Nitartha Digital Library
Tibetan
 
no previousཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་རྟོགས་རྒྱན་གྱི་གཞུང་སྔ་ཕྱིའི་འབྲེལ་དང་དཀའ་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད།next

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་རྟོགས་རྒྱན་གྱི་གཞུང་སྔ་ཕྱིའི་འབྲེལ་དང་དཀའ་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད།

སྤྱིར་བྱམས་པ་དང་འབྲེལ་བའི་ཆོས་སྡེ་ཉི་ཤུའི་རྣམ་བཞག་སོགས།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་རྟོགས་རྒྱན་གྱི་གཞུང་སྔ་ཕྱིའི་འབྲེལ་དང་དཀའ་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་བཞུགས་སོ།། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །ཡེ་ཤེས་ཕུན་ཚོགས་དག་པ་གཉིས་དང་རྣམ་དབྱེར་མེད་པའི་ཆོས་སྐུ་ནམ་མཁའི་དབྱིངས། །གང་གིས་བརྙེས་ཚེ་གདུལ་བྱ་མཆོག་གི་གཟའ་སྐར་དབུས་ན་ལོངས་སྐུའི་དཀྱིལ་འཁོར་རྒྱས། །རྨད་བྱུང་སྐུ་དེའི་གཟུགས་བརྙན་རིགས་ཅན་གསུམ་གྱི་སེམས་རྒྱུད་དག་པའི་ཆུ་ནང་དུ། །རྣམ་པར་འཆར་བའི་ཆ་ཙམ་ཆོས་ཀྱིས་མཐོ་བའི་ཁང་བཟང་དབུས་བཞུགས་དེ་ལ་འདུད། །ཚེ་འདིར་མགོན་པོ་གང་གི་གསུང་རབ་སྦས་དོན་ཟབ་མོའི་གཏེར་གྱི་ཁ་འབྱེད་ཅིང་། །ཚེ་འདིའི་སྣང་བ་ནུབ་ཚེ་ཆོས་ཀྱིས་མཐོ་བའི་ཁང་བཟང་མཆོག་དེའི་སྒོ་འབྱེད་ཕྱིར། །ཆོས་ཀྱི་རྗེས་འབྲང་བློ་གྲོས་མིག་གིས་མཐོང་བའི་ལེགས་བཤད་གནད་ཀྱི་ལྡེ་མིག་འདི། །སྐལ་བཟང་བློ་གསལ་དོན་གཉེར་རྣམས་ལ་འབུལ་ལོ་སྔར་བཤད་དོན་གཉིས་གྲུབ་པར་མཛོད།། །།ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཏེ། ཇི་སྐད་དུ་མདོ་སྡུད་པར། རྒྱལ་བ་འདས་དང་མ་བྱོན་ཕྱོགས་བཅུར་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་དང་། མགོན་པོ་ཀླུ་སྒྲུབ་ཀྱིས། གང་སླད་སངས་རྒྱས་འཇིག་རྟེན་གཙོ། །ཐུགས་རྗེ་ཅན་རྣམས་ཁྱོད་ཀྱི་སྲས། །དེ་ཡི་སླད་དུ་དགེ་མ་ཁྱོད། །སེམས་ཅན་ཀུན་གྱི་ཕྱི་མོ་ལགས། །ཞེས་གསུངས་པའི་ཕྱིར་རོ། །རིགས་ཅན་གསུམ་གྱིས་བྱང་ཆུབ་གསུམ་ཐོབ་པའི་རྒྱུ་ཡང་ཡིན་ཏེ། ཇི་སྐད་དུ། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཚུ་རོལ་ཕ་རོལ་འགྲོ་དོགས་མི་མཐོང་བཞིན། །ཞེས་དང་། མགོན་པོ་ཀླུ་སྒྲུབ་ཀྱིས། སངས་རྒྱས་རང་སངས་རྒྱས་རྣམས་དང་། །ཉན་ཐོས་རྣམས་ཀྱིས་ངེས་བསྟེན་མ། །ཁྱོད་ཉིད་གཅིག་པུ་ཐར་པའི་ལམ། །དེ་ལྟར་གཞན་དག་མེད་པར་ངེས། །ཞེས་གསུངས་པའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་རང་གི་ངོ་བོ་སྨྲ་བསམ་བརྗོད་པའི་ཡུལ་ལས་འདས་པས་བློས་ཡུལ་དུ་བྱས་པའི་སྒོ་ནས་བསམ་དུ་མེད་ཅིང་། བརྗོད་པ་ཚིག་གིས་ཇི་ལྟ་བ་བཞིན་དུ་བརྗོད་དུ་ཡང་མེད་དེ། མདོར། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཁོངས་སུ་གནས་པར་བྱ། །ཞེས་དང་། རྒྱལ་བ་མ་ཕམ་པས། གང་ཞིག་ཡོད་མིན་མེད་མིན་ཡོད་མེད་མ་ཡིན་ཡོད་མེད་གཞན་དུའང་། །བརྟག་པར་མི་ནུས་ངེས་ཚིག་དང་བྲལ་སོ་སོར་རང་གིས་རིག་ཞི་བ། །ཞེས་དང་། མགོན་པོ་ཀླུ་སྒྲུབ་ཀྱིས། འདིར་ཁྱོད་བསྟོད་པར་སུས་རྔོ་ཐོགས། །མཚན་མ་མེད་ཅིང་ཡི་གེ་མེད། །ངག་གི་ཡུལ་ཀུན་ལས་འདས་མ། །གང་ཁྱོད་འགར་ཡང་བསྟན་མི་མངའ། །ཞེས་དང་། བྱང་ཆུབ་སེམས་དཔའ་ཞི་བ་འཚོས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་གསུངས་པའི་ཕྱིར་རོ། །རང་གི་ངོ་བོ་དེ་ལྟར་ཡིན་ཀྱང་གདུལ་བྱས་རྟོགས་པའི་དོན་དུ་ཐ་སྙད་དུ་རྗེས་སུ་མཐུན་པ། བློའི་ཡུལ་དུ་བྱས་པའི་སྒོ་ནས་བསམ་དུ་ཡོད་ཅིང་བརྗོད་པ་ཚིག་གིས་བསྟན་དུ་ཡང་ཡོད་དེ། ཇི་སྐད་དུ། སློབ་མ་བཟང་པོ་བླ་མ་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །ཞེས་དང་། བྱང་ཆུབ་ཕུང་པོར་ཞེན་ནས་མཆོག་འཛིན་མ་བྱེད་ཅེས། །དང་པོའི་ལས་ཅན་དེ་ལ་དེ་སྐད་བསྟེན་པར་བྱ། །ཞེས་དང་། རྒྱལ་བ་མ་ཕམ་པས། བློ་ལྡན་རྒྱལ་བའི་ཡུལ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །ཅེས་དང་། མགོན་པོ་ཀླུ་སྒྲུབ་ཀྱིས། གང་གིས་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་ནི་སྟོན་མཛད་པ། །གོ་ཏཾ་དེ་ལ་ཕྱག་འཚལ་ལོ། །ཞེས་གསུངས་པའི་ཕྱིར། དེས་ན་བརྗོད་པ་དང་བྲལ་བའི་ཤེར་ཕྱིན། སོ་སོ་རང་གིས་རིག་པའི་ཡེ་ཤེས་ཀྱིས་མངོན་དུ་བྱ་བའི་ཆེད་དུ་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱ་རྣམས་ལ་ཐ་སྙད་དུ་ཚིག་གི་སྒོ་ནས་རྗེས་སུ་མཐུན་པ་བསྟན་པའི་ཚུལ་ལ། ཤེར་ཕྱིན་སྟོང་ཕྲག་བརྒྱ་པ་ལ་སོགས་པ་དུ་མ་གསུངས་པའི་སྦས་དོན་མངོན་པར་རྟོགས་པའི་རིམ་པ་གཏན་ལ་འབེབས་པར་བྱེད་པ་མགོན་པོ་བྱམས་པས་གསུངས་པའི་ཚིག་ལེའུར་བྱས་པ་འདིའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་ལ་དོན་བཞི་སྟེ། སྤྱིར་བྱམས་པ་དང་འབྲེལ་པའི་ཆོས་སྡེ་ཉི་ཤུའི་རྣམ་གཞག དེ་ལས་ཆོས་ལྔས་མདོ་ཇི་ལྟར་འཆད་ཚུལ། བྱེ་བྲག་ཏུ་བསྟན་བཅོས་འདིས་མདོ་ཇི་ལྟར་འཆད་པའི་ཚུལ། སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པའོ། །དང་པོ་ནི། གང་ཟག་གསུམ་གྱིས་མཛད་པའི་ཆོས་ཉི་ཤུ་སྟེ། བྱམས་པས་མཛད་པའི་ཆོས་ལྔ། ཐོགས་མེད་ཀྱིས་མཛད་པའི་ས་སྡེ་ལྔ་དང་སྡོམ་རྣམ་པ་གཉིས་ཏེ་བདུན། དབྱིག་གཉེན་གྱིས་མཛད་པའི་པྲ་ཀ་ར་ཎ་སྡེ་བརྒྱད་དོ། །ཆོས་ལྔ་ནི་རྒྱན་གཉིས། འབྱེད་གཉིས། རྒྱུད་བླ་མ་སྟེ། འདི་དག་གི་དོན་ལ་སྔོན་གྱི་མཁས་པ་ཁ་ཅིག སྡེ་སྣོད་གསུམ་གཏན་ལ་འབེབས་པའི་དབང་དུ་མཛད་ནས་ཆོས་ལྔར་ངེས་ཏེ། དེ་ཡང་མདོ་སྡེ་གཏན་ལ་འབེབས་པ་ནི་མདོ་སྡེའི་རྒྱན་དང་། རྒྱུད་བླ་སྟེ། སྔ་མས་ནི་མདོ་སྡེ་དྲང་ངེས་མ་ཕྱེ་བར་གཏན་ལ་འབེབས། ཕྱི་མས་ནི་ངེས་དོན་གྱི་མདོ་སྡེ་བྱེ་བྲག་ཏུ་གཏན་ལ་འབེབས་པར་བྱེད་པའི་ཕྱིར། འདུལ་བའི་སྡེ་སྣོད་གཏན་ལ་འབེབས་པ་ནི་མངོན་རྟོགས་རྒྱན་ཏེ་ཐེག་ཆེན་ཐུན་མོང་མ་ཡིན་པའི་འདུལ་བ་ནི། ཉོན་མོངས་པ་འདུལ་བ་ཡིན་ལ། འདིས་དེའི་གཉེན་པོ་བསྟན་པའི་ཕྱིར་རོ། །མངོན་པའི་སྡེ་སྣོད་གཏན་ལ་འབེབས་པ་ནི་འབྱེད་རྣམ་པ་གཉིས་ཏེ། འདིས་ཆོས་རྣམས་ཀྱི་རང་སྤྱིའི་མཚན་ཉིད་གཏན་ལ་འབེབས་པའི་ཕྱིར་ཞེས་གསུངས་སོ། །ཡང་ཁ་ཅིག་གིས། མདོ་སོ་སོ་བ་དང་། ཐུན་མོང་བ་གཏན་ལ་འབེབས་པའི་དབང་དུ་བྱས་ནས་བྱམས་ཆོས་ལྔར་ངེས་ཏེ། མདོ་སྡེའི་རྒྱན་གྱིས་སངས་རྒྱས་ཀྱི་སའི་མདོ་དང་། མངོན་རྟོགས་རྒྱན་གྱིས་ཤེར་ཕྱིན་འབུམ་པ་དང་། རྒྱུད་བླས་འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོའི་དོན་གཏན་ལ་འབེབས་པས་གསུམ་པོ་མདོ་སོ་སོ་བ་དང་། དབུས་མཐས་གང་ཟག་གཅིག་མངོན་པར་རྫོགས་པར་འཚང་རྒྱ་བའི་ལམ་རིམ་སྟོན་ལ། ཆོས་དང་ཆོས་ཉིད་རྣམ་འབྱེད་ཀྱིས་དེའི་ནང་ནས་ཐེག་ཆེན་ཐུན་མོང་མ་ཡིན་པའི་ལམ་རིམ་སྟོན་པས་གཉིས་པོ་མདོའི་དོན་ཐུན་མོང་དུ་གཏན་ལ་འབེབས་བྱེད་ཡིན་པའི་ཕྱིར་རོ་ཞེས་བཞེད་དོ། །ཡང་ཁ་ཅིག་གིས། གཙོ་བོ་ལུས་ལྟ་བུའི་བསྟན་བཅོས་དང་། གྱེས་པ་ཡན་ལག་ལྟ་བུའི་བསྟན་བཅོས་ཀྱི་དབང་དུ་བྱས་ནས་བྱམས་ཆོས་ལྔར་ངེས་ཏེ། མངོན་རྟོགས་རྒྱན་དང་། མདོ་སྡེའི་རྒྱན་དང་། དབུས་མཐའ་རྣམ་འབྱེད་གསུམ་ནི་རིམ་པ་ལྟར་འདུལ་བའི་སྡེ་སྣོད་དང་། མདོ་སྡེའི་སྡེ་སྣོད་དང་། མངོན་པའི་སྡེ་སྣོད་གཏན་ལ་འབེབས་པས། གཙོ་བོ་ལུས་ལྟ་བུའི་བསྟན་བཅོས་ཡིན་ལ། རྒྱུད་བླས་ནི། མདོ་སྡེའི་རྒྱན་དུ་རིགས་ཆད་ཀྱི་སེམས་ཅན་ཡོད་པར་བསྟན་པ་དེ་དྲང་དོན་དགོངས་པ་ཅན་དུ་བསྟན་ནས། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྒྲུབ་པ་དང་། ཆོས་དང་ཆོས་ཉིད་རྣམ་འབྱེད་ནི། དབུས་མཐར་ཐེག་པ་ཐུན་མོང་བའི་ལམ་རིམ་བསྟན་ཀྱང་། ཐེག་ཆེན་ཐུན་མོང་མ་ཡིན་པའི་ལམ་རིམ་མ་བསྟན་པ་དེ། འདིས་བསྟན་པས་གཉིས་པ་གྱེས་པ་ཡན་ལག་ལྟ་བུའི་བསྟན་བཅོས་ཡིན་ཞེས་བཞེད་དོ། །རང་ལུགས་ནི་འོག་དུ་འབྱུང་ངོ་། །གཉིས་པ་ནི་ཐོགས་མེད་ཀྱིས་མཛད་པའི་ཆོས་བདུན་ལས་སའི་དངོས་གཞི་དང་རྣམ་པར་གཏན་ལ་དབབ་པ་བསྡུ་བ་གཉིས་ཀྱིས་གསུང་རབ་ཀྱི་དོན་གྱི་ཆ་གཏན་ལ་འབེབས་པར་བྱེད་དེ། སྔ་མས་ནི་གང་ཟག་གི་ཆ་རྐྱེན་བསྟན་ལ། ཕྱི་མས་ནི་དེའི་ནང་ནས་ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་ཀྱི་རྣམ་གྲངས་བསྟན་པའི་ཕྱིར་རོ། །གང་ཟག་གི་ཆ་རྐྱེན་གྱི་དོན་ནི། གང་ཟག་གཅིག་སངས་རྒྱ་བའི་ཆ་རྐྱེན་ལ་དམིགས་ཡུལ། ཉམས་ལེན། འབྲས་བུ་གསུམ་ཀར་དགོས་པས་དེ་གསུམ་ཚང་བ་ལ་བྱའོ། །གཞི་བསྡུ་བ་དང་རྣམ་གྲངས་བསྡུ་བ་གཉིས་ཀྱིས་རྗོད་བྱེད་ཚིག་གི་ཆ་གཏན་ལ་འབེབས་པར་བྱེད་དེ། སྔ་མས་ནི་རྗོད་བྱེད་ཐམས་ཅད་སྡེ་སྣོད་གསུམ་དུ་འདུས་པའི་ཚུལ་དང་། ཕྱི་མས་ནི་དེ་དག་གི་ཀུན་ནས་ཉོན་མོངས་པ་དང་། རྣམ་པར་བྱང་བའི་མིང་གི་རྣམ་གྲངས་གཏན་ལ་དབབ་པའི་ཕྱིར་རོ། །རྣམ་པར་བཤད་པའི་སྒོ་བསྡུ་བས་ནི་ཚིག་དེས་དོན་དེ་ཇི་ལྟར་འཆད་ཚུལ་གྱི་རྣམ་པར་གཞག་པ་བསྟན་ཏོ། །འོ་ན་སའི་དངོས་གཞིས་གང་ཟག་གི་ཆ་རྐྱེན་ཇི་ལྟར་གཏན་ལ་འབེབས་ཞེ་ན། སའི་སྤྱི་སྡོམ་དུ། རྣམ་ཤེས་ལྔ་དང་ལྡན་པའི་ས། །ཡིད་ཀྱི་ས་དང་གཞན་གསུམ་སྟེ། །རྟོག་དཔྱོད་བཅས་ལ་སོགས་པ་དང་། །ཏིང་འཛིན་བཅས་དང་མ་ཡིན་དང་། །སེམས་མེད་པ་དང་སེམས་ཡོད་དང་། །ཐོས་དང་བསམ་དང་སྒོམ་པའི་ས། །དེ་བཞིན་ཐེག་པ་གསུམ་ལྡན་དང་། །ཕུང་པོར་བཅས་དང་ཕུང་པོ་མེད། །ཅེས་གསུངས་པའི་དོན་ལ་སྔོན་གྱི་མཁས་པ་ཁ་ཅིག དང་པོ་དགུས་དམིགས་པར་བྱ་བའི་ཡུལ། བར་པ་དྲུག་གིས་སྤྱོད་པའི་བདག་ཉིད། ཐ་མ་གཉིས་ཀྱིས་འབྲས་བུ་བསྟན་ཅེས་གསུངས་ལ། སའི་སྟོད་འགྲེལ་དུ། རང་བཞིན་དང་ནི་ཇི་ལྟར་འཇུག །དེ་ལ་དེ་ཡི་གནས་སྐབས་དང་། །གོ་རིམ་དང་ནི་གང་ཐོབ་དང་། །དེ་ལ་དེ་ནི་འགྲོ་བ་ཡིན། །ཞེས་གསུངས་པ་ལྟར་བཤད་ན་གང་ཟག་གི་རང་བཞིན་གྱི་དབང་དུ་བྱས་ནས་ས་དང་པོ་གཉིས་ཏེ། ཉམས་སུ་ལེན་པའི་གང་ཟག་དེ་ཡང་རྣམ་ཤེས་ཚོགས་བརྒྱད་ཀྱི་རྒྱུན་ལ་འཇོག་པའི་ཕྱིར་རོ། །ཇི་ལྟར་འཇུག་པའི་དབང་དུ་བྱས་ནས་རྟོག་དཔྱོད་དང་བཅས་པ་ལ་སོགས་པའི་ས་གསུམ་སྟེ། གང་ཟག་དེ་ཡང་བསམ་གཏན་དང་པོའི་དངོས་གཞི་ཙམ་པོ་མན་ཆད་དུ་རྟོག་དཔྱོད་གཉིས་ཀ་དང་བཅས་པའི་སྒོ་ནས་འཇུག ཁྱད་པར་ཅན་གྱི་དུས་སུ་རྟོག་པ་མེད་ཅིང་དཔྱོད་པ་ཙམ་གྱི་སྒོ་ནས་འཇུག བསམ་གཏན་གཉིས་པ་ཡན་ཆད་དུ་རྟོག་དཔྱོད་གཉིས་ཀ་མེད་པའི་སྒོ་ནས་འཇུག་པའི་ཕྱིར་རོ། །དེའི་གནས་སྐབས་ཀྱི་དབང་དུ་བྱས་ནས་ཏིང་ངེ་འཛིན་དང་བཅས་པ་ལ་སོགས་པའི་ས་བཞི་སྟེ། གང་ཟག་དེ་གཟུགས་དང་གཟུགས་མེད་དུ་ཏིང་ངེ་འཛིན་དང་བཅས་པ་དང་། འདོད་པ་ཏིང་ངེ་འཛིན་དང་མ་བཅས་པ་དང་། སྙོམས་འཇུག་གཉིས་ལ་སོགས་པའི་གནས་སྐབས་ན་སེམས་མེད་པ་དང་། དེ་ལས་གཞན་དུ་ནི་སེམས་ཡོད་པའི་ཕྱིར་རོ། །གོ་རིམ་གྱི་དབང་དུ་བྱས་ནས་ཐོས་བསམ་སྒོམ་པའི་ས་གསུམ་སྟེ། དེ་གསུམ་ལ་རིམ་གྱིས་འཇུག་དགོས་པའི་ཕྱིར་རོ། །གང་ཐོབ་པའི་དབང་དུ་བྱས་ནས་ཉན་ཐོས་ལ་སོགས་པའི་ས་གསུམ་སྟེ། ཐོབ་བྱའི་ཐེག་པ་ནི་གསུམ་དུ་འདུས་པའི་ཕྱིར་རོ། །དེ་ལ་འགྲོ་བའི་དབང་དུ་བྱས་ནས་ལྷག་མ་གཉིས་པོ་སྟེ། དེ་ལྟ་བུའི་གང་ཟག་དེ་ཡང་མཐར་ཐེག་པ་གསུམ་གྱིས་མྱང་འདས་གཉིས་སུ་འགྲོ་བའི་ཕྱིར་རོ། །སྡོམ་གཉིས་ལས་ཀུན་བཏུས་ནི། ཐེག་པ་ཐུན་མོང་གི་སྡོམ་ཡིན་ཏེ། ཉན་ཐོས་དང་ཐུན་མོང་དུ་ཕྱི་རོལ་གྱི་དོན་གྱི་རྣམ་གཞག་དང་། སེམས་ཙམ་པ་དང་ཐུན་མོང་དུ་མཚན་ཉིད་གསུམ་དང་། རྣམ་ཤེས་ཚོགས་བརྒྱད་ལ་སོགས་པའི་རྣམ་གཞག་གསུངས་པའི་ཕྱིར་རོ། །ཐེག་པ་ཆེན་པོ་བསྡུས་པ་ནི། ཐེག་ཆེན་ཐུན་མོང་མ་ཡིན་པའི་སྡོམ་ཡིན་ཏེ། དེར་བཤད་པའི་ཤེས་བྱའི་གནས་ལ་སོགས་པ་རྣམ་པ་བཅུ་པོ་དེ་སེམས་ཙམ་པའི་ལུགས་ཀྱི་གཞི་ལམ་འབྲས་བུའི་རྣམ་པར་གཞག་པ་ཁོ་ན་ཡིན་པའི་ཕྱིར་རོ། །དེའི་འོག་ཏུ་སློབ་དཔོན་དབྱིག་གཉེན་གྱིས་རང་རྒྱུད་དུ་བརྩམས་པའི་བསྟན་བཅོས་ལྔ། གཞན་འགྲེལ་ཊཱི་ཀ་བཏགས་པ་གསུམ་སྟེ། པྲ་ཀ་ར་ཎ་སྡེ་བརྒྱད་བརྩམས་པ་ལས། འདི་དག་གི་དོན་ལ་སྔོན་གྱི་མཁས་པ་རྣམས་ཀྱིས་སེམས་ཙམ་པའི་ལྟ་བ་སྟོན་པ། དེའི་སྒྲུབ་བྱེད། དེ་ལ་རྩོད་པ་སྤོང་བ་དང་གསུམ་དུ་བྱས་ནས། དང་པོ་ནི། སུམ་ཅུ་པའི་རབ་བྱེད་དེ། ཆོས་དང་གང་ཟག་གི་འགྲོ་བ་ཐམས་ཅད་མཚན་ཉིད་གསུམ་དུ་བསྡུས་ནས་བདག་མེད་པ་གཉིས་བསྟན་པའི་ཕྱིར་རོ། །གཉིས་པ་ནི། ཉི་ཤུ་པའི་རབ་ཏུ་བྱེད་པ་སྟེ། སྣང་བ་ཐམས་ཅད་སེམས་ཡིན་པའི་སྒྲུབ་བྱེད་བསྟན་པའི་ཕྱིར་རོ། །གསུམ་པ་ནི་རབ་ཏུ་བྱེད་པ་ལྷག་མ་རྣམས་ཏེ། དེ་ལྟར་སྣང་བ་ཐམས་ཅད་སེམས་ཡིན་ན། ཕུང་པོ་ལྔའི་རྣམ་གཞག་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་ཕུང་པོ་ལྔའི་རབ་བྱེད། ལས་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ། ལས་སྒྲུབ་པའི་རབ་བྱེད། ཉན་བཤད་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་རྣམ་བཤད་རིག་པ་མཚན་ཉིད་གསུམ་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་དབུས་མཐའི་འགྲེལ་པ། རྟེན་འབྲེལ་བཅུ་གཉིས་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་རྟེན་འབྲེལ་གྱི་མདོ་འགྲེལ། རང་དོན་ཕར་ཕྱིན་དྲུག་དང་གཞན་དོན་བསྡུ་དངོས་བཞིའི་སྤྱོད་པ་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་མདོ་སྡེ་རྒྱན་གྱི་འགྲེལ་པ་མཛད་གསུངས་སོ། །འོན་ཀྱང་བསྟན་བཅོས་རྩོམ་པ་པོས་འདི་ལྟ་བུའི་དགོངས་པ་སྔོན་དུ་བཏང་ནས་གོ་རིམ་འདི་ལྟར་རྩོམ་པ་ཡིན་ན། འདི་ལྟ་བུའི་རྣམ་གཞག་འཐད་ཀྱང་བརྗོད་བྱ་དེ་དང་དེ་སྟོན་པའི་བསྟན་བཅོས་རྩོམ་པར་བཞེད་ནས་སོ་སོར་རྩོམ་པ་ལ་དེ་ལྟ་བུའི་རྣམ་གཞག་དགོས་པའི་ངེས་པ་མེད་དམ་སྙམ་མོ། །གཞན་དུ་ན་འཕགས་པ་ཐོགས་མེད་ཀྱིས་མཛད་པའི་རྒྱུད་བླའི་འགྲེལ་པ་དང་། སློབ་དཔོན་དབྱིག་གཉེན་གྱིས་མཛད་པའི་ཆོས་དང་ཆོས་ཉིད་རྣམ་འབྱེད་ཀྱི་འགྲེལ་པ་གཉིས་བྱམས་པ་དང་འབྲེལ་པའི་ཆོས་སྡེར་མི་བགྲང་བའི་རྒྱུ་མཚན་ཅི་ཡིན་ཞལ་འཛུམ་པ་དང་བཅས་ཏེ་གསུང་གི་མདངས་ཕྱུང་རན་ནོ། །གཉིས་པ་དེ་ལས་ཆོས་ལྔས་མདོ་ཇི་ལྟར་འཆད་ཚུལ་ལ་གཉིས་ཏེ། ཚིག་ཇི་ལྟར་འཆད་པའི་ཚུལ་དང་། དོན་ཇི་ལྟར་འཆད་པའི་ཚུལ་ལོ། །དང་པོ་ལ་གསུམ་སྟེ། བཤད་བྱའི་མདོ་དགོས་པ་དང་། དེ་ཇི་ལྟར་འཆད་པའི་ཚུལ། མདོ་དང་སྦྱར་བའི་དགོས་པའོ། །དང་པོ་ནི། འདིར་བཤད་བྱའི་མདོ་ནི། ཐེག་ཆེན་ཐུན་མོང་མ་ཡིན་པའི་སྡེ་སྣོད་ཡིན་ལ། དེ་ལ་ཡང་དྲང་དོན་གྱི་མདོ་དང་། ངེས་དོན་གྱི་མདོ་གཉིས་ལས། དང་པོ་ནི། མདོ་སྡེ་དགོངས་པ་ངེས་འགྲེལ་ལྟ་བུའོ། །གཉིས་པ་ནི་ཤེར་ཕྱིན་གྱི་མདོ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ། དེ་བཞིན་གཤེགས་པའི་སྙིང་པོའི་མདོ། བུ་མོ་རིན་ཆེན་གྱིས་ཞུས་པའི་མདོ། ལྷག་བསམ་བསྟན་པའི་མདོ། འཕེལ་འགྲིབ་མེད་པའི་མདོ། དཔལ་ཕྲེང་གི་མདོ། ཡེ་ཤེས་སྣང་བ་རྒྱན་གྱི་མདོ་ལ་སོགས་པ་རྣམས་སོ། །གཉིས་པ་ནི། འོ་ན་བྱམས་པའི་ཆོས་ལྔ་པོ་དེས་མདོ་དེ་དག་ཇི་ལྟར་གཏན་ལ་འབེབས་པ་ཡིན་ཞེ་ན། འདི་ལ་ངེས་དོན་གྱི་མདོ་སྡེ་གཏན་ལ་འབེབས་པ་དང་། དྲང་དོན་གྱི་མདོ་སྡེ་གཏན་ལ་འབེབས་པ་དང་། དྲང་དོན་དང་ངེས་དོན་གྱི་མདོ་སྡེ་སྣ་ཚོགས་པ་གཏན་ལ་འབེབས་པ་གསུམ་ལས། དང་པོ་ལ་ངེས་དོན་གྱི་མདོ་སྡེ་རིགས་གཅིག་གཏན་ལ་འབེབས་པ་དང་། རིགས་དུ་མ་གཏན་ལ་འབེབས་པ་གཉིས་སོ། །དང་པོ་ནི་མངོན་པར་རྟོགས་པའི་རྒྱན་ཏེ། དེས་ཤེར་ཕྱིན་གྱི་མདོ་སྡེ་ཁོ་ན་གཏན་ལ་འབེབས་པའི་ཕྱིར་རོ། །གཉིས་པ་ནི་རྒྱུད་བླ་སྟེ། དེས་སྔར་བཤད་པའི་ངེས་དོན་གྱི་མདོ་སྡེ་དེ་རྣམས་གཏན་ལ་འབེབས་པའི་ཕྱིར། དྲང་དོན་གྱི་མདོ་སྡེ་གཏན་ལ་འབེབས་པ་ནི་འབྱེད་རྣམ་གཉིས་ཏེ། དེས་དགོངས་པ་ངེས་འགྲེལ་ལ་སོགས་པ་གཏད་ལ་འབེབས་པའི་ཕྱིར་རོ། །དྲང་དོན་དང་ངེས་དོན་གྱི་མདོ་སྡེ་སྣ་ཚོགས་པ་གཏན་ལ་འབེབས་པ་ནི་མདོ་སྡེའི་རྒྱན་ཏེ། གཞིའི་དུས་སུ་རིགས་ཆད་ཀྱི་སེམས་ཅན་ཡོད་པར་བཤད་པ་དང་། ལམ་གྱི་དུས་སུ་ཆོས་ཐམས་ཅད་སྐྱེ་མེད་དུ་གཏན་ལ་འབེབས་པའི་མདོ་དྲང་དོན་དུ་སྟོན་པ་དང་། འབྲས་བུའི་དུས་སུ་མཐར་ཐུག་ཐེག་པ་གཅིག་ཏུ་ངེས་པ་དྲང་དོན་དུ་བསྟན་ནས། མཐར་ཐུག་ཐེག་པ་གསུམ་དུ་བསྟན་པ་རྣམས་ཀྱིས་ནི་དྲང་དོན་གྱི་མདོ་སྡེ་གཏན་ལ་འབེབས་པའི་ཕྱིར་དང་། གཞིའི་དུས་སུ་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྟན་པ་དང་། ལམ་གྱི་དུས་སུ་ཕར་ཕྱིན་དྲུག་དང་། བསྡུ་དངོས་བཞིའི་སྤྱོད་པ་དང་། འབྲས་བུའི་དུས་སུ་སྐུ་གསུམ་ཡེ་ཤེས་བཞིའི་རྣམ་གཞག་སྟོན་པ་རྣམས་ཀྱིས་ངེས་དོན་གྱི་མདོ་སྡེ་གཏན་ལ་འབེབས་པའི་ཕྱིར་རོ། །གསུམ་པ་མདོ་དང་སྦྱར་བའི་དགོས་པ་ནི། འོ་ན་རྗེ་བཙུན་བྱམས་པ་ས་བཅུ་པའི་བྱང་སེམས་ཀྱི་ཚུལ་བཟུང་བ་ཙམ་ཡིན་གྱི། དོན་ལ་སངས་རྒྱས་ཡིན་པས་བཀའི་དགོངས་པ་འགྲེལ་པ་ལ་མ་ལྟོས་པར་རང་དགར་མི་རྩོམ་པའི་རྒྱུ་མཚན་ཅི་ཡིན་ཞེ་ན། སྟོན་པས་མཛད་པ་བཅུ་གཉིས་ཀྱི་ཚུལ་སྟོན་པའི་བསྟན་པ་འདི་ལ་ཐུབ་པའི་གསུང་གི་རྗེས་སུ་འབྲང་བ་དེ་བསྟན་པ་རྣམ་དག་ཡིན་གྱི། དེའི་རྗེས་སུ་མི་འབྲང་བ་དེ་བསྟན་པ་རྣམ་དག་མ་ཡིན་ནོ་ཞེས་རྗེས་འཇུག་གི་གདུལ་བྱ་རྣམས་ཀྱིས་ཤེས་པའི་ཆེད་དུ་ཐུབ་པའི་བཀའ་དང་སྦྱར་བ་ཁོ་ན་མཛད་པ་ཡིན་ཏེ། དེ་ལྟར་ཡིད་ཆེས་ལུང་དང་རིགས་པ་ལ། །བརྟེན་ནས་བདག་ཉིད་འབའ་ཞིག་དག་ཕྱིར་དང་། །ཞེས་དང་། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་སོ། །གཉིས་པ་དོན་ཇི་ལྟར་འཆད་པའི་ཚུལ་ནི། མངོན་པར་རྟོགས་པའི་རྒྱན་གྱིས་ཤེར་ཕྱིན་གྱི་མདོའི་དོན་མངོན་པར་རྟོགས་པ་བརྒྱད་དུ་བསྡུས་ནས་སྟོན་ཏེ། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །ཅེས་སོ། །རྒྱུད་བླ་མས་ནི་སྔར་བཤད་པའི་ངེས་དོན་གྱི་མདོ་སྡེ་དེ་རྣམས་ཀྱི་དོན་རྡོ་རྗེའི་གནས་བདུན་དུ་བསྡུས་ནས་སྟོན་ཏེ། སངས་རྒྱས་ཆོས་ཚོགས་ཁམས་དང་བྱང་ཆུབ་དང་། །ཡོན་ཏན་སངས་རྒྱས་ཕྲིན་ལས་ཐ་མ་སྟེ། །བསྟན་བཅོས་ཀུན་གྱི་ལུས་ནི་མདོར་བསྡུས་ན། །རྡོ་རྗེ་ཡི་ནི་གནས་བདུན་འདི་དག་གོ །ཅེས་སོ། །དབུས་མཐའ་རྣམ་འབྱེད་ཀྱིས་ཐེག་པ་ཐུན་མོང་གི་ལམ་གྱི་རིམ་པ་དང་། ཐེག་ཆེན་ཐུན་མོང་མ་ཡིན་པའི་ལམ་གྱི་རིམ་པ་གཉིས་སྟོན་ཏེ། མཚན་ཉིད་སྒྲིབ་པ་དེ་ཁོ་ན། །གཉེན་པོ་དག་ནི་སྒོམ་པ་དང་། །དེ་ཡི་གནས་དང་འབྲས་བུ་ཐོབ། །ཐེག་པ་བླ་ན་མེད་པའོ། །ཞེས་གསུངས་པས་སོ། །ཆོས་དང་ཆོས་ཉིད་རྣམ་འབྱེད་ཀྱིས་ནི་ཆོས་ཅན་འཁོར་བ་དང་། ཆོས་ཉིད་མྱ་ངན་ལས་འདས་པ་སོ་སོར་ཕྱེ་ནས་སྟོན་ཏེ། འདི་ཐམས་ཅད་ནི་གཉིས་ཏེ། ཆོས་ཀྱིས་རབ་ཏུ་ཕྱེ་བ་དང་། ཆོས་ཉིད་ཀྱིས་རབ་ཏུ་ཕྱེ་བའོ། །ཆོས་ཀྱིས་རབ་ཏུ་ཕྱེ་བ་ནི་འཁོར་བའོ། །ཆོས་ཉིད་ཀྱིས་རབ་ཏུ་ཕྱེ་བ་ནི་ཐེག་པ་གསུམ་གྱི་མྱ་ངན་ལས་འདས་པའོ། །ཞེས་སོ། །མདོ་སྡེ་རྒྱན་གྱིས་ནི་དྲང་དོན་དང་ངེས་དོན་གྱི་མདོ་སྡེ་དུ་མའི་དོན། གསེར་ལས་བརྡུང་བྱས་འདྲ་བ་ལ་སོགས་པ། དཔེ་ལྔས་མཚོན་པའི་དོན་ལྔར་བསྡུས་ནས་སྟོན་ཏེ། གསེར་ལས་བརྡུང་བྱས་འདྲ་ཞིང་པདྨ་རྒྱས་པ་འདྲ། །བཀྲེས་པས་ཉེན་པ་གཡོས་ལེགས་ཁ་ཟས་ཟ་བ་འདྲ། །ཕྲིན་ཡིག་ལེགས་པ་ཐོས་འདྲ་རིན་ཆེན་སྒྲོམ་ཕྱེ་ལྟའི། །ཆོས་དེ་འདིར་བཤད་པའང་དགའ་བའི་མཆོག་བསྐྱེད་དོ། །ཅེས་སོ། །གསུམ་པ་བྱེ་བྲག་ཏུ་བསྟན་བཅོས་འདི་མདོ་ཇི་ལྟར་འཆད་པའི་ཚུལ་ལ་ལྔ་སྟེ། བཤད་བྱའི་མདོ་ངོས་གཟུང་བ། དགོངས་འགྲེལ་ཤིང་རྟའི་སྲོལ་འབྱེད་ངོས་གཟུང་བ། དེས་སྲོལ་ཇི་ལྟར་ཕྱེ་བའི་ཚུལ། བཤད་ཐབས་ཀྱི་མན་ངག་ངོས་གཟུང་བ། དགོངས་འགྲེལ་གྱི་བསྟན་བཅོས་ཇི་ལྟར་བྱུང་བའི་བྱུང་ཚུལ་ལོ། །དང་པོ་ནི་ཤེར་ཕྱིན་གྱི་མདོ་རྣམས་ཡིན་ལ། འདི་ལ་སྔོན་གྱི་མཁས་པ་རྣམས་ཀྱིས་ཡུམ་དྲུག་དང་། སྲས་བཅུ་གཅིག་གི་རྣམ་གཞག་མཛད་དོ། །ཡུམ་དྲུག་ནི། སྟོང་ཕྲག་བརྒྱ་པ་དང་། སྟོང་ཕྲག་ཉེར་ལྔ་པ་དང་། ཁྲི་བརྒྱད་སྟོང་པ་སྟེ་རྒྱས་པ་སྐོར་གསུམ། ཤེས་རབ་ཁྲི་པ་དང་། བརྒྱད་སྟོང་པ་དང་། ཡོན་ཏན་རིན་ཆེན་སྡུད་པ་སྟེ། བསྡུས་པ་སྐོར་གསུམ་མོ། །སྲས་བཅུ་གཅིག་ནི། ཤེར་ཕྱིན་བདུན་བརྒྱ་པ་དང་། ཤེར་ཕྱིན་སུམ་བརྒྱ་པ་དང་། ཤེར་ཕྱིན་བརྒྱ་ལྔ་བཅུ་པ་དང་། ཤེར་ཕྱིན་ལྔ་བཅུ་པ་དང་། སྒོ་ཉེར་ལྔ་པ་དང་། རབ་རྩལ་རྣམ་གནོན་གྱིས་ཞུས་པ་དང་། ཀོའུ་ཤི་ཀས་ཞུས་པ་དང་། ཡི་གེ་ཉུང་ངུ་མ་དང་། ཡི་གེ་གཅིག་མ་དང་། རྡོ་རྗེ་གཅོད་པ་དང་། ཤེས་རབ་སྙིང་པོའོ། །དེ་ལ་དང་པོ་དྲུག་པོས་ནི་དངོས་བརྒྱད་དོན་བདུན་ཅུ་སོ་སོར་ཕྱེ་ནས་སྟོན་པས་ན་ཡུམ་དང་། ཕྱི་མ་བཅུ་གཅིག་གིས་ནི་དེ་ལྟར་མི་སྟོན་པས་སྲས་ཡིན་ནོ་ཞེས་ཟེར་རོ། །འདི་ལ་གྲངས་ངེས་མི་འཐད་པ་དང་། ཐ་སྙད་མི་འཐད་པ་གཉིས་ལས། དང་པོ་ནི་མདོ་སྡུད་པ་ཁྲི་བརྒྱད་སྟོང་པའི་ལེའུ་གཅིག་ཡིན་པས་དེ་ལོགས་སུ་བགྲངས་ན་ལྷག་པར་འགྱུར་ཞིང་། ཟླ་བའི་སྙིང་པོས་ཞུས་པའི་མདོ་དང་། ཉི་མའི་སྙིང་པོས་ཞུས་པའི་མདོ་དང་། ཤེར་ཕྱིན་ལག་ན་རྡོ་རྗེ་རྣམས་མ་ཚང་བས་ཆད་པའི་སྐྱོན་ཡོད་དོ། །གཉིས་པ་ཐ་སྙད་མི་འཐད་པ་ནི། དངོས་བརྒྱད་དོན་བདུན་ཅུར་ཕྱེ་ནས་སྟོན་པ་ལ་ཡུམ་དང་། དེ་ལྟར་མི་སྟོན་པ་ལ་སྲས་ཀྱི་ཐ་སྙད་གང་ནས་ཀྱང་མ་གསུངས་པའི་ཕྱིར་རོ། །ཡང་ཁ་ཅིག་མངོན་པར་རྟོགས་པའི་རིམ་པ་སྟོན་པས་ན་ཡུམ་དང་། མངོན་རྟོགས་ཀྱི་རིམ་པ་མི་སྟོན་པར་ཡུལ་སྐྱེ་མེད་ཙམ་སྟོན་པས་ན་སྲས་སུ་བཞག་པ་ཡིན་ནོ། །ཞེས་གསུངས་པ་ཡང་མི་འཐད་དེ། ཤེར་ཕྱིན་འབུམ་པ་ལ་སོགས་པས་དེ་གཉིས་ཀ་སྟོན་པས་ཡུམ་སྲས་གཉིས་ཀར་ཐལ་བའི་ཕྱིར་དང་། ཡུལ་སྐྱེ་མེད་དུ་སྟོན་པ་ནི་བདག་མེད་བརྗོད་བྱའི་གཙོ་བོར་བྱས་ནས་སྟོན་པས་ཡུམ་གྱི་ཐ་སྙད་འཐད་པའི་ཕྱིར་དང་། ཤེར་ཕྱིན་བདུན་བརྒྱ་པས་ཚོགས་སྦྱོར་གཉིས། འཕགས་པའི་ས་བཅུ་སྟེ། ས་བཅུ་གཉིས་ཀྱི་རྣམ་གཞག་དང་། རྡོ་རྗེ་གཅོད་པས་ནི་མོས་སྤྱོད་ཀྱི་ས་དང་། བྱང་སེམས་ཀྱི་ས་དང་། སངས་རྒྱས་ཀྱི་ས་སྟེ། ས་གསུམ་གྱི་རྣམ་གཞག་དང་། ཤེས་རབ་སྙིང་པོས་ནི་ལམ་ལྔའི་རྣམ་གཞག་བསྟན་པའི་ཕྱིར་རོ། །འོ་ན་བཤད་བྱའི་མདོ་གང་ཞེ་ན། ཤེར་ཕྱིན་གྱི་མདོ་ཐམས་ཅད་ཀྱིས་འཕགས་བཞིའི་ཡུམ་དུ་གྱུར་པའི་བདག་མེད་རྟོགས་པའི་ཤེས་རབ་བརྗོད་བྱའི་གཙོ་བོར་སྟོན་པས་ཡུམ་གྱི་ཐ་སྙད་འཐད་པས་དེ་ཉིད་འདིར་བཤད་པར་བྱ་བའི་མདོ་ཡིན་ནོ། །གཉིས་པ་ནི་སྔ་རབས་པ་ཁ་ཅིག ཤེར་ཕྱིན་གྱི་དགོངས་འགྲེལ་གྱི་ཤིང་རྟའི་སྲོལ་འབྱེད་དེ་ལ་མགོན་པོ་བྱམས་པས་མཛད་པའི་མངོན་པར་རྟོགས་པའི་རྒྱན་དང་། ཀླུ་སྒྲུབ་ཀྱིས་མཛད་པའི་དབུ་མ་རིགས་པའི་ཚོགས། དཔའ་བོས་མཛད་པའི་འབུམ་ཊཱིཀ ཕྱོགས་གླང་གིས་མཛད་པའི་བརྒྱད་སྟོང་དོན་བསྡུས་ཏེ་བཞིར་གྲངས་ངེས་སོ། །འོ་ན་དེ་དག་གིས་སྲོལ་ཇི་ལྟར་ཕྱེ་ན། དང་པོས་ནི་སྦས་དོན་མངོན་རྟོགས་ཀྱི་རིམ་པ་གསལ་བར་མཛད་ལ། གཉིས་པས་ནི། དངོས་བསྟན་སྟོང་ཉིད་ཀྱི་ལྟ་བ་གསལ་བར་མཛད། གསུམ་པས་ནི་ཡུམ་གྱི་དོན་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་སྟོན་ཏེ། སྒོ་གསུམ་ནི་ཐོག་མར་གླིང་གཞིས་སྐབས་ཕྱེ་ནས་གདུལ་བྱ་དབང་རྣོན་ལ་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་འཚང་རྒྱ་བར་འདོད་པས་ཡུམ་ལ་བསླབ་པར་བྱའོ། །ཞེས་གང་གིས། གང་གི་ཕྱིར། གང་ལ་བསླབ་ཚུལ་བཞིས་དོན་ཐམས་ཅད་བསྡུས་ཏེ་བསྟན་པ་ནི་བསྡུས་ཏེ་བསྟན་པའི་སྒོ། དེ་ནས་སྐབས་དང་པོའི་བར་ལ་འབྲིང་དུ་བསྟན་པའི་སྒོ། དེ་ནས་མཇུག་རྫོགས་པར་བསྟན་པ་རྒྱས་པར་བཤད་པའི་སྒོ་སྟེ་གསུམ་མོ། །རྣམ་གྲངས་བཅུ་གཅིག་ནི། དང་པོ་ཤཱ་རིའི་བུ་ལ་བཀའ་སྩལ་པ་དང་། དེ་ནས་རབ་འབྱོར་གྱིས་བཤད་པ་གཅིག་དང་། དེ་ནས་བརྒྱ་བྱིན་ལ་བཀའ་སྩལ་པ་གཉིས་དང་། རབ་འབྱོར་ལ་བཀའ་སྩལ་པ་བཞི་དང་། བྱམས་པ་ལ་བཀའ་སྩལ་པ་གཉིས་དང་། ཀུན་དགའ་བོ་ལ་བཀའ་སྩལ་ནས་ཡོངས་སུ་རྫོགས་པར་གཏད་པ་སྟེ་བཅུ་གཅིག་གོ །བཞི་པས་ནི་ཡུམ་གྱི་གཙོ་བོའི་དོན་སོ་གཉིས་སུ་བསྡུས་ནས་སྟོན་ཏེ། བརྒྱད་སྟོང་དོན་བསྡུར། རྟེན་དང་དབང་དུ་བྱ་བ་དང་། །ལས་ནི་སྒོམ་པ་དང་བཅས་དང་། །རབ་དབྱེ་རྟགས་དང་ལྟུང་བ་དང་། །ཕན་ཡོན་བཅས་པར་ཡང་དག་བརྗོད། །ཅེས་སོ། །དེ་ལ་རྟེན་སྟོན་པ་སངས་རྒྱས། དབང་དུ་བྱ་བ་འཁོར། ལས་ཡུམ་ལ་ཆོས་སྤྱོད་བཅུས་ཇི་ལྟར་སྤྱོད་པ། སྒོམ་པ་རྣམ་གཡེང་གི་རྣམ་རྟོག་བཅུའི་གཉེན་པོར་སྒོམ་པ་བཅུ། རབ་ཏུ་དབྱེ་བ་སྟོང་ཉིད་བཅུ་དྲུག རྟགས་ལ་བདུད་ལས་ཀྱི་རྟགས་དང་། ཕྱིར་མི་ལྡོག་པའི་རྟགས་གཉིས། ལྟུང་བ་ཤེར་ཕྱིན་སྤངས་ན་ངན་སོང་དུ་ལྟུང་བ། ཕན་ཡོན་སྟོང་གསུམ་རིན་པོ་ཆེས་བཀང་ནས་སྦྱིན་པ་བྱིན་པ་བས་ཡུམ་ལ་སྤྱད་ན་བསོད་ནམས་ཆེ་བ་ལ་སོགས་པའོ་ཞེས་འདོད་དོ། །ཤེས་བྱ་ཀུན་རིག་གི་ཞལ་སྔ་ནས་ཕྱི་མ་གཉིས་ནི་སྔ་མ་གཉིས་ལས་སྲོལ་འབྱེད་གཞན་མ་ཡིན་པས་ན་སྲོལ་འབྱེད་ལ་སྔ་མ་གཉིས་སུ་ངེས་སོ་ཞེས་བཞད་དོ། །འདི་ཉིད་དོན་ལ་ཡང་གནས་ཏེ། སྤྱིར་ཡུམ་གྱི་དགོངས་པ་འགྲེལ་པ་ཙམ་གྱིས་ཤིང་རྟའི་སྲོལ་འབྱེད་དུ་འགྲོ་བ་མ་ཡིན་གྱི། གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་མ་ཡིན་པར་ཆོས་ཉིད་དོན་དམ་པའི་བདེན་པ་མངོན་སུམ་དུ་མཐོང་བའི་སྒོ་ནས་བཀའི་དགོངས་པ་རང་དབང་དུ་འགྲེལ་པ་ལ་ཤིང་རྟའི་སྲོལ་འབྱེད་དུ་འཇོག་པ་གང་ཞིག དེ་ལ་སྔ་མ་གཉིས་པོ་དེར་ངེས་ཤིང་། ཕྱི་མ་གཉིས་ནི་གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་ཙམ་ཡིན་པའི་ཕྱིར་རོ། །འགྲེལ་ཚུལ་མི་འདྲ་བ་ཙམ་གྱིས་སྲོལ་འབྱེད་སོ་སོར་འཇོག་ན་རྩ་བ་ཤེས་རབ་དང་། འཇུག་པ་ཡང་སྲོལ་འབྱེད་སོ་སོར་འགྱུར་ཏེ། སྔ་མས་ནི་རྟེན་འབྲེལ་མཐའ་བརྒྱད་ཀྱི་སྤྲོས་པ་དང་བྲལ་བའི་སྒོ་ནས་འགྲེལ། ཕྱི་མས་ནི་མདོ་སྡེ་ས་བཅུ་པ་ལས་བཤད་པ་དང་སྦྱར་ཏེ་འགྲེལ་བའི་ཕྱིར་རོ། །འོ་ན་ཕྱི་མ་གཉིས་པོ་གང་གི་མན་ངག་ལ་བརྟེན་ཞེ་ན། སློབ་དཔོན་ཕྱོགས་གླང་གིས་ནི་མགོན་པོ་བྱམས་པའི་མན་ངག་ཐོགས་མེད་ནས་བརྒྱུད་དེ། དབྱིག་གཉེན་ལས་ཐོས་པ་ཡིན་ལ། སློབ་དཔོན་དཔའ་བོས་ནི་མགོན་པོ་ཀླུ་སྒྲུབ་ཀྱི་མན་ངག་འཕགས་པ་ལྷ་ལས་ཐོས་པས་དེ་དག་གི་རྗེས་སུ་འབྲང་བའི་ཕྱིར་རོ། །གསུམ་པ་ནི་སྲོལ་འབྱེད་གཉིས་སུ་ངེས་ན་དེས་སྲོལ་ཇི་ལྟར་ཕྱེ་སྙམ་ན། སྤྱིར་ཤེར་ཕྱིན་གྱི་མདོ་ལས་ཐེག་པ་གསུམ་ཀའི་ལམ་བསྟན་ཏེ། ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལ་བསླབ་པར་བྱའོ་ཞེས་སོགས་རྒྱས་པར་གསུངས་ཤིང་། མཐར་དེ་ཅིའི་ཕྱིར་ཞེ་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ནི་ཐེག་པ་གསུམ་པོ་རྒྱ་ཆེར་སྟོན་ནོ་ཞེས་གསུངས་པས་སོ། །དེ་ལ་མངོན་རྟོགས་རྒྱན་གྱི་མཆོད་བརྗོད་ཀྱི་སྐབས་སུ་ནི་གླེང་གཞི་དང་མཐུན་པ་ཐེག་པ་གསུམ་ཆར་གྱི་ལམ་བསྟན་པར་བཞེད་ནས་མཁྱེན་གསུམ་གྱི་ཡོན་ཏན་བརྗོད་པ་ཡིན་ཞིང་། ལུས་ཀྱི་སྐབས་སུ་ནི་ཐེག་ཆེན་གྱི་ལམ་རིམ་ཁོ་ན་བསྟན་ཏེ། གཞན་གྱིས་མྱོང་བ་མ་ཡིན་ཏེ་ཞེས་དང་། མངོན་རྟོགས་བརྒྱད་དང་དྲུག་གི་ལམ་རིམ་ནི་ཐེག་པ་གཞན་ལ་མེད་པའི་ཕྱིར་རོ། །རྟོགས་རིགས་ཀྱི་དབང་དུ་བྱས་ན་ལུས་ཀྱི་སྐབས་སུ་ཡང་ཐེག་པ་གསུམ་ཆར་གྱི་ལམ་བསྟན་པས་མངོན་པར་རྟོགས་པ་མཐའ་དག་བསྡུས་པར་འཕགས་སེང་གཉིས་ཀྱི་གསུངས་པའི་དགོངས་པ་ཡང་འདི་ཡིན་ཏེ། འཆད་པར་འགྱུར་རོ། །དབུ་མ་རིགས་ཚོགས་ཀྱིས་ནི་ཐེག་པ་གསུམ་ཀའི་བྱང་ཆུབ་ཐོབ་པའི་ཐབས་སུ་གཟུགས་ནི་རང་བཞིན་གྱིས་སྐྱེ་བ་མེད་དོ་ཅེས་སོགས་ཀྱིས་དངོས་བསྟན་སྐྱེ་མེད་ཀྱི་དོན་གཏན་ལ་འབེབས་པར་བྱེད་དེ། མདོར། གཟུགས་ནས་རྣམ་མཁྱེན་གྱི་བར་སྐྱེ་མེད་དུ་གསུངས་པའི་སྒྲུབ་བྱེད། རྒྱུ་ལ་དཔྱོད་པ་རྡོ་རྗེ་གཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག གཉིས་ཀ་ལ་དཔྱོད་པ་མུ་བཞི་སྐྱེ་འགོག ངོ་བོ་ལ་དཔྱོད་པ་གཅིག་དུ་བྲལ། ཐམས་ཅད་ལ་དཔྱོད་པ་རྟེན་འབྲེལ་གྱི་རིགས་པ་རྣམས་གསུངས་པའི་ཕྱིར་རོ། །སྔོན་གྱི་མཁས་པ་རྣམས་སྦས་དོན་མངོན་རྟོགས་ཀྱི་རིམ་པ་གཏན་ལ་འབེབས་པ་དང་། དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པ་གཉིས་ཞེས་གསུངས་པ་ཡང་འདི་དང་གནད་གཅིག་ཅིང་། དོན་ལ་ཡང་གནས་ཏེ། དངོས་བརྒྱད་དོན་བདུན་ཅུ་ནང་ཚན་གྱི་དབྱེ་བ་དང་བཅས་པ་འདི་མདོའི་སྦས་དོན་ཡིན་ལ་གཟུགས་སོགས་རང་བཞིན་གྱིས་སྐྱེ་བ་མེད་པ་སོགས་ནི་མདོའི་དངོས་བསྟན་ཡིན་པའི་ཕྱིར་རོ། །བཞི་པ་ནི་སྤྱིར་རྒྱ་བོད་ཀྱི་མཁས་པ་རྣམས་ཀྱིས། མདོ་འཆད་ཚུལ་གྱི་མན་ངག་དུ་མ་སྣང་ཡང་། འདིར་སློབ་དཔོན་དབྱིག་གཉེན་གྱིས། གང་ཞིག་བདག་པས་བློ་དམན་ཞིང་། །མདོ་རྣམས་འཆད་འདོད་དེ་དག་ལ། །མན་ངག་ཅུང་ཞིག་སྦྱིན་པར་བྱ། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྙད་པར་བྱ། །མདོ་དོན་ཆེ་བ་ཉིད་ཐོས་ནས། །ལེན་པ་དང་ནི་འཛིན་པ་ལ། །ཉན་པ་པོ་དེ་གུས་བྱེད་པས། །ཐོག་མར་དགོས་པ་བརྗོད་པར་བྱ། །དགོས་པའི་དོན་ནི་བསྡུས་དོན་ལས། །བསྡུས་པའི་དོན་ནི་ཚིག་དོན་ལས། །གོ་རིམ་རིགས་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་མདོ་དོན་ཐམས་ཅད་བཤད་ཐབས་ཀྱི་མན་ངག་ལྔའི་སྒོ་ནས་བཤད་པར་བཞེད་ཅིང་། དེ་ཉིད་མགོན་པོ་བྱམས་པའི་མན་ངག་ཀྱང་ཡིན་པར་གྲགས་ཏེ། མངོན་རྟོགས་རྒྱན་གྱིས་མདོ་འཆད་པའི་ཚེ་བཤད་ཐབས་ཀྱི་མན་ངག་ལྔ་ཚང་བས་སོ་སྙམ་དུ་དགོངས་སོ། །ཇི་ལྟར་ཚང་ཞེ་ན། འདི་ལ་མི་འཐད་པའི་ལུགས་དགག བཤད་ཐབས་ཀྱི་མན་ངག་ངོས་གཟུང་། དེ་ཉིད་འཐད་པར་སྒྲུབ་པ་དང་གསུམ་ལས། དང་པོ་ནི་སྔ་རབས་པ་ཁ་ཅིག རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་མདོའི་དགོས་དོན། ལུས་རྣམ་གཞག་གིས་བསྡུས་དོན། ཡན་ལག་རྒྱས་བཤད་ཀྱིས་ཚིག་དོན། དེ་ནས་ཐམས་ཅད་ཤེས་པ་ཉིད་ཅེས་དང་། དེ་ནས་སེང་གེ་རྣམ་བསྒྱིངས་པའི། །ཞེས་སོགས་ཀྱིས་མཚམས་སྦྱར། རིགས་ཀྱིས་བརྒལ་ལན་དང་། སྒོམ་ལམ་དང་། སྲིད་ཞི་མཉམ་ཉིད་དང་། དྲི་མ་སེལ་ཚུལ་ལས་འཕྲོས་པའི་བརྒལ་ལན་རྣམས་ཀྱིས་མདོའི་བརྒལ་ལན་བསྟན་པ་ཡིན་ཞེས་བཞེད་དོ། །དེ་ལ་དགོས་དོན་གྱི་ངོས་འཛིན་དེ་མི་འཐད་དེ། རྒྱན་གྱིས་མདོ་འཆད་པའི་ཚེ་མདོའི་དགོས་དོན་འཆད་དགོས་པ་ལས། དགོས་འབྲེལ་གྱི་གཞུང་གིས་ནི་བསྟན་བཅོས་ཀྱི་དགོས་དོན་བསྟན་པའི་ཕྱིར་རོ། །མཚམས་སྦྱར་གྱི་ངོས་འཛིན་དེ་ཡང་མི་འཐད་དེ། འདིར་མཚམས་སྦྱར་ནི་གོ་རིམ་སྔ་ཕྱི་མི་འགལ་བའི་སྒྲུབ་བྱེད་བསྟན་དགོས་པ་ལས་དེ་ནས་ཞེས་པའི་ཚིག་ཙམ་གྱིས་དེ་བསྟན་མི་ནུས་པའི་ཕྱིར་རོ། །བརྒལ་ལན་གྱི་ངོས་འཛིན་དེ་ཡང་མི་འཐད་དེ། འདིར་བརྒལ་ལན་ནི་རིགས་པ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་། རིགས་པ་ནི་རྒྱུད་བླར། དེ་ལྟར་ཡིད་ཆེས་ལུང་དང་རིགས་པ་ལ་བརྟེན་ནས། །ཞེས་གསུངས་པ་ལྟར། མདོའི་དངོས་བསྟན་ལ་མེད་ཀྱང་བསྟན་བཅོས་མཁན་པོས་སྦྱར་བའི་རིགས་པ་ཡིན་ལ། སྔར་གྱི་བརྒལ་ལན་དེ་རྣམས་ནི་མདོ་ཉིད་ལས་གསུངས་པའི་བརྒལ་ལན་ཡིན་པའི་ཕྱིར་རོ། །གཉིས་པ་ནི་མདོའི་དགོས་སོགས་ཆོས་ལྔ་རྒྱན་གྱིས་སྟོན་པའི་ཚུལ་ལ་མཆོད་བརྗོད་ཀྱིས་དགོས་དོན་བསྟན། དེ་ལས་འཕྲོས་ནས་དགོས་འབྲེལ་གྱི་གཞུང་གིས་ནི་བསྟན་བཅོས་ཀྱི་དགོས་དོན་བསྟན་ཏོ། །བསྡུས་དོན་དང་ཚིག་དོན་གྱིས་བསྟན་ཚུལ་སྔར་དང་འདྲ་ཞིང་། མཚམས་སྦྱར་ནི་མཚན་ཉིད་དེ་ཡི་སྦྱོར་བ་དང་། ཞེས་སོགས་དང་། བརྒལ་ལན་ནི་ཡུལ་ནི་རྣམ་པ་གསུམ་པོ་རྒྱུ། །ཞེས་སོགས་ཀྱིས་བསྟན་ཏོ། །གསུམ་པ་ལ་ངོ་བོ་མཐུན་པས་འཐད་པ་དང་། གོ་རིམ་མཐུན་པས་འཐད་པ་གཉིས་ལས། དང་པོ་ནི། མཆོད་བརྗོད་ཀྱིས་དགོས་དོན་བསྟན་ཏེ། དགོས་དོན་ལ་མདོ་དོན་ཆེ་བ་ཉིད་ཐོས་ནས། ཞེས་སོགས་ཚིགས་བཅད་གཅིག་གི་དོན་ཚང་བ་ཅིག་དགོས་ཤིང་། མདོ་དོན་གྱི་ཆེ་བ་རང་དོན་མཁྱེན་གསུམ་གྱི་རྟོགས་པ་མཐར་ཐུག་བརྙེས་ཏེ། གཞན་དོན་རིགས་ཅན་གསུམ་ལ་ཆོས་འཁོར་བསྐོར་བ་དེ་མཆོད་བརྗོད་ཀྱིས་བསྟན་པས་མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་པོ་ཡུམ་བརྗོད་བྱར་སྟོན་པའི་གསུང་རབ་ལེན་པ་དང་འཛིན་པ་ལ་གུས་པར་བྱེད་པ་འབྱུང་བའི་ཕྱིར་རོ། །སློབ་དཔོན་གྱིས་དེ་ལ་རབ་ཏུ་དང་བས་ཀྱང་དེའི་ཡོན་ཏན་མངོན་པར་འདོད་པའི་གང་ཟག་གཉིས་ཀ་ཡང་དེ་དང་དེ་ལ་བརྟེན་པའི་གསུང་རབ་ལ་རྣམ་པ་ཐམས་ཅད་དུ་བཟུང་བ་ལ་སོགས་པའི་དོན་ཏུ་ཤིན་ཏུ་གུས་པར་བྱེད་དོ། །ཞེས་གསུངས་པ་ཡང་འདི་ལ་དགོངས་སོ། །ལུས་རྣམ་གཞག་གིས་བསྡུས་དོན་བསྟན་ཏེ། དགོས་པའི་དོན་དེ་བསྡུས་དོན་ལས་རྟོགས་དགོས་པར་གསུངས་པ་གང་ཞིག་མཆོད་བརྗོད་ཀྱི་སྐབས་སུ་བསྟན་པའི་ཤེར་ཕྱིན་དེ་ལུས་ཀྱི་སྐབས་ནས་བསྟན་པའི་མངོན་པར་རྟོགས་པ་བརྒྱད་ཀྱི་སྒོ་ནས་རྟོགས་པར་བྱ་དགོས་པའི་ཕྱིར་ཏེ། ཉིར་སྣང་དུ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་གང་ཡིན་ཞེས་བྱ་བ་འདི་ནི་བརྗོད་པར་བྱའོ་ཞེ་ན་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཞེས་གསུངས་པའི་ཕྱིར་རོ། །ཡན་ལག་རྒྱས་བཤད་ཀྱིས་ནི་ཚིག་དོན་བསྟན་ཏེ། བསྡུས་པའི་དོན་དེ་ཚིག་དོན་ལས་རྟོགས་དགོས་པར་གསུངས་ཤིང་ལུས་རྣམ་གཞག་གི་སྐབས་ནས་བསྟན་པའི་དངོས་བརྒྱད་དོན་བདུན་ཅུ་པོ་དེ་ཡན་ལག་རྒྱས་བཤད་ལས་རིམ་པ་བཞིན་དུ་རྟོགས་དགོས་པའི་ཕྱིར་ཏེ། འགྲེལ་པ་དོན་གསལ་དུ། བསྡུས་པའི་དོན་གྱི་ཚིག་ལེའུར་བྱས་པ་རྣམས་ནི། བསྟན་བཅོས་མཛད་པ་ཉིད་ཀྱིས། །སེམས་བསྐྱེད་པ་ནི་གཞན་དོན་ཕྱིར། །ཞེས་བྱ་བ་ལ་སོགས་པ་འཆད་པར་འགྱུར་བའི་བསྟན་བཅོས་མཐའ་དག་གིས་འཆད་པས་ཞེས་གསུངས་པའི་ཕྱིར་རོ། །མཚན་ཉིད་དེ་ཡི་སྦྱོར་བ་དང་། །ཞེས་སོགས་ཀྱིས་མཚམས་སྦྱར་བསྟན་ཏེ། མཚམས་སྦྱར་གྱི་དོན་ནི་གོ་རིམ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་། གཞུང་དེས་མངོན་པར་རྟོགས་པ་བརྒྱད་ཀྱི་གོ་རིམ་མི་འགལ་བའི་སྒྲུབ་བྱེད་བསྟན་པའི་ཕྱིར་རོ། །དྲུག་གི་གོ་རིམ་ལས་མ་གསུངས་སོ་སྙམ་ན་མཁྱེན་གསུམ་གྱི་ནང་ཚན་གྱི་གོ་རིམ་ལ་གཞི་ཤེས་དང་པོར་བསྟན་པའི་གོ་རིམ་ནི་མཁྱེན་གསུམ་གྱི་དོན་བསྡུ་དང་། སྐབས་བཞི་པའི་གཞུང་ལས་རྟོགས་ནུས་ཤིང་རྣམ་མཁྱེན་དང་པོར་བསྟན་པའི་གོ་རིམ་ཉིད་ཀྱང་རྣམ་མཁྱེན་གྱི་མཚམས་སྦྱོར་ཉིད་ལས་རྟོགས་ནུས་སོ། །འདིར་མཚན་ཉིད་དང་པོར་བསྟན་པའི་རྒྱུ་མཚན་ནི་ཉིར་སྣང་དུ། དང་པོར་བསྟན་པའི་ཐམས་ཅད་མཁྱེན་པ་ཉིད་གསུམ་ནི་མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་གསུངས་པས་མཁྱེན་གསུམ་མཚོན་བྱེད་ཀྱི་ཆོས་ཀྱིས་མཚོན་ནས་ཐོས་བསམ་གྱིས་གཏན་ལ་ཕབ་པར་བྱ་བ་ཡིན་པས་དང་པོར་བསྟན་པའི་ཕྱིར་སྟེ། རྩ་བར་ལས་སྒྲུབ་ཀྱི་དབང་དུ་བྱས་ནས་མཚན་ཉིད་ཅེས་དང་། འགྲེལ་པར་མཚན་ཉིད་པ་དོན་གཅིག་པའི་ཕྱིར་རོ། །མངོན་རྟོགས་གཞན་རྣམས་ཀྱང་རང་གི་མཚོན་བྱེད་ཀྱིས་མཚོན་པར་བྱ་བ་མ་ཡིན་ནམ་སྙམ་ན། ཁྱད་གཞི་མཁྱེན་གསུམ་གྱི་སྒོ་ནས་འཇོག་པས་སྐྱོན་མེད་དོ། །སྐལ་ལྡན་དག་དགའ་སྟོན་མཛོད་ཅིག ཡུལ་ནི་རྣམ་པ་གསུམ་པོ་རྒྱུ་ཞེས་སོགས་ཀྱིས་བརྒལ་ལན་བསྟན་ཏེ། བརྒལ་ལན་གྱི་དོན་ནི་རིགས་པ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་གཞུང་དེས་མངོན་པར་རྟོགས་པ་བརྒྱད་དུ་བསྟན་པའི་རིགས་པ་དང་། དྲུག་ཏུ་བསྟན་པའི་རིགས་པ་གཉིས་མི་འགལ་བར་བསྟན་པའི་ཕྱིར་ཏེ། མངོན་པར་རྟོགས་པ་བརྒྱད་པོ་དེ་ཡང་བསྡུ་ན་ཡུལ་དང་། སྦྱོར་བ་དང་། འབྲས་བུ་གསུམ་དུ་འདུས་པས་བརྒྱད་ཀྱི་སྐབས་སུ་ཡུལ་ལ་གསུམ་དུ་ཕྱེ་ནས་བསྟན། དྲུག་གི་སྐབས་སུ་ཡུལ་གཅིག་ཏུ་བསྡུས་པ་ཙམ་ཡིན་པས་མི་འགལ་ཞེས་བསྟན་པའི་ཕྱིར་རོ། །རིགས་པའི་དོན་མདོའི་དངོས་བསྟན་ལ་མེད་ཀྱང་བསྟན་བཅོས་རྩོམ་པ་པོ་ཉིད་ཀྱིས་སྦས་དོན་སྦྱར་བ་ལ་འཇོག་དགོས་པ་ནི་རྒྱུད་བླར་ཤེས་སོ། །གཉིས་པ་གོ་རིམ་མཐུན་པ་ནི་དེ་ལྟར་བྱས་ན། དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་དབྱིག་གཉེན་རང་ཉིད་ཀྱིས་གསུངས་པའི་གོ་རིམ་དེ་མངོན་པར་རྟོགས་པའི་རྒྱན་ལས་རྙེད་པར་ཤེས་པར་འགྱུར་བས་འདི་ལས་འོས་མེད་དོ། །ལྔ་པ་དགོངས་འགྲེལ་གྱི་བསྟན་བཅོས་ཇི་ལྟར་བྱུང་བའི་ཚུལ་ནི། ཐོག་མར་འཕགས་པ་ཐོགས་མེད་ཀྱིས་མ་ཕམ་པ་ལས་མདོ་དང་བསྟན་བཅོས་དངོས་སུ་གསན་པ་ལ་བརྟེན་ནས་དེ་ཉིད་རྣམ་ངེས་མཛད་དོ། །དེའི་རྗེས་སུ་སློབ་དཔོན་དབྱིག་གཉེན་གྱིས་སེམས་ཙམ་གྱི་གྲུབ་མཐའ་ལ་བརྟེན་ནས་ཉི་ཁྲི་གཞུང་འགྲེལ་མཛད་ལ། དེ་ཉིད་བོད་དུ་མ་འགྱུར་རོ། །ཁ་ཅིག་དབྱིག་གཉེན་གྱིས་མཛད་པའི་ཡུམ་གསུམ་གནོད་འཇོམས་འདི་ཉི་ཁྲི་གཞུང་འགྲེལ་ཡིན་པར་འདོད་དེ། ལོ་ཆེན་གྱི་ཞལ་ནས་པཎྜི་ཏ་འགའ་ཞིག་ང་ལ་གཞུང་འགྲེལ་ཡོད་ཟེར་ནས་བལྟས་པས། འབུམ་ཊཱིཀ་ཏུ་སོང་ནས། འདི་འབུམ་ཊཱིཀ་ཡིན་བྱས་པས་དེ་ག་གཞུང་འགྲེལ་ཡིན་ཟེར་རོ། །དེའི་རྗེས་སུ་འཕགས་པ་གྲོལ་སྡེས་དབུ་མའི་གྲུབ་མཐའ་དང་སྦྱར་བ་ཉི་ཁྲི་སྣང་བ་མཛད། དེའི་འོག་ཏུ་བཙུན་པ་གྲོལ་སྡེས་ཉི་ཁྲི་དང་སྦྱར་བའི་ཉི་ཁྲི་རྣམ་འགྲེལ་མཛད་དོ། །དེའི་འོག་ཏུ་སློབ་དཔོན་གྱིས་ཉི་ཁྲི་སྣང་བ་ལ་བརྟེན་ནས་ཐོག་མར་ཉི་ཁྲིའི་རྒྱན་དུ་གཟིགས་ཏེ་ཉི་ཁྲི་དང་སྦྱར་བའི་ལེའུ་བརྒྱད་མ་མཛད། དེའི་འོག་ཏུ་བརྒྱད་སྟོང་པའི་རྒྱན་དུ་གཟིགས་ཏེ། བརྒྱད་སྟོང་འགྲེལ་ཆེན་མཛད། དེའི་འོག་ཏུ་ཡུམ་གསུམ་ཆར་གྱི་རྒྱན་དུ་གཟིགས་ཏེ། ཡུམ་གསུམ་གྱི་ལུང་ཁུངས་ཙམ་དང་སྦྱར་ཞིང་རང་གི་འདོད་པ་མདོར་བསྡུས་ཏེ་སྟོན་པ་འགྲེལ་ཆུང་དོན་གསལ་མཛད་དོ། །འདི་གསུམ་བརྩམས་པའི་གོ་རིམ་ནི་པཎྜི་ཏ་དག་གིས་རྣམ་གཞག་གཞན་དུ་འཆད་པ་མང་ཡང་། ཉི་ཁྲི་སྣང་བ་གཞིར་གཞག་པ་ན་དེ་དང་མཐུན་པ་དང་། ཕལ་ཆེར་མཐུན་པ་དང་། ཕལ་ཆེར་མི་མཐུན་པར་འདུག་པས་རང་གི་གྲུབ་མཐའ་ལོགས་སུ་འཇོག་མི་ནུས་པ་དང་། ཅུང་ཟད་འཇོག་ནུས་པ་དང་། རང་ཁོ་ནའི་འདོད་པ་ལ་གཙོ་བོར་བྱེད་པའི་སྐབས་ཏེ། ཤེས་རབ་སྐྱེ་བའི་གོ་རིམ་དང་བསྟུན་ན་དེ་ལྟར་རིགས་སོ། །ཞེས་འབུམ་པ་འཆད་དོ། །སྡུད་འགྲེལ་གསར་མ་ནི་བལ་པོ་ལོ་ཙཱ་དང་། པུཎྱཱ་ཤྲཱི་ནི་འགྲེལ་ཆེན་དང་སྒྲས་སྒྲོས་མཐུན་པས་སློབ་དཔོན་གྱིས་མཛད་པ་ཡིན་གསུངས་ཤིང་། འབུམ་པ་དང་། མ་ཧཱ་ནི་སྒྲས་སྒྲོོས་མི་མཐུན་པས་མ་ཡིན་པར་མཛད། འབྲེས་ནི་སློབ་དཔོན་གྱིས་འགྲེལ་པ་བརྩམས་ལུགས་དང་མཐུན་པས་སློབ་མ་རྗེས་འབྲང་ཞིག་གིས་མཛད་པ་ཡིན་གསུང་། དེའི་རྗེས་སུ་སངས་རྒྱས་ཡེ་ཤེས་ཞབས་ཀྱིས་མདོ་སྡུད་པའི་འགྲེལ་པ་མཛད་དོ། །དེའི་རྗེས་སུ་ཤཱནྟི་པས་ཉི་ཁྲི་དང་སྦྱར་བའི་འགྲེལ་པ་དག་ལྡན། བརྒྱད་སྟོང་པ་དང་སྦྱར་བའི་སྙིང་པོ་མཆོག ཤེར་ཕྱིན་གྱི་མན་ངག་སྟེ་གསུམ་མཛད། འདི་སློབ་དཔོན་ལ་འགྲན་རྙོག་པའི་པཎྜི་ཏ་ཡིན་པས་ཉི་ཁྲི་ལེའུ་བརྒྱད་མ་མ་དག་པ་དང་། བརྒྱད་སྟོང་འགྲེལ་ཆེན་ལ་སྙིང་པོ་མེད་པ་དང་། འགྲེལ་ཆུང་ལ་མན་ངག་མེད་པ་ཡིན་ཞེས་ཟུར་ཟ་བར་གྲགས་སོ། །ཡང་སློབ་དཔོན་གྱི་འགྲེལ་ཆུང་ལ། གསེར་གླིང་པ་དང་། ཤེར་འབྱུང་བློ་གྲོས་དང་། ཀུ་ལེནྟ་དང་། རཏྣ་ཀཱིརྟི་རྣམས་ཀྱིས་འགྲེལ་བཤད་མཛད་དོ། །དེའི་འོག་ཏུ་ཨ་བྷ་ཡ་ཀ་རས་བརྒྱད་སྟོང་པ་དང་སྦྱར་བའི་གནད་ཀྱི་ཟླ་འོད་དང་། བུདྡྷ་ཤྲཱིས་ཤེས་རབ་སྒྲོན་མའི་ཕྲེང་བ་རྣམས་མཛད་དོ། །

སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པ།

བཞི་པ་སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པ་ལ་གསུམ་སྟེ། བརྗོད་བྱ་ཤེར་ཕྱིན་ལ་འཇུག་པའི་ཡན་ལག་མཆོད་བརྗོད། རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འགྲེལ། བསྟན་བཅོས་ཀྱི་བརྗོད་བྱ་མངོན་རྟོགས་བཤད་པའོ། །དང་པོ་ནི་ཉན་ཐོས་ཞི་བ་ཚོལ་རྣམས་ཞེས་སོགས་ཏེ། འདི་ལ་གསུམ་སྟེ། འཕགས་པས་ཇི་ལྟར་ཕྱེ་བའི་ཚུལ། སློབ་དཔོན་གྱིས་ཇི་ལྟར་བཀྲལ་བའི་ཚུལ། གནད་ཀྱི་དོན་ངོས་གཟུང་བའོ། །དང་པོ་ནི། ཉིར་སྣང་དུ། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས་ཐམས་ཅད་མཁྱེན་པ་ཉིད་གསུམ་གྱི་ཐུན་མོང་མ་ཡིན་པའི་ཡོན་ཏན་ཉེ་བར་དགོད་པ་སྔོན་དུ་འགྲོ་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །ཞེས་བརྗོད་པ་འདི་ནི་དེའི་མངོན་པར་རྟོགས་པའི་རྒྱན་གྱི་མན་ངག་བཤད་སྦྱར་དུ་བྱའོ་སྙམ་པས་རྣམ་པར་དགྲོལ་བར་བྱའོ་ཞེས་མངོན་པར་རྟོགས་པའི་རྒྱན་གྱི་བཤད་པ་འདི་སྦྱར་བར་དམ་བཅས་པ་ཡིན་ནོ། །ཅིའི་དོན་དུ་ཞེ་ན། རྣམ་པ་ཐམས་ཅད་མཁྱེན་ཉིད་ལམ་ཞེས་པ་ནས་བྱ་བ་རྩོམ་པའི་དགོས་པ་ཡིན། ཞེས་དེ་ལྟར་ཕྱག་འཚལ་བ་ཉེ་བར་བཀོད་པའི་ཚིགས་སུ་བཅད་པས་ཡང་དག་པར་མཚོན་པའི་དོན་འདི་ཡོད་པ་ཡིན་ནོ། །ཞེས་གསུངས་པ་ཡིན་ནོ། །ཅི་མངོན་པར་རྟོགས་པའི་རྒྱན་གཞི་བསྡུས་པས་སམ། འོན་ཏེ་གཉེན་པོ་བསྡུས་པས་སམ། དེ་སྟེ་རྣམ་པ་བསྡུས་པས་རྒྱན་དུ་བྱེད་པ་ཡིན་ཞེས་བྱ་བ་འདི་བརྗོད་པར་བྱ་བ་ཡིན་ནོ། །དེ་ལས་ཀྱང་ཅིར་འགྱུར་ཞེ་ན། ཕྱོགས་དང་པོ་ལྟར་ན་ནི་འབད་པ་དོན་མེད་པ་ཡིན་ནོ། །ཞེས་སོགས་གསུངས་སོ། །འདི་ལ་དངོས་བསྟན། ཤུགས་བསྟན། འཕྲོས་དོན་གསུམ་ལས། དང་པོ་ནི་འཕགས་པའི་གང་ཟག་ཅེས་སོགས་ཏེ། མཆོད་བརྗོད་ཀྱི་ཚིག་རྐང་དང་པོ་གསུམ་པོས་མཁྱེན་གསུམ་གྱི་ཐུན་མོང་མ་ཡིན་པའི་ཡོན་ཏན་བརྗོད་ཅིང་། བཞི་པས་དེ་སྔོན་དུ་འགྲོ་བས་ཤེར་ཕྱིན་ལ་ཕྱག་འཚལ་བ་ནི་དངོས་བསྟན་ནོ། །གཉིས་པ་ནི་དེའི་མངོན་པར་རྟོགས་པའི་རྒྱན་གྱི་ཞེས་སོགས་ཏེ། ཤེར་ཕྱིན་དེའི་མངོན་པར་རྟོགས་པའི་རྒྱན་བརྩམ་པར་དམ་བཅས་པ་ནི་ཤུགས་བསྟན་ནོ། །གསུམ་པ་ལ། ཤུགས་བསྟན་ལས་འཕྲོས་ནས་དགོས་པ་གང་ཡིན། བརྗོད་བྱ་གང་ཞིག་བསྡུས་པས་རྒྱན་དུ་བྱེད་ཅེ་ན། དང་པོའི་ལན་དུ་དགོས་འབྲེལ་གྱི་གཞུང་འདོན། གཉིས་པ་ལ་བསྟན་བཅོས་ཀྱི་བརྗོད་བྱ་ལ་གཞི་གཉེན་རྣམ་གསུམ་གང་རུང་དུ་ངེས་པས་གཞི་ཁོ་ན་བརྗོད་བྱར་བསྡུས་པས་མངོན་པར་རྟོགས་པའི་རྒྱན་དུ་བྱེད་དམ། གཉེན་པོ་ཁོ་ན་བརྗོད་བྱར་བསྡུས་པས་སམ། རྣམ་པ་ཁོ་ན་བརྗོད་བྱར་བསྡུས་པས་རྒྱན་དུ་བྱེད། གསུམ་ག་ལ་ཕྱོགས་དང་པོ་ལྟར་ན་ནི་ཞེས་སོགས་ཀྱི་སྐྱོན་གནས་སོ་ཞེས་པ་ནི་བརྒལ་བ་ཡིན་ལ། གཞི་གཉེན་རྣམ་པའི་ཕྱོགས་གསུམ་ཆར་བརྗོད་བྱར་བསྡུས་པས་སྐྱོན་མེད་ཅེས་པ་ནི་ལན་ནོ། །གང་དག་ཉིར་སྣང་དང་འགྲེལ་ཆེན་གཉིས་ལས། བརྒལ་ལན་གྱི་གཞུང་འདི་རྣམས་དགོས་འབྲེལ་གྱི་འོག་ཏུ་འབྱུང་བས་དགོས་འབྲེལ་གྱི་འགྲེལ་པ་ཡིན་ཞེས་སྨྲ་བ་ནི་འདི་འདྲ་བའི་འཆད་ཚུལ་མ་ཤེས་པའི་སྐྱོན་ནོ། །གཉིས་པ་སློབ་དཔོན་གྱིས་ཇི་ལྟར་བཀྲལ་པའི་ཚུལ་ནི་རྒྱན་གྱིས་མདོ་འཆད་པའི་ཚེ་ན་ཡང་བཤད་ཐབས་ཀྱི་མན་ངག་ལྔ་ཚང་ཞིང་དེ་ལ་བརྟེན་ནས་སློབ་དཔོན་དབྱིག་གཉེན་གྱིས་ཀྱང་མདོ་དོན་འཆད་པ་ལ་བཤད་ཐབས་ཀྱི་མན་ངག་ལྔ་གསུངས་པའི་རྗེས་སུ་འབྲངས་ནས་སློབ་དཔོན་གྱིས་ཀྱང་མངོན་པར་རྟོགས་པའི་རྒྱན་བཤད་ཐབས་ཀྱི་མན་ངག་ལྔའི་སྒོ་ནས་བཤད་པར་བཞེད་པ་ལས། ཐོག་མར་མཆོད་བརྗོད་ལ་ལྔ་ཆར་སྦྱར་ནས། དགོས་འགྲེལ་མན་ཆེད་ལ་མཚམས་སྦྱར་དང་། ཚིག་དོན་ཙམ་ཞིག་སྦྱར་ཞིང་། སྐབས་འགའ་ཞིག་ཏུ་བརྒལ་ལན་སྦྱར་བ་ཡང་ཡོད་དོ། །དེ་ལ་གཞོན་ནུ་ཚུལ་ཁྲིམས་ཀྱིས་འཕགས་པ་བྱམས་པ་ཞེས་སོགས་ཀྱིས་མཆོད་བརྗོད་ཀྱི་གླེང་བསླང་བར་བྱས་ནས་རྩ་བའི་ངག་ལ་རང་ཉིད་ཀྱིས་བཤད་ཐབས་ཀྱི་མན་ངག་ལྔ་སྦྱར་བ་ནི་མི་འཐད་དེ། སློབ་དཔོན་ཉིད་ཀྱི་འགྲེལ་པ་ལ་བཤད་ཐབས་ཀྱི་མན་ངག་ལྔ་ངོས་གཟུང་དགོས་པའི་ཕྱིར་རོ། །དེས་ན་དགོས་པའི་དབང་གིས་མཚམས་སྦྱར་ཐོག་མར་སྨོས་པ་ནི་འཕགས་པ་བྱམས་པ་རང་ཉིད་ཅེས་སོགས་ཏེ། མཚམས་སྦྱར་སྔ་འགྲེལ་དུ་བཀོད་པ་ནི་འགྲེལ་པ་འདིའི་ལུགས་ཡིན་པའི་ཕྱིར་དང་། མཚམས་སྦྱར་གྱི་དོན་གོ་རིམ་སྔ་ཕྱི་མི་འགལ་བར་བསྟན་པ་ལ་འཆད་དགོས་ཤིང་། གཞུང་འདིས་བསྟན་བཅོས་ཀྱི་གོ་རིམ་ལ་མཆོད་བརྗོད་དང་པོར་བསྟན་པའི་དགོས་པ་བཤད་པའི་ཕྱིར་ཏེ། རེ་ཞིག་དང་པོར་ཡུམ་ལ་ཡོན་ཏན་ཇི་ལྟ་བ་བཞིན་དུ་བརྗོད་པ་སྔོན་དུ་འགྲོ་བ་ཅན་གྱི་ཞེས་སོགས་བཤད་པའི་ཕྱིར་རོ། །ཡན་ལག་ཕྱི་མ་བཞི་ལ་སྔོན་གྱི་མཁས་པ་ཕལ་ཆེར་ཚིགས་སུ་བཅད་པ་འདིས་ནི་ཞེས་སོགས་ཀྱིས་དགོས་དོན། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་བསྡུས་དོན། ཉན་ཐོས་དང་དེའི་ཕྱོགས་སུ་བསླན་པ་ཞེས་སོགས་ཀྱིས་ཚིག་དོན། དེ་ལྟར་ཕྱག་འཚལ་བ་དང་ཞེས་སོགས་ཀྱིས་བརྒལ་ལན་བསྟན་པར་བཞེད་དོ། །ཊཱཱི་ཀར། ཚིགས་སུ་བཅད་པ་འདིས་ནི་ཞེས་སོགས་ཀྱིས་བསྡུས་དོན། དེ་ཐོས་ནས་ཞེས་སོགས་ཀྱིས་དགོས་དོན། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་ཡུམ་ལ་བསྟོད་པའི་རྒྱུ་མཚན་བསྟན་ཅིང་ལྷག་མ་གཉིས་སྔར་བཤད་པ་དང་འདྲ་བར་བཞེད་དོ། །ཁ་ཅིག་བསྡུས་དོན་དགོས་དོན་ཚིག་དོན་གསུམ་དེ་དང་འདྲ་བ་ལས། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་བརྒལ་ལན་བསྟན་ཅིང་དེ་ལྟར་ཕྱག་འཚལ་བ་དང་ཞེས་སོགས་དགོས་འབྲེལ་གྱི་མཚམས་སྦྱར་ལ་སྦྱོར་བར་སྨྲའོ། །དེ་ནི་མི་རིགས་ཏེ། གོ་རིམ་དང་མི་མཐུན་པ་དང་། ཚིག་སྦྱོར་དང་མི་མཐུན་པ་དང་། བརྒལ་ལན་གོ་ལོག་པའི་སྐྱོན་དང་གསུམ་ལས། དང་པོ་ནི། མཚམས་སྦྱར་ཐོག་མར་སྨོས་པ་ལ་ནི་དགོས་པ་ཡོད་ཅིང་། གཞན་བཞི་པོ་གོ་རིམ་དཀྲུགས་པ་ལ་དགོས་པ་མེད་པས་བསྡུས་དོན་ཐོག་མར་སྨོས་ན། དབྱིག་གཉེན་གྱིས་གསུངས་པའི་གོ་རིམ་དང་མི་མཐུན་པའི་སྐྱོན་གནས་སོ། །གཉིས་པ་ནི་འདིར་བཤད་ཐབས་ཀྱི་མན་ངག་ཕྱི་མ་བཞི་པོ་རེ་རེའི་མཇུག་ཏུ་རྫོགས་ཚིག་རེ་འབྱུང་བ་ལས་ཕུལ་དུ་བྱུང་བ་དང་ལྡན་པར་བརྗོད་དོ། །ཅེས་པའི་ཚིག་དེ་འོག་མ་འདྲེན་པའི་ཚིག་ཡིན་གྱི་རྫོགས་ཚིག་མ་ཡིན་པས་ཡན་ལག་ལོགས་སུ་སྟོན་པ་སློབ་དཔོན་གྱི་དགོངས་པ་མ་ཡིན་ནོ། །གསུམ་པ་ནི། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ལ་བརྒལ་ལན་གྱི་དོན་མི་གནས་ཤིང་། དེ་ལྟར་ཕྱག་འཚལ་བ་དང་ཞེས་སོགས་དགོས་འགྲེལ་གྱི་མཚམས་སྦྱར་ཡིན་པ་གོང་དུ་བཀག་ཟིན་པས་མཆོད་བརྗོད་ཀྱི་བརྒལ་ལན་ལས་འོས་མེད་པས་བཟློག་སྟེ་སྨྲ་བ་མི་འཐད་དོ། །གལ་ཏེ་བརྒལ་ལན་གྱི་དོན་གནས་ཏེ་མཆོད་བརྗོད་ཀྱི་སྐབས་སུ་མཁྱེན་གསུམ་ལ་བསྟོད་ནས་ལུས་ཀྱི་སྐབས་སུ་མངོན་པར་རྟོགས་པ་བརྒྱད་བརྗོད་བྱར་བྱས་པ་ལ་རྒོལ་བའི་སྐྱོན་སྤོང་བའི་ཕྱིར་རོ་ཞེ་ན། དེ་ཡང་མི་འཐད་དེ། སྐབས་འདིའི་བརྒལ་ལན་ནི་མཆོད་བརྗོད་ཁོ་ནའི་བརྒལ་ལན་དུ་འགྱུར་བ་ཅིག་དགོས་པ་ལས། དེ་ནི་མཆོད་བརྗོད་དང་། ལུས་གཉིས་ཆར་གྱི་བརྒལ་ལན་དུ་སོང་འདུག་པའི་ཕྱིར་དང་། གཞུང་གཞན་རྣམས་ཀྱི་ཐོག་མར་ཡང་དེ་དང་ཆ་འདྲ་བའི་དོགས་པ་རེ་བསླད་དུ་ཡོད་པས་བརྒལ་ལན་ཐུག་མེད་དུ་ཐལ་བའི་ཕྱིར་རོ། །དེས་ན་སློབ་དཔོན་གྱི་དགོངས་པ་ནི་ལུགས་དང་པོ་ཉིད་ཡིན་པས། འདི་ལ་ཡན་ལག་ངོས་གཟུང་བ་དང་། དཀའ་བའི་གནས་ལ་དཔྱད་པ་གཉིས་ལས། དང་པོ་ནི། ཚིགས་སུ་བཅད་པ་འདིས་ནི་ཞེས་སོགས་ཀྱིས་དགོས་དོན་བསྟན་ཏེ། དེ་ཐོས་ནས་ཞེས་པ་ཡན་ཆད་ཀྱིས་མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་ཀ་དང་བ་སྐྱེ་བའི་དམིགས་རྐྱེན་བསྟན་ནས་དེ་མན་ཆད་ཀྱིས་དང་བ་སྐྱེ་ཚུལ་སོ་སོར་བསྟན་པའི་ཕྱིར་རོ། །དེ་ལ་ཐམས་ཅད་མཁྱེན་པ་ཉིད་གསུམ་གྱི་ཞེས་སོགས་ཀྱིས་བསྡུས་དོན་བསྟན་ཏེ། དགོས་པའི་དོན་བསྡུས་དོན་ལས་རྟོགས་པར་གསུངས་ཤིང་། གང་ཟག་གཉིས་པོ་དང་བ་ལ་བརྟེན་ནས་ཡུམ་ལ་འཇུག་དགོས་ན་ཡུམ་ཇི་ལྟ་བུ་ལ་འཇུག་སྙམ་ན་མངོན་པར་རྟོགས་པ་བརྒྱད་བསྡུས་པར་བྱེད་པའི་མཁྱེན་གསུམ་ལ་འཇུག་དགོས་ཞེས་བསྟན་པའི་ཕྱིར་རོ། །ཉན་ཐོས་ཞེས་སོགས་ཀྱིས་ཚིག་དོན་བསྟན་པའི་ཚུལ་ལ་ནི་གོ་སླ་བར་ཟད་དོ། །དེ་ལྟར་ཕྱག་འཚལ་བ་དང་ཞེས་སོགས་ཀྱིས་བརྒལ་ལན་བསྟན་ཏེ། འདི་ནི་སྔོན་གྱི་མཁས་པ་ཕལ་ཆེར་ཡང་བཞེད་ཅིང་། མཁས་གྲུབ་གཡག་གི་བཞེད་པ་ཡང་ཡིན་ནོ། །གཉིས་པ་དཀའ་བའི་གནས་ལ་དཔྱད་པ་ལ་གསུམ་སྟེ། གསུམ་གྱིས་བརྒྱད་བསྡུས་ཚུལ་དང་། བརྒལ་བ་དང་ལན་གྱི་ཚུལ་དང་། ལམ་ཤེས་ཀྱི་མདོ་ལ་དཔྱད་པའོ། །དང་པོ་ནི། རྔོག་ལོ་ཆེན་པོས་མཁྱེན་གསུམ་རྒྱ་ཆེ་བའམ་ཐུན་མོང་བ་ཡིན་ཞིང་སྦྱོར་བཞི་དང་ཆོས་སྐུ་རྒྱ་ཆུང་བའམ་ཐུན་མོང་མ་ཡིན་པ་ཡིན་པས། རྒྱ་ཆེ་བས་རྒྱ་ཆུང་བ་བསྡུས་པའམ། ཐུན་མོང་བས་ཐུན་མོང་མ་ཡིན་པ་བསྡུས་པའི་ཚུལ་གྱིས་བསྡུས་ཞེས་བཞེད། འབྲེ་ཆེན་པོས་དེ་བཀག་ནས། མཁྱེན་གསུམ་རང་བཞིན་དང་། སྦྱོར་བཞི་དང་ཆོས་སྐུ་གནས་སྐབས་ཡིན་པས་རང་བཞིན་གྱིས་གནས་སྐབས་བསྡུས་པའི་ཚུལ་གྱིས་བསྡུས་སོ་ཞེས་བཞེད། ཨར་གྱིས་དེ་བཀག་ནས་མཁྱེན་གསུམ་མཚོན་བྱེད་ཀྱི་ཆོས་སུམ་ཅུ་པོ་དེ་སྡུད་བྱེད་ཀྱི་མཁྱེན་གསུམ་ཡིན་པས། དེས་སྦྱོར་བཞི་དང་ཆོས་སྐུ་བསྡུས་པར་བཞེད། གཞོན་ནུ་ཚུལ་ཁྲིམས་ཀྱིས་དེ་བཀག་ནས་འབྲེའི་བཞེད་པ་རང་ལུགས་སུ་མཛད། ཤེས་བྱ་ཀུན་རིག་གི་ཞལ་སྔ་ནས་འཕགས་བཞིའི་མངོན་རྟོགས་ལ་མཁྱེན་གསུམ་དུ་བཞག་པ་ནི་མཁྱེན་གསུམ་སྤྱིས་བསྡུས། སྦྱོར་བཞི་ལམ་ཤེས་ཀྱིས་བསྡུས། ཆོས་སྐུ་རྣམ་མཁྱེན་གྱིས་བསྡུས་ཞེས་གསུང་ངོ་། །དེ་རྣམས་ཀྱི་ནང་ནས་འབྲེའི་བཞེད་པ་ལ་གསུམ་གྱིས་བརྒྱད་བསྡུས་པར་མ་སོང་བར་ལྔ་བསྡུས་པར་སོང་བས་སྐྱོན་དང་བཅས་པ་ཡིན་ཀྱང་རང་བཞིན་གྱིས་གནས་སྐབས་བསྡུས་པ་ལ་ནི་དོན་ལ་གནས་པའི་ཆ་ཤས་ཡོད་ཅིང་རྒྱ་ཆེ་བས་རྒྱ་ཆུང་བ་བསྡུས་པ་ལ་ནི་དེ་དང་འདྲའོ། །སློབ་དཔོན་གྱི་དགོངས་པ་ནི་འདི་ཡིན་ཏེ། མཆོད་བརྗོད་ཀྱི་ཚིག་རྐང་དང་པོ་གསུམ་གྱིས་བསྟན་པའི་མཁྱེན་གསུམ་ནི་སྡུད་བྱེད་ཀྱི་མཁྱེན་གསུམ་དང་། ལུས་ཀྱི་མངོན་རྟོགས་བརྒྱད་པོ་བསྡུ་བྱར་འཇོག་པ་ནི་སྐབས་ཀྱི་དོན་ཡིན་པས་སྡུད་བྱེད་དེས་ལུས་ཀྱི་མཁྱེན་གསུམ་མཚན་ཉིད་ཀྱི་སྒོ་ནས་བསྡུས་ཏེ། ལུས་ཀྱི་མཁྱེན་གསུམ་དེ་ཐོས་བསམ་གྱིས་གཏན་ལ་འབེབས་པའི་ལྡོག་པ་ནས་བསྟན་པས་ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་པའི་ཕྱིར་རོ། །རྣམ་རྫོགས་སྦྱོར་བ་ནི་སྦྱོར་བའི་སྒོ་ནས་བསྡུས་ཏེ། རྣམ་རྫོགས་སྦྱོར་བ་དེ་མཁྱེན་གསུམ་གྱི་རྣམ་པ་སྒོམ་པའི་སྦྱོར་བ་ཡིན་པའི་ཕྱིར་རོ། །རྩེ་སྦྱོར་རབ་ཀྱི་སྒོ་ནས་བསྡུས་སྟེ། རྩེ་སྦྱོར་དེ་མཁྱེན་གསུམ་གྱི་སྦྱོར་བ་རབ་ཏུ་གྱུར་པའི་གནས་སྐབས་ཡིན་པའི་ཕྱིར་རོ། །མཐར་གྱིས་པ་གོ་རིམ་གྱི་སྒོ་ནས་བསྡུས་ཏེ། མཐར་གྱིས་པ་དེ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པའི་གནས་སྐབས་ཡིན་པའི་ཕྱིར་རོ། །སྐད་ཅིག་མ་མཐར་ཐུག་པའི་སྒོ་ནས་བསྡུས་ཏེ། སྐད་ཅིག་མ་དེ་མཁྱེན་གསུམ་གྱི་སྦྱོར་བ་མཐར་ཐུག་པའི་གནས་སྐབས་ཡིན་པའི་ཕྱིར་རོ། །ཆོས་སྐུ་རྣམ་སྨིན་གྱི་སྒོ་ནས་བསྡུས་ཏེ། ཆོས་སྐུ་དེ་མཁྱེན་གསུམ་གྱི་སྦྱོར་བ་སྒོམ་པའི་རྣམ་སྨིན་མཐར་ཐུག་ཡིན་པའི་ཕྱིར། བསྡུས་ཚུལ་གཞན་རྣམས་ནི་སྡུད་བྱེད་ཀྱི་མཁྱེན་གསུམ་དེས་མངོན་རྟོགས་དང་པོ་གསུམ་པོ་སོ་སོར་བསྡུས་ཤིང་། རྣམ་རྫོགས་སྦྱོར་བ་མན་ཆད་རེ་རེ་ཡང་མཁྱེན་པ་གསུམ་ཆར་གྱིས་བསྡུས་དགོས་པའི་གནད་མ་རྟོགས་པའི་ཅལ་ཅོལ་དུ་སྣང་ངོ་། །འདི་སློབ་དཔོན་གྱི་དགོངས་པ་འཆད་པའི་སྐབས་ཡིན་ལ། མཚན་ཉིད་དེ་ཡི་སྦྱོར་བ་དང་། །ཞེས་སོགས་ཀྱི་འགྲེལ་པར་ཐམས་ཅད་མཁྱེན་པ་ཉིད་གསུམ་གྱི་སྦྱོར་བ་ཡིན་ནོ་ཞེས་པ་ནས་ཐམས་ཅད་མཁྱེན་པ་ཉིད་གསུམ་གྱི་རྣམ་པར་སྨིན་པ་ཡིན་ནོ། །ཞེས་པའི་བར་གྱི་འགྲེལ་པ་དེ་མཐོང་ན་སློབ་དཔོན་གྱི་དགོངས་པ་ཡིན་མིན་གྱི་རྩོད་པ་མི་འབྱུང་ངོ་། །ཕྱི་མ་ཁ་ཅིག གསུམ་གྱིས་བརྒྱད་བསྡུས་པའི་ཤེས་བྱེད་དུ་གསུམ་ལ་བསྟོད་པར་བཞེད་ནས་བརྒྱད་ལ་བསྟོད་པར་མི་བཞེད་པའི་གང་ཟག་མི་སྲིད་པའི་ཕྱིར་རོ། །ཞེས་སྨྲ་བ་ནི། གསེར་གྱི་ཨ་ལོང་དང་ཆོས་མཚུངས་ཏེ་གསུམ་ལ་བསྟོད་པས་བརྒྱད་ལ་བསྟོད་པར་འགྱུར་བའི་ཤེས་བྱེད་དུ་གསུམ་གྱིས་བརྒྱད་བསྡུས་པ་བཀོད་ནས་སླར་ཡང་དེའི་ཤེས་བྱེད་དུ་གསུམ་ལ་བསྟོད་པས་བརྒྱད་ལ་བསྟོད་པ་བཀོད་འདུག་པས་ཟད་རྒྱུ་མི་འདུག་པའི་ཕྱིར་རོ། །གཉིས་པ་བརྒལ་ལན་གྱི་ཚུལ་ལ་དཔྱད་པ་ནི་ཁ་ཅིག མཁྱེན་གསུམ་བརྗོད་བྱར་བྱས་པའི་བསྟན་བཅོས་རྩོམ་ན་ཞེས་པ་དང་། གཞན་དག་དེ་བཀག་ནས་མཁྱེན་གསུམ་བརྗོད་བྱར་བྱས་པར་ཡིད་དཔྱོད་ཀྱིས་ངེས་པའི་གང་ཟག་གིས་མཁྱེན་གསུམ་བརྗོད་བྱར་བྱས་པའི་རྒྱན་རྩོམ་ན་ཞེས་སོགས་ཀྱིས་འཕྲོས་བྱེད་པ་ནི་མི་འཐད་དེ། ཉིར་སྣང་དུ། མཆོད་བརྗོད་ཀྱི་ཤུགས་ལ་མཁྱེན་གསུམ་གྱི་རྒྱན་རྩོམ་པར་དམ་བཅས་པར་གསུང་གི་བརྗོད་བྱར་བྱས་པའི་རྒྱན་རྩོམ་པར་དམ་བཅས་པར་མ་གསུང་བའི་ཕྱིར་དང་། གལ་ཏེ་གསུངས་ན་གཞི་ཁོ་ན་བརྗོད་བྱར་བྱེད་དམ་ཞེས་སོགས་ཀྱི་དོགས་པ་སྐྱེ་བའི་དོན་མེད་པའི་ཕྱིར་རོ། །ཁ་ཅིག་གཞི་ཁོ་ན་བརྗོད་བྱར་བསྡུས་པའི་སྒོ་ནས་གཞི་ཤེས་ཀྱི་རྒྱན་དུ་བྱེད་དམ་ཞེས་སོགས་ཀྱི་དོགས་པ་གསུམ་བཀོད་པ་ཡང་མི་འཐད་དེ། མཆོད་བརྗོད་ཀྱི་སྐབས་སུ་མཁྱེན་གསུམ་གྱི་རྒྱན་རྩོམ་པར་དམ་བཅས་བཞིན་དུ་མཁྱེན་གསུམ་རེ་རེ་བ་ཁོ་ནའི་རྒྱན་དུ་བྱེད་དམ་ཞེས་དོགས་པ་སྐྱེ་ན་ཧ་ཅང་ཐལ་བའི་ཕྱིར་རོ། །འཐད་པའི་ཕྱོགས་ངོས་གཟུང་བ་ལ་གང་ལ་རྩོད་པའི་ཡུལ། གང་གིས་རྩོད་པའི་གང་ཟག ཇི་ལྟར་རྩོད་པའི་ཚུལ། ལན་གྱི་དོན་ངོས་གཟུང་བ་དང་བཞི་ལས། དང་པོ་ནི་མཆོད་བརྗོད་ཀྱི་སྐབས་སུ་མཁྱེན་གསུམ་གྱི་རྒྱན་རྩོམ་པར་ཤུགས་ལ་དམ་བཅས་པ་ལའོ། །གཉིས་པ་ནི་མཁྱེན་གསུམ་གྱི་རྒྱན་རྩོམ་པར་ངེས་ཀྱང་གཞི་གཉེན་རྣམ་གསུམ་གང་བརྗོད་བྱར་བྱེད་མ་ངེས་ཤིང་སྤྱིར་བསྟན་བཅོས་ཀྱི་བརྗོད་བྱ་དེ་གསུམ་དུ་ངེས་པའི་གང་ཟག་གིས་སོ། །གསུམ་པ་ནི་གཞི་ཁོ་ན་བསྡུས་པས་མཁྱེན་གསུམ་གྱི་རྒྱན་རྩོམ་མམ། དེ་བཞིན་དུ་ལམ་ཁོ་ན་དང་། རྣམ་པ་ཁོ་ན་བསྡུས་པས་མཁྱེན་གསུམ་གྱི་རྒྱན་རྩོམ། གསུམ་པོ་གང་ཁས་བླངས་ཀྱང་གཞུང་ནས་བཀོད་པའི་སྐྱོན་གསུམ་ཡོད་དོ་ཅེས་པའོ། །བཞི་པ་ནི་སྐྱོན་དེ་དག་མེད་དེ། གཞི་གཉེན་རྣམ་པ་གསུམ་ཆར་གྱི་བརྗོད་བྱར་བསྡུས་པའི་སྒོ་ནས་མཁྱེན་གསུམ་གྱི་རྒྱན་རྩོམ་པའི་ཕྱིར་རོ། །ཞེས་པའོ། །འདི་ལ་འཕགས་སེང་གཉིས་ཆར་དགོངས་པ་གཅིག་པར་སྣང་ཞིང་། སློབ་དཔོན་གྱིས་དེ་ལྟར་ཕྱག་འཚལ་བ་དང་ཞེས་པའི་ཚིག་ཙམ་དང་། ཡུམ་བསྡུས་པ་དང་། རྒྱས་པའི་ལུང་ཁུངས་གཉིས་བསྣན་པ་ཙམ་མ་གཏོགས་གཞན་འགྲེལ་པ་གཉིས་ཁྱད་པར་མི་སྣང་ངོ་། །གསུམ་པ་ལམ་ཤེས་ཀྱི་མདོའི་དོན་ལ་དཔྱད་པ་ལ། ལམ་ཐམས་ཅད་བསྐྱེད་པར་བྱ་ཞིང་ལམ་ཐམས་ཅད་ཤེས་པར་བྱའོ་ཞེས་པ་ལ་བརྟེན་ནས་བྱང་སེམས་ཀྱིས་བསྐྱེད་བྱ་དང་ཤེས་བྱའི་ལམ་ངོས་འཛིན་དགོས་པ་ནི་སྐབས་གཉིས་པར་འབྱུང་ངོ་། །དེ་དག་ཀྱང་ཡོངས་སུ་རྫོགས་པར་བྱ་ཞིང་ཞེས་པ་ལ་བརྟེན་ནས་ཉན་རང་གི་སྤང་རྟོགས་རྫོགས་པའི་ཚད་ལ། ཁ་ཅིག་ས་བརྒྱད་པ་ནས་རྫོགས་པར་འདོད་པ་ནི་སེམས་ཙམ་པའི་གྲུབ་མཐའ་དང་འདྲེས་པའི་སྐྱོན་ཡིན་ཞིང་། གཞན་དག་སངས་རྒྱས་མ་ཐོབ་ཀྱི་བར་དུ་མ་རྫོགས་པར་འདོད་པ་ནི་ཀུན་བཏུས་སུ་ཅིག་ཆར་ཉོན་མོངས་པ་དང་། ཤེས་བྱའི་སྒྲིབ་པ་སྤོང་ངོ་། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །ཞེས་པའི་སྐབས་ཀྱི་སྒྲིབ་གཉིས་དང་། ལུགས་འདིའི་ཐུན་མོང་མ་ཡིན་པའི་སྒྲིབ་གཉིས་ཀྱི་ངོས་འཛིན་མ་ཕྱེད་པའི་གཏམ་མོ། །དེས་ན་སེམས་ཙམ་པའི་ལུགས་ལ་ཉན་རང་གི་སྤང་རྟོགས་ས་བརྒྱད་པ་ནས་རྫོགས་ཏེ། དེར་ཉོན་ཡིད་སྤངས་པའི་ཕྱིར་དང་། མདོར་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་བྱང་སེམས་ཆེན་པོའི་མི་སྐྱེ་བའི་ཆོས་ལ་བཟོད་པ་ཐོབ་པའི་བཟོད་པའོ་ཞེས་པའི་བཟོད་པ་དེ་ས་བརྒྱད་པ་ལ་ངོས་འཛིན་པའི་ཕྱིར་ཏེ། གནོད་འཇོམས་སུ། བཟོད་པ་ཡིན་ནོ་ཞེས་བྱ་བ་ནི་བྱང་ཆུབ་སེམས་དཔའི་ཐུགས་རྗེའི་ཤེས་རབ་ཆེ་བར་བསྟན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་དགྲ་བཅོམ་པའི་ལམ་གྱི་འབྲས་བུའི་ཤེས་པ་རྣམས་དང་། ཉོན་མོངས་པ་ཐམས་ཅད་སྤངས་པ་རྣམས་ནི་ས་བརྒྱད་པ་ལ་ཞུགས་པ་མི་སྐྱེ་བའི་ཆོས་ལ་བཟོད་པ་ཙམ་ཉིད་ཀྱིས་མཐར་ཐུག་པར་འགྱུར་ཏེ། དེ་དག་གི་ཤེས་པ་དང་སྤོང་བ་ནི་བཟོད་པ་དེ་ལས་ལྷག་པ་མེད་དོ། །དེ་ཕན་ཆད་དུ་ནི་བྱང་ཆུབ་སེམས་དཔའ་རྣམས་རྣམ་པ་ཐམས་ཅད་དུ་ཉོན་མོངས་པ་མེད་དེ་ཅེས་དང་། སྙིང་པོ་མཆོག་ཏུ་མི་སྐྱེ་བའི་ཆོས་ལ་བཟོད་པ་ཞེས་བྱ་བ་ནི་ཆོས་ཐམས་ཅད་ལ་ཟག་པ་མེད་པར་ཤེས་པ་ནི་བཟོད་པའོ། །དེ་ཐོབ་པར་འགྱུར་བ་ནི་ས་བརྒྱད་པ་སྟེ་ཞེས་གསུངས་པས་སོ། །དབུ་མ་པའི་ལུགས་ལ་ས་དང་པོ་ནས་རྫོགས་ཏེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ལ་ཉན་རང་གི་མཐོང་སྒོམ་གཉིས་ཆར་གྱི་ནུས་པ་ཚང་བས་མཐོང་ལམ་རྣམ་གྲོལ་ལམ་གྱི་སྐབས་སུ་ཉན་རང་གི་སྤང་བྱའི་རིགས་སུ་གནས་པའི་ཉོན་སྒྲིབ་དང་ཤེས་སྒྲིབ་གཟུང་རྟོག་མ་ལུས་པར་སྤངས་ཟིན་པའི་ཕྱིར་རོ། །འཕགས་སེང་གཉིས་ཀྱང་འདི་ཉིད་བཞེད་དེ། ཉིར་སྣང་དུ་སྔར་བཤད་པའི་བཟོད་པའི་ངོས་འཛིན་དུ་བཟོད་པ་དེ་ཡང་གང་ཞེ་ན་སྡུག་བསྔལ་ལ་ཆོས་ཤེས་པའི་བཟོད་པའོ། །འདི་གང་ལས་ཤེས་ཞེ་ན་ལམ་གཞན་ཁྱད་ཡོད་པ་ཡིན་ན། རིགས་དང་། དབང་པོ་དང་། ཚོགས་ཁྱད་ཞུགས་པར་འགྱུར་བའི་ཕྱིར། བྱང་ཆུབ་སེམས་དཔའི་བཟོད་པའི་བྱེད་པར་གཞན་རྣམས་ཀྱིས་རྟོགས་པའི་བྱེད་པ་མ་ལུས་པར་འདུས་པར་འགྱུར་བའི་ཕྱིར། དེ་དག་གི་ཤེས་པ་དང་སྤངས་པ་གང་ཡིན་པ་དེ་ནི་དེའི་བཟོད་པ་ཡིན་གྱི་རྟོགས་པའི་ཚད་འདི་ཙམ་མ་ཡིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ་ཞེས་གསུངས་པ་འདི་མངོན་རྟོགས་རྒྱན་གྱི་དགོངས་པ་འགྲེལ་བ་ལ་ཚད་མ་ཡིན་ནོ། །འགྲེལ་ཆེན་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ་ཞེས་བྱ་བ་ནི་ཆོས་ཐམས་ཅད་སྐྱེ་བ་མེད་པའོ་ཞེས་བྱ་བའི་ཆོས་ལ་དམིགས་པའི་བཟོད་པའམ་སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པའོ། །ཞེས་སོ། །ལུགས་འདི་ལ་མཐོང་ལམ་བར་ཆད་མེད་ལམ་གྱི་དུས་སུ་རྟོགས་པ་རྫོགས་ཤིང་རྣམ་གྲོལ་ལམ་གྱི་དུས་སུ་སྤངས་པ་རྫོགས་ཞེས་པ་འཐད་པར་སྣང་སྟེ། བར་ཆད་མེད་ལམ་གྱི་དུས་སུ་ཉན་རང་གི་ལམ་གྱིས་ཇི་ཙམ་རྟོགས་པ་རྟོགས་ཤིང་ཇི་ཙམ་སྤངས་པ་སྤོང་ནུས་པའི་ཕྱིར་དང་། རྣམ་གྲོལ་ལམ་གྱི་དུས་སུ་ཇི་ཙམ་སྤངས་པ་སྤངས་ཟིན་པའི་ཕྱིར་རོ། །བྱང་སེམས་འཕགས་པས་ཉོན་སྒྲིབ་སྤངས་ཟིན་པར་གསུངས་པ་ཡང་དོན་འདི་ལ་གནས་ཏེ། གཞན་ངོར་བྱང་སེམས་འཕགས་པ་འཇོག་པའི་ཚེ་སྡུག་བསྔལ་ལ་ཆོས་བཟོད་སྐྱེས་ཟིན་པའི་ཕྱིར་རོ། །ད་དུང་སྦྱོར་ལམ་གྱི་གནས་སྐབས་སུ་འཆད་པར་འགྱུར་བ་ལས་ཀྱང་རྟོགས་པར་འགྱུར་ཏེ། འདིར་ཤེར་ཕྱིན་གྱི་མདོར་རྣམ་ཤེས་ཚོགས་དྲུག་ལས་མ་བཤད་ཅིང་། མངོན་རྟོགས་རྒྱན་དང་རྒྱུད་བླར་ཡང་ཚོགས་དྲུག་ལས་གཞན་པའི་ཉོན་ཡིད་ཁས་མི་ལེན་པའི་དབང་དུ་བྱས་ནས་ས་དང་པོ་ནས་ཉན་རང་གི་སྤང་རྟོགས་རྫོགས་པར་བཞད་པ་ནི་ལུགས་འདིའི་ཐུན་མོང་མ་ཡིན་པའོ། །སྨོན་ལམ་ཡོངས་སུ་རྫོགས་པར་མ་བྱས་པ་དང་། ཞེས་སོགས་ལ་བརྟེན་ནས་སྨོན་ལམ་རྫོགས་པའི་ཚད་ནི་མདོ་སྡེ་རྒྱན་དུ། བརྟན་པ་རྣམས་ཀྱི་སྨོན་ལམ་ནི། །སེམས་དཔའ་འདུན་དང་བཅས་པའོ། །ཞེས་དང་། བྱང་སར་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ། །ཞེས་པ་ལྟར་ཐེག་ཆེན་སེམས་བསྐྱེད་ཀྱི་ནུས་པ་ཡོངས་སུ་རྫོགས་པའོ། །སེམས་ཅན་སྨིན་པ་ནི་སྤང་བྱ་མཐོང་སྤང་དངོས་སུ་སྤོང་བ་དང་གཉེན་པོ་མཐོང་ལམ་དངོས་སུ་སྐྱེ་རུང་ཡིན་ལ། རང་ཉིད་སྤྲུལ་སྐུར་སངས་རྒྱ་བའི་འཁོར་གྱི་ཐོག་མ་དེ་དེ་ལྟར་དུ་བྱས་པ་ནི་སྨིན་པར་བྱས་པའི་ཚད་དེ། རྒྱན་དུ། ཇི་ལྟར་རྨ་དང་ཟས་ལ་དེ་དག་གི །གཟག་དང་དཔྱད་དུ་རུང་བ་སྨིན་འདོད་ལྟར། །དེ་བཞིན་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པ་བསྟན། །ཅེས་སོ། །སངས་རྒྱས་ཀྱི་ཞིང་ཡོངས་སུ་སྦྱངས་པའི་ཚད་ནི་རང་སྣང་ལ་སྣོད་བཅུད་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བ་སྟེ། ཞིང་དག་སྦྱོར་གྱི་ནུས་པ་མཐར་ཐུག་པའོ། །འདི་གསུམ་ཆ་མཐུན་པ་ས་བདུན་པ་མན་ཆད་དུ་ཉམས་སུ་ལེན་པ་ཡང་ཡོད་མོད་ཀྱི། རྗེས་ཐོབ་ཀྱི་གནས་སྐབས་སུ་འདི་གསུམ་གྱི་ཉམས་ལེན་རྒྱུན་མ་ཆད་པར་འབྱུང་བ་ནི་ས་བརྒྱད་པ་ནས་འཇོག་གོ །དེ་དག་གིས་ཡང་དག་པའི་མཐའ་མངོན་སུམ་དུ་ནི་མི་བྱའོ་ཞེས་པ་ལ་བརྟེན་ནས། ཡང་དག་མཐའ་ངོས་གཟུང་ཞིང་དེ་མངོན་དུ་བྱས་པའི་ཚད་ལ། ཡང་དག་མཐའ་ནི་སྤྲོས་པ་མཐའ་དག་བཀག་པའི་དེ་བཞིན་ཉིད་དེ། འཇུག་འགྲེལ་དུ། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས། དེ་བཞིན་ཉིད་ལ་འགོག་པ་ཞེས་བྱ་སྟེ་འདིར་སྤྲོས་པ་མཐའ་དག་འགག་པར་འགྱུར་བའི་ཕྱིར་རོ་ཞེས་དང་། དབུས་མཐར། སྟོང་པ་ཉིད་ནི་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་གསུངས་པའི་ཕྱིར་རོ། །དེ་རྟོགས་པ་ཙམ་གྱིས་མངོན་དུ་བྱས་པར་ནི་མི་འཇོག་སྟེ། ཚོགས་སྦྱོར་དུ་དེ་དོན་སྤྱིའི་ཚུལ་གྱིས་རྟོགས་པ་ཡོད་ཅིང་། ས་བཅུའི་མཉམ་གཞག་རྣམས་སུ་མངོན་སུམ་དུ་རྟོགས་པ་ཡོད་ཀྱང་དེ་མ་བཀག་པའི་ཕྱིར་རོ། །མཉམ་པར་བཞག་པ་ཙམ་གྱིས་ཀྱང་མངོན་དུ་བྱས་པར་མི་འཇོག་སྟེ། ངོས་སྐལ་གྱི་སྒྲིབ་པ་སྤོང་བའི་ཚེ་དག་སར་ཡང་མཉམ་པར་བཞག་དགོས་པའི་ཕྱིར་ཏེ། མདོ་སྡེ་ས་བཅུ་པར། རིགས་ཀྱི་བུ་སངས་རྒྱས་ཀྱི་ཆོས་རྣམས་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ཞེས་གསུངས་པའི་ཕྱིར། འོ་ན་ཇི་ལྟར་སྙམ་ན་ཆོས་གསུམ་མ་བྱས་པར་མངོན་དུ་བྱས་པའི་ཚད་ནི། དག་སར་སྒྲིབ་པ་སྤོང་བ་སོགས་ཀྱི་དགོས་པ་མེད་བཞིན་དུ་ཡུན་རིང་དུ་མཉམ་པར་བཞག་པས་དུས་དེ་སྲིད་ཀྱི་བར་དུ་སེམས་ཅན་གྱི་དོན་རྒྱུན་ཆད་པར་འགྱུར་བའོ། །འདི་ལ་མདོ་སྡེ་ས་བཅུ་པར། དུས་དེ་ཉིད་ཀྱི་ཚེ་མྱ་ངན་ལས་འདའ་བར་འགྱུར་རོ་ཞེས་གསུངས་ཤིང་། དེའི་དོན་འཕགས་པས་རེ་ཞིག་སེམས་ཅན་གྱི་དོན་རྒྱུན་ཆད་པས་དགོངས་པ་ཅན་གྱི་མྱང་འདས་སུ་གསུངས་སོ། །ཆོས་གསུམ་བྱས་ནས་མངོན་དུ་བྱས་པའི་ཚད་ནི། ཆོས་གསུམ་རྫོགས་པར་བྱས་པས་གཞན་དོན་འབད་མེད་ལྷུན་གྲུབ་ཏུ་འབྱུང་ཞིང་། འདི་ལ་དུས་རྟག་ཏུ་མཉམ་པར་བཞག་པ་སྟེ། ཐུགས་མཉམ་པར་མ་བཞག་པ་མི་མངའ་བའི་མ་འདྲེས་པ་གསུངས་པ་དང་གནད་གཅིག་གོ །བསོད་ནམས་བསགས་པའི་གདུལ་བྱ་རྣམས་ལ་ཕན་ཐོགས་པར་གྱུར་ཅིག གསུམ་པ་གནད་ཀྱི་དོན་ངོས་གཟུང་བ་ལ་གསུམ་སྟེ། བརྗོད་བྱའི་གཙོ་བོ་བྱང་སེམས་ཀྱི་མངོན་རྟོགས་སུ་བསྟན་པའི་སྒོ་ནས་བསྟན་བཅོས་ལུས་ཀྱི་ཉམས་ལེན་ལ་སྦྱར་བ་དང་། དེའི་འབྲས་བུ་སངས་རྒྱས་ཀྱི་སའི་མངོན་རྟོགས་སུ་བསྟན་པའི་སྒོ་ནས་མདོའི་དགོས་པ་ལ་སྦྱར་བ་དང་། དེའི་འབྲས་བུ་འཕགས་བཞིའི་མངོན་རྟོགས་སུ་བསྟན་པའི་སྒོ་ནས་མདོའི་གླེང་གཞི་ལ་སྦྱར་བའོ། །དང་པོ་ལ་གཉིས་ཏེ། དོན་ངོས་གཟུང་བ་དང་། ཤེས་བྱེད་དགོད་པའོ། །དང་པོ་ནི། མཆོད་བརྗོད་ཀྱི་ཚིག་རྐང་དང་པོས་བྱང་སེམས་ཀྱི་རྒྱུད་ཀྱི་གཞི་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། བྱང་སེམས་ཀྱི་རྒྱུད་ཀྱི་རྟོགས་རིགས་དེ་བསྟན་པས་ཉན་ཐོས་ཞི་བ་ཚོལ་བ་རྣམས་རྟོགས་རིགས་དེ་ཉམས་སུ་བླངས་པས་ཀུན་ཤེས་ཉིད་ཀྱིས་ཉེར་ཞིར་ཁྲིད་པར་མཛད་པའི་ཕྱིར་རོ། །ཚིག་རྐང་པ་གཉིས་པས་ནི་བྱང་སེམས་ཀྱི་རྒྱུད་ཀྱི་ལམ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་རང་གིས་ཉམས་སུ་བླངས་ཤིང་བྱང་སེམས་ཀྱི་རིགས་ཅན་གཞན་ལ་ཡང་བསྟན་པས་འགྲོ་བ་ལ་ཕན་པར་བྱེད་པའི་བྱང་སེམས་རང་གཞན་རྣམས་ལམ་ཤེས་ཉིད་ཀྱིས་འཇིག་རྟེན་གྱི་དོན་སྒྲུབ་པར་མཛད་པའི་ཕྱིར་རོ། །ཚིག་རྐང་གསུམ་པས་ནི་བྱང་སེམས་ཀྱི་རྒྱུད་ཀྱི་རྣམ་པ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་རང་གིས་ཉམས་སུ་བླངས་པས་རྟོགས་པ་མཐར་ཐུག་པ་གང་དང་ཡང་དག་ལྡན་པས་ཐུབ་པ་རྣམས་ཇི་ལྟ་ཇི་སྙེད་ཀྱི་རྣམ་པ་ཀུན་དང་ལྡན་པའི་ཆོས་ཀྱི་འཁོར་ལོ་སྣ་ཚོགས་པ་གསུངས་པ་འདི་འབྱུང་བའི་ཕྱིར་རོ། །དེ་ལྟར་ན་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་དེ་སངས་རྒྱས་ཀྱི་ནི་ཡུམ་ཞེས་བྱ་སྟེ། རང་སྲས་སངས་རྒྱས་འཕགས་པ་སྐྱེད་པར་བྱེད་པའི་ཕྱིར་རོ། །དེས་ན་ཕྱག་འཚལ་ལོ། །ཞེས་པ་ནི་སྐྱེད་བྱེད་ཀྱི་ཡུམ་དང་འབྲེལ་ལོ། །སངས་རྒྱས་ཇི་ལྟ་བུ་ཞེ་ན་ཉན་ཐོས་བྱང་ཆུབ་སེམས་དཔའི་ཚོགས་དང་བཅས་པའོ། །གཉིས་པ་ཤེས་བྱེད་འགོད་པ་ལ་རྩ་བའི་དགོངས་པར་བསྟན་པ། འཕགས་པའི་དགོངས་པར་བསྟན་པ། སློབ་དཔོན་གྱི་དགོངས་པར་བསྟན་པ། གཞུང་གཞན་གྱི་དགོངས་པར་བསྟན་པ་དང་བཞི་ལས། དང་པོ་ནི། བསྟན་བཅོས་རྩ་བར་སྐབས་དང་པོ་གསུམ་གྱི་མཁྱེན་གསུམ་དང་། མཆོད་བརྗོད་ཀྱི་སྐབས་ཀྱི་མཁྱེན་གསུམ་གནད་གཅིག་པར་བཞེད་ནས་ལུས་ཀྱི་སྐབས་སུ་ཡང་ཐུབ་པའི་ཞེས་དང་། བྱང་ཆུབ་སེམས་དཔའ་མཁས་རྣམས་ཀྱི་ཞེས་དང་། ཉན་ཐོས་ལ་སོགས་པ་ཞེས་མཆོད་བརྗོད་ཀྱི་སྐབས་ཀྱི་རྟེན་གྱི་གང་ཟག་དང་སྦྱར་བ་མཛད་ཅིང་། དེ་ཉིད་བྱང་སེམས་ཀྱི་སྒོམ་བྱར་བསྡུ་བའི་ཚེ་ན་མཁྱེན་གསུམ་གྱི་རྣམ་པ་གསུམ་དུ་བསྡུས་ནས་མཁྱེན་གསུམ་གྱི་སྦྱོར་བ་གསུམ་གྱིས་བསྒོམ་པར་སྐབས་བཞི་པར་བཤད་ཅིང་། དེ་ལ་རྟོགས་པ་རབ་ཏུ་གྱུར་པ་རྩེ་སྦྱོར་ཡིན་པ་ལ་སོགས་པ་གསུངས་པའི་ཕྱིར་རོ། །འདི་ཉིད་ཀྱིས་བྱང་སེམས་ཀྱི་རྒྱུད་ཀྱི་མངོན་རྟོགས་སུ་བསྟན་པའི་ཚེ་བསྟན་བཅོས་ལུས་ཀྱི་ཉམས་ལེན་ལ་སྦྱར་བ་ཡང་འབད་མེད་དུ་ཤེས་པར་འགྱུར་རོ། །བཤད་ཚུལ་འདི་ལ་རྣམ་མཁྱེན་དང་གཞི་ཤེས་ཀྱི་རྟེན་གྱི་གང་ཟག་ནི་རྟོགས་རིགས་ཀྱི་དབང་དུ་བྱས་པར་འཆད་དགོས་སོ། །གཉིས་པ་ནི། ཉིར་སྣང་དུ། མཆོད་བརྗོད་ཀྱི་སྐབས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ་ཞེས་པ་ནི་ལུས་ཀྱི་སྐབས་སུ་དངོས་པོ་བརྒྱད་ཀྱི་སྒོ་ནས་བཤད་པར་གསུངས་ཤིང་། མཁྱེན་གསུམ་གྱིས་འཕགས་བཞིའི་མངོན་རྟོགས་བསྡུས་པར་ཡང་གསུངས་པས་ན་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་དེས་འཕགས་པ་བཞི་ཆར་གྱི་རྟོགས་རིགས་བསྡུས་པའི་དོན་དུ་བཞེད་ཅིང་དེ་ཉིད་བསྟན་བཅོས་ལུས་ཀྱི་མངོན་རྟོགས་བརྒྱད་ཀྱི་ཉམས་ལེན་དང་ཁྱད་པར་མེད་པར་བཞེད་དོ། །གསུམ་པ་ནི་འགྲེལ་ཆུང་ལས། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར་ཞེས་བྱ་བ་ལ་སོགས་པའི་ཚད་མས་གཞི་དང་ལམ་དང་རྣམ་པ་སྐྱེ་བ་མེད་པར་ཡོངས་སུ་ཤེས་པ་ཚིགས་སུ་བཅད་པའི་དོན་གྱི་མཚན་ཉིད་ཀྱི་ཡུམ་ལ་གནོད་པ་མ་མཐོང་ནས་ཞེས་པ་ཡང་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་ལ་བཞེད་དེ། དེ་གསུམ་ཆར་གྱིས་ཐོག་མར་སངས་རྒྱས་སྐྲུན་པར་བཤད་པའི་ཕྱིར་དང་། དེ་གསུམ་གྱིས་མངོན་པར་རྟོགས་པ་བརྒྱད་བསྡུས་པར་བཤད་པས་བསྟན་བཅོས་ལུས་ཀྱི་ཉམས་ལེན་བསྡུས་པར་བཤད་པའི་ཕྱིར་རོ། །བཞི་པ་ནི། མདོ་སྡེ་རྒྱན་དང་རྒྱུད་བླ་གཉིས་ཆར་དུ་ཐེག་ཆེན་གྱི་ཆོས་ལ་མོས་པའི་ས་བོན་དང་། བདག་མེད་རྟོགས་པའི་ཤེས་རབ་ཀྱི་མ་དང་། བསམ་གཏན་གྱི་མངལ་དང་། སྙིང་རྗེའི་མ་མ་བཞི་ལས་སངས་རྒྱས་ཀྱི་རྒྱལ་ཚབ་ནུས་པའི་བྱང་སེམས་འཕགས་པ་སྐྱེ་བར་གསུངས་པའི་བདག་མེད་རྟོགས་པའི་ཤེས་རབ་ཀྱི་མ་དེ་འདིར་བསྟན་པའི་སྐྱེ་མེད་གསུམ་རྟོགས་པའི་རྟོགས་པ་དེ་ཉིད་ཡིན་ཏེ། ཚོགས་སྦྱོར་གྱི་གནས་སྐབས་སུ་དེ་གསུམ་ཉམས་སུ་བླངས་པས་ས་དང་པོའི་བྱང་སེམས་འབྱུང་ཞིང་། འཕགས་པའི་གནས་སྐབས་སུ་དེ་གསུམ་ཉམས་སུ་བླངས་པ་ལས་སངས་རྒྱས་འཕགས་པ་འབྱུང་བའི་ཕྱིར་རོ། །མགོན་པོ་ཀླུ་སྒྲུབ་ཀྱི་བཞེད་པ་ཡང་འདི་ཉིད་ཡིན་ཏེ། གཞན་དོན་མངོན་དགའི་བདག་ཉིད་ཅན། །དཔའ་བོ་དག་ནི་ཐམས་ཅད་ཀྱི། །གསོ་མཛད་བསྐྱེད་པར་མཛད་པ་སྟེ། །ཁྱོད་ནི་བྱམས་མའི་ཡུམ་ལགས་སོ། །ཞེས་གསུངས་པའི་ཕྱིར་རོ། །དེ་ལྟར་ན་མཆོད་བརྗོད་ཀྱི་མཁྱེན་པ་གསུམ་པོ་བྱང་སེམས་ཀྱི་རྒྱུད་ཀྱི་རྟོགས་རིགས་ལ་སྦྱར་ཞིང་སངས་རྒྱས་ཀྱི་ཡུམ་དུ་འཇོག་པའི་ཚེ་སྐྱེད་བྱེད་ཀྱི་ཡུམ་དུ་འཇོག་པ་འདི་ནི་བསྟན་བཅོས་ལུས་ཀྱི་བརྗོད་བྱའི་གཙོ་བོར་སྣང་ཞིང་དེས་མངོན་པར་རྟོགས་པ་བརྒྱད་བསྡུས་པའི་ཚུལ་ནི་བཤད་ཟིན་ཏོ། །གཉིས་པ་དེའི་འབྲས་བུ་སངས་རྒྱས་ཀྱི་སའི་མངོན་རྟོགས་ལ་སྦྱར་བའི་སྒོ་ནས་མདོའི་དགོས་པ་ལ་སྦྱར་བ་ལ་གསུམ་སྟེ། དོན་ངོས་གཟུང་བ། མདོའི་དགོས་པར་འགྱུར་ཚུལ། དེ་ལ་ཤེས་བྱེད་འགོད་པའོ། །དང་པོ་ནི། ཚིག་རྐང་དང་པོས་སངས་རྒྱས་ཀྱི་སའི་གཞི་སྐྱེ་མེད་དུ་རྟོགས་པའི་རྟོགས་རིགས་བསྟན་ཏེ། སྒྲུབ་བྱེད་གཞུང་དང་སྦྱར་བ་ནི་སྔར་དང་འདྲའོ། །ཚིག་རྐང་གཉིས་པས་ནི་སངས་རྒྱས་ཀྱི་སའི་ལམ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་གདུལ་བྱ་བྱང་སེམས་ཀྱི་རིགས་ཅན་ལ་བསྟན་པས་འགྲོ་བ་ལ་ཕན་པར་བྱེད་པའི་བྱང་སེམས་རྣམས་ཀྱིས་རྟོགས་རིགས་དེ་ཉམས་སུ་བླངས་པས་ལམ་ཤེས་ཉིད་ཀྱིས་འཇིག་རྟེན་གྱི་དོན་སྒྲུབ་པར་མཛད་པའི་ཕྱིར་རོ། །ཚིག་རྐང་གསུམ་པས་ནི་སངས་རྒྱས་ཀྱི་སའིརྣམ་མཁྱེན་བསྟན་ཏེ། རྣམ་མཁྱེན་རང་ཉིད་གང་དང་ཡང་དག་པར་ལྡན་པས་སོགས་སོ། །དེ་ལྟ་བུའི་མཁྱེན་པ་གསུམ་ནི་སངས་རྒྱས་ཀྱི་བཞད་དོན་སྒྲུབ་བྱེད་ཀྱི་ཡུམ་ཡིན་པས་དེ་ལ་ཕྱག་འཚལ་བའོ། །ཉན་ཐོས་བྱང་ཆུབ་སེམས་དཔའི་ཚོགས་བཅས་ནི་སངས་རྒྱས་ཀྱི་ཁྱད་ཆོས་ལ་སྦྱར་བ་སྔར་དང་འདྲའོ། །གཉིས་པ་ནི། དེ་ལྟར་ན་གཞུང་འདིས་མདོའི་དགོས་པ་བསྟན་ཏེ། མདོའི་དགོས་པ་མཐར་ཐུག་པ་ནི་མཁྱེན་གསུམ་ངོ་བོ་གཅིག་ལ་ལྡོག་པ་ཐ་དད་དུ་ལྡན་པའི་འབྲས་བུ་ཤེར་ཕྱིན་ཡིན་པའི་ཕྱིར་རོ། །གསུམ་པ་ལ་སྔར་ལྟར་བཞི་ལས། དང་པོ་རྩ་བའི་དགོངས་པ་ཡིན་པ་ནི་རྩ་བར་ཐོབ་བྱའི་འབྲས་བུ་མཐར་ཐུག་མཆོད་བརྗོད་ཀྱི་ཡུལ་དུ་བྱས་ནས་དེ་ཐོབ་པར་བྱེད་པའི་ཐབས་སུ་མངོན་པར་རྟོགས་པ་བརྒྱད་བཤད་པ་ལས་མཁྱེན་གསུམ་ཐོས་བསམ་གྱི་ཡུལ་དུ་བྱས། སྦྱོར་བཞིས་ཉམས་སུ་བླངས་པ་ལས་འབྲས་བུ་ཆོས་སྐུ་ཐོབ་པའི་ཚེ་ན་ཕྲིན་ལས་ཉི་ཤུ་རྩ་བདུན་བྱེད་པ་དེ་འབྱུང་ཞིང་། དེ་ལྟ་བུའི་ཕྲིན་ལས་ཀྱི་བདག་རྐྱེན་དུ་གྱུར་པའི་མངོན་པར་རྟོགས་པ་དེ་ཡང་མཆོད་བརྗོད་ཀྱི་སྐབས་ནས་འབྱུང་བའི་མཁྱེན་པ་གསུམ་པོ་དེ་ཉིད་ཡིན་ནོ་ཞེས་བསྟན་ཏེ། རྒྱུད་བླར། ཐོག་མར་དཀོན་མཆོག་གསུམ་དང་མཇུག་ཏུ་ཕྲིན་ལས་སྨོས་པ་དང་འདྲའོ། །གཉིས་པ་འཕགས་པའི་དགོངས་པ་ཡིན་པ་ནི་ཉིར་སྣང་དུ་དང་པོར་བསྟན་པའི་ཐམས་ཅད་མཁྱེན་པ་ཉིད་གསུམ་ནི་མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ་ཞེས་གསུངས་པས། མཆོད་བརྗོད་ཀྱི་སྐབས་སུ་འབྲས་བུ་ཤེར་ཕྱིན་བསྟན་པར་ཡང་བཞེད་དེ། བསྟན་བཅོས་ཀྱི་ཐོག་མར་བསྟན་པའི་མཆོད་བརྗོད་ཀྱི་ཡུལ་དང་། མངོན་རྟོགས་བརྒྱད་ཀྱི་ཐོག་མར་བསྟན་པའི་རྣམ་མཁྱེན་དང་། དྲུག་གི་ཐོག་མར་བསྟན་པའི་མཚན་ཉིད་རྣམས་འབྲས་བུ་ལ་སྤྲོ་བ་བསྐྱེད་པའི་ཆེད་དུ་འབྲས་བུ་ཐོག་མར་བསྟན་པར་བཞེད་པའི་ཕྱིར་རོ། །གསུམ་པ་སློབ་དཔོན་གྱི་དགོངས་པ་ཡིན་པ་ནི། བཅོམ་ལྡན་འདས་མ་ཡོན་ཏན་རིན་པོ་ཆེ་ཕུལ་དུ་དབྱུང་དུ་མེད་ཅིང་དཔག་ཏུ་མེད་པའི་འབྱུང་གནས་ཞེས་དང་། དེའི་ཕྱིར་བཅོམ་ལྡན་འདས་མ་ལ་རབ་ཏུ་དང་བ་ནི་ཞེས་པ་རྣམས་ཀྱིས་འབྲས་བུའི་ཆར་གྱུར་པའི་མཁྱེན་གསུམ་དེ་བསྟན་པའི་ཕྱིར་དང་། འགྲེལ་ཆེན་དུ། དེའི་ཕྱིར་དེ་དང་འབྲེལ་བ་གཟུགས་བརྙན་དང་འབྲེལ་བ་རྣམ་པ་གསུམ་ཀ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དོ་ཅེས་ངེས་པར་བཟུང་བ་སྟེ་གཙོ་བོ་ལས་དབང་དུ་བྱས་པའོ། །དེ་རྣམས་ཀྱིས་ནི་མ་ཡིན་ཏེ་འདི་མེད་ན་མི་འབྱུང་བས་བྱང་ཆུབ་གསུམ་ཀའི་དབང་དུ་བྱས་པའི་ཕྱིར་རོ་ཞེས་གསུངས་པའི་ཕྱིར་རོ། །བཞི་པ་གཞུང་གཞན་གྱི་དགོངས་པ་ཡིན་པ་ནི། ཀླུ་སྒྲུབ་ཀྱིས། འཕགས་མ་ཡོན་ཏན་ཕྱུག་ཁྱོད་དང་། །སངས་རྒྱས་འགྲོ་བའི་བླ་མ་རྣམས། །ཁྱད་པར་ཡོད་པར་མ་ཁུམས་ཏེ། །ཟླ་བ་དང་ནི་ཟླ་འོད་བཞིན། །ཞེས་དང་ཕྱོགས་གླང་གིས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །ཞེས་གསུངས་པའི་ཕྱིར་རོ། །གསུམ་པ་དེའི་འབྲས་བུ་འཕགས་བཞིའི་མངོན་རྟོགས་སུ་བསྟན་པའི་སྒོ་ནས་མདོའི་གླེང་གཞི་ལ་སྦྱར་བ་ལ་གསུམ་སྟེ། དོན་ངོས་གཟུང་བ། གླེང་གཞི་ལ་ཇི་ལྟར་སྦྱར་བའི་ཚུལ། དེ་ལ་ཤེས་བྱེད་འགོད་པའོ། །དང་པོ་ནི། ཚིག་རྐང་དང་པོས་ཐེག་དམན་འཕགས་པའི་རྒྱུད་ཀྱི་གཞི་ཤེས་དང་། གཉིས་པས་བྱང་སེམས་འཕགས་པའི་རྒྱུད་ཀྱི་ལམ་ཤེས་དང་། གསུམ་པས་སངས་རྒྱས་འཕགས་པའི་རྒྱུད་ཀྱི་རྣམ་མཁྱེན་བསྟན་ཏེ། གཞུང་ལ་སྦྱར་བ་ནི་གོ་སླ་སྟེ། དེའི་ཚེ་ཕྱག་འཚལ་བའི་ཡུལ་ནི་འཕགས་པ་སོ་སོའི་མཁྱེན་པ་གསུམ་ལ་འཇོག་པ་མ་ཡིན་གྱི། གང་དང་ཞེས་པའི་ཚིག་དེ་ཕྱག་འཚལ་བའི་ཡུལ་གྱི་ཡུམ་དང་འབྲེལ་བས་སངས་རྒྱས་ཀྱི་ཡུམ་གང་དང་ཡང་དག་པར་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པའི་སངས་རྒྱས་ཀྱི་ཡུམ་དེ་ལ་ཕྱག་འཚལ་ཞེས་འབྲེལ་བའི་ཕྱིར་རོ། །སངས་རྒྱས་དེ་ཇི་ལྟ་བུ་ཞེ་ན། ཉན་ཐོས་ཀྱི་དགེ་འདུན་གྱི་འཁོར་ཚོགས་དང་། བྱང་ཆུབ་སེམས་དཔའི་འཁོར་ཚོགས་དང་བཅས་པའི་སྤྲུལ་པའི་སྐུའོ་ཞེས་པའི་དོན་ཏེ། གླེང་གཞི་ལ་སྦྱར་བའི་སྐབས་སུ་རྒྱས་པར་འབྱུང་ངོ་། །དེས་ན་བཤད་ཚུལ་དང་པོ་ལ་སངས་རྒྱས་ཀྱི་སྐྱེད་བྱེད་ཀྱི་ཡུམ་དང་། ཕྱི་མ་གཉིས་ལ་སངས་རྒྱས་ཀྱི་བཞེད་དོན་སྒྲུབ་བྱེད་ཀྱི་ཡུམ་ལ་ཕྱག་འཚལ་ཞེས་པར་འགྱུར་བས། ཕྱག་གི་ཡུལ་ནི་སངས་རྒྱས་ཀྱི་ཡུམ་ཁོ་ན་སྟེ། འདིར་བསྟན་བཅོས་ལུས་ཀྱི་བརྗོད་བྱའི་གཙོ་བོ་དང་མཐར་ཐུག་གི་འབྲས་བུ་ལ་ཕྱག་འཚལ་བའི་སྐབས་ཡིན་པའི་ཕྱིར། ཐེག་དམན་གྱི་རྒྱུད་ཀྱི་གཞི་ཤེས་ནི་འདིར་ཕྱག་འཚལ་བའི་ཡུལ་མ་ཡིན་ཏེ། བསྟན་བཅོས་འདིའི་གདུལ་བྱའི་གཙོ་བོ་ཐེག་དམན་གྱི་ལམ་ལ་འཇུག་པ་སྤངས་ནས་ཐེག་ཆེན་གྱི་ལམ་ལ་འཇུག་པའི་ཆེད་དུ་ལམ་རེ་རེའི་སྐབས་སུ་ཡང་ཐེག་དམན་གྱི་ལམ་ལས་ཁྱད་པར་འཕགས་ཚུལ་རེ་རེ་བསྟན་པའི་ཕྱིར་རོ། །འོ་ན་ཉན་ཐོས་རྣམས་ལ་ཕྱག་འཚལ་ལོ་ཞེས་བཤད་པ་དང་འགལ་ལོ་སྙམ་ན། དེ་ནི་སློབ་ལམ་གྱི་གནས་སྐབས་སུ་རང་ཉིད་ཀྱི་སྒྲིབ་པ་སྦྱང་ཞིང་ཚོགས་རྫོགས་པའི་ཆེད་དུ་མཆོད་འོས་ཀུན་ལ་ཕྱག་འཚལ་བ་ཡིན་པས་འདི་དང་འདྲ་བ་མ་ཡིན་ནོ། །གཉིས་པ་ནི་མདོ་གཞན་དང་ཐུན་མོང་གི་གླེང་གཞི་ལ་སྦྱར་བ་དང་། ཤེར་ཕྱིན་གྱི་ཐུན་མོང་མ་ཡིན་པའི་གླེང་གཞི་ལ་སྦྱར་བ་གཉིས་ལས། དང་པོ་ནི་དགེ་སློང་ལྔ་སྟོང་ཙམ་དང་ཐབས་ཅིག་སྟེ། འདི་ལྟ་སྟེ། ཚེ་དང་ལྡན་པ་འོད་སྲུང་དང་། ཞེས་སོགས་དང་། སྐྱེ་དགུའི་བདག་མོ་ལ་སོགས་པའི་དགེ་སློང་མ་དང་། གཟུགས་ཅན་སྙིང་པོ་ལ་སོགས་པའི་དགེ་བསྙེན་དང་། ས་ག་མ་ལ་སོགས་པའི་དགེ་བསྙེན་མ་སྟེ། འཁོར་རྣམ་བཞི་སྟོན་པའི་མདོ་རྣམས་ཀྱིས་རྟེན་བསྟན། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཞེས་སོགས་ཉན་ཐོས་ཀྱི་ཡོན་ཏན་བཅོ་ལྔ་གསུངས་པ་རྣམས་ཀྱིས་འབྲས་བུ་ཉེར་ཞི་གཉིས་བསྟན། རྟེན་དེས་འབྲས་བུ་དེ་ཐོབ་པ་ཡང་ཀུན་ཤེས་ཉིད་ལ་བརྟེན་ནས་ཐོབ་པ་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་ཉན་ཐོས་ཞི་བ་ཚོལ་རྣམས་ཞེས་དང་། ཐབས་ནི་ཀུན་ཤེས་ཉིད་ཅེས་དང་། འབྲས་བུ་ནི་ཉེར་ཞི་ཞེས་པས་བསྟན་ནོ། །དེས་ན་འདི་ལ་རང་སངས་རྒྱས་ཉན་ཐོས་ཀྱི་ཕྱོགས་སུ་བསླན་ནས་བསྟན་མི་དགོས་ཏེ། རྟེན་གྱི་གང་ཟག་དེ་རྣམས་ཉན་ཐོས་ཡིན་ཞིང་རང་སངས་རྒྱས་ཀྱི་རིགས་ཅན་སྤྲུལ་སྐུའི་འཁོར་དུ་ཡོད་པ་རྣམས་ཀྱང་ཉན་ཐོས་ཀྱི་ཁོངས་སུ་འདུས་པའི་ཕྱིར་རོ། །འོ་ན་ཞི་བ་ཚོལ་རྣམས་ཞེས་དང་། ཉེར་ཞིར་ཁྲིད་པར་མཛད་ཅེས་པ་དང་འགལ་ཏེ། རྟེན་དེ་རྣམས་ཞི་བ་ཐོབ་ཟིན་པའི་ཕྱིར་རོ་སྙམ་ན། དགྲ་བཅོམ་པ་དེ་རྣམས་ཀྱང་སྔར་ཞི་བ་ཚོལ་བའི་ཚེ་ན་ཀུན་ཤེས་ཉིད་ལ་བརྟེན་ནས་ད་ལྟ་ཉེར་ཞི་ཐོབ་པ་ཡིན་པས་ད་ལྟ་ཞི་བ་ཚོལ་བ་རྣམས་ཀྱང་ཀུན་ཤེས་ཉིད་ལ་བརྟེན་ནས་ཉེར་ཞིར་ཁྲིད་པར་བྱེད་དགོས་སོ། །ཞེས་ཤེས་པར་འགྱུར་བས་སྐྱོན་མེད་དོ། །ཡང་བྱང་སེམས་ཆེན་པོ་བྱེ་བ་ཁྲག་ཁྲིག་བརྒྱ་སྟོང་དང་ཡང་ཐབས་ཅིག་སྟེ། འདི་ལྟ་སྟེ། བྱང་ཆུབ་སེམས་དཔའ་བཟང་སྐྱོང་དང་ཞེས་སོགས་ཀྱིས་རྟེན་བསྟན། ཐམས་ཅད་ཀྱང་གཟུངས་ཐོབ་པ་མ་ཉམས་པའི་མངོན་ཤེས་ཐོབ་པ་ཞེས་སོགས་ཀྱིས་འབྲས་བུ་བསྟན། རྟེན་དེས་འབྲས་བུ་དེ་ཐོབ་པ་ནི་ལམ་ཤེས་ཀྱི་ཐབས་ལ་བརྟེན་ནས་ཐོབ་པ་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་འགྲོ་ལ་ཕན་པར་བྱེད་རྣམས་ཞེས་དང་། ཐབས་ནི་ལམ་ཤེས་ཉིད་ཅེས་དང་། འབྲས་བུ་ནི་འཇིག་རྟེན་དོན་སྒྲུབ་མཛད་པ་གང་ཞེས་བསྡུས་ཏེ་བསྟན་ཏོ། །འོ་ན་བྱམས་པ་སངས་རྒྱས་ཡིན་པས་འཕགས་པ་སོ་སོའི་མངོན་རྟོགས་ལ་སྦྱར་བའི་ཚེ་ལམ་ཤེས་ཀྱི་རྟེན་གྱི་གང་ཟག་དུ་སྦྱར་བ་དང་འགལ་ལོ་ཞེ་ན་སྐྱོན་མེད་དེ། ཤེར་ཕྱིན་གྱི་མདོ་འཆད་པའི་ཚེ་བྱང་སེམས་ཀྱི་ཚུལ་བཟུང་བའི་དབང་དུ་བྱས་པའི་ཕྱིར་རོ། །དེས་ན་སྐབས་འདིའི་ཉན་ཐོས་ཀྱི་དགེ་འདུན་ལ་དོན་ལ་སངས་རྒྱས་ཡིན་ཀྱང་ཉན་ཐོས་ཀྱི་ཚུལ་གཟུང་བ། དོན་ལ་བྱང་སེམས་ཡིན་ཀྱང་ཉན་ཐོས་ཀྱི་ཚུལ་གཟུང་བ། ཉན་ཐོས་རང་རྒྱུད་པ་དང་གསུམ་ཡོད་པས་ཚིག་རྐང་དང་པོས་བསྟན་པའི་གཞི་ཤེས་ལ་ཡང་གསུམ་ཡོད་ཅིང་། བྱང་སེམས་ཀྱི་དགེ་འདུན་ལ་ཡང་དོན་ལ་སངས་རྒྱས་ཡིན་ཀྱང་བྱང་སེམས་ཀྱི་ཚུལ་གཟུང་བ་དང་། བྱང་སེམས་རང་རྒྱུད་པ་གཉིས་ཡོད་པས་ཚིག་རྐང་གཉིས་པས་བསྟན་པའི་ལམ་ཤེས་ལ་གཉིས་ཡོད་དོ། །ཡང་དོན་ལ་བྱང་སེམས་ཡིན་ཀྱང་མཛད་པ་བཅུ་གཉིས་ཀྱི་ཚུལ་སྟོན་པ་དང་། སངས་རྒྱས་རང་ཉིད་ཀྱིས་མཛད་པ་བཅུ་གཉིས་ཀྱི་ཚུལ་སྟོན་པ་དང་གཉིས་ཡོད་པས་ཚིག་རྐང་གསུམ་པས་བསྟན་པའི་རྣམ་མཁྱེན་ལ་ཡང་གཉིས་ཡོད་པར་ཤེས་པར་བྱའོ། །གཉིས་པ་ཐུན་མོང་མ་ཡིན་པའི་གླེང་གཞི་དང་སྦྱར་བ་ལ་གསུམ་སྟེ། བཞུགས་ཐབས་བཤམ་པ། ཆོ་འཕྲུལ་བསྟན་པ། ཆོས་བཤད་པའི་དུས་མཁྱེན་པའོ། །དང་པོ་ལ་གཉིས་ཏེ། གདན་སེང་གེའི་ཁྲི་བཤམ་པ་དང་། སྐུ་རྡོ་རྗེའི་སྐྱིལ་མོ་ཀྲུང་དུ་བཞུགས་པའོ། །དང་པོ་ནི། བཅོམ་ལྡན་འདས་ཉིད་ཀྱིས་བླ་གོས་བཞི་ལྟབ་ཏུ་བྱས་ཏེ་གདན་སེང་གེའི་ཁྲི་བཤམ་པ་མཛད་དོ་ཅེས་པ་སྟེ། ཆོས་འདིའི་གདན་ཙམ་ཡང་གཞན་གྱིས་བཤམས་པར་མི་ནུས་ན་རྟོགས་པ་ལྟ་ཅི་སྨོས་ཞེས་པ་དང་། ཕྱི་མའི་དུས་ན་ཆོས་འཆད་པ་དག་ལ་སྟན་འདིངས་བ་མེད་ན་ཡི་ཆད་པ་བསལ་བར་བྱ་བའི་ཕྱིར་དུ་ཉིད་ཀྱིས་གདན་བཤམ་པར་མཛད་དོ། །གཉིས་པ་ནི་དེ་ལྟ་བུའི་གདན་གྱི་སྟེང་དུ་བཅོམ་ལྡན་འདས་ཞབས་རྡོ་རྗེའི་སྐྱིལ་མོ་ཀྲུང་། སྐུ་དྲང་པོར་བསྲངས་ཏེ་དགོངས་པ་མངོན་དུ་མཛད་ནས་བཞུགས་སོ། །སྤྱོད་ལམ་དེ་ལྟ་བུ་བསྟན་པའི་དགོས་པ་ཡང་ཤེར་ཕྱིན་གྱི་མདོའི་དོན་ནི་མཉམ་པར་བཞག་པས་རྟོགས་དགོས་སོ་ཞེས་ཤེས་པའི་ཆེད་ཡིན་པར་འགྲེལ་ཆེན་དུ་བཤད་དོ། །གཉིས་པ་ལ་གསུམ་སྟེ། ཏིང་ངེ་འཛིན་གྱི་དང་། རྫུ་འཕྲུལ་གྱི་དང་། ཆོས་སྣང་བའི་ཆོ་འཕྲུལ་ལོ། །དང་པོ་ལ་གཉིས་ཏེ། ཏིང་ངེ་འཛིན་གྱི་རྒྱལ་པོའི་དང་། སེང་གེ་རྣམ་པར་རོལ་པའི་ཆོ་འཕྲུལ་ལོ། །དང་པོ་ནི། དེ་ནས་བཅོམ་ལྡན་འདས་ཏིང་ངེ་འཛིན་གང་གི་ནང་དུ་ཏིང་ངེ་འཛིན་ཐམས་ཅད་འདུས་པར་གྱུར་པའི་ཏིང་ངེ་འཛིན་གྱི་རྒྱལ་པོ་ཞེས་བྱ་བ་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཆོ་འཕྲུལ་བསྟན་པའི་གྲངས་བཞི་སྟེ། དང་པོ་ནི་སྐུའི་ཡན་ལག་དང་ཉིང་ལག་ལས་འོད་ཟེར་དཀར་པོ་དང་། དམར་པོ་དང་། སེར་པོ་དང་། སྔོན་པོ་དང་། ཤེལ་དང་དངུལ་གྱི་ཁ་དོག་ལྟ་བུ་སྟེ་དྲུག འཁོར་བྱེ་བ་ཁྲག་ཁྲིག་བརྒྱ་སྟོང་མང་པོ་དང་བཅས་པ་ཕྱོགས་བཅུར་བཀྱེ་བས་དྲུག་ཅུ་དྲུག་ཅུ་དང་། གཉིས་པ་ནི་བ་སྤུའི་བུ་ག་ནས་ཀྱང་དེ་ལྟར་བཀྱེ་བ་དང་། གསུམ་པ་ནི་རྣམ་སྨིན་གྱི་འོད་རང་ལུགས་སུ་བཞག་པ་ན་སྟོང་གསུམ་ཁྱབ་པར་བྱེད་པ་མངའ་བ་ལས་ཐུབ་པའི་ཐུན་མོང་མ་ཡིན་པ་གོ་བའི་དོན་དུ་འོད་འདོམ་གང་བར་བྱིན་གྱིས་བརླབས་པ་ཡིན་ཀྱང་དེའི་ཚེ་སྟོང་གསུམ་ཁྱབ་པ་རང་བཞིན་གྱི་འོད་བཀྱེ་བ་དང་། བཞི་པ་ནི་ཞལ་གྱི་སྒོ་ནས་ལྗགས་ཀྱི་དབང་པོ་བཀྲམ་སྟེ་སྟོང་གསུམ་ཁྱབ་པར་མཛད་ནས་དེ་ལས་འོད་ཟེར་བྱུང་བའི་རྩེ་མོ་ལ་པདྨའི་སྡོང་པོ་རེ་རེ། དེའི་ལྟེ་བ་ལ་སྤྲུལ་སྐུ་ཤཱཀ་ཐུབ། འདབ་མ་ལ་གནས་པའི་བྱང་སེམས་རྣམས་ལ་ཕར་ཕྱིན་དྲུག་ལས་བརྩམས་པའི་ཆོས་འཆད་པའི་སྣང་བས་ཕྱོགས་བཅུར་ཁྱབ་པའོ། །དེ་ལ་དང་པོ་གསུམ་ལ་བྱང་ཆུབ་ཏུ་ངེས་པར་བྱེད་པའི་འོད་དང་། ཕྱི་མ་ལ་རྒྱལ་བའི་ཡུམ་སྟོན་པའི་སྔ་ལྟས་སུ་གྱུར་པའི་འོད་ཅེས་བྱ་བའོ། །གཉིས་པ་ནི་དེ་ནས་ཡང་བཅོམ་ལྡན་འདས་ཏིང་ངེ་འཛིན་སེང་གེ་རྣམ་པར་རོལ་པ་ལ་སྙོམས་པར་ཞུགས་པར་གྱུར་ཏོ། །སྙོམས་པར་ཞུགས་ནས་ཆོ་འཕྲུལ་བསྟན་པ་ལ་རྣམ་འགྱུར་དྲུག་དང་། ལྟས་ཆེན་པོ་བཅོ་བརྒྱད་དང་། ཕྱོགས་འགྱུར་བ་ཟུང་དུ་བསྡེབས་ན་དྲུག བརྐྱང་ན་བཅུ་གཉིས་ལ་སོགས་པས་སྣོད་བཅུད་ཀྱི་ཞིང་སྦྱང་བ་དང་། ཆོས་ཉན་པའི་སྣོད་དུ་བྱེད་པའོ། །དེ་ལ་རྣམ་འགྱུར་དྲུག་ནི། གཡོས་པ་དང་། འགུལ་བ་དང་། ལྡེག་པ་དང་། འཁྲུག་པ་དང་། ཆེམ་པ་དང་། འུར་བ་སྟེ་དྲུག དེ་རྣམས་ཉིད་ལ་ཆུང་ངུ་འབྲིང་ཆེན་པོའི་བྱེ་བྲག་གིས་གསུམ་གསུམ་དུ་བཞག་པས། ལྟས་ཆེན་པོ་བཅོ་བརྒྱད་དོ། །དེ་དག་ཀྱང་ཕྱི་སྣོད་ཀྱི་འཇིག་རྟེན་སྔར་སྦྱང་བ་མ་བྱས་པ་དང་ཅུང་ཟད་སྦྱང་བ་བྱས་པའི་དབང་དུ་བྱས་ནས་དང་པོ་གཉིས་བཞག སེམས་ཅན་གྱི་འཇིག་རྟེན་ལ་ངན་སོང་དུ་སྐྱེས་པ་དང་། ང་རྒྱལ་དང་ལྡན་པ་དང་། ལྷ་སྣ་ཚོགས་ལ་མོས་པ་དང་། རྟོགས་པ་དང་ལྡན་པ་བཞི་ཡོད་པས། དེ་དག་ངན་སོང་ནས་ཐོན་པ་དང་། ང་རྒྱལ་ཆག་པ་དང་། ལྷར་སྐྱེ་བ་དང་། ཤེས་རབ་ཀྱི་རྟོགས་པ་ཆེར་འགྲོ་བའི་དབང་དུ་བྱས་ནས་ལྡེག་པ་ལ་སོགས་པ་བཞི་གསུངས་ཏེ། གནས་མི་གཙང་བ་དང་། ཉན་པ་པོ་སྣོད་དུ་མི་རུང་བ་རྣམས་ལ་ཡུམ་བསྟན་པར་མི་བྱའོ་ཞེས་གོ་བའི་དོན་དུ་འགྲེལ་པ་དག་གིས་བཤད་དོ། །ཕྱོགས་འགྱུར་བ་ཟུང་དུ་བསྡེབས་ན་དྲུག་དང་། བརྐྱང་ན་བཅུ་གཉིས་ནི་དྲུག་པོ་དེ་དག་ལ་གཡོས་གཡོས་ཞེས་པ་གཉིས་གཉིས་ཡོད་པས་སོ། །གཉིས་པ་རྫུ་འཕྲུལ་གྱི་ཆོ་འཕྲུལ་ལ་གཉིས་ཏེ། སྤྲུལ་པའི་ཆོ་འཕྲུལ་དང་། བྱིན་གྱིས་བརླབས་པའི་ཆོ་འཕྲུལ་ལོ། །དང་པོ་ལ་གདུལ་བྱའི་ང་རྒྱལ་བཅག་པའི་དོན་དུ་སྐུ་ཁྱད་པར་དུ་འཕགས་པར་བསྟན་པ་དང་། ཞུམ་པ་བསལ་བའི་དོན་དུ་སྐུ་ཐ་མལ་པར་བསྟན་པ་དང་། ཆགས་སྡང་ཅན་དུ་འཛིན་པ་སྤོང་བའི་དོན་དུ་ཐམས་ཅད་ཀྱི་མདུན་དུ་མཉམ་པར་བསྟན་པ་དང་གསུམ་མོ། །གཉིས་པ་ལ་དད་པ་ཅན་རྣམས་མཆོད་པ་བྱེད་པ་དང་། སྤྲོ་བར་བྱ་བས་དེ་དག་བསོད་ནམས་སྤེལ་བའི་དོན་དུ་བྱིན་གྱིས་བརླབས་པ་གཉིས་སོ། །གསུམ་པ་ཆོས་སྣང་བའི་ཆོ་འཕྲུལ་ལ་གཉིས་ཏེ། འཇིག་རྟེན་གྱི་ཁམས་རྣམ་པར་བསྟན་པ་དང་། འཁོར་བསྡུས་པའི་ཆོ་འཕྲུལ་ལོ། །དང་པོ་ནི་སྟོན་པ་ལ་བཟང་ངན་ཅན་དུ་འཛིན་པ་སྤང་བའི་ཕྱིར་དུ་ཕྱོགས་བཅུའི་སངས་རྒྱས་འཁོར་དང་བཅས་པ་མཐོང་བར་བྱས་པའོ། །གཉིས་པ་ནི་རིན་ཆེན་ཡོད་པ་ལ་སོགས་པའི་འཇིག་རྟེན་གྱི་ཁམས་ན་བྱང་སེམས་ཀུན་ཏུ་འོད་ཟེར་ལ་སོགས་པ་སྟན་ལས་ལངས་ཏེ་རང་རང་གི་སྟོན་པ་རིན་ཆེན་འབྱུང་གནས་ལ་སོགས་པ་ལ་ལྟས་ཁྱད་པར་ཅན་གྱི་རྒྱུ་ཞུས་པ་དང་། སྟོན་པས་དེ་ལུང་བསྟན་པ་དང་། ཕྲག་དོག་མེད་པའི་ཐུགས་དགོངས་བཟང་པོ་རིག་ནས་རང་རང་གི་སྟོན་པ་ལ་འཇིག་རྟེན་གྱི་ཁམས་འདིར་འོང་བར་ཞུས་པ་དང་། པདྨོའི་སྐྱེས་བསྐུར་བ་དང་། སྙུན་སྨྲ་བ་དང་། འཇིག་རྟེན་གྱི་ཁམས་འདིར་སྐྱེས་པའི་སེམས་ཅན་མི་སྨད་པ་ལ་སོགས་པའི་གདམས་པ་དང་བཅས་ཏེ་གནང་བ་དང་། གནང་བ་ཐོབ་པ་རྣམས་མཆོད་རྫས་སྟ་གོན་བྱས་ནས་འཇིག་རྟེན་གྱི་ཁམས་འདིར་འོངས་ནས་སྙུན་སྨྲ་བ་དང་། སྐྱེས་འབུལ་བ་དང་། པདྨོ་རྣམས་གང་ནས་འོངས་པའི་འཇིག་རྟེན་གྱི་ཁམས་ཀྱི་སངས་རྒྱས་སྲས་བཅས་ལ་མཆོད་པའི་ཕྱིར་གཏོར་བས། ཕྱོགས་བཅུའི་འཇིག་རྟེན་དུ་པདྨོའི་ལྟེ་བར་སྤྲུལ་སྐུ་ཤཱཀ་ཐུབ་བཞུགས་ནས་འདབ་མ་ལ་ས་ལ་གནས་པའི་བྱང་སེམས་ཀྱིས་བསྐོར་བ་ལ་ཡུམ་ལས་བརྩམས་པའི་ཆོས་འཆད་པའི་སྣང་བས་ཁྱབ་པ་དང་། ཕྱོགས་བཅུ་ནས་འོངས་པའི་འཁོར་རྣམས་གང་ནས་འོངས་པའི་ཕྱོགས་དང་། སྟེང་འོག་ནས་འོངས་པ་རྣམས་མདུན་རྒྱབ་ཏུ་གནས་པའོ། །གསུམ་པ་ཆོས་བཤད་པའི་དུས་མཁྱེན་པ་ནི་ཉན་པའི་སྐལ་བ་དང་ལྡན་པའི་འཁོར་རྣམས་འཚོགས་པར་མཁྱེན་ཏེ། དེ་ནས་བཅོམ་ལྡན་འདས་ཀྱིས་ལྷ་ལ་སོགས་པའི་འཁོར་ཐམས་ཅད་འདུས་པར་ཐུགས་སུ་ཆུད་པར་གྱུར་ཏོ་ཞེས་པའོ། །དེ་ལ་བྱ་རྒོད་ཕུང་པོའི་རི་ལ་སྟོན་པ་ཉིད་ཀྱི་སྐུ་དང་ལྗགས་ལས་འོད་བཀྱེ་བ་ནས་པདྨོའི་ལྟེ་བ་ལ་སྤྲུལ་པའི་སྐུ་རེ་བཞུགས་པ་དང་། སྤྲུལ་པའི་ཆོ་འཕྲུལ་གྱི་དུས་སུ་སྐུའི་སྣང་བ་དང་། འཇིག་རྟེན་གྱི་ཁམས་བསྟན་པ་ན་ཕྱོགས་བཅུའི་སངས་རྒྱས་ཀྱི་འཁོར་དང་འཁོར་བསྡུས་པས་སྲས་ཕྱོགས་བཅུའི་སངས་རྒྱས་ཀྱི་སྐུ་དང་། པདྨོ་ཕྱོགས་བཅུར་གཏོར་བ་ན་ལྟེ་བ་ན་བཞུགས་པའི་སྐུ་སྟེ། སྐུའི་སྣང་བ་ཇི་སྙེད་བྱུང་བ་རྣམས་ཀྱིས་ནི་རྟེན་བསྟན། ཕར་ཕྱིན་དྲུག་དང་ཡུམ་ལས་བརྩམས་པའི་ཆོས་འཆད་པའི་སྣང་བ་རྣམས་ཀྱིས་ནི་འབྲས་བུ་ཆོས་འཁོར་བསྐོར་བ་བསྟན། རྟེན་དེས་འབྲས་བུ་དེ་ཐོབ་པ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་ཐབས་ཀྱིས་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་ཐུབ་རྣམས་ཞེས་པ་དང་། ཐབས་ནི་གང་དང་ཡང་དག་ལྡན་པས་ཞེས་དང་། འབྲས་བུ་ནི་རྣམ་པ་ཀུན་ལྡན་སྣ་ཚོགས་འདི་གསུངས་པ་ཞེས་བསྡུས་ནས་གསུངས་སོ། །གསུམ་པ་ཤེས་བྱེད་འགོད་པ་ལ་བཞི་ལས། དང་པོ་རྩ་བའི་དགོངས་པ་ཡིན་པ་ནི་བསྟན་བཅོས་རྩ་བར་རྣམ་མཁྱེན་ལུས་ཀྱི་ཐོག་མར་ཡོད་བཞིན་དུ་མཆོད་བརྗོད་ཀྱི་སྐབས་སུ་གཞི་ཤེས་དང་པོར་བཤད་པ་འདི་དང་། ཉན་ཐོས་བྱང་ཆུབ་སེམས་དཔའི་ཚོགས་བཅས་ཞེས་པའི་ཚིག་གིས་སྐབས་འདིར་བསྟན་གྱི་སངས་རྒྱས་དེ་ཉན་ཐོས་ཀྱི་ཚོགས་དང་། བྱང་ཆུབ་སེམས་དཔའི་ཚོགས་དང་བཅས་པར་བསྟན་པ་འདི་དང་། སྐབས་དེར་ཉན་ཐོས་ཀྱི་ཚོགས་དང་། བྱང་ཆུབ་སེམས་པའི་ཚོགས་དང་། སྟོན་པ་སངས་རྒྱས་གསུམ་རིམ་བཞིན་དུ་བསྟན་པ་སྟེ། གནད་འདི་གསུམ་གྱིས་བསྟན་བཅོས་རྩ་བའི་དགོངས་པར་གདོན་མི་ཟའོ། །གཉིས་པ་འཕགས་པའི་དགོངས་པ་ཡིན་པ་ནི། ཉིར་སྣང་དུ། གང་གི་ཕྱིར་གཞུང་སྟོང་ཕྲག་ཉེར་ལྔ་པོ་འདི་རྣམས་ཀྱི་འདི་སྐད་ཅེས་བྱ་བ་ལ་སོགས་པ་སྐབས་འབྱེད་པ་ནས་བརྩམས་ཏེ་ཡོངས་སུ་རྫོགས་པའི་བར་གྱི་དངོས་པོ་རྣམས་གཅིག་ཏུ་བསྡུས་ན་རྣམ་པ་ཐམས་ཅད་མཁྱེན་པ་ལ་སོགས་པ་ཆོས་ཀྱི་སྐུ་མཛད་པ་དང་བཅས་པའི་མཐར་ཐུག་པ་དངོས་པོ་བརྒྱད་དུ་འགྱུར་རོ་ཞེས་གསུངས་པའི་ཕྱིར་རོ། །གལ་ཏེ་ལུང་འདི་ཕྲིན་ལས་ཀྱི་མཇུག་ཏུ་འབྱུང་བས་གླེང་གཞི་ཕྲིན་ལས་ཀྱི་ཁོངས་སུ་གཏོགས་པའི་དོན་ཡིན་ནོ་སྙམ་ན། དེ་ནི་ཁོ་བོའི་ལུགས་ཀྱི་གཞུང་གི་དགོངས་པ་མཛད་པ་ཕྲིན་ལས་ཀྱི་འཁོར་ལོ་རྒྱུན་མི་ཆད་པ་མཚོན་པའི་ཆེད་དུ་མཐའ་ཐོག་གཉིས་པོ་སྦྱར་བའི་ལུགས་འདི་ལ་འཐད་པ་ཡིན་ཏེ། གླེང་གཞི་ཕྲིན་ལས་ཀྱི་ཁོངས་སུ་གཏོགས་པའི་ཚེ་མཆོད་བརྗོད་ཀྱི་བརྗོད་བྱ་ཡང་ཕྲིན་ལས་ཀྱི་ཁོངས་སུ་གཏོགས་པའི་ཕྱིར་རོ། །ཇི་ལྟར་སྙམ་ན་མཆོད་བརྗོད་ཀྱི་ཡུལ་དུ་གྱུར་པའི་འབྲས་བུ་ལ་སྤྲོ་བ་སྐྱེས་ནས་དེ་ཐོབ་པའི་ཆེད་དུ་མཁྱེན་གསུམ་ཐོས་བསམ་གྱིས་གཏན་ལ་ཕབ་པ་སྦྱོར་བཞིས་ཉམས་སུ་བླངས་ཏེ། ཆོས་སྐུ་མངོན་དུ་བྱས་པའི་ཚེ་ཕྲིན་ལས་ཉི་ཤུ་རྩ་བདུན་འབྱུང་ལ་ཕྲིན་ལས་དེ་ཉིད་ལ་གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ་ཞེས་པའི་དོན་གནས་པའི་ཕྱིར་རོ། །གསུམ་པ་སློབ་དཔོན་གྱི་དགོངས་པ་ཡིན་པ་ནི། འགྲེལ་ཆུང་དུ། ཐམས་ཅད་མཁྱེན་པ་ཉིད་གསུམ་གྱི་བདག་ཉིད་ཚུལ་གསུམ་པ་ཅན་སངས་རྒྱས་ལ་སོགས་པ་སྐྲུན་པར་མཛད་པ་ནི་གདོན་མི་ཟ་བར་སྲིད་པ་ཉིད་དོ་ཞེས་དང་། སངས་རྒྱས་ཉན་ཐོས་ལ་སོགས་པས་ཡོངས་སུ་བསྐོར་བ་དེ་ཞེས་རྩ་བར་ཉན་ཐོས་དང་བྱང་སེམས་ཐོག་མར་ཡོད་ཀྱང་འགྲེལ་པར་སངས་རྒྱས་ཐོག་མར་སྨོས་པའི་གནད་ཀྱིས་ཀྱང་གྲུབ་སྟེ། བྱང་སེམས་ཀྱི་རྒྱུད་ཀྱི་རྟོགས་རིགས་གསུམ་པོ་དེས་ཐོག་མར་སངས་རྒྱས་བསྐྱེད་ནས་སངས་རྒྱས་ཀྱི་རྒྱུད་ཀྱི་རྟོགས་རིགས་གསུམ་པོས་བདག་རྐྱེན་བྱས་ཏེ་ཆོས་འཁོར་བསྐོར་བས་སླར་ཡང་འཕགས་པ་གཞན་རྣམས་བསྐྱེད་པ་གླེང་གཞིའི་ཚུལ་དུ་འབྱུང་བའི་ཕྱིར་ཞེས་དགོངས་སོ། །བཞི་པ་གཞུང་གཞན་གྱི་དགོངས་པ་ཡིན་པ་ནི་རྒྱུད་བླར། འདི་དག་རང་མཚན་ཉིད་ཀྱིས་སོ་སོ་བ། །གོ་རིམ་ཇི་བཞིན་གཟུངས་ཀྱི་རྒྱལ་པོའི་མདོར། །གླེང་གཞི་ལས་ནི་གནས་གསུམ་རིག་བྱ་སྟེ། །ཞེས་མདོ་སྡེ་དུ་མའི་དགོངས་འགྲེལ་དུ་བརྩམས་པའི་ཚེ་ན་ཡང་རྡོ་རྗེའི་གནས་དང་པོ་གསུམ་གཟུངས་ཀྱི་དབང་ཕྱུག་རྒྱལ་པོའི་མདོའི་གླེང་གཞི་དང་སྦྱར་བར་མཛད་ན། ཤེར་ཕྱིན་གྱི་མདོ་གཅིག་པུའི་དགོངས་འགྲེལ་དུ་བརྩམས་པའི་ཚེ་དོན་དེ་འབད་མེད་དུ་གྲུབ་པའི་ཕྱིར་རོ། །འོ་ན་རྒྱུད་བླར། རྡོ་རྗེའི་གནས་དང་པོ་གསུམ་གླེང་གཞི་དང་སྦྱར་ཞིང་འདིར་དངོས་པོ་བརྒྱད་ལས་ལོགས་སུ་མཆོད་བརྗོད་གླེང་གཞི་དང་སྦྱར་བའི་དོན་ཅི་ཡིན་སྙམ་ན། གཟུངས་ཀྱི་དབང་ཕྱུག་རྒྱལ་པོའི་མདོའི་གླེང་གཞིའི་གོ་རིམ་དང་རྡོ་རྗེའི་གནས་དང་པོ་གསུམ་གྱི་གོ་རིམ་མཐུན་པས་ལོགས་སུ་མ་སྦྱར་ལ། འདི་ནི་གོ་རིམ་མི་མཐུན་པས་ལུས་ཀྱི་གོ་རིམ་ལས་ལོགས་སུ་མཆོད་བརྗོད་ཀྱི་གོ་རིམ་གླེང་གཞི་དང་སྦྱར་བར་མཛད་པ་ཙམ་ཡིན་གྱི་ངོ་བོ་མི་མཐུན་པ་མེད་པར་ནི་གོང་དུ་བཤད་ཟིན་ཏོ། །དེས་ན་རྒྱུད་བླར་ཡང་མཛད་པའི་འཁོར་ལོ་རྒྱུན་མི་ཆད་པ་འདི་ཉིད་བསྟན་ཏེ། མཐར་ཐུག་གི་དཀོན་མཆོག་གསུམ་དམིགས་ཡུལ་དུ་བྱས་ནས་ཁམས་ཀྱི་དྲི་མ་སྦྱངས་ཏེ་བྱང་ཆུབ་ཐོབ་པ་ན་སྟོབས་སོགས་ཀྱི་ཡོན་ཏན་འབྱུང་ཞིང་དེ་ལས་མཛད་པ་ཕྲིན་ལས་འབྱུང་ལ། དེ་ཉིད་ཀྱི་གནས་སྐབས་སུ་གླེང་གཞི་ནས་བཤད་པའི་གནས་སྐབས་ཀྱི་དཀོན་མཆོག་གསུམ་པོ་དེ་བཞག་པའི་ཕྱིར་རོ། །འཕགས་མཆོག་ཀླུ་སྒྲུབ་ཀྱི་བཞེད་པ་ཡང་ཡིན་ཏེ། གང་སླད་སངས་རྒྱས་འཇིག་རྟེན་གཙོ། །ཐུགས་རྗེ་ཅན་རྣམས་ཁྱོད་ཀྱི་སྲས། །དེ་ཡི་སླད་དུ་དགེ་མ་ཁྱོད། །སེམས་ཅན་ཀུན་གྱི་ཕྱི་མོ་ལགས། །ཞེས་སངས་རྒྱས་ཀྱི་རྒྱུད་ཀྱི་མཁྱེན་པ་གསུམ་པོ་དེ་སངས་རྒྱས་འཕགས་པའི་ཡུམ་དང་དེའི་རྗེས་སུ་བྱུང་བའི་འཕགས་པ་གཞན་རྣམས་ཀྱི་ཕྱི་མོ་ཡིན་པར་གསུངས་པའི་ཕྱིར་རོ། །བསྟན་བཅོས་རིན་ཆེན་སྒྲོན་མེའི་དགོངས་པ་ཡང་ཡིན་ཏེ། དེ་ཉིད་དུ། གླེང་གཞི་རྒྱས་པར་བཀའ་སྩལ་དོན་མཆོག་རྣམས། །ལེགས་པར་སྦྱར་བ་ཕྱག་འཚལ་ཚིགས་བཅད་ཡིན། །ཞེས་གསུངས་པའི་ཕྱིར་རོ། །འབྲེ་ཨར་ལ་སོགས་པའི་སྔོན་གྱི་མཁས་པ་རྣམས་དང་། ཤེར་ཕྱིན་ལ་དབང་འབྱོར་པ་གཡག་རོང་གཉིས་ཀྱི་བཞེད་པ་ཡང་འདི་ཉིད་ཡིན་པས་ཐེ་ཚོམ་དང་སོམ་ཉི་མི་བྱའོ། །མཆོད་བརྗོད་ཚིག་གི་མཁྱེན་གསུམ་རྫིང་བཅས་ནས། །དགོས་འབྲེལ་ངག་གིས་ཡུར་བ་ནས་དྲངས་ཏེ། །མངོན་རྟོགས་བརྒྱད་ཀྱི་ཞིང་ལ་བཅུས་པ་ཡིས། །རང་དོན་མཁྱེན་གསུམ་ལོ་ཏོག་རབ་རྒྱས་ནས། །གཞན་དོན་གླེང་གཞིའི་ཚུལ་གྱིས་རིགས་ཅན་གསུམ། །རང་རང་བཞེད་དོན་ཟས་ལ་སྤྱོད་པ་ཡི། །སོ་ནམ་ཚུལ་འདི་རྫོགས་པའི་སངས་རྒྱས་ཀྱི། །མཛད་པའི་འཁོར་ལོ་ཡིན་པར་ཁོ་བོས་རྟོགས། །ཞེས་བྱ་བ་ཡང་ཤུགས་འབྱུང་དུ་བྲིས་སོ། །མཆོད་བརྗོད་བཤད་ཟིན་ཏོ།། །།གཉིས་པ་རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འབྲེལ་ནི། རྣམ་པ་ཐམས་ཅད་མཁྱེན་ཉིད་ལམ། །ཞེས་སོགས་ཚིགས་བཅད་གཉིས་ཏེ། འདི་ལ་འཕགས་གྲོལ་གྱིས་བསྟན་བཅོས་བརྩམས་པའི་དགོས་པ་ལ་སྦྱར་བ་ཙམ་ཞིག་མ་གཏོགས་པ་དགོས་སོགས་ཆོས་བཞི་ཆར་ལ་སྦྱར་བའི་གསལ་ཀ་མི་སྣང་ངོ་། །སློབ་དཔོན་གྱིས་ནི་རྐང་པ་དང་པོ་གཉིས་ཀྱིས་བརྗོད་བྱ། བར་པ་བཞིས་ཉིང་དགོས། ཐ་མ་གཉིས་ཀྱིས་དགོས་པ། འབྲེལ་པ་ཤུགས་ལས་བསྟན་པར་བཞེད་དོ། །འོན་ཀྱང་དེ་ཞེས་ཚིག་སྦྱོར་དང་བསྟུན་ན་དང་པོ་གསུམ་གྱིས་བརྗོད་བྱ། དེ་ནས་གསུམ་གྱིས་ཉིང་དགོས། ཐ་མ་གཉིས་ཀྱིས་དགོས་པ་བསྟན་ཏེ། མགོན་པོ་བྱམས་པས་མཁྱེན་གསུམ་གྱི་ཡོན་ཏན་བརྗོད་པའི་སྒོ་ནས་ཡུམ་ལ་ཕྱག་འཚལ་ནས་མཁྱེན་པ་གསུམ་གྱི་རྒྱན་རྩོམ་པར་དམ་བཅས་པ་ན་དེའི་བརྗོད་བྱ་གང་ཡིན་ཞེ་ན། མཆོད་བརྗོད་ཀྱི་བཤད་ཚུལ་ཕྱི་མ་གཉིས་ཀྱིས་བསྡུས་པའི་སངས་རྒྱས་ཀྱི་སའི་མཁྱེན་གསུམ་ལ་རྣམ་མཁྱེན་གྱི་ཐ་སྙད་མཛད་པ་དེ་ཐོབ་བྱའི་འབྲས་བུར་བྱས་ནས་དེ་ཐོབ་བྱེད་ཀྱི་ལམ་མཆོད་བརྗོད་ཀྱི་བཤད་ཚུལ་དང་པོས་བསྡུས་པའི་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་གང་ཟག་གི་ཆ་རྐྱེན་གྱི་སྒོ་ནས་མངོན་པར་རྟོགས་པ་བརྒྱད་དུ་འགྱུར་བ་དེ་ཉིད་འདིར་བརྗོད་བྱ་ཡིན་ནོ། །ཞེས་པ་ནི་རྣམ་པ་ཐམས་ཅད་མཁྱེན་ཉིད་ལམ་ཞེས་པས་བསྟན། འོ་ན་དེ་ཉིད་བཀའ་ལ་མ་ལྟོས་པར་རང་སྟོབས་ཀྱིས་བཤད་པ་ཡིན་ནམ་སྙམ་ན། སྟོན་པས་འདི་ལས་བཤད་པ་གང་ཞེས་ཏེ། སྟོན་པས་ཤེར་ཕྱིན་གྱི་མདོ་ལས་གསུངས་པ་དེ་འདིར་བཤད་པར་བྱ་བ་ཡིན་གྱི་དེ་ལས་ལོགས་སུ་མི་འཆད་ཅེས་པའི་དོན་ཏོ། །འོ་ན་ཤེར་ཕྱིན་གྱི་མདོ་ནས་བཤད་པའི་ཐེག་པ་གསུམ་ཆར་གྱི་ལམ་འདིར་འཆད་དམ་ཞེ་ན་གཞན་གྱིས་མྱོང་བ་མ་ཡིན་ཏེ། ཞེས་ཏེ་ཤེར་ཕྱིན་གྱི་མདོར་ཐེག་པ་གསུམ་ཆར་གྱི་ལམ་གསུངས་ཀྱང་འདིར་ནི་ཐེག་པ་གཞན་གྱིས་མྱོང་བ་མ་ཡིན་པ་བྱང་ཆུབ་སེམས་དཔའ་ཁོ་ནས་ཉམས་སུ་མྱང་བར་བྱ་བ་དེ་འཆད་ཅེས་པའི་དོན་ཏོ། །རྟོགས་རིགས་ཀྱི་དབང་དུ་བྱས་ན་ནི་ཐེག་པ་གསུམ་ཆར་གྱི་རྟོགས་རིགས་དངོས་སུ་བསྟན་ཏེ། བྱང་སེམས་ཁོ་ནས་ཉམས་སུ་མྱང་བར་བྱ་བ་དེ་ལ་ཐེག་པ་གསུམ་ཆར་གྱི་རྟོགས་རིགས་ཚང་བའི་ཕྱིར་རོ། །ཐེག་དམན་རང་རྒྱུད་པའི་ལམ་ནི་གཞུང་འདིར་དངོས་སུ་མི་སྟོན་ཏེ། གཞན་གྱིས་མྱོང་བ་མ་ཡིན་ཏེ་ཞེས་དང་། འོག་ཏུ་ཐེག་ཆེན་ལམ་གྱི་རྣམ་གཞག་རེ་རེ་འཆད་པའི་སྐབས་སུ་ཐེག་དམན་གྱི་ལམ་རྣམས་ཤུགས་ལ་བསྟན་པར་གསུངས་པའི་ཕྱིར་རོ། །དེས་ན་འཕགས་སེང་གཉིས་ཀྱིས་བསྟན་བཅོས་འདིས་འཕགས་པ་བཞི་ཆར་གྱི་མངོན་རྟོགས་བསྡུས་པར་གསུངས་པ་དང་། རྩ་བར་ཡང་། སློབ་མ་བསེ་རུའི་ལམ་གང་དང་། །ཞེས་གསུངས་པ་རྣམས་རང་གི་ངོ་བོ་བྱང་སེམས་ཀྱི་མངོན་པར་རྟོགས་པ་ཡིན་ཀྱང་། འཕགས་པ་བཞི་ཆར་གྱི་རྟོགས་རིགས་ཡིན་པ་ལ་དགོངས་ལ། དངོས་བསྟན་ལ་ཐེག་དམན་གྱི་ལམ་མེད་པ་ནི་མི་འགལ་ཞིང་གནད་གཅིག་པར་རྟོགས་དགོས་སོ། །གཉིས་པ་དགོས་པ་ནི། སྟོན་པས་འདི་ལས་བཤད་པ་གང་། །ཞེས་པ་ལས་འཕྲོས་ནས་སྟོན་པས་བཤད་ཟིན་པས་བསྟན་བཅོས་བརྩམས་པ་ལ་དགོས་པ་མེད་པར་འགྱུར་རོ་སྙམ་ན། དེའི་ལན་ནི་ཚིག་རྐང་ཐ་མ་གཉིས་ཏེ། བསྟན་བཅོས་མ་བརྩམས་ན་སོ་སོ་སྐྱེ་བོ་རྣམས་ཀྱིས་མདོ་དོན་བདེ་བླག་ཏུ་རྟོགས་པར་མི་ནུས་པས་དེས་དོན་དེ་རྟོགས་པའི་ཆེད་དུ་བསྟན་བཅོས་རྩོམ་ཞེས་པའི་དོན་ཏོ། །གསུམ་པ་ཉིང་དགོས་ནི། འོ་ན་སོ་སོ་སྐྱེ་བོས་མདོ་དོན་བདེ་བླག་ཏུ་རྟོགས་པ་ལ་དགོས་པ་ཅི་ཡོད་ཅེ་ན། དེའི་ལན་དུ་ཆོས་སྤྱོད་བཅུ་ཡི་བདག་ཉིད་ཀྱི། །ཞེས་སོགས་རྐང་པ་གསུམ་སྟེ། སོ་སོ་སྐྱེ་བོས་མདོ་དོན་བདེ་བླག་ཏུ་རྟོགས་པ་ལ་བརྟེན་ནས་ཆོས་སྤྱོད་བཅུའི་བདག་ཉིད་ཀྱི་མདོ་དོན་དྲན་པའི་ཤེས་པ་ལ་བཞག་ནས་ཚོགས་སྦྱོར་གྱི་གནས་སྐབས་སུ་བསྐལ་པ་གྲངས་མེད་གཅིག་ཏུ་བསྒོམས་པའི་སྟོབས་ཀྱིས་ས་དང་པོར་ཆོས་སྤྱོད་བཅུ་མངོན་དུ་འགྱུར་བ་ནི་བསྟན་བཅོས་ཀྱི་ཉིང་དགོས་ཡིན་ཞེས་པའི་དོན་ཏོ། །འདི་ལ་ཆོས་སྤྱོད་བཅུའི་ངོ་བོ་དང་། དེས་མདོ་དོན་བསྡུས་པའི་ཚུལ་དང་། བསྟན་བཅོས་ཀྱི་ཉིང་དགོས་ས་དང་པོ་ནས་འཇོག་པའི་ཚུལ་གསུམ་ལས། དང་པོ་ནི། རྒྱ་བོད་ཀྱི་མཁས་པ་རྣམས་ཀྱིས། འདིར་བསྟན་གྱི་ཆོས་སྤྱོད་བཅུ་ཡི་གེ་འདྲི་མཆོད་སྦྱིན་པ་སོགས་དབུས་མཐའ་ནས་གསུངས་པ་ལ་ངོས་འཛིན་པ་དང་། རྣམ་མཁྱེན་མཚོན་བྱེད་ཀྱི་ཆོས་བཅུ་ལ་བྱེད་པ་དང་། ཕར་ཕྱིན་བཅུ་ལ་བྱེད་པའི་ལུགས་གསུམ་སྣང་ཡང་བསྟན་བཅོས་རྩ་འགྲེལ་གྱི་དགོངས་པ་ཕྱི་མ་དེ་ཉིད་ཡིན་ཞིང་ལོ་ཙྪ་བ་དཔོན་སློབ་རྣམས་ཀྱང་འདི་ཉིད་བཞེད་དོ། །དེ་ཡང་ཆོས་སྤྱོད་བཅུ་ཡི་བདག་ཉིད་ཀྱི། མདོ་དོན་ཞེས་པས་མདོ་དོན་མ་ལུས་པ་ཆོས་སྤྱོད་བཅུས་བསྡུས་པར་གསུངས་ཤིང་། འགྲེལ་པར་ཡང་དེ་ལྟར་གསུངས་པས་རྣམ་པ་ཐམས་ཅད་མཁྱེན་ཉིད་ལམ་ཞེས་པའི་ལམ་དེ་དང་། སྐབས་འདིར་བཤད་པའི་ཆོས་སྤྱོད་བཅུ་དོན་གཅིག་པ་ཡིན་ཏེ། འགྲེལ་ཆེན་དུ། བྱང་ཆུབ་ཀྱི་སེམས་དང་གདམས་ངག་ལ་སོགས་པ་སྒྲུབ་པའི་རང་བཞིན་སྐབས་བརྒྱད་ཀྱི་དབྱེ་བས་ཕྱེ་བ་ཐམས་ཅད་ཅེས་དང་། འགྲེལ་ཆུང་དུ། བྱང་ཆུབ་ཀྱི་སེམས་དང་སྦྱིན་པ་ལ་སོགས་པ་སྒྲུབ་པའི་སྤྱོད་པ་ལེགས་པར་བཞག་ནས་ཞེས་གསུངས་པའི་ཕྱིར། འོ་ན་བྱང་ཆུབ་ཀྱི་སེམས་དང་ཞེས་སེམས་བསྐྱེད་ཆོས་བཅུའི་དང་པོར་བསྟན་པ་དང་འགལ་ལོ་ཞེ་ན། གཞུང་དེས་སེམས་བསྐྱེད་ཆོས་སྤྱོད་བཅུའི་དང་པོར་བསྟན་པ་མ་ཡིན་ཏེ། སློབ་དཔོན་གྱིས་ནི་ཆོས་སྤྱོད་བཅུས་བསམ་པ་མ་བསྡུས་སོ་སྙམ་དུ་དགོངས་ནས་བསམ་པ་ཡང་བསྡུ་བའི་ཆེད་དུ་བསམ་པ་སེམས་བསྐྱེད་བསྣན་པ་ཡིན་ནོ། །འོན་ཀྱང་ཆོས་སྤྱོད་བཅུས་མདོ་དོན་བསྡུས་པའི་ཚེ་ན་བསམ་པ་སེམས་བསྐྱེད་ཀྱང་ཆོས་སྤྱོད་བཅུར་བསྡུ་བའི་སྐབས་ཡིན་པས་བསམ་པ་མ་བསྡུས་སོ་སྙམ་པ་ནི་མི་དགོས་སོ། །ཅིའི་ཕྱིར་ཕར་ཕྱིན་བཅུ་ལ་ཆོས་སྤྱོད་བཅུར་འཇོག་ཅེ་ན། སློབ་དཔོན་དབྱིག་གཉེན་གྱིས། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །གསུང་རབ་ཚེ་དང་བསོད་ནམས་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དོན་བཅུ་ལ་འཇུག་པར་གསུངས་པ་ལས་སྐབས་འདིར་ནི་ལམ་ལ་འཇུག་ལ། དེའི་སྤྱོད་པ་ནི་ཕ་རོལ་ཏུ་ཕྱིན་པ་བཅུ་སྟེ། གོང་གི་ལམ་ཞེས་པ་དང་དོན་གཅིག་པའི་གནད་ཀྱང་འདི་ཉིད་ཡིན་ནོ། །གཉིས་པ་ནི་ཅིའི་ཕྱིར་སྦྱིན་སོགས་ཕ་རོལ་ཏུ་ཕྱིན་པ་བཅུས་མདོ་དོན་བསྡུས་པ་ཡིན་ཞེ་ན། མཁྱེན་གསུམ་གྱི་སྐབས་སུ་ཡང་ཕར་ཕྱིན་བཅུ་པོ་འདི་ཉིད་ཐོས་བསམ་གྱིས་གཏན་ལ་ཕབ་པའི་ལྡོག་པ་ནས་བསྟན། སྦྱོར་བཞིའི་སྐབས་སུ་ཡང་བཅུ་པོ་དེ་ཉིད་ཉམས་ལེན་གྱི་ལྡོག་པ་ནས་བསྟན། ཆོས་སྐུའི་སྐབས་སུ་བཅུ་པོ་དེ་ཉིད་འབྲས་བུའི་ལྡོག་པ་ནས་བསྟན་པའི་ཕྱིར་རོ། །དེ་ལྟར་བྱས་ན་ཕར་ཕྱིན་ཕྱི་མ་བཞི་ཤེས་རབ་ཀྱི་ཕར་ཕྱིན་གྱི་ནང་དུ་འདུས་པས། བྱང་ཆུབ་སེམས་དཔའི་ཕར་ཕྱིན་དྲུག་པོ་དེ་ལ་སྒྲུབ་པའི་ཐ་སྙད་མཛད་ནས་དེ་ཉིད་མཁྱེན་གསུམ་གྱི་སྐབས་སུ་བསྟན་པ་ལ་སྤྱིའི་སྒྲུབ་པ་དང་། སྦྱོར་བཞིའི་སྐབས་སུ་བསྟན་པ་ལ་བྱེ་བྲག་གི་སྒྲུབ་པ་ཞེས་པའི་གཞུང་དང་ཡང་འབྱོར་པ་ཡིན་ནོ། །གསུམ་པ་ནི་བསྟན་བཅོས་ཀྱི་ཉིང་དགོས་མ་མཐའ་ས་དང་པོ་ནས་འཇོག་པའི་རྒྱུ་མཚན་ཅི་ཡིན་སྙམ་ན། སོ་སོ་སྐྱེ་བོའི་གནས་སྐབས་སུ་བསྟན་བཅོས་ལ་མ་བརྟེན་པར་མདོ་དོན་བདེ་བླག་ཏུ་རྟོགས་མི་ནུས་པས་བསྟན་བཅོས་ལ་བརྟེན་ནས་རྟོགས་པའི་མདོ་དོན་དེ་ཚོགས་སྦྱོར་གྱི་གནས་སྐབས་སུ་བསྒོམས་པའི་སྟོབས་ཀྱིས་ས་དང་པོར་ཆོས་ཉིད་མངོན་དུ་གྱུར་པའི་ཚེ་བསྟན་བཅོས་ལ་མ་ལྟོས་པར་རང་ཉིད་ཀྱིས་མདོ་དོན་མངོན་སུམ་དུ་མཐོང་བའི་སྒོ་ནས་བཀའི་དགོངས་པ་རང་དབང་དུ་འགྲེལ་ནུས་པའི་ཕྱིར་ཏེ། དཔེར་ན་འཕགས་པ་ཀླུ་སྒྲུབ་བཞིན་ནོ། །འདི་ལ་དགོངས་ནས། གང་ཞིག་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་གསུངས་སོ། །མདོར་ན་དགོས་འབྲེལ་དག་གི་ཚིགས་བཅད་གཉིས་པོ་འདིས་རྗོད་བྱེད་མངོན་རྟོགས་རྒྱན་ལ་བརྟེན་ནས། བརྗོད་བྱ་དགོས་པ་ཉིང་དགོས་གསུམ་ལ་འཇུག་པའི་རིམ་པ་འདི་ལྟར་བསྟན་ཏེ། སོ་སོ་སྐྱེ་བོའི་དུས་སུ་མངོན་རྟོགས་རྒྱན་ལ་ཐོས་བསམ་བྱས་པས་ཤེར་ཕྱིན་གྱི་མདོའི་དོན་ངོ་བོ་ཆོས་སྤྱོད་བཅུ་ཡིན་ཀྱང་བསྟན་ཚུལ་སྐབས་བརྒྱད་ཀྱི་སྒོ་ནས་བསྟན་པ་དེ་ཉིད་དོན་སྤྱིའི་ཚུལ་གྱིས་རྟོགས་པར་འབྱུང་ལ། དེའི་དོན་ཚོགས་སྦྱོར་གྱི་གནས་སྐབས་སུ་ཉམས་སུ་བླངས་པས་ས་དང་པོར་ཕ་རོལ་ཏུ་ཕྱིན་པ་བཅུ་པོ་མངོན་དུ་འགྱུར་ལ། དེ་ནས་ལམ་ལྷག་མ་རྣམས་ཀྱི་ཉམས་ལེན་བསྟན་བཅོས་ལ་མི་ལྟོས་པར་མདོའི་དོན་ལ་རང་ཉིད་ཀྱིས་འཇུག་པར་བསྟན་ཏེ་གསུང་རབ་མཐའ་དག་གི་དགོངས་པའོ། །འདི་བློ་ཡུལ་དུ་མ་ཤོང་བ་དག་གིས་གཞན་གྱི་བློ་ཚོད་འཇལ་བ་ནི་ཁྲོན་པའི་ནང་གི་སྦལ་ཆུང་དང་མཚུངས་སོ། །གསུམ་པ་བསྟན་བཅོས་ཀྱི་བརྗོད་བྱ་མངོན་རྟོགས་བཤད་པ་ལ། རྒྱས་པ་ལ་དད་པ་ལ་བརྒྱད་དུ་ཕྱེ་བ། བར་པ་ལ་དད་པ་ལ་དྲུག་ཏུ་བསྟན་པ། བསྡུས་པ་ལ་དད་པ་ལ་གསུམ་དུ་བསྡུ་བ་སྟེ་གསུམ་ལས། དང་པོ་ལ་བསྡུས་དོན་ལུས་རྣམ་གཞག་དང་། ཚིག་དོན་ཡན་ལག་རྒྱས་བཤད་གཉིས་ལས། བསྡུས་དོན་ལུས་རྣམ་གཞག་འཆད་ཅེས་པའམ་བཤད་ཐབས་ཀྱི་མན་ངག་ལྔའི་སྒོ་ནས་བཤད་པ་ལྟར་ན་དགོས་དོན་སྔར་བསྟན་ཟིན་པས་བསྡུས་དོན་འཆད་པ་ནི། ཤེས་རབ་ཕ་རོལ་ཕྱིན་པ་ནི། །ཞེས་སོགས་ཚིགས་བཅད་བཅོ་ལྔ་སྟེ། མཆོད་བརྗོད་ཀྱི་བཤད་ཚུལ་ཐ་མ་གཉིས་ཀྱིས་བསྡུས་པའི་འབྲས་བུ་ཤེར་ཕྱིན་ནི་ཐོབ་བྱེད་ཀྱི་ལམ་མངོན་རྟོགས་བརྒྱད་ཀྱི་སྒོ་ནས་བཤད། བཤད་ཚུལ་དང་པོས་བསྡུས་པའི་ལམ་ཤེར་ཕྱིན་ནི་གང་ཟག་གི་ཆ་རྐྱེན་མངོན་རྟོགས་བརྒྱད་ཀྱི་སྒོ་ནས་བཤད། ཞར་ལ་སྟོན་པས་འདི་ལས་བཤད་པ་གང་ཞེས་པ་ལས་འཕྲོས་ནས་གཞུང་ཤེར་ཕྱིན་ནི་བརྗོད་བྱ་མངོན་པར་རྟོགས་པ་བརྒྱད་ཀྱི་སྒོ་ནས་བཤད་ཅེས་པ་ཡང་ཐོབ་བོ། །དེ་ལྟར་གསུམ་ལས་དང་པོ་ནི་ཤེར་ཕྱིན་མཚན་ཉིད་པ་ཡིན་ལ་ཕྱི་མ་གཉིས་ནི་བཏགས་པ་བ་ཡིན་ཏེ། འདོགས་པའི་རྒྱུ་མཚན་ཡང་གཞུང་ནི་དེ་སྟོན་བྱེད་ཡིན་པ་དང་ལམ་ནི་དེ་ཐོབ་བྱེད་ཡིན་པའི་ཕྱིར་རོ། །བཏགས་པའི་དགོས་པ་ནི་ཤེར་ཕྱིན་དོན་དུ་གཉེར་བས་གཞུང་ལ་ཐོས་སོགས་ཀྱིས་འཇུག་ཅིང་ལམ་བསྒོམ་བྱར་ཤེས་པའི་དོན་ཏོ། །དངོས་ལ་གནོད་བྱེད་ནི་རབ་ཀྱི་མཐར་ཕྱིན་པ་མ་ཡིན་པའི་ཕྱིར་རོ། །ཇི་སྐད་དུ་འགྲེལ་ཆེན་དུ། སངས་རྒྱས་བཅོམ་ལྡན་འདས་ཀྱི་གཉིས་སུ་མེད་པའི་ཡེ་ཤེས་སྒྱུ་མ་ལྟ་བུ་ནི་དངོས་ཡིན་ལ་དེ་ཐོབ་པ་དང་རྗེས་སུ་མཐུན་པ་ཉིད་ཀྱིས་ཚིག་དང་ངག་གི་ཚོགས་ཀྱི་གཞུང་དང་མཐོང་བ་ལ་སོགས་པའི་མཚན་ཉིད་ཅན་གྱི་ལམ་ལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི་བཏགས་པ་བའོ། །དེ་སྐད་དུ་ཡང་སློབ་དཔོན་ཕྱོགས་ཀྱི་གླང་པོའི་ཞལ་སྔ་ནས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དེ་དོན་སྦྱོར་བ་ཡི། །གཞུང་དང་ལམ་ལ་དེ་སྒྲ་ཡིན། །ཞེས་བྱ་བ་གསུངས་པ་ཡིན་ནོ། །ཞེས་གསུངས་སོ། །དངོས་པོ་བརྒྱད་ངོས་འཛིན་པ་ནི། རྣམ་ཀུན་མཁྱེན་ཉིད་ལམ་ཤེས་ཉིད། །ཅེས་སོགས་ཚིག་རྐང་དྲུག་སྟེ། དེ་ནས་ཞེས་པའི་ཚིག་ལ་བརྟེན་ནས་གོ་རིམ་ངེས་པ། དགོས་པ་ནི་ཡན་ལག་རྒྱས་བཤད་ཀྱི་སྐབས་སུ་འབྱུང་ངོ་། །དེ་རྣམ་བརྒྱད་ཅེས་པའི་ཚིག་ལ་བརྟེན་ནས་གྲངས་ངེས་པ། དགོས་པ་ནི། ཡུལ་ནི་རྣམ་པ་གསུམ་པོ་རྒྱུ། །ཞེས་པའི་སྐབས་སུ་འབྱུང་ངོ་། །འདིར་བརྒྱད་ཀྱི་གོ་རིམ་ངེས་པ་འཆད་པའི་ཚེ་བརྒྱད་པོ་སྔ་མ་སྔ་མའི་འོག་ཏུ་ཕྱི་མ་ཕྱི་མ་འཆད་པའི་རྒྱུ་མཚན་སྟོན་དགོས་ཀྱི་མཁྱེན་གསུམ་གྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ་ཅེས་པ་ནི་དྲུག་གི་གོ་རིམ་དང་ཁྱད་པར་མ་ཕྱེད་པ་ཡིན་ལ། མཁྱེན་གསུམ་གྱི་འོག་ཏུ་སྦྱོར་བཞི་འཆད་པའི་རྒྱུ་མཚན་ཡོད་དེ་ཅེས་པ་ནི་གསུམ་གྱི་གོ་རིམ་དང་ཁྱད་པར་མ་ཕྱེད་པའོ། །ཁོ་བོ་ནི་བརྒྱད་ཀྱི་གོ་རིམ་གྱི་སྐབས་སུ་གཞི་ཤེས་ཀྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ་ཅེས་འཆད་པར་འགྱུར་བས་སྒུགས་སྡོད་མཛོད་ཅིག བརྒྱད་པོ་སོ་སོའི་ངོ་བོ་ངོས་གཟུང་བ་ནི་སེམས་བསྐྱེད་པ་དང་གདམས་ངག་དང་ཞེས་སོགས་ཏེ། རེ་རེ་ལ་ཡང་མཚོན་བྱེད་ཀྱི་ཆོས་ཀྱི་རྐང་གྲངས་བསྟན་པ་དང་། དེ་ལུས་དང་སྦྱར་བ་གཉིས་གཉིས་གསུངས་ཤིང་མཁྱེན་གསུམ་ལ་ནི་འདི་ནས་བསྟན་པའི་མཁྱེན་གསུམ་དང་མཆོད་བརྗོད་ཀྱིས་བསྟན་པའི་མཁྱེན་གསུམ་དོན་གཅིག་པར་ཤེས་པའི་ཆེད་དུ། རྟེན་གྱི་གང་ཟག་དང་སྦྱར་བ་ཡང་གསུངས་སོ། །ལུས་དང་སྦྱོར་བ་ལ་མཚོན་བྱེད་ཀྱི་ཆོས་ཀྱི་མཇུག་ཏུ་སྦྱར་བ་དང་། བར་དུ་སྦྱར་བ་དང་། ཐོག་མར་སྦྱར་བ་གསུམ་ལས། དང་པོ་ནི་མཁྱེན་གསུམ་དང་རྩེ་སྦྱོར་ཡིན་ནོ། །གཉིས་པ་ནི་རྣམ་རྫོགས་སྦྱོར་བ་དང་འབྲས་བུ་ཆོས་སྐུའོ། །གསུམ་པ་ནི་མཐར་གྱིས་པ་དང་། སྐད་ཅིག་མའི་སྦྱོར་བའོ། །བསྡུས་དོན་བཤད་ཟིན་ནས་ཚིག་དོན་འཆད་པ་ལ་བརྒྱད་ཡོད་པ་ལས།

རྣམ་མཁྱེན།

དང་པོ་རྣམ་མཁྱེན་ལ་དང་པོར་བསྟན་པའི་རྒྱུ་མཚན་དང་། མཚོན་བྱེད་ཀྱི་ཆོས་སོ་སོའི་འབྲེལ་བཤད་པ་གཉིས་ལས། དང་པོ་ནི། མཁྱེན་གསུམ་སྟོན་པའི་སྐབས་གཞན་དུ་གཞི་ཤེས་ཐོག་མར་བསྟན་ནས་འདིར་རྣམ་མཁྱེན་ཐོག་མར་བསྟན་པའི་རྒྱུ་མཚན་ཅི་ཡིན་ཞེ་ན། དེ་ལ་སྐབས་གཞན་དུ་གཞི་ཤེས་དང་པོར་བསྟན་པའི་རྒྱུ་མཚན་དང་། འདིར་རྣམ་མཁྱེན་དང་པོར་བསྟན་པའི་རྒྱུ་མཚན་གཉིས་ལས། དང་པོ་ལ་འཕགས་པ་སོ་སོའི་མཁྱེན་གསུམ་འཆད་པའི་ཚེ་གཞི་ཤེས་དང་པོར་སྟོན་པའི་རྒྱུ་མཚན་ནི་ཐེག་པ་གསུམ་གྱི་གོ་རིམ་ལྟར་དམན་མཆོག་གི་གོ་རིམ་ཡིན་ཏེ། འདི་ནི་གླེང་གཞིའི་གོ་རིམ་དང་མཐུན་ནོ། །བྱང་སེམས་ཀྱི་ཉམས་ལེན་གསུམ་འཆད་པའི་ཚེ་གཞི་ཤེས་ཀྱི་ཉམས་ལེན་དང་པོར་བསྟན་པའི་རྒྱུ་མཚན་ནི་བྱང་ཆུབ་སེམས་དཔས་རྟོགས་རིགས་གསུམ་གྱི་ནང་ནས་གང་ཟག་གི་བདག་མེད་རྟོགས་པའི་རྟོགས་རིགས་དེ་དང་པོར་བསྒོམ་དགོས་པའི་ཕྱིར་ཏེ། རྣལ་འབྱོར་ས་བཞིའི་རིམ་པས་ལམ་ལ་འཇུག་དགོས་པའི་ཕྱིར་རོ། །འདི་ལ་དགོངས་ནས་རྣམ་རྫོགས་སྦྱོར་བའི་སྐབས་སུ་གཞི་ཤེས་ཀྱི་རྣམ་པ་དང་། གཞི་ཤེས་ཀྱི་སྦྱོར་བ་དང་པོར་བསྟན་པ་ཡིན་ནོ། །སངས་རྒྱས་ཀྱི་སའི་མཁྱེན་གསུམ་འཆད་པའི་ཚེའང་གཞི་ཤེས་དང་པོར་བསྟན་པའི་རྒྱུ་མཚན་ནི་རྒྱུའི་ངོས་ནས་བྱང་ཆུབ་སེམས་དཔའི་མངོན་རྟོགས་ཀྱི་རིམ་པ་དང་མཐུན་པ་དང་། འབྲས་བུའི་ངོས་ནས་གླེང་གཞིའི་གོ་རིམ་དང་མཐུན་པ་གཉིས་ཡོད་པའི་ཕྱིར་རོ། །འདི་ལ་དགོངས་ནས་རྣམ་མཁྱེན་གྱི་རྣམ་པ་བརྒྱ་དང་བཅུ་འཆད་པའི་ཚེ་གཞི་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་དང་པོར་བསྟན་པ་ཡིན་ནོ། །མཆོད་བརྗོད་ཀྱི་སྐབས་ཀྱི་མཁྱེན་གསུམ་གྱི་གོ་རིམ་ལ་ནི་བྱང་སེམས་ཀྱི་མངོན་རྟོགས་དང་། སངས་རྒྱས་ཀྱི་སའི་མཁྱེན་གསུམ་དང་། གླེང་གཞིའི་གོ་རིམ་གསུམ་ཆར་ཚང་སྟེ་སྔར་བསྟན་ཟིན་ཏོ། །གཉིས་པ་ནི་མཁྱེན་གསུམ་གྱི་གོ་རིམ་ཕལ་ཆེར་དེ་ལྟར་ཡིན་ན། འདིར་རྣམ་མཁྱེན་ཐོག་མར་བསྟན་པ་ལ་དགོས་པ་ཅི་ཞིག་ཡོད་ཅེ་ན། འདིའི་གདུལ་བྱའི་གཙོ་བོ་ནི་ཐེག་ཆེན་གྱི་རིགས་ཅན་ཡིན་ལ་དེ་ཉིད་འབྲས་བུ་ལ་སྤྲོ་བ་སྐྱེས་ཏེ་དེའི་རྒྱུ་ལ་འཇུག་པའི་ཆེད་དུ་ཐོབ་བྱའི་འབྲས་བུ་མཐར་ཐུག་དེ་ཐོག་མར་བསྟན་པ་ཡིན་པའི་ཕྱིར་རོ། །དེས་ན་སྐབས་དང་པོར་བསྟན་པའི་རྣམ་མཁྱེན་ནི་སྐབས་བརྒྱད་ཀྱི་གོ་རིམ་ལ་འཇུག་པའི་ཚེ་ཆོས་བཅུ་པོ་མངོན་སུམ་དུ་རྟོགས་པའི་སངས་རྒྱས་ཀྱི་སའི་རྣམ་མཁྱེན་ལ་འཇུག་སྟེ། མཆོད་བརྗོད་ཀྱི་བཤད་ཚུལ་ཕྱི་མ་གཉིས་ཀྱིས་བསྡུས་པའི་རྣམ་མཁྱེན་དང་། རྣམ་པ་ཐམས་ཅད་མཁྱེན་ཉིད་ལམ་ཞེས་པའི་སྐབས་ཀྱི་རྣམ་མཁྱེན་དང་ངོ་བོ་གཅིག་པ་ཡིན་ནོ། །འཆད་ཚུལ་ནི་མི་གཅིག་སྟེ། སྔ་མ་གཉིས་ནི་མངོན་པར་རྟོགས་པ་བརྒྱད་ཆར་ལམ་དུ་བྱས་པའི་འབྲས་བུའི་སྒོ་ནས་བཤད་ཅིང་། འདིར་ནི་མངོན་རྟོགས་ཕྱི་མ་བདུན་ལམ་དུ་བྱས་པའི་འབྲས་བུའི་སྒོ་ནས་བཤད་པའི་ཕྱིར་རོ། །ཐོས་བསམ་གྱིས་གཏན་ལ་དབབ་པའི་ཡུལ་དུ་གཞག་པའི་ཚེ་ནི་ཆོས་བཅུ་པོ་སྐྱེ་མེད་དུ་རྟོགས་པའི་བྱང་སེམས་ཀྱི་རྒྱུད་ཀྱི་མཁྱེན་པ་ལ་འཇུག་གོ །གཉིས་པ་མཚོན་བྱེད་ཀྱི་ཆོས་སོ་སོའི་འབྲེལ་འཆད་པ་ལ། མདོ་ནས་གསུངས་པའི་ཚུལ། རྣམ་མཁྱེན་མཚོན་པའི་ཚུལ། གཞུང་སོ་སོའི་སྐབས་ལ་འཇུག་པ་དང་གསུམ་ལས། དང་པོ་ནི་གླེང་གཞི་རྫོགས་པའི་མཇུག་ཐོག་ཏུ་གནས་སྐབས་དང་མཐར་ཐུག་གི་འབྲས་བུ་ཐམས་ཅད་ཐོབ་པར་འདོད་པས་ཤེར་ཕྱིན་ལ་བསླབ་པར་བྱའོ། །ཞེས་པ་རྣམས་ཀྱིས་སེམས་བསྐྱེད་བསྟན། བསླབ་ཚུལ་ཞུས་པའི་ལན་གྱིས་གདམས་ངག་དང་། ངེས་འབྱེད་ཆ་མཐུན་བསྟན། ངེས་འབྱེད་ཆ་མཐུན་གྱི་སྐབས་སུ་བྱང་ཆུབ་སེམས་དཔའ་ཞེས་མང་དུ་གསུངས་པའི་མིང་གི་དོན་དྲིས་པའི་ལན་གྱིས་སྒྲུབ་པའི་རྟེན་བསྟན། དེ་དག་གི་སྐབས་སུ་ཆོས་ཐམས་ཅད་ཀྱི་ཆགས་པ་མེད་པ་ལ་བསླབ་པར་བྱའོ། །ཞེས་པའི་ཆོས་ཐམས་ཅད་དྲིས་པའི་ལན་གྱིས་སྒྲུབ་པའི་དམིགས་པ་བསྟན། སེམས་དཔའ་ཆེན་པོར་འཇོག་པའི་རྒྱུ་མཚན་དྲིས་པའི་ལན་གྱིས་སྒྲུབ་པའི་ཆེད་དུ་བྱ་བ་དང་། གོ་སྒྲུབ་དང་། འཇུག་སྒྲུབ་བསྟན། གོ་སྒྲུབ་ཀྱི་སྐབས་སུ་གོ་ཆ་ཆེན་པོ་བགོས་པ། ཞེས་གསུངས་ན་ཇི་ཙམ་གྱིས་ན་བྱང་སེམས་ཆེན་པོ་གོ་ཆ་ཆེན་པོ་བགོས་པ་ལགས་ཞེས་དྲིས་པའི་ལན་གྱིས་ཚོགས་དང་པོ་བཅུ་བསྟན། འཇུག་སྒྲུབ་ཀྱི་འཇུག་ཡུལ་ཐེག་ཆེན་ལས་འཕྲོས་ནས་བྱང་སེམས་ཆེན་པོའི་ཐེག་པ་ཆེན་པོ་དེ་གང་ལགས། ཇི་ཙམ་གྱིས་ན་བྱང་སེམས་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པར་རིག་པར་བྱ། བྱང་སེམས་ཆེན་པོའི་ཐེག་པ་ཆེན་པོ་དེ་གང་ནས་ངེས་པར་འབྱུང་བར་འགྱུར། བྱང་སེམས་ཆེན་པོའི་ཐེག་པ་ཆེན་པོ་དེ་གང་དུ་ངེས་པར་འབྱུང་བར་འགྱུར། བྱང་སེམས་ཆེན་པོའི་ཐེག་པ་ཆེན་པོ་དེ་གང་གིས་ངེས་པར་འབྱུང་བར་འགྱུར། ཞེས་པའི་དྲི་བ་ལྔ་ལས། དྲི་བ་དང་པོའི་ལན་གྱིས་ཐབས་མཁས་ནས་གཟུངས་ཀྱི་བར་ལྔ་བསྟན། གཉིས་པའི་ལན་གྱིས་སའི་ཚོགས་བསྟན། ཕྱི་མ་གསུམ་གྱི་ལན་གྱིས་གཉེན་པོའི་ཚོགས་བསྟན་ཏེ། མཐོང་སྤང་གཉེན་པོའི་ཚོགས་སྒྲུབ་བཞི་དང་། སྒོམ་སྤང་གཉེན་པོའི་ཚོགས་སྒྲུབ་དང་པོ་དང་། ཕྱི་མ་གསུམ་རིམ་པ་བཞིན་བསྟན་ཏོ། །ཐེག་པ་ཆེན་པོ་དེས་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ཟིལ་གྱིས་མནན་ཏེ་འབྱུང་བ་ཡིན་ནོ་ཞེས་པས་ངེས་པར་འབྱུང་བའི་སྒྲུབ་པ་བསྟན་ཏོ། །གཉིས་པ་ནི་སྔ་རབས་པའི་མཁས་པ་ཁ་ཅིག ཡུལ་གྱིས་ཡུལ་ཅན་མཚོན་པའི་ཚུལ་གྱིས་ཆོས་བཅུ་པོས་རྣམ་མཁྱེན་མཚོན་པ་ཡིན་ཏེ། ཆོས་བཅུ་པོ་མངོན་སུམ་དུ་རྟོགས་པ་ནི་རྣམ་མཁྱེན་ནོ། །ཞེས་པའི་ཚུལ་གྱིས་མཚོན་པའི་ཕྱིར་རོ། །དེ་ཡང་སྤྱིར་རྣམ་མཁྱེན་ལ་རྒྱུ་འབྲས་ཀྱི་གཙོ་བོ་མཁྱེན་པའི་རྣམ་མཁྱེན་དང་། བདེན་གཉིས་ཀྱི་རྣམ་པ་མ་ལུས་པ་མཁྱེན་པའི་རྣམ་མཁྱེན་གཉིས་ལས། དང་པོ་ནི་འདིའི་སྐབས་ཀྱི་རྣམ་མཁྱེན་དེ་ཡིན་ལ། གཉིས་པ་ནི། རྣམ་པ་གང་དག་དང་ཞེས་སོགས་ཀྱི་སྐབས་ནས་བསྟན་པ་ལྟར་ཡིན་ནོ་ཞེས་བཞེད་དོ། །འོན་ཀྱང་དེ་གཉིས་རྣམ་པ་མཁྱེན་ཚུལ་གྱི་སྒྲ་བཤད་མི་གཅིག་པ་ནི་མ་ཡིན་ཏེ། རྣམ་པ་མཁྱེན་ཚུལ་ལ་དམིགས་པ་ཐེག་ཆེན་གྱི་ལམ་འབྲས་བུ་དང་བཅས་པ་ལ་བཞག་ནས་དེའི་རྣམ་པའི་རབ་དབྱེ་མཁྱེན་པ་དང་། དམིགས་པ་ཆོས་ཐམས་ཅད་ལ་བཞག་ནས་དེའི་ཀུན་རྫོབ་ཀྱི་རྣམ་པའི་རབ་དབྱེ་མཁྱེན་པ་དང་། དམིགས་པ་དེ་ཉིད་ལ་བཞག་ནས་དེའི་དོན་དམ་པའི་རྣམ་པ་མཁྱེན་པ་ལ་རྣམ་མཁྱེན་དུ་བཞག་པ་དང་གསུམ་ལས། དང་པོ་ནི། འདིར་བསྟན་པ་དང་གཉིས་པ་ནི་རྣམ་པ་གང་དག་དང་ཞེས་སོགས་ཀྱི་སྒོ་ནས་བསྟན་པ་དང་། གསུམ་པ་ནི་ཆོས་གཅིག་གིས་རྣམ་པ་ཐམས་ཅད་མཁྱེན་པ་ཉིད་དེ། ཅེས་པའི་སྐབས་ནས་བསྟན་པ་ལྟ་བུའོ། །འོ་ན་ཆོས་བཅུ་པོ་དེ་ཐེག་ཆེན་གྱི་ལམ་འབྲས་བུ་དང་བཅས་པའི་རྣམ་པའི་རབ་དབྱེ་ཇི་ལྟ་བུ་ཡིན་སྙམ་ན། ཆོས་བཅུ་པོ་རེ་རེའི་སྐབས་སུ་ཡང་ཐེག་ཆེན་གྱི་ལམ་མཐའ་དག་གམ། འབྲས་བུ་མཐའ་དག་གམ། ལམ་དང་འབྲས་བུ་གཉིས་ཀ་གཏན་ལ་དབབ་པའི་ཕྱིར་ན་རྣམ་པའི་རབ་དབྱེ་ཞེས་བྱ་སྟེ། ཀུན་བཏུས་སུ། རྫས་ཡོད་ཤེས་བྱ་གཟུགས་ཅན་ལ་སོགས་པ་ཆོས་དྲུག་ཅུ་པོ་རེ་རེའི་སྐབས་སུ་ཡང་ཕུང་ཁམས་སྐྱེ་མཆེད་མཐའ་དག་གཏན་ལ་དབབ་པས་ཕུང་ཁམས་སྐྱེ་མཆེད་ཀྱི་རྣམ་པའི་རབ་དབྱེར་འཇོག་པ་བཞིན་ནོ། །ཆོས་བཅུ་པོ་རེ་རེས་ལམ་དང་འབྲས་བུ་ཇི་ལྟར་གཏན་ལ་དབབ་སྙམ་ན། སེམས་བསྐྱེད་ཀྱི་སྐབས་སུ་ལམ་དང་འབྲས་བུ་གཉིས་ཀའི་སེམས་བསྐྱེད་བཤད་པ་དང་། གདམས་ངག་གི་སྐབས་སུ་སྒྲུབ་པ་རང་གི་ངོ་བོ་ནས་སངས་རྒྱས་དཀོན་མཆོག་གི་བར་བཤད་པ་དང་། ངེས་འབྱེད་ཡན་ལག་གི་སྐབས་སུ་ཐེག་པ་གསུམ་ཆར་གྱི་རྟོགས་རིགས་ཚང་བ་དེ་མཐོང་ལམ་ནས་སངས་རྒྱས་ཀྱི་སའི་བར་ལ་འཇོག་དགོས་ཤིང་། དེའི་རྒྱུ་ངེས་འབྱེད་ཡན་ལག་དང་བཅས་པ་དང་། སྒྲུབ་པའི་རྟེན་གྱི་སྐབས་སུ་དྲོད་ནས་བཟུང་སྟེ་རྒྱུན་མཐའི་བར་གྱི་སྒྲུབ་པ་མཐའ་དག་བཤད་པ་དང་། དམིགས་པའི་སྐབས་སུ་ཆོས་ཐམས་ཅད་བཤད་པ་དང་། ཆེད་དུ་བྱ་བའི་སྐབས་སུ་ཆེན་པོ་གསུམ་གྱི་འབྲས་བུའི་རྣམ་པ་མཐའ་དག་བཤད་ཅིང་། འབྲས་བུའི་རྣམ་པ་མཐའ་དག་བསྡུས་ཤིང་དེ་ཉིད་མདོ་ལས་བྱང་སེམས་ཀྱི་ཉམས་ལེན་དུ་བཤད་པའི་ལམ་མཐའ་དག་ཀྱང་བསྡུས་པ་དང་། གོ་སྒྲུབ་ཀྱི་སྐབས་སུ་ཚོགས་ལམ་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། བསྒྲུབ་བྱ་ཕར་ཕྱིན་དྲུག་གིས་སངས་རྒྱས་ཀྱི་ས་ཡང་བསྡུས་པ་དང་། འཇུག་སྒྲུབ་ཀྱི་སྐབས་སུ་དྲོད་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། འཇུག་བྱ་ཐེག་ཆེན་གྱི་ལམ་དང་། འབྲས་བུ་གཉིས་ཀ་བསྡུས་པ་དང་། ཚོགས་སྒྲུབ་ཀྱི་སྐབས་སུ་ཆོས་མཆོག་ཆེན་པོ་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། སྟོང་ཉིད་རྟོགས་པའི་ཡེ་ཤེས་ཀྱིས་སངས་རྒྱས་ཀྱི་ས་ཡང་བསྡུས་པ་དང་། ངེས་འབྱུང་སྒྲུབ་པའི་སྐབས་སུ་དག་སའི་ཉམས་ལེན་མཐའ་དག་བཤད་ཅིང་། ངེས་པར་འབྱུང་ས་བརྒྱད་པོས་སངས་རྒྱས་ཀྱི་ས་ཡང་བསྡུས་པས་ན་ཆོས་བཅུ་པོ་འདི་ལ་རྣམ་པའི་རབ་དབྱེར་འཇོག་པ་ཡིན་ནོ། །དེ་དག་ནི་ཡུལ་གྱིས་ཡུལ་ཅན་མཚོན་པའི་ཚུལ་ཡིན་ལ། རྒྱུས་འབྲས་བུ་མཚོན་པའི་ཚུལ་ཡང་འདི་ལ་གནས་ཏེ། ཆོས་བཅུ་པོ་དེས་རྣམ་མཁྱེན་སྒྲུབ་པར་བྱེད་པའི་སྒྲུབ་པ་བསྟན་ནས། སྒྲུབ་པ་དེའི་འབྲས་བུ་མཐར་ཐུག་པ་ནི་རྣམ་མཁྱེན་ཡིན་ནོ་ཞེས་པའི་ཚུལ་གྱིས་མཚོན་པར་བྱེད་པའི་ཕྱིར་རོ། །གསུམ་པ་གཞུང་སོ་སོའི་དོན་ལ་འཇུག་པ་ལ་གསུམ་སྟེ། ཆོས་བཅུའི་གྲངས་ངེས་པ། གོ་རིམ་ངེས་པ། སོ་སོའི་དོན་ནོ། །དང་པོ་ནི། ལོ་ཆེན་གྱིས་རྟེན་གྱི་གང་ཟག་དང་། དམིགས་པ་དང་ཆེད་དུ་བྱ་བ་དང་། སྒྲུབ་པ་རང་གི་ངོ་བོ་སྟེ། རྣམ་མཁྱེན་གྱི་སྒྲུབ་པའི་ཆོས་བཞིར་ངེས་པ་ལས། དང་པོ་ནི་ཆོས་བཞི་དང་ལྡན་པ་སྟེ་བསམ་པའི་ཁྱད་པར་སེམས་བསྐྱེད་པ་དང་། གདམས་ངག་རྗེས་སུ་བསྟན་པ་ཐོབ་པ་དང་། སྦྱོར་བའི་ཁྱད་པར་ངེས་འབྱེད་ཆ་མཐུན་ཐོབ་པ་དང་། རིགས་ཀྱི་ཁྱད་པར་ཆོས་ཀྱི་དབྱིངས་ཀྱི་རིགས་དང་ལྡན་པའོ། །རྟེན་ཆོས་བཞི་ལྡན་དེས་དམིགས་པ་བཅུ་གཅིག་ལ་དམིགས་ཏེ། ཆེད་དུ་བྱ་བ་གསུམ་གྱི་ཆེད་དུ་སྒྲུབ་པ་རང་གི་ངོ་བོ་བཞི་བྱས་པས་རྣམ་མཁྱེན་དེ་ཐོབ་པ་ཡིན་ནོ། །ཞེས་གསུངས་སོ། །འབྲེས་རྣམ་མཁྱེན་མཚོན་བྱེད་ཀྱི་ཆོས་བཅུ་པོ་ནི་རྒྱུ་འབྲས་ཀྱི་ཆོས་མ་ལུས་པ་བསྟན་པས་ཆེད་དུ་བྱ་བ་གསུམ་དང་གང་དུ་ངེས་པར་འབྱུང་བ་ནི་འབྲས་བུ་ཡིན་ལ་ལྷག་མ་རྣམས་ནི་རྒྱུའི་ཆོས་ཡིན་ནོ། །ཞེས་བཞེད་དོ། །རང་ལུགས་ནི་རྣམ་མཁྱེན་མཚོན་པར་བྱེད་པའི་ཆོས་ལ་ཆོས་བཅུར་གྲངས་ངེས་ཏེ། དེ་ལ་བསམ་པ་སེམས་བསྐྱེད་པ་དང་སྦྱོར་བ་སྒྲུབ་པ་ལ་འཇུག་ཚུལ་གཉིས་ལས། དང་པོ་ནི་སེམས་བསྐྱེད་དོ། །གཉིས་པ་ལ་ཐེག་པ་གཞན་དུ་འགྱུར་སྲིད་པའི་སྒྲུབ་པ་དང་། ཐེག་པ་གཞན་དུ་འགྱུར་མི་སྲིད་པའི་སྒྲུབ་པ་དང་། དེ་གཉིས་ཀའི་ཐུན་མོང་གི་ཆོས་དང་གསུམ་དུ་ངེས་ཤིང་། དང་པོ་ནི་གདམས་ངག་ལ་ཐོས་བསམ་བྱེད་པའི་སྒྲུབ་པའོ། །གཉིས་པ་ལ་ཐེག་པ་གཞན་དུ་འགྱུར་མི་སྲིད་པའི་སྒྲུབ་པའི་ས་མཚམས་དང་དེའི་རྟེན་དང་དམིགས་པ་དང་ཆེད་དུ་བྱ་བ་བཞི་ལས། དང་པོ་ནི་ངེས་འབྱེད་ཡན་ལག གཉིས་པ་ནི་རྟེན་རིགས་ཏེ། སྒྲུབ་པའི་རྟེན་དུ་གྱུར་པའི་ཆོས་དབྱིངས་དེ་ལ་རྟེན་ཆོས་དྲོད་ཡན་ཆད་ཀྱི་སྒྲུབ་པའི་སྒོ་ནས་དབྱེ་བའི་གནད་ཀྱང་འདི་ཉིད་ཡིན་ནོ། །གསུམ་པ་ནི་དམིགས་པ། བཞི་པ་ནི་ཆེད་དུ་བྱ་བ་སྟེ་སྔར་གྱི་སྒྲུབ་པའི་དམིགས་པ་བདེན་བཞི་ཙམ་དང་། ཆེད་དུ་བྱ་བ་རྣམ་མཁྱེན་ཙམ་དུ་བཤད་པ་ལས་ཁྱད་པར་དུ་བྱས་པའོ། །དེ་གཉིས་ཀའི་ཐུན་མོང་གི་ཆོས་ལ་གོ་སྒྲུབ་ལ་སོགས་པ་བཞིར་ངེས་སོ། །གཉིས་པ་གོ་རིམ་ནི་ཐོག་མར་སེམས་བསྐྱེད་སྟོན་ཏེ། ཐེག་ཆེན་གྱི་ཆོས་ཐམས་ཅད་ཀྱི་རྩ་བ་ཡིན་པའི་ཕྱིར་རོ། །དེའི་འོག་ཏུ་གདམས་ངག་སྟོན་ཏེ། སེམས་བསྐྱེད་ཀྱི་སྐབས་སུ་དམིགས་ཡུལ་དུ་བྱས་པ་དེ་ཐོབ་པའི་ཆེད་དུ་གདམས་ངག་ཉན་དགོས་པའི་ཕྱིར་རོ། །དེའི་འོག་ཏུ་ངེས་འབྱེད་ཡན་ལག་སྟོན་ཏེ། གདམས་ངག་གི་དོན་ཉམས་སུ་བླངས་པ་ལས་ངེས་འབྱེད་ཡན་ལག་འབྱུང་བའི་ཕྱིར་རོ། །དེའི་འོག་ཏུ་སྒྲུབ་པའི་རྟེན་སྟོན་ཏེ། ངེས་འབྱེད་ཡན་ལག་ཐོབ་ནས་སེམས་ཀྱི་ཆོས་དབྱིངས་དེས་ཐེག་ཆེན་གྱི་སྒྲུབ་པ་ཁོ་ནའི་རྟེན་བྱེད་ཀྱི་ཐེག་པ་གཞན་གྱི་སྒྲུབ་པའི་རྟེན་བྱེད་པ་མི་སྲིད་པའི་ཕྱིར་རོ། །དེའི་འོག་ཏུ་སྒྲུབ་པའི་དམིགས་པ་སྟོན་ཏེ། ཐེག་པ་གཞན་དུ་འགྱུར་མི་སྲིད་པའི་སྒྲུབ་པ་དེས་ཆོས་ཐམས་ཅད་ལ་སྒྲོ་འདོགས་གཅོད་དགོས་པའི་ཕྱིར་རོ། །དེའི་འོག་ཏུ་ཆེད་དུ་བྱ་བ་སྟོན་ཏེ། དམིགས་པ་བདེན་བཞི་ལ་སྒྲོ་འདོགས་གཅོད་པའི་ཆེད་དུ་བྱ་བ་དེ་ཆེན་པོ་གསུམ་དུ་མ་ངེས་ཀྱང་དམིགས་པ་ཆོས་ཐམས་ཅད་ལ་སྒྲོ་འདོགས་གཅོད་པའི་ཆེད་དུ་བྱ་བ་དེ་ཆེན་པོ་གསུམ་དུ་ངེས་པའི་ཕྱིར་རོ། །དེའི་འོག་ཏུ་གོ་སྒྲུབ་སྟོན་པ་སོགས་ནི་འོག་ཏུ་བཤད་པར་བྱའོ། །གསུམ་པ་སོ་སོའི་དོན་ལ་བཅུ་ལས། དང་པོ་སེམས་བསྐྱེད་ལ་ཡང་གཉིས་ཏེ། གཞུང་གིས་ཇི་ལྟར་བསྟན་པའི་ཚུལ་དང་། དཀའ་བའི་གནས་ལ་དཔྱད་པའོ། །དང་པོ་ནི། སེམས་བསྐྱེད་པ་ནི། ཞེས་པའི་སེམས་བསྐྱེད་དེ་གང་ཞེ་ན། དེའི་མཚན་ཉིད་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པས་བསྟན་ཏོ། །འོ་ན་གོང་དུ་སྟོན་པས་འདི་ལས་བཤད་པ་གང་། ཞེས་གསུངས་པས་སེམས་བསྐྱེད་ཀྱི་མཚན་ཉིད་དེ་སྟོན་པས་ཤེར་ཕྱིན་གྱི་མདོ་ལས་ཇི་ལྟར་བཤད་པ་དེ་ཉིད་བསྟན་བཅོས་འདིར་བདེ་བླག་ཏུ་རྟོགས་པའི་ཕྱིར་ཇི་ལྟར་བསྟན་སྙམ་ན། སེམས་བསྐྱེད་ཀྱི་དམིགས་པ་བྱང་ཆུབ་དང་གཞན་དོན་གཉིས་པོ་དེ་ནི་ཡུམ་གྱི་མདོ་ཇི་ལྟ་བ་བཞིན་དུ་མངོན་པར་རྟོགས་པའི་རྒྱན་གྱི་ངག་གིས་བསྡུས་པ་དང་རྒྱས་པ་གཉིས་ཀྱི་སྒོ་ནས་བརྗོད་པར་བྱའོ། །ཞེས་ཤེར་ཕྱིན་གྱི་མདོ་དང་སྦྱར་བ་ནི། དེ་དང་དེ་ནི་མདོ་བཞིན་དུ། །ཞེས་སོགས་ཚིག་རྐང་གཉིས་སོ། །བསྟན་བཅོས་ཀྱིས་བསྡུས་པ་དང་། རྒྱས་པའི་སྒོ་ནས་བརྗོད་པ་དེ་ཡང་གང་ཞེ་ན། དེ་ཡང་ས་གསེར་ཟླ་བ་མེ། །ཞེས་སོགས་སོ། །ཚུལ་ཇི་ལྟར་དུ་སྟོན་ན། ས་ལྟ་བུའི་སེམས་བསྐྱེད་དེ། སེམས་བསྐྱེད་ཀྱི་དམིགས་པ་གཞན་དོན་དང་བྱང་ཆུབ་གཉིས་ཀ་མདོར་བསྡུས་ནས་སྟོན་ཏེ། ཤཱ་རིའི་བུ་འདི་ལ་བྱང་སེམས་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ་ཞེས་པས་བྱང་ཆུབ་མདོར་སྟོན་ཅིང་། བྱང་སེམས་ཆེན་པོ་ཕྱོགས་བཅུ་རེ་རེ་ཞིང་གདྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ན་སེམས་ཅན་གང་ཞིག་ཡོད་པ་དེ་དག་ཐམས་ཅད་ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པས་གཞན་དོན་མདོར་བསྟན་པ་ཡིན་ལ། འདིར་དེ་གཉིས་ཀའི་དོན་བསྡུས་ནས་ས་ལྟ་བུའི་སེམས་བསྐྱེད་དུ་བསྟན་པའི་ཕྱིར་རོ། །དེས་ན་ཆོས་དཀར་པོ་ཐམས་ཅད་ཀྱི་གཞིའི་དངོས་པོར་གྱུར་པ་གསུངས་པའི་ཆོས་དཀར་པོ་ནི་བྱང་ཆུབ་དང་གཞན་དོན་གཉིས་ཀ་ལ་འཇོག་དགོས་སོ། །ཉིར་སྣང་དུ། གཞན་དོན་མདོར་བསྟན་གྱི་མདོ་འདི་མེ་ལྟ་བུའི་སེམས་བསྐྱེད་ཀྱི་འོག་ཏུ་འབྱུང་བ་ནི་གཞན་དོན་མདོར་བསྟན་དང་རྒྱས་བཤད་སྒྲིག་པའི་དབང་དུ་བྱས་པ་ཡིན་གྱི། རྒྱན་གྱི་ངག་ལ་སྦྱོར་བའི་ཆོས་ལྟ་བུ་ལས་གཞན་དུ་སྦྱོར་དུ་མེད་དོ། །གསེར་བཟང་པོ་དང་། ཟླ་བ་ཚེས་པ་དང་། མེ་ལྟ་བུའི་སེམས་བསྐྱེད་གསུམ་གྱིས་ནི་བྱང་ཆུབ་རྒྱས་པར་བསྟན་པ་ཡིན་ཏེ། དང་པོས་བྱང་ཆུབ་ཀྱི་ངོ་བོ་ཕར་ཕྱིན་དྲུག་ཏུ་ཕྱེ་ནས་བསྟན། གཉིས་པས་བྱང་ཆུབ་ཀྱི་ངོ་བོ་བྱང་ཕྱོགས་སོ་བདུན་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དུ་ཕྱེ་ནས་བསྟན། གསུམ་པས་བྱང་ཆུབ་ཀྱི་ངོ་བོ་མཁྱེན་པ་གསུམ་དུ་ཕྱེ་ནས་བསྟན་པའི་ཕྱིར་རོ། །གཏེར་ལྟ་བུ་མན་ཆད་ཀྱི་སེམས་བསྐྱེད་ཀྱི་དམིགས་པ་གཞན་དོན་རྒྱས་པར་བསྟན་པ་ཡིན་ཏེ། གཞན་དོན་དུ་ཤེར་ཕྱིན་ལ་སློབ་ཚུལ་དཔེ་དུ་མའི་སྒོ་ནས་བསྟན་པའི་ཕྱིར་རོ། །དེས་ན་དེ་དང་དེ་ནི་ཞེས་པ་ནི་སེམས་བསྐྱེད་ཀྱི་དམིགས་པ་བྱང་ཆུབ་དེ་དང་། གཞན་དོན་དེ་ནི་མདོ་བཞིན་དུ་ཅེས་པ་ནི། མདོ་ལས་དམིགས་པ་གཉིས་པོ་དེ་བསྡུས་པ་དང་། རྒྱས་པ་གཉིས་གཉིས་ཀྱི་སྒོ་ནས་བསྟན་པ་བཞིན་དུ། བསྡུས་དང་རྒྱས་པའི་སྒོ་ནས་བརྗོད་ཅེས་པ་ནི་རྒྱན་གྱི་ངག་གིས་ཀྱང་བསྡུས་པ་དང་། རྒྱས་པ་གཉིས་གཉིས་ཀྱི་སྒོ་ནས་བརྗོད་ཅེས་པའི་དོན་ཏོ། །རྒྱན་གྱི་ངག་དེ་ཡང་ས་གསེར་ཟླ་བ་མེ་ཞེས་སོགས་དང་འབྲེལ་ལོ། །རྒྱན་གྱི་ངག་གཉིས་པོའི་ངོས་འཛིན་ལ་བསྡུས་ཏེ་བརྗོད་པ་ནི་མཚན་ཉིད་སྟོན་པའི་གཞུང་དང་། རྒྱས་པར་སྟོན་པ་ནི་དབྱེ་བ་སྟོན་པའི་གཞུང་ལ་མཛད་པ་ནི་མི་འཐད་དེ། མཚན་ཉིད་སྟོན་པའི་སྐབས་ཀྱི་དམིགས་པ་གཉིས་པོ་དེ་མདོ་དང་སྦྱར་བར་བྱར་མེད་ན། སྟོན་པས་འདི་ལས་བཤད་པ་གང་། །ཞེས་པ་དང་འགལ་ཞིང་། ཡོད་ན་ཇི་ལྟར་ཡིན་ཞེ་ན། ཡུམ་གྱི་མདོ་ཇི་ལྟ་བ་བཞིན་དུ་བསྡུས་པ་དང་། རྒྱས་པ་གཉིས་ཀྱི་སྒོ་ནས་བརྗོད་པར་བྱའོ། །ཞེས་པའི་དོན་ཡིན་པའི་ཕྱིར་དང་། བརྗོད་ཅེས་པའི་མཇུག་ཐོག་དེ་མ་ཐག་ཏུ་དེ་ཡང་ཞེས་པའི་ཚིག་སྦྱོར་འབྱུང་བའི་ཕྱིར་དང་། སེམས་བསྐྱེད་ཀྱི་མདོ་སྦྱོར་གྱི་ཐོག་མ་ས་ལྟ་བུའི་སེམས་བསྐྱེད་ནས་འཛིན་པར་ཉིར་སྣང་ལས་བཤད་འདུག་པའི་ཕྱིར་རོ། །དེ་ལས་གཞན་དུ་དབྱེ་བ་སྟོན་པའི་གཞུང་ལ་རྒྱས་བཤད་དུ་ངོས་འཛིན་ནི། བྱང་ཆུབ་མདོར་བསྟན་གྱི་མདོ་དང་། ས་ལྟ་བུའི་སེམས་བསྐྱེད་སྦྱར་ནས་གསུངས་པ་དང་འགལ་ལོ། །འོ་ན་མཚན་ཉིད་སྟོན་པའི་གཞུང་ལ་མདོ་སྦྱོར་མེད་དམ་ཞེ་ན་སེམས་བསྐྱེད་ཉེར་གཉིས་ཀྱི་ཐད་ཀྱི་མདོ་ཐམས་ཅད་མཚན་ཉིད་སྟོན་པའི་གཞུང་གི་མདོ་སྦྱོར་ཡིན་ཏེ། དཔེར་ན་དམིགས་པ་མི་རྟག་ལ་སོགས་པ་ཞེས་པ་མན་ཆད་ཀྱི་མདོ་ལས་ལོགས་སུ་ངེས་འབྱེད་ཆ་མཐུན་མདོར་བསྟན་གྱི་མདོ་སྦྱོར་མེད་ཀྱང་མདོར་བསྟན་ལ་མདོ་མེད་མི་དགོས་པ་བཞིན་ནོ། །གཞན་དོན་བསྡུས་ཏེ་སྟོན་པའི་རྒྱན་གྱི་ངག་ཀྱང་ས་ཞེས་པའི་རྒྱན་ཚིག་དེ་ཉིད་ཡིན་ཏེ། གསེར་ལྟ་བུ་ལ་སོགས་པ་གསུམ་པོ་དེས་ནི་བྱང་ཆུབ་རྒྱས་པར་བཤད་ཅིང་། གཏེར་ལྟ་བུ་མན་ཆད་ཀྱིས་གཞན་དོན་རྒྱས་པར་བཤད་པས་གཞན་དོན་མདོར་བསྡུས་པའི་ངག་གཞན་མེད་པའི་ཕྱིར་རོ། །དེས་ན་སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་སུ་བསྟན་པའི་སེམས་བསྐྱེད་དང་། ས་ཞེས་པའི་སྐབས་ནས་བསྟན་པའི་སེམས་བསྐྱེད་གཉིས་པོ་ཡིན་ཁྱབ་མཉམ་དུ་འདོད་དགོས་ཏེ། གཞུང་སྔ་མས་སེམས་བསྐྱེད་དེས་གཞན་དོན་དང་བྱང་ཆུབ་གཉིས་ལ་དམིགས་པར་བསྟན་ནས། དམིགས་པ་གཉིས་པོ་དེ་ཉིད་ས་ཞེས་པའི་ཚིག་གིས་མདོར་བསྟན། གསེར་ཞེས་པ་མན་ཆད་ཀྱིས་རྒྱས་པར་བཤད་པའི་ཕྱིར་རོ། །ཚོགས་ལམ་ཆུང་ངུས་བསྡུས་པར་བཤད་པ་དང་འགལ་ལོ་ཞེ་ན། མ་མཐའ་ངོས་འཛིན་པ་ཡིན་པས་སྐྱོན་མེད་དེ། གཞན་དུ་ན་ས་གཉིས་པ་ཡན་ཆད་དུ་སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་མེད་པར་ཐལ་བའི་ཕྱིར་རོ། །བསྟན་བཅོས་རྩ་བར་སེམས་བསྐྱེད་མདོ་དང་སྦྱར་བ་ནི་གདམས་ངག་ནས་ཕྲིན་ལས་ཀྱི་བར་རྣམས་ཀྱང་མདོ་དང་སྦྱར་བར་བྱ་བ་ཡིན་ནོ། །ཞེས་ཤེས་པའི་ཆེད་ཡིན་ལ་དངོས་སུ་མ་སྦྱར་བ་ནི་ཚིག་མང་དུ་དོགས་པའི་ཕྱིར་རོ། །མདོ་དང་སྦྱར་བའི་དགོས་པ་ནི་རྗེས་འཇུག་གི་གདུལ་བྱ་རྣམས་ཀྱིས་རྒྱལ་བའི་བཀའ་ལ་མ་ལྟོས་པར་ཞེན་ལྟའི་དབང་གིས་བསྟན་བཅོས་རང་དགར་བརྩམ་པ་དགག་པའི་ཆེད་ཡིན་ཏེ། སྔར་ཡང་བཤད་ཟིན་ཅིང་། རྒྱུད་བླར་ཡང་འབྱུང་ངོ་། །གཉིས་པ་དཀའ་བའི་གནས་ལ་དཔྱད་པ་ལ། མཚན་གཞི་སེམས་སེམས་བྱུང་གང་ཡིན་དཔྱད། སྨོན་འཇུག་གཉིས་འགལ་མི་འགལ་ལ་དཔྱད། དེ་དང་དོན་དམ་སེམས་བསྐྱེད་ཀྱི་གཞི་མཐུན་ཡོད་མེད་དཔྱད་པ་དང་གསུམ་ལས། དང་པོ་ནི་འཕགས་སེང་གཉིས་ཀྱིས་གཙོ་བོ་སེམས་སུ་བཞེད་དེ། ཉིར་སྣང་དུ། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ། རྣམ་པར་རིག་པའོ་རྣམ་པར་ཤེས་པ་དེ་ཡང་གང་ཞེ་ན་ཡིད་ཀྱི་རྣམ་པར་ཤེས་པ་སྟེ་དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་དང་། སློབ་དཔོན་གྱིས་འདོད་པ་སེམས་བྱུང་ཡིན་པའི་ཕྱིར་ན་སེམས་བསྐྱེད་ཡིན་པར་འགལ་ལོ་ཞེས་པའི་དོགས་པ་བཀོད་ནས་བདེན་མོད་ཀྱི་ཞེས་པའི་ལན་མཛད་པའི་ཕྱིར་དང་། ཡང་དག་རྫོགས་པའི་བྱང་ཆུབ་འདོད་ཅེས་པའི་འདོད་པ་དེ་སེམས་བསྐྱེད་ཀྱི་བཏགས་མིང་ཡིན་གྱི་སེམས་བྱུང་སེམས་བསྐྱེད་དུ་སྟོན་པ་མ་ཡིན་པར་བཤད་པའི་ཕྱིར་རོ། །མགོན་པོ་བྱམས་པས་སེམས་བྱུང་ལ་བཤད་དེ། འདིར་ཡང་ཡང་དག་རྫོགས་པའི་བྱང་ཆུབ་འདོད་ཅེས་དང་། མདོ་སྡེ་རྒྱན་དུ། དོན་གཉིས་ལྡན་པའི་སེམས་བྱུང་བ། །ཞེས་གསུངས་པའི་ཕྱིར། ཐོགས་མེད་སྐུ་མཆེད་ཀྱང་འདི་ཉིད་བཞེད་དེ། བྱང་སར་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ་ཞེས་དང་། དོན་གཉིས་ལྡན་པའི་སེམས་བྱུང་བ་ཞེས་པའི་འགྲེལ་པར། དབྱིག་གཉེན་གྱིས་ཡོན་ཏན་གཉིས་སམ་གསུམ་ལ་དམིགས་པའི་སེམས་པ་ནི་སེམས་བསྐྱེད་པའོ་ཞེས་གསུངས་པའི་ཕྱིར་རོ། །གནད་ཀྱི་དོན་ནི་གཙོ་བོར་སེམས་བྱུང་འདུན་པ་དང་། སེམས་པ་གཉིས་ལ་འཇོག་དགོས་ཏེ། ཡང་དག་རྫོགས་པའི་བྱང་ཆུབ་འདོད་ཅེས་པའི་འདོད་པ་དེ་འདུན་པ་ཡིན་པའི་ཕྱིར་དང་། དོན་གཉིས་ལྡན་པའི་སེམས་བྱུང་བ་ཞེས་པའི་སེམས་བྱུང་དེ་དབྱིག་གཉེན་གྱིས་སེམས་པ་ལ་བཤད་པའི་ཕྱིར་དང་། ཐོགས་མེད་ཀྱིས་ནི་དེ་གཉིས་ཀ་ལ་བཤད་པའི་ཕྱིར། ཇི་ལྟར་ཞེ་ན། སྨོན་ལམ་གྱི་མཆོག་སེམས་བསྐྱེད་དུ་བཤད་ཅིང་སྨོན་ལམ་དེ་ཡང་མདོ་སྡེ་རྒྱན་དུ། བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་སེམས་པ་དང་འདུན་པ་གཉིས་སུ་བཤད་པའི་ཕྱིར་རོ། །འོ་ན་སེམས་བསྐྱེད་དེ་སེམས་བྱུང་གཉིས་པོ་དེར་ངེས་སམ་ཞེ་ན། སེམས་བྱུང་གཉིས་པོ་དེ་སེམས་བསྐྱེད་དུ་ནམ་ཞིག་སོང་བའི་ཚེ་དེ་དང་མཚུངས་ལྡན་གྱི་སེམས་སེམས་བྱུང་གཞན་རྣམས་ཀྱང་། གཞན་སྟོབས་ཀྱིས་སེམས་བསྐྱེད་དུ་སོང་བ་ཡིན་ཏེ། རྣམ་ཤེས་ཚོགས་བརྒྱད་དང་། སེམས་བྱུང་ལྔ་བཅུ་རྩ་གཅིག་ལྟ་བུ་སེམས་སེམས་བྱུང་གི་ལྡོག་པ་ནས་མ་སྨོས་པའི་སྐྱབས་འགྲོ་དང་། སེམས་བསྐྱེད་དང་། སྦྱོར་བ་དང་། སྒྲུབ་པ་ལ་སོགས་པ་རྣམས་གཙོ་བོར་སེམས་བྱུང་གི་སྟེང་ནས་འཇོག་ཀྱང་གཞན་སྟོབས་ཀྱིས་སེམས་སེམས་བྱུང་གཉིས་ཆར་ཡོད་པ་མངོན་པ་གོང་འོག་སོགས་གསུང་རབ་ཀྱི་དགོངས་པ་ཡིན་པའི་ཕྱིར་རོ། །འདི་ནི་ཚད་ལྡན་གྱི་གཞུང་ལུགས་གཞན་གྱི་དགོངས་པ་ཡང་ཡིན་ཏེ། བྱང་སའི་ཚུལ་ཁྲིམས་ལེའུར། ཉེས་སྤྱོད་སྤོང་བ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་པོ་དེ་འཇུག་པ་སེམས་བསྐྱེད་དུ་གསུངས་ཤིང་གསུམ་པོ་དེས་མ་བསྡུས་པའི་བྱང་སེམས་ཀྱི་ཉམས་ལེན་མེད་པའི་ཕྱིར་རོ། །གཉིས་པ་ནི། ས་སྐྱ་པའི་རྗེ་བཙུན་གོང་མ་རྣམས་ཀྱི་བཞེད་པས་སྤྱིར་སྨོན་པ་ལ། སྨོན་པའི་སེམས། སྨོན་པ་སེམས་བསྐྱེད་པ། སྨོན་པ་མི་ཉམས་པར་སྲུང་བ་དང་གསུམ། འཇུག་པ་ལ་ཡང་འཇུག་པའི་སེམས། འཇུག་པ་སེམས་བསྐྱེད་པ། འཇུག་པ་མི་ཉམས་པར་སྲུང་བ་དང་གསུམ་དུ་མཛད་ནས་སྨོན་འཇུག་གཉིས་ཀྱི་ཁྱད་པར་ནི་སེམས་ཅན་གྱི་དོན་དུ་སངས་རྒྱས་ཐོབ་པར་འདོད་པ་དང་། སངས་རྒྱས་ཐོབ་པའི་ཆེད་དུ་ལམ་སྒྲུབ་པར་འདོད་པ་ཡིན་པས་བློ་གཉིས་པོ་དེ་རྒྱུད་ལ་སྐྱེས་ནས་སྡོམ་པས་མ་ཟིན་པའི་ཚེ་ན་སྨོན་པ་དང་། འཇུག་པའི་སེམས་ཙམ་དང་། སྡོམ་པས་ཟིན་པའི་ཚེ་ན་སྨོན་པ་དང་། འཇུག་པའི་སེམས་བསྐྱེད་དང་། དེ་མན་ཆད་དུ་ཉམས་སུ་ལེན་པ་ཐམས་ཅད་སྨོན་པ་མི་ཉམས་པར་སྲུང་བ་དང་། འཇུག་པ་མི་ཉམས་པར་སྲུང་བ་ཡིན་ནོ། །ཞེས་བཞེད་དོ། །དེས་ན་སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་དང་། ཐེག་ཆེན་གྱི་ཚོགས་ལམ་དུ་ཞུགས་པ་དུས་མཉམ་སྟེ། སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་ལ་སྡོམ་པས་ཟིན་པའི་སེམས་བསྐྱེད་རྒྱུད་ལ་སྐྱེ་དགོས་ཤིང་དེ་སྐྱེས་པའི་ཚེ་འགྲོ་བའི་བྱ་བས་ཟིན་པའི་སེམས་བསྐྱེད་སྐྱེས་དགོས་ལ་དེ་ཉིད་ལམ་དུ་ཞུགས་པ་ཡིན་པའི་ཕྱིར་རོ། །སྟོན་པ་དམྱལ་པའི་ཤིང་རྟ་འདྲེན་པའི་གྱད་དུ་འཁྲུངས་པའི་ཚེ་བྱང་ཆུབ་ཏུ་སེམས་བསྐྱེད་པར་བཤད་པ་ལྟ་བུ་ལམ་མ་ཞུགས་ན་སེམས་བསྐྱེད་ཡོད་པར་བཤད་པ་ནི་སྨོན་པ་དང་འཇུག་པའི་སེམས་ཙམ་ལ་དགོངས་པའམ། གལ་ཏེ་སེམས་བསྐྱེད་མཚན་ཉིད་པ་ཡིན་ན་ནི། དེའི་ཚེ་ལམ་དུ་ཞུགས་པ་ལ་འགལ་བ་མེད་དོ། །སྨོན་འཇུག་གི་སེམས་བསྐྱེད་གཉིས་པོ་རྒྱུད་ལ་སྐྱེས་ནས་ཇི་སྲིད་གནས་ཀྱི་བར་དུ་ངོ་བོ་གཅིག་ཏུ་ལྡན་པ་ཡིན་ཏེ། དེ་གཉིས་དུས་མཉམ་དུ་སྐྱེས་པའི་ཚེ་སྨོན་འཇུག་གི་སེམས་ཙམ་ནི་སེམས་བྱུང་འདུན་པ་དང་སྨོན་འཇུག་གི་སེམས་བསྐྱེད་ཀྱི་གཙོ་བོ་ནི། མི་མཐུན་ཕྱོགས་སྤོང་བའི་སེམས་པའི་སྟེང་ནས་འཇོག་པ་ཡིན་པས། སེམས་པ་དེ་སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་དུ་ནམ་ཞིག་སོང་བའི་ཚེ་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་སེམས་བསྐྱེད་གཉིས་སུ་འགྱུར་བའི་ཕྱིར་རོ། །གལ་ཏེ་སྨོན་པ་སེམས་བསྐྱེད་ཀྱི་ངོ་བོར་གྱུར་པའི་སེམས་བྱུང་སེམས་པ་རྫས་ཐ་དད་པ་དང་། འཇུག་པ་སེམས་བསྐྱེད་ཀྱི་ངོ་བོར་གྱུར་པའི་སེམས་བྱུང་སེམས་པ་གཉིས་ཡོད་པས་ངོ་བོ་གཅིག་པར་ཡང་མ་ངེས་སོ་སྙམ་ན་མི་འཐད་དེ། གཙོ་བོ་སེམས་གཅིག་གི་འཁོར་དུ་སེམས་བྱུང་སེམས་པ། རྫས་ཐ་དད་པ་གཉིས་ཅིག་ཅར་དུ་མི་སྲིད་པའི་ཕྱིར་རོ། །འོ་ན་སྨོན་འཇུག་གི་སེམས་བསྐྱེད་གཉིས་པོ་རྒྱུད་ལ་སྐྱེས་པའི་རྗེས་སུ་རྩ་ལྟུང་བྱུང་ནས་དེ་གཉིས་གཏོང་མི་སྲིད་པར་འགྱུར་ཏེ། དེ་སྐྱེས་པ་དང་ཐེག་ཆེན་གྱི་ཚོགས་ལམ་ཐོབ་པ་དུས་མཉམ་ཞིང་ཐེག་ཆེན་གྱི་ཚོགས་ལམ་ཐོབ་ནས་ལམ་མ་ཞུགས་སུ་འགྱུར་བ་མི་སྲིད་པའི་ཕྱིར་རོ་ཞེ་ན། དེ་ཚོགས་ལམ་གྱི་གནས་སྐབས་སུ་ཡང་རྩ་ལྟུང་གི་དབང་གིས་བསླབ་པ་ལས་ཉམས་ནས་ངན་སོང་དུ་ལྟུང་བ་ཡོད་ཅིང་། སེམས་ཅན་གྱི་དོན་དུ་སངས་རྒྱས་ཐོབ་འདོད་མ་བཏང་ན་སྡོམ་པའི་རྩ་བ་མ་བཏང་བས་ལམ་ཞུགས་མ་ཡིན་པར་ཐལ་བའི་སྐྱོན་ཡང་མེད་དོ། །སྨོན་འཇུག་གི་སེམས་བསྐྱེད་མཚན་ཉིད་པ་ཡིན་ན་སྡོམ་པས་ཟིན་པ་དགོས་ན། སྤྱོད་འཇུག་ཏུ། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །ཞེས་གསུངས་པ་དང་འགལ་ལོ་ཞེ་ན་སྐྱོན་མེད་དེ། སྨོན་པའི་སེམས་ནི་སྡོམ་པས་མ་ཟིན་པའི་སྨོན་པའི་སེམས་ཙམ་ལ་དགོངས་ཤིང་། ཇི་ལྟར་འཇུག་པའི་སེམས་བཞིན་དུ་ཞེས་པ་ནི་དེ་ཉིད་སྡོམ་པས་ཟིན་ནས་ལམ་ལ་འཇུག་པ་ལ་དགོངས་པའི་ཕྱིར་ཏེ། དེ་ཉིད་ཀྱི་མཇུག་ཏུ་གང་ནས་བཟུང་སྟེ་སེམས་ཅན་ཁམས་མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་པའི་ཕྱིར་རོ། །སྨོན་འཇུག་གི་སེམས་བསྐྱེད་མཚན་ཉིད་པ་ཐེག་ཆེན་གྱི་ཚོགས་ལམ་ནས་རྒྱུན་མཐའི་བར་དུ་གཞག་པ་ཁྱད་པར་མེད་ན། སྤྱོད་འཇུག་ཏུ། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་དང་འགལ་ལོ་ཞེ་ན་སྐྱོན་མེད་དེ། གཞུང་དེས་ཐེག་ཆེན་གྱི་ལམ་དུ་ཞུགས་ནས་སངས་རྒྱས་མ་ཐོབ་ཀྱི་བར་དུ་བྱང་ཆུབ་ཏུ་འགྲོ་བར་འདོད་པའི་བློ་དང་། འགྲོ་བའི་བྱ་བས་ཟིན་པ་གཉིས་ཡོད་པ་ལ། སྨོན་འཇུག་གཉིས་སུ་གཞག་པར་བསྟན་པས་ལུགས་འདི་ཉིད་ཡིན་པའི་ཕྱིར་རོ། །དེ་ལས་གཞན་དུ་འགྲོ་བའི་བྱ་བས་ཟིན་པའི་ཚེ་འགྲོ་བར་འདོད་པའི་བློ་མེད་པ་ནི་ཤིན་ཏུ་མི་འཐད་དེ། འདི་ནི་འཇིག་རྟེན་གྱི་འགྲོ་བར་འདོད་པ་དང་། འགྲོ་བ་དཔེར་བྱས་པ་ཡིན་པས་འཇིག་རྟེན་ན་འགྲོ་བའི་བྱ་བས་ཟིན་ཀྱང་འགྲོ་བར་འདོད་པའི་བློ་མེད་ན་དེ་ཉིད་དུ་གནས་པའམ། ཕྱིར་ལྡོག་པར་མྱོང་བས་གྲུབ་པའི་ཕྱིར་རོ། །འགྲོ་བའི་བྱ་བས་མ་ཟིན་པའི་གོང་དུ་འགྲོ་བར་འདོད་པའི་བློ་ཙམ་ཡོད་པ་ནི་སྨོན་པའི་སེམས་ཙམ་ཡོད་པ་དང་མཚུངས་སོ། །འདི་ནི་འཕགས་སེང་གཉིས་ཀྱི་དགོངས་པ་ཡང་ཡིན་ཏེ། འཕགས་པས་སེམས་བསྐྱེད་པ་ནི་གཞན་དོན་ཕྱིར། །ཞེས་པའི་སྐབས་ཀྱི་དམིགས་ཡུལ་བྱང་ཆུབ་མདོར་བསྡུས་པ་དེ་འདུན་ལྡན་སེམས་བསྐྱེད་ལ་གཞག་ཅིང་། སློབ་དཔོན་གྱིས་ནི་སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་ཀྱི་སེམས་བསྐྱེད་ལ་སྨོན་འཇུག་གཉིས་སུ་བཤད་ནས། དེ་ཉིད་དཔེའི་སྒོ་ནས་ཉེར་གཉིས་སུ་བྱས་པའི་མ་མཐའི་ས་མཚམས་ཐེག་ཆེན་གྱི་ཚོགས་ལམ་ནས་གཞག་པའི་ཕྱིར་རོ། །འོ་ན་སེམས་བསྐྱེད་ཐ་མ་གསུམ་པོ་དེ་ལ་སྨོན་འཇུག་གཉིས་ཀྱིས་ཁྱབ་པར་འགྱུར་ཞིང་། དེའང་འདོད་ན་སངས་རྒྱས་ཀྱི་སར་གཞག་པ་དང་འགལ་ལོ་ཞེ་ན་སློབ་དཔོན་གྱིས་ནི་དོན་བདུན་ཅུའི་ཐོག་མ་སེམས་བསྐྱེད་དང་། བར་དུ་ཚོགས་སྒྲུབ་ཀྱི་སྐབས་སུ་སྟོང་ཉིད་ཉི་ཤུའི་ཡུལ་ཅན་ཡེ་ཤེས་དང་། ཐ་མ་ཕྲིན་ལས་དང་གསུམ་གྱི་ས་མཚམས་ཐེག་ཆེན་གྱི་ཚོགས་ལམ་ནས་སངས་རྒྱས་ཀྱི་སའི་བར་དུ་གཞག་པས་དོན་གཞན་རྣམས་ཀྱི་ས་མཚམས་ཀྱང་བདེ་བླག་ཏུ་རྟོགས་པ་ལ་དགོངས་ནས་སངས་རྒྱས་ཀྱི་སར་གཞག་པ་ཡིན་གྱི་བྱང་སེམས་ཀྱི་རྒྱུད་ལ་དེ་གསུམ་མེད་པ་ནི་མ་ཡིན་ཏེ། ཤེར་ཕྱིན་གྱི་མདོ་དང་། མདོ་སྡེ་རྒྱན་དུ། སེམས་བསྐྱེད་ཉེར་གཉིས་པོ་ཐམས་ཅད་བྱང་སེམས་ཀྱི་རྒྱུད་ལ་གཞག་པའི་ཕྱིར་དང་། སྤྲིན་ལྟ་བུའི་སེམས་བསྐྱེད་ནི་ས་བཅུ་པ་ཆོས་ཀྱི་སྤྲིན་ལ་འཇོག་པ་སྐབས་ཀྱི་དོན་ཡིན་པའི་ཕྱིར། ཐེག་ཆེན་གྱི་ལམ་དུ་འཇུག་ཁ་མའི་དུས་སུ་སྨོན་འཇུག་གི་སེམས་ཙམ་ཡོད་ལ་དེའི་འབྲས་བུར་གྱུར་པའི་སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་དང་ཐེག་ཆེན་ལམ་དུ་ཞུགས་པ་དུས་མཉམ་པ་ཡང་འཕགས་སེང་གཉིས་ཀྱི་བཞེད་པ་ཡིན་ཏེ། ཐེག་ཆེན་སེམས་བསྐྱེད་ལ་འདོད་པའི་མིང་གིས་བཏགས་པ་དེ་རྒྱུ་མིང་འབྲས་བུ་ལ་བཏགས་པར་བཞེད་པའི་ཕྱིར་དང་། དེ་ལས་གཞན་དུ་དུས་མཉམ་ཡིན་ན། རྒྱུ་མིང་འབྲས་བུ་ལ་བརྟགས་པར་མི་རུང་བའི་ཕྱིར་རོ། །གསུམ་པ་ནི། དེང་སང་ཕལ་ཆེར་སྨོན་འཇུག་གཉིས་པོ་དེ་ཀུན་རྫོབ་སེམས་བསྐྱེད་ཀྱི་དབྱེ་བར་བྱས་ནས་དེ་གཉིས་ལ་ཀུན་རྫོབ་སེམས་བསྐྱེད་ཀྱིས་ཁྱབ་ཅིང་། དེ་གཉིས་དང་དོན་དམ་སེམས་བསྐྱེད་ཀྱི་གཞི་མཐུན་མེད་པར་འདོད་དོ། །དེ་ནི་མི་འཐད་དེ། སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་ནས་བསྟན་པའི་བྱང་ཆུབ་སེམས་དཔའི་རྒྱུད་ཀྱི་སེམས་བསྐྱེད་ཐམས་ཅད་སྨོན་འཇུག་གཉིས་ཀྱིས་བསྡུས་ཤིང་གཞུང་དེས་ཐེག་ཆེན་སེམས་བསྐྱེད་སྤྱིའི་མཚན་ཉིད་བསྟན་པ་ཡིན་གྱི། ཀུན་རྫོབ་སེམས་བསྐྱེད་ཁོ་ནའི་མཚན་ཉིད་བསྟན་པ་མ་ཡིན་པའི་ཕྱིར་རོ། །དེས་ན་སྨོན་འཇུག་གི་སེམས་བསྐྱེད་གཉིས་ཀྱིས་བྱང་སེམས་ཀྱི་རྒྱུད་ཀྱི་སེམས་བསྐྱེད་ཉེར་གཉིས་པོ་ཐམས་ཅད་ཀྱང་བསྡུས་ཤིང་དོན་དམ་སེམས་བསྐྱེད་ཀྱང་སེམས་བསྐྱེད་ཉེར་གཉིས་ཀྱིས་བསྡུས་པས། ཕར་ཕྱིན་དྲུག་དང་ལྡན་པའི་སེམས་བསྐྱེད་ལས་གཞན་དུ་འགྱུར་བའི་བྱང་སེམས་འཕགས་པའི་སེམས་བསྐྱེད་མེད་པའི་ཕྱིར་རོ། །ཐོགས་མེད་ཀྱི་བཞེད་པ་ཡང་ཡིན་ཏེ། བྱང་སའི་ཚུལ་ཁྲིམས་ལེའུར་བྱང་ཆུབ་སེམས་དཔའི་ཉེས་སྤྱོད་སྤོང་བ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་པོ་དེ་འཇུག་པ་སེམས་བསྐྱེད་དུ་གསུངས་ཤིང་། དོན་དམ་སེམས་བསྐྱེད་ཀྱང་གསུམ་པོ་དེའི་ནང་དུ་འདུས་པའི་ཕྱིར་ཏེ། དགེ་བ་ཆོས་སྡུད་ཀྱི་ཚུལ་ཁྲིམས་ཀྱི་ནང་དུ་འདུས་པའི་ཕྱིར། གནད་ཀྱི་དོན་ནི་འདི་ཡིན་ཏེ། ས་དང་པོའི་མཉམ་གཞག་གི་ངོ་བོར་གྱུར་པའི་གཙོ་སེམས་གཅིག་གི་འཁོར་དུ་ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག་སྟེ་སེམས་བྱུང་ཉེར་གཅིག་འབྱུང་ལ། ཀུན་འགྲོ་ལྔའི་ནང་ཚན་དུ་གྱུར་པའི་སེམས་པ་དང་། ཡུལ་ངེས་ལྔའི་ནང་ཚན་དུ་གྱུར་པའི་འདུན་པ་དེ་སྨོན་འཇུག་གི་སེམས་བསྐྱེད་དུ་སོང་བའི་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་སྨོན་འཇུག་གི་སེམས་སེམས་བྱུང་དུ་འགྱུར་བ་གོང་དུ་བཤད་ཟིན་ཏོ། །ཡུལ་ངེས་ལྔའི་ནང་ཚན་དུ་གྱུར་པའི་ཏིང་ངེ་འཛིན་དང་། ཤེས་རབ་གཉིས་པོ་དེ་རྣམ་པར་མི་རྟོག་པའི་ཡེ་ཤེས་སུ་སོང་བའི་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་དོན་དམ་སེམས་བསྐྱེད་དུ་སྒྱུར་བར་བྱེད་དོ། །དེས་ན་ས་དང་པོའི་མཉམ་གཞག་གིས་བསྡུས་པའི་སེམས་སེམས་བྱུང་ཐམས་ཅད་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་དང་མཚུངས་ལྡན་དང་བཅས་པའི་ཆ་ནས་སྨོན་པ་སེམས་བསྐྱེད་དང་། བྱང་ཆུབ་ཀྱི་ཆེད་དུ་ལམ་སྒྲུབ་པའི་སེམས་པ་མཚུངས་ལྡན་དང་བཅས་པའི་ཆ་ནས་འཇུག་པ་སེམས་བསྐྱེད། རྣམ་པར་མི་རྟོག་པའི་ཡེ་ཤེས་ཀྱི་ངོ་བོར་གྱུར་པའི་ཆ་ནས་དོན་དམ་སེམས་བསྐྱེད་དུ་འཇོག་པ་ནི་ཚད་ལྡན་གྱི་གཞུང་ལུགས་རྣམས་ཀྱི་དགོངས་པ་ཕྱོགས་གཅིག་པ་ཡིན་ནོ། །འོ་ན་ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་པོ་མི་འགལ་བར་འགྱུར་ཏེ། སྨོན་འཇུག་གཉིས་པོ་དང་དོན་དམ་སེམས་བསྐྱེད་མི་འགལ་བའི་ཕྱིར་ཞེ་ན། སྨོན་འཇུག་གི་སེམས་བསྐྱེད་ལ་ཀུན་རྫོབ་སེམས་བསྐྱེད་ཀྱིས་མ་ཁྱབ་པས་སྐྱོན་མེད་དོ། །ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་ནི་ངོ་བོ་ཐ་དད་ཡིན་ཏེ། སྔ་མ་ནི། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་པ་ལྟར་ཡིན་ལ་ཕྱི་མ་ནི། རྫོགས་པའི་སངས་རྒྱས་རབ་བསྙེན་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་པ་ལྟར་ཡིན་པའི་ཕྱིར་རོ། །དེ་ལྟར་བྱས་ན་བྱང་སེམས་སོ་སྐྱེའི་རྒྱུད་ཀྱི་སེམས་བསྐྱེད་ཐམས་ཅད་དང་། བྱང་སེམས་འཕགས་པའི་རྗེས་ཐོབ་ཀྱི་སེམས་བསྐྱེད་ཐམས་ཅད་སྨོན་འཇུག་གི་སེམས་བསྐྱེད་དང་། ཀུན་རྫོབ་སེམས་བསྐྱེད་ཀྱི་གཞི་མཐུན་ཡིན་ལ། བྱང་སེམས་འཕགས་པའི་རྒྱུད་ཀྱི་ཆོས་ཉིད་ལ་མཉམ་པར་གཞག་པའི་སེམས་བསྐྱེད་ཐམས་ཅད་སྨོན་འཇུག་གི་སེམས་བསྐྱེད་དང་། དོན་དམ་སེམས་བསྐྱེད་ཀྱི་གཞི་མཐུན་ཡིན་ནོ། །མདོར་བསྡུས་ན་ཐེག་ཆེན་སེམས་བསྐྱེད་ཀྱི་མཚན་ཉིད་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བའོ། །བྱང་སེམས་གྱི་སྡོམ་པའི་མཚན་ཉིད། རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་གང་ཞིག མི་མཐུན་ཕྱོགས་སྤོང་བའི་སེམས་པ་མཚུངས་ལྡན་དང་བཅས་པ་དབང་ལྡན་རྒྱུན་ཆགས་པའོ། །དབྱེ་བ་ལ་ས་མཚམས་ཀྱི་སྒོ་ནས་དབྱེ་ན། མོས་པས་སྤྱོད་པའི་སེམས་བསྐྱེད། ལྷག་བསམ་རྣམ་པར་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞིའོ། །དཔེའི་སྒོ་ནས་དབྱེ་ན་ས་ལྟ་བུ་ནས་སྤྲིན་ལྟ་བུའི་བར་ཉེར་གཉིས་སོ། །དམིགས་ཡུལ་གྱི་སྒོ་ནས་དབྱེ་ན། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས་ཡོད་དེ། འབྲས་བུ་རྫོགས་པའི་བྱང་ཆུབ་ལ་དམིགས་པ་དང་། དེའི་རྒྱུ་ལམ་ལ་དམིགས་པ་གཉིས་ཡོད་པའི་ཕྱིར་རོ། །ངོ་བོའི་སྒོ་ནས་དབྱེ་ན་དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་གཉིས་ཡོད་དེ། རྣམ་པར་མི་རྟོག་པའི་ཡེ་ཤེས་ཀྱིས་བསྡུས་པ་དང་། མ་བསྡུས་པ་གཉིས་སུ་ཡོད་པའི་ཕྱིར་རོ། །སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་ཀྱི་མཚན་ཉིད་རིམ་པ་བཞིན། རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་གང་ཞིག འབྲས་བུ་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་མཚུངས་ལྡན་དང་བཅས་པ་དང་། དེ་གང་ཞིག་བྱང་ཆུབ་ཀྱི་ཆེད་དུ་ལམ་སྒྲུབ་པར་འདོད་པའི་འདུན་པ་མཚུངས་ལྡན་དང་བཅས་པའོ། །དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་ཀྱི་མཚན་ཉིད་རིམ་བཞིན་རྣམ་པར་མི་རྟོག་པའི་ཡེ་ཤེས་ཀྱིས་བསྡུས་པའི་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་དང་། དེས་མ་བསྡུས་པའི་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བའོ། །སེམས་བསྐྱེད་བསྟན་ཟིན་ནས། ད་ནི་གདམས་ངག་བསྟན་པ་ལ་གཉིས་ཏེ། གདམས་ངག་སྟོན་པའི་རྒྱུ་མཚན་དང་། རྒྱུ་མཚན་གྱི་གདམས་ངག་དངོས་བཤད་པའོ། །དང་པོ་ནི། མདོར་བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བགྱི་ཞེས་པ་སྟེ། དེ་ལྟར་སེམས་བསྐྱེད་པའི་གང་ཟག་དེས་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་ཆོས་ཐམས་ཅད་རྫོགས་པའི་ཆེད་དུ་ཤེར་ཕྱིན་ལ་སྒྲུབ་དགོས་ན་ཇི་ལྟར་སྒྲུབ་པར་བགྱི་ཞེས་དྲིས་པའོ། །ལན་ནི་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་ཆོས་ཐམས་ཅད་རྫོགས་པ་ལ་ཤེར་ཕྱིན་ལ་འཇུག་པའི་སྒྲུབ་པ་ཉམས་སུ་ལེན་དགོས་པས་དེ་བརྗོད་བྱར་སྟོན་པའི་གདམས་པ་དང་། རྗེས་སུ་གདམས་པ་གཉིས་འཆད་ཅེས་པ་སྟེ། གདམས་ངག་གི་མདོ་རྫོགས་པའི་མཐར་ཡང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་གདམས་པ་སྟེ། འདི་ནི་རྗེས་སུ་བསྟན་པ་ཡིན་ནོ། །ཞེས་འཆད་པར་འགྱུར་བའི་ཕྱིར་རོ། །དེ་ལ་གདམས་ཞེས་པ་ལས་འཕྲོས་ནས་གང་ཟག་གང་ལ། སྟོན་པ་གང་གིས། སྒྲུབ་པ་གང་ལ། དགོས་པ་གང་གི་ཆེད་དུ་གདམས། གདམས་པ་དང་རྗེས་བསྟན་གྱི་ཁྱད་པར་གང་ཡིན་ཞེ་ན། དང་པོ་ནི་སེམས་བསྐྱེད་ནས་སྒྲུབ་པ་ཉམས་སུ་ལེན་པའི་ཆེད་དུ་གདམས་ངག་དོན་དུ་གཉེར་བའི་གང་ཟག་ལའོ། །གཉིས་པ་ནི་སྤྲུལ་པའི་སྐུ་ལྟ་བུས་སོ། །གསུམ་པ་ནི་ཐེག་ཆེན་གྱི་སྒྲུབ་པ་ལའོ། །བཞི་པ་ནི་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་རང་གཞན་གྱི་དོན་མཐར་ཐུག་པ་འདི་རྫོགས་པའི་ཆེད་དུའོ། །ལྔ་པ་ནི་དེ་ལ་དོན་དུ་གཉེར་བའི་དོན་ཐོབ་པའི་བྱ་བ་ཉེ་བར་སྟོན་པ་ནི་གདམས་པ་དང་རྗེས་སུ་སྟོན་པ་ཡིན་ཏེ། ཐོབ་ཟིན་པའི་ཡོན་ཏན་ཡོངས་སུ་སྐྱོང་བའི་དོན་གྱིས་མི་ཉམས་པར་བྱེད་པ་ནི་གདམས་པ་ཡིན་ལ། དེའི་འོག་ཏུ་མ་ཐོབ་པའི་ཡོན་ཏན་ཐོབ་པར་བྱེད་པའི་ཕྱིར་ན་རྗེས་སུ་བསྟན་པ་ཡིན་ནོ། །གཉིས་པ་གདམས་ངག་དངོས་ནི། སྒྲུབ་དང་བདེན་པ་རྣམས་དང་ནི། །ཞེས་སོགས་ཏེ། འདི་ལ་སྔ་རབས་པ་རྣམས་སྒྲུབ་པའི་ངོ་བོ་དང་། དམིགས་ཡུལ་དང་ཁྱད་པར་གྱི་ཆོས་ལ་འདོམས་པ་གསུམ་དུ་མཛད་ཀྱང་འཕགས་སེང་གཉིས་ཀྱི་དོན་བསྡུའི་གཞུང་ལྟར་ན་སྒྲུབ་པའི་ངོ་བོ་ལ་འདོམས་པ་དང་། ཁྱད་པར་ལ་འདོམས་པ་གཉིས་སུ་འདུས་ཏེ། དམིགས་པ་དང་རྟེན་ལ་སོགས་པ་རྣམས་ཁྱད་པར་གྱི་ཆོས་སུ་མཚུངས་པའི་ཕྱིར་རོ། །དང་པོ་སྒྲུབ་པའི་ངོ་བོ་ལ་འདོམས་པ་ལ་བདེན་པ་གཉིས་ལས་མི་འདའ་བའི་སྒྲུབ་པ་ངོས་གཟུང་། དེ་ཉན་ཐོས་དང་ཐུན་མོང་མ་ཡིན་པར་བསྟན་པ། དེ་ལ་འདོམས་པའི་གདམས་ངག་དངོས་དང་གསུམ་ལས། དང་པོ་ནི་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་སེམས་ཆེན་པོས་ཡུམ་ལ་སྤྱད་པར་བགྱི། བཅོམ་ལྡན་འདས་ཀྱིས་བཀར་སྩལ་པ། ཤཱ་རིའི་བུ་འདི་ལ་བྱང་སེམས་ཆེན་པོ་ཡུམ་ལ་སྤྱོད་པའི་ཚེ་བྱང་སེམས་ཆེན་པོ་ཡོད་བཞིན་དུ་བྱང་སེམས་ཡང་དག་པར་རྗེས་སུ་མི་མཐོང་ངོ་། །བྱང་སེམས་ཀྱི་མིང་ཡང་། བྱང་ཆུབ་ཀྱང་། བྱང་ཆུབ་ཀྱི་མིང་ཡང་། ཡུམ་ཡང་། ཡུམ་གྱི་མིང་ཡང་། སྤྱོད་ཅེས་བྱ་བར། མི་སྤྱོད་ཅེས་བྱ་བར་ཡང་། སྤྱོད་ཀྱང་སྤྱོད་ལ་མི་སྤྱོད་ཀྱང་མི་སྤྱོད་ཅེས་བྱ་བར། སྤྱོད་པ་ཡང་མ་ཡིན་མི་སྤྱོད་པ་ཡང་མ་ཡིན་ཞེས་བྱ་བར། གཟུགས། ཚོར་བ། འདུ་ཤེས། འདུ་བྱེད། རྣམ་པར་ཤེས་པ་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་སེམས་དང་དེའི་མིང་རང་བཞིན་གྱིས་སྟོང་པའི་ཕྱིར་རོ། །ཞེས་སོགས་རྒྱས་པར་གསུངས་སོ། །འདི་དག་གི་དོན་ལ་མདོ་སྡེ་རྒྱན་དང་། ཀུན་བཏུས་དང་། བརྒྱད་སྟོང་དོན་བསྡུས་སོགས་སེམས་ཙམ་པའི་གཞུང་ལུགས་རྣམས་ལས། རྣམ་གཡེང་གི་རྣམ་རྟོག་བཅུའི་གཉེན་པོར་ཤེར་ཕྱིན་རྣམ་པར་མི་རྟོག་པ་བཅུ་བསྒོམ་པ་ལ་སྦྱར་ནས་འཆད་དོ། །ཡུམ་དོན་དབུ་མར་འགྲེལ་བ་རྣམས་ཀྱིས་ནི་བདེན་གཉིས་ལས་མི་འདའ་བའི་སྒྲུབ་པ་བསྟན་པར་བཞེད་དེ། ཉིར་སྣང་དུ། མི་དམིགས་པའི་རྣམ་པ་ཅན་ལ་སྦྱར་བ་ཙམ་མ་གཏོགས་ཀུན་རྫོབ་ཀྱི་བདེན་པ་ལས་མི་འདའ་བ་ལ་སྦྱར་བའི་གསལ་ཀ་མི་སྣང་ཡང་། སློབ་དཔོན་གྱིས་ཀུན་རྫོབ་དང་དོན་དམ་པའི་བདེན་པ་ལས་མི་འདའ་བས་ཞེས་གསུངས་པ་ལྟར་ན། རྔོག་དང་ཨར་གྱིས། བྱང་སེམས་ཆེན་པོ་ཡུམ་ལ་སྤྱོད་པའི་ཚེ་ཞེས་པས་ཀུན་རྫོབ་ཀྱི་བདེན་པ་ལས་མི་འདའ་བ་བསྟན་པར་བཞེད་ཀྱང་། མཁས་གྲུབ་གཡག་པས། བྱང་སེམས་ཆེན་པོ་ཡོད་བཞིན་དུ། །ཅེས་པས་བསྟན་པར་བཞེད་པ་ཉིད་ལེགས་ཏེ། བྱང་ཆུབ་ཀྱི་མིང་ཡོད་བཞིན་དུ་ཞེས་པ་ནས་རྣམ་པར་ཤེས་པ་ཡོད་བཞིན་དུ་ཅེས་པའི་བར་ཐམས་ཅད་ལ་གསལ་བྱེད་དུ་སྦྱར་བར་བྱ་བ་ཡིན་པས་དོན་དམ་དུ་མི་དམིགས་པ་ཐམས་ཅད་ལ་ཡང་ཀུན་རྫོབ་ཏུ་སྣང་བ་ཙམ་མི་འགོག་པའི་ཀུན་རྫོབ་ལས་མི་འདའ་བ་རེ་རེ་འབྱུང་བའི་ཕྱིར་རོ། །དོན་དམ་ལས་མི་འདའ་བ་ནི་བྱང་ཆུབ་སེམས་དཔའ་ལ་སྤྱོད་པ་པོ་བྱང་ཆུབ་སེམས་དཔར་མངོན་པར་ཞེན་པ་དང་། སྤྱོད་པའི་འབྲས་བུ་བྱང་ཆུབ་ཏུ་ཞེན་པ་དང་། སྤྱོད་པར་བྱ་བ་ཤེར་ཕྱིན་དུ་ཞེན་པ་དང་། སྤྱོད་པ་རང་གི་ངོ་བོ་བཟློག་ཟླ་དང་བཅས་པར་ཞེན་པ་དང་། ཤེས་བྱ་ཕུང་པོ་ལྔར་ཞེན་པ་སྟེ་ལྔ་ཡོད་པས་དེའི་གཉེན་པོ་བྱང་སེམས་དང་། བྱང་ཆུབ་དང་། ཡུམ་དང་། སྤྱོད་སོགས་མཐའ་བཞི་དང་། ཕུང་པོ་ལྔར་ཡང་དག་པར་རྗེས་སུ་མི་མཐོང་ངོ་ཞེས་བསྟན་ཏོ། །གཉིས་པ་ནི་མདོར། ཤཱ་རིའི་བུ་གལ་ཏེ་ཕྱོགས་བཅུ་རེ་རེའི་ཞིང་གདྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདིར། དགེ་སློང་ཤཱ་རིའི་བུ་དང་། མོདྒལ་གྱི་བུ་ལྟ་བུ་ཤ་སྟག་གིས་འདི་ལྟ་སྟེ་དཔེར་ན། འདམ་བུ། འོད་མ། བུ་རམ་ཤིང་། སྨྱིག་མ། འབྲས། ཏིལ་གྱི་ཚལ་ལམ་ལྟར་ཡོངས་སུ་གང་བར་གྱུར་ཀྱང་དེ་དག་གི་ཤེས་རབ་གང་ཡིན་པ་དེས་བྱང་སེམས་ཡུམ་ལ་སྤྱོད་པའི་ཤེས་རབ་ཉིན་གཅིག་བསྒོམ་པ་ཙམ་གྱིས་བརྒྱའི་ཆར་ཡང་ཉེ་བར་མི་འགྲོ། སྟོང་དང་། བརྒྱ་སྟོང་དང་། བྱེ་བ་བརྒྱ་སྟོང་དང་། གྲངས་དང་། ཆར་ཡང་། བགྲང་བར་ཡང་། རྒྱུར་ཡང་། དཔེར་ཡང་ཉེ་བར་མི་འགྲོ་བ་ནས་དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་བྱང་སེམས་ཀྱི་ཤེས་རབ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་དོན་དུ་ཉེ་བར་གནས་པ་ཡིན་ཏེ། ཞེས་སོགས་རྒྱ་ཆེར་གསུངས་སོ། །འདི་ལ་གང་དང་ཐུན་མོང་མ་ཡིན་པའི་ཉན་ཐོས་ཀྱི་རྟོགས་པ་ངོས་གཟུང་། གང་ཐུན་མོང་མ་ཡིན་པའི་བྱང་སེམས་ཀྱི་ཤེས་རབ་ངོས་གཟུང་། ཇི་ལྟར་ཐུན་མོང་མ་ཡིན་པའི་ཚུལ་དང་། ཐུན་མོང་མ་ཡིན་པའི་སྒྲུབ་བྱེད་བསྟན་པ་དང་བཞི་ལས། དང་པོ་ནི། འདི་ལྟ་སྟེ་ཞེས་པ་ནས། དེ་དག་གི་ཤེས་རབ་གང་ཡིན་པ་དེས་ནི་ཞེས་པའི་བར་གྱིས་བསྟན་ཏོ། །དགེ་སློང་ཤཱ་རིའི་བུ་དང་། མོངྒལ་གྱི་བུ་ལྟ་བུ་ཤ་སྟག་ཅེས་པ་ནི་འོག་ནས་འཆད་པ་ལྟར་གྱི་རྟོགས་རིགས་མཐུན་པ་ཤ་སྟག་གིས་ཞེས་པའི་དོན་ཏོ། །འདམ་བུ་ནས་ཏིལ་གྱི་བར་གྱིས་ཉན་ཐོས་ཀྱི་རྟོགས་པ་ཆོས་དྲུག་བསྟན་ཏེ། ཉན་ཐོས་ཀྱི་སྦྱོར་ལམ་དྲོད་དེ་འདམ་བུ་ལྟ་བུར་ལས་ཉོན་གྱི་གནོད་པ་ཆུང་ངུ་མི་བཟོད་པ་དང་། རྩེ་མོ་ནི་འོད་མ་ལ་མེ་མཚོན་དག་གི་བཞིན་དུ་ལས་ཉོན་གྱི་གནོད་བྱེད་དྲག་པོ་དང་ཕྲད་ཀྱང་དགེ་རྩ་མི་འཆད་པ་དང་། བཟོད་པ་ནི་བུ་རམ་ཤིང་དང་འདྲ་བར་ངན་སོང་ཆད་པའི་ཕྱིར་བདེ་འགྲོར་ཆོས་བསྒོམ་པའི་མངར་བ་ལས་མི་འདའ་བ་ཉིད་དང་། ཆོས་མཆོག་ནི་སྨྱིག་མ་དང་འདྲ་བར་མྱུར་དུ་བདེན་པ་མངོན་པར་རྟོགས་པར་བྱེད་པ་དང་། མཐོང་ལམ་ནི་འབྲས་དང་འདྲ་བར་འཕགས་པའི་གང་ཟག་རྣམས་ཀྱི་རྟོགས་པ་མཆོག་ཡིན་པ་དང་། སྒོམ་ལམ་ནི་ཏིལ་ལ་མེ་ཏོག་དང་དྲི་ལ་སོགས་པ་རིགས་གཅིག་ཀྱང་ནུས་པ་ཐ་དད་དུ་ཡོད་པ་ལྟར། མཐོང་ལམ་ལས་རྟོགས་རིགས་ཐ་དད་དུ་མེད་ཀྱང་དུས་གཞན་དུ་སྒོམ་སྤང་སྤོང་བའི་ཁྱད་པར་ཡོད་པའི་དབང་དུ་བྱས་ནས་དཔེ་དྲུག་པོ་རྣམས་བསྟན་པའི་ཕྱིར་རོ། །ཚལ་སྨོས་པ་ནི་རྟོགས་རིགས་གཅིག་པའི་གང་ཟག་རྣམས་དབང་པོའི་ཁྱད་པར་ཐ་དད་པ་ཡོད་ཀྱང་དྲོད་ལ་སོགས་པར་རིགས་གཅིག་ཅེས་པའི་དོན་ཏོ། །ལམ་སྔ་མ་སྔ་མ་ནི་དཔེ་ཕྱི་མ་དྲངས་པའི་ཆེད་ཡིན་ལ། ཐ་མར་ལམ་སྨོས་པ་ནི་འཕགས་པའི་གང་ཟག་དེ་རྣམས་ཀྱི་མཐོང་ཆོས་ལ་བདེར་གནས་ཤེས་པའི་ཆེད་ཡིན་ནོ། །གཉིས་པ་ནི། བྱང་སེམས་ཆེན་པོ་ཉིན་གཅིག་ཤེས་རབ་བསྒོམས་པའི་ཤེས་རབ་ཀྱི་ཞེས་པ་སྟེ། ཉིན་གཅིག་ཤེས་རབ་བསྒོམས་པ་ལ་ནུས་པ་དེ་ཙམ་ཡོད་པའི་བྱང་སེམས་ཀྱི་ཤེས་རབ་ཉིད་ཡིན་ནོ། །འོ་ན་དེ་ལྟ་བུའི་བྱང་སེམས་དེ་ཅི་སེམས་དང་པོ་བསྐྱེད་པའམ། སྤྱོད་པ་ལ་ཞུགས་པའམ། ཕྱིར་མི་བཟློག་པའམ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཡིན། རེ་ཞིག་བཞི་པ་ནི་མ་ཡིན་ཏེ། ས་བཅུ་པ་ལ་ནི་དེ་བཞིན་གཤེགས་པ་ཉིད་དུ་བསྟན་པས་ཉན་རང་ལས་ཁྱད་པར་དུ་འཕགས་པར་གྲུབ་ཟིན་པའི་ཕྱིར་རོ། །ཕྱིར་མི་བཟློག་པའི་བྱང་སེམས་ཀྱང་མ་ཡིན་ཏེ། ས་བརྒྱད་པ་ལ་དགོངས་པ་ཅན་གྱི་མྱང་འདས་བཀག་པས་ཉན་རང་ལས་ཁྱད་པར་དུ་འཕགས་པ་གྲུབ་ཟིན་པའི་ཕྱིར་ཏེ། མདོ་སྡེ་ས་བཅུ་པར། དེ་བཞིན་གཤེགས་པ་དེ་དག་གིས་བྱང་ཆུབ་སེམས་དཔའ་དེ་དག་མངོན་པར་འགྲུབ་པའི་སྒོ་ལ་བཅུག་པར་མ་གྱུར་ན་ནི་འདི་དེའི་ཚེ་ཉིད་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་གསུངས་པའི་ཕྱིར་རོ། །འོ་ན་དེའི་མྱ་ངན་ལས་འདས་པ་དེ་ནི་ཉན་ཐོས་ཀྱི་མྱང་འདས་ནི་མ་ཡིན་ཏེ། དེ་ཡིད་ལ་བྱེད་པ་ནི་སེམས་བསྐྱེད་པ་ནས་བརྩམས་ཏེ་རིང་དུ་སྤངས་པའི་ཕྱིར་རོ། །སངས་རྒྱས་ཀྱི་མྱ་ངན་ལས་འདས་པ་ཡང་མ་ཡིན་ཏེ། བསྒོམས་པས་སྤང་བར་བྱ་བ་མ་སྤངས་པའི་ཕྱིར་རོ། །དེས་ན་གང་ཞིག་ཡིན་ཞེ་ན། སྤྱིར་མྱང་འདས་ལ་རྩེ་མོ་ཐོབ་པ་ན་དགེ་རྩ་ཆད་པ་མྱ་ངན་ལས་འདས་པ་དང་། བཟོད་པ་ཐོབ་པ་ན་ངན་འགྲོ་མྱ་ངན་ལས་འདས་པ་དང་། བསམ་གཏན་ཐོབ་པ་ན་དེའི་ཡན་ལག་མྱ་ངན་ལས་འདས་པ་དང་། རྒྱུན་ཏུ་ཞུགས་པ་ན་སྲིད་པ་བརྒྱད་པ་མྱ་ངན་ལས་འདས་པ་དང་། ཕྱིར་འོང་བ་ལ་འདོད་པའི་སྲིད་པ་གཉིས་པ་མྱ་ངན་ལས་འདས་པ་དང་། ཕྱིར་མི་འོང་བ་འདོད་པའི་ཁམས་མྱ་ངན་ལས་འདས་པ་དང་། དགྲ་བཅོམ་པ་རྣམས་ལ་ལྷག་བཅས་ལྷག་མེད་ཀྱི་མྱ་ངན་ལས་འདས་པ་དང་། དགོངས་པ་ཅན་གྱི་མྱ་ངན་ལས་འདས་པ་དང་རྣམ་པ་བརྒྱད་ཡོད་པ་ལས་ཕྱི་མ་སྟེ་རེ་ཞིག་གཞན་དོན་རྒྱུན་ཆད་པ་ལ་དགོངས་ནས་མྱང་འདས་སུ་བཏགས་པ་ཡིན་ནོ། །སྤྱོད་པ་ལ་ཞུགས་པའི་བྱང་སེམས་ཡང་མ་ཡིན་ཏེ། རྒྱུན་ཏུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་བྱང་ཆུབ་སེམས་དཔའི་བཟོད་པ་ཡིན་ནོ་ཞེས་འཆད་པར་འགྱུར་བས་ཉན་ཐོས་ལས་ཁྱད་པར་དུ་འཕགས་པར་གྲུབ་ཟིན་པའི་ཕྱིར་རོ། །འོ་ན་གང་ཡིན་ཞེ་ན་ཡོངས་སུ་མི་ཉམས་པའི་ཆོས་ཅན་ཀུན་རྫོབ་ཀྱི་སེམས་དང་པོ་བསྐྱེད་པའི་བྱང་ཆུབ་སེམས་དཔའི་སེམས་བསྐྱེད་དང་པོ་གསུམ་གྱི་སྐབས་སུ་བསྟན་པའི་བྱང་ཆུབ་སེམས་དཔའོ། །གསུམ་པ་ནི་འོ་ན་དེ་ལྟ་བུའི་བྱང་སེམས་ཀྱི་ཉིན་གཅིག་བསྒོམས་པའི་ཤེས་རབ་དེ་སྔར་བཤད་པའི་རྟོགས་པ་ཆོས་དྲུག་ལས་ཇི་ལྟར་ཁྱད་པར་དུ་འཕགས་ན། འདི་ལ་གྲངས་ཀྱི་ཁྱད་པར། མཐུའི་ཁྱད་པར། རིགས་ཀྱི་ཁྱད་པར། རྒྱུའི་ཁྱད་པར། དཔེའི་ཁྱད་པར་དང་ལྔ་ལས། དང་པོ་ནི་བརྒྱའི་ཆར་ཡང་ཞེས་པ་ནས་གྲངས་སུ་ཡང་ཞེས་པའི་བར་དང་། གཉིས་པ་ནི་ཆར་ཡང་། གསུམ་པ་ནི་བགྲང་བར་ཡང་། བཞི་པ་ནི་རྒྱུར་ཡང་། ལྔ་པ་ནི་དཔེར་ཡང་། ཞེས་པས་སྟོན། བཞི་པ་ནི་འཕགས་པའི་གང་ཟག་ཐམས་ཅད་འདུས་མ་བྱས་ཀྱིས་རབ་ཏུ་ཕྱེ་བས་རྟོགས་པ་ལ་ཁྱད་པར་མེད་པ་མ་ཡིན་ནམ། ཅིའི་ཕྱིར་ཁྱད་པར་དུ་འཕགས་ཤེ་ན་བྱང་ཆུབ་སེམས་དཔའ་རྣམས་ནི་ཆེད་དུ་བྱ་བ་སེམས་ཅན་ཐམས་ཅད་མྱ་ངན་ལས་འདའ་བའི་ཆེད་དང་། སྦྱོར་བ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དང་། རྟོགས་པ་ཆོས་སྐུ་ཐོབ་པར་བྱེད་པའི་མཚན་ཉིད་ཅན་གྱི་སྒོ་ནས་སྦྱིན་གནས་སུ་གྱུར་པ་སྒྲུབ་པར་བྱེད་པའི་ཁྱད་པར་དང་ལྡན་པའི་ཕྱིར་རོ། །ཅིའི་ཕྱིར་སྦྱིན་གནས་སུ་འགྱུར་ཞེ་ན་དགེ་བ་བཅུའི་ལས་ཀྱི་ལམ་དང་། རྒྱལ་རིགས་ཤིང་སཱ་ལ་ཆེན་པོ་ལ་སོགས་པ་དང་། ལྷའི་རིགས་ཐམས་ཅད་དང་། རྒྱུན་ཏུ་ཞུགས་པ་ནས་སངས་རྒྱས་ཀྱི་བར་གྱི་ཤེས་རབ་རྣམས་བྱང་སེམས་མེད་ན་མི་འབྱུང་བར་བསྟན་པའི་ཕྱིར་རོ། །འོ་ན་ཆེད་དུ་བྱ་བ་དང་། སྦྱོར་བ་དང་། རྟོགས་པ་རྣམས་བྱང་སེམས་ཉིན་གཅིག་ཤེས་རབ་བསྒོམས་པའི་འབྲས་བུར་མི་འཐད་དེ། བསྐལ་པ་གྲངས་མེད་གསུམ་དུ་ཤེས་རབ་བསྒོམས་པའི་འབྲས་བུ་ཡིན་པའི་ཕྱིར་རོ་ཞེ་ན། མར་མེའི་དཔེ་ལ་བརྟེན་ནས་མི་འགལ་བའི་ལན་གདབ་པར་བཤད་དོ། །གསུམ་པ་དེ་ལ་འདོམས་པའི་གདམས་ངག་དངོས་ནི། ཡུལ་བྱང་ཆུབ་ཏུ་སེམས་བསྐྱེད་ནས་གདམས་ངག་དོན་དུ་གཉེར་བའི་བྱང་སེམས་ལ་གནས་སྐབས་དང་མཐར་ཐུག་གི་འབྲས་བུ་བསྒྲུབ་པའི་ཆེད་དུ་བདེན་གཉིས་ལས་མི་འདའ་བར་ཐབས་ཤེས་ཟུང་འབྲེལ་གྱི་སྒོ་ནས་ཤེར་ཕྱིན་སྒྲུབས་ཤིག་ཅེས་འདོམས་པར་བྱེད་པའི་མདོ་ཚིག་གོ །དེས་ན་འདིར་བསྟན། གདམས་ངག་བཅུ་པོ་ཐམས་ཅད་ཤེར་ཕྱིན་གྱི་མདོ་ཡིན་གྱི། རྒྱན་གྱི་ཚིག་ལ་འདིར་བསྟན་གདམས་ངག་བཅུ་འཇོག་པ་ནི་བརྗོད་བྱ་རྗོད་བྱེད་མ་ཕྱེད་པའོ། །གཉིས་པ་སྒྲུབ་པའི་ཁྱད་པར་ལ་འདོམས་པ་ལ་གཉིས་ཏེ། ཁྱད་པར་དུ་འགྱུར་བའི་ཚུལ་དང་། དཀའ་བའི་གནས་ལ་དཔྱད་པའོ། །དང་པོ་ནི། སྣང་ཙམ་ལ་སྐུར་བ་མི་འདེབས་ཤིང་དོན་དམ་པར་མི་དམིགས་པའི་བདེན་གཉིས་ལས་མི་འདའ་བ་ཙམ་གྱིས་སེམས་བསྐྱེད་ཀྱི་དབྱེ་བའི་སྐབས་སུ་བཤད་པའི་ཡོན་ཏན་རྣམས་སྒྲུབ་ནུས་སམ་སྙམ་ན་དེ་ལ་ཡང་ཁྱད་པར་གྱི་ཆོས་དམིགས་པ་ལ་སྒྲོ་འདོགས་གཅོད་པ་དང་། སྐྱབས་གསུམ་ལ་བརྟེན་པ་དང་། མི་མཐུན་ཕྱོགས་སེལ་བར་བྱེད་པའི་བརྩོན་འགྲུས་དང་། གནས་སྐབས་སུ་ཐོབ་པའི་ཡོན་ཏན་དང་། མཐར་ཐུག་པར་བྱེད་པའི་རྒྱུ་རྣམས་དགོས་སོ་ཞེས་པ་ནི། བདེན་པ་རྣམས་དང་ནི་ཞེས་པ་མན་ཆད་ཀྱིས་བསྟན་ཏོ། །འདིར་སྒྲོ་འདོགས་གཅོད་པར་བྱ་བའི་གཞི་བདེན་པ་བཞི་ལ་གཞག་པ་དང་། དམིགས་པ་ཆོས་རྣམས་ཐམས་ཅད་དེ། །ཅེས་པའི་སྐབས་སུ་ཆོས་ཐམས་ཅད་ལ་གཞག་པ་དང་། འདི་ཡི་དམིགས་པ་དངོས་མེད་དེ། །ཅེས་པའི་སྐབས་སུ་བདེན་པའི་དངོས་པོ་མེད་པ་ལ་གཞག་པ་གསུམ་གྱི་ཁྱད་པར་ནི་རྟོགས་རིགས་ཐུན་མོང་བའི་དམིགས་པ་དང་། ཐེག་ཆེན་ཐུན་མོང་མ་ཡིན་པའི་རྟོགས་རིགས་ཀྱི་དམིགས་པ་དང་། མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱི་དམིགས་པའི་དབང་དུ་བྱས་པའོ། །གཞན་དག་ནི་ཐེ་ཚོམ་ཙམ་ཡང་མ་ཞུགས་པར་སྣང་ངོ་། །རྟོགས་རིགས་ཐུན་མོང་གི་དབང་དུ་བྱས་ན་ཐེག་ཆེན་གྱི་སྒྲུབ་པས་ཀྱང་བདེན་པ་བཞི་ལ་དམིགས་ཏེ། སྐབས་གསུམ་པར་བསྟན་པའི་མཐོང་ལམ་གྱི་དམིགས་པ་བདེན་བཞི་ལ་བཤད་པའི་ཕྱིར་རོ། །སྐྱབས་གསུམ་པོ་ནི་སྒྲུབ་པའི་རྟེན་ཡིན་ཏེ། ཚོགས་སྦྱོར་གྱི་གནས་སྐབས་སུ་ཆོས་དང་དགེ་འདུན་ལ་བརྟེན་ནས་དེ་ཐོབ་པའི་ཆེད་དུ་སྒྲུབ་པ་ཉམས་སུ་ལེན། འཕགས་པའི་གནས་སྐབས་སུ་སངས་རྒྱས་དཀོན་མཆོག་ལ་བརྟེན་ནས་དེ་ཐོབ་པའི་ཆེད་དུ་སྒྲུབ་པ་ཉམས་སུ་ལེན་པའི་ཕྱིར་རོ། །བརྩོན་འགྲུས་གསུམ་པོ་ནི་སྒྲུབ་པའི་མི་མཐུན་ཕྱོགས་སེལ་བར་བྱེད་པ་ཡིན་ཏེ། མ་ཞེན་པའི་བརྩོན་འགྲུས་ཀྱིས་བྱ་བ་ངན་ཞེན་གྱི་ལེ་ལོ་སྤངས་ནས་སྒྲུབ་པ་ཁྱད་པར་དུ་འགྲོ་བར་བྱེད། ཡོངས་སུ་མི་ངལ་བའི་བརྩོན་འགྲུས་ཀྱིས་སྒྱིད་ལུག་པའི་ལེ་ལོ་སྤངས་ནས་སྒྲུབ་པ་སླར་མི་ལྡོག་པར་བྱེད། ལམ་ཡོངས་སུ་འཛིན་པའི་བརྩོན་འགྲུས་ཀྱིས་སེམས་ཞུམ་པའི་ལེ་ལོ་སྤངས་ནས་ཐེག་དམན་དུ་མི་ལྟུང་བར་བྱེད་པའི་ཕྱིར་རོ། །སྤྱན་དང་མངོན་ཤེས་ནི་སྒྲུབ་པའི་ཡོན་ཏན་ཡིན་ཏེ། སྤྱན་ལྔས་རང་དོན་བླང་དོར་ལ་གཞན་གྱི་དྲིང་མི་འཇོག་པར་བྱེད། མངོན་ཤེས་དྲུག་གིས་རྣམ་མཁྱེན་གྱི་རྒྱུ་ཡོངས་སུ་རྫོགས་པར་བྱེད་པའི་ཕྱིར་རོ། །མཐོང་ལམ་དང་། སྒོམ་ལམ་གཉིས་པོ་ནི་སྒྲུབ་པ་མཐར་ཐུག་པར་བྱེད་པའི་རྒྱུ་ཡིན་ཏེ། སྒྲུབ་པ་མཐར་ཐུག་པ་ལ་མཐོང་སྤང་དང་སྒོམ་སྤང་གཉིས་སྤང་དགོས་པའི་ཕྱིར་རོ། །སྒྲུབ་པའི་ཁྱད་པར་གྱི་ཆོས་ལ་དགུར་གྲངས་ངེས་པ་ནི་སྒྲུབ་པའི་ངོ་བོ་དེས་བསྒྲུབ་བྱ་མཐར་ཐུག་སྒྲུབ་པ་ལ། དགུ་པོ་གང་རུང་ཞིག་མ་ཚང་ན་སྒྲུབ་མི་ནུས་ཤིང་དགུ་ཆར་ཚང་བས་སྒྲུབ་དགོས་པའི་ཕྱིར་རོ། །གོ་རིམ་ནི་བཤད་པའི་གོ་རིམ་ཙམ་ཡིན་པར་མངོན་ནོ། །དེ་དག་ལ་འདོམས་པའི་གདམས་ངག་གི་ངོས་འཛིན་ནི་སྔ་མ་ལ་དཔག་ནས་ཤེས་པར་བྱའོ། །གཉིས་པ་ལ་དཀོན་མཆོག་གསུམ་གྱི་འདོད་ཚུལ་གྱི་ཁྱད་པར་དང་། སྤྱན་དང་མངོན་ཤེས་ཀྱི་ཁྱད་པར་དང་། མཐོང་སྒོམ་རྟོགས་རིགས་ཐ་དད་མེད་པའི་དོན་ལ་དཔྱད་པ་དང་གསུམ་ལས། དང་པོ་ལ། བྱེ་བྲག་ཏུ་སྨྲ་བས། སངས་རྒྱས་ནི་སངས་རྒྱས་ཀྱི་རྒྱུད་ཀྱི་ཟད་མི་སྐྱེ་ཤེས་པའི་ཡེ་ཤེས་འཁོར་དང་བཅས་པ་ཁོ་ན་ཡིན་ལ། ཆོས་ནི་མྱ་ངན་ལས་འདས་པ་སོ་སོར་བརྟགས་པའི་འགོག་པ་ཡིན་ཞིང་། དགེ་འདུན་དཀོན་མཆོག་ནི་སངས་རྒྱས་ལས་གཞན་པའི་སློབ་མི་སློབ་ཀྱི་རྒྱུད་ཀྱི་ལམ་བདེན་འཁོར་དང་བཅས་པ་ཡིན་པར་འདོད་དེ། མཛོད་དུ། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །མདོ་སྡེ་པས་སངས་རྒྱས་ནི་སངས་རྒྱས་ཀྱི་རྒྱུད་ཀྱི་ཟད་མི་སྐྱེ་ཤེས་ཀྱི་ཡེ་ཤེས་འཁོར་དང་བཅས་པ་དང་། གཟུགས་ཀྱི་སྐུ་ཡང་སངས་རྒྱས་སུ་འདོད་ལ་ཆོས་ཀྱི་འདོད་ཚུལ་འདྲའོ། །དགེ་འདུན་ནི་སངས་རྒྱས་ལས་གཞན་པའི་སློབ་པ་དང་། མི་སློབ་པ་དང་དེ་དག་གི་རྒྱུད་ཀྱི་ལམ་བདེན་འཁོར་དང་བཅས་པ་ཡིན་པར་འདོད་དེ། མཛོད་རང་འགྲེལ་དུ་བསྟན་བཅོས་ལས་ནི་མི་སློབ་པའི་ཆོས་ཁོ་ན་སངས་རྒྱས་ཡིན་ཞེས་དེ་སྐད་དུ་མི་འབྱུང་ངོ་། །འོ་ན་ཇི་སྐད་དུ་འབྱུང་ཞེ་ན་སངས་རྒྱས་སུ་བྱེད་པའི་ཆོས་ཞེས་འབྱུང་སྟེ། དེའི་ཕྱིར་རྟེན་སངས་རྒྱས་ཉིད་དུ་མ་བཀག་པས་དེའི་ཕྱིར་ཀླན་ཀར་མི་རུང་བ་ཉིད་ཅེས་སོ། །གང་ཞིག་ཆོས་ལ་སྐྱབས་སུ་འགྲོ་བ་དེ་ནི་མྱ་ངན་ལས་འདས་པ་བདག་དང་གཞན་གྱི་རྒྱུད་ཉོན་མོངས་པ་རྣམ་པར་དག་པ་དང་། དུཿཁ་ཞི་བར་མཚན་ཉིད་གཅིག་པ་ཉིད་ཀྱི་ཕྱིར་རོ། །ཞེས་དང་། དགེ་སློང་དུ་བྱེད་པའི་ཚུལ་ཁྲིམས་ཁོ་ན་དགེ་སློང་དུ་འགྱུར་རོ་ཞེས་སོ། །སེམས་ཙམ་པས་ཐུབ་པའི་སྐུ་གསུམ་སངས་རྒྱས་དཀོན་མཆོག་ཡིན་ལ། བསྟན་པའི་ཆོས་གསུང་རབ་ཡན་ལག་བཅུ་གཉིས་དང་། སྒྲུབ་པའི་ཆོས་འཕགས་ལམ་ཡན་ལག་བརྒྱད་འཁོར་བཅས་དང་། དོན་དམ་པའི་ཆོས་གློ་བུར་གྱི་དྲི་མས་དག་པའི་ཆོས་ཀྱི་དབྱིངས་ནི་ཆོས་དཀོན་མཆོག་ཡིན་ཞིང་། བྱང་ཆུབ་སེམས་དཔའ་རྣམས་དང་། ཉན་ཐོས་ཞུགས་གནས་བརྒྱད་དང་། རང་སངས་རྒྱས་རྣམས་ཀྱང་དགེ་འདུན་དཀོན་མཆོག་ཏུ་འདོད་དེ། དབྱིག་གཉེན་གྱིས། དམིགས་མེད་ཆོས་ཀྱི་སྐུ། །ལོངས་སྤྱོད་རྫོགས་པའི་སྐུ། །ཅིར་ཡང་སྤྲུལ་པའི་སྐུར། །གུས་པས་ཕྱག་འཚལ་ལོ། །རྣམ་དག་ཆོས་ཀྱི་དབྱིངས། །སྒྲུབ་པའི་འཕགས་ལམ་བརྒྱད། །སྟོན་པའི་གསུང་རབ་ལ། །གུས་པས་ཕྱག་འཚལ་ལོ། །བྱང་ཆུབ་སེམས་རྣམས་དང་། །དགྲ་བཅོམ་དག་ལ་སོགས། །རང་སངས་རྒྱས་རྣམས་ལ། །གུས་པས་ཕྱག་འཚལ་ལོ། །ཞེས་གསུངས་པ་ལྟར་རོ། །དབུ་མ་ཐལ་འགྱུར་བ་འགའ་ཞིག སངས་རྒྱས་ནི་སྐུ་གསུམ། ཆོས་ནི་མྱ་ངན་ལས་འདས་པ། དགེ་འདུན་ནི་གང་ཟག་བརྒྱད་དུ་འདོད་དེ། ཟླ་གྲགས་ཀྱིས། ཐུབ་དབང་དག་གི་སྐུ་གསུམ་དང་། །མྱ་ངན་འདས་དང་གང་ཟག་བརྒྱད། །ཅེས་སོ། །དེའི་ཚེ་བྱང་ཆུབ་སེམས་དཔའ་ནི་སངས་རྒྱས་ཀྱི་ཁོངས་སུ་གཏོགས་པར་འདོད་དེ། ཤཱ་རིའི་ལུང་ལས་དགྲ་བཅོམ་གྱིས། །བྱང་ཆུབ་སེམས་དཔའ་ཕྱག་བྱས་ཕྱིར། །འདི་དག་དཀོན་མཆོག་གསུམ་གཞན་མེད། །སངས་རྒྱས་ཁོངས་སུ་གཏོགས་པར་འདོད། །ཅེས་གསུངས་སོ། །རྒྱུད་བླར། འདུས་མ་བྱས་ཤིང་ལྷུན་གྱིས་གྲུབ་པ་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་ཆོས་སྐུ་ནི་སངས་རྒྱས་དཀོན་མཆོག བསམ་མེད་གཉིས་མེད་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་རྣམ་བྱང་གི་བདེན་པ་ནི་ཆོས་དཀོན་མཆོག ཇི་ལྟ་ཇི་སྙེད་རིག་པ་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་ཕྱིར་མི་ལྡོག་པའི་བྱང་སེམས་འཕགས་པ་ནི་དགེ་འདུན་དཀོན་མཆོག་ཏུ་གསུངས་ཏེ། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་ཉིད་ལྡན་པའི་སངས་རྒྱས་ཉིད། །ཅེས་དང་། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱི། །གང་ཞིག་གང་གིས་ཆགས་བྲལ་པ། །བདེན་གཉིས་མཚན་ཉིད་ཅན་དེ་ཆོས། །ཞེས་དང་། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་སོ། །འདི་དག་ནི་གནས་སྐབས་སྐྱབས་གསུམ་དུ་བཞག་པ་ཡིན་གྱི། མཐར་ཐུག་གི་སྐྱབས་གསུམ་ནི་སངས་རྒྱས་གཅིག་ཉིད་ལ་གསུམ་ཆར་ཚང་བར་ཡོད་དོ། །འོ་ན་འདིར་གང་གཟུང་ཞེ་ན། རྒྱུད་བླ་ནས་གསུངས་པའི་གནས་སྐབས་སྐྱབས་གསུམ་པོ་དེ་ཉིད་གཟུང་བར་འཕགས་སེང་གཉིས་ཀྱི་བཞེད་དོ། །གཉིས་པ་ལ་སྤྱིའི་ཁྱད་པར་དང་། སོ་སོའི་ཁྱད་པར་གཉིས་ལས། དང་པོ་ལ་གང་ལས་གསུངས་པའི་སྡེ་སྣོད་ཀྱི་ཁྱད་པར། གང་ལ་ལྡན་པའི་གང་ཟག་གི་ཁྱད་པར། གང་ལས་བྱུང་བ་རྒྱུའི་ཁྱད་པར། བྱ་བ་ལས་ཀྱི་ཁྱད་པར་དང་བཞི་ལས། དང་པོ་ནི། སྤྱན་ལྔ་ནི་ཤེར་ཕྱིན་གྱི་མདོ་དང་། བསྟན་བཅོས་ཁོ་ན་ལས་གསུངས་ལ། མངོན་ཤེས་དྲུག་ནི་ཐེག་པ་ཆེ་ཆུང་གི་སྡེ་སྣོད་གཉིས་ཀ་ལས་གསུངས་སོ། །གཉིས་པ་ནི། སྤྱན་ལྔ་ནི་ཐེག་ཆེན་གྱི་གང་ཟག་ཁོ་ནའི་རྒྱུད་པ་ཡོད་ལ། མངོན་ཤེས་དྲུག་ནི་ཐེག་པ་གསུམ་ཆར་དང་། དང་པོ་ལྔ་ནི་ལམ་མ་ཞུགས་ཀྱི་གང་ཟག་ལ་ཡང་ཡོད་དོ། །གསུམ་པ་ནི། སྤྱན་ལྔ་ནི་ཐེག་ཆེན་གྱི་ཚོགས་ལམ་ཆུང་ངུ་དང་འབྲིང་གི་གནས་སྐབས་སུ་ཕ་རོལ་ཏུ་ཕྱིན་པ་དྲུག་ཉམས་སུ་བླངས་པ་ལས་འབྱུང་ལ། མངོན་ཤེས་དྲུག་ནི་ཕར་ཕྱིན་དྲུག་གི་ཉམས་ལེན་མེད་ཀྱང་བསམ་གཏན་གྱི་དངོས་གཞི་བསྒོམ་ཞིང་རྣམ་གནས་ཡིད་ལ་བྱེད་པ་ལས་འབྱུང་ངོ་། །འོན་ཀྱང་བྱང་སེམས་ཀྱི་རྒྱུད་ཀྱི་མངོན་པར་ཤེས་པ་དྲུག་ནི། བསམ་གཏན་བཞི་པ་ཤིན་ཏུ་དག་པ་བ་དང་། མི་རྟོག་ཡེ་ཤེས་ཀྱི་ཉམས་ལེན་གྱིས་ཟིན་པ་དང་། རྣམ་གནས་ཡིད་ལ་བྱེད་པ་གསུམ་ལས་འབྱུང་བར་མདོ་སྡེ་རྒྱན་དུ་བཤད་དོ། །བདག་རྐྱེན་ལ་ཡང་སྤྱན་ལྔ་ནི་བདག་རྐྱེན་རྫུ་འཕྲུལ་གྱི་རྐང་པ་ལ་བརྟེན་ཏེ། བཙུན་པ་ངོ་བོ་ཉིད་མེད་པས། ཤའི་སྤྱན་ཞེས་བྱ་བ་ནི་རྫུ་འཕྲུལ་གྱི་རྐང་པ་བཞི་བསྒོམས་པས་ཤེས་ཞེས་གསུངས་སོ། །མངོན་ཤེས་དྲུག་ནི་བདག་རྐྱེན་བསམ་གཏན་གྱི་དངོས་གཞི་ལ་བརྟེན་ཏོ། །བཞི་པ་ནི། སྤྱན་ལྔས་ནི་སྒྲུབ་པ་ལ་གཞན་གྱི་དྲིང་མི་འཇོག་པར་བྱེད་དེ། ཤའི་སྤྱན་གྱིས་ཡར་སྟོན་པ་དང་། མར་སློབ་མ་གང་ན་ཡོད་པ་ཤེས། ལྷས་གདུལ་བྱ་རྣམས་ཀྱི་འཆི་འཕོ་བ་དང་སྐྱེ་བ་ཤེས། ཤེས་རབ་ཀྱིས་བསྒོམ་པར་བྱ་བའི་བདག་མེད་གཉིས་ཤེས། ཆོས་ཀྱིས་གྲོགས་དགེ་འདུན་གྱི་རྟོགས་པ་ཤེས། སངས་རྒྱས་ཀྱི་སྤྱན་གྱིས་ཆོས་ཐམས་ཅད་ཀྱི་གནས་ལུགས་གཟིགས་པའི་ཕྱིར་རོ། །མངོན་ཤེས་ལ་ཐེག་དམན་གྱི་རྒྱུད་ཀྱི་མངོན་ཤེས་དྲུག་དང་། ལམ་མ་ཞུགས་ཀྱི་མངོན་ཤེས་དང་པོ་ལྔས་ནི་རང་གཞན་གྱི་དོན་ཅི་རིགས་པ་སྒྲུབ་པ་ཙམ་ཡིན་ལ། བྱང་སེམས་ཀྱི་རྒྱུད་ཀྱི་མངོན་ཤེས་དྲུག་གིས་ནི་རྣམ་མཁྱེན་གྱི་རྒྱུ་གཞན་དོན་ཡོངས་སུ་རྫོགས་པར་བྱེད་དེ། རྫུ་འཕྲུལ་གྱིས་གདུལ་བྱ་གང་ན་ཡོད་པའི་ཡུལ་དུ་གཤེགས་ནས་གཞན་སེམས་ཤེས་པས་གཞན་གྱི་སྤྱོད་པ་འདོད་ཆགས་དང་བཅས་པ་སོགས་ཤེས་ཏེ་ལྷའི་རྣ་བས་དེ་དག་གི་སྐད་དང་མཐུན་པར་ཆོས་སྟོན་སྔོན་གྱི་གནས་རྗེས་སུ་དྲན་པས་གང་ནས་འོངས་པ་དང་། ལྷའི་མིག་གིས་གང་དུ་འགྲོ་བ་དང་། ཟག་པ་ཟད་པ་ཤེས་པའི་མངོན་ཤེས་ཀྱིས་ངེས་པར་འབྱུང་བའི་ལམ་འདོམས་པར་བྱེད་པའི་ཕྱིར་རོ། །གཉིས་པ་སོ་སོའི་ཁྱད་པར་ནི་ཤའི་སྤྱན་ནི་བདག་རྐྱེན་རྫུ་འཕྲུལ་གྱི་རྐང་པ་ལ་བརྟེན་པའི་དབང་པོ་གཟུགས་ཅན་པ་ལ་བརྟེན་པའི་དབང་ཤེས་སོ། །འདི་བསམ་གཏན་གྱི་སས་བསྡུས་སུ་ནི་མ་ངེས་ཏེ། རྟེན་གྱི་གང་ཟག་གང་དུ་སྐྱེས་པ་དེའི་ས་པའི་དབང་པོ་གཟུགས་ཅན་པ་ཡིན་པའི་ཕྱིར་རོ། །རྣམ་པར་སྨིན་པ་ལས་བྱུང་བའི་ལྷའི་སྤྱན་ནི་སྐྱེ་བ་སྔ་མ་བསམ་གཏན་གྱི་སྙོམས་འཇུག་བསྒོམས་པའི་རྣམ་སྨིན་གྱི་འབྲས་བུ་ལ་ཚེ་འདིར་འབད་མེད་དུ་འབྱུང་བའི་བསམ་གཏན་གྱི་སས་བསྡུས་ཀྱི་དབང་པོ་གཟུགས་ཅན་པ་ལ་བརྟེན་པའི་ཤེས་པའོ། །འདི་དང་ལྷའི་མིག་གི་མངོན་པར་ཤེས་པའི་ཁྱད་པར་ནི་ཚེ་འདིར་བསམ་གཏན་མངོན་པར་འདུ་བྱེད་པ་ལས་མ་བྱུང་བ་དང་བྱུང་བའོ། །ཤེས་རབ་ཀྱི་སྤྱན་ནི་ཆོས་ཐམས་ཅད་ལ་རྣམ་པར་མི་རྟོག་པའི་ཡེ་ཤེས་ཏེ། ས་བཅུ་གཅིག་གི་མཉམ་གཞག་རྣམས་སོ། །འདི་དང་དོན་དམ་སེམས་བསྐྱེད་དོན་གཅིག་གོ །ཆོས་ཀྱི་སྤྱན་ནི་རང་དང་རྒྱུད་ཚོད་མཉམ་པ་མན་ཆད་ཀྱི་འཕགས་པའི་གང་ཟག་ཐམས་ཅད་ཀྱི་དབང་པོ་རྣོ་རྟུལ་སོགས་མངོན་སུམ་དུ་རྟོགས་པའོ། །འདི་དང་གཞན་སེམས་ཤེས་པའི་མངོན་ཤེས་ཀྱི་ཁྱད་པར་ནི་རྟེན་གྱི་གང་ཟག་གི་ཁྱད་པར་སྔར་བཤད་ཟིན་ཅིང་། ཡུལ་གྱི་ཁྱད་པར་ལ་འདིའི་ཡུལ་ནི་འཕགས་རྒྱུད་ཀྱི་རྟོགས་པ་ཁོ་ན་ཡིན་ལ། གཞན་སེམས་ཤེས་པའི་མངོན་ཤེས་ཀྱི་ཡུལ་ནི་གཞན་རྒྱུད་ཀྱི་ཤེས་པ་ཐམས་ཅད་དོ། །སངས་རྒྱས་ཀྱི་སྤྱན་ནི་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་ནོ། །རྗེས་མཐུན་པ་ས་བདུན་པ་ནས་ཡོད་དེ། ས་བདུན་པའི་ཡོངས་སྦྱོང་གི་སྐབས་སུ། བྱང་སེམས་ཆེན་པོའི་ཐོགས་པ་མེད་པའི་ཡེ་ཤེས་གང་ཞེ་ན། འདི་ལྟ་སྟེ་སངས་རྒྱས་ཀྱི་སྤྱན་ཐོབ་པ་གང་ཡིན་པ་སྟེ། ཞེས་སོ། །ཨར། གཟད་པ། གཡག་གསུམ་གྱིས་རྗེས་མཐུན་པ་ས་དང་པོ་ནས་ཡོད་ཅིང་མཚན་ཉིད་པ་སངས་རྒྱས་ཀྱི་ས་ཁོ་ནར་ཡོད་དོ། །ཅེས་བཞེད་དོ། །གསུམ་པ་ནི། འདིར་ཐེག་ཆེན་གྱི་མཐོང་ལམ་ལས། སྒོམ་ལམ་རྟོགས་རིགས་ཐ་དད་མེད་པར་གསུངས་ཤིང་། ཉི་ཚེ་བ་དང་། སྣ་ཚོགས་ཉིད་ཅེས་དང་། དེའི་འགྲེལ་པར་དམིགས་པ་དང་བཅས་པ་ཉིད་ཀྱི་འབྲས་བུ་དང་པོ་ལ་སོགས་པ་རྟོགས་པ་ཐ་དད་པ་ཉིད་དང་། ཞེས་ཉན་ཐོས་ཀྱི་འབྲས་བུ་དང་པོ་སོགས་ལ་རྟོགས་རིགས་ཐ་དད་དུ་ཡོད་པར་གསུངས་པ་དང་། ཉིར་སྣང་དུ། ཉན་ཐོས་ཀྱི་སྒོམ་ལམ་ཏིལ་དང་དཔེ་སྦྱར་བའི་ཚེ། མཐོང་ལམ་ལས་རྟོགས་རིགས་ཐ་དད་མེད་པར་གསུངས་པའི་དོན་ཇི་ལྟར་ཞེ་ན་མཉམ་གཞག་གི་དབང་དུ་བྱས་ན་ཐེག་པ་གསུམ་ཆར་ལ་ཡང་མཐོང་ལམ་ལས་སྒོམ་ལམ་རྟོགས་རིགས་ཐ་དད་དུ་མེད་དེ། མཐོང་ལམ་གྱི་གནས་སྐབས་སུ་མངོན་སུམ་དུ་མཐོང་བའི་དོན་དེ་ཉིད་སྒོམ་ལམ་གྱི་གནས་སྐབས་སུ་རྒྱུན་ལྡན་དུ་སྒོམ་པར་བྱེད་པ་ཙམ་ཡིན་པའི་ཕྱིར་རོ། །འདི་ལ་དགོངས་ནས་ཐེག་པ་ཆེ་ཆུང་གཉིས་ཀ་ལ་མཐོང་སྒོམ་རྟོགས་རིགས་ཐ་དད་མེད་པར་གསུངས་སོ། །ཐེག་པ་ཆེན་པོ་ལ་མཉམ་གཞག་གིས་དྲངས་པའི་རྗེས་ཐོབ་ཀྱི་ངེས་ཤེས་ཀྱི་རྟོགས་རིགས་ལ་ཡང་ཐ་དད་མེད་དེ། ངེས་ཤེས་ཐམས་ཅད་ཀྱང་སྤྲོས་བྲལ་གྱི་རྣམ་པ་ཅན་དུ་གཅིག་པའི་ཕྱིར་རོ། །དཔེར་ན་ཐེག་ཆེན་གྱི་མཐོང་ལམ་གྱི་རྟག་སོགས་བཅུ་དྲུག་གི་སྤྲོས་པ་དང་ཡང་བྲལ། མི་རྟག་སོགས་བཅུ་དྲུག་གི་སྤྲོས་པ་དང་ཡང་བྲལ་བ་ལ་ངེས་ཤེས་དྲངས་པའི་ཚེ་ངེས་ཤེས་དེ་དག་ཐམས་ཅད་རྟོགས་རིགས་ཐ་དད་མེད་པ་བཞིན་ནོ། །ཉན་ཐོས་ཀྱི་མཐོང་སྒོམ་མཉམ་གཞག་གིས་དྲངས་པའི་ངེས་ཤེས་ལ་རྟོགས་རིགས་ཐ་དད་དུ་ཡོད་དེ། མཉམ་གཞག་དེས་མི་རྟག་ལ་སོགས་བཅུ་དྲུག་ལ་ངེས་ཤེས་དྲངས་པས་འགའ་ཞིག་ནི་མི་རྟག་པའི་རྣམ་པ་ཅན། འགའ་ཞིག་ནི་སྡུག་བསྔལ་བའི་རྣམ་པ་ཅན་དུ་མངོན་པར་ཞེན་པ་སོགས་ཡིན་པའི་ཕྱིར་རོ། །འོ་ན་མཉམ་གཞག་ལ་ཡང་མཚུངས་སོ་སྙམ་ན་ཉན་ཐོས་ཀྱི་མཐོང་སྒོམ་མཉམ་གཞག་གིས་སྐྱེ་མེད་མངོན་སུམ་དུ་མ་རྟོགས་པའི་ལུགས་ལ་མཚུངས་ཀྱང་འདིར་ནི་ཉན་ཐོས་ཀྱི་མཐོང་སྒོམ་མཉམ་གཞག་གིས་སྐྱེ་མེད་མངོན་སུམ་དུ་རྟོགས་པས་མི་རྟག་སྡུག་བསྔལ་སོགས་ཀྱི་རྣམ་པ་ཅན་མ་ཡིན་པར་འདོད་པའི་ལུགས་ཡིན་པའི་ཕྱིར་རོ། །འོ་ན་མི་རྟག་སྡུག་བསྔལ་སོགས་ཉན་ཐོས་ཀྱི་རྟོགས་རིགས་སུ་གཞུང་འདི་ཉིད་ལས་བཤད་པ་དང་འགལ་ལོ་སྙམ་ན་དེ་ནི་སྦྱོར་ལམ་གྱི་གནས་སྐབས་སུ་བསྒོམ་པའི་རྣམ་པ་དང་། རྗེས་ཐོབ་ཏུ་ངེས་ཤེས་སྐྱེས་པའི་རྣམ་པ་ལ་དགོངས་ཏེ། གཞན་དུ་ན་མེད་པ་དང་། མི་སྐྱེ་བ་དང་། དབེན་པ་སོགས་ཉན་ཐོས་ཀྱི་རྟོགས་རིགས་སུ་བཤད་པ་དང་འགལ་ཏེ། མི་རྟག་པའི་རྣམ་པ་ཅན་ཡིན་ན། འཇིག་པའི་རྣམ་པ་ཅན་ཡིན་དགོས་ཤིང་། དེ་ལྟར་ན་མི་སྐྱེ་བའི་རྣམ་པ་ཅན་ཡིན་པ་དང་འགལ་བའི་ཕྱིར་རོ། །འོ་ན་མ་དག་ས་བདུན་གྱི་གནས་སྐབས་སུ་མི་རྟག་སོགས་སུ་མངོན་པར་ཞེན་པ་སྐྱེ་སྲིད་པས་རྗེས་ཐོབ་ཀྱི་རྟོགས་རིགས་ཐ་དད་པར་མཚུངས་སོ་སྙམ་ན་མ་ཡིན་ཏེ། དེར་མི་རྟག་སོགས་སུ་མངོན་པར་ཞེན་པ་ནི་ཐེག་པ་རང་ལུགས་ཀྱི་སྤང་བྱ་ཡིན་གྱི་ཐེག་པ་རང་ལུགས་ཀྱི་རྟོགས་རིགས་མ་ཡིན་པའི་ཕྱིར་དང་། ཉན་ཐོས་འཕགས་པས་རྗེས་ཐོབ་དུ་མི་རྟག་སོགས་སུ་མངོན་པར་ཞེན་པ་ནི་ཐེག་པ་རང་ལུགས་ཀྱི་རྟོགས་རིགས་ཡིན་པའི་ཕྱིར་རོ། །གཞན་དག་ནི་དཔྱད་པ་ཙམ་ཡང་མ་ཞུགས་པར་སྣང་ངོ་། །དེ་དག་གིས་གདམས་ངག་བཅུ་སྤྱིར་བཤད་ཟིན་ནས་དགེ་འདུན་དཀོན་མཆོག་གི་སྐབས་སུ་བྱང་ཆུབ་སེམས་དཔའི་སྐྱེ་བ་ལེན་ཚུལ་དང་། གཞན་དོན་ཕྲིན་ལས་བྱེད་ཚུལ་གྱི་རབ་ཏུ་དབྱེ་བ་མང་དུ་གསུངས་པ་རྣམས་འདིར་ལོགས་སུ་གསུངས་པ་ནི། དབང་པོ་རྟུལ་དང་རྣོན་པོ་དག །ཅེས་སོགས་ཚིགས་བཅད་གཉིས་ཏེ་འདི་དག་ལ། མཚོན་བྱ་མཚོན་བྱེད། མཚོན་ཚུལ་རྣམས་མཐའ་ཆོད་པའི་ལུང་རིགས་ཀྱིས་དཔྱད་དགོས་པ་ནི་ཁོ་བོས་བྱས་པའི་སྐྱེས་བུ་མཆོག་གི་གསལ་བྱེད་དུ་བསྟན་ཟིན་པས་དེར་བལྟ་བར་བྱའོ། །གདམས་ངག་བསྟན་ཟིན་ནས་དེའི་འོག་ཏུ་ངེས་འབྱེད་ཆ་མཐུན་བསྟན་ཏེ། བྱང་ཆུབ་ཀྱི་སེམས་བསྐྱེད་པའི་ལས་དང་པོ་པས་གདམས་ངག་ཉན་ཏེ། དེའི་དོན་ལ་ཐོས་བསམ་གྱིས་འབད་པས་ཇི་སྲིད་སངས་རྒྱས་སོགས་ཀྱི་ཡུལ་ལྔ་ལ་མཁས་པར་མ་གྱུར་གྱི་བར་དུ་ནི་ཚོགས་ལམ་ཕལ་པ་ཡིན་པར་ཆོས་ཤེས་ཀྱིས་བཤད་ལ། སངས་རྒྱས་སོགས་ཀྱི་ཡུལ་ལྔ་ལ་མཁས་པའི་ཚེ་རྣམ་རྫོགས་སྦྱོར་བའི་སྐབས་ནས་བསྟན་པའི་ཐར་པ་ཆ་མཐུན་ཡིན་ཞིང་། དེའི་དོན་རྩེ་གཅིག་ཏུ་བསྒོམ་པ་ལས་ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པ་ལ་གསལ་སྣང་ཐོབ་པའི་ཚེ་དྲོད་དང་། རྣམ་བྱང་གི་གཟུང་བ་རང་བཞིན་མེད་པ་ལ་གསལ་སྣང་ཐོབ་པའི་ཚེ་རྩེ་མོ་དང་། གང་ཟག་རྫས་ཡོད་ཀྱི་འཛིན་པ་རང་བཞིན་མེད་པ་ལ་གསལ་སྣང་ཐོབ་པའི་ཚེ་བཟོད་པ་དང་། སྐྱེས་བུ་བཏགས་ཡོད་ཀྱི་འཛིན་པ་རང་བཞིན་མེད་པ་ལ་གསལ་སྣང་ཐོབ་པའི་ཚེ་ཆོས་མཆོག་ཏུ་འཇོག་པའི་ཕྱིར་རོ། །འདི་དག་གི་དོན་ལ། མདོ་ལས་ཇི་ལྟར་གསུངས་པའི་ཚུལ། བསྟན་བཅོས་སུ་ཇི་ལྟར་བསྡུས་པའི་ཚུལ། ཁྱད་པར་གྱི་ཆོས་བྱེ་བྲག་ཏུ་བཤད་པ་དང་གསུམ་ལས། དང་པོ་ནི། གདམས་ངག་གི་མདོ་རྫོགས་པའི་རྗེས་སུ་དྲོད་ཆུང་ངུའི་དམིགས་རྣམ་བསྟན། དེའི་འོག་ཏུ་རྒྱུའི་ཁྱད་པར་བསྟན། དེ་ནས་དྲོད་འབྲིང་གི་དམིགས་རྣམ་ནས་ཆོས་མཆོག་ཆེན་པོའི་དམིགས་རྣམ་གྱི་བར་དང་། དེ་ནས་རྣམ་པར་རྟོག་པ་བཞི་དང་། དེ་ནས་ཡོངས་འཛིན་གསུངས་སོ། །གཉིས་པ་ལ། མདོའི་དོན་ཉན་རང་ལས་ཁྱད་པར་དུ་འཕགས་པའི་སྦྱོར་ལམ་དུ་བསྟན་ཚུལ་མདོར་བསྟན་པ་དང་། མདོའི་རིམ་པ་ལྟར་ཁྱད་ཆོས་སོ་སོར་བཤད་པ་གཉིས་ལས། དང་པོ་ནི། དམིགས་པ་དང་ནི་རྣམ་པ་དང་། །ཞེས་སོགས་ཚིགས་བཅད་གཉིས་ཏེ། འདི་ལ་གང་གིས་ཁྱད་པར་དུ་བྱེད་པའི་ཆོས། གང་ཁྱད་པར་དུ་བྱ་བའི་གཞི། གང་ལས་ཁྱད་པར་དུ་འཕགས་པའི་ཡུལ་དང་གསུམ་ལས། དང་པོ་ནི། དམིགས་པ་དང་ནི་རྣམ་པ་དང་། །རྒྱུ་དང་ཡོངས་སུ་འཛིན་པ་ཡིས། །ཞེས་པ་སྟེ། ཉན་རང་གི་སྦྱོར་ལམ་ནི་བདེན་པ་བཞི་ལ་དམིགས་པ་ཙམ་ཡིན་ལ། འདིས་ནི་བདེན་བཞིའི་སྟེང་གི་མི་རྟག་སོགས་ལ་ཡང་དམིགས་པ་དང་། ཉན་རང་གི་སྦྱོར་ལམ་ནི་མི་རྟག་སོགས་སུ་མངོན་པར་ཞེན་པའི་རྣམ་པ་ཅན་ཡིན་ལ། འདི་ནི་མངོན་ཞེན་བཀག་པའི་རྣམ་པ་ཅན་དང་། ཉན་རང་གི་སྦྱོར་ལམ་ནི་ཐེག་པ་གཅིག་དང་། གཉིས་ཀྱི་རྟོགས་རིགས་ཀྱི་རྒྱུ་ཙམ་ཡིན་ལ། འདི་ནི་ཐེག་པ་གསུམ་ཆར་གྱི་རྟོགས་རིགས་ཀྱི་རྒྱུ་ཡིན་པ་དང་། ཉན་རང་གི་སྦྱོར་ལམ་ནི་ཕྱི་ནང་གི་ཡོངས་འཛིན་གཉིས་དང་བྲལ་བས་ཐེག་དམན་དུ་ལྟུང་བ་ཡིན་ལ། འདི་ནི་ཕྱི་ནང་གི་ཡོངས་འཛིན་གཉིས་ཀྱི་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པ་སྟེ། ཁྱད་ཆོས་བཞིས་ཁྱད་པར་དུ་འཕགས་སོ། །འདིར་རྣམ་རྟོག་བཞི་དང་ལྡན་པ་ཁྱད་ཆོས་ཀྱི་ཁོངས་སུ་བགྲངས་ནས་ལྔར་བྱེད་པ་ནི་རྩ་བའི་དགོངས་པ་མ་ཡིན་ཏེ། མདོར་ཡོངས་འཛིན་གྱི་གོང་དུ་རྟོག་པ་ཡོད་བཞིན་དུ་འདིར་རྟོག་པ་འོག་ཏུ་དྲངས་ནས་ཡོངས་འཛིན་ཡན་ཆད་ལ་ཡིས་ཞེས་པའི་བྱེད་ཚིག་སྦྱར་བ་དང་འགལ་བའི་ཕྱིར་རོ། །དེས་ན་མདོར་བསྟན་དུ་ཡོངས་འཛིན་རྟོག་པའི་སྔར་གསུངས་པ་ནི་ཚིགས་བཅད་སྦྱར་བདེ་བའི་ཆེད་དང་། རྒྱས་བཤད་དུ་དེ་ལས་བཟློག་སྟེ་གསུངས་པ་ནི་རྟོག་པ་སྦྱོར་ལམ་གྱི་ཁྱད་ཆོས་སུ་ཤེས་པའི་ཆེད་ཡིན་ཞེས་གསུངས་པ་ཡང་འཐད་པར་མ་མཐོང་སྟེ། རྒྱས་བཤད་ནི་མདོའི་གོ་རིམ་ལྟར་ཡིན་ལ། མདོར་བསྟན་གྱི་སྐབས་སུ་རྟོག་པ་ཁྱད་གཞིའི་ཁོངས་སུ་བགྲངས་པ་ནི་རྟོག་པ་ཉན་རང་ལས་ཁྱད་པར་དུ་འཕགས་པའི་འཕགས་ཆོས་མ་ཡིན་ནོ་ཞེས་ཤེས་པའི་ཆེད་ཡིན་པའི་ཕྱིར་རོ། །འོ་ན་མདོར། རྟོག་པ་ཡོངས་འཛིན་གྱི་སྔར་གསུངས་པའི་དོན་ཅི་སྙམ་ན་ཁྱད་གཞིའི་ཁོངས་སུ་གཏོགས་པར་ཤེས་པའི་ཆེད་ཡིན་ནོ། །འདིར་ནི་ཉིར་སྣང་གི་དགོངས་པ་ཡང་ཡིན་ཏེ། དེ་ཉིད་དུ་འདི་དག་ལ་བརྗོད་པར་བྱ་བའི་ཁྱད་པར་ཅི་ཡོད་ཅེ་ན། ཉན་ཐོས་ལ་སོགས་པ་ལས་ཁྱད་པར་རྣམ་པ་བཞིས་འཕགས་པ་བརྗོད་པར་བྱ་བ་ཡིན་ཏེ། དམིགས་པའི་ཁྱད་པར་དང་། རྣམ་པའི་ཁྱད་པར་དང་། རྒྱུའི་ཁྱད་པར་དང་། ཡོངས་སུ་འཛིན་པའི་ཁྱད་པར་རོ་ཞེས་གསུངས་པའི་ཕྱིར་རོ། །འོ་ན་ལུང་དེ་ཉིད་ཀྱི་མཇུག་ཏུ་འཆད་པར་འགྱུར་བ་གཟུང་བ་དང་འཛིན་པའི་རྣམ་པར་རྟོག་པ་མཐོང་བ་དང་སྒོམ་པའི་ལམ་གྱིས་སྤང་བར་བྱ་བ་བཞི་རྣམས་ཀྱི་རྟོག་པ་དང་ཡང་དག་པར་ལྡན་པ་ཡང་བརྗོད་པར་བྱ་བ་ཡིན་ནོ། །ཞེས་གསུངས་པ་ཇི་ལྟར་དྲང་སྙམ་ན། སྦྱོར་ལམ་སྟོན་པའི་སྐབས་ཀྱི་མདོ་དང་། བསྟན་བཅོས་ཀྱི་བརྗོད་བྱ་ཡང་ཁྱད་ཆོས་བཞི་པོ་དེར་ངེས་སམ་སྙམ་ན་དེར་མ་ཟད་རྟོག་པ་ཡང་བརྗོད་བྱ་ཡིན་ཞེས་པའི་དོན་ཏེ། གཞན་དུ་ན་ཁྱད་པར་ལྔས་འཕགས་པ་བརྗོད་པར་བྱ་བ་ཡིན་ཏེ་ཞེས་ཅིའི་ཕྱིར་མི་བརྗོད། སློབ་དཔོན་གྱིས་རྟོག་པ་ཁྱད་ཆོས་སུ་བགྲང་བའི་འཁྲུལ་གཞི་ཡང་འདིས་བྱས་པར་མངོན་ནོ། །འོ་ན་ཡུལ་ནི་རྣམ་པ་གསུམ་པོ་རྒྱུ་ཞེས་པའི་འོག་ཏུ། ཉིར་སྣང་དུ། རེ་ཞིག་རྣམ་པ་ཐམས་ཅད་མཁྱེན་པ་ཉིད་ཀྱི་དབང་དུ་བྱས་ནས་བྱང་ཆུབ་སེམས་དཔའ་རྣམས་ཀྱིས་ངེས་པར་འབྱེད་པའི་ཆ་དང་མཐུན་པ་གང་ཡིན་པ་དེ་དག་ནི་ཉན་ཐོས་ལ་སོགས་པའི་ངེས་པར་འབྱེད་པའི་ཆ་དང་མཐུན་པ་རྣམས་ལས་ཁྱད་པར་རྣམ་པ་དྲུག་གིས་ཁྱད་པར་འཕགས་པ་ཡིན་ཏེ། ཞེས་བཤད་པ་དང་འགལ་ལོ་ཞེ་ན་དེའི་དོན་ནི་སྐབས་གོང་འོག་གི་སྦྱོར་ལམ་རྣམས་ཀྱི་མི་འདྲ་བའི་ཁྱད་པར་བསྟན་པའི་སྐབས་ཡིན་པས་སྐབས་དང་པོར་བསྟན་པའི་སྦྱོར་ལམ་དེ་སྐབས་འོག་མ་རྣམས་སུ་བསྟན་པའི་སྦྱོར་ལམ་ལས་ཁྱད་ཆོས་དྲུག་གི་སྒོ་ནས་བསྟན་པས་སྐབས་འོག་མ་རྣམས་དང་ཟློས་པའི་སྐྱོན་མེད་ཅེས་པའི་དོན་ཡིན་པའི་ཕྱིར་རོ། །གཞན་དུ་ན་ཁྱད་ཆོས་ལྔར་འདོད་པ་ལ་ཡང་ལུང་འདིས་གནོད་ཅིང་ཉིར་སྣང་ཉིད་ལ་ཡང་ནང་འགལ་བར་འགྱུར་བའི་ཕྱིར་ལེགས་པར་དཔྱོད་ཅིག གཉིས་པ་ཁྱད་གཞི་ནི། བྱང་ཆུབ་སེམས་དཔའ་སྐྱོབ་པ་ཡི། །ཞེས་སོགས་ཚིགས་བཅད་གཅིག་སྟེ། རྟེན་གྱི་ཁྱད་པར་བྱང་ཆུབ་སེམས་དཔའ་སྐྱོབ་པའི་རྒྱུད་ལ་ཡོད་པ། ངོ་བོ་དྲོད་སོགས་བཞི་ཡིན་པ། ལྡན་ཚུལ་གྲངས་ཇི་ལྟ་བ་བཞིན་དུ་རྗེས་ཐོབ་ཀྱི་གནས་སྐབས་སུ་སྒྲུབ་པའི་རྣམ་རྟོག་བཞི་པོ་ལྡན་ཅིང་། མཉམ་གཞག་གི་གནས་སྐབས་སུ་དགག་པའི་རྣམ་རྟོག་བཞི་པོ་ལྡན་པ་དང་། དབྱེ་བའི་ཁྱད་པར་རེ་རེ་ལ་ཡང་ཆུང་ངུ་འབྲིང་ཆེན་པོ་རྣམས་སུ་ཡོད་པ་སྟེ། ཁྱད་ཆོས་བཞི་དང་ལྡན་པའི་སྦྱོར་ལམ་དེ་ཉིད་ཁྱད་པར་དུ་འཕགས་པའི་གཞི་ཡིན་ནོ། །འདིར་ཁྱད་ཆོས་ཙམ་དང་། ཉན་རང་ལས་ཁྱད་པར་དུ་འཕགས་པར་བྱེད་པའི་ཆོས་གཉིས་མ་ནོར་བ་གལ་ཆེའོ། །གསུམ་པ་གང་ལས་ཁྱད་པར་དུ་འཕགས་པའི་ཡུལ་ནི་ཚིག་རྐང་ཐ་མ་གཉིས་ཀྱིས་སྟོན་ཏོ། །འོ་ན་གང་ཁྱད་པར་དུ་འཕགས་པའི་གཞི་ལ་ཁྱད་ཆོས་བཞི་སྨོས་པའི་དགོས་པ་གང་ཞེ་ན། རྟེན་གྱི་ཁྱད་པར་སྨོས་པ་ནི། སྤྱིར་བྱང་སེམས་ཀྱི་སྦྱོར་ལམ་ཙམ་དུ་ཤེས་པའི་ཆེད་ཡིན་ལ། ངོ་བོའི་ཁྱད་པར་ནི་འོག་གི་རྟོག་པ་བཞི་པོ་རིམ་པ་བཞིན་དུ་ལྡན་པའི་གཞི་དང་། ཆུང་ངུ་འབྲིང་ཆེན་པོ་གསུམ་དུ་དབྱེ་བའི་གཞི་ངོས་གཟུང་བའི་ཆེད་ཡིན་ནོ། །ལྡན་ཚུལ་གྱི་ཁྱད་པར་ནི་ཁྱད་པར་དུ་འཕགས་པའི་གཞི་དེ་ཡང་རྟོག་པ་དང་ངོ་བོ་གཅིག་ཡིན་ནོ་ཞེས་ཤེས་པའི་ཆེད་ཡིན་ནོ། །དབྱེ་བའི་ཁྱད་པར་ནི་དྲོད་སོགས་བཞི་ལ་གསུམ་གསུམ་དུ་ཕྱེ་ནས་བཅུ་གཉིས་པོ་རེ་རེའི་སྟེང་དུ་ཡང་གོང་དུ་བཤད་པའི་ཁྱད་ཆོས་བཞི་བཞི་དང་ལྡན་པར་ཤེས་པའི་ཆེད་ཡིན་ནོ། །མདོར་ན་ཚིག་རྐང་བར་པ་བཞིས་བསྟན་པའི་སྦྱོར་ལམ་ཆོས་ཅན། ཚིག་རྐང་ཐ་མ་གཉིས་ཀྱིས་བསྟན་དོན་ཡིན་ཏེ། ཚིག་རྐང་དང་པོ་གཉིས་ཀྱིས་བསྟན་པའི་ཁྱད་ཆོས་དང་ལྡན་པའི་ཕྱིར། ཞེས་པའི་མགོན་པོ་བྱམས་པའི་གཞུང་འདི་མ་དཀྲུགས་པར་རང་སོར་ཞོག་ཅིག གཉིས་པ་མདོའི་རིམ་པ་ལྟར་ཁྱད་པར་གྱི་ཆོས་སོ་སོར་བཤད་པ་ལ། དམིགས་རྣམ་རྒྱུ་གསུམ་རྒྱས་པར་བཤད། ལྡན་པ་རྣམ་རྟོག་རྒྱས་པར་བཤད། ཡོངས་འཛིན་དགེ་བཤེས་རྒྱས་པར་བཤད་པ་དང་གསུམ་ལས། དང་པོ་ནི། དམིགས་པ་མི་རྟག་ལ་སོགས་པ། །ཞེས་སོགས་ཚིགས་སུ་བཅད་པ་བདུན་ཏེ། སྦྱོར་ལམ་བཅུ་གཉིས་པོ་རེ་རེའི་སྟེང་དུ་ཡང་དམིགས་པ་དང་རྣམ་པ་དང་རྒྱུའི་ཁྱད་པར་གསུམ་གསུམ་དང་ལྡན་པར་བསྟན་ཏོ། །དེ་ཡང་མདོར། དྲོད་ཆུང་ངུའི་དམིགས་རྣམ་གྱི་འོག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་གང་ལ་བྱང་སེམས་ཆེན་པོ་རྣམས་ཀྱིས་ཉན་ཐོས་དང་རང་སངས་རྒྱས་ཀྱི་སའམ། བྱང་ཆུབ་སེམས་དཔའི་སའམ། སངས་རྒྱས་ཀྱི་ས་གང་ལ་བསླབ་པར་བྱ་བའི་ཐེག་པ་གསུམ་པོ་རྣམས་རྒྱ་ཆེར་བསྟན་ཏོ། །ཞེས་རྒྱུའི་ཁྱད་པར་གསུངས་པ་ལྟར། འདིར་ཡང་ཐེག་པ་གསུམ་ཆར་འཐོབ་པའི་རྒྱུ་ཞེས་གསུངས་པ་ནི་དྲོད་འབྲིང་ལ་སོགས་པ་ཕྱི་མ་བཅུ་གཅིག་པོ་ལ་ཡང་སྦྱར་བར་བྱ་བ་ཤེས་པའི་ཆེད་ཡིན་ནོ། །གཉིས་པ་ནི། གཞི་དང་དེ་ཡི་གཉེན་པོ་ཡི། །ཞེས་སོགས་ཚིགས་སུ་བཅད་པ་གཉིས་ཏེ། མདོར་ཡང་གནས་སྐབས་འདིར་གསུངས་པ་ལྟར་རྒྱས་བཤད་དུ་ཡང་གནས་སྐབས་འདིར་གསུངས་པ་ནི་གང་ཁྱད་པར་དུ་འཕགས་པའི་གཞི་དེ་ཡང་རྣམ་རྟོག་བཞི་དང་མཚུངས་པར་ལྡན་པའི་སྦྱོར་ལམ་ཡིན་གྱི། དམན་ལམ་སྔོན་སོང་གི་བྱང་སེམས་སྦྱོར་ལམ་པའི་རྒྱུད་ཀྱི་རྣལ་འབྱོར་མངོན་སུམ་ལྟ་བུ་དང་། གཞན་སེམས་ཤེས་པའི་མངོན་ཤེས་ལྟ་བུ་ནི་མ་ཡིན་ནོ། །ཞེས་པའི་དོན་ཏོ། །གསུམ་པ་ནི། སེམས་མི་འགོང་པ་ཉིད་ལ་སོགས། །ཞེས་སོགས་ཚིགས་བཅད་གཅིག་སྟེ། འཕགས་པས་ཚིག་རྐང་དང་པོ་དང་། གསུམ་པས་ནང་གི་ཡོངས་འཛིན་ཐབས་མཁས་དང་། གཉིས་པ་དང་གསུམ་པས་ཕྱིའི་ཡོངས་འཛིན་དགེ་བཤེས་དང་། བཞི་པས་དོན་བསྡུ་བསྟན་པར་བཞེད་ཅིང་། སློབ་དཔོན་གྱིས་ནི་ཚིག་རྐང་དང་པོ་གསུམ་ཕྱིའི་ཡོངས་འཛིན་དགེ་བཤེས་ཀྱི་ཁྱད་ཆོས་གསུམ་ལ་སྦྱོར་བར་མཛད་དོ། །འོ་ན་རྟོག་པ་ཁྱད་གཞིའི་ཁོངས་སུ་བགྲངས་ན་ཁྱད་ཆོས་བཞིའི་གོ་རིམ་ཇི་ལྟར་ཡིན་སྙམ་ན་ཐོག་མར་དམིགས་པའི་ཁྱད་ཆོས་བསྟན་དགོས་ཏེ། ཁྱད་ཆོས་འོག་མ་རྣམས་འདི་ལ་བརྟེན་ནས་འབྱུང་དགོས་པའི་ཕྱིར་རོ། །དེ་ནས་རྣམ་པའི་ཁྱད་ཆོས་སྟོན་ཏེ། མི་རྟག་སོགས་ཀྱང་དམིགས་པར་བྱེད་ན་རྣམ་པ་ཇི་ལྟར་ཡིན་སྙམ་ན་འདིར་ཆོས་སུ་ལྟ་བའི་གཉེན་པོ་ཡིན་པས་མངོན་ཞེན་བཀག་པའི་རྣམ་པ་ཅན་ཡིན་ནོ་ཞེས་པའི་དོན་ཏོ། །འོ་ན་ཐེག་ཆེན་གྱི་རྟོགས་རིགས་ཁོ་ན་ཡིན་ནམ་སྙམ་ན་དེའི་འོག་ཏུ་རྒྱུའི་ཁྱད་པར་བསྟན་ཏེ། ཐེག་པ་གསུམ་ཆར་གྱི་རྟོགས་རིགས་ཚང་བའི་མཐོང་ལམ་གྱི་རྒྱུ་བྱེད་པས་ད་ལྟ་ཡང་ཐེག་པ་གསུམ་ཆར་གྱི་རྟོགས་རིགས་ཚང་ཞེས་པའི་དོན་ཏོ། །ཐེག་པ་གསུམ་ཆར་གྱི་རྒྱུ་ཡིན་ན། ཐེག་དམན་དུ་ལྟུང་བར་འགྱུར་རོ་ཞེ་ན་དེའི་འོག་ཏུ་ཡོངས་འཛིན་སྟོན་ཏེ། ཕྱི་ནང་གི་ཡོངས་འཛིན་གཉིས་ཀྱིས་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་ཞེས་པའི་དོན་ཏོ། །གོ་རིམ་འདིས་ཀྱང་རྟོག་པ་ཁྱད་ཆོས་ཀྱི་ཁོངས་སུ་མི་བགྲང་བར་གྲུབ་བོ། །གསུམ་པ་ཁྱད་པར་གྱི་ཆོས་བྱེ་བྲག་ཏུ་བཤད་པ་ལ་དམིགས་རྣམ་གྱི་ཁྱད་པར་ལས་འཕྲོས་ནས་བློ་རིགས་ངོས་གཟུང་བ། རྒྱུའི་ཁྱད་པར་ལས་འཕྲོས་ནས་རྟོགས་རིགས་གསུམ་པོ་གཅིག་དང་ཐ་དད་དཔྱད་པ། ཁྱད་གཞི་རྟོག་པའི་དཀའ་གནས་ལ་དཔྱད་པ་དང་གསུམ་ལས། དང་པོ་ནི་ཁ་ཅིག རྣལ་འབྱོར་མངོན་སུམ་དུ་འདོད་པ་ནི་སྔ་མ་ཕལ་ཆེར་གྱིས་བཀག་ཅིང་དོན་ལ་ཡང་མི་གནས་སོ། །གཞན་དག་རང་རིག་མངོན་སུམ་དུ་འདོད་པ་ནི་ཤེས་པ་ཐམས་ཅད་རང་གི་ངོ་བོ་ལ་རང་རིག་མངོན་སུམ་ཡིན་པ་ཙམ་ལ་དགོངས་སོ། །འཐད་པའི་ཕྱོགས་ནི་རྒྱུན་ཞུགས་སོགས་ཀྱི་རྟོགས་པ་སྔོན་དུ་སོང་བའི་དབང་དུ་བྱས་པ་དང་། མ་སོང་བའི་དབང་དུ་བྱས་པ་དང་གཉིས་ལས། དང་པོ་ལྟར་ན་རྣལ་འབྱོར་མངོན་སུམ་ཡིན་པ་ཡང་ཡོད་དེ། སྔར་གྱི་ཉོན་སྒྲིབ་ཀྱི་ལྷག་མ་སྤོང་དགོས་པས་གང་ཟག་གི་བདག་མེད་སྒོམ་པའི་ཚེ་དེ་མངོན་སུམ་དུ་རྟོགས་པ་ཡིན་པའི་ཕྱིར་དང་། དགྲ་བཅོམ་གྱི་རྟོགས་པ་སྔོན་སོང་ལ་ཡང་རེས་འགའ་མངོན་དུ་འགྱུར་སྲིད་པའི་ཕྱིར། གལ་ཏེ་དེ་དག་བྱང་སེམས་ཀྱི་སྦྱོར་ལམ་མ་ཡིན་ནོ་སྙམ་ན་བྱང་སེམས་སྦྱོར་ལམ་པའི་རྒྱུད་ཀྱི་གཞི་ཤེས་ཀྱི་རྣམ་པ་སྒོམ་པའི་བློ་ཡིན་པས་རྣམ་རྫོགས་སྦྱོར་བར་འབད་མེད་དུ་གྲུབ་ལ། བྱང་སེམས་སྦྱོར་ལམ་པའི་རྒྱུད་ཀྱི་རྣམ་རྫོགས་སྦྱོར་བ་ལ་བྱང་སེམས་ཀྱི་སྦྱོར་ལམ་མ་ཡིན་པ་མི་སྲིད་དོ། །གཉིས་པ་ལ། ཐེག་པ་གསུམ་ཆར་འཐོབ་པའི་རྒྱུར་གྱུར་པའི་ཐེག་པ་གསུམ་གྱི་རྟོགས་རིགས་སུ་གྱུར་པའི་སྦྱོར་ལམ་རྣམས་ནི་སྒྲ་དོན་འདྲེས་འཛིན་གྱི་རྟོག་པ་ཁོ་ན་ཡིན་ཏེ། བདག་མེད་གསུམ་པོ་དོན་སྤྱིའི་ཚུལ་གྱིས་རྟོགས་པའི་བློ་ཡིན་པའི་ཕྱིར་རོ། །དམན་ལམ་སྔོན་དུ་མ་སོང་བ་ལ་ཡང་སྦྱོར་ལམ་ཐམས་ཅད་ནི་དེར་མ་ངེས་ཏེ། བྱང་སེམས་སྦྱོར་ལམ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་བྱང་སེམས་ཀྱི་སྦྱོར་ལམ་དུ་ཁས་ལེན་དགོས་པའི་ཕྱིར་རོ། །གཉིས་པ་ནི་བྱང་སེམས་ཀྱི་སྦྱོར་ལམ་གྱི་གནས་སྐབས་སུ་རྟོགས་རིགས་གསུམ་པོ་དེ་ངོ་བོ་ཐ་དད་དུ་ཡོད་དེ། རྟོག་པ་སེལ་འཇུག་ཡིན་པས་གང་ཟག་གི་བདག་མེད་ཀྱི་རྣམ་པ་ཅན་དུ་སྐྱེས་པའི་ཚེ་ཆོས་ཀྱི་བདག་མེད་ཀྱི་རྣམ་པ་ཅན་དུ་སྐྱེས་པ་མ་ཡིན་པའི་ཕྱིར་རོ། །ས་དང་པོ་ཡན་ཆད་དུ་ངོ་བོ་གཅིག་ཏུ་ཡོད་དེ། ཡེ་ཤེས་གཅིག་ཉིད་ཀྱིས་སྤྲོས་པ་ཐམས་ཅད་ཅིག་ཅར་དུ་བཀག་ནུས་ལ་དེའི་ཚེ་བདེན་བཞིའི་སྟེང་དུ་རྟག་སོགས་བཅུ་དྲུག་གི་སྤྲོས་པ་བཀག་པའི་ཆ་ནས་གང་ཟག་གི་བདག་མེད་རྟོགས་པའི་རྟོགས་རིགས་དང་། གཟུང་བའི་དོན་དུ་སྤྲོས་པ་བཀག་པའི་ཆ་ནས་གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་དང་། མི་རྟག་སོགས་བཅུ་དྲུག་གི་སྤྲོས་པ་བཀག་པའི་ཆ་ནས་འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས་སུ་འཇོག་པའི་ཕྱིར་རོ། །གསུམ་པ་མཚུངས་ལྡན་རྟོག་པའི་དཀའ་བའི་གནས་ལ་དཔྱད་པ་ལ། ངོ་བོ་དང་སྤང་བྱ་གང་དུ་ལྡན་དཔྱད། དགག་རྟོག་དང་། སྒྲུབ་རྟོག་གང་ཡིན་དཔྱད། མཐོང་སྤང་དང་། སྒོམ་སྤང་གང་ཡིན་དཔྱད། སྒྲིབ་པ་གཉིས་པོ་གང་ཡིན་དཔྱད་པ་དང་བཞི་ལས། དང་པོ་ནི། ལོ་ཆེན་གྱིས་རྟོག་པ་བཞི་པོ་འདི་དག་རྗེས་ཐོབ་ཁོ་ན་ལ་ལྡན་ཅིང་། ལྡན་ཚུལ་རང་གི་མཐོང་སྒོམ་གྱི་སྤང་བྱར་ལྡན་པ་ཡིན་གསུང་། དེ་ལ་འབྲེས་མཉམ་གཞག་ན་རྟོག་པ་མེད་པ་ནི་མི་རིགས་ཏེ། མཐོང་ལམ་དང་ཁྱད་པར་མེད་པར་ཐལ་བའི་ཕྱིར་རོ། །ཞེས་པའི་དགག་པ་མཛད་དོ། །ཨ་མ་རས་དཔེར་ན་དང་པོར་དགྲ་བཙོན་དུ་འཛིན་པ་དང་། ཉམས་དམོད་པ་དང་། མཚོན་དང་པོ་བརྒྱབ་པ་དང་། མཚོན་གཉིས་པ་བརྒྱབ་ནས་གནད་དུ་ཕོག་པ་དང་། ཤི་བའི་གནས་སྐབས་དང་ལྔ་ཡོད་པ་བཞིན་དུ་ཚོགས་ལམ་དུ་རྟོག་པ་བཙོན་དུ་འཛིན། ངེས་འབྱེད་དུ་མངོན་འགྱུར་དང་ས་བོན་མགོ་གནོན། མཐོང་ལམ་དུ་རགས་པ་སྤོང་། སྒོམ་ལམ་དུ་ཕྲ་བ་སྤོང་། མི་སློབ་ལམ་དུ་རྟོག་པ་འགགས་པའི་གནས་སྐབས་དང་ལྔ་ཡོད་དོ་ཅེས་བཤད་པ་དང་མཐུན་པར་དྭགས་པོ་དང་། ཁྱུང་ལ་སོགས་པ་ནི་རྣམ་རྟོག་བཞི་པོ་སྤོང་ལྡན་པ་ཞེས་བསྟན་ནས་དེ་དག་སྤང་བའི་གཉེན་པོའི་སྒོ་ནས་ཁྱད་པར་དུ་འཕགས་པ་ཡིན་ནོ་ཞེས་ཟེར་རོ། །དེ་ལ་འབྲེས། སོ་སོ་སྐྱེ་བོ་ཕྱིན་ཅི་ལོག་ཅེས་སྦྱོར་ལམ་བཞི་པོ་ནི་རང་གི་ངོ་བོ་ཕྱིན་ཅི་ལོག་ཡིན་པས་ཕྱིན་ཅི་ལོག་གི་གཉེན་པོར་འགལ་ལོ་ཞེས་བཀག་ནས། རང་ལུགས་ལ་འདི་དག་ཁྱད་པར་བྱེད་ཆོས་སུ་བཤད་པས་སྒྲུབ་རྟོག་མ་ཡིན་ལ་མཐོང་ལམ་དང་ཁྱད་པར་མེད་པར་ཐལ་བས་མཉམ་གཞག་ན་མི་ལྡན་པ་ཡང་མ་ཡིན་ཞིང་། ཕྱིན་ཅི་ལོག་ཡིན་པས་ཕྱིན་ཅི་ལོག་གི་གཉེན་པོར་མི་རུང་བའི་ཕྱིར་ན་སྤང་བྱར་ལྡན་པ་མ་ཡིན་ནོ་ཞེས་བཞེད་དོ། །ཨར་གྱིས་ཕྱིན་ཅི་ལོག་ཡིན་ཡང་ཐོགས་མེད་ཀྱིས་སུན་འབྱིན་པའི་གཉེན་པོ་དང་། མགོ་གནོན་པའི་གཉེན་པོར་བཤད་པ་དང་། འདི་ཉིད་ནས་ཀྱང་ཆོས་སུ་ལྟ་བའི་གཉེན་པོར་ཉིད་ཀྱིས་ཞེས་གསུངས་པས་གཉེན་པོར་མི་འགལ་ལོ་ཞེས་བཀག་ནས་སྤང་བྱར་ལྡན་པར་འདོད་དོ། །དེ་ལ་སོགས་པའི་ལུགས་རབ་ཏུ་མང་བར་སྣང་ཡང་གནད་ཀྱི་དོན་ནི་འདི་ཡིན་ཏེ། གཞུང་ཉིད་ལས་དྲོད་ལ་སོགས་པའི་བདག་ཉིད་ཇི་ལྟ་བ་བཞིན་དུ་རྣམ་རྟོག་བཞི་པོ་ལྡན་ཞེས་པ་དང་། བསྟན་ཞེས་འབྱུང་བས་ལྡན་ཞེས་པའི་ཚིག་དོན་སྤང་བྱར་ལྡན་པ་ལ་འཆད་པ་ནི་མི་རིགས་ཏེ། སྤང་བྱ་ལ་ལྡན་པའི་སྒྲ་སྦྱོར་ན་ཧ་ཅང་ཐལ་བའི་ཕྱིར་རོ། །ཉིར་སྣང་ལས་ཀྱང་དེ་ལ་ངེས་པར་འབྱེད་པའི་ཆ་དང་མཐུན་པ་དང་པོ་དང་གཉིས་པ་དག་ནི་གོ་རིམ་བཞིན་དུ་གཟུང་བའི་རྣམ་པར་རྟོག་པ་གཉིས་སུ་འགྱུར་བ་ཡིན་ལ། གསུམ་པ་དང་བཞི་པ་དག་ཀྱང་འཛིན་པའི་རྣམ་པར་རྟོག་པ་གཉིས་ཡིན་ནོ་ཞེས་དང་། འགྲེལ་ཆུང་དུ་ཡང་། དེ་ལྟ་བུའི་རྣམ་པར་རྟོག་པ་བཞི་དང་། ངེས་པར་འབྱེད་པའི་ཆ་དང་མཐུན་པ་བཞི་པོ་གྲངས་བཞིན་དུ་ལྡན་པ་ཡིན་ནོ། །ཞེས་གསུངས་ཀྱི་སྤང་བྱར་ལྡན་པ་ཅུང་ཟད་ཀྱང་མ་གསུངས་པའི་ཕྱིར་རོ། །འོན་ཀྱང་སྦྱོར་ལམ་གྱིས་སྤང་བྱ་མ་ཡིན་པ་ནི་མི་འདོད་དེ། སྐབས་འདིའི་དངོས་བསྟན་གྱི་རྟོག་པ་བཞི་པོ་མཐོང་སྤང་ཡིན་པས་དེའི་སྤོང་བ་གཉེན་པོ་ལ་སྦྱོར་བའི་ལམ་དང་། བར་ཆད་མེད་པའི་ལམ་གཉིས་ཡོད་པས་སྔ་མ་ནི་སྦྱོར་ལམ་བཞི་ཆར་དང་། ཕྱི་མ་ནི་སྡུག་བསྔལ་ཆོས་བཟོད་ཀྱི་སྐད་ཅིག་མ་གཅིག་ལ་འཇོག་པ་ནི་གཞུང་གི་དགོངས་པ་ཡིན་ནོ། །དེ་ལྟར་ན་འགྲེལ་ཆེན་དང་། གནད་ཀྱི་ཟླ་འོད་སོགས་ལས། སྦྱོར་བའི་གནས་སྐབས་སུ་ཆ་ཤས་སུ་ཕྱེ་ནས་སྤོང་། བར་ཆད་མེད་པའི་གནས་སྐབས་སུ་ཅིག་ཅར་དུ་སྤོང་བར་བཤད་པ་དང་གནད་གཅིག་པར་འབྱུང་སྟེ། མཐོང་སྤང་གཟུང་འཛིན་གྱི་རྣམ་པར་རྟོག་པ་མངོན་འགྱུར་བ་བཞི་པོ་དེ་ནི་སྦྱོར་ལམ་མཉམ་གཞག་བཞིས་སོ་སོར་སྤོང་བས་སྦྱོར་ལམ་བཞི་ལ་གཟུང་བ་རང་བཞིན་མེད་པ་ལ་གསལ་སྣང་ཐོབ་པ་སོགས་སུ་འཇོག་པའི་ཕྱིར་དང་། ས་བོན་བཞི་པོ་སྡུག་བསྔལ་ཆོས་བཟོད་ཀྱིས་ཅིག་ཅར་དུ་སྤོང་བས་སྡུག་བསྔལ་ཆོས་བཟོད་གཅིག་ཉིད་ལ་མཐོང་ལམ་རྩེ་སྦྱོར་བཞིར་འཇུག་པའི་ཕྱིར་རོ། །དེས་ན་འདིར་ལྡན་པའི་དོན་ནི་བྱང་སེམས་ཀྱི་སྦྱོར་ལམ་རྗེས་ཐོབ་བཞི་ལ་དངོས་བསྟན་སྒྲུབ་རྟོག་བཞི་པོ་ངོ་བོར་ལྡན་ཞིང་། མཉམ་གཞག་བཞི་ལ་ཤུགས་བསྟན་དགག་རྟོག་བཞི་པོ་ངོ་བོར་ལྡན་པས་ན་ལྡན་ཞེས་པ་དང་། བསྟེན་ཞེས་པའི་ཚིག་གཉིས་འབྱུང་སྟེ་མཉམ་རྗེས་གང་དང་གང་ཉམས་སུ་ལེན་པའི་ཚེ་དེའི་ངོ་བོར་ལྡན་པ་དེ་ཉིད་བསྟེན་པ་ཡང་ཡིན་པའི་ཕྱིར་རོ། །འོ་ན་སྒྲུབ་རྟོག་རྗེས་ཐོབ་ལ་ངོ་བོར་ལྡན་པའི་ཚུལ་ཇི་ལྟར་སྙམ་ན་དྲོད་ཀྱི་རྗེས་ཐོབ་ཏུ་ཀུན་ནས་ཉོན་མོངས་ཀྱིས་ཆོས་སམ། ཐེག་དམན་གྱི་ལམ་འབྲས་བུ་དང་བཅས་པ་ནི་དོར་བྱའི་གཟུང་བར་མངོན་པར་ཞེན། རྩེ་མོའི་རྗེས་ཐོབ་ཀྱི་གནས་སྐབས་སུ་རྣམ་བྱང་གི་ཆོས་སམ་བྱང་སེམས་ཀྱི་ལམ་འབྲས་བུ་དང་བཅས་པ་ནི་བླང་བྱའི་གཟུང་བར་མངོན་པར་ཞེན། བཟོད་པའི་རྗེས་ཐོབ་ཀྱི་གནས་སྐབས་སུ་མཉམ་གཞག་གི་ལྟ་བས་མ་ཟིན་པའི་ཚེ། སེམས་ཅན་ལ་དམིགས་པའི་སྙིང་རྗེས་གང་ཟག་རྫས་ཡོད་ལ་དམིགས་ནས་ལོངས་སྤྱོད་པ་པོར་མངོན་པར་ཞེན། ཆོས་མཆོག་གི་རྗེས་ཐོབ་ཏུ་ནི་ཆོས་ལ་དམིགས་པའི་སྙིང་རྗེས་སྐྱེས་བུ་བཏགས་ཡོད་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའོ། །དེ་དག་གི་རྒྱུ་མཚན་ནི་དྲོ་བ་རྣམས་ཀྱིས་དམིགས་པ་འདིར་ཞེས་པའི་སྐབས་སུ་ཤེས་པར་འགྱུར་རོ། །མཉམ་གཞག་ལ་དགག་རྟོག་ངོ་བོར་ལྡན་པའི་ཚུལ་ནི་དྲོད་ཀྱི་མཉམ་གཞག་ཏུ་ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པར་རྟོག་པའི་ཚེ་དེར་ཞེན་པ་ལས་མ་འདས་ཏེ། སྒྲ་དོན་འདྲེས་འཛིན་གྱི་རྟོག་པ་ཡིན་པའི་ཕྱིར་རོ། །དེར་ཞེན་པ་དེ་ཉིད་ཀྱང་ལམ་ཕྱི་མ་ལ་ལྟོས་ཏེ། སྤང་བྱའི་རྣམ་རྟོག་ཡིན་ཏེ། སྤྱིར་དབུ་མའི་ལྟ་བ་ལ་ཡོད་པར་ཞེན་པ་དང་། མེད་པར་ཞེན་པ་དང་། བདེན་པར་ཞེན་པ་དང་། བདེན་མེད་དུ་ཞེན་པ་ཐམས་ཅད་བཀག་ནས་མཐར་འཛིན་པ་གང་ཡང་མེད་པ་ཅིག་དགོས་པའི་ཕྱིར་རོ། །དེང་སང་ལྟ་བ་སྤྲོས་བྲལ་བཀག་ནས། དབུ་མའི་དགག་བྱ་ནི་བདེན་པ་ཁོ་ན་ཡིན་གྱི་སྟོང་ཉིད་དུ་མངོན་པར་ཞེན་པ་དགག་མི་དགོས་ཞེས་སྨྲ་བ་ནི་གཞན་དུ་བཀག་ཟིན་ཅིང་། མདོར་སྟོང་ཞེས་བྱ་བར་སྤྱོད་པ་དང་། མི་སྟོང་ཞེས་བྱ་བར་སྤྱོད་པ། གཉིས་ཀ་མཚན་མ་ལ་སྤྱོད་པར་གསུངས་པ་དང་། འདིར་ཡང་མི་རྟག་ལ་སོགས་བཅུ་དྲུག་ལ་མངོན་ཞེན་བཀག་པའི་ཚེ་སྟོང་པ་དང་བདག་མེད་ལ་ཡང་མངོན་ཞེན་བཀག་དགོས་པ་སོགས་ཕལ་ཆེར་དང་འགལ་བར་འགྱུར་རོ། །ངོ་བོར་ལྡན་པའི་ཚེ་སྦྱོར་ལམ་འདིར་བསྟན་གྱི་རྟོག་པ་ཡིན་ཞེས་པ་དང་། འདིར་བསྟན་གྱི་རྟོག་པ་དེ་སྦྱོར་ལམ་ཡིན་ཞེས་པར་ནི་ཁས་མི་ལེན་ཏེ། འདིར་བསྟན་གྱི་རྟོག་པ་ནི་མངོན་པར་ཞེན་པའི་ཆ་ནས་འཇོག་དགོས་ཤིང་སྦྱོར་ལམ་ནི་མངོན་ཞེན་བཀག་པའི་ཆ་ནས་འཇོག་དགོས་པའི་ཕྱིར་རོ། །འོ་ན་ངོ་བོ་གཅིག་པར་འགལ་ལོ་ཞེ་ན་དྲོད་མཉམ་གཞག་གི་གནས་སྐབས་སུ་སྡུག་བསྔལ་གྱི་བདེན་པ་མི་རྟག་པ་ལ་མངོན་པར་ཞེན་པ་བཀག་པའི་ཚེ་མི་རྟག་པ་མ་ཡིན་ནོ་སྙམ་དུ་མངོན་པར་ཞེན་པ་ལས་མ་འདས་པས་མི་རྟག་པ་ལ་མངོན་པར་ཞེན་པ་བཀག་པ་དང་། མི་རྟག་པ་མ་ཡིན་པར་མངོན་པར་ཞེན་པ་གཉིས་བློ་ངོ་བོ་གཅིག་ཏུ་ཡོད་ཅིང་། དེའི་ཚེ་མི་རྟག་པ་ལ་མངོན་ཞེན་བཀག་པའི་ཆ་དེ་སྦྱོར་ལམ་ཡིན་ཀྱང་འདིར་བསྟན་གྱི་རྟོག་པ་མ་ཡིན། མི་རྟག་པ་མ་ཡིན་པར་མངོན་པར་ཞེན་པའི་ཆ་དེ་འདིར་བསྟན་གྱི་རྟོག་པ་ཡིན་ཀྱང་སྦྱོར་ལམ་དུ་མི་འཇོག་པས་འགལ་བ་མེད་དོ། །དེ་བཞིན་དུ་བློ་སྔ་མས་གང་དུ་ཞེན་པའི་ཡུལ་དེ་ཉིད་བློ་ཕྱི་མས་བཀག་ནས་སྟོང་པ་དང་མི་སྟོང་པ་སོགས་ཀྱི་ཞེན་པ་མཐའ་དག་ཀྱང་བཀག་དགོས་པས་དམིགས་རྣམ་ཐམས་ཅད་ལ་སྦྱར་བར་བྱ་སྟེ་བཤད་ཀྱིས་ག་ལ་ལང་། གནད་འདི་ཤེས་ན་དགག་རྟོག་དང་སྦྱོར་ལམ་མཉམ་གཞག་ངོ་བོ་གཅིག་ཏུ་འཇོག་པའི་ཚུལ་དང་། རྟོག་པས་སྤྲོས་པ་ཅིག་བཀག་ཀྱང་ཅིག་ཤོས་སུ་འཛིན་པས་རེས་འཇོག་གིས་ཐམས་ཅད་བཀག་དགོས་པའི་ཚུལ་དང་། རྣལ་འབྱོར་མངོན་སུམ་གྱིས་སྤྲོས་པ་མཐའ་དག་ཅིག་ཅར་དུ་བཀག་པའི་ཚུལ་རྣམས་གནད་གཅིག་ཏུ་འདུས་པར་གོ་བར་འགྱུར་ཞིང་། གཞན་དུ་ན་བསྐལ་པར་བཙལ་ཀྱང་གོ་བར་མི་འགྱུར་རོ། །གཉིས་པ་དགག་རྟོག་དང་སྒྲུབ་རྟོག་གང་ཡིན་དཔྱད་པ་ནི། ཁ་ཅིག་སྒྲུབ་རྟོག་ཁོ་ནར་འདོད་པ་དང་། གཞན་དག་དགག་རྟོག་ཁོ་ནར་འདོད་པ་དང་། ལོ་ཙཱབའི་བླ་མ་འགའ་ཞིག་རྟོག་པ་བཞི་པོ་སྦྱོར་ལམ་ལ་ངོ་བོར་ལྡན་དགོས་པས། གསུམ་པ་དགག་རྟོག་དང་གཞན་གསུམ་པོ་སྒྲུབ་རྟོག་ཏུ་འདོད་པ་སོགས་དུ་མ་སྣང་ཡང་རྩ་བའི་དགོངས་པ་ནི་འདི་ལྟར་ཡིན་ཏེ། མདོར་རྟོག་པ་གཞན་གསུམ་ལ་དགག་རྟོག་དངོས་སུ་བསྟན་ཞིང་། སྒྲུབ་རྟོག་ཤུགས་ལ་བསྟན་ལ། བསྟན་བཅོས་སུ་ནི་གཞན་གསུམ་དེ་ལས་བཟློག་སྟེ་བསྟན་པས། བསྟན་བཅོས་ཀྱི་དངོས་བསྟན་སྒྲུབ་རྟོག་ཁོ་ན་ཡིན་ཏེ། ཡུལ་དགུ་བཞི་སོ་དྲུག་ལ་དམིགས་ནས་གཟུང་བ་དང་འཛིན་པའི་རྣམ་པ་ཅན་ཡིན་པས། སྒྲུབ་རྟོག་ལས་འོས་མེད་པའི་ཕྱིར་རོ། །མདོའི་དངོས་བསྟན་དང་བསྟན་བཅོས་ཀྱི་ཤུགས་བསྟན་ནི་དགག་རྟོག་ཡིན་ཏེ། ཡུལ་སོ་དྲུག་ལ་དམིགས་ནས་གཟུང་འཛིན་རང་བཞིན་མེད་པའི་རྣམ་པ་ཅན་ཡིན་པས། འཛིན་སྟངས་དགག་པའི་རྣམ་པ་ཅན་ཡིན་པའི་ཕྱིར་རོ། །དགག་རྟོག་ཁས་ལེན་པའི་ཚེ་ན་ཡང་། བུམ་པ་བདེན་མེད་བདེན་པར་མངོན་པར་ཞེན་པའི་བློ་ལྟ་བུ་ནི་དགག་རྟོག་ཏུ་ཁས་མི་ལེན་ཏེ། འཛིན་སྟངས་སྒྲུབ་པའི་རྣམ་པ་ཅན་ཡིན་པའི་ཕྱིར་རོ། །མདོར་ན་འཛིན་སྟངས་སྒྲུབ་པའི་རྣམ་པ་ཅན་གྱི་མངོན་པར་ཞེན་པ་དེ་སྤང་བྱ་ཡིན་ན་དེའི་ལོག་ཕྱོགས་དགག་པའི་རྣམ་པ་ཅན་གྱིས་མངོན་པར་ཞེན་པ་དེ་ཡང་སྤང་བྱ་ཡིན་དགོས་ཏེ་ཡོད་མེད་ཡིན་མིན་སོགས་གཉིས་འཛིན་གྱི་སྤྲོས་པ་མཐའ་དག་བཀག་དགོས་པའི་ཕྱིར་རོ། །འདི་ནི་དབུ་མའི་ལྟ་བ་སྟོན་པའི་བཀའ་དང་བསྟན་བཅོས་ཐམས་ཅད་ལས་མགྲིན་གཅིག་ཏུ་འབྱུང་ཡང་། ལྷན་སྐྱེས་ཀྱི་མགོ་ལ་ཀུན་བཏགས་ཀྱི་ཞྭ་མོ་གྱོན་པ་དག་གིས་ནི་མ་མཐོང་བར་སྣང་ངོ་། །གསུམ་པ་མཐོང་སྤང་དང་། སྒོམ་སྤང་གང་ཡིན་དཔྱད་པ་ནི། དངོས་བསྟན་གྱི་སྒྲུབ་རྟོག་བཞི་པོ་ནི་མཐོང་སྤང་ཁོ་ན་ཡིན་ཏེ། ཉིར་སྣང་དུ་ད་ནི་རྣམ་པར་རྟོག་པ་དང་ཡང་དག་པར་ལྡན་པ་བཤད་པར་བྱའོ། །དེ་ལ་མཐོང་བའི་ལམ་གྱི་མི་མཐུན་པའི་ཕྱོགས་ནི་རྣམ་པར་རྟོག་པ་རྣམ་པ་བཞི་སྟེ། ཅི་ལྟར་ཞེ་ན། གཟུང་བའི་རྣམ་པར་རྟོག་པ་རྣམ་པ་གཉིས་ཏེ། དངོས་པོ་ཙམ་ལ་བརྟེན་པ་དང་། གཉེན་པོའི་ཕྱོགས་ལ་བརྟེན་པའོ། །ཙམ་སྨོས་པ་ནི་ཁྱད་པར་གསལ་བའི་དོན་དུ་ཡིན་ནོ། །འཛིན་པའི་རྣམ་པར་རྟོག་པ་རྣམ་པ་གཉིས་ཏེ། གང་ཟག་རྫས་སུ་ཡོད་པའི་རྟེན་ཅན་དང་། སྐྱེས་བུ་བཏགས་པར་ཡོད་པའི་རྟེན་ཅན་ནོ། །ཞེས་གསུངས་པའི་ཕྱིར་རོ། །བྱང་སེམས་ཀྱི་སྦྱོར་ལམ་མཉམ་གཞག་བཞི་ཆར་མཐོང་སྤང་གི་སྤོང་བ་གཉེན་པོ་ལ་གཉིས་སུ་ཕྱེ་བའི་སྦྱོར་བའི་ལམ་ཡིན་ཞིང་དངོས་བསྟན་གྱི་རྟོག་པ་བཞི་པོ་མཉམ་གཞག་དང་། འཛིན་སྟངས་དངོས་སུ་འགལ་བའི་གནད་ཀྱིས་ཀྱང་། མཐོང་སྤང་དུ་གྲུབ་སྟེ་སྔར་བཤད་ཟིན་ཏོ། །འོ་ན་ཉིར་སྣང་དུ་འཆད་པར་འགྱུར་བའི་གཟུང་བ་དང་འཛིན་པའི་རྣམ་པར་རྟོག་པ་མཐོང་བ་དང་སྒོམ་པའི་ལམ་གྱིས་སྤང་བར་བྱ་བ་ཞེས་དང་། འགྲེལ་ཆུང་ལས་མཐོང་བ་དང་སྒོམ་པས་སྤང་བར་བྱ་བ་གཟུང་བ་དང་འཛིན་པའི་རྣམ་པར་རྟོག་པ་བཞི་པོ་འཆད་པར་འགྱུར་བའི་ཚུལ་དང་། འགྲེལ་པར་འབྱུང་བ་ཞེས་པ་དང་འགལ་ལོ་ཞེ་ན་སྐྱོན་མེད་དེ། དངོས་བསྟན་མཐོང་སྤང་ཡིན་ཡང་། ཤུགས་བསྟན་དགག་པའི་རྣམ་པ་ཅན་གྱི་རྟོག་པ་བཞི་པོ་མཐོང་ལམ་གྱིས་སྤོང་མི་ནུས་པས་བདེན་ཞེན་མེད་པར་ཆོས་ཅན་ལ་བཏགས་པ་ཙམ་དུ་འཛིན་པར་སོང་བའི་ཚེ། བྱང་སེམས་འཕགས་པའི་རྒྱུད་ལ་ཡང་མངོན་དུ་འགྱུར་སྲིད་ལ། དེ་ཉིད་སྐབས་ལྔ་པ་ནས་བཤད་པའི་སྒོམ་སྤང་རྟོག་པར་འཇོག་དགོས་པའི་ཕྱིར་རོ། །དེ་ལྟར་བྱས་ན་རྗེ་བཙུན་ཤེས་བྱ་ཀུན་རིག་གི་ཞལ་སྔ་ནས། སྐབས་ལྔ་པའི་སྒོམ་སྤང་འཛིན་རྟོག་གཉིས་ཀ་ཡང་བཏགས་འཛིན་རྟོག་པའི་ཁོངས་སུ་འདུས་ཞེས་གསུངས་ཤིང་། རྩ་བར་ཡང་བཏགས་འཛིན་རྟོག་པ་ཁོ་ནར་གསུངས་པ་དང་། རྫས་འཛིན་རྟོགས་པ་ཡིན་ན་བདེན་འཛིན་ཡིན་དགོས་པས། བྱང་འཕགས་ཀྱི་རྒྱུད་ལ་རྫས་འཛིན་རྟོག་པ་གཏན་མེད་པ་དང་། དངོས་ཤུགས་མ་ཕྱེ་བའི་སྐབས་འདིར་བསྟན་གྱི་རྟོག་པ་ལ། འཕགས་སེང་གཉིས་ཆར་གྱིས་མཐོང་སྤང་དང་། སྒོམ་སྤང་གཉིས་ཡོད་པར་གསུངས་པ་རྣམས་གནད་གཅིག་ཏུ་འདུས་ཤིང་། གཞན་དུ་ན་སྐབས་འདིར་དངོས་བསྟན་གྱི་རྟོག་པ་བཞི་ལ། སྒོམ་སྤང་དང་མཐོང་སྤང་གཉིས་སུ་ཕྱེ་ན། སྒོམ་སྤང་རྫས་འཛིན་རྟོག་པ་ཁས་ལེན་དགོས་པས། དེ་ནི་རྩ་བར་མ་བཤད་དོ། །བཞི་པ་སྒྲིབ་གཉིས་གང་ཡིན་དཔྱད་པ་ནི། སློབ་དཔོན་གྱིས་སྐབས་ལྔ་པར། མཐོང་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་སྤངས་པ་ན། དེ་དག་གིས་བསྡུས་པའི་རྣམ་པར་རྟོག་པ་སྐྱེད་པར་བྱེད་པའི་ཉོན་མོངས་པའི་བག་ཆགས་བརྒྱ་རྩ་བརྒྱད་སྤང་ཞེས་དང་། སྒོམ་སྤང་རྟོག་པའི་སྐབས་སུ་ཡང་། དེ་དང་འདྲ་བར་གསུངས་པ་ལ་བརྟེན་ནས། བོད་རྣམས་སྐབས་འདིར་བསྟན་གྱི་གཟུང་འཛིན་གྱི་རྣམ་པར་རྟོག་པ་བཞི་ཆར་བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི། ཤེས་སྒྲིབ་ཁོ་ན་ཡིན་པས་ཉན་རང་གི་སྤང་བྱའི་རིགས་སུ་གནས་པའི་ཉོན་སྒྲིབ་དང་། ཤེས་སྒྲིབ་གཟུང་རྟོག་མེད་དོ་ཅེས་མགྲིན་པ་བསྒྲིགས་ཏེ་སྨྲ་བར་ནུས་སོ། །རྩ་བའི་དགོངས་པ་ནི་འདི་ལྟར་ཡིན་ཏེ། སྐབས་འདིར་དངོས་སུ་བསྟན་པའི་མཐོང་སྤང་གཟུང་འཛིན་གྱི་རྣམ་པར་རྟོག་པ་བཞི་པོ་དེ་གང་ཟག་གི་ངོས་ནས་བྱང་སེམས་ལམ་གྱི་སྤང་བྱ་ཁོ་ན་ཡིན་ཀྱང་ཐེག་པ་གསུམ་ཆར་གྱི་སྤང་བྱའི་རིགས་ནི་ཐམས་ཅད་ཚང་སྟེ། གཟུང་རྟོག་གཉིས་ལ་གཞིའི་རྟེན་ཅན་དང་། དེའི་གཉེན་པོའི་རྟེན་ཅན་ཞེས་པའི་ཐ་སྙད་དངོས་སུ་གསུངས་ཤིང་། གཞི་དེ་ཀུན་ནས་ཉོན་མོངས་པའི་ཆོས་ཙམ་དང་། དེའི་གཉེན་པོ་དེ་རྣམ་བྱང་གི་ཆོས་ཙམ་དུ་བྱས་ནས་བླང་དོར་དུ་མངོན་པར་ཞེན་པ་ནི་རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ཡིན་པའི་ཕྱིར་དང་། གཞི་དེ་ཐེག་དམན་གྱི་ལམ་འབྲས་བུ་དང་བཅས་པ་དང་། དེའི་གཉེན་པོ་བྱང་སེམས་ཀྱི་ལམ་འབྲས་བུ་དང་བཅས་པར་བྱས་ནས་དེ་ལ་བླང་དོར་དུ་མངོན་པར་ཞེན་པ་ནི་བྱང་སེམས་ཀྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ཡིན་པའི་ཕྱིར་དང་། རྫས་འཛིན་རྟོག་པ་ལ་གང་ཟག་རྫས་ཡོད་དུ་འཛིན་པ་ནི་གང་ཟག་གི་བདག་འཛིན་ཡིན་པས་ཉན་ཐོས་ཀྱི་སྤང་བྱའི་རིགས་སུ་གནས་པའི་ཉོན་སྒྲིབ་དང་། ཆོས་ལ་རྫས་ཡོད་དུ་འཛིན་པ་དང་། བཏགས་འཛིན་རྟོག་པ་གཉིས་ནི་ཆོས་ཀྱི་བདག་འཛིན་ཡིན་པས་བྱང་སེམས་ཀྱི་སྤང་བྱའི་རིགས་སུ་གནས་པའི་ཤེས་སྒྲིབ་ཡིན་པའི་ཕྱིར་རོ། །སྐབས་དང་པོར་ཐེག་པ་གསུམ་ཆར་གྱི་སྤང་བྱའི་རིགས་འདུས་པའི་མཐོང་སྤང་རྟོག་པ་བཞི་དངོས་སུ་བསྟན་ཅིང་། སྐབས་ལྔ་པར་གཟུང་རྟོག་གཉིས་ལ་ཐེག་ཆེན་གྱི་སྤང་བྱའི་རིགས་དང་། རྫས་འཛིན་རྟོག་པ་ལ་མདོར་བསྟན་སྐབས་དང་པོ་དང་མཐུན་ཅིང་། རྒྱས་བཤད་དུ་བྱང་སེམས་ཀྱི་སྤང་བྱའི་རིགས་བསྟན་པ་ནི་གཞུང་ན་གསལ་བས་ཀླན་ཀའི་གོ་སྐབས་མེད་དོ། །མདོར་ན་མཐོང་སྤང་རྟོག་པའི་ནང་དུ་ཐེག་པ་གསུམ་ཆར་གྱི་སྤང་བྱའི་རིགས་འདུས་པ་དང་། དེའི་གཉེན་པོ་བྱང་སེམས་ཀྱི་སྦྱོར་ལམ་མཉམ་གཞག་ན་ཐེག་པ་གསུམ་ཆར་གྱི་རྟོགས་རིགས་འདུས་པ་དང་། དེའི་འབྲས་བུ་ཐེག་ཆེན་གྱི་མཐོང་ལམ་བར་ཆད་མེད་ལམ་ལ་ཐེག་པ་གསུམ་ཆར་གྱི་རྟོགས་རིགས་ཚང་བ་དང་། དེའི་འབྲས་བུ་རྣམ་དག་ལ་ཐེག་པ་གསུམ་ཆར་གྱི་སྤང་བྱ་སྤངས་པའི་རྣམ་དག་ཚང་བ་ནི་མངོན་པར་རྟོགས་པའི་རྒྱན་འདིའི་དབུ་ཞབས་ཀྱི་དགོངས་པ་གཅིག་ཏུ་སྣང་སྟེ། སྤང་བྱ་ཚང་ཚུལ་ནི་སྔར་བཤད་ཟིན་ལ། གཉེན་པོ་ཚང་ཚུལ་ནི་སྦྱོར་ལམ་གྱིས་བསྡུས་པའི་སེམས་བསྐྱེད་ལ་ཐམས་ཅད་མཁྱེན་པ་ཉིད་གསུམ་གྱི་སྒྲིབ་པའི་བུད་ཤིང་སྲེག་པར་བྱེད་པ་དང་། ཞེས་དང་། རྟོགས་རིགས་ཚང་ཚུལ་ནི་ཐེག་པ་གསུམ་ཆར་འཐོབ་པའི་རྒྱུ་ཞེས་དང་། རྣམ་དག་ཚང་ཚུལ་ནི། ལམ་གསུམ་ཉམས་ཕྱིར་རྒྱལ་སྲས་རྣམས་ཀྱི་དག །ཅེས་འབྱུང་བའི་ཕྱིར་རོ། །འོ་ན་བྱང་སེམས་ཀྱི་སྦྱོར་ལམ་གྱིས་ཐེག་པ་གསུམ་ཆར་གྱི་སྤང་བྱའི་རིགས་མངོན་གྱུར་ཆ་ཤས་སུ་ཕྱེ་ནས་སྤོང་ཞིང་མཐོང་ལམ་བར་ཆད་མེད་ལམ་གྱིས་ས་བོན་ཅིག་ཅར་དུ་སྤོང་བར་ཁས་ལེན་དགོས་སོ་ཞེ་ན། ཤིན་ཏུ་ཡང་ཁས་ལེན་ཏེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་གཅིག་ཉིད་ལ་ཐེག་ཆེན་གྱི་མཐོང་སྤང་མ་ལུས་པ་དང་། ཉན་རང་གི་སྤང་བྱའི་རིགས་སུ་གནས་པའི་མཐོང་སྤང་དང་སྒོམ་སྤང་གཉིས་ཀ་སྤོང་བའི་ནུས་པ་གནས་པའི་ཕྱིར་ཏེ། ཉན་རང་གི་མཐོང་སྒོམ་གྱི་ལམ་གཉིས་ཆར་གྱི་བྱེད་པ་འདུས་པའི་ཕྱིར་རོ། །དེ་སྐད་དུ་ཡང་ཉིར་སྣང་དུ། བྱང་ཆུབ་སེམས་དཔའི་བཟོད་པའི་བྱེད་པར་གཞན་རྣམས་ཀྱི་རྟོགས་པའི་བྱེད་པ་མ་ལུས་པ་འདུས་པར་འགྱུར་བའི་ཕྱིར། དེ་དག་གི་ཤེས་པ་དང་སྤོང་བ་གང་ཡིན་པ་དེའི་བཟོད་པ་ཡིན་གྱི་རྟོགས་པའི་བྱེད་པ་འདི་ཙམ་མ་ཡིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ། །ཞེས་གསུངས་པའི་ཕྱིར་རོ། །དེ་ལྟར་ན་རྒྱུད་བླའི་དགོངས་པ་དང་ཡང་མཐུན་ཏེ། རྒྱུད་བླར། བྱང་སེམས་ཀྱི་མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱིས་ཉོན་སྒྲིབ་སྤོང་བ་དང་། རྗེས་ཐོབ་ཀྱིས་ཤེས་སྒྲིབ་སྤོང་བར་བཤད་ཅིང་། བྱང་སེམས་འཕགས་པས་འཁོར་བར་འཆིང་བྱེད་ཀྱི་ཉོན་སྒྲིབ་སྤངས་ཟིན་པར་ཡང་བཤད་པས་མཐོང་ལམ་བར་ཆད་མེད་ལམ་གྱིས་ཉོན་སྒྲིབ་ཀྱི་དངོས་གཉེན་བྱེད་ཅིང་། རྣམ་གྲོལ་ལམ་གྱི་དུས་སུ་སྤངས་ཟིན་པ་ལས་འོས་མེད་པའི་ཕྱིར་རོ། །གལ་ཏེ་དེའི་ཉོན་སྒྲིབ་ནི་བག་ལ་ཉལ་ལ་དགོངས་སོ་སྙམ་ན་མ་ཡིན་ཏེ། དེ་ཤེས་སྒྲིབ་ཏུ་འཇོག་པའི་སྐབས་ཡིན་པའི་ཕྱིར་རོ། །མཉམ་གཞག་དེ་བྱང་སེམས་ཀྱི་སྦྱོར་ལམ་ལ་དགོངས་སོ་སྙམ་ན་ཡང་མ་ཡིན་ཏེ། མི་རྟོག་ཡེ་ཤེས་སུ་བཤད་པའི་ཕྱིར་རོ། །རང་རྒྱལ་གྱི་སྤང་བྱའི་རིགས་ནི་གཟུང་བ་ཕྱི་རོལ་གྱི་དོན་ལ་བདེན་པར་འཛིན་པའི་བདེན་འཛིན་ཡིན་གྱི། ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་མ་ཡིན་ནོ་སྙམ་ན། དེ་ལྟར་ན་སྐབས་བཞི་པར་བཤད་པའི་ལམ་གཉིས་པའི་རྣམ་པ་ལྔ་པོ་དེ་རང་རྒྱལ་གྱི་རྟོགས་རིགས་ཡིན་གྱི་ལམ་གསུམ་པའི་རྣམ་པ་དྲུག་པོ་དེ་རང་རྒྱལ་གྱི་རྟོགས་རིགས་མ་ཡིན་པར་ཁས་བླངས་པས་ལེགས་པར་དཔྱོད་ལ་སྨྲོས་ཤིག ཁོ་བོ་ནི་གཞུང་ལུགས་ཚད་ལྡན་གྱི་མགོ་མཇུག་བསྒྲིགས་ནས་སྨྲ་བ་ཡིན་གྱི། དེང་སང་གི་རི་བོང་ཅལ་གྱི་རྗེས་སུ་འབྲང་བ་མ་ཡིན་ནོ། །སློབ་དཔོན་གྱིས་སྐབས་ལྔ་པའི་གཞུང་འདི་ཉིར་སྣང་ལས། དེ་ཡང་མཐོང་བའི་ལམ་གྱི་བཟོད་པ་སྐྱེས་པ་ན། འདོད་པ་དང་གཟུགས་དང་། གཟུགས་མེད་པའི་ཁམས་ཀྱིས་བསྡུས་པ་མཐོང་བས་སྤང་བར་བྱ་བའི་ཉོན་མོངས་པ་བརྒྱ་རྩ་བརྒྱད་པོ་རྣམ་པར་རྟོག་པ་བཞིས་བསྡུས་པ་རྣམས་སྤོང་བར་འགྱུར་རོ་ཞེས་པའི་དོན་དུ་མཛད་པར་སྣང་ཡང་། ལུང་དེའི་དོན་ནི་མཐོང་སྤང་རྟོག་པ་ཐམས་ཅད་ལ་ཉོན་མོངས་ཀྱི་མིང་གིས་བཏགས་པའི་དོན་དུ་སྣང་སྟེ། ཉིར་སྣང་དུ། ས་དགུ་ལ་ནི་ཆེན་པོ་ཡི། །ཞེས་པའི་སྐབས་ཀྱི་དྲི་མ་དགུ་པོ་ལ་ཡང་ཉོན་མོངས་པའི་མིང་གིས་གསུངས་པའི་ཕྱིར་དང་། བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི་རྣམ་པར་རྟོག་པའོ་ཞེས་འབྱུང་བ་དང་ཡང་མཐུན་པའི་ཕྱིར་རོ། །ངེས་འབྱེད་ཡན་ལག་བཤད་ཟིན་ནས་དེའི་འོག་ཏུ་སྒྲུབ་པའི་རྟེན་དུ་གྱུར་པའི་རིགས་སྟོན་ཏེ། ངེས་འབྱེད་ཡན་ལག་ཐོབ་ནས་སྒྲུབ་པ་བཅུ་གསུམ་གྱི་རྟེན་དུ་གྱུར་པའི་རིགས་འཇོག་དགོས་པའི་ཕྱིར་རོ། །ཉིར་སྣང་དུ་ནི། རྒྱུ་འབྲས་དོན་གྱི་གོ་རིམ་ལྟར་ན་སེམས་བསྐྱེད་ཀྱི་ཐོག་མར་རིགས་བསྟན་པར་བྱ་བ་ཡིན་ཀྱང་འདིར་འབྲས་བུའི་རྗེས་སུ་རྒྱུ་སྟོན་པ་རྟོགས་པའི་གོ་རིམ་དུ་བཤད་དོ། །འདི་ལ་རིགས་ཀྱི་དབྱེ་བ་དང་། རྩོད་པ་སྤོང་བ་དང་། རང་བཞིན་གཏན་ལ་དབབ་པ་གསུམ་ལས། དང་པོ་ནི། རྟོགས་པ་ཡི་ནི་ཆོས་དྲུག་དང་། །ཞེས་སོགས་ཚིགས་བཅད་གཉིས་ཏེ། རྟེན་ལ་རིགས་ཞེས་བྱ་ཞེས་པ་ཐམས་ཅད་ཀྱི་གསལ་བྱེད་དུ་སྦྱར་ནས་དྲོད་ཀྱི་རྟེན་དུ་གྱུར་པའི་ཆོས་དབྱིངས་ལ་རིགས་ཞེས་བརྗོད་པ་ནས་ཡེ་ཤེས་རྩོལ་བ་མི་མངའ་བར་འཇུག་པའི་རྟེན་དུ་གྱུར་པའི་ཆོས་དབྱིངས་ལ་རིགས་ཞེས་བརྗོད་པའི་བར་བཅུ་གསུམ་དུ་དབྱེར་ཡོད་དོ། །དེ་ཡང་གོང་དུ་བྱང་ཆུབ་སེམས་དཔར་ཞེས་མང་དུ་གསུངས་པའི་ཚིག་གི་དོན་ཞུས་པའི་ལན་དུ། རབ་འབྱོར་བྱང་ཆུབ་སེམས་དཔའི་ཚིག་གི་དོན་ནི་ཚིག་གི་དོན་མེད་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ལ་ནི་སྐྱེ་བའམ་ཡོད་པ་ཉིད་ཡོད་པའམ་དམིགས་པ་མ་ཡིན་ནོ་ཞེས་གསུངས་ལ། འདིས་ནི་བརྟེན་པ་བྱང་ཆུབ་རྫས་སུ་མེད་པའི་འཐད་པས་སྐྱེ་མཆེད་དྲུག་གི་ཆོས་ཉིད་ཀྱི་མཚན་ཉིད་ཀྱི་རིགས་ནི་བྱང་ཆུབ་སེམས་དཔའི་སྒྲ་འཇུག་པའི་རྒྱུ་ཡིན་གྱི་དངོས་པོར་གྱུར་པའི་ཚིག་གི་དོན་ནི་མ་ཡིན་ནོ། །ཞེས་ཉིར་སྣང་དུ་བཤད་དོ། །ལུགས་འདི་ལ་ཆོས་དབྱིངས་དེས་སྒྲུབ་པའི་རྟེན་བྱེད་པའི་ཚེ་ན་རིགས་སུ་འཇོག་པ་ཡིན་གྱི། བར་ཆད་བཞི་དང་བཅས་པའི་ཚེ་རིགས་སུ་མི་འཇོག་པར་བཞེད་དེ། ཉིར་སྣང་དུ། གལ་ཏེ་རང་བཞིན་དུ་གནས་པའི་རིགས་འགའ་ཞིག་ཡོད་ན། ཅིའི་ཕྱིར་ཐོག་མ་དང་བྲལ་བའི་འཁོར་བར་གདྒཱའི་ཀླུང་གི་བྱེ་མ་དང་མཉམ་པའི་སངས་རྒྱས་རྣམས་མྱ་ངན་ལས་འདས་ཀྱང་ད་དུང་དུ་ཡང་རང་བཞིན་དུ་གནས་པའི་རིགས་དང་ལྡན་པའི་སྲོག་ཆགས་རྣམས་མྱ་ངན་ལས་མ་འདས་ཤེ་ན། དེ་ནི་ཉེས་དམིགས་རྣམ་པ་བཞི་དང་ལྡན་པའི་ཕྱིར་ཏེ། ཉོན་མོངས་པ་དང་། གྲོགས་ངན་པ་དང་། ཕོངས་པ་དང་། གཞན་གྱི་དབང་རྣམས་ནི་དེའི་ཉེས་པ་ཡིན་ནོ། །ཞེས་གང་གསུངས་པ་ཡིན་ནོ། །འདིས་ནི་བར་ཆད་མེད་པ་ཉིད་ལ་རང་བཞིན་དུ་གནས་པའི་རིགས་སུ་མངོན་པར་འདོད་དོ། །ཅེས་གསུངས་སོ། །ཡང་ན་ལུང་འདིའི་དགོངས་པ་སྒྲུབ་པའི་རྟེན་དུ་གྱུར་པའི་རིགས་ལ་འཆད་དགོས་ཀྱི། གཞན་དུ་ན། རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་པ་དང་འགལ་བར་འགྱུར་རོ། །དེས་ན་བྱང་ཆུབ་སེམས་དཔའ་རྣམ་པ་བཅུ་གསུམ་པོའི་རྒྱུད་ཀྱི་སེམས་ཀྱི་དབྱིངས་ལ་སྒྲུབ་པའི་རྟེན་དུ་ལུས་རྣམ་གཞག་ལས་བསྟན་ལ། སྐབས་འདིར་ནི་སྒྲུབ་པའི་རྟེན་དེ་ཉིད་ལ་རིགས་ཞེས་བསྟན་པས། འདིར་ཆོས་དབྱིངས་དང་རིགས་གཉིས་པོ་དོན་གཅིག་གོ །དེ་ལ་བཅུ་གསུམ་དུ་ཇི་ལྟར་འགྱུར་ན། རྟོགས་པའི་དབང་དུ་བྱས་པ་དྲུག བར་ཆད་མེད་ལམ་གྱི་དབང་དུ་བྱས་པ་གཉིས། རྣམ་གྲོལ་ལམ་གྱི་དབང་དུ་བྱས་པ་གཅིག ཡོན་ཏན་ཁྱད་པར་ཅན་གྱི་དབང་དུ་བྱས་པ་བཞི་སྟེ། སྒྲུབ་པ་བཅུ་གསུམ་ཡོད་པས་དེའི་རྟེན་ཆོས་དབྱིངས་བཅུ་གསུམ་ལ་རིགས་བཅུ་གསུམ་དུ་འཇོག་པའི་ཕྱིར་རོ། །སྒྲུབ་པ་བཅུ་གསུམ་པོའི་ས་མཚམས་ཇི་ལྟར་སྙམ་ན། བུདྡྷ་ཤྲཱི་ལྟར་ན། དང་པོ་དྲུག་སྦྱོར་ལམ་བཞི་དང་། མཐོང་ལམ་དང་ས་བདུན་པ་མན་ཆད་ཀྱི་སྒོམ་ལམ་ན་རིམ་པ་ལྟར་ཡོད། བདུན་པ་བརྒྱད་པ་དགུ་པ་གསུམ། ས་བརྒྱད་པ་དང་། དགུ་པ་དང་། བཅུ་པ་ན་རིམ་པ་བཞིན་ཡོད། བཅུ་པ། བཅུ་གཅིག་པ། བཅུ་གཉིས་པ་གསུམ་ཡང་དག་པ་ས་གསུམ་ན་རིམ་པ་བཞིན་ཡོད། བཅུ་གསུམ་པ་ས་བཅུ་པའི་ཁྱད་པར་གྱི་ལམ་ན་ཡོད་པར་བཤད་དོ། །ཆོས་བཤེས་ལྟར་ན། དང་པོ་ལྔ་སྔར་དང་འདྲ། དྲུག་པ་སྒོམ་ལམ་སྦྱིན། བདུན་དགུ་གཉིས་རིམ་པ་བཞིན་སྒོམ་ལམ་གྱི་བར་ཆད་མེད་ལམ་དང་། རྣམ་གྲོལ་ལམ་གཉིས་ན། བརྒྱད་པ་ས་འོད་བྱེད་པ་ནས་དྲུག་པའི་བར་ན། བཅུ་པ་ས་བདུན་པ་ན། བཅུ་གཅིག་པ་ས་མི་གཡོ་བ་ནས་ས་བཅུ་བའི་བར་ན། བཅུ་གཉིས་པ་སྐྱེ་བ་གཅིག་གིས་ཐོགས་པ་དང་། སྲིད་པ་ཐ་མ་པ་ན། བཅུ་གསུམ་པ་ས་བཅུ་པའི་ཁྱད་པར་གྱི་ལམ་རྡོ་རྗེ་ལྟ་བུའི་ཏིང་ངེ་འཛིན་ན་ཡོད་པར་བཞེད་དོ། །གཉིས་པ་རྩོད་པ་སྤོང་བ་ལ་འཕགས་པའི་ལུགས། སློབ་དཔོན་རྗེས་འབྲང་དང་བཅས་པའི་ལུགས། བོད་སྔ་རབས་པ་རྣམས་ཀྱི་ལུགས་དང་གསུམ་ལས། དང་པོ་ནི་ཉིར་སྣང་དུ། དོན་གྱིས་ཐོབ་པའི་རྩོད་ལན་དང་། དངོས་སུ་བསྟན་པའི་རྩོད་ལན་གཉིས་ལས། དང་པོ་ནི་གལ་ཏེ་ཆོས་དབྱིངས་རིགས་ཡིན་ན། ཐམས་ཅད་རིགས་ལ་གནས་པར་འགྱུར་ཏེ། དེ་ནི་སྤྱིར་གནས་པ་ཡིན་པའི་ཕྱིར་རོ་ཞེ་ན་ཞེས་པའི་རྩོད་པ་བཀོད་ནས་དེའི་ལན་དུ་ཇི་ལྟར་དམིགས་པ་ན། འཕགས་པའི་ཆོས་རྣམས་ཀྱི་རྒྱུར་འགྱུར་བ་དེ་ལྟར་རིགས་ཡིན་པར་བརྗོད་པ་དེས་ན་འདིར་ཧ་ཅང་ཐལ་བ་ཅི་སྟེ་ཚོལ་བར་བྱེད་ཅེས་གསུངས་ཏེ། འདིའི་དོན་ནི་སྔར་བཤད་པ་ལྟར་བྱང་ཆུབ་སེམས་དཔའི་རྒྱུད་ཀྱི་སྒྲུབ་པས་ཆོས་དབྱིངས་ལ་དམིགས་པ་ན་ཆོས་དབྱིངས་དེ་འཕགས་པའི་ཆོས་སྟོབས་སོགས་རྣམས་ཀྱི་རྒྱུར་འགྱུར་བའི་ཆ་ནས་སྒྲུབ་པའི་རྟེན་དུ་གྱུར་པའི་རིགས་ཡིན་པར་བརྗོད་པས། སྒྲུབ་པའི་རྟེན་དུ་གྱུར་རིགས་ལ་སེམས་ཅན་ཐམས་ཅད་གནས་པར་ཐལ་བའི་ཧ་ཅང་ཐལ་བ་མེད་དོ། །ཅེས་པའི་དོན་ཏོ། །གཉིས་པ་ནི་དེ་ལྟར་ན་ཡང་ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་ཏེ། ཆོས་དབྱིངས་ཆོས་ཅན། ཁྱོད་ལ་ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེར་མི་རུང་བར་ཐལ། ཁྱོད་ལ་རྣམ་པར་དབྱེ་བ་མེད་པའི་ཕྱིར་ཞེ་ན། དེའི་ལན་དུ་བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བརྗོད་ཅེས་ཏེ། འཇིམ་པ་གཅིག་ལས་མངོན་པར་གྲུབ་ཅིང་མེ་ལྕེ་གཅིག་གིས་སོ་བཏང་བའི་སྣོད་གསུམ་ལ་སྦྲང་རྩི་དང་། ལི་ཁ་ར་ལ་སོགས་པའི་བཅུད་ཀྱི་བྱེ་བྲག་གིས་སྦྲང་རྩིའི་སྣོད་ལ་སོགས་པར་འཇོག་པ་བཞིན་དུ། རྟེན་ཆོས་ཐེག་པ་གསུམ་གྱི་སྒྲུབ་པ་ཐ་དད་པའི་སྒོ་ནས་ཐེག་པ་གསུམ་གྱི་རིགས་ཐ་དད་པར་འཇོག་པས་སྐྱོན་མེད་ཅེས་པས་སོ། །གཉིས་པ་ནི་འཕགས་པས་འགོད་པའི་རྩོད་པ་སྔ་མ་དེ་ཉིད། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་པའི་དོན་དུ་མཛད་ནས་དེའི་ལན་དུ་དོན་གྱིས་ཐོབ་པའི་ལན་དང་། གཞུང་ནས་དངོས་སུ་བསྟན་པའི་ལན་གཉིས་མཛད་པར་སྣང་སྟེ། ཇི་ལྟར་ཉན་ཐོས་གྱི་ཐེག་པ་ལ་སོགས་པ་ཞེས་སོགས་ཀྱི་ལན་དང་། རྟེན་པའི་ཆོས་ཀྱི་བྱེ་བྲག་གིས། །ཞེས་སོགས་ཀྱི་ལན་གཉིས་རྩོད་པ་གཅིག་ལ་འདེབས་པར་མཛད་པའི་ཕྱིར་རོ། །ཁ་ཅིག་རྩོད་པའི་སྐབས་སུ་རྩོད་པ་ཕྱི་མ་ཁ་བསྐངས་ནས་མཛད་པར་སྣང་ཡང་། དེ་ནི་སློབ་དཔོན་གྱི་དགོངས་པ་མ་ཡིན་ཏེ། ཞེས་བྱ་བའི་ལན་ཞིག་ཀྱང་གཟིགས་མོད་ཀྱི་བློ་ཆོས་ཉིད་དུ་ཞེས་པའི་ཚིག་གི་ནུས་པས། ལན་གཉིས་ཀ་རྩོད་པ་གཅིག་གི་ལན་དུ་བསྟན་པའི་ཕྱིར་རོ། །ཇི་ལྟར་ཉན་ཐོས་ཀྱི་ཐེག་པ་ལ་སོགས་པ་ཞེས་སོགས་ཀྱི་གཞུང་འདི་ཆོས་ཀྱི་དབྱིངས་ལ་དབྱེར་མེད་ཕྱིར། ཅེས་པའི་ལན་དུ་སྦྱར་བ་ནི་འཕགས་པའི་དགོངས་པ་མ་ཡིན་ཏེ། ཉིར་སྣང་དུ། འདིའི་རྩོད་ལན་གཉིས་ཀ་རྫོགས་པའི་རྗེས་སུ་དེ་ལྟ་ན་ཡང་ཆོས་ཀྱི་དབྱིངས་ལ་དབྱེར་མེད་ཕྱིར། ཞེས་གཞུང་ལས་བསྟན་པའི་རྩོད་པ་གསར་དུ་གསུངས་ནས། ལན་འདེབས་པར་མཛད་པའི་ཕྱིར་རོ། །དེའི་རྗེས་འབྲང་ལ། ཆོས་བཤེས་ལྟར་ན་ཇི་ལྟར་ཉན་ཐོས་ཀྱི་ཐེག་པ་ལ་སོགས་པ་ཞེས་པའི་དོན་དཔེ་ཇི་ལྟར་ན་ཉན་ཐོས་པ་དག་གིས། སེམས་ཙམ་པ་ལྟར་རིགས་ཐ་དད་པ་དང་རིགས་ཆད་པ་ཡོད་པར་མི་འདོད་པས། སེམས་བྱུང་མ་ཆགས་པའི་ངོ་བོ་གཅིག་ཉིད་ལ་རྐྱེན་དབང་གིས་ཉན་ཐོས་ཀྱི་ཐེག་པ་དང་ལ་སོགས་པ་རང་རྒྱལ་དང་བྱང་སེམས་ཀྱི་ཐེག་པའི་རྟོགས་པ་ཐ་དད་པའི་རིམ་གྱིས་ཉན་ཐོས་ཀྱི་རིགས་ལ་སོགས་པར་དམིགས་པ་དེ་བཞིན་དུ། འདིར་ཆོས་ཀྱི་དབྱིངས་གཅིག་ཉིད་ཀྱང་འཕགས་པའི་ཆོས་རྟོགས་པར་བྱ་བའི་ཕྱིར། རྒྱུའི་ངོ་བོར་རྣམ་པར་འཇོག་པའི་སྒོ་ནས་དེ་རྟོགས་པའི་རིམ་པ་ལས་རིགས་ཁྱད་པར་ཅན་བཅུ་གསུམ་ཉིད་དུ་ཐ་སྙད་འདོགས་སོ་ཞེས་བཞེད་དོ། །གསེར་གླིང་པས་དཔེ་ཇི་ལྟར་ན་ཉན་ཐོས་ཀྱི་ཐེག་པ་དང་ལ་སོགས་པ་རང་སངས་རྒྱས་ཀྱི་ཐེག་པའི་སྒོ་ནས་གོང་དུ་རྟོགས་པའི་རིམ་གྱིས་ཇི་ལྟར་དམིགས་པ་དེ་བཞིན་དུ་དེ་དང་འདྲ་བར་འཕགས་པའི་ཆོས་རྟོགས་པར་བྱ་བའི་ཕྱིར། བྱང་ཆུབ་སེམས་དཔའི་ཆོས་ཀྱི་དབྱིངས་ལ་དམིགས་པས་ཀྱང་ཐེག་པ་གསུམ་ཆར་གྱི་རྟོགས་རིགས་ཚང་བའི་རྒྱུ་བྱེད་པའི་ཆ་ནས་བྱང་ཆུབ་སེམས་དཔའི་སེམས་ཀྱི་ཆོས་ཀྱི་དབྱིངས་ཁོ་ན། ཉན་ཐོས། རང་རྒྱལ། ཐེག་ཆེན་གྱི་རིགས་ཉིད་དུ་ཐ་སྙད་འདོགས་སོ་ཞེས་བཞེད་དོ། །གསུམ་པ་ནི། འབྲོམ་ནི་སྔར་གྱི་ཆོས་བཤེས་ཀྱི་ལུགས་དེ་ཉིད་བཞེད། དྭགས་པོ་ནི་སེམས་ཙམ་པ་གཉིས་སུ་མེད་པའི་ཤེས་པ་དོན་ལ་ཡོད་པའི་ངོ་བོ་གཅིག་ཉིད་ལ་རིགས་གསུམ་དུ་འདོད་པ་བཞིན། ངེད་ཀྱང་ཆོས་ཀྱི་དབྱིངས་རིགས་སུ་འདོད་པ་ལ་ཡང་མཚུངས་སོ་ཞེས་བཞེད་དོ། །གཉལ་པ་ནི་གང་ཟག་གཅིག་གིས་ཐེག་པ་གསུམ་ལ་རིམ་གྱིས་སློབ་པ་ན། ཉན་ཐོས་ལྷ་བྱིན། རང་རྒྱལ་ལྷ་བྱིན། ཞེས་པ་རྣམས་རྒྱུད་གཅིག་ཀྱང་ནང་གི་རྟོགས་པ་ཐ་དད་པས་འཇོག་པ་བཞིན་དུ། རྟེན་ཆོས་ཐེག་པ་གསུམ་ཀྱི་རྟོགས་པ་ཐ་དད་པས་རྟེན་རིགས་ཐ་དད་པ་གསུམ་དུ་འདོད་དོ། །ཅེས་ཟེར་རོ། །དེ་དག་ཐམས་ཅད་ནི་ཇི་ལྟར་ཉན་ཐོས་ཀྱི་ཐེག་པ་ཞེས་སོགས་ཀྱིས་དཔེ་སྟོན་པར་འདོད་པའི་ལུགས་སུ་སྣང་ཞིང་། དེ་ལ་ཊཱི་ཀར། དཔེ་སྟོན་པ་ནི་མི་འཐད་དེ། །གཞུང་འདི་ཉིར་སྣང་གི་ཇི་ལྟར་དམིགས་པ་ན་ཞེས་སོགས་ཀྱི་ལུང་དོན་ཡིན་ཞིང་དེ་ཡང་དཔེ་སྟོན་བྱེད་མ་ཡིན་པའི་ཕྱིར་དང་། ཆོས་ཀྱི་དབྱིངས་ལ་རིགས་ཐ་དད་པ་གསུམ་དུ་དབྱེར་མི་རུང་ཞེས་པའི་ལན་དུ་ཐེག་པ་གསུམ་གྱི་སྒོ་ནས་རིགས་ཐ་དད་པ་གསུམ་དུ་དབྱེར་རུང་ཞེས་པའི་དཔེ་ལ་འབྲེལ་མེད་པའི་ཕྱིར། ཞེས་གསུངས་པའི་སྐྱོན་དེ་མི་འདོད་བཞིན་དུ་འཁུར་དགོས་པར་སྣང་ངོ་། །རང་ལུགས་ནི་འཕགས་པའི་དགོངས་པ་སྔར་བཤད་ཟིན་ཅིང་། སློབ་དཔོན་གྱི་གཞུང་གི་དགོངས་པ་ཡང་སློབ་དཔོན་རང་ཉིད་ཀྱིས་གསུངས་པའི་རྩོད་ལན་འདེབས་པའི་ཚེ། དེ་དང་འདྲ་ཡང་རྩ་བའི་རྩོད་པ་ལ་ལན་དུ་མ་སོང་བ་འདྲའོ། །འོ་ན་རྩ་བའི་དགོངས་པ་ཇི་ལྟར་ཡིན་སྙམ་ན། ལོ་ཆེན་གྱིས་ལུས་རྣམ་གཞག་ཏུ་སྒྲུབ་པའི་རྟེན་ཆོས་ཀྱི་དབྱིངས་སུ་བཤད་པ་དང་། སྐབས་འདིར་ཆོས་ཀྱི་དབྱིངས་ལ་རིགས་སུ་བྱས་ནས་དེ་ལ་བཅུ་གསུམ་ཡོད་པར་བཤད་པ་ལ་སྒྲུབ་པའི་རྟེན་དུ་གྱུར་པའི་ཆོས་དབྱིངས་ཆོས་ཅན། ཁྱོད་ལ་དྲོད་ཀྱི་སྒྲུབ་པའི་རྟེན་དུ་གྱུར་པའི་རིགས་ལ་སོགས་པ་ཐ་དད་པ་བཅུ་གསུམ་དུ་རུང་བ་མ་ཡིན་པར་ཐལ། ཁྱོད་ལ་རྣམ་པར་དབྱེ་བ་མེད་པའི་ཕྱིར་ཞེ་ན་སྐྱོན་མེད་དེ། ཆོས་དབྱིངས་ཀྱི་ངོ་བོ་དེ་ལ་དབྱེ་བ་མེད་ཀྱང་། རྟེན་ཆོས་སྒྲུབ་པ་བཅུ་གསུམ་གྱི་བྱེ་བྲག་གིས་ཆོས་དབྱིངས་དེའི་དབྱེ་བ་ཡང་དྲོད་ཀྱི་རྟེན་དུ་གྱུར་པའི་རིགས་ལ་སོགས་པ་བཅུ་གསུམ་དུ་ཡོངས་སུ་བརྗོད་པའི་ཕྱིར། ཞེས་གསུངས་པ་འདི་རྩ་བའི་དགོངས་པར་སྣང་ངོ་། །གསུམ་པ་རིགས་ཀྱི་རང་བཞིན་གཏན་ལ་དབབ་པ་ལ་བཞི་སྟེ། བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས། སེམས་ཙམ་པའི་ལུགས། དབུ་མ་པའི་ལུགས་སོ། །དང་པོ་ནི་སེམས་བྱུང་མ་ཆགས་པའི་རང་བཞིན་འདོད་པ་ཆུང་ཞིང་ཆོག་ཤེས་པ་ཞིག་ལ་རིགས་སུ་འདོད་ཅིང་དེ་ལ་འཕགས་པའི་རིགས་ཞེས་དང་། ཟག་མེད་ཀྱི་རིགས་ཞེས་བྱ་སྟེ། དེ་ལས་འཕགས་པའི་ཟག་མེད་ཀྱི་ལམ་སྐྱེ་བའི་ཕྱིར་རོ། །དེ་ལ་དབྱེ་ན་ཆོས་གོས་དང་། བསོད་སྙོམས་དང་། གནས་མལ་ངན་ངོན་ཙམ་གྱིས་ཆོག་ཤེས་པ་གསུམ་དང་། སྤོང་བ་དང་སྒོམ་པ་ལ་དགའ་བ་སྟེ་བཞི་ཡོད་དོ། །དེ་ལས་འཕགས་པའི་ཟག་མེད་སྐྱེ་བའི་ཚུལ་ནི་འདོད་པ་ཆུང་ཞིང་ཆོག་ཤེས་པ་ལ་ལུས་འདུ་འཛི་ལས་བསྲིང་བ་དང་། སེམས་རྣམ་རྟོག་ལས་བསྲིང་བ་སྟེ། བསྲིང་བ་གཉིས་དང་ལྡན་པ་དེ་འབྱུང་ཞིང་། བསྲིང་བ་ཉིས་ལྡན་གྱིས་སྒོམ་པ་ལ་རབ་ཏུ་བརྩོན་པར་བྱེད་པའི་ཕྱིར་རོ། །འདོད་པ་ཆུང་ཞིང་ཆོག་ཤེས་པའི་སེམས་བྱུང་དེ་ལ་རང་བཞིན་གནས་རིགས་སུ་ནི་མི་འཇོག་སྟེ། རང་བཞིན་གྱི་དོན་མ་ཚང་བའི་ཕྱིར་ཏེ། རྐྱེན་དབང་གིས་བྱུང་བའི་ཕྱིར་དང་། ལུགས་འདི་ལ་རང་བཞིན་གནས་རིགས་ཀྱི་ཐ་སྙད་མེད་པའི་ཕྱིར་རོ། །སངས་རྒྱས་ཀྱི་རིགས་སུ་ཡང་འཇོག་པར་མ་ངེས་ཏེ། ཉན་ཐོས་ཀྱི་འཕགས་ལམ་དང་། རང་རྒྱལ་གྱི་འཕགས་ལམ་བསྐྱེད་པར་ངེས་པ་དེ་ལ་སངས་རྒྱས་ཀྱི་རིགས་སུ་འཇོག་ཏུ་མི་རུང་བའི་ཕྱིར་ཏེ། དེ་ཐོབ་ནས་སངས་རྒྱས་སུ་འགྱུར་བ་མི་སྲིད་པའི་ཕྱིར་རོ། །རིགས་ངེས་པ་དང་། རིགས་ཆད་པའི་རྣམ་གཞག་མེད་པ་ཆོས་བཤེས་ཀྱིས་བཤད་ཀྱང་། རིགས་ཆད་པ་ལུགས་འདི་ལ་ཡང་འདོད་དགོས་པ་འདྲ་སྟེ། ལོག་སྲེད་ཅན་སེམས་བྱུང་མ་ཆགས་པའི་རང་བཞིན་སྐྱེ་མི་རུང་བ་ཅིག་ཁས་ལེན་དགོས་པའི་ཕྱིར་རོ། །རིགས་ཀྱིས་སྟོབས་ཀྱིས་རིགས་ངེས་པ་ནི་མེད་དེ། སེམས་བྱུང་མ་ཆགས་པའི་རང་བཞིན་དེ་ཉན་ཐོས་ཀྱི་སྦྱོར་ལམ་བཟོད་པ་དང་། རང་རྒྱལ་དང་། བྱང་སེམས་ཀྱི་དྲོད་མ་ཐོབ་ཀྱི་བར་དུ་རྐྱེན་དབང་གིས་ཐེག་པ་གཞན་དུ་བསྒྱུར་དུ་རུང་བའི་ཕྱིར་རོ། །དེ་ཐོབ་ནས་བསྒྱུར་དུ་མི་རུང་བ་ནི་རྟོགས་པའི་སྟོབས་ཀྱིས་ཡིན་གྱི་རིགས་ཀྱི་སྟོབས་ཀྱིས་མ་ཡིན་ནོ། །མདོར་ན་རྟེན་གྱི་གང་ཟག་གི་སྒོ་ནས་དབྱེ་ན། རིགས་ཡོད་པ་དང་མེད་པ་གཉིས་ཡོད་པ་ལ་ཡང་ཉན་ཐོས་ཀྱི། རང་རྒྱལ་གྱི། ཐེག་ཆེན་གྱི་རིགས་ཡོད་པ་དང་གསུམ། དེ་རེ་རེ་ལ་ཡང་རྟོགས་པའི་སྟོབས་ཀྱིས་རིགས་ངེས་པ་དང་། མ་ངེས་པ་གཉིས་སུ་ཡོད་ཅིང་དེ་རྣམས་ཀྱི་ནང་ནས་ཐེག་ཆེན་གྱི་རིགས་དེ་ཁོ་ན་སངས་རྒྱས་ཀྱི་རིགས་ཡིན་པར་འདོད་དོ། །གཉིས་པ་ནི་རྒྱལ་པོའི་སྲས་ཀྱིས་མདོ་སྡེ་བ་དག་གིས་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ། སོ་སོའི་སྐྱེ་བོ་དང་། སློབ་པའི་གནས་སྐབས་ན་ཡང་ཡོངས་སུ་ཉམས་པའི་ཆོས་ཅན་གྱི་ས་བོན་ལ་རིགས་ཞེས་བྱའོ། །ཞེས་འབྱུང་བ་ལྟར་ཟག་མེད་ཀྱི་སེམས་ཀྱི་ས་བོན་འབྲས་བུ་འབྱུང་རུང་གི་ནུས་པའོ། །འོ་ན་རྣམ་རིག་པ་དང་ཁྱད་པར་མེད་པར་འགྱུར་རོ་སྙམ་ན། སོ་སོའི་སྐྱེ་བོ་དང་། ཞེས་སོགས་སྨོས་ཏེ་རྣམ་རིག་པའི་ལུགས་ཀྱི་རིགས་དེ་ནི་རྐྱེན་དབང་གིས་གསར་དུ་བཞག་པ་མ་ཡིན་པར་ཐོག་མ་མེད་པ་ནས་ཡོད་པར་འདོད་ལ། འདི་ནི་སོ་སོ་སྐྱེ་བོའི་གནས་སྐབས་ན་སྔར་ཐོས་པ་ལ་སོགས་པའི་རྐྱེན་གྱིས་ཟག་མེད་ཀྱི་ས་བོན་བཞག་པ་དང་། སློབ་པའི་གནས་སྐབས་ན་ཕྱིར་འོང་དང་། ཕྱིར་མི་འོང་བའི་འབྲས་བུ་ལས་ཉམས་པ་ན་ཡང་དེའི་ས་བོན་ཡོད་པ་རིགས་སུ་འདོད་པས་ཁྱད་པར་ཤིན་ཏུ་ཆེའོ། །འདི་ལ་ཡང་རྟེན་གྱི་སྒོ་ནས་དབྱེ་བ་སྔར་བཞིན་དུ་རུང་ཞིང་ཐམས་ཅད་རང་བཞིན་གནས་རིགས་དང་། སངས་རྒྱས་ཀྱི་རིགས་སུ་མི་འདོད་པ་ཡང་སྔར་དང་འདྲའོ། །འོན་ཀྱང་འདི་ལ་རིགས་ཀྱི་སྟོབས་ཀྱིས་རིགས་ངེས་པ་ཡང་བཞག་ཏུ་རུང་སྟེ། ཟག་མེད་ཀྱི་ས་བོན་དེ་ཉན་ཐོས་ཀྱི་འཕགས་ལམ་བསྐྱེད་པའི་ཐོས་སོགས་དང་། རང་རྒྱལ་གྱི་འཕགས་ལམ་བསྐྱེད་པའི་ཐོས་སོགས་དང་། ཐེག་ཆེན་གྱི་འཕགས་ལམ་བསྐྱེད་པའི་ཐོས་སོགས་ཀྱིས་བཞག་པ་རྣམས་ནི་དེ་དང་དེའི་རིགས་ཀྱི་སྟོབས་ཀྱིས་རིགས་ངེས་པ་ཡང་ཡིན་ལ། འཕགས་ལམ་གང་ཡང་རུང་བ་བསྐྱེད་དུ་རུང་བའི་ཐོས་སོགས་ཀྱིས་བཞག་པ་ནི་རིགས་མ་ངེས་པ་ཡིན་པའི་ཕྱིར་རོ། །གསུམ་པ་ནི་བྱང་ས་ལས་བྱང་ཆུབ་སེམས་དཔའ་རྣམས་ཀྱི་རིགས་དེ་ནི་ཐོག་མ་མེད་པ་ནས་འོངས་པ་ཆོས་ཉིད་ཀྱི་ས་ཐོབ་པ་སྐྱེ་མཆེད་དྲུག་གི་ཁྱད་པར་གང་ཡིན་པ་ཏེ། ཞེས་སོགས་བཤད་དོ། །འདི་ལ་ངོ་བོ་དང་། མིང་གི་རྣམ་གྲངས་དང་། དབྱེ་བ་གསུམ་ལས། དང་པོ་ནི། ཀུན་གཞིའི་རྣམ་ཤེས་ལ་ཡོད་པའི་ཟག་མེད་ཀྱི་ཡོན་ཏན་རྐྱེན་དང་ཕྲད་ན་བྱང་ཆུབ་ཐོབ་པར་བྱེད་པའི་ནུས་པ་ཐོག་མ་མེད་པ་ནས་ཡོད་པ་ཞིག་སྟེ། རྒྱ་མཚོའི་སྤྲིན་དུ་སྐྱེ་མཆེད་དྲུག་གི་ཁྱད་པར་ནི་ཀུན་གཞིའི་རྣམ་པར་ཤེས་པ་ལ་གནས་པའི་ས་བོན་ཟག་པ་མེད་པའི་ཆོས་སྐྱེད་པར་བྱེད་པའི་ནུས་པའོ། །ཞེས་གསུངས་སོ། །གཉིས་པ་ནི་སྐྱེ་མཆེད་དྲུག་གི་ཁྱད་པར་དང་། ཟག་མེད་ཀྱི་ས་བོན་དང་། སྒྲིབ་པ་སྤོང་རུང་དང་། ཐོས་པའི་བག་ཆགས་རྣམས་སོ། །སྐྱེ་མཆེད་དྲུག་གི་ཁྱད་པར་ཞེས་བརྗོད་པའི་རྒྱུ་མཚན་ཡོད་དེ། སྐྱེ་མཆེད་དྲུག་གི་ནང་ནས་ཁྱད་པར་ཡིད་ཀྱི་སྐྱེ་མཆེད། དེ་ལ་རྣམ་ཤེས་ཚོགས་བརྒྱད་ཡོད་པ་ལས་ཁྱད་པར་ཀུན་གཞིའི་རྣམ་ཤེས་དེ་ལ་ཡང་རྣམ་སྨིན་གྱི་ཆ་དང་ས་བོན་གྱི་ཆ་གཉིས་ཡོད་པ་ལས་ཁྱད་པར་ས་བོན་གྱི་ཆ། དེ་ལ་ཡང་དགེ་མི་དགེ་ལུང་མ་བསྟན་གྱི་ས་བོན་གསུམ་ཡོད་པ་ལས་ཁྱད་པར་དགེ་བའི་ས་བོན། དེ་ལ་ཟག་བཅས་ཟག་མེད་ཀྱི་ས་བོན་གཉིས་ཡོད་པ་ལས་ཁྱད་པར་ཟག་མེད་ཀྱི་ས་བོན་ཞེས་པ་ནི་སེམས་ཙམ་པའི་འདོད་པ་སྟེ། ལང་གཤེགས་ལས། དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲག་པ་རྣམ་པར་སྦྱང་བར་བྱའོ། །ཞེས་དང་དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་དེ་ནི་དེ་བཞིན་གཤེགས་པའི་ཡུལ་ཏེ། ཞེས་དང་། མདོ་གཞན་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་གསུང་བར་མཛད། །ཞེས་གསུངས་པ་རྣམས་ཀྱི་དགོངས་པ་བསམ་པའོ། །སྤྱིར་བྱང་ས་ནས་གསུངས་པའི་ཁྱད་པར་གསུམ་པོ་དེ་མདོ་ལས་བཤད་པ་ཡིན་པས། དབུ་མ་པ་རྣམས་སྐྱེ་མཆེད་དྲུག་གི་ཁྱད་པར་འདོད་དགོས་ལ་དེའི་ཚེ་སྐྱེ་མཆེད་དྲུག་གི་ཁྱད་པར་ནི་སྐྱེ་མཆེད་དྲུག་གི་ཆོས་ཉིད་དུ་ཉིར་སྣང་ལས་བཤད་དེ། མ་འདྲེས་པར་བྱའོ། །ཟག་མེད་ཀྱི་ས་བོན་ཞེས་བྱ་སྟེ། ཟག་མེད་ཀྱི་ཡེ་ཤེས་བསྐྱེད་པའི་རྒྱུ་ཡིན་པའི་ཕྱིར་རོ། །སྒྲིབ་པ་སྤོང་རུང་ཞེས་བྱ་སྟེ། རྐྱེན་དང་ཕྲད་ན་སྒྲིབ་པ་དང་བྲལ་རུང་ཡིན་པའི་ཕྱིར། ཐོས་པའི་བག་ཆགས་ཞེས་བྱ་སྟེ། གསུང་རབ་ཐོས་པའི་རྐྱེན་གྱིས་གསོ་བར་བྱ་བ་ཡིན་པའི་ཕྱིར། རང་བཞིན་དུ་གནས་པའི་རིགས་ཞེས་བྱ་སྟེ། ཐོག་མ་མེད་པ་ནས་ཆོས་ཉིད་ཀྱིས་ཐོབ་པའི་ཕྱིར་རོ། །སངས་རྒྱས་ཀྱི་རིགས་སུ་འཇོག་པའི་ངེས་པ་མེད་པ་ནི་སྔར་བཞིན་ནོ། །གསུམ་པ་དབྱེ་བ་ལ་རིགས་ངེས་པ་དང་། རིགས་མ་ངེས་པ་གཉིས་ལས། དང་པོ་ནི་ཐོག་མ་མེད་པ་ནས་ཐེག་པ་གསུམ་གྱི་བྱང་ཆུབ་སོ་སོའི་རྒྱུར་ངེས་པས་རྐྱེན་དབང་གིས་བྱང་ཆུབ་གཞན་དུ་མི་འགྱུར་བ་སྟེ། དཔེར་ན་རིའི་ཕྱོགས་འགའ་ཞིག་ནས་གསེར་འབའ་ཞིག་དང་། དངུལ་འབའ་ཞིག་དང་། ཟངས་འབའ་ཞིག་འབྱུང་བ་ལྟར་རོ། །གཉིས་པ་ནི་རྐྱེན་དབང་གིས་ཐེག་པ་གསུམ་ཀའི་རྒྱུར་སྒྱུར་དུ་རུང་བ་སྟེ། དཔེར་ན། རིའི་ཕྱོགས་འགའ་ཞིག་ནས་རེས་འགའ་ཟངས་དང་། རེས་འགའ་དངུལ་དང་། རེས་འགའ་གསེར་འབྱུང་བ་ལྟ་བུའོ། །རིགས་ཆད་པ་ནི་སྒྲིབ་པ་ཤས་ཆེ་བའི་རྒྱུས་ཟག་མེད་ཀྱི་ས་བོན་དེ་དང་མི་ལྡན་པའོ། །འདི་ལ་ཡང་རིགས་ངེས་པ་ལ་འོག་མ་གཉིས་ཀྱི་རིགས་སངས་རྒྱས་ཀྱི་རིགས་སུ་མི་འདོད་ལ། རིགས་མ་ངེས་པ་ནི་ལམ་དུ་མ་ཞུགས་པའི་ཚེ་ཟག་མེད་ཀྱི་རིགས་ཙམ་དུ་འདོད་ཀྱི་ཉན་ཐོས་ཀྱི་རིགས་ལ་སོགས་པར་མི་འདོད་ཅིང་། ལམ་དུ་ཞུགས་པའི་ཚེ་གང་ནས་ཞུགས་པ་དེ་དང་དེའི་རིགས་སུ་འདོད་དོ། །མདོར་ན་མཐར་ཐུག་ཐེག་པ་གསུམ་དུ་འདོད་པ་དག་གིས་རིགས་ལ་སངས་རྒྱས་ཀྱི་རིགས་ཀྱིས་མ་ཁྱབ་པར་འདོད་པ་ནི་གྲུབ་མཐའི་གནད་ཡིན་པས་ཡིད་ལ་ཟུང་ཤིག བཞི་པ་ལ་ངོ་བོ། མིང་གི་རྣམ་གྲངས། དབྱེ་བ། རྟེན་དུ་འགྱུར་ཚུལ། རིགས་སུ་འགྱུར་ཚུལ་དང་ལྔ་ལས། དང་པོ་ནི་དཔལ་ཕྲེང་གི་མདོར། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ན་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་ཆོས་སྐུ་ལ་བཤད་པ་དང་། འདིར་ཡང་ཆོས་ཀྱི་དབྱིངས་ཀྱི་རང་བཞིན་དང་ཞེས་དང་། ཀླུ་སྒྲུབ་ཀྱིས། གང་ཞིག་ཀུན་ཏུ་མ་ཤེས་པས། །སྲིད་པ་གསུམ་ན་རྣམ་འཁོར་ཞིང་། །སེམས་ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་ལོ། །ཞེས་ཆོས་ཀྱི་དབྱིངས་ལ་བཤད་པ་དང་། ས་ར་ཧས་སེམས་ཉིད་གཅིག་པུ་ཀུན་གྱི་ས་བོན་ཏེ། །ཞེས་དང་། ཀླུ་སྒྲུབ་ཀྱིས། ཉོན་མོངས་དྲྭ་བས་གཡོགས་པ་ན། །སེམས་ཞེས་བྱ་བ་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་སེམས་ལ་བཤད་པ་སོགས་དུ་མར་སྣང་ཡང་རང་གི་ངོ་བོ་ཡོངས་སུ་རྫོགས་པ་ནི། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་སོ། །གསུམ་པོ་དེ་ཡི་ངོས་འཛིན་ལ། འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་དོན་རྣམ་པ་དགུར་ཕྱེ་ནས། དཔེ་དགུས་མཚོན་པར་གསུངས་སོ། །དོན་དགུ་ནི་ཆོས་སྐུ་ལ་གློ་བུར་དྲི་བྲལ་གྱི་དབྱིངས་དང་། ཟབ་མོ་སྟོང་ཉིད་སྟོན་པའི་གསུང་རབ་དང་། བརྗོད་བྱ་སྣ་ཚོགས་སྟོན་པའི་གསུང་རབ་གསུམ་དུ་ཕྱེ་ཞིང་། དེ་བཞིན་ཉིད་ནི་རང་བཞིན་རྣམ་དག་གི་ཆོས་ཉིད་ཡིན་ལ། རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་དེ་གཉིས་ཀྱི་འབྲས་བུ་སྐུ་གསུམ་དང་ལྔར་ཕྱེ་བ་སྟེ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་དང་། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླང་བ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཅེས་གསུངས་པའི་ཕྱིར་རོ། །དེ་ལ་རྫོགས་སངས་སྐུ་ནི་འཕྲོ་ཕྱིར་དང་། །ཞེས་པས། རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་བ་བསྟན་ཏེ། འཕྲོ་ཞེས་པའི་ཚིག་གི་ནུས་པ་དང་། རྒྱུད་བླར་དཔེ་དགུ་དོན་དགུ་རྒྱས་པར་བཤད་པའི་སྐབས་སུ་ཡང་། དེ་བཞིན་བདེ་གཤེགས་མནར་མེད་གནས་རྣམས་ལའང་། །སངས་རྒྱས་སྤྱན་གྱིས་རང་ཆོས་ཉིད་གཟིགས་ཏེ། །སྒྲིབ་མེད་ཕྱི་མཐའི་མུར་གནས་ཐུགས་རྗེ་ཡི། །བདག་རྐྱེན་སྒྲིབ་པ་ལས་ནི་གྲོལ་བར་མཛད། །ཅེས་སོགས་སངས་རྒྱས་ཀྱིས་རང་གི་ཆོས་ཉིད་སེམས་ཅན་ལ་ཡོད་པར་གཟིགས་ནས་སྒྲིབ་པ་སྦྱང་བའི་ཆེད་དུ་ཆོས་སྟོན་པར་གསུངས་པ་རྣམས། རྫོགས་སངས་སྐུ་ནི་འཕྲོ་ཕྱིར་དང་། །ཞེས་པའི་དོན་ཡིན་པའི་ཕྱིར་དང་། ཆོས་སྐུ་ལ་གསུམ་དུ་ཕྱེ་བ་ཡང་རྟོགས་པ་ཆོས་སྐུ་བརྙེས་པའི་སྟོབས་ཀྱིས་བསྟན་པ་ཆོས་སྐུ་འབྱུང་བའི་དོན་དུ་སྣང་བའི་ཕྱིར་རོ། །དེ་བཞིན་ཉིད་དབྱེར་མེད་ཕྱིར་དང་། །ཞེས་པས་འགལ་རྐྱེན་སྒྲིབ་པ་སྤང་དུ་རུང་བར་བསྟན་ཏེ། སེམས་ཅན་གྱི་སེམས་ཀྱི་ཆོས་ཉིད་དང་། སངས་རྒྱས་ཀྱི་ཆོས་ཉིད་རང་བཞིན་གྱིས་རྣམ་པར་དག་པར་དབྱེར་མེད་པས་དྲི་མའི་ངོ་བོར་མ་སྐྱེས་པར་མཚུངས་པར་བསྟན་པའི་ཕྱིར་རོ། །རིགས་ཡོད་ཕྱིར་ན་ཞེས་པས་སངས་རྒྱས་ཀྱི་ཡོན་ཏན་འབྱུང་དུ་རུང་བར་བསྟན་ཏེ། རིགས་ཀྱི་དོན་ནི་རྒྱུའི་དོན་ཡིན་པས་སངས་རྒྱས་ཀྱི་ཆོས་ཐམས་ཅད་ཀྱི་རྒྱུར་བསྟན་པའི་ཕྱིར་དང་། འདིའི་རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་སུ་ཕྱེ་ནས་དེ་གཉིས་ལས་འབྲས་བུ་སྐུ་གསུམ་འབྱུང་བར་གཞུང་ལས་བཤད་པའི་ཕྱིར། དེས་ན་བདེ་བར་གཤེགས་པའི་སྙིང་པོ་ལ་ཡང་དོན་དེ་གསུམ་ཆར་ཚང་ཞིང་སངས་རྒྱས་ཀྱི་རིགས་ལ་ཡང་དོན་དེ་གསུམ་ཆར་ཚང་བ་ཡིན་ཀྱང་། རྒྱུ་དུས་ཀྱི་བདེ་གཤེགས་སྙིང་པོར་འཇོག་པ་ལ་ནི་འཇོག་བྱེད་གསུམ་ཆར་དགོས་ཤིང་། རིགས་སུ་འཇོག་པ་ལ་ནི་གསུམ་ཆར་མི་དགོས་ཏེ། གསུམ་པ་དེའི་ནང་ཚན་ཡིན་པའི་ཕྱིར་རོ། །མདོར་ན་རྒྱུ་དུས་ཀྱི་བདེ་གཤེགས་སྙིང་པོའི་མཚན་ཉིད། རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་། འགལ་རྐྱེན་སྒྲིབ་པ་སྤང་དུ་རུང་། འབྲས་བུ་སངས་རྒྱས་ཀྱི་ཡོན་ཏན་ཐམས་ཅད་འབྱུང་དུ་རུང་བའི་ཆོས་དབྱིངས་སོ། །སངས་རྒྱས་ཀྱི་རིགས་ཀྱི་མཚན་ཉིད། རང་གི་ངོ་བོ་སྐུ་གསུམ་གང་རུང་དུ་འགྱུར་དུ་རུང་ཞིང་། །དྲི་མ་ལས་མ་གྲོལ་བའི་དབྱིངས་སམ། རིགས་སད་པའི་གནས་སྐབས་ཀྱི་དགེ་རྩ་གང་རུང་གིས་བསྡུས་པའི་རྒྱུའི་ཆའོ། །གལ་ཏེ་རྒྱུན་མཐའི་བྱང་སེམས་ལོངས་སྐུར་འགྱུར་དུ་རུང་བ་ཡིན་པས་མཚན་ཉིད་དེ་ཞུགས་སོ་སྙམ་ན། རྒྱུན་མཐའི་བྱང་སེམས་གང་ཟག་གི་ཆ་ལོངས་སྐུར་འགྱུར་བ་མ་ཡིན་ཏེ། རྒྱུན་མཐའི་བྱང་སེམས་ཀྱི་སེམས་ཡེ་ཤེས་བཞིར་གྱུར་ཅིང་སེམས་ཀྱི་ཆོས་དབྱིངས་དེ་གློ་བུར་དྲི་བྲལ་གྱི་ཆོས་དབྱིངས་སུ་གྱུར་པའི་ཚེ་ན་མེ་ལོང་ལྟ་བུའི་ཡེ་ཤེས་དང་། དབྱིངས་རྣམ་དག་དེ་ངོ་བོ་ཉིད་ཀྱི་སྐུ་དང་། མཉམ་པ་ཉིད་དང་སོ་སོར་རྟོག་པའི་ཡེ་ཤེས་དེ་ལོངས་སྐུ་དང་། བྱ་བ་གྲུབ་པའི་ཡེ་ཤེས་དེ་སྤྲུལ་སྐུར་འགྱུར་བར་འཕགས་པ་སངས་རྒྱས་ཀྱི་ས་དང་མདོ་སྡེ་རྒྱན་དུ་བཤད་པའི་ཕྱིར་རོ། །དེ་ལྟར་ན་དབྱིངས་རྣམ་དག་དང་། མེ་ལོང་ལྟ་བུའི་ཡེ་ཤེས་ཀྱི་རྒྱུ་ལ་རང་བཞིན་གནས་རིགས་དང་། ཡེ་ཤེས་གཞན་གསུམ་གྱི་རྒྱུ་ལ་རྒྱས་འགྱུར་གྱི་རིགས་སུ་འཇོག་པ་དང་། རྒྱུད་བླར་ངོ་བོ་ཉིད་སྐུའི་རྒྱུ་ལ་རང་བཞིན་གནས་རིགས་དང་། གཟུགས་སྐུ་གཉིས་ཀྱི་རྒྱུ་ལ་རྒྱས་འགྱུར་གྱི་རིགས་སུ་འཇོག་པ་གནད་གཅིག་ཏུ་འབྱུང་ཡང་སྐལ་བ་དང་མི་ལྡན་པ་དག་གིས་གོ་བར་དཀའོ། །དེང་སང་ཆོས་དབྱིངས་ཞེས་པ་ཆོས་ཅན་གྱི་སྟེང་དུ་བདེན་པ་བཀག་ཙམ་གྱི་མེད་དགག་ལ་འདོད་པ་ནི་གསུང་རབ་ཀྱི་གནད་མ་གོ་བ་སྟེ། རང་བཞིན་གནས་རིགས་དེ་ཉིད་ཆོས་སངས་རྒྱས་ཀྱི་སྟོབས་སོགས་ཀྱི་རྒྱུ་ཡིན་པས་ན་ཆོས་ཀྱི་དབྱིངས་སུ་འཇོག་པའི་ཕྱིར་ཏེ། དབྱིངས་དང་། རིགས་དང་། རྒྱུ་རྣམས་དོན་གཅིག་པའི་ཕྱིར་རོ། །གཉིས་པ་རྣམ་གྲངས་ནི་སྤྱིར་རིགས་ཙམ་གྱི་རྣམ་གྲངས་ལ་རིགས་དང་། ཁམས་དང་ས་བོན་དང་། ཉེར་གནས་དང་། སྔོན་འགྲོ་ཞེས་ལྔ་དང་ལྡན་ནོ། །རང་བཞིན་གནས་རིགས་ཀྱི་རྣམ་གྲངས་ལ་བདེ་བར་གཤེགས་པའི་སྙིང་པོ་དང་། ཆོས་དབྱིངས་དང་། སངས་རྒྱས་ཀྱི་རིགས་དང་། སངས་རྒྱས་ཀྱི་ཁམས་རྣམས་ཏེ། ཁྱབ་མཉམ་ཉིད་དུ་འཁྲུལ་བར་མི་བྱའོ། །འོ་ན་ཇི་ལྟར་ཞེ་ན་བདེ་གཤེགས་སྙིང་པོ་དང་ཆོས་དབྱིངས་ནི་འབྲས་བུའི་དུས་ན་ཡང་ཡོད་པས་དེ་ལ་རང་བཞིན་གནས་རིགས་ཀྱིས་མ་ཁྱབ་ཀྱང་རང་བཞིན་གནས་རིགས་ལ་ནི་དེ་གཉིས་ཀྱིས་ཁྱབ་སྟེ། རང་བཞིན་གནས་རིགས་དེ་བདེ་གཤེགས་སྙིང་པོའི་བྱེ་བྲག་ཡིན་པའི་ཕྱིར་དང་། སེམས་ཙམ་པས་རང་བཞིན་གནས་རིགས་ཞེས་པའི་ཟུར་གྱི་རང་བཞིན་དང་། རྒྱུ་དོན་གཅིག་པར་འདོད་པ་ལ་རྒྱས་འགྱུར་གྱི་རིགས་ཀྱིས་མ་ངེས་པ་བརྗོད་ནས། རང་ལུགས་ལ་རང་བཞིན་དང་ཆོས་དབྱིངས་དོན་གཅིག་པར་མཛད་པའི་ཕྱིར་ཏེ། ཉིར་སྣང་དུ། གཞན་དག་ནི་རིགས་ནི་སྐྱེ་མཆེད་དྲུག་གི་ཁྱད་པར་ཡིན་ནོ་དེ་ཡང་རྣམ་པ་གཉིས་ཏེ། རྐྱེན་གྱིས་ཡང་དག་པར་བླངས་པ་དང་རང་བཞིན་དུ་གནས་པའོ། །ཞེས་ཟེར་རོ། །དེ་དག་གིས་ནི་རང་བཞིན་དུ་གནས་པའི་རིགས་ལ་རང་བཞིན་དུ་བརྗོད་པའི་དོན་བརྗོད་དགོས་སོ། །རྒྱུའི་རྣམ་གྲངས་ཡིན་ནོ་ཞེ་ན། རྐྱེན་གྱིས་ཡང་དག་པར་བླངས་པ་ཡང་དེ་ཡིན་པ་དེས་ན་དོན་གྱི་ཁྱད་པར་ཅི་ཡོད། ཆོས་ཉིད་ཀྱི་རྣམ་གྲངས་ཡིན་པ་ལ་ནི་ཉེས་པ་འདི་མེད་དོ། །ཡང་ན་དེ་དག་གི་རིགས་ནི་བཏགས་པ་བ་ཡིན་ལ་འདི་ནི་མཚན་ཉིད་པ་ཡིན་ཏེ། དེས་ན་འདི་དང་དེ་འགྲིགས་པ་མ་ཡིན་ནོ། །ཞེས་གསུངས་པའི་ཕྱིར་རོ། །ཊཱི་ཀ་ལས། འདུས་བྱས་རང་བཞིན་གནས་རིགས་དང་། འདུས་མ་བྱས་རང་བཞིན་གནས་རིགས་གཉིས་སུ་གསུངས་པ་ཡང་དེང་སང་ཕལ་ཆེར་གྱིས་ཆོས་ཅན་གསལ་བའི་སྟེང་གི་བདེན་པ་བཀག་ཙམ་གྱི་སྟོང་ཉིད་ཁོ་ན་རང་བཞིན་གནས་རིགས་སུ་འདོད་པ་བཀག་ནས་དེ་རང་བཞིན་གནས་རིགས་ཡིན་ན། ཆོས་ཅན་གསལ་བ་ཡང་རང་བཞིན་གནས་རིགས་སུ་འདོད་དགོས་ཏེ། ཁྱད་པར་མེད་པའི་ཕྱིར་ཞེས་པའི་དོན་ཡིན་གྱི་ཕུགས་ཀྱི་བཞེད་པ་ནི་མ་ཡིན་ཏེ། ངོ་བོ་ཉིད་སྐུ་དབྱིངས་རིགས་དབྱེར་མེད་ལ་བཞེད་པས་དེའི་རྒྱུར་གྱུར་པའི་རང་བཞིན་གནས་རིགས་དེ་ཡང་དབྱིངས་རིག་དབྱེར་མེད་དུ་གྲུབ་པའི་ཕྱིར་རོ། །སེམས་ཙམ་པའི་ལུགས་ལ་སྟོང་པ་ཉིད་དང་། དེ་བཞིན་ཉིད་དང་། ཡང་དག་མཐའ་དང་། མཚན་མ་མེད་པ་དང་། དོན་དམ་པ་དང་། ཆོས་དབྱིངས་རྣམས་གཞན་དབང་གི་སྟེང་དུ་ཀུན་བཏགས་ཀྱི་སྟོང་པའི་སྟོང་ཉིད་རིགས་པས་དཔྱད་བཟོད་དུ་གྲུབ་པ་ཞིག་གི་མིང་གི་རྣམ་གྲངས་སུ་འདོད་པས། ཡིན་ཁྱབ་མཉམ་ཡིན་ཀྱང་དབུ་མ་པའི་ལུགས་ནི། བདེ་གཤེགས་སྙིང་པོ་དང་། ཆོས་དབྱིངས་དང་། རང་བཞིན་གནས་རིགས་རྣམས་ནི་ཆོས་ཅན་གསལ་བ་དང་། དེ་ཉིད་ལ་མཐའ་བཞིའི་སྤྲོས་པ་བཀག་པའི་ཆོས་ཉིད་དབྱེར་མེད་པའི་ཟུང་འཇུག་ལ་འདོད་ཅིང་། སྟོང་ཉིད་དང་དེ་བཞིན་ཉིད་ལ་སོགས་པ་རྣམས་ནི་བདེན་པའམ་མཐའ་བཞིའི་སྤྲོས་པ་བཀག་པའི་གནས་ལུགས་ཀྱི་ཆ་ནས་འཇོག་པས་ཁྱད་པར་ཤིན་ཏུ་ཆེ་སྟེ། ཟུང་འཇུག་གི་སྟོང་པའི་ཆ་ལ་སྟོང་ཉིད་སོགས་སུ་འཇོག་པ་ཡིན་པའི་ཕྱིར་རོ། །མདོར་ན་སེམས་ཙམ་པའི་ལུགས་ལ་རང་བཞིན་གནས་རིགས་ཡིན་ན་ཆོས་དབྱིངས་མ་ཡིན་དགོས་ཏེ། སྔ་མ་ནི་འདུས་བྱས་དང་། ཕྱི་མ་ནི་འདུས་མ་བྱས་ཁོ་ན་ཡིན་པའི་ཕྱིར་རོ། །དབུ་མ་པའི་ལུགས་ལ་རང་བཞིན་གནས་རིགས་ཡིན་ན། ཆོས་དབྱིངས་ཡིན་དགོས་ཏེ། སྒྲུབ་བྱེད་སྔར་བསྟན་ཟིན་ཅིང་། བསྟན་བཅོས་རྩ་བར་ཡང་སྒྲུབ་པའི་རྟེན་ཆོས་དབྱིངས་ཉིད་ལ་རིགས་ཞེས་བརྗོད་པའི་ཕྱིར་དང་། འགྲེལ་པ་དག་ལས་ཀྱང་འདི་ཁོ་ན་བཞིན་འབྱུང་བའི་ཕྱིར་དང་། འཕགས་མཆོག་ཀླུ་སྒྲུབ་ཀྱིས་ཀྱང་འདི་ཁོ་ན་གསུངས་པའི་ཕྱིར་རོ། །གསུམ་པ་དབྱེ་བ་ལ་གནས་སྐབས་ཀྱི་སྒོ་ནས་དབྱེ་བ། ངོ་བོའི་སྒོ་ནས་དབྱེ་བ། རྟེན་ཆོས་སྒྲུབ་པའི་སྒོ་ནས་དབྱེ་བ་དང་གསུམ་ལས། དང་པོ་ལ། གནས་སྐབས་ལ་ལྟོས་ནས་རིགས་མ་ངེས་པ་དང་། ངེས་པ་གཉིས། ཕྱི་མ་ལ་ཡང་གནས་སྐབས་ཉན་ཐོས། རང་རྒྱལ་ཐེག་ཆེན་དུ་རིགས་ངེས་པ་གསུམ་ཡོད་ཀྱང་མཐར་ཐུག་ལ་ལྟོས་ནས་རིགས་ངེས་པ་དང་མ་ངེས་པའི་དབྱེ་བ་མེད་ཅིང་། ཉན་ཐོས་དང་རང་རྒྱལ་དུ་རིགས་ངེས་པ་ཡང་མེད་དེ། རིགས་ཡིན་ན་མཐར་ཐུག་སངས་རྒྱས་སུ་ངེས་པས་ཁྱབ་པའི་ཕྱིར་རོ། །གནས་སྐབས་ཉན་ཐོས་དང་། རང་རྒྱལ་གྱི་རིགས་ཡིན་པས། ཉན་ཐོས་དང་རང་རྒྱལ་གྱི་རིགས་ཡིན་པའི་གོ་ཆོད་ཀྱང་གནས་སྐབས་ཉན་ཐོས་དང་རང་རྒྱལ་དུ་རིགས་ངེས་པས་དེ་དང་དེར་རིགས་ངེས་པར་ནི་འཇོག་མི་ནུས་ཏེ། ཉན་ཐོས་དང་རང་རྒྱལ་གྱི་རིགས་ཡིན་པ་ཙམ་ནི་ཉན་ཐོས་དང་རང་རྒྱལ་གྱི་སྒྲུབ་པའི་རྟེན་གཞི་བྱེད་པའི་ཆ་ནས་འཇོག་པ་ཡིན་ཅིང་། དེ་དང་དེར་རིགས་ངེས་པ་ཡིན་ན། རྐྱེན་དབང་གིས་ཐེག་པ་གཞན་དུ་བསྒྱུར་དུ་མི་རུང་དགོས་པའི་ཕྱིར་རོ། །མདོར་ན་མཐར་ཐུག་ཐེག་པ་གསུམ་དུ་འདོད་པ་དག་གིས་མཐར་ཐུག་ལ་ལྟོས་ནས་རིགས་ངེས་པ་དང་། མ་ངེས་པ་གཉིས་རིགས་ངེས་པ་ལ་ཡང་མཐར་ཐུག་ཉན་ཐོས་རང་རྒྱལ་ཐེག་ཆེན་དུ་རིགས་ངེས་པ་གསུམ་དུ་འདོད་ཅིང་། མཐར་ཐུག་ཐེག་པ་གཅིག་ཏུ་འདོད་པས་ནི་མཐར་ཐུག་ལ་ལྟོས་ནས་དེ་འདྲའི་དབྱེ་བ་མི་འདོད་པ་ནི་གྲུབ་མཐའ་གོང་འོག་གི་གནད་དུ་ཤེས་པར་བྱའོ། །གཉིས་པ་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་ལས། དང་པོའི་མཚན་ཉིད། དྲི་མས་རྣམ་པར་དག་པ་ན་ངོ་བོ་ཉིད་སྐུར་འགྱུར་རུང་གི་དྲི་མ་ལས་མ་གྲོལ་བའི་ཆོས་དབྱིངས་སོ། །གཉིས་པའི་མཚན་ཉིད་ཐེག་ཆེན་གྱི་ཐར་ལམ་གྱིས་བསྡུས་པའི་དྲི་མ་ལས་མ་གྲོལ་བའི་དགེ་རྩ་གང་ཞིག དྲི་མས་རྣམ་པར་དག་པ་ན་ཡེ་ཤེས་གསུམ་མམ་གཟུགས་སྐུ་གཉིས་སུ་འགྱུར་དུ་རུང་བ་སྟེ་གནད་གཅིག་གོ །ཐེག་དམན་གྱི་ཐར་ལམ་ནི་རྒྱས་འགྱུར་གྱི་རིགས་མ་ཡིན་ཏེ། འདི་ལ་ལུང་དང་རིགས་པ་གཉིས་ལས། དང་པོ་ནི་རྒྱུད་བླར། ཡང་དག་བླངས་པ་མཆོག་ཡིན་ནོ། །ཞེས་གསུངས་སོ། །གཉིས་པ་ནི་རྒྱས་འགྱུར་གྱི་རིགས་སུ་འཇོག་པ་ལ་རིགས་སད་པའི་སྟོབས་ཀྱིས་རིགས་ཀྱི་ནུས་པ་བརྟས་པ་དགོས་པ་གང་ཞིག་ཐེག་དམན་གྱི་ལམ་རྒྱུད་ལ་སྐྱེས་ཀྱང་རིགས་སད་པ་མ་ཡིན་ཏེ། མདོ་སྡེ་རྒྱན་དུ། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དང་། དབུ་མ་འཇུག་པར་ཡང་དེ་དང་འདྲ་བར་གསུངས་པའི་ཕྱིར་རོ། །རྒྱས་འགྱུར་གྱི་རིགས་ལ། རིགས་པ་དྲུག་ཅུ་པ་ནས་གསུངས་པ་ལྟར་གྱི་ཚོགས་གཉིས་གང་རུང་ཡིན་དགོས་པ་ལས། ཉན་ཐོས་ལ་དེ་ལྟ་བུའི་ཚོགས་གཉིས་མེད་པས་ཀྱང་གྲུབ་བོ། །མདོ་འགའ་ཞིག་དང་། མདོ་སྡེ་རྒྱན་ལ་སོགས་པ་རྣམས་ལས། ཉན་ཐོས་ཀྱི་བྱང་ཆུབ་ཏུ་ཞུགས་པ་དེ་དང་པོ་ཉིད་ནས་ཐེག་ཆེན་གྱི་ལམ་དུ་ཞུགས་པ་ལས་ལམ་ཡུན་རིང་དུ་འགོར་བར་བཤད་པས་ཀྱང་གྲུབ་སྟེ། རྒྱས་འགྱུར་གྱི་རིགས་ཡིན་ན་ལམ་དུ་མ་ཞུགས་པའི་གང་ཟག་ལ་ལྟོས་ཏེ་ལམ་ཡུན་རིང་དུ་འགོར་བའི་དོན་མེད་པའི་ཕྱིར་རོ། །མདོར་ན་རྒྱས་འགྱུར་གྱི་རིགས་ཡིན་ན། ཐེག་པ་གཞན་ལ་མ་ཞུགས་པར་རང་གི་ཐེག་པ་དེ་ཉིད་ཀྱི་ནུས་པ་མཐར་ཐུག་སྒྲུབ་ནུས་པ་ནི་གནད་ཀྱི་དོན་ནོ། །གསུམ་པ་ལ་གཞུང་འདིར་བཤད་པ་ནི་སྒྲུབ་པ་བཅུ་གསུམ་གྱི་རྟེན་དུ་གྱུར་པའི་རིགས་བཅུ་གསུམ་མོ། །འགྲེལ་པ་ཆེ་ཆུང་ལྟར་ན། ཐེག་པ་གསུམ་གྱི་སྒྲུབ་པའི་རྟེན་དུ་གྱུར་པའི་རིགས་གསུམ་དུ་ཡང་དབྱེར་ཡོད་དོ། །བཞི་པ་སྒྲུབ་པའི་རྟེན་དུ་འཇོག་པའི་ཚུལ་ལ། ཉིར་སྣང་དུ། དེས་ན་འདིས་ནི་ཆོས་ཀྱི་དབྱིངས་ཉིད། འཕགས་འི་ཆོས་རྣམས་ཀྱི་རྒྱུ་ཡིན་པའི་ཕྱིར། རང་བཞིན་དུ་གནས་པའི་རིགས་སྒྲུབ་པའི་རྟེན་ཡིན་ནོ་ཞེས་སྟོན་པར་བྱེད་དོ། །ཅེས་གསུངས་པ་ལ། འདིའི་དོན་ནི་སེམས་ཀྱི་དབྱིངས་དེ་དགེ་རྩས་སད་པའི་ཚེ། འཁོར་བ་སྤོང་འདོད་དང་། རང་བཞིན་གྱིས་མྱ་ངན་ལས་འདས་པ་སྤྲོས་བྲལ་རྟོགས་པར་འདོད་པའི་བློ་སྐྱེ་བ་ནི་སེམས་རང་གི་གནས་ཚུལ་སྙེགས་པར་འདོད་པའི་བློ་སྐྱེས་པ་ཡིན་ལ། དེ་ལས་སྒྲུབ་པ་ལ་འཇུག་པར་འབྱུང་ཞིང་དེ་ལས་སེམས་རང་གི་གནས་ཚུལ་ཕྱིན་ཅི་མ་ལོག་པར་རྟོགས་པའི་ཚེ། འཁོར་བ་སྤོང་འདོད་དང་། རང་བཞིན་གྱིས་མྱ་ངན་ལས་འདས་པ་སྤྲོས་བྲལ་རྟོགས་པར་འདོད་པའི་བློ་སྐྱེ་ཞིང་དེ་ལས་འཕགས་པའི་ཆོས་རྣམས་འབྱུང་ཞེས་པའི་དོན་ནོ། །བོད་ཁ་ཅིག་དག་པར་བྱ་བའི་དོན་ཡོན་ཏན་དང་ལྡན་ན་དེ་དག་པར་བྱེད་པའི་སྒྲུབ་པ་འཐད་པའི་ཕྱིར་ན། སྒྲུབ་པའི་རྟེན་ཡིན་ནོ་ཞེས་པ་དང་། འབྲེས་སྒྲུབ་པའི་དམིགས་པ་ཡིན་པ་སྒྲུབ་པའི་རྟེན་དུ་བཤད་ཅེས་དང་། ཁ་ཅིག་སྒྲུབ་པའི་རྟེན་ནི་བྱང་ཆུབ་སེམས་དཔའ་ཡིན་ལ་དེ་སྐྱེ་མཆེད་དྲུག་ལ་གདགས། སྐྱེ་མཆེད་གཞན་ལྔ་ཡང་ཡིད་ཀྱི་སྐྱེ་མཆེད་ལ་བརྟེན་ཅིང་དེའི་རྩ་བ་ཡང་ཆོས་དབྱིངས་ཡིན་པས་ཆོས་དབྱིངས་སྒྲུབ་པའི་རྟེན་དུ་འཇོག་པར་བཞེད་པ་རྣམས་ནི་ཕྱོགས་རེ་ལ་བསམ་ན་འགལ་བ་མེད་མོད། ཞིབ་ཏུ་བྱས་ན་གཞིའི་དུས་སུ་འཁོར་བའི་ཆོས་ཐམས་ཅད་ཆོས་དབྱིངས་ལ་བརྟེན་པ་དང་། ལམ་གྱི་དུས་སུ་ལམ་གྱི་ཆོས་ཐམས་ཅད་ཆོས་དབྱིངས་ལ་བརྟེན་པ་དང་། འབྲས་བུའི་དུས་སུ་འབྲས་བུའི་ཆོས་ཐམས་ཅད་ཆོས་དབྱིངས་ལ་བརྟེན་དགོས་པར་གཞན་དུ་བཤད་ཟིན་པ་ལས་ཤེས་སོ། །ལྔ་པ་རིགས་སུ་འཇོག་པའི་ཚུལ་ལ་རྟེན་གྱི་སྒོ་ནས་རིགས་སུ་འཇོག་པ་དང་། དམིགས་པའི་སྒོ་ནས་རིགས་སུ་འཇོག་པའི་ཚུལ་གཉིས་སུ་གསུངས་པ་རྣམས་ཀྱང་། རིགས་ཀྱི་དོན་ནི་རྒྱུའི་དོན་ཡིན་པས། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་གསུངས་པ་འདི་ཉིད་རིགས་སུ་འཇོག་པའི་ཚུལ་ཡིན་པས་གནད་ངོས་ཟིན་པ་ཤིན་ཏུ་གཅེས་སོ། །སྒྲུབ་པའི་རྟེན་བསྟན་ཟིན་ནས་དེའི་འོག་ཏུ་སྒྲུབ་པའི་དམིགས་པ་འཆད་དེ། རིགས་སད་པའི་གང་ཟག་གིས་དམིགས་པ་ལ་སྒྲོ་འདོགས་བཅད་ནས་སྒྲུབ་པ་ཉམས་སུ་ལེན་དགོས་པའི་ཕྱིར་རོ། །འདི་ལ་རང་ལུགས་ཀྱི་དམིགས་པ་ངོས་གཟུང་བ་དང་། གཞན་ལུགས་ཀྱི་དམིགས་པ་དགག་པ་གཉིས་ལས། དང་པོ་ནི། དམིགས་པ་ཆོས་རྣམས་ཐམས་ཅད་དེ། །ཅེས་སོགས་ཚིགས་བཅད་གཉིས་ཏེ། འཕགས་པ་ལྟར་ན་དང་པོ་གཉིས་ཀྱིས་མདོར་བསྟན་ནས། ལྷག་མ་རྣམས་ཀྱིས་རྒྱས་པར་བཤད། སློབ་དཔོན་ལྟར་ན། དང་པོས་མདོར་བསྟན། གཉིས་པས་ཅུང་ཟད་བཤད། ལྷག་མ་རྣམས་ཀྱིས་རྒྱས་པར་བཤད་པའོ། །འདི་ལ་བཞི་སྟེ། རབ་ཏུ་དབྱེ་བ། ཚུལ་ཇི་ལྟར་ངེས་པ། གྲངས་ངེས་པ། གོ་རིམ་ངེས་པའོ། །དང་པོ་ལ། ལམ་གྱི་དབང་དུ་བྱས་པ་དང་། སྤང་གཉེན་གྱི་དབང་དུ་བྱས་པ་དང་། བདེན་གཉིས་ཀྱི་དབང་དུ་བྱས་པ་དང་། འབྲས་བུའི་དབང་དུ་བྱས་པ་རྣམས་ནི་ཚིག་རྐང་པ་གཉིས་དང་། གཅིག་དང་། ཡང་གཅིག་དང་། ཡང་གཉིས་ཀྱིས་རིམ་པ་བཞིན་དུ་བསྟན་ཏོ། །འདི་ལ་ཟངས་ལོ་ན་རེ། དགེ་སོགས་གསུམ་ནི་ཚོགས་ལམ་གྱི་དམིགས་པ། འཇིག་རྟེན་པ་དང་། དེ་ལས་འདས་པ་གཉིས་ནི་སྦྱོར་ལམ་གྱི། ཟག་བཅས་ཟག་མེད་ནི་མཐོང་ལམ་གྱི། འདུས་བྱས་འདུས་མ་བྱས་ནི་སྒོམ་ལམ་གྱི། ཐུན་མོང་དང་ཐུན་མོང་མ་ཡིན་པ་གཉིས་ནི་མི་སློབ་ལམ་གྱི་དམིགས་པ་ཡིན་ནོ། །ཞེས་ཟེར་བ་ནི་ལུང་རིགས་ཀྱི་ཤེས་བྱེད་མེད་ཅིང་། མི་སློབ་ལམ་ན་སྒྲུབ་པ་མེད་པས། དེའི་དམིགས་པ་འཇོག་པ་ཡང་མི་འཐད་དོ། །དེས་ན་ཆོས་ཐམས་ཅད་དགེ་མི་དགེ་ལུང་མ་བསྟན་གསུམ་དུ་བསྡུས་ནས་དེ་དག་གི་རྣམ་གྲངས་ལ་འཇིག་རྟེན་ལས་འདས་མ་འདས་ལ་སོགས་པར་སྒྲོ་འདོགས་གཅོད་པ་ཡིན་ཏེ། གཙོ་བོར་ནི་ཚོགས་ལམ་དུ་ཐོས་བསམ་གྱིས་གཏན་ལ་ཕབ་པ་དང་། སྦྱོར་ལམ་དུ་འཇིག་རྟེན་པའི་སྒོམ་བྱུང་གིས་བསྒོམ་པའི་དམིགས་པ་ཡིན་ཏེ། ཁ་ཅིག་ཏུ་ནི་རྒྱུའི་སྒོ་ནས་ཞེས་སོགས་དང་མཐུན་ནོ། །གཉིས་པ་ནི་བྱང་སེམས་ཆེན་པོས་ཆོས་ཐམས་ཅད་རྟོགས་པར་བྱའོ། །ཆོས་ཐམས་ཅད་ཀྱི་ཡོད་པར་མ་གྱུར་པ་ཉིད་ལ་བསླབ་པར་བྱའོ། །ཞེས་གསུངས་པས་ན། ཀུན་རྫོབ་ཀྱི་བདེན་པ་ལ་བརྟེན་ནས་ཆོས་ཁ་ཅིག་ནི་བླང་བྱ། ཁ་ཅིག་ནི་དོར་བྱ། ཁ་ཅིག་ནི་རྒྱུད་ལ་བསྐྱེད་པར་བྱ་བ། ཁ་ཅིག་ནི་ཐོབ་པར་བྱ་བ་ལ་སོགས་པར་དེ་དག་གི་མཚན་ཉིད་ཇི་ལྟར་གནས་པ་བཞིན་རྟོགས་པར་བྱེད་ལ། དོན་དམ་པའི་བདེན་པ་ལ་བརྟེན་ནས་དེ་ཐམས་ཅད་ངོ་བོ་ཉིད་མེད་པར་རྟོགས་པར་བྱེད་པའི་ཚུལ་གྱིས་དམིགས་སོ། །གསུམ་པ་ནི་སྒྲོ་འདོགས་གཅད་པར་བྱ་བའི་གཞི་ཐམས་ཅད་ནི་འདིར་འདུས་པས་འདི་ལས་མང་བ་མི་དགོས་ལ། འདི་ལས་གང་རུང་ཞིག་མ་ཚང་ན་ཡང་སྒྲོ་འདོགས་གཅོད་ཚུལ་མ་འདུས་པར་འགྱུར་བས་འདི་ལས་ཉུང་བ་ཡང་མ་ཡིན་པས་ན་བཅུ་གཅིག་ཏུ་གྲངས་ངེས་སོ། །བཞི་པ་ནི། རང་གི་ངོ་བོའི་སྒོ་ནས་གོ་རིམ་རྣམ་པར་གཞག་པ་མེད་ཀྱང་། རྟོགས་བྱེད་ཀྱི་བློ་ལ་ལྟོས་ནས་གོ་རིམ་ངེས་པ་ཡོད་དེ། བྱང་ཆུབ་ཏུ་སེམས་བསྐྱེད་པའི་གང་ཟག་གིས་བདག་གིས་ཆོས་ཐམས་ཅད་ལ་བསླབ་དགོས་ན་བླང་བར་བྱ་བ་ནི་གང་། དོར་བྱ་ནི་གང་། རེ་ཞིག་བཏང་སྙོམས་སུ་གཞག་བྱ་ནི་གང་སྙམ་པའི་བློ་སྐྱེ་བས་དེ་ལ་ལྟོས་ནས་དགེ་མི་དགེ་ལུང་མ་བསྟན་གསུམ་པོ་རིམ་པ་བཞིན་གཞག་གོ །དེ་ནས་མི་དགེ་བ་དང་ལུང་མ་བསྟན་བཏང་སྙོམས་སུ་བཞག་སྟེ། དགེ་བ་ཉིད་ལ་ཡང་དང་པོར་བླང་བར་བྱ་བ་དང་། ཕྱིས་བླང་བར་བྱ་བ་གང་སྙམ་པའི་བློ་ལ་ལྟོས་ནས་འཇིག་རྟེན་པ་ཞི་རགས་ཀྱི་རྣམ་པ་ཅན་དང་། འཇིག་རྟེན་ལས་འདས་པ་བདེན་པའི་རྣམ་པ་ཅན་གཉིས་གཞག་གོ །དེ་ནས་ཡང་འཇིག་རྟེན་པ་བཏང་སྙོམས་སུ་བཞག་སྟེ། འཇིག་རྟེན་ལས་འདས་པའི་སྤང་བྱ་ནི་གང་། གཉེན་པོ་ནི་གང་ཡིན་སྙམ་པའི་བློ་སྐྱེ་བས། དེ་ལ་ལྟོས་ནས་ཟག་པ་དང་བཅས་པ་སྤང་བྱ་དང་། ཟག་པ་མེད་པ་གཉེན་པོ་ཉིད་དུ་གཞག་གོ །དེ་ནས་ཡང་ཟག་བཅས་བཏང་སྙོམས་སུ་བཞག་སྟེ། ཟག་མེད་ཀྱིས་རྟོགས་པར་བྱ་བའི་ཡུལ་དེ་གང་ཡིན་སྙམ་པའི་བློ་སྐྱེ་བས་དེ་ལ་ལྟོས་ནས་འདུས་བྱས་ཀུན་རྫོབ་ཀྱི་བདེན་པ་དང་། འདུས་མ་བྱས་དོན་དམ་པའི་བདེན་པ་གཉིས་བཞག་གོ །དེ་ནས་ཡང་འདུས་བྱས་བཏང་སྙོམས་སུ་བཞག་སྟེ། འདུས་མ་བྱས་རྟོགས་པའི་འབྲས་བུ་གང་ཡིན་སྙམ་པའི་བློ་སྐྱེ་བས་དེ་ལ་ལྟོས་ནས་དེའི་འབྲས་བུ་སློབ་མ་དང་ཐུན་མོང་བ་དང་། ཐུན་མོང་མ་ཡིན་པ་གཉིས་བཞག་སྟེ། འཕགས་པའི་གང་ཟག་ཐམས་ཅད་ནི་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གསུངས་པ་དང་ཤིན་ཏུ་མཐུན་ནོ། །སྔ་མ་སྔ་མ་བཏང་སྙོམས་སུ་བཞག་པ་ནི་གནས་སྐབས་དེ་དང་དེ་ནས་སྒྲོ་འདོགས་གཅོད་པའི་བྱ་བ་རྫོགས་པའོ། །གཉིས་པ་གཞན་གྱི་དམིགས་པ་དགག་པ་ནི། ཉིར་སྣང་ལས། གང་དག་ཆོས་ཀྱི་དབྱིངས་ཉིད་དམིགས་པ་ཡིན་ནོ་སྙམ་དུ་སེམས་པ་དེ་དག་གིས་དམིགས་པ་དག་པ་གོང་ནས་གོང་དུ་ཁྱད་པར་འགྲོ་བ་ཞེས་བྱ་བ་ཇི་ལྟར་ཡིན་བརྗོད་དགོས་སོ། །ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །ཅེས་བྱ་བ་ཡིན་ནོ་ཞེ་ན། དེ་ལྟར་ན་ནི་འོ་ན་མི་མཐུན་པ་དང་གཉེན་པོའི་ཕྱོགས་ཀྱི་རྣམ་པར་རྟོག་པ་སྤང་བ་མེད་པས་དག་པ་ཕྱོགས་གཅིག་པར་ཐལ་བར་འགྱུར་རོ། །རབ་འབྱོར་རྣམ་པ་ཐམས་ཅད་མཁྱེན་པ་ཉིད་ལ་ནི་དམིགས་པ་མེད་དོ་ཅེས་པ་འབྱུང་བས་ཁྱེད་ཀྱི་ཕྱོགས་ལ་ཡང་དམིགས་པ་དག་པ་མཐར་ཐུག་པར་མི་འགྱུར་བ་མ་ཡིན་ནམ་ཅི་ཕྱིར་ཞེ་ན་ཆོས་ཐམས་ཅད་འཁྲུལ་པ་ཙམ་ཉིད་ཡིན་པའི་ཕྱིར་ཏེ། རབ་འབྱོར་གཉིས་ནི་དངོས་པོའོ་གཉིས་སུ་མེད་པ་ནི་དངོས་པོ་མེད་པའོ། །ཞེས་འཆད་པར་འགྱུར་ལ་གཉིས་ཀྱང་འཁྲུལ་པ་ལས་གཞན་ཅི་ཞིག་ཡིན་པར་འགྱུར་ཞེ་ན། མངོན་པར་ཞེན་པ་ནི་གཉིས་ཀྱི་མཚན་ཉིད་ཡིན་གྱི་འཁྲུལ་པ་ནི་མ་ཡིན་ཏེ། དེ་ལ་ནི་གཟུང་བ་དང་འཛིན་པའི་རང་བཞིན་དུ་མི་བརྗོད་པའི་ཕྱིར་རོ། །དེས་ན་འདི་ལ་ཁྱོད་འཁྲུལ་པར་ཟད་དོ། །དེ་ལྟར་བྱས་ན་རང་བཞིན་གཙོ་བོར་གྱུར་པ་ནི་རིགས་ཡིན་ལ། རྣམ་འགྱུར་གཙོ་བོར་གྱུར་པ་ནི་དམིགས་པ་ཡིན་ནོ། །གཉིས་ཀ་ཡང་གཉིས་ཀར་མ་བཀག་པ་དེས་ན་རྟེན་དང་དམིགས་པ་དག་གི་མཚན་ཉིད་ཀྱི་དབྱེ་བ་དང་། དམིགས་པ་དག་པའི་མཐར་ཐུག་པར་འགྲོ་བ་ཡང་འཐད་པར་འགྱུར་རོ། །དེ་ཉིད་ཀྱི་ཕྱིར་རབ་འབྱོར་བྱང་ཆུབ་སེམས་དཔས་ཆོས་ཐམས་ཅད་ཀྱི་མ་ཆགས་པ་ཉིད་དང་། ཡོད་པར་གྱུར་པ་མ་ཡིན་པ་ཉིད་ལ་བསླབ་པར་བྱའོ། །ཞེས་གསུངས་སོ། །དོན་གང་ཡིན་ཞེ་ན་རང་བཞིན་དང་རྗེས་སུ་འབྲེལ་བའི་རྣམ་འགྱུར་ནི་དམིགས་པ་ཡིན་གྱི་རྣམ་པར་འགྱུར་བ་ཙམ་ནི་མ་ཡིན་ནོ་ཞེས་བྱ་བ་ཡིན་ནོ། །ཞེས་གསུངས་པ་དེ་དག་གི་དོན་རོང་སྟོན་དམ་པའི་ཊཱི་ཀ་ལས་ཞིབ་ཏུ་བཀོད་པ་བཞིན་ཤེས་པར་བྱ་སྟེ་འདིར་ནི་མ་སྤྲོས་སོ། །སྒྲུབ་པའི་དམིགས་པ་བསྟན་ཟིན་ནས་དེའི་འོག་ཏུ་སྒྲུབ་པའི་ཆེད་དུ་བྱ་བ་སྟོན་ཏེ། དམིགས་པ་ལ་སྒྲོ་འདོགས་ཆོད་པའི་སྒྲུབ་པ་དེ་ཡང་ཆེད་དུ་བྱ་བ་ཆེན་པོ་གསུམ་གྱིས་ཆེད་དུ་འབད་དགོས་པའི་ཕྱིར་རོ། །འདི་ལ་ཆེད་དུ་བྱེད་པ་པོ་དང་། ཆེད་དུ་བྱ་བ་གཉིས་ལས་དང་པོ་ནི་རང་བྱུང་གི་ཞེས་པ་སྟེ། རང་བྱུང་དངོས་ནི་སངས་རྒྱས་ཡིན་ལ། འདིར་ནི་དེའི་མིང་གིས་བཏགས་པའི་བྱང་ཆུབ་སེམས་དཔའ་འོ། །འདོགས་པའི་རྒྱུ་མཚན་ནི་མདོ་ལས་བྱང་སེམས་ཆེན་པོ་ཞེས་གང་བརྗོད་པ་ཅིའི་སླད་དུ་བྱང་སེམས་ཆེན་པོ་ཞེས་བགྱི། རབ་འབྱོར་འདི་ལ་སེམས་ཅན་གྱི་ཕུང་པོ་ཆེན་པོ་དང་། སེམས་ཅན་གྱི་སྡེ་ཆེན་པོའི་མཆོག་ཏུ་འགྱུར་བ་དེའི་ཕྱིར་བྱང་ཆུབ་སེམས་དཔའ་ཆེན་པོ་ཞེས་བྱའོ། །ཞེས་རང་བྱུང་དུ་འགྱུར་བའི་ཕྱིར་ན་རང་བྱུང་གི་མིང་གིས་བཏགས་པའོ། །གཉིས་པ་ལ་གསུམ་ལས། དང་པོ་སེམས་ཆེན་པོ་ནི། སེམས་ཅན་ཀུན་མཆོག་ཉིད་སེམས་དང་། །ཞེས་ཏེ། སྔར་གྱི་མདོ་དེ་ཉིད་ལ་སེམས་ཅན་གྱི་ཕུང་པོ་ནི་འགྲོ་བ་རིགས་ལྔས་བསྡུས་པའི་སེམས་ཅན་ནམ། ཡང་ན་ཚོགས་ཆེན་པོ་སྟེ་སྤྱིར་བསྟན་པའོ། །སེམས་ཅན་གྱི་སྡེ་ཆེན་པོ་ནི། འཕགས་པ་གསུམ་གྱིས་བསྡུས་པའི་སེམས་ཅན་བརྒྱད་པ་ལ་སོགས་པ་ནས་ཕྱིར་མི་བཟློག་པའི་བྱང་སེམས་ཀྱི་བར་རོ། །དེ་དག་ནི་འདིར་སེམས་ཅན་ཀུན་ཅེས་པར་བསྡུས་ལ་མཆོག་ནི་དེ་ཐམས་ཅད་ཀྱི་ནང་ནས་དམ་པར་གྱུར་པ་སྟེ་རྫོགས་པའི་སངས་རྒྱས་སྐུ་གསུམ་མོ། །འདི་དག་ནི་ཆེན་པོ་གསུམ་ལ་སྦྱར་བར་བྱ་སྟེ། དེ་ལྟར་དུ་བྱེད་པའི་སེམས་དང་། སྤོང་བ་དང་། རྟོགས་པ་གསུམ་པོ་ལ་ཆེན་པོ་གསུམ་དུ་འཇོག་པའི་ཕྱིར་རོ། །འོ་ན་སེམས་ཇི་ལྟ་བུ་ཞེ་ན་རྡོ་རྗེ་ལྟ་བུའི་སེམས་བསྐྱེད་དང་། རླབས་པོ་ཆེའི་སེམས་དང་། མི་བསྒུལ་བའི་སེམས་དང་། ཕན་བདེའི་སེམས་དང་། ཆོས་ལ་དགའ་བ་དང་། ཀུན་དགའ་བ་དང་། ཀུན་དགའ་བའི་རྣལ་འབྱོར་ལ་བརྩོན་པའི་སེམས་ནམ་མཁའ་ལྟར་ཆགས་པ་མེད་པས་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་གྱི་བར་ཐམས་ཅད་ལ་མི་དམིགས་པའི་ཚུལ་གྱིས་གནས་ནས་སེམས་ཅན་གྱི་མཆོག་ཉིད་དུ་བྱེད་པ་སྟེ། རྒྱུའི་དུས་སུ་སེམས་དེ་དག་བསྐྱེད་ནས་འབྲས་བུའི་དུས་སུ་མངོན་དུ་གྱུར་པའོ། །གཉིས་པ་སྤོང་བ་ཆེན་པོ་ལ་བཅོམ་ལྡན་འདས་བདག་ཏུ་ལྟ་བ་དང་། སེམས་ཅན་དང་། སྲོག་དང་། སྐྱེ་བ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བདག་དང་། བྱེད་པ་པོ་དང་། ཚོར་བ་པོ་དང་། ཤེས་པ་པོ་དང་། མཐོང་བ་པོར་ལྟ་བ་དང་། ཆད་པ་དང་། རྟག་པར་ལྟ་བ་དང་། ཡོད་པ་དང་། མེད་པར་ལྟ་བ་དང་། ཕུང་པོར་ལྟ་བ་ནས་རྟེན་ཅིང་འབྲེལ་བར་འབྱུང་བར་ལྟ་བའི་བར་དང་། ཕ་རོལ་ཏུ་ཕྱིན་པ་ལྟ་བ་ནས་ཆོས་ཀྱི་འཁོར་ལོ་བསྐོར་བར་ལྟ་བའི་བར་རྣམས་ཏེ་ལྟ་བ་འདི་དག་རབ་ཏུ་སྤོང་བའི་སླད་དུ་སེམས་ཅན་རྣམས་ལ་ཆོས་སྟོན་པར་བགྱིད་ཀྱང་དེ་མི་དམིགས་པའི་ཚུལ་གྱིས་བགྱིད་དེ། དེའི་སླད་དུ་བྱང་སེམས་ཆེན་པོ་ཞེས་བགྱིའོ་ཞེས་གསུངས་སོ། །དེ་ལ་ལྟ་བ་དང་པོ་བཅུ་གཉིས་ལ་ནི་འཇིགས་ཚོགས་ལ་ལྟ་བ། ཆད་པ་དང་རྟག་པར་ལྟ་བ་ནི་མཐར་འཛིན་ལྟ་བ། ཡོད་པ་དང་མེད་པར་ལྟ་བ་ནི་ལོག་ལྟ་སྟེ་སོ་སྐྱེ་དང་ཐུན་མོང་བ་དང་། ཕུང་པོར་ལྟ་བ་ནས་རྟེན་འབྲེལ་དུ་ལྟ་བའི་བར་ནི་ཉན་རང་དང་ཐུན་མོང་བ། ལྷག་མ་རྣམས་ནི་བྱང་སེམས་ལས་དང་པོ་པ་དང་ཐུན་མོང་བ་སྟེ་གཉེན་པོའི་ཚོགས་སྒྲུབ་ཀྱི་སྐབས་སུ་འཆད་པར་འགྱུར་བའི་གཟུང་འཛིན་གྱི་རྣམ་པར་རྟོག་པ་བརྒྱད་ཀྱིས་བསྡུས་པའོ། །ལྟ་བ་འདི་དག་སྤོང་བའི་ཆེད་དུ་སྒྲུབ་པ་ཉམས་སུ་བླངས་པས་མ་ལུས་པར་སྤངས་པ་ནི་སྤོང་བ་ཆེན་པོའོ། །གསུམ་པ་རྟོགས་པ་ཆེན་པོ་ནི་བརྒྱད་སྟོང་པར་བཅོམ་ལྡན་འདས་བྱང་ཆུབ་ཀྱི་སེམས། ཐམས་ཅད་མཁྱེན་པའི་སེམས། ཟག་པ་མེད་པའི་སེམས། མཉམ་པ་མེད་པའི་སེམས། མི་མཉམ་པ་དང་མཉམ་པའི་སེམས། ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་པའི་སེམས་གང་ལགས་པ་དེ་ལ་ཡང་རང་དོན་དུ་མ་ཆགས་ཤིང་མ་ཞེན་ཏེ། དེའི་ཕྱིར་བྱང་སེམས་ཆེན་པོ་ཞེས་བགྱི་བའི་གྲངས་སུ་མཆིའོ། །ཞེས་གསུངས་ཤིང་། འགྲེལ་ཆེན་དུ། སྤྱིར་བསྟེན་ཞེས་གསུངས་ཏེ་དབྱིངས་ཀྱི་དོན་དུ་འདུག་གོ །བར་པ་བཞི་ནི་ཡེ་ཤེས་བཞི་དང་སྦྱར་ནས་ཐ་མ་ནི་ཐམས་ཅད་ཀྱི་ཐུན་མོང་བར་འཆད་དོ། །དེ་ལྟར་ན་སངས་རྒྱས་ཀྱི་ས་ཡེ་ཤེས་བཞི་ནི་རྟོགས་པ་ཆེན་པོའོ། །རྟོགས་པ་ཆེན་པོའི་རྒྱུའི་དབང་དུ་བྱས་ན་དང་པོ་ནི་ཚོགས་ལམ་གྱི་སེམས་བསྐྱེད། བར་པ་བཞི་ནི་མོས་པས་སྤྱོད་པ་དང་། ལྷག་བསམ་དག་པ་དང་། སྒྲིབ་པ་སྤོང་བ་དང་། རྣམ་པར་སྨིན་པའི་སེམས་བསྐྱེད། ཐ་མ་ནི་ཐམས་ཅད་ཀྱི་ཐུན་མོང་བའོ། །ཞེས་སྔ་རབས་པ་འགའ་ཞིག་བཞེད་པ་ནི་རྒྱུའི་དུས་སུ་དེ་ལྟར་ཉམས་སུ་བླངས་པས་འབྲས་བུའི་དུས་སུ་རྟོགས་པ་ཆེན་པོ་མངོན་དུ་འགྱུར་ཞེས་སྦྱར་ན་སྔ་མ་གཉིས་དང་འགྲིག་གོ །སྒྲུབ་པའི་ཆེད་དུ་བྱ་བ་བསྟན་ཟིན་ནས་སྒྲུབ་པ་རང་གི་ངོ་བོ་སྟོན་ཏེ། ཆེད་དུ་བྱ་བ་དེ་ཡང་སྒྲུབ་པ་རང་གི་ངོ་བོས་བསྒྲུབ་དགོས་པའི་ཕྱིར་རོ། །འདི་ཡང་ཡུལ་གྱི་སྒྲུབ་པ་དང་མངོན་རྟོགས་ཀྱི་སྒྲུབ་པའི་ཁྱད་པར། སྒྲུབ་པ་བཞིའི་ས་མཚམས། སྒྲུབ་པ་བཞིའི་གྲངས་དང་གོ་རིམ་ངེས་པ། སོ་སོའི་དོན་ལ་འཇུག་པ་དང་བཞི་ལས། དང་པོ་ནི་ཐམས་ཅད་མཁྱེན་པ་ཉིད་གསུམ་གྱི་ཡུལ་ལ་ཞེས་སོགས་ཏེ། ཤེར་འབྱུང་བློ་གྲོས་ཀྱིས་སྤྱིའི་སྒྲུབ་པ་དང་། ཁྱད་པར་གྱི་སྒྲུབ་པ་ཞེས་པའི་ཐ་སྙད་བྱས་ནས་དེ་གཉིས་ཀྱི་ངོ་བོ་དཀར་པོའི་ཆོས་རྗེས་སུ་སྒྲུབ་པའི་རང་བཞིན་དང་། ཕ་རོལ་ཏུ་ཕྱིན་པ་དྲུག་རྗེས་སུ་སྒྲུབ་པའི་རང་བཞིན་དུ་འདོད་དོ། །གསེར་གླིང་པས་ཐམས་ཅད་མཁྱེན་པ་ཉིད་གསུམ་གྱི་ཡུལ་ནི་འཕགས་པའི་བདེན་པ་བཞི་ཡིན་ལ་སྤྱིར་དགེ་བའི་ཆོས་ནི་དེ་ཐམས་ཅད་ལ་ཁྱབ་པའི་ཆོས་དབྱིངས་ཡིན་ཞིང་། དེའི་རྟེན་ཅན་ནི་དེ་ལ་གནས་པའི་སྒྲུབ་པའོ། །རྣམ་པ་ཀུན་མངོན་པར་རྫོགས་པར་རྟོགས་པ་ལ་སོགས་པ་བཞི་པོ་རེ་རེའི་བསྒོམ་པར་བྱ་བའི་རྟགས་ལ་སོགས་པ་ཕ་རོལ་ཏུ་ཕྱིན་པ་དྲུག་གི་རྟེན་ཅན་ཏེ། བརྟེན་པ་སྦྱིན་པ་ལ་སོགས་པའི་བྱ་བ་ཉམས་སུ་ལེན་པ་ནི་སྒྲུབ་པ་ཡིན་ནོ། །ཆོས་སྐུ་ནི་འབྲས་བུ་ཡིན་པས་སྒྲུབ་པ་མ་བཤད་དོ། །ཞེས་བཤད། ཆོས་བཤེས་ཀྱིས་མཁྱེན་གསུམ་ཐོས་བསམ་གྱིས་ཤེས་པའི་དོན་གོམས་པའི་མཐུ་ཐོབ་པར་བྱ་བའི་ཕྱིར་དུ་སྤྱིར་དགེ་བའི་ཆོས་སྒོ་དུ་མ་ནས་སྤྱོད་པའི་སེམས་པའི་བྱ་བ་དེ་མཁྱེན་གསུམ་དང་འབྲེལ་བའི་སྒྲུབ་པ་ཡིན་ལ། མཁྱེན་གསུམ་ཐོས་བསམ་གྱིས་ཤེས་པའི་དོན་ལ་ཡུན་རིང་དུ་འདྲིས་པའི་མཐུས་དགེ་བ་སྒྲུབ་པ་ཇི་སྙེད་པ་ཕ་རོལ་ཏུ་ཕྱིན་པ་དྲུག་ལྡན་དུ་བསྒྲུབ་ནུས་པའི་སེམས་པའི་བྱ་བ་དེ་སྦྱོར་བཞི་དང་འབྲེལ་བའི་སྒྲུབ་པ་ཡིན་ཞིང་། སྔ་མ་ལ་གོ་སྒྲུབ་སོགས་བཞི་དང་། ཕྱི་མ་ལ་ཕར་ཕྱིན་དྲུག་གི་སྒྲུབ་པ་དྲུག་ཡོད་པར་བཞེད་དོ། །གནད་ཀྱི་དོན་ནི་འདི་ཡིན་ཏེ། ཐེག་ཆེན་གྱི་ཚོགས་ལམ་ཕལ་པའི་གནས་སྐབས་ཀྱི་སྒྲུབ་པ་དེ་ཆོས་ཅན། ཁྱོད་ལ་ཡུལ་གྱི་སྒྲུབ་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་སྤྱིར་དཀར་པོའི་ཆོས་ཀྱི་རྟེན་ཅན་དུ་གྱུར་པའི་བྱ་བ་ཙམ་ཡིན་པའི་སྒོ་ནས་སྒྲུབ་པར་འཇོག་པ་ཡིན་གྱི་ཕར་ཕྱིན་དྲུག་ལྡན་གྱི་མངོན་རྟོགས་ཉམས་སུ་ལེན་ཚུལ་ལ་མཁས་པས་ཐོགས་པ་མེད་པ་དང་། མངོན་ཞེན་བཀག་པས་འཛིན་པ་མེད་པ་དེ་མ་ཡིན་པའི་ཕྱིར་རོ། །དེ་སྐབས་གང་དུ་བསྟན་ན་ཐམས་ཅད་མཁྱེན་པ་ཉིད་གསུམ་གྱི་ཡུལ་སྐྱེ་མེད་གསུམ་གཏན་ལ་དབབ་པའི་གནས་སྐབས་སུ་བསྟན་ཏོ། །རྣམ་རྫོགས་སྦྱོར་བའི་སྐབས་ནས་བསྟན་པའི་ཐར་པ་ཆ་མཐུན་རྒྱུད་ལ་སྐྱེས་པ་ཡན་ཆད་ཀྱི་སྒྲུབ་པ་དེ་ཆོས་ཅན། ཁྱོད་ལ་མངོན་པར་རྟོགས་པའི་སྒྲུབ་པ་ཞེས་བརྗོད་དེ། མངོན་པར་རྟོགས་པ་རེ་རེ་ཞིང་ཕ་རོལ་ཏུ་ཕྱིན་པ་དྲུག་པོ་དག་གི་ཉམས་སུ་ལེན་ཚུལ་ལ་མཁས་པས་ཐོགས་པ་མེད་པ་དང་མངོན་ཞེན་བཀག་པས་འཛིན་པ་མེད་པའི་སྒྲུབ་པ་ཡིན་པའི་ཕྱིར་རོ། །དེ་སྐབས་གང་དུ་བསྟན་ན་རྣམ་པ་ཀུན་མངོན་པར་རྫོགས་པར་རྟོགས་པ་ལ་སོགས་པ་མངོན་པར་རྟོགས་པ་བཞིའི་གནས་སྐབས་སུ་བསྟན་ཏོ། །ཉིར་སྣང་དུ། དེ་ལ་ཐམས་ཅད་མཁྱེན་པ་ཉིད་གསུམ་གྱི་ཡུལ་ལ་ནི་སྤྱིར་དཀར་པོའི་ཆོས་ཀྱི་རྟེན་ཅན་གྱི་བྱ་བ་སྒྲུབ་པ་ཡིན་ལ། རྣམ་པ་ཐམས་ཅད་མངོན་པར་རྫོགས་པར་རྟོགས་པ་ལ་སོགས་པ་མངོན་པར་རྟོགས་པ་བཞི་ལ་ནི་མངོན་པར་རྟོགས་པ་སོགས་ལ་ཕ་རོལ་ཏུ་ཕྱིན་པ་དྲུག་པོ་དག་གིས་ཐོགས་པ་མེད་པ་དང་འཛིན་པ་མེད་པ་གང་ཡིན་པ་དེ་ནི་སྒྲུབ་པ་ཡིན་ནོ་ཞེས་བྱ་བའི་དོན་ནོ། །ཞེས་གསུངས་སོ། །དེ་དག་གི་དོན་ཡང་མཁྱེན་པ་གསུམ་གྱི་སྐབས་ནི་བསྟན་པའི་སྒྲུབ་པ་དང་། སྦྱོར་བ་བཞིའི་སྐབས་ནས་བསྟན་པའི་སྒྲུབ་པ་ལ་བསྟན་ཚུལ་གྱི་ཁྱད་པར་འབྱེད་པ་ཡིན་གྱི་རང་གི་ངོ་བོའི་ཁྱད་པར་འབྱེད་པ་ནི་མ་ཡིན་ཏེ། མཁྱེན་གསུམ་གྱི་སྐབས་ནས་བསྟན་པའི་སྒྲུབ་པ་རྣམས་ཐོས་བསམ་གྱིས་གཏན་ལ་ཕབ་པའི་ལྡོག་པ་ནས་བསྟན་ལ། སྦྱོར་བཞིའི་སྐབས་ནས་བསྟན་པའི་སྒྲུབ་པ་རྣམས་ཐོས་བསམ་རབ་ཀྱི་མཐར་ཕྱིན་པའི་ཐར་པ་ཆ་མཐུན་ཁྱད་པར་ཅན་ཡན་ཆད་དུ་ཉམས་སུ་བླང་བར་བྱ་བའི་ལྡོག་པ་ནས་བསྟན་པའི་ཕྱིར་རོ། །འོ་ན་མཚན་མེད་རབ་ཏུ་སྦྱིན་ལ་སོགས་ཞེས་པའི་སྐབས་ནས་བསྟན་པའི་ཐར་པ་ཆ་མཐུན་དེ་ཐར་པ་ཆ་མཐུན་ཁྱད་པར་ཅན་དང་། དེ་མན་ཆད་ཀྱི་ཚོགས་ལམ་ཕལ་པར་འཇོག་པའི་ཁྱད་པར་གང་ལས་ཤེས་སྙམ་ན། ཉིར་སྣང་དུ། དེ་ལྟར་གདམས་ངག་དང་རྗེས་སུ་བསྟན་པའི་སྦྱོར་བ་དང་ལྡན་པའི་ཐོས་པ་དང་བསམ་པ་གོམས་པས་དད་པ་ལ་སོགས་པའི་མཚན་ཉིད། ཐར་པའི་ཆ་དང་མཐུན་པའི་དགེ་བའི་རྩ་བ་ཕུལ་དུ་ཕྱིན་པ་ཐོབ་པ་ལས། དྲོ་བར་གྱུར་པ་ཞེས་དང་། དེའི་དོན་འགྲེལ་ཆུང་ལས་ཐོས་པ་ལ་སོགས་པ་རབ་ཀྱི་མཐར་ཕྱིན་པ་ཐོབ་པ་ཐར་པའི་ཆ་དང་མཐུན་པ་དད་པ་ལ་སོགས་པ་དགེ་བའི་རྩ་བའི་མཚན་ཉིད་ཀྱི་འོག་ཏུ་ཞེས་དང་། ཆོས་བཤེས་ཀྱིས་སྐབས་དང་པོ་ནས་བསྟན་པའི་སེམས་བསྐྱེད་པ་དང་པོ་དང་། གཉིས་པ་དང་། གསུམ་པ་དང་པོར་བྱས་ཏེ་གདམས་ངག་ལ་བརྟེན་ནས་ཚོགས་ཀྱི་ལམ་ཕལ་པ་སྦྱངས་ནས་སྐབས་བཞི་པ་ནས་བསྟན་པའི་ཐར་པའི་ཆ་དང་མཐུན་པ་བསྐྱེད་དེ། སྐབས་དང་པོ་ནས་བསྟན་པའི་ངེས་པར་འབྱེད་པའི་ཆ་དང་མཐུན་པ་དང་ཞེས་གསུངས་པའི་ཕྱིར་རོ། །སྨོན་ལམ་རྣམ་པར་དག་པའི་གདུལ་བྱ་ལ་ཕན་ཐོགས་པ་སྲིད་དོ། །གཉིས་པ་ནི། དེ་ལྟར་ཇི་ལྟ་བ་བཞིན་དུ་སྦྱོར་བ་དང་ཞེས་སོགས་ཀྱིས་བསྟན་ཏེ། སྦྱོར་བ་དང་ཞེས་པས་གོ་སྒྲུབ་དང་། འཇུག་སྒྲུབ་དང་། ཚོགས་སྒྲུབ་དང་པོ་བཅོ་ལྔ་དང་གསུམ་རིམ་པ་ལྟར་མཐོང་ལམ་ལ་བརྒྱུད་ནས་སྦྱོར་བ་ཚོགས་ལམ་དང་། དངོས་སུ་སྦྱོར་བ་སྦྱོར་ལམ་དང་། མངོན་གསུམ་དུ་སྦྱོར་བ་ཆོས་མཆོག་ཆེན་པོ་ནས་ཡོད་པར་བསྟན། མཐོང་བ་དང་། སྒོམ་པ་དང་ཞེས་པས་ས་དང་པོའི་ཚོགས་སྒྲུབ་དང་། མཐོང་སྤང་གཉེན་པོའི་ཚོགས་སྒྲུབ་གཉིས་མཐོང་ལམ་དང་། ས་ལྷག་མ་རྣམས་ཀྱི་ཚོགས་སྒྲུབ་དང་། སྒོམ་སྤང་གཉེན་པོའི་ཚོགས་སྒྲུབ་གཉིས་སྒོམ་ལམ་ནས་ཡོད་པར་བསྟན། ཁྱད་པར་གྱི་ལམ་གྱི་ངོ་བོ་ཉིད་ཅེས་པས་ངེས་འབྱུང་སྒྲུབ་པ་སྒོམ་ལམ་གྱི་ཁྱད་པར་ལམ་ས་བརྒྱད་པ་ནས་ཡོད་པར་བསྟན་པའི་ཕྱིར་རོ། །དེ་ལྟར་ཐོགས་མེད་ཀྱི་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་། དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་པའི་ཚོགས་ཀྱི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། ས་གཉིས་པ་ལ་སོགས་པའི་རང་བཞིན་སྒོམ་པའི་ལམ་གྱི་ངོ་བོ་ཉིད་ཡིན་ཞིང་། གཉེན་པོའི་ཚོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་སོ། །འགྲེལ་ཆེན་དུ་ཡང་དེ་ཉིད་ཤེས་བྱེད་དུ་དྲངས་ཤིང་། ཨ་བྷ་ཡ་ཡང་བཞེད་དོ། །ཁྱུང་པོས་གོ་རིམ་ཇི་ལྟ་བ་བཞིན་དུ་ཞེས་པའི་དོན་ཡིན་པས། གོ་ཆ་སྦྱོར་ལམ། འཇུག་པ་མཐོང་ལམ། ཚོགས་ས་བདུན་པ་མན་ཆད་ཀྱི་སྒོམ་ལམ། ངེས་འབྱུང་སྒོམ་ལམ་ལ་བརྟེན་ནས་ས་བརྒྱད་པ་ནས་འཇོག་པ་ཡིན་ཞེས་དང་། ཕྱི་མ་དག་གཞུང་འདིས་སྒྲུབ་པ་བཞིའི་ས་མཚམས་བསྟན་ན་སྒྲུབ་པ་བཞི་དང་། ལམ་བཞི་རིམ་པ་ལྟར་སྦྱོར་དགོས་པར་འགྱུར་བས་ས་མཚམས་མ་བསྟན་ཞེས་སྨྲ་བ་རྣམས་ཀྱིས་ནི་ཐོགས་མེད་ཀྱི་ལུང་འགྲེལ་ཆེན་དུ་དྲངས་པའི་དོན་མ་རྟོགས་པའོ། །གསུམ་པ་ལ་སྤང་བྱ་སྤོང་བའི་དབང་དུ་བྱས་པ་དང་། བསྒྲུབ་བྱ་སྒྲུབ་པའི་དབང་དུ་བྱས་པ་གཉིས་ལས་དང་པོ་ནི་ཉིར་སྣང་དུ། གོ་ཆའི་སྒྲུབ་པ་ལ་སོགས་པ་འདི་རྣམས་ཀྱི་གོ་རིམ་གྱི་ཚུལ་འདི་ནི་རིགས་པ་ཉིད་ཡིན་ཏེ། གོ་བགོས་པ་ནི་འཇུག་གོ །ཞུགས་པ་ནི་དཔུང་གི་ཚོགས་སོ། །དཔུང་ཚོགས་གསོག་པ་ནི་མ་རྒྱལ་བ་ལས་རྒྱལ་བ་ཐོབ་པས་ངེས་པར་འབྱུང་བ་ཡིན་པའི་ཕྱིར་རོ། །ཞེས་གསུངས་ལ་འདིའི་དོན་ནི། བསྟན་བཅོས་འདིར་འབྱུང་བའི་བྱང་སེམས་ཀྱི་སྤང་བྱ་ནི་མཐོང་སྤང་དང་སྒོམ་སྤང་གཉིས་ཡིན་ལ། དེ་ལས་རྒྱལ་བར་བྱེད་པ་ལ་དམག་དཔོན་དཔའ་བོ་གཡུལ་དུ་འཇུག་པའི་དཔེ་དང་སྦྱར་ཏེ། དེ་ལ་དང་པོར་གོ་ཆ་བགོས་པ། དེ་ནས་དཔུང་ཚོགས་པའི་ཆེད་དུ་གཡུལ་དུ་འཇུག་པ། དེ་ནས་དཔུང་མ་ལུས་པ་གསོག་པ། དེ་ནས་མི་མཐུན་ཕྱོགས་དང་གཡུལ་བསྐྲད་དེ་དེ་ལས་རྒྱལ་བ་བཞི་ཡོད་པ་ལྟར། འདིར་ཡང་སྤང་བྱ་གཉིས་པོ་དེ་སྤོང་བའི་ཆེད་དུ་བསམ་པས་གོ་བགོས་པ་ནི་གོ་ཆ། སྦྱོར་བས་ཚུལ་བཞིན་དུ་ཞུགས་པ་ནི་འཇུག་པ། གཉེན་པོའི་དཔུང་ཚོགས་གསོག་སྟེ་མི་མཐུན་ཕྱོགས་དང་གཡུལ་བསྐྲད་པ་ནི་ཚོགས། མི་མཐུན་ཕྱོགས་ལས་ངེས་པར་འབྱུང་བ་ཐོབ་པ་ནི་ངེས་འབྱུང་གི་སྒྲུབ་པ་ཡིན་པས་གྲངས་དང་གོ་རིམ་གཉིས་ཆར་ངེས་པའོ། །འདིར་ཚོགས་སྒྲུབ་ཀྱི་མ་མཐའི་ས་མཚམས་ཆོས་མཆོག་ཆེན་པོ་ནས་བཞག་པ་དང་། ངེས་འབྱུང་སྒྲུབ་པ་ས་བརྒྱད་པ་ནས་བཞག་པའི་གནད་ཀྱང་འདི་ཉིད་ཡིན་ཏེ། ཀུན་བཏུས་སུ། སྤོང་བ་གཉེན་པོ་ལ་གཉིས་སུ་བྱས་པའི་སྦྱོར་བའི་ལམ་ནི་སྤང་བྱ་དངོས་སུ་སྤོང་བའི་བྱ་བ་བྱེད་པ་ཡིན་ལ། བར་ཆད་མེད་པའི་ལམ་ནི་གང་གི་འོག་ཏུ་རྣམ་པར་གྲོལ་བ་མངོན་དུ་བྱེད་པར་འགྱུར་བ་ལ་བཤད་པས་སྦྱོར་ལམ་ཆོས་མཆོག་ཆེན་པོ་དང་། སྡུག་བསྔལ་ལ་ཆོས་བཟོད་གཉིས་མཐོང་སྤང་དངོས་སུ་སྤོང་བའི་བྱ་བ་བྱེད་པར་འདྲ་ཡང་ཆོས་བཟོད་ཀྱི་སྐད་ཅིག་ཕྱིར་ལོགས་རྣམ་གྲོལ་ལམ་མངོན་དུ་བྱེད་པར་འགྱུར་བའི་ཕྱིར་དང་། ས་བརྒྱད་པ་ནས་སྒོམ་སྤང་རྟོག་པ་སླར་མི་སྐྱེ་བའི་ཚུལ་གྱིས་སྤངས་ཟིན་པས་དེ་ཡན་ཆད་ནི་རྟོག་པ་གཉིས་པོ་ལ་ལྟོས་པའི་ཁྱད་པར་གྱི་ལམ་ཡིན་ནོ། །འདི་ལ་དགོངས་ནས་སློབ་དཔོན་གྱི་འགྲེལ་པར་དག་པ་ས་གསུམ་ལ་ཁྱད་པར་གྱི་ལམ་ཞེས་མང་དུ་གསུངས་པ་ཡིན་ནོ། །གཉིས་པ་ནི་འགྲེལ་ཆུང་དུ་སྙིང་རྗེ་ལ་སོགས་པ་འདི་དག་གིས་ཡང་དག་པར་སྒྲུབ་པའི་ངོ་བོས་བྱང་ཆུབ་ཆེན་པོ་འཛིན་པར་བྱེད་པའི་ཕྱིར་ན། སྙིང་རྗེ་ཆེན་པོ་ལ་སོགས་པ་ནི་ཚོགས་ཡིན་པས་ཞེས་གསུངས། སངས་རྒྱས་སའི་སྐུ་གསུམ་ནི་བྱང་ཆུབ་ཆེན་པོ་ཡིན་ལ་དེ་སྒྲུབ་པར་བྱེད་པ་ལ་བསམ་པས་གོ་བགོས་པས་གོ་ཆ། སྦྱོར་བས་ཚུལ་བཞིན་དུ་ཞུགས་པས་འཇུག་པ། རྒྱུ་ཚོགས་ཀྱི་ནུས་པ་མཐུ་ཅན་ཚོགས་པ་ནི་ཚོགས་སྒྲུབ། བསྒྲུབ་བྱ་དེར་སྐད་ཅིག་ཀྱང་བར་ཆད་མེད་པའི་ཚུལ་གྱིས་ངེས་པར་འབྱུང་བ་ནི་ངེས་འབྱུང་གི་སྒྲུབ་པ་སྟེ། འདི་ལ་ཡང་ས་མཚམས་ནི་སྔ་མ་དང་འདྲ་ཞིང་འོ་ན་ཆོས་མཆོག་ཆེན་པོ་ནས་རྒྱུ་ཚོགས་ཀྱི་ནུས་པ་ཇི་ལྟར་ཚང་སྙམ་ན། རང་བཞིན་རྣམ་དག་གི་ཆོས་སྐུ་མངོན་སུམ་དུ་མཐོང་བ་ལ་ས་བཅུ་གཅིག་གི་མཉམ་གཞག་ལ་ཁྱད་པར་མེད་པས་དེ་དངོས་སུ་བསྐྱེད་པའི་ནུས་པ་ཚང་བ་ལ་དགོངས་སོ། །ས་བརྒྱད་པ་ནས་སྐད་ཅིག་ཀྱང་བར་མ་ཆད་པར་བསྒྲུབ་བྱ་དེར་ངེས་པར་འབྱུང་བའི་ཚུལ་ནི་མཚན་འཛིན་གྱིས་བར་མ་ཆད་པར་སངས་རྒྱས་ཀྱི་སར་ངེས་པར་འབྱུང་བའི་དོན་ནོ། །ལུགས་འདི་གཉིས་ཆར་ཡང་བསྟན་བཅོས་རྩ་བའི་དགོངས་པར་སོང་ཞིང་དོན་གྱི་གནད་ཀྱང་གཅིག་པར་སྣང་སྟེ། ཆེད་དུ་བྱ་བ་ཆེན་པོ་གསུམ་སྒྲུབ་པ་ལ་མཐོང་སྤང་དང་སྒོམ་སྤང་གཉིས་སྤོང་དགོས་པའི་ཕྱིར་རོ། །བཞི་པ་སོ་སོའི་དོན་ལ་བཞི་ལས་དང་པོ་གོ་སྒྲུབ་ནི། དེ་དག་སོ་སོར་སྦྱིན་ལ་སོགས། །ཞེས་ཏེ། འདི་ལ་སྡུད་བྱེད་དྲུག་ངོས་གཟུང་། བསྡུ་བྱ་དྲུག་ཚན་དྲུག་ཏུ་འགྱུར་བའི་ཚུལ། དེ་ཉིད་གོ་ཆར་འགྱུར་བའི་ཚུལ་དང་གསུམ་ལས། དང་པོ་ནི་སྦྱིན་པའི་གོ་སྒྲུབ་ནས་ཤེས་རབ་ཀྱི་གོ་སྒྲུབ་ཀྱི་བར་རྣམ་པ་དྲུག་གོ །གཉིས་པ་ནི། མཚན་བཞི་ཆོས་ཀྱི་སྦྱིན་པ་ལྟ་བུ་ལ་མཚོན་ན། ཆོས་ཀྱི་སྦྱིན་པ་དེ་ཉིད་སྦྱིན་པའི་སྦྱིན་པ། དེ་ཉིད་ཀྱི་ཚེ་ཉན་ཐོས་ལ་སོགས་པའི་ཡིད་ལ་བྱེད་པ་སྤོང་པ་སྦྱིན་པའི་ཚུལ་ཁྲིམས། དེ་ཉིད་ཀྱི་ཚེ་སྐྱེ་བོ་ཐམས་ཅད་ཀྱིས་མི་སྙན་པར་སྨྲ་བ་ཉིད་བཟོད་པ་ནི་བཟོད་པ། དེ་ཉིད་ཀྱི་ཚེ་འདུན་པ་བསྐྱེད་པ་ནི་སྦྱིན་པའི་བརྩོན་འགྲུས། དེ་ཉིད་ཀྱི་ཚེ་ཐེག་པ་གཞན་དང་མ་འདྲེས་པའི་སེམས་རྩེ་གཅིག་པ་ནི་སྦྱིན་པའི་བསམ་གཏན། དེ་ཉིད་ཀྱི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བ་ནི་སྦྱིན་པའི་ཤེས་རབ་སྟེ་སྦྱིན་པའི་གོ་ཆ་དྲུག་ཡིན་ལ། དེ་བཞིན་དུ་གཞན་གནོད་སྤོང་བའི་ཚུལ་ཁྲིམས་ལྟ་བུ་ལ་དྲུག་ཏུ་སྦྱར་བ་ནས་ཤེས་རབ་ཀྱི་བར་རེ་རེ་ལ་ཡང་དྲུག་དྲུག་སྦྱར་རོ། །ཉིར་སྣང་ལས། དང་པོ་གཉིས་འདྲ་བ་ལ་རྣམ་པ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ལ་བཟོད་པ་དང་། འདོད་པ་དང་ཉེ་བར་རྟོག་པ་ནི་བཟོད་པ་དང་། དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བ་ནི་བརྩོན་འགྲུས་དང་། ཐེག་པ་གཞན་དང་མ་འདྲེས་པའི་རྩེ་གཅིག་པ་ཉིད་ཀྱི་དགེ་རྩ་བྱང་ཆུབ་ཏུ་བསྔོ་བ་ནི་བསམ་གཏན་དང་། སྒྱུ་མའི་འདུ་ཤེས་ཉེ་བར་གནས་པས་སྦྱིན་པར་བྱ་བ་དང་། གཏོང་བ་པོ་དང་། ལེན་པ་པོ་མི་དམིགས་པ་ནི་ཤེས་རབ་ཏུ་བཤད་དོ། །འོ་ན་སྡུད་བྱེད་ཀྱི་སྦྱིན་པ་དང་། བསྡུ་བྱའི་སྦྱིན་པ་ལ་ཁྱད་པར་ཅི་ཡོད་སྙམ་ན། སྦྱིན་པ་ཙམ་དུ་འཇོག་པའི་ཆ་དེ་སྡུད་བྱེད་ཡིན་ཞིང་། མཚན་གཞི་ཆོས་ཀྱི་སྦྱིན་པ་ལྟ་བུ་དེ་བསྡུ་བྱ་ཡིན་ནོ། །གོ་སྒྲུབ་དྲུག་ཏུ་འཇོག་པའི་ཚུལ་ཇི་ལྟར་སྙམ་ན་འདི་ལ་ཕར་ཕྱིན་དྲུག་གི་སྦྱིན་པ་དྲུག་སྦྱིན་པར་ཆོས་མཐུན་ཞེས་འཇོག་པའི་ཚུལ་དང་སྦྱིན་པའི་བསྡུ་བྱ་དྲུག་སྦྱིན་པར་ཆོས་མཐུན་ཞེས་པའི་ཚུལ་གཉིས་སྣང་བ་ལས་ཕྱི་མ་འདི་ཉིད་འཐད་དེ། འདིར་སྡུད་བྱེད་ཀྱི་གོ་ཆ་དྲུག་པོ་དེ་ཉིད་གོ་སྒྲུབ་ཏུ་འཇོག་ཅིང་དེ་རེ་རེ་ལ་ཡང་དྲུག་དྲུག་ཏུ་ཕྱེ་བའི་ཚེ་སུམ་ཅུ་སོ་དྲུག་ཏུ་འགྱུར་བ་ནི་སྐབས་ཀྱི་དོན་ཡིན་པའི་ཕྱིར་རོ། །འདི་དག་གི་གྲངས་ངེས་པ་དང་། གོ་རིམ་ངེས་པ་ནི་ཕར་ཕྱིན་དྲུག་གི་སྐབས་ལྟར་ཤེས་པར་བྱའོ། །གསུམ་པ་ནི་འཕགས་པ་ལྟར་ན་ཕར་ཕྱིན་དྲུག་གི་ཉམས་ལེན་ལ་འཇུག་པར་བྱའོ་སྙམ་པའི་བསམ་པས་ཁྱབ་པར་བྱས་པ་ནི་གོ་བགོས་པའི་དོན་ཏེ། འཇིག་རྟེན་ན་གཡུལ་ལ་འཇུག་པའི་ཆེད་དུ་ཡ་ལད་ལ་སོགས་པ་བགོས་པ་ལ་གོ་བགོས་པར་བརྗོད་པ་བཞིན་ནོ། །སློབ་དཔོན་ལྟར་ན་བསྒོམ་བྱ་ཕ་རོལ་ཏུ་ཕྱིན་པ་དྲུག་གི་ཉམས་ལེན་ལ་སྒོམ་བྱེད་འཁོར་གསུམ་མི་དམིགས་པའི་བསམ་པས་གོ་བགོས་པ་སྟེ་འགྲེལ་པར་གོ་རིམ་བཞིན་དུ་སྦྱིན་པར་བྱ་བ་ལ་སོགས་པ་མི་དམིགས་པའི་གོ་བྱ་ཉིད་ཀྱི་བྱེད་པ་དང་ཞེས་གསུངས་སོ། །གཉིས་པ་ནི། བསམ་གཏན་གཟུགས་མེད་སྦྱིན་སོགས་དང་། །ཞེས་སོགས་ཏེ། འདི་ལ་རང་གི་ངོ་བོ་དང་། ཡུལ་དང་། གོ་རིམ་གསུམ་ལས། དང་པོ་ནི་འཇུག་ཡུལ་ཐེག་པ་ཆེན་པོ་ལ་ཚོགས་ཀྱི་ལམ་ལས་འདས་ནས་སྦྱོར་བའི་བརྩོན་འགྲུས་ཀྱིས་འཇུག་པ་དང་འཛེག་པའི་སྒྲུབ་པ་སྟེ་མདོར། ཚེ་དང་ལྡན་པ་གང་པོ་ཇི་ཙམ་གྱིས་ན་བྱང་སེམས་ཆེན་པོ་ཐེག་པ་ཆེན་པོ་ལ་འཇུག་པ་དང་། ཐེག་པ་ཆེན་པོ་ལ་འཛེག་པར་འགྱུར་བ་ཡིན་ཞེས་གསུངས་པས་སོ། །འཇུག་པ་དང་འཛེག་པ་གཉིས་དོན་གཅིག་ཏེ། ཉིར་སྣང་དུ། དེ་ཡང་དོན་གཅིག་པ་ཉིད་ཀྱིས་འཇུག་པ་ནི་འཛེག་པ་ཡིན་ལ་འཛེག་པ་འཇུག་པ་ཡིན་ནོ། །ཞེས་གསུངས་པའི་ཕྱིར། གཉིས་པ་ནི། ཐེག་པ་ཆེན་པོ་སྟེ། འདི་ལ་རྒྱུའི་ཐེག་པ་དང་། འབྲས་བུའི་ཐེག་པ་གཉིས་ལས། དང་པོ་ནི་བསམ་གཏན་གཟུགས་མེད་ནས་འཁོར་གསུམ་རྣམ་པར་དག་པའི་བར་རོ། །གཉིས་པ་ནི། ཆེད་དུ་བྱ་བ་ལ་སོགས་པ་ཕྱི་མ་གསུམ་མོ། །ཡང་ཚན་པ་གསུམ་དུ་ཡང་བསྡུ་སྟེ། རང་དོན་གྱི་དང་། གཞན་དོན་གྱི་དང་། གཉིས་དོན་གྱི་དབང་དུ་བྱས་པའོ། །དང་པོ་ནི་བསམ་གཏན་གཟུགས་མེད་སོགས་གསུམ་མོ། །གཉིས་པ་ནི་བྱམས་སོགས་གསུམ་མོ། །གསུམ་པ་ནི་ཆེད་དུ་བྱ་བ་སོགས་གསུམ་མོ། །གསུམ་པ་གོ་རིམ་ནི། དང་པོར་སེམས་བརྟན་པར་བྱ་བའི་དོན་དུ་མི་དམིགས་པའི་ཤེས་རབ་ཀྱིས་ཟིན་པའི་བསམ་གཏན་བཞི་དང་། གཟུགས་མེད་པའི་སྙོམས་པར་འཇུག་པ་བཞི་ལ་འཇུག་གོ །དེ་བསྒོམས་པས་སེམས་བརྟན་ཞིང་ལས་སུ་རུང་བ་ཐོབ་པ་ན། ཚོགས་གཉིས་གསོག་དགོས་པས་སྦྱིན་སོགས་དྲུག་ལ་འཇུག་གོ །ཚོགས་གཉིས་བསགས་པའི་སྟོབས་ཀྱིས་མཐོང་སྒོམ་གྱི་ལམ་སྐྱེ་བས་ལམ་ལ་འཇུག་གོ །འདིར་སློབ་དཔོན་གྱིས་མི་སློབ་པ་དང་ཁྱད་པར་གྱི་ལམ་ཡང་ཡང་གསུངས་པ་ནི་དག་པ་ས་ཡི་དབང་དུ་བྱས་པའོ། །དེ་གསུམ་གྱིས་རང་དོན་གྲུབ་པར་བྱས་ཟིན་ནས་དེའི་འོག་ཏུ་གཞན་དོན་གྱི་རྒྱུ་ཚད་མེད་བཞི་ལ་འཇུག་གོ །དེ་ནས་ཡང་གང་ཟག་དང་ཆོས་ཀྱི་བདག་ཏུ་དམིགས་པ་དང་བཅས་པས་གཞན་དོན་བྱེད་མི་ནུས་པས་གང་ཟག་དང་ཆོས་ཀྱི་བདག་ཏུ་དམིགས་པ་མེད་པའི་ཤེས་རབ་ལ་འཇུག་གོ །གང་ཟག་དང་ཆོས་ཀྱི་བདག་ཏུ་དམིགས་པ་མེད་ཀྱང་འཁོར་གསུམ་དུ་རྣམ་པར་རྟོག་པའི་བློ་མ་སྤངས་ན་གཞན་དོན་མི་ནུས་པས་དེ་ནས་འཁོར་གསུམ་མི་དམིགས་པ་ལ་འཇུག་གོ །འཁོར་གསུམ་དག་པའི་སྤྱོད་པ་དང་ལྡན་པ་དེས་རང་དོན་ཆེད་དུ་བྱ་བ་གསུམ་བསྒྲུབ་དགོས་པས་དེ་ནས་ཆེད་དུ་བྱ་བ་ལ་འཇུག་གོ །དེ་ཡང་གནས་སྐབས་ཀྱི་ཆེད་དུ་བྱ་བའི་དབང་དུ་བྱས་པ་ཡིན་ལ། དེ་ནས་རྣམ་མཁྱེན་གྱི་རྒྱུ་མངོན་པར་ཤེས་པ་དྲུག་ལ་འཇུག་གོ །རྣམ་མཁྱེན་གྱི་རྒྱུ་ཚོགས་པས་རྣམ་མཁྱེན་ཐོབ་པར་འགྱུར་བས་དེ་ནས་རྣམ་པ་ཐམས་ཅད་མཁྱེན་པ་ཉིད་ལ་འཇུག་གོ །གསུམ་པ་ཚོགས་སྒྲུབ་ནི། བརྩེ་དང་སྦྱིན་ལ་སོགས་པ་དྲུག །ཅེས་སོགས་ཏེ། འདི་ལ་ཚོགས་བཅུ་བདུན་སྤྱིར་བསྟན་པ་དང་། རྟོགས་དཀའ་བ་བྱེ་བྲག་ཏུ་བཤད་པ་གཉིས། དང་པོ་ལ། དང་པོར་སྒྲུབ་པའི་གོ་རིམ་དང་། ཚོགས་སུ་འགྱུར་ཚུལ་གཉིས་ལས། དང་པོ་ནི་ཚོགས་ཀྱི་སྒྲུབ་པ་ཡི། །རིམ་པ་ཡིན་པར་ཤེས་པར་བྱ། །ཞེས་གསུངས་ན། རིམ་པ་ཇི་ལྟར་ཡིན་སྙམ་ན། ཐོག་མར་སྡུག་བསྔལ་དང་བྲལ་འདོད་ཀྱི་བརྩེ་བ་མངོན་དུ་བྱས་ནས་དེའི་འོག་ཏུ་གཞན་དོན་སྦྱིན་པ་ལ་སོགས་པ་དྲུག་ལ་རིམ་པར་འཇུག་གོ །དེ་ནས་གཞན་དོན་ལ་རྩེ་གཅིག་པའི་ཞི་གནས་ལ་ཞུགས་ནས་སྟོང་ཉིད་རྟོགས་པའི་ལྷག་མཐོང་བསྐྱེད་དོ། །སྟོང་ཉིད་རྟོགས་པ་ཙམ་གྱིས་སངས་རྒྱས་མི་ཐོབ་པས་དེ་ནས་ཤེས་རབ་དང་སྙིང་རྗེ་ཟུང་དུ་འབྲེལ་བའི་ལམ་ལ་སློབ་བོ། །གཉིས་པོ་ལ་བསླབས་པས་གཞན་དོན་བྱེད་པའི་ཐབས་ལ་མཁས་པ་གང་ཡིན་པ་འཐོབ་བོ། །དེ་ལས་སྟོང་ཉིད་རྟོགས་པའི་ཡེ་ཤེས་སྐྱེ་ཞིང་ཡེ་ཤེས་ལས་བསོད་ནམས་ཀྱི་འབྲས་བུ་ཅན་གྱི་ཏིང་ངེ་འཛིན་སྐྱེའོ། །ཚོགས་གཉིས་གོམས་པར་བྱས་པས་ནི་དེ་ཁོ་ན་ཉིད་རྟོགས་པའི་དོན་དུ་ལམ་ལ་འཇུག་ཅིང་ལམ་ཐོབ་པ་ལས་མི་བརྗེད་པའི་གཟུངས་ཐོབ་པར་འགྱུར་རོ། །དེ་ལས་ས་བཅུ་ཐོབ་ནས་སྐབས་དེ་དག་ཏུ་གཉེན་པོ་ཡང་མངོན་དུ་བྱེད་དོ། །གཉིས་པ་ནི་འཕགས་པ་ལྟར་ན་ཚོགས་དང་པོ་བཅོ་ལྔ་ཆོས་མཆོག་ཆེན་པོའི་གནས་སྐབས་སུ་ཅིག་ཅར་དུ་ཚོགས་པས་མཐོང་སྤང་དང་གཡུལ་འགྱེད་པར་བྱེད་པའོ། །སའི་ཚོགས་ལ་ས་དང་པོའི་ཡོངས་སྦྱང་ནི་ས་དང་པོའི་རྗེས་ཐོབ་ཏུ་ཚོགས་པས་མཐོང་སྤང་གི་གནས་ངན་ལེན་སྦྱོང་བར་བྱེད་ཅིང་། ས་ལྷག་མ་རྣམས་ཀྱི་ཚོགས་ས་དེ་དང་དེའི་རྗེས་ཐོབ་ཏུ་ཚོགས་པས་སྔར་གྱི་བར་ཆད་མེད་ལམ་གྱིས་སྤངས་པའི་གནས་ངན་ལེན་སྦྱོང་བར་བྱེད་པའོ། །གཉེན་པོའི་ཚོགས་ལ་མཐོང་སྤང་གཉེན་པོའི་ཚོགས་སྒྲུབ་ནི་མཐོང་ལམ་བར་ཆད་མེད་ལམ་དང་། སྒོམ་སྤང་གཉེན་པོའི་ཚོགས་སྒྲུབ་ནི་སྒོམ་ལམ་བར་ཆད་མེད་ལམ་དུ་ཚོགས་པས་སྤང་བྱ་དེ་དང་དེ་སླར་མི་སྐྱེ་བའི་ཆོས་ཅན་དུ་བྱེད་པའོ། །སློབ་དཔོན་ལྟར་ན་ཚོགས་དང་པོ་བཅོ་ལྔ་སྦྱོར་ལམ་ཆོས་མཆོག་ཏུ་ཅིག་ཅར་ཚོགས་པས་རང་བཞིན་རྣམ་དག་གི་ཆོས་ཉིད་མངོན་སུམ་དུ་མཐོང་བའི་བྱང་ཆུབ་ཆེན་པོའི་རྒྱུའི་ནུས་པ་ཚོགས་པ་ཡིན་གྱི་སའི་ཚོགས་དང་གཉེན་པོའི་ཚོགས་སྔ་མ་རྣམས་ནི་གློ་བུར་གྱི་དྲི་མ་ཕྱོགས་རེ་དང་བྲལ་བའི་ཆོས་དབྱིངས་མངོན་སུམ་དུ་མཐོང་བའི་བྱང་ཆུབ་ཆེན་པོ་དང་། ཐ་མ་ནི་གློ་བུར་གྱི་དྲི་མ་མཐའ་དག་དང་བྲལ་བའི་བྱང་ཆུབ་ཆེན་པོའི་རྒྱུའི་ནུས་པ་ཚོགས་པའོ། །འོ་ན་ལམ་གྱི་ཚོགས་མཐོང་བ་ལ་སོགས་པའི་ལམ་དང་གཟུངས་ཀྱི་ཚོགས་ཚིག་ལ་སོགས་པའི་གཟུངས་ལ་བཞག་པས་ཆོས་མཆོག་ཆེན་པོར་ཚོགས་སོག་པ་འགལ་ཏེ། དེར་མཐོང་བ་ལ་སོགས་པའི་ལམ་མེད་པའི་ཕྱིར་དང་། བཟོད་པའམ་གཟུངས་མེད་པའི་ཕྱིར་རོ་ཞེ་ན། སྔོན་གྱི་མཁས་པ་དག་ལམ་དང་གཟུངས་ཀྱི་དངོས་རྒྱུ་ཚོགས་པ་དང་། ངོ་བོ་ཚོགས་པ་དང་གཉིས་ལས། སྔ་མའི་དབང་དུ་བྱས་པས་མི་འགལ་བར་བཞེད་དོ། །གཉིས་པ་རྟོགས་དཀའ་བ་བྱེ་བྲག་ཏུ་བཤད་པ་ལ་ཡེ་ཤེས་ཀྱི་ཚོགས་བྱེ་བྲག་ཏུ་བཤད་པ། སའི་ཚོགས་བྱེ་བྲག་ཏུ་བཤད་པ། གཉེན་པོའི་ཚོགས་བྱེ་བྲག་ཏུ་བཤད་པ་དང་གསུམ་ལས། དང་པོ་ལ་འཕགས་པས་ཇི་ལྟར་བཤད་པའི་ཚུལ། དེའི་དགོངས་པ་སློབ་དཔོན་གྱིས་ཇི་ལྟར་བཀྲལ་བའི་ཚུལ། དེའི་དགོངས་པ་སྔ་རབས་ཀྱི་མཁས་པ་རྣམས་ཀྱིས་བཀྲལ་བའི་ཚུལ། འཐད་པའི་ཕྱོགས་ངོས་གཟུང་བ་དང་བཞི་ལས། དང་པོ་ནི་ཡེ་ཤེས་ཀྱི་ཚོགས་ཉིད་ཀྱི་ཐད་དུ་མདོར་སྟོང་ཉིད་ཉི་ཤུ་གསུངས་པ་ལས། ཉིར་སྣང་དུ། སྟོང་གཞིའི་ཆོས་ཅན་ཉི་ཤུ་ངོས་བཟུང་ནས་དེ་དག་ཇི་ལྟར་སྟོང་པའི་ཚུལ་དང་བཅས་པ་བརྗོད་ཟིན་པའི་མཇུག་ཏུ་ཕྱོགས་འདིས་སྐབས་གོ་རིམ་མ་ཚང་བ་རྣམས་ཀྱི་སྐབས་ཀྱི་དོན་ལ་ཡང་བརྗོད་པར་བྱའོ། །དེ་དག་ནི་གཞན་དགག་པའི་སྒོ་ནས་སྟོང་ཉིད་འབའ་ཞིག་ཁོ་ན་བརྗོད་པར་བྱེད་པ་ཡིན་གྱི་འདི་དག་ལ་མངོན་པར་རྟོགས་པའི་གོ་རིམ་ནི་འགའ་ཡང་ཡོད་པ་མ་ཡིན་ནོ། །ཞེས་ཟེར་བ་དེ་དག་གི་ལྟར་ན་ནི་སྐབས་ཀྱི་དོན་ཁོ་ན་བརྗོད་པར་བྱ་བ་ཡིན་གྱི་གཙོ་བོར་བསྟན་བཅོས་ཀྱི་དོན་ནི་མ་ཚང་བར་འགྱུར་བ་དེས་ན་སྟོང་པ་ཉིད་ཀྱི་སྐབས་རྣམས་སོང་བ་དང་འགྲོ་བར་བྱ་བའི་གོ་རིམ་དང་བྲལ་བའི་ཕྱིར་ཆེད་དུ་བྱ་བ་ཉམས་པའི་ངོ་བོར་སྟོན་པ་ཡིན་ནོ། །ཞེས་གསུངས་སོ། །གཉིས་པ་ནི་འགྲེལ་ཆེན་དུ། སྟོང་ཉིད་དང་པོ་གསུམ་གྱི་སྐབས་སུ་སྟོང་པ་ཉིད་འདི་གསུམ་ནི་མོས་པས་སྤྱོད་པའི་ས་ལ་ཡིན་ནོ་ཞེས་དང་། བཞི་པའི་སྐབས་སུ་འདི་ནི་སྦྱོར་བའི་ལམ་ལའོ་ཞེས་དང་། ལྔ་པའི་སྐབས་སུ་འདི་ནི་ཀུན་ཏུ་འགྲོ་བའི་དོན་གྱིས་ན་དང་པོའོ་ཞེས་དང་། སྟོང་ཉིད་ཐ་མ་གསུམ་གྱི་སྐབས་སུ་སྟོང་པ་ཉིད་འདི་གསུམ་ནི་གོ་རིམ་བཞིན་དུ་ཉོན་མོངས་པའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཡིན་པའི་ཕྱིར་དང་། ཤེས་བྱའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཡིན་པའི་ཕྱིར་དང་། རང་བྱུང་ཉིད་ཡིན་པའི་དོན་གྱིས་ན་སངས་རྒྱས་ཀྱི་ས་ལ་ཡིན་པར་ཤེས་པར་བྱའོ། །ཞེས་གསུངས་སོ། །གསུམ་པ་ནི། དྭགས་པོ་དབང་ཕྱུག་སེང་གེ་ན་རེ། ཡེ་ཤེས་དང་པོ་གསུམ་ཚོགས་ལམ། བཞི་པ་སྦྱོར་ལམ། དེ་ནས་བདུན་ས་དང་པོ་ནས་བདུན་པའི་བར་ལ་རེ་རེ་དང་། དེ་ནས་དག་པ་ས་གསུམ་ལ་གཉིས་གཉིས་དང་། སྟོང་ཉིད་ཐ་མ་གསུམ་རྟོགས་པའི་ཡེ་ཤེས་སངས་རྒྱས་ཀྱི་ས་ཁོ་ནར་འཇོག་པར་བཞེད་དོ། །ཨར་ན་རེ། ཡེ་ཤེས་གཞན་རྣམས་ཀྱི་ས་མཚམས་དེ་ལྟར་ཡིན་ཀྱང་དང་པོ་གསུམ་ཚོགས་ལམ་དུ་འཇོག་པ་མི་འཐད་དེ། འགྲེལ་ཆེན་དུ། ཡེ་ཤེས་དང་པོ་གསུམ་མོས་སྤྱོད་ཀྱི་ས་ལ་བཞག་ཅིང་། མོས་སྤྱོད་ཀྱི་ས་ནི་སྦྱོར་ལམ་ལ་བཞེད་པའི་ཕྱིར་ཏེ། མཚན་ཉིད་ཀྱི་སྐབས་སུ་ཚོགས་དང་མོས་པས་སྤྱོད་པ་དང་ཞེས་དང་། རྟག་ཏུ་ངུའི་ལེའུའི་སྐབས་སུ་ཡང་ཚོགས་ཀྱི་ས་དང་། མོས་པས་སྤྱོད་པའི་ས་དང་། བྱང་ཆུབ་སེམས་དཔའི་ས་དང་། དེ་བཞིན་གཤེགས་པའི་ས་ཞེས་གསུངས་པའི་ཕྱིར། དེས་ན་སྟོང་ཉིད་དང་པོ་གསུམ་འཇོག་པའི་མོས་སྤྱོད་ཀྱི་ས་ནི་སྦྱོར་ལམ་བཞི་ཀ་དང་། བཞི་པ་འཇོག་པའི་སྦྱོར་ལམ་ནི་ཆོས་མཆོག་ཡིན་ཞེས་བཞེད་དོ། །ཁྱུང་གིས། དང་པོ་གསུམ་འཇོག་པའི་མོས་སྤྱོད་ཀྱི་ས་ནི་སྦྱོར་ལམ་དང་པོ་གསུམ་དང་། བཞི་པ་འཇོག་པའི་སྦྱོར་ལམ་ནི་ཆོས་མཆོག་ཡིན་པས་སྦྱོར་ལམ་བཞི་ལ་རིམ་པ་བཞིན་དུ་འཇོག་པར་བཞེད་དོ། །བཞི་པ་ནི་སློབ་དཔོན་གྱི་བཞེད་པ་སྟོང་ཉིད་དང་པོ་གསུམ་རྟོགས་པའི་ཡེ་ཤེས་ཚོགས་ལམ་ནས་འཇོག་སྟེ། སྟོང་ཉིད་ཉི་ཤུ་པོ་འདིས་ཚོགས་ལམ་ནས་སངས་རྒྱས་ཀྱི་སའི་བར་གྱི་མངོན་པར་རྟོགས་པའི་རིམ་པ་སྟོན་པའི་ཚུལ་ནི་སེམས་བསྐྱེད་ཉེར་གཉིས་ཀྱི་ས་མཚམས་དང་འདྲ་བར་བཞེད་པའི་ཕྱིར་རོ། །མ་མཐའ་སྦྱོར་ལམ་ནས་འཇོག་པ་ལ་ཤེས་བྱེད་མེད་དེ། སྤྱིར་ཚོགས་བཅུ་བདུན་གྱི་ནང་ཚན་དུ་གྱུར་པའི་ཡེ་ཤེས་ཀྱི་ཚོགས་ཚོགས་ལམ་ནས་ཡོད་པ་ལ་འགལ་བ་མེད་པའི་ཕྱིར་དང་། ཚོགས་སྒྲུབ་ཀྱི་ནང་ཚན་དུ་གྱུར་པའི་ཡེ་ཤེས་ཀྱི་ཚོགས་ནི་ཆོས་མཆོག་མན་ཆད་དུ་མེད་པའི་ཕྱིར་རོ། །མོས་སྤྱོད་ཀྱི་ས་ཞེས་པས་སྦྱོར་ལམ་དུ་མི་འགྲུབ་སྟེ། སྤྱིར་མོས་སྤྱོད་ཀྱི་ས་ནི་ཚོགས་སྦྱོར་གཉིས་ཀ་ལ་འཇུག་པས་ཚོགས་ལམ་གྱི་ཟླས་དྲངས་པའི་ཚེ་སྦྱོར་ལམ་དང་། སྦྱོར་ལམ་གྱི་ཟླས་དྲངས་པའི་ཚེ་ཚོགས་ལམ་ལ་འཇུག་པའི་ཕྱིར་རོ། །དེ་ལྟ་མིན་པར་མོས་སྤྱོད་ཀྱི་ས་ཞེས་པ་སྦྱོར་ལམ་བཞི་ཀ་དང་། སྦྱོར་བའི་ལམ་ཞེས་པ་ཆོས་མཆོག་ཡིན་ན་ཐ་སྙད་དེ་ཉིད་ཀྱིས་གསུང་རིགས་ཤིང་། སྦྱོར་ལམ་བཞི་ལ་རིམ་པ་བཞིན་དུ་འཇོག་ན། དང་པོ་གསུམ་དང་བཞི་པ་སོ་སོར་བྱེད་པ་ལ་དགོས་པ་མེད་དོ། །སློབ་དཔོན་གྱིས་ཡེ་ཤེས་ཉི་ཤུའི་ས་མཚམས་གྱི་རྗེས་སུ་སྔར་གྱི་ཉིར་སྣང་གི་ལུང་དེ་ཉིད་འགྲེལ་ཆེན་ནས་དྲངས་པའི་དེའི་དོན་ཡང་གནས་སྐབས་གཞན་དུ་ཚོགས་ལམ་ནས་སངས་རྒྱས་ཀྱི་སའི་བར་གྱི་ས་མཚམས་ངེས་པ་ཅན་དང་བྲལ་བ་རྣམས་ཀྱི་སྐབས་དོན་ཡང་འདིར་ཡེ་ཤེས་ཉི་ཤུའི་ས་མཚམས་ལ་བརྟེན་ནས་རྟོགས་པར་བྱའོ། །གང་དག་སྟོང་ཉིད་ཉི་ཤུ་སྟོན་པའི་མདོར་སྟོང་ཉིད་མེད་དགག་ཁོ་ན་བསྟན་ནས་ཡུལ་ཅན་ཡེ་ཤེས་མ་བསྟན་པར་འདོད་པ་དེ་དག་གི་ལྟར་ན། མདོ་དེས་ཡུལ་སྟོང་ཉིད་ཁོ་ན་བསྟན་ནས་ཡུལ་ཅན་མངོན་རྟོགས་ཀྱི་རིམ་པ་མ་བསྟན་པར་འགྱུར་རོ། །དེ་ཡང་འདོད་ན་སྐབས་དོན་སྟོང་ཉིད་ཁོ་ན་བརྗོད་བྱར་འགྱུར་གྱི་བསྟན་བཅོས་ཀྱི་དོན་མངོན་རྟོགས་ཀྱི་རིམ་པ་བརྗོད་བྱ་མ་ཡིན་པར་འགྱུར་རོ། །དེ་ཡང་འདོད་ན་སྟོང་ཉིད་ཉི་ཤུའི་བྱེ་བྲག་གིས་ཡུལ་ཅན་ཡེ་ཤེས་ལ་སྔར་བགྲོད་ཟིན་པ་དང་། ཕྱིས་བགྲོད་པར་བྱ་བའི་གོ་རིམ་དང་བྲལ་བས་ན་བསྟན་བཅོས་ཀྱི་ཆེད་དུ་བྱ་བ་ཉམས་པར་འགྱུར་རོ། །ཞེས་པའི་དོན་ཏོ། །གཉིས་པ་སའི་ཚོགས་བྱེ་བྲག་ཏུ་བཤད་པ་ལ། མཚན་ཉིད། དབྱེ་བ། སྒྲ་དོན། ཁྱད་པར་གྱི་ཆོས་དང་བཞི་ལས། དང་པོ་ལ་ས་ཙམ་གྱི་མཚན་ཉིད་ནི། རྟོགས་པ་ཕྱི་མ་དང་ཡོན་ཏན་གྱི་རྟེན་བྱེད་པའོ། །སྐབས་དོན་བྱང་སེམས་ཀྱི་སའི་མཚན་ཉིད་ནི་སྟོང་ཉིད་མངོན་སུམ་དུ་རྟོགས་པའི་ཤེས་རབ་དང་། སྙིང་རྗེ་ཆེན་པོ་ཟུང་དུ་འབྲེལ་བའི་སྒོ་ནས་རྟོགས་པ་ཕྱི་མ་དང་ཡོན་ཏན་གྱི་རྟེན་བྱེད་པའི་ཉམས་ལེན་ཁྱད་པར་ཅན་ཏེ། འཇུག་འགྲེལ་དུ། བྱང་ཆུབ་སེམས་དཔའ་རྣམས་ཀྱི་ཟག་པ་མེད་པའི་ཡེ་ཤེས་སྙིང་རྗེ་ལ་སོགས་པས་ཟིན་པ་ཉིད་ཆར་རྣམ་པར་ཕྱེ་བ་ནས་ཞེས་བྱ་བའི་མིང་ཐོབ་སྟེ། ཡོན་ཏན་གྱི་འབྱུང་གནས་སུ་འགྱུར་བའི་ཕྱིར་རོ། །ཞེས་གསུངས་སོ། །གཉིས་པ་ནི། སྤྱིར་ས་ཙམ་ལ་དབྱེ་ན། ཉན་ཐོས་ཀྱི་ས། རང་རྒྱལ་གྱི་ས། ཐེག་ཆེན་གྱི་ས་དང་གསུམ་ལས། དང་པོ་ལ་དཀར་པོ་རྣམ་པར་མཐོང་བའི་ས། རིགས་ཀྱི་ས། བརྒྱད་པའི་ས། མཐོང་བའི་ས། བསྲབས་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། ཉན་ཐོས་ཀྱི་ས་དང་བརྒྱད་དོ། །གཉིས་པ་ལ་རབ་ཏུ་དབྱེ་བ་བཤད་པ་མི་སྣང་ཞིང་། གསུམ་པ་ལ་མོས་སྤྱོད་ཀྱི་ས། བྱང་ཆུབ་སེམས་དཔའི་ས། སངས་རྒྱས་ཀྱི་ས་དང་གསུམ་ལས། བྱང་སེམས་ཀྱི་ས་ལ་ཡང་ས་དང་པོ་རབ་ཏུ་དགའ་བ་ནས་ས་བཅུ་པ་ཆོས་ཀྱི་སྤྲིན་གྱི་བར་བཅུར་ཡོད་དེ། རིན་ཆེན་ཕྲེང་བར། ཇི་ལྟར་ཉན་ཐོས་ཐེག་པ་ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་གསུངས་སོ། །གསུམ་པ་ལ། སྤྱིའི་སྒྲ་དོན་དང་། སོ་སོའི་སྒྲ་དོན་གཉིས་ལས། དང་པོ་ནི་རྒྱན་དུ། འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཅེས་སོ། །གཉིས་པ་ནི་དེ་ཉིད་དུ། བྱང་ཆུབ་ལ་ནི་ཉེ་བ་དང་། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་བསྲེགས་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །རང་གི་སེམས་ཀྱང་བསྲུངས་པའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་དང་། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད། །སོ་སོ་ཡང་དག་རིགས་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སོ། །བཞི་པ་ལ་བཅུ་གཉིས་ཏེ། མཉམ་གཞག་ཏུ་ཆོས་དབྱིངས་རྟོགས་པའི་ཁྱད་པར། རྗེས་ཐོབ་ཏུ་ངེས་ཤེས་དྲངས་ཚུལ་གྱི་ཁྱད་པར། ཡང་དག་པར་འགྲུབ་པའི་དུས་ཀྱི་ཁྱད་པར། གང་ཟག་རྣམ་པར་དག་པའི་ཁྱད་པར། བསླབ་པ་གསུམ་སྦྱོང་བའི་ཁྱད་པར། ཟག་མེད་ཀྱི་ཕུང་པོ་ལྔ་སྦྱང་བའི་ཁྱད་པར། ཕར་ཕྱིན་ལྷག་པའི་ཁྱད་པར། རྣམ་སྨིན་གྱི་སྐྱེ་བ་འཛིན་པའི་ཁྱད་པར། སྤང་བྱ་སྤོང་བའི་ཁྱད་པར། ཡོངས་སྦྱོང་གི་ཆོས་ཀྱི་ཁྱད་པར། ཡོན་ཏན་གྱི་གྲངས་ཀྱི་ཁྱད་པར། འཕོ་ཚུལ་གྱི་ཁྱད་པར་རོ། །དང་པོ་ནི་ས་བཅུ་པོ་རྣམས་ལ། རང་བཞིན་རྣམ་དག་གི་ཆོས་དབྱིངས་རྟོགས་ཚུལ་ལ་ནི་ཁྱད་པར་མེད་དེ། ཆོས་དབྱིངས་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་ཕྱིར་རོ། །གློ་བུར་དྲི་བྲལ་གྱི་ཆོས་དབྱིངས་མཐོང་ཚུལ་ལ་ནི་ཁྱད་པར་ཡོད་དེ། ས་ཕྱི་མ་རྣམས་སུ་སྔ་མ་རྣམས་ཀྱི་ངོས་སྐལ་གྱི་དྲི་མ་ལས་གྲོལ་བའི་བྲལ་བ་གསར་མཐོང་རེ་རེ་ཡོད་པའི་ཕྱིར་ཏེ། མདོར། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་མཆོག་གིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་སོ། །གཉིས་པ་ནི་མཉམ་གཞག་གི་ནུས་པས་རྗེས་ཐོབ་ཀྱི་གནས་སྐབས་སུ་ས་དང་པོར་ཆོས་དབྱིངས་ཀུན་ཏུ་འགྲོ་བའི་དོན་དུ་རྟོགས། གཉིས་པ་ལ་མཆོག་གི་དོན་དུ་རྟོགས། གསུམ་པ་ལ་རྒྱུ་མཐུན་པའི་དོན་གྱི་མཆོག་ཏུ་རྟོགས། བཞི་པ་ལ་ཡོངས་སུ་འཛིན་པ་མེད་པའི་དོན་དུ་རྟོགས། ལྔ་པ་ལ་རྒྱུད་ཐ་དད་པ་མེད་པའི་དོན་དུ་རྟོགས། དྲུག་པ་ལ་ཀུན་ནས་ཉོན་མོངས་པ་དང་རྣམ་པར་རྟོག་པ་མེད་པའི་དོན་དུ་རྟོགས། བདུན་པ་ལ་ཐ་དད་མེད་པའི་དོན་དུ་རྟོགས། བརྒྱད་པ་ལ་འབྲི་བ་དང་འཕེལ་བ་མེད་པའི་དོན་དུ་རྟོགས་ཤིང་། དབང་བཞི་ལས་ཆོས་དབྱིངས་ནི་རྣམ་པར་མི་རྟོག་པའི་ཡེ་ཤེས་ལ་དབང་བའི་གནས་དང་། ཞིང་དག་པ་ལ་དབང་བའི་གནས་སུ་རྟོགས། དགུ་པ་ལ་ཆོས་དབྱིངས་ཡེ་ཤེས་ལ་དབང་བའི་གནས་སུ་རྟོགས། བཅུ་པ་ལ་ཆོས་དབྱིངས་ལས་ལ་དབང་བའི་གནས་སུ་རྟོགས་ཏེ། དབུས་མཐར། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་དོན་དང་། །ཉོན་མོངས་རྣམ་རྟོག་མིན་དོན་དང་། །ཐ་དད་མེད་པའི་དོན་ཉིད་དང་། །འབྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་དོན། །ཞེས་སོ། །གསུམ་པ་ནི་བསྐལ་པ་གྲངས་མེད་པ་དང་པོས་ས་དང་པོ་དང་། གཉིས་པས་ས་བརྒྱད་པ་དང་། གསུམ་པས་ས་བཅུ་པར་འགྲུབ་སྟེ། བྱང་སར་བསྐལ་པ་ཆེན་པོ་གྲངས་མེད་པ་དང་པོས་ནི་མོས་པས་སྤྱོད་པ་ལ་གནས་པ་ལས་ཡང་དག་པར་འདས་ནས་རབ་ཏུ་དགའ་བ་ལ་གནས་པ་ཐོབ་སྟེ། དེ་རྟག་ཏུ་འབད་པས་ཐོབ་ཀྱི་མི་འབད་པས་ནི་མ་ཡིན་ནོ། །བསྐལ་པ་ཆེན་པོ་གྲངས་མེད་པ་གཉིས་པས་ནི་རབ་ཏུ་དགའ་བ་ལ་གནས་པ་ནས་མཚན་མ་མེད་པ་ལ་གནས་པ་རྩོལ་བ་དང་བཅས་པའི་བར་ལས་འདས་ཏེ། མཚན་མ་མེད་པ་ལ་གནས་པ་ལྷུན་གྱིས་གྲུབ་པ་ཐོབ་པར་འགྱུར་རོ། །དེ་ནི་ངེས་པ་ཁོ་ན་ཏེ། འདི་ལྟར་བསམ་པ་དག་པའི་བྱང་ཆུབ་སེམས་དཔའ་དེ་ནི་ངེས་པར་འབད་པའི་ཕྱིར་རོ། །བསྐལ་པ་ཆེན་པོ་གྲངས་མེད་པ་གསུམ་པས་ནི་མཚན་མ་མེད་པ་ལྷུན་གྱིས་གྲུབ་པ་དང་། སོ་སོ་ཡང་དག་པར་རིག་པ་ལ་གནས་པ་ལས་ཡང་དག་པར་འདས་ནས་བྱང་ཆུབ་སེམས་དཔའི་གནས་པ་མཆོག་ཐོབ་པར་འགྱུར་རོ། །ཞེས་གསུངས་སོ། །བཞི་པ་ནི་ས་དང་པོ་ལ་ལྟ་བ་རྣམ་པར་དག་པའི་གང་ཟག་དང་། གཉིས་པ་ལ་ཚུལ་ཁྲིམས་རྣམ་པར་དག་པའི་དང་། གསུམ་པ་ལ་མཉམ་པར་བཞག་པའི་དང་། བཞི་པ་ལ་ཆོས་ལ་ང་རྒྱལ་སྤངས་པའི་དང་། ལྔ་པ་ལ་རྒྱུད་ཐ་དད་པར་ང་རྒྱལ་མེད་པའི་དང་། དྲུག་པ་ལ་ཀུན་བྱང་ཐ་དད་པར་ང་རྒྱལ་མེད་པའི་དང་། བདུན་པ་ལ་སྐད་ཅིག་གཅིག་པ་དང་ལྡན་པའི་བློ་ཐོབ་པའི་དང་། བརྒྱད་པ་ལ་བཏང་སྙོམས་པ་དང་སངས་རྒྱས་ཀྱི་ཞིང་རྣམ་པར་སྦྱོང་བའི་དང་། དགུ་པ་ལ་སེམས་ཅན་སྨིན་པར་བྱེད་པ་ལ་མཁས་པའི་དང་། བཅུ་པ་ལ་མངོན་པར་ཤེས་པའི་མཐུ་ཆེན་པོ་དང་། ཏིང་ངེ་འཛིན་དང་གཟུངས་ཀྱི་ལུས་ཡོངས་སུ་རྫོགས་པ་དང་། སྤྲུལ་པའི་ལུས་ངེས་པར་སྟོན་པ་ལ་མཁས་པ་དང་། སངས་རྒྱས་རྣམས་ཀྱི་ཆོས་ཀྱི་རྒྱལ་ཚབ་ཏུ་མངོན་པར་དབང་བསྐུར་བའི་གང་ཟག་ཏུ་རྣམ་པར་གཞག་པ་ཡིན་ཏེ། རྒྱན་དུ། བྱང་ཆུབ་སེམས་དཔའ་ལྟ་བ་རྣམ་དག་པ། །ཚུལ་ཁྲིམས་ཤིན་ཏུ་རྣམ་དག་མཉམ་པར་གཞག །ཆོས་ལ་ང་སྤངས་རྒྱུད་དང་ཀུན་ཉོན་མོངས། །རྣམ་པར་བྱང་བ་ཐ་དད་ང་རྒྱལ་མེད། །སྐད་ཅིག་གཅིག་བློ་ཐོབ་པ་བཏང་སྙོམས་པ། །ཞིང་རྣམས་སྦྱོང་བ་སེམས་ཅན་སྨིན་བྱེད་པར། །མཁས་པ་མཐུ་ཆེན་ལུས་ཡོངས་རྫོགས་པ་དང་། །ངེས་པར་སྟོན་ལ་མཁས་པ་དབང་བསྐུར་ཡིན། །ཞེས་སོ། །ལྔ་པ་ནི། ས་དང་པོ་ནི་བསླབ་པ་གསུམ་གྱི་རྟེན་དང་། གཉིས་པར་ཚུལ་ཁྲིམས་ཀྱི་བསླབ་པ་དང་། གསུམ་པར་སེམས་ཀྱི་བསླབ་པ་དང་། བཞི་པར་བྱང་ཕྱོགས་སོ་བདུན་གྱིས་བསྒོམ་པས་བསྡུས་པའི་ཤེས་རབ་དང་། ལྔ་པར་བདེན་བཞིའི་ཆོས་ཀྱི་དེ་ཁོ་ན་ཉིད་རྟོགས་པའི་ཤེས་རབ་དང་། དྲུག་པར་རྟེན་ཅིང་འབྲེལ་བར་འབྱུང་བ་ཤེས་པའི་ཤེས་རབ་ལ་སློབ་ཅིང་། ས་ལྷག་མ་བཞི་ལ་བསླབ་པ་གསུམ་གྱི་འབྲས་བུ་ཡང་དག་པར་བསྟན་པ་སྟེ། རྒྱན་དུ། ཆོས་ཉིད་རབ་ཏུ་རྟོགས་ནས་འདིར། །ལྷག་པའི་ཚུལ་ཁྲིམས་ལྷག་སེམས་དང་། །ལྷག་པའི་ཤེས་རབ་ལ་རྗེས་སློབ། །ཤེས་རབ་སྤྱོད་ཡུལ་གཉིས་ཡིན་ཏེ། །ཆོས་ཀྱི་དེ་ཉིད་དང་དེ་ནི། །མི་ཤེས་ཤེས་སོགས་འཇུག་པ་ཉིད། །ཤེས་རབ་སྤྱོད་ཡུལ་དེ་ལྟ་བས། །དེ་ས་གཉིས་ལ་རྣམ་པར་གནས། །བསླབ་པ་རྣམས་དང་སྒོམ་པ་ཡི། །འབྲས་བུ་གཞན་ནི་རྣམ་པ་བཞི། །མཚན་མེད་འདུ་བྱེད་དང་བཅས་པར། །གནས་པ་འབྲས་བུ་དང་པོ་ཡིན། །དེ་ཉིད་མངོན་འདུ་བྱེད་མེད་དང་། །ཞིང་ནི་རྣམ་པར་དག་པ་དག །འབྲས་བུ་གཉིས་པར་འདོད་པ་ཡིན། །སེམས་ཅན་སྨིན་པ་གྲུབ་ཉིད་དང་། །ཏིང་ངེ་འཛིན་དང་གཟུངས་རྣམས་ནི། །འགྲུབ་པ་འབྲས་བུ་དམ་པ་ཡིན། །འབྲས་བུ་རྣམ་པ་འདི་བཞི་ནི། །ས་བཞི་པོ་ལ་ཡང་དག་བརྟེན། །ཞེས་སོ། །དྲུག་པ་ནི། ས་དང་པོ་ནི་ཟག་མེད་ཀྱི་ཕུང་པོ་ལྔའི་རྟེན་ཡིན་ལ། ས་གཉིས་པར་ཚུལ་ཁྲིམས་ཀྱི་ཕུང་པོ་སྦྱོང་། ས་གསུམ་པར་ཏིང་ངེ་འཛིན་གྱི་ཕུང་པོ་སྦྱོང་། བཞི་པ་ནས་དྲུག་པའི་བར་དུ་ཤེས་རབ་ཀྱི་ཕུང་པོ་སྦྱོང་། བདུན་པ་ཡན་ཆད་དུ་རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྦྱོང་སྟེ། རྒྱན་དུ། ཆོས་ཉིད་རབ་ཏུ་རྟོགས་ནས་འདིར། །ཚུལ་ཁྲིམས་ཀྱི་ནི་ཕུང་པོ་སྦྱོང་། །དེ་ཡི་འོག་ཏུ་ཏིང་འཛིན་དང་། །ཤེས་རབ་ཕུང་པོ་རྣམ་པར་སྦྱོང་། །དེ་ལས་གཞན་པ་དག་ལས་ནི། །སྒྲིབ་རྣམ་བཞི་དང་ཐོགས་པ་ཡི། །སྒྲིབ་པ་ལས་ཀྱང་རྣམ་གྲོལ་དང་། །གྲོལ་བའི་ཡེ་ཤེས་རྣམ་པར་སྦྱོང་། །ཞེས་སོ། །བདུན་པ་ནི། ས་དང་པོར་སྦྱིན་པའི་ཕར་ཕྱིན་ལྷག་པར་སྤྱོད་པ་ནས་ས་བཅུ་པར་ཡེ་ཤེས་ཀྱི་ཕར་ཕྱིན་ལ་ལྷག་པར་སྤྱོད་པ་སྟེ། དབུས་མཐར། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་ལམ་སྟོབས་དང་ཡེ་ཤེས་ཏེ། །འདི་དག་ཕ་རོལ་ཕྱིན་བཅུའོ། །ཁྱད་པར་ཅན་དང་ཁྱད་མེད་ནི། །ས་བཅུ་རྣམས་སུ་ཤེས་པར་བྱ། །ཞེས་སོ། །བརྒྱད་པ་ནི། མདོ་སྡེ་ས་བཅུ་པར། ས་དང་པོ་ལ་གནས་པ་ནི་ཕལ་ཆེར་ཛམྦཱུའི་གླིང་གི་དབང་ཕྱུག་སེར་སྣའི་དྲི་མ་དང་བྲལ་བ་སེམས་ཅན་རྣམས་ཀྱི་སེར་སྣའི་དྲི་མ་སེལ་བའི་བདག་པོར་འགྱུར་རོ། །གཉིས་པ་ལ་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ་ཤས་ཆེར་སེམས་ཅན་རྣམས་འཆལ་ཚུལ་དང་མི་དགེ་བ་ལས་བཟློག་ནས་དགེ་བ་ལ་འཛུད་དོ། །གསུམ་པ་ལ་བརྒྱ་བྱིན་དུ་གྱུར་ཏེ་སེམས་ཅན་གྱི་འདོད་པའི་འདོད་ཆགས་བཟློག་པ་ལ་མཁས་སོ། །བཞི་པ་ལ་འཐབ་བྲལ་གྱི་ལྷའི་རྒྱལ་པོ་རབ་འཐབ་བྲལ་དུ་གྱུར་ཏེ། སེམས་ཅན་རྣམས་ཀྱི་འཇིག་ཚོགས་ལ་ལྟ་བ་བཟློག་པ་ལ་མཁས་སོ། །ལྔ་པར་དགའ་ལྡན་གྱི་ལྷའི་རྒྱལ་པོ་ཡོངས་སུ་དགའ་ལྡན་དུ་གྱུར་ཏེ་མུ་སྟེགས་ཐམས་ཅད་བཟློག་པ་ལ་མཁས་སོ། །དྲུག་པ་ལ་འཕྲུལ་དགའི་ལྷའི་རྒྱལ་པོ་རབ་འཕྲུལ་དུ་གྱུར་ཏེ་སེམས་ཅན་རྣམས་ཀྱི་མངོན་པའི་ང་རྒྱལ་བཟློག་པ་ལ་མཁས་སོ། །བདུན་པ་ལ་གཞན་འཕྲུལ་དབང་བྱེད་ཀྱི་བདག་པོ་ལྷའི་རྒྱལ་པོ་དབང་བསྒྱུར་དུ་གྱུར་ཏེ་ཉན་རང་གི་མངོན་པར་རྟོགས་པ་སྒྲུབ་པ་རྣམས་ལ་མཁས་སོ། །བརྒྱད་པ་ལ་སྟོང་གི་བདག་པོ་ཚངས་པ་ཆེན་པོར་གྱུར་ཏེ་ཐེག་པ་གསུམ་གྱི་ཕ་རོལ་ཏུ་ཕྱིན་པ་སྟོན་པ་ལ་མཁས་ཤིང་འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན་ནོ། །དགུ་པ་ལ་སྟོང་གསུམ་གྱི་བདག་པོ་ཚངས་པ་ཆེན་པོར་གྱུར་ཏེ་ཐེག་པ་གསུམ་གྱི་ཕ་རོལ་ཏུ་ཕྱིན་པ་སྟོན་པ་ལ་བྱང་ཞིང་སེམས་ཅན་གྱི་བསམ་པ་ཡོངས་སུ་དྲིས་པ་བསྟན་པ་རྣམས་ཀྱིས་མི་འཕྲོགས་པ་ཡིན་ནོ། །བཅུ་པ་ལ་འོག་མིན་གྱི་ལྷའི་རྒྱལ་པོ་དབང་ཕྱུག་ཆེན་པོར་གྱུར་ཏེ་ཐེག་པ་གསུམ་གྱི་ཕར་ཕྱིན་སྟོན་པ་ལ་མཁས་ཤིང་ཆོས་ཀྱི་དབྱིངས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་སོ། །ཞེས་གསུངས་སོ། །དེ་དག་གི་དོན་ཡང་ཕར་ཕྱིན་ལྷག་པའི་ཁྱད་པར་དང་། སོ་སོའི་སྒྲ་དོན་རྣམས་ཕྱོགས་གཅིག་ཏུ་དྲིལ་ནས་རིན་ཆེན་ཕྲེང་བར། དེ་དག་དང་པོར་རབ་དགའ་བ། །བྱང་ཆུབ་སེམས་དཔའ་དགའ་བྱེད་ཕྱིར། །ཞེས་སོགས་ཚིགས་བཅད་ཉི་ཤུ་གསུངས་སོ། །དགུ་པ་ནི་དབུས་མཐར། ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ཀྱི། །གཉེན་པོ་དག་ནི་ས་ཡིན་ནོ། །ཞེས་ཉོན་མོངས་པ་ཅན་མ་ཡིན་པའི་སྒྲིབ་པ་བཅུ་རིམ་པ་བཞིན་སྤོང་བར་བཤད་ཅིང་། ཀུན་བཏུས་སུ། ས་བཅུའི་ཤེས་སྒྲིབ་བཅུ་དངོས་སུ་སྤོང་བའི་ཞར་ལ་ཉོན་སྒྲིབ་བཅུ་ཡང་སྤོང་བས། སངས་རྒྱས་ཀྱི་སར་སྒྲིབ་གཉིས་ཅིག་ཅར་དུ་སྤངས་པར་བཤད་དོ། །འདི་དང་རྒྱུད་བླ་གཉིས་ཀྱི་ཐུན་མོང་མ་ཡིན་པའི་ལུགས་ནི་ས་དང་པོའི་བར་ཆད་མེད་ལམ་གྱིས་ཐེག་པ་འོག་མའི་སྤང་བྱའི་རིགས་མ་ལུས་པ་དང་། ཐེག་ཆེན་གྱི་མཐོང་སྤང་ཅིག་ཅར་དུ་སྤོང་ཞིང་། ཐེག་ཆེན་གྱི་སྒོམ་སྤང་ནི་ཤེས་སྒྲིབ་སྒོམ་སྤང་ཡིན་པས་དེ་ལ་ཆེན་པོའི་ཆེན་པོ་ལ་སོགས་པ་རྣམ་པ་དགུར་ཕྱེ་ནས་ས་གཉིས་པའི་བར་ཆད་མེད་ལམ་ནས་བཅུ་པའི་བར་ཆད་མེད་ལམ་གྱི་བར་གྱིས་རིམ་པ་བཞིན་དུ་སྤོང་བར་བཞེད་དེ། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་སོ། །དེ་ཡང་སྒོམ་སྤང་གཉེན་པོའི་ཚོགས་སྒྲུབ་དང་། སྒོམ་ལམ་རྩེ་སྦྱོར་གྱི་སྐབས་སུ་བཤད་པ་ལྟར་གྱི་སྒོམ་སྤང་གཟུང་འཛིན་གྱི་རྣམ་པར་རྟོག་པ་བཞི་པོ་ཉིད་འདོད་པ་ནས་སྲིད་རྩེའི་བར་གྱི་ས་དགུ་པོ་རེ་རེས་བསྡུས་པའི་རྣམ་པ་དགུ་དགུ་ཡོད་པ་ལས། ཆེན་པོའི་ཆེན་པོ་དགུ་ས་གཉིས་པའི་བར་ཆད་མེད་ལམ་གྱིས་ཅིག་ཅར་དུ་སྤོང་བ་ནས་ཆུང་ངུའི་ཆུང་ངུ་དགུ་ས་བཅུ་པའི་བར་ཆད་མེད་ལམ་གྱིས་ཅིག་ཅར་དུ་སྤོང་བའི་བར་དུ་ཤེས་པར་བྱའོ། །བཅུ་པ་ནི། ས་དང་པོ་ལ་ཡོངས་སྦྱོང་བཅུ། གཉིས་པ་ལ་བརྒྱད། གསུམ་པ་ལ་ལྔ། བཞི་པ་ལ་བཅུ། ལྔ་པ་ལ་བཅུ། དྲུག་པ་ལ་བཅུ་གཉིས། བདུན་པ་ལ་ཉི་ཤུ། བརྒྱད་པ་ལ་བརྒྱད། དགུ་པ་ལ་བཅུ་གཉིས་ཏེ། ཀུན་བསྡོམས་པས་དགུ་བཅུ་གོ་ལྔའོ། །ས་བཅུ་པ་ལ་ཡོངས་སྦྱོང་ལོགས་སུ་མི་བགྲང་བ་ནི་སྤྲོ་བ་བསྐྱེད་པའི་ཆེད་དུ་འབྲས་བུའི་སྒོ་ནས་བསྟན་པའི་སྐབས་ཡིན་པའི་ཕྱིར་རོ། །མེད་པ་ནི་མ་ཡིན་ཏེ། ཉིར་སྣང་དུ། སའི་ཚོགས་ནི་བྱང་ཆུབ་སེམས་དཔའི་ས་བཅུ་པོ་རྣམས་སོ་སོར་བདག་ཉིད་ཀྱི་ཡོངས་སུ་སྦྱོང་བའི་དབྱེ་བས་རྣམ་པ་བཅུར་འགྱུར་རོ། །ཞེས་གསུངས་པའི་ཕྱིར་རོ། །འོ་ན་ས་བཅུ་པའི་ཡོངས་སྦྱོང་གང་སྙམ་ན་ས་དགུ་པའི་ཡོངས་སྦྱོང་དེ་ཉིད་ས་དགུ་པ་ཡོངས་སུ་མ་རྫོགས་པ་རྫོགས་པར་བྱ་བའི་ཆེད་དུ་སྦྱོང་བ་ནི་ས་དགུ་པའི་ཡོངས་སྦྱོང་ཡིན་ལ་རྫོགས་ནས་ས་བཅུ་པའི་རྗེས་ཐོབ་ཏུ་འགྱུར་བ་ནི་ས་བཅུ་པའི་ཡོངས་སྦྱོང་ཡིན་ནོ། །ཡང་ཡོངས་སྦྱོང་དང་པོ་ནི་སྨོན་ལམ་གྱི་ཕར་ཕྱིན་ལྷག་པ་ཡིན་པས་ས་བརྒྱད་པ་དང་ཐུན་མོང་བ་ཡིན་ལ། གཉིས་པ་ནི་སོ་སོ་ཡང་དག་རིག་པ་རྗེས་སུ་མཐུན་པ་ཐོབ་པའི་དོན་ཡིན་པས་ས་དགུ་པའི་ཡོངས་སྦྱོང་གཙོ་ཆེ་ལ་མངལ་དུ་འཇུག་པ་མཆོག་མན་ཆད་ནི་གཞན་ངོར་ཕྲིན་ལས་བྱེད་ཚུལ་སངས་རྒྱས་དང་མཉམ་པའི་དོན་ཡིན་པས་ས་བཅུ་པའི་ཡོངས་སྦྱོང་གཙོ་ཆེའོ། །ཡོངས་སྦྱོང་འདི་རྣམས་ས་མ་ཐོབ་པ་སྦྱོང་ངམ་ཐོབ་ཟིན་སྦྱོང་ཞེ་ན། འདི་ལ་ཁ་ཅིག་མ་ཐོབ་པ་ཐོབ་པར་བྱེད་པའི་ཆེད་དུ་སྦྱོང་ཞེས་འདོད་པ་ནི་མི་འཐད་དེ། མདོར། རབ་འབྱོར་ས་དང་པོ་ལ་གནས་པའི་བྱང་སེམས་ཆེན་པོས་ཡོངས་སུ་སྦྱོང་བ་བཅུ་པོ་འདི་དག་བྱ་སྟེ། ཞེས་དང་། ས་བཅུ་པའི་མདོར། ཀྱེ་རྒྱལ་བའི་སྲས་དག་བྱང་སེམས་ས་དང་པོ་ལ་གནས་པས་ཆོས་བཅུ་ཡིད་ལ་བྱ་སྟེ། ཞེས་གསུངས་པའི་ཕྱིར་རོ། །འོ་ན་ས་ནི་དང་པོ་འཐོབ་འགྱུར་ཏེ། །ཞེས་པ་དང་འགལ་ལོ་ཞེ་ན། དེ་ནི་ས་དང་པོ་ཡོངས་སུ་རྫོགས་པར་འཐོབ་པར་འགྱུར་ཞེས་པའི་དོན་ཏེ། ས་དང་པོའི་རྗེས་ཐོབ་ཏུ་བཅུ་པོ་སྦྱངས་པས་བཅུ་པོ་རྫོགས་པར་མ་ཐོབ་ཀྱི་བར་དུ་ས་དང་པོ་ཡིན་ལ། ཡོངས་སུ་རྫོགས་ནས་ས་གཉིས་པར་འཕོས་པ་ཡིན་པའི་ཕྱིར་རོ། །དེ་ལྟར་ན་འགྲེལ་ཆེན་དུ། ཡོངས་སྦྱོང་མ་རྫོགས་པ་དེ་སྲིད་དུ་ས་དེ་ཡིན་ལ། ཡོངས་སྦྱོང་རྫོགས་ནས་ས་གཞན་ཡིན་པར་གསུངས་པའི་དོན་ཡང་ལེགས་པར་བཤད་པ་ཡིན་ནོ། །བཅུ་གཅིག་པ་ནི་མདོ་སྡེ་ས་བཅུ་པར། ཀྱེ་རྒྱལ་བའི་སྲས་འདི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་རབ་ཏུ་དགའ་བ་ཐོབ་མ་ཐག་ཏུ་འཇིགས་པ་གང་དག་ཡིན་པ་འདི་ལྟ་སྟེ། འཚོ་བ་མེད་པའི་འཇིགས་པའམ། ཚིགས་སུ་བཅད་པ་མེད་པའི་འཇིགས་པའམ། འཆི་བས་འཇིགས་པའམ། ངན་འགྲོས་འཇིགས་པའམ། འཁོར་གྱི་ནང་དུ་བག་ཚ་བས་འཇིགས་པ་དེ་དག་ཐམས་ཅད་དེ་ལ་མེད་པ་ཡིན་ནོ་ཞེས་སོ། །གཞན་ཡང་ས་བཅུ་ལ་གོ་རིམ་བཞིན་དུ་ཕར་ཕྱིན་བཅུ་རྫོགས་པ་དང་། ཡང་ས་དང་པོ་ལ་ཡོན་ཏན་བརྒྱ་ཕྲག་བཅུ་གཉིས་ཡོད་དེ། ས་བཅུ་པར། འདོད་ན་བརྩོན་འགྲུས་རྩོམ་པ་རྣམ་པ་འདི་ལྟ་བུས་ཁྱིམ་དང་། ཆུང་མ་དང་། ལོངས་སྤྱོད་ཐམས་ཅད་སྤངས་ཏེ་རབ་ཏུ་བྱུང་བ་དང་། རབ་ཏུ་བྱུང་ནས་ཀྱང་སྐད་ཅིག་ཐང་ཅིག་ཡུད་ཙམ་ཅིག་ལ་ཏིང་ངེ་འཛིན་བརྒྱ་ཐོབ་ཅིང་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གི་བྱིན་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང་། ཞིང་བརྒྱར་འགྲོ་བ་དང་། འཇིག་རྟེན་གྱི་ཁམས་བརྒྱ་འོད་ཀྱིས་ཁྱབ་པར་བྱས་ནས་གཞན་དག་ལ་སྟོན་པ་དང་། སྤྲུལ་པ་བརྒྱས་སེམས་ཅན་བརྒྱ་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱར་གནས་པར་བྱེད་པ་དང་། སྔོན་དང་ཕྱི་མའི་མཐའི་བསྐལ་པ་བརྒྱར་ཡེ་ཤེས་མཐོང་བ་འཇུག་པ་དང་། ཆོས་ཀྱི་སྒོ་བརྒྱ་རབ་ཏུ་རྣམ་པར་འབྱེད་པ་དང་། ལུས་བརྒྱ་སྤྲུལ་པ་དང་། ལུས་རེ་རེ་ཡང་འཁོར་བྱང་ཆུབ་སེམས་དཔའ་བརྒྱ་བརྒྱ་དང་ལྡན་པར་ཀུན་ཏུ་སྟོན་པའོ་ཞེས་གསུངས་སོ། །ས་གཉིས་པ་ལ་ཡོན་ཏན་དེ་དག་སྟོང་ཕྲག་དང་། གསུམ་པ་ལ་འབུམ་དང་། བཞི་པ་ལ་བྱེ་བ་དང་། ལྔ་པ་ལ་བྱེ་བ་ཕྲག་སྟོང་དང་། དྲུག་པ་ལ་བྱེ་བ་ཕྲག་འབུམ་དང་། བདུན་པ་ལ་བྱེ་བ་ཕྲག་ཁྲིག་འབུམ་དང་། བརྒྱད་པ་ལ་སྟོང་གསུམ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དང་། དགུ་པ་ལ་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྔུལ་ཕྲ་རབ་ཀྱི་རྡུལ་སྙེད་དང་། བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་བརྒྱ་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐོབ་པར་གསུངས་སོ། །དེ་དག་གི་དོན་དབུ་མ་འཇུག་པར། དེ་ཚེ་འདིས་ནི་སངས་རྒྱས་བརྒྱ་མཐོང་ཞིང་། །ཞེས་སོགས་ཚིག་བཅད་དགུར་གསུངས་སོ། །བཅུ་གཉིས་པ་ནི་བདག་མེད་མངོན་སུམ་དུ་རྟོགས་པའི་ཡེ་ཤེས་ཐོབ་ནས་ཇི་སྲིད་དུ་ལྟུང་བའི་འཁྲུལ་པ་ཆ་ཕྲ་བ་རྣམས་ལ་ཤེས་བཞིན་དུ་གནས་པར་བྱེད་མི་ནུས་པ་དེ་སྲིད་དུ་ས་དང་པོ་དང་ནུས་པ་ནི་གཉིས་པ་ཡིན་ནོ། །དེ་ནས་ཇི་སྲིད་དུ་འཇིག་རྟེན་པའི་ཏིང་ངེ་འཛིན་མཐའ་དག་ལ་སྙོམས་པར་འཇུག་པ་དང་། ཐོས་པའི་དོན་ཀུན་འཛིན་མི་ནུས་པ་དེ་སྲིད་དུ་གཉིས་པ་དང་། ནུས་པ་ན་གསུམ་པའོ། །དེ་ནས་ཇི་སྲིད་དུ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱིས་ལན་མང་དུ་གནས་པར་བྱེད་མི་ནུས་ཤིང་སྙོམས་པར་འཇུག་པ་ལ་སྲེད་པ་དང་། ཆོས་ལ་སྲེད་པ་ལས་སེམས་ལྷག་པར་བཏང་སྙོམས་སུ་འཇོག་མི་ནུས་པ་དེ་སྲིད་དུ་གསུམ་པ་དང་། ནུས་པ་ན་བཞི་པ་ཡིན་ནོ། །དེ་ནས་ཇི་སྲིད་དུ་བདེན་པ་བཞི་བསྒོམ་པ་ན་འཁོར་བ་དང་མྱ་ངན་ལས་འདས་པ་དག་ལ་གཅིག་ཏུ་ཕྱོགས་པ་དང་། མངོན་པར་ཕྱོགས་པའི་སེམས་བཟློག་སྟེ་ཐབས་ཀྱིས་ཟིན་པའི་བྱང་ཆུབ་ཀྱི་ཕྱོགས་བསྒོམ་པར་མི་ནུས་པ་དེ་སྲིད་དུ་བཞི་པ་དང་། ནུས་པ་ན་ལྔ་པ་ཡིན་ནོ། །དེ་ནས་ཇི་སྲིད་དུ་འཁོར་བས་སྐྱོ་བ་དང་། མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་ལྔ་པ་དང་། དེ་ནུས་པ་ན་དྲུག་པ་ཡིན་ནོ། །དེ་ནས་ཇི་སྲིད་དུ་གནས་སྐབས་ཐམས་ཅད་ལ་མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་དྲུག་པ་དང་། ནུས་པ་ན་བདུན་པ་ཡིན་ནོ། །དེ་ནས་ཇི་སྲིད་དུ་ལྷུན་གྱིས་གྲུབ་པ་མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་བདུན་པ་དང་། ནུས་པ་ན་བརྒྱད་པ་ཡིན་ནོ། །དེ་ནས་སོ་སོ་ཡང་དག་པར་རིགས་པ་བཞིས་ཆོས་སྟོན་པ་ལ་དབང་དུ་མ་གྱུར་པ་དེ་སྲིད་དུ་བརྒྱད་པ་དང་། གྱུར་པ་ན་དགུ་པ་ཡིན་ནོ། །དེ་ནས་ཆོས་ཀྱི་སྐུ་ཡོངས་སུ་རྫོགས་པ་ཐོབ་པ་དང་ཡང་དག་པར་རིག་པར་མི་ནུས་པ་དེ་སྲིད་དུ་དགུ་པ་དང་། ནུས་པ་ན་བཅུ་པ་ཡིན་ནོ། །དེ་ནས་སྤྲུལ་པ་ལ་སོགས་པའི་དབང་ཐོབ་ཀྱང་ཤེས་བྱ་ཐམས་ཅད་ལ་ཆགས་པ་དང་། ཐོགས་པ་མེད་པའི་ཡེ་ཤེས་སྐྱེད་པར་བྱེད་མི་ནུས་པ་དེ་སྲིད་དུ་བཅུ་པ་དང་ནུས་པ་དེའི་ཚེ་སངས་རྒྱས་ཀྱི་ས་ཡིན་ནོ་ཞེས་པ་ནི་དགོངས་འགྲེལ་གྱི་ལུང་ལས་གསུངས་པའི་དོན་ནོ། །བློ་གྲོས་མི་ཟད་པས་ཞུས་པའི་མདོར། ས་དང་པོ་ལ་རྨི་ལམ་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཕྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ་། །གཉིས་པ་ལ་སྟོང་གསུམ་ལག་མཐིལ་ལྟར་མཉམ་པ་ལ་རིན་པོ་ཆེ་བྱེ་བ་ཕྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པ་མཐོང་ངོ་། །གསུམ་པ་ལ་བདག་ཉིད་དཔའ་ཞིང་གོ་ཆ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བར་མཐོང་ངོ་། །བཞི་པ་ལ་ཕྱོགས་བཞི་ནས་རླུང་གི་དཀྱིལ་འཁོར་བཞི་ལས་ཐམས་ཅད་དང་ལྡན་པའི་དཀྱིལ་འཁོར་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་སུམ་དུ་འཐོར་བ་མཐོང་ངོ་། །ལྔ་པ་ལ་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱི་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པར་མཐོང་ངོ་། །དྲུག་པ་ལ་རྫིང་ཐེམ་སྐས་བཞི་དང་ལྡན་པ་གསེར་གྱི་བྱེ་མ་གདལ་བ་རྙོག་པ་མེད་ཅིང་དྭངས་ལ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་ལ་མེ་ཏོག་ཨུཏྤ་ལ་དང་། ཀུ་མུད་དང་། པདྨ་དཀར་པོས་བརྒྱན་པ་མཐོང་སྟེ། དེ་ལ་བདག་ཉིད་རྩེ་དགའ་ཡོངས་སུ་སྤྱོད་པར་མཐོང་ངོ་། །བདུན་པ་ལ་ངོས་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ་དེ་ལས་བདག་ཉིད་མ་རྨས་མ་ཉམས་པར་སླར་ལྡོག་པ་མཐོང་ངོ་། །བརྒྱད་པ་ལ་ཕྲག་པ་གཉིས་ན་རི་དྭགས་ཀྱི་རྒྱལ་པོ་སེང་གེ་རལ་པ་ཅན་ཅོད་པན་ཐོགས་པ་གཅན་གཟན་ཕྲ་མོ་ཐམས་ཅད་སྐྲག་པར་བྱེད་ཅིང་འདུག་པ་མཐོང་ངོ་། །དགུ་པ་ལ་འཁོར་ལོས་སྒྱུར་བའི་རྒྱལ་པོ་མཐོང་སྟེ། སྐྱེ་བོ་བྱེ་བ་ཕྲག་ཁྲིག་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་མགོའི་སྟེང་ན་རིན་པོ་ཆེ་སྣ་ཚོགས་ཀྱིས་སྤྲས་པའི་གདུགས་འཛིན་པ་མཐོང་ངོ་། །བཅུ་པ་ལ་དེ་བཞིན་གཤེགས་པའི་སྐུ་མཐོང་སྟེ་སྐུ་མདོག་གསེར་ལྟ་བུ་འོད་འདོམ་གང་བ་ཚངས་པ་བྱེ་བ་ཕྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་ཆོས་སྟོན་པ་མཐོང་ངོ་ཞེས་གསུང་ཞིང་། དེ་བཞིན་དུ་དཀོན་མཆོག་བརྩེགས་པ་དང་། གསེར་འོད་དམ་པ་ནས་ཀྱང་ས་བཅུ་པོ་ལ་རྨི་ལམ་གྱི་རྟགས་མང་དུ་གསུངས་པ་རྣམས་ལ་སྔོན་གྱི་མཁས་པ་གཞོན་ནུ་ཚུལ་ཁྲིམས་ལ་སོགས་པ་རྣམས་ནི། བྱང་འཕགས་ལ་གཉིད་མེད་པས་རྨི་ལམ་མི་སྲིད་པ་དང་། ཉན་ཐོས་བདེན་པ་མཐོང་བ་ཡང་ཐེ་ཚོམ་ལས་བརྒལ། སོམ་ཉི་ལས་བརྒལ་བར་གསུངས་ན། བྱང་སེམས་ཆོས་ཐམས་ཅད་ཀྱི་སྟོང་པ་ཉིད་མངོན་སུམ་དུ་མཐོང་བ་ནི་ས་ཐོབ་པའི་རྟགས་རྨི་ལམ་ལ་ལྟོས་པ་མི་སྲིད་པས། ས་མ་ཐོབ་པའི་ཟླ་བོ་གཞན་གྱིས་གཞན་ལ་དཔོག་པའི་རྟགས་ཡིན་ནོ་ཞེས་གསུངས་སོ། །མཁན་ཆེན་པ་ནི། ས་ཐོབ་ནས་མི་དགེ་བའི་གཉིད་མེད་ཀྱང་དགེ་བའི་གཉིད་ཡོད་པས་རྨི་ལམ་གྱི་རྟགས་ཡོད་པ་མི་འགལ་ཞེས་བཞེད་ཀྱང་། དཔལ་ལྡན་ས་སྐྱ་པཎྜི་ཏ་ནི། རྨི་ལམ་གྱི་རྟགས་དེ་དག་མོས་སྤྱོད་ཀྱི་ས་ལ་སྦྱར་ན་རུང་མོད་ཀྱི། འཕགས་པའི་ས་ལ་དངོས་སུ་སྦྱར་ན་མདོ་རྒྱུད་ཀུན་དང་འགལ་ཞེས་གསུངས་པ་འདི་ཉིད་དོན་ལ་གནས་ཏེ། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་ཁམས་གོང་དུ་སྐྱེས་པའི་སོ་སྐྱེ་ཙམ་ལ་ཡང་གཉིད་མེད་པར་བཤད་ན། ཆོས་དབྱིངས་ཀུན་འགྲོའི་ཚུལ་གྱིས་རྟོགས་པའི་སྟོབས་ཀྱིས་མཐར་གནས་ཀྱི་སྙོམས་འཇུག་དགུ་ཐོབ་པའི་བྱང་འཕགས་རྣམས་ལ་ལྟ་སྨོས་ཀྱང་ཅི་དགོས་པའི་ཕྱིར་དང་། དཀོན་མཆོག་བརྩེགས་པར། ས་དང་པོ་ཐོབ་པའི་རྨི་ལམ་གྱི་རྟགས་བྱུང་བའི་བྱང་སེམས་ཀྱི་ལས་ཀྱི་སྒྲིབ་པ་སྦྱང་བའི་ཆེད་དུ་ཕུང་པོ་གསུམ་པའི་མདོ་འདོན་པར་གསུང་ཞིང་། བྱང་སེམས་འཕགས་པས་ལས་ཉོན་མ་ལུས་པ་སྤངས་ཟིན་པས་ལས་སྒྲིབ་སྦྱང་བའི་ཆེད་དུ་ཕུང་པོ་གསུམ་པའི་མདོ་འདོན་པ་ཡང་འགལ་བའི་ཕྱིར། འོ་ན་ཅི་ལྟར་སྙམ་ན། རྩེ་སྦྱོར་ཐོབ་ནས་ཐེག་པ་གཞན་གྱིས་བར་མ་ཆོད་པར་ས་བཅུ་འཐོབ་པར་ངེས་པས་ན་དྲོད་ཀྱི་རྩེ་སྦྱོར་གྱི་སྐབས་སུ་རྨི་ལམ་གྱི་རྟགས་བཅུ་ཆར་འབྱུང་ཞིང་དེ་དག་ཐེག་པ་གཞན་གྱིས་བར་མ་ཆོད་པར་ས་དེ་དང་དེ་དག་འཐོབ་པར་འགྱུར་བའི་རྟགས་དེ་རྟགས་ཀྱིས་མཚོན་པའི་རྩེ་སྦྱོར་གྱི་སྐབས་སུ་རྨི་ལམ་གྱི་རྟགས་དྲུག་བཤད་པ་དང་དོན་གཅིག་པར་མངོན་ནོ། །ད་ནི་གཞུང་གི་དོན་ལ་འཇུག་པར་བྱ་སྟེ། འདི་ལ་ས་དགུ་ཡོངས་སྦྱོང་གི་སྒོ་ནས་བསྟན་པ་དང་། ས་བཅུ་པ་འབྲས་བུའི་སྒོ་ནས་བསྟན་པ་གཉིས། དང་པོ་ལ་དགུ་ལས་ས་དང་པོ་ཡོངས་སྦྱོང་ནི། ཡོངས་སུ་སྦྱོང་བ་རྣམ་བཅུ་ཡི། །ཞེས་སོགས་ཏེ། ཚིག་རྐང་དང་པོ་གཉིས་ནི་གྲངས་འདོན་པ་བསྒྱུར་ཏེ་འོག་མ་རྣམས་ཀྱི་ཡང་གསལ་བྱེད་དུ་སྦྱར་བར་བྱའོ། །འདི་ལ་སྦྱོང་བྱེད་ཆོས་ཀྱི་སྒོ་ནས་དབྱེ་བ་དང་། སྦྱོང་ཚུལ་ཇི་ལྟ་བུས་འཐོབ་པ་གཉིས་ལས། དང་པོ་ལ་དབྱིག་གཉེན་གྱི་འགྲེལ་པར་བསམ་པ་དང་། སྦྱོར་བ་དང་བསྔོ་བ་ཕུན་སུམ་ཚོགས་པ་གསུམ་ལས། དང་པོ་ལ་རང་དོན་གྱི་བསམ་པ་ནི་བསམ་དང་ཞེས་དང་། གཉིས་དོན་གྱི་བསམ་པ་ནི་ཕན་པའི་དངོས་ཉིད་དང་ཞེས་དང་། གཞན་དོན་གྱི་བསམ་པ་ནི་སེམས་ཅན་རྣམས་ལ་སེམས་མཉམ་ཉིད་ཅེས་པའོ། །སྦྱོར་བ་ཕུན་སུམ་ཚོགས་པ་ལ་ཟང་ཟིང་གིས་སྡུད་པའི་སྦྱོར་བ་དང་། ཆོས་ཀྱིས་སྡུད་པའི་སྦྱོར་བ་དང་། བདག་ཉིད་ཀུན་ཏུ་བསྲུང་བའི་སྦྱོར་བ་གསུམ་ལས། དང་པོ་ནི་གཏོང་བ་དང་། གཉིས་པ་ལ་རང་སྡུད་པ་ནི་བཤེས་གཉེན་བསྟེན་པ་དང་། དམ་ཆོས་དམིགས་པ་ཚོལ་བ་གཉིས་དང་། གཞན་སྡུད་པ་ནི་འོག་གི་ཆོས་སྟོན་པ་དང་། གསུམ་པ་ནི་རྟག་ཏུ་ངེས་འབྱུང་སེམས་ཉིད་དང་། བདེན་པའི་ཚིག་སྨྲས་པའོ། །བསྔོ་བ་ཕུན་སུམ་ཚོགས་པ་ནི་སངས་རྒྱས་བཀུར་འདོད་དགའ་བའོ། །སྦྱོར་ཚུལ་ཇི་ལྟ་བུས་འཐོབ་པ་ནི་འདི་དག་རང་བཞིན་མི་དམིགས་པས། ཡོངས་སུ་སྦྱོང་བ་ཤེས་པར་བྱ་ཅེས་པ་སྟེ་འོག་མ་ཐམས་ཅད་ཀྱི་གསལ་བྱེད་དུ་སྦྱར་རོ། །དེ་ཡང་འདིར་ས་བཅུའི་མཉམ་གཞག་གི་སྒྲིབ་པ་སྤོང་ཚུལ་ལ་གཉེན་པོའི་ཚོགས་སྒྲུབ་དང་། མཉམ་གཞག་ཏུ་ཐོབ་པའི་ས་དེ་ཉིད་ཡོན་ཏན་ཡོངས་སུ་རྫོགས་པའི་ཆེད་དུ་རྗེས་ཐོབ་ཏུ་སྦྱོང་བ་ལ་སའི་ཚོགས་སུ་འཇོག་པའི་སྐབས་ཡིན་པས་རྗེས་ཐོབ་ཀྱི་གནས་སྐབས་སུ་མཚན་འཛིན་དང་བཅས་པའི་ཉམས་ལེན་འབྱུང་སྲིད་པས་དེ་དགག་པའི་ཆེད་དུ་རང་བཞིན་མི་དམིགས་པས་སྦྱོང་བར་གསུངས་པ་སྟེ་མོས་བསྔོ་རྗེས་སུ་ཡི་རང་རྣམས་ལ་ཡང་མི་དམིགས་པའི་རྣམ་པ་ཅན་དགོས་པར་གསུངས་པ་དང་དོན་གཅིག་གོ །འདིར་ཟང་ཟིང་གི་གཏོང་བ་དང་། ཆོས་སྟོན་པ་གཙོ་བོར་གསུངས་པ་ནི་ས་དང་པོར་སྦྱིན་པའི་ཕར་ཕྱིན་ལྷག་པའི་དོན་ཡིན་ཞིང་བཅུ་པོ་འདི་དག་རྫོགས་པར་ཐོབ་པའི་ཚེ་ས་དང་པོ་རྫོགས་པར་ཐོབ་ཟིན་པས། ས་གཉིས་པར་འཕོས་པ་ཡིན་ལ་འོག་མ་རྣམས་ལ་ཡང་འདི་བཞིན་དུ་ཤེས་པར་བྱའོ། །ལོ་ཆེན་གྱིས་ས་དང་པོ་ལ་འཇུག་པའི་སྦྱོར་བའི་སྐབས་སུ་ཡོངས་སྦྱོང་བཅུ་པོ་འདི་དག་སྦྱོང་བར་བཤད་པ་ནི་སྔར་དྲངས་པའི་མདོ་གཉིས་དང་འགལ་ལོ། །ས་གཉིས་པའི་ཡོངས་སྦྱོང་ནི། ཚུལ་ཁྲིམས་བྱས་པ་གཟོ་དང་བཟོད། །ཅེས་པ་སྟེ། འདི་ལ་གཞི་ཚུལ་ཁྲིམས། བསམ་པ་ཁྱད་པར་ཅན། སྦྱོར་བ་ཁྱད་པར་ཅན་དང་གསུམ་ལས། དང་པོ་ནི། ཚུལ་ཁྲིམས་ཞེས་པ་སྟེ། ཐོགས་མེད་ཀྱིས་ཉེས་སྤྱོད་སྡོམ་པའི་ཚུལ་ཁྲིམས་ཁོ་ན་ལ་བཞེད་ཅིང་། སློབ་དཔོན་གྱིས་ནི་དབྱིག་གཉེན་གྱི་རྗེས་སུ་འབྲངས་ནས་ཚུལ་ཁྲིམས་གསུམ་ཆར་ལ་བཞེད་དོ། །གཉིས་པ་ནི་བྱས་པ་གཟོ་བ་དང་། གནོད་པ་བཟོད་པ་དང་། རབ་ཏུ་དགའ་བ་དང་། སྙིང་བརྩེ་ཆེ་བ་སྟེ་བཞིའོ། །གསུམ་པ་ནི་བཀུར་སྟི་དང་། བླ་མ་ལ་གུས་ཉན་དང་། སྦྱིན་སོགས་ལ་བརྩོན་པ་སྟེ་གསུམ་མོ། །འདིར་ཚུལ་ཁྲིམས་གཙོ་བོར་གསུངས་པ་ནི་ས་གཉིས་པའི་རྗེས་ཐོབ་ཏུ་ཚུལ་ཁྲིམས་ཀྱི་ཕར་ཕྱིན་ལྷག་ཅིང་ཚུལ་ཁྲིམས་ཀྱི་བསླབ་པ་སྦྱོང་བའི་དོན་ཏོ། །ས་གསུམ་པའི་ཡོངས་སྦྱོང་ནི། ཐོས་པས་མི་ངོམས་ཉིད་དང་ནི་ཞེས་སོགས་ཏེ། ས་གསུམ་པའི་རྗེས་ཐོབ་ཏུ་སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བར་བྱ་སྙམ་པའི་བསམ་པ་ཆོས་ཉིད་ཀྱི་ས་སྐྱེ་ཞིང་། དེ་ལ་ཐབས་སྒྲིབ་པ་མེད་པའི་ཡེ་ཤེས་དགོས། སྒྲིབ་པ་སྤོང་བའི་རྒྱུ་ལ་ཤེས་རབ་དགོས། དེའི་རྒྱུར་ཡང་ཏིང་ངེ་འཛིན་དགོས། དེ་ལ་ཡང་ཏིང་ངེ་འཛིན་གྱི་རབ་དབྱེ་ལ་མཁས་པ་ཅིག་དགོས། དེའི་ཆེད་དུ་གསུང་རབ་ཐོས་པ་ཅིག་དགོས་པས་ཐོས་པ་མཆོག་ཏུ་རྟོགས་ཤིང་། དེའི་ཚེ་ཚིག་བཞི་པ་ཅིག་ཙམ་གྱི་དོན་དུ་ཡང་སྟོང་གསུམ་མེ་ལྕེ་གཅིག་ཏུ་གྱུར་པ་ལས་ཀྱང་བརྒལ་བར་བྱེད་དོ། །དེས་ན་ཐོས་པས་མི་ངོམས་པ་ཉིད་དང་ཟང་ཟིང་མེད་པར་གཞན་ལ་ཆོས་སྦྱིན་པ་གཉིས་འབྱུང་ཞིང་སངས་རྒྱས་ལས་ཆོས་ཐོས་པའི་ཚེ་སངས་རྒྱས་ཀྱི་ཞིང་མཐོང་ནས་དེ་ཐོབ་པར་འདོད་པས་སངས་རྒྱས་ཞིང་ཀུན་སྦྱོང་བ་དང་། གཞན་ལ་ཆོས་སྦྱིན་པའི་ཚེ་ལོག་སྒྲུབ་བཟོད་པས་འཁོར་བས་ཡོངས་སུ་མི་སྐྱོ་བ་གཉིས་འབྱུང་། གཞན་དོན་བྱེད་པ་ལ་རང་དོན་རྫོགས་དགོས་པར་མཐོང་ནས་ངོ་ཚ་ཤེས་པ་དང་། ཁྲེལ་ཡོད་པ་གཉིས་འབྱུང་ངོ་། །རློམ་མེད་བདག་ཉིད་ཅེས་པ་ནི་མངོན་ཞེན་མེད་པའི་དོན་ཏོ། །འདིར་ཐོས་པས་མི་ངོམས་པ་ནི་ས་གསུམ་པའི་རྗེས་ཐོབ་ཏུ་ཏིང་ངེ་འཛིན་གྱི་བསླབ་པ་སྦྱོང་བའི་དོན་ཡིན་ཞིང་། འཁོར་བས་ཡོངས་སུ་མི་སྐྱོ་བ་ནི་བཟོད་པའི་ཕར་ཕྱིན་ལྷག་པའི་དོན་ཡིན་ནོ། །ས་བཞི་པའི་ཡོངས་སྦྱོང་ནི། ནགས་གནས་འདོད་ཆུང་ཆོག་ཤེས་དང་། །ཞེས་སོགས་ཏེ། འདི་ལ་ཡང་བཅུ་ཡོད་པ་དོན་དྲུག་ཏུ་འདུས་ཏེ། སེམས་རྣམ་དག སྤྱོད་པ་རྣམ་དག ཡིད་བྱེད་རྣམ་དག ཕྲིན་ལས་རྣམ་དག སྟོང་པ་རྣམ་དག རྣལ་འབྱོར་རྣམ་དག་གོ །དང་པོ་ནི་ནགས་གནས་དང་། འདོད་ཆུང་དང་། ཆོག་ཤེས་གསུམ་མོ། །གཉིས་པ་ནི་སྦྱངས་པའི་ཡོན་ཏན་བཅུ་གཉིས་ལེན་པ་དང་། བསླབ་པ་ཡོངས་སུ་མི་གཏོང་བ་གཉིས་སོ། །སྦྱངས་པའི་ཡོན་ཏན་བཅུ་གཉིས་ནི། ཟས་ཀྱི་དབང་དུ་བྱས་པ་གསུམ་དང་། གོས་ཀྱི་དབང་དུ་བྱས་པ་གསུམ་དང་། གནས་ཀྱི་དབང་དུ་བྱས་པ་ལྔ་དང་། སྤྱོད་ལམ་གྱི་དབང་དུ་བྱས་པ་གཅིག་རྣམས་སོ། །དང་པོ་ནི་ཟས་བཟང་པོ་ལ་ཞེན་པ་དགག་པའི་ཕྱིར་བསོད་སྙོམས་པ་དང་། ཡང་ཡང་ཟ་བ་ལ་ཞེན་པ་དགག་པའི་ཕྱིར་སྟན་གཅིག་པ་དང་། ཕྱིས་མི་ལེན་པའོ། །བསོད་སྙོམས་ལ་སྒོ་ཐེར་ཆགས་རྒྱུ་བ་དང་། ཅི་ཐོབ་པ་ལེན་པ་གཉིས་སོ། །སྟན་གཅིག་པ་ལ་ཟོས་པའི་དང་། ཆུའི་དང་། སྟན་གྱི་མཐའ་པ་གསུམ་མོ། །ཕྱིས་མི་ལེན་པ་ལ་བླངས་པའི་དང་། ཟ་བའི་མཐའ་པ་གཉིས་སོ། །གོས་ཀྱི་དབང་དུ་བྱས་པ་ལ་བཟང་པོ་ལ་ཞེན་པ་དགག་པའི་ཕྱིར་ཕྱག་དར་ཁྲོད་པ་དང་། འཇམ་པོ་ལ་ཞེན་པ་དགག་པའི་ཕྱིར་ཕྱིང་པ་བ་དང་། མང་པོ་ལ་ཞེན་པ་དགག་པའི་ཕྱིར་ཆོས་གོས་གསུམ་པའོ། །གནས་ཀྱི་དབང་དུ་བྱས་པ་ནི་འདུ་འཛི་ཅན་ལ་ཞེན་པ་དགག་པའི་ཕྱིར་དགོན་པ་བ་དང་། སྟེང་གཡོགས་ཅན་ལ་ཞེན་པ་དགག་པའི་ཕྱིར་བླ་གབ་མེད་པ་དང་། བསྐོར་བ་ལ་ཞེན་པ་དགག་པའི་ཕྱིར་ཤིང་དྲུང་པ་དང་། གནས་ཀྱི་སྦྱོར་བ་ལ་ཞེན་པ་དགག་པའི་ཕྱིར་དུར་ཁྲོད་པ་དང་། མང་པོ་ལ་ཞེན་པ་དགག་པའི་ཕྱིར་གཞི་ཇི་བཞིན་པའོ། །སྤྱོད་ལམ་གྱི་དབང་དུ་བྱས་པ་ནི་ཉལ་བ་སོགས་ལ་ཞེན་པ་དགག་པའི་ཕྱིར་ཙོག་པུ་པའོ། །གསུམ་པ་ནི་འདོད་པ་རྣམས་ལ་སྨོད་པའོ། །བཞི་པ་ནི་མྱ་ངན་ལས་འདས་པ་ལ་གཞོལ་བའོ། །ལྔ་པ་ནི་བདོག་ཀུན་གཏོང་བའོ། །དྲུག་པ་ནི་མི་ཞུམ་པ་དང་ལྟ་བ་མེད་པ་གཉིས་སོ། །འདིར་འདོད་ཆུང་ཆོག་ཤེས་དང་སྦྱངས་པའི་ཡོན་ཏན་བཅུ་གཉིས་ལེན་པ་གཙོ་བོར་གསུངས་པ་ནི་ས་བཞི་པའི་རྗེས་ཐོབ་ཏུ་བརྩོན་འགྲུས་ཀྱི་ཕར་ཕྱིན་ལྷག་པའི་དོན་ཡིན་ཞིང་། མྱང་འདས་ལ་གཞོལ་བ་ནི་བྱང་ཕྱོགས་སོ་བདུན་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་ལྔ་པའི་ཡོངས་སྦྱོང་ནི། འདྲིས་དང་ཁྱིམ་ལ་འཁྲེན་པ་དང་། །ཞེས་སོགས་ཏེ། འདི་ལ་ཡང་སྤང་བྱ་བཅུ་སྤོངས་དགོས་པ་ཡང་བཞིར་འདུས་ཏེ། བསམ་སྦྱོར་མ་དག་པ་དང་། གནས་མ་དག་པ་དང་། ཉེས་པར་སྤྱོད་པ་དང་། རྩ་བའི་ཉོན་མོངས་པ་སྤོང་བའོ། །དང་པོ་ནི་འདྲིས་དང་ཁྱིམ་ལ་འཁྲེན་པ་སྤོང་བ་གཉིས་སོ། །གཉིས་པ་ནི་འདུ་འཛིར་གྱུར་པའི་གནས་སྤོང་བའོ། །གསུམ་པ་ནི་བདག་བསྟོད་གཞན་ལ་རྨད་པ་དང་། མི་དགེ་བའི་ལས་ཀྱི་ལམ་བཅུ་སྤང་བ་གསུམ་མོ། །བཞི་པ་ལ་ང་རྒྱལ་ནི་རློམ་པས་ཁེངས་པ་དང་། མ་རིག་པ་ནི་ཕྱིན་ཅི་ལོག་དང་། ཐེ་ཚེམ་དང་ལྟ་བ་ནི་བློ་ངན་ཏེ། ཐེ་ཚོམ་ལྟ་བ་མཐོང་སྤང་ཡིན་ཡང་། སྐབས་འདིར་སྤོང་བར་བཤད་པ་ནི་གནས་ངན་ལེན་སྦྱོང་བའམ། ཐག་བསྲིང་པའི་གཉེན་པོ་ལ་དགོངས་ནས་གསུང་ཞིང་། ཉོན་མོངས་པ་ལ་བཟོད་པ་སྟེ་བཞི་སྤོང་བའོ། །འདིར་འདུ་འཛིར་གྱུར་པའི་གནས་སྤོང་བ་གསུངས་པ་ནི་ས་ལྔ་པའི་རྗེས་ཐོབ་ཏུ་བསམ་གཏན་གྱི་ཕར་ཕྱིན་ལྷག་པའི་དོན་ཡིན་ཞིང་། མཐོང་སྤང་གི་གཉེན་པོ་གསུངས་པ་ནི་བདེན་བཞི་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་དྲུག་པའི་ཡོངས་སྦྱོང་ནི། སྦྱིན་དང་ཚུལ་ཁྲིམས་བཟོད་བརྩོན་འགྲུས། །ཞེས་སོགས་ཏེ། འདི་ལ་བཅུ་གཉིས་ཡོད་པ་གཉིས་སུ་འདུས་ཏེ། སྤོང་བྱེད་ཀྱི་གཉེན་པོ་དང་སྤང་བྱ་མི་མཐུན་པའི་ཕྱོགས་སོ། །དང་པོ་ནི་ཕར་ཕྱིན་དྲུག་རྫོགས་པའོ། །ཕར་ཕྱིན་དྲུག་ས་དང་པོ་ནས་ཐོབ་པ་མ་ཡིན་ནམ་སྙམ་ན་ཐོབ་མོད་ཀྱི་འདིར་ནི་རྫོགས་པར་ཐོབ་པའི་དོན་ནོ། །གཉིས་པ་ལ་བྱང་ཆུབ་ཀྱི་གེགས་དང་། སྤྱོད་པ་རྗེས་སུ་སྒྲུབ་པའི་གེགས་གཉིས་ལས། དང་པོ་ནི། སློབ་མ་དང་། བསེ་རུ་ལ་དགའ་བའི་སེམས་སོ། །གཉིས་པ་ལ་གསུམ་ལས། དང་པོར་འཇུག་པའི་གེགས་ནི་ངོ་བོ་ཉིད་མི་དམིགས་པ་ལ་སྐྲག་པའི་སེམས་སོ། །བར་དུ་སྒྲུབ་པའི་གེགས་ནི་བླངས་ན་སེམས་ཞུམ་པ་དང་། བཏང་ན་མི་དགའ་བའི་སེམས་སོ། །ཐ་མར་མཐར་ཕྱིན་པའི་གེགས་ནི་དབུལ་ཡང་སློང་བ་མི་སྤོང་བའི་སེམས་སོ། །འདིར་སྤྱིར་ཕར་ཕྱིན་དྲུག་རྫོགས་པས་སྤང་བྱ་དྲུག་སྤོང་བ་ཡིན་གྱི་སོ་སོར་སྦྱར་བར་བྱ་བ་མ་ཡིན་པས་གཉེན་པོ་རྫོགས་པ་དང་། སྤང་བྱ་སྤངས་པ་རྣམས་སྦྱོང་བྱེད་ཀྱི་ཆོས་ཀྱི་རྐང་གྲངས་སོ་སོར་བགྲངས་ཤིང་སྤང་བྱ་རྣམས་ཀྱང་སྤོང་བྱེད་གཉེན་པོའི་ལྡོག་པ་ནས་གསུངས་པ་ཡིན་ནོ། །འདིར་ཕར་ཕྱིན་དྲུག་རྫོགས་པར་གསུངས་པ་ནི་ས་དྲུག་པའི་རྗེས་ཐོབ་ཏུ་ཤེས་རབ་ཀྱི་ཕར་ཕྱིན་ལྷག་པའི་དོན་ཡིན་ཞིང་། ངོ་བོ་ཉིད་མི་དམིགས་པ་ལ་སྐྲག་པ་སྤོང་བ་ནི་རྟེན་འབྲེལ་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་བདུན་པའི་ཡོངས་སྦྱོང་ལ་སྤང་བྱ་མི་མཐུན་པའི་ཕྱོགས་དང་། སྤོང་བྱེད་གཉེན་པོ་གཉིས་ལས། དང་པོ་ནི། བདག་དང་སེམས་ཅན་འཛིན་པ་དང་། །ཞེས་སོགས་ཏེ། འདི་ལ་སྤང་བྱའི་དབྱེ་བ་དང་། ཉེས་པ་སྤངས་པས་ཐོབ་པར་བསྟན་པ་གཉིས་ལས། དང་པོ་ལ་ཉི་ཤུ་ཡོད་པ་གསུམ་དུ་འདུས་ཏེ། སོ་སྐྱེ་དང་ཐུན་མོང་བ་དང་། ཉན་རང་དང་ཐུན་མོང་བ་དང་། བྱང་སེམས་ལས་དང་པོ་བ་དང་ཐུན་མོང་བའོ། །དང་པོ་ནི་བདག་ཏུ་འཛིན་པ་ནས་རྟག་པར་འཛིན་པའི་བར་དྲུག་གོ །གཉིས་པ་ནི་མཚན་མར་འཛིན་པ་ནས་ཚུལ་ཁྲིམས་སུ་ལྟ་བའི་མངོན་ཞེན་གྱི་བར་བཅུ་གཉིས་སོ། །གསུམ་པ་ནི་སྟོང་ཉིད་ལ་རྩོད་པ་དང་། སྟོང་ཉིད་དེ་དང་མངོན་སུམ་དུ་མཐོང་བ་འགལ་བའི་ཉེས་པ་འཛིན་པ་གཉིས་སོ། །ཉེས་པ་སྤངས་པས་ཐོབ་པར་བསྟན་པ་ནི། ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་ཐོབ། །ཅེས་པའོ། །འོ་ན་དང་པོ་དྲུག་པོ་འཇིག་ཚོགས་སུ་ལྟ་བ་དང་། མཐར་འཛིན་ལྟ་བ་ཡིན་པས་ས་དང་པོ་ནས་སྤངས་ཟིན་པ་མ་ཡིན་ནམ་སྙམ་ན། འདི་ལ་བདག་དང་སེམས་ཅན་སོགས་བདེན་པར་འཛིན་པ་དང་། བརྟགས་པ་ཙམ་དུ་འཛིན་པ་གཉིས་ལས། དང་པོ་ནི། ཉོན་སྒྲིབ་ཡིན་པས་ས་དང་པོ་ནས་སྤངས་ཟིན་ལ། ཕྱི་མ་ལ་ཀུན་བརྟགས་དང་། ལྷན་སྐྱེས་གཉིས་ལས། དང་པོ་ནི་མཐོང་སྤང་དུ་གྱུར་པའི་བཏགས་འཛིན་རྟོག་པ་ཡིན་པས་ས་དང་པོ་ནས་སྤངས་ཟིན་ཏེ། སོ་སོ་སྐྱེ་བོ་འཕགས་དབྱེ་བས། །སེམས་ཅན་རྫས་དང་བཏགས་ཡོད་པར། །རྣམ་རྟོག་འཛིན་པ་དག་ཏུ་འདོད། །ཅེས་པའི་སྐབས་སུ་དངོས་སུ་བསྟན་པའི་རྫས་འཛིན་རྟོག་པ་ནི་ཁོ་བོའི་ལུགས་ཀྱི་ཉོན་སྒྲིབ་ཡིན་ཞིང་བཏགས་འཛིན་རྟོག་པ་ནི་ཤེས་སྒྲིབ་ཡིན་པས་གཉིས་ཆར་ཡང་མཐོང་སྤང་རྟོག་པ་ཡིན་པའི་ཕྱིར་རོ། །ལྷན་སྐྱེས་སུ་གྱུར་པའི་གང་ཟག་བཏགས་པ་ཙམ་དུ་འཛིན་པའི་བློ་ནི་སྒོམ་སྤང་རྟོག་པ་ཡིན་པས་ས་བདུན་པའི་རྗེས་ཐོབ་ཀྱི་བར་དུ་མངོན་གྱུར་དུ་འབྱུང་སྲིད་ཅིང་དེའི་ཚེ་མཚན་འཛིན་གྱི་བར་ཆད་འབྱུང་བས་ལམ་གྱི་དངོས་པོའི་རྒྱུན་དང་མི་ལྡན་པ་ཡིན་ལ། རྗེས་ཐོབ་ཀྱི་གནས་སྐབས་སུ་ཡང་དེ་འབྱུང་མི་སྲིད་པའི་ཚེ་ས་བདུན་པ་རྫོགས་པར་ཐོབ་ནས་ས་བརྒྱད་པར་འཕོས་པ་ཡིན་པས། ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་ཐོབ། །ཅེས་གསུངས་པ་ཡང་འདི་ལ་དགོངས་སོ། །ཆོས་སུ་འཛིན་པ་ལ་ཡང་ཆོས་སུ་བདེན་པ་དང་། དེར་བཏགས་པ་ཙམ་དུ་འཛིན་པ་གཉིས་ལས། དང་པོ་ནི་མཐོང་སྤང་ཁོ་ན་སྟེ། འཛིན་པ་དང་ནི་འདོར་བ་དང་། །ཞེས་པའི་དངོས་བསྟན་གྱི་རྫས་འཛིན་རྟོག་པ་དང་དོན་གཅིག་གོ །ཕྱི་མ་ལ་ཀུན་བརྟགས་དང་། ལྷན་སྐྱེས་གཉིས་ལས། དང་པོ་ནི་མཐོང་སྤང་སྟེ། ཆེད་བཞིན་ངེས་པར་མི་འབྱུང་དང་། །ཞེས་པའི་དངོས་བསྟན་དང་དོན་གཅིག་གོ །འདིར་རོང་སྟོན་ཐམས་ཅད་མཁྱེན་པའི་ཞལ་སྔ་ནས། མདོར་བསྟན་དུ་གང་ཟག་ལ་རྫས་ཡོད་དང་བརྟགས་ཡོད་དུ་འཛིན་པ་དངོས་སུ་བསྟན་ནས་ཆོས་ལ་དེ་དང་དེར་འཛིན་པ་ཤུགས་ལ་བསྟན། རྒྱས་བཤད་དུ་དེ་ལས་བཟློག་སྟེ་བསྟན་པར་གསུངས་པ་ནི་འཆད་ཚུལ་འདིའི་མེ་ལོང་གི་ནང་དུ་སོང་དུས་མཁས་པའི་ཡིད་འཕྲོགས་པར་འགྱུར་རོ། །ལྷན་སྐྱེས་ནི། བདག་ཉིད་ཇི་བཞིན་ཀུན་མཁྱེན་ནི། །ཞེས་པའི་སྐབས་ཀྱི་སྒོམ་སྤང་རྟོག་པ་ཡིན་ལ་དེ་ཉིད་འདིར་བཤད་པའི་མཚན་མར་འཛིན་པ་སོགས་བཅུ་གཉིས་དང་དོན་གཅིག་པས་ས་བདུན་པའི་རྗེས་ཐོབ་ཀྱི་བར་དུ་འབྱུང་སྲིད་པའོ། །དེ་ལྟར་བྱས་ན་འཕགས་པས་སྒོམ་སྤང་དུ་གྱུར་པའི་འཛིན་རྟོག་གཉིས་ལ་སེམས་ཅན་དུ་གདགས་པ་ལ་བརྟེན་པ་དང་། གདགས་པའི་རྒྱུ་མཚན་ལ་བརྟེན་པ་ཞེས་པའི་ཐ་སྙད་མཛད་ཅིང་། གཉིས་ཀ་ཡང་བཏགས་འཛིན་རྟོགས་པར་བཞེད་པ་ནི་བསྟན་བཅོས་རྩ་བའི་དགོངས་པར་གནས་པའོ། །གཉིས་པ་སྤོང་བྱེད་གཉེན་པོ་ནི། རྣམ་ཐར་སྒོ་གསུམ་ཤེས་པ་དང་། །ཞེས་སོགས་ཏེ། འདིར་གཉེན་པོ་རེ་རེས་སྤང་བྱ་རེ་རེ་སོ་སོར་སྤངས་པས་ཡོངས་སྦྱོང་གི་གྲངས་ལོགས་སུ་མ་སྨོས་ལ། ས་དྲུག་པའི་སྐབས་སུ་སྤང་གཉེན་སོ་སོར་སྦྱར་བར་བྱ་བ་མ་ཡིན་པས་ཡོངས་སྦྱོང་གི་གྲངས་ལོགས་སུ་སྨོས་སོ། །ས་བརྒྱད་པའི་ཡོངས་སྦྱོང་ལ། སེམས་ཅན་ཀུན་ཡིད་ཤེས་པ་དང་། །ཞེས་པ་སྟེ། འདི་ལ་མདོ་ལས་བྱང་ཆུབ་སེམས་དཔའ་ས་བརྒྱད་པ་ལ་གནས་པས་ནི་ཆོས་ཀྱི་སྐུ་ཡོངས་སུ་བཏགས་པའི་དོན་དུ་ཆོས་བཞི་ཡོངས་སུ་རྫོགས་པར་བྱ་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་སེམས་ཁོང་དུ་ཆུད་པར་བྱ་བ་དང་། ཞེས་སོགས་དང་། གཞན་ཡང་ཆོས་བཞི་ཡོངས་སུ་རྫོགས་པར་བྱ་སྟེ་ཞེས་བཞི་ཕྲག་གཉིས་སོ་སོར་བྱས་པ་ནི་གང་ཡང་རུང་བ་ཡང་ས་དེའི་ཡོངས་སུ་སྦྱོང་བ་ཉིད་ཡིན་པར་ཤེས་པར་བྱ་བའི་དོན་དུ་ཡིན་ནོ། །ཞེས་ཉིར་སྣང་ལས་བཤད་དོ། །སངས་རྒྱས་ཀྱི་ཞིང་སྦྱོང་བ་གཉིས་སུ་བྱས་པའི་སྔ་མ་ནི་སྣོད་ཀྱི་འཇིག་རྟེན་དང་། ཕྱི་མ་ནི་བཅུད་ཀྱི་འཇིག་རྟེན་སྦྱོང་བ་ཡིན་ཞིང་འདི་དང་། ཞིང་དག་སྦྱོང་བའི་སྐབས་སུ་སྣོད་བཅུད་ཀྱི་འཇིག་རྟེན་སོ་སོར་དག་པ་སྒྲུབ་པར་བཤད་པ་ནི་གནད་གཅིག་པས་རྫོགས་སྨིན་སྦྱོང་གསུམ་གྱི་ནང་ཚན་དུ་གྱུར་པའི་སངས་རྒྱས་ཀྱི་ཞིང་སྦྱོང་བ་མ་མཐའ་ས་བརྒྱད་པ་ནས་འཇོག་པའི་དོན་ཏེ། སངས་རྒྱས་ཀྱི་ཞིང་དངོས་སུ་སྒྲུབ་པའི་དབང་དུ་བྱས་པ་ཡིན་ལ་ས་གསུམ་པའི་སྐབས་སུ་སངས་རྒྱས་ཀྱི་ཞིང་སྦྱོང་བར་བཤད་པ་ནི་ཞིང་དག་པ་སྒྲུབ་པར་འདོད་པའི་བློ་སྐྱེད་པ་ཙམ་མོ། །དེ་ལྟར་བྱས་ན་བཞི་ཚན་གཉིས་ལ་སྣོད་བཅུད་ཀྱི་ཞིང་སྦྱོང་བ་སོ་སོར་སྣང་བས་གང་རུང་ཅིག་གིས་ས་བརྒྱད་པའི་ཡོངས་སྦྱོང་དུ་འགྱུར་བ་མ་ཡིན་གྱི། གཉིས་ཀ་དགོས་ལ་གཉིས་སུ་བྱས་པ་ནི་སྔ་མ་ས་བདུན་པ་དང་ཐུན་མོང་བ་དང་། ཕྱི་མ་ས་དགུ་པ་དང་ཐུན་མོང་བར་མངོན་ཏེ། དཔྱད་པས་ཤེས་སོ། །ས་དགུ་པའི་ཡོངས་སྦྱོང་ནི། སྨོན་ལམ་དག་ནི་མཐའ་ཡས་དང་། །ཞེས་སོགས་ཏེ། འདི་ལ་བཅུ་གཉིས་ཡོད་པ་དོན་ལྔར་འདུས་ཏེ། ཕུན་སུམ་ཚོགས་པ་ཐམས་ཅད་ཀྱི་རྒྱུ། ཆོས་སྟོན་པའི་རྒྱུ། བདག་པོ་ཕུན་སུམ་ཚོགས་པ། ཉེར་སྤྱོད་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པའོ། །དང་པོ་ནི་སྨོན་ལམ་མཐའ་ཡས་པའོ། །གཉིས་པ་ནི་ཚིག་སོ་སོར་རིག་པ་ལྷ་ལ་སོགས་པའི་སྐད་ཤེས་པ་དང་། སྤོབས་པ་སོ་སོར་རིག་པ་ཆུ་བོའི་རྒྱུན་ལྟར་མི་ཟད་པ་གཉིས་སོ། །གསུམ་པ་ལ་ལུས་དག་པ་དང་། དག་པའི་ཕྱོགས་འཛིན་པ་གཉིས་ལས། དང་པོ་ནི་མངལ་དུ་འཇུག་པ་མཆོག་ལ་སོགས་པ་དྲུག་གོ །གཉིས་པ་ནི་སངས་རྒྱས་ལ་སོགས་པས་བསྐུལ་ཏེ་ངེས་པར་འབྱུང་བའོ། །ཉེར་སྤྱོད་ཕུན་སུམ་ཚོགས་པ་ནི་བྱང་ཆུབ་ཀྱི་ཤིང་རྣམས་སོ། །འབྲས་བུ་ཕུན་སུམ་ཚོགས་པ་ནི་ཡོན་ཏན་ཞེས་པ་སྟེ་ཕུན་སུམ་ཚོགས་པ་ནི་ཐམས་ཅད་ཀྱི་གསལ་བྱེད་དུ་སྦྱར་རོ། །འདིར་སྨོན་ལམ་མཐའ་ཡས་པ་ཕར་ཕྱིན་ལྷག་པའི་གོ་རིམ་ལྟར་ན་ས་བརྒྱད་པ་ལ་འཐད་ཅིང་། མངལ་དུ་འཇུག་པ་མཆོག་ལ་སོགས་པ། ས་བཅུ་པའི་བྱང་སེམས་ལ་འཐད་པས་ས་དགུ་པ་ལ་ཇི་ལྟར་འཐད་སྙམ་ན་སྐྱོན་མེད་དེ། སྔ་མ་ནི་ས་བརྒྱད་པ་དང་ཐུན་མོང་བའི་དབང་དུ་བྱས་ལ། ཕྱི་མ་ནི་ས་བཅུ་པ་དང་ཐུན་མོང་བའི་དབང་དུ་བྱས་ཤིང་། གཉིས་པ་དང་གསུམ་པ་ནི་ས་དགུ་པའི་ཐུན་མོང་མ་ཡིན་པ་ཡིན་པའི་ཕྱིར་རོ། །དེ་ལྟར་མཛད་པའི་གནད་ཀྱང་ས་སྔ་མའི་ཡོངས་སྦྱོང་དེ་མ་རྫོགས་པ་དེ་སྲིད་དུ་ས་སྔ་མ་དེ་ཡིན་ལ། རྫོགས་པར་ཐོབ་ནས་ས་ཕྱི་མར་འཕོས་པ་ཡིན་པས་ཡོངས་སྦྱོང་ཐམས་ཅད་ལ་ཡང་འདི་བཞིན་དུ་ཡོད་པར་ཞིབ་ཏུ་དཔྱད་ན་ཤེས་སོ། །གཉིས་པ་ས་བཅུ་པ་འབྲས་བུའི་སྒོ་ནས་བསྟན་པ་ནི། ས་དགུ་འདས་ནས་ཡེ་ཤེས་ནི། །ཞེས་སོགས་ཏེ་མདོ་ལས། རིགས་ཀྱི་ས་དང་། བརྒྱད་པའི་ས་དང་། མཐོང་བའི་ས་དང་། བསྲབས་པའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་ལས་ཡང་དག་པར་འདས་ཏེ། རབ་འབྱོར་དེ་ལྟར་བྱང་སེམས་ཆེན་པོ་ས་དགུ་ལས་འདས་ནས་སངས་རྒྱས་ཀྱི་ས་ལ་གནས་པ་སྟེ། རབ་འབྱོར་དེ་ནི་བྱང་སེམས་ཆེན་པོའི་ས་བཅུ་པའོ། །ཞེས་གསུངས། འདི་ལ་འདས་ས་ས་དགུ་ངོས་བཟུང་བ། དེ་ལས་འདས་པའི་ཚུལ་ལ་དཔྱད་པ། འབྲས་བུའི་སྒོ་ནས་བསྟན་པའི་དགོས་པ་དང་གསུམ་ལས། དང་པོ་རིགས་ཀྱི་ས་ནི་གནས་སྐབས་ཐེག་དམན་དུ་རིགས་ངེས་པའི་སྦྱོར་ལམ་བཞིའོ། །བརྒྱད་པའི་ས་ནི་རྒྱུན་ཞུགས་ཞུགས་པའི་རྟོགས་པའོ། །མཐོང་བ་དང་། བསྲབས་པ་དང་། འདོད་ཆགས་དང་བྲལ་བའི་ས་གསུམ་ནི་འབྲས་གནས་དང་པོ་གསུམ་གྱི་ཙམ་པོའི་མངོན་པར་རྟོགས་པའོ། །བྱས་པ་རྟོགས་པའི་ས་ནི་ཉན་ཐོས་དགྲ་བཅོམ་པའི་མངོན་པར་རྟོགས་པའོ། །ཉན་ཐོས་ཀྱི་ས་ནི་འབྲས་གནས་དང་པོ་གསུམ་གྱི་ཁྱད་པར་ཅན་གྱི་མངོན་པར་རྟོགས་པའོ། །དེ་གསུམ་ལ་ཉན་ཐོས་ཀྱི་ས་ཞེས་ལོགས་སུ་བཞག་པའི་དགོས་པ་ནི། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་གཉིས་ཀྱི་ཟླ་བོར་ཉན་ཐོས་ཀྱི་ས་ཞེས་བཞག་པས་ཐེག་པ་གསུམ་གྱི་རྣམ་གཞག་གྲུབ་པའི་ཆེད་ཡིན་ཏེ། ཉིར་སྣང་དུ། ཉན་ཐོས་ཀྱི་ས་ནི་ཐེག་པ་གསུམ་གསལ་བར་རྣམ་པར་བཞག་པ་ལ་དགོངས་པ་སྟེ་ཞེས་དང་། དེའི་དོན་འགྲེལ་ཆུང་དུ། ཚུལ་གསུམ་རྣམ་པར་གཞག་པར་དགོངས་པས་ཞེས་གསུངས་པའི་ཕྱིར་རོ། །ཐེག་པ་གསུམ་གྱི་རྣམ་གཞག་གྲུབ་པའི་དགོས་པ་ནི་ས་བཅུ་པར་ཐེག་པ་གསུམ་གྱི་རྟོགས་རིགས་ཡོན་ཏན་ཡར་ལྡན་དུ་འདུ་བར་རྟོགས་པའི་ཆེད་དུ་ཡིན་ནོ། །རང་སངས་རྒྱས་ཀྱི་ས་ནི་བསེ་རུ་ལྟ་བུ་དང་ཚོགས་ན་སྤྱོད་པའི་མངོན་པར་རྟོགས་པའོ། །བྱང་ཆུབ་སེམས་དཔའི་ས་ནི་ཇི་སྐད་བཤད་པའི་ས་དགུའོ། །གཉིས་པ་ནི། འོ་ན་ས་བཅུ་པའི་ཡེ་ཤེས་དེ་བྱང་སེམས་ཀྱི་ས་ལས་འདས་པར་རིགས་ཀྱང་དམན་པའི་ས་བརྒྱད་ལས་འདས་པར་ཇི་ལྟར་རིགས་ཏེ། དམན་པའི་ས་བརྒྱད་སྔོན་དུ་མ་སོང་ན་ནི་དེ་ལས་འདས་པའི་དོན་མེད་ཅིང་། སྔོན་དུ་སོང་ན་ནི་ཐེག་པ་འོག་མ་གཉིས་ཀ་བགྲོད་ཟིན་པའི་དབང་དུ་བྱས་པར་འགྱུར་བའི་ཕྱིར་རོ་ཞེ་ན། བྱང་སེམས་ཀྱི་སྦྱོར་ལམ་གྱི་གནས་སྐབས་སུ་ཐེག་པ་འོག་མ་གཉིས་ཀྱི་རྟོགས་རིགས་རྒྱུན་ལྡན་དུ་བསྒོམ་པའི་སྟོབས་ཀྱིས་མཐོང་ལམ་དུ་མངོན་སུམ་དུ་མཐོང་ཟིན་ནས་དེ་ཕྱིན་ཆད་རྟོགས་རིགས་རྒྱུན་ལྡན་དུ་མི་སྒོམ་པས་དམན་པའི་ས་བརྒྱད་ཆར་ལས་འདས་པ་ཞེས་བྱ་བར་འཇོག་སྟེ། ཉིར་སྣང་དུ། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ཤེས་པ་དང་མཐོང་བས་བལྟས་ནས་འདའོ། །ཞེས་གསུངས་པས་ན་འདི་ནི་གཞན་གཙོར་བྱེད་པའི་ཕྱིར་རོ། །ཞེས་བྱ་བར་དགོངས་པ་ཡིན་ནོ། །ཞེས་དང་། གཞན་ཡང་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའི་བཟོད་པ་ཡིན་ནོ། །བཟོད་པ་དེ་ཡང་གང་ཞེ་ན་སྡུག་བསྔལ་ལ་ཆོས་ཤེས་པའི་བཟོད་པའོ། །ཞེས་གསུངས་པའི་ཕྱིར་རོ། །མདོར་ན་ས་དང་པོ་ནས་ཉན་རང་གི་སྤང་རྟོགས་རྫོགས་པའི་ཚེ་དམན་པའི་ས་བརྒྱད་ལས་འདས་ཟིན་ཅིང་དེའི་རྗེས་སུ་བྱང་སེམས་ཀྱི་ས་དགུ་ལས་འདས་པས་ན་དམན་པའི་ས་བརྒྱད་ལས་འདས་པ་ནི་ཤེས་མཐོང་གིས་བལྟས་ནས་འདས་པའི་དོན་ཡིན་ཞིང་བྱང་སེམས་ཀྱི་ས་དགུ་ལས་འདས་པ་ནི་ལམ་ཕྱི་མ་སྐྱེས་པ་ན་སྔ་མ་ལས་འདས་པའི་དོན་ནོ། །སྔོན་ཆད་འདི་ལྟ་བུའི་བཤད་པ་འབྱུང་བའི་ཞལ་གྱི་པདྨོ་དཀོན་ཙམ་འདུག་པས་ཟབ་དོན་དོན་དུ་གཉེར་བ་དག་གིས་ལོག་རྟོག་གི་དྲི་མ་རྣམས་གནས་ལུགས་ལ་དཔྱོད་པའི་ཤེས་རབ་ཀྱིས་བསལ་ནས་གཟུང་བར་བྱའོ། །གསུམ་པ་ནི། འོ་ན་ས་བཅུ་པ་ཡོངས་སྦྱོང་གི་སྒོ་ནས་མི་སྟོན་པར་འབྲས་བུའི་སྒོ་ནས་སྟོན་པ་ཅི་ཞེ་ན། ལོ་ཆེན་གྱིས་ཡོངས་སྦྱོང་ནི་ས་སྔ་མ་སྔ་མ་ལས་ཁྱད་པར་དུ་བྱེད་པའི་ཆེད་ཡིན་ལ། འབྲས་བུའི་སྒོ་ནས་བསྟན་པས་ས་སྔ་མ་ལས་ཁྱད་པར་དུ་འཕགས་པར་གྲུབ་པའི་ཕྱིར་ཞེས་གསུངས་པ་ནི། ཡོངས་སྦྱོང་དེ་རྫོགས་པར་ཐོབ་པའི་ཆེད་དུ་ཡིན་པར་གཞུང་ལས་བཤད་པས་ས་སྔ་མ་ལས་ཁྱད་པར་བྱེད་པའི་ཆེད་ཡིན་པར་མི་འགྲུབ་ཅིང་། གྲུབ་ཏུ་ཆུག་ན་ཡང་ཡོངས་སྦྱོང་གི་སྒོ་ནས་མི་སྟོན་པའི་རྒྱུ་མཚན་དུ་སོང་གི་འབྲས་བུའི་སྒོ་ནས་སྟོན་པའི་རྒྱུ་མཚན་ད་དུང་ཚོལ་དགོས་པས་དཔྱད་པ་མ་རྫོགས་པའོ། །འཐད་པའི་ཕྱོགས་ནི་འདི་ཡིན་ཏེ། ས་དགུ་པོ་ཡོངས་སྦྱོང་གི་སྒོ་ནས་བསྟན་པ་ན་བྱང་སེམས་ལས་དང་པོ་པ་འགའ་ཞིག་དེ་ལ་འཇུག་པར་མི་ནུས་སོ་སྙམ་དུ་སེམས་ཞུམ་པར་འགྱུར་བས་མཐར་ཐུག་གི་འབྲས་བུར་མ་ཟད་གནས་སྐབས་ས་བཅུ་པ་ལ་ཡང་འབྲས་བུ་འདི་ལྟར་ཡོད་དོ་ཞེས་སྤྲོ་བ་སྐྱེད་པའི་ཆེད་དུ་ཡིན་ཏེ། ས་བཅུ་པ་ལ་ཡོངས་སྦྱོང་ཡོད་ཀྱང་ས་དགུ་པའི་ཡོངས་སྦྱོང་གི་ཁོངས་སུ་བསྡུས་པ་ལས་ཀྱང་ཤེས་ཤིང་འདི་འདྲའི་རིགས་ཅན། སྐབས་ལྔ་པར་ཡང་འབྱུང་ངོ་། །གསུམ་པ་གཉེན་པོའི་ཚོགས་བྱེ་བྲག་ཏུ་བཤད་པ་ནི། མཐོང་དང་སྒོམ་པའི་ལམ་དག་ལ། །ཞེས་སོགས་ཏེ། འདིར་སྤང་བྱ་བརྒྱད་ཀྱི་ཐ་སྙད་ལ་སློབ་དཔོན་གྱིས་ནི་སྔར་སྦྱོར་ལམ་གྱི་གནས་སྐབས་སུ་བསྟན་པའི་ཐ་སྙད་བཞི་པོ་དེ་ཉིད་མཐོང་སྤང་རྟོག་པ་དང་། སྒོམ་སྤང་རྟོག་པ་གཉིས་ཀ་ལ་སྦྱར་བར་བཞེད་ཅིང་། འཕགས་པས་མཐོང་སྤང་རྟོག་པ་ལ་གཟུང་བའི་རྣམ་པར་རྟོག་པ་དངོས་པོ་ཙམ་ལ་བརྟེན་པ་དང་། གཉེན་པོ་ལ་བརྟེན་པ་གཉིས། འཛིན་པའི་རྣམ་པར་རྟོག་པ་གང་ཟག་རྫས་སུ་ཡོད་པ་ལ་བརྟེན་པ་དང་། སྐྱེས་བུ་བརྟགས་པར་ཡོད་པ་ལ་བརྟེན་པ་གཉིས་ཏེ་བཞི། སྒོམ་སྤང་རྟོག་པ་ལ་གཟུང་བའི་རྣམ་པར་རྟོག་པ་དངོས་པོ་ཙམ་གྱི་རྣམ་པ་ལ་བརྟེན་པ་དང་། གཉེན་པོ་ལ་བརྟེན་པ་གཉིས། འཛིན་པའི་རྣམ་པར་རྟོག་པ་འཕགས་པའི་གང་ཟག་ཏུ་བཏགས་པ་ལ་བརྟེན་པ་དང་། བཏགས་པ་དེའི་རྒྱུ་མཚན་ལ་བརྟེན་པ་གཉིས་ཏེ་བརྒྱད་དུ་བཞེད་དོ། །དེ་ལྟ་བུའི་རྣམ་རྟོག་བརྒྱད་པོ་ངེས་པར་འབྱུང་བར་བྱས་ནས། ངེས་པར་འབྱུང་བྱེད་ཐེག་པ་ཆེན་པོ་དེས་འབྱུང་ཚུལ་མི་དམིགས་པའི་ཚུལ་གྱིས་འབྱུང་བའི་ཀུན་རྫོབ་ཁས་བླངས་པའི་ལན་གྱིས་མཐོང་སྤང་གཉེན་པོའི་ཚོགས་སྒྲུབ་དང་། དེ་དག་མི་དམིགས་པའི་དོན་དམ་གྱི་ལན་གྱིས་སྒོམ་སྤང་གཉེན་པོའི་ཚོགས་སྒྲུབ་གསུངས་སོ། །བཞི་པ་ངེས་པར་འབྱུང་བའི་སྒྲུབ་པ་ནི། ཆེད་དུ་བྱ་དང་མཉམ་ཉིད་དང་། །ཞེས་སོགས་ཏེ། འདིར་ངེས་པར་འབྱུང་ས་བརྒྱད་ལས། དང་པོ་བདུན་སངས་རྒྱས་ཀྱི་ས་དང་། ལམ་གྱི་ཡུལ་ཅན་ནི་རྒྱུན་མཐའ་ན་ཡོད་པར་བོད་རྣམས་བཞེད་ལ། ཉི་ཁྲི་སྣང་བར། ཚེ་དང་ལྡན་པ་ཤཱ་རིའི་བུ་སྦྱིན་པའི་ཕ་རོལ་ཏུ་ཕྱིན་པ་འཇིག་རྟེན་པ་ཡང་ཡོད། འཇིག་རྟེན་ལས་འདས་པ་ཡང་ཡོད་ཅེས་བྱ་བས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་པའི་ལམ་ཉེ་བར་དགོད་པ་དང་། ཞེས་གསུངས་པ་ལྟར་ན་རྒྱུན་མཐའ་ན་ཡོད་པ་ཉིད་ལེགས་ཤིང་། སློབ་དཔོན་གྱིས་ཇི་སྐད་བཤད་པའི་རྣམ་པ་ཐམས་ཅད་མཁྱེན་པ་ཉིད་དང་། དེའི་ཁྱད་པར་གྱི་ལམ་སྟེ། ཞེས་གསུངས་པ་ལྟར་ན་སངས་རྒྱས་ཀྱི་ས་ན་ཡོད་པར་མངོན་ནོ། །ངེས་པར་འབྱུང་ས་བརྒྱད་པོ་དེར་བར་ཆད་མེད་པར་ངེས་པར་འབྱུང་བ་ནི་ས་བརྒྱད་པ་ནས་ཡོད་ཅིང་། དངོས་སུ་ངེས་པར་འབྱུང་བ་ལ་འཇོག་ན་རྒྱུན་མཐར་འཇོག་དགོས་པར་སྣང་ངོ་། །སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་ལས་སྐབས་དང་པོའི་གཞུང་སོ་སོའི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

ལམ་ཤེས།

གཉིས་པ་ལམ་ཤེས་ལ་རྣམ་མཁྱེན་གྱི་འོག་ཏུ་ལམ་ཤེས་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་གཞུང་གི་དོན་གཉིས་ལས། དང་པོ་ལ། དོན་གྱི་འབྲེལ་དང་། ཚིག་གི་འབྲེལ་གཉིས། དང་པོ་ནི། འབྲས་བུ་རྣམ་མཁྱེན་ཐོབ་པ་ལ་རྒྱུ་ལམ་ཤེས་དགོས་པས་འབྲས་བུ་རྟོགས་པའི་བློས་རྒྱུ་རྟོགས་པའི་བློ་དྲངས་པ་རྟོགས་པའི་གོ་རིམ་མོ། །གཉིས་པ་ལ་གསར་དུ་ལྷགས་པའི་འཁོར་གྱི་དབང་དུ་བྱས་པ་དང་། སྔར་གནས་པའི་འཁོར་གྱི་དབང་དུ་བྱས་པ་གཉིས་ལས། དང་པོ་ནི། རྣམ་མཁྱེན་གྱི་མདོ་རྫོགས་པའི་རྗེས་སུ་རྒྱལ་ཆེན་རིས་བཞི་ནས་འོག་མིན་གྱི་བར་གྱི་ལྷའི་བུ་རྣམས་ལྷགས་པ་ན་དེ་དག་ལ་སྔར་གྱི་རྣམ་མཁྱེན་གྱི་སྐབས་ཀྱི་རྟོགས་པ་དེ་བསྒྲུབ་དགོས་པས་སྔ་མ་དེ་ཉིད་བརྗོད་ན། སྔར་ནས་གནས་པའི་འཁོར་རྣམས་བརྙས་པ་སྐྱེ་བར་འགྱུར་བས། ལམ་ཤེས་འདིས་སྔར་གྱི་རྣམ་མཁྱེན་ཐོབ་པར་འགྱུར་རོ་ཞེས་རྒྱུའི་ཚུལ་གྱིས་གསུངས་པའོ། །གཉིས་པ་ནི་སྔར་ནས་གནས་པའི་འཁོར་ཁ་ཅིག སྔར་བསྟན་པའི་ཆོས་བཅུ་པོ་དེ་དག་ནི་སངས་རྒྱས་ཁོ་ནས་རྟོགས་པར་བྱ་བ་ཡིན་གྱི་བྱང་ཆུབ་སེམས་དཔས་རྟོགས་པར་བྱ་བ་མེད་དམ་སྙམ་པའི་དོགས་པ་ཡོད་པས་རྒྱུའི་ཆོས་ཙམ་ཞིག་དྲངས་ནས་བྱང་སེམས་ཀྱི་རྟོགས་བྱར་བསྟན་པའོ། །གཉིས་པ་རྒྱུ་མཚན་ཅན་གྱི་གཞུང་གི་དོན་ལ་ཆོས་བཅུ་གཅིག་ཡོད་པ་ལམ་ཤེས་ཀྱི་ཡན་ལག་དང་། ལམ་ཤེས་ཀྱི་རང་བཞིན་གཉིས་ལས། དང་པོ་ལ་རྒྱུའི་ཡན་ལག རང་བཞིན་གྱི་ཡན་ལག བྱེད་ལས་ཀྱི་ཡན་ལག་དང་གསུམ། དང་པོ་ལ་སྔ་རབས་པ་ཁ་ཅིག་འགལ་རྐྱེན་དང་བྲལ་བའི་རྟེན། ལྷན་ཅིག་བྱེད་པའི་རྐྱེན། ཉེ་བར་ལེན་པའི་རྒྱུ་དང་གསུམ་དུ་མཛད་ནས་ཁྱབ་པའི་དོན་རང་བཞིན་གནས་རིགས་ཀྱིས་ཁྱབ་པ་ལ་འཆད་པ་ནི་ཤིན་ཏུ་མི་འཐད་དེ། ཉིར་སྣང་དུ། ཁྱབ་པ་ནི་ལམ་ཤེས་པ་ཉིད་ཀྱི་དབང་དུ་བྱས་ཏེ་ཞེས་གསུངས་ཤིང་། འདིར་ཡན་ལག་ལྔ་ཆར་ཡང་ལམ་ཤེས་ལ་སྦྱར་དགོས་པ་སྐབས་ཀྱི་དོན་ཡིན་པའི་ཕྱིར་རོ། །དེས་ན་འདིར་བསྟན་ཡན་ལག་ལྔ་ཆར་ཡང་ལམ་ཤེས་ཀྱི་ཡན་ལག་ཡིན་པས། འོད་ཀྱིས་མོག་མོག་པོར་མཛད་དང་། །ཞེས་པས་ལམ་ཤེས་སྐྱེ་བར་རུང་བ་བསྟན། ཡུལ་ངེས་པ་དང་ཞེས་པས་ལམ་ཤེས་ཀྱི་ཡུལ་ངེས་པ་བསྟན། ཁྱབ་པ་དང་ཞེས་པས་ལམ་ཤེས་ཀྱིས་ཁྱབ་པ་བསྟན། རང་བཞིན་དང་ནི་ཞེས་པས་ལམ་ཤེས་ཀྱི་རང་བཞིན་བསྟན། དེའི་ལས་ཞེས་པས་ལམ་ཤེས་ཀྱི་བྱེད་ལས་བསྟན་ནོ། །དེ་ལྟར་ལྔ་ལས་དང་པོས་ལམ་ཤེས་དངོས་སུ་སྐྱེ་རུང་བ་ལ་གེགས་ང་རྒྱལ་མངོན་གྱུར་པས་མཚོན་པའི་ཉོན་མོངས་མངོན་གྱུར་པ་ཐམས་ཅད་བཅོམ་པ་ཅིག་དགོས་ཞེས་བསྟན་ནས་ཡོངས་གཅོད་ལ་སྦྱོར་ལམ་ཆོས་མཆོག་ཆེན་པོ་ལ་གནས་པའི་བྱང་སེམས་དེས་ང་རྒྱལ་མངོན་གྱུར་པས་མཚོན་པའི་ཉོན་མོངས་མངོན་གྱུར་པ་བཅོམ་པས་ལམ་ཤེས་དངོས་སུ་སྐྱེ་རུང་དུ་བསྟན། རྣམ་བཅད་ལ་འཇིག་རྟེན་པའི་ལམ་གྱིས་ཆགས་བྲལ་དེས་ཅི་ཡང་མེད་མན་ཆད་ཀྱི་ཉོན་མོངས་མངོན་གྱུར་པ་བཅོམ་ཀྱང་སྲིད་རྩེའི་ཉོན་མོངས་མངོན་གྱུར་པ་མ་བཅོམ་པས་ལམ་ཤེས་དངོས་སུ་སྐྱེ་མི་རུང་བར་བསྟན། འོ་ན་ཉོན་མོངས་མངོན་གྱུར་པ་བཅོམ་པ་ཐམས་ཅད་ལ་ལམ་ཤེས་དངོས་སུ་སྐྱེ་རུང་ངམ་སྙམ་ན་ཡུལ་ངེས་པ་དང་ཞེས་པས་དེའི་སྟེང་དུ་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་ཡོད་མེད་ཀྱི་བྱེ་བྲག་གིས་ལམ་ཤེས་དངོས་སུ་སྐྱེ་བའི་ཡུལ་སོ་སོར་ངེས་པ་བསྟན། འདིས་ཡོངས་གཅོད་ལ་ཆོས་མཆོག་ཆེན་པོ་ལ་གནས་པའི་བྱང་སེམས་ལ་གེགས་ང་རྒྱལ་མངོན་གྱུར་པ་བཅོམ་པའི་སྟེང་དུ་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་ཡང་ཡོད་པས་ལམ་ཤེས་དངོས་སུ་སྐྱེ་རུང་དུ་བསྟན་ནས། རྣམ་བཅད་ལ་ཉན་རང་དགྲ་བཅོམ་པས་ཉོན་མོངས་མ་ལུས་པར་སྤངས་ཀྱང་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་མེད་པས་ལམ་ཤེས་དངོས་སུ་སྐྱེ་མི་རུང་བར་བསྟན། འོ་ན་འཇིག་རྟེན་པའི་ལམ་གྱིས་ཅི་ཡང་མེད་མན་ཆད་ལ་ཆགས་བྲལ་བྱས་པ་དང་། ཉན་རང་དགྲ་བཅོམ་པའི་རྒྱུད་ལ་ལམ་ཤེས་གཏན་མི་སྐྱེའམ་སྙམ་ན་ཁྱབ་པ་དང་ཞེས་པས་དེ་གཉིས་ལ་ཡང་ལམ་ཤེས་སྐྱེ་བ་བསྟན་ཏེ། མཐར་ཐུག་ཐེག་པ་གཅིག་ཏུ་ངེས་པས་དེ་དག་གིས་ཀྱང་སྐབས་དང་པོར་བསྟན་པའི་རྣམ་མཁྱེན་དེ་ཐོབ་པར་བྱ་བའི་ཕྱིར་དུ་ལམ་ཤེས་བསྒོམ་དགོས་པའི་ཕྱིར་ཞེས་སྟོན། དེས་ན་ཁྱབ་པའི་དོན་ནི་རང་བཞིན་གནས་རིགས་ཀྱིས་ཁྱབ་པ་ལ་འཆད་པ་ནི་འཕགས་སེང་གཉིས་ཀྱི་གཞུང་དང་འགལ་ཞིང་། རྒྱུ་ལ་གསུམ་དུ་བྱས་ནས་ཉེར་ལེན་གྱི་རྒྱུ་ལ་འཆད་པ་ཡང་དེ་དང་དོན་གཅིག་པས་མི་འཐད་དེ། ཡན་ལག་སྔ་མ་གཉིས་ཀྱི་རྟེན་གྱི་གང་ཟག་དང་། འདིའི་རྟེན་གྱི་གང་ཟག་རྟེན་མི་གཅིག་པའི་ཕྱིར་རོ། །དེས་ན་སྔ་མ་གཉིས་ཀྱིས་དངོས་སུ་སྐྱེ་བའི་རྒྱུ་ཚོགས་བཤད་ནས་འདིས་ནི་དེ་དག་ལ་དོགས་པ་བཅད་པའི་སྒོ་ནས་དངོས་སུ་མི་སྐྱེ་བ་རྣམས་ལ་ཡང་བརྒྱུད་ནས་སྐྱེ་བའི་ཚུལ་སྟོན་པ་ཡིན་པས་ཤེས་ལྡན་དག་དཔྱོད་མཛོད་ཅིག འོ་ན་ལམ་ཤེས་དངོས་སུ་སྐྱེ་བ་ལ་ང་རྒྱལ་གྱིས་བསྡུས་པའི་ཉོན་མོངས་མངོན་གྱུར་པ་བཅོམ་དགོས་ན་ལམ་ཤེས་ཉིད་ཀྱིས་འདོད་སྲེད་ཀྱིས་བསྡུས་པའི་ཉོན་མོངས་ཆེད་དུ་གཉེར་ནས་སྤོང་ངམ་ཞེ་ན་དེའི་ལན་དུ་གཉིས་པ་རང་བཞིན་གྱི་ཡན་ལག་ནི་རང་བཞིན་དང་ཞེས་པས་ལམ་ཤེས་ཀྱིས་ཉོན་མོངས་ཆེད་དུ་གཉེར་ནས་མི་སྤོང་སྟེ། ཉོན་མོངས་པ་དེ་དག་གཞན་དོན་དུ་སྲིད་པར་སྐྱེ་བ་ལེན་པའི་རྒྱུར་དགོས་པས་ཉོན་མོངས་ཆེད་དུ་གཉེར་ནས་མི་སྤོང་བ་དེ་ལམ་ཤེས་ཀྱི་རང་བཞིན་ཡིན་པའི་ཕྱིར་རོ། །ཞེས་བསྟན་ཏོ། །འོ་ན་ཉོན་མོངས་དེ་གང་ཡིན་ཞེ་ན། འདི་ལ་ཁ་ཅིག ཉོན་མོངས་མཚན་ཉིད་པ་ལ་འདོད་པ་དང་། གཞན་དག་ཉོན་མོངས་པའི་བག་ཆགས་ལ་འདོད་པ་དང་། འགའ་ཞིག་དགེ་རྩ་དང་མཚུངས་ལྡན་གྱི་ཉོན་མོངས་པ་ལ་འདོད་པ་དང་གསུམ་ཡོད་པ་ལས། དང་པོ་ནི་ས་དང་པོ་ནས་ཉོན་མོངས་སྤངས་ཟིན་པས་བསལ་ལ། གཉིས་པ་ཡང་རྒྱུད་བླར་མཉམ་རྗེས་གཉིས་ཀྱིས་སྒྲིབ་པ་གཉིས་ཆེད་དུ་གཉེར་ནས་སྤོང་བའི་ཤེས་སྒྲིབ་ཀྱི་ངོས་འཛིན་ཉོན་མོངས་པའི་བག་ཆགས་ལ་མཛད་པས་ཆེད་དུ་གཉེར་ནས་མི་སྤོང་བ་འགལ་ལོ། །དེས་ན་སྔོན་གྱི་མཁས་པ་དུ་མ་དང་། མཁས་གྲུབ་གཡག་པས་གསུམ་པ་ཉིད་ལ་བཞེད་པ་ལྟར་འཐད་དེ། སྟོང་ཉིད་རྟོགས་པའི་ཤེས་རབ་ཀྱིས་ཟིན་ཅིང་། སེམས་ཅན་ལ་དམིགས་པའི་སྙིང་རྗེས་ཀུན་ནས་བསླངས་པས་བསམ་བཞིན་དུ་སྲིད་པར་གཞན་དོན་དུ་སྐྱེ་བ་ལེན་པར་འདོད་པའི་འདུན་པའམ་སྲེད་པ་ནི་སྐབས་འདིར་བསྟན་གྱི་མི་སྤོང་རྒྱུའི་དགེ་རྩ་དང་མཚུངས་ལྡན་གྱི་ཉོན་མོངས་ཡིན་ཞིང་། བློ་གྲོས་རྒྱ་མཚོས་ཞུས་པའི་མདོ་ལས། དགེ་རྩ་དང་མཚུངས་ལྡན་གྱི་ཉོན་མོངས་བརྒྱད་གསུངས་པའི་གཅིག་ཡིན་ནོ། །འདི་ལ་ཉོན་མོངས་པའི་མིང་གིས་འདོགས་པའི་རྒྱུ་མཚན། བཏགས་པའི་དགོས་པ། དངོས་ལ་གནོད་བྱེད། སྤང་བྱར་དོགས་པ་སྐྱེ་བའི་རྒྱུ་མཚན། གང་ཟག་གཞན་ལ་སྤང་བྱར་བསྟན་པ། དོགས་པའི་གནས་གཞན་དཔྱད་པ། ཤེས་བྱེད་ཀྱི་ལུང་དང་སྦྱར་བ་དང་བདུན་ལས། དང་པོ་ནི་ཉོན་མོངས་པས་ཁམས་གསུམ་དུ་སྦྱོར་བར་བྱེད་པ་ལྟར། འདིས་ཀྱང་བྱང་སེམས་ཁམས་གསུམ་དུ་སྦྱོར་བར་བྱེད་པའི་ཕྱིར་རོ། །གཉིས་པ་ནི་བྱང་ཆུབ་སེམས་དཔའི་ཐབས་མཁས་དེ་ཉན་ཐོས་ལས་ཁྱད་པར་དུ་འཕགས་པར་བསྟན་པའི་ཆེད་ཡིན་ཏེ། བྱང་ཆུབ་སེམས་དཔའི་ཐབས་མཁས་ཀྱིས་ཟིན་ན། ཉོན་མོངས་པ་མ་སྤངས་བཞིན་དུ་བྱང་ཆུབ་ཀྱི་ལམ་དུ་སྒྱུར་བར་བྱེད་པ་ཤེས་པའི་ཆེད་ཡིན་པའི་ཕྱིར་རོ། །གསུམ་པ་ནི་ཉོན་མོངས་མཚན་ཉིད་པ་མ་ཡིན་ཏེ། བྱང་ཆུབ་སེམས་དཔའི་རྒྱུད་ཀྱི་ཐབས་ཤེས་ཁྱད་པར་ཅན་གྱིས་ཟིན་པས་ཐེག་པ་ཆེན་པོའི་ལམ་དུ་བསྒྱུར་བ་ཡིན་པའི་ཕྱིར་དང་། ས་བརྒྱད་པའི་སྐབས་སུ་ཡོངས་སྦྱོང་གི་ཆོས་ཀྱི་ཡ་གྱལ་གཅིག་ཡིན་པའི་ཕྱིར་རོ། །བཞི་པ་ནི་འོ་ན་དེ་ལྟ་བུའི་ལམ་ཁྱད་པར་ཅན་དེ་སྤང་བྱ་ཡིན་ནམ་སྙམ་པའི་དོགས་པ་མེད་པས་ལམ་ཤེས་ཀྱིས་ཆེད་དུ་གཉེར་ནས་མི་སྤོང་ཞེས་སྨོས་པ་ལ་དགོས་པ་མེད་པར་འགྱུར་རོ་སྙམ་ན་མ་ཡིན་ཏེ། འཁོར་བ་མཐའ་དག་སྤང་བྱར་བསྟན་པའི་ཚེ་འཁོར་བར་སྐྱེ་བ་ལེན་པར་འདོད་པའི་བློ་དེ་སྤང་བྱར་བསྟན་ཟིན་པའི་ཕྱིར་རོ། །ལྔ་པ་ནི་དེ་སུ་ཞིག་གིས་སྤང་བྱར་བྱེད་པ་ཡིན་ཞེ་ན། ཉན་ཐོས་དང་རང་སངས་རྒྱས་ཀྱི་རིགས་ཅན་གྱིས་སྤང་བྱར་བྱེད་དེ། དེ་དག་ནི་འཁོར་བ་སྤངས་པའི་མྱ་ངན་ལས་འདས་པ་འབའ་ཞིག་དོན་དུ་གཉེར་བའི་ཕྱིར་རོ། །དྲུག་པ་ནི་འོ་ན་ཉན་ཐོས་དགྲ་བཅོམ་གྱིས་དེ་ལྟ་བུའི་སྲེད་པ་དེ་སྤངས་ཟིན་པས་ཐེག་ཆེན་ལམ་དུ་འཇུག་པའི་ཚེ་འཁོར་བར་སྐྱེ་བ་ལེན་པའི་རྒྱུ་མེད་པར་འགྱུར་རོ་ཞེ་ན། འདི་ནི་དཀའ་བའི་གནས་ཤིན་ཏུ་ཆེ་བས་ལུགས་འདི་ལ་མཐའ་ཆོད་པའི་བཤད་པ་དགོས་པར་སྣང་ཞིང་ཅིས་ཀྱང་བཤད་པར་ཞུ་ཞེས་གསོལ་ཞིང་བཤད་ན་འདི་ལ་སེམས་ཙམ་པ་རྣམས་ཀྱིས་ནི་སྲེད་པ་ལ་ཉོན་མོངས་པས་ཁྱབ་པས་ཉན་རང་དགྲ་བཅོམ་ཐེག་ཆེན་ལམ་དུ་འཇུག་པའི་ཚེ་བསམ་གཏན་ལ་བརྟེན་ནས་སྤྲུལ་པའི་ལུས་བསྒྲུབས་ཏེ། ལུས་དེ་ཉིད་ཀྱིས་བསྐལ་པ་གྲངས་མེད་གསུམ་དུ་གནས་ནས་རྫོགས་པའི་བྱང་ཆུབ་བསྒྲུབ་པར་བཞེད་དེ། རྒྱན་ལས། དོན་བྱས་མ་ཡིན་དེ་སངས་རྒྱས། །མེད་པར་སྐྱེས་ནས་སྤྲུལ་དོན་གཉེར། །བསམ་གཏན་དོན་བརྩོན་དེར་བསྟེན་ནས། །བྱང་ཆུབ་དམ་པ་ཐོབ་པར་འགྱུར། །ཞེས་སོ། །དབུ་མ་པས་ནི་ཉན་རང་དགྲ་བཅོམ་གྱིས་སྲེད་པ་ཉོན་མོངས་ཅན་སྤངས་ཀྱང་། ཉོན་མོངས་ཅན་མ་ཡིན་པའི་སྲེད་པ་ཡོད་པས། དེ་ཉིད་བྱང་ཆུབ་མཆོག་ཏུ་སེམས་བསྐྱེད་པའི་ཚེ་དགེ་རྩ་དང་མཚུངས་ལྡན་གྱི་ཉོན་མོངས་པར་གྱུར་ནས་དེའི་དབང་གིས་སྐྱེ་བ་ལེན་པར་བཞེད་དེ། སྤྱོད་འཇུག་ལས། ལྷག་མེད་མྱང་འདས་ལས་ལངས་ནས་འཁོར་བར་སྐྱེ་བ་ལེན་པའི་ཤེས་བྱེད་དུ། སྲེད་འདི་ཉོན་མོངས་ཅན་མིན་ཡང་། །ཀུན་རྨོངས་བཞིན་དུ་ཅི་སྟེ་མེད། །ཚོར་བའི་དབང་གིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །ཅེས་གསུངས་པའི་ཕྱིར་རོ། །མདོར་ན་ཉན་རང་སློབ་པས་རང་རྒྱུད་ཀྱི་འཁོར་བར་སྐྱེ་བ་ལེན་པར་འདོད་པའི་སྲེད་པ་དེ་ཆེད་དུ་གཉེར་ནས་སྤོང་ཞིང་བྱང་སེམས་འཕགས་པས་རང་རྒྱུད་ཀྱི་འཁོར་བར་སྐྱེ་བ་ལེན་པར་འདོད་པའི་བློ་དེ་ཆེད་དུ་གཉེར་ནས་མི་སྤོང་བ་ནི་རང་དོན་གཙོ་བོར་བྱེད་པ་དང་། གཞན་དོན་གཙོ་བོར་བྱེད་པའི་ཁྱད་པར་ཡིན་པས་སྐབས་འདིར་ཡང་དེ་སྦྱར་བར་བྱའོ། །བདུན་པ་ནི་དཀོན་བརྩེགས་སུ། ཇི་ལྟར་གྲོང་ཁྱེར་སྐྱེ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་སངས་རྒྱས་ཆོས་རྣམས་བསྐྱེད་ལ་ཕན། །ཞེས་དང་། ཡང་མདོ་ལས། ཐབས་ཆེན་དང་ནི་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བའང་ཞི་བའི་བདག་ཉིད་པས། །དེ་ཕྱིར་རྒྱལ་སྲས་བསམ་མི་ཁྱབ། །ཅེས་དང་། འདིའི་ཐད་ཀྱི་མདོ་ལས། ཇི་ལྟར་ཉན་ཐོས་ལ་སོགས་པའི་ལམ་རྣམས་ཀྱི་འབྲས་བུ་དང་། ལམ་གྱི་རྟོགས་པ་སོ་སོར་ངེས་པ་དེ་ལྟར་བྱང་ཆུབ་སེམས་དཔའི་ལམ་ཤེས་པ་ནི་མ་ཡིན་ཏེ། རྣམ་པ་ཐམས་ཅད་དུ་ཉོན་མོངས་པ་སྤོང་བ་མ་ཡིན་པའི་ཕྱིར་རོ། །ཞེས་དང་། ས་བརྒྱད་པའི་ཡོངས་སྦྱོང་གི་ཐད་ཀྱི་མདོར་སེམས་ཅན་རྣམས་ཇི་ལྟར་སྨིན་པར་འགྱུར་བ་དེ་ལྟར་ཆེད་དུ་བསམ་ཞིང་ལུས་ཡོངས་སུ་འཛིན་པའོ། །ཞེས་དང་། དེ་ཡི་དོན་བསྟན་བཅོས་ལས། བསམ་བཞིན་སྲིད་པ་ལེན་པ་དང་། །ཞེས་དང་། དེའི་འགྲེལ་པར། སེམས་ཅན་ཐམས་ཅད་ཀྱི་དོན་མཐོང་ནས་བློ་སྔོན་དུ་གཏང་བའི་སྐྱེ་བ་ཡོངས་སུ་འཛིན་པ་ཞེས་བྱ་བ་ཞེས་དང་། བག་ལ་ཉལ་ཀུན་འཇོམས་པ་དང་། །ཞེས་པའི་འགྲེལ་པར་ཉིར་སྣང་ལས། བག་ལ་ཉལ་ཐམས་ཅད་ནས་ཐམས་ཅད་དུ་མེད་པ་ནི། མ་རིག་པ་དང་། ལྟ་བའི་ཟག་པས་བསྡུས་པའི་བག་ལ་ཉལ་ཡིན་གྱི། བྱང་ཆུབ་སེམས་དཔའ་ནི་བསམ་བཞིན་དུ་སྲིད་པར་སྐྱེ་བ་ལེན་པའི་ཕྱིར། འདོད་པ་དང་། སྲིད་པའི་ཟག་པས་བསྡུས་པ་ནི་མ་ཡིན་ནོ། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། འཁོར་བའི་རྒྱུ་བྱེད་ལ་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་དེ་གང་ཞེ་ན། འདི་ལྟ་སྟེ། བསོད་ནམས་ཀྱི་ཚོགས་ཡོངས་སུ་བཙལ་བས་མི་ངོམས་པ་དང་། བསམ་བཞིན་དུ་སྲིད་པར་སྐྱེ་བ་ཡོངས་སུ་འཛིན་པ་དང་། སངས་རྒྱས་དང་ཕྲད་པར་སྨོན་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་མི་སྐྱོ་བ་དང་། དམ་པའི་ཆོས་ཡོངས་སུ་འཛིན་པ་ལ་བརྩོན་པ་དང་། སེམས་ཅན་གྱི་དོན་བྱ་བ་ཅི་ཡོད་སྙམ་པ་ལ་སྤྲོ་བ་དང་། ཆོས་འདོད་པའི་བག་ལ་ཉལ་མི་འདོར་བ་དང་། ཕ་རོལ་ཏུ་ཕྱིན་པ་ལ་སྦྱོར་བ་ཡོངས་སུ་མི་འདོར་བ་སྟེ། བློ་གྲོས་རྒྱ་མཚོ། གང་དག་གིས་བྱང་ཆུབ་སེམས་དཔའ་ཁམས་གསུམ་དུ་ཀུན་ཏུ་སྦྱོར་བར་བྱེད་ཀྱང་ཉོན་མོངས་པའི་སྐྱོན་གྱིས་མ་གོས་པའི་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་ནི་འདི་དག་གོ །བཅོམ་ལྡན་འདས་གང་གི་ཚེ་དགེ་བའི་རྩ་བ་ལགས་ན། དེ་རྒྱུ་ཅིའི་སླད་དུ་ཉོན་མོངས་པ་ཞེས་བགྱི། བཀའ་སྩལ་པ། བློ་གྲོས་རྒྱ་མཚོ་འདི་ལྟར་དེ་ལྟ་བུའི་རང་བཞིན་གྱི་ཉོན་མོངས་པ་འདི་དག་གིས་བྱང་སེམས་ཁམས་གསུམ་པོར་ཀུན་ཏུ་སྦྱོར་བར་བྱེད་ལ། ཁམས་གསུམ་པོ་ཡང་ཉོན་མོངས་པ་ལས་བྱུང་བ་ཡིན་ནོ། །དེ་ལ་བྱང་སེམས་ནི་ཐབས་མཁས་པ་དང་། དགེ་བའི་རྩ་བའི་སྟོབས་བསྐྱེད་པས་བསམ་བཞིན་དུ་ཁམས་གསུམ་ཀུན་ཏུ་སྦྱོར་ཏེ། དེས་ན་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་ཞེས་བྱའོ། །ཇི་སྲིད་ཁམས་གསུམ་པོར་ཀུན་ཏུ་སྦྱོར་བས་ཡིན་གྱིས་སེམས་ཉེ་བར་ཉོན་མོངས་པ་ནི་མ་ཡིན་ནོ། །བློ་གྲོས་རྒྱ་མཚོ་མཚམས་སྦྱོར་བ་ཐམས་ཅད་ལས་ཤིན་ཏུ་གྲོལ་བ་ཡང་སྲིད་པར་སྐྱེ་བ་ལེན་པ་གང་ཡིན་པ་འདི་ནི། བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་སྟེ་ཐབས་མཁས་པ་དང་། ཤེས་རབ་ཀྱིས་ཡོངས་སུ་ཟིན་པས་ཀུན་ནས་ཉོན་མོངས་པ་དག་གིས་ཀྱང་མི་གནོད་ལ་ཉོན་མོངས་པའི་འཆིང་བ་ཐམས་ཅད་ལས་གྲོལ་བར་བྱ་བའི་ཕྱིར། སེམས་ཅན་རྣམས་ལ་ཆོས་ཀྱང་སྟོན་ཏོ། །ཞེས་གསུངས་སོ། །འོ་ན་འཁོར་བར་སྐྱེ་བ་བླངས་པ་ལ་དགོས་པ་ཅི་ཡོད་ཅེ་ན། གསུམ་པ་བྱེད་ལས་ནི་དེའི་ལས་ཞེས་ཏེ་གཞན་དོན་བྱེད་པའི་དགོས་པ་ཡོད་དོ་ཞེས་བསྟན། གཞན་དོན་བྱེད་ན་ཡུལ་གང་ལ། ཚུལ་ཇི་ལྟར་ལམ་གང་ཞིག་བསྟན་པའི་སྒོ་ནས་བྱེད་ཅེ་ན། ཡུལ་ནི་རིགས་ཅན་གསུམ་ལའོ། །ཚུལ་ནི་སེམས་ཅན་འཁོར་དུ་མ་བསྡུས་པ་བསྡུས། བསྡུས་པ་སྨིན། སྨིན་པ་གྲོལ། གྲོལ་བ་མཐར་ཕྱིན་པར་བྱེད་པའི་ཚུལ་གྱིས་སོ། །དེ་ཡང་ལམ་དུ་མ་ཞུགས་པ་རྣམས་ཐེག་པ་གསུམ་གྱི་ཚོགས་ལམ་ལ་འགོད་པ་ནི་དང་པོ། ཚོགས་ལམ་པ་རྣམས་སྦྱོར་ལམ་ལ་འགོད་པ་ནི་གཉིས་པ། སྦྱོར་ལམ་པ་རྣམས་མཐོང་ལམ་ལ་འགོད་པ་ནི་གསུམ་པ། རིགས་ཅན་འོག་མ་གཉིས་དང་། གོང་མའི་མཐོང་ལམ་པ་རྣམས་སྒོམ་ལམ་ལ་འགོད། སྒོམ་ལམ་པ་རྣམས་མི་སློབ་ལམ་ལ་འགོད་པ་ནི་བཞི་པ་ཡིན་ལ་བྱང་སེམས་ཀྱི་རིགས་ཅན་རྣམས་རང་དང་རྟོགས་པ་མཉམ་པ་ཙམ་ལ་འགོད་ནུས་ཀྱི། རང་ལས་ལྷག་པ་ལ་འགོད་མི་ནུས་པས་དེ་ནི་བྱང་སེམས་གོང་མ་རྣམས་དང་སངས་རྒྱས་རྣམས་ཀྱི་མཛད་པ་ཡིན་ནོ། །ལམ་ནི་ཐེག་པ་གསུམ་གྱི་ལམ་བསྟན་པའི་སྒོ་ནས་གཞན་དོན་བྱེད་པས་དེ་ཉིད་ཡན་ལག་ཅན་གྱི་ལམ་ཤེས་ཀྱིས་སྟོན་པས་འདི་ལ་ཐོག་མར་ཉན་ཐོས་ཀྱི་ལམ་ཤེས་པའི་ལམ་ཤེས་ནི། ལམ་ཤེས་ཉིད་ཀྱི་ཚུལ་ལ་ནི། །ཞེས་སོགས་ཏེ། ལམ་ཤེས་དངོས་དང་། དེའི་རྒྱུ་ངེས་འབྱེད་ཆ་མཐུན་གཉིས་ལས། དང་པོ་ལ་ཤེས་བྱ་ཉན་ཐོས་ཀྱི་ལམ་དང་། དེ་ཇི་ལྟར་ཤེས་པའི་ཚུལ་གཉིས། དང་པོ་ལ་ཉན་ཐོས་རང་རྒྱུད་པའི་ལམ་ཁོ་ན་ལ་འདོད་པ་དང་། བྱང་སེམས་ཀྱི་རྒྱུད་ལ་ཡོད་པའི་རྟོགས་རིགས་ཁོ་ན་ལ་འདོད་པ་དང་། གཉིས་ཀ་ཡོད་པར་འདོད་པའི་ལུགས་གསུམ་ལས། དང་པོ་ནི། ལམ་ཐམས་ཅད་བསྐྱེད་པར་བྱ་ཞིང་། ཞེས་དང་། ཐེག་པ་ལ་གསུམ་ཆར་ཐོབ་པའི་རྒྱུ། །ཞེས་སོགས་གཞུང་ཕལ་ཆེར་དང་འགལ་བས་མི་འཐད་དོ། །གཉིས་པ་ནི་གཞུང་གི་དངོས་བསྟན་ཕལ་ཆེར་དེ་ལྟར་དུ་གནས་ཀྱང་བྱང་སེམས་འཕགས་པའི་རྒྱུད་ཀྱི་ཆོས་ཀྱི་སྤྱན་གྱིས་འཕགས་པའི་གང་ཟག་ཐམས་ཅད་ཀྱི་རྟོགས་པ་མཁྱེན་པར་གསུངས་པ་དང་། གཞན་སེམས་ཤེས་པའི་མངོན་ཤེས་ཀྱིས་རང་དང་རྒྱུད་ཚད་མཉམ་པ་མན་ཆད་ཀྱི་སེམས་འདོད་ཆགས་ཡོད་མེད་སོགས་ཇི་ལྟ་བ་བཞིན་དུ་མཁྱེན་པར་གསུངས་པ་རྣམས་ཀྱང་། ལམ་ཤེས་སུ་གྲུབ་པས་ཅུང་ཟད་མི་འཐད་དོ། །དེས་ན་ལུགས་གསུམ་པ་ཉིད་འཐད་པས་འདི་ལ་རང་རྒྱུད་ལ་ཉམས་སུ་མྱོང་བའི་སྒོ་ནས་ཤེས་པར་བྱ་བ་དང་། གཞན་རྒྱུད་ལ་ཡོད་པ་གཞན་རིག་གི་ཚུལ་གྱིས་ཤེས་པར་བྱ་བ་གཉིས་ལས་དང་པོ་ནི་ལམ་ཐམས་ཅད་བསྐྱེད་པར་བྱ་ཞིང་ཞེས་པའི་སྐབས་ཀྱི་བསྐྱེད་བྱའི་ཉན་ཐོས་ཀྱི་ལམ་དང་། སྐབས་གསུམ་པའི་མཐོང་ལམ་གྱི་ཐད་ཀྱི་མདོར། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ཤེས་པ་དང་མཐོང་བས་བལྟས་ནས་འདའོ། །ཞེས་པའི་འདའ་བར་བྱ་བའི་ལམ་དང་། ས་བཅུ་པའི་སའི་ཚོགས་ཀྱི་སྐབས་སུ། ས་དགུ་ལས་འདས་པར་གསུངས་པའི་ས་དང་པོ་བདུན་དང་། ལུས་རྣམ་གཞག་ཏུ། སློབ་མ་བསེ་རུའི་ལམ་གང་དང་། །ཞེས་པའི་སྐབས་ཀྱི་ལམ་དང་། འདིར་ཡང་འཕགས་པའི་བདེན་པ་བཞི་དག་གི །རྣམ་པ་ཞེས་དང་། ཉན་ཐོས་ལམ་འདི་ཞེས་པའི་སྐབས་ཀྱི་དངོས་བསྟན་གྱི་ལམ་རྣམས་སོ། །གཉིས་པ་ནི། སྔར་བཤད་པ་ལྟར་བྱང་འཕགས་ཀྱི་རྒྱུད་ཀྱི་ཆོས་ཀྱི་སྤྱན་དང་། གཞན་སེམས་ཤེས་པའི་མངོན་ཤེས་ཀྱིས་ཉན་ཐོས་རང་རྒྱུད་ལ་ཡོད་པ་རྟོགས་པའི་ལམ་རྣམས་དང་། ལམ་ཐམས་ཅད་བསྐྱེད་པར་བྱ་ཞིང་ཞེས་བཤད་པའི་འོག་ཏུ་ལམ་ཐམས་ཅད་ཤེས་པར་བྱའོ། །ཞེས་པ་འདིས་ཀྱང་ཤེས་པར་ནུས་ཏེ། བསྐྱེད་བྱའི་ལམ་ལས་ལོགས་སུ་གྱུར་པའི་ཤེས་བྱའི་ལམ་གཅིག་ཡོད་པ་བསྟན་པའི་ཕྱིར་རོ། །གཙོ་བོ་ནི་སྔ་མ་སྟེ་ཤེས་བྱ་རང་རྒྱལ་གྱི་ལམ་ལ་ཡང་དེ་བཞིན་དུ་སྦྱར་བར་བྱའོ། །འོ་ན་འཕགས་པའི་བདེན་པ་བཞིའི་རྣམ་པ་ཤེས་བྱ་ཉན་ཐོས་ཀྱི་ལམ་ཡིན་ན། རྣམ་པ་དུ་ཞིག་ཡོད་ཅེ་ན། ཤེར་ཕྱིན་གྱི་མདོ་ལས། མི་རྟག་པ་ལ་སོགས་པའི་རྣམ་པ་ཉེར་དྲུག་གསུངས་ཤིང་འདི་ཉིད་འཕགས་སེང་གཉིས་ཀྱིས་མངོན་པ་ནས་བཤད་པའི་མི་རྟག་ལ་སོགས་བཅུ་དྲུག་དང་སྦྱོར་བར་མཛད་དོ། །གཉིས་པ་དེ་ཇི་ལྟར་ཤེས་པའི་ཚུལ་ནི་མི་དམིགས་སྒོ་ནས་ནི། ཉན་ཐོས་ལམ་འདི་ཤེས་པར་བྱ། །ཞེས་ཏེ། དེ་ལྟ་བུའི་ཉན་ཐོས་ཀྱི་ལམ་གྱི་རྟོགས་རིགས་དེ་ཡང་ཐེག་ཆེན་ཐུན་མོང་མ་ཡིན་པའི་རྟོགས་རིགས་མི་དམིགས་པའི་རྣམ་པ་ཅན་གྱི་ཤེས་རབ་ཀྱིས་ཟིན་པའི་སྒོ་ནས་ཤེས་པར་བྱ་དགོས་སོ་ཞེས་བསྟན་ཏོ། །དེའི་རྣམ་གཅད་ལ་བྱང་འཕགས་ཀྱི་རྒྱུད་ལ། འདི་ནི་ཉན་ཐོས་ཀྱི་ལམ་གྱི་དམིགས་པའོ། །འདི་ནི་རྣམ་པའོ་སྙམ་དུ་མངོན་པར་ཞེན་པ་ཅན་གྱི་བློ་སྐྱེ་སྲིད་པས་དེ་ཉན་ཐོས་ཀྱི་ལམ་ཤེས་པའི་ལམ་ཤེས་མ་ཡིན་པར་བསྟན་ཏེ། མཚན་འཛིན་གྱིས་བར་ཆད་ཀྱི་གནས་སྐབས་ཡིན་པའི་ཕྱིར་རོ། །འདི་ནི་ལམ་ཤེས་ཡིན་ན། རྣལ་འབྱོར་མངོན་སུམ་ཡིན་པས་ཁྱབ་པའི་སྒྲུབ་བྱེད་ཀྱི་གཙོ་བོའོ། །དེ་ལྟར་བྱས་ན་མི་དམིགས་པའི་རྣམ་པས་མ་ཟིན་པར་མངོན་ཞེན་ཅན་གྱི་གནས་སྐབས་ཀྱི་བྱང་འཕགས་ཀྱི་རྒྱུད་ཀྱི་ཉན་ཐོས་ཀྱི་རྟོགས་རིགས་དེ་ཤེས་བྱ་ཉན་ཐོས་ཀྱི་ལམ་ཡིན་ཀྱང་། ཉན་ཐོས་ཀྱི་ལམ་ཤེས་པའི་ལམ་ཤེས་མ་ཡིན་གྱི། མི་དམིགས་པའི་རྣམ་པས་ཟིན་པ་ནི་གཉིས་ཀ་ཡིན་པར་གྲུབ་བོ། །འོན་ཀྱང་ལྡོག་པ་མི་འདྲ་བའི་ཁྱད་པར་ཡོད་དེ། བློ་གཅིག་གི་སྟེང་གི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཤེས་བྱའི་ལམ་དང་། མི་དམིགས་པའི་རྣམ་པ་ཅན་དེ་ཡུལ་ཅན་ལམ་ཤེས་སུ་འཇོག་པའི་ཕྱིར་རོ། །འདི་ལ་དགོངས་ནས་ལུས་རྣམ་གཞག་ཏུ། སློབ་མ་བསེ་རུའི་ལམ་གང་དང་། །ཞེས་པས་ཤེས་བྱའི་ལམ་གཉིས་དང་། འདི་དང་གཞན་པའི་ཡོན་ཏན་གྱི། །ཞེས་པ་ནས། བྱ་བ་འདི་ནི་སྒོམ་པའི་ལམ། །ཞེས་པའི་བར་གྱིས་ཤེས་བྱ་བྱང་སེམས་ཀྱི་ལམ་ངོས་བཟུང་ནས། ལམ་གསུམ་པོ་དེ་ཉིད་ལ། ལམ་ཤེས་ཉིད་ནི་དེ་འདྲར་བཤད། །ཅེས་གསུངས་ཤིང་། ཡན་ལག་རྒྱས་བཤད་དུ་མི་དམིགས་པའི་སྒོ་ནས་ཤེས་པ་དེ་ཉིད་ལམ་ཤེས་སུ་གསུངས་པ་ཡིན་ནོ། །གཉིས་པ་དེའི་རྒྱུ་ངེས་འབྱེད་ཆ་མཐུན་ནི། འཕགས་པ་ཉན་ཐོས་ལམ་ལ་ནི། །ཞེས་སོགས་ཏེ། ཉན་ཐོས་ཀྱི་རྟོགས་རིགས་དེ་ཉིད་དོན་སྤྱིའི་ཚུལ་གྱིས་ཤེས་པ་ཙམ་གྱིས་གཞན་ལ་ཕྱིན་ཅི་མ་ལོག་པར་འཆད་མི་ནུས་པས་མངོན་སུམ་དུ་ཤེས་དགོས་ལ། དེ་ལ་སྦྱོར་ལམ་དུ་རྒྱུན་ལྡན་དུ་བསྒོམ་དགོས་པས་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ཉན་ཐོས་ཀྱི་རྟོགས་རིགས་མི་དམིགས་པའི་སྒོ་ནས་སྒོམ་པར་བྱེད་པའི་བྱང་སེམས་ཀྱི་སྦྱོར་ལམ་བསྟན་ནོ། །གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་ལ། ལམ་ཤེས་དངོས་དང་། དེའི་རྒྱུ་ངེས་འབྱེད་ཆ་མཐུན་གཉིས་ལས། དང་པོ་ནི། རང་བྱུང་བདག་ཉིད་རྟོགས་པའི་ཕྱིར། །ཞེས་སོགས་ཚིགས་བཅད་གསུམ་སྟེ། ཉན་ཐོས་ཀྱི་མི་སློབ་ལམ་དང་། རང་རྒྱལ་གྱི་མི་སློབ་ལམ་ལ་ཁྱད་པར་མེད་ན་དེ་གཉིས་ཀྱི་སློབ་ལམ་ལ་ཡང་ཁྱད་པར་མེད་པར་འགྱུར་བས་ཉན་ཐོས་ཀྱི་ལམ་ཤེས་པའི་ལམ་ཤེས་ལས་ལོགས་སུ་རང་རྒྱལ་གྱི་ལམ་ཤེས་པའི་ལམ་ཤེས་བསྟན་པ་དོན་མེད་པར་འགྱུར་ཞིང་། མི་སློབ་ལམ་ཉིད་ལ་ཁྱད་པར་ཡོད་ན་ཁྱད་པར་ཇི་ལྟ་བུ་ཞེ་ན། བསེ་རུ་ལྟ་བུའི་རང་སངས་རྒྱས་ཀྱི་ཡེ་ཤེས་ཆོས་ཅན། ཉན་ཐོས་ཀྱི་མི་སློབ་ལམ་ལས་ཁྱད་པར་འཕགས་ཏེ། ལམ་བགྲོད་ཚུལ་དང་ཆོས་སྟོན་ཚུལ་གྱི་སྒོ་ནས་ཁྱད་པར་འཕགས་པ་ཡིན་པའི་ཕྱིར། དང་པོ་གྲུབ་སྟེ། འདོད་ཁམས་སུ་སྲིད་པ་ཐ་མ་པའི་རྟེན་ལ་སློབ་དཔོན་གྱིས་གདམས་ངག་བསྟན་པ་ལ་མི་ལྟོས་པར་རང་བྱུང་གི་བྱང་ཆུབ་མངོན་དུ་བྱས་པའི་ཕྱིར། གཉིས་པ་གྲུབ་སྟེ། སངས་རྒྱས་དང་ཉན་ཐོས་མི་བཞུགས་པའི་ཞིང་ཁམས་སུ་རང་གི་གདུལ་བྱ་ལ་སྒྲ་མེད་ལུས་ཀྱི་རྣམ་འགྱུར་གྱི་སྒོ་ནས་ཆོས་སྟོན་པའི་བདག་རྐྱེན་བྱེད་པའི་མཁྱེན་པ་ཡིན་པའི་ཕྱིར། ཞེས་པ་ནི་རང་བྱུང་བདག་ཉིད་རྟོགས་པའི་ཕྱིར་ཞེས་སོགས་ཀྱིས་བསྟན། འདིར་བསེ་རུ་ལྟ་བུའི་ཡེ་ཤེས་ནི་ཞེས་མི་སློབ་ལམ་གྱི་ཁྱད་ཆོས་ངོས་གཟུང་བའི་སྐབས་ཡིན་པ་མ་རྟོགས་པ་དག་གིས་རང་རྒྱལ་སྒོམ་ལམ་པ་དང་། རང་རྒྱལ་གྱི་རིགས་ཅན་སྒོམ་ལམ་པ་ཆོས་ཅན་དུ་བཟུང་ནས་ཁྱད་པར་གྱི་ཆོས་གཉིས་པོ་བརྩི་བ་ནི་སེང་གེའི་གཞུང་མིག་གིས་མ་བལྟས་པར་རི་བོང་གི་ཅལ་རྣ་བས་ཉན་པའི་སྐྱོན་ཡིན་ནོ། །ཆོས་སྟོན་ཚུལ་ལ་རྩོད་པ་སྤོང་བ་ནི། གང་གང་དོན་ནི་གང་གང་ལ། །ཞེས་སོགས་ཀྱིས་སྟོན་ཏོ། །དེ་ལྟར་མི་སློབ་ལམ་ལ་ཁྱད་པར་ཡོད་པས་སློབ་ལམ་ལ་ཡང་ཁྱད་པར་ཡོད་པར་གྲུབ་སྟེ། འབྲས་བུའི་ཁྱད་པར་ནི་རྒྱུའི་ཁྱད་པར་ལས་འབྱུང་བའི་ཕྱིར་རོ། །སློབ་ལམ་གྱི་ཁྱད་པར་གང་ཞེ་ན། གཟུང་དོན་རྟོག་པ་སྤོང་ཕྱིར་དང་། །ཞེས་སོགས་ཏེ། འདི་ལ་མདོ་ལས་གསུངས་པའི་ཚུལ། སྔོན་གྱི་མཁས་པ་རྣམས་ཀྱིས་བཀྲལ་བའི་ཚུལ། གནད་ཀྱི་དོན་ངོས་གཟུང་བ། དོགས་པའི་གནས་གཞན་དཔྱད་པ་དང་བཞི་ལས། དང་པོ་ནི་མདོ་ལས། ལྷའི་བུ་དག་གཟུགས་ནི་ཟབ་པ་མ་ཡིན། ཕྲ་བ་མ་ཡིན་ནོ། །ཅིའི་ཕྱིར་ཞེ་ན། གཟུགས་ཀྱི་རང་བཞིན་ཟབ་པ་མ་ཡིན། ཕྲ་བ་མ་ཡིན་པའི་ཕྱིར་རོ། །ཞེས་སོགས་རྣམ་མཁྱེན་གྱི་བར་ལ་སྦྱར་ཏེ་གསུངས་པས་གཟུང་རྟོག་སྤོང་བའི་ཁྱད་པར་བསྟན། གནས་བརྟན་རབ་འབྱོར་ལ་ཆོས་ཉན་པ་ནི་ཇི་ལྟར་བུར་བཙལ་བར་བྱ། ཞེས་པའི་ལན་དུ་ལྷའི་བུ་དག་གཟུགས་ཀྱང་སྒྱུ་མ་ལྟ་བུ་རྨི་ལམ་ལྟ་བུ་ཞེས་པ་ནས་ཡང་དག་པར་རྫོགས་པའི་སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུའོ། །ཞེས་པའི་བར་གྱིས་འཛིན་རྟོག་མི་སྤོང་བའི་ཁྱད་པར་བསྟན། ཡུམ་འདི་ལེན་པར་བྱེད་པ་སུ་དག་འབྱུང་བར་འགྱུར་ཞེས་པའི་ལན་དུ་ཕྱིར་མི་ལྡོག་པའི་བྱང་སེམས་ཆེན་པོ་རྣམས་སམ། བདེན་པ་མཐོང་བའི་གང་ཟག་གམ། དགྲ་བཅོམ་པ་ཟག་པ་ཟད་པ་བསམ་པ་ཡོངས་སུ་རྫོགས་པའམ། སྔོན་གྱི་རྒྱལ་བ་ལ་བྱ་བ་བྱས་པའམ། སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་དག་གམ། དགེ་བའི་བཤེས་གཉེན་གྱིས་ཡོངས་སུ་ཟིན་པ་དག་གིས་ལེན་པར་འགྱུར་ཞེས་དྲུག་གསུངས་ཤིང་། བརྒྱད་སྟོང་པ་ལས། ཕྱིར་མི་ལྡོག་པའི་བྱང་སེམས་ཆེན་པོ་དང་། ལྟ་བ་ཕུན་སུམ་ཚོགས་པ་དང་། དགྲ་བཅོམ་པ་ཟག་པ་ཟད་པ་གསུམ་གསུངས་ལ། མདོ་སྡུད་པ་ལས། གང་ཟག་བཞི་པོ་འདི་དག་དེ་ལ་མི་སྐྲག་སྟེ། །རྒྱལ་སྲས་བདེན་ལ་མཁས་དང་ཕྱིར་མི་ཟློག་པ་དང་། །དགྲ་བཅོམ་དྲི་མ་བསལ་ཞིང་སོམ་ཉི་སྤངས་པ་དང་། །བཞི་པ་དགེ་བའི་བཤེས་ཀྱིས་ཡོངས་སུ་ཟིན་པའོ། །ཞེས་བཞི་གསུངས་པ་དང་། སྤྲུལ་པའི་མེ་ཏོག་མ་སྐྱེས་པར་བསྟན་པའི་སྐབས་རྣམས་ཀྱིས་ནི་རྟེན་གྱི་ཁྱད་པར་བསྟན་ནོ། །གཉིས་པ་ནི་མདོ་དང་པོས། ལམ་ཤེས་ཀྱི་འཁོར་གྱི་ལྷའི་བུ་རྣམས་ཀྱིས་ཤེས་པ་ཟབ་པ་དང་། མ་བརྗོད་པ་ཟབ་པ་གཉིས་ཀྱི་རང་བཞིན་ཟབ་པ་དང་ཕྲ་བར་རྟོགས་ཀྱང་ཕྱི་རོལ་གྱི་དོན་བདེན་མེད་དུ་མ་རྟོགས་པས་ཕྱི་རོལ་གྱི་དོན་དགག་པའི་ཕྱིར་ཟབ་པ་དང་ཕྲ་བ་འགོག་པ་བསྟན་ཞེས་འབྲེ་ཆེན་པོ་བཞེད་དོ། །མདོ་གཉིས་པས། འཛིན་པའི་རྣམ་པར་རྟོག་པ་མ་སྤངས་པར་ནི་རྟོགས་པ་དེ་ལྟ་བུ་མི་སྲིད་དོ་སྙམ་ནས་ལྷའི་བུ་རྣམས་གནས་བརྟན་རབ་འབྱོར་ལས་ཆོས་ཉན་པ་ཇི་ལྟ་བུར་བཙལ་བར་བྱ་སྙམ་པ་དང་། བདག་ལ་ཆོས་ཉན་པ་ནི་སྒྱུ་མ་ལྟ་བུ་དང་། སྤྲུལ་པ་ལྟ་བུར་བཙལ་བར་བྱ་སྟེ། ཞེས་བསྟན་པར་གཞོན་ནུ་ཚུལ་ཁྲིམས་བཞེད་དོ། །མདོ་གསུམ་པའི་དོན་ལ། ཉིར་སྣང་ལས། གང་ཟག་སོ་སོ་ལ་སྦྱར་བའི་གསལ་ཀ་མི་སྣང་ཞིང་། འགྲེལ་ཆེན་ནས། ཕྱིར་མི་ལྡོག་པ་ཞེས་བྱ་བ་ནི་ངེས་པར་འབྱེད་པའི་ཆ་རྟོགས་པས་རང་བྱང་ཆུབ་ལས་ཕྱིར་མི་ལྡོག་པའོ། །དེ་ཉིད་ནི་རང་གི་བྱང་ཆུབ་མངོན་པར་འདོད་པ་ཡིན་པས་ན་བྱང་ཆུབ་སེམས་དཔའོ། །ལུས་ཀྱིས་ཆོས་སྟོན་པས་སངས་རྒྱས་མི་འབྱུང་བའི་ཞིང་དུ་སེམས་ཅན་རྣམས་ཀྱི་དོན་བྱེད་པའི་བསམ་པ་དང་ལྡན་པས་ན་སེམས་དཔའ་ཆེན་པོའོ། །ལྟ་བ་ཕུན་སུམ་ཚོགས་པ་ཞེས་བྱ་བ་ནི་ཤེས་རབ་ཀྱི་ལྟ་བ་བར་པ་དང་ཡང་དག་པར་ལྡན་པའོ། །དགྲ་བཅོམ་པ་ཟག་པ་ཟད་པ་ཞེས་བྱ་བ་ནི་རང་གི་མཐོང་བའི་ལམ་གྱི་སྒྲིབ་པ་སྤངས་པས་ན་མཆོད་པར་འོས་པའོ། །ཚིག་འདི་གསུམ་གྱིས་ནི་རང་བྱང་ཆུབ་ལ་གོ་རིམ་བཞིན་དུ་ཡང་དག་པར་སྒྲུབ་པའི་རིགས་དང་། ཆོས་ཉིད་ཀྱིས་ཐོབ་པའི་རིགས་དང་། དེ་ཉིད་ལ་ངེས་པའི་རིགས་ཀྱི་གང་ཟག་ཅེས་བཤད་དོ། །སམ་ཞེས་བྱ་བའི་སྒྲ་ནི་ཐམས་ཅད་དུ་ཕན་ཚུན་གྱི་རྣམ་པར་རྟོགས་པ་ལ་ལྟོས་པ་ཡིན་པར་བལྟ་བར་བྱའོ། །ཞེས་གསུངས་སོ། །སྡུད་པའི་འགྲེལ་པར་ཤེས་རབ་འབྲིང་གི་ལྟ་བ་དང་ལྡན་པས་ཀུན་རྫོབ་དང་དོན་དམ་པའི་དབྱེ་བ་ཡོངས་སུ་ཤེས་པའི་མཁས་པ་ནི་རྒྱལ་སྲས་སོ། །དང་པོར་ངེས་པར་འབྱེད་པའི་ཆ་དང་མཐུན་པ་ཐོབ་པ་ཉིད་ཀྱིས་རང་སངས་རྒྱས་ཀྱི་བྱང་ཆུབ་འཐོབ་པར་ངེས་པ་ནི་ཕྱིར་མི་ལྡོག་པ་སྟེ་གཉིས་པའོ། །ཐམས་ཅད་ཀྱིས་མཆོད་པར་འོས་པས་ན་དགྲ་བཅོམ་པ་སྟེ། མཐོང་བའི་ལམ་ལ་སོགས་པ་དེ་ཉིད་ཀྱིས་གཟུང་བའི་རྣམ་པར་རྟོག་པ་སྤངས་པས་རིམ་པ་ཇི་ལྟ་བ་བཞིན་དུ་དྲི་མ་བསལ་བ་དང་། དེ་ཉིད་ཀྱིས་ཆོས་ཉིད་མངོན་སུམ་དུ་བྱས་པས་ཐེ་ཚོམ་མེད་པའི་ཕྱིར་རོ། །ཐེ་ཚོམ་སྤངས་པ་ནི་གསུམ་པའོ། །དགེ་བའི་བཤེས་གཉེན་གྱིས་ཡོངས་སུ་བཟུང་བ་ནི་བཞི་པའོ། །གང་ཟག་བཞི་པོ་དེ་དག་རང་སངས་རྒྱས་ཀྱི་རིགས་ཅན་ཡིན་པའི་ཕྱིར་འདི་ལ་སྐྲག་པར་མི་འགྱུར་རོ། །ཞེས་གསུངས་སོ། །ཡེ་ཤེས་ཞབས་ཀྱིས་བདེན་པ་མཐོང་བ་མཐོང་ལམ་པ་ལ་བཤད། ཨར་གྱིས་བདེན་པ་མཐོང་བ་ཚོགས་ལམ་པ། ཕྱིར་མི་ལྡོག་པ་སྦྱོར་ལམ་པ། དགྲ་བཅོམ་པ་མཐོང་ལམ་པ་ལ་བཤད་དོ། །གཞོན་ནུ་ཚུལ་ཁྲིམས་ཀྱིས་བརྒྱ་བྱིན་གྱིས་སྤྲུལ་པའི་མེ་ཏོག་གི་རྣམ་པ་ཉེ་བར་བཀོད་པས། དེ་དག་རབ་འབྱོར་གྱིས་ལྷ་ཡུལ་ལ་སོགས་པ་ན་མ་མཐོང་ཞིང་། ངས་མ་མཐོང་བའི་ས་ནས་ཁྱེར་འོང་བའི་ནུས་པ་ཡང་བརྒྱ་བྱིན་ལ་མེད་པར་བསམས་ནས་ལྷའི་དབང་པོས་གཏོར་བའི་མེ་ཏོག་འདི་དག་ནི་ཤིང་ལ་སོགས་པ་ལས་སྐྱེས་པ་མ་ཡིན་གྱི་ཡིད་ཀྱིས་སྤྲུལ་པའོ་སྙམ་པ་དང་། ཞེས་པས་ཕྱི་དོན་དུ་གྲུབ་པ་བཀག་གོ །རབ་འབྱོར་གྱི་རྟོག་པ་བརྒྱ་བྱིན་གྱིས་ཤེས་ནས་གནས་བརྟན་རབ་འབྱོར་ཡིད་ལས་བྱུང་བའི་མེ་ཏོག་ནི་གང་ཡང་མེད་དོ། །མེ་ཏོག་འདི་དག་ནི་མ་སྐྱེས་པའོ། །ཞེས་པས་ནང་སེམས་སུ་གྲུབ་པ་བཀག་གོ །འཁོར་ཁ་ཅིག་གི་རྟོག་པ་ལ་མེ་ཏོག་མཆོད་པའི་བྱ་བ་བྱེད་པར་མཐོང་བས་འདི་དག་མེད་པར་ནི་མི་འཐད་ཅིང་། ཕྱི་ནང་དུ་བདེན་པ་ཡང་སྔར་བཀག་པས་མ་སྐྱེས་པའི་རང་བཞིན་དུ་སྔ་ནས་གནས་པ་བདེན་ནམ་སྙམ་པ་ལ། རབ་འབྱོར་གྱིས་གང་མ་སྐྱེས་པ་དེ་ནི་མེ་ཏོག་ཀྱང་མ་ཡིན་ནོ། །ཞེས་མེ་ཏོག་ཀྱང་བདེན་པ་བཀག་གོ །དོན་ནི་མེ་ཏོག་དེ་དག་ཕྱི་དང་ནང་དང་། མ་སྐྱེས་པའི་རང་བཞིན་དུ་བདེན་པར་མ་གྲུབ་ཀྱང་སངས་རྒྱས་འཁོར་བཅས་ལ་མཆོད་པའི་བྱ་བ་བྱེད་པ་བཞིན་དུ་གཟུང་བ་རང་བཞིན་མེད་པར་རྟོགས་པའི་རྟེན་ཆོས་ཉིད་ཀྱང་ཕྱི་དང་། ནང་དང་མ་སྐྱེས་པར་བདེན་པར་མ་གྲུབ་ཀྱང་། རང་རྒྱལ་གྱི་ལམ་གྱི་རྟེན་བྱེད་དོ། །ཅེས་རྟེན་ཆོས་ཉིད་བསྟན་ནོ། །ཞེས་བཤད་དོ། །གསུམ་པ་ནི། ཁྱད་པར་གསུམ་པོ་འདི་དག་རང་རྒྱལ་རང་རྒྱུད་པའི་ལམ་གྱི་ཁྱད་ཆོས་སུ་བྱེད་དམ། བྱང་སེམས་ཀྱི་རྒྱུད་ལ་ཡོད་པའི་རྟོགས་རིགས་ཀྱི་ཁྱད་ཆོས་སུ་བྱེད་ཅེ་ན། མདོ་དང་བསྟན་བཅོས་ཀྱི་དངོས་བསྟན་ནི་ཕྱི་མ་ལྟར་ཡིན་ཏེ། གོང་གི་ཤེས་བྱ་ཉན་ཐོས་ཀྱི་ལམ་དེ་སྦྱོར་བ་སེམས་བསྐྱེད་དང་། དངོས་གཞི་མི་དམིགས་པར་རྟོགས་པའི་ཤེས་རབ་དང་། རྗེས་བསྔོ་བ་གསུམ་གྱིས་ཟིན་པའི་སྒོ་ནས་བཤད་པས་བྱང་སེམས་ཀྱི་རྒྱུད་ཀྱི་རྟོགས་རིགས་ལ་འཇོག་དགོས་ཤིང་དེ་དང་རྒྱུ་མཚན་མཚུངས་པའི་ཕྱིར་དང་། འདིར་རྟེན་གྱི་ཁྱད་པར་འཆད་པའི་སྐབས་སུ་ཡང་བྱང་སེམས་དང་རྒྱལ་སྲས་ཀྱི་ལྡོག་པ་ནས་བཤད་པའི་ཕྱིར་དང་། སྐབས་དེར་སྒོམ་ལམ་མ་བཤད་པའི་གནད་ཀྱང་རྟོགས་རིགས་དེ་བྱང་སེམས་ཀྱི་སྒོམ་ལམ་དུ་གོམས་པར་མི་བྱེད་པའི་དོན་ཡིན་པའི་ཕྱིར་དང་། གཞན་དུ་ན་རང་རྒྱལ་གྱི་སྒོམ་ལམ་ལ་ཡང་ཁྱད་ཆོས་གསུམ་པོ་དེ་ཡོད་པས་སྒོམ་ལམ་པ་ཡང་འཆད་དགོས་པར་ཐལ་བའི་ཕྱིར་རོ། །བཞི་པ་ནི་སློབ་དཔོན་གྱི་འགྲེལ་པ་ཆེ་ཆུང་གཉིས་ལས། རང་བྱང་ཆུབ་ལས་ཕྱིར་མི་ལྡོག་པ་ཞེས་དང་། ཤེས་རབ་ཀྱི་དབང་པོ་བར་མ་དང་ལྡན་པ་ཞེས་བཤད་པས་རང་རྒྱལ་རང་རྒྱུད་པའི་ལམ་གྱི་ཁྱད་ཆོས་སུ་འཇོག་དགོས་སོ་སྙམ་ན་དེ་ནི་རྟོགས་རིགས་ཀྱི་དབང་དུ་བྱས་པར་གཡག་རོང་གཉིས་བཞེད་པ་ལྟར་འཐད་དེ། ཐེག་པ་གསུམ་ཆར་ཐོབ་པའི་རྒྱུ། །ཞེས་རྟོགས་རིགས་ཐོབ་པ་ལ་ཐེག་པ་དེ་ཐོབ་པར་བཤད་པའི་ཕྱིར། བོད་རྣམས་ཕྱིར་མི་ལྡོག་པའི་བྱང་སེམས་ཆེན་པོ་རྣམས་སམ་ཞེས་སོགས་ཀྱིས་ལམ་པ་གང་ཟག་གི་རྟེན་དང་མེ་ཏོག་འདི་དག་ནི་སྤྲུལ་པའོ་ཞེས་སོགས་ཀྱིས་ཆོས་ཉིད་རིགས་ཀྱི་རྟེན་བསྟན་པར་བཞེད་ཀྱང་སྔ་མས་གང་ཟག་དེ་དག་གི་རྒྱུད་ཀྱི་ཆོས་ཉིད་དེ་རང་རྒྱལ་གྱི་རྟོགས་རིགས་ཀྱི་ཆོས་ཉིད་རིགས་ཀྱི་རྟེན་དང་། ཕྱི་མས་ཆོས་ཉིད་ཡིན་ཀྱང་རྟེན་དུ་རུང་བའི་སྒྲུབ་བྱེད་སྟོན་པ་ཉིར་སྣང་གི་དགོངས་པར་སྣང་སྟེ། དེ་ཉིད་དུ། རྟོགས་པའི་རྟེན་རིགས་ཀྱི་དབང་དུ་མཛད་ནས་གསུངས་པ་ནི་ཕྱིར་མི་ལྡོག་པའི་བྱང་སེམས་ཆེན་པོ་ལ་སོགས་པ་ཞེས་སོགས་དང་། དངོས་པོར་གྱུར་པའི་རྟེན་མེད་པར་རྟོགས་པའི་ཆོས་ཐོབ་པར་སྟོན་པར་བྱེད་པ་སྤྲུལ་པའི་མེ་ཏོག་གི་རྣམ་པ་ཉེ་བར་དགོད་པ་དང་ཞེས་གསུངས་པའི་ཕྱིར་རོ། །རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ནི་བོད་དག་གཟུང་བ་ཕྱི་རོལ་གྱི་དོན་ལ་བདེན་པར་འཛིན་པའི་བདེན་འཛིན་ཁོ་ན་ལ་འདོད་པ་ནི། གཞི་ཤེས་ཀྱིས་བསྡུས་པའི་ལམ་བདེན་གྱི་རྣམ་པ་ཕྱི་མ་བཅུ་གཅིག་རང་སངས་རྒྱས་ཀྱི་རྟོགས་རིགས་ཡིན་པའི་དོན་མ་རྟོགས་ཤིང་། སྐབས་དང་པོར་བསྟན་པའི་གཟུང་རྟོག་གཉིས་ལ་རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་མེད་པའི་ལུགས་སུ་སྣང་བས་སྔར་བཀག་ཟིན་ཞིང་ཤེར་སྒྲོན་དུ། ཇི་སྐད་བཤད་པའི་བདེན་པ་སྒོམ་པ་ཁོ་ན་དང་། དོན་ཇི་ལྟ་བ་བཞིན་དུ་རྟེན་ཅིང་འབྲེལ་བར་འབྱུང་བ་བསྒོམ་པས་གཟུང་བའི་དོན་གྱི་རྣམ་པར་རྟོག་པ་སྤངས་ཏེ། མ་རིག་པ་དང་། ཕུང་པོ་དང་། བདག་ལ་སོགས་པ་ལ་མངོན་པར་ཞེན་པ་རབ་ཏུ་སྤངས་པ་ཉིད་དེ། ཞེས་གསུངས་པ་ཡང་མ་མཐོང་བར་ཟད་དོ། །གཉིས་པ་དེའི་རྒྱུ་ངེས་འབྱེད་ཆ་མཐུན་ནི། བཏགས་པའི་ཆོས་ཉིད་མི་འགལ་བར། །ཞེས་སོགས་ཏེ། རང་རྒྱལ་ལམ་གྱི་རྟོགས་རིགས་དེ་ཡང་དོན་སྤྱིའི་ཚུལ་གྱིས་ཤེས་པ་ཙམ་གྱི་གཞན་ལ་ཕྱིན་ཅི་མ་ལོག་པར་འཆད་པར་མི་ནུས་པས་མངོན་སུམ་དུ་ཤེས་དགོས་ལ། དེ་ལ་ཡང་སྦྱོར་ལམ་གྱི་གནས་སྐབས་སུ་རྒྱུན་ལྡན་དུ་བསྒོམ་དགོས་པས་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་རང་རྒྱལ་གྱི་ལམ་གྱི་རྟོགས་རིགས་རྒྱུན་ལྡན་དུ་སྒོམ་པའི་བྱང་སེམས་ཀྱི་སྦྱོར་ལམ་བསྟན་ནོ། །འགྲེལ་ཆེན་དུ། བྱང་སེམས་ཀྱི་སྦྱོར་ལམ་སྐབས་དང་པོར་ཁ་འཕངས་པ་ནི་ལམ་ཤེས་གསུམ་གྱི་ནང་ནས་བྱང་སེམས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཁ་འཕངས་པ་ཡིན་པས། སྐབས་འདིར་ལམ་ཤེས་དང་པོ་གཉིས་ཀྱི་སྐབས་སུ་ངེས་འབྱེད་ཆ་མཐུན་གསུངས་པ་ནི་རྟོགས་རིགས་འོག་མ་གཉིས་བསྒོམ་པའི་བྱང་སེམས་ནི་སྦྱོར་ལམ་ཡིན་པ་དང་། ལམ་ཤེས་ཕྱི་མའི་སྐབས་སུ་རྒྱུ་ངེས་འབྱེད་ཆ་མཐུན་མ་གསུངས་པའི་རྒྱུ་མཚན་རྣམས་ལེགས་པར་གྲུབ་པ་ཡིན་ནོ། །གསུམ་པ་བྱང་སེམས་ཀྱི་རིགས་ཅན་ལ་བསྟན་པར་བྱ་བའི་བྱང་སེམས་ཀྱི་ལམ་ཤེས་པའི་ཚུལ་ལ། ཤེས་བྱ་བྱང་སེམས་ཀྱི་ལམ་ནི་གདུལ་བྱ་གཞན་ལ་བསྟན་པར་བྱ་བ་ཡང་ཡིན་ཞིང་། རང་ཉིད་ཀྱིས་ཀྱང་རྒྱུན་ལྡན་དུ་བསྒོམ་པར་བྱ་བ་ཡང་ཡིན་པས་ཡན་ལག་རྒྱས་བཤད་དུ་ཤེས་པར་བྱ་ཞེས་པའི་ཚིག་གི་ཁྱད་པར་མ་སྨོས་པར་རང་གི་ངོ་བོའི་སྒོ་ནས་བསྟན་ཅིང་། རྟོགས་རིགས་སྔ་མ་གཉིས་ནི་གཞན་དོན་དུ་མཐོང་ལམ་དུ་མངོན་སུམ་དུ་ཤེས་པར་བྱ་བ་ཙམ་ཡིན་གྱི་དེ་ཡན་ཆད་རྒྱུན་ལྡན་དུ་བསྒོམ་པར་བྱ་བ་མ་ཡིན་པས་ཤེས་པར་བྱ་ཞེས་པའི་ཚིག་གི་ཁྱད་པར་གསུངས་པ་ཡིན་ནོ། །ཡང་ཤེས་བྱ་བྱང་སེམས་ཀྱི་ལམ་དང་། དེ་ཤེས་པའི་ལམ་ཤེས་གཉིས་རྟོགས་རིགས་གཅིག་པས་ཤེས་པར་བྱ་ཞེས་པའི་ཚིག་གི་ཁྱད་པར་མ་གསུངས་པར། རང་གི་ངོ་བོ་མཐོང་ལམ་དང་། སྒོམ་ལམ་གཉིས་གསུངས་པ་ཡིན་ལ་རྟོགས་རིགས་སྔ་མ་གཉིས་དང་། དེ་ཤེས་པའི་ལམ་ཤེས་གཉིས་རྟོགས་རིགས་ཐ་དད་ཡིན་པས་ཤེས་པར་བྱ་ཞེས་པའི་ཚིག་གི་ཁྱད་པར་གསུངས་པ་ཡིན་ནོ། །མི་དམིགས་པའི་རྣམ་པས་ཟིན་པའི་ཚེ་ཤེས་བྱའི་ལམ་དང་། ཤེས་བྱེད་ཀྱི་ལམ་ཤེས་གཉིས་ངོ་བོ་གཅིག་ཡིན་པས་ལུས་རྣམ་གཞག་ཏུ་ནི་གསུམ་ཆར་ལ་ཡང་ཤེས་པར་བྱ་ཞེས་པའི་ཚིག་གི་ཁྱད་པར་མ་གསུངས་པ་སྟེ་སྔར་བཤད་ཟིན་ཏོ།། །།དེས་ན་ཤེས་བྱ་བྱང་སེམས་ཀྱི་ལམ་མམ། དེ་ཤེས་པའི་ལམ་ཤེས་ལ་འདིར་མཐོང་ལམ་དང་སྒོམ་ལམ་གཉིས་གསུངས་པ་ནི་ཤེས་བྱ་དང་། ཤེས་བྱེད་ངོ་བོ་གཅིག་པའི་དབང་དུ་བྱས་ཏེ། མི་དམིགས་པའི་རྣམ་པས་མ་ཟིན་པའི་འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས་ནི་ཤེས་བྱ་བྱང་སེམས་ཀྱི་ལམ་ཡིན་ཀྱང་ལམ་ཤེས་མ་ཡིན་པའི་ཕྱིར་རོ། །དེ་ལྟར་གཉིས་ལས་དང་པོ་མཐོང་ལམ་ནི་བདེན་དང་བདེན་ལ་བཟོད་པ་དང་། །ཞེས་སོགས་ཚིགས་བཅད་གཅིག་དང་། དེའི་རྣམ་པ་རྒྱས་པར་བཤད་པ། དེ་བཞིན་ཉིད་དང་སངས་རྒྱས་དག །ཞེས་སོགས་ཚིགས་བཅད་ལྔ་སྟེ། སྐབས་གཞན་དུ་ཡོན་ཏན་གྱི་ལྡོག་པ་གཞན་གྱི་སྒོ་ནས་བཤད་ཀྱང་འདིར་འདི་ཕྱིའི་ཕན་ཡོན་གྱི་ལྡོག་པ་ནས་བསྟན་པའི་རྒྱུ་མཚན་ནི་སྐབས་འདིར་གདུལ་བྱ་བྱང་སེམས་ཀྱི་རིགས་ཅན་ལ་བསྟན་པ་དང་། རང་ཉིད་རྒྱུན་ལྡན་དུ་སྒོམ་པ་གཉིས་ཀྱི་སྒོ་ནས་བསྟན་པ་གང་ཞིག དེ་གཉིས་ཀ་ལ་ཕན་ཡོན་གྱི་སྒོ་ནས་སྤྲོ་བ་བསྐྱེད་དགོས་པའི་ཕྱིར་རོ། །འདིར་མཐོང་ལམ་གྱི་མཐའ་ཅུང་ཟད་དཔྱད་པ་ལ། མཛོད་ཀྱི་ལུགས། ཀུན་ལས་བཏུས་ཀྱི་ལུགས། གཏན་ལ་དབབ་པ་བསྡུ་བའི་ལུགས། དབུ་མ་པའི་ལུགས་དང་བཞི་ལས། དང་པོ་ནི། འདོད་པའི་སས་བསྡུས་ཀྱི་སྡུག་བསྔལ་བདེན་པའི་སྟེང་གི་ཁྱད་ཆོས་བཞི་པོ་མངོན་སུམ་དུ་མཐོང་བས་ས་དེས་བསྡུས་པའི་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་ནི་སྡུག་བསྔལ་ཆོས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་ཆོས་ཤེས། དེའི་རྗེས་སུ་ཁམས་གོང་གི་སས་བསྡུས་ཀྱི་སྡུག་བསྔལ་བདེན་པའི་སྟེང་གི་ཁྱད་ཆོས་བཞི་པོ་མངོན་སུམ་དུ་མཐོང་བས་ས་དེས་བསྡུས་པའི་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་ནི་སྡུག་བསྔལ་རྗེས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་རྗེས་ཤེས་ཏེ། བདེན་པ་གཞན་གསུམ་ལ་ཡང་དེ་བཞིན་དུ་སྦྱར་བས་སྐད་ཅིག་མ་བཅུ་དྲུག་འབྱུང་བའི་ཕྱི་མ་ནི་སྒོམ་ལམ་དུ་འདོད་པས་མཐོང་ལམ་ལ་བར་ཆད་མེད་ལམ་བརྒྱད་དང་། རྣམ་གྲོལ་ལམ་བདུན་ཏེ་སྐད་ཅིག་མ་བཅོ་ལྔ་རིམ་པ་བཞིན་དུ་སྤེལ་ནས་སྐྱེའོ། །འདི་ནི་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་དུ་འདོད་དོ། །གཉིས་པ་ནི། སྡུག་བསྔལ་བདེན་པའི་གནས་ལུགས་མངོན་སུམ་དུ་མཐོང་བས་ཁམས་གོང་འོག་གི་སྡུག་བསྔལ་མཐོང་སྤང་ཐམས་ཅད་ཅིག་ཅར་དུ་སྤོང་བའི་བར་ཆད་མེད་ལམ་ནི་སྡུག་བསྔལ་ཆོས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་ཆོས་ཤེས། དེའི་འོག་ཏུ་ཡེ་ཤེས་དེ་གཉིས་འཕགས་པའི་ཆོས་རྣམས་ཀྱི་རྒྱུར་ངེས་པ་འདྲེན་པའི་ཡེ་ཤེས་ནི་སྡུག་བསྔལ་རྗེས་བཟོད། དེའི་འོག་ཏུ་རྗེས་བཟོད་དེ་ཉིད་ཡུལ་དུ་བྱེད་པའི་ཡེ་ཤེས་ནི་སྡུག་བསྔལ་རྗེས་ཤེས་ཏེ། བདེན་པ་གཞན་གསུམ་ལ་ཡང་དེ་བཞིན་དུ་སྦྱར་བས་སྐད་ཅིག་མ་བཅུ་དྲུག་རྫས་ཀྱི་སྒོ་ནས་རིམ་པ་བཞིན་དུ་འབྱུང་སྟེ། རྒྱལ་པོའི་སྲས་ལས་སྐད་ཅིག་མ་བཅུ་དྲུག་བར་མ་ཆད་དུ་འབྱུང་བས་ཞེས་གསུངས་པའི་ཕྱིར་རོ། །དེ་ལ་ཆོས་བཟོད་བཞི་ནི་བར་ཆད་མེད་ལམ་དང་། ཆོས་ཤེས་བཞི་ནི་རྣམ་གྲོལ་ལམ་དང་། རྗེས་བཟོད་དང་། རྗེས་ཤེས་བརྒྱད་ནི་ཁྱད་པར་གྱི་ལམ་ཡིན་པས་འདིར་བར་ཆད་མེད་ལམ་བཞིར་ངེས་པ་ནི་སྔ་མ་ལས་གྲུབ་མཐའ་ཅུང་ཟད་ཁྱད་པར་འཕགས་པ་སྟེ། བདེན་པ་གཅིག་ལ་ཁམས་གོང་འོག་གིས་བསྡུས་པའི་གནས་ལུགས་ཐམས་ཅད་བློ་གཅིག་གིས་ཅིག་ཅར་དུ་མཐོང་བར་འདོད་པའི་ཕྱིར་རོ། །འདི་ཡང་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་ལ་སྦྱར་བར་བྱ་བ་ཡིན་ནོ། །བོད་སྔ་རབས་པ་དག་མངོན་རྟོགས་རྒྱན་ནས་གསུངས་པའི་ཐེག་ཆེན་གྱི་མཐོང་ལམ་གྱི་རྣམ་གཞག་ལ་ལུགས་འདི་སྦྱར་ཏེ། ཕར་བསྲེས་ཚུར་བསྲེས་བྱེད་པ་ནི་གང་གི་ཕྱིར་འདི་ནི་རྣམ་པར་གཞག་པ་གཞན་ཁོ་ན་ཡིན་ཏེ། དེའི་ཕྱིར་ཐེག་པ་གཞན་ལ་བརྟེན་ནས་ནི་གང་དུ་ཡང་སུན་འབྱིན་པ་བརྗོད་པར་མི་བྱའོ་ཞེས་པའི་གཞུང་མ་དྲན་པ་ཡིན་ནོ། །གསུམ་པ་ནི། ཆོས་ཤེས་ཕྱོགས་མཐུན་བཞི་དང་། རྗེས་ཤེས་ཕྱོགས་མཐུན་བཞི་དང་། མཇུག་ཏུ་ཞི་གནས་འབའ་ཞིག་པའི་སེམས་གཅིག་སྟེ། སེམས་རྣམ་པ་དགུས་མཐོང་བའི་ལམ་ཡོངས་སུ་རྫོགས་པར་འགྱུར་བར་གསུངས་ཤིང་། དེ་དག་ཀྱང་གདུལ་བྱ་སྤྲོས་པ་ལ་དགའ་བ་བདེན་པ་མངོན་པར་རྟོགས་པ་ལ་གཞུག་པའི་ཐབས་སུ་མིང་ཚིག་ཡི་གེའི་ཚོགས་ཀྱི་སྤྲོས་ཏེ་རྣམ་པར་བཞག་པ་ཡིན་གྱི། དོན་དམ་སྤྲོས་མེད་ཀྱི་དབང་དུ་བྱས་ན་དེ་བཞིན་ཉིད་ཤེས་པ་དང་མཚུངས་པར་ལྡན་པ་ཅིག་ཁོ་ནའི་སེམས་ཀྱི་རང་བཞིན་ལས་བརྩམས་ཏེ་མཐོང་བའི་ལམ་ཡོངས་སུ་རྫོགས་པར་འགྱུར་རོ། །ཞེས་བཤད་དོ། །ལུགས་འདི་ལ་མཐོང་སྤང་ཐམས་ཅད་ཅིག་ཅར་དུ་སྤོང་བར་བཞེད་དེ། བསྡུ་བ་ལས། ཉོན་མོངས་པ་རྣམས་ནི་ཅིག་ཅར་སྤོང་བར་རིག་པར་བྱ་ཡི། རིམ་གྱིས་ནི་མ་ཡིན་ནོ། །ཅིའི་ཕྱིར་ཞེ་ན། འདི་ལྟར་མངོན་པར་རྟོགས་པའི་ཤེས་པ་བདེན་པ་མངོན་པར་རྟོགས་པས་མཐོང་བས་སྤང་བར་བྱ་བའི་ཉོན་མོངས་རྣམས་སྤོང་བར་འགྱུར་བ་ལ། མངོན་པར་རྟོགས་པ་དེ་ཡང་བདེན་པ་འདྲེན་མ་ལ་དམིགས་པའི་ཡིད་ལ་བྱེད་པ་དང་མཚུངས་པར་ལྡན་པ་ཡིན་པས་དེ་ཉིད་སེམས་གསུམ་གྱིས་མཐོང་བས་སྤང་བར་བྱ་བའི་ཉོན་མོངས་པ་སྡུག་བསྔལ་ལ་སོགས་པ་ལ་ལོག་པར་བཞུགས་པ་ཐམས་ཅད་ཅིག་ཅར་སྤོང་བར་འགྱུར་བའི་ཕྱིར་རོ། །སྒོམ་པས་སྤང་བར་བྱ་བ་རྣམས་ནི་རིམ་གྱིས་སྤོང་བར་རིག་པར་བྱ་སྟེ། ལམ་གོམས་པས་སྤང་བར་བྱ་བ་ཡིན་པའི་ཕྱིར་རོ། །ཞེས་གསུངས་པས་སོ། །འདི་ཡང་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་དུ་འདོད་ཅིང་། ཐེག་པ་འོག་མ་གཉིས་ཀྱིས་དེ་བཞིན་ཉིད་རྟོགས་པ་ནི་གཞན་དབང་གི་སྟེང་དུ་གང་ཟག་གི་བདག་གིས་སྟོང་པའི་སྟོང་ཉིད་ལ་དེ་བཞིན་ཉིད་དུ་བྱས་པའོ། །བཞི་པ་ལ་ཀླུ་སྒྲུབ་ཀྱིས་བཤད་ཚུལ། བྱམས་པས་བཤད་ཚུལ། རྗེས་འབྲང་གིས་བཤད་ཚུལ། འགལ་མེད་ཀྱི་གནད་ངོས་གཟུང་བ། ཀླན་ཀ་མ་ལུས་པ་སྤང་བ་དང་ལྔ་ལས། དང་པོ་ནི། རིགས་པ་དྲུག་ཅུ་པ་ལས། ཆོས་ཤེས་པ་ཡི་འོག་ཏུ་ནི། །འདི་ལ་བྱེ་བྲག་དབྱེར་ཡོད་ན། །ཤིན་ཏུ་ཕྲ་བའི་དངོས་རྣམས་ལ། །གང་གིས་སྐྱེ་བར་རྣམ་བརྟགས་པ། །རྣམ་པར་མི་མཁས་པ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་ཆོས་ཤེས་པའི་འོག་ཏུ་རྣམ་པར་དབྱེ་བ་མེད་པར་གསུངས་ཤིང་། ཆོས་ཤེས་པ་ཡང་ཆོས་བཟོད་ཀྱི་ཟླས་ཕྱེ་བའི་ཆོས་ཤེས་མ་ཡིན་གྱི། བདེན་པ་གསུམ་པོ་རྟེན་འབྲེལ་སྐྱེ་འགག་མེད་པའི་རང་བཞིན་རྣམ་དག་དང་། སོ་སོར་བརྟགས་འགོག་གློ་བུར་གྱི་དྲི་བྲལ་གཉིས་དབྱེར་མེད་པའི་དག་པ་གཉིས་ལྡན་ལ་མྱ་ངན་ལས་འདས་པའི་ཆོས་སུ་བྱས་ནས་དེ་ཤེས་པ་ལ་ཆོས་ཤེས་པར་འཇོག་པའི་ཕྱིར་ཏེ། དེའི་འགྲེལ་པར་དཔལ་ལྡན་ཟླ་བས། དེ་ལ་ཆོས་ཞེས་བྱ་བའི་སྒྲ་ནི་མྱ་ངན་ལས་འདས་པ་ལ་བྱའོ། །དེ་ཡང་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ལས་གཞན་མ་ཡིན་ཏེ། ཞེས་དང་། རྟེན་ཅིང་འབྲེལ་བར་འབྱུང་བ་དེ་དང་། མྱ་ངན་ལས་འདས་པ་ཐ་མི་དད་པའི་རང་བཞིན་དུ་གྱུར་པའི་ཡོངས་སུ་དཔྱོད་པའི་ཤེས་པ་གང་ཡིན་པ་དེ་ནི་ཆོས་ཤེས་པ་སྟེ། ཆོས་ཀྱི་ཡུལ་ཤེས་པ་ནི་ཆོས་ཤེས་པ་ཞེས་བྱ་བ་ཡིན་པའི་ཕྱིར་ཞེས་དང་། དེ་ལྟར་ན་རྟེན་ཅིང་འབྲེལ་བར་འབྱུང་བ་སྐྱེ་བ་མེད་པ་དང་། འགག་པ་མེད་པ་ལ་དམིགས་པའི་ཆོས་ཤེས་པ་བདེན་པ་གསུམ་པོ་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ཀྱིས་མ་སྐྱེས་པ་མྱ་ངན་ལས་འདས་པ་ཡང་དེའི་ངོ་བོ་ཉིད་ཡིན་པར་མཐོང་བས་མངོན་པར་རྟོགས་པ་གཅིག་ཏུ་ཟད་དོ། །ཞེས་གསུངས་པས་སོ། །བྱེ་བྲག་ཏུ་སྨྲ་བས་ཁམས་གོང་འོག་གི་བདེན་པའི་གནས་ལུགས་སོ་སོར་མཐོང་བས་སྐད་ཅིག་མ་བཅོ་ལྔར་འདོད་པ་ནི། མངོན་པར་རྟོགས་པ་གཅིག་པོ་དེ་ཉིད་ལ་ལྡོག་པའི་སྒོ་ནས་ཕྱེ་སྟེ་དྲང་དོན་དུ་བསྟན་པ་སྟེ། ཡང་དེ་ཉིད་ལས་གང་དག་སྐད་ཅིག་མ་བཅོ་ལྔར་འདོད་པ་དེ་དག་གི་ལྟར་ན་ཡང་དེ་ལྟ་བུས་འདུལ་བའི་སྐྱེ་བོ་ལ་དེ་ལྟ་བུ་བསྟན་པས་ཕན་གདགས་པའི་ཕྱིར། ཤེས་པ་ངོ་བོ་ཉིད་ལ་ཆར་ཕྱེ་སྟེ་ཆ་བཅོ་ལྔར་རྣམ་པར་གཞག་གོ །གལ་ཏེ་དེ་ལྟར་ན་ལམ་བསྒོམ་པ་རྣམ་པ་བཅུ་དྲུག་པོ་དེ་ཇི་ལྟ་བུ་ཐར་པ་འདོད་པ་རྣམས་ལམ་རྣམ་པར་གཞྃག་པྃ་ཅྃན་གྱིྃ་དེ་ཁོ་ན་ཤེས་པ་ལ་འཇུག་པ་གོམས་པར་བྱ་བའི་ཕྱིར་འདི་ཡོངས་སུ་བརྟགས་ནས་རྣམ་པར་བཞག་པ་ཉིད་དེ། དེ་ཁོ་ན་ནི་ངོ་བོ་གཅིག་ཏུ་ཟད་དོ། །ཞེས་གསུངས་པས་སོ། །གཉིས་པ་ནི། མངོན་རྟོགས་རྒྱན་གྱི་སྐབས་དང་པོར་མཐོང་སྤང་རྟོག་པ་བཞིའི་གཉེན་པོར་མཐོང་སྤང་གཉེན་པོའི་ཚོགས་སྒྲུབ་བཞི་གསུངས། སྐབས་གཉིས་པར་འདི་ཕྱིའི་ཕན་ཡོན་གྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་གསུམ་པར་སྤྲོས་པ་སོ་གཉིས་དང་བྲལ་བའི་ཆོས་ཉིད་རྟོགས་པའི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་བཞི་པར་ཕྱིར་མི་ལྡོག་པའི་རྟགས་ཀྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་དང་། ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པའི་ཁྱད་མཚན་གྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་ལྔ་པའི་ལུས་རྣམ་གཞག་ཏུ་མཐོང་སྤང་རྟོག་པ་བཞིའི་གཉེན་པོར་མཐོང་ལམ་རྩེ་སྦྱོར་བཞི་གསུངས་ཤིང་། དེ་ཉིད་ཡན་ལག་རྒྱས་བཤད་དུ་བཟོད་པས་བསྡུས་པའི་སྐད་ཅིག་མ་གཅིག་ཁོ་ན་ཡིན་པར་གསུངས་སོ། །བོད་དུ་འགྱུར་བའི་བསྟན་བཅོས་ཞིག་ལ་ཐེག་ཆེན་གྱི་མཐོང་ལམ་གྱི་རྣམ་པར་བཞག་པ་འདི་ལས་རྒྱས་པ་མེད་ཅིང་། ལུགས་གཞན་དང་ཐུན་མོང་མ་ཡིན་པ་ཡིན་ཀྱང་། འདིའི་རྣམ་གཞག་མངོན་པ་གོང་འོག་ནས་བཤད་པ་དང་བསྲེ་བ་ནི་ཡོད་པའི་སྒོ་བོར་ནས་མེད་པའི་སྲང་དུ་འཆག་པའོ། །གསུམ་པ་ལ། གཞན་གྱི་འདོད་པ་བརྗོད་པ་དང་། སློབ་དཔོན་རང་ཉིད་ཀྱི་དགོངས་པ་བསྟན་པ་གཉིས་ལས། དང་པོ་ནི། ཁ་ཅིག་སྡུག་བསྔལ་གྱི་ཆོས་ཉིད་ཤེས་པའི་ཚེ་སྡུག་བསྔལ་ཆོས་བཟོད་ཀྱིས་ཀུན་འབྱུང་སྤོང་ལ། དེ་ཉིད་ཀྱིས་འགོག་པ་མངོན་དུ་བྱེད། དེ་ཉིད་ཀྱིས་ལམ་གོམས་པར་བྱ་བ་ཡིན་ལ། དེ་ཡང་སེམས་ཀྱི་སྐད་ཅིག་མ་གཅིག་ལས་འགྲུབ་པས་འབྲས་བུའི་མངོན་པར་རྟོགས་པ་ལ་ལྟོས་ནས་གཅིག་ཏུ་གཞག་གོ །སོ་སོར་མངོན་པར་རྟོགས་པ་ལས་ནི་སྐད་ཅིག་མ་བཅུ་དྲུག་ཡིན་ཏེ། བདེན་པ་བཞི་པོ་རེ་རེ་ལ་ཡང་ལོག་པར་རྟོག་པ་དུ་མ་འབྱུང་བས། དེ་སེལ་བྱེད་ཀྱི་ཡེ་ཤེས་ཀྱང་དེ་སྙེད་དུ་འབྱུང་བས་སོ། །དེ་ལྟར་ན་ཞུགས་པ་དང་གནས་པའི་རྣམ་པར་གཞག་པ་ཡང་ལེགས་པར་གནས་པ་ཡིན་ནོ། །ཞེས་སོ། །གཞན་དག་ན་རེ། དོན་གྱི་རང་གི་ངོ་བོ་གཅིག །བདག་ཉིད་མངོན་སུམ་ཡིན་པ་ལ། །ཚད་མ་རྣམས་ཀྱིས་བརྟག་བྱ་གང་། །མ་མཐོང་ཆ་གཞན་ཅི་ཞིག་ཡོད། །ཅེས་པའི་ཚུལ་གྱིས་ཡེ་ཤེས་སྐད་ཅིག་མ་གཅིག་གིས་བདེན་པ་ཐམས་ཅད་ཀྱི་ཆོས་ཉིད་མངོན་སུམ་དུ་མཐོང་བས། སོ་སོར་མངོན་པར་རྟོགས་པ་ལས་ཀྱང་སྐད་ཅིག་མ་གཅིག་ཡིན་ནོ། །ཞེས་ཟེར་རོ། །གཉིས་པ་ལ། འགྲེལ་ཆེན་དུ་ཕྱོགས་ཕྱི་མ་ཞུགས་པ་དང་། གནས་པའི་རྣམ་པར་གཞག་པ་མི་རུང་བས་སུན་ཕྱུང་ནས་རང་ཕྱོགས་སུ་བཞག་པ་ནི། ཉ་ཕྱིས་ལ་དངུལ་རྣམ་པ་ལྟར། །གལ་ཏེ་འཁྲུལ་པའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །ཞེས་པ་ལྟར། བདེན་པ་ལ་ཕྱིན་ཅི་ལོག་ཏུ་སྒྲོ་འདོགས་པ་དུ་མ་མེད་ན། མཐོང་བ་ཙམ་གྱིས་བདེན་པ་མངོན་པར་རྟོགས་པ་མཐར་ཕྱིན་ཡང་བདེན་པ་ལ་ཕྱིན་ཅི་ལོག་ཏུ་སྒྲོ་འདོགས་པ་དུ་མ་ཡོད་པས་དེ་སེལ་བྱེད་ཀྱི་ཡེ་ཤེས་དེ་སྙེད་དུ་འཇུག་པས་ན་འདི་ལྟར་འགྱུར་བ་སྟེ། ཆོས་ཉིད་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་བདེན་བཞིའི་ཆོས་ཉིད་ཅིག་ཆར་མཐོང་བས། མཐོང་བ་ལ་སྐད་ཅིག་མ་གཅིག་ཡིན་ཡང་སྒྲོ་འདོགས་སེལ་བྱེད་ཀྱི་ངེས་པ་བསྐྱེད་པའི་ནུས་པ་བཅུ་དྲུག་མཉམ་གཞག་ཏུ་རིམ་ཅན་དུ་ཐོབ་པ་ལས་བཅུ་དྲུག་གོ །ཞེས་ཊཱི་ཀ་ལས་བཤད་པ་འདི་ཉིད་འགྲེལ་ཆེན་གྱི་དགོངས་པ་དཔྱིས་ཕྱིན་པར་སྣང་ངོ་། །བཞི་པ་ལ། རང་ངོར་མངོན་པར་རྟོགས་པ་གཅིག་ཏུ་བསྟན་པ། བློ་གཞན་གྱི་ངོར་སྐད་ཅིག་མ་བཅུ་དྲུག་ཏུ་བསྟན་པ། ཆོས་ཉིད་མཐོང་བ་ལ་ཁྱད་པར་མེད་པ། ངེས་ཤེས་འདྲེན་ཚུལ་ལ་ཁྱད་པར་ཡོད་པ། ལམ་གཉིས་ཀྱི་ཁྱད་པར་རྣམ་པར་གཞག་པ། སྐབས་གོང་འོག་གི་ཁྱད་པར་རྣམ་པར་གཞག་པ། ཡོན་ཏན་གཞན་ཡང་ཐོབ་པའི་ཚུལ་དང་བདུན་ལས། དང་པོ་ནི། མཐོང་ལམ་མཉམ་གཞག་སྐྱེས་པ་ནས། མཉམ་གཞག་གི་རྒྱུན་དེ་ལས་མ་ལངས་ཀྱི་བར་དུ་བློ་དེའི་ངོར་སྐད་ཅིག་སྔ་ཕྱིའི་བྱེ་བྲག་མེད་དེ། བློ་དེས་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་འཛིན་སྟངས་ཀྱི་གཙོ་བོར་བྱས་ནས་མངོན་སུམ་དུ་མཐོང་བ་གང་ཞིག སྐད་ཅིག་སྔ་ཕྱིའི་བྱེ་བྲག་མཐོང་ན་སྔ་མ་འགགས་ནས་ཕྱི་མ་སྐྱེ་བར་མཐོང་དགོས་པའི་ཕྱིར་རོ། །འདི་ལ་དགོངས་ནས་མགོན་པོ་ཀླུ་སྒྲུབ་ཀྱིས་བློ་དེ་ཉིད་ཀྱིས་གནས་ལུགས་མཐོང་ཚུལ་གྱི་དབང་དུ་བྱས་ནས། རྟེན་འབྲེལ་སྐྱེ་འགག་མེད་པའི་ཆོས་ཤེས་པའི་འོག་ཏུ་དབྱེ་བ་མེད་པར་གསུངས་སོ། །དེས་ན་ལུང་དེའི་དོན་ནི། བདེན་པ་གསུམ་པོ་སྐྱེ་ཞིང་འགག་པའི་ཆོས་ཉིད་དང་། མྱ་ངན་ལས་འདས་པ་དབྱེར་མེད་པའི་ཆོས་དང་པོར་ཤེས་ནས། མཉམ་གཞག་དེ་ལས་མ་ལངས་ཀྱི་བར་དུ་བློ་དེའི་ངོར་སྐད་ཅིག་སྔ་ཕྱིའི་བྱེ་བྲག་དབྱེར་ཡོད་ན། བློ་དེ་ཆོས་ཅན། ཤིན་ཏུ་ཕྲ་བའི་དངོས་པོ་སྐྱེ་འགག་མེད་པའི་དོན་ལ་རྣམ་པར་མི་མཁས་པར་ཐལ། སྐྱེ་འགག་དང་བཅས་པར་སྣང་བའི་ཕྱིར་ཏེ། སྐད་ཅིག་སྔ་མའི་འོག་ཏུ་སྐད་ཅིག་ཕྱི་མ་སྐྱེ་བར་རྣམ་པར་བརྟགྃས་པའི་ཕྱིར། འདོད་ན་རྐྱེན་ལས་འབྱུང་བའི་དོན་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་མ་མཐོང་བར་ཐལ་ལོ། །ཞེས་པའི་དོན་ཏོ། །འོ་ན་མངོན་པར་རྟོགས་པ་གཅིག་ཡིན་པ་ཡང་མི་འཐད་པར་འགྱུར་ཏེ། བློ་དེའི་ངོར་མངོན་པར་རྟོགས་པ་གཅིག་ཏུ་ཡང་མི་སྣང་བའི་ཕྱིར་རོ། །ཞེ་ན་སྐྱོན་མེད་དེ། བློ་དེས་སྐྱེ་འགག་མེད་པའི་ཆོས་གཉིས་སྣང་ནུབ་པའི་ཚུལ་གྱིས་རྟོགས་པ་ནི་ཡོད་ཅིང་། སྐད་ཅིག་སྔ་ཕྱིའི་བྱེ་བྲག་མི་སྣང་བའི་ཆ་ནས་མངོན་པར་རྟོགས་པ་གཅིག་ཏུ་གཞག་པ་ཙམ་ཡིན་པའི་ཕྱིར་རོ། །ལུགས་འདི་ཐེག་པ་གསུམ་ཆར་གྱི་མཐོང་ལམ་གྱི་རྣམ་གཞག་ཡིན་པས་ཉན་ཐོས་ཀྱི་མཐོང་ལམ་གྱིས་སྐྱེ་འགག་མེད་པའི་དོན་ཇི་ལྟར་རྟོགས་ཤེ་ན། ཉན་ཐོས་ཀྱི་མཐོང་ལམ་གྱིས་ཀྱང་གང་ཟག་གི་བདག་མེད་མངོན་སུམ་དུ་རྟོགས་པས་གདགས་གཞི་ཉེར་ལེན་གྱི་ཕུང་པོ་ལྔ་པོ་སྐྱེ་མེད་དུ་མངོན་སུམ་དུ་རྟོགས་དགོས་པས་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་མཐོང་བ་ཡོད་པར་བཞེད་དོ། །འོ་ན་མི་རྟག་ལ་སོགས་བཅུ་དྲུག་མ་རྟོགས་པར་འགྱུར་རོ། །ཞེ་ན། མི་རྟག་ལ་སོགས་བཅུ་དྲུག་ལ་ངེས་ཤེས་དྲངས་པའི་ཆ་ནས་རྟོགས་པར་གཞག་པ་ཡིན་གྱི་བློ་དེ་ཉིད་ཀྱི་ངོ་ན་སྣང་བ་ནི་མ་ཡིན་ཏེ། དཔེར་ན་ཐེག་ཆེན་གྱི་མཐོང་ལམ་བཞིན་ནོ། །འདི་ཉིད་མགོན་པོ་བྱམས་པ་ཡང་བཞེད་དེ། ཐེག་ཆེན་གྱི་མཐོང་ལམ་མཉམ་གཞག་སྐྱེས་ནས་རྒྱུན་མ་རྫོགས་ཀྱི་བར་དུ་ཆོས་དབྱིངས་སྤྲོས་པ་མཐའ་དག་དང་བྲལ་བ་མངོན་སུམ་དུ་མཐོང་བས་སྐད་ཅིག་སྔ་ཕྱིའི་སྤྲོས་པ་སྣང་བ་འགལ་བའི་ཕྱིར་རོ། །གཉིས་པ་ནི། མཐོང་ལམ་མཉམ་གཞག་དེ་ཡང་དུས་མཐའི་སྐད་ཅིག་མ་མ་ཡིན་གྱི་བྱ་རྫོགས་ཀྱི་སྐད་ཅིག་མ་ཡིན་པས་དེ་སྐྱེས་པའི་ཡུན་ཚད་དེ་ལ་རང་རྒྱུད་ཀྱི་རྗེས་ཀྱི་ངེས་ཤེས་ལྟ་བུའམ། གང་ཟག་གོང་མས་གཞན་སེམས་ཤེས་པའི་མངོན་ཤེས་ཀྱིས་གཟིགས་པའི་ཚེ་སྐད་ཅིག་སྔ་ཕྱིའི་བྱེ་བྲག་མང་དུ་ཡོད་ལ། དེ་དག་ཀྱང་རྗེས་ཀྱི་ངེས་ཤེས་འདྲེན་པའི་གྲངས་ལ་ལྟོས་ནས། སྐད་ཅིག་མ་བཅུ་དྲུག་ཏུ་རྣམ་པར་གཞག་གོ །འདི་ལ་དགོངས་ནས་བཀའ་དང་བསྟན་བཅོས་ཕལ་ཆེར་ལས། སྐད་ཅིག་མ་བཅུ་དྲུག་ཏུ་གསུངས་ཤིང་། ལུགས་འདིའི་མདོ་དང་བསྟན་བཅོས་གཉིས་ཀ་ལས། ལམ་ཤེས་གཞི་ཤེས་རྣམ་རྫོགས་སྦྱོར་བའི་སྐབས་སུ་སྐད་ཅིག་མ་བཅུ་དྲུག་ཏུ་གསུངས་སོ། །འཕགས་སེང་གཉིས་ཀྱི་བཞེད་པ་ཡང་འདི་ཉིད་ཡིན་ཏེ། ཉིར་སྣང་དང་འགྲེལ་ཆེན་གཉིས་ལས། གཞི་ཤེས་ཀྱི་མཐོང་ལམ་གྱི་སྐབས་སུ་སངས་རྒྱས་སྟོང་སྨོས་པ་ནི་མཐོང་ལམ་སྐད་ཅིག་མ་བཅུ་དྲུག་ལས་གྲངས་ལྷག་པ་མེད་པའི་དཔང་པོར་གསུངས་ཤིང་སྐབས་གཉིས་པར་འགྲེལ་ཆེན་ལས་སྔར་བཤད་པ་ལྟར་སོ་སོར་མངོན་པར་རྟོགས་པ་ལ་ལྟོས་ནས་སྐད་ཅིག་མ་བཅུ་དྲུག་ཡིན་པར་གསུངས་སོ། །གལ་ཏེ་སྐད་ཅིག་མ་བཅུ་དྲུག་པོ་དེ་དག་ལྡོག་པའི་སྒོ་ནས་ཕྱེ་བ་ཡིན་གྱི་སྐད་ཅིག་སྔ་ཕྱིའི་བྱེ་བྲག་མ་ཡིན་ནོ་སྙམ་ན། དེ་ལྟར་ན་སྤྱིར་བཅུ་དྲུག་ཙམ་སྨོས་རིགས་ཀྱི་སྐད་ཅིག་མ་བཅུ་དྲུག་ཞེས་སྨོས་མི་རིགས་ཏེ། དཔེར་ན། མཐོང་སྤང་གཉེན་པོའི་ཚོགས་སྒྲུབ་བཞི་དང་། མཐོང་ལམ་རྩེ་སྦྱོར་བཞི་ལ་སྐད་ཅིག་མ་བཞི་ཞེས་པའི་ཚིག་གི་ཁྱད་པར་མེད་པ་བཞིན་ནོ། །དེ་ལྟ་བུའི་མཉམ་གཞག་སྐད་ཅིག་མ་བཅུ་དྲུག་ལ་སྡུག་བསྔལ་ཆོས་བཟོད་ལ་སོགས་པའི་རྣམ་པ་བཅུ་དྲུག་ཏུ་འཇོག་པའི་རྒྱུ་མཚན་འོག་ཏུ་འབྱུང་ངོ་། །གསུམ་པ་ནི། བསྟན་བཅོས་འདིར་བཤད་པའི་སྐབས་གོང་འོག་གི་མཐོང་ལམ་ཐམས་ཅད་ཐེག་ཆེན་གྱི་མཐོང་ལམ་ཁོ་ན་ཡིན་པས། སྐད་ཅིག་མ་བཅུ་དྲུག་པོ་ཐམས་ཅད་ཆོས་དབྱིངས་མཐོང་ཚུལ་ལ་ཁྱད་པར་མེད་དེ། ཆོས་དབྱིངས་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་ཕྱིར་དང་། དེ་ལྟ་བུའི་མཉམ་གཞག་སྐྱེས་ནས་ཇི་སྲིད་རྒྱུན་མ་རྫོགས་ཀྱི་བར་དུ་ཆོས་དབྱིངས་སྤྲོས་པ་མཐའ་དག་དང་བྲལ་བ་དང་། རྟོགས་བྱེད་ཀྱི་བློ་གཉིས་པོ་གཉིས་སུ་སྣང་བ་ནུབ་ནས་དམིགས་རྣམ་མི་འདྲ་བའི་ཁྱད་པར་མེད་པའི་ཕྱིར་རོ། །དེས་ན་སྡུག་བསྔལ་ལ་ཆོས་བཟོས་ཉིད་ཀྱིས་བདེན་པ་ཞི་ཆར་གྱི་ཆོས་དབྱིངས་མངོན་སུམ་དུ་མཐོང་བ་ཡིན་གྱི་བདེན་པ་བཞིའི་ཆོས་དབྱིངས་རིམ་པ་བཞིན་དུ་མཐོང་བའི་ཁྱད་པར་ནི་ལུགས་འདི་ལ་མེད་དོ། །སྐད་ཅིག་ཕྱི་མ་རྣམས་མཐོང་ལམ་མ་ཡིན་པར་འགྱུར་ཏེ། སྔར་མ་མཐོང་བ་མཐོང་བར་བྱར་མེད་པའི་ཕྱིར་རོ་ཞེ་ན། དེའི་ལན་དུ་ཊཱི་ཀ་ལས། བདེན་བཞི་ལ་སྒྲོ་འདོགས་མང་དུ་ཡོད་པས་དེ་དག་སེལ་བར་བྱེད་པའི་ངེས་ཤེས་བསྐྱེད་པའི་ནུས་པ་མཉམ་གཞག་གི་གནས་སྐབས་སུ་རིམ་བཞིན་དུ་ཐོབ་ཅིང་། ནུས་པ་ཐོབ་པ་ལ་རྟོགས་པའི་ཐ་སྙད་འཇོག་པས་ན་མ་རྟོགས་པ་རྟོགས་པར་བྱར་ཡོད་པའི་ཕྱིར་མཐོང་ལམ་དུ་འཐད་ཅེས་གསུངས་སོ། །ཁོ་བོའི་རྟོག་པ་ལ་ནི་ཆོས་ཉིད་དང་པོར་མཐོང་བའི་མཉམ་གཞག་གི་རྒྱུན་དེ་ཉིད་ཀྱི་རིགས་སུ་གཏོགས་པས་མཐོང་ལམ་དུ་འཇོག་སྟེ། དཔེར་ན། ཆོས་མཆོག་ཆུང་ངུ་དང་། འབྲིང་གཉིས་པོ་འཇིག་རྟེན་པའི་ཆོས་ཐམས་ཅད་ཀྱི་མཆོག་མ་ཡིན་ཀྱང་དེའི་རིགས་སུ་གཏོགས་པས་འཇིག་རྟེན་ཆོས་མཆོག་ཏུ་འཇོག་པ་བཞིན་ནོ་སྙམ་དུ་སེམས་སོ། །བཞི་པ་ནི། འོ་ན་སྐད་ཅིག་སྔ་ཕྱི་རྣམས་ཀྱི་ཁྱད་པར་ཇི་ལྟ་བུ་ཞེ་ན། རྗེས་ཀྱི་ངེས་ཤེས་འདྲེན་པའི་ནུས་པ་སྐད་ཅིག་རེ་རེ་ལ་སོ་སོར་ཐོབ་པས་སྐད་ཅིག་དང་པོ་དང་གཉིས་པ་ཞེས་པ་ཙམ་གྱི་གྲངས་མ་ཡིན་པ་བདེན་པ་བཞི་ལ་ཆོས་བཟོད་དང་། ཆོས་ཤེས་ལ་སོགས་པའི་བྱེ་བྲག་སོ་སོར་འཇོག་པ་སྟེ། རྒྱས་པར་འོག་ཏུ་འབྱུང་ངོ་། །ཉན་ཐོས་ཀྱི་མཐོང་ལམ་སྐད་ཅིག་མ་བཅུ་དྲུག་པོ་སྐྱེ་མེད་རྟོགས་པར་མཚུངས་ཀྱང་མི་རྟག་ལ་སོགས་བཅུ་དྲུག་ལ་ངེས་པ་འདྲེན་པའི་ནུས་པ་མཉམ་གཞག་གི་གནས་སྐབས་སུ་རིམ་ཅན་དུ་ཐོབ་པས་སྡུག་བསྔལ་ལ་ཆོས་བཟོད་ལ་སོགས་པའི་བྱེ་བྲག་འཇོག་པར་བསྟན་བཅོས་འདིའི་ལུགས་ལ་ཡང་བཞེད་དགོས་པ་འདྲ་སྟེ། ཐེག་ཆེན་གྱི་མཐོང་ལམ་དེ་རྟག་མི་རྟག་སོགས་ཀྱི་སྤྲོས་བྲལ་བཅུ་དྲུག་ལ་ངེས་ཤེས་རིམ་པ་བཞིན་དུ་དྲངས་པའི་ཆ་ནས་ཤེས་བཟོད་སྐད་ཅིག་མ་བཅུ་དྲུག་ཏུ་གཞག་པར་སྣང་བའི་ཕྱིར་རོ། །མི་རྟག་ལ་སོགས་བཅུ་དྲུག་དང་ཤེས་བཟོད་སྐད་ཅིག་མ་བཅུ་དྲུག་སྦྱར་བ་གཞུང་གཞན་ལ་ནི་མི་སྣང་ངོ་། །ལྔ་པ་ནི། དེ་ལྟར་སྐད་ཅིག་མ་བཅུ་དྲུག་ལས། སྐད་ཅིག་དང་པོ་སྡུག་བསྔལ་ཆོས་བཟོད་ཁོ་ན་མཐོང་སྤང་ཐམས་ཅད་ཅིག་ཅར་དུ་སྤོང་བར་བྱེད་པའི་བར་ཆད་མེད་ལམ་ཡིན་ཏེ། སྐབས་སྔ་མ་རྣམས་སུ་སྐད་ཅིག་མ་བཅུ་དྲུག་ཏུ་བཤད་ཀྱང་རྩེ་སྦྱོར་གྱི་སྐབས་སུ་མཐོང་སྤང་སྤོང་བའི་བར་ཆད་མེད་ལམ་གྱི་དབང་དུ་བྱས་ནས། སྐད་ཅིག་གཅིག་པའི་བཟོད་པ་ཡིས། །བསྡུས་པ་དེ་འདིར་མཐོང་བའི་ལམ། །ཞེས་གསུངས་ཤིང་། དེའི་འགྲེལ་པར་འཕགས་སེང་གཉིས་ཆར་གྱིས་སྡུག་བསྔལ་ལ་ཆོས་བཟོད་སྐྱེས་ཟིན་པའི་ཚེ། མཐོང་སྤང་ཉོན་སྒྲིབ་དང་། ཤེས་སྒྲིབ་ཐམས་ཅད་སྤངས་ཟིན་པར་གསུངས་པའི་ཕྱིར་ཏེ། ཉིར་སྣང་ལས། དེ་ཡང་མཐོང་བའི་ལམ་གྱི་བཟོད་པ་སྐྱེས་པ་ན། འདོད་པ་དང་། གཟུགས་དང་། གཟུགས་མེད་པའི་ཁམས་ཀྱིས་བསྡུས་པ་མཐོང་བས་སྤང་བར་བྱ་བའི་ཉོན་མོངས་པ་བརྒྱ་རྩ་བརྒྱད་པོ་རྣམ་པར་རྟོག་པ་བཞིས་བསྡུས་པ་རྣམས་སྤོང་བར་འགྱུར་རོ་ཞེས་དང་། དེའི་དོན་འགྲེལ་ཆུང་ལས་དེ་སྐྱེས་པ་ན་འདོད་པ་དང་། གཟུགས་དང་། གཟུགས་མེད་པའི་ཁམས་ཀྱི་རབ་ཏུ་དབྱེ་བས་ཞེས་གསུངས་པའི་ཕྱིར་རོ། །འགྲེལ་ཆེན་གྱི་དགོངས་པ་ཡང་འདི་ཉིད་ཡིན་ཏེ། འབྲས་བུའི་མངོན་པར་རྟོགས་པ་ལ་ལྟོས་ནས་སྐད་ཅིག་མ་གཅིག་ཡིན་པའི་དོན་བདེན་པ་བཞི་ལ་བྱ་བ་ཅིག་ཅར་བྱེད་པ་ལ་བཤད་པའི་ཕྱིར་རོ། །རིགས་པས་ཀྱང་གྲུབ་སྟེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་དེས་བདེན་པ་བཞི་ཆར་གྱི་ཆོས་ཉིད་ཅིག་ཅར་དུ་མཐོང་བས་མཐོང་སྤང་ཅིག་ཅར་དུ་སྤོང་བར་གྲུབ་པའི་ཕྱིར་རོ། །རྒྱུ་མཚན་དེས་ན་སྐད་ཅིག་ཕྱི་མ་བཅོ་ལྔ་པོ་ཐམས་ཅད་རྣམ་གྲོལ་ལམ་དུ་གྲུབ་སྟེ། བར་ཆད་མེད་ལམ་གྱི་ངོས་སྐལ་གྱི་དྲི་མ་ལས་གྲོལ་ཞིང་དེ་དང་དམིགས་རྣམ་ཁྱད་པར་མེད་པའི་མཉམ་གཞག་གི་རྒྱུན་ཡིན་པའི་ཕྱིར་རོ། །དྲུག་པ་ནི། སྐབས་དང་པོར་གསུངས་པའི་མཐོང་སྤང་གཉེན་པོའི་ཚོགས་སྒྲུབ་བཞི་དང་། སྐབས་ལྔ་པར་གསུངས་པའི་མཐོང་ལམ་རྩེ་སྦྱོར་བཞི་ནི་དོན་གཅིག་པས་བར་ཆད་མེད་ལམ་ཁོ་ན་ལ་འཇོག་སྟེ། མཐོང་སྤང་བཞི་སྤོང་བའི་གཉེན་པོའི་ལྡོག་པ་ནས་བཞིར་ཕྱེ་བ་ཙམ་ཡིན་གྱི་ངོ་བོ་གཅིག་ཡིན་པའི་ཕྱིར་རོ། །རིགས་པ་འདིས་སྒོམ་སྤང་གཉེན་པོའི་ཚོགས་སྒྲུབ་བཞི་དང་། སྒོམ་ལམ་རྩེ་སྦྱོར་བཞི་ཡང་ས་གཉིས་པ་ནས་བཅུ་པའི་བར་གྱི་བར་ཆད་མེད་ལམ་རེ་རེའི་སྟེང་དུ་ཡང་ལྡོག་པའི་སྒོ་ནས་བཞི་བཞིར་ཕྱེ་བར་ཤེས་པར་བྱའོ། །སྐབས་གཉིས་པ་དང་། གསུམ་པ་དང་། བཞི་པར་གསུངས་པའི་སྐད་ཅིག་མ་བཅུ་དྲུག་པོ་ཐམས་ཅད་དམིགས་རྣམ་མི་འདྲ་བའི་ཁྱད་པར་རྣམས་ནི་རྗེས་ཐོབ་ཀྱི་གནས་སྐབས་ཀྱི་ངེས་ཤེས་འདྲེན་པའི་ཁྱད་པར་ཁོ་ན་ཡིན་ལ། དེ་དག་འདྲེན་པའི་ནུས་པ་སྐད་ཅིག་མ་བཅུ་དྲུག་རིམ་ཅན་དུ་ཐོབ་པས་ཤེས་བཟོད་ཀྱི་ཁྱད་པར་རྣམས་ནི་མཉམ་གཞག་ལ་འཇོག་གོ །གཅིག་ལ་དཔེར་མཚོན་ན། བྱང་སེམས་ཀྱི་མཐོང་ལམ་མཉམ་གཞག་སྐད་ཅིག་དང་པོ་དེ་ཆོས་ཅན། སྐབས་གཉིས་པ་ནས་བཤད་པའི་སྡུག་བསྔལ་ཆོས་བཟོད་ཡིན་ཏེ། དེ་བཞིན་ཉིད་དང་སངས་རྒྱས་དག་ཕན་ཚུན་རྣམ་གྲངས་ཀྱིས་གནས་པ་ཁས་མི་ལེན་པ་ལ་ངེས་པ་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར་རོ། །དེ་བཞིན་དུ་སྐབས་གསུམ་པ་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། སྡུག་བསྔལ་གྱི་བདེན་པ་རྟག་མི་རྟག་གི་སྤྲོས་བྲལ་ལ་ངེས་ཤེས་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར། ཕྱིར་མི་ལྡོག་གི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། གཟུགས་སོགས་ལ་འདུ་ཤེས་ལྡོག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་ལ་ངེས་ཤེས་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར། ཁྱད་མཚན་གྱི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། ཆོས་དབྱིངས་བསམ་གྱིས་མི་ཁྱབ་པ་ལ་ངེས་པ་རང་སྟོབས་ཀྱིས་འདྲེན་པར་བྱེད་པའི་མཉམ་བཞག་ཡིན་པའི་ཕྱིར། དེ་བཞིན་དུ་སྐད་ཅིག་མ་བཅུ་དྲུག་པོའི་བར་རེ་རེ་བཞིན་དུ་ཆོས་ཅན་དུ་བཟུང་ནས་ཡོན་ཏན་གྱི་ལྡོག་པ་འདྲེན་ཚུལ་རྣམས་མ་འཛོལ་པར་བཀོད་པར་བྱའོ། །དེ་ལྟར་བྱས་ན་སྐབས་གཉིས་པར་སྐད་ཅིག་མ་བརྒྱད་པའི་གནས་སྐབས་སུ་བྱམས་སོགས་ཚད་མེད་བཞི་བསྒོམ་དགོས་པར་གསུངས་པ་ཡང་རྗེས་ཐོབ་ཀྱི་གནས་སྐབས་སུ་བཞག་ནས་དེ་འདྲེན་པའི་ནུས་པ་མཉམ་གཞག་སྐད་ཅིག་མ་བརྒྱད་པ་ལ་ཐོབ་པ་དང་། ཕྱིར་མི་ལྡོག་ཏུ་སྒྲུབ་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་རྣམས་ཀྱང་དེ་བཞིན་དུ་ཤེས་པར་འགྱུར་བས་གོང་འོག་གི་རྣམ་གཞག་ཐམས་ཅད་འགལ་མེད་དུ་རྟོགས་པར་འགྱུར་རོ། །བདུན་པ་ནི། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཀྱི་སྐབས་སུ་མདོ་སྡེ་ས་བཅུ་པ་ནས་བཤད་པ་ལྟར་གྱི་ཡོན་ཏན་བརྒྱ་ཕྲག་བཅུ་གཉིས་དང་། ཤེར་ཕྱིན་གྱི་མདོ་ལས་གསུངས་པའི་སེང་གེ་རྣམ་བསྒྱིངས་དང་། ཐོད་རྒལ་གྱི་ཏིང་ངེ་འཛིན་རྣམས་དང་། མདོ་སྡེ་རྒྱན་དུ། རྒྱལ་སྲས་བྱང་ཆུབ་ཕྱོགས་མཐུན་པ། །རྣམ་པ་སྣ་ཚོགས་ཐམས་ཅད་ནི། །རྟག་ཏུ་མཐོང་བའི་ལམ་འདི་དང་། །ལྷན་ཅིག་ཏུ་ནི་ཐོབ་པར་འདོད། །ཅེས་གསུངས་པ་ལྟར་བྱང་ཆུབ་ཀྱི་ཡན་ལག་བདུན་དང་། འཕགས་ལམ་ཡན་ལག་བརྒྱད་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་ཅིག་ཅར་དུ་ཐོབ་ཅིང་མཉམ་གཞག་གི་གནས་སྐབས་སུ་ཆོས་ཉིད་སྤྲོས་པ་དང་བྲལ་བའི་དོན་ལ་རྩེ་གཅིག་ཏུ་མཉམ་པར་གཞག་པ་ཡིན་པས་དེ་དག་མངོན་དུ་བྱེད་མི་ནུས་ཀྱང་ཡོན་ཏན་དེ་དག་ས་དང་པོའི་རྗེས་ཐོབ་ཀྱི་གནས་སྐབས་སུ་མངོན་དུ་བྱེད་པ་ནི་གནས་ཀྱི་དོན་ནོ། །བྱང་ཆུབ་ཡན་ལག་བདུན་ནི་མཐོང་ལམ་མཉམ་གཞག་གི་ངོ་བོ་ལ་ཚང་ཡང་འཕགས་ལམ་ཡན་ལག་བརྒྱད་ནི་ནུས་པ་མཉམ་གཞག་ཏུ་ཐོབ་ཀྱང་མངོན་དུ་བྱེད་པ་རྗེས་ཐོབ་ཏུ་འབྱུང་བས་སྒོམ་ལམ་ནས་གཞག་པར་སྣང་སྟེ་ཐོད་རྒལ་གྱི་སྙོམས་འཇུག་བཞིན་ནོ། །ལྔ་པ་ཀླན་ཀ་མ་ལུས་པ་སྤང་བ་ལ་བཞི་སྟེ། གྲུབ་མཐའ་གཞན་དང་འགལ་བ་སྤང་བ། རང་གཞུང་གཞན་དང་འགལ་བ་སྤང་བ། རྗེས་འབྲང་གི་གཞུང་དང་འགལ་པ་སྤང་བ། སྒོམ་སྤང་སྤོང་ཚུལ་དང་མཚུངས་པ་སྤང་བའོ། །དང་པོ་ནི། མངོན་པ་གོང་མ་ལས་བར་ཆད་མེད་ལམ་བཞི་དང་། རྣམ་གྲོལ་ལམ་བཞི་སྟེ་བརྒྱད་གསུངས་པ་དང་འགལ་ལོ་ཞེ་ན། དེ་ནི་གྲུབ་མཐའི་ཁྱད་པར་ཡིན་པར་གོང་དུ་བཤད་ཟིན་ལ། མཛོད་དུ་བར་ཆད་མེད་ལམ་བརྒྱད་དང་། ཀུན་བཏུས་སུ་བཞི་དང་། འདིར་གཅིག་ཏུ་བཞག་པ་ཡང་། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པའི་དོན་དུ་རྟོགས་པར་བྱའོ། །གཉིས་པ་ནི། བར་ཆད་མེད་ལམ་གཅིག་གིས་མཐོང་སྤང་ཐམས་ཅད་ཅིག་ཅར་དུ་སྤོང་ན། རྒྱུད་བླར། ཇི་ལྟར་སྨྱུག་སོགས་རིམ་སྐྱེས་པས། །ས་བོན་ཤུན་པ་གཅོད་པ་ལྟར། །དེ་བཞིན་མཐོང་ལམ་རིམ་སྐྱེས་པས། །མཐོང་སྤང་རྣམས་ནི་ལྡོག་པར་བྱེད། །ཅེས་གསུངས་པ་དང་འགལ་ལོ་ཞེ་ན། དེའི་དོན་ནི་འདི་ལྟར་ཡིན་ཏེ། སྦྱོར་ལམ་དྲོད་ནས་བཟུང་སྟེ་སྡུག་བསྔལ་ཆོས་བཟོད་མ་སྐྱེས་བར་དུ་མཐོང་ལམ་རིམ་གྱིས་སྐྱེ་བར་འཇོག་སྟེ། མཐོང་ལམ་རྣམ་པར་མི་རྟོག་པའི་ཡེ་ཤེས་ཀྱི་མི་སྐྱེ་བའི་སྔ་ལྟས་སུ་གྱུར་པ་ལ་དྲོད་དུ་འཇོག་པའི་ཕྱིར་རོ། །སྦྱོར་ལམ་བཞི་རིམ་ཅན་དུ་སྐྱེ་བས་མཐོང་སྤང་རྟོག་པ་མངོན་གྱུར་བཞི་རིམ་ཅན་སྤོང་བ་ནི་མཐོང་སྤང་རིམ་ཅན་དུ་སྤོང་བའི་དོན་ཡིན་ལ། སྡུག་བསྔལ་ཆོས་བཟོད་སྐྱེས་པའི་ཚེ་མཐོང་ལམ་སྐྱེས་པར་འཇོག་ཅིང་། དེའི་སྐད་ཅིག་ཕྱི་ལོག་ནས་མཐོང་སྤང་མ་ལུས་པ་དང་བྲལ་བའོ། །དཔེར་ན། ས་བོན་ས་འོག་ན་ཡོད་པའི་དུས་སུ་མྱུ་གུ་རིམ་བཞིན་དུ་སྐྱེ་བས། ས་བོན་གྱི་ཤུན་པ་རིམ་བཞིན་དུ་གཅོད་ཅིང་། ཤུན་པའི་ཕྱི་རོལ་དུ་མྱུ་གུ་ཐོན་པའི་ཚེ་ཤུན་པ་བཅད་ཟིན་པ་བཞིན་ནོ། །དེ་ལྟར་བྱས་ན་འཇུག་པའི་རང་འགྲེལ་དུ། མདོ་ཐ་དད་ནས་གསུངས་པའི་དཔེ་འཁོར་ལོས་སྒྱུར་བའི་རྒྱལ་པོའི་སྲས་བཙས་མ་ཐག་པ་དང་། ནམ་མཁའ་ལྡིང་གི་ཕྲུ་གུ་སྒོ་ངའི་སྦུབས་ལས་ཐོན་མ་ཐག་པ་དང་། ཡར་ངོའི་ཚེས་གཅིག་གི་ཟླ་བ་དང་། ལྗོན་ཤིང་གི་མྱུ་གུ་ཐོན་མ་ཐག་པ་རྣམས་ས་དང་པོའི་བྱང་སེམས་དང་དཔེ་དོན་བསྒྲིགས་པའི་དོན་རྣམས་འདི་ལ་འགྲིག་པར་འགྱུར་ཞིང་། ཤེས་བཟོད་སྐད་ཅིག་མ་རྣམས་ཀྱིས་མཐོང་སྤང་རིམ་བཞིན་དུ་སྤོང་བ་ལ་སྦྱར་ན་ཐེག་པ་ཆེན་པོའི་སྡེ་སྣོད་ཕལ་ཆེར་དང་འགལ་བར་འགྱུར་རོ། །གསུམ་པ་ནི། འགྲེལ་ཆུང་ལས། སྤོང་བའི་ལམ་ལ་ཡུལ་བདེན་པ་བཞིས་བསྡུས་པའི་བར་ཆད་མེད་ལམ་བཞི་གསུངས་པ་མཐོང་ལམ་ལ་སྦྱར་དགོས་པས་བར་ཆད་མེད་ལམ་གཅིག་ཏུ་གསུངས་པ་དང་འགལ་ལོ་ཞེ་ན། དེ་མཐོང་ལམ་ཁོ་ན་ལ་སྦྱར་བའི་ངེས་པ་མེད་ཅིང་། སྦྱར་བའི་ཚེ་ན་ཡང་སྡུག་བསྔལ་ཆོས་བཟོད་དེ་ཉིད་ལ་ཡུལ་བདེན་བཞིའི་གནས་ལུགས་རྟོགས་པའི་ལྡོག་པའི་སྒོ་ནས་ཕྱེ་བ་སྟེ། སྤང་བྱ་བཞི་སྤོང་བའི་ལྡོག་པ་ནས་མཐོང་ལམ་རྩེ་སྦྱོར་བཞིར་བཞག་པ་དང་འདྲའོ། །འདི་ལ་སློབ་དཔོན་གྱི་འགྲེལ་པ་ཆེ་ཆུང་གཉིས་ནས་བདེན་པ་བཞིས་བསྡུས་པ་བར་ཆད་མེད་ལམ་བཞི་ཞེས་པ་ཙམ་དང་། ཉིར་སྣང་དུ་ཡང་སྤོང་བའི་ལམ་ལ་བར་ཆད་མེད་ལམ་བདེན་པ་རྣམ་པ་བཞི་ལ་བརྟེན་པ་ཞེས་པ་ཙམ་ལས་གང་ལ་སྦྱར་གྱི་གསལ་ཀ་མི་སྣང་ཞིང་། བུདྡྷ་ཤྲཱིས་བདེན་པ་བཞིའི་ཆོས་ཤེས་པ་ཉིད་ཀྱི་བཟོད་པས་རབ་ཏུ་བསྡུས་པ་རྣམ་པ་བཞིའོ། །ཞེས་མཐོང་ལམ་བཟོད་པ་བཞི་ལ་སྦྱར་ཞིང་། ཆོས་བཤེས་ཀྱིས་སྤོང་བའི་ལམ་གྱི་རྣམ་པ་ནི་བར་ཆད་མེད་པའི་ཏིང་ངེ་འཛིན་གྱི་མཚན་ཉིད་དོ། །ཞེས་བར་ཆད་མེད་པའི་ཏིང་ངེ་འཛིན་ལ་ངོས་འཛིན་པར་མཛད་དོ། །དོན་ནི་འདི་ཡིན་ཏེ། ས་དང་པོ་ནས་བཅུ་པའི་བར་གྱི་བར་ཆད་མེད་ལམ་རེ་རེ་ཡང་ཡུལ་བདེན་པ་བཞིའི་ཆོས་ཉིད་རྟོགས་པའི་ལྡོག་པའི་སྒོ་ནས་བཞི་བཞིར་ཕྱེ་བ་ནི་སྤོང་བའི་ལམ་ཡིན་ཏེ། གཉེན་པོའི་ཚོགས་སྒྲུབ་དང་ཆོས་མཚུངས་སོ། །འཇོག་ཚུལ་ནི་མི་འདྲ་སྟེ། ཡུལ་གྱི་སྒོ་ནས་དང་། སྤང་བྱའི་སྒོ་ནས་ཕྱེ་བའི་ཁྱད་པར་ཡོད་པའི་ཕྱིར་རོ། །སངས་རྒྱས་ཉིད་ཀྱི་ལམ་ནི་ས་བཅུའི་རྗེས་ཐོབ་ཀྱི་ཕ་རོལ་ཏུ་ཕྱིན་པ་བཅུ་སྟེ། འདི་ནི་སའི་ཚོགས་དང་ཆོས་མཚུངས་སོ། །བཞི་པ་ནི། སྡུག་བསྔལ་ཆོས་བཟོད་ཀྱིས་བདེན་པ་བཞི་ཆར་གྱི་ཆོས་དབྱིངས་རྟོགས་པའི་རྒྱུ་མཚན་གྱིས་བདེན་པ་བཞི་ཆར་གྱིས་མཐོང་སྤང་ཅིག་ཅར་དུ་སྤོང་ན། ས་གཉིས་པའི་བར་ཆད་མེད་ལམ་གཅིག་ཉིད་ཀྱིས་སྒོམ་སྤང་ཐམས་ཅད་ཅིག་ཅར་དུ་སྤོང་བར་འགྱུར་ཏེ། ཁམས་གསུམ་ཆར་གྱི་ཆོས་དབྱིངས་རྟོགས་པའི་ཕྱིར་རོ་ཞེ་ན། དེ་ནི་མི་མཚུངས་ཏེ། མཐོང་སྤང་ནི་ཆོས་ཉིད་མཐོང་བ་ཙམ་གྱིས་སྤང་བར་བྱ་བའི་རིགས་ཡིན་པས་མཐོང་ཟིན་རྒྱུན་ལྡན་དུ་བསྒོམས་པ་ལ་མི་ལྟོས་ལ། སྒོམ་སྤང་ནི་ཆོས་ཉིད་མཐོང་ཟིན་གོམས་པས་སྤང་བར་བྱ་བའི་རིགས་ཡིན་པས་མཐོང་ཟིན་གོམས་པ་སྔ་ཕྱི་ལ་སྤང་བྱ་སྤོང་བའི་ནུས་པ་ཆེ་ཆུང་གི་ཁྱད་པར་ཆེ་བའི་ཕྱིར་རོ། །འདི་དག་ནི་ཐུན་མོང་མ་ཡིན་པའི་རྣམ་གཞག་རྟོགས་པའི་ཆེད་དུ་གྲུབ་མཐའ་གོང་འོག་གི་མི་འདྲ་བའི་ཁྱད་པར་ཅུང་ཟད་ཕྱེ་ཞིང་ཐེག་ཆེན་དབུ་མའི་ལུགས་ཀྱི་ཐུན་མོང་མ་ཡིན་པ་ཞིབ་ཏུ་བཤད་པ་ཡིན་ནོ། །གྲུབ་མཐའ་གོང་འོག་བསྲེས་པའི་ལུགས་ངོས་གཟུང་མེད་པ་རྣམས་ལ་འདིར་དགག་སྒྲུབ་བྱེད་པ་མ་ལོང་ཞིང་། གཞན་དུ་ཅུང་ཟད་བཤད་ཟིན་ལ། ཞིབ་པར་ནི་རང་ལུགས་འདི་རྟོགས་ན་ཤེས་པར་འགྱུར་རོ། །མཁས་པ་སྔ་མའི་གྲུབ་མཐའ་སུན་ཕྱུང་ནས། །རང་གི་རྣམ་རྟོག་ཤིང་རྟའི་སྲོལ་འབྱེད་དུ། །སྟོན་འདོད་མེད་ཀྱང་རྣམ་དཔྱོད་མེ་ལོང་ལ། །གནས་ལུགས་གཟུགས་བརྙན་འཆར་བ་སུ་ཡིས་འགོག །སྐབས་སུ་བབ་པའི་གཞུང་ལུགས་ཚད་ལྡན་དང་། །འགལ་བར་སྟོན་ན་ཁོ་བོས་འཇུག་ལྡོག་བྱེད། །དེ་ལྟ་མིན་པར་ཅལ་ཅལ་མགྲིན་བསྒྲིགས་ནས། །ཅོལ་ཅོལ་སྒྲོགས་ལ་བ་སྤུ་གཡོ་རེ་སྐན། །ཞེས་སྨྲས་སོ། །བྱང་སེམས་ཀྱི་སྒོམ་ལམ་ལ་སྒོམ་ལམ་གྱི་བྱེད་པ་ནི། ཀུན་ནས་ཞི་དང་ཐམས་ཅད་ལ། །ཞེས་སོགས་ཏེ། སྒོམ་ལམ་གྱི་བྱེད་པ་དང་པོར་བསྟན་པ་ནི་བྱང་སེམས་ཀྱི་སྒོམ་ལམ་དེ་ཡང་གཞན་ལ་སྟོན་པ་དང་། རང་གིས་སྒོམ་པ་གཉིས་ཆར་གྱི་ཚེ་ཡང་། བྱེད་པའི་སྒོ་ནས་སྤྲོ་བ་བསྐྱེད་དགོས་ཞེས་ཤེས་པའི་ཆེད་ཡིན་ནོ། །འོ་ན་རྟོགས་རིགས་སྔ་མ་གཉིས་ཀྱང་ཕན་ཡོན་གྱིས་སྤྲོ་བ་བསྐྱེད་པའི་སྒོ་ནས་སྟོན་དགོས་པར་མཚུངས་སོ། །ཞེ་ན་མི་མཚུངས་ཏེ། འདི་ནི་མ་ངེས་པའི་རིགས་ཅན་རྣམས་དམན་པའི་ལམ་སྤངས་ནས་ཐེག་ཆེན་གྱི་ལམ་གྱིས་རྗེས་སུ་གཟུང་བར་བྱ་བའི་ཕྱིར་དུ་ཕན་ཡོན་གྱིས་སྤྲོ་བ་བསྐྱེད་པ་ཡིན་ལ། སྔ་མ་གཉིས་ནི་རེ་ཞིག་ཐེག་ཆེན་གྱི་ལམ་དུ་འཇུག་པར་མི་ནུས་པ་རྣམས་ལ་བསྟན་པར་བྱ་བ་ཡིན་པས་དེ་ལ་ཕན་ཡོན་གྱིས་སྤྲོ་བ་བསྐྱེད་པ་ལ་དགོས་པ་མེད་པའི་ཕྱིར་རོ། །འོ་ན་བྱང་སེམས་ཀྱི་སྒོམ་ལམ་དེ་ལ་སྐབས་དང་པོར་གདམས་ངག་གི་སྐབས་སུ་མཐོང་ལམ་དང་རྟོགས་རིགས་ཐ་དད་མེད་པ་དང་། ཚོགས་སྒྲུབ་ཀྱི་སྐབས་སུ་སའི་ཚོགས་དང་། གཉེན་པོའི་ཚོགས་དང་། སྐབས་བཞི་པར་ཕྱིར་མི་ལྡོག་པའི་གཏན་ཚིགས་དང་། སྐབས་ལྔ་པར་སྒོམ་སྤང་གི་གཉེན་པོའི་ལྡོག་པ་ནས་བསྟན་པ་ལས་འདིར་རྗེས་ཐོབ་དང་མཉམ་གཞག་གིས་བསྟན་པའི་རྒྱུ་མཚན་ཅི་ཡིན་ཞེ་ན། བྱང་སེམས་ཀྱི་སྒོམ་ལམ་དེ་གཞན་ལ་སྟོན་པའི་ཚེ་ཡང་སྒོམ་ལམ་གྱི་རིགས་མ་ལུས་པ་བསྟན་དགོས་ལ་རང་གིས་བསྒོམ་པའི་ཚེ་ཡང་རིགས་མ་ལུས་པ་བསྒོམ་དགོས་ཤིང་རིགས་མ་ལུས་པ་དེ་ཡང་རྗེས་ཐོབ་དང་མཉམ་གཞག་གཉིས་ཀྱིས་བསྡུས་པའི་དོན་ནོ། །བྱང་སེམས་ཀྱི་སྒོམ་ལམ་རྗེས་ཐོབ་དེ་ཡང་བསོད་ནམས་ཀྱི་ཚོགས་རྫོགས་པར་བྱེད་པའི་ལྡོག་པ་ནས་བསྟན་དགོས་པས། དང་པོར་བསོད་ནམས་ཀྱི་ཚོགས་གསོག་པ་དང་། བར་དུ་སྤེལ་བ་དང་། ཐ་མར་མི་ཟད་པར་བྱེད་པ་གསུམ་གྱི་དབང་དུ་བྱས་ནས་མོས་བསྔོ་རྗེས་སུ་ཡི་རང་གསུམ་དུ་ངེས་ཤིང་། གོ་རིམ་ཀྱང་དེ་ལྟར་དུ་བསྟན་པ་ཡིན་ནོ། །དེ་ཡང་མོས་པ་སྒོམ་ལམ་ནི། ས་མཚམས་ཀྱི་རབ་དབྱེའི་སྒོ་ནས་བསྟན། བསྔོ་བ་སྒོམ་ལམ་ནི། བྱེད་པ་དང་མི་དམིགས་པའི་རྣམ་པ་ཅན་གྱི་སྒོ་ནས་བསྟན། རྗེས་སུ་ཡི་རང་སྒོམ་ལམ་ནི། ཐབས་ཤེས་གཉིས་ཀྱི་སྒོ་ནས་བསྟན་ནས། མོས་པ་སྒོམ་ལམ་གྱི་ས་མཚམས་ཀྱི་རབ་དབྱེ་འོག་མ་གཉིས་ལ་སྦྱར། བསྔོ་བ་སྒོམ་ལམ་གྱི་བྱེད་པ་དང་མི་དམིགས་པ་ཡང་གོང་འོག་གཉིས་ལ་སྦྱར། རྗེས་སུ་ཡི་རང་སྒོམ་ལམ་གྱི་ཐབས་ཤེས་གཉིས་ཀྱང་གོང་མ་གཉིས་ལ་སྦྱར་བར་བྱ་བ་ཡིན་ནོ། །མོས་པ་སྒོམ་ལམ་གྱི་ས་མཚམས་ཀྱི་རབ་དབྱེ་ཇི་ལྟ་བུ་དེ་འོག་མ་གཉིས་ལ་ཇི་ལྟར་སྦྱོར་ཞེ་ན། དང་པོ་ནི། གང་ལ་མོས་པར་བྱ་བའི་ཡུལ་ནི་ཤེར་ཕྱིན་དང་། མོས་པར་བྱེད་པའི་བློ་ནི་ས་གཉིས་པ་ནས་བཅུ་པའི་བར་གྱི་མོས་པ་དགུ་པོ་དེ་ཡིན་ལ། ཚུལ་ནི་བློ་དགུ་པོ་དེས་ཤེར་ཕྱིན་རང་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་རང་དོན་མོས་པ་དགུ། གཉིས་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་གཉིས་དོན་མོས་པ་དགུ། གཞན་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་གཞན་དོན་མོས་པ་དགུར་འཇོག་པ་ནི། མོས་པ་རང་གི་དོན་དང་ནི། །ཞེས་སོགས་ཀྱིས་བསྟན་ནོ། །དེས་ན་དགུ་ཚན་གསུམ་པོ་དེ་ཉིད་རེ་རེ་བཞིན་ས་གཉིས་པ་ནས་བཅུ་པའི་བར་དུ་ཡོད་པར་ཤེས་པར་བྱའོ། །འདི་ནི་འགྲེལ་ཆེན་ལས་ལུགས་གཉིས་གསུངས་པའི་གཅིག་ཡིན་ཞིང་བསྟན་བཅོས་རྩ་བར་གསུམ་པོ་རེ་རེ་ལ་ཡང་ཆུང་ངུའི་ཆུང་ངུ་ལ་སོགས་པ་དགུ་དགུར་གསུངས་པའི་གནད་ཀྱིས་ས་གཉིས་པ་ནས་བཅུ་པའི་བར་དུ་འཇོག་པར་སྣང་སྟེ། ས་དགུ་ལ་ནི་ཆེན་པོ་ཡི། །ཞེས་སོགས་དང་། དེ་ནི་རྒྱུན་ཆགས་ཡིན་པའི་ཕྱིར་ཞེས་པའི་སྐབས་དང་ཚུལ་འདྲའོ། །ཉིར་སྣང་ལས། མོས་པའི་རྣམ་པ་ཐམས་ཅད་ལ་ཡང་ཆུང་ངུའི་ཆུང་ངུ་ལ་སོགས་པ་དཔེ་གོང་ནས་གོང་དུ་གྱུར་པས། གང་དང་གང་བསྟན་པ་དེ་དང་དེའི་རྗེས་སུ་འབྲངས་ནས་ཆེན་པོའི་ཆེན་པོ་ལ་སོགས་པ་ལྡོག་པ་མི་མཐུན་པའི་ཕྱོགས་སུ་ཤེས་པར་བྱའོ། །ཞེས་གསུངས་པས་ཀྱང་དོན་འདི་ཉིད་བསྟན་ནོ། །ཉིར་སྣང་ལས། རང་གི་དོན་གྱི་མོས་པ་ནི་གང་གིས་རང་གི་དོན་དངོས་སུ་སྒྲུབ་པར་བྱེད་ཅིང་གཞན་གྱི་དོན་ཡང་ཆེད་དུ་བྱ་བའི་རང་བཞིན་གྱིས་བྱེད་པའོ། །རང་དང་གཞན་གྱི་དོན་ནི་གང་གིས་གཉིས་ཀའི་དོན་སྒྲུབ་པར་བྱེད་པའོ། །གཞན་གྱི་དོན་ནི་གང་གིས་གཞན་ཁོ་ནའི་དོན་དུ་འགྱུར་བ་སྟེ། དེར་ཡང་རང་གི་དོན་ནི་འགྲུབ་པ་ཡིན་གྱི་དེར་རང་གི་དོན་འགོག་པ་ནི་མ་ཡིན་ནོ། །ཞེས་གསུངས་པའི་དོན་དུ་བསམས་ནས་རང་དོན་མོས་པ་ས་གཉིས་པ་ནས་བདུན་པའི་བར་དང་། གཉིས་དོན་མོས་པ་ས་བརྒྱད་པ་དང་དགུ་པ་གཉིས་དང་། གཞན་དོན་མོས་པ་ས་བཅུ་པར་འཇོག་པ་ནི་རེ་རེ་ལ་ཡང་དགུ་དགུར་ཕྱེ་བའི་འཇོག་ཚུལ་དང་མི་མཐུན་ཅིང་། ཉིར་སྣང་ཉིད་ལས། དེ་ལ་རང་གི་དོན་གྱི་མོས་པ་ནི་གཞན་གི་དོན་ཆེད་དུ་བྱ་བར་འགྱུར་ལ། གཉིས་པ་ལ་ནི། སྦྱོར་བ་བར་ཆད་དང་བཅས་པའོ། །གསུམ་པ་ལ་ནི། སྦྱོར་བ་བར་ཆད་མེད་པ་ཡིན་ནོ། །ཞེས་གསུངས་པ་དང་ཡང་མི་འགྲིག་སྟེ། ས་བདུན་པ་མན་ཆད་དུ་གཞན་དོན་དངོས་སུ་མི་བྱེད་པར་ཆེད་དུ་བྱ་བའི་སྒོ་ནས་བྱེད་པར་མ་ངེས་པའི་ཕྱིར་དང་། ས་བརྒྱད་པ་དང་དགུ་པ་ལ་གཞན་དོན་ལ་སྦྱོར་བ་བར་ཆད་དང་བཅས་པར་མ་ངེས་པའི་ཕྱིར། དེས་ན་ལུང་དེའི་དོན་ཡང་ས་དགུའི་རྗེས་ཐོབ་རེ་རེ་ལ་ཡང་གསུམ་གསུམ་ཡོད་པ་ལ་མོས་པ་གསུམ་གསུམ་དུ་འཇོག་པར་མངོན་ཏེ། སྔ་མའི་དོན་ཏོ། །དེ་ལྟ་བུའི་མོས་པ་བསྒོམ་པའི་བྱང་ཆུབ་སེམས་དཔའ་སྤྲོ་བ་བསྐྱེད་པའི་ཆེད་དུ་དེ་བཞིན་གཤེགས་པས་རང་དོན་མོས་པ་དགུ་ལ་བསྟོད་པ་དགུ། གཉིས་དོན་མོས་པ་དགུ་ལ་བཀུར་བ་དགུ། གཞན་དོན་མོས་པ་དགུ་ལ་བསྔགས་པ་དགུ་མཛད་པ་ཡིན་ནོ། །ཞེས་པ་ནི། ཤེས་རབ་ཕ་རོལ་ཕྱིན་པ་ལ། །ཞེས་སོགས་ཀྱིས་བསྟན་ཏོ། །མོས་པའི་དབྱེ་བ་འོག་མ་གཉིས་ལ་སྦྱོར་ཚུལ་ནི། བསྔོ་བ་སྒོམ་ལམ་བཅུ་གཉིས་སུ་ཡོད་པ་དེ་རེ་རེ་ལ་ཡང་ཆུང་ངུའི་ཆུང་དུ་སོགས་དགུ་དགུར་ཕྱེ་ཞིང་རྗེས་སུ་ཡི་རང་སྒོམ་ལམ་ལ་ཡང་ཆུང་ངུའི་ཆུང་ངུ་སོགས་དགུ་ཡོད་པས་དེ་གཉིས་ས་གཉིས་པ་ནས་བཅུ་པའི་བར་དུ་ཡོད་པར་ཤེས་པར་བྱའོ། །བསྔོ་བ་སྒོམ་ལམ་བྱེད་པ་དང་མི་དམིགས་པའི་རྣམ་པའི་སྒོ་ནས་བསྟན་པ་ནི། ཡོངས་སུ་བསྔོ་བ་ཁྱད་པར་ཅན། །ཞེས་སོགས་ཏེ། དེ་གོང་འོག་གཉིས་ལ་སྦྱོར་པའི་ཚུལ་ནི་མོས་པ་སྒོམ་ལམ་དེ་ཡང་བྱེད་པ་མ་འོངས་པ་ན་ཤེར་ཕྱིན་འཐོབ་པའི་བྱ་བ་བྱེད་ཅིང་། རྣམ་པ་མི་དམིགས་པའི་རྣམ་པ་ཅན་དང་། རྗེས་སུ་ཡི་རང་སྒོམ་ལམ་དེ་ཡང་བྱེད་པ་རང་གཞན་གྱི་དགེ་རྩ་མཉམ་པར་ཐོབ་པའི་བྱ་བ་བྱེད་ཅིང་། རྣམ་པ་མི་དམིགས་པའི་རྣམ་པ་ཅན་ཡིན་ནོ། །ཞེས་པའི་སྒོ་ནས་སོ། །རྗེས་སུ་ཡི་རང་སྒོམ་ལམ་ཐབས་ཤེས་གཉིས་ཀྱི་སྒོ་ནས་བསྟན་པ་ནི། ཐབས་དང་མི་དམིགས་པ་དག་གི །ཞེས་སོགས་ཏེ། དེ་གོང་མ་གཉིས་ལ་ཇི་ལྟར་སྦྱོར་བའི་ཚུལ་ནི་གོང་མ་གཉིས་ཀྱང་མི་དམིགས་པའི་རྣམ་པ་ཅན་ཁོ་ན་མ་ཡིན་པར་ཐབས་དང་ཟུང་འཇུག་ཡིན་ནོ། །ཞེས་པའི་སྒོ་ནས་སོ། །དེ་ལྟར་རྗེས་ཐོབ་བསོད་ནམས་ཀྱི་ཚོགས་ཀྱིས་བསྡུས་པ་བསྟན་ཟིན་ནས། མཉམ་གཞག་ཡེ་ཤེས་ཀྱི་ཚོགས་ཀྱི་ལྡོག་པ་ནས་བསྟན་དགོས་པས་མཉམ་གཞག་འཆད་དོ། །དེ་ལ་ཡང་རང་གི་ངོས་སྐལ་གྱི་སྒྲིབ་པ་སྤོང་བའི་གཉེན་པོ་དང་། དེ་ལས་གྲོལ་བའི་རྣམ་གྲོལ་ལམ་གཉིས་སུ་ངེས་པས་སྒྲུབ་པ་སྒོམ་ལམ་དང་རྣམ་དག་སྒོམ་ལམ་གཉིས་སུ་བསྟན་ལ་དེ་ལ་དང་པོར་སྒྲུབ་པ་སྒོམ་ལམ་ནི། དེ་ཡི་ངོ་བོ་ཉིད་མཆོག་ཉིད། །ཅེས་སོགས་ཏེ། ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་སྒོམ་ལམ་མཉམ་གཞག་སྦྱོར་བའི་ལམ་དང་། བར་ཆད་མེད་པའི་ལམ་གྱིས་བསྡུས་པ་རྣམས་སོ། །དེ་ལྟ་བུའི་སྒྲུབ་པ་སྒོམ་ལམ་དེ་ཡང་མཐུན་རྐྱེན་རྒྱུ་ཚོགས་ཚང་ཞིང་འགལ་རྐྱེན་བར་ཆད་སྤོང་བའི་སྒོ་ནས་སྒྲུབ་དགོས་པས་རྒྱུ་ཚོགས་དང་། འགལ་རྐྱེན་བར་ཆད་གཉིས་པོ་དེ། །སངས་རྒྱས་བསྟན་དང་སྦྱིན་སོགས་དང་། །ཞེས་སོགས་ཀྱིས་བསྟན། སློབ་དཔོན་གྱིས་འདི་རྣམ་དག་སྒོམ་ལམ་ལ་སྦྱོར་བར་མཛད་ཀྱང་སྔ་མ་དང་དོན་གཅིག་པ་ཡིན་ཏེ། རྒྱུ་ཚོགས་གཉིས་སྒྲུབ་པ་དང་། བར་ཆད་སྤོང་བ་གཉིས་པོ་དེ་ཡང་སྒོམ་ལམ་གཉིས་ཆར་གྱི་སྔོན་དུ་འགྲོ་དགོས་པ་ཡིན་གྱི། དེ་གཉིས་ཀྱི་བར་དུ་འགྱུར་བ་མ་ཡིན་པའི་ཕྱིར་རོ། །འོན་ཀྱང་། འདི་ལ་མོས་པའི་རྒྱུ་དག་ཡིན། །ཞེས་པའི་ཉེ་ཚིག་གི་ནུས་པས་སྔ་མ་དང་སྦྱར་བ་ལེགས་སོ། །རྣམ་དག་སྒོམ་ལམ་བསྟན་པ་ལ་འཕགས་བཞིའི་རྣམ་དག་སྤྱིར་བསྟན་པ་ནི། འབྲས་བུ་དག་པ་གཟུགས་ལ་སོགས། །ཞེས་སོགས་ཏེ། དེའི་དོན་ཡང་འཕགས་བཞིའི་རྣམ་དག་དེ་དྲི་མས་རྣམ་པར་དག་པ་ན། དེའི་ཡུལ་གཟུགས་སོགས་ཀྱང་དྲི་མ་དེ་ཉིད་ཀྱིས་དག་པ་ཡིན་ཞེས་པའོ། །འོ་ན་སངས་རྒྱས་ཀྱི་ཡེ་ཤེས་དྲི་མས་དག་པས་ཤེས་བྱ་ཐམས་ཅད་དྲི་མས་དག་པར་འགྱུར་རོ་ཞེ་ན། རང་སྣང་ལ་འདོད་དེ། རང་སྣང་ལ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཕྱིར་རོ། །འོ་ན་དྲི་མ་གང་དང་གང་དག་པས་འཕགས་པ་གང་དང་གང་གི་རྣམ་དག་ཏུ་འཇོག་ཅེ་ན། རྣམ་དག་གི་ཁྱད་པར་སོ་སོར་བསྟན་པ་ནི། ཉོན་མོངས་ཤེས་བྱ་ལམ་གསུམ་གྱི། །ཞེས་སོགས་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་ཙམ་གྱིས་དག་པའི་ཕྱིར་ན་ཉན་ཐོས་ཀྱི་རྣམ་དག་དང་། དེ་དང་ཤེས་སྒྲིབ་གཟུང་རྟོག་ཙམ་གྱིས་དག་པའི་ཕྱིར་རང་རྒྱལ་གྱི་རྣམ་དག་དང་། ཐེག་པ་གསུམ་གྱི་ལམ་གྱི་སྒྲིབ་པ་གསུམ་རྣམ་པར་དག་པའི་ཕྱིར་ན་བྱང་སེམས་ཀྱི་རྣམ་དག་དང་། སྒྲིབ་པ་མ་ལུས་པ་དག་པའི་ཕྱིར་ན་སངས་རྒྱས་ཀྱི་རྣམ་དག་ཏུ་འཇོག་ཅེས་པའི་དོན་ཏོ། །འདི་རྣམ་དག་སྒོམ་ལམ་འཆད་པའི་སྐབས་ཡིན་པས་འཕགས་བཞིའི་རྣམ་དག་འཆད་པ་སྐབས་སུ་མ་བབ་བོ་སྙམ་ན་བརྗོད་བྱའི་གཙོ་བོ་རྣམ་དག་སྒོམ་ལམ་གྱི་སྤངས་པའི་ཁྱད་པར་བདེ་བླག་ཏུ་རྟོགས་པའི་ཆེད་དུ་འཕགས་པ་བཞི་ཆར་གྱི་རྣམ་དག་འཆད་དགོས་པས་དེའི་དབང་དུ་བྱས་པའོ། །ཇི་ལྟར་རྟོགས་ཤེ་ན། རྣམ་དག་སྒོམ་ལམ་ཆོས་ཅན། རྣམ་དག་སྔ་མ་གཉིས་ལས་སྤངས་པའི་སྒོ་ནས་ཁྱད་པར་དུ་འཕགས་ཏེ། རྣམ་དག་དང་པོས་ནི་ཉན་ཐོས་ཀྱི་སྤང་བྱ་ཙམ་ལས་མ་སྤངས། གཉིས་པས་ནི་རང་རྒྱལ་གྱི་སྤང་བྱ་ཙམ་ལས་མ་སྤངས་ཤིང་། ཁྱོད་ཀྱིས་དེ་གཉིས་ཀྱི་སྟེང་དུ་ཐེག་ཆེན་གྱི་ལམ་གྱི་སྤང་བྱར་གྱུར་པའི་མཐོང་སྤང་ཤེས་སྒྲིབ་དང་། རང་རྒྱུ་སྒོམ་ལམ་བར་ཆད་མེད་ལམ་གྱི་ངོས་སྐལ་གྱི་སྤང་བྱ་སྤངས་པས་ཐེག་པ་གསུམ་གྱི་ལམ་གྱི་སྒྲིབ་པ་གསུམ་སྤངས་པའི་ཕྱིར་རོ། །སངས་རྒྱས་ཀྱི་རྣམ་དག་ལས་སྤངས་པའི་སྒོ་ནས་དམན་པ་ཡིན་ཏེ། སྒྲིབ་པ་མ་ལུས་པ་མ་སྤངས་པའི་ཕྱིར། ཞེས་པའི་ཚུལ་གྱིས་རྟོགས་སོ། །དེས་ན་འདིར་རྣམ་དག་སྒོམ་ལམ་བརྗོད་བྱའི་གཙོ་བོ་ཡིན་ཀྱང་དེའི་ཁྱད་པར་རྟོགས་པ་ལ་གོང་འོག་གི་རྣམ་དག་གཞན་གསུམ་ཡང་བསྟན་དགོས་པས་འཕགས་པ་བཞི་ཆར་གྱི་རྣམ་དག་བསྟན་པའི་གནད་ཀྱང་དེ་ཉིད་ཡིན་ནོ། །དཔེར་ན། གོང་དུ་ཤེས་བྱ་རང་རྒྱལ་གྱི་ལམ་དེ་ཉན་ཐོས་ཀྱི་ལམ་ལས་རྟོགས་རིགས་ཁྱད་པར་འཕགས་ཤིང་བྱང་སེམས་ཀྱི་ལམ་ལས་རྟོགས་རིགས་དམན་པར་བསྟན་པ་བཞིན་ནོ། །བྱང་སེམས་འཕགས་པའི་རྒྱུད་ཀྱི་རྣམ་གྲོལ་ལམ་ཐམས་ཅད་ནི་རྣམ་དག་སྒོམ་ལམ་མ་ཡིན་ཏེ། བྱང་སེམས་ཀྱི་མཐོང་ལམ་རྣམ་གྲོལ་ལམ་དེ་ཡང་སྐབས་འདིར་བསྟན་གྱི་བྱང་སེམས་ཀྱི་རྣམ་དག་ཡིན་པའི་ཕྱིར་རོ། །འོ་ན་རྣམ་དག་སྒོམ་ལམ་དེ་ཐེག་པ་གསུམ་གྱི་ལམ་གྱི་སྒྲིབ་པ་གསུམ་སྤངས་པའི་སྒོ་ནས་བསྟན་པའི་རྒྱུ་མཚན་ཅི་ཡིན་ཞེ་ན། གོང་དུ་ཤེས་བྱའི་ལམ་དེ་ལ་ཤེས་བྱ་ཉན་ཐོས་ཀྱི་ལམ། ཤེས་བྱ་རང་རྒྱལ་གྱི་ལམ། ཤེས་བྱ་བྱང་སེམས་ཀྱི་ལམ་གསུམ་དུ་ཕྱེ་ནས་རྣམ་དག་སྒོམ་ལམ་ནི། ལམ་ཕྱི་མ་དེར་བསྟན་པ་ན་སྤང་བྱ་ཡང་བྱང་སེམས་ཀྱི་སྤང་བྱའི་རིགས་ཁོ་ན་སྤོང་ཞིང་རྟོགས་པ་ཡང་བྱང་སེམས་ཀྱི་ལམ་གྱི་རྟོགས་རིགས་ཁོ་ན་ཡིན་ནམ་སྙམ་པའི་དོགས་པ་སྐྱེ་བས་དེ་བཅད་པའི་ཆེད་ཡིན་ཏེ། སྤང་བྱ་ཐེག་པ་གསུམ་གྱི་ལམ་གྱི་སྤང་བྱའི་རིགས་སྤངས་པར་བསྟན་ཅིང་རྟོགས་པ་ཡང་ཐེག་པ་གསུམ་ཆར་གྱི་རྟོགས་རིགས་ཚང་བ་ཡིན་ནོ། །ཞེས་བསྟན་པའི་ཕྱིར་རོ། །སློབ་དཔོན་གྱིས་འགྲེལ་པའི་དངོས་བསྟན་ལ་རྣམ་དག་སྒོམ་ལམ་གྱི་སྐབས་སུ་ཉན་ཐོས་སོགས་ཀྱི་རྣམ་དག་དེ་ཤིན་ཏུ་བ་མ་ཡིན་པ་དང་། སངས་རྒྱས་ཀྱི་རྣམ་དག་ཤིན་ཏུ་བར་བསྟན་ན་དེ་གཉིས་ཀྱི་ཁྱད་པར་ཇི་ལྟ་བུ་ཞེ་ན། ཐེག་ཆེན་གྱི་སྒོམ་ལམ་དེས་ཁམས་གསུམ་གྱི་ཤེས་སྒྲིབ་མཐའ་དག་གི་དངོས་གཉེན་བྱེད་པའི་ཕྱིར། ཞེས་པ་ནི། ས་དགུ་ལ་ནི་ཆེན་པོ་ཡི། །ཞེས་སོགས་ཀྱིས་བསྟན། དེའི་སྐབས་སུ་གཉེན་པོ་ཆུང་རིམ་ནས་སྐྱེ། སྤང་བྱ་ཆེ་རིམ་ནས་འགག་པར་བསྟན་པ་ལ་དེ་ལྟ་བུའི་སྤང་གཉེན་གྱི་རིམ་པ་མི་འཐད་ཅེས་པའི་རྩོད་པ་སྤོང་བ་ནི། དེ་ལ་ཀླན་ཀ་སྤངས་པ་ཡིས། །ཞེས་སོགས་ཀྱིས་བསྟན། ཞེས་བཤད་ཅིང་། དེའི་དོན་ནུས་པ་ཐོན་པར་བྱས་ན་འདི་ལྟར་བྱ་སྟེ། བྱང་སེམས་ཀྱི་རྣམ་དག་དེ་ཐེག་པ་གསུམ་གྱི་ལམ་གྱི་སྒྲིབ་པས་དག་ཅེས་པ་དང་། སངས་རྒྱས་ཀྱི་རྣམ་དག་དེ་རྣམ་དག་ཤིན་ཏུ་བ་ཡིན་ཞེས་པའི་ཁྱད་པར་དེ་མི་འཐད་པར་ཐལ། ཐེག་པ་གསུམ་གྱི་ལམ་གྱི་སྤང་བྱ་ལས་ལོགས་སུ་གྱུར་པའི་སྤང་བྱ་མེད་པའི་ཕྱིར་ཞེ་ན། སྐྱོན་མེད་དེ། བྱང་སེམས་ཀྱི་རྣམ་དག་གིས་སྤངས་པའི་སྒྲིབ་པ་གསུམ་ནི་ཉན་ཐོས་ཀྱི་སྤང་བྱའི་རིགས་སུ་གནས་པའི་ཉོན་སྒྲིབ་དང་། རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་དང་། ཐེག་ཆེན་གྱི་སྤང་བྱའི་རིགས་སུ་གནས་པའི་མཐོང་སྤང་དང་། སྒོམ་སྤང་གི་ཆ་སྔ་མ་ཡིན་ཞིང་། དེས་སྒོམ་སྤང་གི་ཆ་ཕྱི་མ་མ་སྤངས། སངས་རྒྱས་ཀྱི་རྣམ་དག་དེས་དེ་སྤངས་པས་ཤིན་ཏུ་བར་འཇོག་པའི་ཕྱིར། བྱང་སེམས་ཀྱི་རྣམ་དག་དེས་བྱང་སེམས་ཀྱི་སྤང་བྱའི་རིགས་སུ་གནས་པའི་སྒོམ་སྤང་ཤེས་སྒྲིབ་མ་སྤངས། སངས་རྒྱས་ཀྱི་རྣམ་དག་དེས་དེ་སྤངས་པའི་རྒྱུ་མཚན་ཅི་ཡིན་ཞེ་ན། སྔ་མས་དེ་མ་སྤངས་ཏེ། དེ་ལ་བྱང་སེམས་ཀྱི་མཐོང་ལམ་རྣམ་གྲོལ་ལམ་ནས་ས་དགུ་པའི་རྣམ་གྲོལ་ལམ་གྱི་བར་དགུ་ཡོད་པ་ལས། སྔ་མས་བྱང་སེམས་ཀྱི་སྤང་བྱའི་རིགས་སུ་གནས་པའི་སྒོམ་སྤང་ཤེས་སྒྲིབ་ཅུང་ཟད་ཀྱང་མ་སྤངས། ཕྱི་མས་སྒོམ་སྤང་ཤེས་སྒྲིབ་ཆུང་ངུའི་ཆུང་ངུ་མ་སྤངས་པའི་ཕྱིར། སངས་རྒྱས་ཀྱི་རྣམ་དག་དེས་དེ་སྤངས་ཏེ། ཐེག་ཆེན་གྱི་སྒོམ་ལམ་བར་ཆད་མེད་ལམ་དགུ་པོ་དེས་ཁམས་གསུམ་གྱི་སྒོམ་སྤང་ཤེས་སྒྲིབ་དགུའི་དངོས་གཉེན་བྱེད་ནུས་པ་གང་ཞིག སངས་རྒྱས་ཀྱི་རྣམ་དག་དེ་དེ་ཐམས་ཅད་རྫོགས་པའི་རྗེས་སུ་བྱུང་བ་ཡིན་པའི་ཕྱིར། ཞེས་པ་ནི། ས་དགུ་ལ་ནི་ཆེན་པོ་ཡི། །ཞེས་སོགས་སོ། །བྱང་སེམས་ཀྱི་རྣམ་དག་ཡིན་ན་ཐེག་པ་གསུམ་གྱི་ལམ་གྱི་སྒྲིབ་པ་གསུམ་གྱིས་དག་པས་ཁྱབ་པའི་རྒྱུ་མཚན་ནི། བྱང་སེམས་ཀྱི་རྣམ་དག་གི་མ་མཐའ་མཐོང་ལམ་རྣམ་གྲོལ་ལམ་ནས་ངོས་འཛིན་ལ་དེས་མཐོང་སྤང་གཟུང་འཛིན་གྱི་རྣམ་པར་རྟོགས་པ་བཞི་ཀ་སྤངས་ཟིན་ཞིང་། དེའི་ནང་དུ་ཐེག་པ་གསུམ་གྱི་སྤང་བྱའི་རིགས་འདུས་པའི་ཚུལ་ནི་སྔར་བཤད་ཟིན་ཏོ།། །།རྣམ་དག་སྒོམ་ལམ་ཕྱི་མ་རྣམས་ཀྱི་སྒོམ་སྤང་གི་ཆ་སྔ་མ་སྔ་མ་སྤངས་པ་ཡང་ཐེག་ཆེན་གྱི་ལམ་གྱི་སྤང་བྱ་སྤངས་པའི་ཁོངས་སུ་འདུས་པས་ལོགས་སུ་སྨོས་མི་དགོས་སོ། །འདིར་སྤང་བྱ་སྒྲིབ་པའི་ངོས་འཛིན། སྤོང་བྱེད་གཉེན་པོའི་ངོས་འཛིན། སྤང་གཉེན་སྦྱར་བའི་ཚུལ་དང་གསུམ་ལས། དང་པོ་ནི། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །ཞེས་ཏེ། ས་དགུ་ནི་འདོད་པ་ནས་སྲིད་རྩེའི་བར་གྱི་ཁམས་གསུམ་ས་དགུ་སྟེ། ཉིར་སྣང་ལས། དེ་ཡང་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱིས་བསྡུས་པའི་ས་དགུ་པོ་རྣམས་ལ་ཞེས་དང་། འགྲེལ་ཆུང་ལས། འདོད་པའི་ཁམས་དང་། བསམ་གཏན་དང་། གཟུགས་མེད་པའི་ཁམས་ཏེ་ས་དགུ་པོ་དག་ལ་ཞེས་གསུངས་པའི་ཕྱིར། ས་དགུ་པོ་རེ་རེ་ལ་ཡང་སྒོམ་སྤང་ཆེན་པོའི་ཆེན་པོ་ལ་སོགས་པ་རྣམ་པ་དགུ་དགུར་ཕྱེ་བས། བརྒྱད་ཅུ་གྱ་གཅིག་ཏུ་འགྱུར་བ་ནི་འདིར་སྤང་བྱའི་གྲངས་ངེས་ཏེ། ཉིར་སྣང་ལས། ས་དགུ་པོ་རྣམས་ལ་སོ་སོར་རྣམ་པར་རྟོགས་པ་ཆེན་པོའི་ཆེན་པོ་ལ་སོགས་པ་ཞེས་གསུངས་པའི་ཕྱིར་རོ། །འོ་ན་དགུར་བཤད་པ་དང་འགལ་ལོ་ཞེ་ན། ས་རེ་རེའི་དབང་དུ་བྱས་པས་མི་འགལ་ལོ། །སྐབས་ལྔ་པར་སྒོམ་སྤང་བཞིའམ་སུམ་ཅུ་སོ་དྲུག་ཏུ་བཤད་པ་དང་འགལ་ལོ་ཞེ་ན། དེ་ཉིད་འདི་དང་དོན་གཅིག་སྟེ། འདོད་པའི་སས་བསྡུས་ཀྱི་གཟུང་འཛིན་གྱི་རྣམ་པར་རྟོག་པ་སུམ་ཅུ་སོ་དྲུག་པོ་རེ་རེ་ལ་ཡང་། སྐབས་འདིར་འདོད་པའི་སས་བསྡུས་པའི་སྒོམ་སྤང་ཆེན་པོའི་ཆེན་པོ་ལ་སོགས་པ་དགུར་འཇོག་ཅིང་། སྲིད་རྩེའི་བར་དུ་ཡང་དེ་བཞིན་དུ་འགྱུར་བའི་ཕྱིར་རོ། །གཉིས་པ་ནི། གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་ཏེ། ས་གཉིས་པ་ནས་བཅུ་པའི་བར་གྱི་བར་ཆད་མེད་ལམ་དགུའོ། །གསུམ་པ་ནི། ཁམས་གསུམ་ས་དགུའི་སྒོམ་སྤང་དགུ་པོ་སྒོམ་ལམ་དགུས་རིམ་པ་བཞིན་དུ་སྤོང་བ་དང་། ས་རེ་རེའི་སྒོམ་སྤང་དགུ་པོ་སྒོམ་ལམ་དགུས་རིམ་པ་བཞིན་དུ་སྤོང་བ་གཉིས་པོ་གང་རུང་ལས་མ་འདས་ཏེ། ཁམས་གསུམ་ས་དགུའི་སྒོམ་སྤང་ཆེན་པོའི་ཆེན་པོ་ལ་སོགས་པ་དགུ། སྒོམ་ལམ་ཆུང་ངུའི་ཆུང་ངུ་ལ་སོགས་པ་དགུས་རིམ་པ་བཞིན་དུ་སྤོང་བར་གཞུང་ལས་དངོས་སུ་བཤད་པས་གཉིས་པོ་ལས་གཞན་བྱར་མེད་པའི་ཕྱིར་རོ། །དེ་ལྟར་ལུགས་གཉིས་ལས། སྔ་མ་མི་འཐད་དེ། དེ་ལྟར་ན་འདོད་པའི་སྒོམ་སྤང་ལ་ཆེན་པོའི་ཆེན་པོ་དང་། སྲིད་རྩེའི་སྒོམ་སྤང་ལ་ཆུང་ངུའི་ཆུང་ངུར་འཇོག་དགོས་པས་དེ་འདྲ་གཞུང་གང་ནས་ཀྱང་མ་བཤད་ཅིང་། ས་རེ་རེ་ལ་ཆེན་པོའི་ཆེན་པོ་ལ་སོགས་པ་དགུ་དགུར་ཡོད་པར་མཚུངས་པས་རིགས་པས་ཀྱང་མི་འཐད་པའི་ཕྱིར་རོ། །དེས་ན་ལུགས་ཕྱི་མ་ལས་འོས་མེད་པས་ས་དགུའི་སྒོམ་སྤང་བརྒྱད་ཅུ་རྩ་གཅིག་ཡོད་པས། ཐེག་ཆེན་གྱི་སྒོམ་ལམ་དེ་ལ་ཡང་ལྡོག་པའི་སྒོ་ནས་བརྒྱད་ཅུ་རྩ་གཅིག་ཏུ་འགྱུར་ཀྱང་རྫས་ཀྱི་སྒོ་ནས་རྣམ་པ་དགུར་འདུས་ཏེ། ས་གཉིས་པའི་བར་ཆད་མེད་ལམ་དེས་འདོད་པའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོ་ནས། སྲིད་རྩེའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོའི་བར་དགུ་ཅིག་ཆར་དུ་སྤོང་བ་ནས་ས་བཅུ་པའི་བར་ཆད་མེད་ལམ་དེས་འདོད་པའི་སྒོམ་སྤང་ཤེས་སྒྲིབ་ཆུང་ངུའི་ཆུང་ངུ་ནས། སྲིད་རྩེའི་སྒོམ་སྤང་ཤེས་སྒྲིབ་ཆུང་ངུའི་ཆུང་ངུའི་བར་དགུ་ཅིག་ཅར་དུ་སྤོང་བའི་ཕྱིར་རོ། །བྱང་སེམས་ཀྱིས་ཤེས་སྒྲིབ་རྣམ་པས་ཅིག་ཅར་དུ་སྤོང་བ་གཞུང་གཞན་ལས་ཀྱང་གྲུབ་སྟེ། ཉན་ཐོས་ལ་དབང་པོ་རྣོ་རྟུལ་གཉིས་ལས། རྣོན་པོས་ཉོན་སྒྲིབ་རྣམ་པས་ཅིག་ཅར་དུ་སྤོང་ནུས་ན། བྱང་སེམས་རིགས་ཅན་གསུམ་གྱི་ནང་ནས་རང་བཞིན་གྱིས་དབང་པོ་རྣོན་པོ་ཡིན་པས་ཤེས་སྒྲིབ་རྣམ་པས་ཅིག་ཅར་ཏུ་སྤོང་བར་གྲུབ་པའི་ཕྱིར་རོ། །ཀླན་ཀ་སྤང་ཚུལ་ལ། སློབ་དཔོན་གྱིས། ས་དགུ་ལ་ནི་ཆེན་པོ་ཡི། །ཞེས་པའི་སྐབས་སུ་གཉེན་པོ་ཆུང་རིམ་ནས་སྐྱེ་ཞིང་། སྤང་བྱ་ཆེ་རིམ་ནས་འགག་པར་བཤད་པ་ལ་དེ་ལྟ་བུའི་སྤང་གཉེན་གྱི་རིམ་པ་མི་འཐད་དོ་ཞེ་ན། གོས་ལ་ཆགས་པའི་དྲི་མ་རགས་པ་བཙོ་བླག་མཁན་གྱིས་འབད་པ་ཆུང་ངུས་སེལ་ལ། ཕྲ་མོ་འབད་པ་ཆེན་པོས་སེལ་དགོས་པའི་དཔེས་འཐད་པ་ཡིན་ནོ། །ཞེས་པ་ནི། དེ་ལ་ཀླན་ཀ་སྤངས་པ་ཡི། །ཞེས་པས་བསྟན། དེ་ལྟར་ཀླན་ཀ་སྤངས་ཟིན་ནས་བྱང་སེམས་ཀྱི་སྒོམ་ལམ་དེ་ཁམས་གསུམ་གྱི་ཤེས་པ་དང་། ཤེས་བྱ་མཉམ་ཉིད་དུ་རྟོགས་པའི་ཡུལ་ཅན་ཡིན་པས་སྒོམ་སྤང་ཤེས་སྒྲིབ་མ་ལུས་པའི་གཉེན་པོར་གྲུབ་བོ། །ཞེས་པ་ནི། ལམ་ནི་འཇལ་དང་ཞེས་སོགས་ཀྱིས་བསྟན་ཏོ། །ཉིར་སྣང་ལས། ཁམས་གསུམ་པ་ཡི་རྣམ་པ་ཅན། །འཇལ་དང་གཞལ་བྱ་མཉམ་པ་ཉིད། །དེ་ལ་ཀླན་ཀ་སྤངས་པ་ཡིས། །གཉེན་པོ་ཉིད་དུ་འདོད་པ་ཡིན། །ཞེས་བསྟན་ནས། གང་ལ་རྩོད་པའི་ཡུལ་ནི། ས་དགུ་ལ་ནི་ཆེན་པོ་ཡི། །ཞེས་པའི་སྐབས་སུ་སྤང་གཉེན་གྱི་རྣམ་གཞག་གསུངས་པ་དང་། འཇལ་དང་གཞལ་བྱ་མཉམ་པ་ཉིད། །ཅེས་པས། འཇལ་བྱེད་དང་གཞལ་བྱ་མཉམ་པ་ཉིད་དུ་བསྟན་པ་ལའོ། །ཇི་ལྟར་རྩོད་པའི་ཚུལ་ནི་འཇལ་བྱེད་དང་གཞལ་བྱ་མཉམ་པ་ཉིད་ཡིན་པ་དེ་མི་འཐད་པར་ཐལ། སྤང་གཉེན་གཉིས་སུ་རྟོག་པའི་སྒོ་ནས་སྤང་བྱ་ཆེ་རིམ་ནས་འགག་ཅིང་གཉེན་པོ་ཆུང་རིམ་ནས་སྐྱེ་བ་ཡིན་པའི་ཕྱིར་ཞེ་ན། དེའི་ལན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྣམ་པ་ཐམས་ཅད་མཁྱེན་པ་ཉིད་ལ་སྨན་པར་ཡང་མི་བགྱི། གནོན་པར་ཡང་མི་བགྱིད་པ་ལགས་སོ་ཞེས་ཏེ། དོན་དམ་པར་སྤང་གཉེན་མ་གྲུབ་པས་སྤང་གཉེན་གཉིས་སུ་རྟོག་པར་མི་འགྱུར། ཞེས་པའི་དོན་ཏོ། །འོ་ན་ཚོགས་གཉིས་ལ་འབད་པས་ཅི་ཞིག་བསྐྱེད་སྙམ་ན། དེའི་ལན་དུ་བཅོམ་ལྡན་འདས་ཤེར་ཕྱིན་རྣམ་པར་དག་པ་ནི། ཆོས་འགའ་ཡང་ཡོངས་སུ་འཛིན་པར་མི་བགྱིད་ལགས་སོ་ཞེས་ཏེ། དོན་དམ་པར་ཚོགས་གཉིས་ཀྱིས་བསྐྱེད་པའི་འབྲས་བུ་ཡང་མེད་ཅེས་པའི་དོན་ཏོ། །འོ་ན་ཐོབ་པའམ་མངོན་པར་རྟོགས་པ་འགའ་ཡང་མེད་པར་འགྱུར་རོ་སྙམ་ན། དེའི་ལན་དུ་བཅོམ་ལྡན་འདས་དབྱིངས་རྣམ་པར་དག་པ་ལ་ནི་ཐོབ་པ་མ་མཆིས། མངོན་པར་རྟོགས་པ་མ་མཆིས་སོ་ཞེས་ཏེ། དོན་དམ་པར་ཐོབ་པར་བྱ་བ་དང་། མངོན་པར་རྟོགས་པ་ཡང་མེད། ཅེས་པའི་དོན་ཏོ། །དེ་ལྟར་དངོས་བསྟན་དོན་དམ་གྱི་ལན་རྣམས་ཀྱིས་ནི་གཉེན་པོ་སྒོམ་ལམ་ཡུལ་གྱི་གནས་ཚུལ་ལ་ཞུགས་པར་བསྟན་ཅིང་། ཤུགས་བསྟན་ཀུན་རྫོབ་ཏུ་སྤང་གཉེན་གྱི་རྣམ་གཞག་ཡོད་པ་དང་། ཚོགས་གཉིས་ཀྱིས་བསྐྱེད་པའི་འབྲས་བུ་ཡོད་པ་དང་། ཐོབ་པ་དང་མངོན་པར་རྟོགས་པ་ཡོད་པའི་ལན་རྣམས་ཀྱིས་ནི་ཀུན་རྫོབ་ཏུ་སྤང་གཉེན་འཐད་པར་བསྟན་པས། ཐེག་པ་ཆེན་པོའི་སྒོམ་ལམ་དེ་ཁམས་གསུམ་གྱི་ཤེས་སྒྲིབ་མཐའ་དག་གི་གཉེན་པོ་ཉིད་དུ་གྲུབ་པའི་དོན་བསྡུ་བ་ནི། གཉེན་པོ་ཉིད་དུ་འདོད་པ་ཡིན། །ཞེས་པའོ། །གཞན་ལ་ནི་བཤད་ཚུལ་ལྟ་བུ་མི་སྣང་ངོ་། །སྦས་དོན་ཟབ་མོའི་གཏེར་གྱི་ཁ་འབྱེད་ལས། སྐབས་གཉིས་པའི་གཞུང་སོ་སོའི་འབྲེལ་དང་དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

གཞི་ཤེས།

སྐབས་གསུམ་པའི་འབྲེལ་ལ་སློབ་དཔོན་གྱིས་ཇི་ལྟར་བཀྲལ་བའི་ཚུལ་དང་། གནད་ཀྱི་དོན་ངོས་གཟུང་བ་གཉིས་ལས། དང་པོ་ནི། གཞི་མི་མཐུན་ཕྱོགས་དང་གཉེན་པོའི་རབ་དབྱེ་ཤེས་པ་མེད་པར་ལམ་ལེགས་པར་ཤེས་པ་མེད་པས། ལམ་ཤེས་ཀྱི་འོག་ཏུ་གཞི་ཤེས་འཆད་པ་ཡིན་ལ། དེ་ལ་ཡང་འཇུག་ཡུལ་གཞི་ཤེས། འཇུག་པ་སྦྱོར་བ། གཞུག་འབྲས་མཐོང་ལམ་དང་གསུམ། དང་པོ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིགས་བཅད་གཅིག་གིས་དངོས་སུ་བྱང་སེམས་ཀྱི་གཞི་ཤེས་དང་། ཤུགས་ལ་ཐེག་དམན་གྱི་གཞི་ཤེས་བསྟན། དེ་ལྟར་གཉིས་ལས་ཤུགས་བསྟན་ཐེག་དམན་གྱི་གཞི་ཤེས་དེ་མཚན་མར་དམིགས་པའི་རྒྱུ་མཚན་གྱིས་འབྲས་ཡུམ་སྒྲུབ་པའི་ཐབས་ལ་མི་མཁས་པས་འབྲས་ཡུམ་ལ་རིང་བ་དང་། དངོས་བསྟན་བྱང་སེམས་ཀྱི་གཞི་ཤེས་དེ་མཚན་མར་མི་དམིགས་པའི་རྒྱུ་མཚན་གྱིས་འབྲས་ཡུམ་སྒྲུབ་པའི་ཐབས་ལ་མཁས་པས་འབྲས་ཡུམ་ལ་ཉེ་བ་ཡིན་ནོ། །ཞེས་པ་ནི། དེ་ནི་མཚན་མར་དམིགས་སྒོ་ནས། །ཞེས་སོགས་ཚིགས་བཅད་གཅིག་གིས་བསྟན། ཡང་ཤུགས་བསྟན་ཐེག་དམན་གྱི་གཞི་ཤེས་དེ་གཞི་ལམ་འབྲས་གསུམ་ལ་མཚན་མར་དམིགས་པས་མི་མཐུན་ཕྱོགས་སུ་སྟོན་པ་ལ་གཞི་ལ་མཚན་འཛིན་ཡིན་པ་ནི། གཟུགས་སོགས་ཕུང་པོ་སྟོང་ཉིད་དང་། །དུས་གསུམ་རྟོགས་པའི་ཆོས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པས་བསྟན། ལམ་ལ་མཚན་འཛིན་ཡིན་པ་ནི། སྦྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པས་བསྟན། འབྲས་བུ་ལ་མཚན་འཛིན་ཡིན་པ་ནི། རྒྱལ་ལ་སོགས་ལ་ཆགས་པ་ཕྲ། །ཞེས་པས་བསྟན། དངོས་བསྟན་བྱང་སེམས་ཀྱི་གཞི་ཤེས་དེས་གཞི་ལམ་འབྲས་གསུམ་རང་བཞིན་མེད་པར་རྟོགས་པས་གཉེན་པོ་ཡིན་པར་སྟོན་པ་ལ་གཞི་ལ་མཚན་འཛིན་གྱི་གཉེན་པོ་ཡིན་པ་ནི་འོག་འཇུག་པ་སྦྱོར་བའི་སྐབས་སུ་སྟོན་པ་ལ་དགོངས་ནས་འདིར་དངོས་སུ་མ་བསྟན་ནོ། །ལམ་ལ་མཚན་གྱི་གཉེན་པོ་ཡིན་པ་ནི། སྦྱིན་ལ་སོགས་ལ་ངར་འཛིན་མེད། །ཅེས་སོགས་རྐང་པ་གསུམ་གྱིས་བསྟན། འབྲས་བུ་ལ་མཚན་འཛིན་གྱི་གཉེན་པོ་ཡིན་པ་ནི། ཆོས་རྣམས་རང་བཞིན་གཅིག་པར་ནི། །ཞེས་སོགས་ཚིག་རྐང་གཉིས་ཀྱིས་བསྟན། འབྲས་བུ་ལ་མཚན་འཛིན་མི་མཐུན་ཕྱོགས་ཡིན་པའི་སྒྲུབ་བྱེད་ནི། ཆོས་ཀྱི་ལམ་གྱི་རང་བཞིན་གྱིས། །ཞེས་སོགས་ཚིག་རྐང་གཉིས་ཀྱིས་བསྟན། ཟབ་པའི་སྒྲུབ་བྱེད་ནི། མཐོང་བ་ལ་སོགས་བཀག་པ་ཡིས། །དེ་ནི་རྟོགས་པར་དཀའ་བར་བཤད། །ཅེས་པས་བསྟན། རྟོགས་དཀའ་བའི་སྒྲུབ་བྱེད་ནི། གཟུགས་ལ་སོགས་པར་མི་ཤེས་ཕྱིར། །དེ་ནི་བསམ་མི་ཁྱབ་པར་འདོད། །ཅེས་པས་བསྟན། དེ་ལྟར་གཉིས་ལས། དངོས་བསྟན་བྱང་སེམས་ཀྱི་གཞི་ཤེས་གཉེན་པོ་ཡིན་པ་དང་། ཤུགས་བསྟན་ཐེག་དམན་གྱི་གཞི་ཤེས་མི་མཐུན་ཕྱོགས་ཡིན་པའི་དོན་བསྡུ་བ་ནི། དེ་ལྟར་ཀུན་ཤེས་ཉིན་ལུགས་ལ། །ཞེས་སོགས་ཚིགས་བཅད་གཅིག་གིས་བསྟན་ཏོ། །གཉིས་པ་འཇུག་པ་སྦྱོར་བ་ལ། དངོས་བསྟན་བྱང་སེམས་ཀྱི་གཞི་ཤེས་ལ་འཇུག་པའི་སྦྱོར་བ་ནི། གཟུགས་སོགས་དེ་མི་རྟག་སོགས་དང་། །ཞེས་སོགས་ཀྱིས་དངོས་སུ་བསྟན། ཤུགས་བསྟན་ཐེག་དམན་གྱི་གཞི་ཤེས་ལ་འཇུག་པའི་སྦྱོར་བ་ནི་དེའི་ཤུགས་ལ་བསྟན། སྦྱོར་བའི་མཉམ་ཉིད་ལའང་དེ་དང་འདྲའོ། །གསུམ་པ་ཞུགས་འབྲས་མཐོང་ལམ་ལ། དངོས་བསྟན་བྱང་སེམས་ཀྱི་གཞི་ཤེས་ཀྱི་སྦྱོར་བ་བསྒོམས་པའི་འབྲས་བུ་བྱང་སེམས་ཀྱི་མཐོང་ལམ་ནི། སྡུག་བསྔལ་ལ་སོགས་བདེན་པ་ལ། །ཞེས་སོགས་ཀྱིས་དངོས་སུ་བསྟན། ཤུགས་བསྟན་གྱི་གཞི་ཤེས་ཀྱི་སྦྱོར་བ་བསྒོམས་པའི་འབྲས་སུ་ཐེག་དམན་གྱི་མཐོང་ལམ་ནི་དེའི་ཤུགས་ལ་བསྟན། འོ་ན་དེའི་རྗེས་སུ་སྒོམ་ལམ་མི་སྟོན་པའི་རྒྱུ་མཚན་ཅི་ཡིན་ཞེ་ན། དེ་ནི་མཐོང་ལམ་ནི་ཐེག་དམན་གྱི་རྟོགས་རིགས་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་གྱི་ལྡོག་པ་ནས་བསྟན་པས་སྒོམ་ལམ་ཡང་ཐེག་དམན་གྱི་རྟོགས་རིགས་མངོན་སུམ་དུ་རྟོགས་ཟིན་རྒྱུན་ལྡན་དུ་སྒོམ་པར་བྱེད་པའི་ཐེག་ཆེན་གྱི་སྒོམ་ལམ་གྱི་ལྡོག་པ་ནས་བསྟན་དགོས་པ་ལས་དེ་མེད་པའི་ཕྱིར་ཏེ། བྱང་སེམས་འཕགས་པས་ཐེག་དམན་གྱི་རྟོགས་རིགས་མངོན་སུམ་དུ་མཐོང་ཟིན་རྒྱུན་ལྡན་དུ་བསྒོམ་པ་མེད་པའི་ཕྱིར། དེས་ན་སྐབས་འདིར་སྟོན་པ་སྐབས་སུ་བབ་པའི་ཐེག་པ་ཆེན་པོའི་སྒོམ་ལམ་མེད་པས་མ་བསྟན་ནོ། །ཞེས་པའི་སློབ་དཔོན་གྱི་གཞུང་ནི་ཉན་ཐོས་ཀྱི་ལམ་ནི་ཞེས་སོགས་སོ། །དེའི་རྗེས་སུ་མཁྱེན་གསུམ་གྱི་དོན་བསྡུ་སྟོན་པའི་མདོ་ཚིག་གསུམ་ཡོད་པའི་དོན་རྩ་བར་ཚིགས་བཅད་དུ་བསྡུས་པ་ནི། དེ་ལྟར་འདི་དང་ཡང་འདི་དང་། །ཞེས་སོགས་ཀྱིས་བསྟན་ཏོ། །ཞེས་བཞེད་དོ། །དེ་ལྟར་སློབ་དཔོན་གྱི་བཞེད་པ་དེ་དག་ལས་འཇུག་ཡུལ་གཞི་ཤེས། འཇུག་པ་སྦྱོར་བ། ཞུགས་འབྲས་མཐོང་ལམ་གསུམ་ལ་དངོས་བསྟན་དང་། ཤུགས་བསྟན་གཉིས་གཉིས་སུ་ཕྱེ་ནས་དངོས་བསྟན་བྱང་སེམས་ཀྱི་མངོན་རྟོགས་དང་། ཤུགས་བསྟན་ཐེག་དམན་གྱི་མངོན་རྟོགས་ལ་སྦྱོར་བ་ཤིན་ཏུ་ལེགས་ཏེ་སྐབས་གསུམ་པའི་གཞི་ཤེས་ཀྱི་རྟེན་གྱི་གང་ཟག་འཆད་པའི་ལུས་རྣམ་གཞག་གི་སྐབས་སུ་ཉན་ཐོས་ལ་སོགས་ཞེས་གསུངས་ཤིང་། སོགས་ཁོངས་ནས་རང་རྒྱལ་དང་། བྱང་སེམས་བསྡུ་དགོས་ལ་དེའི་ཚེ་ཐེག་དམན་གྱི་མངོན་རྟོགས་ཤུགས་བསྟན་ཡིན་པ་ལས་འོས་མེད་པའི་ཕྱིར་ཏེ། སྐབས་གསུམ་པའི་དངོས་བསྟན་གྱི་གཞི་ཤེས་ཡིན་ན་བྱང་སེམས་ཀྱི་མངོན་རྟོགས་ཡིན་པས་ཁྱབ་པ་མཆོད་བརྗོད་ཀྱི་སྐབས་སུ་བསྒྲུབས་ཟིན་པའི་ཕྱིར་རོ། །དེ་ཡང་ཐེག་དམན་རང་རྒྱུད་པའི་མངོན་རྟོགས་ཀྱི་དབང་དུ་བྱས་ཀྱི་རྟོགས་རིགས་ཀྱི་དབང་དུ་བྱས་ན། བྱང་སེམས་ཀྱི་གཞི་ཤེས་ཀྱི་རྟེན་གྱི་གང་ཟག་ཉན་ཐོས་དང་། རང་རྒྱལ་ལ་ངོས་གཟུང་བ་ལ་ཡང་འགལ་བ་མེད་དེ། སྔར་བཤད་ཟིན་ཏོ། །ཉེ་རིང་གི་ཁྱད་པར་དང་། མི་མཐུན་ཕྱོགས་དང་གཉེན་པོའི་ཁྱད་པར་ཐེག་དམན་གྱི་གཞི་ཤེས་དང་། བྱང་སེམས་ཀྱི་གཞི་ཤེས་ལ་སོ་སོར་སྦྱོར་བ་ནི་མི་འཐད་དེ། དེ་ནི་ཞེས་པའི་ཚིག་གོང་འོག་གཉིས་པོ་དེས་གཞི་གཅིག་ཉིད་ལ་མཚན་མར་དམིགས་ན་འབྲས་ཡུམ་སྒྲུབ་པའི་ཐབས་ལ་མི་མཁས་པས་འབྲས་ཡུམ་ལ་རིང་བ་དང་། མཚན་མར་མི་དམིགས་ན་འབྲས་ཡུམ་སྒྲུབ་པའི་ཐབས་ལ་མཁས་པས་འབྲས་ཡུམ་ལ་ཉེ་བར་བསྟན་པའི་ཕྱིར། གཞན་དུ་གཞི་སོ་སོ་ཡིན་ན། དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་སྟེ། །ཅིག་ཤོས་ཐབས་ལ་མཁས་པ་ཡིས། །ཞེས་འབྱུང་རིགས་ཀྱི། དེ་ནི་ཐབས་ལ་མཁས་པ་ཡིས་ཞེས་འབྱུང་མི་རིགས་སོ། །ཡང་ཐེག་དམན་གྱི་གཞི་ཤེས་འདིར་བསྟན་མཚན་འཛིན་གྱི་བློ་ཡིན་པ་ཡང་མི་འཐད་དེ། ཐེག་དམན་གྱི་གཞི་ཤེས་ནི་རྣལ་འབྱོར་མངོན་སུམ་ཡིན་ལ། འདིར་བསྟན་མཚན་འཛིན་ནི་སྒྲ་དོན་འདྲེས་འཛིན་གྱི་རྟོགས་པ་ཡིན་པའི་ཕྱིར། གལ་ཏེ་མཚན་འཛིན་གྱིས་བཅིངས་པ་ཡིན་གྱི་མཚན་འཛིན་མ་ཡིན་ནོ། །ཞེ་ན། དེ་ལྟར་ན་མི་མཐུན་ཕྱོགས་ཞེས་པས་ཐེག་དམན་གྱི་གཞི་ཤེས་དངོས་སུ་བསྟན་པ་དང་འགལ་ཏེ། གོང་གི་མཚན་མར་དམིགས་པའི་བློ་དེ་མི་མཐུན་ཕྱོགས་ཞེས་པའི་སྐབས་ཀྱི་མི་མཐུན་ཕྱོགས་ཀྱི་བློ་དེ་ཡིན་པའི་ཕྱིར་ཏེ། སྤྱོད་པའི་འདུ་ཤེས་མི་མཐུན་ཕྱོགས། །ཞེས་གསུངས་པའི་ཕྱིར། ཡང་མི་མཐུན་གཉེན་པོའི་ཕྱོགས་དག་དང་། །ཞེས་པ་ཐེག་དམན་དང་བྱང་སེམས་ཀྱི་གཞི་ཤེས་ལ་སོ་སོར་སྦྱོར་བ་མི་འཐད་དེ། འདིར་བསྟན་མི་མཐུན་ཕྱོགས་དང་གཉེན་པོ་གཉིས་སྤང་གཉེན་ཡིན་པ་གང་ཞིག གཞི་ཤེས་གཉིས་པོ་སྤང་གཉེན་མ་ཡིན་པའི་ཕྱིར། གཞན་དུ་ན་ཐེག་དམན་གྱི་གཞི་ཤེས་ཆོས་ཅན། སྐབས་གསུམ་པའི་དངོས་བསྟན་གྱི་གཞི་ཤེས་ཡིན་པར་ཐལ། དེ་ནི་མཚན་མར་དམིགས་སྒོ་ནས། །ཞེས་པ་དང་། སྤྱོད་པའི་འདུ་ཤེས་མི་མཐུན་ཕྱོགས། །ཞེས་པའི་སྐབས་ནས་དངོས་སུ་བསྟན་པའི་གཞི་ཤེས་ཡིན་པའི་ཕྱིར། འདོད་ན། གཞན་གྱིས་མྱོང་བ་མ་ཡིན་ཏེ། །ཞེས་པའི་དངོས་བསྟན་གྱི་དངོས་བརྒྱད་གང་རུང་དུ་ཐལ། འདོད་པ་དེའི་ཕྱིར། འདོད་ན་ཐེག་དམན་གྱི་གཞི་ཤེས་སུ་འགལ་ལོ། །ལེགས་པར་དཔྱོད་ཅིག གཉིས་པ་གནད་ཀྱི་དོན་ངོས་གཟུང་བ་ལ་ས་གཉིས་པའི་ལམ་ཤེས་རྣམ་པར་དག་བྱེད་ཀྱི་གཞི་ཤེས་དང་། སྐབས་དོན་ཐེག་དམན་གྱི་རྟོགས་རིགས་སུ་གྱུར་པའི་གཞི་ཤེས་དང་། ཐོས་བསམ་གྱི་ཡུལ་རྣམ་པར་བསྡུ་བའི་ཆེད་དུ་གོ་རིམ་བཟློག་སྟེ་མཁྱེན་གསུམ་གྱི་མཇུག་བསྡུ་བ་དང་གསུམ་ལས། དང་པོ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིགས་བཅད་བདུན་ཏེ། འདི་ལ་གཞུང་གི་འབྲེལ་དངོས་དང་། སྐབས་སུ་བབ་པའི་དཀའ་བའི་གནས་ལ་དཔྱད་པ་གཉིས་ལས། དང་པོ་ནི། ལམ་ཤེས་ཀྱི་འོག་ཏུ་གཞི་ཤེས་འཆད་པའི་རྒྱུ་མཚན་ཡོད་དེ། ལམ་ཤེས་ཀྱི་སྐབས་སུ་རྗེས་ཐོབ་བསོད་ནམས་ཀྱི་ཚོགས་དང་། མཉམ་གཞག་ཡེ་ཤེས་ཀྱི་ཚོགས་གཉིས་ཀྱིས་སྐབས་དང་པོར་བསྟན་པའི་རྣམ་མཁྱེན་སྒྲུབ་པར་བྱེད་པ་ལ། རྣམ་མཁྱེན་སྒྲུབ་པའི་ཐབས་ལ་མཁས་པ་དང་མི་མཁས་པའི་སྒོ་ནས་ཉེ་རིང་གི་ཁྱད་པར་སྐབས་གསུམ་པར་རྟོགས་པར་འགྱུར་བ་ཡིན་པའི་ཕྱིར་རོ། །ཅི་ལྟར་རྟོགས་པར་འགྱུར་ན། འཇལ་དང་གཞལ་བྱ་མཉམ་པ་ཉིད། །ཅེས་པའི་སྐབས་སུ། ཐེག་ཆེན་གྱི་སྒོམ་ལམ་མཉམ་གཞག་དགུ་ཁམས་གསུམ་པའི་རྣམ་པ་ཅན་གྱི་ཤེས་པ་དང་། ཤེས་བྱ་མཉམ་པ་ཉིད་དུ་རྟོགས་པར་བསྟན་པ་ལ། འོ་ན་རྟོགས་པ་དེ་ཙམ་དུ་ངེས་སམ་ཞེ་ན། དེ་ནི་ཤེས་རབ་ཆེན་པོས་སྲིད་པ་ལ་མི་གནས་པའི་རྟོགས་པ་ཡིན་གྱི་དེའི་སྟེང་དུ་སྙིང་རྗེ་ཆེན་པོས་ཞི་བ་ལ་མི་གནས་པ་དང་། དེ་གཉིས་ཀྱི་བར་ལ་ཡང་མི་གནས་པའི་ཡེ་ཤེས་དེ་སྐབས་གསུམ་པ་འདིར་གཞི་ཤེས་ཀྱིས་བསྡུས་པའི་ཤེས་རབ་ཀྱི་ཕ་རོལ་ཏུ་ཕྱིན་པར་འདོད་པ་ཡིན་ཞེས་པ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིག་རྐང་དང་པོ་གཉིས་དང་བཞི་པས་བསྟན། ཅིའི་ཕྱིར་འཁོར་འདས་བར་གསུམ་ལ་མི་གནས་ཞེ་ན། དུས་རྣམས་མཉམ་པ་ཉིད་ཅེས་པ་སྟེ། ཉིར་སྣང་དུ། དེ་དག་མི་དམིགས་པ་ཡང་གང་གི་ཕྱིར་ཞེས་པའི་མཚམས་སྦྱོར་བཀོད་ནས་དུས་གསུམ་པའི་ཆོས་རྣམས་མཉམ་པ་ཉིད་ཡིན་པའི་ཕྱིར་རོ། །ཞེས་བྱ་བའི་འཐད་པས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །མདོར་ན་ཚིགས་བཅད་འདིས་བྱང་སེམས་ཀྱི་རྒྱུད་ཀྱི་མཉམ་གཞག་གིས་བསྡུས་པའི་གཞི་ཤེས་བསྟན་ཏེ། བྱང་སེམས་ཀྱི་མཐོང་སྒོམ་མཉམ་གཞག་དེ་ཉིད་སྐབས་གཉིས་པར་ལམ་སྐྱེ་མེད་དུ་རྟོགས་པའི་ལྡོག་པ་ནས་ལམ་ཤེས་སུ་བསྟན་ཟིན་ལ། འཁོར་འདས་བར་གསུམ་ལ་མི་གནས་པའི་ལྡོག་པ་ནས་སྐབས་གསུམ་པར་གཞི་ཤེས་སུ་བསྟན་པ་ཙམ་ཡིན་གྱི་སྔ་མ་ལས་ངོ་བོ་ཐ་དད་པ་མ་ཡིན་པའི་ཕྱིར་རོ། །དེ་ལྟ་བུའི་མཉམ་གཞག་གི་གནས་སྐབས་ཀྱི་ཤེར་ཕྱིན་དེ་རྗེས་ཐོབ་ཏུ་མཚན་མར་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མི་མཁས་པས་རྣམ་མཁྱེན་ལ་རིང་བ་ཡིན་ལ། མཚན་མར་མི་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མཁས་པས་རྣམ་མཁྱེན་ལ་ཉེ་བ་ཡིན་ནོ། །ཞེས་པ་ནི། དེ་ནི་མཚན་མར་དམིགས་སྒོ་ནས། །ཞེས་སོགས་ཚིགས་བཅད་གཅིག་གིས་བསྟན། དེས་ན་གཞུང་ནས་བསྟན་པའི་ཉེ་རིང་བཤད་གཞིར་བྱས་ནས་ཡུལ་གང་ལ་ཉེ་རིང་དུ་འཇོག ཉམས་ལེན་གང་གིས་ཉེ་རིང་དུ་འཇོག རྒྱུ་གང་གིས་ཉེ་རིང་དུ་འཇོག དེས་ཉེ་རིང་དུ་འཇོག་ནུས་པའི་རྒྱུ་མཚན་དང་བཞི་ལས། དང་པོ་ནི། སྐབས་དང་པོར་བསྟན་པའི་རྣམ་མཁྱེན་ལ་ཉེ་རིང་དུ་འཇོག་དགོས་ཏེ། འདིར་རྣམ་མཁྱེན་ཐོབ་བྱ་དང་། ལམ་ཤེས་ཐོབ་བྱེད་དུ་བྱས་ནས་དེའི་ཡན་ལག་ཏུ་ཉེ་རིང་བརྩི་བའི་སྐབས་ཡིན་པའི་ཕྱིར་རོ། །གཉིས་པ་ནི། སྐབས་གཉིས་པར་བསྟན་པའི་ལམ་ཤེས་དེ་ཉིད་ཉེ་རིང་དུ་འཇོག་དགོས་ཏེ། རྒྱུ་མཚན་སྔ་མ་དེའི་ཕྱིར་རོ། །འོན་ཀྱང་ཐ་སྙད་ནི་གཞི་ཤེས་ཀྱི་ཐ་སྙད་བརྗོད་དགོས་ཏེ། སྐབས་གཉིས་པའི་ལམ་ཤེས་དེ་ཉིད་འཁོར་འདས་བར་གསུམ་ལ་མི་གནས་པའི་ལྡོག་པ་ནས་འདིར་གཞི་ཤེས་སུ་འཆད་པའི་སྐབས་ཡིན་པའི་ཕྱིར་རོ། །གསུམ་པ་ནི། རྗེས་ཐོབ་ཏུ་སྦྱིན་སོགས་ལ་སྤྱོད་པའི་ཚེ་མཚན་མར་མི་དམིགས་པ་དང་། དམིགས་པའི་སྒོ་ནས་འཇོག་དགོས་ཏེ། མཚན་མར་མི་དམིགས་ན་རྗེས་ཐོབ་ཀྱི་ཉམས་ལེན་ཁྱད་པར་ཅན་དུ་འགྱུར་ཞིང་། མཚན་མར་དམིགས་ན་མཚན་འཛིན་གྱིས་བར་ཆོད་ཡིན་པས་རྗེས་ཐོབ་ཀྱི་ཉམས་ལེན་རྒྱུན་ཆད་པའི་སྐབས་ཡིན་པའི་ཕྱིར་རོ། །བཞི་པ་ནི། ཅིའི་ཕྱིར་མཚན་མར་དམིགས་མི་དམིགས་ཀྱི་སྒོ་ནས་ཉེ་རིང་དུ་འགྱུར་ཞེ་ན། མཚན་མར་དམིགས་པའི་བློ་ནི། རྒྱུད་བླར། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་པ་ལྟར་བྱང་སེམས་ལམ་གྱི་མི་མཐུན་ཕྱོགས་སུ་གྱུར་པའི་ཤེས་སྒྲིབ་ཡིན་པའི་ཕྱིར། མཚན་མར་མི་དམིགས་པའི་བློ་ནི་དེ་དང་འཛིན་སྟངས་དངོས་སུ་འགལ་བས་གཉེན་པོ་བྱང་སེམས་ཀྱི་རྟོགས་རིགས་ཡིན་པའི་ཕྱིར་རོ། །སློབ་དཔོན་སངས་རྒྱས་ཡེ་ཤེས་ཞབས་ཀྱིས། ཐམས་ཅད་ཤེས་པ་ཉིད་ནི་ས་བདུན་པ་ལ་གཞག་པར་གསུངས་པའི་གནད་ཀྱང་འདི་ཉིད་ཡིན་ཏེ། ས་བདུན་པ་མན་ཆད་དུ་མཚན་འཛིན་ཡོད་མེད་ཀྱི་བྱེ་བྲག་གིས་ཉེ་རིང་གཉིས་སུ་ཡོད་པའི་ཕྱིར་རོ། །མདོ་དང་ཉིར་སྣང་གི་དགོངས་པ་ཡང་འདི་ཉིད་ཡིན་ཏེ། ཉིར་སྣང་དུ། ཐབས་མ་ཡིན་པས་རིང་བ་སྟེ། །ཞེས་བྱ་བ་ནི་བཅོམ་ལྡན་འདས་གལ་ཏེ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་ཐབས་མི་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དམིགས་པའི་ཚུལ་གྱིས་ཤེས་པར་བགྱིད་ན་ཤེར་ཕྱིན་འདི་འདོར་བར་འགྱུར། རིང་དུ་བྱེད་པར་འགྱུར་རོ། །ཞེས་གང་གསུངས་པ་ཡིན་ཏེ། དེའི་ཚེ་དང་ཕྱི་མའི་ཚེ་ལ་ལྟོས་ཏེ་ཚིག་གཉིས་སོ། །ཐབས་མ་ཡིན་པ་ཡང་གང་ཞེ་ན། དེ་ནི་མཚན་མར་དམིགས་སྒོ་ནས། །ཞེས་བྱ་བ་སྨོས་ཏེ། རབ་འབྱོར་མིང་ལས་ཀྱང་ཆགས་སོ། །རབ་འབྱོར་མཚན་མ་ལས་ཀྱང་ཆགས་སོ། །དེ་ཅིའི་ཕྱིར་ཞེ་ན། རབ་འབྱོར་ཆོས་ཐམས་ཅད་ནི་མཚན་མ་མེད་པ་མིང་མེད་པའོ། །ཞེས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །གལ་ཏེ་འདིར་བྱང་སེམས་ཐབས་ལ་མི་མཁས་པའི་དབང་དུ་བྱས་པར་གསུངས་པས། བྱང་སེམས་འཕགས་པ་ལ་སྦྱར་བ་མི་འཐད་དོ་སྙམ་ན། དེ་ནི་སྐབས་ཀྱི་དོན་མ་གོ་བ་སྟེ། འདིར་མཚན་མར་དམིགས་པའི་སྒོ་ནས་ཐབས་ལ་མི་མཁས་པར་གསུངས་ཤིང་། དེ་ནི་ས་བདུན་པ་མན་ཆད་ན་ཡོད་པ་སྟེ། བསྔོ་བ་སྒོམ་ལམ་གྱི་སྐབས་སུ་སྡུད་པར། གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཞེས་གསུངས་པའི་ཕྱིར་རོ། །རྒྱུ་མཚན་དེས་ན་ཉེ་རིང་གི་ཁྱད་པར་ཡང་མི་མཐུན་ཕྱོགས་དང་གཉེན་པོའི་སྒོ་ནས་རྟོགས་དགོས་པས་འདིར་མི་མཐུན་ཕྱོགས་ནི་བྱང་སེམས་ཀྱི་རྒྱུད་ཀྱི་མཚན་འཛིན་དང་། གཉེན་པོ་ནི་བྱང་སེམས་ཀྱི་རྒྱུད་ཀྱི་མཚན་མེད་རྟོགས་པའི་བློ་ཡིན་པའི་ཁྱད་པར་སྟོན་པ་ལ་བཏགས་པ་ཙམ་གྱི་གང་ཟག་ལ་དམིགས་པའི་མཚན་འཛིན་དང་། དེའི་གཉེན་པོ། བཏགས་པ་ཙམ་གྱི་ཆོས་ལ་དམིགས་པའི་མཚན་འཛིན་དང་། དེའི་གཉེན་པོ་གཉིས་ཏེ་བཞི་ལས། དང་པོ་ནི། གཟུགས་སོགས་ཕུང་པོ་སྟོང་ཉིད་ལ་སྤྱོད་པ་པོ་ངའོ་སྙམ་པའི་འདུ་ཤེས་ནས། བྱང་ཆུབ་ཕྱོགས་རྣམས་ལ་སྤྱོད་པ་པོ་ངའོ་སྙམ་པའི་འདུ་ཤེས་ཀྱི་བར་ནི་བཏགས་པ་ཙམ་གྱི་གང་ཟག་ལ་དམིགས་པའི་མཚན་འཛིན་ཡིན་པས་བྱང་སེམས་ཀྱི་མི་མཐུན་ཕྱོགས་ཡིན་ནོ་ཞེས་པ་ནི། གཟུགས་སོགས་ཕུང་པོ་སྟོང་ཉིད་དང་། །ཞེས་སོགས་ཚིགས་བཅད་གཅིག་གིས་བསྟན། གཉིས་པ་ནི། བཏགས་པ་ཙམ་གྱི་ངར་འཛིན་དགག་པའི་མཚན་མེད་རྟོགས་པའི་ཤེས་རབ་དེ་རང་ཉིད་ཀྱིས་བསྒོམས་ན་རང་རྒྱུད་ཀྱི་ཆགས་པའི་མཐའ་འགོག་ནུས་ཤིང་། གཞན་ལ་བསྟན་ན་གཞན་རྒྱུད་ཀྱི་ཆགས་པའི་མཐའ་འགོག་ནུས་པས་གཉེན་པོ་ཡིན་ནོ། །ཞེས་པ་ནི། སྦྱིན་ལ་སོགས་ལ་ངར་འཛིན་མེད། །ཅེས་སོགས་ཚིགས་རྐང་གསུམ་གྱིས་བསྟན། གསུམ་པ་ལ། རྒྱལ་བ་ནི་འབྲས་བུ་ཡིན་ལ། སོགས་ཀྱིས་གཞི་དང་ལམ་བསྡུས། གཞི་ལ་དམིགས་པར་ཞེན་པའི་བློ། ལམ་ལ་ཉམས་སུ་བླང་བྱར་ཞེན་པའི་བློ། འབྲས་བུ་ལ་ཐོབ་བྱར་ཞེན་པའི་བློ་ནི་ཆགས་པ་ཕྲ་མོ་ཡིན་པས་མི་མཐུན་ཕྱོགས་ཡིན་ནོ། །ཞེས་པ་ནི། རྒྱལ་ལ་སོགས་ལ་ཆགས་པ་ཕྲ། །ཞེས་པས་བསྟན། དེ་དག་མི་མཐུན་ཕྱོགས་ཡིན་པའི་སྒྲུབ་བྱེད་ནི། ཆོས་ཀྱི་ལམ་ནི་རང་བཞིན་གྱིས། །དབེན་པའི་ཕྱིར་ན་དེ་ཟབ་ཉིད། །ཅེས་པས་བསྟན། བཞི་པ་ནི། གཞི་ལམ་འབྲས་གསུམ་རང་བཞིན་གཅིག་ཏུ་ཤེས་པས་གཞི་ལམ་འབྲས་གསུམ་ལ་དེ་དང་དེར་ཞེན་པའི་བློ་སྤོང་ནུས་པ་ཡིན་ནོ། །ཞེས་པ་ནི། ཆོས་རྣམས་རང་བཞིན་གཅིག་པར་ནི། །ཤེས་པས་ཆགས་པ་སྤོང་བ་ཡིན། །ཞེས་པས་བསྟན། རང་བཞིན་གཅིག་པའི་ཚུལ་ཇི་ལྟར་ཞེ་ན། དེ་ནི་རྟོགས་པར་དཀའ་ཞིང་བསམ་གྱིས་མི་ཁྱབ་པ་ཞེས་པ་ནི། མཐོང་བ་ལ་སོགས་བཀག་པ་ཡིས། །ཞེས་སོགས་དང་། གཟུགས་ལ་སོགས་པར་མི་ཤེས་ཕྱིར། །ཞེས་སོགས་ཀྱིས་བསྟན་ཏོ། །བྱང་སེམས་འཕགས་པས་རྗེས་ཐོབ་ཏུ་བཏགས་པ་ཙམ་གྱི་གང་ཟག་དང་། ཆོས་ལ་དམིགས་པའི་མཚན་འཛིན་མི་མཐུན་ཕྱོགས་དང་། དེ་གཉིས་མི་དམིགས་པའི་མཚན་མེད་རྟོགས་པའི་ཤེས་རབ་གཉེན་པོ་ཡིན་པ་དེ་སྐབས་གསུམ་པ་གཞི་ཤེས་འཆད་པའི་སྐབས་འདིར་སྤང་གཉེན་གྱི་རིམ་པ་ཡིན་ནོ། །ཞེས་དོན་བསྡུས་པ་ནི། དེ་ལྟར་ཀུན་ཤེས་ཉིད་ལུགས་ལ། །ཞེས་སོགས་ཚིགས་བཅད་གཅིག་གིས་བསྟན། སྐབས་འདིར་བསྟན་གྱི་མི་མཐུན་ཕྱོགས་ཐེག་དམན་གྱི་གཞི་ཤེས་མ་ཡིན་པར་བྱང་སེམས་ཀྱི་རྒྱུད་ཀྱི་མཚན་འཛིན་ཡིན་པ་ནི་མདོའི་དགོངས་པ་ཡིན་ཏེ། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་ཐད་དུ་བྱང་ཆུབ་སེམས་དཔའ་ཐབས་མི་མཁས་པ་དེས་གཟུགས་སྟོང་ཞེས་བྱ་བར་འདུ་ཤེས་ན་ཞེས་སོགས་དང་། ཀོའུ་ཤི་ཀ་འདི་ལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་སེམས་སུ་འདུ་ཤེས་པ་དང་། ཞེས་སོགས་དང་། རྒྱལ་ལ་སོགས་ལ་ཆགས་པ་ཕྲ། །ཞེས་པའི་ཐད་དུ་རབ་འབྱོར་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པ་མཚན་མར་ཡིད་ལ་བྱེད་ན། ཞེས་སོགས་བྱང་སེམས་ཁོ་ན་ལ་སྦྱར་བར་གསུངས་པའི་ཕྱིར་རོ། །ཉིར་སྣང་གི་དགོངས་པ་ཡང་ཡིན་ཏེ། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་མཚམས་སྦྱར་དུ་མི་མཐུན་ཕྱོགས་ནི་ཞེས་དང་། སྦྱིན་ལ་སོགས་ལ་ངར་འཛིན་མེད། །ཅེས་པའི་མཚམས་སྦྱར་དུ། གཉེན་པོ་ནི་ཞེས་དང་། རྒྱལ་ལ་སོགས་ལ་ཆགས་པ་ཕྲ། །ཞེས་པའི་མཚམས་སྦྱར་དུ། གཞན་ཡང་ཞེས་དང་། དེ་ལྟར་ཀུན་ཤེས་ཉིད་ལུགས་ལ་ཞེས་པའི་མཚམས་སྦྱར་དུ། དེ་ལྟར་བྱས་ན། ཞེས་པ་ཙམ་ཞིག་གསུངས་ཀྱི་མི་མཐུན་ཕྱོགས་ཞེས་པས་ཐེག་དམན་གྱི་གཞི་ཤེས་སྟོན་པ་ཉིར་སྣང་གི་མགོ་མཇུག་གང་ན་ཡང་མི་འདུག་པའི་ཕྱིར་རོ། །འདིར་ཞེས་པའི་ཚིག་གི་ནུས་པས་ཀྱང་ཤེས་ཏེ། སྐབས་དང་པོར་བཤད་པའི་སྤང་གཉེན་ནི། མཐོང་སྤང་དང་། སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱད་དང་། གཉེན་པོའི་ཚོགས་སྒྲུབ་བརྒྱད་ལ་བཤད། སྐབས་གཉིས་པར་ནི་སྒོམ་སྤང་དགུ་དང་། སྒོམ་ལམ་དགུ་ལ་བཤད། སྐབས་བཞི་པར་ནི་ཡོན་ཏན་དང་སྐྱོན་ལ་བཤད། སྐབས་ལྔ་པར་ནི་མཐོང་སྒོམ་གྱི་སྤང་བྱར་གྱུར་པའི་རྟོག་པ་དང་། མཐོང་སྒོམ་གྱི་རྩེ་སྦྱོར་ལ་བཤད་པ་རྣམས་ལས་འདིར་མི་འདྲ་བའི་ཁྱད་པར་ནི་མཚན་འཛིན་དང་། མཚན་མེད་རྟོགས་པའི་ཤེས་རབ་སྤང་གཉེན་དུ་བཤད་ཅེས་པའི་དོན་ཡིན་པའི་ཕྱིར་རོ། །གཉིས་པ་སྐབས་སུ་བབ་པའི་དཀའ་བའི་གནས་ལ་དཔྱད་པ་ལ། ཐེག་པ་གསུམ་གྱི་ལམ་གྱི་རྣམ་གཞག་གྲུབ་མཐའ་བཞི་པོ་རེ་རེ་ལ་ཡང་ཚང་བ་རེ་ཡོད་པས་ཐོག་མར་གྲུབ་མཐའི་སྒོ་ནས་དབྱེ་བར་བྱའོ། །དེ་ལ་བཞི་ལས་བྱེ་བྲག་ཏུ་སྨྲ་བས་སེམས་བྱུང་མ་ཆགས་པའི་རང་བཞིན་འཕགས་པའི་རིགས་དེ་ཡོད་པའི་ཚེ། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར་བ་འབྱུང་ལ་གཞི་ཚུལ་ཁྲིམས་ལ་གནས་ནས་ཐོས་བསམ་མཐར་ཕྱིན་པའི་ཚེ་སྒོམ་པ་ལ་སྦྱོར་བའི་ཚུལ་ལ་ཞི་གནས་བསྒོམ་པ་དང་། ལྷག་མཐོང་བསྒོམ་པ་གཉིས་ལས། དང་པོ་ནི། འདོད་ཆགས་ལྷག་པའི་གང་ཟག་གིས་མི་སྡུག་པ་དང་། རྣམ་རྟོག་ལྷག་པའི་གང་ཟག་གིས་དབུགས་འབྱུང་རྔུབ་བསྒོམ་པ་ནས་བརྩམས་ཏེ་ཞི་གནས་བསྒྲུབ་བོ། །དེ་ལྟར་ཞི་གནས་གྲུབ་ནས། གཉིས་པ་ལྷག་མཐོང་ནི། དྲན་པ་ཉེར་གཞག་བཞི་བསྒོམ་སྟེ། དམིགས་པ་ལུས་སོགས་བཞི་ལ་རྣམ་པ་ལུས་མི་གཙང་བ་ལ་སོགས་རང་གི་མཚན་ཉིད་དང་། ཐམས་ཅད་ཀྱང་གང་ཟག་གི་བདག་མེད་པའི་སྤྱིའི་མཚན་ཉིད་གཉིས་སུ་བཅད་ནས་བསྒོམ་མོ། །དེ་ལྟ་བུའི་དྲན་པ་ཉེར་གཞག་བཞི་ལ་བདེན་བཞིའི་སྟེང་གི་མི་རྟག་ལ་སོགས་བཅུ་དྲུག་བསྒོམ་པ་ཚང་བས་དེ་ཉིད་ཚོགས་ཆུང་ངུས་ཚེ་གསུམ་ལ་སོགས་པར་བསྒོམས་ན་ཉན་ཐོས་ཀྱི་བྱང་ཆུབ་ཐོབ། ཚོགས་འབྲིང་གིས་བསྐལ་པ་བརྒྱར་བསྒོམས་ན་རང་སངས་རྒྱས་ཀྱི་བྱང་ཆུབ་ཐོབ། ཚོགས་ཆེན་པོས་བསྐལ་པ་གྲངས་མེད་གསུམ་དུ་བསྒོམས་ན་བླ་ན་མེད་པའི་བྱང་ཆུབ་ཐོབ་པར་འདོད་དེ། མཛོད་དུ། མྱུར་བ་སྲིད་པ་གསུམ་གྱི་མཐར། །ཞེས་དང་། བསེ་རུ་བསྐལ་པ་བརྒྱ་ཡི་རྒྱུས། །ཞེས་དང་། དེ་གྲངས་མེད་གསུམ་ལ་སངས་རྒྱས། །ཞེས་གསུངས་པའི་ཕྱིར་རོ། །དེས་ན་ཐེག་པ་གསུམ་ཆར་ལྟ་བ་ལ་ཁྱད་པར་མེད་དེ། ཤེས་བྱ་གཞི་ལྔ་བདེན་པར་གྲུབ་པས་དེ་དག་བདེན་མེད་དུ་མ་རྟོགས་པར་མཚུངས་པའི་ཕྱིར་དང་། བདེན་བཞིའི་སྟེང་གི་མི་རྟག་ལ་སོགས་བཅུ་དྲུག་རྟོགས་པར་མཚུངས་པའི་ཕྱིར་རོ། །ལུགས་འདི་ལ་གང་ཟག་གི་བདག་མེད་རྟོགས་པ་ལ་ཕུང་པོ་བདེན་མེད་དུ་རྟོགས་མི་དགོས་སོ། །མདོ་སྡེ་པའི་ལུགས་ལ་ཕལ་ཆེར་སྔ་མ་དང་འདྲ་བ་ལས། མི་རྟག་ལ་སོགས་བཅུ་དྲུག་རྟོགས་པའི་ལྟ་བ་དེ་ཉིད་རང་ཉིད་གཅིག་པུ་འཁོར་བ་ལས་ཐར་བ་ཙམ་གྱི་ཆེད་དུ་བསྒོམས་ན་ཉན་ཐོས་ཀྱི་བྱང་ཆུབ་ཐོབ། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་རང་བྱུང་གི་བྱང་ཆུབ་མངོན་དུ་བྱེད་པའི་ཆེད་དུ་བསྒོམས་ན་རང་རྒྱལ་གྱི་བྱང་ཆུབ་ཐོབ། སྙིང་རྗེའི་དམིགས་རྣམ་སྐྱེ་བ་དུ་མར་གོམས་པ་ལས་སེམས་ཉིད་སྙིང་རྗེའི་རང་བཞིན་དུ་གྱུར་ཏེ། འགྲོ་བ་ལ་ཕན་པ་བཞེད་པས་ཀུན་ནས་བསླང་སྟེ། བསྐལ་པ་གྲངས་མེད་གསུམ་དུ་བསྒོམས་ན་བླ་ན་མེད་པའི་བྱང་ཆུབ་ཐོབ་པར་འདོད་དེ། རྣམ་འགྲེལ་དུ། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཅེས་དང་། རྣམ་པ་དུ་མར་ཐབས་མང་པོ། །ཡུན་རིང་དུས་སུ་གོམས་པ་ལས། །དེ་ལ་སྐྱོན་དང་ཡོན་ཏན་དག །རབ་ཏུ་གསལ་བ་ཉིད་དུ་འགྱུར། །ཞེས་གསུངས་པའི་ཕྱིར་རོ། །འདི་ལ་ཡང་ཐེག་པ་གསུམ་པོ་ལྟ་བ་ལ་ཁྱད་པར་མེད་དེ། གང་ཟག་གི་བདག་མེད་དང་། འདུས་མ་བྱས་ཀྱི་གཞི་དང་། ལྡན་པ་མ་ཡིན་པའི་འདུ་བྱེད་བདེན་མེད་དུ་རྟོགས་པར་མཚུངས་ཤིང་། གཞི་གཞན་གསུམ་པོ་བདེན་པར་གྲུབ་པས་བདེན་མེད་དུ་མ་རྟོགས་པར་མཚུངས་པའི་ཕྱིར་རོ། །ལྟ་བ་རྟོགས་ཚུལ་ལ་ཁྱད་པར་ཡོད་དེ། ཉན་ཐོས་དང་རང་སངས་རྒྱས་ཀྱིས་ལྟ་བ་གོམས་པ་ཤས་ཆུང་ཞིང་སྤྱོད་པ་ཁྱད་པར་ཅན་གྱི་གྲོགས་དང་བྲལ་བས། ཉོན་མོངས་པའི་བག་ཆགས་སྤོང་མ་ནུས་པས། བདེན་བཞིའི་གནས་ཚུལ་ལ་ཐུགས་གསལ་བ་རབ་ཀྱི་མཐར་ཕྱིན་པ་མ་ཐོབ་ལ། རྫོགས་པའི་སངས་རྒྱས་ནི་དེ་ལས་བཟློག་པའི་ཕྱིར་ཏེ། རྣམ་འགྲེལ་དུ། དེས་ན་ཐུགས་ཀྱང་གསལ་བའི་ཕྱིར། །རྒྱུ་ཡི་བག་ཆགས་སྤངས་པ་ཡིན། །ཐུབ་ཆེན་གཞན་དོན་འཇུག་ཅན་གྱི། །བསེ་རུ་ལ་སོགས་ཁྱད་འདི་ཡིན། །ཞེས་དང་། ཉོན་མོངས་མེད་དང་ནད་མེད་དང་། །ལམ་བཤད་མི་གསལ་ཉིད་ལུས་ཡིན། །གོམས་ཕྱིར་མ་ལུས་སྤངས་པ་ཉིད། །ཅེས་གསུངས་པའི་ཕྱིར། ལུགས་འདིས་ཀྱང་གང་ཟག་གི་བདག་མེད་རྟོགས་པ་ལ་ཕུང་པོ་བདེན་མེད་དུ་རྟོགས་མི་དགོས་པར་འདོད་དོ། །སེམས་ཙམ་པའི་ལུགས་ལ་ཉན་རང་གཉིས་སྔར་གྱི་ལྟ་བ་དེ་ཉིད་ཀྱིས་འབྲས་བུའི་ཁྱད་པར་སོ་སོར་ཐོབ་པར་འདོད་པས་ལྟ་བ་ལ་ཁྱད་པར་མེད་པར་འདོད་དེ། རང་ས་ལས། བསེ་རུ་ལྟ་བུའི་དབང་དུ་མཛད་ནས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མངོན་དུ་བྱེད་དོ། །ཞེས་དང་། བྱང་སར་རང་སངས་རྒྱས་ནི་ཉན་ཐོས་ཇི་ལྟ་བ་བཞིན་དུ་རིག་པར་བྱ་སྟེ། ཉན་ཐོས་རྣམས་དང་ལམ་གྱི་རང་བཞིན་མཚུངས་པའི་ཕྱིར་རོ། །ཞེས་གསུངས་པའི་ཕྱིར་རོ། །དེ་གཉིས་དང་ཐེག་ཆེན་ལ་ནི་ལྟ་བའི་ཁྱད་པར་ཡོད་པར་འདོད་དེ། མདོ་སྡེ་རྒྱན་དང་། ཀུན་བཏུས་དང་། བརྒྱད་སྟོང་དོན་བསྡུས་རྣམས་སུ། རྣམ་གཡེང་གི་རྣམ་རྟོག་བཅུའི་གཉེན་པོར་ཤེར་ཕྱིན་བསྒོམ་པ་བཅུ་གསུངས་པ་ཡང་ཐེག་ཆེན་གྱི་ལྟ་བའི་དབང་དུ་བྱས་པའི་ཕྱིར་དང་། ལུགས་འདི་ལ་གང་ཟག་གི་བདག་མེད་དང་། ཆོས་ཀྱི་བདག་མེད་གཉིས་སུ་བྱས་ནས་སྔ་མ་ནི་ཐེག་པ་འོག་མའི་རྟོགས་བྱ་དང་། ཕྱི་མ་ཐེག་ཆེན་གྱི་རྟོགས་བྱར་གསུངས་པའི་ཕྱིར་རོ། །གང་ཟག་གི་བདག་གི་ངོས་འཛིན་དང་། དེ་མེད་པའི་ཚུལ་ཕལ་ཆེར་གྲུབ་མཐའ་འོག་མ་གཉིས་དང་འདྲ་ཞིང་། མི་འདྲ་བའི་ཁྱད་པར་ནི་འདིར་ཀུན་གཞིའི་རྣམ་པར་ཤེས་པ་ཁོ་ན་གང་ཟག་གི་གདགས་གཞིར་འདོད་པའོ། །ཆོས་བདག་གི་ངོས་འཛིན་ནི་གཞན་དབང་དོན་ལ་གཟུང་འཛིན་གཉིས་ཀྱིས་སྟོང་པ་ཡིན་ཀྱང་བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བས་གཟུང་འཛིན་གཉིས་པོ་དེ་ཉིད་ཆོས་ཀྱི་བདག་ཏུ་བྱས་ནས། གཞན་དབང་གི་སྟེང་དུ་དེ་སྟོང་པའི་སྟོང་ཉིད་བདེན་པར་གྲུབ་པ་ཞིག་ཡོད་པ་ལ། དེ་བཞིན་ཉིད་དང་། ཡང་དག་མཐའ་དང་། མཚན་མ་མེད་པ་དང་། དོན་དམ་པ་དང་། ཆོས་དབྱིངས་ཞེས་པའི་མིང་གི་རྣམ་གྲངས་ལྔ་དང་ལྡན་པ་ཡིན་ཞིང་། དེ་རྟོགས་པ་ལ་ཆོས་ཀྱི་བདག་མེད་རྟོགས་པར་འདོད་དོ། །དེས་ན་ལུགས་འདི་ལ་ཡང་གཞན་དབང་གི་སྟེང་དུ་ངར་འཛིན་ལྷན་སྐྱེས་ཀྱི་འཛིན་སྟངས་ཀྱི་གཟུང་བྱར་གྱུར་པའི་ང་ཙམ་གྱིས་སྟོང་པའི་སྟོང་ཉིད་རྟོགས་པ་ལ་གང་ཟག་གི་བདག་མེད་རྟོགས་པ་དང་། གཟུང་འཛིན་གཉིས་སྟོང་གི་སྟོང་ཉིད་རྟོགས་པ་ལ་ཆོས་ཀྱི་བདག་མེད་རྟོགས་པར་འཇོག་པས། བདག་མེད་གཉིས་པོ་རྟོགས་པ་ལ་གཞན་དབང་བདེན་མེད་དུ་རྟོགས་མི་དགོས་སོ། །དེའི་ཕྱིར་ཐེག་པ་གསུམ་ཆར་གྱིས་ཀྱང་གཞན་དབང་དང་ཡོངས་གྲུབ་བདེན་མེད་དུ་མ་རྟོགས་པར་མཚུངས་ཤིང་། གཟུང་འཛིན་གཉིས་སྟོང་གི་དེ་བཞིན་ཉིད་རྟོགས་པ་དང་། མ་རྟོགས་པའི་བྱེ་བྲག་གིས་ཐེག་པ་ཆེ་ཆུང་ལ་ནི་ལྟ་བའི་ཁྱད་པར་ཡོད་པར་འདོད་དོ། །འོ་ན་དགོངས་འགྲེལ་དུ་གཞན་དབང་ལ་ཀུན་བཏགས་ཀྱི་ངོ་བོ་ཉིད་དུ་མངོན་པར་ཞེན་པས། ཉོན་མོངས་པར་སྐྱེད་ཅིང་དེས་ལས་བསགས་ནས་འཁོར་བར་འཁོར་ལ་གཞན་དབང་ལ་ཀུན་བཏགས་ཀྱི་ངོ་བོ་ཉིད་མེད་པར་མཐོང་ན། དེ་དག་རིམ་པ་བཞིན་དུ་བཟློག་པར་གསུངས་ནས་ཉན་རང་དང་། བྱང་སེམས་གསུམ་ཀས་ལམ་འདི་ཉིད་དང་། སྒྲུབ་པ་འདི་ཉིད་ཀྱིས་མྱ་ངན་ལས་འདས་པ་ཐོབ་པས། དེ་དག་གི་རྣམ་པར་གཞག་པའི་ལམ་དང་། རྣམ་པར་གཞག་པ་ཡང་གཅིག་སྟེ་གཉིས་མེད་པར་གསུངས་པ་དང་འགལ་ལོ་ཞེ་ན། གཞན་དབང་གི་སྟེང་དུ་གང་ཟག་གི་བདག་གིས་སྟོང་པ་ལ་ཀུན་བཏགས་ཀྱིས་སྟོང་པར་བྱས་པ་དང་། ཆོས་ཀྱི་བདག་གིས་སྟོང་པ་ལ་ཀུན་བཏགས་ཀྱིས་སྟོང་པར་བྱས་པ་གཉིས་སུ་ཡོད་པས་མི་འགལ་ཞིང་སྒྲུབ་བྱེད་དུ་ཤེས་པར་བྱའོ། །དབུ་མ་པའི་ལུགས་ལ་མདོ་ལས་ཇི་ལྟར་གསུངས་པའི་ཚུལ། དགོངས་འགྲེལ་གཉིས་ཀྱིས་བཀྲལ་བའི་ཚུལ། དཔལ་ལྡན་ཟླ་བས་གསལ་བར་མཛད་པའི་ཚུལ། དོན་གྱི་དགོངས་པ་གཅིག་ཏུ་བསྟན་པ་དང་བཞི་ལས། དང་པོ་ནི། ཤེར་ཕྱིན་གྱི་མདོར། ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཤེར་ཕྱིན་འདི་ཉིད་ལ་བསླབ་པར་བྱའོ། །རང་སངས་རྒྱས་ཀྱི་ས་ལ་བསླབ་པར་འདོད་པས་ཀྱང་ཤེར་ཕྱིན་འདི་ཉིད་ལ་བསླབ་པར་བྱའོ། །ཞེས་དང་། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཚུ་རོལ་ཕ་རོལ་འགྲོ་ངོགས་མི་མཐོང་བཞིན། །ཞེས་ཐེག་པ་གསུམ་ཆར་གྱི་ཤེར་ཕྱིན་ལ་བསླབ་དགོས་པར་གསུངས་ཤིང་། ཐེག་པ་འོག་མ་གཉིས་ཀྱིས་བསླབ་པར་བྱ་བའི་ཤེར་ཕྱིན་ཡང་རབ་འབྱོར་ཐམས་ཅད་ནི་ཕྱི་དང་ནང་གི་ཆོས་རྣམས་ཇི་སྙེད་པ་འདི་ཙམ་ཡིན་ལ། དེ་དག་ཀྱང་ཉན་ཐོས་དང་། རང་སངས་རྒྱས་རྣམས་ཀྱིས་ཤེས་ཀྱི་ལམ་ཐམས་ཅད་ཀྱིས་ཀྱང་མ་ཡིན་ལ་རྣམ་པ་ཐམས་ཅད་དུ་ཡང་མ་ཡིན་པས། དེའི་ཕྱིར་ཉན་ཐོས་དང་། རང་སངས་རྒྱས་རྣམས་ཀྱིས་ནི་ཐམས་ཅད་ཤེས་པ་ཉིད་ཅེས་བྱའོ། །ཞེས་གཞི་ཕྱི་ནང་གི་ཆོས་སྐྱེ་མེད་དུ་རྟོགས་པ་ཙམ་ལ་གསུངས་སོ། །གཉིས་པ་ནི། མགོན་པོ་བྱམས་པས་མཆོད་བརྗོད་ཀྱི་སྐབས་སུ་ཉན་ཐོས་ཀྱིས་གཞི་ཤེས་པར་གསུངས། སྐབས་དང་པོའི་སྦྱོར་ལམ་དང་། སྐབས་བཞི་པའི་མཐོང་ལམ་དང་སྒོམ་ལམ་གྱི་སྐབས་སུ་བྱང་སེམས་ཀྱི་སྦྱོར་མཐོང་སྒོམ་གསུམ་ཉན་རང་གི་སྦྱོར་མཐོང་སྒོམ་གསུམ་ལས་རྟོགས་པའི་སྒོ་ནས་ཁྱད་པར་དུ་འཕགས་པར་གསུངས། སྐབས་གཉིས་པར་ཉན་ཐོས་དང་། རང་རྒྱལ་དང་། བྱང་སེམས་ཀྱི་རྟོགས་རིགས་གསུམ་གྱིས་རིམ་པ་ལྟར་གང་ཟག་གི་བདག་མེད་དང་། བདག་མེད་ཕྱེད་དང་གཉིས་དང་། བདག་མེད་གཉིས་ཆར་རྟོགས་པའི་རྣམ་གཞག་གསུངས་སོ། །རྒྱུད་བླར། རང་བྱུང་རྣམས་ཀྱི་དོན་དམ་སྟེ། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་ཐེག་ཆེན་འཕགས་པ་ལས་གཞན་གྱིས་བདེ་གཤེགས་སྙིང་པོ་མཐོང་བ་མེད་པར་གསུངས་སོ། །འཕགས་མཆོག་ཀླུ་སྒྲུབ་ཀྱིས་རིན་ཆེན་ཕྲེང་བར། མེད་པ་པ་ནི་ངན་འགྲོར་འགྲོ། །ཡོད་པ་པ་ནི་བདེ་འགྲོར་འགྲོ། །ཡོངས་དག་ཇི་བཞིན་ཡོངས་ཤེས་པས། །གཉིས་ལ་མི་བརྟེན་ཐར་པ་ལགས། །ཞེས་དངོས་པོ་དོན་དམ་དུ་ཡོད་པར་འཛིན་ན་ཐར་པ་མི་ཐོབ་པར་གསུངས་ཤིང་། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་གཞན་གཉིས་ཀ་དང་། །དུས་གསུམ་ཉིད་དུ་མ་མཐོང་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང་། །ཞེས་དང་། སྟོང་ཉིད་བདུན་ཅུ་པར། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང་། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང་། །ཞེས་ཕུང་པོ་ལ་བདེན་པར་འཛིན་པའི་བདེན་འཛིན་ཡོད་ན་གང་ཟག་ལ་བདེན་པར་འཛིན་པའི་ངར་འཛིན་ལྷན་སྐྱེས་འབྱུང་ཞིང་དེ་ལས་འཁོར་བ་འབྱུང་བས་འཁོར་བ་སྤངས་པ་ལ་ཕུང་པོ་རང་བཞིན་མེད་པར་རྟོགས་པ་དགོས་པར་གསུངས་སོ། །ཡང་རིན་ཆེན་ཕྲེང་བར། གཟུགས་ཀྱང་དོན་དུ་དོན་མེད་དོ། །རྣམ་ཤེས་ཚོར་དང་འདུ་ཤེས་དང་། །འདུ་བྱེད་རྣམས་ཀྱང་ཐམས་ཅད་དུ། །སོ་སོར་བདེན་དོན་མེད་པའི་ཕྱིར། །དམ་པའི་དོན་དུ་དོན་མེད་དོ། །ཞེས་སོགས་གསུངས་པའི་མཇུག་ཏུ། དེ་ལྟར་ཡང་དག་ཇི་བཞིན་དུ། །འགྲོ་བ་དོན་མེད་ཤེས་ནས་ནི། །རྒྱུ་མེད་པ་ཡི་མེ་བཞིན་དུ། །གནས་མེད་ལེན་མེད་མྱ་ངན་འདས། །ཞེས་འཁོར་བ་སྤངས་པའི་མྱང་འདས་ཐོབ་པ་ལ་བདག་ཏུ་གདགས་པའི་རྒྱུ་ཕུང་པོ་ལྔ་པོ་རང་བཞིན་མེད་པར་རྟོགས་དགོས་པར་གསུངས་སོ། །དེ་ལྟར་ན་ཐེག་པ་གསུམ་ཆར་གྱི་བྱང་ཆུབ་ཐོབ་པ་ལ་ཐུན་མོང་དུ་ཕུང་པོ་བདེན་པའི་སྐྱེ་མེད་དུ་རྟོགས་པ་དགོས་པར་བཞེད་དེ། རིན་ཆེན་ཕྲེང་བར། ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པ་སྟོང་པ་ཉིད། །ཟད་དང་མི་སྐྱེ་དོན་དུ་ནི། །གཅིག་པས་དེ་ཕྱིར་བཟོད་པར་གྱིས། །ཞེས་དང་། ཤེར་ཕྱིན་ལ་བསྟོད་པར། སངས་རྒྱས་རང་སངས་རྒྱས་རྣམས་དང་། །ཉན་ཐོས་རྣམས་ཀྱིས་ངེས་བསྟེན་མ། །ཁྱོད་ཉིད་གཅིག་པུ་ཐར་པའི་ལམ། །དེ་ལྟར་གཞན་དག་མེད་པར་ངེས། །ཞེས་གསུངས་སོ། །འོན་ཀྱང་ཐེག་པ་ཆེ་ཆུང་ལ་ལྟ་བའི་ཁྱད་པར་ནི་ཤིན་ཏུ་ཆེ་སྟེ། ཆོས་དབྱིངས་བསྟོད་པ་ལས་གསུངས་པའི་ཆོས་དབྱིངས་དེ་མཐོང་ན་བདེ་གཤེགས་སྙིང་པོ་མཐོང་བར་བཞེད་པའི་ཕྱིར་དང་། བསྟོད་ཚོགས་སུ། མཚན་མ་མེད་པ་མ་རྟོགས་པར། །ཁྱོད་ཀྱིས་ཐར་པ་མེད་པར་གསུངས། །དེ་ཡི་ཕྱིར་ན་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་ཉན་རང་གིས་མཚན་མེད་ཚང་བར་མ་རྟོགས་ཤིང་། ཐེག་ཆེན་གྱིས་དེ་ཚང་བར་རྟོགས་པར་གསུངས་ཤིང་། དེ་ཉིད་དཔལ་ལྡན་ཟླ་བས་ཆོས་ཀྱི་བདག་མེད་རྒྱས་པར་རྟོགས་མ་རྟོགས་ཀྱི་ཤེས་བྱེད་དུ་དྲངས་པར་མཛད་པའི་ཕྱིར་རོ། །ཉན་ཐོས་དང་རང་སངས་རྒྱས་ལ་ལྟ་བའི་ཁྱད་པར་གསལ་བར་གསུངས་པ་མ་མཐོང་ཡང་། མངོན་རྟོགས་རྒྱན་ནས་གསུངས་པ་ལྟར་གྱི་ལྟ་བའི་ཁྱད་པར་ངེས་པར་བཞེད་དགོས་པར་སྣང་སྟེ། དེ་ཉིད་ཤེར་ཕྱིན་གྱི་མདོའི་དོན་ཡིན་པའི་ཕྱིར་དང་། འཇུག་འགྲེལ་དུ་སློབ་དཔོན་གྱི་དགོངས་པ་འཆད་པ་ན་ཡང་དེ་དག་ནི་བསོད་ནམས་དང་ཡེ་ཤེས་གོང་དུ་འཕེལ་བའི་ཁྱད་པར་གྱིས་ཉན་ཐོས་རྣམས་ལས་ཁྱད་པར་དུ་འཕགས་པའི་ཕྱིར་དང་། བསོད་ནམས་དང་། ཡེ་ཤེས་ཀྱི་ཚོགས་དང་། ཐུགས་རྗེ་ཆེན་པོ་དང་། རྣམ་པ་ཐམས་ཅད་མཁྱེན་པ་ལ་སོགས་པ་མེད་པས་ཡང་དག་པར་རྫོགས་པའི་སངས་རྒྱས་རྣམས་ལས་དམན་པའི་ཕྱིར་ན་འབྲིང་པོ་ཞེས་ཉན་ཐོས་ལས་ཡེ་ཤེས་ཁྱད་པར་དུ་འཕགས་ཤིང་། ཐེག་ཆེན་ལས་དམན་པ་མངོན་རྟོགས་རྒྱན་ཇི་ལྟ་བ་བཞིན་དུ་གསུངས་པའི་ཕྱིར་རོ། །གསུམ་པ་ནི། འཇུག་འགྲེལ་དུ། ཉན་རང་གིས་ཆོས་རང་བཞིན་མེད་པར་རྟོགས་པ་ལ་མདོ་སྡེ་ས་བཅུ་པའི་ལུང་ལ་བརྟེན་ནས་བསྒྲུབ་པ་དང་། རིགས་པ་གཉིས་ཀྱི་སྒོ་ནས་བསྒྲུབ་པ་དང་། རིན་ཆེན་ཕྲེང་བའི་ལུང་ལ་བརྟེན་ནས་བསྒྲུབ་པ་དང་། ཉན་ཐོས་ལ་བསྟན་པའི་མདོ་ལ་བརྟེན་ནས་བསྒྲུབ་པ་དང་། རྩ་བ་ཤེས་རབ་ཀྱི་ལུང་ལ་བརྟེན་ནས་བསྒྲུབ་པ་དང་། ཐེག་ཆེན་བསྟན་པ་དོན་མེད་དུ་ཐལ་བ་སྤང་བ་དང་དྲུག་ལས། དང་པོ་ནི། མདོ་སྡེ་ས་བཅུ་པ་ལས། ས་དང་པོ་ལ་གནས་པའི་བྱང་སེམས་ཀྱིས་ཉན་རང་བློའི་སྟོབས་ཀྱིས་ཟིལ་གྱིས་གནོན་མི་ནུས་ཤིང་། ས་བདུན་པ་ཐོབ་ནས་ཟིལ་གྱིས་གནོན་ནུས་པར་གསུངས་པས་གྲུབ་སྟེ། ཉན་རང་ལ་ཆོས་རང་བཞིན་མེད་པར་རྟོགས་པ་མེད་ན། ས་དང་པོ་ལ་གནས་པའི་བྱང་སེམས་ཀྱིས་ཀྱང་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ་བའི་ཕྱིར་རོ། །གཉིས་པ་ནི། འཇུག་འགྲེལ་དུ། ཕྱི་རོལ་པ་བཞིན་དུ་འདི་དག་གིས་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤངས་པར་ཡང་མི་འགྱུར་རོ། །གཟུགས་ལ་སོགས་པའི་རང་གི་ངོ་བོ་ལ་དམིགས་པས་ཕྱིན་ཅི་ལོག་ཏུ་གྱུར་པའི་ཕྱིར་གང་ཟག་གི་བདག་མེད་པ་རྟོགས་པར་མི་འགྱུར་ཏེ། བདག་ཏུ་གདགས་པའི་རྒྱུ་ཕུང་པོ་ལ་དམིགས་པའི་ཕྱིར་རོ། །ཞེས་གསུངས་སོ། །གསུམ་པ་ནི། སྔར་དྲངས་པའི་རིན་ཆེན་ཕྲེང་བའི་ལུང་རྣམས་ཉན་ཐོས་ཀྱི་དབང་དུ་བྱས་པ་ཡིན་ཏེ། དེའི་མཇུག་ཐོག་ཁོ་ནར་བྱང་ཆུབ་སེམས་དཔའི་དབང་དུ་མཛད་ནས། དེ་ལྟར་བྱང་ཆུབ་སེམས་དཔས་ཀྱང་། །མཐོང་ནས་བྱང་ཆུབ་ངེས་པར་འདོད། །འོན་ཀྱང་དེ་ནི་སྙིང་རྗེ་ཡིས། །བྱང་ཆུབ་བར་དུ་སྲིད་མཚམས་སྦྱོར། །ཞེས་གསུངས་པའི་ཕྱིར་རོ། །བཞི་པ་ནི། ཉན་ཐོས་ལ་བསྟན་པའི་མདོ་དག་ལས་ཀྱང་ཉན་ཐོས་རྣམས་ཀྱིས་ཉོན་མོངས་པའི་སྒྲིབ་པ་སྤང་བར་བྱ་བའི་ཕྱིར། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པར་ཤེས་པ་སྒྱུ་མ་ལྟར། །ཉི་མའི་གཉེན་གྱིས་བཀའ་སྩལ་ཏོ། །ཞེས་བྱ་བ་ལས་དབུ་བ་རྡོས་པ་ལ་སོགས་པའི་དཔེ་དག་གིས་འདུ་བྱེད་རྣམས་ངེས་པར་དཔྱད་པ་ཡིན་ནོ། །ལྔ་པ་ནི། མདོའི་དོན་དེ་ཉིད་རྩ་ཤེར། བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏ་ཡ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པ་མཛད། །ཅེས་གསུངས་སོ། །དྲུག་པ་ནི། ཉན་ཐོས་ཀྱི་ཐེག་པ་ལས་ཆོས་ཀྱི་བདག་མེད་བསྟན་ན་ཐེག་ཆེན་བསྟན་པ་དོན་མེད་པར་འགྱུར་རོ། །ཞེས་པའི་ལན་དུ་ཐེག་པ་ཆེན་པོ་བསྟན་པས་ནི་ཆོས་ལ་བདག་མེད་པ་ཙམ་འབའ་ཞིག་སྟོན་པར་བྱེད་པ་མ་ཡིན་གྱི་འོ་ན་ཅི་ཞེ་ན། བྱང་ཆུབ་སེམས་དཔའ་རྣམས་ཀྱི་ས་དང་། ཕ་རོལ་ཏུ་ཕྱིན་པ་དང་། སྨོན་ལམ་དང་། སྙིང་རྗེ་ཆེན་པོ་ལ་སོགས་པ་དང་། ཡོངས་སུ་བསྔོ་བ་དང་། ཚོགས་གཉིས་དང་། བསམ་གྱིས་མི་ཁྱབ་པའི་ཆོས་ཉིད་ཀྱང་ཡིན་ནོ། །ཞེས་དང་། ཆོས་ཀྱི་བདག་མེད་པ་གསལ་བར་བྱ་བའི་ཕྱིར་ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ། རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །ཉན་ཐོས་ཀྱི་ཐེག་པ་ལས་ནི་ཆོས་ཀྱི་བདག་མེད་པ་མདོར་མཚོན་པ་ཙམ་ཞིག་ཏུ་ཟད་དོ། །ཇི་སྐད་དུ་སློབ་དཔོན་གྱི་ཞལ་སྔ་ནས་ཀྱིས། མཚན་མ་མེད་པ་མ་རྟོགས་པར། །ཞེས་སོགས་གསུངས་སོ། །བཞི་པ་ལ་ལྔ་སྟེ། ལྟ་བའི་ཁྱད་པར་ངོས་གཟུང་བ། ཚད་ལྡན་གྱི་དགོངས་པ་ཕྱོགས་གཅིག་པར་བསྟན་པ། ཐ་སྙད་མི་འདྲ་བ་གསུངས་པའི་དགོངས་པ། ཀླན་ཀའི་གནས་མ་ལུས་པ་སྤངས་པ། མ་རྟོགས་པའི་དབང་གིས་སྣ་ཚོགས་སུ་འགྱུར་བའི་སྐྱོན་བསྟན་པའོ། །དང་པོ་ནི། ཉན་ཐོས་ཀྱིས་གང་ལ་བརྟེན་ནས་ངར་འཛིན་སྐྱེ་བར་འགྱུར་བའི་རྟེན་ཕུང་པོ་བདེན་མེད་དུ་རྟོགས་ཏེ། ཕུང་པོ་ལ་བདེན་པར་འཛིན་པའི་བདེན་འཛིན་དེ་ཉིད་ཇི་སྲིད་ཡོད་ཀྱི་བར་དུ་ངའོ་སྙམ་པའི་འཛིན་པ་འབྱུང་ཞིང་། འཛིན་པ་དེ་ཉིད་གང་ཟག་གི་བདག་མེད་མ་རྟོགས་ཀྱི་བར་དུ་གང་ཟག་ལ་བདེན་པར་འཛིན་པའི་བདེན་འཛིན་ཁོ་ན་ཡིན་པའི་ཕྱིར་རོ། །དེ་ལས་གཞན་པའི་ཆོས་ཐམས་ཅད་བདེན་མེད་དུ་རྟོགས་པ་ནི་མ་ཡིན་ཏེ། ཁམས་གསུམ་གྱི་ཉོན་མོངས་སྤོང་བ་ལ་ཆོས་ཐམས་ཅད་ཀྱི་གནས་ལུགས་རྟོགས་མི་དགོས་པའི་ཕྱིར་རོ། །རང་སངས་རྒྱས་ཀྱིས་སྔར་གྱི་ལྟ་བ་དེའི་སྟེང་དུ་སྒྱུ་མ་ལ་སོགས་པའི་དཔེས་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་ཤིང་། ཀུན་ནས་ཉོན་མོངས་ཀྱི་གཟུང་བ་སོགས་དྲུག་པོ་ཡང་རང་བཞིན་མེད་པར་རྟོགས་ཀྱང་། ཆོས་ཐམས་ཅད་རང་བཞིན་མེད་པར་ནི་མ་རྟོགས་ཏེ། བདག་འཛིན་སྐྱེ་བའི་རྟེན་ཕུང་པོ་ལྔ་དང་། ཤེས་སྒྲིབ་གཟུང་རྟོག་སྐྱེ་བའི་རྟེན་གཟུང་བའི་ཡུལ་རྣམས་ལས་གཞན་དུ་གྱུར་པའི་ཆོས་རང་བཞིན་མེད་པར་མ་རྟོགས་པའི་ཕྱིར། ཐེག་པ་ཆེན་པོས་ནི་ཆོས་ཀྱི་བདག་མེད་རྒྱས་པར་རྟོགས་པས། འདི་ལ་སྟོང་གཞིའི་ཆོས་ཅན་གྱི་སྒོ་ནས་རྒྱས་པར་འཇོག་པ་དང་། སྟོང་ཚུལ་རྣམ་པའི་སྒོ་ནས་རྒྱས་པར་འཇོག་པ་གཉིས་ལས། དང་པོ་ནི། ནང་དང་ཕྱི་རོལ་ནས་བཟུང་སྟེ། གཞན་གྱི་ངོ་བོའི་བར་ཆོས་ཅན་གྱིས་བསྡུས་པ་འདུས་བྱས་དང་། འདུས་མ་བྱས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་ཐམས་ཅད་དང་། ཆོས་ཉིད་ཀྱིས་བསྡུས་པ་རང་བཞིན་སྟོང་པ་ཉིད་ཐམས་ཅད་ཀྱང་སྟོང་ཉིད་དུ་རྟོགས་པས་ན་སྟོང་ཉིད་ཉི་ཤུ་རྟོགས་པར་འཇོག་པ་སྟེ། འདིའི་སྟོང་གཞིའི་ཆོས་ཅན་ཉི་ཤུས་མ་བསྡུས་པའི་ཆོས་གང་ཡང་མེད་པས། ཆོས་ཐམས་ཅད་ལ་ཆོས་ཀྱི་བདག་མེད་པར་རྟོགས་པའོ། །གཉིས་པ་ནི། ཉན་ཐོས་ཀྱིས་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དང་། རང་སངས་རྒྱས་ཀྱིས་གཟུང་བ་རང་བཞིན་མེད་པར་རྟོགས་པ་དེ་ཡང་རྡོ་རྗེའི་ཟེགས་མ་དང་། གཅིག་དུ་བྲལ་ལ་སོགས་པའི་རྟགས་ལ་བརྟེན་ནས་རང་བཞིན་གྱིས་སྐྱེ་བ་མེད་པར་རྟོགས་པ་ཙམ་ཡིན་པས་སྤྲོས་པའི་མཐའ་བཞིའི་ནང་ནས། དང་པོ་ཁོ་ན་ཁེགས་པ་ཡིན་གྱི་ཕྱི་མ་གསུམ་མི་ཁེགས་ལ། ཐེག་པ་ཆེན་པོས་ནི་ཐོག་མར་དབུ་མའི་གཏན་ཚིགས་རྣམས་ཀྱི་བདེན་པ་བཀག དེའི་འོག་ཏུ་ཡང་དགག་བྱ་བདེན་པ་མེད་པས་དེ་བཀག་པའི་བདེན་མེད་དུ་མངོན་པར་ཞེན་པ་ཡང་བཀག དེའི་འོག་ཏུ་གཉིས་ཀ་དང་། གཉིས་ཀ་མ་ཡིན་པར་ཞེན་པ་ཡང་བཀག་ནས་སྤྲོས་པའི་མཐའ་བཞི་ཆར་དང་བྲལ་བར་རྟོགས་པས་ན་རྒྱས་པའོ། །མདོར་ན་དབུ་མ་པས་ཐེག་པ་གསུམ་གྱི་བྱང་ཆུབ་གསུམ་ཀ་ཡང་དབུ་མའི་ལམ་གྱིས་ཐོབ་དགོས་པ་ལས་ཐེག་པ་འོག་མས་ནི་བདེན་པའི་མཐའ་བཀག་པས་ཡོད་མཐའ་དང་བྲལ། ཐ་སྙད་དུ་ལས་འབྲས་མེད་པར་མི་བལྟ་བས་མེད་མཐའ་དང་བྲལ་བའི་བདེན་པ་གཉིས་ཀ་ལ་ལྟོས་ནས་དབུ་མར་འཇོག་པའི་དབུ་མ་རྟོགས་དགོས། ཐེག་པ་ཆེན་པོས་ནི་གནས་ལུགས་ཉིད་ལ་མཐའ་བཞི་ཆར་དང་བྲལ་བའི་དབུ་མ་རྟོགས་དགོས་པར་བཞེད་དོ། །གཉིས་པ་ནི། ཐོག་མར་ཤེར་ཕྱིན་གྱི་མདོའི་དགོངས་པ་ཡིན་ཏེ། ཐེག་པ་གསུམ་ཆར་གྱི་བྱང་ཆུབ་ཐོབ་པར་འདོད་པས་ཤེར་ཕྱིན་ལ་བསླབ་དགོས་པར་གསུངས་པའི་ཉན་རང་གི་བསླབ་བྱ་ནི་ཐམས་ཅད་ཤེས་པ་ཉིད་ཡིན་པར་གསུངས་ལ། དེའི་ཡུལ་ཐམས་ཅད་ནི་ཕྱི་དང་ནང་གི་ཆོས་རྣམས་ཇི་སྙེད་པ་འདི་ཙམ་ཡིན་པར་གསུངས་པས། ཕྱིའི་ཆོས་ནི་གཟུགས་སོགས་ཕྱིའི་སྐྱེ་མཆེད་དྲུག་ཡིན་ཞིང་། ནང་གི་ཆོས་ནི་མིག་སོགས་ནང་གི་སྐྱེ་མཆེད་དྲུག་ཡིན་ལ། ནང་གི་སྐྱེ་མཆེད་དྲུག་གིས་གཟུགས་ཕུང་དང་རྣམ་ཤེས་ཀྱི་ཕུང་པོ་བསྡུས། ཕྱིའི་སྐྱེ་མཆེད་དྲུག་གི་ནང་ནས་ཆོས་ཀྱི་སྐྱེ་མཆེད་ཀྱིས་ཕུང་པོ་བར་པ་གསུམ་ཡང་བསྡུས་པས་དེ་དག་ཉན་ཐོས་ཀྱིས་སྐྱེ་མེད་དུ་རྟོགས་བྱ་ཡིན་ལ། ཕྱིའི་སྐྱེ་མཆེད་གཞན་ལྔ་དང་། ཆོས་ཀྱི་སྐྱེ་མཆེད་ཀྱིས་བསྡུས་པའི་ཀུན་ནས་ཉོན་མོངས་ཀྱི་གཟུང་བ་སོགས་ནི་རང་སངས་རྒྱས་ཀྱིས་སྐྱེ་མེད་དུ་རྟོགས་པར་བྱ་བ་ཡིན་པའི་ཕྱིར་རོ། །གཞན་ཡང་ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་སོགས་གཞི་ཤེས་ཀྱི་རྣམ་པ་ཉེར་བདུན་འཆད་པའི་སྐབས་སུ་ཡང་མེད་པ་དང་། མི་སྐྱེ་བ་སོགས་ཀྱི་རྣམ་པ་བཅུ་དྲུག་པོ་ཉན་ཐོས་ཀྱི་རྟོགས་རིགས་དང་། གཟུང་བ་ཕྱི་རོལ་གྱི་དོན་རྨི་ལམ་ལྟར་མ་སྐྱེས་པ་སོགས་ལྔ་དང་། ཀུན་ནས་ཉོན་མོངས་ཀྱི་གཟུང་བ་མེད་པ་སོགས་དྲུག་སྟེ། རྣམ་པ་བཅུ་གཅིག་ནི་རང་སངས་རྒྱས་ཀྱི་རྟོགས་རིགས་སུ་གསུངས་པས་ཀྱང་གང་ཟག་གི་བདག་མེད་རྟོགས་པ་ལ་བཏགས་པའི་རྒྱུ་ཕུང་པོ་བདེན་མེད་དུ་རྟོགས་པ་དང་། རང་སངས་རྒྱས་ཀྱིས་ཕྱི་རོལ་གྱི་དོན་དང་། ཀུན་ནས་ཉོན་མོངས་ཀྱི་གཟུང་བ་སོགས་རང་བཞིན་མེད་པར་རྟོགས་པར་གྲུབ་བོ། །ཡེ་ཤེས་ཀྱི་ཚོགས་ཀྱི་སྐབས་སུ་རབ་འབྱོར་གཞན་ཡང་བྱང་སེམས་ཆེན་པོའི་ཐེག་པ་ཆེན་པོ་ནི་ནང་སྟོང་པ་ཉིད་དང་། ཞེས་སོགས་སྟོང་ཉིད་ཉི་ཤུ་ཐེག་ཆེན་གྱི་རྟོགས་བྱར་གསུངས་པ་དང་། གཟུགས་རྟག་ཅེས་བྱ་བར་སྤྱོད་ན་མཚན་མ་ལ་སྤྱོད་དོ། །མི་རྟག་ཅེས་བྱ་བར་སྤྱོད་ན་མཚན་མ་ལ་སྤྱོད་དོ། །དེ་བཞིན་དུ་སྟོང་མི་སྟོང་དང་། མཚན་མ་ཡོད་མེད་སོགས་མཐའ་གཉིས་ཆར་བཀག་པར་གསུངས་པ་རྣམས་ཀྱིས་ཐེག་ཆེན་གྱི་ཆོས་ཀྱི་བདག་མེད་རྒྱས་པར་རྟོགས་ཚུལ་གཉིས་པོ་དེ་གྲུབ་བོ། །ཉན་ཐོས་ལ་བསྟན་པའི་མདོའི་དགོངས་པར་ཡང་གྲུབ་སྟེ། ཉན་ཐོས་རྣམས་ཀྱིས་ཉོན་སྒྲིབ་སྤོང་བའི་ཆེད་དུ་གཟུགས་ནི་དབུ་བ་རྡོས་པ་འདྲ་ཞེས་སོགས་ཕུང་པོ་ལྔ་བདེན་མེད་དུ་བསྟན་པའི་ཕྱིར་རོ། །མགོན་པོ་བྱམས་པའི་དགོངས་པར་ཡང་གྲུབ་སྟེ། ཉན་ཐོས་ལ་གང་ཟག་གི་བདག་མེད་རྟོགས་པ་ཙམ་ལས་མ་བཞག་ཀྱང་དེ་ཉིད་ལ་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དགོས་པ་ལ་དགོངས་ནས། ཐེག་ཆེན་གྱི་སྦྱོར་མཐོང་སྒོམ་གསུམ་ཉན་རང་གི་དེ་གསུམ་ལས་ཁྱད་པར་འཕགས་ཚུལ་སྟོན་པའི་སྐབས་རྣམས་སུ་མི་རྟག་ལ་སོགས་བཅུ་དྲུག་ལ་མངོན་ཞེན་བཀག་པའི་ཆ་ནས་ཁྱད་པར་འཕགས་པར་གསུངས་ཀྱི་ཕུང་པོ་བདེན་མེད་དུ་རྟོགས་པའི་ཆ་ནས་ཁྱད་པར་འཕགས་པར་གསུངས་པ་མི་སྣང་བའི་ཕྱིར་དང་། མེད་པའི་རྣམ་པ་ནས་བཟུང་སྟེ། །ཞེས་པའི་དོན་སྔར་བཤད་པ་བཞིན་དུ་བསྟན་བཅོས་ཉིད་ལས་བཤད་པས་ཀྱང་ཉན་ཐོས་ཀྱི་མཐོང་སྒོམ་མཉམ་གཞག་གི་གནས་སྐབས་སུ་སྐྱེ་མེད་རྟོགས་པར་བཞེད་པའི་ཕྱིར་རོ། །རང་རྒྱལ་གྱིས་དེའི་སྟེང་དུ་གཟུང་བ་ཆོས་ཀྱི་བདག་མེད་རྟོགས་པ་དང་། ཐེག་ཆེན་གྱིས་དེའི་སྟེང་དུ་འཛིན་པ་ཆོས་ཀྱི་བདག་མེད་རྟོགས་པའི་ཁྱད་པར་ནི་སྐབས་གཉིས་པར་གསལ་ཞིང་། ཆོས་ཀྱི་བདག་མེད་རྒྱས་པར་རྟོགས་ཚུལ་གཉིས་པོ་ཡང་སྟོང་ཉིད་ཉི་ཤུ་པོ་ཡེ་ཤེས་ཀྱི་ཚོགས་ཞེས་པ་གཅིག་ཏུ་བསྡུས་ཤིང་། སྐབས་དང་པོར་སྦྱོར་ལམ་དང་། སྐབས་གསུམ་པར་མཚན་འཛིན་མཐའ་དག་བཀག་པར་གསུངས་པ་ལས་ཤེས་སོ། །འཕགས་མཆོག་ཀླུ་སྒྲུབ་ཡབ་སྲས་ཀྱི་དགོངས་པ་ཡང་ཡིན་ཏེ། སྔར་དྲངས་པའི་རིན་ཆེན་ཕྲེང་བ་དང་། སྟོང་ཉིད་བདུན་ཅུ་པའི་ལུང་དང་། རྩ་ཤེར། ལས་དང་ཉོན་མོངས་རྣམ་རྟོག་ལས། །ཞེས་དང་། ཆོས་དབྱིངས་བསྟོད་པར། བདག་དང་བདག་གིར་ཞེས་འཛིན་པས། །ཇི་སྲིད་ཕྱི་རོལ་རྣམ་བརྟགས་པ། །བདག་མེད་རྣམ་པ་གཉིས་མཐོང་ནས། །སྲིད་པའི་ས་བོན་འགག་པར་འགྱུར། །ཞེས་དང་། བཞི་བརྒྱ་པར། ཡུལ་ལ་བདག་མེད་མཐོང་ནས་ནི། །སྲིད་པའི་ས་བོན་ལྡོག་པར་འགྱུར། །ཞེས་ཕུང་པོ་ལ་བདེན་པར་འཛིན་པའི་བདེན་འཛིན་དེ་གང་ཟག་གི་བདག་འཛིན་གྱི་དངོས་རྒྱུ་ཡིན་ལ། གང་ཟག་གི་བདག་འཛིན་དེ་ཡང་སྲིད་པའི་ས་བོན་ཡན་ལག་བཅུ་གཉིས་ཀྱིས་བསྡུས་པའི་མ་རིག་པ་ཡིན་པས། སྲིད་པའི་ས་བོན་འགག་པ་ལ་གང་ཟག་བདེན་མེད་དུ་རྟོགས་པ་དགོས་ཤིང་། དེ་རྟོགས་པ་ལ་གང་ཟག་གི་བདག་འཛིན་སྐྱེ་བའི་རྒྱུ་ཕུང་པོ་བདེན་མེད་དུ་རྟོགས་པའི་ཆོས་ཀྱི་བདག་མེད་རྟོགས་པ་དགོས་པར་གསུངས་པའི་ཕྱིར་རོ། །དེ་ལྟ་བུའི་ལྟ་བ་དེ་ཐེག་པ་གསུམ་ཆར་ཐུན་མོང་བ་ཡིན་པ་ལས་རང་རྒྱལ་ལ་དེ་ལས་ཁྱད་པར་དུ་གྱུར་པའི་ལྟ་བ་ཡོད་པ་ནི་སྔར་དཔལ་ལྡན་ཟླ་བའི་ལུང་གིས་བཤད་ཟིན་ཞིང་། ཐེག་ཆེན་གྱིས་བདག་མེད་གཉིས་རྒྱས་པར་རྟོགས་པའི་ཚུལ་ཡང་ཐེག་པ་གསུམ་ཆར་གྱི་ཐུན་མོང་བར་གྱུར་པའི་ཆོས་ཀྱི་བདག་མེད་དེ་ལས་ཁྱད་པར་དུ་གྱུར་པའི་ཐེག་ཆེན་རང་ལུགས་ཀྱི་ཆོས་ལ་བདག་མེད་པ་ཡོད་པར་གསུངས་ཏེ། བསམ་གྱིས་མི་ཁྱབ་པའི་བསྟོད་པར། ཇི་ལྟར་ཁྱོད་ཀྱིས་ཐེག་ཆེན་ལས། །རང་གི་ཆོས་ལ་བདག་མེད་རྟོགས། །དེ་བཞིན་བློ་དང་ལྡན་རྣམས་ལ། །ཐུགས་རྗེའི་དབང་གིས་བསྟན་པར་མཛད། །ཅེས་གསུངས་པའི་ཕྱིར་རོ། །འདི་ཉིད་མདོ་སྡེ་ས་བཅུ་པའི་ལུང་གི་དགོངས་པར་ཡང་སྣང་སྟེ། ནམ་ཞིག་ས་བདུན་པ་རིང་དུ་སོང་བ་དེར་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཀྱང་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ། །ཞེས་གསུངས་པའི་རང་གི་ཡུལ་དང་། རང་གི་ཆོས་ལ་བདག་མེད་གཉིས་པོ་དོན་གཅིག་པར་སྣང་བའི་ཕྱིར་རོ། །འོ་ན་རང་གི་ཡུལ་ཆོས་ལ་བདག་མེད་པ་དེ་གང་། དེ་ཤེས་པ་ནི་གང་། དེའི་ཆེ་བ་ནི་གང་། དེ་ཉན་རང་ལས་ཤིན་ཏུ་འདས་པའི་དོན་ནི་གང་ཞེ་ན། བཤད་པར་བྱ་སྟེ། རྣམ་དཔྱོད་དང་བསོད་ནམས་གཉིས་ཀ་དང་ལྡན་པ་དག་རྣ་བ་བླགས་ཏེ་ཉན་པར་བྱོས་ཤིག དྲི་བ་དང་པོའི་ལན་ནི། དེ་ཉིད་ཕྱིར་ན་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་པའི་ཚང་བ་དང་། འཇུག་འགྲེལ་དུ། ཆོས་ཀྱི་བདག་མེད་པ་གསལ་བར་བྱ་བའི་ཕྱིར། ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ། རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །ཞེས་དང་། ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་པར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟ་ན་ཡང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པ་བསྒོམས་པ་མེད་དེ། ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ། །ཞེས་གསུངས་པའི་ཆོས་ཀྱི་བདག་མེད་གསལ་བ་དང་། རྒྱས་པ་དང་། རྫོགས་པ་རྣམས་ཏེ། སྔར་བཤད་པའི་རྒྱས་ཚུལ་གཉིས་པོ་དེ་ཉིད་དོ། །དྲི་བ་གཉིས་པའི་ལན་ནི། དེ་ལྟ་བུའི་ཐེག་ཆེན་རང་ལུགས་ཀྱི་ཆོས་ལ་བདག་མེད་པ་ཐོས་བསམ་གྱིས་ཤེས་པ་ཚོགས་ལམ་ན་ཡང་ཡོད་པས། མཚན་མེད་རབ་ཏུ་སྦྱིན་ལ་སོགས། །ཞེས་པའི་ཐར་པ་ཆ་མཐུན་དུ་བསྟན། སྒོམ་བྱུང་གཙོ་བོར་གྱུར་པའི་ཤེས་པ་སྦྱོར་ལམ་ན་ཡང་ཡོད་པས་ཉན་ཐོས་བསེ་རུ་ལྟ་བུ་དང་། བཅས་པ་དག་ལས་ཁྱད་པར་འཕགས། །ཞེས་པའི་སྦྱོར་ལམ་དུ་བསྟན་མངོན་སུམ་དུ་མཐོང་བའི་སྒོ་ནས་ཤེས་པ་མཐོང་ལམ་ནས་ཡོད་པས། གང་གི་ལམ་ནི་གཞན་དག་ལས། །ཁྱད་དུ་འཕགས་པས་ཁྱད་པར་ལམ། །ཞེས་པའི་མཐོང་ལམ་དུ་བསྟན། མཐོང་ཟིན་རྒྱུན་ལྡན་དུ་བསྒོམ་པ་སྒོམ་ལམ་ནས་ཡོད་པས། སྒོམ་པའི་ལམ་ནི་ཟབ་པ་སྟེ། །ཞེས་པའི་སྒོམ་ལམ་དུ་བསྟན་ཏོ། །དྲི་བ་གསུམ་པའི་ལན་ནི། ས་བདུན་པའི་ཡོངས་སྦྱོང་གི་སྐབས་སུ་བཤད་པ་ལྟར་གྱི་ཆོས་དང་གང་ཟག་ལ་མཚན་མར་འཛིན་པའི་མཚན་འཛིན་མཐའ་དག་སླར་མི་སྐྱེ་བའི་ཆོས་ཅན་དུ་བྱེད་པ་ནི་དེའི་ཆེ་བ་སྟེ། རང་གི་སྤང་བྱ་སླར་མི་སྐྱེ་བའི་ཆོས་ཅན་དུ་བྱེད་པ་གཉེན་པོའི་ཆེ་བར་འཇོག་པ་ནི་གཉེན་པོ་སྤྱིའི་ཆོས་ཡིན་པའི་ཕྱིར་རོ། །དེ་ཉིད་ས་བདུན་པར་ཐོབ་སྟེ། ས་བདུན་པའི་མཉམ་གཞག་དེས་རྗེས་ཐོབ་ཏུ་རྣམ་ཐར་སྒོ་གསུམ་ཤེས་པ་ལ་སོགས་པའི་རྟོགས་པ་ཉི་ཤུ་འདྲེན་པའི་ཕྱིར་རོ། །དྲི་བ་བཞི་པའི་ལན་ནི། ཉན་རང་ལས་ཤིན་ཏུ་འདས་པ་དང་། དེ་ཟིལ་གྱིས་གནོན་པ་དོན་གཅིག་པས་ས་བདུན་པའི་སྔ་རོལ་དུ་མ་ཐོབ་སྟེ། ས་བདུན་པ་མན་ཆད་ཀྱི་རྗེས་ཐོབ་ཀྱི་གནས་སྐབས་སུ་ཡང་ཉན་རང་དང་ཐུན་མོང་བར་གྱུར་པའི་མཚན་འཛིན་མངོན་གྱུར་དུ་འབྱུང་བའི་ཕྱིར་རོ། །དེའི་ཤུགས་ཀྱིས་ཉན་རང་ལས་འདས་པ་དང་། ལྟ་བ་ཁྱད་པར་དུ་འཕགས་པ་སྔ་རོལ་དུ་ཡང་ཡོད་པར་གྲུབ་བོ། །ཉན་རང་དང་ས་བདུན་པ་མན་ཆད་ཀྱི་བྱང་སེམས་གཉིས་ཀ་ལ་ཐུན་མོང་དུ་འབྱུང་བའི་མཚན་འཛིན་སླར་མི་སྐྱེ་བའི་ཆོས་ཅན་དུ་བྱས་པའི་ཚེ་ཉན་རང་ཟིལ་གྱིས་གནོན་པ་ཡིན་པས། འཇུག་པར། ས་བརྒྱད་པར་ཉོན་མོངས་རྩ་བ་དང་བཅས་པ་ཞི་བས་ཁམས་གསུམ་གྱི་བླ་མ་ཐོབ་པར་གསུངས་པ་ཡིན་ནོ། །དཔལ་ལྡན་ཞི་བ་ལྷའི་བཞེད་པ་ཡང་ཡིན་ཏེ། སྤྱོད་འཇུག་ཏུ། གང་ཟག་གི་བདག་མེད་བསྒོམ་པའི་ཚུལ་ནི། དཔེར་ན་ཆུ་ཤིང་སྡོང་པོ་དག །ཆ་ཤས་ཕྱེ་ན་འགལ་མེད་པ། །དེ་བཞིན་རྣམ་པར་དཔྱད་པ་ཡིས། །བཙལ་ན་བདག་ཀྱང་ཡང་དག་མིན། །ཞེས་གསུངས་ཤིང་། ཇི་ལྟར་བཙལ་བའི་ཚུལ་ནི། ལུས་ནི་རྐང་པ་བྱིན་པ་མིན། །ཞེས་པ་ནས། །ཕྱི་དང་ནང་ནའང་ལུས་མེད་ན། །ཇི་ལྟར་ལག་སོགས་ལ་ལུས་ཡོད། །ལག་སོགས་རྣམས་ལས་གཞན་མེད་ན། །དེ་ནི་ཇི་ལྟར་ཡོད་པ་ཡིན། །ཞེས་ལུས་བཙལ་ནས་མ་རྙེད་པའི་ཚུལ་དང་། དེ་བཞིན་སོར་མོའི་ཚོགས་ཡིན་ཕྱིར། །ལག་པའང་གང་ཞིག་ཡིན་པར་འགྱུར། །དེ་ཡང་ཚིགས་ཀྱི་ཚོགས་ཡིན་ཕྱིར། །ཚིགས་ཀྱང་རང་གི་ཆ་ཕྱེ་བས། །ཞེས་པ་ནས། མཁའ་བཞིན་དེས་ན་རྡུལ་ཡང་མེད། །ཅེས་ལུས་ཀྱི་ཡན་ལག་རྡུལ་ཕྲན་གྱི་བར་ཡང་མི་རྙེད་པར་གསུངས་པས་གང་ཟག་གི་བདག་མེད་རྟོགས་པ་ལ་ཉེར་ལེན་གྱི་ཕུང་པོ་བདེན་མེད་རྟོགས་པ་དགོས་པར་བཞེད་དོ། །འོན་ཀྱང་སྟོང་ཉིད་རྒྱས་པའི་ཚུལ་གཉིས་པོ་མ་རྟོགས་པར་བཞེད་དེ། སེམས་ནི་དམིགས་དང་བཅས་རྣམས་ཀྱི། །མྱ་ངན་འདས་པའང་དཀའ་བར་གནས། །ཞེས་ཉན་རང་ལ་མངོན་ཞེན་གྱི་དམིགས་པ་ཡོད་པས་འཁོར་བར་སྐྱེ་བ་ལེན་མི་སྲིད་པའི་མྱང་འདས་མེད་པར་གསུངས་པའི་ཕྱིར་རོ། །གལ་ཏེ་ཉོན་མོངས་སྤངས་པས་འཁོར་བར་སྐྱེ་བ་ལེན་མི་སྲིད་པའི་མྱང་འདས་ཐོབ་བོ་སྙམ་ན། དེ་ལྟར་ན་ཉོན་མོངས་སྤངས་མ་ཐག་ཏུ་སྡུག་བསྔལ་ཡང་སྤངས་པར་འགྱུར་བ་ལས་ལྷག་ཅེས་མྱང་འདས་ལ་སྡུག་བསྔལ་ཡོད་པས་བསལ་ལོ། །ཞེས་པ་ནི། ཉོན་མོངས་སྤངས་པས་གྲོལ་ན་དེ། །དེ་མ་ཐག་ཏུ་དེར་འགྱུར་རོ། །ཞེས་གསུངས་སོ། །མདོར་ན་ཐེག་པ་གསུམ་གྱི་ལྟ་བའི་ཁྱད་པར་ལ་ཤེར་ཕྱིན་གྱི་མདོ་དང་། བྱམས་པ་དང་། ཀླུ་སྒྲུབ་དང་། ཞི་བ་ལྷ་དང་། ཟླ་བ་གྲགས་པ་དང་། འཕགས་སེང་གཉིས་བཞེད་པ་མི་མཐུན་པ་ནི་ཅི་ཡང་མེད་པར་ཤེས་པར་བྱའོ། །གསུམ་པ་ནི། འོན་ཀྱང་ཐ་སྙད་འཇོག་ལུགས་ནི་མི་འདྲ་བར་སྣང་སྟེ། ཀླུ་སྒྲུབ་ཡབ་སྲས་ཀྱིས་གང་ཟག་བདེན་མེད་རྟོགས་པ་ལ། གང་ཟག་གི་བདག་མེད་རྟོགས་པ་དང་། ཉེར་ལེན་གྱི་ཕུང་པོ་བདེན་མེད་དུ་རྟོགས་པ་ལ་ཆོས་ཀྱི་བདག་མེད་རྟོགས་པར་བྱས་ནས། ཉན་རང་ལ་ཡང་ཆོས་ཀྱི་བདག་མེད་རྟོགས་པ་ཡོད་པར་བཞེད་ལ། བྱམས་ཆོས་རྗེས་འབྲང་དང་བཅས་པས་ནི་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དེ་ཉིད་གང་ཟག་གི་བདག་མེད་རྟོགས་པའི་ཡན་ལག་ཏུ་བྱས་ནས། ཉན་ཐོས་ལ་ཆོས་ཀྱི་བདག་མེད་རྟོགས་པ་མེད། རང་རྒྱལ་ལ་ཆོས་ཀྱི་བདག་མེད་ཀྱི་ཕྱེད་རྟོགས་པ་ཡོད། ཐེག་ཆེན་ལ་བདག་མེད་གཉིས་ཀ་རྟོགས་པ་ཡོད་པའི་ཐ་སྙད་མཛད་པའི་ཕྱིར་རོ། །འོ་ན་ཐ་སྙད་མི་འདྲ་བ་གཉིས་འབྱུང་བའི་དགོས་པ་གང་ཞེ་ན། ཀླུ་སྒྲུབ་ཀྱིས་ཤེར་ཕྱིན་གྱི་མདོར་ཐེག་པ་གསུམ་ཆར་གྱི་བྱང་ཆུབ་ཐོབ་པར་འདོད་པས་ཤེར་ཕྱིན་ལ་བསླབ་པར་གསུངས་པའི་ཐུན་མོང་བའི་ལྟ་བ་དང་། ཐེག་ཆེན་ཐུན་མོང་མ་ཡིན་པའི་ལྟ་བ་གཉིས་ཀ་གཏན་ལ་དབབ་པར་མཛད་པས་དེའི་ཚེ་དངོས་སྨྲ་བ་དག་གིས་ཉན་ཐོས་ཀྱིས་ཉེར་ལེན་གྱི་ཕུང་པོ་བདེན་མེད་དུ་མ་རྟོགས་པར་གང་ཟག་གི་བདག་མེད་རྟོགས་པར་འདོད་པ་དེ་བཀག་ནས་ཕུང་པོ་བདེན་མེད་དུ་རྟོགས་པར་ཤེས་པའི་ཆེད་དུ་བདག་མེད་གཉིས་ཀ་རྟོགས་པའི་ཁྱད་པར་མཛད་དོ། །འདི་ལ་དགོངས་ནས་འཇུག་འགྲེལ་དུ། ཉན་ཐོས་ཀྱིས་རྟོགས་པའི་ཆོས་ཀྱི་བདག་མེད་ལ་ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་དུ་གསུངས་སོ། །མགོན་པོ་བྱམས་པས་ནི། གཞན་གྱིས་མྱོང་བ་མ་ཡིན་ཏེ། །ཞེས་པའི་ཚུལ་གྱིས་ཐེག་ཆེན་ཐུན་མོང་མ་ཡིན་པའི་ལམ་གྱི་རིམ་པ་གཏན་ལ་འབེབས་པར་མཛད་པས། བྱང་སེམས་ཀྱི་མངོན་རྟོགས་གཅིག་ཉིད་ལ་ཐེག་པ་གསུམ་གྱི་རྟོགས་རིགས་གསུམ་དུ་ཕྱེ་དགོས་པས་ཉན་ཐོས་ཀྱིས་ཆོས་ཀྱི་བདག་མེད་མ་རྟོགས་པའི་རྣམ་གཞག་མཛད་དོ། །འོ་ན་ཐེག་ཆེན་གྱི་རྟོགས་པ་གཅིག་ཉིད་ལ་རྟོགས་རིགས་གསུམ་དུ་འཇོག་པའི་དགོས་པ་གང་ཞེ་ན། རབ་འབྱོར་བྱང་ཆུབ་སེམས་དཔའ་རྣམས་ཀྱིས་ནི་ཉན་ཐོས་ཀྱི་ལམ་གང་ཡིན་པ་དང་། རང་སངས་རྒྱས་ཀྱི་ལམ་གང་ཡིན་པ་དང་། སངས་རྒྱས་ཀྱི་ལམ་གང་ཡིན་པའི་ལམ་ཐམས་ཅད་བསྐྱེད་པར་བྱ་ཞིང་ལམ་ཐམས་ཅད་ཤེས་པར་བྱའོ། །ཞེས་ལམ་ཤེས་ཀྱི་ལམ་གསུམ་གྱི་དམིགས་རྣམ་སོ་སོར་ཤེས་དགོས་ལ་དེའི་ཚེ་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་གང་ཟག་གི་བདག་མེད་རྟོགས་པའི་ནང་དུ་བསྡུས་ནས་ཆོས་ཀྱི་བདག་མེད་ལ་གཉིས་སུ་ཕྱེ་སྟེ། ཐེག་པ་གསུམ་གྱི་ལྟ་བའི་ཁྱད་པར་འཇོག་དགོས་པའི་ཕྱིར་རོ། །བཞི་པ་ནི། ཉན་རང་གིས་ཉེར་ལེན་གྱི་ཕུང་པོ་བདེན་མེད་དུ་རྟོགས་ན་ཉི་ཚེ་བ་དང་སྣ་ཚོགས་ཉིད་ཅེས་པ་དང་འགལ་ལོ། །ཞེ་ན། དེའི་དོན་རྟོགས་པ་ཉི་ཚེ་བ་ཡིན་པས་ཉེར་ལེན་གྱི་ཕུང་པོ་བདེན་མེད་ཙམ་ལས་ཆོས་ཀྱི་བདག་མེད་མཐའ་དག་རྟོགས་པ་མེད་པར་བཤད་ཟིན་པས་ཅིའི་ཕྱིར་ཀླན་ཀ་ཚོལ་བར་བྱེད། གལ་ཏེ་ཉན་རང་གི་མཐོང་ལམ་གྱིས་སྐྱེ་མེད་རྟོགས་ན་མི་རྟག་ལ་སོགས་བཅུ་དྲུག་རྟོགས་པའི་བློ་དེ་ཉན་རང་གི་རྟོགས་རིགས་སུ་མདོ་དང་བསྟན་བཅོས་གཉིས་ཀར་ལས་བཤད་པ་དང་འགལ་ལོ་སྙམ་ན། དེ་ནི་མཉམ་གཞག་གི་ཡུལ་མཐོང་ཚུལ་མ་ཡིན་གྱི་རྗེས་ཐོབ་ཀྱིས་ངེས་ཤེས་ཀྱི་དབང་དུ་བྱས་པ་སྟེ། སློབ་དཔོན་གྱིས་དམིགས་པ་དང་བཅས་པ་ཉིད་ཀྱིས་འབྲས་བུ་དང་པོ་ལ་སོགས་པ་རྟོགས་པ་ཐ་དད་པ་དང་། ཞེས་གསུངས་པའི་ཕྱིར་རོ། །འདི་ཡང་མཉམ་གཞག་གི་དབང་དུ་བྱས་སོ་སྙམ་ན་མ་ཡིན་ཏེ། དམིགས་པ་དང་བཅས་པའི་དོན་ནི་ཞེན་པ་དང་བཅས་པ་ཡིན་པས་ཉན་རང་གི་མཐོང་སྒོམ་མཉམ་གཞག་ན་མངོན་ཞེན་མེད་པའི་ཕྱིར་དང་། གཞན་དུ་ན་ཉན་རང་གི་མཐོང་སྒོམ་མཉམ་གཞག་ལ་རྟོགས་རིགས་ཐ་དད་ཡོད་པར་འགྱུར་ཏེ། འདི་འབྲས་བུ་དང་པོ་སོགས་རྟོགས་རིགས་ཐ་དད་དུ་སྟོན་པའི་གཞུང་ཡིན་པའི་ཕྱིར་རོ། །འདོད་ན་ཉིར་སྣང་དུ། ཏིལ་གྱི་དཔེས་ཉན་ཐོས་ཀྱི་སྒོམ་ལམ་སྟོན་པའི་རྒྱུ་མཚན་དུ་མཐོང་སྒོམ་རྟོགས་རིགས་ཐ་དད་མེད་ཀྱང་ནུས་པ་ཐ་དད་ཡོད་པར་བཤད་པ་དང་ཅིའི་ཕྱིར་མི་འགལ། ཁྱེད་རང་ལ་ཡང་མཚུངས་སོ་སྙམ་ན་མི་མཚུངས་ཏེ། འདིར་རྗེས་ཐོབ་ཀྱི་ངེས་ཤེས་ཀྱི་དབང་དུ་བྱས་ལ་མཉམ་གཞག་གིས་དྲངས་པའི་ངེས་ཤེས་འགའ་ཞིག་ནི་མི་རྟག་པར་མངོན་པར་ཞེན་པ་དང་། འགའ་ཞིག་ནི་སྡུག་བསྔལ་བར་མངོན་པར་ཞེན་པ་སོགས་ཡིན་པས་རིགས་ཐ་དད་པའི་ཕྱིར་རོ། །ཐེག་ཆེན་ལ་ནི་མི་མཚུངས་ཏེ། མཉམ་གཞག་གིས་རང་སྟོབས་ཀྱིས་དྲངས་པའི་ངེས་ཤེས་ཐམས་ཅད་སྤྲོས་བྲལ་གྱི་རྣམ་པ་ཅན་ཡིན་པས་རིགས་གཅིག་པའི་ཕྱིར་རོ། །ལྔ་པ་ནི། ལུགས་འདི་མ་རྟོགས་པའི་མཁས་པ་ཁ་ཅིག ཆོས་ཀྱི་བདག་མེད་ཀྱི་ངོས་འཛིན་གཅིག་ཏུ་བྱས་ནས་དེ་ཀླུ་སྒྲུབ་ཀྱི་ལུགས་ལ་ཉན་རང་གིས་རྟོགས། བྱམས་ཆོས་ཀྱི་ལུགས་ལ་ཉན་རང་གིས་མ་རྟོགས་པར་ཁས་བླངས་པས་གང་རུང་ཅིག་ལ་སྐུར་པ་བཏབ་པར་འགྱུར་ཞིང་། མཁས་པ་ཁ་ཅིག་གཉིས་ཆར་གྱི་ལུགས་ལ་ཉན་རང་གིས་ཕུང་པོ་བདེན་མེད་དུ་མ་རྟོགས་པར་ཁས་བླངས་པས་ཀླུ་སྒྲུབ་ཀྱི་གཞུང་ལ་སྦྱོར་བའི་ཚེ་ཀྱོག་བཤད་འབའ་ཞིག་དགོས་པར་འགྱུར་རོ། །ཙོང་ཁ་པས་ཐེག་པ་ཆེ་ཆུང་གཉིས་ཆར་གྱིས་ཆོས་ཐམས་ཅད་ཀྱི་གནས་ལུགས་རྟོགས་པར་མཚུངས་པས་ལྟ་བ་ལ་ཁྱད་པར་མེད་པར་འདོད་པས་ཐེག་ཆེན་གྱི་ལྟ་སྤྱོད་ནམ་མཁའ་ལྟ་བུ་ལ་སྐུར་པ་བཏབ་པར་འགྱུར་ཞིང་། ཡབ་སྲས་ཀྱི་གཞུང་རྣམས་ལས། ཆོས་ཀྱི་བདག་མེད་རྫོགས་པ་དང་། རྒྱས་པར་རྟོགས་མ་རྟོགས་ཀྱི་ཁྱད་པར་བཤད་པ་དང་ཡང་འགལ་ལོ། །དེའི་ལན་དུ་བསྒྲུབ་བྱ་ཆོས་ཀྱི་བདག་མེད་གཅིག་ཉིད་ལ་སྒྲུབ་བྱེད་རིགས་པ་རྒྱས་བསྡུས་ཀྱི་སྒོ་ནས་རྟོགས་པའི་ཁྱད་པར་ཡོད་པར་སྨྲ་བ་ནི་ཐེག་པ་ཆེ་ཆུང་དབང་པོ་རྣོ་རྟུལ་གོ་བཟློག་པར་འགྱུར་ཞིང་། སྒྲིབ་པ་སྤོང་བའི་ནུས་པ་ཆེ་ཆུང་ལ་འཆད་ན་ཡང་། སྤང་བྱ་བདེན་འཛིན་གཅིག་ཉིད་ཉན་ཐོས་བརྩོན་འགྲུས་མྱུར་བས་ཚེ་གསུམ་གྱིས་སྤོང་ནུས་ཤིང་། བྱང་སེམས་ཀྱིས་བསྐལ་པ་གྲངས་མེད་གཉིས་ཀྱི་བར་དུ་སྤོང་མི་ནུས་པར་ཁས་བླངས་པ་དང་ཅིའི་ཕྱིར་མི་འགལ། ཕུང་པོ་བདེན་མེད་དུ་མ་རྟོགས་ཀྱང་མི་རྟག་ལ་སོགས་བཅུ་དྲུག་གིས་བསྡུས་པའི་གང་ཟག་གི་བདག་མེད་མངོན་སུམ་དུ་རྟོགས་པ་ཐེག་པ་གསུམ་ཆར་ལ་ཡོད་པ་ཉན་ཐོས་སྡེ་གཉིས་ཀྱི་གྲུབ་མཐའ་ཡིན་པའི་དོན་མ་རྟོགས་པར་དབུ་མ་པའི་ལུགས་ལ་ཡང་དེ་ལྟ་བུའི་གང་ཟག་ཡོད་ཅིང་། དེས་ཁམས་གསུམ་ན་སྤྱོད་པའི་ཉོན་མོངས་མངོན་གྱུར་བ་སྤངས་ཀྱང་། ཉོན་མོངས་ཀྱི་ས་བོན་མ་སྤངས་པས། བསྟན་རྩ་དགེ་སློང་ཉིད་ཡིན་ན། །དགེ་སློང་ཉིད་ཀྱང་དཀའ་བར་གནས། །ཞེས་སྤྱོད་འཇུག་གི་གཞུང་འདི་ལ་སྦྱར་ནས་འཆད་པ་ནི་མཁས་པའི་མདུན་སར་རྣ་བའི་ཡུལ་དུ་འགྲོ་བའི་གཏམ་མ་ཡིན་ནོ། །དེ་སོགས་ནོར་བ་དཔག་ཏུ་མེད་པ་སྣང་མོད་ཀྱང་། ཐེག་མཆོག་གནད་ཀྱི་ཟླ་ཟེར་དུ་ཡང་ཅུང་ཟད་བཤད་ཟིན་ཞིང་། རྒྱས་པར་ངག་ལས་རྟོགས་པར་བྱའོ། །གཉིས་པ་སྐབས་དོན་ཐེག་དམན་གྱི་རྟོགས་རིགས་སུ་འགྱུར་བའི་གཞི་ཤེས་ལ་གསུམ་སྟེ། རྒྱུ་སྦྱོར་བ། འབྲས་བུ་མཐོང་ལམ། སྒོམ་ལམ་མི་སྟོན་པའི་རྒྱུ་མཚན་ནོ། །དང་པོ་ལ། སྦྱོར་བའི་དབྱེ་བ་དང་། སྦྱོར་བའི་མཉམ་པ་ཉིད་གཉིས་ལས། དང་པོ་ནི། གཟུགས་སོགས་དེ་མི་རྟག་སོགས་དང་། །ཞེས་སོགས་ཏེ། ཚུ་རོལ་ཕ་རོལ་མཐའ་ལ་མིན། །ཞེས་པ་ནས། ཇི་སྐད་བཤད་པ་འདིར་ཤེས་བྱ། །ཞེས་པའི་བར་གྱིས་བྱང་སེམས་ཀྱི་གཞི་ཤེས་ལ་ཐེག་ཆེན་གྱི་རྟོགས་རིགས་དང་། ཐེག་དམན་གྱི་རྟོགས་རིགས་གཉིས་ལས། དང་པོའི་དབང་དུ་བྱས་པའི་སྤང་གཉེན་གྱི་རིམ་པ་བསྟན་པ་ཡིན་ལ། དེ་ལ་ཡང་མཉམ་རྗེས་གཉིས་ལས། མཉམ་གཞག་གི་དབང་དུ་བྱས་པའི་སྤང་གཉེན་གྱི་རིམ་པ་སྐབས་གཉིས་པར་བསྟན་ཟིན་ནས། རྗེས་ཐོབ་ཀྱི་དབང་དུ་བྱས་པའི་སྤང་གཉེན་གྱི་རིམ་པ་བསྟན་པ་ཡིན་ཏེ། མཉམ་གཞག་གི་དབང་དུ་བྱས་པའི་སྤང་གཉེན་གྱི་རིམ་པ་དེ་ཡོད་པར་མཚུངས་ཀྱང་། རྗེས་ཐོབ་ཀྱི་དབང་དུ་བྱས་པའི་སྤང་གཉེན་གྱི་རིམ་པ་དེ་ཤེས་པ་དང་། མ་ཤེས་པའི་བྱེ་བྲག་གིས་རྣམ་མཁྱེན་ལ་ཉེ་བ་དང་རིང་བར་བསྟན་པའི་ཕྱིར། འོ་ན་ཐེག་ཆེན་གྱི་རྟོགས་རིགས་སུ་འགྱུར་བའི་གཞི་ཤེས་མཉམ་གཞག་ཏུ་སྐྱེས་པ་དེ་རྗེས་ཐོབ་ཏུ་མཚན་འཛིན་བཀག་པའི་སྒོ་ནས་ཉམས་སུ་ལེན་དགོས་ན་ཐེག་དམན་གྱི་རྟོགས་རིགས་སུ་གྱུར་པའི་བྱང་སེམས་ཀྱི་གཞི་ཤེས་ལ་ཡང་དེ་ལྟར་དུ་མཚུངས་སམ་ཞེ་ན། དེ་ནི་མི་མཚུངས་ཏེ། དེ་སྦྱོར་ལམ་གྱི་གནས་སྐབས་སུ་ཞེན་སྤྱོད་བཀག་པའི་སྒོ་ནས་རྒྱུན་ལྡན་དུ་བསྒོམས་པས་དེའི་འབྲས་བུ་མཐོང་ལམ་གྱི་གནས་སྐབས་སུ་མངོན་སུམ་དུ་ཤེས་པ་ཙམ་ཡིན་གྱི་དེ་ཕྱིན་ཆད་དུ་རྒྱུན་ལྡན་དུ་བསྒོམས་པ་མེད་པའི་ཕྱིར་རོ། །འོ་ན་སངས་རྒྱས་ཡེ་ཤེས་ཞབས་ཀྱིས་ཐམས་ཅད་ཤེས་པ་ཉིད་ནི་ས་བདུན་པ་ལ་བཞག་གོ །ཞེས་གཞི་ཤེས་ཀྱི་སྦྱོར་བ་ས་བདུན་པའི་བར་དུ་རྗེས་སུ་འགྲོ་བར་གསུངས་པ་དང་འགལ་ལོ་སྙམ་ན་སྐྱོན་མེད་དེ། བྱང་སེམས་ཀྱི་སྦྱོར་ལམ་གྱི་གནས་སྐབས་སུ་མངོན་ཞེན་བཀག་པའི་སྒོ་ནས་མི་རྟག་ལ་སོགས་བཅུ་དྲུག་བསྒོམ་དགོས་ལ། མ་དག་ས་བདུན་གྱི་རྗེས་ཐོབ་ཏུ་མི་རྟག་ལ་སོགས་བཅུ་དྲུག་ལ་མངོན་ཞེན་སྐྱེས་པའི་ཚེ་མངོན་ཞེན་བཀག་དགོས་པས་གཞི་ཤེས་ཀྱི་སྦྱོར་བ་གཞག་པ་ཡིན་གྱི། མངོན་ཞེན་བཀག་པའི་སྒོ་ནས་མི་རྟག་ལ་སོགས་བཅུ་དྲུག་བསྒོམ་མི་དགོས་པའི་ཕྱིར་རོ། །དེ་ལྟ་བུའི་སྦྱོར་བའི་དབྱེ་བ་ལ་འཕགས་སེང་གཉིས་ཀྱིས་སྦྱོར་བ་བཅུར་བྱས་ནས། ཞེན་སྤྱོད་བཀག་པའི་སྦྱོར་བ་བཅུ་ཆར་ལ་སྦྱར་བར་བཞེད་ཅིང་། དེའི་དོན་སྔ་རབས་པ་རྣམས་ཀྱིས་དང་པོ་བཞི་རང་བཞིན་གྱི་སྦྱོར་བ་དང་། ཕྱི་མ་དྲུག་གནས་སྐབས་ཀྱི་སྦྱོར་བར་བཞེད་ཀྱང་ཤེས་བྱེད་མ་མཐོང་ངོ་། །དེས་ན་དང་པོ་བཞི་སོགས་སུ་བཅད་ནས་ཞེན་སྤྱོད་བཀག་པར་རྩ་བར་གསུངས་པའི་དོན་ནི་བདེན་བཞིའི་སྟེང་གི་ཁྱད་ཆོས་ལ་ཞེན་སྤྱོད་བཀག་པས་ན། ཉན་ཐོས་ཀྱི་རྟོགས་རིགས་ལ་ཞེན་སྤྱོད་བཀག་པར་མངོན་ཏེ། གཟུགས་སོགས་ཞེས་པས་བདེན་པ་བཞི་བསྟན། དེ་མི་རྟག་སོགས་ཞེས་པས་སྡུག་བསྔལ་བདེན་པའི་ཁྱད་ཆོས་བསྟན། དེ་མ་རྫོགས་དང་། ཞེས་པས་ཀུན་འབྱུང་བདེན་པའི་ཁྱད་ཆོས་བསྟན། རབ་རྫོགས་དང་། ཞེས་པས་འགོག་བདེན་གྱི་ཁྱད་ཆོས་དང་། དེ་ལ་ཆགས་པ་མེད་ཉིད་དང་། །ཞེས་པས་ལམ་བདེན་གྱི་ཁྱད་ཆོས་སྟོན། དེ་དག་ལ་ཞེན་སྤྱོད་བཀག་ནས་བསྒོམས་པའི་འབྲས་བུ་ལ་མཐོང་ལམ་གྱི་གནས་སྐབས་སུ་བདེན་བཞིའི་སྟེང་གི་རྟག་མི་རྟག་སོགས་ཀྱི་སྤྲོས་པ་སོ་གཉིས་དང་བྲལ་བའི་ཆོས་དབྱིངས་མངོན་སུམ་དུ་མཐོང་བ་འབྱུང་བའི་ཕྱིར་རོ། །ཕྱི་མ་དྲུག་གིས་རང་རྒྱལ་གྱི་རྟོགས་རིགས་ལ་ཞེན་སྤྱོད་བཀག་པ་སྟོན་ཏེ། དང་པོ་ལྔས་ནི། ཀུན་ནས་ཉོན་མོངས་ཀྱི་གཟུང་བ་སོགས་རང་བཞིན་མེད་པར་རྟོགས་པ་སོགས་བསྟན་ཞིང་། སྣང་བ་རྣམ་བདུན་གྱིས་ནི་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་པ་བསྟན་པའི་ཕྱིར་ཏེ། དེ་ཉིད་ཀྱི་མཇུག་ཏུ། ཉིར་སྣང་དུ། ཐམས་ཅད་ཤེས་པ་ཉིད་ལ་ཉན་ཐོས་ལ་སོགས་པའི་དབང་དུ་བྱས་ནས་དཔེའི་དོན་འཐད་པར་བྱས་པས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །སློབ་དཔོན་བུདྡྷ་ཤྲཱི། གསེར་གླིང་པ་རྣམས་ཀྱིས་མ་རྫོགས་པས་ཀུན་བཏགས་དང་། རྫོགས་པས་ཡོངས་གྲུབ་བསྟན་ཅིང་། གཞན་དབང་ཤུགས་ལ་བསྟན་པར་བཞེད་དོ། །འགྲེལ་ཆེན་དུ། མཚན་ཉིད་ཀྱིས་སྟོང་པའི་ཕྱིར་བཏགས་པའི་གཟུགས་ནི་ཡོངས་སུ་མ་རྫོགས་པའོ། །ཡོན་ཏན་གྱི་ཚོགས་དང་ལྡན་པའི་ཕྱིར་ཆོས་ཉིད་ཀྱི་གཟུགས་ནི་རབ་ཏུ་རྫོགས་པའོ། །ཞེས་དང་། ཤེར་སྒྲོན་དུ་མ་རྫོགས་པ་དང་རྫོགས་པའི་གཟུགས་ཀུན་བཏགས་པ་དང་། ཡོངས་སུ་གྲུབ་པ་ལ་སྤྱོད་པ་བཀག་པའི་སྒོ་ནས་མི་དམིགས་པའི་ཚུལ་གྱིས་ཉེ་བར་སྦྱོར་ཞེས་དང་། རྟོགས་དཀའི་སྣང་བར། མཚན་ཉིད་ཀྱི་སྟོང་པ་ཉིད་དུ་བཏགས་པའི་ཕྱིར་དང་། ཡོན་ཏན་གྱི་ཚོགས་དང་ལྡན་པ་ཉིད་དང་། ཆོས་ཉིད་ཀྱི་ངོ་བོ་ཉིད་ཡིན་པས་སོ་སོར་མ་རྫོགས་པ་དང་རྫོགས་པ་ཉིད་དེ། གཟུགས་ལ་སོགས་པ་མ་ཚང་བ་དང་། ཚང་བ་ཉིད་དོ། །ཞེས་སོ། །གཉལ་པས། མ་རྫོགས་པ་བྱིས་པའི་ཕུང་པོ་ལྔ་དང་། རྫོགས་པ་རྒན་པོའི་ཕུང་པོ་ལྔ་ལ་འཆད་ཅིང་ཀུན་བཏགས་སོགས་སེམས་ཙམ་པའི་ལུགས་ཡིན་པས་དེ་འདིར་འཆད་པ་མི་འཐད་ཅེས་དང་། གཟད་པས། མ་རྫོགས་པ་སྟེ་མ་སྨིན་པ། རྫོགས་པ་སྟེ་སྨིན་པ་ལ་འཆད། ཁ་ཅིག ཚོགས་རྫོགས་མ་རྫོགས་ལ་འཆད་དོ། །འབྲེ་ཨར་དང་། གཡག་རོང་གཉིས་སློབ་དཔོན་གྱི་བཞེད་པ་ལྟར་མཛད་པས་དེ་དག་གི་ལྟར་ན། འདིར་མཚན་ཉིད་གསུམ་གྱི་རྣམ་གཞག་ལ་དཔྱད་པ་ལ། སྤྱིར་གྲུབ་མཐའ་སྨྲ་བ་བཞི་པོ་རེ་རེ་ལ་ཡང་གནས་ལུགས་འབྱེད་པ་དང་། གསུང་རབ་འཆད་པའི་སྒོ་ཐུན་མོང་མ་ཡིན་པ་རེ་རེ་ཡོད་དེ། བྱེ་བྲག་ཏུ་སྨྲ་བས་ནི་ཤེས་བྱ་གཞི་ལྔ་དང་། མདོ་སྡེ་པས་ནི་རང་སྤྱི་གཉིས་དང་། སེམས་ཙམ་པས་ནི་མཚན་ཉིད་གསུམ་དང་། དབུ་མ་པས་ནི་བདེན་པ་གཉིས་ལ་གནས་ལུགས་འབྱེད་པ་དང་། གསུང་རབ་འཆད་པའི་སྒོ་ཐུན་མོང་མ་ཡིན་པར་མཛད་པའི་ཕྱིར་རོ། །དེས་ན་མཚན་ཉིད་གསུམ་གྱི་རྣམ་གཞག་འདི་སེམས་ཙམ་པའི་ལུགས་བཞིན་དུ་འཆད་པ་ལ་དོན་གསུམ་སྟེ། ངོ་བོ་ངོས་གཟུང་བ། དེས་གནས་ལུགས་ཇི་ལྟར་འབྱེད་པའི་ཚུལ། གསུང་རབ་ཇི་ལྟར་འགྲེལ་བའི་ཚུལ་ལོ། །དང་པོ་ལ་ཀུན་བཏགས་ནི། དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་མཚན་མ་ལ་གཟུགས་ཀྱི་ཕུང་པོ་ཞེས་ངོ་བོ་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་གཞག་པ་དང་། གཟུགས་ཀྱི་ཕུང་པོ་སྐྱེ་བ་ཞེའམ། འགག་པ་ཞེའམ། གཟུགས་ཀྱི་ཕུང་པོ་སྤངས་པ་དང་། ཡོངས་སུ་ཤེས་པ་ཞེས་ངོ་བོ་ཉིད་ཀྱི་མཚན་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་བཞག་པ་གང་ལགས་པ་དེ་ནི་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་ལགས་ཏེ། ཞེས་གསུངས་སོ། །དེ་ལ་འདུ་བྱེད་ཀྱི་མཚན་མ་ཞེས་པ་ཡན་ཆད་ཀྱིས་ཀུན་བཏགས་འདོགས་པའི་གཞིར་གྱུར་པའི་གཞན་དབང་སྟོན་ཏེ། འོག་མ་གཉིས་པོ་ལ་ཡང་དེ་བཞིན་དུ་ཤེས་པར་བྱའོ། །རྣམ་པར་རྟོག་པའི་སྤྱོད་ཡུལ་ཞེས་པ་ནི་ཀུན་བཏགས་ཀྱི་ཁྱད་ཆོས་ཡིན་ལ། དེའི་གནས་འདུ་བྱེད་ཀྱི་མཚན་མ་ནི་གཞན་དབང་ངོ་། །གཟུགས་ཀྱི་ཕུང་པོ་ཞེས་པ་མན་ཆད་ཀྱིས་གཞན་དབང་དེ་ལ་ཀུན་བཏགས་ཇི་ལྟར་འདོགས་པའི་ཚུལ་བསྟན་ཏེ། ངོ་བོ་དང་ཁྱད་པར་གྱི་མཚན་ཉིད་རྣམ་པར་རྟོག་པས་སྒྲོ་བཏགས་ཏེ། འཇིག་རྟེན་གྱི་ཐ་སྙད་དུ་བྱེད་པ་རྣམས་སོ། །གཞན་དབང་ནི་དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་གང་ལགས་པ་དེ་ནི་གཞན་གྱི་དབང་གི་མཚན་ཉིད་ལགས་ཏེ། ཞེས་གསུངས་ལ། འདུ་བྱེད་ཀྱི་མཚན་མ་ཞེས་པའི་དོན་ནི་རྒྱུ་དང་རྐྱེན་ལས་སྐྱེས་པ་ལ་འཇོག་ལ། རྣམ་པར་རྟོག་པའི་སྤྱོད་ཡུལ་ནི་ཀུན་བཏགས་ཀྱི་ཁྱད་ཆོས་སུ་འགྲོ་བ་ཡང་སྔར་བཞིན་ནོ། །ཡོངས་གྲུབ་ནི་དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད་ཀུན་བཏགས་པའི་མཚན་ཉིད་དེར་ཡོངས་སུ་མ་གྲུབ་ཅིང་། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཏེ། ཞེས་གསུངས་ལ། དེའི་དོན་ནི་གཞན་དབང་གི་སྟེང་དུ་ཀུན་བཏགས་ཁོ་ནས་སྟོང་པའི་ཆ་ནས་སྟོང་ཉིད་དུ་བཞག་པ། རང་གི་ངོ་བོ་ཆོས་ལ་བདག་མེད་པ་དེ་བཞིན་ཉིད་དང་། ཡང་དག་མཐའ་ལ་སོགས་པ་མིང་གི་རྣམ་གྲངས་ལྔ་དང་ལྡན་པ་གང་ལ་དམིགས་ནས་བསྒོམས་ན་སྒྲིབ་པ་རྣམ་པར་དག་པར་འགྱུར་བའི་དམིགས་པ་ཆོས་ཀྱི་དབྱིངས་ལ་ཡོངས་གྲུབ་ཏུ་འཇུག་གོ །མདོར་བསྡུ་ན། གཟུང་འཛིན་གཉིས་སུ་སྣང་བ་སྐྱེ་བའི་གཞིར་གྱུར་པ་རྒྱུ་རྐྱེན་གཞན་ལས་སྐྱེས་པའི་ཤེས་པ་འཁོར་བ་ཐོག་མ་མེད་པ་ནས་སངས་རྒྱས་ཀྱི་སའི་བར་དུ་རྒྱུན་མ་ཆད་པ་ཞིག་ལ་གཞན་དབང་དུ་འཇོག་ཅིང་། དེ་ཉིད་བག་ཆགས་ཀྱི་དབང་གིས་གང་ཟག་དང་། གཟུང་འཛིན་གཉིས་སུ་སྣང་བ་སྐྱེ་བའི་ཚེ་ན་དེ་ལྟར་སྣང་བའི་ཤེས་པ་དེའི་ཡུལ་གང་ཟག་དང་གཟུང་འཛིན་གཉིས་ལ་ཀུན་བཏགས་སུ་འཇོག་གོ །དེས་ན་རྣམ་པར་རྟོག་པའི་སྤྱོད་ཡུལ་ཞེས་གསུངས་པའི་རྣམ་རྟོག་ནི་ཡང་དག་པ་མ་ཡིན་པའི་ཀུན་ཏུ་རྟོག་པ་ཙམ་མོ། །གཞན་དབང་དེ་ཉིད་འཁྲུལ་པའི་སྣང་བ་དང་བཅས་པའི་ཚེ་ན་མ་དག་པ་གཞན་དབང་དང་། འཁྲུལ་པའི་སྣང་བ་རེ་ཞིག་འགག་པ་འཕགས་པ་སློབ་པའི་མཉམ་གཞག་དང་། གཏན་ནས་འགག་པ་སངས་རྒྱས་ཀྱི་སར་དག་པ་གཞན་དབང་དུ་འཇོག་ཅིང་། ཕྱི་མ་འདི་ལ་ཡོངས་གྲུབ་གཉིས་སུ་ཕྱེ་བའི་ཚེ་ཕྱིན་ཅི་མ་ལོག་པའི་ཡོངས་གྲུབ་དང་། དོན་དམ་གསུམ་དུ་ཕྱེ་བའི་ཚེ་སྒྲུབ་པ་དོན་དམ་དུ་གཞག་པ་ཡོད་མོད་ཀྱི་ཡོངས་གྲུབ་ཀྱི་ཡུལ་ཅན་དང་། དོན་དམ་གྱི་ཡུལ་ཅན་ལ་དགོངས་ནས་དེར་གཞག་པ་ཡིན་གྱི་ཡོངས་གྲུབ་དང་། དོན་དམ་བདེན་པ་མཚན་ཉིད་པ་ནི་མ་ཡིན་ཏེ། དེ་ཡིན་ན། འདུས་མ་བྱས་ཡིན་དགོས་པ་ལས། འདི་ནི་འདུས་བྱས་ཡིན་པའི་ཕྱིར་རོ། །ཇི་སྐད་དུ། དགོངས་འགྲེལ་ལས། ཇི་ལྟར་འཕགས་པའི་ལམ་ཡན་ལག་བརྒྱད་པ་ཕན་ཚུན་མཚན་ཉིད་ཐ་དད་པ་ཡིན་པ་དེ་བཞིན་དུ་གལ་ཏེ་ཆོས་དེ་དག་གི་དེ་བཞིན་ཉིད་དོན་དམ་པ་ཆོས་བདག་མེད་པ་ཡང་མཚན་ཉིད་ཐ་དད་པ་ཡིན་པར་གྱུར་ན་ནི། དེས་ན་དེ་བཞིན་ཉིད་དོན་དམ་པ་ཆོས་ལ་བདག་མེད་པ་ཡང་རྒྱུ་དང་བཅས་པ་ཡིན་པར་འགྱུར་རོ། །རྒྱུ་ལས་བྱུང་བ་ཉིད་ཡིན་ན་ནི་འདུས་བྱས་ཡིན་པར་འགྱུར་རོ། །འདུས་བྱས་ཡིན་ན་ནི་དོན་དམ་པ་ཡིན་པར་མི་འགྱུར་རོ། །ཞེས་དང་། དབུས་མཐར། དམ་པའི་དོན་ནི་གཅིག་པུའོ། །ཞེས་གསུངས་ཤིང་། དེའི་འགྲེལ་པར་ཡང་། དོན་དམ་པའི་བདེན་པ་ནི་ཡོངས་སུ་གྲུབ་པའི་ངོ་བོ་ཉིད་གཅིག་པུར་རིག་པར་བྱའོ། །ཞེས་དང་། མདོ་སྡེ་རྒྱན་དུ། ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་འབྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམ་པར་དག་གྱུར་དེ་ནི་དོན་དམ་མཚན། །ཞེས་གསུངས་སོ། །འོ་ན་བསྡུ་བར། གཞན་དབང་གི་དབང་དུ་མཛད་ནས་རྫས་དང་། དོན་དམ་པར་གཉིས་ཀར་ཡང་དེ་བཞིན་དུ་ཡོད་པར་རིག་པར་བྱའོ། །ཞེས་དང་། ཡེ་ཤེས་སྙིང་པོ་ཀུན་ལས་བཏུས་པར། གཟུང་དང་འཛིན་པ་ལས་གྲོལ་བའི། །རྣམ་ཤེས་དམ་པའི་དོན་དུ་ཡོད། །བློ་མཚོའི་ཕ་རོལ་ཕྱིན་པ་ཡི། །རྣལ་འབྱོར་སྤྱོད་པའི་གཞུང་དུ་གྲགས། །ཞེས་གཞན་དབང་དོན་དམ་དུ་ཡོད་པར་བཤད་པ་དང་འགལ་ལོ་ཞེ་ན། ཉན་ཐོས་སྡེ་གཉིས་ཀྱི་ལུགས་ལ་དོན་དམ་དུ་ཡོད་ན། དོན་དམ་བདེན་པ་ཡིན་པས་ཁྱབ་ཀྱང་། རྣལ་འབྱོར་སྤྱོད་པའི་ལུགས་ལ་རང་གི་མཚན་ཉིད་ཀྱིས་གྲུབ་པ་ལ་དོན་དམ་པར་བྱས་པ་དང་། རྣམ་པར་དག་པའི་དམིགས་པ་ལ་དོན་དམ་པར་བྱས་པ་གཉིས་ལས། སྔ་མ་ལ་དོན་དམ་བདེན་པས་མ་ཁྱབ་པས་སྐྱོན་མེད་དོ། །དེ་ལྟར་ན་གཞན་དབང་ཡིན་ན། ཀུན་རྫོབ་བདེན་པ་ཡིན་པས་ཁྱབ་སྟེ། དོན་དམ་བདེན་པ་ལ་མཚན་ཉིད་ལྔ་ལྡན་དུ། དགོངས་འགྲེལ་དང་། མདོ་སྡེ་རྒྱན་དུ་བཤད་ཅིང་། གཞན་དབང་དེ་གཞན་དབང་དང་གཅིག་ཡིན་པས་དེ་བཞིན་ཉིད་མ་ཡིན་ཞེས་པའི་ཁྱད་ཆོས་ཀྱང་མི་གྲུབ་པའི་ཕྱིར་དང་། སྐྱེ་དང་། འཇིག་མེད་དང་། འཕེལ་འགྲིབ་མེད་པའི་མཚན་ཉིད་ཀྱང་མ་གྲུབ་པའི་ཕྱིར་རོ། །འོ་ན་དབུས་མཐར། རྣམ་དག་སྤྱོད་ཡུལ་རྣམ་གཉིས་ཏེ། །གཅིག་པུ་ཁོ་ནར་བརྗོད་པ་ཡིན། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། རྣམ་པར་དག་པའི་ཡེ་ཤེས་གཉིས་སུ་བྱས་ནས། རྗེས་ཐོབ་དག་པ་འཇིག་རྟེན་པའི་སྤྱོད་ཡུལ་ལ་ཡོངས་གྲུབ་ཏུ་གཞག་པ་ནི། ཕྱིན་ཅི་མ་ལོག་པའི་ཡོངས་གྲུབ་ཀྱི་དབང་དུ་བྱས་པའི་ཕྱིར་རོ། །མཚན་ཉིད་གསུམ་གྱི་དཔེ་ལ་དགོངས་འགྲེལ་དུ་དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན་ནམ་མཁའི་མེ་ཏོག་ཅི་ལྟ་བ་དེ་ལྟ་བུར་ནི་མཚན་ཉིད་ངོ་བོ་ཉིད་མེད་པར་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན། སྒྱུ་མ་བྱས་པ་ཇི་ལྟ་བ་དེ་ལྟ་བུར་ནི་སྐྱེ་བ་ངོ་བོ་ཉིད་མེད་པ་ཉིད་བལྟ་བར་བྱའོ། །དོན་དམ་པ་ངོ་བོ་ཉིད་མེད་པ་ཉིད་དེ་ལས་ཀྱང་གཅིག་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན། ནམ་མཁའ་ནི་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་། ཐམས་ཅད་དུ་སོང་བ་ཇི་ལྟ་བ་དེ་ལྟ་བུར་ནི་དོན་དམ་པ་ངོ་བོ་ཉིད་མེད་པ་དེ་ལས་ཆོས་བདག་མེད་པས་རབ་ཏུ་ཕྱེ་བ་དང་། ཐམས་ཅད་དུ་སོང་བ་གཅིག་བལྟ་བར་བྱ་སྟེ། ཞེས་གསུང་ལ། ཀུན་བཏགས་ལ་ནམ་མཁའི་མེ་ཏོག་དཔེར་བྱས་པ་ནི་ཐ་སྙད་དུ་མེད་པའི་དཔེར་མ་ཡིན་གྱི་རང་གི་མཚན་ཉིད་ཀྱིས་མ་གྲུབ་པའི་དཔེའོ། །གཞན་དབང་ལ་སྒྱུ་མ་བྱས་པ་དཔེར་བྱས་པ་ནི། སྒྱུ་མའི་སྤྲུལ་གཞི་རྟ་གླང་དུ་མེད་ཀྱང་རྟ་གླང་དུ་སྣང་བ་ལྟར་གཞན་དབང་ཡང་གཟུང་འཛིན་གཉིས་སུ་མེད་ཀྱང་། གཟུང་འཛིན་གཉིས་སུ་སྣང་བའི་དཔེའོ། །ཡོངས་གྲུབ་ལ་ནམ་མཁའ་དཔེར་བྱས་པ་ནི་ནམ་མཁའ་ལ་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་། ཐམས་ཅད་དུ་སོང་བའི་ཆོས་གཉིས་ཡོད་པ་ལྟར་ཡོངས་གྲུབ་ཆོས་ཉིད་དེ་ཡང་ཆོས་ལ་བདག་མེད་པས་རབ་ཏུ་ཕྱེ་བ་དང་། ཆོས་ཐམས་ཅད་ལ་སོང་བའི་ཆོས་གཉིས་ཡོད་པའི་ཕྱིར་རོ། །དོན་དམ་པ་ངོ་བོ་ཉིད་མེད་པ་དེ་ལས་ཀྱང་གཅིག་བལྟ་བར་བྱ་སྟེ། ཞེས་པའི་དོན་ནི་ལུགས་འདི་ལ་དོན་དམ་པ་ངོ་བོ་ཉིད་མེད་པ་ལ་གཞན་དབང་དུ་སྦྱར་བ་དང་། ཡོངས་གྲུབ་ལ་སྦྱར་བ་གཉིས་ཡོད་པ་ལས། ཕྱི་མའི་དབང་དུ་བྱས་ཞེས་པའི་དོན་ཏེ་འཆད་པར་འགྱུར་རོ། །མདོ་སྡེ་རྒྱན་དུ། ཇི་ལྟར་སྒྱུ་མ་དེ་བཞིན་དུ། །ཡང་དག་མ་ཡིན་ཀུན་རྟོག་འདོད། །སྒྱུ་མའི་རྣམ་པ་ཇི་ལྟ་བུ། །དེ་བཞིན་གཉིས་སུ་འཁྲུལ་པར་བརྗོད། །ཅེས་སྒྱུ་མའི་སྤྲུལ་གཞི་གཞན་དབང་གི་དཔེ་དང་། སྒྱུ་མའི་རྣམ་པ་ཀུན་བཏགས་ཀྱི་དཔེར་གསུངས་པ་ནི་གཞན་དབང་གཟུང་འཛིན་གཉིས་སུ་འཁྲུལ་པའི་གཞི་དང་། ཀུན་བཏགས་འཁྲུལ་པའི་དབང་གིས་བྱུང་བའི་གཟུང་འཛིན་གཉིས་ལ་འཇོག་པའི་དཔེའོ། །གཉིས་པ་དེས་གནས་ལུགས་ཇི་ལྟར་འབྱེད་པའི་ཚུལ་ལ་གསུམ་སྟེ། བྱང་ས་ནས། བསྡུ་བ་ནས། དབུས་མཐའ་ནས་བཤད་པའི་ཚུལ་ལོ། །དང་པོ་ལ་སྒྲོ་སྐུར་སྤང་ཚུལ་སྤྱིར་བསྟན། སྐུར་འདེབས་སྤང་ཚུལ་བྱེ་བྲག་ཏུ་བཤད། དེས་ན་དབུ་མའི་ལམ་དུ་གྲུབ་པ་དང་གསུམ་ལས། དང་པོ་ནི། བྱང་སར། གཟུགས་ལ་སོགས་པའི་ཆོས་རྣམས་དང་། གཟུགས་ལ་སོགས་པའི་དངོས་པོ་ལ་འདོགས་པའི་ཚིག་གིས་ངོ་བོ་ཉིད་ཀྱིས་རང་གི་མཚན་ཉིད་ཡོད་པ་མ་ཡིན་པ་ལ་སྒྲོ་བཏགས་ནས་མངོན་པར་ཞེན་པ་གང་ཡིན་པ་དང་། བཏགས་པའི་ཚིག་གིས་མཚན་མའི་གཞི་བཏགས་པའི་ཚིག་གི་མཚན་མའི་རྟེན་དུ་གྱུར་པ་བརྗོད་དུ་མེད་པའི་བདག་ཉིད་ཀྱི་དོན་དམ་པར་ཡོད་པ་ཡང་དག་པའི་དངོས་པོ་ལ་ཐམས་ཅད་ཀྱིས་ཐམས་ཅད་དུ་མེད་དོ། །ཞེས་སྐུར་པ་འདེབས་ཤིང་ཆུད་གཟོན་པར་བྱེད་པ་གང་ཡིན་པ་འདི་གཉིས་ནི་ཆོས་འདུལ་བ་འདི་ལ་རབ་ཏུ་ཉམས་པ་ཡིན་པར་རིག་པར་བྱའོ། །ཞེས་གསུངས་སོ། །དེ་ལ་མངོན་པར་ཞེན་པ་གང་ཡིན་པ་ཞེས་པ་ཡན་ཆད་ཀྱིས་སྒྲོ་འདོགས་ཚུལ་བསྟན་ཏེ། གཟུགས་ལ་སོགས་པའི་ཆོས་རྣམས་ལ་ངོ་བོ་དང་ཁྱད་པར་དུ་རྣམ་པར་རྟོག་པས་སྒྲོ་བཏགས་པ་ཀུན་བཏགས་ཡིན་པས་དེ་རང་གི་མཚན་ཉིད་ཀྱིས་ཡོད་པར་འདོད་པ་ནི་སྒྲོ་བཏགས་པའོ། །བཏགས་པའི་ཚིག་གིས་ཞེས་པ་མན་ཆད་ཀྱིས་ནི་སྐུར་བ་འདེབས་ཚུལ་བསྟན་ཏེ། ཀུན་བཏགས་འདོགས་པའི་གཞི་གཞན་དབང་རང་གི་མཚན་ཉིད་ཀྱིས་མ་གྲུབ་པར་འདོད་པ་ནི་སྐུར་པ་འདེབས་པའོ། །ཆུད་གཟོན་པར་བྱེད་པ་གང་ཡིན་པ་ཞེས་པ་མན་ཆད་ཀྱིས་ནི་དངོས་སུ་ཐེག་ཆེན་ལས་ཉམས་པར་བསྟན་ཅིང་ཤུགས་ལ་དེ་ལྟ་བུའི་སྒྲོ་སྐུར་སྤང་དགོས་པ་བསྟན་ཏོ། །གཉིས་པ་ནི། བྱང་སར། གཟུགས་ལ་སོགས་པའི་ཆོས་རྣམས་ཀྱི་དངོས་པོ་ཙམ་ལ་སྐུར་པ་འདེབས་པ་ལ་ནི་དེ་ཁོ་ན་ཡང་མེད་ལ་འདོགས་པ་ཡང་མེད་དེ། དེ་གཉིས་ཀ་ཡང་མི་རིགས་སོ། །འདི་ལྟ་སྟེ་དཔེར་ན། གཟུགས་ལ་སོགས་པའི་ཕུང་པོ་རྣམས་ཡོད་ན་གང་ཟག་གདགས་སུ་རུང་གི་མེད་དུ་ཟིན་ན་ནི་དངོས་པོ་མེད་པ་ལ་གང་ཟག་གདགས་སུ་མེད་དོ། །དེ་བཞིན་དུ་གཟུགས་ལ་སོགས་པའི་ཆོས་རྣམས་ཀྱི་དངོས་པོ་ཙམ་ཡོད་ན། གཟུགས་ལ་སོགས་པའི་ཆོས་འདོགས་པའི་ཚིག་ཉེ་བར་གདགས་སུ་རུང་གི་དངོས་པོ་མེད་པ་ལ་གདགས་པའི་ཚིག་གིས་ཉེ་བར་འདོགས་པ་མེད་དོ། །དེ་ལ་འདོགས་པའི་གཞི་མེད་དུ་ཟིན་ན་ནི་གཞི་མེད་པར་འགྱུར་བས་འདོགས་པ་ཡང་མེད་པར་འགྱུར་རོ། །ཞེས་གསུངས་སོ། །དེའི་དོན་ནི་གཉིས་ཀ་ཡང་མི་རིགས་སོ། །ཞེས་པ་ཡན་ཆད་ཀྱིས་གཞན་དབང་ལ་སྐུར་པ་བཏབ་ན་མཚན་ཉིད་གཞན་གཉིས་འཇོག་ཏུ་མི་རུང་བར་བསྟན། འདི་ལྟ་སྟེ། ཞེས་པ་མན་ཆད་ཀྱིས་ཀུན་བཏགས་མི་རུང་བའི་སྒྲུབ་བྱེད་རྒྱས་པར་བསྟན་ཏོ། །གཟུགས་ལ་སོགས་པའི་ཆོས་ཞེས་པ་ནི་རྣམ་པར་རྟོག་པས་སྒྲོ་བཏགས་པའི་ཀུན་བཏགས་ཡིན་ལ། དངོས་པོ་ཙམ་ཞེས་པ་ནི་དེའི་བཞི་གཞན་དབང་ངོ་། །གསུམ་པ་ནི། བྱང་སར། དངོས་པོ་སྔ་མ་གང་ཡིན་པ་དང་། དངོས་པོ་མེད་པ་འདི་གཉིས་ཀྱི་ཡོད་པ་དང་། མེད་པ་ལས་རྣམ་པར་གྲོལ་བའི་ཆོས་ཀྱི་མཚན་ཉིད་ཀྱིས་བསྡུས་པའི་དངོས་པོ་དེ་ནི་གཉིས་སུ་མེད་པ་ཡིན་ནོ། །གཉིས་སུ་མེད་པ་གང་ཡིན་པ་དེ་ནི་དབུ་མའི་ལམ་མཐའ་གཉིས་སྤངས་པ་བླ་ན་མེད་པ་ཞེས་བྱ་སྟེ། ཞེས་གསུངས་སོ། །དེ་ལ་དངོས་པོ་སྔ་མ་ནི་གཞན་དབང་དང་། དངོས་པོ་མེད་པ་ནི་ཀུན་བཏགས་ཡིན་ལ། ཀུན་བཏགས་ཡོད་པ་དང་གཞན་དབང་མེད་པ་ལས་རྣམ་པར་གྲོལ་བའི་ཆོས་ཀྱིས་བསྡུས་པའི་དངོས་པོ་ནི་གཟུང་འཛིན་གཉིས་སུ་མེད་པའི་ཡོངས་གྲུབ་ཡིན་པས། དེ་ཉིད་ལ་མཐའ་གཉིས་སྤངས་པའི་དབུ་མར་འཇོག་ཅེས་པའི་དོན་ནོ། །དེས་ན་ལུགས་འདི་ལ་འདུས་མ་བྱས་དང་དངོས་པོ་མི་འགལ་ཏེ། འདིར་ཡང་དངོས་པོ་དེ་ནི་གཉིས་སུ་མེད་པ་ཡིན་ནོ། །ཞེས་དང་། དབུས་མཐར། གཉིས་དངོས་མེད་པའི་དངོས་མེད་པའི། །དངོས་པོ་སྟོང་པའི་མཚན་ཉིད་དོ། །ཞེས་དང་། ཀུན་བཏུས་སུ་འདུས་མ་བྱས་ཀྱི་དངོས་པོ་བརྒྱད་གསུངས་པ་དང་། འཕགས་མཆོག་ཀླུ་སྒྲུབ་ཀྱིས་སེམས་ཙམ་པའི་ལུགས་ཀྱི་ཡོངས་གྲུབ་ཀྱི་དབང་དུ་མཛད་ནས། ཡང་དག་རྫས་དངོས་རྟག་པ་ལགས། །ཞེས་གསུངས་པའི་ཕྱིར་རོ། །འདུས་མ་བྱས་དང་དངོས་པོའི་གཞི་མཐུན་མེད་པ་ནི། དངོས་སྨྲ་བ་གསུམ་ལས། མདོ་སྡེ་པ་ཁོ་ནའི་ལུགས་ཡིན་གྱི་བྱེ་བྲག་ཏུ་སྨྲ་བ་དང་། སེམས་ཙམ་པ་གཉིས་ཀྱི་ལུགས་ལ་དེ་གཉིས་ཀྱི་གཞི་མཐུན་ཡོད་པར་རྗེ་བཙུན་གྲགས་པ་རྒྱལ་མཚན་གྱིས་གསུངས་པ་འདི་ཉིད་གསུང་རབ་ཀྱི་གནད་དུ་སྣང་ངོ་། །གཉིས་པ་བསྡུ་བ་ལས་གསུངས་པའི་ཚུལ་ལ་སྒྲ