱི་མཐོང་ལམ་མཉམ་གཞག་རྟོགས་པའི་ཚད་མ་ཡོད་པའི་ཕྱིར་ཏེ། དེའི་རྟགས་ལས་གང་ཟག་དེའི་རྒྱུད་ལ་ཐེག་ཆེན་མཐོང་ལམ་པ་རྫོགས་བྱང་ལས་ཕྱིར་མི་ལྡོག་པར་རྟོགས་པ་ཡོད་དགོས་པའི་ཕྱིར། གཞན་ཡང་གཟུགས་སོགས་ཀྱི་འདུ་ཤེས་ལྡོག་པ་སོགས་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་ཐེག་ཆེན་མཐོང་ལམ་པ་རྫོགས་བྱང་ལས་ཕྱིར་མི་ལྡོག་པར་ངེས། མཉམ་གཞག་ལ་གནས་པའི་ཐེག་ཆེན་མཐོང་ལམ་པ་ཕྱིར་ལྡོག་མི་ལྡོག་ཐེ་ཚོམ་ཟ་བའི་གང་ཟག་ཅིག་སྲིད་པར་ཐལ། ཐེག་ཆེན་མཐོང་ལམ་པ་དབང་འབྲིང་རྫོགས་བྱང་ལས་ཕྱིར་མི་ལྡོག་ཏུ་སྒྲུབ་པའི་གཏན་ཚིགས་ཡིན་ན་རྗེས་ཐོབ་ལུས་ངག་གི་སྤྱོད་པ་ཡིན་དགོས་པའི་ཕྱིར། རྟགས་ཁས། དྲོད་ཀྱི་རྟགས་བཅུ་གཅིག་པོ་ཕྱོགས་གཅིག་ཏུ་སྡོམ་པ་དྲོད་ལ་གནས་པའི་སེམས་དཔའ་དབང་རྣོན་རྫོགས་བྱང་ལས་ཕྱིར་མི་ལྡོག་ཏུ་སྒྲུབ་པའི་རྟགས་མིན་པར་ཐལ། བྱང་སེམས་སྦྱོར་ལམ་པ་རང་ལས་རྟོགས་པ་དམའ་བའི་གང་ཟག་གིས་དྲོད་ཀྱི་རྟགས་བཅུ་གཅིག་པོ་དེ་ཅིག་ཅར་དུ་རྟོགས་པར་མི་སྲིད་པའི་ཕྱིར། རེ་རེ་བ་གཏན་ཚིགས་སུ་མི་འགྱུར་བའི་སྒྲུབ་བྱེད་ཀྱང་མ་ངེས་ཏེ། ཁྱེད་རང་ལྟར་རྗེས་ཐོབ་ལུས་ངག་གི་སྤྱོད་པ་དེ་དེ་ལྟར་སྒྲུབ་པའི་གཏན་ཚིགས་མིན་པར་ཐལ། ཉན་ཐོས་དགྲ་བཅོམ་པའི་ཡང་རྗེས་ཐོབ་ལུས་ངག་གི་སྤྱོད་པ་ཡོད་པའི་ཕྱིར། ཁོ་ན་རེ། འདོད་དེ། རྫོགས་བྱང་ལས་ཕྱིར་མི་ལྡོག་པར་སྒྲུབ་ནུས་ཀྱི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་གཏན་ཚིགས་སུ་དགོས་པའི་ཕྱིར་ཞེ་ན། འོ་ན་ཐེ་ཚོམ་ཟད་པ་སོགས་རེ་རེ་བ་གཏན་ཚིགས་མིན་པར་ཡང་འདོད་དེ། དེ་ལྟར་སྒྲུབ་ནུས་པའི་ཐེ་ཚོམ་ཟད་པ་དང་། མི་དལ་ཟད་པ་སོགས་ཀྱི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་རྟགས་སུ་འགོད་དགོས་པའི་ཕྱིར། གཞན་ཡང་སེན་མོ་སྣུམ་པ་དེ་ཐུབ་པའི་དཔེ་བྱད་བཟང་པོ་མིན་པར་ཐལ། སོ་སོ་སྐྱེ་བོ་ལའང་དེ་འདྲ་ཡོད་པའི་ཕྱིར། ཁྱབ་པ་ཁས། འདོད་ན། སྔ་མ་ལ་ཡང་འདོད་བྱས་པས། ཁོ་ན་རེ། ཐེ་ཚོམ་ཟད་པ་དང་། མི་དལ་ཟད་པ་དེ་དེ་ལྟར་སྒྲུབ་པའི་གཏན་ཚིགས་ཡིན་པར་ཐལ། དྲོད་ཀྱི་རྟགས་བཅུ་གཅིག་པོ་རེ་རེ་བཞིན་དུ་དེ་སྒྲུབ་ཀྱི་གཏན་ཚིགས་ཡིན་པའི་ཕྱིར་ཟེར་ན། འོ་ན་དེའང་དེར་ཐལ། ཐུབ་པའི་དཔེ་བྱད་བཟང་པོ་རེ་རེ་བཞིན་དུ་ཐུབ་པའི་དཔེ་བྱད་བཟང་པོ་ཡིན་པའི་ཕྱིར་ཏེ། རང་ལུགས་ནི་ད་ལྟ་ཉིད་དུ་འབྱུང་ངོ་། །བཞི་པ་ནི། འདིར་རྟགས་བཞི་བཅུ་ཞེ་བཞི་པོ་ཐམས་ཅད་མཉམ་གཞག་དང་རྗེས་ཐོབ་ཀྱི་སྤྱོད་པ་གང་ཡིན། སྔར་གྱི་གཏན་ཚིགས་གསུམ་རྒྱུད་ལ་ཇི་ལྟར་འགོད་ཅེ་ན། རྩ་བའི་དངོས་བསྟན་གྱི་གཏན་ཚིགས་འགའ་ཞིག་མཉམ་གཞག་ཡིན་པའང་ཡོད་ལ། འགའ་ཞིག་རྗེས་ཐོབ་ལུས་ངག་གི་སྤྱོད་པ་ཡིན་པའང་ཡོད་དེ། གོས་ལ་སོགས་པ་གཙང་བ་དང་། །ཞེས་པ་ལྟ་བུའོ། །དེ་ལ་མཉམ་གཞག་དངོས་སུ་བསྟན་པ་རྣམས་ལ་རྗེས་ཐོབ་ཀྱི་སྤྱོད་པ་རེ་རེ་ཁ་སྐོང་ཞིང་། རྗེས་ཐོབ་ཀྱི་སྤྱོད་པ་དངོས་སུ་བསྟན་པ་རྣམས་ལ་སྙིང་རྗེ་ཆེན་པོས་ཟིན་པའི་སྒོམ་བྱུང་གཙོ་བོར་གྱུར་པའི་མཉམ་གཞག་རེ་རེ་ཁ་བསྐང་སྟེ། དེ་ལའང་རྗེས་ཐོབ་ལུས་ངག་གི་སྤྱོད་པའི་རྟགས་ལས། མཉམ་གཞག་གི་རྟོགས་པ་དཔོག་པའི་འབྲས་རྟགས་དང་། དེའི་རྟགས་ལས་རྫོགས་བྱང་འབྱུང་རུང་དུ་སྒྲུབ་པའི་རང་བཞིན་གྱི་གཏན་ཚིགས། དེའི་རྟགས་ལས་ཕྱིར་མི་ལྡོག་པར་དཔོག་པའི་མ་དམིགས་པའི་གཏན་ཚིགས་གསུམ་གསུམ་དུ་འགྱུར་ཏེ། དེའང་དཔེར་མཚོན་ན། དྲོད་རྗེས་ཐོབ་ལ་གནས་པའི་བྱང་སེམས་དབང་རྣོན་ཆོས་ཅན། སྙིང་རྗེ་ཆེན་པོས་ཟིན་པའི་སྒོམ་བྱུང་གཙོ་བོར་གྱུར་པའི་སྒོ་ནས་གཟུགས་སོགས་ལ་ཞེན་སྤྱོད་མངོན་འགྱུར་བ་ལྡོག་པའི་མཉམ་གཞག་གི་རྟོགས་པ་སྔོན་དུ་སོང་བ་ཡིན་ཏེ། དེ་ལྟར་ལྡོག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་སེམས་དཔའ་ཡིན་པའི་ཕྱིར་ཞེས་པའི་འབྲས་རྟགས་བཀོད་ནས། དེ་གྲུབ་པའི་ཚེ། དེ་ཆོས་ཅན། ཐེག་པ་གཞན་གྱིས་བར་མ་ཆོད་པར་སངས་རྒྱས་ཀྱི་ཡེ་ཤེས་འབྱུང་རུང་ཡིན་ཏེ། དེ་ལྟ་བུའི་མཉམ་གཞག་ཚང་བའི་སེམས་དཔའ་ཡིན་པའི་ཕྱིར་ཞེས་པའི་རང་བཞིན་གྱི་གཏན་ཚིགས་བཀོད་ནས། དེ་གྲུབ་པའི་ཚེ། དེ་ཆོས་ཅན། གནས་སྐབས་རྫོགས་བྱང་ལས་ཕྱིར་མི་ལྡོག་པ་ཡིན་ཏེ། དེ་འབྱུང་རུང་གི་སེམས་དཔའ་ཡིན་པའི་ཕྱིར་ཞེས་མ་དམིགས་པའི་གཏན་ཚིགས་འགོད་དོ། །དེས་ན་གཏན་ཚིགས་བཞི་བཅུ་ཞེ་བཞི་ལ། འབྲས་རང་མ་དམིགས་པའི་རྟགས་གསུམ་གསུམ་ཡོད་པས་བསྒྲུབ་བྱ་མཐར་ཐུག་པ་ནི་གནས་སྐབས་རྫོགས་བྱང་ལས་ཕྱིར་མི་ལྡོག་པ་ཡིན་ལ། སྒྲུབ་བྱེད་མཐར་ཐུག་པ་ནི་རྗེས་ཐོབ་ལུས་ངག་གི་སྤྱོད་པ་ཡིན་ཏེ། རང་ལས་རྟོགས་པ་དམའ་བའི་གང་ཟག་གཞན་གྱིས་ཕྱིར་མི་ལྡོག་པར་རྟོགས་དགོས་པའི་ཕྱིར། ཞེས་པ་འདི་ནི་གཞུང་གི་དགོངས་པ་བླ་ན་མེད་པའོ། །དབང་སོགས་བཅས་པ་ཡི། །ཞེས་པའི་སྐབས་སུ། ངག་དོན་ལ་དཔྱད་པ་དང་། ཞེན་པ་འགོག་ཚུལ་ལ་དཔྱད་པ་དང་གཉིས་ལས། དང་པོ་ལ། ཁ་ཅིག་ན་རེ། ཐེག་ཆེན་གྱི་མཐོང་ལམ་འགོག་པ་རྗེས་ཤེས་ལ་གནས་པའི་སེམས་དཔའ་དབང་འབྲིང་ཆོས་ཅན། གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པ་ཡིན་ཏེ། སྤང་གཉེན་གྱི་གཡུལ་འགྱེད་པ་དང་། གྲོང་གི་སྒྲས་བསྟན་པའི་དབང་པོ་དང་། གྲོང་ཁྱེར་གྱི་སྒྲས་བསྟན་པའི་དབང་རྟེན་དང་། གྲོང་རྡལ་གྱི་སྒྲས་བསྟན་པའི་དབང་ཡུལ་དང་། བདག་གི་སྒྲས་བསྟན་པའི་རྣམ་པར་ཤེས་པ་རྣམས་ལ་སྦྱོར་བ་དང་། རྗེས་སུ་སྦྱོར་བའི་གནས་པ་སོ་སོར་བཀག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་སེམས་དཔའ་ཡིན་པའི་ཕྱིར་ཟེར་བ་མི་འཐད་དེ། དེ་ཆོས་ཅན། རྟགས་དེ་མིན་པར་ཐལ། མཉམ་གཞག་ལ་གནས་པའི་སློབ་པ་ཡིན་པའི་ཕྱིར། མ་གྲུབ་ན། དེ་དེར་ཐལ། ཐེག་ཆེན་གྱི་མཐོང་ལམ་འགོག་པ་རྗེས་ཤེས་ཡིན་ན་མཉམ་གཞག་ཡིན་པས་ཁྱབ་པའི་ཕྱིར། གཞན་ཡང་། ཐེག་ཆེན་གྱི་མཐོང་ལམ་ཤེས་པ་བརྒྱད་པོ་གང་རུང་གི་འབྲས་བུར་གྱུར་པའི་རྗེས་ཐོབ་ལུས་ངག་གི་སྤྱོད་པ་གང་རུང་ཅིག་དང་ལྡན་ན། དེ་བརྒྱད་ཆར་དང་ལྡན་པས་ཁྱབ་པར་ཐལ། དེ་ལྟ་བུའི་སེམས་དཔའ་དབང་འབྲིང་དེ་ཐེག་ཆེན་གྱི་མཐོང་ལམ་འགོག་པ་རྗེས་ཤེས་ཀྱི་འབྲས་བུར་གྱུར་པའི་རྗེས་ཐོབ་ལུས་ངག་གི་སྤྱོད་པ་དེ་དང་ལྡན་པ་གང་ཞིག དེ་ལྟ་བུའི་སེམས་དཔའ་དེ་ཐེག་ཆེན་གྱི་མཐོང་ལམ་ཤེས་པ་བརྒྱད་ཆར་ལ་གནས་པ་ཡིན་པའི་ཕྱིར། རྟགས་ཕྱི་མ་ཁས་བླངས་ཏེ། ཤེས་པ་བརྒྱད་ཆར་ངོ་བོ་གཅིག་ལ་ལྡོག་པའི་སྒོ་ནས་ཕྱེ་བའི་ཕྱིར། གཉིས་པ་ལ། གང་ལ་ཞེན་པ་འགོག་པའི་ཡུལ་ངོས་གཟུང་བ་དང་། དེ་ལ་ཞེན་པ་ཇི་ལྟར་འགོག་པའི་ཚུལ་གཉིས། དང་པོ་ལ་ཡུལ་སྤྱིར་བསྟན་པ་དང་། དབང་པོ་བྱེ་བྲག་ཏུ་བཤད་པ་གཉིས་ལས། དང་པོ་ནི། འདིར་ཞེན་པ་འགོག་པའི་ཡུལ་ནི། མདོ་ལས། གྲོང་དང་གྲོང་ཁྱེར་དང་གྲོང་རྡལ་དང་བདག་དང་བཞི་གསུང་ཤིང་། གྲོང་གི་སྒྲས་དབང་པོ་བསྟན་ཏེ། གྲོང་སྐྱེ་བོའི་རྟེན་ཡིན་པ་བཞིན་དུ་དབང་པོས་ཀྱང་དབང་ཤེས་ཀྱི་རྟེན་བྱེད་པའི་ཕྱིར། གྲོང་ཁྱེར་གྱི་སྒྲས་དབང་རྟེན་འབྱུང་བ་བསྟན་ཏེ། གྲོང་ཁྱེར་གྲོང་གི་རྟེན་ཡིན་པ་བཞིན་དུ་དེ་དག་ཀྱང་གྲོང་དང་འདྲ་བའི་དབང་པོའི་རྟེན་བྱེད་པའི་ཕྱིར། གྲོང་རྡལ་གྱི་སྒྲས་དབང་ཡུལ་བསྟན་ཏེ། ཚོང་འདུས་ཀྱི་གནས་ན་གྲོང་རྡལ་ཞེས་བརྗོད་ལ། དེར་སྐྱེས་བུའི་འཇུག་ལྡོག་བྱ་བ་ཡིན་པ་ལྟར་དུ་ཡུལ་རྣམས་ཀྱང་རྣམ་པར་ཤེས་པས་འཇུག་པར་བྱ་བ་ཡིན་པའི་ཕྱིར། བདག་གི་སྒྲས་རྣམ་པར་ཤེས་པ་བསྟན་ཏེ། ཡུལ་ལ་ལོངས་སྤྱོད་པ་པོ་ཡིན་པའི་ཕྱིར། གཉིས་པ་ལ་དབྱེ་བ། སྒྲ་དོན། གྲངས་ངེས། སོ་སོའི་ངོ་བོ་དང་བཞི་ལས། དང་པོ་ནི། དབང་པོ་ཉི་ཤུ་རྩ་གཉིས་ཡོད་དེ། ཀུན་ནས་ཉོན་མོངས་ཀྱི་དབང་པོ་ལ་མིག་སོགས་དབང་པོ་དྲུག ཕོ་མོའི་དབང་པོ་གཉིས། ཚོར་བ་སྡུག་བསྔལ་བདེ་བ་ཡིད་བདེ་མི་བདེ་བཏང་སྙོམས་ཏེ་ཚོར་བའི་དབང་པོ་ལྔ། སྲོག་གི་དབང་པོ་སྟེ་བཅུ་བཞིར་ཡོད། རྣམ་བྱང་གི་དབང་པོ་ལ་དད་སོགས་དབང་པོ་ལྔ། མི་ཤེས་པ་ཀུན་ནས་ཤེས་པར་བྱེད་པའི་དབང་པོ། ཀུན་ཤེས་པའི་དབང་པོ། ཀུན་ཤེས་ལྡན་པའི་དབང་པོ་སྟེ་བརྒྱད་རྣམས་སུ་ཡོད་པའི་ཕྱིར། གཉིས་པ་ནི། ལྷག་པར་དབང་བྱེད་པའི་དོན་གྱིས་ན་དབང་པོ་ཞེས་བྱ་སྟེ། གང་གིས་གང་ལ་དབང་བྱེད་ཅེ་ན། མིག་སོགས་དབང་པོ་ལྔ་ནི་གཟུགས་སོགས་རང་རང་གི་དོན་ལ་དམིགས་པར་དབང་བྱེད། ཡིད་ནི་དོན་སྤྱི་ལ་དམིགས་པར་དབང་བྱེད། ཕོའི་དབང་པོ་ནི་ང་རོ་གསང་མཐོ་བ་སོགས་ཕོའི་རང་བཞིན་ལ་དབང་བྱེད། མོའི་དབང་པོ་ནི་ང་རོ་གསང་དམའ་བ་སོགས་མོའི་རང་བཞིན་ལ་དབང་བྱེད། སྲོག་གི་དབང་པོས་ནི་རིས་མཐུན་དུ་གནས་པ་ལ་དབང་བྱེད། ཚོར་བའི་དབང་པོ་ལྔས་ནི་ཀུན་ནས་ཉོན་མོངས་ལ་དབང་བྱེད། དད་སོགས་དབང་པོ་ལྔས་ནི་རྣམ་པར་བྱང་བ་ལ་དབང་བྱེད། མི་ཤེས་པ་ཀུན་ཤེས་པའི་དབང་པོས་ནི་ཀུན་ཤེས་པའི་དབང་པོ་ཐོབ་པ་ལ་དབང་བྱེད། དེས་ཀུན་ཤེས་ལྡན་པའི་དབང་པོ་ཐོབ་པ་ལ་དབང་བྱེད། དེས་ནི་མྱང་འདས་ཐོབ་པ་ལ་དབང་བྱེད། དེས་ན་དབང་པོ་ཞེས་བྱའོ། །གསུམ་པ་ནི་ཅིའི་ཕྱིར་དབང་པོ་ཉེར་གཉིས་སུ་ངེས་ཤེས་ན། འཁོར་བར་འཇུག་པའི་ཕྱོགས་ལ་དང་པོ་བཅུ་བཞིར་ངེས་ཏེ། དེར་འཇུག་པའི་རྟེན་ལ་མིག་སོགས་དབང་པོ་དྲུག དེར་སྐྱེ་བར་བྱེད་པ་ལ་ཕོ་མོའི་དབང་པོ་གཉིས། སྐྱེས་ཟིན་ནས་གནས་པར་བྱེད་པ་ལ་སྲོག་གི་དབང་པོ། གནས་པ་ཡུལ་ཉེ་བར་ལོངས་སྤྱོད་པ་ལ་ཚོར་བའི་དབང་པོ་ལྔར་ངེས་པའི་ཕྱིར། འཁོར་བ་ལས་ལོག་ནས་མྱང་འདས་ལ་འཇུག་པའི་ཕྱོགས་ལ་རྣམ་བྱང་གི་དབང་པོ་བརྒྱད་དུ་ངེས་ཏེ། དེ་ལ་འཇུག་པའི་རྟེན་གྱི་དབང་དུ་བྱས་ཏེ་དད་སོགས་དབང་པོ་ལྔ། དེར་སྐྱེ་བ་ལ་མི་ཤེས་པ་ཀུན་ཤེས་པའི་དབང་པོ། རྒྱུན་གནས་པར་བྱེད་པ་ལ་ཀུན་ཤེས་པའི་དབང་པོ། རྣམ་གྲོལ་གྱི་བདེ་བ་ལ་ཉེ་བར་ལོངས་སྤྱོད་པའི་དབང་དུ་བྱས་ནས་ཀུན་ཤེས་ལྡན་པའི་དབང་པོ་རྣམས་སུ་ངེས་པའི་ཕྱིར། བཞི་པ་ལ་དགག་གཞག་གཉིས་ལས། དང་པོ་ལ་ཁ་ཅིག རང་གི་བདག་འབྲས་མིག་གི་རྣམ་པར་ཤེས་པ་སྐྱེད་པར་བྱེད་པའི་ནང་གིས་རྡུལ་ཕྲན་དྭངས་པ་དེ་མིག་དབང་གི་མཚན་ཉིད་ཡིན། དེས་ལུས་དབང་གི་བར་དུ་འགྲེ་ཞེ་ན། མིག་དབང་ཡིན་ན་རྟེན་བཅས་ཀྱི་མིག་དབང་ཡིན་དགོས་པར་ཐལ། དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། ཡིད་དབང་གི་སྐབས་སུ། ཁ་ཅིག ཀུན་གཞི་ཁས་མི་ལེན་པའི་དབང་དུ་བྱས་ནས་ཡིད་དང་གཙོ་བོ་སེམས་དང་རྣམ་པར་ཤེས་པ་རྣམས་དོན་གཅིག་སྟེ། མཛོད་ལས། སེམས་དང་ཡིད་དང་རྣམ་ཤེས་རྣམས་དོན་གཅིག །ཅེས་གསུངས་པའི་ཕྱིར་རོ། །དེས་ན་ཡིད་ཡིན་ན་ཡིད་དབང་ཡིན་པས་ཁྱབ་ཅིང་། ཡིད་དབང་གི་མཚན་ཉིད་འཇུག་པའི་རྣམ་པར་ཤེས་པ་གང་ཞིག རང་གི་བདག་འབྲས་སུ་གྱུར་པའི་རྣམ་པར་ཤེས་པ་སྐྱེད་བྱེད་ཟེར་རོ། །འོ་ན་རྟེན་བཅས་དང་མཚུངས་ལྡན་དོན་གཅིག་པར་ཐལ། མཛོད་ལས། རྟེན་དང་དམིགས་པ་རྣམ་བཅས་ཏེ། །མཚུངས་པར་ལྡན་པ་ཞེས་བཤད་པའི་ཕྱིར། ཁྱབ་པ་ཁས། འདོད་ན། རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། མཚུངས་ལྡན་དུ་ཐལ། རྟེན་བཅས་ཡིན་པའི་ཕྱིར། ཁྱབ་པ་དངོས། གཞན་ཡང་། རང་གི་རྒྱུན་འགག་ཁ་མའི་ཡིད་ཀྱི་རྣམ་པར་ཤེས་པ་ཆོས་ཅན། ཡིད་དབང་གི་མཚན་ཉིད་ཕྱི་ཟུར་དེར་ཐལ། མཚོན་བྱ་དེའི་ཕྱིར། རྟགས་ཁས་བླངས་ཏེ། ཡིད་ཡིན་པའི་ཕྱིར་ཏེ། གཙོ་བོ་སེམས་ཡིན་པའི་ཕྱིར་ཏེ། རྣམ་པར་ཤེས་པ་ཡིན་པའི་ཕྱིར། མ་གྲུབ་ན། དེ་དེར་ཐལ། དེ་འདྲ་ཡོད་པའི་ཕྱིར་ཏེ། མཛོད་ལས། འདུ་ཤེས་མེད་པ་བ་འདུ་ཤེས། །མེད་པར་སེམས་དང་སེམས་བྱུང་རྣམས། །འགོག་པའོ། །ཞེས་བཤད་པའི་ཕྱིར། ཁྱབ་པ་ཁས། ཁ་ཅིག ཀུན་གཞིའི་རྣམ་ཤེས་ཁས་ལེན་པའི་དབང་དུ་བྱས་ནས་ཡིད་དབང་ལ་ཡིད་དབང་དོན་དམ་པ་དང་། དེ་ཀུན་རྫོབ་པ་གཉིས། སྔ་མ་ནི་ཉོན་ཡིད་དང་། ཕྱི་མ་ནི་འཇུག་ཤེས་དྲུག་དང་། ཀུན་གཞིའི་རྣམ་ཤེས་ཡིན་ནོ། །དེས་ན་ཡིད་ཡིན་ན་ཡིད་དབང་ཡིན་པས་མ་ཁྱབ་སྟེ། ཡིད་དབང་ཀུན་རྫོབ་པ་བདུན་པོ་དེ་ཡིད་ཡིན་ཀྱང་ཡིད་དབང་མིན་པའི་ཕྱིར། དེ་རྣམས་ཆོས་ཅན། ཡིད་ཡིན་ཏེ། ཡིད་ཀྱི་སྐྱེ་མཆེད་ཡིན་པའི་ཕྱིར་ཟེར་རོ། །འོ་ན་མིག་གི་སྐྱེ་མཆེད་ཡིན་ན་ཡིད་ཡིན་པས་ཁྱབ་པ་ཡོད་པར་ཐལ། ཡིད་ཀྱི་སྐྱེ་མཆེད་ཡིན་ན་ཡིད་ཡིན་པས་ཁྱབ་པའི་ཕྱིར། འདོད་ན། ཡིད་ཀྱི་སྐྱེ་མཆེད་ཡིན་ན་ཡིད་དབང་ཡིན་པས་ཁྱབ་པར་ཐལ། མིག་གི་སྐྱེ་མཆེད་ཡིན་ན་མིག་དབང་ཡིན་པས་ཁྱབ་པའི་ཕྱིར། ཁྱབ་པ་བསྒྲིག འདོད་ན། འཇུག་ཤེས་དྲུག་དང་ཀུན་གཞིའི་རྣམ་པར་ཤེས་པ་ཆོས་ཅན། དེར་ཐལ། དེའི་ཕྱིར། འཁོར་གསུམ། ཡང་འདོམས་ཀྱི་གནས་སྐབས་ན་ཡོད་པའི་ལུས་དབང་གི་ཕྱོགས་གཅིག་གང་ཞིག་ཕོའི་རང་བཞིན་ལ་དབང་བྱེད་པ་དང་། གང་ཞིག་མོའི་རང་བཞིན་ལ་དབང་བྱེད་པ་ཞེས་པ་རིམ་བཞིན་ཕོ་དབང་དང་མོ་དབང་གི་མཚན་ཉིད་ཡིན་ཟེར་ན། མ་ནིང་མཚན་གཉིས་པའི་ཕོ་དབང་ཆོས་ཅན། མཚན་ཉིད་ཀྱི་ཕྱི་ཟུར་དེར་ཐལ། མཚོན་བྱ་དེའི་ཕྱིར། འདོད་ན། རང་རྒྱུད་ལ་ལྡན་པའི་རྟེན་གྱི་གང་ཟག་དེ་ཕོར་བྱེད་པར་ཐལ། འདོད་པ་དེའི་ཕྱིར། འདོད་ན། དེའི་མོ་དབང་དེ་ཆོས་ཅན། མོ་དབང་གི་མཚན་ཉིད་ཕྱི་ཟུར་དེར་ཐལ། མོ་དབང་ཡིན་པའི་ཕྱིར། འདོད་ན། རང་རྒྱུད་ལ་ལྡན་པའི་གང་ཟག་དེ་མོར་བྱེད་པར་ཐལ། འདོད་པ་དེའི་ཕྱིར། འདོད་ན། མ་ནིང་མཚན་གཉིས་པ་ཆོས་ཅན། ཕོ་མིན་པར་ཐལ། མོ་ཡིན་པའི་ཕྱིར། རྟགས་བསལ་ཁས། དྲོད་དང་རྣམ་ཤེས་ཀྱི་རྟེན་བྱེད་པའི་ཚེ་དེ་སྲོག་དབང་གི་མཚན་ཉིད་ཡིན་ནོ་ཞེ་ན། གཟུགས་མེད་ཁམས་པའི་སྲོག་དབང་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ན་དྲོད་ཡོད་པར་ཐལ། འདོད་པ་དེའི་ཕྱིར། ཚོར་བ་སྡུག་བསྔལ། བདེ་བ། ཡིད་བདེ་བ། ཡིད་མི་བདེ་རྣམས་ཀྱི་མཚན་ཉིད་རིམ་བཞིན། དབང་ཤེས་ཀྱི་འཁོར་དུ་བྱུང་བའི་ཚོར་བ་གང་ཞིག་གདུང་བར་ཉམས་སུ་མྱོང་བ་དང་། དེ་གང་ཞིག་སིམ་པར་ཉམས་སུ་མྱོང་བ་དང་། ཡིད་ཤེས་འཁོར་གྱི་ཚོར་བ་གང་ཞིག་སིམ་པར་ཉམས་སུ་མྱོང་བ་དང་། དེ་གང་ཞིག་གདུང་བར་ཉམས་སུ་མྱོང་བ་ཞེ་ན། དབང་ཤེས་ཆོས་ཅན། ཁྱོད་གཙོ་སེམས་སུ་ཐལ། ཁྱོད་ཀྱི་འཁོར་དུ་བྱུང་བའི་ཚོར་བ་ཡོད་པའི་ཕྱིར། དེ་བཞིན་དུ་ཡིད་ཤེས་ལའང་འགྲེའོ། །དེ་གཅད་པའི་ཕྱིར་དུ་དབང་པོའི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཞེས་སོགས་སྦྱོར་ན། བསམ་གཏན་གསུམ་པའི་སས་བསྡུས་ཀྱི་སེམས་བདེ་ཆོས་ཅན། མཚན་ཉིད་སྔ་མ་དེར་ཐལ། བདེ་བ་ཡིན་པའི་ཕྱིར་ཏེ། དེའི་ཕན་ཡོན་གྱི་ཡན་ལག་ཏུ་གྱུར་པའི་ཚོར་བ་ཡིན་པའི་ཕྱིར། ཡང་དེ་ཆོས་ཅན། ཚོར་བ་ཡིད་བདེའི་དབང་པོ་ཡིན་པར་ཐལ། དེའི་མཚན་ཉིད་དེའི་ཕྱིར། འདོད་མི་ནུས་ཏེ། བསམ་གཏན་གསུམ་པ་དེ་ཡིད་བདེ་ལ་འདོད་ཆགས་དང་བྲལ་ཟིན་པའི་ཕྱིར། ཡང་སིམ་གདུང་བར་མར་ཉམས་སུ་མྱོང་བར་བྱེད་པའི་ཚོར་བ་དེ་ཚོར་བ་བཏང་སྙོམས་ཀྱི་མཚན་ཉིད་ཡིན་ནོ་ཟེར་ན། བསམ་གཏན་བཞི་པའི་སས་བསྡུས་ཀྱི་ཚོར་བ་བཏང་སྙོམས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། བསམ་གཏན་བཞི་པ་ན་སིམ་གདུང་བར་མ་ཡོད་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། དེ་ན་ཚོར་བ་བདེ་སྡུག་མེད་པའི་ཕྱིར། ཡང་རང་སྟོབས་ཀྱིས་དགེ་བའི་དམིགས་པ་ལ་ཡིད་ཆེས་པའི་སེམས་བྱུང་དང་། དེ་ལ་སྤྲོ་བའི་དང་། དེའི་དམིགས་རྣམ་མི་བརྗེད་པའི་དང་། དེ་ལ་སེམས་རྩེ་གཅིག་པའི་རང་སྟོབས་ཀྱི་དེ་རྣམ་པར་འབྱེད་པའི་སེམས་བྱུང་ཞེས་པ་རྣམས་དད་སོགས་དབང་པོ་ལྔའི་མཚན་ཉིད་གཞག་པ་ལ། ཁ་ཅིག ཚོགས་ལམ་པའི་རྒྱུད་ཀྱི་དད་པ་ཆོས་ཅན། དད་པའི་དབང་པོར་ཐལ། དེའི་མཚན་ཉིད་དེའི་ཕྱིར། དེས་གཞན་བཞི་པོ་ལའང་འགྲེའོ། །དེ་རྣམས་ལ་འདོད་ན། དོན་གསལ་ལས། དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་ཁྱད་པར་ཅན་དབང་པོའི་ངོ་བོ་ཉིད་མིན་པས་ཞེས་གསུངས་པ་དང་འགལ་ལོ། །ཞེས་ཟེར་རོ། །འོ་ན་དད་སོགས་དབང་པོ་ལྔ་པོ་གང་རུང་ཡིན་ན། བདེན་པ་མངོན་པར་རྟོགས་པ་ལ་དབང་བྱེད་པའི་དབང་པོ་ཡིན་དགོས་པར་ཐལ། དོན་གསལ་གྱི་ལུང་དོན་གྲུབ་ན། དེ་དེ་མིན་པའི་ཁྱབ་འབྲེལ་ཡོད་པའི་ཕྱིར། འདོད་ན། སྦྱོར་ལམ་ཆོས་མཆོག་ཡིན་ན་འཇིག་རྟེན་པའི་ཆོས་ཐམས་ཅད་ཀྱི་མཆོག་ཡིན་དགོས་པར་ཐལ། འདོད་པའི་ཕྱིར། འདོད་ན། སྦྱོར་ལམ་ཆོས་མཆོག་ཆུང་ངུ་ཆོས་ཅན། དེར་ཐལ། དེའི་ཕྱིར། འདོད་ན། མིན་པར་ཐལ། ཁྱོད་ལས་མཆོག་ཏུ་གྱུར་པའི་དེ་ཡོད་པའི་ཕྱིར་ཏེ། དེ་འབྲིང་དང་ཆེན་པོ་གཉིས་པོ་དེ་ཁྱོད་ལས་མཆོག་ཏུ་གྱུར་པའི་དེ་ཡིན་པའི་ཕྱིར་རོ། །ཡང་མཐོང་ལམ་གྱི་ཚོགས་པ་ན་ཡོད་པའི་དད་སོགས་དབང་པོ་དགུ་དང་། སྒོམ་ལམ་གྱི་ཚོགས་པ་ན་ཡོད་པའི་དད་སོགས་དབང་པོ་དགུ་དང་། མི་སློབ་ལམ་གྱི་དེ་ན་ཡོད་པའི་དེ་དག་རིམ་བཞིན་དབང་པོ་ཐ་མ་གསུམ་གྱི་མཚན་ཉིད་ཡིན་ཞིང་། དགུ་ནི་དད་སོགས་དབང་པོ་ལྔ། ཚོར་བ་བདེ་བ་ཡིད་བདེ། བཏང་སྙོམས་གསུམ། ཡིད་དབང་དང་དགུའོ་ཟེར་རོ། །མཐོང་ལམ་བར་ཆད་མེད་ལམ་ཆོས་ཅན། མི་ཤེས་པ་ཀུན་ཤེས་པའི་དབང་པོའི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། མཐོང་ལམ་གྱི་ཚོགས་པ་ན་ཡོད་པའི་དད་སོགས་དབང་པོ་དགུ་ཡིན་པ་མི་སྲིད་པའི་ཕྱིར་ཏེ། དེའི་ཚོགས་པ་ན་ཡོད་པའི་དད་སོགས་དབང་པོ་དགུ་པོ་གང་རུང་ཡིན་ན་ཅིག་ཤོས་རྣམས་མིན་དགོས་པའི་ཕྱིར། གཞན་ཡང་། སྦྱོར་ལམ་སྟན་གཅིག་པའི་གནས་སྐབས་སུ་མི་ཤེས་པ་ཀུན་ཤེས་པའི་དབང་པོ་མེད་པར་ཐལ། མི་ཤེས་པ་ཀུན་ཤེས་པའི་དབང་པོ་ཡིན་ན་མཚན་ཉིད་དེ་ཡིན་དགོས་པའི་ཕྱིར། འདོད་ན། ཀུན་བཏུས་ལས། མི་ཤེས་པ་ཀུན་ཤེས་པར་བྱེད་པའི་དབང་པོ་གང་ཞེ་ན། སྦྱོར་བའི་ལམ་དང་མཐོང་བའི་ལམ་གྱི་སྐད་ཅིག་བཅོ་ལྔ་ལ་དབང་བྱེད་པའོ་ཞེས་གསུངས་པ་དང་འགལ་ལོ། །ཡང་གདགས་གཞི་མཐོང་ལམ་གྱི་ཚོགས་པ་ན་ཡོད་པའི་དད་སོགས་དབང་པོ་དགུ་ལ་བཏགས་ནས་བཞག་པའི་ཟག་མེད་ཀྱི་དབང་པོ་དང་། དེ་བཞིན་དུ་གདགས་གཞི་སྒོམ་ལམ་དང་མི་སློབ་ལམ་གྱི་ཚོགས་པ་ན་ཡོད་པའི་དད་སོགས་དབང་པོ་དགུ་ལ་བཏགས་ནས་བཞག་པའི་ཟག་མེད་ཀྱི་དབང་པོ་རྣམས་རིམ་བཞིན་དུ་དེ་གསུམ་གྱི་མཚན་ཉིད་ཡིན་ཞེ་ན། འོ་ན། བསམ་གཏན་བཞི་པའི་དངོས་གཞི་ལ་བརྟེན་པའི་མཐོང་ལམ་བར་ཆད་མེད་ལམ་དེ་ཆོས་ཅན། དང་པོའི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ལ་བརྟེན་པའི་དེའི་ཚོགས་པ་ན་ཚོར་བ་བདེ་བ། ཡིད་བདེ་བའི་དབང་པོ་ཡོད་པར་ཐལ། འདོད་པ་དེའི་ཕྱིར། འདོད་ན། བསམ་གཏན་བཞི་པའི་སས་བསྡུས་ཀྱི་དེ་གཉིས་ཡོད་པར་ཐལ་ལོ། །གཉིས་པ་ལ། ངོ་བོ་ངོས་གཟུང་བ་དང་། ཁམས་གོང་ན་དེ་དུ་ཡོད་དཔྱད་པ་གཉིས། དང་པོ་ནི། རང་གི་བདག་འབྲས་སུ་གྱུར་པའི་མིག་གི་རྣམ་པར་ཤེས་པ་སྐྱེད་པའི་རིགས་སུ་གནས་པའི་ནང་གི་རྡུལ་ཕྲན་དྭངས་པ་དེ་མིག་གི་དབང་པོའི་མཚན་ཉིད། དེས་ལུས་དབང་གི་བར་དུ་འགྲེ། རང་གི་བདག་འབྲས་ཡིད་ཀྱི་རྣམ་པར་ཤེས་པ་དེ་མ་ཐག་ཏུ་སྐྱེད་པའི་གཙོ་བོ་རྣམ་རིག་དེ་ཡིད་དབང་གི་མཚན་ཉིད། ཚེ་གཅིག་གི་རིགས་མཐུན་གནས་པ་ལ་དབང་བྱེད་པའི་ལྡན་མིན་འདུ་བྱེད་དེ་སྲོག་གི་དབང་པོའི་མཚན་ཉིད། ལུས་དབང་གྱི་ཕྱོགས་གཅིག་གང་ཞིག མོ་དབང་དང་ཕྲད་ན་འཁྲིག་པའི་བདེ་བ་ཉམས་སུ་མྱོང་བར་བྱེད་པའི་རིགས་སུ་གནས་པ་དང་། དེས་ཅིག་ཤོས་ལ་རིགས་འགྲེ་བ་དེ་ཕོ་དབང་དང་མོ་དབང་གི་མཚན་ཉིད་རིམ་བཞིན་ཡིན་ནོ། །དབང་ཤེས་ཀྱིས་བསྡུས་པའི་གདུང་བར་ཉམས་སུ་མྱོང་བའི་སེམས་བྱུང་དང་། ཡིད་བདེ་མིན་པ་གང་ཞིག སིམ་པར་ཉམས་སུ་མྱོང་བའི་སེམས་བྱུང་དེ་རིམ་བཞིན་ཚོར་བ་སྡུག་བསྔལ་དང་བདེ་བའི་དབང་པོའི་མཚན་ཉིད། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཚོར་བ་སིམ་པར་ཉམས་སུ་མྱོང་བ་གང་ཞིག རང་གི་ནང་ཚན་དུ་གྱུར་པའི་བསམ་གཏན་གསུམ་པ་ཡིན་གྱི་སས་བསྡུས་མེད་པ་དེ་ཚོར་བ་ཡིད་བདེའི་མཚན་ཉིད། ཡང་དེའི་འཁོར་དུ་བྱུང་བའི་ཚོར་བ་གདུང་བར་ཉམས་སུ་མྱོང་བའི་ཚོར་བ་དེ་ཡིད་མི་བདེ་བའི་དབང་པོའི་མཚན་ཉིད། ཚོར་བ་གང་ཞིག་རང་གི་ནང་ཚན་དུ་གྱུར་པའི་སིམ་གདུང་གང་རུང་ཉམས་སུ་མྱོང་བ་མེད་པའི་ཚོར་བ་དེ་ཚོར་བ་བཏང་སྙོམས་ཀྱི་དབང་པོའི་མཚན་ཉིད། འདིར་བསྟན་གྱི་དད་སོགས་ལྔ་པོ་དེ་རྣམ་པར་བྱང་བ་ཙམ་ལ་དབང་བྱེད་པའི་ཆ་ནས་འཇོག་ན། ཚོགས་ལམ་ནས་ཡོད་པས་རང་སྟོབས་ཀྱིས་དགེ་བའི་དམིགས་པ་ལ་ཡིད་ཆེས་པའི་སེམས་བྱུང་ཞེས་སོགས་གོང་ལྟར་འཇོག་གོ །ཡང་དེ་བྱང་ཕྱོགས་སོ་བདུན་གྱི་ནང་ཚན་དུ་གྱུར་པའི་དབང་པོ་ལྔ་ལ་འཇོག་ན་འདི་ལྟར་གཞག་སྟེ། དྲོད་ཡན་ཆད་ཀྱི་དབང་པོ་གང་ཞིག་དགེ་བའི་དམིགས་པ་ལ་ཡིད་ཆེས་པའི་སེམས་བྱུང་དང་། དེ་གང་ཞིག་དེ་ལ་སྤྲོ་བའི་སེམས་བྱུང་དང་། གང་ཞིག་དེའི་དམིགས་རྣམ་མི་བརྗེད་པའི་དང་། གང་ཞིག་དེའི་དམིགས་པ་ལ་སེམས་རྩེ་གཅིག་པའི་དང་། གང་ཞིག་དེའི་དམིགས་པ་རྣམ་པར་འབྱེད་པའི་སེམས་བྱུང་རྣམས་རིམ་བཞིན་དད་སོགས་དབང་པོ་ལྔའི་མཚན་ཉིད། མཛོད་ལྟར་ན་མཐོང་ལམ་གྱི་ངོ་བོར་གྱུར་པའི་དབང་པོ་དད་སོགས་དགུ་པོ་ཅི་རིགས་པས་བསྡུས་པ་དང་། སྒོམ་ལམ་དང་མི་སློབ་ལམ་གྱི་ངོ་བོར་ཞེས་སོགས་རིགས་འགྲེས་པ་དབང་པོ་ཕྱི་མ་གསུམ་གྱི་མཚན་ཉིད་ཡིན་ནོ། །མཚན་གཞི་ནི་ལམ་དེ་དང་དེའི་ངོ་བོར་གྱུར་པའི་དད་སོགས་རེ་རེའང་མི་ཤེས་པ་ཀུན་ཤེས་པའི་དབང་པོ་སོགས་དེ་དང་དེའི་ངོ་བོར་འཇོག་པ་ཡིན་གྱི། དད་སོགས་དགུ་གདགས་གཞིར་བྱས་ནས་དེ་ལ་བཏགས་པའི་བཏགས་ཡོད་ལ་འཇོག་པ་ནི་ཆོས་མངོན་མཛོད་ཀྱི་དགོངས་པ་མིན་ཏེ། མཛོད་རྩ་བར། མཐོང་སྒོམ་མི་སློབ་ལམ་ལ་དགུ། །གསུམ་ཡིན་ཞེས་དང་། དེའི་འགྲེལ་པར། དབང་པོ་དགུ་པོ་དེ་དག་ནི། །ལམ་གསུམ་དག་ཏུ་དབང་པོ་གསུམ། །ཞེས་བྱས་ཏེ་ཞེས་གསུངས་པའི་ཕྱིར། དེའང་ཅི་རིགས་པའི་དབང་དུ་བྱས་ཀྱི་དབང་པོ་དགུ་པོ་དེ་དག་ཅིག་ཅར་དུ་ཚོགས་པ་ནི་མི་སྲིད་པའི་ཕྱིར་ཏེ། ཚོར་བའི་དབང་པོ་གསུམ་པོ་དེ་ཅིག་ཆར་དུ་ཚོགས་པ་མི་སྲིད་པའི་ཕྱིར་རོ། །ཀུན་བཏུས་དང་བསྡུ་བ་ལྟར་ན། སྦྱོར་ལམ་དང་མཐོང་ལམ་སྐད་ཅིག་དང་པོ་བཅོ་ལྔས་བསྡུས་པའི་རྣམ་བྱང་གི་དབང་པོ་རྣམས་ནི་མི་ཤེས་པ་ཀུན་ཤེས་པའི་དབང་པོ། བཅུ་དྲུག་པ་ནས་སྒོམ་ལམ་སྐད་ཅིག་ཐ་མའི་བར་གྱི་རྣམ་བྱང་གི་དབང་པོ་རྣམས་ནི་ཀུན་ཤེས་པའི་དབང་པོར་བཤད་དོ། །གཉིས་པ་ནི་མཛོད་ལས། དྲི་མེད་མ་གཏོགས་འདོད་པར་གཏོགས། །ཕོ་མོའི་དབང་དང་སྡུག་བསྔལ་དག །མ་གཏོགས་གཟུགས་གཏོགས་གཟུགས་ཅན་དང་། །བདེ་བའང་མ་གཏོགས་གཟུགས་མེད་གཏོགས། །ཞེས་གསུངས་ཏེ། འདོད་པའི་སས་བསྡུས་ལ་ཐ་མ་གསུམ་མ་གཏོགས་པའི་བཅུ་དགུ། གཟུགས་ཀྱི་སས་བསྡུས་ལ་དེ་གསུམ་དང་། ཕོ་མོའི་དབང་པོ་གཉིས་དང་། སྡུག་བསྔལ་དང་ཡིད་མི་བདེ་གཉིས་ཏེ་བདུན་མ་གཏོགས་པའི་བཅོ་ལྔ། གཟུགས་མེད་ཀྱི་སས་བསྡུས་ལ་བདུན་པོ་དེའི་སྟེང་དུ་མིག་གི་དབང་པོ་སོགས་ལྔ། བདེ་བ་ཡིད་བདེ་གཉིས་ཏེ་བཅུ་བཞི་མ་གཏོགས་པའི་བརྒྱད་ཡོད་དོ། །བསྡུ་བ་ལས། གཞན་འདྲ་བ་ལ། སྡུག་བསྔལ་གྱི་དབང་པོ་གཟུགས་ཀྱི་སས་བསྡུས་ལ་ཡོད་པས་གཟུགས་ཀྱི་སས་བསྡུས་ལ་བཅུ་དྲུག་གོ །གཉིས་པ་དེ་ལ་ཞེན་པ་ཇི་ལྟར་འགོག་པའི་ཚུལ་ལ་མདོ་ལས་གསུངས་ཚུལ། གཞུང་འགྲེལ་ལས་བཀྲལ་ཚུལ། དེའི་དོན་བཤད་པ་དང་གསུམ། དང་པོ་ལ། བརྒྱད་སྟོང་པ་ལས། འཐབ་མོའི་གཏམ་གྱི་སྦྱོར་བ་དང་རྗེས་སུ་སྦྱོར་བ་ལ་བརྩོན་པར་མི་གནས། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་གྱི་སྦྱོར་བ་དང་རྗེས་སུ་སྦྱོར་བ་ལ་བརྩོན་པར་མི་གནས། བདག་གི་གཏམ་གྱི་སྦྱོར་བ་དང་རྗེས་སུ་སྦྱོར་བ་ལ་བརྩོན་པར་མི་གནས། བློན་པོ་དང་བློན་པོ་ཆེན་པོའི་གཏམ་གྱི་སྦྱོར་བ་དང་རྗེས་སུ་སྦྱོར་བ་ལ་བརྩོན་པར་མི་གནས་ཞེས་གསུངས་སོ། །གཉིས་པ་ནི། རྩ་བར་དབང་སོགས་བཅས་པ་ཡི། གཡུལ་འགྱེད་ལ་སྦྱོར་བ་དང་རྗེས་སུ་སྦྱོར་བ་ཡིས། གནས་པ་སོ་སོར་བཀག་པ་དང་། །ཞེས་དང་། དོན་གསལ་ལས། གཟུང་བ་དང་འཛིན་པ་དག་སྤང་བར་བྱ་བ་ཉིད་ཀྱིས་དབང་པོ་དང་། རྟེན་གྲོང་ཁྱེར་ལ་སོགས་པའི་གཡུལ་འགྱེད་པ་ལ་སྔ་མ་བཞིན་དུ་སྦྱོར་བ་དང་རྗེས་སུ་སྦྱོར་བའི་གནས་པ་སོ་སོར་བཀག་པ་ཞེས་དང་། འགྲེལ་ཆེན་ལས། གཟུང་བ་དང་འཛིན་པ་དག་སྤང་བར་བྱ་བ་ཉིད་ཀྱིས་མི་མཐུན་པ་དང་གཉེན་པོའི་ཕྱོགས་གསད་པར་བྱ་བ་དང་། གསོད་པ་པོ་གཡུལ་འགྱེད་པའི་གཏམ་གྱི་སྦྱོར་བ་དང་རྗེས་སུ་སྦྱོར་བ་ལ་གནས་པ་བཀག་པས་འགོག་པ་ལ་རྗེས་སུ་ཤེས་པ་ཡིན་པ་ནི་འཐབ་མོའི་གཏམ་གྱི་ཞེས་པ་ལ་སོགས་པ་གསུངས་པ་ཡིན་ནོ། །དེ་ལྟ་བུའི་གནས་སྐབས་སུ་རང་གི་ངང་ཉིད་ཀྱིས་རྣམ་པར་སྨིན་པ་འགོག་པ་རྣམ་པ་བཞིར་འགྱུར་བ་ནི། འདི་ལྟ་སྟེ། དབང་པོའི་གྲོང་འགོག་པ་ནི་དང་པོའོ། །དེ་བཞིན་དུ་དབང་པོའི་རྟེན་འབྱུང་བ་དང་། འབྱུང་བ་ལས་གྱུར་པ་གྲོང་ཁྱེར་འགོག་པ་ནི་གཉིས་པའོ། །དེ་བཞིན་དུ་དབང་པོའི་ཡུལ་གྱི་གྲོང་རྡལ་འགོག་པ་ནི་གསུམ་པ་སྟེ། དེ་བཞིན་གྲོང་དང་ཞེས་པ་ལ་སོགས་གང་གསུངས་པ་ཡིན་ནོ། །ལྗོངས་ལ་སོགས་པ་ནི་གྲོང་ཁྱེར་གྱི་དབྱེ་བ་ཡིན་ནོ། །བདག་ཏུ་མངོན་པར་ཞེན་པ་འགོག་པ་སྟེ་བཞི་པ་ནི་བདག་གི་གཏམ་གྱི་ཞེས་བྱ་བ་ལ་སོགས་པ་སྨྲོས་པ་ཡིན་ནོ། །བདག་ཁོ་ན་ལ་བདག་གི་འབྲེལ་པས་རབ་ཏུ་དབྱེ་བའི་དོན་ནི། བློན་པོ་ཆེན་པོའི་ཞེས་བྱ་བ་ལ་སོགས་པ་སྨོས་པ་ཡིན་ནོ་ཞེས་གསུང་ངོ་། །གསུམ་པ་ནི། འདིར་སྤང་གཉེན་གཡུལ་འགྱེད་པའི་མིང་ཙམ་ལ་མངོན་པར་ཞེན་པ་ནི་འགོག་པར་བྱ་བའི་ཞེན་པ་ཡིན་ལ། དེ་འགོག་པ་རྗེས་ཤེས་ཀྱིས་བཀག་པའམ། དེས་དྲངས་པའི་རྗེས་ཐོབ་ཀྱི་གནས་སྐབས་སུ་དེའི་མིང་ཙམ་ཡང་མི་དམིགས་པའི་ངེས་པ་དྲངས་པ་ནི་ཞེན་པ་འགོག་པའི་ཚུལ་ཡིན་ལ། དེ་ནི་མདོ་ལས། འཐབ་མོའི་གཏམ་གྱི་སྦྱོར་བ་དང་རྗེས་སུ་སྦྱོར་བ་ལ་བརྩོན་པར་མི་གནས་ཞེས་དང་། རྩ་བར། གཡུལ་འགྱེད་ལ་སྦྱོར་དང་ཞེས་གསུངས་པ་དང་། དོན་གསལ་ལས། གཡུལ་འགྱེད་པ་ལ་སྔ་མ་བཞིན་དུ་ཞེས་སོགས་དང་། འགྲེལ་ཆེན་ལས། གཟུང་བ་དང་འཛིན་པ་ཞེས་པ་ནས་གསུངས་པ་ཡིན་ནོ་ཞེས་པའི་བར་གྱི་བསྟན་པ་ཡིན་ནོ། །འོ་ན་སྤང་བྱ་ནི་གང་། གཉེན་པོ་གང་། གཡུལ་འགྱེད་པའི་ཚུལ་ཇི་ལྟར། མིང་སྨོས་པའི་དགོས་པ་གང་ཞེ་ན། མཐོང་སྤང་གི་རྣམ་སྨིན་དབང་སོགས་བཞི་མདོ་ལས་གྲོང་ལ་སོགས་པའི་སྒྲས་གསུངས་པ་ནི་སྤང་བྱ་ཡིན་ལ། འགོག་པ་རྗེས་ཤེས་ནི་གཉེན་པོ་ཡིན་ནོ། །དེའི་སྐབས་སུ་སྤང་བྱ་བཞི་དང་བྲལ་བའི་འགོག་པ་བཞི་ཐོབ་པ་ནི་སྤང་གཉེན་གཡུལ་འགྱེད་པའི་ཚུལ་ཡིན་ནོ་ཞེས་པ་ནི་མདོ་ལས་གྲོང་དང་ཞེས་སོགས་དང་། རྩ་བར། དབང་སོགས་བཅས་པ་ཡི་ཞེས་དང་། དོན་གསལ་ལས། དབང་པོ་དང་རྟེན་གྲོང་ཁྱེར་ལ་སོགས་པའི་ཞེས་དང་། འགྲེལ་ཆེན་ལས། དེ་ལྟ་བུའི་གནས་སྐབས་སུ་རང་གི་ངང་ཉིད་ཀྱིས་ཞེས་སོགས་ཀྱིས་བསྟན་ཏོ། །དེས་ན་མདོ་ལས། གཡུལ་འགྱེད་ཀྱི་དོན་འཐབ་མོ་ཐོག་མར་སྨོས་པ་ནི། དང་པོར་ཞེན་པ་འགོག་ཚུལ་བསྟན་ནས་དེའི་རྗེས་སུ་གཡུལ་འགྱེད་པར་བྱེད་པ་པོ་ངོས་འཛིན་པའི་དབང་དུ་བྱས་ལ། བསྟན་བཅོས་ལས་དེ་ལས་ལྡོག་སྟེ་གསུངས་པ་ནི། དང་པོར་གཡུལ་འགྱེད་པར་བྱེད་པ་པོ་ངོས་གཟུང་ནས་དེའི་འོག་ཏུ་དེའི་མིང་ལ་ཞེན་པ་དགག་བྱར་བྱེད་པའི་དོན་ནོ། །འགྲེལ་པ་ཆེ་ཆུང་གཉིས་ཀྱི་གོ་རིམ་དེ་ལྟར་ཡོད་པ་ནི་རིམ་པ་བཞིན་མདོ་དང་བསྟན་བཅོས་དངོས་སུ་འགྲེལ་བའི་དབང་དུ་བྱས་པའོ། །མིང་སྨོས་པའི་དགོས་པ་ནི། སྤང་གཉེན་དེ་གཡུལ་འགྱེད་པ་ལ་ཞེན་པ་ནི་སྡུག་ཀུན་ཤེས་པའི་དུས་སུ་བསལ་ཟིན་པས། འདིར་དེ་དག་གི་མིང་ཙམ་ལ་ཞེན་པ་འགོག་ཅེས་པ་སྟེ། འགྲེལ་ཆེན་ལས། གཏམ་སྨོས་པས་ནི་དངོས་པོའི་རྣམ་པར་རྟོག་པ་སྡུག་བསྔལ་དང་ཀུན་འབྱུང་གི་ཤེས་པའི་དུས་ཉིད་དུ་བསལ་ཟིན་པ་ཉིད་ཡིན་པའི་ཕྱིར། འགོག་པར་ཤེས་པ་ནི་གཏམ་ཙམ་གྱི་རྣམ་པར་རྟོག་པའི་གཉེན་པོའི་ཕྱོགས་ཡིན་པར་བསྟན་པ་ཡིན་ནོ་ཞེས་གསུང་ངོ་། །གནད་འདི་མ་རྟོགས་པ་ཁ་ཅིག སྤང་གཉེན་གཡུལ་འགྱེད་པ་དང་། གྲོང་གི་སྒྲས་བསྟན་པའི་དབང་པོ་དང་ཞེས་སོགས་དྲངས་ནས་གཡུལ་འགྱེད་ཐོག་མར་སྨོས་པ་ནི་ཉི་སྣང་དང་། འགྲེལ་ཆེན་དང་། ལེ་བརྒྱད་མ་ལྟར་བྱས་པའོ་ཞེས་པ་ནི་བློ་གྲོས་ཁབ་ཀྱི་རྩེ་མོ་ལ་ཉུངས་འབྲུ་སྦྱར་བ་སྟོན་པར་ཟད་དོ། །ཐམས་ཅད་རིག་པའི་གཞན་སྔ་ནས། མདོ་ལས་གཡུལ་འགྱེད་ཅེས་པ་ལ་སོགས་བཅད་པས་དང་ཞེས་འབྱེད་པའི་སྒྲ་ཐོབ་ཀྱི། ཡི་ཞེས་པའི་དྲུག་སྒྲ་འབྱུང་བ་མ་དག་པ་ཡིན་ནོ་ཞེས་གསུངས་ཀྱང་། རྩ་འགྲེལ་གཉིས་ཆར་ལས་དྲུག་སྒྲ་འབྱུང་ཞིང་། བརྗོད་བྱའི་གཙོ་བོ་ཡིན་ཚུལ་ནི་སྔར་བཤད་པ་ལྟར་ཡིན་པས་མ་དག་པ་མིན་ནོ། །འོན་ཀྱང་སློབ་དཔོན་གྱི་འགྲེལ་པ་གཉིས་ལས། གཡུལ་འགྱེད་ཀྱི་མིང་ལ་ཞེན་པ་འགོག་པ་ཙམ་བསྟན་ཞིང་། མདོ་དང་རྩ་བ་ལས་སྤང་གཉེན་གྱི་མིང་ལའང་ཞེན་པ་འགོག་པ་བསྟན་ཏེ། མདོ་ལས་གྲོང་དང་གྲོང་ཁྱེར་ལ་སོགས་པ་ལའང་ཞེན་པ་མི་བྱ་བར་གསུངས་ཤིང་། རྩ་བར། བཅས་པ་ཞེས་པའི་ཚིག་གི་ནུས་པ་བསྟན་ཏོ། །གངས་རིའི་ཁྲོད་འདིར་སྔོན་མ་བྱུང་བའི་ལེགས་བཤད་དོ། །སྒོམ་པའི་ལམ་ནི་ཟབ་པ་སྟེ། །ཞེས་པའི་སྐབས་སུ། ཁ་ཅིག ཐེག་ཆེན་གྱི་སྒོམ་ལམ་ཆོས་ཅན། ཐེག་དམན་གྱི་སྒོམ་ལམ་ལས་ཟབ་པ་ཡིན་ཏེ། ཟབ་མོ་སྟོང་པ་ཉིད་ངོ་བོར་ལྡན་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར་ཞེ་ན། ཐེག་ཆེན་གྱི་སྒོམ་ལམ་དེ་ཟབ་མོ་སྟོང་པ་ཉིད་ངོ་བོར་ལྡན་པའི་སྒོ་ནས་ཐེག་དམན་གྱི་སྒོམ་ལམ་ལས་ཟབ་པ་མིན་པར་ཐལ། ཐེག་དམན་གྱི་དེ་ལ་དེ་ལྟར་ལྡན་པའི་ཕྱིར་ཏེ། དེ་དོན་དམ་པར་བདེན་སྟོང་ཡིན་པའི་ཕྱིར། དེ་ལ་ཁོ་ན་རེ། ཐེག་ཆེན་གྱི་བསྒྲུབ་པ་དེ་རང་བཞིན་གནས་རིགས་ཁྱད་ཆོས་སུ་ལྡན་པའི་སྒོ་ནས། དེ་ལྟ་བུའི་རང་བཞིན་གནས་རིགས་དེ་ཐེག་ཆེན་གྱི་རིགས་སུ་འཇོག་པ་མིན་པར་ཐལ། ཐེག་དམན་ལ་ཡང་རང་བཞིན་གནས་རིགས་ཁྱད་ཆོས་སུ་ལྡན་པ་ཡོད་པའི་ཕྱིར་ཞེ་ན། མི་མཚུངས་ཏེ། རང་བཞིན་གནས་རིགས་དེ་ལ་ཐེག་ཆེན་སྒྲུབ་པའི་ཁྱད་ཆོས་སུ་ལྡན་མི་ལྡན་གཉིས་སུ་ཡོད་ཅིང་། སྒོམ་ལམ་ལ་ཟབ་མོ་སྟོང་པ་ཉིད་ངོ་བོར་ལྡན་མི་ལྡན་གཉིས་སུ་མེད་པའི་ཕྱིར། ཡང་ཁ་ཅིག དངོས་པོ་བརྗོད་དུ་མེད་པ་ལ་ཞེས་པའི་རྩོད་པ་དེ་སྒོམ་པའི་ལམ་ནི་ཟབ་པ་སྟེ། ཞེས་པའི་གཞུང་གི་དོན་ལ་རྩོད་པ་མིན་པར་ཐལ། གཞུང་དེས་ཐེག་ཆེན་གྱི་སྒོམ་ལམ་ཟབ་མོ་སྟོང་པ་ཉིད་ངོ་བོར་ལྡན་པའི་སྒོ་ནས་ཐེག་དམན་གྱི་སྒོམ་ལམ་ལས་ཟབ་པར་མ་བསྟན་པའི་ཕྱིར་ཞེ་ན། འོ་ན། ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་པའི་རྩོད་པ་དེ། སྒྲུབ་པ་ཡི་ནི་རྟེན་གྱུར་པ། །ཞེས་པའི་གཞུང་དོན་ལ་རྩོད་པ་མིན་པར་ཐལ། གཞུང་དེས་ཆོས་དབྱིངས་རིགས་སུ་མ་བསྟན་པའི་ཕྱིར། ཁྱབ་པ་ཁས། མ་གྲུབ་ན། ཆོས་དབྱིངས་རིགས་སུ་ཐལ། མ་གྲུབ་པ་དེའི་ཕྱིར། རང་ལུགས་ནི་འོག་གི་རྩོད་པ་ནི། འདིའི་ཚིག་ཟིན་ལ་རྩོད་པ་ཡིན་ལ། བསྟན་བྱའི་གཙོ་བོ་ནི་ཟབ་མོ་རྟོགས་པའི་སྒོ་ནས་ཁྱད་པར་དུ་འཕགས་པ་ཡིན་ཏེ། རྒྱན་འདིར་ཐེག་ཆེན་གྱི་སྦྱོར་མཐོང་སྒོམ་གསུམ་ཐེག་དམན་གྱི་དེ་གསུམ་ལས་ཁྱད་པར་དུ་འཕགས་པ་བསྟན་པར་བཞེད་པ་ལ་དང་པོ་གཉིས་བསྟན་ཟིན་ནས་ཐ་མ་འདིར་བསྟན་པ་ཡིན་པའི་ཕྱིར། ངེས་འབྱེད་ཡན་ལག་དང་མཐོང་བའི། །ཞེས་པའི་སྐབས་སུ། ཁ་ཅིག སྦྱོར་མཐོང་སྒོམ་གསུམ་གྱི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོགས་གསུམ་བྱེད་པའི་ཐེག་ཆེན་གྱི་རྗེས་ལ་མངོན་རྟོགས་དེ་རྣམ་རྫོགས་སྦྱོར་བ་འཆད་པའི་སྐབས་ནས་བསྟན་པའི་ཐེག་ཆེན་གྱི་སྒོམ་ལམ་གྱི་མཚན་ཉིད་ཡིན་ཟེར་རོ། །འོ་ན་སྐབས་འདིར་བསྟན་གྱི་སྒོམ་ལམ་དེ་ལ་ས་གཉིས་པ་ནས་བཅུ་པའི་བར་དགུར་གྲངས་ངེས་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། རེ་ཞིག་སོང་། ས་དང་པོའི་རྗེས་ཐོབ་སྔ་མའི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོགས་གསུམ་བྱེད་པའི་ས་དང་པོའི་རྗེས་ཐོབ་ཡེ་ཤེས་དེ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། གོང་དུ་འདོད་ལན་བཏབ་པ་དང་འགལ་ལོ། །མ་གྲུབ་ན། དེ་དེར་ཐལ། ས་དང་པོའི་རྗེས་ཐོབ་ཡེ་ཤེས་སྔ་མ་འདི་སྒོམ་ལམ་ཡིན་པའི་ཕྱིར་ཏེ། ས་དང་པོའི་རྗེས་ཐོབ་ཡེ་ཤེས་དེ་སྒོམ་ལམ་ཡིན་པའི་ཕྱིར། རང་ལུགས་ནི། སྦྱོར་མཐོང་སྒོམ་གསུམ་གྱི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོགས་གསུམ་བྱེད་པའི་ས་གཉིས་པ་ཡན་ཆད་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས་དེ་རྣམ་རྫོགས་སྦྱོར་བ་འཆད་པའི་སྐབས་ནས་བསྟན་པའི་ཐེག་ཆེན་གྱི་སྒོམ་ལམ་གྱི་མཚན་ཉིད་ཡིན་ནོ། །དེ་ལ་ཁོ་ན་རེ། ས་དང་པོའི་རྗེས་ཐོབ་ཡེ་ཤེས་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། ཡང་དང་ཡང་དུ་སེམས་པ་དང་། །ཞེས་པའི་སྐབས་གནས་བསྟན་པའི་ཐེག་ཆེན་གྱི་སྒོམ་ལམ་ཡིན་པའི་ཕྱིར། མ་གྲུབ་ན། དེ་དེར་ཐལ། གཞུང་དེས་དེ་ཐེག་ཆེན་གྱི་སྒོམ་ལམ་དུ་བསྟན་པའི་ཕྱིར་ཞེ་ན། རྒྱུན་ཞུགས་ཞུགས་པ་དེ། །དབང་པོ་རྟུལ་དང་རྣོན་པོ་དག །ཅེས་པའི་སྐབས་ནས་བསྟན་པའི་དགེ་འདུན་དཀོན་མཆོག་ཡིན་པར་ཐལ། གཞུང་དེས་དགེ་འདུན་དཀོན་མཆོག་ཡིན་པར་བསྟན་པའི་ཕྱིར་ཏེ། དེས་དེ་མཚོན་བྱེད་དཔེའི་དགེ་འདུན་ཡིན་པར་བསྟན་པའི་ཕྱིར། རྩ་བར་འདོད་ན། རྒྱུན་ཞུགས་ཞུགས་པ་ཆོས་ཅན། སངས་རྒྱས་ལ་སོགས་དཀོན་མཆོག་གསུམ། །ཞེས་པའི་སྐབས་ནས་བསྟན་པའི་དགེ་འདུན་དཀོན་མཆོག་མིན་པར་ཐལ། འདོད་པ་དེའི་ཕྱིར། གཞན་ཡང་ས་དང་པོའི་རྗེས་ཐོབ་ཡེ་ཤེས་དེ་ཆོས་ཅན། དེ་ནི་རྒྱུན་ཞུགས་ཡིན་པའི་ཕྱིར་ཞེས་པའི་སྐབས་ནས་བསྟན་པའི་ཐེག་ཆེན་གྱི་སྒོམ་ལམ་ཡིན་པར་ཐལ། ངེས་འབྱེད་ཡན་ལག་དང་མཐོང་བའི། །ཞེས་པའི་སྐབས་ནས་བསྟན་པའི་དེ་ཡིན་པའི་ཕྱིར། དེས་ན་གཞུང་འདིས་ས་དང་པོའི་རྗེས་ཐོབ་ཡེ་ཤེས་སྒོམ་ལམ་དུ་བསྟན་ཏེ། འདིར་བསྟན་གྱི་མཚན་ཉིད་ལྡན་པའི་སྒོམ་ལམ་དེ་ནི། དེ་ནི་རྒྱུན་ཞུགས་ཡིན་པའི་ཕྱིར། །ཞེས་པའི་སྐབས་ནས་བསྟན་པའི་དབྱེ་གཞིའི་སྒོམ་ལམ་ཡིན་པས་ས་གཉིས་པ་ཡན་ཆད་ཀྱི་སྒོམ་ལམ་ཡིན་ལ། དེ་ལ་སྒོམ་ལམ་སྔོན་དུ་འགྲོ་དགོས་པར་བསྟན་པའི་ཕྱིར། འོན་ཀྱང་དེ་སྐབས་འདིར་བསྟན་གྱི་མིན་པའི་ཚུལ་ནི་བཤད་ཟིན་ཏོ། །གྲངས་མེད་ལ་སོགས་ཞེས་པའི་སྐབས་སུ། ཁ་ཅིག ཐེག་ཆེན་གྱི་སྒོམ་ལམ་ལ་དགུར་གྲངས་མ་ངེས་པར་ཐལ། དེ་དགུ་པོ་རེ་རེ་ལའང་འབྲས་བུ་བསོད་ནམས་གྲངས་མེད་གཞལ་མེད་སོགས་ཡོད་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མིན་པར་ཐལ། དེས་ཁྱོད་ལ་དོན་དམ་དུ་རྟགས་མ་གྲུབ་པ་དང་། ཀུན་རྫོབ་ཏུ་ཁྱབ་པ་མ་ངེས་པའི་ལན་དོན་མཐུན་དུ་ཐེབས་པའི་ཕྱིར་ཞེ་ན། རྟགས་དང་པོ་དེ་མིན་པར་ཐལ། དབུ་མ་པས་དོན་དམ་དུ་རྟགས་མ་གྲུབ་ཀྱི་ལན་དོན་མཐུན་དུ་ཐེབས་པ་མི་སྲིད་དེ། དབུ་མ་པས་དོན་དམ་དུ་རྩོད་པ་བྱེད་པ་མི་སྲིད་པའི་ཕྱིར། རང་ལུགས་ནི་ཐེག་དམན་གྱི་སྒོམ་ལམ་དེ་ལ་དགུར་གྲངས་མ་ངེས་པར་ཐལ། དོན་དམ་པར་དགུ་པོ་རེ་རེ་ལ་འབྲས་བུ་བསོད་ནམས་གྲངས་མེད་གཞལ་མེད་སོགས་ཡོད་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མིན་པར་ཐལ། ཁྱོད་ལ་དབུ་མ་པས་རྟགས་མ་གྲུབ་ཀྱི་ལན་དོན་མཐུན་དུ་ཐེབས་པའི་ཕྱིར། ཡང་དེར་གྲངས་མ་ངེས་པར་ཐལ། ཀུན་རྫོབ་ཏུ་དགུ་པོ་རེ་རེ་ལ་འབྲས་བུ་བསོད་ནམས་གྲངས་མེད་གཞལ་མེད་སོགས་ཡོད་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མིན་པར་ཐལ། ཁྱོད་ལ་དེས་ཁྱབ་པ་མེད་པའི་ལན་དོན་མཐུན་དུ་ཐེབས་པའི་ཕྱིར། དེ་ལ་ཁོ་ན་རེ། དོན་དམ་པར་ཐེག་ཆེན་གྱི་སྒོམ་ལམ་དགུ་པོ་རེ་རེ་ལ་འབྲས་བུ་བསོད་ནམས་གྲངས་མེད་གཞལ་མེད་སོགས་མེད་པར་ཐལ། ཐལ་འགྱུར་སྔ་མའི་རྟགས་དེའི་ཕྱིར། འདོད་ན། དེ་ཡོད་པར་ཐལ། གཞི་གྲུབ་ན་དེ་ཡིན་དགོས་པའི་ཕྱིར་ཞེ་ན། དོན་དམ་པར་བསྐལ་པ་གྲངས་མེད་གསུམ་ཡོད་པར་ཐལ། གཞི་གྲུབ་ན། དོན་དམ་པར་བསྐལ་པ་གྲངས་མེད་ཡིན་དགོས་པའི་ཕྱིར། བྱང་ཆུབ་ཇི་ལྟ་དེ་བཞིན་དུ། །ཞེས་པའི་སྐབས་སུ། ཐེག་ཆེན་གྱི་སྒོམ་ལམ་དེ་དོན་དམ་པར་བདེན་སྟོང་ཡིན་ཀྱང་ཀུན་རྫོབ་ཏུ་སྤང་བྱ་ཉམས་པ་དང་གཉེན་པོ་འཕེལ་བའི་བྱ་བ་བྱེད་པ་འཐད་དེ། སྐུ་གསུམ་པོ་དེ་དོན་དམ་པར་བདེན་སྟོང་ཡིན་ཀྱང་ཀུན་རྫོབ་ཏུ་གདུལ་བྱའི་དོན་བྱེད་པ་འཐད་པའི་ཕྱིར། དེ་ལ་ཁ་ཅིག རྟོགས་པ་ཡེ་ཤེས་ཆོས་སྐུ་ཆོས་ཅན། ཁྱོད་ཐེག་ཆེན་སྒོམ་ལམ་དོན་དམ་པར་བདེན་སྟོང་ཡིན་ཀྱང་ཀུན་རྫོབ་ཏུ་སྤང་གཉེན་ཉམས་འཕེལ་གྱི་བྱ་བ་བྱེད་པའི་མཐུན་དཔེ་ཡང་དག་མིན་པར་ཐལ། ཁྱོད་དང་དེ་གཉིས་བདེན་སྟོང་དུ་རྟོགས་དཀའ་བླའི་ཁྱད་པར་མེད་པའི་ཕྱིར། མ་གྲུབ་ན། དེ་དེར་ཐལ། ཚད་མས་གྲུབ་པའི་ཆོས་གཅིག་བདེན་སྟོང་དུ་རྟོགས་ན། དེས་གྲུབ་པའི་ཆོས་ཐམས་ཅད་བདེན་སྟོང་དུ་རྟོགས་དགོས་པའི་ཕྱིར་ཏེ། དངོས་གཅིག་དངོས་པོ་ཀུན་གྱི་ངོ་བོ་ཉིད། །ཅེས་སོགས་གསུངས་པའི་ཕྱིར། གཞན་ཡང་དངོས་པོ་བརྗོད་དུ་མེད་པ་ལ་ཞེས་པའི་ཕྱོགས་སྔ་སྨྲ་བ་པོ་དེས། སྐུ་གསུམ་པོ་དེ་དོན་དམ་པར་བདེན་སྟོང་ཡིན་པ་དང་། ཐེག་ཆེན་གྱི་སྒོམ་ལམ་དོན་དམ་པར་བདེན་སྟོང་མིན་པར་ཁས་ལེན་པར་ཐལ། སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། དངོས་སྨྲ་བས་དེ་ལྟར་ཁས་ལེན་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། དེ་ཡིན་ན་ཤེས་པ་བདེན་གྲུབ་ཏུ་ཁས་ལེན་པའི་ཁྱབ་པའི་ཕྱིར་ཞེས་ཟེར་རོ། །དང་པོ་ལ། གཟུགས་བརྙན་ཆོས་ཅན། ཁྱོད་གཅིག་དུ་བྲལ་གྱི་རྟགས་ལས་མྱུ་གུ་བདེན་མེད་དུ་སྒྲུབ་པའི་མཐུན་དཔེ་ཡང་དག་མིན་པར་ཐལ། ཁྱོད་དང་དེ་གཉིས་པོ་བདག་མེད་དུ་རྟོགས་དཀའ་སླའི་ཁྱད་པར་མེད་པའི་ཕྱིར། རྟགས་ཁས་བླངས་ཏེ། དེར་ཐལ། ཚད་མས་གྲུབ་པའི་ཆོས་གཅིག་བདེན་མེད་དུ་རྟོགས་ན། དེས་གྲུབ་པའི་ཆོས་ཐམས་ཅད་བདེན་མེད་དུ་རྟོགས་དགོས་པའི་ཕྱིར། ཁོ་ན་རེ། ཁྱབ་པ་མི་མཚུངས་ཏེ། གཟུགས་དང་མྱུ་གུ་གཉིས་སྣང་བ་ལྟར་བདེན་མེད་དུ་རྟོགས་དཀའ་སླའི་ཁྱད་པར་ཡོད་པས། སྣང་བ་ལྟར་མི་བདེན་པ་དེ་ཉིད་མཐུན་དཔེར་གཟུང་བ་ཡིན་པའི་ཕྱིར་ཞེ་ན། འོ་ན་སྔ་མ་ཡང་དེའི་མཐུན་དཔེ་ཡང་དག་ཏུ་ཐལ། རྟོགས་ཡེ་ཆོས་སྐུ་དང་ཐེག་ཆེན་གྱི་སྒོམ་ལམ་གཉིས་གཟུང་འཛིན་གཉིས་ཀྱིས་སྟོང་པར་རྟོགས་དཀའ་སླའི་ཁྱད་པར་ཡོད་པས། དེས་སྟོང་ཡང་གདུལ་བྱའི་དོན་བྱེད་པ་མཐུན་དཔེར་གཟུང་བ་ཡིན་པའི་ཕྱིར། དེ་གཉིས་གཟུང་འཛིན་གཉིས་སྟོང་པར་རྟོགས་དཀའ་སླའི་ཁྱད་པར་ཡོད་དེ། སྔ་མ་ལ་གཟུང་འཛིན་གཉིས་སུ་སྣང་བ་མི་འཐད་ཅིང་། ཕྱི་མ་ལ་དེར་སྣང་བ་ཡོད་པའི་ཕྱིར། ཐལ་འགྱུར་ཕྱི་མ་ལ། སེམས་ནི་སྔ་མས་བྱང་ཆུབ་བར། །ཞེས་པའི་ཕྱོགས་སྔ་སྨྲ་བ་པོ་དེས། མེ་ལྕེ་སྔ་ཕྱི་ཕན་ཚུན་ལྟོས་ནས་རང་གི་བསྲེག་བྱར་གྱུར་པའི་སྡོང་བུ་སྣུམ་ལྡན་སྲེག་པ་དང་། ཐེག་ཆེན་གྱི་སེམས་བསྐྱེད་དེ་སྐད་ཅིག་སྔ་ཕྱི་ཕན་ཚུན་ལྟོས་ནས་སངས་རྒྱས་ཀྱི་ཡེ་ཤེས་མི་སྐྱེད་པར་ཁས་ལེན་པར་ཐལ། ཐེག་ཆེན་སེམས་བསྐྱེད་དེ་ལྟར་ལྟོས་ནས་སངས་རྒྱས་ཀྱི་ཡེ་ཤེས་སྐྱེད་དེ། མར་མེའི་མེ་ལྕེ་སྐད་ཅིག་སྔ་ཕྱི་ཕན་ཚུན་ལྟོས་ནས་དེ་ལྟར་སྲེག་པའི་ཕྱིར་ཞེས་པའི་སྦྱོར་བ་དེ། མར་མེའི་དཔེ་ཡི་ཚུལ་གྱིས་ནི། །ཞེས་པའི་གཞུང་གི་དོན་སྦྱོར་ཡིན་པའི་ཕྱིར། ཁྱབ་པ་ཁས། འདོད་ན། ཐེག་ཆེན་སེམས་བསྐྱེད་སྐད་ཅིག་རེ་རེ་ཁོ་ནས་སངས་རྒྱས་ཀྱི་ཡེ་ཤེས་མི་སྐྱེད་པར་ཁས་ལེན་པའི་གང་ཟག་ཡིན་ན་དེ་སྐད་ཅིག་སྔ་ཕྱི་ཕན་ཚུན་ལྟོས་ནས་དེ་མི་སྐྱེད་པར་ཁས་ལེན་པའི་གང་ཟག་ཡིན་དགོས་པར་ཐལ། འདོད་པ་དེའི་ཕྱིར། འདོད་ན། དབུ་མ་པ་ཆོས་ཅན། དེར་ཐལ། དེའི་ཕྱིར། སེམས་ནི་སྔ་མས་བྱང་ཆུབ་པ། །ཞེས་པ་དང་། མར་མེའི་དཔེ་ཡི་ཚུལ་གྱིས་ནི། །ཞེས་པའི་སྐབས་སུ། ཁ་ཅིག ཐེག་ཆེན་སྒོམ་ལམ་པའི་སེམས་བསྐྱེད་ཆོས་ཅན། ཁྱོད་ཀྱིས་བླ་ན་མེད་པའི་བྱང་ཆུབ་མི་སྐྱེད་པར་ཐལ། ཁྱོད་ཀྱི་སྐད་ཅིག་སྔ་མས་ཀྱང་མི་སྐྱེད། ཁྱོད་ཀྱི་སྐད་ཅིག་ཕྱི་མས་ཀྱང་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་ཕན་ཚུན་ལྷན་ཅིག་ཏུ་ཚོགས་པས་ཀྱང་མི་སྐྱེད་པའི་ཕྱིར་ཞེས་པའི་དོགས་པ་བཀོད་པ་མི་འཐད་དེ། འོ་ན་དེས་དེ་སྐྱེད་ཚུལ་ལ་དེའི་སྐད་ཅིག་སྔ་ཕྱིས་དེ་བསྐྱེད་པ་སོགས་གསུམ་པོ་དེར་ངེས་སམ་མ་ངེས། དང་པོ་ལྟར་ན། དེས་དེ་སྐྱེད་པ་མི་འཐད་པར་ཐལ། དེས་དེ་སྐྱེད་ཚུལ་ལ་དེར་ངེས་པ་གང་ཞིག དེ་གསུམ་གང་གིས་ཀྱང་བླ་ན་མེད་པའི་བྱང་ཆུབ་སྐྱེད་པར་སྒྲུབ་མི་ནུས་པའི་ཕྱིར། ཕྱི་མ་ལྟར་ན། སློབ་དཔོན་སེང་གེ་བཟང་པོ་ཆོས་ཅན། ཐེག་ཆེན་སེམས་བསྐྱེད་ཀྱིས་བླ་མེད་བྱང་ཆུབ་སྐྱེད་ཚུལ་གྱི་དོགས་པ་བསུ་བ་ལ་མཁས་པ་མིན་པར་ཐལ། དེས་དེ་སྐྱེད་པའི་མཐའ་མ་ཆོད་པའི་དོགས་པ་བཀོད་ནས་ལན་བཏབ་པའི་ཕྱིར། ཡང་ཁ་ཅིག ཐེག་ཆེན་སྒོམ་ལམ་པའི་རྒྱུད་ཀྱི་སེམས་བསྐྱེད་དེ་ཆོས་ཅན། ཁྱོད་ཀྱིས་བླ་མེད་བྱང་ཆུབ་མི་སྐྱེད་པར་ཐལ། ཁྱོད་ཀྱི་སྐད་ཅིག་སྔ་ཕྱི་རེ་རེས་ཀྱང་དེ་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་ཅིག་ཆར་དུ་འབྱུང་བར་ལྷན་ཅིག་ཏུ་འབྱུང་བས་ཀྱང་དེ་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་རིམ་གྱིས་འབྱུང་བ་ལྷན་ཅིག་ཏུ་ཚོགས་པས་ཀྱང་དེ་མི་སྐྱེད་པའི་ཕྱིར་ཞེས་སྨྲའོ། །དེ་ལ་རེད་མདའ་བ་ན་རེ། དེས་དེ་བསྐྱེད་ཚུལ་ལ་དེའི་སྐད་ཅིག་རེ་རེས་དེ་སྐྱེད་པ་སོགས་གསུམ་པོ་དེར་མཐའ་ཆོད་དམ་མ་ཆོད་ཅེས་དྲིས་ནས་སྔ་མ་བཞིན་བརྗོད་པར་མཛད་དོ། །གཞན་ཡང་དེ་ལ་སྐྱོན་འདི་ལྟར་གནས་ཏེ། ཐེག་ཆེན་སེམས་བསྐྱེད་སྐད་ཅིག་སྔ་ཕྱི་རིམ་གྱིས་འབྱུང་བ་ལྷན་ཅིག་ཏུ་ཚོགས་པས་བླ་མེད་བྱང་ཆུབ་སྐྱེད་ནུས་པ་ཆོས་ཅན། ཁྱོད་སློབ་དཔོན་གྱི་རང་ལུགས་སུ་ཁས་ལེན་པར་ཐལ། ཁྱོད་དེས་དེ་སྐྱེད་པའི་ཚུལ་ལ་མཐའ་གསུམ་དུ་བརྟགས་པའི་མཐའ་ཕྱི་མ་དེ་ཡིན་པའི་ཕྱིར། ཁྱབ་སྟེ། འགྲེལ་ཆེན་ལས། སྔར་བཤད་པའི་ཕྱོགས་མངོན་པར་འདོད་པ་མིན་པའི་ཕྱིར། ཕྱོགས་ཕྱི་མ་ལ་རབ་ཏུ་གྲགས་པའི་དཔེའི་ཚུལ་གྱིས་ལན་བཏབ་པའི་ཕྱིར་ཞེས་གསུངས་པའི་ཕྱིར། དེ་ལ་ཁོ་ན་རེ། སློབ་དཔོན་གྱི་རང་ལུགས་སུ་ཁས་མི་ལེན་པར་ཐལ། མཐའ་གསུམ་དུ་བརྟགས་པའི་རྗེས་སུ། དོན་གསལ་ལས། དེ་ནི་ཡང་དག་པ་མིན་པས་ཞེས་གསུངས་པའི་ཕྱིར་ཟེར་ན། སྐྱོན་མེད་དེ། དེའི་དོན་ནི། མཐའ་གསུམ་དུ་བརྟགས་ནས་ཐེག་ཆེན་སེམས་བསྐྱེད་ཀྱིས་བླ་ན་མེད་པའི་བྱང་ཆུབ་མི་སྐྱེད་པ་ཡང་དག་པ་མ་ཡིན་ཞེས་པའི་དོན་ཡིན་པའི་ཕྱིར། དེས་ན་རང་ལུགས་ནི། བྱང་སེམས་སྒོམ་ལམ་པའི་རྒྱུད་ཀྱི་སེམས་བསྐྱེད་དེ་ཆོས་ཅན། ཁྱོད་ཀྱིས་བླ་མེད་བྱང་ཆུབ་མི་སྐྱེད་པར་ཐལ། ཁྱོད་ཀྱི་སྐད་ཅིག་སྔ་ཕྱི་རེ་རེས་ཀྱང་དེ་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་ཅིག་ཅར་དུ་འབྱུང་བ་ལྷན་ཅིག་ཏུ་ཚོགས་པས་ཀྱང་དེ་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་རིམ་གྱིས་འབྱུང་བས་ཀྱང་དེ་མི་སྐྱེད་པའི་ཕྱིར་ཞེ་ན། མཐའ་ཕྱི་མ་ལ་རྟགས་མ་གྲུབ་ཀྱི་ལན་འདེབས་ཤིང་། དེའི་སྒྲུབ་བྱེད་དུ་དེ་བྱུང་མ་ཐག་ཏུ་རྗེས་སུ་འགྲོ་བ་མེད་པ་ཉིད་འཇིགས་པའི་ཕྱིར་ཞེས་པ་ལ། མར་མེའི་དཔེའི་སྒོ་ནས་ཁྱབ་པ་མ་གྲུབ་པའི་ལན་འདེབས་པ་ནི་སྔར་གྱི་འགྲེལ་ཆེན་གྱི་དགོངས་པ་དཔྱིས་ཕྱིན་པའོ། །ཆོས་རྣམས་རྨི་ལམ་འདྲ་བའི་ཕྱིར། །ཞེས་པའི་སྐབས་སུ། སྦྱོར་བ་གསུམ་གྱི་ས་མཚམས་ལ་དཔྱད། དངོས་ཀྱི་དོན་ལ་དཔྱད། ཀླན་ཀ་སྤང་བའི་ཚུལ་དང་གསུམ་ལས། དང་པོ་ལ་དགག་གཞག་གཉིས། དང་པོ་ལ་ཁ་ཅིག སྲིད་ཞི་མཉམ་ཉིད་ཀྱི་སྦྱོར་བ། ཞིང་དག་པའི་སྦྱོར་བ། ཐབས་ལ་མཁས་པའི་སྦྱོར་བ་གསུམ་གྱི་མ་མཐའི་ས་མཚམས་ཐེག་ཆེན་གྱི་ཚོགས་ལམ་ན་ཡོད་དེ། དེ་ནས་ཆོས་སྐུ་དང་། ལོངས་སྐུ་དང་། ཕྲིན་ལས་ཀྱི་ཐུན་མོང་མིན་པའི་རྒྱུར་གྱུར་པའི་སྦྱོར་བ་རྣམས་ཡོད་པའི་ཕྱིར་ཟེར། ཁ་ཅིག དེ་གསུམ་གྱི་མ་མཐའ་ས་དང་པོ་ནས་ཡོད་དེ། དེར་སྲིད་ཞི་རང་བཞིན་མེད་པར་མངོན་སུམ་དུ་རྟོགས་པའི་སྦྱོར་བ་ཡོད་པའི་ཕྱིར་ཟེར། ཡང་ཁ་ཅིག དེ་གསུམ་མ་མཐའ་ཐེག་ཆེན་གྱི་སྦྱོར་ལམ་དྲོད་ནས་ཡོད་དེ། དེར་སྲིད་ཞི་རང་བཞིན་མེད་པར་མཉམ་ཉིད་དུ་རྟོགས་པ་ལ་སྒོམ་བྱུང་གཙོ་བོར་གྱུར་པའི་སྦྱོར་བ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བར་བྱེད་པའི་སྦྱོར་བ་དང་། ཐེག་ཆེན་སེམས་བསྐྱེད་ཀྱི་སྒོ་ནས་གཞན་དོན་ཕུན་སུམ་ཚོགས་པ་སྒྲུབ་པའི་སྦྱོར་བ་ཡོད་པའི་ཕྱིར་ཞེས་སྨྲའོ། །དེ་ལྟར་ལུགས་གསུམ་ལས། དང་པོ་ལ་ཆོས་སྐུའི་ཐུན་མོང་མིན་པའི་རྒྱུའི་དོན་དེ་ཐེག་ཆེན་གྱི་ཉམས་ལེན་རྣམས་ཀྱི་ནང་ནས་ཆོས་སྐུའི་ཐུན་མོང་མིན་པའི་རྒྱུ་ཡིན་པ་ལ་བྱེད་དམ། ཉན་རང་དང་ཐུན་མོང་མིན་པའི་ཆོས་སྐུའི་རྒྱུ་ཡིན་པ་ལ་བྱེད། དང་པོ་ལྟར་ན། ཐེག་ཆེན་གྱི་ཚོགས་ལམ་ན་དེ་འདྲ་ཡོད་པའི་གཏན་ཚིགས་མ་གྲུབ་སྟེ། དེར་རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར་བ་མ་ཐོབ་པའི་ཕྱིར། ཕྱི་མ་ལྟར་ན། མ་ཁྱབ་སྟེ། ཐེག་ཆེན་ལམ་དུ་འཇུག་ཁ་མའི་ཉན་ཐོས་དགྲ་བཅོམ་པའི་རྒྱུད་ལའང་འབྲས་ཡུམ་ལ་ཉེ་བའི་གཞི་ཤེས་ཡོད་པར་ཐལ། དེའི་རྒྱུད་ལ་བསྐལ་པ་གྲངས་མེད་གསུམ་ནས་འབྲས་ཡུམ་ཐོབ་པར་ངེས་པའི་གཞི་ཤེས་ཡོད་པའི་ཕྱིར། ཁྱབ་པ་ཁས། ལུགས་གསུམ་ཆར་ལ་ཐུན་མོང་དུ་ཐེག་ཆེན་གྱི་སྦྱོར་ལམ་དྲོད་ཀྱི་གནས་སྐབས་ན་ཕྱིར་མི་ལྡོག་པའི་སྦྱོར་བ་ཡོད་པར་ཐལ། དེའི་གནས་སྐབས་ན་རྫོགས་བྱང་ལས་ཕྱིར་མི་ལྡོག་པའི་སྦྱོར་བ་ཡོད་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། དྲོད་ལ་གནས་པའི་བྱང་སེམས་ཡིན་ན་གནས་སྐབས་རྫོགས་བྱང་ལས་ཕྱིར་མི་ལྡོག་པས་ཁྱབ་པའི་ཕྱིར། གཞན་ཡང་ཐེག་ཆེན་སྦྱོར་ལམ་ན་བྱང་ཆུབ་ལ་ཉེ་བའི་སྦྱོར་བ་ཡོད་པར་ཐལ། ཆོས་མཆོག་ཆེན་པོའི་ཡེ་ཤེས་དེ་བསྐལ་པ་གྲངས་མེད་གསུམ་ནས་བྱང་ཆུབ་ཐོབ་པར་ངེས་པའི་སྦྱོར་བ་ཡིན་པའི་ཕྱིར། ཡང་ཐེག་ཆེན་དྲོད་ཀྱི་གནས་སྐབས་སུ་ཚོགས་སྒྲུབ་ཡོད་པར་ཐལ། དེར་བྱང་ཆུབ་ཆེན་པོའི་རྒྱུ་ཚོགས་སུ་གྱུར་པའི་སྒྲུབ་པ་ཡོད་པའི་ཕྱིར། གསུམ་ཆར་གྱི་ཁྱབ་པ་ཁས། གཞན་ཡང་ལུགས་དང་པོ་ལ། སྲིད་ཞི་མཉམ་ཉིད་ཀྱི་སྦྱོར་བ་ཐོབ་པའི་གང་ཟག་ཡིན་ན་ཕྱིར་མི་ལྡོག་པའི་དགེ་འདུན་སྔོན་སོང་ཡིན་པས་མ་ཁྱབ་པར་ཐལ། དེའི་མ་མཐའི་ས་མཚམས་ཐེག་ཆེན་གྱི་ཚོགས་ལམ་ནས་འཇོག་པར་འཐད་པའི་ཕྱིར། འདོད་མི་ནུས་ཏེ། སློབ་པའི་ཚོགས་ཀྱི་ཆོས་ཐོབ་པ། །ཞེས་གསུངས་པའི་ཕྱིར། ཡང་ཁ་ཅིག སྲིད་ཞི་མཉམ་ཉིད་ཀྱི་མ་མཐའི་ས་མཚམས་ཐེག་ཆེན་གྱི་སྦྱོར་ལམ་ནས་ཡོད་དེ། དེ་སྒོམ་པའི་རྟེན་གྱི་གང་ཟག་དེ་སྦྱོར་མཐོང་སྒོམ་གསུམ་ལ་གནས་པའི་གང་ཟག་ཏུ་བཤད་པའི་ཕྱིར་ཏེ། སློབ་པའི་ཚོགས་ཀྱི་ཆོས་ཐོབ་པའི་བྱང་ཆུབ་སེམས་དཔས་སྒོམ་པར་བཤད་པ་གང་ཞིག སྦྱོར་མཐོང་སྒོམ་གསུམ་ལ་གནས་པའི་སེམས་དཔས་སློབ་པའི་ཚོགས་ཀྱི་ཆོས་ཐོབ་པའི་ཕྱིར། སྔ་མ་དེར་ཐལ། སློབ་པའི་ཚོགས་ཀྱི་ཆོས་ཐོབ་པ་ཞེས་སོགས་གསུངས་པའི་ཕྱིར་ཟེར། འོ་ན་རྩེ་སྦྱོར་སྒོམ་པའི་རྟེན་གྱི་གང་ཟག་དེ་ཐེག་ཆེན་གྱི་སློབ་ལམ་བཞི་ཀ་ལ་གནས་པའི་གང་ཟག་ཏུ་བཤད་པར་ཐལ། རྣམ་རྫོགས་སྦྱོར་བ་ཐོབ་པའི་བྱང་ཆུབ་སེམས་དཔས་དེ་སྒོམ་པར་བཤད་པ་གང་ཞིག ཐེག་ཆེན་གྱི་སློབ་ལམ་བཞི་ཀ་ལ་གནས་པའི་བྱང་ཆུབ་སེམས་དཔས་རྣམ་རྫོགས་སྦྱོར་བ་ཐོབ་པའི་ཕྱིར། རྟགས་སྔ་མ་དེར་ཐལ། རྣམ་པ་ཀུན་མངོན་པར་རྫོགས་པར་རྟོགས་པ་ཐོབ་པ་ལ་རབ་ཀྱི་མཐར་ཕྱིན་པའི་རྟོགས་པ་འབྱུང་བས་ཞེས་གསུངས་པའི་ཕྱིར། རིམ་བཞིན་ཁས་བླངས། རྩ་བར་འདོད་ན། ཐེག་ཆེན་གྱི་ཚོགས་ལམ་ན་རྩེ་སྦྱོར་ཡོད་པར་ཐལ་ལོ། །གཉིས་པ་ལ། སྦྱོར་བ་གསུམ་གྱི་མ་མཐའི་ས་མཚམས་ས་བརྒྱད་པ་ན་ཡོད་དེ། དག་སའི་བྱང་སེམས་ལ་མི་སློབ་པའི་དགེ་འདུན་གྱི་ཐ་སྙད་གསུངས་ཤིང་། སྦྱོར་བ་དེ་གསུམ་མི་སློབ་པའི་དགེ་འདུན་ཁོ་ནས་སྒོམ་པར་བཤད་པའི་ཕྱིར་ཏེ། འགྲེལ་ཆེན་ལས། དེ་བས་ན་མི་སློབ་པའི་དགེ་འདུན་གྱི་མཚན་ཉིད་གསལ་བར་བསྟན་པའི་ཕྱིར། འཁོར་བ་དང་མྱང་འདས་མཉམ་པ་ཉིད་བཤད་པར་བྱ་བ་ཡིན་པས་ཞེས་གསུངས་པའི་ཕྱིར། འདི་དག་ས་ནས་འཇོག་པའི་རྒྱུ་མཚན་གཞན་ཡང་། རྫོགས་སྨིན་སྦྱང་གསུམ་མ་བྱས་པར་ཡང་དག་མཐའ་མངོན་དུ་མ་བྱེད་ཅིག་ཅེས་པའི་གདམས་པའང་དག་སའི་བྱང་སེམས་ལ་མཛད་པ་དང་། རྒྱལ་བ་རྣམས་ཀྱིས་འགོག་པ་ལས་སློང་བར་མཛད་པ་ཡང་དག་སའི་བྱང་སེམས་ལ་མཛད་པ་སོགས་གནད་དུ་མ་ཤེས་དགོས་ཏེ་འདིར་མ་སྤྲོས་སོ། །གཉིས་པ་ལ། ཡུལ་འཁོར་འདས་གཉིས་ངོས་གཟུང་བ་དང་། ཡུལ་ཅན་སྦྱོར་བའི་ངོ་བོ་གཉིས་ལས། དང་པོ་ལ་མཚན་གཞི་དང་མཚན་ཉིད་གཉིས་ལས། དང་པོ་ནི། སེམས་ཙམ་པའི་གཞུང་འགའ་ཞིག་ལས། ཀུན་བརྟགས་དང་། མ་དག་གཞན་དབང་འཁོར་བ་དང་། དག་པ་གཞན་དབང་དང་ཡོངས་གྲུབ་མྱང་འདས་སུ་བཤད་པ་ཡོད་ཀྱང་མི་འཐད་དེ། འཁོར་བ་ཡིན་ན་འདུས་བྱས་ཡིན་དགོས་པའི་ཕྱིར་དང་། ཀུན་བརྟགས་འདུས་བྱས་མིན་པའི་ཕྱིར། མྱང་འདས་ཡིན་ན་སོ་སོར་བརྟགས་འགོག་ཡིན་དགོས་ལ། དག་པ་གཞན་དབང་དེ་འཕགས་རྒྱུད་ཀྱི་མཉམ་གཞག་ཡིན་པའི་ཕྱིར། ཡང་ཁ་ཅིག སྡུག་ཀུན་གཉིས་འཁོར་བ་དང་། འགོག་ལམ་གཉིས་མྱང་འདས་ཀྱི་མཚན་གཞིར་འཇོག་པའང་མི་འཐད་དེ། དེ་ཡིན་ན་འཁོར་བ་ཡིན་པས་མ་ཁྱབ་སྟེ། མ་དག་པའི་སྣོད་ཀྱི་འཇིག་རྟེན་དེ་འཁོར་བ་མིན་པའི་ཕྱིར་དང་། ལམ་བདེན་མྱང་འདས་མིན་པའི་ཕྱིར། ཡང་ཁ་ཅིག མྱང་འདས་ལ་ལྷག་བཅས་མྱང་འདས་དང་། ལྷག་མེད་མྱང་འདས། མི་གནས་པའི་མྱང་འདས། རང་བཞིན་གྱི་མྱང་འདས་དང་བཞིར་བཞེད་པའང་མི་འཐད་དེ། རང་བཞིན་གྱི་མྱང་འདས་ཀྱིས་མྱང་འདས་ཀྱི་གོ་མི་ཆོད་པའི་ཕྱིར་ཏེ། འཁོར་བ་ཡིན་ན་རང་བཞིན་གྱི་མྱང་འདས་དང་ལྡན་པས་ཁྱབ་པའི་ཕྱིར། རང་ལུགས་ནི། རྟེན་འབྲེལ་ཡན་ལག་བཅུ་གཉིས་པོ་འདི་འཁོར་བའི་མཚན་གཞི་ཡིན་ཏེ། ཀླུ་སྒྲུབ་ཀྱིས། གསུམ་པོ་དག་ལས་གཉིས་འབྱུང་ཞིང་། །གཉིས་ལས་གཉིས་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་ནི། །དེ་ཉིད་ཡང་དང་ཡང་དུ་འཁོར། །ཞེས་གསུངས་པས་སོ། །འཁོར་བའི་སྒྲ་དོན་ཡང་འདི་ཡིན་གྱི། འགའ་ཞིག་མནར་མེད་ནས་སྲིད་རྩེའི་བར་འཁོར་བ་ཞེས་འདོད་པ་བཞད་གད་ཀྱི་གནས་ཡིན་ནོ། །ཉོན་སྒྲིབ་སྤངས་པའི་སོ་སོར་བརྟགས་འགོག་དེ་མྱང་འདས་ཀྱི་མཚན་གཞི་ཡིན་ཏེ། ཀླུ་སྒྲུབ་ཀྱིས། ལས་དང་ཉོན་མོངས་ཟད་པས་ཐར། །ཞེས་གསུངས་པའི་ཕྱིར། གཉིས་པ་ལ། ཁ་ཅིག ལས་ཉོན་གྱི་འཆིང་བ་ལས་མ་གྲོལ་བའི་གང་ཟག་གི་རྒྱུད་ཀྱི་མ་དག་པའི་རྟེན་འབྲེལ་འཁོར་བའི་མཚན་ཉིད་དང་། བར་ཆད་མེད་ལམ་གྱི་སྟོབས་ཀྱིས་ལས་ཉོན་གྱི་འཆིང་བ་སྤངས་པའི་སོ་སོར་བརྟགས་འགོག་དེ་མྱང་འདས་ཀྱི་མཚན་ཉིད་ཡིན་ཟེར། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་གཟུགས་ཕུང་ཆོས་ཅན། འཁོར་བ་ཡིན་པར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། དེ་ལྟ་བུའི་དགྲ་བཅོམ་པ་དེས། འཁོར་བ་ཟད་པར་སྤངས་པའི་ཕྱིར། རྩ་རྟགས་མ་གྲུབ་ན། དེ་ཆོས་ཅན། དེར་ཐལ། ལས་ཉོན་གྱི་འཆིང་བ་ལས་མ་གྲོལ་བའི་གང་ཟག་གི་རྒྱུད་ཀྱི་མ་དག་པའི་གཟུགས་ཕུང་ཡིན་པའི་ཕྱིར། མ་གྲུབ་ན། དེ་དེར་ཐལ། དེ་ལྟ་བུའི་དགྲ་བཅོམ་པ་དེ་ལས་ཉོན་གྱི་འཆིང་བ་ལས་མ་གྲོལ་བའི་གང་ཟག་ཡིན་པའི་ཕྱིར་ཏེ། དེ་ལས་ཀྱི་འཆིང་བ་ལས་མ་གྲོལ་བའི་གང་ཟག་ཡིན་པའི་ཕྱིར། དེ་བཞིན་དུ་མྱང་འདས་ཀྱི་མཚན་ཉིད་ལའང་སྐྱོན་སྔ་མ་འཇུག་པར་ཤེས་པར་བྱའོ། །གཞན་ཡང་དམན་ལམ་སྔོན་དུ་མ་སོང་བའི་ཐེག་ཆེན་མཐོང་ལམ་པའི་རྒྱུད་ཀྱི་ཉོན་སྒྲིབ་སྤངས་པའི་སྤངས་པ་ཆོས་ཅན། མྱང་འདས་ཀྱི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དམན་ལམ་སྔོན་དུ་མ་སོང་བའི་ཐེག་ཆེན་མཐོང་ལམ་པའི་རྒྱུད་ལ་ཉོན་སྒྲིབ་ཀྱི་དངོས་གཉེན་བར་ཆད་མེད་ལམ་ཡོད་པར་ཐལ་ལོ། །རང་ལུགས་ནི། མཚན་ཉིད་རིམ་པ་བཞིན། ཉོན་མོངས་མ་སྤངས་པའི་གང་ཟག་གི་རྒྱུད་ཀྱི་མ་དག་པའི་རྟེན་འབྲེལ་དང་། འཁོར་བར་འཆིང་བྱེད་ཀྱི་ཉོན་སྒྲིབ་ཟད་པར་སྤངས་པའི་སོ་སོར་བརྟགས་འགོག གཉིས་པ་རྣམ་པར་མི་རྟོག་པའི་ཡེ་ཤེས་ལ་དབང་སྒྱུར་ཐོབ་པའི་སྒོ་ནས་སྲིད་ཞི་མཉམ་ཉིད་དུ་རྟོགས་ནས་སྒོམ་པའི་སེམས་དཔའི་རྣལ་འབྱོར་རོ། །གསུམ་པ་ལ། རྩ་འགྲེལ་གཉིས་ལས་དངོས་སུ་སྟོན་པའི་ལས་མེད་པར་ཐལ་བའི་ཀླན་ཀ་སྤང་བ། སོགས་པའི་སྒྲས་བསྟན་པའི་ལན་ལ་མ་ངེས་པར་ཐལ་བའི་ཀླན་ཀ་སྤང་བ། ལུང་དང་འགལ་བའི་ཀླན་ཀ་སྤང་བ། ཧ་ཅང་ཐལ་བའི་ཀླན་ཀ་སྤང་བ་དང་བཞིའོ། །དང་པོ་ལ། ཀླན་ཀ་དང་ལན་གཉིས། དང་པོ་ནི། ཆོས་རྣམས་རྨི་ལམ་འདྲ་བའི་ཕྱིར། །ཞེས་པའི་སྐབས་སུ་ཆོས་ཐམས་ཅད་རྨི་ལམ་དང་འདྲ་བར་ཁས་བླངས་པ་ལ། དངོས་སྨྲ་བ་རྣམས་ན་རེ། ཉིན་བར་གྱི་གནས་སྐབས་སུ་དགེ་སྡིག་གི་ལས་སོགས་པ་མེད་པར་ཐལ། དེ་རང་བཞིན་གྱིས་མེད་པའི་ཕྱིར། དཔེར་ན་རྨི་ལམ་བཞིན་ནོ་ཞེས་པའོ། །གཉིས་པ་ནི། དངོས་སྨྲ་བ་རང་ལུགས་ལ་ཁྱབ་པ་མ་གྲུབ་པའི་ལན། དབུ་མ་པའི་ལུགས་ལ་ཁྱབ་པ་མ་གྲུབ་པའི་ལན། དངོས་སྨྲ་བའི་ལུགས་ལ་རྨི་ལམ་དགེ་སྡིག་གི་ལས་མེད་པའི་མཐུན་དཔེར་མ་གྲུབ་པའི་ལན། དབུ་མ་པའི་ལུགས་ལ་དེ་མ་གྲུབ་པའི་ལན་དང་བཞིའོ། །དང་པོ་ནི། དངོས་སྨྲ་བ་ཁྱེད་རང་གི་ལུགས་ལ་གོང་གི་ཐལ་བ་ལ་ཁྱབ་པ་མེད་དེ། ཁྱེད་རང་གི་གསད་བྱའི་སྲོག་སྐད་ཅིག་མ་ཡིན་པས་རྒྱུ་རྐྱེན་གཞན་ལ་ལྟོས་མེད་དུ་འཇིག་པའི་ཕྱིར་ན། དོན་དམ་པར་སྲོག་གཅོད་པའི་ལས་མེད་ཀྱང་། ཐ་སྙད་དུ་ཡོད་པར་ཁས་བླངས་པའི་ཕྱིར། གཉིས་པ་ནི། དབུ་མ་པའི་ལུགས་ལའང་དེ་ལ་ཁྱབ་པ་མེད་པར་ཐལ། དགེ་སྡིག་གི་ལས་རང་བཞིན་གྱིས་མེད་ཀྱང་། མངོན་ཞེན་གྱི་དབང་གིས་དགེ་སྡིག་གི་ལས་སོགས་པ་ཡོད་པའི་ཕྱིར། གསུམ་པ་དངོས་སྨྲ་བའི་ལུགས་ལའང་། དེ་དེའི་མཐུན་དཔེར་མ་གྲུབ་སྟེ། དེའི་ལུགས་ལ་རྨི་ལམ་ན་དགེ་སྡིག་གི་ལས་བཟང་པོ་མེད་ཀྱང་། དེ་དམན་པ་ཙམ་ཡོད་པར་ཁས་བླངས་པའི་ཕྱིར། བཞི་པ་དབུ་མ་པའི་ལུགས་ལ་ཡང་དེ་དེའི་མཐུན་དཔེར་མ་གྲུབ་སྟེ། དེའི་ལུགས་ལ་རྨི་ལམ་དུ་དགེ་སྡིག་གི་ལས་བྱས་པ་རྨིས་པ་དེ། རྗེས་ཀྱི་སེམས་ཀྱི་གསོས་བཏབ་ན། དགེ་སྡིག་གི་ལས་གསོག་པ་ཡོད་པར་འདོད་པའི་ཕྱིར། བཞི་པོ་དེ་རིམ་པ་བཞིན་དུ་འགྲེལ་པར། ཇི་ལྟར་ཕྱི་རོལ་ཞེས་སོགས་དང་། དངོས་པོ་རྨི་ལམ་ཞེས་སོགས་དང་། གཞན་ཡང་ཞེས་སོགས་དང་། དེ་བཞིན་དུ་རྨི་ལམ་ན་ཞེས་སོགས་ཀྱིས་བསྟན་ཏོ། །གཉིས་པ་ལ། ཀླན་ཀ་ནི། དངོས་སྨྲ་བ་ན་རེ། མངོན་ཞེན་ཡོད་ན་ལས་སོག་པ་ཡོད་པས་ཁྱབ་ན། དེ་བཞིན་གཤེགས་པ་ལ་ལས་སོགས་པ་ཡོད་པར་ཐལ། དེ་ལ་མངོན་ཞེན་ཡོད་པའི་ཕྱིར་ཏེ། ང་ནི་འཁོར་བའི་ཕུང་པོ་ཟད་པའོ་ཞེས་ངར་འཛིན་ཡོད་པར་བསྟན་པའི་ཕྱིར་ཞེས་པའོ། །གཉིས་པ་ལན་ནི། གཏན་ཚིགས་མ་གྲུབ་སྟེ། ངར་འཛིན་ཡོད་པར་བསྟན་པ་ནི་དྲང་བའི་དོན་ཅན་ཡིན་གྱི། དེ་བཞིན་གཤེགས་པ་ནི་རྣམ་པར་རྟོག་པའི་བག་ཆགས་ཟད་པར་སྤངས་པའི་ཕྱིར་ཞེས་པའོ། །གསུམ་པ་ལ། ཀླན་ཀ་ནི། དགེ་སྡིག་གི་ལས་སོགས་པ་ཡོད་ཅིང་འཕེལ་བ་ཡོད་ན། བཅོམ་ལྡན་འདས་ཀྱིས། ལས་དང་སེམས་པ་ཐམས་ཅད་ནི་དབེན་ནོ་ཞེས་གསུངས་པ་དང་འགལ་ལོ་ཞེས་པའོ། །གཉིས་པ་ལན་ནི་སྐྱོན་མེད་དེ། དེ་ལྟར་གསུངས་པ་ནི་དོན་དམ་ལ་དགོངས་ལ། དགེ་སྡིག་གི་ལས་སོགས་ཅིང་འཕེལ་བ་ཡོད་པ་ནི་ཀུན་རྫོབ་ལ་དགོངས་པའི་ཕྱིར་ཞེས་བཤད་པའོ། །བཞི་པ་ལ། ཀླན་ཀ་ནི་རྨི་ལམ་དུ་སྦྱིན་པ་སྦྱིན་པར་བྱེད་ཅིང་དེ་བླ་མེད་བྱང་ཆུབ་ཏུ་བསྔོས་ན། ཅིས་དེ་ཡོངས་སུ་བསྔོ་བ་ཞེས་བྱ་བའམ་ཞེས་སླར་ཡང་དྲིས་པའོ། །གཉིས་པ་ལན་ནི། རྗེས་ཀྱི་ཤེས་པས་གསོས་བཏབ་ན། བསྔོ་བར་འགྱུར་ཞེས་ལན་བཏབ་ཟིན་བཞིན་དུ་སླར་ཡང་དོགས་པ་བྱེད་ན། ཧ་ཅང་ཐལ་བར་འགྱུར་བའི་བསམ་པས། རབ་འབྱོར་རང་ཉིད་ཀྱི་ལན་མ་གསུངས་པར་བྱམས་པ་ལ་ཁ་འཕངས་པའོ། །དེ་ལྟར་དུ་ཤཱ་རིའི་བུས་བྱམས་པ་ལ་དྲིས་པ་ན། བྱམས་པས་ཀྱང་བྱམས་པ་ཞེས་བྱ་བའི་མིང་གང་ཡིན་པ་དེས་དོན་འདིའི་ལན་འདོན་ནམ། འོན་ཏེ་གཟུགས་ཀྱི་ལན་འདོན་ཞེས་པ་ནས་ཡང་དག་པར་རྗེས་སུ་མ་མཐོང་། ཞེས་གསུངས་ནས་ལན་དངོས་སུ་མ་གསུངས་སོ། །འོ་ན་ཅིའི་ཕྱིར་རབ་འབྱོར་གྱིས་བྱམས་པ་ལ་ཁ་འཕངས་ཤེ་ན། བསྟན་པ་འདིའི་གདུལ་བྱ་ཡིན་ན་སྔར་གྱི་དྲིས་ལན་རྣམས་ཀྱིས་ལོག་རྟོག་བསལ་ནུས་ཤིང་། མིན་ན་མ་འོངས་པའི་སངས་རྒྱས་བརྒྱུད་མར་འབྱུང་བས་ལོག་རྟོག་བསལ་དགོས་པའི་དོན་ནོ། །བྱམས་པས་ཀྱང་ལན་དངོས་སུ་མི་གསུང་བ་ནི་དེ་དང་འདྲའོ། །ཀླན་ཀ་བཞི་པོ་འདི་དག་ནི། །ཆོས་རྣམས་རྨི་ལམ་འདྲ་བའི་ཕྱིར། །ཞེས་པའི་ཐད་ཀྱི་མདོར་རྨི་ལམ་དང་ཉིན་པར་ནི་རྣམ་པར་མི་རྟོག་པའོ་ཞེས་གསུངས་ལ། མ་འོངས་པའི་དངོས་སྨྲ་བ་རྣམས་ཀྱི་དོགས་པ་བསུས་ནས་ཤཱ་རིའི་བུས་རབ་འབྱོར་ལ་དྲིས་པ་ཡིན་ལ། ལན་རྣམས་ནི་དང་པོ་གསུམ་རབ་འབྱོར་གྱིས་དངོས་སུ་སྨྲས་ཤིང་། ཕྱི་མ་བྱམས་པ་ལ་ཁ་འཕངས་པ་སྟེ། འདི་དག་གི་མདོ་སྦྱོར་ནི་ཚིག་མང་གིས་དོགས་ནས་མ་སྤྲོས་སོ། །སེམས་ཅན་འཇིག་རྟེན་དེ་བཞིན་དུ། །ཞེས་པའི་སྐབས་སུ། ཞིང་དག་སྦྱོར་གྱི་མཚན་ཉིད་ལ། ཁ་ཅིག་མ་འོངས་པ་ན་སངས་རྒྱས་པའི་ཞིང་དེ་ཉེས་པ་མེད་ཅིང་། ཡོན་ཏན་དང་ལྡན་པའི་ཆེད་དུ་མཁྱེན་གསུམ་གྱི་རྣམ་པར་བསྡུས་ནས་སྒོམ་པའི་སེམས་དཔའི་རྣལ་འབྱོར་རོ་ཞེས་དང་། ལོངས་སྐུའི་ཆེད་དུ་སངས་རྒྱས་ཀྱི་ཞིང་སྦྱོང་བར་བྱེད་པའི་དག་སའི་རྣལ་འབྱོར་རོ་ཞེ་ན། དང་པོ་ལ། སྟོན་པ་ཤཱཀྱ་ཐུབ་པས་ཞིང་དག་པའི་སྦྱོར་བ་བསྒོམས་པའི་འབྲས་བུ་མཐར་ཐུག་མ་ཐོབ་པར་ཐལ། དེ་སངས་རྒྱས་པའི་ཞིང་མི་མཇེད་འཇིག་རྟེན་གྱི་ཁམས་དེ་ཉེས་པ་མེད་ཅིང་ཡོན་ཏན་དང་ལྡན་པ་མིན་པའི་ཕྱིར། གཉིས་པ་ལ། བདེ་བ་ཅན་གྱི་ཞིང་སྒྲུབ་པའི་དག་སའི་རྣལ་འབྱོར་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེ་དེར་ཐལ། དེ་འདྲ་ཡོད་པ་གང་ཞིག བདེ་བ་ཅན་གྱི་ཞིང་དེ་སངས་རྒྱས་ཀྱི་ཞིང་ཡོངས་སུ་དག་པ་ཡིན་པའི་ཕྱིར། རྩ་བར་འདོད་ན། བདེ་བ་ཅན་གྱི་ཞིང་དེ་ལ་ལོངས་སྐུའི་ཞིང་ཡིན་པར་ཐལ། རང་ལུགས་ནི། རང་སྣང་ལ་སྣོད་བཅུད་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བའི་ཆེད་དུ་མ་དག་པའི་སྣོད་བཅུད་ཀྱི་ཞིང་སྦྱོང་བར་བྱེད་པའི་དག་སའི་རྣལ་འབྱོར་རོ། །ཡུལ་དང་སྦྱོར་བ་ཅན་འདི་ནི། །ཞེས་པའི་སྐབས་སུ། ཐབས་མཁས་སྦྱོར་བའི་མཚན་ཉིད་ལ། ཡུལ་ཐབས་མཁས་མངོན་དུ་བྱ་བའི་དུས་དང་དུས་མིན་པ་མངོན་དུ་ཤེས་ནས་དུས་ལ་མ་བབས་ན་མངོན་དུ་མི་བྱེད་ཅིང་འདྲིས་པར་བྱེད་པའི་དག་སའི་རྣལ་འབྱོར་རོ་ཟེར་ན། ས་བཅུ་རྒྱུན་མཐའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཡུལ་ཐབས་མཁས་བཅུ་ལ་འདྲིས་པར་བྱེད་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། ཁྱོད་ཀྱི་སྐད་ཅིག་ཕྱི་ལོགས་དེ་མ་ཐག་ཏུ་རྣམ་མཁྱེན་མངོན་དུ་འགྱུར་བའི་ཕྱིར། རང་ལུགས་ནི། ཡུལ་ཐབས་མཁས་བཅུ་པོ་མངོན་དུ་བྱ་བའི་དུས་དང་དུས་མིན་པ་ཤེས་ནས་དུས་ལ་མ་བབས་པར་མངོན་དུ་མི་བྱེད་ཅིང་། དུས་ལ་བབས་ན་མངོན་དུ་བྱེད་པའི་དག་སའི་རྣལ་འབྱོར་རོ། །དགྲ་རྣམས་ལས་ནི་འདས་པ་དང་། །ཞེས་པའི་སྐབས་སུ། བདུད་བཞིའི་ངོ་བོ་ལ་དཔྱད་པ་དང་། བཅོམ་པའི་ས་མཚམས་ལ་དཔྱད་པ་གཉིས། དང་པོ་ལ། དགག་གཞག་གཉིས་ལས། དང་པོ་ནི། ལྷའི་བུའི། ཉོན་མོངས་པའི། ཕུང་པོའི། འཆི་བདག་གི་བདུད་དང་བཞིའོ། །དེ་བཞིའི་མཚན་ཉིད་རིམ་བཞིན། ཁ་ཅིག བདུད་གཞན་གསུམ་ལས་འདའ་བྱེད་ཀྱི་དགེ་བ་ལ་བར་དུ་གཅོད་པར་བྱེད་པའི་འདོད་ལྷའི་རིགས་སུ་གཏོགས་པ་དང་། སེམས་རྒྱུད་རབ་ཏུ་མ་ཞི་བར་བྱེད་པའི་མ་རིག་པ་བག་ཆགས་དང་བཅས་པ་དང་། སྤང་བར་བྱ་བའི་ཕུང་པོ་དང་། སྲོག་འགག་པར་བྱེད་པ་ཡིན་ལ། ཉོན་མོངས་པའི་བདུད་ལ་དབྱེ་ན། རགས་པ་རྩ་ཉོན་དྲུག་དང་། ཉེ་ཉོན་ཉི་ཤུ་ལྟ་བུའོ། །ཕྲ་བ་ཉོན་སྒྲིབ་ཀྱི་བག་ཆགས་ལྟ་བུའོ། །ཕུང་པོའི་བདུད་ལ་དབྱེ་ན། རགས་པ་ཟག་བཅས་ཉེར་ལེན་གྱི་ཕུང་པོ་ལྔ། ཕྲ་བ་ཡིད་ཀྱི་རང་བཞིན་གྱི་ལུགས་གཉིས། འཆི་བདག་གི་བདུད་ལ་དབྱེ་ན། རགས་པ་རང་དབང་མེད་པར་སྲོག་འགག་པ་དང་། ཕྲ་བ་བསམ་གྱིས་མི་ཁྱབ་པའི་འཆི་འཕོ་བ་ལྟ་བུའོ་ཟེར་རོ། །འོ་ན་ཉོན་མོངས་པའི་བདུད་ཁོ་ན་ལས་འདའ་བའི་དགེ་བ་ལ་བར་དུ་གཅོད་པའི་ལྷའི་བུའི་བདུད་ཆོས་ཅན། ལྷའི་བུའི་བདུད་ཀྱི་མཚན་ཉིད་དེར་ཐལ། མཚོན་བྱ་དེའི་ཕྱིར། བྱང་སེམས་འཕགས་པའི་རྒྱུད་ཀྱི་ཉོན་སྒྲིབ་ཀྱི་བག་ཆགས་ཆོས་ཅན། ཉོན་མོངས་པའི་བདུད་ཡིན་པར་ཐལ། ཉོན་སྒྲིབ་ཀྱི་བག་ཆགས་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། ཤེས་སྒྲིབ་ཡིན་པའི་ཕྱིར། མ་དག་པའི་སྣོད་ཀྱི་འཇིག་རྟེན་ཆོས་ཅན། ཕུང་པོའི་བདུད་ཡིན་པར་ཐལ། སྤང་བར་བྱ་བའི་ཕུང་པོ་ཡིན་པའི་ཕྱིར་ཏེ། དེར་བྱ་བའི་འདུས་བྱས་ཡིན་པའི་ཕྱིར། ཡིད་ཀྱི་རང་བཞིན་གྱི་ལུས་ཆོས་ཅན། ཕུང་པོའི་བདུད་མིན་པར་ཐལ། ཁྱོད་རང་རྒྱུ་ཟག་མེད་ཀྱི་ལས་ཀྱི་འབྲས་བུ་ཡིན་པའི་ཕྱིར། ཁྱབ་པ་ཁས། སེམས་ཅན་གཞན་གྱི་སྲོག་གཅོད་པའི་གཤེད་མ་ཆོས་ཅན། འཆི་བདག་གི་བདུད་ཡིན་པར་ཐལ། མཚན་ཉིད་དེའི་ཕྱིར་ཏེ། དེ་སྲོག་གཅོད་པར་བྱེད་པ་ཡིན་པའི་ཕྱིར། ཡང་དག་ས་ན་འཆི་བདག་གི་བདུད་ཡོད་པར་ཐལ། དེར་བསམ་གྱིས་མི་ཁྱབ་པའི་འཆི་འཕོ་ཡོད་པའི་ཕྱིར། ཁྱབ་པ་ཁས། འདོད་ན། ཧ་ཅང་ཐལ་ལོ། །གཉིས་པ་ནི་རིམ་བཞིན། བདུད་གཞན་གསུམ་གང་རུང་ལས་འདའ་བའི་དགེ་བ་ལ་བར་དུ་གཅོད་པར་བྱེད་པའི་འདོད་ལྷའི་རིགས་སུ་གཏོགས་པ་དང་སེམས་རྒྱུད་རབ་ཏུ་མ་ཞི་བར་བྱེད་པའི་ཉོན་མོངས་པ་དང་། སེམས་ཅན་གྱི་རྒྱུད་ཀྱིས་བསྡུས་པའི་ཟག་བཅས་ཀྱི་ཕུང་པོ་དང་། རང་དབང་མེད་པར་སྲོག་འགག་པར་བྱེད་པའི་ལས་སོ། །གཉིས་པ་ནི། རང་ལུགས་ལ། ཐེག་དམན་གྱི་དབང་དུ་བྱས་ནས་ལྷའི་བུའི་བདུད་མཐོང་ལམ་ནས་བཅོམ་སྟེ། དེར་བདེན་པ་མངོན་སུམ་མཐོང་བས་དཀོན་མཆོག་ལ་ཤེས་ནས་དད་པ་བརྟན་པོ་ཐོབ་པའི་ཕྱིར། ལྷག་བཅས་མྱང་འདས་ཐོབ་པ་ནས་ཉོན་མོངས་པའི་བདུད་བཅོམ་སྟེ། དེ་ནས་འཁོར་བར་འཆིང་བྱེད་ཀྱི་ཉོན་སྒྲིབ་ཟད་པར་སྤངས་པའི་ཕྱིར། ལྷག་མེད་མྱང་འདས་ཐོབ་ནས་ཕུང་པོའི་བདུད་བཅོམ་སྟེ། ཟག་བཅས་ཉེར་ལེན་གྱི་ཕུང་པོ་སྔ་མ་སྤངས་ཤིང་། ཕྱི་མ་མི་ལེན་པའི་ཕྱིར། ཕུང་པོའི་བདུད་མ་ལུས་པར་བཅོམ་པ་ནི་ཐེག་དམན་ལ་མེད་དོ། །བསམ་གཏན་བཞི་པའི་རབ་མཐའ་ཐོབ་ནས་འཆི་བདག་གི་བདུད་བཅོམ་སྟེ། དེ་ནས་ཚེ་འདོར་ལེན་ལ་དབང་ཐོབ་པའི་ཕྱིར། ཐེག་ཆེན་གྱི་དབང་དུ་བྱས་ནས་སྦྱོར་ལམ་ནས་ལྷའི་བུའི་བདུད་བཅོམ་སྟེ། ཤེས་ནས་དད་པ་ཐོབ་པའི་ཕྱིར། ས་དང་པོ་ནས་ཉོན་མོངས་པ་དང་འཆི་བདག་གི་བདུད་བཅོམ་སྟེ། ལས་ཉོན་གྱི་སྐྱེ་འཆི་ཟད་པར་སྤངས་པའི་ཕྱིར། ས་བརྒྱད་པ་ནས་ཕུང་པོའི་བདུད་བཅོམ་སྟེ། དེར་རྣམ་གྲོལ་གྱི་ཆོས་སྐུ་མངོན་དུ་བྱེད་པའི་ནུས་པ་ཐོབ་པའི་ཕྱིར། མ་དག་ས་བདུན་གྱི་གནས་སྐབས་སུ་ཕུང་པོའི་བདུད་ཡོད་པའི་དོན་ནི། གཟུང་འཛིན་གྱི་རྣམ་པར་རྟོག་པ་མངོན་གྱུར་པ་སྐྱེས་པའི་ཚེ། དེས་བསྡུས་པའི་གཙོ་སེམས་དང་། དེའི་འཁོར་དུ་བྱུང་བའི་ཕུང་པོ་གཞན་གསུམ་པོ་སྟེ། ཤེས་སྒྲིབ་ཀྱི་རྣམ་པར་རྟོག་པས་བསྡུས་པའི་ཕུང་པོ་བཞིར་ཡོད་པ་ལ་དགོངས་སོ། །དག་སར་རྣམ་གྲོལ་གྱི་ཆོས་སྐུ་མངོན་དུ་བྱེད་པའི་ནུས་པ་ཡོད་པ་ནི། སྒྲ་དོན་འདྲེས་འཛིན་གྱི་རྟོག་པ་མེད་པས། འཁོར་གསུམ་དུ་རྣམ་པར་མི་རྟོག་པའི་བློ་མཉམ་རྗེས་རྒྱུན་ཆད་མེད་པར་འབྱུང་བའོ། །གནད་འདི་ནི་ཁོ་བོའི་སྤྱོད་ཡུལ་ལོ། །ཡུམ་དོན་རབ་གསལ་ལས་སྐབས་བཞི་པའི་དཀའ་བའི་གནས་རྣམ་པར་བཤད་པའོ།། །།
སྐབས་ལྔ་པ་རྩེ་མོའི་སྦྱོར་བའི་དཀའ་བའི་གནས་རྣམ་པར་བཤད་པ།
རྣམ་ཀུན་རྫོགས་པ་རབ་མཐར་ཕྱིན་པ་ཡིས། །གཟུང་འཛིན་རྟོགས་པའི་དྲྭ་བ་ཀུན་བསལ་ནས། །བསོད་ནམས་མང་ལྡན་བར་མེད་ཏིང་འཛིན་གྱིས། །རྣམ་མཁྱེན་སྐྱེད་པའི་རྒྱལ་ཡུམ་དེ་ལ་འདུད། །རྣམ་པ་ཀུན་མངོན་པར་རྫོགས་པར་རྟོགས་པ་ཐོབ་པ་ལ་རབ་ཀྱི་མཐར། ཞེས་པའི་སྐབས་སུ། ངག་དོན་ལ་དཔྱད་པ་དང་། རྩེ་སྦྱོར་གྱི་མཚན་ཉིད་ལ་དཔྱད་པ་གཉིས་ལས། དང་པོ་ནི། བྱམས་མགོན་ཆོས་ཅན། རྣམ་རྫོགས་སྦྱོར་བའི་འོག་ཏུ་རྩེ་སྦྱོར་འཆད་པ་ལ་རྒྱུ་མཚན་ཡོད་དེ། ཚོགས་ལམ་གྱི་རྣམ་རྫོགས་སྦྱོར་བ་ལས་སྦྱོར་ལམ་གྱི་རྩེ་སྦྱོར་འབྱུང་བ་ཡིན་པའི་ཕྱིར། དེ་ལ་ཁ་ཅིག་ན་རེ། རྩེ་སྦྱོར་གྱི་འོག་ཏུ་རྣམ་རྫོགས་སྦྱོར་བ་འཆད་པ་ལ་རྒྱུ་མཚན་ཡོད་པར་ཐལ། སྦྱོར་ལམ་གྱི་རྩེ་སྦྱོར་ལས་མཐོང་ལམ་གྱི་རྣམ་རྫོགས་སྦྱོར་བ་འབྱུང་བའི་ཕྱིར། འདོད་ན། མངོན་པར་རྟོགས་པ་བརྒྱད་ཀྱི་རིམ་པ་དེ་གོ་རིམ་འཆོལ་བའི་སྐྱོན་ཅན་དུ་ཐལ་ལོ་ཞེ་ན། དེའི་ལན་ནི་རྣམ་རྫོགས་སྦྱོར་བའི་སྐབས་ལྟར་ཤེས་པར་བྱའོ། །གཉིས་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག་ན་རེ། མཁྱེན་གསུམ་བསྡུས་སྒོམ་ཚོགས་ལམ་ལས་རབ་ཏུ་གྱུར་པ་ཞེས་འཇོག་གི མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་ཞེས་མི་འཇོག་སྟེ། གལ་ཏེ་འཇོག་ན། ཐེག་ཆེན་གྱི་ཚོགས་ལམ་ཆེན་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། མཁྱེན་གསུམ་བསྡུས་སྒོམ་ཐེག་ཆེན་གྱི་ཚོགས་ལམ་འབྲིང་པོ་ལས་རབ་ཏུ་གྱུར་པ་ཡིན་པའི་ཕྱིར་ཞེ་ན། དེ་ཆོས་ཅན། མཚོན་བྱ་དེར་ཐལ། ཁོ་རང་གི་མཚན་ཉིད་དེའི་ཕྱིར་ཏེ། མཁྱེན་གསུམ་བསྡུས་སྒོམ་ཐེག་དམན་གྱི་ཚོགས་ལམ་ལས་རབ་ཏུ་གྱུར་པ་ཡིན་པའི་ཕྱིར། ཁྱབ་པ་ཁས། ཁ་ཅིག་ན་རེ། མཁྱེན་གསུམ་བསྡུས་ནས་སྒོམ་པའི་དྲོད་ཡན་ཆད་ཀྱི་སེམས་དཔའི་རྣལ་འབྱོར་ཞེ་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་གྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། མཁྱེན་གསུམ་བསྡུས་ནས་སྒོམ་པ་གང་ཞིག དྲོད་ཡན་ཆད་ཀྱི་སེམས་དཔའི་རྣལ་འབྱོར་ཡིན་པའི་ཕྱིར། ཕྱི་མ་དེར་ཐལ། དྲོད་སྔོན་སོང་གི་དེ་ཡིན་པའི་ཕྱིར་ཏེ། ཉན་ཐོས་ཀྱི་དྲོད་སྔོན་སོང་གི་དེ་ཡིན་པའི་ཕྱིར། གཉིས་པ་ནི། མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར། གསུམ་པ་ནི། ཁ་ཅིག་ན་རེ། ཐེག་ཆེན་གྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། མཁྱེན་གསུམ་བསྡུས་སྒོམ་ཁྱད་པར་དུ་འཕགས་པའི་དེ་ཡིན་པའི་ཕྱིར་ཞེ་ན། དེ་ཆོས་ཅན། ཆོས་མཆོག་ཏུ་ཐལ། ཆོས་ཁྱད་པར་དུ་འཕགས་པའི་དེ་ཡིན་པའི་ཕྱིར། ཡང་ཁོ་ན་རེ། ཐེག་ཆེན་གྱི་སྦྱོར་ལམ་དྲོད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མཁྱེན་གསུམ་བསྡུས་པར་ཐལ། འདོད་པ་དེའི་ཕྱིར། འདོད་ན། མངོན་པར་རྟོགས་པ་བརྒྱད་བསྡུས་པར་ཐལ་ལོ་ཞེ་ན། སྔར་རྣམ་རྫོགས་སྦྱོར་བའི་སྐབས་ལྟར་ལན་བརྗོད་པར་བྱའོ། །རྨི་ལམ་ན་ཡང་ཆོས་རྣམས་ཀུན། །ཞེས་པའི་སྐབས་སུ། དྲོད་ཀྱི་རྩེ་སྦྱོར་གྱི་མཚན་ཉིད་ལ་དཔྱད་པ། རྟགས་ཀྱི་ངོ་བོ་ལ་དཔྱད་པ། རྟགས་སུ་འགྱུར་བའི་དུས་ལ་དཔྱད་པ་དང་གསུམ་ལས། དང་པོ་ལ་ཁ་ཅིག་ན་རེ། རྟགས་བཅུ་གཉིས་ཀྱིས་མཚོན་ནས་བསྟན་པའི་མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་དེ་དེའི་མཚན་ཉིད་ཡིན་ཞེས་དང་། གཞན་དག་དེ་རྟགས་ཀྱི་རྩེ་སྦྱོར་གྱི་མཚན་ཉིད་ཡིན་ཟེར་རོ། །དང་པོ་ལ་བྱང་སེམས་སྦྱོར་ལམ་པ་དབང་རྟུལ་གྱི་དྲོད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རྨི་ལམ་གྱི་གནས་སྐབས་སུའང་ཉན་ཐོས་དང་རང་སངས་རྒྱས་ཀྱི་ས་ལ་དགའ་བའི་སེམས་མི་སྐྱེ་བ་དེ་ཐོབ་པར་ཐལ། འདོད་པ་དེའི་ཕྱིར། འདོད་ན། བསམ་པའི་སྟོབས་ཀྱིས་ཕྱིར་ལྡོག་མི་སྲིད་པར་ཐལ་ལོ། །ཕྱི་མ་ལ་རྟགས་བཅུ་གཉིས་པོ་གང་རུང་གཅིག་ཐོབ་ན། རྟགས་བཅུ་གཉིས་པོ་ཐམས་ཅད་ཐོབ་དགོས་པར་ཐལ། དེ་དེའི་མཚན་ཉིད་ཡིན་པའི་ཕྱིར། ཁ་ཅིག་ན་རེ། མཁྱེན་གསུམ་བསྡུས་སྒོམ་རབ་ཏུ་གྱུར་པའི་དྲོད་ཀྱི་ཡེ་ཤེས་དེ་དྲོད་ཀྱི་རྩེ་སྦྱོར་གྱི་མཚན་ཉིད་ཡིན་ཞེ་ན། དེ་ཆོས་ཅན། དེའི་མཚན་ཉིད་མིན་པར་ཐལ། མཚན་ཉིད་མིན་པའི་ཕྱིར་ཏེ། མཚོན་བྱ་ཡིན་པའི་ཕྱིར། མ་གྲུབ་ན། དེ་དེར་ཐལ། དྲོད་ཀྱི་ཡེ་ཤེས་མཚོན་བྱ་ཡིན་པའི་ཕྱིར། རང་ལུགས་ནི། དྲོད་ཀྱི་ངོ་བོར་གྱུར་པའི་མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་དེ་དྲོད་ཀྱི་རྩེ་སྦྱོར་གྱི་མཚན་ཉིད་ཡིན་ནོ། །གཉིས་པ་ལ་ལོ་ཆེན་ན་རེ། དང་པོ་བརྒྱད་འབྲས་བུའི་རྟགས་དང་། ཐ་མ་བཞི་རང་བཞིན་གྱི་རྟགས་ཡིན་གསུངས་པ་ལ། ཁ་ཅིག་ན་རེ། འབྲས་རྟགས་སུ་འདོད་པར་མི་འཐད་དེ། རྟགས་བཅུ་གཉིས་པོ་དྲོད་ཀྱི་ངོ་བོ་ཡིན་པ་གང་ཞིག དྲོད་ཀྱི་ངོ་བོ་དང་དྲོད་ཀྱི་འབྲས་བུའི་གཞི་མཐུན་མེད་པའི་ཕྱིར་ཞེས་ཟེར་ན། དེ་ལ་མ་ཁྱབ་པར་ཐལ། འདིར་རྗེས་ཐོབ་ཀྱི་རྟགས་ལས་མཉམ་གཞག་དཔོག་པ་གང་ཞིག མཉམ་གཞག་གི་དྲོད་དང་རྗེས་ཐོབ་ཀྱི་དྲོད་ཀྱི་རྩེ་སྦྱོར་གཉིས་རྒྱུ་འབྲས་ཡིན་པ་སྲིད་པའི་ཕྱིར། ཁ་ཅིག རྟགས་བཅུ་གཉིས་པོ་དྲོད་ཀྱི་རྩེ་སྦྱོར་ཐོབ་པའི་རྟགས་མིན་གྱི་ཕྱིར་མི་ལྡོག་གི་རྟགས་ཡིན་ཏེ། མདོ་ལས། དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །ཞེས་བཤད་པའི་ཕྱིར་ཞེ་ན། སྐྱོན་མེད་དེ། དྲོད་ཀྱི་རྩེ་སྦྱོར་ཐོབ་པའི་རྟགས་དང་། ཕྱིར་མི་ལྡོག་པའི་རྟགས་ལ་འགལ་བ་མེད་པའི་ཕྱིར་དང་། མདོའི་དོན་ནི། རྟགས་བཅུ་གཉིས་པོ་གང་རུང་གཅིག་ཐོབ་ན་དྲོད་ཀྱི་རྩེ་སྦྱོར་ཐོབ་ཅིང་། དེ་ཐོབ་ན་ཕྱིར་མི་ལྡོག་པར་རྒྱལ་བས་ལྐོག་ཏུ་ལུང་སྟོན་པ་ཐོབ་ཅེས་པའི་དོན་ཡིན་པའི་ཕྱིར། ཁ་ཅིག་ན་རེ། དྲོད་ཀྱི་ཡེ་ཤེས་ཡིན་ན་དྲོད་ཀྱི་རྩེ་སྦྱོར་ཐོབ་པས་ཁྱབ་ཅིང་། དྲོད་ཀྱི་རྩེ་སྦྱོར་གྱི་རྟགས་ཐོབ་པས་ཀྱང་ཁྱབ་བོ། །གལ་ཏེ་དབང་རྣོན་ཁོ་ནའི་དབང་དུ་བྱས་ན་དྲོད་ལ་གནས་པའི་སེམས་དཔའ་དབང་རྟུལ་གྱི་རྒྱུད་ཀྱི་དྲོད་ཀྱི་ཡེ་ཤེས་དེ་དྲོད་ཀྱི་རྩེ་སྦྱོར་དུ་སྒྲུབ་པའི་རྟགས་ཤིག་མེད་པར་ཐལ། དེས་དྲོད་ཀྱི་རྩེ་སྦྱོར་གྱི་རྟགས་མ་ཐོབ་པའི་ཕྱིར་ཞེ་ན། བྱང་སེམས་སྦྱོར་ལམ་པ་དབང་རྟུལ་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་ཏུ་སྒྲུབ་པའི་རྟགས་ཤིག་མེད་པར་ཐལ། དེས་དེའི་རྟགས་མ་ཐོབ་པའི་ཕྱིར། ཁྱབ་པ་ཁས། འདོད་ན། དེ་ཡོད་པར་ཐལ། བྱང་སེམས་སྦྱོར་ལམ་པ་དབང་རྟུལ་ཡིན་ན། གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པས་ཁྱབ་པའི་ཕྱིར། གཞན་ཡང་གནས་སྐབས་རྫོགས་བྱང་ལས་ཕྱིར་མི་ལྡོག་པ་ཡིན་ན་དེའི་རྟགས་ཐོབ་པའི་ཁྱབ་པར་ཐལ། ཐེག་ཆེན་གྱི་སྦྱོར་ལམ་དྲོད་ཀྱི་ཡེ་ཤེས་ཡིན་ན་དྲོད་ཀྱི་རྟགས་ཐོབ་པས་ཁྱབ་པའི་ཕྱིར། ཁ་ཅིག རྟགས་བཅུ་གཉིས་པོ་དེ་དྲོད་ཀྱི་ངོ་བོ་ཡིན་ཏེ། འགྲེལ་པར། རྟགས་ལ་སོགས་པ་དེ་དག་ནི་གོ་རིམ་བཞིན་དུ་ངེས་པར་འབྱེད་པའི་ཆ་དང་མཐུན་པ་བཞིའི་ངོ་བོ་ཡིན་པར་ཁོང་དུ་ཆུད་པར་བྱའོ་ཞེས་གསུངས་པའི་ཕྱིར་ཞེ་ན། འོ་ན། བྱང་སེམས་སྦྱོར་ལམ་པས་གྲོང་ཁྱེར་ཚིག་པ་རབ་ཏུ་ཞི་བར་བྱེད་པའི་བདེན་ཚིག་གྲུབ་པ་ཆོས་ཅན། དྲོད་ཀྱི་ངོ་བོ་ཡིན་པར་ཐལ། རྟགས་བཅུ་གཉིས་པོ་གང་རུང་ཡིན་པའི་ཕྱིར། ཁྱབ་པ་ཁས། འདོད་ན། མཐོང་ལམ་པས་སངས་རྒྱས་བརྒྱ་མཐོང་བ་མཐོང་ལམ་གྱི་ངོ་བོ་ཡིན་པར་ཐལ་ལོ། །དེས་ན་ལུང་དེའི་དོན་ནི། རྟགས་ཀྱིས་མཚོན་པའི་རྩེ་སྦྱོར་སོགས་བཞི་པོ་དེ་དྲོད་སོགས་བཞིའི་ངོ་བོ་ཡིན་ཞེས་པའི་དོན་ཏེ། རྩ་བར་རྟགས་དང་། རྣམ་འཕེལ་དང་། བརྟན་པ་དང་། སེམས་ཀུན་ཏུ་གནས་པ་ཞེས་པ་ཙམ་མ་གཏོགས་འདི་ཡིན་དངོས་སུ་མ་གསུངས་ལ། འོག་ཏུ་མཐོང་ལམ་རྩེ་སྦྱོར་དང་སྒོམ་ལམ་དངོས་སུ་གསུངས་པའི་ཤུགས་ཀྱིས་འདི་སྦྱོར་ལམ་བཞིའི་ངོ་བོ་ཡིན་ནོ་སྙམ་དུ་སློབ་དཔོན་གྱིས་དགོངས་སོ། །གསུམ་པ་ལ། འབྲེ་ཆེན་པོ་ན་རེ། དང་པོ་བཞི་རྨི་ལམ་གྱི་རྟགས། ཐ་མ་དྲུག་སད་པའི་རྟགས། བར་པ་གཉིས་སད་རྨི་གཉིས་ཀའི་རྟགས་ཡིན་ཏེ། རྟགས་ཀྱི་རྒྱུ་རྨི་ལམ་གྱི་གནས་སྐབས་ན་ཡོད་ཅིང་། རྟགས་ཀྱི་ངོ་བོ་སད་པའི་གནས་སྐབས་ན་ཡོད་པའི་ཕྱིར་ཞེས་གསུང་ངོ་། །འོ་ན་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་གྱི་རྟགས་ལས་མཉམ་གཞག་གི་རྟོགས་པ་དཔོག་པའི་རྟགས་ཡིན་ན་མཉམ་རྗེས་གཉིས་ཀའི་རྟགས་ཡིན་དགོས་པར་ཐལ། རྟགས་ཀྱི་རྒྱུ་རྨི་ལམ་གྱི་གནས་སྐབས་ན་ཡོད་ཅིང་། རྟགས་ཀྱི་ངོ་བོ་སད་པའི་གནས་སྐབས་ན་ཡོད་པའི་རྟགས་དེ་ཡིན་ན་སད་རྨི་གཉིས་ཀའི་རྟགས་ཡིན་དགོས་པའི་ཕྱིར། འཛམ་བུ་གླིང་གི་སྐྱེ་བོ་སྙེད། །ཅེས་པའི་སྐབས་སུ། རྩེ་མོའི་རྩེ་སྦྱོར་གྱི་མཚན་ཉིད་ལ། ཁ་ཅིག རྣམ་འཕེལ་བཅུ་དྲུག་གིས་མཚོན་ནས་བསྟན་པའི་ཐེག་ཆེན་གྱི་ངེས་འབྱེད་ཆ་མཐུན་ཞེ་ན། རྒྱུ་ལམ་ཤེས་ཡིན་ན་ལམ་ཤེས་མཚོན་བྱེད་ཀྱི་ཆོས་བཅུ་གཅིག་གིས་མཚོན་ནས་བསྟན་དགོས་པར་ཐལ། མཚོན་བྱ་དེ་ཡིན་ན་མཚན་ཉིད་དེ་ཡིན་དགོས་པའི་ཕྱིར། འདོད་ན། ཐེག་ཆེན་གྱི་མོས་པ་སྒོམ་ལམ་ཆོས་ཅན། དེར་ཐལ། དེའི་ཕྱིར། གཞན་ཡང་རྩེ་མོའི་རྩེ་སྦྱོར་ཡིན་ན་རྣམ་འཕེལ་བཅུ་དྲུག་ཐོབ་དགོས་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། རྟགས་ཀྱི་རྩེ་སྦྱོར་ཡིན་ན་རྟགས་བཅུ་གཉིས་ཐོབ་པའི་ཁྱབ་པ་ཡོད་པར་ཐལ་ལོ། །རང་ལུགས་ནི་སྔ་མ་ལ་དཔགས་ཏེ་ཤེས་པར་བྱའོ། །ཀུན་མཁྱེན་ཉིད་གསུམ་ཆོས་རྣམས། །ཞེས་པའི་སྐབས་སུ། བཟོད་པའི་རྩེ་སྦྱོར་གྱི་མཚན་ཉིད་ལ། ཁ་ཅིག བརྟན་པ་གཉིས་ཀྱིས་མཚོན་ནས་བསྟན་པའི་ཐེག་ཆེན་གྱི་ངེས་འབྱེད་ཆ་མཐུན་ཟེར་ན། གོང་གི་རིགས་པས་ཁེགས་སོ། །བརྟན་པ་གཉིས་ཀྱི་དོན་ལ། ཁ་ཅིག མཁྱེན་གསུམ་གྱི་ཆོས་ཡོངས་སུ་རྫོགས་པ་རང་དོན་རྟོགས་པ་བརྟན་པ་དང་། སེམས་ཅན་གྱི་དོན་ཡོངས་སུ་མི་གཏོང་བ་གཞན་དོན་ཕྲིན་ལས་བརྟན་པ་ཡིན་ཞེས་ཟེར་རོ། །འོ་ན་བཟོད་པའི་གནས་སྐབས་ན་བརྟན་པ་གཉིས་མེད་པར་ཐལ། དེར་མཁྱེན་གསུམ་གྱི་ཆོས་ཡོངས་སུ་རྫོགས་པ་མེད་པའི་ཕྱིར། རང་ལུགས་ནི། བཟོད་པ་ལ་གནས་པའི་བྱང་སེམས་ཀྱི་རྒྱུད་ཀྱི་མཁྱེན་གསུམ་གྱི་ཆོས་ཡོངས་སུ་རྫོགས་པར་བསྔོ་བའི་རྟོགས་པ་དེ་རང་དོན་རྟོགས་པ་བརྟན་པ་དང་། དེའི་རྒྱུད་ཀྱི་སེམས་ཅན་གྱི་དོན་ཡོངས་སུ་མི་གཏོང་བའི་སྙིང་རྗེ་གཞན་དོན་ཕྲིན་ལས་བརྟན་པ་ཡིན་ཏེ། བརྟན་པ་གཉིས་པོ་དེ་མདོ་ལས་བསྔོ་བའི་རྣམ་པས་གསུངས་པའི་ཕྱིར། དེའང་དང་པོ་ནི། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་གྱུར་ཅིག དེ་བཞིན་དུ་རྣམ་མཁྱེན་དང་། རང་བྱུང་དང་། ཟག་པ་མེད་པའི་ཆོས་རྣམས་ཡོངས་སུ་རྫོགས་པར་གྱུར་ཅིག ཅེས་དང་པོས་མདོར་བསྟན། ཕྱི་མ་གསུམ་གྱིས་རིམ་པ་ལྟར། རྣམ་མཁྱེན་དང་། ལམ་ཤེས་དང་། གཞི་ཤེས་ཀྱི་ཆོས་ཡོངས་སུ་རྫོགས་པར་བསྔོ་བའོ། །གཉིས་པ་ནི་བདག་བརྒལ་ནས་སེམས་ཅན་མ་གྲོལ་བ་རྣམས་དགྲོལ་བར་འགྱུར་བའོ་ཞེས་པའོ། །གླིང་བཞི་པ་དང་སྟོང་དག་དང་། །ཞེས་པའི་སྐབས་སུ། ཆོས་མཆོག་གི་རྩེ་སྦྱོར་ལ་མདོ་ལས་གསུངས་ཚུལ། བསྟན་བཅོས་ལས་བསྟན་པའི་ཚུལ། དེ་དག་གི་དགོངས་པ་དཔྱད་པ་དང་གསུམ་ལས། དང་པོ་ནི། སྡུད་པ་ལས། མི་ལྡོག་བྱང་ཆུབ་མཆོག་ལ་རབ་ཏུ་ཞུགས་པ་ཡི། །སེམས་བསྐྱེད་པ་ལ་བསམ་པ་དག་པས་ཡི་རང་བ། །སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟར་མིན། །ཞེས་གསུངས་ཏེ། མི་ལྡོག་བྱང་ཆུབ་མཆོག་ལ་རབ་ཏུ་ཞུགས་པའི་བྱང་སེམས་ཀྱི་སེམས་བསྐྱེད་ཀྱིས་བསྡུས་པའི་དགེ་རྩ་ནི་རྗེས་སུ་ཡི་རང་བར་བྱ་བའི་ཡུལ་དང་། ཆོས་མཆོག་གི་ངོ་བོར་གྱུར་པའི་རྗེས་སུ་ཡི་རང་ནི་རྗེས་སུ་ཡི་རང་བར་བྱེད་པ་པོར་བསྟན་ཞིང་། དེས་ནི་གླིང་བཞི་པ་དང་། སྟོང་དང་པོ་དང་། སྟོང་གཉིས་པ་དང་། སྟོང་གསུམ་པའི་ས་རྡོའི་སྲང་གྲངས་ལས་རྗེས་སུ་ཡི་རང་བསོད་ནམས་མང་བར་བསྟན་ཏོ། །གཉིས་པ་ནི། མདོ་ལས་དངོས་སུ་བསྟན་པའི་དཔེ་ནི། གླིང་བཞི་པ་དང་སྟོང་དག་དང་། །སྟོང་གཉིས་གསུམ་དག་དཔེར་མཛད་ནས། །ཞེས་པས་བསྟན། དོན་ཡི་རང་འདིར་དངོས་སུ་མི་སྟོན་པར་མདོའི་སྦས་དོན་ཏིང་ངེ་འཛིན་འདིར་དངོས་སུ་སྟོན་པ་ནི། བསོད་ནམས་མང་པོ་ཉིད་ཀྱིས་ནི། །ཏིང་འཛིན་ཡོངས་སུ་བསྒྲགས་པ་ཡིན། །ཞེས་པས་བསྟན་ཏོ། །གསུམ་པ་ལ། སློབ་དཔོན་གྱི་བཞེད་པ་ནི། ཆོས་མཆོག་གི་ངོ་བོར་གྱུར་པའི་རྗེས་སུ་ཡི་རང་བ་དང་ཏིང་ངེ་འཛིན་གཉིས་དོན་གཞན་ཡིན་ཏེ། སེམས་བྱུང་རྫས་གཞན་ཡིན་པའི་ཕྱིར། འོན་ཀྱང་རྗེས་སུ་ཡི་རང་བསོད་ནམས་མང་བར་བསྟན་པས་ཏིང་ངེ་འཛིན་ཀྱང་བསོད་ནམས་མང་བར་མཚོན་ནུས་ཏེ། དེ་གཉིས་མཚུངས་ལྡན་གང་ཞིག གྲོགས་ཀྱི་ཡོན་ཏན་བརྗོད་པས་གཅིག་ཤོས་གྲོགས་ཅན་གྱི་ཡོན་ཏན་ཀྱང་བརྗོད་པར་འགྱུར་བའི་ཕྱིར་ཞེས་ཊཱི་ཀར་གསུང་། འབྲེ་ཆེན་པོ་ན་རེ། ཆོས་མཆོག་གི་ངོ་བོ་ནི་རྗེས་སུ་ཡི་རང་ཀྱང་ཡིན། ཏིང་འཛིན་ཡང་ཡིན་ལ་མདོ་ལས་ཡི་རང་གི་ལྡོག་པ་ནས་བསྟན། བསྟན་བཅོས་ལས་ཏིང་ངེ་འཛིན་གྱི་ལྡོག་པ་ནས་བསྟན་གསུང་། ལུགས་དང་པོ་དེ་ལ། དེ་གཉིས་མཚུངས་ལྡན་མིན་པར་ཐལ། རྗེས་སུ་ཡི་རང་ནི་རྗེས་ཐོབ་བསོད་ནམས་ཀྱི་ཚོགས་ཡིན་ལ། ཏིང་འཛིན་མཉམ་གཞག་ཡེ་ཤེས་ཀྱི་ཚོགས་ཀྱིས་བསྡུས་པའི་ཕྱིར། དེས་ན་སློབ་དཔོན་གྱི་བཞེད་པ་ནི་ཡི་རང་བསོད་ནམས་ཀྱི་ཚོགས་དང་། ཏིང་འཛིན་ཡེ་ཤེས་ཀྱི་ཚོགས་སུ་བཞེད་པས། རྗེས་ཐོབ་དང་མཉམ་གཞག་ལ་སོ་སོར་གཞག་དགོས་ཏེ། རྗེས་སུ་ཡི་རང་སྒོམ་ལམ་རྗེས་ཐོབ་ལ་གཞག་པ་དང་དོན་གཅིག་པའི་ཕྱིར་ཏེ། འགྲེལ་པར། ཏིང་འཛིན་དང་ཡེ་ཤེས་ཀྱི་ཚོགས་སོ་སོར་དཔེར་མཛད་ནས་ཞེས་གསུངས་པའི་ཕྱིར། འབྲེའི་དེ་ཡང་མི་འཐད་དེ། ཆོས་མཆོག་གི་ངོ་བོར་གྱུར་པའི་ཏིང་འཛིན་དང་རྗེས་སུ་ཡི་རང་གཉིས་བདག་ཉིད་གཅིག་མིན་པར་ཐལ། དེ་གཉིས་སེམས་བྱུང་རྫས་གཞན་ཡིན་པའི་ཕྱིར། དེས་ན་གཞུང་འདི་དག་གི་དོན་ལ་རྗེས་སུ་ཡི་རང་བར་བྱ་བའི་དགེ་རྩ་དང་ལྡན་པའི་བྱང་སེམས་ངོས་གཟུང་བ། ཆོས་མཆོག་གི་ངོ་བོར་གྱུར་པའི་རྗེས་སུ་ཡི་རང་དང་ཏིང་འཛིན་ལ་དཔྱད། དཔེ་དང་ཆོས་མཐུན་སྦྱོར་བ་གསུམ། དང་པོ་ནི། བརྒྱད་སྟོང་པར། ཐེག་པ་ལ་གསར་དུ་ཞུགས་པའི་དང་། སྤྱོད་པ་ལ་ཞུགས་པའི་དང་། ཕྱིར་མི་ལྡོག་པའི་དང་། སྐྱེ་བ་གཅིག་གིས་ཐོགས་པའི་བྱང་སེམས་ཞེས་དངོས་སུ་གསུངས་ཞིང་། འདིའི་ངོས་འཛིན་པ་ལ་འགྲེལ་ཆེན་ལས། ལུགས་གསུམ་གསུངས་ཏེ། ཁ་ཅིག་མཐོང་ལམ་དང་སྒོམ་ལམ་བཞིའི་སྤང་བྱ་རྟོགས་པ་བཞིའི་གཉེན་པོ་ལ་གནས་པ་ལ་འདོད་པ་དང་། གཞན་དག་རྟགས་དང་རྣམ་འཕེལ་སོགས་བཞི་ལ་གནས་པ་ལ་འདོད་པ་དང་། འགའ་ཞིག་མོས་པས་སྤྱོད་པ་དང་། ས་དང་པོ་ནས་བདུན་པའི་བར་ལ་གནས་པ་དང་། དག་པ་ས་ལ་གནས་པ་དང་། ས་བཅུ་ལ་གནས་པ་ལ་འདོད་པ་གསུམ་གསུངས་ཤིང་། ཊཱི་ཀར་མཐོང་སྒོམ་ལམ་གྱི་རྟོགས་པ་པོའི་དབང་དུ་བྱས་ནས་གསུངས་པས། ས་དང་པོ་དང་། གཉིས་པ་ནས་བདུན་པའི་བར་དང་། བརྒྱད་དགུ་གཉིས་དང་། བཅུ་པ་ལ་གནས་པ་ལ་གསུངས་ཀྱང་། དེ་གཉིས་ལུགས་སོ་སོ་མིན་ནམ་སྙམ་དུ་སེམས་སོ། །གང་ལྟར་ཡང་བྱང་སེམས་བཞི་པོ་དེ་དག་གིས་སེམས་བསྐྱེད་པའི་རྩ་བ་ནི་རྗེས་སུ་ཡི་རང་བར་བྱ་བའི་ཡུལ་ལོ། །རྗེས་སུ་ཡི་རང་བར་བྱེད་པ་པོ་ནི་ཆོས་མཆོག་ལ་གནས་པའི་སེམས་དཔའ་འོ། །གཉིས་པ་ནི། ཆོས་མཆོག་གི་ངོ་བོར་གྱུར་པའི་རྗེས་སུ་ཡི་རང་ནི་རྗེས་ཐོབ་བསོད་ནམས་ཀྱི་ཚོགས་ཀྱིས་བསྡུས་པ་ཡིན་ལ། ཏིང་འཛིན་ནི་མཉམ་གཞག་ཡེ་ཤེས་ཀྱི་ཚོགས་ཀྱིས་བསྡུས་པ་ཡིན་ཏེ། མདོ་ལས། བསོད་ནམས་ཀྱི་ཚོགས་བསོད་ནམས་མང་བར་དངོས་སུ་བསྟན་པས་ཡེ་ཤེས་ཀྱི་ཚོགས་བསོད་ནམས་མང་བར་ཤུགས་ལ་བསྟན་པའི་ཕྱིར། འགྲེལ་ཆེན་ལས་དོན་གཞན་ཐབས་ཀྱི་ཞེས་གསུངས་པ་འདི་ཉིད་ཡིན་ནོ། །གསུམ་པ་ནི། གླིང་བཞི་པ་དང་། སྟོང་དང་པོ་དང་། སྟོང་གཉིས་པ་དང་། སྟོང་གསུམ་པས་བྱང་སེམས་བཞི་པོ་བསྟན་ཅིང་། དེའི་སྲང་གྲངས་ཀྱི་རྗེས་ཐོབ་བསོད་ནམས་ཀྱིས་བསྡུས་པའི་རྗེས་སུ་ཡི་རང་བསྟན་སྟེ། མདོ་ལས། ས་རྡོའི་སྲང་གྲངས་ཁོ་ན་བཤད་པའི་ཕྱིར། སྦས་དོན་ཏིང་འཛིན་ནི་ཆུ་ཐིགས་ཀྱི་གྲངས་ཀྱིས་བསྟན་ཏེ། དེ་མཉམ་གཞག་དང་ཆོས་མཚུངས་པའི་ཕྱིར་རོ། །འཇུག་པ་དང་ནི་ལྡོག་པ་ལ། །ཞེས་པའི་སྐབས་སུ། འབུམ་ཕྲག་གསུམ་པ་ན་རེ། འདིར་བསྟན་འཇུག་པ་གཟུང་རྟོག་དང་ལྡོག་པ་གཟུང་རྟོག་གཉིས་ནི་སྐབས་དང་པོར་བསྟན་པའི་རྣམ་བྱང་གཟུང་རྟོག་ཏུ་འདུས་ཏེ། འཇུག་པ་གཟུང་རྟོག་གི་འཇུག་བྱའི་ཡུལ་བྱང་སེམས་ཀྱི་ལམ་འབྲས་བུ་དང་བཅས་པ་དང་། ལྡོག་པ་གཟུང་རྟོག་གི་ལྡོག་བྱའི་ཡུལ་ཉན་ཐོས་ཀྱི་ལམ་འབྲས་བུ་དང་བཅས་པ་དེ་རྣམ་བྱང་གི་ཆོས་སུ་འདུས་པའི་ཕྱིར་ཟེར་རོ། །འོ་ན་འདིར་བསྟན་ལྡོག་པ་གཟུང་རྟོག་ཆོས་ཅན། ཡུལ་ལ་བླང་བྱར་མངོན་པར་ཞེན་པའི་བློ་ཡིན་པར་ཐལ། རྣམ་བྱང་གཟུང་རྟོག་ཡིན་པའི་ཕྱིར། འདོད་ན། མིན་པར་ཐལ། ཡུལ་ལ་ལྡོག་བྱར་མངོན་པར་ཞེན་པ་ཡིན་པའི་ཕྱིར་ཏེ། ལྡོག་པ་གཟུང་རྟོག་ཡིན་པའི་ཕྱིར། ཡང་འདིར་བསྟན་གཟུང་འཛིན་གྱི་རྣམ་པར་རྟོག་པ་བཞིས་མ་བསྡུས་པའི་མཐོང་སྤང་ཤེས་སྒྲིབ་རྟོག་པ་ཅིག་ཡོད་པར་ཐལ། འདིར་བསྟན་གཟུང་རྟོག་ཡིན་ན་སྐབས་དང་པོར་བསྟན་པའི་རྣམ་བྱང་གཟུང་རྟོག་ཡིན་པས་ཁྱབ་པའི་ཕྱིར། འདོད་ན། འདིར་བསྟན་གཟུང་འཛིན་གྱི་རྣམ་པར་རྟོག་པ་བཞིའི་ས་བོན་གྱིས་མ་བསྡུས་པའི་མཐོང་སྤང་ཤེས་སྒྲིབ་ཏུ་གཏོགས་པའི་ས་བོན་ཡོད་པར་ཐལ། འདོད་པ་དེའི་ཕྱིར། འདོད་ན། འདིར་བསྟན་གཟུང་འཛིན་གྱི་རྣམ་པར་རྟོག་པ་བཞིའི་ས་བོན་སྤངས་ན། མཐོང་སྤང་ཤེས་སྒྲིབ་ཀྱི་ས་བོན་སྤངས་པས་མ་ཁྱབ་པར་ཐལ་ལོ། །ཡང་རྣམ་བྱང་ལ་དམིགས་པའི་ཤེས་སྒྲིབ་རྟོག་པ་ཡིན་ན་རྣམ་བྱང་གཟུང་རྟོག་ཡིན་པས་ཁྱབ་པར་ཐལ། ཐེག་དམན་གྱི་ལམ་འབྲས་བུ་དང་བཅས་པ་ལ་དམིགས་པའི་རྣམ་བྱང་གི་ཆོས་ལྡོག་པ་གཟུང་རྟོག་དེ་རྣམ་བྱང་གཟུང་རྟོག་ཡིན་དགོས་པའི་ཕྱིར། རྟགས་ཁས། འདོད་ན། མཐོང་ལམ་ལ་དམིགས་ནས་འཛིན་པ་པོར་མངོན་པར་ཞེན་པའི་བློ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། གཟུང་རྟོག་མིན་པའི་ཕྱིར་ཏེ། འཛིན་རྟོག་ཡིན་པའི་ཕྱིར་ཏེ། རྫས་འཛིན་རྟོག་པ་ཡིན་པའི་ཕྱིར། རང་ལུགས་ནི། འདིར་བསྟན་ལྡོག་པ་གཟུང་རྟོག་དེ་སྐབས་དང་པོར་བསྟན་པའི་རྟོག་པ་བཞིའི་དང་པོར་འདུས་ཏེ། དེ་བཞི་གང་རུང་དུ་འདུས་པ་གང་ཞིག ཕྱི་མ་གསུམ་དུ་མི་འདུས་པའི་ཕྱིར་ཏེ། རང་ཡུལ་ལ་ལྡོག་བྱར་མངོན་པར་ཞེན་པའི་བློ་ཡིན་པའི་ཕྱིར། སྐབས་དང་པོར་བསྟན་པའི་མཐོང་སྤང་གཟུང་འཛིན་གྱི་རྣམ་པར་རྟོག་པ་བཞིའི་དང་པོ་འདིར་བསྟན་ལྡོག་པ་གཟུང་རྟོག་ཏུ་འདུས་ཏེ། འདིར་བསྟན་རྟོག་པ་བཞི་གང་རུང་དུ་འདུས་པ་གང་ཞིག གཞན་གསུམ་དུ་མ་འདུས་པའི་ཕྱིར། དེ་ལ་ཁ་ཅིག ཐེག་དམན་གྱི་ལམ་འབྲས་བུ་དང་བཅས་པ་དེ་ཀུན་ནས་ཉོན་མོངས་ཀྱི་ཆོས་སུ་ཐལ། དེ་ལ་ལྡོག་བྱར་མངོན་པར་ཞེན་པའི་བློ་དེ་ཀུན་ནས་ཉོན་མོངས་གཟུང་རྟོག་ཡིན་པའི་ཕྱིར། མ་གྲུབ་ན། དེ་འདྲའི་བློ་ཆོས་ཅན། དེར་ཐལ། སྐབས་དང་པོར་བསྟན་པའི་རྟོག་པ་བཞིའི་དང་པོ་ཡིན་པའི་ཕྱིར་ཞེས་ཟེར་ན། རྣམ་དག་སྐྱེ་བྱེད་ལ་དམིགས་ནས་བདེན་པར་མངོན་པར་ཞེན་པའི་བློ་ཆོས་ཅན། དེར་ཐལ། དེའི་ཕྱིར། འདོད་ན་ཁས་བླངས་ཏེ། རྣམ་དག་སྐྱེ་བྱེད་ཀུན་ནས་ཉོན་མོངས་ཀྱི་ཆོས་སུ་ཐལ། འདོད་པ་དེའི་ཕྱིར། ཁྱབ་པ་ཁས། མདོར་ན། འདིར་བསྟན་ལྡོག་པ་གཟུང་རྟོག་སོགས་ནི་དམིགས་ཡུལ་གྱི་སྒོ་ནས་ཕྱེ་བ་མིན་པར་འཛིན་སྟངས་ཀྱི་སྒོ་ནས་ཕྱེ་བའི་གནད་ཤེས་ན་དེ་འཁྲུལ་ས་མེད་དོ། །སོ་སོ་སྐྱེ་བོ་འཕགས་དབྱེ་བས། །ཞེས་པའི་སྐབས་སུ། མཐའ་དཔྱད་པ་ལ་གཞུང་ལས་བཤད་ཚུལ། དེ་ལས་གཞན་གྱི་བཤད་པའི་ཚུལ་དགག་པ། དོན་ལ་གནས་པའི་ཕྱོགས་བཤད་པ་གསུམ། དང་པོ་ནི། རྩ་བར། སོ་སོ་སྐྱེ་བོའི་དབྱེ་བས། སེམས་ཅན་རྫས་ཡོད་པར། རྣམ་རྟོག་འཛིན་པར་དག་ཏུ་འདོད། འཕགས་པའི་དབྱེ་བས། སེམས་ཅན་བཏགས་ཡོད་པར། རྣམ་རྟོག་འཛིན་པ་དག་ཏུ་འདོད། ཞེས་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པར་བསྟན་པ་དང་། ཉི་ཁྲི་སྣང་བར། ཆོས་ཐམས་ཅད་བདག་མེད་པའོ་ཞེས་ཆོས་དེ་ལྟ་བུ་སོ་སོ་སྐྱེ་བོས་ཀྱང་རྟོགས་པ་མིན་ནམ། དེས་ན་འཛིན་པའི་རྣམ་པར་རྟོག་པ་དང་པོའི་རྣམ་པར་གཞག་པས་མ་ཁྱབ་པར་འགྱུར་རོ་ཞེ་ན། དེ་དག་གི་ནི་དེ་ནི་མོས་པ་ཡིད་ལ་བྱེད་པ་ཡིན་ལ། འདི་ནི་དེ་ཁོ་ན་ཉིད་ཡིད་ལ་བྱེད་པ་བརྗོད་པར་འདོད་པས་སྙིང་པོ་མེད་དོ་ཞེས་པ་དང་། ཡང་འཕགས་པ་ལའང་འདི་ལྟ་བུ་ཡོད་པ་ཡིན་ཏེ། དགེ་སློང་དག་མཚན་མོ་འདས་ནས་ནང་པར་གྱི་དུས་སུ་སྲོག་ཆགས་ལྕེ་སྤྱང་སྐད་འབྱིན་པའི་སྒྲ་ཐོས་སོ་ཞེས་བྱ་བ་དང་། དེ་བཞིན་དུ་ང་དེའི་དུས་ན་རི་དྭགས་ཀྱི་རྒྱལ་པོ་སེང་གེ་ཡན་ལག་མ་སྨད་པ་ཞེས་བྱ་བར་འགྱུར་རོ་ཞེས་གསུངས་པ་མིན་ནམ། དེས་ན་འཛིན་པའི་རྣམ་པར་རྟོག་པ་གཉིས་པའི་རྣམ་པར་གཞག་པས་མ་ཁྱབ་པར་འགྱུར་རོ་ཞེ་ན། དེའི་ཚིག་དེ་ནི་ཐ་སྙད་པ་ཡིན་གྱི། དོན་ལ་མིན་པས་དེས་ན་སྙིང་པོ་མེད་དོ་ཞེས་པ་དང་། དེ་བཞིན་དུ་འགྲེལ་ཆེན་ལས་ཀྱང་བཤད་དོ། །གཉིས་པ་ནི། ཨར་ན་རེ། གཞུང་འདིས་དངོས་སུ་སྟོན་པའི་རྫས་འཛིན་རྟོག་པ་དང་བཏགས་འཛིན་རྟོག་པ་གཉིས་སྐྱེ་འཕགས་གཉིས་ལ་གཙོ་ཆེ་བས་རྣམ་པ་གསལ་བའི་དཔེ་ཙམ་བསྟན་གྱི་སོ་སོར་ངེས་པར་བསྟན་པ་ནི་མིན་ནོ་ཞེས་ཟེར་རོ། །གཞན་ན་རེ། གཞུང་འདིས་མཐོང་སྤང་རྫས་འཛིན་རྟོག་པ་དང་བཏགས་འཛིན་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པར་བསྟན་གྱི། སྤྱིར་དེ་གཉིས་སོ་སོར་ངེས་པར་མ་བསྟན་ཞེས་སྨྲའོ། །ཚིག་ཙམ་ལ་བརྟེན་པ་ཁ་ཅིག གཞུང་འདིས་གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་གང་ཟག་གི་བདག་འཛིན་དེ་ཡུལ་རྫས་འཛིན་དང་། བདག་མེད་མངོན་སུམ་རྟོགས་པའི་ཤེས་རབ་ཀྱིས་དྲངས་པའི་གང་ཟག་བཏགས་པ་ཙམ་དུ་འཛིན་པའི་བློ་དེ་ཡུལ་བཏགས་འཛིན་ཡིན་པས་སྐྱེ་འཕགས་གཉིས་ལ་སོ་སོར་ངེས་པར་བཤད་པ་ཡིན་གྱི། ཡུལ་ཅན་རྫས་འཛིན་རྟོག་པ་དང་རྟགས་འཛིན་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པར་མ་བཤད་དེ། རྫས་འཛིན་རྟོག་པ་འཕགས་པ་ལའང་ཡོད། བཏགས་འཛིན་རྟོག་པ་སོ་སྐྱེ་ལའང་ཡོད་པའི་ཕྱིར་ཞེས་ཟེར་རོ། །ལུགས་དང་པོ་དེ་མི་འཐད་དེ། སྐབས་འདིར་དངོས་སུ་བསྟན་པའི་རྫས་འཛིན་རྟོག་པ་ཡིན་ན་སོ་སྐྱེ་ཁོ་ནའི་རྒྱུད་ལ་ཡོད་པས་མ་ཁྱབ་པར་ཐལ་བ་དང་། བཏགས་འཛིན་རྟོག་པ་ཡིན་ན་འཕགས་པ་ཁོ་ནའི་རྒྱུད་ལ་ཡོད་པས་མ་ཁྱབ་པར་ཐལ། དམ་བཅའ་དེའི་ཕྱིར། འདོད་ན། ཉི་སྣང་ལས་འཛིན་པའི་རྣམ་པར་རྟོག་པ་དང་པོའི་རྣམ་པར་གཞག་པས་མ་ཁྱབ་བོ་ཞེས་དང་། གཉིས་པའི་རྣམ་པར་གཞག་པས་མ་ཁྱབ་བོ་ཞེས་པ་ལ་སྙིང་པོ་མེད་ཅེས་པའི་ལན་བཏབ་པ་མི་འཐད་པར་ཐལ་ལོ། །ལུགས་གཉིས་པ་མི་འཐད་དེ། ཐེག་དམན་འཕགས་པ་ལའང་མཐོང་སྤང་དུ་གྱུར་པའི་རྫས་འཛིན་རྟོག་པ་ཡོད་པ་གང་ཞིག བྱང་སེམས་སོ་སྐྱེ་ལ་མཐོང་སྤང་དུ་གྱུར་པའི་བཏགས་འཛིན་རྟོག་པ་ཡོད་པའི་ཕྱིར། རྟགས་དང་པོ་དེར་ཐལ། དེའི་རྒྱུད་ལ་ཆོས་ཀྱི་དབང་དུ་བྱས་པའི་མཐོང་སྤང་དུ་གྱུར་པའི་རྫས་འཛིན་རྟོག་པ་ཡོད་པའི་ཕྱིར་ཏེ། དེའི་རྒྱུད་ལ་མཐོང་སྤང་དུ་གྱུར་པའི་ཆོས་ལ་བདེན་པར་འཛིན་པའི་བདེན་འཛིན་ཡོད་པའི་ཕྱིར། རྟགས་ཕྱི་མ་དེར་ཐལ། དེའི་རྒྱུད་ལ་མཐོང་སྤང་དུ་གྱུར་པའི་ཆོས་ལ་མོས་པ་ཡིད་བྱེད་ཀྱི་བཏགས་འཛིན་རྟོག་པ་ཡོད་པའི་ཕྱིར། གསུམ་པའང་མི་འཐད་དེ། འདིར་བསྟན་རྫས་འཛིན་རྟོག་པའི་ཡུལ་ཡིན་ན་གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་གང་ཟག་གི་བདག་འཛིན་ཡིན་དགོས་པར་ཐལ། དེའི་ཡུལ་གྱི་ངོས་འཛིན་དེ་ལྟར་འཐད་པའི་ཕྱིར། འདོད་ན། འཛིན་འདོར་ལ་སོགས་པའི་ཡུལ་དགུ་པོ་ཆོས་ཅན། དེར་ཐལ། དེའི་ཕྱིར། མ་གྲུབ་ན། འདིར་བསྟན་རྫས་འཛིན་རྟོག་པ་དེ་ལ་ཡུལ་གྱི་དབྱེ་བས་དགུར་དབྱེ་བ་མི་འཐད་པར་ཐལ་ལོ། །ཕྱི་མ་ལ་བཏགས་འཛིན་རྟོག་པའི་ཡུལ་ཡིན་ན་བདག་མེད་མངོན་སུམ་དུ་རྟོགས་པའི་ཤེས་རབ་ཀྱིས་དྲངས་པའི་གང་ཟག་བཏགས་པ་ཙམ་དུ་འཛིན་པའི་བློ་ཡིན་པར་ཐལ། དེའི་ཡུལ་གྱི་ངོས་འཛིན་དེ་འཐད་པའི་ཕྱིར། འདོད་ན། སྔར་ལྟར་རོ། །གཞན་ཡང་ཉི་སྣང་ལས། དེའང་འཛིན་པའི་རྣམ་པར་རྟོག་པ་དང་པོས་མ་ཁྱབ་པར་འགྱུར་རོ་ཞེ་ན། ཞེས་པའི་འཛིན་པའི་རྣམ་པར་རྟོག་པ་དང་པོ་དེ་ཡུལ་ཅན་རྫས་འཛིན་རྟོག་པ་མིན་པར་ཡུལ་རྫས་འཛིན་ཁོ་ན་དང་། འཛིན་པའི་རྣམ་པར་རྟོག་པ་གཉིས་པས་མ་ཁྱབ་པར་འགྱུར་ཞེས་པའི་འཛིན་པའི་རྣམ་པར་རྟོག་པ་གཉིས་པ་དེ་ཡུལ་ཅན་བཏགས་འཛིན་རྟོག་པ་མིན་པར་ཡུལ་བཏགས་འཛིན་ཁོ་ནར་ཐལ། སྐྱེ་འཕགས་གཉིས་ལ་སོ་སོར་ངེས་པར་བཤད་པའི་རྟོག་པ་དེ་ཡུལ་ཅན་རྫས་འཛིན་རྟོག་པ་དང་བཏགས་འཛིན་རྟོག་པ་ལ་མི་བྱེད་པར་ཡུལ་རྫས་འཛིན་དང་བཏགས་འཛིན་གཉིས་ལ་བྱེད་པ་འཐད་པའི་ཕྱིར། འདོད་ན། འདིར་བསྟན་འཛིན་རྟོགས་གཉིས་པོ་དེ་ལྟར་དུ་འཇོག་པ་རིགས་པར་ཐལ་ལོ། །ཡང་སྐབས་འདིར་དངོས་བསྟན་གྱི་བཏགས་འཛིན་རྟོག་པ་ཡིན་ན་དེ་ཁོ་ན་ཡིད་བྱེད་ཀྱི་བཏགས་འཛིན་རྟོག་པ་ཡིན་པས་མ་ཁྱབ་པར་ཐལ། དེ་འཕགས་པ་ཁོ་ན་ལ་ཡོད་པར་མ་ངེས་པའི་ཕྱིར། རྟགས་ཁས། འདོད་ན། འདིར་ནི་དེ་ཁོ་ན་ཉིད་ཡིད་ལ་བྱེད་པ་བརྗོད་པར་འདོད་པ་ཡིན་པས་སྙིང་པོ་མེད་དོ་ཞེས་པའི་ཉི་སྣང་གི་ལུང་དང་འགལ་ལོ། །ཡང་འདིར་དངོས་བསྟན་གྱི་རྫས་འཛིན་རྟོག་པ་འཕགས་པའི་རྒྱུད་ལ་ཡོད་པར་ཐལ། འདིར་དངོས་སུ་བསྟན་པའི་རྟོག་པ་གཉིས་སྐྱེ་འཕགས་གཉིས་ལ་སོ་སོར་མ་ངེས་པའི་ཕྱིར། རྟགས་ཁས། འདོད་ན། དེའི་རྒྱུད་ལ་དེ་ཡོད་པར་བཤད་པ་དེ་དྲང་དོན་མིན་པར་ཐལ་ལོ། །འདོད་ན། དེའི་ཚིག་དེ་ནི་ཐ་སྙད་པ་ཡིན་གྱི། དོན་དམ་པ་མིན་པས་དེས་ན་སྙིང་པོ་མེད་དོ་ཞེས་པ་དང་འགལ་ལོ། །གསུམ་པ་ནི། གཞུང་འགྲེལ་གཉིས་ཀྱི་སྐབས་ནས་བསྟན་པའི་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པར་བསྟན་པ་ཡིན་ཏེ། འདི་ལྟར་སྐབས་འདིར་དངོས་བསྟན་གྱི་རྫས་འཛིན་རྟོག་པ་ཡིན་ན་སོ་སོ་སྐྱེ་བོ་ཁོ་ནའི་རྒྱུད་ལ་ཡོད་པས་ཁྱབ་སྟེ། དེ་ཡིན་ན་གང་ཟག་གི་དབང་དུ་བྱས་པའི་རྫས་འཛིན་རྟོག་པ་ཡིན་པས་ཁྱབ་པ་གང་ཞིག དེ་འཕགས་པའི་རྒྱུད་ལ་ཡོད་པ་མི་སྲིད་པའི་ཕྱིར། དང་པོ་དེར་ཐལ། སེམས་ཅན་རྫས་ཡོད་པར། རྣམ་རྟོག་འཛིན་པ་དག་ཏུ་འདོད། །ཅེས་སོ། །ཕྱི་མ་དེར་ཐལ། འཕགས་པ་ཡིན་ན། གང་ཟག་གི་བདག་མེད་མངོན་སུམ་རྟོགས་པས་ཁྱབ་པའི་ཕྱིར། ཡང་སྐབས་འདིར་དངོས་སུ་བསྟན་པའི་བཏགས་འཛིན་རྟོག་པ་ཡིན་ན་འཕགས་པ་ཁོ་ནའི་རྒྱུད་ལ་ཡོད་པས་ཁྱབ་སྟེ། དེ་ཡིན་ན་གང་ཟག་གི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་ཡིན་པས་ཁྱབ། དེ་སོ་སྐྱེའི་རྒྱུད་ལ་ཡོད་པ་མི་སྲིད་པའི་ཕྱིར་ཏེ། དེ་ཡིན་ན་གང་ཟག་གི་དབང་དུ་བྱས་པའི་བཏགས་འཛིན་རྟོག་པ་ཡིན་པས་ཀྱང་ཁྱབ། དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་ཡིན་པས་ཁྱབ་པའི་ཕྱིར། དང་པོ་དེར་ཐལ། སེམས་ཅན་བཏགས་ཡོད་པར། །རྣམ་རྟོགས་འཛིན་པ་དག་ཏུ་འདོད། །ཅེས་གསུངས་པའི་ཕྱིར། ཕྱི་མ་དེར་ཐལ། དེ་དག་གིས་དེ་ནི་མོས་པ་ཡིད་ལ་བྱེད་པ་ཡིན་ལ། འདིར་ནི་དེ་ཁོ་ན་ཉིད་ཡིད་ལ་བྱེད་པ་བརྗོད་པར་འདོད་པ་ཡིན་པས་སྙིང་པོ་མེད་དོ་ཞེས་གསུངས་པའི་ཕྱིར། འདིར་ཤུགས་ལ་བསྟན་པའི་རྫས་འཛིན་རྟོག་པ་དང་བཏགས་འཛིན་རྟོག་པ་གཉིས་སྐྱེ་འཕགས་གཉིས་ལ་སོ་སོར་ངེས་པ་ནི་མིན་ཏེ། དེ་ལྟར་བསྟན་པའི་རྫས་འཛིན་རྟོག་པ་ཐེག་དམན་འཕགས་པ་དང་། བཏགས་འཛིན་རྟོག་པ་བྱང་སེམས་སོ་སྐྱེའི་རྒྱུད་ལ་ཡོད་པའི་ཕྱིར། དང་པོ་དེར་ཐལ། སྐབས་འདིར་ཤུགས་ལ་ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་བསྟན་པ་གང་ཞིག དེ་དེའི་རྒྱུད་ལ་ཡོད་པའི་ཕྱིར་ཏེ། དེའི་རྒྱུད་ལ་མཐོང་སྤང་དུ་གྱུར་པའི་ཆོས་ལ་བདེན་པར་འཛིན་པའི་བདེན་འཛིན་ཡོད་པའི་ཕྱིར། རྩ་རྟགས་ཕྱི་མ་དེར་ཐལ། སྐབས་འདིར་ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་ཤུགས་ལ་བསྟན་པ་གང་ཞིག དེ་བྱང་སེམས་སོ་སྐྱེའི་རྒྱུད་ལ་ཡོད་པའི་ཕྱིར་ཏེ། དེའི་རྒྱུད་ལ་ཆོས་ཀྱི་དབང་དུ་བྱས་པའི་མོས་པ་ཡིད་བྱེད་ཀྱི་བཏགས་འཛིན་རྟོག་པ་ཡོད་པའི་ཕྱིར་ཏེ། མཐོང་སྤང་དུ་གྱུར་པའི་ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་ཡོད་པ་གང་ཞིག དེ་ལྟ་བུའི་མོས་པ་ཡིད་བྱེད་ཀྱི་བཏགས་འཛིན་རྟོག་པ་གཞི་གྲུབ་པའི་ཕྱིར། དེས་ན་འདིར་བཏགས་ཆོས་གང་ཟག་ལ་རྫས་ཡོད་དང་བཏགས་ཡོད་དུ་འཛིན་པའི་བློ་དངོས་སུ་བསྟན་ཅིང་། གདགས་གཞི་ཆོས་ལ་རྫས་ཡོད་བཏགས་ཡོད་དུ་འཛིན་པའི་བློ་ཤུགས་ལ་བསྟན་ཏེ། དེ་གཉིས་སྐབས་འདིར་བསྟན་དགོས་པ་གང་ཞིག དངོས་སུ་བསྟན་པའི་ཕྱིར། འདིར་བསྟན་དགོས་ཏེ། རྒྱས་བཤད་ཀྱི་སྐབས་སུ་དངོས་སུ་བསྟན་པའི་ཕྱིར་ཏེ། འཛིན་པ་དང་ནི་འདོར་བ་དང་། །ཞེས་པར་གདགས་གཞི་ཆོས་ལ་འཛིན་འདོར་སོགས་དགུ་ཕྱེ་ནས་དེ་ལ་རྫས་ཡོད་དུ་འཛིན་པའི་བློ་དེ་ལ་འཛིན་རྟོགས་དང་པོ། ཆེད་བཞིན་ངེས་པར་མི་འབྱུང་དང་། །ཞེས་པར་གདགས་གཞི་ཆོས་དེ་ལ་ཆེད་བཞིན་ངེས་པར་མི་འབྱུང་བ་སོགས་དགུར་ཕྱེ་ནས་དེ་ལ་བཏགས་ཡོད་དུ་འཛིན་པའི་བློ་དེ་འཛིན་རྟོག་གཉིས་པར་དངོས་སུ་བསྟན་པའི་ཕྱིར། དེ་བཞིན་དུ་རྒྱས་བཤད་པའི་སྐབས་སུ་བཏགས་ཆོས་གང་ཟག་ལ་རྫས་ཡོད་དང་བཏགས་ཡོད་དུ་འཛིན་པའི་བློ་ཤུགས་ལ་བསྟན་པའི་རྒྱུ་མཚན་ལའང་སྦྱར་བར་བྱའོ། །གལ་ཏེ་གང་ཟག་གི་དབང་དུ་བྱས་པའི་རྫས་འཛིན་རྟོག་པ་དེ་གང་ཟག་གི་བདེན་འཛིན་ཡིན་པས་ཉོན་སྒྲིབ་ཡིན་ལ། དེ་འདིར་བསྟན་རྟོག་པར་མི་འདོད་དོ་སྙམ་ན། དེ་དེ་མིན་ཏེ། གང་ཟག་གི་བདེན་འཛིན་ནི་ཕུང་པོ་ལ་དམིགས་ནས་ངར་འཛིན་པའི་བློ་ཡིན་ལ། འདི་ནི་དེ་ལ་དམིགས་ནས་བདེན་པར་འཛིན་པའི་བློ་ཡིན་པའི་ཕྱིར། ཤེས་བྱ་ཀུན་རིག་གི་དགོངས་པ་དཔྱིས་ཕྱིན་པར་བཀོད་པའོ། །ངོ་བོ་ཉིད་དང་རིགས་དང་ནི། །ཞེས་པའི་སྐབས་སུ། ཁ་ཅིག བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག བྱང་སེམས་ཀྱི་ལམ་འབྲས་བུ་དང་བཅས་པ་ལ་འཇུག་བྱར་མངོན་པར་ཞེན་པའི་བློ་དེ་གཟུང་རྟོག་དང་པོའི་མཚན་ཉིད་ཟེར་ན། བྱང་སེམས་ཀྱི་ལམ་ཁོ་ན་ལ་འཇུག་བྱར་མངོན་པར་ཞེན་པའི་བློ་ཆོས་ཅན། ཕྱི་ཟུར་དུ་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཆོས་ཅན་དང་གཅིག་ཡིན་པའི་ཕྱིར། ཁ་ཅིག གང་ཞིག ངོ་བོ་ཉིད་ལ་སོགས་པའི་ཡུལ་དགུ་ལ་འཇུག་བྱར་མངོན་པར་ཞེན་པའི་བློ་ཟེར་ན། སྒོམ་སྤང་འཇུག་པ་གཟུང་རྟོག་ཆོས་ཅན། ཕྱི་མར་ཐལ། མཚོན་བྱ་དེའི་ཕྱིར། འདོད་ན། མཐོང་སྤང་དུ་གྱུར་པའི་འཇུག་པ་གཟུང་རྟོག་ཏུ་ཐལ་ལོ། །ཁ་ཅིག དེ་འདྲ་དེ་མཐོང་སྤང་དུ་གྱུར་པའི་འཇུག་པ་གཟུང་རྟོག་གི་མཚན་ཉིད་ཡིན་ཟེར། བྱང་སེམས་ཀྱི་ངོ་བོ་ཉིད་ཁོ་ན་ལ་འཇུག་བྱར་མངོན་པར་ཞེན་པའི་འཇུག་པ་གཟུང་རྟོག་ཆོས་ཅན། ཟུར་ཕྱི་མར་ཐལ། མཚོན་བྱ་དེའི་ཕྱིར། མ་གྲུབ་ན། མཐོང་སྤང་དུ་གྱུར་པའི་འཇུག་པ་གཟུང་རྟོག་དེ་ལ་ལམ་གྱི་ངོ་བོ་ཉིད་ལ་འཇུག་བྱར་ཞེན་པ་སོགས་དགུར་དབྱེ་བ་མི་འཐད་པར་ཐལ། མ་གྲུབ་པ་དེའི་ཕྱིར། རྩ་བར་འདོད་ན། བྱང་སེམས་ལམ་གྱི་ངོ་བོ་ཉིད་དེ་ངོ་བོ་ཉིད་ལ་སོགས་པའི་ཡུལ་དགུར་ཐལ་ལོ། །ཁ་ཅིག ཡུལ་དགུ་གང་རུང་ལ་ཞེས་པའི་ཁྱད་པར་སྦྱོར་རོ་ཞེ་ན། ངོ་བོ་ཉིད་ལ་སོགས་པའི་ཡུལ་དགུ་ཆར་ལ་འཇུག་པར་མངོན་པར་ཞེན་པའི་བློ་ཆོས་ཅན། ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། འདོད་ན། བྱང་སེམས་ལམ་གྱི་ངོ་བོ་ཉིད་ལ་འཇུག་བྱར་མངོན་པར་ཞེན་པའི་བློ་ཡིན་པར་ཐལ། འདོད་པ་གང་ཞིག གཞན་བརྒྱད་མིན་པའི་ཕྱིར། འདོད་ན། ངོ་བོ་ཉིད་ལ་སོགས་པའི་ཡུལ་དགུ་བྱང་སེམས་ལམ་གྱི་ངོ་བོ་ཉིད་དུ་ཐལ། འདོད་པ་དེའི་ཕྱིར། སྲིད་དང་ཞི་བར་ལྟུང་བའི་ཕྱིར། །ཞེས་པའི་སྐབས་སུ། ཁ་ཅིག བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག ཐེག་དམན་གྱི་ལམ་འབྲས་བུ་དང་བཅས་པ་ལ་ལྡོག་བྱར་མངོན་པར་ཞེན་པའི་བློ་ལྡོག་པ་གཟུང་རྟོག་གི་མཚན་ཉིད་ཡིན་ཟེར། ཐེག་དམན་གྱི་ལམ་ཁོ་ན་ལ་ལྡོག་བྱར་ཞེན་པའི་ལྡོག་པ་གཟུང་རྟོག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག དེ་གང་ཞིག རྟོག་པ་དམན་པ་སོགས་ཡུལ་དགུ་ལ་ལྡོག་བྱར་མངོན་པར་ཞེན་པའི་བློ་ཞེ་ན། སྒོམ་སྤང་ལྡོག་པ་གཟུང་རྟོག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག་དེ་མཐོང་སྤང་ལྡོག་པ་གཟུང་རྟོག་གི་མཚན་ཉིད་ཡིན་ཟེར་ན། རྟོག་པ་དམན་པ་ཁོ་ན་ལ་ལྡོག་བྱར་མངོན་པར་ཞེན་པའི་ལྡོག་པ་གཟུང་རྟོགས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག ཡུལ་དགུ་གང་རུང་ལ་ཞེས་པའི་ཁྱད་པར་སྦྱོར་ན། རྟོག་པ་དམན་པ་སོགས་ཡུལ་དགུ་ཆར་ལ་ལྡོག་བྱར་མངོན་པར་ཞེན་པའི་བློ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེ་རྣམས་ཀྱི་རྟགས་སྒྲུབ་ཚུལ་སྔར་ལྟར་ཤེས་སོ། །འཛིན་པ་དང་ནི་འདོར་བ་དང་། །ཞེས་པའི་སྐབས་སུ། ཁ་ཅིག བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག འཛིན་འདོར་ལ་སོགས་པའི་ཡུལ་དགུ་ལ་བདེན་པར་མངོན་པར་ཞེན་པའི་བློ་དེ་རྫས་འཛིན་རྟོག་པའི་མཚན་ཉིད་ཡིན་ཟེར་ན། སྒོམ་སྤང་རྫས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག དེ་མཐོང་སྤང་རྫས་འཛིན་རྟོག་པའི་མཚན་ཉིད་ཡིན་ཞེས་དང་། ཡུལ་དགུ་གང་རུང་ལ་ཞེས་སྦྱོར་ན་སྔ་མ་ལྟར་རོ། །ཡང་མཚན་ཉིད་ཕྱི་མ་ལ། བདག་རང་དབང་ཅན་ལ་བདེན་པར་མངོན་པར་ཞེན་པའི་མཐོང་སྤང་རྫས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེ་དེར་ཐལ། བདག་རང་དབང་ཅན་དང་ཞེས་པའི་སྐབས་ནས་བསྟན་པའི་རྟོག་པ་དེ་ལ་མཐོང་སྤང་དང་སྒོམ་སྤང་གཉིས་སུ་ཡོད་པའི་ཕྱིར། རྩ་བར་འདོད་ན། དེ་ཆོས་ཅན། ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་ཡིན་པར་ཐལ། འདོད་པ་དེའི་ཕྱིར། འདོད་མི་ནུས་ཏེ། གང་ཟག་གི་དབང་དུ་བྱས་པའི་རྫས་འཛིན་རྟོག་པ་ཡིན་པའི་ཕྱིར། གཞན་ཡང་། སོ་སོ་སྐྱེ་བོ་འཕགས་དབྱེ་བས། །ཞེས་པའི་སྐབས་ནས་བསྟན་པའི་རྫས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སྔར་ལྟར་རོ། །ཆེད་བཞིན་ངེས་པར་མི་འབྱུང་དང་། །ཞེས་པའི་སྐབས་སུ། ཁ་ཅིག བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག ཆེད་བཞིན་ངེས་པར་མི་འབྱུང་བ་ལ་སོགས་པའི་ཡུལ་དགུ་ལ་བཏགས་པ་ཙམ་དུ་མངོན་པར་ཞེན་པའི་བློ་དེ་བཏགས་འཛིན་རྟོག་པའི་མཚན་ཉིད་ཡིན་ཞེ་ན། སྒོམ་སྤང་བཏགས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག དེ་མཐོང་སྤང་བཏགས་འཛིན་རྟོག་པའི་མཚན་ཉིད་ཡིན་ཞེས་དང་། ཡུལ་དགུ་གང་རུང་ལ་ཞེས་པའི་ཁྱད་པར་སྦྱོར་ནའང་སྔ་མས་ཤེས་སོ། །གཞན་ཡང་མཚན་ཉིད་ཕྱི་མ་ལ། གང་ཟག་ལ་བཏགས་པ་ཙམ་དུ་མངོན་པར་ཞེན་པའི་མཐོང་སྤང་བཏགས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཞན་ཡང་། སོ་སོ་སྐྱེ་བོ་འཕགས་དབྱེ་བས། །ཞེས་པས་བསྟན་པའི་བཏགས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། སྔ་ཕྱི་གཉིས་ཆར་ལ་འདོད་ན། ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་དང་། ཕུང་པོ་ལ་སོགས་པའི་ཡུལ་དགུ་ལ་བཏགས་པ་ཙམ་དུ་མངོན་པར་ཞེན་པའི་མཐོང་སྤང་བཏགས་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཕུང་པོ་ལ་སོགས་པའི་ཡུལ་དགུ་དང་། ཆེད་བཞིན་ངེས་པར་མི་འབྱུང་བ་ལ་སོགས་པའི་ཡུལ་དགུ་དོན་གཅིག་པར་ཐལ་ལོ། །རང་ལུགས་ནི། མཐོང་སྤང་དུ་གྱུར་པའི་འཇུག་པ་གཟུང་རྟོག་སོགས་བཞིའི་མཚན་ཉིད་རིམ་བཞིན། མཐོང་སྤང་དུ་གྱུར་པའི་ཤེས་སྒྲིབ་གང་ཞིག རང་ཡུལ་ལ་བླང་བྱའི་གཟུང་བར་མངོན་པར་ཞེན་པའི་བློ། དེ་གང་ཞིག རང་ཡུལ་ལ་དོར་བྱའི་གཟུང་བར་མངོན་པར་ཞེན་པའི་བློ། དེ་གང་ཞིག རང་ཡུལ་ལ་འཛིན་པ་པོར་བདེན་པར་མངོན་པར་ཞེན་པའི་བློ། དེ་གང་ཞིག རང་ཡུལ་ལ་འཛིན་པ་པོར་བཏགས་པ་ཙམ་དུ་མངོན་པར་ཞེན་པའི་བློ། དྲི་མ་ཟད་དང་མི་སྐྱེ་བའི། །ཞེས་པའི་སྐབས་སུ། བྱང་ཆུབ་ཆེན་པོའི་མཐའ་དཔྱད་པ་ལ། མཚན་གཞི་ལ་དཔྱད། མཚན་ཉིད་ལ་དཔྱད། སྒྲུབ་བྱེད་ལ་དཔྱད་པ་གསུམ་མོ། །དང་པོ་ལ། ཁ་ཅིག གནས་སྐབས་ཀྱི་བྱང་ཆུབ་ཆེན་པོ་ཡིན་ན་བྱང་ཆུབ་ཆེན་པོ་ཡིན་དགོས་ཏེ། ཐེག་ཆེན་གྱི་མཐོང་ལམ་དེ་བྱང་ཆུབ་ཆེན་པོ་ཡིན་པའི་ཕྱིར་ཏེ། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོའི་ཡེ་ཤེས་དེ་རང་འབྲས་བྱང་ཆུབ་ཆེན་པོ་དངོས་སུ་འབྱིན་བྱེད་ཡིན་པའི་ཕྱིར་ཏེ། དེ་ཚོགས་སྒྲུབ་ཡིན་པའི་ཕྱིར་ཞེ་ན། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོའི་ཡེ་ཤེས་དེ་རང་འབྲས་ཐེག་ཆེན་སྒྲུབ་པའི་ཆེད་དུ་བྱ་བ་དངོས་སུ་འབྱིན་བྱེད་ཡིན་པར་ཐལ། དེ་ཐེག་ཆེན་གྱི་སྒྲུབ་པ་ཡིན་པའི་ཕྱིར། ཁྱབ་པ་ཁས། འདོད་ན། ཐེག་ཆེན་གྱི་མཐོང་ལམ་དེ་ཐེག་ཆེན་སྒྲུབ་པའི་ཆེད་དུ་བྱ་བ་ཡིན་པར་ཐལ་ལོ། །ཁ་ཅིག ཐེག་ཆེན་གྱི་མཐོང་ལམ་དེ་བྱང་ཆུབ་ཆེན་པོ་ཡིན་པར་ཐལ། མཐོང་ལམ་རྩེ་སྦྱོར་འཆད་པའི་སྐབས་སུ། བྱང་ཆུབ་ཆེན་པོ་འཆད་པ་ལ་རྒྱུ་མཚན་ཡོད་པའི་ཕྱིར་ཞེ་ན། རྣམ་མཁྱེན་དེ་རང་བཞིན་གནས་རིགས་སུ་ཐལ། རྣམ་མཁྱེན་འཆད་པའི་སྐབས་སུ་རང་བཞིན་གནས་རིགས་འཆད་པ་ལ་རྒྱུ་མཚན་ཡོད་པའི་ཕྱིར། གཉིས་པ་ལ་དགག་གཞག་གཉིས། དང་པོ་ལ། ཁ་ཅིག དྲི་མ་ཟད་སྐྱེ་བདེན་པ་བ་མེད་པར་མངོན་སུམ་རྟོགས་པའི་ཡེ་ཤེས་དེ་བྱང་ཆུབ་ཆེན་པོའི་མཚན་ཉིད་ཡིན་ཟེར་ན། ཐེག་ཆེན་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁ་ཅིག དེའི་ཡེ་ཤེས་མཐར་ཐུག་ཅེ་ན། གཟུགས་སྐུ་གཉིས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། ཆོས་ཀྱི་སྐུ་ལ་སོགས་པ་ཇི་ལྟ་བ་བཞིན་གྱི་བདག་ཉིད་ནི་བྱང་ཆུབ་ཆེན་པོ་ཡིན་པར་བརྗོད་དོ་ཞེས་དང་། རྒྱུད་བླར། དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོའི་ཡོན་ཏན་གྱི། །ཞེས་གསུངས་པའི་ཕྱིར། ཁ་ཅིག དྲི་མ་ཟད་སྐྱེ་བདེན་པ་བ་མེད་པར་རྟོགས་པའི་ཡེ་ཤེས་དང་ལྡན་པའི་སྐྱབས་གནས་མཐར་ཐུག་ཅེ་ན། སངས་རྒྱས་འཕགས་པའི་རྒྱུད་ཀྱི་དྲི་མ་ཟད་སྐྱེ་བདེན་པ་མེད་པར་མངོན་སུམ་རྟོགས་པའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སངས་རྒྱས་འཕགས་པ་དེ་སངས་རྒྱས་འཕགས་པ་དང་ལྡན་པར་ཐལ་ལོ། །གཉིས་པ་ནི། སྤངས་རྟོགས་མཐར་ཐུག་གི་སྐྱབས་གནས། དབྱེ་ན་སྐུ་གསུམ་མོ། །གསུམ་པ་ནི། དྲི་མ་དོན་དམ་པར་ཟད་པ་མེད་པ་དང་སྐྱེ་བ་མེད་པ་གཉིས། བྱང་ཆུབ་ཆེན་པོའི་དྲི་མ་གདོད་མ་ནས་ཟད་པ་དང་མི་སྐྱེ་བར་རྟོགས་པའི་སྒྲུབ་བྱེད་དུ་རིམ་པ་བཞིན་ཤེས་པར་བྱའོ། །གལ་ཏེ་དྲི་མ་ཟད་པར་རྟོགས་པའི་སྒྲུབ་བྱེད་དུ་དྲི་མ་ཟད་པ་མེད་པར་བཀོད་པ་ལ་འབྲེལ་མེད་དོ་ཞེ་ན་སྐྱོན་མེད་དེ། ཟད་པ་མེད་པ་ནི་དོན་དམ་པར་ཟད་པ་མེད་ཡིན་ལ། ཟད་པ་ནི་གདོད་མ་ནས་ཟད་པ་ཡིན་པ་གང་ཞིག དེ་གཉིས་དོན་གཅིག་པའི་ཕྱིར། དེ་ལ་ཁོ་ན་རེ། དྲི་མ་དོན་དམ་པར་སྐྱེ་བ་མེད་པ་དང་དྲི་མ་གདོད་མ་ནས་སྐྱེ་བ་གཉིས་དོན་གཅིག་པར་ཐལ། དྲི་མ་དོན་དམ་པར་ཟད་པ་མེད་པ་དང་གདོད་མ་ནས་ཟད་པ་གཉིས་དོན་གཅིག་པའི་ཕྱིར་ཞེ་ན། མ་ཁྱབ་སྟེ། ཟད་པ་ཞེས་པའི་སྒྲ་དོན་དེ་གདོད་མ་ནས་མེད་པ་དང་། གཉེན་པོས་གསར་དུ་ཟད་པར་བྱས་པ་གཉིས་ཀ་ལ་འཇུག་པ་གང་ཞིག སྐྱེ་བ་ཞེས་པའི་སྒྲ་དེ་རྒྱུ་རྐྱེན་གྱིས་གསར་དུ་སྐྱེ་བ་ཁོ་ན་ལ་འཇུག་པའི་ཕྱིར་དང་། གདོད་མ་ནས་སྐྱེ་བ་ལ་མི་འཇུག་པའི་ཕྱིར། དྲི་མ་ཟད་སྐྱེ་བདེན་པ་བ་མེད་པའི་སྒྲུབ་བྱེད་དུ། དབུས་མཐའ་ལས། ཆོས་ཀྱི་དབྱིངས་ལས་མ་གཏོགས་པའི། །འདི་ལྟར་ཆོས་ཡོད་མ་ཡིན་ཏེ། །ཞེས་གསུངས་པའི་ཕྱིར་བྱས་པ་ལ་ཁོ་ན་རེ། དེ་འདྲའི་གཞུང་དེ་ཆོས་ཅན། དྲི་མ་ཟད་སྐྱེ་བདེན་པ་བ་མེད་པར་མ་བསྟན་པར་ཐལ། དབུས་མཐའི་གཞུང་ཡིན་པའི་ཕྱིར། ཁྱབ་སྟེ། དེ་སེམས་ཙམ་པའི་རང་གཞུང་ཡིན་པའི་ཕྱིར། དེས་ན་གཞུང་འདི་དབུས་མཐའ་ན་ཡོད་ཀྱང་། དེ་དྲངས་པ་མིན་གྱི། དབུ་མའི་གཞུང་ཞིག་ལ་ཡོད་པ་དེ་དྲངས་པར་གསལ་ལོ་ཟེར་རོ། །སེམས་ཙམ་པའི་རང་གཞུང་དུ་ཁས་ལེན་ན། བདེན་མེད་སྟོན་བྱེད་མིན་དགོས་པར་ཐལ། དབུས་མཐའ་ལས་གསུངས་པའི་དེ་འདྲའི་གཞུང་དེས་བདེན་མེད་མ་བསྟན་པ་གང་ཞིག དབུ་མའི་གཞུང་ལས་གསུངས་པའི་དེ་འདྲའི་གཞུང་དེས་བདེན་མེད་བསྟན་པའི་ཕྱིར། འདོད་ན། བཀའ་རྒྱས་འབྲིང་བསྡུས་པ་དེ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། སེམས་ཙམ་པས་སེམས་ཙམ་པའི་ལྟ་བ་སྟོན་བྱེད་དུ་ཁས་ལེན་པའི་ཕྱིར། གཞན་ཡང་། ཆོས་ཀྱི་དབྱིངས་ལས་མ་གཏོགས་པར། །ཞེས་པའི་གཞུང་དེ་ཆོས་ཅན། བདག་མེད་མ་བསྟན་པར་ཐལ། དབུས་མཐའི་གཞུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དབུས་མཐའི་གཞུང་ཡིན་ན་དེ་ལས་གཞན་པའི་གཞུང་མིན་དགོས་པར་ཐལ། མ་གྲུབ་པ་དེའི་ཕྱིར། འདོད་ན། འདི་ལ་བསལ་བྱ་ཅི་ཡང་མེད། །ཅེས་སོགས་ཀྱི་ཚིགས་བཅད་དེ་ཆོས་ཅན། རྒྱུད་བླའི་གཞུང་མིན་པར་ཐལ། མངོན་རྟོགས་རྒྱན་གྱི་གཞུང་ཡིན་པའི་ཕྱིར། དེ་ལ་སྐྱེ་བ་དང་འཇིག་པས་སྟོང་། ཞེས་པའི་སྐབས་སུ། གཞུང་གི་འབྲེལ། གཞུང་སྤྱིའི་དོན། སོ་སོའི་སྒྲུབ་བྱེད་དང་གསུམ་ལས། དང་པོ་ནི། དྲི་མའི་ཆོས་བདེན་པར་ཡོད་པ་དང་། སྟོན་པ་སངས་རྒྱས་ཀྱིས་སྒྲིབ་གཉིས་སྤངས་པ་གཉིས་ཁས་བླངས་ནང་འགལ་བར་སྟོན་པའི་སྐབས་སུ། རྣལ་འབྱོར་ས་བཞི་སྟོན་པ་ལ་དེ་ལྟར་ཁས་ལེན་པ་དངོས་སྨྲ་བ་ཡིན་ཞིང་དེ་ལ་གསུམ་ལས། ཉན་ཐོས་སྡེ་གཉིས་ཀྱི་ཆོས་ཐམས་ཅད་རང་བཞིན་མེད་པར་མ་རྟོགས་པར་གང་ཟག་གི་བདག་མེད་རྟོགས་པ་ཙམ་གྱིས་སྒྲིབ་པ་ཐམས་ཅད་སྤངས་ནས་བྱང་ཆུབ་ཆེན་པོ་ཐོབ་པར་འདོད་པ་དང་། སེམས་ཙམ་པས་ཐམས་ཅད་རང་བཞིན་མེད་པར་མ་རྟོགས་པར། གཟུང་འཛིན་གཉིས་སྟོང་གི་དེ་བཞིན་ཉིད་རྟོག་པ་ཙམ་གྱིས་སྒྲིབ་པ་ཐམས་ཅད་སྤངས་ནས་བྱང་ཆུབ་ཆེན་པོ་ཐོབ་པར་འདོད་པ་བཀག་ནས་བྱང་ཆུབ་ཆེན་པོ་ཐོབ་པ་ལ་རྣལ་འབྱོར་ས་བཞི་རིམ་གྱིས་སྐྱེད་དེ། སྤྲོས་བྲལ་རྟོགས་པའི་རྣལ་འབྱོར་གྱི་ས་ལ་བརྟེན་ནས་ཤེས་སྒྲིབ་སྤོང་དགོས་སོ་ཞེས་ཤེས་པའི་ཆེད་དུ་རྣལ་འབྱོར་ས་བཞི་སྟོན་ཏོ། །གཉིས་པ་ལ། རྣལ་འབྱོར་སའི་མཚན་ཉིད། ས་མཚམས། གྲངས་ངེས། གོ་རིམ་ངེས་པ་དང་བཞིའོ། །དང་པོ་ནི། དགག་གཞག་གཉིས། དང་པོ་ནི། ཁ་ཅིག བདག་མེད་རྟོགས་པ་དང་། གཟུང་མེད་རྟོགས་པ་དང་། འཛིན་མེད་རྟོགས་པ་དང་། སྤྲོས་བྲལ་རྟོགས་པའི་རྣལ་འབྱོར་གྱི་སའི་མཚན་ཉིད་རིམ་བཞིན། གང་ཟག་གི་བདག་མེད་རྟོགས་ནས་རྩེ་གཅིག་ཏུ་སྒོམ་པ་བྱེད་པའི་མདོ་སྡེ་པའི་ལྟ་བ་དང་། སྣང་བ་ཕྱི་རོལ་གྱི་དོན་མི་བདེན་པར་ཤེས་པའི་དོན་དུ་བདེན་མེད་རྟོགས་ནས་རྩེ་གཅིག་ཏུ་སྒོམ་པར་བྱེད་པའི་སེམས་ཙམ་རྣམ་བདེན་པའི་ལྟ་བ་དང་། གཟུང་བ་མེད་ན་འཛིན་པ་མེད་པའི་ཕྱིར་ན་གཟུང་འཛིན་གཉིས་སྟོང་གི་ཤེས་པ་ཡང་དག་པར་ཡོད་པར་ལྡན་པའི་སེམས་ཙམ་རྣམ་རྫུན་པའི་ལྟ་བ་དང་། ཆོས་ཐམས་ཅད་དོན་དམ་པར་སྤྲོས་བྲལ་དང་ཀུན་རྫོབ་ཏུ་སྒྱུ་མ་ལྟ་བུར་རྟོགས་ནས་སྒོམ་པའི་དབུ་མ་པའི་ལྟ་བ་དང་ཞེས་ཟེར་རོ། །འོ་ན་རྣལ་འབྱོར་གྱི་ས་བཞི་པོ་དེ་དབུ་མ་པའི་ལྟ་བ་རྟོགས་པའི་བློ་མིན་པར་ཐལ། ས་དང་པོ་གསུམ་པོ་དེ་དངོས་སྨྲ་བའི་ལྟ་བ་ཡིན་པའི་ཕྱིར། འདོད་མི་ནུས་ཏེ། ཆོས་བཤེས་ཀྱིས། དེ་ལ་སྐྱེ་བ་དང་འཇིག་པས་སྟོང་པའི་ཕྱིར་ཞེས་བྱ་བ་ལ་སོགས་སྙིང་རྗེ་ཆེན་པོའི་དོན་སྒོམ་པའི་རིམ་པ་ཡིད་ལ་བྱེད་པ་འདི་ནི་དབུ་མ་པའི་བསྟན་བཅོས་ལས་གསལ་བས་འདིར་བདག་གིས་མི་བསམ་མོ་ཞེས་གསུངས་པའི་ཕྱིར། གཞན་ཡང་འདིར་བསྟན་རྣལ་འབྱོར་གྱི་ས་བཞི་པོ་དེ་དངོས་སྨྲ་བའི་ལུགས་ཀྱི་བྱང་ཆུབ་ཆེན་པོ་ཐོབ་པའི་ཐབས་འགོག་པའི་ཆེད་དུ་བསྟན་པ་མིན་པར་ཐལ། རྟགས་སྔར་ལྟར་རོ། །འདོད་མི་ནུས་ཏེ། གསེར་གླིང་པས། ནང་གི་མུ་སྟེགས་པ་རྣམས་ཀྱིས་བྱང་ཆུབ་སྒྲུབ་པའི་ཐབས་མིན་པར་སྟོན་པའི་སྐབས་སུ་ཐམས་ཅད་དུ་འགྲོ་བ་མེད་པར་བསྟན་པ་ནི་བྱང་ཆུབ་ཇི་ལྟ་བ་དེ་ལྟ་བུ་ཡིན་པ་བླ་མའི་མན་ངག་མདོར་བསྡུས་ཏེ་བསྟན་པས་འཇུག་པའི་སྒོ་ནས་ཚིག་ལེའུར་བྱས་པ་ལས་མ་སྨོས་པའི་དོན་གྱི་ཤུགས་ཀྱིས་འཕངས་པ་བསྟན་པར་བྱ་བའི་ཕྱིར་ཞེས་བྱ་བ་ལ་སོགས་པ་སྨོས་པ་ཡིན་ཏེ་ཞེས་བཤད་པའི་ཕྱིར། གཞན་ཡང་ཐེག་ཆེན་ལམ་དུ་གསར་དུ་འཇུག་པའི་གང་ཟག་ཡིན་ན་དང་པོར་དངོས་སྨྲ་བའི་ལྟ་བ་རྒྱུད་ལ་སྐྱེད་དགོས་པར་ཐལ། དེ་ཡིན་ན་རྣལ་འབྱོར་ས་བཞི་རིམ་བཞིན་སྐྱེད་དགོས་པ་གང་ཞིག དང་པོ་གསུམ་པོ་དེ་དངོས་སྨྲ་བའི་ལྟ་བ་ཡིན་པའི་ཕྱིར། འདོད་ན། དང་པོ་ནས་དབུ་མ་པའི་ལྟ་བ་རྒྱུད་ལ་སྐྱེས་པའི་བྱང་སེམས་ཚོགས་ལམ་པ་མེད་པར་ཐལ་ལོ། །ཁ་ཅིག་རིམ་བཞིན། ཕུང་པོ་གང་ཟག་གི་བདག་མེད་དུ་རྟོགས་པའི་རྣལ་འབྱོར་དང་། གཟུང་བ་ཕྱི་དོན་མེད་པར་རྟོགས་པའི་རྣལ་འབྱོར་དང་། ཕྱི་དོན་འཛིན་པའི་ཤེས་པ་མ་འཁྲུལ་བ་མེད་པར་རྟོགས་པའི་རྣལ་འབྱོར་དང་། ཆོས་ཐམས་ཅད་བདག་མེད་རྟོགས་པའི་རྣལ་འབྱོར་ཟེར་རོ། །དང་པོ་ལ། ལམ་མ་ཞུགས་ཀྱི་གང་ཟག་གི་རྒྱུད་ཀྱི་གང་ཟག་གི་བདག་མེད་རྟོགས་པའི་རྣལ་འབྱོར་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། དེ་འདྲ་ཡོད་པའི་ཕྱིར། ཕྱི་མ་གསུམ་ལ་རྣམ་མཁྱེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། རང་གི་ངོས་སྐལ་གྱི་ཤེས་སྒྲིབ་ཀྱི་གཉེན་པོར་ཐལ་ལོ། །ཁ་ཅིག མཚན་ཉིད་རིམ་བཞིན། ཕུང་པོ་གང་ཟག་གི་བདག་མེད་པར་བསྟན་པའི་དོན་སྒོམ་པར་བྱེད་པའི་མངོན་པར་རྟོགས་པ་གང་ཞིག གང་ཟག་གི་བདག་འཛིན་སྤངས་པའི་རྣལ་གྲོལ་དོན་དུ་གཉེར་བའི་རིགས་ཅན་དང་། གཟུང་བ་ཕྱི་དོན་མེད་པར་གཏན་ལ་ཕབ་པའི་དོན་སྒོམ་པར་བྱེད་པའི་མངོན་པར་རྟོགས་པ་གང་ཞིག ཕྱི་དོན་ལ་བདེན་པར་འཛིན་པའི་བདེན་འཛིན་སྤངས་པའི་དང་། ཕྱི་དོན་འཛིན་པའི་འཛིན་པ་མ་འཁྲུལ་བ་མེད་པར་བསྟན་པའི་དོན་སྒོམ་པར་བྱེད་པའི་དེ་གང་ཞིག དེ་ལྟར་འཛིན་པའི་འཛིན་པ་མ་འཁྲུལ་བ་ཡོད་པར་འཛིན་པའི་བདེན་འཛིན་སྤངས་པའི་དང་། ཆོས་ཐམས་ཅད་རང་བཞིན་མེད་པར་གཏན་ལ་ཕབ་པའི་དོན་སྒོམ་པར་བྱེད་པའི་དེ་གང་ཞིག ཆོས་ཐམས་ཅད་བདེན་པར་འཛིན་པའི་བདེན་འཛིན་སྤངས་པའི་རྣམ་གྲོལ་དོན་དུ་གཉེར་བའི་རིགས་ཅན་ནོ་ཟེར་རོ། །འོ་ན་ཉན་ཐོས་ཀྱི་སྦྱོར་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། བྱང་སེམས་ཀྱི་མངོན་རྟོགས་སུ་ཐལ། འདོད་པ་དེའི་ཕྱིར། མ་ཁྱབ་ན། འདིར་བསྟན་གྱི་རྣལ་འབྱོར་གྱི་ས་བཞི་པོ་དེ་བྱང་སེམས་ཀྱི་ཤེས་སྒྲིབ་སྤོང་བའི་ཆེད་དུ་རིམ་བཞིན་བསྐྱེད་པར་བྱ་བ་མིན་པར་ཐལ། མ་ཁྱབ་པ་དེའི་ཕྱིར། མཚན་ཉིད་ཕྱི་མ་ལ་བྱང་སེམས་ཀྱི་སྦྱོར་ལམ་མཉམ་གཞག་ཡེ་ཤེས་ཆོས་ཅན། མཚོན་བྱར་ཐལ། མཚན་ཉིད་དེའི་ཕྱིར། འདོད་ན། སྤྲོས་བྲལ་མངོན་སུམ་རྟོགས་པར་ཐལ། དེ་རྟོགས་པའི་རྣལ་འབྱོར་ཡིན་པའི་ཕྱིར། འདོད་ན། ཆོས་དབྱིངས་ཀུན་ཏུ་འགྲོ་བའི་ཚུལ་གྱིས་རྟོགས་པའི་ཡེ་ཤེས་ཡིན་ན་ཆོས་དབྱིངས་མངོན་སུམ་རྟོགས་པས་མ་ཁྱབ་པར་ཐལ། ཆོས་དབྱིངས་རྟོགས་པའི་ཡེ་ཤེས་ཡིན་ན་དེ་མངོན་སུམ་རྟོགས་པའི་ཡེ་ཤེས་ཡིན་པས་མ་ཁྱབ་པའི་ཕྱིར། ཁྱབ་པ་སྒྲིགས་མཚམས་དང་བཅས་པ་ཁས་བླངས། གཉིས་པ་ནི། མཚན་ཉིད་རིམ་བཞིན། ཆོས་ཐམས་ཅད་བདག་མེད་པར་རྟོགས་པའི་ལྟ་བ་བསྐྱེད་པའི་ཆེད་དུ་ཕུང་པོ་གང་ཟག་གི་བདག་མེད་པར་སྒོམ་པར་བྱེད་པའི་ཐེག་ཆེན་གྱི་ཚོགས་ལམ་གྱིས་བསྡུས་པའི་མངོན་རྟོགས་དང་། གཟུང་བ་རང་བཞིན་མེད་པ་ལ་གསལ་སྣང་ཐོབ་པའི་བྱང་སེམས་ཀྱི་དྲོད་རྩེ་གང་རུང་གིས་བསྡུས་པའི་མངོན་རྟོགས་དང་། འཛིན་པ་རང་བཞིན་མེད་པའི་དོན་ལ་གསལ་སྣང་ཐོབ་པའི་བཟོད་མཆོག་གང་རུང་གིས་བསྡུས་པའི་མངོན་པར་རྟོགས་པ་དང་། ཆོས་ཐམས་ཅད་སྤྲོས་པའི་མཐའ་བཞི་དང་བྲལ་བར་མངོན་སུམ་རྟོགས་པའི་ཡེ་ཤེས་གང་ཞིག རང་གི་ངོས་སྐལ་གྱི་ཤེས་སྒྲིབ་ཀྱི་དངོས་གཉེན་དུ་གྱུར་པའམ། ཡང་ན་ཕྱི་མའི་མཚན་ཉིད་ལ། དེ་ལྟར་རྟོགས་པའི་མཁྱེན་པ་གང་ཞིག རང་གི་ངོས་སྐལ་གྱི་ཤེས་སྒྲིབ་ཀྱི་གཉེན་པོའི་རིགས་སུ་གནས་པའི་མངོན་རྟོགས་སོ། །གཉིས་པ་ལ། དངོས་དང་རྩོད་པ་སྤང་བ་གཉིས་ལས། དང་པོ་ལ། དང་པོ་ནི་ཐེག་ཆེན་གྱི་ཚོགས་ལམ་དུ་བསྒོམ་པར་བྱ་བ་ཡིན་ཏེ། དེར་ཆོས་ཀྱི་བདག་མེད་པར་རྟོགས་པའི་སྣོད་རུང་དུ་བྱ་བའི་ཕྱིར་རམ། ཉོན་མོངས་པའི་འཆིང་བ་གནོན་པའི་ཕྱིར་དུ་བསྒོམ་དགོས་པའི་ཕྱིར། གཉིས་པ་ནི་ཐེག་ཆེན་གྱི་དྲོད་རྩེ་གཉིས་སུ་བསྒོམ་པར་བྱ་བ་ཡིན་ཏེ། དེར་གཟུང་བ་རང་བཞིན་མེད་པ་ལ་གསལ་སྣང་ལྷག་པའི་ཕྱིར། གསུམ་པ་ནི་ཐེག་ཆེན་གྱི་བཟོད་མཆོག་གཉིས་སུ་བསྒོམ་པར་བྱ་བ་ཡིན་ཏེ། དེར་འཛིན་པ་རང་བཞིན་མེད་པའི་དོན་ལ་གསལ་སྣང་ལྷག་པའི་ཕྱིར། བཞི་པ་ནི་ཐེག་ཆེན་གྱི་མཐོང་ལམ་ནས་བསྒོམ་པར་བྱ་བ་ཡིན་ཏེ། དེར་གཟུང་འཛིན་གྱི་རྣམ་རྟོག་བཞིའི་ས་བོན་གྱི་དངོས་གཉེན་བསྒོམ་པར་བྱ་བ་ཡིན་པའི་ཕྱིར། གཉིས་པ་ནི། ཁ་ཅིག་ན་རེ། རྣལ་འབྱོར་ས་བཞིའི་ལམ་རིམ་དེ་ལྟར་དུ་འཇོག་པ་མི་འཐད་དེ། དེ་དོན་སྤྱིའི་ཚུལ་གྱིས་རྟོགས་པ་ལ་བྱེད་ན་ཐེག་ཆེན་གྱི་ཚོགས་ལམ་ནས་འཇོག་རིགས་པའི་ཕྱིར་དང་། མངོན་སུམ་རྟོགས་པ་ལ་བྱེད་ན་བཞི་ཀའང་ཐེག་ཆེན་གྱི་མཐོང་ལམ་ནས་འཇོག་རིགས་པའི་ཕྱིར་ཟེར། འོ་ན་གཟུང་འཛིན་གྱི་རྣམ་པར་རྟོག་པ་མངོན་གྱུར་པ་བཞི་པོ་དེ་ཐེག་ཆེན་གྱི་སྦྱོར་ལམ་བཞི་ལ་རིམ་བཞིན་སྤང་བྱར་ལྡན་པ་མིན་པར་ཐལ། ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པ་ལ་སོགས་པ་བཞི་པོ་དེ་དོན་སྤྱིའི་ཚུལ་གྱིས་རྟོགས་པ་ཐེག་ཆེན་གྱི་ཚོགས་ལམ་ནས་ཡོད་པའི་ཕྱིར་དང་། མངོན་སུམ་དུ་རྟོགས་པ་ཐེག་ཆེན་གྱི་མཐོང་ལམ་མ་ཐོབ་ཀྱི་བར་མེད་པའི་ཕྱིར། རྟགས་ཁས། ཡང་ཚོགས་སྒྲུབ་དང་པོ་བཅོ་ལྔའི་མ་མཐའི་ས་མཚམས་ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ནས་འཇོག་པ་དང་། ཕྱི་མ་གཉིས་ཀྱི་མ་མཐའི་ས་མཚམས་ཐེག་ཆེན་གྱི་མཐོང་ལམ་ནས་འཇོག་པ་དེ་མི་འཐད་པར་ཐལ། གནས་སྐབས་ཀྱི་བྱང་ཆེན་སྐྱེད་པའི་ཚོགས་སྒྲུབ་ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ན་ཡོད་ཅིང་། མཐར་ཐུག་གི་བྱང་ཆེན་དངོས་སུ་སྐྱེད་པ་རྒྱུན་མཐའ་ན་ཡོད་པའི་ཕྱིར། ཁྱབ་པ་ཁས། གསུམ་པ་གྲངས་ངེས་ལ། དགག་གཞག་གཉིས། དང་པོ་ལ། དར་ཊཱིཀ་པ་ན་རེ། ཁ་ཅིག རྣལ་འབྱོར་གྱི་ས་གཉིས་པས་སེམས་ཙམ་པའི་ལྟ་བ་དང་མཐུན་པའི་རྣལ་འབྱོར་གྱི་ས་དང་། གསུམ་པས་རང་ལུགས་ཀྱི་ལྟ་བ་དང་མཐུན་པའི་རྣལ་འབྱོར་གྱི་ས་སྟོན་པར་འདོད་པ་ནི་མི་འཐད་དེ། ས་བཞི་པས་ལྷན་ཅིག་དམིགས་ངེས་ཀྱི་རྟགས་ལ་བརྟེན་པའི་ལྟ་བ་བསྟན་པ་གང་ཞིག དེ་ལས་གོང་དུ་གྱུར་པའི་ལྟ་བ་ཁས་ལེན་པའི་སེམས་ཙམ་པ་མེད་པའི་ཕྱིར། རྣལ་འབྱོར་གྱི་ས་གཞི་འདོད་པ་མི་འཐད་དེ། སྔོན་པོ་སྔོ་སྣང་ཤེས་པ་ལས་རྫས་གཞན་མིན་པར་རྟོགས་ནས། སྔོ་སྣང་ཤེས་པ་སྔོན་པོ་ལས་རྫས་གཞན་མ་ཡིན་པར་མ་རྟོགས་པའི་རིམ་པ་འདོད་པའི་གང་ཟག་མེད་པའི་ཕྱིར། དེས་ན་རྣལ་འབྱོར་གྱི་ས་དེ་ལ་གསུམ་དུ་ངེས་པ་ཡིན་ཏེ། གང་ཟག་གི་བདག་མེད་རྟོགས་པའི་དང་། གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་རྟོགས་པ་དང་། སྟོང་ཉིད་ཕྲ་མོ་རྟོགས་པའི་རྣལ་འབྱོར་གྱི་ས་གསུམ་དུ་ངེས་པའི་ཕྱིར། འོ་ན་སློབ་དཔོན་གྱིས། སྔོན་པོ་དང་དེའི་བློ་དག་ལྷན་ཅིག་དམིགས་པར་ངེས་པའི་ཕྱིར་ཞེས་པའི་སྐབས་སུ་བསྟན་པའི་རྣལ་འབྱོར་གྱི་ས་དང་། གཟུང་བ་མེད་ན་འཛིན་པ་མེད་དོ་སྙམ་དུ་ངེས་པར་བྱས་ནས་ཞེས་པས་རྣལ་འབྱོར་གྱི་ས་སོ་སོར་བསྟན་པ་ལྟར་སྣང་བ་ཅི་ཡིན་ཞེ་ན། གཞུང་དངོས་མཉམ་གཞག་གི་གནས་སྐབས་སུ་གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་རྟོགས་པ་དང་། ཕྱི་མས་རྗེས་ཐོབ་ཏུ་གཟུང་འཛིན་གཉིས་སུ་སྣང་བའི་བློ་འཁྲུལ་པར་རྟོགས་པའི་རིམ་པ་སྣང་བ་ཡིན་གྱི། དེ་གཉིས་ཀྱི་གནས་སྐབས་ནས་བསྟན་པའི་རྣལ་འབྱོར་གྱི་ས་གཉིས་པོ་དེ་ལ་བཟང་ངན་ཡོད་པ་ནི་མིན་ནོ་ཟེར་རོ། །སེམས་ཙམ་རྣམ་བདེན་པའི་ལྟ་བ་ལས་ལྷག་པའི་སེམས་ཙམ་པ་མེད་པར་ཐལ། སེམས་ཙམ་རྣམ་བདེན་པས་ལྷན་ཅིག་དམིགས་ངེས་ཀྱི་རྟགས་ལ་བརྟེན་པའི་ལྟ་བ་ཁས་ལེན་པ་གང་ཞིག དེ་ལས་གོང་དུ་གྱུར་པའི་ལྟ་བ་ཁས་ལེན་པའི་སེམས་ཙམ་པ་མེད་པའི་ཕྱིར། རྟགས་ཁྱབ་ཁས། འདོད་ན། དེ་རྣམ་བདེན་པས་རྣམ་པ་བདེན་པར་འདོད་པ་དང་། ཅིག་ཤོས་ཀྱིས་རྫུན་པར་འདོད་པའི་གཞི་གཅིག་མེད་པར་ཐལ། འདོད་པ་དེའི་ཕྱིར། གཞན་ཡང་སྔོན་པོ་དང་དེའི་བློ་དག་ཞེས་སོགས་ཀྱིས་བསྟན་པའི་རྣལ་འབྱོར་གྱི་ས་དང་། གཟུང་བ་མེད་ན་འཛིན་པ་མེད་དོ་ཞེས་པའི་སྐབས་ནས་བསྟན་པའི་རྣལ་འབྱོར་གྱི་ས་དེ་མཉམ་གཞག་དང་རྗེས་ཐོབ་ལ་འཇོག་པ་དེ་མི་འཐད་པར་ཐལ། མཉམ་གཞག་ཏུ་གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་རྟོགས་ནས། གཟུང་འཛིན་གཉིས་སུ་སྣང་བའི་བློ་འཁྲུལ་པར་མ་རྟོགས་པའི་རིམ་པ་འདོད་པའི་གང་ཟག་མེད་པའི་ཕྱིར་དང་། རྗེས་ཐོབ་ཏུ་ཡང་དེ་ལྟར་མི་འཐད་པའི་ཕྱིར། ཁྱབ་པ་ཁས། གཞན་ཡང་གཟུང་བ་མེད་ན་འཛིན་པ་མེད་དོ་ཞེས་པའི་གཞུང་དེ་སྔོ་སྣང་ཤེས་པ་སྔོན་པོ་ལས་རྫས་གཞན་མིན་པར་རྟོགས་པའི་རྣལ་འབྱོར་གྱི་ས་གཅིག་བསྟན་པར་ཐལ། ཁྱོད་ཀྱིས་གཞན་ལུགས་འགོག་པ་དེ་ལ་ཁྱབ་པ་ཡོད་པའི་ཕྱིར། འདོད་ན། གཞུང་དེས་རྗེས་ཐོབ་ཀྱི་རྣལ་འབྱོར་གྱི་ས་ཁོ་ན་བསྟན་པ་མིན་པར་ཐལ། འདོད་པ་གང་ཞིག གཟུང་འཛིན་རྫས་གཞན་གྱིས་སྟོང་ཉིད་རྟོག་པའི་མཉམ་གཞག་ཡིན་ན་སྔོར་སྣང་ཤེས་པ་སྔོན་པོ་ལས་རྫས་གཞན་མིན་པར་རྟོགས་དགོས་པའི་ཕྱིར། གཞན་ཡང་འཛིན་པའི་རྣམ་པའི་མཚན་ཉིད་རྣམ་པར་རིག་པ་ཙམ་བསལ་ཏེ་ཞེས་པའི་ཡང་སྒྲ་དེ། འཛིན་པའི་རྣམ་པ་ཅན་གྱི་སེམས་ལ་མངོན་པར་ཞེན་པ་ཡོངས་སུ་མ་བོར་བས་ཞེས་པ་ལ་སྙག་པ་མིན་པར་ཐལ། གཞུང་བར་པ་གཉིས་ནས་བསྟན་པའི་རྣལ་འབྱོར་གྱིས་ས་ལ་བཟང་ངན་མེད་པའི་ཕྱིར། རྟགས་ཁས། འདོད་ན། དེའང་རྟེན་ཅིང་འབྲེལ་བར་འབྱུང་བའི་ཕྱིར་ཞེས་པའི་ཡང་སྒྲ་དེ། གཉིས་སུ་མེད་པའི་ཡེ་ཤེས་འབའ་ཞིག་འདི་ཡང་དག་པར་ཡོད་པའི་ངོ་བོ་ཡིན་ནོ་སྙམ་དུ་ངེས་པར་བྱས་ནས་ཞེས་པ་ལ་སྙག་པ་མིན་པར་ཐལ། འདོད་པ་དེའི་ཕྱིར། གཉིས་པ་ནི། རྣལ་འབྱོར་གྱི་ས་དེ་ལ་བཞིར་གྲངས་ངེས་ཏེ། ཡུལ་བདག་མེད་ལ་ལྟོས་ནས་ཀྱང་དེར་ངེས་པ་དང་། སྤང་བྱ་སྒྲིབ་པ་ལ་ལྟོས་ནས་ཀྱང་བཞིར་གྲངས་ངེས་པའི་ཕྱིར། དང་པོ་དེར་ཐལ། ཡུལ་བདག་མེད་ལ་གང་ཟག་གི་བདག་མེད་དང་། ཆོས་ཀྱི་བདག་མེད་གཉིས། ཕྱི་མ་ལ་བདེན་པ་བཀག་ཙམ་གྱི་ཆོས་ཀྱི་བདག་མེད་དང་། མཐའ་བཞིའི་སྤྲོས་པ་དང་བྲལ་བའི་དེའི་བདག་མེད་གཉིས། དང་པོ་ལའང་གཟུང་བ་ཕྱི་རོལ་གྱི་དོན་དུ་བདེན་པ་བཀག་ཙམ་གྱི་ཆོས་ཀྱི་བདག་མེད་དང་། དེ་འཛིན་པའི་ཤེས་པ་ལ་བདེན་པ་བཀག་ཙམ་གྱི་ཆོས་ཀྱི་བདག་མེད་གཉིས་སུ་འདུས་པའི་ཕྱིར། རྩ་རྟགས་ཕྱི་མ་དེར་ཐལ། སྤང་བྱ་སྒྲིབ་པ་དེ་ལ་ཤེས་སྒྲིབ་དང་ཉོན་སྒྲིབ་གཉིས་ལས། དང་པོ་ལ་མངོན་གྱུར་དང་ས་བོན་གཉིས། དང་པོ་ལ་གཟུང་རྟོག་དང་འཛིན་རྟོག་མངོན་གྱུར་པ་གཉིས་ཡོད་པའི་ཕྱིར། བཞི་པ་གོ་རིམ་ངེས་པ་ནི། བདག་མེད་རྟོགས་པའི་རྣལ་འབྱོར་གྱི་ས་ནི་དང་པོར་སྒོམ་དགོས་ཏེ། ཕུང་པོ་ལ་དམིགས་ནས་ངར་འཛིན་པའི་བློ་ནི་ཉེས་པ་ཀུན་གྱི་རྩ་བ་ཡིན་པས་དང་པོར་འགོག་དགོས་པའི་ཕྱིར་ཏེ། འཇུག་པར། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ཅིང་། །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་གསུངས་པའི་ཕྱིར། དེའི་འོག་ཏུ་ཆོས་ཀྱི་བདག་མེད་རྟོགས་པའི་ལྟ་བ་སྒོམ་དགོས་ཏེ། དེ་མི་སྐྱེད་པར་ཤེས་སྒྲིབ་སྤོང་མི་ནུས་པའི་ཕྱིར། དེ་ལའང་གཟུང་བ་ཕྱི་རོལ་གྱི་དོན་ལ་བདེན་པར་འཛིན་པ་དེ་འགོག་སླ་བས་དང་པོར་འགོག་ཅིང་། དེའི་རྗེས་སུ་འཛིན་པ་ལ་བདེན་པར་འཛིན་པ་འགོག་པ་ཡིན་ཏེ། འཇུག་པ་ལས། ཤེས་བྱ་མེད་ན་ཤེས་པ་བཀག་འགྲུབ་པས། །དང་པོར་ཤེས་བྱ་དགག་པར་མཛད་པ་ཡིན། །ཞེས་གསུངས་སོ། །དེའི་འོག་ཏུ་སྤྲོས་བྲལ་རྟོགས་པའི་ལྟ་བ་སྒོམ་དགོས་ཏེ། ཤེས་སྒྲིབ་ཀྱི་ས་བོན་སྤོང་བ་ལ་ཐེག་ཆེན་ཐུན་མོང་མིན་པའི་རྟོགས་རིགས་དགོས་པའི་ཕྱིར་ཏེ། མདོ་སྡེ་ས་བཅུ་པ་ལས། སངས་རྒྱས་ཀྱི་ཆོས་རྗེས་སུ་རྟོགས་པ་བྱ་བ་ལ། འདི་ནི་དོན་དམ་པའི་བཟོད་པ་ཡིན་ན། ཞེས་གསུངས་པའི་ཕྱིར། གསུམ་པ་གཞུང་སོ་སོའི་སྒྲུབ་བྱེད་ལ། རྣལ་འབྱོར་གྱི་ས་དང་པོའི་སྐབས་སུ་གང་ཟག་གི་བདག་མེད་པར་སྒྲུབ་པའི་རིགས་པ། གཉིས་པའི་སྐབས་སུ་གཟུང་བ་ཕྱི་རོལ་གྱི་དོན་མེད་པར་སྒྲུབ་པའི་རིགས་པ། གསུམ་པའི་སྐབས་སུ་གཟུང་བ་མེད་པས་དེ་འཛིན་མེད་པར་སྒྲུབ་པའི་རིགས་པ། བཞི་པའི་སྐབས་སུ་ཆོས་ཐམས་ཅད་ངོ་བོ་ཉིད་མེད་པར་སྒྲུབ་པའི་རིགས་པ་དང་བཞི་ལས། དང་པོ་ལ། སློབ་དཔོན་ཟླ་གྲགས་ཀྱི་ལུགས། དབྱིག་གཉེན་གྱི་ལུགས། ལེགས་ལྡན་འབྱེད་ཀྱི་ལུགས་དང་གསུམ། དང་པོ་ནི། ཕུང་པོ་དམིགས་ཡུལ་དུ་བྱས་ནས་ངར་འཛིན་ལྷན་སྐྱེས་ཀྱིས་ངའོ་སྙམ་དུ་གཟུང་བའི་ཡུལ་གང་ཟག་དང་། དེ་རང་བཞིན་གྱིས་གྲུབ་པ་གང་ཟག་གི་བདག་ཡིན་ནོ། །གལ་ཏེ་ཕུང་པོ་ལ་བདག་ཏུ་འདོགས་ཏེ། ཕུང་པོ་བདག་གི་གདགས་གཞི་ཡིན་པའི་ཕྱིར་ཟེར་ན། གཏན་ཚིགས་མ་གྲུབ་སྟེ། ཕུང་པོ་ལ་དམིགས་ནས་ངར་འཛིན་ལྷན་སྐྱེས་དེས་གཞི་མེད་ལ་བདག་ཏུ་གཟུང་བའི་ཕྱིར། གང་ཟག་གི་བདག་མེད་པ་ནི་ངར་འཛིན་ལྷན་སྐྱེས་ཀྱི་ཡུལ་དུ་གྱུར་པའི་བདག་དེ་ངོ་བོ་ཉིད་ཀྱིས་མ་གྲུབ་སྟེ། རྟགས་གཅིག་རང་དབང་ཅན་གྱི་བདག་མེད་པར་རྟོགས་པས་གང་ཟག་གི་བདག་མེད་པར་རྟོགས་པར་མི་འགྱུར་ཏེ། གང་ཟག་གི་བདག་མེད་རྟོགས་པའི་དོན་བསྒོམས་པས་འཁོར་བ་ལས་གྲོལ་བ་གང་ཞིག རྟགས་གཅིག་རང་དབང་ཅན་གྱི་བདག་མེད་བསྒོམ་པས་འཁོར་བ་ལས་གྲོལ་བར་མི་འགྱུར་བའི་ཕྱིར་ཏེ། དེས་ལྷན་སྐྱེས་ཀྱི་བདག་འཛིན་ལ་མི་གནོད་པའི་ཕྱིར། གཉིས་པ་ནི། བདག་ཅེས་བརྗོད་པའི་སྒྲ་དེ་ཕུང་པོའི་རྒྱུན་ཁོ་ན་ལ་འཇུག་སྟེ། ངར་འཛིན་ལྷན་སྐྱེས་ཀྱི་ཕུང་པོའི་རྒྱུན་ལ་བདག་ཏུ་འདོགས་པའི་ཕྱིར། དེའང་མཛོད་འགྲེལ་ལས། བདག་ཏུ་མངོན་པར་བརྗོད་པ་འདི་ནི་ཕུང་པོའི་རྒྱུན་ཁོ་ན་ལ་འཇུག་གི་བརྗོད་པར་བྱ་བ་གཞན་ལ་ནི་མིན་ནོ་ཞེས་གསུང་ངོ་། །བདག་དེའང་གཟུགས་ཀྱི་སྐྱེ་མཆེད་བཞིན་དུ་རྫས་སུ་ཡོད་པ་ནི་མ་ཡིན་གྱི། རྡུལ་རྫས་བརྒྱད་ལ་འོ་མ་ཞེས་བརྗོད་པ་ལྟར་བཏགས་པ་ཙམ་དུ་ཡོད་པར་བཞེད་དེ། མཛོད་འགྲེལ་ལས། བཏགས་པར་ཡོད་དོ་ཞེ་ན་ཁོ་བོ་ཅག་ཀྱང་དེ་སྐད་སྨྲའོ་ཞེས་གསུངས་ཤིང་། གལ་ཏེ་བདག་རྫས་སུ་མེད་ན་སེམས་ཅན་སྐྱེ་བ་མི་འཐད་དོ་སྙམ་ན་སྐྱོན་མེད་དེ། ཕུང་པོ་ལ་སེམས་ཅན་དུ་སྒྲོ་བཏགས་ནས་ཕུང་པོའི་རྒྱུན་སྐད་ཅིག་སྔ་མ་ལས་ཕྱི་མ་སྐྱེ་བ་ལ་སེམས་ཅན་སྐྱེ་ཞེས་ཐ་སྙད་བྱེད་པའི་ཕྱིར་རོ། །དེས་ན་སྔར་གྱི་བདག་དེ་རྫས་སུ་ཡོད་པ་ལ་གང་ཟག་གི་བདག་དང་། དེར་འཛིན་པའི་བློ་དེ་གང་ཟག་གི་བདག་འཛིན་ཡིན་པས་གང་ཟག་གི་བདག་ནི་ཐ་སྙད་ཙམ་དུའང་མེད་དོ། །གསུམ་པ་ནི། རྣམ་པར་ཤེས་པའི་ཕུང་པོ་ལ་དམིགས་ནས་ངར་འཛིན་ལྷན་སྐྱེས་ཀྱིས་ངའོ་སྙམ་པའི་བདག་ཏུ་ཐ་སྙད་འདོགས་ཏེ། མདོ་ལས། བདག་ནི་བདག་གི་མགོན་ཡིན་གྱི། །གཞན་ནི་སུ་ཞིག་མགོན་དུ་འགྱུར། །བདག་ཉིད་ལེགས་པར་ཐུལ་བ་ཡིས། །མཁས་པས་མཐོ་རིས་འཐོབ་པར་འགྱུར། །ཞེས་སེམས་ཐུལ་བ་ལ་བདག་ཐུལ་ཞེས་ཐ་སྙད་མཛད་པའི་ཕྱིར། དེས་ན་ངར་འཛིན་ལྷན་སྐྱེས་ཀྱི་ཡུལ་དུ་གྱུར་པའི་བདག་དེ་གྲུབ་མཐའ་ཕྱིན་ཅི་ལོག་གམ་ཐོག་མ་མེད་པའི་བག་ཆགས་ཀྱི་དབང་གིས་རྟག་པ་གཅིག་པུ་རང་དབང་ཅན་དུ་སྒྲོ་འདོགས་པར་བྱེད་དེ། བདག་གིས་བྱས་པའི་ལས་ཀྱི་རྣམ་པར་སྨིན་པ་བདག་གིས་མྱོང་བར་མཐོང་ནས། བདག་རྟག་པར་སྒྲོ་འདོགས་པར་བྱེད། བདག་སྐྱེ་ནའང་གཅིག་པུར་སྐྱེ། འཆི་ནའང་གཅིག་པུར་འཆི་ཞེས་གཅིག་པུར་སྒྲོ་འདོགས་པར་བྱེད། བདག་ཅེས་པའི་འཛིན་སྟངས་ལ་བརྟེན་ནས་གཞན་ལ་རག་མ་ལས་པས་རང་དབང་ཅན་དུ་སྒྲོ་འདོགས་པར་བྱེད་པའི་ཕྱིར། གང་ཟག་གི་བདག་མེད་པའི་ཚུལ་ནི་ངར་འཛིན་ལྷན་སྐྱེས་ཀྱི་འཛིན་པའི་ཡུལ་ནི་དོན་དམ་པར་མེད་པ་ཡིན་གྱི། ཐ་སྙད་དུ་ཡོད་ལ། ཀུན་བཏགས་ཀྱི་འཛིན་པའི་ཡུལ་གྱི་རྟག་པ་གཅིག་པོ་རང་དབང་ཅན་གྱི་བདག་ནི་ཐ་སྙད་ཙམ་དུ་ཡང་མེད་དོ། །གཉིས་པ་ནི། སེམས་ཙམ་པའི་གཞུང་རྣམས་ལས། སྣང་བ་སེམས་སུ་སྒྲུབ་པ་ལ་གསལ་ཞིང་རིག་པའི་རྟགས་ཀྱིས་སྒྲུབ་པ་དང་། ལྷན་ཅིག་དམིགས་ངེས་ཀྱི་རྟགས་ཀྱིས་སྒྲུབ་པ་དང་གཉིས་ཡོད་དེ། རིགས་གཏེར་ལས། གསལ་དང་ལྷན་ཅིག་དམིགས་པས་འགྲུབ། །ཅེས་གསུངས་པའི་ཕྱིར། དང་པོ་ནི། གཟུགས་སོགས་སྣང་བ་ཆོས་ཅན། སེམས་ཀྱི་བདག་ཉིད་ཡིན་ཏེ། གསལ་བ་ཡིན་པའི་ཕྱིར། གཉིས་པ་ནི། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་སྟེ། སྔོན་པོ་དང་དེར་འཛིན་ཚད་མ་ཆོས་ཅན། རྫས་གཞན་མིན་ཏེ། ལྷན་ཅིག་དམིགས་ངེས་ཡིན་པའི་ཕྱིར། དཔེར་ན་དབང་ཤེས་འཁྲུལ་པ་ལ་སྣང་བའི་ཟླ་གཉིས་ཀྱི་རྣམ་པ་བཞིན། དེ་ལའང་ཆོས་ཅན་གྱི་དོན། བསྒྲུབ་བྱའི་ཆོས་ཀྱི་དོན། གཏན་ཚིགས་ཀྱི་དོན་དང་གསུམ་ལས། དང་པོ་ནི། གཟུགས་སོགས་དོན་ལྔ་དང་། དེར་འཛིན་པའི་ཚད་མ་ལྔའོ། །གཉིས་པ་ནི། དེ་གཉིས་རྫས་གཞན་ཡིན་པ་བཀག་ནས། གཟུགས་སོགས་སྣང་བ་སེམས་དང་རྫས་གཅིག་ཏུ་སྒྲུབ་པའོ། །གསུམ་པ་ནི། ལྷན་ཅིག་པ་ནི་དུས་གཅིག་པ། དམིགས་པ་ནི་རྟོགས་པ། ངེས་པ་ནི་ཁྱབ་པའོ། །གསུམ་པ་ནི། གཟུང་བ་ཕྱི་རོལ་གྱི་དོན་འཛིན་པའི་འཛིན་པ་བདེན་པར་མེད་དེ། གཟུང་བ་ཕྱི་རོལ་གྱི་དོན་མེད་པའི་ཕྱིར། དཔེར་ན་གསད་བྱ་མོ་གཤམ་གྱི་བུ་མེད་པས་གསོད་བྱེད་ཀྱི་གཤེད་མ་མེད་པ་བཞིན་ནོ། །བཞི་པ་ནི། ཆོས་ཐམས་ཅད་རང་བཞིན་གྱིས་མེད་པར་སྒྲུབ་པའི་རང་རྒྱུད་ཀྱི་གཏན་ཚིགས་ལ་ལྔར་ཡོད་དེ། ངོ་བོ་ལ་དཔྱོད་པ་གཅིག་དུ་བྲལ། རྒྱུ་ལ་དཔྱོད་པ་རྡོ་རྗེ་ཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག གཉིས་ཀ་ལ་དཔྱོད་པ་མུ་བཞི་སྐྱེ་འགོག ཐམས་ཅད་ལ་དཔྱོད་པ་རྟེན་འབྲེལ་གྱི་གཏན་ཚིགས་རྣམས་སོ། །གཏན་ཚིགས་བར་པ་གསུམ་གྱིས་ནི་སྐྱེ་བའི་སྤྲོས་པ་ཙམ་འགོག་གི བདེན་པ་སྤྱི་ལྡོག་ནས་མི་འགོག་པས་དབུ་མའི་ལུས་ཡོངས་སུ་རྫོགས་པ་མིན་ལ་གཏན་ཚིགས་དང་པོ་དང་མཐའ་མས་ནི་བདེན་པ་སྤྱི་ལྡོག་ནས་འགོག་པས་རང་བཞིན་མེད་པར་སྒྲུབ་པའི་རིག་པ་ཡོངས་སུ་རྫོགས་པ་ཡིན་ནོ། །འོན་ཀྱང་གཏན་ཚིགས་དང་པོ་བཞིས་ཡོད་པ་སྒྲོ་འདོགས་འགོག་གི མེད་པར་སྐུར་འདེབས་མི་འགོག་ཅིང་། རྟེན་འབྲེལ་གྱི་གཏན་ཚིགས་ཀྱིས་ནི་སྒྲོ་འདོགས་དང་སྐུར་འདེབས་གཉིས་ཀ་འགོག་པས་གཏན་ཚིགས་གཞན་རྣམས་ལས་ནུས་པ་ལྷག་པ་ཡིན་ཏེ། འདི་ལ་དགོངས་ནས་འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲྭ་བ་མཐའ་དག་གཅོད་པར་བྱེད། །ཅེས་གསུངས་པའི་ཕྱིར། འོ་ན་དེ་གཉིས་ཀ་ཇི་ལྟར་འགོག་ཅེ་ན། རང་བཞིན་གྱིས་མེད་དེ། རྟེན་འབྲེལ་ཡིན་པའི་ཕྱིར། ཐ་སྙད་དུ་ཡོད་དེ། རྟེན་འབྲེལ་ཡིན་པའི་ཕྱིར་ཞེས་པའི་ཚུལ་གྱིས་སོ། །དེའང་། དང་པོ་གཅིག་དུ་བྲལ་གྱི་གཏན་ཚིགས་ལ། རྟགས་འགོད་པ། ཆོས་ཅན་སོགས་བཤད་པ། ཚུལ་སྒྲུབ་པ་དང་གསུམ་ལས། དང་པོ་ནི། གཟུགས་སོགས་སྣང་བ་འདི་ཆོས་ཅན། བདེན་པར་མེད་དེ། བདེན་པའི་གཅིག་དང་དུ་མ་གང་རུང་དང་བྲལ་བའི་ཕྱིར། དཔེར་ན་གཟུགས་བརྙན་བཞིན་ནོ། །གཉིས་པ་ལ་ཆོས་ཅན་གྱི་དོན། བསྒྲུབ་བྱའི་ཆོས་ཀྱི་དོན། དགག་བྱའི་དོན། གཏན་ཚིགས་ཀྱི་དོན་ནོ། །དང་པོ་ནི། དབུ་མ་པ་དང་དངོས་སྨྲ་བ་གཉིས་ཀ་ལ་མཐུན་སྣང་དུ་གྲུབ་པའི་གཟུགས་སོགས་སྣང་བ་ཙམ་ཆོས་ཅན་དུ་འཛིན་གྱི། བདེན་གྲུབ་ཀྱིས་ཁྱད་པར་དུ་བྱས་པ་དང་། བདེན་མེད་ཀྱིས་ཁྱད་པར་དུ་བྱས་པའི་སྣང་བ་ཆོས་ཅན་དུ་མི་འཛིན་ཏེ། ཤེས་འདོད་ཆོས་ཅན་ཡིན་ན་རྒོལ་ཕྱི་རྒོལ་གཉིས་ཀ་ལ་མཐུན་སྣང་དུ་གྲུབ་དགོས་པའི་ཕྱིར། གཉིས་པ་ནི། བདེན་མེད་སྒྱུ་མ་ལྟ་བུ་ལ་འདོད་པ་དང་། བདེན་པ་བཀག་ཙམ་གྱི་མེད་དགག་ལ་འདོད་པ་གཉིས་ལས། དང་པོ་ནི་མི་འཐད་དེ། མཐར་ཐུག་དཔྱོད་པའི་རིག་ངོར་ཡོངས་གཅོད་དུ་གྱུར་པའི་ཆོས་མེད་པའི་ཕྱིར། དེས་ན་ཕྱི་མ་ཁོ་ནའོ། །གསུམ་པ་ལ་ཁ་ཅིག བློ་ལ་མ་ལྟོས་པར་ཡུལ་རང་ངོས་ནས་གྲུབ་པ་བདེན་པའི་དོན་ཡིན་ལ་དེ་དགག་བྱ་ཡིན་ཞིང་། དབུ་མ་རང་རྒྱུད་པས་ནི་དངོས་སུ་བདེན་པ་ཁས་མི་ལེན་ཀྱང་རང་གི་མཚན་ཉིད་ཀྱིས་གྲུབ་པའི་ཆོས་ཁས་བླངས་པས་བདེན་དངོས་ཁས་བླངས་པའི་ཕྱིར་དེ་དབུ་མ་པ་ཡང་དག་མིན་ནོ་ཞེས་ཟེར་རོ། །འོ་ན། མཚན་ཉིད་ཀྱིས་གྲུབ་པ་རིགས་པས་དཔྱད་བཟོད་ལ་བྱེད་དམ། འཇོག་བྱེད་ལ་བྱེད། ཕྱི་མ་ལྟར་ན་ཟླ་བ་གྲགས་པས་ཀྱང་རང་གི་མཚན་ཉིད་ཀྱིས་གྲུབ་པའི་ཆོས་ཁས་བླངས་པར་འགྱུར་ཏེ། དེས་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་མཚན་ཉིད་ཀྱིས་གྲུབ་པར་ཁས་བླངས་པའི་ཕྱིར། དང་པོ་ལྟར་ན་རང་རྒྱུད་པས་རིགས་པས་དཔྱད་བཟོད་དུ་གྲུབ་པའི་ཆོས་ཁས་བླངས་པ་མེད་དེ། སློབ་དཔོན་སེང་གེ་བཟང་པོས། འཁོར་བ་དང་རྣམ་པར་བྱང་བ་མི་མཐུན་པ་དང་གཉེན་པོ་སྣང་བརྙན་ཙམ་གྱི་ངོ་བོས་ཞེས་དང་། སློབ་དཔོན་ཡེ་ཤེས་སྙིང་པོས། གལ་ཏེ་རིགས་པའི་སྟོབས་ཀྱིས་ནི། །ཐ་སྙད་དུ་ཡང་མི་སྐྱེ་ཟེར། །དེ་བདེན་དེ་ཕྱིར་དེ་ན་དེ། །ཇི་ལྟར་སྣང་ཞིང་ཡིན་པར་གསུངས། །ཞེས་གསུངས་པའི་ཕྱིར། རང་ལུགས་ནི། དབུ་མ་པའི་དགག་བྱ་ལ་དངོས་ཀྱི་དགག་བྱ་དང་། ཆེད་དུ་བྱ་བའི་དགག་བྱ་གཉིས་ལས། དང་པོ་ནི། མཐའ་བཞིའི་སྤྲོས་པ་ཡིན་ལ། ཕྱི་མ་ནི། མཐའ་བཞིར་འཛིན་པའི་བློ་རྟག་འཛིན་ཅན་འདིའི་དགག་བྱ་ནི་མཐའ་དང་པོ་ཡིན་ཞིང་དེ་ལ་བག་ཆགས་ཀྱི་དབང་གིས་དང་པོ་ནས་བདེན་པར་འཛིན་པའི་ལྷན་སྐྱེས་ཀྱི་བདེན་འཛིན་དང་། དེའི་ཡུལ་བདེན་པ་ཡོད་པའི་སྒྲུབ་བྱེད་བཙལ་བ་ན། གྲུབ་མཐའ་སྨྲ་བ་རྣམས་ཀྱིས་སྒྲུབ་བྱེད་མང་དུ་བཀོད་ཀྱང་། ཐམས་ཅད་རིགས་པས་དཔྱད་བཟོད་དུ་འདོད་པར་མཚུངས་པས། དཔྱད་བཟོད་ཀྱི་དོན་བདེན་པ་ཡོད་པར་འཛིན་པའི་བློ་ནི་བདེན་འཛིན་ཀུན་བཏགས་ཡིན་པས་གཉིས་ཡོད་དོ། །འགོག་བྱེད་ཀྱི་རིགས་པ་ལའང་ཐལ་འགྱུར་དང་། རང་རྒྱུད་གཉིས་ཡོད་པ་ལས། དང་པོས་ཀུན་བཏགས་ཀྱི་བདེན་པ་འགོག ཕྱི་མས་ལྷན་སྐྱེས་ཀྱི་བདེན་པ་འགོག་ཏེ། སྒྲུབ་བྱེད་རིགས་པས་དཔྱད་བཟོད་ལ་གནོད་པ་བསྟན་པའི་སྒོ་ནས་བསྒྲུབ་བྱ་བདེན་པ་འགོག་དགོས་པའི་ཕྱིར། འོ་ན་ཀུན་བཏགས་ཀྱི་བདེན་པ་ལྡོག་པས་ལྷན་སྐྱེས་ཀྱི་བདེན་པ་ལྡོག་པར་ཇི་ལྟར་འགྱུར་ཞེ་ན། ལྷན་སྐྱེས་ཀྱི་བདེན་པ་ཡོད་པའི་སྒྲུབ་བྱེད་ཀུན་བཏགས་ཀྱི་བདེན་པའི་སྒྲུབ་བྱེད་ལས་གཞན་མེད་ལ། སྒྲུབ་བྱེད་མ་མཐོང་བ་ན་བསྒྲུབ་བྱ་ཁས་མི་ལེན་པ་རིགས་པ་སྨྲ་བ་ཐམས་ཅད་ཀྱི་ཚུལ་ཡིན་པའི་ཕྱིར། འོ་ན་ཐལ་འགྱུར་གྱི་འོག་ཏུ་རང་རྒྱུད་འགོད་མི་དགོས་སོ་སྙམ་ན། འདི་ནི་ཐ་སྙད་འབའ་ཞིག་སྒྲུབ་ཀྱི་གཏན་ཚིགས་ཡིན་པས་སྐྱོན་མེད་དོ། །བཞི་པ་ནི། བདེན་པའི་གཅིག་དང་དུ་མ་གང་རུང་དང་བྲལ་བ་གཏན་ཚིགས་ཀྱི་དོན་ཡིན་ཏེ། འདིར་བདེན་པ་འགོག་པའི་སྐབས་ཡིན་པའི་ཕྱིར། ཐ་སྙད་གཅིག་དང་དུ་མ་གང་རུང་དང་བྲལ་བ་གཏན་ཚིགས་ཀྱི་དོན་མིན་ཏེ། དེ་ལྟར་ན་ཕྱོགས་ཆོས་མི་འགྲུབ་པའི་ཕྱིར། གསུམ་པ་ཚུལ་སྒྲུབ་པ་ལ། ཕྱོགས་ཆོས་སྒྲུབ་པ་དང་། ཁྱབ་པ་སྒྲུབ་པ་གཉིས་ཏེ། དང་པོ་ནི། རྡུལ་ཕྲན་ཆོས་ཅན། བདེན་པའི་གཅིག་ཏུ་མེད་དེ། ཕྱོགས་ཀྱི་ཆ་དང་བཅས་པ་ཡིན་པའི་ཕྱིར། རྟགས་ཁས་བླངས་ཏེ། རྡུལ་ཕྲན་གྱིས་རགས་པ་རྩོམ་པར་ཁས་བླངས་པ་གང་ཞིག ཕྱོགས་ཀྱི་ཆ་བཅས་མིན་པར་རགས་པ་རྩོམ་མི་ནུས་པའི་ཕྱིར། རྡུལ་ཕྲན་བཀག་པས་རགས་པ་ཡང་ཁེགས་ཏེ། ཚོགས་པ་ཅན་མེད་ན་ཚོགས་པ་མེད་དགོས་པའི་ཕྱིར། རྡུལ་ཕྲན་དང་རགས་པ་གཉིས་ཀ་བཀག་པས་གཟུགས་ཅན་གྱི་ཁམས་བཅུ་ཡང་ཁེགས་ཏེ། དེ་བཅུ་རྡུལ་ཕྲན་གྱིས་རྩོམ་པ་ལས་བྱུང་བའི་རགས་པ་ཡིན་པའི་ཕྱིར། དེ་བཀག་པས་རྣམ་ཤེས་ཀྱི་ཁམས་ལྔ་ཡང་ཁེགས་ཏེ། དེའི་དམིགས་རྐྱེན་དང་བདག་རྐྱེན་མེད་པའི་ཕྱིར། དེ་བཀག་པས་ཡིད་ཀྱི་རྣམ་པར་ཤེས་པ་ཡང་ཁེགས་ཏེ། དེའི་དེ་མ་ཐག་རྐྱེན་མེད་པའི་ཕྱིར། འཇུག་ཤེས་དྲུག་བཀག་པས་ཀུན་གཞིའི་རྣམ་ཤེས་ཡང་ཁེགས་ཏེ། དེའི་བག་ཆགས་གསོག་པ་པོ་མེད་པའི་ཕྱིར། དེ་ཁེགས་པས་ཉོན་ཡིད་ཁེགས་ཏེ། དེའི་དམིགས་པ་མེད་པའི་ཕྱིར། རྣམ་པར་ཤེས་པ་བཀག་པས་སེམས་བྱུང་ཁེགས་ཏེ། གཙོ་བོ་མེད་པས་འཁོར་མི་སྲིད་པའི་ཕྱིར། དེ་ལྟར་བདེན་པའི་གཅིག་བཀག་པས་དེའི་དུ་མ་ཁེགས་ཏེ། དུ་མ་ནི་གཅིག་བསགས་པའི་མཚན་ཉིད་ཅན་ཡིན་པའི་ཕྱིར། དཔེར་ན་ཤིང་མེད་ན་ནགས་ཚལ་མེད་པ་བཞིན་ནོ། །གཉིས་པ་ལ་རྗེས་ཁྱབ་སྒྲུབ་པ་དང་། ལྡོག་ཁྱབ་སྒྲུབ་པ་གཉིས། དང་པོ་ནི། མཐུན་དཔེ་གཟུགས་བརྙན་བདེན་མེད་དུ་གང་གིས་གྲུབ་པ་ཡིན་ཞེ་ན། གངས་པ་ཤེའུ་ན་རེ། གཟུགས་བརྙན་བདེན་མེད་དུ་མངོན་སུམ་གྱིས་གྲུབ་པ་ཡིན་ཏེ། དེ་ཚད་མས་གྲུབ་པ་གང་ཞིག རྟགས་ལ་མི་ལྟོས་པའི་ཕྱིར། དཔེར་འགྱུར་ཚུལ་ནི། གཟུགས་བརྙན་སྣང་ཡང་དེ་མི་བདེན་པ་དེ་བཞིན་དུ། གཟུགས་སུ་སྣང་ཡང་དེར་མི་བདེན་པ་ཡིན་ཞེས་གསུངས་སོ། །ཞི་བ་འཚོ་ན་རེ། དེ་རྗེས་དཔག་གིས་འགྲུབ་སྟེ་འདི་ལྟར། གཟུགས་བརྙན་ཆོས་ཅན། བདེན་པར་མེད་དེ། འདུས་བྱས་སུའང་མི་བདེན། འདུས་མ་བྱས་སུའང་མི་བདེན་པའི་ཕྱིར། ཕྱི་མ་དེར་ཐལ། དབང་ཤེས་ཀྱིས་དམིགས་པའི་ཕྱིར། སྔ་མ་དེར་ཐལ། ཤེས་པར་ཡང་མི་བདེན། ཕྱི་རོལ་དོན་དུའང་མི་བདེན་པའི་ཕྱིར། དང་པོ་དེར་ཐལ། ཕྱི་དོན་དུ་སྣང་བའི་ཕྱིར། ཕྱི་མ་དེར་ཐལ། མེ་ལོང་ནང་དུའང་མི་བདེན། དེ་ལས་གཞན་དུའང་མི་བདེན་པའི་ཕྱིར། སྔ་མ་དེར་ཐལ། གཟུགས་བརྙན་གཡོ་ཡང་མེ་ལོང་མི་གཡོ་བའི་ཕྱིར། ཕྱི་མ་དེར་ཐལ། གོ་ས་གཅིག་ཏུ་ཐོགས་བཅས་ཀྱི་གཟུགས་གཉིས་མི་རུང་བའི་ཕྱིར་ཞེས་གསུངས་སོ། །གཉིས་པ་ལྡོག་ཁྱབ་སྒྲུབ་པ་ནི། མི་མཐུན་ཕྱོགས་དང་གཏན་ཚིགས་གཞི་མཐུན་ཡོད་པ་ལ། གནོད་པ་ཅན་གྱི་ཚད་མ་སྟོན་པར་བྱེད་པ་སྟེ། བདེན་པར་གྲུབ་ན་བདེན་པའི་གཅིག་དང་དུ་མ་གང་རུང་དང་བྲལ་བ་མིན་དགོས་ཏེ། བདེན་པར་མེད་ན་བདེན་པའི་གཅིག་དང་དུ་མ་གང་རུང་དང་བྲལ་བ་ཡིན་དགོས་པའི་ཕྱིར་རོ། །འོ་ན་གཏན་ཚིགས་འདི་ལ་བརྟེན་ནས་དབུ་མ་པའི་ལྟ་བ་དུས་ནམ་ཙམ་རྒྱུད་ལ་སྐྱེས་པ་ཡིན་ཞེ་ན། བསྒྲུབ་བྱ་ངེས་པའི་དུས་དུ་སྐྱེས་པར་འདོད་པ་དང་། ཕྱོགས་ཆོས་ངེས་པའི་དུས་སུ་སྐྱེས་པར་འདོད་པ་གཉིས་ལས། དོན་སྒྲུབ་ཀྱི་གཏན་ཚིགས་ཡིན་ན་དང་པོ་འཐད་ཀྱང་། འདི་ཐ་སྙད་འབའ་ཞིག་སྒྲུབ་ཀྱི་གཏན་ཚིགས་ཡིན་པས་ཕྱི་མ་འཐད་དེ། བདེན་པའི་དུ་བྲལ་དུ་རྟོགས་པའི་ཚེ་བདེན་མེད་ཀྱི་དོན་རྟོགས་ཟིན་པའི་ཕྱིར་ཏེ། སློབ་དཔོན་དཔལ་སྦས་ཀྱིས་དེ་ཁོ་ན་ཉིད་ལ་འཇུག་པ་ལས། རང་བཞིན་མེད་དེ་ཐ་སྙད་དུ། །རུང་བ་ཉིད་དུ་སྒྲུབ་པར་བྱེད། །གཅིག་དང་དུ་མའི་རང་བཞིན་ཅན། །བྲལ་བའི་ཕྱིར་ན་རང་བཞིན་མེད། །ཅེས་གསུངས་པའི་ཕྱིར། གཉིས་པ་རྡོ་རྗེ་ཟེགས་མའི་གཏན་ཚིགས་ནི། ཕྱི་ནང་གི་དངོས་པོ་ཆོས་ཅན། རང་བཞིན་གྱིས་སྐྱེ་བ་མེད་དེ། བདག་ལས་མི་སྐྱེ། གཞན་ལས་མི་སྐྱེ། གཉིས་ཀ་ལས་མི་སྐྱེ། རྒྱུ་མེད་ལས་མི་སྐྱེ་བའི་ཕྱིར། འདི་ལ་རྡོ་རྗེ་ཟེགས་མ་ཞེས་བརྗོད་པའི་རྒྱུ་མཚན་ཡོད་དེ། རྡོ་རྗེའི་ཆ་ཤས་རེ་རེས་ཀྱང་བྲག་རི་འཇོམས་པར་ནུས་པ་བཞིན། འདིའི་རིགས་པའི་ཆ་ཤས་རེ་རེས་ཀྱང་དངོས་པོར་སྨྲ་བའི་ལོག་རྟོག་གི་བྲག་རི་འཇོམས་པར་ནུས་པའི་ཕྱིར། འདིའི་ཕྱོགས་ཆོས་སྒྲུབ་པ་ལ་རྩ་ཤེར་ལས་དམ་བཅའ་བཞི་གསུངས་ཤིང་། དེ་ཉིད་སངས་རྒྱས་བསྐྱང་གིས་ཐལ་འགྱུར་གྱི་སྒོ་ནས་སྒྲུབ་པ་དང་། ལེགས་ལྡན་འབྱེད་ཀྱིས་རང་རྒྱུད་ཀྱི་སྒོ་ནས་སྒྲུབ་པ་གཉིས་ལས། དང་པོ་ནི། ཕྱི་ནང་གི་དངོས་པོ་རྣམས་ཆོས་ཅན། བདག་ལས་སྐྱེ་བ་མེད་དེ། སྐྱེ་བ་དོན་མེད་པ་དང་། སྐྱེ་བ་ཐུག་མེད་དུ་ཐལ་བའི་ཕྱིར། གཞན་ལས་ཀྱང་མི་སྐྱེ་སྟེ། ཐམས་ཅད་ལས་ཐམས་ཅད་སྐྱེ་བར་ཐལ་བའི་ཕྱིར་རོ། །གཉིས་ཀ་ལས་ཀྱང་མི་སྐྱེ་སྟེ། གཉིས་ཀའི་སྐྱོན་དུ་འགྱུར་བའི་ཕྱིར་རོ། །རྒྱུ་མེད་པར་མི་སྐྱེ་སྟེ། རྟག་ཏུ་ཐམས་ཅད་ལས་ཐམས་ཅད་སྐྱེ་བར་ཐལ་བ་དང་། རྩོམ་པར་དོན་མེད་པར་ཐལ་བའི་ཕྱིར། འདི་དག་གི་རྣམ་པར་གཞག་པ་ལ་གཞན་ལ་གྲགས་ཀྱི་རྗེས་དཔག་འགལ་བ་བརྗོད་པའི་ཐལ་འགྱུར། རྒྱུ་མཚན་མཚུངས་པའི་མགོ་སྙོམས། སྒྲུབ་བྱེད་བསྒྲུབ་བྱ་དང་མཚུངས་པས་མ་གྲུབ་པ། རང་རྒྱུད་ཀྱི་དམ་བཅའ་མེད་པར་ཐལ་བ་དང་ལྔ་ལས། དེའང་བདག་སྐྱེ་བཀག་པ་ལྟ་བུ་ལ་མཚོན་ན། གཞན་ལ་གྲགས་ཀྱི་རྗེས་དཔག་ནི། གྲངས་ཅན་པས་འཇིམ་པ་དང་བུམ་པ་བདག་ཉིད་གཅིག་ཏུ་ཁས་བླངས་པ་ལ། འཇིམ་པའི་དུས་ཀྱི་བུམ་པ་ཆོས་ཅན། རང་དང་བདག་ཉིད་གཅིག་ཏུ་གྱུར་པའི་རྒྱུ་ལས་སྐྱེ་བ་དོན་མེད་དེ། གྲུབ་ཟིན་པའི་ཕྱིར། དཔེར་ན་མངོན་གསལ་གྱི་བུམ་པ་བཞིན་ཞེས་པ་དེ་རྟགས་དང་མཐུན་དཔེ་ཕ་རོལ་པོས་ཁས་བླངས་ལ་བརྟེན་ནས་དགག་པ་ནི་གཞན་ལ་གྲགས་ཀྱི་རྗེས་དཔག་གོ །ཕ་རོལ་པོས་མངོན་པར་མི་གསལ་བའི་བུམ་པ་སྐྱེད་དགོས་ལ། མངོན་པར་གསལ་བའི་བུམ་པ་སྐྱེད་མི་དགོས་ཏེ། གྲུབ་ཟིན་པའི་ཕྱིར་ཞེ་ན། མངོན་པར་མི་གསལ་བའི་བུམ་པ་ཆོས་ཅན། དེར་ཐལ། དེའི་ཕྱིར་ཞེས་པ་ནི་རྒྱུ་མཚན་མཚུངས་པའི་མགོ་སྙོམས། ཐུག་མེད་དུ་སྐྱེ་བར་ཐལ། གྲུབ་ཟིན་པའང་སྐྱེ་དགོས་པའི་ཕྱིར། སྐྱེ་བ་དོན་མེད་པར་ཐལ། གྲུབ་ཟིན་ཡང་སྐྱེ་དགོས་པའི་ཕྱིར་ཞེས་པ་ནི་འགལ་བ་བརྗོད་པའི་ཐལ་འགྱུར། གལ་ཏེ་འཇིམ་དུས་ཀྱི་བུམ་པ་སྐྱེད་དགོས་ཏེ། དེ་རྒྱུའི་བདག་ཉིད་དུ་ཡོད་པའི་ཕྱིར་ཞེ་ན། སྒྲུབ་བྱེད་བསྒྲུབ་བྱ་ལྟར་མ་གྲུབ་པའོ། །རང་རྒྱུད་ཀྱི་དམ་བཅའ་མེད་པར་ཐལ་བ་ནི་དངོས་སྨྲ་བ་དང་། བདེན་པར་གྲུབ་མ་གྲུབ་རྩོད་པ་བྱེད་པའི་ཚེ་རང་རྒྱུད་ཀྱི་དམ་བཅའ་མེད་པར་ཐལ་ཏེ། དེའི་ཚེ་དེ་དེ་ལྟར་ཡོད་ན་རིགས་ངོར་གྲུབ་དགོས་པའི་ཕྱིར། གཉིས་པ་ལེགས་ལྡན་འབྱེད་ཀྱིས་རང་རྒྱུད་ཀྱི་སྒོ་ནས་སྒྲུབ་པ་ནི། ཕྱི་ནང་གི་དངོས་པོ་རྣམས་ཆོས་ཅན། དོན་དམ་པར་བདག་ལས་མི་སྐྱེ་སྟེ། ཡོད་པའི་ཕྱིར། དོན་དམ་པར་གཞན་ལས་མི་སྐྱེ་སྟེ། གཞན་དུ་སྒྲུབ་ཟིན་པའི་ཕྱིར། བུམ་པ་བཞིན། གཉིས་ཀ་ལས་མི་སྐྱེ་སྟེ། གཉིས་ཀའི་རིགས་པ་བསྟན་ཟིན་པའི་ཕྱིར། རྒྱུ་མེད་པ་ལས་མི་སྐྱེ་སྟེ། སྤྱི་དང་ཁྱད་པར་དང་ལྡན་པའི་ཕྱིར། མྱུ་གུ་བཞིན་ནོ། །དེས་ན་རྩ་ཤེར་ལས། བདག་ལས་མ་ཡིན་གཞན་ལས་མིན། །ཞེས་སོགས་གསུངས་པའི་དམ་བཅའ་བཞི་པོ་སྒྲུབ་པ་ལ། ཐལ་འགྱུར་གྱི་སྒོ་ནས་སྒྲུབ་པ་དང་། རང་རྒྱུད་ཀྱི་སྒོ་ནས་སྒྲུབ་པ་གཉིས་འབྱུང་བས་ཐལ་རང་གཉིས་སུ་གྲགས་པ་ཡིན་གྱི། རང་གི་མཚན་ཉིད་ཀྱིས་གྲུབ་པའི་ཆོས་ཁས་མི་ལེན་པ་སོགས་ཀྱི་སྒོ་ནས་འབྱེད་པ་ནི་རང་གི་རྣམ་པར་རྟོག་པའི་རྡུལ་གྱིས་འཕགས་ཡུལ་གྱི་དབུ་མ་པ་ཆེན་པོ་རྣམས་ཀྱི་གདོང་འགེངས་པར་བྱེད་པ་ཡིན་པས། ཁོ་བོས་འབད་པས་ལོགས་ཤིག་ཏུ་འཆད་དོ། །གསུམ་པ་ཡོད་མེད་སྐྱེ་འགོག་གི་གཏན་ཚིགས་ནི། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་སྐྱེ་བ་མེད་དེ། རྒྱུ་དུས་ན་ཡོད་པའང་མི་སྐྱེ། རྒྱུ་དུས་ན་མེད་པའང་མི་སྐྱེ་བའི་ཕྱིར། དཔེར་ན་ནམ་མཁའ་བཞིན། འདིའི་ཕྱོགས་ཆོས་སྒྲུབ་པ་ལ། གལ་ཏེ་རྒྱུ་དུས་ན་ཡོད་པ་སྐྱེའོ་ཞེ་ན། འདི་ལ་རྒྱུ་འབྲས་འཆོལ་བར་ཐལ་བ་དང་། རྒྱུ་འབྲས་ཐུག་མེད་དུ་ཐལ་བ་དང་། རྒྱུ་མེད་དུ་ཐལ་བའི་སྐྱོན་གསུམ་ལས། དང་པོ་ནི་རྒྱུ་འབྲས་གཉིས་ཀ་གྲུབ་ཟིན་པས་བསྐྱེད་བྱ་སྐྱེད་བྱེད་གང་ཡིན་སོ་སོར་གཟུང་དུ་མེད་པའོ། །གཉིས་པ་ནི་གྲུབ་ཟིན་པའང་སྐྱེད་དགོས་ན་ཐུག་མེད་དུ་ཐལ་བའོ། །གསུམ་པ་ནི་རྒྱུ་དུས་ན་ཡོད་པ་སྐྱེ་ན་རྒྱུས་འབྲས་བུ་ལ་ཕན་མ་བཏགས་པར་འགྱུར་བས་འབྲས་བུ་རྒྱུ་མེད་དུ་འགྱུར་ཏེ། རྒྱུས་ཕན་མ་བཏགས་པའི་ཕྱིར། གལ་ཏེ་རྒྱུ་དུས་ན་མེད་པ་སྐྱེའོ་ཞེ་ན། དེའང་མི་འཐད་པར་ཐལ། བསྐྱེད་བྱར་མི་འཐད་པ་དང་། རྒྱུའི་ནུས་པ་འཇུག་པའི་ཡུལ་མིན་པ་དང་། ཧ་ཅང་ཐལ་བའི་སྐྱོན་གསུམ་ཡོད་པའི་ཕྱིར། དང་པོ་ནི་རྒྱུ་དུས་ན་བསྐྱེད་བྱར་མེད་པའོ། །གཉིས་པ་ནི་རྒྱུའི་ནུས་པ་ཡོད་པའི་དུས་ན་འབྲས་བུ་མེད། འབྲས་བུ་ཡོད་པའི་དུས་ན་རྒྱུའི་ནུས་པ་མེད་པའོ། །གསུམ་པ་ནི་རི་བོང་གི་རྭའང་བསྐྱེད་པར་འགྱུར་བའམ། ཡང་ན་འབྲས་བུ་ཡང་བསྐྱེད་བྱར་མིན་པར་འགྱུར་ཏེ། དེ་གཉིས་རྒྱུ་དུས་ན་མེད་པར་མཚུངས་པའི་ཕྱིར། བཞི་པ་མུ་བཞི་སྐྱེ་འགོག་ནི། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་སྐྱེ་བ་མེད་དེ། རྒྱུ་དུ་མས་འབྲས་བུ་གཅིག་ཀྱང་མི་སྐྱེད། རྒྱུ་དུ་མས་འབྲས་བུ་དུ་མའང་མི་སྐྱེད། རྒྱུ་གཅིག་གིས་འབྲས་བུ་གཅིག་ཀྱང་མི་སྐྱེད། རྒྱུ་གཅིག་གིས་འབྲས་བུ་དུ་མའང་མི་སྐྱེད་པའི་ཕྱིར། འདིའི་ཕྱོགས་ཆོས་སྒྲུབ་པ་ལ། གལ་ཏེ་རྒྱུ་དུ་མས་འབྲས་བུ་གཅིག་སྐྱེད་དོ་ཞེ་ན། འོ་ན་འབྲས་བུ་གཅིག་པོ་དེ་ལ་རྒྱུ་དུ་མས་ཕན་བཏགས་པའི་ཆ་དུ་མ་ཡོད་དམ་མེད། མེད་ན་རྒྱུ་དུ་མས་འབྲས་བུ་གཅིག་སྐྱེད་པ་འགལ་ལ། ཡོད་ན་རྒྱུ་དུ་མས་འབྲས་བུ་དུ་མ་སྐྱེད་པའི་མུར་སོང་གི རྒྱུ་དུ་མས་འབྲས་བུ་གཅིག་སྐྱེད་པའི་མུར་མ་སོང་ངོ་། །གལ་ཏེ་གཏན་ཚིགས་གཉིས་པ་མ་གྲུབ་བོ་ཞེ་ན། རྒྱུའི་ཆ་ཤས་རེ་རེས་འབྲས་བུའི་ཆ་ཤས་རེ་རེ་སྐྱེད་པ་ཡིན་ནམ། འབྲས་བུའི་ཆ་ཤས་ཐམས་ཅད་སྐྱེད་པ་ཡིན། དང་པོ་ལྟར་ན་རྒྱུ་གཅིག་གིས་འབྲས་བུ་གཅིག་སྐྱེད་པའི་མུར་སོང་གི རྒྱུ་དུ་མས་འབྲས་བུ་དུ་མ་སྐྱེད་པའི་མུར་མ་སོང་ངོ་། །ཕྱི་མ་ལྟར་ན་རྒྱུ་གཅིག་གིས་འབྲས་བུ་དུ་མ་སྐྱེད་པའི་མུར་སོང་གི རྒྱུ་དུ་མས་འབྲས་བུ་དུ་མ་སྐྱེད་པའི་མུར་མ་སོང་བའི་ཕྱིར། གཏན་ཚིགས་ཕྱི་མ་གཉིས་ཀྱང་གྲུབ་སྟེ། འབྲས་བུ་སྐྱེད་པ་ལ་རྒྱུ་རྐྱེན་ཚོགས་དགོས་པའི་ཕྱིར། ལྔ་པ་རྟེན་འབྲེལ་གྱི་གཏན་ཚིགས་ནི། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་སྐྱེ་བ་མེད་དེ། རྟེན་འབྲེལ་ཡིན་པའི་ཕྱིར། དཔེར་ན་གཟུགས་བརྙན་བཞིན་ནོ། །འདིའི་རྗེས་ཁྱབ་ནི། མཐུན་དཔེ་གཟུགས་བརྙན་གྱི་སྟེང་དུ་སྒྲུབ་ཚུལ་སྔར་ལྟར་རོ། །ལྡོག་ཁྱབ་ནི། རྟེན་འབྲེལ་དང་། ངོ་བོ་ཉིད་ཀྱིས་གྲུབ་པ་འགལ་བ་ཡིན་ཏེ། ངོ་བོ་ཉིད་ནི་རྒྱུ་རྐྱེན་གྱིས་མ་བྱས་པ་དང་། གཞན་ལ་ལྟོས་པ་མིན་པ་དང་། གནས་སྐབས་གཞན་དུ་མི་འགྱུར་བའི་དོན་གསུམ་ལ་འཇོག་དགོས་ཤིང་། རྟེན་འབྲེལ་ལ་ལྟོས་གྲུབ་དང་། རྒྱུ་རྐྱེན་ལས་སྐྱེས་པ། གཞན་དུ་འགྱུར་བ་སྟེ་དོན་གསུམ་པོ་དེ་ཚང་བ་ཡིན་པའི་ཕྱིར། ཕྱོགས་ཆོས་སྒྲུབ་ཚུལ་ནི། ཆོས་ཐམས་ཅད་རྟེན་འབྲེལ་གཉིས་པོ་གང་རུང་དུ་འདུས་པའོ། །སྦྱོར་བའི་རྣམ་པའི་སྤྱོད་ཡུལ་ཅན། །ཞེས་དང་། འཇུག་པའི་ཡུལ་ཅན་ཡིན་བཞེད་དེ། །ཅེས་པའི་སྐབས་སུ་སྦྱོར་འཇུག་གཉིས་ཀྱི་མཐའ་དཔྱད་པ་ལ། གཞུང་ལས་ཇི་ལྟར་བཤད་པའི་ཚུལ་དང་། དེ་འཕགས་སེང་གཉིས་ཀྱིས་བཀྲལ་བའི་ཚུལ། སློབ་དཔོན་གྱི་དགོངས་པ་བྱེ་བྲག་ཏུ་བཤད་པ། རྩ་བའི་དགོངས་པ་ངོས་གཟུང་བ་དང་བཞི་ལས། དང་པོ་ནི། ལུས་རྣམ་གཞག་ཏུ། མཐོང་ཞེས་བྱ་དང་སྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དང་ནི། །ཞེས་མཐོང་སྤང་རྟོག་པ་བཞི་ཡོད་པས་དེའི་གཉེན་པོ་བཞི། སྒོམ་སྤང་རྟོག་པ་བཞི་ཡོད་པས་དེའི་གཉེན་པོ་བཞིར་གསུངས་སོ། །རྟོག་པ་དེ་དག་གི་ཐ་སྙད་ནི། སྐབས་ལྔ་པར་མཐོང་སྤང་རྟོག་པའི་སྐབས་སུ་འཇུག་པ་གཟུང་རྟོག་སོགས་བཞིའི་ཐ་སྙད་གསུངས་ཏེ། འཇུག་པ་དང་ནི་ལྡོག་པ་དང་། །ཞེས་དང་། སེམས་ཅན་རྫས་དང་བཏགས་ཡོད་དང་། །ཞེས་གསུངས་པའི་ཕྱིར། སྒོམ་སྤང་རྟོག་པའི་སྐབས་སུ་འཇུག་པ་གཟུང་རྟོག་སོགས་ཀྱི་ཐ་སྙད་མ་གསུངས་པར། སྦྱོར་བའི་ཡུལ་ཅན་དང་། འཇུག་པའི་ཡུལ་ཅན་དང་། སེམས་ཅན་དུ་བཏགས་པ་ལ་བརྟེན་པ་དང་། དེའི་རྒྱུ་མཚན་ལ་བརྟེན་པ་ཞེས་པའི་ཐ་སྙད་གསུངས་ཏེ། སྦྱོར་བའི་རྣམ་པའི་སྤྱོད་ཡུལ་ཅན། །ཞེས་དང་། འཇུག་པའི་ཡུལ་ཅན་ཡིན་བཞེད་དེ། །ཞེས་དང་། སེམས་ཅན་བཏགས་པའི་སྤྱོད་ཡུལ་དང་། །ཞེས་དང་། སེམས་ཅན་བཏགས་དང་དེ་རྒྱུ་ཡི། །ཡུལ་ཅན་ཞེས་གསུངས་པའི་ཕྱིར། གཉིས་པ་ནི། འཕགས་པའི་བཞེད་པ་ལ། སྒོམ་སྤང་རྟོག་པའི་སྐབས་སུ་འཇུག་པ་གཟུང་རྟོག་སོགས་ཀྱི་ཐ་སྙད་མ་མཛད་པར། སྦྱོར་བའི་ཡུལ་ཅན་ཞེས་སོགས་ཀྱི་ཐ་སྙད་མཛད་ཅིང་། སྦྱོར་འཇུག་གཉིས་པོའང་རྟོག་པའི་གཉེན་པོར་མི་འདོད་པར་དེའི་ཡུལ་ལ་འདོད་དེ། མདོར་བསྡུས་རྒྱས་པ་ལ་སོགས་པའི་ཆོས་དགུ་ལ་ལྡོག་པ་དང་རྣལ་མ་ཅི་རིགས་པར་སྦྱོར་བ་ནི་ཡུལ་ཡིན་ལ། དེ་ལ་རྟོག་པའི་བློ་རྟོག་པ་དང་པོ་དང་། སེམས་སེམས་བྱུང་རྣམས་ནི་འཇུག་པ་ཡིན་ལ། དེ་ལ་རྟོག་པའི་བློ་ནི་རྟོག་པ་གཉིས་པར་བཞེད་དེ། རྩ་བར་དེ་བཞིན་དུ་སྣང་ངོ་། །སློབ་དཔོན་གྱི་བཞེད་པ་ལ། སྒོམ་སྤང་རྟོག་པའི་དང་པོ་གསུམ་གྱི་སྐབས་སུ་སྦྱོར་འཇུག་གི་ཐ་སྙད་གསུངས་པ་དེ་རྟོག་པའི་གཉེན་པོར་མཛད་ནས། དེ་མཐོང་སྤང་རྟོག་པའི་གཉེན་པོ་ལའང་སྦྱོར་བ་ཡིན་ནོ། །མཐོང་སྤང་རྟོག་པའི་སྐབས་སུ་གཟུང་རྟོག་སོགས་ཀྱི་ཐ་སྙད་གསུངས་པ་དེ། སྒོམ་སྤང་རྟོག་པ་ལའང་སྦྱོར་བར་མཛད་དེ། དོན་གསལ་ལས། གཉེན་པོ་ཚོགས་སྒྲུབ་འཆད་པའི་སྐབས་སུ་སྒོམ་སྤང་རྟོག་པ་ལའང་གཟུང་རྟོག་སོགས་ཀྱི་ཐ་སྙད་དངོས་སུ་གསུངས་པའི་ཕྱིར། དེས་ན་སྦྱོར་འཇུག་གཉིས་རྟོག་པའི་གཉེན་པོ་དང་། དེའི་ཡུལ་ཅན་དེའི་སྤང་བྱ་ལ་བཞེད་དེ། གཟུང་རྟོག་དང་འཛིན་རྟོག་དང་པོ་སྦྱོར་བའི་སྤང་བྱ་དང་། གཟུང་རྟོག་གཉིས་པ་དང་འཛིན་རྟོག་གཉིས་པ་འཇུག་པའི་སྤང་བྱར་བཤད་པའི་ཕྱིར། གསུམ་པ་ནི། སློབ་དཔོན་གྱིས་ཀུན་བཏུས་ལས། སྤོང་བ་གཉེན་པོ་ལ་སྦྱོར་བ་དང་བར་ཆད་མེད་ལམ་གཉིས་གསུངས་པ་དང་། འདིར་སྦྱོར་འཇུག་གཉིས་གསུངས་པ་དོན་གཅིག་ཏུ་མཛད་ནས། མཐོང་སྤང་རྟོག་པའི་གཉེན་པོ་ལ་སྦྱོར་འཇུག་བཞི། སྒོམ་སྤང་རྟོག་པའི་སྤོང་བ་གཉེན་པོ་ལ་སྦྱོར་འཇུག་བཞི་སྟེ་བརྒྱད་དུ་བཞེད་དོ། །འོ་ན་མཐོང་སྤང་རྟོག་པའི་གཉེན་པོ་སྦྱོར་བ་དང་། འཇུག་པ་གང་ལ་བྱེད་ཅེ་ན། དེ་ལ་ཁ་ཅིག བར་ཆད་མེད་ལམ་སྦྱོར་བ་དང་། རྣམ་གྲོལ་ལམ་འཇུག་པ་ཡིན་ནོ་ཞེས་པ་མི་འཐད་དེ། འདིར་བསྟན་སྦྱོར་འཇུག་གཉིས་སྤོང་བ་གཉེན་པོར་ངེས་ལ། རྣམ་གྲོལ་ལམ་སྤོང་བ་གཉེན་པོ་མིན་པའི་ཕྱིར། ཁ་ཅིག མཐོང་ལམ་གྱི་རྟོགས་པ་ཐོབ་པ་མ་རྫོགས་པ་སྦྱོར་བ་དང་། རྫོགས་པ་འཇུག་པ་ཡིན་ཞེས་པ་དང་། ཁ་ཅིག མཐོང་ལམ་གྱི་རྟོགས་པ་ཐོབ། ཡོན་ཏན་དང་བྱེད་པ་མ་རྫོགས་པ་སྦྱོར་བ་དང་། དེ་རྫོགས་པ་འཇུག་པ་ཡིན་ཞེས་པའང་མི་འཐད་དེ། དེ་དང་པོ་དེ་སྤོང་བ་གཉེན་པོར་མ་ངེས་པའི་ཕྱིར། ཁ་ཅིག སྡུག་བསྔལ་ཆོས་བཟོད་སྐད་ཅིག་མ་དང་པོ་སྦྱོར་བ་དང་། དེ་སྐད་ཅིག་གཉིས་པ་འཇུག་པ་ཡིན་ཞེས་འདོད་པའང་མི་འཐད་དེ། དེ་དང་པོ་དེ་མཐོང་ལམ་གྱི་སྦྱོར་བ་ཡང་མིན། སྡུག་བསྔལ་ཆོས་བཟོད་ཀྱི་སྦྱོར་བའང་མིན་པའི་ཕྱིར་ཏེ། དེ་དེ་དངོས་ཡིན་པའི་ཕྱིར། དེ་ལ་ཁ་ཅིག ཐེག་ཆེན་གྱི་མཐོང་ལམ་ཆོས་ཅན། ལམ་ཤེས་ཀྱི་སྦྱོར་བ་མིན་པར་ཐལ། དེ་དངོས་ཡིན་པའི་ཕྱིར་ཞེ་ན། འོ་ན། རྣམ་མཁྱེན་དངོས་ཡིན་ན་རྣམ་མཁྱེན་གྱི་སྦྱོར་བ་མིན་པས་མ་ཁྱབ་པར་ཐལ། གཞི་ཤེས་དངོས་ཡིན་ན་དེའི་སྦྱོར་བ་མིན་པས་མ་ཁྱབ་པའི་ཕྱིར། ཁྱབ་པ་སྒྲིག་མཚམས་ལ་བསྒྲིག་གོ །རང་ལུགས་ནི། སློབ་དཔོན་གྱི་དགོངས་པ། མཐོང་སྤང་རྟོག་པའི་གཉེན་པོ་སྦྱོར་བའི་ལམ་ནི་སྦྱོར་ལམ་ཆོས་མཆོག་ལ་བཞེད་དེ། ཀུན་བཏུས་ལས། སྤོང་བ་གཉེན་པོ་ལ་སྦྱོར་བ་དང་བར་ཆད་མེད་ལམ་གཉིས་གསུངས་པའི་དོན་ལ། འགྲེལ་ཆེན་ལས། སྦྱོར་བའི་གནས་སྐབས་སུ་སྤང་བྱའི་ཆ་ཤས་རེ་རེ་ནས་སྤོང་བ་དང་། བར་ཆད་མེད་ལམ་གྱི་སྐབས་སུ་མ་ལུས་པར་སྤོང་བར་བཤད་པ་དང་། ཆོས་བཤེས་ཀྱིས་ཀྱང་སྦྱོར་བའི་གནས་སྐབས་སུ་སོ་སོར་ཕྱེ་ནས་སྤང་བ་དང་། བར་ཆད་མེད་ལམ་གྱི་གནས་སྐབས་སུ་བསྡོམས་ནས་སྤོང་བར་བཤད་པ་དང་། སྔར་བཤད་པའི་རིགས་པས་སྡུག་བསྔལ་ཆོས་བཟོད་དེ་བར་ཆད་མེད་ལམ་དུ་གྲུབ་ཅིང་། དེའི་སྦྱོར་བ་ཆོས་མཆོག་ཆེན་པོ་ལས་གཞན་མེད་པའི་ཕྱིར་དང་། གནད་ཀྱི་ཟླ་འོད་རྒྱལ་པོ་སྲས། གང་སྤེལ་སོགས་ཀྱིས་ཀྱང་དེ་ལྟར་དུ་བཤད་པའི་ཕྱིར། བཞི་པ་ནི། སྦྱོར་བའི་ཡུལ་ཅན་དང་། འཇུག་པའི་ཡུལ་ཅན་གཉིས་པོ་དེ་ནི། སྒོམ་སྤང་རྟོག་པ་དང་པོ་གཉིས་ཀྱི་ཐུན་མོང་མིན་པའི་མིང་ཡིན་ཏེ། མཐོང་སྤང་རྟོག་པ་ལ་ཐུན་མོང་མིན་པའི་མིང་འཇུག་པ་གཟུང་རྟོག་སོགས་བཞི་གསུངས་པ་དེ་བཞིན་དུ་སྒོམ་སྤང་རྟོག་པ་ལའང་ཐུན་མོང་མིན་པའི་མིང་རེ་རེ་དགོས་པར་བཞེད་ནས། སྔར་གྱི་སྦྱོར་བའི་ཡུལ་ཅན་སོགས་བཞི་པོ་དེ་གསུངས་སོ། །གཟུང་རྟོག་དང་། འཛིན་རྟོག་གི་ཐ་སྙད་ནི་ཐུན་མོང་གི་མིང་ཡིན་ཏེ། མཐོང་དང་གོམས་པའི་ལམ་དག་ལ། །གཟུང་དང་འཛིན་པའི་རྣམ་རྟོག་རྣམས། །ཞེས་གསུངས་པའི་ཕྱིར། དེ་ལྟར་མ་ཡིན་པར་སྦྱོར་ལམ་པའི་ཡུལ་ཅན་གཉེན་པོ་ལ་བྱས་ནས། སྦྱོར་ལམ་ཆོས་མཆོག་གི་ཡེ་ཤེས་མཐོང་སྤང་རྟོག་པ་བཞིའི་གཉེན་པོར་བཞི་གསུངས་པའི་གཉིས་པ་དེ་ཡིན་ན། དེ་ཆོས་ཅན། མཐོང་ལམ་རྩེ་སྦྱོར་དུ་ཐལ། གཉེན་པོ་རྣམ་པ་བཞི་དང་ནི། །ཞེས་པའི་སྐབས་ནས་བསྟན་པའི་མཐོང་སྤང་གི་གཉེན་པོ་ཡིན་པའི་ཕྱིར། གཞན་ཡང་དེ་མཐོང་སྤང་འཇུག་པ་གཟུང་རྟོག་དང་། རྫས་འཛིན་རྟོག་པ་སྤོང་བའི་དོན་དེ། ས་བོན་དངོས་སུ་སྤོང་བ་ལ་བྱེད་དམ། མངོན་གྱུར་པ་དངོས་སུ་སྤོང་བ་ལ་བྱེད། དང་པོ་ལྟར་ན་མི་འཐད་དེ། སོ་སྐྱེའི་རྟོག་པ་ཡིན་པའི་ཕྱིར། གཉིས་པ་ལྟར་ན་མི་འཐད་དེ། འཇུག་པ་གཟུང་རྟོག་མངོན་གྱུར་བ་རྩེ་མོའི་སྤང་བྱ་དང་། རྫས་འཛིན་རྟོག་པ་མངོན་གྱུར་བ་བཟོད་པའི་སྤང་བྱར་བཤད་པའི་ཕྱིར། དེས་ན་མཐོང་སྤང་རྟོག་པ་བཞིའི་གཉེན་པོར་མཐོང་ལམ་རྩེ་སྦྱོར་བཞི་ནི། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ངོ་བོ་གཅིག་ལ་སྤང་བྱ་སྤོང་བའི་ལྡོག་པའི་སྒོ་ནས་ཕྱེ་བ་སྟེ། ལུས་རྣམ་གཞག་ཏུ་གཉེན་པོའི་རྣམ་པ་གསུངས་པའི་དོན་སྐབས་ལྔ་པར། སྐད་ཅིག་པ་ཡི་བཟོད་པ་ཡིས། །བསྡུས་པ་དེ་འདིར་མཐོང་བའི་ལམ། །ཞེས་གསུངས་པའི་ཕྱིར། མགོན་པོ་བྱམས་པའི་དགོངས་པ་འདི་ཡིན་མིན་གཞུང་གོང་འོག་བསྒྲིགས་ནས་རྣམ་དཔྱོད་དང་ལྡན་པ་དག་གིས་གཟིགས་མཛོད། ཡམས་ནད་འདི་རྣམས་ཟད་ནས་ནི། །ཞེས་པའི་སྐབས་སུ་ཁ་ཅིག རྒྱུན་མཐའི་བྱང་སེམས་ཆོས་ཅན། ཁྱོད་ལ་ཐེག་པ་གསུམ་གྱི་ཡོན་ཏན་ཕུན་སུམ་ཚོགས་པ་ཐམས་ཅད་བརྟེན་པ་ཡིན་ཏེ། ཁྱོད་སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་སྤངས་པའི་གང་ཟག་ཡིན་པའི་ཕྱིར་ཟེར་ན། འོ་ན་དེ་མངོན་གྱུར་བ་སྤངས་པ་ལ་བྱེད་དམ། དེའི་ས་བོན་སྤངས་པ་ལ་བྱེད། དང་པོ་ལྟར་ན་ས་བརྒྱད་པའི་བྱང་སེམས་ཆོས་ཅན། དེར་ཐལ། དེའི་ཕྱིར་ཏེ། དག་ས་ལ་གནས་པའི་གང་ཟག་ཡིན་པའི་ཕྱིར་ཏེ། གཉིས་པ་ལྟར་ན་སྔ་མ་དེ་ཆོས་ཅན། སྒོམ་སྤང་གཟུང་འཛིན་རྣམ་པར་རྟོག་པའི་བག་ཆགས་བརྒྱ་རྩ་བརྒྱད་སྤངས་པར་ཐལ། དེའི་ས་བོན་དེ་རྣམས་སྤངས་པའི་ཕྱིར། འདི་ནི་དེང་སང་གི་སྐྱེ་བོ་ཀུན་ཁ་མཐུན་པ་འདི་ལ་ཁྱབ་པ་མེད་དེ། རྒྱུན་མཐའི་གནས་སྐབས་སུ་དེའི་ས་བོན་སྤངས་ཀྱང་། དེའི་བག་ཆགས་མ་སྤངས་ཞེས་སྒྲོག་པར་བྱེད་དོ། །ཁོ་བོ་འདི་མི་འདོད་དེ། འོ་ན་མཐོང་སྤང་རྟོག་པའི་ས་བོན་སྤངས་ན་དེའི་བག་ཆགས་སྤངས་པས་མ་ཁྱབ་པར་ཐལ། དམ་བཅའ་དེའི་ཕྱིར། འདོད་ན། ཐེག་ཆེན་གྱི་མཐོང་ལམ་བར་ཆད་མེད་ལམ་དེས། དེའི་ས་བོན་སྤངས། བག་ཆགས་མ་སྤངས་པའི་གཞི་མཐུན་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་དེའི་ས་བོན་གྱི་དངོས་གཉེན་མིན་པར་ཐལ། ཁྱོད་ཀྱིས་དེའི་ས་བོན་ཟད་པར་མ་སྤངས་པའི་ཕྱིར། གལ་ཏེ་ཁོ་ན་རེ། སྒོམ་སྤང་གི་ས་བོན་སྤངས། དེའི་བག་ཆགས་མ་སྤངས་པ་ཡོད་དེ། སྒོམ་ལམ་རྩེ་སྦྱོར་གྱི་སྤང་བྱ་ལས་ལོགས་སུ་གྱུར་པའི་བར་ཆད་མེད་ལམ་གྱི་རྩེ་སྦྱོར་གྱི་སྤང་བྱ་ཡོད་པའི་ཕྱིར་ཞེ་ན། འདི་ནི་ཤིན་ཏུ་ཐ་ཆད་དེ། དེ་ལྟ་བུའི་སྤང་བྱ་ཆོས་ཅན། ཁྱོད་སྒོམ་སྤང་དུ་གྱུར་པའི་ཤེས་སྒྲིབ་ཀྱི་བག་ཆགས་མིན་པར་ཐལ། ཁྱོད་སྒོམ་ལམ་རྩེ་སྦྱོར་གྱི་སྤང་བྱ་མིན་པའི་ཕྱིར། རྟགས་ཁྱབ་གཉིས་ཀ་ཆོས་ཅན་ཡོད་པའི་སྟེང་དུ་འབུད་དོ། །གཞན་ཡང་ཤེས་སྒྲིབ་ཀྱི་བག་ཆགས་དེ་ལ་མཐོང་སྤང་དང་སྒོམ་སྤང་གཉིས་སུ་གྲངས་ངེས་པ་མེད་པར་ཐལ། དེའི་དངོས་གཉེན་དེ་ལ་ལམ་དེ་གཉིས་སུ་མ་ངེས་པའི་ཕྱིར། རྟགས་ཁས། གཞན་ཡང་སྔ་མ་བཞིན་རྣམ་པར་རྟོག་པ་བརྒྱ་རྩ་བརྒྱད་སྤངས་པ་དང་དུས་མཉམ་པ་ཁོ་ནར་དེ་དག་གིས་བསྡུས་པའི་ཉོན་མོངས་པ་བརྒྱ་རྩ་བརྒྱད་སྤངས་པས་ཞེས་པའི་སྡུད་བྱེད་ཀྱི་སྤང་བྱ་བརྒྱ་རྩ་བརྒྱད་པོ་སྒོམ་སྤང་གི་ས་བོན་ལ་བྱེད་དམ། བག་ཆགས་ལ་བྱེད། སྔ་མ་ལྟར་ན། རྒྱུན་མཐའི་བྱང་སེམས་ཆོས་ཅན། སྒོམ་སྤང་ཉོན་སྒྲིབ་ཀྱི་བག་ཆགས་བརྒྱ་རྩ་བརྒྱད་སྤངས་པར་ཐལ། དེའི་ས་བོན་དེ་དག་སྤངས་པའི་ཕྱིར། རྟགས་ཁས། ཁོ་ན་རེ། མ་ཁྱབ་སྟེ། ཉོན་མོངས་པ་བརྒྱ་རྩ་བརྒྱད་སྤངས་པས་ཞེས་པ་དེའང་ཉོན་སྒྲིབ་ཀྱི་ས་བོན་ལ་བྱེད་པའི་ཕྱིར་ཟེར། དེ་བས་ཀྱང་ཀྱེ་མ་འདི་ངོ་མཚར་ཆེ་བར་འདུག་སྟེ། དེའི་ས་བོན་ས་དང་པོ་ནས་སྤངས་ཟིན་པའི་ཕྱིར། གཉིས་པ་ལྟར་ན། དེ་སྒོམ་ལམ་རྩེ་སྦྱོར་ལས་ལོགས་སུ་གྱུར་པའི་བར་ཆད་མེད་པའི་རྩེ་སྦྱོར་གྱི་སྤང་བྱར་ཐལ། ཁས་བླངས་པ་དེའི་ཕྱིར། རྟགས་ཁྱབ་ཁས། དེས་ན་སྤྱིར་རྩེ་སྦྱོར་གཉེན་པོའི་ལྡོག་པ་ནས་བསྟན་པའི་དོན་ཡང་མཐོང་ལམ་དང་སྒོམ་ལམ་རྩེ་སྦྱོར་ཡིན་གྱི། རྩེ་སྦྱོར་ཐོག་མཐའ་གཉིས་གཉེན་པོའི་སྒོ་ནས་བསྟན་པ་རྒྱན་གཞུང་འདིའི་ནང་དུ་བསྟན་པ་ཁོ་བོས་མ་མཐོང་ངོ་། །གཉེན་པོ་དེ་གཉིས་ཀྱི་སྒོ་ནས་བསྟན་པའི་དོན་ཡང་སྤང་བྱ་ལ་མཐོང་སྤང་སྒོམ་སྤང་གཉིས་སུ་ངེས་པ་ཤེས་པའི་ཆེད་ཡིན་ལ། བར་ཆད་མེད་པའི་རྩེ་སྦྱོར་གྱི་སྤང་བྱ་ནི་སྒོམ་སྤངས་ཀྱི་ནང་དུ་འདུས་པས་དེས་སྤང་བྱའི་གཉེན་པོ་བྱེད་པའི་བྱ་བ་ནི་སྒོམ་ལམ་རྩེ་སྦྱོར་གྱི་སྐབས་སུ་བསྟན་ཟིན་ཏོ། །བར་ཆད་མེད་ལམ་པའི་རྩེ་སྦྱོར་གྱི་སྐབས་སུ་བསོད་ནམས་མང་པོའི་ལྡོག་པ་ནས་བསྟན་ཏེ། སྔར་གྱི་ལམ་གཉིས་པོ་དེ་གཉེན་པོའི་ལྡོག་པ་ནས་བསྟན་པས། གདུལ་བྱ་འགའ་ཞིག་བློ་ཞུམ་པར་འགྱུར་བས། དེ་སྤོང་བའི་ཆེད་དུ་ཕན་ཡོན་གྱི་ལྡོག་པ་ནས་བསྟན་པའི་ཕྱིར། དཔེར་ན་ས་དགུ་པ་མན་ཆད་ཡོངས་སྦྱོང་གི་སྒོ་ནས་བསྟན་ནས། ས་བཅུ་པ་འབྲས་བུའི་སྒོ་ནས་བསྟན་པ་བཞིན་ནོ། །ངག་དོན་ནི། རྒྱུན་མཐའི་བྱང་སེམས་ཆོས་ཅན། རང་གི་སྐད་ཅིག་ཕྱི་ལོགས་སུ་ཐེག་པ་གསུམ་གྱི་ཡོན་ཏན་ཕུན་སུམ་ཚོགས་པ་ཐམས་ཅད་བརྟེན་པ་ཡིན་ཏེ། རང་གི་ཕྱི་ལོགས་སུ་སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་ཀྱི་ས་བོན་དང་། སྒོམ་སྤང་ཉོན་མོངས་པའི་སྒྲིབ་པའི་བག་ཆགས་བརྒྱ་རྩ་བརྒྱད་སྤངས་པའི་ཕྱིར་ཏེ། རྩ་བར་བརྟེན་པར་བྱེད་ཅེས་དང་། འགྲེལ་བར་སྔོན་དུ་འོང་བའི་རྣམ་པས་བརྟེན་པར་བྱེད་དོ་ཅེས་གསུངས་པའི་ཕྱིར། བརྟེན་པར་བྱེད་པ་གཞན་ལའང་ཡོད་པ་མིན་ནམ་སྙམ་ན། རང་གི་སྐད་ཅིག་ཕྱི་ལོགས་དེ་མ་ཐག་ཏུ་བརྟེན་པ་ཕན་ཡོན་གྱི་སྒོ་ནས་བསྟན་པའོ། །རྩེ་མོར་ཕྱིན་པའི་རྣམ་དཔྱོད་ཀྱིས། །རྩེ་སྦྱོར་ཕྱིན་པའི་སྦྱོར་བ་ནི། །རྩེ་མོར་ཕྱིན་པ་རབ་ཏུ་རྟོགས། །རྩེ་མོར་ཕྱིན་པ་འདི་ལ་ལྟོས། །རྩེ་མོར་ཕྱིན་པའི་ཚིགས་བཅད་ཡིན། །སྟོང་གསུམ་སྐྱེ་བོ་ཉན་ཐོས་དང་། །ཞེས་པའི་སྐབས་སུ། མདོ་ལས་གསུངས་ཚུལ། བསྟན་བཅོས་ལས་བསྟན་ཚུལ། དེ་ལྟར་བསྟན་པའི་བར་ཆད་མེད་པའི་རྩེ་སྦྱོར་གྱི་མཚན་ཉིད་དང་གསུམ། དང་པོ་ནི། མདོ་ལས། སྟོང་གསུམ་གྱི་སེམས་ཅན་ཐམས་ཅད་ཉན་ཐོས་དང་རང་སངས་རྒྱས་ཀྱི་དང་། བྱང་སེམས་ཀྱི་སྐྱོན་མེད་པ་ལ་བཀོད་པའི་བསོད་ནམས་ལས། རྣམ་མཁྱེན་བསོད་ནམས་མང་བར་བསྟན་ཞིང་། །འདི་ཡི་དམིགས་པ་དངོས་མེད་དེ། །ཞེས་པའི་མདོ་ལས་རྣམ་མཁྱེན་གྱི་དམིགས་རྐྱེན་སོགས་གསུམ་བསྟན། དམིགས་པ་འཐད་དང་དེ་ཡི་ནི། །ཞེས་པའི་མདོ་ལས་རྣམ་མཁྱེན་གྱི་དམིགས་རྣམ་ལ་ལོག་པར་རྟོགས་པ་བསྟན་ཏོ། །གཉིས་པ་བསྟན་བཅོས་ལས། མདོའི་དངོས་བསྟན་གྱི་རྣམ་མཁྱེན་གྱི་སྦས་དོན་བར་ཆད་མེད་ལམ་པའི་རྩེ་སྦྱོར་བསྟན་ཏེ། བར་ཆད་མེད་པའི་དོན་ནི། རང་འབྲས་ཆོས་གཞན་གྱིས་བར་མ་ཆོད་པར་བསྐྱེད་པ་ཡིན་ལ། དེ་ལྟར་བསྐྱེད་པར་བྱ་བ་ནི་རྣམ་མཁྱེན་ཡིན་པའི་ཚུལ་གྱིས་བསྟན་ཏོ། །དེས་ན་གཞུང་གོང་འོག་གསུམ་ཆར་བར་ཆད་མེད་པའི་རྩེ་སྦྱོར་བསོད་ནམས་མང་བ་སོགས་ལ་སྦྱོར་བ་ཡིན་ནོ། །རྩེ་སྦྱོར་འདི་བསོད་ནམས་མང་པོའི་ལྡོག་པ་ནས་བསྟན་པའི་དོན་ནི་བཤད་ཟིན་ཏོ། །གསུམ་པ་ལ། དགག་གཞག་སྤང་གསུམ་ལས། དང་པོ་ལ་ཁ་ཅིག རང་འབྲས་སུ་གྱུར་པའི་རྣམ་མཁྱེན་སྐྱེད་པ་ལ་རིགས་མཐུན་གྱི་སྦྱོར་བ་དང་། རིགས་མི་མཐུན་གྱི་སྒྲིབ་པ་གང་གིས་ཀྱང་བར་མ་ཆོད་པའི་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་ཟེར་ན། ཐེག་ཆེན་གྱི་སྒོམ་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། བསྡུས་སྒོམ་རབ་ཏུ་གྱུར་པའི་དེ་གང་ཞིག བར་ཆད་མེད་ལམ་པའི་རྩེ་སྦྱོར་དེ་ཁྱོད་ཡིན་པའི་ཕྱིར། གཉིས་པ་ནི། རང་གི་དངོས་འབྲས་སུ་གྱུར་པའི་རྣམ་མཁྱེན་སྐྱེད་པའི་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར་རོ། །གསུམ་པ་ལ། ཁ་ཅིག རྒྱུན་མཐའི་ཡེ་ཤེས་སྐད་ཅིག་མ་དང་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཁྱོད་དང་ཁྱོད་ཀྱི་འབྲས་བུར་གྱུར་པའི་རྣམ་མཁྱེན་གྱི་བར་དུ་རྒྱུན་མཐའི་ཡེ་ཤེས་སྐད་ཅིག་མ་གཉིས་པས་ཆོད་པའི་ཕྱིར་ཟེར་ན། འོ་ན་རྒྱུན་མཐའི་ཡེ་ཤེས་ཀྱི་དངོས་འབྲས་སུ་གྱུར་པའི་རྣམ་མཁྱེན་སྐད་ཅིག་མ་དང་པོ་མེད་པར་ཐལ། དེ་སྐད་ཅིག་མ་དང་པོ་དེ་ཡིན་ན་རང་རྒྱུ་རྒྱུན་མཐའི་ཡེ་ཤེས་ཀྱི་དངོས་འབྲས་ཡིན་པས་མ་ཁྱབ་པའི་ཕྱིར། རྟགས་ཁས་བླངས་ཏེ། རྣམ་མཁྱེན་སྐད་ཅིག་གཉིས་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། ཁྱོད་ཀྱི་ཆོས་ཅན་དེ་རྒྱུན་མཐའི་ཡེ་ཤེས་ཡིན་པ་བུད། འདོད་པར་མི་ནུས་ཏེ། ཁྱོད་དང་ཁྱོད་ཀྱི་རྒྱུར་གྱུར་པའི་རྒྱུན་མཐའི་ཡེ་ཤེས་ཀྱི་བར་དུ་རྣམ་མཁྱེན་སྐད་ཅིག་མ་དང་པོས་ཆོད་པའི་ཕྱིར། འཁོར་གསུམ་ཆོས་ཅན་དང་བཅས་ཏེ་ཁས་བླངས་སོ། །ཡང་ཁ་ཅིག སྦྱོར་ལམ་རྩེ་སྦྱོར་ཆོས་ཅན། མཚོན་བྱ་དེར་ཐལ། དེའི་ཕྱིར། མ་གྲུབ་ན། དེར་ཐལ། ཁྱོད་ཀྱི་དངོས་འབྲས་སུ་གྱུར་པའི་རྣམ་མཁྱེན་ཡོད་པའི་ཕྱིར་ཏེ། ཁྱོད་དངོས་པོ་ཡིན་པའི་ཕྱིར་ཟེར་རོ། །འོ་ན་དེ་ཆོས་ཅན། ཁྱོད་དེའི་དངོས་རྒྱུ་ཡིན་པར་ཐལ། ཁྱོད་ཀྱི་དངོས་འབྲས་སུ་གྱུར་པའི་དེ་ཡོད་པའི་ཕྱིར། འདོད་མི་ནུས་ཏེ། ཁྱོད་དེའི་བརྒྱུད་རྒྱུ་ཡིན་པའི་ཕྱིར། འདི་ཡི་དམིགས་པ་དངོས་མེད་དེ། །ཞེས་པའི་སྐབས་སུ། ཨར་ན་རེ། བདེན་པར་མ་གྲུབ་པའི་སྣང་བ་བརྟེན་འབྲེལ་མ་ཡིན་དགག་དེ་རྩེ་སྦྱོར་དེའི་དམིགས་རྐྱེན་ཡིན་གྱི། སྣང་བ་བདེན་མེད་མེད་དགག་དེ་དེའི་དམིགས་རྐྱེན་མ་ཡིན་ནོ་ཞེས་གསུངས་སོ། །དེ་ལ་ཁ་ཅིག་ན་རེ། སྔ་མ་དེ་དེའི་དམིགས་རྐྱེན་མིན་པར་ཐལ། དེ་དེ་ལ་རྣམ་པ་གཏོད་བྱེད་ཀྱི་རྒྱུ་མིན་པའི་ཕྱིར་དང་། བར་ཆད་མེད་པའི་རྩེ་སྦྱོར་དེ་དེའི་བྱེ་བྲག་ཡིན་པའི་ཕྱིར། དེས་ན་འདིའི་དམིགས་པའི་རྐྱེན་ནི་ཆོས་ཐམས་ཅད་དངོས་པོར་མེད་པར་དམིགས་པ་ཡིན་ནོ་ཞེས་གསུངས་པ་དེས་ཀྱང་འདིའི་དམིགས་པ་ཙམ་ཞིག་བསྟན་གྱི། དེའི་དམིགས་རྐྱེན་མ་བསྟན་པ་ཡིན་ཏེ། རྩ་བར། འདི་ཡི་དམིགས་པ་དངོས་མེད་དེ། །ཞེས་གསུངས་པའི་ཕྱིར་ཞེས་སྨྲའོ། །འོ་ན་བར་ཆད་མེད་པའི་རྩེ་སྦྱོར་གྱི་དམིགས་རྐྱེན་མེད་པར་ཐལ། དེ་ལ་རྣམ་པ་གཏོད་བྱེད་ཀྱི་རྒྱུ་མེད་པའི་ཕྱིར། རྟགས་ཁས། འདོད་ན། དེ་ལ་བདག་རྐྱེན་མེད་པར་ཐལ། འདོད་པ་དེའི་ཕྱིར། ཁྱབ་སྟེ། འདིའི་དམིགས་པའི་རྐྱེན་ནི་ཆོས་ཐམས་ཅད་དངོས་པོ་མེད་པར་དམིགས་པ་ཡིན་ནོ། །བདག་པོའི་རྐྱེན་ནི་དྲན་པ་ཡིན་ནོ་ཞེས་གསུངས་པའི་ཕྱིར། གཞན་ཡང་གཞུང་ཕྱི་མ་དེ་འདིའི་བདག་པོ་ཙམ་ཡིན་ལ། བདག་རྐྱེན་མ་བསྟན་པར་ཐལ། རྩ་བར། བདག་པོ་དྲན་པ་ཡིན་པར་བཞེད། །ཅེས་གསུངས་པའི་ཕྱིར། ཁྱབ་པ་ཁས། ཨར་གྱི་བཞེད་པའང་མི་འཐད་དེ། སྣང་བ་བདེན་པར་མེད་པའི་མེད་དགག་དམིགས་རྐྱེན་དུ་བཤད་པའི་ཕྱིར་ཏེ། འདི་ཡི་དམིགས་པ་དངོས་མེད་དེ། །ཞེས་གསུངས་པའི་ཕྱིར། འདིའི་དམིགས་རྐྱེན་གྱི་དོན་ནི་དམིགས་པ་གང་ལ་གཙོ་བོར་དམིགས་པ་ལ་བརྟེན་ནས་དེ་ལྟ་བུའི་ཏིང་ངེ་འཛིན་སྐྱེ་བར་འགྱུར་བ་ལ་བྱེད་ལ། བར་ཆད་མེད་པའི་རྩེ་སྦྱོར་དེ་བདེན་མེད་པ་དམིགས་པ་ལ་བརྟེན་ནས་སྐྱེ་བའི་ཕྱིར། དེས་ན་ཆོས་ཐམས་ཅད་ཆོས་ཅན། བར་ཆད་མེད་པའི་རྩེ་སྦྱོར་གྱི་དམིགས་རྐྱེན་ཡིན་ཏེ། དེས་ཁྱོད་ལ་བདེན་པའི་དངོས་པོ་མེད་པར་དམིགས་པའི་སྒོ་ནས་སྒྲོ་འདོགས་བཅད་པར་བྱ་བའི་གཞི་ཡིན་པའི་ཕྱིར། དེ་ལ་ཁ་ཅིག་ན་རེ། བར་ཆད་མེད་པའི་རྩེ་སྦྱོར་ཆོས་ཅན། དེར་ཐལ། དེའི་ཕྱིར། འདོད་ན། དེ་དེའི་དམིགས་རྐྱེན་མིན་པར་ཐལ། བདག་སྐྱེ་མ་གྲུབ་པའི་ཕྱིར་ཟེར་ན། ཆོས་ཤེས་པའི་དམིགས་རྐྱེན་ཡིན་ན། དེ་སྐྱེད་བྱེད་ཡིན་དགོས་པར་ཐལ། ཐལ་བ་ཕྱི་མ་ལ་ཁྱབ་པ་མེད་པའི་ཕྱིར། དེ་བས་ན་ཀུན་རྫོབ་དང་། ཞེས་པའི་སྐབས་སུ། བསལ་བྱ་དང་། སེལ་བྱེད་གཉིས་ལས། དང་པོ་ལ། བསལ་བྱ་ལོག་རྟོག་དང་། ལོག་རྟོག་དེས་ཀུན་ནས་བསླངས་པའི་ཀླན་ཀ་གཉིས་ལས། དང་པོ་ལ། དོན་དམ་རྒྱུ་མཚན་དུ་བྱས་ནས་ཀུན་རྫོབ་ཀྱི་རྣམ་གཞག་མི་འཐད་དོ་སྙམ་དུ་འཛིན་པ་དང་། ཀུན་རྫོབ་རྒྱུ་མཚན་དུ་བྱས་ནས་དོན་དམ་གྱི་རྣམ་གཞག་མི་འཐད་སྙམ་དུ་འཛིན་པའི་ལོག་རྟོག་གཉིས་སོ། །གཉིས་པ་ལ། ཀུན་རྫོབ་སྒོ་ཅན་དང་དོན་དམ་སྒོ་ཅན་གྱི་ཀླན་ཀ་གཉིས་ལས། དེའང་ཀུན་རྫོབ་རྟགས་སུ་བཀོད་པའི་ཀླན་ཀ་ཐམས་ཅད་ཀུན་རྫོབ་སྒོ་ཅན་ཀླན་ཀ་དང་། དོན་དམ་རྟགས་སུ་བཀོད་པའི་ཀླན་ཀ་ཐམས་ཅད་དོན་དམ་སྒོ་ཅན་གྱི་ཀླན་ཀ་ཡིན་ཞིང་། དང་པོ་ལ་ཀུན་རྫོབ་རིགས་མཐུན་ཀྱི་ཀླན་ཀ་དང་། དེའི་རིགས་མི་མཐུན་གྱི་ཀླན་ཀ་གཉིས། མཚན་གཞི་རིམ་བཞིན། བྱང་འཕགས་ཆོས་ཅན། ལམ་གསུམ་སྒོམ་པ་མི་འཐད་པར་ཐལ། ཉན་རང་གི་ལམ་སྒོམ་པ་མི་འཐད་པའི་ཕྱིར་ཞེས་དང་། ཀུན་རྫོབ་ཏུ་བསྒོམ་བྱ་རང་དང་སྤྱིའི་མཚན་ཉིད་མི་འཐད་པར་ཐལ། དོན་དམ་དུ་ཡུམ་སྒོམ་པ་མེད་པའི་ཕྱིར་ཞེས་པའོ། །ཕྱི་མ་ལའང་དོན་དམ་རིགས་མཐུན་དང་། དེའི་རིགས་མི་མཐུན་གཉིས། མཚན་གཞི་རིམ་བཞིན། དོན་དམ་པར་བར་ཆད་མེད་པའི་རྩེ་སྦྱོར་གྱི་དམིགས་པ་མི་འཐད་པར་ཐལ། དོན་དམ་པར་འདུས་བྱས་དང་འདུས་མ་བྱས་ཀྱི་ཁམས་མེད་པའི་ཕྱིར་ཞེས་པ་དང་། ཀུན་རྫོབ་ཏུ་ཡུམ་སྒོམ་པ་མི་འཐད་པར་ཐལ། དོན་དམ་པར་བསྒོམ་བྱ་རང་དང་སྤྱིའི་མཚན་ཉིད་མི་འཐད་པའི་ཕྱིར་ཞེས་པ་དང་། ཀུན་རྫོབ་ཏུ་བར་ཆད་མེད་པའི་རྩེ་སྦྱོར་གྱི་དམིགས་པ་མི་འཐད་པར་ཐལ། དོན་དམ་པར་འདུས་བྱས་དང་འདུས་མ་བྱས་ཀྱི་ཁམས་མེད་པའི་ཕྱིར་ཞེས་པའོ། །གཞུང་ལས་དངོས་སུ་བསྟན་པའི་ཀླན་ཀ་བཅུ་དྲུག་ནི་དོན་དམ་པར་རིགས་མི་མཐུན་གྱི་ཀླན་ཀ་དང་། དོན་དམ་པར་འདུས་བྱས་དང་འདུས་མ་བྱས་ཀྱི་ཁམས་ཡོད་པར་ཐལ། ཀུན་རྫོབ་དུ་བར་ཆད་མེད་པའི་རྩེ་སྦྱོར་གྱི་དམིགས་པ་མི་འཐད་པའི་ཕྱིར། ཞེས་པ་གཞུང་ལས་ཤུགས་ལ་བསྟན་པའི་ཀླན་ཀ་བཅུ་དྲུག་ནི་ཀུན་རྫོབ་རིགས་མི་མཐུན་གྱི་ཀླན་ཀ་ཡིན་ནོ། །གཉིས་པ་སེལ་བྱེད་ལ། ལོག་རྟོག་སེལ་བྱེད་ཤེས་རབ་དང་། ཀླན་ཀ་སེལ་བྱེད་ལན་གཉིས། དང་པོ་ལ་ཀུན་རྫོབ་ཏུ་ཡོད་ཀྱང་དོན་དམ་དུ་མེད་པ་མི་འགལ་བར་རྟོགས་པའི་དོན་དམ་རྟོགས་པའི་ཤེས་རབ་ཀྱིས་ཀུན་རྫོབ་རྒྱུ་མཚན་དུ་བྱས་ནས། དོན་དམ་གྱི་རྣམ་གཞག་མི་འཐད་དོ་སྙམ་པའི་ལོག་རྟོག་སེལ། དོན་དམ་དུ་མེད་ཀྱང་ཀུན་རྫོབ་ཏུ་ཡོད་པ་མི་འགལ་བར་རྟོགས་པའི་ཀུན་རྫོབ་རྟོགས་པའི་ཤེས་རབ་ཀྱིས་དོན་དམ་རྒྱུ་མཚན་དུ་བྱས་ནས། ཀུན་རྫོབ་ཀྱི་རྣམ་གཞག་མི་འཐད་དོ་སྙམ་པའི་ལོག་རྟོག་སེལ་ལོ། །གཉིས་པ་ནི། གཞུང་ལས་དངོས་སུ་བསྟན་པའི་དོན་དམ་སྒོ་ཅན་གྱི་ཀླན་ཀ་བཅུ་དྲུག་ལ་ཀུན་རྫོབ་ཀྱི་སྒོ་ནས་ལན་འདེབས་ཤིང་། ཤུགས་བསྟན་ཀུན་རྫོབ་སྒོ་ཅན་གྱི་ཀླན་ཀ་བཅུ་དྲུག་ལ་དོན་དམ་གྱི་སྒོ་ནས་ལན་འདེབས་པའོ། །སྤྱིར་དོན་དམ་སྒོ་ཅན་གྱི་ཀླན་ཀ་ལ་ཀུན་རྫོབ་དང་། ཀུན་རྫོབ་སྒོ་ཅན་གྱི་ཀླན་ཀ་ལ་དོན་དམ་གྱི་སྒོ་ནས་ལན་འདེབས་པར་མ་ངེས་ཏེ། དོན་དམ་སྒོ་ཅན་གྱི་ཀླན་ཀ་ཡིན་ན་ཀུན་རྫོབ་སུན་འབྱིན་པས་མ་ཁྱབ་པའི་ཕྱིར་དང་། ཀུན་རྫོབ་སྒོ་ཅན་གྱི་ཀླན་ཀ་ཡིན་ན་དོན་དམ་སུན་འབྱིན་པས་མ་ཁྱབ་པའི་ཕྱིར། དེས་ན་སྐབས་འདིར་བསྟན་གྱི་བསལ་བྱ་ལོག་རྟོག་གི་མཚན་ཉིད། དམིགས་པ་འཐད་པ་ལ་སོགས་པའི་ཡུལ་བཅུ་དྲུག་གང་རུང་ལ་བདེན་གཉིས་གང་རུང་རྒྱུ་མཚན་དུ་བྱས་ནས་བདེན་གཉིས་གང་རུང་མི་འཐད་དོ་སྙམ་དུ་འཛིན་པར་བྱེད་པའི་ལོག་པར་རྟོག་པའོ། །སྐབས་འདིར་བསྟན་གྱི་བསལ་བྱ་ཀླན་ཀའི་མཚན་ཉིད། དམིགས་པ་འཐད་པ་ལ་སོགས་པའི་ཡུལ་བཅུ་དྲུག་གང་རུང་ལ་བདེན་གཉིས་གང་རུང་རྒྱུ་མཚན་དུ་བྱས་ནས་དེ་གཉིས་གང་རུང་སུན་འབྱིན་པར་བྱེད་པའི་སུན་འབྱིན་ལྟར་སྣང་ངོ་། །དབྱེ་ན་སྐབས་འདིར་བསྟན་གྱི་དོན་དམ་སྒོ་ཅན་གྱི་ཀླན་ཀ་དང་། ཀུན་རྫོབ་སྒོ་ཅན་གྱི་ཀླན་ཀ་གཉིས་ལས། དེ་གཉིས་ཀྱི་མཚན་ཉིད་གཞན་འདྲ་བ་ལ། དོན་དམ་རྒྱུ་མཚན་དུ་བྱས་ནས་ཞེས་པ་དང་། ཀུན་རྫོབ་རྒྱུ་མཚན་དུ་བྱས་ནས་ཞེས་སྦྱར་རོ། །སྐབས་འདིར་བསྟན་གྱི་སེལ་བྱེད་གཉེན་པོའི་མཚན་ཉིད། བདེན་གཉིས་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པའི་ཤེས་རབ་མཚུངས་ལྡན་དང་བཅས་པའོ། །ཡུམ་དོན་རབ་གསལ་ལས་སྐབས་ལྔ་པའི་དཀའ་བའི་གནས་རྣམ་པར་བཤད་པའོ།། །།
སྐབས་དྲུག་པ་མཐར་གྱིས་པའི་སྦྱོར་བའི་དཀའ་བའི་གནས་རྣམ་པར་བཤད་པ།
སྦྱོར་དང་བསམ་པ་ལྟ་བ་ཕུན་ཚོགས་ཀྱི། །མ་ལུས་རྣམ་པ་མ་འཁྲུལ་གོ་རིམ་བཞིན། །ཡང་ཡང་བསླབས་ནས་སྒོམ་པའི་རྣལ་འབྱོར་གྱི། །བརྟན་པ་འཐོབ་བྱེད་རྒྱལ་ཡུམ་དེ་ལ་འདུད། །རྩེ་མོའི་མངོན་པར་རྟོགས་པ་ཐོབ་པ་སོ་སོ་བ་དང་བསྡུས་པ་ཉིད་དུ། ཞེས་པའི་སྐབས་སུ། སོ་སོ་བ་དང་བསྡུས་པའི་དོན་ལ་དགག་གཞག་གཉིས་ལས། དང་པོ་ལ་སློབ་དཔོན་ཆོས་བཤེས་ན་རེ། སོ་སོ་བ་ནི་ཚོགས་སྦྱོར་གྱི་སྐབས་སུ་མངོན་པར་རྟོགས་པའི་དོན་ཡིད་ལ་བྱེད་པའི་གོ་རིམ་དང་། བསྡུས་པ་ནི། ཆོས་ཉིད་མངོན་སུམ་དུ་རྟོགས་ནས་སྙིང་པོའི་དོན་ཡིད་ལ་བྱེད་པའི་གོ་རིམ་དུ་བཞེད་དེ། ཚིག་གསལ་ལས། སོ་སོ་བ་དང་བསྡུས་པ་ཉིད་དུ་རྟོགས་པའི་དོན་རྣམས་ཞེས་བྱ་བ་ལ། སོ་སོའི་དོན་རྣམས་ནི་སྐབས་རེ་རེས་ཇི་ལྟར་བསྟན་པ་དང་། ཚོགས་ཀྱི་ལམ་ལ་སོགས་པའི་གནས་སྐབས་རེ་རེ་ལའང་རང་བཞིན་ཇི་སྙེད་ཡོད་ཅེས་མངོན་པར་རྟོགས་པའི་དོན་དེ། དེ་ནི་རྗེས་ཀྱི་ངོ་བོར་ཐོབ་པའི་ཡེ་ཤེས་ཀྱི་རྟོགས་པའོ། །བསྡུས་པ་ཉིད་ཀྱི་དོན་ནི་ཆོས་ཀྱི་དབྱིངས་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ཏེ། དོན་དེ་ནི་མཉམ་པར་གཞག་པའི་ཡེ་ཤེས་ཀྱི་རྟོགས་པར་མཛད་ནས་སོ་ཞེས་གསུངས་སོ། །མཁན་ཆེན་པ་ན་རེ། སོ་སོ་བ་ནི། ཕར་ཕྱིན་དྲུག་དང་། རྗེས་དྲན་དྲུག་བསྡུས་པ་དངོས་མེད་ངོ་བོ་ཉིད་དུ་རྟོགས་པ་མཐར་གྱིས་པའི་སྦྱོར་བ་སྟེ། དབྱེ་བ་དང་སྦྱོར་བའི་ཕྱིར་ཞེས་གསུངས་སོ། །དང་པོ་ལ། མངོན་པར་རྟོགས་པའི་དོན་ཡིད་ལ་བྱེད་པའི་སྒོམ་པའི་རིམ་པ་དང་། སྙིང་པོའི་དོན་ཡིད་ལ་བྱེད་པའི་སྒོམ་རིམ་གཉིས་རྒྱན་གྱི་བརྗོད་བྱའི་གཙོ་བོ་ཡིན་མིན་གྱི་ཁྱད་པར་མེད་པར་ཐལ། དམ་བཅའ་རྟགས། འདོད་ན། རྒྱན་འདི་སྦས་དོན་མངོན་པར་རྟོགས་པའི་རིམ་པ་གཙོ་བོར་སྟོན་བྱེད་མིན་པར་ཐལ་ལོ། །གཞན་ཡང་སྦྱོར་ལམ་གྱི་གནས་སྐབས་ན་སོ་སོ་བ་དང་བསྡུས་པ་ཉིད་དུ་རྟོགས་པའི་དོན་སྒོམ་པ་མེད་པར་ཐལ། བསྡུས་པ་ཉིད་ཀྱི་དོན་རྣམ་པར་མི་རྟོག་པའི་ཡེ་ཤེས་ཡིན་པའི་ཕྱིར། འདོད་ན། དེར་མཐར་གྱིས་པའི་སྦྱོར་བ་མེད་པར་ཐལ་ལོ། །ཕྱི་མ་ལ་མཐར་གྱིས་པའི་སྦྱོར་བས་གོ་རིམ་དུ་བསྒོམ་པར་བྱ་བའི་ཆོས་དེ་མཐར་གྱིས་པའི་ཆོས་བཅུ་ལ་བྱེད་པ་འཐད་པར་ཐལ། དམ་བཅའ་རྟགས། འདོད་ན། སྐད་ཅིག་མའི་སྦྱོར་བས་ཅིག་ཅར་དུ་སྒོམ་པའི་ཆོས་དེ། དེ་བཅུ་ལ་བྱེད་པ་འཐད་པར་ཐལ། འདོད་པ་དེའི་ཕྱིར། ཁྱབ་སྟེ། འགྲེལ་པར། མཐར་གྱིས་པའི་མངོན་པར་རྟོགས་པ་རྣམ་པར་སྒོམ་པ་ནི་ཤིན་ཏུ་བསྒོམ་པར་བྱ་བའི་ཕྱིར། དེ་དག་ཉིད་སྐད་ཅིག་མ་གཅིག་གིས་སྒོམ་ཞེས་གསུངས་པའི་ཕྱིར། གཉིས་པ་ནི། སོ་སོ་བ་མཁྱེན་གསུམ་གྱི་ཆོས་སུམ་ཅུ་དང་། བསྡུས་པ་ནི་རྣམ་རྫོགས་སྦྱོར་བའི་བསྒོམ་བྱར་གྱུར་པའི་རྣམ་པ་བརྒྱ་བདུན་ཅུ་གསུམ་ལ་འཇོག་སྟེ། ཉི་ཁྲི་སྣང་བ་ལས། ཡང་རྣམ་པ་ཐམས་ཅད་མཁྱེན་པ་ཉིད་དང་། རྣམ་པ་ཐམས་ཅད་མངོན་པར་རྟོགས་པ་ལ་ཁྱད་པར་ཅི་ཡོད་ཅེ་ན། ཐམས་ཅད་མཁྱེན་པ་ཉིད་གསུམ་ནི་རྣམ་པ་སོ་སོར་ངེས་པའི་ཡུལ་ཅན་ཏེ། རྣམ་པ་སོ་སོར་ངེས་པ་ཇི་ལྟར་བཤད་པས་སོ། །རྣམ་པ་ཐམས་ཅད་མངོན་པར་རྟོགས་པ་ནི་རྣམ་པ་མ་ལུས་པའི་ཡུལ་ཅན་ནོ་ཞེས་དང་། དོན་གསལ་ལས། ཐམས་ཅད་མཁྱེན་པ་ཉིད་གསུམ་ཡོངས་སུ་ཤེས་པ་ནི་དབང་དུ་བྱ་བའི་ཕྱིར། ཡང་རྣམ་པ་དང་ལམ་དང་གཞི་ཤེས་པ་བསྡུ་བའི་སྒོ་ནས་ཞེས་དང་། གསེར་གླིང་པས་རྟོགས་དཀའི་སྣང་བ་ལས། སོ་སོ་བ་དང་བསྡུས་པ་ཉིད་དུ་ཞེས་བྱ་བ་ནི་ལུགས་ལས་ལྡོག་པ་དང་ལུགས་ལས་འབྱུང་བ་དག་གིས་སོ། །རྟོགས་པའི་དོན་རྣམས་ནི་སྒོམ་པས་ཡུལ་དུ་བྱས་པའི་ཡུལ་ལོ་ཞེས་གསུངས་པའི་ཕྱིར། དེས་ན་མཁྱེན་གསུམ་མཚོན་བྱེད་ཀྱི་ཆོས་སུམ་ཅུ་ལ་སོ་སོ་བ་ཞེས་བརྗོད་དེ། དེ་ཐོས་བསམ་གྱིས་གཏན་ལ་ཕབ་པའི་ལྡོག་པ་ནས་བསྟན་པའི་ཕྱིར། རྣམ་པ་བརྒྱ་བདུན་ཅུ་རྩ་གསུམ་ལ་བསྡུས་པ་ཞེས་བརྗོད་དེ། སྔར་ཐོས་བསམ་གྱིས་གཏན་ལ་ཕབ་པའི་དོན་དེ་བསྒོམ་བྱའི་རྣམ་པར་བསྡུས་པའི་ཕྱིར། འོ་ན་རྩེ་མོའི་མངོན་པར་རྟོགས་པ་ཐོབ་པའི་སོ་སོ་བ་དང་ཞེས་སོགས་ཀྱི་གཞུང་གིས་རྩེ་སྦྱོར་གྱི་འོག་ཏུ་མཐར་གྱིས་པའི་སྦྱོར་བ་འཆད་པའི་རྒྱུ་མཚན་མ་བསྟན་པར་ཐལ་ལོ་སྙམ་ན། སྐྱོན་མེད་དེ། རྩེ་སྦྱོར་ཐོབ་པའི་གང་ཟག་གིས་སོ་སོ་བ་མཁྱེན་གསུམ་དང་བསྡུས་པ་རྣམ་རྫོགས་སྦྱོར་བར་རྟོགས་པའི་དོན་དེ་ཉིད་སྒོམ་པའི་ཕྱིར་ན་དེའི་འོག་ཏུ་དེ་འཆད་ཅེས་བསྟན་པའི་ཕྱིར། མདོར་ན་རྣམ་པ་བརྒྱ་བདུན་ཅུ་རྩ་གསུམ་པོ་གོ་རིམ་ངེས་མེད་དུ་སྒོམ་པ་ལ་རྣམ་རྫོགས་སྦྱོར་བ་ཁོ་ན་དང་། དེ་ལ་བརྟེན་ནས་སྒོམ་བྱུང་གི་ཡེ་ཤེས་སྐྱེས་པ་ལ་རྩེ་སྦྱོར། དེ་ཉིད་བསྟན་པ་ཐོབ་པའི་ཕྱིར་གོ་རིམ་དུ་སྒོམ་པ་ལ་མཐར་གྱིས་པ། དེ་ཐོབ་ནས་ཅིག་ཅར་དུ་སྒོམ་པ་སྐད་ཅིག་མའི་སྦྱོར་བར་འཇོག་པའི་ཕྱིར་ན། སོ་སོ་བ་མཁྱེན་གསུམ་གྱི་ཆོས་སུམ་ཅུ་དང་། བསྡུས་པ་རྣམ་པ་བརྒྱ་བདུན་ཅུ་རྩ་གསུམ་ལ་བྱེད་པ་ཤིན་ཏུ་འཐད་དོ། །སྦྱིན་པ་ཤེས་རབ་བར་དག་དང་། །ཞེས་པའི་སྐབས་སུ་མཐར་གྱིས་པའི་སྦྱོར་བའི་མཚན་ཉིད། དབྱེ་བ། ས་མཚམས་གསུམ། དང་པོ་ལ། ཁ་ཅིག མཁྱེན་གསུམ་བསྡུས་ནས་གོ་རིམ་དུ་སྒོམ་པའི་སེམས་དཔའི་རྣལ་འབྱོར། ཡང་དེའི་རྣམ་པ་བསྡུས་ནས་སྔར་བཞིན་དང་། ཡང་དེ་ལྟར་སྒོམ་པའི་དྲོད་སྐད་ཅིག་མ་གཉིས་པ་ཡན་ཆད་ཀྱི་སེམས་དཔའི་རྣལ་འབྱོར་ཟེར་ན། སྔ་མ་གཉིས་ལ་མཁྱེན་གསུམ་བསྡུས་ནས་གོ་རིམ་དུ་སྒོམ་པར་བྱེད་པའི་བྱང་སེམས་ཀྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། རྩེ་སྦྱོར་སྔོན་སོང་དུ་ཐལ་ལོ། །དང་པོ་ལ། ཁ་ཅིག ཐེག་ཆེན་གྱི་རྩེ་མོའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མཁྱེན་གསུམ་བསྡུས་པར་ཐལ་ལོ། །འདོད་ན། མངོན་པར་རྟོགས་པ་བརྒྱད་བསྡུས་པར་ཐལ། ཞེས་ཟེར་བ་ལ་སྐྱོན་སྤོང་ཡང་བསྟན་ཏོ། །གསུམ་པ་ལ་ཉན་ཐོས་དགྲ་བཅོམ་པའི་རྟོགས་པ་སྔོན་སོང་གི་བྱང་སེམས་ཚོགས་ལམ་པའི་རྒྱུད་ཀྱི་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པའི་སེམས་དཔའི་རྣལ་འབྱོར་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དེ་ལྟར་སྒོམ་པར་བྱེད་པ་གང་ཞིག དྲོད་ཡན་ཆད་ཀྱི་སེམས་དཔའི་རྣལ་འབྱོར་ཡིན་པའི་ཕྱིར་ཏེ། དྲོད་སྔོན་སོང་གི་དེའི་ཕྱིར། ཁ་ཅིག སྦྱིན་པའི་ཕར་ཕྱིན་གྱི་མཐར་གྱིས་པའི་སྦྱོར་བའི་མཚན་ཉིད། སྦྱིན་པའི་ཕར་ཕྱིན་གོ་རིམ་དུ་བསྒོམ་པར་བྱེད་པའི་མཐར་གྱིས་པའི་སྦྱོར་བ། དེས་གཞན་རྣམས་ལ་རིགས་འགྲེ་ཟེར་རོ། །འོ་ན་སྦྱིན་པའི་ཕར་ཕྱིན་གྱི་མཐར་གྱིས་པའི་སྦྱོར་བས་གོ་རིམ་དུ་བསྒོམ་པར་བྱ་བའི་ཆོས་དེ་ཡིན་ན་སྦྱིན་པའི་ཕར་ཕྱིན་ཡིན་དགོས་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། རྣམ་པ་བརྒྱ་བདུན་ཅུ་རྩ་གསུམ་པོ་དེ་ཆོས་ཅན། དེར་ཐལ། དེའི་ཕྱིར་ཏེ། མཐར་གྱིས་པའི་སྦྱོར་བས་གོ་རིམ་དུ་བསྒོམ་པར་བྱ་བའི་ཆོས་དེ་ཡིན་པའི་ཕྱིར། གཉིས་པ་ནི། རང་རྒྱུ་རྩེ་སྦྱོར་ལས་བྱུང་བའི་བརྟན་པ་ཐོབ་པའི་ཕྱིར་དུ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པའི་སེམས་དཔའི་རྣལ་འབྱོར། གཉིས་པ་དབྱེ་བ་ལ། སྦྱིན་པའི་ཕར་ཕྱིན་གྱི་མཐར་གྱིས་པའི་སྦྱོར་བ་ནས་དངོས་མེད་ངོ་བོ་ཉིད་དུ་རྟོགས་པའི་མཐར་གྱིས་པའི་སྦྱོར་བའི་བར་བཅུ་གསུམ། དེ་དག་གི་མཚན་ཉིད་རིམ་བཞིན། སྦྱིན་པ་ཉམས་སུ་ལེན་པའི་བྱ་བས་ཟིན་པས་མཐར་གྱིས་པའི་སྦྱོར་བ། དེས་གཞན་རྣམས་ལའང་འགྲེ། སངས་རྒྱས་རྗེས་སུ་དྲན་པའི་མཐར་གྱིས་པའི་སྦྱོར་བའི་མཚན་ཉིད། སངས་རྒྱས་དཀོན་མཆོག་དོན་དམ་པར་དྲན་པ་མེད་ཅིང་ཀུན་རྫོབ་ཏུ་མཚན་ཉིད་ཀྱི་སྒོ་ནས་རྗེས་སུ་དྲན་པས་ཟིན་པའི་མཐར་གྱིས་པའི་སྦྱོར་བ། དེས་གཞན་རྣམས་ལའང་འགྲེ། དངོས་མེད་ངོ་བོ་ཉིད་དུ་རྟོགས་པའི་མཐར་གྱིས་པའི་སྦྱོར་བའི་མཚན་ཉིད། ཆོས་ཐམས་ཅད་རང་བཞིན་མེད་པར་རྟོགས་པའི་ཤེས་རབ་ཀྱིས་ཟིན་པའི་མཐར་གྱིས་པའི་སྦྱོར་བ། དེ་དག་རེ་རེ་ལའང་མཐར་གྱིས་བྱ་བ། དེའི་བསླབ་པ། དེའི་སྒྲུབ་པ་དང་གསུམ་གསུམ་ཡོད་དེ། སློབ་དཔོན་ལྟར་ན་སྦྱོར་མཐོང་སྒོམ་གསུམ་ལ་རིམ་བཞིན་འཇོག་ཞིང་། ཉི་ཁྲི་སྣང་བ་ལས། བགྱི་བ་སྨོས་པ་ནི་སེམས་བསྐྱེད་པ་གཟུང་བའི་དོན་དུའོ། །བསླབ་པ་སྨོས་པ་ནི་ངེས་པར་འབྱེད་པའི་ཆ་དང་མཐུན་པ་ཤེས་པར་བྱ་བའི་དོན་དུའོ། །སྒྲུབ་པ་སྨོས་པ་ནི་མཐོང་བའི་ལམ་དང་སྒོམ་པའི་ལམ་ཤེས་པའི་དོན་དུའོ་ཞེས་གསུངས་སོ། །གསུམ་པ་ས་མཚམས་ནི། སློབ་དཔོན་ལྟར་ན་ཐེག་ཆེན་གྱི་སྦྱོར་ལམ་དྲོད་སྐད་ཅིག་གཉིས་པ་ནས་འཇོག་ལ། འཕགས་པ་ལྟར་ན་དེའི་ཚོགས་ལམ་ནས་འཇོག་པར་མཛད་དོ། །ཡུམ་དོན་རབ་གསལ་ལས་སྐབས་དྲུག་པའི་དཀའ་བའི་གནས་རྣམ་པར་བཤད་པ་ཨྀཐི།། །།
སྐབས་བདུན་པ་སྐད་ཅིག་མའི་སྦྱོར་བའི་དཀའ་བའི་གནས་རྣམ་པར་བཤད་པ།
བཟོ་སྦྱོང་མཁས་པའི་ཟོ་ཆུན་རྒྱུན་བཞིན་དུ། །གྲངས་མེད་གསུམ་དུ་ཚོགས་གཉིས་གོམས་པའི་མཐུས། །ཟག་མེད་རྟོགས་པའི་རིགས་རྣམས་སྐད་ཅིག་ལ། །མངོན་དུ་བྱེད་པའི་རྒྱལ་ཡུམ་དེ་ལ་འདུད། །སྦྱིན་པ་ལ་སོགས་རེ་རེས་ཀྱང་། །ཞེས་པའི་སྐབས་སུ་སྐད་ཅིག་མའི་སྦྱོར་བའི་ས་མཚམས་ལ་དཔྱད་པ་དང་། ངོ་བོ་ལ་དཔྱད་པ་དང་། སྒོམ་པའི་དོན་ལ་དཔྱད་པ་དང་གསུམ། དང་པོ་ལ། དགག་གཞག་གཉིས། དང་པོ་ལ། ལོ་ཆེན་ན་རེ། རྣམ་པར་སྨིན་པ་མ་ཡིན་པའི་སྐད་ཅིག་མའི་སྦྱོར་བ་ས་བདུན་པ་ནས་ཡོད་དེ། རྒྱན་ལས། བྱང་ཆུབ་སེམས་དཔའ་ལྟ་བ་རྣམ་དག་པ། །ཚུལ་ཁྲིམས་ཤིན་ཏུ་རྣམ་དག་མཉམ་པར་གཞག །ཆོས་ལ་ང་སྤོང་རྒྱུད་དང་ཀུན་ཉོན་མོངས། །རྣམ་པར་བྱང་བ་ཐ་དད་ང་རྒྱལ་མེད། །སྐད་ཅིག་གཅིག་བློ་ཐོབ་པ་བཏང་སྙོམས་པ། །ཞེས་གསུངས་ཞིང་། དེའི་འགྲེལ་པར། དབྱིག་གཉེན་གྱིས། ལྟ་བ་རྣམ་དག་དང་། ཚུལ་ཁྲིམས་རྣམ་དག་དང་། ཆོས་ལ་ང་རྒྱལ་སྤོང་བ་དང་། རྒྱུད་ཐ་དད་པ་ལ་ང་རྒྱལ་མེད་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་ཐ་དད་པ་ལ་ང་རྒྱལ་མེད་པ་དང་དྲུག་ས་དང་པོ་དྲུག་ལ་རིམ་བཞིན་གཞག་ནས། ས་བདུན་པ་ལ་ནི་མཚན་མ་མེད་པར་གནས་པའི་མཐུས་སྐད་ཅིག་རེ་རེ་ལ་བྱང་ཕྱོགས་སོ་བདུན་སྒོམ་ནུས་པའི་སྐད་ཅིག་གཅིག་བློ་ཐོབ་པ་དེ་གཞག་པའི་ཕྱིར། རྣམ་པར་སྨིན་པའི་སྐད་ཅིག་མའི་སྦྱོར་བ་ས་བརྒྱད་པ་ནས་ཡོད་དེ། རྣམ་པར་སྨིན་པའི་སེམས་བསྐྱེད་དེ་ནས་བཤད་པའི་ཕྱིར། དེ་གཉིས་ཀྱི་རིགས་པས་ཕྱི་མ་གཉིས་ས་དགུ་པ་དང་བཅུ་པ་ལ་འཇོག་ཅེས་གསུངས་སོ། །འོ་ན་ས་བདུན་པར་མཚན་འཛིན་ཡོད་པར་ཐལ། དེར་ང་རྒྱལ་ཡོད་པའི་ཕྱིར། རྟགས་ཁས་བླངས་ཏེ། དེར་ཐལ། རྒྱན་ལས། ང་རྒྱལ་ཕྲ་དང་ང་རྒྱལ་མེད་པར་འདོད། །ཅེས་པའི་ཕྱིར། ཁྱབ་པ་ཁས། ཡང་ས་དང་པོར་རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བ་ཡོད་པར་ཐལ། མ་དག་ས་བདུན་གྱི་རྟོགས་རིགས་རྣམས་རྣམ་པར་སྨིན་པ་མིན་པའི་རྟོགས་རིགས་ཡིན་པའི་ཕྱིར། ཡང་གསལ་བ་དེར་ཐལ། དེར་ཕར་ཕྱིན་དྲུག་ཅིག་ཅར་དུ་སྒོམ་པའི་སྦྱོར་བ་ཡོད་པའི་ཕྱིར། གཉིས་ཆར་གྱི་ཁྱབ་པ་ཁས། ཡང་གསལ་བ་དེར་ཐལ། དེར་རྣམ་པར་སྨིན་པ་མིན་པའི་སེམས་བསྐྱེད་ཡོད་པའི་ཕྱིར། ཁྱབ་པ་ཁས། གཉིས་པ་ནི། དེ་རྒྱུན་མཐའ་ཁོ་ནར་ཡོད་དེ། རྒྱུན་མཐའི་ཡེ་ཤེས་སྐད་ཅིག་མ་གཅིག་ཉིད་ལ་མཚན་ཉིད་ཀྱི་དོན་མི་འདྲ་བའི་སྒོ་ནས་བཞིར་འབྱེད་པའི་ཕྱིར་ཏེ། རྩ་བར། མཚན་ཉིད་ཀྱིས་ནི་རྣམ་པ་བཞི། །ཞེས་དང་། དེའང་མཚན་ཉིད་ཀྱིས་རྣམ་པ་བཞི་ཡིན་པའི་ཕྱིར་ཞེས་གསུངས་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ལ་ཁ་ཅིག མཁྱེན་གསུམ་བསྡུས་ནས་ཅིག་ཅར་སྒོམ་པར་བྱེད་པའི་སེམས་དཔའི་རྣལ་འབྱོར་མཐར་ཐུག་ཅེས་དང་། དེའི་རྣམ་པ་བསྡུས་ནས་བྱར་རྫོགས་ཀྱི་སྐད་ཅིག་མ་གཅིག་ལ་རྟོགས་ནས་སྒོམ་པར་བྱེད་པའི་སེམས་དཔའི་རྣལ་འབྱོར་མཐར་ཐུག་དེ་དེའི་མཚན་ཉིད་ཡིན་ཟེར། སྔ་མ་ལ། ཁ་ཅིག རྒྱུན་མཐའི་བྱང་སེམས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དེ་བསྡུས་ནས་ཅིག་ཅར་དུ་སྒོམ་པར་བྱེད་པ་གང་ཞིག དེ་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། ཕྱི་མ་དེར་ཐལ། ཤཱཀྱ་ཐུབ་པ་དེ་སྤངས་རྟོགས་མཐར་ཐུག་ཡིན་པའི་ཕྱིར་ཟེར་བ་མི་འཐད་དེ། སེམས་དཔའི་རྣལ་འབྱོར་མཐར་ཐུག་ཐོབ་པ་ཡིན་ན་དེ་མཐར་ཐུག་ཡིན་དགོས་པར་ཐལ། རྒྱུན་མཐའི་ཡེ་ཤེས་དེ་དེ་མཐར་ཐུག་ཡིན་པའི་ཕྱིར། འདོད་ན། སྦྱོར་ལམ་ཆོས་མཆོག་ལ་གནས་པའི་བྱང་སེམས་ཆོས་ཅན། འཇིག་རྟེན་ཆོས་མཆོག་ཡིན་པར་ཐལ། དེའི་ཆོས་ཀྱི་མཆོག་ཐོབ་པའི་ཕྱིར། ཡང་རྟོགས་པ་མཐར་ཐུག་ཐོབ་པ་ཡིན་ན་རྟོགས་པ་མཐར་ཐུག་ཡིན་དགོས་པར་ཐལ། ཤཱཀྱ་ཐུབ་པ་དེ་དེ་ཡིན་པའི་ཕྱིར། འདོད་ན། རྣམ་མཁྱེན་ཐོབ་ན་རྣམ་མཁྱེན་ཡིན་དགོས་པར་ཐལ་ལོ། །གཉིས་པ་ལ་སྐད་ཅིག་མའི་སྦྱོར་བ་ལ་སྐད་ཅིག་སྔ་ཕྱིའི་རིམ་པ་ཡོད་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། དེ་སྐད་ཅིག་མ་སྔ་མ་དེ་ཆོས་ཅན། རང་གི་འབྲས་བུར་གྱུར་པའི་ཆོས་སྐུའི་དངོས་རྒྱུ་བྱེད་པར་ཐལ། རྒྱུན་མཐའི་ཡེ་ཤེས་ཡིན་པའི་ཕྱིར། ཁྱབ་སྟེ། སྐད་ཅིག་མ་གཅིག་པའི་མངོན་པར་རྫོགས་པར་བྱང་ཆུབ་པ། ཞེས་གསུངས་པའི་ཕྱིར། འདོད་ན། མིན་པར་ཐལ། ཁྱོད་དང་དེའི་བར་དུ་སྐད་ཅིག་མའི་སྦྱོར་བ་སྐད་ཅིག་མ་ཕྱི་མས་ཆོད་པའི་ཕྱིར། ཡང་དེ་ཆོས་ཅན། མཁྱེན་གསུམ་གྱི་སྦྱོར་བ་མཐར་ཐུག་ཡིན་པར་ཐལ། སྐད་ཅིག་མའི་སྦྱོར་བ་ཡིན་པའི་ཕྱིར། ཁྱབ་སྟེ། དེ་མཐའ་ཞེས་པ་དང་། དེ་ནས་ཁྱད་པར་དུ་འགྲོར་མེད་པའི་ཡང་དག་པར་སྐད་ཅིག་མ་གཅིག་པའི་མངོན་པར་རྫོགས་པར་བྱང་ཆུབ་པ་ནི་ཐམས་ཅད་མཁྱེན་པ་ཉིད་གསུམ་གྱི་མཐར་ཐུག་པའི་གནས་སྐབས་ཡིན་ནོ་ཞེས་གསུངས་པའི་ཕྱིར། འདོད་མི་ནུས་ཏེ། ཁྱོད་ཀྱི་སྐད་ཅིག་ཕྱི་ལོགས་སུ་རྣམ་མཁྱེན་གྱི་སྦྱོར་བ་མེད་པའི་ཕྱིར། རྟགས་ཁས། ཁ་ཅིག རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བའི་མཚན་ཉིད། རྣམ་པར་སྨིན་པ་མིན་པའི་ཟག་མེད་ཀྱི་ཆོས་གཅིག་མངོན་དུ་བྱས་པའི་ཚེ་དེ་དང་རིགས་མཐུན་པའི་ཟག་མེད་ཀྱི་ཆོས་ཐམས་ཅད་མངོན་དུ་བྱེད་པའི་སེམས་དཔའི་རྣལ་འབྱོར་མཐར་ཐུག་དང་། རྣམ་པར་སྨིན་པའི་ཟག་མེད་ཀྱི་ཆོས་གཅིག་མངོན་དུ་བྱས་པའི་ཚེ། དེ་དང་རིགས་མཐུན་པའི་ཟག་མེད་ཀྱི་ཆོས་ཐམས་ཅད་མངོན་དུ་བྱེད་པའི་སེམས་དཔའི་རྣལ་འབྱོར་མཐར་ཐུག་དེ་རྣམ་པར་སྨིན་པའི་སྐད་ཅིག་མའི་སྦྱོར་བའི་མཚན་ཉིད་ཟེར་ན། སྔ་མ་ལ། རྒྱུན་མཐའ་ན་རྣམ་པར་སྨིན་པ་མིན་པའི་ཟག་མེད་ཀྱི་ཆོས་མངོན་དུ་བྱེད་པ་ཡོད་པར་ཐལ། རྒྱུན་མཐའི་ཡེ་ཤེས་དེ་མཚན་ཉིད་དེའི་ཕྱིར། འདོད་ན། རྒྱུན་མཐའི་སྐབས་ཀྱི་ས་བདུན་པ་མན་ཆད་ཀྱི་རྟོགས་རིགས་དེ་རྣམ་པར་སྨིན་པ་མིན་པའི་ཟག་མེད་ཀྱི་ཆོས་སུ་ཐལ་ལོ། །འདོད་ན། དེ་མིན་པར་ཐལ། རྣམ་པར་སྨིན་པའི་ཟག་མེད་ཀྱི་ཆོས་ཡིན་པའི་ཕྱིར་ཏེ། དག་སའི་ཡེ་ཤེས་ཡིན་པའི་ཕྱིར། དེ་ལ་ཁོ་ན་རེ། རྒྱུན་མཐའི་ཡེ་ཤེས་ཆོས་ཅན། རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བ་མིན་པར་ཐལ། རྣམ་པར་སྨིན་པའི་སྐད་ཅིག་མའི་སྦྱོར་བ་ཡིན་པའི་ཕྱིར། ཁྱབ་པ་བསྒྲིགས་གོ་ཟེར་རོ། །མི་མཚུངས་ཏེ། ཉན་ཐོས་ཀྱི་ལམ་ཡིན་ན་བྱང་སེམས་ཀྱི་ལམ་མིན་པས་མ་ཁྱབ་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ན་བྱང་སེམས་ཀྱི་ལམ་མིན་པས་མ་ཁྱབ་པའི་ཕྱིར། ཁྱབ་པ་ཁས། གཞན་ཡང་རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་ཡིན་ན་དེའི་ཆོས་ཡིན་དགོས་པར་ཐལ། རྒྱུན་མཐའི་སྐབས་ཀྱི་ས་བདུན་པ་མན་ཆད་ཀྱི་རྟོགས་རིགས་དེ་རྣམ་པར་སྨིན་པ་མིན་པའི་ཟག་མེད་ཀྱི་ཆོས་ཡིན་པའི་ཕྱིར། རྟགས་ཁས། འདོད་ན། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཆོས་ཅན། ཉན་ཐོས་ཀྱི་ལམ་ཡིན་པར་ཐལ། དེའི་རྟོགས་རིགས་ཡིན་པའི་ཕྱིར། ཁྱབ་པ་ཁས། མཚན་ཉིད་ཕྱི་མ་ལ། རྒྱུན་མཐའི་ཡེ་ཤེས་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཡང་དེས་རྣམ་པར་སྨིན་པའི་ཟག་མེད་ཀྱི་ཆོས་ཐམས་ཅད་མངོན་དུ་བྱས་པར་ཐལ། དེས་དེ་གཅིག་མངོན་དུ་བྱས་པའི་ཕྱིར། རྟགས་ཁྱབ་ཁས། གཉིས་པ་ནི། བརྟན་པ་ཐོབ་ནས་མཁྱེན་གསུམ་གྱི་རྣམ་པ་སྐད་ཅིག་མ་གཅིག་ལ་ཅིག་ཅར་དུ་སྒོམ་པའི་སེམས་དཔའི་རྣལ་འབྱོར་མཐར་ཐུག དབྱེ་ན་བཞི་ཡོད་པ་ལས། མཚན་ཉིད་རིམ་བཞིན། རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་གཅིག་སྒོམ་པའི་ཚེ་དེ་དང་རིགས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་སྒོམ་ནུས་པའི་སེམས་དཔའི་རྣལ་འབྱོར་མཐར་ཐུག རྣམ་པར་སྨིན་པའི་ཟག་མེད་ཀྱི་རྟོགས་རིགས་གཅིག་སྒོམ་པའི་ཚེ་དེ་དང་རིགས་མཐུན་པའི་ཞེས་སོགས་འགྲེ། ཆོས་ཐམས་ཅད་བདེན་པའི་མཚན་ཉིད་མེད་པ་དང་། ཆོས་ཐམས་ཅད་གཟུང་འཛིན་གཉིས་སུ་མེད་པར་དུས་སྐད་ཅིག་མ་གཅིག་ལ་སྒོམ་པའི་སེམས་དཔའི་རྣལ་འབྱོར་མཐར་ཐུག་གོ །གསུམ་པ་ལ། ཁ་ཅིག་ན་རེ། རྒྱུན་མཐའི་ཡེ་ཤེས་ཆོས་ཅན། རྣམ་པར་སྨིན་པའི་ཟག་མེད་ཀྱི་རྟོགས་རིགས་ཐམས་ཅད་སྒོམ་པར་ཐལ། དེ་གཅིག་སྒོམ་པའི་ཕྱིར། རྟགས་ཁས། འདོད་ན། དེས་སངས་རྒྱས་ཀྱི་ཡེ་ཤེས་སྒོམ་པར་ཐལ་ལོ། །འདོད་ན། དེས་དེ་མངོན་སུམ་དུ་རྟོགས་པར་ཐལ། འདོད་པ་གང་ཞིག རྣལ་འབྱོར་ཡིན་པའི་ཕྱིར་ཟེར་ན། སློབ་ལམ་ན་རྣམ་པ་བརྒྱ་བདུན་ཅུ་རྩ་གསུམ་སྒོམ་པའི་རྣལ་འབྱོར་མེད་པར་ཐལ། དེར་ཐུན་མོང་མིན་པའི་རྣམ་མཁྱེན་གྱི་རྣམ་པ་སུམ་ཅུ་སོ་དགུ་སྒོམ་པར་བྱེད་པའི་རྣལ་འབྱོར་མེད་པའི་ཕྱིར། རྟགས་ཁས། འདོད་ན། དེར་རྣམ་རྫོགས་སྦྱོར་བར་གྱུར་པའི་རྣལ་འབྱོར་མེད་པར་ཐལ་ལོ། །གསུམ་པ་བསྒོམ་བྱའི་དོན་ནི། རྒྱུན་མཐའི་ཡེ་ཤེས་གཅིག་ཉིད་ཀྱིས་རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་ཐམས་ཅད་དང་། རྣམ་པར་སྨིན་པའི་ཟག་མེད་ཀྱི་རྟོགས་རིགས་ཐམས་ཅད་ཅིག་ཅར་དུ་སྒོམ་པར་བྱེད་ཅིང་། སྒོམ་བྱེད་ཀྱི་བློའི་རྣམ་པ་ལའང་ཆོས་ཐམས་ཅད་མཚན་ཉིད་མེད་པར་རྟོགས་པ་དང་། གཟུང་འཛིན་གཉིས་སུ་མེད་པར་རྟོགས་པའི་ལྡོག་པ་བཞི་ཡོད་པ་ལས། དེ་ལ་སྐད་ཅིག་མའི་སྦྱོར་བ་བཞིར་འཇོག་པ་ཡིན་ནོ། །འོ་ན་རྟོགས་རིགས་གཉིས་པོ་དེ་ཇི་ལྟ་བུ་ཞེ་ན། མ་དག་ས་བདུན་དུ་ཐོབ་པའི་ཟག་མེད་ཀྱི་ཡོན་ཏན་རྣམས་ནི་རྣམ་པར་སྨིན་པ་མིན་པ་ཞེས་བརྗོད་དེ། འབད་རྩོལ་དང་བཅས་པའི་སྒོ་ནས་ཐོབ་པའི་ཕྱིར། དེའི་རྟོགས་རིགས་ལ་རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་ཞེས་བྱའོ། །ས་བརྒྱད་པ་ཡན་ཆད་དུ་ཐོབ་པའི་ཡོན་ཏན་རྣམས་ལ་རྣམ་པར་སྨིན་པ་ཞེས་བྱ་སྟེ། འབད་མེད་ལྷུན་གྲུབ་ཏུ་ཐོབ་པའི་ཕྱིར། དེའི་རྟོགས་རིགས་རྣམས་ལ་རྣམ་པར་སྨིན་པའི་ཟག་མེད་ཀྱི་རྟོགས་རིགས་ཞེས་བྱའོ། །ས་བརྒྱད་པ་ཡན་ཆད་དུ་རྟོགས་རིགས་གཉིས་པོ་དེ་ཡོད་པ་ཡིན་གྱི། རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་ནི་མེད་དེ། དེ་ཡན་ཆད་ཀྱི་ཡོན་ཏན་ཐམས་ཅད་རྣམ་པར་སྨིན་པའི་ཡོན་ཏན་ཡིན་པའི་ཕྱིར་རོ། །ཡུམ་དོན་རབ་གསལ་ལས་སྐབས་བདུན་པའི་དཀའ་བའི་གནས་རྣམ་པར་བཤད་པའོ།། །།
སྐབས་བརྒྱད་པ་འབྲས་བུ་ཆོས་སྐུའི་དཀའ་བའི་གནས་རྣམ་པར་བཤད་པ།
ཟག་མེད་ཡོན་ཏན་གཏེར་གྱུར་དྲི་དྲལ་དབྱིངས། །ཐེག་མཆོག་པདྨོ་རྒྱས་མཛད་ལོངས་སྤྱོད་རྫོགས། །དགེ་ལེགས་ཀུན་གྱི་གཞིར་གྱུར་སྤྲུལ་པའི་སྐུ། །མཛད་པར་བཅས་པའི་རྒྱལ་ཡུམ་དེ་ལ་འདུད། །སྐད་ཅིག་མ་གཅིག་པའི་མངོན་པར་རྫོགས། །ཞེས་པའི་སྐབས་སུ། ངག་འདོན་དང་། འབྲས་བུ་ཆོས་སྐུའི་མཚན་ཉིད་གཉིས་ལས། དང་པོ་ནི། བྱམས་མགོན་ཆོས་ཅན། སྐད་ཅིག་མའི་སྦྱོར་བ་བཤད་པའི་འོག་ཏུ། འབྲས་བུ་ཆོས་སྐུ་འཆད་པ་ལ་རྒྱུ་མཚན་ཡོད་དེ། སྐད་ཅིག་མའི་སྦྱོར་བ་རྣམ་པར་སྒོམ་པའི་སྐད་ཅིག་གཉིས་པ་ལ་འབྲས་བུ་ཆོས་ཀྱི་སྐུ་འབྱུང་བའི་ཕྱིར་བྱས་པ་ལ། ཁ་ཅིག་ན་རེ། སྐད་ཅིག་མའི་སྦྱོར་བ་དེ་འབྲས་བུ་ཆོས་སྐུའི་དངོས་རྒྱུ་ཡིན་པར་ཐལ། སྦྱོར་བ་དེའི་རྟགས་དེའི་ཕྱིར། འདོད་ན། དེ་ཆོས་ཅན། དངོས་སུ་སྐྱེད་བྱེད་ཡིན་པར་ཐལ། འདོད་པ་དེའི་ཕྱིར། ཞེས་ཟེར་ན། དེ་ཆོས་ཅན། དེ་སྐྱེད་བྱེད་དུ་ཐལ། དེའི་རྒྱུ་ཡིན་པའི་ཕྱིར། ཁྱབ་པ་ཁས། གཞན་ཡང་ས་དང་པོའི་ཡེ་ཤེས་ཆོས་ཅན། འབྲས་བུ་ཆོས་སྐུ་བརྒྱུད་ནས་སྐྱེད་བྱེད་ཡིན་པར་ཐལ། དེའི་བརྒྱུད་རྒྱུ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། དེའི་རྒྱུ་ཡིན་པ་གང་ཞིག ཁྱོད་དང་དེ་གཉིས་ཀྱི་བར་དུ་ཐེག་ཆེན་གྱི་སྒོམ་ལམ་གྱིས་ཆོད་པའི་ཕྱིར། དང་པོ་མ་གྲུབ་ན། དེར་ཐལ། ལམ་བདེན་འགོག་བདེན་གྱི་རྒྱུ་ཡིན་པའི་ཕྱིར་ཏེ། མྱང་འདས་རྒྱུ་འབྲས་གཞི་གྲུབ་པའི་ཕྱིར། གཉིས་པ་ནི། ཁ་ཅིག སྦྱོར་བཞི་སྒོམ་པའི་རྣམ་སྨིན་མཐར་ཐུག་གང་ཞིག ཟག་མེད་ཆོས་ཀྱི་ཡན་ལག་དུ་མ་དང་ལྡན་པ་ཞེས་སྨྲ་བ་ལ། གཞན་དག་ན་རེ། ལོངས་སྐུའི་དབུ་སྐྲ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དང་པོ་དེར་ཐལ། སངས་རྒྱས་ཀྱི་ཐུན་མོང་མིན་པའི་ཡོན་ཏན་ཡིན་པའི་ཕྱིར། ཕྱི་མ་མ་གྲུབ་ན། དེ་དེར་ཐལ། ལོངས་སྐུ་དེ་དང་ལྡན་པའི་ཕྱིར། རྩ་བར་འདོད་ན། དེ་ཆོས་ཅན། ལོངས་སྐུར་ཐལ། འབྲས་བུ་ཆོས་སྐུ་གང་ཞིག ཁྱོད་དེ་ཡིན་ན་ཁྱོད་ལོངས་སྐུ་ཡིན་དགོས་པའི་ཕྱིར་ཞེས་ཟེར་ན། ཕྱི་ཟུར་མ་གྲུབ་སྟེ། སངས་རྒྱས་སའི་བྱང་ཕྱོགས་སོ་བདུན་དེ་ངོ་བོ་ཉིད་སྐུར་ཐལ། དེ་འབྲས་བུ་ཆོས་སྐུ་ཡིན་པའི་ཕྱིར། སངས་རྒྱས་སའི་བཟོ་སྤྲུལ་སྐུ་དེ་མཆོག་གི་སྤྲུལ་སྐུར་ཐལ། དེ་འབྲས་བུ་ཆོས་སྐུ་ཡིན་པའི་ཕྱིར། ཁྱབ་པ་གཉིས་ཁས། མ་གྲུབ་ན། དེ་ཆོས་ཅན། དེར་ཐལ། སངས་རྒྱས་ཀྱི་སྤྲུལ་སྐུ་ཡིན་པའི་ཕྱིར། ཡང་ཁ་ཅིག རྣམ་མཁྱེན་སྐད་ཅིག་མ་དང་པོའི་གནས་སྐབས་ཀྱི་ས་བདུན་པ་མན་ཆད་ཀྱི་རྟོགས་རིགས་ཆོས་ཅན། མཚན་ཉིད་ཀྱི་ཟུར་སྔ་མ་དེར་ཐལ། འབྲས་བུ་ཆོས་སྐུ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་དེ་མིན་པར་ཐལ། ཁྱོད་རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་ཡིན་པའི་ཕྱིར་ཏེ། ཁྱོད་རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བས་མངོན་དུ་བྱ་རྒྱུའི་ཟག་མེད་ཀྱི་ཡོན་ཏན་ཡིན་པའི་ཕྱིར་ཞེ་ན། ཁྱབ་པ་དང་པོ་ལ། སངས་རྒྱས་སའི་དྲན་པ་ཉེར་གཞག་ཆོས་ཅན། ཁྱོད་སངས་རྒྱས་སའི་ཐུན་མོང་མིན་པའི་ཡོན་ཏན་མིན་པར་ཐལ། ཁྱོད་ཐུན་མོང་བའི་རྣམ་མཁྱེན་གྱི་རྣམ་པ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་དེར་ཐལ། ཁྱོད་སངས་རྒྱས་ཁོ་ནའི་ཁྱད་ཆོས་སུ་གྱུར་པའི་ཡོན་ཏན་ཡིན་པའི་ཕྱིར། ཁྱབ་པ་ཕྱི་མ་ལ། གཟུགས་སྐུ་གཉིས་ཆོས་ཅན། རང་དོན་དོན་དམ་པའི་སྐུ་ཡིན་པར་ཐལ། ཡེ་ཤེས་ཀྱི་ཚོགས་ཀྱི་འབྲས་བུར་གྱུར་པའི་སྐུ་ཡིན་པའི་ཕྱིར། ངོ་བོ་ཉིད་སྐུའང་ཆོས་ཅན། གཞན་དོན་ཀུན་རྫོབ་པའི་སྐུ་ཡིན་པར་ཐལ། བསོད་ནམས་ཀྱི་ཚོགས་ཀྱི་འབྲས་བུར་གྱུར་པའི་སྐུ་ཡིན་པའི་ཕྱིར། ཁྱབ་པ་གཉིས་ཁས། གཞན་ཡང་སངས་རྒྱས་འཕགས་པའི་རྒྱུད་ཀྱི་སྦྱིན་པ་ནས་དཔེ་བྱད་བཟང་པོ་བརྒྱད་ཅུའི་བར་གྱི་ཟག་མེད་ཀྱི་ཡོན་ཏན་རྣམས་ཆོས་ཅན། རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་ཡིན་པར་ཐལ། རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བས་མངོན་དུ་བྱ་རྒྱུའི་ཟག་མེད་ཀྱི་ཡོན་ཏན་ཡིན་པའི་ཕྱིར། འདོད་ན། སངས་རྒྱས་སའི་ཟག་མེད་ཀྱི་ཡོན་ཏན་ཡིན་ན་རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་ཡིན་དགོས་པར་ཐལ་ལོ། །ཐུབ་པའི་ངོ་བོ་ཉིད་སྐུ་ནི། །ཞེས་པའི་སྐབས་སུ། ངག་དོན་ལ་དཔྱད་པ་དང་། ངོ་བོ་ཉིད་སྐུ་སངས་རྒྱས་ཡིན་མིན་ལ་དཔྱད་པ། སྐུའི་གྲངས་ངེས་ལ་དཔྱད་པ་དང་གསུམ་ལས། དང་པོ་ལ་སངས་རྒྱས་འཕགས་པའི་རྒྱུད་ཀྱི་འགོག་བདེན་ཆོས་ཅན། ངོ་བོ་ཉིད་སྐུ་ཡིན་ཏེ། ཟག་མེད་ཀྱི་ཡེ་ཤེས་ཡོན་ཏན་དུ་ལྡན་པའི་དག་པ་གཉིས་ལྡན་གྱི་འགོག་བདེན་ཡིན་པའི་ཕྱིར། དེ་ལ་ཁ་ཅིག་ན་རེ། ས་བརྒྱད་པ་ལ་གནས་པའི་བྱང་སེམས་ཀྱི་རྒྱུད་ཀྱི་འགོག་བདེན་ཆོས་ཅན། དེར་ཐལ། དེའི་ཕྱིར་ཏེ། ཟག་མེད་ཀྱི་ཡེ་ཤེས་ཡོན་ཏན་དུ་ལྡན་པ་གང་ཞིག དག་པ་གཉིས་ལྡན་གྱི་འགོག་བདེན་ཡིན་པའི་ཕྱིར། དང་པོ་མ་གྲུབ་ན། དེར་ཐལ། ས་བརྒྱད་པ་ལ་གནས་པའི་བྱང་སེམས་ཀྱི་རྒྱུད་ལ་ཟག་མེད་ཀྱི་ཡེ་ཤེས་ཡོད་པ་གང་ཞིག སངས་རྒྱས་ཀྱི་འགོག་བདེན་དེ་ལ་དེ་ཡོན་ཏན་དུ་ལྡན་པའི་ཕྱིར། ཕྱི་མ་མ་གྲུབ་ན། དེ་ཆོས་ཅན། དེར་ཐལ། གློ་བུར་གྱི་དྲི་མས་དག་པའི་དག་པ་དང་ལྡན་པའི་འགོག་བདེན་ཡིན་པའི་ཕྱིར་ཏེ། ས་བདུན་པའི་ངོས་སྐལ་གྱི་དྲིས་མས་དག་པའི་དག་པ་དང་ལྡན་པའི་འགོག་བདེན་ཡིན་པའི་ཕྱིར་དང་། ས་བཅུ་པོ་རེ་རེ་ལ་གློ་བུར་དྲི་བྲལ་གྱི་ཆོས་ཉིད་གསར་མཐོང་རེ་རེ་ཡོད་པའི་ཕྱིར་རོ་ཞེས་ཟེར་ན། འོ་ན་ས་བདུན་པའི་ངོས་སྐལ་གྱི་དྲི་མས་དག་པའི་དག་པ་དང་ལྡན་པའི་འགོག་བདེན་ཡིན་ན་གློ་བུར་གྱི་དྲི་མས་དག་པའི་ཁྱབ་པ་ཡོད་པར་ཐལ། སྔ་མ་ལ་ཁྱབ་པ་ཡོད་པའི་ཕྱིར། འདོད་ན། ས་བརྒྱད་པའི་འགོག་བདེན་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། ཤེས་སྒྲིབ་མ་སྤངས་པའི་ཕྱིར། གཉིས་པ་ནི། གཞོན་ནུ་བློ་ལྡན་སོགས་ན་རེ། ངོ་བོ་ཉིད་སྐུ་སངས་རྒྱས་མིན་ཏེ། གལ་ཏེ་ཡིན་ན། དེ་ཆོས་ཅན། སེམས་ཅན་གྱི་དོན་བྱེད་པར་ཐལ། སངས་རྒྱས་ཡིན་པའི་ཕྱིར། འདོད་ན། དེ་ཅིག་ཅར་དུ་བྱེད་པར་ཐལ། འདོད་པ་གང་ཞིག རྟག་པ་ཡིན་པའི་ཕྱིར། འདོད་ན། སེམས་ཅན་ཐམས་ཅད་ཅིག་ཅར་དུ་སྨིན་པར་ཐལ། འདོད་པ་དེའི་ཕྱིར། ཡང་དེ་ཆོས་ཅན། ཤེས་བྱ་མཁྱེན་པར་ཐལ། སངས་རྒྱས་ཡིན་པའི་ཕྱིར། འདོད་ན། དེ་ཅིག་ཅར་དུ་མཁྱེན་པར་ཐལ། འདོད་པ་གང་ཞིག རྟག་པ་ཡིན་པའི་ཕྱིར། འདོད་ན། ཤེས་བྱ་ཐམས་ཅད་ཅིག་ཅར་དུ་གྲུབ་པར་ཐལ་ལོ། །ཡང་དེ་ཆོས་ཅན། སྐྱེས་བུ་དང་མཁྱེན་པ་གང་རུང་དུ་ཐལ། ཤེས་བྱ་མཁྱེན་པའི་ཕྱིར། ཡང་དེ་ཆོས་ཅན། དངོས་པོ་བརྒྱད་ཀྱི་ནང་ཚན་དུ་ཐལ། སྐབས་བརྒྱད་པའི་བསྟན་བྱའི་གཙོ་བོར་གྱུར་པའི་སངས་རྒྱས་ཀྱི་སྐུ་ཡིན་པའི་ཕྱིར། འདོད་ན། དངོས་པོར་ཐལ་ལོ། །ཡང་རྣམ་མཁྱེན་བདེན་པས་སྟོང་པའི་བདེན་སྟོང་དེ་སངས་རྒྱས་སུ་ཐལ། ངོ་བོ་ཉིད་སྐུ་དེ་སངས་རྒྱས་ཡིན་པའི་ཕྱིར། འདོད་ན། དེ་གློ་བུར་དྲི་བྲལ་གྱི་ཆོས་ཉིད་དུ་ཐལ། འདོད་པ་དེའི་ཕྱིར། འདོད་ན། ས་དང་པོའི་བྱང་སེམས་དེས་དེ་མ་རྟོགས་པར་ཐལ། འདོད་པ་དེའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་དེ་མངོན་སུམ་རྟོགས་པར་ཐལ། ཁྱོད་ཀྱིས་ཆོས་ཐམས་ཅད་ཀྱི་བདེན་སྟོང་མངོན་སུམ་དུ་རྟོགས་པའི་ཕྱིར་ཟེར་རོ། །དང་པོ་ལ། སེམས་ཅན་ཐམས་ཅད་ཅིག་ཅར་དུ་སྨིན་པར་ཐལ། མཆོག་གི་སྤྲུལ་སྐུ་དེས་སེམས་ཅན་གྱི་དོན་ཅིག་ཅར་དུ་བྱེད་པའི་ཕྱིར་ཏེ། དེས་དགེ་སློང་ལྔ་སྟོང་ཙམ་གྱི་དོན་ཅིག་ཅར་དུ་བྱེད་པའི་ཕྱིར་ཏེ། དེས་ཆོས་གཅིག་བསྟན་པ་ལ་བརྟེན་ནས་སེམས་ཅན་ལྔ་སྟོང་ཙམ་གྱིས་བྱང་ཆུབ་མཆོག་ཏུ་སེམས་བསྐྱེད་པ་དང་། ཅིག་ཅར་དུ་རྒྱུན་དུ་ཞུགས་པའི་འབྲས་བུ་ཐོབ་པ་སོགས་བཤད་པའི་ཕྱིར། གཉིས་པ་ལ་ཤེས་བྱ་ཐམས་ཅད་ཅིག་ཅར་དུ་གྲུབ་པར་ཐལ་བ་དང་། དུས་གསུམ་པོ་ཅིག་ཅར་དུ་གྲུབ་པར་ཐལ། སངས་རྒྱས་ཀྱི་ཡེ་ཤེས་དེས་དེ་གཉིས་ཅིག་ཅར་དུ་མཁྱེན་པའི་ཕྱིར་ཏེ། རིམ་བཞིན། ཡེ་ཤེས་སྙིང་པོས། མཁྱེན་པའི་སྐད་ཅིག་གཅིག་གི་ནི། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་གསུངས་པའི་ཕྱིར་དང་། སངས་རྒྱས་ཀྱི་ཡེ་ཤེས་སྐད་ཅིག་མ་གཅིག་གིས་དུས་གསུམ་མཁྱེན་པའི་ཕྱིར། གསུམ་པ་ལ། སངས་རྒྱས་ཆོས་ཅན། དེར་ཐལ། དེའི་ཕྱིར། བཞི་པ་ལ། ཆོས་ཐམས་ཅད་ཆོས་ཅན། རྣམ་མཁྱེན་མཚོན་བྱེད་ཀྱི་ཆོས་བཅུ་གང་རུང་དུ་ཐལ། དམིགས་པ་དག་དང་ཞེས་པའི་གཞུང་གིས་བསྟན་བྱའི་གཙོ་བོར་གྱུར་པའི་ཐེག་ཆེན་སྒྲུབ་པའི་དམིགས་པ་ཡིན་པའི་ཕྱིར། ཁྱབ་གསལ་ཁས་བླངས། འདོད་ན། རྣམ་མཁྱེན་མཚོན་བྱེད་དུ་ཐལ། འདོད་པའི་ཕྱིར། ཁྱབ་པ་ཁས། ལྔ་པ་ལ། ཆོས་ཞེས་པའི་རང་བཞིན་རྣམ་དག་གི་ཆོས་ཉིད་མངོན་སུམ་རྟོགས་ན། ཆོས་ཞེས་པའི་ཆོས་ཉིད་མངོན་སུམ་རྟོགས་པས་ཁྱབ་པར་ཐལ། ས་དང་པོའི་བྱང་སེམས་དེས་ཆོས་ཐམས་ཅད་ཀྱི་ཆོས་ཉིད་མངོན་སུམ་རྟོགས་པའི་ཕྱིར། རྟགས་ཁས། འདོད་ན། ས་དང་པོའི་བྱང་སེམས་ཆོས་ཅན། གློ་བུར་དྲི་བྲལ་གྱི་ཆོས་ཉིད་མངོན་སུམ་རྟོགས་པར་ཐལ། དེའི་རང་བཞིན་རྣམ་དག་གི་ཆོས་ཉིད་མངོན་སུམ་རྟོགས་པའི་ཕྱིར། འདོད་མི་ནུས་ཏེ། སློབ་པའི་གང་ཟག་ཡིན་པའི་ཕྱིར། དེ་ལ་ཁོ་ན་རེ། ས་གཉིས་པའི་ཡེ་ཤེས་ཆོས་ཅན། དེར་ཐལ། དེའི་ཕྱིར། འདོད་ན། རྟོགས་པར་ཐལ། མཐོང་སྤང་གི་དྲི་མ་དང་བྲལ་བའི་ཆོས་ཉིད་མངོན་སུམ་རྟོགས་པ་གང་ཞིག གློ་བུར་གྱི་དྲི་མ་ཡིན་པའི་ཕྱིར་ཟེར་ན། ས་གཉིས་པའི་བྱང་སེམས་ཆོས་ཅན། ཁྱོད་ཀྱི་རྒྱུད་ལ་དག་པ་གཉིས་ལྡན་གྱི་འགོག་བདེན་ཡོད་པར་ཐལ། ཁྱོད་ཀྱི་རྒྱུད་ལ་མཐོང་སྤང་གི་དྲི་མས་དག་པའི་འགོག་བདེན་ཡོད་པ་གང་ཞིག དེ་གློ་བུར་བ་ཡིན་པའི་ཕྱིར། གསུམ་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག མངོན་རྟོགས་རྒྱན་གྱི་དགོངས་པ་སངས་རྒྱས་ཀྱི་སྐུ་ལ་བཞིར་གྲངས་ངེས་པ་ཡིན་ཏེ། རྟོགས་ཡེ་ཆོས་སྐུ་དེ་སངས་རྒྱས་ཀྱི་སྐུ་ཡིན་པ་གང་ཞིག དེ་ངོ་བོ་ཉིད་སྐུ་དང་། གཟུགས་སྐུ་གཉིས་པོ་གང་རུང་མིན་པའི་ཕྱིར། རྟགས་དང་པོ་གྲུབ་སྟེ། ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་བཤད་ཟིན་པའི་མཇུག་ཏུ་ཆོས་ཀྱི་སྐུ་ཞེས་བརྗོད་པ་ཡིན་ཞེས་གསུངས་པའི་ཕྱིར་དང་། དེ་ཆོས་ཀྱི་སྐུ་དང་དེ་རྣམ་བརྒྱད་ཅེས་པའི་སྐབས་ནས་བསྟན་པའི་ཆོས་སྐུ་དང་དོན་གཅིག་ཡིན་པའི་ཕྱིར། ཡང་བཞིར་ངེས་ཏེ། ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་པོ་དེ་སྐུ་དང་པོ་གསུམ་གང་རུང་མིན་པ་གང་ཞིག ཆོས་སྐུ་མཛད་པ་དང་བཅས་པ་ཞེས་པའི་སྐབས་ནས་བསྟན་པའི་མཛད་པ་དང་བཅས་པའི་སྐུ་ཡིན་པའི་ཕྱིར། ཡང་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་པོ་དེ་སྐུ་གསུམ་ལས་ལོགས་སུ་གྱུར་པའི་སངས་རྒྱས་ཀྱི་སྐུར་ཐལ། དེ་སངས་རྒྱས་ཀྱི་སྐུ་གང་ཞིག དེ་གསུམ་གང་རུང་མིན་པའི་ཕྱིར། འདོད་ན། སངས་རྒྱས་ཀྱི་སྐུ་དེ་ལ་གསུམ་དུ་མ་ངེས་པར་ཐལ་ལོ་ཞེས་སྨྲའོ། །འོ་ན་ཆོས་སྐུ་མཛད་པ་དང་བཅས་པ་ཞེས་པའི་སྐབས་ཀྱི་ཆོས་སྐུ་དེ་ཡིན་ན་ཡེ་ཤེས་ཆོས་སྐུ་ཡིན་དགོས་པར་ཐལ། བྱང་ཆུབ་ཕྱོགས་མཐུན་ཚད་མེད་དང་། །ཞེས་པའི་གཞུང་འདི་ཁོ་ན་ཆོས་སྐུ་མཛད་པ་དང་བཅས་པ་ཞེས་པའི་སྐབས་ཀྱི་རྒྱས་བཤད་ཡིན་པའི་ཕྱིར། རྟགས་ཁས། འདོད་ན། ངོ་བོ་ཉིད་སྐུ་དང་། ལོངས་སྐུ། སྤྲུལ་སྐུ་གསུམ་པོ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། མཐར་གྱིས་པའི་ཆོས་བཅུ་གསུམ་པོ་དེ། མཐར་གྱིས་པ། རྣམ་གསུམ་རྣམ་བཅུ་ཞེས་པའི་སྐབས་ཀྱི་མཐར་གྱིས་པ་ཡིན་པའི་ཕྱིར་རོ། །གཞན་ཡང་ཆོས་སྐུ་མཛད་པ་དང་བཅས་པ་ཞེས་པའི་ཆོས་སྐུ་ཞེས་པའི་ཚིག་དེ། ངོ་བོ་ཉིད་ཡོངས་རྫོགས་བཅས་དང་། །ཞེས་པའི་ངོ་བོ་ཉིད་ཅེས་པའི་སྒྲའི་མཇུག་ཐོག་ཏུ་བརྗོད་རིགས་པར་ཐལ། དེའི་སྐབས་ཀྱི་ཆོས་སྐུ་དེ། བྱང་ཆུབ་ཕྱོགས་མཐུན་ཚད་མེད་དང་། །ཞེས་པའི་སྐབས་ཀྱི་ཡེ་ཤེས་ཆོས་སྐུ་ཡིན་པའི་ཕྱིར། རྟགས་ཁས། དེ་ལ་མཁན་པོ་རྣམ་པར་སྣང་མཛད་ན་རེ། སྐྱོན་མེད་དེ། ཕྲིན་ལས་ཉེར་བདུན་པོ་དེ་ཡེ་ཤེས་ཆོས་སྐུ་ཁོ་ནའི་ཕྲིན་ལས་ཡིན་པར་ཤེས་པའི་ཕྱིར་དུ། ལུས་རྣམ་གཞག་ཏུ་ཆོས་སྐུ་མཇུག་ཏུ་སྨོས་པ་ཡིན་པའི་ཕྱིར་དང་། རྣམ་པ་གཅིག་ཏུ་ལུས་རྣམ་གཞག་གི་ཚིགས་བཅད་སྦྱར་བདེ་བའི་ཆེད་ཡིན་པའི་ཕྱིར་ཞེས་གསུངས་སོ། །འདི་ནི་གཞུང་ལུགས་ཆེན་པོ་འཆད་པ་ལ་འཁྲུལ་བར་སེམས་ཏེ། སེམས་བསྐྱེད་པ་དང་པོ་དང་ཐ་མའི་ལས་བསྟན་པས་ཞེས་པའི་ཐ་མ་དེ་སྤྲུལ་སྐུ་ལ་བྱེད་དམ། ཕྲིན་ལས་ལ་བྱེད། དང་པོ་ལྟར་ན་ཕྲིན་ལས་ཉེར་བདུན་པོ་དེ་སྐུ་བཞིའི་ནང་ནས་སྤྲུལ་སྐུའི་ཕྲིན་ལས་སུ་ཐལ། དམ་བཅའ་དེའི་ཕྱིར། འདོད་ན། སྐུ་བཞིའི་ནང་ནས་ཡེ་ཤེས་ཆོས་སྐུ་ཁོ་ནའི་ཕྲིན་ལས་སུ་འདོད་པ་དང་འགལ་ལོ། །ཕྱི་མ་ལྟར་ན་ནི། ཕྲིན་ལས་དོན་བདུན་ཅུའི་ཐ་མར་ཐལ། ཁས་བླངས་དེའི་ཕྱིར། འདོད་ན། ཕྲིན་ལས་དེ་ཆོས་སྐུ་མཚོན་བྱེད་ཀྱི་ཆོས་གཅིག་ཡིན་པར་ཐལ། འདོད་པའི་ཕྱིར། འདོད་ན། ཆོས་སྐུ་མཚོན་བྱེད་ཀྱི་ཆོས་དེ་ལ་རྣམ་པ་ལྔ་ཡོད་པར་ཐལ། སངས་རྒྱས་ཀྱི་སྐུ་དེ་ལ་བཞིར་གྲངས་ངེས་པ་གང་ཞིག ཕྲིན་ལས་དེ་ཆོས་སྐུ་མཚོན་བྱེད་ཀྱི་ཆོས་གཅིག་ཡིན་པའི་ཕྱིར། སྒྲུབ་བྱེད་ཕྱི་མ་ལ། ལུས་རྣམ་གཞག་ཏུ། དེ་བཞིན་གཞན་པ་སྤྲུལ་པ་དང་། །ཆོས་སྐུ་མཛད་པ་དང་བཅས་པ། །ཞེས་བརྗོད་རིགས་པར་ཐལ། ལུས་རྣམ་གཞག་ཏུ་ཆོས་སྐུ་རྗེས་སུ་སྨོས་པ་དེ་ཚིགས་བཅད་སྦྱར་བདེ་བའི་ཆེད་དང་། དེའི་གནས་སྐབས་ཀྱི་ཆོས་སྐུ་དེ་ཡེ་ཤེས་ཆོས་སྐུ་ཁོ་ན་ཡིན་པ་གང་ཞིག དེ་བཞིན་གཞན་པ་སྤྲུལ་པ་ནི། །ཆོས་སྐུ་ཞེས་པ་དང་། དེ་བཞིན་གཞན་པ་སྤྲུལ་པ་དང་། ཆོས་སྐུ་ཞེས་པ་གཉིས་ལ་ཚིགས་བཅད་སྦྱར་བདེ་མི་བདེའི་ཁྱད་པར་མེད་པའི་ཕྱིར། རྩ་བའི་ཐལ་འགྱུར་ཕྱི་མ་ལ་ལོངས་སྐུའི་མཚན་དཔེ་དེ་སྐུ་གསུམ་ལས་ལོགས་སུ་གྱུར་པའི་སངས་རྒྱས་ཀྱི་སྐུ་ཡིན་པར་ཐལ། དེ་སངས་རྒྱས་ཀྱི་སྐུ་གང་ཞིག དེ་གསུམ་གང་རུང་མིན་པའི་ཕྱིར། ཁྱབ་པ་ཁས། དང་པོ་མ་གྲུབ་ན། ཡེ་ཤེས་ཆོས་སྐུ་དེ་སངས་རྒྱས་ཀྱི་སྐུ་ཡིན་པའི་སྒྲུབ་བྱེད་ཅི་ཡོད། སྦྱོར་བཞི་སྒོམ་པའི་རྣམ་སྨིན་མཐར་ཐུག་ཡིན་པའི་ཕྱིར་ཞེ་ན། འདི་ལའང་མཚུངས་སོ། །གལ་ཏེ་ཡེ་ཤེས་ཉེར་གཅིག་གི་མཇུག་ཏུའང་། ཆོས་ཀྱི་སྐུ་ཞེས་བརྗོད་པ་ཡིན། །ཞེས་གསུངས་པའི་ཕྱིར་ཞེ་ན། དེ་ནི་ཆོས་ཉིད་ཀྱི་སྐུ་ལ་ཆོས་སྐུར་བྱས་པ་ཡིན་གྱི། དངོས་པོ་བརྒྱད་ཀྱི་ནང་ཚན་དུ་གྱུར་པའི་ཆོས་སྐུ་དང་དོན་མི་གཅིག་པ་ནི་འོག་ཏུ་བཤད་པར་བྱའོ། །གཞན་ཡང་སྟོབས་སོགས་བྲལ་བའི་ཡོན་ཏན་སོ་གཉིས་པོ་དེ་རང་དོན་དོན་དམ་པའི་སྐུ་ལས་ལོགས་སུ་གྱུར་པའི་སངས་རྒྱས་ཀྱི་སྐུར་ཐལ། ཡེ་ཤེས་སྡེ་ཚན་ཉེར་གཅིག་པོ་དེ་ངོ་བོ་ཉིད་སྐུ་ལས་ལོགས་སུ་གྱུར་པའི་སངས་རྒྱས་ཀྱི་སྐུ་ཡིན་པའི་ཕྱིར། འདོད་ན། རང་དོན་གཞན་དོན་སྐུ་དང་ནི། །ཞེས་པའི་སྐབས་སུ། སངས་རྒྱས་ཀྱི་སྐུ་དེ་ལ་རང་དོན་དོན་དམ་པའི་སྐུ་དང་། གཞན་དོན་ཀུན་རྫོབ་པའི་སྐུ་གཉིས་སུ་གྲངས་མ་ངེས་པར་ཐལ། འདོད་པ་དེའི་ཕྱིར། ཁྱབ་སྟེ། ཡེ་ཤེས་སྡེ་ཚན་ཉེར་གཅིག་པོ་ངོ་བོ་ཉིད་སྐུ་ལས་ལོགས་སུ་གྱུར་པའི་སངས་རྒྱས་ཀྱི་སྐུ་ཡིན་ན་ངོ་བོ་ཉིད་ལོངས་རྫོགས་བཅས་དང་། ཞེས་པའི་སྐབས་སུ། སངས་རྒྱས་ཀྱི་སྐུ་ལ་གསུམ་དུ་གྲངས་མ་ངེས་པས་ཁྱབ་པར་ཁས་བླངས་པའི་ཕྱིར། རྩ་བར་འདོད་ན། དེའི་སྐབས་སུ་དེ་ལ་གཉིས་སུ་གྲངས་ངེས་པར་ཐལ། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་པར་བྱ། །ཞེས་པའི་སྐབས་སུ་གསུམ་དུ་གྲངས་ངེས་པའི་ཕྱིར། དེ་ལ་ཁོ་ན་རེ། སངས་རྒྱས་ཀྱི་སྐུ་ལ་གཉིས་སུ་གྲངས་ངེས་པར་ཐལ། དེ་ལ་རང་དོན་གྱི་སྐུ་དང་། གཞན་དོན་གྱི་སྐུ་གཉིས་སུ་གྲངས་ངེས་པའི་ཕྱིར། འདོད་ན། དེ་ལ་གསུམ་དུ་གྲངས་མ་ངེས་པར་ཐལ། འདོད་པའི་ཕྱིར་ཞེ་ན། མ་ཁྱབ་སྟེ། ཐེག་ཆེན་གྱི་སྒོམ་ལམ་དེ་ལ་གཉིས་སུ་གྲངས་ངེས་པར་ཐལ། ཟག་བཅས་སྒོམ་ལམ་དང་ཟག་མེད་སྒོམ་ལམ་གཉིས་སུ་གྲངས་ངེས་པའི་ཕྱིར། འདོད་ན། དེ་ལ་དགུར་གྲངས་མ་ངེས་པར་ཐལ། འདོད་པའི་ཕྱིར། ཁྱབ་པ་ཁས། འདོད་ན། དེ་ལ་དགུར་གྲངས་ངེས་པར་ཐལ། དེ་ལ་ཆུང་ངུའི་ཆུང་ངུ་སོགས་དགུར་ངེས་པའི་ཕྱིར། ཁྱབ་པ་ཁས། ཡང་ཁོ་ན་རེ། ཆོས་སྐུ་མཛད་པ་དང་བཅས་པ། །ཞེས་པའི་སྐབས་ཀྱི་ཆོས་སྐུ་དེ་རྟོགས་ཡེ་ཆོས་སྐུ་ཁོ་ན་ཡིན་ཏེ། ཕྲིན་ལས་ཉེར་བདུན་པོ་དེ་རྟོགས་ཡེ་ཆོས་སྐུ་ཁོ་ནའི་ཕྲིན་ལས་ཡིན་པའི་ཕྱིར་ཏེ། ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་འདོད། །ཅེས་གསུངས་པའི་ཕྱིར་དང་། ཕྲིན་ལས་ཉེར་བདུན་པོ་དེ་རྟོགས་ཡེ་ཆོས་སྐུས་བདག་རྐྱེན་བྱས་པ་ལ་བརྟེན་ནས་བྱུང་བའི་ཕྱིར་ཞེ་ན། སྔ་མ་ལ། ཆོས་སྐུ་ཕྲིན་ལས་འབྲས་བུ་ནི། །ཞེས་པའི་སྐབས་ཀྱི་ཆོས་སྐུ་དེ་རྟོགས་ཡེ་ཆོས་སྐུ་ཁོ་ནར་ཐལ། ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་འདོད། །ཅེས་པའི་སྐབས་ཀྱི་ཆོས་སྐུ་དེ་རྟོགས་ཡེ་ཆོས་སྐུ་ཁོ་ན་ཡིན་པའི་ཕྱིར། འདོད་ན། སྦྱོར་བཞི་བསྒོམས་པའི་རྣམ་སྨིན་མཐར་ཐུག་ཡིན་ན། རྟོགས་ཡེ་ཆོས་སྐུ་ཁོ་ན་ཡིན་དགོས་པར་ཐལ། འདོད་པའི་ཕྱིར། ཁྱབ་སྟེ། དེ་མཐའ་དེ་ཡི་རྣམ་སྨིན་ནི། །ཞེས་པའི་སྐབས་ཀྱི་རྣམ་སྨིན་དེ་དང་། ཆོས་སྐུ་ཕྲིན་ལས་འབྲས་བུ་ནི། །ཞེས་པའི་སྐབས་ཀྱི་ཆོས་སྐུ་གཉིས་དོན་གཅིག་པའི་ཕྱིར། ལེགས་པར་སོམས་ཤིག ཡང་ཁོ་ན་རེ། རྟོགས་ཡེ་ཆོས་སྐུ་དེ། ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་འདོད། །ཅེས་པའི་སྐབས་ཀྱི་ཆོས་སྐུ་དང་དོན་གཅིག་པར་ཐལ། རྣམ་པ་ཐམས་ཅད་མཁྱེན་ཉིད་དང་། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་སྐབས་ཀྱི་ཆོས་སྐུ་དང་། ཆོས་ཀྱི་སྐུ་ཡི་ཕྲིན་ལས་ནི། །ཞེས་པའི་སྐབས་ཀྱི་ཆོས་སྐུ་གཉིས་དོན་གཅིག་པའི་ཕྱིར་ཞེ་ན། མ་གྲུབ་སྟེ། གཞུང་སྔ་མའི་ཆོས་སྐུ་དེ་ངོ་བོ་ཉིད་སྐུ་ཁོ་ན་ལ་བྱེད་རིགས་པའི་ཕྱིར། མ་གྲུབ་ན། སྡེ་ཚན་ཉེར་གཅིག་པོ་དེ་གཞུང་དེའི་སྐབས་ཀྱི་ཆོས་སྐུར་ཐལ། མ་གྲུབ་པ་དེའི་ཕྱིར། འདོད་ན། ལོངས་སྐུའི་མཚན་དཔེ་དེ། ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པའི་སྐབས་ཀྱི་ལོངས་སྐུར་ཐལ། འདོད་པའི་ཕྱིར། ཁོ་ན་རེ། མ་ཁྱབ་སྟེ། མཚན་དཔེས་བརྒྱན་པའི་སྐུ་དེ་དེའི་སྐབས་ཀྱི་ལོངས་སྐུ་ཡིན་པའི་ཕྱིར་ཞེ་ན། འོ་ན་སྡེ་ཚན་ཉེར་གཅིག་པོ་དེ། ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་སྐབས་ཀྱི་ཆོས་སྐུ་མིན་པར་ཐལ། སྡེ་ཚན་ཉེར་གཅིག་ཡོན་ཏན་དུ་ལྡན་པའི་དག་པ་གཉིས་ལྡན་གྱི་འགོག་བདེན་དེ། དེའི་སྐབས་ཀྱི་ཆོས་སྐུ་ཡིན་པའི་ཕྱིར། གཉིས་པ་ལ། སྤྱིར་ཕར་ཕྱིན་ཐེག་པའི་སྐབས་སུ་སྐུ་གསུམ་དུ་གྲངས་ངེས་པ། བྱེ་བྲག་ཏུ་བྱམས་ཆོས་ཀྱི་དགོངས་པ་ལ་སྐུ་གསུམ་དུ་གྲངས་ངེས་པ། ཁྱད་པར་དུ་ས་སྐྱ་པའི་བཞེད་པ་ལ་སྐུ་གསུམ་དུ་བཞེད་པ་དང་གསུམ་གྱི། དང་པོ་ནི་ཕར་ཕྱིན་ཐེག་པ་ལ་གྲུབ་མཐའ་སྨྲ་བ་བཞི་ལས། བྱེ་བྲག་སྨྲ་བའི་ལུགས་ལ་ལོངས་སྐུ་མེད་པས་ཆོས་སྐུ་དང་གཟུགས་སྐུ་གཉིས་གསུངས་ཤིང་། དེ་ལས་གཞན་པའི་སྐུ་བཤད་པ་མེད་ལ། གཟུགས་སྐུའང་ཤཱཀྱ་ཐུབ་པ་ལྟ་བུ་ལ་འདོད་ཅིང་། དེ་ལ་སྤྲུལ་སྐུའི་ཐ་སྙད་མི་བྱེད་དེ། རང་རྒྱུད་པར་ཁས་ལེན་པའི་ཕྱིར། མདོ་སྡེ་པའི་ལུགས་ལ་སྐུ་གསུམ་དུ་གྲངས་ངེས་ཏེ། རྟོག་པའི་དྲྭ་བ་རྣམ་བསལ་ཞིང་། །ཞེས་པའི་སྐབས་སུ་སྐུ་གསུམ་བཤད་པ་དེ་མདོ་སེམས་ཐུན་མོང་བ་ཡིན་པའི་ཕྱིར་དང་། ཀུན་བཏུས་ལས། སྐུ་གསུམ་གྱི་རྣམ་གཞག་གསུངས་པ་དེ། རྗེ་བཙུན་ལྟར་ན་མདོ་སྡེ་པའི་ལུགས་ཡིན་ཞིང་། སྔ་རབས་ཀྱི་མཁས་པ་གཞན་ལྟར་ན་མདོ་སེམས་ཐུན་མོང་བའི་ལུགས་ཡིན་པའི་ཕྱིར། སེམས་ཙམ་པའི་ལུགས་ལ་སྐུ་གསུམ་དུ་ངེས་ཏེ། སེམས་ཙམ་པའི་ཐུན་མོང་མ་ཡིན་པའི་གཞུང་ལུགས་ཐེག་བསྡུས་ལས་སྐུ་གསུམ་གྱི་རྣམ་གཞག་ཁོ་ན་གསུངས་པའི་ཕྱིར། དབུ་མ་པའི་ལུགས་ལའང་གསུམ་དུ་ངེས་ཏེ། ཀླུ་སྒྲུབ་ཀྱི་བསྟོད་ཚོགས་ལས། སྐུ་གསུམ་ལ་བསྟོད་པ་མཛད་ཀྱི། བཞི་ལ་བསྟོད་པ་མ་མཛད་པའི་ཕྱིར་དང་། དབྱིག་གཉེན་གྱི་ཀྱང་སྐུ་གསུམ་ལ་བསྟོད་པ་མཛད་པའི་ཕྱིར་དང་། མགོན་པོ་བྱམས་པས་རྒྱན་གཉིས་རྒྱུད་བླ་དང་གསུམ་ལས། སྐུ་གསུམ་གྱི་རྣམ་གཞག་མཛད་པའི་ཕྱིར་དང་། སློབ་དཔོན་སེང་གེ་བཟང་པོས། རྣམ་པ་ཀུན་གྱི་མཆོག་ལྡན་སྐུ་ནི་གསུམ་པོ་ངེས་ཐོབ་ཤོག །ཅེས་གསུངས་པའི་ཕྱིར། གཉིས་པ་ནི། རྒྱུད་བླར་རིགས་ཀྱི་ལེའུའི་སྐབས་སུ་སྐུ་གསུམ་ཁོ་ནར་གསུངས་ཤིང་། བྱང་ཆུབ་ལེའུའི་སྐབས་སུའང་། ངོ་བོ་རྒྱུ་འབྲས་ལས་ལྡན་འཇུག་པ་རྟགས་བསམ་གྱི་མི་ཁྱབ་པ་དང་རྣམ་པ་བརྒྱད་ཀྱིས་བྱང་ཆུབ་གཏན་ལ་ཕབ་པའི་འཇུག་པའི་སྐབས་སུ་སྐུ་གསུམ་གྱི་དབྱེ་བ་གསུངས་པ་དང་། མདོ་སྡེ་རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་པར་བྱ། །ཞེས་པ་དང་། སྐུ་གསུམ་དག་གིས་བྱང་ཆུབ་ཆེ། །རྣམ་པ་སྐུ་བརྙེས་ཐམས་ཅད་དུ། །ཞེས་སྐུ་གསུམ་གྱི་དབྱེ་བ་ཁོ་ན་གསུངས་པ་དང་། མངོན་རྟོགས་རྒྱན་འདིར་ཡང་། ཆོས་ཀྱི་སྐུ་དང་དེ་རྣམ་བརྒྱད། །ཅེས་པའི་ཆོས་སྐུ་ངོས་འཛིན་པ་ལ། ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་ཞེས་མགོན་པོ་བྱམས་པའི་དགོངས་པའང་སྐུ་གསུམ་དུ་གནས་པ་ཁོ་ནའོ། །དེས་ན་གཞུང་འདིར། ཆོས་ཀྱི་སྐུ་དང་དེ་རྣམ་བརྒྱད། །ཅེས་དང་། ཆོས་སྐུ་མཛད་པ་དང་བཅས་པ། །ཞེས་དང་། ཆོས་ཀྱི་སྐུ་ཞེས་བརྗོད་པ་ཡིན། །ཞེས་དང་། ཆོས་སྐུ་ཕྲིན་ལས་འབྲས་བུ་ནི། །ཞེས་དང་། ཆོས་ཀྱི་སྐུ་ཡི་ཕྲིན་ལས་ནི། །ཞེས་ཆོས་སྐུའི་ཐ་སྙད་གསུངས་པ་ལས། ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་ཆོས་སྐུ་ནི་ཆོས་ཉིད་ཀྱི་སྐུ་ལ་སྡེབ་སྦྱོར་གྱི་དབང་གིས་ངོ་བོ་ཉིད་རྐྱེན་ཏཱ་མི་མངོན་པར་བྱས་ནས་ཆོས་ཀྱི་སྐུ་ཞེས་བརྗོད་པ་ཡིན་པས་ངོ་བོ་ཉིད་སྐུ་དང་དོན་གཅིག་པ་ཡིན་ལ། གཞན་བཞི་ནི་སྐུ་གསུམ་གྱི་དབྱེ་གཞིར་སྦྱོར་བཞི་སྒོམ་པའི་རྣམ་སྨིན་མཐར་ཐུག་ལ་ཆོས་སྐུར་བཞག་པ་དེ་ཉིད་ཡིན་པས་སྔ་མ་དང་དོན་མི་གཅིག་གོ །འོ་ན་སྡེབ་སྦྱོར་གྱི་དབང་གིས་དེ་ལྟར་བརྗོད་དགོས་པའི་རྒྱུ་མཚན་ཅི་ཡིན། ཆོས་སྐུ་གཞན་བཞི་པོ་སྐུ་གསུམ་གྱི་དབྱེ་གཞི་ལ་འཇོག་དགོས་པའི་རྒྱུ་མཚན་ཅི་ཡིན་ཞེ་ན། ཐུབ་པའི་ངོ་བོ་ཉིད་སྐུ་ནི། །ཞེས་པ་ནས། ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་བར་གྱི་ངོ་བོ་ཉིད་སྐུ་སྟོན་པར་བྱེད་པའི་གཞུང་ཡིན་པས་ངོ་བོ་ཉིད་སྐུ་ནི་ཆོས་ཉིད་ཀྱི་སྐུ་ཞེས་བརྗོད་པ་ཡིན། དེ་གང་ཞེ་ན། ཟག་པ་མེད་པའི་ཆོས་ཐོབ་པ་དང་། རྣམ་པ་ཀུན་རྣམ་པར་དག་པའི་གློ་བུར་དྲི་བྲལ་དང་། རང་བཞིན་མཚན་ཉིད་ཅན་རང་བཞིན་རྣམ་དག་སྟེ་གསུམ་པོ་ཚོགས་པ་དེ་ཡིན་ནོ་ཞེས་པ་ནི། ཟག་པ་མེད་པའི་ཆོས་གང་དག །ཅེས་སོགས་ཚིག་རྐང་གསུམ་གྱི་བསྟན་ཏོ། །དེ་གསུམ་གྱི་ནང་ཚན་དུ་གྱུར་པའི་ཟག་པ་མེད་པའི་ཆོས་དེ་གང་ཞེ་ན། བྱང་ཆུབ་ཕྱོགས་མཐུན་ཚད་མེད་དང་། །ཞེས་པ་ནས། རྣམ་པ་ཐམས་ཅད་མཁྱེན་ཉིད་དང་། །ཞེས་པའི་བར་གྱིས་བསྟན་ཏོ། །དེས་ན་སྡེ་ཚན་ཉེར་གཅིག་པོ་དེས་ཟག་པ་མེད་པའི་ཆོས་ཀྱི་མཚན་གཞི་ངོས་གཟུང་བ་ཡིན་གྱི། འོག་གི་ཆོས་ཀྱི་སྐུ་ཞེས་བརྗོད་པ་ཡིན། ཞེས་པའི་མཚན་གཞི་མིན་ནོ་ཞེས་ཤེས་པའི་ཕྱིར་དུ། རྣམ་པ་ཐམས་ཅད་མཁྱེན་ཉིད་དང་། །ཞེས་འབྱེད་པའི་སྒྲས་གསུངས་པ་ཡིན་གྱི། དང་གི་སྒྲས་ལམ་ཤེས་དང་གཞི་ཤེས་བསྡུས་པ་ནི་སྐུ་བཞིར་འདོད་པ་རྣམས་ཀྱིས་རང་གི་གྲུབ་མཐའ་ངན་པའི་རྒྱབ་རྟེན་དུ་རྟོག་པས་བཏགས་པ་ཁོ་ནའོ། །འོ་ན་ཆོས་ཀྱི་སྐུ་ཞེས་བརྗོད་པ་ཡིན། །ཞེས་དང་། ཆོས་ཉིད་སྐུ་ཞེས་བརྗོད་པ་ཡིན། །ཞེས་པ་གཉིས་ལ་སྡེབས་བདེ་མི་བདེའི་ཁྱད་པར་མེད་པས། ཁྱེད་རང་ལའང་མཚུངས་སོ་ཞེ་ན། མི་མཚུངས་ཏེ། འདི་ནི་རྒྱ་གར་གྱི་སྡེབ་སྦྱོར་གྱི་དབང་དུ་བྱས་པ་ཡིན་ལ། དེའི་ཚེ་ཆོས་ཉིད་སྐུ་ལ་དྷརྨ་ཏཱ་ཀཱ་ཡ་ཞེས་པའི་ཡི་གེ་ལྔ་ཡོད་པའི་ཕྱིར་དང་། ཆོས་ཀྱི་སྐུ་ལ་དྷརྨ་ཀཱ་ཡ་ཞེས་པའི་ཡི་གེ་བཞི་ལས་མེད་པའི་ཕྱིར་རོ། །དྲི་བ་གཉིས་པའི་ལན་ནི། ཆོས་ཀྱི་སྐུ་དང་དེ་རྣམ་བརྒྱད། །ཅེས་པའི་སྐབས་ཀྱི་ཆོས་སྐུ་དེ་དངོས་པོ་བརྒྱད་ཀྱི་ནང་ཚན་དུ་གྱུར་པའི་ཆོས་སྐུ་ཡིན་ཞིང་། དེ་ལ་ངོ་བོའི་སྒོ་ནས་དབྱེ་ན་དུ་ཡོད་ཅེ་ན། ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་ཞེས་པའི་སྐུ་གསུམ་པོ་དེ་སྔར་གྱི་ཆོས་སྐུ་དེའི་དབྱེ་བ་ཡིན་ནོ་ཞེས་བསྟན། འོ་ན་མཚོན་བྱེད་ཀྱི་ཆོས་ཀྱང་དེར་ངེས་སམ་ཞེ་ན། མཚོན་བྱེད་ཀྱི་ཆོས་ལ་ནི་མཛད་པ་ཕྲིན་ལས་དང་བཅས་པ་བཞིར་ཡོད་ཅེས་པ་ནི། མཛད་པ་དང་བཅས་པ། རྣམ་པ་བཞིར་ནི་ཡང་དག་བརྗོད། །ཅེས་པས་བསྟན་ཏོ། །ཡན་ལག་རྒྱས་བཤད་དུ། ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་པའི་སྐབས་ཀྱི་ཆོས་སྐུ་དང་། ཆོས་སྐུ་མཛད་པ་དང་བཅས་པ། །ཞེས་པའི་སྐབས་ཀྱི་ཆོས་སྐུ་གཉིས་དོན་གཅིག་པས་ཕྲིན་ལས་ཉེར་བདུན་པོའང་སྐུ་གསུམ་ཆར་ལ་ཆོས་སྐུར་བྱས་པའི་ཆོས་སྐུ་དེའི་ཕྲིན་ལས་ཡིན་པ་རྩ་བའི་དགོངས་པའོ། །དེའི་རྒྱུ་མཚན་ཡང་། ཆོས་སྐུ་མཛད་པ་དང་བཅས་པ། །ཞེས་མཛད་པ་དང་ཆོས་སྐུ་སྦྱར། ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་པ་དང་། ཆོས་སྐུ་ཕྲིན་ལས་འབྲས་བུ་ནི། །ཞེས་པས་ཕྲིན་ལས་དང་ཆོས་སྐུ་སྦྱར་ཞིང་། མངོན་པར་རྟོགས་པ་བརྒྱད་ཀྱི་ལམ་རིམ་གྱི་གནས་སྐབས་ཀྱི་ཆོས་སྐུ་དང་། དྲུག་གི་སྐབས་ཀྱི་རྣམ་སྨིན་དང་གསུམ་གྱི་སྐབས་ཀྱི་ཆོས་སྐུ་གསུམ་པོ་དོན་གཅིག་པའི་ཕྱིར། བརྒྱད་ཀྱི་སྐབས་སུ་ཡུལ་དང་སྦྱོར་བ་གཉིས་ཀ་ལ་དབྱེ་བ་མཛད། དྲུག་གི་སྐབས་སུ་ཡུལ་གཅིག་ཏུ་སྡུད། གསུམ་གྱི་སྐབས་སུ་སྦྱོར་བའང་གཅིག་ཏུ་སྡུད་པ་མ་གཏོགས་འབྲས་བུ་ལ་དབྱེ་བ་མེད་པའི་ཕྱིར་རོ། །མདོར་ན་མགོན་པོ་བྱམས་པས། རྒྱན་འདིར་ཐུབ་པ་ཞེས་པའི་ཚིག་གི་ཁྱད་པར་ཡོད་པ་རྣམས་སྐུའི་གྲངས་ཀྱི་ཁོངས་སུ་གཏོགས་པར་བཞེད་ནས། ཐུབ་པའི་ངོ་བོ་ཉིད་སྐུ་ནི། །ཞེས་པ་དང་། ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་དང་། ཐུབ་པའི་སྤྲུལ་སྐུ་རྒྱུན་མི་ཆད། །ཅེས་གསུངས་པས་རྟོགས་ཡེ་ཆོས་སྐུ་བཞི་པ་ཡིན་ན། ཐུབ་པའི་རྟོགས་ཡེ་ཆོས་སྐུ་ནི། །ཞེས་པའི་གཞུང་འདོན་མཛོད་ཅིག ཕྱོགས་ཞེན་གྱི་རྗེས་སུ་མ་འབྲེང་བར་གཞུང་ལུགས་ཀྱི་རྗེས་སུ་ཞིབ་ཏུ་དཔྱད་པ་མཛོད། གསུམ་པ་ནི། རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་ལས་ཕར་ཕྱིན་ཐེག་པ་ལ་སྐུ་གསུམ་དང་ཡེ་ཤེས་བཞི་ལས་མ་བཤད་ཅིང་། སྐུ་བཞི་དང་ཡེ་ཤེས་ལྔ་ནི་རྡོ་རྗེ་ཐེག་པའི་ཁྱད་ཆོས་ཡིན་པར་གསུངས་པ་དང་། ས་པཎ་གྱིས། ཁ་ཅིག་དབང་བཞི་མི་འདོད་ཅིང་། །བསྐྱེད་རིམ་ལ་སོགས་ལམ་བཞི་པོའི། །རྣམ་པར་གཞག་པ་མི་འདོད་པར། །རྡོ་རྗེ་ཐེག་པའི་འབྲས་བུ་ནི། །སྤྲུལ་སྐུ་ལ་སོགས་སྐུ་བཞི་ཞེས། །འདོད་པ་དེ་ཡང་ལོག་ཤེས་ཡིན། །ཞེས་དང་། འཛམ་གླིང་མཁས་པའི་དབང་པོ་སངས་རྒྱས་དཔལ་གྱིས་ཀྱང་རྣམ་བཤད་ཆེན་མོར་སྐུ་གསུམ་དུ་མཛད་པ་དང་། ཐུབ་དབང་མིའི་གཟུགས་སུ་སྤྲུལ་པ་རོང་སྟོན་ཆེན་པོའི་རྣམ་བཤད་ལས་ཀྱང་སྐུ་གསུམ་གྱི་རྣམ་གཞག་བྱམས་པའི་དགོངས་པར་གསུངས་པས་ཕྱོགས་འདི་ལ་ཐེ་ཚོམ་ཡང་མེད་དོ། །མདོ་རྒྱུད་ཀུན་གྱི་གནས་ལུགས་ལ། །ཆེན་པོ་རྣམས་ཀྱི་རྗེས་འབྲང་ནས། །བློ་མིག་དག་པས་བལྟས་པའི་ཚེ། །འཁྲུལ་མེད་རྣམ་དག་འདི་ལྟར་གོ །བར་ཚིག་གོ །གསུམ་པ་ནི། མཁན་པོ་རྣམ་སྣང་མཛད་སོགས་ན་རེ། སངས་རྒྱས་ཀྱི་སྐུ་དེ་ལ་གསུམ་དུ་གྲངས་ངེས་ན། སངས་རྒྱས་ཀྱི་སར་ཟག་བཅས་ཀྱི་སེམས་སེམས་བྱུང་གནས་གྱུར་པའི་ཁྱད་པར་གསུམ་ལྡན་གྱི་སངས་རྒྱས་ཀྱི་ཡེ་ཤེས་ཡོད་དམ་མེད། མེད་ན་སངས་རྒྱས་ཀྱི་ཆོས་འཁོར་བསྐོར་བའི་བདག་རྐྱེན་མེད་པར་འགྱུར་ཞིང་། ཡོད་ན་སྐུ་བཞིར་གྲངས་ངེས་པར་གྲུབ་བོ་གསུངས། འོ་ན། སྐུ་བཞིར་གྲངས་ངེས་ནའང་སངས་རྒྱས་ཀྱི་ས་ན་ཟག་བཅས་ཀྱི་གཟུགས་ཕུང་གནས་གྱུར་པའི་ཟག་མེད་ཀྱི་གཟུགས་ཕུང་ཡོད་དམ་མེད། མེད་ན་སངས་རྒྱས་ཀྱི་ཆོས་འཁོར་བསྐོར་བའི་རྟེན་མེད་པར་འགྱུར་ཞིང་། ཡོད་ན་སྐུ་ལྔར་གྲངས་ངེས་པར་གྲུབ་བོ་ཞེས་མཚུངས་སོ། །ད་ལྟའི་སྐྱེ་བོ་ཁ་ཅིག སངས་རྒྱས་ཀྱི་སྐུ་ལ་གསུམ་དུ་གྲངས་ངེས་པ་ཡིན་གྱི། འབྲས་བུ་ཆོས་སྐུ་ལ་སྐུ་གསུམ་དུ་གྲངས་མ་ངེས་ཏེ། གྲངས་ངེས་ལ་ཁྱབ་པ་ཁས་ལེན་དགོས་ཤིང་། སྡེ་ཚན་ཉེར་གཅིག་པོ་དེ་འབྲས་བུ་ཆོས་སྐུ་ཡིན་གྱི། སངས་རྒྱས་ཀྱི་སྐུ་མ་ཡིན་པའི་ཕྱིར་རོ་ཞེས་སྨྲའོ། །དེ་ནི་རྩ་བ་བོར་ནས་ཡལ་ག་སྙོགས་པ་བྱིས་པའི་གཏམ་སྟེ། གཞུང་འདིར་དངོས་པོ་བརྒྱད་ཀྱི་ནང་ཚན་དུ་གྱུར་པའི་འབྲས་བུ་ཆོས་སྐུ་ལ་སྐུ་གསུམ་དུ་གྲངས་ངེས་པར་འཇོག་པའི་སྐབས་ཡིན་གྱི། དེ་ལས་ལོགས་སུ་སངས་རྒྱས་ཀྱི་སྐུ་ཞེས་པའི་ཐ་སྙད་མངོན་རྟོགས་རྒྱན་ལས་མ་གསུངས་པའི་ཕྱིར། དེས་ན་གྲངས་ངེས་ལ། ཚད་མ་ལ་མངོན་རྗེས་གཉིས་སུ་གྲངས་ངེས་པ་ལྟ་བུ་ངོ་བོའི་གྲངས་ངེས་དང་། རྒྱལ་ཆེན་རིགས་བཞི་ལྟ་བུ་སྡེ་ཚན་གྱི་གྲངས་ངེས་གཉིས་ལས་དང་པོ་ལ་སྤྱི་སྐྱོན་སོགས་སྤངས་ནས། ཁྱབ་པ་འཆའ་བ་གཞུང་ལུགས་ཀྱི་དགོངས་པ་ཡིན་ཀྱང་། ཕྱི་མ་ལ་ཁྱབ་པ་མི་འཆའ་ཞིང་། སྡེ་ཚན་དང་པོ་དེའི་ཁོངས་སུ་གཏོགས་པ་གཞུང་ལུགས་ཀྱི་དགོངས་པ་བླ་ན་མེད་པ་ཡིན་ནོ། །དེ་ལྟར་སྐུ་དང་པོ་བསྟན་ནས། ཞེས་པའི་སྐབས་སུ། སངས་རྒྱས་ཀྱི་སའི་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་ཆོས་ཅན། ཡེ་ཤེས་ཆོས་སྐུ་ཡིན་ཏེ། ཟག་བཅས་གནས་གྱུར་པས་ཟག་མེད་དུ་གྱུར་པའི་མཐར་ཐུག་གི་མཁྱེན་པ་ཡིན་པའི་ཕྱིར། དེ་ལ་ཁོ་ན་རེ། སངས་རྒྱས་འཕགས་པའི་མིག་གི་རྣམ་ཤེས་ཆོས་ཅན། དེར་ཐལ། དེའི་ཕྱིར། འདོད་ན། ཁྱོད་ཀྱིས་ཤེས་བྱ་ཐམས་ཅད་མངོན་སུམ་དུ་རྟོགས་པར་ཐལ། ཁྱོད་རྣམ་མཁྱེན་ཡིན་པའི་ཕྱིར་ཏེ། ཡེ་ཤེས་ཆོས་སྐུ་ཡིན་པའི་ཕྱིར། འདོད་ན། དེ་ཆོས་ཅན། སྒྲ་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། སྒྲ་ཆོས་ཅན། གཟུགས་ཀྱི་སྐྱེ་མཆེད་དུ་ཐལ། མིག་ཤེས་ཀྱི་གཟུང་བྱ་ཡིན་པའི་ཕྱིར་ཏེ། སངས་རྒྱས་ཀྱི་མིག་ཤེས་ཀྱི་གཟུང་བྱ་ཡིན་པའི་ཕྱིར། ཡང་དེ་ཆོས་ཅན། ཐེག་ཆེན་གྱི་སེམས་བསྐྱེད་དུ་ཐལ། གཞན་དོན་དུ་བླ་མེད་བྱང་ཆུབ་ལ་དམིགས་ཤིང་། ཐེག་ཆེན་སྐྱེས་བུའི་རྒྱུད་ཀྱི་རྩེ་མོའི་རྣམ་རིགས་ཡིན་པའི་ཕྱིར། དང་པོ་ཁས་བླངས་ཏེ། ཤེས་བྱ་ཐམས་ཅད་མངོན་སུམ་དུ་རྟོགས་པའི་ཕྱིར། རྩ་བར་འདོད་ན། དེ་ཆོས་ཅན། ཡིད་ཀྱི་རྣམ་པར་ཤེས་པར་ཐལ། འདོད་པའི་ཕྱིར། ཁྱབ་སྟེ། ཉི་ཁྲི་སྣང་བ་ལས། སེམས་བསྐྱེད་པ་ཞེས་གསུངས་པའི་སེམས་ནི་རྣམ་པར་ཤེས་པ་དེ་རྣམ་པར་རིག་པའོ། །དེའང་གང་ཞེ་ན། ཡིད་ཀྱི་རྣམ་པར་ཤེས་པ་སྟེ། །ཞེས་གསུངས་པའི་ཕྱིར། ཡང་རྒྱུན་མཐའི་བྱང་སེམས་ཀྱི་མིག་གི་རྣམ་ཤེས་ཆོས་ཅན། ལམ་ཤེས་སུ་ཐལ། རང་འབྲས་རྣམ་མཁྱེན་གྱི་ཉེར་ལེན་དུ་གྱུར་པའི་ཤེས་པ་ཡིན་པའི་ཕྱིར། རྟགས་ཁས་ཞེས་ཟེར་རོ། །དང་པོ་ལ་མིག་གི་རྣམ་ཤེས་ཡིན་ན་ཤེས་བྱ་ཐམས་ཅད་མངོན་སུམ་རྟོགས་པ་ལ་སྒྲིབ་བྱེད་ཀྱི་དྲི་མ་མ་སྤངས་པས་ཁྱབ་པ་ཐལ། དེ་ཡིན་ན་ཤེས་བྱ་ཐམས་ཅད་མངོན་སུམ་མ་རྟོགས་པས་ཁྱབ་པའི་ཕྱིར། འདོད་ན། སངས་རྒྱས་འཕགས་པའི་མིག་གི་རྣམ་ཤེས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། ཤེས་སྒྲིབ་ཟད་པར་སྤངས་པའི་ཕྱིར། གཉིས་པ་ལ། བསམ་གཏན་དང་པོའི་ཏིང་ངེ་འཛིན་ཡིན་ན། དཔྱོད་པ་དང་བཅས་པའི་ཏིང་ངེ་འཛིན་ཡིན་དགོས་པར་ཐལ། ཐེག་ཆེན་སེམས་བསྐྱེད་ཡིན་ན་ཡིད་ཤེས་ཡིན་དགོས་པའི་ཕྱིར་རོ། །འདོད་ན། བསམ་གཏན་གཉིས་པའི་ཏིང་ངེ་འཛིན་ཡིན་ན་སྤྱོད་པ་མེད་པའི་ཏིང་ངེ་འཛིན་ཡིན་དགོས་པར་ཐལ། འདོད་པའི་ཕྱིར། འདོད་ན། སངས་རྒྱས་ཀྱི་སའི་བསམ་གཏན་དང་པོའི་ཏིང་ངེ་འཛིན་ཆོས་ཅན། སྔ་མ་དེར་ཐལ། དེའི་ཕྱིར། འདོད་ན། དེ་ཆོས་ཅན། ཕྱི་མར་ཐལ། དེའི་ཕྱིར། ཕྱི་མ་ལ། སངས་རྒྱས་འཕགས་པའི་མིག་གི་རྣམ་པར་ཤེས་པ་ཆོས་ཅན། ཤེས་པ་མིན་པར་ཐལ། རྒྱུན་མཐའི་བྱང་སེམས་ཀྱི་མིག་གི་རྣམ་པར་ཤེས་པ་དེ་རང་འབྲས་ཤེས་པའི་ཉེར་ལེན་མིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། དེ་མེད་པའི་ཕྱིར། མ་གྲུབ་ན། རྒྱུན་མཐའི་བྱང་སེམས་ཆོས་ཅན། སྤྲོས་པ་མཐའ་དག་བཀག་པའི་ཆོས་ཉིད་ལ་མཉམ་པར་གཞག་པའི་སློབ་པ་མིན་པར་ཐལ། ཁྱོད་ཀྱི་རྒྱུད་ལ་གཟུང་འཛིན་ཐ་དད་དུ་སྣང་བའི་ཡང་དག་པ་མིན་པའི་ཀུན་ཏུ་རྟོག་པ་ཡོད་པའི་ཕྱིར་ཏེ། ཁྱོད་ཀྱི་རྒྱུད་ལ་སློབ་པའི་དབང་ཤེས་ཡོད་པའི་ཕྱིར། རྟགས་ཁས། དེ་ལ་ཁོ་ན་རེ། སངས་རྒྱས་འཕགས་པའི་མིག་གི་རྣམ་པར་ཤེས་པ་དེ་རྒྱུ་མེད་དུ་ཐལ། རྒྱུན་མཐའི་བྱང་སེམས་ལ་མིག་གི་རྣམ་པར་ཤེས་པ་མེད་པའི་ཕྱིར་ཞེ་ན། གཟུགས་མེད་ཁམས་ནས་ཤི་འཕོས་ནས་འདོད་པ་ཁམས་སུ་སྐྱེས་མ་ཐག་པའི་གང་ཟག་གི་མིག་གི་རྣམ་པར་ཤེས་པ་དེ་རྒྱུ་མེད་དུ་ཐལ། གཟུགས་མེད་ཁམས་པའི་གང་ཟག་ལ་དེ་མེད་པའི་ཕྱིར། ཡང་འགོག་པའི་སྙོམས་འཇུག་ལས་ལངས་མ་ཐག་པའི་ཉན་ཐོས་དགྲ་བཅོམ་པའི་མིག་གི་རྣམ་པར་ཤེས་པ་དེ་རྒྱུ་མེད་དུ་ཐལ། འགོག་པ་ལ་སྙོམས་པར་འཇུག་བཞིན་པའི་ཉན་ཐོས་དགྲ་བཅོམ་པ་ལ་དེ་མེད་པའི་ཕྱིར། རྫོགས་པའི་སངས་རྒྱས་ཀྱིས་གཞན་དོན་དུ་སྤྲུལ་པ་སྣ་ཚོགས་འགྱེད་པ་རྒྱུ་མེད་དུ་ཐལ། རྒྱུན་མཐའི་བྱང་སེམས་ཀྱིས་དེ་འགྱེད་པ་རྒྱུ་མེད་ཡིན་པའི་ཕྱིར། མ་གྲུབ་ན། དེ་ཆོས་ཅན། སངས་རྒྱས་འཕགས་པར་ཐལ། ཆོས་ཉིད་ལ་རྩེ་གཅིག་ཏུ་མཉམ་པར་གཞག་བཞིན་དུ་གཞན་དོན་དུ་སྤྲུལ་པ་སྣ་ཚོགས་འགྱེད་བཞིན་པའི་འཕགས་པ་ཡིན་པའི་ཕྱིར། ཉན་ཐོས་ཉོན་མོངས་མེད་པའི་ལྟ། །ཞེས་པའི་སྐབས་སུ། ཉན་ཐོས་ཀྱི་ཉོན་མོངས་པ་མེད་པའི་ཏིང་ངེ་འཛིན་ཆོས་ཅན། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ལས་དམན་པ་ཡིན་ཏེ། གདུལ་བྱའི་རྒྱུད་ལ་ཉོན་མོངས་པ་སྐྱེ་བའི་དམིགས་རྐྱེན་མི་བྱེད་པ་ཙམ་ཡིན་གྱི། གདུལ་བྱའི་རྒྱུད་ཀྱི་ཉོན་མོངས་པའི་ས་བོན་རྒྱུན་གཅོད་མི་ནུས་པའི་ཏིང་ངེ་འཛིན་ཡིན་པའི་ཕྱིར། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ཆོས་ཅན། ཉན་ཐོས་ཀྱི་དེ་ལས་ཁྱད་པར་འཕགས་པ་ཡིན་ཏེ། གདུལ་བྱའི་རྒྱུད་ཀྱི་ཉོན་མོངས་པའི་རྒྱུན་གཅོད་ནུས་པའི་ཏིང་ངེ་འཛིན་ཡིན་པའི་ཕྱིར། དེ་ལ་ཁ་ཅིག སྔ་མ་དེ་ཆོས་ཅན། དམ་བཅའ་དེ་མིན་པར་ཐལ། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ཡིན་པའི་ཕྱིར་ཏེ། དེ་དང་སངས་རྒྱས་ཀྱི་ཉོན་མོངས་པ་ཡོད་པའི་ཏིང་ངེ་འཛིན་གང་རུང་གང་ཞིག ཕྱི་མ་མིན་པའི་ཕྱིར་ཏེ། སངས་རྒྱས་ཀྱི་ཉོན་མོངས་པ་ཡོད་པའི་ཏིང་ངེ་འཛིན་མ་གྲུབ་པའི་ཕྱིར། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ཆོས་ཅན། ཉན་ཐོས་ཀྱི་དེ་ལས་ཁྱད་པར་དུ་འཕགས་པ་མིན་པར་ཐལ། ཉན་ཐོས་ཀྱི་དེ་ཡིན་པའི་ཕྱིར། དེ་དེ་དང་ཉན་ཐོས་ཀྱི་དེ་ཡོད་པའི་ཏིང་ངེ་འཛིན་གང་རུང་གང་ཞིག ཕྱི་མ་མིན་པའི་ཕྱིར། ཕྱི་མ་དེར་ཐལ། ཉོན་མོངས་པ་ཐམས་ཅད་མེད་པའི་ཏིང་ངེ་འཛིན་ཡིན་པའི་ཕྱིར། གཞན་ཡང་གདུལ་བྱའི་ཉོན་མོངས་པའི་ས་བོན་ཐམས་ཅད་འབད་མེད་དུ་འགགས་པར་ཐལ། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་དེས་གདུལ་བྱའི་ཉོན་མོངས་པའི་ས་བོན་རྒྱུན་བཅད་པའི་ཕྱིར། དེས་ན་ཉོན་མོངས་པ་མེད་པའི་ཉན་ཐོས་ཀྱི་ཏིང་ངེ་འཛིན་དང་། ཉོན་མོངས་པ་མེད་པའི་སངས་རྒྱས་ཀྱི་ཏིང་ངེ་འཛིན་ཆོས་ཅན་དུ་གཟུང་ནས་སྦྱོར་བ་སྔར་བཞིན་འགོད་པ་ཡིན་ནོ་ཞེས་ཟེར་རོ། །དང་པོ་ལ། སྒྲིབ་གཉིས་སྤངས་པའི་སེམས་བསྐྱེད་ཡིན་ན། སློབ་པའི་སེམས་བསྐྱེད་ཡིན་དགོས་པར་ཐལ། སངས་རྒྱས་ཀྱི་སྒྲིབ་གཉིས་སྤངས་པའི་སེམས་བསྐྱེད་དེ། སློབ་པའི་རྒྱུད་ཀྱི་སྒྲིབ་གཉིས་སྤངས་པའི་སེམས་བསྐྱེད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དེ་དེ་དང་སློབ་པའི་རྒྱུད་ཀྱི་སྒྲིབ་གཉིས་སྤངས་པའི་སེམས་བསྐྱེད་གང་རུང་གང་ཞིག ཕྱི་མ་མིན་པའི་ཕྱིར། དང་པོ་དེར་ཐལ། སེམས་བསྐྱེད་ཡིན་པའི་ཕྱིར། ཕྱི་མ་མ་གྲུབ་ན། དེ་ཆོས་ཅན། དེར་ཐལ། སྒྲིབ་གཉིས་སྤངས་པའི་སེམས་བསྐྱེད་ཡིན་པའི་ཕྱིར། གཉིས་པ་ལ་སྙོམས་འཇུག་ཡིན་ན་གཟུགས་མེད་ཀྱི་སྙོམས་འཇུག་ཡིན་དགོས་པར་ཐལ། བསམ་གཏན་དང་པོའི་དངོས་གཞིའི་སྙོམས་འཇུག་དེ་གཟུགས་མེད་ཀྱི་སྙོམས་འཇུག་ཡིན་པའི་ཕྱིར། མ་གྲུབ་ན། ཁས་བླངས་ཏེ། དེ་ཆོས་ཅན། དེར་ཐལ། དེ་དང་དེའི་རྒྱུད་ཀྱི་གཟུགས་མེད་ཀྱི་སྙོམས་འཇུག་གང་རུང་གང་ཞིག ཕྱི་མ་མིན་པའི་ཕྱིར། དང་པོ་དེར་ཐལ། དེ་མེད་པའི་ཕྱིར། ཐམས་ཅད་རིམ་བཞིན་ཁས་བླངས་སོ། །གསུམ་པ་ལ། སེང་གེའི་སྒྲ་ཐམས་ཅད་འབད་མེད་དུ་གྲགས་པར་ཐལ། ཤཱཀྱ་ཐུབ་པས་སེང་གེའི་སྒྲ་བསྒྲགས་པའི་ཕྱིར་ཏེ། གདུལ་བྱའི་ཐེ་ཚོམ་ཐམས་ཅད་གཅོད་པར་བྱེད་པའི་ཕྱིར། གཉིས་ཆར་གྱི་ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། གདུལ་བྱའི་དྲི་བ་ཀུན་ལ་ལན་ཅིག་ཅར་བཏབ་པའི་ཕྱིར། གཞན་ཡང་ཉོན་མོངས་པ་མེད་པའི་ཉན་ཐོས་ཀྱི་ཏིང་ངེ་འཛིན་དེ་ཉོན་མོངས་པ་མེད་པའི་ཏིང་ངེ་འཛིན་དུ་ཐལ། ཉོན་མོངས་པ་མེད་པའི་ཉན་ཐོས་ཀྱི་ཏིང་ངེ་འཛིན་ཆོས་ཅན་ཞེས་སོགས་ཀྱི་སྦྱོར་བ་དེ་གཞུང་དེའི་དོན་སྦྱོར་ཡིན་པའི་ཕྱིར། འདོད་ན། ཉན་ཐོས་དགྲ་བཅོམ་པའི་རྒྱུད་ཀྱི་ཏིང་ངེ་འཛིན་ཡིན་ན་ཉོན་མོངས་པ་མེད་པའི་ཏིང་ངེ་འཛིན་ཡིན་དགོས་པར་ཐལ། འདོད་པའི་ཕྱིར། འདོད་ན། ཉན་ཐོས་དགྲ་བཅོམ་པའི་རྒྱུད་ཀྱི་ཉོན་མོངས་པ་མེད་པའི་ཏིང་ངེ་འཛིན་དེ། དེའི་རྒྱུད་ཀྱི་ཏིང་ངེ་འཛིན་གྱི་བྱེ་བྲག་མིན་པར་ཐལ། འདོད་པའི་ཕྱིར། འདོད་ན། དེའི་རྒྱུད་ཀྱི་སྨོན་གནས་མཁྱེན་པའི་ཏིང་ངེ་འཛིན་དེའང་དེའི་རྒྱུད་ཀྱི་ཏིང་ངེ་འཛིན་གྱི་བྱེ་བྲག་མིན་པར་ཐལ་ལོ། །སངས་རྒྱས་སྨོན་གནས་མཁྱེན་པ་ནི། །ཞེས་པའི་སྐབས་སུ། སྨོན་གནས་མཁྱེན་པའི་ཏིང་ངེ་འཛིན་གྱི་མཚན་ཉིད་ལ། ཁ་ཅིག བསམ་གཏན་བཞི་པའི་དངོས་བཞི་ལ་བརྟེན་ནས་བདག་མཐོང་བས་དམིགས་རྐྱེན་བྱས་ནས་ཕ་རོལ་གྱི་རྒྱུད་ལ་ཉོན་མོངས་པ་སྐྱེ་བ་དང་མི་སྐྱེ་བའི་བྱེ་བྲག་སོ་སོར་ཤེས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ཞེས་ཟེར་ན། ཕྱིར་མི་འོང་འབྲས་གནས་ཀྱི་རྒྱུད་ཀྱི་བསམ་གཏན་བཞི་པའི་དངོས་གཞི་ལ་བརྟེན་པའི་གཞན་སེམས་ཤེས་པའི་མངོན་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། བསམ་གཏན་བཞི་པའི་དངོས་གཞི་ལ་བརྟེན་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་གང་ཞིག ཕ་རོལ་གྱི་རྒྱུད་ལ་ཉོན་མོངས་པ་སྐྱེ་བ་དང་མི་སྐྱེ་བའི་བྱེ་བྲག་སོ་སོར་ཤེས་པའི་ཕྱིར་ཏེ། འཕགས་རྒྱུད་ཀྱི་གཞན་སེམས་ཤེས་པའི་མངོན་ཤེས་ཡིན་པའི་ཕྱིར། རྩ་བར་འདོད་ན། ཉན་ཐོས་སློབ་པའི་རྒྱུད་ཀྱི་ཏིང་ངེ་འཛིན་མིན་པར་ཐལ་ལོ། །མཚན་ནི་སུམ་ཅུ་རྩ་གཉིས་དང་། །ཞེས་པའི་སྐབས་སུ། གནས་འོག་མིན་ཁོ་ནར་བཞུགས་པའི་སངས་རྒྱས་ཀྱི་གཟུགས་སྐུ་ཆོས་ཅན། ལོངས་སྐུ་ཡིན་ཏེ། ངེས་པ་ལྔ་ལྡན་གྱི་གཟུགས་སྐུ་མཐར་ཐུག་ཡིན་པའི་ཕྱིར། ངེས་པ་ལྔ་པོ་གང་ཞེ་ན། ངོ་བོ་ངེས་པ་མཚན་དང་དཔེ་བྱད་ཀྱིས་སྤྲས་པ། འཁོར་ངེས་པ་བྱང་འཕགས་ཁོ་ནས་བསྐོར་བ། ཆོས་ངེས་པ་ཐེག་ཆེན་གྱི་ཆོས་ཁོ་ན་གསུངས་པ། དུས་ངེས་པ་འཁོར་བ་ཇི་སྲིད་མ་སྟོངས་ཀྱི་བར་དུ་སྐུའི་སྣང་བ་མི་སྡུད་པར་བཞུགས་པ། གནས་ངེས་པ་འོག་མིན་ཁོ་ནར་བཞུགས་པའོ། །དེ་ལ་ཁ་ཅིག་ན་རེ། མཚན་དང་དཔེ་བྱད་ཀྱིས་སྤྲས་པ་དེ་ལོངས་སྐུའི་ངོ་བོ་ངེས་པ་མིན་པར་ཐལ། སྤྲུལ་སྐུ་ལའང་མཚན་དཔེ་ཡོད་པའི་ཕྱིར། བྱང་འཕགས་ཁོ་ནས་བསྐོར་བ་དེ་ལོངས་སྐུའི་འཁོར་ངེས་པ་མིན་པར་ཐལ། སྤྲུལ་སྐུ་ལའང་དེ་ཁོ་ནས་བསྐོར་བ་ཡོད་པའི་ཕྱིར། ཐེག་ཆེན་ཀྱི་ཆོས་ཁོ་ན་གསུང་བ་དེ་ལོངས་སྐུའི་ཆོས་ངེས་པ་མིན་པར་ཐལ། ལོངས་སྐུས་ཐེག་པ་ཆེ་ཆུང་གཉིས་ཀའི་ཆོས་གསུངས་པའི་ཕྱིར་ཏེ། དེའི་འཁོར་གྱི་བྱང་སེམས་འཕགས་པས་ཐེག་པ་ཆེ་ཆུང་གཉིས་ཀའི་ཆོས་ཉན་དགོས་པའི་ཕྱིར་ཏེ། དེས་རིགས་ཅན་གསུམ་ཀ་རྗེས་སུ་གཟུང་བའི་ཕྱིར་དུ་དེ་ལ་བསྟན་པར་བྱ་བའི་ལམ་ཤེས་དགོས་པའི་ཕྱིར། འཁོར་བ་ཇི་སྲིད་མ་སྟོངས་ཀྱི་བར་དུ་སྐུའི་སྣང་བ་མི་སྡུད་པར་བཞུགས་པ་དེ་ལོངས་སྐུའི་དུས་ངེས་པ་མིན་པར་ཐལ། དེ་ལྟར་བཞུགས་པའི་སྤྲུལ་སྐུ་ཡོད་པའི་ཕྱིར་ཏེ། འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་མི་འཇིག་པའི་སྤྲུལ་སྐུའི་ཞིང་ཡོད་པའི་ཕྱིར། འོག་མིན་ཁོ་ནར་བཞུགས་པའི་ཐེག་ཆེན་འཕགས་པ་ཡིན་ན་ལོངས་སྐུ་ཡིན་དགོས་པར་ཐལ། ལོངས་སྐུ་གནས་ངེས་པ་འོག་མིན་ཁོ་ནར་བཞུགས་པའི་ཕྱིར། འདོད་ན། འོག་མིན་ན་བཞུགས་པའི་རྒྱུན་མཐའི་བྱང་སེམས་ཆོས་ཅན། དེར་ཐལ། སྤྲོས་པ་མཐའ་དག་བཀག་པའི་མཉམ་གཞག་ལ་གནས་བཞིན་པའི་བྱང་འཕགས་གང་ཞིག མཉམ་གཞག་དེ་ལས་མ་ལངས་པའི་ངང་ནས་རྣམ་མཁྱེན་སྐད་ཅིག་དང་པོ་མངོན་སུམ་བྱེད་པའི་ཕྱིར་ཞེས་ཟེར། དང་པོ་ལ། ཐུགས་དུས་རྟག་ཏུ་མཉམ་པར་གཞག་པ་དེ་སངས་རྒྱས་ཀྱི་མ་འདྲེས་པའི་ཡོན་ཏན་མིན་པར་ཐལ། བྱང་སེམས་འཕགས་པ་ལའང་དེ་འདྲ་ཡོད་པའི་ཕྱིར་ཏེ། རྒྱུན་མཐའི་བྱང་སེམས་དེ་དུས་རྟག་ཏུ་མཉམ་པར་གཞག་པ་ཡིན་པའི་ཕྱིར། ཁ་དོག་སེར་པོ་དེ་གསེར་གྱི་ཁ་དོག་ངེས་པ་མིན་པར་ཐལ། རས་ལ་སོགས་པའི་དངོས་པོ་འགའ་ཞིག་ལའང་དེ་འདྲ་ཡོད་པའི་ཕྱིར། ཁྱབ་པ་གཉིས་ཀ་ཁས། གཉིས་པ་ལ། གླང་ཕྲན་བརྒྱ་སྟོང་གིས་བསྐོར་བ་དེ་གླང་ཆེན་རབ་བརྟན་གྱི་འཁོར་ངེས་པ་མིན་པར་ཐལ། གླང་པོ་ཆེ་ས་སྲུང་གི་བུ་ལའང་དེས་བསྐོར་བ་ཡོད་པའི་ཕྱིར། འདོད་ན། བྲག་ཕྲན་བརྒྱ་སྟོང་གིས་བསྐོར་བ་དེ་བྲག་རི་གསེར་གྱི་བྱ་སྐྱིབས་ཅན་ཀྱི་འཁོར་ངེས་པ་མིན་པར་ཐལ་ལོ། །གསུམ་པའི་ཁྱབ་པ་ཕྱི་མ་ལ། བྱང་སེམས་འཕགས་པས་རིགས་ཅན་གསུམ་རྗེས་སུ་གཟུང་བའི་ཕྱིར་དུ་དེའི་ལམ་གསུམ་རྒྱུན་ལྡན་དུ་སྒོམ་དགོས་པར་ཐལ། དེས་དེ་རྗེས་སུ་བཟུང་བའི་ཕྱིར་དུ་དེའི་ལམ་གསུམ་ཤེས་དགོས་པའི་ཕྱིར། ཁྱབ་པ་ཁས། དེ་ལ་ཁོ་ན་རེ། བྱང་སེམས་འཕགས་པས་ལོངས་སྐུ་ལས་ཉན་པར་བྱ་བའི་ཆོས་ཡིན་ན་དེ་རྒྱུད་ལ་ཉམས་སུ་བླང་བྱའི་ཆོས་ཡིན་པས་ཁྱབ་པར་ཐལ། དེས་རིགས་ཅན་གསུམ་ལ་བསྟན་པར་བྱ་བའི་ཆོས་ལོངས་སྐུ་ལས་ཉན་པ་མེད་པའི་ཕྱིར། འདོད་ན། དེས་གདུལ་བྱ་གཞན་ལ་བསྟན་པར་བྱ་བའི་ཆོས་ལོངས་སྐུ་ལས་ཉན་པ་མེད་པར་ཐལ། འདོད་པའི་ཕྱིར། འདོད་ན། དེས་ཐེག་ཆེན་གྱི་རིགས་ཅན་ལ་བསྟན་པར་བྱ་བའི་ཆོས་ལོངས་སྐུ་ལས་ཉན་པ་མེད་པར་ཐལ་ལོ་ཞེ་ན། བྱང་སེམས་འཕགས་པས་རྒྱུན་ལྡན་དུ་བསྒོམ་པར་བྱ་བའི་ལམ་ཡིན་ན་རང་རྒྱུད་ལ་ཉམས་སུ་བླང་བར་བྱ་བའི་ལམ་ཡིན་དགོས་པར་ཐལ། དེས་རིགས་ཅན་གསུམ་གྱི་ལམ་རྒྱུན་ལྡན་དུ་སྒོམ་པ་མེད་པའི་ཕྱིར། འདོད་ན། དེས་གདུལ་བྱ་གཞན་ལ་བསྟན་པར་བྱ་བའི་ལམ་རྒྱུན་ལྡན་དུ་སྒོམ་པར་བྱེད་པ་མེད་པར་ཐལ། འདོད་པའི་ཕྱིར། འདོད་ན། དེས་ཐེག་ཆེན་གྱི་རིགས་ཅན་ལ་བསྟན་པར་བྱ་བའི་ལམ་རྒྱུན་ལྡན་དུ་སྒོམ་པ་མེད་པར་ཐལ། འདོད་པའི་ཕྱིར། རིམ་བཞིན་ཁས་བླངས་སོ། །བཞི་པ་ལ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་བཞུགས་པ་དེ་རྫོགས་པའི་སངས་རྒྱས་ཀྱི་དུས་ངེས་པ་མིན་པར་ཐལ། དེ་ལྟར་བཞུགས་པའི་བྱང་སེམས་ཡོད་པའི་ཕྱིར། འདོད་མི་ནུས་ཏེ། རྫོགས་པའི་སངས་རྒྱས་ཀྱིས་དུས་འཁོར་བ་ཇི་སྲིད་མ་སྟོངས་ཀྱི་བར་དུ་གདུལ་བྱའི་དོན་མཛད་པ་མཐར་ཐུག་པའི་སྨོན་ལམ་གྲུབ་པ་ཡིན་པའི་ཕྱིར། ལྔ་པ་ལ། ལོངས་སྐུའི་དབུ་ལ་གནས་པའི་མཚན་དཔེ་ཡིན་ན། ལོངས་སྐུའི་གཙུག་ཏོར་ཡིན་དགོས་པར་ཐལ། ལོངས་སྐུའི་གཙུག་ཏོར་དེ་ལོངས་སྐུའི་དབུ་ཁོ་ན་ལ་གནས་པའི་ཕྱིར། འདོད་ན། ལོངས་སྐུའི་དབུ་སྐྲ་བུང་བ་ལྟར་གནག་པ་ཆོས་ཅན། དེར་ཐལ། དེའི་ཕྱིར་རོ། །གང་གིས་སྲིད་པ་ཇི་སྲིད་པར། །ཞེས་པའི་སྐབས་སུ་སྤྲུལ་སྐུའི་མཚན་ཉིད་ལ་དཔྱད། སྤྲུལ་སྐུ་སངས་རྒྱས་ཡིན་མིན་ལ་དཔྱད་པ་གཉིས་ལས། དང་པོ་ནི། ཁ་ཅིག གདུལ་བྱ་དག་མ་དག་སྣ་ཚོགས་ལ་ཆོས་དངོས་སུ་སྟོན་པའི་གཟུགས་སྐུ་མཐར་ཐུག་དང་། གདུལ་བྱ་མཐོང་སྤང་གིས་དག་མ་དག་སྣ་ཚོགས་ལ་ཆོས་དངོས་སུ་སྟོན་པའི་གཟུགས་སྐུ་མཐར་ཐུག་དང་། སྤྲུལ་པ་སྣ་ཚོགས་ཀྱི་སྒོ་ནས་གདུལ་བྱ་སྣ་ཚོགས་ཀྱི་དོན་མཛད་པའི་གཟུགས་སྐུ་མཐར་ཐུག་རྣམས་རྫོགས་པའི་སངས་རྒྱས་ཀྱི་སྤྲུལ་སྐུའི་མཚན་ཉིད་ཡིན་ཟེར་བ་དང་། མཛད་པ་བཅུ་གཉིས་ཀྱི་ཚུལ་དངོས་སུ་སྟོན་པའི་སྒོ་ནས་གདུལ་བྱ་སྣ་ཚོགས་ཀྱི་དོན་བྱེད་པའི་གཟུགས་སྐུ་མཐར་ཐུག་དང་། ངེས་པ་ལྔ་བྲལ་གྱི་གཟུགས་སྐུ་མཐར་ཐུག་རྣམས་མཆོག་གི་སྤྲུལ་སྐུའི་མཚན་ཉིད་ཡིན་ཟེར་རོ། །དང་པོ་ལ། སྟོན་པ་ཤཱཀྱ་ཐུབ་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། གདུལ་བྱ་མ་དག་པ་ལ་ཆོས་དངོས་སུ་སྟོན་པར་ཐལ། འདོད་པའི་ཕྱིར། འདོད་ན། སོ་སྐྱེ་མ་དག་པ་ལ་ཆོས་དངོས་སུ་སྟོན་པར་ཐལ། འདོད་པ་གང་ཞིག འཕགས་པ་མ་དག་པ་མེད་པའི་ཕྱིར། འདོད་ན། དེ་མིན་པར་ཐལ། ཁྱོད་ལ་ཆོས་དངོས་སུ་ཉན་པའི་སོ་སྐྱེ་ཡིན་ན་སོ་སྐྱེ་ལས་དག་ཡིན་དགོས་པའི་ཕྱིར། གཉིས་པ་ལ། རྫོགས་པའི་སངས་རྒྱས་ཀྱི་ཟམ་པར་སྤྲུལ་པ་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། སངས་རྒྱས་སའི་སྤྲུལ་སྐུ་ཡིན་ན། མཆོག་གི་སྤྲུལ་སྐུ་ཡིན་དགོས་པར་ཐལ། མ་གྲུབ་པ་དེའི་ཕྱིར། རྩ་བར་འདོད་ན། དེ་ཆོས་ཅན། གདུལ་བྱ་ལ་ཆོས་དངོས་སུ་སྟོན་པར་ཐལ། འདོད་པའི་ཕྱིར། འདོད་ན། རྫོགས་པའི་སངས་རྒྱས་ཀྱིས་སེམས་ཅན་གྱི་དོན་དུ་རང་རྒྱལ་དུ་སྤྲུལ་པའི་སྤྲུལ་པའི་རང་རྒྱལ་དེས་གདུལ་བྱ་ལ་སྒྲ་བཅས་ཀྱི་སྒོ་ནས་གདམས་ངག་དངོས་སུ་བསྟན་པར་ཐལ། འདོད་པའི་ཕྱིར། གསུམ་པ་ལ་ལོངས་སྐུ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། ཁྱོད་ཀྱི་སྤྲུལ་པ་སྣ་ཚོགས་ཀྱི་སྒོ་ནས་གདུལ་བྱ་སྣ་ཚོགས་ཀྱི་དོན་བྱེད་པ་གང་ཞིག གཟུགས་སྐུ་མཐར་ཐུག་ཡིན་པའི་ཕྱིར། དང་པོ་མ་གྲུབ་ན། དེར་ཐལ། སྤྲུལ་སྐུ་དེ་ལོངས་སྐུའི་སྤྲུལ་པ་ཡིན་པའི་ཕྱིར། བཞི་པ་ལ། རྫོགས་པའི་སངས་རྒྱས་ཀྱི་ཉན་ཐོས་སུ་སྤྲུལ་པའི་སྤྲུལ་པའི་ཉན་ཐོས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། གདུལ་བྱ་སྐྱེ་འཕགས་གཉིས་ཀའི་དོན་བྱེད་པའི་སྤྲུལ་སྐུ་ཡིན་པའི་ཕྱིར། རྩ་བར་འདོད་མི་ནུས་ཏེ། སྤྲུལ་པའི་ཉན་ཐོས་ཡིན་པའི་ཕྱིར། ལྔ་པ་ལ། འོད་དཔག་མེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཡུམ་གྱི་ལྷུམས་སུ་ཞུགས་པའི་ཚུལ་དངོས་སུ་སྟོན་པར་ཐལ། འདོད་པའི་ཕྱིར། དེ་ལ་ཁོ་ན་རེ། འོད་དཔག་མེད་ཆོས་ཅན། ཁྱོད་ཀྱིས་མཛད་པ་བཅུ་གཉིས་ཀྱི་ཚུལ་དངོས་སུ་སྟོན་པར་ཐལ། ཁྱོད་ཀྱི་སྤྲུལ་པས་ཞིང་ཁམས་གཞན་དུ་དེ་ལྟར་བསྟན་པའི་ཕྱིར་ཞེ་ན། ལོངས་སྐུ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། མཆོག་གི་སྤྲུལ་སྐུར་ཐལ། མཚན་ཉིད་དེའི་ཕྱིར། དྲུག་པ་ལ། རྫོགས་པའི་སངས་རྒྱས་ཀྱི་གཟུགས་བརྙན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། གཟུགས་སྐུ་མཐར་ཐུག་གང་ཞིག ངེས་པ་ལྔ་དང་བྲལ་བའི་ཕྱིར་ཏེ། ངོ་བོ་ངེས་པ་མཚན་དཔེས་སྤྲས་པ་སོགས་མི་འཐད་པའི་ཕྱིར་ཏེ། ཁྱོད་དང་མཚན་དཔེས་མ་སྤྲས་པའི་གཞི་མཐུན་ཡོད་པའི་ཕྱིར། རང་ལུགས་ནི། སེམས་ཅན་གྱི་དོན་དུ་གང་ལ་གང་འདུལ་གྱི་སྐུར་སྟོན་པའི་ལོངས་སྐུའི་སྤྲུལ་པ་དེ་སངས་རྒྱས་ཀྱི་སྤྲུལ་སྐུའི་མཚན་ཉིད། དབྱེ་ན། བཟོའི་སྤྲུལ་སྐུ། སྐྱེ་བའི་སྤྲུལ་སྐུ། མཆོག་གི་སྤྲུལ་སྐུ་གསུམ་དུ་རྒྱན་ལས་བཤད་ལ། ཕྱི་མའི་མཚན་ཉིད། སངས་རྒྱས་ཀྱི་སྐུར་དངོས་སུ་སྟོན་པའི་སྤྲུལ་སྐུའོ། །གཉིས་པ་ནི། ཁ་ཅིག སྤྲུལ་སྐུ་སངས་རྒྱས་དངོས་མིན་ཏེ། གལ་ཏེ་ཡིན་ན་ཆུ་ནང་དུ་ཤར་བའི་ཟླ་བའི་གཟུགས་བརྙན་དེ་ཟླ་གཟུགས་མཚན་ཉིད་པ་ཡིན་པར་ཐལ། སྤྲུལ་སྐུ་སངས་རྒྱས་མཚན་ཉིད་པ་ཡིན་པའི་ཕྱིར། ཁྱབ་སྟེ། རྒྱུད་བླར། དག་ལ་ཉེ་དང་རིང་རྣམས་ལ། །འཇིག་རྟེན་རྒྱལ་བའི་དཀྱིལ་འཁོར་དུ། །ཆུ་དང་ནམ་མཁའ་ཟླ་གཟུགས་བཞིན། །དེ་མཐོང་བ་ནི་རྣམ་པ་གཉིས། །ཞེས་གསུངས་པའི་ཕྱིར། བཻ་ཌཱུརྻའི་ས་གཞི་ལ་ཤར་བའི་ལྷ་དབང་གི་གཟུགས་བརྙན་དེ། དེའི་གཟུགས་མཚན་ཉིད་པ་ཡིན་པར་ཐལ། སྔ་མ་དེའི་ཕྱིར། ཁྱབ་སྟེ། རྒྱུད་བླར། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་ཤར་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་གསུངས་པའི་ཕྱིར། ཡང་སྤྲུལ་པའི་ཉན་ཐོས་དེ་ཉན་ཐོས་ཡིན་པར་ཐལ། རྟགས་སྔ་མ་དེའི་ཕྱིར། ཡང་ཤཱཀྱ་ཐུབ་པས་སྤྲུལ་པ་བརྒྱ་ཕྲག་མཛད་པའི་སྤྲུལ་པ་དེ་རྣམས་གང་ཟག་རྒྱུད་ཐ་དད་པ་ཡིན་པར་ཐལ། དེ་རྣམས་སངས་རྒྱས་མཚན་ཉིད་པ་ཡིན་པའི་ཕྱིར། འདོད་ན། དེ་རྣམས་ལ་ཡིད་ཀྱི་རྣམ་པར་ཤེས་པ་རྫས་ཐ་དད་པ་རེ་རེ་ཡོད་པར་ཐལ། འདོད་པའི་ཕྱིར། འདོད་ན། དེ་རྣམས་ཤཱཀྱ་ཐུབ་པ་ཁོ་ནའི་སྤྲུལ་པ་མིན་པར་ཐལ་ལོ་ཞེས་ཟེར་རོ། །དང་པོ་ལ། ཆུ་ནང་གི་ཟླ་བའི་གཟུགས་བརྙན་དེ་ནམ་མཁའི་ཟླ་བའི་གཟུགས་བརྙན་མིན་པར་ཐལ། མཆོག་གི་སྤྲུལ་སྐུ་དེ་ལོངས་སྐུའི་གཟུགས་བརྙན་མིན་པའི་ཕྱིར། མ་གྲུབ་ན་ཁས་བླངས་ཏེ། དག་ལ་ཉེ་དང་རིང་རྣམས་ལ། །ཞེས་སོགས་ཀྱི་གཞུང་དེས་ཆུ་ནང་གི་ཟླ་བའི་གཟུགས་བརྙན་དེ་ནམ་མཁའི་ཟླ་བའི་གཟུགས་བརྙན་དང་། མཆོག་གི་སྤྲུལ་སྐུ་ལོངས་སྐུའི་གཟུགས་བརྙན་ཡིན་པ་དཔེ་དོན་དུ་སྦྱར་ནས་སྟོན་པར་ཐལ། མ་གྲུབ་པ་དེའི་ཕྱིར། འདོད་ན། ཁྱེད་རང་གི་ལུང་ཁྱབ་ལ་ཁྱབ་འབྲེལ་མེད་དོ། །གཉིས་པ་ལ། ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་པའི་གཞུང་དེས་སྤྲུལ་སྐུ་སངས་རྒྱས་མཚན་ཉིད་པ་མིན་པར་སྟོན་པར་མིན་པར་ཐལ། དེས་སྤྲུལ་སྐུ་ལོངས་སྐུ་མ་ཡིན་པ་ཙམ་སྟོན་པའི་ཕྱིར་ཏེ། དེའི་སྐབས་ཀྱི་ཐུབ་པའི་དབང་པོ་དེ་ལོངས་སྐུ་ཡིན་པའི་ཕྱིར་ཏེ། ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པའི་ཐུབ་པ་དེ་ལོངས་སྐུ་ཡིན་པའི་ཕྱིར། གསུམ་པ་ལ་བྱང་སེམས་འཕགས་པའི་རི་བོང་དུ་སྤྲུལ་བའི་རི་བོང་དེ་དུད་འགྲོར་ཐལ། དེ་བྱང་འཕགས་མིན་པར་ཐལ། ཁྱབ་པ་ཁས། བཞི་པ་ལ། བྱང་འཕགས་ཀྱི་ཉན་ཐོས་སུ་སྤྲུལ་པའི་སྤྲུལ་པའི་ཉན་ཐོས་བརྒྱད་པོ་དེ་ཉན་ཐོས་མཚན་ཉིད་པར་ཐལ། དེ་བྱང་འཕགས་མིན་པའི་ཕྱིར། མ་གྲུབ་ན་ཁས་བླངས་ཏེ། དེ་རྣམས་གང་ཟག་རྒྱུད་ཐ་དད་པར་ཐལ། མ་གྲུབ་པ་དེའི་ཕྱིར། ཁྱབ་པ་ཁས། མ་གྲུབ་ན། སྔ་མ་བཞིན་དུ་བསྒྲེའོ། །གཞན་ཡང་བཀའ་རྒྱས་འབྲིང་བསྡུས་གསུམ་པོ་དེ་སངས་རྒྱས་ཀྱི་བཀའ་མིན་པར་ཐལ། ཆོས་འཁོར་རིམ་པ་གསུམ་བསྐོར་བ་པོའི་སངས་རྒྱས་འཕགས་པ་མེད་པའི་ཕྱིར་ཏེ། མཆོག་གི་སྤྲུལ་སྐུ་དེ་སངས་རྒྱས་མིན་པའི་ཕྱིར། གཞན་ཡང་བསྐལ་པ་བརྒྱར་སངས་རྒྱས་འབྱུང་བ་མཉེས་པར་བྱ་བའི་རང་རྒྱལ་གྱི་རིགས་ཅན་ཚོགས་ལམ་པ་མེད་པར་ཐལ། བསྐལ་པ་བརྒྱར་ལོངས་སྐུ་འབྱུང་བ་མཉེས་པར་བྱས་པའི་དེ་མེད་པ་གང་ཞིག སྤྲུལ་སྐུ་མཉེས་པར་བྱས་པས་སངས་རྒྱས་མཉེས་པའི་གོ་མི་ཆོད་པའི་ཕྱིར། རྟགས་ཕྱི་མ་ཁས་བླངས་ཤིང་། སྔ་མ་དེར་ཐལ། ལོངས་སྐུའི་དངོས་ཀྱི་འཁོར་ཡིན་ན་བྱང་འཕགས་ཡིན་པས་ཁྱབ་པའི་ཕྱིར། ཡང་ཤཱཀྱ་ཐུབ་པ་ཆོས་ཅན། རྫོགས་པའི་སངས་རྒྱས་སུ་ཐལ། རྣམ་མཁྱེན་རྒྱུད་ལྡན་གྱི་ཐུབ་པ་ཡིན་པའི་ཕྱིར་ཏེ། གང་དང་ཡང་དག་ལྡན་པས་ཐུབ་རྣམས། །ཞེས་པའི་སྐབས་ནས་དངོས་བསྟན་གྱི་ཐུབ་པ་ཡིན་པའི་ཕྱིར་ཏེ། ཆོས་འཁོར་རིམ་པ་གསུམ་དངོས་སུ་བསྐོར་བ་པོའི་ཐུབ་པ་ཡིན་པའི་ཕྱིར། ཡང་དེ་ཆོས་ཅན། སངས་རྒྱས་སུ་ཐལ། སྦྱོར་གཞི་བསྒོམ་པའི་རྣམ་སྨིན་མཐར་ཐུག་ཡིན་པའི་ཕྱིར་ཏེ། སྐུ་གསུམ་གང་རུང་ཡིན་པའི་ཕྱིར། ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་པའི་སྐུ། ཞེས་པའི་སྐབས་སུ། ཁ་ཅིག ཕྲིན་ལས་ཉེར་བདུན་པོ་དེ་ཡེ་ཤེས་ཆོས་སྐུ་ཁོ་ནའི་ཕྲིན་ལས་ཡིན་ཏེ། ཀུན་རྫོབ་ཏུ་ཡེ་ཤེས་ཆོས་སྐུ་ཁོ་ན་གཟུགས་སྐུ་སྣང་བ་སྐྱེད་པའི་སྒོ་ནས་ཕྲིན་ལས་མཛད་པའི་ཕྱིར་ཞེ་ན། འོ་ན་མཆོག་གི་སྤྲུལ་སྐུས་གདུལ་བྱ་ཚོགས་ལམ་ལ་འགོད་པའི་ཕྲིན་ལས་དེ་ལོངས་སྐུ་ཁོ་ནའི་ཕྲིན་ལས་སུ་ཐལ། ཀུན་རྫོབ་ཏུ་ལོངས་སྐུ་ཁོ་ན་མཆོག་གི་སྤྲུལ་སྐུ་ཁོ་ནར་སྣང་བ་སྐྱེད་པའི་སྒོ་ནས་གདུལ་བྱ་ཚོགས་ལམ་ལ་འགོད་པའི་ཕྲིན་ལས་ཡིན་པའི་ཕྱིར། རྟགས་ཁྱབ་ཁས། འདོད་ན། དེ་ཆོས་ཅན། ལོངས་སྐུ་ཁོ་ནའི་ཕྲིན་ལས་མིན་པར་ཐལ། ཡེ་ཤེས་ཆོས་སྐུ་ཁོ་ནའི་ཕྲིན་ལས་ཡིན་པའི་ཕྱིར། རྟགས་གསལ་དངོས། དེ་ལ་ཁོ་ན་རེ། ཀུན་རྫོབ་ཏུ་ལོངས་སྐུ་ཁོ་ན་མཆོག་གི་སྤྲུལ་སྐུ་སྣང་བ་སྐྱེད་པའི་སྒོ་ནས་དེ་ལྟ་བུའི་ཕྲིན་ལས་མཛད་པ་མིན་པར་ཐལ། མཆོག་གི་སྤྲུལ་སྐུར་སྣང་བ་སྐྱེད་པའི་སྒོ་ནས་གདུལ་བྱ་ཚོགས་ལམ་ལ་འགོད་པར་གནས་པའི་རྒྱུ་དེ་ལ་ཡེ་ཤེས་ཆོས་སྐུ་ངེས་པར་དགོས་པའི་ཕྱིར་ཞེས་ཟེར། ཀུན་རྫོབ་ཏུ་ཡེ་ཤེས་ཆོས་སྐུ་ཁོ་ན་སྤྲུལ་སྐུར་སྣང་བ་སྐྱེད་པའི་སྒོ་ནས་གདུལ་བྱ་ཚོགས་ལམ་ལ་འགོད་པའི་ཕྲིན་ལས་མཛད་པ་མ་ཡིན་པར་ཐལ། དེའི་རྒྱུ་ལའང་ལོངས་སྐུ་ངེས་པར་དགོས་པའི་ཕྱིར། ཁྱབ་པ་ཁས། གཞན་ཡང་ཕྲིན་ལས་ཉེར་བདུན་པོ་དེ་ངོ་བོ་ཉིད་སྐུ་ཁོ་ནའི་ཕྲིན་ལས་སུ་ཐལ། ངོ་བོ་ཉིད་སྐུ་ཁོ་ན་སངས་རྒྱས་དང་། བྱང་སེམས་དང་། ཉན་ཐོས་ལ་སོགས་པ་ལ་ཡེ་ཤེས་ཆོས་སྐུ་ལ་སོགས་པ་སྐུ་གསུམ་དུ་སྣང་བའི་སྒོ་ནས་གདུལ་བྱའི་དོན་མཛད་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། དེ་ཁོ་ནའི་ཕྲིན་ལས་མིན་པར་ཐལ། ཡེ་ཤེས་ཆོས་སྐུ་ཁོ་ནའི་ཕྲིན་ལས་ཡིན་པའི་ཕྱིར། རྟགས་གསལ་དངོས་རྩ་བར་མ་གྲུབ་ན། དེར་ཐལ། དེ་ལྟར་ངོ་བོ་ཉིད་ཀྱི་སྐུའི་བདག་ཉིད་བསྒོམས་པའི་སྟོབས་ལས་བྱུང་བ་སངས་རྒྱས་ལ་སོགས་པ་ཡུལ་ཉིད་དུ་ཞེས་སོགས་གསུངས་པའི་ཕྱིར། དེ་བཞིན་འཁོར་བ་ཇི་སྲིད་འདིའི། །ཞེས་པའི་སྐབས་སུ། ཁ་ཅིག གདུལ་བྱ་ལ་ལམ་གྱི་རྟེན་ལ་འགོད་པ་ནས། གདུལ་བྱ་མི་གནས་པའི་མྱང་འདས་ལ་འགོད་པའི་བར་གྱི་ཕྲིན་ལས་རྣམས་ཆོས་ཅན། ཆོས་སྐུའི་ཕྲིན་ལས་ཡིན་ཏེ། ཆོས་སྐུས་བདག་རྐྱེན་བྱས་པ་ལ་བརྟེན་ནས་བྱུང་བའི་རྣམ་དཀར་གྱི་ཡོན་ཏན་ཡིན་པའི་ཕྱིར་ཏེ། རྟགས་དེས་གསལ་བ་དེའི་མཚན་ཉིད་ཡིན་པའི་ཕྱིར་ཞེས་ཟེར་རོ། །དེ་ལ་གཞན་དག་ན་རེ། ཆོས་སྐུའི་རྒྱུར་གྱུར་པའི་ས་བཅུ་པའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། བྱ་བ་ཡུལ་ལ་ཡོད་པའི་ཆོས་སྐུའི་ཕྲིན་ལས་ཡིན་པའི་ཕྱིར་ཏེ། ས་བཅུ་པའི་ཡེ་ཤེས་ཡིན་པའི་ཕྱིར། རྩ་བར་འདོད་ན། ཆོས་སྐུའི་འབྲས་བུར་ཐལ། འདོད་པའི་ཕྱིར། འདོད་ན། ས་དགུ་པའི་གནས་སྐབས་ན་ཆོས་སྐུ་ཡོད་པར་ཐལ་ལོ་ཞེས་ཟེར། འོ་ན་རང་གི་རྒྱུར་གྱུར་པའི་ཆོས་སྐུའི་ཕྲིན་ལས་ཡིན་ན་ཆོས་སྐུའི་ཕྲིན་ལས་ཡིན་དགོས་པར་ཐལ། ཆོས་སྐུའི་རྒྱུར་གྱུར་པའི་ས་བཅུ་པའི་ཡེ་ཤེས་དེ་ཆོས་སྐུའི་ཕྲིན་ལས་ཡིན་པའི་ཕྱིར། འདོད་ན། དེ་ཆོས་ཅན། ཆོས་སྐུའི་འབྲས་བུར་ཐལ། རང་གི་རྒྱུར་གྱུར་པའི་ཆོས་སྐུའི་འབྲས་བུ་ཡིན་པའི་ཕྱིར། ཁ་ཅིག རང་རྒྱུ་ཆོས་སྐུའི་བདག་རྐྱེན་བྱས་པ་ལ་བརྟེན་ནས་བྱུང་བའི་རྣམ་དཀར་གྱི་ལས་དེ་ཆོས་སྐུའི་ཕྲིན་ལས་ཀྱི་མཚན་ཉིད་ཡིན་ཞིང་། སྤྱིར་ཕྲིན་ལས་ཀྱི་མིང་གིས་བརྗོད་རུང་ལ་དབྱེ་ན། བྱེད་པ་པོ་ལ་ཡོད་པའི་དང་། བྱ་བ་ཡུལ་ལ་ཡོད་པའི་ཕྲིན་ལས་གཉིས་ལས། ཆོས་སྐུའི་ཕྲིན་ལས་མཚན་ཉིད་པ་ཡིན་ན་དང་པོ་དེ་ཡིན་དགོས་ཏེ། དེ་ཡིན་ན་ཆོས་སྐུའི་བྱེད་ལས་ཡིན་དགོས་པ་གང་ཞིག བྱ་བ་དང་བྱེད་པ་རྫས་གཞན་དུ་མེད་པའི་ཕྱིར་དང་། ནུས་པ་དང་ནུས་པ་ཅན་རྫས་གཞན་དུ་མེད་པའི་ཕྱིར། གལ་ཏེ་ཆོས་སྐུའི་ཕྲིན་ལས་ལ་ཉེར་བདུན་དུ་དབྱེ་བ་མི་འཐད་པར་ཐལ། དེ་སངས་རྒྱས་ཀྱི་ས་ཁོ་ནར་ཡོད་པའི་ཕྱིར་ཞེ་ན། སྐྱོན་མེད་དེ། རྫོགས་པའི་སངས་རྒྱས་ཀྱི་གདུལ་བྱ་ལམ་གྱི་རྟེན་ལ་འགོད་པའི་མཛད་པ་ནས་གཟུང་སྟེ། དེས་གདུལ་བྱ་མི་གནས་པའི་མྱང་འདས་ལ་འགོད་པར་མཛད་པའི་བར་ཉེར་བདུན་པོ་ལ་ཕྲིན་ལས་ཉེར་བདུན་དུ་འདོད་ཅིང་། དེ་ལྟ་བུའི་མཛད་པ་ཉེར་བདུན་པོ་སངས་རྒྱས་ཀྱི་ས་ཁོ་ནར་ཡོད་པའི་ཕྱིར་ཏེ། མྱ་ངན་འདས་ལ་འགོད་པ་སྟེ། །ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་འདོད། །ཅེས་གསུངས་པའི་ཕྱིར། གཞན་ཡང་ཕྲིན་ལས་ཉེར་བདུན་པོ་ཆོས་ཅན། སངས་རྒྱས་ཀྱི་ས་ཁོ་ནར་ཡོད་པར་ཐལ། སྦྱོར་བཞི་བསྒོམས་པའི་རྣམ་སྨིན་མཐར་ཐུག་ཡིན་པའི་ཕྱིར། མ་གྲུབ་ན། དེར་ཐལ། དངོས་པོ་དྲུག་ཏུ་དབྱེ་བའི་ཚེ། དེ་ཡི་རྣམ་སྨིན་ཞེས་པའི་རྣམ་སྨིན་གཅིག་པོ་དེ་ཉིད་ལ་དངོས་པོ་གསུམ་དུ་ཕྱེ་བའི་ཚེ་ཆོས་སྐུའི་ཕྲིན་ལས་ཞེས་ཆོས་སྐུ་དང་ཕྲིན་ལས་གཉིས་སུ་བཤད་པའི་ཕྱིར་རོ་ཞེས་ཟེར་རོ། །འོ་ན་ཆོས་སྐུ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། རང་རྒྱུ་ཆོས་སྐུས་བདག་རྐྱེན་བྱས་པ་ལ་བརྟེན་ནས་བྱུང་བའི་རྟོགས་པའི་ཆོས་འཁོར་ཡིན་པའི་ཕྱིར། རྩ་བར་འདོད་ན། རྫོགས་པའི་སངས་རྒྱས་ཀྱིས་གདུལ་བྱ་ཚོགས་ལམ་ལ་འགོད་པའི་མཛད་པ་དེ་ཆོས་སྐུའི་ཕྲིན་ལས་ཡིན་པ་དང་། ཚོགས་ལམ་དེ་མིན་པའི་ཁྱད་པར་མི་འཐད་པར་ཐལ། དེས་གདུལ་བྱ་མི་གནས་པའི་མྱང་འདས་ལ་འགོད་པའི་མཛད་པ་དང་། མི་གནས་པའི་མྱང་འདས་གཉིས་པོ་ཆོས་སྐུའི་ཕྲིན་ལས་ཡིན་མིན་གྱི་ཁྱད་པར་མེད་པའི་ཕྱིར་ཏེ། དེ་གཉིས་ཀ་དེ་ཡིན་པར་མཚུངས་པའི་ཕྱིར་ཏེ། མི་གནས་པའི་མྱང་འདས་དེ་དེ་ཡིན་པའི་ཕྱིར་ཏེ། ཆོས་སྐུ་དེ་ཡིན་པའི་ཕྱིར་རོ། །ཡང་དེ་ཆོས་ཅན། ཆོས་སྐུའི་བྱེད་ལས་སུ་ཐལ། དེའི་ཕྲིན་ལས་ཡིན་པའི་ཕྱིར། འདོད་ན། དེ་ཆོས་ཅན། དེ་མིན་པར་ཐལ། ཆོས་སྐུ་དང་ཐ་དད་མིན་པའི་ཕྱིར། གཞན་ཡང་གདུལ་བྱའི་རྒྱུད་ལ་ཆོས་སྐུའི་ཕྲིན་ལས་དངོས་སུ་སྐྱེ་བ་མེད་པར་ཐལ། ཆོས་སྐུའི་ཕྲིན་ལས་ཡིན་ན་སངས་རྒྱས་ཀྱི་ས་ཁོ་ན་ན་ཡོད་དགོས་པའི་ཕྱིར། འདོད་ན། སངས་རྒྱས་ཀྱི་ཕྲིན་ལས་དངོས་སུ་སྐྱེས་པའི་ཡུལ་མ་གྲུབ་པར་ཐལ། འདོད་པ་གང་ཞིག སངས་རྒྱས་ཀྱི་རྒྱུད་ལ་ཕྲིན་ལས་དངོས་སུ་མི་འཇུག་པའི་ཕྱིར་ཏེ། དེ་དེའི་གདུལ་བྱ་མིན་པའི་ཕྱིར། གཞན་ཡང་ཆོས་འཁོར་དང་དེ་བསྐོར་བ་པོ་རྫས་གཞན་ཡིན་པ་མི་སྲིད་པར་ཐལ། ཕྲིན་ལས་དང་ཕྲིན་ལས་ཅན་རྫས་གཞན་ཡིན་པ་མི་སྲིད་པའི་ཕྱིར། འདོད་ན། དེ་སྲིད་པར་ཐལ། བྱང་སེམས་མཐོང་ལམ་པའི་རྒྱུད་ལ་སྐྱེས་པའི་རྟོགས་པའི་ཆོས་འཁོར་དང་། དེ་སྐོར་བ་པོའི་མཆོག་གི་སྤྲུལ་སྐུ་གཉིས་རྫས་གཞན་ཡིན་པའི་ཕྱིར། གཞན་ཡང་། སངས་རྒྱས་ཀྱི་ཕྲིན་ལས་ཀྱི་ས་མཚམས་དེ་ཐེག་ཆེན་ལམ་དུ་འཇུག་ཁ་མ་ནས་མི་གནས་པའི་མྱང་འདས་ཀྱི་བར་དུ་འཇོག་པ་མི་འཐད་པར་ཐལ། དེ་སངས་རྒྱས་ཀྱི་ས་ཁོ་ནར་ཡོད་པའི་ཕྱིར། འདོད་ན། ཐེག་ཆེན་སེམས་བསྐྱེད་ཀྱི་ས་མཚམས་དེ་ཐེག་ཆེན་གྱི་ཚོགས་ལམ་ཆུང་ངུ་ནས་སངས་རྒྱས་ཀྱི་སའི་བར་དུ་འཇོག་པ་མི་འཐད་པར་ཐལ། འདོད་པའི་ཕྱིར། ཁྱབ་སྟེ། སེམས་བསྐྱེད་པ་དང་པོ་དང་། ཐ་མའི་ལས་བསྟན་པའི་གོ་རིམ་བསྟན་པའི་རིམ་པས་ཞེས་གསུངས་པའི་ཕྱིར། གཞན་ཡང་། སངས་རྒྱས་ཀྱི་ཕྲིན་ལས་དེ་སངས་རྒྱས་ཀྱི་ས་ཁོ་ནར་འཇོག་པ་མི་འཐད་པར་ཐལ། གདུལ་བྱའི་རྒྱུད་ལ་སངས་རྒྱས་ཀྱི་ཕྲིན་ལས་དངོས་སུ་འཇུག་པའི་ཕྱིར་ཏེ། རྫོགས་པའི་སངས་རྒྱས་དེ་དུས་འཁོར་བ་ཇི་སྲིད་མ་སྟོངས་ཀྱི་བར་དུ་འབད་མེད་ལྷུན་གྲུབ་ཀྱི་ཕྲིན་ལས་མཛད་པ་དེ་དགོས་པ་ཡོད་པའི་ཕྱིར་རོ། །ཡུམ་དོན་རབ་གསལ་ལས་སྐབས་བརྒྱད་པའི་དཀའ་བའི་གནས་རྣམ་པར་བཤད་པའོ། །དེ་ལྟར་དགེ་འདུན་ཉི་ཤུ། སྙོམས་འཇུག་དགུ། རྟེན་འབྲེལ། ཐོད་རྒལ་རྣམས་ནི་གཞན་དུ་བཤད་ཟིན་ཅིང་། འདིར་ནི་དེ་ལས་གཞན་པའི་དཀའ་གནས་ཆེ་ཆུང་རྣམས་ལ་དོན་ལ་གནས་པའི་དགག་སྒྲུབ་ཆེ་བ། རོང་སྟོན་ཐམས་ཅད་མཁྱེན་པའི་བཞེད་པ་ཇི་ལྟ་བ་བཞིན་བཀོད་ཅིང་ཀུན་མཁྱེན་བླ་མའི་བཞེད་པའང་དེ་ལས་གཞན་མེད་པས་ལོགས་སུ་མ་སྨོས་ལ། འདི་ཙམ་གྱིས་སྐབས་ཀྱི་དོན་རྣམས་རྟོགས་པར་འགྱུར་བས། ཕྱོགས་ཞེན་སྤངས་ནས་གུས་པས་བླངས་ཏེ་རང་གཞན་ལ་ཕན་པ་བསྒྲུབ་པར་བྱའོ། །རྨད་བྱུང་ཕྲིན་ལས་བྱེ་བའི་གཟི་འབར་རྒྱལ་བ་ཉིན་བྱེད་དབང་པོ་དང་། །ཕྱོགས་རེའི་མཛད་པས་གདུལ་བྱ་ཀུ་མུད་སྐྱོང་མཛད་རང་རྒྱལ་མཚན་མོའི་མགོན། །ཉི་ཚེའི་རྟོགས་པས་རང་རྒྱུད་རྣམ་གསལ་སློབ་མའི་སྐར་ཚོགས་བཅས་རྣམས་ཀྱི། །བགྲོད་གཅིག་ལམ་གྱུར་མཐའ་དང་དབུས་མེད་ཟབ་ཅིང་ལྟ་དཀའི་རྒྱལ་ཡུམ་འདི། །དགྲ་ལས་རྣམ་རྒྱལ་རྒྱལ་སྲས་དཔའ་བོར་བཅས། །མི་དང་ལྷ་དང་ལྷ་མིན་ཚོགས་དབུས་སུ། །ཐུབ་པའི་དབང་པོ་ཉིད་ཀྱིས་གདན་བཤམས་ནས། །འགྲོ་ལ་སྟོན་པའི་དགོངས་པ་མཉམ་གཞག་ཚེ། །རབ་འབྱམས་ཕྱོགས་བཅུའི་ཞིང་གི་རྒྱལ་བའི་སྲས། །ས་ཆེན་གཡོས་པའི་ངོ་མཚར་སྐྱེས་གྱུར་ཏེ། །རྫུ་འཕྲུལ་སྟོབས་ཀྱིས་གསེར་གྱི་པདྨོ་ནི། །འདབ་མ་སྟོང་ལྡན་རྒྱལ་བའི་བཀའ་ཡིས་འཐོར། །དེ་ཚེ་ཚེམས་དཀར་བར་ནས་འཕྲུལ་གྱི་ལྗགས། །རྣམ་པར་བརྐྱངས་ཏེ་སྲིད་གསུམ་ཀུན་ཁྱབ་པའི། །ཚངས་པའི་དབྱངས་ཀྱིས་བློ་ཡི་རིམ་པ་བཞིན། །ཐམས་ཅད་ལྡན་པའི་འཁོར་ལ་གོ་བར་མཛད། །དེ་ཡི་སྦས་དོན་ཐེག་མཆོག་ལམ་གྱི་རིམ། །ཟབ་ཅིང་ཡངས་པའི་མ་ཕམ་བློ་མཚོ་ལས། །ཐོགས་མེད་མཁྱེན་པའི་ཆུ་འཛིན་གྱིས་བླངས་ཏེ། །རྣམ་གྲོལ་དགེ་བའི་ལོ་ཐོག་སྤེལ་ཕྱིར་ཕབ། །གང་དེའི་ལེགས་བཤད་རྒྱ་བོད་མཁས་རྣམས་ཀྱི། །བློ་གྲོས་བུམ་བཟང་ལས་བྱུང་བདུད་རྩའི་རྒྱུན། །འཆི་མེད་དཔལ་སྦྱིན་འདི་ནི་བློ་ལྡན་ཞིང་། །དོན་གཉེར་གཟུ་བོར་གནས་པ་རྣམས་ལ་སྤེལ། །ལྷག་བསམ་དགེ་བའི་སེམས་ཀྱིས་ཡུམ་གྱི་དོན། །དགོངས་པ་རབ་གསལ་ལེགས་བཤད་འདི་བགྱིས་པའི། །རབ་དཀར་དགེ་ཚོགས་ཇི་སྙེད་མཆིས་པ་དེ། །མཁའ་མཉམ་འགྲོ་བས་བྱང་ཆུབ་ཐོབ་ཕྱིར་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །སྐྱོན་མེད་བླ་མའི་ཐུགས་ཀྱིས་རྗེས་གཟུང་ཞིང་། །ཐོས་བསམ་སྒོམ་པའི་ནོར་གྱིས་རྒྱུད་ཕྱུག་སྟེ། །རྟག་ཏུ་འགྲོ་ལ་དམ་ཆོས་སྟོན་པར་ཤོག །མངོན་པར་རྟོགས་པའི་རྒྱན་འགྲེལ་པ་དང་བཅས་པའི་དཀའ་བའི་གནས་རྣམ་པར་བཤད་པ་ཡུམ་དོན་རབ་གསལ་ཞེས་བྱ་བ་འདི་ནི། ཐོག་མར་ཐུབ་དབང་གཉིས་པ་རོང་སྟོན་ཆོས་རྗེ་ལས་ཅུང་ཟད་ཐོས་ཤིང་། འཛམ་གླིང་མཁས་པའི་དབང་པོ་ཀུན་མཁྱེན་སངས་རྒྱས་འཕེལ་ལ་སོགས་པ་རྣམས་ལས་ཞིབ་ཏུ་མཉན་ཏེ་ལུགས་འདི་ལ་མི་འཕྲོག་པའི་སྤོབས་པ་ཐོབ་ཅིང་། གཞན་ཡང་སྡེ་སྣོད་དང་རྒྱུད་སྡེའི་དོན་ཕལ་མོ་ཆེ་ལ་བློ་ཁ་ཅུང་ཟད་ཕྱོགས་པ་ཤཱཀྱའི་དགེ་སློང་བསོད་ནམས་སེང་གེས་སྡེ་སྣོད་འཛིན་པ་དུ་མས་ཡང་ཡང་བསྐུལ་ཞིང་རང་གི་རྟོགས་པ་མི་བརྗེད་པའི་ཕྱིར་དུ་ཤིང་ཕོ་སྤྲེའུ་ལོ་གྲོ་ཞུན་གྱི་ཟླ་བའི་ཡར་ཚེས་བརྒྱད་ལ་འབྲས་ཡུལ་རྫོང་དཀར་གྱི་སྐྱེད་མོས་ཚལ་དུ་སྦྱར་བའི་ཡི་གེ་པ་ནི་གཞོན་ནུ་བློ་གྲོས་རབ་ལྡན་ནོ། །ཤུ་བྷཾ།། །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། དགེའོ། དགེའོ།། །