ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ཇ༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་རྟོགས་རྒྱན་གྱི་གཞུང་སྔ་ཕྱིའི་འབྲེལ་དང་དཀའ་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད།

སྤྱིར་བྱམས་པ་དང་འབྲེལ་བའི་ཆོས་སྡེ་ཉི་ཤུའི་རྣམ་བཞག་སོགས།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་རྟོགས་རྒྱན་གྱི་གཞུང་སྔ་ཕྱིའི་འབྲེལ་དང་དཀའ་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་བཞུགས་སོ།། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །ཡེ་ཤེས་ཕུན་ཚོགས་དག་པ་གཉིས་དང་རྣམ་དབྱེར་མེད་པའི་ཆོས་སྐུ་ནམ་མཁའི་དབྱིངས། །གང་གིས་བརྙེས་ཚེ་གདུལ་བྱ་མཆོག་གི་གཟའ་སྐར་དབུས་ན་ལོངས་སྐུའི་དཀྱིལ་འཁོར་རྒྱས། །རྨད་བྱུང་སྐུ་དེའི་གཟུགས་བརྙན་རིགས་ཅན་གསུམ་གྱི་སེམས་རྒྱུད་དག་པའི་ཆུ་ནང་དུ། །རྣམ་པར་འཆར་བའི་ཆ་ཙམ་ཆོས་ཀྱིས་མཐོ་བའི་ཁང་བཟང་དབུས་བཞུགས་དེ་ལ་འདུད། །ཚེ་འདིར་མགོན་པོ་གང་གི་གསུང་རབ་སྦས་དོན་ཟབ་མོའི་གཏེར་གྱི་ཁ་འབྱེད་ཅིང་། །ཚེ་འདིའི་སྣང་བ་ནུབ་ཚེ་ཆོས་ཀྱིས་མཐོ་བའི་ཁང་བཟང་མཆོག་དེའི་སྒོ་འབྱེད་ཕྱིར། །ཆོས་ཀྱི་རྗེས་འབྲང་བློ་གྲོས་མིག་གིས་མཐོང་བའི་ལེགས་བཤད་གནད་ཀྱི་ལྡེ་མིག་འདི། །སྐལ་བཟང་བློ་གསལ་དོན་གཉེར་རྣམས་ལ་འབུལ་ལོ་སྔར་བཤད་དོན་གཉིས་གྲུབ་པར་མཛོད།། །།ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཏེ། ཇི་སྐད་དུ་མདོ་སྡུད་པར། རྒྱལ་བ་འདས་དང་མ་བྱོན་ཕྱོགས་བཅུར་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་དང་། མགོན་པོ་ཀླུ་སྒྲུབ་ཀྱིས། གང་སླད་སངས་རྒྱས་འཇིག་རྟེན་གཙོ། །ཐུགས་རྗེ་ཅན་རྣམས་ཁྱོད་ཀྱི་སྲས། །དེ་ཡི་སླད་དུ་དགེ་མ་ཁྱོད། །སེམས་ཅན་ཀུན་གྱི་ཕྱི་མོ་ལགས། །ཞེས་གསུངས་པའི་ཕྱིར་རོ། །རིགས་ཅན་གསུམ་གྱིས་བྱང་ཆུབ་གསུམ་ཐོབ་པའི་རྒྱུ་ཡང་ཡིན་ཏེ། ཇི་སྐད་དུ། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཚུ་རོལ་ཕ་རོལ་འགྲོ་དོགས་མི་མཐོང་བཞིན། །ཞེས་དང་། མགོན་པོ་ཀླུ་སྒྲུབ་ཀྱིས། སངས་རྒྱས་རང་སངས་རྒྱས་རྣམས་དང་། །ཉན་ཐོས་རྣམས་ཀྱིས་ངེས་བསྟེན་མ། །ཁྱོད་ཉིད་གཅིག་པུ་ཐར་པའི་ལམ། །དེ་ལྟར་གཞན་དག་མེད་པར་ངེས། །ཞེས་གསུངས་པའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་རང་གི་ངོ་བོ་སྨྲ་བསམ་བརྗོད་པའི་ཡུལ་ལས་འདས་པས་བློས་ཡུལ་དུ་བྱས་པའི་སྒོ་ནས་བསམ་དུ་མེད་ཅིང་། བརྗོད་པ་ཚིག་གིས་ཇི་ལྟ་བ་བཞིན་དུ་བརྗོད་དུ་ཡང་མེད་དེ། མདོར། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཁོངས་སུ་གནས་པར་བྱ། །ཞེས་དང་། རྒྱལ་བ་མ་ཕམ་པས། གང་ཞིག་ཡོད་མིན་མེད་མིན་ཡོད་མེད་མ་ཡིན་ཡོད་མེད་གཞན་དུའང་། །བརྟག་པར་མི་ནུས་ངེས་ཚིག་དང་བྲལ་སོ་སོར་རང་གིས་རིག་ཞི་བ། །ཞེས་དང་། མགོན་པོ་ཀླུ་སྒྲུབ་ཀྱིས། འདིར་ཁྱོད་བསྟོད་པར་སུས་རྔོ་ཐོགས། །མཚན་མ་མེད་ཅིང་ཡི་གེ་མེད། །ངག་གི་ཡུལ་ཀུན་ལས་འདས་མ། །གང་ཁྱོད་འགར་ཡང་བསྟན་མི་མངའ། །ཞེས་དང་། བྱང་ཆུབ་སེམས་དཔའ་ཞི་བ་འཚོས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་གསུངས་པའི་ཕྱིར་རོ། །རང་གི་ངོ་བོ་དེ་ལྟར་ཡིན་ཀྱང་གདུལ་བྱས་རྟོགས་པའི་དོན་དུ་ཐ་སྙད་དུ་རྗེས་སུ་མཐུན་པ། བློའི་ཡུལ་དུ་བྱས་པའི་སྒོ་ནས་བསམ་དུ་ཡོད་ཅིང་བརྗོད་པ་ཚིག་གིས་བསྟན་དུ་ཡང་ཡོད་དེ། ཇི་སྐད་དུ། སློབ་མ་བཟང་པོ་བླ་མ་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །ཞེས་དང་། བྱང་ཆུབ་ཕུང་པོར་ཞེན་ནས་མཆོག་འཛིན་མ་བྱེད་ཅེས། །དང་པོའི་ལས་ཅན་དེ་ལ་དེ་སྐད་བསྟེན་པར་བྱ། །ཞེས་དང་། རྒྱལ་བ་མ་ཕམ་པས། བློ་ལྡན་རྒྱལ་བའི་ཡུལ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །ཅེས་དང་། མགོན་པོ་ཀླུ་སྒྲུབ་ཀྱིས། གང་གིས་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་ནི་སྟོན་མཛད་པ། །གོ་ཏཾ་དེ་ལ་ཕྱག་འཚལ་ལོ། །ཞེས་གསུངས་པའི་ཕྱིར། དེས་ན་བརྗོད་པ་དང་བྲལ་བའི་ཤེར་ཕྱིན། སོ་སོ་རང་གིས་རིག་པའི་ཡེ་ཤེས་ཀྱིས་མངོན་དུ་བྱ་བའི་ཆེད་དུ་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱ་རྣམས་ལ་ཐ་སྙད་དུ་ཚིག་གི་སྒོ་ནས་རྗེས་སུ་མཐུན་པ་བསྟན་པའི་ཚུལ་ལ། ཤེར་ཕྱིན་སྟོང་ཕྲག་བརྒྱ་པ་ལ་སོགས་པ་དུ་མ་གསུངས་པའི་སྦས་དོན་མངོན་པར་རྟོགས་པའི་རིམ་པ་གཏན་ལ་འབེབས་པར་བྱེད་པ་མགོན་པོ་བྱམས་པས་གསུངས་པའི་ཚིག་ལེའུར་བྱས་པ་འདིའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་ལ་དོན་བཞི་སྟེ། སྤྱིར་བྱམས་པ་དང་འབྲེལ་པའི་ཆོས་སྡེ་ཉི་ཤུའི་རྣམ་གཞག དེ་ལས་ཆོས་ལྔས་མདོ་ཇི་ལྟར་འཆད་ཚུལ། བྱེ་བྲག་ཏུ་བསྟན་བཅོས་འདིས་མདོ་ཇི་ལྟར་འཆད་པའི་ཚུལ། སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པའོ། །དང་པོ་ནི། གང་ཟག་གསུམ་གྱིས་མཛད་པའི་ཆོས་ཉི་ཤུ་སྟེ། བྱམས་པས་མཛད་པའི་ཆོས་ལྔ། ཐོགས་མེད་ཀྱིས་མཛད་པའི་ས་སྡེ་ལྔ་དང་སྡོམ་རྣམ་པ་གཉིས་ཏེ་བདུན། དབྱིག་གཉེན་གྱིས་མཛད་པའི་པྲ་ཀ་ར་ཎ་སྡེ་བརྒྱད་དོ། །ཆོས་ལྔ་ནི་རྒྱན་གཉིས། འབྱེད་གཉིས། རྒྱུད་བླ་མ་སྟེ། འདི་དག་གི་དོན་ལ་སྔོན་གྱི་མཁས་པ་ཁ་ཅིག སྡེ་སྣོད་གསུམ་གཏན་ལ་འབེབས་པའི་དབང་དུ་མཛད་ནས་ཆོས་ལྔར་ངེས་ཏེ། དེ་ཡང་མདོ་སྡེ་གཏན་ལ་འབེབས་པ་ནི་མདོ་སྡེའི་རྒྱན་དང་། རྒྱུད་བླ་སྟེ། སྔ་མས་ནི་མདོ་སྡེ་དྲང་ངེས་མ་ཕྱེ་བར་གཏན་ལ་འབེབས། ཕྱི་མས་ནི་ངེས་དོན་གྱི་མདོ་སྡེ་བྱེ་བྲག་ཏུ་གཏན་ལ་འབེབས་པར་བྱེད་པའི་ཕྱིར། འདུལ་བའི་སྡེ་སྣོད་གཏན་ལ་འབེབས་པ་ནི་མངོན་རྟོགས་རྒྱན་ཏེ་ཐེག་ཆེན་ཐུན་མོང་མ་ཡིན་པའི་འདུལ་བ་ནི། ཉོན་མོངས་པ་འདུལ་བ་ཡིན་ལ། འདིས་དེའི་གཉེན་པོ་བསྟན་པའི་ཕྱིར་རོ། །མངོན་པའི་སྡེ་སྣོད་གཏན་ལ་འབེབས་པ་ནི་འབྱེད་རྣམ་པ་གཉིས་ཏེ། འདིས་ཆོས་རྣམས་ཀྱི་རང་སྤྱིའི་མཚན་ཉིད་གཏན་ལ་འབེབས་པའི་ཕྱིར་ཞེས་གསུངས་སོ། །ཡང་ཁ་ཅིག་གིས། མདོ་སོ་སོ་བ་དང་། ཐུན་མོང་བ་གཏན་ལ་འབེབས་པའི་དབང་དུ་བྱས་ནས་བྱམས་ཆོས་ལྔར་ངེས་ཏེ། མདོ་སྡེའི་རྒྱན་གྱིས་སངས་རྒྱས་ཀྱི་སའི་མདོ་དང་། མངོན་རྟོགས་རྒྱན་གྱིས་ཤེར་ཕྱིན་འབུམ་པ་དང་། རྒྱུད་བླས་འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོའི་དོན་གཏན་ལ་འབེབས་པས་གསུམ་པོ་མདོ་སོ་སོ་བ་དང་། དབུས་མཐས་གང་ཟག་གཅིག་མངོན་པར་རྫོགས་པར་འཚང་རྒྱ་བའི་ལམ་རིམ་སྟོན་ལ། ཆོས་དང་ཆོས་ཉིད་རྣམ་འབྱེད་ཀྱིས་དེའི་ནང་ནས་ཐེག་ཆེན་ཐུན་མོང་མ་ཡིན་པའི་ལམ་རིམ་སྟོན་པས་གཉིས་པོ་མདོའི་དོན་ཐུན་མོང་དུ་གཏན་ལ་འབེབས་བྱེད་ཡིན་པའི་ཕྱིར་རོ་ཞེས་བཞེད་དོ། །ཡང་ཁ་ཅིག་གིས། གཙོ་བོ་ལུས་ལྟ་བུའི་བསྟན་བཅོས་དང་། གྱེས་པ་ཡན་ལག་ལྟ་བུའི་བསྟན་བཅོས་ཀྱི་དབང་དུ་བྱས་ནས་བྱམས་ཆོས་ལྔར་ངེས་ཏེ། མངོན་རྟོགས་རྒྱན་དང་། མདོ་སྡེའི་རྒྱན་དང་། དབུས་མཐའ་རྣམ་འབྱེད་གསུམ་ནི་རིམ་པ་ལྟར་འདུལ་བའི་སྡེ་སྣོད་དང་། མདོ་སྡེའི་སྡེ་སྣོད་དང་། མངོན་པའི་སྡེ་སྣོད་གཏན་ལ་འབེབས་པས། གཙོ་བོ་ལུས་ལྟ་བུའི་བསྟན་བཅོས་ཡིན་ལ། རྒྱུད་བླས་ནི། མདོ་སྡེའི་རྒྱན་དུ་རིགས་ཆད་ཀྱི་སེམས་ཅན་ཡོད་པར་བསྟན་པ་དེ་དྲང་དོན་དགོངས་པ་ཅན་དུ་བསྟན་ནས། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྒྲུབ་པ་དང་། ཆོས་དང་ཆོས་ཉིད་རྣམ་འབྱེད་ནི། དབུས་མཐར་ཐེག་པ་ཐུན་མོང་བའི་ལམ་རིམ་བསྟན་ཀྱང་། ཐེག་ཆེན་ཐུན་མོང་མ་ཡིན་པའི་ལམ་རིམ་མ་བསྟན་པ་དེ། འདིས་བསྟན་པས་གཉིས་པ་གྱེས་པ་ཡན་ལག་ལྟ་བུའི་བསྟན་བཅོས་ཡིན་ཞེས་བཞེད་དོ། །རང་ལུགས་ནི་འོག་དུ་འབྱུང་ངོ་། །གཉིས་པ་ནི་ཐོགས་མེད་ཀྱིས་མཛད་པའི་ཆོས་བདུན་ལས་སའི་དངོས་གཞི་དང་རྣམ་པར་གཏན་ལ་དབབ་པ་བསྡུ་བ་གཉིས་ཀྱིས་གསུང་རབ་ཀྱི་དོན་གྱི་ཆ་གཏན་ལ་འབེབས་པར་བྱེད་དེ། སྔ་མས་ནི་གང་ཟག་གི་ཆ་རྐྱེན་བསྟན་ལ། ཕྱི་མས་ནི་དེའི་ནང་ནས་ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་ཀྱི་རྣམ་གྲངས་བསྟན་པའི་ཕྱིར་རོ། །གང་ཟག་གི་ཆ་རྐྱེན་གྱི་དོན་ནི། གང་ཟག་གཅིག་སངས་རྒྱ་བའི་ཆ་རྐྱེན་ལ་དམིགས་ཡུལ། ཉམས་ལེན། འབྲས་བུ་གསུམ་ཀར་དགོས་པས་དེ་གསུམ་ཚང་བ་ལ་བྱའོ། །གཞི་བསྡུ་བ་དང་རྣམ་གྲངས་བསྡུ་བ་གཉིས་ཀྱིས་རྗོད་བྱེད་ཚིག་གི་ཆ་གཏན་ལ་འབེབས་པར་བྱེད་དེ། སྔ་མས་ནི་རྗོད་བྱེད་ཐམས་ཅད་སྡེ་སྣོད་གསུམ་དུ་འདུས་པའི་ཚུལ་དང་། ཕྱི་མས་ནི་དེ་དག་གི་ཀུན་ནས་ཉོན་མོངས་པ་དང་། རྣམ་པར་བྱང་བའི་མིང་གི་རྣམ་གྲངས་གཏན་ལ་དབབ་པའི་ཕྱིར་རོ། །རྣམ་པར་བཤད་པའི་སྒོ་བསྡུ་བས་ནི་ཚིག་དེས་དོན་དེ་ཇི་ལྟར་འཆད་ཚུལ་གྱི་རྣམ་པར་གཞག་པ་བསྟན་ཏོ། །འོ་ན་སའི་དངོས་གཞིས་གང་ཟག་གི་ཆ་རྐྱེན་ཇི་ལྟར་གཏན་ལ་འབེབས་ཞེ་ན། སའི་སྤྱི་སྡོམ་དུ། རྣམ་ཤེས་ལྔ་དང་ལྡན་པའི་ས། །ཡིད་ཀྱི་ས་དང་གཞན་གསུམ་སྟེ། །རྟོག་དཔྱོད་བཅས་ལ་སོགས་པ་དང་། །ཏིང་འཛིན་བཅས་དང་མ་ཡིན་དང་། །སེམས་མེད་པ་དང་སེམས་ཡོད་དང་། །ཐོས་དང་བསམ་དང་སྒོམ་པའི་ས། །དེ་བཞིན་ཐེག་པ་གསུམ་ལྡན་དང་། །ཕུང་པོར་བཅས་དང་ཕུང་པོ་མེད། །ཅེས་གསུངས་པའི་དོན་ལ་སྔོན་གྱི་མཁས་པ་ཁ་ཅིག དང་པོ་དགུས་དམིགས་པར་བྱ་བའི་ཡུལ། བར་པ་དྲུག་གིས་སྤྱོད་པའི་བདག་ཉིད། ཐ་མ་གཉིས་ཀྱིས་འབྲས་བུ་བསྟན་ཅེས་གསུངས་ལ། སའི་སྟོད་འགྲེལ་དུ། རང་བཞིན་དང་ནི་ཇི་ལྟར་འཇུག །དེ་ལ་དེ་ཡི་གནས་སྐབས་དང་། །གོ་རིམ་དང་ནི་གང་ཐོབ་དང་། །དེ་ལ་དེ་ནི་འགྲོ་བ་ཡིན། །ཞེས་གསུངས་པ་ལྟར་བཤད་ན་གང་ཟག་གི་རང་བཞིན་གྱི་དབང་དུ་བྱས་ནས་ས་དང་པོ་གཉིས་ཏེ། ཉམས་སུ་ལེན་པའི་གང་ཟག་དེ་ཡང་རྣམ་ཤེས་ཚོགས་བརྒྱད་ཀྱི་རྒྱུན་ལ་འཇོག་པའི་ཕྱིར་རོ། །ཇི་ལྟར་འཇུག་པའི་དབང་དུ་བྱས་ནས་རྟོག་དཔྱོད་དང་བཅས་པ་ལ་སོགས་པའི་ས་གསུམ་སྟེ། གང་ཟག་དེ་ཡང་བསམ་གཏན་དང་པོའི་དངོས་གཞི་ཙམ་པོ་མན་ཆད་དུ་རྟོག་དཔྱོད་གཉིས་ཀ་དང་བཅས་པའི་སྒོ་ནས་འཇུག ཁྱད་པར་ཅན་གྱི་དུས་སུ་རྟོག་པ་མེད་ཅིང་དཔྱོད་པ་ཙམ་གྱི་སྒོ་ནས་འཇུག བསམ་གཏན་གཉིས་པ་ཡན་ཆད་དུ་རྟོག་དཔྱོད་གཉིས་ཀ་མེད་པའི་སྒོ་ནས་འཇུག་པའི་ཕྱིར་རོ། །དེའི་གནས་སྐབས་ཀྱི་དབང་དུ་བྱས་ནས་ཏིང་ངེ་འཛིན་དང་བཅས་པ་ལ་སོགས་པའི་ས་བཞི་སྟེ། གང་ཟག་དེ་གཟུགས་དང་གཟུགས་མེད་དུ་ཏིང་ངེ་འཛིན་དང་བཅས་པ་དང་། འདོད་པ་ཏིང་ངེ་འཛིན་དང་མ་བཅས་པ་དང་། སྙོམས་འཇུག་གཉིས་ལ་སོགས་པའི་གནས་སྐབས་ན་སེམས་མེད་པ་དང་། དེ་ལས་གཞན་དུ་ནི་སེམས་ཡོད་པའི་ཕྱིར་རོ། །གོ་རིམ་གྱི་དབང་དུ་བྱས་ནས་ཐོས་བསམ་སྒོམ་པའི་ས་གསུམ་སྟེ། དེ་གསུམ་ལ་རིམ་གྱིས་འཇུག་དགོས་པའི་ཕྱིར་རོ། །གང་ཐོབ་པའི་དབང་དུ་བྱས་ནས་ཉན་ཐོས་ལ་སོགས་པའི་ས་གསུམ་སྟེ། ཐོབ་བྱའི་ཐེག་པ་ནི་གསུམ་དུ་འདུས་པའི་ཕྱིར་རོ། །དེ་ལ་འགྲོ་བའི་དབང་དུ་བྱས་ནས་ལྷག་མ་གཉིས་པོ་སྟེ། དེ་ལྟ་བུའི་གང་ཟག་དེ་ཡང་མཐར་ཐེག་པ་གསུམ་གྱིས་མྱང་འདས་གཉིས་སུ་འགྲོ་བའི་ཕྱིར་རོ། །སྡོམ་གཉིས་ལས་ཀུན་བཏུས་ནི། ཐེག་པ་ཐུན་མོང་གི་སྡོམ་ཡིན་ཏེ། ཉན་ཐོས་དང་ཐུན་མོང་དུ་ཕྱི་རོལ་གྱི་དོན་གྱི་རྣམ་གཞག་དང་། སེམས་ཙམ་པ་དང་ཐུན་མོང་དུ་མཚན་ཉིད་གསུམ་དང་། རྣམ་ཤེས་ཚོགས་བརྒྱད་ལ་སོགས་པའི་རྣམ་གཞག་གསུངས་པའི་ཕྱིར་རོ། །ཐེག་པ་ཆེན་པོ་བསྡུས་པ་ནི། ཐེག་ཆེན་ཐུན་མོང་མ་ཡིན་པའི་སྡོམ་ཡིན་ཏེ། དེར་བཤད་པའི་ཤེས་བྱའི་གནས་ལ་སོགས་པ་རྣམ་པ་བཅུ་པོ་དེ་སེམས་ཙམ་པའི་ལུགས་ཀྱི་གཞི་ལམ་འབྲས་བུའི་རྣམ་པར་གཞག་པ་ཁོ་ན་ཡིན་པའི་ཕྱིར་རོ། །དེའི་འོག་ཏུ་སློབ་དཔོན་དབྱིག་གཉེན་གྱིས་རང་རྒྱུད་དུ་བརྩམས་པའི་བསྟན་བཅོས་ལྔ། གཞན་འགྲེལ་ཊཱི་ཀ་བཏགས་པ་གསུམ་སྟེ། པྲ་ཀ་ར་ཎ་སྡེ་བརྒྱད་བརྩམས་པ་ལས། འདི་དག་གི་དོན་ལ་སྔོན་གྱི་མཁས་པ་རྣམས་ཀྱིས་སེམས་ཙམ་པའི་ལྟ་བ་སྟོན་པ། དེའི་སྒྲུབ་བྱེད། དེ་ལ་རྩོད་པ་སྤོང་བ་དང་གསུམ་དུ་བྱས་ནས། དང་པོ་ནི། སུམ་ཅུ་པའི་རབ་བྱེད་དེ། ཆོས་དང་གང་ཟག་གི་འགྲོ་བ་ཐམས་ཅད་མཚན་ཉིད་གསུམ་དུ་བསྡུས་ནས་བདག་མེད་པ་གཉིས་བསྟན་པའི་ཕྱིར་རོ། །གཉིས་པ་ནི། ཉི་ཤུ་པའི་རབ་ཏུ་བྱེད་པ་སྟེ། སྣང་བ་ཐམས་ཅད་སེམས་ཡིན་པའི་སྒྲུབ་བྱེད་བསྟན་པའི་ཕྱིར་རོ། །གསུམ་པ་ནི་རབ་ཏུ་བྱེད་པ་ལྷག་མ་རྣམས་ཏེ། དེ་ལྟར་སྣང་བ་ཐམས་ཅད་སེམས་ཡིན་ན། ཕུང་པོ་ལྔའི་རྣམ་གཞག་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་ཕུང་པོ་ལྔའི་རབ་བྱེད། ལས་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ། ལས་སྒྲུབ་པའི་རབ་བྱེད། ཉན་བཤད་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་རྣམ་བཤད་རིག་པ་མཚན་ཉིད་གསུམ་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་དབུས་མཐའི་འགྲེལ་པ། རྟེན་འབྲེལ་བཅུ་གཉིས་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་རྟེན་འབྲེལ་གྱི་མདོ་འགྲེལ། རང་དོན་ཕར་ཕྱིན་དྲུག་དང་གཞན་དོན་བསྡུ་དངོས་བཞིའི་སྤྱོད་པ་མི་འཐད་པར་འགྱུར་རོ་ཞེ་ན། དེའི་རྩོད་པ་སྤོང་བ་མདོ་སྡེ་རྒྱན་གྱི་འགྲེལ་པ་མཛད་གསུངས་སོ། །འོན་ཀྱང་བསྟན་བཅོས་རྩོམ་པ་པོས་འདི་ལྟ་བུའི་དགོངས་པ་སྔོན་དུ་བཏང་ནས་གོ་རིམ་འདི་ལྟར་རྩོམ་པ་ཡིན་ན། འདི་ལྟ་བུའི་རྣམ་གཞག་འཐད་ཀྱང་བརྗོད་བྱ་དེ་དང་དེ་སྟོན་པའི་བསྟན་བཅོས་རྩོམ་པར་བཞེད་ནས་སོ་སོར་རྩོམ་པ་ལ་དེ་ལྟ་བུའི་རྣམ་གཞག་དགོས་པའི་ངེས་པ་མེད་དམ་སྙམ་མོ། །གཞན་དུ་ན་འཕགས་པ་ཐོགས་མེད་ཀྱིས་མཛད་པའི་རྒྱུད་བླའི་འགྲེལ་པ་དང་། སློབ་དཔོན་དབྱིག་གཉེན་གྱིས་མཛད་པའི་ཆོས་དང་ཆོས་ཉིད་རྣམ་འབྱེད་ཀྱི་འགྲེལ་པ་གཉིས་བྱམས་པ་དང་འབྲེལ་པའི་ཆོས་སྡེར་མི་བགྲང་བའི་རྒྱུ་མཚན་ཅི་ཡིན་ཞལ་འཛུམ་པ་དང་བཅས་ཏེ་གསུང་གི་མདངས་ཕྱུང་རན་ནོ། །གཉིས་པ་དེ་ལས་ཆོས་ལྔས་མདོ་ཇི་ལྟར་འཆད་ཚུལ་ལ་གཉིས་ཏེ། ཚིག་ཇི་ལྟར་འཆད་པའི་ཚུལ་དང་། དོན་ཇི་ལྟར་འཆད་པའི་ཚུལ་ལོ། །དང་པོ་ལ་གསུམ་སྟེ། བཤད་བྱའི་མདོ་དགོས་པ་དང་། དེ་ཇི་ལྟར་འཆད་པའི་ཚུལ། མདོ་དང་སྦྱར་བའི་དགོས་པའོ། །དང་པོ་ནི། འདིར་བཤད་བྱའི་མདོ་ནི། ཐེག་ཆེན་ཐུན་མོང་མ་ཡིན་པའི་སྡེ་སྣོད་ཡིན་ལ། དེ་ལ་ཡང་དྲང་དོན་གྱི་མདོ་དང་། ངེས་དོན་གྱི་མདོ་གཉིས་ལས། དང་པོ་ནི། མདོ་སྡེ་དགོངས་པ་ངེས་འགྲེལ་ལྟ་བུའོ། །གཉིས་པ་ནི་ཤེར་ཕྱིན་གྱི་མདོ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ། དེ་བཞིན་གཤེགས་པའི་སྙིང་པོའི་མདོ། བུ་མོ་རིན་ཆེན་གྱིས་ཞུས་པའི་མདོ། ལྷག་བསམ་བསྟན་པའི་མདོ། འཕེལ་འགྲིབ་མེད་པའི་མདོ། དཔལ་ཕྲེང་གི་མདོ། ཡེ་ཤེས་སྣང་བ་རྒྱན་གྱི་མདོ་ལ་སོགས་པ་རྣམས་སོ། །གཉིས་པ་ནི། འོ་ན་བྱམས་པའི་ཆོས་ལྔ་པོ་དེས་མདོ་དེ་དག་ཇི་ལྟར་གཏན་ལ་འབེབས་པ་ཡིན་ཞེ་ན། འདི་ལ་ངེས་དོན་གྱི་མདོ་སྡེ་གཏན་ལ་འབེབས་པ་དང་། དྲང་དོན་གྱི་མདོ་སྡེ་གཏན་ལ་འབེབས་པ་དང་། དྲང་དོན་དང་ངེས་དོན་གྱི་མདོ་སྡེ་སྣ་ཚོགས་པ་གཏན་ལ་འབེབས་པ་གསུམ་ལས། དང་པོ་ལ་ངེས་དོན་གྱི་མདོ་སྡེ་རིགས་གཅིག་གཏན་ལ་འབེབས་པ་དང་། རིགས་དུ་མ་གཏན་ལ་འབེབས་པ་གཉིས་སོ། །དང་པོ་ནི་མངོན་པར་རྟོགས་པའི་རྒྱན་ཏེ། དེས་ཤེར་ཕྱིན་གྱི་མདོ་སྡེ་ཁོ་ན་གཏན་ལ་འབེབས་པའི་ཕྱིར་རོ། །གཉིས་པ་ནི་རྒྱུད་བླ་སྟེ། དེས་སྔར་བཤད་པའི་ངེས་དོན་གྱི་མདོ་སྡེ་དེ་རྣམས་གཏན་ལ་འབེབས་པའི་ཕྱིར། དྲང་དོན་གྱི་མདོ་སྡེ་གཏན་ལ་འབེབས་པ་ནི་འབྱེད་རྣམ་གཉིས་ཏེ། དེས་དགོངས་པ་ངེས་འགྲེལ་ལ་སོགས་པ་གཏད་ལ་འབེབས་པའི་ཕྱིར་རོ། །དྲང་དོན་དང་ངེས་དོན་གྱི་མདོ་སྡེ་སྣ་ཚོགས་པ་གཏན་ལ་འབེབས་པ་ནི་མདོ་སྡེའི་རྒྱན་ཏེ། གཞིའི་དུས་སུ་རིགས་ཆད་ཀྱི་སེམས་ཅན་ཡོད་པར་བཤད་པ་དང་། ལམ་གྱི་དུས་སུ་ཆོས་ཐམས་ཅད་སྐྱེ་མེད་དུ་གཏན་ལ་འབེབས་པའི་མདོ་དྲང་དོན་དུ་སྟོན་པ་དང་། འབྲས་བུའི་དུས་སུ་མཐར་ཐུག་ཐེག་པ་གཅིག་ཏུ་ངེས་པ་དྲང་དོན་དུ་བསྟན་ནས། མཐར་ཐུག་ཐེག་པ་གསུམ་དུ་བསྟན་པ་རྣམས་ཀྱིས་ནི་དྲང་དོན་གྱི་མདོ་སྡེ་གཏན་ལ་འབེབས་པའི་ཕྱིར་དང་། གཞིའི་དུས་སུ་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྟན་པ་དང་། ལམ་གྱི་དུས་སུ་ཕར་ཕྱིན་དྲུག་དང་། བསྡུ་དངོས་བཞིའི་སྤྱོད་པ་དང་། འབྲས་བུའི་དུས་སུ་སྐུ་གསུམ་ཡེ་ཤེས་བཞིའི་རྣམ་གཞག་སྟོན་པ་རྣམས་ཀྱིས་ངེས་དོན་གྱི་མདོ་སྡེ་གཏན་ལ་འབེབས་པའི་ཕྱིར་རོ། །གསུམ་པ་མདོ་དང་སྦྱར་བའི་དགོས་པ་ནི། འོ་ན་རྗེ་བཙུན་བྱམས་པ་ས་བཅུ་པའི་བྱང་སེམས་ཀྱི་ཚུལ་བཟུང་བ་ཙམ་ཡིན་གྱི། དོན་ལ་སངས་རྒྱས་ཡིན་པས་བཀའི་དགོངས་པ་འགྲེལ་པ་ལ་མ་ལྟོས་པར་རང་དགར་མི་རྩོམ་པའི་རྒྱུ་མཚན་ཅི་ཡིན་ཞེ་ན། སྟོན་པས་མཛད་པ་བཅུ་གཉིས་ཀྱི་ཚུལ་སྟོན་པའི་བསྟན་པ་འདི་ལ་ཐུབ་པའི་གསུང་གི་རྗེས་སུ་འབྲང་བ་དེ་བསྟན་པ་རྣམ་དག་ཡིན་གྱི། དེའི་རྗེས་སུ་མི་འབྲང་བ་དེ་བསྟན་པ་རྣམ་དག་མ་ཡིན་ནོ་ཞེས་རྗེས་འཇུག་གི་གདུལ་བྱ་རྣམས་ཀྱིས་ཤེས་པའི་ཆེད་དུ་ཐུབ་པའི་བཀའ་དང་སྦྱར་བ་ཁོ་ན་མཛད་པ་ཡིན་ཏེ། དེ་ལྟར་ཡིད་ཆེས་ལུང་དང་རིགས་པ་ལ། །བརྟེན་ནས་བདག་ཉིད་འབའ་ཞིག་དག་ཕྱིར་དང་། །ཞེས་དང་། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་སོ། །གཉིས་པ་དོན་ཇི་ལྟར་འཆད་པའི་ཚུལ་ནི། མངོན་པར་རྟོགས་པའི་རྒྱན་གྱིས་ཤེར་ཕྱིན་གྱི་མདོའི་དོན་མངོན་པར་རྟོགས་པ་བརྒྱད་དུ་བསྡུས་ནས་སྟོན་ཏེ། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །ཅེས་སོ། །རྒྱུད་བླ་མས་ནི་སྔར་བཤད་པའི་ངེས་དོན་གྱི་མདོ་སྡེ་དེ་རྣམས་ཀྱི་དོན་རྡོ་རྗེའི་གནས་བདུན་དུ་བསྡུས་ནས་སྟོན་ཏེ། སངས་རྒྱས་ཆོས་ཚོགས་ཁམས་དང་བྱང་ཆུབ་དང་། །ཡོན་ཏན་སངས་རྒྱས་ཕྲིན་ལས་ཐ་མ་སྟེ། །བསྟན་བཅོས་ཀུན་གྱི་ལུས་ནི་མདོར་བསྡུས་ན། །རྡོ་རྗེ་ཡི་ནི་གནས་བདུན་འདི་དག་གོ །ཅེས་སོ། །དབུས་མཐའ་རྣམ་འབྱེད་ཀྱིས་ཐེག་པ་ཐུན་མོང་གི་ལམ་གྱི་རིམ་པ་དང་། ཐེག་ཆེན་ཐུན་མོང་མ་ཡིན་པའི་ལམ་གྱི་རིམ་པ་གཉིས་སྟོན་ཏེ། མཚན་ཉིད་སྒྲིབ་པ་དེ་ཁོ་ན། །གཉེན་པོ་དག་ནི་སྒོམ་པ་དང་། །དེ་ཡི་གནས་དང་འབྲས་བུ་ཐོབ། །ཐེག་པ་བླ་ན་མེད་པའོ། །ཞེས་གསུངས་པས་སོ། །ཆོས་དང་ཆོས་ཉིད་རྣམ་འབྱེད་ཀྱིས་ནི་ཆོས་ཅན་འཁོར་བ་དང་། ཆོས་ཉིད་མྱ་ངན་ལས་འདས་པ་སོ་སོར་ཕྱེ་ནས་སྟོན་ཏེ། འདི་ཐམས་ཅད་ནི་གཉིས་ཏེ། ཆོས་ཀྱིས་རབ་ཏུ་ཕྱེ་བ་དང་། ཆོས་ཉིད་ཀྱིས་རབ་ཏུ་ཕྱེ་བའོ། །ཆོས་ཀྱིས་རབ་ཏུ་ཕྱེ་བ་ནི་འཁོར་བའོ། །ཆོས་ཉིད་ཀྱིས་རབ་ཏུ་ཕྱེ་བ་ནི་ཐེག་པ་གསུམ་གྱི་མྱ་ངན་ལས་འདས་པའོ། །ཞེས་སོ། །མདོ་སྡེ་རྒྱན་གྱིས་ནི་དྲང་དོན་དང་ངེས་དོན་གྱི་མདོ་སྡེ་དུ་མའི་དོན། གསེར་ལས་བརྡུང་བྱས་འདྲ་བ་ལ་སོགས་པ། དཔེ་ལྔས་མཚོན་པའི་དོན་ལྔར་བསྡུས་ནས་སྟོན་ཏེ། གསེར་ལས་བརྡུང་བྱས་འདྲ་ཞིང་པདྨ་རྒྱས་པ་འདྲ། །བཀྲེས་པས་ཉེན་པ་གཡོས་ལེགས་ཁ་ཟས་ཟ་བ་འདྲ། །ཕྲིན་ཡིག་ལེགས་པ་ཐོས་འདྲ་རིན་ཆེན་སྒྲོམ་ཕྱེ་ལྟའི། །ཆོས་དེ་འདིར་བཤད་པའང་དགའ་བའི་མཆོག་བསྐྱེད་དོ། །ཅེས་སོ། །གསུམ་པ་བྱེ་བྲག་ཏུ་བསྟན་བཅོས་འདི་མདོ་ཇི་ལྟར་འཆད་པའི་ཚུལ་ལ་ལྔ་སྟེ། བཤད་བྱའི་མདོ་ངོས་གཟུང་བ། དགོངས་འགྲེལ་ཤིང་རྟའི་སྲོལ་འབྱེད་ངོས་གཟུང་བ། དེས་སྲོལ་ཇི་ལྟར་ཕྱེ་བའི་ཚུལ། བཤད་ཐབས་ཀྱི་མན་ངག་ངོས་གཟུང་བ། དགོངས་འགྲེལ་གྱི་བསྟན་བཅོས་ཇི་ལྟར་བྱུང་བའི་བྱུང་ཚུལ་ལོ། །དང་པོ་ནི་ཤེར་ཕྱིན་གྱི་མདོ་རྣམས་ཡིན་ལ། འདི་ལ་སྔོན་གྱི་མཁས་པ་རྣམས་ཀྱིས་ཡུམ་དྲུག་དང་། སྲས་བཅུ་གཅིག་གི་རྣམ་གཞག་མཛད་དོ། །ཡུམ་དྲུག་ནི། སྟོང་ཕྲག་བརྒྱ་པ་དང་། སྟོང་ཕྲག་ཉེར་ལྔ་པ་དང་། ཁྲི་བརྒྱད་སྟོང་པ་སྟེ་རྒྱས་པ་སྐོར་གསུམ། ཤེས་རབ་ཁྲི་པ་དང་། བརྒྱད་སྟོང་པ་དང་། ཡོན་ཏན་རིན་ཆེན་སྡུད་པ་སྟེ། བསྡུས་པ་སྐོར་གསུམ་མོ། །སྲས་བཅུ་གཅིག་ནི། ཤེར་ཕྱིན་བདུན་བརྒྱ་པ་དང་། ཤེར་ཕྱིན་སུམ་བརྒྱ་པ་དང་། ཤེར་ཕྱིན་བརྒྱ་ལྔ་བཅུ་པ་དང་། ཤེར་ཕྱིན་ལྔ་བཅུ་པ་དང་། སྒོ་ཉེར་ལྔ་པ་དང་། རབ་རྩལ་རྣམ་གནོན་གྱིས་ཞུས་པ་དང་། ཀོའུ་ཤི་ཀས་ཞུས་པ་དང་། ཡི་གེ་ཉུང་ངུ་མ་དང་། ཡི་གེ་གཅིག་མ་དང་། རྡོ་རྗེ་གཅོད་པ་དང་། ཤེས་རབ་སྙིང་པོའོ། །དེ་ལ་དང་པོ་དྲུག་པོས་ནི་དངོས་བརྒྱད་དོན་བདུན་ཅུ་སོ་སོར་ཕྱེ་ནས་སྟོན་པས་ན་ཡུམ་དང་། ཕྱི་མ་བཅུ་གཅིག་གིས་ནི་དེ་ལྟར་མི་སྟོན་པས་སྲས་ཡིན་ནོ་ཞེས་ཟེར་རོ། །འདི་ལ་གྲངས་ངེས་མི་འཐད་པ་དང་། ཐ་སྙད་མི་འཐད་པ་གཉིས་ལས། དང་པོ་ནི་མདོ་སྡུད་པ་ཁྲི་བརྒྱད་སྟོང་པའི་ལེའུ་གཅིག་ཡིན་པས་དེ་ལོགས་སུ་བགྲངས་ན་ལྷག་པར་འགྱུར་ཞིང་། ཟླ་བའི་སྙིང་པོས་ཞུས་པའི་མདོ་དང་། ཉི་མའི་སྙིང་པོས་ཞུས་པའི་མདོ་དང་། ཤེར་ཕྱིན་ལག་ན་རྡོ་རྗེ་རྣམས་མ་ཚང་བས་ཆད་པའི་སྐྱོན་ཡོད་དོ། །གཉིས་པ་ཐ་སྙད་མི་འཐད་པ་ནི། དངོས་བརྒྱད་དོན་བདུན་ཅུར་ཕྱེ་ནས་སྟོན་པ་ལ་ཡུམ་དང་། དེ་ལྟར་མི་སྟོན་པ་ལ་སྲས་ཀྱི་ཐ་སྙད་གང་ནས་ཀྱང་མ་གསུངས་པའི་ཕྱིར་རོ། །ཡང་ཁ་ཅིག་མངོན་པར་རྟོགས་པའི་རིམ་པ་སྟོན་པས་ན་ཡུམ་དང་། མངོན་རྟོགས་ཀྱི་རིམ་པ་མི་སྟོན་པར་ཡུལ་སྐྱེ་མེད་ཙམ་སྟོན་པས་ན་སྲས་སུ་བཞག་པ་ཡིན་ནོ། །ཞེས་གསུངས་པ་ཡང་མི་འཐད་དེ། ཤེར་ཕྱིན་འབུམ་པ་ལ་སོགས་པས་དེ་གཉིས་ཀ་སྟོན་པས་ཡུམ་སྲས་གཉིས་ཀར་ཐལ་བའི་ཕྱིར་དང་། ཡུལ་སྐྱེ་མེད་དུ་སྟོན་པ་ནི་བདག་མེད་བརྗོད་བྱའི་གཙོ་བོར་བྱས་ནས་སྟོན་པས་ཡུམ་གྱི་ཐ་སྙད་འཐད་པའི་ཕྱིར་དང་། ཤེར་ཕྱིན་བདུན་བརྒྱ་པས་ཚོགས་སྦྱོར་གཉིས། འཕགས་པའི་ས་བཅུ་སྟེ། ས་བཅུ་གཉིས་ཀྱི་རྣམ་གཞག་དང་། རྡོ་རྗེ་གཅོད་པས་ནི་མོས་སྤྱོད་ཀྱི་ས་དང་། བྱང་སེམས་ཀྱི་ས་དང་། སངས་རྒྱས་ཀྱི་ས་སྟེ། ས་གསུམ་གྱི་རྣམ་གཞག་དང་། ཤེས་རབ་སྙིང་པོས་ནི་ལམ་ལྔའི་རྣམ་གཞག་བསྟན་པའི་ཕྱིར་རོ། །འོ་ན་བཤད་བྱའི་མདོ་གང་ཞེ་ན། ཤེར་ཕྱིན་གྱི་མདོ་ཐམས་ཅད་ཀྱིས་འཕགས་བཞིའི་ཡུམ་དུ་གྱུར་པའི་བདག་མེད་རྟོགས་པའི་ཤེས་རབ་བརྗོད་བྱའི་གཙོ་བོར་སྟོན་པས་ཡུམ་གྱི་ཐ་སྙད་འཐད་པས་དེ་ཉིད་འདིར་བཤད་པར་བྱ་བའི་མདོ་ཡིན་ནོ། །གཉིས་པ་ནི་སྔ་རབས་པ་ཁ་ཅིག ཤེར་ཕྱིན་གྱི་དགོངས་འགྲེལ་གྱི་ཤིང་རྟའི་སྲོལ་འབྱེད་དེ་ལ་མགོན་པོ་བྱམས་པས་མཛད་པའི་མངོན་པར་རྟོགས་པའི་རྒྱན་དང་། ཀླུ་སྒྲུབ་ཀྱིས་མཛད་པའི་དབུ་མ་རིགས་པའི་ཚོགས། དཔའ་བོས་མཛད་པའི་འབུམ་ཊཱིཀ ཕྱོགས་གླང་གིས་མཛད་པའི་བརྒྱད་སྟོང་དོན་བསྡུས་ཏེ་བཞིར་གྲངས་ངེས་སོ། །འོ་ན་དེ་དག་གིས་སྲོལ་ཇི་ལྟར་ཕྱེ་ན། དང་པོས་ནི་སྦས་དོན་མངོན་རྟོགས་ཀྱི་རིམ་པ་གསལ་བར་མཛད་ལ། གཉིས་པས་ནི། དངོས་བསྟན་སྟོང་ཉིད་ཀྱི་ལྟ་བ་གསལ་བར་མཛད། གསུམ་པས་ནི་ཡུམ་གྱི་དོན་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་སྟོན་ཏེ། སྒོ་གསུམ་ནི་ཐོག་མར་གླིང་གཞིས་སྐབས་ཕྱེ་ནས་གདུལ་བྱ་དབང་རྣོན་ལ་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་འཚང་རྒྱ་བར་འདོད་པས་ཡུམ་ལ་བསླབ་པར་བྱའོ། །ཞེས་གང་གིས། གང་གི་ཕྱིར། གང་ལ་བསླབ་ཚུལ་བཞིས་དོན་ཐམས་ཅད་བསྡུས་ཏེ་བསྟན་པ་ནི་བསྡུས་ཏེ་བསྟན་པའི་སྒོ། དེ་ནས་སྐབས་དང་པོའི་བར་ལ་འབྲིང་དུ་བསྟན་པའི་སྒོ། དེ་ནས་མཇུག་རྫོགས་པར་བསྟན་པ་རྒྱས་པར་བཤད་པའི་སྒོ་སྟེ་གསུམ་མོ། །རྣམ་གྲངས་བཅུ་གཅིག་ནི། དང་པོ་ཤཱ་རིའི་བུ་ལ་བཀའ་སྩལ་པ་དང་། དེ་ནས་རབ་འབྱོར་གྱིས་བཤད་པ་གཅིག་དང་། དེ་ནས་བརྒྱ་བྱིན་ལ་བཀའ་སྩལ་པ་གཉིས་དང་། རབ་འབྱོར་ལ་བཀའ་སྩལ་པ་བཞི་དང་། བྱམས་པ་ལ་བཀའ་སྩལ་པ་གཉིས་དང་། ཀུན་དགའ་བོ་ལ་བཀའ་སྩལ་ནས་ཡོངས་སུ་རྫོགས་པར་གཏད་པ་སྟེ་བཅུ་གཅིག་གོ །བཞི་པས་ནི་ཡུམ་གྱི་གཙོ་བོའི་དོན་སོ་གཉིས་སུ་བསྡུས་ནས་སྟོན་ཏེ། བརྒྱད་སྟོང་དོན་བསྡུར། རྟེན་དང་དབང་དུ་བྱ་བ་དང་། །ལས་ནི་སྒོམ་པ་དང་བཅས་དང་། །རབ་དབྱེ་རྟགས་དང་ལྟུང་བ་དང་། །ཕན་ཡོན་བཅས་པར་ཡང་དག་བརྗོད། །ཅེས་སོ། །དེ་ལ་རྟེན་སྟོན་པ་སངས་རྒྱས། དབང་དུ་བྱ་བ་འཁོར། ལས་ཡུམ་ལ་ཆོས་སྤྱོད་བཅུས་ཇི་ལྟར་སྤྱོད་པ། སྒོམ་པ་རྣམ་གཡེང་གི་རྣམ་རྟོག་བཅུའི་གཉེན་པོར་སྒོམ་པ་བཅུ། རབ་ཏུ་དབྱེ་བ་སྟོང་ཉིད་བཅུ་དྲུག རྟགས་ལ་བདུད་ལས་ཀྱི་རྟགས་དང་། ཕྱིར་མི་ལྡོག་པའི་རྟགས་གཉིས། ལྟུང་བ་ཤེར་ཕྱིན་སྤངས་ན་ངན་སོང་དུ་ལྟུང་བ། ཕན་ཡོན་སྟོང་གསུམ་རིན་པོ་ཆེས་བཀང་ནས་སྦྱིན་པ་བྱིན་པ་བས་ཡུམ་ལ་སྤྱད་ན་བསོད་ནམས་ཆེ་བ་ལ་སོགས་པའོ་ཞེས་འདོད་དོ། །ཤེས་བྱ་ཀུན་རིག་གི་ཞལ་སྔ་ནས་ཕྱི་མ་གཉིས་ནི་སྔ་མ་གཉིས་ལས་སྲོལ་འབྱེད་གཞན་མ་ཡིན་པས་ན་སྲོལ་འབྱེད་ལ་སྔ་མ་གཉིས་སུ་ངེས་སོ་ཞེས་བཞད་དོ། །འདི་ཉིད་དོན་ལ་ཡང་གནས་ཏེ། སྤྱིར་ཡུམ་གྱི་དགོངས་པ་འགྲེལ་པ་ཙམ་གྱིས་ཤིང་རྟའི་སྲོལ་འབྱེད་དུ་འགྲོ་བ་མ་ཡིན་གྱི། གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་མ་ཡིན་པར་ཆོས་ཉིད་དོན་དམ་པའི་བདེན་པ་མངོན་སུམ་དུ་མཐོང་བའི་སྒོ་ནས་བཀའི་དགོངས་པ་རང་དབང་དུ་འགྲེལ་པ་ལ་ཤིང་རྟའི་སྲོལ་འབྱེད་དུ་འཇོག་པ་གང་ཞིག དེ་ལ་སྔ་མ་གཉིས་པོ་དེར་ངེས་ཤིང་། ཕྱི་མ་གཉིས་ནི་གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་ཙམ་ཡིན་པའི་ཕྱིར་རོ། །འགྲེལ་ཚུལ་མི་འདྲ་བ་ཙམ་གྱིས་སྲོལ་འབྱེད་སོ་སོར་འཇོག་ན་རྩ་བ་ཤེས་རབ་དང་། འཇུག་པ་ཡང་སྲོལ་འབྱེད་སོ་སོར་འགྱུར་ཏེ། སྔ་མས་ནི་རྟེན་འབྲེལ་མཐའ་བརྒྱད་ཀྱི་སྤྲོས་པ་དང་བྲལ་བའི་སྒོ་ནས་འགྲེལ། ཕྱི་མས་ནི་མདོ་སྡེ་ས་བཅུ་པ་ལས་བཤད་པ་དང་སྦྱར་ཏེ་འགྲེལ་བའི་ཕྱིར་རོ། །འོ་ན་ཕྱི་མ་གཉིས་པོ་གང་གི་མན་ངག་ལ་བརྟེན་ཞེ་ན། སློབ་དཔོན་ཕྱོགས་གླང་གིས་ནི་མགོན་པོ་བྱམས་པའི་མན་ངག་ཐོགས་མེད་ནས་བརྒྱུད་དེ། དབྱིག་གཉེན་ལས་ཐོས་པ་ཡིན་ལ། སློབ་དཔོན་དཔའ་བོས་ནི་མགོན་པོ་ཀླུ་སྒྲུབ་ཀྱི་མན་ངག་འཕགས་པ་ལྷ་ལས་ཐོས་པས་དེ་དག་གི་རྗེས་སུ་འབྲང་བའི་ཕྱིར་རོ། །གསུམ་པ་ནི་སྲོལ་འབྱེད་གཉིས་སུ་ངེས་ན་དེས་སྲོལ་ཇི་ལྟར་ཕྱེ་སྙམ་ན། སྤྱིར་ཤེར་ཕྱིན་གྱི་མདོ་ལས་ཐེག་པ་གསུམ་ཀའི་ལམ་བསྟན་ཏེ། ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལ་བསླབ་པར་བྱའོ་ཞེས་སོགས་རྒྱས་པར་གསུངས་ཤིང་། མཐར་དེ་ཅིའི་ཕྱིར་ཞེ་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ནི་ཐེག་པ་གསུམ་པོ་རྒྱ་ཆེར་སྟོན་ནོ་ཞེས་གསུངས་པས་སོ། །དེ་ལ་མངོན་རྟོགས་རྒྱན་གྱི་མཆོད་བརྗོད་ཀྱི་སྐབས་སུ་ནི་གླེང་གཞི་དང་མཐུན་པ་ཐེག་པ་གསུམ་ཆར་གྱི་ལམ་བསྟན་པར་བཞེད་ནས་མཁྱེན་གསུམ་གྱི་ཡོན་ཏན་བརྗོད་པ་ཡིན་ཞིང་། ལུས་ཀྱི་སྐབས་སུ་ནི་ཐེག་ཆེན་གྱི་ལམ་རིམ་ཁོ་ན་བསྟན་ཏེ། གཞན་གྱིས་མྱོང་བ་མ་ཡིན་ཏེ་ཞེས་དང་། མངོན་རྟོགས་བརྒྱད་དང་དྲུག་གི་ལམ་རིམ་ནི་ཐེག་པ་གཞན་ལ་མེད་པའི་ཕྱིར་རོ། །རྟོགས་རིགས་ཀྱི་དབང་དུ་བྱས་ན་ལུས་ཀྱི་སྐབས་སུ་ཡང་ཐེག་པ་གསུམ་ཆར་གྱི་ལམ་བསྟན་པས་མངོན་པར་རྟོགས་པ་མཐའ་དག་བསྡུས་པར་འཕགས་སེང་གཉིས་ཀྱི་གསུངས་པའི་དགོངས་པ་ཡང་འདི་ཡིན་ཏེ། འཆད་པར་འགྱུར་རོ། །དབུ་མ་རིགས་ཚོགས་ཀྱིས་ནི་ཐེག་པ་གསུམ་ཀའི་བྱང་ཆུབ་ཐོབ་པའི་ཐབས་སུ་གཟུགས་ནི་རང་བཞིན་གྱིས་སྐྱེ་བ་མེད་དོ་ཅེས་སོགས་ཀྱིས་དངོས་བསྟན་སྐྱེ་མེད་ཀྱི་དོན་གཏན་ལ་འབེབས་པར་བྱེད་དེ། མདོར། གཟུགས་ནས་རྣམ་མཁྱེན་གྱི་བར་སྐྱེ་མེད་དུ་གསུངས་པའི་སྒྲུབ་བྱེད། རྒྱུ་ལ་དཔྱོད་པ་རྡོ་རྗེ་གཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག གཉིས་ཀ་ལ་དཔྱོད་པ་མུ་བཞི་སྐྱེ་འགོག ངོ་བོ་ལ་དཔྱོད་པ་གཅིག་དུ་བྲལ། ཐམས་ཅད་ལ་དཔྱོད་པ་རྟེན་འབྲེལ་གྱི་རིགས་པ་རྣམས་གསུངས་པའི་ཕྱིར་རོ། །སྔོན་གྱི་མཁས་པ་རྣམས་སྦས་དོན་མངོན་རྟོགས་ཀྱི་རིམ་པ་གཏན་ལ་འབེབས་པ་དང་། དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པ་གཉིས་ཞེས་གསུངས་པ་ཡང་འདི་དང་གནད་གཅིག་ཅིང་། དོན་ལ་ཡང་གནས་ཏེ། དངོས་བརྒྱད་དོན་བདུན་ཅུ་ནང་ཚན་གྱི་དབྱེ་བ་དང་བཅས་པ་འདི་མདོའི་སྦས་དོན་ཡིན་ལ་གཟུགས་སོགས་རང་བཞིན་གྱིས་སྐྱེ་བ་མེད་པ་སོགས་ནི་མདོའི་དངོས་བསྟན་ཡིན་པའི་ཕྱིར་རོ། །བཞི་པ་ནི་སྤྱིར་རྒྱ་བོད་ཀྱི་མཁས་པ་རྣམས་ཀྱིས། མདོ་འཆད་ཚུལ་གྱི་མན་ངག་དུ་མ་སྣང་ཡང་། འདིར་སློབ་དཔོན་དབྱིག་གཉེན་གྱིས། གང་ཞིག་བདག་པས་བློ་དམན་ཞིང་། །མདོ་རྣམས་འཆད་འདོད་དེ་དག་ལ། །མན་ངག་ཅུང་ཞིག་སྦྱིན་པར་བྱ། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྙད་པར་བྱ། །མདོ་དོན་ཆེ་བ་ཉིད་ཐོས་ནས། །ལེན་པ་དང་ནི་འཛིན་པ་ལ། །ཉན་པ་པོ་དེ་གུས་བྱེད་པས། །ཐོག་མར་དགོས་པ་བརྗོད་པར་བྱ། །དགོས་པའི་དོན་ནི་བསྡུས་དོན་ལས། །བསྡུས་པའི་དོན་ནི་ཚིག་དོན་ལས། །གོ་རིམ་རིགས་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་མདོ་དོན་ཐམས་ཅད་བཤད་ཐབས་ཀྱི་མན་ངག་ལྔའི་སྒོ་ནས་བཤད་པར་བཞེད་ཅིང་། དེ་ཉིད་མགོན་པོ་བྱམས་པའི་མན་ངག་ཀྱང་ཡིན་པར་གྲགས་ཏེ། མངོན་རྟོགས་རྒྱན་གྱིས་མདོ་འཆད་པའི་ཚེ་བཤད་ཐབས་ཀྱི་མན་ངག་ལྔ་ཚང་བས་སོ་སྙམ་དུ་དགོངས་སོ། །ཇི་ལྟར་ཚང་ཞེ་ན། འདི་ལ་མི་འཐད་པའི་ལུགས་དགག བཤད་ཐབས་ཀྱི་མན་ངག་ངོས་གཟུང་། དེ་ཉིད་འཐད་པར་སྒྲུབ་པ་དང་གསུམ་ལས། དང་པོ་ནི་སྔ་རབས་པ་ཁ་ཅིག རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་མདོའི་དགོས་དོན། ལུས་རྣམ་གཞག་གིས་བསྡུས་དོན། ཡན་ལག་རྒྱས་བཤད་ཀྱིས་ཚིག་དོན། དེ་ནས་ཐམས་ཅད་ཤེས་པ་ཉིད་ཅེས་དང་། དེ་ནས་སེང་གེ་རྣམ་བསྒྱིངས་པའི། །ཞེས་སོགས་ཀྱིས་མཚམས་སྦྱར། རིགས་ཀྱིས་བརྒལ་ལན་དང་། སྒོམ་ལམ་དང་། སྲིད་ཞི་མཉམ་ཉིད་དང་། དྲི་མ་སེལ་ཚུལ་ལས་འཕྲོས་པའི་བརྒལ་ལན་རྣམས་ཀྱིས་མདོའི་བརྒལ་ལན་བསྟན་པ་ཡིན་ཞེས་བཞེད་དོ། །དེ་ལ་དགོས་དོན་གྱི་ངོས་འཛིན་དེ་མི་འཐད་དེ། རྒྱན་གྱིས་མདོ་འཆད་པའི་ཚེ་མདོའི་དགོས་དོན་འཆད་དགོས་པ་ལས། དགོས་འབྲེལ་གྱི་གཞུང་གིས་ནི་བསྟན་བཅོས་ཀྱི་དགོས་དོན་བསྟན་པའི་ཕྱིར་རོ། །མཚམས་སྦྱར་གྱི་ངོས་འཛིན་དེ་ཡང་མི་འཐད་དེ། འདིར་མཚམས་སྦྱར་ནི་གོ་རིམ་སྔ་ཕྱི་མི་འགལ་བའི་སྒྲུབ་བྱེད་བསྟན་དགོས་པ་ལས་དེ་ནས་ཞེས་པའི་ཚིག་ཙམ་གྱིས་དེ་བསྟན་མི་ནུས་པའི་ཕྱིར་རོ། །བརྒལ་ལན་གྱི་ངོས་འཛིན་དེ་ཡང་མི་འཐད་དེ། འདིར་བརྒལ་ལན་ནི་རིགས་པ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་། རིགས་པ་ནི་རྒྱུད་བླར། དེ་ལྟར་ཡིད་ཆེས་ལུང་དང་རིགས་པ་ལ་བརྟེན་ནས། །ཞེས་གསུངས་པ་ལྟར། མདོའི་དངོས་བསྟན་ལ་མེད་ཀྱང་བསྟན་བཅོས་མཁན་པོས་སྦྱར་བའི་རིགས་པ་ཡིན་ལ། སྔར་གྱི་བརྒལ་ལན་དེ་རྣམས་ནི་མདོ་ཉིད་ལས་གསུངས་པའི་བརྒལ་ལན་ཡིན་པའི་ཕྱིར་རོ། །གཉིས་པ་ནི་མདོའི་དགོས་སོགས་ཆོས་ལྔ་རྒྱན་གྱིས་སྟོན་པའི་ཚུལ་ལ་མཆོད་བརྗོད་ཀྱིས་དགོས་དོན་བསྟན། དེ་ལས་འཕྲོས་ནས་དགོས་འབྲེལ་གྱི་གཞུང་གིས་ནི་བསྟན་བཅོས་ཀྱི་དགོས་དོན་བསྟན་ཏོ། །བསྡུས་དོན་དང་ཚིག་དོན་གྱིས་བསྟན་ཚུལ་སྔར་དང་འདྲ་ཞིང་། མཚམས་སྦྱར་ནི་མཚན་ཉིད་དེ་ཡི་སྦྱོར་བ་དང་། ཞེས་སོགས་དང་། བརྒལ་ལན་ནི་ཡུལ་ནི་རྣམ་པ་གསུམ་པོ་རྒྱུ། །ཞེས་སོགས་ཀྱིས་བསྟན་ཏོ། །གསུམ་པ་ལ་ངོ་བོ་མཐུན་པས་འཐད་པ་དང་། གོ་རིམ་མཐུན་པས་འཐད་པ་གཉིས་ལས། དང་པོ་ནི། མཆོད་བརྗོད་ཀྱིས་དགོས་དོན་བསྟན་ཏེ། དགོས་དོན་ལ་མདོ་དོན་ཆེ་བ་ཉིད་ཐོས་ནས། ཞེས་སོགས་ཚིགས་བཅད་གཅིག་གི་དོན་ཚང་བ་ཅིག་དགོས་ཤིང་། མདོ་དོན་གྱི་ཆེ་བ་རང་དོན་མཁྱེན་གསུམ་གྱི་རྟོགས་པ་མཐར་ཐུག་བརྙེས་ཏེ། གཞན་དོན་རིགས་ཅན་གསུམ་ལ་ཆོས་འཁོར་བསྐོར་བ་དེ་མཆོད་བརྗོད་ཀྱིས་བསྟན་པས་མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་པོ་ཡུམ་བརྗོད་བྱར་སྟོན་པའི་གསུང་རབ་ལེན་པ་དང་འཛིན་པ་ལ་གུས་པར་བྱེད་པ་འབྱུང་བའི་ཕྱིར་རོ། །སློབ་དཔོན་གྱིས་དེ་ལ་རབ་ཏུ་དང་བས་ཀྱང་དེའི་ཡོན་ཏན་མངོན་པར་འདོད་པའི་གང་ཟག་གཉིས་ཀ་ཡང་དེ་དང་དེ་ལ་བརྟེན་པའི་གསུང་རབ་ལ་རྣམ་པ་ཐམས་ཅད་དུ་བཟུང་བ་ལ་སོགས་པའི་དོན་ཏུ་ཤིན་ཏུ་གུས་པར་བྱེད་དོ། །ཞེས་གསུངས་པ་ཡང་འདི་ལ་དགོངས་སོ། །ལུས་རྣམ་གཞག་གིས་བསྡུས་དོན་བསྟན་ཏེ། དགོས་པའི་དོན་དེ་བསྡུས་དོན་ལས་རྟོགས་དགོས་པར་གསུངས་པ་གང་ཞིག་མཆོད་བརྗོད་ཀྱི་སྐབས་སུ་བསྟན་པའི་ཤེར་ཕྱིན་དེ་ལུས་ཀྱི་སྐབས་ནས་བསྟན་པའི་མངོན་པར་རྟོགས་པ་བརྒྱད་ཀྱི་སྒོ་ནས་རྟོགས་པར་བྱ་དགོས་པའི་ཕྱིར་ཏེ། ཉིར་སྣང་དུ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་གང་ཡིན་ཞེས་བྱ་བ་འདི་ནི་བརྗོད་པར་བྱའོ་ཞེ་ན་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཞེས་གསུངས་པའི་ཕྱིར་རོ། །ཡན་ལག་རྒྱས་བཤད་ཀྱིས་ནི་ཚིག་དོན་བསྟན་ཏེ། བསྡུས་པའི་དོན་དེ་ཚིག་དོན་ལས་རྟོགས་དགོས་པར་གསུངས་ཤིང་ལུས་རྣམ་གཞག་གི་སྐབས་ནས་བསྟན་པའི་དངོས་བརྒྱད་དོན་བདུན་ཅུ་པོ་དེ་ཡན་ལག་རྒྱས་བཤད་ལས་རིམ་པ་བཞིན་དུ་རྟོགས་དགོས་པའི་ཕྱིར་ཏེ། འགྲེལ་པ་དོན་གསལ་དུ། བསྡུས་པའི་དོན་གྱི་ཚིག་ལེའུར་བྱས་པ་རྣམས་ནི། བསྟན་བཅོས་མཛད་པ་ཉིད་ཀྱིས། །སེམས་བསྐྱེད་པ་ནི་གཞན་དོན་ཕྱིར། །ཞེས་བྱ་བ་ལ་སོགས་པ་འཆད་པར་འགྱུར་བའི་བསྟན་བཅོས་མཐའ་དག་གིས་འཆད་པས་ཞེས་གསུངས་པའི་ཕྱིར་རོ། །མཚན་ཉིད་དེ་ཡི་སྦྱོར་བ་དང་། །ཞེས་སོགས་ཀྱིས་མཚམས་སྦྱར་བསྟན་ཏེ། མཚམས་སྦྱར་གྱི་དོན་ནི་གོ་རིམ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་། གཞུང་དེས་མངོན་པར་རྟོགས་པ་བརྒྱད་ཀྱི་གོ་རིམ་མི་འགལ་བའི་སྒྲུབ་བྱེད་བསྟན་པའི་ཕྱིར་རོ། །དྲུག་གི་གོ་རིམ་ལས་མ་གསུངས་སོ་སྙམ་ན་མཁྱེན་གསུམ་གྱི་ནང་ཚན་གྱི་གོ་རིམ་ལ་གཞི་ཤེས་དང་པོར་བསྟན་པའི་གོ་རིམ་ནི་མཁྱེན་གསུམ་གྱི་དོན་བསྡུ་དང་། སྐབས་བཞི་པའི་གཞུང་ལས་རྟོགས་ནུས་ཤིང་རྣམ་མཁྱེན་དང་པོར་བསྟན་པའི་གོ་རིམ་ཉིད་ཀྱང་རྣམ་མཁྱེན་གྱི་མཚམས་སྦྱོར་ཉིད་ལས་རྟོགས་ནུས་སོ། །འདིར་མཚན་ཉིད་དང་པོར་བསྟན་པའི་རྒྱུ་མཚན་ནི་ཉིར་སྣང་དུ། དང་པོར་བསྟན་པའི་ཐམས་ཅད་མཁྱེན་པ་ཉིད་གསུམ་ནི་མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་གསུངས་པས་མཁྱེན་གསུམ་མཚོན་བྱེད་ཀྱི་ཆོས་ཀྱིས་མཚོན་ནས་ཐོས་བསམ་གྱིས་གཏན་ལ་ཕབ་པར་བྱ་བ་ཡིན་པས་དང་པོར་བསྟན་པའི་ཕྱིར་སྟེ། རྩ་བར་ལས་སྒྲུབ་ཀྱི་དབང་དུ་བྱས་ནས་མཚན་ཉིད་ཅེས་དང་། འགྲེལ་པར་མཚན་ཉིད་པ་དོན་གཅིག་པའི་ཕྱིར་རོ། །མངོན་རྟོགས་གཞན་རྣམས་ཀྱང་རང་གི་མཚོན་བྱེད་ཀྱིས་མཚོན་པར་བྱ་བ་མ་ཡིན་ནམ་སྙམ་ན། ཁྱད་གཞི་མཁྱེན་གསུམ་གྱི་སྒོ་ནས་འཇོག་པས་སྐྱོན་མེད་དོ། །སྐལ་ལྡན་དག་དགའ་སྟོན་མཛོད་ཅིག ཡུལ་ནི་རྣམ་པ་གསུམ་པོ་རྒྱུ་ཞེས་སོགས་ཀྱིས་བརྒལ་ལན་བསྟན་ཏེ། བརྒལ་ལན་གྱི་དོན་ནི་རིགས་པ་སྔ་ཕྱི་མི་འགལ་བར་བསྟན་པ་ལ་གསུངས་ཤིང་གཞུང་དེས་མངོན་པར་རྟོགས་པ་བརྒྱད་དུ་བསྟན་པའི་རིགས་པ་དང་། དྲུག་ཏུ་བསྟན་པའི་རིགས་པ་གཉིས་མི་འགལ་བར་བསྟན་པའི་ཕྱིར་ཏེ། མངོན་པར་རྟོགས་པ་བརྒྱད་པོ་དེ་ཡང་བསྡུ་ན་ཡུལ་དང་། སྦྱོར་བ་དང་། འབྲས་བུ་གསུམ་དུ་འདུས་པས་བརྒྱད་ཀྱི་སྐབས་སུ་ཡུལ་ལ་གསུམ་དུ་ཕྱེ་ནས་བསྟན། དྲུག་གི་སྐབས་སུ་ཡུལ་གཅིག་ཏུ་བསྡུས་པ་ཙམ་ཡིན་པས་མི་འགལ་ཞེས་བསྟན་པའི་ཕྱིར་རོ། །རིགས་པའི་དོན་མདོའི་དངོས་བསྟན་ལ་མེད་ཀྱང་བསྟན་བཅོས་རྩོམ་པ་པོ་ཉིད་ཀྱིས་སྦས་དོན་སྦྱར་བ་ལ་འཇོག་དགོས་པ་ནི་རྒྱུད་བླར་ཤེས་སོ། །གཉིས་པ་གོ་རིམ་མཐུན་པ་ནི་དེ་ལྟར་བྱས་ན། དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་དབྱིག་གཉེན་རང་ཉིད་ཀྱིས་གསུངས་པའི་གོ་རིམ་དེ་མངོན་པར་རྟོགས་པའི་རྒྱན་ལས་རྙེད་པར་ཤེས་པར་འགྱུར་བས་འདི་ལས་འོས་མེད་དོ། །ལྔ་པ་དགོངས་འགྲེལ་གྱི་བསྟན་བཅོས་ཇི་ལྟར་བྱུང་བའི་ཚུལ་ནི། ཐོག་མར་འཕགས་པ་ཐོགས་མེད་ཀྱིས་མ་ཕམ་པ་ལས་མདོ་དང་བསྟན་བཅོས་དངོས་སུ་གསན་པ་ལ་བརྟེན་ནས་དེ་ཉིད་རྣམ་ངེས་མཛད་དོ། །དེའི་རྗེས་སུ་སློབ་དཔོན་དབྱིག་གཉེན་གྱིས་སེམས་ཙམ་གྱི་གྲུབ་མཐའ་ལ་བརྟེན་ནས་ཉི་ཁྲི་གཞུང་འགྲེལ་མཛད་ལ། དེ་ཉིད་བོད་དུ་མ་འགྱུར་རོ། །ཁ་ཅིག་དབྱིག་གཉེན་གྱིས་མཛད་པའི་ཡུམ་གསུམ་གནོད་འཇོམས་འདི་ཉི་ཁྲི་གཞུང་འགྲེལ་ཡིན་པར་འདོད་དེ། ལོ་ཆེན་གྱི་ཞལ་ནས་པཎྜི་ཏ་འགའ་ཞིག་ང་ལ་གཞུང་འགྲེལ་ཡོད་ཟེར་ནས་བལྟས་པས། འབུམ་ཊཱིཀ་ཏུ་སོང་ནས། འདི་འབུམ་ཊཱིཀ་ཡིན་བྱས་པས་དེ་ག་གཞུང་འགྲེལ་ཡིན་ཟེར་རོ། །དེའི་རྗེས་སུ་འཕགས་པ་གྲོལ་སྡེས་དབུ་མའི་གྲུབ་མཐའ་དང་སྦྱར་བ་ཉི་ཁྲི་སྣང་བ་མཛད། དེའི་འོག་ཏུ་བཙུན་པ་གྲོལ་སྡེས་ཉི་ཁྲི་དང་སྦྱར་བའི་ཉི་ཁྲི་རྣམ་འགྲེལ་མཛད་དོ། །དེའི་འོག་ཏུ་སློབ་དཔོན་གྱིས་ཉི་ཁྲི་སྣང་བ་ལ་བརྟེན་ནས་ཐོག་མར་ཉི་ཁྲིའི་རྒྱན་དུ་གཟིགས་ཏེ་ཉི་ཁྲི་དང་སྦྱར་བའི་ལེའུ་བརྒྱད་མ་མཛད། དེའི་འོག་ཏུ་བརྒྱད་སྟོང་པའི་རྒྱན་དུ་གཟིགས་ཏེ། བརྒྱད་སྟོང་འགྲེལ་ཆེན་མཛད། དེའི་འོག་ཏུ་ཡུམ་གསུམ་ཆར་གྱི་རྒྱན་དུ་གཟིགས་ཏེ། ཡུམ་གསུམ་གྱི་ལུང་ཁུངས་ཙམ་དང་སྦྱར་ཞིང་རང་གི་འདོད་པ་མདོར་བསྡུས་ཏེ་སྟོན་པ་འགྲེལ་ཆུང་དོན་གསལ་མཛད་དོ། །འདི་གསུམ་བརྩམས་པའི་གོ་རིམ་ནི་པཎྜི་ཏ་དག་གིས་རྣམ་གཞག་གཞན་དུ་འཆད་པ་མང་ཡང་། ཉི་ཁྲི་སྣང་བ་གཞིར་གཞག་པ་ན་དེ་དང་མཐུན་པ་དང་། ཕལ་ཆེར་མཐུན་པ་དང་། ཕལ་ཆེར་མི་མཐུན་པར་འདུག་པས་རང་གི་གྲུབ་མཐའ་ལོགས་སུ་འཇོག་མི་ནུས་པ་དང་། ཅུང་ཟད་འཇོག་ནུས་པ་དང་། རང་ཁོ་ནའི་འདོད་པ་ལ་གཙོ་བོར་བྱེད་པའི་སྐབས་ཏེ། ཤེས་རབ་སྐྱེ་བའི་གོ་རིམ་དང་བསྟུན་ན་དེ་ལྟར་རིགས་སོ། །ཞེས་འབུམ་པ་འཆད་དོ། །སྡུད་འགྲེལ་གསར་མ་ནི་བལ་པོ་ལོ་ཙཱ་དང་། པུཎྱཱ་ཤྲཱི་ནི་འགྲེལ་ཆེན་དང་སྒྲས་སྒྲོས་མཐུན་པས་སློབ་དཔོན་གྱིས་མཛད་པ་ཡིན་གསུངས་ཤིང་། འབུམ་པ་དང་། མ་ཧཱ་ནི་སྒྲས་སྒྲོོས་མི་མཐུན་པས་མ་ཡིན་པར་མཛད། འབྲེས་ནི་སློབ་དཔོན་གྱིས་འགྲེལ་པ་བརྩམས་ལུགས་དང་མཐུན་པས་སློབ་མ་རྗེས་འབྲང་ཞིག་གིས་མཛད་པ་ཡིན་གསུང་། དེའི་རྗེས་སུ་སངས་རྒྱས་ཡེ་ཤེས་ཞབས་ཀྱིས་མདོ་སྡུད་པའི་འགྲེལ་པ་མཛད་དོ། །དེའི་རྗེས་སུ་ཤཱནྟི་པས་ཉི་ཁྲི་དང་སྦྱར་བའི་འགྲེལ་པ་དག་ལྡན། བརྒྱད་སྟོང་པ་དང་སྦྱར་བའི་སྙིང་པོ་མཆོག ཤེར་ཕྱིན་གྱི་མན་ངག་སྟེ་གསུམ་མཛད། འདི་སློབ་དཔོན་ལ་འགྲན་རྙོག་པའི་པཎྜི་ཏ་ཡིན་པས་ཉི་ཁྲི་ལེའུ་བརྒྱད་མ་མ་དག་པ་དང་། བརྒྱད་སྟོང་འགྲེལ་ཆེན་ལ་སྙིང་པོ་མེད་པ་དང་། འགྲེལ་ཆུང་ལ་མན་ངག་མེད་པ་ཡིན་ཞེས་ཟུར་ཟ་བར་གྲགས་སོ། །ཡང་སློབ་དཔོན་གྱི་འགྲེལ་ཆུང་ལ། གསེར་གླིང་པ་དང་། ཤེར་འབྱུང་བློ་གྲོས་དང་། ཀུ་ལེནྟ་དང་། རཏྣ་ཀཱིརྟི་རྣམས་ཀྱིས་འགྲེལ་བཤད་མཛད་དོ། །དེའི་འོག་ཏུ་ཨ་བྷ་ཡ་ཀ་རས་བརྒྱད་སྟོང་པ་དང་སྦྱར་བའི་གནད་ཀྱི་ཟླ་འོད་དང་། བུདྡྷ་ཤྲཱིས་ཤེས་རབ་སྒྲོན་མའི་ཕྲེང་བ་རྣམས་མཛད་དོ། །

སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པ།

བཞི་པ་སྐབས་སུ་བབ་པ་བསྟན་བཅོས་ཀྱི་དོན་དངོས་ལ་འཇུག་པ་ལ་གསུམ་སྟེ། བརྗོད་བྱ་ཤེར་ཕྱིན་ལ་འཇུག་པའི་ཡན་ལག་མཆོད་བརྗོད། རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འགྲེལ། བསྟན་བཅོས་ཀྱི་བརྗོད་བྱ་མངོན་རྟོགས་བཤད་པའོ། །དང་པོ་ནི་ཉན་ཐོས་ཞི་བ་ཚོལ་རྣམས་ཞེས་སོགས་ཏེ། འདི་ལ་གསུམ་སྟེ། འཕགས་པས་ཇི་ལྟར་ཕྱེ་བའི་ཚུལ། སློབ་དཔོན་གྱིས་ཇི་ལྟར་བཀྲལ་བའི་ཚུལ། གནད་ཀྱི་དོན་ངོས་གཟུང་བའོ། །དང་པོ་ནི། ཉིར་སྣང་དུ། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས་ཐམས་ཅད་མཁྱེན་པ་ཉིད་གསུམ་གྱི་ཐུན་མོང་མ་ཡིན་པའི་ཡོན་ཏན་ཉེ་བར་དགོད་པ་སྔོན་དུ་འགྲོ་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །ཞེས་བརྗོད་པ་འདི་ནི་དེའི་མངོན་པར་རྟོགས་པའི་རྒྱན་གྱི་མན་ངག་བཤད་སྦྱར་དུ་བྱའོ་སྙམ་པས་རྣམ་པར་དགྲོལ་བར་བྱའོ་ཞེས་མངོན་པར་རྟོགས་པའི་རྒྱན་གྱི་བཤད་པ་འདི་སྦྱར་བར་དམ་བཅས་པ་ཡིན་ནོ། །ཅིའི་དོན་དུ་ཞེ་ན། རྣམ་པ་ཐམས་ཅད་མཁྱེན་ཉིད་ལམ་ཞེས་པ་ནས་བྱ་བ་རྩོམ་པའི་དགོས་པ་ཡིན། ཞེས་དེ་ལྟར་ཕྱག་འཚལ་བ་ཉེ་བར་བཀོད་པའི་ཚིགས་སུ་བཅད་པས་ཡང་དག་པར་མཚོན་པའི་དོན་འདི་ཡོད་པ་ཡིན་ནོ། །ཞེས་གསུངས་པ་ཡིན་ནོ། །ཅི་མངོན་པར་རྟོགས་པའི་རྒྱན་གཞི་བསྡུས་པས་སམ། འོན་ཏེ་གཉེན་པོ་བསྡུས་པས་སམ། དེ་སྟེ་རྣམ་པ་བསྡུས་པས་རྒྱན་དུ་བྱེད་པ་ཡིན་ཞེས་བྱ་བ་འདི་བརྗོད་པར་བྱ་བ་ཡིན་ནོ། །དེ་ལས་ཀྱང་ཅིར་འགྱུར་ཞེ་ན། ཕྱོགས་དང་པོ་ལྟར་ན་ནི་འབད་པ་དོན་མེད་པ་ཡིན་ནོ། །ཞེས་སོགས་གསུངས་སོ། །འདི་ལ་དངོས་བསྟན། ཤུགས་བསྟན། འཕྲོས་དོན་གསུམ་ལས། དང་པོ་ནི་འཕགས་པའི་གང་ཟག་ཅེས་སོགས་ཏེ། མཆོད་བརྗོད་ཀྱི་ཚིག་རྐང་དང་པོ་གསུམ་པོས་མཁྱེན་གསུམ་གྱི་ཐུན་མོང་མ་ཡིན་པའི་ཡོན་ཏན་བརྗོད་ཅིང་། བཞི་པས་དེ་སྔོན་དུ་འགྲོ་བས་ཤེར་ཕྱིན་ལ་ཕྱག་འཚལ་བ་ནི་དངོས་བསྟན་ནོ། །གཉིས་པ་ནི་དེའི་མངོན་པར་རྟོགས་པའི་རྒྱན་གྱི་ཞེས་སོགས་ཏེ། ཤེར་ཕྱིན་དེའི་མངོན་པར་རྟོགས་པའི་རྒྱན་བརྩམ་པར་དམ་བཅས་པ་ནི་ཤུགས་བསྟན་ནོ། །གསུམ་པ་ལ། ཤུགས་བསྟན་ལས་འཕྲོས་ནས་དགོས་པ་གང་ཡིན། བརྗོད་བྱ་གང་ཞིག་བསྡུས་པས་རྒྱན་དུ་བྱེད་ཅེ་ན། དང་པོའི་ལན་དུ་དགོས་འབྲེལ་གྱི་གཞུང་འདོན། གཉིས་པ་ལ་བསྟན་བཅོས་ཀྱི་བརྗོད་བྱ་ལ་གཞི་གཉེན་རྣམ་གསུམ་གང་རུང་དུ་ངེས་པས་གཞི་ཁོ་ན་བརྗོད་བྱར་བསྡུས་པས་མངོན་པར་རྟོགས་པའི་རྒྱན་དུ་བྱེད་དམ། གཉེན་པོ་ཁོ་ན་བརྗོད་བྱར་བསྡུས་པས་སམ། རྣམ་པ་ཁོ་ན་བརྗོད་བྱར་བསྡུས་པས་རྒྱན་དུ་བྱེད། གསུམ་ག་ལ་ཕྱོགས་དང་པོ་ལྟར་ན་ནི་ཞེས་སོགས་ཀྱི་སྐྱོན་གནས་སོ་ཞེས་པ་ནི་བརྒལ་བ་ཡིན་ལ། གཞི་གཉེན་རྣམ་པའི་ཕྱོགས་གསུམ་ཆར་བརྗོད་བྱར་བསྡུས་པས་སྐྱོན་མེད་ཅེས་པ་ནི་ལན་ནོ། །གང་དག་ཉིར་སྣང་དང་འགྲེལ་ཆེན་གཉིས་ལས། བརྒལ་ལན་གྱི་གཞུང་འདི་རྣམས་དགོས་འབྲེལ་གྱི་འོག་ཏུ་འབྱུང་བས་དགོས་འབྲེལ་གྱི་འགྲེལ་པ་ཡིན་ཞེས་སྨྲ་བ་ནི་འདི་འདྲ་བའི་འཆད་ཚུལ་མ་ཤེས་པའི་སྐྱོན་ནོ། །གཉིས་པ་སློབ་དཔོན་གྱིས་ཇི་ལྟར་བཀྲལ་པའི་ཚུལ་ནི་རྒྱན་གྱིས་མདོ་འཆད་པའི་ཚེ་ན་ཡང་བཤད་ཐབས་ཀྱི་མན་ངག་ལྔ་ཚང་ཞིང་དེ་ལ་བརྟེན་ནས་སློབ་དཔོན་དབྱིག་གཉེན་གྱིས་ཀྱང་མདོ་དོན་འཆད་པ་ལ་བཤད་ཐབས་ཀྱི་མན་ངག་ལྔ་གསུངས་པའི་རྗེས་སུ་འབྲངས་ནས་སློབ་དཔོན་གྱིས་ཀྱང་མངོན་པར་རྟོགས་པའི་རྒྱན་བཤད་ཐབས་ཀྱི་མན་ངག་ལྔའི་སྒོ་ནས་བཤད་པར་བཞེད་པ་ལས། ཐོག་མར་མཆོད་བརྗོད་ལ་ལྔ་ཆར་སྦྱར་ནས། དགོས་འགྲེལ་མན་ཆེད་ལ་མཚམས་སྦྱར་དང་། ཚིག་དོན་ཙམ་ཞིག་སྦྱར་ཞིང་། སྐབས་འགའ་ཞིག་ཏུ་བརྒལ་ལན་སྦྱར་བ་ཡང་ཡོད་དོ། །དེ་ལ་གཞོན་ནུ་ཚུལ་ཁྲིམས་ཀྱིས་འཕགས་པ་བྱམས་པ་ཞེས་སོགས་ཀྱིས་མཆོད་བརྗོད་ཀྱི་གླེང་བསླང་བར་བྱས་ནས་རྩ་བའི་ངག་ལ་རང་ཉིད་ཀྱིས་བཤད་ཐབས་ཀྱི་མན་ངག་ལྔ་སྦྱར་བ་ནི་མི་འཐད་དེ། སློབ་དཔོན་ཉིད་ཀྱི་འགྲེལ་པ་ལ་བཤད་ཐབས་ཀྱི་མན་ངག་ལྔ་ངོས་གཟུང་དགོས་པའི་ཕྱིར་རོ། །དེས་ན་དགོས་པའི་དབང་གིས་མཚམས་སྦྱར་ཐོག་མར་སྨོས་པ་ནི་འཕགས་པ་བྱམས་པ་རང་ཉིད་ཅེས་སོགས་ཏེ། མཚམས་སྦྱར་སྔ་འགྲེལ་དུ་བཀོད་པ་ནི་འགྲེལ་པ་འདིའི་ལུགས་ཡིན་པའི་ཕྱིར་དང་། མཚམས་སྦྱར་གྱི་དོན་གོ་རིམ་སྔ་ཕྱི་མི་འགལ་བར་བསྟན་པ་ལ་འཆད་དགོས་ཤིང་། གཞུང་འདིས་བསྟན་བཅོས་ཀྱི་གོ་རིམ་ལ་མཆོད་བརྗོད་དང་པོར་བསྟན་པའི་དགོས་པ་བཤད་པའི་ཕྱིར་ཏེ། རེ་ཞིག་དང་པོར་ཡུམ་ལ་ཡོན་ཏན་ཇི་ལྟ་བ་བཞིན་དུ་བརྗོད་པ་སྔོན་དུ་འགྲོ་བ་ཅན་གྱི་ཞེས་སོགས་བཤད་པའི་ཕྱིར་རོ། །ཡན་ལག་ཕྱི་མ་བཞི་ལ་སྔོན་གྱི་མཁས་པ་ཕལ་ཆེར་ཚིགས་སུ་བཅད་པ་འདིས་ནི་ཞེས་སོགས་ཀྱིས་དགོས་དོན། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་བསྡུས་དོན། ཉན་ཐོས་དང་དེའི་ཕྱོགས་སུ་བསླན་པ་ཞེས་སོགས་ཀྱིས་ཚིག་དོན། དེ་ལྟར་ཕྱག་འཚལ་བ་དང་ཞེས་སོགས་ཀྱིས་བརྒལ་ལན་བསྟན་པར་བཞེད་དོ། །ཊཱཱི་ཀར། ཚིགས་སུ་བཅད་པ་འདིས་ནི་ཞེས་སོགས་ཀྱིས་བསྡུས་དོན། དེ་ཐོས་ནས་ཞེས་སོགས་ཀྱིས་དགོས་དོན། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་ཡུམ་ལ་བསྟོད་པའི་རྒྱུ་མཚན་བསྟན་ཅིང་ལྷག་མ་གཉིས་སྔར་བཤད་པ་དང་འདྲ་བར་བཞེད་དོ། །ཁ་ཅིག་བསྡུས་དོན་དགོས་དོན་ཚིག་དོན་གསུམ་དེ་དང་འདྲ་བ་ལས། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ཀྱིས་བརྒལ་ལན་བསྟན་ཅིང་དེ་ལྟར་ཕྱག་འཚལ་བ་དང་ཞེས་སོགས་དགོས་འབྲེལ་གྱི་མཚམས་སྦྱར་ལ་སྦྱོར་བར་སྨྲའོ། །དེ་ནི་མི་རིགས་ཏེ། གོ་རིམ་དང་མི་མཐུན་པ་དང་། ཚིག་སྦྱོར་དང་མི་མཐུན་པ་དང་། བརྒལ་ལན་གོ་ལོག་པའི་སྐྱོན་དང་གསུམ་ལས། དང་པོ་ནི། མཚམས་སྦྱར་ཐོག་མར་སྨོས་པ་ལ་ནི་དགོས་པ་ཡོད་ཅིང་། གཞན་བཞི་པོ་གོ་རིམ་དཀྲུགས་པ་ལ་དགོས་པ་མེད་པས་བསྡུས་དོན་ཐོག་མར་སྨོས་ན། དབྱིག་གཉེན་གྱིས་གསུངས་པའི་གོ་རིམ་དང་མི་མཐུན་པའི་སྐྱོན་གནས་སོ། །གཉིས་པ་ནི་འདིར་བཤད་ཐབས་ཀྱི་མན་ངག་ཕྱི་མ་བཞི་པོ་རེ་རེའི་མཇུག་ཏུ་རྫོགས་ཚིག་རེ་འབྱུང་བ་ལས་ཕུལ་དུ་བྱུང་བ་དང་ལྡན་པར་བརྗོད་དོ། །ཅེས་པའི་ཚིག་དེ་འོག་མ་འདྲེན་པའི་ཚིག་ཡིན་གྱི་རྫོགས་ཚིག་མ་ཡིན་པས་ཡན་ལག་ལོགས་སུ་སྟོན་པ་སློབ་དཔོན་གྱི་དགོངས་པ་མ་ཡིན་ནོ། །གསུམ་པ་ནི། དེ་ལ་ཐམས་ཅད་མཁྱེན་པ་ཉིད་གསུམ་གྱིས་ནི་ཞེས་སོགས་ལ་བརྒལ་ལན་གྱི་དོན་མི་གནས་ཤིང་། དེ་ལྟར་ཕྱག་འཚལ་བ་དང་ཞེས་སོགས་དགོས་འགྲེལ་གྱི་མཚམས་སྦྱར་ཡིན་པ་གོང་དུ་བཀག་ཟིན་པས་མཆོད་བརྗོད་ཀྱི་བརྒལ་ལན་ལས་འོས་མེད་པས་བཟློག་སྟེ་སྨྲ་བ་མི་འཐད་དོ། །གལ་ཏེ་བརྒལ་ལན་གྱི་དོན་གནས་ཏེ་མཆོད་བརྗོད་ཀྱི་སྐབས་སུ་མཁྱེན་གསུམ་ལ་བསྟོད་ནས་ལུས་ཀྱི་སྐབས་སུ་མངོན་པར་རྟོགས་པ་བརྒྱད་བརྗོད་བྱར་བྱས་པ་ལ་རྒོལ་བའི་སྐྱོན་སྤོང་བའི་ཕྱིར་རོ་ཞེ་ན། དེ་ཡང་མི་འཐད་དེ། སྐབས་འདིའི་བརྒལ་ལན་ནི་མཆོད་བརྗོད་ཁོ་ནའི་བརྒལ་ལན་དུ་འགྱུར་བ་ཅིག་དགོས་པ་ལས། དེ་ནི་མཆོད་བརྗོད་དང་། ལུས་གཉིས་ཆར་གྱི་བརྒལ་ལན་དུ་སོང་འདུག་པའི་ཕྱིར་དང་། གཞུང་གཞན་རྣམས་ཀྱི་ཐོག་མར་ཡང་དེ་དང་ཆ་འདྲ་བའི་དོགས་པ་རེ་བསླད་དུ་ཡོད་པས་བརྒལ་ལན་ཐུག་མེད་དུ་ཐལ་བའི་ཕྱིར་རོ། །དེས་ན་སློབ་དཔོན་གྱི་དགོངས་པ་ནི་ལུགས་དང་པོ་ཉིད་ཡིན་པས། འདི་ལ་ཡན་ལག་ངོས་གཟུང་བ་དང་། དཀའ་བའི་གནས་ལ་དཔྱད་པ་གཉིས་ལས། དང་པོ་ནི། ཚིགས་སུ་བཅད་པ་འདིས་ནི་ཞེས་སོགས་ཀྱིས་དགོས་དོན་བསྟན་ཏེ། དེ་ཐོས་ནས་ཞེས་པ་ཡན་ཆད་ཀྱིས་མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་ཀ་དང་བ་སྐྱེ་བའི་དམིགས་རྐྱེན་བསྟན་ནས་དེ་མན་ཆད་ཀྱིས་དང་བ་སྐྱེ་ཚུལ་སོ་སོར་བསྟན་པའི་ཕྱིར་རོ། །དེ་ལ་ཐམས་ཅད་མཁྱེན་པ་ཉིད་གསུམ་གྱི་ཞེས་སོགས་ཀྱིས་བསྡུས་དོན་བསྟན་ཏེ། དགོས་པའི་དོན་བསྡུས་དོན་ལས་རྟོགས་པར་གསུངས་ཤིང་། གང་ཟག་གཉིས་པོ་དང་བ་ལ་བརྟེན་ནས་ཡུམ་ལ་འཇུག་དགོས་ན་ཡུམ་ཇི་ལྟ་བུ་ལ་འཇུག་སྙམ་ན་མངོན་པར་རྟོགས་པ་བརྒྱད་བསྡུས་པར་བྱེད་པའི་མཁྱེན་གསུམ་ལ་འཇུག་དགོས་ཞེས་བསྟན་པའི་ཕྱིར་རོ། །ཉན་ཐོས་ཞེས་སོགས་ཀྱིས་ཚིག་དོན་བསྟན་པའི་ཚུལ་ལ་ནི་གོ་སླ་བར་ཟད་དོ། །དེ་ལྟར་ཕྱག་འཚལ་བ་དང་ཞེས་སོགས་ཀྱིས་བརྒལ་ལན་བསྟན་ཏེ། འདི་ནི་སྔོན་གྱི་མཁས་པ་ཕལ་ཆེར་ཡང་བཞེད་ཅིང་། མཁས་གྲུབ་གཡག་གི་བཞེད་པ་ཡང་ཡིན་ནོ། །གཉིས་པ་དཀའ་བའི་གནས་ལ་དཔྱད་པ་ལ་གསུམ་སྟེ། གསུམ་གྱིས་བརྒྱད་བསྡུས་ཚུལ་དང་། བརྒལ་བ་དང་ལན་གྱི་ཚུལ་དང་། ལམ་ཤེས་ཀྱི་མདོ་ལ་དཔྱད་པའོ། །དང་པོ་ནི། རྔོག་ལོ་ཆེན་པོས་མཁྱེན་གསུམ་རྒྱ་ཆེ་བའམ་ཐུན་མོང་བ་ཡིན་ཞིང་སྦྱོར་བཞི་དང་ཆོས་སྐུ་རྒྱ་ཆུང་བའམ་ཐུན་མོང་མ་ཡིན་པ་ཡིན་པས། རྒྱ་ཆེ་བས་རྒྱ་ཆུང་བ་བསྡུས་པའམ། ཐུན་མོང་བས་ཐུན་མོང་མ་ཡིན་པ་བསྡུས་པའི་ཚུལ་གྱིས་བསྡུས་ཞེས་བཞེད། འབྲེ་ཆེན་པོས་དེ་བཀག་ནས། མཁྱེན་གསུམ་རང་བཞིན་དང་། སྦྱོར་བཞི་དང་ཆོས་སྐུ་གནས་སྐབས་ཡིན་པས་རང་བཞིན་གྱིས་གནས་སྐབས་བསྡུས་པའི་ཚུལ་གྱིས་བསྡུས་སོ་ཞེས་བཞེད། ཨར་གྱིས་དེ་བཀག་ནས་མཁྱེན་གསུམ་མཚོན་བྱེད་ཀྱི་ཆོས་སུམ་ཅུ་པོ་དེ་སྡུད་བྱེད་ཀྱི་མཁྱེན་གསུམ་ཡིན་པས། དེས་སྦྱོར་བཞི་དང་ཆོས་སྐུ་བསྡུས་པར་བཞེད། གཞོན་ནུ་ཚུལ་ཁྲིམས་ཀྱིས་དེ་བཀག་ནས་འབྲེའི་བཞེད་པ་རང་ལུགས་སུ་མཛད། ཤེས་བྱ་ཀུན་རིག་གི་ཞལ་སྔ་ནས་འཕགས་བཞིའི་མངོན་རྟོགས་ལ་མཁྱེན་གསུམ་དུ་བཞག་པ་ནི་མཁྱེན་གསུམ་སྤྱིས་བསྡུས། སྦྱོར་བཞི་ལམ་ཤེས་ཀྱིས་བསྡུས། ཆོས་སྐུ་རྣམ་མཁྱེན་གྱིས་བསྡུས་ཞེས་གསུང་ངོ་། །དེ་རྣམས་ཀྱི་ནང་ནས་འབྲེའི་བཞེད་པ་ལ་གསུམ་གྱིས་བརྒྱད་བསྡུས་པར་མ་སོང་བར་ལྔ་བསྡུས་པར་སོང་བས་སྐྱོན་དང་བཅས་པ་ཡིན་ཀྱང་རང་བཞིན་གྱིས་གནས་སྐབས་བསྡུས་པ་ལ་ནི་དོན་ལ་གནས་པའི་ཆ་ཤས་ཡོད་ཅིང་རྒྱ་ཆེ་བས་རྒྱ་ཆུང་བ་བསྡུས་པ་ལ་ནི་དེ་དང་འདྲའོ། །སློབ་དཔོན་གྱི་དགོངས་པ་ནི་འདི་ཡིན་ཏེ། མཆོད་བརྗོད་ཀྱི་ཚིག་རྐང་དང་པོ་གསུམ་གྱིས་བསྟན་པའི་མཁྱེན་གསུམ་ནི་སྡུད་བྱེད་ཀྱི་མཁྱེན་གསུམ་དང་། ལུས་ཀྱི་མངོན་རྟོགས་བརྒྱད་པོ་བསྡུ་བྱར་འཇོག་པ་ནི་སྐབས་ཀྱི་དོན་ཡིན་པས་སྡུད་བྱེད་དེས་ལུས་ཀྱི་མཁྱེན་གསུམ་མཚན་ཉིད་ཀྱི་སྒོ་ནས་བསྡུས་ཏེ། ལུས་ཀྱི་མཁྱེན་གསུམ་དེ་ཐོས་བསམ་གྱིས་གཏན་ལ་འབེབས་པའི་ལྡོག་པ་ནས་བསྟན་པས་ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་པའི་ཕྱིར་རོ། །རྣམ་རྫོགས་སྦྱོར་བ་ནི་སྦྱོར་བའི་སྒོ་ནས་བསྡུས་ཏེ། རྣམ་རྫོགས་སྦྱོར་བ་དེ་མཁྱེན་གསུམ་གྱི་རྣམ་པ་སྒོམ་པའི་སྦྱོར་བ་ཡིན་པའི་ཕྱིར་རོ། །རྩེ་སྦྱོར་རབ་ཀྱི་སྒོ་ནས་བསྡུས་སྟེ། རྩེ་སྦྱོར་དེ་མཁྱེན་གསུམ་གྱི་སྦྱོར་བ་རབ་ཏུ་གྱུར་པའི་གནས་སྐབས་ཡིན་པའི་ཕྱིར་རོ། །མཐར་གྱིས་པ་གོ་རིམ་གྱི་སྒོ་ནས་བསྡུས་ཏེ། མཐར་གྱིས་པ་དེ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པའི་གནས་སྐབས་ཡིན་པའི་ཕྱིར་རོ། །སྐད་ཅིག་མ་མཐར་ཐུག་པའི་སྒོ་ནས་བསྡུས་ཏེ། སྐད་ཅིག་མ་དེ་མཁྱེན་གསུམ་གྱི་སྦྱོར་བ་མཐར་ཐུག་པའི་གནས་སྐབས་ཡིན་པའི་ཕྱིར་རོ། །ཆོས་སྐུ་རྣམ་སྨིན་གྱི་སྒོ་ནས་བསྡུས་ཏེ། ཆོས་སྐུ་དེ་མཁྱེན་གསུམ་གྱི་སྦྱོར་བ་སྒོམ་པའི་རྣམ་སྨིན་མཐར་ཐུག་ཡིན་པའི་ཕྱིར། བསྡུས་ཚུལ་གཞན་རྣམས་ནི་སྡུད་བྱེད་ཀྱི་མཁྱེན་གསུམ་དེས་མངོན་རྟོགས་དང་པོ་གསུམ་པོ་སོ་སོར་བསྡུས་ཤིང་། རྣམ་རྫོགས་སྦྱོར་བ་མན་ཆད་རེ་རེ་ཡང་མཁྱེན་པ་གསུམ་ཆར་གྱིས་བསྡུས་དགོས་པའི་གནད་མ་རྟོགས་པའི་ཅལ་ཅོལ་དུ་སྣང་ངོ་། །འདི་སློབ་དཔོན་གྱི་དགོངས་པ་འཆད་པའི་སྐབས་ཡིན་ལ། མཚན་ཉིད་དེ་ཡི་སྦྱོར་བ་དང་། །ཞེས་སོགས་ཀྱི་འགྲེལ་པར་ཐམས་ཅད་མཁྱེན་པ་ཉིད་གསུམ་གྱི་སྦྱོར་བ་ཡིན་ནོ་ཞེས་པ་ནས་ཐམས་ཅད་མཁྱེན་པ་ཉིད་གསུམ་གྱི་རྣམ་པར་སྨིན་པ་ཡིན་ནོ། །ཞེས་པའི་བར་གྱི་འགྲེལ་པ་དེ་མཐོང་ན་སློབ་དཔོན་གྱི་དགོངས་པ་ཡིན་མིན་གྱི་རྩོད་པ་མི་འབྱུང་ངོ་། །ཕྱི་མ་ཁ་ཅིག གསུམ་གྱིས་བརྒྱད་བསྡུས་པའི་ཤེས་བྱེད་དུ་གསུམ་ལ་བསྟོད་པར་བཞེད་ནས་བརྒྱད་ལ་བསྟོད་པར་མི་བཞེད་པའི་གང་ཟག་མི་སྲིད་པའི་ཕྱིར་རོ། །ཞེས་སྨྲ་བ་ནི། གསེར་གྱི་ཨ་ལོང་དང་ཆོས་མཚུངས་ཏེ་གསུམ་ལ་བསྟོད་པས་བརྒྱད་ལ་བསྟོད་པར་འགྱུར་བའི་ཤེས་བྱེད་དུ་གསུམ་གྱིས་བརྒྱད་བསྡུས་པ་བཀོད་ནས་སླར་ཡང་དེའི་ཤེས་བྱེད་དུ་གསུམ་ལ་བསྟོད་པས་བརྒྱད་ལ་བསྟོད་པ་བཀོད་འདུག་པས་ཟད་རྒྱུ་མི་འདུག་པའི་ཕྱིར་རོ། །གཉིས་པ་བརྒལ་ལན་གྱི་ཚུལ་ལ་དཔྱད་པ་ནི་ཁ་ཅིག མཁྱེན་གསུམ་བརྗོད་བྱར་བྱས་པའི་བསྟན་བཅོས་རྩོམ་ན་ཞེས་པ་དང་། གཞན་དག་དེ་བཀག་ནས་མཁྱེན་གསུམ་བརྗོད་བྱར་བྱས་པར་ཡིད་དཔྱོད་ཀྱིས་ངེས་པའི་གང་ཟག་གིས་མཁྱེན་གསུམ་བརྗོད་བྱར་བྱས་པའི་རྒྱན་རྩོམ་ན་ཞེས་སོགས་ཀྱིས་འཕྲོས་བྱེད་པ་ནི་མི་འཐད་དེ། ཉིར་སྣང་དུ། མཆོད་བརྗོད་ཀྱི་ཤུགས་ལ་མཁྱེན་གསུམ་གྱི་རྒྱན་རྩོམ་པར་དམ་བཅས་པར་གསུང་གི་བརྗོད་བྱར་བྱས་པའི་རྒྱན་རྩོམ་པར་དམ་བཅས་པར་མ་གསུང་བའི་ཕྱིར་དང་། གལ་ཏེ་གསུངས་ན་གཞི་ཁོ་ན་བརྗོད་བྱར་བྱེད་དམ་ཞེས་སོགས་ཀྱི་དོགས་པ་སྐྱེ་བའི་དོན་མེད་པའི་ཕྱིར་རོ། །ཁ་ཅིག་གཞི་ཁོ་ན་བརྗོད་བྱར་བསྡུས་པའི་སྒོ་ནས་གཞི་ཤེས་ཀྱི་རྒྱན་དུ་བྱེད་དམ་ཞེས་སོགས་ཀྱི་དོགས་པ་གསུམ་བཀོད་པ་ཡང་མི་འཐད་དེ། མཆོད་བརྗོད་ཀྱི་སྐབས་སུ་མཁྱེན་གསུམ་གྱི་རྒྱན་རྩོམ་པར་དམ་བཅས་བཞིན་དུ་མཁྱེན་གསུམ་རེ་རེ་བ་ཁོ་ནའི་རྒྱན་དུ་བྱེད་དམ་ཞེས་དོགས་པ་སྐྱེ་ན་ཧ་ཅང་ཐལ་བའི་ཕྱིར་རོ། །འཐད་པའི་ཕྱོགས་ངོས་གཟུང་བ་ལ་གང་ལ་རྩོད་པའི་ཡུལ། གང་གིས་རྩོད་པའི་གང་ཟག ཇི་ལྟར་རྩོད་པའི་ཚུལ། ལན་གྱི་དོན་ངོས་གཟུང་བ་དང་བཞི་ལས། དང་པོ་ནི་མཆོད་བརྗོད་ཀྱི་སྐབས་སུ་མཁྱེན་གསུམ་གྱི་རྒྱན་རྩོམ་པར་ཤུགས་ལ་དམ་བཅས་པ་ལའོ། །གཉིས་པ་ནི་མཁྱེན་གསུམ་གྱི་རྒྱན་རྩོམ་པར་ངེས་ཀྱང་གཞི་གཉེན་རྣམ་གསུམ་གང་བརྗོད་བྱར་བྱེད་མ་ངེས་ཤིང་སྤྱིར་བསྟན་བཅོས་ཀྱི་བརྗོད་བྱ་དེ་གསུམ་དུ་ངེས་པའི་གང་ཟག་གིས་སོ། །གསུམ་པ་ནི་གཞི་ཁོ་ན་བསྡུས་པས་མཁྱེན་གསུམ་གྱི་རྒྱན་རྩོམ་མམ། དེ་བཞིན་དུ་ལམ་ཁོ་ན་དང་། རྣམ་པ་ཁོ་ན་བསྡུས་པས་མཁྱེན་གསུམ་གྱི་རྒྱན་རྩོམ། གསུམ་པོ་གང་ཁས་བླངས་ཀྱང་གཞུང་ནས་བཀོད་པའི་སྐྱོན་གསུམ་ཡོད་དོ་ཅེས་པའོ། །བཞི་པ་ནི་སྐྱོན་དེ་དག་མེད་དེ། གཞི་གཉེན་རྣམ་པ་གསུམ་ཆར་གྱི་བརྗོད་བྱར་བསྡུས་པའི་སྒོ་ནས་མཁྱེན་གསུམ་གྱི་རྒྱན་རྩོམ་པའི་ཕྱིར་རོ། །ཞེས་པའོ། །འདི་ལ་འཕགས་སེང་གཉིས་ཆར་དགོངས་པ་གཅིག་པར་སྣང་ཞིང་། སློབ་དཔོན་གྱིས་དེ་ལྟར་ཕྱག་འཚལ་བ་དང་ཞེས་པའི་ཚིག་ཙམ་དང་། ཡུམ་བསྡུས་པ་དང་། རྒྱས་པའི་ལུང་ཁུངས་གཉིས་བསྣན་པ་ཙམ་མ་གཏོགས་གཞན་འགྲེལ་པ་གཉིས་ཁྱད་པར་མི་སྣང་ངོ་། །གསུམ་པ་ལམ་ཤེས་ཀྱི་མདོའི་དོན་ལ་དཔྱད་པ་ལ། ལམ་ཐམས་ཅད་བསྐྱེད་པར་བྱ་ཞིང་ལམ་ཐམས་ཅད་ཤེས་པར་བྱའོ་ཞེས་པ་ལ་བརྟེན་ནས་བྱང་སེམས་ཀྱིས་བསྐྱེད་བྱ་དང་ཤེས་བྱའི་ལམ་ངོས་འཛིན་དགོས་པ་ནི་སྐབས་གཉིས་པར་འབྱུང་ངོ་། །དེ་དག་ཀྱང་ཡོངས་སུ་རྫོགས་པར་བྱ་ཞིང་ཞེས་པ་ལ་བརྟེན་ནས་ཉན་རང་གི་སྤང་རྟོགས་རྫོགས་པའི་ཚད་ལ། ཁ་ཅིག་ས་བརྒྱད་པ་ནས་རྫོགས་པར་འདོད་པ་ནི་སེམས་ཙམ་པའི་གྲུབ་མཐའ་དང་འདྲེས་པའི་སྐྱོན་ཡིན་ཞིང་། གཞན་དག་སངས་རྒྱས་མ་ཐོབ་ཀྱི་བར་དུ་མ་རྫོགས་པར་འདོད་པ་ནི་ཀུན་བཏུས་སུ་ཅིག་ཆར་ཉོན་མོངས་པ་དང་། ཤེས་བྱའི་སྒྲིབ་པ་སྤོང་ངོ་། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །ཞེས་པའི་སྐབས་ཀྱི་སྒྲིབ་གཉིས་དང་། ལུགས་འདིའི་ཐུན་མོང་མ་ཡིན་པའི་སྒྲིབ་གཉིས་ཀྱི་ངོས་འཛིན་མ་ཕྱེད་པའི་གཏམ་མོ། །དེས་ན་སེམས་ཙམ་པའི་ལུགས་ལ་ཉན་རང་གི་སྤང་རྟོགས་ས་བརྒྱད་པ་ནས་རྫོགས་ཏེ། དེར་ཉོན་ཡིད་སྤངས་པའི་ཕྱིར་དང་། མདོར་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་བྱང་སེམས་ཆེན་པོའི་མི་སྐྱེ་བའི་ཆོས་ལ་བཟོད་པ་ཐོབ་པའི་བཟོད་པའོ་ཞེས་པའི་བཟོད་པ་དེ་ས་བརྒྱད་པ་ལ་ངོས་འཛིན་པའི་ཕྱིར་ཏེ། གནོད་འཇོམས་སུ། བཟོད་པ་ཡིན་ནོ་ཞེས་བྱ་བ་ནི་བྱང་ཆུབ་སེམས་དཔའི་ཐུགས་རྗེའི་ཤེས་རབ་ཆེ་བར་བསྟན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་དགྲ་བཅོམ་པའི་ལམ་གྱི་འབྲས་བུའི་ཤེས་པ་རྣམས་དང་། ཉོན་མོངས་པ་ཐམས་ཅད་སྤངས་པ་རྣམས་ནི་ས་བརྒྱད་པ་ལ་ཞུགས་པ་མི་སྐྱེ་བའི་ཆོས་ལ་བཟོད་པ་ཙམ་ཉིད་ཀྱིས་མཐར་ཐུག་པར་འགྱུར་ཏེ། དེ་དག་གི་ཤེས་པ་དང་སྤོང་བ་ནི་བཟོད་པ་དེ་ལས་ལྷག་པ་མེད་དོ། །དེ་ཕན་ཆད་དུ་ནི་བྱང་ཆུབ་སེམས་དཔའ་རྣམས་རྣམ་པ་ཐམས་ཅད་དུ་ཉོན་མོངས་པ་མེད་དེ་ཅེས་དང་། སྙིང་པོ་མཆོག་ཏུ་མི་སྐྱེ་བའི་ཆོས་ལ་བཟོད་པ་ཞེས་བྱ་བ་ནི་ཆོས་ཐམས་ཅད་ལ་ཟག་པ་མེད་པར་ཤེས་པ་ནི་བཟོད་པའོ། །དེ་ཐོབ་པར་འགྱུར་བ་ནི་ས་བརྒྱད་པ་སྟེ་ཞེས་གསུངས་པས་སོ། །དབུ་མ་པའི་ལུགས་ལ་ས་དང་པོ་ནས་རྫོགས་ཏེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ལ་ཉན་རང་གི་མཐོང་སྒོམ་གཉིས་ཆར་གྱི་ནུས་པ་ཚང་བས་མཐོང་ལམ་རྣམ་གྲོལ་ལམ་གྱི་སྐབས་སུ་ཉན་རང་གི་སྤང་བྱའི་རིགས་སུ་གནས་པའི་ཉོན་སྒྲིབ་དང་ཤེས་སྒྲིབ་གཟུང་རྟོག་མ་ལུས་པར་སྤངས་ཟིན་པའི་ཕྱིར་རོ། །འཕགས་སེང་གཉིས་ཀྱང་འདི་ཉིད་བཞེད་དེ། ཉིར་སྣང་དུ་སྔར་བཤད་པའི་བཟོད་པའི་ངོས་འཛིན་དུ་བཟོད་པ་དེ་ཡང་གང་ཞེ་ན་སྡུག་བསྔལ་ལ་ཆོས་ཤེས་པའི་བཟོད་པའོ། །འདི་གང་ལས་ཤེས་ཞེ་ན་ལམ་གཞན་ཁྱད་ཡོད་པ་ཡིན་ན། རིགས་དང་། དབང་པོ་དང་། ཚོགས་ཁྱད་ཞུགས་པར་འགྱུར་བའི་ཕྱིར། བྱང་ཆུབ་སེམས་དཔའི་བཟོད་པའི་བྱེད་པར་གཞན་རྣམས་ཀྱིས་རྟོགས་པའི་བྱེད་པ་མ་ལུས་པར་འདུས་པར་འགྱུར་བའི་ཕྱིར། དེ་དག་གི་ཤེས་པ་དང་སྤངས་པ་གང་ཡིན་པ་དེ་ནི་དེའི་བཟོད་པ་ཡིན་གྱི་རྟོགས་པའི་ཚད་འདི་ཙམ་མ་ཡིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ་ཞེས་གསུངས་པ་འདི་མངོན་རྟོགས་རྒྱན་གྱི་དགོངས་པ་འགྲེལ་བ་ལ་ཚད་མ་ཡིན་ནོ། །འགྲེལ་ཆེན་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ་ཞེས་བྱ་བ་ནི་ཆོས་ཐམས་ཅད་སྐྱེ་བ་མེད་པའོ་ཞེས་བྱ་བའི་ཆོས་ལ་དམིགས་པའི་བཟོད་པའམ་སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པའོ། །ཞེས་སོ། །ལུགས་འདི་ལ་མཐོང་ལམ་བར་ཆད་མེད་ལམ་གྱི་དུས་སུ་རྟོགས་པ་རྫོགས་ཤིང་རྣམ་གྲོལ་ལམ་གྱི་དུས་སུ་སྤངས་པ་རྫོགས་ཞེས་པ་འཐད་པར་སྣང་སྟེ། བར་ཆད་མེད་ལམ་གྱི་དུས་སུ་ཉན་རང་གི་ལམ་གྱིས་ཇི་ཙམ་རྟོགས་པ་རྟོགས་ཤིང་ཇི་ཙམ་སྤངས་པ་སྤོང་ནུས་པའི་ཕྱིར་དང་། རྣམ་གྲོལ་ལམ་གྱི་དུས་སུ་ཇི་ཙམ་སྤངས་པ་སྤངས་ཟིན་པའི་ཕྱིར་རོ། །བྱང་སེམས་འཕགས་པས་ཉོན་སྒྲིབ་སྤངས་ཟིན་པར་གསུངས་པ་ཡང་དོན་འདི་ལ་གནས་ཏེ། གཞན་ངོར་བྱང་སེམས་འཕགས་པ་འཇོག་པའི་ཚེ་སྡུག་བསྔལ་ལ་ཆོས་བཟོད་སྐྱེས་ཟིན་པའི་ཕྱིར་རོ། །ད་དུང་སྦྱོར་ལམ་གྱི་གནས་སྐབས་སུ་འཆད་པར་འགྱུར་བ་ལས་ཀྱང་རྟོགས་པར་འགྱུར་ཏེ། འདིར་ཤེར་ཕྱིན་གྱི་མདོར་རྣམ་ཤེས་ཚོགས་དྲུག་ལས་མ་བཤད་ཅིང་། མངོན་རྟོགས་རྒྱན་དང་རྒྱུད་བླར་ཡང་ཚོགས་དྲུག་ལས་གཞན་པའི་ཉོན་ཡིད་ཁས་མི་ལེན་པའི་དབང་དུ་བྱས་ནས་ས་དང་པོ་ནས་ཉན་རང་གི་སྤང་རྟོགས་རྫོགས་པར་བཞད་པ་ནི་ལུགས་འདིའི་ཐུན་མོང་མ་ཡིན་པའོ། །སྨོན་ལམ་ཡོངས་སུ་རྫོགས་པར་མ་བྱས་པ་དང་། ཞེས་སོགས་ལ་བརྟེན་ནས་སྨོན་ལམ་རྫོགས་པའི་ཚད་ནི་མདོ་སྡེ་རྒྱན་དུ། བརྟན་པ་རྣམས་ཀྱི་སྨོན་ལམ་ནི། །སེམས་དཔའ་འདུན་དང་བཅས་པའོ། །ཞེས་དང་། བྱང་སར་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ། །ཞེས་པ་ལྟར་ཐེག་ཆེན་སེམས་བསྐྱེད་ཀྱི་ནུས་པ་ཡོངས་སུ་རྫོགས་པའོ། །སེམས་ཅན་སྨིན་པ་ནི་སྤང་བྱ་མཐོང་སྤང་དངོས་སུ་སྤོང་བ་དང་གཉེན་པོ་མཐོང་ལམ་དངོས་སུ་སྐྱེ་རུང་ཡིན་ལ། རང་ཉིད་སྤྲུལ་སྐུར་སངས་རྒྱ་བའི་འཁོར་གྱི་ཐོག་མ་དེ་དེ་ལྟར་དུ་བྱས་པ་ནི་སྨིན་པར་བྱས་པའི་ཚད་དེ། རྒྱན་དུ། ཇི་ལྟར་རྨ་དང་ཟས་ལ་དེ་དག་གི །གཟག་དང་དཔྱད་དུ་རུང་བ་སྨིན་འདོད་ལྟར། །དེ་བཞིན་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པ་བསྟན། །ཅེས་སོ། །སངས་རྒྱས་ཀྱི་ཞིང་ཡོངས་སུ་སྦྱངས་པའི་ཚད་ནི་རང་སྣང་ལ་སྣོད་བཅུད་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བ་སྟེ། ཞིང་དག་སྦྱོར་གྱི་ནུས་པ་མཐར་ཐུག་པའོ། །འདི་གསུམ་ཆ་མཐུན་པ་ས་བདུན་པ་མན་ཆད་དུ་ཉམས་སུ་ལེན་པ་ཡང་ཡོད་མོད་ཀྱི། རྗེས་ཐོབ་ཀྱི་གནས་སྐབས་སུ་འདི་གསུམ་གྱི་ཉམས་ལེན་རྒྱུན་མ་ཆད་པར་འབྱུང་བ་ནི་ས་བརྒྱད་པ་ནས་འཇོག་གོ །དེ་དག་གིས་ཡང་དག་པའི་མཐའ་མངོན་སུམ་དུ་ནི་མི་བྱའོ་ཞེས་པ་ལ་བརྟེན་ནས། ཡང་དག་མཐའ་ངོས་གཟུང་ཞིང་དེ་མངོན་དུ་བྱས་པའི་ཚད་ལ། ཡང་དག་མཐའ་ནི་སྤྲོས་པ་མཐའ་དག་བཀག་པའི་དེ་བཞིན་ཉིད་དེ། འཇུག་འགྲེལ་དུ། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས། དེ་བཞིན་ཉིད་ལ་འགོག་པ་ཞེས་བྱ་སྟེ་འདིར་སྤྲོས་པ་མཐའ་དག་འགག་པར་འགྱུར་བའི་ཕྱིར་རོ་ཞེས་དང་། དབུས་མཐར། སྟོང་པ་ཉིད་ནི་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་གསུངས་པའི་ཕྱིར་རོ། །དེ་རྟོགས་པ་ཙམ་གྱིས་མངོན་དུ་བྱས་པར་ནི་མི་འཇོག་སྟེ། ཚོགས་སྦྱོར་དུ་དེ་དོན་སྤྱིའི་ཚུལ་གྱིས་རྟོགས་པ་ཡོད་ཅིང་། ས་བཅུའི་མཉམ་གཞག་རྣམས་སུ་མངོན་སུམ་དུ་རྟོགས་པ་ཡོད་ཀྱང་དེ་མ་བཀག་པའི་ཕྱིར་རོ། །མཉམ་པར་བཞག་པ་ཙམ་གྱིས་ཀྱང་མངོན་དུ་བྱས་པར་མི་འཇོག་སྟེ། ངོས་སྐལ་གྱི་སྒྲིབ་པ་སྤོང་བའི་ཚེ་དག་སར་ཡང་མཉམ་པར་བཞག་དགོས་པའི་ཕྱིར་ཏེ། མདོ་སྡེ་ས་བཅུ་པར། རིགས་ཀྱི་བུ་སངས་རྒྱས་ཀྱི་ཆོས་རྣམས་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ཞེས་གསུངས་པའི་ཕྱིར། འོ་ན་ཇི་ལྟར་སྙམ་ན་ཆོས་གསུམ་མ་བྱས་པར་མངོན་དུ་བྱས་པའི་ཚད་ནི། དག་སར་སྒྲིབ་པ་སྤོང་བ་སོགས་ཀྱི་དགོས་པ་མེད་བཞིན་དུ་ཡུན་རིང་དུ་མཉམ་པར་བཞག་པས་དུས་དེ་སྲིད་ཀྱི་བར་དུ་སེམས་ཅན་གྱི་དོན་རྒྱུན་ཆད་པར་འགྱུར་བའོ། །འདི་ལ་མདོ་སྡེ་ས་བཅུ་པར། དུས་དེ་ཉིད་ཀྱི་ཚེ་མྱ་ངན་ལས་འདའ་བར་འགྱུར་རོ་ཞེས་གསུངས་ཤིང་། དེའི་དོན་འཕགས་པས་རེ་ཞིག་སེམས་ཅན་གྱི་དོན་རྒྱུན་ཆད་པས་དགོངས་པ་ཅན་གྱི་མྱང་འདས་སུ་གསུངས་སོ། །ཆོས་གསུམ་བྱས་ནས་མངོན་དུ་བྱས་པའི་ཚད་ནི། ཆོས་གསུམ་རྫོགས་པར་བྱས་པས་གཞན་དོན་འབད་མེད་ལྷུན་གྲུབ་ཏུ་འབྱུང་ཞིང་། འདི་ལ་དུས་རྟག་ཏུ་མཉམ་པར་བཞག་པ་སྟེ། ཐུགས་མཉམ་པར་མ་བཞག་པ་མི་མངའ་བའི་མ་འདྲེས་པ་གསུངས་པ་དང་གནད་གཅིག་གོ །བསོད་ནམས་བསགས་པའི་གདུལ་བྱ་རྣམས་ལ་ཕན་ཐོགས་པར་གྱུར་ཅིག གསུམ་པ་གནད་ཀྱི་དོན་ངོས་གཟུང་བ་ལ་གསུམ་སྟེ། བརྗོད་བྱའི་གཙོ་བོ་བྱང་སེམས་ཀྱི་མངོན་རྟོགས་སུ་བསྟན་པའི་སྒོ་ནས་བསྟན་བཅོས་ལུས་ཀྱི་ཉམས་ལེན་ལ་སྦྱར་བ་དང་། དེའི་འབྲས་བུ་སངས་རྒྱས་ཀྱི་སའི་མངོན་རྟོགས་སུ་བསྟན་པའི་སྒོ་ནས་མདོའི་དགོས་པ་ལ་སྦྱར་བ་དང་། དེའི་འབྲས་བུ་འཕགས་བཞིའི་མངོན་རྟོགས་སུ་བསྟན་པའི་སྒོ་ནས་མདོའི་གླེང་གཞི་ལ་སྦྱར་བའོ། །དང་པོ་ལ་གཉིས་ཏེ། དོན་ངོས་གཟུང་བ་དང་། ཤེས་བྱེད་དགོད་པའོ། །དང་པོ་ནི། མཆོད་བརྗོད་ཀྱི་ཚིག་རྐང་དང་པོས་བྱང་སེམས་ཀྱི་རྒྱུད་ཀྱི་གཞི་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། བྱང་སེམས་ཀྱི་རྒྱུད་ཀྱི་རྟོགས་རིགས་དེ་བསྟན་པས་ཉན་ཐོས་ཞི་བ་ཚོལ་བ་རྣམས་རྟོགས་རིགས་དེ་ཉམས་སུ་བླངས་པས་ཀུན་ཤེས་ཉིད་ཀྱིས་ཉེར་ཞིར་ཁྲིད་པར་མཛད་པའི་ཕྱིར་རོ། །ཚིག་རྐང་པ་གཉིས་པས་ནི་བྱང་སེམས་ཀྱི་རྒྱུད་ཀྱི་ལམ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་རང་གིས་ཉམས་སུ་བླངས་ཤིང་བྱང་སེམས་ཀྱི་རིགས་ཅན་གཞན་ལ་ཡང་བསྟན་པས་འགྲོ་བ་ལ་ཕན་པར་བྱེད་པའི་བྱང་སེམས་རང་གཞན་རྣམས་ལམ་ཤེས་ཉིད་ཀྱིས་འཇིག་རྟེན་གྱི་དོན་སྒྲུབ་པར་མཛད་པའི་ཕྱིར་རོ། །ཚིག་རྐང་གསུམ་པས་ནི་བྱང་སེམས་ཀྱི་རྒྱུད་ཀྱི་རྣམ་པ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་རང་གིས་ཉམས་སུ་བླངས་པས་རྟོགས་པ་མཐར་ཐུག་པ་གང་དང་ཡང་དག་ལྡན་པས་ཐུབ་པ་རྣམས་ཇི་ལྟ་ཇི་སྙེད་ཀྱི་རྣམ་པ་ཀུན་དང་ལྡན་པའི་ཆོས་ཀྱི་འཁོར་ལོ་སྣ་ཚོགས་པ་གསུངས་པ་འདི་འབྱུང་བའི་ཕྱིར་རོ། །དེ་ལྟར་ན་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་དེ་སངས་རྒྱས་ཀྱི་ནི་ཡུམ་ཞེས་བྱ་སྟེ། རང་སྲས་སངས་རྒྱས་འཕགས་པ་སྐྱེད་པར་བྱེད་པའི་ཕྱིར་རོ། །དེས་ན་ཕྱག་འཚལ་ལོ། །ཞེས་པ་ནི་སྐྱེད་བྱེད་ཀྱི་ཡུམ་དང་འབྲེལ་ལོ། །སངས་རྒྱས་ཇི་ལྟ་བུ་ཞེ་ན་ཉན་ཐོས་བྱང་ཆུབ་སེམས་དཔའི་ཚོགས་དང་བཅས་པའོ། །གཉིས་པ་ཤེས་བྱེད་འགོད་པ་ལ་རྩ་བའི་དགོངས་པར་བསྟན་པ། འཕགས་པའི་དགོངས་པར་བསྟན་པ། སློབ་དཔོན་གྱི་དགོངས་པར་བསྟན་པ། གཞུང་གཞན་གྱི་དགོངས་པར་བསྟན་པ་དང་བཞི་ལས། དང་པོ་ནི། བསྟན་བཅོས་རྩ་བར་སྐབས་དང་པོ་གསུམ་གྱི་མཁྱེན་གསུམ་དང་། མཆོད་བརྗོད་ཀྱི་སྐབས་ཀྱི་མཁྱེན་གསུམ་གནད་གཅིག་པར་བཞེད་ནས་ལུས་ཀྱི་སྐབས་སུ་ཡང་ཐུབ་པའི་ཞེས་དང་། བྱང་ཆུབ་སེམས་དཔའ་མཁས་རྣམས་ཀྱི་ཞེས་དང་། ཉན་ཐོས་ལ་སོགས་པ་ཞེས་མཆོད་བརྗོད་ཀྱི་སྐབས་ཀྱི་རྟེན་གྱི་གང་ཟག་དང་སྦྱར་བ་མཛད་ཅིང་། དེ་ཉིད་བྱང་སེམས་ཀྱི་སྒོམ་བྱར་བསྡུ་བའི་ཚེ་ན་མཁྱེན་གསུམ་གྱི་རྣམ་པ་གསུམ་དུ་བསྡུས་ནས་མཁྱེན་གསུམ་གྱི་སྦྱོར་བ་གསུམ་གྱིས་བསྒོམ་པར་སྐབས་བཞི་པར་བཤད་ཅིང་། དེ་ལ་རྟོགས་པ་རབ་ཏུ་གྱུར་པ་རྩེ་སྦྱོར་ཡིན་པ་ལ་སོགས་པ་གསུངས་པའི་ཕྱིར་རོ། །འདི་ཉིད་ཀྱིས་བྱང་སེམས་ཀྱི་རྒྱུད་ཀྱི་མངོན་རྟོགས་སུ་བསྟན་པའི་ཚེ་བསྟན་བཅོས་ལུས་ཀྱི་ཉམས་ལེན་ལ་སྦྱར་བ་ཡང་འབད་མེད་དུ་ཤེས་པར་འགྱུར་རོ། །བཤད་ཚུལ་འདི་ལ་རྣམ་མཁྱེན་དང་གཞི་ཤེས་ཀྱི་རྟེན་གྱི་གང་ཟག་ནི་རྟོགས་རིགས་ཀྱི་དབང་དུ་བྱས་པར་འཆད་དགོས་སོ། །གཉིས་པ་ནི། ཉིར་སྣང་དུ། མཆོད་བརྗོད་ཀྱི་སྐབས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ་ཞེས་པ་ནི་ལུས་ཀྱི་སྐབས་སུ་དངོས་པོ་བརྒྱད་ཀྱི་སྒོ་ནས་བཤད་པར་གསུངས་ཤིང་། མཁྱེན་གསུམ་གྱིས་འཕགས་བཞིའི་མངོན་རྟོགས་བསྡུས་པར་ཡང་གསུངས་པས་ན་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་དེས་འཕགས་པ་བཞི་ཆར་གྱི་རྟོགས་རིགས་བསྡུས་པའི་དོན་དུ་བཞེད་ཅིང་དེ་ཉིད་བསྟན་བཅོས་ལུས་ཀྱི་མངོན་རྟོགས་བརྒྱད་ཀྱི་ཉམས་ལེན་དང་ཁྱད་པར་མེད་པར་བཞེད་དོ། །གསུམ་པ་ནི་འགྲེལ་ཆུང་ལས། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར་ཞེས་བྱ་བ་ལ་སོགས་པའི་ཚད་མས་གཞི་དང་ལམ་དང་རྣམ་པ་སྐྱེ་བ་མེད་པར་ཡོངས་སུ་ཤེས་པ་ཚིགས་སུ་བཅད་པའི་དོན་གྱི་མཚན་ཉིད་ཀྱི་ཡུམ་ལ་གནོད་པ་མ་མཐོང་ནས་ཞེས་པ་ཡང་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་ལ་བཞེད་དེ། དེ་གསུམ་ཆར་གྱིས་ཐོག་མར་སངས་རྒྱས་སྐྲུན་པར་བཤད་པའི་ཕྱིར་དང་། དེ་གསུམ་གྱིས་མངོན་པར་རྟོགས་པ་བརྒྱད་བསྡུས་པར་བཤད་པས་བསྟན་བཅོས་ལུས་ཀྱི་ཉམས་ལེན་བསྡུས་པར་བཤད་པའི་ཕྱིར་རོ། །བཞི་པ་ནི། མདོ་སྡེ་རྒྱན་དང་རྒྱུད་བླ་གཉིས་ཆར་དུ་ཐེག་ཆེན་གྱི་ཆོས་ལ་མོས་པའི་ས་བོན་དང་། བདག་མེད་རྟོགས་པའི་ཤེས་རབ་ཀྱི་མ་དང་། བསམ་གཏན་གྱི་མངལ་དང་། སྙིང་རྗེའི་མ་མ་བཞི་ལས་སངས་རྒྱས་ཀྱི་རྒྱལ་ཚབ་ནུས་པའི་བྱང་སེམས་འཕགས་པ་སྐྱེ་བར་གསུངས་པའི་བདག་མེད་རྟོགས་པའི་ཤེས་རབ་ཀྱི་མ་དེ་འདིར་བསྟན་པའི་སྐྱེ་མེད་གསུམ་རྟོགས་པའི་རྟོགས་པ་དེ་ཉིད་ཡིན་ཏེ། ཚོགས་སྦྱོར་གྱི་གནས་སྐབས་སུ་དེ་གསུམ་ཉམས་སུ་བླངས་པས་ས་དང་པོའི་བྱང་སེམས་འབྱུང་ཞིང་། འཕགས་པའི་གནས་སྐབས་སུ་དེ་གསུམ་ཉམས་སུ་བླངས་པ་ལས་སངས་རྒྱས་འཕགས་པ་འབྱུང་བའི་ཕྱིར་རོ། །མགོན་པོ་ཀླུ་སྒྲུབ་ཀྱི་བཞེད་པ་ཡང་འདི་ཉིད་ཡིན་ཏེ། གཞན་དོན་མངོན་དགའི་བདག་ཉིད་ཅན། །དཔའ་བོ་དག་ནི་ཐམས་ཅད་ཀྱི། །གསོ་མཛད་བསྐྱེད་པར་མཛད་པ་སྟེ། །ཁྱོད་ནི་བྱམས་མའི་ཡུམ་ལགས་སོ། །ཞེས་གསུངས་པའི་ཕྱིར་རོ། །དེ་ལྟར་ན་མཆོད་བརྗོད་ཀྱི་མཁྱེན་པ་གསུམ་པོ་བྱང་སེམས་ཀྱི་རྒྱུད་ཀྱི་རྟོགས་རིགས་ལ་སྦྱར་ཞིང་སངས་རྒྱས་ཀྱི་ཡུམ་དུ་འཇོག་པའི་ཚེ་སྐྱེད་བྱེད་ཀྱི་ཡུམ་དུ་འཇོག་པ་འདི་ནི་བསྟན་བཅོས་ལུས་ཀྱི་བརྗོད་བྱའི་གཙོ་བོར་སྣང་ཞིང་དེས་མངོན་པར་རྟོགས་པ་བརྒྱད་བསྡུས་པའི་ཚུལ་ནི་བཤད་ཟིན་ཏོ། །གཉིས་པ་དེའི་འབྲས་བུ་སངས་རྒྱས་ཀྱི་སའི་མངོན་རྟོགས་ལ་སྦྱར་བའི་སྒོ་ནས་མདོའི་དགོས་པ་ལ་སྦྱར་བ་ལ་གསུམ་སྟེ། དོན་ངོས་གཟུང་བ། མདོའི་དགོས་པར་འགྱུར་ཚུལ། དེ་ལ་ཤེས་བྱེད་འགོད་པའོ། །དང་པོ་ནི། ཚིག་རྐང་དང་པོས་སངས་རྒྱས་ཀྱི་སའི་གཞི་སྐྱེ་མེད་དུ་རྟོགས་པའི་རྟོགས་རིགས་བསྟན་ཏེ། སྒྲུབ་བྱེད་གཞུང་དང་སྦྱར་བ་ནི་སྔར་དང་འདྲའོ། །ཚིག་རྐང་གཉིས་པས་ནི་སངས་རྒྱས་ཀྱི་སའི་ལམ་སྐྱེ་མེད་དུ་རྟོགས་པའི་རྟོགས་པ་བསྟན་ཏེ། རྟོགས་རིགས་དེ་གདུལ་བྱ་བྱང་སེམས་ཀྱི་རིགས་ཅན་ལ་བསྟན་པས་འགྲོ་བ་ལ་ཕན་པར་བྱེད་པའི་བྱང་སེམས་རྣམས་ཀྱིས་རྟོགས་རིགས་དེ་ཉམས་སུ་བླངས་པས་ལམ་ཤེས་ཉིད་ཀྱིས་འཇིག་རྟེན་གྱི་དོན་སྒྲུབ་པར་མཛད་པའི་ཕྱིར་རོ། །ཚིག་རྐང་གསུམ་པས་ནི་སངས་རྒྱས་ཀྱི་སའིརྣམ་མཁྱེན་བསྟན་ཏེ། རྣམ་མཁྱེན་རང་ཉིད་གང་དང་ཡང་དག་པར་ལྡན་པས་སོགས་སོ། །དེ་ལྟ་བུའི་མཁྱེན་པ་གསུམ་ནི་སངས་རྒྱས་ཀྱི་བཞད་དོན་སྒྲུབ་བྱེད་ཀྱི་ཡུམ་ཡིན་པས་དེ་ལ་ཕྱག་འཚལ་བའོ། །ཉན་ཐོས་བྱང་ཆུབ་སེམས་དཔའི་ཚོགས་བཅས་ནི་སངས་རྒྱས་ཀྱི་ཁྱད་ཆོས་ལ་སྦྱར་བ་སྔར་དང་འདྲའོ། །གཉིས་པ་ནི། དེ་ལྟར་ན་གཞུང་འདིས་མདོའི་དགོས་པ་བསྟན་ཏེ། མདོའི་དགོས་པ་མཐར་ཐུག་པ་ནི་མཁྱེན་གསུམ་ངོ་བོ་གཅིག་ལ་ལྡོག་པ་ཐ་དད་དུ་ལྡན་པའི་འབྲས་བུ་ཤེར་ཕྱིན་ཡིན་པའི་ཕྱིར་རོ། །གསུམ་པ་ལ་སྔར་ལྟར་བཞི་ལས། དང་པོ་རྩ་བའི་དགོངས་པ་ཡིན་པ་ནི་རྩ་བར་ཐོབ་བྱའི་འབྲས་བུ་མཐར་ཐུག་མཆོད་བརྗོད་ཀྱི་ཡུལ་དུ་བྱས་ནས་དེ་ཐོབ་པར་བྱེད་པའི་ཐབས་སུ་མངོན་པར་རྟོགས་པ་བརྒྱད་བཤད་པ་ལས་མཁྱེན་གསུམ་ཐོས་བསམ་གྱི་ཡུལ་དུ་བྱས། སྦྱོར་བཞིས་ཉམས་སུ་བླངས་པ་ལས་འབྲས་བུ་ཆོས་སྐུ་ཐོབ་པའི་ཚེ་ན་ཕྲིན་ལས་ཉི་ཤུ་རྩ་བདུན་བྱེད་པ་དེ་འབྱུང་ཞིང་། དེ་ལྟ་བུའི་ཕྲིན་ལས་ཀྱི་བདག་རྐྱེན་དུ་གྱུར་པའི་མངོན་པར་རྟོགས་པ་དེ་ཡང་མཆོད་བརྗོད་ཀྱི་སྐབས་ནས་འབྱུང་བའི་མཁྱེན་པ་གསུམ་པོ་དེ་ཉིད་ཡིན་ནོ་ཞེས་བསྟན་ཏེ། རྒྱུད་བླར། ཐོག་མར་དཀོན་མཆོག་གསུམ་དང་མཇུག་ཏུ་ཕྲིན་ལས་སྨོས་པ་དང་འདྲའོ། །གཉིས་པ་འཕགས་པའི་དགོངས་པ་ཡིན་པ་ནི་ཉིར་སྣང་དུ་དང་པོར་བསྟན་པའི་ཐམས་ཅད་མཁྱེན་པ་ཉིད་གསུམ་ནི་མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ་ཞེས་གསུངས་པས། མཆོད་བརྗོད་ཀྱི་སྐབས་སུ་འབྲས་བུ་ཤེར་ཕྱིན་བསྟན་པར་ཡང་བཞེད་དེ། བསྟན་བཅོས་ཀྱི་ཐོག་མར་བསྟན་པའི་མཆོད་བརྗོད་ཀྱི་ཡུལ་དང་། མངོན་རྟོགས་བརྒྱད་ཀྱི་ཐོག་མར་བསྟན་པའི་རྣམ་མཁྱེན་དང་། དྲུག་གི་ཐོག་མར་བསྟན་པའི་མཚན་ཉིད་རྣམས་འབྲས་བུ་ལ་སྤྲོ་བ་བསྐྱེད་པའི་ཆེད་དུ་འབྲས་བུ་ཐོག་མར་བསྟན་པར་བཞེད་པའི་ཕྱིར་རོ། །གསུམ་པ་སློབ་དཔོན་གྱི་དགོངས་པ་ཡིན་པ་ནི། བཅོམ་ལྡན་འདས་མ་ཡོན་ཏན་རིན་པོ་ཆེ་ཕུལ་དུ་དབྱུང་དུ་མེད་ཅིང་དཔག་ཏུ་མེད་པའི་འབྱུང་གནས་ཞེས་དང་། དེའི་ཕྱིར་བཅོམ་ལྡན་འདས་མ་ལ་རབ་ཏུ་དང་བ་ནི་ཞེས་པ་རྣམས་ཀྱིས་འབྲས་བུའི་ཆར་གྱུར་པའི་མཁྱེན་གསུམ་དེ་བསྟན་པའི་ཕྱིར་དང་། འགྲེལ་ཆེན་དུ། དེའི་ཕྱིར་དེ་དང་འབྲེལ་བ་གཟུགས་བརྙན་དང་འབྲེལ་བ་རྣམ་པ་གསུམ་ཀ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དོ་ཅེས་ངེས་པར་བཟུང་བ་སྟེ་གཙོ་བོ་ལས་དབང་དུ་བྱས་པའོ། །དེ་རྣམས་ཀྱིས་ནི་མ་ཡིན་ཏེ་འདི་མེད་ན་མི་འབྱུང་བས་བྱང་ཆུབ་གསུམ་ཀའི་དབང་དུ་བྱས་པའི་ཕྱིར་རོ་ཞེས་གསུངས་པའི་ཕྱིར་རོ། །བཞི་པ་གཞུང་གཞན་གྱི་དགོངས་པ་ཡིན་པ་ནི། ཀླུ་སྒྲུབ་ཀྱིས། འཕགས་མ་ཡོན་ཏན་ཕྱུག་ཁྱོད་དང་། །སངས་རྒྱས་འགྲོ་བའི་བླ་མ་རྣམས། །ཁྱད་པར་ཡོད་པར་མ་ཁུམས་ཏེ། །ཟླ་བ་དང་ནི་ཟླ་འོད་བཞིན། །ཞེས་དང་ཕྱོགས་གླང་གིས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །ཞེས་གསུངས་པའི་ཕྱིར་རོ། །གསུམ་པ་དེའི་འབྲས་བུ་འཕགས་བཞིའི་མངོན་རྟོགས་སུ་བསྟན་པའི་སྒོ་ནས་མདོའི་གླེང་གཞི་ལ་སྦྱར་བ་ལ་གསུམ་སྟེ། དོན་ངོས་གཟུང་བ། གླེང་གཞི་ལ་ཇི་ལྟར་སྦྱར་བའི་ཚུལ། དེ་ལ་ཤེས་བྱེད་འགོད་པའོ། །དང་པོ་ནི། ཚིག་རྐང་དང་པོས་ཐེག་དམན་འཕགས་པའི་རྒྱུད་ཀྱི་གཞི་ཤེས་དང་། གཉིས་པས་བྱང་སེམས་འཕགས་པའི་རྒྱུད་ཀྱི་ལམ་ཤེས་དང་། གསུམ་པས་སངས་རྒྱས་འཕགས་པའི་རྒྱུད་ཀྱི་རྣམ་མཁྱེན་བསྟན་ཏེ། གཞུང་ལ་སྦྱར་བ་ནི་གོ་སླ་སྟེ། དེའི་ཚེ་ཕྱག་འཚལ་བའི་ཡུལ་ནི་འཕགས་པ་སོ་སོའི་མཁྱེན་པ་གསུམ་ལ་འཇོག་པ་མ་ཡིན་གྱི། གང་དང་ཞེས་པའི་ཚིག་དེ་ཕྱག་འཚལ་བའི་ཡུལ་གྱི་ཡུམ་དང་འབྲེལ་བས་སངས་རྒྱས་ཀྱི་ཡུམ་གང་དང་ཡང་དག་པར་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པའི་སངས་རྒྱས་ཀྱི་ཡུམ་དེ་ལ་ཕྱག་འཚལ་ཞེས་འབྲེལ་བའི་ཕྱིར་རོ། །སངས་རྒྱས་དེ་ཇི་ལྟ་བུ་ཞེ་ན། ཉན་ཐོས་ཀྱི་དགེ་འདུན་གྱི་འཁོར་ཚོགས་དང་། བྱང་ཆུབ་སེམས་དཔའི་འཁོར་ཚོགས་དང་བཅས་པའི་སྤྲུལ་པའི་སྐུའོ་ཞེས་པའི་དོན་ཏེ། གླེང་གཞི་ལ་སྦྱར་བའི་སྐབས་སུ་རྒྱས་པར་འབྱུང་ངོ་། །དེས་ན་བཤད་ཚུལ་དང་པོ་ལ་སངས་རྒྱས་ཀྱི་སྐྱེད་བྱེད་ཀྱི་ཡུམ་དང་། ཕྱི་མ་གཉིས་ལ་སངས་རྒྱས་ཀྱི་བཞེད་དོན་སྒྲུབ་བྱེད་ཀྱི་ཡུམ་ལ་ཕྱག་འཚལ་ཞེས་པར་འགྱུར་བས། ཕྱག་གི་ཡུལ་ནི་སངས་རྒྱས་ཀྱི་ཡུམ་ཁོ་ན་སྟེ། འདིར་བསྟན་བཅོས་ལུས་ཀྱི་བརྗོད་བྱའི་གཙོ་བོ་དང་མཐར་ཐུག་གི་འབྲས་བུ་ལ་ཕྱག་འཚལ་བའི་སྐབས་ཡིན་པའི་ཕྱིར། ཐེག་དམན་གྱི་རྒྱུད་ཀྱི་གཞི་ཤེས་ནི་འདིར་ཕྱག་འཚལ་བའི་ཡུལ་མ་ཡིན་ཏེ། བསྟན་བཅོས་འདིའི་གདུལ་བྱའི་གཙོ་བོ་ཐེག་དམན་གྱི་ལམ་ལ་འཇུག་པ་སྤངས་ནས་ཐེག་ཆེན་གྱི་ལམ་ལ་འཇུག་པའི་ཆེད་དུ་ལམ་རེ་རེའི་སྐབས་སུ་ཡང་ཐེག་དམན་གྱི་ལམ་ལས་ཁྱད་པར་འཕགས་ཚུལ་རེ་རེ་བསྟན་པའི་ཕྱིར་རོ། །འོ་ན་ཉན་ཐོས་རྣམས་ལ་ཕྱག་འཚལ་ལོ་ཞེས་བཤད་པ་དང་འགལ་ལོ་སྙམ་ན། དེ་ནི་སློབ་ལམ་གྱི་གནས་སྐབས་སུ་རང་ཉིད་ཀྱི་སྒྲིབ་པ་སྦྱང་ཞིང་ཚོགས་རྫོགས་པའི་ཆེད་དུ་མཆོད་འོས་ཀུན་ལ་ཕྱག་འཚལ་བ་ཡིན་པས་འདི་དང་འདྲ་བ་མ་ཡིན་ནོ། །གཉིས་པ་ནི་མདོ་གཞན་དང་ཐུན་མོང་གི་གླེང་གཞི་ལ་སྦྱར་བ་དང་། ཤེར་ཕྱིན་གྱི་ཐུན་མོང་མ་ཡིན་པའི་གླེང་གཞི་ལ་སྦྱར་བ་གཉིས་ལས། དང་པོ་ནི་དགེ་སློང་ལྔ་སྟོང་ཙམ་དང་ཐབས་ཅིག་སྟེ། འདི་ལྟ་སྟེ། ཚེ་དང་ལྡན་པ་འོད་སྲུང་དང་། ཞེས་སོགས་དང་། སྐྱེ་དགུའི་བདག་མོ་ལ་སོགས་པའི་དགེ་སློང་མ་དང་། གཟུགས་ཅན་སྙིང་པོ་ལ་སོགས་པའི་དགེ་བསྙེན་དང་། ས་ག་མ་ལ་སོགས་པའི་དགེ་བསྙེན་མ་སྟེ། འཁོར་རྣམ་བཞི་སྟོན་པའི་མདོ་རྣམས་ཀྱིས་རྟེན་བསྟན། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཞེས་སོགས་ཉན་ཐོས་ཀྱི་ཡོན་ཏན་བཅོ་ལྔ་གསུངས་པ་རྣམས་ཀྱིས་འབྲས་བུ་ཉེར་ཞི་གཉིས་བསྟན། རྟེན་དེས་འབྲས་བུ་དེ་ཐོབ་པ་ཡང་ཀུན་ཤེས་ཉིད་ལ་བརྟེན་ནས་ཐོབ་པ་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་ཉན་ཐོས་ཞི་བ་ཚོལ་རྣམས་ཞེས་དང་། ཐབས་ནི་ཀུན་ཤེས་ཉིད་ཅེས་དང་། འབྲས་བུ་ནི་ཉེར་ཞི་ཞེས་པས་བསྟན་ནོ། །དེས་ན་འདི་ལ་རང་སངས་རྒྱས་ཉན་ཐོས་ཀྱི་ཕྱོགས་སུ་བསླན་ནས་བསྟན་མི་དགོས་ཏེ། རྟེན་གྱི་གང་ཟག་དེ་རྣམས་ཉན་ཐོས་ཡིན་ཞིང་རང་སངས་རྒྱས་ཀྱི་རིགས་ཅན་སྤྲུལ་སྐུའི་འཁོར་དུ་ཡོད་པ་རྣམས་ཀྱང་ཉན་ཐོས་ཀྱི་ཁོངས་སུ་འདུས་པའི་ཕྱིར་རོ། །འོ་ན་ཞི་བ་ཚོལ་རྣམས་ཞེས་དང་། ཉེར་ཞིར་ཁྲིད་པར་མཛད་ཅེས་པ་དང་འགལ་ཏེ། རྟེན་དེ་རྣམས་ཞི་བ་ཐོབ་ཟིན་པའི་ཕྱིར་རོ་སྙམ་ན། དགྲ་བཅོམ་པ་དེ་རྣམས་ཀྱང་སྔར་ཞི་བ་ཚོལ་བའི་ཚེ་ན་ཀུན་ཤེས་ཉིད་ལ་བརྟེན་ནས་ད་ལྟ་ཉེར་ཞི་ཐོབ་པ་ཡིན་པས་ད་ལྟ་ཞི་བ་ཚོལ་བ་རྣམས་ཀྱང་ཀུན་ཤེས་ཉིད་ལ་བརྟེན་ནས་ཉེར་ཞིར་ཁྲིད་པར་བྱེད་དགོས་སོ། །ཞེས་ཤེས་པར་འགྱུར་བས་སྐྱོན་མེད་དོ། །ཡང་བྱང་སེམས་ཆེན་པོ་བྱེ་བ་ཁྲག་ཁྲིག་བརྒྱ་སྟོང་དང་ཡང་ཐབས་ཅིག་སྟེ། འདི་ལྟ་སྟེ། བྱང་ཆུབ་སེམས་དཔའ་བཟང་སྐྱོང་དང་ཞེས་སོགས་ཀྱིས་རྟེན་བསྟན། ཐམས་ཅད་ཀྱང་གཟུངས་ཐོབ་པ་མ་ཉམས་པའི་མངོན་ཤེས་ཐོབ་པ་ཞེས་སོགས་ཀྱིས་འབྲས་བུ་བསྟན། རྟེན་དེས་འབྲས་བུ་དེ་ཐོབ་པ་ནི་ལམ་ཤེས་ཀྱི་ཐབས་ལ་བརྟེན་ནས་ཐོབ་པ་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་འགྲོ་ལ་ཕན་པར་བྱེད་རྣམས་ཞེས་དང་། ཐབས་ནི་ལམ་ཤེས་ཉིད་ཅེས་དང་། འབྲས་བུ་ནི་འཇིག་རྟེན་དོན་སྒྲུབ་མཛད་པ་གང་ཞེས་བསྡུས་ཏེ་བསྟན་ཏོ། །འོ་ན་བྱམས་པ་སངས་རྒྱས་ཡིན་པས་འཕགས་པ་སོ་སོའི་མངོན་རྟོགས་ལ་སྦྱར་བའི་ཚེ་ལམ་ཤེས་ཀྱི་རྟེན་གྱི་གང་ཟག་དུ་སྦྱར་བ་དང་འགལ་ལོ་ཞེ་ན་སྐྱོན་མེད་དེ། ཤེར་ཕྱིན་གྱི་མདོ་འཆད་པའི་ཚེ་བྱང་སེམས་ཀྱི་ཚུལ་བཟུང་བའི་དབང་དུ་བྱས་པའི་ཕྱིར་རོ། །དེས་ན་སྐབས་འདིའི་ཉན་ཐོས་ཀྱི་དགེ་འདུན་ལ་དོན་ལ་སངས་རྒྱས་ཡིན་ཀྱང་ཉན་ཐོས་ཀྱི་ཚུལ་གཟུང་བ། དོན་ལ་བྱང་སེམས་ཡིན་ཀྱང་ཉན་ཐོས་ཀྱི་ཚུལ་གཟུང་བ། ཉན་ཐོས་རང་རྒྱུད་པ་དང་གསུམ་ཡོད་པས་ཚིག་རྐང་དང་པོས་བསྟན་པའི་གཞི་ཤེས་ལ་ཡང་གསུམ་ཡོད་ཅིང་། བྱང་སེམས་ཀྱི་དགེ་འདུན་ལ་ཡང་དོན་ལ་སངས་རྒྱས་ཡིན་ཀྱང་བྱང་སེམས་ཀྱི་ཚུལ་གཟུང་བ་དང་། བྱང་སེམས་རང་རྒྱུད་པ་གཉིས་ཡོད་པས་ཚིག་རྐང་གཉིས་པས་བསྟན་པའི་ལམ་ཤེས་ལ་གཉིས་ཡོད་དོ། །ཡང་དོན་ལ་བྱང་སེམས་ཡིན་ཀྱང་མཛད་པ་བཅུ་གཉིས་ཀྱི་ཚུལ་སྟོན་པ་དང་། སངས་རྒྱས་རང་ཉིད་ཀྱིས་མཛད་པ་བཅུ་གཉིས་ཀྱི་ཚུལ་སྟོན་པ་དང་གཉིས་ཡོད་པས་ཚིག་རྐང་གསུམ་པས་བསྟན་པའི་རྣམ་མཁྱེན་ལ་ཡང་གཉིས་ཡོད་པར་ཤེས་པར་བྱའོ། །གཉིས་པ་ཐུན་མོང་མ་ཡིན་པའི་གླེང་གཞི་དང་སྦྱར་བ་ལ་གསུམ་སྟེ། བཞུགས་ཐབས་བཤམ་པ། ཆོ་འཕྲུལ་བསྟན་པ། ཆོས་བཤད་པའི་དུས་མཁྱེན་པའོ། །དང་པོ་ལ་གཉིས་ཏེ། གདན་སེང་གེའི་ཁྲི་བཤམ་པ་དང་། སྐུ་རྡོ་རྗེའི་སྐྱིལ་མོ་ཀྲུང་དུ་བཞུགས་པའོ། །དང་པོ་ནི། བཅོམ་ལྡན་འདས་ཉིད་ཀྱིས་བླ་གོས་བཞི་ལྟབ་ཏུ་བྱས་ཏེ་གདན་སེང་གེའི་ཁྲི་བཤམ་པ་མཛད་དོ་ཅེས་པ་སྟེ། ཆོས་འདིའི་གདན་ཙམ་ཡང་གཞན་གྱིས་བཤམས་པར་མི་ནུས་ན་རྟོགས་པ་ལྟ་ཅི་སྨོས་ཞེས་པ་དང་། ཕྱི་མའི་དུས་ན་ཆོས་འཆད་པ་དག་ལ་སྟན་འདིངས་བ་མེད་ན་ཡི་ཆད་པ་བསལ་བར་བྱ་བའི་ཕྱིར་དུ་ཉིད་ཀྱིས་གདན་བཤམ་པར་མཛད་དོ། །གཉིས་པ་ནི་དེ་ལྟ་བུའི་གདན་གྱི་སྟེང་དུ་བཅོམ་ལྡན་འདས་ཞབས་རྡོ་རྗེའི་སྐྱིལ་མོ་ཀྲུང་། སྐུ་དྲང་པོར་བསྲངས་ཏེ་དགོངས་པ་མངོན་དུ་མཛད་ནས་བཞུགས་སོ། །སྤྱོད་ལམ་དེ་ལྟ་བུ་བསྟན་པའི་དགོས་པ་ཡང་ཤེར་ཕྱིན་གྱི་མདོའི་དོན་ནི་མཉམ་པར་བཞག་པས་རྟོགས་དགོས་སོ་ཞེས་ཤེས་པའི་ཆེད་ཡིན་པར་འགྲེལ་ཆེན་དུ་བཤད་དོ། །གཉིས་པ་ལ་གསུམ་སྟེ། ཏིང་ངེ་འཛིན་གྱི་དང་། རྫུ་འཕྲུལ་གྱི་དང་། ཆོས་སྣང་བའི་ཆོ་འཕྲུལ་ལོ། །དང་པོ་ལ་གཉིས་ཏེ། ཏིང་ངེ་འཛིན་གྱི་རྒྱལ་པོའི་དང་། སེང་གེ་རྣམ་པར་རོལ་པའི་ཆོ་འཕྲུལ་ལོ། །དང་པོ་ནི། དེ་ནས་བཅོམ་ལྡན་འདས་ཏིང་ངེ་འཛིན་གང་གི་ནང་དུ་ཏིང་ངེ་འཛིན་ཐམས་ཅད་འདུས་པར་གྱུར་པའི་ཏིང་ངེ་འཛིན་གྱི་རྒྱལ་པོ་ཞེས་བྱ་བ་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཆོ་འཕྲུལ་བསྟན་པའི་གྲངས་བཞི་སྟེ། དང་པོ་ནི་སྐུའི་ཡན་ལག་དང་ཉིང་ལག་ལས་འོད་ཟེར་དཀར་པོ་དང་། དམར་པོ་དང་། སེར་པོ་དང་། སྔོན་པོ་དང་། ཤེལ་དང་དངུལ་གྱི་ཁ་དོག་ལྟ་བུ་སྟེ་དྲུག འཁོར་བྱེ་བ་ཁྲག་ཁྲིག་བརྒྱ་སྟོང་མང་པོ་དང་བཅས་པ་ཕྱོགས་བཅུར་བཀྱེ་བས་དྲུག་ཅུ་དྲུག་ཅུ་དང་། གཉིས་པ་ནི་བ་སྤུའི་བུ་ག་ནས་ཀྱང་དེ་ལྟར་བཀྱེ་བ་དང་། གསུམ་པ་ནི་རྣམ་སྨིན་གྱི་འོད་རང་ལུགས་སུ་བཞག་པ་ན་སྟོང་གསུམ་ཁྱབ་པར་བྱེད་པ་མངའ་བ་ལས་ཐུབ་པའི་ཐུན་མོང་མ་ཡིན་པ་གོ་བའི་དོན་དུ་འོད་འདོམ་གང་བར་བྱིན་གྱིས་བརླབས་པ་ཡིན་ཀྱང་དེའི་ཚེ་སྟོང་གསུམ་ཁྱབ་པ་རང་བཞིན་གྱི་འོད་བཀྱེ་བ་དང་། བཞི་པ་ནི་ཞལ་གྱི་སྒོ་ནས་ལྗགས་ཀྱི་དབང་པོ་བཀྲམ་སྟེ་སྟོང་གསུམ་ཁྱབ་པར་མཛད་ནས་དེ་ལས་འོད་ཟེར་བྱུང་བའི་རྩེ་མོ་ལ་པདྨའི་སྡོང་པོ་རེ་རེ། དེའི་ལྟེ་བ་ལ་སྤྲུལ་སྐུ་ཤཱཀ་ཐུབ། འདབ་མ་ལ་གནས་པའི་བྱང་སེམས་རྣམས་ལ་ཕར་ཕྱིན་དྲུག་ལས་བརྩམས་པའི་ཆོས་འཆད་པའི་སྣང་བས་ཕྱོགས་བཅུར་ཁྱབ་པའོ། །དེ་ལ་དང་པོ་གསུམ་ལ་བྱང་ཆུབ་ཏུ་ངེས་པར་བྱེད་པའི་འོད་དང་། ཕྱི་མ་ལ་རྒྱལ་བའི་ཡུམ་སྟོན་པའི་སྔ་ལྟས་སུ་གྱུར་པའི་འོད་ཅེས་བྱ་བའོ། །གཉིས་པ་ནི་དེ་ནས་ཡང་བཅོམ་ལྡན་འདས་ཏིང་ངེ་འཛིན་སེང་གེ་རྣམ་པར་རོལ་པ་ལ་སྙོམས་པར་ཞུགས་པར་གྱུར་ཏོ། །སྙོམས་པར་ཞུགས་ནས་ཆོ་འཕྲུལ་བསྟན་པ་ལ་རྣམ་འགྱུར་དྲུག་དང་། ལྟས་ཆེན་པོ་བཅོ་བརྒྱད་དང་། ཕྱོགས་འགྱུར་བ་ཟུང་དུ་བསྡེབས་ན་དྲུག བརྐྱང་ན་བཅུ་གཉིས་ལ་སོགས་པས་སྣོད་བཅུད་ཀྱི་ཞིང་སྦྱང་བ་དང་། ཆོས་ཉན་པའི་སྣོད་དུ་བྱེད་པའོ། །དེ་ལ་རྣམ་འགྱུར་དྲུག་ནི། གཡོས་པ་དང་། འགུལ་བ་དང་། ལྡེག་པ་དང་། འཁྲུག་པ་དང་། ཆེམ་པ་དང་། འུར་བ་སྟེ་དྲུག དེ་རྣམས་ཉིད་ལ་ཆུང་ངུ་འབྲིང་ཆེན་པོའི་བྱེ་བྲག་གིས་གསུམ་གསུམ་དུ་བཞག་པས། ལྟས་ཆེན་པོ་བཅོ་བརྒྱད་དོ། །དེ་དག་ཀྱང་ཕྱི་སྣོད་ཀྱི་འཇིག་རྟེན་སྔར་སྦྱང་བ་མ་བྱས་པ་དང་ཅུང་ཟད་སྦྱང་བ་བྱས་པའི་དབང་དུ་བྱས་ནས་དང་པོ་གཉིས་བཞག སེམས་ཅན་གྱི་འཇིག་རྟེན་ལ་ངན་སོང་དུ་སྐྱེས་པ་དང་། ང་རྒྱལ་དང་ལྡན་པ་དང་། ལྷ་སྣ་ཚོགས་ལ་མོས་པ་དང་། རྟོགས་པ་དང་ལྡན་པ་བཞི་ཡོད་པས། དེ་དག་ངན་སོང་ནས་ཐོན་པ་དང་། ང་རྒྱལ་ཆག་པ་དང་། ལྷར་སྐྱེ་བ་དང་། ཤེས་རབ་ཀྱི་རྟོགས་པ་ཆེར་འགྲོ་བའི་དབང་དུ་བྱས་ནས་ལྡེག་པ་ལ་སོགས་པ་བཞི་གསུངས་ཏེ། གནས་མི་གཙང་བ་དང་། ཉན་པ་པོ་སྣོད་དུ་མི་རུང་བ་རྣམས་ལ་ཡུམ་བསྟན་པར་མི་བྱའོ་ཞེས་གོ་བའི་དོན་དུ་འགྲེལ་པ་དག་གིས་བཤད་དོ། །ཕྱོགས་འགྱུར་བ་ཟུང་དུ་བསྡེབས་ན་དྲུག་དང་། བརྐྱང་ན་བཅུ་གཉིས་ནི་དྲུག་པོ་དེ་དག་ལ་གཡོས་གཡོས་ཞེས་པ་གཉིས་གཉིས་ཡོད་པས་སོ། །གཉིས་པ་རྫུ་འཕྲུལ་གྱི་ཆོ་འཕྲུལ་ལ་གཉིས་ཏེ། སྤྲུལ་པའི་ཆོ་འཕྲུལ་དང་། བྱིན་གྱིས་བརླབས་པའི་ཆོ་འཕྲུལ་ལོ། །དང་པོ་ལ་གདུལ་བྱའི་ང་རྒྱལ་བཅག་པའི་དོན་དུ་སྐུ་ཁྱད་པར་དུ་འཕགས་པར་བསྟན་པ་དང་། ཞུམ་པ་བསལ་བའི་དོན་དུ་སྐུ་ཐ་མལ་པར་བསྟན་པ་དང་། ཆགས་སྡང་ཅན་དུ་འཛིན་པ་སྤོང་བའི་དོན་དུ་ཐམས་ཅད་ཀྱི་མདུན་དུ་མཉམ་པར་བསྟན་པ་དང་གསུམ་མོ། །གཉིས་པ་ལ་དད་པ་ཅན་རྣམས་མཆོད་པ་བྱེད་པ་དང་། སྤྲོ་བར་བྱ་བས་དེ་དག་བསོད་ནམས་སྤེལ་བའི་དོན་དུ་བྱིན་གྱིས་བརླབས་པ་གཉིས་སོ། །གསུམ་པ་ཆོས་སྣང་བའི་ཆོ་འཕྲུལ་ལ་གཉིས་ཏེ། འཇིག་རྟེན་གྱི་ཁམས་རྣམ་པར་བསྟན་པ་དང་། འཁོར་བསྡུས་པའི་ཆོ་འཕྲུལ་ལོ། །དང་པོ་ནི་སྟོན་པ་ལ་བཟང་ངན་ཅན་དུ་འཛིན་པ་སྤང་བའི་ཕྱིར་དུ་ཕྱོགས་བཅུའི་སངས་རྒྱས་འཁོར་དང་བཅས་པ་མཐོང་བར་བྱས་པའོ། །གཉིས་པ་ནི་རིན་ཆེན་ཡོད་པ་ལ་སོགས་པའི་འཇིག་རྟེན་གྱི་ཁམས་ན་བྱང་སེམས་ཀུན་ཏུ་འོད་ཟེར་ལ་སོགས་པ་སྟན་ལས་ལངས་ཏེ་རང་རང་གི་སྟོན་པ་རིན་ཆེན་འབྱུང་གནས་ལ་སོགས་པ་ལ་ལྟས་ཁྱད་པར་ཅན་གྱི་རྒྱུ་ཞུས་པ་དང་། སྟོན་པས་དེ་ལུང་བསྟན་པ་དང་། ཕྲག་དོག་མེད་པའི་ཐུགས་དགོངས་བཟང་པོ་རིག་ནས་རང་རང་གི་སྟོན་པ་ལ་འཇིག་རྟེན་གྱི་ཁམས་འདིར་འོང་བར་ཞུས་པ་དང་། པདྨོའི་སྐྱེས་བསྐུར་བ་དང་། སྙུན་སྨྲ་བ་དང་། འཇིག་རྟེན་གྱི་ཁམས་འདིར་སྐྱེས་པའི་སེམས་ཅན་མི་སྨད་པ་ལ་སོགས་པའི་གདམས་པ་དང་བཅས་ཏེ་གནང་བ་དང་། གནང་བ་ཐོབ་པ་རྣམས་མཆོད་རྫས་སྟ་གོན་བྱས་ནས་འཇིག་རྟེན་གྱི་ཁམས་འདིར་འོངས་ནས་སྙུན་སྨྲ་བ་དང་། སྐྱེས་འབུལ་བ་དང་། པདྨོ་རྣམས་གང་ནས་འོངས་པའི་འཇིག་རྟེན་གྱི་ཁམས་ཀྱི་སངས་རྒྱས་སྲས་བཅས་ལ་མཆོད་པའི་ཕྱིར་གཏོར་བས། ཕྱོགས་བཅུའི་འཇིག་རྟེན་དུ་པདྨོའི་ལྟེ་བར་སྤྲུལ་སྐུ་ཤཱཀ་ཐུབ་བཞུགས་ནས་འདབ་མ་ལ་ས་ལ་གནས་པའི་བྱང་སེམས་ཀྱིས་བསྐོར་བ་ལ་ཡུམ་ལས་བརྩམས་པའི་ཆོས་འཆད་པའི་སྣང་བས་ཁྱབ་པ་དང་། ཕྱོགས་བཅུ་ནས་འོངས་པའི་འཁོར་རྣམས་གང་ནས་འོངས་པའི་ཕྱོགས་དང་། སྟེང་འོག་ནས་འོངས་པ་རྣམས་མདུན་རྒྱབ་ཏུ་གནས་པའོ། །གསུམ་པ་ཆོས་བཤད་པའི་དུས་མཁྱེན་པ་ནི་ཉན་པའི་སྐལ་བ་དང་ལྡན་པའི་འཁོར་རྣམས་འཚོགས་པར་མཁྱེན་ཏེ། དེ་ནས་བཅོམ་ལྡན་འདས་ཀྱིས་ལྷ་ལ་སོགས་པའི་འཁོར་ཐམས་ཅད་འདུས་པར་ཐུགས་སུ་ཆུད་པར་གྱུར་ཏོ་ཞེས་པའོ། །དེ་ལ་བྱ་རྒོད་ཕུང་པོའི་རི་ལ་སྟོན་པ་ཉིད་ཀྱི་སྐུ་དང་ལྗགས་ལས་འོད་བཀྱེ་བ་ནས་པདྨོའི་ལྟེ་བ་ལ་སྤྲུལ་པའི་སྐུ་རེ་བཞུགས་པ་དང་། སྤྲུལ་པའི་ཆོ་འཕྲུལ་གྱི་དུས་སུ་སྐུའི་སྣང་བ་དང་། འཇིག་རྟེན་གྱི་ཁམས་བསྟན་པ་ན་ཕྱོགས་བཅུའི་སངས་རྒྱས་ཀྱི་འཁོར་དང་འཁོར་བསྡུས་པས་སྲས་ཕྱོགས་བཅུའི་སངས་རྒྱས་ཀྱི་སྐུ་དང་། པདྨོ་ཕྱོགས་བཅུར་གཏོར་བ་ན་ལྟེ་བ་ན་བཞུགས་པའི་སྐུ་སྟེ། སྐུའི་སྣང་བ་ཇི་སྙེད་བྱུང་བ་རྣམས་ཀྱིས་ནི་རྟེན་བསྟན། ཕར་ཕྱིན་དྲུག་དང་ཡུམ་ལས་བརྩམས་པའི་ཆོས་འཆད་པའི་སྣང་བ་རྣམས་ཀྱིས་ནི་འབྲས་བུ་ཆོས་འཁོར་བསྐོར་བ་བསྟན། རྟེན་དེས་འབྲས་བུ་དེ་ཐོབ་པ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་ཐབས་ཀྱིས་ཡིན་ནོ་སྙམ་དུ་བྱམས་པས་དགོངས་ནས་རྟེན་ནི་ཐུབ་རྣམས་ཞེས་པ་དང་། ཐབས་ནི་གང་དང་ཡང་དག་ལྡན་པས་ཞེས་དང་། འབྲས་བུ་ནི་རྣམ་པ་ཀུན་ལྡན་སྣ་ཚོགས་འདི་གསུངས་པ་ཞེས་བསྡུས་ནས་གསུངས་སོ། །གསུམ་པ་ཤེས་བྱེད་འགོད་པ་ལ་བཞི་ལས། དང་པོ་རྩ་བའི་དགོངས་པ་ཡིན་པ་ནི་བསྟན་བཅོས་རྩ་བར་རྣམ་མཁྱེན་ལུས་ཀྱི་ཐོག་མར་ཡོད་བཞིན་དུ་མཆོད་བརྗོད་ཀྱི་སྐབས་སུ་གཞི་ཤེས་དང་པོར་བཤད་པ་འདི་དང་། ཉན་ཐོས་བྱང་ཆུབ་སེམས་དཔའི་ཚོགས་བཅས་ཞེས་པའི་ཚིག་གིས་སྐབས་འདིར་བསྟན་གྱི་སངས་རྒྱས་དེ་ཉན་ཐོས་ཀྱི་ཚོགས་དང་། བྱང་ཆུབ་སེམས་དཔའི་ཚོགས་དང་བཅས་པར་བསྟན་པ་འདི་དང་། སྐབས་དེར་ཉན་ཐོས་ཀྱི་ཚོགས་དང་། བྱང་ཆུབ་སེམས་པའི་ཚོགས་དང་། སྟོན་པ་སངས་རྒྱས་གསུམ་རིམ་བཞིན་དུ་བསྟན་པ་སྟེ། གནད་འདི་གསུམ་གྱིས་བསྟན་བཅོས་རྩ་བའི་དགོངས་པར་གདོན་མི་ཟའོ། །གཉིས་པ་འཕགས་པའི་དགོངས་པ་ཡིན་པ་ནི། ཉིར་སྣང་དུ། གང་གི་ཕྱིར་གཞུང་སྟོང་ཕྲག་ཉེར་ལྔ་པོ་འདི་རྣམས་ཀྱི་འདི་སྐད་ཅེས་བྱ་བ་ལ་སོགས་པ་སྐབས་འབྱེད་པ་ནས་བརྩམས་ཏེ་ཡོངས་སུ་རྫོགས་པའི་བར་གྱི་དངོས་པོ་རྣམས་གཅིག་ཏུ་བསྡུས་ན་རྣམ་པ་ཐམས་ཅད་མཁྱེན་པ་ལ་སོགས་པ་ཆོས་ཀྱི་སྐུ་མཛད་པ་དང་བཅས་པའི་མཐར་ཐུག་པ་དངོས་པོ་བརྒྱད་དུ་འགྱུར་རོ་ཞེས་གསུངས་པའི་ཕྱིར་རོ། །གལ་ཏེ་ལུང་འདི་ཕྲིན་ལས་ཀྱི་མཇུག་ཏུ་འབྱུང་བས་གླེང་གཞི་ཕྲིན་ལས་ཀྱི་ཁོངས་སུ་གཏོགས་པའི་དོན་ཡིན་ནོ་སྙམ་ན། དེ་ནི་ཁོ་བོའི་ལུགས་ཀྱི་གཞུང་གི་དགོངས་པ་མཛད་པ་ཕྲིན་ལས་ཀྱི་འཁོར་ལོ་རྒྱུན་མི་ཆད་པ་མཚོན་པའི་ཆེད་དུ་མཐའ་ཐོག་གཉིས་པོ་སྦྱར་བའི་ལུགས་འདི་ལ་འཐད་པ་ཡིན་ཏེ། གླེང་གཞི་ཕྲིན་ལས་ཀྱི་ཁོངས་སུ་གཏོགས་པའི་ཚེ་མཆོད་བརྗོད་ཀྱི་བརྗོད་བྱ་ཡང་ཕྲིན་ལས་ཀྱི་ཁོངས་སུ་གཏོགས་པའི་ཕྱིར་རོ། །ཇི་ལྟར་སྙམ་ན་མཆོད་བརྗོད་ཀྱི་ཡུལ་དུ་གྱུར་པའི་འབྲས་བུ་ལ་སྤྲོ་བ་སྐྱེས་ནས་དེ་ཐོབ་པའི་ཆེད་དུ་མཁྱེན་གསུམ་ཐོས་བསམ་གྱིས་གཏན་ལ་ཕབ་པ་སྦྱོར་བཞིས་ཉམས་སུ་བླངས་ཏེ། ཆོས་སྐུ་མངོན་དུ་བྱས་པའི་ཚེ་ཕྲིན་ལས་ཉི་ཤུ་རྩ་བདུན་འབྱུང་ལ་ཕྲིན་ལས་དེ་ཉིད་ལ་གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ་ཞེས་པའི་དོན་གནས་པའི་ཕྱིར་རོ། །གསུམ་པ་སློབ་དཔོན་གྱི་དགོངས་པ་ཡིན་པ་ནི། འགྲེལ་ཆུང་དུ། ཐམས་ཅད་མཁྱེན་པ་ཉིད་གསུམ་གྱི་བདག་ཉིད་ཚུལ་གསུམ་པ་ཅན་སངས་རྒྱས་ལ་སོགས་པ་སྐྲུན་པར་མཛད་པ་ནི་གདོན་མི་ཟ་བར་སྲིད་པ་ཉིད་དོ་ཞེས་དང་། སངས་རྒྱས་ཉན་ཐོས་ལ་སོགས་པས་ཡོངས་སུ་བསྐོར་བ་དེ་ཞེས་རྩ་བར་ཉན་ཐོས་དང་བྱང་སེམས་ཐོག་མར་ཡོད་ཀྱང་འགྲེལ་པར་སངས་རྒྱས་ཐོག་མར་སྨོས་པའི་གནད་ཀྱིས་ཀྱང་གྲུབ་སྟེ། བྱང་སེམས་ཀྱི་རྒྱུད་ཀྱི་རྟོགས་རིགས་གསུམ་པོ་དེས་ཐོག་མར་སངས་རྒྱས་བསྐྱེད་ནས་སངས་རྒྱས་ཀྱི་རྒྱུད་ཀྱི་རྟོགས་རིགས་གསུམ་པོས་བདག་རྐྱེན་བྱས་ཏེ་ཆོས་འཁོར་བསྐོར་བས་སླར་ཡང་འཕགས་པ་གཞན་རྣམས་བསྐྱེད་པ་གླེང་གཞིའི་ཚུལ་དུ་འབྱུང་བའི་ཕྱིར་ཞེས་དགོངས་སོ། །བཞི་པ་གཞུང་གཞན་གྱི་དགོངས་པ་ཡིན་པ་ནི་རྒྱུད་བླར། འདི་དག་རང་མཚན་ཉིད་ཀྱིས་སོ་སོ་བ། །གོ་རིམ་ཇི་བཞིན་གཟུངས་ཀྱི་རྒྱལ་པོའི་མདོར། །གླེང་གཞི་ལས་ནི་གནས་གསུམ་རིག་བྱ་སྟེ། །ཞེས་མདོ་སྡེ་དུ་མའི་དགོངས་འགྲེལ་དུ་བརྩམས་པའི་ཚེ་ན་ཡང་རྡོ་རྗེའི་གནས་དང་པོ་གསུམ་གཟུངས་ཀྱི་དབང་ཕྱུག་རྒྱལ་པོའི་མདོའི་གླེང་གཞི་དང་སྦྱར་བར་མཛད་ན། ཤེར་ཕྱིན་གྱི་མདོ་གཅིག་པུའི་དགོངས་འགྲེལ་དུ་བརྩམས་པའི་ཚེ་དོན་དེ་འབད་མེད་དུ་གྲུབ་པའི་ཕྱིར་རོ། །འོ་ན་རྒྱུད་བླར། རྡོ་རྗེའི་གནས་དང་པོ་གསུམ་གླེང་གཞི་དང་སྦྱར་ཞིང་འདིར་དངོས་པོ་བརྒྱད་ལས་ལོགས་སུ་མཆོད་བརྗོད་གླེང་གཞི་དང་སྦྱར་བའི་དོན་ཅི་ཡིན་སྙམ་ན། གཟུངས་ཀྱི་དབང་ཕྱུག་རྒྱལ་པོའི་མདོའི་གླེང་གཞིའི་གོ་རིམ་དང་རྡོ་རྗེའི་གནས་དང་པོ་གསུམ་གྱི་གོ་རིམ་མཐུན་པས་ལོགས་སུ་མ་སྦྱར་ལ། འདི་ནི་གོ་རིམ་མི་མཐུན་པས་ལུས་ཀྱི་གོ་རིམ་ལས་ལོགས་སུ་མཆོད་བརྗོད་ཀྱི་གོ་རིམ་གླེང་གཞི་དང་སྦྱར་བར་མཛད་པ་ཙམ་ཡིན་གྱི་ངོ་བོ་མི་མཐུན་པ་མེད་པར་ནི་གོང་དུ་བཤད་ཟིན་ཏོ། །དེས་ན་རྒྱུད་བླར་ཡང་མཛད་པའི་འཁོར་ལོ་རྒྱུན་མི་ཆད་པ་འདི་ཉིད་བསྟན་ཏེ། མཐར་ཐུག་གི་དཀོན་མཆོག་གསུམ་དམིགས་ཡུལ་དུ་བྱས་ནས་ཁམས་ཀྱི་དྲི་མ་སྦྱངས་ཏེ་བྱང་ཆུབ་ཐོབ་པ་ན་སྟོབས་སོགས་ཀྱི་ཡོན་ཏན་འབྱུང་ཞིང་དེ་ལས་མཛད་པ་ཕྲིན་ལས་འབྱུང་ལ། དེ་ཉིད་ཀྱི་གནས་སྐབས་སུ་གླེང་གཞི་ནས་བཤད་པའི་གནས་སྐབས་ཀྱི་དཀོན་མཆོག་གསུམ་པོ་དེ་བཞག་པའི་ཕྱིར་རོ། །འཕགས་མཆོག་ཀླུ་སྒྲུབ་ཀྱི་བཞེད་པ་ཡང་ཡིན་ཏེ། གང་སླད་སངས་རྒྱས་འཇིག་རྟེན་གཙོ། །ཐུགས་རྗེ་ཅན་རྣམས་ཁྱོད་ཀྱི་སྲས། །དེ་ཡི་སླད་དུ་དགེ་མ་ཁྱོད། །སེམས་ཅན་ཀུན་གྱི་ཕྱི་མོ་ལགས། །ཞེས་སངས་རྒྱས་ཀྱི་རྒྱུད་ཀྱི་མཁྱེན་པ་གསུམ་པོ་དེ་སངས་རྒྱས་འཕགས་པའི་ཡུམ་དང་དེའི་རྗེས་སུ་བྱུང་བའི་འཕགས་པ་གཞན་རྣམས་ཀྱི་ཕྱི་མོ་ཡིན་པར་གསུངས་པའི་ཕྱིར་རོ། །བསྟན་བཅོས་རིན་ཆེན་སྒྲོན་མེའི་དགོངས་པ་ཡང་ཡིན་ཏེ། དེ་ཉིད་དུ། གླེང་གཞི་རྒྱས་པར་བཀའ་སྩལ་དོན་མཆོག་རྣམས། །ལེགས་པར་སྦྱར་བ་ཕྱག་འཚལ་ཚིགས་བཅད་ཡིན། །ཞེས་གསུངས་པའི་ཕྱིར་རོ། །འབྲེ་ཨར་ལ་སོགས་པའི་སྔོན་གྱི་མཁས་པ་རྣམས་དང་། ཤེར་ཕྱིན་ལ་དབང་འབྱོར་པ་གཡག་རོང་གཉིས་ཀྱི་བཞེད་པ་ཡང་འདི་ཉིད་ཡིན་པས་ཐེ་ཚོམ་དང་སོམ་ཉི་མི་བྱའོ། །མཆོད་བརྗོད་ཚིག་གི་མཁྱེན་གསུམ་རྫིང་བཅས་ནས། །དགོས་འབྲེལ་ངག་གིས་ཡུར་བ་ནས་དྲངས་ཏེ། །མངོན་རྟོགས་བརྒྱད་ཀྱི་ཞིང་ལ་བཅུས་པ་ཡིས། །རང་དོན་མཁྱེན་གསུམ་ལོ་ཏོག་རབ་རྒྱས་ནས། །གཞན་དོན་གླེང་གཞིའི་ཚུལ་གྱིས་རིགས་ཅན་གསུམ། །རང་རང་བཞེད་དོན་ཟས་ལ་སྤྱོད་པ་ཡི། །སོ་ནམ་ཚུལ་འདི་རྫོགས་པའི་སངས་རྒྱས་ཀྱི། །མཛད་པའི་འཁོར་ལོ་ཡིན་པར་ཁོ་བོས་རྟོགས། །ཞེས་བྱ་བ་ཡང་ཤུགས་འབྱུང་དུ་བྲིས་སོ། །མཆོད་བརྗོད་བཤད་ཟིན་ཏོ།། །།གཉིས་པ་རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འབྲེལ་ནི། རྣམ་པ་ཐམས་ཅད་མཁྱེན་ཉིད་ལམ། །ཞེས་སོགས་ཚིགས་བཅད་གཉིས་ཏེ། འདི་ལ་འཕགས་གྲོལ་གྱིས་བསྟན་བཅོས་བརྩམས་པའི་དགོས་པ་ལ་སྦྱར་བ་ཙམ་ཞིག་མ་གཏོགས་པ་དགོས་སོགས་ཆོས་བཞི་ཆར་ལ་སྦྱར་བའི་གསལ་ཀ་མི་སྣང་ངོ་། །སློབ་དཔོན་གྱིས་ནི་རྐང་པ་དང་པོ་གཉིས་ཀྱིས་བརྗོད་བྱ། བར་པ་བཞིས་ཉིང་དགོས། ཐ་མ་གཉིས་ཀྱིས་དགོས་པ། འབྲེལ་པ་ཤུགས་ལས་བསྟན་པར་བཞེད་དོ། །འོན་ཀྱང་དེ་ཞེས་ཚིག་སྦྱོར་དང་བསྟུན་ན་དང་པོ་གསུམ་གྱིས་བརྗོད་བྱ། དེ་ནས་གསུམ་གྱིས་ཉིང་དགོས། ཐ་མ་གཉིས་ཀྱིས་དགོས་པ་བསྟན་ཏེ། མགོན་པོ་བྱམས་པས་མཁྱེན་གསུམ་གྱི་ཡོན་ཏན་བརྗོད་པའི་སྒོ་ནས་ཡུམ་ལ་ཕྱག་འཚལ་ནས་མཁྱེན་པ་གསུམ་གྱི་རྒྱན་རྩོམ་པར་དམ་བཅས་པ་ན་དེའི་བརྗོད་བྱ་གང་ཡིན་ཞེ་ན། མཆོད་བརྗོད་ཀྱི་བཤད་ཚུལ་ཕྱི་མ་གཉིས་ཀྱིས་བསྡུས་པའི་སངས་རྒྱས་ཀྱི་སའི་མཁྱེན་གསུམ་ལ་རྣམ་མཁྱེན་གྱི་ཐ་སྙད་མཛད་པ་དེ་ཐོབ་བྱའི་འབྲས་བུར་བྱས་ནས་དེ་ཐོབ་བྱེད་ཀྱི་ལམ་མཆོད་བརྗོད་ཀྱི་བཤད་ཚུལ་དང་པོས་བསྡུས་པའི་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་གང་ཟག་གི་ཆ་རྐྱེན་གྱི་སྒོ་ནས་མངོན་པར་རྟོགས་པ་བརྒྱད་དུ་འགྱུར་བ་དེ་ཉིད་འདིར་བརྗོད་བྱ་ཡིན་ནོ། །ཞེས་པ་ནི་རྣམ་པ་ཐམས་ཅད་མཁྱེན་ཉིད་ལམ་ཞེས་པས་བསྟན། འོ་ན་དེ་ཉིད་བཀའ་ལ་མ་ལྟོས་པར་རང་སྟོབས་ཀྱིས་བཤད་པ་ཡིན་ནམ་སྙམ་ན། སྟོན་པས་འདི་ལས་བཤད་པ་གང་ཞེས་ཏེ། སྟོན་པས་ཤེར་ཕྱིན་གྱི་མདོ་ལས་གསུངས་པ་དེ་འདིར་བཤད་པར་བྱ་བ་ཡིན་གྱི་དེ་ལས་ལོགས་སུ་མི་འཆད་ཅེས་པའི་དོན་ཏོ། །འོ་ན་ཤེར་ཕྱིན་གྱི་མདོ་ནས་བཤད་པའི་ཐེག་པ་གསུམ་ཆར་གྱི་ལམ་འདིར་འཆད་དམ་ཞེ་ན་གཞན་གྱིས་མྱོང་བ་མ་ཡིན་ཏེ། ཞེས་ཏེ་ཤེར་ཕྱིན་གྱི་མདོར་ཐེག་པ་གསུམ་ཆར་གྱི་ལམ་གསུངས་ཀྱང་འདིར་ནི་ཐེག་པ་གཞན་གྱིས་མྱོང་བ་མ་ཡིན་པ་བྱང་ཆུབ་སེམས་དཔའ་ཁོ་ནས་ཉམས་སུ་མྱང་བར་བྱ་བ་དེ་འཆད་ཅེས་པའི་དོན་ཏོ། །རྟོགས་རིགས་ཀྱི་དབང་དུ་བྱས་ན་ནི་ཐེག་པ་གསུམ་ཆར་གྱི་རྟོགས་རིགས་དངོས་སུ་བསྟན་ཏེ། བྱང་སེམས་ཁོ་ནས་ཉམས་སུ་མྱང་བར་བྱ་བ་དེ་ལ་ཐེག་པ་གསུམ་ཆར་གྱི་རྟོགས་རིགས་ཚང་བའི་ཕྱིར་རོ། །ཐེག་དམན་རང་རྒྱུད་པའི་ལམ་ནི་གཞུང་འདིར་དངོས་སུ་མི་སྟོན་ཏེ། གཞན་གྱིས་མྱོང་བ་མ་ཡིན་ཏེ་ཞེས་དང་། འོག་ཏུ་ཐེག་ཆེན་ལམ་གྱི་རྣམ་གཞག་རེ་རེ་འཆད་པའི་སྐབས་སུ་ཐེག་དམན་གྱི་ལམ་རྣམས་ཤུགས་ལ་བསྟན་པར་གསུངས་པའི་ཕྱིར་རོ། །དེས་ན་འཕགས་སེང་གཉིས་ཀྱིས་བསྟན་བཅོས་འདིས་འཕགས་པ་བཞི་ཆར་གྱི་མངོན་རྟོགས་བསྡུས་པར་གསུངས་པ་དང་། རྩ་བར་ཡང་། སློབ་མ་བསེ་རུའི་ལམ་གང་དང་། །ཞེས་གསུངས་པ་རྣམས་རང་གི་ངོ་བོ་བྱང་སེམས་ཀྱི་མངོན་པར་རྟོགས་པ་ཡིན་ཀྱང་། འཕགས་པ་བཞི་ཆར་གྱི་རྟོགས་རིགས་ཡིན་པ་ལ་དགོངས་ལ། དངོས་བསྟན་ལ་ཐེག་དམན་གྱི་ལམ་མེད་པ་ནི་མི་འགལ་ཞིང་གནད་གཅིག་པར་རྟོགས་དགོས་སོ། །གཉིས་པ་དགོས་པ་ནི། སྟོན་པས་འདི་ལས་བཤད་པ་གང་། །ཞེས་པ་ལས་འཕྲོས་ནས་སྟོན་པས་བཤད་ཟིན་པས་བསྟན་བཅོས་བརྩམས་པ་ལ་དགོས་པ་མེད་པར་འགྱུར་རོ་སྙམ་ན། དེའི་ལན་ནི་ཚིག་རྐང་ཐ་མ་གཉིས་ཏེ། བསྟན་བཅོས་མ་བརྩམས་ན་སོ་སོ་སྐྱེ་བོ་རྣམས་ཀྱིས་མདོ་དོན་བདེ་བླག་ཏུ་རྟོགས་པར་མི་ནུས་པས་དེས་དོན་དེ་རྟོགས་པའི་ཆེད་དུ་བསྟན་བཅོས་རྩོམ་ཞེས་པའི་དོན་ཏོ། །གསུམ་པ་ཉིང་དགོས་ནི། འོ་ན་སོ་སོ་སྐྱེ་བོས་མདོ་དོན་བདེ་བླག་ཏུ་རྟོགས་པ་ལ་དགོས་པ་ཅི་ཡོད་ཅེ་ན། དེའི་ལན་དུ་ཆོས་སྤྱོད་བཅུ་ཡི་བདག་ཉིད་ཀྱི། །ཞེས་སོགས་རྐང་པ་གསུམ་སྟེ། སོ་སོ་སྐྱེ་བོས་མདོ་དོན་བདེ་བླག་ཏུ་རྟོགས་པ་ལ་བརྟེན་ནས་ཆོས་སྤྱོད་བཅུའི་བདག་ཉིད་ཀྱི་མདོ་དོན་དྲན་པའི་ཤེས་པ་ལ་བཞག་ནས་ཚོགས་སྦྱོར་གྱི་གནས་སྐབས་སུ་བསྐལ་པ་གྲངས་མེད་གཅིག་ཏུ་བསྒོམས་པའི་སྟོབས་ཀྱིས་ས་དང་པོར་ཆོས་སྤྱོད་བཅུ་མངོན་དུ་འགྱུར་བ་ནི་བསྟན་བཅོས་ཀྱི་ཉིང་དགོས་ཡིན་ཞེས་པའི་དོན་ཏོ། །འདི་ལ་ཆོས་སྤྱོད་བཅུའི་ངོ་བོ་དང་། དེས་མདོ་དོན་བསྡུས་པའི་ཚུལ་དང་། བསྟན་བཅོས་ཀྱི་ཉིང་དགོས་ས་དང་པོ་ནས་འཇོག་པའི་ཚུལ་གསུམ་ལས། དང་པོ་ནི། རྒྱ་བོད་ཀྱི་མཁས་པ་རྣམས་ཀྱིས། འདིར་བསྟན་གྱི་ཆོས་སྤྱོད་བཅུ་ཡི་གེ་འདྲི་མཆོད་སྦྱིན་པ་སོགས་དབུས་མཐའ་ནས་གསུངས་པ་ལ་ངོས་འཛིན་པ་དང་། རྣམ་མཁྱེན་མཚོན་བྱེད་ཀྱི་ཆོས་བཅུ་ལ་བྱེད་པ་དང་། ཕར་ཕྱིན་བཅུ་ལ་བྱེད་པའི་ལུགས་གསུམ་སྣང་ཡང་བསྟན་བཅོས་རྩ་འགྲེལ་གྱི་དགོངས་པ་ཕྱི་མ་དེ་ཉིད་ཡིན་ཞིང་ལོ་ཙྪ་བ་དཔོན་སློབ་རྣམས་ཀྱང་འདི་ཉིད་བཞེད་དོ། །དེ་ཡང་ཆོས་སྤྱོད་བཅུ་ཡི་བདག་ཉིད་ཀྱི། མདོ་དོན་ཞེས་པས་མདོ་དོན་མ་ལུས་པ་ཆོས་སྤྱོད་བཅུས་བསྡུས་པར་གསུངས་ཤིང་། འགྲེལ་པར་ཡང་དེ་ལྟར་གསུངས་པས་རྣམ་པ་ཐམས་ཅད་མཁྱེན་ཉིད་ལམ་ཞེས་པའི་ལམ་དེ་དང་། སྐབས་འདིར་བཤད་པའི་ཆོས་སྤྱོད་བཅུ་དོན་གཅིག་པ་ཡིན་ཏེ། འགྲེལ་ཆེན་དུ། བྱང་ཆུབ་ཀྱི་སེམས་དང་གདམས་ངག་ལ་སོགས་པ་སྒྲུབ་པའི་རང་བཞིན་སྐབས་བརྒྱད་ཀྱི་དབྱེ་བས་ཕྱེ་བ་ཐམས་ཅད་ཅེས་དང་། འགྲེལ་ཆུང་དུ། བྱང་ཆུབ་ཀྱི་སེམས་དང་སྦྱིན་པ་ལ་སོགས་པ་སྒྲུབ་པའི་སྤྱོད་པ་ལེགས་པར་བཞག་ནས་ཞེས་གསུངས་པའི་ཕྱིར། འོ་ན་བྱང་ཆུབ་ཀྱི་སེམས་དང་ཞེས་སེམས་བསྐྱེད་ཆོས་བཅུའི་དང་པོར་བསྟན་པ་དང་འགལ་ལོ་ཞེ་ན། གཞུང་དེས་སེམས་བསྐྱེད་ཆོས་སྤྱོད་བཅུའི་དང་པོར་བསྟན་པ་མ་ཡིན་ཏེ། སློབ་དཔོན་གྱིས་ནི་ཆོས་སྤྱོད་བཅུས་བསམ་པ་མ་བསྡུས་སོ་སྙམ་དུ་དགོངས་ནས་བསམ་པ་ཡང་བསྡུ་བའི་ཆེད་དུ་བསམ་པ་སེམས་བསྐྱེད་བསྣན་པ་ཡིན་ནོ། །འོན་ཀྱང་ཆོས་སྤྱོད་བཅུས་མདོ་དོན་བསྡུས་པའི་ཚེ་ན་བསམ་པ་སེམས་བསྐྱེད་ཀྱང་ཆོས་སྤྱོད་བཅུར་བསྡུ་བའི་སྐབས་ཡིན་པས་བསམ་པ་མ་བསྡུས་སོ་སྙམ་པ་ནི་མི་དགོས་སོ། །ཅིའི་ཕྱིར་ཕར་ཕྱིན་བཅུ་ལ་ཆོས་སྤྱོད་བཅུར་འཇོག་ཅེ་ན། སློབ་དཔོན་དབྱིག་གཉེན་གྱིས། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །གསུང་རབ་ཚེ་དང་བསོད་ནམས་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དོན་བཅུ་ལ་འཇུག་པར་གསུངས་པ་ལས་སྐབས་འདིར་ནི་ལམ་ལ་འཇུག་ལ། དེའི་སྤྱོད་པ་ནི་ཕ་རོལ་ཏུ་ཕྱིན་པ་བཅུ་སྟེ། གོང་གི་ལམ་ཞེས་པ་དང་དོན་གཅིག་པའི་གནད་ཀྱང་འདི་ཉིད་ཡིན་ནོ། །གཉིས་པ་ནི་ཅིའི་ཕྱིར་སྦྱིན་སོགས་ཕ་རོལ་ཏུ་ཕྱིན་པ་བཅུས་མདོ་དོན་བསྡུས་པ་ཡིན་ཞེ་ན། མཁྱེན་གསུམ་གྱི་སྐབས་སུ་ཡང་ཕར་ཕྱིན་བཅུ་པོ་འདི་ཉིད་ཐོས་བསམ་གྱིས་གཏན་ལ་ཕབ་པའི་ལྡོག་པ་ནས་བསྟན། སྦྱོར་བཞིའི་སྐབས་སུ་ཡང་བཅུ་པོ་དེ་ཉིད་ཉམས་ལེན་གྱི་ལྡོག་པ་ནས་བསྟན། ཆོས་སྐུའི་སྐབས་སུ་བཅུ་པོ་དེ་ཉིད་འབྲས་བུའི་ལྡོག་པ་ནས་བསྟན་པའི་ཕྱིར་རོ། །དེ་ལྟར་བྱས་ན་ཕར་ཕྱིན་ཕྱི་མ་བཞི་ཤེས་རབ་ཀྱི་ཕར་ཕྱིན་གྱི་ནང་དུ་འདུས་པས། བྱང་ཆུབ་སེམས་དཔའི་ཕར་ཕྱིན་དྲུག་པོ་དེ་ལ་སྒྲུབ་པའི་ཐ་སྙད་མཛད་ནས་དེ་ཉིད་མཁྱེན་གསུམ་གྱི་སྐབས་སུ་བསྟན་པ་ལ་སྤྱིའི་སྒྲུབ་པ་དང་། སྦྱོར་བཞིའི་སྐབས་སུ་བསྟན་པ་ལ་བྱེ་བྲག་གི་སྒྲུབ་པ་ཞེས་པའི་གཞུང་དང་ཡང་འབྱོར་པ་ཡིན་ནོ། །གསུམ་པ་ནི་བསྟན་བཅོས་ཀྱི་ཉིང་དགོས་མ་མཐའ་ས་དང་པོ་ནས་འཇོག་པའི་རྒྱུ་མཚན་ཅི་ཡིན་སྙམ་ན། སོ་སོ་སྐྱེ་བོའི་གནས་སྐབས་སུ་བསྟན་བཅོས་ལ་མ་བརྟེན་པར་མདོ་དོན་བདེ་བླག་ཏུ་རྟོགས་མི་ནུས་པས་བསྟན་བཅོས་ལ་བརྟེན་ནས་རྟོགས་པའི་མདོ་དོན་དེ་ཚོགས་སྦྱོར་གྱི་གནས་སྐབས་སུ་བསྒོམས་པའི་སྟོབས་ཀྱིས་ས་དང་པོར་ཆོས་ཉིད་མངོན་དུ་གྱུར་པའི་ཚེ་བསྟན་བཅོས་ལ་མ་ལྟོས་པར་རང་ཉིད་ཀྱིས་མདོ་དོན་མངོན་སུམ་དུ་མཐོང་བའི་སྒོ་ནས་བཀའི་དགོངས་པ་རང་དབང་དུ་འགྲེལ་ནུས་པའི་ཕྱིར་ཏེ། དཔེར་ན་འཕགས་པ་ཀླུ་སྒྲུབ་བཞིན་ནོ། །འདི་ལ་དགོངས་ནས། གང་ཞིག་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་གསུངས་སོ། །མདོར་ན་དགོས་འབྲེལ་དག་གི་ཚིགས་བཅད་གཉིས་པོ་འདིས་རྗོད་བྱེད་མངོན་རྟོགས་རྒྱན་ལ་བརྟེན་ནས། བརྗོད་བྱ་དགོས་པ་ཉིང་དགོས་གསུམ་ལ་འཇུག་པའི་རིམ་པ་འདི་ལྟར་བསྟན་ཏེ། སོ་སོ་སྐྱེ་བོའི་དུས་སུ་མངོན་རྟོགས་རྒྱན་ལ་ཐོས་བསམ་བྱས་པས་ཤེར་ཕྱིན་གྱི་མདོའི་དོན་ངོ་བོ་ཆོས་སྤྱོད་བཅུ་ཡིན་ཀྱང་བསྟན་ཚུལ་སྐབས་བརྒྱད་ཀྱི་སྒོ་ནས་བསྟན་པ་དེ་ཉིད་དོན་སྤྱིའི་ཚུལ་གྱིས་རྟོགས་པར་འབྱུང་ལ། དེའི་དོན་ཚོགས་སྦྱོར་གྱི་གནས་སྐབས་སུ་ཉམས་སུ་བླངས་པས་ས་དང་པོར་ཕ་རོལ་ཏུ་ཕྱིན་པ་བཅུ་པོ་མངོན་དུ་འགྱུར་ལ། དེ་ནས་ལམ་ལྷག་མ་རྣམས་ཀྱི་ཉམས་ལེན་བསྟན་བཅོས་ལ་མི་ལྟོས་པར་མདོའི་དོན་ལ་རང་ཉིད་ཀྱིས་འཇུག་པར་བསྟན་ཏེ་གསུང་རབ་མཐའ་དག་གི་དགོངས་པའོ། །འདི་བློ་ཡུལ་དུ་མ་ཤོང་བ་དག་གིས་གཞན་གྱི་བློ་ཚོད་འཇལ་བ་ནི་ཁྲོན་པའི་ནང་གི་སྦལ་ཆུང་དང་མཚུངས་སོ། །གསུམ་པ་བསྟན་བཅོས་ཀྱི་བརྗོད་བྱ་མངོན་རྟོགས་བཤད་པ་ལ། རྒྱས་པ་ལ་དད་པ་ལ་བརྒྱད་དུ་ཕྱེ་བ། བར་པ་ལ་དད་པ་ལ་དྲུག་ཏུ་བསྟན་པ། བསྡུས་པ་ལ་དད་པ་ལ་གསུམ་དུ་བསྡུ་བ་སྟེ་གསུམ་ལས། དང་པོ་ལ་བསྡུས་དོན་ལུས་རྣམ་གཞག་དང་། ཚིག་དོན་ཡན་ལག་རྒྱས་བཤད་གཉིས་ལས། བསྡུས་དོན་ལུས་རྣམ་གཞག་འཆད་ཅེས་པའམ་བཤད་ཐབས་ཀྱི་མན་ངག་ལྔའི་སྒོ་ནས་བཤད་པ་ལྟར་ན་དགོས་དོན་སྔར་བསྟན་ཟིན་པས་བསྡུས་དོན་འཆད་པ་ནི། ཤེས་རབ་ཕ་རོལ་ཕྱིན་པ་ནི། །ཞེས་སོགས་ཚིགས་བཅད་བཅོ་ལྔ་སྟེ། མཆོད་བརྗོད་ཀྱི་བཤད་ཚུལ་ཐ་མ་གཉིས་ཀྱིས་བསྡུས་པའི་འབྲས་བུ་ཤེར་ཕྱིན་ནི་ཐོབ་བྱེད་ཀྱི་ལམ་མངོན་རྟོགས་བརྒྱད་ཀྱི་སྒོ་ནས་བཤད། བཤད་ཚུལ་དང་པོས་བསྡུས་པའི་ལམ་ཤེར་ཕྱིན་ནི་གང་ཟག་གི་ཆ་རྐྱེན་མངོན་རྟོགས་བརྒྱད་ཀྱི་སྒོ་ནས་བཤད། ཞར་ལ་སྟོན་པས་འདི་ལས་བཤད་པ་གང་ཞེས་པ་ལས་འཕྲོས་ནས་གཞུང་ཤེར་ཕྱིན་ནི་བརྗོད་བྱ་མངོན་པར་རྟོགས་པ་བརྒྱད་ཀྱི་སྒོ་ནས་བཤད་ཅེས་པ་ཡང་ཐོབ་བོ། །དེ་ལྟར་གསུམ་ལས་དང་པོ་ནི་ཤེར་ཕྱིན་མཚན་ཉིད་པ་ཡིན་ལ་ཕྱི་མ་གཉིས་ནི་བཏགས་པ་བ་ཡིན་ཏེ། འདོགས་པའི་རྒྱུ་མཚན་ཡང་གཞུང་ནི་དེ་སྟོན་བྱེད་ཡིན་པ་དང་ལམ་ནི་དེ་ཐོབ་བྱེད་ཡིན་པའི་ཕྱིར་རོ། །བཏགས་པའི་དགོས་པ་ནི་ཤེར་ཕྱིན་དོན་དུ་གཉེར་བས་གཞུང་ལ་ཐོས་སོགས་ཀྱིས་འཇུག་ཅིང་ལམ་བསྒོམ་བྱར་ཤེས་པའི་དོན་ཏོ། །དངོས་ལ་གནོད་བྱེད་ནི་རབ་ཀྱི་མཐར་ཕྱིན་པ་མ་ཡིན་པའི་ཕྱིར་རོ། །ཇི་སྐད་དུ་འགྲེལ་ཆེན་དུ། སངས་རྒྱས་བཅོམ་ལྡན་འདས་ཀྱི་གཉིས་སུ་མེད་པའི་ཡེ་ཤེས་སྒྱུ་མ་ལྟ་བུ་ནི་དངོས་ཡིན་ལ་དེ་ཐོབ་པ་དང་རྗེས་སུ་མཐུན་པ་ཉིད་ཀྱིས་ཚིག་དང་ངག་གི་ཚོགས་ཀྱི་གཞུང་དང་མཐོང་བ་ལ་སོགས་པའི་མཚན་ཉིད་ཅན་གྱི་ལམ་ལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི་བཏགས་པ་བའོ། །དེ་སྐད་དུ་ཡང་སློབ་དཔོན་ཕྱོགས་ཀྱི་གླང་པོའི་ཞལ་སྔ་ནས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དེ་དོན་སྦྱོར་བ་ཡི། །གཞུང་དང་ལམ་ལ་དེ་སྒྲ་ཡིན། །ཞེས་བྱ་བ་གསུངས་པ་ཡིན་ནོ། །ཞེས་གསུངས་སོ། །དངོས་པོ་བརྒྱད་ངོས་འཛིན་པ་ནི། རྣམ་ཀུན་མཁྱེན་ཉིད་ལམ་ཤེས་ཉིད། །ཅེས་སོགས་ཚིག་རྐང་དྲུག་སྟེ། དེ་ནས་ཞེས་པའི་ཚིག་ལ་བརྟེན་ནས་གོ་རིམ་ངེས་པ། དགོས་པ་ནི་ཡན་ལག་རྒྱས་བཤད་ཀྱི་སྐབས་སུ་འབྱུང་ངོ་། །དེ་རྣམ་བརྒྱད་ཅེས་པའི་ཚིག་ལ་བརྟེན་ནས་གྲངས་ངེས་པ། དགོས་པ་ནི། ཡུལ་ནི་རྣམ་པ་གསུམ་པོ་རྒྱུ། །ཞེས་པའི་སྐབས་སུ་འབྱུང་ངོ་། །འདིར་བརྒྱད་ཀྱི་གོ་རིམ་ངེས་པ་འཆད་པའི་ཚེ་བརྒྱད་པོ་སྔ་མ་སྔ་མའི་འོག་ཏུ་ཕྱི་མ་ཕྱི་མ་འཆད་པའི་རྒྱུ་མཚན་སྟོན་དགོས་ཀྱི་མཁྱེན་གསུམ་གྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ་ཅེས་པ་ནི་དྲུག་གི་གོ་རིམ་དང་ཁྱད་པར་མ་ཕྱེད་པ་ཡིན་ལ། མཁྱེན་གསུམ་གྱི་འོག་ཏུ་སྦྱོར་བཞི་འཆད་པའི་རྒྱུ་མཚན་ཡོད་དེ་ཅེས་པ་ནི་གསུམ་གྱི་གོ་རིམ་དང་ཁྱད་པར་མ་ཕྱེད་པའོ། །ཁོ་བོ་ནི་བརྒྱད་ཀྱི་གོ་རིམ་གྱི་སྐབས་སུ་གཞི་ཤེས་ཀྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ་ཅེས་འཆད་པར་འགྱུར་བས་སྒུགས་སྡོད་མཛོད་ཅིག བརྒྱད་པོ་སོ་སོའི་ངོ་བོ་ངོས་གཟུང་བ་ནི་སེམས་བསྐྱེད་པ་དང་གདམས་ངག་དང་ཞེས་སོགས་ཏེ། རེ་རེ་ལ་ཡང་མཚོན་བྱེད་ཀྱི་ཆོས་ཀྱི་རྐང་གྲངས་བསྟན་པ་དང་། དེ་ལུས་དང་སྦྱར་བ་གཉིས་གཉིས་གསུངས་ཤིང་མཁྱེན་གསུམ་ལ་ནི་འདི་ནས་བསྟན་པའི་མཁྱེན་གསུམ་དང་མཆོད་བརྗོད་ཀྱིས་བསྟན་པའི་མཁྱེན་གསུམ་དོན་གཅིག་པར་ཤེས་པའི་ཆེད་དུ། རྟེན་གྱི་གང་ཟག་དང་སྦྱར་བ་ཡང་གསུངས་སོ། །ལུས་དང་སྦྱོར་བ་ལ་མཚོན་བྱེད་ཀྱི་ཆོས་ཀྱི་མཇུག་ཏུ་སྦྱར་བ་དང་། བར་དུ་སྦྱར་བ་དང་། ཐོག་མར་སྦྱར་བ་གསུམ་ལས། དང་པོ་ནི་མཁྱེན་གསུམ་དང་རྩེ་སྦྱོར་ཡིན་ནོ། །གཉིས་པ་ནི་རྣམ་རྫོགས་སྦྱོར་བ་དང་འབྲས་བུ་ཆོས་སྐུའོ། །གསུམ་པ་ནི་མཐར་གྱིས་པ་དང་། སྐད་ཅིག་མའི་སྦྱོར་བའོ། །བསྡུས་དོན་བཤད་ཟིན་ནས་ཚིག་དོན་འཆད་པ་ལ་བརྒྱད་ཡོད་པ་ལས།

རྣམ་མཁྱེན།

དང་པོ་རྣམ་མཁྱེན་ལ་དང་པོར་བསྟན་པའི་རྒྱུ་མཚན་དང་། མཚོན་བྱེད་ཀྱི་ཆོས་སོ་སོའི་འབྲེལ་བཤད་པ་གཉིས་ལས། དང་པོ་ནི། མཁྱེན་གསུམ་སྟོན་པའི་སྐབས་གཞན་དུ་གཞི་ཤེས་ཐོག་མར་བསྟན་ནས་འདིར་རྣམ་མཁྱེན་ཐོག་མར་བསྟན་པའི་རྒྱུ་མཚན་ཅི་ཡིན་ཞེ་ན། དེ་ལ་སྐབས་གཞན་དུ་གཞི་ཤེས་དང་པོར་བསྟན་པའི་རྒྱུ་མཚན་དང་། འདིར་རྣམ་མཁྱེན་དང་པོར་བསྟན་པའི་རྒྱུ་མཚན་གཉིས་ལས། དང་པོ་ལ་འཕགས་པ་སོ་སོའི་མཁྱེན་གསུམ་འཆད་པའི་ཚེ་གཞི་ཤེས་དང་པོར་སྟོན་པའི་རྒྱུ་མཚན་ནི་ཐེག་པ་གསུམ་གྱི་གོ་རིམ་ལྟར་དམན་མཆོག་གི་གོ་རིམ་ཡིན་ཏེ། འདི་ནི་གླེང་གཞིའི་གོ་རིམ་དང་མཐུན་ནོ། །བྱང་སེམས་ཀྱི་ཉམས་ལེན་གསུམ་འཆད་པའི་ཚེ་གཞི་ཤེས་ཀྱི་ཉམས་ལེན་དང་པོར་བསྟན་པའི་རྒྱུ་མཚན་ནི་བྱང་ཆུབ་སེམས་དཔས་རྟོགས་རིགས་གསུམ་གྱི་ནང་ནས་གང་ཟག་གི་བདག་མེད་རྟོགས་པའི་རྟོགས་རིགས་དེ་དང་པོར་བསྒོམ་དགོས་པའི་ཕྱིར་ཏེ། རྣལ་འབྱོར་ས་བཞིའི་རིམ་པས་ལམ་ལ་འཇུག་དགོས་པའི་ཕྱིར་རོ། །འདི་ལ་དགོངས་ནས་རྣམ་རྫོགས་སྦྱོར་བའི་སྐབས་སུ་གཞི་ཤེས་ཀྱི་རྣམ་པ་དང་། གཞི་ཤེས་ཀྱི་སྦྱོར་བ་དང་པོར་བསྟན་པ་ཡིན་ནོ། །སངས་རྒྱས་ཀྱི་སའི་མཁྱེན་གསུམ་འཆད་པའི་ཚེའང་གཞི་ཤེས་དང་པོར་བསྟན་པའི་རྒྱུ་མཚན་ནི་རྒྱུའི་ངོས་ནས་བྱང་ཆུབ་སེམས་དཔའི་མངོན་རྟོགས་ཀྱི་རིམ་པ་དང་མཐུན་པ་དང་། འབྲས་བུའི་ངོས་ནས་གླེང་གཞིའི་གོ་རིམ་དང་མཐུན་པ་གཉིས་ཡོད་པའི་ཕྱིར་རོ། །འདི་ལ་དགོངས་ནས་རྣམ་མཁྱེན་གྱི་རྣམ་པ་བརྒྱ་དང་བཅུ་འཆད་པའི་ཚེ་གཞི་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་དང་པོར་བསྟན་པ་ཡིན་ནོ། །མཆོད་བརྗོད་ཀྱི་སྐབས་ཀྱི་མཁྱེན་གསུམ་གྱི་གོ་རིམ་ལ་ནི་བྱང་སེམས་ཀྱི་མངོན་རྟོགས་དང་། སངས་རྒྱས་ཀྱི་སའི་མཁྱེན་གསུམ་དང་། གླེང་གཞིའི་གོ་རིམ་གསུམ་ཆར་ཚང་སྟེ་སྔར་བསྟན་ཟིན་ཏོ། །གཉིས་པ་ནི་མཁྱེན་གསུམ་གྱི་གོ་རིམ་ཕལ་ཆེར་དེ་ལྟར་ཡིན་ན། འདིར་རྣམ་མཁྱེན་ཐོག་མར་བསྟན་པ་ལ་དགོས་པ་ཅི་ཞིག་ཡོད་ཅེ་ན། འདིའི་གདུལ་བྱའི་གཙོ་བོ་ནི་ཐེག་ཆེན་གྱི་རིགས་ཅན་ཡིན་ལ་དེ་ཉིད་འབྲས་བུ་ལ་སྤྲོ་བ་སྐྱེས་ཏེ་དེའི་རྒྱུ་ལ་འཇུག་པའི་ཆེད་དུ་ཐོབ་བྱའི་འབྲས་བུ་མཐར་ཐུག་དེ་ཐོག་མར་བསྟན་པ་ཡིན་པའི་ཕྱིར་རོ། །དེས་ན་སྐབས་དང་པོར་བསྟན་པའི་རྣམ་མཁྱེན་ནི་སྐབས་བརྒྱད་ཀྱི་གོ་རིམ་ལ་འཇུག་པའི་ཚེ་ཆོས་བཅུ་པོ་མངོན་སུམ་དུ་རྟོགས་པའི་སངས་རྒྱས་ཀྱི་སའི་རྣམ་མཁྱེན་ལ་འཇུག་སྟེ། མཆོད་བརྗོད་ཀྱི་བཤད་ཚུལ་ཕྱི་མ་གཉིས་ཀྱིས་བསྡུས་པའི་རྣམ་མཁྱེན་དང་། རྣམ་པ་ཐམས་ཅད་མཁྱེན་ཉིད་ལམ་ཞེས་པའི་སྐབས་ཀྱི་རྣམ་མཁྱེན་དང་ངོ་བོ་གཅིག་པ་ཡིན་ནོ། །འཆད་ཚུལ་ནི་མི་གཅིག་སྟེ། སྔ་མ་གཉིས་ནི་མངོན་པར་རྟོགས་པ་བརྒྱད་ཆར་ལམ་དུ་བྱས་པའི་འབྲས་བུའི་སྒོ་ནས་བཤད་ཅིང་། འདིར་ནི་མངོན་རྟོགས་ཕྱི་མ་བདུན་ལམ་དུ་བྱས་པའི་འབྲས་བུའི་སྒོ་ནས་བཤད་པའི་ཕྱིར་རོ། །ཐོས་བསམ་གྱིས་གཏན་ལ་དབབ་པའི་ཡུལ་དུ་གཞག་པའི་ཚེ་ནི་ཆོས་བཅུ་པོ་སྐྱེ་མེད་དུ་རྟོགས་པའི་བྱང་སེམས་ཀྱི་རྒྱུད་ཀྱི་མཁྱེན་པ་ལ་འཇུག་གོ །གཉིས་པ་མཚོན་བྱེད་ཀྱི་ཆོས་སོ་སོའི་འབྲེལ་འཆད་པ་ལ། མདོ་ནས་གསུངས་པའི་ཚུལ། རྣམ་མཁྱེན་མཚོན་པའི་ཚུལ། གཞུང་སོ་སོའི་སྐབས་ལ་འཇུག་པ་དང་གསུམ་ལས། དང་པོ་ནི་གླེང་གཞི་རྫོགས་པའི་མཇུག་ཐོག་ཏུ་གནས་སྐབས་དང་མཐར་ཐུག་གི་འབྲས་བུ་ཐམས་ཅད་ཐོབ་པར་འདོད་པས་ཤེར་ཕྱིན་ལ་བསླབ་པར་བྱའོ། །ཞེས་པ་རྣམས་ཀྱིས་སེམས་བསྐྱེད་བསྟན། བསླབ་ཚུལ་ཞུས་པའི་ལན་གྱིས་གདམས་ངག་དང་། ངེས་འབྱེད་ཆ་མཐུན་བསྟན། ངེས་འབྱེད་ཆ་མཐུན་གྱི་སྐབས་སུ་བྱང་ཆུབ་སེམས་དཔའ་ཞེས་མང་དུ་གསུངས་པའི་མིང་གི་དོན་དྲིས་པའི་ལན་གྱིས་སྒྲུབ་པའི་རྟེན་བསྟན། དེ་དག་གི་སྐབས་སུ་ཆོས་ཐམས་ཅད་ཀྱི་ཆགས་པ་མེད་པ་ལ་བསླབ་པར་བྱའོ། །ཞེས་པའི་ཆོས་ཐམས་ཅད་དྲིས་པའི་ལན་གྱིས་སྒྲུབ་པའི་དམིགས་པ་བསྟན། སེམས་དཔའ་ཆེན་པོར་འཇོག་པའི་རྒྱུ་མཚན་དྲིས་པའི་ལན་གྱིས་སྒྲུབ་པའི་ཆེད་དུ་བྱ་བ་དང་། གོ་སྒྲུབ་དང་། འཇུག་སྒྲུབ་བསྟན། གོ་སྒྲུབ་ཀྱི་སྐབས་སུ་གོ་ཆ་ཆེན་པོ་བགོས་པ། ཞེས་གསུངས་ན་ཇི་ཙམ་གྱིས་ན་བྱང་སེམས་ཆེན་པོ་གོ་ཆ་ཆེན་པོ་བགོས་པ་ལགས་ཞེས་དྲིས་པའི་ལན་གྱིས་ཚོགས་དང་པོ་བཅུ་བསྟན། འཇུག་སྒྲུབ་ཀྱི་འཇུག་ཡུལ་ཐེག་ཆེན་ལས་འཕྲོས་ནས་བྱང་སེམས་ཆེན་པོའི་ཐེག་པ་ཆེན་པོ་དེ་གང་ལགས། ཇི་ཙམ་གྱིས་ན་བྱང་སེམས་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པར་རིག་པར་བྱ། བྱང་སེམས་ཆེན་པོའི་ཐེག་པ་ཆེན་པོ་དེ་གང་ནས་ངེས་པར་འབྱུང་བར་འགྱུར། བྱང་སེམས་ཆེན་པོའི་ཐེག་པ་ཆེན་པོ་དེ་གང་དུ་ངེས་པར་འབྱུང་བར་འགྱུར། བྱང་སེམས་ཆེན་པོའི་ཐེག་པ་ཆེན་པོ་དེ་གང་གིས་ངེས་པར་འབྱུང་བར་འགྱུར། ཞེས་པའི་དྲི་བ་ལྔ་ལས། དྲི་བ་དང་པོའི་ལན་གྱིས་ཐབས་མཁས་ནས་གཟུངས་ཀྱི་བར་ལྔ་བསྟན། གཉིས་པའི་ལན་གྱིས་སའི་ཚོགས་བསྟན། ཕྱི་མ་གསུམ་གྱི་ལན་གྱིས་གཉེན་པོའི་ཚོགས་བསྟན་ཏེ། མཐོང་སྤང་གཉེན་པོའི་ཚོགས་སྒྲུབ་བཞི་དང་། སྒོམ་སྤང་གཉེན་པོའི་ཚོགས་སྒྲུབ་དང་པོ་དང་། ཕྱི་མ་གསུམ་རིམ་པ་བཞིན་བསྟན་ཏོ། །ཐེག་པ་ཆེན་པོ་དེས་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ཟིལ་གྱིས་མནན་ཏེ་འབྱུང་བ་ཡིན་ནོ་ཞེས་པས་ངེས་པར་འབྱུང་བའི་སྒྲུབ་པ་བསྟན་ཏོ། །གཉིས་པ་ནི་སྔ་རབས་པའི་མཁས་པ་ཁ་ཅིག ཡུལ་གྱིས་ཡུལ་ཅན་མཚོན་པའི་ཚུལ་གྱིས་ཆོས་བཅུ་པོས་རྣམ་མཁྱེན་མཚོན་པ་ཡིན་ཏེ། ཆོས་བཅུ་པོ་མངོན་སུམ་དུ་རྟོགས་པ་ནི་རྣམ་མཁྱེན་ནོ། །ཞེས་པའི་ཚུལ་གྱིས་མཚོན་པའི་ཕྱིར་རོ། །དེ་ཡང་སྤྱིར་རྣམ་མཁྱེན་ལ་རྒྱུ་འབྲས་ཀྱི་གཙོ་བོ་མཁྱེན་པའི་རྣམ་མཁྱེན་དང་། བདེན་གཉིས་ཀྱི་རྣམ་པ་མ་ལུས་པ་མཁྱེན་པའི་རྣམ་མཁྱེན་གཉིས་ལས། དང་པོ་ནི་འདིའི་སྐབས་ཀྱི་རྣམ་མཁྱེན་དེ་ཡིན་ལ། གཉིས་པ་ནི། རྣམ་པ་གང་དག་དང་ཞེས་སོགས་ཀྱི་སྐབས་ནས་བསྟན་པ་ལྟར་ཡིན་ནོ་ཞེས་བཞེད་དོ། །འོན་ཀྱང་དེ་གཉིས་རྣམ་པ་མཁྱེན་ཚུལ་གྱི་སྒྲ་བཤད་མི་གཅིག་པ་ནི་མ་ཡིན་ཏེ། རྣམ་པ་མཁྱེན་ཚུལ་ལ་དམིགས་པ་ཐེག་ཆེན་གྱི་ལམ་འབྲས་བུ་དང་བཅས་པ་ལ་བཞག་ནས་དེའི་རྣམ་པའི་རབ་དབྱེ་མཁྱེན་པ་དང་། དམིགས་པ་ཆོས་ཐམས་ཅད་ལ་བཞག་ནས་དེའི་ཀུན་རྫོབ་ཀྱི་རྣམ་པའི་རབ་དབྱེ་མཁྱེན་པ་དང་། དམིགས་པ་དེ་ཉིད་ལ་བཞག་ནས་དེའི་དོན་དམ་པའི་རྣམ་པ་མཁྱེན་པ་ལ་རྣམ་མཁྱེན་དུ་བཞག་པ་དང་གསུམ་ལས། དང་པོ་ནི། འདིར་བསྟན་པ་དང་གཉིས་པ་ནི་རྣམ་པ་གང་དག་དང་ཞེས་སོགས་ཀྱི་སྒོ་ནས་བསྟན་པ་དང་། གསུམ་པ་ནི་ཆོས་གཅིག་གིས་རྣམ་པ་ཐམས་ཅད་མཁྱེན་པ་ཉིད་དེ། ཅེས་པའི་སྐབས་ནས་བསྟན་པ་ལྟ་བུའོ། །འོ་ན་ཆོས་བཅུ་པོ་དེ་ཐེག་ཆེན་གྱི་ལམ་འབྲས་བུ་དང་བཅས་པའི་རྣམ་པའི་རབ་དབྱེ་ཇི་ལྟ་བུ་ཡིན་སྙམ་ན། ཆོས་བཅུ་པོ་རེ་རེའི་སྐབས་སུ་ཡང་ཐེག་ཆེན་གྱི་ལམ་མཐའ་དག་གམ། འབྲས་བུ་མཐའ་དག་གམ། ལམ་དང་འབྲས་བུ་གཉིས་ཀ་གཏན་ལ་དབབ་པའི་ཕྱིར་ན་རྣམ་པའི་རབ་དབྱེ་ཞེས་བྱ་སྟེ། ཀུན་བཏུས་སུ། རྫས་ཡོད་ཤེས་བྱ་གཟུགས་ཅན་ལ་སོགས་པ་ཆོས་དྲུག་ཅུ་པོ་རེ་རེའི་སྐབས་སུ་ཡང་ཕུང་ཁམས་སྐྱེ་མཆེད་མཐའ་དག་གཏན་ལ་དབབ་པས་ཕུང་ཁམས་སྐྱེ་མཆེད་ཀྱི་རྣམ་པའི་རབ་དབྱེར་འཇོག་པ་བཞིན་ནོ། །ཆོས་བཅུ་པོ་རེ་རེས་ལམ་དང་འབྲས་བུ་ཇི་ལྟར་གཏན་ལ་དབབ་སྙམ་ན། སེམས་བསྐྱེད་ཀྱི་སྐབས་སུ་ལམ་དང་འབྲས་བུ་གཉིས་ཀའི་སེམས་བསྐྱེད་བཤད་པ་དང་། གདམས་ངག་གི་སྐབས་སུ་སྒྲུབ་པ་རང་གི་ངོ་བོ་ནས་སངས་རྒྱས་དཀོན་མཆོག་གི་བར་བཤད་པ་དང་། ངེས་འབྱེད་ཡན་ལག་གི་སྐབས་སུ་ཐེག་པ་གསུམ་ཆར་གྱི་རྟོགས་རིགས་ཚང་བ་དེ་མཐོང་ལམ་ནས་སངས་རྒྱས་ཀྱི་སའི་བར་ལ་འཇོག་དགོས་ཤིང་། དེའི་རྒྱུ་ངེས་འབྱེད་ཡན་ལག་དང་བཅས་པ་དང་། སྒྲུབ་པའི་རྟེན་གྱི་སྐབས་སུ་དྲོད་ནས་བཟུང་སྟེ་རྒྱུན་མཐའི་བར་གྱི་སྒྲུབ་པ་མཐའ་དག་བཤད་པ་དང་། དམིགས་པའི་སྐབས་སུ་ཆོས་ཐམས་ཅད་བཤད་པ་དང་། ཆེད་དུ་བྱ་བའི་སྐབས་སུ་ཆེན་པོ་གསུམ་གྱི་འབྲས་བུའི་རྣམ་པ་མཐའ་དག་བཤད་ཅིང་། འབྲས་བུའི་རྣམ་པ་མཐའ་དག་བསྡུས་ཤིང་དེ་ཉིད་མདོ་ལས་བྱང་སེམས་ཀྱི་ཉམས་ལེན་དུ་བཤད་པའི་ལམ་མཐའ་དག་ཀྱང་བསྡུས་པ་དང་། གོ་སྒྲུབ་ཀྱི་སྐབས་སུ་ཚོགས་ལམ་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། བསྒྲུབ་བྱ་ཕར་ཕྱིན་དྲུག་གིས་སངས་རྒྱས་ཀྱི་ས་ཡང་བསྡུས་པ་དང་། འཇུག་སྒྲུབ་ཀྱི་སྐབས་སུ་དྲོད་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། འཇུག་བྱ་ཐེག་ཆེན་གྱི་ལམ་དང་། འབྲས་བུ་གཉིས་ཀ་བསྡུས་པ་དང་། ཚོགས་སྒྲུབ་ཀྱི་སྐབས་སུ་ཆོས་མཆོག་ཆེན་པོ་ནས་རྒྱུན་མཐའི་བར་གྱི་ཉམས་ལེན་མཐའ་དག་བཤད་ཅིང་། སྟོང་ཉིད་རྟོགས་པའི་ཡེ་ཤེས་ཀྱིས་སངས་རྒྱས་ཀྱི་ས་ཡང་བསྡུས་པ་དང་། ངེས་འབྱུང་སྒྲུབ་པའི་སྐབས་སུ་དག་སའི་ཉམས་ལེན་མཐའ་དག་བཤད་ཅིང་། ངེས་པར་འབྱུང་ས་བརྒྱད་པོས་སངས་རྒྱས་ཀྱི་ས་ཡང་བསྡུས་པས་ན་ཆོས་བཅུ་པོ་འདི་ལ་རྣམ་པའི་རབ་དབྱེར་འཇོག་པ་ཡིན་ནོ། །དེ་དག་ནི་ཡུལ་གྱིས་ཡུལ་ཅན་མཚོན་པའི་ཚུལ་ཡིན་ལ། རྒྱུས་འབྲས་བུ་མཚོན་པའི་ཚུལ་ཡང་འདི་ལ་གནས་ཏེ། ཆོས་བཅུ་པོ་དེས་རྣམ་མཁྱེན་སྒྲུབ་པར་བྱེད་པའི་སྒྲུབ་པ་བསྟན་ནས། སྒྲུབ་པ་དེའི་འབྲས་བུ་མཐར་ཐུག་པ་ནི་རྣམ་མཁྱེན་ཡིན་ནོ་ཞེས་པའི་ཚུལ་གྱིས་མཚོན་པར་བྱེད་པའི་ཕྱིར་རོ། །གསུམ་པ་གཞུང་སོ་སོའི་དོན་ལ་འཇུག་པ་ལ་གསུམ་སྟེ། ཆོས་བཅུའི་གྲངས་ངེས་པ། གོ་རིམ་ངེས་པ། སོ་སོའི་དོན་ནོ། །དང་པོ་ནི། ལོ་ཆེན་གྱིས་རྟེན་གྱི་གང་ཟག་དང་། དམིགས་པ་དང་ཆེད་དུ་བྱ་བ་དང་། སྒྲུབ་པ་རང་གི་ངོ་བོ་སྟེ། རྣམ་མཁྱེན་གྱི་སྒྲུབ་པའི་ཆོས་བཞིར་ངེས་པ་ལས། དང་པོ་ནི་ཆོས་བཞི་དང་ལྡན་པ་སྟེ་བསམ་པའི་ཁྱད་པར་སེམས་བསྐྱེད་པ་དང་། གདམས་ངག་རྗེས་སུ་བསྟན་པ་ཐོབ་པ་དང་། སྦྱོར་བའི་ཁྱད་པར་ངེས་འབྱེད་ཆ་མཐུན་ཐོབ་པ་དང་། རིགས་ཀྱི་ཁྱད་པར་ཆོས་ཀྱི་དབྱིངས་ཀྱི་རིགས་དང་ལྡན་པའོ། །རྟེན་ཆོས་བཞི་ལྡན་དེས་དམིགས་པ་བཅུ་གཅིག་ལ་དམིགས་ཏེ། ཆེད་དུ་བྱ་བ་གསུམ་གྱི་ཆེད་དུ་སྒྲུབ་པ་རང་གི་ངོ་བོ་བཞི་བྱས་པས་རྣམ་མཁྱེན་དེ་ཐོབ་པ་ཡིན་ནོ། །ཞེས་གསུངས་སོ། །འབྲེས་རྣམ་མཁྱེན་མཚོན་བྱེད་ཀྱི་ཆོས་བཅུ་པོ་ནི་རྒྱུ་འབྲས་ཀྱི་ཆོས་མ་ལུས་པ་བསྟན་པས་ཆེད་དུ་བྱ་བ་གསུམ་དང་གང་དུ་ངེས་པར་འབྱུང་བ་ནི་འབྲས་བུ་ཡིན་ལ་ལྷག་མ་རྣམས་ནི་རྒྱུའི་ཆོས་ཡིན་ནོ། །ཞེས་བཞེད་དོ། །རང་ལུགས་ནི་རྣམ་མཁྱེན་མཚོན་པར་བྱེད་པའི་ཆོས་ལ་ཆོས་བཅུར་གྲངས་ངེས་ཏེ། དེ་ལ་བསམ་པ་སེམས་བསྐྱེད་པ་དང་སྦྱོར་བ་སྒྲུབ་པ་ལ་འཇུག་ཚུལ་གཉིས་ལས། དང་པོ་ནི་སེམས་བསྐྱེད་དོ། །གཉིས་པ་ལ་ཐེག་པ་གཞན་དུ་འགྱུར་སྲིད་པའི་སྒྲུབ་པ་དང་། ཐེག་པ་གཞན་དུ་འགྱུར་མི་སྲིད་པའི་སྒྲུབ་པ་དང་། དེ་གཉིས་ཀའི་ཐུན་མོང་གི་ཆོས་དང་གསུམ་དུ་ངེས་ཤིང་། དང་པོ་ནི་གདམས་ངག་ལ་ཐོས་བསམ་བྱེད་པའི་སྒྲུབ་པའོ། །གཉིས་པ་ལ་ཐེག་པ་གཞན་དུ་འགྱུར་མི་སྲིད་པའི་སྒྲུབ་པའི་ས་མཚམས་དང་དེའི་རྟེན་དང་དམིགས་པ་དང་ཆེད་དུ་བྱ་བ་བཞི་ལས། དང་པོ་ནི་ངེས་འབྱེད་ཡན་ལག གཉིས་པ་ནི་རྟེན་རིགས་ཏེ། སྒྲུབ་པའི་རྟེན་དུ་གྱུར་པའི་ཆོས་དབྱིངས་དེ་ལ་རྟེན་ཆོས་དྲོད་ཡན་ཆད་ཀྱི་སྒྲུབ་པའི་སྒོ་ནས་དབྱེ་བའི་གནད་ཀྱང་འདི་ཉིད་ཡིན་ནོ། །གསུམ་པ་ནི་དམིགས་པ། བཞི་པ་ནི་ཆེད་དུ་བྱ་བ་སྟེ་སྔར་གྱི་སྒྲུབ་པའི་དམིགས་པ་བདེན་བཞི་ཙམ་དང་། ཆེད་དུ་བྱ་བ་རྣམ་མཁྱེན་ཙམ་དུ་བཤད་པ་ལས་ཁྱད་པར་དུ་བྱས་པའོ། །དེ་གཉིས་ཀའི་ཐུན་མོང་གི་ཆོས་ལ་གོ་སྒྲུབ་ལ་སོགས་པ་བཞིར་ངེས་སོ། །གཉིས་པ་གོ་རིམ་ནི་ཐོག་མར་སེམས་བསྐྱེད་སྟོན་ཏེ། ཐེག་ཆེན་གྱི་ཆོས་ཐམས་ཅད་ཀྱི་རྩ་བ་ཡིན་པའི་ཕྱིར་རོ། །དེའི་འོག་ཏུ་གདམས་ངག་སྟོན་ཏེ། སེམས་བསྐྱེད་ཀྱི་སྐབས་སུ་དམིགས་ཡུལ་དུ་བྱས་པ་དེ་ཐོབ་པའི་ཆེད་དུ་གདམས་ངག་ཉན་དགོས་པའི་ཕྱིར་རོ། །དེའི་འོག་ཏུ་ངེས་འབྱེད་ཡན་ལག་སྟོན་ཏེ། གདམས་ངག་གི་དོན་ཉམས་སུ་བླངས་པ་ལས་ངེས་འབྱེད་ཡན་ལག་འབྱུང་བའི་ཕྱིར་རོ། །དེའི་འོག་ཏུ་སྒྲུབ་པའི་རྟེན་སྟོན་ཏེ། ངེས་འབྱེད་ཡན་ལག་ཐོབ་ནས་སེམས་ཀྱི་ཆོས་དབྱིངས་དེས་ཐེག་ཆེན་གྱི་སྒྲུབ་པ་ཁོ་ནའི་རྟེན་བྱེད་ཀྱི་ཐེག་པ་གཞན་གྱི་སྒྲུབ་པའི་རྟེན་བྱེད་པ་མི་སྲིད་པའི་ཕྱིར་རོ། །དེའི་འོག་ཏུ་སྒྲུབ་པའི་དམིགས་པ་སྟོན་ཏེ། ཐེག་པ་གཞན་དུ་འགྱུར་མི་སྲིད་པའི་སྒྲུབ་པ་དེས་ཆོས་ཐམས་ཅད་ལ་སྒྲོ་འདོགས་གཅོད་དགོས་པའི་ཕྱིར་རོ། །དེའི་འོག་ཏུ་ཆེད་དུ་བྱ་བ་སྟོན་ཏེ། དམིགས་པ་བདེན་བཞི་ལ་སྒྲོ་འདོགས་གཅོད་པའི་ཆེད་དུ་བྱ་བ་དེ་ཆེན་པོ་གསུམ་དུ་མ་ངེས་ཀྱང་དམིགས་པ་ཆོས་ཐམས་ཅད་ལ་སྒྲོ་འདོགས་གཅོད་པའི་ཆེད་དུ་བྱ་བ་དེ་ཆེན་པོ་གསུམ་དུ་ངེས་པའི་ཕྱིར་རོ། །དེའི་འོག་ཏུ་གོ་སྒྲུབ་སྟོན་པ་སོགས་ནི་འོག་ཏུ་བཤད་པར་བྱའོ། །གསུམ་པ་སོ་སོའི་དོན་ལ་བཅུ་ལས། དང་པོ་སེམས་བསྐྱེད་ལ་ཡང་གཉིས་ཏེ། གཞུང་གིས་ཇི་ལྟར་བསྟན་པའི་ཚུལ་དང་། དཀའ་བའི་གནས་ལ་དཔྱད་པའོ། །དང་པོ་ནི། སེམས་བསྐྱེད་པ་ནི། ཞེས་པའི་སེམས་བསྐྱེད་དེ་གང་ཞེ་ན། དེའི་མཚན་ཉིད་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པས་བསྟན་ཏོ། །འོ་ན་གོང་དུ་སྟོན་པས་འདི་ལས་བཤད་པ་གང་། ཞེས་གསུངས་པས་སེམས་བསྐྱེད་ཀྱི་མཚན་ཉིད་དེ་སྟོན་པས་ཤེར་ཕྱིན་གྱི་མདོ་ལས་ཇི་ལྟར་བཤད་པ་དེ་ཉིད་བསྟན་བཅོས་འདིར་བདེ་བླག་ཏུ་རྟོགས་པའི་ཕྱིར་ཇི་ལྟར་བསྟན་སྙམ་ན། སེམས་བསྐྱེད་ཀྱི་དམིགས་པ་བྱང་ཆུབ་དང་གཞན་དོན་གཉིས་པོ་དེ་ནི་ཡུམ་གྱི་མདོ་ཇི་ལྟ་བ་བཞིན་དུ་མངོན་པར་རྟོགས་པའི་རྒྱན་གྱི་ངག་གིས་བསྡུས་པ་དང་རྒྱས་པ་གཉིས་ཀྱི་སྒོ་ནས་བརྗོད་པར་བྱའོ། །ཞེས་ཤེར་ཕྱིན་གྱི་མདོ་དང་སྦྱར་བ་ནི། དེ་དང་དེ་ནི་མདོ་བཞིན་དུ། །ཞེས་སོགས་ཚིག་རྐང་གཉིས་སོ། །བསྟན་བཅོས་ཀྱིས་བསྡུས་པ་དང་། རྒྱས་པའི་སྒོ་ནས་བརྗོད་པ་དེ་ཡང་གང་ཞེ་ན། དེ་ཡང་ས་གསེར་ཟླ་བ་མེ། །ཞེས་སོགས་སོ། །ཚུལ་ཇི་ལྟར་དུ་སྟོན་ན། ས་ལྟ་བུའི་སེམས་བསྐྱེད་དེ། སེམས་བསྐྱེད་ཀྱི་དམིགས་པ་གཞན་དོན་དང་བྱང་ཆུབ་གཉིས་ཀ་མདོར་བསྡུས་ནས་སྟོན་ཏེ། ཤཱ་རིའི་བུ་འདི་ལ་བྱང་སེམས་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ་ཞེས་པས་བྱང་ཆུབ་མདོར་སྟོན་ཅིང་། བྱང་སེམས་ཆེན་པོ་ཕྱོགས་བཅུ་རེ་རེ་ཞིང་གདྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ན་སེམས་ཅན་གང་ཞིག་ཡོད་པ་དེ་དག་ཐམས་ཅད་ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པས་གཞན་དོན་མདོར་བསྟན་པ་ཡིན་ལ། འདིར་དེ་གཉིས་ཀའི་དོན་བསྡུས་ནས་ས་ལྟ་བུའི་སེམས་བསྐྱེད་དུ་བསྟན་པའི་ཕྱིར་རོ། །དེས་ན་ཆོས་དཀར་པོ་ཐམས་ཅད་ཀྱི་གཞིའི་དངོས་པོར་གྱུར་པ་གསུངས་པའི་ཆོས་དཀར་པོ་ནི་བྱང་ཆུབ་དང་གཞན་དོན་གཉིས་ཀ་ལ་འཇོག་དགོས་སོ། །ཉིར་སྣང་དུ། གཞན་དོན་མདོར་བསྟན་གྱི་མདོ་འདི་མེ་ལྟ་བུའི་སེམས་བསྐྱེད་ཀྱི་འོག་ཏུ་འབྱུང་བ་ནི་གཞན་དོན་མདོར་བསྟན་དང་རྒྱས་བཤད་སྒྲིག་པའི་དབང་དུ་བྱས་པ་ཡིན་གྱི། རྒྱན་གྱི་ངག་ལ་སྦྱོར་བའི་ཆོས་ལྟ་བུ་ལས་གཞན་དུ་སྦྱོར་དུ་མེད་དོ། །གསེར་བཟང་པོ་དང་། ཟླ་བ་ཚེས་པ་དང་། མེ་ལྟ་བུའི་སེམས་བསྐྱེད་གསུམ་གྱིས་ནི་བྱང་ཆུབ་རྒྱས་པར་བསྟན་པ་ཡིན་ཏེ། དང་པོས་བྱང་ཆུབ་ཀྱི་ངོ་བོ་ཕར་ཕྱིན་དྲུག་ཏུ་ཕྱེ་ནས་བསྟན། གཉིས་པས་བྱང་ཆུབ་ཀྱི་ངོ་བོ་བྱང་ཕྱོགས་སོ་བདུན་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དུ་ཕྱེ་ནས་བསྟན། གསུམ་པས་བྱང་ཆུབ་ཀྱི་ངོ་བོ་མཁྱེན་པ་གསུམ་དུ་ཕྱེ་ནས་བསྟན་པའི་ཕྱིར་རོ། །གཏེར་ལྟ་བུ་མན་ཆད་ཀྱི་སེམས་བསྐྱེད་ཀྱི་དམིགས་པ་གཞན་དོན་རྒྱས་པར་བསྟན་པ་ཡིན་ཏེ། གཞན་དོན་དུ་ཤེར་ཕྱིན་ལ་སློབ་ཚུལ་དཔེ་དུ་མའི་སྒོ་ནས་བསྟན་པའི་ཕྱིར་རོ། །དེས་ན་དེ་དང་དེ་ནི་ཞེས་པ་ནི་སེམས་བསྐྱེད་ཀྱི་དམིགས་པ་བྱང་ཆུབ་དེ་དང་། གཞན་དོན་དེ་ནི་མདོ་བཞིན་དུ་ཅེས་པ་ནི། མདོ་ལས་དམིགས་པ་གཉིས་པོ་དེ་བསྡུས་པ་དང་། རྒྱས་པ་གཉིས་གཉིས་ཀྱི་སྒོ་ནས་བསྟན་པ་བཞིན་དུ། བསྡུས་དང་རྒྱས་པའི་སྒོ་ནས་བརྗོད་ཅེས་པ་ནི་རྒྱན་གྱི་ངག་གིས་ཀྱང་བསྡུས་པ་དང་། རྒྱས་པ་གཉིས་གཉིས་ཀྱི་སྒོ་ནས་བརྗོད་ཅེས་པའི་དོན་ཏོ། །རྒྱན་གྱི་ངག་དེ་ཡང་ས་གསེར་ཟླ་བ་མེ་ཞེས་སོགས་དང་འབྲེལ་ལོ། །རྒྱན་གྱི་ངག་གཉིས་པོའི་ངོས་འཛིན་ལ་བསྡུས་ཏེ་བརྗོད་པ་ནི་མཚན་ཉིད་སྟོན་པའི་གཞུང་དང་། རྒྱས་པར་སྟོན་པ་ནི་དབྱེ་བ་སྟོན་པའི་གཞུང་ལ་མཛད་པ་ནི་མི་འཐད་དེ། མཚན་ཉིད་སྟོན་པའི་སྐབས་ཀྱི་དམིགས་པ་གཉིས་པོ་དེ་མདོ་དང་སྦྱར་བར་བྱར་མེད་ན། སྟོན་པས་འདི་ལས་བཤད་པ་གང་། །ཞེས་པ་དང་འགལ་ཞིང་། ཡོད་ན་ཇི་ལྟར་ཡིན་ཞེ་ན། ཡུམ་གྱི་མདོ་ཇི་ལྟ་བ་བཞིན་དུ་བསྡུས་པ་དང་། རྒྱས་པ་གཉིས་ཀྱི་སྒོ་ནས་བརྗོད་པར་བྱའོ། །ཞེས་པའི་དོན་ཡིན་པའི་ཕྱིར་དང་། བརྗོད་ཅེས་པའི་མཇུག་ཐོག་དེ་མ་ཐག་ཏུ་དེ་ཡང་ཞེས་པའི་ཚིག་སྦྱོར་འབྱུང་བའི་ཕྱིར་དང་། སེམས་བསྐྱེད་ཀྱི་མདོ་སྦྱོར་གྱི་ཐོག་མ་ས་ལྟ་བུའི་སེམས་བསྐྱེད་ནས་འཛིན་པར་ཉིར་སྣང་ལས་བཤད་འདུག་པའི་ཕྱིར་རོ། །དེ་ལས་གཞན་དུ་དབྱེ་བ་སྟོན་པའི་གཞུང་ལ་རྒྱས་བཤད་དུ་ངོས་འཛིན་ནི། བྱང་ཆུབ་མདོར་བསྟན་གྱི་མདོ་དང་། ས་ལྟ་བུའི་སེམས་བསྐྱེད་སྦྱར་ནས་གསུངས་པ་དང་འགལ་ལོ། །འོ་ན་མཚན་ཉིད་སྟོན་པའི་གཞུང་ལ་མདོ་སྦྱོར་མེད་དམ་ཞེ་ན་སེམས་བསྐྱེད་ཉེར་གཉིས་ཀྱི་ཐད་ཀྱི་མདོ་ཐམས་ཅད་མཚན་ཉིད་སྟོན་པའི་གཞུང་གི་མདོ་སྦྱོར་ཡིན་ཏེ། དཔེར་ན་དམིགས་པ་མི་རྟག་ལ་སོགས་པ་ཞེས་པ་མན་ཆད་ཀྱི་མདོ་ལས་ལོགས་སུ་ངེས་འབྱེད་ཆ་མཐུན་མདོར་བསྟན་གྱི་མདོ་སྦྱོར་མེད་ཀྱང་མདོར་བསྟན་ལ་མདོ་མེད་མི་དགོས་པ་བཞིན་ནོ། །གཞན་དོན་བསྡུས་ཏེ་སྟོན་པའི་རྒྱན་གྱི་ངག་ཀྱང་ས་ཞེས་པའི་རྒྱན་ཚིག་དེ་ཉིད་ཡིན་ཏེ། གསེར་ལྟ་བུ་ལ་སོགས་པ་གསུམ་པོ་དེས་ནི་བྱང་ཆུབ་རྒྱས་པར་བཤད་ཅིང་། གཏེར་ལྟ་བུ་མན་ཆད་ཀྱིས་གཞན་དོན་རྒྱས་པར་བཤད་པས་གཞན་དོན་མདོར་བསྡུས་པའི་ངག་གཞན་མེད་པའི་ཕྱིར་རོ། །དེས་ན་སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་སུ་བསྟན་པའི་སེམས་བསྐྱེད་དང་། ས་ཞེས་པའི་སྐབས་ནས་བསྟན་པའི་སེམས་བསྐྱེད་གཉིས་པོ་ཡིན་ཁྱབ་མཉམ་དུ་འདོད་དགོས་ཏེ། གཞུང་སྔ་མས་སེམས་བསྐྱེད་དེས་གཞན་དོན་དང་བྱང་ཆུབ་གཉིས་ལ་དམིགས་པར་བསྟན་ནས། དམིགས་པ་གཉིས་པོ་དེ་ཉིད་ས་ཞེས་པའི་ཚིག་གིས་མདོར་བསྟན། གསེར་ཞེས་པ་མན་ཆད་ཀྱིས་རྒྱས་པར་བཤད་པའི་ཕྱིར་རོ། །ཚོགས་ལམ་ཆུང་ངུས་བསྡུས་པར་བཤད་པ་དང་འགལ་ལོ་ཞེ་ན། མ་མཐའ་ངོས་འཛིན་པ་ཡིན་པས་སྐྱོན་མེད་དེ། གཞན་དུ་ན་ས་གཉིས་པ་ཡན་ཆད་དུ་སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་མེད་པར་ཐལ་བའི་ཕྱིར་རོ། །བསྟན་བཅོས་རྩ་བར་སེམས་བསྐྱེད་མདོ་དང་སྦྱར་བ་ནི་གདམས་ངག་ནས་ཕྲིན་ལས་ཀྱི་བར་རྣམས་ཀྱང་མདོ་དང་སྦྱར་བར་བྱ་བ་ཡིན་ནོ། །ཞེས་ཤེས་པའི་ཆེད་ཡིན་ལ་དངོས་སུ་མ་སྦྱར་བ་ནི་ཚིག་མང་དུ་དོགས་པའི་ཕྱིར་རོ། །མདོ་དང་སྦྱར་བའི་དགོས་པ་ནི་རྗེས་འཇུག་གི་གདུལ་བྱ་རྣམས་ཀྱིས་རྒྱལ་བའི་བཀའ་ལ་མ་ལྟོས་པར་ཞེན་ལྟའི་དབང་གིས་བསྟན་བཅོས་རང་དགར་བརྩམ་པ་དགག་པའི་ཆེད་ཡིན་ཏེ། སྔར་ཡང་བཤད་ཟིན་ཅིང་། རྒྱུད་བླར་ཡང་འབྱུང་ངོ་། །གཉིས་པ་དཀའ་བའི་གནས་ལ་དཔྱད་པ་ལ། མཚན་གཞི་སེམས་སེམས་བྱུང་གང་ཡིན་དཔྱད། སྨོན་འཇུག་གཉིས་འགལ་མི་འགལ་ལ་དཔྱད། དེ་དང་དོན་དམ་སེམས་བསྐྱེད་ཀྱི་གཞི་མཐུན་ཡོད་མེད་དཔྱད་པ་དང་གསུམ་ལས། དང་པོ་ནི་འཕགས་སེང་གཉིས་ཀྱིས་གཙོ་བོ་སེམས་སུ་བཞེད་དེ། ཉིར་སྣང་དུ། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ། རྣམ་པར་རིག་པའོ་རྣམ་པར་ཤེས་པ་དེ་ཡང་གང་ཞེ་ན་ཡིད་ཀྱི་རྣམ་པར་ཤེས་པ་སྟེ་དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་དང་། སློབ་དཔོན་གྱིས་འདོད་པ་སེམས་བྱུང་ཡིན་པའི་ཕྱིར་ན་སེམས་བསྐྱེད་ཡིན་པར་འགལ་ལོ་ཞེས་པའི་དོགས་པ་བཀོད་ནས་བདེན་མོད་ཀྱི་ཞེས་པའི་ལན་མཛད་པའི་ཕྱིར་དང་། ཡང་དག་རྫོགས་པའི་བྱང་ཆུབ་འདོད་ཅེས་པའི་འདོད་པ་དེ་སེམས་བསྐྱེད་ཀྱི་བཏགས་མིང་ཡིན་གྱི་སེམས་བྱུང་སེམས་བསྐྱེད་དུ་སྟོན་པ་མ་ཡིན་པར་བཤད་པའི་ཕྱིར་རོ། །མགོན་པོ་བྱམས་པས་སེམས་བྱུང་ལ་བཤད་དེ། འདིར་ཡང་ཡང་དག་རྫོགས་པའི་བྱང་ཆུབ་འདོད་ཅེས་དང་། མདོ་སྡེ་རྒྱན་དུ། དོན་གཉིས་ལྡན་པའི་སེམས་བྱུང་བ། །ཞེས་གསུངས་པའི་ཕྱིར། ཐོགས་མེད་སྐུ་མཆེད་ཀྱང་འདི་ཉིད་བཞེད་དེ། བྱང་སར་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ་ཞེས་དང་། དོན་གཉིས་ལྡན་པའི་སེམས་བྱུང་བ་ཞེས་པའི་འགྲེལ་པར། དབྱིག་གཉེན་གྱིས་ཡོན་ཏན་གཉིས་སམ་གསུམ་ལ་དམིགས་པའི་སེམས་པ་ནི་སེམས་བསྐྱེད་པའོ་ཞེས་གསུངས་པའི་ཕྱིར་རོ། །གནད་ཀྱི་དོན་ནི་གཙོ་བོར་སེམས་བྱུང་འདུན་པ་དང་། སེམས་པ་གཉིས་ལ་འཇོག་དགོས་ཏེ། ཡང་དག་རྫོགས་པའི་བྱང་ཆུབ་འདོད་ཅེས་པའི་འདོད་པ་དེ་འདུན་པ་ཡིན་པའི་ཕྱིར་དང་། དོན་གཉིས་ལྡན་པའི་སེམས་བྱུང་བ་ཞེས་པའི་སེམས་བྱུང་དེ་དབྱིག་གཉེན་གྱིས་སེམས་པ་ལ་བཤད་པའི་ཕྱིར་དང་། ཐོགས་མེད་ཀྱིས་ནི་དེ་གཉིས་ཀ་ལ་བཤད་པའི་ཕྱིར། ཇི་ལྟར་ཞེ་ན། སྨོན་ལམ་གྱི་མཆོག་སེམས་བསྐྱེད་དུ་བཤད་ཅིང་སྨོན་ལམ་དེ་ཡང་མདོ་སྡེ་རྒྱན་དུ། བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་སེམས་པ་དང་འདུན་པ་གཉིས་སུ་བཤད་པའི་ཕྱིར་རོ། །འོ་ན་སེམས་བསྐྱེད་དེ་སེམས་བྱུང་གཉིས་པོ་དེར་ངེས་སམ་ཞེ་ན། སེམས་བྱུང་གཉིས་པོ་དེ་སེམས་བསྐྱེད་དུ་ནམ་ཞིག་སོང་བའི་ཚེ་དེ་དང་མཚུངས་ལྡན་གྱི་སེམས་སེམས་བྱུང་གཞན་རྣམས་ཀྱང་། གཞན་སྟོབས་ཀྱིས་སེམས་བསྐྱེད་དུ་སོང་བ་ཡིན་ཏེ། རྣམ་ཤེས་ཚོགས་བརྒྱད་དང་། སེམས་བྱུང་ལྔ་བཅུ་རྩ་གཅིག་ལྟ་བུ་སེམས་སེམས་བྱུང་གི་ལྡོག་པ་ནས་མ་སྨོས་པའི་སྐྱབས་འགྲོ་དང་། སེམས་བསྐྱེད་དང་། སྦྱོར་བ་དང་། སྒྲུབ་པ་ལ་སོགས་པ་རྣམས་གཙོ་བོར་སེམས་བྱུང་གི་སྟེང་ནས་འཇོག་ཀྱང་གཞན་སྟོབས་ཀྱིས་སེམས་སེམས་བྱུང་གཉིས་ཆར་ཡོད་པ་མངོན་པ་གོང་འོག་སོགས་གསུང་རབ་ཀྱི་དགོངས་པ་ཡིན་པའི་ཕྱིར་རོ། །འདི་ནི་ཚད་ལྡན་གྱི་གཞུང་ལུགས་གཞན་གྱི་དགོངས་པ་ཡང་ཡིན་ཏེ། བྱང་སའི་ཚུལ་ཁྲིམས་ལེའུར། ཉེས་སྤྱོད་སྤོང་བ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་པོ་དེ་འཇུག་པ་སེམས་བསྐྱེད་དུ་གསུངས་ཤིང་གསུམ་པོ་དེས་མ་བསྡུས་པའི་བྱང་སེམས་ཀྱི་ཉམས་ལེན་མེད་པའི་ཕྱིར་རོ། །གཉིས་པ་ནི། ས་སྐྱ་པའི་རྗེ་བཙུན་གོང་མ་རྣམས་ཀྱི་བཞེད་པས་སྤྱིར་སྨོན་པ་ལ། སྨོན་པའི་སེམས། སྨོན་པ་སེམས་བསྐྱེད་པ། སྨོན་པ་མི་ཉམས་པར་སྲུང་བ་དང་གསུམ། འཇུག་པ་ལ་ཡང་འཇུག་པའི་སེམས། འཇུག་པ་སེམས་བསྐྱེད་པ། འཇུག་པ་མི་ཉམས་པར་སྲུང་བ་དང་གསུམ་དུ་མཛད་ནས་སྨོན་འཇུག་གཉིས་ཀྱི་ཁྱད་པར་ནི་སེམས་ཅན་གྱི་དོན་དུ་སངས་རྒྱས་ཐོབ་པར་འདོད་པ་དང་། སངས་རྒྱས་ཐོབ་པའི་ཆེད་དུ་ལམ་སྒྲུབ་པར་འདོད་པ་ཡིན་པས་བློ་གཉིས་པོ་དེ་རྒྱུད་ལ་སྐྱེས་ནས་སྡོམ་པས་མ་ཟིན་པའི་ཚེ་ན་སྨོན་པ་དང་། འཇུག་པའི་སེམས་ཙམ་དང་། སྡོམ་པས་ཟིན་པའི་ཚེ་ན་སྨོན་པ་དང་། འཇུག་པའི་སེམས་བསྐྱེད་དང་། དེ་མན་ཆད་དུ་ཉམས་སུ་ལེན་པ་ཐམས་ཅད་སྨོན་པ་མི་ཉམས་པར་སྲུང་བ་དང་། འཇུག་པ་མི་ཉམས་པར་སྲུང་བ་ཡིན་ནོ། །ཞེས་བཞེད་དོ། །དེས་ན་སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་དང་། ཐེག་ཆེན་གྱི་ཚོགས་ལམ་དུ་ཞུགས་པ་དུས་མཉམ་སྟེ། སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་ལ་སྡོམ་པས་ཟིན་པའི་སེམས་བསྐྱེད་རྒྱུད་ལ་སྐྱེ་དགོས་ཤིང་དེ་སྐྱེས་པའི་ཚེ་འགྲོ་བའི་བྱ་བས་ཟིན་པའི་སེམས་བསྐྱེད་སྐྱེས་དགོས་ལ་དེ་ཉིད་ལམ་དུ་ཞུགས་པ་ཡིན་པའི་ཕྱིར་རོ། །སྟོན་པ་དམྱལ་པའི་ཤིང་རྟ་འདྲེན་པའི་གྱད་དུ་འཁྲུངས་པའི་ཚེ་བྱང་ཆུབ་ཏུ་སེམས་བསྐྱེད་པར་བཤད་པ་ལྟ་བུ་ལམ་མ་ཞུགས་ན་སེམས་བསྐྱེད་ཡོད་པར་བཤད་པ་ནི་སྨོན་པ་དང་འཇུག་པའི་སེམས་ཙམ་ལ་དགོངས་པའམ། གལ་ཏེ་སེམས་བསྐྱེད་མཚན་ཉིད་པ་ཡིན་ན་ནི། དེའི་ཚེ་ལམ་དུ་ཞུགས་པ་ལ་འགལ་བ་མེད་དོ། །སྨོན་འཇུག་གི་སེམས་བསྐྱེད་གཉིས་པོ་རྒྱུད་ལ་སྐྱེས་ནས་ཇི་སྲིད་གནས་ཀྱི་བར་དུ་ངོ་བོ་གཅིག་ཏུ་ལྡན་པ་ཡིན་ཏེ། དེ་གཉིས་དུས་མཉམ་དུ་སྐྱེས་པའི་ཚེ་སྨོན་འཇུག་གི་སེམས་ཙམ་ནི་སེམས་བྱུང་འདུན་པ་དང་སྨོན་འཇུག་གི་སེམས་བསྐྱེད་ཀྱི་གཙོ་བོ་ནི། མི་མཐུན་ཕྱོགས་སྤོང་བའི་སེམས་པའི་སྟེང་ནས་འཇོག་པ་ཡིན་པས། སེམས་པ་དེ་སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་དུ་ནམ་ཞིག་སོང་བའི་ཚེ་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་སེམས་བསྐྱེད་གཉིས་སུ་འགྱུར་བའི་ཕྱིར་རོ། །གལ་ཏེ་སྨོན་པ་སེམས་བསྐྱེད་ཀྱི་ངོ་བོར་གྱུར་པའི་སེམས་བྱུང་སེམས་པ་རྫས་ཐ་དད་པ་དང་། འཇུག་པ་སེམས་བསྐྱེད་ཀྱི་ངོ་བོར་གྱུར་པའི་སེམས་བྱུང་སེམས་པ་གཉིས་ཡོད་པས་ངོ་བོ་གཅིག་པར་ཡང་མ་ངེས་སོ་སྙམ་ན་མི་འཐད་དེ། གཙོ་བོ་སེམས་གཅིག་གི་འཁོར་དུ་སེམས་བྱུང་སེམས་པ། རྫས་ཐ་དད་པ་གཉིས་ཅིག་ཅར་དུ་མི་སྲིད་པའི་ཕྱིར་རོ། །འོ་ན་སྨོན་འཇུག་གི་སེམས་བསྐྱེད་གཉིས་པོ་རྒྱུད་ལ་སྐྱེས་པའི་རྗེས་སུ་རྩ་ལྟུང་བྱུང་ནས་དེ་གཉིས་གཏོང་མི་སྲིད་པར་འགྱུར་ཏེ། དེ་སྐྱེས་པ་དང་ཐེག་ཆེན་གྱི་ཚོགས་ལམ་ཐོབ་པ་དུས་མཉམ་ཞིང་ཐེག་ཆེན་གྱི་ཚོགས་ལམ་ཐོབ་ནས་ལམ་མ་ཞུགས་སུ་འགྱུར་བ་མི་སྲིད་པའི་ཕྱིར་རོ་ཞེ་ན། དེ་ཚོགས་ལམ་གྱི་གནས་སྐབས་སུ་ཡང་རྩ་ལྟུང་གི་དབང་གིས་བསླབ་པ་ལས་ཉམས་ནས་ངན་སོང་དུ་ལྟུང་བ་ཡོད་ཅིང་། སེམས་ཅན་གྱི་དོན་དུ་སངས་རྒྱས་ཐོབ་འདོད་མ་བཏང་ན་སྡོམ་པའི་རྩ་བ་མ་བཏང་བས་ལམ་ཞུགས་མ་ཡིན་པར་ཐལ་བའི་སྐྱོན་ཡང་མེད་དོ། །སྨོན་འཇུག་གི་སེམས་བསྐྱེད་མཚན་ཉིད་པ་ཡིན་ན་སྡོམ་པས་ཟིན་པ་དགོས་ན། སྤྱོད་འཇུག་ཏུ། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །ཞེས་གསུངས་པ་དང་འགལ་ལོ་ཞེ་ན་སྐྱོན་མེད་དེ། སྨོན་པའི་སེམས་ནི་སྡོམ་པས་མ་ཟིན་པའི་སྨོན་པའི་སེམས་ཙམ་ལ་དགོངས་ཤིང་། ཇི་ལྟར་འཇུག་པའི་སེམས་བཞིན་དུ་ཞེས་པ་ནི་དེ་ཉིད་སྡོམ་པས་ཟིན་ནས་ལམ་ལ་འཇུག་པ་ལ་དགོངས་པའི་ཕྱིར་ཏེ། དེ་ཉིད་ཀྱི་མཇུག་ཏུ་གང་ནས་བཟུང་སྟེ་སེམས་ཅན་ཁམས་མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་པའི་ཕྱིར་རོ། །སྨོན་འཇུག་གི་སེམས་བསྐྱེད་མཚན་ཉིད་པ་ཐེག་ཆེན་གྱི་ཚོགས་ལམ་ནས་རྒྱུན་མཐའི་བར་དུ་གཞག་པ་ཁྱད་པར་མེད་ན། སྤྱོད་འཇུག་ཏུ། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་དང་འགལ་ལོ་ཞེ་ན་སྐྱོན་མེད་དེ། གཞུང་དེས་ཐེག་ཆེན་གྱི་ལམ་དུ་ཞུགས་ནས་སངས་རྒྱས་མ་ཐོབ་ཀྱི་བར་དུ་བྱང་ཆུབ་ཏུ་འགྲོ་བར་འདོད་པའི་བློ་དང་། འགྲོ་བའི་བྱ་བས་ཟིན་པ་གཉིས་ཡོད་པ་ལ། སྨོན་འཇུག་གཉིས་སུ་གཞག་པར་བསྟན་པས་ལུགས་འདི་ཉིད་ཡིན་པའི་ཕྱིར་རོ། །དེ་ལས་གཞན་དུ་འགྲོ་བའི་བྱ་བས་ཟིན་པའི་ཚེ་འགྲོ་བར་འདོད་པའི་བློ་མེད་པ་ནི་ཤིན་ཏུ་མི་འཐད་དེ། འདི་ནི་འཇིག་རྟེན་གྱི་འགྲོ་བར་འདོད་པ་དང་། འགྲོ་བ་དཔེར་བྱས་པ་ཡིན་པས་འཇིག་རྟེན་ན་འགྲོ་བའི་བྱ་བས་ཟིན་ཀྱང་འགྲོ་བར་འདོད་པའི་བློ་མེད་ན་དེ་ཉིད་དུ་གནས་པའམ། ཕྱིར་ལྡོག་པར་མྱོང་བས་གྲུབ་པའི་ཕྱིར་རོ། །འགྲོ་བའི་བྱ་བས་མ་ཟིན་པའི་གོང་དུ་འགྲོ་བར་འདོད་པའི་བློ་ཙམ་ཡོད་པ་ནི་སྨོན་པའི་སེམས་ཙམ་ཡོད་པ་དང་མཚུངས་སོ། །འདི་ནི་འཕགས་སེང་གཉིས་ཀྱི་དགོངས་པ་ཡང་ཡིན་ཏེ། འཕགས་པས་སེམས་བསྐྱེད་པ་ནི་གཞན་དོན་ཕྱིར། །ཞེས་པའི་སྐབས་ཀྱི་དམིགས་ཡུལ་བྱང་ཆུབ་མདོར་བསྡུས་པ་དེ་འདུན་ལྡན་སེམས་བསྐྱེད་ལ་གཞག་ཅིང་། སློབ་དཔོན་གྱིས་ནི་སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་ཀྱི་སེམས་བསྐྱེད་ལ་སྨོན་འཇུག་གཉིས་སུ་བཤད་ནས། དེ་ཉིད་དཔེའི་སྒོ་ནས་ཉེར་གཉིས་སུ་བྱས་པའི་མ་མཐའི་ས་མཚམས་ཐེག་ཆེན་གྱི་ཚོགས་ལམ་ནས་གཞག་པའི་ཕྱིར་རོ། །འོ་ན་སེམས་བསྐྱེད་ཐ་མ་གསུམ་པོ་དེ་ལ་སྨོན་འཇུག་གཉིས་ཀྱིས་ཁྱབ་པར་འགྱུར་ཞིང་། དེའང་འདོད་ན་སངས་རྒྱས་ཀྱི་སར་གཞག་པ་དང་འགལ་ལོ་ཞེ་ན་སློབ་དཔོན་གྱིས་ནི་དོན་བདུན་ཅུའི་ཐོག་མ་སེམས་བསྐྱེད་དང་། བར་དུ་ཚོགས་སྒྲུབ་ཀྱི་སྐབས་སུ་སྟོང་ཉིད་ཉི་ཤུའི་ཡུལ་ཅན་ཡེ་ཤེས་དང་། ཐ་མ་ཕྲིན་ལས་དང་གསུམ་གྱི་ས་མཚམས་ཐེག་ཆེན་གྱི་ཚོགས་ལམ་ནས་སངས་རྒྱས་ཀྱི་སའི་བར་དུ་གཞག་པས་དོན་གཞན་རྣམས་ཀྱི་ས་མཚམས་ཀྱང་བདེ་བླག་ཏུ་རྟོགས་པ་ལ་དགོངས་ནས་སངས་རྒྱས་ཀྱི་སར་གཞག་པ་ཡིན་གྱི་བྱང་སེམས་ཀྱི་རྒྱུད་ལ་དེ་གསུམ་མེད་པ་ནི་མ་ཡིན་ཏེ། ཤེར་ཕྱིན་གྱི་མདོ་དང་། མདོ་སྡེ་རྒྱན་དུ། སེམས་བསྐྱེད་ཉེར་གཉིས་པོ་ཐམས་ཅད་བྱང་སེམས་ཀྱི་རྒྱུད་ལ་གཞག་པའི་ཕྱིར་དང་། སྤྲིན་ལྟ་བུའི་སེམས་བསྐྱེད་ནི་ས་བཅུ་པ་ཆོས་ཀྱི་སྤྲིན་ལ་འཇོག་པ་སྐབས་ཀྱི་དོན་ཡིན་པའི་ཕྱིར། ཐེག་ཆེན་གྱི་ལམ་དུ་འཇུག་ཁ་མའི་དུས་སུ་སྨོན་འཇུག་གི་སེམས་ཙམ་ཡོད་ལ་དེའི་འབྲས་བུར་གྱུར་པའི་སྨོན་འཇུག་གི་སེམས་བསྐྱེད་མཚན་ཉིད་པ་སྐྱེས་པ་དང་ཐེག་ཆེན་ལམ་དུ་ཞུགས་པ་དུས་མཉམ་པ་ཡང་འཕགས་སེང་གཉིས་ཀྱི་བཞེད་པ་ཡིན་ཏེ། ཐེག་ཆེན་སེམས་བསྐྱེད་ལ་འདོད་པའི་མིང་གིས་བཏགས་པ་དེ་རྒྱུ་མིང་འབྲས་བུ་ལ་བཏགས་པར་བཞེད་པའི་ཕྱིར་དང་། དེ་ལས་གཞན་དུ་དུས་མཉམ་ཡིན་ན། རྒྱུ་མིང་འབྲས་བུ་ལ་བརྟགས་པར་མི་རུང་བའི་ཕྱིར་རོ། །གསུམ་པ་ནི། དེང་སང་ཕལ་ཆེར་སྨོན་འཇུག་གཉིས་པོ་དེ་ཀུན་རྫོབ་སེམས་བསྐྱེད་ཀྱི་དབྱེ་བར་བྱས་ནས་དེ་གཉིས་ལ་ཀུན་རྫོབ་སེམས་བསྐྱེད་ཀྱིས་ཁྱབ་ཅིང་། དེ་གཉིས་དང་དོན་དམ་སེམས་བསྐྱེད་ཀྱི་གཞི་མཐུན་མེད་པར་འདོད་དོ། །དེ་ནི་མི་འཐད་དེ། སེམས་བསྐྱེད་པ་ནི་གཞན་དོན་ཕྱིར་ཞེས་པའི་སྐབས་ནས་བསྟན་པའི་བྱང་ཆུབ་སེམས་དཔའི་རྒྱུད་ཀྱི་སེམས་བསྐྱེད་ཐམས་ཅད་སྨོན་འཇུག་གཉིས་ཀྱིས་བསྡུས་ཤིང་གཞུང་དེས་ཐེག་ཆེན་སེམས་བསྐྱེད་སྤྱིའི་མཚན་ཉིད་བསྟན་པ་ཡིན་གྱི། ཀུན་རྫོབ་སེམས་བསྐྱེད་ཁོ་ནའི་མཚན་ཉིད་བསྟན་པ་མ་ཡིན་པའི་ཕྱིར་རོ། །དེས་ན་སྨོན་འཇུག་གི་སེམས་བསྐྱེད་གཉིས་ཀྱིས་བྱང་སེམས་ཀྱི་རྒྱུད་ཀྱི་སེམས་བསྐྱེད་ཉེར་གཉིས་པོ་ཐམས་ཅད་ཀྱང་བསྡུས་ཤིང་དོན་དམ་སེམས་བསྐྱེད་ཀྱང་སེམས་བསྐྱེད་ཉེར་གཉིས་ཀྱིས་བསྡུས་པས། ཕར་ཕྱིན་དྲུག་དང་ལྡན་པའི་སེམས་བསྐྱེད་ལས་གཞན་དུ་འགྱུར་བའི་བྱང་སེམས་འཕགས་པའི་སེམས་བསྐྱེད་མེད་པའི་ཕྱིར་རོ། །ཐོགས་མེད་ཀྱི་བཞེད་པ་ཡང་ཡིན་ཏེ། བྱང་སའི་ཚུལ་ཁྲིམས་ལེའུར་བྱང་ཆུབ་སེམས་དཔའི་ཉེས་སྤྱོད་སྤོང་བ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་པོ་དེ་འཇུག་པ་སེམས་བསྐྱེད་དུ་གསུངས་ཤིང་། དོན་དམ་སེམས་བསྐྱེད་ཀྱང་གསུམ་པོ་དེའི་ནང་དུ་འདུས་པའི་ཕྱིར་ཏེ། དགེ་བ་ཆོས་སྡུད་ཀྱི་ཚུལ་ཁྲིམས་ཀྱི་ནང་དུ་འདུས་པའི་ཕྱིར། གནད་ཀྱི་དོན་ནི་འདི་ཡིན་ཏེ། ས་དང་པོའི་མཉམ་གཞག་གི་ངོ་བོར་གྱུར་པའི་གཙོ་སེམས་གཅིག་གི་འཁོར་དུ་ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག་སྟེ་སེམས་བྱུང་ཉེར་གཅིག་འབྱུང་ལ། ཀུན་འགྲོ་ལྔའི་ནང་ཚན་དུ་གྱུར་པའི་སེམས་པ་དང་། ཡུལ་ངེས་ལྔའི་ནང་ཚན་དུ་གྱུར་པའི་འདུན་པ་དེ་སྨོན་འཇུག་གི་སེམས་བསྐྱེད་དུ་སོང་བའི་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་སྨོན་འཇུག་གི་སེམས་སེམས་བྱུང་དུ་འགྱུར་བ་གོང་དུ་བཤད་ཟིན་ཏོ། །ཡུལ་ངེས་ལྔའི་ནང་ཚན་དུ་གྱུར་པའི་ཏིང་ངེ་འཛིན་དང་། ཤེས་རབ་གཉིས་པོ་དེ་རྣམ་པར་མི་རྟོག་པའི་ཡེ་ཤེས་སུ་སོང་བའི་སྟོབས་ཀྱིས་དེ་དང་མཚུངས་ལྡན་གྱི་སེམས་སེམས་བྱུང་ཐམས་ཅད་དོན་དམ་སེམས་བསྐྱེད་དུ་སྒྱུར་བར་བྱེད་དོ། །དེས་ན་ས་དང་པོའི་མཉམ་གཞག་གིས་བསྡུས་པའི་སེམས་སེམས་བྱུང་ཐམས་ཅད་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་དང་མཚུངས་ལྡན་དང་བཅས་པའི་ཆ་ནས་སྨོན་པ་སེམས་བསྐྱེད་དང་། བྱང་ཆུབ་ཀྱི་ཆེད་དུ་ལམ་སྒྲུབ་པའི་སེམས་པ་མཚུངས་ལྡན་དང་བཅས་པའི་ཆ་ནས་འཇུག་པ་སེམས་བསྐྱེད། རྣམ་པར་མི་རྟོག་པའི་ཡེ་ཤེས་ཀྱི་ངོ་བོར་གྱུར་པའི་ཆ་ནས་དོན་དམ་སེམས་བསྐྱེད་དུ་འཇོག་པ་ནི་ཚད་ལྡན་གྱི་གཞུང་ལུགས་རྣམས་ཀྱི་དགོངས་པ་ཕྱོགས་གཅིག་པ་ཡིན་ནོ། །འོ་ན་ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་པོ་མི་འགལ་བར་འགྱུར་ཏེ། སྨོན་འཇུག་གཉིས་པོ་དང་དོན་དམ་སེམས་བསྐྱེད་མི་འགལ་བའི་ཕྱིར་ཞེ་ན། སྨོན་འཇུག་གི་སེམས་བསྐྱེད་ལ་ཀུན་རྫོབ་སེམས་བསྐྱེད་ཀྱིས་མ་ཁྱབ་པས་སྐྱོན་མེད་དོ། །ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་ནི་ངོ་བོ་ཐ་དད་ཡིན་ཏེ། སྔ་མ་ནི། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་པ་ལྟར་ཡིན་ལ་ཕྱི་མ་ནི། རྫོགས་པའི་སངས་རྒྱས་རབ་བསྙེན་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་པ་ལྟར་ཡིན་པའི་ཕྱིར་རོ། །དེ་ལྟར་བྱས་ན་བྱང་སེམས་སོ་སྐྱེའི་རྒྱུད་ཀྱི་སེམས་བསྐྱེད་ཐམས་ཅད་དང་། བྱང་སེམས་འཕགས་པའི་རྗེས་ཐོབ་ཀྱི་སེམས་བསྐྱེད་ཐམས་ཅད་སྨོན་འཇུག་གི་སེམས་བསྐྱེད་དང་། ཀུན་རྫོབ་སེམས་བསྐྱེད་ཀྱི་གཞི་མཐུན་ཡིན་ལ། བྱང་སེམས་འཕགས་པའི་རྒྱུད་ཀྱི་ཆོས་ཉིད་ལ་མཉམ་པར་གཞག་པའི་སེམས་བསྐྱེད་ཐམས་ཅད་སྨོན་འཇུག་གི་སེམས་བསྐྱེད་དང་། དོན་དམ་སེམས་བསྐྱེད་ཀྱི་གཞི་མཐུན་ཡིན་ནོ། །མདོར་བསྡུས་ན་ཐེག་ཆེན་སེམས་བསྐྱེད་ཀྱི་མཚན་ཉིད་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བའོ། །བྱང་སེམས་གྱི་སྡོམ་པའི་མཚན་ཉིད། རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་གང་ཞིག མི་མཐུན་ཕྱོགས་སྤོང་བའི་སེམས་པ་མཚུངས་ལྡན་དང་བཅས་པ་དབང་ལྡན་རྒྱུན་ཆགས་པའོ། །དབྱེ་བ་ལ་ས་མཚམས་ཀྱི་སྒོ་ནས་དབྱེ་ན། མོས་པས་སྤྱོད་པའི་སེམས་བསྐྱེད། ལྷག་བསམ་རྣམ་པར་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞིའོ། །དཔེའི་སྒོ་ནས་དབྱེ་ན་ས་ལྟ་བུ་ནས་སྤྲིན་ལྟ་བུའི་བར་ཉེར་གཉིས་སོ། །དམིགས་ཡུལ་གྱི་སྒོ་ནས་དབྱེ་ན། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས་ཡོད་དེ། འབྲས་བུ་རྫོགས་པའི་བྱང་ཆུབ་ལ་དམིགས་པ་དང་། དེའི་རྒྱུ་ལམ་ལ་དམིགས་པ་གཉིས་ཡོད་པའི་ཕྱིར་རོ། །ངོ་བོའི་སྒོ་ནས་དབྱེ་ན་དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་གཉིས་ཡོད་དེ། རྣམ་པར་མི་རྟོག་པའི་ཡེ་ཤེས་ཀྱིས་བསྡུས་པ་དང་། མ་བསྡུས་པ་གཉིས་སུ་ཡོད་པའི་ཕྱིར་རོ། །སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་ཀྱི་མཚན་ཉིད་རིམ་པ་བཞིན། རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་གང་ཞིག འབྲས་བུ་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་མཚུངས་ལྡན་དང་བཅས་པ་དང་། དེ་གང་ཞིག་བྱང་ཆུབ་ཀྱི་ཆེད་དུ་ལམ་སྒྲུབ་པར་འདོད་པའི་འདུན་པ་མཚུངས་ལྡན་དང་བཅས་པའོ། །དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་ཀྱི་མཚན་ཉིད་རིམ་བཞིན་རྣམ་པར་མི་རྟོག་པའི་ཡེ་ཤེས་ཀྱིས་བསྡུས་པའི་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་དང་། དེས་མ་བསྡུས་པའི་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བའོ། །སེམས་བསྐྱེད་བསྟན་ཟིན་ནས། ད་ནི་གདམས་ངག་བསྟན་པ་ལ་གཉིས་ཏེ། གདམས་ངག་སྟོན་པའི་རྒྱུ་མཚན་དང་། རྒྱུ་མཚན་གྱི་གདམས་ངག་དངོས་བཤད་པའོ། །དང་པོ་ནི། མདོར་བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བགྱི་ཞེས་པ་སྟེ། དེ་ལྟར་སེམས་བསྐྱེད་པའི་གང་ཟག་དེས་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་ཆོས་ཐམས་ཅད་རྫོགས་པའི་ཆེད་དུ་ཤེར་ཕྱིན་ལ་སྒྲུབ་དགོས་ན་ཇི་ལྟར་སྒྲུབ་པར་བགྱི་ཞེས་དྲིས་པའོ། །ལན་ནི་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་ཆོས་ཐམས་ཅད་རྫོགས་པ་ལ་ཤེར་ཕྱིན་ལ་འཇུག་པའི་སྒྲུབ་པ་ཉམས་སུ་ལེན་དགོས་པས་དེ་བརྗོད་བྱར་སྟོན་པའི་གདམས་པ་དང་། རྗེས་སུ་གདམས་པ་གཉིས་འཆད་ཅེས་པ་སྟེ། གདམས་ངག་གི་མདོ་རྫོགས་པའི་མཐར་ཡང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་གདམས་པ་སྟེ། འདི་ནི་རྗེས་སུ་བསྟན་པ་ཡིན་ནོ། །ཞེས་འཆད་པར་འགྱུར་བའི་ཕྱིར་རོ། །དེ་ལ་གདམས་ཞེས་པ་ལས་འཕྲོས་ནས་གང་ཟག་གང་ལ། སྟོན་པ་གང་གིས། སྒྲུབ་པ་གང་ལ། དགོས་པ་གང་གི་ཆེད་དུ་གདམས། གདམས་པ་དང་རྗེས་བསྟན་གྱི་ཁྱད་པར་གང་ཡིན་ཞེ་ན། དང་པོ་ནི་སེམས་བསྐྱེད་ནས་སྒྲུབ་པ་ཉམས་སུ་ལེན་པའི་ཆེད་དུ་གདམས་ངག་དོན་དུ་གཉེར་བའི་གང་ཟག་ལའོ། །གཉིས་པ་ནི་སྤྲུལ་པའི་སྐུ་ལྟ་བུས་སོ། །གསུམ་པ་ནི་ཐེག་ཆེན་གྱི་སྒྲུབ་པ་ལའོ། །བཞི་པ་ནི་སེམས་བསྐྱེད་ཀྱི་དབྱེ་བའི་སྐབས་སུ་བསྟན་པའི་རང་གཞན་གྱི་དོན་མཐར་ཐུག་པ་འདི་རྫོགས་པའི་ཆེད་དུའོ། །ལྔ་པ་ནི་དེ་ལ་དོན་དུ་གཉེར་བའི་དོན་ཐོབ་པའི་བྱ་བ་ཉེ་བར་སྟོན་པ་ནི་གདམས་པ་དང་རྗེས་སུ་སྟོན་པ་ཡིན་ཏེ། ཐོབ་ཟིན་པའི་ཡོན་ཏན་ཡོངས་སུ་སྐྱོང་བའི་དོན་གྱིས་མི་ཉམས་པར་བྱེད་པ་ནི་གདམས་པ་ཡིན་ལ། དེའི་འོག་ཏུ་མ་ཐོབ་པའི་ཡོན་ཏན་ཐོབ་པར་བྱེད་པའི་ཕྱིར་ན་རྗེས་སུ་བསྟན་པ་ཡིན་ནོ། །གཉིས་པ་གདམས་ངག་དངོས་ནི། སྒྲུབ་དང་བདེན་པ་རྣམས་དང་ནི། །ཞེས་སོགས་ཏེ། འདི་ལ་སྔ་རབས་པ་རྣམས་སྒྲུབ་པའི་ངོ་བོ་དང་། དམིགས་ཡུལ་དང་ཁྱད་པར་གྱི་ཆོས་ལ་འདོམས་པ་གསུམ་དུ་མཛད་ཀྱང་འཕགས་སེང་གཉིས་ཀྱི་དོན་བསྡུའི་གཞུང་ལྟར་ན་སྒྲུབ་པའི་ངོ་བོ་ལ་འདོམས་པ་དང་། ཁྱད་པར་ལ་འདོམས་པ་གཉིས་སུ་འདུས་ཏེ། དམིགས་པ་དང་རྟེན་ལ་སོགས་པ་རྣམས་ཁྱད་པར་གྱི་ཆོས་སུ་མཚུངས་པའི་ཕྱིར་རོ། །དང་པོ་སྒྲུབ་པའི་ངོ་བོ་ལ་འདོམས་པ་ལ་བདེན་པ་གཉིས་ལས་མི་འདའ་བའི་སྒྲུབ་པ་ངོས་གཟུང་། དེ་ཉན་ཐོས་དང་ཐུན་མོང་མ་ཡིན་པར་བསྟན་པ། དེ་ལ་འདོམས་པའི་གདམས་ངག་དངོས་དང་གསུམ་ལས། དང་པོ་ནི་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་སེམས་ཆེན་པོས་ཡུམ་ལ་སྤྱད་པར་བགྱི། བཅོམ་ལྡན་འདས་ཀྱིས་བཀར་སྩལ་པ། ཤཱ་རིའི་བུ་འདི་ལ་བྱང་སེམས་ཆེན་པོ་ཡུམ་ལ་སྤྱོད་པའི་ཚེ་བྱང་སེམས་ཆེན་པོ་ཡོད་བཞིན་དུ་བྱང་སེམས་ཡང་དག་པར་རྗེས་སུ་མི་མཐོང་ངོ་། །བྱང་སེམས་ཀྱི་མིང་ཡང་། བྱང་ཆུབ་ཀྱང་། བྱང་ཆུབ་ཀྱི་མིང་ཡང་། ཡུམ་ཡང་། ཡུམ་གྱི་མིང་ཡང་། སྤྱོད་ཅེས་བྱ་བར། མི་སྤྱོད་ཅེས་བྱ་བར་ཡང་། སྤྱོད་ཀྱང་སྤྱོད་ལ་མི་སྤྱོད་ཀྱང་མི་སྤྱོད་ཅེས་བྱ་བར། སྤྱོད་པ་ཡང་མ་ཡིན་མི་སྤྱོད་པ་ཡང་མ་ཡིན་ཞེས་བྱ་བར། གཟུགས། ཚོར་བ། འདུ་ཤེས། འདུ་བྱེད། རྣམ་པར་ཤེས་པ་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་སེམས་དང་དེའི་མིང་རང་བཞིན་གྱིས་སྟོང་པའི་ཕྱིར་རོ། །ཞེས་སོགས་རྒྱས་པར་གསུངས་སོ། །འདི་དག་གི་དོན་ལ་མདོ་སྡེ་རྒྱན་དང་། ཀུན་བཏུས་དང་། བརྒྱད་སྟོང་དོན་བསྡུས་སོགས་སེམས་ཙམ་པའི་གཞུང་ལུགས་རྣམས་ལས། རྣམ་གཡེང་གི་རྣམ་རྟོག་བཅུའི་གཉེན་པོར་ཤེར་ཕྱིན་རྣམ་པར་མི་རྟོག་པ་བཅུ་བསྒོམ་པ་ལ་སྦྱར་ནས་འཆད་དོ། །ཡུམ་དོན་དབུ་མར་འགྲེལ་བ་རྣམས་ཀྱིས་ནི་བདེན་གཉིས་ལས་མི་འདའ་བའི་སྒྲུབ་པ་བསྟན་པར་བཞེད་དེ། ཉིར་སྣང་དུ། མི་དམིགས་པའི་རྣམ་པ་ཅན་ལ་སྦྱར་བ་ཙམ་མ་གཏོགས་ཀུན་རྫོབ་ཀྱི་བདེན་པ་ལས་མི་འདའ་བ་ལ་སྦྱར་བའི་གསལ་ཀ་མི་སྣང་ཡང་། སློབ་དཔོན་གྱིས་ཀུན་རྫོབ་དང་དོན་དམ་པའི་བདེན་པ་ལས་མི་འདའ་བས་ཞེས་གསུངས་པ་ལྟར་ན། རྔོག་དང་ཨར་གྱིས། བྱང་སེམས་ཆེན་པོ་ཡུམ་ལ་སྤྱོད་པའི་ཚེ་ཞེས་པས་ཀུན་རྫོབ་ཀྱི་བདེན་པ་ལས་མི་འདའ་བ་བསྟན་པར་བཞེད་ཀྱང་། མཁས་གྲུབ་གཡག་པས། བྱང་སེམས་ཆེན་པོ་ཡོད་བཞིན་དུ། །ཅེས་པས་བསྟན་པར་བཞེད་པ་ཉིད་ལེགས་ཏེ། བྱང་ཆུབ་ཀྱི་མིང་ཡོད་བཞིན་དུ་ཞེས་པ་ནས་རྣམ་པར་ཤེས་པ་ཡོད་བཞིན་དུ་ཅེས་པའི་བར་ཐམས་ཅད་ལ་གསལ་བྱེད་དུ་སྦྱར་བར་བྱ་བ་ཡིན་པས་དོན་དམ་དུ་མི་དམིགས་པ་ཐམས་ཅད་ལ་ཡང་ཀུན་རྫོབ་ཏུ་སྣང་བ་ཙམ་མི་འགོག་པའི་ཀུན་རྫོབ་ལས་མི་འདའ་བ་རེ་རེ་འབྱུང་བའི་ཕྱིར་རོ། །དོན་དམ་ལས་མི་འདའ་བ་ནི་བྱང་ཆུབ་སེམས་དཔའ་ལ་སྤྱོད་པ་པོ་བྱང་ཆུབ་སེམས་དཔར་མངོན་པར་ཞེན་པ་དང་། སྤྱོད་པའི་འབྲས་བུ་བྱང་ཆུབ་ཏུ་ཞེན་པ་དང་། སྤྱོད་པར་བྱ་བ་ཤེར་ཕྱིན་དུ་ཞེན་པ་དང་། སྤྱོད་པ་རང་གི་ངོ་བོ་བཟློག་ཟླ་དང་བཅས་པར་ཞེན་པ་དང་། ཤེས་བྱ་ཕུང་པོ་ལྔར་ཞེན་པ་སྟེ་ལྔ་ཡོད་པས་དེའི་གཉེན་པོ་བྱང་སེམས་དང་། བྱང་ཆུབ་དང་། ཡུམ་དང་། སྤྱོད་སོགས་མཐའ་བཞི་དང་། ཕུང་པོ་ལྔར་ཡང་དག་པར་རྗེས་སུ་མི་མཐོང་ངོ་ཞེས་བསྟན་ཏོ། །གཉིས་པ་ནི་མདོར། ཤཱ་རིའི་བུ་གལ་ཏེ་ཕྱོགས་བཅུ་རེ་རེའི་ཞིང་གདྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདིར། དགེ་སློང་ཤཱ་རིའི་བུ་དང་། མོདྒལ་གྱི་བུ་ལྟ་བུ་ཤ་སྟག་གིས་འདི་ལྟ་སྟེ་དཔེར་ན། འདམ་བུ། འོད་མ། བུ་རམ་ཤིང་། སྨྱིག་མ། འབྲས། ཏིལ་གྱི་ཚལ་ལམ་ལྟར་ཡོངས་སུ་གང་བར་གྱུར་ཀྱང་དེ་དག་གི་ཤེས་རབ་གང་ཡིན་པ་དེས་བྱང་སེམས་ཡུམ་ལ་སྤྱོད་པའི་ཤེས་རབ་ཉིན་གཅིག་བསྒོམ་པ་ཙམ་གྱིས་བརྒྱའི་ཆར་ཡང་ཉེ་བར་མི་འགྲོ། སྟོང་དང་། བརྒྱ་སྟོང་དང་། བྱེ་བ་བརྒྱ་སྟོང་དང་། གྲངས་དང་། ཆར་ཡང་། བགྲང་བར་ཡང་། རྒྱུར་ཡང་། དཔེར་ཡང་ཉེ་བར་མི་འགྲོ་བ་ནས་དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་བྱང་སེམས་ཀྱི་ཤེས་རབ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་དོན་དུ་ཉེ་བར་གནས་པ་ཡིན་ཏེ། ཞེས་སོགས་རྒྱ་ཆེར་གསུངས་སོ། །འདི་ལ་གང་དང་ཐུན་མོང་མ་ཡིན་པའི་ཉན་ཐོས་ཀྱི་རྟོགས་པ་ངོས་གཟུང་། གང་ཐུན་མོང་མ་ཡིན་པའི་བྱང་སེམས་ཀྱི་ཤེས་རབ་ངོས་གཟུང་། ཇི་ལྟར་ཐུན་མོང་མ་ཡིན་པའི་ཚུལ་དང་། ཐུན་མོང་མ་ཡིན་པའི་སྒྲུབ་བྱེད་བསྟན་པ་དང་བཞི་ལས། དང་པོ་ནི། འདི་ལྟ་སྟེ་ཞེས་པ་ནས། དེ་དག་གི་ཤེས་རབ་གང་ཡིན་པ་དེས་ནི་ཞེས་པའི་བར་གྱིས་བསྟན་ཏོ། །དགེ་སློང་ཤཱ་རིའི་བུ་དང་། མོངྒལ་གྱི་བུ་ལྟ་བུ་ཤ་སྟག་ཅེས་པ་ནི་འོག་ནས་འཆད་པ་ལྟར་གྱི་རྟོགས་རིགས་མཐུན་པ་ཤ་སྟག་གིས་ཞེས་པའི་དོན་ཏོ། །འདམ་བུ་ནས་ཏིལ་གྱི་བར་གྱིས་ཉན་ཐོས་ཀྱི་རྟོགས་པ་ཆོས་དྲུག་བསྟན་ཏེ། ཉན་ཐོས་ཀྱི་སྦྱོར་ལམ་དྲོད་དེ་འདམ་བུ་ལྟ་བུར་ལས་ཉོན་གྱི་གནོད་པ་ཆུང་ངུ་མི་བཟོད་པ་དང་། རྩེ་མོ་ནི་འོད་མ་ལ་མེ་མཚོན་དག་གི་བཞིན་དུ་ལས་ཉོན་གྱི་གནོད་བྱེད་དྲག་པོ་དང་ཕྲད་ཀྱང་དགེ་རྩ་མི་འཆད་པ་དང་། བཟོད་པ་ནི་བུ་རམ་ཤིང་དང་འདྲ་བར་ངན་སོང་ཆད་པའི་ཕྱིར་བདེ་འགྲོར་ཆོས་བསྒོམ་པའི་མངར་བ་ལས་མི་འདའ་བ་ཉིད་དང་། ཆོས་མཆོག་ནི་སྨྱིག་མ་དང་འདྲ་བར་མྱུར་དུ་བདེན་པ་མངོན་པར་རྟོགས་པར་བྱེད་པ་དང་། མཐོང་ལམ་ནི་འབྲས་དང་འདྲ་བར་འཕགས་པའི་གང་ཟག་རྣམས་ཀྱི་རྟོགས་པ་མཆོག་ཡིན་པ་དང་། སྒོམ་ལམ་ནི་ཏིལ་ལ་མེ་ཏོག་དང་དྲི་ལ་སོགས་པ་རིགས་གཅིག་ཀྱང་ནུས་པ་ཐ་དད་དུ་ཡོད་པ་ལྟར། མཐོང་ལམ་ལས་རྟོགས་རིགས་ཐ་དད་དུ་མེད་ཀྱང་དུས་གཞན་དུ་སྒོམ་སྤང་སྤོང་བའི་ཁྱད་པར་ཡོད་པའི་དབང་དུ་བྱས་ནས་དཔེ་དྲུག་པོ་རྣམས་བསྟན་པའི་ཕྱིར་རོ། །ཚལ་སྨོས་པ་ནི་རྟོགས་རིགས་གཅིག་པའི་གང་ཟག་རྣམས་དབང་པོའི་ཁྱད་པར་ཐ་དད་པ་ཡོད་ཀྱང་དྲོད་ལ་སོགས་པར་རིགས་གཅིག་ཅེས་པའི་དོན་ཏོ། །ལམ་སྔ་མ་སྔ་མ་ནི་དཔེ་ཕྱི་མ་དྲངས་པའི་ཆེད་ཡིན་ལ། ཐ་མར་ལམ་སྨོས་པ་ནི་འཕགས་པའི་གང་ཟག་དེ་རྣམས་ཀྱི་མཐོང་ཆོས་ལ་བདེར་གནས་ཤེས་པའི་ཆེད་ཡིན་ནོ། །གཉིས་པ་ནི། བྱང་སེམས་ཆེན་པོ་ཉིན་གཅིག་ཤེས་རབ་བསྒོམས་པའི་ཤེས་རབ་ཀྱི་ཞེས་པ་སྟེ། ཉིན་གཅིག་ཤེས་རབ་བསྒོམས་པ་ལ་ནུས་པ་དེ་ཙམ་ཡོད་པའི་བྱང་སེམས་ཀྱི་ཤེས་རབ་ཉིད་ཡིན་ནོ། །འོ་ན་དེ་ལྟ་བུའི་བྱང་སེམས་དེ་ཅི་སེམས་དང་པོ་བསྐྱེད་པའམ། སྤྱོད་པ་ལ་ཞུགས་པའམ། ཕྱིར་མི་བཟློག་པའམ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཡིན། རེ་ཞིག་བཞི་པ་ནི་མ་ཡིན་ཏེ། ས་བཅུ་པ་ལ་ནི་དེ་བཞིན་གཤེགས་པ་ཉིད་དུ་བསྟན་པས་ཉན་རང་ལས་ཁྱད་པར་དུ་འཕགས་པར་གྲུབ་ཟིན་པའི་ཕྱིར་རོ། །ཕྱིར་མི་བཟློག་པའི་བྱང་སེམས་ཀྱང་མ་ཡིན་ཏེ། ས་བརྒྱད་པ་ལ་དགོངས་པ་ཅན་གྱི་མྱང་འདས་བཀག་པས་ཉན་རང་ལས་ཁྱད་པར་དུ་འཕགས་པ་གྲུབ་ཟིན་པའི་ཕྱིར་ཏེ། མདོ་སྡེ་ས་བཅུ་པར། དེ་བཞིན་གཤེགས་པ་དེ་དག་གིས་བྱང་ཆུབ་སེམས་དཔའ་དེ་དག་མངོན་པར་འགྲུབ་པའི་སྒོ་ལ་བཅུག་པར་མ་གྱུར་ན་ནི་འདི་དེའི་ཚེ་ཉིད་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་གསུངས་པའི་ཕྱིར་རོ། །འོ་ན་དེའི་མྱ་ངན་ལས་འདས་པ་དེ་ནི་ཉན་ཐོས་ཀྱི་མྱང་འདས་ནི་མ་ཡིན་ཏེ། དེ་ཡིད་ལ་བྱེད་པ་ནི་སེམས་བསྐྱེད་པ་ནས་བརྩམས་ཏེ་རིང་དུ་སྤངས་པའི་ཕྱིར་རོ། །སངས་རྒྱས་ཀྱི་མྱ་ངན་ལས་འདས་པ་ཡང་མ་ཡིན་ཏེ། བསྒོམས་པས་སྤང་བར་བྱ་བ་མ་སྤངས་པའི་ཕྱིར་རོ། །དེས་ན་གང་ཞིག་ཡིན་ཞེ་ན། སྤྱིར་མྱང་འདས་ལ་རྩེ་མོ་ཐོབ་པ་ན་དགེ་རྩ་ཆད་པ་མྱ་ངན་ལས་འདས་པ་དང་། བཟོད་པ་ཐོབ་པ་ན་ངན་འགྲོ་མྱ་ངན་ལས་འདས་པ་དང་། བསམ་གཏན་ཐོབ་པ་ན་དེའི་ཡན་ལག་མྱ་ངན་ལས་འདས་པ་དང་། རྒྱུན་ཏུ་ཞུགས་པ་ན་སྲིད་པ་བརྒྱད་པ་མྱ་ངན་ལས་འདས་པ་དང་། ཕྱིར་འོང་བ་ལ་འདོད་པའི་སྲིད་པ་གཉིས་པ་མྱ་ངན་ལས་འདས་པ་དང་། ཕྱིར་མི་འོང་བ་འདོད་པའི་ཁམས་མྱ་ངན་ལས་འདས་པ་དང་། དགྲ་བཅོམ་པ་རྣམས་ལ་ལྷག་བཅས་ལྷག་མེད་ཀྱི་མྱ་ངན་ལས་འདས་པ་དང་། དགོངས་པ་ཅན་གྱི་མྱ་ངན་ལས་འདས་པ་དང་རྣམ་པ་བརྒྱད་ཡོད་པ་ལས་ཕྱི་མ་སྟེ་རེ་ཞིག་གཞན་དོན་རྒྱུན་ཆད་པ་ལ་དགོངས་ནས་མྱང་འདས་སུ་བཏགས་པ་ཡིན་ནོ། །སྤྱོད་པ་ལ་ཞུགས་པའི་བྱང་སེམས་ཡང་མ་ཡིན་ཏེ། རྒྱུན་ཏུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་བྱང་ཆུབ་སེམས་དཔའི་བཟོད་པ་ཡིན་ནོ་ཞེས་འཆད་པར་འགྱུར་བས་ཉན་ཐོས་ལས་ཁྱད་པར་དུ་འཕགས་པར་གྲུབ་ཟིན་པའི་ཕྱིར་རོ། །འོ་ན་གང་ཡིན་ཞེ་ན་ཡོངས་སུ་མི་ཉམས་པའི་ཆོས་ཅན་ཀུན་རྫོབ་ཀྱི་སེམས་དང་པོ་བསྐྱེད་པའི་བྱང་ཆུབ་སེམས་དཔའི་སེམས་བསྐྱེད་དང་པོ་གསུམ་གྱི་སྐབས་སུ་བསྟན་པའི་བྱང་ཆུབ་སེམས་དཔའོ། །གསུམ་པ་ནི་འོ་ན་དེ་ལྟ་བུའི་བྱང་སེམས་ཀྱི་ཉིན་གཅིག་བསྒོམས་པའི་ཤེས་རབ་དེ་སྔར་བཤད་པའི་རྟོགས་པ་ཆོས་དྲུག་ལས་ཇི་ལྟར་ཁྱད་པར་དུ་འཕགས་ན། འདི་ལ་གྲངས་ཀྱི་ཁྱད་པར། མཐུའི་ཁྱད་པར། རིགས་ཀྱི་ཁྱད་པར། རྒྱུའི་ཁྱད་པར། དཔེའི་ཁྱད་པར་དང་ལྔ་ལས། དང་པོ་ནི་བརྒྱའི་ཆར་ཡང་ཞེས་པ་ནས་གྲངས་སུ་ཡང་ཞེས་པའི་བར་དང་། གཉིས་པ་ནི་ཆར་ཡང་། གསུམ་པ་ནི་བགྲང་བར་ཡང་། བཞི་པ་ནི་རྒྱུར་ཡང་། ལྔ་པ་ནི་དཔེར་ཡང་། ཞེས་པས་སྟོན། བཞི་པ་ནི་འཕགས་པའི་གང་ཟག་ཐམས་ཅད་འདུས་མ་བྱས་ཀྱིས་རབ་ཏུ་ཕྱེ་བས་རྟོགས་པ་ལ་ཁྱད་པར་མེད་པ་མ་ཡིན་ནམ། ཅིའི་ཕྱིར་ཁྱད་པར་དུ་འཕགས་ཤེ་ན་བྱང་ཆུབ་སེམས་དཔའ་རྣམས་ནི་ཆེད་དུ་བྱ་བ་སེམས་ཅན་ཐམས་ཅད་མྱ་ངན་ལས་འདའ་བའི་ཆེད་དང་། སྦྱོར་བ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དང་། རྟོགས་པ་ཆོས་སྐུ་ཐོབ་པར་བྱེད་པའི་མཚན་ཉིད་ཅན་གྱི་སྒོ་ནས་སྦྱིན་གནས་སུ་གྱུར་པ་སྒྲུབ་པར་བྱེད་པའི་ཁྱད་པར་དང་ལྡན་པའི་ཕྱིར་རོ། །ཅིའི་ཕྱིར་སྦྱིན་གནས་སུ་འགྱུར་ཞེ་ན་དགེ་བ་བཅུའི་ལས་ཀྱི་ལམ་དང་། རྒྱལ་རིགས་ཤིང་སཱ་ལ་ཆེན་པོ་ལ་སོགས་པ་དང་། ལྷའི་རིགས་ཐམས་ཅད་དང་། རྒྱུན་ཏུ་ཞུགས་པ་ནས་སངས་རྒྱས་ཀྱི་བར་གྱི་ཤེས་རབ་རྣམས་བྱང་སེམས་མེད་ན་མི་འབྱུང་བར་བསྟན་པའི་ཕྱིར་རོ། །འོ་ན་ཆེད་དུ་བྱ་བ་དང་། སྦྱོར་བ་དང་། རྟོགས་པ་རྣམས་བྱང་སེམས་ཉིན་གཅིག་ཤེས་རབ་བསྒོམས་པའི་འབྲས་བུར་མི་འཐད་དེ། བསྐལ་པ་གྲངས་མེད་གསུམ་དུ་ཤེས་རབ་བསྒོམས་པའི་འབྲས་བུ་ཡིན་པའི་ཕྱིར་རོ་ཞེ་ན། མར་མེའི་དཔེ་ལ་བརྟེན་ནས་མི་འགལ་བའི་ལན་གདབ་པར་བཤད་དོ། །གསུམ་པ་དེ་ལ་འདོམས་པའི་གདམས་ངག་དངོས་ནི། ཡུལ་བྱང་ཆུབ་ཏུ་སེམས་བསྐྱེད་ནས་གདམས་ངག་དོན་དུ་གཉེར་བའི་བྱང་སེམས་ལ་གནས་སྐབས་དང་མཐར་ཐུག་གི་འབྲས་བུ་བསྒྲུབ་པའི་ཆེད་དུ་བདེན་གཉིས་ལས་མི་འདའ་བར་ཐབས་ཤེས་ཟུང་འབྲེལ་གྱི་སྒོ་ནས་ཤེར་ཕྱིན་སྒྲུབས་ཤིག་ཅེས་འདོམས་པར་བྱེད་པའི་མདོ་ཚིག་གོ །དེས་ན་འདིར་བསྟན། གདམས་ངག་བཅུ་པོ་ཐམས་ཅད་ཤེར་ཕྱིན་གྱི་མདོ་ཡིན་གྱི། རྒྱན་གྱི་ཚིག་ལ་འདིར་བསྟན་གདམས་ངག་བཅུ་འཇོག་པ་ནི་བརྗོད་བྱ་རྗོད་བྱེད་མ་ཕྱེད་པའོ། །གཉིས་པ་སྒྲུབ་པའི་ཁྱད་པར་ལ་འདོམས་པ་ལ་གཉིས་ཏེ། ཁྱད་པར་དུ་འགྱུར་བའི་ཚུལ་དང་། དཀའ་བའི་གནས་ལ་དཔྱད་པའོ། །དང་པོ་ནི། སྣང་ཙམ་ལ་སྐུར་བ་མི་འདེབས་ཤིང་དོན་དམ་པར་མི་དམིགས་པའི་བདེན་གཉིས་ལས་མི་འདའ་བ་ཙམ་གྱིས་སེམས་བསྐྱེད་ཀྱི་དབྱེ་བའི་སྐབས་སུ་བཤད་པའི་ཡོན་ཏན་རྣམས་སྒྲུབ་ནུས་སམ་སྙམ་ན་དེ་ལ་ཡང་ཁྱད་པར་གྱི་ཆོས་དམིགས་པ་ལ་སྒྲོ་འདོགས་གཅོད་པ་དང་། སྐྱབས་གསུམ་ལ་བརྟེན་པ་དང་། མི་མཐུན་ཕྱོགས་སེལ་བར་བྱེད་པའི་བརྩོན་འགྲུས་དང་། གནས་སྐབས་སུ་ཐོབ་པའི་ཡོན་ཏན་དང་། མཐར་ཐུག་པར་བྱེད་པའི་རྒྱུ་རྣམས་དགོས་སོ་ཞེས་པ་ནི། བདེན་པ་རྣམས་དང་ནི་ཞེས་པ་མན་ཆད་ཀྱིས་བསྟན་ཏོ། །འདིར་སྒྲོ་འདོགས་གཅོད་པར་བྱ་བའི་གཞི་བདེན་པ་བཞི་ལ་གཞག་པ་དང་། དམིགས་པ་ཆོས་རྣམས་ཐམས་ཅད་དེ། །ཅེས་པའི་སྐབས་སུ་ཆོས་ཐམས་ཅད་ལ་གཞག་པ་དང་། འདི་ཡི་དམིགས་པ་དངོས་མེད་དེ། །ཅེས་པའི་སྐབས་སུ་བདེན་པའི་དངོས་པོ་མེད་པ་ལ་གཞག་པ་གསུམ་གྱི་ཁྱད་པར་ནི་རྟོགས་རིགས་ཐུན་མོང་བའི་དམིགས་པ་དང་། ཐེག་ཆེན་ཐུན་མོང་མ་ཡིན་པའི་རྟོགས་རིགས་ཀྱི་དམིགས་པ་དང་། མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱི་དམིགས་པའི་དབང་དུ་བྱས་པའོ། །གཞན་དག་ནི་ཐེ་ཚོམ་ཙམ་ཡང་མ་ཞུགས་པར་སྣང་ངོ་། །རྟོགས་རིགས་ཐུན་མོང་གི་དབང་དུ་བྱས་ན་ཐེག་ཆེན་གྱི་སྒྲུབ་པས་ཀྱང་བདེན་པ་བཞི་ལ་དམིགས་ཏེ། སྐབས་གསུམ་པར་བསྟན་པའི་མཐོང་ལམ་གྱི་དམིགས་པ་བདེན་བཞི་ལ་བཤད་པའི་ཕྱིར་རོ། །སྐྱབས་གསུམ་པོ་ནི་སྒྲུབ་པའི་རྟེན་ཡིན་ཏེ། ཚོགས་སྦྱོར་གྱི་གནས་སྐབས་སུ་ཆོས་དང་དགེ་འདུན་ལ་བརྟེན་ནས་དེ་ཐོབ་པའི་ཆེད་དུ་སྒྲུབ་པ་ཉམས་སུ་ལེན། འཕགས་པའི་གནས་སྐབས་སུ་སངས་རྒྱས་དཀོན་མཆོག་ལ་བརྟེན་ནས་དེ་ཐོབ་པའི་ཆེད་དུ་སྒྲུབ་པ་ཉམས་སུ་ལེན་པའི་ཕྱིར་རོ། །བརྩོན་འགྲུས་གསུམ་པོ་ནི་སྒྲུབ་པའི་མི་མཐུན་ཕྱོགས་སེལ་བར་བྱེད་པ་ཡིན་ཏེ། མ་ཞེན་པའི་བརྩོན་འགྲུས་ཀྱིས་བྱ་བ་ངན་ཞེན་གྱི་ལེ་ལོ་སྤངས་ནས་སྒྲུབ་པ་ཁྱད་པར་དུ་འགྲོ་བར་བྱེད། ཡོངས་སུ་མི་ངལ་བའི་བརྩོན་འགྲུས་ཀྱིས་སྒྱིད་ལུག་པའི་ལེ་ལོ་སྤངས་ནས་སྒྲུབ་པ་སླར་མི་ལྡོག་པར་བྱེད། ལམ་ཡོངས་སུ་འཛིན་པའི་བརྩོན་འགྲུས་ཀྱིས་སེམས་ཞུམ་པའི་ལེ་ལོ་སྤངས་ནས་ཐེག་དམན་དུ་མི་ལྟུང་བར་བྱེད་པའི་ཕྱིར་རོ། །སྤྱན་དང་མངོན་ཤེས་ནི་སྒྲུབ་པའི་ཡོན་ཏན་ཡིན་ཏེ། སྤྱན་ལྔས་རང་དོན་བླང་དོར་ལ་གཞན་གྱི་དྲིང་མི་འཇོག་པར་བྱེད། མངོན་ཤེས་དྲུག་གིས་རྣམ་མཁྱེན་གྱི་རྒྱུ་ཡོངས་སུ་རྫོགས་པར་བྱེད་པའི་ཕྱིར་རོ། །མཐོང་ལམ་དང་། སྒོམ་ལམ་གཉིས་པོ་ནི་སྒྲུབ་པ་མཐར་ཐུག་པར་བྱེད་པའི་རྒྱུ་ཡིན་ཏེ། སྒྲུབ་པ་མཐར་ཐུག་པ་ལ་མཐོང་སྤང་དང་སྒོམ་སྤང་གཉིས་སྤང་དགོས་པའི་ཕྱིར་རོ། །སྒྲུབ་པའི་ཁྱད་པར་གྱི་ཆོས་ལ་དགུར་གྲངས་ངེས་པ་ནི་སྒྲུབ་པའི་ངོ་བོ་དེས་བསྒྲུབ་བྱ་མཐར་ཐུག་སྒྲུབ་པ་ལ། དགུ་པོ་གང་རུང་ཞིག་མ་ཚང་ན་སྒྲུབ་མི་ནུས་ཤིང་དགུ་ཆར་ཚང་བས་སྒྲུབ་དགོས་པའི་ཕྱིར་རོ། །གོ་རིམ་ནི་བཤད་པའི་གོ་རིམ་ཙམ་ཡིན་པར་མངོན་ནོ། །དེ་དག་ལ་འདོམས་པའི་གདམས་ངག་གི་ངོས་འཛིན་ནི་སྔ་མ་ལ་དཔག་ནས་ཤེས་པར་བྱའོ། །གཉིས་པ་ལ་དཀོན་མཆོག་གསུམ་གྱི་འདོད་ཚུལ་གྱི་ཁྱད་པར་དང་། སྤྱན་དང་མངོན་ཤེས་ཀྱི་ཁྱད་པར་དང་། མཐོང་སྒོམ་རྟོགས་རིགས་ཐ་དད་མེད་པའི་དོན་ལ་དཔྱད་པ་དང་གསུམ་ལས། དང་པོ་ལ། བྱེ་བྲག་ཏུ་སྨྲ་བས། སངས་རྒྱས་ནི་སངས་རྒྱས་ཀྱི་རྒྱུད་ཀྱི་ཟད་མི་སྐྱེ་ཤེས་པའི་ཡེ་ཤེས་འཁོར་དང་བཅས་པ་ཁོ་ན་ཡིན་ལ། ཆོས་ནི་མྱ་ངན་ལས་འདས་པ་སོ་སོར་བརྟགས་པའི་འགོག་པ་ཡིན་ཞིང་། དགེ་འདུན་དཀོན་མཆོག་ནི་སངས་རྒྱས་ལས་གཞན་པའི་སློབ་མི་སློབ་ཀྱི་རྒྱུད་ཀྱི་ལམ་བདེན་འཁོར་དང་བཅས་པ་ཡིན་པར་འདོད་དེ། མཛོད་དུ། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །མདོ་སྡེ་པས་སངས་རྒྱས་ནི་སངས་རྒྱས་ཀྱི་རྒྱུད་ཀྱི་ཟད་མི་སྐྱེ་ཤེས་ཀྱི་ཡེ་ཤེས་འཁོར་དང་བཅས་པ་དང་། གཟུགས་ཀྱི་སྐུ་ཡང་སངས་རྒྱས་སུ་འདོད་ལ་ཆོས་ཀྱི་འདོད་ཚུལ་འདྲའོ། །དགེ་འདུན་ནི་སངས་རྒྱས་ལས་གཞན་པའི་སློབ་པ་དང་། མི་སློབ་པ་དང་དེ་དག་གི་རྒྱུད་ཀྱི་ལམ་བདེན་འཁོར་དང་བཅས་པ་ཡིན་པར་འདོད་དེ། མཛོད་རང་འགྲེལ་དུ་བསྟན་བཅོས་ལས་ནི་མི་སློབ་པའི་ཆོས་ཁོ་ན་སངས་རྒྱས་ཡིན་ཞེས་དེ་སྐད་དུ་མི་འབྱུང་ངོ་། །འོ་ན་ཇི་སྐད་དུ་འབྱུང་ཞེ་ན་སངས་རྒྱས་སུ་བྱེད་པའི་ཆོས་ཞེས་འབྱུང་སྟེ། དེའི་ཕྱིར་རྟེན་སངས་རྒྱས་ཉིད་དུ་མ་བཀག་པས་དེའི་ཕྱིར་ཀླན་ཀར་མི་རུང་བ་ཉིད་ཅེས་སོ། །གང་ཞིག་ཆོས་ལ་སྐྱབས་སུ་འགྲོ་བ་དེ་ནི་མྱ་ངན་ལས་འདས་པ་བདག་དང་གཞན་གྱི་རྒྱུད་ཉོན་མོངས་པ་རྣམ་པར་དག་པ་དང་། དུཿཁ་ཞི་བར་མཚན་ཉིད་གཅིག་པ་ཉིད་ཀྱི་ཕྱིར་རོ། །ཞེས་དང་། དགེ་སློང་དུ་བྱེད་པའི་ཚུལ་ཁྲིམས་ཁོ་ན་དགེ་སློང་དུ་འགྱུར་རོ་ཞེས་སོ། །སེམས་ཙམ་པས་ཐུབ་པའི་སྐུ་གསུམ་སངས་རྒྱས་དཀོན་མཆོག་ཡིན་ལ། བསྟན་པའི་ཆོས་གསུང་རབ་ཡན་ལག་བཅུ་གཉིས་དང་། སྒྲུབ་པའི་ཆོས་འཕགས་ལམ་ཡན་ལག་བརྒྱད་འཁོར་བཅས་དང་། དོན་དམ་པའི་ཆོས་གློ་བུར་གྱི་དྲི་མས་དག་པའི་ཆོས་ཀྱི་དབྱིངས་ནི་ཆོས་དཀོན་མཆོག་ཡིན་ཞིང་། བྱང་ཆུབ་སེམས་དཔའ་རྣམས་དང་། ཉན་ཐོས་ཞུགས་གནས་བརྒྱད་དང་། རང་སངས་རྒྱས་རྣམས་ཀྱང་དགེ་འདུན་དཀོན་མཆོག་ཏུ་འདོད་དེ། དབྱིག་གཉེན་གྱིས། དམིགས་མེད་ཆོས་ཀྱི་སྐུ། །ལོངས་སྤྱོད་རྫོགས་པའི་སྐུ། །ཅིར་ཡང་སྤྲུལ་པའི་སྐུར། །གུས་པས་ཕྱག་འཚལ་ལོ། །རྣམ་དག་ཆོས་ཀྱི་དབྱིངས། །སྒྲུབ་པའི་འཕགས་ལམ་བརྒྱད། །སྟོན་པའི་གསུང་རབ་ལ། །གུས་པས་ཕྱག་འཚལ་ལོ། །བྱང་ཆུབ་སེམས་རྣམས་དང་། །དགྲ་བཅོམ་དག་ལ་སོགས། །རང་སངས་རྒྱས་རྣམས་ལ། །གུས་པས་ཕྱག་འཚལ་ལོ། །ཞེས་གསུངས་པ་ལྟར་རོ། །དབུ་མ་ཐལ་འགྱུར་བ་འགའ་ཞིག སངས་རྒྱས་ནི་སྐུ་གསུམ། ཆོས་ནི་མྱ་ངན་ལས་འདས་པ། དགེ་འདུན་ནི་གང་ཟག་བརྒྱད་དུ་འདོད་དེ། ཟླ་གྲགས་ཀྱིས། ཐུབ་དབང་དག་གི་སྐུ་གསུམ་དང་། །མྱ་ངན་འདས་དང་གང་ཟག་བརྒྱད། །ཅེས་སོ། །དེའི་ཚེ་བྱང་ཆུབ་སེམས་དཔའ་ནི་སངས་རྒྱས་ཀྱི་ཁོངས་སུ་གཏོགས་པར་འདོད་དེ། ཤཱ་རིའི་ལུང་ལས་དགྲ་བཅོམ་གྱིས། །བྱང་ཆུབ་སེམས་དཔའ་ཕྱག་བྱས་ཕྱིར། །འདི་དག་དཀོན་མཆོག་གསུམ་གཞན་མེད། །སངས་རྒྱས་ཁོངས་སུ་གཏོགས་པར་འདོད། །ཅེས་གསུངས་སོ། །རྒྱུད་བླར། འདུས་མ་བྱས་ཤིང་ལྷུན་གྱིས་གྲུབ་པ་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་ཆོས་སྐུ་ནི་སངས་རྒྱས་དཀོན་མཆོག བསམ་མེད་གཉིས་མེད་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་རྣམ་བྱང་གི་བདེན་པ་ནི་ཆོས་དཀོན་མཆོག ཇི་ལྟ་ཇི་སྙེད་རིག་པ་ལ་སོགས་པའི་ཡོན་ཏན་དྲུག་གམ་བརྒྱད་དང་ལྡན་པའི་ཕྱིར་མི་ལྡོག་པའི་བྱང་སེམས་འཕགས་པ་ནི་དགེ་འདུན་དཀོན་མཆོག་ཏུ་གསུངས་ཏེ། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་ཉིད་ལྡན་པའི་སངས་རྒྱས་ཉིད། །ཅེས་དང་། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱི། །གང་ཞིག་གང་གིས་ཆགས་བྲལ་པ། །བདེན་གཉིས་མཚན་ཉིད་ཅན་དེ་ཆོས། །ཞེས་དང་། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་སོ། །འདི་དག་ནི་གནས་སྐབས་སྐྱབས་གསུམ་དུ་བཞག་པ་ཡིན་གྱི། མཐར་ཐུག་གི་སྐྱབས་གསུམ་ནི་སངས་རྒྱས་གཅིག་ཉིད་ལ་གསུམ་ཆར་ཚང་བར་ཡོད་དོ། །འོ་ན་འདིར་གང་གཟུང་ཞེ་ན། རྒྱུད་བླ་ནས་གསུངས་པའི་གནས་སྐབས་སྐྱབས་གསུམ་པོ་དེ་ཉིད་གཟུང་བར་འཕགས་སེང་གཉིས་ཀྱི་བཞེད་དོ། །གཉིས་པ་ལ་སྤྱིའི་ཁྱད་པར་དང་། སོ་སོའི་ཁྱད་པར་གཉིས་ལས། དང་པོ་ལ་གང་ལས་གསུངས་པའི་སྡེ་སྣོད་ཀྱི་ཁྱད་པར། གང་ལ་ལྡན་པའི་གང་ཟག་གི་ཁྱད་པར། གང་ལས་བྱུང་བ་རྒྱུའི་ཁྱད་པར། བྱ་བ་ལས་ཀྱི་ཁྱད་པར་དང་བཞི་ལས། དང་པོ་ནི། སྤྱན་ལྔ་ནི་ཤེར་ཕྱིན་གྱི་མདོ་དང་། བསྟན་བཅོས་ཁོ་ན་ལས་གསུངས་ལ། མངོན་ཤེས་དྲུག་ནི་ཐེག་པ་ཆེ་ཆུང་གི་སྡེ་སྣོད་གཉིས་ཀ་ལས་གསུངས་སོ། །གཉིས་པ་ནི། སྤྱན་ལྔ་ནི་ཐེག་ཆེན་གྱི་གང་ཟག་ཁོ་ནའི་རྒྱུད་པ་ཡོད་ལ། མངོན་ཤེས་དྲུག་ནི་ཐེག་པ་གསུམ་ཆར་དང་། དང་པོ་ལྔ་ནི་ལམ་མ་ཞུགས་ཀྱི་གང་ཟག་ལ་ཡང་ཡོད་དོ། །གསུམ་པ་ནི། སྤྱན་ལྔ་ནི་ཐེག་ཆེན་གྱི་ཚོགས་ལམ་ཆུང་ངུ་དང་འབྲིང་གི་གནས་སྐབས་སུ་ཕ་རོལ་ཏུ་ཕྱིན་པ་དྲུག་ཉམས་སུ་བླངས་པ་ལས་འབྱུང་ལ། མངོན་ཤེས་དྲུག་ནི་ཕར་ཕྱིན་དྲུག་གི་ཉམས་ལེན་མེད་ཀྱང་བསམ་གཏན་གྱི་དངོས་གཞི་བསྒོམ་ཞིང་རྣམ་གནས་ཡིད་ལ་བྱེད་པ་ལས་འབྱུང་ངོ་། །འོན་ཀྱང་བྱང་སེམས་ཀྱི་རྒྱུད་ཀྱི་མངོན་པར་ཤེས་པ་དྲུག་ནི། བསམ་གཏན་བཞི་པ་ཤིན་ཏུ་དག་པ་བ་དང་། མི་རྟོག་ཡེ་ཤེས་ཀྱི་ཉམས་ལེན་གྱིས་ཟིན་པ་དང་། རྣམ་གནས་ཡིད་ལ་བྱེད་པ་གསུམ་ལས་འབྱུང་བར་མདོ་སྡེ་རྒྱན་དུ་བཤད་དོ། །བདག་རྐྱེན་ལ་ཡང་སྤྱན་ལྔ་ནི་བདག་རྐྱེན་རྫུ་འཕྲུལ་གྱི་རྐང་པ་ལ་བརྟེན་ཏེ། བཙུན་པ་ངོ་བོ་ཉིད་མེད་པས། ཤའི་སྤྱན་ཞེས་བྱ་བ་ནི་རྫུ་འཕྲུལ་གྱི་རྐང་པ་བཞི་བསྒོམས་པས་ཤེས་ཞེས་གསུངས་སོ། །མངོན་ཤེས་དྲུག་ནི་བདག་རྐྱེན་བསམ་གཏན་གྱི་དངོས་གཞི་ལ་བརྟེན་ཏོ། །བཞི་པ་ནི། སྤྱན་ལྔས་ནི་སྒྲུབ་པ་ལ་གཞན་གྱི་དྲིང་མི་འཇོག་པར་བྱེད་དེ། ཤའི་སྤྱན་གྱིས་ཡར་སྟོན་པ་དང་། མར་སློབ་མ་གང་ན་ཡོད་པ་ཤེས། ལྷས་གདུལ་བྱ་རྣམས་ཀྱི་འཆི་འཕོ་བ་དང་སྐྱེ་བ་ཤེས། ཤེས་རབ་ཀྱིས་བསྒོམ་པར་བྱ་བའི་བདག་མེད་གཉིས་ཤེས། ཆོས་ཀྱིས་གྲོགས་དགེ་འདུན་གྱི་རྟོགས་པ་ཤེས། སངས་རྒྱས་ཀྱི་སྤྱན་གྱིས་ཆོས་ཐམས་ཅད་ཀྱི་གནས་ལུགས་གཟིགས་པའི་ཕྱིར་རོ། །མངོན་ཤེས་ལ་ཐེག་དམན་གྱི་རྒྱུད་ཀྱི་མངོན་ཤེས་དྲུག་དང་། ལམ་མ་ཞུགས་ཀྱི་མངོན་ཤེས་དང་པོ་ལྔས་ནི་རང་གཞན་གྱི་དོན་ཅི་རིགས་པ་སྒྲུབ་པ་ཙམ་ཡིན་ལ། བྱང་སེམས་ཀྱི་རྒྱུད་ཀྱི་མངོན་ཤེས་དྲུག་གིས་ནི་རྣམ་མཁྱེན་གྱི་རྒྱུ་གཞན་དོན་ཡོངས་སུ་རྫོགས་པར་བྱེད་དེ། རྫུ་འཕྲུལ་གྱིས་གདུལ་བྱ་གང་ན་ཡོད་པའི་ཡུལ་དུ་གཤེགས་ནས་གཞན་སེམས་ཤེས་པས་གཞན་གྱི་སྤྱོད་པ་འདོད་ཆགས་དང་བཅས་པ་སོགས་ཤེས་ཏེ་ལྷའི་རྣ་བས་དེ་དག་གི་སྐད་དང་མཐུན་པར་ཆོས་སྟོན་སྔོན་གྱི་གནས་རྗེས་སུ་དྲན་པས་གང་ནས་འོངས་པ་དང་། ལྷའི་མིག་གིས་གང་དུ་འགྲོ་བ་དང་། ཟག་པ་ཟད་པ་ཤེས་པའི་མངོན་ཤེས་ཀྱིས་ངེས་པར་འབྱུང་བའི་ལམ་འདོམས་པར་བྱེད་པའི་ཕྱིར་རོ། །གཉིས་པ་སོ་སོའི་ཁྱད་པར་ནི་ཤའི་སྤྱན་ནི་བདག་རྐྱེན་རྫུ་འཕྲུལ་གྱི་རྐང་པ་ལ་བརྟེན་པའི་དབང་པོ་གཟུགས་ཅན་པ་ལ་བརྟེན་པའི་དབང་ཤེས་སོ། །འདི་བསམ་གཏན་གྱི་སས་བསྡུས་སུ་ནི་མ་ངེས་ཏེ། རྟེན་གྱི་གང་ཟག་གང་དུ་སྐྱེས་པ་དེའི་ས་པའི་དབང་པོ་གཟུགས་ཅན་པ་ཡིན་པའི་ཕྱིར་རོ། །རྣམ་པར་སྨིན་པ་ལས་བྱུང་བའི་ལྷའི་སྤྱན་ནི་སྐྱེ་བ་སྔ་མ་བསམ་གཏན་གྱི་སྙོམས་འཇུག་བསྒོམས་པའི་རྣམ་སྨིན་གྱི་འབྲས་བུ་ལ་ཚེ་འདིར་འབད་མེད་དུ་འབྱུང་བའི་བསམ་གཏན་གྱི་སས་བསྡུས་ཀྱི་དབང་པོ་གཟུགས་ཅན་པ་ལ་བརྟེན་པའི་ཤེས་པའོ། །འདི་དང་ལྷའི་མིག་གི་མངོན་པར་ཤེས་པའི་ཁྱད་པར་ནི་ཚེ་འདིར་བསམ་གཏན་མངོན་པར་འདུ་བྱེད་པ་ལས་མ་བྱུང་བ་དང་བྱུང་བའོ། །ཤེས་རབ་ཀྱི་སྤྱན་ནི་ཆོས་ཐམས་ཅད་ལ་རྣམ་པར་མི་རྟོག་པའི་ཡེ་ཤེས་ཏེ། ས་བཅུ་གཅིག་གི་མཉམ་གཞག་རྣམས་སོ། །འདི་དང་དོན་དམ་སེམས་བསྐྱེད་དོན་གཅིག་གོ །ཆོས་ཀྱི་སྤྱན་ནི་རང་དང་རྒྱུད་ཚོད་མཉམ་པ་མན་ཆད་ཀྱི་འཕགས་པའི་གང་ཟག་ཐམས་ཅད་ཀྱི་དབང་པོ་རྣོ་རྟུལ་སོགས་མངོན་སུམ་དུ་རྟོགས་པའོ། །འདི་དང་གཞན་སེམས་ཤེས་པའི་མངོན་ཤེས་ཀྱི་ཁྱད་པར་ནི་རྟེན་གྱི་གང་ཟག་གི་ཁྱད་པར་སྔར་བཤད་ཟིན་ཅིང་། ཡུལ་གྱི་ཁྱད་པར་ལ་འདིའི་ཡུལ་ནི་འཕགས་རྒྱུད་ཀྱི་རྟོགས་པ་ཁོ་ན་ཡིན་ལ། གཞན་སེམས་ཤེས་པའི་མངོན་ཤེས་ཀྱི་ཡུལ་ནི་གཞན་རྒྱུད་ཀྱི་ཤེས་པ་ཐམས་ཅད་དོ། །སངས་རྒྱས་ཀྱི་སྤྱན་ནི་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་ནོ། །རྗེས་མཐུན་པ་ས་བདུན་པ་ནས་ཡོད་དེ། ས་བདུན་པའི་ཡོངས་སྦྱོང་གི་སྐབས་སུ། བྱང་སེམས་ཆེན་པོའི་ཐོགས་པ་མེད་པའི་ཡེ་ཤེས་གང་ཞེ་ན། འདི་ལྟ་སྟེ་སངས་རྒྱས་ཀྱི་སྤྱན་ཐོབ་པ་གང་ཡིན་པ་སྟེ། ཞེས་སོ། །ཨར། གཟད་པ། གཡག་གསུམ་གྱིས་རྗེས་མཐུན་པ་ས་དང་པོ་ནས་ཡོད་ཅིང་མཚན་ཉིད་པ་སངས་རྒྱས་ཀྱི་ས་ཁོ་ནར་ཡོད་དོ། །ཅེས་བཞེད་དོ། །གསུམ་པ་ནི། འདིར་ཐེག་ཆེན་གྱི་མཐོང་ལམ་ལས། སྒོམ་ལམ་རྟོགས་རིགས་ཐ་དད་མེད་པར་གསུངས་ཤིང་། ཉི་ཚེ་བ་དང་། སྣ་ཚོགས་ཉིད་ཅེས་དང་། དེའི་འགྲེལ་པར་དམིགས་པ་དང་བཅས་པ་ཉིད་ཀྱི་འབྲས་བུ་དང་པོ་ལ་སོགས་པ་རྟོགས་པ་ཐ་དད་པ་ཉིད་དང་། ཞེས་ཉན་ཐོས་ཀྱི་འབྲས་བུ་དང་པོ་སོགས་ལ་རྟོགས་རིགས་ཐ་དད་དུ་ཡོད་པར་གསུངས་པ་དང་། ཉིར་སྣང་དུ། ཉན་ཐོས་ཀྱི་སྒོམ་ལམ་ཏིལ་དང་དཔེ་སྦྱར་བའི་ཚེ། མཐོང་ལམ་ལས་རྟོགས་རིགས་ཐ་དད་མེད་པར་གསུངས་པའི་དོན་ཇི་ལྟར་ཞེ་ན་མཉམ་གཞག་གི་དབང་དུ་བྱས་ན་ཐེག་པ་གསུམ་ཆར་ལ་ཡང་མཐོང་ལམ་ལས་སྒོམ་ལམ་རྟོགས་རིགས་ཐ་དད་དུ་མེད་དེ། མཐོང་ལམ་གྱི་གནས་སྐབས་སུ་མངོན་སུམ་དུ་མཐོང་བའི་དོན་དེ་ཉིད་སྒོམ་ལམ་གྱི་གནས་སྐབས་སུ་རྒྱུན་ལྡན་དུ་སྒོམ་པར་བྱེད་པ་ཙམ་ཡིན་པའི་ཕྱིར་རོ། །འདི་ལ་དགོངས་ནས་ཐེག་པ་ཆེ་ཆུང་གཉིས་ཀ་ལ་མཐོང་སྒོམ་རྟོགས་རིགས་ཐ་དད་མེད་པར་གསུངས་སོ། །ཐེག་པ་ཆེན་པོ་ལ་མཉམ་གཞག་གིས་དྲངས་པའི་རྗེས་ཐོབ་ཀྱི་ངེས་ཤེས་ཀྱི་རྟོགས་རིགས་ལ་ཡང་ཐ་དད་མེད་དེ། ངེས་ཤེས་ཐམས་ཅད་ཀྱང་སྤྲོས་བྲལ་གྱི་རྣམ་པ་ཅན་དུ་གཅིག་པའི་ཕྱིར་རོ། །དཔེར་ན་ཐེག་ཆེན་གྱི་མཐོང་ལམ་གྱི་རྟག་སོགས་བཅུ་དྲུག་གི་སྤྲོས་པ་དང་ཡང་བྲལ། མི་རྟག་སོགས་བཅུ་དྲུག་གི་སྤྲོས་པ་དང་ཡང་བྲལ་བ་ལ་ངེས་ཤེས་དྲངས་པའི་ཚེ་ངེས་ཤེས་དེ་དག་ཐམས་ཅད་རྟོགས་རིགས་ཐ་དད་མེད་པ་བཞིན་ནོ། །ཉན་ཐོས་ཀྱི་མཐོང་སྒོམ་མཉམ་གཞག་གིས་དྲངས་པའི་ངེས་ཤེས་ལ་རྟོགས་རིགས་ཐ་དད་དུ་ཡོད་དེ། མཉམ་གཞག་དེས་མི་རྟག་ལ་སོགས་བཅུ་དྲུག་ལ་ངེས་ཤེས་དྲངས་པས་འགའ་ཞིག་ནི་མི་རྟག་པའི་རྣམ་པ་ཅན། འགའ་ཞིག་ནི་སྡུག་བསྔལ་བའི་རྣམ་པ་ཅན་དུ་མངོན་པར་ཞེན་པ་སོགས་ཡིན་པའི་ཕྱིར་རོ། །འོ་ན་མཉམ་གཞག་ལ་ཡང་མཚུངས་སོ་སྙམ་ན་ཉན་ཐོས་ཀྱི་མཐོང་སྒོམ་མཉམ་གཞག་གིས་སྐྱེ་མེད་མངོན་སུམ་དུ་མ་རྟོགས་པའི་ལུགས་ལ་མཚུངས་ཀྱང་འདིར་ནི་ཉན་ཐོས་ཀྱི་མཐོང་སྒོམ་མཉམ་གཞག་གིས་སྐྱེ་མེད་མངོན་སུམ་དུ་རྟོགས་པས་མི་རྟག་སྡུག་བསྔལ་སོགས་ཀྱི་རྣམ་པ་ཅན་མ་ཡིན་པར་འདོད་པའི་ལུགས་ཡིན་པའི་ཕྱིར་རོ། །འོ་ན་མི་རྟག་སྡུག་བསྔལ་སོགས་ཉན་ཐོས་ཀྱི་རྟོགས་རིགས་སུ་གཞུང་འདི་ཉིད་ལས་བཤད་པ་དང་འགལ་ལོ་སྙམ་ན་དེ་ནི་སྦྱོར་ལམ་གྱི་གནས་སྐབས་སུ་བསྒོམ་པའི་རྣམ་པ་དང་། རྗེས་ཐོབ་ཏུ་ངེས་ཤེས་སྐྱེས་པའི་རྣམ་པ་ལ་དགོངས་ཏེ། གཞན་དུ་ན་མེད་པ་དང་། མི་སྐྱེ་བ་དང་། དབེན་པ་སོགས་ཉན་ཐོས་ཀྱི་རྟོགས་རིགས་སུ་བཤད་པ་དང་འགལ་ཏེ། མི་རྟག་པའི་རྣམ་པ་ཅན་ཡིན་ན། འཇིག་པའི་རྣམ་པ་ཅན་ཡིན་དགོས་ཤིང་། དེ་ལྟར་ན་མི་སྐྱེ་བའི་རྣམ་པ་ཅན་ཡིན་པ་དང་འགལ་བའི་ཕྱིར་རོ། །འོ་ན་མ་དག་ས་བདུན་གྱི་གནས་སྐབས་སུ་མི་རྟག་སོགས་སུ་མངོན་པར་ཞེན་པ་སྐྱེ་སྲིད་པས་རྗེས་ཐོབ་ཀྱི་རྟོགས་རིགས་ཐ་དད་པར་མཚུངས་སོ་སྙམ་ན་མ་ཡིན་ཏེ། དེར་མི་རྟག་སོགས་སུ་མངོན་པར་ཞེན་པ་ནི་ཐེག་པ་རང་ལུགས་ཀྱི་སྤང་བྱ་ཡིན་གྱི་ཐེག་པ་རང་ལུགས་ཀྱི་རྟོགས་རིགས་མ་ཡིན་པའི་ཕྱིར་དང་། ཉན་ཐོས་འཕགས་པས་རྗེས་ཐོབ་དུ་མི་རྟག་སོགས་སུ་མངོན་པར་ཞེན་པ་ནི་ཐེག་པ་རང་ལུགས་ཀྱི་རྟོགས་རིགས་ཡིན་པའི་ཕྱིར་རོ། །གཞན་དག་ནི་དཔྱད་པ་ཙམ་ཡང་མ་ཞུགས་པར་སྣང་ངོ་། །དེ་དག་གིས་གདམས་ངག་བཅུ་སྤྱིར་བཤད་ཟིན་ནས་དགེ་འདུན་དཀོན་མཆོག་གི་སྐབས་སུ་བྱང་ཆུབ་སེམས་དཔའི་སྐྱེ་བ་ལེན་ཚུལ་དང་། གཞན་དོན་ཕྲིན་ལས་བྱེད་ཚུལ་གྱི་རབ་ཏུ་དབྱེ་བ་མང་དུ་གསུངས་པ་རྣམས་འདིར་ལོགས་སུ་གསུངས་པ་ནི། དབང་པོ་རྟུལ་དང་རྣོན་པོ་དག །ཅེས་སོགས་ཚིགས་བཅད་གཉིས་ཏེ་འདི་དག་ལ། མཚོན་བྱ་མཚོན་བྱེད། མཚོན་ཚུལ་རྣམས་མཐའ་ཆོད་པའི་ལུང་རིགས་ཀྱིས་དཔྱད་དགོས་པ་ནི་ཁོ་བོས་བྱས་པའི་སྐྱེས་བུ་མཆོག་གི་གསལ་བྱེད་དུ་བསྟན་ཟིན་པས་དེར་བལྟ་བར་བྱའོ། །གདམས་ངག་བསྟན་ཟིན་ནས་དེའི་འོག་ཏུ་ངེས་འབྱེད་ཆ་མཐུན་བསྟན་ཏེ། བྱང་ཆུབ་ཀྱི་སེམས་བསྐྱེད་པའི་ལས་དང་པོ་པས་གདམས་ངག་ཉན་ཏེ། དེའི་དོན་ལ་ཐོས་བསམ་གྱིས་འབད་པས་ཇི་སྲིད་སངས་རྒྱས་སོགས་ཀྱི་ཡུལ་ལྔ་ལ་མཁས་པར་མ་གྱུར་གྱི་བར་དུ་ནི་ཚོགས་ལམ་ཕལ་པ་ཡིན་པར་ཆོས་ཤེས་ཀྱིས་བཤད་ལ། སངས་རྒྱས་སོགས་ཀྱི་ཡུལ་ལྔ་ལ་མཁས་པའི་ཚེ་རྣམ་རྫོགས་སྦྱོར་བའི་སྐབས་ནས་བསྟན་པའི་ཐར་པ་ཆ་མཐུན་ཡིན་ཞིང་། དེའི་དོན་རྩེ་གཅིག་ཏུ་བསྒོམ་པ་ལས་ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པ་ལ་གསལ་སྣང་ཐོབ་པའི་ཚེ་དྲོད་དང་། རྣམ་བྱང་གི་གཟུང་བ་རང་བཞིན་མེད་པ་ལ་གསལ་སྣང་ཐོབ་པའི་ཚེ་རྩེ་མོ་དང་། གང་ཟག་རྫས་ཡོད་ཀྱི་འཛིན་པ་རང་བཞིན་མེད་པ་ལ་གསལ་སྣང་ཐོབ་པའི་ཚེ་བཟོད་པ་དང་། སྐྱེས་བུ་བཏགས་ཡོད་ཀྱི་འཛིན་པ་རང་བཞིན་མེད་པ་ལ་གསལ་སྣང་ཐོབ་པའི་ཚེ་ཆོས་མཆོག་ཏུ་འཇོག་པའི་ཕྱིར་རོ། །འདི་དག་གི་དོན་ལ། མདོ་ལས་ཇི་ལྟར་གསུངས་པའི་ཚུལ། བསྟན་བཅོས་སུ་ཇི་ལྟར་བསྡུས་པའི་ཚུལ། ཁྱད་པར་གྱི་ཆོས་བྱེ་བྲག་ཏུ་བཤད་པ་དང་གསུམ་ལས། དང་པོ་ནི། གདམས་ངག་གི་མདོ་རྫོགས་པའི་རྗེས་སུ་དྲོད་ཆུང་ངུའི་དམིགས་རྣམ་བསྟན། དེའི་འོག་ཏུ་རྒྱུའི་ཁྱད་པར་བསྟན། དེ་ནས་དྲོད་འབྲིང་གི་དམིགས་རྣམ་ནས་ཆོས་མཆོག་ཆེན་པོའི་དམིགས་རྣམ་གྱི་བར་དང་། དེ་ནས་རྣམ་པར་རྟོག་པ་བཞི་དང་། དེ་ནས་ཡོངས་འཛིན་གསུངས་སོ། །གཉིས་པ་ལ། མདོའི་དོན་ཉན་རང་ལས་ཁྱད་པར་དུ་འཕགས་པའི་སྦྱོར་ལམ་དུ་བསྟན་ཚུལ་མདོར་བསྟན་པ་དང་། མདོའི་རིམ་པ་ལྟར་ཁྱད་ཆོས་སོ་སོར་བཤད་པ་གཉིས་ལས། དང་པོ་ནི། དམིགས་པ་དང་ནི་རྣམ་པ་དང་། །ཞེས་སོགས་ཚིགས་བཅད་གཉིས་ཏེ། འདི་ལ་གང་གིས་ཁྱད་པར་དུ་བྱེད་པའི་ཆོས། གང་ཁྱད་པར་དུ་བྱ་བའི་གཞི། གང་ལས་ཁྱད་པར་དུ་འཕགས་པའི་ཡུལ་དང་གསུམ་ལས། དང་པོ་ནི། དམིགས་པ་དང་ནི་རྣམ་པ་དང་། །རྒྱུ་དང་ཡོངས་སུ་འཛིན་པ་ཡིས། །ཞེས་པ་སྟེ། ཉན་རང་གི་སྦྱོར་ལམ་ནི་བདེན་པ་བཞི་ལ་དམིགས་པ་ཙམ་ཡིན་ལ། འདིས་ནི་བདེན་བཞིའི་སྟེང་གི་མི་རྟག་སོགས་ལ་ཡང་དམིགས་པ་དང་། ཉན་རང་གི་སྦྱོར་ལམ་ནི་མི་རྟག་སོགས་སུ་མངོན་པར་ཞེན་པའི་རྣམ་པ་ཅན་ཡིན་ལ། འདི་ནི་མངོན་ཞེན་བཀག་པའི་རྣམ་པ་ཅན་དང་། ཉན་རང་གི་སྦྱོར་ལམ་ནི་ཐེག་པ་གཅིག་དང་། གཉིས་ཀྱི་རྟོགས་རིགས་ཀྱི་རྒྱུ་ཙམ་ཡིན་ལ། འདི་ནི་ཐེག་པ་གསུམ་ཆར་གྱི་རྟོགས་རིགས་ཀྱི་རྒྱུ་ཡིན་པ་དང་། ཉན་རང་གི་སྦྱོར་ལམ་ནི་ཕྱི་ནང་གི་ཡོངས་འཛིན་གཉིས་དང་བྲལ་བས་ཐེག་དམན་དུ་ལྟུང་བ་ཡིན་ལ། འདི་ནི་ཕྱི་ནང་གི་ཡོངས་འཛིན་གཉིས་ཀྱི་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པ་སྟེ། ཁྱད་ཆོས་བཞིས་ཁྱད་པར་དུ་འཕགས་སོ། །འདིར་རྣམ་རྟོག་བཞི་དང་ལྡན་པ་ཁྱད་ཆོས་ཀྱི་ཁོངས་སུ་བགྲངས་ནས་ལྔར་བྱེད་པ་ནི་རྩ་བའི་དགོངས་པ་མ་ཡིན་ཏེ། མདོར་ཡོངས་འཛིན་གྱི་གོང་དུ་རྟོག་པ་ཡོད་བཞིན་དུ་འདིར་རྟོག་པ་འོག་ཏུ་དྲངས་ནས་ཡོངས་འཛིན་ཡན་ཆད་ལ་ཡིས་ཞེས་པའི་བྱེད་ཚིག་སྦྱར་བ་དང་འགལ་བའི་ཕྱིར་རོ། །དེས་ན་མདོར་བསྟན་དུ་ཡོངས་འཛིན་རྟོག་པའི་སྔར་གསུངས་པ་ནི་ཚིགས་བཅད་སྦྱར་བདེ་བའི་ཆེད་དང་། རྒྱས་བཤད་དུ་དེ་ལས་བཟློག་སྟེ་གསུངས་པ་ནི་རྟོག་པ་སྦྱོར་ལམ་གྱི་ཁྱད་ཆོས་སུ་ཤེས་པའི་ཆེད་ཡིན་ཞེས་གསུངས་པ་ཡང་འཐད་པར་མ་མཐོང་སྟེ། རྒྱས་བཤད་ནི་མདོའི་གོ་རིམ་ལྟར་ཡིན་ལ། མདོར་བསྟན་གྱི་སྐབས་སུ་རྟོག་པ་ཁྱད་གཞིའི་ཁོངས་སུ་བགྲངས་པ་ནི་རྟོག་པ་ཉན་རང་ལས་ཁྱད་པར་དུ་འཕགས་པའི་འཕགས་ཆོས་མ་ཡིན་ནོ་ཞེས་ཤེས་པའི་ཆེད་ཡིན་པའི་ཕྱིར་རོ། །འོ་ན་མདོར། རྟོག་པ་ཡོངས་འཛིན་གྱི་སྔར་གསུངས་པའི་དོན་ཅི་སྙམ་ན་ཁྱད་གཞིའི་ཁོངས་སུ་གཏོགས་པར་ཤེས་པའི་ཆེད་ཡིན་ནོ། །འདིར་ནི་ཉིར་སྣང་གི་དགོངས་པ་ཡང་ཡིན་ཏེ། དེ་ཉིད་དུ་འདི་དག་ལ་བརྗོད་པར་བྱ་བའི་ཁྱད་པར་ཅི་ཡོད་ཅེ་ན། ཉན་ཐོས་ལ་སོགས་པ་ལས་ཁྱད་པར་རྣམ་པ་བཞིས་འཕགས་པ་བརྗོད་པར་བྱ་བ་ཡིན་ཏེ། དམིགས་པའི་ཁྱད་པར་དང་། རྣམ་པའི་ཁྱད་པར་དང་། རྒྱུའི་ཁྱད་པར་དང་། ཡོངས་སུ་འཛིན་པའི་ཁྱད་པར་རོ་ཞེས་གསུངས་པའི་ཕྱིར་རོ། །འོ་ན་ལུང་དེ་ཉིད་ཀྱི་མཇུག་ཏུ་འཆད་པར་འགྱུར་བ་གཟུང་བ་དང་འཛིན་པའི་རྣམ་པར་རྟོག་པ་མཐོང་བ་དང་སྒོམ་པའི་ལམ་གྱིས་སྤང་བར་བྱ་བ་བཞི་རྣམས་ཀྱི་རྟོག་པ་དང་ཡང་དག་པར་ལྡན་པ་ཡང་བརྗོད་པར་བྱ་བ་ཡིན་ནོ། །ཞེས་གསུངས་པ་ཇི་ལྟར་དྲང་སྙམ་ན། སྦྱོར་ལམ་སྟོན་པའི་སྐབས་ཀྱི་མདོ་དང་། བསྟན་བཅོས་ཀྱི་བརྗོད་བྱ་ཡང་ཁྱད་ཆོས་བཞི་པོ་དེར་ངེས་སམ་སྙམ་ན་དེར་མ་ཟད་རྟོག་པ་ཡང་བརྗོད་བྱ་ཡིན་ཞེས་པའི་དོན་ཏེ། གཞན་དུ་ན་ཁྱད་པར་ལྔས་འཕགས་པ་བརྗོད་པར་བྱ་བ་ཡིན་ཏེ་ཞེས་ཅིའི་ཕྱིར་མི་བརྗོད། སློབ་དཔོན་གྱིས་རྟོག་པ་ཁྱད་ཆོས་སུ་བགྲང་བའི་འཁྲུལ་གཞི་ཡང་འདིས་བྱས་པར་མངོན་ནོ། །འོ་ན་ཡུལ་ནི་རྣམ་པ་གསུམ་པོ་རྒྱུ་ཞེས་པའི་འོག་ཏུ། ཉིར་སྣང་དུ། རེ་ཞིག་རྣམ་པ་ཐམས་ཅད་མཁྱེན་པ་ཉིད་ཀྱི་དབང་དུ་བྱས་ནས་བྱང་ཆུབ་སེམས་དཔའ་རྣམས་ཀྱིས་ངེས་པར་འབྱེད་པའི་ཆ་དང་མཐུན་པ་གང་ཡིན་པ་དེ་དག་ནི་ཉན་ཐོས་ལ་སོགས་པའི་ངེས་པར་འབྱེད་པའི་ཆ་དང་མཐུན་པ་རྣམས་ལས་ཁྱད་པར་རྣམ་པ་དྲུག་གིས་ཁྱད་པར་འཕགས་པ་ཡིན་ཏེ། ཞེས་བཤད་པ་དང་འགལ་ལོ་ཞེ་ན་དེའི་དོན་ནི་སྐབས་གོང་འོག་གི་སྦྱོར་ལམ་རྣམས་ཀྱི་མི་འདྲ་བའི་ཁྱད་པར་བསྟན་པའི་སྐབས་ཡིན་པས་སྐབས་དང་པོར་བསྟན་པའི་སྦྱོར་ལམ་དེ་སྐབས་འོག་མ་རྣམས་སུ་བསྟན་པའི་སྦྱོར་ལམ་ལས་ཁྱད་ཆོས་དྲུག་གི་སྒོ་ནས་བསྟན་པས་སྐབས་འོག་མ་རྣམས་དང་ཟློས་པའི་སྐྱོན་མེད་ཅེས་པའི་དོན་ཡིན་པའི་ཕྱིར་རོ། །གཞན་དུ་ན་ཁྱད་ཆོས་ལྔར་འདོད་པ་ལ་ཡང་ལུང་འདིས་གནོད་ཅིང་ཉིར་སྣང་ཉིད་ལ་ཡང་ནང་འགལ་བར་འགྱུར་བའི་ཕྱིར་ལེགས་པར་དཔྱོད་ཅིག གཉིས་པ་ཁྱད་གཞི་ནི། བྱང་ཆུབ་སེམས་དཔའ་སྐྱོབ་པ་ཡི། །ཞེས་སོགས་ཚིགས་བཅད་གཅིག་སྟེ། རྟེན་གྱི་ཁྱད་པར་བྱང་ཆུབ་སེམས་དཔའ་སྐྱོབ་པའི་རྒྱུད་ལ་ཡོད་པ། ངོ་བོ་དྲོད་སོགས་བཞི་ཡིན་པ། ལྡན་ཚུལ་གྲངས་ཇི་ལྟ་བ་བཞིན་དུ་རྗེས་ཐོབ་ཀྱི་གནས་སྐབས་སུ་སྒྲུབ་པའི་རྣམ་རྟོག་བཞི་པོ་ལྡན་ཅིང་། མཉམ་གཞག་གི་གནས་སྐབས་སུ་དགག་པའི་རྣམ་རྟོག་བཞི་པོ་ལྡན་པ་དང་། དབྱེ་བའི་ཁྱད་པར་རེ་རེ་ལ་ཡང་ཆུང་ངུ་འབྲིང་ཆེན་པོ་རྣམས་སུ་ཡོད་པ་སྟེ། ཁྱད་ཆོས་བཞི་དང་ལྡན་པའི་སྦྱོར་ལམ་དེ་ཉིད་ཁྱད་པར་དུ་འཕགས་པའི་གཞི་ཡིན་ནོ། །འདིར་ཁྱད་ཆོས་ཙམ་དང་། ཉན་རང་ལས་ཁྱད་པར་དུ་འཕགས་པར་བྱེད་པའི་ཆོས་གཉིས་མ་ནོར་བ་གལ་ཆེའོ། །གསུམ་པ་གང་ལས་ཁྱད་པར་དུ་འཕགས་པའི་ཡུལ་ནི་ཚིག་རྐང་ཐ་མ་གཉིས་ཀྱིས་སྟོན་ཏོ། །འོ་ན་གང་ཁྱད་པར་དུ་འཕགས་པའི་གཞི་ལ་ཁྱད་ཆོས་བཞི་སྨོས་པའི་དགོས་པ་གང་ཞེ་ན། རྟེན་གྱི་ཁྱད་པར་སྨོས་པ་ནི། སྤྱིར་བྱང་སེམས་ཀྱི་སྦྱོར་ལམ་ཙམ་དུ་ཤེས་པའི་ཆེད་ཡིན་ལ། ངོ་བོའི་ཁྱད་པར་ནི་འོག་གི་རྟོག་པ་བཞི་པོ་རིམ་པ་བཞིན་དུ་ལྡན་པའི་གཞི་དང་། ཆུང་ངུ་འབྲིང་ཆེན་པོ་གསུམ་དུ་དབྱེ་བའི་གཞི་ངོས་གཟུང་བའི་ཆེད་ཡིན་ནོ། །ལྡན་ཚུལ་གྱི་ཁྱད་པར་ནི་ཁྱད་པར་དུ་འཕགས་པའི་གཞི་དེ་ཡང་རྟོག་པ་དང་ངོ་བོ་གཅིག་ཡིན་ནོ་ཞེས་ཤེས་པའི་ཆེད་ཡིན་ནོ། །དབྱེ་བའི་ཁྱད་པར་ནི་དྲོད་སོགས་བཞི་ལ་གསུམ་གསུམ་དུ་ཕྱེ་ནས་བཅུ་གཉིས་པོ་རེ་རེའི་སྟེང་དུ་ཡང་གོང་དུ་བཤད་པའི་ཁྱད་ཆོས་བཞི་བཞི་དང་ལྡན་པར་ཤེས་པའི་ཆེད་ཡིན་ནོ། །མདོར་ན་ཚིག་རྐང་བར་པ་བཞིས་བསྟན་པའི་སྦྱོར་ལམ་ཆོས་ཅན། ཚིག་རྐང་ཐ་མ་གཉིས་ཀྱིས་བསྟན་དོན་ཡིན་ཏེ། ཚིག་རྐང་དང་པོ་གཉིས་ཀྱིས་བསྟན་པའི་ཁྱད་ཆོས་དང་ལྡན་པའི་ཕྱིར། ཞེས་པའི་མགོན་པོ་བྱམས་པའི་གཞུང་འདི་མ་དཀྲུགས་པར་རང་སོར་ཞོག་ཅིག གཉིས་པ་མདོའི་རིམ་པ་ལྟར་ཁྱད་པར་གྱི་ཆོས་སོ་སོར་བཤད་པ་ལ། དམིགས་རྣམ་རྒྱུ་གསུམ་རྒྱས་པར་བཤད། ལྡན་པ་རྣམ་རྟོག་རྒྱས་པར་བཤད། ཡོངས་འཛིན་དགེ་བཤེས་རྒྱས་པར་བཤད་པ་དང་གསུམ་ལས། དང་པོ་ནི། དམིགས་པ་མི་རྟག་ལ་སོགས་པ། །ཞེས་སོགས་ཚིགས་སུ་བཅད་པ་བདུན་ཏེ། སྦྱོར་ལམ་བཅུ་གཉིས་པོ་རེ་རེའི་སྟེང་དུ་ཡང་དམིགས་པ་དང་རྣམ་པ་དང་རྒྱུའི་ཁྱད་པར་གསུམ་གསུམ་དང་ལྡན་པར་བསྟན་ཏོ། །དེ་ཡང་མདོར། དྲོད་ཆུང་ངུའི་དམིགས་རྣམ་གྱི་འོག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་གང་ལ་བྱང་སེམས་ཆེན་པོ་རྣམས་ཀྱིས་ཉན་ཐོས་དང་རང་སངས་རྒྱས་ཀྱི་སའམ། བྱང་ཆུབ་སེམས་དཔའི་སའམ། སངས་རྒྱས་ཀྱི་ས་གང་ལ་བསླབ་པར་བྱ་བའི་ཐེག་པ་གསུམ་པོ་རྣམས་རྒྱ་ཆེར་བསྟན་ཏོ། །ཞེས་རྒྱུའི་ཁྱད་པར་གསུངས་པ་ལྟར། འདིར་ཡང་ཐེག་པ་གསུམ་ཆར་འཐོབ་པའི་རྒྱུ་ཞེས་གསུངས་པ་ནི་དྲོད་འབྲིང་ལ་སོགས་པ་ཕྱི་མ་བཅུ་གཅིག་པོ་ལ་ཡང་སྦྱར་བར་བྱ་བ་ཤེས་པའི་ཆེད་ཡིན་ནོ། །གཉིས་པ་ནི། གཞི་དང་དེ་ཡི་གཉེན་པོ་ཡི། །ཞེས་སོགས་ཚིགས་སུ་བཅད་པ་གཉིས་ཏེ། མདོར་ཡང་གནས་སྐབས་འདིར་གསུངས་པ་ལྟར་རྒྱས་བཤད་དུ་ཡང་གནས་སྐབས་འདིར་གསུངས་པ་ནི་གང་ཁྱད་པར་དུ་འཕགས་པའི་གཞི་དེ་ཡང་རྣམ་རྟོག་བཞི་དང་མཚུངས་པར་ལྡན་པའི་སྦྱོར་ལམ་ཡིན་གྱི། དམན་ལམ་སྔོན་སོང་གི་བྱང་སེམས་སྦྱོར་ལམ་པའི་རྒྱུད་ཀྱི་རྣལ་འབྱོར་མངོན་སུམ་ལྟ་བུ་དང་། གཞན་སེམས་ཤེས་པའི་མངོན་ཤེས་ལྟ་བུ་ནི་མ་ཡིན་ནོ། །ཞེས་པའི་དོན་ཏོ། །གསུམ་པ་ནི། སེམས་མི་འགོང་པ་ཉིད་ལ་སོགས། །ཞེས་སོགས་ཚིགས་བཅད་གཅིག་སྟེ། འཕགས་པས་ཚིག་རྐང་དང་པོ་དང་། གསུམ་པས་ནང་གི་ཡོངས་འཛིན་ཐབས་མཁས་དང་། གཉིས་པ་དང་གསུམ་པས་ཕྱིའི་ཡོངས་འཛིན་དགེ་བཤེས་དང་། བཞི་པས་དོན་བསྡུ་བསྟན་པར་བཞེད་ཅིང་། སློབ་དཔོན་གྱིས་ནི་ཚིག་རྐང་དང་པོ་གསུམ་ཕྱིའི་ཡོངས་འཛིན་དགེ་བཤེས་ཀྱི་ཁྱད་ཆོས་གསུམ་ལ་སྦྱོར་བར་མཛད་དོ། །འོ་ན་རྟོག་པ་ཁྱད་གཞིའི་ཁོངས་སུ་བགྲངས་ན་ཁྱད་ཆོས་བཞིའི་གོ་རིམ་ཇི་ལྟར་ཡིན་སྙམ་ན་ཐོག་མར་དམིགས་པའི་ཁྱད་ཆོས་བསྟན་དགོས་ཏེ། ཁྱད་ཆོས་འོག་མ་རྣམས་འདི་ལ་བརྟེན་ནས་འབྱུང་དགོས་པའི་ཕྱིར་རོ། །དེ་ནས་རྣམ་པའི་ཁྱད་ཆོས་སྟོན་ཏེ། མི་རྟག་སོགས་ཀྱང་དམིགས་པར་བྱེད་ན་རྣམ་པ་ཇི་ལྟར་ཡིན་སྙམ་ན་འདིར་ཆོས་སུ་ལྟ་བའི་གཉེན་པོ་ཡིན་པས་མངོན་ཞེན་བཀག་པའི་རྣམ་པ་ཅན་ཡིན་ནོ་ཞེས་པའི་དོན་ཏོ། །འོ་ན་ཐེག་ཆེན་གྱི་རྟོགས་རིགས་ཁོ་ན་ཡིན་ནམ་སྙམ་ན་དེའི་འོག་ཏུ་རྒྱུའི་ཁྱད་པར་བསྟན་ཏེ། ཐེག་པ་གསུམ་ཆར་གྱི་རྟོགས་རིགས་ཚང་བའི་མཐོང་ལམ་གྱི་རྒྱུ་བྱེད་པས་ད་ལྟ་ཡང་ཐེག་པ་གསུམ་ཆར་གྱི་རྟོགས་རིགས་ཚང་ཞེས་པའི་དོན་ཏོ། །ཐེག་པ་གསུམ་ཆར་གྱི་རྒྱུ་ཡིན་ན། ཐེག་དམན་དུ་ལྟུང་བར་འགྱུར་རོ་ཞེ་ན་དེའི་འོག་ཏུ་ཡོངས་འཛིན་སྟོན་ཏེ། ཕྱི་ནང་གི་ཡོངས་འཛིན་གཉིས་ཀྱིས་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་ཞེས་པའི་དོན་ཏོ། །གོ་རིམ་འདིས་ཀྱང་རྟོག་པ་ཁྱད་ཆོས་ཀྱི་ཁོངས་སུ་མི་བགྲང་བར་གྲུབ་བོ། །གསུམ་པ་ཁྱད་པར་གྱི་ཆོས་བྱེ་བྲག་ཏུ་བཤད་པ་ལ་དམིགས་རྣམ་གྱི་ཁྱད་པར་ལས་འཕྲོས་ནས་བློ་རིགས་ངོས་གཟུང་བ། རྒྱུའི་ཁྱད་པར་ལས་འཕྲོས་ནས་རྟོགས་རིགས་གསུམ་པོ་གཅིག་དང་ཐ་དད་དཔྱད་པ། ཁྱད་གཞི་རྟོག་པའི་དཀའ་གནས་ལ་དཔྱད་པ་དང་གསུམ་ལས། དང་པོ་ནི་ཁ་ཅིག རྣལ་འབྱོར་མངོན་སུམ་དུ་འདོད་པ་ནི་སྔ་མ་ཕལ་ཆེར་གྱིས་བཀག་ཅིང་དོན་ལ་ཡང་མི་གནས་སོ། །གཞན་དག་རང་རིག་མངོན་སུམ་དུ་འདོད་པ་ནི་ཤེས་པ་ཐམས་ཅད་རང་གི་ངོ་བོ་ལ་རང་རིག་མངོན་སུམ་ཡིན་པ་ཙམ་ལ་དགོངས་སོ། །འཐད་པའི་ཕྱོགས་ནི་རྒྱུན་ཞུགས་སོགས་ཀྱི་རྟོགས་པ་སྔོན་དུ་སོང་བའི་དབང་དུ་བྱས་པ་དང་། མ་སོང་བའི་དབང་དུ་བྱས་པ་དང་གཉིས་ལས། དང་པོ་ལྟར་ན་རྣལ་འབྱོར་མངོན་སུམ་ཡིན་པ་ཡང་ཡོད་དེ། སྔར་གྱི་ཉོན་སྒྲིབ་ཀྱི་ལྷག་མ་སྤོང་དགོས་པས་གང་ཟག་གི་བདག་མེད་སྒོམ་པའི་ཚེ་དེ་མངོན་སུམ་དུ་རྟོགས་པ་ཡིན་པའི་ཕྱིར་དང་། དགྲ་བཅོམ་གྱི་རྟོགས་པ་སྔོན་སོང་ལ་ཡང་རེས་འགའ་མངོན་དུ་འགྱུར་སྲིད་པའི་ཕྱིར། གལ་ཏེ་དེ་དག་བྱང་སེམས་ཀྱི་སྦྱོར་ལམ་མ་ཡིན་ནོ་སྙམ་ན་བྱང་སེམས་སྦྱོར་ལམ་པའི་རྒྱུད་ཀྱི་གཞི་ཤེས་ཀྱི་རྣམ་པ་སྒོམ་པའི་བློ་ཡིན་པས་རྣམ་རྫོགས་སྦྱོར་བར་འབད་མེད་དུ་གྲུབ་ལ། བྱང་སེམས་སྦྱོར་ལམ་པའི་རྒྱུད་ཀྱི་རྣམ་རྫོགས་སྦྱོར་བ་ལ་བྱང་སེམས་ཀྱི་སྦྱོར་ལམ་མ་ཡིན་པ་མི་སྲིད་དོ། །གཉིས་པ་ལ། ཐེག་པ་གསུམ་ཆར་འཐོབ་པའི་རྒྱུར་གྱུར་པའི་ཐེག་པ་གསུམ་གྱི་རྟོགས་རིགས་སུ་གྱུར་པའི་སྦྱོར་ལམ་རྣམས་ནི་སྒྲ་དོན་འདྲེས་འཛིན་གྱི་རྟོག་པ་ཁོ་ན་ཡིན་ཏེ། བདག་མེད་གསུམ་པོ་དོན་སྤྱིའི་ཚུལ་གྱིས་རྟོགས་པའི་བློ་ཡིན་པའི་ཕྱིར་རོ། །དམན་ལམ་སྔོན་དུ་མ་སོང་བ་ལ་ཡང་སྦྱོར་ལམ་ཐམས་ཅད་ནི་དེར་མ་ངེས་ཏེ། བྱང་སེམས་སྦྱོར་ལམ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་བྱང་སེམས་ཀྱི་སྦྱོར་ལམ་དུ་ཁས་ལེན་དགོས་པའི་ཕྱིར་རོ། །གཉིས་པ་ནི་བྱང་སེམས་ཀྱི་སྦྱོར་ལམ་གྱི་གནས་སྐབས་སུ་རྟོགས་རིགས་གསུམ་པོ་དེ་ངོ་བོ་ཐ་དད་དུ་ཡོད་དེ། རྟོག་པ་སེལ་འཇུག་ཡིན་པས་གང་ཟག་གི་བདག་མེད་ཀྱི་རྣམ་པ་ཅན་དུ་སྐྱེས་པའི་ཚེ་ཆོས་ཀྱི་བདག་མེད་ཀྱི་རྣམ་པ་ཅན་དུ་སྐྱེས་པ་མ་ཡིན་པའི་ཕྱིར་རོ། །ས་དང་པོ་ཡན་ཆད་དུ་ངོ་བོ་གཅིག་ཏུ་ཡོད་དེ། ཡེ་ཤེས་གཅིག་ཉིད་ཀྱིས་སྤྲོས་པ་ཐམས་ཅད་ཅིག་ཅར་དུ་བཀག་ནུས་ལ་དེའི་ཚེ་བདེན་བཞིའི་སྟེང་དུ་རྟག་སོགས་བཅུ་དྲུག་གི་སྤྲོས་པ་བཀག་པའི་ཆ་ནས་གང་ཟག་གི་བདག་མེད་རྟོགས་པའི་རྟོགས་རིགས་དང་། གཟུང་བའི་དོན་དུ་སྤྲོས་པ་བཀག་པའི་ཆ་ནས་གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་དང་། མི་རྟག་སོགས་བཅུ་དྲུག་གི་སྤྲོས་པ་བཀག་པའི་ཆ་ནས་འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས་སུ་འཇོག་པའི་ཕྱིར་རོ། །གསུམ་པ་མཚུངས་ལྡན་རྟོག་པའི་དཀའ་བའི་གནས་ལ་དཔྱད་པ་ལ། ངོ་བོ་དང་སྤང་བྱ་གང་དུ་ལྡན་དཔྱད། དགག་རྟོག་དང་། སྒྲུབ་རྟོག་གང་ཡིན་དཔྱད། མཐོང་སྤང་དང་། སྒོམ་སྤང་གང་ཡིན་དཔྱད། སྒྲིབ་པ་གཉིས་པོ་གང་ཡིན་དཔྱད་པ་དང་བཞི་ལས། དང་པོ་ནི། ལོ་ཆེན་གྱིས་རྟོག་པ་བཞི་པོ་འདི་དག་རྗེས་ཐོབ་ཁོ་ན་ལ་ལྡན་ཅིང་། ལྡན་ཚུལ་རང་གི་མཐོང་སྒོམ་གྱི་སྤང་བྱར་ལྡན་པ་ཡིན་གསུང་། དེ་ལ་འབྲེས་མཉམ་གཞག་ན་རྟོག་པ་མེད་པ་ནི་མི་རིགས་ཏེ། མཐོང་ལམ་དང་ཁྱད་པར་མེད་པར་ཐལ་བའི་ཕྱིར་རོ། །ཞེས་པའི་དགག་པ་མཛད་དོ། །ཨ་མ་རས་དཔེར་ན་དང་པོར་དགྲ་བཙོན་དུ་འཛིན་པ་དང་། ཉམས་དམོད་པ་དང་། མཚོན་དང་པོ་བརྒྱབ་པ་དང་། མཚོན་གཉིས་པ་བརྒྱབ་ནས་གནད་དུ་ཕོག་པ་དང་། ཤི་བའི་གནས་སྐབས་དང་ལྔ་ཡོད་པ་བཞིན་དུ་ཚོགས་ལམ་དུ་རྟོག་པ་བཙོན་དུ་འཛིན། ངེས་འབྱེད་དུ་མངོན་འགྱུར་དང་ས་བོན་མགོ་གནོན། མཐོང་ལམ་དུ་རགས་པ་སྤོང་། སྒོམ་ལམ་དུ་ཕྲ་བ་སྤོང་། མི་སློབ་ལམ་དུ་རྟོག་པ་འགགས་པའི་གནས་སྐབས་དང་ལྔ་ཡོད་དོ་ཅེས་བཤད་པ་དང་མཐུན་པར་དྭགས་པོ་དང་། ཁྱུང་ལ་སོགས་པ་ནི་རྣམ་རྟོག་བཞི་པོ་སྤོང་ལྡན་པ་ཞེས་བསྟན་ནས་དེ་དག་སྤང་བའི་གཉེན་པོའི་སྒོ་ནས་ཁྱད་པར་དུ་འཕགས་པ་ཡིན་ནོ་ཞེས་ཟེར་རོ། །དེ་ལ་འབྲེས། སོ་སོ་སྐྱེ་བོ་ཕྱིན་ཅི་ལོག་ཅེས་སྦྱོར་ལམ་བཞི་པོ་ནི་རང་གི་ངོ་བོ་ཕྱིན་ཅི་ལོག་ཡིན་པས་ཕྱིན་ཅི་ལོག་གི་གཉེན་པོར་འགལ་ལོ་ཞེས་བཀག་ནས། རང་ལུགས་ལ་འདི་དག་ཁྱད་པར་བྱེད་ཆོས་སུ་བཤད་པས་སྒྲུབ་རྟོག་མ་ཡིན་ལ་མཐོང་ལམ་དང་ཁྱད་པར་མེད་པར་ཐལ་བས་མཉམ་གཞག་ན་མི་ལྡན་པ་ཡང་མ་ཡིན་ཞིང་། ཕྱིན་ཅི་ལོག་ཡིན་པས་ཕྱིན་ཅི་ལོག་གི་གཉེན་པོར་མི་རུང་བའི་ཕྱིར་ན་སྤང་བྱར་ལྡན་པ་མ་ཡིན་ནོ་ཞེས་བཞེད་དོ། །ཨར་གྱིས་ཕྱིན་ཅི་ལོག་ཡིན་ཡང་ཐོགས་མེད་ཀྱིས་སུན་འབྱིན་པའི་གཉེན་པོ་དང་། མགོ་གནོན་པའི་གཉེན་པོར་བཤད་པ་དང་། འདི་ཉིད་ནས་ཀྱང་ཆོས་སུ་ལྟ་བའི་གཉེན་པོར་ཉིད་ཀྱིས་ཞེས་གསུངས་པས་གཉེན་པོར་མི་འགལ་ལོ་ཞེས་བཀག་ནས་སྤང་བྱར་ལྡན་པར་འདོད་དོ། །དེ་ལ་སོགས་པའི་ལུགས་རབ་ཏུ་མང་བར་སྣང་ཡང་གནད་ཀྱི་དོན་ནི་འདི་ཡིན་ཏེ། གཞུང་ཉིད་ལས་དྲོད་ལ་སོགས་པའི་བདག་ཉིད་ཇི་ལྟ་བ་བཞིན་དུ་རྣམ་རྟོག་བཞི་པོ་ལྡན་ཞེས་པ་དང་། བསྟན་ཞེས་འབྱུང་བས་ལྡན་ཞེས་པའི་ཚིག་དོན་སྤང་བྱར་ལྡན་པ་ལ་འཆད་པ་ནི་མི་རིགས་ཏེ། སྤང་བྱ་ལ་ལྡན་པའི་སྒྲ་སྦྱོར་ན་ཧ་ཅང་ཐལ་བའི་ཕྱིར་རོ། །ཉིར་སྣང་ལས་ཀྱང་དེ་ལ་ངེས་པར་འབྱེད་པའི་ཆ་དང་མཐུན་པ་དང་པོ་དང་གཉིས་པ་དག་ནི་གོ་རིམ་བཞིན་དུ་གཟུང་བའི་རྣམ་པར་རྟོག་པ་གཉིས་སུ་འགྱུར་བ་ཡིན་ལ། གསུམ་པ་དང་བཞི་པ་དག་ཀྱང་འཛིན་པའི་རྣམ་པར་རྟོག་པ་གཉིས་ཡིན་ནོ་ཞེས་དང་། འགྲེལ་ཆུང་དུ་ཡང་། དེ་ལྟ་བུའི་རྣམ་པར་རྟོག་པ་བཞི་དང་། ངེས་པར་འབྱེད་པའི་ཆ་དང་མཐུན་པ་བཞི་པོ་གྲངས་བཞིན་དུ་ལྡན་པ་ཡིན་ནོ། །ཞེས་གསུངས་ཀྱི་སྤང་བྱར་ལྡན་པ་ཅུང་ཟད་ཀྱང་མ་གསུངས་པའི་ཕྱིར་རོ། །འོན་ཀྱང་སྦྱོར་ལམ་གྱིས་སྤང་བྱ་མ་ཡིན་པ་ནི་མི་འདོད་དེ། སྐབས་འདིའི་དངོས་བསྟན་གྱི་རྟོག་པ་བཞི་པོ་མཐོང་སྤང་ཡིན་པས་དེའི་སྤོང་བ་གཉེན་པོ་ལ་སྦྱོར་བའི་ལམ་དང་། བར་ཆད་མེད་པའི་ལམ་གཉིས་ཡོད་པས་སྔ་མ་ནི་སྦྱོར་ལམ་བཞི་ཆར་དང་། ཕྱི་མ་ནི་སྡུག་བསྔལ་ཆོས་བཟོད་ཀྱི་སྐད་ཅིག་མ་གཅིག་ལ་འཇོག་པ་ནི་གཞུང་གི་དགོངས་པ་ཡིན་ནོ། །དེ་ལྟར་ན་འགྲེལ་ཆེན་དང་། གནད་ཀྱི་ཟླ་འོད་སོགས་ལས། སྦྱོར་བའི་གནས་སྐབས་སུ་ཆ་ཤས་སུ་ཕྱེ་ནས་སྤོང་། བར་ཆད་མེད་པའི་གནས་སྐབས་སུ་ཅིག་ཅར་དུ་སྤོང་བར་བཤད་པ་དང་གནད་གཅིག་པར་འབྱུང་སྟེ། མཐོང་སྤང་གཟུང་འཛིན་གྱི་རྣམ་པར་རྟོག་པ་མངོན་འགྱུར་བ་བཞི་པོ་དེ་ནི་སྦྱོར་ལམ་མཉམ་གཞག་བཞིས་སོ་སོར་སྤོང་བས་སྦྱོར་ལམ་བཞི་ལ་གཟུང་བ་རང་བཞིན་མེད་པ་ལ་གསལ་སྣང་ཐོབ་པ་སོགས་སུ་འཇོག་པའི་ཕྱིར་དང་། ས་བོན་བཞི་པོ་སྡུག་བསྔལ་ཆོས་བཟོད་ཀྱིས་ཅིག་ཅར་དུ་སྤོང་བས་སྡུག་བསྔལ་ཆོས་བཟོད་གཅིག་ཉིད་ལ་མཐོང་ལམ་རྩེ་སྦྱོར་བཞིར་འཇུག་པའི་ཕྱིར་རོ། །དེས་ན་འདིར་ལྡན་པའི་དོན་ནི་བྱང་སེམས་ཀྱི་སྦྱོར་ལམ་རྗེས་ཐོབ་བཞི་ལ་དངོས་བསྟན་སྒྲུབ་རྟོག་བཞི་པོ་ངོ་བོར་ལྡན་ཞིང་། མཉམ་གཞག་བཞི་ལ་ཤུགས་བསྟན་དགག་རྟོག་བཞི་པོ་ངོ་བོར་ལྡན་པས་ན་ལྡན་ཞེས་པ་དང་། བསྟེན་ཞེས་པའི་ཚིག་གཉིས་འབྱུང་སྟེ་མཉམ་རྗེས་གང་དང་གང་ཉམས་སུ་ལེན་པའི་ཚེ་དེའི་ངོ་བོར་ལྡན་པ་དེ་ཉིད་བསྟེན་པ་ཡང་ཡིན་པའི་ཕྱིར་རོ། །འོ་ན་སྒྲུབ་རྟོག་རྗེས་ཐོབ་ལ་ངོ་བོར་ལྡན་པའི་ཚུལ་ཇི་ལྟར་སྙམ་ན་དྲོད་ཀྱི་རྗེས་ཐོབ་ཏུ་ཀུན་ནས་ཉོན་མོངས་ཀྱིས་ཆོས་སམ། ཐེག་དམན་གྱི་ལམ་འབྲས་བུ་དང་བཅས་པ་ནི་དོར་བྱའི་གཟུང་བར་མངོན་པར་ཞེན། རྩེ་མོའི་རྗེས་ཐོབ་ཀྱི་གནས་སྐབས་སུ་རྣམ་བྱང་གི་ཆོས་སམ་བྱང་སེམས་ཀྱི་ལམ་འབྲས་བུ་དང་བཅས་པ་ནི་བླང་བྱའི་གཟུང་བར་མངོན་པར་ཞེན། བཟོད་པའི་རྗེས་ཐོབ་ཀྱི་གནས་སྐབས་སུ་མཉམ་གཞག་གི་ལྟ་བས་མ་ཟིན་པའི་ཚེ། སེམས་ཅན་ལ་དམིགས་པའི་སྙིང་རྗེས་གང་ཟག་རྫས་ཡོད་ལ་དམིགས་ནས་ལོངས་སྤྱོད་པ་པོར་མངོན་པར་ཞེན། ཆོས་མཆོག་གི་རྗེས་ཐོབ་ཏུ་ནི་ཆོས་ལ་དམིགས་པའི་སྙིང་རྗེས་སྐྱེས་བུ་བཏགས་ཡོད་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའོ། །དེ་དག་གི་རྒྱུ་མཚན་ནི་དྲོ་བ་རྣམས་ཀྱིས་དམིགས་པ་འདིར་ཞེས་པའི་སྐབས་སུ་ཤེས་པར་འགྱུར་རོ། །མཉམ་གཞག་ལ་དགག་རྟོག་ངོ་བོར་ལྡན་པའི་ཚུལ་ནི་དྲོད་ཀྱི་མཉམ་གཞག་ཏུ་ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པར་རྟོག་པའི་ཚེ་དེར་ཞེན་པ་ལས་མ་འདས་ཏེ། སྒྲ་དོན་འདྲེས་འཛིན་གྱི་རྟོག་པ་ཡིན་པའི་ཕྱིར་རོ། །དེར་ཞེན་པ་དེ་ཉིད་ཀྱང་ལམ་ཕྱི་མ་ལ་ལྟོས་ཏེ། སྤང་བྱའི་རྣམ་རྟོག་ཡིན་ཏེ། སྤྱིར་དབུ་མའི་ལྟ་བ་ལ་ཡོད་པར་ཞེན་པ་དང་། མེད་པར་ཞེན་པ་དང་། བདེན་པར་ཞེན་པ་དང་། བདེན་མེད་དུ་ཞེན་པ་ཐམས་ཅད་བཀག་ནས་མཐར་འཛིན་པ་གང་ཡང་མེད་པ་ཅིག་དགོས་པའི་ཕྱིར་རོ། །དེང་སང་ལྟ་བ་སྤྲོས་བྲལ་བཀག་ནས། དབུ་མའི་དགག་བྱ་ནི་བདེན་པ་ཁོ་ན་ཡིན་གྱི་སྟོང་ཉིད་དུ་མངོན་པར་ཞེན་པ་དགག་མི་དགོས་ཞེས་སྨྲ་བ་ནི་གཞན་དུ་བཀག་ཟིན་ཅིང་། མདོར་སྟོང་ཞེས་བྱ་བར་སྤྱོད་པ་དང་། མི་སྟོང་ཞེས་བྱ་བར་སྤྱོད་པ། གཉིས་ཀ་མཚན་མ་ལ་སྤྱོད་པར་གསུངས་པ་དང་། འདིར་ཡང་མི་རྟག་ལ་སོགས་བཅུ་དྲུག་ལ་མངོན་ཞེན་བཀག་པའི་ཚེ་སྟོང་པ་དང་བདག་མེད་ལ་ཡང་མངོན་ཞེན་བཀག་དགོས་པ་སོགས་ཕལ་ཆེར་དང་འགལ་བར་འགྱུར་རོ། །ངོ་བོར་ལྡན་པའི་ཚེ་སྦྱོར་ལམ་འདིར་བསྟན་གྱི་རྟོག་པ་ཡིན་ཞེས་པ་དང་། འདིར་བསྟན་གྱི་རྟོག་པ་དེ་སྦྱོར་ལམ་ཡིན་ཞེས་པར་ནི་ཁས་མི་ལེན་ཏེ། འདིར་བསྟན་གྱི་རྟོག་པ་ནི་མངོན་པར་ཞེན་པའི་ཆ་ནས་འཇོག་དགོས་ཤིང་སྦྱོར་ལམ་ནི་མངོན་ཞེན་བཀག་པའི་ཆ་ནས་འཇོག་དགོས་པའི་ཕྱིར་རོ། །འོ་ན་ངོ་བོ་གཅིག་པར་འགལ་ལོ་ཞེ་ན་དྲོད་མཉམ་གཞག་གི་གནས་སྐབས་སུ་སྡུག་བསྔལ་གྱི་བདེན་པ་མི་རྟག་པ་ལ་མངོན་པར་ཞེན་པ་བཀག་པའི་ཚེ་མི་རྟག་པ་མ་ཡིན་ནོ་སྙམ་དུ་མངོན་པར་ཞེན་པ་ལས་མ་འདས་པས་མི་རྟག་པ་ལ་མངོན་པར་ཞེན་པ་བཀག་པ་དང་། མི་རྟག་པ་མ་ཡིན་པར་མངོན་པར་ཞེན་པ་གཉིས་བློ་ངོ་བོ་གཅིག་ཏུ་ཡོད་ཅིང་། དེའི་ཚེ་མི་རྟག་པ་ལ་མངོན་ཞེན་བཀག་པའི་ཆ་དེ་སྦྱོར་ལམ་ཡིན་ཀྱང་འདིར་བསྟན་གྱི་རྟོག་པ་མ་ཡིན། མི་རྟག་པ་མ་ཡིན་པར་མངོན་པར་ཞེན་པའི་ཆ་དེ་འདིར་བསྟན་གྱི་རྟོག་པ་ཡིན་ཀྱང་སྦྱོར་ལམ་དུ་མི་འཇོག་པས་འགལ་བ་མེད་དོ། །དེ་བཞིན་དུ་བློ་སྔ་མས་གང་དུ་ཞེན་པའི་ཡུལ་དེ་ཉིད་བློ་ཕྱི་མས་བཀག་ནས་སྟོང་པ་དང་མི་སྟོང་པ་སོགས་ཀྱི་ཞེན་པ་མཐའ་དག་ཀྱང་བཀག་དགོས་པས་དམིགས་རྣམ་ཐམས་ཅད་ལ་སྦྱར་བར་བྱ་སྟེ་བཤད་ཀྱིས་ག་ལ་ལང་། གནད་འདི་ཤེས་ན་དགག་རྟོག་དང་སྦྱོར་ལམ་མཉམ་གཞག་ངོ་བོ་གཅིག་ཏུ་འཇོག་པའི་ཚུལ་དང་། རྟོག་པས་སྤྲོས་པ་ཅིག་བཀག་ཀྱང་ཅིག་ཤོས་སུ་འཛིན་པས་རེས་འཇོག་གིས་ཐམས་ཅད་བཀག་དགོས་པའི་ཚུལ་དང་། རྣལ་འབྱོར་མངོན་སུམ་གྱིས་སྤྲོས་པ་མཐའ་དག་ཅིག་ཅར་དུ་བཀག་པའི་ཚུལ་རྣམས་གནད་གཅིག་ཏུ་འདུས་པར་གོ་བར་འགྱུར་ཞིང་། གཞན་དུ་ན་བསྐལ་པར་བཙལ་ཀྱང་གོ་བར་མི་འགྱུར་རོ། །གཉིས་པ་དགག་རྟོག་དང་སྒྲུབ་རྟོག་གང་ཡིན་དཔྱད་པ་ནི། ཁ་ཅིག་སྒྲུབ་རྟོག་ཁོ་ནར་འདོད་པ་དང་། གཞན་དག་དགག་རྟོག་ཁོ་ནར་འདོད་པ་དང་། ལོ་ཙཱབའི་བླ་མ་འགའ་ཞིག་རྟོག་པ་བཞི་པོ་སྦྱོར་ལམ་ལ་ངོ་བོར་ལྡན་དགོས་པས། གསུམ་པ་དགག་རྟོག་དང་གཞན་གསུམ་པོ་སྒྲུབ་རྟོག་ཏུ་འདོད་པ་སོགས་དུ་མ་སྣང་ཡང་རྩ་བའི་དགོངས་པ་ནི་འདི་ལྟར་ཡིན་ཏེ། མདོར་རྟོག་པ་གཞན་གསུམ་ལ་དགག་རྟོག་དངོས་སུ་བསྟན་ཞིང་། སྒྲུབ་རྟོག་ཤུགས་ལ་བསྟན་ལ། བསྟན་བཅོས་སུ་ནི་གཞན་གསུམ་དེ་ལས་བཟློག་སྟེ་བསྟན་པས། བསྟན་བཅོས་ཀྱི་དངོས་བསྟན་སྒྲུབ་རྟོག་ཁོ་ན་ཡིན་ཏེ། ཡུལ་དགུ་བཞི་སོ་དྲུག་ལ་དམིགས་ནས་གཟུང་བ་དང་འཛིན་པའི་རྣམ་པ་ཅན་ཡིན་པས། སྒྲུབ་རྟོག་ལས་འོས་མེད་པའི་ཕྱིར་རོ། །མདོའི་དངོས་བསྟན་དང་བསྟན་བཅོས་ཀྱི་ཤུགས་བསྟན་ནི་དགག་རྟོག་ཡིན་ཏེ། ཡུལ་སོ་དྲུག་ལ་དམིགས་ནས་གཟུང་འཛིན་རང་བཞིན་མེད་པའི་རྣམ་པ་ཅན་ཡིན་པས། འཛིན་སྟངས་དགག་པའི་རྣམ་པ་ཅན་ཡིན་པའི་ཕྱིར་རོ། །དགག་རྟོག་ཁས་ལེན་པའི་ཚེ་ན་ཡང་། བུམ་པ་བདེན་མེད་བདེན་པར་མངོན་པར་ཞེན་པའི་བློ་ལྟ་བུ་ནི་དགག་རྟོག་ཏུ་ཁས་མི་ལེན་ཏེ། འཛིན་སྟངས་སྒྲུབ་པའི་རྣམ་པ་ཅན་ཡིན་པའི་ཕྱིར་རོ། །མདོར་ན་འཛིན་སྟངས་སྒྲུབ་པའི་རྣམ་པ་ཅན་གྱི་མངོན་པར་ཞེན་པ་དེ་སྤང་བྱ་ཡིན་ན་དེའི་ལོག་ཕྱོགས་དགག་པའི་རྣམ་པ་ཅན་གྱིས་མངོན་པར་ཞེན་པ་དེ་ཡང་སྤང་བྱ་ཡིན་དགོས་ཏེ་ཡོད་མེད་ཡིན་མིན་སོགས་གཉིས་འཛིན་གྱི་སྤྲོས་པ་མཐའ་དག་བཀག་དགོས་པའི་ཕྱིར་རོ། །འདི་ནི་དབུ་མའི་ལྟ་བ་སྟོན་པའི་བཀའ་དང་བསྟན་བཅོས་ཐམས་ཅད་ལས་མགྲིན་གཅིག་ཏུ་འབྱུང་ཡང་། ལྷན་སྐྱེས་ཀྱི་མགོ་ལ་ཀུན་བཏགས་ཀྱི་ཞྭ་མོ་གྱོན་པ་དག་གིས་ནི་མ་མཐོང་བར་སྣང་ངོ་། །གསུམ་པ་མཐོང་སྤང་དང་། སྒོམ་སྤང་གང་ཡིན་དཔྱད་པ་ནི། དངོས་བསྟན་གྱི་སྒྲུབ་རྟོག་བཞི་པོ་ནི་མཐོང་སྤང་ཁོ་ན་ཡིན་ཏེ། ཉིར་སྣང་དུ་ད་ནི་རྣམ་པར་རྟོག་པ་དང་ཡང་དག་པར་ལྡན་པ་བཤད་པར་བྱའོ། །དེ་ལ་མཐོང་བའི་ལམ་གྱི་མི་མཐུན་པའི་ཕྱོགས་ནི་རྣམ་པར་རྟོག་པ་རྣམ་པ་བཞི་སྟེ། ཅི་ལྟར་ཞེ་ན། གཟུང་བའི་རྣམ་པར་རྟོག་པ་རྣམ་པ་གཉིས་ཏེ། དངོས་པོ་ཙམ་ལ་བརྟེན་པ་དང་། གཉེན་པོའི་ཕྱོགས་ལ་བརྟེན་པའོ། །ཙམ་སྨོས་པ་ནི་ཁྱད་པར་གསལ་བའི་དོན་དུ་ཡིན་ནོ། །འཛིན་པའི་རྣམ་པར་རྟོག་པ་རྣམ་པ་གཉིས་ཏེ། གང་ཟག་རྫས་སུ་ཡོད་པའི་རྟེན་ཅན་དང་། སྐྱེས་བུ་བཏགས་པར་ཡོད་པའི་རྟེན་ཅན་ནོ། །ཞེས་གསུངས་པའི་ཕྱིར་རོ། །བྱང་སེམས་ཀྱི་སྦྱོར་ལམ་མཉམ་གཞག་བཞི་ཆར་མཐོང་སྤང་གི་སྤོང་བ་གཉེན་པོ་ལ་གཉིས་སུ་ཕྱེ་བའི་སྦྱོར་བའི་ལམ་ཡིན་ཞིང་དངོས་བསྟན་གྱི་རྟོག་པ་བཞི་པོ་མཉམ་གཞག་དང་། འཛིན་སྟངས་དངོས་སུ་འགལ་བའི་གནད་ཀྱིས་ཀྱང་། མཐོང་སྤང་དུ་གྲུབ་སྟེ་སྔར་བཤད་ཟིན་ཏོ། །འོ་ན་ཉིར་སྣང་དུ་འཆད་པར་འགྱུར་བའི་གཟུང་བ་དང་འཛིན་པའི་རྣམ་པར་རྟོག་པ་མཐོང་བ་དང་སྒོམ་པའི་ལམ་གྱིས་སྤང་བར་བྱ་བ་ཞེས་དང་། འགྲེལ་ཆུང་ལས་མཐོང་བ་དང་སྒོམ་པས་སྤང་བར་བྱ་བ་གཟུང་བ་དང་འཛིན་པའི་རྣམ་པར་རྟོག་པ་བཞི་པོ་འཆད་པར་འགྱུར་བའི་ཚུལ་དང་། འགྲེལ་པར་འབྱུང་བ་ཞེས་པ་དང་འགལ་ལོ་ཞེ་ན་སྐྱོན་མེད་དེ། དངོས་བསྟན་མཐོང་སྤང་ཡིན་ཡང་། ཤུགས་བསྟན་དགག་པའི་རྣམ་པ་ཅན་གྱི་རྟོག་པ་བཞི་པོ་མཐོང་ལམ་གྱིས་སྤོང་མི་ནུས་པས་བདེན་ཞེན་མེད་པར་ཆོས་ཅན་ལ་བཏགས་པ་ཙམ་དུ་འཛིན་པར་སོང་བའི་ཚེ། བྱང་སེམས་འཕགས་པའི་རྒྱུད་ལ་ཡང་མངོན་དུ་འགྱུར་སྲིད་ལ། དེ་ཉིད་སྐབས་ལྔ་པ་ནས་བཤད་པའི་སྒོམ་སྤང་རྟོག་པར་འཇོག་དགོས་པའི་ཕྱིར་རོ། །དེ་ལྟར་བྱས་ན་རྗེ་བཙུན་ཤེས་བྱ་ཀུན་རིག་གི་ཞལ་སྔ་ནས། སྐབས་ལྔ་པའི་སྒོམ་སྤང་འཛིན་རྟོག་གཉིས་ཀ་ཡང་བཏགས་འཛིན་རྟོག་པའི་ཁོངས་སུ་འདུས་ཞེས་གསུངས་ཤིང་། རྩ་བར་ཡང་བཏགས་འཛིན་རྟོག་པ་ཁོ་ནར་གསུངས་པ་དང་། རྫས་འཛིན་རྟོགས་པ་ཡིན་ན་བདེན་འཛིན་ཡིན་དགོས་པས། བྱང་འཕགས་ཀྱི་རྒྱུད་ལ་རྫས་འཛིན་རྟོག་པ་གཏན་མེད་པ་དང་། དངོས་ཤུགས་མ་ཕྱེ་བའི་སྐབས་འདིར་བསྟན་གྱི་རྟོག་པ་ལ། འཕགས་སེང་གཉིས་ཆར་གྱིས་མཐོང་སྤང་དང་། སྒོམ་སྤང་གཉིས་ཡོད་པར་གསུངས་པ་རྣམས་གནད་གཅིག་ཏུ་འདུས་ཤིང་། གཞན་དུ་ན་སྐབས་འདིར་དངོས་བསྟན་གྱི་རྟོག་པ་བཞི་ལ། སྒོམ་སྤང་དང་མཐོང་སྤང་གཉིས་སུ་ཕྱེ་ན། སྒོམ་སྤང་རྫས་འཛིན་རྟོག་པ་ཁས་ལེན་དགོས་པས། དེ་ནི་རྩ་བར་མ་བཤད་དོ། །བཞི་པ་སྒྲིབ་གཉིས་གང་ཡིན་དཔྱད་པ་ནི། སློབ་དཔོན་གྱིས་སྐབས་ལྔ་པར། མཐོང་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་སྤངས་པ་ན། དེ་དག་གིས་བསྡུས་པའི་རྣམ་པར་རྟོག་པ་སྐྱེད་པར་བྱེད་པའི་ཉོན་མོངས་པའི་བག་ཆགས་བརྒྱ་རྩ་བརྒྱད་སྤང་ཞེས་དང་། སྒོམ་སྤང་རྟོག་པའི་སྐབས་སུ་ཡང་། དེ་དང་འདྲ་བར་གསུངས་པ་ལ་བརྟེན་ནས། བོད་རྣམས་སྐབས་འདིར་བསྟན་གྱི་གཟུང་འཛིན་གྱི་རྣམ་པར་རྟོག་པ་བཞི་ཆར་བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི། ཤེས་སྒྲིབ་ཁོ་ན་ཡིན་པས་ཉན་རང་གི་སྤང་བྱའི་རིགས་སུ་གནས་པའི་ཉོན་སྒྲིབ་དང་། ཤེས་སྒྲིབ་གཟུང་རྟོག་མེད་དོ་ཅེས་མགྲིན་པ་བསྒྲིགས་ཏེ་སྨྲ་བར་ནུས་སོ། །རྩ་བའི་དགོངས་པ་ནི་འདི་ལྟར་ཡིན་ཏེ། སྐབས་འདིར་དངོས་སུ་བསྟན་པའི་མཐོང་སྤང་གཟུང་འཛིན་གྱི་རྣམ་པར་རྟོག་པ་བཞི་པོ་དེ་གང་ཟག་གི་ངོས་ནས་བྱང་སེམས་ལམ་གྱི་སྤང་བྱ་ཁོ་ན་ཡིན་ཀྱང་ཐེག་པ་གསུམ་ཆར་གྱི་སྤང་བྱའི་རིགས་ནི་ཐམས་ཅད་ཚང་སྟེ། གཟུང་རྟོག་གཉིས་ལ་གཞིའི་རྟེན་ཅན་དང་། དེའི་གཉེན་པོའི་རྟེན་ཅན་ཞེས་པའི་ཐ་སྙད་དངོས་སུ་གསུངས་ཤིང་། གཞི་དེ་ཀུན་ནས་ཉོན་མོངས་པའི་ཆོས་ཙམ་དང་། དེའི་གཉེན་པོ་དེ་རྣམ་བྱང་གི་ཆོས་ཙམ་དུ་བྱས་ནས་བླང་དོར་དུ་མངོན་པར་ཞེན་པ་ནི་རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ཡིན་པའི་ཕྱིར་དང་། གཞི་དེ་ཐེག་དམན་གྱི་ལམ་འབྲས་བུ་དང་བཅས་པ་དང་། དེའི་གཉེན་པོ་བྱང་སེམས་ཀྱི་ལམ་འབྲས་བུ་དང་བཅས་པར་བྱས་ནས་དེ་ལ་བླང་དོར་དུ་མངོན་པར་ཞེན་པ་ནི་བྱང་སེམས་ཀྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ཡིན་པའི་ཕྱིར་དང་། རྫས་འཛིན་རྟོག་པ་ལ་གང་ཟག་རྫས་ཡོད་དུ་འཛིན་པ་ནི་གང་ཟག་གི་བདག་འཛིན་ཡིན་པས་ཉན་ཐོས་ཀྱི་སྤང་བྱའི་རིགས་སུ་གནས་པའི་ཉོན་སྒྲིབ་དང་། ཆོས་ལ་རྫས་ཡོད་དུ་འཛིན་པ་དང་། བཏགས་འཛིན་རྟོག་པ་གཉིས་ནི་ཆོས་ཀྱི་བདག་འཛིན་ཡིན་པས་བྱང་སེམས་ཀྱི་སྤང་བྱའི་རིགས་སུ་གནས་པའི་ཤེས་སྒྲིབ་ཡིན་པའི་ཕྱིར་རོ། །སྐབས་དང་པོར་ཐེག་པ་གསུམ་ཆར་གྱི་སྤང་བྱའི་རིགས་འདུས་པའི་མཐོང་སྤང་རྟོག་པ་བཞི་དངོས་སུ་བསྟན་ཅིང་། སྐབས་ལྔ་པར་གཟུང་རྟོག་གཉིས་ལ་ཐེག་ཆེན་གྱི་སྤང་བྱའི་རིགས་དང་། རྫས་འཛིན་རྟོག་པ་ལ་མདོར་བསྟན་སྐབས་དང་པོ་དང་མཐུན་ཅིང་། རྒྱས་བཤད་དུ་བྱང་སེམས་ཀྱི་སྤང་བྱའི་རིགས་བསྟན་པ་ནི་གཞུང་ན་གསལ་བས་ཀླན་ཀའི་གོ་སྐབས་མེད་དོ། །མདོར་ན་མཐོང་སྤང་རྟོག་པའི་ནང་དུ་ཐེག་པ་གསུམ་ཆར་གྱི་སྤང་བྱའི་རིགས་འདུས་པ་དང་། དེའི་གཉེན་པོ་བྱང་སེམས་ཀྱི་སྦྱོར་ལམ་མཉམ་གཞག་ན་ཐེག་པ་གསུམ་ཆར་གྱི་རྟོགས་རིགས་འདུས་པ་དང་། དེའི་འབྲས་བུ་ཐེག་ཆེན་གྱི་མཐོང་ལམ་བར་ཆད་མེད་ལམ་ལ་ཐེག་པ་གསུམ་ཆར་གྱི་རྟོགས་རིགས་ཚང་བ་དང་། དེའི་འབྲས་བུ་རྣམ་དག་ལ་ཐེག་པ་གསུམ་ཆར་གྱི་སྤང་བྱ་སྤངས་པའི་རྣམ་དག་ཚང་བ་ནི་མངོན་པར་རྟོགས་པའི་རྒྱན་འདིའི་དབུ་ཞབས་ཀྱི་དགོངས་པ་གཅིག་ཏུ་སྣང་སྟེ། སྤང་བྱ་ཚང་ཚུལ་ནི་སྔར་བཤད་ཟིན་ལ། གཉེན་པོ་ཚང་ཚུལ་ནི་སྦྱོར་ལམ་གྱིས་བསྡུས་པའི་སེམས་བསྐྱེད་ལ་ཐམས་ཅད་མཁྱེན་པ་ཉིད་གསུམ་གྱི་སྒྲིབ་པའི་བུད་ཤིང་སྲེག་པར་བྱེད་པ་དང་། ཞེས་དང་། རྟོགས་རིགས་ཚང་ཚུལ་ནི་ཐེག་པ་གསུམ་ཆར་འཐོབ་པའི་རྒྱུ་ཞེས་དང་། རྣམ་དག་ཚང་ཚུལ་ནི། ལམ་གསུམ་ཉམས་ཕྱིར་རྒྱལ་སྲས་རྣམས་ཀྱི་དག །ཅེས་འབྱུང་བའི་ཕྱིར་རོ། །འོ་ན་བྱང་སེམས་ཀྱི་སྦྱོར་ལམ་གྱིས་ཐེག་པ་གསུམ་ཆར་གྱི་སྤང་བྱའི་རིགས་མངོན་གྱུར་ཆ་ཤས་སུ་ཕྱེ་ནས་སྤོང་ཞིང་མཐོང་ལམ་བར་ཆད་མེད་ལམ་གྱིས་ས་བོན་ཅིག་ཅར་དུ་སྤོང་བར་ཁས་ལེན་དགོས་སོ་ཞེ་ན། ཤིན་ཏུ་ཡང་ཁས་ལེན་ཏེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་གཅིག་ཉིད་ལ་ཐེག་ཆེན་གྱི་མཐོང་སྤང་མ་ལུས་པ་དང་། ཉན་རང་གི་སྤང་བྱའི་རིགས་སུ་གནས་པའི་མཐོང་སྤང་དང་སྒོམ་སྤང་གཉིས་ཀ་སྤོང་བའི་ནུས་པ་གནས་པའི་ཕྱིར་ཏེ། ཉན་རང་གི་མཐོང་སྒོམ་གྱི་ལམ་གཉིས་ཆར་གྱི་བྱེད་པ་འདུས་པའི་ཕྱིར་རོ། །དེ་སྐད་དུ་ཡང་ཉིར་སྣང་དུ། བྱང་ཆུབ་སེམས་དཔའི་བཟོད་པའི་བྱེད་པར་གཞན་རྣམས་ཀྱི་རྟོགས་པའི་བྱེད་པ་མ་ལུས་པ་འདུས་པར་འགྱུར་བའི་ཕྱིར། དེ་དག་གི་ཤེས་པ་དང་སྤོང་བ་གང་ཡིན་པ་དེའི་བཟོད་པ་ཡིན་གྱི་རྟོགས་པའི་བྱེད་པ་འདི་ཙམ་མ་ཡིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ། །ཞེས་གསུངས་པའི་ཕྱིར་རོ། །དེ་ལྟར་ན་རྒྱུད་བླའི་དགོངས་པ་དང་ཡང་མཐུན་ཏེ། རྒྱུད་བླར། བྱང་སེམས་ཀྱི་མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱིས་ཉོན་སྒྲིབ་སྤོང་བ་དང་། རྗེས་ཐོབ་ཀྱིས་ཤེས་སྒྲིབ་སྤོང་བར་བཤད་ཅིང་། བྱང་སེམས་འཕགས་པས་འཁོར་བར་འཆིང་བྱེད་ཀྱི་ཉོན་སྒྲིབ་སྤངས་ཟིན་པར་ཡང་བཤད་པས་མཐོང་ལམ་བར་ཆད་མེད་ལམ་གྱིས་ཉོན་སྒྲིབ་ཀྱི་དངོས་གཉེན་བྱེད་ཅིང་། རྣམ་གྲོལ་ལམ་གྱི་དུས་སུ་སྤངས་ཟིན་པ་ལས་འོས་མེད་པའི་ཕྱིར་རོ། །གལ་ཏེ་དེའི་ཉོན་སྒྲིབ་ནི་བག་ལ་ཉལ་ལ་དགོངས་སོ་སྙམ་ན་མ་ཡིན་ཏེ། དེ་ཤེས་སྒྲིབ་ཏུ་འཇོག་པའི་སྐབས་ཡིན་པའི་ཕྱིར་རོ། །མཉམ་གཞག་དེ་བྱང་སེམས་ཀྱི་སྦྱོར་ལམ་ལ་དགོངས་སོ་སྙམ་ན་ཡང་མ་ཡིན་ཏེ། མི་རྟོག་ཡེ་ཤེས་སུ་བཤད་པའི་ཕྱིར་རོ། །རང་རྒྱལ་གྱི་སྤང་བྱའི་རིགས་ནི་གཟུང་བ་ཕྱི་རོལ་གྱི་དོན་ལ་བདེན་པར་འཛིན་པའི་བདེན་འཛིན་ཡིན་གྱི། ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་མ་ཡིན་ནོ་སྙམ་ན། དེ་ལྟར་ན་སྐབས་བཞི་པར་བཤད་པའི་ལམ་གཉིས་པའི་རྣམ་པ་ལྔ་པོ་དེ་རང་རྒྱལ་གྱི་རྟོགས་རིགས་ཡིན་གྱི་ལམ་གསུམ་པའི་རྣམ་པ་དྲུག་པོ་དེ་རང་རྒྱལ་གྱི་རྟོགས་རིགས་མ་ཡིན་པར་ཁས་བླངས་པས་ལེགས་པར་དཔྱོད་ལ་སྨྲོས་ཤིག ཁོ་བོ་ནི་གཞུང་ལུགས་ཚད་ལྡན་གྱི་མགོ་མཇུག་བསྒྲིགས་ནས་སྨྲ་བ་ཡིན་གྱི། དེང་སང་གི་རི་བོང་ཅལ་གྱི་རྗེས་སུ་འབྲང་བ་མ་ཡིན་ནོ། །སློབ་དཔོན་གྱིས་སྐབས་ལྔ་པའི་གཞུང་འདི་ཉིར་སྣང་ལས། དེ་ཡང་མཐོང་བའི་ལམ་གྱི་བཟོད་པ་སྐྱེས་པ་ན། འདོད་པ་དང་གཟུགས་དང་། གཟུགས་མེད་པའི་ཁམས་ཀྱིས་བསྡུས་པ་མཐོང་བས་སྤང་བར་བྱ་བའི་ཉོན་མོངས་པ་བརྒྱ་རྩ་བརྒྱད་པོ་རྣམ་པར་རྟོག་པ་བཞིས་བསྡུས་པ་རྣམས་སྤོང་བར་འགྱུར་རོ་ཞེས་པའི་དོན་དུ་མཛད་པར་སྣང་ཡང་། ལུང་དེའི་དོན་ནི་མཐོང་སྤང་རྟོག་པ་ཐམས་ཅད་ལ་ཉོན་མོངས་ཀྱི་མིང་གིས་བཏགས་པའི་དོན་དུ་སྣང་སྟེ། ཉིར་སྣང་དུ། ས་དགུ་ལ་ནི་ཆེན་པོ་ཡི། །ཞེས་པའི་སྐབས་ཀྱི་དྲི་མ་དགུ་པོ་ལ་ཡང་ཉོན་མོངས་པའི་མིང་གིས་གསུངས་པའི་ཕྱིར་དང་། བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི་རྣམ་པར་རྟོག་པའོ་ཞེས་འབྱུང་བ་དང་ཡང་མཐུན་པའི་ཕྱིར་རོ། །ངེས་འབྱེད་ཡན་ལག་བཤད་ཟིན་ནས་དེའི་འོག་ཏུ་སྒྲུབ་པའི་རྟེན་དུ་གྱུར་པའི་རིགས་སྟོན་ཏེ། ངེས་འབྱེད་ཡན་ལག་ཐོབ་ནས་སྒྲུབ་པ་བཅུ་གསུམ་གྱི་རྟེན་དུ་གྱུར་པའི་རིགས་འཇོག་དགོས་པའི་ཕྱིར་རོ། །ཉིར་སྣང་དུ་ནི། རྒྱུ་འབྲས་དོན་གྱི་གོ་རིམ་ལྟར་ན་སེམས་བསྐྱེད་ཀྱི་ཐོག་མར་རིགས་བསྟན་པར་བྱ་བ་ཡིན་ཀྱང་འདིར་འབྲས་བུའི་རྗེས་སུ་རྒྱུ་སྟོན་པ་རྟོགས་པའི་གོ་རིམ་དུ་བཤད་དོ། །འདི་ལ་རིགས་ཀྱི་དབྱེ་བ་དང་། རྩོད་པ་སྤོང་བ་དང་། རང་བཞིན་གཏན་ལ་དབབ་པ་གསུམ་ལས། དང་པོ་ནི། རྟོགས་པ་ཡི་ནི་ཆོས་དྲུག་དང་། །ཞེས་སོགས་ཚིགས་བཅད་གཉིས་ཏེ། རྟེན་ལ་རིགས་ཞེས་བྱ་ཞེས་པ་ཐམས་ཅད་ཀྱི་གསལ་བྱེད་དུ་སྦྱར་ནས་དྲོད་ཀྱི་རྟེན་དུ་གྱུར་པའི་ཆོས་དབྱིངས་ལ་རིགས་ཞེས་བརྗོད་པ་ནས་ཡེ་ཤེས་རྩོལ་བ་མི་མངའ་བར་འཇུག་པའི་རྟེན་དུ་གྱུར་པའི་ཆོས་དབྱིངས་ལ་རིགས་ཞེས་བརྗོད་པའི་བར་བཅུ་གསུམ་དུ་དབྱེར་ཡོད་དོ། །དེ་ཡང་གོང་དུ་བྱང་ཆུབ་སེམས་དཔར་ཞེས་མང་དུ་གསུངས་པའི་ཚིག་གི་དོན་ཞུས་པའི་ལན་དུ། རབ་འབྱོར་བྱང་ཆུབ་སེམས་དཔའི་ཚིག་གི་དོན་ནི་ཚིག་གི་དོན་མེད་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ལ་ནི་སྐྱེ་བའམ་ཡོད་པ་ཉིད་ཡོད་པའམ་དམིགས་པ་མ་ཡིན་ནོ་ཞེས་གསུངས་ལ། འདིས་ནི་བརྟེན་པ་བྱང་ཆུབ་རྫས་སུ་མེད་པའི་འཐད་པས་སྐྱེ་མཆེད་དྲུག་གི་ཆོས་ཉིད་ཀྱི་མཚན་ཉིད་ཀྱི་རིགས་ནི་བྱང་ཆུབ་སེམས་དཔའི་སྒྲ་འཇུག་པའི་རྒྱུ་ཡིན་གྱི་དངོས་པོར་གྱུར་པའི་ཚིག་གི་དོན་ནི་མ་ཡིན་ནོ། །ཞེས་ཉིར་སྣང་དུ་བཤད་དོ། །ལུགས་འདི་ལ་ཆོས་དབྱིངས་དེས་སྒྲུབ་པའི་རྟེན་བྱེད་པའི་ཚེ་ན་རིགས་སུ་འཇོག་པ་ཡིན་གྱི། བར་ཆད་བཞི་དང་བཅས་པའི་ཚེ་རིགས་སུ་མི་འཇོག་པར་བཞེད་དེ། ཉིར་སྣང་དུ། གལ་ཏེ་རང་བཞིན་དུ་གནས་པའི་རིགས་འགའ་ཞིག་ཡོད་ན། ཅིའི་ཕྱིར་ཐོག་མ་དང་བྲལ་བའི་འཁོར་བར་གདྒཱའི་ཀླུང་གི་བྱེ་མ་དང་མཉམ་པའི་སངས་རྒྱས་རྣམས་མྱ་ངན་ལས་འདས་ཀྱང་ད་དུང་དུ་ཡང་རང་བཞིན་དུ་གནས་པའི་རིགས་དང་ལྡན་པའི་སྲོག་ཆགས་རྣམས་མྱ་ངན་ལས་མ་འདས་ཤེ་ན། དེ་ནི་ཉེས་དམིགས་རྣམ་པ་བཞི་དང་ལྡན་པའི་ཕྱིར་ཏེ། ཉོན་མོངས་པ་དང་། གྲོགས་ངན་པ་དང་། ཕོངས་པ་དང་། གཞན་གྱི་དབང་རྣམས་ནི་དེའི་ཉེས་པ་ཡིན་ནོ། །ཞེས་གང་གསུངས་པ་ཡིན་ནོ། །འདིས་ནི་བར་ཆད་མེད་པ་ཉིད་ལ་རང་བཞིན་དུ་གནས་པའི་རིགས་སུ་མངོན་པར་འདོད་དོ། །ཅེས་གསུངས་སོ། །ཡང་ན་ལུང་འདིའི་དགོངས་པ་སྒྲུབ་པའི་རྟེན་དུ་གྱུར་པའི་རིགས་ལ་འཆད་དགོས་ཀྱི། གཞན་དུ་ན། རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་པ་དང་འགལ་བར་འགྱུར་རོ། །དེས་ན་བྱང་ཆུབ་སེམས་དཔའ་རྣམ་པ་བཅུ་གསུམ་པོའི་རྒྱུད་ཀྱི་སེམས་ཀྱི་དབྱིངས་ལ་སྒྲུབ་པའི་རྟེན་དུ་ལུས་རྣམ་གཞག་ལས་བསྟན་ལ། སྐབས་འདིར་ནི་སྒྲུབ་པའི་རྟེན་དེ་ཉིད་ལ་རིགས་ཞེས་བསྟན་པས། འདིར་ཆོས་དབྱིངས་དང་རིགས་གཉིས་པོ་དོན་གཅིག་གོ །དེ་ལ་བཅུ་གསུམ་དུ་ཇི་ལྟར་འགྱུར་ན། རྟོགས་པའི་དབང་དུ་བྱས་པ་དྲུག བར་ཆད་མེད་ལམ་གྱི་དབང་དུ་བྱས་པ་གཉིས། རྣམ་གྲོལ་ལམ་གྱི་དབང་དུ་བྱས་པ་གཅིག ཡོན་ཏན་ཁྱད་པར་ཅན་གྱི་དབང་དུ་བྱས་པ་བཞི་སྟེ། སྒྲུབ་པ་བཅུ་གསུམ་ཡོད་པས་དེའི་རྟེན་ཆོས་དབྱིངས་བཅུ་གསུམ་ལ་རིགས་བཅུ་གསུམ་དུ་འཇོག་པའི་ཕྱིར་རོ། །སྒྲུབ་པ་བཅུ་གསུམ་པོའི་ས་མཚམས་ཇི་ལྟར་སྙམ་ན། བུདྡྷ་ཤྲཱི་ལྟར་ན། དང་པོ་དྲུག་སྦྱོར་ལམ་བཞི་དང་། མཐོང་ལམ་དང་ས་བདུན་པ་མན་ཆད་ཀྱི་སྒོམ་ལམ་ན་རིམ་པ་ལྟར་ཡོད། བདུན་པ་བརྒྱད་པ་དགུ་པ་གསུམ། ས་བརྒྱད་པ་དང་། དགུ་པ་དང་། བཅུ་པ་ན་རིམ་པ་བཞིན་ཡོད། བཅུ་པ། བཅུ་གཅིག་པ། བཅུ་གཉིས་པ་གསུམ་ཡང་དག་པ་ས་གསུམ་ན་རིམ་པ་བཞིན་ཡོད། བཅུ་གསུམ་པ་ས་བཅུ་པའི་ཁྱད་པར་གྱི་ལམ་ན་ཡོད་པར་བཤད་དོ། །ཆོས་བཤེས་ལྟར་ན། དང་པོ་ལྔ་སྔར་དང་འདྲ། དྲུག་པ་སྒོམ་ལམ་སྦྱིན། བདུན་དགུ་གཉིས་རིམ་པ་བཞིན་སྒོམ་ལམ་གྱི་བར་ཆད་མེད་ལམ་དང་། རྣམ་གྲོལ་ལམ་གཉིས་ན། བརྒྱད་པ་ས་འོད་བྱེད་པ་ནས་དྲུག་པའི་བར་ན། བཅུ་པ་ས་བདུན་པ་ན། བཅུ་གཅིག་པ་ས་མི་གཡོ་བ་ནས་ས་བཅུ་བའི་བར་ན། བཅུ་གཉིས་པ་སྐྱེ་བ་གཅིག་གིས་ཐོགས་པ་དང་། སྲིད་པ་ཐ་མ་པ་ན། བཅུ་གསུམ་པ་ས་བཅུ་པའི་ཁྱད་པར་གྱི་ལམ་རྡོ་རྗེ་ལྟ་བུའི་ཏིང་ངེ་འཛིན་ན་ཡོད་པར་བཞེད་དོ། །གཉིས་པ་རྩོད་པ་སྤོང་བ་ལ་འཕགས་པའི་ལུགས། སློབ་དཔོན་རྗེས་འབྲང་དང་བཅས་པའི་ལུགས། བོད་སྔ་རབས་པ་རྣམས་ཀྱི་ལུགས་དང་གསུམ་ལས། དང་པོ་ནི་ཉིར་སྣང་དུ། དོན་གྱིས་ཐོབ་པའི་རྩོད་ལན་དང་། དངོས་སུ་བསྟན་པའི་རྩོད་ལན་གཉིས་ལས། དང་པོ་ནི་གལ་ཏེ་ཆོས་དབྱིངས་རིགས་ཡིན་ན། ཐམས་ཅད་རིགས་ལ་གནས་པར་འགྱུར་ཏེ། དེ་ནི་སྤྱིར་གནས་པ་ཡིན་པའི་ཕྱིར་རོ་ཞེ་ན་ཞེས་པའི་རྩོད་པ་བཀོད་ནས་དེའི་ལན་དུ་ཇི་ལྟར་དམིགས་པ་ན། འཕགས་པའི་ཆོས་རྣམས་ཀྱི་རྒྱུར་འགྱུར་བ་དེ་ལྟར་རིགས་ཡིན་པར་བརྗོད་པ་དེས་ན་འདིར་ཧ་ཅང་ཐལ་བ་ཅི་སྟེ་ཚོལ་བར་བྱེད་ཅེས་གསུངས་ཏེ། འདིའི་དོན་ནི་སྔར་བཤད་པ་ལྟར་བྱང་ཆུབ་སེམས་དཔའི་རྒྱུད་ཀྱི་སྒྲུབ་པས་ཆོས་དབྱིངས་ལ་དམིགས་པ་ན་ཆོས་དབྱིངས་དེ་འཕགས་པའི་ཆོས་སྟོབས་སོགས་རྣམས་ཀྱི་རྒྱུར་འགྱུར་བའི་ཆ་ནས་སྒྲུབ་པའི་རྟེན་དུ་གྱུར་པའི་རིགས་ཡིན་པར་བརྗོད་པས། སྒྲུབ་པའི་རྟེན་དུ་གྱུར་རིགས་ལ་སེམས་ཅན་ཐམས་ཅད་གནས་པར་ཐལ་བའི་ཧ་ཅང་ཐལ་བ་མེད་དོ། །ཅེས་པའི་དོན་ཏོ། །གཉིས་པ་ནི་དེ་ལྟར་ན་ཡང་ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་ཏེ། ཆོས་དབྱིངས་ཆོས་ཅན། ཁྱོད་ལ་ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེར་མི་རུང་བར་ཐལ། ཁྱོད་ལ་རྣམ་པར་དབྱེ་བ་མེད་པའི་ཕྱིར་ཞེ་ན། དེའི་ལན་དུ་བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བརྗོད་ཅེས་ཏེ། འཇིམ་པ་གཅིག་ལས་མངོན་པར་གྲུབ་ཅིང་མེ་ལྕེ་གཅིག་གིས་སོ་བཏང་བའི་སྣོད་གསུམ་ལ་སྦྲང་རྩི་དང་། ལི་ཁ་ར་ལ་སོགས་པའི་བཅུད་ཀྱི་བྱེ་བྲག་གིས་སྦྲང་རྩིའི་སྣོད་ལ་སོགས་པར་འཇོག་པ་བཞིན་དུ། རྟེན་ཆོས་ཐེག་པ་གསུམ་གྱི་སྒྲུབ་པ་ཐ་དད་པའི་སྒོ་ནས་ཐེག་པ་གསུམ་གྱི་རིགས་ཐ་དད་པར་འཇོག་པས་སྐྱོན་མེད་ཅེས་པས་སོ། །གཉིས་པ་ནི་འཕགས་པས་འགོད་པའི་རྩོད་པ་སྔ་མ་དེ་ཉིད། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་པའི་དོན་དུ་མཛད་ནས་དེའི་ལན་དུ་དོན་གྱིས་ཐོབ་པའི་ལན་དང་། གཞུང་ནས་དངོས་སུ་བསྟན་པའི་ལན་གཉིས་མཛད་པར་སྣང་སྟེ། ཇི་ལྟར་ཉན་ཐོས་གྱི་ཐེག་པ་ལ་སོགས་པ་ཞེས་སོགས་ཀྱི་ལན་དང་། རྟེན་པའི་ཆོས་ཀྱི་བྱེ་བྲག་གིས། །ཞེས་སོགས་ཀྱི་ལན་གཉིས་རྩོད་པ་གཅིག་ལ་འདེབས་པར་མཛད་པའི་ཕྱིར་རོ། །ཁ་ཅིག་རྩོད་པའི་སྐབས་སུ་རྩོད་པ་ཕྱི་མ་ཁ་བསྐངས་ནས་མཛད་པར་སྣང་ཡང་། དེ་ནི་སློབ་དཔོན་གྱི་དགོངས་པ་མ་ཡིན་ཏེ། ཞེས་བྱ་བའི་ལན་ཞིག་ཀྱང་གཟིགས་མོད་ཀྱི་བློ་ཆོས་ཉིད་དུ་ཞེས་པའི་ཚིག་གི་ནུས་པས། ལན་གཉིས་ཀ་རྩོད་པ་གཅིག་གི་ལན་དུ་བསྟན་པའི་ཕྱིར་རོ། །ཇི་ལྟར་ཉན་ཐོས་ཀྱི་ཐེག་པ་ལ་སོགས་པ་ཞེས་སོགས་ཀྱི་གཞུང་འདི་ཆོས་ཀྱི་དབྱིངས་ལ་དབྱེར་མེད་ཕྱིར། ཅེས་པའི་ལན་དུ་སྦྱར་བ་ནི་འཕགས་པའི་དགོངས་པ་མ་ཡིན་ཏེ། ཉིར་སྣང་དུ། འདིའི་རྩོད་ལན་གཉིས་ཀ་རྫོགས་པའི་རྗེས་སུ་དེ་ལྟ་ན་ཡང་ཆོས་ཀྱི་དབྱིངས་ལ་དབྱེར་མེད་ཕྱིར། ཞེས་གཞུང་ལས་བསྟན་པའི་རྩོད་པ་གསར་དུ་གསུངས་ནས། ལན་འདེབས་པར་མཛད་པའི་ཕྱིར་རོ། །དེའི་རྗེས་འབྲང་ལ། ཆོས་བཤེས་ལྟར་ན་ཇི་ལྟར་ཉན་ཐོས་ཀྱི་ཐེག་པ་ལ་སོགས་པ་ཞེས་པའི་དོན་དཔེ་ཇི་ལྟར་ན་ཉན་ཐོས་པ་དག་གིས། སེམས་ཙམ་པ་ལྟར་རིགས་ཐ་དད་པ་དང་རིགས་ཆད་པ་ཡོད་པར་མི་འདོད་པས། སེམས་བྱུང་མ་ཆགས་པའི་ངོ་བོ་གཅིག་ཉིད་ལ་རྐྱེན་དབང་གིས་ཉན་ཐོས་ཀྱི་ཐེག་པ་དང་ལ་སོགས་པ་རང་རྒྱལ་དང་བྱང་སེམས་ཀྱི་ཐེག་པའི་རྟོགས་པ་ཐ་དད་པའི་རིམ་གྱིས་ཉན་ཐོས་ཀྱི་རིགས་ལ་སོགས་པར་དམིགས་པ་དེ་བཞིན་དུ། འདིར་ཆོས་ཀྱི་དབྱིངས་གཅིག་ཉིད་ཀྱང་འཕགས་པའི་ཆོས་རྟོགས་པར་བྱ་བའི་ཕྱིར། རྒྱུའི་ངོ་བོར་རྣམ་པར་འཇོག་པའི་སྒོ་ནས་དེ་རྟོགས་པའི་རིམ་པ་ལས་རིགས་ཁྱད་པར་ཅན་བཅུ་གསུམ་ཉིད་དུ་ཐ་སྙད་འདོགས་སོ་ཞེས་བཞེད་དོ། །གསེར་གླིང་པས་དཔེ་ཇི་ལྟར་ན་ཉན་ཐོས་ཀྱི་ཐེག་པ་དང་ལ་སོགས་པ་རང་སངས་རྒྱས་ཀྱི་ཐེག་པའི་སྒོ་ནས་གོང་དུ་རྟོགས་པའི་རིམ་གྱིས་ཇི་ལྟར་དམིགས་པ་དེ་བཞིན་དུ་དེ་དང་འདྲ་བར་འཕགས་པའི་ཆོས་རྟོགས་པར་བྱ་བའི་ཕྱིར། བྱང་ཆུབ་སེམས་དཔའི་ཆོས་ཀྱི་དབྱིངས་ལ་དམིགས་པས་ཀྱང་ཐེག་པ་གསུམ་ཆར་གྱི་རྟོགས་རིགས་ཚང་བའི་རྒྱུ་བྱེད་པའི་ཆ་ནས་བྱང་ཆུབ་སེམས་དཔའི་སེམས་ཀྱི་ཆོས་ཀྱི་དབྱིངས་ཁོ་ན། ཉན་ཐོས། རང་རྒྱལ། ཐེག་ཆེན་གྱི་རིགས་ཉིད་དུ་ཐ་སྙད་འདོགས་སོ་ཞེས་བཞེད་དོ། །གསུམ་པ་ནི། འབྲོམ་ནི་སྔར་གྱི་ཆོས་བཤེས་ཀྱི་ལུགས་དེ་ཉིད་བཞེད། དྭགས་པོ་ནི་སེམས་ཙམ་པ་གཉིས་སུ་མེད་པའི་ཤེས་པ་དོན་ལ་ཡོད་པའི་ངོ་བོ་གཅིག་ཉིད་ལ་རིགས་གསུམ་དུ་འདོད་པ་བཞིན། ངེད་ཀྱང་ཆོས་ཀྱི་དབྱིངས་རིགས་སུ་འདོད་པ་ལ་ཡང་མཚུངས་སོ་ཞེས་བཞེད་དོ། །གཉལ་པ་ནི་གང་ཟག་གཅིག་གིས་ཐེག་པ་གསུམ་ལ་རིམ་གྱིས་སློབ་པ་ན། ཉན་ཐོས་ལྷ་བྱིན། རང་རྒྱལ་ལྷ་བྱིན། ཞེས་པ་རྣམས་རྒྱུད་གཅིག་ཀྱང་ནང་གི་རྟོགས་པ་ཐ་དད་པས་འཇོག་པ་བཞིན་དུ། རྟེན་ཆོས་ཐེག་པ་གསུམ་ཀྱི་རྟོགས་པ་ཐ་དད་པས་རྟེན་རིགས་ཐ་དད་པ་གསུམ་དུ་འདོད་དོ། །ཅེས་ཟེར་རོ། །དེ་དག་ཐམས་ཅད་ནི་ཇི་ལྟར་ཉན་ཐོས་ཀྱི་ཐེག་པ་ཞེས་སོགས་ཀྱིས་དཔེ་སྟོན་པར་འདོད་པའི་ལུགས་སུ་སྣང་ཞིང་། དེ་ལ་ཊཱི་ཀར། དཔེ་སྟོན་པ་ནི་མི་འཐད་དེ། །གཞུང་འདི་ཉིར་སྣང་གི་ཇི་ལྟར་དམིགས་པ་ན་ཞེས་སོགས་ཀྱི་ལུང་དོན་ཡིན་ཞིང་དེ་ཡང་དཔེ་སྟོན་བྱེད་མ་ཡིན་པའི་ཕྱིར་དང་། ཆོས་ཀྱི་དབྱིངས་ལ་རིགས་ཐ་དད་པ་གསུམ་དུ་དབྱེར་མི་རུང་ཞེས་པའི་ལན་དུ་ཐེག་པ་གསུམ་གྱི་སྒོ་ནས་རིགས་ཐ་དད་པ་གསུམ་དུ་དབྱེར་རུང་ཞེས་པའི་དཔེ་ལ་འབྲེལ་མེད་པའི་ཕྱིར། ཞེས་གསུངས་པའི་སྐྱོན་དེ་མི་འདོད་བཞིན་དུ་འཁུར་དགོས་པར་སྣང་ངོ་། །རང་ལུགས་ནི་འཕགས་པའི་དགོངས་པ་སྔར་བཤད་ཟིན་ཅིང་། སློབ་དཔོན་གྱི་གཞུང་གི་དགོངས་པ་ཡང་སློབ་དཔོན་རང་ཉིད་ཀྱིས་གསུངས་པའི་རྩོད་ལན་འདེབས་པའི་ཚེ། དེ་དང་འདྲ་ཡང་རྩ་བའི་རྩོད་པ་ལ་ལན་དུ་མ་སོང་བ་འདྲའོ། །འོ་ན་རྩ་བའི་དགོངས་པ་ཇི་ལྟར་ཡིན་སྙམ་ན། ལོ་ཆེན་གྱིས་ལུས་རྣམ་གཞག་ཏུ་སྒྲུབ་པའི་རྟེན་ཆོས་ཀྱི་དབྱིངས་སུ་བཤད་པ་དང་། སྐབས་འདིར་ཆོས་ཀྱི་དབྱིངས་ལ་རིགས་སུ་བྱས་ནས་དེ་ལ་བཅུ་གསུམ་ཡོད་པར་བཤད་པ་ལ་སྒྲུབ་པའི་རྟེན་དུ་གྱུར་པའི་ཆོས་དབྱིངས་ཆོས་ཅན། ཁྱོད་ལ་དྲོད་ཀྱི་སྒྲུབ་པའི་རྟེན་དུ་གྱུར་པའི་རིགས་ལ་སོགས་པ་ཐ་དད་པ་བཅུ་གསུམ་དུ་རུང་བ་མ་ཡིན་པར་ཐལ། ཁྱོད་ལ་རྣམ་པར་དབྱེ་བ་མེད་པའི་ཕྱིར་ཞེ་ན་སྐྱོན་མེད་དེ། ཆོས་དབྱིངས་ཀྱི་ངོ་བོ་དེ་ལ་དབྱེ་བ་མེད་ཀྱང་། རྟེན་ཆོས་སྒྲུབ་པ་བཅུ་གསུམ་གྱི་བྱེ་བྲག་གིས་ཆོས་དབྱིངས་དེའི་དབྱེ་བ་ཡང་དྲོད་ཀྱི་རྟེན་དུ་གྱུར་པའི་རིགས་ལ་སོགས་པ་བཅུ་གསུམ་དུ་ཡོངས་སུ་བརྗོད་པའི་ཕྱིར། ཞེས་གསུངས་པ་འདི་རྩ་བའི་དགོངས་པར་སྣང་ངོ་། །གསུམ་པ་རིགས་ཀྱི་རང་བཞིན་གཏན་ལ་དབབ་པ་ལ་བཞི་སྟེ། བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས། སེམས་ཙམ་པའི་ལུགས། དབུ་མ་པའི་ལུགས་སོ། །དང་པོ་ནི་སེམས་བྱུང་མ་ཆགས་པའི་རང་བཞིན་འདོད་པ་ཆུང་ཞིང་ཆོག་ཤེས་པ་ཞིག་ལ་རིགས་སུ་འདོད་ཅིང་དེ་ལ་འཕགས་པའི་རིགས་ཞེས་དང་། ཟག་མེད་ཀྱི་རིགས་ཞེས་བྱ་སྟེ། དེ་ལས་འཕགས་པའི་ཟག་མེད་ཀྱི་ལམ་སྐྱེ་བའི་ཕྱིར་རོ། །དེ་ལ་དབྱེ་ན་ཆོས་གོས་དང་། བསོད་སྙོམས་དང་། གནས་མལ་ངན་ངོན་ཙམ་གྱིས་ཆོག་ཤེས་པ་གསུམ་དང་། སྤོང་བ་དང་སྒོམ་པ་ལ་དགའ་བ་སྟེ་བཞི་ཡོད་དོ། །དེ་ལས་འཕགས་པའི་ཟག་མེད་སྐྱེ་བའི་ཚུལ་ནི་འདོད་པ་ཆུང་ཞིང་ཆོག་ཤེས་པ་ལ་ལུས་འདུ་འཛི་ལས་བསྲིང་བ་དང་། སེམས་རྣམ་རྟོག་ལས་བསྲིང་བ་སྟེ། བསྲིང་བ་གཉིས་དང་ལྡན་པ་དེ་འབྱུང་ཞིང་། བསྲིང་བ་ཉིས་ལྡན་གྱིས་སྒོམ་པ་ལ་རབ་ཏུ་བརྩོན་པར་བྱེད་པའི་ཕྱིར་རོ། །འདོད་པ་ཆུང་ཞིང་ཆོག་ཤེས་པའི་སེམས་བྱུང་དེ་ལ་རང་བཞིན་གནས་རིགས་སུ་ནི་མི་འཇོག་སྟེ། རང་བཞིན་གྱི་དོན་མ་ཚང་བའི་ཕྱིར་ཏེ། རྐྱེན་དབང་གིས་བྱུང་བའི་ཕྱིར་དང་། ལུགས་འདི་ལ་རང་བཞིན་གནས་རིགས་ཀྱི་ཐ་སྙད་མེད་པའི་ཕྱིར་རོ། །སངས་རྒྱས་ཀྱི་རིགས་སུ་ཡང་འཇོག་པར་མ་ངེས་ཏེ། ཉན་ཐོས་ཀྱི་འཕགས་ལམ་དང་། རང་རྒྱལ་གྱི་འཕགས་ལམ་བསྐྱེད་པར་ངེས་པ་དེ་ལ་སངས་རྒྱས་ཀྱི་རིགས་སུ་འཇོག་ཏུ་མི་རུང་བའི་ཕྱིར་ཏེ། དེ་ཐོབ་ནས་སངས་རྒྱས་སུ་འགྱུར་བ་མི་སྲིད་པའི་ཕྱིར་རོ། །རིགས་ངེས་པ་དང་། རིགས་ཆད་པའི་རྣམ་གཞག་མེད་པ་ཆོས་བཤེས་ཀྱིས་བཤད་ཀྱང་། རིགས་ཆད་པ་ལུགས་འདི་ལ་ཡང་འདོད་དགོས་པ་འདྲ་སྟེ། ལོག་སྲེད་ཅན་སེམས་བྱུང་མ་ཆགས་པའི་རང་བཞིན་སྐྱེ་མི་རུང་བ་ཅིག་ཁས་ལེན་དགོས་པའི་ཕྱིར་རོ། །རིགས་ཀྱིས་སྟོབས་ཀྱིས་རིགས་ངེས་པ་ནི་མེད་དེ། སེམས་བྱུང་མ་ཆགས་པའི་རང་བཞིན་དེ་ཉན་ཐོས་ཀྱི་སྦྱོར་ལམ་བཟོད་པ་དང་། རང་རྒྱལ་དང་། བྱང་སེམས་ཀྱི་དྲོད་མ་ཐོབ་ཀྱི་བར་དུ་རྐྱེན་དབང་གིས་ཐེག་པ་གཞན་དུ་བསྒྱུར་དུ་རུང་བའི་ཕྱིར་རོ། །དེ་ཐོབ་ནས་བསྒྱུར་དུ་མི་རུང་བ་ནི་རྟོགས་པའི་སྟོབས་ཀྱིས་ཡིན་གྱི་རིགས་ཀྱི་སྟོབས་ཀྱིས་མ་ཡིན་ནོ། །མདོར་ན་རྟེན་གྱི་གང་ཟག་གི་སྒོ་ནས་དབྱེ་ན། རིགས་ཡོད་པ་དང་མེད་པ་གཉིས་ཡོད་པ་ལ་ཡང་ཉན་ཐོས་ཀྱི། རང་རྒྱལ་གྱི། ཐེག་ཆེན་གྱི་རིགས་ཡོད་པ་དང་གསུམ། དེ་རེ་རེ་ལ་ཡང་རྟོགས་པའི་སྟོབས་ཀྱིས་རིགས་ངེས་པ་དང་། མ་ངེས་པ་གཉིས་སུ་ཡོད་ཅིང་དེ་རྣམས་ཀྱི་ནང་ནས་ཐེག་ཆེན་གྱི་རིགས་དེ་ཁོ་ན་སངས་རྒྱས་ཀྱི་རིགས་ཡིན་པར་འདོད་དོ། །གཉིས་པ་ནི་རྒྱལ་པོའི་སྲས་ཀྱིས་མདོ་སྡེ་བ་དག་གིས་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ། སོ་སོའི་སྐྱེ་བོ་དང་། སློབ་པའི་གནས་སྐབས་ན་ཡང་ཡོངས་སུ་ཉམས་པའི་ཆོས་ཅན་གྱི་ས་བོན་ལ་རིགས་ཞེས་བྱའོ། །ཞེས་འབྱུང་བ་ལྟར་ཟག་མེད་ཀྱི་སེམས་ཀྱི་ས་བོན་འབྲས་བུ་འབྱུང་རུང་གི་ནུས་པའོ། །འོ་ན་རྣམ་རིག་པ་དང་ཁྱད་པར་མེད་པར་འགྱུར་རོ་སྙམ་ན། སོ་སོའི་སྐྱེ་བོ་དང་། ཞེས་སོགས་སྨོས་ཏེ་རྣམ་རིག་པའི་ལུགས་ཀྱི་རིགས་དེ་ནི་རྐྱེན་དབང་གིས་གསར་དུ་བཞག་པ་མ་ཡིན་པར་ཐོག་མ་མེད་པ་ནས་ཡོད་པར་འདོད་ལ། འདི་ནི་སོ་སོ་སྐྱེ་བོའི་གནས་སྐབས་ན་སྔར་ཐོས་པ་ལ་སོགས་པའི་རྐྱེན་གྱིས་ཟག་མེད་ཀྱི་ས་བོན་བཞག་པ་དང་། སློབ་པའི་གནས་སྐབས་ན་ཕྱིར་འོང་དང་། ཕྱིར་མི་འོང་བའི་འབྲས་བུ་ལས་ཉམས་པ་ན་ཡང་དེའི་ས་བོན་ཡོད་པ་རིགས་སུ་འདོད་པས་ཁྱད་པར་ཤིན་ཏུ་ཆེའོ། །འདི་ལ་ཡང་རྟེན་གྱི་སྒོ་ནས་དབྱེ་བ་སྔར་བཞིན་དུ་རུང་ཞིང་ཐམས་ཅད་རང་བཞིན་གནས་རིགས་དང་། སངས་རྒྱས་ཀྱི་རིགས་སུ་མི་འདོད་པ་ཡང་སྔར་དང་འདྲའོ། །འོན་ཀྱང་འདི་ལ་རིགས་ཀྱི་སྟོབས་ཀྱིས་རིགས་ངེས་པ་ཡང་བཞག་ཏུ་རུང་སྟེ། ཟག་མེད་ཀྱི་ས་བོན་དེ་ཉན་ཐོས་ཀྱི་འཕགས་ལམ་བསྐྱེད་པའི་ཐོས་སོགས་དང་། རང་རྒྱལ་གྱི་འཕགས་ལམ་བསྐྱེད་པའི་ཐོས་སོགས་དང་། ཐེག་ཆེན་གྱི་འཕགས་ལམ་བསྐྱེད་པའི་ཐོས་སོགས་ཀྱིས་བཞག་པ་རྣམས་ནི་དེ་དང་དེའི་རིགས་ཀྱི་སྟོབས་ཀྱིས་རིགས་ངེས་པ་ཡང་ཡིན་ལ། འཕགས་ལམ་གང་ཡང་རུང་བ་བསྐྱེད་དུ་རུང་བའི་ཐོས་སོགས་ཀྱིས་བཞག་པ་ནི་རིགས་མ་ངེས་པ་ཡིན་པའི་ཕྱིར་རོ། །གསུམ་པ་ནི་བྱང་ས་ལས་བྱང་ཆུབ་སེམས་དཔའ་རྣམས་ཀྱི་རིགས་དེ་ནི་ཐོག་མ་མེད་པ་ནས་འོངས་པ་ཆོས་ཉིད་ཀྱི་ས་ཐོབ་པ་སྐྱེ་མཆེད་དྲུག་གི་ཁྱད་པར་གང་ཡིན་པ་ཏེ། ཞེས་སོགས་བཤད་དོ། །འདི་ལ་ངོ་བོ་དང་། མིང་གི་རྣམ་གྲངས་དང་། དབྱེ་བ་གསུམ་ལས། དང་པོ་ནི། ཀུན་གཞིའི་རྣམ་ཤེས་ལ་ཡོད་པའི་ཟག་མེད་ཀྱི་ཡོན་ཏན་རྐྱེན་དང་ཕྲད་ན་བྱང་ཆུབ་ཐོབ་པར་བྱེད་པའི་ནུས་པ་ཐོག་མ་མེད་པ་ནས་ཡོད་པ་ཞིག་སྟེ། རྒྱ་མཚོའི་སྤྲིན་དུ་སྐྱེ་མཆེད་དྲུག་གི་ཁྱད་པར་ནི་ཀུན་གཞིའི་རྣམ་པར་ཤེས་པ་ལ་གནས་པའི་ས་བོན་ཟག་པ་མེད་པའི་ཆོས་སྐྱེད་པར་བྱེད་པའི་ནུས་པའོ། །ཞེས་གསུངས་སོ། །གཉིས་པ་ནི་སྐྱེ་མཆེད་དྲུག་གི་ཁྱད་པར་དང་། ཟག་མེད་ཀྱི་ས་བོན་དང་། སྒྲིབ་པ་སྤོང་རུང་དང་། ཐོས་པའི་བག་ཆགས་རྣམས་སོ། །སྐྱེ་མཆེད་དྲུག་གི་ཁྱད་པར་ཞེས་བརྗོད་པའི་རྒྱུ་མཚན་ཡོད་དེ། སྐྱེ་མཆེད་དྲུག་གི་ནང་ནས་ཁྱད་པར་ཡིད་ཀྱི་སྐྱེ་མཆེད། དེ་ལ་རྣམ་ཤེས་ཚོགས་བརྒྱད་ཡོད་པ་ལས་ཁྱད་པར་ཀུན་གཞིའི་རྣམ་ཤེས་དེ་ལ་ཡང་རྣམ་སྨིན་གྱི་ཆ་དང་ས་བོན་གྱི་ཆ་གཉིས་ཡོད་པ་ལས་ཁྱད་པར་ས་བོན་གྱི་ཆ། དེ་ལ་ཡང་དགེ་མི་དགེ་ལུང་མ་བསྟན་གྱི་ས་བོན་གསུམ་ཡོད་པ་ལས་ཁྱད་པར་དགེ་བའི་ས་བོན། དེ་ལ་ཟག་བཅས་ཟག་མེད་ཀྱི་ས་བོན་གཉིས་ཡོད་པ་ལས་ཁྱད་པར་ཟག་མེད་ཀྱི་ས་བོན་ཞེས་པ་ནི་སེམས་ཙམ་པའི་འདོད་པ་སྟེ། ལང་གཤེགས་ལས། དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲག་པ་རྣམ་པར་སྦྱང་བར་བྱའོ། །ཞེས་དང་དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་དེ་ནི་དེ་བཞིན་གཤེགས་པའི་ཡུལ་ཏེ། ཞེས་དང་། མདོ་གཞན་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་གསུང་བར་མཛད། །ཞེས་གསུངས་པ་རྣམས་ཀྱི་དགོངས་པ་བསམ་པའོ། །སྤྱིར་བྱང་ས་ནས་གསུངས་པའི་ཁྱད་པར་གསུམ་པོ་དེ་མདོ་ལས་བཤད་པ་ཡིན་པས། དབུ་མ་པ་རྣམས་སྐྱེ་མཆེད་དྲུག་གི་ཁྱད་པར་འདོད་དགོས་ལ་དེའི་ཚེ་སྐྱེ་མཆེད་དྲུག་གི་ཁྱད་པར་ནི་སྐྱེ་མཆེད་དྲུག་གི་ཆོས་ཉིད་དུ་ཉིར་སྣང་ལས་བཤད་དེ། མ་འདྲེས་པར་བྱའོ། །ཟག་མེད་ཀྱི་ས་བོན་ཞེས་བྱ་སྟེ། ཟག་མེད་ཀྱི་ཡེ་ཤེས་བསྐྱེད་པའི་རྒྱུ་ཡིན་པའི་ཕྱིར་རོ། །སྒྲིབ་པ་སྤོང་རུང་ཞེས་བྱ་སྟེ། རྐྱེན་དང་ཕྲད་ན་སྒྲིབ་པ་དང་བྲལ་རུང་ཡིན་པའི་ཕྱིར། ཐོས་པའི་བག་ཆགས་ཞེས་བྱ་སྟེ། གསུང་རབ་ཐོས་པའི་རྐྱེན་གྱིས་གསོ་བར་བྱ་བ་ཡིན་པའི་ཕྱིར། རང་བཞིན་དུ་གནས་པའི་རིགས་ཞེས་བྱ་སྟེ། ཐོག་མ་མེད་པ་ནས་ཆོས་ཉིད་ཀྱིས་ཐོབ་པའི་ཕྱིར་རོ། །སངས་རྒྱས་ཀྱི་རིགས་སུ་འཇོག་པའི་ངེས་པ་མེད་པ་ནི་སྔར་བཞིན་ནོ། །གསུམ་པ་དབྱེ་བ་ལ་རིགས་ངེས་པ་དང་། རིགས་མ་ངེས་པ་གཉིས་ལས། དང་པོ་ནི་ཐོག་མ་མེད་པ་ནས་ཐེག་པ་གསུམ་གྱི་བྱང་ཆུབ་སོ་སོའི་རྒྱུར་ངེས་པས་རྐྱེན་དབང་གིས་བྱང་ཆུབ་གཞན་དུ་མི་འགྱུར་བ་སྟེ། དཔེར་ན་རིའི་ཕྱོགས་འགའ་ཞིག་ནས་གསེར་འབའ་ཞིག་དང་། དངུལ་འབའ་ཞིག་དང་། ཟངས་འབའ་ཞིག་འབྱུང་བ་ལྟར་རོ། །གཉིས་པ་ནི་རྐྱེན་དབང་གིས་ཐེག་པ་གསུམ་ཀའི་རྒྱུར་སྒྱུར་དུ་རུང་བ་སྟེ། དཔེར་ན། རིའི་ཕྱོགས་འགའ་ཞིག་ནས་རེས་འགའ་ཟངས་དང་། རེས་འགའ་དངུལ་དང་། རེས་འགའ་གསེར་འབྱུང་བ་ལྟ་བུའོ། །རིགས་ཆད་པ་ནི་སྒྲིབ་པ་ཤས་ཆེ་བའི་རྒྱུས་ཟག་མེད་ཀྱི་ས་བོན་དེ་དང་མི་ལྡན་པའོ། །འདི་ལ་ཡང་རིགས་ངེས་པ་ལ་འོག་མ་གཉིས་ཀྱི་རིགས་སངས་རྒྱས་ཀྱི་རིགས་སུ་མི་འདོད་ལ། རིགས་མ་ངེས་པ་ནི་ལམ་དུ་མ་ཞུགས་པའི་ཚེ་ཟག་མེད་ཀྱི་རིགས་ཙམ་དུ་འདོད་ཀྱི་ཉན་ཐོས་ཀྱི་རིགས་ལ་སོགས་པར་མི་འདོད་ཅིང་། ལམ་དུ་ཞུགས་པའི་ཚེ་གང་ནས་ཞུགས་པ་དེ་དང་དེའི་རིགས་སུ་འདོད་དོ། །མདོར་ན་མཐར་ཐུག་ཐེག་པ་གསུམ་དུ་འདོད་པ་དག་གིས་རིགས་ལ་སངས་རྒྱས་ཀྱི་རིགས་ཀྱིས་མ་ཁྱབ་པར་འདོད་པ་ནི་གྲུབ་མཐའི་གནད་ཡིན་པས་ཡིད་ལ་ཟུང་ཤིག བཞི་པ་ལ་ངོ་བོ། མིང་གི་རྣམ་གྲངས། དབྱེ་བ། རྟེན་དུ་འགྱུར་ཚུལ། རིགས་སུ་འགྱུར་ཚུལ་དང་ལྔ་ལས། དང་པོ་ནི་དཔལ་ཕྲེང་གི་མདོར། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ན་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་ཆོས་སྐུ་ལ་བཤད་པ་དང་། འདིར་ཡང་ཆོས་ཀྱི་དབྱིངས་ཀྱི་རང་བཞིན་དང་ཞེས་དང་། ཀླུ་སྒྲུབ་ཀྱིས། གང་ཞིག་ཀུན་ཏུ་མ་ཤེས་པས། །སྲིད་པ་གསུམ་ན་རྣམ་འཁོར་ཞིང་། །སེམས་ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་ལོ། །ཞེས་ཆོས་ཀྱི་དབྱིངས་ལ་བཤད་པ་དང་། ས་ར་ཧས་སེམས་ཉིད་གཅིག་པུ་ཀུན་གྱི་ས་བོན་ཏེ། །ཞེས་དང་། ཀླུ་སྒྲུབ་ཀྱིས། ཉོན་མོངས་དྲྭ་བས་གཡོགས་པ་ན། །སེམས་ཞེས་བྱ་བ་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་སེམས་ལ་བཤད་པ་སོགས་དུ་མར་སྣང་ཡང་རང་གི་ངོ་བོ་ཡོངས་སུ་རྫོགས་པ་ནི། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་སོ། །གསུམ་པོ་དེ་ཡི་ངོས་འཛིན་ལ། འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་དོན་རྣམ་པ་དགུར་ཕྱེ་ནས། དཔེ་དགུས་མཚོན་པར་གསུངས་སོ། །དོན་དགུ་ནི་ཆོས་སྐུ་ལ་གློ་བུར་དྲི་བྲལ་གྱི་དབྱིངས་དང་། ཟབ་མོ་སྟོང་ཉིད་སྟོན་པའི་གསུང་རབ་དང་། བརྗོད་བྱ་སྣ་ཚོགས་སྟོན་པའི་གསུང་རབ་གསུམ་དུ་ཕྱེ་ཞིང་། དེ་བཞིན་ཉིད་ནི་རང་བཞིན་རྣམ་དག་གི་ཆོས་ཉིད་ཡིན་ལ། རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་དེ་གཉིས་ཀྱི་འབྲས་བུ་སྐུ་གསུམ་དང་ལྔར་ཕྱེ་བ་སྟེ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་དང་། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླང་བ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཅེས་གསུངས་པའི་ཕྱིར་རོ། །དེ་ལ་རྫོགས་སངས་སྐུ་ནི་འཕྲོ་ཕྱིར་དང་། །ཞེས་པས། རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་བ་བསྟན་ཏེ། འཕྲོ་ཞེས་པའི་ཚིག་གི་ནུས་པ་དང་། རྒྱུད་བླར་དཔེ་དགུ་དོན་དགུ་རྒྱས་པར་བཤད་པའི་སྐབས་སུ་ཡང་། དེ་བཞིན་བདེ་གཤེགས་མནར་མེད་གནས་རྣམས་ལའང་། །སངས་རྒྱས་སྤྱན་གྱིས་རང་ཆོས་ཉིད་གཟིགས་ཏེ། །སྒྲིབ་མེད་ཕྱི་མཐའི་མུར་གནས་ཐུགས་རྗེ་ཡི། །བདག་རྐྱེན་སྒྲིབ་པ་ལས་ནི་གྲོལ་བར་མཛད། །ཅེས་སོགས་སངས་རྒྱས་ཀྱིས་རང་གི་ཆོས་ཉིད་སེམས་ཅན་ལ་ཡོད་པར་གཟིགས་ནས་སྒྲིབ་པ་སྦྱང་བའི་ཆེད་དུ་ཆོས་སྟོན་པར་གསུངས་པ་རྣམས། རྫོགས་སངས་སྐུ་ནི་འཕྲོ་ཕྱིར་དང་། །ཞེས་པའི་དོན་ཡིན་པའི་ཕྱིར་དང་། ཆོས་སྐུ་ལ་གསུམ་དུ་ཕྱེ་བ་ཡང་རྟོགས་པ་ཆོས་སྐུ་བརྙེས་པའི་སྟོབས་ཀྱིས་བསྟན་པ་ཆོས་སྐུ་འབྱུང་བའི་དོན་དུ་སྣང་བའི་ཕྱིར་རོ། །དེ་བཞིན་ཉིད་དབྱེར་མེད་ཕྱིར་དང་། །ཞེས་པས་འགལ་རྐྱེན་སྒྲིབ་པ་སྤང་དུ་རུང་བར་བསྟན་ཏེ། སེམས་ཅན་གྱི་སེམས་ཀྱི་ཆོས་ཉིད་དང་། སངས་རྒྱས་ཀྱི་ཆོས་ཉིད་རང་བཞིན་གྱིས་རྣམ་པར་དག་པར་དབྱེར་མེད་པས་དྲི་མའི་ངོ་བོར་མ་སྐྱེས་པར་མཚུངས་པར་བསྟན་པའི་ཕྱིར་རོ། །རིགས་ཡོད་ཕྱིར་ན་ཞེས་པས་སངས་རྒྱས་ཀྱི་ཡོན་ཏན་འབྱུང་དུ་རུང་བར་བསྟན་ཏེ། རིགས་ཀྱི་དོན་ནི་རྒྱུའི་དོན་ཡིན་པས་སངས་རྒྱས་ཀྱི་ཆོས་ཐམས་ཅད་ཀྱི་རྒྱུར་བསྟན་པའི་ཕྱིར་དང་། འདིའི་རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་སུ་ཕྱེ་ནས་དེ་གཉིས་ལས་འབྲས་བུ་སྐུ་གསུམ་འབྱུང་བར་གཞུང་ལས་བཤད་པའི་ཕྱིར། དེས་ན་བདེ་བར་གཤེགས་པའི་སྙིང་པོ་ལ་ཡང་དོན་དེ་གསུམ་ཆར་ཚང་ཞིང་སངས་རྒྱས་ཀྱི་རིགས་ལ་ཡང་དོན་དེ་གསུམ་ཆར་ཚང་བ་ཡིན་ཀྱང་། རྒྱུ་དུས་ཀྱི་བདེ་གཤེགས་སྙིང་པོར་འཇོག་པ་ལ་ནི་འཇོག་བྱེད་གསུམ་ཆར་དགོས་ཤིང་། རིགས་སུ་འཇོག་པ་ལ་ནི་གསུམ་ཆར་མི་དགོས་ཏེ། གསུམ་པ་དེའི་ནང་ཚན་ཡིན་པའི་ཕྱིར་རོ། །མདོར་ན་རྒྱུ་དུས་ཀྱི་བདེ་གཤེགས་སྙིང་པོའི་མཚན་ཉིད། རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་། འགལ་རྐྱེན་སྒྲིབ་པ་སྤང་དུ་རུང་། འབྲས་བུ་སངས་རྒྱས་ཀྱི་ཡོན་ཏན་ཐམས་ཅད་འབྱུང་དུ་རུང་བའི་ཆོས་དབྱིངས་སོ། །སངས་རྒྱས་ཀྱི་རིགས་ཀྱི་མཚན་ཉིད། རང་གི་ངོ་བོ་སྐུ་གསུམ་གང་རུང་དུ་འགྱུར་དུ་རུང་ཞིང་། །དྲི་མ་ལས་མ་གྲོལ་བའི་དབྱིངས་སམ། རིགས་སད་པའི་གནས་སྐབས་ཀྱི་དགེ་རྩ་གང་རུང་གིས་བསྡུས་པའི་རྒྱུའི་ཆའོ། །གལ་ཏེ་རྒྱུན་མཐའི་བྱང་སེམས་ལོངས་སྐུར་འགྱུར་དུ་རུང་བ་ཡིན་པས་མཚན་ཉིད་དེ་ཞུགས་སོ་སྙམ་ན། རྒྱུན་མཐའི་བྱང་སེམས་གང་ཟག་གི་ཆ་ལོངས་སྐུར་འགྱུར་བ་མ་ཡིན་ཏེ། རྒྱུན་མཐའི་བྱང་སེམས་ཀྱི་སེམས་ཡེ་ཤེས་བཞིར་གྱུར་ཅིང་སེམས་ཀྱི་ཆོས་དབྱིངས་དེ་གློ་བུར་དྲི་བྲལ་གྱི་ཆོས་དབྱིངས་སུ་གྱུར་པའི་ཚེ་ན་མེ་ལོང་ལྟ་བུའི་ཡེ་ཤེས་དང་། དབྱིངས་རྣམ་དག་དེ་ངོ་བོ་ཉིད་ཀྱི་སྐུ་དང་། མཉམ་པ་ཉིད་དང་སོ་སོར་རྟོག་པའི་ཡེ་ཤེས་དེ་ལོངས་སྐུ་དང་། བྱ་བ་གྲུབ་པའི་ཡེ་ཤེས་དེ་སྤྲུལ་སྐུར་འགྱུར་བར་འཕགས་པ་སངས་རྒྱས་ཀྱི་ས་དང་མདོ་སྡེ་རྒྱན་དུ་བཤད་པའི་ཕྱིར་རོ། །དེ་ལྟར་ན་དབྱིངས་རྣམ་དག་དང་། མེ་ལོང་ལྟ་བུའི་ཡེ་ཤེས་ཀྱི་རྒྱུ་ལ་རང་བཞིན་གནས་རིགས་དང་། ཡེ་ཤེས་གཞན་གསུམ་གྱི་རྒྱུ་ལ་རྒྱས་འགྱུར་གྱི་རིགས་སུ་འཇོག་པ་དང་། རྒྱུད་བླར་ངོ་བོ་ཉིད་སྐུའི་རྒྱུ་ལ་རང་བཞིན་གནས་རིགས་དང་། གཟུགས་སྐུ་གཉིས་ཀྱི་རྒྱུ་ལ་རྒྱས་འགྱུར་གྱི་རིགས་སུ་འཇོག་པ་གནད་གཅིག་ཏུ་འབྱུང་ཡང་སྐལ་བ་དང་མི་ལྡན་པ་དག་གིས་གོ་བར་དཀའོ། །དེང་སང་ཆོས་དབྱིངས་ཞེས་པ་ཆོས་ཅན་གྱི་སྟེང་དུ་བདེན་པ་བཀག་ཙམ་གྱི་མེད་དགག་ལ་འདོད་པ་ནི་གསུང་རབ་ཀྱི་གནད་མ་གོ་བ་སྟེ། རང་བཞིན་གནས་རིགས་དེ་ཉིད་ཆོས་སངས་རྒྱས་ཀྱི་སྟོབས་སོགས་ཀྱི་རྒྱུ་ཡིན་པས་ན་ཆོས་ཀྱི་དབྱིངས་སུ་འཇོག་པའི་ཕྱིར་ཏེ། དབྱིངས་དང་། རིགས་དང་། རྒྱུ་རྣམས་དོན་གཅིག་པའི་ཕྱིར་རོ། །གཉིས་པ་རྣམ་གྲངས་ནི་སྤྱིར་རིགས་ཙམ་གྱི་རྣམ་གྲངས་ལ་རིགས་དང་། ཁམས་དང་ས་བོན་དང་། ཉེར་གནས་དང་། སྔོན་འགྲོ་ཞེས་ལྔ་དང་ལྡན་ནོ། །རང་བཞིན་གནས་རིགས་ཀྱི་རྣམ་གྲངས་ལ་བདེ་བར་གཤེགས་པའི་སྙིང་པོ་དང་། ཆོས་དབྱིངས་དང་། སངས་རྒྱས་ཀྱི་རིགས་དང་། སངས་རྒྱས་ཀྱི་ཁམས་རྣམས་ཏེ། ཁྱབ་མཉམ་ཉིད་དུ་འཁྲུལ་བར་མི་བྱའོ། །འོ་ན་ཇི་ལྟར་ཞེ་ན་བདེ་གཤེགས་སྙིང་པོ་དང་ཆོས་དབྱིངས་ནི་འབྲས་བུའི་དུས་ན་ཡང་ཡོད་པས་དེ་ལ་རང་བཞིན་གནས་རིགས་ཀྱིས་མ་ཁྱབ་ཀྱང་རང་བཞིན་གནས་རིགས་ལ་ནི་དེ་གཉིས་ཀྱིས་ཁྱབ་སྟེ། རང་བཞིན་གནས་རིགས་དེ་བདེ་གཤེགས་སྙིང་པོའི་བྱེ་བྲག་ཡིན་པའི་ཕྱིར་དང་། སེམས་ཙམ་པས་རང་བཞིན་གནས་རིགས་ཞེས་པའི་ཟུར་གྱི་རང་བཞིན་དང་། རྒྱུ་དོན་གཅིག་པར་འདོད་པ་ལ་རྒྱས་འགྱུར་གྱི་རིགས་ཀྱིས་མ་ངེས་པ་བརྗོད་ནས། རང་ལུགས་ལ་རང་བཞིན་དང་ཆོས་དབྱིངས་དོན་གཅིག་པར་མཛད་པའི་ཕྱིར་ཏེ། ཉིར་སྣང་དུ། གཞན་དག་ནི་རིགས་ནི་སྐྱེ་མཆེད་དྲུག་གི་ཁྱད་པར་ཡིན་ནོ་དེ་ཡང་རྣམ་པ་གཉིས་ཏེ། རྐྱེན་གྱིས་ཡང་དག་པར་བླངས་པ་དང་རང་བཞིན་དུ་གནས་པའོ། །ཞེས་ཟེར་རོ། །དེ་དག་གིས་ནི་རང་བཞིན་དུ་གནས་པའི་རིགས་ལ་རང་བཞིན་དུ་བརྗོད་པའི་དོན་བརྗོད་དགོས་སོ། །རྒྱུའི་རྣམ་གྲངས་ཡིན་ནོ་ཞེ་ན། རྐྱེན་གྱིས་ཡང་དག་པར་བླངས་པ་ཡང་དེ་ཡིན་པ་དེས་ན་དོན་གྱི་ཁྱད་པར་ཅི་ཡོད། ཆོས་ཉིད་ཀྱི་རྣམ་གྲངས་ཡིན་པ་ལ་ནི་ཉེས་པ་འདི་མེད་དོ། །ཡང་ན་དེ་དག་གི་རིགས་ནི་བཏགས་པ་བ་ཡིན་ལ་འདི་ནི་མཚན་ཉིད་པ་ཡིན་ཏེ། དེས་ན་འདི་དང་དེ་འགྲིགས་པ་མ་ཡིན་ནོ། །ཞེས་གསུངས་པའི་ཕྱིར་རོ། །ཊཱི་ཀ་ལས། འདུས་བྱས་རང་བཞིན་གནས་རིགས་དང་། འདུས་མ་བྱས་རང་བཞིན་གནས་རིགས་གཉིས་སུ་གསུངས་པ་ཡང་དེང་སང་ཕལ་ཆེར་གྱིས་ཆོས་ཅན་གསལ་བའི་སྟེང་གི་བདེན་པ་བཀག་ཙམ་གྱི་སྟོང་ཉིད་ཁོ་ན་རང་བཞིན་གནས་རིགས་སུ་འདོད་པ་བཀག་ནས་དེ་རང་བཞིན་གནས་རིགས་ཡིན་ན། ཆོས་ཅན་གསལ་བ་ཡང་རང་བཞིན་གནས་རིགས་སུ་འདོད་དགོས་ཏེ། ཁྱད་པར་མེད་པའི་ཕྱིར་ཞེས་པའི་དོན་ཡིན་གྱི་ཕུགས་ཀྱི་བཞེད་པ་ནི་མ་ཡིན་ཏེ། ངོ་བོ་ཉིད་སྐུ་དབྱིངས་རིགས་དབྱེར་མེད་ལ་བཞེད་པས་དེའི་རྒྱུར་གྱུར་པའི་རང་བཞིན་གནས་རིགས་དེ་ཡང་དབྱིངས་རིག་དབྱེར་མེད་དུ་གྲུབ་པའི་ཕྱིར་རོ། །སེམས་ཙམ་པའི་ལུགས་ལ་སྟོང་པ་ཉིད་དང་། དེ་བཞིན་ཉིད་དང་། ཡང་དག་མཐའ་དང་། མཚན་མ་མེད་པ་དང་། དོན་དམ་པ་དང་། ཆོས་དབྱིངས་རྣམས་གཞན་དབང་གི་སྟེང་དུ་ཀུན་བཏགས་ཀྱི་སྟོང་པའི་སྟོང་ཉིད་རིགས་པས་དཔྱད་བཟོད་དུ་གྲུབ་པ་ཞིག་གི་མིང་གི་རྣམ་གྲངས་སུ་འདོད་པས། ཡིན་ཁྱབ་མཉམ་ཡིན་ཀྱང་དབུ་མ་པའི་ལུགས་ནི། བདེ་གཤེགས་སྙིང་པོ་དང་། ཆོས་དབྱིངས་དང་། རང་བཞིན་གནས་རིགས་རྣམས་ནི་ཆོས་ཅན་གསལ་བ་དང་། དེ་ཉིད་ལ་མཐའ་བཞིའི་སྤྲོས་པ་བཀག་པའི་ཆོས་ཉིད་དབྱེར་མེད་པའི་ཟུང་འཇུག་ལ་འདོད་ཅིང་། སྟོང་ཉིད་དང་དེ་བཞིན་ཉིད་ལ་སོགས་པ་རྣམས་ནི་བདེན་པའམ་མཐའ་བཞིའི་སྤྲོས་པ་བཀག་པའི་གནས་ལུགས་ཀྱི་ཆ་ནས་འཇོག་པས་ཁྱད་པར་ཤིན་ཏུ་ཆེ་སྟེ། ཟུང་འཇུག་གི་སྟོང་པའི་ཆ་ལ་སྟོང་ཉིད་སོགས་སུ་འཇོག་པ་ཡིན་པའི་ཕྱིར་རོ། །མདོར་ན་སེམས་ཙམ་པའི་ལུགས་ལ་རང་བཞིན་གནས་རིགས་ཡིན་ན་ཆོས་དབྱིངས་མ་ཡིན་དགོས་ཏེ། སྔ་མ་ནི་འདུས་བྱས་དང་། ཕྱི་མ་ནི་འདུས་མ་བྱས་ཁོ་ན་ཡིན་པའི་ཕྱིར་རོ། །དབུ་མ་པའི་ལུགས་ལ་རང་བཞིན་གནས་རིགས་ཡིན་ན། ཆོས་དབྱིངས་ཡིན་དགོས་ཏེ། སྒྲུབ་བྱེད་སྔར་བསྟན་ཟིན་ཅིང་། བསྟན་བཅོས་རྩ་བར་ཡང་སྒྲུབ་པའི་རྟེན་ཆོས་དབྱིངས་ཉིད་ལ་རིགས་ཞེས་བརྗོད་པའི་ཕྱིར་དང་། འགྲེལ་པ་དག་ལས་ཀྱང་འདི་ཁོ་ན་བཞིན་འབྱུང་བའི་ཕྱིར་དང་། འཕགས་མཆོག་ཀླུ་སྒྲུབ་ཀྱིས་ཀྱང་འདི་ཁོ་ན་གསུངས་པའི་ཕྱིར་རོ། །གསུམ་པ་དབྱེ་བ་ལ་གནས་སྐབས་ཀྱི་སྒོ་ནས་དབྱེ་བ། ངོ་བོའི་སྒོ་ནས་དབྱེ་བ། རྟེན་ཆོས་སྒྲུབ་པའི་སྒོ་ནས་དབྱེ་བ་དང་གསུམ་ལས། དང་པོ་ལ། གནས་སྐབས་ལ་ལྟོས་ནས་རིགས་མ་ངེས་པ་དང་། ངེས་པ་གཉིས། ཕྱི་མ་ལ་ཡང་གནས་སྐབས་ཉན་ཐོས། རང་རྒྱལ་ཐེག་ཆེན་དུ་རིགས་ངེས་པ་གསུམ་ཡོད་ཀྱང་མཐར་ཐུག་ལ་ལྟོས་ནས་རིགས་ངེས་པ་དང་མ་ངེས་པའི་དབྱེ་བ་མེད་ཅིང་། ཉན་ཐོས་དང་རང་རྒྱལ་དུ་རིགས་ངེས་པ་ཡང་མེད་དེ། རིགས་ཡིན་ན་མཐར་ཐུག་སངས་རྒྱས་སུ་ངེས་པས་ཁྱབ་པའི་ཕྱིར་རོ། །གནས་སྐབས་ཉན་ཐོས་དང་། རང་རྒྱལ་གྱི་རིགས་ཡིན་པས། ཉན་ཐོས་དང་རང་རྒྱལ་གྱི་རིགས་ཡིན་པའི་གོ་ཆོད་ཀྱང་གནས་སྐབས་ཉན་ཐོས་དང་རང་རྒྱལ་དུ་རིགས་ངེས་པས་དེ་དང་དེར་རིགས་ངེས་པར་ནི་འཇོག་མི་ནུས་ཏེ། ཉན་ཐོས་དང་རང་རྒྱལ་གྱི་རིགས་ཡིན་པ་ཙམ་ནི་ཉན་ཐོས་དང་རང་རྒྱལ་གྱི་སྒྲུབ་པའི་རྟེན་གཞི་བྱེད་པའི་ཆ་ནས་འཇོག་པ་ཡིན་ཅིང་། དེ་དང་དེར་རིགས་ངེས་པ་ཡིན་ན། རྐྱེན་དབང་གིས་ཐེག་པ་གཞན་དུ་བསྒྱུར་དུ་མི་རུང་དགོས་པའི་ཕྱིར་རོ། །མདོར་ན་མཐར་ཐུག་ཐེག་པ་གསུམ་དུ་འདོད་པ་དག་གིས་མཐར་ཐུག་ལ་ལྟོས་ནས་རིགས་ངེས་པ་དང་། མ་ངེས་པ་གཉིས་རིགས་ངེས་པ་ལ་ཡང་མཐར་ཐུག་ཉན་ཐོས་རང་རྒྱལ་ཐེག་ཆེན་དུ་རིགས་ངེས་པ་གསུམ་དུ་འདོད་ཅིང་། མཐར་ཐུག་ཐེག་པ་གཅིག་ཏུ་འདོད་པས་ནི་མཐར་ཐུག་ལ་ལྟོས་ནས་དེ་འདྲའི་དབྱེ་བ་མི་འདོད་པ་ནི་གྲུབ་མཐའ་གོང་འོག་གི་གནད་དུ་ཤེས་པར་བྱའོ། །གཉིས་པ་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་ལས། དང་པོའི་མཚན་ཉིད། དྲི་མས་རྣམ་པར་དག་པ་ན་ངོ་བོ་ཉིད་སྐུར་འགྱུར་རུང་གི་དྲི་མ་ལས་མ་གྲོལ་བའི་ཆོས་དབྱིངས་སོ། །གཉིས་པའི་མཚན་ཉིད་ཐེག་ཆེན་གྱི་ཐར་ལམ་གྱིས་བསྡུས་པའི་དྲི་མ་ལས་མ་གྲོལ་བའི་དགེ་རྩ་གང་ཞིག དྲི་མས་རྣམ་པར་དག་པ་ན་ཡེ་ཤེས་གསུམ་མམ་གཟུགས་སྐུ་གཉིས་སུ་འགྱུར་དུ་རུང་བ་སྟེ་གནད་གཅིག་གོ །ཐེག་དམན་གྱི་ཐར་ལམ་ནི་རྒྱས་འགྱུར་གྱི་རིགས་མ་ཡིན་ཏེ། འདི་ལ་ལུང་དང་རིགས་པ་གཉིས་ལས། དང་པོ་ནི་རྒྱུད་བླར། ཡང་དག་བླངས་པ་མཆོག་ཡིན་ནོ། །ཞེས་གསུངས་སོ། །གཉིས་པ་ནི་རྒྱས་འགྱུར་གྱི་རིགས་སུ་འཇོག་པ་ལ་རིགས་སད་པའི་སྟོབས་ཀྱིས་རིགས་ཀྱི་ནུས་པ་བརྟས་པ་དགོས་པ་གང་ཞིག་ཐེག་དམན་གྱི་ལམ་རྒྱུད་ལ་སྐྱེས་ཀྱང་རིགས་སད་པ་མ་ཡིན་ཏེ། མདོ་སྡེ་རྒྱན་དུ། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དང་། དབུ་མ་འཇུག་པར་ཡང་དེ་དང་འདྲ་བར་གསུངས་པའི་ཕྱིར་རོ། །རྒྱས་འགྱུར་གྱི་རིགས་ལ། རིགས་པ་དྲུག་ཅུ་པ་ནས་གསུངས་པ་ལྟར་གྱི་ཚོགས་གཉིས་གང་རུང་ཡིན་དགོས་པ་ལས། ཉན་ཐོས་ལ་དེ་ལྟ་བུའི་ཚོགས་གཉིས་མེད་པས་ཀྱང་གྲུབ་བོ། །མདོ་འགའ་ཞིག་དང་། མདོ་སྡེ་རྒྱན་ལ་སོགས་པ་རྣམས་ལས། ཉན་ཐོས་ཀྱི་བྱང་ཆུབ་ཏུ་ཞུགས་པ་དེ་དང་པོ་ཉིད་ནས་ཐེག་ཆེན་གྱི་ལམ་དུ་ཞུགས་པ་ལས་ལམ་ཡུན་རིང་དུ་འགོར་བར་བཤད་པས་ཀྱང་གྲུབ་སྟེ། རྒྱས་འགྱུར་གྱི་རིགས་ཡིན་ན་ལམ་དུ་མ་ཞུགས་པའི་གང་ཟག་ལ་ལྟོས་ཏེ་ལམ་ཡུན་རིང་དུ་འགོར་བའི་དོན་མེད་པའི་ཕྱིར་རོ། །མདོར་ན་རྒྱས་འགྱུར་གྱི་རིགས་ཡིན་ན། ཐེག་པ་གཞན་ལ་མ་ཞུགས་པར་རང་གི་ཐེག་པ་དེ་ཉིད་ཀྱི་ནུས་པ་མཐར་ཐུག་སྒྲུབ་ནུས་པ་ནི་གནད་ཀྱི་དོན་ནོ། །གསུམ་པ་ལ་གཞུང་འདིར་བཤད་པ་ནི་སྒྲུབ་པ་བཅུ་གསུམ་གྱི་རྟེན་དུ་གྱུར་པའི་རིགས་བཅུ་གསུམ་མོ། །འགྲེལ་པ་ཆེ་ཆུང་ལྟར་ན། ཐེག་པ་གསུམ་གྱི་སྒྲུབ་པའི་རྟེན་དུ་གྱུར་པའི་རིགས་གསུམ་དུ་ཡང་དབྱེར་ཡོད་དོ། །བཞི་པ་སྒྲུབ་པའི་རྟེན་དུ་འཇོག་པའི་ཚུལ་ལ། ཉིར་སྣང་དུ། དེས་ན་འདིས་ནི་ཆོས་ཀྱི་དབྱིངས་ཉིད། འཕགས་འི་ཆོས་རྣམས་ཀྱི་རྒྱུ་ཡིན་པའི་ཕྱིར། རང་བཞིན་དུ་གནས་པའི་རིགས་སྒྲུབ་པའི་རྟེན་ཡིན་ནོ་ཞེས་སྟོན་པར་བྱེད་དོ། །ཅེས་གསུངས་པ་ལ། འདིའི་དོན་ནི་སེམས་ཀྱི་དབྱིངས་དེ་དགེ་རྩས་སད་པའི་ཚེ། འཁོར་བ་སྤོང་འདོད་དང་། རང་བཞིན་གྱིས་མྱ་ངན་ལས་འདས་པ་སྤྲོས་བྲལ་རྟོགས་པར་འདོད་པའི་བློ་སྐྱེ་བ་ནི་སེམས་རང་གི་གནས་ཚུལ་སྙེགས་པར་འདོད་པའི་བློ་སྐྱེས་པ་ཡིན་ལ། དེ་ལས་སྒྲུབ་པ་ལ་འཇུག་པར་འབྱུང་ཞིང་དེ་ལས་སེམས་རང་གི་གནས་ཚུལ་ཕྱིན་ཅི་མ་ལོག་པར་རྟོགས་པའི་ཚེ། འཁོར་བ་སྤོང་འདོད་དང་། རང་བཞིན་གྱིས་མྱ་ངན་ལས་འདས་པ་སྤྲོས་བྲལ་རྟོགས་པར་འདོད་པའི་བློ་སྐྱེ་ཞིང་དེ་ལས་འཕགས་པའི་ཆོས་རྣམས་འབྱུང་ཞེས་པའི་དོན་ནོ། །བོད་ཁ་ཅིག་དག་པར་བྱ་བའི་དོན་ཡོན་ཏན་དང་ལྡན་ན་དེ་དག་པར་བྱེད་པའི་སྒྲུབ་པ་འཐད་པའི་ཕྱིར་ན། སྒྲུབ་པའི་རྟེན་ཡིན་ནོ་ཞེས་པ་དང་། འབྲེས་སྒྲུབ་པའི་དམིགས་པ་ཡིན་པ་སྒྲུབ་པའི་རྟེན་དུ་བཤད་ཅེས་དང་། ཁ་ཅིག་སྒྲུབ་པའི་རྟེན་ནི་བྱང་ཆུབ་སེམས་དཔའ་ཡིན་ལ་དེ་སྐྱེ་མཆེད་དྲུག་ལ་གདགས། སྐྱེ་མཆེད་གཞན་ལྔ་ཡང་ཡིད་ཀྱི་སྐྱེ་མཆེད་ལ་བརྟེན་ཅིང་དེའི་རྩ་བ་ཡང་ཆོས་དབྱིངས་ཡིན་པས་ཆོས་དབྱིངས་སྒྲུབ་པའི་རྟེན་དུ་འཇོག་པར་བཞེད་པ་རྣམས་ནི་ཕྱོགས་རེ་ལ་བསམ་ན་འགལ་བ་མེད་མོད། ཞིབ་ཏུ་བྱས་ན་གཞིའི་དུས་སུ་འཁོར་བའི་ཆོས་ཐམས་ཅད་ཆོས་དབྱིངས་ལ་བརྟེན་པ་དང་། ལམ་གྱི་དུས་སུ་ལམ་གྱི་ཆོས་ཐམས་ཅད་ཆོས་དབྱིངས་ལ་བརྟེན་པ་དང་། འབྲས་བུའི་དུས་སུ་འབྲས་བུའི་ཆོས་ཐམས་ཅད་ཆོས་དབྱིངས་ལ་བརྟེན་དགོས་པར་གཞན་དུ་བཤད་ཟིན་པ་ལས་ཤེས་སོ། །ལྔ་པ་རིགས་སུ་འཇོག་པའི་ཚུལ་ལ་རྟེན་གྱི་སྒོ་ནས་རིགས་སུ་འཇོག་པ་དང་། དམིགས་པའི་སྒོ་ནས་རིགས་སུ་འཇོག་པའི་ཚུལ་གཉིས་སུ་གསུངས་པ་རྣམས་ཀྱང་། རིགས་ཀྱི་དོན་ནི་རྒྱུའི་དོན་ཡིན་པས། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་གསུངས་པ་འདི་ཉིད་རིགས་སུ་འཇོག་པའི་ཚུལ་ཡིན་པས་གནད་ངོས་ཟིན་པ་ཤིན་ཏུ་གཅེས་སོ། །སྒྲུབ་པའི་རྟེན་བསྟན་ཟིན་ནས་དེའི་འོག་ཏུ་སྒྲུབ་པའི་དམིགས་པ་འཆད་དེ། རིགས་སད་པའི་གང་ཟག་གིས་དམིགས་པ་ལ་སྒྲོ་འདོགས་བཅད་ནས་སྒྲུབ་པ་ཉམས་སུ་ལེན་དགོས་པའི་ཕྱིར་རོ། །འདི་ལ་རང་ལུགས་ཀྱི་དམིགས་པ་ངོས་གཟུང་བ་དང་། གཞན་ལུགས་ཀྱི་དམིགས་པ་དགག་པ་གཉིས་ལས། དང་པོ་ནི། དམིགས་པ་ཆོས་རྣམས་ཐམས་ཅད་དེ། །ཅེས་སོགས་ཚིགས་བཅད་གཉིས་ཏེ། འཕགས་པ་ལྟར་ན་དང་པོ་གཉིས་ཀྱིས་མདོར་བསྟན་ནས། ལྷག་མ་རྣམས་ཀྱིས་རྒྱས་པར་བཤད། སློབ་དཔོན་ལྟར་ན། དང་པོས་མདོར་བསྟན། གཉིས་པས་ཅུང་ཟད་བཤད། ལྷག་མ་རྣམས་ཀྱིས་རྒྱས་པར་བཤད་པའོ། །འདི་ལ་བཞི་སྟེ། རབ་ཏུ་དབྱེ་བ། ཚུལ་ཇི་ལྟར་ངེས་པ། གྲངས་ངེས་པ། གོ་རིམ་ངེས་པའོ། །དང་པོ་ལ། ལམ་གྱི་དབང་དུ་བྱས་པ་དང་། སྤང་གཉེན་གྱི་དབང་དུ་བྱས་པ་དང་། བདེན་གཉིས་ཀྱི་དབང་དུ་བྱས་པ་དང་། འབྲས་བུའི་དབང་དུ་བྱས་པ་རྣམས་ནི་ཚིག་རྐང་པ་གཉིས་དང་། གཅིག་དང་། ཡང་གཅིག་དང་། ཡང་གཉིས་ཀྱིས་རིམ་པ་བཞིན་དུ་བསྟན་ཏོ། །འདི་ལ་ཟངས་ལོ་ན་རེ། དགེ་སོགས་གསུམ་ནི་ཚོགས་ལམ་གྱི་དམིགས་པ། འཇིག་རྟེན་པ་དང་། དེ་ལས་འདས་པ་གཉིས་ནི་སྦྱོར་ལམ་གྱི། ཟག་བཅས་ཟག་མེད་ནི་མཐོང་ལམ་གྱི། འདུས་བྱས་འདུས་མ་བྱས་ནི་སྒོམ་ལམ་གྱི། ཐུན་མོང་དང་ཐུན་མོང་མ་ཡིན་པ་གཉིས་ནི་མི་སློབ་ལམ་གྱི་དམིགས་པ་ཡིན་ནོ། །ཞེས་ཟེར་བ་ནི་ལུང་རིགས་ཀྱི་ཤེས་བྱེད་མེད་ཅིང་། མི་སློབ་ལམ་ན་སྒྲུབ་པ་མེད་པས། དེའི་དམིགས་པ་འཇོག་པ་ཡང་མི་འཐད་དོ། །དེས་ན་ཆོས་ཐམས་ཅད་དགེ་མི་དགེ་ལུང་མ་བསྟན་གསུམ་དུ་བསྡུས་ནས་དེ་དག་གི་རྣམ་གྲངས་ལ་འཇིག་རྟེན་ལས་འདས་མ་འདས་ལ་སོགས་པར་སྒྲོ་འདོགས་གཅོད་པ་ཡིན་ཏེ། གཙོ་བོར་ནི་ཚོགས་ལམ་དུ་ཐོས་བསམ་གྱིས་གཏན་ལ་ཕབ་པ་དང་། སྦྱོར་ལམ་དུ་འཇིག་རྟེན་པའི་སྒོམ་བྱུང་གིས་བསྒོམ་པའི་དམིགས་པ་ཡིན་ཏེ། ཁ་ཅིག་ཏུ་ནི་རྒྱུའི་སྒོ་ནས་ཞེས་སོགས་དང་མཐུན་ནོ། །གཉིས་པ་ནི་བྱང་སེམས་ཆེན་པོས་ཆོས་ཐམས་ཅད་རྟོགས་པར་བྱའོ། །ཆོས་ཐམས་ཅད་ཀྱི་ཡོད་པར་མ་གྱུར་པ་ཉིད་ལ་བསླབ་པར་བྱའོ། །ཞེས་གསུངས་པས་ན། ཀུན་རྫོབ་ཀྱི་བདེན་པ་ལ་བརྟེན་ནས་ཆོས་ཁ་ཅིག་ནི་བླང་བྱ། ཁ་ཅིག་ནི་དོར་བྱ། ཁ་ཅིག་ནི་རྒྱུད་ལ་བསྐྱེད་པར་བྱ་བ། ཁ་ཅིག་ནི་ཐོབ་པར་བྱ་བ་ལ་སོགས་པར་དེ་དག་གི་མཚན་ཉིད་ཇི་ལྟར་གནས་པ་བཞིན་རྟོགས་པར་བྱེད་ལ། དོན་དམ་པའི་བདེན་པ་ལ་བརྟེན་ནས་དེ་ཐམས་ཅད་ངོ་བོ་ཉིད་མེད་པར་རྟོགས་པར་བྱེད་པའི་ཚུལ་གྱིས་དམིགས་སོ། །གསུམ་པ་ནི་སྒྲོ་འདོགས་གཅད་པར་བྱ་བའི་གཞི་ཐམས་ཅད་ནི་འདིར་འདུས་པས་འདི་ལས་མང་བ་མི་དགོས་ལ། འདི་ལས་གང་རུང་ཞིག་མ་ཚང་ན་ཡང་སྒྲོ་འདོགས་གཅོད་ཚུལ་མ་འདུས་པར་འགྱུར་བས་འདི་ལས་ཉུང་བ་ཡང་མ་ཡིན་པས་ན་བཅུ་གཅིག་ཏུ་གྲངས་ངེས་སོ། །བཞི་པ་ནི། རང་གི་ངོ་བོའི་སྒོ་ནས་གོ་རིམ་རྣམ་པར་གཞག་པ་མེད་ཀྱང་། རྟོགས་བྱེད་ཀྱི་བློ་ལ་ལྟོས་ནས་གོ་རིམ་ངེས་པ་ཡོད་དེ། བྱང་ཆུབ་ཏུ་སེམས་བསྐྱེད་པའི་གང་ཟག་གིས་བདག་གིས་ཆོས་ཐམས་ཅད་ལ་བསླབ་དགོས་ན་བླང་བར་བྱ་བ་ནི་གང་། དོར་བྱ་ནི་གང་། རེ་ཞིག་བཏང་སྙོམས་སུ་གཞག་བྱ་ནི་གང་སྙམ་པའི་བློ་སྐྱེ་བས་དེ་ལ་ལྟོས་ནས་དགེ་མི་དགེ་ལུང་མ་བསྟན་གསུམ་པོ་རིམ་པ་བཞིན་གཞག་གོ །དེ་ནས་མི་དགེ་བ་དང་ལུང་མ་བསྟན་བཏང་སྙོམས་སུ་བཞག་སྟེ། དགེ་བ་ཉིད་ལ་ཡང་དང་པོར་བླང་བར་བྱ་བ་དང་། ཕྱིས་བླང་བར་བྱ་བ་གང་སྙམ་པའི་བློ་ལ་ལྟོས་ནས་འཇིག་རྟེན་པ་ཞི་རགས་ཀྱི་རྣམ་པ་ཅན་དང་། འཇིག་རྟེན་ལས་འདས་པ་བདེན་པའི་རྣམ་པ་ཅན་གཉིས་གཞག་གོ །དེ་ནས་ཡང་འཇིག་རྟེན་པ་བཏང་སྙོམས་སུ་བཞག་སྟེ། འཇིག་རྟེན་ལས་འདས་པའི་སྤང་བྱ་ནི་གང་། གཉེན་པོ་ནི་གང་ཡིན་སྙམ་པའི་བློ་སྐྱེ་བས། དེ་ལ་ལྟོས་ནས་ཟག་པ་དང་བཅས་པ་སྤང་བྱ་དང་། ཟག་པ་མེད་པ་གཉེན་པོ་ཉིད་དུ་གཞག་གོ །དེ་ནས་ཡང་ཟག་བཅས་བཏང་སྙོམས་སུ་བཞག་སྟེ། ཟག་མེད་ཀྱིས་རྟོགས་པར་བྱ་བའི་ཡུལ་དེ་གང་ཡིན་སྙམ་པའི་བློ་སྐྱེ་བས་དེ་ལ་ལྟོས་ནས་འདུས་བྱས་ཀུན་རྫོབ་ཀྱི་བདེན་པ་དང་། འདུས་མ་བྱས་དོན་དམ་པའི་བདེན་པ་གཉིས་བཞག་གོ །དེ་ནས་ཡང་འདུས་བྱས་བཏང་སྙོམས་སུ་བཞག་སྟེ། འདུས་མ་བྱས་རྟོགས་པའི་འབྲས་བུ་གང་ཡིན་སྙམ་པའི་བློ་སྐྱེ་བས་དེ་ལ་ལྟོས་ནས་དེའི་འབྲས་བུ་སློབ་མ་དང་ཐུན་མོང་བ་དང་། ཐུན་མོང་མ་ཡིན་པ་གཉིས་བཞག་སྟེ། འཕགས་པའི་གང་ཟག་ཐམས་ཅད་ནི་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གསུངས་པ་དང་ཤིན་ཏུ་མཐུན་ནོ། །སྔ་མ་སྔ་མ་བཏང་སྙོམས་སུ་བཞག་པ་ནི་གནས་སྐབས་དེ་དང་དེ་ནས་སྒྲོ་འདོགས་གཅོད་པའི་བྱ་བ་རྫོགས་པའོ། །གཉིས་པ་གཞན་གྱི་དམིགས་པ་དགག་པ་ནི། ཉིར་སྣང་ལས། གང་དག་ཆོས་ཀྱི་དབྱིངས་ཉིད་དམིགས་པ་ཡིན་ནོ་སྙམ་དུ་སེམས་པ་དེ་དག་གིས་དམིགས་པ་དག་པ་གོང་ནས་གོང་དུ་ཁྱད་པར་འགྲོ་བ་ཞེས་བྱ་བ་ཇི་ལྟར་ཡིན་བརྗོད་དགོས་སོ། །ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །ཅེས་བྱ་བ་ཡིན་ནོ་ཞེ་ན། དེ་ལྟར་ན་ནི་འོ་ན་མི་མཐུན་པ་དང་གཉེན་པོའི་ཕྱོགས་ཀྱི་རྣམ་པར་རྟོག་པ་སྤང་བ་མེད་པས་དག་པ་ཕྱོགས་གཅིག་པར་ཐལ་བར་འགྱུར་རོ། །རབ་འབྱོར་རྣམ་པ་ཐམས་ཅད་མཁྱེན་པ་ཉིད་ལ་ནི་དམིགས་པ་མེད་དོ་ཅེས་པ་འབྱུང་བས་ཁྱེད་ཀྱི་ཕྱོགས་ལ་ཡང་དམིགས་པ་དག་པ་མཐར་ཐུག་པར་མི་འགྱུར་བ་མ་ཡིན་ནམ་ཅི་ཕྱིར་ཞེ་ན་ཆོས་ཐམས་ཅད་འཁྲུལ་པ་ཙམ་ཉིད་ཡིན་པའི་ཕྱིར་ཏེ། རབ་འབྱོར་གཉིས་ནི་དངོས་པོའོ་གཉིས་སུ་མེད་པ་ནི་དངོས་པོ་མེད་པའོ། །ཞེས་འཆད་པར་འགྱུར་ལ་གཉིས་ཀྱང་འཁྲུལ་པ་ལས་གཞན་ཅི་ཞིག་ཡིན་པར་འགྱུར་ཞེ་ན། མངོན་པར་ཞེན་པ་ནི་གཉིས་ཀྱི་མཚན་ཉིད་ཡིན་གྱི་འཁྲུལ་པ་ནི་མ་ཡིན་ཏེ། དེ་ལ་ནི་གཟུང་བ་དང་འཛིན་པའི་རང་བཞིན་དུ་མི་བརྗོད་པའི་ཕྱིར་རོ། །དེས་ན་འདི་ལ་ཁྱོད་འཁྲུལ་པར་ཟད་དོ། །དེ་ལྟར་བྱས་ན་རང་བཞིན་གཙོ་བོར་གྱུར་པ་ནི་རིགས་ཡིན་ལ། རྣམ་འགྱུར་གཙོ་བོར་གྱུར་པ་ནི་དམིགས་པ་ཡིན་ནོ། །གཉིས་ཀ་ཡང་གཉིས་ཀར་མ་བཀག་པ་དེས་ན་རྟེན་དང་དམིགས་པ་དག་གི་མཚན་ཉིད་ཀྱི་དབྱེ་བ་དང་། དམིགས་པ་དག་པའི་མཐར་ཐུག་པར་འགྲོ་བ་ཡང་འཐད་པར་འགྱུར་རོ། །དེ་ཉིད་ཀྱི་ཕྱིར་རབ་འབྱོར་བྱང་ཆུབ་སེམས་དཔས་ཆོས་ཐམས་ཅད་ཀྱི་མ་ཆགས་པ་ཉིད་དང་། ཡོད་པར་གྱུར་པ་མ་ཡིན་པ་ཉིད་ལ་བསླབ་པར་བྱའོ། །ཞེས་གསུངས་སོ། །དོན་གང་ཡིན་ཞེ་ན་རང་བཞིན་དང་རྗེས་སུ་འབྲེལ་བའི་རྣམ་འགྱུར་ནི་དམིགས་པ་ཡིན་གྱི་རྣམ་པར་འགྱུར་བ་ཙམ་ནི་མ་ཡིན་ནོ་ཞེས་བྱ་བ་ཡིན་ནོ། །ཞེས་གསུངས་པ་དེ་དག་གི་དོན་རོང་སྟོན་དམ་པའི་ཊཱི་ཀ་ལས་ཞིབ་ཏུ་བཀོད་པ་བཞིན་ཤེས་པར་བྱ་སྟེ་འདིར་ནི་མ་སྤྲོས་སོ། །སྒྲུབ་པའི་དམིགས་པ་བསྟན་ཟིན་ནས་དེའི་འོག་ཏུ་སྒྲུབ་པའི་ཆེད་དུ་བྱ་བ་སྟོན་ཏེ། དམིགས་པ་ལ་སྒྲོ་འདོགས་ཆོད་པའི་སྒྲུབ་པ་དེ་ཡང་ཆེད་དུ་བྱ་བ་ཆེན་པོ་གསུམ་གྱིས་ཆེད་དུ་འབད་དགོས་པའི་ཕྱིར་རོ། །འདི་ལ་ཆེད་དུ་བྱེད་པ་པོ་དང་། ཆེད་དུ་བྱ་བ་གཉིས་ལས་དང་པོ་ནི་རང་བྱུང་གི་ཞེས་པ་སྟེ། རང་བྱུང་དངོས་ནི་སངས་རྒྱས་ཡིན་ལ། འདིར་ནི་དེའི་མིང་གིས་བཏགས་པའི་བྱང་ཆུབ་སེམས་དཔའ་འོ། །འདོགས་པའི་རྒྱུ་མཚན་ནི་མདོ་ལས་བྱང་སེམས་ཆེན་པོ་ཞེས་གང་བརྗོད་པ་ཅིའི་སླད་དུ་བྱང་སེམས་ཆེན་པོ་ཞེས་བགྱི། རབ་འབྱོར་འདི་ལ་སེམས་ཅན་གྱི་ཕུང་པོ་ཆེན་པོ་དང་། སེམས་ཅན་གྱི་སྡེ་ཆེན་པོའི་མཆོག་ཏུ་འགྱུར་བ་དེའི་ཕྱིར་བྱང་ཆུབ་སེམས་དཔའ་ཆེན་པོ་ཞེས་བྱའོ། །ཞེས་རང་བྱུང་དུ་འགྱུར་བའི་ཕྱིར་ན་རང་བྱུང་གི་མིང་གིས་བཏགས་པའོ། །གཉིས་པ་ལ་གསུམ་ལས། དང་པོ་སེམས་ཆེན་པོ་ནི། སེམས་ཅན་ཀུན་མཆོག་ཉིད་སེམས་དང་། །ཞེས་ཏེ། སྔར་གྱི་མདོ་དེ་ཉིད་ལ་སེམས་ཅན་གྱི་ཕུང་པོ་ནི་འགྲོ་བ་རིགས་ལྔས་བསྡུས་པའི་སེམས་ཅན་ནམ། ཡང་ན་ཚོགས་ཆེན་པོ་སྟེ་སྤྱིར་བསྟན་པའོ། །སེམས་ཅན་གྱི་སྡེ་ཆེན་པོ་ནི། འཕགས་པ་གསུམ་གྱིས་བསྡུས་པའི་སེམས་ཅན་བརྒྱད་པ་ལ་སོགས་པ་ནས་ཕྱིར་མི་བཟློག་པའི་བྱང་སེམས་ཀྱི་བར་རོ། །དེ་དག་ནི་འདིར་སེམས་ཅན་ཀུན་ཅེས་པར་བསྡུས་ལ་མཆོག་ནི་དེ་ཐམས་ཅད་ཀྱི་ནང་ནས་དམ་པར་གྱུར་པ་སྟེ་རྫོགས་པའི་སངས་རྒྱས་སྐུ་གསུམ་མོ། །འདི་དག་ནི་ཆེན་པོ་གསུམ་ལ་སྦྱར་བར་བྱ་སྟེ། དེ་ལྟར་དུ་བྱེད་པའི་སེམས་དང་། སྤོང་བ་དང་། རྟོགས་པ་གསུམ་པོ་ལ་ཆེན་པོ་གསུམ་དུ་འཇོག་པའི་ཕྱིར་རོ། །འོ་ན་སེམས་ཇི་ལྟ་བུ་ཞེ་ན་རྡོ་རྗེ་ལྟ་བུའི་སེམས་བསྐྱེད་དང་། རླབས་པོ་ཆེའི་སེམས་དང་། མི་བསྒུལ་བའི་སེམས་དང་། ཕན་བདེའི་སེམས་དང་། ཆོས་ལ་དགའ་བ་དང་། ཀུན་དགའ་བ་དང་། ཀུན་དགའ་བའི་རྣལ་འབྱོར་ལ་བརྩོན་པའི་སེམས་ནམ་མཁའ་ལྟར་ཆགས་པ་མེད་པས་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་གྱི་བར་ཐམས་ཅད་ལ་མི་དམིགས་པའི་ཚུལ་གྱིས་གནས་ནས་སེམས་ཅན་གྱི་མཆོག་ཉིད་དུ་བྱེད་པ་སྟེ། རྒྱུའི་དུས་སུ་སེམས་དེ་དག་བསྐྱེད་ནས་འབྲས་བུའི་དུས་སུ་མངོན་དུ་གྱུར་པའོ། །གཉིས་པ་སྤོང་བ་ཆེན་པོ་ལ་བཅོམ་ལྡན་འདས་བདག་ཏུ་ལྟ་བ་དང་། སེམས་ཅན་དང་། སྲོག་དང་། སྐྱེ་བ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བདག་དང་། བྱེད་པ་པོ་དང་། ཚོར་བ་པོ་དང་། ཤེས་པ་པོ་དང་། མཐོང་བ་པོར་ལྟ་བ་དང་། ཆད་པ་དང་། རྟག་པར་ལྟ་བ་དང་། ཡོད་པ་དང་། མེད་པར་ལྟ་བ་དང་། ཕུང་པོར་ལྟ་བ་ནས་རྟེན་ཅིང་འབྲེལ་བར་འབྱུང་བར་ལྟ་བའི་བར་དང་། ཕ་རོལ་ཏུ་ཕྱིན་པ་ལྟ་བ་ནས་ཆོས་ཀྱི་འཁོར་ལོ་བསྐོར་བར་ལྟ་བའི་བར་རྣམས་ཏེ་ལྟ་བ་འདི་དག་རབ་ཏུ་སྤོང་བའི་སླད་དུ་སེམས་ཅན་རྣམས་ལ་ཆོས་སྟོན་པར་བགྱིད་ཀྱང་དེ་མི་དམིགས་པའི་ཚུལ་གྱིས་བགྱིད་དེ། དེའི་སླད་དུ་བྱང་སེམས་ཆེན་པོ་ཞེས་བགྱིའོ་ཞེས་གསུངས་སོ། །དེ་ལ་ལྟ་བ་དང་པོ་བཅུ་གཉིས་ལ་ནི་འཇིགས་ཚོགས་ལ་ལྟ་བ། ཆད་པ་དང་རྟག་པར་ལྟ་བ་ནི་མཐར་འཛིན་ལྟ་བ། ཡོད་པ་དང་མེད་པར་ལྟ་བ་ནི་ལོག་ལྟ་སྟེ་སོ་སྐྱེ་དང་ཐུན་མོང་བ་དང་། ཕུང་པོར་ལྟ་བ་ནས་རྟེན་འབྲེལ་དུ་ལྟ་བའི་བར་ནི་ཉན་རང་དང་ཐུན་མོང་བ། ལྷག་མ་རྣམས་ནི་བྱང་སེམས་ལས་དང་པོ་པ་དང་ཐུན་མོང་བ་སྟེ་གཉེན་པོའི་ཚོགས་སྒྲུབ་ཀྱི་སྐབས་སུ་འཆད་པར་འགྱུར་བའི་གཟུང་འཛིན་གྱི་རྣམ་པར་རྟོག་པ་བརྒྱད་ཀྱིས་བསྡུས་པའོ། །ལྟ་བ་འདི་དག་སྤོང་བའི་ཆེད་དུ་སྒྲུབ་པ་ཉམས་སུ་བླངས་པས་མ་ལུས་པར་སྤངས་པ་ནི་སྤོང་བ་ཆེན་པོའོ། །གསུམ་པ་རྟོགས་པ་ཆེན་པོ་ནི་བརྒྱད་སྟོང་པར་བཅོམ་ལྡན་འདས་བྱང་ཆུབ་ཀྱི་སེམས། ཐམས་ཅད་མཁྱེན་པའི་སེམས། ཟག་པ་མེད་པའི་སེམས། མཉམ་པ་མེད་པའི་སེམས། མི་མཉམ་པ་དང་མཉམ་པའི་སེམས། ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་པའི་སེམས་གང་ལགས་པ་དེ་ལ་ཡང་རང་དོན་དུ་མ་ཆགས་ཤིང་མ་ཞེན་ཏེ། དེའི་ཕྱིར་བྱང་སེམས་ཆེན་པོ་ཞེས་བགྱི་བའི་གྲངས་སུ་མཆིའོ། །ཞེས་གསུངས་ཤིང་། འགྲེལ་ཆེན་དུ། སྤྱིར་བསྟེན་ཞེས་གསུངས་ཏེ་དབྱིངས་ཀྱི་དོན་དུ་འདུག་གོ །བར་པ་བཞི་ནི་ཡེ་ཤེས་བཞི་དང་སྦྱར་ནས་ཐ་མ་ནི་ཐམས་ཅད་ཀྱི་ཐུན་མོང་བར་འཆད་དོ། །དེ་ལྟར་ན་སངས་རྒྱས་ཀྱི་ས་ཡེ་ཤེས་བཞི་ནི་རྟོགས་པ་ཆེན་པོའོ། །རྟོགས་པ་ཆེན་པོའི་རྒྱུའི་དབང་དུ་བྱས་ན་དང་པོ་ནི་ཚོགས་ལམ་གྱི་སེམས་བསྐྱེད། བར་པ་བཞི་ནི་མོས་པས་སྤྱོད་པ་དང་། ལྷག་བསམ་དག་པ་དང་། སྒྲིབ་པ་སྤོང་བ་དང་། རྣམ་པར་སྨིན་པའི་སེམས་བསྐྱེད། ཐ་མ་ནི་ཐམས་ཅད་ཀྱི་ཐུན་མོང་བའོ། །ཞེས་སྔ་རབས་པ་འགའ་ཞིག་བཞེད་པ་ནི་རྒྱུའི་དུས་སུ་དེ་ལྟར་ཉམས་སུ་བླངས་པས་འབྲས་བུའི་དུས་སུ་རྟོགས་པ་ཆེན་པོ་མངོན་དུ་འགྱུར་ཞེས་སྦྱར་ན་སྔ་མ་གཉིས་དང་འགྲིག་གོ །སྒྲུབ་པའི་ཆེད་དུ་བྱ་བ་བསྟན་ཟིན་ནས་སྒྲུབ་པ་རང་གི་ངོ་བོ་སྟོན་ཏེ། ཆེད་དུ་བྱ་བ་དེ་ཡང་སྒྲུབ་པ་རང་གི་ངོ་བོས་བསྒྲུབ་དགོས་པའི་ཕྱིར་རོ། །འདི་ཡང་ཡུལ་གྱི་སྒྲུབ་པ་དང་མངོན་རྟོགས་ཀྱི་སྒྲུབ་པའི་ཁྱད་པར། སྒྲུབ་པ་བཞིའི་ས་མཚམས། སྒྲུབ་པ་བཞིའི་གྲངས་དང་གོ་རིམ་ངེས་པ། སོ་སོའི་དོན་ལ་འཇུག་པ་དང་བཞི་ལས། དང་པོ་ནི་ཐམས་ཅད་མཁྱེན་པ་ཉིད་གསུམ་གྱི་ཡུལ་ལ་ཞེས་སོགས་ཏེ། ཤེར་འབྱུང་བློ་གྲོས་ཀྱིས་སྤྱིའི་སྒྲུབ་པ་དང་། ཁྱད་པར་གྱི་སྒྲུབ་པ་ཞེས་པའི་ཐ་སྙད་བྱས་ནས་དེ་གཉིས་ཀྱི་ངོ་བོ་དཀར་པོའི་ཆོས་རྗེས་སུ་སྒྲུབ་པའི་རང་བཞིན་དང་། ཕ་རོལ་ཏུ་ཕྱིན་པ་དྲུག་རྗེས་སུ་སྒྲུབ་པའི་རང་བཞིན་དུ་འདོད་དོ། །གསེར་གླིང་པས་ཐམས་ཅད་མཁྱེན་པ་ཉིད་གསུམ་གྱི་ཡུལ་ནི་འཕགས་པའི་བདེན་པ་བཞི་ཡིན་ལ་སྤྱིར་དགེ་བའི་ཆོས་ནི་དེ་ཐམས་ཅད་ལ་ཁྱབ་པའི་ཆོས་དབྱིངས་ཡིན་ཞིང་། དེའི་རྟེན་ཅན་ནི་དེ་ལ་གནས་པའི་སྒྲུབ་པའོ། །རྣམ་པ་ཀུན་མངོན་པར་རྫོགས་པར་རྟོགས་པ་ལ་སོགས་པ་བཞི་པོ་རེ་རེའི་བསྒོམ་པར་བྱ་བའི་རྟགས་ལ་སོགས་པ་ཕ་རོལ་ཏུ་ཕྱིན་པ་དྲུག་གི་རྟེན་ཅན་ཏེ། བརྟེན་པ་སྦྱིན་པ་ལ་སོགས་པའི་བྱ་བ་ཉམས་སུ་ལེན་པ་ནི་སྒྲུབ་པ་ཡིན་ནོ། །ཆོས་སྐུ་ནི་འབྲས་བུ་ཡིན་པས་སྒྲུབ་པ་མ་བཤད་དོ། །ཞེས་བཤད། ཆོས་བཤེས་ཀྱིས་མཁྱེན་གསུམ་ཐོས་བསམ་གྱིས་ཤེས་པའི་དོན་གོམས་པའི་མཐུ་ཐོབ་པར་བྱ་བའི་ཕྱིར་དུ་སྤྱིར་དགེ་བའི་ཆོས་སྒོ་དུ་མ་ནས་སྤྱོད་པའི་སེམས་པའི་བྱ་བ་དེ་མཁྱེན་གསུམ་དང་འབྲེལ་བའི་སྒྲུབ་པ་ཡིན་ལ། མཁྱེན་གསུམ་ཐོས་བསམ་གྱིས་ཤེས་པའི་དོན་ལ་ཡུན་རིང་དུ་འདྲིས་པའི་མཐུས་དགེ་བ་སྒྲུབ་པ་ཇི་སྙེད་པ་ཕ་རོལ་ཏུ་ཕྱིན་པ་དྲུག་ལྡན་དུ་བསྒྲུབ་ནུས་པའི་སེམས་པའི་བྱ་བ་དེ་སྦྱོར་བཞི་དང་འབྲེལ་བའི་སྒྲུབ་པ་ཡིན་ཞིང་། སྔ་མ་ལ་གོ་སྒྲུབ་སོགས་བཞི་དང་། ཕྱི་མ་ལ་ཕར་ཕྱིན་དྲུག་གི་སྒྲུབ་པ་དྲུག་ཡོད་པར་བཞེད་དོ། །གནད་ཀྱི་དོན་ནི་འདི་ཡིན་ཏེ། ཐེག་ཆེན་གྱི་ཚོགས་ལམ་ཕལ་པའི་གནས་སྐབས་ཀྱི་སྒྲུབ་པ་དེ་ཆོས་ཅན། ཁྱོད་ལ་ཡུལ་གྱི་སྒྲུབ་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་སྤྱིར་དཀར་པོའི་ཆོས་ཀྱི་རྟེན་ཅན་དུ་གྱུར་པའི་བྱ་བ་ཙམ་ཡིན་པའི་སྒོ་ནས་སྒྲུབ་པར་འཇོག་པ་ཡིན་གྱི་ཕར་ཕྱིན་དྲུག་ལྡན་གྱི་མངོན་རྟོགས་ཉམས་སུ་ལེན་ཚུལ་ལ་མཁས་པས་ཐོགས་པ་མེད་པ་དང་། མངོན་ཞེན་བཀག་པས་འཛིན་པ་མེད་པ་དེ་མ་ཡིན་པའི་ཕྱིར་རོ། །དེ་སྐབས་གང་དུ་བསྟན་ན་ཐམས་ཅད་མཁྱེན་པ་ཉིད་གསུམ་གྱི་ཡུལ་སྐྱེ་མེད་གསུམ་གཏན་ལ་དབབ་པའི་གནས་སྐབས་སུ་བསྟན་ཏོ། །རྣམ་རྫོགས་སྦྱོར་བའི་སྐབས་ནས་བསྟན་པའི་ཐར་པ་ཆ་མཐུན་རྒྱུད་ལ་སྐྱེས་པ་ཡན་ཆད་ཀྱི་སྒྲུབ་པ་དེ་ཆོས་ཅན། ཁྱོད་ལ་མངོན་པར་རྟོགས་པའི་སྒྲུབ་པ་ཞེས་བརྗོད་དེ། མངོན་པར་རྟོགས་པ་རེ་རེ་ཞིང་ཕ་རོལ་ཏུ་ཕྱིན་པ་དྲུག་པོ་དག་གི་ཉམས་སུ་ལེན་ཚུལ་ལ་མཁས་པས་ཐོགས་པ་མེད་པ་དང་མངོན་ཞེན་བཀག་པས་འཛིན་པ་མེད་པའི་སྒྲུབ་པ་ཡིན་པའི་ཕྱིར་རོ། །དེ་སྐབས་གང་དུ་བསྟན་ན་རྣམ་པ་ཀུན་མངོན་པར་རྫོགས་པར་རྟོགས་པ་ལ་སོགས་པ་མངོན་པར་རྟོགས་པ་བཞིའི་གནས་སྐབས་སུ་བསྟན་ཏོ། །ཉིར་སྣང་དུ། དེ་ལ་ཐམས་ཅད་མཁྱེན་པ་ཉིད་གསུམ་གྱི་ཡུལ་ལ་ནི་སྤྱིར་དཀར་པོའི་ཆོས་ཀྱི་རྟེན་ཅན་གྱི་བྱ་བ་སྒྲུབ་པ་ཡིན་ལ། རྣམ་པ་ཐམས་ཅད་མངོན་པར་རྫོགས་པར་རྟོགས་པ་ལ་སོགས་པ་མངོན་པར་རྟོགས་པ་བཞི་ལ་ནི་མངོན་པར་རྟོགས་པ་སོགས་ལ་ཕ་རོལ་ཏུ་ཕྱིན་པ་དྲུག་པོ་དག་གིས་ཐོགས་པ་མེད་པ་དང་འཛིན་པ་མེད་པ་གང་ཡིན་པ་དེ་ནི་སྒྲུབ་པ་ཡིན་ནོ་ཞེས་བྱ་བའི་དོན་ནོ། །ཞེས་གསུངས་སོ། །དེ་དག་གི་དོན་ཡང་མཁྱེན་པ་གསུམ་གྱི་སྐབས་ནི་བསྟན་པའི་སྒྲུབ་པ་དང་། སྦྱོར་བ་བཞིའི་སྐབས་ནས་བསྟན་པའི་སྒྲུབ་པ་ལ་བསྟན་ཚུལ་གྱི་ཁྱད་པར་འབྱེད་པ་ཡིན་གྱི་རང་གི་ངོ་བོའི་ཁྱད་པར་འབྱེད་པ་ནི་མ་ཡིན་ཏེ། མཁྱེན་གསུམ་གྱི་སྐབས་ནས་བསྟན་པའི་སྒྲུབ་པ་རྣམས་ཐོས་བསམ་གྱིས་གཏན་ལ་ཕབ་པའི་ལྡོག་པ་ནས་བསྟན་ལ། སྦྱོར་བཞིའི་སྐབས་ནས་བསྟན་པའི་སྒྲུབ་པ་རྣམས་ཐོས་བསམ་རབ་ཀྱི་མཐར་ཕྱིན་པའི་ཐར་པ་ཆ་མཐུན་ཁྱད་པར་ཅན་ཡན་ཆད་དུ་ཉམས་སུ་བླང་བར་བྱ་བའི་ལྡོག་པ་ནས་བསྟན་པའི་ཕྱིར་རོ། །འོ་ན་མཚན་མེད་རབ་ཏུ་སྦྱིན་ལ་སོགས་ཞེས་པའི་སྐབས་ནས་བསྟན་པའི་ཐར་པ་ཆ་མཐུན་དེ་ཐར་པ་ཆ་མཐུན་ཁྱད་པར་ཅན་དང་། དེ་མན་ཆད་ཀྱི་ཚོགས་ལམ་ཕལ་པར་འཇོག་པའི་ཁྱད་པར་གང་ལས་ཤེས་སྙམ་ན། ཉིར་སྣང་དུ། དེ་ལྟར་གདམས་ངག་དང་རྗེས་སུ་བསྟན་པའི་སྦྱོར་བ་དང་ལྡན་པའི་ཐོས་པ་དང་བསམ་པ་གོམས་པས་དད་པ་ལ་སོགས་པའི་མཚན་ཉིད། ཐར་པའི་ཆ་དང་མཐུན་པའི་དགེ་བའི་རྩ་བ་ཕུལ་དུ་ཕྱིན་པ་ཐོབ་པ་ལས། དྲོ་བར་གྱུར་པ་ཞེས་དང་། དེའི་དོན་འགྲེལ་ཆུང་ལས་ཐོས་པ་ལ་སོགས་པ་རབ་ཀྱི་མཐར་ཕྱིན་པ་ཐོབ་པ་ཐར་པའི་ཆ་དང་མཐུན་པ་དད་པ་ལ་སོགས་པ་དགེ་བའི་རྩ་བའི་མཚན་ཉིད་ཀྱི་འོག་ཏུ་ཞེས་དང་། ཆོས་བཤེས་ཀྱིས་སྐབས་དང་པོ་ནས་བསྟན་པའི་སེམས་བསྐྱེད་པ་དང་པོ་དང་། གཉིས་པ་དང་། གསུམ་པ་དང་པོར་བྱས་ཏེ་གདམས་ངག་ལ་བརྟེན་ནས་ཚོགས་ཀྱི་ལམ་ཕལ་པ་སྦྱངས་ནས་སྐབས་བཞི་པ་ནས་བསྟན་པའི་ཐར་པའི་ཆ་དང་མཐུན་པ་བསྐྱེད་དེ། སྐབས་དང་པོ་ནས་བསྟན་པའི་ངེས་པར་འབྱེད་པའི་ཆ་དང་མཐུན་པ་དང་ཞེས་གསུངས་པའི་ཕྱིར་རོ། །སྨོན་ལམ་རྣམ་པར་དག་པའི་གདུལ་བྱ་ལ་ཕན་ཐོགས་པ་སྲིད་དོ། །གཉིས་པ་ནི། དེ་ལྟར་ཇི་ལྟ་བ་བཞིན་དུ་སྦྱོར་བ་དང་ཞེས་སོགས་ཀྱིས་བསྟན་ཏེ། སྦྱོར་བ་དང་ཞེས་པས་གོ་སྒྲུབ་དང་། འཇུག་སྒྲུབ་དང་། ཚོགས་སྒྲུབ་དང་པོ་བཅོ་ལྔ་དང་གསུམ་རིམ་པ་ལྟར་མཐོང་ལམ་ལ་བརྒྱུད་ནས་སྦྱོར་བ་ཚོགས་ལམ་དང་། དངོས་སུ་སྦྱོར་བ་སྦྱོར་ལམ་དང་། མངོན་གསུམ་དུ་སྦྱོར་བ་ཆོས་མཆོག་ཆེན་པོ་ནས་ཡོད་པར་བསྟན། མཐོང་བ་དང་། སྒོམ་པ་དང་ཞེས་པས་ས་དང་པོའི་ཚོགས་སྒྲུབ་དང་། མཐོང་སྤང་གཉེན་པོའི་ཚོགས་སྒྲུབ་གཉིས་མཐོང་ལམ་དང་། ས་ལྷག་མ་རྣམས་ཀྱི་ཚོགས་སྒྲུབ་དང་། སྒོམ་སྤང་གཉེན་པོའི་ཚོགས་སྒྲུབ་གཉིས་སྒོམ་ལམ་ནས་ཡོད་པར་བསྟན། ཁྱད་པར་གྱི་ལམ་གྱི་ངོ་བོ་ཉིད་ཅེས་པས་ངེས་འབྱུང་སྒྲུབ་པ་སྒོམ་ལམ་གྱི་ཁྱད་པར་ལམ་ས་བརྒྱད་པ་ནས་ཡོད་པར་བསྟན་པའི་ཕྱིར་རོ། །དེ་ལྟར་ཐོགས་མེད་ཀྱི་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་། དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་པའི་ཚོགས་ཀྱི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། ས་གཉིས་པ་ལ་སོགས་པའི་རང་བཞིན་སྒོམ་པའི་ལམ་གྱི་ངོ་བོ་ཉིད་ཡིན་ཞིང་། གཉེན་པོའི་ཚོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་སོ། །འགྲེལ་ཆེན་དུ་ཡང་དེ་ཉིད་ཤེས་བྱེད་དུ་དྲངས་ཤིང་། ཨ་བྷ་ཡ་ཡང་བཞེད་དོ། །ཁྱུང་པོས་གོ་རིམ་ཇི་ལྟ་བ་བཞིན་དུ་ཞེས་པའི་དོན་ཡིན་པས། གོ་ཆ་སྦྱོར་ལམ། འཇུག་པ་མཐོང་ལམ། ཚོགས་ས་བདུན་པ་མན་ཆད་ཀྱི་སྒོམ་ལམ། ངེས་འབྱུང་སྒོམ་ལམ་ལ་བརྟེན་ནས་ས་བརྒྱད་པ་ནས་འཇོག་པ་ཡིན་ཞེས་དང་། ཕྱི་མ་དག་གཞུང་འདིས་སྒྲུབ་པ་བཞིའི་ས་མཚམས་བསྟན་ན་སྒྲུབ་པ་བཞི་དང་། ལམ་བཞི་རིམ་པ་ལྟར་སྦྱོར་དགོས་པར་འགྱུར་བས་ས་མཚམས་མ་བསྟན་ཞེས་སྨྲ་བ་རྣམས་ཀྱིས་ནི་ཐོགས་མེད་ཀྱི་ལུང་འགྲེལ་ཆེན་དུ་དྲངས་པའི་དོན་མ་རྟོགས་པའོ། །གསུམ་པ་ལ་སྤང་བྱ་སྤོང་བའི་དབང་དུ་བྱས་པ་དང་། བསྒྲུབ་བྱ་སྒྲུབ་པའི་དབང་དུ་བྱས་པ་གཉིས་ལས་དང་པོ་ནི་ཉིར་སྣང་དུ། གོ་ཆའི་སྒྲུབ་པ་ལ་སོགས་པ་འདི་རྣམས་ཀྱི་གོ་རིམ་གྱི་ཚུལ་འདི་ནི་རིགས་པ་ཉིད་ཡིན་ཏེ། གོ་བགོས་པ་ནི་འཇུག་གོ །ཞུགས་པ་ནི་དཔུང་གི་ཚོགས་སོ། །དཔུང་ཚོགས་གསོག་པ་ནི་མ་རྒྱལ་བ་ལས་རྒྱལ་བ་ཐོབ་པས་ངེས་པར་འབྱུང་བ་ཡིན་པའི་ཕྱིར་རོ། །ཞེས་གསུངས་ལ་འདིའི་དོན་ནི། བསྟན་བཅོས་འདིར་འབྱུང་བའི་བྱང་སེམས་ཀྱི་སྤང་བྱ་ནི་མཐོང་སྤང་དང་སྒོམ་སྤང་གཉིས་ཡིན་ལ། དེ་ལས་རྒྱལ་བར་བྱེད་པ་ལ་དམག་དཔོན་དཔའ་བོ་གཡུལ་དུ་འཇུག་པའི་དཔེ་དང་སྦྱར་ཏེ། དེ་ལ་དང་པོར་གོ་ཆ་བགོས་པ། དེ་ནས་དཔུང་ཚོགས་པའི་ཆེད་དུ་གཡུལ་དུ་འཇུག་པ། དེ་ནས་དཔུང་མ་ལུས་པ་གསོག་པ། དེ་ནས་མི་མཐུན་ཕྱོགས་དང་གཡུལ་བསྐྲད་དེ་དེ་ལས་རྒྱལ་བ་བཞི་ཡོད་པ་ལྟར། འདིར་ཡང་སྤང་བྱ་གཉིས་པོ་དེ་སྤོང་བའི་ཆེད་དུ་བསམ་པས་གོ་བགོས་པ་ནི་གོ་ཆ། སྦྱོར་བས་ཚུལ་བཞིན་དུ་ཞུགས་པ་ནི་འཇུག་པ། གཉེན་པོའི་དཔུང་ཚོགས་གསོག་སྟེ་མི་མཐུན་ཕྱོགས་དང་གཡུལ་བསྐྲད་པ་ནི་ཚོགས། མི་མཐུན་ཕྱོགས་ལས་ངེས་པར་འབྱུང་བ་ཐོབ་པ་ནི་ངེས་འབྱུང་གི་སྒྲུབ་པ་ཡིན་པས་གྲངས་དང་གོ་རིམ་གཉིས་ཆར་ངེས་པའོ། །འདིར་ཚོགས་སྒྲུབ་ཀྱི་མ་མཐའི་ས་མཚམས་ཆོས་མཆོག་ཆེན་པོ་ནས་བཞག་པ་དང་། ངེས་འབྱུང་སྒྲུབ་པ་ས་བརྒྱད་པ་ནས་བཞག་པའི་གནད་ཀྱང་འདི་ཉིད་ཡིན་ཏེ། ཀུན་བཏུས་སུ། སྤོང་བ་གཉེན་པོ་ལ་གཉིས་སུ་བྱས་པའི་སྦྱོར་བའི་ལམ་ནི་སྤང་བྱ་དངོས་སུ་སྤོང་བའི་བྱ་བ་བྱེད་པ་ཡིན་ལ། བར་ཆད་མེད་པའི་ལམ་ནི་གང་གི་འོག་ཏུ་རྣམ་པར་གྲོལ་བ་མངོན་དུ་བྱེད་པར་འགྱུར་བ་ལ་བཤད་པས་སྦྱོར་ལམ་ཆོས་མཆོག་ཆེན་པོ་དང་། སྡུག་བསྔལ་ལ་ཆོས་བཟོད་གཉིས་མཐོང་སྤང་དངོས་སུ་སྤོང་བའི་བྱ་བ་བྱེད་པར་འདྲ་ཡང་ཆོས་བཟོད་ཀྱི་སྐད་ཅིག་ཕྱིར་ལོགས་རྣམ་གྲོལ་ལམ་མངོན་དུ་བྱེད་པར་འགྱུར་བའི་ཕྱིར་དང་། ས་བརྒྱད་པ་ནས་སྒོམ་སྤང་རྟོག་པ་སླར་མི་སྐྱེ་བའི་ཚུལ་གྱིས་སྤངས་ཟིན་པས་དེ་ཡན་ཆད་ནི་རྟོག་པ་གཉིས་པོ་ལ་ལྟོས་པའི་ཁྱད་པར་གྱི་ལམ་ཡིན་ནོ། །འདི་ལ་དགོངས་ནས་སློབ་དཔོན་གྱི་འགྲེལ་པར་དག་པ་ས་གསུམ་ལ་ཁྱད་པར་གྱི་ལམ་ཞེས་མང་དུ་གསུངས་པ་ཡིན་ནོ། །གཉིས་པ་ནི་འགྲེལ་ཆུང་དུ་སྙིང་རྗེ་ལ་སོགས་པ་འདི་དག་གིས་ཡང་དག་པར་སྒྲུབ་པའི་ངོ་བོས་བྱང་ཆུབ་ཆེན་པོ་འཛིན་པར་བྱེད་པའི་ཕྱིར་ན། སྙིང་རྗེ་ཆེན་པོ་ལ་སོགས་པ་ནི་ཚོགས་ཡིན་པས་ཞེས་གསུངས། སངས་རྒྱས་སའི་སྐུ་གསུམ་ནི་བྱང་ཆུབ་ཆེན་པོ་ཡིན་ལ་དེ་སྒྲུབ་པར་བྱེད་པ་ལ་བསམ་པས་གོ་བགོས་པས་གོ་ཆ། སྦྱོར་བས་ཚུལ་བཞིན་དུ་ཞུགས་པས་འཇུག་པ། རྒྱུ་ཚོགས་ཀྱི་ནུས་པ་མཐུ་ཅན་ཚོགས་པ་ནི་ཚོགས་སྒྲུབ། བསྒྲུབ་བྱ་དེར་སྐད་ཅིག་ཀྱང་བར་ཆད་མེད་པའི་ཚུལ་གྱིས་ངེས་པར་འབྱུང་བ་ནི་ངེས་འབྱུང་གི་སྒྲུབ་པ་སྟེ། འདི་ལ་ཡང་ས་མཚམས་ནི་སྔ་མ་དང་འདྲ་ཞིང་འོ་ན་ཆོས་མཆོག་ཆེན་པོ་ནས་རྒྱུ་ཚོགས་ཀྱི་ནུས་པ་ཇི་ལྟར་ཚང་སྙམ་ན། རང་བཞིན་རྣམ་དག་གི་ཆོས་སྐུ་མངོན་སུམ་དུ་མཐོང་བ་ལ་ས་བཅུ་གཅིག་གི་མཉམ་གཞག་ལ་ཁྱད་པར་མེད་པས་དེ་དངོས་སུ་བསྐྱེད་པའི་ནུས་པ་ཚང་བ་ལ་དགོངས་སོ། །ས་བརྒྱད་པ་ནས་སྐད་ཅིག་ཀྱང་བར་མ་ཆད་པར་བསྒྲུབ་བྱ་དེར་ངེས་པར་འབྱུང་བའི་ཚུལ་ནི་མཚན་འཛིན་གྱིས་བར་མ་ཆད་པར་སངས་རྒྱས་ཀྱི་སར་ངེས་པར་འབྱུང་བའི་དོན་ནོ། །ལུགས་འདི་གཉིས་ཆར་ཡང་བསྟན་བཅོས་རྩ་བའི་དགོངས་པར་སོང་ཞིང་དོན་གྱི་གནད་ཀྱང་གཅིག་པར་སྣང་སྟེ། ཆེད་དུ་བྱ་བ་ཆེན་པོ་གསུམ་སྒྲུབ་པ་ལ་མཐོང་སྤང་དང་སྒོམ་སྤང་གཉིས་སྤོང་དགོས་པའི་ཕྱིར་རོ། །བཞི་པ་སོ་སོའི་དོན་ལ་བཞི་ལས་དང་པོ་གོ་སྒྲུབ་ནི། དེ་དག་སོ་སོར་སྦྱིན་ལ་སོགས། །ཞེས་ཏེ། འདི་ལ་སྡུད་བྱེད་དྲུག་ངོས་གཟུང་། བསྡུ་བྱ་དྲུག་ཚན་དྲུག་ཏུ་འགྱུར་བའི་ཚུལ། དེ་ཉིད་གོ་ཆར་འགྱུར་བའི་ཚུལ་དང་གསུམ་ལས། དང་པོ་ནི་སྦྱིན་པའི་གོ་སྒྲུབ་ནས་ཤེས་རབ་ཀྱི་གོ་སྒྲུབ་ཀྱི་བར་རྣམ་པ་དྲུག་གོ །གཉིས་པ་ནི། མཚན་བཞི་ཆོས་ཀྱི་སྦྱིན་པ་ལྟ་བུ་ལ་མཚོན་ན། ཆོས་ཀྱི་སྦྱིན་པ་དེ་ཉིད་སྦྱིན་པའི་སྦྱིན་པ། དེ་ཉིད་ཀྱི་ཚེ་ཉན་ཐོས་ལ་སོགས་པའི་ཡིད་ལ་བྱེད་པ་སྤོང་པ་སྦྱིན་པའི་ཚུལ་ཁྲིམས། དེ་ཉིད་ཀྱི་ཚེ་སྐྱེ་བོ་ཐམས་ཅད་ཀྱིས་མི་སྙན་པར་སྨྲ་བ་ཉིད་བཟོད་པ་ནི་བཟོད་པ། དེ་ཉིད་ཀྱི་ཚེ་འདུན་པ་བསྐྱེད་པ་ནི་སྦྱིན་པའི་བརྩོན་འགྲུས། དེ་ཉིད་ཀྱི་ཚེ་ཐེག་པ་གཞན་དང་མ་འདྲེས་པའི་སེམས་རྩེ་གཅིག་པ་ནི་སྦྱིན་པའི་བསམ་གཏན། དེ་ཉིད་ཀྱི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བ་ནི་སྦྱིན་པའི་ཤེས་རབ་སྟེ་སྦྱིན་པའི་གོ་ཆ་དྲུག་ཡིན་ལ། དེ་བཞིན་དུ་གཞན་གནོད་སྤོང་བའི་ཚུལ་ཁྲིམས་ལྟ་བུ་ལ་དྲུག་ཏུ་སྦྱར་བ་ནས་ཤེས་རབ་ཀྱི་བར་རེ་རེ་ལ་ཡང་དྲུག་དྲུག་སྦྱར་རོ། །ཉིར་སྣང་ལས། དང་པོ་གཉིས་འདྲ་བ་ལ་རྣམ་པ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ལ་བཟོད་པ་དང་། འདོད་པ་དང་ཉེ་བར་རྟོག་པ་ནི་བཟོད་པ་དང་། དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བ་ནི་བརྩོན་འགྲུས་དང་། ཐེག་པ་གཞན་དང་མ་འདྲེས་པའི་རྩེ་གཅིག་པ་ཉིད་ཀྱི་དགེ་རྩ་བྱང་ཆུབ་ཏུ་བསྔོ་བ་ནི་བསམ་གཏན་དང་། སྒྱུ་མའི་འདུ་ཤེས་ཉེ་བར་གནས་པས་སྦྱིན་པར་བྱ་བ་དང་། གཏོང་བ་པོ་དང་། ལེན་པ་པོ་མི་དམིགས་པ་ནི་ཤེས་རབ་ཏུ་བཤད་དོ། །འོ་ན་སྡུད་བྱེད་ཀྱི་སྦྱིན་པ་དང་། བསྡུ་བྱའི་སྦྱིན་པ་ལ་ཁྱད་པར་ཅི་ཡོད་སྙམ་ན། སྦྱིན་པ་ཙམ་དུ་འཇོག་པའི་ཆ་དེ་སྡུད་བྱེད་ཡིན་ཞིང་། མཚན་གཞི་ཆོས་ཀྱི་སྦྱིན་པ་ལྟ་བུ་དེ་བསྡུ་བྱ་ཡིན་ནོ། །གོ་སྒྲུབ་དྲུག་ཏུ་འཇོག་པའི་ཚུལ་ཇི་ལྟར་སྙམ་ན་འདི་ལ་ཕར་ཕྱིན་དྲུག་གི་སྦྱིན་པ་དྲུག་སྦྱིན་པར་ཆོས་མཐུན་ཞེས་འཇོག་པའི་ཚུལ་དང་སྦྱིན་པའི་བསྡུ་བྱ་དྲུག་སྦྱིན་པར་ཆོས་མཐུན་ཞེས་པའི་ཚུལ་གཉིས་སྣང་བ་ལས་ཕྱི་མ་འདི་ཉིད་འཐད་དེ། འདིར་སྡུད་བྱེད་ཀྱི་གོ་ཆ་དྲུག་པོ་དེ་ཉིད་གོ་སྒྲུབ་ཏུ་འཇོག་ཅིང་དེ་རེ་རེ་ལ་ཡང་དྲུག་དྲུག་ཏུ་ཕྱེ་བའི་ཚེ་སུམ་ཅུ་སོ་དྲུག་ཏུ་འགྱུར་བ་ནི་སྐབས་ཀྱི་དོན་ཡིན་པའི་ཕྱིར་རོ། །འདི་དག་གི་གྲངས་ངེས་པ་དང་། གོ་རིམ་ངེས་པ་ནི་ཕར་ཕྱིན་དྲུག་གི་སྐབས་ལྟར་ཤེས་པར་བྱའོ། །གསུམ་པ་ནི་འཕགས་པ་ལྟར་ན་ཕར་ཕྱིན་དྲུག་གི་ཉམས་ལེན་ལ་འཇུག་པར་བྱའོ་སྙམ་པའི་བསམ་པས་ཁྱབ་པར་བྱས་པ་ནི་གོ་བགོས་པའི་དོན་ཏེ། འཇིག་རྟེན་ན་གཡུལ་ལ་འཇུག་པའི་ཆེད་དུ་ཡ་ལད་ལ་སོགས་པ་བགོས་པ་ལ་གོ་བགོས་པར་བརྗོད་པ་བཞིན་ནོ། །སློབ་དཔོན་ལྟར་ན་བསྒོམ་བྱ་ཕ་རོལ་ཏུ་ཕྱིན་པ་དྲུག་གི་ཉམས་ལེན་ལ་སྒོམ་བྱེད་འཁོར་གསུམ་མི་དམིགས་པའི་བསམ་པས་གོ་བགོས་པ་སྟེ་འགྲེལ་པར་གོ་རིམ་བཞིན་དུ་སྦྱིན་པར་བྱ་བ་ལ་སོགས་པ་མི་དམིགས་པའི་གོ་བྱ་ཉིད་ཀྱི་བྱེད་པ་དང་ཞེས་གསུངས་སོ། །གཉིས་པ་ནི། བསམ་གཏན་གཟུགས་མེད་སྦྱིན་སོགས་དང་། །ཞེས་སོགས་ཏེ། འདི་ལ་རང་གི་ངོ་བོ་དང་། ཡུལ་དང་། གོ་རིམ་གསུམ་ལས། དང་པོ་ནི་འཇུག་ཡུལ་ཐེག་པ་ཆེན་པོ་ལ་ཚོགས་ཀྱི་ལམ་ལས་འདས་ནས་སྦྱོར་བའི་བརྩོན་འགྲུས་ཀྱིས་འཇུག་པ་དང་འཛེག་པའི་སྒྲུབ་པ་སྟེ་མདོར། ཚེ་དང་ལྡན་པ་གང་པོ་ཇི་ཙམ་གྱིས་ན་བྱང་སེམས་ཆེན་པོ་ཐེག་པ་ཆེན་པོ་ལ་འཇུག་པ་དང་། ཐེག་པ་ཆེན་པོ་ལ་འཛེག་པར་འགྱུར་བ་ཡིན་ཞེས་གསུངས་པས་སོ། །འཇུག་པ་དང་འཛེག་པ་གཉིས་དོན་གཅིག་ཏེ། ཉིར་སྣང་དུ། དེ་ཡང་དོན་གཅིག་པ་ཉིད་ཀྱིས་འཇུག་པ་ནི་འཛེག་པ་ཡིན་ལ་འཛེག་པ་འཇུག་པ་ཡིན་ནོ། །ཞེས་གསུངས་པའི་ཕྱིར། གཉིས་པ་ནི། ཐེག་པ་ཆེན་པོ་སྟེ། འདི་ལ་རྒྱུའི་ཐེག་པ་དང་། འབྲས་བུའི་ཐེག་པ་གཉིས་ལས། དང་པོ་ནི་བསམ་གཏན་གཟུགས་མེད་ནས་འཁོར་གསུམ་རྣམ་པར་དག་པའི་བར་རོ། །གཉིས་པ་ནི། ཆེད་དུ་བྱ་བ་ལ་སོགས་པ་ཕྱི་མ་གསུམ་མོ། །ཡང་ཚན་པ་གསུམ་དུ་ཡང་བསྡུ་སྟེ། རང་དོན་གྱི་དང་། གཞན་དོན་གྱི་དང་། གཉིས་དོན་གྱི་དབང་དུ་བྱས་པའོ། །དང་པོ་ནི་བསམ་གཏན་གཟུགས་མེད་སོགས་གསུམ་མོ། །གཉིས་པ་ནི་བྱམས་སོགས་གསུམ་མོ། །གསུམ་པ་ནི་ཆེད་དུ་བྱ་བ་སོགས་གསུམ་མོ། །གསུམ་པ་གོ་རིམ་ནི། དང་པོར་སེམས་བརྟན་པར་བྱ་བའི་དོན་དུ་མི་དམིགས་པའི་ཤེས་རབ་ཀྱིས་ཟིན་པའི་བསམ་གཏན་བཞི་དང་། གཟུགས་མེད་པའི་སྙོམས་པར་འཇུག་པ་བཞི་ལ་འཇུག་གོ །དེ་བསྒོམས་པས་སེམས་བརྟན་ཞིང་ལས་སུ་རུང་བ་ཐོབ་པ་ན། ཚོགས་གཉིས་གསོག་དགོས་པས་སྦྱིན་སོགས་དྲུག་ལ་འཇུག་གོ །ཚོགས་གཉིས་བསགས་པའི་སྟོབས་ཀྱིས་མཐོང་སྒོམ་གྱི་ལམ་སྐྱེ་བས་ལམ་ལ་འཇུག་གོ །འདིར་སློབ་དཔོན་གྱིས་མི་སློབ་པ་དང་ཁྱད་པར་གྱི་ལམ་ཡང་ཡང་གསུངས་པ་ནི་དག་པ་ས་ཡི་དབང་དུ་བྱས་པའོ། །དེ་གསུམ་གྱིས་རང་དོན་གྲུབ་པར་བྱས་ཟིན་ནས་དེའི་འོག་ཏུ་གཞན་དོན་གྱི་རྒྱུ་ཚད་མེད་བཞི་ལ་འཇུག་གོ །དེ་ནས་ཡང་གང་ཟག་དང་ཆོས་ཀྱི་བདག་ཏུ་དམིགས་པ་དང་བཅས་པས་གཞན་དོན་བྱེད་མི་ནུས་པས་གང་ཟག་དང་ཆོས་ཀྱི་བདག་ཏུ་དམིགས་པ་མེད་པའི་ཤེས་རབ་ལ་འཇུག་གོ །གང་ཟག་དང་ཆོས་ཀྱི་བདག་ཏུ་དམིགས་པ་མེད་ཀྱང་འཁོར་གསུམ་དུ་རྣམ་པར་རྟོག་པའི་བློ་མ་སྤངས་ན་གཞན་དོན་མི་ནུས་པས་དེ་ནས་འཁོར་གསུམ་མི་དམིགས་པ་ལ་འཇུག་གོ །འཁོར་གསུམ་དག་པའི་སྤྱོད་པ་དང་ལྡན་པ་དེས་རང་དོན་ཆེད་དུ་བྱ་བ་གསུམ་བསྒྲུབ་དགོས་པས་དེ་ནས་ཆེད་དུ་བྱ་བ་ལ་འཇུག་གོ །དེ་ཡང་གནས་སྐབས་ཀྱི་ཆེད་དུ་བྱ་བའི་དབང་དུ་བྱས་པ་ཡིན་ལ། དེ་ནས་རྣམ་མཁྱེན་གྱི་རྒྱུ་མངོན་པར་ཤེས་པ་དྲུག་ལ་འཇུག་གོ །རྣམ་མཁྱེན་གྱི་རྒྱུ་ཚོགས་པས་རྣམ་མཁྱེན་ཐོབ་པར་འགྱུར་བས་དེ་ནས་རྣམ་པ་ཐམས་ཅད་མཁྱེན་པ་ཉིད་ལ་འཇུག་གོ །གསུམ་པ་ཚོགས་སྒྲུབ་ནི། བརྩེ་དང་སྦྱིན་ལ་སོགས་པ་དྲུག །ཅེས་སོགས་ཏེ། འདི་ལ་ཚོགས་བཅུ་བདུན་སྤྱིར་བསྟན་པ་དང་། རྟོགས་དཀའ་བ་བྱེ་བྲག་ཏུ་བཤད་པ་གཉིས། དང་པོ་ལ། དང་པོར་སྒྲུབ་པའི་གོ་རིམ་དང་། ཚོགས་སུ་འགྱུར་ཚུལ་གཉིས་ལས། དང་པོ་ནི་ཚོགས་ཀྱི་སྒྲུབ་པ་ཡི། །རིམ་པ་ཡིན་པར་ཤེས་པར་བྱ། །ཞེས་གསུངས་ན། རིམ་པ་ཇི་ལྟར་ཡིན་སྙམ་ན། ཐོག་མར་སྡུག་བསྔལ་དང་བྲལ་འདོད་ཀྱི་བརྩེ་བ་མངོན་དུ་བྱས་ནས་དེའི་འོག་ཏུ་གཞན་དོན་སྦྱིན་པ་ལ་སོགས་པ་དྲུག་ལ་རིམ་པར་འཇུག་གོ །དེ་ནས་གཞན་དོན་ལ་རྩེ་གཅིག་པའི་ཞི་གནས་ལ་ཞུགས་ནས་སྟོང་ཉིད་རྟོགས་པའི་ལྷག་མཐོང་བསྐྱེད་དོ། །སྟོང་ཉིད་རྟོགས་པ་ཙམ་གྱིས་སངས་རྒྱས་མི་ཐོབ་པས་དེ་ནས་ཤེས་རབ་དང་སྙིང་རྗེ་ཟུང་དུ་འབྲེལ་བའི་ལམ་ལ་སློབ་བོ། །གཉིས་པོ་ལ་བསླབས་པས་གཞན་དོན་བྱེད་པའི་ཐབས་ལ་མཁས་པ་གང་ཡིན་པ་འཐོབ་བོ། །དེ་ལས་སྟོང་ཉིད་རྟོགས་པའི་ཡེ་ཤེས་སྐྱེ་ཞིང་ཡེ་ཤེས་ལས་བསོད་ནམས་ཀྱི་འབྲས་བུ་ཅན་གྱི་ཏིང་ངེ་འཛིན་སྐྱེའོ། །ཚོགས་གཉིས་གོམས་པར་བྱས་པས་ནི་དེ་ཁོ་ན་ཉིད་རྟོགས་པའི་དོན་དུ་ལམ་ལ་འཇུག་ཅིང་ལམ་ཐོབ་པ་ལས་མི་བརྗེད་པའི་གཟུངས་ཐོབ་པར་འགྱུར་རོ། །དེ་ལས་ས་བཅུ་ཐོབ་ནས་སྐབས་དེ་དག་ཏུ་གཉེན་པོ་ཡང་མངོན་དུ་བྱེད་དོ། །གཉིས་པ་ནི་འཕགས་པ་ལྟར་ན་ཚོགས་དང་པོ་བཅོ་ལྔ་ཆོས་མཆོག་ཆེན་པོའི་གནས་སྐབས་སུ་ཅིག་ཅར་དུ་ཚོགས་པས་མཐོང་སྤང་དང་གཡུལ་འགྱེད་པར་བྱེད་པའོ། །སའི་ཚོགས་ལ་ས་དང་པོའི་ཡོངས་སྦྱང་ནི་ས་དང་པོའི་རྗེས་ཐོབ་ཏུ་ཚོགས་པས་མཐོང་སྤང་གི་གནས་ངན་ལེན་སྦྱོང་བར་བྱེད་ཅིང་། ས་ལྷག་མ་རྣམས་ཀྱི་ཚོགས་ས་དེ་དང་དེའི་རྗེས་ཐོབ་ཏུ་ཚོགས་པས་སྔར་གྱི་བར་ཆད་མེད་ལམ་གྱིས་སྤངས་པའི་གནས་ངན་ལེན་སྦྱོང་བར་བྱེད་པའོ། །གཉེན་པོའི་ཚོགས་ལ་མཐོང་སྤང་གཉེན་པོའི་ཚོགས་སྒྲུབ་ནི་མཐོང་ལམ་བར་ཆད་མེད་ལམ་དང་། སྒོམ་སྤང་གཉེན་པོའི་ཚོགས་སྒྲུབ་ནི་སྒོམ་ལམ་བར་ཆད་མེད་ལམ་དུ་ཚོགས་པས་སྤང་བྱ་དེ་དང་དེ་སླར་མི་སྐྱེ་བའི་ཆོས་ཅན་དུ་བྱེད་པའོ། །སློབ་དཔོན་ལྟར་ན་ཚོགས་དང་པོ་བཅོ་ལྔ་སྦྱོར་ལམ་ཆོས་མཆོག་ཏུ་ཅིག་ཅར་ཚོགས་པས་རང་བཞིན་རྣམ་དག་གི་ཆོས་ཉིད་མངོན་སུམ་དུ་མཐོང་བའི་བྱང་ཆུབ་ཆེན་པོའི་རྒྱུའི་ནུས་པ་ཚོགས་པ་ཡིན་གྱི་སའི་ཚོགས་དང་གཉེན་པོའི་ཚོགས་སྔ་མ་རྣམས་ནི་གློ་བུར་གྱི་དྲི་མ་ཕྱོགས་རེ་དང་བྲལ་བའི་ཆོས་དབྱིངས་མངོན་སུམ་དུ་མཐོང་བའི་བྱང་ཆུབ་ཆེན་པོ་དང་། ཐ་མ་ནི་གློ་བུར་གྱི་དྲི་མ་མཐའ་དག་དང་བྲལ་བའི་བྱང་ཆུབ་ཆེན་པོའི་རྒྱུའི་ནུས་པ་ཚོགས་པའོ། །འོ་ན་ལམ་གྱི་ཚོགས་མཐོང་བ་ལ་སོགས་པའི་ལམ་དང་གཟུངས་ཀྱི་ཚོགས་ཚིག་ལ་སོགས་པའི་གཟུངས་ལ་བཞག་པས་ཆོས་མཆོག་ཆེན་པོར་ཚོགས་སོག་པ་འགལ་ཏེ། དེར་མཐོང་བ་ལ་སོགས་པའི་ལམ་མེད་པའི་ཕྱིར་དང་། བཟོད་པའམ་གཟུངས་མེད་པའི་ཕྱིར་རོ་ཞེ་ན། སྔོན་གྱི་མཁས་པ་དག་ལམ་དང་གཟུངས་ཀྱི་དངོས་རྒྱུ་ཚོགས་པ་དང་། ངོ་བོ་ཚོགས་པ་དང་གཉིས་ལས། སྔ་མའི་དབང་དུ་བྱས་པས་མི་འགལ་བར་བཞེད་དོ། །གཉིས་པ་རྟོགས་དཀའ་བ་བྱེ་བྲག་ཏུ་བཤད་པ་ལ་ཡེ་ཤེས་ཀྱི་ཚོགས་བྱེ་བྲག་ཏུ་བཤད་པ། སའི་ཚོགས་བྱེ་བྲག་ཏུ་བཤད་པ། གཉེན་པོའི་ཚོགས་བྱེ་བྲག་ཏུ་བཤད་པ་དང་གསུམ་ལས། དང་པོ་ལ་འཕགས་པས་ཇི་ལྟར་བཤད་པའི་ཚུལ། དེའི་དགོངས་པ་སློབ་དཔོན་གྱིས་ཇི་ལྟར་བཀྲལ་བའི་ཚུལ། དེའི་དགོངས་པ་སྔ་རབས་ཀྱི་མཁས་པ་རྣམས་ཀྱིས་བཀྲལ་བའི་ཚུལ། འཐད་པའི་ཕྱོགས་ངོས་གཟུང་བ་དང་བཞི་ལས། དང་པོ་ནི་ཡེ་ཤེས་ཀྱི་ཚོགས་ཉིད་ཀྱི་ཐད་དུ་མདོར་སྟོང་ཉིད་ཉི་ཤུ་གསུངས་པ་ལས། ཉིར་སྣང་དུ། སྟོང་གཞིའི་ཆོས་ཅན་ཉི་ཤུ་ངོས་བཟུང་ནས་དེ་དག་ཇི་ལྟར་སྟོང་པའི་ཚུལ་དང་བཅས་པ་བརྗོད་ཟིན་པའི་མཇུག་ཏུ་ཕྱོགས་འདིས་སྐབས་གོ་རིམ་མ་ཚང་བ་རྣམས་ཀྱི་སྐབས་ཀྱི་དོན་ལ་ཡང་བརྗོད་པར་བྱའོ། །དེ་དག་ནི་གཞན་དགག་པའི་སྒོ་ནས་སྟོང་ཉིད་འབའ་ཞིག་ཁོ་ན་བརྗོད་པར་བྱེད་པ་ཡིན་གྱི་འདི་དག་ལ་མངོན་པར་རྟོགས་པའི་གོ་རིམ་ནི་འགའ་ཡང་ཡོད་པ་མ་ཡིན་ནོ། །ཞེས་ཟེར་བ་དེ་དག་གི་ལྟར་ན་ནི་སྐབས་ཀྱི་དོན་ཁོ་ན་བརྗོད་པར་བྱ་བ་ཡིན་གྱི་གཙོ་བོར་བསྟན་བཅོས་ཀྱི་དོན་ནི་མ་ཚང་བར་འགྱུར་བ་དེས་ན་སྟོང་པ་ཉིད་ཀྱི་སྐབས་རྣམས་སོང་བ་དང་འགྲོ་བར་བྱ་བའི་གོ་རིམ་དང་བྲལ་བའི་ཕྱིར་ཆེད་དུ་བྱ་བ་ཉམས་པའི་ངོ་བོར་སྟོན་པ་ཡིན་ནོ། །ཞེས་གསུངས་སོ། །གཉིས་པ་ནི་འགྲེལ་ཆེན་དུ། སྟོང་ཉིད་དང་པོ་གསུམ་གྱི་སྐབས་སུ་སྟོང་པ་ཉིད་འདི་གསུམ་ནི་མོས་པས་སྤྱོད་པའི་ས་ལ་ཡིན་ནོ་ཞེས་དང་། བཞི་པའི་སྐབས་སུ་འདི་ནི་སྦྱོར་བའི་ལམ་ལའོ་ཞེས་དང་། ལྔ་པའི་སྐབས་སུ་འདི་ནི་ཀུན་ཏུ་འགྲོ་བའི་དོན་གྱིས་ན་དང་པོའོ་ཞེས་དང་། སྟོང་ཉིད་ཐ་མ་གསུམ་གྱི་སྐབས་སུ་སྟོང་པ་ཉིད་འདི་གསུམ་ནི་གོ་རིམ་བཞིན་དུ་ཉོན་མོངས་པའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཡིན་པའི་ཕྱིར་དང་། ཤེས་བྱའི་སྒྲིབ་པ་བག་ཆགས་དང་བཅས་པ་སྤངས་པའི་རྟེན་ཉིད་ཡིན་པའི་ཕྱིར་དང་། རང་བྱུང་ཉིད་ཡིན་པའི་དོན་གྱིས་ན་སངས་རྒྱས་ཀྱི་ས་ལ་ཡིན་པར་ཤེས་པར་བྱའོ། །ཞེས་གསུངས་སོ། །གསུམ་པ་ནི། དྭགས་པོ་དབང་ཕྱུག་སེང་གེ་ན་རེ། ཡེ་ཤེས་དང་པོ་གསུམ་ཚོགས་ལམ། བཞི་པ་སྦྱོར་ལམ། དེ་ནས་བདུན་ས་དང་པོ་ནས་བདུན་པའི་བར་ལ་རེ་རེ་དང་། དེ་ནས་དག་པ་ས་གསུམ་ལ་གཉིས་གཉིས་དང་། སྟོང་ཉིད་ཐ་མ་གསུམ་རྟོགས་པའི་ཡེ་ཤེས་སངས་རྒྱས་ཀྱི་ས་ཁོ་ནར་འཇོག་པར་བཞེད་དོ། །ཨར་ན་རེ། ཡེ་ཤེས་གཞན་རྣམས་ཀྱི་ས་མཚམས་དེ་ལྟར་ཡིན་ཀྱང་དང་པོ་གསུམ་ཚོགས་ལམ་དུ་འཇོག་པ་མི་འཐད་དེ། འགྲེལ་ཆེན་དུ། ཡེ་ཤེས་དང་པོ་གསུམ་མོས་སྤྱོད་ཀྱི་ས་ལ་བཞག་ཅིང་། མོས་སྤྱོད་ཀྱི་ས་ནི་སྦྱོར་ལམ་ལ་བཞེད་པའི་ཕྱིར་ཏེ། མཚན་ཉིད་ཀྱི་སྐབས་སུ་ཚོགས་དང་མོས་པས་སྤྱོད་པ་དང་ཞེས་དང་། རྟག་ཏུ་ངུའི་ལེའུའི་སྐབས་སུ་ཡང་ཚོགས་ཀྱི་ས་དང་། མོས་པས་སྤྱོད་པའི་ས་དང་། བྱང་ཆུབ་སེམས་དཔའི་ས་དང་། དེ་བཞིན་གཤེགས་པའི་ས་ཞེས་གསུངས་པའི་ཕྱིར། དེས་ན་སྟོང་ཉིད་དང་པོ་གསུམ་འཇོག་པའི་མོས་སྤྱོད་ཀྱི་ས་ནི་སྦྱོར་ལམ་བཞི་ཀ་དང་། བཞི་པ་འཇོག་པའི་སྦྱོར་ལམ་ནི་ཆོས་མཆོག་ཡིན་ཞེས་བཞེད་དོ། །ཁྱུང་གིས། དང་པོ་གསུམ་འཇོག་པའི་མོས་སྤྱོད་ཀྱི་ས་ནི་སྦྱོར་ལམ་དང་པོ་གསུམ་དང་། བཞི་པ་འཇོག་པའི་སྦྱོར་ལམ་ནི་ཆོས་མཆོག་ཡིན་པས་སྦྱོར་ལམ་བཞི་ལ་རིམ་པ་བཞིན་དུ་འཇོག་པར་བཞེད་དོ། །བཞི་པ་ནི་སློབ་དཔོན་གྱི་བཞེད་པ་སྟོང་ཉིད་དང་པོ་གསུམ་རྟོགས་པའི་ཡེ་ཤེས་ཚོགས་ལམ་ནས་འཇོག་སྟེ། སྟོང་ཉིད་ཉི་ཤུ་པོ་འདིས་ཚོགས་ལམ་ནས་སངས་རྒྱས་ཀྱི་སའི་བར་གྱི་མངོན་པར་རྟོགས་པའི་རིམ་པ་སྟོན་པའི་ཚུལ་ནི་སེམས་བསྐྱེད་ཉེར་གཉིས་ཀྱི་ས་མཚམས་དང་འདྲ་བར་བཞེད་པའི་ཕྱིར་རོ། །མ་མཐའ་སྦྱོར་ལམ་ནས་འཇོག་པ་ལ་ཤེས་བྱེད་མེད་དེ། སྤྱིར་ཚོགས་བཅུ་བདུན་གྱི་ནང་ཚན་དུ་གྱུར་པའི་ཡེ་ཤེས་ཀྱི་ཚོགས་ཚོགས་ལམ་ནས་ཡོད་པ་ལ་འགལ་བ་མེད་པའི་ཕྱིར་དང་། ཚོགས་སྒྲུབ་ཀྱི་ནང་ཚན་དུ་གྱུར་པའི་ཡེ་ཤེས་ཀྱི་ཚོགས་ནི་ཆོས་མཆོག་མན་ཆད་དུ་མེད་པའི་ཕྱིར་རོ། །མོས་སྤྱོད་ཀྱི་ས་ཞེས་པས་སྦྱོར་ལམ་དུ་མི་འགྲུབ་སྟེ། སྤྱིར་མོས་སྤྱོད་ཀྱི་ས་ནི་ཚོགས་སྦྱོར་གཉིས་ཀ་ལ་འཇུག་པས་ཚོགས་ལམ་གྱི་ཟླས་དྲངས་པའི་ཚེ་སྦྱོར་ལམ་དང་། སྦྱོར་ལམ་གྱི་ཟླས་དྲངས་པའི་ཚེ་ཚོགས་ལམ་ལ་འཇུག་པའི་ཕྱིར་རོ། །དེ་ལྟ་མིན་པར་མོས་སྤྱོད་ཀྱི་ས་ཞེས་པ་སྦྱོར་ལམ་བཞི་ཀ་དང་། སྦྱོར་བའི་ལམ་ཞེས་པ་ཆོས་མཆོག་ཡིན་ན་ཐ་སྙད་དེ་ཉིད་ཀྱིས་གསུང་རིགས་ཤིང་། སྦྱོར་ལམ་བཞི་ལ་རིམ་པ་བཞིན་དུ་འཇོག་ན། དང་པོ་གསུམ་དང་བཞི་པ་སོ་སོར་བྱེད་པ་ལ་དགོས་པ་མེད་དོ། །སློབ་དཔོན་གྱིས་ཡེ་ཤེས་ཉི་ཤུའི་ས་མཚམས་གྱི་རྗེས་སུ་སྔར་གྱི་ཉིར་སྣང་གི་ལུང་དེ་ཉིད་འགྲེལ་ཆེན་ནས་དྲངས་པའི་དེའི་དོན་ཡང་གནས་སྐབས་གཞན་དུ་ཚོགས་ལམ་ནས་སངས་རྒྱས་ཀྱི་སའི་བར་གྱི་ས་མཚམས་ངེས་པ་ཅན་དང་བྲལ་བ་རྣམས་ཀྱི་སྐབས་དོན་ཡང་འདིར་ཡེ་ཤེས་ཉི་ཤུའི་ས་མཚམས་ལ་བརྟེན་ནས་རྟོགས་པར་བྱའོ། །གང་དག་སྟོང་ཉིད་ཉི་ཤུ་སྟོན་པའི་མདོར་སྟོང་ཉིད་མེད་དགག་ཁོ་ན་བསྟན་ནས་ཡུལ་ཅན་ཡེ་ཤེས་མ་བསྟན་པར་འདོད་པ་དེ་དག་གི་ལྟར་ན། མདོ་དེས་ཡུལ་སྟོང་ཉིད་ཁོ་ན་བསྟན་ནས་ཡུལ་ཅན་མངོན་རྟོགས་ཀྱི་རིམ་པ་མ་བསྟན་པར་འགྱུར་རོ། །དེ་ཡང་འདོད་ན་སྐབས་དོན་སྟོང་ཉིད་ཁོ་ན་བརྗོད་བྱར་འགྱུར་གྱི་བསྟན་བཅོས་ཀྱི་དོན་མངོན་རྟོགས་ཀྱི་རིམ་པ་བརྗོད་བྱ་མ་ཡིན་པར་འགྱུར་རོ། །དེ་ཡང་འདོད་ན་སྟོང་ཉིད་ཉི་ཤུའི་བྱེ་བྲག་གིས་ཡུལ་ཅན་ཡེ་ཤེས་ལ་སྔར་བགྲོད་ཟིན་པ་དང་། ཕྱིས་བགྲོད་པར་བྱ་བའི་གོ་རིམ་དང་བྲལ་བས་ན་བསྟན་བཅོས་ཀྱི་ཆེད་དུ་བྱ་བ་ཉམས་པར་འགྱུར་རོ། །ཞེས་པའི་དོན་ཏོ། །གཉིས་པ་སའི་ཚོགས་བྱེ་བྲག་ཏུ་བཤད་པ་ལ། མཚན་ཉིད། དབྱེ་བ། སྒྲ་དོན། ཁྱད་པར་གྱི་ཆོས་དང་བཞི་ལས། དང་པོ་ལ་ས་ཙམ་གྱི་མཚན་ཉིད་ནི། རྟོགས་པ་ཕྱི་མ་དང་ཡོན་ཏན་གྱི་རྟེན་བྱེད་པའོ། །སྐབས་དོན་བྱང་སེམས་ཀྱི་སའི་མཚན་ཉིད་ནི་སྟོང་ཉིད་མངོན་སུམ་དུ་རྟོགས་པའི་ཤེས་རབ་དང་། སྙིང་རྗེ་ཆེན་པོ་ཟུང་དུ་འབྲེལ་བའི་སྒོ་ནས་རྟོགས་པ་ཕྱི་མ་དང་ཡོན་ཏན་གྱི་རྟེན་བྱེད་པའི་ཉམས་ལེན་ཁྱད་པར་ཅན་ཏེ། འཇུག་འགྲེལ་དུ། བྱང་ཆུབ་སེམས་དཔའ་རྣམས་ཀྱི་ཟག་པ་མེད་པའི་ཡེ་ཤེས་སྙིང་རྗེ་ལ་སོགས་པས་ཟིན་པ་ཉིད་ཆར་རྣམ་པར་ཕྱེ་བ་ནས་ཞེས་བྱ་བའི་མིང་ཐོབ་སྟེ། ཡོན་ཏན་གྱི་འབྱུང་གནས་སུ་འགྱུར་བའི་ཕྱིར་རོ། །ཞེས་གསུངས་སོ། །གཉིས་པ་ནི། སྤྱིར་ས་ཙམ་ལ་དབྱེ་ན། ཉན་ཐོས་ཀྱི་ས། རང་རྒྱལ་གྱི་ས། ཐེག་ཆེན་གྱི་ས་དང་གསུམ་ལས། དང་པོ་ལ་དཀར་པོ་རྣམ་པར་མཐོང་བའི་ས། རིགས་ཀྱི་ས། བརྒྱད་པའི་ས། མཐོང་བའི་ས། བསྲབས་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། ཉན་ཐོས་ཀྱི་ས་དང་བརྒྱད་དོ། །གཉིས་པ་ལ་རབ་ཏུ་དབྱེ་བ་བཤད་པ་མི་སྣང་ཞིང་། གསུམ་པ་ལ་མོས་སྤྱོད་ཀྱི་ས། བྱང་ཆུབ་སེམས་དཔའི་ས། སངས་རྒྱས་ཀྱི་ས་དང་གསུམ་ལས། བྱང་སེམས་ཀྱི་ས་ལ་ཡང་ས་དང་པོ་རབ་ཏུ་དགའ་བ་ནས་ས་བཅུ་པ་ཆོས་ཀྱི་སྤྲིན་གྱི་བར་བཅུར་ཡོད་དེ། རིན་ཆེན་ཕྲེང་བར། ཇི་ལྟར་ཉན་ཐོས་ཐེག་པ་ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་གསུངས་སོ། །གསུམ་པ་ལ། སྤྱིའི་སྒྲ་དོན་དང་། སོ་སོའི་སྒྲ་དོན་གཉིས་ལས། དང་པོ་ནི་རྒྱན་དུ། འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཅེས་སོ། །གཉིས་པ་ནི་དེ་ཉིད་དུ། བྱང་ཆུབ་ལ་ནི་ཉེ་བ་དང་། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་བསྲེགས་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །རང་གི་སེམས་ཀྱང་བསྲུངས་པའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་དང་། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད། །སོ་སོ་ཡང་དག་རིགས་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སོ། །བཞི་པ་ལ་བཅུ་གཉིས་ཏེ། མཉམ་གཞག་ཏུ་ཆོས་དབྱིངས་རྟོགས་པའི་ཁྱད་པར། རྗེས་ཐོབ་ཏུ་ངེས་ཤེས་དྲངས་ཚུལ་གྱི་ཁྱད་པར། ཡང་དག་པར་འགྲུབ་པའི་དུས་ཀྱི་ཁྱད་པར། གང་ཟག་རྣམ་པར་དག་པའི་ཁྱད་པར། བསླབ་པ་གསུམ་སྦྱོང་བའི་ཁྱད་པར། ཟག་མེད་ཀྱི་ཕུང་པོ་ལྔ་སྦྱང་བའི་ཁྱད་པར། ཕར་ཕྱིན་ལྷག་པའི་ཁྱད་པར། རྣམ་སྨིན་གྱི་སྐྱེ་བ་འཛིན་པའི་ཁྱད་པར། སྤང་བྱ་སྤོང་བའི་ཁྱད་པར། ཡོངས་སྦྱོང་གི་ཆོས་ཀྱི་ཁྱད་པར། ཡོན་ཏན་གྱི་གྲངས་ཀྱི་ཁྱད་པར། འཕོ་ཚུལ་གྱི་ཁྱད་པར་རོ། །དང་པོ་ནི་ས་བཅུ་པོ་རྣམས་ལ། རང་བཞིན་རྣམ་དག་གི་ཆོས་དབྱིངས་རྟོགས་ཚུལ་ལ་ནི་ཁྱད་པར་མེད་དེ། ཆོས་དབྱིངས་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་ཕྱིར་རོ། །གློ་བུར་དྲི་བྲལ་གྱི་ཆོས་དབྱིངས་མཐོང་ཚུལ་ལ་ནི་ཁྱད་པར་ཡོད་དེ། ས་ཕྱི་མ་རྣམས་སུ་སྔ་མ་རྣམས་ཀྱི་ངོས་སྐལ་གྱི་དྲི་མ་ལས་གྲོལ་བའི་བྲལ་བ་གསར་མཐོང་རེ་རེ་ཡོད་པའི་ཕྱིར་ཏེ། མདོར། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་མཆོག་གིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་སོ། །གཉིས་པ་ནི་མཉམ་གཞག་གི་ནུས་པས་རྗེས་ཐོབ་ཀྱི་གནས་སྐབས་སུ་ས་དང་པོར་ཆོས་དབྱིངས་ཀུན་ཏུ་འགྲོ་བའི་དོན་དུ་རྟོགས། གཉིས་པ་ལ་མཆོག་གི་དོན་དུ་རྟོགས། གསུམ་པ་ལ་རྒྱུ་མཐུན་པའི་དོན་གྱི་མཆོག་ཏུ་རྟོགས། བཞི་པ་ལ་ཡོངས་སུ་འཛིན་པ་མེད་པའི་དོན་དུ་རྟོགས། ལྔ་པ་ལ་རྒྱུད་ཐ་དད་པ་མེད་པའི་དོན་དུ་རྟོགས། དྲུག་པ་ལ་ཀུན་ནས་ཉོན་མོངས་པ་དང་རྣམ་པར་རྟོག་པ་མེད་པའི་དོན་དུ་རྟོགས། བདུན་པ་ལ་ཐ་དད་མེད་པའི་དོན་དུ་རྟོགས། བརྒྱད་པ་ལ་འབྲི་བ་དང་འཕེལ་བ་མེད་པའི་དོན་དུ་རྟོགས་ཤིང་། དབང་བཞི་ལས་ཆོས་དབྱིངས་ནི་རྣམ་པར་མི་རྟོག་པའི་ཡེ་ཤེས་ལ་དབང་བའི་གནས་དང་། ཞིང་དག་པ་ལ་དབང་བའི་གནས་སུ་རྟོགས། དགུ་པ་ལ་ཆོས་དབྱིངས་ཡེ་ཤེས་ལ་དབང་བའི་གནས་སུ་རྟོགས། བཅུ་པ་ལ་ཆོས་དབྱིངས་ལས་ལ་དབང་བའི་གནས་སུ་རྟོགས་ཏེ། དབུས་མཐར། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་དོན་དང་། །ཉོན་མོངས་རྣམ་རྟོག་མིན་དོན་དང་། །ཐ་དད་མེད་པའི་དོན་ཉིད་དང་། །འབྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་དོན། །ཞེས་སོ། །གསུམ་པ་ནི་བསྐལ་པ་གྲངས་མེད་པ་དང་པོས་ས་དང་པོ་དང་། གཉིས་པས་ས་བརྒྱད་པ་དང་། གསུམ་པས་ས་བཅུ་པར་འགྲུབ་སྟེ། བྱང་སར་བསྐལ་པ་ཆེན་པོ་གྲངས་མེད་པ་དང་པོས་ནི་མོས་པས་སྤྱོད་པ་ལ་གནས་པ་ལས་ཡང་དག་པར་འདས་ནས་རབ་ཏུ་དགའ་བ་ལ་གནས་པ་ཐོབ་སྟེ། དེ་རྟག་ཏུ་འབད་པས་ཐོབ་ཀྱི་མི་འབད་པས་ནི་མ་ཡིན་ནོ། །བསྐལ་པ་ཆེན་པོ་གྲངས་མེད་པ་གཉིས་པས་ནི་རབ་ཏུ་དགའ་བ་ལ་གནས་པ་ནས་མཚན་མ་མེད་པ་ལ་གནས་པ་རྩོལ་བ་དང་བཅས་པའི་བར་ལས་འདས་ཏེ། མཚན་མ་མེད་པ་ལ་གནས་པ་ལྷུན་གྱིས་གྲུབ་པ་ཐོབ་པར་འགྱུར་རོ། །དེ་ནི་ངེས་པ་ཁོ་ན་ཏེ། འདི་ལྟར་བསམ་པ་དག་པའི་བྱང་ཆུབ་སེམས་དཔའ་དེ་ནི་ངེས་པར་འབད་པའི་ཕྱིར་རོ། །བསྐལ་པ་ཆེན་པོ་གྲངས་མེད་པ་གསུམ་པས་ནི་མཚན་མ་མེད་པ་ལྷུན་གྱིས་གྲུབ་པ་དང་། སོ་སོ་ཡང་དག་པར་རིག་པ་ལ་གནས་པ་ལས་ཡང་དག་པར་འདས་ནས་བྱང་ཆུབ་སེམས་དཔའི་གནས་པ་མཆོག་ཐོབ་པར་འགྱུར་རོ། །ཞེས་གསུངས་སོ། །བཞི་པ་ནི་ས་དང་པོ་ལ་ལྟ་བ་རྣམ་པར་དག་པའི་གང་ཟག་དང་། གཉིས་པ་ལ་ཚུལ་ཁྲིམས་རྣམ་པར་དག་པའི་དང་། གསུམ་པ་ལ་མཉམ་པར་བཞག་པའི་དང་། བཞི་པ་ལ་ཆོས་ལ་ང་རྒྱལ་སྤངས་པའི་དང་། ལྔ་པ་ལ་རྒྱུད་ཐ་དད་པར་ང་རྒྱལ་མེད་པའི་དང་། དྲུག་པ་ལ་ཀུན་བྱང་ཐ་དད་པར་ང་རྒྱལ་མེད་པའི་དང་། བདུན་པ་ལ་སྐད་ཅིག་གཅིག་པ་དང་ལྡན་པའི་བློ་ཐོབ་པའི་དང་། བརྒྱད་པ་ལ་བཏང་སྙོམས་པ་དང་སངས་རྒྱས་ཀྱི་ཞིང་རྣམ་པར་སྦྱོང་བའི་དང་། དགུ་པ་ལ་སེམས་ཅན་སྨིན་པར་བྱེད་པ་ལ་མཁས་པའི་དང་། བཅུ་པ་ལ་མངོན་པར་ཤེས་པའི་མཐུ་ཆེན་པོ་དང་། ཏིང་ངེ་འཛིན་དང་གཟུངས་ཀྱི་ལུས་ཡོངས་སུ་རྫོགས་པ་དང་། སྤྲུལ་པའི་ལུས་ངེས་པར་སྟོན་པ་ལ་མཁས་པ་དང་། སངས་རྒྱས་རྣམས་ཀྱི་ཆོས་ཀྱི་རྒྱལ་ཚབ་ཏུ་མངོན་པར་དབང་བསྐུར་བའི་གང་ཟག་ཏུ་རྣམ་པར་གཞག་པ་ཡིན་ཏེ། རྒྱན་དུ། བྱང་ཆུབ་སེམས་དཔའ་ལྟ་བ་རྣམ་དག་པ། །ཚུལ་ཁྲིམས་ཤིན་ཏུ་རྣམ་དག་མཉམ་པར་གཞག །ཆོས་ལ་ང་སྤངས་རྒྱུད་དང་ཀུན་ཉོན་མོངས། །རྣམ་པར་བྱང་བ་ཐ་དད་ང་རྒྱལ་མེད། །སྐད་ཅིག་གཅིག་བློ་ཐོབ་པ་བཏང་སྙོམས་པ། །ཞིང་རྣམས་སྦྱོང་བ་སེམས་ཅན་སྨིན་བྱེད་པར། །མཁས་པ་མཐུ་ཆེན་ལུས་ཡོངས་རྫོགས་པ་དང་། །ངེས་པར་སྟོན་ལ་མཁས་པ་དབང་བསྐུར་ཡིན། །ཞེས་སོ། །ལྔ་པ་ནི། ས་དང་པོ་ནི་བསླབ་པ་གསུམ་གྱི་རྟེན་དང་། གཉིས་པར་ཚུལ་ཁྲིམས་ཀྱི་བསླབ་པ་དང་། གསུམ་པར་སེམས་ཀྱི་བསླབ་པ་དང་། བཞི་པར་བྱང་ཕྱོགས་སོ་བདུན་གྱིས་བསྒོམ་པས་བསྡུས་པའི་ཤེས་རབ་དང་། ལྔ་པར་བདེན་བཞིའི་ཆོས་ཀྱི་དེ་ཁོ་ན་ཉིད་རྟོགས་པའི་ཤེས་རབ་དང་། དྲུག་པར་རྟེན་ཅིང་འབྲེལ་བར་འབྱུང་བ་ཤེས་པའི་ཤེས་རབ་ལ་སློབ་ཅིང་། ས་ལྷག་མ་བཞི་ལ་བསླབ་པ་གསུམ་གྱི་འབྲས་བུ་ཡང་དག་པར་བསྟན་པ་སྟེ། རྒྱན་དུ། ཆོས་ཉིད་རབ་ཏུ་རྟོགས་ནས་འདིར། །ལྷག་པའི་ཚུལ་ཁྲིམས་ལྷག་སེམས་དང་། །ལྷག་པའི་ཤེས་རབ་ལ་རྗེས་སློབ། །ཤེས་རབ་སྤྱོད་ཡུལ་གཉིས་ཡིན་ཏེ། །ཆོས་ཀྱི་དེ་ཉིད་དང་དེ་ནི། །མི་ཤེས་ཤེས་སོགས་འཇུག་པ་ཉིད། །ཤེས་རབ་སྤྱོད་ཡུལ་དེ་ལྟ་བས། །དེ་ས་གཉིས་ལ་རྣམ་པར་གནས། །བསླབ་པ་རྣམས་དང་སྒོམ་པ་ཡི། །འབྲས་བུ་གཞན་ནི་རྣམ་པ་བཞི། །མཚན་མེད་འདུ་བྱེད་དང་བཅས་པར། །གནས་པ་འབྲས་བུ་དང་པོ་ཡིན། །དེ་ཉིད་མངོན་འདུ་བྱེད་མེད་དང་། །ཞིང་ནི་རྣམ་པར་དག་པ་དག །འབྲས་བུ་གཉིས་པར་འདོད་པ་ཡིན། །སེམས་ཅན་སྨིན་པ་གྲུབ་ཉིད་དང་། །ཏིང་ངེ་འཛིན་དང་གཟུངས་རྣམས་ནི། །འགྲུབ་པ་འབྲས་བུ་དམ་པ་ཡིན། །འབྲས་བུ་རྣམ་པ་འདི་བཞི་ནི། །ས་བཞི་པོ་ལ་ཡང་དག་བརྟེན། །ཞེས་སོ། །དྲུག་པ་ནི། ས་དང་པོ་ནི་ཟག་མེད་ཀྱི་ཕུང་པོ་ལྔའི་རྟེན་ཡིན་ལ། ས་གཉིས་པར་ཚུལ་ཁྲིམས་ཀྱི་ཕུང་པོ་སྦྱོང་། ས་གསུམ་པར་ཏིང་ངེ་འཛིན་གྱི་ཕུང་པོ་སྦྱོང་། བཞི་པ་ནས་དྲུག་པའི་བར་དུ་ཤེས་རབ་ཀྱི་ཕུང་པོ་སྦྱོང་། བདུན་པ་ཡན་ཆད་དུ་རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྦྱོང་སྟེ། རྒྱན་དུ། ཆོས་ཉིད་རབ་ཏུ་རྟོགས་ནས་འདིར། །ཚུལ་ཁྲིམས་ཀྱི་ནི་ཕུང་པོ་སྦྱོང་། །དེ་ཡི་འོག་ཏུ་ཏིང་འཛིན་དང་། །ཤེས་རབ་ཕུང་པོ་རྣམ་པར་སྦྱོང་། །དེ་ལས་གཞན་པ་དག་ལས་ནི། །སྒྲིབ་རྣམ་བཞི་དང་ཐོགས་པ་ཡི། །སྒྲིབ་པ་ལས་ཀྱང་རྣམ་གྲོལ་དང་། །གྲོལ་བའི་ཡེ་ཤེས་རྣམ་པར་སྦྱོང་། །ཞེས་སོ། །བདུན་པ་ནི། ས་དང་པོར་སྦྱིན་པའི་ཕར་ཕྱིན་ལྷག་པར་སྤྱོད་པ་ནས་ས་བཅུ་པར་ཡེ་ཤེས་ཀྱི་ཕར་ཕྱིན་ལ་ལྷག་པར་སྤྱོད་པ་སྟེ། དབུས་མཐར། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་ལམ་སྟོབས་དང་ཡེ་ཤེས་ཏེ། །འདི་དག་ཕ་རོལ་ཕྱིན་བཅུའོ། །ཁྱད་པར་ཅན་དང་ཁྱད་མེད་ནི། །ས་བཅུ་རྣམས་སུ་ཤེས་པར་བྱ། །ཞེས་སོ། །བརྒྱད་པ་ནི། མདོ་སྡེ་ས་བཅུ་པར། ས་དང་པོ་ལ་གནས་པ་ནི་ཕལ་ཆེར་ཛམྦཱུའི་གླིང་གི་དབང་ཕྱུག་སེར་སྣའི་དྲི་མ་དང་བྲལ་བ་སེམས་ཅན་རྣམས་ཀྱི་སེར་སྣའི་དྲི་མ་སེལ་བའི་བདག་པོར་འགྱུར་རོ། །གཉིས་པ་ལ་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ་ཤས་ཆེར་སེམས་ཅན་རྣམས་འཆལ་ཚུལ་དང་མི་དགེ་བ་ལས་བཟློག་ནས་དགེ་བ་ལ་འཛུད་དོ། །གསུམ་པ་ལ་བརྒྱ་བྱིན་དུ་གྱུར་ཏེ་སེམས་ཅན་གྱི་འདོད་པའི་འདོད་ཆགས་བཟློག་པ་ལ་མཁས་སོ། །བཞི་པ་ལ་འཐབ་བྲལ་གྱི་ལྷའི་རྒྱལ་པོ་རབ་འཐབ་བྲལ་དུ་གྱུར་ཏེ། སེམས་ཅན་རྣམས་ཀྱི་འཇིག་ཚོགས་ལ་ལྟ་བ་བཟློག་པ་ལ་མཁས་སོ། །ལྔ་པར་དགའ་ལྡན་གྱི་ལྷའི་རྒྱལ་པོ་ཡོངས་སུ་དགའ་ལྡན་དུ་གྱུར་ཏེ་མུ་སྟེགས་ཐམས་ཅད་བཟློག་པ་ལ་མཁས་སོ། །དྲུག་པ་ལ་འཕྲུལ་དགའི་ལྷའི་རྒྱལ་པོ་རབ་འཕྲུལ་དུ་གྱུར་ཏེ་སེམས་ཅན་རྣམས་ཀྱི་མངོན་པའི་ང་རྒྱལ་བཟློག་པ་ལ་མཁས་སོ། །བདུན་པ་ལ་གཞན་འཕྲུལ་དབང་བྱེད་ཀྱི་བདག་པོ་ལྷའི་རྒྱལ་པོ་དབང་བསྒྱུར་དུ་གྱུར་ཏེ་ཉན་རང་གི་མངོན་པར་རྟོགས་པ་སྒྲུབ་པ་རྣམས་ལ་མཁས་སོ། །བརྒྱད་པ་ལ་སྟོང་གི་བདག་པོ་ཚངས་པ་ཆེན་པོར་གྱུར་ཏེ་ཐེག་པ་གསུམ་གྱི་ཕ་རོལ་ཏུ་ཕྱིན་པ་སྟོན་པ་ལ་མཁས་ཤིང་འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན་ནོ། །དགུ་པ་ལ་སྟོང་གསུམ་གྱི་བདག་པོ་ཚངས་པ་ཆེན་པོར་གྱུར་ཏེ་ཐེག་པ་གསུམ་གྱི་ཕ་རོལ་ཏུ་ཕྱིན་པ་སྟོན་པ་ལ་བྱང་ཞིང་སེམས་ཅན་གྱི་བསམ་པ་ཡོངས་སུ་དྲིས་པ་བསྟན་པ་རྣམས་ཀྱིས་མི་འཕྲོགས་པ་ཡིན་ནོ། །བཅུ་པ་ལ་འོག་མིན་གྱི་ལྷའི་རྒྱལ་པོ་དབང་ཕྱུག་ཆེན་པོར་གྱུར་ཏེ་ཐེག་པ་གསུམ་གྱི་ཕར་ཕྱིན་སྟོན་པ་ལ་མཁས་ཤིང་ཆོས་ཀྱི་དབྱིངས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་སོ། །ཞེས་གསུངས་སོ། །དེ་དག་གི་དོན་ཡང་ཕར་ཕྱིན་ལྷག་པའི་ཁྱད་པར་དང་། སོ་སོའི་སྒྲ་དོན་རྣམས་ཕྱོགས་གཅིག་ཏུ་དྲིལ་ནས་རིན་ཆེན་ཕྲེང་བར། དེ་དག་དང་པོར་རབ་དགའ་བ། །བྱང་ཆུབ་སེམས་དཔའ་དགའ་བྱེད་ཕྱིར། །ཞེས་སོགས་ཚིགས་བཅད་ཉི་ཤུ་གསུངས་སོ། །དགུ་པ་ནི་དབུས་མཐར། ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ཀྱི། །གཉེན་པོ་དག་ནི་ས་ཡིན་ནོ། །ཞེས་ཉོན་མོངས་པ་ཅན་མ་ཡིན་པའི་སྒྲིབ་པ་བཅུ་རིམ་པ་བཞིན་སྤོང་བར་བཤད་ཅིང་། ཀུན་བཏུས་སུ། ས་བཅུའི་ཤེས་སྒྲིབ་བཅུ་དངོས་སུ་སྤོང་བའི་ཞར་ལ་ཉོན་སྒྲིབ་བཅུ་ཡང་སྤོང་བས། སངས་རྒྱས་ཀྱི་སར་སྒྲིབ་གཉིས་ཅིག་ཅར་དུ་སྤངས་པར་བཤད་དོ། །འདི་དང་རྒྱུད་བླ་གཉིས་ཀྱི་ཐུན་མོང་མ་ཡིན་པའི་ལུགས་ནི་ས་དང་པོའི་བར་ཆད་མེད་ལམ་གྱིས་ཐེག་པ་འོག་མའི་སྤང་བྱའི་རིགས་མ་ལུས་པ་དང་། ཐེག་ཆེན་གྱི་མཐོང་སྤང་ཅིག་ཅར་དུ་སྤོང་ཞིང་། ཐེག་ཆེན་གྱི་སྒོམ་སྤང་ནི་ཤེས་སྒྲིབ་སྒོམ་སྤང་ཡིན་པས་དེ་ལ་ཆེན་པོའི་ཆེན་པོ་ལ་སོགས་པ་རྣམ་པ་དགུར་ཕྱེ་ནས་ས་གཉིས་པའི་བར་ཆད་མེད་ལམ་ནས་བཅུ་པའི་བར་ཆད་མེད་ལམ་གྱི་བར་གྱིས་རིམ་པ་བཞིན་དུ་སྤོང་བར་བཞེད་དེ། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་སོ། །དེ་ཡང་སྒོམ་སྤང་གཉེན་པོའི་ཚོགས་སྒྲུབ་དང་། སྒོམ་ལམ་རྩེ་སྦྱོར་གྱི་སྐབས་སུ་བཤད་པ་ལྟར་གྱི་སྒོམ་སྤང་གཟུང་འཛིན་གྱི་རྣམ་པར་རྟོག་པ་བཞི་པོ་ཉིད་འདོད་པ་ནས་སྲིད་རྩེའི་བར་གྱི་ས་དགུ་པོ་རེ་རེས་བསྡུས་པའི་རྣམ་པ་དགུ་དགུ་ཡོད་པ་ལས། ཆེན་པོའི་ཆེན་པོ་དགུ་ས་གཉིས་པའི་བར་ཆད་མེད་ལམ་གྱིས་ཅིག་ཅར་དུ་སྤོང་བ་ནས་ཆུང་ངུའི་ཆུང་ངུ་དགུ་ས་བཅུ་པའི་བར་ཆད་མེད་ལམ་གྱིས་ཅིག་ཅར་དུ་སྤོང་བའི་བར་དུ་ཤེས་པར་བྱའོ། །བཅུ་པ་ནི། ས་དང་པོ་ལ་ཡོངས་སྦྱོང་བཅུ། གཉིས་པ་ལ་བརྒྱད། གསུམ་པ་ལ་ལྔ། བཞི་པ་ལ་བཅུ། ལྔ་པ་ལ་བཅུ། དྲུག་པ་ལ་བཅུ་གཉིས། བདུན་པ་ལ་ཉི་ཤུ། བརྒྱད་པ་ལ་བརྒྱད། དགུ་པ་ལ་བཅུ་གཉིས་ཏེ། ཀུན་བསྡོམས་པས་དགུ་བཅུ་གོ་ལྔའོ། །ས་བཅུ་པ་ལ་ཡོངས་སྦྱོང་ལོགས་སུ་མི་བགྲང་བ་ནི་སྤྲོ་བ་བསྐྱེད་པའི་ཆེད་དུ་འབྲས་བུའི་སྒོ་ནས་བསྟན་པའི་སྐབས་ཡིན་པའི་ཕྱིར་རོ། །མེད་པ་ནི་མ་ཡིན་ཏེ། ཉིར་སྣང་དུ། སའི་ཚོགས་ནི་བྱང་ཆུབ་སེམས་དཔའི་ས་བཅུ་པོ་རྣམས་སོ་སོར་བདག་ཉིད་ཀྱི་ཡོངས་སུ་སྦྱོང་བའི་དབྱེ་བས་རྣམ་པ་བཅུར་འགྱུར་རོ། །ཞེས་གསུངས་པའི་ཕྱིར་རོ། །འོ་ན་ས་བཅུ་པའི་ཡོངས་སྦྱོང་གང་སྙམ་ན་ས་དགུ་པའི་ཡོངས་སྦྱོང་དེ་ཉིད་ས་དགུ་པ་ཡོངས་སུ་མ་རྫོགས་པ་རྫོགས་པར་བྱ་བའི་ཆེད་དུ་སྦྱོང་བ་ནི་ས་དགུ་པའི་ཡོངས་སྦྱོང་ཡིན་ལ་རྫོགས་ནས་ས་བཅུ་པའི་རྗེས་ཐོབ་ཏུ་འགྱུར་བ་ནི་ས་བཅུ་པའི་ཡོངས་སྦྱོང་ཡིན་ནོ། །ཡང་ཡོངས་སྦྱོང་དང་པོ་ནི་སྨོན་ལམ་གྱི་ཕར་ཕྱིན་ལྷག་པ་ཡིན་པས་ས་བརྒྱད་པ་དང་ཐུན་མོང་བ་ཡིན་ལ། གཉིས་པ་ནི་སོ་སོ་ཡང་དག་རིག་པ་རྗེས་སུ་མཐུན་པ་ཐོབ་པའི་དོན་ཡིན་པས་ས་དགུ་པའི་ཡོངས་སྦྱོང་གཙོ་ཆེ་ལ་མངལ་དུ་འཇུག་པ་མཆོག་མན་ཆད་ནི་གཞན་ངོར་ཕྲིན་ལས་བྱེད་ཚུལ་སངས་རྒྱས་དང་མཉམ་པའི་དོན་ཡིན་པས་ས་བཅུ་པའི་ཡོངས་སྦྱོང་གཙོ་ཆེའོ། །ཡོངས་སྦྱོང་འདི་རྣམས་ས་མ་ཐོབ་པ་སྦྱོང་ངམ་ཐོབ་ཟིན་སྦྱོང་ཞེ་ན། འདི་ལ་ཁ་ཅིག་མ་ཐོབ་པ་ཐོབ་པར་བྱེད་པའི་ཆེད་དུ་སྦྱོང་ཞེས་འདོད་པ་ནི་མི་འཐད་དེ། མདོར། རབ་འབྱོར་ས་དང་པོ་ལ་གནས་པའི་བྱང་སེམས་ཆེན་པོས་ཡོངས་སུ་སྦྱོང་བ་བཅུ་པོ་འདི་དག་བྱ་སྟེ། ཞེས་དང་། ས་བཅུ་པའི་མདོར། ཀྱེ་རྒྱལ་བའི་སྲས་དག་བྱང་སེམས་ས་དང་པོ་ལ་གནས་པས་ཆོས་བཅུ་ཡིད་ལ་བྱ་སྟེ། ཞེས་གསུངས་པའི་ཕྱིར་རོ། །འོ་ན་ས་ནི་དང་པོ་འཐོབ་འགྱུར་ཏེ། །ཞེས་པ་དང་འགལ་ལོ་ཞེ་ན། དེ་ནི་ས་དང་པོ་ཡོངས་སུ་རྫོགས་པར་འཐོབ་པར་འགྱུར་ཞེས་པའི་དོན་ཏེ། ས་དང་པོའི་རྗེས་ཐོབ་ཏུ་བཅུ་པོ་སྦྱངས་པས་བཅུ་པོ་རྫོགས་པར་མ་ཐོབ་ཀྱི་བར་དུ་ས་དང་པོ་ཡིན་ལ། ཡོངས་སུ་རྫོགས་ནས་ས་གཉིས་པར་འཕོས་པ་ཡིན་པའི་ཕྱིར་རོ། །དེ་ལྟར་ན་འགྲེལ་ཆེན་དུ། ཡོངས་སྦྱོང་མ་རྫོགས་པ་དེ་སྲིད་དུ་ས་དེ་ཡིན་ལ། ཡོངས་སྦྱོང་རྫོགས་ནས་ས་གཞན་ཡིན་པར་གསུངས་པའི་དོན་ཡང་ལེགས་པར་བཤད་པ་ཡིན་ནོ། །བཅུ་གཅིག་པ་ནི་མདོ་སྡེ་ས་བཅུ་པར། ཀྱེ་རྒྱལ་བའི་སྲས་འདི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་རབ་ཏུ་དགའ་བ་ཐོབ་མ་ཐག་ཏུ་འཇིགས་པ་གང་དག་ཡིན་པ་འདི་ལྟ་སྟེ། འཚོ་བ་མེད་པའི་འཇིགས་པའམ། ཚིགས་སུ་བཅད་པ་མེད་པའི་འཇིགས་པའམ། འཆི་བས་འཇིགས་པའམ། ངན་འགྲོས་འཇིགས་པའམ། འཁོར་གྱི་ནང་དུ་བག་ཚ་བས་འཇིགས་པ་དེ་དག་ཐམས་ཅད་དེ་ལ་མེད་པ་ཡིན་ནོ་ཞེས་སོ། །གཞན་ཡང་ས་བཅུ་ལ་གོ་རིམ་བཞིན་དུ་ཕར་ཕྱིན་བཅུ་རྫོགས་པ་དང་། ཡང་ས་དང་པོ་ལ་ཡོན་ཏན་བརྒྱ་ཕྲག་བཅུ་གཉིས་ཡོད་དེ། ས་བཅུ་པར། འདོད་ན་བརྩོན་འགྲུས་རྩོམ་པ་རྣམ་པ་འདི་ལྟ་བུས་ཁྱིམ་དང་། ཆུང་མ་དང་། ལོངས་སྤྱོད་ཐམས་ཅད་སྤངས་ཏེ་རབ་ཏུ་བྱུང་བ་དང་། རབ་ཏུ་བྱུང་ནས་ཀྱང་སྐད་ཅིག་ཐང་ཅིག་ཡུད་ཙམ་ཅིག་ལ་ཏིང་ངེ་འཛིན་བརྒྱ་ཐོབ་ཅིང་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གི་བྱིན་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང་། ཞིང་བརྒྱར་འགྲོ་བ་དང་། འཇིག་རྟེན་གྱི་ཁམས་བརྒྱ་འོད་ཀྱིས་ཁྱབ་པར་བྱས་ནས་གཞན་དག་ལ་སྟོན་པ་དང་། སྤྲུལ་པ་བརྒྱས་སེམས་ཅན་བརྒྱ་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱར་གནས་པར་བྱེད་པ་དང་། སྔོན་དང་ཕྱི་མའི་མཐའི་བསྐལ་པ་བརྒྱར་ཡེ་ཤེས་མཐོང་བ་འཇུག་པ་དང་། ཆོས་ཀྱི་སྒོ་བརྒྱ་རབ་ཏུ་རྣམ་པར་འབྱེད་པ་དང་། ལུས་བརྒྱ་སྤྲུལ་པ་དང་། ལུས་རེ་རེ་ཡང་འཁོར་བྱང་ཆུབ་སེམས་དཔའ་བརྒྱ་བརྒྱ་དང་ལྡན་པར་ཀུན་ཏུ་སྟོན་པའོ་ཞེས་གསུངས་སོ། །ས་གཉིས་པ་ལ་ཡོན་ཏན་དེ་དག་སྟོང་ཕྲག་དང་། གསུམ་པ་ལ་འབུམ་དང་། བཞི་པ་ལ་བྱེ་བ་དང་། ལྔ་པ་ལ་བྱེ་བ་ཕྲག་སྟོང་དང་། དྲུག་པ་ལ་བྱེ་བ་ཕྲག་འབུམ་དང་། བདུན་པ་ལ་བྱེ་བ་ཕྲག་ཁྲིག་འབུམ་དང་། བརྒྱད་པ་ལ་སྟོང་གསུམ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དང་། དགུ་པ་ལ་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྔུལ་ཕྲ་རབ་ཀྱི་རྡུལ་སྙེད་དང་། བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་བརྒྱ་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐོབ་པར་གསུངས་སོ། །དེ་དག་གི་དོན་དབུ་མ་འཇུག་པར། དེ་ཚེ་འདིས་ནི་སངས་རྒྱས་བརྒྱ་མཐོང་ཞིང་། །ཞེས་སོགས་ཚིག་བཅད་དགུར་གསུངས་སོ། །བཅུ་གཉིས་པ་ནི་བདག་མེད་མངོན་སུམ་དུ་རྟོགས་པའི་ཡེ་ཤེས་ཐོབ་ནས་ཇི་སྲིད་དུ་ལྟུང་བའི་འཁྲུལ་པ་ཆ་ཕྲ་བ་རྣམས་ལ་ཤེས་བཞིན་དུ་གནས་པར་བྱེད་མི་ནུས་པ་དེ་སྲིད་དུ་ས་དང་པོ་དང་ནུས་པ་ནི་གཉིས་པ་ཡིན་ནོ། །དེ་ནས་ཇི་སྲིད་དུ་འཇིག་རྟེན་པའི་ཏིང་ངེ་འཛིན་མཐའ་དག་ལ་སྙོམས་པར་འཇུག་པ་དང་། ཐོས་པའི་དོན་ཀུན་འཛིན་མི་ནུས་པ་དེ་སྲིད་དུ་གཉིས་པ་དང་། ནུས་པ་ན་གསུམ་པའོ། །དེ་ནས་ཇི་སྲིད་དུ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱིས་ལན་མང་དུ་གནས་པར་བྱེད་མི་ནུས་ཤིང་སྙོམས་པར་འཇུག་པ་ལ་སྲེད་པ་དང་། ཆོས་ལ་སྲེད་པ་ལས་སེམས་ལྷག་པར་བཏང་སྙོམས་སུ་འཇོག་མི་ནུས་པ་དེ་སྲིད་དུ་གསུམ་པ་དང་། ནུས་པ་ན་བཞི་པ་ཡིན་ནོ། །དེ་ནས་ཇི་སྲིད་དུ་བདེན་པ་བཞི་བསྒོམ་པ་ན་འཁོར་བ་དང་མྱ་ངན་ལས་འདས་པ་དག་ལ་གཅིག་ཏུ་ཕྱོགས་པ་དང་། མངོན་པར་ཕྱོགས་པའི་སེམས་བཟློག་སྟེ་ཐབས་ཀྱིས་ཟིན་པའི་བྱང་ཆུབ་ཀྱི་ཕྱོགས་བསྒོམ་པར་མི་ནུས་པ་དེ་སྲིད་དུ་བཞི་པ་དང་། ནུས་པ་ན་ལྔ་པ་ཡིན་ནོ། །དེ་ནས་ཇི་སྲིད་དུ་འཁོར་བས་སྐྱོ་བ་དང་། མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་ལྔ་པ་དང་། དེ་ནུས་པ་ན་དྲུག་པ་ཡིན་ནོ། །དེ་ནས་ཇི་སྲིད་དུ་གནས་སྐབས་ཐམས་ཅད་ལ་མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་དྲུག་པ་དང་། ནུས་པ་ན་བདུན་པ་ཡིན་ནོ། །དེ་ནས་ཇི་སྲིད་དུ་ལྷུན་གྱིས་གྲུབ་པ་མཚན་མ་མེད་པ་ལ་མཉམ་པར་འཇོག་མི་ནུས་པ་དེ་སྲིད་དུ་བདུན་པ་དང་། ནུས་པ་ན་བརྒྱད་པ་ཡིན་ནོ། །དེ་ནས་སོ་སོ་ཡང་དག་པར་རིགས་པ་བཞིས་ཆོས་སྟོན་པ་ལ་དབང་དུ་མ་གྱུར་པ་དེ་སྲིད་དུ་བརྒྱད་པ་དང་། གྱུར་པ་ན་དགུ་པ་ཡིན་ནོ། །དེ་ནས་ཆོས་ཀྱི་སྐུ་ཡོངས་སུ་རྫོགས་པ་ཐོབ་པ་དང་ཡང་དག་པར་རིག་པར་མི་ནུས་པ་དེ་སྲིད་དུ་དགུ་པ་དང་། ནུས་པ་ན་བཅུ་པ་ཡིན་ནོ། །དེ་ནས་སྤྲུལ་པ་ལ་སོགས་པའི་དབང་ཐོབ་ཀྱང་ཤེས་བྱ་ཐམས་ཅད་ལ་ཆགས་པ་དང་། ཐོགས་པ་མེད་པའི་ཡེ་ཤེས་སྐྱེད་པར་བྱེད་མི་ནུས་པ་དེ་སྲིད་དུ་བཅུ་པ་དང་ནུས་པ་དེའི་ཚེ་སངས་རྒྱས་ཀྱི་ས་ཡིན་ནོ་ཞེས་པ་ནི་དགོངས་འགྲེལ་གྱི་ལུང་ལས་གསུངས་པའི་དོན་ནོ། །བློ་གྲོས་མི་ཟད་པས་ཞུས་པའི་མདོར། ས་དང་པོ་ལ་རྨི་ལམ་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཕྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ་། །གཉིས་པ་ལ་སྟོང་གསུམ་ལག་མཐིལ་ལྟར་མཉམ་པ་ལ་རིན་པོ་ཆེ་བྱེ་བ་ཕྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པ་མཐོང་ངོ་། །གསུམ་པ་ལ་བདག་ཉིད་དཔའ་ཞིང་གོ་ཆ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བར་མཐོང་ངོ་། །བཞི་པ་ལ་ཕྱོགས་བཞི་ནས་རླུང་གི་དཀྱིལ་འཁོར་བཞི་ལས་ཐམས་ཅད་དང་ལྡན་པའི་དཀྱིལ་འཁོར་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་སུམ་དུ་འཐོར་བ་མཐོང་ངོ་། །ལྔ་པ་ལ་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱི་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པར་མཐོང་ངོ་། །དྲུག་པ་ལ་རྫིང་ཐེམ་སྐས་བཞི་དང་ལྡན་པ་གསེར་གྱི་བྱེ་མ་གདལ་བ་རྙོག་པ་མེད་ཅིང་དྭངས་ལ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་ལ་མེ་ཏོག་ཨུཏྤ་ལ་དང་། ཀུ་མུད་དང་། པདྨ་དཀར་པོས་བརྒྱན་པ་མཐོང་སྟེ། དེ་ལ་བདག་ཉིད་རྩེ་དགའ་ཡོངས་སུ་སྤྱོད་པར་མཐོང་ངོ་། །བདུན་པ་ལ་ངོས་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ་དེ་ལས་བདག་ཉིད་མ་རྨས་མ་ཉམས་པར་སླར་ལྡོག་པ་མཐོང་ངོ་། །བརྒྱད་པ་ལ་ཕྲག་པ་གཉིས་ན་རི་དྭགས་ཀྱི་རྒྱལ་པོ་སེང་གེ་རལ་པ་ཅན་ཅོད་པན་ཐོགས་པ་གཅན་གཟན་ཕྲ་མོ་ཐམས་ཅད་སྐྲག་པར་བྱེད་ཅིང་འདུག་པ་མཐོང་ངོ་། །དགུ་པ་ལ་འཁོར་ལོས་སྒྱུར་བའི་རྒྱལ་པོ་མཐོང་སྟེ། སྐྱེ་བོ་བྱེ་བ་ཕྲག་ཁྲིག་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་མགོའི་སྟེང་ན་རིན་པོ་ཆེ་སྣ་ཚོགས་ཀྱིས་སྤྲས་པའི་གདུགས་འཛིན་པ་མཐོང་ངོ་། །བཅུ་པ་ལ་དེ་བཞིན་གཤེགས་པའི་སྐུ་མཐོང་སྟེ་སྐུ་མདོག་གསེར་ལྟ་བུ་འོད་འདོམ་གང་བ་ཚངས་པ་བྱེ་བ་ཕྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་ཆོས་སྟོན་པ་མཐོང་ངོ་ཞེས་གསུང་ཞིང་། དེ་བཞིན་དུ་དཀོན་མཆོག་བརྩེགས་པ་དང་། གསེར་འོད་དམ་པ་ནས་ཀྱང་ས་བཅུ་པོ་ལ་རྨི་ལམ་གྱི་རྟགས་མང་དུ་གསུངས་པ་རྣམས་ལ་སྔོན་གྱི་མཁས་པ་གཞོན་ནུ་ཚུལ་ཁྲིམས་ལ་སོགས་པ་རྣམས་ནི། བྱང་འཕགས་ལ་གཉིད་མེད་པས་རྨི་ལམ་མི་སྲིད་པ་དང་། ཉན་ཐོས་བདེན་པ་མཐོང་བ་ཡང་ཐེ་ཚོམ་ལས་བརྒལ། སོམ་ཉི་ལས་བརྒལ་བར་གསུངས་ན། བྱང་སེམས་ཆོས་ཐམས་ཅད་ཀྱི་སྟོང་པ་ཉིད་མངོན་སུམ་དུ་མཐོང་བ་ནི་ས་ཐོབ་པའི་རྟགས་རྨི་ལམ་ལ་ལྟོས་པ་མི་སྲིད་པས། ས་མ་ཐོབ་པའི་ཟླ་བོ་གཞན་གྱིས་གཞན་ལ་དཔོག་པའི་རྟགས་ཡིན་ནོ་ཞེས་གསུངས་སོ། །མཁན་ཆེན་པ་ནི། ས་ཐོབ་ནས་མི་དགེ་བའི་གཉིད་མེད་ཀྱང་དགེ་བའི་གཉིད་ཡོད་པས་རྨི་ལམ་གྱི་རྟགས་ཡོད་པ་མི་འགལ་ཞེས་བཞེད་ཀྱང་། དཔལ་ལྡན་ས་སྐྱ་པཎྜི་ཏ་ནི། རྨི་ལམ་གྱི་རྟགས་དེ་དག་མོས་སྤྱོད་ཀྱི་ས་ལ་སྦྱར་ན་རུང་མོད་ཀྱི། འཕགས་པའི་ས་ལ་དངོས་སུ་སྦྱར་ན་མདོ་རྒྱུད་ཀུན་དང་འགལ་ཞེས་གསུངས་པ་འདི་ཉིད་དོན་ལ་གནས་ཏེ། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་ཁམས་གོང་དུ་སྐྱེས་པའི་སོ་སྐྱེ་ཙམ་ལ་ཡང་གཉིད་མེད་པར་བཤད་ན། ཆོས་དབྱིངས་ཀུན་འགྲོའི་ཚུལ་གྱིས་རྟོགས་པའི་སྟོབས་ཀྱིས་མཐར་གནས་ཀྱི་སྙོམས་འཇུག་དགུ་ཐོབ་པའི་བྱང་འཕགས་རྣམས་ལ་ལྟ་སྨོས་ཀྱང་ཅི་དགོས་པའི་ཕྱིར་དང་། དཀོན་མཆོག་བརྩེགས་པར། ས་དང་པོ་ཐོབ་པའི་རྨི་ལམ་གྱི་རྟགས་བྱུང་བའི་བྱང་སེམས་ཀྱི་ལས་ཀྱི་སྒྲིབ་པ་སྦྱང་བའི་ཆེད་དུ་ཕུང་པོ་གསུམ་པའི་མདོ་འདོན་པར་གསུང་ཞིང་། བྱང་སེམས་འཕགས་པས་ལས་ཉོན་མ་ལུས་པ་སྤངས་ཟིན་པས་ལས་སྒྲིབ་སྦྱང་བའི་ཆེད་དུ་ཕུང་པོ་གསུམ་པའི་མདོ་འདོན་པ་ཡང་འགལ་བའི་ཕྱིར། འོ་ན་ཅི་ལྟར་སྙམ་ན། རྩེ་སྦྱོར་ཐོབ་ནས་ཐེག་པ་གཞན་གྱིས་བར་མ་ཆོད་པར་ས་བཅུ་འཐོབ་པར་ངེས་པས་ན་དྲོད་ཀྱི་རྩེ་སྦྱོར་གྱི་སྐབས་སུ་རྨི་ལམ་གྱི་རྟགས་བཅུ་ཆར་འབྱུང་ཞིང་དེ་དག་ཐེག་པ་གཞན་གྱིས་བར་མ་ཆོད་པར་ས་དེ་དང་དེ་དག་འཐོབ་པར་འགྱུར་བའི་རྟགས་དེ་རྟགས་ཀྱིས་མཚོན་པའི་རྩེ་སྦྱོར་གྱི་སྐབས་སུ་རྨི་ལམ་གྱི་རྟགས་དྲུག་བཤད་པ་དང་དོན་གཅིག་པར་མངོན་ནོ། །ད་ནི་གཞུང་གི་དོན་ལ་འཇུག་པར་བྱ་སྟེ། འདི་ལ་ས་དགུ་ཡོངས་སྦྱོང་གི་སྒོ་ནས་བསྟན་པ་དང་། ས་བཅུ་པ་འབྲས་བུའི་སྒོ་ནས་བསྟན་པ་གཉིས། དང་པོ་ལ་དགུ་ལས་ས་དང་པོ་ཡོངས་སྦྱོང་ནི། ཡོངས་སུ་སྦྱོང་བ་རྣམ་བཅུ་ཡི། །ཞེས་སོགས་ཏེ། ཚིག་རྐང་དང་པོ་གཉིས་ནི་གྲངས་འདོན་པ་བསྒྱུར་ཏེ་འོག་མ་རྣམས་ཀྱི་ཡང་གསལ་བྱེད་དུ་སྦྱར་བར་བྱའོ། །འདི་ལ་སྦྱོང་བྱེད་ཆོས་ཀྱི་སྒོ་ནས་དབྱེ་བ་དང་། སྦྱོང་ཚུལ་ཇི་ལྟ་བུས་འཐོབ་པ་གཉིས་ལས། དང་པོ་ལ་དབྱིག་གཉེན་གྱི་འགྲེལ་པར་བསམ་པ་དང་། སྦྱོར་བ་དང་བསྔོ་བ་ཕུན་སུམ་ཚོགས་པ་གསུམ་ལས། དང་པོ་ལ་རང་དོན་གྱི་བསམ་པ་ནི་བསམ་དང་ཞེས་དང་། གཉིས་དོན་གྱི་བསམ་པ་ནི་ཕན་པའི་དངོས་ཉིད་དང་ཞེས་དང་། གཞན་དོན་གྱི་བསམ་པ་ནི་སེམས་ཅན་རྣམས་ལ་སེམས་མཉམ་ཉིད་ཅེས་པའོ། །སྦྱོར་བ་ཕུན་སུམ་ཚོགས་པ་ལ་ཟང་ཟིང་གིས་སྡུད་པའི་སྦྱོར་བ་དང་། ཆོས་ཀྱིས་སྡུད་པའི་སྦྱོར་བ་དང་། བདག་ཉིད་ཀུན་ཏུ་བསྲུང་བའི་སྦྱོར་བ་གསུམ་ལས། དང་པོ་ནི་གཏོང་བ་དང་། གཉིས་པ་ལ་རང་སྡུད་པ་ནི་བཤེས་གཉེན་བསྟེན་པ་དང་། དམ་ཆོས་དམིགས་པ་ཚོལ་བ་གཉིས་དང་། གཞན་སྡུད་པ་ནི་འོག་གི་ཆོས་སྟོན་པ་དང་། གསུམ་པ་ནི་རྟག་ཏུ་ངེས་འབྱུང་སེམས་ཉིད་དང་། བདེན་པའི་ཚིག་སྨྲས་པའོ། །བསྔོ་བ་ཕུན་སུམ་ཚོགས་པ་ནི་སངས་རྒྱས་བཀུར་འདོད་དགའ་བའོ། །སྦྱོར་ཚུལ་ཇི་ལྟ་བུས་འཐོབ་པ་ནི་འདི་དག་རང་བཞིན་མི་དམིགས་པས། ཡོངས་སུ་སྦྱོང་བ་ཤེས་པར་བྱ་ཅེས་པ་སྟེ་འོག་མ་ཐམས་ཅད་ཀྱི་གསལ་བྱེད་དུ་སྦྱར་རོ། །དེ་ཡང་འདིར་ས་བཅུའི་མཉམ་གཞག་གི་སྒྲིབ་པ་སྤོང་ཚུལ་ལ་གཉེན་པོའི་ཚོགས་སྒྲུབ་དང་། མཉམ་གཞག་ཏུ་ཐོབ་པའི་ས་དེ་ཉིད་ཡོན་ཏན་ཡོངས་སུ་རྫོགས་པའི་ཆེད་དུ་རྗེས་ཐོབ་ཏུ་སྦྱོང་བ་ལ་སའི་ཚོགས་སུ་འཇོག་པའི་སྐབས་ཡིན་པས་རྗེས་ཐོབ་ཀྱི་གནས་སྐབས་སུ་མཚན་འཛིན་དང་བཅས་པའི་ཉམས་ལེན་འབྱུང་སྲིད་པས་དེ་དགག་པའི་ཆེད་དུ་རང་བཞིན་མི་དམིགས་པས་སྦྱོང་བར་གསུངས་པ་སྟེ་མོས་བསྔོ་རྗེས་སུ་ཡི་རང་རྣམས་ལ་ཡང་མི་དམིགས་པའི་རྣམ་པ་ཅན་དགོས་པར་གསུངས་པ་དང་དོན་གཅིག་གོ །འདིར་ཟང་ཟིང་གི་གཏོང་བ་དང་། ཆོས་སྟོན་པ་གཙོ་བོར་གསུངས་པ་ནི་ས་དང་པོར་སྦྱིན་པའི་ཕར་ཕྱིན་ལྷག་པའི་དོན་ཡིན་ཞིང་བཅུ་པོ་འདི་དག་རྫོགས་པར་ཐོབ་པའི་ཚེ་ས་དང་པོ་རྫོགས་པར་ཐོབ་ཟིན་པས། ས་གཉིས་པར་འཕོས་པ་ཡིན་ལ་འོག་མ་རྣམས་ལ་ཡང་འདི་བཞིན་དུ་ཤེས་པར་བྱའོ། །ལོ་ཆེན་གྱིས་ས་དང་པོ་ལ་འཇུག་པའི་སྦྱོར་བའི་སྐབས་སུ་ཡོངས་སྦྱོང་བཅུ་པོ་འདི་དག་སྦྱོང་བར་བཤད་པ་ནི་སྔར་དྲངས་པའི་མདོ་གཉིས་དང་འགལ་ལོ། །ས་གཉིས་པའི་ཡོངས་སྦྱོང་ནི། ཚུལ་ཁྲིམས་བྱས་པ་གཟོ་དང་བཟོད། །ཅེས་པ་སྟེ། འདི་ལ་གཞི་ཚུལ་ཁྲིམས། བསམ་པ་ཁྱད་པར་ཅན། སྦྱོར་བ་ཁྱད་པར་ཅན་དང་གསུམ་ལས། དང་པོ་ནི། ཚུལ་ཁྲིམས་ཞེས་པ་སྟེ། ཐོགས་མེད་ཀྱིས་ཉེས་སྤྱོད་སྡོམ་པའི་ཚུལ་ཁྲིམས་ཁོ་ན་ལ་བཞེད་ཅིང་། སློབ་དཔོན་གྱིས་ནི་དབྱིག་གཉེན་གྱི་རྗེས་སུ་འབྲངས་ནས་ཚུལ་ཁྲིམས་གསུམ་ཆར་ལ་བཞེད་དོ། །གཉིས་པ་ནི་བྱས་པ་གཟོ་བ་དང་། གནོད་པ་བཟོད་པ་དང་། རབ་ཏུ་དགའ་བ་དང་། སྙིང་བརྩེ་ཆེ་བ་སྟེ་བཞིའོ། །གསུམ་པ་ནི་བཀུར་སྟི་དང་། བླ་མ་ལ་གུས་ཉན་དང་། སྦྱིན་སོགས་ལ་བརྩོན་པ་སྟེ་གསུམ་མོ། །འདིར་ཚུལ་ཁྲིམས་གཙོ་བོར་གསུངས་པ་ནི་ས་གཉིས་པའི་རྗེས་ཐོབ་ཏུ་ཚུལ་ཁྲིམས་ཀྱི་ཕར་ཕྱིན་ལྷག་ཅིང་ཚུལ་ཁྲིམས་ཀྱི་བསླབ་པ་སྦྱོང་བའི་དོན་ཏོ། །ས་གསུམ་པའི་ཡོངས་སྦྱོང་ནི། ཐོས་པས་མི་ངོམས་ཉིད་དང་ནི་ཞེས་སོགས་ཏེ། ས་གསུམ་པའི་རྗེས་ཐོབ་ཏུ་སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བར་བྱ་སྙམ་པའི་བསམ་པ་ཆོས་ཉིད་ཀྱི་ས་སྐྱེ་ཞིང་། དེ་ལ་ཐབས་སྒྲིབ་པ་མེད་པའི་ཡེ་ཤེས་དགོས། སྒྲིབ་པ་སྤོང་བའི་རྒྱུ་ལ་ཤེས་རབ་དགོས། དེའི་རྒྱུར་ཡང་ཏིང་ངེ་འཛིན་དགོས། དེ་ལ་ཡང་ཏིང་ངེ་འཛིན་གྱི་རབ་དབྱེ་ལ་མཁས་པ་ཅིག་དགོས། དེའི་ཆེད་དུ་གསུང་རབ་ཐོས་པ་ཅིག་དགོས་པས་ཐོས་པ་མཆོག་ཏུ་རྟོགས་ཤིང་། དེའི་ཚེ་ཚིག་བཞི་པ་ཅིག་ཙམ་གྱི་དོན་དུ་ཡང་སྟོང་གསུམ་མེ་ལྕེ་གཅིག་ཏུ་གྱུར་པ་ལས་ཀྱང་བརྒལ་བར་བྱེད་དོ། །དེས་ན་ཐོས་པས་མི་ངོམས་པ་ཉིད་དང་ཟང་ཟིང་མེད་པར་གཞན་ལ་ཆོས་སྦྱིན་པ་གཉིས་འབྱུང་ཞིང་སངས་རྒྱས་ལས་ཆོས་ཐོས་པའི་ཚེ་སངས་རྒྱས་ཀྱི་ཞིང་མཐོང་ནས་དེ་ཐོབ་པར་འདོད་པས་སངས་རྒྱས་ཞིང་ཀུན་སྦྱོང་བ་དང་། གཞན་ལ་ཆོས་སྦྱིན་པའི་ཚེ་ལོག་སྒྲུབ་བཟོད་པས་འཁོར་བས་ཡོངས་སུ་མི་སྐྱོ་བ་གཉིས་འབྱུང་། གཞན་དོན་བྱེད་པ་ལ་རང་དོན་རྫོགས་དགོས་པར་མཐོང་ནས་ངོ་ཚ་ཤེས་པ་དང་། ཁྲེལ་ཡོད་པ་གཉིས་འབྱུང་ངོ་། །རློམ་མེད་བདག་ཉིད་ཅེས་པ་ནི་མངོན་ཞེན་མེད་པའི་དོན་ཏོ། །འདིར་ཐོས་པས་མི་ངོམས་པ་ནི་ས་གསུམ་པའི་རྗེས་ཐོབ་ཏུ་ཏིང་ངེ་འཛིན་གྱི་བསླབ་པ་སྦྱོང་བའི་དོན་ཡིན་ཞིང་། འཁོར་བས་ཡོངས་སུ་མི་སྐྱོ་བ་ནི་བཟོད་པའི་ཕར་ཕྱིན་ལྷག་པའི་དོན་ཡིན་ནོ། །ས་བཞི་པའི་ཡོངས་སྦྱོང་ནི། ནགས་གནས་འདོད་ཆུང་ཆོག་ཤེས་དང་། །ཞེས་སོགས་ཏེ། འདི་ལ་ཡང་བཅུ་ཡོད་པ་དོན་དྲུག་ཏུ་འདུས་ཏེ། སེམས་རྣམ་དག སྤྱོད་པ་རྣམ་དག ཡིད་བྱེད་རྣམ་དག ཕྲིན་ལས་རྣམ་དག སྟོང་པ་རྣམ་དག རྣལ་འབྱོར་རྣམ་དག་གོ །དང་པོ་ནི་ནགས་གནས་དང་། འདོད་ཆུང་དང་། ཆོག་ཤེས་གསུམ་མོ། །གཉིས་པ་ནི་སྦྱངས་པའི་ཡོན་ཏན་བཅུ་གཉིས་ལེན་པ་དང་། བསླབ་པ་ཡོངས་སུ་མི་གཏོང་བ་གཉིས་སོ། །སྦྱངས་པའི་ཡོན་ཏན་བཅུ་གཉིས་ནི། ཟས་ཀྱི་དབང་དུ་བྱས་པ་གསུམ་དང་། གོས་ཀྱི་དབང་དུ་བྱས་པ་གསུམ་དང་། གནས་ཀྱི་དབང་དུ་བྱས་པ་ལྔ་དང་། སྤྱོད་ལམ་གྱི་དབང་དུ་བྱས་པ་གཅིག་རྣམས་སོ། །དང་པོ་ནི་ཟས་བཟང་པོ་ལ་ཞེན་པ་དགག་པའི་ཕྱིར་བསོད་སྙོམས་པ་དང་། ཡང་ཡང་ཟ་བ་ལ་ཞེན་པ་དགག་པའི་ཕྱིར་སྟན་གཅིག་པ་དང་། ཕྱིས་མི་ལེན་པའོ། །བསོད་སྙོམས་ལ་སྒོ་ཐེར་ཆགས་རྒྱུ་བ་དང་། ཅི་ཐོབ་པ་ལེན་པ་གཉིས་སོ། །སྟན་གཅིག་པ་ལ་ཟོས་པའི་དང་། ཆུའི་དང་། སྟན་གྱི་མཐའ་པ་གསུམ་མོ། །ཕྱིས་མི་ལེན་པ་ལ་བླངས་པའི་དང་། ཟ་བའི་མཐའ་པ་གཉིས་སོ། །གོས་ཀྱི་དབང་དུ་བྱས་པ་ལ་བཟང་པོ་ལ་ཞེན་པ་དགག་པའི་ཕྱིར་ཕྱག་དར་ཁྲོད་པ་དང་། འཇམ་པོ་ལ་ཞེན་པ་དགག་པའི་ཕྱིར་ཕྱིང་པ་བ་དང་། མང་པོ་ལ་ཞེན་པ་དགག་པའི་ཕྱིར་ཆོས་གོས་གསུམ་པའོ། །གནས་ཀྱི་དབང་དུ་བྱས་པ་ནི་འདུ་འཛི་ཅན་ལ་ཞེན་པ་དགག་པའི་ཕྱིར་དགོན་པ་བ་དང་། སྟེང་གཡོགས་ཅན་ལ་ཞེན་པ་དགག་པའི་ཕྱིར་བླ་གབ་མེད་པ་དང་། བསྐོར་བ་ལ་ཞེན་པ་དགག་པའི་ཕྱིར་ཤིང་དྲུང་པ་དང་། གནས་ཀྱི་སྦྱོར་བ་ལ་ཞེན་པ་དགག་པའི་ཕྱིར་དུར་ཁྲོད་པ་དང་། མང་པོ་ལ་ཞེན་པ་དགག་པའི་ཕྱིར་གཞི་ཇི་བཞིན་པའོ། །སྤྱོད་ལམ་གྱི་དབང་དུ་བྱས་པ་ནི་ཉལ་བ་སོགས་ལ་ཞེན་པ་དགག་པའི་ཕྱིར་ཙོག་པུ་པའོ། །གསུམ་པ་ནི་འདོད་པ་རྣམས་ལ་སྨོད་པའོ། །བཞི་པ་ནི་མྱ་ངན་ལས་འདས་པ་ལ་གཞོལ་བའོ། །ལྔ་པ་ནི་བདོག་ཀུན་གཏོང་བའོ། །དྲུག་པ་ནི་མི་ཞུམ་པ་དང་ལྟ་བ་མེད་པ་གཉིས་སོ། །འདིར་འདོད་ཆུང་ཆོག་ཤེས་དང་སྦྱངས་པའི་ཡོན་ཏན་བཅུ་གཉིས་ལེན་པ་གཙོ་བོར་གསུངས་པ་ནི་ས་བཞི་པའི་རྗེས་ཐོབ་ཏུ་བརྩོན་འགྲུས་ཀྱི་ཕར་ཕྱིན་ལྷག་པའི་དོན་ཡིན་ཞིང་། མྱང་འདས་ལ་གཞོལ་བ་ནི་བྱང་ཕྱོགས་སོ་བདུན་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་ལྔ་པའི་ཡོངས་སྦྱོང་ནི། འདྲིས་དང་ཁྱིམ་ལ་འཁྲེན་པ་དང་། །ཞེས་སོགས་ཏེ། འདི་ལ་ཡང་སྤང་བྱ་བཅུ་སྤོངས་དགོས་པ་ཡང་བཞིར་འདུས་ཏེ། བསམ་སྦྱོར་མ་དག་པ་དང་། གནས་མ་དག་པ་དང་། ཉེས་པར་སྤྱོད་པ་དང་། རྩ་བའི་ཉོན་མོངས་པ་སྤོང་བའོ། །དང་པོ་ནི་འདྲིས་དང་ཁྱིམ་ལ་འཁྲེན་པ་སྤོང་བ་གཉིས་སོ། །གཉིས་པ་ནི་འདུ་འཛིར་གྱུར་པའི་གནས་སྤོང་བའོ། །གསུམ་པ་ནི་བདག་བསྟོད་གཞན་ལ་རྨད་པ་དང་། མི་དགེ་བའི་ལས་ཀྱི་ལམ་བཅུ་སྤང་བ་གསུམ་མོ། །བཞི་པ་ལ་ང་རྒྱལ་ནི་རློམ་པས་ཁེངས་པ་དང་། མ་རིག་པ་ནི་ཕྱིན་ཅི་ལོག་དང་། ཐེ་ཚེམ་དང་ལྟ་བ་ནི་བློ་ངན་ཏེ། ཐེ་ཚོམ་ལྟ་བ་མཐོང་སྤང་ཡིན་ཡང་། སྐབས་འདིར་སྤོང་བར་བཤད་པ་ནི་གནས་ངན་ལེན་སྦྱོང་བའམ། ཐག་བསྲིང་པའི་གཉེན་པོ་ལ་དགོངས་ནས་གསུང་ཞིང་། ཉོན་མོངས་པ་ལ་བཟོད་པ་སྟེ་བཞི་སྤོང་བའོ། །འདིར་འདུ་འཛིར་གྱུར་པའི་གནས་སྤོང་བ་གསུངས་པ་ནི་ས་ལྔ་པའི་རྗེས་ཐོབ་ཏུ་བསམ་གཏན་གྱི་ཕར་ཕྱིན་ལྷག་པའི་དོན་ཡིན་ཞིང་། མཐོང་སྤང་གི་གཉེན་པོ་གསུངས་པ་ནི་བདེན་བཞི་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་དྲུག་པའི་ཡོངས་སྦྱོང་ནི། སྦྱིན་དང་ཚུལ་ཁྲིམས་བཟོད་བརྩོན་འགྲུས། །ཞེས་སོགས་ཏེ། འདི་ལ་བཅུ་གཉིས་ཡོད་པ་གཉིས་སུ་འདུས་ཏེ། སྤོང་བྱེད་ཀྱི་གཉེན་པོ་དང་སྤང་བྱ་མི་མཐུན་པའི་ཕྱོགས་སོ། །དང་པོ་ནི་ཕར་ཕྱིན་དྲུག་རྫོགས་པའོ། །ཕར་ཕྱིན་དྲུག་ས་དང་པོ་ནས་ཐོབ་པ་མ་ཡིན་ནམ་སྙམ་ན་ཐོབ་མོད་ཀྱི་འདིར་ནི་རྫོགས་པར་ཐོབ་པའི་དོན་ནོ། །གཉིས་པ་ལ་བྱང་ཆུབ་ཀྱི་གེགས་དང་། སྤྱོད་པ་རྗེས་སུ་སྒྲུབ་པའི་གེགས་གཉིས་ལས། དང་པོ་ནི། སློབ་མ་དང་། བསེ་རུ་ལ་དགའ་བའི་སེམས་སོ། །གཉིས་པ་ལ་གསུམ་ལས། དང་པོར་འཇུག་པའི་གེགས་ནི་ངོ་བོ་ཉིད་མི་དམིགས་པ་ལ་སྐྲག་པའི་སེམས་སོ། །བར་དུ་སྒྲུབ་པའི་གེགས་ནི་བླངས་ན་སེམས་ཞུམ་པ་དང་། བཏང་ན་མི་དགའ་བའི་སེམས་སོ། །ཐ་མར་མཐར་ཕྱིན་པའི་གེགས་ནི་དབུལ་ཡང་སློང་བ་མི་སྤོང་བའི་སེམས་སོ། །འདིར་སྤྱིར་ཕར་ཕྱིན་དྲུག་རྫོགས་པས་སྤང་བྱ་དྲུག་སྤོང་བ་ཡིན་གྱི་སོ་སོར་སྦྱར་བར་བྱ་བ་མ་ཡིན་པས་གཉེན་པོ་རྫོགས་པ་དང་། སྤང་བྱ་སྤངས་པ་རྣམས་སྦྱོང་བྱེད་ཀྱི་ཆོས་ཀྱི་རྐང་གྲངས་སོ་སོར་བགྲངས་ཤིང་སྤང་བྱ་རྣམས་ཀྱང་སྤོང་བྱེད་གཉེན་པོའི་ལྡོག་པ་ནས་གསུངས་པ་ཡིན་ནོ། །འདིར་ཕར་ཕྱིན་དྲུག་རྫོགས་པར་གསུངས་པ་ནི་ས་དྲུག་པའི་རྗེས་ཐོབ་ཏུ་ཤེས་རབ་ཀྱི་ཕར་ཕྱིན་ལྷག་པའི་དོན་ཡིན་ཞིང་། ངོ་བོ་ཉིད་མི་དམིགས་པ་ལ་སྐྲག་པ་སྤོང་བ་ནི་རྟེན་འབྲེལ་ལ་མཁས་པའི་ཤེས་རབ་སྦྱོང་བའི་དོན་ཡིན་ནོ། །ས་བདུན་པའི་ཡོངས་སྦྱོང་ལ་སྤང་བྱ་མི་མཐུན་པའི་ཕྱོགས་དང་། སྤོང་བྱེད་གཉེན་པོ་གཉིས་ལས། དང་པོ་ནི། བདག་དང་སེམས་ཅན་འཛིན་པ་དང་། །ཞེས་སོགས་ཏེ། འདི་ལ་སྤང་བྱའི་དབྱེ་བ་དང་། ཉེས་པ་སྤངས་པས་ཐོབ་པར་བསྟན་པ་གཉིས་ལས། དང་པོ་ལ་ཉི་ཤུ་ཡོད་པ་གསུམ་དུ་འདུས་ཏེ། སོ་སྐྱེ་དང་ཐུན་མོང་བ་དང་། ཉན་རང་དང་ཐུན་མོང་བ་དང་། བྱང་སེམས་ལས་དང་པོ་བ་དང་ཐུན་མོང་བའོ། །དང་པོ་ནི་བདག་ཏུ་འཛིན་པ་ནས་རྟག་པར་འཛིན་པའི་བར་དྲུག་གོ །གཉིས་པ་ནི་མཚན་མར་འཛིན་པ་ནས་ཚུལ་ཁྲིམས་སུ་ལྟ་བའི་མངོན་ཞེན་གྱི་བར་བཅུ་གཉིས་སོ། །གསུམ་པ་ནི་སྟོང་ཉིད་ལ་རྩོད་པ་དང་། སྟོང་ཉིད་དེ་དང་མངོན་སུམ་དུ་མཐོང་བ་འགལ་བའི་ཉེས་པ་འཛིན་པ་གཉིས་སོ། །ཉེས་པ་སྤངས་པས་ཐོབ་པར་བསྟན་པ་ནི། ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་ཐོབ། །ཅེས་པའོ། །འོ་ན་དང་པོ་དྲུག་པོ་འཇིག་ཚོགས་སུ་ལྟ་བ་དང་། མཐར་འཛིན་ལྟ་བ་ཡིན་པས་ས་དང་པོ་ནས་སྤངས་ཟིན་པ་མ་ཡིན་ནམ་སྙམ་ན། འདི་ལ་བདག་དང་སེམས་ཅན་སོགས་བདེན་པར་འཛིན་པ་དང་། བརྟགས་པ་ཙམ་དུ་འཛིན་པ་གཉིས་ལས། དང་པོ་ནི། ཉོན་སྒྲིབ་ཡིན་པས་ས་དང་པོ་ནས་སྤངས་ཟིན་ལ། ཕྱི་མ་ལ་ཀུན་བརྟགས་དང་། ལྷན་སྐྱེས་གཉིས་ལས། དང་པོ་ནི་མཐོང་སྤང་དུ་གྱུར་པའི་བཏགས་འཛིན་རྟོག་པ་ཡིན་པས་ས་དང་པོ་ནས་སྤངས་ཟིན་ཏེ། སོ་སོ་སྐྱེ་བོ་འཕགས་དབྱེ་བས། །སེམས་ཅན་རྫས་དང་བཏགས་ཡོད་པར། །རྣམ་རྟོག་འཛིན་པ་དག་ཏུ་འདོད། །ཅེས་པའི་སྐབས་སུ་དངོས་སུ་བསྟན་པའི་རྫས་འཛིན་རྟོག་པ་ནི་ཁོ་བོའི་ལུགས་ཀྱི་ཉོན་སྒྲིབ་ཡིན་ཞིང་བཏགས་འཛིན་རྟོག་པ་ནི་ཤེས་སྒྲིབ་ཡིན་པས་གཉིས་ཆར་ཡང་མཐོང་སྤང་རྟོག་པ་ཡིན་པའི་ཕྱིར་རོ། །ལྷན་སྐྱེས་སུ་གྱུར་པའི་གང་ཟག་བཏགས་པ་ཙམ་དུ་འཛིན་པའི་བློ་ནི་སྒོམ་སྤང་རྟོག་པ་ཡིན་པས་ས་བདུན་པའི་རྗེས་ཐོབ་ཀྱི་བར་དུ་མངོན་གྱུར་དུ་འབྱུང་སྲིད་ཅིང་དེའི་ཚེ་མཚན་འཛིན་གྱི་བར་ཆད་འབྱུང་བས་ལམ་གྱི་དངོས་པོའི་རྒྱུན་དང་མི་ལྡན་པ་ཡིན་ལ། རྗེས་ཐོབ་ཀྱི་གནས་སྐབས་སུ་ཡང་དེ་འབྱུང་མི་སྲིད་པའི་ཚེ་ས་བདུན་པ་རྫོགས་པར་ཐོབ་ནས་ས་བརྒྱད་པར་འཕོས་པ་ཡིན་པས། ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་ཐོབ། །ཅེས་གསུངས་པ་ཡང་འདི་ལ་དགོངས་སོ། །ཆོས་སུ་འཛིན་པ་ལ་ཡང་ཆོས་སུ་བདེན་པ་དང་། དེར་བཏགས་པ་ཙམ་དུ་འཛིན་པ་གཉིས་ལས། དང་པོ་ནི་མཐོང་སྤང་ཁོ་ན་སྟེ། འཛིན་པ་དང་ནི་འདོར་བ་དང་། །ཞེས་པའི་དངོས་བསྟན་གྱི་རྫས་འཛིན་རྟོག་པ་དང་དོན་གཅིག་གོ །ཕྱི་མ་ལ་ཀུན་བརྟགས་དང་། ལྷན་སྐྱེས་གཉིས་ལས། དང་པོ་ནི་མཐོང་སྤང་སྟེ། ཆེད་བཞིན་ངེས་པར་མི་འབྱུང་དང་། །ཞེས་པའི་དངོས་བསྟན་དང་དོན་གཅིག་གོ །འདིར་རོང་སྟོན་ཐམས་ཅད་མཁྱེན་པའི་ཞལ་སྔ་ནས། མདོར་བསྟན་དུ་གང་ཟག་ལ་རྫས་ཡོད་དང་བརྟགས་ཡོད་དུ་འཛིན་པ་དངོས་སུ་བསྟན་ནས་ཆོས་ལ་དེ་དང་དེར་འཛིན་པ་ཤུགས་ལ་བསྟན། རྒྱས་བཤད་དུ་དེ་ལས་བཟློག་སྟེ་བསྟན་པར་གསུངས་པ་ནི་འཆད་ཚུལ་འདིའི་མེ་ལོང་གི་ནང་དུ་སོང་དུས་མཁས་པའི་ཡིད་འཕྲོགས་པར་འགྱུར་རོ། །ལྷན་སྐྱེས་ནི། བདག་ཉིད་ཇི་བཞིན་ཀུན་མཁྱེན་ནི། །ཞེས་པའི་སྐབས་ཀྱི་སྒོམ་སྤང་རྟོག་པ་ཡིན་ལ་དེ་ཉིད་འདིར་བཤད་པའི་མཚན་མར་འཛིན་པ་སོགས་བཅུ་གཉིས་དང་དོན་གཅིག་པས་ས་བདུན་པའི་རྗེས་ཐོབ་ཀྱི་བར་དུ་འབྱུང་སྲིད་པའོ། །དེ་ལྟར་བྱས་ན་འཕགས་པས་སྒོམ་སྤང་དུ་གྱུར་པའི་འཛིན་རྟོག་གཉིས་ལ་སེམས་ཅན་དུ་གདགས་པ་ལ་བརྟེན་པ་དང་། གདགས་པའི་རྒྱུ་མཚན་ལ་བརྟེན་པ་ཞེས་པའི་ཐ་སྙད་མཛད་ཅིང་། གཉིས་ཀ་ཡང་བཏགས་འཛིན་རྟོགས་པར་བཞེད་པ་ནི་བསྟན་བཅོས་རྩ་བའི་དགོངས་པར་གནས་པའོ། །གཉིས་པ་སྤོང་བྱེད་གཉེན་པོ་ནི། རྣམ་ཐར་སྒོ་གསུམ་ཤེས་པ་དང་། །ཞེས་སོགས་ཏེ། འདིར་གཉེན་པོ་རེ་རེས་སྤང་བྱ་རེ་རེ་སོ་སོར་སྤངས་པས་ཡོངས་སྦྱོང་གི་གྲངས་ལོགས་སུ་མ་སྨོས་ལ། ས་དྲུག་པའི་སྐབས་སུ་སྤང་གཉེན་སོ་སོར་སྦྱར་བར་བྱ་བ་མ་ཡིན་པས་ཡོངས་སྦྱོང་གི་གྲངས་ལོགས་སུ་སྨོས་སོ། །ས་བརྒྱད་པའི་ཡོངས་སྦྱོང་ལ། སེམས་ཅན་ཀུན་ཡིད་ཤེས་པ་དང་། །ཞེས་པ་སྟེ། འདི་ལ་མདོ་ལས་བྱང་ཆུབ་སེམས་དཔའ་ས་བརྒྱད་པ་ལ་གནས་པས་ནི་ཆོས་ཀྱི་སྐུ་ཡོངས་སུ་བཏགས་པའི་དོན་དུ་ཆོས་བཞི་ཡོངས་སུ་རྫོགས་པར་བྱ་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་སེམས་ཁོང་དུ་ཆུད་པར་བྱ་བ་དང་། ཞེས་སོགས་དང་། གཞན་ཡང་ཆོས་བཞི་ཡོངས་སུ་རྫོགས་པར་བྱ་སྟེ་ཞེས་བཞི་ཕྲག་གཉིས་སོ་སོར་བྱས་པ་ནི་གང་ཡང་རུང་བ་ཡང་ས་དེའི་ཡོངས་སུ་སྦྱོང་བ་ཉིད་ཡིན་པར་ཤེས་པར་བྱ་བའི་དོན་དུ་ཡིན་ནོ། །ཞེས་ཉིར་སྣང་ལས་བཤད་དོ། །སངས་རྒྱས་ཀྱི་ཞིང་སྦྱོང་བ་གཉིས་སུ་བྱས་པའི་སྔ་མ་ནི་སྣོད་ཀྱི་འཇིག་རྟེན་དང་། ཕྱི་མ་ནི་བཅུད་ཀྱི་འཇིག་རྟེན་སྦྱོང་བ་ཡིན་ཞིང་འདི་དང་། ཞིང་དག་སྦྱོང་བའི་སྐབས་སུ་སྣོད་བཅུད་ཀྱི་འཇིག་རྟེན་སོ་སོར་དག་པ་སྒྲུབ་པར་བཤད་པ་ནི་གནད་གཅིག་པས་རྫོགས་སྨིན་སྦྱོང་གསུམ་གྱི་ནང་ཚན་དུ་གྱུར་པའི་སངས་རྒྱས་ཀྱི་ཞིང་སྦྱོང་བ་མ་མཐའ་ས་བརྒྱད་པ་ནས་འཇོག་པའི་དོན་ཏེ། སངས་རྒྱས་ཀྱི་ཞིང་དངོས་སུ་སྒྲུབ་པའི་དབང་དུ་བྱས་པ་ཡིན་ལ་ས་གསུམ་པའི་སྐབས་སུ་སངས་རྒྱས་ཀྱི་ཞིང་སྦྱོང་བར་བཤད་པ་ནི་ཞིང་དག་པ་སྒྲུབ་པར་འདོད་པའི་བློ་སྐྱེད་པ་ཙམ་མོ། །དེ་ལྟར་བྱས་ན་བཞི་ཚན་གཉིས་ལ་སྣོད་བཅུད་ཀྱི་ཞིང་སྦྱོང་བ་སོ་སོར་སྣང་བས་གང་རུང་ཅིག་གིས་ས་བརྒྱད་པའི་ཡོངས་སྦྱོང་དུ་འགྱུར་བ་མ་ཡིན་གྱི། གཉིས་ཀ་དགོས་ལ་གཉིས་སུ་བྱས་པ་ནི་སྔ་མ་ས་བདུན་པ་དང་ཐུན་མོང་བ་དང་། ཕྱི་མ་ས་དགུ་པ་དང་ཐུན་མོང་བར་མངོན་ཏེ། དཔྱད་པས་ཤེས་སོ། །ས་དགུ་པའི་ཡོངས་སྦྱོང་ནི། སྨོན་ལམ་དག་ནི་མཐའ་ཡས་དང་། །ཞེས་སོགས་ཏེ། འདི་ལ་བཅུ་གཉིས་ཡོད་པ་དོན་ལྔར་འདུས་ཏེ། ཕུན་སུམ་ཚོགས་པ་ཐམས་ཅད་ཀྱི་རྒྱུ། ཆོས་སྟོན་པའི་རྒྱུ། བདག་པོ་ཕུན་སུམ་ཚོགས་པ། ཉེར་སྤྱོད་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པའོ། །དང་པོ་ནི་སྨོན་ལམ་མཐའ་ཡས་པའོ། །གཉིས་པ་ནི་ཚིག་སོ་སོར་རིག་པ་ལྷ་ལ་སོགས་པའི་སྐད་ཤེས་པ་དང་། སྤོབས་པ་སོ་སོར་རིག་པ་ཆུ་བོའི་རྒྱུན་ལྟར་མི་ཟད་པ་གཉིས་སོ། །གསུམ་པ་ལ་ལུས་དག་པ་དང་། དག་པའི་ཕྱོགས་འཛིན་པ་གཉིས་ལས། དང་པོ་ནི་མངལ་དུ་འཇུག་པ་མཆོག་ལ་སོགས་པ་དྲུག་གོ །གཉིས་པ་ནི་སངས་རྒྱས་ལ་སོགས་པས་བསྐུལ་ཏེ་ངེས་པར་འབྱུང་བའོ། །ཉེར་སྤྱོད་ཕུན་སུམ་ཚོགས་པ་ནི་བྱང་ཆུབ་ཀྱི་ཤིང་རྣམས་སོ། །འབྲས་བུ་ཕུན་སུམ་ཚོགས་པ་ནི་ཡོན་ཏན་ཞེས་པ་སྟེ་ཕུན་སུམ་ཚོགས་པ་ནི་ཐམས་ཅད་ཀྱི་གསལ་བྱེད་དུ་སྦྱར་རོ། །འདིར་སྨོན་ལམ་མཐའ་ཡས་པ་ཕར་ཕྱིན་ལྷག་པའི་གོ་རིམ་ལྟར་ན་ས་བརྒྱད་པ་ལ་འཐད་ཅིང་། མངལ་དུ་འཇུག་པ་མཆོག་ལ་སོགས་པ། ས་བཅུ་པའི་བྱང་སེམས་ལ་འཐད་པས་ས་དགུ་པ་ལ་ཇི་ལྟར་འཐད་སྙམ་ན་སྐྱོན་མེད་དེ། སྔ་མ་ནི་ས་བརྒྱད་པ་དང་ཐུན་མོང་བའི་དབང་དུ་བྱས་ལ། ཕྱི་མ་ནི་ས་བཅུ་པ་དང་ཐུན་མོང་བའི་དབང་དུ་བྱས་ཤིང་། གཉིས་པ་དང་གསུམ་པ་ནི་ས་དགུ་པའི་ཐུན་མོང་མ་ཡིན་པ་ཡིན་པའི་ཕྱིར་རོ། །དེ་ལྟར་མཛད་པའི་གནད་ཀྱང་ས་སྔ་མའི་ཡོངས་སྦྱོང་དེ་མ་རྫོགས་པ་དེ་སྲིད་དུ་ས་སྔ་མ་དེ་ཡིན་ལ། རྫོགས་པར་ཐོབ་ནས་ས་ཕྱི་མར་འཕོས་པ་ཡིན་པས་ཡོངས་སྦྱོང་ཐམས་ཅད་ལ་ཡང་འདི་བཞིན་དུ་ཡོད་པར་ཞིབ་ཏུ་དཔྱད་ན་ཤེས་སོ། །གཉིས་པ་ས་བཅུ་པ་འབྲས་བུའི་སྒོ་ནས་བསྟན་པ་ནི། ས་དགུ་འདས་ནས་ཡེ་ཤེས་ནི། །ཞེས་སོགས་ཏེ་མདོ་ལས། རིགས་ཀྱི་ས་དང་། བརྒྱད་པའི་ས་དང་། མཐོང་བའི་ས་དང་། བསྲབས་པའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་ལས་ཡང་དག་པར་འདས་ཏེ། རབ་འབྱོར་དེ་ལྟར་བྱང་སེམས་ཆེན་པོ་ས་དགུ་ལས་འདས་ནས་སངས་རྒྱས་ཀྱི་ས་ལ་གནས་པ་སྟེ། རབ་འབྱོར་དེ་ནི་བྱང་སེམས་ཆེན་པོའི་ས་བཅུ་པའོ། །ཞེས་གསུངས། འདི་ལ་འདས་ས་ས་དགུ་ངོས་བཟུང་བ། དེ་ལས་འདས་པའི་ཚུལ་ལ་དཔྱད་པ། འབྲས་བུའི་སྒོ་ནས་བསྟན་པའི་དགོས་པ་དང་གསུམ་ལས། དང་པོ་རིགས་ཀྱི་ས་ནི་གནས་སྐབས་ཐེག་དམན་དུ་རིགས་ངེས་པའི་སྦྱོར་ལམ་བཞིའོ། །བརྒྱད་པའི་ས་ནི་རྒྱུན་ཞུགས་ཞུགས་པའི་རྟོགས་པའོ། །མཐོང་བ་དང་། བསྲབས་པ་དང་། འདོད་ཆགས་དང་བྲལ་བའི་ས་གསུམ་ནི་འབྲས་གནས་དང་པོ་གསུམ་གྱི་ཙམ་པོའི་མངོན་པར་རྟོགས་པའོ། །བྱས་པ་རྟོགས་པའི་ས་ནི་ཉན་ཐོས་དགྲ་བཅོམ་པའི་མངོན་པར་རྟོགས་པའོ། །ཉན་ཐོས་ཀྱི་ས་ནི་འབྲས་གནས་དང་པོ་གསུམ་གྱི་ཁྱད་པར་ཅན་གྱི་མངོན་པར་རྟོགས་པའོ། །དེ་གསུམ་ལ་ཉན་ཐོས་ཀྱི་ས་ཞེས་ལོགས་སུ་བཞག་པའི་དགོས་པ་ནི། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་གཉིས་ཀྱི་ཟླ་བོར་ཉན་ཐོས་ཀྱི་ས་ཞེས་བཞག་པས་ཐེག་པ་གསུམ་གྱི་རྣམ་གཞག་གྲུབ་པའི་ཆེད་ཡིན་ཏེ། ཉིར་སྣང་དུ། ཉན་ཐོས་ཀྱི་ས་ནི་ཐེག་པ་གསུམ་གསལ་བར་རྣམ་པར་བཞག་པ་ལ་དགོངས་པ་སྟེ་ཞེས་དང་། དེའི་དོན་འགྲེལ་ཆུང་དུ། ཚུལ་གསུམ་རྣམ་པར་གཞག་པར་དགོངས་པས་ཞེས་གསུངས་པའི་ཕྱིར་རོ། །ཐེག་པ་གསུམ་གྱི་རྣམ་གཞག་གྲུབ་པའི་དགོས་པ་ནི་ས་བཅུ་པར་ཐེག་པ་གསུམ་གྱི་རྟོགས་རིགས་ཡོན་ཏན་ཡར་ལྡན་དུ་འདུ་བར་རྟོགས་པའི་ཆེད་དུ་ཡིན་ནོ། །རང་སངས་རྒྱས་ཀྱི་ས་ནི་བསེ་རུ་ལྟ་བུ་དང་ཚོགས་ན་སྤྱོད་པའི་མངོན་པར་རྟོགས་པའོ། །བྱང་ཆུབ་སེམས་དཔའི་ས་ནི་ཇི་སྐད་བཤད་པའི་ས་དགུའོ། །གཉིས་པ་ནི། འོ་ན་ས་བཅུ་པའི་ཡེ་ཤེས་དེ་བྱང་སེམས་ཀྱི་ས་ལས་འདས་པར་རིགས་ཀྱང་དམན་པའི་ས་བརྒྱད་ལས་འདས་པར་ཇི་ལྟར་རིགས་ཏེ། དམན་པའི་ས་བརྒྱད་སྔོན་དུ་མ་སོང་ན་ནི་དེ་ལས་འདས་པའི་དོན་མེད་ཅིང་། སྔོན་དུ་སོང་ན་ནི་ཐེག་པ་འོག་མ་གཉིས་ཀ་བགྲོད་ཟིན་པའི་དབང་དུ་བྱས་པར་འགྱུར་བའི་ཕྱིར་རོ་ཞེ་ན། བྱང་སེམས་ཀྱི་སྦྱོར་ལམ་གྱི་གནས་སྐབས་སུ་ཐེག་པ་འོག་མ་གཉིས་ཀྱི་རྟོགས་རིགས་རྒྱུན་ལྡན་དུ་བསྒོམ་པའི་སྟོབས་ཀྱིས་མཐོང་ལམ་དུ་མངོན་སུམ་དུ་མཐོང་ཟིན་ནས་དེ་ཕྱིན་ཆད་རྟོགས་རིགས་རྒྱུན་ལྡན་དུ་མི་སྒོམ་པས་དམན་པའི་ས་བརྒྱད་ཆར་ལས་འདས་པ་ཞེས་བྱ་བར་འཇོག་སྟེ། ཉིར་སྣང་དུ། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ཤེས་པ་དང་མཐོང་བས་བལྟས་ནས་འདའོ། །ཞེས་གསུངས་པས་ན་འདི་ནི་གཞན་གཙོར་བྱེད་པའི་ཕྱིར་རོ། །ཞེས་བྱ་བར་དགོངས་པ་ཡིན་ནོ། །ཞེས་དང་། གཞན་ཡང་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་གྱི་ཤེས་པ་དང་སྤོང་བ་གང་ཡིན་པ་དེ་ནི་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའི་བཟོད་པ་ཡིན་ནོ། །བཟོད་པ་དེ་ཡང་གང་ཞེ་ན་སྡུག་བསྔལ་ལ་ཆོས་ཤེས་པའི་བཟོད་པའོ། །ཞེས་གསུངས་པའི་ཕྱིར་རོ། །མདོར་ན་ས་དང་པོ་ནས་ཉན་རང་གི་སྤང་རྟོགས་རྫོགས་པའི་ཚེ་དམན་པའི་ས་བརྒྱད་ལས་འདས་ཟིན་ཅིང་དེའི་རྗེས་སུ་བྱང་སེམས་ཀྱི་ས་དགུ་ལས་འདས་པས་ན་དམན་པའི་ས་བརྒྱད་ལས་འདས་པ་ནི་ཤེས་མཐོང་གིས་བལྟས་ནས་འདས་པའི་དོན་ཡིན་ཞིང་བྱང་སེམས་ཀྱི་ས་དགུ་ལས་འདས་པ་ནི་ལམ་ཕྱི་མ་སྐྱེས་པ་ན་སྔ་མ་ལས་འདས་པའི་དོན་ནོ། །སྔོན་ཆད་འདི་ལྟ་བུའི་བཤད་པ་འབྱུང་བའི་ཞལ་གྱི་པདྨོ་དཀོན་ཙམ་འདུག་པས་ཟབ་དོན་དོན་དུ་གཉེར་བ་དག་གིས་ལོག་རྟོག་གི་དྲི་མ་རྣམས་གནས་ལུགས་ལ་དཔྱོད་པའི་ཤེས་རབ་ཀྱིས་བསལ་ནས་གཟུང་བར་བྱའོ། །གསུམ་པ་ནི། འོ་ན་ས་བཅུ་པ་ཡོངས་སྦྱོང་གི་སྒོ་ནས་མི་སྟོན་པར་འབྲས་བུའི་སྒོ་ནས་སྟོན་པ་ཅི་ཞེ་ན། ལོ་ཆེན་གྱིས་ཡོངས་སྦྱོང་ནི་ས་སྔ་མ་སྔ་མ་ལས་ཁྱད་པར་དུ་བྱེད་པའི་ཆེད་ཡིན་ལ། འབྲས་བུའི་སྒོ་ནས་བསྟན་པས་ས་སྔ་མ་ལས་ཁྱད་པར་དུ་འཕགས་པར་གྲུབ་པའི་ཕྱིར་ཞེས་གསུངས་པ་ནི། ཡོངས་སྦྱོང་དེ་རྫོགས་པར་ཐོབ་པའི་ཆེད་དུ་ཡིན་པར་གཞུང་ལས་བཤད་པས་ས་སྔ་མ་ལས་ཁྱད་པར་བྱེད་པའི་ཆེད་ཡིན་པར་མི་འགྲུབ་ཅིང་། གྲུབ་ཏུ་ཆུག་ན་ཡང་ཡོངས་སྦྱོང་གི་སྒོ་ནས་མི་སྟོན་པའི་རྒྱུ་མཚན་དུ་སོང་གི་འབྲས་བུའི་སྒོ་ནས་སྟོན་པའི་རྒྱུ་མཚན་ད་དུང་ཚོལ་དགོས་པས་དཔྱད་པ་མ་རྫོགས་པའོ། །འཐད་པའི་ཕྱོགས་ནི་འདི་ཡིན་ཏེ། ས་དགུ་པོ་ཡོངས་སྦྱོང་གི་སྒོ་ནས་བསྟན་པ་ན་བྱང་སེམས་ལས་དང་པོ་པ་འགའ་ཞིག་དེ་ལ་འཇུག་པར་མི་ནུས་སོ་སྙམ་དུ་སེམས་ཞུམ་པར་འགྱུར་བས་མཐར་ཐུག་གི་འབྲས་བུར་མ་ཟད་གནས་སྐབས་ས་བཅུ་པ་ལ་ཡང་འབྲས་བུ་འདི་ལྟར་ཡོད་དོ་ཞེས་སྤྲོ་བ་སྐྱེད་པའི་ཆེད་དུ་ཡིན་ཏེ། ས་བཅུ་པ་ལ་ཡོངས་སྦྱོང་ཡོད་ཀྱང་ས་དགུ་པའི་ཡོངས་སྦྱོང་གི་ཁོངས་སུ་བསྡུས་པ་ལས་ཀྱང་ཤེས་ཤིང་འདི་འདྲའི་རིགས་ཅན། སྐབས་ལྔ་པར་ཡང་འབྱུང་ངོ་། །གསུམ་པ་གཉེན་པོའི་ཚོགས་བྱེ་བྲག་ཏུ་བཤད་པ་ནི། མཐོང་དང་སྒོམ་པའི་ལམ་དག་ལ། །ཞེས་སོགས་ཏེ། འདིར་སྤང་བྱ་བརྒྱད་ཀྱི་ཐ་སྙད་ལ་སློབ་དཔོན་གྱིས་ནི་སྔར་སྦྱོར་ལམ་གྱི་གནས་སྐབས་སུ་བསྟན་པའི་ཐ་སྙད་བཞི་པོ་དེ་ཉིད་མཐོང་སྤང་རྟོག་པ་དང་། སྒོམ་སྤང་རྟོག་པ་གཉིས་ཀ་ལ་སྦྱར་བར་བཞེད་ཅིང་། འཕགས་པས་མཐོང་སྤང་རྟོག་པ་ལ་གཟུང་བའི་རྣམ་པར་རྟོག་པ་དངོས་པོ་ཙམ་ལ་བརྟེན་པ་དང་། གཉེན་པོ་ལ་བརྟེན་པ་གཉིས། འཛིན་པའི་རྣམ་པར་རྟོག་པ་གང་ཟག་རྫས་སུ་ཡོད་པ་ལ་བརྟེན་པ་དང་། སྐྱེས་བུ་བརྟགས་པར་ཡོད་པ་ལ་བརྟེན་པ་གཉིས་ཏེ་བཞི། སྒོམ་སྤང་རྟོག་པ་ལ་གཟུང་བའི་རྣམ་པར་རྟོག་པ་དངོས་པོ་ཙམ་གྱི་རྣམ་པ་ལ་བརྟེན་པ་དང་། གཉེན་པོ་ལ་བརྟེན་པ་གཉིས། འཛིན་པའི་རྣམ་པར་རྟོག་པ་འཕགས་པའི་གང་ཟག་ཏུ་བཏགས་པ་ལ་བརྟེན་པ་དང་། བཏགས་པ་དེའི་རྒྱུ་མཚན་ལ་བརྟེན་པ་གཉིས་ཏེ་བརྒྱད་དུ་བཞེད་དོ། །དེ་ལྟ་བུའི་རྣམ་རྟོག་བརྒྱད་པོ་ངེས་པར་འབྱུང་བར་བྱས་ནས། ངེས་པར་འབྱུང་བྱེད་ཐེག་པ་ཆེན་པོ་དེས་འབྱུང་ཚུལ་མི་དམིགས་པའི་ཚུལ་གྱིས་འབྱུང་བའི་ཀུན་རྫོབ་ཁས་བླངས་པའི་ལན་གྱིས་མཐོང་སྤང་གཉེན་པོའི་ཚོགས་སྒྲུབ་དང་། དེ་དག་མི་དམིགས་པའི་དོན་དམ་གྱི་ལན་གྱིས་སྒོམ་སྤང་གཉེན་པོའི་ཚོགས་སྒྲུབ་གསུངས་སོ། །བཞི་པ་ངེས་པར་འབྱུང་བའི་སྒྲུབ་པ་ནི། ཆེད་དུ་བྱ་དང་མཉམ་ཉིད་དང་། །ཞེས་སོགས་ཏེ། འདིར་ངེས་པར་འབྱུང་ས་བརྒྱད་ལས། དང་པོ་བདུན་སངས་རྒྱས་ཀྱི་ས་དང་། ལམ་གྱི་ཡུལ་ཅན་ནི་རྒྱུན་མཐའ་ན་ཡོད་པར་བོད་རྣམས་བཞེད་ལ། ཉི་ཁྲི་སྣང་བར། ཚེ་དང་ལྡན་པ་ཤཱ་རིའི་བུ་སྦྱིན་པའི་ཕ་རོལ་ཏུ་ཕྱིན་པ་འཇིག་རྟེན་པ་ཡང་ཡོད། འཇིག་རྟེན་ལས་འདས་པ་ཡང་ཡོད་ཅེས་བྱ་བས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་པའི་ལམ་ཉེ་བར་དགོད་པ་དང་། ཞེས་གསུངས་པ་ལྟར་ན་རྒྱུན་མཐའ་ན་ཡོད་པ་ཉིད་ལེགས་ཤིང་། སློབ་དཔོན་གྱིས་ཇི་སྐད་བཤད་པའི་རྣམ་པ་ཐམས་ཅད་མཁྱེན་པ་ཉིད་དང་། དེའི་ཁྱད་པར་གྱི་ལམ་སྟེ། ཞེས་གསུངས་པ་ལྟར་ན་སངས་རྒྱས་ཀྱི་ས་ན་ཡོད་པར་མངོན་ནོ། །ངེས་པར་འབྱུང་ས་བརྒྱད་པོ་དེར་བར་ཆད་མེད་པར་ངེས་པར་འབྱུང་བ་ནི་ས་བརྒྱད་པ་ནས་ཡོད་ཅིང་། དངོས་སུ་ངེས་པར་འབྱུང་བ་ལ་འཇོག་ན་རྒྱུན་མཐར་འཇོག་དགོས་པར་སྣང་ངོ་། །སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་ལས་སྐབས་དང་པོའི་གཞུང་སོ་སོའི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

ལམ་ཤེས།

གཉིས་པ་ལམ་ཤེས་ལ་རྣམ་མཁྱེན་གྱི་འོག་ཏུ་ལམ་ཤེས་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་གཞུང་གི་དོན་གཉིས་ལས། དང་པོ་ལ། དོན་གྱི་འབྲེལ་དང་། ཚིག་གི་འབྲེལ་གཉིས། དང་པོ་ནི། འབྲས་བུ་རྣམ་མཁྱེན་ཐོབ་པ་ལ་རྒྱུ་ལམ་ཤེས་དགོས་པས་འབྲས་བུ་རྟོགས་པའི་བློས་རྒྱུ་རྟོགས་པའི་བློ་དྲངས་པ་རྟོགས་པའི་གོ་རིམ་མོ། །གཉིས་པ་ལ་གསར་དུ་ལྷགས་པའི་འཁོར་གྱི་དབང་དུ་བྱས་པ་དང་། སྔར་གནས་པའི་འཁོར་གྱི་དབང་དུ་བྱས་པ་གཉིས་ལས། དང་པོ་ནི། རྣམ་མཁྱེན་གྱི་མདོ་རྫོགས་པའི་རྗེས་སུ་རྒྱལ་ཆེན་རིས་བཞི་ནས་འོག་མིན་གྱི་བར་གྱི་ལྷའི་བུ་རྣམས་ལྷགས་པ་ན་དེ་དག་ལ་སྔར་གྱི་རྣམ་མཁྱེན་གྱི་སྐབས་ཀྱི་རྟོགས་པ་དེ་བསྒྲུབ་དགོས་པས་སྔ་མ་དེ་ཉིད་བརྗོད་ན། སྔར་ནས་གནས་པའི་འཁོར་རྣམས་བརྙས་པ་སྐྱེ་བར་འགྱུར་བས། ལམ་ཤེས་འདིས་སྔར་གྱི་རྣམ་མཁྱེན་ཐོབ་པར་འགྱུར་རོ་ཞེས་རྒྱུའི་ཚུལ་གྱིས་གསུངས་པའོ། །གཉིས་པ་ནི་སྔར་ནས་གནས་པའི་འཁོར་ཁ་ཅིག སྔར་བསྟན་པའི་ཆོས་བཅུ་པོ་དེ་དག་ནི་སངས་རྒྱས་ཁོ་ནས་རྟོགས་པར་བྱ་བ་ཡིན་གྱི་བྱང་ཆུབ་སེམས་དཔས་རྟོགས་པར་བྱ་བ་མེད་དམ་སྙམ་པའི་དོགས་པ་ཡོད་པས་རྒྱུའི་ཆོས་ཙམ་ཞིག་དྲངས་ནས་བྱང་སེམས་ཀྱི་རྟོགས་བྱར་བསྟན་པའོ། །གཉིས་པ་རྒྱུ་མཚན་ཅན་གྱི་གཞུང་གི་དོན་ལ་ཆོས་བཅུ་གཅིག་ཡོད་པ་ལམ་ཤེས་ཀྱི་ཡན་ལག་དང་། ལམ་ཤེས་ཀྱི་རང་བཞིན་གཉིས་ལས། དང་པོ་ལ་རྒྱུའི་ཡན་ལག རང་བཞིན་གྱི་ཡན་ལག བྱེད་ལས་ཀྱི་ཡན་ལག་དང་གསུམ། དང་པོ་ལ་སྔ་རབས་པ་ཁ་ཅིག་འགལ་རྐྱེན་དང་བྲལ་བའི་རྟེན། ལྷན་ཅིག་བྱེད་པའི་རྐྱེན། ཉེ་བར་ལེན་པའི་རྒྱུ་དང་གསུམ་དུ་མཛད་ནས་ཁྱབ་པའི་དོན་རང་བཞིན་གནས་རིགས་ཀྱིས་ཁྱབ་པ་ལ་འཆད་པ་ནི་ཤིན་ཏུ་མི་འཐད་དེ། ཉིར་སྣང་དུ། ཁྱབ་པ་ནི་ལམ་ཤེས་པ་ཉིད་ཀྱི་དབང་དུ་བྱས་ཏེ་ཞེས་གསུངས་ཤིང་། འདིར་ཡན་ལག་ལྔ་ཆར་ཡང་ལམ་ཤེས་ལ་སྦྱར་དགོས་པ་སྐབས་ཀྱི་དོན་ཡིན་པའི་ཕྱིར་རོ། །དེས་ན་འདིར་བསྟན་ཡན་ལག་ལྔ་ཆར་ཡང་ལམ་ཤེས་ཀྱི་ཡན་ལག་ཡིན་པས། འོད་ཀྱིས་མོག་མོག་པོར་མཛད་དང་། །ཞེས་པས་ལམ་ཤེས་སྐྱེ་བར་རུང་བ་བསྟན། ཡུལ་ངེས་པ་དང་ཞེས་པས་ལམ་ཤེས་ཀྱི་ཡུལ་ངེས་པ་བསྟན། ཁྱབ་པ་དང་ཞེས་པས་ལམ་ཤེས་ཀྱིས་ཁྱབ་པ་བསྟན། རང་བཞིན་དང་ནི་ཞེས་པས་ལམ་ཤེས་ཀྱི་རང་བཞིན་བསྟན། དེའི་ལས་ཞེས་པས་ལམ་ཤེས་ཀྱི་བྱེད་ལས་བསྟན་ནོ། །དེ་ལྟར་ལྔ་ལས་དང་པོས་ལམ་ཤེས་དངོས་སུ་སྐྱེ་རུང་བ་ལ་གེགས་ང་རྒྱལ་མངོན་གྱུར་པས་མཚོན་པའི་ཉོན་མོངས་མངོན་གྱུར་པ་ཐམས་ཅད་བཅོམ་པ་ཅིག་དགོས་ཞེས་བསྟན་ནས་ཡོངས་གཅོད་ལ་སྦྱོར་ལམ་ཆོས་མཆོག་ཆེན་པོ་ལ་གནས་པའི་བྱང་སེམས་དེས་ང་རྒྱལ་མངོན་གྱུར་པས་མཚོན་པའི་ཉོན་མོངས་མངོན་གྱུར་པ་བཅོམ་པས་ལམ་ཤེས་དངོས་སུ་སྐྱེ་རུང་དུ་བསྟན། རྣམ་བཅད་ལ་འཇིག་རྟེན་པའི་ལམ་གྱིས་ཆགས་བྲལ་དེས་ཅི་ཡང་མེད་མན་ཆད་ཀྱི་ཉོན་མོངས་མངོན་གྱུར་པ་བཅོམ་ཀྱང་སྲིད་རྩེའི་ཉོན་མོངས་མངོན་གྱུར་པ་མ་བཅོམ་པས་ལམ་ཤེས་དངོས་སུ་སྐྱེ་མི་རུང་བར་བསྟན། འོ་ན་ཉོན་མོངས་མངོན་གྱུར་པ་བཅོམ་པ་ཐམས་ཅད་ལ་ལམ་ཤེས་དངོས་སུ་སྐྱེ་རུང་ངམ་སྙམ་ན་ཡུལ་ངེས་པ་དང་ཞེས་པས་དེའི་སྟེང་དུ་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་ཡོད་མེད་ཀྱི་བྱེ་བྲག་གིས་ལམ་ཤེས་དངོས་སུ་སྐྱེ་བའི་ཡུལ་སོ་སོར་ངེས་པ་བསྟན། འདིས་ཡོངས་གཅོད་ལ་ཆོས་མཆོག་ཆེན་པོ་ལ་གནས་པའི་བྱང་སེམས་ལ་གེགས་ང་རྒྱལ་མངོན་གྱུར་པ་བཅོམ་པའི་སྟེང་དུ་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་ཡང་ཡོད་པས་ལམ་ཤེས་དངོས་སུ་སྐྱེ་རུང་དུ་བསྟན་ནས། རྣམ་བཅད་ལ་ཉན་རང་དགྲ་བཅོམ་པས་ཉོན་མོངས་མ་ལུས་པར་སྤངས་ཀྱང་མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པ་མེད་པས་ལམ་ཤེས་དངོས་སུ་སྐྱེ་མི་རུང་བར་བསྟན། འོ་ན་འཇིག་རྟེན་པའི་ལམ་གྱིས་ཅི་ཡང་མེད་མན་ཆད་ལ་ཆགས་བྲལ་བྱས་པ་དང་། ཉན་རང་དགྲ་བཅོམ་པའི་རྒྱུད་ལ་ལམ་ཤེས་གཏན་མི་སྐྱེའམ་སྙམ་ན་ཁྱབ་པ་དང་ཞེས་པས་དེ་གཉིས་ལ་ཡང་ལམ་ཤེས་སྐྱེ་བ་བསྟན་ཏེ། མཐར་ཐུག་ཐེག་པ་གཅིག་ཏུ་ངེས་པས་དེ་དག་གིས་ཀྱང་སྐབས་དང་པོར་བསྟན་པའི་རྣམ་མཁྱེན་དེ་ཐོབ་པར་བྱ་བའི་ཕྱིར་དུ་ལམ་ཤེས་བསྒོམ་དགོས་པའི་ཕྱིར་ཞེས་སྟོན། དེས་ན་ཁྱབ་པའི་དོན་ནི་རང་བཞིན་གནས་རིགས་ཀྱིས་ཁྱབ་པ་ལ་འཆད་པ་ནི་འཕགས་སེང་གཉིས་ཀྱི་གཞུང་དང་འགལ་ཞིང་། རྒྱུ་ལ་གསུམ་དུ་བྱས་ནས་ཉེར་ལེན་གྱི་རྒྱུ་ལ་འཆད་པ་ཡང་དེ་དང་དོན་གཅིག་པས་མི་འཐད་དེ། ཡན་ལག་སྔ་མ་གཉིས་ཀྱི་རྟེན་གྱི་གང་ཟག་དང་། འདིའི་རྟེན་གྱི་གང་ཟག་རྟེན་མི་གཅིག་པའི་ཕྱིར་རོ། །དེས་ན་སྔ་མ་གཉིས་ཀྱིས་དངོས་སུ་སྐྱེ་བའི་རྒྱུ་ཚོགས་བཤད་ནས་འདིས་ནི་དེ་དག་ལ་དོགས་པ་བཅད་པའི་སྒོ་ནས་དངོས་སུ་མི་སྐྱེ་བ་རྣམས་ལ་ཡང་བརྒྱུད་ནས་སྐྱེ་བའི་ཚུལ་སྟོན་པ་ཡིན་པས་ཤེས་ལྡན་དག་དཔྱོད་མཛོད་ཅིག འོ་ན་ལམ་ཤེས་དངོས་སུ་སྐྱེ་བ་ལ་ང་རྒྱལ་གྱིས་བསྡུས་པའི་ཉོན་མོངས་མངོན་གྱུར་པ་བཅོམ་དགོས་ན་ལམ་ཤེས་ཉིད་ཀྱིས་འདོད་སྲེད་ཀྱིས་བསྡུས་པའི་ཉོན་མོངས་ཆེད་དུ་གཉེར་ནས་སྤོང་ངམ་ཞེ་ན་དེའི་ལན་དུ་གཉིས་པ་རང་བཞིན་གྱི་ཡན་ལག་ནི་རང་བཞིན་དང་ཞེས་པས་ལམ་ཤེས་ཀྱིས་ཉོན་མོངས་ཆེད་དུ་གཉེར་ནས་མི་སྤོང་སྟེ། ཉོན་མོངས་པ་དེ་དག་གཞན་དོན་དུ་སྲིད་པར་སྐྱེ་བ་ལེན་པའི་རྒྱུར་དགོས་པས་ཉོན་མོངས་ཆེད་དུ་གཉེར་ནས་མི་སྤོང་བ་དེ་ལམ་ཤེས་ཀྱི་རང་བཞིན་ཡིན་པའི་ཕྱིར་རོ། །ཞེས་བསྟན་ཏོ། །འོ་ན་ཉོན་མོངས་དེ་གང་ཡིན་ཞེ་ན། འདི་ལ་ཁ་ཅིག ཉོན་མོངས་མཚན་ཉིད་པ་ལ་འདོད་པ་དང་། གཞན་དག་ཉོན་མོངས་པའི་བག་ཆགས་ལ་འདོད་པ་དང་། འགའ་ཞིག་དགེ་རྩ་དང་མཚུངས་ལྡན་གྱི་ཉོན་མོངས་པ་ལ་འདོད་པ་དང་གསུམ་ཡོད་པ་ལས། དང་པོ་ནི་ས་དང་པོ་ནས་ཉོན་མོངས་སྤངས་ཟིན་པས་བསལ་ལ། གཉིས་པ་ཡང་རྒྱུད་བླར་མཉམ་རྗེས་གཉིས་ཀྱིས་སྒྲིབ་པ་གཉིས་ཆེད་དུ་གཉེར་ནས་སྤོང་བའི་ཤེས་སྒྲིབ་ཀྱི་ངོས་འཛིན་ཉོན་མོངས་པའི་བག་ཆགས་ལ་མཛད་པས་ཆེད་དུ་གཉེར་ནས་མི་སྤོང་བ་འགལ་ལོ། །དེས་ན་སྔོན་གྱི་མཁས་པ་དུ་མ་དང་། མཁས་གྲུབ་གཡག་པས་གསུམ་པ་ཉིད་ལ་བཞེད་པ་ལྟར་འཐད་དེ། སྟོང་ཉིད་རྟོགས་པའི་ཤེས་རབ་ཀྱིས་ཟིན་ཅིང་། སེམས་ཅན་ལ་དམིགས་པའི་སྙིང་རྗེས་ཀུན་ནས་བསླངས་པས་བསམ་བཞིན་དུ་སྲིད་པར་གཞན་དོན་དུ་སྐྱེ་བ་ལེན་པར་འདོད་པའི་འདུན་པའམ་སྲེད་པ་ནི་སྐབས་འདིར་བསྟན་གྱི་མི་སྤོང་རྒྱུའི་དགེ་རྩ་དང་མཚུངས་ལྡན་གྱི་ཉོན་མོངས་ཡིན་ཞིང་། བློ་གྲོས་རྒྱ་མཚོས་ཞུས་པའི་མདོ་ལས། དགེ་རྩ་དང་མཚུངས་ལྡན་གྱི་ཉོན་མོངས་བརྒྱད་གསུངས་པའི་གཅིག་ཡིན་ནོ། །འདི་ལ་ཉོན་མོངས་པའི་མིང་གིས་འདོགས་པའི་རྒྱུ་མཚན། བཏགས་པའི་དགོས་པ། དངོས་ལ་གནོད་བྱེད། སྤང་བྱར་དོགས་པ་སྐྱེ་བའི་རྒྱུ་མཚན། གང་ཟག་གཞན་ལ་སྤང་བྱར་བསྟན་པ། དོགས་པའི་གནས་གཞན་དཔྱད་པ། ཤེས་བྱེད་ཀྱི་ལུང་དང་སྦྱར་བ་དང་བདུན་ལས། དང་པོ་ནི་ཉོན་མོངས་པས་ཁམས་གསུམ་དུ་སྦྱོར་བར་བྱེད་པ་ལྟར། འདིས་ཀྱང་བྱང་སེམས་ཁམས་གསུམ་དུ་སྦྱོར་བར་བྱེད་པའི་ཕྱིར་རོ། །གཉིས་པ་ནི་བྱང་ཆུབ་སེམས་དཔའི་ཐབས་མཁས་དེ་ཉན་ཐོས་ལས་ཁྱད་པར་དུ་འཕགས་པར་བསྟན་པའི་ཆེད་ཡིན་ཏེ། བྱང་ཆུབ་སེམས་དཔའི་ཐབས་མཁས་ཀྱིས་ཟིན་ན། ཉོན་མོངས་པ་མ་སྤངས་བཞིན་དུ་བྱང་ཆུབ་ཀྱི་ལམ་དུ་སྒྱུར་བར་བྱེད་པ་ཤེས་པའི་ཆེད་ཡིན་པའི་ཕྱིར་རོ། །གསུམ་པ་ནི་ཉོན་མོངས་མཚན་ཉིད་པ་མ་ཡིན་ཏེ། བྱང་ཆུབ་སེམས་དཔའི་རྒྱུད་ཀྱི་ཐབས་ཤེས་ཁྱད་པར་ཅན་གྱིས་ཟིན་པས་ཐེག་པ་ཆེན་པོའི་ལམ་དུ་བསྒྱུར་བ་ཡིན་པའི་ཕྱིར་དང་། ས་བརྒྱད་པའི་སྐབས་སུ་ཡོངས་སྦྱོང་གི་ཆོས་ཀྱི་ཡ་གྱལ་གཅིག་ཡིན་པའི་ཕྱིར་རོ། །བཞི་པ་ནི་འོ་ན་དེ་ལྟ་བུའི་ལམ་ཁྱད་པར་ཅན་དེ་སྤང་བྱ་ཡིན་ནམ་སྙམ་པའི་དོགས་པ་མེད་པས་ལམ་ཤེས་ཀྱིས་ཆེད་དུ་གཉེར་ནས་མི་སྤོང་ཞེས་སྨོས་པ་ལ་དགོས་པ་མེད་པར་འགྱུར་རོ་སྙམ་ན་མ་ཡིན་ཏེ། འཁོར་བ་མཐའ་དག་སྤང་བྱར་བསྟན་པའི་ཚེ་འཁོར་བར་སྐྱེ་བ་ལེན་པར་འདོད་པའི་བློ་དེ་སྤང་བྱར་བསྟན་ཟིན་པའི་ཕྱིར་རོ། །ལྔ་པ་ནི་དེ་སུ་ཞིག་གིས་སྤང་བྱར་བྱེད་པ་ཡིན་ཞེ་ན། ཉན་ཐོས་དང་རང་སངས་རྒྱས་ཀྱི་རིགས་ཅན་གྱིས་སྤང་བྱར་བྱེད་དེ། དེ་དག་ནི་འཁོར་བ་སྤངས་པའི་མྱ་ངན་ལས་འདས་པ་འབའ་ཞིག་དོན་དུ་གཉེར་བའི་ཕྱིར་རོ། །དྲུག་པ་ནི་འོ་ན་ཉན་ཐོས་དགྲ་བཅོམ་གྱིས་དེ་ལྟ་བུའི་སྲེད་པ་དེ་སྤངས་ཟིན་པས་ཐེག་ཆེན་ལམ་དུ་འཇུག་པའི་ཚེ་འཁོར་བར་སྐྱེ་བ་ལེན་པའི་རྒྱུ་མེད་པར་འགྱུར་རོ་ཞེ་ན། འདི་ནི་དཀའ་བའི་གནས་ཤིན་ཏུ་ཆེ་བས་ལུགས་འདི་ལ་མཐའ་ཆོད་པའི་བཤད་པ་དགོས་པར་སྣང་ཞིང་ཅིས་ཀྱང་བཤད་པར་ཞུ་ཞེས་གསོལ་ཞིང་བཤད་ན་འདི་ལ་སེམས་ཙམ་པ་རྣམས་ཀྱིས་ནི་སྲེད་པ་ལ་ཉོན་མོངས་པས་ཁྱབ་པས་ཉན་རང་དགྲ་བཅོམ་ཐེག་ཆེན་ལམ་དུ་འཇུག་པའི་ཚེ་བསམ་གཏན་ལ་བརྟེན་ནས་སྤྲུལ་པའི་ལུས་བསྒྲུབས་ཏེ། ལུས་དེ་ཉིད་ཀྱིས་བསྐལ་པ་གྲངས་མེད་གསུམ་དུ་གནས་ནས་རྫོགས་པའི་བྱང་ཆུབ་བསྒྲུབ་པར་བཞེད་དེ། རྒྱན་ལས། དོན་བྱས་མ་ཡིན་དེ་སངས་རྒྱས། །མེད་པར་སྐྱེས་ནས་སྤྲུལ་དོན་གཉེར། །བསམ་གཏན་དོན་བརྩོན་དེར་བསྟེན་ནས། །བྱང་ཆུབ་དམ་པ་ཐོབ་པར་འགྱུར། །ཞེས་སོ། །དབུ་མ་པས་ནི་ཉན་རང་དགྲ་བཅོམ་གྱིས་སྲེད་པ་ཉོན་མོངས་ཅན་སྤངས་ཀྱང་། ཉོན་མོངས་ཅན་མ་ཡིན་པའི་སྲེད་པ་ཡོད་པས། དེ་ཉིད་བྱང་ཆུབ་མཆོག་ཏུ་སེམས་བསྐྱེད་པའི་ཚེ་དགེ་རྩ་དང་མཚུངས་ལྡན་གྱི་ཉོན་མོངས་པར་གྱུར་ནས་དེའི་དབང་གིས་སྐྱེ་བ་ལེན་པར་བཞེད་དེ། སྤྱོད་འཇུག་ལས། ལྷག་མེད་མྱང་འདས་ལས་ལངས་ནས་འཁོར་བར་སྐྱེ་བ་ལེན་པའི་ཤེས་བྱེད་དུ། སྲེད་འདི་ཉོན་མོངས་ཅན་མིན་ཡང་། །ཀུན་རྨོངས་བཞིན་དུ་ཅི་སྟེ་མེད། །ཚོར་བའི་དབང་གིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །ཅེས་གསུངས་པའི་ཕྱིར་རོ། །མདོར་ན་ཉན་རང་སློབ་པས་རང་རྒྱུད་ཀྱི་འཁོར་བར་སྐྱེ་བ་ལེན་པར་འདོད་པའི་སྲེད་པ་དེ་ཆེད་དུ་གཉེར་ནས་སྤོང་ཞིང་བྱང་སེམས་འཕགས་པས་རང་རྒྱུད་ཀྱི་འཁོར་བར་སྐྱེ་བ་ལེན་པར་འདོད་པའི་བློ་དེ་ཆེད་དུ་གཉེར་ནས་མི་སྤོང་བ་ནི་རང་དོན་གཙོ་བོར་བྱེད་པ་དང་། གཞན་དོན་གཙོ་བོར་བྱེད་པའི་ཁྱད་པར་ཡིན་པས་སྐབས་འདིར་ཡང་དེ་སྦྱར་བར་བྱའོ། །བདུན་པ་ནི་དཀོན་བརྩེགས་སུ། ཇི་ལྟར་གྲོང་ཁྱེར་སྐྱེ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་སངས་རྒྱས་ཆོས་རྣམས་བསྐྱེད་ལ་ཕན། །ཞེས་དང་། ཡང་མདོ་ལས། ཐབས་ཆེན་དང་ནི་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བའང་ཞི་བའི་བདག་ཉིད་པས། །དེ་ཕྱིར་རྒྱལ་སྲས་བསམ་མི་ཁྱབ། །ཅེས་དང་། འདིའི་ཐད་ཀྱི་མདོ་ལས། ཇི་ལྟར་ཉན་ཐོས་ལ་སོགས་པའི་ལམ་རྣམས་ཀྱི་འབྲས་བུ་དང་། ལམ་གྱི་རྟོགས་པ་སོ་སོར་ངེས་པ་དེ་ལྟར་བྱང་ཆུབ་སེམས་དཔའི་ལམ་ཤེས་པ་ནི་མ་ཡིན་ཏེ། རྣམ་པ་ཐམས་ཅད་དུ་ཉོན་མོངས་པ་སྤོང་བ་མ་ཡིན་པའི་ཕྱིར་རོ། །ཞེས་དང་། ས་བརྒྱད་པའི་ཡོངས་སྦྱོང་གི་ཐད་ཀྱི་མདོར་སེམས་ཅན་རྣམས་ཇི་ལྟར་སྨིན་པར་འགྱུར་བ་དེ་ལྟར་ཆེད་དུ་བསམ་ཞིང་ལུས་ཡོངས་སུ་འཛིན་པའོ། །ཞེས་དང་། དེ་ཡི་དོན་བསྟན་བཅོས་ལས། བསམ་བཞིན་སྲིད་པ་ལེན་པ་དང་། །ཞེས་དང་། དེའི་འགྲེལ་པར། སེམས་ཅན་ཐམས་ཅད་ཀྱི་དོན་མཐོང་ནས་བློ་སྔོན་དུ་གཏང་བའི་སྐྱེ་བ་ཡོངས་སུ་འཛིན་པ་ཞེས་བྱ་བ་ཞེས་དང་། བག་ལ་ཉལ་ཀུན་འཇོམས་པ་དང་། །ཞེས་པའི་འགྲེལ་པར་ཉིར་སྣང་ལས། བག་ལ་ཉལ་ཐམས་ཅད་ནས་ཐམས་ཅད་དུ་མེད་པ་ནི། མ་རིག་པ་དང་། ལྟ་བའི་ཟག་པས་བསྡུས་པའི་བག་ལ་ཉལ་ཡིན་གྱི། བྱང་ཆུབ་སེམས་དཔའ་ནི་བསམ་བཞིན་དུ་སྲིད་པར་སྐྱེ་བ་ལེན་པའི་ཕྱིར། འདོད་པ་དང་། སྲིད་པའི་ཟག་པས་བསྡུས་པ་ནི་མ་ཡིན་ནོ། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། འཁོར་བའི་རྒྱུ་བྱེད་ལ་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་དེ་གང་ཞེ་ན། འདི་ལྟ་སྟེ། བསོད་ནམས་ཀྱི་ཚོགས་ཡོངས་སུ་བཙལ་བས་མི་ངོམས་པ་དང་། བསམ་བཞིན་དུ་སྲིད་པར་སྐྱེ་བ་ཡོངས་སུ་འཛིན་པ་དང་། སངས་རྒྱས་དང་ཕྲད་པར་སྨོན་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་མི་སྐྱོ་བ་དང་། དམ་པའི་ཆོས་ཡོངས་སུ་འཛིན་པ་ལ་བརྩོན་པ་དང་། སེམས་ཅན་གྱི་དོན་བྱ་བ་ཅི་ཡོད་སྙམ་པ་ལ་སྤྲོ་བ་དང་། ཆོས་འདོད་པའི་བག་ལ་ཉལ་མི་འདོར་བ་དང་། ཕ་རོལ་ཏུ་ཕྱིན་པ་ལ་སྦྱོར་བ་ཡོངས་སུ་མི་འདོར་བ་སྟེ། བློ་གྲོས་རྒྱ་མཚོ། གང་དག་གིས་བྱང་ཆུབ་སེམས་དཔའ་ཁམས་གསུམ་དུ་ཀུན་ཏུ་སྦྱོར་བར་བྱེད་ཀྱང་ཉོན་མོངས་པའི་སྐྱོན་གྱིས་མ་གོས་པའི་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་ནི་འདི་དག་གོ །བཅོམ་ལྡན་འདས་གང་གི་ཚེ་དགེ་བའི་རྩ་བ་ལགས་ན། དེ་རྒྱུ་ཅིའི་སླད་དུ་ཉོན་མོངས་པ་ཞེས་བགྱི། བཀའ་སྩལ་པ། བློ་གྲོས་རྒྱ་མཚོ་འདི་ལྟར་དེ་ལྟ་བུའི་རང་བཞིན་གྱི་ཉོན་མོངས་པ་འདི་དག་གིས་བྱང་སེམས་ཁམས་གསུམ་པོར་ཀུན་ཏུ་སྦྱོར་བར་བྱེད་ལ། ཁམས་གསུམ་པོ་ཡང་ཉོན་མོངས་པ་ལས་བྱུང་བ་ཡིན་ནོ། །དེ་ལ་བྱང་སེམས་ནི་ཐབས་མཁས་པ་དང་། དགེ་བའི་རྩ་བའི་སྟོབས་བསྐྱེད་པས་བསམ་བཞིན་དུ་ཁམས་གསུམ་ཀུན་ཏུ་སྦྱོར་ཏེ། དེས་ན་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་ཞེས་བྱའོ། །ཇི་སྲིད་ཁམས་གསུམ་པོར་ཀུན་ཏུ་སྦྱོར་བས་ཡིན་གྱིས་སེམས་ཉེ་བར་ཉོན་མོངས་པ་ནི་མ་ཡིན་ནོ། །བློ་གྲོས་རྒྱ་མཚོ་མཚམས་སྦྱོར་བ་ཐམས་ཅད་ལས་ཤིན་ཏུ་གྲོལ་བ་ཡང་སྲིད་པར་སྐྱེ་བ་ལེན་པ་གང་ཡིན་པ་འདི་ནི། བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་སྟེ་ཐབས་མཁས་པ་དང་། ཤེས་རབ་ཀྱིས་ཡོངས་སུ་ཟིན་པས་ཀུན་ནས་ཉོན་མོངས་པ་དག་གིས་ཀྱང་མི་གནོད་ལ་ཉོན་མོངས་པའི་འཆིང་བ་ཐམས་ཅད་ལས་གྲོལ་བར་བྱ་བའི་ཕྱིར། སེམས་ཅན་རྣམས་ལ་ཆོས་ཀྱང་སྟོན་ཏོ། །ཞེས་གསུངས་སོ། །འོ་ན་འཁོར་བར་སྐྱེ་བ་བླངས་པ་ལ་དགོས་པ་ཅི་ཡོད་ཅེ་ན། གསུམ་པ་བྱེད་ལས་ནི་དེའི་ལས་ཞེས་ཏེ་གཞན་དོན་བྱེད་པའི་དགོས་པ་ཡོད་དོ་ཞེས་བསྟན། གཞན་དོན་བྱེད་ན་ཡུལ་གང་ལ། ཚུལ་ཇི་ལྟར་ལམ་གང་ཞིག་བསྟན་པའི་སྒོ་ནས་བྱེད་ཅེ་ན། ཡུལ་ནི་རིགས་ཅན་གསུམ་ལའོ། །ཚུལ་ནི་སེམས་ཅན་འཁོར་དུ་མ་བསྡུས་པ་བསྡུས། བསྡུས་པ་སྨིན། སྨིན་པ་གྲོལ། གྲོལ་བ་མཐར་ཕྱིན་པར་བྱེད་པའི་ཚུལ་གྱིས་སོ། །དེ་ཡང་ལམ་དུ་མ་ཞུགས་པ་རྣམས་ཐེག་པ་གསུམ་གྱི་ཚོགས་ལམ་ལ་འགོད་པ་ནི་དང་པོ། ཚོགས་ལམ་པ་རྣམས་སྦྱོར་ལམ་ལ་འགོད་པ་ནི་གཉིས་པ། སྦྱོར་ལམ་པ་རྣམས་མཐོང་ལམ་ལ་འགོད་པ་ནི་གསུམ་པ། རིགས་ཅན་འོག་མ་གཉིས་དང་། གོང་མའི་མཐོང་ལམ་པ་རྣམས་སྒོམ་ལམ་ལ་འགོད། སྒོམ་ལམ་པ་རྣམས་མི་སློབ་ལམ་ལ་འགོད་པ་ནི་བཞི་པ་ཡིན་ལ་བྱང་སེམས་ཀྱི་རིགས་ཅན་རྣམས་རང་དང་རྟོགས་པ་མཉམ་པ་ཙམ་ལ་འགོད་ནུས་ཀྱི། རང་ལས་ལྷག་པ་ལ་འགོད་མི་ནུས་པས་དེ་ནི་བྱང་སེམས་གོང་མ་རྣམས་དང་སངས་རྒྱས་རྣམས་ཀྱི་མཛད་པ་ཡིན་ནོ། །ལམ་ནི་ཐེག་པ་གསུམ་གྱི་ལམ་བསྟན་པའི་སྒོ་ནས་གཞན་དོན་བྱེད་པས་དེ་ཉིད་ཡན་ལག་ཅན་གྱི་ལམ་ཤེས་ཀྱིས་སྟོན་པས་འདི་ལ་ཐོག་མར་ཉན་ཐོས་ཀྱི་ལམ་ཤེས་པའི་ལམ་ཤེས་ནི། ལམ་ཤེས་ཉིད་ཀྱི་ཚུལ་ལ་ནི། །ཞེས་སོགས་ཏེ། ལམ་ཤེས་དངོས་དང་། དེའི་རྒྱུ་ངེས་འབྱེད་ཆ་མཐུན་གཉིས་ལས། དང་པོ་ལ་ཤེས་བྱ་ཉན་ཐོས་ཀྱི་ལམ་དང་། དེ་ཇི་ལྟར་ཤེས་པའི་ཚུལ་གཉིས། དང་པོ་ལ་ཉན་ཐོས་རང་རྒྱུད་པའི་ལམ་ཁོ་ན་ལ་འདོད་པ་དང་། བྱང་སེམས་ཀྱི་རྒྱུད་ལ་ཡོད་པའི་རྟོགས་རིགས་ཁོ་ན་ལ་འདོད་པ་དང་། གཉིས་ཀ་ཡོད་པར་འདོད་པའི་ལུགས་གསུམ་ལས། དང་པོ་ནི། ལམ་ཐམས་ཅད་བསྐྱེད་པར་བྱ་ཞིང་། ཞེས་དང་། ཐེག་པ་ལ་གསུམ་ཆར་ཐོབ་པའི་རྒྱུ། །ཞེས་སོགས་གཞུང་ཕལ་ཆེར་དང་འགལ་བས་མི་འཐད་དོ། །གཉིས་པ་ནི་གཞུང་གི་དངོས་བསྟན་ཕལ་ཆེར་དེ་ལྟར་དུ་གནས་ཀྱང་བྱང་སེམས་འཕགས་པའི་རྒྱུད་ཀྱི་ཆོས་ཀྱི་སྤྱན་གྱིས་འཕགས་པའི་གང་ཟག་ཐམས་ཅད་ཀྱི་རྟོགས་པ་མཁྱེན་པར་གསུངས་པ་དང་། གཞན་སེམས་ཤེས་པའི་མངོན་ཤེས་ཀྱིས་རང་དང་རྒྱུད་ཚད་མཉམ་པ་མན་ཆད་ཀྱི་སེམས་འདོད་ཆགས་ཡོད་མེད་སོགས་ཇི་ལྟ་བ་བཞིན་དུ་མཁྱེན་པར་གསུངས་པ་རྣམས་ཀྱང་། ལམ་ཤེས་སུ་གྲུབ་པས་ཅུང་ཟད་མི་འཐད་དོ། །དེས་ན་ལུགས་གསུམ་པ་ཉིད་འཐད་པས་འདི་ལ་རང་རྒྱུད་ལ་ཉམས་སུ་མྱོང་བའི་སྒོ་ནས་ཤེས་པར་བྱ་བ་དང་། གཞན་རྒྱུད་ལ་ཡོད་པ་གཞན་རིག་གི་ཚུལ་གྱིས་ཤེས་པར་བྱ་བ་གཉིས་ལས་དང་པོ་ནི་ལམ་ཐམས་ཅད་བསྐྱེད་པར་བྱ་ཞིང་ཞེས་པའི་སྐབས་ཀྱི་བསྐྱེད་བྱའི་ཉན་ཐོས་ཀྱི་ལམ་དང་། སྐབས་གསུམ་པའི་མཐོང་ལམ་གྱི་ཐད་ཀྱི་མདོར། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ཤེས་པ་དང་མཐོང་བས་བལྟས་ནས་འདའོ། །ཞེས་པའི་འདའ་བར་བྱ་བའི་ལམ་དང་། ས་བཅུ་པའི་སའི་ཚོགས་ཀྱི་སྐབས་སུ། ས་དགུ་ལས་འདས་པར་གསུངས་པའི་ས་དང་པོ་བདུན་དང་། ལུས་རྣམ་གཞག་ཏུ། སློབ་མ་བསེ་རུའི་ལམ་གང་དང་། །ཞེས་པའི་སྐབས་ཀྱི་ལམ་དང་། འདིར་ཡང་འཕགས་པའི་བདེན་པ་བཞི་དག་གི །རྣམ་པ་ཞེས་དང་། ཉན་ཐོས་ལམ་འདི་ཞེས་པའི་སྐབས་ཀྱི་དངོས་བསྟན་གྱི་ལམ་རྣམས་སོ། །གཉིས་པ་ནི། སྔར་བཤད་པ་ལྟར་བྱང་འཕགས་ཀྱི་རྒྱུད་ཀྱི་ཆོས་ཀྱི་སྤྱན་དང་། གཞན་སེམས་ཤེས་པའི་མངོན་ཤེས་ཀྱིས་ཉན་ཐོས་རང་རྒྱུད་ལ་ཡོད་པ་རྟོགས་པའི་ལམ་རྣམས་དང་། ལམ་ཐམས་ཅད་བསྐྱེད་པར་བྱ་ཞིང་ཞེས་བཤད་པའི་འོག་ཏུ་ལམ་ཐམས་ཅད་ཤེས་པར་བྱའོ། །ཞེས་པ་འདིས་ཀྱང་ཤེས་པར་ནུས་ཏེ། བསྐྱེད་བྱའི་ལམ་ལས་ལོགས་སུ་གྱུར་པའི་ཤེས་བྱའི་ལམ་གཅིག་ཡོད་པ་བསྟན་པའི་ཕྱིར་རོ། །གཙོ་བོ་ནི་སྔ་མ་སྟེ་ཤེས་བྱ་རང་རྒྱལ་གྱི་ལམ་ལ་ཡང་དེ་བཞིན་དུ་སྦྱར་བར་བྱའོ། །འོ་ན་འཕགས་པའི་བདེན་པ་བཞིའི་རྣམ་པ་ཤེས་བྱ་ཉན་ཐོས་ཀྱི་ལམ་ཡིན་ན། རྣམ་པ་དུ་ཞིག་ཡོད་ཅེ་ན། ཤེར་ཕྱིན་གྱི་མདོ་ལས། མི་རྟག་པ་ལ་སོགས་པའི་རྣམ་པ་ཉེར་དྲུག་གསུངས་ཤིང་འདི་ཉིད་འཕགས་སེང་གཉིས་ཀྱིས་མངོན་པ་ནས་བཤད་པའི་མི་རྟག་ལ་སོགས་བཅུ་དྲུག་དང་སྦྱོར་བར་མཛད་དོ། །གཉིས་པ་དེ་ཇི་ལྟར་ཤེས་པའི་ཚུལ་ནི་མི་དམིགས་སྒོ་ནས་ནི། ཉན་ཐོས་ལམ་འདི་ཤེས་པར་བྱ། །ཞེས་ཏེ། དེ་ལྟ་བུའི་ཉན་ཐོས་ཀྱི་ལམ་གྱི་རྟོགས་རིགས་དེ་ཡང་ཐེག་ཆེན་ཐུན་མོང་མ་ཡིན་པའི་རྟོགས་རིགས་མི་དམིགས་པའི་རྣམ་པ་ཅན་གྱི་ཤེས་རབ་ཀྱིས་ཟིན་པའི་སྒོ་ནས་ཤེས་པར་བྱ་དགོས་སོ་ཞེས་བསྟན་ཏོ། །དེའི་རྣམ་གཅད་ལ་བྱང་འཕགས་ཀྱི་རྒྱུད་ལ། འདི་ནི་ཉན་ཐོས་ཀྱི་ལམ་གྱི་དམིགས་པའོ། །འདི་ནི་རྣམ་པའོ་སྙམ་དུ་མངོན་པར་ཞེན་པ་ཅན་གྱི་བློ་སྐྱེ་སྲིད་པས་དེ་ཉན་ཐོས་ཀྱི་ལམ་ཤེས་པའི་ལམ་ཤེས་མ་ཡིན་པར་བསྟན་ཏེ། མཚན་འཛིན་གྱིས་བར་ཆད་ཀྱི་གནས་སྐབས་ཡིན་པའི་ཕྱིར་རོ། །འདི་ནི་ལམ་ཤེས་ཡིན་ན། རྣལ་འབྱོར་མངོན་སུམ་ཡིན་པས་ཁྱབ་པའི་སྒྲུབ་བྱེད་ཀྱི་གཙོ་བོའོ། །དེ་ལྟར་བྱས་ན་མི་དམིགས་པའི་རྣམ་པས་མ་ཟིན་པར་མངོན་ཞེན་ཅན་གྱི་གནས་སྐབས་ཀྱི་བྱང་འཕགས་ཀྱི་རྒྱུད་ཀྱི་ཉན་ཐོས་ཀྱི་རྟོགས་རིགས་དེ་ཤེས་བྱ་ཉན་ཐོས་ཀྱི་ལམ་ཡིན་ཀྱང་། ཉན་ཐོས་ཀྱི་ལམ་ཤེས་པའི་ལམ་ཤེས་མ་ཡིན་གྱི། མི་དམིགས་པའི་རྣམ་པས་ཟིན་པ་ནི་གཉིས་ཀ་ཡིན་པར་གྲུབ་བོ། །འོན་ཀྱང་ལྡོག་པ་མི་འདྲ་བའི་ཁྱད་པར་ཡོད་དེ། བློ་གཅིག་གི་སྟེང་གི་གང་ཟག་གི་བདག་མེད་རྟོགས་པའི་རྟོགས་རིགས་དེ་ཤེས་བྱའི་ལམ་དང་། མི་དམིགས་པའི་རྣམ་པ་ཅན་དེ་ཡུལ་ཅན་ལམ་ཤེས་སུ་འཇོག་པའི་ཕྱིར་རོ། །འདི་ལ་དགོངས་ནས་ལུས་རྣམ་གཞག་ཏུ། སློབ་མ་བསེ་རུའི་ལམ་གང་དང་། །ཞེས་པས་ཤེས་བྱའི་ལམ་གཉིས་དང་། འདི་དང་གཞན་པའི་ཡོན་ཏན་གྱི། །ཞེས་པ་ནས། བྱ་བ་འདི་ནི་སྒོམ་པའི་ལམ། །ཞེས་པའི་བར་གྱིས་ཤེས་བྱ་བྱང་སེམས་ཀྱི་ལམ་ངོས་བཟུང་ནས། ལམ་གསུམ་པོ་དེ་ཉིད་ལ། ལམ་ཤེས་ཉིད་ནི་དེ་འདྲར་བཤད། །ཅེས་གསུངས་ཤིང་། ཡན་ལག་རྒྱས་བཤད་དུ་མི་དམིགས་པའི་སྒོ་ནས་ཤེས་པ་དེ་ཉིད་ལམ་ཤེས་སུ་གསུངས་པ་ཡིན་ནོ། །གཉིས་པ་དེའི་རྒྱུ་ངེས་འབྱེད་ཆ་མཐུན་ནི། འཕགས་པ་ཉན་ཐོས་ལམ་ལ་ནི། །ཞེས་སོགས་ཏེ། ཉན་ཐོས་ཀྱི་རྟོགས་རིགས་དེ་ཉིད་དོན་སྤྱིའི་ཚུལ་གྱིས་ཤེས་པ་ཙམ་གྱིས་གཞན་ལ་ཕྱིན་ཅི་མ་ལོག་པར་འཆད་མི་ནུས་པས་མངོན་སུམ་དུ་ཤེས་དགོས་ལ། དེ་ལ་སྦྱོར་ལམ་དུ་རྒྱུན་ལྡན་དུ་བསྒོམ་དགོས་པས་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ཉན་ཐོས་ཀྱི་རྟོགས་རིགས་མི་དམིགས་པའི་སྒོ་ནས་སྒོམ་པར་བྱེད་པའི་བྱང་སེམས་ཀྱི་སྦྱོར་ལམ་བསྟན་ནོ། །གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་ལ། ལམ་ཤེས་དངོས་དང་། དེའི་རྒྱུ་ངེས་འབྱེད་ཆ་མཐུན་གཉིས་ལས། དང་པོ་ནི། རང་བྱུང་བདག་ཉིད་རྟོགས་པའི་ཕྱིར། །ཞེས་སོགས་ཚིགས་བཅད་གསུམ་སྟེ། ཉན་ཐོས་ཀྱི་མི་སློབ་ལམ་དང་། རང་རྒྱལ་གྱི་མི་སློབ་ལམ་ལ་ཁྱད་པར་མེད་ན་དེ་གཉིས་ཀྱི་སློབ་ལམ་ལ་ཡང་ཁྱད་པར་མེད་པར་འགྱུར་བས་ཉན་ཐོས་ཀྱི་ལམ་ཤེས་པའི་ལམ་ཤེས་ལས་ལོགས་སུ་རང་རྒྱལ་གྱི་ལམ་ཤེས་པའི་ལམ་ཤེས་བསྟན་པ་དོན་མེད་པར་འགྱུར་ཞིང་། མི་སློབ་ལམ་ཉིད་ལ་ཁྱད་པར་ཡོད་ན་ཁྱད་པར་ཇི་ལྟ་བུ་ཞེ་ན། བསེ་རུ་ལྟ་བུའི་རང་སངས་རྒྱས་ཀྱི་ཡེ་ཤེས་ཆོས་ཅན། ཉན་ཐོས་ཀྱི་མི་སློབ་ལམ་ལས་ཁྱད་པར་འཕགས་ཏེ། ལམ་བགྲོད་ཚུལ་དང་ཆོས་སྟོན་ཚུལ་གྱི་སྒོ་ནས་ཁྱད་པར་འཕགས་པ་ཡིན་པའི་ཕྱིར། དང་པོ་གྲུབ་སྟེ། འདོད་ཁམས་སུ་སྲིད་པ་ཐ་མ་པའི་རྟེན་ལ་སློབ་དཔོན་གྱིས་གདམས་ངག་བསྟན་པ་ལ་མི་ལྟོས་པར་རང་བྱུང་གི་བྱང་ཆུབ་མངོན་དུ་བྱས་པའི་ཕྱིར། གཉིས་པ་གྲུབ་སྟེ། སངས་རྒྱས་དང་ཉན་ཐོས་མི་བཞུགས་པའི་ཞིང་ཁམས་སུ་རང་གི་གདུལ་བྱ་ལ་སྒྲ་མེད་ལུས་ཀྱི་རྣམ་འགྱུར་གྱི་སྒོ་ནས་ཆོས་སྟོན་པའི་བདག་རྐྱེན་བྱེད་པའི་མཁྱེན་པ་ཡིན་པའི་ཕྱིར། ཞེས་པ་ནི་རང་བྱུང་བདག་ཉིད་རྟོགས་པའི་ཕྱིར་ཞེས་སོགས་ཀྱིས་བསྟན། འདིར་བསེ་རུ་ལྟ་བུའི་ཡེ་ཤེས་ནི་ཞེས་མི་སློབ་ལམ་གྱི་ཁྱད་ཆོས་ངོས་གཟུང་བའི་སྐབས་ཡིན་པ་མ་རྟོགས་པ་དག་གིས་རང་རྒྱལ་སྒོམ་ལམ་པ་དང་། རང་རྒྱལ་གྱི་རིགས་ཅན་སྒོམ་ལམ་པ་ཆོས་ཅན་དུ་བཟུང་ནས་ཁྱད་པར་གྱི་ཆོས་གཉིས་པོ་བརྩི་བ་ནི་སེང་གེའི་གཞུང་མིག་གིས་མ་བལྟས་པར་རི་བོང་གི་ཅལ་རྣ་བས་ཉན་པའི་སྐྱོན་ཡིན་ནོ། །ཆོས་སྟོན་ཚུལ་ལ་རྩོད་པ་སྤོང་བ་ནི། གང་གང་དོན་ནི་གང་གང་ལ། །ཞེས་སོགས་ཀྱིས་སྟོན་ཏོ། །དེ་ལྟར་མི་སློབ་ལམ་ལ་ཁྱད་པར་ཡོད་པས་སློབ་ལམ་ལ་ཡང་ཁྱད་པར་ཡོད་པར་གྲུབ་སྟེ། འབྲས་བུའི་ཁྱད་པར་ནི་རྒྱུའི་ཁྱད་པར་ལས་འབྱུང་བའི་ཕྱིར་རོ། །སློབ་ལམ་གྱི་ཁྱད་པར་གང་ཞེ་ན། གཟུང་དོན་རྟོག་པ་སྤོང་ཕྱིར་དང་། །ཞེས་སོགས་ཏེ། འདི་ལ་མདོ་ལས་གསུངས་པའི་ཚུལ། སྔོན་གྱི་མཁས་པ་རྣམས་ཀྱིས་བཀྲལ་བའི་ཚུལ། གནད་ཀྱི་དོན་ངོས་གཟུང་བ། དོགས་པའི་གནས་གཞན་དཔྱད་པ་དང་བཞི་ལས། དང་པོ་ནི་མདོ་ལས། ལྷའི་བུ་དག་གཟུགས་ནི་ཟབ་པ་མ་ཡིན། ཕྲ་བ་མ་ཡིན་ནོ། །ཅིའི་ཕྱིར་ཞེ་ན། གཟུགས་ཀྱི་རང་བཞིན་ཟབ་པ་མ་ཡིན། ཕྲ་བ་མ་ཡིན་པའི་ཕྱིར་རོ། །ཞེས་སོགས་རྣམ་མཁྱེན་གྱི་བར་ལ་སྦྱར་ཏེ་གསུངས་པས་གཟུང་རྟོག་སྤོང་བའི་ཁྱད་པར་བསྟན། གནས་བརྟན་རབ་འབྱོར་ལ་ཆོས་ཉན་པ་ནི་ཇི་ལྟར་བུར་བཙལ་བར་བྱ། ཞེས་པའི་ལན་དུ་ལྷའི་བུ་དག་གཟུགས་ཀྱང་སྒྱུ་མ་ལྟ་བུ་རྨི་ལམ་ལྟ་བུ་ཞེས་པ་ནས་ཡང་དག་པར་རྫོགས་པའི་སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུའོ། །ཞེས་པའི་བར་གྱིས་འཛིན་རྟོག་མི་སྤོང་བའི་ཁྱད་པར་བསྟན། ཡུམ་འདི་ལེན་པར་བྱེད་པ་སུ་དག་འབྱུང་བར་འགྱུར་ཞེས་པའི་ལན་དུ་ཕྱིར་མི་ལྡོག་པའི་བྱང་སེམས་ཆེན་པོ་རྣམས་སམ། བདེན་པ་མཐོང་བའི་གང་ཟག་གམ། དགྲ་བཅོམ་པ་ཟག་པ་ཟད་པ་བསམ་པ་ཡོངས་སུ་རྫོགས་པའམ། སྔོན་གྱི་རྒྱལ་བ་ལ་བྱ་བ་བྱས་པའམ། སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་དག་གམ། དགེ་བའི་བཤེས་གཉེན་གྱིས་ཡོངས་སུ་ཟིན་པ་དག་གིས་ལེན་པར་འགྱུར་ཞེས་དྲུག་གསུངས་ཤིང་། བརྒྱད་སྟོང་པ་ལས། ཕྱིར་མི་ལྡོག་པའི་བྱང་སེམས་ཆེན་པོ་དང་། ལྟ་བ་ཕུན་སུམ་ཚོགས་པ་དང་། དགྲ་བཅོམ་པ་ཟག་པ་ཟད་པ་གསུམ་གསུངས་ལ། མདོ་སྡུད་པ་ལས། གང་ཟག་བཞི་པོ་འདི་དག་དེ་ལ་མི་སྐྲག་སྟེ། །རྒྱལ་སྲས་བདེན་ལ་མཁས་དང་ཕྱིར་མི་ཟློག་པ་དང་། །དགྲ་བཅོམ་དྲི་མ་བསལ་ཞིང་སོམ་ཉི་སྤངས་པ་དང་། །བཞི་པ་དགེ་བའི་བཤེས་ཀྱིས་ཡོངས་སུ་ཟིན་པའོ། །ཞེས་བཞི་གསུངས་པ་དང་། སྤྲུལ་པའི་མེ་ཏོག་མ་སྐྱེས་པར་བསྟན་པའི་སྐབས་རྣམས་ཀྱིས་ནི་རྟེན་གྱི་ཁྱད་པར་བསྟན་ནོ། །གཉིས་པ་ནི་མདོ་དང་པོས། ལམ་ཤེས་ཀྱི་འཁོར་གྱི་ལྷའི་བུ་རྣམས་ཀྱིས་ཤེས་པ་ཟབ་པ་དང་། མ་བརྗོད་པ་ཟབ་པ་གཉིས་ཀྱི་རང་བཞིན་ཟབ་པ་དང་ཕྲ་བར་རྟོགས་ཀྱང་ཕྱི་རོལ་གྱི་དོན་བདེན་མེད་དུ་མ་རྟོགས་པས་ཕྱི་རོལ་གྱི་དོན་དགག་པའི་ཕྱིར་ཟབ་པ་དང་ཕྲ་བ་འགོག་པ་བསྟན་ཞེས་འབྲེ་ཆེན་པོ་བཞེད་དོ། །མདོ་གཉིས་པས། འཛིན་པའི་རྣམ་པར་རྟོག་པ་མ་སྤངས་པར་ནི་རྟོགས་པ་དེ་ལྟ་བུ་མི་སྲིད་དོ་སྙམ་ནས་ལྷའི་བུ་རྣམས་གནས་བརྟན་རབ་འབྱོར་ལས་ཆོས་ཉན་པ་ཇི་ལྟ་བུར་བཙལ་བར་བྱ་སྙམ་པ་དང་། བདག་ལ་ཆོས་ཉན་པ་ནི་སྒྱུ་མ་ལྟ་བུ་དང་། སྤྲུལ་པ་ལྟ་བུར་བཙལ་བར་བྱ་སྟེ། ཞེས་བསྟན་པར་གཞོན་ནུ་ཚུལ་ཁྲིམས་བཞེད་དོ། །མདོ་གསུམ་པའི་དོན་ལ། ཉིར་སྣང་ལས། གང་ཟག་སོ་སོ་ལ་སྦྱར་བའི་གསལ་ཀ་མི་སྣང་ཞིང་། འགྲེལ་ཆེན་ནས། ཕྱིར་མི་ལྡོག་པ་ཞེས་བྱ་བ་ནི་ངེས་པར་འབྱེད་པའི་ཆ་རྟོགས་པས་རང་བྱང་ཆུབ་ལས་ཕྱིར་མི་ལྡོག་པའོ། །དེ་ཉིད་ནི་རང་གི་བྱང་ཆུབ་མངོན་པར་འདོད་པ་ཡིན་པས་ན་བྱང་ཆུབ་སེམས་དཔའོ། །ལུས་ཀྱིས་ཆོས་སྟོན་པས་སངས་རྒྱས་མི་འབྱུང་བའི་ཞིང་དུ་སེམས་ཅན་རྣམས་ཀྱི་དོན་བྱེད་པའི་བསམ་པ་དང་ལྡན་པས་ན་སེམས་དཔའ་ཆེན་པོའོ། །ལྟ་བ་ཕུན་སུམ་ཚོགས་པ་ཞེས་བྱ་བ་ནི་ཤེས་རབ་ཀྱི་ལྟ་བ་བར་པ་དང་ཡང་དག་པར་ལྡན་པའོ། །དགྲ་བཅོམ་པ་ཟག་པ་ཟད་པ་ཞེས་བྱ་བ་ནི་རང་གི་མཐོང་བའི་ལམ་གྱི་སྒྲིབ་པ་སྤངས་པས་ན་མཆོད་པར་འོས་པའོ། །ཚིག་འདི་གསུམ་གྱིས་ནི་རང་བྱང་ཆུབ་ལ་གོ་རིམ་བཞིན་དུ་ཡང་དག་པར་སྒྲུབ་པའི་རིགས་དང་། ཆོས་ཉིད་ཀྱིས་ཐོབ་པའི་རིགས་དང་། དེ་ཉིད་ལ་ངེས་པའི་རིགས་ཀྱི་གང་ཟག་ཅེས་བཤད་དོ། །སམ་ཞེས་བྱ་བའི་སྒྲ་ནི་ཐམས་ཅད་དུ་ཕན་ཚུན་གྱི་རྣམ་པར་རྟོགས་པ་ལ་ལྟོས་པ་ཡིན་པར་བལྟ་བར་བྱའོ། །ཞེས་གསུངས་སོ། །སྡུད་པའི་འགྲེལ་པར་ཤེས་རབ་འབྲིང་གི་ལྟ་བ་དང་ལྡན་པས་ཀུན་རྫོབ་དང་དོན་དམ་པའི་དབྱེ་བ་ཡོངས་སུ་ཤེས་པའི་མཁས་པ་ནི་རྒྱལ་སྲས་སོ། །དང་པོར་ངེས་པར་འབྱེད་པའི་ཆ་དང་མཐུན་པ་ཐོབ་པ་ཉིད་ཀྱིས་རང་སངས་རྒྱས་ཀྱི་བྱང་ཆུབ་འཐོབ་པར་ངེས་པ་ནི་ཕྱིར་མི་ལྡོག་པ་སྟེ་གཉིས་པའོ། །ཐམས་ཅད་ཀྱིས་མཆོད་པར་འོས་པས་ན་དགྲ་བཅོམ་པ་སྟེ། མཐོང་བའི་ལམ་ལ་སོགས་པ་དེ་ཉིད་ཀྱིས་གཟུང་བའི་རྣམ་པར་རྟོག་པ་སྤངས་པས་རིམ་པ་ཇི་ལྟ་བ་བཞིན་དུ་དྲི་མ་བསལ་བ་དང་། དེ་ཉིད་ཀྱིས་ཆོས་ཉིད་མངོན་སུམ་དུ་བྱས་པས་ཐེ་ཚོམ་མེད་པའི་ཕྱིར་རོ། །ཐེ་ཚོམ་སྤངས་པ་ནི་གསུམ་པའོ། །དགེ་བའི་བཤེས་གཉེན་གྱིས་ཡོངས་སུ་བཟུང་བ་ནི་བཞི་པའོ། །གང་ཟག་བཞི་པོ་དེ་དག་རང་སངས་རྒྱས་ཀྱི་རིགས་ཅན་ཡིན་པའི་ཕྱིར་འདི་ལ་སྐྲག་པར་མི་འགྱུར་རོ། །ཞེས་གསུངས་སོ། །ཡེ་ཤེས་ཞབས་ཀྱིས་བདེན་པ་མཐོང་བ་མཐོང་ལམ་པ་ལ་བཤད། ཨར་གྱིས་བདེན་པ་མཐོང་བ་ཚོགས་ལམ་པ། ཕྱིར་མི་ལྡོག་པ་སྦྱོར་ལམ་པ། དགྲ་བཅོམ་པ་མཐོང་ལམ་པ་ལ་བཤད་དོ། །གཞོན་ནུ་ཚུལ་ཁྲིམས་ཀྱིས་བརྒྱ་བྱིན་གྱིས་སྤྲུལ་པའི་མེ་ཏོག་གི་རྣམ་པ་ཉེ་བར་བཀོད་པས། དེ་དག་རབ་འབྱོར་གྱིས་ལྷ་ཡུལ་ལ་སོགས་པ་ན་མ་མཐོང་ཞིང་། ངས་མ་མཐོང་བའི་ས་ནས་ཁྱེར་འོང་བའི་ནུས་པ་ཡང་བརྒྱ་བྱིན་ལ་མེད་པར་བསམས་ནས་ལྷའི་དབང་པོས་གཏོར་བའི་མེ་ཏོག་འདི་དག་ནི་ཤིང་ལ་སོགས་པ་ལས་སྐྱེས་པ་མ་ཡིན་གྱི་ཡིད་ཀྱིས་སྤྲུལ་པའོ་སྙམ་པ་དང་། ཞེས་པས་ཕྱི་དོན་དུ་གྲུབ་པ་བཀག་གོ །རབ་འབྱོར་གྱི་རྟོག་པ་བརྒྱ་བྱིན་གྱིས་ཤེས་ནས་གནས་བརྟན་རབ་འབྱོར་ཡིད་ལས་བྱུང་བའི་མེ་ཏོག་ནི་གང་ཡང་མེད་དོ། །མེ་ཏོག་འདི་དག་ནི་མ་སྐྱེས་པའོ། །ཞེས་པས་ནང་སེམས་སུ་གྲུབ་པ་བཀག་གོ །འཁོར་ཁ་ཅིག་གི་རྟོག་པ་ལ་མེ་ཏོག་མཆོད་པའི་བྱ་བ་བྱེད་པར་མཐོང་བས་འདི་དག་མེད་པར་ནི་མི་འཐད་ཅིང་། ཕྱི་ནང་དུ་བདེན་པ་ཡང་སྔར་བཀག་པས་མ་སྐྱེས་པའི་རང་བཞིན་དུ་སྔ་ནས་གནས་པ་བདེན་ནམ་སྙམ་པ་ལ། རབ་འབྱོར་གྱིས་གང་མ་སྐྱེས་པ་དེ་ནི་མེ་ཏོག་ཀྱང་མ་ཡིན་ནོ། །ཞེས་མེ་ཏོག་ཀྱང་བདེན་པ་བཀག་གོ །དོན་ནི་མེ་ཏོག་དེ་དག་ཕྱི་དང་ནང་དང་། མ་སྐྱེས་པའི་རང་བཞིན་དུ་བདེན་པར་མ་གྲུབ་ཀྱང་སངས་རྒྱས་འཁོར་བཅས་ལ་མཆོད་པའི་བྱ་བ་བྱེད་པ་བཞིན་དུ་གཟུང་བ་རང་བཞིན་མེད་པར་རྟོགས་པའི་རྟེན་ཆོས་ཉིད་ཀྱང་ཕྱི་དང་། ནང་དང་མ་སྐྱེས་པར་བདེན་པར་མ་གྲུབ་ཀྱང་། རང་རྒྱལ་གྱི་ལམ་གྱི་རྟེན་བྱེད་དོ། །ཅེས་རྟེན་ཆོས་ཉིད་བསྟན་ནོ། །ཞེས་བཤད་དོ། །གསུམ་པ་ནི། ཁྱད་པར་གསུམ་པོ་འདི་དག་རང་རྒྱལ་རང་རྒྱུད་པའི་ལམ་གྱི་ཁྱད་ཆོས་སུ་བྱེད་དམ། བྱང་སེམས་ཀྱི་རྒྱུད་ལ་ཡོད་པའི་རྟོགས་རིགས་ཀྱི་ཁྱད་ཆོས་སུ་བྱེད་ཅེ་ན། མདོ་དང་བསྟན་བཅོས་ཀྱི་དངོས་བསྟན་ནི་ཕྱི་མ་ལྟར་ཡིན་ཏེ། གོང་གི་ཤེས་བྱ་ཉན་ཐོས་ཀྱི་ལམ་དེ་སྦྱོར་བ་སེམས་བསྐྱེད་དང་། དངོས་གཞི་མི་དམིགས་པར་རྟོགས་པའི་ཤེས་རབ་དང་། རྗེས་བསྔོ་བ་གསུམ་གྱིས་ཟིན་པའི་སྒོ་ནས་བཤད་པས་བྱང་སེམས་ཀྱི་རྒྱུད་ཀྱི་རྟོགས་རིགས་ལ་འཇོག་དགོས་ཤིང་དེ་དང་རྒྱུ་མཚན་མཚུངས་པའི་ཕྱིར་དང་། འདིར་རྟེན་གྱི་ཁྱད་པར་འཆད་པའི་སྐབས་སུ་ཡང་བྱང་སེམས་དང་རྒྱལ་སྲས་ཀྱི་ལྡོག་པ་ནས་བཤད་པའི་ཕྱིར་དང་། སྐབས་དེར་སྒོམ་ལམ་མ་བཤད་པའི་གནད་ཀྱང་རྟོགས་རིགས་དེ་བྱང་སེམས་ཀྱི་སྒོམ་ལམ་དུ་གོམས་པར་མི་བྱེད་པའི་དོན་ཡིན་པའི་ཕྱིར་དང་། གཞན་དུ་ན་རང་རྒྱལ་གྱི་སྒོམ་ལམ་ལ་ཡང་ཁྱད་ཆོས་གསུམ་པོ་དེ་ཡོད་པས་སྒོམ་ལམ་པ་ཡང་འཆད་དགོས་པར་ཐལ་བའི་ཕྱིར་རོ། །བཞི་པ་ནི་སློབ་དཔོན་གྱི་འགྲེལ་པ་ཆེ་ཆུང་གཉིས་ལས། རང་བྱང་ཆུབ་ལས་ཕྱིར་མི་ལྡོག་པ་ཞེས་དང་། ཤེས་རབ་ཀྱི་དབང་པོ་བར་མ་དང་ལྡན་པ་ཞེས་བཤད་པས་རང་རྒྱལ་རང་རྒྱུད་པའི་ལམ་གྱི་ཁྱད་ཆོས་སུ་འཇོག་དགོས་སོ་སྙམ་ན་དེ་ནི་རྟོགས་རིགས་ཀྱི་དབང་དུ་བྱས་པར་གཡག་རོང་གཉིས་བཞེད་པ་ལྟར་འཐད་དེ། ཐེག་པ་གསུམ་ཆར་ཐོབ་པའི་རྒྱུ། །ཞེས་རྟོགས་རིགས་ཐོབ་པ་ལ་ཐེག་པ་དེ་ཐོབ་པར་བཤད་པའི་ཕྱིར། བོད་རྣམས་ཕྱིར་མི་ལྡོག་པའི་བྱང་སེམས་ཆེན་པོ་རྣམས་སམ་ཞེས་སོགས་ཀྱིས་ལམ་པ་གང་ཟག་གི་རྟེན་དང་མེ་ཏོག་འདི་དག་ནི་སྤྲུལ་པའོ་ཞེས་སོགས་ཀྱིས་ཆོས་ཉིད་རིགས་ཀྱི་རྟེན་བསྟན་པར་བཞེད་ཀྱང་སྔ་མས་གང་ཟག་དེ་དག་གི་རྒྱུད་ཀྱི་ཆོས་ཉིད་དེ་རང་རྒྱལ་གྱི་རྟོགས་རིགས་ཀྱི་ཆོས་ཉིད་རིགས་ཀྱི་རྟེན་དང་། ཕྱི་མས་ཆོས་ཉིད་ཡིན་ཀྱང་རྟེན་དུ་རུང་བའི་སྒྲུབ་བྱེད་སྟོན་པ་ཉིར་སྣང་གི་དགོངས་པར་སྣང་སྟེ། དེ་ཉིད་དུ། རྟོགས་པའི་རྟེན་རིགས་ཀྱི་དབང་དུ་མཛད་ནས་གསུངས་པ་ནི་ཕྱིར་མི་ལྡོག་པའི་བྱང་སེམས་ཆེན་པོ་ལ་སོགས་པ་ཞེས་སོགས་དང་། དངོས་པོར་གྱུར་པའི་རྟེན་མེད་པར་རྟོགས་པའི་ཆོས་ཐོབ་པར་སྟོན་པར་བྱེད་པ་སྤྲུལ་པའི་མེ་ཏོག་གི་རྣམ་པ་ཉེ་བར་དགོད་པ་དང་ཞེས་གསུངས་པའི་ཕྱིར་རོ། །རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་ནི་བོད་དག་གཟུང་བ་ཕྱི་རོལ་གྱི་དོན་ལ་བདེན་པར་འཛིན་པའི་བདེན་འཛིན་ཁོ་ན་ལ་འདོད་པ་ནི། གཞི་ཤེས་ཀྱིས་བསྡུས་པའི་ལམ་བདེན་གྱི་རྣམ་པ་ཕྱི་མ་བཅུ་གཅིག་རང་སངས་རྒྱས་ཀྱི་རྟོགས་རིགས་ཡིན་པའི་དོན་མ་རྟོགས་ཤིང་། སྐབས་དང་པོར་བསྟན་པའི་གཟུང་རྟོག་གཉིས་ལ་རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་མེད་པའི་ལུགས་སུ་སྣང་བས་སྔར་བཀག་ཟིན་ཞིང་ཤེར་སྒྲོན་དུ། ཇི་སྐད་བཤད་པའི་བདེན་པ་སྒོམ་པ་ཁོ་ན་དང་། དོན་ཇི་ལྟ་བ་བཞིན་དུ་རྟེན་ཅིང་འབྲེལ་བར་འབྱུང་བ་བསྒོམ་པས་གཟུང་བའི་དོན་གྱི་རྣམ་པར་རྟོག་པ་སྤངས་ཏེ། མ་རིག་པ་དང་། ཕུང་པོ་དང་། བདག་ལ་སོགས་པ་ལ་མངོན་པར་ཞེན་པ་རབ་ཏུ་སྤངས་པ་ཉིད་དེ། ཞེས་གསུངས་པ་ཡང་མ་མཐོང་བར་ཟད་དོ། །གཉིས་པ་དེའི་རྒྱུ་ངེས་འབྱེད་ཆ་མཐུན་ནི། བཏགས་པའི་ཆོས་ཉིད་མི་འགལ་བར། །ཞེས་སོགས་ཏེ། རང་རྒྱལ་ལམ་གྱི་རྟོགས་རིགས་དེ་ཡང་དོན་སྤྱིའི་ཚུལ་གྱིས་ཤེས་པ་ཙམ་གྱི་གཞན་ལ་ཕྱིན་ཅི་མ་ལོག་པར་འཆད་པར་མི་ནུས་པས་མངོན་སུམ་དུ་ཤེས་དགོས་ལ། དེ་ལ་ཡང་སྦྱོར་ལམ་གྱི་གནས་སྐབས་སུ་རྒྱུན་ལྡན་དུ་བསྒོམ་དགོས་པས་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་རང་རྒྱལ་གྱི་ལམ་གྱི་རྟོགས་རིགས་རྒྱུན་ལྡན་དུ་སྒོམ་པའི་བྱང་སེམས་ཀྱི་སྦྱོར་ལམ་བསྟན་ནོ། །འགྲེལ་ཆེན་དུ། བྱང་སེམས་ཀྱི་སྦྱོར་ལམ་སྐབས་དང་པོར་ཁ་འཕངས་པ་ནི་ལམ་ཤེས་གསུམ་གྱི་ནང་ནས་བྱང་སེམས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཁ་འཕངས་པ་ཡིན་པས། སྐབས་འདིར་ལམ་ཤེས་དང་པོ་གཉིས་ཀྱི་སྐབས་སུ་ངེས་འབྱེད་ཆ་མཐུན་གསུངས་པ་ནི་རྟོགས་རིགས་འོག་མ་གཉིས་བསྒོམ་པའི་བྱང་སེམས་ནི་སྦྱོར་ལམ་ཡིན་པ་དང་། ལམ་ཤེས་ཕྱི་མའི་སྐབས་སུ་རྒྱུ་ངེས་འབྱེད་ཆ་མཐུན་མ་གསུངས་པའི་རྒྱུ་མཚན་རྣམས་ལེགས་པར་གྲུབ་པ་ཡིན་ནོ། །གསུམ་པ་བྱང་སེམས་ཀྱི་རིགས་ཅན་ལ་བསྟན་པར་བྱ་བའི་བྱང་སེམས་ཀྱི་ལམ་ཤེས་པའི་ཚུལ་ལ། ཤེས་བྱ་བྱང་སེམས་ཀྱི་ལམ་ནི་གདུལ་བྱ་གཞན་ལ་བསྟན་པར་བྱ་བ་ཡང་ཡིན་ཞིང་། རང་ཉིད་ཀྱིས་ཀྱང་རྒྱུན་ལྡན་དུ་བསྒོམ་པར་བྱ་བ་ཡང་ཡིན་པས་ཡན་ལག་རྒྱས་བཤད་དུ་ཤེས་པར་བྱ་ཞེས་པའི་ཚིག་གི་ཁྱད་པར་མ་སྨོས་པར་རང་གི་ངོ་བོའི་སྒོ་ནས་བསྟན་ཅིང་། རྟོགས་རིགས་སྔ་མ་གཉིས་ནི་གཞན་དོན་དུ་མཐོང་ལམ་དུ་མངོན་སུམ་དུ་ཤེས་པར་བྱ་བ་ཙམ་ཡིན་གྱི་དེ་ཡན་ཆད་རྒྱུན་ལྡན་དུ་བསྒོམ་པར་བྱ་བ་མ་ཡིན་པས་ཤེས་པར་བྱ་ཞེས་པའི་ཚིག་གི་ཁྱད་པར་གསུངས་པ་ཡིན་ནོ། །ཡང་ཤེས་བྱ་བྱང་སེམས་ཀྱི་ལམ་དང་། དེ་ཤེས་པའི་ལམ་ཤེས་གཉིས་རྟོགས་རིགས་གཅིག་པས་ཤེས་པར་བྱ་ཞེས་པའི་ཚིག་གི་ཁྱད་པར་མ་གསུངས་པར། རང་གི་ངོ་བོ་མཐོང་ལམ་དང་། སྒོམ་ལམ་གཉིས་གསུངས་པ་ཡིན་ལ་རྟོགས་རིགས་སྔ་མ་གཉིས་དང་། དེ་ཤེས་པའི་ལམ་ཤེས་གཉིས་རྟོགས་རིགས་ཐ་དད་ཡིན་པས་ཤེས་པར་བྱ་ཞེས་པའི་ཚིག་གི་ཁྱད་པར་གསུངས་པ་ཡིན་ནོ། །མི་དམིགས་པའི་རྣམ་པས་ཟིན་པའི་ཚེ་ཤེས་བྱའི་ལམ་དང་། ཤེས་བྱེད་ཀྱི་ལམ་ཤེས་གཉིས་ངོ་བོ་གཅིག་ཡིན་པས་ལུས་རྣམ་གཞག་ཏུ་ནི་གསུམ་ཆར་ལ་ཡང་ཤེས་པར་བྱ་ཞེས་པའི་ཚིག་གི་ཁྱད་པར་མ་གསུངས་པ་སྟེ་སྔར་བཤད་ཟིན་ཏོ།། །།དེས་ན་ཤེས་བྱ་བྱང་སེམས་ཀྱི་ལམ་མམ། དེ་ཤེས་པའི་ལམ་ཤེས་ལ་འདིར་མཐོང་ལམ་དང་སྒོམ་ལམ་གཉིས་གསུངས་པ་ནི་ཤེས་བྱ་དང་། ཤེས་བྱེད་ངོ་བོ་གཅིག་པའི་དབང་དུ་བྱས་ཏེ། མི་དམིགས་པའི་རྣམ་པས་མ་ཟིན་པའི་འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས་ནི་ཤེས་བྱ་བྱང་སེམས་ཀྱི་ལམ་ཡིན་ཀྱང་ལམ་ཤེས་མ་ཡིན་པའི་ཕྱིར་རོ། །དེ་ལྟར་གཉིས་ལས་དང་པོ་མཐོང་ལམ་ནི་བདེན་དང་བདེན་ལ་བཟོད་པ་དང་། །ཞེས་སོགས་ཚིགས་བཅད་གཅིག་དང་། དེའི་རྣམ་པ་རྒྱས་པར་བཤད་པ། དེ་བཞིན་ཉིད་དང་སངས་རྒྱས་དག །ཞེས་སོགས་ཚིགས་བཅད་ལྔ་སྟེ། སྐབས་གཞན་དུ་ཡོན་ཏན་གྱི་ལྡོག་པ་གཞན་གྱི་སྒོ་ནས་བཤད་ཀྱང་འདིར་འདི་ཕྱིའི་ཕན་ཡོན་གྱི་ལྡོག་པ་ནས་བསྟན་པའི་རྒྱུ་མཚན་ནི་སྐབས་འདིར་གདུལ་བྱ་བྱང་སེམས་ཀྱི་རིགས་ཅན་ལ་བསྟན་པ་དང་། རང་ཉིད་རྒྱུན་ལྡན་དུ་སྒོམ་པ་གཉིས་ཀྱི་སྒོ་ནས་བསྟན་པ་གང་ཞིག དེ་གཉིས་ཀ་ལ་ཕན་ཡོན་གྱི་སྒོ་ནས་སྤྲོ་བ་བསྐྱེད་དགོས་པའི་ཕྱིར་རོ། །འདིར་མཐོང་ལམ་གྱི་མཐའ་ཅུང་ཟད་དཔྱད་པ་ལ། མཛོད་ཀྱི་ལུགས། ཀུན་ལས་བཏུས་ཀྱི་ལུགས། གཏན་ལ་དབབ་པ་བསྡུ་བའི་ལུགས། དབུ་མ་པའི་ལུགས་དང་བཞི་ལས། དང་པོ་ནི། འདོད་པའི་སས་བསྡུས་ཀྱི་སྡུག་བསྔལ་བདེན་པའི་སྟེང་གི་ཁྱད་ཆོས་བཞི་པོ་མངོན་སུམ་དུ་མཐོང་བས་ས་དེས་བསྡུས་པའི་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་ནི་སྡུག་བསྔལ་ཆོས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་ཆོས་ཤེས། དེའི་རྗེས་སུ་ཁམས་གོང་གི་སས་བསྡུས་ཀྱི་སྡུག་བསྔལ་བདེན་པའི་སྟེང་གི་ཁྱད་ཆོས་བཞི་པོ་མངོན་སུམ་དུ་མཐོང་བས་ས་དེས་བསྡུས་པའི་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་ནི་སྡུག་བསྔལ་རྗེས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་རྗེས་ཤེས་ཏེ། བདེན་པ་གཞན་གསུམ་ལ་ཡང་དེ་བཞིན་དུ་སྦྱར་བས་སྐད་ཅིག་མ་བཅུ་དྲུག་འབྱུང་བའི་ཕྱི་མ་ནི་སྒོམ་ལམ་དུ་འདོད་པས་མཐོང་ལམ་ལ་བར་ཆད་མེད་ལམ་བརྒྱད་དང་། རྣམ་གྲོལ་ལམ་བདུན་ཏེ་སྐད་ཅིག་མ་བཅོ་ལྔ་རིམ་པ་བཞིན་དུ་སྤེལ་ནས་སྐྱེའོ། །འདི་ནི་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་དུ་འདོད་དོ། །གཉིས་པ་ནི། སྡུག་བསྔལ་བདེན་པའི་གནས་ལུགས་མངོན་སུམ་དུ་མཐོང་བས་ཁམས་གོང་འོག་གི་སྡུག་བསྔལ་མཐོང་སྤང་ཐམས་ཅད་ཅིག་ཅར་དུ་སྤོང་བའི་བར་ཆད་མེད་ལམ་ནི་སྡུག་བསྔལ་ཆོས་བཟོད། དེའི་རྗེས་སུ་དེ་སྤངས་པའི་རྣམ་གྲོལ་ལམ་སྐྱེས་པ་ནི་སྡུག་བསྔལ་ཆོས་ཤེས། དེའི་འོག་ཏུ་ཡེ་ཤེས་དེ་གཉིས་འཕགས་པའི་ཆོས་རྣམས་ཀྱི་རྒྱུར་ངེས་པ་འདྲེན་པའི་ཡེ་ཤེས་ནི་སྡུག་བསྔལ་རྗེས་བཟོད། དེའི་འོག་ཏུ་རྗེས་བཟོད་དེ་ཉིད་ཡུལ་དུ་བྱེད་པའི་ཡེ་ཤེས་ནི་སྡུག་བསྔལ་རྗེས་ཤེས་ཏེ། བདེན་པ་གཞན་གསུམ་ལ་ཡང་དེ་བཞིན་དུ་སྦྱར་བས་སྐད་ཅིག་མ་བཅུ་དྲུག་རྫས་ཀྱི་སྒོ་ནས་རིམ་པ་བཞིན་དུ་འབྱུང་སྟེ། རྒྱལ་པོའི་སྲས་ལས་སྐད་ཅིག་མ་བཅུ་དྲུག་བར་མ་ཆད་དུ་འབྱུང་བས་ཞེས་གསུངས་པའི་ཕྱིར་རོ། །དེ་ལ་ཆོས་བཟོད་བཞི་ནི་བར་ཆད་མེད་ལམ་དང་། ཆོས་ཤེས་བཞི་ནི་རྣམ་གྲོལ་ལམ་དང་། རྗེས་བཟོད་དང་། རྗེས་ཤེས་བརྒྱད་ནི་ཁྱད་པར་གྱི་ལམ་ཡིན་པས་འདིར་བར་ཆད་མེད་ལམ་བཞིར་ངེས་པ་ནི་སྔ་མ་ལས་གྲུབ་མཐའ་ཅུང་ཟད་ཁྱད་པར་འཕགས་པ་སྟེ། བདེན་པ་གཅིག་ལ་ཁམས་གོང་འོག་གིས་བསྡུས་པའི་གནས་ལུགས་ཐམས་ཅད་བློ་གཅིག་གིས་ཅིག་ཅར་དུ་མཐོང་བར་འདོད་པའི་ཕྱིར་རོ། །འདི་ཡང་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་ལ་སྦྱར་བར་བྱ་བ་ཡིན་ནོ། །བོད་སྔ་རབས་པ་དག་མངོན་རྟོགས་རྒྱན་ནས་གསུངས་པའི་ཐེག་ཆེན་གྱི་མཐོང་ལམ་གྱི་རྣམ་གཞག་ལ་ལུགས་འདི་སྦྱར་ཏེ། ཕར་བསྲེས་ཚུར་བསྲེས་བྱེད་པ་ནི་གང་གི་ཕྱིར་འདི་ནི་རྣམ་པར་གཞག་པ་གཞན་ཁོ་ན་ཡིན་ཏེ། དེའི་ཕྱིར་ཐེག་པ་གཞན་ལ་བརྟེན་ནས་ནི་གང་དུ་ཡང་སུན་འབྱིན་པ་བརྗོད་པར་མི་བྱའོ་ཞེས་པའི་གཞུང་མ་དྲན་པ་ཡིན་ནོ། །གསུམ་པ་ནི། ཆོས་ཤེས་ཕྱོགས་མཐུན་བཞི་དང་། རྗེས་ཤེས་ཕྱོགས་མཐུན་བཞི་དང་། མཇུག་ཏུ་ཞི་གནས་འབའ་ཞིག་པའི་སེམས་གཅིག་སྟེ། སེམས་རྣམ་པ་དགུས་མཐོང་བའི་ལམ་ཡོངས་སུ་རྫོགས་པར་འགྱུར་བར་གསུངས་ཤིང་། དེ་དག་ཀྱང་གདུལ་བྱ་སྤྲོས་པ་ལ་དགའ་བ་བདེན་པ་མངོན་པར་རྟོགས་པ་ལ་གཞུག་པའི་ཐབས་སུ་མིང་ཚིག་ཡི་གེའི་ཚོགས་ཀྱི་སྤྲོས་ཏེ་རྣམ་པར་བཞག་པ་ཡིན་གྱི། དོན་དམ་སྤྲོས་མེད་ཀྱི་དབང་དུ་བྱས་ན་དེ་བཞིན་ཉིད་ཤེས་པ་དང་མཚུངས་པར་ལྡན་པ་ཅིག་ཁོ་ནའི་སེམས་ཀྱི་རང་བཞིན་ལས་བརྩམས་ཏེ་མཐོང་བའི་ལམ་ཡོངས་སུ་རྫོགས་པར་འགྱུར་རོ། །ཞེས་བཤད་དོ། །ལུགས་འདི་ལ་མཐོང་སྤང་ཐམས་ཅད་ཅིག་ཅར་དུ་སྤོང་བར་བཞེད་དེ། བསྡུ་བ་ལས། ཉོན་མོངས་པ་རྣམས་ནི་ཅིག་ཅར་སྤོང་བར་རིག་པར་བྱ་ཡི། རིམ་གྱིས་ནི་མ་ཡིན་ནོ། །ཅིའི་ཕྱིར་ཞེ་ན། འདི་ལྟར་མངོན་པར་རྟོགས་པའི་ཤེས་པ་བདེན་པ་མངོན་པར་རྟོགས་པས་མཐོང་བས་སྤང་བར་བྱ་བའི་ཉོན་མོངས་རྣམས་སྤོང་བར་འགྱུར་བ་ལ། མངོན་པར་རྟོགས་པ་དེ་ཡང་བདེན་པ་འདྲེན་མ་ལ་དམིགས་པའི་ཡིད་ལ་བྱེད་པ་དང་མཚུངས་པར་ལྡན་པ་ཡིན་པས་དེ་ཉིད་སེམས་གསུམ་གྱིས་མཐོང་བས་སྤང་བར་བྱ་བའི་ཉོན་མོངས་པ་སྡུག་བསྔལ་ལ་སོགས་པ་ལ་ལོག་པར་བཞུགས་པ་ཐམས་ཅད་ཅིག་ཅར་སྤོང་བར་འགྱུར་བའི་ཕྱིར་རོ། །སྒོམ་པས་སྤང་བར་བྱ་བ་རྣམས་ནི་རིམ་གྱིས་སྤོང་བར་རིག་པར་བྱ་སྟེ། ལམ་གོམས་པས་སྤང་བར་བྱ་བ་ཡིན་པའི་ཕྱིར་རོ། །ཞེས་གསུངས་པས་སོ། །འདི་ཡང་གྲུབ་མཐའ་འདིའི་ལུགས་ཀྱི་ཐེག་པ་གསུམ་ཆར་གྱི་མཐོང་ལམ་སྐྱེ་ཚུལ་དུ་འདོད་ཅིང་། ཐེག་པ་འོག་མ་གཉིས་ཀྱིས་དེ་བཞིན་ཉིད་རྟོགས་པ་ནི་གཞན་དབང་གི་སྟེང་དུ་གང་ཟག་གི་བདག་གིས་སྟོང་པའི་སྟོང་ཉིད་ལ་དེ་བཞིན་ཉིད་དུ་བྱས་པའོ། །བཞི་པ་ལ་ཀླུ་སྒྲུབ་ཀྱིས་བཤད་ཚུལ། བྱམས་པས་བཤད་ཚུལ། རྗེས་འབྲང་གིས་བཤད་ཚུལ། འགལ་མེད་ཀྱི་གནད་ངོས་གཟུང་བ། ཀླན་ཀ་མ་ལུས་པ་སྤང་བ་དང་ལྔ་ལས། དང་པོ་ནི། རིགས་པ་དྲུག་ཅུ་པ་ལས། ཆོས་ཤེས་པ་ཡི་འོག་ཏུ་ནི། །འདི་ལ་བྱེ་བྲག་དབྱེར་ཡོད་ན། །ཤིན་ཏུ་ཕྲ་བའི་དངོས་རྣམས་ལ། །གང་གིས་སྐྱེ་བར་རྣམ་བརྟགས་པ། །རྣམ་པར་མི་མཁས་པ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་ཆོས་ཤེས་པའི་འོག་ཏུ་རྣམ་པར་དབྱེ་བ་མེད་པར་གསུངས་ཤིང་། ཆོས་ཤེས་པ་ཡང་ཆོས་བཟོད་ཀྱི་ཟླས་ཕྱེ་བའི་ཆོས་ཤེས་མ་ཡིན་གྱི། བདེན་པ་གསུམ་པོ་རྟེན་འབྲེལ་སྐྱེ་འགག་མེད་པའི་རང་བཞིན་རྣམ་དག་དང་། སོ་སོར་བརྟགས་འགོག་གློ་བུར་གྱི་དྲི་བྲལ་གཉིས་དབྱེར་མེད་པའི་དག་པ་གཉིས་ལྡན་ལ་མྱ་ངན་ལས་འདས་པའི་ཆོས་སུ་བྱས་ནས་དེ་ཤེས་པ་ལ་ཆོས་ཤེས་པར་འཇོག་པའི་ཕྱིར་ཏེ། དེའི་འགྲེལ་པར་དཔལ་ལྡན་ཟླ་བས། དེ་ལ་ཆོས་ཞེས་བྱ་བའི་སྒྲ་ནི་མྱ་ངན་ལས་འདས་པ་ལ་བྱའོ། །དེ་ཡང་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ལས་གཞན་མ་ཡིན་ཏེ། ཞེས་དང་། རྟེན་ཅིང་འབྲེལ་བར་འབྱུང་བ་དེ་དང་། མྱ་ངན་ལས་འདས་པ་ཐ་མི་དད་པའི་རང་བཞིན་དུ་གྱུར་པའི་ཡོངས་སུ་དཔྱོད་པའི་ཤེས་པ་གང་ཡིན་པ་དེ་ནི་ཆོས་ཤེས་པ་སྟེ། ཆོས་ཀྱི་ཡུལ་ཤེས་པ་ནི་ཆོས་ཤེས་པ་ཞེས་བྱ་བ་ཡིན་པའི་ཕྱིར་ཞེས་དང་། དེ་ལྟར་ན་རྟེན་ཅིང་འབྲེལ་བར་འབྱུང་བ་སྐྱེ་བ་མེད་པ་དང་། འགག་པ་མེད་པ་ལ་དམིགས་པའི་ཆོས་ཤེས་པ་བདེན་པ་གསུམ་པོ་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་ཀྱིས་མ་སྐྱེས་པ་མྱ་ངན་ལས་འདས་པ་ཡང་དེའི་ངོ་བོ་ཉིད་ཡིན་པར་མཐོང་བས་མངོན་པར་རྟོགས་པ་གཅིག་ཏུ་ཟད་དོ། །ཞེས་གསུངས་པས་སོ། །བྱེ་བྲག་ཏུ་སྨྲ་བས་ཁམས་གོང་འོག་གི་བདེན་པའི་གནས་ལུགས་སོ་སོར་མཐོང་བས་སྐད་ཅིག་མ་བཅོ་ལྔར་འདོད་པ་ནི། མངོན་པར་རྟོགས་པ་གཅིག་པོ་དེ་ཉིད་ལ་ལྡོག་པའི་སྒོ་ནས་ཕྱེ་སྟེ་དྲང་དོན་དུ་བསྟན་པ་སྟེ། ཡང་དེ་ཉིད་ལས་གང་དག་སྐད་ཅིག་མ་བཅོ་ལྔར་འདོད་པ་དེ་དག་གི་ལྟར་ན་ཡང་དེ་ལྟ་བུས་འདུལ་བའི་སྐྱེ་བོ་ལ་དེ་ལྟ་བུ་བསྟན་པས་ཕན་གདགས་པའི་ཕྱིར། ཤེས་པ་ངོ་བོ་ཉིད་ལ་ཆར་ཕྱེ་སྟེ་ཆ་བཅོ་ལྔར་རྣམ་པར་གཞག་གོ །གལ་ཏེ་དེ་ལྟར་ན་ལམ་བསྒོམ་པ་རྣམ་པ་བཅུ་དྲུག་པོ་དེ་ཇི་ལྟ་བུ་ཐར་པ་འདོད་པ་རྣམས་ལམ་རྣམ་པར་གཞྃག་པྃ་ཅྃན་གྱིྃ་དེ་ཁོ་ན་ཤེས་པ་ལ་འཇུག་པ་གོམས་པར་བྱ་བའི་ཕྱིར་འདི་ཡོངས་སུ་བརྟགས་ནས་རྣམ་པར་བཞག་པ་ཉིད་དེ། དེ་ཁོ་ན་ནི་ངོ་བོ་གཅིག་ཏུ་ཟད་དོ། །ཞེས་གསུངས་པས་སོ། །གཉིས་པ་ནི། མངོན་རྟོགས་རྒྱན་གྱི་སྐབས་དང་པོར་མཐོང་སྤང་རྟོག་པ་བཞིའི་གཉེན་པོར་མཐོང་སྤང་གཉེན་པོའི་ཚོགས་སྒྲུབ་བཞི་གསུངས། སྐབས་གཉིས་པར་འདི་ཕྱིའི་ཕན་ཡོན་གྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་གསུམ་པར་སྤྲོས་པ་སོ་གཉིས་དང་བྲལ་བའི་ཆོས་ཉིད་རྟོགས་པའི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་བཞི་པར་ཕྱིར་མི་ལྡོག་པའི་རྟགས་ཀྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་དང་། ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པའི་ཁྱད་མཚན་གྱི་སྒོ་ནས་ཤེས་བཟོད་སྐད་ཅིག་མ་བཅུ་དྲུག་གསུངས། སྐབས་ལྔ་པའི་ལུས་རྣམ་གཞག་ཏུ་མཐོང་སྤང་རྟོག་པ་བཞིའི་གཉེན་པོར་མཐོང་ལམ་རྩེ་སྦྱོར་བཞི་གསུངས་ཤིང་། དེ་ཉིད་ཡན་ལག་རྒྱས་བཤད་དུ་བཟོད་པས་བསྡུས་པའི་སྐད་ཅིག་མ་གཅིག་ཁོ་ན་ཡིན་པར་གསུངས་སོ། །བོད་དུ་འགྱུར་བའི་བསྟན་བཅོས་ཞིག་ལ་ཐེག་ཆེན་གྱི་མཐོང་ལམ་གྱི་རྣམ་པར་བཞག་པ་འདི་ལས་རྒྱས་པ་མེད་ཅིང་། ལུགས་གཞན་དང་ཐུན་མོང་མ་ཡིན་པ་ཡིན་ཀྱང་། འདིའི་རྣམ་གཞག་མངོན་པ་གོང་འོག་ནས་བཤད་པ་དང་བསྲེ་བ་ནི་ཡོད་པའི་སྒོ་བོར་ནས་མེད་པའི་སྲང་དུ་འཆག་པའོ། །གསུམ་པ་ལ། གཞན་གྱི་འདོད་པ་བརྗོད་པ་དང་། སློབ་དཔོན་རང་ཉིད་ཀྱི་དགོངས་པ་བསྟན་པ་གཉིས་ལས། དང་པོ་ནི། ཁ་ཅིག་སྡུག་བསྔལ་གྱི་ཆོས་ཉིད་ཤེས་པའི་ཚེ་སྡུག་བསྔལ་ཆོས་བཟོད་ཀྱིས་ཀུན་འབྱུང་སྤོང་ལ། དེ་ཉིད་ཀྱིས་འགོག་པ་མངོན་དུ་བྱེད། དེ་ཉིད་ཀྱིས་ལམ་གོམས་པར་བྱ་བ་ཡིན་ལ། དེ་ཡང་སེམས་ཀྱི་སྐད་ཅིག་མ་གཅིག་ལས་འགྲུབ་པས་འབྲས་བུའི་མངོན་པར་རྟོགས་པ་ལ་ལྟོས་ནས་གཅིག་ཏུ་གཞག་གོ །སོ་སོར་མངོན་པར་རྟོགས་པ་ལས་ནི་སྐད་ཅིག་མ་བཅུ་དྲུག་ཡིན་ཏེ། བདེན་པ་བཞི་པོ་རེ་རེ་ལ་ཡང་ལོག་པར་རྟོག་པ་དུ་མ་འབྱུང་བས། དེ་སེལ་བྱེད་ཀྱི་ཡེ་ཤེས་ཀྱང་དེ་སྙེད་དུ་འབྱུང་བས་སོ། །དེ་ལྟར་ན་ཞུགས་པ་དང་གནས་པའི་རྣམ་པར་གཞག་པ་ཡང་ལེགས་པར་གནས་པ་ཡིན་ནོ། །ཞེས་སོ། །གཞན་དག་ན་རེ། དོན་གྱི་རང་གི་ངོ་བོ་གཅིག །བདག་ཉིད་མངོན་སུམ་ཡིན་པ་ལ། །ཚད་མ་རྣམས་ཀྱིས་བརྟག་བྱ་གང་། །མ་མཐོང་ཆ་གཞན་ཅི་ཞིག་ཡོད། །ཅེས་པའི་ཚུལ་གྱིས་ཡེ་ཤེས་སྐད་ཅིག་མ་གཅིག་གིས་བདེན་པ་ཐམས་ཅད་ཀྱི་ཆོས་ཉིད་མངོན་སུམ་དུ་མཐོང་བས། སོ་སོར་མངོན་པར་རྟོགས་པ་ལས་ཀྱང་སྐད་ཅིག་མ་གཅིག་ཡིན་ནོ། །ཞེས་ཟེར་རོ། །གཉིས་པ་ལ། འགྲེལ་ཆེན་དུ་ཕྱོགས་ཕྱི་མ་ཞུགས་པ་དང་། གནས་པའི་རྣམ་པར་གཞག་པ་མི་རུང་བས་སུན་ཕྱུང་ནས་རང་ཕྱོགས་སུ་བཞག་པ་ནི། ཉ་ཕྱིས་ལ་དངུལ་རྣམ་པ་ལྟར། །གལ་ཏེ་འཁྲུལ་པའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །ཞེས་པ་ལྟར། བདེན་པ་ལ་ཕྱིན་ཅི་ལོག་ཏུ་སྒྲོ་འདོགས་པ་དུ་མ་མེད་ན། མཐོང་བ་ཙམ་གྱིས་བདེན་པ་མངོན་པར་རྟོགས་པ་མཐར་ཕྱིན་ཡང་བདེན་པ་ལ་ཕྱིན་ཅི་ལོག་ཏུ་སྒྲོ་འདོགས་པ་དུ་མ་ཡོད་པས་དེ་སེལ་བྱེད་ཀྱི་ཡེ་ཤེས་དེ་སྙེད་དུ་འཇུག་པས་ན་འདི་ལྟར་འགྱུར་བ་སྟེ། ཆོས་ཉིད་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་བདེན་བཞིའི་ཆོས་ཉིད་ཅིག་ཆར་མཐོང་བས། མཐོང་བ་ལ་སྐད་ཅིག་མ་གཅིག་ཡིན་ཡང་སྒྲོ་འདོགས་སེལ་བྱེད་ཀྱི་ངེས་པ་བསྐྱེད་པའི་ནུས་པ་བཅུ་དྲུག་མཉམ་གཞག་ཏུ་རིམ་ཅན་དུ་ཐོབ་པ་ལས་བཅུ་དྲུག་གོ །ཞེས་ཊཱི་ཀ་ལས་བཤད་པ་འདི་ཉིད་འགྲེལ་ཆེན་གྱི་དགོངས་པ་དཔྱིས་ཕྱིན་པར་སྣང་ངོ་། །བཞི་པ་ལ། རང་ངོར་མངོན་པར་རྟོགས་པ་གཅིག་ཏུ་བསྟན་པ། བློ་གཞན་གྱི་ངོར་སྐད་ཅིག་མ་བཅུ་དྲུག་ཏུ་བསྟན་པ། ཆོས་ཉིད་མཐོང་བ་ལ་ཁྱད་པར་མེད་པ། ངེས་ཤེས་འདྲེན་ཚུལ་ལ་ཁྱད་པར་ཡོད་པ། ལམ་གཉིས་ཀྱི་ཁྱད་པར་རྣམ་པར་གཞག་པ། སྐབས་གོང་འོག་གི་ཁྱད་པར་རྣམ་པར་གཞག་པ། ཡོན་ཏན་གཞན་ཡང་ཐོབ་པའི་ཚུལ་དང་བདུན་ལས། དང་པོ་ནི། མཐོང་ལམ་མཉམ་གཞག་སྐྱེས་པ་ནས། མཉམ་གཞག་གི་རྒྱུན་དེ་ལས་མ་ལངས་ཀྱི་བར་དུ་བློ་དེའི་ངོར་སྐད་ཅིག་སྔ་ཕྱིའི་བྱེ་བྲག་མེད་དེ། བློ་དེས་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་འཛིན་སྟངས་ཀྱི་གཙོ་བོར་བྱས་ནས་མངོན་སུམ་དུ་མཐོང་བ་གང་ཞིག སྐད་ཅིག་སྔ་ཕྱིའི་བྱེ་བྲག་མཐོང་ན་སྔ་མ་འགགས་ནས་ཕྱི་མ་སྐྱེ་བར་མཐོང་དགོས་པའི་ཕྱིར་རོ། །འདི་ལ་དགོངས་ནས་མགོན་པོ་ཀླུ་སྒྲུབ་ཀྱིས་བློ་དེ་ཉིད་ཀྱིས་གནས་ལུགས་མཐོང་ཚུལ་གྱི་དབང་དུ་བྱས་ནས། རྟེན་འབྲེལ་སྐྱེ་འགག་མེད་པའི་ཆོས་ཤེས་པའི་འོག་ཏུ་དབྱེ་བ་མེད་པར་གསུངས་སོ། །དེས་ན་ལུང་དེའི་དོན་ནི། བདེན་པ་གསུམ་པོ་སྐྱེ་ཞིང་འགག་པའི་ཆོས་ཉིད་དང་། མྱ་ངན་ལས་འདས་པ་དབྱེར་མེད་པའི་ཆོས་དང་པོར་ཤེས་ནས། མཉམ་གཞག་དེ་ལས་མ་ལངས་ཀྱི་བར་དུ་བློ་དེའི་ངོར་སྐད་ཅིག་སྔ་ཕྱིའི་བྱེ་བྲག་དབྱེར་ཡོད་ན། བློ་དེ་ཆོས་ཅན། ཤིན་ཏུ་ཕྲ་བའི་དངོས་པོ་སྐྱེ་འགག་མེད་པའི་དོན་ལ་རྣམ་པར་མི་མཁས་པར་ཐལ། སྐྱེ་འགག་དང་བཅས་པར་སྣང་བའི་ཕྱིར་ཏེ། སྐད་ཅིག་སྔ་མའི་འོག་ཏུ་སྐད་ཅིག་ཕྱི་མ་སྐྱེ་བར་རྣམ་པར་བརྟགྃས་པའི་ཕྱིར། འདོད་ན་རྐྱེན་ལས་འབྱུང་བའི་དོན་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་མ་མཐོང་བར་ཐལ་ལོ། །ཞེས་པའི་དོན་ཏོ། །འོ་ན་མངོན་པར་རྟོགས་པ་གཅིག་ཡིན་པ་ཡང་མི་འཐད་པར་འགྱུར་ཏེ། བློ་དེའི་ངོར་མངོན་པར་རྟོགས་པ་གཅིག་ཏུ་ཡང་མི་སྣང་བའི་ཕྱིར་རོ། །ཞེ་ན་སྐྱོན་མེད་དེ། བློ་དེས་སྐྱེ་འགག་མེད་པའི་ཆོས་གཉིས་སྣང་ནུབ་པའི་ཚུལ་གྱིས་རྟོགས་པ་ནི་ཡོད་ཅིང་། སྐད་ཅིག་སྔ་ཕྱིའི་བྱེ་བྲག་མི་སྣང་བའི་ཆ་ནས་མངོན་པར་རྟོགས་པ་གཅིག་ཏུ་གཞག་པ་ཙམ་ཡིན་པའི་ཕྱིར་རོ། །ལུགས་འདི་ཐེག་པ་གསུམ་ཆར་གྱི་མཐོང་ལམ་གྱི་རྣམ་གཞག་ཡིན་པས་ཉན་ཐོས་ཀྱི་མཐོང་ལམ་གྱིས་སྐྱེ་འགག་མེད་པའི་དོན་ཇི་ལྟར་རྟོགས་ཤེ་ན། ཉན་ཐོས་ཀྱི་མཐོང་ལམ་གྱིས་ཀྱང་གང་ཟག་གི་བདག་མེད་མངོན་སུམ་དུ་རྟོགས་པས་གདགས་གཞི་ཉེར་ལེན་གྱི་ཕུང་པོ་ལྔ་པོ་སྐྱེ་མེད་དུ་མངོན་སུམ་དུ་རྟོགས་དགོས་པས་རྟེན་ཅིང་འབྲེལ་བར་འབྱུང་བ་སྐྱེ་འགག་མེད་པའི་དོན་མཐོང་བ་ཡོད་པར་བཞེད་དོ། །འོ་ན་མི་རྟག་ལ་སོགས་བཅུ་དྲུག་མ་རྟོགས་པར་འགྱུར་རོ། །ཞེ་ན། མི་རྟག་ལ་སོགས་བཅུ་དྲུག་ལ་ངེས་ཤེས་དྲངས་པའི་ཆ་ནས་རྟོགས་པར་གཞག་པ་ཡིན་གྱི་བློ་དེ་ཉིད་ཀྱི་ངོ་ན་སྣང་བ་ནི་མ་ཡིན་ཏེ། དཔེར་ན་ཐེག་ཆེན་གྱི་མཐོང་ལམ་བཞིན་ནོ། །འདི་ཉིད་མགོན་པོ་བྱམས་པ་ཡང་བཞེད་དེ། ཐེག་ཆེན་གྱི་མཐོང་ལམ་མཉམ་གཞག་སྐྱེས་ནས་རྒྱུན་མ་རྫོགས་ཀྱི་བར་དུ་ཆོས་དབྱིངས་སྤྲོས་པ་མཐའ་དག་དང་བྲལ་བ་མངོན་སུམ་དུ་མཐོང་བས་སྐད་ཅིག་སྔ་ཕྱིའི་སྤྲོས་པ་སྣང་བ་འགལ་བའི་ཕྱིར་རོ། །གཉིས་པ་ནི། མཐོང་ལམ་མཉམ་གཞག་དེ་ཡང་དུས་མཐའི་སྐད་ཅིག་མ་མ་ཡིན་གྱི་བྱ་རྫོགས་ཀྱི་སྐད་ཅིག་མ་ཡིན་པས་དེ་སྐྱེས་པའི་ཡུན་ཚད་དེ་ལ་རང་རྒྱུད་ཀྱི་རྗེས་ཀྱི་ངེས་ཤེས་ལྟ་བུའམ། གང་ཟག་གོང་མས་གཞན་སེམས་ཤེས་པའི་མངོན་ཤེས་ཀྱིས་གཟིགས་པའི་ཚེ་སྐད་ཅིག་སྔ་ཕྱིའི་བྱེ་བྲག་མང་དུ་ཡོད་ལ། དེ་དག་ཀྱང་རྗེས་ཀྱི་ངེས་ཤེས་འདྲེན་པའི་གྲངས་ལ་ལྟོས་ནས། སྐད་ཅིག་མ་བཅུ་དྲུག་ཏུ་རྣམ་པར་གཞག་གོ །འདི་ལ་དགོངས་ནས་བཀའ་དང་བསྟན་བཅོས་ཕལ་ཆེར་ལས། སྐད་ཅིག་མ་བཅུ་དྲུག་ཏུ་གསུངས་ཤིང་། ལུགས་འདིའི་མདོ་དང་བསྟན་བཅོས་གཉིས་ཀ་ལས། ལམ་ཤེས་གཞི་ཤེས་རྣམ་རྫོགས་སྦྱོར་བའི་སྐབས་སུ་སྐད་ཅིག་མ་བཅུ་དྲུག་ཏུ་གསུངས་སོ། །འཕགས་སེང་གཉིས་ཀྱི་བཞེད་པ་ཡང་འདི་ཉིད་ཡིན་ཏེ། ཉིར་སྣང་དང་འགྲེལ་ཆེན་གཉིས་ལས། གཞི་ཤེས་ཀྱི་མཐོང་ལམ་གྱི་སྐབས་སུ་སངས་རྒྱས་སྟོང་སྨོས་པ་ནི་མཐོང་ལམ་སྐད་ཅིག་མ་བཅུ་དྲུག་ལས་གྲངས་ལྷག་པ་མེད་པའི་དཔང་པོར་གསུངས་ཤིང་སྐབས་གཉིས་པར་འགྲེལ་ཆེན་ལས་སྔར་བཤད་པ་ལྟར་སོ་སོར་མངོན་པར་རྟོགས་པ་ལ་ལྟོས་ནས་སྐད་ཅིག་མ་བཅུ་དྲུག་ཡིན་པར་གསུངས་སོ། །གལ་ཏེ་སྐད་ཅིག་མ་བཅུ་དྲུག་པོ་དེ་དག་ལྡོག་པའི་སྒོ་ནས་ཕྱེ་བ་ཡིན་གྱི་སྐད་ཅིག་སྔ་ཕྱིའི་བྱེ་བྲག་མ་ཡིན་ནོ་སྙམ་ན། དེ་ལྟར་ན་སྤྱིར་བཅུ་དྲུག་ཙམ་སྨོས་རིགས་ཀྱི་སྐད་ཅིག་མ་བཅུ་དྲུག་ཞེས་སྨོས་མི་རིགས་ཏེ། དཔེར་ན། མཐོང་སྤང་གཉེན་པོའི་ཚོགས་སྒྲུབ་བཞི་དང་། མཐོང་ལམ་རྩེ་སྦྱོར་བཞི་ལ་སྐད་ཅིག་མ་བཞི་ཞེས་པའི་ཚིག་གི་ཁྱད་པར་མེད་པ་བཞིན་ནོ། །དེ་ལྟ་བུའི་མཉམ་གཞག་སྐད་ཅིག་མ་བཅུ་དྲུག་ལ་སྡུག་བསྔལ་ཆོས་བཟོད་ལ་སོགས་པའི་རྣམ་པ་བཅུ་དྲུག་ཏུ་འཇོག་པའི་རྒྱུ་མཚན་འོག་ཏུ་འབྱུང་ངོ་། །གསུམ་པ་ནི། བསྟན་བཅོས་འདིར་བཤད་པའི་སྐབས་གོང་འོག་གི་མཐོང་ལམ་ཐམས་ཅད་ཐེག་ཆེན་གྱི་མཐོང་ལམ་ཁོ་ན་ཡིན་པས། སྐད་ཅིག་མ་བཅུ་དྲུག་པོ་ཐམས་ཅད་ཆོས་དབྱིངས་མཐོང་ཚུལ་ལ་ཁྱད་པར་མེད་དེ། ཆོས་དབྱིངས་ཆ་ཤས་མེད་པ་ལ་མཐོང་མ་མཐོང་ཆ་གཉིས་མེད་པའི་ཕྱིར་དང་། དེ་ལྟ་བུའི་མཉམ་གཞག་སྐྱེས་ནས་ཇི་སྲིད་རྒྱུན་མ་རྫོགས་ཀྱི་བར་དུ་ཆོས་དབྱིངས་སྤྲོས་པ་མཐའ་དག་དང་བྲལ་བ་དང་། རྟོགས་བྱེད་ཀྱི་བློ་གཉིས་པོ་གཉིས་སུ་སྣང་བ་ནུབ་ནས་དམིགས་རྣམ་མི་འདྲ་བའི་ཁྱད་པར་མེད་པའི་ཕྱིར་རོ། །དེས་ན་སྡུག་བསྔལ་ལ་ཆོས་བཟོས་ཉིད་ཀྱིས་བདེན་པ་ཞི་ཆར་གྱི་ཆོས་དབྱིངས་མངོན་སུམ་དུ་མཐོང་བ་ཡིན་གྱི་བདེན་པ་བཞིའི་ཆོས་དབྱིངས་རིམ་པ་བཞིན་དུ་མཐོང་བའི་ཁྱད་པར་ནི་ལུགས་འདི་ལ་མེད་དོ། །སྐད་ཅིག་ཕྱི་མ་རྣམས་མཐོང་ལམ་མ་ཡིན་པར་འགྱུར་ཏེ། སྔར་མ་མཐོང་བ་མཐོང་བར་བྱར་མེད་པའི་ཕྱིར་རོ་ཞེ་ན། དེའི་ལན་དུ་ཊཱི་ཀ་ལས། བདེན་བཞི་ལ་སྒྲོ་འདོགས་མང་དུ་ཡོད་པས་དེ་དག་སེལ་བར་བྱེད་པའི་ངེས་ཤེས་བསྐྱེད་པའི་ནུས་པ་མཉམ་གཞག་གི་གནས་སྐབས་སུ་རིམ་བཞིན་དུ་ཐོབ་ཅིང་། ནུས་པ་ཐོབ་པ་ལ་རྟོགས་པའི་ཐ་སྙད་འཇོག་པས་ན་མ་རྟོགས་པ་རྟོགས་པར་བྱར་ཡོད་པའི་ཕྱིར་མཐོང་ལམ་དུ་འཐད་ཅེས་གསུངས་སོ། །ཁོ་བོའི་རྟོག་པ་ལ་ནི་ཆོས་ཉིད་དང་པོར་མཐོང་བའི་མཉམ་གཞག་གི་རྒྱུན་དེ་ཉིད་ཀྱི་རིགས་སུ་གཏོགས་པས་མཐོང་ལམ་དུ་འཇོག་སྟེ། དཔེར་ན། ཆོས་མཆོག་ཆུང་ངུ་དང་། འབྲིང་གཉིས་པོ་འཇིག་རྟེན་པའི་ཆོས་ཐམས་ཅད་ཀྱི་མཆོག་མ་ཡིན་ཀྱང་དེའི་རིགས་སུ་གཏོགས་པས་འཇིག་རྟེན་ཆོས་མཆོག་ཏུ་འཇོག་པ་བཞིན་ནོ་སྙམ་དུ་སེམས་སོ། །བཞི་པ་ནི། འོ་ན་སྐད་ཅིག་སྔ་ཕྱི་རྣམས་ཀྱི་ཁྱད་པར་ཇི་ལྟ་བུ་ཞེ་ན། རྗེས་ཀྱི་ངེས་ཤེས་འདྲེན་པའི་ནུས་པ་སྐད་ཅིག་རེ་རེ་ལ་སོ་སོར་ཐོབ་པས་སྐད་ཅིག་དང་པོ་དང་གཉིས་པ་ཞེས་པ་ཙམ་གྱི་གྲངས་མ་ཡིན་པ་བདེན་པ་བཞི་ལ་ཆོས་བཟོད་དང་། ཆོས་ཤེས་ལ་སོགས་པའི་བྱེ་བྲག་སོ་སོར་འཇོག་པ་སྟེ། རྒྱས་པར་འོག་ཏུ་འབྱུང་ངོ་། །ཉན་ཐོས་ཀྱི་མཐོང་ལམ་སྐད་ཅིག་མ་བཅུ་དྲུག་པོ་སྐྱེ་མེད་རྟོགས་པར་མཚུངས་ཀྱང་མི་རྟག་ལ་སོགས་བཅུ་དྲུག་ལ་ངེས་པ་འདྲེན་པའི་ནུས་པ་མཉམ་གཞག་གི་གནས་སྐབས་སུ་རིམ་ཅན་དུ་ཐོབ་པས་སྡུག་བསྔལ་ལ་ཆོས་བཟོད་ལ་སོགས་པའི་བྱེ་བྲག་འཇོག་པར་བསྟན་བཅོས་འདིའི་ལུགས་ལ་ཡང་བཞེད་དགོས་པ་འདྲ་སྟེ། ཐེག་ཆེན་གྱི་མཐོང་ལམ་དེ་རྟག་མི་རྟག་སོགས་ཀྱི་སྤྲོས་བྲལ་བཅུ་དྲུག་ལ་ངེས་ཤེས་རིམ་པ་བཞིན་དུ་དྲངས་པའི་ཆ་ནས་ཤེས་བཟོད་སྐད་ཅིག་མ་བཅུ་དྲུག་ཏུ་གཞག་པར་སྣང་བའི་ཕྱིར་རོ། །མི་རྟག་ལ་སོགས་བཅུ་དྲུག་དང་ཤེས་བཟོད་སྐད་ཅིག་མ་བཅུ་དྲུག་སྦྱར་བ་གཞུང་གཞན་ལ་ནི་མི་སྣང་ངོ་། །ལྔ་པ་ནི། དེ་ལྟར་སྐད་ཅིག་མ་བཅུ་དྲུག་ལས། སྐད་ཅིག་དང་པོ་སྡུག་བསྔལ་ཆོས་བཟོད་ཁོ་ན་མཐོང་སྤང་ཐམས་ཅད་ཅིག་ཅར་དུ་སྤོང་བར་བྱེད་པའི་བར་ཆད་མེད་ལམ་ཡིན་ཏེ། སྐབས་སྔ་མ་རྣམས་སུ་སྐད་ཅིག་མ་བཅུ་དྲུག་ཏུ་བཤད་ཀྱང་རྩེ་སྦྱོར་གྱི་སྐབས་སུ་མཐོང་སྤང་སྤོང་བའི་བར་ཆད་མེད་ལམ་གྱི་དབང་དུ་བྱས་ནས། སྐད་ཅིག་གཅིག་པའི་བཟོད་པ་ཡིས། །བསྡུས་པ་དེ་འདིར་མཐོང་བའི་ལམ། །ཞེས་གསུངས་ཤིང་། དེའི་འགྲེལ་པར་འཕགས་སེང་གཉིས་ཆར་གྱིས་སྡུག་བསྔལ་ལ་ཆོས་བཟོད་སྐྱེས་ཟིན་པའི་ཚེ། མཐོང་སྤང་ཉོན་སྒྲིབ་དང་། ཤེས་སྒྲིབ་ཐམས་ཅད་སྤངས་ཟིན་པར་གསུངས་པའི་ཕྱིར་ཏེ། ཉིར་སྣང་ལས། དེ་ཡང་མཐོང་བའི་ལམ་གྱི་བཟོད་པ་སྐྱེས་པ་ན། འདོད་པ་དང་། གཟུགས་དང་། གཟུགས་མེད་པའི་ཁམས་ཀྱིས་བསྡུས་པ་མཐོང་བས་སྤང་བར་བྱ་བའི་ཉོན་མོངས་པ་བརྒྱ་རྩ་བརྒྱད་པོ་རྣམ་པར་རྟོག་པ་བཞིས་བསྡུས་པ་རྣམས་སྤོང་བར་འགྱུར་རོ་ཞེས་དང་། དེའི་དོན་འགྲེལ་ཆུང་ལས་དེ་སྐྱེས་པ་ན་འདོད་པ་དང་། གཟུགས་དང་། གཟུགས་མེད་པའི་ཁམས་ཀྱི་རབ་ཏུ་དབྱེ་བས་ཞེས་གསུངས་པའི་ཕྱིར་རོ། །འགྲེལ་ཆེན་གྱི་དགོངས་པ་ཡང་འདི་ཉིད་ཡིན་ཏེ། འབྲས་བུའི་མངོན་པར་རྟོགས་པ་ལ་ལྟོས་ནས་སྐད་ཅིག་མ་གཅིག་ཡིན་པའི་དོན་བདེན་པ་བཞི་ལ་བྱ་བ་ཅིག་ཅར་བྱེད་པ་ལ་བཤད་པའི་ཕྱིར་རོ། །རིགས་པས་ཀྱང་གྲུབ་སྟེ། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་དེས་བདེན་པ་བཞི་ཆར་གྱི་ཆོས་ཉིད་ཅིག་ཅར་དུ་མཐོང་བས་མཐོང་སྤང་ཅིག་ཅར་དུ་སྤོང་བར་གྲུབ་པའི་ཕྱིར་རོ། །རྒྱུ་མཚན་དེས་ན་སྐད་ཅིག་ཕྱི་མ་བཅོ་ལྔ་པོ་ཐམས་ཅད་རྣམ་གྲོལ་ལམ་དུ་གྲུབ་སྟེ། བར་ཆད་མེད་ལམ་གྱི་ངོས་སྐལ་གྱི་དྲི་མ་ལས་གྲོལ་ཞིང་དེ་དང་དམིགས་རྣམ་ཁྱད་པར་མེད་པའི་མཉམ་གཞག་གི་རྒྱུན་ཡིན་པའི་ཕྱིར་རོ། །དྲུག་པ་ནི། སྐབས་དང་པོར་གསུངས་པའི་མཐོང་སྤང་གཉེན་པོའི་ཚོགས་སྒྲུབ་བཞི་དང་། སྐབས་ལྔ་པར་གསུངས་པའི་མཐོང་ལམ་རྩེ་སྦྱོར་བཞི་ནི་དོན་གཅིག་པས་བར་ཆད་མེད་ལམ་ཁོ་ན་ལ་འཇོག་སྟེ། མཐོང་སྤང་བཞི་སྤོང་བའི་གཉེན་པོའི་ལྡོག་པ་ནས་བཞིར་ཕྱེ་བ་ཙམ་ཡིན་གྱི་ངོ་བོ་གཅིག་ཡིན་པའི་ཕྱིར་རོ། །རིགས་པ་འདིས་སྒོམ་སྤང་གཉེན་པོའི་ཚོགས་སྒྲུབ་བཞི་དང་། སྒོམ་ལམ་རྩེ་སྦྱོར་བཞི་ཡང་ས་གཉིས་པ་ནས་བཅུ་པའི་བར་གྱི་བར་ཆད་མེད་ལམ་རེ་རེའི་སྟེང་དུ་ཡང་ལྡོག་པའི་སྒོ་ནས་བཞི་བཞིར་ཕྱེ་བར་ཤེས་པར་བྱའོ། །སྐབས་གཉིས་པ་དང་། གསུམ་པ་དང་། བཞི་པར་གསུངས་པའི་སྐད་ཅིག་མ་བཅུ་དྲུག་པོ་ཐམས་ཅད་དམིགས་རྣམ་མི་འདྲ་བའི་ཁྱད་པར་རྣམས་ནི་རྗེས་ཐོབ་ཀྱི་གནས་སྐབས་ཀྱི་ངེས་ཤེས་འདྲེན་པའི་ཁྱད་པར་ཁོ་ན་ཡིན་ལ། དེ་དག་འདྲེན་པའི་ནུས་པ་སྐད་ཅིག་མ་བཅུ་དྲུག་རིམ་ཅན་དུ་ཐོབ་པས་ཤེས་བཟོད་ཀྱི་ཁྱད་པར་རྣམས་ནི་མཉམ་གཞག་ལ་འཇོག་གོ །གཅིག་ལ་དཔེར་མཚོན་ན། བྱང་སེམས་ཀྱི་མཐོང་ལམ་མཉམ་གཞག་སྐད་ཅིག་དང་པོ་དེ་ཆོས་ཅན། སྐབས་གཉིས་པ་ནས་བཤད་པའི་སྡུག་བསྔལ་ཆོས་བཟོད་ཡིན་ཏེ། དེ་བཞིན་ཉིད་དང་སངས་རྒྱས་དག་ཕན་ཚུན་རྣམ་གྲངས་ཀྱིས་གནས་པ་ཁས་མི་ལེན་པ་ལ་ངེས་པ་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར་རོ། །དེ་བཞིན་དུ་སྐབས་གསུམ་པ་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། སྡུག་བསྔལ་གྱི་བདེན་པ་རྟག་མི་རྟག་གི་སྤྲོས་བྲལ་ལ་ངེས་ཤེས་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར། ཕྱིར་མི་ལྡོག་གི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། གཟུགས་སོགས་ལ་འདུ་ཤེས་ལྡོག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་ལ་ངེས་ཤེས་རང་སྟོབས་ཀྱིས་འདྲེན་པའི་མཉམ་གཞག་ཡིན་པའི་ཕྱིར། ཁྱད་མཚན་གྱི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། ཆོས་དབྱིངས་བསམ་གྱིས་མི་ཁྱབ་པ་ལ་ངེས་པ་རང་སྟོབས་ཀྱིས་འདྲེན་པར་བྱེད་པའི་མཉམ་བཞག་ཡིན་པའི་ཕྱིར། དེ་བཞིན་དུ་སྐད་ཅིག་མ་བཅུ་དྲུག་པོའི་བར་རེ་རེ་བཞིན་དུ་ཆོས་ཅན་དུ་བཟུང་ནས་ཡོན་ཏན་གྱི་ལྡོག་པ་འདྲེན་ཚུལ་རྣམས་མ་འཛོལ་པར་བཀོད་པར་བྱའོ། །དེ་ལྟར་བྱས་ན་སྐབས་གཉིས་པར་སྐད་ཅིག་མ་བརྒྱད་པའི་གནས་སྐབས་སུ་བྱམས་སོགས་ཚད་མེད་བཞི་བསྒོམ་དགོས་པར་གསུངས་པ་ཡང་རྗེས་ཐོབ་ཀྱི་གནས་སྐབས་སུ་བཞག་ནས་དེ་འདྲེན་པའི་ནུས་པ་མཉམ་གཞག་སྐད་ཅིག་མ་བརྒྱད་པ་ལ་ཐོབ་པ་དང་། ཕྱིར་མི་ལྡོག་ཏུ་སྒྲུབ་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་རྣམས་ཀྱང་དེ་བཞིན་དུ་ཤེས་པར་འགྱུར་བས་གོང་འོག་གི་རྣམ་གཞག་ཐམས་ཅད་འགལ་མེད་དུ་རྟོགས་པར་འགྱུར་རོ། །བདུན་པ་ནི། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཀྱི་སྐབས་སུ་མདོ་སྡེ་ས་བཅུ་པ་ནས་བཤད་པ་ལྟར་གྱི་ཡོན་ཏན་བརྒྱ་ཕྲག་བཅུ་གཉིས་དང་། ཤེར་ཕྱིན་གྱི་མདོ་ལས་གསུངས་པའི་སེང་གེ་རྣམ་བསྒྱིངས་དང་། ཐོད་རྒལ་གྱི་ཏིང་ངེ་འཛིན་རྣམས་དང་། མདོ་སྡེ་རྒྱན་དུ། རྒྱལ་སྲས་བྱང་ཆུབ་ཕྱོགས་མཐུན་པ། །རྣམ་པ་སྣ་ཚོགས་ཐམས་ཅད་ནི། །རྟག་ཏུ་མཐོང་བའི་ལམ་འདི་དང་། །ལྷན་ཅིག་ཏུ་ནི་ཐོབ་པར་འདོད། །ཅེས་གསུངས་པ་ལྟར་བྱང་ཆུབ་ཀྱི་ཡན་ལག་བདུན་དང་། འཕགས་ལམ་ཡན་ལག་བརྒྱད་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་ཅིག་ཅར་དུ་ཐོབ་ཅིང་མཉམ་གཞག་གི་གནས་སྐབས་སུ་ཆོས་ཉིད་སྤྲོས་པ་དང་བྲལ་བའི་དོན་ལ་རྩེ་གཅིག་ཏུ་མཉམ་པར་གཞག་པ་ཡིན་པས་དེ་དག་མངོན་དུ་བྱེད་མི་ནུས་ཀྱང་ཡོན་ཏན་དེ་དག་ས་དང་པོའི་རྗེས་ཐོབ་ཀྱི་གནས་སྐབས་སུ་མངོན་དུ་བྱེད་པ་ནི་གནས་ཀྱི་དོན་ནོ། །བྱང་ཆུབ་ཡན་ལག་བདུན་ནི་མཐོང་ལམ་མཉམ་གཞག་གི་ངོ་བོ་ལ་ཚང་ཡང་འཕགས་ལམ་ཡན་ལག་བརྒྱད་ནི་ནུས་པ་མཉམ་གཞག་ཏུ་ཐོབ་ཀྱང་མངོན་དུ་བྱེད་པ་རྗེས་ཐོབ་ཏུ་འབྱུང་བས་སྒོམ་ལམ་ནས་གཞག་པར་སྣང་སྟེ་ཐོད་རྒལ་གྱི་སྙོམས་འཇུག་བཞིན་ནོ། །ལྔ་པ་ཀླན་ཀ་མ་ལུས་པ་སྤང་བ་ལ་བཞི་སྟེ། གྲུབ་མཐའ་གཞན་དང་འགལ་བ་སྤང་བ། རང་གཞུང་གཞན་དང་འགལ་བ་སྤང་བ། རྗེས་འབྲང་གི་གཞུང་དང་འགལ་པ་སྤང་བ། སྒོམ་སྤང་སྤོང་ཚུལ་དང་མཚུངས་པ་སྤང་བའོ། །དང་པོ་ནི། མངོན་པ་གོང་མ་ལས་བར་ཆད་མེད་ལམ་བཞི་དང་། རྣམ་གྲོལ་ལམ་བཞི་སྟེ་བརྒྱད་གསུངས་པ་དང་འགལ་ལོ་ཞེ་ན། དེ་ནི་གྲུབ་མཐའི་ཁྱད་པར་ཡིན་པར་གོང་དུ་བཤད་ཟིན་ལ། མཛོད་དུ་བར་ཆད་མེད་ལམ་བརྒྱད་དང་། ཀུན་བཏུས་སུ་བཞི་དང་། འདིར་གཅིག་ཏུ་བཞག་པ་ཡང་། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པའི་དོན་དུ་རྟོགས་པར་བྱའོ། །གཉིས་པ་ནི། བར་ཆད་མེད་ལམ་གཅིག་གིས་མཐོང་སྤང་ཐམས་ཅད་ཅིག་ཅར་དུ་སྤོང་ན། རྒྱུད་བླར། ཇི་ལྟར་སྨྱུག་སོགས་རིམ་སྐྱེས་པས། །ས་བོན་ཤུན་པ་གཅོད་པ་ལྟར། །དེ་བཞིན་མཐོང་ལམ་རིམ་སྐྱེས་པས། །མཐོང་སྤང་རྣམས་ནི་ལྡོག་པར་བྱེད། །ཅེས་གསུངས་པ་དང་འགལ་ལོ་ཞེ་ན། དེའི་དོན་ནི་འདི་ལྟར་ཡིན་ཏེ། སྦྱོར་ལམ་དྲོད་ནས་བཟུང་སྟེ་སྡུག་བསྔལ་ཆོས་བཟོད་མ་སྐྱེས་བར་དུ་མཐོང་ལམ་རིམ་གྱིས་སྐྱེ་བར་འཇོག་སྟེ། མཐོང་ལམ་རྣམ་པར་མི་རྟོག་པའི་ཡེ་ཤེས་ཀྱི་མི་སྐྱེ་བའི་སྔ་ལྟས་སུ་གྱུར་པ་ལ་དྲོད་དུ་འཇོག་པའི་ཕྱིར་རོ། །སྦྱོར་ལམ་བཞི་རིམ་ཅན་དུ་སྐྱེ་བས་མཐོང་སྤང་རྟོག་པ་མངོན་གྱུར་བཞི་རིམ་ཅན་སྤོང་བ་ནི་མཐོང་སྤང་རིམ་ཅན་དུ་སྤོང་བའི་དོན་ཡིན་ལ། སྡུག་བསྔལ་ཆོས་བཟོད་སྐྱེས་པའི་ཚེ་མཐོང་ལམ་སྐྱེས་པར་འཇོག་ཅིང་། དེའི་སྐད་ཅིག་ཕྱི་ལོག་ནས་མཐོང་སྤང་མ་ལུས་པ་དང་བྲལ་བའོ། །དཔེར་ན། ས་བོན་ས་འོག་ན་ཡོད་པའི་དུས་སུ་མྱུ་གུ་རིམ་བཞིན་དུ་སྐྱེ་བས། ས་བོན་གྱི་ཤུན་པ་རིམ་བཞིན་དུ་གཅོད་ཅིང་། ཤུན་པའི་ཕྱི་རོལ་དུ་མྱུ་གུ་ཐོན་པའི་ཚེ་ཤུན་པ་བཅད་ཟིན་པ་བཞིན་ནོ། །དེ་ལྟར་བྱས་ན་འཇུག་པའི་རང་འགྲེལ་དུ། མདོ་ཐ་དད་ནས་གསུངས་པའི་དཔེ་འཁོར་ལོས་སྒྱུར་བའི་རྒྱལ་པོའི་སྲས་བཙས་མ་ཐག་པ་དང་། ནམ་མཁའ་ལྡིང་གི་ཕྲུ་གུ་སྒོ་ངའི་སྦུབས་ལས་ཐོན་མ་ཐག་པ་དང་། ཡར་ངོའི་ཚེས་གཅིག་གི་ཟླ་བ་དང་། ལྗོན་ཤིང་གི་མྱུ་གུ་ཐོན་མ་ཐག་པ་རྣམས་ས་དང་པོའི་བྱང་སེམས་དང་དཔེ་དོན་བསྒྲིགས་པའི་དོན་རྣམས་འདི་ལ་འགྲིག་པར་འགྱུར་ཞིང་། ཤེས་བཟོད་སྐད་ཅིག་མ་རྣམས་ཀྱིས་མཐོང་སྤང་རིམ་བཞིན་དུ་སྤོང་བ་ལ་སྦྱར་ན་ཐེག་པ་ཆེན་པོའི་སྡེ་སྣོད་ཕལ་ཆེར་དང་འགལ་བར་འགྱུར་རོ། །གསུམ་པ་ནི། འགྲེལ་ཆུང་ལས། སྤོང་བའི་ལམ་ལ་ཡུལ་བདེན་པ་བཞིས་བསྡུས་པའི་བར་ཆད་མེད་ལམ་བཞི་གསུངས་པ་མཐོང་ལམ་ལ་སྦྱར་དགོས་པས་བར་ཆད་མེད་ལམ་གཅིག་ཏུ་གསུངས་པ་དང་འགལ་ལོ་ཞེ་ན། དེ་མཐོང་ལམ་ཁོ་ན་ལ་སྦྱར་བའི་ངེས་པ་མེད་ཅིང་། སྦྱར་བའི་ཚེ་ན་ཡང་སྡུག་བསྔལ་ཆོས་བཟོད་དེ་ཉིད་ལ་ཡུལ་བདེན་བཞིའི་གནས་ལུགས་རྟོགས་པའི་ལྡོག་པའི་སྒོ་ནས་ཕྱེ་བ་སྟེ། སྤང་བྱ་བཞི་སྤོང་བའི་ལྡོག་པ་ནས་མཐོང་ལམ་རྩེ་སྦྱོར་བཞིར་བཞག་པ་དང་འདྲའོ། །འདི་ལ་སློབ་དཔོན་གྱི་འགྲེལ་པ་ཆེ་ཆུང་གཉིས་ནས་བདེན་པ་བཞིས་བསྡུས་པ་བར་ཆད་མེད་ལམ་བཞི་ཞེས་པ་ཙམ་དང་། ཉིར་སྣང་དུ་ཡང་སྤོང་བའི་ལམ་ལ་བར་ཆད་མེད་ལམ་བདེན་པ་རྣམ་པ་བཞི་ལ་བརྟེན་པ་ཞེས་པ་ཙམ་ལས་གང་ལ་སྦྱར་གྱི་གསལ་ཀ་མི་སྣང་ཞིང་། བུདྡྷ་ཤྲཱིས་བདེན་པ་བཞིའི་ཆོས་ཤེས་པ་ཉིད་ཀྱི་བཟོད་པས་རབ་ཏུ་བསྡུས་པ་རྣམ་པ་བཞིའོ། །ཞེས་མཐོང་ལམ་བཟོད་པ་བཞི་ལ་སྦྱར་ཞིང་། ཆོས་བཤེས་ཀྱིས་སྤོང་བའི་ལམ་གྱི་རྣམ་པ་ནི་བར་ཆད་མེད་པའི་ཏིང་ངེ་འཛིན་གྱི་མཚན་ཉིད་དོ། །ཞེས་བར་ཆད་མེད་པའི་ཏིང་ངེ་འཛིན་ལ་ངོས་འཛིན་པར་མཛད་དོ། །དོན་ནི་འདི་ཡིན་ཏེ། ས་དང་པོ་ནས་བཅུ་པའི་བར་གྱི་བར་ཆད་མེད་ལམ་རེ་རེ་ཡང་ཡུལ་བདེན་པ་བཞིའི་ཆོས་ཉིད་རྟོགས་པའི་ལྡོག་པའི་སྒོ་ནས་བཞི་བཞིར་ཕྱེ་བ་ནི་སྤོང་བའི་ལམ་ཡིན་ཏེ། གཉེན་པོའི་ཚོགས་སྒྲུབ་དང་ཆོས་མཚུངས་སོ། །འཇོག་ཚུལ་ནི་མི་འདྲ་སྟེ། ཡུལ་གྱི་སྒོ་ནས་དང་། སྤང་བྱའི་སྒོ་ནས་ཕྱེ་བའི་ཁྱད་པར་ཡོད་པའི་ཕྱིར་རོ། །སངས་རྒྱས་ཉིད་ཀྱི་ལམ་ནི་ས་བཅུའི་རྗེས་ཐོབ་ཀྱི་ཕ་རོལ་ཏུ་ཕྱིན་པ་བཅུ་སྟེ། འདི་ནི་སའི་ཚོགས་དང་ཆོས་མཚུངས་སོ། །བཞི་པ་ནི། སྡུག་བསྔལ་ཆོས་བཟོད་ཀྱིས་བདེན་པ་བཞི་ཆར་གྱི་ཆོས་དབྱིངས་རྟོགས་པའི་རྒྱུ་མཚན་གྱིས་བདེན་པ་བཞི་ཆར་གྱིས་མཐོང་སྤང་ཅིག་ཅར་དུ་སྤོང་ན། ས་གཉིས་པའི་བར་ཆད་མེད་ལམ་གཅིག་ཉིད་ཀྱིས་སྒོམ་སྤང་ཐམས་ཅད་ཅིག་ཅར་དུ་སྤོང་བར་འགྱུར་ཏེ། ཁམས་གསུམ་ཆར་གྱི་ཆོས་དབྱིངས་རྟོགས་པའི་ཕྱིར་རོ་ཞེ་ན། དེ་ནི་མི་མཚུངས་ཏེ། མཐོང་སྤང་ནི་ཆོས་ཉིད་མཐོང་བ་ཙམ་གྱིས་སྤང་བར་བྱ་བའི་རིགས་ཡིན་པས་མཐོང་ཟིན་རྒྱུན་ལྡན་དུ་བསྒོམས་པ་ལ་མི་ལྟོས་ལ། སྒོམ་སྤང་ནི་ཆོས་ཉིད་མཐོང་ཟིན་གོམས་པས་སྤང་བར་བྱ་བའི་རིགས་ཡིན་པས་མཐོང་ཟིན་གོམས་པ་སྔ་ཕྱི་ལ་སྤང་བྱ་སྤོང་བའི་ནུས་པ་ཆེ་ཆུང་གི་ཁྱད་པར་ཆེ་བའི་ཕྱིར་རོ། །འདི་དག་ནི་ཐུན་མོང་མ་ཡིན་པའི་རྣམ་གཞག་རྟོགས་པའི་ཆེད་དུ་གྲུབ་མཐའ་གོང་འོག་གི་མི་འདྲ་བའི་ཁྱད་པར་ཅུང་ཟད་ཕྱེ་ཞིང་ཐེག་ཆེན་དབུ་མའི་ལུགས་ཀྱི་ཐུན་མོང་མ་ཡིན་པ་ཞིབ་ཏུ་བཤད་པ་ཡིན་ནོ། །གྲུབ་མཐའ་གོང་འོག་བསྲེས་པའི་ལུགས་ངོས་གཟུང་མེད་པ་རྣམས་ལ་འདིར་དགག་སྒྲུབ་བྱེད་པ་མ་ལོང་ཞིང་། གཞན་དུ་ཅུང་ཟད་བཤད་ཟིན་ལ། ཞིབ་པར་ནི་རང་ལུགས་འདི་རྟོགས་ན་ཤེས་པར་འགྱུར་རོ། །མཁས་པ་སྔ་མའི་གྲུབ་མཐའ་སུན་ཕྱུང་ནས། །རང་གི་རྣམ་རྟོག་ཤིང་རྟའི་སྲོལ་འབྱེད་དུ། །སྟོན་འདོད་མེད་ཀྱང་རྣམ་དཔྱོད་མེ་ལོང་ལ། །གནས་ལུགས་གཟུགས་བརྙན་འཆར་བ་སུ་ཡིས་འགོག །སྐབས་སུ་བབ་པའི་གཞུང་ལུགས་ཚད་ལྡན་དང་། །འགལ་བར་སྟོན་ན་ཁོ་བོས་འཇུག་ལྡོག་བྱེད། །དེ་ལྟ་མིན་པར་ཅལ་ཅལ་མགྲིན་བསྒྲིགས་ནས། །ཅོལ་ཅོལ་སྒྲོགས་ལ་བ་སྤུ་གཡོ་རེ་སྐན། །ཞེས་སྨྲས་སོ། །བྱང་སེམས་ཀྱི་སྒོམ་ལམ་ལ་སྒོམ་ལམ་གྱི་བྱེད་པ་ནི། ཀུན་ནས་ཞི་དང་ཐམས་ཅད་ལ། །ཞེས་སོགས་ཏེ། སྒོམ་ལམ་གྱི་བྱེད་པ་དང་པོར་བསྟན་པ་ནི་བྱང་སེམས་ཀྱི་སྒོམ་ལམ་དེ་ཡང་གཞན་ལ་སྟོན་པ་དང་། རང་གིས་སྒོམ་པ་གཉིས་ཆར་གྱི་ཚེ་ཡང་། བྱེད་པའི་སྒོ་ནས་སྤྲོ་བ་བསྐྱེད་དགོས་ཞེས་ཤེས་པའི་ཆེད་ཡིན་ནོ། །འོ་ན་རྟོགས་རིགས་སྔ་མ་གཉིས་ཀྱང་ཕན་ཡོན་གྱིས་སྤྲོ་བ་བསྐྱེད་པའི་སྒོ་ནས་སྟོན་དགོས་པར་མཚུངས་སོ། །ཞེ་ན་མི་མཚུངས་ཏེ། འདི་ནི་མ་ངེས་པའི་རིགས་ཅན་རྣམས་དམན་པའི་ལམ་སྤངས་ནས་ཐེག་ཆེན་གྱི་ལམ་གྱིས་རྗེས་སུ་གཟུང་བར་བྱ་བའི་ཕྱིར་དུ་ཕན་ཡོན་གྱིས་སྤྲོ་བ་བསྐྱེད་པ་ཡིན་ལ། སྔ་མ་གཉིས་ནི་རེ་ཞིག་ཐེག་ཆེན་གྱི་ལམ་དུ་འཇུག་པར་མི་ནུས་པ་རྣམས་ལ་བསྟན་པར་བྱ་བ་ཡིན་པས་དེ་ལ་ཕན་ཡོན་གྱིས་སྤྲོ་བ་བསྐྱེད་པ་ལ་དགོས་པ་མེད་པའི་ཕྱིར་རོ། །འོ་ན་བྱང་སེམས་ཀྱི་སྒོམ་ལམ་དེ་ལ་སྐབས་དང་པོར་གདམས་ངག་གི་སྐབས་སུ་མཐོང་ལམ་དང་རྟོགས་རིགས་ཐ་དད་མེད་པ་དང་། ཚོགས་སྒྲུབ་ཀྱི་སྐབས་སུ་སའི་ཚོགས་དང་། གཉེན་པོའི་ཚོགས་དང་། སྐབས་བཞི་པར་ཕྱིར་མི་ལྡོག་པའི་གཏན་ཚིགས་དང་། སྐབས་ལྔ་པར་སྒོམ་སྤང་གི་གཉེན་པོའི་ལྡོག་པ་ནས་བསྟན་པ་ལས་འདིར་རྗེས་ཐོབ་དང་མཉམ་གཞག་གིས་བསྟན་པའི་རྒྱུ་མཚན་ཅི་ཡིན་ཞེ་ན། བྱང་སེམས་ཀྱི་སྒོམ་ལམ་དེ་གཞན་ལ་སྟོན་པའི་ཚེ་ཡང་སྒོམ་ལམ་གྱི་རིགས་མ་ལུས་པ་བསྟན་དགོས་ལ་རང་གིས་བསྒོམ་པའི་ཚེ་ཡང་རིགས་མ་ལུས་པ་བསྒོམ་དགོས་ཤིང་རིགས་མ་ལུས་པ་དེ་ཡང་རྗེས་ཐོབ་དང་མཉམ་གཞག་གཉིས་ཀྱིས་བསྡུས་པའི་དོན་ནོ། །བྱང་སེམས་ཀྱི་སྒོམ་ལམ་རྗེས་ཐོབ་དེ་ཡང་བསོད་ནམས་ཀྱི་ཚོགས་རྫོགས་པར་བྱེད་པའི་ལྡོག་པ་ནས་བསྟན་དགོས་པས། དང་པོར་བསོད་ནམས་ཀྱི་ཚོགས་གསོག་པ་དང་། བར་དུ་སྤེལ་བ་དང་། ཐ་མར་མི་ཟད་པར་བྱེད་པ་གསུམ་གྱི་དབང་དུ་བྱས་ནས་མོས་བསྔོ་རྗེས་སུ་ཡི་རང་གསུམ་དུ་ངེས་ཤིང་། གོ་རིམ་ཀྱང་དེ་ལྟར་དུ་བསྟན་པ་ཡིན་ནོ། །དེ་ཡང་མོས་པ་སྒོམ་ལམ་ནི། ས་མཚམས་ཀྱི་རབ་དབྱེའི་སྒོ་ནས་བསྟན། བསྔོ་བ་སྒོམ་ལམ་ནི། བྱེད་པ་དང་མི་དམིགས་པའི་རྣམ་པ་ཅན་གྱི་སྒོ་ནས་བསྟན། རྗེས་སུ་ཡི་རང་སྒོམ་ལམ་ནི། ཐབས་ཤེས་གཉིས་ཀྱི་སྒོ་ནས་བསྟན་ནས། མོས་པ་སྒོམ་ལམ་གྱི་ས་མཚམས་ཀྱི་རབ་དབྱེ་འོག་མ་གཉིས་ལ་སྦྱར། བསྔོ་བ་སྒོམ་ལམ་གྱི་བྱེད་པ་དང་མི་དམིགས་པ་ཡང་གོང་འོག་གཉིས་ལ་སྦྱར། རྗེས་སུ་ཡི་རང་སྒོམ་ལམ་གྱི་ཐབས་ཤེས་གཉིས་ཀྱང་གོང་མ་གཉིས་ལ་སྦྱར་བར་བྱ་བ་ཡིན་ནོ། །མོས་པ་སྒོམ་ལམ་གྱི་ས་མཚམས་ཀྱི་རབ་དབྱེ་ཇི་ལྟ་བུ་དེ་འོག་མ་གཉིས་ལ་ཇི་ལྟར་སྦྱོར་ཞེ་ན། དང་པོ་ནི། གང་ལ་མོས་པར་བྱ་བའི་ཡུལ་ནི་ཤེར་ཕྱིན་དང་། མོས་པར་བྱེད་པའི་བློ་ནི་ས་གཉིས་པ་ནས་བཅུ་པའི་བར་གྱི་མོས་པ་དགུ་པོ་དེ་ཡིན་ལ། ཚུལ་ནི་བློ་དགུ་པོ་དེས་ཤེར་ཕྱིན་རང་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་རང་དོན་མོས་པ་དགུ། གཉིས་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་གཉིས་དོན་མོས་པ་དགུ། གཞན་དོན་ཕུན་ཚོགས་ཀྱི་འབྱུང་གནས་སུ་མོས་པ་ལ་གཞན་དོན་མོས་པ་དགུར་འཇོག་པ་ནི། མོས་པ་རང་གི་དོན་དང་ནི། །ཞེས་སོགས་ཀྱིས་བསྟན་ནོ། །དེས་ན་དགུ་ཚན་གསུམ་པོ་དེ་ཉིད་རེ་རེ་བཞིན་ས་གཉིས་པ་ནས་བཅུ་པའི་བར་དུ་ཡོད་པར་ཤེས་པར་བྱའོ། །འདི་ནི་འགྲེལ་ཆེན་ལས་ལུགས་གཉིས་གསུངས་པའི་གཅིག་ཡིན་ཞིང་བསྟན་བཅོས་རྩ་བར་གསུམ་པོ་རེ་རེ་ལ་ཡང་ཆུང་ངུའི་ཆུང་ངུ་ལ་སོགས་པ་དགུ་དགུར་གསུངས་པའི་གནད་ཀྱིས་ས་གཉིས་པ་ནས་བཅུ་པའི་བར་དུ་འཇོག་པར་སྣང་སྟེ། ས་དགུ་ལ་ནི་ཆེན་པོ་ཡི། །ཞེས་སོགས་དང་། དེ་ནི་རྒྱུན་ཆགས་ཡིན་པའི་ཕྱིར་ཞེས་པའི་སྐབས་དང་ཚུལ་འདྲའོ། །ཉིར་སྣང་ལས། མོས་པའི་རྣམ་པ་ཐམས་ཅད་ལ་ཡང་ཆུང་ངུའི་ཆུང་ངུ་ལ་སོགས་པ་དཔེ་གོང་ནས་གོང་དུ་གྱུར་པས། གང་དང་གང་བསྟན་པ་དེ་དང་དེའི་རྗེས་སུ་འབྲངས་ནས་ཆེན་པོའི་ཆེན་པོ་ལ་སོགས་པ་ལྡོག་པ་མི་མཐུན་པའི་ཕྱོགས་སུ་ཤེས་པར་བྱའོ། །ཞེས་གསུངས་པས་ཀྱང་དོན་འདི་ཉིད་བསྟན་ནོ། །ཉིར་སྣང་ལས། རང་གི་དོན་གྱི་མོས་པ་ནི་གང་གིས་རང་གི་དོན་དངོས་སུ་སྒྲུབ་པར་བྱེད་ཅིང་གཞན་གྱི་དོན་ཡང་ཆེད་དུ་བྱ་བའི་རང་བཞིན་གྱིས་བྱེད་པའོ། །རང་དང་གཞན་གྱི་དོན་ནི་གང་གིས་གཉིས་ཀའི་དོན་སྒྲུབ་པར་བྱེད་པའོ། །གཞན་གྱི་དོན་ནི་གང་གིས་གཞན་ཁོ་ནའི་དོན་དུ་འགྱུར་བ་སྟེ། དེར་ཡང་རང་གི་དོན་ནི་འགྲུབ་པ་ཡིན་གྱི་དེར་རང་གི་དོན་འགོག་པ་ནི་མ་ཡིན་ནོ། །ཞེས་གསུངས་པའི་དོན་དུ་བསམས་ནས་རང་དོན་མོས་པ་ས་གཉིས་པ་ནས་བདུན་པའི་བར་དང་། གཉིས་དོན་མོས་པ་ས་བརྒྱད་པ་དང་དགུ་པ་གཉིས་དང་། གཞན་དོན་མོས་པ་ས་བཅུ་པར་འཇོག་པ་ནི་རེ་རེ་ལ་ཡང་དགུ་དགུར་ཕྱེ་བའི་འཇོག་ཚུལ་དང་མི་མཐུན་ཅིང་། ཉིར་སྣང་ཉིད་ལས། དེ་ལ་རང་གི་དོན་གྱི་མོས་པ་ནི་གཞན་གི་དོན་ཆེད་དུ་བྱ་བར་འགྱུར་ལ། གཉིས་པ་ལ་ནི། སྦྱོར་བ་བར་ཆད་དང་བཅས་པའོ། །གསུམ་པ་ལ་ནི། སྦྱོར་བ་བར་ཆད་མེད་པ་ཡིན་ནོ། །ཞེས་གསུངས་པ་དང་ཡང་མི་འགྲིག་སྟེ། ས་བདུན་པ་མན་ཆད་དུ་གཞན་དོན་དངོས་སུ་མི་བྱེད་པར་ཆེད་དུ་བྱ་བའི་སྒོ་ནས་བྱེད་པར་མ་ངེས་པའི་ཕྱིར་དང་། ས་བརྒྱད་པ་དང་དགུ་པ་ལ་གཞན་དོན་ལ་སྦྱོར་བ་བར་ཆད་དང་བཅས་པར་མ་ངེས་པའི་ཕྱིར། དེས་ན་ལུང་དེའི་དོན་ཡང་ས་དགུའི་རྗེས་ཐོབ་རེ་རེ་ལ་ཡང་གསུམ་གསུམ་ཡོད་པ་ལ་མོས་པ་གསུམ་གསུམ་དུ་འཇོག་པར་མངོན་ཏེ། སྔ་མའི་དོན་ཏོ། །དེ་ལྟ་བུའི་མོས་པ་བསྒོམ་པའི་བྱང་ཆུབ་སེམས་དཔའ་སྤྲོ་བ་བསྐྱེད་པའི་ཆེད་དུ་དེ་བཞིན་གཤེགས་པས་རང་དོན་མོས་པ་དགུ་ལ་བསྟོད་པ་དགུ། གཉིས་དོན་མོས་པ་དགུ་ལ་བཀུར་བ་དགུ། གཞན་དོན་མོས་པ་དགུ་ལ་བསྔགས་པ་དགུ་མཛད་པ་ཡིན་ནོ། །ཞེས་པ་ནི། ཤེས་རབ་ཕ་རོལ་ཕྱིན་པ་ལ། །ཞེས་སོགས་ཀྱིས་བསྟན་ཏོ། །མོས་པའི་དབྱེ་བ་འོག་མ་གཉིས་ལ་སྦྱོར་ཚུལ་ནི། བསྔོ་བ་སྒོམ་ལམ་བཅུ་གཉིས་སུ་ཡོད་པ་དེ་རེ་རེ་ལ་ཡང་ཆུང་ངུའི་ཆུང་དུ་སོགས་དགུ་དགུར་ཕྱེ་ཞིང་རྗེས་སུ་ཡི་རང་སྒོམ་ལམ་ལ་ཡང་ཆུང་ངུའི་ཆུང་ངུ་སོགས་དགུ་ཡོད་པས་དེ་གཉིས་ས་གཉིས་པ་ནས་བཅུ་པའི་བར་དུ་ཡོད་པར་ཤེས་པར་བྱའོ། །བསྔོ་བ་སྒོམ་ལམ་བྱེད་པ་དང་མི་དམིགས་པའི་རྣམ་པའི་སྒོ་ནས་བསྟན་པ་ནི། ཡོངས་སུ་བསྔོ་བ་ཁྱད་པར་ཅན། །ཞེས་སོགས་ཏེ། དེ་གོང་འོག་གཉིས་ལ་སྦྱོར་པའི་ཚུལ་ནི་མོས་པ་སྒོམ་ལམ་དེ་ཡང་བྱེད་པ་མ་འོངས་པ་ན་ཤེར་ཕྱིན་འཐོབ་པའི་བྱ་བ་བྱེད་ཅིང་། རྣམ་པ་མི་དམིགས་པའི་རྣམ་པ་ཅན་དང་། རྗེས་སུ་ཡི་རང་སྒོམ་ལམ་དེ་ཡང་བྱེད་པ་རང་གཞན་གྱི་དགེ་རྩ་མཉམ་པར་ཐོབ་པའི་བྱ་བ་བྱེད་ཅིང་། རྣམ་པ་མི་དམིགས་པའི་རྣམ་པ་ཅན་ཡིན་ནོ། །ཞེས་པའི་སྒོ་ནས་སོ། །རྗེས་སུ་ཡི་རང་སྒོམ་ལམ་ཐབས་ཤེས་གཉིས་ཀྱི་སྒོ་ནས་བསྟན་པ་ནི། ཐབས་དང་མི་དམིགས་པ་དག་གི །ཞེས་སོགས་ཏེ། དེ་གོང་མ་གཉིས་ལ་ཇི་ལྟར་སྦྱོར་བའི་ཚུལ་ནི་གོང་མ་གཉིས་ཀྱང་མི་དམིགས་པའི་རྣམ་པ་ཅན་ཁོ་ན་མ་ཡིན་པར་ཐབས་དང་ཟུང་འཇུག་ཡིན་ནོ། །ཞེས་པའི་སྒོ་ནས་སོ། །དེ་ལྟར་རྗེས་ཐོབ་བསོད་ནམས་ཀྱི་ཚོགས་ཀྱིས་བསྡུས་པ་བསྟན་ཟིན་ནས། མཉམ་གཞག་ཡེ་ཤེས་ཀྱི་ཚོགས་ཀྱི་ལྡོག་པ་ནས་བསྟན་དགོས་པས་མཉམ་གཞག་འཆད་དོ། །དེ་ལ་ཡང་རང་གི་ངོས་སྐལ་གྱི་སྒྲིབ་པ་སྤོང་བའི་གཉེན་པོ་དང་། དེ་ལས་གྲོལ་བའི་རྣམ་གྲོལ་ལམ་གཉིས་སུ་ངེས་པས་སྒྲུབ་པ་སྒོམ་ལམ་དང་རྣམ་དག་སྒོམ་ལམ་གཉིས་སུ་བསྟན་ལ་དེ་ལ་དང་པོར་སྒྲུབ་པ་སྒོམ་ལམ་ནི། དེ་ཡི་ངོ་བོ་ཉིད་མཆོག་ཉིད། །ཅེས་སོགས་ཏེ། ཆོས་ཉིད་ལ་རྩེ་གཅིག་ཏུ་མཉམ་པར་གཞག་པའི་སྒོམ་ལམ་མཉམ་གཞག་སྦྱོར་བའི་ལམ་དང་། བར་ཆད་མེད་པའི་ལམ་གྱིས་བསྡུས་པ་རྣམས་སོ། །དེ་ལྟ་བུའི་སྒྲུབ་པ་སྒོམ་ལམ་དེ་ཡང་མཐུན་རྐྱེན་རྒྱུ་ཚོགས་ཚང་ཞིང་འགལ་རྐྱེན་བར་ཆད་སྤོང་བའི་སྒོ་ནས་སྒྲུབ་དགོས་པས་རྒྱུ་ཚོགས་དང་། འགལ་རྐྱེན་བར་ཆད་གཉིས་པོ་དེ། །སངས་རྒྱས་བསྟན་དང་སྦྱིན་སོགས་དང་། །ཞེས་སོགས་ཀྱིས་བསྟན། སློབ་དཔོན་གྱིས་འདི་རྣམ་དག་སྒོམ་ལམ་ལ་སྦྱོར་བར་མཛད་ཀྱང་སྔ་མ་དང་དོན་གཅིག་པ་ཡིན་ཏེ། རྒྱུ་ཚོགས་གཉིས་སྒྲུབ་པ་དང་། བར་ཆད་སྤོང་བ་གཉིས་པོ་དེ་ཡང་སྒོམ་ལམ་གཉིས་ཆར་གྱི་སྔོན་དུ་འགྲོ་དགོས་པ་ཡིན་གྱི། དེ་གཉིས་ཀྱི་བར་དུ་འགྱུར་བ་མ་ཡིན་པའི་ཕྱིར་རོ། །འོན་ཀྱང་། འདི་ལ་མོས་པའི་རྒྱུ་དག་ཡིན། །ཞེས་པའི་ཉེ་ཚིག་གི་ནུས་པས་སྔ་མ་དང་སྦྱར་བ་ལེགས་སོ། །རྣམ་དག་སྒོམ་ལམ་བསྟན་པ་ལ་འཕགས་བཞིའི་རྣམ་དག་སྤྱིར་བསྟན་པ་ནི། འབྲས་བུ་དག་པ་གཟུགས་ལ་སོགས། །ཞེས་སོགས་ཏེ། དེའི་དོན་ཡང་འཕགས་བཞིའི་རྣམ་དག་དེ་དྲི་མས་རྣམ་པར་དག་པ་ན། དེའི་ཡུལ་གཟུགས་སོགས་ཀྱང་དྲི་མ་དེ་ཉིད་ཀྱིས་དག་པ་ཡིན་ཞེས་པའོ། །འོ་ན་སངས་རྒྱས་ཀྱི་ཡེ་ཤེས་དྲི་མས་དག་པས་ཤེས་བྱ་ཐམས་ཅད་དྲི་མས་དག་པར་འགྱུར་རོ་ཞེ་ན། རང་སྣང་ལ་འདོད་དེ། རང་སྣང་ལ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཕྱིར་རོ། །འོ་ན་དྲི་མ་གང་དང་གང་དག་པས་འཕགས་པ་གང་དང་གང་གི་རྣམ་དག་ཏུ་འཇོག་ཅེ་ན། རྣམ་དག་གི་ཁྱད་པར་སོ་སོར་བསྟན་པ་ནི། ཉོན་མོངས་ཤེས་བྱ་ལམ་གསུམ་གྱི། །ཞེས་སོགས་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་ཙམ་གྱིས་དག་པའི་ཕྱིར་ན་ཉན་ཐོས་ཀྱི་རྣམ་དག་དང་། དེ་དང་ཤེས་སྒྲིབ་གཟུང་རྟོག་ཙམ་གྱིས་དག་པའི་ཕྱིར་རང་རྒྱལ་གྱི་རྣམ་དག་དང་། ཐེག་པ་གསུམ་གྱི་ལམ་གྱི་སྒྲིབ་པ་གསུམ་རྣམ་པར་དག་པའི་ཕྱིར་ན་བྱང་སེམས་ཀྱི་རྣམ་དག་དང་། སྒྲིབ་པ་མ་ལུས་པ་དག་པའི་ཕྱིར་ན་སངས་རྒྱས་ཀྱི་རྣམ་དག་ཏུ་འཇོག་ཅེས་པའི་དོན་ཏོ། །འདི་རྣམ་དག་སྒོམ་ལམ་འཆད་པའི་སྐབས་ཡིན་པས་འཕགས་བཞིའི་རྣམ་དག་འཆད་པ་སྐབས་སུ་མ་བབ་བོ་སྙམ་ན་བརྗོད་བྱའི་གཙོ་བོ་རྣམ་དག་སྒོམ་ལམ་གྱི་སྤངས་པའི་ཁྱད་པར་བདེ་བླག་ཏུ་རྟོགས་པའི་ཆེད་དུ་འཕགས་པ་བཞི་ཆར་གྱི་རྣམ་དག་འཆད་དགོས་པས་དེའི་དབང་དུ་བྱས་པའོ། །ཇི་ལྟར་རྟོགས་ཤེ་ན། རྣམ་དག་སྒོམ་ལམ་ཆོས་ཅན། རྣམ་དག་སྔ་མ་གཉིས་ལས་སྤངས་པའི་སྒོ་ནས་ཁྱད་པར་དུ་འཕགས་ཏེ། རྣམ་དག་དང་པོས་ནི་ཉན་ཐོས་ཀྱི་སྤང་བྱ་ཙམ་ལས་མ་སྤངས། གཉིས་པས་ནི་རང་རྒྱལ་གྱི་སྤང་བྱ་ཙམ་ལས་མ་སྤངས་ཤིང་། ཁྱོད་ཀྱིས་དེ་གཉིས་ཀྱི་སྟེང་དུ་ཐེག་ཆེན་གྱི་ལམ་གྱི་སྤང་བྱར་གྱུར་པའི་མཐོང་སྤང་ཤེས་སྒྲིབ་དང་། རང་རྒྱུ་སྒོམ་ལམ་བར་ཆད་མེད་ལམ་གྱི་ངོས་སྐལ་གྱི་སྤང་བྱ་སྤངས་པས་ཐེག་པ་གསུམ་གྱི་ལམ་གྱི་སྒྲིབ་པ་གསུམ་སྤངས་པའི་ཕྱིར་རོ། །སངས་རྒྱས་ཀྱི་རྣམ་དག་ལས་སྤངས་པའི་སྒོ་ནས་དམན་པ་ཡིན་ཏེ། སྒྲིབ་པ་མ་ལུས་པ་མ་སྤངས་པའི་ཕྱིར། ཞེས་པའི་ཚུལ་གྱིས་རྟོགས་སོ། །དེས་ན་འདིར་རྣམ་དག་སྒོམ་ལམ་བརྗོད་བྱའི་གཙོ་བོ་ཡིན་ཀྱང་དེའི་ཁྱད་པར་རྟོགས་པ་ལ་གོང་འོག་གི་རྣམ་དག་གཞན་གསུམ་ཡང་བསྟན་དགོས་པས་འཕགས་པ་བཞི་ཆར་གྱི་རྣམ་དག་བསྟན་པའི་གནད་ཀྱང་དེ་ཉིད་ཡིན་ནོ། །དཔེར་ན། གོང་དུ་ཤེས་བྱ་རང་རྒྱལ་གྱི་ལམ་དེ་ཉན་ཐོས་ཀྱི་ལམ་ལས་རྟོགས་རིགས་ཁྱད་པར་འཕགས་ཤིང་བྱང་སེམས་ཀྱི་ལམ་ལས་རྟོགས་རིགས་དམན་པར་བསྟན་པ་བཞིན་ནོ། །བྱང་སེམས་འཕགས་པའི་རྒྱུད་ཀྱི་རྣམ་གྲོལ་ལམ་ཐམས་ཅད་ནི་རྣམ་དག་སྒོམ་ལམ་མ་ཡིན་ཏེ། བྱང་སེམས་ཀྱི་མཐོང་ལམ་རྣམ་གྲོལ་ལམ་དེ་ཡང་སྐབས་འདིར་བསྟན་གྱི་བྱང་སེམས་ཀྱི་རྣམ་དག་ཡིན་པའི་ཕྱིར་རོ། །འོ་ན་རྣམ་དག་སྒོམ་ལམ་དེ་ཐེག་པ་གསུམ་གྱི་ལམ་གྱི་སྒྲིབ་པ་གསུམ་སྤངས་པའི་སྒོ་ནས་བསྟན་པའི་རྒྱུ་མཚན་ཅི་ཡིན་ཞེ་ན། གོང་དུ་ཤེས་བྱའི་ལམ་དེ་ལ་ཤེས་བྱ་ཉན་ཐོས་ཀྱི་ལམ། ཤེས་བྱ་རང་རྒྱལ་གྱི་ལམ། ཤེས་བྱ་བྱང་སེམས་ཀྱི་ལམ་གསུམ་དུ་ཕྱེ་ནས་རྣམ་དག་སྒོམ་ལམ་ནི། ལམ་ཕྱི་མ་དེར་བསྟན་པ་ན་སྤང་བྱ་ཡང་བྱང་སེམས་ཀྱི་སྤང་བྱའི་རིགས་ཁོ་ན་སྤོང་ཞིང་རྟོགས་པ་ཡང་བྱང་སེམས་ཀྱི་ལམ་གྱི་རྟོགས་རིགས་ཁོ་ན་ཡིན་ནམ་སྙམ་པའི་དོགས་པ་སྐྱེ་བས་དེ་བཅད་པའི་ཆེད་ཡིན་ཏེ། སྤང་བྱ་ཐེག་པ་གསུམ་གྱི་ལམ་གྱི་སྤང་བྱའི་རིགས་སྤངས་པར་བསྟན་ཅིང་རྟོགས་པ་ཡང་ཐེག་པ་གསུམ་ཆར་གྱི་རྟོགས་རིགས་ཚང་བ་ཡིན་ནོ། །ཞེས་བསྟན་པའི་ཕྱིར་རོ། །སློབ་དཔོན་གྱིས་འགྲེལ་པའི་དངོས་བསྟན་ལ་རྣམ་དག་སྒོམ་ལམ་གྱི་སྐབས་སུ་ཉན་ཐོས་སོགས་ཀྱི་རྣམ་དག་དེ་ཤིན་ཏུ་བ་མ་ཡིན་པ་དང་། སངས་རྒྱས་ཀྱི་རྣམ་དག་ཤིན་ཏུ་བར་བསྟན་ན་དེ་གཉིས་ཀྱི་ཁྱད་པར་ཇི་ལྟ་བུ་ཞེ་ན། ཐེག་ཆེན་གྱི་སྒོམ་ལམ་དེས་ཁམས་གསུམ་གྱི་ཤེས་སྒྲིབ་མཐའ་དག་གི་དངོས་གཉེན་བྱེད་པའི་ཕྱིར། ཞེས་པ་ནི། ས་དགུ་ལ་ནི་ཆེན་པོ་ཡི། །ཞེས་སོགས་ཀྱིས་བསྟན། དེའི་སྐབས་སུ་གཉེན་པོ་ཆུང་རིམ་ནས་སྐྱེ། སྤང་བྱ་ཆེ་རིམ་ནས་འགག་པར་བསྟན་པ་ལ་དེ་ལྟ་བུའི་སྤང་གཉེན་གྱི་རིམ་པ་མི་འཐད་ཅེས་པའི་རྩོད་པ་སྤོང་བ་ནི། དེ་ལ་ཀླན་ཀ་སྤངས་པ་ཡིས། །ཞེས་སོགས་ཀྱིས་བསྟན། ཞེས་བཤད་ཅིང་། དེའི་དོན་ནུས་པ་ཐོན་པར་བྱས་ན་འདི་ལྟར་བྱ་སྟེ། བྱང་སེམས་ཀྱི་རྣམ་དག་དེ་ཐེག་པ་གསུམ་གྱི་ལམ་གྱི་སྒྲིབ་པས་དག་ཅེས་པ་དང་། སངས་རྒྱས་ཀྱི་རྣམ་དག་དེ་རྣམ་དག་ཤིན་ཏུ་བ་ཡིན་ཞེས་པའི་ཁྱད་པར་དེ་མི་འཐད་པར་ཐལ། ཐེག་པ་གསུམ་གྱི་ལམ་གྱི་སྤང་བྱ་ལས་ལོགས་སུ་གྱུར་པའི་སྤང་བྱ་མེད་པའི་ཕྱིར་ཞེ་ན། སྐྱོན་མེད་དེ། བྱང་སེམས་ཀྱི་རྣམ་དག་གིས་སྤངས་པའི་སྒྲིབ་པ་གསུམ་ནི་ཉན་ཐོས་ཀྱི་སྤང་བྱའི་རིགས་སུ་གནས་པའི་ཉོན་སྒྲིབ་དང་། རང་རྒྱལ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་གཟུང་རྟོག་དང་། ཐེག་ཆེན་གྱི་སྤང་བྱའི་རིགས་སུ་གནས་པའི་མཐོང་སྤང་དང་། སྒོམ་སྤང་གི་ཆ་སྔ་མ་ཡིན་ཞིང་། དེས་སྒོམ་སྤང་གི་ཆ་ཕྱི་མ་མ་སྤངས། སངས་རྒྱས་ཀྱི་རྣམ་དག་དེས་དེ་སྤངས་པས་ཤིན་ཏུ་བར་འཇོག་པའི་ཕྱིར། བྱང་སེམས་ཀྱི་རྣམ་དག་དེས་བྱང་སེམས་ཀྱི་སྤང་བྱའི་རིགས་སུ་གནས་པའི་སྒོམ་སྤང་ཤེས་སྒྲིབ་མ་སྤངས། སངས་རྒྱས་ཀྱི་རྣམ་དག་དེས་དེ་སྤངས་པའི་རྒྱུ་མཚན་ཅི་ཡིན་ཞེ་ན། སྔ་མས་དེ་མ་སྤངས་ཏེ། དེ་ལ་བྱང་སེམས་ཀྱི་མཐོང་ལམ་རྣམ་གྲོལ་ལམ་ནས་ས་དགུ་པའི་རྣམ་གྲོལ་ལམ་གྱི་བར་དགུ་ཡོད་པ་ལས། སྔ་མས་བྱང་སེམས་ཀྱི་སྤང་བྱའི་རིགས་སུ་གནས་པའི་སྒོམ་སྤང་ཤེས་སྒྲིབ་ཅུང་ཟད་ཀྱང་མ་སྤངས། ཕྱི་མས་སྒོམ་སྤང་ཤེས་སྒྲིབ་ཆུང་ངུའི་ཆུང་ངུ་མ་སྤངས་པའི་ཕྱིར། སངས་རྒྱས་ཀྱི་རྣམ་དག་དེས་དེ་སྤངས་ཏེ། ཐེག་ཆེན་གྱི་སྒོམ་ལམ་བར་ཆད་མེད་ལམ་དགུ་པོ་དེས་ཁམས་གསུམ་གྱི་སྒོམ་སྤང་ཤེས་སྒྲིབ་དགུའི་དངོས་གཉེན་བྱེད་ནུས་པ་གང་ཞིག སངས་རྒྱས་ཀྱི་རྣམ་དག་དེ་དེ་ཐམས་ཅད་རྫོགས་པའི་རྗེས་སུ་བྱུང་བ་ཡིན་པའི་ཕྱིར། ཞེས་པ་ནི། ས་དགུ་ལ་ནི་ཆེན་པོ་ཡི། །ཞེས་སོགས་སོ། །བྱང་སེམས་ཀྱི་རྣམ་དག་ཡིན་ན་ཐེག་པ་གསུམ་གྱི་ལམ་གྱི་སྒྲིབ་པ་གསུམ་གྱིས་དག་པས་ཁྱབ་པའི་རྒྱུ་མཚན་ནི། བྱང་སེམས་ཀྱི་རྣམ་དག་གི་མ་མཐའ་མཐོང་ལམ་རྣམ་གྲོལ་ལམ་ནས་ངོས་འཛིན་ལ་དེས་མཐོང་སྤང་གཟུང་འཛིན་གྱི་རྣམ་པར་རྟོགས་པ་བཞི་ཀ་སྤངས་ཟིན་ཞིང་། དེའི་ནང་དུ་ཐེག་པ་གསུམ་གྱི་སྤང་བྱའི་རིགས་འདུས་པའི་ཚུལ་ནི་སྔར་བཤད་ཟིན་ཏོ།། །།རྣམ་དག་སྒོམ་ལམ་ཕྱི་མ་རྣམས་ཀྱི་སྒོམ་སྤང་གི་ཆ་སྔ་མ་སྔ་མ་སྤངས་པ་ཡང་ཐེག་ཆེན་གྱི་ལམ་གྱི་སྤང་བྱ་སྤངས་པའི་ཁོངས་སུ་འདུས་པས་ལོགས་སུ་སྨོས་མི་དགོས་སོ། །འདིར་སྤང་བྱ་སྒྲིབ་པའི་ངོས་འཛིན། སྤོང་བྱེད་གཉེན་པོའི་ངོས་འཛིན། སྤང་གཉེན་སྦྱར་བའི་ཚུལ་དང་གསུམ་ལས། དང་པོ་ནི། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །ཞེས་ཏེ། ས་དགུ་ནི་འདོད་པ་ནས་སྲིད་རྩེའི་བར་གྱི་ཁམས་གསུམ་ས་དགུ་སྟེ། ཉིར་སྣང་ལས། དེ་ཡང་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱིས་བསྡུས་པའི་ས་དགུ་པོ་རྣམས་ལ་ཞེས་དང་། འགྲེལ་ཆུང་ལས། འདོད་པའི་ཁམས་དང་། བསམ་གཏན་དང་། གཟུགས་མེད་པའི་ཁམས་ཏེ་ས་དགུ་པོ་དག་ལ་ཞེས་གསུངས་པའི་ཕྱིར། ས་དགུ་པོ་རེ་རེ་ལ་ཡང་སྒོམ་སྤང་ཆེན་པོའི་ཆེན་པོ་ལ་སོགས་པ་རྣམ་པ་དགུ་དགུར་ཕྱེ་བས། བརྒྱད་ཅུ་གྱ་གཅིག་ཏུ་འགྱུར་བ་ནི་འདིར་སྤང་བྱའི་གྲངས་ངེས་ཏེ། ཉིར་སྣང་ལས། ས་དགུ་པོ་རྣམས་ལ་སོ་སོར་རྣམ་པར་རྟོགས་པ་ཆེན་པོའི་ཆེན་པོ་ལ་སོགས་པ་ཞེས་གསུངས་པའི་ཕྱིར་རོ། །འོ་ན་དགུར་བཤད་པ་དང་འགལ་ལོ་ཞེ་ན། ས་རེ་རེའི་དབང་དུ་བྱས་པས་མི་འགལ་ལོ། །སྐབས་ལྔ་པར་སྒོམ་སྤང་བཞིའམ་སུམ་ཅུ་སོ་དྲུག་ཏུ་བཤད་པ་དང་འགལ་ལོ་ཞེ་ན། དེ་ཉིད་འདི་དང་དོན་གཅིག་སྟེ། འདོད་པའི་སས་བསྡུས་ཀྱི་གཟུང་འཛིན་གྱི་རྣམ་པར་རྟོག་པ་སུམ་ཅུ་སོ་དྲུག་པོ་རེ་རེ་ལ་ཡང་། སྐབས་འདིར་འདོད་པའི་སས་བསྡུས་པའི་སྒོམ་སྤང་ཆེན་པོའི་ཆེན་པོ་ལ་སོགས་པ་དགུར་འཇོག་ཅིང་། སྲིད་རྩེའི་བར་དུ་ཡང་དེ་བཞིན་དུ་འགྱུར་བའི་ཕྱིར་རོ། །གཉིས་པ་ནི། གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་ཏེ། ས་གཉིས་པ་ནས་བཅུ་པའི་བར་གྱི་བར་ཆད་མེད་ལམ་དགུའོ། །གསུམ་པ་ནི། ཁམས་གསུམ་ས་དགུའི་སྒོམ་སྤང་དགུ་པོ་སྒོམ་ལམ་དགུས་རིམ་པ་བཞིན་དུ་སྤོང་བ་དང་། ས་རེ་རེའི་སྒོམ་སྤང་དགུ་པོ་སྒོམ་ལམ་དགུས་རིམ་པ་བཞིན་དུ་སྤོང་བ་གཉིས་པོ་གང་རུང་ལས་མ་འདས་ཏེ། ཁམས་གསུམ་ས་དགུའི་སྒོམ་སྤང་ཆེན་པོའི་ཆེན་པོ་ལ་སོགས་པ་དགུ། སྒོམ་ལམ་ཆུང་ངུའི་ཆུང་ངུ་ལ་སོགས་པ་དགུས་རིམ་པ་བཞིན་དུ་སྤོང་བར་གཞུང་ལས་དངོས་སུ་བཤད་པས་གཉིས་པོ་ལས་གཞན་བྱར་མེད་པའི་ཕྱིར་རོ། །དེ་ལྟར་ལུགས་གཉིས་ལས། སྔ་མ་མི་འཐད་དེ། དེ་ལྟར་ན་འདོད་པའི་སྒོམ་སྤང་ལ་ཆེན་པོའི་ཆེན་པོ་དང་། སྲིད་རྩེའི་སྒོམ་སྤང་ལ་ཆུང་ངུའི་ཆུང་ངུར་འཇོག་དགོས་པས་དེ་འདྲ་གཞུང་གང་ནས་ཀྱང་མ་བཤད་ཅིང་། ས་རེ་རེ་ལ་ཆེན་པོའི་ཆེན་པོ་ལ་སོགས་པ་དགུ་དགུར་ཡོད་པར་མཚུངས་པས་རིགས་པས་ཀྱང་མི་འཐད་པའི་ཕྱིར་རོ། །དེས་ན་ལུགས་ཕྱི་མ་ལས་འོས་མེད་པས་ས་དགུའི་སྒོམ་སྤང་བརྒྱད་ཅུ་རྩ་གཅིག་ཡོད་པས། ཐེག་ཆེན་གྱི་སྒོམ་ལམ་དེ་ལ་ཡང་ལྡོག་པའི་སྒོ་ནས་བརྒྱད་ཅུ་རྩ་གཅིག་ཏུ་འགྱུར་ཀྱང་རྫས་ཀྱི་སྒོ་ནས་རྣམ་པ་དགུར་འདུས་ཏེ། ས་གཉིས་པའི་བར་ཆད་མེད་ལམ་དེས་འདོད་པའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོ་ནས། སྲིད་རྩེའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོའི་བར་དགུ་ཅིག་ཆར་དུ་སྤོང་བ་ནས་ས་བཅུ་པའི་བར་ཆད་མེད་ལམ་དེས་འདོད་པའི་སྒོམ་སྤང་ཤེས་སྒྲིབ་ཆུང་ངུའི་ཆུང་ངུ་ནས། སྲིད་རྩེའི་སྒོམ་སྤང་ཤེས་སྒྲིབ་ཆུང་ངུའི་ཆུང་ངུའི་བར་དགུ་ཅིག་ཅར་དུ་སྤོང་བའི་ཕྱིར་རོ། །བྱང་སེམས་ཀྱིས་ཤེས་སྒྲིབ་རྣམ་པས་ཅིག་ཅར་དུ་སྤོང་བ་གཞུང་གཞན་ལས་ཀྱང་གྲུབ་སྟེ། ཉན་ཐོས་ལ་དབང་པོ་རྣོ་རྟུལ་གཉིས་ལས། རྣོན་པོས་ཉོན་སྒྲིབ་རྣམ་པས་ཅིག་ཅར་དུ་སྤོང་ནུས་ན། བྱང་སེམས་རིགས་ཅན་གསུམ་གྱི་ནང་ནས་རང་བཞིན་གྱིས་དབང་པོ་རྣོན་པོ་ཡིན་པས་ཤེས་སྒྲིབ་རྣམ་པས་ཅིག་ཅར་ཏུ་སྤོང་བར་གྲུབ་པའི་ཕྱིར་རོ། །ཀླན་ཀ་སྤང་ཚུལ་ལ། སློབ་དཔོན་གྱིས། ས་དགུ་ལ་ནི་ཆེན་པོ་ཡི། །ཞེས་པའི་སྐབས་སུ་གཉེན་པོ་ཆུང་རིམ་ནས་སྐྱེ་ཞིང་། སྤང་བྱ་ཆེ་རིམ་ནས་འགག་པར་བཤད་པ་ལ་དེ་ལྟ་བུའི་སྤང་གཉེན་གྱི་རིམ་པ་མི་འཐད་དོ་ཞེ་ན། གོས་ལ་ཆགས་པའི་དྲི་མ་རགས་པ་བཙོ་བླག་མཁན་གྱིས་འབད་པ་ཆུང་ངུས་སེལ་ལ། ཕྲ་མོ་འབད་པ་ཆེན་པོས་སེལ་དགོས་པའི་དཔེས་འཐད་པ་ཡིན་ནོ། །ཞེས་པ་ནི། དེ་ལ་ཀླན་ཀ་སྤངས་པ་ཡི། །ཞེས་པས་བསྟན། དེ་ལྟར་ཀླན་ཀ་སྤངས་ཟིན་ནས་བྱང་སེམས་ཀྱི་སྒོམ་ལམ་དེ་ཁམས་གསུམ་གྱི་ཤེས་པ་དང་། ཤེས་བྱ་མཉམ་ཉིད་དུ་རྟོགས་པའི་ཡུལ་ཅན་ཡིན་པས་སྒོམ་སྤང་ཤེས་སྒྲིབ་མ་ལུས་པའི་གཉེན་པོར་གྲུབ་བོ། །ཞེས་པ་ནི། ལམ་ནི་འཇལ་དང་ཞེས་སོགས་ཀྱིས་བསྟན་ཏོ། །ཉིར་སྣང་ལས། ཁམས་གསུམ་པ་ཡི་རྣམ་པ་ཅན། །འཇལ་དང་གཞལ་བྱ་མཉམ་པ་ཉིད། །དེ་ལ་ཀླན་ཀ་སྤངས་པ་ཡིས། །གཉེན་པོ་ཉིད་དུ་འདོད་པ་ཡིན། །ཞེས་བསྟན་ནས། གང་ལ་རྩོད་པའི་ཡུལ་ནི། ས་དགུ་ལ་ནི་ཆེན་པོ་ཡི། །ཞེས་པའི་སྐབས་སུ་སྤང་གཉེན་གྱི་རྣམ་གཞག་གསུངས་པ་དང་། འཇལ་དང་གཞལ་བྱ་མཉམ་པ་ཉིད། །ཅེས་པས། འཇལ་བྱེད་དང་གཞལ་བྱ་མཉམ་པ་ཉིད་དུ་བསྟན་པ་ལའོ། །ཇི་ལྟར་རྩོད་པའི་ཚུལ་ནི་འཇལ་བྱེད་དང་གཞལ་བྱ་མཉམ་པ་ཉིད་ཡིན་པ་དེ་མི་འཐད་པར་ཐལ། སྤང་གཉེན་གཉིས་སུ་རྟོག་པའི་སྒོ་ནས་སྤང་བྱ་ཆེ་རིམ་ནས་འགག་ཅིང་གཉེན་པོ་ཆུང་རིམ་ནས་སྐྱེ་བ་ཡིན་པའི་ཕྱིར་ཞེ་ན། དེའི་ལན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྣམ་པ་ཐམས་ཅད་མཁྱེན་པ་ཉིད་ལ་སྨན་པར་ཡང་མི་བགྱི། གནོན་པར་ཡང་མི་བགྱིད་པ་ལགས་སོ་ཞེས་ཏེ། དོན་དམ་པར་སྤང་གཉེན་མ་གྲུབ་པས་སྤང་གཉེན་གཉིས་སུ་རྟོག་པར་མི་འགྱུར། ཞེས་པའི་དོན་ཏོ། །འོ་ན་ཚོགས་གཉིས་ལ་འབད་པས་ཅི་ཞིག་བསྐྱེད་སྙམ་ན། དེའི་ལན་དུ་བཅོམ་ལྡན་འདས་ཤེར་ཕྱིན་རྣམ་པར་དག་པ་ནི། ཆོས་འགའ་ཡང་ཡོངས་སུ་འཛིན་པར་མི་བགྱིད་ལགས་སོ་ཞེས་ཏེ། དོན་དམ་པར་ཚོགས་གཉིས་ཀྱིས་བསྐྱེད་པའི་འབྲས་བུ་ཡང་མེད་ཅེས་པའི་དོན་ཏོ། །འོ་ན་ཐོབ་པའམ་མངོན་པར་རྟོགས་པ་འགའ་ཡང་མེད་པར་འགྱུར་རོ་སྙམ་ན། དེའི་ལན་དུ་བཅོམ་ལྡན་འདས་དབྱིངས་རྣམ་པར་དག་པ་ལ་ནི་ཐོབ་པ་མ་མཆིས། མངོན་པར་རྟོགས་པ་མ་མཆིས་སོ་ཞེས་ཏེ། དོན་དམ་པར་ཐོབ་པར་བྱ་བ་དང་། མངོན་པར་རྟོགས་པ་ཡང་མེད། ཅེས་པའི་དོན་ཏོ། །དེ་ལྟར་དངོས་བསྟན་དོན་དམ་གྱི་ལན་རྣམས་ཀྱིས་ནི་གཉེན་པོ་སྒོམ་ལམ་ཡུལ་གྱི་གནས་ཚུལ་ལ་ཞུགས་པར་བསྟན་ཅིང་། ཤུགས་བསྟན་ཀུན་རྫོབ་ཏུ་སྤང་གཉེན་གྱི་རྣམ་གཞག་ཡོད་པ་དང་། ཚོགས་གཉིས་ཀྱིས་བསྐྱེད་པའི་འབྲས་བུ་ཡོད་པ་དང་། ཐོབ་པ་དང་མངོན་པར་རྟོགས་པ་ཡོད་པའི་ལན་རྣམས་ཀྱིས་ནི་ཀུན་རྫོབ་ཏུ་སྤང་གཉེན་འཐད་པར་བསྟན་པས། ཐེག་པ་ཆེན་པོའི་སྒོམ་ལམ་དེ་ཁམས་གསུམ་གྱི་ཤེས་སྒྲིབ་མཐའ་དག་གི་གཉེན་པོ་ཉིད་དུ་གྲུབ་པའི་དོན་བསྡུ་བ་ནི། གཉེན་པོ་ཉིད་དུ་འདོད་པ་ཡིན། །ཞེས་པའོ། །གཞན་ལ་ནི་བཤད་ཚུལ་ལྟ་བུ་མི་སྣང་ངོ་། །སྦས་དོན་ཟབ་མོའི་གཏེར་གྱི་ཁ་འབྱེད་ལས། སྐབས་གཉིས་པའི་གཞུང་སོ་སོའི་འབྲེལ་དང་དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

གཞི་ཤེས།

སྐབས་གསུམ་པའི་འབྲེལ་ལ་སློབ་དཔོན་གྱིས་ཇི་ལྟར་བཀྲལ་བའི་ཚུལ་དང་། གནད་ཀྱི་དོན་ངོས་གཟུང་བ་གཉིས་ལས། དང་པོ་ནི། གཞི་མི་མཐུན་ཕྱོགས་དང་གཉེན་པོའི་རབ་དབྱེ་ཤེས་པ་མེད་པར་ལམ་ལེགས་པར་ཤེས་པ་མེད་པས། ལམ་ཤེས་ཀྱི་འོག་ཏུ་གཞི་ཤེས་འཆད་པ་ཡིན་ལ། དེ་ལ་ཡང་འཇུག་ཡུལ་གཞི་ཤེས། འཇུག་པ་སྦྱོར་བ། གཞུག་འབྲས་མཐོང་ལམ་དང་གསུམ། དང་པོ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིགས་བཅད་གཅིག་གིས་དངོས་སུ་བྱང་སེམས་ཀྱི་གཞི་ཤེས་དང་། ཤུགས་ལ་ཐེག་དམན་གྱི་གཞི་ཤེས་བསྟན། དེ་ལྟར་གཉིས་ལས་ཤུགས་བསྟན་ཐེག་དམན་གྱི་གཞི་ཤེས་དེ་མཚན་མར་དམིགས་པའི་རྒྱུ་མཚན་གྱིས་འབྲས་ཡུམ་སྒྲུབ་པའི་ཐབས་ལ་མི་མཁས་པས་འབྲས་ཡུམ་ལ་རིང་བ་དང་། དངོས་བསྟན་བྱང་སེམས་ཀྱི་གཞི་ཤེས་དེ་མཚན་མར་མི་དམིགས་པའི་རྒྱུ་མཚན་གྱིས་འབྲས་ཡུམ་སྒྲུབ་པའི་ཐབས་ལ་མཁས་པས་འབྲས་ཡུམ་ལ་ཉེ་བ་ཡིན་ནོ། །ཞེས་པ་ནི། དེ་ནི་མཚན་མར་དམིགས་སྒོ་ནས། །ཞེས་སོགས་ཚིགས་བཅད་གཅིག་གིས་བསྟན། ཡང་ཤུགས་བསྟན་ཐེག་དམན་གྱི་གཞི་ཤེས་དེ་གཞི་ལམ་འབྲས་གསུམ་ལ་མཚན་མར་དམིགས་པས་མི་མཐུན་ཕྱོགས་སུ་སྟོན་པ་ལ་གཞི་ལ་མཚན་འཛིན་ཡིན་པ་ནི། གཟུགས་སོགས་ཕུང་པོ་སྟོང་ཉིད་དང་། །དུས་གསུམ་རྟོགས་པའི་ཆོས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པས་བསྟན། ལམ་ལ་མཚན་འཛིན་ཡིན་པ་ནི། སྦྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པས་བསྟན། འབྲས་བུ་ལ་མཚན་འཛིན་ཡིན་པ་ནི། རྒྱལ་ལ་སོགས་ལ་ཆགས་པ་ཕྲ། །ཞེས་པས་བསྟན། དངོས་བསྟན་བྱང་སེམས་ཀྱི་གཞི་ཤེས་དེས་གཞི་ལམ་འབྲས་གསུམ་རང་བཞིན་མེད་པར་རྟོགས་པས་གཉེན་པོ་ཡིན་པར་སྟོན་པ་ལ་གཞི་ལ་མཚན་འཛིན་གྱི་གཉེན་པོ་ཡིན་པ་ནི་འོག་འཇུག་པ་སྦྱོར་བའི་སྐབས་སུ་སྟོན་པ་ལ་དགོངས་ནས་འདིར་དངོས་སུ་མ་བསྟན་ནོ། །ལམ་ལ་མཚན་གྱི་གཉེན་པོ་ཡིན་པ་ནི། སྦྱིན་ལ་སོགས་ལ་ངར་འཛིན་མེད། །ཅེས་སོགས་རྐང་པ་གསུམ་གྱིས་བསྟན། འབྲས་བུ་ལ་མཚན་འཛིན་གྱི་གཉེན་པོ་ཡིན་པ་ནི། ཆོས་རྣམས་རང་བཞིན་གཅིག་པར་ནི། །ཞེས་སོགས་ཚིག་རྐང་གཉིས་ཀྱིས་བསྟན། འབྲས་བུ་ལ་མཚན་འཛིན་མི་མཐུན་ཕྱོགས་ཡིན་པའི་སྒྲུབ་བྱེད་ནི། ཆོས་ཀྱི་ལམ་གྱི་རང་བཞིན་གྱིས། །ཞེས་སོགས་ཚིག་རྐང་གཉིས་ཀྱིས་བསྟན། ཟབ་པའི་སྒྲུབ་བྱེད་ནི། མཐོང་བ་ལ་སོགས་བཀག་པ་ཡིས། །དེ་ནི་རྟོགས་པར་དཀའ་བར་བཤད། །ཅེས་པས་བསྟན། རྟོགས་དཀའ་བའི་སྒྲུབ་བྱེད་ནི། གཟུགས་ལ་སོགས་པར་མི་ཤེས་ཕྱིར། །དེ་ནི་བསམ་མི་ཁྱབ་པར་འདོད། །ཅེས་པས་བསྟན། དེ་ལྟར་གཉིས་ལས། དངོས་བསྟན་བྱང་སེམས་ཀྱི་གཞི་ཤེས་གཉེན་པོ་ཡིན་པ་དང་། ཤུགས་བསྟན་ཐེག་དམན་གྱི་གཞི་ཤེས་མི་མཐུན་ཕྱོགས་ཡིན་པའི་དོན་བསྡུ་བ་ནི། དེ་ལྟར་ཀུན་ཤེས་ཉིན་ལུགས་ལ། །ཞེས་སོགས་ཚིགས་བཅད་གཅིག་གིས་བསྟན་ཏོ། །གཉིས་པ་འཇུག་པ་སྦྱོར་བ་ལ། དངོས་བསྟན་བྱང་སེམས་ཀྱི་གཞི་ཤེས་ལ་འཇུག་པའི་སྦྱོར་བ་ནི། གཟུགས་སོགས་དེ་མི་རྟག་སོགས་དང་། །ཞེས་སོགས་ཀྱིས་དངོས་སུ་བསྟན། ཤུགས་བསྟན་ཐེག་དམན་གྱི་གཞི་ཤེས་ལ་འཇུག་པའི་སྦྱོར་བ་ནི་དེའི་ཤུགས་ལ་བསྟན། སྦྱོར་བའི་མཉམ་ཉིད་ལའང་དེ་དང་འདྲའོ། །གསུམ་པ་ཞུགས་འབྲས་མཐོང་ལམ་ལ། དངོས་བསྟན་བྱང་སེམས་ཀྱི་གཞི་ཤེས་ཀྱི་སྦྱོར་བ་བསྒོམས་པའི་འབྲས་བུ་བྱང་སེམས་ཀྱི་མཐོང་ལམ་ནི། སྡུག་བསྔལ་ལ་སོགས་བདེན་པ་ལ། །ཞེས་སོགས་ཀྱིས་དངོས་སུ་བསྟན། ཤུགས་བསྟན་གྱི་གཞི་ཤེས་ཀྱི་སྦྱོར་བ་བསྒོམས་པའི་འབྲས་སུ་ཐེག་དམན་གྱི་མཐོང་ལམ་ནི་དེའི་ཤུགས་ལ་བསྟན། འོ་ན་དེའི་རྗེས་སུ་སྒོམ་ལམ་མི་སྟོན་པའི་རྒྱུ་མཚན་ཅི་ཡིན་ཞེ་ན། དེ་ནི་མཐོང་ལམ་ནི་ཐེག་དམན་གྱི་རྟོགས་རིགས་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་གྱི་ལྡོག་པ་ནས་བསྟན་པས་སྒོམ་ལམ་ཡང་ཐེག་དམན་གྱི་རྟོགས་རིགས་མངོན་སུམ་དུ་རྟོགས་ཟིན་རྒྱུན་ལྡན་དུ་སྒོམ་པར་བྱེད་པའི་ཐེག་ཆེན་གྱི་སྒོམ་ལམ་གྱི་ལྡོག་པ་ནས་བསྟན་དགོས་པ་ལས་དེ་མེད་པའི་ཕྱིར་ཏེ། བྱང་སེམས་འཕགས་པས་ཐེག་དམན་གྱི་རྟོགས་རིགས་མངོན་སུམ་དུ་མཐོང་ཟིན་རྒྱུན་ལྡན་དུ་བསྒོམ་པ་མེད་པའི་ཕྱིར། དེས་ན་སྐབས་འདིར་སྟོན་པ་སྐབས་སུ་བབ་པའི་ཐེག་པ་ཆེན་པོའི་སྒོམ་ལམ་མེད་པས་མ་བསྟན་ནོ། །ཞེས་པའི་སློབ་དཔོན་གྱི་གཞུང་ནི་ཉན་ཐོས་ཀྱི་ལམ་ནི་ཞེས་སོགས་སོ། །དེའི་རྗེས་སུ་མཁྱེན་གསུམ་གྱི་དོན་བསྡུ་སྟོན་པའི་མདོ་ཚིག་གསུམ་ཡོད་པའི་དོན་རྩ་བར་ཚིགས་བཅད་དུ་བསྡུས་པ་ནི། དེ་ལྟར་འདི་དང་ཡང་འདི་དང་། །ཞེས་སོགས་ཀྱིས་བསྟན་ཏོ། །ཞེས་བཞེད་དོ། །དེ་ལྟར་སློབ་དཔོན་གྱི་བཞེད་པ་དེ་དག་ལས་འཇུག་ཡུལ་གཞི་ཤེས། འཇུག་པ་སྦྱོར་བ། ཞུགས་འབྲས་མཐོང་ལམ་གསུམ་ལ་དངོས་བསྟན་དང་། ཤུགས་བསྟན་གཉིས་གཉིས་སུ་ཕྱེ་ནས་དངོས་བསྟན་བྱང་སེམས་ཀྱི་མངོན་རྟོགས་དང་། ཤུགས་བསྟན་ཐེག་དམན་གྱི་མངོན་རྟོགས་ལ་སྦྱོར་བ་ཤིན་ཏུ་ལེགས་ཏེ་སྐབས་གསུམ་པའི་གཞི་ཤེས་ཀྱི་རྟེན་གྱི་གང་ཟག་འཆད་པའི་ལུས་རྣམ་གཞག་གི་སྐབས་སུ་ཉན་ཐོས་ལ་སོགས་ཞེས་གསུངས་ཤིང་། སོགས་ཁོངས་ནས་རང་རྒྱལ་དང་། བྱང་སེམས་བསྡུ་དགོས་ལ་དེའི་ཚེ་ཐེག་དམན་གྱི་མངོན་རྟོགས་ཤུགས་བསྟན་ཡིན་པ་ལས་འོས་མེད་པའི་ཕྱིར་ཏེ། སྐབས་གསུམ་པའི་དངོས་བསྟན་གྱི་གཞི་ཤེས་ཡིན་ན་བྱང་སེམས་ཀྱི་མངོན་རྟོགས་ཡིན་པས་ཁྱབ་པ་མཆོད་བརྗོད་ཀྱི་སྐབས་སུ་བསྒྲུབས་ཟིན་པའི་ཕྱིར་རོ། །དེ་ཡང་ཐེག་དམན་རང་རྒྱུད་པའི་མངོན་རྟོགས་ཀྱི་དབང་དུ་བྱས་ཀྱི་རྟོགས་རིགས་ཀྱི་དབང་དུ་བྱས་ན། བྱང་སེམས་ཀྱི་གཞི་ཤེས་ཀྱི་རྟེན་གྱི་གང་ཟག་ཉན་ཐོས་དང་། རང་རྒྱལ་ལ་ངོས་གཟུང་བ་ལ་ཡང་འགལ་བ་མེད་དེ། སྔར་བཤད་ཟིན་ཏོ། །ཉེ་རིང་གི་ཁྱད་པར་དང་། མི་མཐུན་ཕྱོགས་དང་གཉེན་པོའི་ཁྱད་པར་ཐེག་དམན་གྱི་གཞི་ཤེས་དང་། བྱང་སེམས་ཀྱི་གཞི་ཤེས་ལ་སོ་སོར་སྦྱོར་བ་ནི་མི་འཐད་དེ། དེ་ནི་ཞེས་པའི་ཚིག་གོང་འོག་གཉིས་པོ་དེས་གཞི་གཅིག་ཉིད་ལ་མཚན་མར་དམིགས་ན་འབྲས་ཡུམ་སྒྲུབ་པའི་ཐབས་ལ་མི་མཁས་པས་འབྲས་ཡུམ་ལ་རིང་བ་དང་། མཚན་མར་མི་དམིགས་ན་འབྲས་ཡུམ་སྒྲུབ་པའི་ཐབས་ལ་མཁས་པས་འབྲས་ཡུམ་ལ་ཉེ་བར་བསྟན་པའི་ཕྱིར། གཞན་དུ་གཞི་སོ་སོ་ཡིན་ན། དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་སྟེ། །ཅིག་ཤོས་ཐབས་ལ་མཁས་པ་ཡིས། །ཞེས་འབྱུང་རིགས་ཀྱི། དེ་ནི་ཐབས་ལ་མཁས་པ་ཡིས་ཞེས་འབྱུང་མི་རིགས་སོ། །ཡང་ཐེག་དམན་གྱི་གཞི་ཤེས་འདིར་བསྟན་མཚན་འཛིན་གྱི་བློ་ཡིན་པ་ཡང་མི་འཐད་དེ། ཐེག་དམན་གྱི་གཞི་ཤེས་ནི་རྣལ་འབྱོར་མངོན་སུམ་ཡིན་ལ། འདིར་བསྟན་མཚན་འཛིན་ནི་སྒྲ་དོན་འདྲེས་འཛིན་གྱི་རྟོགས་པ་ཡིན་པའི་ཕྱིར། གལ་ཏེ་མཚན་འཛིན་གྱིས་བཅིངས་པ་ཡིན་གྱི་མཚན་འཛིན་མ་ཡིན་ནོ། །ཞེ་ན། དེ་ལྟར་ན་མི་མཐུན་ཕྱོགས་ཞེས་པས་ཐེག་དམན་གྱི་གཞི་ཤེས་དངོས་སུ་བསྟན་པ་དང་འགལ་ཏེ། གོང་གི་མཚན་མར་དམིགས་པའི་བློ་དེ་མི་མཐུན་ཕྱོགས་ཞེས་པའི་སྐབས་ཀྱི་མི་མཐུན་ཕྱོགས་ཀྱི་བློ་དེ་ཡིན་པའི་ཕྱིར་ཏེ། སྤྱོད་པའི་འདུ་ཤེས་མི་མཐུན་ཕྱོགས། །ཞེས་གསུངས་པའི་ཕྱིར། ཡང་མི་མཐུན་གཉེན་པོའི་ཕྱོགས་དག་དང་། །ཞེས་པ་ཐེག་དམན་དང་བྱང་སེམས་ཀྱི་གཞི་ཤེས་ལ་སོ་སོར་སྦྱོར་བ་མི་འཐད་དེ། འདིར་བསྟན་མི་མཐུན་ཕྱོགས་དང་གཉེན་པོ་གཉིས་སྤང་གཉེན་ཡིན་པ་གང་ཞིག གཞི་ཤེས་གཉིས་པོ་སྤང་གཉེན་མ་ཡིན་པའི་ཕྱིར། གཞན་དུ་ན་ཐེག་དམན་གྱི་གཞི་ཤེས་ཆོས་ཅན། སྐབས་གསུམ་པའི་དངོས་བསྟན་གྱི་གཞི་ཤེས་ཡིན་པར་ཐལ། དེ་ནི་མཚན་མར་དམིགས་སྒོ་ནས། །ཞེས་པ་དང་། སྤྱོད་པའི་འདུ་ཤེས་མི་མཐུན་ཕྱོགས། །ཞེས་པའི་སྐབས་ནས་དངོས་སུ་བསྟན་པའི་གཞི་ཤེས་ཡིན་པའི་ཕྱིར། འདོད་ན། གཞན་གྱིས་མྱོང་བ་མ་ཡིན་ཏེ། །ཞེས་པའི་དངོས་བསྟན་གྱི་དངོས་བརྒྱད་གང་རུང་དུ་ཐལ། འདོད་པ་དེའི་ཕྱིར། འདོད་ན་ཐེག་དམན་གྱི་གཞི་ཤེས་སུ་འགལ་ལོ། །ལེགས་པར་དཔྱོད་ཅིག གཉིས་པ་གནད་ཀྱི་དོན་ངོས་གཟུང་བ་ལ་ས་གཉིས་པའི་ལམ་ཤེས་རྣམ་པར་དག་བྱེད་ཀྱི་གཞི་ཤེས་དང་། སྐབས་དོན་ཐེག་དམན་གྱི་རྟོགས་རིགས་སུ་གྱུར་པའི་གཞི་ཤེས་དང་། ཐོས་བསམ་གྱི་ཡུལ་རྣམ་པར་བསྡུ་བའི་ཆེད་དུ་གོ་རིམ་བཟློག་སྟེ་མཁྱེན་གསུམ་གྱི་མཇུག་བསྡུ་བ་དང་གསུམ་ལས། དང་པོ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིགས་བཅད་བདུན་ཏེ། འདི་ལ་གཞུང་གི་འབྲེལ་དངོས་དང་། སྐབས་སུ་བབ་པའི་དཀའ་བའི་གནས་ལ་དཔྱད་པ་གཉིས་ལས། དང་པོ་ནི། ལམ་ཤེས་ཀྱི་འོག་ཏུ་གཞི་ཤེས་འཆད་པའི་རྒྱུ་མཚན་ཡོད་དེ། ལམ་ཤེས་ཀྱི་སྐབས་སུ་རྗེས་ཐོབ་བསོད་ནམས་ཀྱི་ཚོགས་དང་། མཉམ་གཞག་ཡེ་ཤེས་ཀྱི་ཚོགས་གཉིས་ཀྱིས་སྐབས་དང་པོར་བསྟན་པའི་རྣམ་མཁྱེན་སྒྲུབ་པར་བྱེད་པ་ལ། རྣམ་མཁྱེན་སྒྲུབ་པའི་ཐབས་ལ་མཁས་པ་དང་མི་མཁས་པའི་སྒོ་ནས་ཉེ་རིང་གི་ཁྱད་པར་སྐབས་གསུམ་པར་རྟོགས་པར་འགྱུར་བ་ཡིན་པའི་ཕྱིར་རོ། །ཅི་ལྟར་རྟོགས་པར་འགྱུར་ན། འཇལ་དང་གཞལ་བྱ་མཉམ་པ་ཉིད། །ཅེས་པའི་སྐབས་སུ། ཐེག་ཆེན་གྱི་སྒོམ་ལམ་མཉམ་གཞག་དགུ་ཁམས་གསུམ་པའི་རྣམ་པ་ཅན་གྱི་ཤེས་པ་དང་། ཤེས་བྱ་མཉམ་པ་ཉིད་དུ་རྟོགས་པར་བསྟན་པ་ལ། འོ་ན་རྟོགས་པ་དེ་ཙམ་དུ་ངེས་སམ་ཞེ་ན། དེ་ནི་ཤེས་རབ་ཆེན་པོས་སྲིད་པ་ལ་མི་གནས་པའི་རྟོགས་པ་ཡིན་གྱི་དེའི་སྟེང་དུ་སྙིང་རྗེ་ཆེན་པོས་ཞི་བ་ལ་མི་གནས་པ་དང་། དེ་གཉིས་ཀྱི་བར་ལ་ཡང་མི་གནས་པའི་ཡེ་ཤེས་དེ་སྐབས་གསུམ་པ་འདིར་གཞི་ཤེས་ཀྱིས་བསྡུས་པའི་ཤེས་རབ་ཀྱི་ཕ་རོལ་ཏུ་ཕྱིན་པར་འདོད་པ་ཡིན་ཞེས་པ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཚིག་རྐང་དང་པོ་གཉིས་དང་བཞི་པས་བསྟན། ཅིའི་ཕྱིར་འཁོར་འདས་བར་གསུམ་ལ་མི་གནས་ཞེ་ན། དུས་རྣམས་མཉམ་པ་ཉིད་ཅེས་པ་སྟེ། ཉིར་སྣང་དུ། དེ་དག་མི་དམིགས་པ་ཡང་གང་གི་ཕྱིར་ཞེས་པའི་མཚམས་སྦྱོར་བཀོད་ནས་དུས་གསུམ་པའི་ཆོས་རྣམས་མཉམ་པ་ཉིད་ཡིན་པའི་ཕྱིར་རོ། །ཞེས་བྱ་བའི་འཐད་པས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །མདོར་ན་ཚིགས་བཅད་འདིས་བྱང་སེམས་ཀྱི་རྒྱུད་ཀྱི་མཉམ་གཞག་གིས་བསྡུས་པའི་གཞི་ཤེས་བསྟན་ཏེ། བྱང་སེམས་ཀྱི་མཐོང་སྒོམ་མཉམ་གཞག་དེ་ཉིད་སྐབས་གཉིས་པར་ལམ་སྐྱེ་མེད་དུ་རྟོགས་པའི་ལྡོག་པ་ནས་ལམ་ཤེས་སུ་བསྟན་ཟིན་ལ། འཁོར་འདས་བར་གསུམ་ལ་མི་གནས་པའི་ལྡོག་པ་ནས་སྐབས་གསུམ་པར་གཞི་ཤེས་སུ་བསྟན་པ་ཙམ་ཡིན་གྱི་སྔ་མ་ལས་ངོ་བོ་ཐ་དད་པ་མ་ཡིན་པའི་ཕྱིར་རོ། །དེ་ལྟ་བུའི་མཉམ་གཞག་གི་གནས་སྐབས་ཀྱི་ཤེར་ཕྱིན་དེ་རྗེས་ཐོབ་ཏུ་མཚན་མར་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མི་མཁས་པས་རྣམ་མཁྱེན་ལ་རིང་བ་ཡིན་ལ། མཚན་མར་མི་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མཁས་པས་རྣམ་མཁྱེན་ལ་ཉེ་བ་ཡིན་ནོ། །ཞེས་པ་ནི། དེ་ནི་མཚན་མར་དམིགས་སྒོ་ནས། །ཞེས་སོགས་ཚིགས་བཅད་གཅིག་གིས་བསྟན། དེས་ན་གཞུང་ནས་བསྟན་པའི་ཉེ་རིང་བཤད་གཞིར་བྱས་ནས་ཡུལ་གང་ལ་ཉེ་རིང་དུ་འཇོག ཉམས་ལེན་གང་གིས་ཉེ་རིང་དུ་འཇོག རྒྱུ་གང་གིས་ཉེ་རིང་དུ་འཇོག དེས་ཉེ་རིང་དུ་འཇོག་ནུས་པའི་རྒྱུ་མཚན་དང་བཞི་ལས། དང་པོ་ནི། སྐབས་དང་པོར་བསྟན་པའི་རྣམ་མཁྱེན་ལ་ཉེ་རིང་དུ་འཇོག་དགོས་ཏེ། འདིར་རྣམ་མཁྱེན་ཐོབ་བྱ་དང་། ལམ་ཤེས་ཐོབ་བྱེད་དུ་བྱས་ནས་དེའི་ཡན་ལག་ཏུ་ཉེ་རིང་བརྩི་བའི་སྐབས་ཡིན་པའི་ཕྱིར་རོ། །གཉིས་པ་ནི། སྐབས་གཉིས་པར་བསྟན་པའི་ལམ་ཤེས་དེ་ཉིད་ཉེ་རིང་དུ་འཇོག་དགོས་ཏེ། རྒྱུ་མཚན་སྔ་མ་དེའི་ཕྱིར་རོ། །འོན་ཀྱང་ཐ་སྙད་ནི་གཞི་ཤེས་ཀྱི་ཐ་སྙད་བརྗོད་དགོས་ཏེ། སྐབས་གཉིས་པའི་ལམ་ཤེས་དེ་ཉིད་འཁོར་འདས་བར་གསུམ་ལ་མི་གནས་པའི་ལྡོག་པ་ནས་འདིར་གཞི་ཤེས་སུ་འཆད་པའི་སྐབས་ཡིན་པའི་ཕྱིར་རོ། །གསུམ་པ་ནི། རྗེས་ཐོབ་ཏུ་སྦྱིན་སོགས་ལ་སྤྱོད་པའི་ཚེ་མཚན་མར་མི་དམིགས་པ་དང་། དམིགས་པའི་སྒོ་ནས་འཇོག་དགོས་ཏེ། མཚན་མར་མི་དམིགས་ན་རྗེས་ཐོབ་ཀྱི་ཉམས་ལེན་ཁྱད་པར་ཅན་དུ་འགྱུར་ཞིང་། མཚན་མར་དམིགས་ན་མཚན་འཛིན་གྱིས་བར་ཆོད་ཡིན་པས་རྗེས་ཐོབ་ཀྱི་ཉམས་ལེན་རྒྱུན་ཆད་པའི་སྐབས་ཡིན་པའི་ཕྱིར་རོ། །བཞི་པ་ནི། ཅིའི་ཕྱིར་མཚན་མར་དམིགས་མི་དམིགས་ཀྱི་སྒོ་ནས་ཉེ་རིང་དུ་འགྱུར་ཞེ་ན། མཚན་མར་དམིགས་པའི་བློ་ནི། རྒྱུད་བླར། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་པ་ལྟར་བྱང་སེམས་ལམ་གྱི་མི་མཐུན་ཕྱོགས་སུ་གྱུར་པའི་ཤེས་སྒྲིབ་ཡིན་པའི་ཕྱིར། མཚན་མར་མི་དམིགས་པའི་བློ་ནི་དེ་དང་འཛིན་སྟངས་དངོས་སུ་འགལ་བས་གཉེན་པོ་བྱང་སེམས་ཀྱི་རྟོགས་རིགས་ཡིན་པའི་ཕྱིར་རོ། །སློབ་དཔོན་སངས་རྒྱས་ཡེ་ཤེས་ཞབས་ཀྱིས། ཐམས་ཅད་ཤེས་པ་ཉིད་ནི་ས་བདུན་པ་ལ་གཞག་པར་གསུངས་པའི་གནད་ཀྱང་འདི་ཉིད་ཡིན་ཏེ། ས་བདུན་པ་མན་ཆད་དུ་མཚན་འཛིན་ཡོད་མེད་ཀྱི་བྱེ་བྲག་གིས་ཉེ་རིང་གཉིས་སུ་ཡོད་པའི་ཕྱིར་རོ། །མདོ་དང་ཉིར་སྣང་གི་དགོངས་པ་ཡང་འདི་ཉིད་ཡིན་ཏེ། ཉིར་སྣང་དུ། ཐབས་མ་ཡིན་པས་རིང་བ་སྟེ། །ཞེས་བྱ་བ་ནི་བཅོམ་ལྡན་འདས་གལ་ཏེ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་ཐབས་མི་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དམིགས་པའི་ཚུལ་གྱིས་ཤེས་པར་བགྱིད་ན་ཤེར་ཕྱིན་འདི་འདོར་བར་འགྱུར། རིང་དུ་བྱེད་པར་འགྱུར་རོ། །ཞེས་གང་གསུངས་པ་ཡིན་ཏེ། དེའི་ཚེ་དང་ཕྱི་མའི་ཚེ་ལ་ལྟོས་ཏེ་ཚིག་གཉིས་སོ། །ཐབས་མ་ཡིན་པ་ཡང་གང་ཞེ་ན། དེ་ནི་མཚན་མར་དམིགས་སྒོ་ནས། །ཞེས་བྱ་བ་སྨོས་ཏེ། རབ་འབྱོར་མིང་ལས་ཀྱང་ཆགས་སོ། །རབ་འབྱོར་མཚན་མ་ལས་ཀྱང་ཆགས་སོ། །དེ་ཅིའི་ཕྱིར་ཞེ་ན། རབ་འབྱོར་ཆོས་ཐམས་ཅད་ནི་མཚན་མ་མེད་པ་མིང་མེད་པའོ། །ཞེས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །གལ་ཏེ་འདིར་བྱང་སེམས་ཐབས་ལ་མི་མཁས་པའི་དབང་དུ་བྱས་པར་གསུངས་པས། བྱང་སེམས་འཕགས་པ་ལ་སྦྱར་བ་མི་འཐད་དོ་སྙམ་ན། དེ་ནི་སྐབས་ཀྱི་དོན་མ་གོ་བ་སྟེ། འདིར་མཚན་མར་དམིགས་པའི་སྒོ་ནས་ཐབས་ལ་མི་མཁས་པར་གསུངས་ཤིང་། དེ་ནི་ས་བདུན་པ་མན་ཆད་ན་ཡོད་པ་སྟེ། བསྔོ་བ་སྒོམ་ལམ་གྱི་སྐབས་སུ་སྡུད་པར། གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཞེས་གསུངས་པའི་ཕྱིར་རོ། །རྒྱུ་མཚན་དེས་ན་ཉེ་རིང་གི་ཁྱད་པར་ཡང་མི་མཐུན་ཕྱོགས་དང་གཉེན་པོའི་སྒོ་ནས་རྟོགས་དགོས་པས་འདིར་མི་མཐུན་ཕྱོགས་ནི་བྱང་སེམས་ཀྱི་རྒྱུད་ཀྱི་མཚན་འཛིན་དང་། གཉེན་པོ་ནི་བྱང་སེམས་ཀྱི་རྒྱུད་ཀྱི་མཚན་མེད་རྟོགས་པའི་བློ་ཡིན་པའི་ཁྱད་པར་སྟོན་པ་ལ་བཏགས་པ་ཙམ་གྱི་གང་ཟག་ལ་དམིགས་པའི་མཚན་འཛིན་དང་། དེའི་གཉེན་པོ། བཏགས་པ་ཙམ་གྱི་ཆོས་ལ་དམིགས་པའི་མཚན་འཛིན་དང་། དེའི་གཉེན་པོ་གཉིས་ཏེ་བཞི་ལས། དང་པོ་ནི། གཟུགས་སོགས་ཕུང་པོ་སྟོང་ཉིད་ལ་སྤྱོད་པ་པོ་ངའོ་སྙམ་པའི་འདུ་ཤེས་ནས། བྱང་ཆུབ་ཕྱོགས་རྣམས་ལ་སྤྱོད་པ་པོ་ངའོ་སྙམ་པའི་འདུ་ཤེས་ཀྱི་བར་ནི་བཏགས་པ་ཙམ་གྱི་གང་ཟག་ལ་དམིགས་པའི་མཚན་འཛིན་ཡིན་པས་བྱང་སེམས་ཀྱི་མི་མཐུན་ཕྱོགས་ཡིན་ནོ་ཞེས་པ་ནི། གཟུགས་སོགས་ཕུང་པོ་སྟོང་ཉིད་དང་། །ཞེས་སོགས་ཚིགས་བཅད་གཅིག་གིས་བསྟན། གཉིས་པ་ནི། བཏགས་པ་ཙམ་གྱི་ངར་འཛིན་དགག་པའི་མཚན་མེད་རྟོགས་པའི་ཤེས་རབ་དེ་རང་ཉིད་ཀྱིས་བསྒོམས་ན་རང་རྒྱུད་ཀྱི་ཆགས་པའི་མཐའ་འགོག་ནུས་ཤིང་། གཞན་ལ་བསྟན་ན་གཞན་རྒྱུད་ཀྱི་ཆགས་པའི་མཐའ་འགོག་ནུས་པས་གཉེན་པོ་ཡིན་ནོ། །ཞེས་པ་ནི། སྦྱིན་ལ་སོགས་ལ་ངར་འཛིན་མེད། །ཅེས་སོགས་ཚིགས་རྐང་གསུམ་གྱིས་བསྟན། གསུམ་པ་ལ། རྒྱལ་བ་ནི་འབྲས་བུ་ཡིན་ལ། སོགས་ཀྱིས་གཞི་དང་ལམ་བསྡུས། གཞི་ལ་དམིགས་པར་ཞེན་པའི་བློ། ལམ་ལ་ཉམས་སུ་བླང་བྱར་ཞེན་པའི་བློ། འབྲས་བུ་ལ་ཐོབ་བྱར་ཞེན་པའི་བློ་ནི་ཆགས་པ་ཕྲ་མོ་ཡིན་པས་མི་མཐུན་ཕྱོགས་ཡིན་ནོ། །ཞེས་པ་ནི། རྒྱལ་ལ་སོགས་ལ་ཆགས་པ་ཕྲ། །ཞེས་པས་བསྟན། དེ་དག་མི་མཐུན་ཕྱོགས་ཡིན་པའི་སྒྲུབ་བྱེད་ནི། ཆོས་ཀྱི་ལམ་ནི་རང་བཞིན་གྱིས། །དབེན་པའི་ཕྱིར་ན་དེ་ཟབ་ཉིད། །ཅེས་པས་བསྟན། བཞི་པ་ནི། གཞི་ལམ་འབྲས་གསུམ་རང་བཞིན་གཅིག་ཏུ་ཤེས་པས་གཞི་ལམ་འབྲས་གསུམ་ལ་དེ་དང་དེར་ཞེན་པའི་བློ་སྤོང་ནུས་པ་ཡིན་ནོ། །ཞེས་པ་ནི། ཆོས་རྣམས་རང་བཞིན་གཅིག་པར་ནི། །ཤེས་པས་ཆགས་པ་སྤོང་བ་ཡིན། །ཞེས་པས་བསྟན། རང་བཞིན་གཅིག་པའི་ཚུལ་ཇི་ལྟར་ཞེ་ན། དེ་ནི་རྟོགས་པར་དཀའ་ཞིང་བསམ་གྱིས་མི་ཁྱབ་པ་ཞེས་པ་ནི། མཐོང་བ་ལ་སོགས་བཀག་པ་ཡིས། །ཞེས་སོགས་དང་། གཟུགས་ལ་སོགས་པར་མི་ཤེས་ཕྱིར། །ཞེས་སོགས་ཀྱིས་བསྟན་ཏོ། །བྱང་སེམས་འཕགས་པས་རྗེས་ཐོབ་ཏུ་བཏགས་པ་ཙམ་གྱི་གང་ཟག་དང་། ཆོས་ལ་དམིགས་པའི་མཚན་འཛིན་མི་མཐུན་ཕྱོགས་དང་། དེ་གཉིས་མི་དམིགས་པའི་མཚན་མེད་རྟོགས་པའི་ཤེས་རབ་གཉེན་པོ་ཡིན་པ་དེ་སྐབས་གསུམ་པ་གཞི་ཤེས་འཆད་པའི་སྐབས་འདིར་སྤང་གཉེན་གྱི་རིམ་པ་ཡིན་ནོ། །ཞེས་དོན་བསྡུས་པ་ནི། དེ་ལྟར་ཀུན་ཤེས་ཉིད་ལུགས་ལ། །ཞེས་སོགས་ཚིགས་བཅད་གཅིག་གིས་བསྟན། སྐབས་འདིར་བསྟན་གྱི་མི་མཐུན་ཕྱོགས་ཐེག་དམན་གྱི་གཞི་ཤེས་མ་ཡིན་པར་བྱང་སེམས་ཀྱི་རྒྱུད་ཀྱི་མཚན་འཛིན་ཡིན་པ་ནི་མདོའི་དགོངས་པ་ཡིན་ཏེ། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་ཐད་དུ་བྱང་ཆུབ་སེམས་དཔའ་ཐབས་མི་མཁས་པ་དེས་གཟུགས་སྟོང་ཞེས་བྱ་བར་འདུ་ཤེས་ན་ཞེས་སོགས་དང་། ཀོའུ་ཤི་ཀ་འདི་ལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་སེམས་སུ་འདུ་ཤེས་པ་དང་། ཞེས་སོགས་དང་། རྒྱལ་ལ་སོགས་ལ་ཆགས་པ་ཕྲ། །ཞེས་པའི་ཐད་དུ་རབ་འབྱོར་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པ་མཚན་མར་ཡིད་ལ་བྱེད་ན། ཞེས་སོགས་བྱང་སེམས་ཁོ་ན་ལ་སྦྱར་བར་གསུངས་པའི་ཕྱིར་རོ། །ཉིར་སྣང་གི་དགོངས་པ་ཡང་ཡིན་ཏེ། གཟུགས་སོགས་ཕུང་པོ་སྟོང་ཉིད་དང་། །ཞེས་པའི་མཚམས་སྦྱར་དུ་མི་མཐུན་ཕྱོགས་ནི་ཞེས་དང་། སྦྱིན་ལ་སོགས་ལ་ངར་འཛིན་མེད། །ཅེས་པའི་མཚམས་སྦྱར་དུ། གཉེན་པོ་ནི་ཞེས་དང་། རྒྱལ་ལ་སོགས་ལ་ཆགས་པ་ཕྲ། །ཞེས་པའི་མཚམས་སྦྱར་དུ། གཞན་ཡང་ཞེས་དང་། དེ་ལྟར་ཀུན་ཤེས་ཉིད་ལུགས་ལ་ཞེས་པའི་མཚམས་སྦྱར་དུ། དེ་ལྟར་བྱས་ན། ཞེས་པ་ཙམ་ཞིག་གསུངས་ཀྱི་མི་མཐུན་ཕྱོགས་ཞེས་པས་ཐེག་དམན་གྱི་གཞི་ཤེས་སྟོན་པ་ཉིར་སྣང་གི་མགོ་མཇུག་གང་ན་ཡང་མི་འདུག་པའི་ཕྱིར་རོ། །འདིར་ཞེས་པའི་ཚིག་གི་ནུས་པས་ཀྱང་ཤེས་ཏེ། སྐབས་དང་པོར་བཤད་པའི་སྤང་གཉེན་ནི། མཐོང་སྤང་དང་། སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱད་དང་། གཉེན་པོའི་ཚོགས་སྒྲུབ་བརྒྱད་ལ་བཤད། སྐབས་གཉིས་པར་ནི་སྒོམ་སྤང་དགུ་དང་། སྒོམ་ལམ་དགུ་ལ་བཤད། སྐབས་བཞི་པར་ནི་ཡོན་ཏན་དང་སྐྱོན་ལ་བཤད། སྐབས་ལྔ་པར་ནི་མཐོང་སྒོམ་གྱི་སྤང་བྱར་གྱུར་པའི་རྟོག་པ་དང་། མཐོང་སྒོམ་གྱི་རྩེ་སྦྱོར་ལ་བཤད་པ་རྣམས་ལས་འདིར་མི་འདྲ་བའི་ཁྱད་པར་ནི་མཚན་འཛིན་དང་། མཚན་མེད་རྟོགས་པའི་ཤེས་རབ་སྤང་གཉེན་དུ་བཤད་ཅེས་པའི་དོན་ཡིན་པའི་ཕྱིར་རོ། །གཉིས་པ་སྐབས་སུ་བབ་པའི་དཀའ་བའི་གནས་ལ་དཔྱད་པ་ལ། ཐེག་པ་གསུམ་གྱི་ལམ་གྱི་རྣམ་གཞག་གྲུབ་མཐའ་བཞི་པོ་རེ་རེ་ལ་ཡང་ཚང་བ་རེ་ཡོད་པས་ཐོག་མར་གྲུབ་མཐའི་སྒོ་ནས་དབྱེ་བར་བྱའོ། །དེ་ལ་བཞི་ལས་བྱེ་བྲག་ཏུ་སྨྲ་བས་སེམས་བྱུང་མ་ཆགས་པའི་རང་བཞིན་འཕགས་པའི་རིགས་དེ་ཡོད་པའི་ཚེ། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར་བ་འབྱུང་ལ་གཞི་ཚུལ་ཁྲིམས་ལ་གནས་ནས་ཐོས་བསམ་མཐར་ཕྱིན་པའི་ཚེ་སྒོམ་པ་ལ་སྦྱོར་བའི་ཚུལ་ལ་ཞི་གནས་བསྒོམ་པ་དང་། ལྷག་མཐོང་བསྒོམ་པ་གཉིས་ལས། དང་པོ་ནི། འདོད་ཆགས་ལྷག་པའི་གང་ཟག་གིས་མི་སྡུག་པ་དང་། རྣམ་རྟོག་ལྷག་པའི་གང་ཟག་གིས་དབུགས་འབྱུང་རྔུབ་བསྒོམ་པ་ནས་བརྩམས་ཏེ་ཞི་གནས་བསྒྲུབ་བོ། །དེ་ལྟར་ཞི་གནས་གྲུབ་ནས། གཉིས་པ་ལྷག་མཐོང་ནི། དྲན་པ་ཉེར་གཞག་བཞི་བསྒོམ་སྟེ། དམིགས་པ་ལུས་སོགས་བཞི་ལ་རྣམ་པ་ལུས་མི་གཙང་བ་ལ་སོགས་རང་གི་མཚན་ཉིད་དང་། ཐམས་ཅད་ཀྱང་གང་ཟག་གི་བདག་མེད་པའི་སྤྱིའི་མཚན་ཉིད་གཉིས་སུ་བཅད་ནས་བསྒོམ་མོ། །དེ་ལྟ་བུའི་དྲན་པ་ཉེར་གཞག་བཞི་ལ་བདེན་བཞིའི་སྟེང་གི་མི་རྟག་ལ་སོགས་བཅུ་དྲུག་བསྒོམ་པ་ཚང་བས་དེ་ཉིད་ཚོགས་ཆུང་ངུས་ཚེ་གསུམ་ལ་སོགས་པར་བསྒོམས་ན་ཉན་ཐོས་ཀྱི་བྱང་ཆུབ་ཐོབ། ཚོགས་འབྲིང་གིས་བསྐལ་པ་བརྒྱར་བསྒོམས་ན་རང་སངས་རྒྱས་ཀྱི་བྱང་ཆུབ་ཐོབ། ཚོགས་ཆེན་པོས་བསྐལ་པ་གྲངས་མེད་གསུམ་དུ་བསྒོམས་ན་བླ་ན་མེད་པའི་བྱང་ཆུབ་ཐོབ་པར་འདོད་དེ། མཛོད་དུ། མྱུར་བ་སྲིད་པ་གསུམ་གྱི་མཐར། །ཞེས་དང་། བསེ་རུ་བསྐལ་པ་བརྒྱ་ཡི་རྒྱུས། །ཞེས་དང་། དེ་གྲངས་མེད་གསུམ་ལ་སངས་རྒྱས། །ཞེས་གསུངས་པའི་ཕྱིར་རོ། །དེས་ན་ཐེག་པ་གསུམ་ཆར་ལྟ་བ་ལ་ཁྱད་པར་མེད་དེ། ཤེས་བྱ་གཞི་ལྔ་བདེན་པར་གྲུབ་པས་དེ་དག་བདེན་མེད་དུ་མ་རྟོགས་པར་མཚུངས་པའི་ཕྱིར་དང་། བདེན་བཞིའི་སྟེང་གི་མི་རྟག་ལ་སོགས་བཅུ་དྲུག་རྟོགས་པར་མཚུངས་པའི་ཕྱིར་རོ། །ལུགས་འདི་ལ་གང་ཟག་གི་བདག་མེད་རྟོགས་པ་ལ་ཕུང་པོ་བདེན་མེད་དུ་རྟོགས་མི་དགོས་སོ། །མདོ་སྡེ་པའི་ལུགས་ལ་ཕལ་ཆེར་སྔ་མ་དང་འདྲ་བ་ལས། མི་རྟག་ལ་སོགས་བཅུ་དྲུག་རྟོགས་པའི་ལྟ་བ་དེ་ཉིད་རང་ཉིད་གཅིག་པུ་འཁོར་བ་ལས་ཐར་བ་ཙམ་གྱི་ཆེད་དུ་བསྒོམས་ན་ཉན་ཐོས་ཀྱི་བྱང་ཆུབ་ཐོབ། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་རང་བྱུང་གི་བྱང་ཆུབ་མངོན་དུ་བྱེད་པའི་ཆེད་དུ་བསྒོམས་ན་རང་རྒྱལ་གྱི་བྱང་ཆུབ་ཐོབ། སྙིང་རྗེའི་དམིགས་རྣམ་སྐྱེ་བ་དུ་མར་གོམས་པ་ལས་སེམས་ཉིད་སྙིང་རྗེའི་རང་བཞིན་དུ་གྱུར་ཏེ། འགྲོ་བ་ལ་ཕན་པ་བཞེད་པས་ཀུན་ནས་བསླང་སྟེ། བསྐལ་པ་གྲངས་མེད་གསུམ་དུ་བསྒོམས་ན་བླ་ན་མེད་པའི་བྱང་ཆུབ་ཐོབ་པར་འདོད་དེ། རྣམ་འགྲེལ་དུ། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཅེས་དང་། རྣམ་པ་དུ་མར་ཐབས་མང་པོ། །ཡུན་རིང་དུས་སུ་གོམས་པ་ལས། །དེ་ལ་སྐྱོན་དང་ཡོན་ཏན་དག །རབ་ཏུ་གསལ་བ་ཉིད་དུ་འགྱུར། །ཞེས་གསུངས་པའི་ཕྱིར་རོ། །འདི་ལ་ཡང་ཐེག་པ་གསུམ་པོ་ལྟ་བ་ལ་ཁྱད་པར་མེད་དེ། གང་ཟག་གི་བདག་མེད་དང་། འདུས་མ་བྱས་ཀྱི་གཞི་དང་། ལྡན་པ་མ་ཡིན་པའི་འདུ་བྱེད་བདེན་མེད་དུ་རྟོགས་པར་མཚུངས་ཤིང་། གཞི་གཞན་གསུམ་པོ་བདེན་པར་གྲུབ་པས་བདེན་མེད་དུ་མ་རྟོགས་པར་མཚུངས་པའི་ཕྱིར་རོ། །ལྟ་བ་རྟོགས་ཚུལ་ལ་ཁྱད་པར་ཡོད་དེ། ཉན་ཐོས་དང་རང་སངས་རྒྱས་ཀྱིས་ལྟ་བ་གོམས་པ་ཤས་ཆུང་ཞིང་སྤྱོད་པ་ཁྱད་པར་ཅན་གྱི་གྲོགས་དང་བྲལ་བས། ཉོན་མོངས་པའི་བག་ཆགས་སྤོང་མ་ནུས་པས། བདེན་བཞིའི་གནས་ཚུལ་ལ་ཐུགས་གསལ་བ་རབ་ཀྱི་མཐར་ཕྱིན་པ་མ་ཐོབ་ལ། རྫོགས་པའི་སངས་རྒྱས་ནི་དེ་ལས་བཟློག་པའི་ཕྱིར་ཏེ། རྣམ་འགྲེལ་དུ། དེས་ན་ཐུགས་ཀྱང་གསལ་བའི་ཕྱིར། །རྒྱུ་ཡི་བག་ཆགས་སྤངས་པ་ཡིན། །ཐུབ་ཆེན་གཞན་དོན་འཇུག་ཅན་གྱི། །བསེ་རུ་ལ་སོགས་ཁྱད་འདི་ཡིན། །ཞེས་དང་། ཉོན་མོངས་མེད་དང་ནད་མེད་དང་། །ལམ་བཤད་མི་གསལ་ཉིད་ལུས་ཡིན། །གོམས་ཕྱིར་མ་ལུས་སྤངས་པ་ཉིད། །ཅེས་གསུངས་པའི་ཕྱིར། ལུགས་འདིས་ཀྱང་གང་ཟག་གི་བདག་མེད་རྟོགས་པ་ལ་ཕུང་པོ་བདེན་མེད་དུ་རྟོགས་མི་དགོས་པར་འདོད་དོ། །སེམས་ཙམ་པའི་ལུགས་ལ་ཉན་རང་གཉིས་སྔར་གྱི་ལྟ་བ་དེ་ཉིད་ཀྱིས་འབྲས་བུའི་ཁྱད་པར་སོ་སོར་ཐོབ་པར་འདོད་པས་ལྟ་བ་ལ་ཁྱད་པར་མེད་པར་འདོད་དེ། རང་ས་ལས། བསེ་རུ་ལྟ་བུའི་དབང་དུ་མཛད་ནས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མངོན་དུ་བྱེད་དོ། །ཞེས་དང་། བྱང་སར་རང་སངས་རྒྱས་ནི་ཉན་ཐོས་ཇི་ལྟ་བ་བཞིན་དུ་རིག་པར་བྱ་སྟེ། ཉན་ཐོས་རྣམས་དང་ལམ་གྱི་རང་བཞིན་མཚུངས་པའི་ཕྱིར་རོ། །ཞེས་གསུངས་པའི་ཕྱིར་རོ། །དེ་གཉིས་དང་ཐེག་ཆེན་ལ་ནི་ལྟ་བའི་ཁྱད་པར་ཡོད་པར་འདོད་དེ། མདོ་སྡེ་རྒྱན་དང་། ཀུན་བཏུས་དང་། བརྒྱད་སྟོང་དོན་བསྡུས་རྣམས་སུ། རྣམ་གཡེང་གི་རྣམ་རྟོག་བཅུའི་གཉེན་པོར་ཤེར་ཕྱིན་བསྒོམ་པ་བཅུ་གསུངས་པ་ཡང་ཐེག་ཆེན་གྱི་ལྟ་བའི་དབང་དུ་བྱས་པའི་ཕྱིར་དང་། ལུགས་འདི་ལ་གང་ཟག་གི་བདག་མེད་དང་། ཆོས་ཀྱི་བདག་མེད་གཉིས་སུ་བྱས་ནས་སྔ་མ་ནི་ཐེག་པ་འོག་མའི་རྟོགས་བྱ་དང་། ཕྱི་མ་ཐེག་ཆེན་གྱི་རྟོགས་བྱར་གསུངས་པའི་ཕྱིར་རོ། །གང་ཟག་གི་བདག་གི་ངོས་འཛིན་དང་། དེ་མེད་པའི་ཚུལ་ཕལ་ཆེར་གྲུབ་མཐའ་འོག་མ་གཉིས་དང་འདྲ་ཞིང་། མི་འདྲ་བའི་ཁྱད་པར་ནི་འདིར་ཀུན་གཞིའི་རྣམ་པར་ཤེས་པ་ཁོ་ན་གང་ཟག་གི་གདགས་གཞིར་འདོད་པའོ། །ཆོས་བདག་གི་ངོས་འཛིན་ནི་གཞན་དབང་དོན་ལ་གཟུང་འཛིན་གཉིས་ཀྱིས་སྟོང་པ་ཡིན་ཀྱང་བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བས་གཟུང་འཛིན་གཉིས་པོ་དེ་ཉིད་ཆོས་ཀྱི་བདག་ཏུ་བྱས་ནས། གཞན་དབང་གི་སྟེང་དུ་དེ་སྟོང་པའི་སྟོང་ཉིད་བདེན་པར་གྲུབ་པ་ཞིག་ཡོད་པ་ལ། དེ་བཞིན་ཉིད་དང་། ཡང་དག་མཐའ་དང་། མཚན་མ་མེད་པ་དང་། དོན་དམ་པ་དང་། ཆོས་དབྱིངས་ཞེས་པའི་མིང་གི་རྣམ་གྲངས་ལྔ་དང་ལྡན་པ་ཡིན་ཞིང་། དེ་རྟོགས་པ་ལ་ཆོས་ཀྱི་བདག་མེད་རྟོགས་པར་འདོད་དོ། །དེས་ན་ལུགས་འདི་ལ་ཡང་གཞན་དབང་གི་སྟེང་དུ་ངར་འཛིན་ལྷན་སྐྱེས་ཀྱི་འཛིན་སྟངས་ཀྱི་གཟུང་བྱར་གྱུར་པའི་ང་ཙམ་གྱིས་སྟོང་པའི་སྟོང་ཉིད་རྟོགས་པ་ལ་གང་ཟག་གི་བདག་མེད་རྟོགས་པ་དང་། གཟུང་འཛིན་གཉིས་སྟོང་གི་སྟོང་ཉིད་རྟོགས་པ་ལ་ཆོས་ཀྱི་བདག་མེད་རྟོགས་པར་འཇོག་པས། བདག་མེད་གཉིས་པོ་རྟོགས་པ་ལ་གཞན་དབང་བདེན་མེད་དུ་རྟོགས་མི་དགོས་སོ། །དེའི་ཕྱིར་ཐེག་པ་གསུམ་ཆར་གྱིས་ཀྱང་གཞན་དབང་དང་ཡོངས་གྲུབ་བདེན་མེད་དུ་མ་རྟོགས་པར་མཚུངས་ཤིང་། གཟུང་འཛིན་གཉིས་སྟོང་གི་དེ་བཞིན་ཉིད་རྟོགས་པ་དང་། མ་རྟོགས་པའི་བྱེ་བྲག་གིས་ཐེག་པ་ཆེ་ཆུང་ལ་ནི་ལྟ་བའི་ཁྱད་པར་ཡོད་པར་འདོད་དོ། །འོ་ན་དགོངས་འགྲེལ་དུ་གཞན་དབང་ལ་ཀུན་བཏགས་ཀྱི་ངོ་བོ་ཉིད་དུ་མངོན་པར་ཞེན་པས། ཉོན་མོངས་པར་སྐྱེད་ཅིང་དེས་ལས་བསགས་ནས་འཁོར་བར་འཁོར་ལ་གཞན་དབང་ལ་ཀུན་བཏགས་ཀྱི་ངོ་བོ་ཉིད་མེད་པར་མཐོང་ན། དེ་དག་རིམ་པ་བཞིན་དུ་བཟློག་པར་གསུངས་ནས་ཉན་རང་དང་། བྱང་སེམས་གསུམ་ཀས་ལམ་འདི་ཉིད་དང་། སྒྲུབ་པ་འདི་ཉིད་ཀྱིས་མྱ་ངན་ལས་འདས་པ་ཐོབ་པས། དེ་དག་གི་རྣམ་པར་གཞག་པའི་ལམ་དང་། རྣམ་པར་གཞག་པ་ཡང་གཅིག་སྟེ་གཉིས་མེད་པར་གསུངས་པ་དང་འགལ་ལོ་ཞེ་ན། གཞན་དབང་གི་སྟེང་དུ་གང་ཟག་གི་བདག་གིས་སྟོང་པ་ལ་ཀུན་བཏགས་ཀྱིས་སྟོང་པར་བྱས་པ་དང་། ཆོས་ཀྱི་བདག་གིས་སྟོང་པ་ལ་ཀུན་བཏགས་ཀྱིས་སྟོང་པར་བྱས་པ་གཉིས་སུ་ཡོད་པས་མི་འགལ་ཞིང་སྒྲུབ་བྱེད་དུ་ཤེས་པར་བྱའོ། །དབུ་མ་པའི་ལུགས་ལ་མདོ་ལས་ཇི་ལྟར་གསུངས་པའི་ཚུལ། དགོངས་འགྲེལ་གཉིས་ཀྱིས་བཀྲལ་བའི་ཚུལ། དཔལ་ལྡན་ཟླ་བས་གསལ་བར་མཛད་པའི་ཚུལ། དོན་གྱི་དགོངས་པ་གཅིག་ཏུ་བསྟན་པ་དང་བཞི་ལས། དང་པོ་ནི། ཤེར་ཕྱིན་གྱི་མདོར། ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཤེར་ཕྱིན་འདི་ཉིད་ལ་བསླབ་པར་བྱའོ། །རང་སངས་རྒྱས་ཀྱི་ས་ལ་བསླབ་པར་འདོད་པས་ཀྱང་ཤེར་ཕྱིན་འདི་ཉིད་ལ་བསླབ་པར་བྱའོ། །ཞེས་དང་། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཚུ་རོལ་ཕ་རོལ་འགྲོ་ངོགས་མི་མཐོང་བཞིན། །ཞེས་ཐེག་པ་གསུམ་ཆར་གྱི་ཤེར་ཕྱིན་ལ་བསླབ་དགོས་པར་གསུངས་ཤིང་། ཐེག་པ་འོག་མ་གཉིས་ཀྱིས་བསླབ་པར་བྱ་བའི་ཤེར་ཕྱིན་ཡང་རབ་འབྱོར་ཐམས་ཅད་ནི་ཕྱི་དང་ནང་གི་ཆོས་རྣམས་ཇི་སྙེད་པ་འདི་ཙམ་ཡིན་ལ། དེ་དག་ཀྱང་ཉན་ཐོས་དང་། རང་སངས་རྒྱས་རྣམས་ཀྱིས་ཤེས་ཀྱི་ལམ་ཐམས་ཅད་ཀྱིས་ཀྱང་མ་ཡིན་ལ་རྣམ་པ་ཐམས་ཅད་དུ་ཡང་མ་ཡིན་པས། དེའི་ཕྱིར་ཉན་ཐོས་དང་། རང་སངས་རྒྱས་རྣམས་ཀྱིས་ནི་ཐམས་ཅད་ཤེས་པ་ཉིད་ཅེས་བྱའོ། །ཞེས་གཞི་ཕྱི་ནང་གི་ཆོས་སྐྱེ་མེད་དུ་རྟོགས་པ་ཙམ་ལ་གསུངས་སོ། །གཉིས་པ་ནི། མགོན་པོ་བྱམས་པས་མཆོད་བརྗོད་ཀྱི་སྐབས་སུ་ཉན་ཐོས་ཀྱིས་གཞི་ཤེས་པར་གསུངས། སྐབས་དང་པོའི་སྦྱོར་ལམ་དང་། སྐབས་བཞི་པའི་མཐོང་ལམ་དང་སྒོམ་ལམ་གྱི་སྐབས་སུ་བྱང་སེམས་ཀྱི་སྦྱོར་མཐོང་སྒོམ་གསུམ་ཉན་རང་གི་སྦྱོར་མཐོང་སྒོམ་གསུམ་ལས་རྟོགས་པའི་སྒོ་ནས་ཁྱད་པར་དུ་འཕགས་པར་གསུངས། སྐབས་གཉིས་པར་ཉན་ཐོས་དང་། རང་རྒྱལ་དང་། བྱང་སེམས་ཀྱི་རྟོགས་རིགས་གསུམ་གྱིས་རིམ་པ་ལྟར་གང་ཟག་གི་བདག་མེད་དང་། བདག་མེད་ཕྱེད་དང་གཉིས་དང་། བདག་མེད་གཉིས་ཆར་རྟོགས་པའི་རྣམ་གཞག་གསུངས་སོ། །རྒྱུད་བླར། རང་བྱུང་རྣམས་ཀྱི་དོན་དམ་སྟེ། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་ཐེག་ཆེན་འཕགས་པ་ལས་གཞན་གྱིས་བདེ་གཤེགས་སྙིང་པོ་མཐོང་བ་མེད་པར་གསུངས་སོ། །འཕགས་མཆོག་ཀླུ་སྒྲུབ་ཀྱིས་རིན་ཆེན་ཕྲེང་བར། མེད་པ་པ་ནི་ངན་འགྲོར་འགྲོ། །ཡོད་པ་པ་ནི་བདེ་འགྲོར་འགྲོ། །ཡོངས་དག་ཇི་བཞིན་ཡོངས་ཤེས་པས། །གཉིས་ལ་མི་བརྟེན་ཐར་པ་ལགས། །ཞེས་དངོས་པོ་དོན་དམ་དུ་ཡོད་པར་འཛིན་ན་ཐར་པ་མི་ཐོབ་པར་གསུངས་ཤིང་། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་གཞན་གཉིས་ཀ་དང་། །དུས་གསུམ་ཉིད་དུ་མ་མཐོང་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང་། །ཞེས་དང་། སྟོང་ཉིད་བདུན་ཅུ་པར། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང་། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང་། །ཞེས་ཕུང་པོ་ལ་བདེན་པར་འཛིན་པའི་བདེན་འཛིན་ཡོད་ན་གང་ཟག་ལ་བདེན་པར་འཛིན་པའི་ངར་འཛིན་ལྷན་སྐྱེས་འབྱུང་ཞིང་དེ་ལས་འཁོར་བ་འབྱུང་བས་འཁོར་བ་སྤངས་པ་ལ་ཕུང་པོ་རང་བཞིན་མེད་པར་རྟོགས་པ་དགོས་པར་གསུངས་སོ། །ཡང་རིན་ཆེན་ཕྲེང་བར། གཟུགས་ཀྱང་དོན་དུ་དོན་མེད་དོ། །རྣམ་ཤེས་ཚོར་དང་འདུ་ཤེས་དང་། །འདུ་བྱེད་རྣམས་ཀྱང་ཐམས་ཅད་དུ། །སོ་སོར་བདེན་དོན་མེད་པའི་ཕྱིར། །དམ་པའི་དོན་དུ་དོན་མེད་དོ། །ཞེས་སོགས་གསུངས་པའི་མཇུག་ཏུ། དེ་ལྟར་ཡང་དག་ཇི་བཞིན་དུ། །འགྲོ་བ་དོན་མེད་ཤེས་ནས་ནི། །རྒྱུ་མེད་པ་ཡི་མེ་བཞིན་དུ། །གནས་མེད་ལེན་མེད་མྱ་ངན་འདས། །ཞེས་འཁོར་བ་སྤངས་པའི་མྱང་འདས་ཐོབ་པ་ལ་བདག་ཏུ་གདགས་པའི་རྒྱུ་ཕུང་པོ་ལྔ་པོ་རང་བཞིན་མེད་པར་རྟོགས་དགོས་པར་གསུངས་སོ། །དེ་ལྟར་ན་ཐེག་པ་གསུམ་ཆར་གྱི་བྱང་ཆུབ་ཐོབ་པ་ལ་ཐུན་མོང་དུ་ཕུང་པོ་བདེན་པའི་སྐྱེ་མེད་དུ་རྟོགས་པ་དགོས་པར་བཞེད་དེ། རིན་ཆེན་ཕྲེང་བར། ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པ་སྟོང་པ་ཉིད། །ཟད་དང་མི་སྐྱེ་དོན་དུ་ནི། །གཅིག་པས་དེ་ཕྱིར་བཟོད་པར་གྱིས། །ཞེས་དང་། ཤེར་ཕྱིན་ལ་བསྟོད་པར། སངས་རྒྱས་རང་སངས་རྒྱས་རྣམས་དང་། །ཉན་ཐོས་རྣམས་ཀྱིས་ངེས་བསྟེན་མ། །ཁྱོད་ཉིད་གཅིག་པུ་ཐར་པའི་ལམ། །དེ་ལྟར་གཞན་དག་མེད་པར་ངེས། །ཞེས་གསུངས་སོ། །འོན་ཀྱང་ཐེག་པ་ཆེ་ཆུང་ལ་ལྟ་བའི་ཁྱད་པར་ནི་ཤིན་ཏུ་ཆེ་སྟེ། ཆོས་དབྱིངས་བསྟོད་པ་ལས་གསུངས་པའི་ཆོས་དབྱིངས་དེ་མཐོང་ན་བདེ་གཤེགས་སྙིང་པོ་མཐོང་བར་བཞེད་པའི་ཕྱིར་དང་། བསྟོད་ཚོགས་སུ། མཚན་མ་མེད་པ་མ་རྟོགས་པར། །ཁྱོད་ཀྱིས་ཐར་པ་མེད་པར་གསུངས། །དེ་ཡི་ཕྱིར་ན་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་ཉན་རང་གིས་མཚན་མེད་ཚང་བར་མ་རྟོགས་ཤིང་། ཐེག་ཆེན་གྱིས་དེ་ཚང་བར་རྟོགས་པར་གསུངས་ཤིང་། དེ་ཉིད་དཔལ་ལྡན་ཟླ་བས་ཆོས་ཀྱི་བདག་མེད་རྒྱས་པར་རྟོགས་མ་རྟོགས་ཀྱི་ཤེས་བྱེད་དུ་དྲངས་པར་མཛད་པའི་ཕྱིར་རོ། །ཉན་ཐོས་དང་རང་སངས་རྒྱས་ལ་ལྟ་བའི་ཁྱད་པར་གསལ་བར་གསུངས་པ་མ་མཐོང་ཡང་། མངོན་རྟོགས་རྒྱན་ནས་གསུངས་པ་ལྟར་གྱི་ལྟ་བའི་ཁྱད་པར་ངེས་པར་བཞེད་དགོས་པར་སྣང་སྟེ། དེ་ཉིད་ཤེར་ཕྱིན་གྱི་མདོའི་དོན་ཡིན་པའི་ཕྱིར་དང་། འཇུག་འགྲེལ་དུ་སློབ་དཔོན་གྱི་དགོངས་པ་འཆད་པ་ན་ཡང་དེ་དག་ནི་བསོད་ནམས་དང་ཡེ་ཤེས་གོང་དུ་འཕེལ་བའི་ཁྱད་པར་གྱིས་ཉན་ཐོས་རྣམས་ལས་ཁྱད་པར་དུ་འཕགས་པའི་ཕྱིར་དང་། བསོད་ནམས་དང་། ཡེ་ཤེས་ཀྱི་ཚོགས་དང་། ཐུགས་རྗེ་ཆེན་པོ་དང་། རྣམ་པ་ཐམས་ཅད་མཁྱེན་པ་ལ་སོགས་པ་མེད་པས་ཡང་དག་པར་རྫོགས་པའི་སངས་རྒྱས་རྣམས་ལས་དམན་པའི་ཕྱིར་ན་འབྲིང་པོ་ཞེས་ཉན་ཐོས་ལས་ཡེ་ཤེས་ཁྱད་པར་དུ་འཕགས་ཤིང་། ཐེག་ཆེན་ལས་དམན་པ་མངོན་རྟོགས་རྒྱན་ཇི་ལྟ་བ་བཞིན་དུ་གསུངས་པའི་ཕྱིར་རོ། །གསུམ་པ་ནི། འཇུག་འགྲེལ་དུ། ཉན་རང་གིས་ཆོས་རང་བཞིན་མེད་པར་རྟོགས་པ་ལ་མདོ་སྡེ་ས་བཅུ་པའི་ལུང་ལ་བརྟེན་ནས་བསྒྲུབ་པ་དང་། རིགས་པ་གཉིས་ཀྱི་སྒོ་ནས་བསྒྲུབ་པ་དང་། རིན་ཆེན་ཕྲེང་བའི་ལུང་ལ་བརྟེན་ནས་བསྒྲུབ་པ་དང་། ཉན་ཐོས་ལ་བསྟན་པའི་མདོ་ལ་བརྟེན་ནས་བསྒྲུབ་པ་དང་། རྩ་བ་ཤེས་རབ་ཀྱི་ལུང་ལ་བརྟེན་ནས་བསྒྲུབ་པ་དང་། ཐེག་ཆེན་བསྟན་པ་དོན་མེད་དུ་ཐལ་བ་སྤང་བ་དང་དྲུག་ལས། དང་པོ་ནི། མདོ་སྡེ་ས་བཅུ་པ་ལས། ས་དང་པོ་ལ་གནས་པའི་བྱང་སེམས་ཀྱིས་ཉན་རང་བློའི་སྟོབས་ཀྱིས་ཟིལ་གྱིས་གནོན་མི་ནུས་ཤིང་། ས་བདུན་པ་ཐོབ་ནས་ཟིལ་གྱིས་གནོན་ནུས་པར་གསུངས་པས་གྲུབ་སྟེ། ཉན་རང་ལ་ཆོས་རང་བཞིན་མེད་པར་རྟོགས་པ་མེད་ན། ས་དང་པོ་ལ་གནས་པའི་བྱང་སེམས་ཀྱིས་ཀྱང་བློའི་སྟོབས་ཀྱིས་ཟིལ་གྱིས་གནོན་ནུས་པར་ཐལ་བའི་ཕྱིར་རོ། །གཉིས་པ་ནི། འཇུག་འགྲེལ་དུ། ཕྱི་རོལ་པ་བཞིན་དུ་འདི་དག་གིས་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤངས་པར་ཡང་མི་འགྱུར་རོ། །གཟུགས་ལ་སོགས་པའི་རང་གི་ངོ་བོ་ལ་དམིགས་པས་ཕྱིན་ཅི་ལོག་ཏུ་གྱུར་པའི་ཕྱིར་གང་ཟག་གི་བདག་མེད་པ་རྟོགས་པར་མི་འགྱུར་ཏེ། བདག་ཏུ་གདགས་པའི་རྒྱུ་ཕུང་པོ་ལ་དམིགས་པའི་ཕྱིར་རོ། །ཞེས་གསུངས་སོ། །གསུམ་པ་ནི། སྔར་དྲངས་པའི་རིན་ཆེན་ཕྲེང་བའི་ལུང་རྣམས་ཉན་ཐོས་ཀྱི་དབང་དུ་བྱས་པ་ཡིན་ཏེ། དེའི་མཇུག་ཐོག་ཁོ་ནར་བྱང་ཆུབ་སེམས་དཔའི་དབང་དུ་མཛད་ནས། དེ་ལྟར་བྱང་ཆུབ་སེམས་དཔས་ཀྱང་། །མཐོང་ནས་བྱང་ཆུབ་ངེས་པར་འདོད། །འོན་ཀྱང་དེ་ནི་སྙིང་རྗེ་ཡིས། །བྱང་ཆུབ་བར་དུ་སྲིད་མཚམས་སྦྱོར། །ཞེས་གསུངས་པའི་ཕྱིར་རོ། །བཞི་པ་ནི། ཉན་ཐོས་ལ་བསྟན་པའི་མདོ་དག་ལས་ཀྱང་ཉན་ཐོས་རྣམས་ཀྱིས་ཉོན་མོངས་པའི་སྒྲིབ་པ་སྤང་བར་བྱ་བའི་ཕྱིར། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པར་ཤེས་པ་སྒྱུ་མ་ལྟར། །ཉི་མའི་གཉེན་གྱིས་བཀའ་སྩལ་ཏོ། །ཞེས་བྱ་བ་ལས་དབུ་བ་རྡོས་པ་ལ་སོགས་པའི་དཔེ་དག་གིས་འདུ་བྱེད་རྣམས་ངེས་པར་དཔྱད་པ་ཡིན་ནོ། །ལྔ་པ་ནི། མདོའི་དོན་དེ་ཉིད་རྩ་ཤེར། བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏ་ཡ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པ་མཛད། །ཅེས་གསུངས་སོ། །དྲུག་པ་ནི། ཉན་ཐོས་ཀྱི་ཐེག་པ་ལས་ཆོས་ཀྱི་བདག་མེད་བསྟན་ན་ཐེག་ཆེན་བསྟན་པ་དོན་མེད་པར་འགྱུར་རོ། །ཞེས་པའི་ལན་དུ་ཐེག་པ་ཆེན་པོ་བསྟན་པས་ནི་ཆོས་ལ་བདག་མེད་པ་ཙམ་འབའ་ཞིག་སྟོན་པར་བྱེད་པ་མ་ཡིན་གྱི་འོ་ན་ཅི་ཞེ་ན། བྱང་ཆུབ་སེམས་དཔའ་རྣམས་ཀྱི་ས་དང་། ཕ་རོལ་ཏུ་ཕྱིན་པ་དང་། སྨོན་ལམ་དང་། སྙིང་རྗེ་ཆེན་པོ་ལ་སོགས་པ་དང་། ཡོངས་སུ་བསྔོ་བ་དང་། ཚོགས་གཉིས་དང་། བསམ་གྱིས་མི་ཁྱབ་པའི་ཆོས་ཉིད་ཀྱང་ཡིན་ནོ། །ཞེས་དང་། ཆོས་ཀྱི་བདག་མེད་པ་གསལ་བར་བྱ་བའི་ཕྱིར་ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ། རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །ཉན་ཐོས་ཀྱི་ཐེག་པ་ལས་ནི་ཆོས་ཀྱི་བདག་མེད་པ་མདོར་མཚོན་པ་ཙམ་ཞིག་ཏུ་ཟད་དོ། །ཇི་སྐད་དུ་སློབ་དཔོན་གྱི་ཞལ་སྔ་ནས་ཀྱིས། མཚན་མ་མེད་པ་མ་རྟོགས་པར། །ཞེས་སོགས་གསུངས་སོ། །བཞི་པ་ལ་ལྔ་སྟེ། ལྟ་བའི་ཁྱད་པར་ངོས་གཟུང་བ། ཚད་ལྡན་གྱི་དགོངས་པ་ཕྱོགས་གཅིག་པར་བསྟན་པ། ཐ་སྙད་མི་འདྲ་བ་གསུངས་པའི་དགོངས་པ། ཀླན་ཀའི་གནས་མ་ལུས་པ་སྤངས་པ། མ་རྟོགས་པའི་དབང་གིས་སྣ་ཚོགས་སུ་འགྱུར་བའི་སྐྱོན་བསྟན་པའོ། །དང་པོ་ནི། ཉན་ཐོས་ཀྱིས་གང་ལ་བརྟེན་ནས་ངར་འཛིན་སྐྱེ་བར་འགྱུར་བའི་རྟེན་ཕུང་པོ་བདེན་མེད་དུ་རྟོགས་ཏེ། ཕུང་པོ་ལ་བདེན་པར་འཛིན་པའི་བདེན་འཛིན་དེ་ཉིད་ཇི་སྲིད་ཡོད་ཀྱི་བར་དུ་ངའོ་སྙམ་པའི་འཛིན་པ་འབྱུང་ཞིང་། འཛིན་པ་དེ་ཉིད་གང་ཟག་གི་བདག་མེད་མ་རྟོགས་ཀྱི་བར་དུ་གང་ཟག་ལ་བདེན་པར་འཛིན་པའི་བདེན་འཛིན་ཁོ་ན་ཡིན་པའི་ཕྱིར་རོ། །དེ་ལས་གཞན་པའི་ཆོས་ཐམས་ཅད་བདེན་མེད་དུ་རྟོགས་པ་ནི་མ་ཡིན་ཏེ། ཁམས་གསུམ་གྱི་ཉོན་མོངས་སྤོང་བ་ལ་ཆོས་ཐམས་ཅད་ཀྱི་གནས་ལུགས་རྟོགས་མི་དགོས་པའི་ཕྱིར་རོ། །རང་སངས་རྒྱས་ཀྱིས་སྔར་གྱི་ལྟ་བ་དེའི་སྟེང་དུ་སྒྱུ་མ་ལ་སོགས་པའི་དཔེས་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་ཤིང་། ཀུན་ནས་ཉོན་མོངས་ཀྱི་གཟུང་བ་སོགས་དྲུག་པོ་ཡང་རང་བཞིན་མེད་པར་རྟོགས་ཀྱང་། ཆོས་ཐམས་ཅད་རང་བཞིན་མེད་པར་ནི་མ་རྟོགས་ཏེ། བདག་འཛིན་སྐྱེ་བའི་རྟེན་ཕུང་པོ་ལྔ་དང་། ཤེས་སྒྲིབ་གཟུང་རྟོག་སྐྱེ་བའི་རྟེན་གཟུང་བའི་ཡུལ་རྣམས་ལས་གཞན་དུ་གྱུར་པའི་ཆོས་རང་བཞིན་མེད་པར་མ་རྟོགས་པའི་ཕྱིར། ཐེག་པ་ཆེན་པོས་ནི་ཆོས་ཀྱི་བདག་མེད་རྒྱས་པར་རྟོགས་པས། འདི་ལ་སྟོང་གཞིའི་ཆོས་ཅན་གྱི་སྒོ་ནས་རྒྱས་པར་འཇོག་པ་དང་། སྟོང་ཚུལ་རྣམ་པའི་སྒོ་ནས་རྒྱས་པར་འཇོག་པ་གཉིས་ལས། དང་པོ་ནི། ནང་དང་ཕྱི་རོལ་ནས་བཟུང་སྟེ། གཞན་གྱི་ངོ་བོའི་བར་ཆོས་ཅན་གྱིས་བསྡུས་པ་འདུས་བྱས་དང་། འདུས་མ་བྱས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་ཐམས་ཅད་དང་། ཆོས་ཉིད་ཀྱིས་བསྡུས་པ་རང་བཞིན་སྟོང་པ་ཉིད་ཐམས་ཅད་ཀྱང་སྟོང་ཉིད་དུ་རྟོགས་པས་ན་སྟོང་ཉིད་ཉི་ཤུ་རྟོགས་པར་འཇོག་པ་སྟེ། འདིའི་སྟོང་གཞིའི་ཆོས་ཅན་ཉི་ཤུས་མ་བསྡུས་པའི་ཆོས་གང་ཡང་མེད་པས། ཆོས་ཐམས་ཅད་ལ་ཆོས་ཀྱི་བདག་མེད་པར་རྟོགས་པའོ། །གཉིས་པ་ནི། ཉན་ཐོས་ཀྱིས་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དང་། རང་སངས་རྒྱས་ཀྱིས་གཟུང་བ་རང་བཞིན་མེད་པར་རྟོགས་པ་དེ་ཡང་རྡོ་རྗེའི་ཟེགས་མ་དང་། གཅིག་དུ་བྲལ་ལ་སོགས་པའི་རྟགས་ལ་བརྟེན་ནས་རང་བཞིན་གྱིས་སྐྱེ་བ་མེད་པར་རྟོགས་པ་ཙམ་ཡིན་པས་སྤྲོས་པའི་མཐའ་བཞིའི་ནང་ནས། དང་པོ་ཁོ་ན་ཁེགས་པ་ཡིན་གྱི་ཕྱི་མ་གསུམ་མི་ཁེགས་ལ། ཐེག་པ་ཆེན་པོས་ནི་ཐོག་མར་དབུ་མའི་གཏན་ཚིགས་རྣམས་ཀྱི་བདེན་པ་བཀག དེའི་འོག་ཏུ་ཡང་དགག་བྱ་བདེན་པ་མེད་པས་དེ་བཀག་པའི་བདེན་མེད་དུ་མངོན་པར་ཞེན་པ་ཡང་བཀག དེའི་འོག་ཏུ་གཉིས་ཀ་དང་། གཉིས་ཀ་མ་ཡིན་པར་ཞེན་པ་ཡང་བཀག་ནས་སྤྲོས་པའི་མཐའ་བཞི་ཆར་དང་བྲལ་བར་རྟོགས་པས་ན་རྒྱས་པའོ། །མདོར་ན་དབུ་མ་པས་ཐེག་པ་གསུམ་གྱི་བྱང་ཆུབ་གསུམ་ཀ་ཡང་དབུ་མའི་ལམ་གྱིས་ཐོབ་དགོས་པ་ལས་ཐེག་པ་འོག་མས་ནི་བདེན་པའི་མཐའ་བཀག་པས་ཡོད་མཐའ་དང་བྲལ། ཐ་སྙད་དུ་ལས་འབྲས་མེད་པར་མི་བལྟ་བས་མེད་མཐའ་དང་བྲལ་བའི་བདེན་པ་གཉིས་ཀ་ལ་ལྟོས་ནས་དབུ་མར་འཇོག་པའི་དབུ་མ་རྟོགས་དགོས། ཐེག་པ་ཆེན་པོས་ནི་གནས་ལུགས་ཉིད་ལ་མཐའ་བཞི་ཆར་དང་བྲལ་བའི་དབུ་མ་རྟོགས་དགོས་པར་བཞེད་དོ། །གཉིས་པ་ནི། ཐོག་མར་ཤེར་ཕྱིན་གྱི་མདོའི་དགོངས་པ་ཡིན་ཏེ། ཐེག་པ་གསུམ་ཆར་གྱི་བྱང་ཆུབ་ཐོབ་པར་འདོད་པས་ཤེར་ཕྱིན་ལ་བསླབ་དགོས་པར་གསུངས་པའི་ཉན་རང་གི་བསླབ་བྱ་ནི་ཐམས་ཅད་ཤེས་པ་ཉིད་ཡིན་པར་གསུངས་ལ། དེའི་ཡུལ་ཐམས་ཅད་ནི་ཕྱི་དང་ནང་གི་ཆོས་རྣམས་ཇི་སྙེད་པ་འདི་ཙམ་ཡིན་པར་གསུངས་པས། ཕྱིའི་ཆོས་ནི་གཟུགས་སོགས་ཕྱིའི་སྐྱེ་མཆེད་དྲུག་ཡིན་ཞིང་། ནང་གི་ཆོས་ནི་མིག་སོགས་ནང་གི་སྐྱེ་མཆེད་དྲུག་ཡིན་ལ། ནང་གི་སྐྱེ་མཆེད་དྲུག་གིས་གཟུགས་ཕུང་དང་རྣམ་ཤེས་ཀྱི་ཕུང་པོ་བསྡུས། ཕྱིའི་སྐྱེ་མཆེད་དྲུག་གི་ནང་ནས་ཆོས་ཀྱི་སྐྱེ་མཆེད་ཀྱིས་ཕུང་པོ་བར་པ་གསུམ་ཡང་བསྡུས་པས་དེ་དག་ཉན་ཐོས་ཀྱིས་སྐྱེ་མེད་དུ་རྟོགས་བྱ་ཡིན་ལ། ཕྱིའི་སྐྱེ་མཆེད་གཞན་ལྔ་དང་། ཆོས་ཀྱི་སྐྱེ་མཆེད་ཀྱིས་བསྡུས་པའི་ཀུན་ནས་ཉོན་མོངས་ཀྱི་གཟུང་བ་སོགས་ནི་རང་སངས་རྒྱས་ཀྱིས་སྐྱེ་མེད་དུ་རྟོགས་པར་བྱ་བ་ཡིན་པའི་ཕྱིར་རོ། །གཞན་ཡང་ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་སོགས་གཞི་ཤེས་ཀྱི་རྣམ་པ་ཉེར་བདུན་འཆད་པའི་སྐབས་སུ་ཡང་མེད་པ་དང་། མི་སྐྱེ་བ་སོགས་ཀྱི་རྣམ་པ་བཅུ་དྲུག་པོ་ཉན་ཐོས་ཀྱི་རྟོགས་རིགས་དང་། གཟུང་བ་ཕྱི་རོལ་གྱི་དོན་རྨི་ལམ་ལྟར་མ་སྐྱེས་པ་སོགས་ལྔ་དང་། ཀུན་ནས་ཉོན་མོངས་ཀྱི་གཟུང་བ་མེད་པ་སོགས་དྲུག་སྟེ། རྣམ་པ་བཅུ་གཅིག་ནི་རང་སངས་རྒྱས་ཀྱི་རྟོགས་རིགས་སུ་གསུངས་པས་ཀྱང་གང་ཟག་གི་བདག་མེད་རྟོགས་པ་ལ་བཏགས་པའི་རྒྱུ་ཕུང་པོ་བདེན་མེད་དུ་རྟོགས་པ་དང་། རང་སངས་རྒྱས་ཀྱིས་ཕྱི་རོལ་གྱི་དོན་དང་། ཀུན་ནས་ཉོན་མོངས་ཀྱི་གཟུང་བ་སོགས་རང་བཞིན་མེད་པར་རྟོགས་པར་གྲུབ་བོ། །ཡེ་ཤེས་ཀྱི་ཚོགས་ཀྱི་སྐབས་སུ་རབ་འབྱོར་གཞན་ཡང་བྱང་སེམས་ཆེན་པོའི་ཐེག་པ་ཆེན་པོ་ནི་ནང་སྟོང་པ་ཉིད་དང་། ཞེས་སོགས་སྟོང་ཉིད་ཉི་ཤུ་ཐེག་ཆེན་གྱི་རྟོགས་བྱར་གསུངས་པ་དང་། གཟུགས་རྟག་ཅེས་བྱ་བར་སྤྱོད་ན་མཚན་མ་ལ་སྤྱོད་དོ། །མི་རྟག་ཅེས་བྱ་བར་སྤྱོད་ན་མཚན་མ་ལ་སྤྱོད་དོ། །དེ་བཞིན་དུ་སྟོང་མི་སྟོང་དང་། མཚན་མ་ཡོད་མེད་སོགས་མཐའ་གཉིས་ཆར་བཀག་པར་གསུངས་པ་རྣམས་ཀྱིས་ཐེག་ཆེན་གྱི་ཆོས་ཀྱི་བདག་མེད་རྒྱས་པར་རྟོགས་ཚུལ་གཉིས་པོ་དེ་གྲུབ་བོ། །ཉན་ཐོས་ལ་བསྟན་པའི་མདོའི་དགོངས་པར་ཡང་གྲུབ་སྟེ། ཉན་ཐོས་རྣམས་ཀྱིས་ཉོན་སྒྲིབ་སྤོང་བའི་ཆེད་དུ་གཟུགས་ནི་དབུ་བ་རྡོས་པ་འདྲ་ཞེས་སོགས་ཕུང་པོ་ལྔ་བདེན་མེད་དུ་བསྟན་པའི་ཕྱིར་རོ། །མགོན་པོ་བྱམས་པའི་དགོངས་པར་ཡང་གྲུབ་སྟེ། ཉན་ཐོས་ལ་གང་ཟག་གི་བདག་མེད་རྟོགས་པ་ཙམ་ལས་མ་བཞག་ཀྱང་དེ་ཉིད་ལ་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དགོས་པ་ལ་དགོངས་ནས། ཐེག་ཆེན་གྱི་སྦྱོར་མཐོང་སྒོམ་གསུམ་ཉན་རང་གི་དེ་གསུམ་ལས་ཁྱད་པར་འཕགས་ཚུལ་སྟོན་པའི་སྐབས་རྣམས་སུ་མི་རྟག་ལ་སོགས་བཅུ་དྲུག་ལ་མངོན་ཞེན་བཀག་པའི་ཆ་ནས་ཁྱད་པར་འཕགས་པར་གསུངས་ཀྱི་ཕུང་པོ་བདེན་མེད་དུ་རྟོགས་པའི་ཆ་ནས་ཁྱད་པར་འཕགས་པར་གསུངས་པ་མི་སྣང་བའི་ཕྱིར་དང་། མེད་པའི་རྣམ་པ་ནས་བཟུང་སྟེ། །ཞེས་པའི་དོན་སྔར་བཤད་པ་བཞིན་དུ་བསྟན་བཅོས་ཉིད་ལས་བཤད་པས་ཀྱང་ཉན་ཐོས་ཀྱི་མཐོང་སྒོམ་མཉམ་གཞག་གི་གནས་སྐབས་སུ་སྐྱེ་མེད་རྟོགས་པར་བཞེད་པའི་ཕྱིར་རོ། །རང་རྒྱལ་གྱིས་དེའི་སྟེང་དུ་གཟུང་བ་ཆོས་ཀྱི་བདག་མེད་རྟོགས་པ་དང་། ཐེག་ཆེན་གྱིས་དེའི་སྟེང་དུ་འཛིན་པ་ཆོས་ཀྱི་བདག་མེད་རྟོགས་པའི་ཁྱད་པར་ནི་སྐབས་གཉིས་པར་གསལ་ཞིང་། ཆོས་ཀྱི་བདག་མེད་རྒྱས་པར་རྟོགས་ཚུལ་གཉིས་པོ་ཡང་སྟོང་ཉིད་ཉི་ཤུ་པོ་ཡེ་ཤེས་ཀྱི་ཚོགས་ཞེས་པ་གཅིག་ཏུ་བསྡུས་ཤིང་། སྐབས་དང་པོར་སྦྱོར་ལམ་དང་། སྐབས་གསུམ་པར་མཚན་འཛིན་མཐའ་དག་བཀག་པར་གསུངས་པ་ལས་ཤེས་སོ། །འཕགས་མཆོག་ཀླུ་སྒྲུབ་ཡབ་སྲས་ཀྱི་དགོངས་པ་ཡང་ཡིན་ཏེ། སྔར་དྲངས་པའི་རིན་ཆེན་ཕྲེང་བ་དང་། སྟོང་ཉིད་བདུན་ཅུ་པའི་ལུང་དང་། རྩ་ཤེར། ལས་དང་ཉོན་མོངས་རྣམ་རྟོག་ལས། །ཞེས་དང་། ཆོས་དབྱིངས་བསྟོད་པར། བདག་དང་བདག་གིར་ཞེས་འཛིན་པས། །ཇི་སྲིད་ཕྱི་རོལ་རྣམ་བརྟགས་པ། །བདག་མེད་རྣམ་པ་གཉིས་མཐོང་ནས། །སྲིད་པའི་ས་བོན་འགག་པར་འགྱུར། །ཞེས་དང་། བཞི་བརྒྱ་པར། ཡུལ་ལ་བདག་མེད་མཐོང་ནས་ནི། །སྲིད་པའི་ས་བོན་ལྡོག་པར་འགྱུར། །ཞེས་ཕུང་པོ་ལ་བདེན་པར་འཛིན་པའི་བདེན་འཛིན་དེ་གང་ཟག་གི་བདག་འཛིན་གྱི་དངོས་རྒྱུ་ཡིན་ལ། གང་ཟག་གི་བདག་འཛིན་དེ་ཡང་སྲིད་པའི་ས་བོན་ཡན་ལག་བཅུ་གཉིས་ཀྱིས་བསྡུས་པའི་མ་རིག་པ་ཡིན་པས། སྲིད་པའི་ས་བོན་འགག་པ་ལ་གང་ཟག་བདེན་མེད་དུ་རྟོགས་པ་དགོས་ཤིང་། དེ་རྟོགས་པ་ལ་གང་ཟག་གི་བདག་འཛིན་སྐྱེ་བའི་རྒྱུ་ཕུང་པོ་བདེན་མེད་དུ་རྟོགས་པའི་ཆོས་ཀྱི་བདག་མེད་རྟོགས་པ་དགོས་པར་གསུངས་པའི་ཕྱིར་རོ། །དེ་ལྟ་བུའི་ལྟ་བ་དེ་ཐེག་པ་གསུམ་ཆར་ཐུན་མོང་བ་ཡིན་པ་ལས་རང་རྒྱལ་ལ་དེ་ལས་ཁྱད་པར་དུ་གྱུར་པའི་ལྟ་བ་ཡོད་པ་ནི་སྔར་དཔལ་ལྡན་ཟླ་བའི་ལུང་གིས་བཤད་ཟིན་ཞིང་། ཐེག་ཆེན་གྱིས་བདག་མེད་གཉིས་རྒྱས་པར་རྟོགས་པའི་ཚུལ་ཡང་ཐེག་པ་གསུམ་ཆར་གྱི་ཐུན་མོང་བར་གྱུར་པའི་ཆོས་ཀྱི་བདག་མེད་དེ་ལས་ཁྱད་པར་དུ་གྱུར་པའི་ཐེག་ཆེན་རང་ལུགས་ཀྱི་ཆོས་ལ་བདག་མེད་པ་ཡོད་པར་གསུངས་ཏེ། བསམ་གྱིས་མི་ཁྱབ་པའི་བསྟོད་པར། ཇི་ལྟར་ཁྱོད་ཀྱིས་ཐེག་ཆེན་ལས། །རང་གི་ཆོས་ལ་བདག་མེད་རྟོགས། །དེ་བཞིན་བློ་དང་ལྡན་རྣམས་ལ། །ཐུགས་རྗེའི་དབང་གིས་བསྟན་པར་མཛད། །ཅེས་གསུངས་པའི་ཕྱིར་རོ། །འདི་ཉིད་མདོ་སྡེ་ས་བཅུ་པའི་ལུང་གི་དགོངས་པར་ཡང་སྣང་སྟེ། ནམ་ཞིག་ས་བདུན་པ་རིང་དུ་སོང་བ་དེར་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཀྱང་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ། །ཞེས་གསུངས་པའི་རང་གི་ཡུལ་དང་། རང་གི་ཆོས་ལ་བདག་མེད་གཉིས་པོ་དོན་གཅིག་པར་སྣང་བའི་ཕྱིར་རོ། །འོ་ན་རང་གི་ཡུལ་ཆོས་ལ་བདག་མེད་པ་དེ་གང་། དེ་ཤེས་པ་ནི་གང་། དེའི་ཆེ་བ་ནི་གང་། དེ་ཉན་རང་ལས་ཤིན་ཏུ་འདས་པའི་དོན་ནི་གང་ཞེ་ན། བཤད་པར་བྱ་སྟེ། རྣམ་དཔྱོད་དང་བསོད་ནམས་གཉིས་ཀ་དང་ལྡན་པ་དག་རྣ་བ་བླགས་ཏེ་ཉན་པར་བྱོས་ཤིག དྲི་བ་དང་པོའི་ལན་ནི། དེ་ཉིད་ཕྱིར་ན་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་པའི་ཚང་བ་དང་། འཇུག་འགྲེལ་དུ། ཆོས་ཀྱི་བདག་མེད་པ་གསལ་བར་བྱ་བའི་ཕྱིར། ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ། རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །ཞེས་དང་། ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་པར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟ་ན་ཡང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པ་བསྒོམས་པ་མེད་དེ། ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ། །ཞེས་གསུངས་པའི་ཆོས་ཀྱི་བདག་མེད་གསལ་བ་དང་། རྒྱས་པ་དང་། རྫོགས་པ་རྣམས་ཏེ། སྔར་བཤད་པའི་རྒྱས་ཚུལ་གཉིས་པོ་དེ་ཉིད་དོ། །དྲི་བ་གཉིས་པའི་ལན་ནི། དེ་ལྟ་བུའི་ཐེག་ཆེན་རང་ལུགས་ཀྱི་ཆོས་ལ་བདག་མེད་པ་ཐོས་བསམ་གྱིས་ཤེས་པ་ཚོགས་ལམ་ན་ཡང་ཡོད་པས། མཚན་མེད་རབ་ཏུ་སྦྱིན་ལ་སོགས། །ཞེས་པའི་ཐར་པ་ཆ་མཐུན་དུ་བསྟན། སྒོམ་བྱུང་གཙོ་བོར་གྱུར་པའི་ཤེས་པ་སྦྱོར་ལམ་ན་ཡང་ཡོད་པས་ཉན་ཐོས་བསེ་རུ་ལྟ་བུ་དང་། བཅས་པ་དག་ལས་ཁྱད་པར་འཕགས། །ཞེས་པའི་སྦྱོར་ལམ་དུ་བསྟན་མངོན་སུམ་དུ་མཐོང་བའི་སྒོ་ནས་ཤེས་པ་མཐོང་ལམ་ནས་ཡོད་པས། གང་གི་ལམ་ནི་གཞན་དག་ལས། །ཁྱད་དུ་འཕགས་པས་ཁྱད་པར་ལམ། །ཞེས་པའི་མཐོང་ལམ་དུ་བསྟན། མཐོང་ཟིན་རྒྱུན་ལྡན་དུ་བསྒོམ་པ་སྒོམ་ལམ་ནས་ཡོད་པས། སྒོམ་པའི་ལམ་ནི་ཟབ་པ་སྟེ། །ཞེས་པའི་སྒོམ་ལམ་དུ་བསྟན་ཏོ། །དྲི་བ་གསུམ་པའི་ལན་ནི། ས་བདུན་པའི་ཡོངས་སྦྱོང་གི་སྐབས་སུ་བཤད་པ་ལྟར་གྱི་ཆོས་དང་གང་ཟག་ལ་མཚན་མར་འཛིན་པའི་མཚན་འཛིན་མཐའ་དག་སླར་མི་སྐྱེ་བའི་ཆོས་ཅན་དུ་བྱེད་པ་ནི་དེའི་ཆེ་བ་སྟེ། རང་གི་སྤང་བྱ་སླར་མི་སྐྱེ་བའི་ཆོས་ཅན་དུ་བྱེད་པ་གཉེན་པོའི་ཆེ་བར་འཇོག་པ་ནི་གཉེན་པོ་སྤྱིའི་ཆོས་ཡིན་པའི་ཕྱིར་རོ། །དེ་ཉིད་ས་བདུན་པར་ཐོབ་སྟེ། ས་བདུན་པའི་མཉམ་གཞག་དེས་རྗེས་ཐོབ་ཏུ་རྣམ་ཐར་སྒོ་གསུམ་ཤེས་པ་ལ་སོགས་པའི་རྟོགས་པ་ཉི་ཤུ་འདྲེན་པའི་ཕྱིར་རོ། །དྲི་བ་བཞི་པའི་ལན་ནི། ཉན་རང་ལས་ཤིན་ཏུ་འདས་པ་དང་། དེ་ཟིལ་གྱིས་གནོན་པ་དོན་གཅིག་པས་ས་བདུན་པའི་སྔ་རོལ་དུ་མ་ཐོབ་སྟེ། ས་བདུན་པ་མན་ཆད་ཀྱི་རྗེས་ཐོབ་ཀྱི་གནས་སྐབས་སུ་ཡང་ཉན་རང་དང་ཐུན་མོང་བར་གྱུར་པའི་མཚན་འཛིན་མངོན་གྱུར་དུ་འབྱུང་བའི་ཕྱིར་རོ། །དེའི་ཤུགས་ཀྱིས་ཉན་རང་ལས་འདས་པ་དང་། ལྟ་བ་ཁྱད་པར་དུ་འཕགས་པ་སྔ་རོལ་དུ་ཡང་ཡོད་པར་གྲུབ་བོ། །ཉན་རང་དང་ས་བདུན་པ་མན་ཆད་ཀྱི་བྱང་སེམས་གཉིས་ཀ་ལ་ཐུན་མོང་དུ་འབྱུང་བའི་མཚན་འཛིན་སླར་མི་སྐྱེ་བའི་ཆོས་ཅན་དུ་བྱས་པའི་ཚེ་ཉན་རང་ཟིལ་གྱིས་གནོན་པ་ཡིན་པས། འཇུག་པར། ས་བརྒྱད་པར་ཉོན་མོངས་རྩ་བ་དང་བཅས་པ་ཞི་བས་ཁམས་གསུམ་གྱི་བླ་མ་ཐོབ་པར་གསུངས་པ་ཡིན་ནོ། །དཔལ་ལྡན་ཞི་བ་ལྷའི་བཞེད་པ་ཡང་ཡིན་ཏེ། སྤྱོད་འཇུག་ཏུ། གང་ཟག་གི་བདག་མེད་བསྒོམ་པའི་ཚུལ་ནི། དཔེར་ན་ཆུ་ཤིང་སྡོང་པོ་དག །ཆ་ཤས་ཕྱེ་ན་འགལ་མེད་པ། །དེ་བཞིན་རྣམ་པར་དཔྱད་པ་ཡིས། །བཙལ་ན་བདག་ཀྱང་ཡང་དག་མིན། །ཞེས་གསུངས་ཤིང་། ཇི་ལྟར་བཙལ་བའི་ཚུལ་ནི། ལུས་ནི་རྐང་པ་བྱིན་པ་མིན། །ཞེས་པ་ནས། །ཕྱི་དང་ནང་ནའང་ལུས་མེད་ན། །ཇི་ལྟར་ལག་སོགས་ལ་ལུས་ཡོད། །ལག་སོགས་རྣམས་ལས་གཞན་མེད་ན། །དེ་ནི་ཇི་ལྟར་ཡོད་པ་ཡིན། །ཞེས་ལུས་བཙལ་ནས་མ་རྙེད་པའི་ཚུལ་དང་། དེ་བཞིན་སོར་མོའི་ཚོགས་ཡིན་ཕྱིར། །ལག་པའང་གང་ཞིག་ཡིན་པར་འགྱུར། །དེ་ཡང་ཚིགས་ཀྱི་ཚོགས་ཡིན་ཕྱིར། །ཚིགས་ཀྱང་རང་གི་ཆ་ཕྱེ་བས། །ཞེས་པ་ནས། མཁའ་བཞིན་དེས་ན་རྡུལ་ཡང་མེད། །ཅེས་ལུས་ཀྱི་ཡན་ལག་རྡུལ་ཕྲན་གྱི་བར་ཡང་མི་རྙེད་པར་གསུངས་པས་གང་ཟག་གི་བདག་མེད་རྟོགས་པ་ལ་ཉེར་ལེན་གྱི་ཕུང་པོ་བདེན་མེད་རྟོགས་པ་དགོས་པར་བཞེད་དོ། །འོན་ཀྱང་སྟོང་ཉིད་རྒྱས་པའི་ཚུལ་གཉིས་པོ་མ་རྟོགས་པར་བཞེད་དེ། སེམས་ནི་དམིགས་དང་བཅས་རྣམས་ཀྱི། །མྱ་ངན་འདས་པའང་དཀའ་བར་གནས། །ཞེས་ཉན་རང་ལ་མངོན་ཞེན་གྱི་དམིགས་པ་ཡོད་པས་འཁོར་བར་སྐྱེ་བ་ལེན་མི་སྲིད་པའི་མྱང་འདས་མེད་པར་གསུངས་པའི་ཕྱིར་རོ། །གལ་ཏེ་ཉོན་མོངས་སྤངས་པས་འཁོར་བར་སྐྱེ་བ་ལེན་མི་སྲིད་པའི་མྱང་འདས་ཐོབ་བོ་སྙམ་ན། དེ་ལྟར་ན་ཉོན་མོངས་སྤངས་མ་ཐག་ཏུ་སྡུག་བསྔལ་ཡང་སྤངས་པར་འགྱུར་བ་ལས་ལྷག་ཅེས་མྱང་འདས་ལ་སྡུག་བསྔལ་ཡོད་པས་བསལ་ལོ། །ཞེས་པ་ནི། ཉོན་མོངས་སྤངས་པས་གྲོལ་ན་དེ། །དེ་མ་ཐག་ཏུ་དེར་འགྱུར་རོ། །ཞེས་གསུངས་སོ། །མདོར་ན་ཐེག་པ་གསུམ་གྱི་ལྟ་བའི་ཁྱད་པར་ལ་ཤེར་ཕྱིན་གྱི་མདོ་དང་། བྱམས་པ་དང་། ཀླུ་སྒྲུབ་དང་། ཞི་བ་ལྷ་དང་། ཟླ་བ་གྲགས་པ་དང་། འཕགས་སེང་གཉིས་བཞེད་པ་མི་མཐུན་པ་ནི་ཅི་ཡང་མེད་པར་ཤེས་པར་བྱའོ། །གསུམ་པ་ནི། འོན་ཀྱང་ཐ་སྙད་འཇོག་ལུགས་ནི་མི་འདྲ་བར་སྣང་སྟེ། ཀླུ་སྒྲུབ་ཡབ་སྲས་ཀྱིས་གང་ཟག་བདེན་མེད་རྟོགས་པ་ལ། གང་ཟག་གི་བདག་མེད་རྟོགས་པ་དང་། ཉེར་ལེན་གྱི་ཕུང་པོ་བདེན་མེད་དུ་རྟོགས་པ་ལ་ཆོས་ཀྱི་བདག་མེད་རྟོགས་པར་བྱས་ནས། ཉན་རང་ལ་ཡང་ཆོས་ཀྱི་བདག་མེད་རྟོགས་པ་ཡོད་པར་བཞེད་ལ། བྱམས་ཆོས་རྗེས་འབྲང་དང་བཅས་པས་ནི་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་དེ་ཉིད་གང་ཟག་གི་བདག་མེད་རྟོགས་པའི་ཡན་ལག་ཏུ་བྱས་ནས། ཉན་ཐོས་ལ་ཆོས་ཀྱི་བདག་མེད་རྟོགས་པ་མེད། རང་རྒྱལ་ལ་ཆོས་ཀྱི་བདག་མེད་ཀྱི་ཕྱེད་རྟོགས་པ་ཡོད། ཐེག་ཆེན་ལ་བདག་མེད་གཉིས་ཀ་རྟོགས་པ་ཡོད་པའི་ཐ་སྙད་མཛད་པའི་ཕྱིར་རོ། །འོ་ན་ཐ་སྙད་མི་འདྲ་བ་གཉིས་འབྱུང་བའི་དགོས་པ་གང་ཞེ་ན། ཀླུ་སྒྲུབ་ཀྱིས་ཤེར་ཕྱིན་གྱི་མདོར་ཐེག་པ་གསུམ་ཆར་གྱི་བྱང་ཆུབ་ཐོབ་པར་འདོད་པས་ཤེར་ཕྱིན་ལ་བསླབ་པར་གསུངས་པའི་ཐུན་མོང་བའི་ལྟ་བ་དང་། ཐེག་ཆེན་ཐུན་མོང་མ་ཡིན་པའི་ལྟ་བ་གཉིས་ཀ་གཏན་ལ་དབབ་པར་མཛད་པས་དེའི་ཚེ་དངོས་སྨྲ་བ་དག་གིས་ཉན་ཐོས་ཀྱིས་ཉེར་ལེན་གྱི་ཕུང་པོ་བདེན་མེད་དུ་མ་རྟོགས་པར་གང་ཟག་གི་བདག་མེད་རྟོགས་པར་འདོད་པ་དེ་བཀག་ནས་ཕུང་པོ་བདེན་མེད་དུ་རྟོགས་པར་ཤེས་པའི་ཆེད་དུ་བདག་མེད་གཉིས་ཀ་རྟོགས་པའི་ཁྱད་པར་མཛད་དོ། །འདི་ལ་དགོངས་ནས་འཇུག་འགྲེལ་དུ། ཉན་ཐོས་ཀྱིས་རྟོགས་པའི་ཆོས་ཀྱི་བདག་མེད་ལ་ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་དུ་གསུངས་སོ། །མགོན་པོ་བྱམས་པས་ནི། གཞན་གྱིས་མྱོང་བ་མ་ཡིན་ཏེ། །ཞེས་པའི་ཚུལ་གྱིས་ཐེག་ཆེན་ཐུན་མོང་མ་ཡིན་པའི་ལམ་གྱི་རིམ་པ་གཏན་ལ་འབེབས་པར་མཛད་པས། བྱང་སེམས་ཀྱི་མངོན་རྟོགས་གཅིག་ཉིད་ལ་ཐེག་པ་གསུམ་གྱི་རྟོགས་རིགས་གསུམ་དུ་ཕྱེ་དགོས་པས་ཉན་ཐོས་ཀྱིས་ཆོས་ཀྱི་བདག་མེད་མ་རྟོགས་པའི་རྣམ་གཞག་མཛད་དོ། །འོ་ན་ཐེག་ཆེན་གྱི་རྟོགས་པ་གཅིག་ཉིད་ལ་རྟོགས་རིགས་གསུམ་དུ་འཇོག་པའི་དགོས་པ་གང་ཞེ་ན། རབ་འབྱོར་བྱང་ཆུབ་སེམས་དཔའ་རྣམས་ཀྱིས་ནི་ཉན་ཐོས་ཀྱི་ལམ་གང་ཡིན་པ་དང་། རང་སངས་རྒྱས་ཀྱི་ལམ་གང་ཡིན་པ་དང་། སངས་རྒྱས་ཀྱི་ལམ་གང་ཡིན་པའི་ལམ་ཐམས་ཅད་བསྐྱེད་པར་བྱ་ཞིང་ལམ་ཐམས་ཅད་ཤེས་པར་བྱའོ། །ཞེས་ལམ་ཤེས་ཀྱི་ལམ་གསུམ་གྱི་དམིགས་རྣམ་སོ་སོར་ཤེས་དགོས་ལ་དེའི་ཚེ་ཉེར་ལེན་གྱི་ཕུང་པོ་བདེན་མེད་དུ་རྟོགས་པ་གང་ཟག་གི་བདག་མེད་རྟོགས་པའི་ནང་དུ་བསྡུས་ནས་ཆོས་ཀྱི་བདག་མེད་ལ་གཉིས་སུ་ཕྱེ་སྟེ། ཐེག་པ་གསུམ་གྱི་ལྟ་བའི་ཁྱད་པར་འཇོག་དགོས་པའི་ཕྱིར་རོ། །བཞི་པ་ནི། ཉན་རང་གིས་ཉེར་ལེན་གྱི་ཕུང་པོ་བདེན་མེད་དུ་རྟོགས་ན་ཉི་ཚེ་བ་དང་སྣ་ཚོགས་ཉིད་ཅེས་པ་དང་འགལ་ལོ། །ཞེ་ན། དེའི་དོན་རྟོགས་པ་ཉི་ཚེ་བ་ཡིན་པས་ཉེར་ལེན་གྱི་ཕུང་པོ་བདེན་མེད་ཙམ་ལས་ཆོས་ཀྱི་བདག་མེད་མཐའ་དག་རྟོགས་པ་མེད་པར་བཤད་ཟིན་པས་ཅིའི་ཕྱིར་ཀླན་ཀ་ཚོལ་བར་བྱེད། གལ་ཏེ་ཉན་རང་གི་མཐོང་ལམ་གྱིས་སྐྱེ་མེད་རྟོགས་ན་མི་རྟག་ལ་སོགས་བཅུ་དྲུག་རྟོགས་པའི་བློ་དེ་ཉན་རང་གི་རྟོགས་རིགས་སུ་མདོ་དང་བསྟན་བཅོས་གཉིས་ཀར་ལས་བཤད་པ་དང་འགལ་ལོ་སྙམ་ན། དེ་ནི་མཉམ་གཞག་གི་ཡུལ་མཐོང་ཚུལ་མ་ཡིན་གྱི་རྗེས་ཐོབ་ཀྱིས་ངེས་ཤེས་ཀྱི་དབང་དུ་བྱས་པ་སྟེ། སློབ་དཔོན་གྱིས་དམིགས་པ་དང་བཅས་པ་ཉིད་ཀྱིས་འབྲས་བུ་དང་པོ་ལ་སོགས་པ་རྟོགས་པ་ཐ་དད་པ་དང་། ཞེས་གསུངས་པའི་ཕྱིར་རོ། །འདི་ཡང་མཉམ་གཞག་གི་དབང་དུ་བྱས་སོ་སྙམ་ན་མ་ཡིན་ཏེ། དམིགས་པ་དང་བཅས་པའི་དོན་ནི་ཞེན་པ་དང་བཅས་པ་ཡིན་པས་ཉན་རང་གི་མཐོང་སྒོམ་མཉམ་གཞག་ན་མངོན་ཞེན་མེད་པའི་ཕྱིར་དང་། གཞན་དུ་ན་ཉན་རང་གི་མཐོང་སྒོམ་མཉམ་གཞག་ལ་རྟོགས་རིགས་ཐ་དད་ཡོད་པར་འགྱུར་ཏེ། འདི་འབྲས་བུ་དང་པོ་སོགས་རྟོགས་རིགས་ཐ་དད་དུ་སྟོན་པའི་གཞུང་ཡིན་པའི་ཕྱིར་རོ། །འདོད་ན་ཉིར་སྣང་དུ། ཏིལ་གྱི་དཔེས་ཉན་ཐོས་ཀྱི་སྒོམ་ལམ་སྟོན་པའི་རྒྱུ་མཚན་དུ་མཐོང་སྒོམ་རྟོགས་རིགས་ཐ་དད་མེད་ཀྱང་ནུས་པ་ཐ་དད་ཡོད་པར་བཤད་པ་དང་ཅིའི་ཕྱིར་མི་འགལ། ཁྱེད་རང་ལ་ཡང་མཚུངས་སོ་སྙམ་ན་མི་མཚུངས་ཏེ། འདིར་རྗེས་ཐོབ་ཀྱི་ངེས་ཤེས་ཀྱི་དབང་དུ་བྱས་ལ་མཉམ་གཞག་གིས་དྲངས་པའི་ངེས་ཤེས་འགའ་ཞིག་ནི་མི་རྟག་པར་མངོན་པར་ཞེན་པ་དང་། འགའ་ཞིག་ནི་སྡུག་བསྔལ་བར་མངོན་པར་ཞེན་པ་སོགས་ཡིན་པས་རིགས་ཐ་དད་པའི་ཕྱིར་རོ། །ཐེག་ཆེན་ལ་ནི་མི་མཚུངས་ཏེ། མཉམ་གཞག་གིས་རང་སྟོབས་ཀྱིས་དྲངས་པའི་ངེས་ཤེས་ཐམས་ཅད་སྤྲོས་བྲལ་གྱི་རྣམ་པ་ཅན་ཡིན་པས་རིགས་གཅིག་པའི་ཕྱིར་རོ། །ལྔ་པ་ནི། ལུགས་འདི་མ་རྟོགས་པའི་མཁས་པ་ཁ་ཅིག ཆོས་ཀྱི་བདག་མེད་ཀྱི་ངོས་འཛིན་གཅིག་ཏུ་བྱས་ནས་དེ་ཀླུ་སྒྲུབ་ཀྱི་ལུགས་ལ་ཉན་རང་གིས་རྟོགས། བྱམས་ཆོས་ཀྱི་ལུགས་ལ་ཉན་རང་གིས་མ་རྟོགས་པར་ཁས་བླངས་པས་གང་རུང་ཅིག་ལ་སྐུར་པ་བཏབ་པར་འགྱུར་ཞིང་། མཁས་པ་ཁ་ཅིག་གཉིས་ཆར་གྱི་ལུགས་ལ་ཉན་རང་གིས་ཕུང་པོ་བདེན་མེད་དུ་མ་རྟོགས་པར་ཁས་བླངས་པས་ཀླུ་སྒྲུབ་ཀྱི་གཞུང་ལ་སྦྱོར་བའི་ཚེ་ཀྱོག་བཤད་འབའ་ཞིག་དགོས་པར་འགྱུར་རོ། །ཙོང་ཁ་པས་ཐེག་པ་ཆེ་ཆུང་གཉིས་ཆར་གྱིས་ཆོས་ཐམས་ཅད་ཀྱི་གནས་ལུགས་རྟོགས་པར་མཚུངས་པས་ལྟ་བ་ལ་ཁྱད་པར་མེད་པར་འདོད་པས་ཐེག་ཆེན་གྱི་ལྟ་སྤྱོད་ནམ་མཁའ་ལྟ་བུ་ལ་སྐུར་པ་བཏབ་པར་འགྱུར་ཞིང་། ཡབ་སྲས་ཀྱི་གཞུང་རྣམས་ལས། ཆོས་ཀྱི་བདག་མེད་རྫོགས་པ་དང་། རྒྱས་པར་རྟོགས་མ་རྟོགས་ཀྱི་ཁྱད་པར་བཤད་པ་དང་ཡང་འགལ་ལོ། །དེའི་ལན་དུ་བསྒྲུབ་བྱ་ཆོས་ཀྱི་བདག་མེད་གཅིག་ཉིད་ལ་སྒྲུབ་བྱེད་རིགས་པ་རྒྱས་བསྡུས་ཀྱི་སྒོ་ནས་རྟོགས་པའི་ཁྱད་པར་ཡོད་པར་སྨྲ་བ་ནི་ཐེག་པ་ཆེ་ཆུང་དབང་པོ་རྣོ་རྟུལ་གོ་བཟློག་པར་འགྱུར་ཞིང་། སྒྲིབ་པ་སྤོང་བའི་ནུས་པ་ཆེ་ཆུང་ལ་འཆད་ན་ཡང་། སྤང་བྱ་བདེན་འཛིན་གཅིག་ཉིད་ཉན་ཐོས་བརྩོན་འགྲུས་མྱུར་བས་ཚེ་གསུམ་གྱིས་སྤོང་ནུས་ཤིང་། བྱང་སེམས་ཀྱིས་བསྐལ་པ་གྲངས་མེད་གཉིས་ཀྱི་བར་དུ་སྤོང་མི་ནུས་པར་ཁས་བླངས་པ་དང་ཅིའི་ཕྱིར་མི་འགལ། ཕུང་པོ་བདེན་མེད་དུ་མ་རྟོགས་ཀྱང་མི་རྟག་ལ་སོགས་བཅུ་དྲུག་གིས་བསྡུས་པའི་གང་ཟག་གི་བདག་མེད་མངོན་སུམ་དུ་རྟོགས་པ་ཐེག་པ་གསུམ་ཆར་ལ་ཡོད་པ་ཉན་ཐོས་སྡེ་གཉིས་ཀྱི་གྲུབ་མཐའ་ཡིན་པའི་དོན་མ་རྟོགས་པར་དབུ་མ་པའི་ལུགས་ལ་ཡང་དེ་ལྟ་བུའི་གང་ཟག་ཡོད་ཅིང་། དེས་ཁམས་གསུམ་ན་སྤྱོད་པའི་ཉོན་མོངས་མངོན་གྱུར་བ་སྤངས་ཀྱང་། ཉོན་མོངས་ཀྱི་ས་བོན་མ་སྤངས་པས། བསྟན་རྩ་དགེ་སློང་ཉིད་ཡིན་ན། །དགེ་སློང་ཉིད་ཀྱང་དཀའ་བར་གནས། །ཞེས་སྤྱོད་འཇུག་གི་གཞུང་འདི་ལ་སྦྱར་ནས་འཆད་པ་ནི་མཁས་པའི་མདུན་སར་རྣ་བའི་ཡུལ་དུ་འགྲོ་བའི་གཏམ་མ་ཡིན་ནོ། །དེ་སོགས་ནོར་བ་དཔག་ཏུ་མེད་པ་སྣང་མོད་ཀྱང་། ཐེག་མཆོག་གནད་ཀྱི་ཟླ་ཟེར་དུ་ཡང་ཅུང་ཟད་བཤད་ཟིན་ཞིང་། རྒྱས་པར་ངག་ལས་རྟོགས་པར་བྱའོ། །གཉིས་པ་སྐབས་དོན་ཐེག་དམན་གྱི་རྟོགས་རིགས་སུ་འགྱུར་བའི་གཞི་ཤེས་ལ་གསུམ་སྟེ། རྒྱུ་སྦྱོར་བ། འབྲས་བུ་མཐོང་ལམ། སྒོམ་ལམ་མི་སྟོན་པའི་རྒྱུ་མཚན་ནོ། །དང་པོ་ལ། སྦྱོར་བའི་དབྱེ་བ་དང་། སྦྱོར་བའི་མཉམ་པ་ཉིད་གཉིས་ལས། དང་པོ་ནི། གཟུགས་སོགས་དེ་མི་རྟག་སོགས་དང་། །ཞེས་སོགས་ཏེ། ཚུ་རོལ་ཕ་རོལ་མཐའ་ལ་མིན། །ཞེས་པ་ནས། ཇི་སྐད་བཤད་པ་འདིར་ཤེས་བྱ། །ཞེས་པའི་བར་གྱིས་བྱང་སེམས་ཀྱི་གཞི་ཤེས་ལ་ཐེག་ཆེན་གྱི་རྟོགས་རིགས་དང་། ཐེག་དམན་གྱི་རྟོགས་རིགས་གཉིས་ལས། དང་པོའི་དབང་དུ་བྱས་པའི་སྤང་གཉེན་གྱི་རིམ་པ་བསྟན་པ་ཡིན་ལ། དེ་ལ་ཡང་མཉམ་རྗེས་གཉིས་ལས། མཉམ་གཞག་གི་དབང་དུ་བྱས་པའི་སྤང་གཉེན་གྱི་རིམ་པ་སྐབས་གཉིས་པར་བསྟན་ཟིན་ནས། རྗེས་ཐོབ་ཀྱི་དབང་དུ་བྱས་པའི་སྤང་གཉེན་གྱི་རིམ་པ་བསྟན་པ་ཡིན་ཏེ། མཉམ་གཞག་གི་དབང་དུ་བྱས་པའི་སྤང་གཉེན་གྱི་རིམ་པ་དེ་ཡོད་པར་མཚུངས་ཀྱང་། རྗེས་ཐོབ་ཀྱི་དབང་དུ་བྱས་པའི་སྤང་གཉེན་གྱི་རིམ་པ་དེ་ཤེས་པ་དང་། མ་ཤེས་པའི་བྱེ་བྲག་གིས་རྣམ་མཁྱེན་ལ་ཉེ་བ་དང་རིང་བར་བསྟན་པའི་ཕྱིར། འོ་ན་ཐེག་ཆེན་གྱི་རྟོགས་རིགས་སུ་འགྱུར་བའི་གཞི་ཤེས་མཉམ་གཞག་ཏུ་སྐྱེས་པ་དེ་རྗེས་ཐོབ་ཏུ་མཚན་འཛིན་བཀག་པའི་སྒོ་ནས་ཉམས་སུ་ལེན་དགོས་ན་ཐེག་དམན་གྱི་རྟོགས་རིགས་སུ་གྱུར་པའི་བྱང་སེམས་ཀྱི་གཞི་ཤེས་ལ་ཡང་དེ་ལྟར་དུ་མཚུངས་སམ་ཞེ་ན། དེ་ནི་མི་མཚུངས་ཏེ། དེ་སྦྱོར་ལམ་གྱི་གནས་སྐབས་སུ་ཞེན་སྤྱོད་བཀག་པའི་སྒོ་ནས་རྒྱུན་ལྡན་དུ་བསྒོམས་པས་དེའི་འབྲས་བུ་མཐོང་ལམ་གྱི་གནས་སྐབས་སུ་མངོན་སུམ་དུ་ཤེས་པ་ཙམ་ཡིན་གྱི་དེ་ཕྱིན་ཆད་དུ་རྒྱུན་ལྡན་དུ་བསྒོམས་པ་མེད་པའི་ཕྱིར་རོ། །འོ་ན་སངས་རྒྱས་ཡེ་ཤེས་ཞབས་ཀྱིས་ཐམས་ཅད་ཤེས་པ་ཉིད་ནི་ས་བདུན་པ་ལ་བཞག་གོ །ཞེས་གཞི་ཤེས་ཀྱི་སྦྱོར་བ་ས་བདུན་པའི་བར་དུ་རྗེས་སུ་འགྲོ་བར་གསུངས་པ་དང་འགལ་ལོ་སྙམ་ན་སྐྱོན་མེད་དེ། བྱང་སེམས་ཀྱི་སྦྱོར་ལམ་གྱི་གནས་སྐབས་སུ་མངོན་ཞེན་བཀག་པའི་སྒོ་ནས་མི་རྟག་ལ་སོགས་བཅུ་དྲུག་བསྒོམ་དགོས་ལ། མ་དག་ས་བདུན་གྱི་རྗེས་ཐོབ་ཏུ་མི་རྟག་ལ་སོགས་བཅུ་དྲུག་ལ་མངོན་ཞེན་སྐྱེས་པའི་ཚེ་མངོན་ཞེན་བཀག་དགོས་པས་གཞི་ཤེས་ཀྱི་སྦྱོར་བ་གཞག་པ་ཡིན་གྱི། མངོན་ཞེན་བཀག་པའི་སྒོ་ནས་མི་རྟག་ལ་སོགས་བཅུ་དྲུག་བསྒོམ་མི་དགོས་པའི་ཕྱིར་རོ། །དེ་ལྟ་བུའི་སྦྱོར་བའི་དབྱེ་བ་ལ་འཕགས་སེང་གཉིས་ཀྱིས་སྦྱོར་བ་བཅུར་བྱས་ནས། ཞེན་སྤྱོད་བཀག་པའི་སྦྱོར་བ་བཅུ་ཆར་ལ་སྦྱར་བར་བཞེད་ཅིང་། དེའི་དོན་སྔ་རབས་པ་རྣམས་ཀྱིས་དང་པོ་བཞི་རང་བཞིན་གྱི་སྦྱོར་བ་དང་། ཕྱི་མ་དྲུག་གནས་སྐབས་ཀྱི་སྦྱོར་བར་བཞེད་ཀྱང་ཤེས་བྱེད་མ་མཐོང་ངོ་། །དེས་ན་དང་པོ་བཞི་སོགས་སུ་བཅད་ནས་ཞེན་སྤྱོད་བཀག་པར་རྩ་བར་གསུངས་པའི་དོན་ནི་བདེན་བཞིའི་སྟེང་གི་ཁྱད་ཆོས་ལ་ཞེན་སྤྱོད་བཀག་པས་ན། ཉན་ཐོས་ཀྱི་རྟོགས་རིགས་ལ་ཞེན་སྤྱོད་བཀག་པར་མངོན་ཏེ། གཟུགས་སོགས་ཞེས་པས་བདེན་པ་བཞི་བསྟན། དེ་མི་རྟག་སོགས་ཞེས་པས་སྡུག་བསྔལ་བདེན་པའི་ཁྱད་ཆོས་བསྟན། དེ་མ་རྫོགས་དང་། ཞེས་པས་ཀུན་འབྱུང་བདེན་པའི་ཁྱད་ཆོས་བསྟན། རབ་རྫོགས་དང་། ཞེས་པས་འགོག་བདེན་གྱི་ཁྱད་ཆོས་དང་། དེ་ལ་ཆགས་པ་མེད་ཉིད་དང་། །ཞེས་པས་ལམ་བདེན་གྱི་ཁྱད་ཆོས་སྟོན། དེ་དག་ལ་ཞེན་སྤྱོད་བཀག་ནས་བསྒོམས་པའི་འབྲས་བུ་ལ་མཐོང་ལམ་གྱི་གནས་སྐབས་སུ་བདེན་བཞིའི་སྟེང་གི་རྟག་མི་རྟག་སོགས་ཀྱི་སྤྲོས་པ་སོ་གཉིས་དང་བྲལ་བའི་ཆོས་དབྱིངས་མངོན་སུམ་དུ་མཐོང་བ་འབྱུང་བའི་ཕྱིར་རོ། །ཕྱི་མ་དྲུག་གིས་རང་རྒྱལ་གྱི་རྟོགས་རིགས་ལ་ཞེན་སྤྱོད་བཀག་པ་སྟོན་ཏེ། དང་པོ་ལྔས་ནི། ཀུན་ནས་ཉོན་མོངས་ཀྱི་གཟུང་བ་སོགས་རང་བཞིན་མེད་པར་རྟོགས་པ་སོགས་བསྟན་ཞིང་། སྣང་བ་རྣམ་བདུན་གྱིས་ནི་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་པ་བསྟན་པའི་ཕྱིར་ཏེ། དེ་ཉིད་ཀྱི་མཇུག་ཏུ། ཉིར་སྣང་དུ། ཐམས་ཅད་ཤེས་པ་ཉིད་ལ་ཉན་ཐོས་ལ་སོགས་པའི་དབང་དུ་བྱས་ནས་དཔེའི་དོན་འཐད་པར་བྱས་པས་གང་གསུངས་པ་ཡིན་ནོ། །ཞེས་གསུངས་པའི་ཕྱིར་རོ། །སློབ་དཔོན་བུདྡྷ་ཤྲཱི། གསེར་གླིང་པ་རྣམས་ཀྱིས་མ་རྫོགས་པས་ཀུན་བཏགས་དང་། རྫོགས་པས་ཡོངས་གྲུབ་བསྟན་ཅིང་། གཞན་དབང་ཤུགས་ལ་བསྟན་པར་བཞེད་དོ། །འགྲེལ་ཆེན་དུ། མཚན་ཉིད་ཀྱིས་སྟོང་པའི་ཕྱིར་བཏགས་པའི་གཟུགས་ནི་ཡོངས་སུ་མ་རྫོགས་པའོ། །ཡོན་ཏན་གྱི་ཚོགས་དང་ལྡན་པའི་ཕྱིར་ཆོས་ཉིད་ཀྱི་གཟུགས་ནི་རབ་ཏུ་རྫོགས་པའོ། །ཞེས་དང་། ཤེར་སྒྲོན་དུ་མ་རྫོགས་པ་དང་རྫོགས་པའི་གཟུགས་ཀུན་བཏགས་པ་དང་། ཡོངས་སུ་གྲུབ་པ་ལ་སྤྱོད་པ་བཀག་པའི་སྒོ་ནས་མི་དམིགས་པའི་ཚུལ་གྱིས་ཉེ་བར་སྦྱོར་ཞེས་དང་། རྟོགས་དཀའི་སྣང་བར། མཚན་ཉིད་ཀྱི་སྟོང་པ་ཉིད་དུ་བཏགས་པའི་ཕྱིར་དང་། ཡོན་ཏན་གྱི་ཚོགས་དང་ལྡན་པ་ཉིད་དང་། ཆོས་ཉིད་ཀྱི་ངོ་བོ་ཉིད་ཡིན་པས་སོ་སོར་མ་རྫོགས་པ་དང་རྫོགས་པ་ཉིད་དེ། གཟུགས་ལ་སོགས་པ་མ་ཚང་བ་དང་། ཚང་བ་ཉིད་དོ། །ཞེས་སོ། །གཉལ་པས། མ་རྫོགས་པ་བྱིས་པའི་ཕུང་པོ་ལྔ་དང་། རྫོགས་པ་རྒན་པོའི་ཕུང་པོ་ལྔ་ལ་འཆད་ཅིང་ཀུན་བཏགས་སོགས་སེམས་ཙམ་པའི་ལུགས་ཡིན་པས་དེ་འདིར་འཆད་པ་མི་འཐད་ཅེས་དང་། གཟད་པས། མ་རྫོགས་པ་སྟེ་མ་སྨིན་པ། རྫོགས་པ་སྟེ་སྨིན་པ་ལ་འཆད། ཁ་ཅིག ཚོགས་རྫོགས་མ་རྫོགས་ལ་འཆད་དོ། །འབྲེ་ཨར་དང་། གཡག་རོང་གཉིས་སློབ་དཔོན་གྱི་བཞེད་པ་ལྟར་མཛད་པས་དེ་དག་གི་ལྟར་ན། འདིར་མཚན་ཉིད་གསུམ་གྱི་རྣམ་གཞག་ལ་དཔྱད་པ་ལ། སྤྱིར་གྲུབ་མཐའ་སྨྲ་བ་བཞི་པོ་རེ་རེ་ལ་ཡང་གནས་ལུགས་འབྱེད་པ་དང་། གསུང་རབ་འཆད་པའི་སྒོ་ཐུན་མོང་མ་ཡིན་པ་རེ་རེ་ཡོད་དེ། བྱེ་བྲག་ཏུ་སྨྲ་བས་ནི་ཤེས་བྱ་གཞི་ལྔ་དང་། མདོ་སྡེ་པས་ནི་རང་སྤྱི་གཉིས་དང་། སེམས་ཙམ་པས་ནི་མཚན་ཉིད་གསུམ་དང་། དབུ་མ་པས་ནི་བདེན་པ་གཉིས་ལ་གནས་ལུགས་འབྱེད་པ་དང་། གསུང་རབ་འཆད་པའི་སྒོ་ཐུན་མོང་མ་ཡིན་པར་མཛད་པའི་ཕྱིར་རོ། །དེས་ན་མཚན་ཉིད་གསུམ་གྱི་རྣམ་གཞག་འདི་སེམས་ཙམ་པའི་ལུགས་བཞིན་དུ་འཆད་པ་ལ་དོན་གསུམ་སྟེ། ངོ་བོ་ངོས་གཟུང་བ། དེས་གནས་ལུགས་ཇི་ལྟར་འབྱེད་པའི་ཚུལ། གསུང་རབ་ཇི་ལྟར་འགྲེལ་བའི་ཚུལ་ལོ། །དང་པོ་ལ་ཀུན་བཏགས་ནི། དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་མཚན་མ་ལ་གཟུགས་ཀྱི་ཕུང་པོ་ཞེས་ངོ་བོ་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་གཞག་པ་དང་། གཟུགས་ཀྱི་ཕུང་པོ་སྐྱེ་བ་ཞེའམ། འགག་པ་ཞེའམ། གཟུགས་ཀྱི་ཕུང་པོ་སྤངས་པ་དང་། ཡོངས་སུ་ཤེས་པ་ཞེས་ངོ་བོ་ཉིད་ཀྱི་མཚན་ཉིད་དམ། བྱེ་བྲག་གི་མཚན་ཉིད་དུ་མིང་དང་བརྡས་རྣམ་པར་བཞག་པ་གང་ལགས་པ་དེ་ནི་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་ལགས་ཏེ། ཞེས་གསུངས་སོ། །དེ་ལ་འདུ་བྱེད་ཀྱི་མཚན་མ་ཞེས་པ་ཡན་ཆད་ཀྱིས་ཀུན་བཏགས་འདོགས་པའི་གཞིར་གྱུར་པའི་གཞན་དབང་སྟོན་ཏེ། འོག་མ་གཉིས་པོ་ལ་ཡང་དེ་བཞིན་དུ་ཤེས་པར་བྱའོ། །རྣམ་པར་རྟོག་པའི་སྤྱོད་ཡུལ་ཞེས་པ་ནི་ཀུན་བཏགས་ཀྱི་ཁྱད་ཆོས་ཡིན་ལ། དེའི་གནས་འདུ་བྱེད་ཀྱི་མཚན་མ་ནི་གཞན་དབང་ངོ་། །གཟུགས་ཀྱི་ཕུང་པོ་ཞེས་པ་མན་ཆད་ཀྱིས་གཞན་དབང་དེ་ལ་ཀུན་བཏགས་ཇི་ལྟར་འདོགས་པའི་ཚུལ་བསྟན་ཏེ། ངོ་བོ་དང་ཁྱད་པར་གྱི་མཚན་ཉིད་རྣམ་པར་རྟོག་པས་སྒྲོ་བཏགས་ཏེ། འཇིག་རྟེན་གྱི་ཐ་སྙད་དུ་བྱེད་པ་རྣམས་སོ། །གཞན་དབང་ནི་དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་གང་ལགས་པ་དེ་ནི་གཞན་གྱི་དབང་གི་མཚན་ཉིད་ལགས་ཏེ། ཞེས་གསུངས་ལ། འདུ་བྱེད་ཀྱི་མཚན་མ་ཞེས་པའི་དོན་ནི་རྒྱུ་དང་རྐྱེན་ལས་སྐྱེས་པ་ལ་འཇོག་ལ། རྣམ་པར་རྟོག་པའི་སྤྱོད་ཡུལ་ནི་ཀུན་བཏགས་ཀྱི་ཁྱད་ཆོས་སུ་འགྲོ་བ་ཡང་སྔར་བཞིན་ནོ། །ཡོངས་གྲུབ་ནི་དགོངས་འགྲེལ་དུ། རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད་ཀུན་བཏགས་པའི་མཚན་ཉིད་དེར་ཡོངས་སུ་མ་གྲུབ་ཅིང་། ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཏེ། ཞེས་གསུངས་ལ། དེའི་དོན་ནི་གཞན་དབང་གི་སྟེང་དུ་ཀུན་བཏགས་ཁོ་ནས་སྟོང་པའི་ཆ་ནས་སྟོང་ཉིད་དུ་བཞག་པ། རང་གི་ངོ་བོ་ཆོས་ལ་བདག་མེད་པ་དེ་བཞིན་ཉིད་དང་། ཡང་དག་མཐའ་ལ་སོགས་པ་མིང་གི་རྣམ་གྲངས་ལྔ་དང་ལྡན་པ་གང་ལ་དམིགས་ནས་བསྒོམས་ན་སྒྲིབ་པ་རྣམ་པར་དག་པར་འགྱུར་བའི་དམིགས་པ་ཆོས་ཀྱི་དབྱིངས་ལ་ཡོངས་གྲུབ་ཏུ་འཇུག་གོ །མདོར་བསྡུ་ན། གཟུང་འཛིན་གཉིས་སུ་སྣང་བ་སྐྱེ་བའི་གཞིར་གྱུར་པ་རྒྱུ་རྐྱེན་གཞན་ལས་སྐྱེས་པའི་ཤེས་པ་འཁོར་བ་ཐོག་མ་མེད་པ་ནས་སངས་རྒྱས་ཀྱི་སའི་བར་དུ་རྒྱུན་མ་ཆད་པ་ཞིག་ལ་གཞན་དབང་དུ་འཇོག་ཅིང་། དེ་ཉིད་བག་ཆགས་ཀྱི་དབང་གིས་གང་ཟག་དང་། གཟུང་འཛིན་གཉིས་སུ་སྣང་བ་སྐྱེ་བའི་ཚེ་ན་དེ་ལྟར་སྣང་བའི་ཤེས་པ་དེའི་ཡུལ་གང་ཟག་དང་གཟུང་འཛིན་གཉིས་ལ་ཀུན་བཏགས་སུ་འཇོག་གོ །དེས་ན་རྣམ་པར་རྟོག་པའི་སྤྱོད་ཡུལ་ཞེས་གསུངས་པའི་རྣམ་རྟོག་ནི་ཡང་དག་པ་མ་ཡིན་པའི་ཀུན་ཏུ་རྟོག་པ་ཙམ་མོ། །གཞན་དབང་དེ་ཉིད་འཁྲུལ་པའི་སྣང་བ་དང་བཅས་པའི་ཚེ་ན་མ་དག་པ་གཞན་དབང་དང་། འཁྲུལ་པའི་སྣང་བ་རེ་ཞིག་འགག་པ་འཕགས་པ་སློབ་པའི་མཉམ་གཞག་དང་། གཏན་ནས་འགག་པ་སངས་རྒྱས་ཀྱི་སར་དག་པ་གཞན་དབང་དུ་འཇོག་ཅིང་། ཕྱི་མ་འདི་ལ་ཡོངས་གྲུབ་གཉིས་སུ་ཕྱེ་བའི་ཚེ་ཕྱིན་ཅི་མ་ལོག་པའི་ཡོངས་གྲུབ་དང་། དོན་དམ་གསུམ་དུ་ཕྱེ་བའི་ཚེ་སྒྲུབ་པ་དོན་དམ་དུ་གཞག་པ་ཡོད་མོད་ཀྱི་ཡོངས་གྲུབ་ཀྱི་ཡུལ་ཅན་དང་། དོན་དམ་གྱི་ཡུལ་ཅན་ལ་དགོངས་ནས་དེར་གཞག་པ་ཡིན་གྱི་ཡོངས་གྲུབ་དང་། དོན་དམ་བདེན་པ་མཚན་ཉིད་པ་ནི་མ་ཡིན་ཏེ། དེ་ཡིན་ན། འདུས་མ་བྱས་ཡིན་དགོས་པ་ལས། འདི་ནི་འདུས་བྱས་ཡིན་པའི་ཕྱིར་རོ། །ཇི་སྐད་དུ། དགོངས་འགྲེལ་ལས། ཇི་ལྟར་འཕགས་པའི་ལམ་ཡན་ལག་བརྒྱད་པ་ཕན་ཚུན་མཚན་ཉིད་ཐ་དད་པ་ཡིན་པ་དེ་བཞིན་དུ་གལ་ཏེ་ཆོས་དེ་དག་གི་དེ་བཞིན་ཉིད་དོན་དམ་པ་ཆོས་བདག་མེད་པ་ཡང་མཚན་ཉིད་ཐ་དད་པ་ཡིན་པར་གྱུར་ན་ནི། དེས་ན་དེ་བཞིན་ཉིད་དོན་དམ་པ་ཆོས་ལ་བདག་མེད་པ་ཡང་རྒྱུ་དང་བཅས་པ་ཡིན་པར་འགྱུར་རོ། །རྒྱུ་ལས་བྱུང་བ་ཉིད་ཡིན་ན་ནི་འདུས་བྱས་ཡིན་པར་འགྱུར་རོ། །འདུས་བྱས་ཡིན་ན་ནི་དོན་དམ་པ་ཡིན་པར་མི་འགྱུར་རོ། །ཞེས་དང་། དབུས་མཐར། དམ་པའི་དོན་ནི་གཅིག་པུའོ། །ཞེས་གསུངས་ཤིང་། དེའི་འགྲེལ་པར་ཡང་། དོན་དམ་པའི་བདེན་པ་ནི་ཡོངས་སུ་གྲུབ་པའི་ངོ་བོ་ཉིད་གཅིག་པུར་རིག་པར་བྱའོ། །ཞེས་དང་། མདོ་སྡེ་རྒྱན་དུ། ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་འབྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམ་པར་དག་གྱུར་དེ་ནི་དོན་དམ་མཚན། །ཞེས་གསུངས་སོ། །འོ་ན་བསྡུ་བར། གཞན་དབང་གི་དབང་དུ་མཛད་ནས་རྫས་དང་། དོན་དམ་པར་གཉིས་ཀར་ཡང་དེ་བཞིན་དུ་ཡོད་པར་རིག་པར་བྱའོ། །ཞེས་དང་། ཡེ་ཤེས་སྙིང་པོ་ཀུན་ལས་བཏུས་པར། གཟུང་དང་འཛིན་པ་ལས་གྲོལ་བའི། །རྣམ་ཤེས་དམ་པའི་དོན་དུ་ཡོད། །བློ་མཚོའི་ཕ་རོལ་ཕྱིན་པ་ཡི། །རྣལ་འབྱོར་སྤྱོད་པའི་གཞུང་དུ་གྲགས། །ཞེས་གཞན་དབང་དོན་དམ་དུ་ཡོད་པར་བཤད་པ་དང་འགལ་ལོ་ཞེ་ན། ཉན་ཐོས་སྡེ་གཉིས་ཀྱི་ལུགས་ལ་དོན་དམ་དུ་ཡོད་ན། དོན་དམ་བདེན་པ་ཡིན་པས་ཁྱབ་ཀྱང་། རྣལ་འབྱོར་སྤྱོད་པའི་ལུགས་ལ་རང་གི་མཚན་ཉིད་ཀྱིས་གྲུབ་པ་ལ་དོན་དམ་པར་བྱས་པ་དང་། རྣམ་པར་དག་པའི་དམིགས་པ་ལ་དོན་དམ་པར་བྱས་པ་གཉིས་ལས། སྔ་མ་ལ་དོན་དམ་བདེན་པས་མ་ཁྱབ་པས་སྐྱོན་མེད་དོ། །དེ་ལྟར་ན་གཞན་དབང་ཡིན་ན། ཀུན་རྫོབ་བདེན་པ་ཡིན་པས་ཁྱབ་སྟེ། དོན་དམ་བདེན་པ་ལ་མཚན་ཉིད་ལྔ་ལྡན་དུ། དགོངས་འགྲེལ་དང་། མདོ་སྡེ་རྒྱན་དུ་བཤད་ཅིང་། གཞན་དབང་དེ་གཞན་དབང་དང་གཅིག་ཡིན་པས་དེ་བཞིན་ཉིད་མ་ཡིན་ཞེས་པའི་ཁྱད་ཆོས་ཀྱང་མི་གྲུབ་པའི་ཕྱིར་དང་། སྐྱེ་དང་། འཇིག་མེད་དང་། འཕེལ་འགྲིབ་མེད་པའི་མཚན་ཉིད་ཀྱང་མ་གྲུབ་པའི་ཕྱིར་རོ། །འོ་ན་དབུས་མཐར། རྣམ་དག་སྤྱོད་ཡུལ་རྣམ་གཉིས་ཏེ། །གཅིག་པུ་ཁོ་ནར་བརྗོད་པ་ཡིན། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། རྣམ་པར་དག་པའི་ཡེ་ཤེས་གཉིས་སུ་བྱས་ནས། རྗེས་ཐོབ་དག་པ་འཇིག་རྟེན་པའི་སྤྱོད་ཡུལ་ལ་ཡོངས་གྲུབ་ཏུ་གཞག་པ་ནི། ཕྱིན་ཅི་མ་ལོག་པའི་ཡོངས་གྲུབ་ཀྱི་དབང་དུ་བྱས་པའི་ཕྱིར་རོ། །མཚན་ཉིད་གསུམ་གྱི་དཔེ་ལ་དགོངས་འགྲེལ་དུ་དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན་ནམ་མཁའི་མེ་ཏོག་ཅི་ལྟ་བ་དེ་ལྟ་བུར་ནི་མཚན་ཉིད་ངོ་བོ་ཉིད་མེད་པར་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན། སྒྱུ་མ་བྱས་པ་ཇི་ལྟ་བ་དེ་ལྟ་བུར་ནི་སྐྱེ་བ་ངོ་བོ་ཉིད་མེད་པ་ཉིད་བལྟ་བར་བྱའོ། །དོན་དམ་པ་ངོ་བོ་ཉིད་མེད་པ་ཉིད་དེ་ལས་ཀྱང་གཅིག་བལྟ་བར་བྱའོ། །དོན་དམ་ཡང་དག་འཕགས་དེ་ལ་འདི་ལྟ་སྟེ། དཔེར་ན། ནམ་མཁའ་ནི་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་། ཐམས་ཅད་དུ་སོང་བ་ཇི་ལྟ་བ་དེ་ལྟ་བུར་ནི་དོན་དམ་པ་ངོ་བོ་ཉིད་མེད་པ་དེ་ལས་ཆོས་བདག་མེད་པས་རབ་ཏུ་ཕྱེ་བ་དང་། ཐམས་ཅད་དུ་སོང་བ་གཅིག་བལྟ་བར་བྱ་སྟེ། ཞེས་གསུང་ལ། ཀུན་བཏགས་ལ་ནམ་མཁའི་མེ་ཏོག་དཔེར་བྱས་པ་ནི་ཐ་སྙད་དུ་མེད་པའི་དཔེར་མ་ཡིན་གྱི་རང་གི་མཚན་ཉིད་ཀྱིས་མ་གྲུབ་པའི་དཔེའོ། །གཞན་དབང་ལ་སྒྱུ་མ་བྱས་པ་དཔེར་བྱས་པ་ནི། སྒྱུ་མའི་སྤྲུལ་གཞི་རྟ་གླང་དུ་མེད་ཀྱང་རྟ་གླང་དུ་སྣང་བ་ལྟར་གཞན་དབང་ཡང་གཟུང་འཛིན་གཉིས་སུ་མེད་ཀྱང་། གཟུང་འཛིན་གཉིས་སུ་སྣང་བའི་དཔེའོ། །ཡོངས་གྲུབ་ལ་ནམ་མཁའ་དཔེར་བྱས་པ་ནི་ནམ་མཁའ་ལ་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་། ཐམས་ཅད་དུ་སོང་བའི་ཆོས་གཉིས་ཡོད་པ་ལྟར་ཡོངས་གྲུབ་ཆོས་ཉིད་དེ་ཡང་ཆོས་ལ་བདག་མེད་པས་རབ་ཏུ་ཕྱེ་བ་དང་། ཆོས་ཐམས་ཅད་ལ་སོང་བའི་ཆོས་གཉིས་ཡོད་པའི་ཕྱིར་རོ། །དོན་དམ་པ་ངོ་བོ་ཉིད་མེད་པ་དེ་ལས་ཀྱང་གཅིག་བལྟ་བར་བྱ་སྟེ། ཞེས་པའི་དོན་ནི་ལུགས་འདི་ལ་དོན་དམ་པ་ངོ་བོ་ཉིད་མེད་པ་ལ་གཞན་དབང་དུ་སྦྱར་བ་དང་། ཡོངས་གྲུབ་ལ་སྦྱར་བ་གཉིས་ཡོད་པ་ལས། ཕྱི་མའི་དབང་དུ་བྱས་ཞེས་པའི་དོན་ཏེ་འཆད་པར་འགྱུར་རོ། །མདོ་སྡེ་རྒྱན་དུ། ཇི་ལྟར་སྒྱུ་མ་དེ་བཞིན་དུ། །ཡང་དག་མ་ཡིན་ཀུན་རྟོག་འདོད། །སྒྱུ་མའི་རྣམ་པ་ཇི་ལྟ་བུ། །དེ་བཞིན་གཉིས་སུ་འཁྲུལ་པར་བརྗོད། །ཅེས་སྒྱུ་མའི་སྤྲུལ་གཞི་གཞན་དབང་གི་དཔེ་དང་། སྒྱུ་མའི་རྣམ་པ་ཀུན་བཏགས་ཀྱི་དཔེར་གསུངས་པ་ནི་གཞན་དབང་གཟུང་འཛིན་གཉིས་སུ་འཁྲུལ་པའི་གཞི་དང་། ཀུན་བཏགས་འཁྲུལ་པའི་དབང་གིས་བྱུང་བའི་གཟུང་འཛིན་གཉིས་ལ་འཇོག་པའི་དཔེའོ། །གཉིས་པ་དེས་གནས་ལུགས་ཇི་ལྟར་འབྱེད་པའི་ཚུལ་ལ་གསུམ་སྟེ། བྱང་ས་ནས། བསྡུ་བ་ནས། དབུས་མཐའ་ནས་བཤད་པའི་ཚུལ་ལོ། །དང་པོ་ལ་སྒྲོ་སྐུར་སྤང་ཚུལ་སྤྱིར་བསྟན། སྐུར་འདེབས་སྤང་ཚུལ་བྱེ་བྲག་ཏུ་བཤད། དེས་ན་དབུ་མའི་ལམ་དུ་གྲུབ་པ་དང་གསུམ་ལས། དང་པོ་ནི། བྱང་སར། གཟུགས་ལ་སོགས་པའི་ཆོས་རྣམས་དང་། གཟུགས་ལ་སོགས་པའི་དངོས་པོ་ལ་འདོགས་པའི་ཚིག་གིས་ངོ་བོ་ཉིད་ཀྱིས་རང་གི་མཚན་ཉིད་ཡོད་པ་མ་ཡིན་པ་ལ་སྒྲོ་བཏགས་ནས་མངོན་པར་ཞེན་པ་གང་ཡིན་པ་དང་། བཏགས་པའི་ཚིག་གིས་མཚན་མའི་གཞི་བཏགས་པའི་ཚིག་གི་མཚན་མའི་རྟེན་དུ་གྱུར་པ་བརྗོད་དུ་མེད་པའི་བདག་ཉིད་ཀྱི་དོན་དམ་པར་ཡོད་པ་ཡང་དག་པའི་དངོས་པོ་ལ་ཐམས་ཅད་ཀྱིས་ཐམས་ཅད་དུ་མེད་དོ། །ཞེས་སྐུར་པ་འདེབས་ཤིང་ཆུད་གཟོན་པར་བྱེད་པ་གང་ཡིན་པ་འདི་གཉིས་ནི་ཆོས་འདུལ་བ་འདི་ལ་རབ་ཏུ་ཉམས་པ་ཡིན་པར་རིག་པར་བྱའོ། །ཞེས་གསུངས་སོ། །དེ་ལ་མངོན་པར་ཞེན་པ་གང་ཡིན་པ་ཞེས་པ་ཡན་ཆད་ཀྱིས་སྒྲོ་འདོགས་ཚུལ་བསྟན་ཏེ། གཟུགས་ལ་སོགས་པའི་ཆོས་རྣམས་ལ་ངོ་བོ་དང་ཁྱད་པར་དུ་རྣམ་པར་རྟོག་པས་སྒྲོ་བཏགས་པ་ཀུན་བཏགས་ཡིན་པས་དེ་རང་གི་མཚན་ཉིད་ཀྱིས་ཡོད་པར་འདོད་པ་ནི་སྒྲོ་བཏགས་པའོ། །བཏགས་པའི་ཚིག་གིས་ཞེས་པ་མན་ཆད་ཀྱིས་ནི་སྐུར་བ་འདེབས་ཚུལ་བསྟན་ཏེ། ཀུན་བཏགས་འདོགས་པའི་གཞི་གཞན་དབང་རང་གི་མཚན་ཉིད་ཀྱིས་མ་གྲུབ་པར་འདོད་པ་ནི་སྐུར་པ་འདེབས་པའོ། །ཆུད་གཟོན་པར་བྱེད་པ་གང་ཡིན་པ་ཞེས་པ་མན་ཆད་ཀྱིས་ནི་དངོས་སུ་ཐེག་ཆེན་ལས་ཉམས་པར་བསྟན་ཅིང་ཤུགས་ལ་དེ་ལྟ་བུའི་སྒྲོ་སྐུར་སྤང་དགོས་པ་བསྟན་ཏོ། །གཉིས་པ་ནི། བྱང་སར། གཟུགས་ལ་སོགས་པའི་ཆོས་རྣམས་ཀྱི་དངོས་པོ་ཙམ་ལ་སྐུར་པ་འདེབས་པ་ལ་ནི་དེ་ཁོ་ན་ཡང་མེད་ལ་འདོགས་པ་ཡང་མེད་དེ། དེ་གཉིས་ཀ་ཡང་མི་རིགས་སོ། །འདི་ལྟ་སྟེ་དཔེར་ན། གཟུགས་ལ་སོགས་པའི་ཕུང་པོ་རྣམས་ཡོད་ན་གང་ཟག་གདགས་སུ་རུང་གི་མེད་དུ་ཟིན་ན་ནི་དངོས་པོ་མེད་པ་ལ་གང་ཟག་གདགས་སུ་མེད་དོ། །དེ་བཞིན་དུ་གཟུགས་ལ་སོགས་པའི་ཆོས་རྣམས་ཀྱི་དངོས་པོ་ཙམ་ཡོད་ན། གཟུགས་ལ་སོགས་པའི་ཆོས་འདོགས་པའི་ཚིག་ཉེ་བར་གདགས་སུ་རུང་གི་དངོས་པོ་མེད་པ་ལ་གདགས་པའི་ཚིག་གིས་ཉེ་བར་འདོགས་པ་མེད་དོ། །དེ་ལ་འདོགས་པའི་གཞི་མེད་དུ་ཟིན་ན་ནི་གཞི་མེད་པར་འགྱུར་བས་འདོགས་པ་ཡང་མེད་པར་འགྱུར་རོ། །ཞེས་གསུངས་སོ། །དེའི་དོན་ནི་གཉིས་ཀ་ཡང་མི་རིགས་སོ། །ཞེས་པ་ཡན་ཆད་ཀྱིས་གཞན་དབང་ལ་སྐུར་པ་བཏབ་ན་མཚན་ཉིད་གཞན་གཉིས་འཇོག་ཏུ་མི་རུང་བར་བསྟན། འདི་ལྟ་སྟེ། ཞེས་པ་མན་ཆད་ཀྱིས་ཀུན་བཏགས་མི་རུང་བའི་སྒྲུབ་བྱེད་རྒྱས་པར་བསྟན་ཏོ། །གཟུགས་ལ་སོགས་པའི་ཆོས་ཞེས་པ་ནི་རྣམ་པར་རྟོག་པས་སྒྲོ་བཏགས་པའི་ཀུན་བཏགས་ཡིན་ལ། དངོས་པོ་ཙམ་ཞེས་པ་ནི་དེའི་བཞི་གཞན་དབང་ངོ་། །གསུམ་པ་ནི། བྱང་སར། དངོས་པོ་སྔ་མ་གང་ཡིན་པ་དང་། དངོས་པོ་མེད་པ་འདི་གཉིས་ཀྱི་ཡོད་པ་དང་། མེད་པ་ལས་རྣམ་པར་གྲོལ་བའི་ཆོས་ཀྱི་མཚན་ཉིད་ཀྱིས་བསྡུས་པའི་དངོས་པོ་དེ་ནི་གཉིས་སུ་མེད་པ་ཡིན་ནོ། །གཉིས་སུ་མེད་པ་གང་ཡིན་པ་དེ་ནི་དབུ་མའི་ལམ་མཐའ་གཉིས་སྤངས་པ་བླ་ན་མེད་པ་ཞེས་བྱ་སྟེ། ཞེས་གསུངས་སོ། །དེ་ལ་དངོས་པོ་སྔ་མ་ནི་གཞན་དབང་དང་། དངོས་པོ་མེད་པ་ནི་ཀུན་བཏགས་ཡིན་ལ། ཀུན་བཏགས་ཡོད་པ་དང་གཞན་དབང་མེད་པ་ལས་རྣམ་པར་གྲོལ་བའི་ཆོས་ཀྱིས་བསྡུས་པའི་དངོས་པོ་ནི་གཟུང་འཛིན་གཉིས་སུ་མེད་པའི་ཡོངས་གྲུབ་ཡིན་པས། དེ་ཉིད་ལ་མཐའ་གཉིས་སྤངས་པའི་དབུ་མར་འཇོག་ཅེས་པའི་དོན་ནོ། །དེས་ན་ལུགས་འདི་ལ་འདུས་མ་བྱས་དང་དངོས་པོ་མི་འགལ་ཏེ། འདིར་ཡང་དངོས་པོ་དེ་ནི་གཉིས་སུ་མེད་པ་ཡིན་ནོ། །ཞེས་དང་། དབུས་མཐར། གཉིས་དངོས་མེད་པའི་དངོས་མེད་པའི། །དངོས་པོ་སྟོང་པའི་མཚན་ཉིད་དོ། །ཞེས་དང་། ཀུན་བཏུས་སུ་འདུས་མ་བྱས་ཀྱི་དངོས་པོ་བརྒྱད་གསུངས་པ་དང་། འཕགས་མཆོག་ཀླུ་སྒྲུབ་ཀྱིས་སེམས་ཙམ་པའི་ལུགས་ཀྱི་ཡོངས་གྲུབ་ཀྱི་དབང་དུ་མཛད་ནས། ཡང་དག་རྫས་དངོས་རྟག་པ་ལགས། །ཞེས་གསུངས་པའི་ཕྱིར་རོ། །འདུས་མ་བྱས་དང་དངོས་པོའི་གཞི་མཐུན་མེད་པ་ནི། དངོས་སྨྲ་བ་གསུམ་ལས། མདོ་སྡེ་པ་ཁོ་ནའི་ལུགས་ཡིན་གྱི་བྱེ་བྲག་ཏུ་སྨྲ་བ་དང་། སེམས་ཙམ་པ་གཉིས་ཀྱི་ལུགས་ལ་དེ་གཉིས་ཀྱི་གཞི་མཐུན་ཡོད་པར་རྗེ་བཙུན་གྲགས་པ་རྒྱལ་མཚན་གྱིས་གསུངས་པ་འདི་ཉིད་གསུང་རབ་ཀྱི་གནད་དུ་སྣང་ངོ་། །གཉིས་པ་བསྡུ་བ་ལས་གསུངས་པའི་ཚུལ་ལ་སྒྲོ་སྐུར་སྤངས་པའི་ཚུལ་དང་། དེས་ན་དབུ་མའི་ལམ་དུ་གྲུབ་པ་གཉིས་ལས། དང་པོ་ནི། བསྡུ་བར། ཐེག་པ་ཆེན་པོ་ལ་རང་རང་གིས་ཉེས་པར་གཟུང་བས་འདི་སྐད་ཅེས། ཀུན་རྫོབ་ཏུ་ནི་ཐམས་ཅད་ཡོད་ལ་དོན་དམ་པར་ནི་ཐམས་ཅད་མེད་དོ། །ཞེས་ཟེར་རོ། །དེ་ལ་འདི་སྐད་ཅེས་ཚེ་དང་ལྡན་པ་དོན་དམ་པ་ནི་གང་ཡིན། ཀུན་རྫོབ་ནི་གང་ཡིན་ཞེས་བརྗོད་པར་བྱའོ། །དེ་སྐད་དྲིས་པ་ན་གལ་ཏེ་འདི་སྐད་ཅེས་ཆོས་ཐམས་ཅད་ཀྱི་ངོ་བོ་ཉིད་མེད་པ་གང་ཡིན་པ་དེ་ནི་དོན་དམ་པ་ཡིན་ལ། ངོ་བོ་ཉིད་མེད་པའི་ཆོས་དེ་དག་ལ་ངོ་བོ་ཉིད་དུ་དམིགས་པ་གང་ཡིན་པ་དེ་ནི་ཀུན་རྫོབ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཡོད་པ་མ་ཡིན་པ་དག་ལ་ཀུན་རྫོབ་ཏུ་བྱེད་པ་དང་། འདོགས་པ་དང་། མངོན་པར་བརྗོད་པ་དང་། ཐ་སྙད་དུ་བྱེད་པའི་ཕྱིར་རོ། །ཞེས་ལན་འདེབས་པར་གྱུར་ན་ཞེས་ངོ་བོ་ཉིད་མེད་པར་སྨྲ་བའི་བདེན་གཉིས་ཀྱི་ངོས་འཛིན་ཕྱོགས་སྔར་བྱས་པའོ། །དེ་ལ་ཀུན་རྫོབ་ཀྱི་ངོས་འཛིན་འགོག་པ་ནི་བསྡུ་བར། དེ་ལ་འདི་སྐད་ཅེས་བརྗོད་པར་བྱ་སྟེ། ངོ་བོ་ཉིད་དུ་དམིགས་པ་དེ་མངོན་པར་བརྗོད་པ་དང་། ཀུན་རྫོབ་ཀྱི་རྒྱུ་ལས་བྱུང་བ་ཡིན་པར་འདོད་དམ། གལ་ཏེ་མངོན་པར་བརྗོད་པ་དང་། ཀུན་རྫོབ་ཙམ་ཞིག་ཡིན་པ་འདོད། གལ་ཏེ་མངོན་པར་བརྗོད་པ་དང་། ཀུན་རྫོབ་ཀྱི་རྒྱུ་ལས་བྱུང་བ་ཡིན་ན་ནི་དེས་ན་མངོན་པར་བརྗོད་པ་དང་། ཀུན་རྫོབ་ཀྱི་རྒྱུ་ལས་བྱུང་བ་ཡིན་པས་ཡོད་པ་མ་ཡིན་ནོ་ཞེས་བྱར་མི་རུང་ངོ་། །གལ་ཏེ་མངོན་པར་བརྗོད་པ་དང་། ཀུན་རྫོབ་ཙམ་ཞིག་ཡིན་ན་ནི་དེས་ན་གཞི་མེད་པར་མངོན་པར་བརྗོད་པ་དང་། ཀུན་རྫོབ་ཅེས་བྱར་མི་རུང་ངོ་། །ཞེས་གསུངས་སོ། །དེའི་དོན་ནི་ངོ་བོ་ཉིད་མེད་པ་ལ་ཡོད་དོ་སྙམ་དུ་དམིགས་པའི་ཀུན་རྫོབ་དེ་ནང་གི་མངོན་པར་བརྗོད་པ་རྣམ་རྟོག་གི་རྒྱུ་ལས་བྱུང་བ་དང་། ཀུན་རྫོབ་རང་གི་རིགས་འདྲ་སྔ་མ་ལས་བྱུང་བ་ཡིན་ན་དོན་དམ་དུ་མེད་པ་འགལ་ཞིང་ནང་གི་མངོན་པར་བརྗོད་པ་རྣམ་རྟོག་གིས་བཏགས་པ་ཙམ་དང་རང་གི་རིག་འདྲ་སྔ་མའི་རྒྱུ་ལས་མ་བྱུང་བའི་ཀུན་རྫོབ་ཙམ་ཞིག་ཡིན་ན་གདགས་གཞི་དོན་དམ་དུ་མེད་པས་བཏགས་པ་ཙམ་ཡང་མི་རུང་ངོ་ཞེས་པའོ། །དོན་དམ་གྱི་ངོས་འཛིན་འགོག་པ་ནི་བསྡུ་བར་དེ་ལ་འདི་སྐད་ཅེས་ཚེ་དང་ལྡན་པ་ཅིའི་ཕྱིར་ན་གང་དམིགས་པ་དེ་མེད་པ་ཡིན་ཞེས་ཀྱང་བརྗོད་པར་བྱའོ། །དེ་སྐད་ཅེས་དྲིས་པ་ན་གལ་ཏེ་དེ་འདི་སྐད་ཅེས་ཕྱིན་ཅི་ལོག་གི་དངོས་པོ་ཡིན་པའི་ཕྱིར་རོ། །ཞེས་ལན་འདེབས་པར་གྱུར་ན། དེ་ལ་འདི་སྐད་ཅེས་བརྗོད་པར་བྱ་སྟེ་ཕྱིན་ཅི་ལོག་དེ་ཡོད་པར་འདོད་དམ་འོན་ཏེ་མེད་པར་འདོད། གལ་ཏེ་ཡོད་ན་ནི་དེས་ན་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ནི་དོན་དམ་པའོ་ཞེས་བྱ་བར་མི་རུང་ངོ་། །གལ་ཏེ་མེད་ན་ནི་དེས་ན་ཕྱིན་ཅི་ལོག་གི་དངོས་པོ་ཡིན་པའི་ཕྱིར། གང་དམིགས་པ་དེ་ངོ་བོ་ཉིད་མེད་དོ་ཅེས་བྱར་མི་རུང་ངོ་ཞེས་གསུངས་སོ། །དེའི་དོན་ནི་གང་དམིགས་པ་དེའི་ངོ་བོ་ཉིད་མེད་པ་ཡིན་པའི་རྒྱུ་མཚན་ཅི་ཡིན་ཞེས་དྲིས་པས། དམིགས་བྱེད་ཀྱི་བློ་དེ་ཕྱིན་ཅི་ལོག་གི་དངོས་པོ་ཡིན་པའི་ཕྱིར་རོ་ཞེ་ན། འོ་ན་ཕྱིན་ཅི་ལོག་གི་བློ་དེ་ངོ་བོ་ཉིད་ཀྱིས་ཡོད་དམ་མེད། དང་པོ་ལྟར་ན་ཆོས་ཐམས་ཅད་ངོ་བོ་ཉིད་ཀྱིས་མེད་པ་དང་འགལ་ལོ། །ཕྱི་མ་ལྟར་ན་ཕྱིན་ཅི་ལོག་གི་དངོས་པོ་རྒྱུ་མཚན་དུ་བྱས་ནས་དམིགས་པ་ངོ་བོ་ཉིད་ཀྱིས་མེད་པར་བསྒྲུབ་མི་ནུས་སོ་ཞེས་པའོ། །གཉིས་པ་ནི། བསྡུ་བར། དེ་ལ་གཞན་གྱི་དབང་གི་ངོ་བོ་ཉིད་དང་ཡོངས་སུ་གྲུབ་པ་ལ་ཀུན་བརྟགས་པའི་ངོ་བོ་ཉིད་དུ་མངོན་པར་ཞེན་པ་གང་ཡིན་པ་དེ་ནི་སྒྲོ་འདོགས་པའི་ངོ་བོ་ཉིད་དུ་རིག་པར་བྱའོ། །གཞན་གྱི་དབང་གི་ངོ་བོ་ཉིད་དང་ཡོངས་སུ་གྲུབ་པའི་ངོ་བོ་ཉིད་ཡོད་པ་མི་འཐད་དོ། །ཞེས་རང་གི་མཚན་ཉིད་ལ་སྐུར་པ་འདེབས་པ་གང་ཡིན་པ་སྟེ། དེ་ལྟར་མཐའ་གཉིས་རྣམ་པར་སྤང་བའི་ཚུལ་གྱིས་དེ་ཁོ་ནའི་དོན་གྱི་ཚུལ་ཁོང་དུ་ཆུད་པར་བྱའོ། །ཞེས་གསུངས་ཏེ་གཞན་དབང་དང་ཡོངས་གྲུབ་ལ་ཀུན་བཏགས་སུ་སྒྲོ་འདོགས་པ་དང་། གཞན་དབང་དང་ཡོངས་གྲུབ་རང་གི་མཚན་ཉིད་ཀྱིས་མེད་དོ། །ཞེས་སྐུར་པ་འདེབས་པ་སྤངས་ནས་གཞན་དབང་དང་དེ་ལ་ཀུན་བཏགས་ཀྱིས་སྟོང་པའི་ངོ་བོ་ཉིད་དོན་དམ་དུ་ཡོད་པ་ནི་དབུ་མའོ། །ཞེས་པའི་དོན་ནོ། །གསུམ་པ་དབུས་མཐའ་ནས་བཤད་པའི་ཚུལ་ལ། སྒྲོ་སྐུར་སྤང་བའི་ཚུལ་དང་། དེས་ན་དབུ་མའི་ལམ་དུ་གྲུབ་པ་གཉིས་ལས། དང་པོ་ནི། དབུས་མཐར། ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་པོ་ཡོད་མ་ཡིན། །སྟོང་པ་ཉིད་ནི་འདི་ལ་ཡོད། །དེ་ལ་ཡང་ནི་དེ་ཡོད་དོ། །ཞེས་དང་། དེའི་འགྲེལ་བཤད་དུ་བློ་བརྟན་གྱིས་ལ་ལ་དག་ཆོས་ཐམས་ཅད་རི་བོང་གི་རྭ་ལྟར་རང་བཞིན་ཡེ་མེད་དོ་སྙམ་དུ་སེམས་པ་དེའི་ཕྱིར། ཐམས་ཅད་ལ་སྐུར་པ་འདེབས་པ་དགག་པའི་དོན་དུ། ཡང་དག་མ་ཡིན་ཀུན་རྟོག་ཡོད། །ཅེས་བྱ་བ་གསུངས་ཏེ། རང་བཞིན་གྱིས་ཞེས་བྱ་བའི་ཚིག་གི་ལྷག་མའོ། །དེ་ལྟར་ན་མདོར་ཆོས་ཐམས་ཅད་སྟོང་པའོ། །ཞེས་བཤད་པས་མདོ་དང་མི་འགལ་ལམ་ཞེ་ན། མི་འགལ་ཏེ་འདི་ལྟར། དེ་ལ་གཉིས་པོ་ཡོད་མ་ཡིན། །ཡང་དག་པ་མ་ཡིན་པའི་ཀུན་ཏུ་རྟོག་པ་ལ་གཟུང་བ་དང་འཛིན་པའི་ངོ་བོ་ཉིད་དང་བྲལ་བས་སྟོང་པ་ཞེས་བྱ་ཡི་རང་བཞིན་ཡེ་མེད་པ་ནི་མ་ཡིན་ཏེ། དེའི་ཕྱིར་མདོ་དང་མི་འགལ་ལོ། །གལ་ཏེ་དེ་ལྟར་གཉིས་པོ་ནི་རི་བོང་གི་རྭ་ལྟར་ཡེ་མེད་ལ་ཡང་དག་མ་ཡིན་པའི་ཀུན་ཏུ་རྟོག་པ་ནི་དོན་དམ་པར་རང་བཞིན་གྱིས་ཡོད་ན་དེ་ལྟར་ན་སྟོང་པ་ཉིད་མེད་པར་འགྱུར་རོ་ཞེ་ན། དེ་ནི་དེ་ལྟ་མ་ཡིན་ཏེ། འདི་ལྟར་སྟོང་པ་ཉིད་ནི་འདི་ལ་ཡོད། ཡང་དག་པ་མ་ཡིན་པའི་ཀུན་ཏུ་རྟོག་པ་ལ་གཟུང་བ་དང་འཛིན་པ་མེད་པ་ཉིད་གང་ཡིན་པ་དེ་སྟོང་པ་ཉིད་ཡིན་པས་སྟོང་པ་ཉིད་མེད་པར་མི་འགྱུར་རོ་ཞེས་གསུངས་སོ། །དེའི་དོན་ནི་ཆོས་ནི་ཆོས་ཐམས་ཅད་རང་བཞིན་གྱིས་མེད་པར་འདོད་པ་ནི་སྐུར་འདེབས་ཡིན་པས་དེའི་གཉེན་པོར་གཞན་དབང་རང་གི་མཚན་ཉིད་ཀྱིས་ཡོད་ཅེས་བྱའོ། །འོ་ན་མདོར་ཆོས་ཐམས་ཅད་སྟོང་པར་བཤད་པ་དང་འགལ་ལོ་ཞེ་ན་དེ་ནི་ཀུན་བཏགས་ཀྱིས་སྟོང་པ་ལ་དགོངས་པས་མི་འགལ་ལོ། །འོ་ན་སྟོང་ཉིད་རང་གི་མཚན་ཉིད་ཀྱིས་མེད་པར་འགྱུར་རོ་ཞེ་ན་སྟོང་ཉིད་ཀྱི་དོན་ནི་རང་གི་ངོ་བོས་སྟོང་པའི་སྟོང་ཉིད་མ་ཡིན་གྱི་གཞན་དབང་གི་སྟེང་དུ་གཟུང་འཛིན་གཉིས་ཀྱིས་སྟོང་པའི་སྟོང་ཉིད་ཡིན་པས་རང་གི་མཚན་ཉིད་ཀྱིས་མེད་པར་མི་འགྱུར་རོ། །ཞེས་པའོ། །གཉིས་པ་ནི་དབུས་མཐར། སྟོང་པ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བཤད། །ཡོད་པས་མེད་པས་ཡོད་པས་ནི། །དེ་ནི་དབུ་མའི་ལམ་ཡིན་ནོ། །ཞེས་ཏེ་གཞན་དབང་རང་གི་མཚན་ཉིད་ཀྱིས་གྲུབ་པ་དང་། མདོའི་དོན་མི་འགལ་བར་བཤད་ཟིན་པའི་ཕྱིར་ན། གཞན་དབང་རང་གི་མཚན་ཉིད་ཀྱིས་ཡོད་པ་དང་། ཀུན་བཏགས་རང་གི་མཚན་ཉིད་ཀྱིས་མེད་པ་དང་། ཡོངས་གྲུབ་རང་གི་མཚན་ཉིད་ཀྱིས་ཡོད་པ་དེ་ནི་མཐའ་གཉིས་སྤངས་པ་དབུ་མའི་ལམ་ཡིན་ནོ་ཞེས་པའོ། །གསུམ་པ་དེས་གསུང་རབ་ཇི་ལྟར་འགྲེལ་པའི་ཚུལ་ལ་གསུམ་སྟེ། དོགས་པ་ཇི་ལྟར་སྐྱེ་བའི་ཚུལ། དེ་སེལ་བྱེད་ཀྱི་ལན་བཤད་པ། དེས་ན་འཁོར་ལོ་གསུམ་ལ་གྲངས་ངེས་ཀྱི་རྣམ་པར་གཞག་པའོ། །དང་པོ་ལ་དོགས་པ་སྐྱེ་བའི་གཞི་ནི་འཁོར་ལོ་དང་པོར་ཆོས་ཐམས་ཅད་རང་སྤྱིའི་མཚན་ཉིད་གསུངས་པ་དང་། འཁོར་ལོ་གཉིས་པར་ཆོས་ཐམས་ཅད་ངོ་བོ་ཉིད་མ་མཆིས་པ་སོགས་སུ་གསུངས་པ་ལའོ། །དོགས་པ་སྐྱེ་བའི་ཚུལ་ནི་དེ་གཉིས་འགལ་ལོ་སྙམ་དུ་བསམ་ནས་ཆོས་ཐམས་ཅད་ཀྱི་རང་སྤྱིའི་མཚན་ཉིད་གསུངས་པ་དེ་ཅི་ལ་དགོངས། ཆོས་ཐམས་ཆད་ངོ་བོ་ཉིད་མ་མཆིས་པ་སོགས་སུ་གསུངས་པ་དེ་ཅི་ལ་དགོངས་ཞེས་ཞུས་པ་སྟེ། དགོངས་འགྲེལ་དུ། བཅོམ་ལྡན་འདས་ཀྱིས་རྣམ་གྲངས་དུ་མར་ཕུང་པོ་རྣམས་ཀྱི་རང་གི་མཚན་ཉིད་ཀྱང་བཀའ་སྩལ། སྐྱེ་བའི་མཚན་ཉིད་དང་འཇིག་པའི་མཚན་ཉིད་དང་། སྤངས་པ་དང་ཡོངས་སུ་ཤེས་པ་ཡང་བཀའ་སྩལ། ཕུང་པོ་རྣམས་ཇི་ལྟ་བ་དེ་བཞིན་དུ་སྐྱེ་མཆེད་རྣམས་དང་རྟེན་ཅིང་འབྲེལ་བར་འབྱུང་བ་དང་ཟག་བཅས་ཀྱི་བར་ཡང་བཀའ་སྩལ། དེ་བཞིན་དུ་སྦྱར་ནས་བདེན་པ་རྣམས་ཀྱི་རང་གི་མཚན་ཉིད་དང་། ཡོངས་སུ་ཤེས་པ་དང་སྤངས་པ་དང་མངོན་དུ་བགྱི་བ་དང་། བསྒོམ་པ་དང་ཁམས་རྣམས་ཀྱི་རང་གི་མཚན་ཉིད་དང་། ཁམས་སྣ་ཚོགས་པ་དང་ཁམས་དུ་མ་དང་སྤངས་པ་དང་ཡོངས་སུ་ཤེས་པ་དག་བྱང་ཕྱོགས་སོ་བདུན་གྱི་རང་གི་མཚན་ཉིད་དང་། མི་མཐུན་པ་དང་། གཉེན་པོ་དང་། མ་སྐྱེས་པ་དང་། སྐྱེ་བ་དང་། སྐྱེས་པ་གནས་པ་དང་། མི་འབྱུང་བ་དང་། སླར་ཞིང་གནས་པ་དང་། འཕེལ་ཞིང་ཡངས་པ་ཉིད་ཀྱང་བཀའ་སྩལ་ལ། བཅོམ་ལྡན་འདས་ཀྱིས་ཆོས་ཐམས་ཅད་ངོ་བོ་ཉིད་མ་མཆིས་པ་ཆོས་ཐམས་ཅད་མ་སྐྱེས་པ་མ་འགགས་པ་གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པ་ཞེས་ཀྱང་བཀའ་སྩལ་ལགས་ན་བཅོམ་ལྡན་འདས་ཀྱིས་ཅི་ལ་དགོངས་ནས་ཆོས་ཐམས་ཅད་ངོ་བོ་ཉིད་མ་མཆིས་པ་ཆོས་ཐམས་ཅད་མ་སྐྱེས་པ་མ་འགགས་པ་གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པ་ཞེས་བཀའ་སྩལ་སྙམ་བགྱིད་ལགས་ཏེ། བཅོམ་ལྡན་འདས་ཀྱིས་ཅི་ལ་དགོངས་ནས་ཆོས་ཐམས་ཅད་ངོ་བོ་ཉིད་མ་མཆིས་པ་ཆོས་ཐམས་ཅད་མ་སྐྱེས་པ་མ་འགགས་པ་གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པ་ཞེས་ཀྱང་བཀའ་སྩལ་པའི་དོན་དེ་ཉིད་བཅོམ་ལྡན་འདས་ལ་བདག་ཡོངས་སུ་ཞུ་ལགས་སོ། །ཞེས་གསུངས་སོ། །གཉིས་པ་ལ་གསུམ་སྟེ། དགོངས་འགྲེལ་ལས་གསུངས་ཚུལ། མདོ་སྡེ་རྒྱན་ལས་གསུངས་ཚུལ། ཀུན་བཏུས་ནས་གསུངས་ཚུལ་ལོ། །དང་པོ་ནི། ངོ་བོ་ཉིད་མེད་པར་གསུངས་པའི་དོན་བཤད་པ་དང་། མ་སྐྱེས་པ་སོགས་གསུངས་པའི་དོན་བཤད་པ་གཉིས་ལས། དང་པོ་ནི། དགོངས་འགྲེལ་དུ་དོན་དམ་ཡང་དག་འཕགས་པས་ཆོས་རྣམས་ཀྱི་ངོ་བོ་ཉིད་མེད་པ་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་ཉིད་དང་། སྐྱེ་བ་ངོ་བོ་ཉིད་མེད་པ་ཉིད་དང་། དོན་དམ་པ་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ། །ཞེས་ངོ་བོ་ཉིད་མེད་པ་གསུམ་ལ་དགོངས་ནས་ངོ་བོ་ཉིད་མེད་པར་གསུངས་སོ། །འོ་ན་ངོ་བོ་ཉིད་མེད་པ་གསུམ་པོ་དེ་གང་ཡིན། ངོ་བོ་ཉིད་མེད་ཚུལ་ཇི་ལྟར་ཡིན་སྙམ་ན། ངོ་བོ་ཉིད་མེད་པ་དང་པོ་ནི། དགོངས་འགྲེལ་དུ་དེ་ལ་ཆོས་རྣམས་ཀྱི་མཚན་ཉིད་ངོ་བོ་ཉིད་མེད་པ་གང་ཞེ་ན། ཀུན་བཏགས་པའི་མཚན་ཉིད་གང་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་མིང་དང་བརྡར་རྣམ་པར་བཞག་པའི་མཚན་ཉིད་ཡིན་གྱི་རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས་དེའི་ཕྱིར་དེ་ནི་མཚན་ཉིད་ངོ་བོ་ཉིད་མེད་པ་ཉིད་ཅེས་བྱའོ། །ཞེས་ཀུན་བཏགས་ལ་དགོངས་ནས་མཚན་ཉིད་ངོ་བོ་ཉིད་མེད་པར་འཇོག་སྟེ་རང་གི་མཚན་ཉིད་ཀྱིས་མ་གྲུབ་པའི་ཕྱིར་ཞེས་པའོ། །གཉིས་པ་ནི། དགོངས་འགྲེལ་དུ་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་ཉིད་གང་ཞེ་ན། ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཡིན་པའོ། །དེ་ཅིའི་ཕྱིར་ཞེ་ན་འདི་ལྟར་དེ་ནི་རྐྱེན་གཞན་གྱི་སྟོབས་ཀྱི་བྱུང་བ་ཡིན་གྱི་བདག་ཉིད་ཀྱིས་མ་ཡིན་པས་དེའི་ཕྱིར་དེ་ནི་སྐྱེ་བ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་ཏེ། གཞན་དབང་ནི་སྐྱེ་བ་ངོ་བོ་ཉིད་མེད་པ་ཡིན་ཏེ། སྐྱེ་བ་ངོ་བོ་ཉིད་ནི་རྐྱེན་གཞན་ལ་མི་ལྟོས་པར་བདག་ཉིད་ཀྱིས་སྐྱེ་བ་ལ་འཇོག་དགོས་པ་ལས་གཞན་དབང་ནི་རྐྱེན་གཞན་གྱི་སྟོབས་ཀྱིས་བྱུང་བའི་ཕྱིར་ཞེས་པའོ། །ངོ་བོ་ཉིད་མེད་པ་གསུམ་པ་ལ་འཇོག་ཚུལ་གཉིས་ལས་གཞན་དབང་ལ་བཞག་པ་ནི། དགོངས་འགྲེལ་དུ་ཆོས་རྣམས་ཀྱི་དོན་དམ་པ་ངོ་བོ་ཉིད་མེད་པ་གང་ཞེ་ན་རྟེན་ཅིང་འབྲེལ་བར་འབྱུང་བ་ཆོས་གང་དག་སྐྱེ་བ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་དེ་དག་ནི་དོན་དམ་པ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས་ཆོས་རྣམས་ལ་རྣམ་པར་དག་པའི་དམིགས་པ་གང་ཡིན་པ་དེ་ནི་དོན་དམ་པ་ཡིན་པར་ཡོངས་སུ་བསྟན་ལ་གཞན་གྱི་དབང་གི་མཚན་ཉིད་དེ་ནི་རྣམ་པར་དག་པའི་དམིགས་པ་མ་ཡིན་པས་དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་སོ། །ཡོངས་གྲུབ་ལ་གཞག་པ་ཡང་དགོངས་འགྲེལ་དུ་གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེ་ཡང་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས་ཆོས་རྣམས་ཀྱི་བདག་མེད་པ་གང་ཡིན་པ་དེ་ནི་དེ་དག་གི་ངོ་བོ་ཉིད་མེད་པ་ཉིད་ཅེས་བྱ་སྟེ། དེ་ནི་དོན་དམ་པ་ཡིན་ལ་དོན་དམ་པ་ནི་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས་དེའི་ཕྱིར་དེ་ཉིད་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་སོ། །དེ་དག་གི་དོན་ནི་དོན་དམ་པ་དེ་རྣམ་དག་གི་དམིགས་པ་ལ་འཇོག་པའི་ཚེ་གཞན་དབང་ལ་དོན་དམ་པ་ངོ་བོ་ཉིད་མེད་པ་ཉིད་དུ་འཇོག་སྟེ། གཞན་དབང་དེ་རྣམ་དག་གི་དམིགས་པ་མ་ཡིན་པའི་ཕྱིར་རོ། །ཆོས་དེའི་དོན་དམ་པ་ཡང་ཡིན། ཆོས་དེའི་ངོ་བོ་ཉིད་མེད་པ་ཡང་ཡིན་པ་ལ་དོན་དམ་པ་ངོ་བོ་ཉིད་མེད་པ་ཉིད་དུ་གཞག་པའི་ཚེ་ཡོངས་གྲུབ་ལ་འཇོག་སྟེ། ཡོངས་གྲུབ་དེ་གཞན་དབང་གི་དོན་དམ་པ་ཡང་ཡིན། གཞན་དབང་གི་ངོ་བོ་ཉིད་དུ་མེད་པ་ཡང་ཡིན་པའི་ཕྱིར་རོ། །ཞེས་པའོ། །གཉིས་པ་ནི། ངོ་བོ་ཉིད་མེད་པར་གསུངས་པའི་ཚུལ་དེ་ལྟར་ཡིན་ན། སྐྱེ་བ་མེད་པ་སོགས་གང་ལ་དགོངས་ནས་གསུང་ཞེ་ན། འདི་ནི་ངོ་བོ་ཉིད་མེད་པ་དང་པོ་དང་ཐ་མ་ལ་དགོངས་ནས་གསུངས་ཏེ། དགོངས་འགྲེལ་དུ། དེ་ལ་མཚན་ཉིད་ངོ་བོ་ཉིད་མེད་པ་ལ་དགོངས་ནས་ངས་ཆོས་ཐམས་ཅད་མ་སྐྱེས་པ་མ་འགགས་པ་གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པའོ། །ཞེས་བསྟན་ཏོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས་འདི་ལྟར་རང་གི་མཚན་ཉིད་ཀྱིས་མེད་པ་གང་ཡིན་པ་དེ་ནི་མ་སྐྱེས་པ་ཡིན། མ་སྐྱེས་པ་གང་ཡིན་པ་དེ་ནི་མ་འགགས་པ་ཡིན་ཞེས་སོགས་དང་། ཡང་དོན་དམ་པ་ངོ་བོ་ཉིད་མེད་པ་ཉིད་ཆོས་བདག་མེད་པས་རབ་ཏུ་ཕྱེ་བ་ལ་དགོངས་ནས་ངས་ཆོས་ཐམས་ཅད་མ་སྐྱེས་པ་མ་འགགས་པ། གཟོད་མ་ནས་ཞི་བ་རང་བཞིན་གྱིས་ཡོངས་སུ་མྱ་ངན་ལས་འདས་པའོ། །ཞེས་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་དོན་དམ་པ་ངོ་བོ་ཉིད་མེད་པ་ཉིད་ཆོས་བདག་མེད་པས་རབ་ཏུ་ཕྱེ་བ་ནི་རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་རྣམ་པར་གནས་པ་ཁོ་ན་ཡིན་ལ་དེ་ནི་ཆོས་རྣམས་ཀྱི་ཆོས་ཉིད་འདུས་མ་བྱས་པ་ཉོན་མོངས་པ་ཐམས་ཅད་དང་བྲལ་བ་ཡིན་ཏེ། ཞེས་སོགས་གསུངས་སོ། །གཉིས་པ་ནི། མདོ་སྡེ་རྒྱན་ནས་གསུངས་ཚུལ་ལ་ངོ་བོ་ཉིད་མེད་པར་གསུངས་པའི་དོན་བཤད་པ། མ་སྐྱེས་པ་སོགས་སུ་གསུངས་པའི་དོན་བཤད་པ་གཉིས་ལས། དང་པོ་ནི། ཆོས་རྣམས་རྐྱེན་ལ་རག་ལས་པས་རང་དབང་མེད་པའི་ཕྱིར་ན་ངོ་བོ་ཉིད་མེད་པ་དང་། ཆོས་གང་འགགས་པ་སླར་ཡང་ཆོས་དེའི་བདག་ཉིད་དུ་མི་སྐྱེ་བས་རང་གི་བདག་ཉིད་དུ་མེད་པའི་ཕྱིར་ན་ངོ་བོ་ཉིད་མེད་པ་དང་། སྐྱེས་ལ་མ་འགགས་པ་ནི་སྐད་ཅིག་མ་ཡིན་པས་རང་གི་ངོ་བོ་ལ་དུས་གཉིས་པར་མི་གནས་པའི་ཕྱིར་ངོ་བོ་ཉིད་མེད་པ་དང་། བྱིས་པས་གཙང་བདེ་རྟག་བདག་སོགས་སུ་འཛིན་པ་བཞིན་དེ་མེད་པའི་ཕྱིར་ན་ངོ་བོ་ཉིད་མེད་པར་གསུངས་ཏེ། རྒྱན་དུ། རང་དང་རང་གི་བདག་ཉིད་དུ། །མེད་ཕྱིར་རང་གི་ངོ་བོ་ལ། །མི་གནས་ཕྱིར་དང་འཛིན་བཞིན་ཏེ། །མེད་ཕྱིར་ངོ་བོ་ཉིད་མེད་འདོད། །ཅེས་གསུངས་པའི་ཕྱིར་རོ། །གཉིས་པ་ནི། ཇི་ལྟར་ངོ་བོ་ཉིད་མེད་པ་དེ་ལྟར་མ་སྐྱེས་པ། ཅི་ལྟར་མ་སྐྱེས་པ་དེ་ལྟར་མ་འགགས་ཞེས་སོགས་སྔ་མ་སྔ་མ་རྒྱུ་མཚན་དུ་བྱས་ནས་ཕྱི་མ་ཕྱི་མ་སྒྲུབ་སྟེ། རྒྱན་དུ། སྔ་མ་ཕྱི་མའི་རྟེན་ཡིན་པས། །ངོ་བོ་ཉིད་ནི་མེད་པ་ཡིས། །སྐྱེ་མེད་འགག་མེད་གཟོད་ནས་ཞི། །རང་བཞིན་མྱ་ངན་འདས་པ་གྲུབ། །ཅེས་སོ། །གསུམ་པ་ཀུན་བཏུས་ནས་བཤད་ཚུལ་ནི། དེ་ཉིད་དུ། ཀུན་བཏགས་པའི་ངོ་བོ་ཉིད་ལ་མཚན་ཉིད་ངོ་བོ་ཉིད་མེད་པ་དང་། གཞན་གྱི་དབང་ལ་སྐྱེ་བ་ངོ་བོ་ཉིད་མེད་པ་དང་། ཡོངས་སུ་གྲུབ་པ་ལ་དོན་དམ་པ་ངོ་བོ་ཉིད་མེད་པའི་ཕྱིར་རོ། །མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་ཡོངས་སུ་མྱ་ངན་ལས་འདས་པ་ཞེས་སོགས་འབྱུང་བའི་དགོངས་པ་གང་ཡིན་ཞེ་ན། ཇི་ལྟར་ངོ་བོ་ཉིད་མེད་པ་དེ་ལྟར་མ་སྐྱེས་སོ། །ཇི་ལྟར་མ་སྐྱེས་པ་དེ་ལྟར་མ་འགགས་སོ། །ཇི་ལྟར་མ་སྐྱེས་པ་དང་། མ་འགགས་པ་དེ་ལྟར་གཟོད་མ་ནས་ཞིའོ། །དེ་ལྟར་རང་བཞིན་གྱིས་ཡོངས་སུ་མྱ་ངན་ལས་འདས་སོ། །ཞེས་སོགས་མཚན་ཉིད་གསུམ་ཀའི་དབང་དུ་བྱས་ནས་མ་སྐྱེས་པ་སོགས་སུ་བཤད་པར་གསུངས་སོ། །འོ་ན་དགོངས་འགྲེལ་དུ། ངོ་བོ་ཉིད་མེད་པ་དང་པོ་དང་ཐ་མའི་དབང་དུ་བྱས་ནས་གསུངས་པ་དང་འགལ་ལོ་སྙམ་ན་སྐྱོན་མེད་དེ། དགོངས་འགྲེལ་དུ་ནི། དང་པོ་དང་ཐ་མ་གཉིས་འདུས་བྱས་སུ་མེད་པས་མ་སྐྱེས་པ་དང་། མ་འགགས་པ་སོགས་སུ་བཤད་ལ། རྒྱན་དང་། ཀུན་བཏུས་སུ། ཇི་ལྟར་ཞེས་དང་། དེ་ལྟར་ཞེས་པའི་ཚིག་གི་ནུས་པས་གཞན་དབང་ལ་ཡང་བདག་ཉིད་ཀྱིས་སྐྱེ་བའི་ངོ་བོ་ཉིད་མེད་པས་བདག་ཉིད་ཀྱིས་མ་སྐྱེས་པས་བདག་ཉིད་དུ་མ་འགགས་ཞེས་སོགས་སུ་བཤད་པའི་ཕྱིར་རོ། །གསུམ་པ་དེས་ན་འཁོར་ལོ་གསུམ་ལ་གྲངས་ངེས་ཀྱི་ཁྱད་པར་རྣམ་པར་གཞག་པ་ནི། དགོངས་འགྲེལ་དུ། བཅོམ་ལྡན་འདས་ཀྱིས་དང་པོར་ཡུལ་བཱ་རཱ་ཎཱ་སཱིར། དྲང་སྲོང་སྨྲ་བ་རི་དྭགས་ཀྱི་ནགས་སུ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་འཕགས་པའི་བདེན་པ་བཞིའི་རྣམ་པ་བསྟན་པས་ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་སྔོན་ལྷར་གྱུར་པའམ་མིར་གྱུར་པ་སུས་ཀྱང་ཆོས་དང་མཐུན་པར་འཇིག་རྟེན་དུ་མ་བསྐོར་བ་གཅིག་རབ་ཏུ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ། དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་ལ། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས་ཏེ་སྐྱེ་བ་མ་མཆིས་པ་དང་། འགག་པ་མ་མཆིས་པ་དང་། གཟོད་མ་ནས་ཞི་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་སྟོང་པ་ཉིད་སྨོས་པའི་རྣམ་པས། ཆེས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གཉིས་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ། དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་ཀྱི། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས་ཏེ། སྐྱེ་བ་མ་མཆིས་པ་དང་། འགག་པ་མ་མཆིས་པ་དང་། གཟོད་མ་ནས་ཞི་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་འདི་ནི་བླ་ན་མ་མཆིས་པ། སྐབས་མ་མཆིས་པ། ངེས་པའི་དོན་ལགས་ཏེ་རྩོད་པའི་གཞིའི་གནས་སུ་གྱུར་པ་མ་ལགས་སོ། །ཞེས་གསུངས་སོ། །འདི་དག་གི་དོན་ལ་དབུ་སེམས་གཉིས་ཀྱིས་འཁོར་ལོ་གསུམ་ལ་དྲང་ངེས་ཀྱི་ཁྱད་པར་ཇི་ལྟར་འཇོག་པའི་ཚུལ་དང་། འཁོར་ལོ་ཕྱི་མའི་ངོས་འཛིན་གྱི་ཁྱད་པར་ཞིབ་ཏུ་ཕྱེ་དགོས་མོད་ཀྱི་མང་བས་འཇིགས་པས་རེ་ཞིག་བཞག་གོ །གཉིས་པ་སྦྱོར་བའི་མཉམ་པ་ཉིད་ནི། གཟུགས་ལ་སོགས་ལ་རློམ་མེད་པ། །རྣམ་བཞི་དེ་ཡི་མཉམ་པ་ཉིད། །ཅེས་ཏེ། མདོར། རྣམ་པ་བཞི་ནི་གཟུགས་རློམ་སེམས་སུ་མི་བྱེད། གཟུགས་ཀྱིས་རློམ་སེམས་སུ་མི་བྱེད། གཟུགས་བདག་གི་ཞེས་བྱ་བར་རློམ་སེམས་སུ་མི་བྱེད། གཟུགས་ལ་རློམ་སེམས་སུ་མི་བྱེད་ཅེས་པ་ནས། རྣམ་མཁྱེན་གྱི་བར་དུ་སྦྱར་ནས་གསུངས་པའི་དོན་སློབ་དཔོན་གྱིས་གཟུགས་ལ་སོགས་པ་ལ་མངོན་པར་ཞེན་པ་དང་། སྔོན་པོ་ལ་སོགས་པའི་མཚན་མ་དང་། རྟོགས་པའི་རློམ་པ་རྣམས་མི་དམིགས་པར་མཉམ་པ་ཉིད་དུ་སྒོམ་པ་ལ་འཆད་དོ། །གཉིས་པ་འབྲས་བུ་མཐོང་ལམ་ནི། སྡུག་བསྔལ་ལ་སོགས་བདེན་པ་ལ། །ཞེས་སོགས་ཏེ། སྦྱོར་ལམ་གྱི་གནས་སྐབས་སུ་བདེན་བཞིའི་སྟེང་གི་རྟག་སོགས་བཅུ་དྲུག་དང་། མི་རྟག་སོགས་བཅུ་དྲུག་ལ་ཞེན་པ་བཀག་ནས་བསྒོམ་པའི་མཐུས་རྟག་མི་རྟག་སོགས་ཀྱི་སྤྲོས་པ་སོ་གཉིས་དང་བྲལ་བའི་སྤྲོས་བྲལ་མངོན་སུམ་དུ་མཐོང་བའོ། །གལ་ཏེ་གཞུང་འདིས་ཐེག་དམན་གྱི་རྟོགས་རིགས་མངོན་སུམ་དུ་མཐོང་བའི་ཐེག་ཆེན་གྱི་མཐོང་ལམ་བསྟན་པ་མི་འཐད་དེ། ཐེག་དམན་གྱི་རྟོགས་རིགས་མངོན་སུམ་དུ་མཐོང་ན་མི་རྟག་ལ་སོགས་བཅུ་དྲུག་མངོན་སུམ་དུ་མཐོང་དགོས་པ་ལས། འདིར་མི་རྟག་ལ་སོགས་བཅུ་དྲུག་གི་སྤྲོས་པ་དང་བྲལ་བའི་ཕྱིར་རོ་སྙམ་ན། རྗེས་ཀྱི་ངེས་ཤེས་ཀྱི་གནས་སྐབས་སུ་མི་རྟག་ལ་སོགས་བཅུ་དྲུག་ལ་ངེས་པ་འདྲེན་ནུས་པའི་ཆ་ནས་ཉན་ཐོས་ཀྱི་རྟོགས་རིགས་ཚང་བར་བཞག་པ་ཡིན་གྱི། མི་རྟག་ལ་སོགས་བཅུ་དྲུག་མངོན་སུམ་དུ་མཐོང་བ་ནི་ཉན་ཐོས་ཀྱི་མཐོང་ལམ་ལ་ཡང་མེད་དེ། སྐྱེ་མེད་མངོན་སུམ་དུ་མཐོང་བའི་ཕྱིར་ཞེས་བཤད་ཟིན་ཏོ། །ཡང་མཐོང་ལམ་དེ་ཉིད་གཟུང་བ་ཕྱི་རོལ་གྱི་དོན་རང་བཞིན་མེད་པ་ལ་ངེས་ཤེས་འདྲེན་པའི་ལྡོག་པ་ནས་རང་རྒྱལ་གྱི་རྟོགས་རིགས་ཀྱང་ཚང་བས་ན། ཐེག་པ་གསུམ་ཆར་གྱི་རྟོགས་རིགས་ཚང་བ་ཡིན་ནོ། །འོ་ན་སྐབས་འདིར་ཐེག་དམན་གྱི་རྟོགས་རིགས་སུ་གྱུར་པའི་ཐེག་ཆེན་གྱི་མཐོང་ལམ་དངོས་སུ་སྟོན་པའི་རྒྱུ་མཚན་ཅི་ཡིན་སྙམ་ན། བྱང་ཆུབ་སེམས་དཔས་ཐོས་བསམ་གྱིས་གཏན་ལ་ཕབ་པའི་ཚེ་ན་ཡང་། ཐེག་པ་གསུམ་ཆར་གྱི་རྟོགས་རིགས་གཏན་ལ་ཕབ་ཅིང་། རྣམ་པར་བསྡུས་ནས་སྒོམ་པའི་ཚེ་ན་ཡང་། ཐེག་པ་གསུམ་ཆར་གྱི་རྟོགས་རིགས་བསྒོམ་དགོས་པས། སྐབས་འདིར་ཐེག་དམན་གྱི་རྟོགས་རིགས་ཐོས་བསམ་གྱིས་གཏན་ལ་ཕབ་པའི་སྐབས་ཡིན་པའི་ཕྱིར་དང་། དེ་ཉིད་རྣམ་པར་བསྡུས་པའི་ཚེ་འོག་ནས་འཆད་པའི་གཞི་ཤེས་ཀྱི་རྣམ་པ་དེ་ཡང་། ཐེག་དམན་གྱི་རྟོགས་རིགས་ཡིན་པའི་ཕྱིར་རོ། །འོ་ན་ཐེག་དམན་གྱི་གཞི་ཤེས་ཉིད་དངོས་སུ་སྟོན་རིགས་སོ་སྙམ་ན། འདིར་དངོས་སུ་བསྟན་པའི་མངོན་པར་རྟོགས་པ་བྱང་སེམས་ཀྱི་མངོན་རྟོགས་ཡིན་པའི་རྒྱུ་མཚན་ནི་བཤད་ཟིན་ཏོ། །གསུམ་པ་སྒོམ་ལམ་མི་སྟོན་པའི་རྒྱུ་མཚན་ནི། ཉིར་སྣང་དུ། ཡང་ཅིའི་དོན་གྱིས་ལམ་ཤེས་པ་ཉིད་བཞིན་དུ་ཐམས་ཅད་ཤེས་པ་ཉིད་ལ་སྒོམ་པའི་ལམ་ལོགས་ཤིག་པ་མེད་ཅེ་ན། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ཤེས་པ་དང་། མཐོང་བས་བལྟས་ནས་འདིའོ། །ཞེས་གསུངས་པས་ན། འདི་ནི་གཞན་གཙོ་བོར་བྱེད་པའི་ཕྱིར་རོ། །ཞེས་བྱ་བར་དགོངས་པ་ཡིན་ནོ། །ཞེས་དང་། དེའི་དོན་སློབ་དཔོན་གྱིས་ཉན་ཐོས་ཀྱི་ལམ་ནི་བྱང་ཆུབ་སེམས་དཔས་ཡོངས་སུ་ཤེས་པར་བྱ་བ་ཡིན་གྱི་མངོན་དུ་བྱ་བ་ནི་མ་ཡིན་པས་སྒོམ་པའི་ལམ་ནི་མ་བསྟན་ཏོ། །ཞེས་གསུངས་སོ། །དེ་དག་གི་དོན་ཡང་སྐབས་གཉིས་པར་མཐོང་ལམ་གྱི་རྗེས་སུ་སྒོམ་ལམ་བསྟན་པ་ལྟར་འདིར་ཡང་ཅིའི་ཕྱིར་མི་སྟོན་སྙམ་ན། འདིར་མཐོང་ལམ་ནི་ཐེག་དམན་གྱི་རྟོགས་རིགས་སུ་གྱུར་པའི་ཐེག་པ་ཆེན་པོའི་མཐོང་ལམ་ཡིན་པས། དེའི་རྗེས་སུ་སྒོམ་ལམ་སྟོན་ན་ཐེག་དམན་གྱི་རྟོགས་རིགས་རྒྱུན་ལྡན་དུ་སྒོམ་པར་བྱེད་པའི་ཐེག་ཆེན་གྱི་སྒོམ་ལམ་བསྟན་དགོས་ལ། བྱང་ཆུབ་སེམས་དཔས་ཐེག་དམན་གྱི་རྟོགས་རིགས་གཞན་དོན་དུ་མངོན་སུམ་དུ་ཤེས་པར་བྱ་བ་ཙམ་ཡིན་གྱི་མངོན་སུམ་དུ་མཐོང་ཟིན་རང་དོན་དུ་རྒྱུན་ལྡན་དུ་བསྒོམ་པར་བྱ་བ་ནི་མ་ཡིན་པས་དེ་ལྟ་བུའི་སྒོམ་ལམ་མེད་པས་མ་བསྟན་པ་ཡིན་ནོ། །གཞི་ཤེས་ཀྱི་སྦྱོར་བ་དང་། འབྲས་བུ་མཐོང་ལམ་གྱི་རྟོགས་རིགས་ཀྱི་གནད་ངོས་ཟིན་ན། འདི་ལ་དཀའ་བའི་གནས་གཞན་མེད་པས་སྨྲ་བ་མང་བ་ལ་དགོས་པ་མེད་དོ། །གསུམ་པ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་པའི་ཆེད་དུ་མཁྱེན་གསུམ་གྱིས་མཇུག་བསྡུ་བ་ནི། དེ་ལྟར་འདི་དང་ཡང་འདི་དང་། །ཞེས་སོགས་ཏེ། འདི་ལ་རྫོགས་པར་བསྟན་བྱ། རྫོགས་པར་སྟོན་བྱེད། གོ་རིམ་བཟློག་པའི་དགོས་པ། སྐབས་འདིར་བསྟན་པའི་དགོས་པ་དང་བཞི་ལས། དང་པོ་ནི། དོན་བསྡུ་འདི་ལ་ལྟོས་ནས་བཤད་མ་ཐག་པའི་གཞི་ཤེས་འདི་དང་། གཞི་ཤེས་ལ་ལྟོས་ནས་ཡང་བཤད་མ་ཐག་པའི་ལམ་ཤེས་འདི་དང་། ལམ་ཤེས་ལ་ལྟོས་ནས་ཡང་བཤད་མ་ཐག་པའི་རྣམ་མཁྱེན་འདིའོ། །སློབ་དཔོན་གྱིས་རྣམ་མཁྱེན་ལ་ཐོག་མར་འདི་ཞེས་སྨོས་ནས་བཤད་མ་ཐག་པའི་ཚུལ་དུ་ཞེས་སྦྱར་བ་ནི་སྔར་གྱི་མཁྱེན་གསུམ་གྱི་གོ་རིམ་དང་། འདིའི་མཁྱེན་གསུམ་གྱི་གོ་རིམ་མཐུན་པ་གཅིག་དགོས་སོ་སྙམ་དུ་དགོངས་པ་ཡིན་ན་ཡང་རྣམ་མཁྱེན་ནི་བཤད་མ་ཐག་པ་དང་འཆད་འགྱུར་གང་ཡང་མ་ཡིན་པས་འདི་ཞེས་སྦྱར་བ་མི་འཐད་དོ། །དེས་ན་དང་པོར་དེ་ལྟར་འདི་ཞེས་དང་། འོག་མ་གཉིས་ལ་ཡང་འདི་ཞེས་པའི་ཚིག་གི་ནུས་པས་གོ་རིམ་སྔ་མ་ལས་མ་འདས་ཤིང་། མདོ་དང་། ཉིར་སྣང་དུ་ཡང་འདི་བཞིན་དུ་བཤད་དོ། །གཉིས་པ་ནི། ཁ་ཅིག་ལེའུ་གསུམ་ལ་རྫོགས་པར་སྟོན་བྱེད་དུ་བྱས་ནས། དེས་མཁྱེན་པ་གསུམ་རྫོགས་པར་བསྟན་ཞེས་འཆད་པ་ནི་མི་འཐད་དེ། འདིར་རྫོགས་པར་སྟོན་བྱེད་ནི་ལེའུ་གསུམ་རྫོགས་པའི་མཇུག་ཐོག་ཏུ་འབྱུང་བའི་དོན་བསྡུའི་མདོ་ཚིག་གསུམ་ལ་ངོས་འཛིན་དགོས་པའི་ཕྱིར་རོ། །འོ་ན་དེ་ཉིད་གང་ཞེ་ན། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་གང་ཡང་ཐོབ་པར་བྱེད་པ་མ་ཡིན། སྟོན་པར་བྱེད་པ་མ་ཡིན། ཞེས་སོགས་ཀྱིས་ཐམས་ཅད་ཤེས་པ་ཉིད་ཀྱི་སྐབས་ཡོངས་སུ་རྫོགས་པར་བསྟན། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཁམས་གསུམ་ལས་འདའ་བར་བྱེད་པ་མ་ཡིན། མྱ་ངན་ལས་འདས་པའི་དབྱིངས་ལ་གནས་པར་བྱེད་པ་མ་ཡིན། ཞེས་སོགས་ཀྱིས་ལམ་ཤེས་པ་ཉིད་ཀྱི་སྐབས་ཡོངས་སུ་རྫོགས་པར་བསྟན། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། སངས་རྒྱས་ཀྱི་ཆོས་རྣམས་དང་། སོ་སོ་སྐྱེ་བོའི་ཆོས་རྣམས་དང་། ཉན་ཐོས་དང་རང་སངས་རྒྱས་ཀྱི་ཆོས་རྣམས་སོ་སོར་གཏོང་བར་བྱེད་པ་མ་ཡིན། འདོར་བར་བྱེད་པ་མ་ཡིན། ཞེས་སོགས་ཀྱིས་རྣམ་པ་ཐམས་ཅད་མཁྱེན་པ་ཉིད་ཀྱི་སྐབས་ཡོངས་སུ་རྫོགས་པར་བསྟན་ཏོ། །གསུམ་པ་ནི། རྒྱས་བཤད་ཀྱི་སྐབས་སུ་རྣམ་མཁྱེན་དང་པོར་བསྟན་ནས་དོན་བསྡུ་བའི་སྐབས་སུ་གཞི་ཤེས་དང་པོར་སྟོན་པའི་རྒྱུ་མཚན་ཅི་ཡིན་སྙམ་ན་རྒྱས་བཤད་ཀྱི་སྐབས་སུ་ནི་འབྲས་བུ་ལ་སྤྲོ་བ་བསྐྱེད་པའི་ཆེད་དུ་རྣམ་མཁྱེན་དང་པོར་བསྟན་ལ། འདིར་ནི་མཁྱེན་གསུམ་གྱི་རྣམ་པའི་གོ་རིམ་དང་མཚམས་སྦྱོར་བའི་ཆེད་དུ་གཞི་ཤེས་དང་པོར་བསྟན་པར་ཤེས་པར་བྱའོ། །བཞི་པ་ནི། སྔར་མཁྱེན་གསུམ་རྒྱས་པར་བསྟན་པའི་མཇུག་ཏུ། མདོ་དང་བསྟན་བཅོས་གཉིས་ཆར་ལས་མཁྱེན་གསུམ་བསྡུས་ཏེ་བསྟན་པའི་དགོས་པ་གང་ཞེ་ན། སྔར་ཐོས་བསམ་གྱིས་གཏན་ལ་ཕབ་པ་དེ་དག་ཀྱང་བསྡུས་ནས་བསྒོམ་དགོས་པར་ཤེས་པའི་ཆེད་ཡིན་ལ། བསྡུས་ཚུལ་ཇི་ལྟར་ཞེ་ན་རྣམ་པ་བརྒྱ་དང་བདུན་ཅུ་རྩ་གསུམ་དུ་བསྡུ་ཞེས་པ་ནི། འོག་རྣམ་རྫོགས་སྦྱོར་བ་དང་འབྲེལ་པར་ཤེས་པའི་ཆེད་དུའོ། །དེ་ལྟར་བྱས་ན་བདེན་བཞིའི་སྟེང་དུ་སྤྲོས་པ་སོ་གཉིས་དང་བྲལ་བའི་མཐོང་ལམ་བསྟན་མ་ཐག་ཏུ་མཁྱེན་གསུམ་གྱི་མཇུག་སྡུད་བསྟན་ཅིང་། དེའི་འོག་ཏུ་མཁྱེན་གསུམ་གྱི་རྣམ་པ་བསྟན་པའི་དགོས་པ་ཡང་འགྲུབ་སྟེ། མཁྱེན་གསུམ་གྱི་རྣམ་པ་དེ་དག་ཀྱང་འཕགས་པའི་བདེན་བཞིའི་སྟེང་གི་རྣམ་པར་བསྡུ་བར་ཤེས་པའི་ཆེད་ཡིན་པའི་ཕྱིར་རོ། །སྦས་དོན་ཟབ་མོའི་གཏེར་གྱི་ཁ་འབྱེད་ལས། སྐབས་གསུམ་པའི་གཞུང་སོ་སོའི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

རྣམས་རྫོགས་སྦྱོར་བ།

སྐབས་བཞི་པའི་འབྲེལ་ལ་གཞི་ཤེས་ཀྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་དང་། བཤད་པར་བྱ་བ་རྣམ་རྫོགས་སྦྱོར་བ་དངོས་གཉིས་ལས། དང་པོ་ནི། ཁ་ཅིག་མཁྱེན་གསུམ་གྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ། ཞེས་འཆད་པ་ནི་ཅུང་ཟད་མི་འཐད་དེ། མངོན་པར་རྟོགས་པ་དྲུག་ཏུ་བསྟན་པའི་ཚེ་མཁྱེན་པ་གསུམ་པོ་དེ་མཚན་ཉིད་ཅེས་གཅིག་ཏུ་བསྡུས་པས་དེའི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་བཤད་པར་བྱ་བ་ཡིན་ཀྱང་མངོན་པར་རྟོགས་པ་བརྒྱད་དུ་བསྟན་པའི་ཚེ་སྔ་མ་སྔ་མའི་འོག་ཏུ་ཕྱི་མ་ཕྱི་མ་འཆད་པའི་རྒྱུ་མཚན་བཤད་པར་བྱ་བ་ཡིན་པས་འདིར་ཡང་གཞི་ཤེས་ཀྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་བཤད་དགོས་པའི་ཕྱིར་རོ། །དེས་ན་དེའི་རྒྱུ་མཚན་ཡོད་དེ། གཞི་ཤེས་ཀྱི་སྐབས་སུ་མཁྱེན་གསུམ་རྒྱས་པར་གཏན་ལ་ཕབ་པའི་དོན་གཞི་བདེན་བཞིའི་སྟེང་དུ་བསྡུ་ཚུལ་གསུངས་པའི་བསྡུ་ཚུལ་དེ་གང་ཞེ་ན། གཞི་བདེན་བཞིའི་སྟེང་དུ་མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་དུ་བསྡུས་ནས་སྒོམ་པར་བྱེད་པ་རྣམ་རྫོགས་སྦྱོར་བ་ཡིན་པའི་ཕྱིར་ཞེས་པའི་དོན་ནོ། །བསྡུ་བའི་ཚེ་རྣམ་པ་དང་ལམ་དང་གཞི་ཤེས་པ་བསྡུ་བའི་སྒོ་ནས་ཞེས་རྣམ་མཁྱེན་དང་པོར་སྟོན་པ་ནི་འདིའི་གོ་རིམ་མ་ཡིན་ཏེ། བསྡུ་བའི་ཚེ་དང་པོར་གཞི་ཤེས་ཀྱི་རྣམ་པ་གཞུང་ཉིད་ལས་དངོས་སུ་གསུངས་པའི་ཕྱིར་རོ། །གཉིས་པ་ནི། རྣམ་རྫོགས་སྦྱོར་བའི་དོན་ཡང་རྣམ་པ་བརྒྱ་བདུན་ཅུ་རྩ་གསུམ་རྫོགས་པར་བསྒོམ་པ་ཡིན་པས་བསྒོམ་པའི་ཚུལ་ལ་སྒོམ་བྱུང་གཙོ་བོར་གྱུར་པའི་ཉམས་མ་སྐྱེས་པའི་གནས་སྐབས་ཀྱི་སྒོམ་རིམ་དང་། དེ་སྐྱེས་པའི་སྒོམ་རིམ་གཉིས་ལས། དང་པོ་ལ་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པ་བརྒྱ་བདུན་ཅུ་རྩ་གསུམ་དུ་བསྡུ་བའི་ཚུལ། དེ་ལྟར་སྒོམ་པ་ལ་སྦྱོར་བ་པོའི་རྟེན་གྱི་གང་ཟག གང་ཟག་དེས་རྣམ་པ་དེ་སྒོམ་པའི་སྦྱོར་བ་ལ་འཇུག་ཚུལ། སྦྱོར་བ་དེ་ཉིད་ཀྱི་ཁྱད་པར་གྱི་ཆོས། དེ་ལ་བརྟེན་ནས་ཐོབ་པའི་ཐར་པ་ཆ་མཐུན་དང་ལྔ། དེ་དག་གི་དོན་ཡང་སྔར་ཐོས་བསམ་གྱིས་གཏན་ལ་ཕབ་པ་དེ་ཉིད་སྒོམ་པར་བྱེད་པའི་ཚེ་རྣམ་པ་བརྒྱ་བདུན་ཅུ་རྩ་གསུམ་དུ་བསྡུ་དགོས་པས་བསྡུ་བའི་ཚུལ་ནི། གཞི་ཤེས་པ་ཡི་བྱེ་བྲག་རྣམས། །ཞེས་སོགས་ཀྱིས་བསྟན། ཐོས་བསམ་གྱིས་གཏན་ལ་འབེབས་པ་ནས་རྣམ་པར་བསྡུ་བའི་བར་གྱིས་རྟེན་གྱི་གང་ཟག་དེ་ལ་ཡང་ཡུམ་ཉན་པ་དང་། ཚིག་བློ་ལ་ལེན་པ་དང་། དོན་མི་བརྗེད་པར་འཛིན་པ་དང་། བསམ་བྱུང་གིས་ཚུལ་བཞིན་དུ་ཡིད་ལ་བྱེད་པ་དང་བཞིར་ཡོད་དོ། །ཞེས་པ་ནི། སངས་རྒྱས་རྣམས་ལ་ལྷག་པར་བྱས། །ཞེས་སོགས་ཀྱིས་སྟོན། དེ་ལྟར་ཐོས་བསམ་མཐར་ཕྱིན་པའི་གང་ཟག་དེས་རྣམ་པར་བསྡུས་པ་དེ་ཉིད་བསྒོམ་དགོས་ན་ཡུལ་ཅན་གང་གིས་བསྒོམ་ཞེ་ན། ཡུལ་ཅན་སྦྱོར་བ་ཉི་ཤུས་བསྒོམ་པ་ཡིན་ནོ། །ཞེས་པ་ནི། གཟུགས་ལ་སོགས་ལ་མི་གནས་ཕྱིར། །ཞེས་སོགས་ཀྱིས་སྟོན། དེ་ལྟ་བུའི་སྦྱོར་བ་དེ་ལ་ཡང་ཡོན་ཏན་དང་། སྐྱོན་དང་། མཚན་ཉིད་ཤེས་དགོས་པས་དེའི་འོག་ཏུ་དེ་གསུམ་རིམ་པ་བཞིན་དུ་སྟོན། གང་ཟག་དེས་དེ་གསུམ་ཤེས་པའི་ཚེ་སངས་རྒྱས་ལ་སོགས་པའི་ཡུལ་ལྔ་ལ་མཁས་པའི་ཐེག་ཆེན་གྱི་ཐར་པ་ཆ་མཐུན་སྐྱེས་པ་ཡིན་ནོ། །ཞེས་པ་ནི། མཚན་མེད་རབ་ཏུ་སྦྱིན་ལ་སོགས། །ཞེས་སོགས་ཀྱིས་སྟོན། དེའི་འོག་ཏུ་ཡང་ཐེག་ཆེན་གྱི་ཐར་པ་ཆ་མཐུན་མེད་པ་མ་ཡིན་ཏེ། འཇུག་པ་སེམས་བསྐྱེད་སྐྱེས་པ་ནས་མཚན་ཉིད་ཤེས་པའི་བར་གྱི་ལམ་རྣམས་ཐེག་ཆེན་གྱི་ཐར་པ་ཆ་མཐུན་ཡིན་པའི་ཕྱིར། འོན་ཀྱང་འདིའི་སྐབས་ནས་བསྟན་པའི་ཐེག་ཆེན་གྱི་ཐར་པ་ཆ་མཐུན་མ་ཡིན་ཏེ། ཡོན་ཏན་སོགས་གསུམ་ཤེས་པའི་སྒོ་ནས་སངས་རྒྱས་སོགས་ཡུལ་ལྔ་ལ་མཁས་པ་མ་ཡིན་པའི་ཕྱིར། འོ་ན་སྔར་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུ་ན་རྣམ་པའི་ངོ་བོ་གང་། དབྱེ་ན་དུ་ཡོད་ཅེ་ན། འདི་ལ་མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་ལ་ངོ་བོ་ནི། གཞི་བདེན་བཞིའི་སྟེང་དུ་གནས་ཚུལ་རྟོགས་པའི་ཡེ་ཤེས་ཀྱི་བྱེ་བྲག་ཡིན་ལ། དབྱེ་ན་གཞི་བདེན་བཞིའི་སྟེང་དུ་གཞི་ཤེས་ཀྱི་རྣམ་པ་རྟོགས་པ་དང་། གཞི་བདེན་བཞིའི་སྟེང་དུ་ལམ་ཤེས་ཀྱི་རྣམ་པ་རྟོགས་པ་དང་། གཞི་ལམ་བདེན་གྱི་སྟེང་དུ་རྣམ་མཁྱེན་གྱི་རྣམ་པ་རྟོགས་པ་དང་གསུམ་ཡོད་ཅེས་སྟོན་པ་ནི། གཞི་ཤེས་པ་ཡི་བྱེ་བྲག་རྣམས། །ཞེས་སོགས་ཚིགས་བཅད་གཅིག་གིས་སྟོན་ཏོ། །འདིར་བསྟན་གྱི་རྣམ་པ་དོན་རྣམ་དང་ཤེས་རྣམ་གང་ཡིན་ཞེ་ན། ཁ་ཅིག་དོན་རྣམ་དང་ཤེས་རྣམ་གཉིས་ཀ་དངོས་སུ་བསྟན་པར་འདོད་པ་ནི་མི་འཐད་དེ། བསྟན་བཅོས་རྩ་བར་ཡང་འདིར་དངོས་བསྟན་གྱི་རྣམ་པ་ལ་མཁྱེན་པ་གསུམ་གྱི་རྣམ་པ་གསུམ་དུ་ངེས་པར་གསུངས་ཤིང་དེ་གསུམ་ནི་ཤེས་རྣམ་ཁོ་ན་ཡིན་པའི་ཕྱིར་དང་། ཉི་ཁྲི་སྣང་བར་ཡང་། དེ་ལ་དངོས་པོ་ལ་དམིགས་པ་ནི་གཞི་ཤེས་པའོ། །བྱེ་བྲག་ནི་མཚན་ཉིད་དེ་ཞེས་དང་། གསེར་གླིང་པས་ཡེ་ཤེས་ནི་རྣམ་གསུམ་ཕྱིར། །ཞེས་བྱ་བ་དབྱེ་བ་རྣམ་པ་གསུམ་ཡོད་པས་དེ་ནི་རྣམ་པ་གསུམ་པ་ཉིད་ཡིན་ལ་ཞེས་དང་། ཆོས་བཤེས་ཀྱིས། ད་ནི་རྣམ་པ་ཞེས་བྱ་བ་ནི་དུ་ཞིག་ཡོད། རྣམ་པའི་རང་བཞིན་ཅི་ཞིག་ཡིན། རྣམ་པ་དེ་དག་གང་གིས་བཞག ཅེས་རྟོག་པ་ལ་གཞི་དང་ཡེ་ཤེས་རྣམ་པ་ནི་ཞེས་བྱ་བ་ལ་སོགས་པ་བསྟན་པ་བཀྲོལ་བའི་ཕྱིར། རྟག་པ་ལ་སོགས་པ་འཛིན་པ་ཞེས་བྱ་བ་ལ་སོགས་པ་སྨོས་ཏེ། སོགས་པ་སྨོས་པས་ནི་བདེ་བ་དང་། གཙང་བ་དང་། བདག་ལ་སོགས་པ་བསྡུའོ། །དེ་ལྟར་འཛིན་པ་ཉིད་མི་མཐུན་པའི་ཕྱོགས་ཏེ་བྱིས་པ་རྣམས་སྲིད་པར་འཁྱམ་པའི་རྒྱུའི་གཙོ་བོ་ཡང་འདི་ཉིད་ཡིན་པས་ན་འདི་ནི་འཁོར་བའི་གཞིའམ་རྒྱུའོ། །དེ་ནི་གཞི་དེ་ཇི་ལྟར་གཟུང་བ་ལྟར་མེད་པར་ཤེས་པའི་སྒོ་ནས་གཉེན་པོའི་ཆོས་ཉིད་ཀྱི་ངོ་བོ་ཉིད་མི་རྟག་པ་ལ་སོགས་པར་དམིགས་པ་དང་ཞེས་སྨོས་ཏེ་དེའི་དབང་དུ་བྱས་པའི་རྣམ་པ་དང་ཞེས་བྱ་བ་དང་སྦྱོར་རོ། །ཞེས་སོགས་གཞུང་འགྲེལ་ཐམས་ཅད་སྐབས་འདིར་དངོས་བསྟན་གྱི་རྣམ་པ་ཤེས་རྣམ་དུ་བཞེད་པར་མཚུངས་པའི་ཕྱིར་རོ། །དེ་ཡང་འདིར་དངོས་བསྟན་གྱི་མེད་པའི་རྣམ་པ་དེ་སྡུག་བསྔལ་གྱི་བདེན་པ་རྟག་པར་མེད་པ་ཙམ་ལ་འཇོག་པ་མ་ཡིན་པར་དེར་རྟོགས་པའི་ཡེ་ཤེས་ཀྱི་བྱེ་བྲག་ལ་འཇོག་པ་ནས་སངས་རྒྱས་ཉིད་ཀྱི་རྣམ་པ་ཡང་ཆོས་ཐམས་ཅད་རྣམ་པ་ཐམས་ཅད་མངོན་པར་རྫོགས་པར་བྱང་ཆུབ་པར་རྟོགས་པའི་འཛིན་སྟངས་ཀྱི་བྱེ་བྲག་ལ་འཇོག་པར་བྱེད་དགོས་པས་ན་སྐབས་འདིར་དངོས་བསྟན་གྱི་རྣམ་པ་བརྒྱ་བདུན་ཅུ་རྩ་གསུམ་པོ་གང་རུང་ཡིན་ན། ཤེས་རྣམ་ཡིན་པས་ཁྱབ་པའི་དོན་ནོ། །ཤུགས་ལ་དོན་རྣམ་ཡང་བསྟན་པར་བྱ་དགོས་ཏེ། མདོར། བཅོམ་ལྡན་འདས་ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་སོགས་དམ་བཅའ་སྟོན་པ་རྣམས་ཀྱིས་ཤེས་རྣམ་བསྟན། བཀའ་སྩལ་པ་ནམ་མཁའ་དམིགས་སུ་མེད་པའི་ཕྱིར་རོ། །ཞེས་སོགས་སྒྲུབ་བྱེད་བསྟན་པ་རྣམས་ཀྱིས་དོན་རྣམ་བསྟན་པས་དེ་དག་ཀྱང་བསྟན་བཅོས་ཀྱི་བརྗོད་བྱར་བྱེད་དགོས་ལ་དེའི་ཚེ་ཤུགས་ལ་བསྟན་པ་ལས་འོས་མེད་པའི་ཕྱིར་རོ། །དེ་ལྟར་བྱས་ན་མགོན་པོ་བྱམས་པས་སྦས་དོན་མངོན་རྟོགས་ཀྱི་རིམ་པ་དང་། ཀླུ་སྒྲུབ་ཀྱིས་དངོས་བསྟན་སྟོང་ཉིད་ཀྱི་ལྟ་བ་གཏན་ལ་འབེབས་པའི་ཚུལ་དང་ཡང་ལེགས་པར་འབྱོར་བ་ཡིན་ནོ། །གཉིས་པ་རྒྱས་པར་བཤད་པ་ལ་གསུམ་ལས། དང་པོ་གཞི་ཤེས་ཀྱི་རྣམ་པ་རྒྱས་པར་བཤད་པ་ནི། མེད་པའི་རྣམ་པ་ནས་བཟུང་སྟེ། །ཞེས་སོགས་ཏེ། དེའི་དོན་ཡང་སྔར་གཞི་ཤེས་ཀྱི་སྐབས་སུ་ཐོས་བསམ་གྱིས་གཏན་ལ་ཕབ་པ་དེ་ཉིད་རྣམ་པར་བསྡུ་ན་མེད་པའི་རྣམ་པ་སོགས་ཉེར་བདུན་དུ་འདུ་ཞེས་པའི་དོན་ནོ། །དེ་ལ་བདེན་པ་དང་པོ་གསུམ་གྱི་རྣམ་པ་བཅུ་གཉིས། ལམ་བདེན་གྱི་ལམ་དང་པོའི་རྣམ་པ་བཞི་སྟེ་བཅུ་དྲུག་ནི་འཕགས་སེང་གཉིས་ཀྱིས་མངོན་པ་ལས་བཤད་པའི་མི་རྟག་ལ་སོགས་བཅུ་དྲུག་དང་སྦྱར་བས་ཉན་ཐོས་ཀྱི་རྟོགས་རིགས་ཏེ། མཉམ་གཞག་ཏུ་མེད་པའི་རྣམ་པ་སོགས་བཅུ་དྲུག་མངོན་སུམ་དུ་རྟོགས་པས་རྗེས་ཐོབ་ཏུ་མི་རྟག་ལ་སོགས་བཅུ་དྲུག་ལ་ངེས་ཤེས་འདྲེན་ནུས་པ་ནི་ཉན་ཐོས་ལ་ཡོད་པའི་ཕྱིར་རོ། །འདིར་མེད་པའི་རྣམ་པ་སོགས་བཅུ་དྲུག་ནི་སྐྱེ་མེད་རྟོགས་པའི་རྣམ་པ་ཡིན་ཡང་། བྱམས་ཆོས་ཀྱི་ལུགས་ལ་གང་ཟག་གི་བདག་མེད་རྟོགས་པར་བསྡུ་ཞིང་། ཀླུ་སྒྲུབ་ཀྱིས་དེ་ཉིད་ལ་ཆོས་ཀྱི་བདག་མེད་རྟོགས་པར་བྱས་ནས་ཉན་ཐོས་ཀྱིས་ཀྱང་བདག་མེད་གཉིས་ཀ་རྟོགས་པར་བཞེད་པ་ནི་སྐབས་གསུམ་པར་བཤད་ཟིན་ཏོ།། །།ལམ་བདེན་གྱི་ལམ་གཉིས་པའི་རྣམ་པ་ལྔ། གསུམ་པའི་རྣམ་པ་དྲུག་སྟེ་བཅུ་གཅིག་ནི་གཟུང་བ་ཆོས་ཀྱི་བདག་མེད་རྟོགས་པའི་བློ་ཡིན་པས་རང་རྒྱལ་གྱི་རྟོགས་རིགས་ཡིན་ནོ། །དེ་ལྟར་ཉེར་བདུན་ལ་བྱང་སེམས་ཀྱི་རྒྱུད་ལ་ཡོད་པ་ནི་རྟོགས་རིགས་དང་། ཐེག་དམན་གྱི་རྒྱུད་ལ་ཡོད་པ་ནི་རྟོགས་པ་དངོས་ཡིན་ལ། ཐེག་དམན་གྱི་རྒྱུད་ལ་ཡོད་པ་ལ་ཡང་རྟོགས་པ་དང་པོ་བཅུ་དྲུག་ནི་ཉོན་སྒྲིབ་ཀྱི་གཉེན་པོར་གྱུར་པའི་ལམ་ཟག་མེད་ཡིན་པས་དེ་ལ་ཉན་ཐོས་ཀྱི་མཐོང་སྒོམ་ཟག་མེད་གཉིས། རང་རྒྱལ་གྱི་མཐོང་སྒོམ་ཟག་མེད་གཉིས་ཏེ་བཞིར་ཡོད། ལམ་གཉིས་པའི་རྣམ་པ་ལྔ་ནི་ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་བཅས་ཡིན་པས་རང་རྒྱལ་གྱི་སྒོམ་ལམ་རྗེས་ཐོབ་ཡིན་ནོ། །ལམ་གསུམ་པའི་རྣམ་པ་དྲུག་ནི་ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་མེད་ཡིན་པས་རང་རྒྱལ་གྱི་མཐོང་སྒོམ་ཟག་མེད་གཉིས་ཡོད་དེ། རང་རྒྱལ་གྱི་ལམ་གྱི་སྤང་བྱར་གྱུར་པའི་ཤེས་སྒྲིབ་གཟུང་རྟོག་དེ་བྱང་སེམས་ཀྱི་ལམ་ལ་ལྟོས་ནས་མཐོང་སྤང་ཁོ་ན་ཡིན་ཀྱང་། རང་རྒྱལ་གྱི་ལམ་ལ་ལྟོས་ནས་མཐོང་སྤང་དང་སྒོམ་སྤང་གཉིས་ཀ་ཡོད་པའི་ཕྱིར་རོ། །འདིར་ཟག་པ་ཡོད་མེད་ཀྱི་དོན་ནི་གཟུང་འཛིན་གཉིས་སུ་སྣང་བ་ཡོད་མེད་ཀྱི་བྱེ་བྲག་གི་རྗེས་ཐོབ་དང་མཉམ་བཞག་ལ་འཇོག་གོ །དེ་དག་ནི་རང་ལུགས་ཡིན་ལ། འདིར་བཞེད་པའི་རྣམ་གྲངས་ཅུང་ཟད་བཀོད་ན། འཕགས་སེང་། བུདྡྷ་ཤྲཱིས་ཐེག་དམན་གྱི་རྒྱུད་ལ་ཡོད་པའི་ལམ་བདེན་གྱི་རྣམ་པ་གསུམ་ལས། དང་པོ་ལ་དམིགས་བསལ་མ་ཕྱེ། གཉིས་པ་སྒོམ་ལམ། གསུམ་པ་མཐོང་ལམ་དུ་གསལ་བར་གསུངས་ཏེ། ཉིར་སྣང་དུ། རིམ་པ་བཞིན་ཤེས་བྱའི་སྒྲིབ་པའི་གཉེན་པོའི་ལམ་ནི་རྣམ་པ་གཉིས་ཏེ། སྒོམ་པའི་ལམ་ཟག་པ་དང་བཅས་པ་དང་། མཐོང་བའི་ལམ་ཟག་པ་མེད་པའོ་ཞེས་དང་། འགྲེལ་ཆེན་ལས། ཐམས་ཅད་ཤེས་པ་ཉིད་ཀྱིས་རང་སངས་རྒྱས་ཀྱང་བསྡུས་པའི་ཕྱིར། དེ་དག་གི་ཤེས་བྱའི་སྒྲིབ་པའི་གཉེན་པོའི་བདག་ཉིད་ཅན་སྒོམ་པའི་ལམ་ཟག་པ་དང་བཅས་པ་ལས་གྱུར་པ་ཡིན་ནོ། །ཞེས་དང་། རང་སངས་རྒྱས་རྣམས་ཀྱི་མཐོང་བའི་ལམ་ཟག་པ་མེད་པ་ཤེས་བྱའི་སྒྲིབ་པའི་གཉེན་པོའི་བདག་ཉིད་ཅན་ཞེས་དང་། ཤེར་སྒྲོན་ལས། དེའི་འོག་ཏུ་བཅུ་གཅིག་ནི་ཤེས་བྱའི་སྒྲིབ་པའི་གཉེན་པོ་སྟེ། གྲངས་བཞིན་དུ་སྒོམ་པ་དང་མཐོང་བའི་ལམ་གྱི་བདག་ཉིད་ཟག་པ་དང་བཅས་པ་དང་ཅིག་ཤོས་ཀྱི་མཚན་ཉིད་ལྔ་དང་དྲུག་ཡིན་ཞེས་སོ། །ཤེར་འབྱུང་བློ་གྲོས་ཀྱིས་དང་པོ་ཉན་རང་གཉིས་ཀ་ལ། གཉིས་པ་དང་གསུམ་པ་རང་རྒྱལ་གྱི་སྒོམ་ལམ་དང་མཐོང་ལམ་ལ་གསལ་བར་བཤད་དེ། མངོན་རྟོགས་རྒྱན་གྱི་བསྡུས་དོན་ལས། དོན་འདི་ཡིན་ཏེ། ཉན་ཐོས་དང་རང་སངས་རྒྱས་དག་གིས་ནི་ཉོན་མོངས་པའི་སྒྲིབ་པ་སྤང་བྱ་ཉིད་དུ་མཚུངས་པའི་ཕྱིར། སྡུག་བསྔལ་ལ་སོགས་པའི་བདེན་པ་ལ་གནས་པ་མི་རྟག་པ་ལ་སོགས་པའི་མཚན་ཉིད་ཅན་མེད་པ་ལ་སོགས་པའི་རྣམ་པ་བཅུ་དྲུག་མཚུངས་པ་ཁོ་ནའོ། །རང་སངས་རྒྱས་དག་གིས་ནི་ཐུན་མོང་མ་ཡིན་པའི་ཕྱིར་ཤེས་བྱའི་སྒྲིབ་པའི་གཉེན་པོའི་བདག་ཉིད་ཟག་པ་དང་བཅས་པ་དང་། ཟག་པ་མེད་པའི་སྒོམ་ལམ་དང་། མཐོང་བའི་ལམ་ལ་བརྟེན་པ་ཞེས་སོགས་དང་། ཆོས་བཤེས་ཀྱིས་དང་པོ་ཉན་ཐོས་ཀྱི་མཐོང་སྒོམ་གཉིས་ཀ་ལ། གཉིས་པ་དང་གསུམ་པ་རང་རྒྱལ་གྱི་སྒོམ་ལམ་དུ་བཤད་དེ། ཚིག་གསལ་ལས། ཐམས་ཅད་ཤེས་པའི་སྐབས་སུ། ཉན་ཐོས་ཀྱི་རྣམ་པ་བཅུ་དྲུག་སྨོས་པ་ནི། དེ་དག་གིས་མཐོང་བ་དང་སྒོམ་པའི་ལམ་གྱི་མཚན་ཉིད་དོ། །རང་སངས་རྒྱས་ཀྱི་རྣམ་པ་བཅོ་ལྔ་སྨོས་པ་ནི་དེ་དག་གི་སྒོམ་པའི་ལམ་གྱི་མཚན་ཉིད་དོ། །ཞེས་སོ། །གསེར་གླིང་བས་དང་པོ་ཉན་ཐོས། གཉིས་པ་དང་གསུམ་པ་རང་རྒྱལ་ལ་བཤད་ཀྱི་ལམ་གྱི་དམིགས་བསལ་མེད་དོ། །བྱང་སེམས་ཀྱི་རྒྱུད་ལ་ཡོད་པའི་ཉེར་བདུན་ལ་སོ་སྐྱེའི་རྒྱུད་ལ་ཡོད་པ་ནི་མེད་པའི་རྣམ་པ་སོགས་དོན་སྤྱིའི་ཚུལ་གྱིས་རྟོགས་པ་ཡིན་གྱི་མངོན་སུམ་དུ་མ་རྟོགས་པས་གཞི་ཤེས་ཀྱི་རྣམ་པ་དངོས་མ་ཡིན་ནོ། །འོན་ཀྱང་ཐེག་དམན་གྱི་མཐོང་ལམ་སྔོན་སོང་ལ་ནི་དམིགས་བསལ་བྱ་དགོས་སོ། །བྱང་སེམས་འཕགས་པའི་རྒྱུད་ལ་ཡོད་པ་ནི་གཞི་ཤེས་ཀྱི་རྣམ་པ་ཡིན་ཏེ། མེད་པའི་རྣམ་པ་སོགས་མི་དམིགས་པར་མངོན་སུམ་རྟོགས་པའི་ཕྱིར་རོ། །གཉིས་པ་ལམ་ཤེས་ཀྱི་རྣམ་པ་རྒྱས་པར་བཤད་པ་ནི། རྒྱུ་དང་ལམ་དང་སྡུག་བསྔལ་དང་། །ཞེས་སོགས་ཚིགས་བཅད་གཅིག་སྟེ། དེའི་དོན་ཡང་སྔར་ལམ་ཤེས་ཀྱི་སྐབས་སུ་ཐོས་བསམ་གྱིས་རྒྱས་པར་གཏན་ལ་ཕབ་པ་དེ་ཉིད་རྣམ་པར་བསྡུ་ན་འདོད་ཆགས་དང་བྲལ་བའི་རྣམ་པ་སོགས་སོ་དྲུག་ཏུ་འདུས་ཞེས་པའི་དོན་ནོ། །དེ་ལྟར་སོ་དྲུག་པོ་བྱང་སེམས་སོ་སྐྱེའི་རྒྱུད་ལ་ཡོད་པ་རྣམས་འདོད་ཆགས་དང་བྲལ་བའི་རྣམ་པ་སོགས་དོན་སྤྱིའི་ཚུལ་གྱིས་རྟོགས་པ་ཡིན་གྱི་མངོན་སུམ་མ་རྟོགས་པས་ལམ་ཤེས་ཀྱི་རྣམ་པ་དངོས་མ་ཡིན་ལ་བྱང་སེམས་འཕགས་པའི་རྒྱུད་ལ་ཡོད་པ་རྣམས་ནི་ལམ་ཤེས་ཀྱི་རྣམ་པ་དངོས་ཡིན་པར་ཤེས་པར་བྱའོ། །འདིར་བདེན་བཞིའི་གོ་རིམ་གཞན་དང་མི་མཐུན་པར་ཀུན་འབྱུང་བདེན་པ་དང་། ལམ་བདེན་དང་པོར་བསྟན། སྡུག་བདེན་དང་། འགོག་བདེན་ཕྱིས་སྟོན་པའི་རྒྱུ་མཚན་ཅི་ཡིན་སྙམ་ན། གོ་རིམ་གཞན་རྣམས་ནི་རྒྱུད་བླར། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་གསུངས་པ་ལྟར། འབྲས་བུ་རྟོགས་པས་རྒྱུ་རྟོགས་པའི་བློ་དྲང་བ་རྟོགས་པའི་གོ་རིམ་ཡིན་ལ། འདིར་ནི་རྒྱུ་སྔར་བསྟན་ནས་འབྲས་བུ་ཕྱིས་བསྟན་པ་རྒྱུ་འབྲས་དོན་གྱི་གོ་རིམ་ཡིན་ནོ། །འདིར་ཀུན་འབྱུང་བདེན་པའི་རྣམ་པ་ལ་འདོད་ཆགས་དང་བྲལ་བ་སོགས་བརྒྱད། ལམ་བདེན་གྱི་རྣམ་པ་ལ་ཚད་མེད་པའི་རྣམ་པ་སོགས་བདུན། སྡུག་བདེན་གྱི་རྣམ་པ་ལ་མི་རྟག་པའི་རྣམ་པ་སོགས་ལྔ། འགོག་བདེན་གྱི་རྣམ་པ་ལ་ནང་སྟོང་པ་ཉིད་ཀྱི་རྣམ་པ་སོགས་བཅུ་དྲུག་སྟེ། སོ་དྲུག་པོ་རྣམས་འཕགས་སེང་གཉིས་ཀྱིས་མངོན་པ་ནས་བཤད་པའི་རྒྱུ་ཀུན་འབྱུང་སོགས་བཅུ་དྲུག་དང་སྦྱོར་བར་མཛད་པ་ནི་བདེན་བཞིའི་རྣམ་པ་ཡིན་ན། ཤེར་ཕྱིན་གྱི་མདོར་བཤད་པ་རྣམས་ཀྱང་མངོན་པ་དང་སྦྱོར་བར་མཛད་དགོས་པར་དགོངས་སོ། །འོ་ན་གཞི་ཤེས་ཀྱི་རྣམ་པ་ཉེར་བདུན་ཐེག་དམན་གྱི་རྟོགས་རིགས་ལ་བཞག་པ་ལྟར་ལམ་ཤེས་ཀྱི་རྣམ་པ་སོ་དྲུག་བྱང་སེམས་ཀྱི་རྟོགས་རིགས་སུ་གཞག་དགོས་པ་ལས། ཀུན་འབྱུང་བདེན་པའི་རྣམ་པ་བརྒྱད་ནི་ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པར་རྟོགས་པའི་རྟོགས་རིགས་དང་། སྡུག་བསྔལ་བདེན་པའི་རྣམ་པ་དང་པོ་བཞི་མི་རྟག་སོགས་བཞི་རྟོགས་པའི་ལྡོག་པ་ནས་བསྟན་པས་དེ་དག་བྱང་སེམས་ཀྱི་རྟོགས་རིགས་སུ་ཇི་ལྟར་འགྱུར་ཞེ་ན། སྐྱོན་མེད་དེ། འདི་དག་སྔར་ལམ་ཤེས་ཀྱི་སྐབས་སུ་རྒྱས་པར་ཐོས་བསམ་གྱིས་གཏན་ལ་ཕབ་པ་དེ་ཉིད་རྣམ་པར་བསྡུ་བའི་སྐབས་ཡིན་པས། དེར་ཐེག་པ་གསུམ་ཆར་གྱི་རྟོགས་རིགས་གཏན་ལ་ཕབ་པ་དེ་འདིར་ཡང་ཐེག་པ་གསུམ་ཆར་གྱི་རྟོགས་རིགས་ཀྱི་རྣམ་པར་བསྡུ་དགོས་པའི་ཕྱིར་རོ། །འོ་ན་མེད་པའི་རྣམ་པ་ནས་བཟུང་སྟེ། །ཞེས་པ་དང་། ཟློས་པའི་སྐྱོན་ཡོད་དོ་ཞེ་ན། སྐྱོན་མེད་དེ། དེར་གཞི་ཤེས་ཀྱི་རྣམ་པའི་ལྡོག་པ་ནས་བསྟན། འདིར་ལམ་ཤེས་ཀྱི་རྣམ་པའི་ལྡོག་པ་ནས་བསྟན་པའི་ཕྱིར་རོ། །དཔེར་ན་སྐབས་གཉིས་པར་ཡང་ཐེག་དམན་གྱི་རྟོགས་རིགས་བསྟན། སྐབས་གསུམ་པར་ཡང་ཐེག་དམན་གྱི་རྟོགས་རིགས་བསྟན་པ་གཉིས་ལ་ཟློས་པའི་སྐྱོན་མེད་པ་བཞིན་ནོ། །སྔོན་ཆད་འདི་ལ་ཐེ་ཚོམ་ཙམ་ཡང་མ་བྱུང་བ་འདྲ་སྟེ། འཕགས་པ་རྣམས་ནི་ཐེ་ཚོམ་ཆོད་པའི་ཕྱིར་དང་། སོ་སྐྱེ་རྣམས་ནི་ཐེ་ཚོམ་མ་ཞུགས་པར་སྣང་བའི་ཕྱིར་རོ། །གསུམ་པ་རྣམ་མཁྱེན་གྱི་རྣམ་པ་རྒྱས་པར་བཤད་པ་ནི། དྲན་པ་ཉེར་གཞག་ནས་བཟུང་སྟེ། །ཞེས་སོགས་ཚིགས་བཅད་གཉིས་ཏེ། དེའི་དོན་ཡང་སྐབས་དང་པོར་རྣམ་མཁྱེན་ཐོས་བསམ་གྱིས་རྒྱས་པར་གཏན་ལ་ཕབ་པ་དེ་ཉིད་སྒོམ་བྱུང་གིས་སྒོམ་པའི་ཚེ་རྣམ་པ་བརྒྱ་དང་བཅུར་བསྡུས་ནས་བསྒོམ་དགོས་སོ་ཞེས་པའི་དོན་ཏོ། །དེ་ལྟར་བརྒྱ་དང་བཅུ་ལས། བྱང་སེམས་སོ་སྐྱེའི་རྒྱུད་ལ་ཡོད་པ་རྣམས་ནི་རྣམ་པ་དེ་དག་དོན་སྤྱིའི་ཚུལ་གྱིས་རྟོགས་པ་ཙམ་ཡིན་པས་རྣམ་མཁྱེན་གྱི་རྣམ་པ་དངོས་མ་ཡིན་ནོ། །ཉན་ཐོས་དང་། བྱང་འཕགས་ཀྱི་རྒྱུད་ལ་ཡོད་པའི་གཞི་ཤེས་དང་རྗེས་སུ་མཐུན་པའི་སོ་བདུན། ལམ་ཤེས་དང་རྗེས་སུ་མཐུན་པའི་སོ་བཞི་རྣམས་ཀྱང་རྣམ་མཁྱེན་གྱི་རྣམ་པ་དངོས་མ་ཡིན་ཏེ། རྣམ་མཁྱེན་གྱི་རྣམ་པ་ཡིན་ན། རྣམ་མཁྱེན་ཡིན་དགོས་པའི་ཕྱིར་རོ། །འོ་ན་དེ་ལ་གྲངས་དུ་ཞིག་ཡོད། བདེན་བཞི་གང་གི་རྣམ་པ་ཡིན། འཕགས་པ་གང་གི་རྟོགས་རིགས་ཡིན་ཞེ་ན། དྲི་བ་དང་པོའི་ལན་དུ་གྲངས་བརྒྱ་དང་བཅུར་ཡོད་དོ་ཞེས་པ་ནི། དྲན་པ་ཉེར་གཞག་ནས་བཟུང་སྟེ། །སངས་རྒྱས་རྣམ་པའི་མཐར་ཐུག་བར། །ཞེས་པས་སྟོན། དྲི་བ་གཉིས་པའི་ལན་དུ་བདེན་བཞིའི་ནང་ནས་ལམ་བདེན་གྱི་རྣམ་པ་ཡིན་ནོ་ཞེས་པ་ནི། ལམ་གྱི་བདེན་པའི་ཞེས་པས་སྟོན། དྲི་བ་གསུམ་པའི་ལན་ནི་རྣམ་མཁྱེན་གྱི་རྣམ་པ་དེ་ལ་ཀུན་མཁྱེན་གསུམ་དུ་ཕྱེ་བའི་གཞི་ཤེས་ཀྱི་རྣམ་པ་ནི་ཉན་ཐོས་ཀྱི་རྟོགས་རིགས་དང་རྗེས་སུ་མཐུན། ལམ་ཤེས་ཀྱི་རྣམ་པ་ནི་བྱང་སེམས་ཀྱི་རྟོགས་རིགས་དང་རྗེས་སུ་མཐུན། སྟོབས་བཅུ་ལ་སོགས་པ་ནི་སངས་རྒྱས་ཁོ་ནའི་རྟོགས་རིགས་ཡིན་ནོ། །ཞེས་པ་ནི་རྗེས་མཐུན་པར་ཞེས་སོགས་ཀྱིས་སྟོན་ཏོ། །འོ་ན་སྔར་རྣམ་པ་ཙམ་ལ་ཀུན་མཁྱེན་གསུམ་དུ་ཕྱེ་ཟིན་བཞིན་དུ་སླར་ཡང་རྣམ་མཁྱེན་གྱི་རྣམ་པ་ལ་ཀུན་མཁྱེན་གསུམ་དུ་ཕྱེ་བ་ལ་དགོས་པ་ཅི་ཡོད་ཅེ་ན། རྣམ་མཁྱེན་གྱི་རྣམ་པ་སངས་རྒྱས་ཀྱི་སར་བཞག་པ་ན་སངས་རྒྱས་ཀྱི་སར་མཁྱེན་པ་གཞན་གཉིས་མེད་དམ་སྙམ་པའི་ལོག་རྟོག་འབྱུང་བས་དེ་དགག་པའི་ཆེད་དུ་རྣམ་མཁྱེན་གྱི་རྣམ་པ་ཉིད་ལ་ཡང་མཁྱེན་པ་གསུམ་དུ་ཕྱེ་བའོ། །ཁ་ཅིག་རྗེས་སུ་མཐུན་པར་ཞེས་པའི་དོན་སྐབས་འདིར་བསྟན་གྱི་མཁྱེན་པ་གཞན་གཉིས་གཞི་ཤེས་དང་ལམ་ཤེས་རྗེས་སུ་མཐུན་པ་ཡིན་ཞེས་པའི་དོན་དུ་བཤད་ནས་སངས་རྒྱས་ཀྱི་སར་མཁྱེན་པ་གཞན་གཉིས་མེད་པའི་ལུང་དུ་སྦྱོར་བ་ནི་གཞུང་གི་གཅོད་མཚམས་མ་ཤེས་པ་སྟེ། རྗེས་སུ་མཐུན་ཞེས་པའི་དོན་གང་དང་རྗེས་སུ་མཐུན་ན། སློབ་མ་བྱང་ཆུབ་སེམས་དཔའ་དང་། །སངས་རྒྱས་རྣམས་ལ་རིམ་བཞིན་ཏེ། །སུམ་ཅུ་བདུན་དང་སུམ་ཅུ་བཞི། །སུམ་ཅུ་རྩ་དགུ་དག་ཏུ་བཞེད། །ཅེས་པའི་དང་པོ་གཉིས་ལ་སྦྱར་དགོས་པའི་ཕྱིར་རོ། །དེས་ན་སངས་རྒྱས་ཀྱི་སར་མཁྱེན་པ་གསུམ་ཀ་ཡོད་པ་གཞུང་འདིས་གྲུབ་སྟེ། བྱང་ཆུབ་སེམས་དཔས་ཐོས་བསམ་གྱིས་གཏན་ལ་འབེབས་པའི་ཚེ་ཡང་མཁྱེན་གསུམ་ཐོས་བསམ་གྱིས་གཏན་ལ་ཕབ། རྣམ་པར་བསྡུ་བའི་ཚེ་ཡང་མཁྱེན་གསུམ་གྱི་རྣམ་པ་གསུམ་དུ་བསྡུས། སྦྱོར་བས་སྒོམ་པའི་ཚེ་ཡང་མཁྱེན་གསུམ་གྱི་སྦྱོར་བས་བསྒོམས་པས་འབྲས་བུ་མཐར་ཐུག་པའི་ཚེ་མཁྱེན་གསུམ་འབྱུང་བ་རྟེན་འབྲེལ་གྱི་ཆོས་ཉིད་ཡིན་པའི་ཕྱིར་རོ། །འོ་ན་སྔར་རྣམ་པ་ཙམ་ལ་ཀུན་མཁྱེན་གསུམ་དུ་ཕྱེ་བའི་གཞི་ཤེས་ཀྱི་རྣམ་པ་དེ་ལ་ཉན་ཐོས་དང་། རང་རྒྱལ་གྱི་རྟོགས་རིགས་སོ་སོར་ཕྱེ་ནས་སྐབས་འདིར་བསྟན་གྱི་གཞི་ཤེས་ཀྱི་རྣམ་པ་ལ་སློབ་མ་ཉན་ཐོས་ཀྱི་སོ་བདུན་དང་རྗེས་མཐུན་པ་ཞེས་སྟོན་ནས་རང་སངས་རྒྱས་ཀྱི་རྟོགས་རིགས་དང་རྗེས་མཐུན་པ་ཞེས་མི་སྟོན་པའི་རྒྱུ་མཚན་ཅི་ཡིན་སྙམ་ན་འདིར་ནི་སངས་རྒྱས་འཕགས་པས་རིགས་ཅན་གསུམ་ལ་ཆོས་འཁོར་བསྐོར་བའི་བདག་རྐྱེན་དུ་གྱུར་པའི་མཁྱེན་པ་སྟོན་པའི་སྐབས་ཡིན་པས་མཆོག་གི་སྤྲུལ་སྐུས་རིགས་ཅན་གསུམ་ལ་ཆོས་འཁོར་བསྐོར་བའི་ཚེ་རང་སངས་རྒྱས་ཀྱི་རིགས་ཅན་དང་། ཉན་ཐོས་ཀྱི་རིགས་ཅན་གཉིས་ཀ་ཡང་ཉན་ཐོས་ཀྱི་དགེ་འདུན་དུ་བསྡུས་ནས་ཀུན་ཤེས་ཉིད་ཀྱིས་ཉེར་ཞིར་ཁྲིད་པར་མཛད་པའི་དབང་དུ་བྱས་པའོ། །འོ་ན་དེའི་ཚེ་རང་སངས་རྒྱས་ཀྱི་རིགས་ཅན་ལ་རང་སངས་རྒྱས་ཀྱི་རྟོགས་རིགས་མི་སྟོན་པ་ཡིན་ནམ་སྙམ་ན། དེའི་ཚེ་དེ་ལ་དེ་སྟོན་ཀྱང་ཉན་ཐོས་ཀྱི་རིགས་ཅན་ལ་གཞི་ཤེས་སྟོན་པའི་ཁོངས་སུ་འདུས་པའི་ཕྱིར། དོན་འདི་ལ་དགོངས་ནས་གླེང་གཞིའི་སྐབས་སུ་ཐེག་དམན་གྱི་དགེ་འདུན་རྣམས་ཉན་ཐོས་ཀྱི་དགེ་འདུན་དུ་བསྡུས་ནས་དེ་ཉིད་ཀུན་ཤེས་ཉིད་ཀྱིས་ཁྲིད་པར་མཛད་ཅེས་གསུངས་པ་ཡིན་པར་ཤེས་པར་བྱའོ། །དེ་དག་གི་སྐབས་སུ་དཀའ་གནས་སོ་སོའི་དོན་ལ་བྱང་ཕྱོགས་སོ་བདུན་གྱི་ས་མཚམས་ལ་དཔྱད་པ། གཉེན་པོའི་ལམ་ལ་དཔྱད་པ། སྤྲུལ་པ་དང་མཐོང་ཆོས་ལ་བདེར་གནས་ཀྱི་ལམ་ལ་དཔྱད་པ། སྤོང་བའི་ལམ་ལ་དཔྱད་པ་དང་བཞི་ལས། དང་པོ་ནི། མཛོད་ཀྱི་ལུགས་ལ་དྲན་པ་ཉེར་གཞག་བཞི་ཚོགས་ལམ། ཡང་དག་སྤོང་བ་བཞི་སྦྱོར་ལམ་དྲོད། རྫུ་འཕྲུལ་གྱི་རྐང་པ་བཞི་རྩེ་མོ། དབང་པོ་ལྔ་བཟོད་པ། སྟོབས་ལྔ་ཆོས་མཆོག འཕགས་ལམ་ཡན་ལག་བརྒྱད་མཐོང་ལམ། བྱང་ཆུབ་ཡན་ལག་བདུན་སྒོམ་ལམ་ནས་འཇོག་པར་བཤད་དེ། དེ་ཉིད་དུ། སྡེ་ཚན་བདུན་ནི་གོ་རིམ་བཞིན། །ལས་ནི་དང་པོ་པ་དག་དང་། །ངེས་འབྱེད་ཆ་མཐུན་རྣམས་དང་ནི། །མཐོང་དང་སྒོམ་ལ་རབ་ཏུ་ཕྱེ། །ཞེས་སོ། །ཀུན་བཏུས་ཀྱི་ལུགས་ལ། དྲན་པ་ཉེར་བཞག་བཞི་ཚོགས་ལམ་ཆུང་ངུ་། ཡང་དག་སྤོང་བ་བཞི་འབྲིང་། རྫུ་འཕྲུལ་གྱི་རྐང་པ་བཞི་ཆེན་པོ། དབང་པོ་ལྔ་དྲོད་རྩེ་གཉིས། སྟོབས་ལྔ་བཟོད་མཆོག་གཉིས། བྱང་ཆུབ་ཡན་ལག་བདུན་མཐོང་ལམ། འཕགས་ལམ་ཡན་ལག་བརྒྱད་སྒོམ་ལམ་ནས་ཡོད་པར་བཤད་ཅིང་། སྡེ་ཚན་བདུན་ལ་མིང་གི་ཐ་སྙད་དངོས་པོ་ལ་ཡོངས་སུ་རྟོག་པའི་ལམ། རྩོལ་བ་ལས་བྱུང་བའི་ལམ། ཏིང་ངེ་འཛིན་ཡོངས་སུ་སྦྱོང་བའི་ལམ། མངོན་པར་རྟོགས་པར་སྦྱོར་བའི་ལམ། མངོན་པར་རྟོགས་པ་དང་འབྲེལ་བའི་ལམ། མངོན་པར་རྟོགས་པའི་ལམ། རྣམ་དག་ངེས་འབྱིན་གྱི་ལམ་ཞེས་པའི་ཐ་སྙད་མཛད་ཅིང་། འཕགས་སེང་གཉིས་ཀྱང་འདི་བཞིན་དུ་བཞེད་དོ། །གཉིས་པ་གཉེན་པོའི་ལམ་གྱི་སྐབས་སུ། ཉིར་སྣང་ལས་གཉེན་པོའི་ལམ་ནི་རྣམ་པ་གསུམ་སྟེ། ལྟ་བས་བྱས་པའི་གཉེན་པོ་སྟོང་པ་ཉིད་ནི་སྟོང་པ་ཉིད་ཀྱི་རྣམ་པས་ལྟ་བས་བྱས་པའི་གཉེན་པོ་མེད་པའི་ཕྱིར་རོ། །ཞེས་གསུངས་པ་ཡིན་ནོ། །ལྟ་བའི་རྒྱུ་མཚན་གྱི་རྣམ་པར་རྟོག་པའི་གཉེན་པོ་མཚན་མ་མེད་པ་ནི་མཚན་མ་མེད་པའི་རྣམ་པས་རྟོག་པ་དམིགས་སུ་མེད་པའི་ཕྱིར་རོ། །ཞེས་གསུངས་པ་ཡིན་ནོ། །ཁམས་གསུམ་པོ་ལ་སྨོན་པའི་གཉེན་པོ་སྨོན་པ་མེད་པ་ནི་སྨོན་པ་མེད་པའི་རྣམ་པས་སྨོན་པ་དམིགས་སུ་མེད་པའི་ཕྱིར་རོ། །ཞེས་གང་གསུངས་པ་ཡིན་ནོ། །དེ་ལ་སྟོང་པ་དང་བདག་མེད་པའི་རྣམ་པ་གཉིས་ཀྱིས་ནི་རྣམ་པར་ཐར་བའི་སྒོ་སྟོང་པ་ཉིད་དོ། །མི་རྟག་པ་དང་སྡུག་བསྔལ་བའི་རྣམ་པ་གཉིས་དང་། ཀུན་འབྱུང་གི་རྣམ་པ་བཞི་པོ་རྣམས་ཀྱིས་ནི་རྣམ་པར་ཐར་པའི་སྒོ་སྨོན་པ་མེད་པའོ། །འགོག་པ་དང་ལམ་གྱི་རྣམ་པ་རྣམས་ཀྱིས་ནི་རྣམ་པར་ཐར་པའི་སྒོ་མཚན་མ་མེད་པ་ཡིན་ཏེ། མཚན་མ་མེད་པ་གང་ཡིན་པ་དེ་ནི་འགོག་པ་དང་། མཚན་མའི་རྣམ་པར་རྟོག་པ་གང་གིས་བསལ་བ་ནི་ལམ་ཡིན་པའི་ཕྱིར་རོ། །མཚན་མེད་ཞི་བའི་རྣམ་པ་ཡིས། །ཞེས་གསུངས་པ་ནི་དངོས་པོའི་མཚན་མ་དང་རྗེས་སུ་འབྲེལ་བ་ཉན་ཐོས་ཀྱི་ལམ་གྱི་དབང་དུ་མཛད་པ་ཡིན་པའི་ཕྱིར་རོ། །དེ་དང་འདི་ལ་འགལ་བ་མེད་དོ་ཅེས་སོ། །འདི་དག་གི་དོན་ལ་མདོ་ལས་བསྟན་པའི་ཚུལ། རྟོགས་བྱའི་ཡུལ། ཡུལ་ཅན་གྱི་རྣམ་པ། ཐོས་བསམ་སྒོམ་གསུམ་གྱི་ཁྱད་པར། རྣམ་པ་བསྡུ་ཚུལ། གནད་ཀྱི་དོན་ངོས་གཟུང་བ་དང་དྲུག་ལས། དང་པོ་ནི། ཤེར་ཕྱིན་གྱི་མདོར། སྟོང་པ་ཉིད་ཀྱི་རྣམ་པས་ལྟ་བས་བྱས་པའི་གཉེན་པོ་དམིགས་སུ་མེད་པའི་ཕྱིར་རོ། །ཞེས་པས་རྣམ་པར་ཐར་བའི་སྒོ་སྟོང་པ་ཉིད་བསྟན། མཚན་མ་མེད་པའི་རྣམ་པས་རྟོག་པ་དམིགས་སུ་མེད་པའི་ཕྱིར་རོ། །ཞེས་པས་མཚན་མ་མེད་པ་བསྟན། སྨོན་པ་མེད་པའི་རྣམ་པས་སྨོན་ལམ་དམིགས་སུ་མེད་པའི་ཕྱིར་རོ། །ཞེས་པས་སྨོན་པ་མེད་པ་བསྟན་ཏོ། །གཉིས་པ་ནི། ཆོས་ཀྱི་སྡོམ་བཞི་ལས། ཆོས་ཐམས་ཅད་བདག་མེད་པ་ནི་སྟོང་པ་ཉིད་དང་། མྱ་ངན་ལས་འདས་པ་ཞི་བ་ནི་མཚན་མ་མེད་པ་དང་། འདུས་བྱས་ཐམས་ཅད་མི་རྟག་པ་དང་། ཟག་པ་དང་བཅས་པ་སྡུག་བསྔལ་བ་གཉིས་ནི་སྨོན་པ་མེད་པའི་ཡུལ་དུ་བསྟན་ཏོ། །གསུམ་པ་ནི། བདེན་བཞིའི་རྣམ་པ་བཅུ་དྲུག་ལས་སྡུག་བདེན་གྱི་སྟོང་པ་དང་། བདག་མེད་ཀྱི་རྣམ་པ་གཉིས་ནི་རྣམ་པར་ཐར་པའི་སྒོ་དང་པོ་སྟོང་པ་ཉིད་ཀྱི་རྣམ་པ་ཡིན་ལ། འགོག་ལམ་གྱི་རྣམ་པ་བརྒྱད་ནི་རྣམ་པར་ཐར་པའི་སྒོ་གཉིས་པ་མཚན་མ་མེད་པའི་རྣམ་པ་ཡིན་ཏེ། མཛོད་དུ། མཚན་མེད་ཞི་བའི་རྣམ་པ་ཡིས། །ཞེས་འགོག་བདེན་གྱི་ཞི་བའི་རྣམ་པ་ཁོ་ན་བཤད་པ་ནི། དངོས་པོའི་མཚན་མ་དང་འབྲེལ་བ་ཉན་ཐོས་ཀྱི་ལམ་གྱི་དབང་དུ་མཛད་པས་མི་འགལ་ལོ། །སྡུག་བདེན་གྱི་མི་རྟག་སྡུག་བསྔལ་གཉིས་དང་། ཀུན་འབྱུང་བདེན་པའི་རྣམ་པ་བཞི་སྟེ། དྲུག་ནི་རྣམ་པར་ཐར་བའི་སྒོ་གསུམ་པ་སྨོན་པ་མེད་པའི་རྣམ་པ་ཡིན་ནོ། །གོ་རིམ་འདི་ནི་སློབ་དཔོན་གྱི་འགྲེལ་པ་ཆེ་ཆུང་གཉིས་ཀྱི་དབང་དུ་བྱས་པ་ཡིན་ལ། ཉིར་སྣང་དུ་ནི། སྨོན་པ་མེད་པ་ལ་གཉིས་པ་དང་། མཚན་མ་མེད་པ་ལ་གསུམ་པར་བཤད་ཅིང་། བདེན་བཞིའི་རྣམ་པ་སྦྱོར་ཚུལ་ལ་ནི་ཁྱད་པར་མི་སྣང་ངོ་། །བཞི་པ་ནི། བསྡུ་བར་ནི། གཞུང་གང་དུ་སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་ཞེས་འབྱུང་བ་ནི་ཐོས་བསམ་སྒོམ་གསུམ་གྱི་ཤེས་རབ་གསུམ་ཀ་སྤྱིར་གཟུང་བ་ཡིན་ལ། ཏིང་ངེ་འཛིན་གྱི་སྒྲས་གསུངས་པ་ནི་འཇིག་རྟེན་དང་འཇིག་རྟེན་ལས་འདས་པའི་སྒོམ་བྱུང་ཐུན་མོང་དུ་འཛིན་པ་ཡིན་ལ། རྣམ་པར་ཐར་པའི་སྒོ་ཞེས་བཤད་པ་ནི། འཇིག་རྟེན་ལས་འདས་པའི་ཡེ་ཤེས་ཁོ་ནའོ་ཞེས་བཤད་དོ། །ལྔ་པ་ནི། འདིར་བསྟན་རྣམ་པ་ཐམས་ཅད་གསུམ་དུ་འདུས་ཏེ། འགོག་ལམ་གྱི་རྣམ་པ་རྣམས་ནི་མཚན་མ་མེད་པ་དང་། སྡུག་ཀུན་གྱི་རྣམ་པ་རྣམས་ནི་སྟོང་པ་ཉིད་དང་སྨོན་པ་མེད་པའི་རྣམ་པས་བསྡུས་པའི་ཕྱིར་རོ། །གཉེན་པོར་འགྱུར་ཚུལ་ལ་ཡང་གསུམ་སྟེ། རྣམ་པར་ཐར་པའི་སྒོ་དང་པོ་ནི། བདག་དང་བདག་གིར་ལྟ་བའི་གཉེན་པོ་ཡིན་པའི་ཕྱིར་དང་། སྒོ་གཉིས་པ་ནི་དེའི་རྒྱུ་རྣམ་པར་རྟོགས་པའི་གཉེན་པོ་ཡིན་པའི་ཕྱིར་དང་། གསུམ་པ་ནི། ཁམས་གསུམ་པ་ལ་བླང་བྱར་སྨོན་པའི་གཉེན་པོ་ཡིན་པའི་ཕྱིར་རོ། །དྲུག་པ་ནི། སྤྱིར་ཐེག་པ་གསུམ་ཆར་གྱི་གང་ཟག་གི་རྒྱུད་ལ་རྣམ་ཐར་སྒོ་གསུམ་ཡོད་ཀྱང་སྐབས་འདིར་བསྟན་གྱི་མཐུན་ཡུལ་དུ་གྱུར་པའི་རྣམ་ཐར་སྒོ་གསུམ་ནི་བྱང་སེམས་འཕགས་པའི་རྒྱུད་ཀྱི་མི་རྟག་ལ་སོགས་བཅུ་དྲུག་རྟོགས་པའི་མཁྱེན་པ་ཡིན་ལ། མཐུན་ཆོས་རྣམ་མཁྱེན་གྱི་རྣམ་པའི་ཁོངས་སུ་བགྲང་བར་བྱ་བ་ནི། དེའི་རྟོགས་རིགས་སངས་རྒྱས་འཕགས་པའི་རྒྱུད་ལ་ཡོད་པའོ། །གསུམ་པ་སྤྲུལ་པ་དང་མཐོང་ཆོས་ལ་བདེར་གནས་ཀྱི་ལམ་ལ་དཔྱད་པ་ལ། སྤྲུལ་པའི་ལམ་ནི་རྣམ་ཐར་དང་པོ་གསུམ་དང་། མཐོང་ཆོས་ལ་བདེར་གནས་ཀྱི་ལམ་ནི་རྣམ་ཐར་ཕྱི་མ་ལྔ་སྟེ་རྣམ་ཐར་བརྒྱད་དོ། །འདི་ལ་མཛོད་དུ། རྣམ་པར་ཐར་བརྒྱད་དང་པོ་གཉིས། །མི་སྡུག་བསམ་གཏན་གཉིས་ན་ཡོད། །གསུམ་པ་མཐའ་ན་དེ་མ་ཆགས། །གཟུགས་མེད་མཉམ་བཞག་དགེ་རྣམས་སོ། །ཞེས་དང་། འགོག་པའི་སྙོམས་པར་འཇུག་པའོ། །ཕྲ་བ་ཕྲ་བའི་མཇུག་ཐོག་ཏུ། །ཞེས་རྣམ་ཐར་དང་པོ་གཉིས་ནི། ངོ་བོ་མི་སྡུག་པ། ས་བསམ་གཏན་དང་པོ་གཉིས་ན་རིམ་པ་ལྟར་ཡོད། གསུམ་པ་ནི་ངོ་བོ་སེམས་བྱུང་མ་ཆགས་པ། ས་བསམ་གཏན་བཞི་པ་ན་ཡོད། གཟུགས་མེད་ཀྱི་རྣམ་ཐར་བཞི་ནི་གཟུགས་མེད་ཀྱི་སྙོམས་འཇུག་དག་པ་པ་དང་། ཟག་མེད་རྣམས་དང་། འགོག་པའི་རྣམ་པར་ཐར་པ་ནི། འགོག་པའི་སྙོམས་འཇུག་ཡིན་པར་བཤད་དོ། །ཀུན་བཏུས་སུ། ཏིང་ངེ་འཛིན་དང་། ཤེས་རབ་ནི་གཙོ་བོ་ཡིན་ལ། དེ་དག་དང་མཚུངས་པར་ལྡན་པའི་སེམས་དང་། སེམས་བྱུང་གི་ཆོས་ཐམས་ཅད་ནི་རྣམ་ཐར་དང་པོ་བདུན་གྱི་ངོ་བོ་དང་། འགོག་པའི་རྣམ་པར་ཐར་པ་ནི་ལྡན་མིན་འདུ་བྱེད་དུ་བཞེད་དོ། །ཅིའི་ཕྱིར་རྣམ་པར་ཐར་པ་ཞེས་བྱ་ཞེ་ན། རྣམ་ཐར་དང་པོ་གཉིས་ནི། སྤྲུལ་པའི་སྒྲིབ་པ་ལས་རྣམ་པར་ཐར་བའི་ཕྱིར་དང་། གསུམ་པ་ནི། གཟུགས་སྡུག་པ་དང་། མི་སྡུག་པ་སྤྲུལ་པར་འདོད་མི་འདོད་ཀྱི་སྒྲིབ་པ་ལས་ཐར་པའི་ཕྱིར་དང་། གཟུགས་མེད་ཀྱི་རྣམ་ཐར་བཞི་ནི་གཟུགས་མེད་ཞི་བའི་རོ་མྱང་གི་སྒྲིབ་པ་ལས་རྣམ་པར་ཐར་པའི་ཕྱིར་དང་། འགོག་པའི་རྣམ་པར་ཐར་པ་ནི་ཟག་བཅས་ཀྱི་ཚོར་འདུ་འགོག་པ་ལ་སྒྲིབ་པའི་སྒྲིབ་པ་ལས་རྣམ་པར་ཐར་པའི་ཕྱིར་རོ། །མདོར་བསྡུ་ན། གཟུགས་ཅན་གཟུགས་ལ་ལྟ་བའི་རྣམ་ཐར་གྱི་མཚན་ཉིད། ༼བསམ་གཏན་བཞི་པའི་༽དངོས་གཞིའི་སེམས་ལ་བརྟེན་ནས་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་སྣ་ཚོགས་སུ་སྤྲུལ་པ་ལ་གེགས་བྱེད་པའི་སྒྲིབ་པ་ལས་རྣམ་པར་གྲོལ་བའི་རྣམ་ཐར་རོ། །གཟུགས་མེད་གཟུགས་ལ་ལྟ་བའི་རྣམ་ཐར་གྱི་མཚན་ཉིད། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྣ་ཚོགས་སུ་སྤྲུལ་པ་ལ་གེགས་བྱེད་པའི་སྒྲིབ་པ་ལས་གྲོལ་བའི་རྣམ་ཐར་རོ། །སྡུག་པའི་རྣམ་ཐར་གྱི་མཚན་ཉིད་བསམ་གཏན་བཞི་པའི་སེམས་ལ་བརྟེན་ནས་གཟུགས་སྡུག་པར་རོ་གཅིག་ཏུ་སྤྲུལ་པ་ལ་གེགས་བྱེད་པའི་སྒྲིབ་ལས་གྲོལ་བའི་རྣམ་ཐར་རོ། །གཟུགས་མེད་ཀྱི་རྣམ་ཐར་བཞིའི་མཚན་ཉིད་རིམ་བཞིན། རང་རང་གི་དངོས་གཞིའི་དགེ་བ་གང་ཞིག རང་རང་གི་དངོས་གཞིའི་རོ་མྱང་བའི་སྒྲིབ་པ་ལས་གྲོལ་བའི་རྣམ་ཐར་རོ། །འགོག་པའི་རྣམ་ཐར་གྱི་མཚན་ཉིད། འགོག་པའི་སྙོམས་འཇུག་གང་ཞིག མི་མཐུན་ཕྱོགས་ཀྱིས་ཉམས་པ་ལས་གྲོལ་བའི་རྣམ་ཐར་རོ། །ཕྱི་མ་ལྔ་པོ་འདི་ལ་སྙོམས་འཇུག་དང་། རྣམ་ཐར་གྱི་ཁྱད་པར་ནི་སྙོམས་འཇུག་གཞིར་གཞག་པ་ལ་མི་མཐུན་ཕྱོགས་ཀྱིས་ཉམས་མི་སྲིད་པ་ནི་རྣམ་ཐར་དུ་འཇོག་པ་གནད་ཀྱི་དོན་ཏོ། །བཞི་པ་སྤོང་བའི་ལམ་ལ། མདོ་ལས་ཡུམ་འདི་ནི་བདེན་པ་བཞིའི་ཕ་རོལ་ཏུ་ཕྱིན་པའོ། །ཞེས་དང་། འགྲེལ་ཆེན་དུ། བདེན་པ་བཞིས་བསྡུས་པ་ཉོན་མོངས་པ་དང་མི་ལྡན་པའི་མཚན་ཉིད། བར་ཆད་མེད་པའི་ལམ་བཞི་ནི་སྤོང་བའི་ལམ་ཡིན་ནོ། །ཞེས་གསུངས་སོ། །འདི་ལ་བུདྡྷ་ཤྲཱིས་བདེན་པ་བཞིའི་ཆོས་ཤེས་པ་ཉིད་ཀྱི་བཟོད་པས་རབ་ཏུ་བསྡུས་པ་རྣམ་པ་བཞིའོ། །ཞེས་མཐོང་ལམ་ཆོས་བཟོད་བཞི་ལ་བཞེད་པ་དང་། ཨ་བྷ་ཡས་མཐོང་བའི་ལམ་བར་ཆད་མེད་པའི་ལམ་བཞི་དང་། ཞེས་མཐོང་ལམ་བར་ཆད་མེད་ལམ་བཞི་ལ་བཞེད་པ་དང་། ཚིག་གསལ་ལས། སྤོང་བའི་ལམ་གྱི་རྣམ་པ་ནི་བར་ཆད་མེད་པའི་ཏིང་ངེ་འཛིན་གྱི་མཚན་ཉིད་དོ། །ཅེས་བར་ཆད་མེད་པའི་ཏིང་ངེ་འཛིན་ལ་བཞེད་པ་དང་། གཟད་པས་མཐོང་སྒོམ་གཉིས་ཀའི་བར་ཆད་མེད་ལམ་ལ་བཞེད་དོ། །གནད་ཀྱི་དོན་ནི་འདི་ཡིན་ཏེ། ཚོགས་སྒྲུབ་ཀྱི་སྐབས་སུ་ས་བཅུའི་མཉམ་གཞག་ལ་གཉེན་པོའི་ཚོགས་དང་། རྗེས་ཐོབ་ལ་སའི་ཚོགས་སུ་བཞག་པ་ལྟར། འདིར་ཡང་ས་བཅུའི་མཉམ་གཞག་སྤོང་བ་གཉེན་པོ་རྣམས་ལ་སྤོང་བའི་ལམ་དང་། རྗེས་ཐོབ་རྣམས་ལ་སངས་རྒྱས་ཉིད་ཀྱི་ལམ་དུ་གཞག་པའི་སྐབས་ཡིན་པས་འདིར་སྤོང་བའི་ལམ་ཡང་མཐོང་ལམ་བར་ཆད་མེད་ལམ་ནས་རྒྱུན་མཐའི་བར་ཆད་མེད་ལམ་གྱི་བར་བཅུ་པོ་རེ་རེ་ལ་ཡང་བཞི་བཞིར་ཕྱེ་ནས་བཞག་གོ །ཕྱེ་ཚུལ་གཉེན་པོའི་ཚོགས་སྒྲུབ་དང་མི་འདྲ་སྟེ། དེར་ནི་བར་ཆད་མེད་ལམ་གཅིག་ཉིད་ཀྱང་སྤང་བྱ་བཞི་སྤོང་བའི་ཆ་ནས་བཞིར་འཇོག་ལ། འདིར་ནི་ཡུལ་བདེན་བཞིའི་གནས་ལུགས་རྟོགས་པའི་ཆ་ནས་བཞིར་ཕྱེ་བའི་ཕྱིར་རོ། །དེས་ན་སྡུག་བསྔལ་ལ་ཆོས་བཟོད་ཀྱི་སྐད་ཅིག་མ་གཅིག་ལ་ཡང་སྤོང་ལམ་བཞི་ཚང་བ་ནས་རྒྱུན་མཐའི་ཡེ་ཤེས་གཅིག་ཉིད་ལ་ཡང་སྤོང་ལམ་བཞི་ཚང་བའི་བར་རོ། །རྣམ་པའི་དོན་བསྡུའི་སྐབས་སུ་འཕགས་སེང་གཉིས་ཆར་གྱིས་གཞི་ཤེས་ཀྱི་རྣམ་པ་ལ་ཉན་ཐོས་ཀྱི་རྒྱུད་ལ་ཡོད་པ་ཟག་མེད་དང་། བྱང་ཆུབ་སེམས་ཀྱི་རྒྱུད་ལ་ཡོད་པ་ཟག་བཅས་སུ་བཤད་ཅིང་། ལམ་ཤེས་ཀྱི་རྣམ་པ་ནི་ཉིར་སྣང་དུ། རྣམ་གྲངས་ཀྱི་ཟག་བཅས་སུ་བཤད། རྣམ་མཁྱེན་གྱི་རྣམ་པ་ནི་ཟག་མེད་ཁོ་ནར་བཤད་དོ། །འདིར་ཁ་ཅིག་རྣམ་མཁྱེན་གྱི་རྣམ་པ་ལ་མཁྱེན་པ་གསུམ་དུ་ཕྱེ་བའི་དོན་བསྡུར་འཆད་པ་ནི་ནོར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ལམ་གྱི་རྣམ་པ་ནི་ཞེས་རྣམ་མཁྱེན་གྱི་རྣམ་པ་ལམ་བདེན་གྱི་རྣམ་པ་ཞེས་ལོགས་སུ་བཀར་ནས་གསུངས་པའི་ཤུགས་ཀྱིས་མཁྱེན་པ་གཞན་གཉིས་པོ་བདེན་པ་བཞི་ཆར་གྱི་རྣམ་པར་གྲུབ་པའི་ཕྱིར་ཏེ། གཞན་དུ་ན་འདིར་བསྟན་གྱི་མཁྱེན་པ་གསུམ་ཆར་ལམ་བདེན་གྱི་རྣམ་པར་ཁས་བླང་དགོས་པས་རྣམ་མཁྱེན་ལ་ལམ་བདེན་གྱི་རྣམ་པ་ཞེས་ལོགས་སུ་བཀར་བ་དོན་མེད་པའི་ཕྱིར་རོ། །འདིར་ཉན་ཐོས་ལ་སོགས་ཁོངས་སྦྱར་ནས་ཉན་རང་གི་རྒྱུད་ལ་ཡོད་པའི་གཞི་ཤེས་ཀྱི་རྣམ་པ་ཉེར་བདུན་ཟག་མེད་དུ་འཆད་པ་ནི་ཅུང་ཟད་རྩིང་སྟེ། རང་རྒྱལ་གྱི་སྒོམ་ལམ་རྗེས་ཐོབ་ཀྱིས་བསྡུས་པའི་ལམ་གཉིས་པའི་རྣམ་པ་ལྔ་ཟག་བཅས་སུ་བཤད་པ་དང་དངོས་སུ་འགལ་བའི་ཕྱིར་རོ། །འོ་ན་ཅི་ཞེ་ན་མདོར་བསྟན་གྱི་སྐབས་སུ་ཐེག་དམན་གྱི་རྒྱུད་ལ་ཡོད་པའི་ལམ་བདེན་གྱི་རྣམ་པ་བཅོ་ལྔ་ལ་ཟག་བཅས་ཟག་མེད་ཀྱི་ཁྱད་པར་ཕྱེ་ཟིན་པས། དེའི་ལྷག་མ་ཉན་ཐོས་ཀྱི་རྒྱུད་ལ་ཡོད་པའི་བདེན་པ་དང་པོ་གསུམ་གྱི་རྣམ་པ་བཅུ་གཉིས་དང་། བྱང་སེམས་ཀྱི་རྒྱུད་ཀྱི་གཞི་ཤེས་ཀྱི་རྣམ་པ་ཉེར་བདུན་གྱི་ཟག་བཅས་ཟག་མེད་ཀྱི་ཁྱད་པར་འདིར་འཆད་པ་ཡིན་པས་ཉིར་སྣང་དང་། འགྲེལ་ཆུང་གཉིས་ཆར་ལས་ཉན་ཐོས་ལ་སོགས་ཁོངས་མ་སྦྱར་བའི་གནད་ཀྱང་འདི་ཉིད་ཡིན་ནོ། །འདིའི་ཟག་བཅས་ཟག་མེད་དང་། སྐབས་གཉིས་པའི་སྒོམ་ལམ་ཟག་བཅས་ཟག་མེད་ཀྱི་དོན་གནད་གཅིག་པས་མཚན་གཞི་འཕགས་རྒྱུད་ཀྱི་རྗེས་ཐོབ་དང་། མཉམ་གཞག་ལ་འཇོག་པ་འཐད་ཀྱང་ཟག་བཅས་ཟག་མེད་དུ་འཇོག་པའི་དོན་གཟུང་འཛིན་གཉིས་སུ་སྣང་བའི་ཡང་དག་པ་མ་ཡིན་པའི་ཀུན་རྟོག་དང་བཅས་མ་བཅས་ལ་འཇོག་པ་ནི་ཀུན་མཁྱེན་ཆོས་རྗེའི་བཞེད་པའོ། །འོན་ཀྱང་ཉིར་སྣང་གི་དགོངས་པ་ལ་ཟག་པ་འདི་དང་བྱང་སེམས་ཀྱིས་ཆེད་དུ་གཉེར་ནས་མི་སྤོང་རྒྱུའི་ཉོན་མོངས་པ་དོན་གཅིག་ཏུ་བཞེད་པ་འདྲ་སྟེ། ངག་ལས་ཤེས་སོ། །རྣམ་པ་བསྟན་ཟིན་ནས་རྣམ་པ་སྒོམ་པའི་སྦྱོར་བ་ལ་འཇུག་པ་པོའི་རྟེན་གྱི་གང་ཟག་ནི། སངས་རྒྱས་རྣམས་ལ་ལྷག་པར་བྱས། །ཞེས་སོགས་ཏེ། ཁ་ཅིག་འདིར་བསྟན་གྱི་གང་ཟག་བཞི་པོ་འོག་ནས་འཆད་པར་འགྱུར་བའི་སྦྱོར་བ་ཉི་ཤུའི་རྟེན་གྱི་གང་ཟག་ལ་འདོད་པ་ནི་ཅུང་ཟད་མི་འཐད་དེ། འདིར་བསྟན་གང་ཟག་བཞི་པོ་ནི་ཐོས་བསམ་བྱེད་པའི་རྟེན་གྱི་གང་ཟག་ཡིན་ལ། སྦྱོར་བ་ཉི་ཤུའི་རྟེན་གྱི་གང་ཟག་ནི་སྒོམ་བྱུང་གི་རྟེན་གྱི་གང་ཟག་ཡིན་པའི་ཕྱིར་དང་། སློབ་དཔོན་གྱིས་ཀྱང་འདིར་བསྟན་གང་ཟག་བཞི་པོ་དེ་སྦྱོར་བ་སྒོམ་པ་ལ་སྦྱོར་བ་པོར་བཤད་པའི་ཕྱིར་ཏེ། དེ་དག་ཀྱང་སྦྱོར་བ་པོ་མེད་པར་བརྗོད་པར་མི་ནུས་པས་ཞེས་དང་། དེ་ལྟར་སྦྱོར་བ་པོ་བསྟན་ནས། །ཞེས་གསུངས་པའི་ཕྱིར་རོ། །དེས་ན་གང་ཟག་གཅིག་ཉིད་ཀྱི་རྒྱུན་ལ་དང་པོར་ཡུམ་ཉན་པ་དང་། དེ་ནས་ཚིག་བློ་ལ་ལེན་པ་དང་། དེ་ནས་དོན་མི་བརྗེད་པར་འཛིན་པ་སྟེ། གསུམ་ནི་མཁྱེན་གསུམ་ལ་ཐོས་པ་བྱེད་པའི་གང་ཟག་ཡིན་ལ། དེ་ནས་ཚུལ་བཞིན་ཡིད་ལ་བྱེད་པ་ནི་རྣམ་པ་བརྒྱ་བདུན་ཅུ་རྩ་གསུམ་དུ་བསྡུས་ནས་སེམས་པར་བྱེད་པའི་བསམ་བྱུང་གི་གང་ཟག་ཡིན་པས་དེས་སྦྱོར་བ་སྒོམ་པ་ལ་འཇུག་པ་ཡིན་ནོ། །མདོར་ན་འདིར་བསྟན་གྱི་གང་ཟག་དང་པོ་གསུམ་ནི་སྐབས་དང་པོ་གསུམ་དུ་བསྟན་པའི་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་གནས་སྐབས་ཡིན་ལ། བཞི་པ་ནི། དེ་དག་རྣམ་པར་བསྡུ་བའི་གནས་སྐབས་ཡིན་པས་ད་དུང་སྦྱོར་བའི་ཡོན་ཏན་དང་། སྐྱོན་དང་མཚན་ཉིད་གཏན་ལ་དབབ་པ་ལ་འཇུག་པར་བྱ་དགོས་སོ། །འོ་ན་གང་ཟག་བཞི་པོ་དེ་ཐོས་བསམ་གྱིས་གཏན་ལ་དབབ་པའི་དོན་རྣམ་པར་བསྡུས་ནས་སྦྱོར་བ་སྒོམ་པ་ལ་འཇུག་དགོས་ན། ཡུལ་ཅན་སྦྱོར་བ་དེ་ལ་དབྱེ་ན་དུ་ཡོད་ཅེ་ན་ཉི་ཤུ་ཡོད་དོ་ཅེས་པ་ནི། གཟུགས་ལ་སོགས་ལ་མི་གནས་ཕྱིར། །ཞེས་སོགས་ཀྱིས་སྟོན་ཏོ། །འདི་ལ་བུདྡྷ་ཤྲཱི་ལྟར་ན། དང་པོ་ལྔ་རང་བཞིན་གྱི་དང་། ཕྱི་མ་བཅོ་ལྔ་གནས་སྐབས་ཀྱི་སྦྱོར་བར་བཞེད། འབྲེས་དང་པོ་ལྔ་རང་བཞིན་གྱི། དེ་ནས་བཅུ་བཞི་གནས་སྐབས་ཀྱི། ཐ་མ་དེ་དག་འགྲུབ་པར་བྱེད་པ་ཐབས་ཀྱི་སྦྱོར་བར་བཞེད་དོ། །ཟབ་པའི་སྦྱོར་བ་སོགས་གསུམ་ལ་ཉིར་སྣང་དུ། དེ་ཡང་ཆུང་ངུ་དང་། འབྲིང་དང་། ཆེན་པོའི་གོ་རིམ་བཞིན་དུ། སྦྱོར་བ་རྣམ་པ་གསུམ་ཡིན་ནོ་ཞེས་པ་དང་། ཡང་ན་ཟབ་མོར་མངོན་པར་བྱང་ཆུབ་པ་དང་། ཐུན་མོང་མ་ཡིན་པར་མངོན་པར་བྱང་ཆུབ་པ་དང་། བླ་ན་མེད་པར་མངོན་པར་བྱང་ཆུབ་པའི་དབང་དུ་མཛད་ནས་ཟབ་པ་ལ་སོགས་པའི་སྦྱོར་བ་གསུམ་ཡིན་པར་ཤེས་པར་བྱའོ། །ཞེས་གསུངས་ལ། བོད་དག་གིས་ནི་མཁྱེན་གསུམ་གྱི་སྦྱོར་བ་ལ་གོ་རིམ་བཞིན་དུ་སྦྱོར་བར་མཛད་དོ། །ས་མཚམས་ལ་སློབ་དཔོན་གྱིས་དང་པོ་ལྔ་ཚོགས་ལམ་ནས་རྒྱུན་མཐའི་བར། ཚེགས་ཆེན་ཡུན་རིང་རྟོགས་པའི་སྦྱོར་བ་ཐེག་ཆེན་གྱི་ཚོགས་ལམ། ལུང་བསྟན་ཐོབ་པ། ཕྱིར་མི་ལྡོག་པ། ངེས་པར་འབྱུང་བ། བར་ཆད་མེད་པའི་སྦྱོར་བ་བཞི། སྦྱོར་ལམ་བཞི་ལ་རིམ་པ་བཞིན། བྱང་ཆུབ་ལ་ཉེ་སྦྱོར་ས་དང་པོ། མྱུར་བར་བྱང་ཆུབ་པ་ས་གཉིས་པ་ནས་བདུན་པའི་བར། གཞན་དོན་གྱི་སྦྱོར་བ་སོགས་ལྔ་ས་བརྒྱད་པ། འབྲས་བུ་རིན་པོ་ཆེ་སྦྱིན་པའི་སྦྱོར་བ་ས་དགུ་པ། རྣམ་པར་དག་པའི་སྦྱོར་བ་ས་བཅུ་པ། ས་མཚམས་ཀྱི་སྦྱོར་བ་ས་བདུན་པ་མན་ཆད་ན་ཡོད་པར་བཞེད་དོ། །ཤེར་འབྱུང་བློ་གྲོས་ཀྱིས་དང་པོ་ལྔ་སྦྱོར་ལམ། ཚེགས་ཆེན་མཐོང་ལམ། ལུང་བསྟན་སོགས་དགུ་སྒོམ་ལམ་ས་དགུ་ན། འདུ་ཤེས་འགོག་པ་ནས་འབྲས་བུ་སྦྱིན་པའི་བར་དག་པ་ས་གསུམ་ན། རྣམ་པར་དག་པ་དང་ས་མཚམས་ཀྱི་སྦྱོར་བ་གཉིས་ས་བཅུ་པའི་བར་ཆད་མེད་ལམ་ན་ཡོད་པར་བཞེད་དོ། །སྦྱོར་བ་ཉི་ཤུ་པོ་དེ་ལ་རྣམ་རྫོགས་སྦྱོར་བ་ཞེས་བརྗོད་པའི་རྒྱུ་མཚན་ཡོད་དེ། ཉི་ཤུ་པོ་རེ་རེས་ཀྱང་རྣམ་པ་བརྒྱ་བདུན་ཅུ་རྩ་གསུམ་རྫོགས་པར་སྒོམ་པར་བྱེད་པའི་ཕྱིར་རོ། །འོ་ན་བྱང་སེམས་སོ་སྐྱེའི་རྒྱུད་ཀྱི་སྦྱོར་བས་མཁྱེན་གསུམ་གྱི་རྣམ་པ་ཇི་ལྟར་བསྒོམ་སྙམ་ན། མཚན་ཉིད་རྗེས་སུ་སྤྱོད་པ་དང་། སྨོན་ལམ་གྱི་རྣམ་པ་སོགས་ཀྱི་སྒོ་ནས་བསྒོམ་པར་ཤེས་པར་བྱའོ། །དེ་ལྟར་སྦྱོར་བ་བསྒོམ་པ་ལ་མ་འོངས་པ་ན་བདུད་ཀྱི་མཐུ་བཅོམ་པ་ལ་སོགས་པ་ཡོན་ཏན་བཅུ་བཞི་འབྱུང་ངོ་ཞེས་པའི་སྒོ་ནས་སྤྲོ་བ་བསྐྱེད་པ་ནི། བདུད་ཀྱི་མཐུ་བཅོམ་ལ་སོགས་པ། །ཡོན་ཏན་རྣམ་པ་བཅུ་བཞིའོ། །ཞེས་ཏེ། འདི་ནི་ད་ལྟར་སྦྱོར་བ་རང་ལ་ཡོད་པའི་ཡོན་ཏན་རྟགས་སུ་བཀོད་ནས། བདུད་ཀྱི་མཐུ་བཅོམ་པ་ལ་སོགས་པ་མ་འོངས་པ་ན་འབྱུང་བར་འགྱུར་བའི་ཡོན་ཏན་དཔོག་པ་རྒྱུ་ཚོགས་གྲངས་ཚང་གི་རྟགས་ལས་འབྲས་བུ་འབྱུང་རུང་སྒྲུབ་པར་བྱེད་པ་རང་བཞིན་གྱི་རྟགས་ཡང་དག་གོ །མ་འོངས་པ་ན་འབྱུང་བར་འགྱུར་བ་འདིར་སྦྱོར་བའི་ཡོན་ཏན་དུ་བཤད་པ་ལ་དགོས་པ་ཅི་ཡོད་སྙམ་ན། བྱང་ཆུབ་སེམས་དཔའ་དེས་མཁྱེན་གསུམ་ཐོས་བསམ་གྱིས་གཏན་ལ་ཕབ་པ་དང་། དེ་ཉིད་རྣམ་པར་བསྡུ་བ་དང་། དེ་ཉིད་སྦྱོར་བས་བསྒོམ་དགོས་པར་བསྟན་པ་ན་བྱང་སེམས་དབང་རྟུལ་འགའ་ཞིག་སེམས་ཞུམ་པར་འགྱུར་བས་དེ་བསལ་ནས་ཕན་ཡོན་གྱི་སྒོ་ནས་སྤྲོ་བ་བསྐྱེད་པའི་ཆེད་ཡིན་ཏེ། དཔེར་ན་སའི་ཡོངས་སྦྱོང་མང་པོ་བསྟན་ནས་ས་བཅུ་པ་འབྲས་བུའི་སྒོ་ནས་བཤད་པ་དང་། སྒོམ་ལམ་རྩེ་སྦྱོར་སྒོམ་སྤང་གི་གཉེན་པོའི་ལྡོག་པ་ནས་བསྟན་ནས། བར་ཆད་མེད་པའི་རྩེ་སྦྱོར་བསོད་ནམས་མང་པོའི་ལྡོག་པ་ནས་བསྟན་པ་བཞིན་ནོ། །དེ་ལྟར་སྦྱོར་བ་སྒོམ་པ་ལ་ཡོན་ཏན་འབྱུང་བར་ཤེས་ནས་སྤྲོ་བ་སྐྱེས་ཀྱང་གནས་སྐབས་སུ་བར་དུ་གཅོད་པར་བྱེད་པའི་སྐྱོན་ངོ་མ་ཤེས་ན་སྦྱོར་བ་མཐར་ཕྱིན་པར་མི་འགྱུར་བས་སྐྱོན་འདི་དང་འདི་དག་ནི་སྦྱོར་བ་བསྒོམ་པ་ལ་བར་དུ་གཅོད་པར་བྱེད་པ་ཡིན་པས་ཤེས་ནས་སྤོང་དགོས་སོ་ཞེས་པ་ནི། སྐྱོན་ནི་བཅུ་ཚན་བཞིར་བཅས་པ། །དྲུག་ཏུ་ངེས་པར་རྟོགས་པར་བྱ། །ཞེས་གསུངས་སོ། །དེ་ལྟར་ཡོན་ཏན་མཐོང་ནས་སྤྲོ་བ་སྐྱེ། སྐྱོན་ཤེས་ནས་སྤོང་བའི་སྒོ་ནས་བསྒོམ་པར་བྱ་དགོས་པའི་སྦྱོར་བའི་མཚན་ཉིད་གང་ཞེ་ན། མཚོན་པར་བྱེད་པ་བྱེད་སྒྲུབ་ཀྱི་དབང་དུ་བྱས་པ་གསུམ་དང་། མཚོན་པར་བྱ་བ་ལས་སྒྲུབ་ཀྱི་དབང་དུ་བྱས་པ་གཅིག་སྟེ་བཞིར་ཡོད་དོ། །ཞེས་སྤྱིར་བསྟན་པ་ནི། གང་གིས་མཚོན་དེ་མཚན་ཉིད་དུ། །ཞེས་སོགས་ཚིགས་བཅད་གཅིག་གོ །འོ་ན་བྱེད་སྒྲུབ་ཀྱི་དབང་དུ་བྱས་པའི་མཚན་ཉིད་ལ་གསུམ་ཇི་ལྟར་དགོས་སྙམ་ན། ཐེག་ཆེན་གྱི་སྦྱོར་བར་མཚོན་པ་ལ་སྦྱོར་བའི་ངོ་བོ་ཤེས་རབ་རྟོགས་པའི་ཆ་དང་། ཐབས་ཕྲིན་ལས་ཀྱི་ཆ་ཟུང་དུ་འཇུག་པའི་སྒོ་ནས་སྦྱོར་བ་ཡིན་པས་ཤེས་རབ་རྟོགས་པའི་ཆ་མཚོན་པར་བྱེད་པ་ཤེས་མཚན་དང་། ཐབས་ཕྲིན་ལས་ཀྱི་ཆ་མཚོན་པར་བྱེད་པ་བྱེད་མཚན་ཡིན་ཞིང་། དེ་ཉིད་ཐེག་ཆེན་དུ་མཚོན་པར་བྱེད་པ་ཐེག་དམན་ལས་ཁྱད་པར་དུ་འཕགས་པར་མཚོན་དགོས་པས་དེ་ཉིད་ལ་ཁྱད་མཚན་དགོས་པའི་ཕྱིར་རོ། །མཚོན་པར་བྱ་བ་ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཇི་ལྟ་བུ་ཞེ་ན། ངོ་བོ་ཉིད་མཚན་བཅུ་དྲུག་སྟེ། དེ་ཉིད་མཚན་གཞིར་བྱས་ནས་སྤྱིར་ཐེག་ཆེན་གྱི་སྦྱོར་བ་དང་། བྱེ་བྲག་མཁྱེན་གསུམ་གྱི་སྦྱོར་བར་མཚོན་དགོས་པའི་ཕྱིར་རོ། །ཞིབ་ཏུ་ཕྱེ་ན་མཚོན་བྱ་གང་། མཚོན་བྱེད་གང་གིས། མཚན་གཞི་གང་གི་སྟེང་དུ་མཚོན་པར་བྱེད་ཅེས་པ་གསུམ་ལས། མཚོན་བྱ་ནི་གོང་དུ་བཤད་པའི་སྦྱོར་བ་ཉི་ཤུ་པོ་རེ་རེའི་སྟེང་དུ་ཡང་རང་གི་ངོ་བོ་ཐེག་ཆེན་གྱི་སྦྱོར་བ་ཡིན་པ་དང་། བྱེ་བྲག་ཕྱེ་ན་མཁྱེན་པ་གསུམ་གྱི་སྦྱོར་བ་གསུམ་གསུམ་དུ་ཡོད་དེ། རང་གི་ངོ་བོ་རྣམ་རྫོགས་སྦྱོར་བ་ཡིན་པའི་ཕྱིར་དང་། རེ་རེས་ཀྱང་རྣམ་པ་བརྒྱ་བདུན་ཅུ་རྩ་གསུམ་པོ་ཀུན་རྫོགས་པར་སྒོམ་པར་བྱེད་པའི་ཕྱིར་རོ། །དེས་ན་སྤྱིར་ཐེག་ཆེན་གྱི་སྦྱོར་བ་དང་། བྱེ་བྲག་མཁྱེན་གསུམ་གྱི་སྦྱོར་བ་གསུམ་ནི་མཚོན་པར་བྱ་བ་ཡིན་པར་ཤེས་པར་བྱའོ། །མཚོན་བྱེད་ལ་ཡང་སྦྱོར་བ་རང་གི་ངོ་བོ་མཚོན་པར་བྱེད་པ་དང་། ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པར་མཚོན་པ་བྱེད་པ་གཉིས་ལས། དང་པོ་ནི། ཤེས་མཚན་དང་། བྱེད་མཚན་གཉིས་ཏེ། ཐབས་ཤེས་ཟུང་དུ་འཇུག་པའི་སེམས་དཔའི་རྣལ་འབྱོར་ཞེས་པའི་དོན་ནོ། །དེས་ནི་སྤྱིར་ཐེག་ཆེན་གྱི་སྦྱོར་བ་ཙམ་མཚོན་པར་བྱེད་པ་ཡིན་ལ། བྱེ་བྲག་ཕྱེ་ན་གཞི་ཤེས་སྦྱོར་བའི་ཤེས་མཚན་དང་། བྱེད་མཚན་གཉིས་ཀྱིས་ནི་ཐེག་ཆེན་གྱི་གཞི་ཤེས་ཀྱི་སྦྱོར་བ་མཚོན་པར་བྱེད། ལམ་ཤེས་སྦྱོར་བའི་ཤེས་མཚན་དང་། བྱེད་མཚན་གཉིས་ཀྱིས་ནི་ལམ་ཤེས་སྦྱོར་བ་མཚོན་པར་བྱེད། རྣམ་མཁྱེན་སྦྱོར་བའི་ཤེས་མཚན་དང་། བྱེད་མཚན་གཉིས་ཀྱིས་ནི་རྣམ་མཁྱེན་གྱི་སྦྱོར་བ་མཚོན་པར་བྱེད་དེ། ཤེས་མཚན་དང་། བྱེད་མཚན་སྟོན་པའི་གཞུང་རྣམས་ལས་མཁྱེན་པ་གསུམ་གྱི་ས་མཚམས་སོ་སོར་བཅད་པའི་གནད་ཀྱང་འདི་ཉིད་ཡིན་ནོ། །གཉིས་པ་ནི། སྦྱོར་བ་གསུམ་པོ་དེ་དག་ཀྱང་ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པ་ཡིན་ཏེ། བསམ་གྱིས་མི་ཁྱབ་པ་ལ་སོགས་པའི་ཆོས་ཀྱི་བདག་མེད་རྟོགས་པས་ཁྱད་པར་དུ་བྱས་པའི་ཕྱིར་རོ། །ཞེས་པ་སྟེ། ཁྱད་མཚན་སྟོན་པའི་གཞུང་ལ་མཁྱེན་གསུམ་གྱི་ས་མཚམས་སོ་སོར་མ་བཅད་པའི་གནད་ཀྱང་འདི་ཉིད་ཡིན་ནོ། །མཚན་གཞི་ནི། སྤྱིར་ཐེག་ཆེན་གྱི་སྦྱོར་བ་ཙམ་ནི་ངོ་བོ་ཉིད་མཚན་བཅུ་དྲུག་གི་སྟེང་དུ་མཚོན་པར་བྱེད། བྱེ་བྲག་ཐེག་ཆེན་གྱི་གཞི་ཤེས་སྦྱོར་བ་ནི་ཉོན་མོངས་ཀྱིས་དབེན་པའི་ངོ་བོ་ཉིད་ལ་སོགས་པ་བཞིའི་སྟེང་དུ་མཚོན་པར་བྱེད། ལམ་ཤེས་ཀྱི་སྦྱོར་བ་ནི་བྱ་དཀའ་བའི་ངོ་བོ་ཉིད་ལ་སོགས་པ་ལྔའི་སྟེང་དུ་མཚོན་པར་བྱེད། རྣམ་མཁྱེན་གྱི་སྦྱོར་བ་ནི་དམིགས་པའི་ངོ་བོ་ཉིད་ལ་སོགས་པ་བདུན་གྱི་སྟེང་དུ་མཚོན་པར་བྱེད་དོ། །མཚོན་ཚུལ་མདོར་བསྡུ་ན། ངོ་བོ་ཉིད་མཚན་བཅུ་དྲུག་མཚན་གཞི། ཐེག་ཆེན་གྱི་སྦྱོར་བ་ཡིན་པར་མཚོན། ཐབས་ཤེས་ཟུང་དུ་འཇུག་པའི་སེམས་དཔའི་རྣལ་འབྱོར་ཡིན་པ། ཐེག་ཆེན་གྱི་སྦྱོར་བ་མཚན་གཞི། ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པའི་སྦྱོར་བ་ཡིན་པར་མཚོན། བསམ་གྱིས་མི་ཁྱབ་པ་སོགས་ཆོས་ཀྱི་བདག་མེད་རྟོགས་པས་ཁྱད་པར་དུ་བྱས་པའི་སེམས་དཔའི་རྣལ་འབྱོར་ཡིན་པ། ཞེས་པ་ནི། སྤྱིའི་མཚོན་ཚུལ་ཡིན་ལ། བྱེ་བྲག་ཕྱེ་ན་ཉོན་མོངས་ཀྱིས་དབེན་པའི་ངོ་བོ་ཉིད་སོགས་བཞི་ནི་མཚན་གཞི། ཐེག་པ་ཆེན་པོའི་གཞི་ཤེས་ཀྱི་སྦྱོར་བ་ཡིན་པར་མཚོན། ཡུམ་ལ་བརྟེན་ནས་དེ་བཞིན་གཤེགས་པ་འབྱུང་བར་རྟོགས་པ་སོགས་གཞིའི་གནས་ལུགས་རྟོགས་པའི་རྟོགས་པ་དང་། ཕན་བདེ་སྐྱོབ་པའི་བྱེད་པ་གསུམ་དང་ལྡན་པའི་སེམས་དཔའི་རྣལ་འབྱོར་ཡིན་པ། ཐེག་ཆེན་གྱི་གཞི་ཤེས་སྦྱོར་བ་མཚན་གཞི། ཐེག་དམན་གྱི་སྦྱོར་བ་ལས་ཁྱད་པར་དུ་འཕགས་པའི་སྦྱོར་བར་མཚོན། མཚན་ཉིད་སྔར་བཞིན་ནོ། །བྱ་དཀའ་བའི་ངོ་བོ་ཉིད་ལ་སོགས་པ་ལྔ་མཚན་གཞི། ལམ་ཤེས་ཀྱི་སྦྱོར་བ་ཡིན་པར་མཚོན། རྣམ་ཐར་སྒོ་གསུམ་ཤེས་པ་སོགས་ལམ་གྱི་གནས་ལུགས་རྟོགས་པའི་རྟོགས་པ་དང་། སྐྱབས་ལ་སོགས་པའི་བྱེད་པ་བདུན་དང་ལྡན་པའི་སེམས་དཔའི་རྣལ་འབྱོར་ཡིན་པ། ལམ་ཤེས་གྱི་སྦྱོར་བ་མཚན་གཞིར་བྱས་ནས་ཁྱད་མཚན་གྱིས་མཚོན་ཚུལ་སྔར་བཞིན་ནོ། །དམིགས་པའི་ངོ་བོ་ཉིད་ལ་སོགས་པ་བདུན་མཚན་གཞི། རྣམ་མཁྱེན་གྱི་སྦྱོར་བ་ཡིན་པར་མཚོན། མཐོང་ཆོས་ལ་བདེར་གནས་ཤེས་པ་སོགས་རྣམ་པའི་གནས་ལུགས་རྟོགས་པའི་རྟོགས་པ་དང་། རྟེན་གྱི་མཛད་པ་གཅིག་དང་ལྡན་པའི་སེམས་དཔའི་རྣལ་འབྱོར་ཡིན་པ། རྣམ་མཁྱེན་གྱི་སྦྱོར་བ་མཚན་གཞིར་བྱས་ནས་ཁྱད་མཚན་གྱིས་མཚོན་ཚུལ་སྔར་བཞིན་ནོ། །གནད་ཀྱི་དོན་ནི་ཐོས་བསམ་གྱིས་གཏན་ལ་ཕབ་པའི་ཚེ། མཁྱེན་པ་གསུམ་གཏན་ལ་ཕབ། རྣམ་པར་བསྡུ་བའི་ཚེ་ཡང་མཁྱེན་གསུམ་གྱི་རྣམ་པར་བསྡུས། དེ་དག་སྦྱོར་བ་ཉི་ཤུས་བསྒོམ་དགོས་པར་བསྟན་པ་ན། ཉི་ཤུ་པོ་རེ་རེའི་སྟེང་དུ་ཡང་སྤྱིར་ཐེག་ཆེན་གྱི་སྦྱོར་བ་ཡིན་པ་དང་། བྱེ་བྲག་མཁྱེན་གསུམ་གྱི་སྦྱོར་བ་གསུམ་དུ་ཡོད་པར་ངེས་ནས་དེ་དག་མཚོན་བྱེད་གང་གིས། མཚན་གཞི་གང་གི་སྟེང་དུ་མཚོན་མ་ངེས་པ་ལ་སྐབས་འདིར་མཚན་ཉིད་ཀྱི་གཞུང་རྣམས་གསུངས་པ་ཡིན་པས་རང་གི་ངོ་བོ་མཚོན་པའི་ཚུལ་ལ་སྦྱར་བར་བྱ་བ་ཡིན་ནོ། །སྔ་རབས་པ་རྣམས་ཀྱིས་རྒྱུས་འབྲས་བུ་མཚོན་ཚུལ་དང་། འབྲས་བུས་རྒྱུ་མཚོན་ཚུལ་ལ་སྦྱར་བའི་བཤད་པ་མང་དུ་མཛད་པ་ནི་གཞུང་གི་ཟུར་རེ་རེ་ལ་བལྟས་ན་རུང་བར་འདྲ་བར་སྣང་ཡང་། མཚོན་ཚུལ་གྱི་ངོ་བོ་ཇི་ལྟ་བ་བཞིན་མི་རྟོགས་པས་གཞུང་གི་དགོངས་པ་ལ་སྒྲིབ་ཉན་ཡོད་དོ། །འོ་ན་ཉིར་སྣང་དུ། ད་ནི་ཇི་ལྟར་ལམ་ཤེས་པ་ཉིད་ཀྱི་ཤེས་པ་རྣམ་པ་བཅུ་དྲུག་གིས་དེ་བཞིན་གཤེགས་པ་བསྐྱེད་པ་གང་ཡིན་པ་དེའི་དབང་དུ་མཛད་ནས། ཞེས་གསུངས་པ་ཇི་ལྟར་དྲང་སྙམ་ན། དེའི་དོན་ནི་སྐྱོན་གྱི་སྐབས་སུ་སྦྱོར་བ་བསྒོམ་པ་ལ་སྐྱོན་མང་དུ་ཡོད་ཀྱང་། ཕྱོགས་བཅུའི་སངས་རྒྱས་རྣམས་ཀྱིས་སྲུང་སྐྱོབ་མཛད་པས་སྐྱོན་གྱི་དབང་དུ་མི་འགྲོ་སྟེ། ཐེག་ཆེན་གྱི་སྦྱོར་བ་ནི། དེ་བཞིན་གཤེགས་པ་ཐམས་ཅད་བསྐྱེད་པའི་ཡུམ་ཡིན་པའི་ཕྱིར་རོ། །དཔེར་ན་བུ་མང་དུ་ཡོད་པའི་མ་ན་བར་གྱུར་པའི་ཚེ་བུ་ཐམས་ཅད་ཀྱིས་མའི་རིམ་གྲོ་བྱེད་པ་བཞིན་ནོ། །ཞེས་བསྟན་པ་ན། དེ་བཞིན་གཤེགས་པ་བསྐྱེད་པར་བསྟན་པའི་ཐེག་ཆེན་གྱི་སྦྱོར་བའི་མཚན་ཉིད་ཇི་ལྟ་བུ་ཞེ་ན་དེ་གཏན་ལ་དབབ་པའི་དབང་དུ་བྱས་པ་ཡིན་གྱི། དེ་བཞིན་གཤེགས་པ་སྐྱེད་བྱེད་མཚོན་བྱར་བྱས་ནས་དེའི་མཚན་ཉིད་སྟོན་པ་ནི་སྐབས་ཀྱི་དོན་མ་ཡིན་ནོ། །ཇི་སྐད་དུ་མདོ་སྡུད་པར། མ་ཞིག་ན་བར་གྱུར་ལ་བུ་ནི་མང་ཡོད་པ། །དེ་དག་ཡིད་མི་བདེ་ཞིང་དེ་ལ་རིམ་གྲོ་བྱེད། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཀྱང་། །ཡུམ་གྱུར་ཤེས་རབ་དམ་པ་འདི་ལ་དགོངས་པར་མཛད། །ཅེས་གསུངས་སོ། །འོ་ན་དེ་སྐྱེད་པར་བྱེད་པའི་ཐེག་ཆེན་སྦྱོར་བ་མཚོན་བྱར་བྱས་ནས་དེའི་མཚན་ཉིད་འཇོག་དགོས་སོ་སྙམ་ན། འདི་ལ་རིགས་པའི་གཞུང་ལུགས་ལས། ཡང་ན་དེ་རྟོགས་ནས་ལྡོག་ཕྱིར། །བསྒྲུབ་བྱའི་དུས་སུ་ཡན་ལག་མིན། །ཞེས་པའི་དོན་རྟོགས་དགོས་སོ། །དེ་དག་གི་སྐབས་སུ་དཀའ་བའི་གནས་ལ་དཔྱད་པ་ལ་ཤེས་པ་དེ། གཡོ་བ་ལ་སོགས་ཤེས་བྱ་དང་། །ཞེས་པའི་སྐབས་སུ་ལུང་མ་བསྟན་གྱི་ལྟ་བ་བཅུ་བཞི་ལ་དཔྱད་པ། ཁྱད་མཚན་གྱི་སྐབས་སུ་གཞི་ཤེས་སྦྱོར་བ་ལ་ཁྱད་མཚན་ཡོད་མེད་དཔྱད་པ། བྱེད་མཚན་གྱི་སྐབས་སུ་སངས་རྒྱས་དང་བྱང་སེམས་གང་གི་མཛད་པ་ཡིན་དཔྱད་པ་དང་གསུམ་ལས། དང་པོ་ལ་གཉིས་ཏེ། ལྟ་ངན་དྲུག་ཅུ་རྩ་གཉིས་ངོས་གཟུང་བ་དང་། དེ་བཅུ་བཞིར་བསྡུ་བའོ། །དང་པོ་ནི། ཕྱི་རོལ་མུ་སྟེགས་བྱེད་ཀྱི་ལྟ་བ་གང་ཇི་སྙེད་པ་ཐམས་ཅད་སྔོན་གྱི་མཐར་རྟོག་པའི་ལྟ་བ་བཅོ་བརྒྱད། ཕྱི་མའི་མཐར་རྟོག་པའི་ལྟ་བ་བཞི་བཅུ་རྩ་བཞི་སྟེ་དྲུག་ཅུ་རྩ་གཉིས་སུ་འདུས་པ་ལས། དང་པོ་ལ་སྡོམ་ནི། རྟག་དང་ཁ་ཅིག་རྒྱུ་མེད་དང་། །མཐའ་ལྡན་དེ་བཞིན་ལྷ་མི་སྤོང་། །ཞེས་པ་ལྟར་རྟག་པར་སྨྲ་བ་རྣམས་ཀྱི་བཞི། ཁ་ཅིག་རྟག་པར་སྨྲ་བ་རྣམས་ཀྱི་བཞི། རྒྱུ་མེད་པར་སྨྲ་བ་རྣམས་ཀྱི་གཉིས། མཐའ་དང་ལྡན་མི་ལྡན་དུ་སྨྲ་བ་རྣམས་ཀྱི་བཞི། ལྷ་མི་སྤོང་བར་སྨྲ་བ་རྣམས་ཀྱི་བཞི་རྣམས་སོ། །དེ་ལ་དང་པོ་བཞི་ནི། ཕྱི་རོལ་པའི་བསམ་གཏན་པ་འགའ་ཞིག་གིས་སྔོན་གྱིས་གནས་རྗེས་སུ་དྲན་པའི་མངོན་ཤེས་ཀྱིས་བར་གྱི་བསྐལ་པ་ཉི་ཤུ་དང་། བཞི་བཅུ་དང་བརྒྱད་ཅུ་དྲན་པ་དང་། ལྷའི་མིག་གི་མངོན་ཤེས་ཀྱིས་སེམས་ཅན་ཁ་དོག་བཟང་པོ་དང་། ངན་པ་ཤི་བ་རྣམས་དེ་དང་དེར་སྐྱེས་པར་མཐོང་ན་བདག་དང་འཇིག་རྟེན་མཐོང་བ་ལྟར་རྟག་གོ་ཞེས་སྨྲས་པའོ། །ཁ་ཅིག་རྟག་པར་སྨྲ་བ་རྣམས་ཀྱི་བཞི་ནི། ཚངས་ཆེན་གྱི་འཁོར་འགའ་ཞིག་ཤི་ནས་མིར་སྐྱེས་བསམ་གཏན་སྒྲུབ་སྟེ་མངོན་ཤེས་བསྐྱེད་ནས་བལྟས་པས་ཚངས་པ་ཆེན་པོ་མ་ཤི་བར་མཐོང་ནས་ཚངས་པ་ཆེན་པོ་ནི་རྟག་ལ། ལྷ་གཞན་རྣམས་ནི་མི་རྟག་གོ་ཞེས་སྨྲ་བ་དང་། ཚངས་ཆེན་གྱི་འབྱུང་བ་ཆེན་པོ་རྣམས་ནི་མི་རྟག་ཅིང་། སེམས་མི་འགག་པར་མཐོང་ནས་འབྱུང་བ་རྣམས་མི་རྟག་ལ་སེམས་རྟག་ཅེས་པ་དང་། འདོད་ལྷ་རྩེ་བས་རབ་ཏུ་བསླུས་པ་ཞིག་རྩད་མོས་དྲན་ཤེས་བཞིན་ཉམས་ཏེ་ཤི་བ་ན་མིར་སྐྱེས་ཏེ། མངོན་ཤེས་བསྐྱེད་དེ་བལྟས་པས་རང་གི་སྔར་གྱི་ཟླ་བོ་རྣམས་མ་ཤི་བར་མཐོང་སྟེ་ལྷ་རྩེ་བས་བསླུས་པ་རྣམས་མི་རྟག་ལ་གཞན་རྟག་ཅེས་པ་དང་། ལྷ་གྲོགས་ལ་ཡིད་འཁྲུགས་པ་ཁ་ཅིག་གི་དེའི་སྟོབས་ཀྱིས་ཤི་སྟེ་མིར་སྐྱེས་ནས་སྔ་མ་ལྟར་མངོན་ཤེས་བསྐྱེད་དེ་བལྟས་པས། གཞན་རྣམས་མ་ཤི་བར་མཐོང་ནས་ལྷ་ཡིད་འཁྲུགས་པ་དག་ནི་མི་རྟག་ལ་གཞན་རྣམས་རྟག་གོ་ཞེས་སྨྲའོ། །རྒྱུ་མེད་པར་སྨྲ་བ་ལ་གཉིས་ཀྱི་བསམ་གཏན་ལ་བརྟེན་ནས་རྒྱུ་མེད་པར་སྨྲ་བ་ནི། གཟུགས་མེད་ནས་ཤི་འཕོས་པའི་སེམས་ཅན་འགའ་ཞིག་འདོད་གཟུགས་སུ་སྐྱེས་པ་ན། མངོན་ཤེས་དང་ལྡན་པའི་དྲང་སྲོང་འགའ་ཞིག་གིས་དེའི་རྒྱུ་སྔ་མ་གང་ཡིན་བལྟས་པས་མ་མཐོང་ནས་ལུས་དང་སེམས་གློ་བུར་དུ་འབྱུང་བར་ལྟ་བ་དང་། རྟོག་གེ་ལ་བརྟེན་ནས་རྒྱུ་མེད་པར་སྨྲ་བ་ནི་ཆར་པ་དང་རླུང་སོགས་གློ་བུར་དུ་འབྱུང་ཞིང་། ཤིང་རྣམས་ལ་ཡང་རེས་འགའ་མེ་ཏོག་དང་འབྲས་བུ་གློ་བུར་དུ་འབྱུང་ཞིང་རེས་འགའ་མི་འབྱུང་བར་མཐོང་ནས་བདག་དང་འཇིག་རྟེན་རྒྱུ་མེད་པར་སྨྲའོ། །མཐའ་དང་ལྡན་མི་ལྡན་དུ་སྨྲ་བ་རྣམས་ཀྱི་བཞི་ནི་ཕྱི་རོལ་པའི་དྲང་སྲོང་མངོན་པར་ཤེས་པ་དང་ལྡན་པ་འགའ་ཞིག་འཇིག་རྟེན་གྱི་མཐའ་ཆད་པར་འགྱུར་རམ། འོན་ཏེ་ཆད་པར་མ་གྱུར་སྙམ་དུ་ཡང་དག་པར་ཚོལ་བར་འདོད་པ་ན་གང་གི་ཚེ་འཇིག་པའི་བསྐལ་པ་དྲན་པ་དེའི་ཚེ་ནི་མཐའ་ཡོད་པའི་འདུ་ཤེས་འབྱུང་ངོ་། །གང་གི་ཚེ་ཆགས་པའི་བསྐལ་པ་དྲན་པ་དེའི་ཚེ་མཐའ་མེད་པའི་འདུ་ཤེས་འབྱུང་ངོ་། །ཡང་དེ་དག་ཡུལ་རྒྱ་ཆེ་བའི་མཐའ་ཡང་དག་པར་ཚོལ་བར་འདོད་པ་ན་གང་གི་ཚེ་འོག་ཏུ་མནར་མེད་པ་ཡན་ཆད་ལས་མ་མཐོང་ཞིང་སྟེང་དུ་བསམ་གཏན་བཞི་པ་མན་ཆད་ལས་མ་མཐོང་ལ་ཐད་ཀར་ཐམས་ཅད་ཀྱི་ཕ་རོལ་མ་མཐོང་བ་དེའི་ཚེ་འོག་དང་སྟེང་དུ་ནི་མཐའ་ཡོད་པའི་འདུ་ཤེས་འབྱུང་ལ། ཐད་ཀར་ནི་མཐའ་མེད་པའི་འདུ་ཤེས་འབྱུང་ངོ་། །དེ་ལ་སྔ་མ་ནི་སྔོན་གནས་རྗེས་སུ་དྲན་པའི་མངོན་ཤེས་ལ་བརྟེན་ནས་དུས་ཀྱི་མཐའ་ལ་རྟོག་པ་ཡིན་ནོ། །ཕྱི་མ་ནི་ལྷའི་མིག་གི་མངོན་ཤེས་ལ་བརྟེན་ནས་ཡུལ་གྱི་མཐའ་ལ་རྟོག་པ་ཡིན་ནོ། །ཕྱི་མ་དེ་དང་མི་མཐུན་པའི་ཕྱོགས་ཀྱང་ཡི་གེའི་ཁྱད་པར་ལ་མངོན་པར་ཞེན་ལ་དོན་གྱི་ཁྱད་པར་ལ་ནི་མ་ཡིན་ཏེ་མཐའ་ཡོད་པ་ཡང་མ་ཡིན་མེད་པ་ཡང་མ་ཡིན་པའི་འདུ་ཤེས་འབྱུང་བ་མ་ཡིན་ནོ། །ལྷ་མི་སྤོང་བར་སྨྲ་བ་རྣམས་ཀྱི་བཞི་ནི་བློ་མ་བྱང་བ་དང་། རྟོགས་པ་ཡོད་པར་མངོན་པའི་ང་རྒྱལ་ཅན་དང་། བློ་བྱང་བ་རྣམ་པར་མ་ངེས་པ་དང་། ཤེས་པ་ཞེན་ཅིང་ཀུན་ཏུ་རྨོངས་པ་བཞི་ལ་མངོན་པར་མཐོ་བའི་ལམ་དགེ་བ་དང་། མི་དགེ་བ་དང་། ངེས་པར་ལེགས་པའི་ལམ་བདེན་པ་བཞི་ལས་བརྩམས་ཏེ་དྲིས་པ་ན་བདག་ནི་ལྷ་མི་སྤོང་བ་ཡིན་ནོ་སྙམ་དུ་དམ་བཅས་ནས་གང་དུ་འཆི་བ་མེད་པ་རྣམ་པར་དག་པའི་ལྷ་རྣམས་ཀྱི་གོ་འཕང་ཐོབ་པའི་རྒྱུ་ལས་བརྩམས་ཏེ། དྲི་བ་དྲིས་པ་སྤང་བར་བྱ་བ་མ་ཡིན་པ་དེར་ཚིག་གཞན་དང་གཞན་དུ་རླུང་ལ་བསྐུར་བ་དང་། ཕྱི་རོལ་པ་དང་མཐོན་པའི་ཚུལ་གྱིས་སྤོང་བར་བྱེད་པའོ། །དེ་དག་ནི་ཅི་རིགས་པར་འདས་པ་དང་། ད་ལྟར་གྱི་ཡུལ་ལ་རྟོག་པའི་ཕྱིར་སྔོན་གྱི་མཐའ་ལ་རྟོག་པ་ཞེས་བྱ་སྟེ། འདས་པ་དང་། ད་ལྟར་བ་དག་ནི་བྱུང་ཟིན་པའི་ཕྱིར་སྔོན་གྱི་མཐའ་ཡིན་པས་སོ། །གཉིས་པ་ལ་སྡོམ་ནི། འདུ་ཤེས་ཡོད་སྨྲའི་བཅུ་དྲུག་དང་། །མེད་དང་གཉིས་མིན་བརྒྱད་བརྒྱད་དང་། །ཆད་པར་སྨྲ་བ་རྣམས་ཀྱི་བདུན། །ཚེ་འདི་ཉིད་ལ་གྲོལ་ངེས་ལྔ། །ཞེས་པ་ལྟར་དང་པོ་བཅུ་དྲུག་ནི་བདག་གཟུགས་དང་ལྡན་འདུ་ཤེས་ཅན། མི་ལྡན་འདུ་ཤེས་ཅན། གཉིས་ཡིན་འདུ་ཤེས་ཅན། གཉིས་མིན་འདུ་ཤེས་ཅན་ཏེ་བཞི་དང་། བདག་མཐའ་དང་ལྡན་པ་དང་། མི་ལྡན་པ་དང་། གཉིས་ཀ་ཡིན་པ་དང་། གཉིས་ཀ་མ་ཡིན་པའི་འདུ་ཤེས་ཅན་ཏེ་བཞི་དང་། བདག་བདེ་བ་ཡིན་པ་དང་། སྡུག་བསྔལ་ཡིན་པ་དང་། གཉིས་ཡིན་དང་། གཉིས་མིན་གྱི་འདུ་ཤེས་ཅན་ཏེ་བཞི་དང་། བདག་གཅིག་པུ་ཡིན་པ་དང་། ཐ་དད་པ་དང་། ཆུང་ངུ་ཡིན་པ་དང་། ཚད་མེད་པའི་འདུ་ཤེས་ཅན་དུ་ལྟ་བ་རྣམས་སོ། །འདུ་ཤེས་མེད་པར་སྨྲ་བ་རྣམས་ཀྱི་བརྒྱད་ནི། བདག་གཟུགས་ཅན་ཡིན། འདུ་ཤེས་མེད་ཅེས་པ་ནས། བདག་མཐའ་དང་ལྡན་མི་ལྡན་གཉིས་ཀ་མ་ཡིན། འདུ་ཤེས་མེད་ཅེས་པའི་བར་བརྒྱད་རྣམས་སོ། །གཉིས་ཀ་མ་ཡིན་པར་སྨྲ་བ་རྣམས་ཀྱི་བརྒྱད་ནི་སྔ་མ་བརྒྱད་པོ་དེ་ཉིད་ལ་འདུ་ཤེས་ཡོད་པ་ཡང་མ་ཡིན། མེད་པ་ཡང་མ་ཡིན་ཞེས་སྦྱོར་བ་བརྒྱད་རྣམས་སོ། །ཆད་པར་སྨྲ་བ་རྣམས་ཀྱི་བདུན་ནི་འདོད་པའི་མི་དང་། ལྷ་དང་། གཟུགས་ཁམས་པ་དང་། གཟུགས་མེད་སྐྱེ་མཆེད་བཞི་སྟེ། བདུན་པོ་རྣམས་མ་ཤི་བའི་བར་དུ་ནད་དང་། འབྲས་དང་། ཟུག་རྔུ་དང་བཅས་པ་ཡིན་ལ། ཤི་ནས་ཡེ་མེད་དུ་སྨྲ་བའོ། །ཚེ་འདི་ཉིད་ལ་གྲོལ་བར་སྨྲ་བ་རྣམས་ཀྱི་ལྔ་ནི་འདོད་པའི་ཡོན་ཏན་ལ་འཛེམ་མེད་དུ་སྤྱོད་པས་གྲོལ་བ་དང་། བསམ་གཏན་བཞི་ཐོབ་པས་གྲོལ་བར་སྨྲ་བ་རྣམས་སོ། །འདི་དག་ནི་ཕལ་ཆེར་མ་འོངས་པའི་ཆ་ལ་རྟོག་པའི་ཕྱིར། ཕྱི་མའི་མཐའ་ལ་རྟོག་པའི་ལྟ་བ་ཡིན་ནོ། །འོ་ན་འདི་དག་ལྟ་བ་ལྔ་པོ་གང་དུ་འདུ་སྙམ་ན་རང་གི་ངོ་བོའི་དབང་དུ་བྱས་ནས་མཐར་འཛིན་ལྟ་བ་དང་ལོག་ལྟ་གཉིས་ལས་བྱུང་བ་རྣམ་པར་བཞག་སྟེ། རྟག་པར་སྨྲ་བའི་བརྒྱད། མཐའ་དང་མི་ལྡན་པ་དང་། ཆད་ལྟ་བདུན་ནི་དང་པོ། ལས་དང་རྒྱུ་མེད་དུ་སྨྲ་བ་གཉིས་ནི་གཉིས་པ། ལས་དང་། ལྷག་མ་བཞི་བཅུ་རྩ་གཉིས་ནི་གཉིས་ཀའི་མཚན་ཉིད་ཅན་ཏེ། སྒྲོ་འདོགས་ཀྱི་ལོག་ལྟ་དང་། མཐར་འཛིན་ཡིན་པའི་ཕྱིར་རོ། །རྒྱུ་འབྲས་ངོ་བོ་མ་ལུས་པའི་དབང་དུ་བྱས་ན་ལྟ་བ་ལྔ་པོ་ཐམས་ཅད་ལས་རྣམ་པར་བཞག་སྟེ། འཇིག་ཚོགས་ལ་ལྟ་བ་ནི་དེ་དག་ཀུན་གྱི་རྒྱུ་ཡིན་པའི་ཕྱིར་དང་། མཆོག་འཛིན་གཉིས་ནི་འབྲས་བུ་ཡིན་པའི་ཕྱིར་རོ། །འདི་ལ་དགོངས་ནས་ཡུམ་གྱི་མདོར། འཇིག་ཚོགས་ལྟ་བར་ལྟ་བ་དྲུག་ཅུ་གཉིས་འདུས་ལྟར། །དེ་བཞིན་ཕ་རོལ་ཕྱིན་པར་ཐམས་ཅད་འདུས་པར་གསུངས། །ཞེས་གསུངས་སོ། །གཉིས་པ་དེ་ལྟ་བ་བཅུ་བཞིར་བསྡུ་བ་ལ། ངོ་བོ། དབྱེ་བ། གང་ཟག་གང་གི གཡོ་སོགས་སུ་འདོགས་པའི་རྒྱུ་མཚན། ཡུལ་ལ་འཇུག་པའི་ཚུལ། གང་ལ་བརྟེན་ནས་སྐྱེ་བ། ལུང་མ་བསྟན་དུ་གཞག་པའི་རྒྱུ་མཚན་སྔོན་དང་ཕྱི་མཐའ་སོགས་ངོས་གཟུང་བ། གང་ལ་དགོངས་ནས་དབྱེ་བ་མཛད་པ་དང་དགུ་ལས། དང་པོ་ལུང་མ་བསྟན་གྱི་ལྟ་བའི་ངོ་བོ་ནི། ཕྱིན་ཅི་ལོག་གི་སེམས་ཀྱིས་བསྡུས་པའི་ཤེས་རབ་མཚུངས་ལྡན་དང་བཅས་པའོ། །གཉིས་པ་དབྱེ་བ་ནི་དབུ་མ་རྩ་བར་འདས་ཕན་ཆད་དང་མཐའ་སོགས་དང་། རྟག་ལ་སོགས་པར་ལྟ་བ་དག །མྱ་ངན་འདས་དང་ཕྱི་མཐའ་དང་། །སྔོན་གྱི་མཐའ་ལ་བརྟེན་པ་ཡིན། །ཞེས་པ་ལྟར་བདག་དང་འཇིག་རྟེན་རྟག་པར་དང་མི་རྟག་པ་དང་། གཉིས་ཀར་དང་། གཉིས་ཀ་མ་ཡིན་པར་ལྟ་བ་དང་བཞི་སྔོན་གྱི་མཐའ་ལ་བརྟེན་པ་དང་། བདག་དང་འཇིག་རྟེན་མཐའ་དང་ལྡན་པར་དང་། མི་ལྡན་པར་དང་། གཉིས་ཀར་དང་། གཉིས་ཀ་མ་ཡིན་པར་ལྟ་བ་དང་བཞི་ཕྱི་མའི་མཐའ་ལ་བརྟེན་པ་དང་། དེ་བཞིན་གཤེགས་པ་གྲོངས་ནས་འབྱུང་བར་དང་། མི་འབྱུང་བར་དང་། གཉིས་ཀར་དང་། གཉིས་ཀ་མ་ཡིན་པར་ལྟ་བ་བཞི་མྱང་འདས་ལ་བརྟེན་པ་དང་། ལུས་སྲོག་གཅིག་ཏུ་དང་། ལུས་སྲོག་ཐ་དད་དུ་ལྟ་བ་ནི་ལུས་སྲོག་ལ་བརྟེན་པ་སྟེ་བཅུ་བཞིའོ། །གསུམ་པ་གང་ཟག་གང་གི་ཡིན་པ་ནི། རྟག་མཐའ་དང་ལྡན། གྲོངས་ནས་འབྱུང་བར་ལྟ་བ་གསུམ་གྲངས་ཅན་གྱི་ལྟ་བ་མིང་གཡོ་བ་ཞེས་ཟེར། དེ་འོག་གསུམ་རྒྱང་འཕེན་གྱི་ལྟ་བ་མིང་འདུ་བ་ཞེས་ཟེར། དེ་འོག་གསུམ་གཅེར་བུ་པའི་ལྟ་བ་མིང་བཀྲམ་པ་ཞེས་ཟེར། དེ་འོག་གསུམ་གནས་མ་བུའི་ལྟ་བ་མིང་བཅུམ་པ་ཞེས་ཟེར། ལུས་སྲོག་གཅིག་ཏུ་ལྟ་བ་བྱེ་བྲག་པ་སོགས་ཀྱི་ཡིན། ལུས་སྲོག་ཐ་དད་ཟེར་ཡང་། ལུས་ཀྱང་སྲོག་མ་ཡིན། སྲོག་ཀྱང་ལུས་མ་ཡིན་པར་ལྟ་བ་གྲངས་ཅན་སོགས་ཀྱི་ཡིན་ནོ། །བཞི་པ་གཡོ་སོགས་སུ་འདོགས་པའི་རྒྱུ་མཚན་ཅན་ནི་གྲངས་ཅན་གྱིས་ཉེ་བར་ཞ་བའི་མི་རྟག་པ་འདོད་ཅིང་སེམས་ཅན་ཤི་བ་ན་ཉི་མ་རྒས་པའམ། ཕུར་པ་བཏབ་པ་ལྟར་རེ་ཞིག་ནུབ་པར་གྱུར་པའི་ཚུལ་དུ་གནས་པར་འདོད་པས་སམ། ཡོད་པ་ལ་མི་མཐོང་བའི་ཚུལ་གྱིས་གནས་པར་འདོད་པས་ཁོའི་ལྟ་བ་ལ་གཡོ་བ་ཞེས་བཏགས། རྒྱང་འཕེན་པ་སྐྱེ་བ་སྔ་ཕྱི་མེད་ཅིང་སྐྱིད་སྡུག་ལེགས་ཉེས་ཐམས་ཅད་ཚེ་འདིར་རྫོགས་པར་འདོད་པས་ཁོའི་ལྟ་བ་ལ་འདུ་བ་ཞེས་བཏགས། གཅེར་བུ་པས་སྦྲུལ་དང་སྦྲུལ་གྱི་འཁྱིལ་བ་བཞིན་རང་བཞིན་རྟག་གནས་སྐབས་མི་རྟག་ཅེས་སོགས་རང་བཞིན་དང་གནས་སྐབས་ལ་ལྟོས་ཏེ་གཉིས་སུ་འདོད་པས་ཁོའི་ལྟ་བ་ལ་བཀྲམ་པ་ཞེས་བྱ། གནས་མ་བུ་པ་རྟག་མི་རྟག་སོགས་གང་དུ་ཡང་བརྗོད་དུ་མེད་པར་འདོད་པས་ཁོའི་ལྟ་བ་ལ་བཅུམ་པ་ཞེས་བཏགས་སོ། །ལྔ་པ་ཡུལ་ལ་འཇུག་ཚུལ་ནི་གཡོ་བ། བཀྲམ་པ། ལུས་སྲོག་གཅིག་ཏུ་ལྟ་བ་རྣམས་ཡུལ་ལ་བསྒྲུབ་པའི་སྒོ་ནས་འཇུག འདུ་བ། བཅུམ་པ། ལུས་སྲོག་ཐ་དད་དུ་ལྟ་བ་རྣམས་ཡུལ་ལ་དགག་པའི་སྒོ་ནས་འཇུག་གོ །དྲུག་པ་གང་ལ་བརྟེན་ནས་སྐྱེ་བ་ནི་འཁྲུལ་གཞི་ཕུང་པོ་ལྔ་ལ་བརྟེན་ནས་སོ། །བདུན་པ་ལུང་མ་བསྟན་དུ་གཞག་པའི་རྒྱུ་མཚན་ནི་གྲངས་ཅན་སོགས་ཀྱིས་གང་ཟག་གི་བདག་ལས་བརྩམས་ཏེ། འཇིག་རྟེན་མཐའ་དང་ལྡན་ནམ་མི་ལྡན་ཞེས་སོགས་དེ་བཞིན་གཤེགས་པ་ལ་ཞུས་པས་མི་འདུལ་བ་ལ་དགོངས་ནས་ལན་ལུང་དུ་མ་བསྟན་པས་དེར་བཞག་སྟེ། རིན་ཆེན་ཕྲེང་བར། འཇིག་རྟེན་མཐའ་དང་ལྡན་ནམ་ཞེས། ཞུས་ནས་རྒྱལ་བ་མི་གསུངས་བཞུགས། །གང་ཕྱིར་དེ་ལྟར་ཟབ་མོའི་ཆོས། །སྣོད་མིན་འགྲོ་ལ་མི་གསུང་བ། །དེ་ཉིད་ཕྱིར་ན་མཁས་རྣམས་ཀྱིས། །ཀུན་མཁྱེན་ཐམས་ཅད་མཁྱེན་པར་ཤེས། །ཞེས་སོ། །ལན་ལུང་དུ་མ་བསྟན་པ་ནི་མཛོད་ལས། མགོ་གཅིག་པ་དང་རྣམ་ཕྱེ་དང་། །དྲི་དང་བཞག་པར་ལུང་བསྟན་པ། །འཆི་དང་སྐྱེ་དང་ཁྱད་པར་འཕགས། །བདག་གཞན་ལ་སོགས་ལྟ་བུ་ཡིན། །ཞེས་དྲི་བའི་ལན་འདེབས་པའི་ཚུལ་བཞི་གསུངས་པའི་ཕྱི་མ་དེ་ཉིད་ཡིན་ནོ། །བརྒྱད་པ་སྔོན་དང་ཕྱི་མཐའ་སོགས་ངོས་གཟུང་བ་ནི། ཚེ་སྔ་མའི་ཕུང་པོ་རྣམས་སྔོན་མཐའ་དང་། ཚེ་ཕྱི་མའི་ཕུང་པོ་རྣམས་ཕྱི་མཐའོ། །མྱ་ངན་ལས་འདས་པ་ནི་འདས་པའོ། །གང་ཟག་ནི་བདག་གོ །ཕུང་པོ་ལྔ་ནི་འཇིག་རྟེན་ནོ། །དེས་ན་བདག་དང་བཅས་པའི་འཇིག་རྟེན་རྟག་མི་རྟག མཐའ་དང་ལྡན་མི་ལྡན་ཞེས་སོགས་སོ། །སྲོག་ནི་བདག་ཡིན་ལ་ལུས་ནི་འཇིག་རྟེན་ཡིན་པས། གཅིག་དང་ཐ་དད་དུ་ལྟ་བའི་ཆ་ནས་བཞག་པ་ཡིན་གྱི་མཚན་གཞི་ཆ་སྔ་མ་དང་འདྲའོ། །དགུ་པ་གང་ལ་དགོངས་ནས་དབྱེ་བ་མཛད་པ་ནི། གོང་དུ་བཤད་པའི་བདག་ཏུ་ལྟ་བ་དང་ལྡན་པའི་གདུལ་བྱའི་སྐྱེ་བོ་ཉེ་བ་རྣམས་ཀྱི་བསམ་པའི་དབང་དུ་བྱས་ནས་བཅུ་བཞིར་དབྱེ་བ་ཡིན་གྱི་དངོས་པོ་ལ་གྲངས་མེད་དོ། །འོ་ན་ལྟ་བ་དྲུག་ཅུ་རྩ་གཉིས་དང་། བཅུ་བཞི་ལ་ཁྱད་པར་ཅི་ཡོད་ཅེ་ན། སྔོན་དེ་བཞིན་གཤེགས་པས་འཛམ་བུའི་གླིང་དུ་ཆོས་ཀྱི་འཁོར་ལོ་མ་བསྐོར་བའི་སྔ་རོལ་ན་ཕྱི་རོལ་པ་རྣམས་ཀྱི་རྟག་ཆད་དུ་ལྟ་བའི་རྣམ་གྲངས་ཇི་སྙེད་ཡོད་པ་ཐམས་ཅད་ནི་དྲུག་ཅུ་རྩ་གཉིས་པོ་དེ་ཙམ་དུ་ཟད་པའི་ཕྱིར་མདོ་ལས་ལྟ་བ་དྲུག་ཅུ་རྩ་གཉིས་སུ་རྣམ་པར་བཞག་ལ། དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བའི་ཚེ་ཕྱི་རོལ་པའི་དྲང་སྲོང་འགའ་ཞིག་གིས་བཅོམ་ལྡན་འདས་ལ་ལྟ་བར་གྱུར་པ་དྲུག་ཅུ་རྩ་གཉིས་ཀྱི་དོན་རྣམས་མཐའ་བཅུ་བཞིར་བཅད་ནས་ཞུས་པ་ནི་ལུང་དུ་མ་བསྟན་པའི་ལྟ་བ་བཅུ་བཞི་པོ་འདི་ཡིན་ནོ། །གཉིས་པ་གཞི་ཤེས་སྦྱོར་བ་ལ་ཁྱད་མཚན་ཡོད་མེད་དཔྱད་པ་ནི། ཉིར་སྣང་དུ། གསལ་ཀ་གང་ཡང་མ་གསུངས་པར་ཐེག་ཆེན་གྱི་སྦྱོར་བའི་དབང་དུ་བྱས་ནས་ཁྱད་མཚན་བཅུ་དྲུག་བཤད་ལ། སློབ་དཔོན་གྱིས་ལམ་ཤེས་དང་། རྣམ་མཁྱེན་གྱི་སྦྱོར་བ་གཉིས་ཀྱི་ཁྱད་ཆོས་ཡིན་པར་བཤད་དོ། །དེའི་དགོངས་པ་ཡང་ཁྱད་མཚན་གྱིས་གཞན་ལྡན་རྣམ་གཅོད་ཀྱི་ཚུལ་ཀྱིས་མཚོན་པས་རང་གང་ལ་ལྡན་པའི་སྦྱོར་བ་དེ་གཞན་ཐེག་དམན་ལ་ལྡན་པ་རྣམ་པར་བཅད་དགོས་པས་སྦྱོར་བ་ཕྱི་མ་གཉིས་ལ་སྦྱར་བ་ཡིན་ཏེ། སྦྱོར་བ་ཕྱི་མ་གཉིས་ཐེག་དམན་ལ་མི་ལྡན་པའི་ཕྱིར་དང་། གཞི་ཤེས་ཀྱི་སྦྱོར་བ་ཙམ་ཐེག་དམན་ལ་ཡང་ཡོད་པས་དེ་ལ་ཁྱད་མཚན་སྦྱར་ན། ཐེག་དམན་ལ་ལྡན་པ་བཅད་དགོས་པ་ལས་དེ་གཅོད་མི་ནུས་པའི་ཕྱིར་རོ་སྙམ་དུ་དགོངས་སོ། །འོན་ཀྱང་རྟོགས་རིགས་ཀྱི་དབང་དུ་བྱས་ན་གཞི་ཤེས་ཀྱི་སྦྱོར་བ་ལ་ཁྱད་མཚན་མེད་དེ། དེ་ནི་ཐེག་དམན་གྱི་རྟོགས་རིགས་ཡིན་པའི་ཕྱིར་རོ། །རང་གི་ངོ་བོའི་དབང་དུ་བྱས་ན་སྦྱོར་བ་གསུམ་ཆར་ལ་ཁྱད་མཚན་ཡོད་དེ། ཐེག་ཆེན་གྱི་སྦྱོར་བ་གཅིག་གི་ངོ་བོ་ཡིན་པའི་ཕྱིར་དང་། ཐེག་དམན་གྱི་རྟོགས་རིགས་དེ་ཡང་མི་དམིགས་པའི་རྣམ་པས་ཟིན་པའི་སྒོ་ནས་ཉམས་སུ་ལེན་དགོས་པའི་ཕྱིར་རོ། །གསུམ་པ་བྱེད་མཚན་གྱི་སྐབས་སུ་སངས་རྒྱས་དང་བྱང་སེམས་གང་གི་མཛད་པ་ཡིན་དཔྱད་པ་ནི། བརྒྱད་སྟོང་པར་དང་པོ་གཉིས་བྱང་སེམས་ཀྱི་དང་། ཕྱི་མ་དགུ་སངས་རྒྱས་ཀྱི་བྱེད་པར་བཤད། འབུམ་དང་ཉི་ཁྲི་ལེ་མང་ལས། དང་པོ་ལྔ་བྱང་སེམས་དང་། ཕྱི་མ་དྲུག་སངས་རྒྱས་ལ་སྦྱར། ཁྲི་བརྒྱད་སྟོང་པར་དང་པོ་དྲུག་སངས་རྒྱས་དང་། ཕྱི་མ་ལྔ་བྱང་སེམས་ལ་སྦྱར། ཤེས་རབ་ཁྲི་པར་ཐམས་ཅད་ཀྱང་བྱང་སེམས་ལ་བཤད་དོ། །འདི་དག་གི་དོན་ལ་ཊཱི་ཀར། བྱེད་པ་བཅུ་གཅིག་པོ་སངས་རྒྱས་དང་བྱང་སེམས་གཉིས་ཀ་ལ་ཡང་ཡོད་མོད་ཀྱི་མཚན་ཉིད་དུ་བཤད་པ་ནི་བྱང་སེམས་ལ་ཡོད་པའི་ཆ་གཟུང་ངོ་། །ཞེས་གསུངས་པ་ལྟར་ལེགས་སོ། །ཉིར་སྣང་དུ་སྦྱོར་བ་གསུམ་ལ་སོ་སོར་སྦྱར་བའི་གསལ་ཁ་མི་སྣང་ཡང་། སློབ་དཔོན་གྱིས་གསུམ་དང་། བདུན་དང་། གཅིག་རྣམས་མཁྱེན་གསུམ་གྱི་སྦྱོར་བ་ལ་སོ་སོར་སྦྱོར་བར་མཛད་དོ། །མཚན་ཉིད་ཀྱི་འོག་ཏུ་ཐར་པ་ཆ་མཐུན་འཆད་པའི་རྒྱུ་མཚན་ཡོད་དེ། སྔར་མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་པ་ན། སངས་རྒྱས་རྣམས་ལ་ལྷག་པར་བྱས། །ཞེས་པའི་སྐབས་གྱི་རྟེན་གྱི་གང་ཟག་བཞི་བདེར་འགྱུར་ཞིང་། དེས་སྦྱོར་བའི་དབྱེ་བ་དང་། ཡོན་ཏན་དང་། སྐྱོན་དང་། མཚན་ཉིད་ལ་མཁས་པའི་ཚེ་འདིར་བསྟན་ཐར་པ་ཆ་མཐུན་སྐྱེས་པ་ཡིན་པའི་ཕྱིར་རོ། །འོ་ན་འདིར་བསྟན་ཐར་པ་ཆ་མཐུན་དེ་དེ་དག་ལ་མཁས་པའི་རྒྱུ་མཚན་ཅི་ཡིན་སྙམ་ན། འདིར་བསྟན་ཐར་པ་ཆ་མཐུན་དེ་ལྟ་བ་མཚན་མེད་རྟོགས་པའི་ཤེས་རབ་དང་། སྤྱོད་པ་སངས་རྒྱས་ལ་སོགས་པའི་ཡུལ་ལྔ་ལ་མཁས་པའི་སྤྱོད་པ་ཟུང་དུ་འཇུག་པ་ཡིན་པའི་ཕྱིར་ཏེ། མཚན་མེད་རབ་ཏུ་སྦྱིན་ལ་སོགས། །ཡང་དག་བསྒྲུབ་ལ་མཁས་པ་ནི། །རྣམ་པ་ཐམས་ཅད་རྟོགས་འདི་ལ། །ཐར་པའི་ཆ་དང་མཐུན་པར་འདོད། །ཅེས་གསུངས་པའི་ཕྱིར་རོ། །ཐེག་ཆེན་གྱི་ཐར་པ་ཆ་མཐུན་ཡིན་ན། སངས་རྒྱས་སོགས་ཀྱི་ཡུལ་ལྔ་ལ་མཁས་པས་ནི་མ་ཁྱབ་སྟེ། སངས་རྒྱས་སོགས་ཀྱི་ཡུལ་ལྔ་ལ་མཁས་པའི་ཆེད་དུ་ཐོས་བསམ་བྱེད་པའི་གནས་སྐབས་ཀྱི་ཐར་པ་ཆ་མཐུན་ཡང་ཡོད་པའི་ཕྱིར་རོ། །དེས་ན་མཁྱེན་གསུམ་ཐོས་བསམ་གྱིས་གཏན་ལ་འབེབས་པ་ནས་སྦྱོར་བའི་མཚན་ཉིད་ལ་མཁས་པར་མ་གྱུར་པའི་བར་གྱི་ཐོས་བསམ་གྱིས་བསྡུས་པའི་ཐར་པ་ཆ་མཐུན་ནི་ཆོས་བཤེས་ཀྱིས་ཚོགས་ལམ་ཕལ་པ་ཞེས་པའི་ཐ་སྙད་གསུངས་སོ། །སྦྱོར་བའི་མཚན་ཉིད་ལ་མཁས་པའི་ཚེ་སངས་རྒྱས་སོགས་ཀྱི་ཡུལ་ལྔ་ལ་མཁས་པ་ཡིན་ཞིང་། དེ་ནས་བཟུང་སྟེ་སྦྱོར་ལམ་དྲོད་མ་སྐྱེས་བར་གྱི་ཐར་པ་ཆ་མཐུན་ནི་བསྒོམས་པས་བསྡུས་པའི་ཐར་པ་ཆ་མཐུན་ཏེ། འདི་ལ་ཐར་པ་ཆ་མཐུན་ཁྱད་པར་ཅན་ཞེས་པའི་ཐ་སྙད་མཛད་དོ། །འདིར་བསྟན་གྱི་ཐར་པ་ཆ་མཐུན་རྒྱུད་ལ་སྐྱེས་ནས་དྲོད་མ་ཐོབ་ཀྱི་བར་དུ་ནི་ཐོས་བསམ་ལ་མི་ལྟོས་ཏེ། ཡུལ་ལྔ་ལ་མཁས་པའི་དད་སོགས་དེའི་རིགས་རྒྱུན་བསྒོམས་པས་བསྒོམ་བྱའི་དོན་ལ་གསལ་སྣང་ཐོབ་པའི་ཚེ་དད་སོགས་ལྔ་པོ་དེ་དབང་པོར་འགྱུར་ལ་དེའི་ཚེ་དྲོད་ཐོབ་པར་འཇོག་པའི་ཕྱིར་རོ། །དྲོད་མ་ཐོབ་བར་གྱི་དད་སོགས་ལྔ་ནི་རྣམ་པར་བྱང་བ་ཙམ་ལ་དབང་བྱེད་པའི་དབང་པོ་ཡིན་ཀྱང་བྱང་ཕྱོགས་སོ་བདུན་གྱི་ནང་ཚན་དུ་གྱུར་པའི་དབང་པོ་ནི་མ་ཡིན་ཏེ། བདེན་པ་མངོན་པར་རྟོགས་པ་ལ་དབང་བྱེད་པའི་དབང་པོ་མ་ཐོབ་པའི་ཕྱིར་རོ། །འདི་ལ་དགོངས་ནས་ཉིར་སྣང་དུ། དད་པ་ལ་སོགས་པ་འདི་དག་ལ་དབང་པོར་ནི་བརྗོད་པར་མི་བྱ་སྟེ། དབང་པོའི་དོན་མེད་པའི་ཕྱིར་རོ་ཞེས་དང་། འགྲེལ་ཆུང་དུ་ཡང་དབང་པོའི་ངོ་བོ་ཉིད་མ་ཡིན་པ་ཞེས་སོགས་གསུངས་སོ། །འོ་ན་འདིར་བསྟན་ཐར་པ་ཆ་མཐུན་ལ་གནས་པའི་བྱང་སེམས་ཡིན་ན། གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པས་ཁྱབ་པར་འགྱུར་ཏེ། དེ་ཡིན་ན། སངས་རྒྱས་ལ་སོགས་པའི་ཡུལ་ལྔ་ལ་མཁས་པས་ཁྱབ་པའི་ཕྱིར་ཞེ་ན། སྐྱོན་མེད་དེ། འདིར་བསྟན་ཐར་པ་ཆ་མཐུན་ལ་གནས་པའི་བྱང་སེམས་དབང་རྣོན་རྣམས་ཕལ་ཆེར་རྫོགས་པའི་བྱང་ཆུབ་རྟོགས་པར་སླ་བས་ཕྱིར་མི་ལྡོག་ལ། དབང་རྟུལ་རྣམས་ཕལ་ཆེར་དེ་རྟོགས་པར་དཀའ་བ་ཡིན་པའི་ཕྱིར་ཞེས་པ་ནི། རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རྟུལ་པོས་རྟོགས་དཀར་བཞེད། །ཅེས་པས་བསྟན་ཏོ། །དེ་ལྟར་བསྟན་པའི་དགོས་པ་ཡང་ཐེག་ཆེན་གྱི་སྦྱོར་ལམ་ཐོབ་པའི་བྱང་སེམས་དབང་པོ་རྣོ་རྟུལ་ཐམས་ཅད་ཀྱང་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པས་ཁྱབ་པ་འོག་ཏུ་སྟོན་པར་འགྱུར་བས་ན་བྱང་སེམས་ཚོགས་ལམ་པ་ཕྱིར་ལྡོག་མི་ལྡོག་གཉིས་ཡོད་དོ། །ཞེས་ཤེས་པའི་ཆེད་དུ་ཡིན་ནོ། །དེས་ན་སློབ་དཔོན་གྱི་དགོངས་པ་ནི། སྤྱིར་ཚོགས་ལམ་པའི་དད་སོགས་ལ་ཆེན་པོ་དང་། འབྲིང་དང་། ཆུང་ངུ་གསུམ་དུ་ཡོད་དེ། ཐེག་པ་གསུམ་གྱི་ཚོགས་ལམ་གསུམ་དུ་ཡོད་པའི་ཕྱིར་རོ། །སྐབས་འདིར་ཆེན་པོ་དངོས་སུ་བསྟན་ནས་གཞན་གཉིས་ཤུགས་ལ་བསྟན་ཏེ། ཐེག་ཆེན་གྱི་སྦྱོར་མཐོང་སྒོམ་གསུམ་དངོས་སུ་བསྟན་ནས་ཐེག་དམན་གྱི་སྦྱོར་མཐོང་སྒོམ་གསུམ་ཤུགས་ལ་བསྟན་པའི་རིགས་པས་འདིར་ཡང་ཐེག་ཆེན་གྱི་ཐར་པ་ཆ་མཐུན་དངོས་སུ་བསྟན་ནས་ཐེག་དམན་གྱི་ཐར་པ་ཆ་མཐུན་ཤུགས་ལ་བསྟན་པ་ཐོབ་པའི་ཕྱིར་རོ། །འདིར་བསྟན་གྱི་དད་སོགས་ཆེན་པོ་ཉིད་ལ་རྣོ་རྟུལ་གཉིས་སུ་བྱས་ནས་རྫོགས་པའི་བྱང་ཆུབ་རྟོགས་དཀའ་སླའི་ཁྱད་པར་ཕྱེ་བར་མཛད་པ་ནི་རྩ་བའི་དགོངས་པ་བླ་ན་མེད་པའོ། །འབྲེ་ཆེན་པོས་ཐེག་ཆེན་དུ་རིགས་ངེས་པ་རྣོན་པོ་དང་། མ་ངེས་པ་འབྲིང་པོ་དང་། དམན་པའི་རིགས་ཅན་རྟུལ་པོར་མཛད་ནས་རྩ་བར་རྣོ་རྟུལ་གཉིས་དངོས་སུ་བསྟན་པའི་ཤུགས་ལ་འབྲིང་པོ་འཕངས་པར་བཞེད་པ་ཡང་མི་འཐད་དེ། འདིའི་རྣོན་པོ་ལ་ཐེག་ཆེན་དུ་རིགས་ངེས་པས་མ་ཁྱབ་པའི་ཕྱིར་དང་། རྟུལ་པོ་དམན་པའི་རིགས་ཅན་ཡང་མ་ཡིན་པའི་ཕྱིར་རོ། །ཨར་གྱིས་ཐེག་ཆེན་དང་། རང་རྒྱལ་དང་། ཉན་ཐོས་ཀྱི་རིགས་ཅན་གྱི་བྱང་ཆུབ་སེམས་དཔའ་གསུམ་དུ་མཛད་ནས། གསུམ་ཀ་ཡང་ད་ལྟ་ཐེག་ཆེན་གྱི་ཐར་པ་ཆ་མཐུན་ལ་གནས་པར་མཚུངས་ཀྱང་། སྔ་མས་བྱང་ཆུབ་རྟོགས་པར་སླ་ལ། ཕྱི་མ་གཉིས་རྟུལ་པོའི་སྒྲས་གསུངས་ནས་རྟོགས་པར་དཀའ་བ་དངོས་སུ་བསྟན། དེའི་ཤུགས་ཀྱིས་ཕྱི་མ་གཉིས་ཐེག་ཆེན་གྱི་ལམ་ལས་ལོག་ནས་འབྲིང་པོ་རང་རྒྱལ་གྱི་རིགས་ཅན་གྱིས་རང་རྒྱལ་གྱི་བྱང་ཆུབ་དང་། ཉན་ཐོས་ཀྱི་རིགས་ཅན་གྱིས་ཉན་ཐོས་ཀྱི་བྱང་ཆུབ་ཐོབ་པར་འཕངས་སོ། །ཞེས་འཆད་པ་ཡང་མི་འཐད་དེ། ཤུགས་ཀྱིས་ནི་འབྲིང་པོ་རྣམས་ཀྱི་ནི་ཞེས་པའི་སྐབས་ཀྱི་འབྲིང་པོ་དང་། ཆུང་ངུ་གཉིས་ད་ལྟ་ཐེག་ཆེན་གྱི་ཐར་པ་ཆ་མཐུན་ལ་གནས་པ་མ་ཡིན་པའི་ཕྱིར་རོ། །ཉིར་སྣང་དུ། རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་ཞེས་པས་ནི་ཐེག་ཆེན་གྱི་ཐར་པ་ཆ་མཐུན་ཆེན་པོ་ཁོ་ན་བསྟན་ཞིང་། རྟུལ་པོས་རྟོགས་དཀར་བཞེད་ཅེས་པས་ཐེག་ཆེན་གྱི་ཐར་པ་ཆ་མཐུན་ཆུང་ངུ་འབྲིང་ཆེན་པོ་གསུམ་ཀར་བསྟན་པར་མཛད་ནས་འདི་དག་ཐམས་ཅད་ཀྱང་ཐོས་པ་དང་བསམ་པའི་རང་བཞིན་ཅན་ཡིན་པར་ཤེས་པར་བྱ་སྟེ། དེ་ཐོག་མ་ཁོ་ནར་བསྟན་པ་ལ་འཇུག་པའི་རྒྱུ་ཉིད་ཡིན་པའི་ཕྱིར་རོ། །ཞེས་གསུངས་པ་ལྟར་ན། གཞུང་སྔ་མས་སྐབས་འདིར་བསྟན་གྱི་ཐར་པ་ཆ་མཐུན་བསྟན་ཞིང་རྟུལ་པོས་རྟོགས་དཀར་བཞེད་ཅེས་པས་ཚོགས་ལམ་ཕལ་པ་བསྟན་པར་སྣང་སྟེ། ཚོགས་ལམ་ཕལ་པ་ནི་ཐོས་བསམ་གྱིས་བསྡུས་པ་ཁོ་ན་ཡིན་ཞིང་། དེ་ཉིད་ལ་ཡང་ཆུང་ངུ་འབྲིང་ཆེན་པོ་གསུམ་དུ་ཡོད་པའི་ཕྱིར་རོ། །ད་ནི་གཉིས་པ་སྒོམ་བྱུང་གཙོ་བོར་གྱུར་བའི་ཉམས་སྐྱེས་པའི་གནས་སྐབས་ཀྱི་སྒོམ་རིམ་ནི་ངེས་འབྱེད་ཆ་མཐུན་ནས་ཐབས་མཁས་སྦྱོར་བའི་བར་གྱིས་སྟོན་ཏེ། འདི་ལྟར་སངས་རྒྱས་ལ་སོགས་པའི་ཡུལ་ལྔ་ལ་མཁས་པའི་དད་སོགས་ལྔས་བསྡུས་པའི་ཐར་པ་ཆ་མཐུན་རྒྱུན་ལྡན་དུ་བསྒོམས་པས་སྒོམ་བྱུང་གཙོ་བོར་གྱུར་པའི་ཉམས་སྐྱེས་པ་ན། བྱང་སེམས་ཀྱི་སྦྱོར་ལམ་སྐྱེས་པར་འཇོག་པས་ཐར་པ་ཆ་མཐུན་གྱི་འོག་ཏུ་ངེས་འབྱེད་ཆ་མཐུན་སྟོན་པ་ནི། དྲོ་བ་རྣམས་ཀྱི་དམིགས་པ་འདིར། །ཞེས་སོགས་སོ། །སྤྱིར་བྱང་སེམས་ཀྱི་སྦྱོར་ལམ་ལ་ཡོན་ཏན་གྱི་ལྡོག་པ་མི་འདྲ་བ་དུ་མ་ཡོད་པས་སྐབས་དང་པོར་བྱང་སེམས་ཀྱི་རྟོགས་རིགས་ཀྱི་ལྡོག་པ་ནས་བསྟན། སྐབས་གཉིས་པར་ཉན་རང་གི་རྟོགས་རིགས་ཀྱི་ལྡོག་པ་ནས་བསྟན། སྐབས་གསུམ་པར་དེ་དག་ལ་ཞེན་སྤྱོད་བཀག་པའི་ལྡོག་པ་ནས་བསྟན། འདིར་ནི་རྗེས་ཐོབ་ཀྱིས་བསྡུས་པའི་སེམས་ཅན་ལ་དམིགས་པའི་བསམ་སྦྱོར་ཕུན་སུམ་ཚོགས་པའི་ལྡོག་པ་ནས་བསྟན་པ་ཡིན་ལ། རྗེས་ཐོབ་ཏུ་སེམས་ཅན་ལ་དམིགས་ནས་ཕ་དང་། མའི་སེམས་ལ་སོགས་པའི་རྣམ་པ་ཅན་གྱི་བྱམས་པ་དང་སྙིང་རྗེ་སྒོམ་པ་ན་སྐབས་འགའ་ཞིག་ཏུ་མཉམ་གཞག་གི་ལྟ་བས་ཟིན་པའི་སེམས་ཅན་བརྟགས་ཡོད་ཙམ་ལ་དམིགས་པ་ཡང་ཡོད་ཅིང་། དེའི་ཚེ་བདེན་འཛིན་མ་ཡིན་པའི་གཟུང་རྟོག་གཉིས་དང་། བཏགས་འཛིན་རྟོག་པ་ཅི་རིགས་པ་ངོ་བོར་ལྡན་པ་ཡིན་ནོ། །སྐབས་འགའ་ཞིག་ཏུ་མཉམ་གཞག་གི་ལྟ་བས་མ་ཟིན་པར་སེམས་ཅན་ལ་དམིགས་ནས་དགེ་སྡིག་གི་བླང་དོར་ལ་འགོད་པ་སོགས་ཡོད་ཅིང་། དེའི་ཚེ་བདེན་འཛིན་གྱིས་བསྡུས་པའི་གཟུང་རྟོག་གཉིས་དང་། རྫས་འཛིན་རྟོག་པ་ངོ་བོར་ལྡན་ནོ། །འོ་ན་འདིར་རྗེས་ཐོབ་སེམས་ཅན་ལ་དམིགས་པའི་བསམ་སྦྱོར་གྱི་ལྡོག་པ་ནས་བསྟན་པའི་རྒྱུ་མཚན་ཅི་ཞེ་ན། འོག་ཏུ་སྦྱོར་ལམ་པ་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་ཏུ་སྒྲུབ་པའི་གཏན་ཚིགས་རྗེས་ཐོབ་ལུས་ངག་གི་སྤྱོད་པ་འཆད་པར་འགྱུར་བས་དེ་གང་ལ་ལྡན་པའི་སྦྱོར་ལམ་སྟོན་དགོས་ཤིང་དེ་ཡང་སྦྱོར་ལམ་རྗེས་ཐོབ་ལ་ལྡན་པའི་ཕྱིར་རོ། །འདིར་སྐབས་དང་པོ་དྲུག་ཏུ་སྦྱོར་མཐོང་སྒོམ་གསུམ་ལན་དྲུག་བསྟན་པ་ལ་ཟློས་པའི་སྐྱོན་ཡོད་ཅེས་པའི་དོགས་པ་བཀོད་ནས། དེའི་ལན་དུ་མཚན་བཏགས་ཀྱི་ཁྱད་པར་ཡོད་པ་བཀོད་པ་སོགས་འཕགས་པའི་ཡུལ་ན་ཡང་བར་སྐབས་སུ་བྱུང་འདུག་པ་ནི་དོན་མེད་དེ། ལམ་རེ་རེ་ཡང་ཡོན་ཏན་གྱི་ལྡོག་པ་མི་འདྲ་བའི་སྒོ་ནས་སྐབས་གོང་འོག་ཏུ་བསྟན་པས་དེ་ལྟ་བུའི་དོགས་པ་མི་སྐྱེ་ཞིང་། སྐྱེ་སྲིད་ན་ཡང་ཉིར་སྣང་དུ། ཡོན་ཏན་གྱི་ལྡོག་པ་མི་འདྲ་བའི་སྒོ་ནས་བསྟན་ཚུལ་བཤད་པ་ལྟར་ལན་གདབ་པར་བྱ་བ་ཡིན་པའི་ཕྱིར་རོ། །དེས་ན་སྐབས་དང་པོར་སྦྱོར་ལམ་དྲོད་སོགས་བཞི་རང་རང་གི་བདག་ཉིད་ཇི་ལྟ་བ་བཞིན་དུ་རྣམ་རྟོག་བཞི་ལྡན་བསྟེན་ཞེས་གསུངས་ལ། རྣམ་རྟོག་བཞི་ལ་དངོས་བསྟན་སྒྲུབ་རྟོག་བཞི་དང་། ཤུགས་བསྟན་དགག་རྟོག་བཞི་ཡོད་པ་ལས་ཕྱི་མ་རང་གི་ངོ་བོར་ལྡན་ཚུལ་སྔར་བཤད་ཟིན་ཞིང་། དངོས་བསྟན་སྒྲུབ་རྟོག་བཞི་ནི་འདིར་བསྟན་གྱི་དྲོད་སོགས་བཞི་ལ་རང་གི་བདག་ཉིད་དུ་ལྡན་ཞིང་བརྟེན་པ་ཡིན་ཏེ། འདིར་བསྟན་དྲོད་སོགས་བཞི་དམིགས་པ་སེམས་ཅན་ལ་དམིགས་པར་མཚུངས་ཤིང་རྣམ་པ་དྲོད་ཀྱི་སྐབས་སུ་མཉམ་པ་དང་བྱམས་པ་སོགས་དང་། རྩེ་མོའི་སྐབས་སུ་རང་ཉིད་སྡིག་པ་ལས་བཟློག་ཅིང་དགེ་བ་ལ་གནས་པ་དང་། གཞན་དེ་ལ་སྦྱོར་བ་སོགས་དང་། བཟོད་པའི་སྐབས་སུ་རང་ཉིད་བདེན་པ་ཤེས་པ་ལ་གནས་ཤིང་གཞན་དེ་ལ་འགོད་པ་སོགས་དང་། ཆོས་མཆོག་གི་སྐབས་སུ་རང་ཉིད་སེམས་ཅན་སྨིན་གྲོལ་བྱེད་པ་ལ་གནས་ཤིང་གཞན་དེ་ལ་འགོད་པ་སོགས་སུ་བཤད་པས་དེ་དག་གི་སྐབས་སུ་ཡུལ་གྱི་ཕྱོགས་སུ་ཞེན་པ་དང་། ཡུལ་ཅན་གྱི་ཕྱོགས་སུ་ཞེན་པ་གཉིས་ལས་དང་པོ་ལ་དོར་བྱའི་ཕྱོགས་ཞེན་པའི་ཚེ་གཞིའི་རྟེན་ཅན་གྱི་རྟོག་པ་དང་། བླང་བྱའི་ཕྱོགས་སུ་ཞེན་པའི་ཚེ་དེའི་གཉེན་པོའི་ཕྱོགས་སུ་ཞེན་པའི་རྟོག་པ་གཉིས་ལྡན་ཞིང་བརྟེན་པ་ཡིན་ལ། དེ་རེ་རེ་ལ་ཡང་མཉམ་གཞག་གི་ལྟ་བས་མ་ཟིན་པ་དང་། ཟིན་པའི་བྱེ་བྲག་གིས་བདེན་འཛིན་ཡིན་མིན་གཉིས་གཉིས་ཡོད་དོ། །ཡུལ་ཅན་གྱི་ཕྱོགས་སུ་ཞེན་པ་ལ་ཡང་མཉམ་གཞག་གི་ལྟ་བས་མ་ཟིན་པའི་ཚེ་བདེན་འཛིན་དང་། ཟིན་པའི་ཚེ་བརྟགས་པ་ཙམ་དུ་འཛིན་པ་ཡིན་པས། རྫས་འཛིན་རྟོག་པ་དང་བརྟགས་འཛིན་རྟོག་པ་ལྡན་ཞིང་བརྟེན་པ་ཡིན་ནོ། །ཐེག་ཆེན་གྱི་སྦྱོར་ལམ་ཐོབ་ནས་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པར་ངེས་པས་དེའི་འོག་ཏུ་ཕྱིར་མི་ལྡོག་པའི་དགེ་འདུན་སྟོན་ཏེ། འདི་ཡང་ལུས་རྣམ་གཞག་ཏུ། སློབ་པ་ཕྱིར་མི་ལྡོག་པའི་ཚོགས། །ཞེས་གསུངས་ལ། འདི་ལ་སློབ་པ་སྨོས་པའི་དགོས་པ། ཕྱིར་མི་ལྡོག་པ་སྨོས་པའི་དགོས་པ། ཚོགས་སྨོས་པའི་དགོས་པ། མཚན་གཞི་ངོས་གཟུང་བ་དང་བཞི་ལས། དང་པོ་ནི། རྣམ་རྫོགས་སྦྱོར་བ་འཆད་པའི་སྐབས་འདིར་སློབ་པ་ཕྱིར་མི་ལྡོག་པ་དང་། མི་སློབ་པ་ཕྱིར་མི་ལྡོག་པ་གཉིས་ལས། འདིར་སློབ་པ་ཕྱིར་མི་ལྡོག་པ་སྟོན་ཞེས་པའི་དོན་ཏོ། །སློབ་དཔོན་གྱིས་ནི་ས་བདུན་པ་མན་ཆད་ལ་སློབ་པར་བྱས་ནས་དེ་ཕྱིར་མི་ལྡོག་པར་བཞེད་དོ། །གཉིས་པ་ནི། དེ་ཡི་རྟགས་དང་ཞེས་པའི་སྐབས་ཀྱི་ཕྱིར་མི་ལྡོག་པའི་རྟགས་ཀྱི་ཐབས་ལ་མཁས་པ་དེ་སངས་རྒྱས་ཀྱི་ཡེ་ཤེས་ཉིད་ཡིན་པས་དེས་སྟོན་ཏོ། །གཉིས་པ་ནི། རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རྟུལ་པོས་རྟོགས་དཀར་བཞེད། །ཅེས་པའི་སྐབས་སུ་བྱང་སེམས་ཚོགས་ལམ་པ་ལ་གནས་སྐབས་རྫོགས་བྱང་ལས་ཕྱིར་ལྡོག་མི་ལྡོག་གཉིས་སུ་ཡོད་པར་བཤད་པས་བྱང་སེམས་ཀྱི་སྦྱོར་ལམ་ཐོབ་ནས་ཀྱང་དེ་ལྟར་དུ་ཡོད་དམ་ཞེ་ན། དེ་ནི་མ་ཡིན་ཏེ་བྱང་སེམས་ཀྱི་སྦྱོར་ལམ་ཐོབ་ནས་བསམ་སྦྱོར་གཉིས་ཀྱི་སྒོ་ནས་དམན་པའི་བྱང་ཆུབ་ཏུ་མི་འཇུག་པས་ཁྱབ་པའི་ཕྱིར། ཞེས་ཤེས་པའི་ཆེད་དུ་ཡིན་ནོ། །གསུམ་པ་ནི། ཉན་ཐོས་ཀྱི་སྡེ་སྣོད་དུ། ཚོགས་སམ་དགེ་འདུན་དུ་འགྱུར་བ་ལ་དགེ་སློང་བཞི་དགོས་པར་བཤད་པས་དེ་ལས་ཁྱད་པར་དུ་བྱ་བའི་ཕྱིར་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་རེ་རེ་ཡང་ཚོགས་སམ་དགེ་འདུན་ཡིན་ཞེས་བསྟན་པ་ཡིན་ནོ། །བཞི་པ་ནི། དེའི་མཚན་གཞི་གང་ཞེ་ན། སྦྱོར་མཐོང་སྒོམ་གསུམ་ལ་གནས་པའི་བྱང་སེམས་རྣམས་ཡིན་ནོ། །ཞེས་པ་ནི། ངེས་འབྱེད་ཡན་ལག་ནས་བཟུང་སྟེ། །ཞེས་སོགས་ཚིགས་བཅད་གཅིག་གིས་སྟོན་ཏོ། །གཞུང་འདིས་སློབ་པ་ཕྱིར་མི་ལྡོག་པའི་ཚོགས་ཀྱི་མཚན་གཞི་ངོས་གཟུང་བ་ཙམ་ཡིན་གྱི་ཕྱིར་མི་ལྡོག་ཏུ་བསྒྲུབ་པའི་གཏན་ཚིགས་སྟོན་པ་ནི་མ་ཡིན་ཏེ། གཏན་ཚིགས་ནི་གཞུང་འདི་ལས་འཕྲོས་ནས་གཞུང་འོག་མ་རྣམས་ཀྱིས་སྟོན་དགོས་པའི་ཕྱིར་རོ། །ཇི་ལྟར་སྟོན་ཞེ་ན། སྦྱོར་མཐོང་སྒོམ་གསུམ་ལ་གནས་པའི་བྱང་སེམས་རྣམས་ཕྱིར་མི་ལྡོག་པའི་ཚོགས་ཡིན་ན། དེ་དག་ཕྱིར་མི་ལྡོག་པའི་སྒྲུབ་བྱེད་ཡོད་དམ་མེད། མེད་ན་དམ་བཅའ་ཙམ་གྱིས་རྒོལ་བ་རྟོགས་ལྡན་ལ་ངེས་ཤེས་བསྐྱེད་མི་ནུས་ཤིང་། ཡོད་ན་སྒྲུབ་པ་བྱེད་དེ་གང་ཞེ་ན། དེའི་ལན་ལ་སྦྱོར་ལམ་དང་། མཐོང་ལམ་དང་། སྒོམ་ལམ་ལ་གནས་པའི་བྱང་སེམས་རྣམས་ཕྱིར་མི་ལྡོག་པར་བསྒྲུབ་པའི་གཏན་ཚིགས་གསུམ་ལས། དང་པོ་ལ་ཉི་ཤུ་ཡོད་དོ། །ཞེས་མདོར་བསྡུས་ནས་སྟོན་པ་ནི། གཟུགས་ལ་སོགས་ལ་ལྡོག་སོགས་རྟགས། །ཞེས་སོགས་ཚིགས་སུ་བཅད་པ་གཅིག་གིས་བསྟན་ཏོ། །དེ་ལ་ཡང་དྲོད་ལ་གནས་པའི་བྱང་སེམས་ཕྱིར་མི་ལྡོག་པར་བསྒྲུབ་པའི་གཏན་ཚིགས་བཅུ་གཅིག་དང་། རྩེ་མོའི་རྟགས་དྲུག་དང་། བཟོད་པའི་རྟགས་གཉིས་དང་། ཆོས་མཆོག་ལ་གནས་པའི་བྱང་སེམས་ཕྱིར་མི་ལྡོག་པར་བསྒྲུབ་པའི་གཏན་ཚིགས་གཅིག་སྟེ་ངོ་བོ་ངོས་གཟུང་བ་དང་བཅས་པ་ནི། གཟུགས་ལ་སོགས་ལ་ལྡོག་པ་དང་། །ཞེས་སོགས་ཀྱིས་བསྟན། དེ་དག་གི་རྟགས་ཆོས་དོན་གསུམ་གཞུང་གང་དང་གང་གིས་བསྟན་ཞེ་ན། གཟུགས་ལ་སོགས་ལ་ལྡོག་སོགས་རྟགས། །རྣམ་པ་ཉི་ཤུར་བརྗོད་པ་ཡིས། །ཞེས་པས་གཏན་ཚིགས་བསྟན། ངེས་འབྱེད་ཡན་ལག་ལ་གནས་པའི། །ཞེས་པས་ཤེས་འདོད་ཆོས་ཅན་བསྟན། ཕྱིར་མི་ལྡོག་ཅེས་པས་བསྒྲུབ་བྱའི་ཆོས་བསྟན། མཚན་ཉིད་འདི་ཞེས་པས་དངོས་སུ་བསྒྲུབ་བྱའི་དོན་བསྡུ་དང་། ཤུགས་ལ་ཁྱབ་པ་བསྟན། རྒྱས་བཤད་དུ། གཟུགས་ལ་སོགས་ལ་ལྡོག་པ་དང་། །ཞེས་པ་ནས། རྟགས་ནི་ཉི་ཤུ་དེ་དག་གིས། །ཞེས་པའི་བར་གྱིས་གཏན་ཚིགས། དྲོད་དང་རྩེ་མོ་བཟོད་བཅས་དང་། །ཆོས་མཆོག་རྣམས་ལ་གནས་པ་ནི། །ཞེས་པས་ཤེས་འདོད་ཆོས་ཅན། རྫོགས་པའི་བྱང་ཆུབ་ལས་མི་ལྡོག །ཅེས་པས་བསྒྲུབ་བྱའི་ཆོས་བསྟན་ཏོ། །གཉིས་པ་མཐོང་ལམ་ལ་གནས་པའི་སེམས་དཔའ་ཕྱིར་མི་ལྡོག་ཏུ་བསྒྲུབ་པའི་གཏན་ཚིགས་དེ་ལ་མཉམ་གཞག་ཤེས་བཟོད་སྐད་ཅིག་མ་བཅུ་དྲུག་ཡོད་དོ། །ཞེས་པ་ནི། མཐོང་བའི་ལམ་ལ་བཟོད་པ་དང་། །ཞེས་སོགས་ཚིགས་བཅད་གཅིག་གིས་སྟོན་ཏོ། །འོ་ན་མཉམ་གཞག་ཤེས་བཟོད་སྐད་ཅིག་མ་བཅུ་དྲུག་པོ་དེ་ཉིད་དང་པོ་ནས་གཏན་ཚིགས་སུ་འགྱུར་རམ་སྙམ་ན་དེ་ནི་མ་ཡིན་གྱི་དེས་དྲངས་པའི་རྗེས་ཐོབ་ལུས་ངག་གི་སྤྱོད་པ་བཅུ་དྲུག་པོ་དེ་དང་པོར་རྟགས་ཡང་དག་ཏུ་འགྱུར་བ་ཡིན་ནོ། །ཞེས་པ་ནི། གཟུགས་སོགས་འདུ་ཤེས་ལྡོག་པ་དང་། །ཞེས་སོགས་ཀྱིས་བསྟན་ཏོ། །དེ་དག་གི་རྟགས་ཆོས་དོན་གསུམ་ནི་མདོར་བསྟན་དུ་བཟོད་པ་དང་། ཤེས་པའི་སྐད་ཅིག་བཅུ་དྲུག་ནི། །ཞེས་པས་གཏན་ཚིགས། མཐོང་བའི་ལམ་ལ་ཞེས་དང་། བྱང་ཆུབ་སེམས་དཔའ་ཞེས་སྦྲེལ་བས་ཤེས་འདོད་ཆོས་ཅན། མི་ལྡོག་ཅེས་པས་སྒྲུབ་ཆོས། མཚན་ཉིད་ཡིན་པར་ཤེས་པར་བྱ། །ཞེས་པས་དངོས་སུ་དོན་བསྡུ་དང་། ཤུགས་ལ་ཁྱབ་པ་བསྟན་ཏོ། །རྒྱས་བཤད་དུ་གཟུགས་སོགས་འདུ་ཤེས་ལྡོག་པ་དང་། །ཞེས་པ་ནས། དེ་འདྲའི་སྐད་ཅིག་བཅུ་དྲུག་ནི། །ཞེས་པའི་བར་གྱིས་གཏན་ཚིགས། བློ་ལྡན་མཐོང་བའི་ལམ་གནས་ཀྱི། །ཞེས་པས་ཤེས་འདོད་ཆོས་ཅན། ཕྱིར་མི་ལྡོག་ཅེས་པས་སྒྲུབ་ཆོས། །རྟགས་དག་ཡིན་ཞེས་པས་སྔར་བཞིན་ནོ། །གསུམ་པ་སྒོམ་ལམ་ལ་གནས་པའི་བྱང་སེམས་ཕྱིར་མི་ལྡོག་ཏུ་བསྒྲུབ་པའི་གཏན་ཚིགས་ལ། སློབ་དཔོན་གྱིས་ཇི་ལྟར་བཀྲལ་བའི་ཚུལ་དང་། གནད་ཀྱི་དོན་ཁ་བསྐང་བ་གཉིས་ལས། དང་པོ་ལ་སྒོམ་ལམ་གྱི་ཁྱད་པར་བྱེད་ཆོས། ཁྱད་གཞི་སྒོམ་ལམ་གྱི་ངོ་བོ། དེ་དག་ལ་རྩོད་པ་སྤོང་བ། གཏན་ཚིགས་དངོས་དང་བཞི་ལས། དང་པོ་ནི། སྒོམ་པོའི་ལམ་ནི་ཟབ་པ་སྟེ། །ཞེས་སོགས་ཚིགས་བཅད་གཅིག་གོ །གཉིས་པ་ལ་ངོ་བོ་ནི། ངེས་འབྱེད་ཡན་ལག་དང་མཐོང་བའི། །ཞེས་སོགས་ཚིགས་བཅད་གཅིག དེའི་དབྱེ་བ་ནི། དེ་ནི་རྒྱུན་ཆགས་ཡིན་པའི་ཕྱིར། །ཞེས་སོགས་ཚིགས་བཅད་གཅིག་གོ །གསུམ་པ་དབྱེ་བ་ལ་རྩོད་པ་སྤོང་བ་ནི། གྲངས་མེད་ལ་སོགས་བསྟན་པ་རྣམས། །ཞེས་སོགས་ཚིགས་བཅད་གཅིག་དང་། མཐར་ཐུག་གི་བྱེད་ལས་ལ་རྩོད་པ་སྤོང་བ་ལ། རྩོད་པ་ནི། དངོས་པོ་བརྗོད་དུ་མེད་པ་ལ། །ཞེས་སོགས་ཚིགས་བཅད་གཅིག ལན་ནི། བྱང་ཆུབ་ཇི་ལྟ་དེ་བཞིན་དུ། །ཞེས་སོགས་ཚིགས་བཅད་གཅིག གནས་སྐབས་ཀྱི་བྱེད་ལས་ལ་རྩོད་པ་སྤོང་བ་ལ། རྩོད་པ་ནི། སེམས་ནི་སྔ་མས་བྱང་ཆུབ་བར། །ཞེས་སོགས་ཚིག་རྐང་གཉིས། ལན་ནི། མར་མེའི་དཔེ་ཡི་ཚུལ་གྱིས་ནི། །ཞེས་སོགས་ཚིག་རྐང་གཉིས། གཏན་ཚིགས་དངོས་ནི། སྐྱེ་བ་དང་ནི་འགག་པ་དང་། །ཞེས་སོགས་ཚིགས་བཅད་གཅིག་གིས་བསྟན། ཞེས་བཞེད་དོ། །གཉིས་པ་ནི། སྒོམ་ལམ་པ་ཕྱིར་མི་ལྡོག་པའི་གཏན་ཚིགས་ལ་མདོར་བསྟན། རྒྱས་བཤད་གཉིས་ལས། དང་པོ་ནི། སྒོམ་པའི་ལམ་ནི་ཟབ་པ་སྟེ། །ཞེས་སོགས་ཚིགས་བཅད་གཅིག་སྟེ། འདི་ཉིད་སྒོམ་ལམ་པ་ཕྱིར་མི་ལྡོག་པའི་གཏན་ཚིགས་ལ་སྦྱར་བ་དང་། ཐེག་པ་འོག་མའི་སྒོམ་ལམ་ལས་ཁྱད་པར་དུ་འཕགས་པའི་འཕགས་ཚུལ་ལ་སྦྱར་བ་དང་། གྲུབ་མཐའ་འོག་མའི་འདོད་པ་ལས་ཁྱད་པར་དུ་འཕགས་པའི་འཕགས་ཚུལ་ལ་སྦྱར་བ་དང་གསུམ་ལས། དང་པོ་ནི། སྒོམ་ལམ་པ་ཕྱིར་མི་ལྡོག་པའི་གཏན་ཚིགས་དེ་གང་ཞེ་ན། ཟབ་པ་ཡིན་ནོ། །ཞེས་པ་ནི། ཚིག་རྐང་དང་པོས་བསྟན། ཟབ་པ་དེ་ཡང་གང་ཞེ་ན་མཉམ་གཞག་ཏུ་ཟབ་མོ་མངོན་སུམ་དུ་རྟོགས་པས་དྲངས་པའི་སྒྲོ་སྐུར་དང་བྲལ་བའི་དོན་དཔོག་པར་བྱེད་པའི་རྗེས་ཐོབ་ལུས་ངག་གི་སྤྱོད་པ་དེ་གཏན་ཚིགས་སུ་གྱུར་པའི་ཟབ་པ་ཡིན་ནོ། །ཞེས་པ་ནི། ཚིག་རྐང་ཕྱི་མ་གསུམ་གྱིས་བསྟན། གཉིས་པ་ནི། ཐེག་ཆེན་གྱི་སྒོམ་ལམ་ནི་ཆོས་ཅན། ཐེག་དམན་གྱི་སྒོམ་ལམ་ལས་ཟབ་པ་ཡིན་ཏེ། མཉམ་གཞག་ཏུ་ཟབ་མོ་སྤྲོས་བྲལ་མངོན་སུམ་དུ་རྟོགས་ཤིང་རྗེས་ཐོབ་ཏུ་དེས་དྲངས་པའི་ངེས་ཤེས་ཀྱིས་ཟབ་མོའི་དོན་ལ་སྒྲོ་སྐུར་དང་བྲལ་བའི་ཕྱིར་ཞེས་པའོ། །གསུམ་པ་ནི། དབུ་མ་པའི་ལུགས་ཀྱི་སྒོམ་ལམ་གྱི་འདོད་ཚུལ་དེ་དངོས་སྨྲ་བའི་ལུགས་ཀྱི་སྒོམ་ལམ་གྱི་འདོད་ཚུལ་ལས་ཟབ་པ་ཡིན་ཏེ། དབུ་མ་པའི་ལུགས་ལ་སྒོམ་ལམ་དེ་དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་ཀྱང་། ཀུན་རྫོབ་ཏུ་སྤང་གཉེན་ཉམས་འཕེལ་གྱི་བྱ་བ་བྱེད་པ་མི་འགལ་བས་སྒྲོ་སྐུར་དང་བྲལ་བའི་ཕྱིར། ཞེས་པའོ། །དེ་ལྟར་གསུམ་ལས། དང་པོ་དེ་ཉིད་ཀྱང་གཞུང་གི་དོན་ལ་ཞུགས་ཏེ། གོང་དུ་སྦྱོར་ལམ་པ་དང་མཐོང་ལམ་པ་ཕྱིར་མི་ལྡོག་པའི་གཏན་ཚིགས་གཉིས་ལ་མདོར་བསྟན། རྒྱས་བཤད་གཉིས་གཉིས་གསུངས་པ་ལྟར། འདི་ལ་ཡང་བསྟན་བཤད་གཉིས་དགོས་ཤིང་དགོས་པ་ལྟར་གཞུང་ཉིད་ལ་གནས་པའི་ཕྱིར་ཏེ། མདོར་བསྟན་དུ། སྒོམ་ལམ་པ་ཕྱིར་མི་ལྡོག་པའི་གཏན་ཚིགས་དེ་ཟབ་པ་ཡིན་པར་བསྟན་ཞིང་། རྒྱས་བཤད་དུ་ཟབ་པ་དེ་ཉིད་ལ་བརྒྱད་དུ་ཕྱེ་བའི་ཕྱིར་རོ། །གཉིས་པ་ཡང་དོན་ལ་ཞུགས་ཏེ། རྒྱན་འདིར་ཐེག་ཆེན་གྱི་སྦྱོར་མཐོང་སྒོམ་གསུམ་ཐེག་དམན་གྱི་སྦྱོར་མཐོང་སྒོམ་གསུམ་ལས་ཁྱད་པར་འཕགས་པའི་འཕགས་ཆོས་བསྟན་དགོས་པ་ལས་ཐེག་ཆེན་གྱི་སྦྱོར་ལམ་ཐེག་དམན་གྱི་སྦྱོར་ལམ་ལས་ཁྱད་པར་དུ་འཕགས་པའི་འཕགས་ཆོས་སྐབས་དང་པོར་བསྟན་ཟིན། ཐེག་ཆེན་གྱི་མཐོང་ལམ་ཐེག་དམན་གྱི་མཐོང་ལམ་ལས་ཁྱད་པར་དུ་འཕགས་པའི་འཕགས་ཆོས་ཁྱད་མཚན་འཆད་པའི་སྐབས་སུ་བསྟན་ཟིན་པས་འདིར་ཐེག་ཆེན་གྱི་སྒོམ་ལམ་ཐེག་དམན་གྱི་སྒོམ་ལམ་ལས་ཁྱད་པར་དུ་འཕགས་པའི་འཕགས་ཆོས་སྟོན་དགོས་པ་སྐབས་སུ་བབས་པའི་ཕྱིར་རོ། །གསུམ་པ་ཡང་དོན་ལ་ཞུགས་ཏེ། སྐབས་ལྔ་པར་དབུ་མ་པའི་ལུགས་ཀྱི་མཐོང་ལམ་གྱི་དྲི་མ་སྤོང་ཚུལ་དངོས་སྨྲ་བའི་ལུགས་ཀྱི་མཐོང་ལམ་གྱི་དྲི་མ་སྤོང་ཚུལ་ལས་ཟབ་པར་བསྟན་པ་དེ་སྒོམ་ལམ་གྱི་དྲི་མ་སྤོང་ཚུལ་ལ་ཡང་སྦྱར་བར་བྱ་བ་ཡིན་ཞིང་། འདིར་དབུ་མ་པའི་ལུགས་ཀྱི་སྒོམ་ལམ་གྱི་ངོ་བོའི་འདོད་ཚུལ་དངོས་སྨྲ་བའི་ལུགས་ཀྱི་སྒོམ་ལམ་གྱི་ངོ་བོའི་འདོད་ཚུལ་ལས་ཟབ་པར་བསྟན་པ་དེ་མཐོང་ལམ་གྱི་ངོ་བོའི་འདོད་ཚུལ་ལ་ཡང་སྦྱར་བར་བྱ་བ་ཡིན་པའི་ཕྱིར་རོ། །གཉིས་པ་རྒྱས་པར་བཤད་པ་ལ། གཏན་ཚིགས་གང་ལ་ལྡན་པའི་གཞིར་གྱུར་པའི་སྒོམ་ལམ་ངོས་གཟུང་བ། དེ་ལ་རྩོད་པ་སྤངས་ཏེ་སྒྲོ་སྐུར་དང་བྲལ་བའི་ཚུལ་སྒྲུབ་པ། དེས་འགྲུབ་པའི་སྒྲོ་སྐུར་དང་བྲལ་བའི་གཏན་ཚིགས་ཀྱི་དབྱེ་བ་དང་གསུམ་ལས། དང་པོ་ལ་ངོ་བོ་ནི། ངེས་འབྱེད་ཡན་ལག་དང་མཐོང་བའི། །ཞེས་སོགས་ཚིགས་བཅད་གཅིག་དང་། དབྱེ་བ་ནི། དེ་ནི་རྒྱུན་ཆགས་ཡིན་པའི་ཕྱིར། །ཞེས་སོགས་ཚིགས་བཅད་གཅིག་གིས་བསྟན་ནོ། །དེ་ལ་འདིར་བསྟན་སྒོམ་ལམ་གྱི་ངོ་བོ་ནི། སྦྱོར་མཐོང་སྒོམ་གསུམ་མཉམ་གཞག་གི་གནས་སྐབས་སུ་མཐོང་ཟིན་གྱི་ཟབ་མོའི་དོན་ལ་སེམས་འཇལ་རྟོག་གསུམ་བྱེད་པའི་རྗེས་ཐོབ་ཀྱི་མཁྱེན་པ་ཡིན་ཞིང་། དེ་ལྟར་བསྟན་དགོས་པའི་རྒྱུ་མཚན་ཡང་སྐབས་འདིར་སྒོམ་ལམ་པ་ཕྱིར་མི་ལྡོག་པའི་གཏན་ཚིགས་རྗེས་ཐོབ་ལུས་ངག་གི་སྤྱོད་པ་གང་ལ་ལྡན་པའི་སྒོམ་ལམ་སྟོན་པ་སྐབས་ཀྱི་དོན་ཡིན་ཞིང་། དེ་ལ་ཐེག་ཆེན་གྱི་སྦྱོར་མཐོང་མཉམ་གཞག་སྔོན་དུ་འགྲོ་དགོས་པར་མ་ཟད་ཐེག་ཆེན་གྱི་སྒོམ་ལམ་མཉམ་གཞག་གཅིག་ཀྱང་སྔོན་དུ་འགྲོ་དགོས་པའི་ཕྱིར་ཏེ། སྒོམ་ལམ་པ་ཕྱིར་མི་ལྡོག་པའི་གཏན་ཚིགས་དེ་མཉམ་གཞག་ཏུ་ཟབ་མོ་མངོན་སུམ་དུ་མཐོང་ཟིན་རྒྱུན་ལྡན་དུ་གོམས་པས་དྲངས་པའི་སྒྲོ་སྐུར་དང་བྲལ་བའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་ལ་བཤད་པའི་ཕྱིར་རོ། །དེ་ལྟ་བུའི་སྒོམ་ལམ་དེ་ལ་དབྱེ་ན་ཆུང་ངུའི་ཆུང་ངུ་ལ་སོགས་པ་དགུར་ཡོད་དེ། ཐེག་ཆེན་གྱི་སྒོམ་ལམ་མཉམ་གཞག་དེ་ལ་དྲི་མ་ཆེན་པོའི་ཆེན་པོ་ལ་སོགས་པ་དགུའི་གཉེན་པོར་ལམ་ཆུང་ངུའི་ཆུང་ངུ་ལ་སོགས་པ་དགུ་ཡོད་པའི་ཕྱིར་རོ། །ཁྱབ་སྟེ། ཐེག་ཆེན་གྱི་སྒོམ་ལམ་མཉམ་གཞག་རེའི་རྗེས་སུ་མཉམ་གཞག་ཏུ་མངོན་སུམ་དུ་རྟོགས་ཟིན་པའི་ཟབ་མོའི་དོན་ལ་སེམས་འཇལ་རྟོག་གསུམ་བྱེད་པའི་རྗེས་ཐོབ་ཀྱི་མཁྱེན་པ་རེ་རེ་རྒྱུན་ཆགས་སུ་འབྱུང་བའི་ཕྱིར་རོ། །ཉིར་སྣང་དུ། སྒོམ་པའི་ལམ་ལ་གནས་པ་དེ་ཉིད་ཇི་ལྟར་ཡུལ་ཡིན་ཞེ་ན། རྒྱུན་ཆགས་པ་ཡིན་པའི་ཕྱིར། ཕྱི་མ་ཕྱི་མའི་ཡུལ་སྔ་མ་སྔ་མ་ཡིན་པས་ཉེས་པ་མེད་དོ། །སྐབས་འདིར་བསྟན་གྱི་སྒོམ་ལམ་ལ་ངེས་འབྱེད་ཆ་མཐུན་བཞི་དང་། མཐོང་སྒོམ་གཉིས་ཏེ་དྲུག་སྔོན་དུ་འགྲོ་དགོས་པ་ཡང་མདོར་དེ་བཞིན་དུ་སྒྲུབ་པ་དང་། དེ་བཞིན་དུ་ངེས་པར་རྟོགས་པ་དང་། དེ་བཞིན་དུ་ཉེ་བར་རྟོག་པ་དང་། དེ་བཞིན་དུ་རྩོལ་བ་དང་། དེ་བཞིན་དུ་སྦྱོར་བ་དང་། དེ་བཞིན་དུ་འབད་པ་ཞེས་བྱ་བའི་ཚིག་དྲུག་གསུངས་པ་ཡིན་ནོ། །གཉིས་པ་ལ་སྒྲོ་འདོགས་པའི་རྩོད་པ་སྤོང་བ་དང་། སྐུར་པ་འདེབས་པའི་རྩོད་པ་སྤོང་བ་གཉིས་ལས། དང་པོ་ལ་གཉིས་ཏེ། བསོད་ནམས་གྲངས་མེད་སོགས་མི་སྐྱེད་པར་ཐལ་བའི་རྩོད་པ་སྤོང་བ་དང་། སྤང་གཉེན་ཉམས་འཕེལ་གྱི་བྱ་བ་མི་བྱེད་པར་ཐལ་བའི་རྩོད་པ་སྤོང་བའོ། །དང་པོ་ལ་གང་ལ་རྩོད་པའི་ཡུལ། དེ་ལ་སྒྲོ་འདོགས་པའི་རྩོད་པ། དེ་སྤངས་ནས་སྒྲོ་འདོགས་དང་བྲལ་བའི་ཚུལ་དང་གསུམ་ལས། དང་པོ་ནི། ཟབ་མོ་སྟོང་པ་ཉིད་ལ་སོགས། །ཞེས་པའི་སྒྲ་ཇི་བཞིན་པ་ལའོ། །གཉིས་པ་ནི། གྲངས་མེད་ལ་སོགས་བསྟན་པ་རྣམས། །ཞེས་པའི་ཚིག་རྐང་གཉིས་ཏེ། ཐེག་ཆེན་ཀྱི་སྒོམ་ལམ་ཆོས་ཅན། འབྲས་བུ་བསོད་ནམས་གྲངས་མེད་སོགས་མི་སྐྱེད་པར་ཐལ། དོན་དམ་པར་དེ་མི་བསྐྱེད་པའི་ཕྱིར་ཏེ། དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་པའི་ཕྱིར། དེས་ན་སྒོམ་ལམ་དེས་འབྲས་བུ་བསོད་ནམས་གྲངས་མེད་སོགས་སྐྱེད་པར་གྲུབ་པས་དོན་དམ་པར་དེ་བསྐྱེད་པར་གྲུབ། དེ་གྲུབ་པས་སྒོམ་ལམ་དོན་དམ་པར་ཡོད་པར་གྲུབ་བོ། །ཞེས་པ་ནི་སྒྲོ་འདོགས་པའི་རྩོད་པའོ། །གསུམ་པ་ནི། ཀུན་རྫོབ་ཏུ་ནི་ཐུགས་བརྩེ་བའི། །ཞེས་སོགས་ཚིག་རྐང་གཉིས་ཏེ། ཐེག་ཆེན་གྱི་སྒོམ་ལམ་ཆོས་ཅན། དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་ཡང་། ཀུན་རྫོབ་ཏུ་འབྲས་བུ་བསོད་ནམས་གྲངས་མེད་གཞལ་མེད་སོགས་བསྐྱེད་པ་མི་འགལ་ཏེ། ཀུན་རྫོབ་ཏུ་ཁྱོད་ཀྱིས་དེ་བཞིན་གཤེགས་པ་བསྐྱེད་ཅིང་། བསོད་ནམས་གྲངས་མེད་གཞལ་མེད་སོགས་དེ་བཞིན་གཤེགས་པའི་ཐུགས་རྗེའི་རྒྱུ་མཐུན་གྱི་འབྲས་བུ་ཡིན་པའི་ཕྱིར་རོ། །དེས་ན་ཐེག་པ་ཆེན་པོའི་སྒོམ་ལམ་གྱི་འབྲས་བུ་བསོད་ནམས་གྲངས་མེད་སོགས་བསྐྱེད་པར་གྲུབ་པས་ཐེག་པ་ཆེན་པོའི་སྒོམ་ལམ་དེ་དོན་དམ་པར་ཡོད་པར་མི་འགྲུབ་བོ་ཞེས་པ་ནི་སྒྲོ་འདོགས་ལས་གྲོལ་བའི་ཚུལ་ལོ། །གཉིས་པ་ལ་ཡང་སྔར་ལྟར་གསུམ་ལས། དང་པོ་གང་ལ་རྩོད་པའི་ཡུལ་ནི། ཟབ་མོ་སྟོང་པ་ཉིད་ལ་སོགས། །ཞེས་སྒོམ་ལམ་གྱི་ངོ་བོ་དོན་དམ་པར་སྟོང་ཉིད་དུ་བསྟན་པ་དང་། ཆུང་དང་འབྲིང་དང་ཆེན་པོ་རྣམས། །ཞེས་པའི་སྐབས་སུ་སྤང་བྱ་དགུའི་གཉེན་པོར་སྒོམ་ལམ་དགུའི་གྲངས་ངེས་པར་བསྟན་པ་ལའོ། །གཉིས་པ་ནི། དངོས་པོ་བརྗོད་དུ་མེད་པ་ལ། །ཞེས་སོགས་ཚིགས་བཅད་གཅིག་སྟེ། ཐེག་ཆེན་གྱི་སྒོམ་ལམ་ཆོས་ཅན། སྤང་གཉེན་ཉམས་འཕེལ་གྱི་བྱ་བ་མི་བྱེད་པར་ཐལ། དོན་དམ་པར་སྟོང་ཉིད་ཀྱི་ངོ་བོ་ཡིན་པའི་ཕྱིར་ཁྱབ་སྟེ། བདེན་གྲུབ་ཀྱི་དངོས་པོར་བརྗོད་དུ་མེད་ན་སྤང་གཉེན་ཉམས་འཕེལ་གྱི་བྱ་བ་བྱེད་པར་མི་རུང་བའི་ཕྱིར་རོ། །དེས་ན་ཐེག་ཆེན་གྱི་སྒོམ་ལམ་དེས་སྤང་གཉེན་ཉམས་འཕེལ་གྱི་བྱ་བ་བྱེད་པའི་རྒྱུ་མཚན་གྱིས་བདེན་པར་གྲུབ་པ་ཡིན་ནོ། །ཞེས་པ་ནི་སྒྲོ་འདོགས་པའི་རྩོད་པའོ། །གསུམ་པ་ནི། བྱང་ཆུབ་ཇི་ལྟ་དེ་བཞིན་དུ། །ཞེས་སོགས་ཚིགས་བཅད་གཅིག་སྟེ། དེ་ཡང་བྱང་ཆུབ་དེ་བཞིན་ཉིད་མཚན་ཉིད། །བྱང་ཆུབ་ཇི་ལྟ་དེ་བཞིན་དུ། །ཞེས་པས་དཔེ་བསྟན། དེ་ཡང་དེ་ཡི་མཚན་ཉིད་བཞེད། །འདི་ནི་འདོད་པའི་དོན་གྲུབ་བྱེད། །ཞེས་པས་དོན་བསྟན་ཏེ། ཐེག་ཆེན་གྱི་སྒོམ་ལམ་དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་ཡང་ཀུན་རྫོབ་ཏུ་སྤང་གཉེན་ཉམས་འཕེལ་གྱི་བྱ་བ་བྱེད་དེ། བྱང་ཆུབ་སྐུ་གསུམ་པོ་དེ་དོན་དམ་པར་གཟུང་འཛིན་གྱི་སྤྲོས་པ་དང་བྲལ་བའི་དེ་བཞིན་ཉིད་ཡིན་ཡང་ཀུན་རྫོབ་ཏུ་གཟུང་འཛིན་གྱི་སྤྲོས་པར་བསྟན་ནས་གདུལ་བྱའི་དོན་བྱེད་པའི་ཕྱིར་རོ། །དེས་ན་ཐེག་ཆེན་གྱི་སྒོམ་ལམ་དེས་སྤང་གཉེན་ཉམས་འཕེལ་གྱི་བྱ་བ་བྱེད་ཀྱང་བདེན་པར་གྲུབ་པར་མི་འགྲུབ་བོ། །ཞེས་པ་ནི་སྒྲོ་འདོགས་ལས་གྲོལ་བའི་ཚུལ་ལོ། །གཉིས་པ་སྐུར་འདེབས་ཀྱི་རྩོད་པ་སྤོང་བ་ལ་གང་ལ་རྩོད་པའི་ཡུལ། དེ་ལ་སྐུར་པ་འདེབས་པའི་རྩོད་པ། དེ་སྤངས་ཏེ་སྐུར་འདེབས་ལས་གྲོལ་བའི་ཚུལ་དང་གསུམ་ལས། དང་པོ་ནི། འདི་ནི་འདོད་པའི་དོན་སྒྲུབ་བྱེད། །ཅེས་པ་ལའོ། །གཉིས་པ་ནི། སེམས་ནི་སྔ་མས་བྱང་ཆུབ་པར། །རིགས་མིན་ཕྱི་མས་ཀྱང་མ་ཡིན། །ཞེས་པ་སྟེ། ཐེག་པ་ཆེན་པོའི་སྒོམ་ལམ་ཆོས་ཅན། ཁྱོད་ཀྱིས་བླ་ན་མེད་པའི་བྱང་ཆུབ་མི་སྐྱེད་པར་ཐལ། ཁྱོད་ཀྱིས་སྐད་ཅིག་སྔ་མས་ཀྱང་དེ་མི་སྐྱེད། ཁྱོད་ཀྱིས་སྐད་ཅིག་ཕྱི་མས་ཀྱང་དེ་མི་སྐྱེད་པའི་ཕྱིར། ཞེས་པ་ནི། སྐུར་འདེབས་ཀྱི་རྩོད་པའོ། །གཞུང་གི་དངོས་བསྟན་གྱི་རྩོད་པ་ནི་འདི་ཉིད་ཡིན་ལ། འགྲེལ་པར་དངོས་བསྟན་གྱི་རྩོད་པ་དེ་ཉིད་སྐད་ཅིག་སྔ་ཕྱི་རེ་རེ་ཁོ་ནས་བྱང་ཆུབ་མི་སྐྱེད་ཅེས་པའི་མཐའ་གཅིག་ཏུ་བྱས་ནས་ཅིག་ཅར་འབྱུང་བ་མང་པོས་ཀྱང་མི་སྐྱེད་པ་དང་། རིམ་གྱིས་འབྱུང་བ་མང་པོས་ཀྱང་མི་སྐྱེད་པར་བསྟན་ཏེ། མཐའ་གསུམ་དུ་བརྟག་པར་མཛད་དོ། །གསུམ་པ་ནི། མར་མེའི་དཔེ་ཡི་ཚུལ་གྱིས་ནི། །ཞེས་སོགས་ཚིག་རྐང་གཉིས་ཏེ། མར་མེའི་དཔེའི་ཚུལ་གྱིས་འོག་ནས་འཆད་པར་འགྱུར་བའི་ཟབ་མོའི་ཆོས་ཉིད་རྣམ་པ་བརྒྱད་མི་འགལ་བར་རྟོགས་པའི་ནང་ནས་དང་པོ་སྐྱེ་བ་ཟབ་པ་མི་འགལ་བར་རྟོགས་པ་དེ་ཉིད་ཀྱིས་འདིའི་རྩོད་པའི་ལན་དེ་རྟོགས་པར་འགྱུར་རོ། །ཇི་ལྟར་ཞེ་ན། ཐེག་ཆེན་གྱི་སྒོམ་ལམ་སྐད་ཅིག་སྔ་ཕྱི་རེ་རེ་ཁོ་ནས་ཀྱང་བླ་ན་མེད་པའི་བྱང་ཆུབ་མི་སྐྱེད། དེ་དག་མེད་པར་ཡང་བླ་ན་མེད་པའི་བྱང་ཆུབ་མི་སྐྱེད་ཀྱང་སྐད་ཅིག་སྔ་ཕྱི་ཕན་ཚུན་ལྟོས་ནས་བླ་ན་མེད་པའི་བྱང་ཆུབ་སྐྱེད་པ་ཡིན་ཏེ། མར་མེའི་སྐད་ཅིག་སྔ་ཕྱི་གང་རུང་རེ་རེ་ཁོ་ནས་སྡོང་བུ་སྣུམ་ལྡན་རྫོགས་པར་མི་བསྲེག དེ་དག་མེད་པར་ཡང་དེ་རྫོགས་པར་མི་བསྲེག་ཀྱང་སྐད་ཅིག་སྔ་ཕྱི་ཕན་ཚུན་ལྟོས་ནས་སྡོང་བུ་སྣུམ་ལྡན་རྫོགས་པར་བསྲེག་པའི་ཕྱིར། ཞེས་པ་ནི། སྐུར་འདེབས་ལས་གྲོལ་བའི་དོན་ནོ། །གསུམ་པ་སྒྲོ་སྐུར་དང་བྲལ་བའི་གཏན་ཚིགས་ཀྱི་དབྱེ་བ་ནི། སྐྱེ་བ་དང་ནི་འགག་པ་དང་། །ཞེས་སོགས་ཚིགས་བཅད་གཅིག་སྟེ། མདོར་བསྟན་དུ། སྒོམ་ལམ་པ་ཕྱིར་མི་ལྡོག་པའི་གཏན་ཚིགས་དེ་ཟབ་པ་ཡིན་པ་དང་། ཟབ་པ་དེ་སྒྲོ་སྐུར་དང་བྲལ་བར་བསྟན་ན་གཏན་ཚིགས་ཟབ་པ་དེ་ལ་དབྱེ་ན་དུ་ཡོད་དེ་སྒྲོ་སྐུར་དང་བྲལ་བའི་ཚུལ་ཇི་ལྟར་ཞེ་ན་གཏན་ཚིགས་ཟབ་པ་དེ་ལ་སྐྱེ་བ་ཟབ་པ་སོགས་བརྒྱད་ཡོད་ཅིང་། སྒྲོ་སྐུར་དང་བྲལ་བའི་ཚུལ་སྐྱེ་བ་ཟབ་པ་ལ་མཚོན་ན། ཐེག་ཆེན་གྱི་སྒོམ་ལམ་སྐད་ཅིག་སྔ་ཕྱི་གང་རུང་རེ་རེ་ཁོ་ནས་བླ་ན་མེད་པའི་བྱང་ཆུབ་བསྐྱེད་པ་དང་། དེ་དག་མེད་པར་བླ་ན་མེད་པའི་བྱང་ཆུབ་བསྐྱེད་པ་ནི་སྒྲོ་འདོགས་ཡིན་ལ། སྤྱིར་བླ་ན་མེད་པའི་བྱང་ཆུབ་མི་བསྐྱེད་པ་ནི་སྐུར་འདེབས་ཡིན་པས། དེ་གཉིས་ལས་གྲོལ་བ་ནི་སྐྱེ་བ་སྒྲོ་སྐུར་ལས་གྲོལ་བའི་ཕྱིར་ན་ཟབ་པའི་དོན་ཏེ། འོག་མ་བདུན་ལ་ཡང་དེ་བཞིན་དུ་སྦྱར་བར་བྱའོ། །འོ་ན་དེ་དག་གི་རྟགས་ཆོས་དོན་གསུམ་གཞུང་གང་དང་གང་གིས་བསྟན་ཞེ་ན། སྒོམ་པའི་ལམ་ནི་ཟབ་པ་སྟེ། །ཞེས་སོགས་དང་། སྐྱེ་བ་དང་ནི་འགག་པ་དང་། །ཞེས་སོགས་ཀྱིས་གཏན་ཚིགས་བསྟན། བློ་ལྡན་སྒོམ་པའི་ལམ་གནས་ཀྱི། །ཕྱིར་མི་ལྡོག་པའི་རྟགས་དག་ཡིན། །ཞེས་པས་ཤེས་འདོད་ཆོས་ཅན་དང་། བསྒྲུབ་བྱའི་ཆོས་དང་དོན་བསྡུ་བསྟན་ནོ། །གཞུང་དེ་འདིར་དངོས་སུ་མ་གསུངས་པའི་རྒྱུ་མཚན་ནི་ཚིགས་བཅད་མང་ཉུང་གི་ལྷག་ཆད་སྤོང་བའི་ཆེད་ཡིན་ལ། མི་རྟོགས་པ་ནི་མ་ཡིན་ཏེ། སྦྱོར་མཐོང་གཉིས་ཀྱི་གཞུང་གི་ཤུགས་ལ་ཤེས་ནུས་པའི་ཕྱིར་རོ། །དཔེར་ན་གཞི་ཤེས་དང་རྣམ་མཁྱེན་གྱི་རྣམ་པའི་སྐབས་སུ་རྣམ་པ་ཐོག་མཐའ་གཉིས་དངོས་སུ་བསྟན་ནས་ལམ་ཤེས་ཀྱི་རྣམ་པའི་སྐབས་སུ་མ་བསྟན་པ་བཞིན་ནོ། །འདིར་བསྟན་གཏན་ཚིགས་བཞི་བཅུ་ཞེ་བཞི་པོ་སྦྱོར་མཐོང་སྒོམ་གསུམ་ལ་གནས་པའི་སེམས་དཔའ་ཙམ་གྱི་དབང་དུ་བྱས་སམ། དབང་པོའི་རིམ་པས་འཇོག གཏན་ཚིགས་རང་གི་ངོ་བོ་འབྲས་རང་མ་དམིགས་པའི་རྟགས་གསུམ་པོ་གང་ཡིན། གང་ཟག་རང་ངོར་གཏན་ཚིགས་སུ་འགྱུར་བ་ཡིན་ནམ་གདུལ་བྱ་གཞན་གྱི་ངོར་གཏན་ཚིགས་སུ་འགྱུར་བ་ཡིན་སྙམ་དུ་རྒོལ་བ་རྟོག་ལྡན་ལ་དོགས་པ་གསུམ་སྐྱེ་བར་འགྱུར་རོ། །དང་པོའི་ལན་ལ་ཁ་ཅིག སྦྱོར་མཐོང་སྒོམ་གསུམ་ལ་གནས་པའི་བྱང་སེམས་ལ་ཕྱིར་མི་ལྡོག་པས་ཁྱབ་ཀྱང་། ཕྱིར་མི་ལྡོག་པའི་རྟགས་ཐོབ་པས་མ་ཁྱབ་པས་གཏན་ཚིགས་རྣམས་སྦྱོར་ལམ་པ་དབང་རྣོན་དང་། མཐོང་ལམ་པ་དབང་འབྲིང་ཡན་ཆད་དང་། སྒོམ་ལམ་པ་དབང་རྟུལ་ཡན་ཆད་ཀྱི་དབང་དུ་བྱས་པ་ཡིན་ནོ། །ཞེས་བཞེད་དོ། །འདི་ནི་འཐད་པར་མ་མཐོང་སྟེ། །སྦྱོར་ལམ་པ་དབང་འབྲིང་མན་ཆད་དང་། མཐོང་ལམ་པ་དབང་རྟུལ་ཕྱིར་མི་ལྡོག་པར་སྒྲུབ་པའི་སྒྲུབ་བྱེད་ཡོད་ན་རྟགས་མ་ཐོབ་པར་འགལ་ཞིང་། སྒྲུབ་བྱེད་མེད་ན་ཕྱིར་མི་ལྡོག་པར་དམ་བཅས་པའི་དམ་བཅའ་དེ་དམ་བཅར་ལྟར་སྣང་དུ་འགྱུར་བའི་ཕྱིར་དང་། ཕྱིར་མི་ལྡོག་པའི་གཏན་ཚིགས་ཐོབ་ན་སྐབས་དེ་དང་དེ་ནས་བཤད་པའི་གཏན་ཚིགས་ཐམས་ཅད་ཐོབ་པས་མ་ཁྱབ་ཅིང་། ཕྱིར་མི་ལྡོག་པའི་རྟགས་ཀྱི་གཙོ་བོ་ནི་སྙིང་རྗེ་ཆེན་པོ་དང་ཟུང་དུ་འཇུག་པའི་སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་ཡིན་ལ། དེ་མ་ཐོབ་པའི་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་མི་སྲིད་པའི་ཕྱིར་རོ། །གལ་ཏེ་མཉམ་གཞག་ཏུ་རྟོགས་པ་དེ་ཐོབ་ཀྱང་དེས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་མ་ཐོབ་པ་ཡོད་པས་སྐྱོན་མེད་དོ་སྙམ་ན། དེ་ལྟར་ན་རྣལ་འབྱོར་པ་རྣམས་ཀྱི་ཐ་སྙད་ནི། སེམས་ཅན་འདུལ་བའི་དགོས་པའི་དབང་མ་གཏོགས་པར་ཐམས་ཅད་དུ་རྟོགས་པ་དང་མཐུན་པ་ཁོ་ན་ཡིན་ནོ། །ཞེས་གསུངས་པ་དང་འགལ་བར་རྟོགས་སོ། །དེས་ན་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་ཐམས་ཅད་ཀྱིས་ཕྱིར་མི་ལྡོག་པའི་གཏན་ཚིགས་ཐོབ་སྟེ། སྐབས་འདིར་བསྟན་གྱི་གཏན་ཚིགས་གང་རུང་གཅིག་མ་ཐོབ་པའི་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་མེད་པ་གང་ཞིག རེ་རེས་ཀྱང་ཕྱིར་མི་ལྡོག་ཏུ་སྒྲུབ་ནུས་པའི་ཕྱིར་རོ། །ཁ་ཅིག་ཐེ་ཚོམ་ཟད་པ་དང་། མི་དལ་ཟད་པས་ཕྱིར་མི་ལྡོག་ཏུ་སྒྲུབ་ནུས་ན་ཉན་ཐོས་དགྲ་བཅོམ་པས་ཀྱང་ཕྱིར་མི་ལྡོག་གི་རྟགས་ཐོབ་པར་ཐལ་ལོ། །ཞེས་སྨྲ་བ་ནི་སེན་མོ་སྣུམ་པ་དཔེ་བྱད་ཡིན་ན། སེན་མོ་ལ་སྣུམ་བསྐུས་པས་དཔེ་བྱད་ཐོབ་པར་འགྱུར་རོ། །ཞེས་སྨྲ་བ་དང་མཚུངས་པས་བློ་གྲོས་རྩིང་པའི་རྟགས་མ་སྟོན་ཅིག དོགས་པ་གཉིས་པའི་ལན་ནི་བསྟན་བཅོས་རྩ་བར་ཕྱིར་མི་ལྡོག་པ་ཙམ་བསྒྲུབ་བྱའི་ཆོས་སུ་བྱས་ནས་གཏན་ཚིགས་འགོད་པར་གསུངས་པ་ལྟར་ན་མ་དམིགས་པའི་གཏན་ཚིགས་ཡིན་ཞིང་། མདོར་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་དང་ལྡན་པའི་བྱང་སེམས་ཆེན་པོ་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །ཞེས་པའི་འགྲེལ་པར་འགྲེལ་ཆེན་དུ། ནུས་པའི་རྒྱུ་ཡི་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་བྱ་བའི་ཚུལ་གྱིས་རུང་བ་ཉིད་ཀྱི་རྗེས་སུ་དཔག་པས་གཟུང་བར་བྱའོ། །ཞེས་དང་། སྡུད་འགྲེལ་རྟོགས་པར་སླ་བ་ལས་ཀྱང་། ལུང་དེ་དྲངས་ནས་ཞེས་བྱ་བའི་རིགས་པས་འདིར་བསྟན་པའི་རྟགས་ཀྱང་ཤེས་པར་བྱའོ། །ཞེས་གསུངས་པ་ལྟར་ན། རྒྱུ་ཚོགས་གྲངས་ཚང་གི་རྟགས་ལས་འབྲས་བུ་འབྱུང་རུང་སྒྲུབ་པར་བྱེད་པའི་རང་བཞིན་གྱི་གཏན་ཚིགས་ཡིན་ནོ། །འགྲེལ་ཆུང་དུ། དེ་ལྟར་ན་བཟོད་པ་དང་ཤེས་པའི་སྐད་ཅིག་མ་བཅུ་དྲུག་གིས་བསྡུས་པ་འདི་རྣམས་ཡང་དག་པར་ཐོབ་པ་ན་དག་པ་འཇིག་རྟེན་པ་གཟུང་བ་དང་འཛིན་པར་མངོན་པར་ཞེན་པའི་རྣམ་པ་ཅན་རྗེས་ཀྱི་སེམས་ཀྱིས་བསྡུས་པ་དང་མཐུན་པའི་འབྲས་བུ་གཟུགས་ལ་སོགས་པའི་འདུ་ཤེས་ལྡོག་པ་ལ་སོགས་པ་སྐྱེད་པའི་ཕྱིར། བྱང་ཆུབ་སེམས་དཔའ་མཐོང་བའི་ལམ་ལ་གནས་པའི་ཕྱིར་མི་ལྡོག་པའི་མཚན་ཉིད་དག་ཡིན་ནོ། །ཞེས་པ་ལྟར་ན་འབྲས་བུའི་གཏན་ཚིགས་ཡིན་ནོ། །འོ་ན་དེ་དག་ཇི་ལྟར་ངེས་པར་བྱ་ཞེ་ན། གཏན་ཚིགས་བཞི་བཅུ་ཞེ་བཞི་པོ་རེ་རེའི་སྟེང་དུ་ཡང་རྗེས་ཐོབ་ལུས་ངག་གི་སྤྱོད་པའི་རྟགས་ལས་མཉམ་གཞག་གི་རྟོགས་པ་དཔོག་པའི་ཚེ་ན་འབྲས་བུའི་གཏན་ཚིགས་ཡིན་ཏེ། འབྲས་བུ་རྟགས་སུ་བཀོད་ནས་རྒྱུ་སྔོན་དུ་སོང་བར་བསྒྲུབ་པའི་ཕྱིར་རོ། །སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་གི་རྟགས་ལས་ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འབྱུང་རུང་དཔོག་པའི་ཚེ་རང་བཞིན་གྱི་གཏན་ཚིགས་ཡིན་ཏེ། རྒྱུ་ཚོགས་གྲངས་ཚང་རྟགས་སུ་བཀོད་ནས་འབྲས་བུ་འབྱུང་རུང་སྒྲུབ་པའི་ཕྱིར་རོ། །དེ་ལྟ་བུའི་བསྒྲུབ་བྱའི་ཆོས་རྟགས་སུ་བཀོད་པ་ལས་གནས་སྐབས་རྫོགས་པའི་བྱང་ཆུབ་ལས་ཕྱིར་མི་ལྡོག་པར་སྒྲུབ་པའི་ཚེ་མ་དམིགས་པའི་གཏན་ཚིགས་ཡིན་ཏེ། ཕན་ཚུན་སྤང་འགལ་ལ་བརྟེན་པའི་འགལ་ཟླ་དམིགས་པ་རྟགས་སུ་བཀོད་ནས་གནས་སྐབས་རྫོགས་བྱང་ལས་ཕྱིར་ལྡོག་པ་བཀག་པ་ཙམ་བསྒྲུབ་པའི་ཕྱིར་རོ། །འོ་ན་རྟགས་སྦྱོར་ཇི་ལྟར་སྙམ་ན། གཟུགས་སོགས་ལ་བདེན་ཞེན་མངོན་གྱུར་པ་ལྡོག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་སེམས་དཔའ་ཕ་རོལ་པོ་འདི་ཆོས་ཅན། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་སྔོན་དུ་སོང་སྟེ། དེ་ལྟ་བུའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་ཕྱིར། ཞེས་པ་ནི་འབྲས་རྟགས་སོ། །དེ་གྲུབ་ནས་གང་ཟག་དེ་ཆོས་ཅན། ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འབྱུང་དུ་རུང་སྟེ། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་གི་རྟོགས་པ་ཚང་བའི་ཕྱིར། ཞེས་པ་ནི་རང་བཞིན་གྱི་རྟགས་སོ། །དེ་གྲུབ་ནས་གང་ཟག་དེ་ཆོས་ཅན། གནས་སྐབས་བླ་མེད་རྫོགས་པའི་བྱང་ཆུབ་ལས་ཕྱིར་མི་ལྡོག་སྟེ། ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འབྱུང་དུ་རུང་བའི་ཕྱིར། ཞེས་པ་ནི་མ་དམིགས་པའི་གཏན་ཚིགས་སོ། །འོ་ན་དྲོད་དང་རྩེ་མོ་སོགས་ལ་གནས་པའི་སེམས་དཔའ་ཆོས་ཅན་དུ་འཛིན་མི་དགོས་སམ་སྙམ་ན། དྲོད་སོགས་ལ་གནས་པའི་རྟགས་སོ་སོར་བཤད་པ་ནི། རྗེས་ཐོབ་ཀྱི་གཏན་ཚིགས་འདི་དང་འདི་མཉམ་གཞག་གི་རྟོགས་པ་འདི་དང་འདིས་དྲངས་པ་ཡིན་ནོ། །ཞེས་ཤེས་པའི་ཆེད་དུ་ལམ་གསུམ་ལ་གཏན་ཚིགས་སོ་སོར་བཤད་པ་ཡིན་གྱི། གཏན་ཚིགས་འགོད་པའི་ཚེ་གཏན་ཚིགས་གང་ལ་ལྡན་པའི་སྐྱེས་བུ་ཕ་རོལ་པོ་ཆོས་ཅན་དུ་གཟུང་བར་བྱ་བ་ནི་རིགས་པའི་གཞུང་ལུགས་ཀྱི་སྲོལ་ལོ། །དཔེར་ན་གོང་བུ་རྭ་ཅན་དེ་དོན་ལ་བ་ལང་དང་གཡག་ལ་སོགས་པ་གང་ཡིན་ཀྱང་རུང་གོང་བུ་རྭ་ཅན་དེ་ཆོས་ཅན། རྟ་མ་ཡིན་ཏེ། རྭ་ཅན་ཡིན་པའི་ཕྱིར། ཞེས་བཀོད་པ་བཞིན་ནོ། །མདོ་དང་བསྟན་བཅོས་དང་འགྲེལ་པ་ཆེ་ཆུང་རྣམས་ཀྱི་དགོངས་པ་ནི། འདི་ཁོ་ན་ཡིན་པས་མི་ཤེས་པ་དག་གིས་ངོ་ཚ་བོར་ནས་ཅི་ཡང་མ་སྨྲ་ཤིག འདི་ནི་ཁོ་བོ་གཅིག་པུའི་སྤྱོད་ཡུལ་ཡིན་ནོ། །དོགས་པ་གསུམ་པའི་ལན་ནི། རྗེས་ཐོབ་ལུས་ངག་གི་སྤྱོད་པའི་རྟགས་ལས་མཉམ་གཞག་གི་རྟོགས་པ་དཔོག་པ་རྣམས་ནི་གཞན་ངོར་རྟགས་སུ་འགྱུར་བ་ཁོ་ན་སྟེ། རང་རྒྱུད་ལ་མཉམ་གཞག་མྱོང་བས་གྲུབ་པས་རྟགས་ཀྱིས་བསྒྲུབ་མི་དགོས་པའི་ཕྱིར་རོ། །གཏན་ཚིགས་ཕྱི་མ་གཉིས་ལ་རང་ངོར་རྟགས་སུ་འགྱུར་བ་དང་། གཞན་ངོར་རྟགས་སུ་འགྱུར་བ་གཉིས་གཉིས་ཡོད་དེ། རང་རྒྱུད་ལ་མཉམ་གཞག་སྐྱེས་ནས་རྗེས་ཐོབ་ཏུ་ཁྱབ་འབྲེལ་ངེས་པའི་ཚེ་རང་དོན་སྐབས་ཀྱི་རྟགས་ཡང་དག་ཏུ་འགྱུར་བའི་ཕྱིར་དང་། གཞན་ངོར་ནི་སྔར་གྱི་གཏན་ཚིགས་གསུམ་བརྒྱུད་བཀོད་པའི་རིགས་པས་ཤེས་པས་སོ། །དེ་ལྟར་སློབ་པ་ཕྱིར་མི་ལྡོག་པའི་ཚོགས་བཤད་ཟིན་ནས་དེའི་འོག་ཏུ་སྲིད་ཞི་མཉམ་ཉིད་ཀྱི་སྦྱོར་བ་སོགས་གསུམ་འཆད་པ་ལ་འཕགས་སེང་གཉིས་ཆར་གྱིས་ས་བདུན་པ་མན་ཆད་ཀྱི་བྱང་སེམས་ལ་སློབ་པའི་དགེ་འདུན་གྱི་ཐ་སྙད་མཛད་ནས་སྔར་གྱི་གཏན་ཚིགས་རྣམས་ས་བདུན་པ་མན་ཆད་ཀྱི་གཏན་ཚིགས་སུ་བཞེད་ཅིང་། དག་པ་ས་གསུམ་གྱི་བྱང་སེམས་ལ་མི་སློབ་པའི་དགེ་འདུན་གྱི་ཐ་སྙད་མཛད་ནས་སྦྱོར་བ་གསུམ་པོ་དེ་དག་གི་ཉམས་ལེན་དུ་བཞེད་དོ། །འོན་ཀྱང་སྒོམ་ལམ་པ་ཕྱིར་མི་ལྡོག་པའི་གཏན་ཚིགས་རྣམས་དེ་ནི་རྒྱུན་ཆགས་ཡིན་པའི་ཕྱིར། ཞེས་པའི་སྐབས་ཀྱི་སྒོམ་ལམ་དགུ་ཆར་ལ་ལྡན་པ་རྩ་བ་དང་། སློབ་དཔོན་གྱི་འགྲེལ་པ་གཉིས་ཀའི་དགོངས་པ་ཡིན་པས་ས་བདུན་པ་མན་ཆད་ཀྱི་བྱང་སེམས་ལ་སློབ་པ་ཕྱིར་མི་ལྡོག་པ་དང་། དག་པ་སའི་བྱང་སེམས་ལ་མི་སློབ་པའི་ཐ་སྙད་མཛད་པ་ཤིན་ཏུ་དཀའོ། །གཞན་དུ་ན་དག་པ་ས་ལ་གནས་པའི་བྱང་སེམས་ཆོས་ཅན། སློབ་པ་ཕྱིར་མི་ལྡོག་པའི་ཚོགས། །ཞེས་པའི་སྐབས་ཀྱི་སློབ་པ་ཕྱིར་མི་ལྡོག་པའི་དགེ་འདུན་ཡིན་པར་ཐལ། དེ་ནི་རྒྱུན་ཆགས་ཡིན་པའི་ཕྱིར། །ཞེས་པའི་སྐབས་སུ་འཆད་པར་འགྱུར་བའི་སྒོམ་ལམ་ལ་གནས་པའི་བྱང་སེམས་ཡིན་པའི་ཕྱིར། གསལ་བ་ནི་ས་བདུན་པ་མན་ཆད་ལ་སློབ་པ་དང་། ས་བརྒྱད་པ་ཡན་ཆད་ལ་དེའི་ཟླས་དྲངས་པའི་མི་སློབ་པའི་ཐ་སྙད་གསུངས་པ་ལ་གཟིགས་པ་ཞུ་ཞིང་། ཁྱབ་པ་ནི་མཐོང་བའི་ལམ་དང་སྒོམ་པའི་ལམ་འཆད་པར་འགྱུར་བ་ལ་དེ་དང་དེའི་རྟོགས་པའི་ཚུལ་གྱི་གནས་པ་དེ་དག་ནི། བྱང་ཆུབ་སེམས་དཔའ་སློབ་པ་ཕྱིར་མི་ལྡོག་པའི་ཚོགས་ཀྱི་དགེ་འདུན་ཡིན་ནོ། །ཞེས་གསུངས་པ་ལ་གཟིགས་ཤིག རྟགས་ནི་མུན་པ་ཤིན་ཏུ་ཆེན་པོ་ནི་སྣང་བ་ཆུང་ངུས་སེལ་ལ་ཆུང་ངུ་ནི་ཆེན་པོས་སེལ་ཏོ། །ཞེས་བྱ་བའི་དཔེས་ཞེས་སོགས་ཀྱི་ཐད་ལ་གཟིགས་ཤིག འོ་ན་ཕྱིར་མི་ལྡོག་པའི་གཏན་ཚིགས་ཀྱི་རྗེས་སུ་སྦྱོར་བ་གསུམ་འཆད་པའི་རྒྱུ་མཚན་ཅི་ཡིན་སྙམ་ན། སྦྱོར་མཐོང་སྒོམ་གསུམ་ལ་གནས་པའི་བྱང་སེམས་ཐམས་ཅད་ཀྱིས་ཕྱིར་མི་ལྡོག་པའི་གཏན་ཚིགས་ཐོབ་ན་དེ་དག་ཉམས་ལེན་གྱི་རིམ་པ་ལ་མི་ལྟོས་པར་འགྱུར་རོ་ཞེ་ན་སྤྱིར་ས་བཅུའི་རྗེས་ཐོབ་ཡོངས་སྦྱོང་གི་ཉམས་ལེན་ནི་སྐབས་དང་པོར་བསྟན་ཟིན། མཉམ་གཞག་སྒྲིབ་པ་སྤོང་བའི་ཉམས་ལེན་ནི་སྐབས་ལྔ་པར་འཆད་པར་འགྱུར་བས་འདི་དག་ས་ལ་གནས་པའི་བྱང་སེམས་ཀྱི་ཐུན་མོང་མ་ཡིན་པའི་ཉམས་ལེན་སྦྱོར་བ་གསུམ་སྟོན་པ་ལ་དང་པོ་སྲིད་ཞི་མཉམ་ཉིད་ཀྱི་སྦྱོར་བ་ལ་ཐུན་མོང་མ་ཡིན་པའི་ཉམས་ལེན་ཡིན་པའི་རྒྱུ་མཚན། རྒྱུ་མཚན་ཅན་གྱི་སྦྱོར་བའི་ངོ་བོ་ངོས་གཟུང་། དེ་ལ་ཀླན་ཀ་སྤོང་བ་དང་གསུམ་ལས། དང་པོ་ནི། སྲིད་ཞི་མཉམ་ཉིད་ཀྱི་སྦྱོར་བའི་དོན་རྗེས་ཐོབ་ཏུ་ཡང་འཁོར་འདས་ལ་བཟང་ངན་ཐ་དད་དུ་འཛིན་པའི་རྣམ་རྟོག་འབྱུང་མི་སྲིད་པ་ལ་འཇོག་དགོས་ཤིང་། ས་བདུན་པ་མན་ཆད་ཀྱི་རྗེས་ཐོབ་ཏུ་དེ་ལྟ་བུའི་རྣམ་རྟོགས་འབྱུང་སྲིད་པའི་ཕྱིར་ན་དག་སའི་ཐུན་མོང་མ་ཡིན་པའི་ཉམས་ལེན་དུ་གྲུབ་བོ། །གཉིས་པ་ནི། ཆོས་རྣམས་རྨི་ལམ་འདྲ་བའི་ཕྱིར། །ཞེས་སོགས་ཚིགས་རྐང་གཉིས་ཏེ། མདོ་ལས། ཤཱ་རིའི་བུས་རབ་འབྱོར་ལ་སྨྲས་པ། རྨི་ལམ་དུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་ལ་སྙོམས་པར་ཞུགས་ན་ཅི་ཤེར་ཕྱིན་རྣམ་པར་འཕེལ་ལམ། རབ་འབྱོར་གྱིས་སྨྲས་པ། ཉིན་པར་བསྒོམ་པས་འཕེལ་ན་རྨི་ལམ་དུ་སྒོམ་པས་ཀྱང་འཕེལ་ལོ། །ཅིའི་ཕྱིར་ན། རྨི་ལམ་དང་ཉིན་པར་ནི་རྣམ་པར་རྟོག་པ་མེད་པའོ། །ཞེས་སོ། །རྨི་ལམ་གྱིས་འཁོར་བ་བསྟན་ཏེ། མ་རིག་པའི་འཁྲུལ་སྣང་དང་བཅས་པ་ཡིན་པས་སོ། །ཉིན་པར་གྱིས་མྱང་འདས་བསྟན་ཏེ། མ་རིག་པའི་གཉིད་སད་པས་སོ། །རྟོག་པ་མེད་པས་ནི། དག་པ་སར་རྗེས་ཐོབ་ཏུ་ཡང་འཁོར་འདས་ཐ་དད་པར་འཛིན་པའི་རྟོག་པ་སྤངས་པར་བསྟན་ནས་ཤུགས་ལ་མཉམ་གཞག་བསྟན་ཏོ། །གསུམ་པ་ནི། ལས་མེད་ལ་སོགས་ཀླན་ཀ་ཡི། །ཞེས་སོགས་ཚིག་རྐང་གཉིས་ཏེ། ཉིར་སྣང་ལྟར་ན། ལས་མེད་པར་ཐལ་པའི་ཀླན་ཀའི་ལན་སོགས་ཀྱི་སྒྲས་བསྡུས་པ་དོན་དམ་དུ་འགལ་བའི་དང་། ཀུན་རྫོབ་ཏུ་མ་ངེས་པའི་དང་། ལུང་དང་འགལ་བའི་དང་། སྔ་ཕྱི་འགལ་བའི་ཀླན་ཀའི་ལན་དང་བཞི་ལས། དང་པོ་ལ་ཀླན་ཀ་ནི། འཁོར་འདས་ཀྱི་ཆོས་ཐམས་ཅད་རྨི་ལམ་དང་འདྲ་བར་གསུངས་པ་ལ་འཁྲིས་ནས་རྨི་ལམ་དང་འདྲ་ན་ཉིན་པར་གྱི་ལས་ལ་ཡང་ལས་སོགས་པ་མེད་པར་འགྱུར་རོ། །ཞེས་པ་སྟེ། མདོར། ཤཱ་རིའི་བུས་སྨྲས་པ། རབ་འབྱོར་བྱང་སེམས་ཆེན་པོས་རྨི་ལམ་དུ་ལས་གང་ཞིག་བྱས་པའི་ལས་དེ་སོག་པའམ་འབྲི་བར་འགྱུར་བ་ཡོད་དམ་ཞེས་དང་། དེའི་དོན་ཉིར་སྣང་དུ་དེ་ལ་ལས་མེད་པར་བརྩད་པ་ནི་འདི་ཡིན་ཏེ་རྨི་ལམ་དང་འདྲ་བའི་ཆོས་ཡིན་ན། རྨི་ལམ་དང་འདྲ་བར་སྦྱོར་བ་དངོས་གཞི་དང་མཇུག་གིས་བསྡུས་པའི་ལས་ཉམས་པ་དང་འཕེལ་བ་མེད་པར་ཐལ་བ་ཉིད་དུ་གང་གསུངས་པ་ཡིན་ནོ། །ཞེས་སོ། །གཉིས་པ་ལན་ལ་དོན་དམ་དུ་འདོད་པའི་ལན་ནི། མདོ་ལས། བཅོམ་ལྡན་འདས་ཀྱིས་ཆོས་ཐམས་ཅད་རྨི་ལམ་ལྟ་བུར་གསུངས་པ་དེ་ལྟར་ན་ལས་སོག་པའམ་ཉེ་བར་སོག་པར་མི་འགྱུར་རོ། །དེ་ཅིའི་ཕྱིར་ཞེ་ན། རྨི་ལམ་གྱི་ཆོས་གང་ལ་ཡང་སོག་པའམ་འབྲི་བར་འགྱུར་བ་མི་དམིགས་པའི་ཕྱིར་རོ། །ཞེས་སོ། །ཀུན་རྫོབ་ཏུ་ཁྱབ་པ་མ་ངེས་པའི་ལན་ནི། མདོ་ལས། འོན་ཏེ་སད་ནས་རྣམ་པར་རྟོག་ན་ནི་དེ་ལས་སོག་པའམ་འབྲི་བར་འགྱུར་རོ། །ཞེས་དང་། ཉིར་སྣང་དུ། འོན་ཏེ་སད་ཀྱང་ཡོངས་སུ་ཤེས་པ་ཕྱི་ནས་རྣམ་པར་རྟོག་པར་བྱེད་ཀྱི་རྣམ་པར་རྟོག་པར་མི་བྱེད་པ་ནི་མ་ཡིན་ནོ། །ཞེས་བྱ་བས་ལས་དང་འབྲས་བུར་འབྲེལ་བ་བརྡ་ལས་བྱུང་བ་ཉིད་དུ་ཉེ་བར་བཀོད་པས་གང་གསུངས་པ་ཡིན་ནོ། །ཞེས་གསུངས་ཏེ། དོན་ནི་རྨི་ལམ་དང་འདྲ་བ་ཉིད་ཡིན་ན། ཐ་སྙད་དུ་ལས་མེད་མི་དགོས་ཏེ། རྨི་ལམ་དུ་ལས་སོག་པར་རྨིས་ཏེ་རྗེས་ཀྱི་རྟོག་པས་གསོས་བཏབ་ན་ལས་སོག་པར་འགྱུར་བའི་ཕྱིར། ཞེས་པའོ། །གཉིས་པ་ལ་ཀླན་ཀ་ནི་རྗེས་ཀྱི་རྟོག་པས་གསོས་བཏབ་ན་ལས་སོག་བྱས་པ་ལ་འཁྲིས་ནས་རྨི་ལམ་གྱི་ལས་བདེན་པར་མེད་ཀྱང་རྗེས་ཀྱི་རྟོག་པས་གསོས་བཏབ་པས་ལས་སོག་ན་རྗེས་ཀྱི་རྟོག་པས་ལས་དོན་དམ་པའི་དངོས་པོའོ། །ཞེས་གསོས་བཏབ་ན་ཡང་ལས་དོན་དམ་པའི་དངོས་པོར་ཐལ་ལོ་ཞེ་ན་ཞེས་པ་སྟེ། མདོ་ལས། རབ་འབྱོར་གྱིས་སྨྲས་པ། ཤཱ་རིའི་བུ་འདི་སྐད་དུ་ཉིན་པར་སྲོག་བཅད་པ་དང་། རྨི་ལམ་གྱི་ནང་དུ་སྲོག་བཅད་པ་དེ་ལ་འདི་སྙམ་དུ་དེ་བདག་གིས་བསད་དོ། །དེ་བདག་གིས་བསད་པས་ལེགས་སོ། །ཞེས་དེ་རྣམ་པར་རྟོག་པ་ན་ཚེ་དང་ལྡན་པ་ཤཱ་རིའི་བུ་ལས་དེ་ལ་ཁྱོད་ཇི་སྐད་སྨྲ་ཞེས་དང་། དེའི་དོན་ཉིར་སྣང་དུ། ཉིན་པར་སྲོག་གཅོད་པར་བྱས་པ་གང་ཡིན་པ་དང་། རྨི་ལམ་གྱི་ནང་དུ་སྲོག་བཅད་པ་ཞེས་བྱ་བ་ནི་རབ་ཏུ་གྲགས་པའི་མཚན་མོ་དང་ཉིན་མོ་ཉིད་མངོན་པར་བརྗོད་དོ། །ནང་ན་སྨོས་པས་ནི་འཁོར་བའི་རྨི་ལམ་ལས་ཁྱད་པར་དུ་བྱས་པའི་དོན་དུའོ། །ཚེ་དང་ལྡན་པ་ཤཱ་རིའི་བུ་ལས་དེ་ལ་ཁྱོད་ཇི་སྐད་སྨྲ། ཞེས་བྱ་བ་ནི་ཡང་དག་པ་དང་ཡང་དག་པ་མ་ཡིན་པའི་རང་བཞིན་གྱིས་ཡོངས་སུ་དྲིས་པས་གཉེན་པོ་དང་འགལ་བ་ཡིན་ཡང་། རྣམ་པར་རྟོག་པ་རྗེས་སུ་འཇུག་པར་ཐལ་བས་དེ་དོན་དམ་པ་ཉིད་དུ་ཡང་དག་པར་སྟོན་པའི་དོན་གྱིས་དེ་ལྟར་བཅད་པ་ཡིན་ནོ། །ཞེས་སོ། །གཉིས་པ་ལན་ནི་མདོ་ལས། རབ་འབྱོར་གྱིས་ཤཱ་རིའི་བུ་ལ་དམིགས་པ་མེད་པར་ལས་མི་སྐྱེད་དམིགས་པ་མེད་པར་སེམས་པ་མི་སྐྱེའོ། །དམིགས་པ་དང་བཅས་པ་ལས་ལས་དང་སེམས་པ་འབྱུང་སྟེ་དམིགས་པ་མེད་པར་མ་ཡིན་ནོ། །ཞེས་པ་ནས་རྣམ་པར་བྱང་བ་ཡོངས་སུ་འཛིན་ཏེ་ཞེས་དང་། ཉིར་སྣང་ལས། འདིའི་ལན་ནི་དམིགས་པ་དང་བཅས་པ་ལས་ལས་སྐྱེ་བར་ཁས་བླངས་པའི་ཕྱིར་དང་། དམིགས་པ་མེད་པར་ལས་སྐྱེ་བ་བཀག་པའི་ཕྱིར་ན། སླར་དེ་བརྡ་ལས་བྱུང་བ་ཉིད་དུ་གང་གསུངས་པ་ཡིན་ནོ། །ཞེས་གསུངས་ཏེ། དེ་དག་གི་དོན་ནི་རྗེས་ཀྱི་རྟོག་པས་གསོས་བཏབ་པས་ལས་སོག་ན་རྗེས་ཀྱི་རྟོག་པས་ལས་དོན་དམ་པའི་དངོས་པོ་ཞེས་གསོས་བཏབ་པས་ལས་དོན་དམ་པའི་དངོས་པོར་འགྱུར་དགོས་པ་དེ་མ་ཡིན་པར་ཐལ། ཐ་སྙད་དུ་ཟག་བཅས་ཀྱི་ལས་དང་སེམས་པ་རང་རྒྱུ་རྣམ་རྟོག་ལས་སྐྱེ་ཡི་དེ་མེད་པར་མི་སྐྱེ་བའི་ཕྱིར་ཞེས་པའོ། །གསུམ་པ་ལ་ཀླན་ཀ་ནི་རང་རྒྱུ་རྣམ་རྟོག་ལས་སེམས་སྐྱེ་བར་ཁས་བླང་པ་ལ་འཁྲིས་ནས་རང་རྒྱུ་རྣམ་རྟོག་ལས་སེམས་སྐྱེ་བ་མིན་པར་ཐལ། བཅོམ་ལྡན་འདས་ཀྱིས་ལས་དང་སེམས་པ་ཐམས་ཅད་ནི་དབེན་པར་གསུངས་པའི་ཕྱིར་ཞེ་ན། ཞེས་པ་སྟེ། མདོར། ཚེ་དང་ལྡན་པ་རབ་འབྱོར་ལས་དང་སེམས་པ་ཐམས་ཅད་དབེན་པའོ། །ཞེས་བཅོམ་ལྡན་འདས་ཀྱིས་གསུངས་ན་དེ་ཇི་ལྟར་དམིགས་པ་དང་བཅས་པར་ལས་དང་སེམས་པ་འབྱུང་སྟེ། དམིགས་པ་མེད་པར་མ་ཡིན་ཞེས་དང་། ཉིར་སྣང་དུ། སེམས་པ་ཐམས་ཅད་དབེན་པ་ཡིན་པའི་ཕྱིར་ན་དེའི་དམིགས་པའི་དངོས་པོ་མེད་པ་ཉིད་ཀྱིས་སོ་ཞེས་བྱ་བ་ནི་རྩོད་པ་ཡིན་ནོ། །ཞེས་སོ། །ལན་ནི་མདོར། ཚེ་དང་ལྡན་པ་ཤཱ་རིའི་བུ་མཚན་མར་བྱས་ན་དམིགས་པ་དང་བཅས་པར་ལས་དང་སེམས་པ་འབྱུང་སྟེ། དམིགས་པ་མེད་པར་མ་ཡིན་ནོ། །ཞེས་དང་། ཉིར་སྣང་དུ། སེམས་པ་ཐམས་ཅད་དབེན་པ་ཡིན་པའི་ཕྱིར་ན་དེའི་དམིགས་པའི་དངོས་པོ་མེད་པ་ཉིད་ཀྱིས་སོ་ཞེས་བྱ་བ་འདིའི་ལན་ནི། ཚེ་དང་ལྡན་པ་ཤཱ་རིའི་བུ་མཚན་མར་བྱས་ནས་ཞེས་གང་གསུངས་པ་ཡིན་ནོ། །ཞེས་གསུངས་སོ། །དེའི་དོན་ནི་བཅོམ་ལྡན་འདས་ཀྱིས་ལས་དང་སེམས་པ་ཐམས་ཅད་དབེན་པར་གསུངས་པ་དང་། རང་རྒྱུ་རྣམ་རྟོག་ལས། ལས་དང་སེམས་པ་ཐམས་ཅད་སྐྱེ་བར་བཤད་པ་མི་འགལ་ཏེ། སྔ་མ་ནི་དོན་དམ་པ་ལ་དགོངས་ལ། ཕྱི་མ་ནི་ཀུན་རྫོབ་ལ་དགོངས་པའི་ཕྱིར། ཞེས་པའོ། །བཞི་པ་ལ་ཀླན་ཀ་ནི་རང་རྒྱུ་རྣམ་རྟོག་ལས། ལས་དང་སེམས་པ་སྐྱེ་བར་ཁས་བླངས་པ་ལ་འཁྲིས་ནས། འོ་ན་བྱང་སེམས་ཀྱིས་རྨི་ལམ་དུ་སྦྱིན་སོགས་དྲུག་བསྒོམས་ཏེ། དགེ་བ་བླ་མེད་བྱང་ཆུབ་ཏུ་བསྔོས་ན་དེ་བྱང་ཆུབ་ཏུ་བསྔོས་པར་འགྱུར་རམ་མི་འགྱུར། འགྱུར་ན་ལས་དང་སེམས་པ་སྒྲོ་བཏགས་པའི་དངོས་པོར་ཁས་བླངས་པ་དང་འགལ། མི་འགྱུར་ན་དམིགས་པ་དང་བཅས་པ་ལས། སེམས་སྐྱེ་བར་ཁས་བླངས་པ་དང་འགལ་ལོ་ཞེ་ན། ཞེས་པ་སྟེ། མདོ་ལས། ཚེ་དང་ལྡན་པ་རབ་འབྱོར་བྱང་སེམས་ཆེན་པོས་རྨི་ལམ་དུ་སྦྱིན་པ་བྱིན་པ་ནས་ཤེས་རབ་ཀྱི་བར་བསྒོམ་སྟེ། དགེ་བའི་རྩ་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན་དེ་བྱང་ཆུབ་ཏུ་ཡང་དག་པར་ཡོངས་སུ་བསྔོས་པར་འགྱུར་རམ་ཞེ་ན། ཞེས་དང་། ཉི་ཁྲི་སྣང་བར། ཡོངས་སུ་བརྟགས་པའི་དམིགས་པའི་དངོས་པོ་ཁས་བླངས་པ་ན། རྨི་ལམ་གྱི་ནང་གི་སྦྱིན་པ་ལ་སོགས་པའི་དགེ་བའི་རྩ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ན་ཡང་དག་པའམ་ཡང་དག་པ་མ་ཡིན་པར་བསྔོས་པ་ཡིན་ཞེས་དྲིས་པས་བརྩད་པ་ཡིན་ནོ། །ཞེས་གསུངས་སོ། །ལན་ནི་མདོ་ལས། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ་བྱང་སེམས་ཆེན་པོ་བྱམས་པ་སྐྱེ་བ་གཅིག་གིས་ཐོགས་པའི་དགེ་བའི་རྩ་བ་ལ་ཕྱིར་མི་ལྡོག་པར་ལུང་བསྟན་པ་ཉིད་མངོན་དུ་གྱུར་ན་འདི་ལ་དྲིས་ཤིག་དང་འདིས་ལན་ལྡོན་པར་འགྱུར་རོ། །དེ་ནས་ཤཱ་རིའི་བུས་བྱང་སེམས་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བྱམས་པ་གནས་བརྟན་རབ་འབྱོར་འདི་སྐད་དུ་བྱང་སེམས་ཆེན་པོ་བྱམས་པས་དོན་འདིའི་ལན་ལྡོན་པར་འགྱུར་གྱིས་འདི་ལ་དྲིས་ཤིག་ཅེས་སྨྲ་ན། ཚེ་དང་ལྡན་པ་མ་ཕམ་པ་ལན་ཇི་ལྟ་བུ། དེ་ནས་བྱང་སེམས་ཆེན་པོ་བྱམས་པས་ཚེ་དང་ལྡན་པ་ཤཱ་རིའི་བུ་ལ་སྨྲས་པ། ཤཱ་རིའི་བུ་བྱང་ཆུབ་སེམས་དཔའ་བྱམས་པ་ཞེས་པའི་མིང་གིས་ལན་ལྡོན་ནམ། འོན་ཏེ་གཟུགས་ནས་རྣམ་པར་ཤེས་པས་ལན་ལྡོན་ནམ། འོན་ཏེ་ཁ་དོག་ལན་ལྡོན་ནམ། འོན་ཏེ་དབྱིབས་ལན་ལྡོན་ནམ། འོན་ཏེ་གཟུགས་ནས་རྣམ་པར་ཤེས་པའི་སྟོང་པ་ཉིད་ལན་ལྡོན་ནམ། ཞེས་པ་ནས་དེ་རྣམས་ལ་ནི་ལན་ལྡོན་པའི་མཐུ་མེད་དོ། །བདག་གིས་ནི་གང་ལན་ལྡོན་པ་དང་། གང་གིས་ལན་གླན་པ་དང་། གང་ལ་ལན་གླན་པའི་ཆོས་དེ་ལྟ་བུ་ཡང་དག་པར་རྗེས་སུ་མི་མཐོང་ངོ་། །ཞེས་སོགས་ནས་ཤཱ་རིའི་བུས་ཚེ་དང་ལྡན་པ་བྱམས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བྱམས་པ་ཆོས་དེ་དག་ཇི་སྐད་བཤད་པ་བཞིན་དུ་ཁྱོད་ཀྱིས་མངོན་སུམ་དུ་བྱས་སམ། བྱམས་པས་སྨྲས་པ། ཚེ་དང་ལྡན་པ་ཤཱ་རིའི་བུ་ཆོས་དེ་དག་ཇི་ལྟར་བཤད་པ་དེ་ལྟར་ཁོ་བོས་མངོན་སུམ་དུ་མ་བྱས་མོད། ཚེ་དང་ལྡན་པ་ཤཱ་རིའི་བུ་ཇི་ལྟར་ཚིག་གིས་བརྗོད་པ་དང་། སེམས་ཀྱིས་སེམས་པའི་ཆོས་དེ་དག་ཀྱང་ཁོ་བོས་མི་ཤེས་མི་དམིགས་ཡང་དག་པར་རྗེས་སུ་མ་མཐོང་ངོ་། །ཞེས་དང་། ཉིར་སྣང་དུ། འདིའི་ལན་ནི། འཕགས་པ་བྱམས་པ་འདི་ནི་ཐམས་ཅད་མཁྱེན་པ་ཉིད་གསུམ་གྱི་མངོན་པར་རྟོགས་པ་མངོན་སུམ་དུ་བྱས་པ་ཡིན་པའི་ཕྱིར། སྐྱེ་བ་གཅིག་གིས་ཐོགས་པ་འདི་ཉིད་ཀྱིས་དྲི་བ་འདིའི་ལན་ལྡོན་པ་ལ་དབང་དུ་གྱུར་པ་ཡིན་ནོ། །ཞེས་གང་གསུངས་པ་ཡིན་ནོ། །དོན་ཅི་ཡིན་ཞེ་ན། དྲི་བ་དེའི་དབང་དུ་བྱས་པ་ཉིད་ཀྱིས་མ་འོངས་པའི་སངས་རྒྱས་བརྒྱུད་མར་འབྱུང་བ་དེས་ན། དྲི་བ་འདིའི་ལན་ཡོངས་སུ་མ་རྫོགས་པ་བསྟན་པ་ཡིན་ཏེ། དེ་ཡོངས་སུ་རྫོགས་པ་ཡིན་ན་ནི། མ་འོངས་པའི་སངས་རྒྱས་རྒྱུན་མར་འབྱུང་བ་དོན་མེད་པར་ཐལ་ལོ། ཞེས་བྱ་བ་ཡིན་ནོ། །ཇི་ལྟར་ན་ཡོངས་སུ་མ་རྫོགས་པར་བསྟན་པ་ཡིན་ནོ་ཞེ་ན། མིང་ནས་བརྩམས་ཏེ། ཆོས་ཐམས་ཅད་ལ་ལན་ལྡོན་པར་བྱེད་པའི་དངོས་པོ་དམིགས་སུ་མེད་པས་སོ། །དེ་ལྟ་ན་ཡང་འདི་དག་རང་ཉིད་ཀྱིས་མངོན་སུམ་དུ་མ་བྱས་པར་སྨྲས་པ་ཡིན་ནོ། །དེ་མངོན་སུམ་དུ་མ་བྱས་པར་དམ་བཅས་པ་ནི། མངོན་དུ་མ་བྱས་པའི་དོན་ལ་དྲི་བ་དེའི་ལན་བཏབ་པ་ཡོངས་སུ་རྫོགས་པའི་ཉེས་པ་སྤོང་བའི་དོན་དུ་ཡིན་ཏེ། མ་འོངས་པའི་སངས་རྒྱས་ཀྱི་ཚུལ་ཡང་དག་པར་ཆད་པ་མེད་པར་འདོད་པའི་ཕྱིར་རོ། །ཞེས་གསུངས་སོ། །དེ་དག་གི་དོན་ནི་རབ་འབྱོར་གྱིས་ལན་དངོས་སུ་མ་སྨོས་པར་བྱམས་པ་ལ་ཁ་འཕངས་ནས་བྱམས་པས་ལན་ལྡོན་བྱ་ལྡོན་བྱེད་ཡང་དག་པར་རྗེས་སུ་མ་མཐོང་བར་གསུངས་པས་ནི་དོན་དམ་ལ་དགོངས་ནས་གང་ཡང་མ་དམིགས་པར་དངོས་སུ་བསྟན་པས་ཤུགས་ལ་རྗེས་ཀྱི་རྟོགས་པས་གསོས་བཏབ་ན་བསྔོ་བར་འགྱུར་བར་བསྟན་ཏོ། །བྱམས་པ་ལ་ཁ་འཕངས་པའི་དགོས་པ་ནི་བསྟན་པ་འདི་ལ་དེ་ལྟ་བུའི་དྲིས་ལན་མི་རྫོགས་པར་ཤེས་པའི་ཆེད་ཡིན་ཏེ། བསྟན་པ་འདི་ལ་དེ་ལྟ་བུའི་དྲིས་ལན་རྫོགས་ན་མ་འོངས་པའི་སངས་རྒྱས་བརྒྱུད་མར་འབྱུང་བ་དོན་མེད་པའི་ཕྱིར་རོ། །བྱམས་པ་རང་ཉིད་ཀྱིས་དེ་ལྟ་བུའི་དོན་མངོན་སུམ་དུ་མ་བྱས་པར་དམ་བཅས་པའི་རྒྱུ་མཚན་ནི་མངོན་སུམ་དུ་བྱས་ཞེས་སྨྲས་ན་དྲི་བ་དེའི་ལན་རྫོགས་པའི་ཉེས་པ་འབྱུང་བས་དེ་སྤོང་བའི་དོན་དུ་མངོན་སུམ་དུ་མ་བྱས་ཞེས་དམ་བཅས་པ་ཡིན་པའི་ཕྱིར་རོ། །དེའི་དགོས་པ་ཡང་མ་འོངས་པའི་སངས་རྒྱས་ཀྱི་ཕྲིན་ལས་རྒྱུན་མི་ཆད་པར་ཤེས་པའི་ཆེད་ཡིན་པའི་ཕྱིར་རོ། །འདི་དག་ནི་ཉི་ཁྲི་དང་། ཉི་ཁྲི་སྣང་བ་སྦྱར་བའི་དགོངས་པ་ཡིན་ལ། བརྒྱད་སྟོང་པ་དང་། འགྲེལ་ཆེན་སྦྱར་བའི་དགོངས་པ་ནི་མངས་ཀྱིས་དོགས་པས་རེ་ཞིག་མ་སྤྲོས་སོ། །གཉིས་པ་ཞིང་དག་པའི་སྦྱོར་བ་དག་སའི་ཐུན་མོང་མ་ཡིན་པའི་ཉམས་ལེན་དུ་སྟོན་པ་ནི། སེམས་ཅན་འཇིག་རྟེན་དེ་བཞིན་དུ། །ཞེས་སོགས་ཚིགས་བཅད་གཅིག་སྟེ། ཐུན་མོང་མ་ཡིན་པའི་རྒྱུ་མཚན་སྟོན་པ་ནི་ས་བདུན་པ་མན་ཆད་དུ་ཞིང་སྦྱོང་བར་གསུངས་པ་ནི། མ་འོངས་པ་ན་རང་ཉིད་འཚང་རྒྱ་བའི་ཞིང་དེ་ན་སྣོད་བཅུད་ཀྱི་སྐྱོན་མེད་པར་བྱའོ་སྙམ་པའི་སེམས་བསྐྱེད་པ་ཙམ་ཡིན་ཞིང་འདིར་ནི་རང་ཉིད་འཚང་རྒྱ་བའི་སྣོད་བཅུད་ཀྱི་ཞིང་དེའི་རྒྱུ་དགེ་རྩ་དངོས་སུ་བསྒྲུབ་པ་ཡིན་པས་དེ་ནི་དག་སའི་ཁྱད་ཆོས་ཡིན་པའི་ཕྱིར་རོ། །ས་གསུམ་པའི་ཡོངས་སྦྱོང་གིས་སྐབས་སུ་སྣོད་བཅུད་སོ་སོར་མ་ཕྱེ་བར་སངས་རྒྱས་ཞིང་ཀུན་སྦྱོང་བ་དང་། ཞེས་དང་། ས་བརྒྱད་པའི་ཡོངས་སྦྱོང་གི་སྐབས་སུ། རྒྱལ་བ་ཡི། ཞིང་སྦྱོང་ཞེས་དང་། སངས་རྒྱས་ཞིང་བཟང་བསྒྲུབ། ཞེས་སོ་སོར་ཕྱེ་བ་དང་། འདིར་ཡང་། སེམས་ཅན་འཇིག་རྟེན་དེ་བཞིན་དུ། །སྣོད་ཀྱི་འཇིག་རྟེན་མ་དག་པ། །ཞེས་སོ་སོར་ཕྱེ་བ་དང་། ས་བརྒྱད་པའི་ཡོངས་སྦྱོང་དང་། སྐབས་འདི་གཉིས་ཆར་དུ་སྒྲུབ་ཅེས་པའི་ཚིག་གི་ཁྱད་པར་འབྱུང་བའི་གནད་ཀྱང་འདི་ཉིད་ཡིན་པར་ཤེས་པར་བྱའོ། །གསུམ་པ་ཐབས་མཁས་སྦྱོར་བ་དག་པ་སའི་ཐུན་མོང་མ་ཡིན་པའི་ཉམས་ལེན་དུ་སྟོན་པ་ནི། ཡུལ་དང་སྦྱོར་བ་ཅན་འདི་ནི། །ཞེས་སོགས་ཚིགས་བཅད་གཉིས་ཏེ། ཐུན་མོང་མ་ཡིན་པའི་ཉམས་ལེན་ཡིན་པའི་རྒྱུ་མཚན་ནི་མངོན་དུ་བྱ་རྒྱུའི་ཡུལ་ཐབས་མཁས་བཅུ་པོ་དེ་སངས་རྒྱས་ཀྱི་ཡེ་ཤེས་ཡིན་ལ། དེ་མངོན་དུ་བྱེད་པའི་དུས་དང་དུས་མ་ཡིན་པར་ཤེས་པའི་སྦྱོར་བ་ནི་ཐབས་མཁས་སྦྱོར་བར་འཇོག་ཅིང་། དེ་ནི་དག་པ་སའི་ཐུན་མོང་མ་ཡིན་པའི་ཉམས་ལེན་ཡིན་པའི་ཕྱིར་རོ། །དཔེར་ན་མཐོང་ལམ་མངོན་དུ་བྱ་བའི་དུས་དང་དུས་མ་ཡིན་པ་ཤེས་པ་ནི་སྦྱོར་ལམ་ཁོ་ནར་ཡོད་ཀྱི་དེ་མན་ཆད་ན་མེད་པ་བཞིན་ནོ། །འདི་ལ་ཉི་ཁྲི་སྣང་བར། ཡུལ་དང་ཞེས་པས་སྦྱོར་བའི་ཡུལ་བསྟན། སྦྱོར་བ་ཅན་འདི་ནི་ཞེས་པས་སྦྱོར་བའི་ངོ་བོ་བསྟན། དགྲ་རྣམས་ལས་ནི་འདས་པ་དང་། །ཞེས་པ་མན་ཆད་ཀྱིས་ཡུལ་གྱི་དབྱེ་བ་ཐབས་མཁས་བཅུ་བསྟན་ཞིང་། དེ་ལ་འཇུག་པ་ནི་ཐབས་ལ་མཁས་པའི་སྦྱོར་བར་བཞེད་དོ། །སློབ་དཔོན་གྱིས། དགྲ་རྣམས་ལས་ནི་འདས་པ་དང་། །ཞེས་པ་ནས་ཚད་མེད་པ་ཞེས་པའི་བར་བཅུ་ནི་ཡུལ་ཡིན་ལ། ཡུལ་རྣམ་པ་བཅུ་མངོན་སུམ་དུ་བྱ་བ་ལ་དུས་དང་དུས་མ་ཡིན་པ་ཤེས་པའི་སྦྱོར་བ་ནི་ཐབས་མཁས་ཉིད་དུ་བཞེད་དོ། །སྦས་དོན་ཟབ་མོའི་གཏེར་གྱི་ཁ་འབྱེད་ལས་སྐབས་བཞི་པའི་གཞུང་སོ་སོའི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། །།སྐབས་ལྔ་པའི་འབྲེལ་ལ་གཉིས་ཏེ། རྣམ་རྫོགས་སྦྱོར་བའི་འོག་ཏུ་རྩེ་སྦྱོར་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་རྩེ་སྦྱོར་དངོས་སོ། །དང་པོ་ལ་དོན་གྱི་འབྲེལ་དང་། ཚིག་གི་འབྲེལ་གཉིས་ལས། དང་པོ་ནི། བྱང་སེམས་ཚོགས་ལམ་པས་རྣམ་པ་བརྒྱ་བདུན་ཅུ་རྩ་གསུམ་རྫོགས་པར་བསྒོམས་པས་བསྒོམ་བྱའི་དོན་ལ་སྒོམ་བྱུང་གཙོ་བོར་གྱུར་པའི་ཉམས་སྐྱེས་པའི་ཚེ། རྩེ་སྦྱོར་དུ་འཇོག་པའི་ཕྱིར་ན་རྣམ་རྫོགས་སྦྱོར་བའི་འོག་ཏུ་རྩེ་སྦྱོར་འཆད་དོ། །གཉིས་པ་ནི། སློབ་པ་ཕྱིར་མི་ལྡོག་པའི་ཚོགས་ཞེས་པའི་སྐབས་སུ། སློབ་པ་ཕྱིར་མི་ལྡོག་པའི་གཏན་ཚིགས་དང་། དེའི་རྟགས་དང་། ཞེས་པའི་སྐབས་སུ་མི་སློབ་པ་ཕྱིར་མི་ལྡོག་པའི་གཏན་ཚིགས་བསྟན་པ་ན། རྣམ་རྫོགས་སྦྱོར་བ་སྒོམ་པ་ལས་རྩེ་སྦྱོར་ཐོབ་པའི་རྟགས་གང་ཡིན་ཞེ་ན། དེ་ནི་རྨི་ལམ་ན་ཡང་ཆོས་རྣམས་ཀུན། །ཞེས་སོགས་ཀྱིས་སྟོན་པས་རྣམ་རྫོགས་སྦྱོར་བའི་མཇུག་གི་གཞུང་གིས་རྩེ་སྦྱོར་གྱི་གཞུང་གི་ཐོག་མ་འདྲེན་པར་བྱེད་པ་སྟེ། དཔེར་ན། ལམ་གྱི་ཡུལ་ཅན་ངེས་འབྱུང་དང་། །ཞེས་པ་ལས་འཕྲོས་ནས་ཡུལ་ཅན་ལམ་ཤེས་ཀྱི་སྐྱེ་བར་རུང་བ་སོགས་ཡན་ལག་ལྔ་ནི་འོད་ཀྱིས་མོག་མོག་པོར་མཛད་དང་། ཞེས་སོགས་ཀྱིས་སྟོན་པ་དང་། ཁམས་གསུམ་པ་ཡི་རྣམ་པ་ཅན། །འཇལ་དང་གཞལ་བྱ་མཉམ་པ་ཉིད། །ཅེས་པ་ལས་འཕྲོས་ནས་ལམ་ཤེས་དེ་ཁམས་གསུམ་པའི་རྣམ་པ་ཅན་གྱི་ཤེས་པ་དང་། ཤེས་བྱ་མཉམ་པ་ཉིད་དུ་རྟོགས་པ་ཡིན་ན། རྟོགས་པ་དེ་ཙམ་དུ་ངེས་སམ་ཞེ་ན། དེར་མ་ཟད་འཁོར་འདས་བར་གསུམ་དང་དུས་གསུམ་མཉམ་པ་ཉིད་དུ་རྟོགས་པ་ཡིན་ནོ། །ཞེས་པ་ནི། ཚུ་རོལ་ཕ་རོལ་མཐའ་ལ་མིན། །ཞེས་སོགས་ཀྱིས་སྟོན་པ་དང་། དེ་ལྟར་འདི་དང་ཡང་འདི་དང་། །ཞེས་སོགས་ཀྱི་སྐབས་སུ་མཁྱེན་གསུམ་བསྡུ་བར་གསུངས་པ་དེ་བསྡུ་ཚུལ་གང་ཞེ་ན། བཞི་ཤེས་པ་ཡི་བྱེ་བྲག་རྣམས། །ཞེས་སོགས་ཀྱི་གཞུང་གིས་སྟོན་པ་བཞིན་ནོ། །གཉིས་པ་རྒྱུ་མཚན་ཅན་གྱི་རྩེ་སྦྱོར་དངོས་ལ་མཚོན་བྱེད་ཀྱི་ཆོས་རྣམ་པ་བརྒྱད་དེ། སྦྱོར་ལམ་རྩེ་སྦྱོར་བཞི། མཐོང་ལམ་རྩེ་སྦྱོར། སྒོམ་ལམ་རྩེ་སྦྱོར། བར་ཆད་མེད་པའི་རྩེ་སྦྱོར། བསལ་བྱ་ལོག་སྒྲུབ་རྣམས་སོ། །རྩེ་སྦྱོར་གྱི་གྲངས་ངེས་ལ་སྔ་རབས་པ་རྣམས་སྦྱོར་ལམ་རྩེ་སྦྱོར། མཐོང་ལམ་རྩེ་སྦྱོར། སྒོམ་ལམ་རྩེ་སྦྱོར། བར་ཆད་མེད་པའི་རྩེ་སྦྱོར་དང་བཞིར་གྲངས་ངེས་ཏེ། རྩེ་སྦྱོར་ནི་སྤང་བྱ་མི་མཐུན་ཕྱོགས་སྤོང་བའི་ལྡོག་པ་ནས་བསྟན་པ་ཡིན་ལ། སྤང་བྱ་དེ་ལ་མངོན་གྱུར་པ་དང་། ས་བོན་དང་། བག་ལ་ཉལ་གསུམ་ལས། དང་པོ་ནི། སྦྱོར་ལམ་རྩེ་སྦྱོར། གཉིས་པ་ནི་མཐོང་ལམ་རྩེ་སྦྱོར་དང་སྒོམ་ལམ་རྩེ་སྦྱོར། གསུམ་པ་ནི། བར་ཆད་མེད་པའི་རྩེ་སྦྱོར་གྱིས་སྤོང་བའི་ཕྱིར་ཞེས་བཞེད། དེ་མི་འཐད་དེ། མཐོང་ལམ་རྩེ་སྦྱོར་དང་། སྒོམ་ལམ་རྩེ་སྦྱོར། སྤང་བྱ་སྤོང་བའི་ལྡོག་པ་ནས་བསྟན་ཀྱང་། རྩེ་སྦྱོར་ཐོག་མཐའ་གཉིས། དེའི་སྒོ་ནས་མ་བསྟན་པའི་ཕྱིར་ཏེ། སྦྱོར་ལམ་རྩེ་སྦྱོར་ནི། རྟགས་དང་རྣམ་འཕེལ་སོགས་ཀྱི་སྒོ་ནས། བར་ཆད་མེད་པའི་རྩེ་སྦྱོར་ནི་བསོད་ནམས་མང་པོའི་ལྡོག་པ་ནས་བསྟན་པའི་ཕྱིར་དང་། སྦྱོར་ལམ་རྩེ་སྦྱོར་དེས་སྒོམ་སྤང་མངོན་གྱུར་པ་སྤོང་བ་མ་ཡིན་པའི་ཕྱིར་ཏེ། དེ་རྫོགས་པའི་རྗེས་སུ་ཡང་སྒོམ་སྤང་རྟོག་པ་མངོན་གྱུར་པ་འབྱུང་སྲིད་པའི་ཕྱིར། དེའི་ཕྱིར་སྐབས་དང་པོར་དངོས་སུ་བསྟན་པའི་གཟུང་འཛིན་གྱི་རྣམ་རྟོག་བཞི་ཡང་མཐོང་སྤང་ཡིན་ཏེ། དེར་གཟུང་རྟོག་དེ་ལ་དོར་བྱ་དང་། བླང་བྱར་འཛིན་པ་གཉིས་དང་། འཛིན་རྟོག་ལ་རྫས་འཛིན་རྟོག་པ་དང་། བརྟགས་འཛིན་རྟོག་པ་གཉིས་སུ་བཤད་ཅིང་། དེ་དག་འདིར་མཐོང་སྤང་དུ་བཤད་པའི་ཕྱིར་དང་། སྒོམ་ལམ་རྩེ་སྦྱོར་གྱི་སྤང་བྱ་ལས་ལོགས་སུ་གྱུར་པའི་བར་ཆད་མེད་པའི་རྩེ་སྦྱོར་གྱི་སྤང་བྱ་འདོད་པ་མི་འཐད་དེ། དེས་སྤང་བྱ་སྤོང་བའི་ལྡོག་པ་ནི་སྒོམ་ལམ་རྩེ་སྦྱོར་གྱི་སྐབས་སུ་བཤད་པ་ལ་དགོངས་ནས་རང་ཉིད་ཀྱི་སྐབས་སུ་བསོད་ནམས་མང་པོའི་ལྡོག་པ་ནས་བསྟན་པའི་ཕྱིར། དེས་ན་རང་ལུགས་ལ་སྤྱིར་རྩེ་སྦྱོར་ལ་སྦྱོར་ལམ་རྩེ་སྦྱོར་དང་། མཐོང་ལམ་རྩེ་སྦྱོར་དང་། སྒོམ་ལམ་རྩེ་སྦྱོར་གསུམ་དུ་གྲངས་ངེས་པ་ཡིན་ཏེ། རྩེ་སྦྱོར་གྱི་མ་མཐའི་ས་མཚམས་བྱང་སེམས་ཀྱི་སྦྱོར་ལམ་ནས་ཡ་མཐའ་རྒྱུན་མཐའི་བར་དུ་ཡོད་པའི་ཕྱིར། འོན་ཀྱང་འདིར་བར་ཆད་མེད་པའི་རྩེ་སྦྱོར་དང་བཞིར་ཕྱེ་བ་ལ་དགོས་པ་ཡོད་དེ། མཐོང་ལམ་དང་སྒོམ་ལམ་རྩེ་སྦྱོར་སྤང་བྱ་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་ཀྱི་གཉེན་པོར་བསྟན་པ་ན་བྱང་སེམས་དབང་རྟུལ་འགའ་ཞིག་སེམས་ཞུམ་པར་འགྱུར་བས་ཞུམ་པ་གཟེངས་བསྟོད་པའི་ཕྱིར་བར་ཆད་མེད་པའི་རྩེ་སྦྱོར་ཉིད་ཡོན་ཏན་གྱི་ལྡོག་པ་ནས་བསྟན་པའི་ཕྱིར་རོ། །དེ་ལྟར་བཞི་ལས་སྦྱོར་ལམ་རྩེ་སྦྱོར་རྟགས་སོགས་ཀྱི་སྒོ་ནས་བསྟན་པ་ནི། རྨི་ལམ་ན་ཡང་ཆོས་རྣམས་ཀུན། །ཞེས་སོགས་ཚིགས་བཅད་བཞི་སྟེ། རྩ་བར་རྟགས་དང་། རྣམ་འཕེལ་དང་། བརྟན་པ་དང་། སེམས་ཀུན་ཏུ་གནས་པ། ཞེས་པ་ཙམ་ལས་མ་གསུངས་ལ་འཕགས་སེང་གཉིས་ཀྱིས། མཐོང་ལམ་རྩེ་སྦྱོར་གྱི་སྔར་བཤད་པས་སྦྱོར་ལམ་དུ་གྲུབ་ཅིང་རྟགས་སོགས་བཞིར་ཕྱེ་བས་སྦྱོར་ལམ་བཞིའི་ངོ་བོ་ཡིན་པར་བཞེད་དེ། ཉིར་སྣང་དུ། རྟགས་ལ་སོགས་པ་དེ་དག་ནི་རིམ་པ་ཇི་ལྟ་བ་བཞིན་དྲོ་བ་ལ་སོགས་པ་ངེས་པར་འབྱེད་པའི་ཆ་དང་མཐུན་པ་བཞིའི་རང་བཞིན་གྱི་མཚན་ཉིད་ཅན་ཡིན་པར་ཤེས་པར་བྱའོ། །ཞེས་དང་། འགྲེལ་ཆུང་ལས་ཀྱང་། དེ་དང་འདྲ་བར་གསུངས་པའི་ཕྱིར་རོ། །དཀའ་འགྲེལ་དུ། རྩེ་སྦྱོར་ཐོབ་པའི་རྟགས་དང་། རྩེ་སྦྱོར་གྱི་བསོད་ནམས་རྣམ་པར་འཕེལ་བ་དང་། རྩེ་སྦྱོར་གྱི་བརྟན་པ་དང་། རྩེ་སྦྱོར་གྱི་སེམས་ཀུན་ཏུ་གནས་པ་ཞེས་པའི་དོན་ཡིན་པས། བཞི་ཀ་ཡང་བྱང་སེམས་ཀྱི་སྦྱོར་ལམ་དྲོད་ནས་ཐོབ་པ་ཡིན་གྱི་དྲོད་སོགས་བཞི་དང་། རིམ་པ་བཞིན་སྦྱོར་བ་རྩ་བའི་དགོངས་པ་མ་ཡིན་ནོ། །ཞེས་གསུངས་ཀྱང་། དེ་ཐོབ་བར་ཆད་མེད་པའི་རྒྱུ། །བསོད་ནམས་མང་པོའི་མཚན་ཉིད་དོ། །ཅེས་པ་དང་བསྟུན་ན། སེམས་ཀུན་གནས་མཐོང་ལམ་གྱི་དངོས་རྒྱུར་གྲུབ་སྟེ། བསོད་ནམས་མང་པོའི་མཚན་ཉིད་ཀྱིས། །ཏིང་འཛིན་ཡོངས་སུ་བསྒྲགས་པ་ཡིན། །ཞེས་གསུངས་པའི་ཕྱིར་རོ། །དེའི་ཤུགས་ཀྱིས་དང་པོ་གསུམ། སྦྱོར་ལམ་དང་པོ་གསུམ་དུ་སྦྱོར་བར་གྲུབ་པས་འཕགས་སེང་གཉིས་ཀྱི་བཞེད་པ་དེ་ཉིད་རྩ་བའི་དགོངས་པ་སྣང་ངོ་། །དེའི་འོག་ཏུ་མཐོང་ལམ་རྩེ་སྦྱོར་ནི་ལུས་རྣམ་བཞག་ཏུ། མཐོང་ཞེས་བྱ་དང་སྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དང་ནི། །ཞེས་མཐོང་སྤང་གཟུང་འཛིན་གྱི་རྣམ་པར་རྟོག་པ་བཞིའི་གཉེན་པོའི་ལྡོག་པ་ནས་བསྟན་པས། འདིར་དེ་གཏན་ལ་དབབ་པ་ལ་སྤང་བྱ་གཟུང་འཛིན་གྱི་རྣམ་རྟོག་ངོས་གཟུང་བ་དང་། གཉེན་པོ་མཐོང་ལམ་རྩེ་སྦྱོར་ངོས་གཟུང་བ་གཉིས་ལས། དང་པོ་ལ་གཟུང་རྟོག་དང་། འཛིན་རྟོག་གཉིས། དང་པོ་ལ་འཇུག་པ་གཟུང་རྟོག་དང་། ལྡོག་པ་གཟུང་རྟོག་གཉིས་ཀྱི་ངོ་བོ་ཡུལ་གྱི་སྒོ་ནས་དགུར་ཕྱེ་བ་དང་བཅས་པ་མདོར་བསྟན་པ་ནི། འཇུག་པ་དང་ནི་ལྡོག་པ་ལ། །ཞེས་སོགས་ཚིགས་བཅད་གཅིག་གོ །འབུམ་ཕྲག་གསུམ་པས། འདི་གཉིས་སྐབས་དང་པོར་བསྟན་པའི་རྣམ་བྱང་གཟུང་རྟོག་ཏུ་བཞེད་དེ། དེ་གཉིས་ཀྱི་ཡུལ་བྱང་སེམས་ཀྱི་ལམ་འབྲས་བུ་དང་བཅས་པ་དང་། ཐེག་དམན་གྱི་ལམ་འབྲས་བུ་དང་བཅས་པ་དེ་རྣམ་བྱང་གི་ཆོས་ཡིན་པའི་ཕྱིར་སྙམ་དུ་དགོངས་སོ། །དེ་ནི་མི་འཐད་དེ། སྐབས་དང་པོར་བསྟན་པའི་རྣམ་བྱང་གཟུང་རྟོག་ནི་རང་ཡུལ་ལ་བླང་བྱར་མངོན་པར་ཞེན་པའི་བློ་ཡིན་ལ་ལྡོག་པ་གཟུང་རྟོག་ནི་རང་ཡུལ་ལ་ལྡོག་བྱར་མངོན་པར་ཞེན་པའི་བློ་ཡིན་པའི་ཕྱིར་རོ། །གནད་ཀྱི་དོན་ནི་འདི་ཡིན་ཏེ། སྐབས་དང་པོར་གཟུང་རྟོག་ལ་གཞིའི་རྟེན་ཅན་དང་། དེའི་གཉེན་པོའི་རྟེན་ཅན་གྱི་ཐ་སྙད་དངོས་སུ་གསུངས་ཤིང་གཞིའི་རྟེན་ཅན་གྱི་གཟུང་རྟོག་གི་དོན་ཡང་རང་ཡུལ་དེ་མ་རིག་པ་སོགས་ཀུན་ནས་ཉོན་མོངས་ཀྱི་ཆོས་དང་། ཐེག་དམན་གྱི་ལམ་ལ་སོགས་པ་རྣམ་བྱང་གི་ཆོས་ཡིན་ཀྱང་རུང་སྟེ། དེ་ལ་དམིགས་ནས་དོར་བྱའི་གཟུང་བར་མངོན་པར་ཞེན་པ་ཡིན་ལ། དེ་ལ་རང་རྒྱལ་ལམ་གྱི་སྤང་བྱའི་རིགས་སུ་གནས་པའི་གཞིའི་རྟེན་ཅན་དང་། བྱང་སེམས་ལམ་གྱི་སྤང་བྱའི་རིགས་སུ་གནས་པའི་གཞིའི་རྟེན་ཅན་གྱི་གཟུང་རྟོག་གཉིས་ལས། དང་པོ་ནི། མ་རིག་པ་སོགས་ཀུན་ནས་ཉོན་མོངས་པའི་ཆོས་ལ་དམིགས་ནས་དོར་བྱའི་གཟུང་བར་མངོན་པར་ཞེན་པ་འདི་ཡིན་ཏེ། ལམ་གསུམ་པའི་སྐབས་སུ་ཀུན་ནས་ཉོན་མོངས་པ་མེད་པ་དང་། ཞེས་ཀུན་ནས་ཉོན་མོངས་པའི་གཟུང་བ་རང་བཞིན་མེད་པར་རྟོགས་པའི་བློ་རང་རྒྱལ་ལམ་གྱི་རྟོགས་རིགས་སུ་བཤད་པའི་ཕྱིར། གཉིས་པ་ནི། ཐེག་དམན་གྱི་ལམ་འབྲས་བུ་དང་བཅས་པ་བཟློག་བྱར་མངོན་པར་ཞེན་པ་འདི་ཡིན་ཏེ། ཉན་ཐོས་དང་རང་རྒྱལ་གྱིས་དེ་ལྟར་ཞེན་པ་མེད། བྱང་སེམས་ཀྱིས་དེ་ལྟར་དུ་ཞེན་པ་ཡོད་པའི་ཕྱིར། དེ་ལྟར་གཉིས་ལས་ཕྱི་མ་ནི་འདིར་བསྟན་ལྡོག་པ་གཟུང་རྟོག་གིས་སྟོན་པ་ཡིན་ནོ། །གཉིས་པ་དེའི་གཉེན་པོའི་རྟེན་ཅན་གྱི་རྟོག་པའི་དོན་ནི། རྣམ་བྱང་གི་ཆོས་ལ་བླང་བྱའི་གཟུང་བར་མངོན་པར་ཞེན་པ་ཡིན་ལ། དེ་ལ་ཐེག་དམན་གྱི་རྣམ་བྱང་གི་ཆོས་ལ་དེར་ཞེན་པ་དང་། ཐེག་ཆེན་གྱི་རྣམ་བྱང་གི་ཆོས་ལ་དེར་ཞེན་པ་གཉིས་ལས། སྔ་མ་ནི་རང་རྒྱལ་ལམ་གྱི་སྤང་བྱའི་རིགས་སུ་གནས་པའི་གཟུང་རྟོག་ཡིན་ཏེ། ལམ་གསུམ་པའི་རྣམ་པའི་སྐབས་སུ་རྣམ་པར་བྱང་བ་མེད་པ་དང་། ཞེས་དང་། དེའི་སྤང་བྱར་རྣམ་བྱང་གི་གཟུང་བར་རྟོག་པ་གཟུང་བའི་ཕྱིར། གཉིས་པ་ནི། བྱང་སེམས་ལམ་གྱི་སྤང་བྱའི་རིགས་སུ་གནས་པའི་གཟུང་རྟོག་ཡིན་ཏེ། དེ་བྱང་སེམས་ཀྱི་རྒྱུད་ལ་ཡོད། ཐེག་དམན་གྱི་རྒྱུད་ལ་མེད་པའི་ཕྱིར། དེ་ལྟར་གཉིས་ལས་སྐབས་དང་པོར་དེ་གཉིས་སོ་སོར་མ་ཕྱེ་བར་དེའི་གཉེན་པོའི་རྟེན་ཅན་ཞེས་དེ་གཉིས་ཀྱི་སྤྱི་འཛིན་པར་བྱེད་ལ་ཕྱི་མ་དེ་ཉིད་སྐབས་འདིར་འཇུག་པ་གཟུང་རྟོག་ཏུ་བསྟན་ཏོ། །འཇུག་པ་གཟུང་རྟོག་ལ་ཡུལ་གྱི་སྒོ་ནས་དགུར་ཕྱེ་བ་ནི། ངོ་བོ་ཉིད་དང་རིགས་དང་ནི། །ཞེས་སོགས་ཚིགས་བཅད་གཉིས། ལྡོག་པ་གཟུང་རྟོག་ལ་ཡུལ་གྱི་སྒོ་ནས་དགུར་ཕྱེ་བ་ནི། སྲིད་དང་ཞི་བར་ལྟུང་བའི་ཕྱིར། །ཞེས་སོགས་ཚིགས་བཅད་གསུམ་མོ། །འཛིན་རྟོག་ལ་གཉིས་ལས། རྫས་འཛིན་རྟོག་པ་ནི་བདེན་འཛིན་ཡིན་ལ། དེ་ལ་གང་ཟག་གི་དབང་དུ་བྱས་པའི་རྫས་འཛིན་རྟོག་པ་དང་། ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་གཉིས་ལས། སྔ་མ་ཉན་ཐོས་ཀྱི་དང་། ཕྱི་མ་ཐེག་ཆེན་གྱི་སྤང་བྱའི་རིགས་ཡིན་པ་སྔར་བཤད་ཟིན་ཅིང་། སྐབས་དང་པོར་དེ་གཉིས་སོ་སོར་མ་ཕྱེ་བར་རྫས་ཀྱི་རྟེན་ཅན་ཞེས་གསུངས་ལ། སྐབས་འདིར་ནི་མདོར་བསྟན་དུ་སྔ་མ་དངོས་སུ་བསྟན་ཏེ། སེམས་ཅན་རྫས་ཡོད་པ། རྣམ་རྟོག་འཛིན་པ་དག་ཏུ་འདོད། །ཅེས་གསུངས་པའི་ཕྱིར་རོ། །རྒྱས་བཤད་དུ་ཕྱི་མ་དངོས་སུ་བསྟན་ཏེ། དེའི་ཡུལ་དེ་ལ་འཛིན་འདོར་སོགས་ཆོས་དགུར་ཕྱེ་ནས་གསུངས་པའི་ཕྱིར་རོ། །གཉིས་པ་བཏགས་འཛིན་རྟོག་པ་ནི་བྱང་སེམས་ཀྱི་ཐུན་མོང་མ་ཡིན་པའི་སྤང་བྱ་ཡིན་ཏེ། ཐེག་དམན་གྱིས་ཡུལ་ལ་བཏགས་པ་ཙམ་དུ་མངོན་པར་ཞེན་པའི་གློ་དེ་སྤོང་མི་ནུས་པའི་ཕྱིར་རོ། །དེ་ལ་ཡང་གང་ཟག་གི་དབང་དུ་བྱས་པའི་བཏགས་འཛིན་རྟོག་པ་དང་། ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་གཉིས་ལས། སྐབས་དང་པོར་དེ་གཉིས་སོ་སོར་མ་ཕྱེ་བར་བཏགས་པའི་རྟེན་ཅན་ཅེས་གསུངས་ལ། སྐབས་འདིར་མདོར་བསྟན་དུ་སྔ་མ་དངོས་སུ་བསྟན་པ་དང་། རྒྱས་བཤད་དུ་ཕྱི་མ་དངོས་སུ་བསྟན་པའི་ཚུལ་ནི་སྔར་དང་འདྲའོ། །དེ་ལྟར་འཛིན་རྟོག་གཉིས་ཀྱི་ངོ་བོ་དང་། དབྱེ་ན་དགུར་ཡོད་དོ། །ཅེས་མདོར་བསྡུས་ཏེ་སྟོན་པ་ནི། སོ་སོ་སྐྱེ་བོ་འཕགས་དབྱེ་བས། །ཞེས་སོགས་ཚིགས་བཅད་གཉིས་སོ། །རྫས་འཛིན་རྟོག་པ་ལ་ཡུལ་གྱི་སྒོ་ནས་དགུར་ཕྱེ་བ་ནི། འཛིན་པ་དང་ནི་འདོར་བ་དང་། །ཞེས་སོགས་ཚིགས་བཅད་གཉིས་སོ། །བཏགས་འཛིན་རྟོག་པ་ལ་ཡུལ་གྱི་སྒོ་ནས་དགུར་དབྱེ་བ་ནི། ཆེད་བཞིན་ངེས་པར་མི་འབྱུང་དང་། །ཞེས་སོགས་ཚིགས་བཅད་གཉིས་སོ། །འདིར་མདོར་བསྟན་དུ་སོ་སོ་སྐྱེ་བོ་འཕགས་དབྱེ་བས། །ཞེས་འཛིན་རྟོག་གཉིས་པོ་སྐྱེ་འཕགས་གཉིས་ལ་སོ་སོར་བཤད་པའི་དོན་ལ། ཁ་ཅིག་སྒྲ་ཇི་བཞིན་དུ་རྫས་འཛིན་རྟོག་པ་དང་། བཏགས་འཛིན་རྟོག་པ་སྐྱེ་འཕགས་གཉིས་ལ་སོ་སོར་ངེས་པར་འདོད་པ་དང་། ཁ་ཅིག་གཞུང་དེས་རྣམ་པར་གསལ་བའི་མཚན་གཞི་ངོས་གཟུང་བ་ཙམ་ཡིན་གྱི་སྐྱེ་འཕགས་གཉིས་ལ་སོ་སོར་ངེས་པར་མ་བསྟན་པར་འདོད་པ་དང་། གཞན་དག་ཡུལ་རྫས་འཛིན་དང་བཏགས་འཛིན་གཉིས་སོ་སོར་ངེས་པར་བསྟན་གྱི་ཡུལ་ཅན་རྫས་འཛིན་རྟོག་པ་དང་། བརྟགས་འཛིན་རྟོག་པ་གཉིས་སོ་སོར་ངེས་པར་མ་བསྟན་པར་འདོད་པ་རྣམས་ནི་གཞུང་གི་དགོངས་པ་མ་ཡིན་པར་གཞན་དུ་བཤད་ཟིན་ཏོ། །འོ་ན་ཅི་ཞེ་ན་སོ་སོ་སྐྱེ་བོ་འཕགས་དབྱེ་བས། །སེམས་ཅན་རྫས་དང་བརྟགས་ཡོད་པར། །ཞེས་པའི་གཞུང་གིས་དངོས་སུ་བསྟན་པའི་རྫས་འཛིན་རྟོག་པ་སོ་སྐྱེ་ཁོ་ནའི་རྒྱུད་ལ་ཡོད་དེ། དེ་གང་ཟག་གི་དབང་དུ་བྱས་པའི་རྫས་འཛིན་རྟོག་པ་ཡིན་པ་གང་ཞིག འཕགས་རྒྱུད་ལ་དེ་མེད་པའི་ཕྱིར་རོ། །དངོས་བསྟན་གྱི་བཏགས་འཛིན་རྟོག་པ་འཕགས་པ་ཁོ་ནའི་རྒྱུད་ལ་ཡོད་དེ། དེ་གང་ཟག་གི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་ཡིན་པ་གང་ཞིག སོ་སོ་སྐྱེ་བོའི་རྒྱུད་ལ་གང་ཟག་གི་དབང་དུ་བྱས་པའི་དེ་ཁོ་ན་ཉིད་ཡིད་བྱེད་ཀྱི་བཏགས་འཛིན་རྟོག་པ་མེད་པའི་ཕྱིར་རོ། །དེ་ལྟར་ཡང་ཉིར་སྣང་ལས། ཆོས་ཐམས་ཅད་བདག་མེད་པ་ཡིན་ནོ། །ཞེས་ཆོས་དེ་ལྟ་བུ་རྣམས་སོ་སོའི་སྐྱེ་བོས་ཀྱང་རྟོགས་པ་མ་ཡིན་ནམ། དེས་ན་འཛིན་པའི་རྣམ་པར་རྟོག་པ་དང་པོའི་རྣམ་པར་བཞག་པས་ནི་མ་ཁྱབ་པར་འགྱུར་རོ་ཞེ་ན། དེ་དག་གི་དེ་ནི་མོས་པ་ཡིད་ལ་བྱེད་པ་ཡིན་ལ། འདིར་ནི་དེ་ཁོ་ན་ཉིད་ཡིད་ལ་བྱེད་པ་བརྗོད་པར་འདོད་པ་ཡིན་པས་སྙིང་པོ་མེད་དོ་ཞེས་དང་། འཕགས་པ་ལ་ཡང་འདི་ལྟ་བུ་ཡོད་པ་ཡིན་ཏེ། དགེ་སློང་དག་མཚན་མོ་འདས་ནས་ནངས་པར་གྱི་དུས་སུ་ངས་སྲོག་ཆགས་ལྕེ་སྤྱང་སྐད་འབྱིན་པའི་སྒྲ་ཐོས་སོ་ཞེས་བྱ་བ་དང་། དེ་བཞིན་དུ་ང་དེའི་ཚེ་དེའི་དུས་ན་རི་དྭགས་ཀྱི་རྒྱལ་པོ་སེང་གེ་ཡན་ལག་མ་སྨད་པ་ཞེས་བྱ་བར་གྱུར་ཏོ། །ཞེས་གསུངས་པ་མ་ཡིན་ནམ་དེས་ན་འཛིན་པའི་རྣམ་པར་རྟོག་པ་གཉིས་པའི་རྣམ་པར་བཞག་པས་མ་ཁྱབ་པར་འགྱུར་རོ་ཞེ་ན། དེའི་ཚིག་དེ་ནི་ཐ་སྙད་པ་ཡིན་གྱི་དོན་དམ་པ་ནི་མ་ཡིན་པ་དེས་ན་སྙིང་པོ་མེད་དོ། །ཞེས་གསུངས་སོ། །གཉིས་པ་གཉེན་པོ་མཐོང་ལམ་རྩེ་སྦྱོར་ངོས་གཟུང་བ་ལ། སློབ་དཔོན་གྱིས་མཐོང་ལམ་རྩེ་སྦྱོར་གྱི་རྒྱུ། དེའི་འབྲས་བུ་བྱང་ཆུབ་ཆེན་པོ། རྣལ་མ་མཐོང་ལམ་རྩེ་སྦྱོར་དང་གསུམ། དང་པོ་ནི། བྱང་ཆུབ་ལ་གཞན་སྟོན་པ་དང་། །ཞེས་སོགས་ཚིགས་བཅད་གཅིག་གིས་སྟོན། གཉིས་པ་ལ། དབུ་མ་པའི་ལུགས་ཀྱི་བྱང་ཆུབ་ཆེན་པོའི་འདོད་ཚུལ། དངོས་སྨྲ་བའི་ལུགས་ཀྱི་བྱང་ཆུབ་ཆེན་པོའི་འདོད་ཚུལ་དགག་པ། གྲོལ་བ་འདོད་པས་སྟོང་ཉིད་ལ་འཇུག་པར་གདམས་པ་དང་གསུམ་ལས། དང་པོ་ནི། དྲི་མ་ཟད་དང་མི་སྐྱེ་བའི། །ཞེས་སོགས་ཚིགས་བཅད་གཅིག་གིས་སྟོན། གཉིས་པ་ལ། དངོས་སྟོབས་རིགས་པས་དགག་པ་དང་། མཁས་བླང་འགལ་བས་དགག་པ་གཉིས། དང་པོ་ནི། འགོག་པ་མེད་པའི་རང་བཞིན་ལ། །ཞེས་སོགས་ཚིགས་བཅད་གཅིག་གིས་སྟོན། གཉིས་པ་ནི། གཞན་གྱི་ཆོས་རྣམས་ཀྱང་ཡོད་ལ། །ཞེས་སོགས་ཚིགས་བཅད་གཅིག་གིས་སྟོན། གསུམ་པ་ནི། འདི་ལ་བསལ་བྱ་ཅི་ཡོད་མེད། །ཅེས་སོགས་ཚིགས་བཅད་གཅིག་གིས་སྟོན། རྣལ་མ་མཐོང་ལམ་རྩེ་སྦྱོར་རང་གི་ངོ་བོ་ནི། སྦྱིན་པ་ལ་སོགས་རེ་རེ་ནི། །ཞེས་སོགས་ཚིགས་བཅད་གཅིག་གིས་བསྟན། དེའི་ཁྱད་པར་གྱི་ལམ་ནི། དེ་ནས་སེངྒེ་རྣམ་བསྒྱིངས་པའི། །ཞེས་སོགས་གྱིས་སྟོན། དྲི་མ་ཟད་དང་མི་སྐྱེ་བའི། །ཡེ་ཤེས་བྱང་ཆུབ་ཅེས་པའི་སྐབས་ཀྱི་བྱང་ཆུབ་དེ་སངས་རྒྱས་ཡིན་པར་བཞེད་དེ། འདིར་བྱང་ཆུབ་ཅེས་པའི་ཚིག་དངོས་སུ་གསུངས་པ་དང་། རྒྱུད་བླའི་བྱང་ཆུབ་ཀྱི་ལེའུའི་སྐབས་སུ་བྱང་ཆུབ་དེ་སངས་རྒྱས་སུ་བཤད་ཅིང་། དེ་ལ་དབྱེ་ན། སྐུ་གསུམ་དུ་དབྱེ་བ་མཛད་པ་དེ་དང་། དགོངས་པ་གཅིག་ཏུ་མཛད་པའི་ཕྱིར་རོ། །རྩ་བའི་དགོངས་པ་ནི་མཐོང་ལམ་གྱི་རྒྱུ། གཉེན་པོས་སྤང་བྱ་སྤོང་བའི་ཚུལ། གཉེན་པོ་མཐོང་ལམ་རྩེ་སྦྱོར་དངོས་དང་གསུམ་ལས། དང་པོ་ནི། བྱང་ཆུབ་ལ་གཞན། ཞེས་སོགས་ཚིགས་བཅད་གཅིག་གིས་སྟོན། དེ་ཡང་སྤྱིར་མཐོང་ལམ་གྱི་རྒྱུ་དང་། སྒོམ་ལམ་གྱི་རྒྱུ་གཉིས་ལས། ཕྱི་མ་ནི་སྐབས་གཉིས་པར་བསྟན་ཟིན་ལ། འདིར་སྔ་མ་དེ་ཉིད་སྟོན་པ་ཡིན་པས། དེའི་བརྒྱུད་རྒྱུ་དང་དེའི་དངོས་རྒྱུ་གཉིས་ལས་སྔ་མ་ལ་ལྷན་ཅིག་བྱེད་རྐྱེན་དང་། ཉེར་ལེན་གྱི་རྒྱུ་གཉིས་ལས། སྔ་མ་ནི་ཚིག་རྐང་དང་པོས་སྟོན། ཕྱི་མ་ནི་ཚིག་རྐང་གཉིས་པས་སྟོན། གཉིས་པ་ནི། ཚིག་རྐང་ཕྱི་མ་གཉིས་ཀྱིས་སྟོན་ཏེ། བསོད་ནམས་མང་པོ་དེ་ཡང་། བསོད་ནམས་མང་པོ་ཉིད་ཀྱི་ནི། །ཞེས་པ་ལ་དགོངས་པར་སྣང་བའི་ཕྱིར་རོ། །གཉིས་པ་ལ། དབུ་མ་པའི་ལུགས་ཀྱི་དྲི་མ་སྤོང་ཚུལ་འཐད་པ་དངོས་སྨྲ་བའི་ལུགས་ཀྱི་དྲི་མ་སྤོང་ཚུལ་མི་འཐད་པ། ཤེས་བྱེད་ཀྱི་ལུང་དང་སྦྱར་བ་དང་གསུམ་ལས། དང་པོ་ནི། མཐོང་ལམ་རྩེ་སྦྱོར་དེས་སྔར་བཤད་པའི་སྤང་བྱ་རྣམ་རྟོག་སུམ་ཅུ་རྩ་དྲུག་སྤོང་བ་ཡིན་ན། གཉེན་པོས་སྤང་བྱ་སྤོང་བའི་ཚུལ་ཇི་ལྟ་བུ་ཞེ་ན། སྤྱིར་གཉེན་པོས་སྤང་བྱ་སྤང་ཚུལ་ནི། སྤང་བྱའི་དྲི་མ་གདོད་མ་ནས་ཟད་པ་ལ་ཟད་པ་དང་། མི་སྐྱེ་བ་ལ་མི་སྐྱེ་བར་རྟོགས་པས་སྤོང་བ་ཡིན་གྱི་སྔར་ཡོད་གཉེན་པོས་གསར་དུ་ཟད་པ་དང་སྔར་ཡོད་སྐྱེ་འཕྲོ་ཆོད་པའི་ཚུལ་གྱིས་སྤོང་བ་མ་ཡིན་ནོ། །ཞེས་པ་ནི། དྲི་མ་ཞེས་སོགས་ཚིག་རྐང་གཉིས་ཀྱི་སྟོན། དེའི་སྒྲུབ་བྱེད་སྔར་ཡོད་གཉེན་པོས་གསར་དུ་ཟད་པ་མེད་པ་དང་། སྔར་མེད་གསར་དུ་སྐྱེ་བ་མེད་པའི་ཕྱིར་ཞེས་པ་ནི། ཟད་མེད་ཅེས་སོགས་ཚིག་རྐང་གཉིས་ཀྱིས་སྟོན། རྒྱུ་མཚན་དེས་ན་མཐོང་ལམ་རྩེ་སྦྱོར་དེས་ཀྱང་མཐོང་སྤང་གི་རྣམ་རྟོག་གིས་རིགས་སྔར་ཡོད་གསར་དུ་ཟད་པ་མེད་པ་དང་། སྐྱེ་མེད་ཀྱི་རྣམ་པ་འགོག་བདེན་གསར་དུ་ཐོབ་པ་མེད་པ་ཡིན་ཏེ། མཐོང་སྤང་གི་དྲི་མའི་རིགས་རྣམས་གདོད་མ་ནས་འགོག་པའི་རང་བཞིན་ཡིན་པའི་ཕྱིར། ཞེས་པ་ནི། འགོག་པ་མེད་པའི་རང་བཞིན་ལ། །ཞེས་སོགས་ཚིགས་བཅད་གཅིག་གིས་སྟོན། གཉིས་པ་ནི། དེ་ལྟར་མིན་པར་དྲི་མ་བདེན་པར་ཡོད་པ་ཕྱིས་གཉེན་པོས་བཅོམ་པར་བྱས་པ་ཡིན་ན། སྟོན་པ་སངས་རྒྱས་ཀྱིས་ཤེས་སྒྲིབ་སྤངས་པ་དང་། ཤེས་སྒྲིབ་བདེན་པར་ཡོད་པ་ཁས་བླངས་ནང་འགལ་བ་ཡིན་ནོ། །ཞེས་པ་ནི། གཞན་གྱི་ཆོས་རྣམས་ཀྱང་ཡོད་ལ། །ཞེས་སོགས་ཚིགས་བཅད་གཅིག་གིས་སྟོན། གསུམ་པ་ནི། དྲི་མ་རྣམས་སྔར་ཡོད་གཉེན་པོས་བསལ་བར་བྱ་རྒྱུ་ཡང་མེད། གཉེན་པོས་དྲི་མ་སྤངས་པའི་འགོག་བདེན་སྔར་མེད་གསར་དུ་གཞག་ཏུ་ཡང་མེད་ཅེས་པ་ནི། འདི་ལ་བསལ་བྱ་ཅི་ཡང་མེད། །ཅེས་སོགས་ཚིགས་བཅད་གཅིག་གིས་བསྟན་ཏོ། །གསུམ་པ་གཉེན་པོ་མཐོང་ལམ་རྩེ་སྦྱོར་དངོས་ནི། སྦྱིན་པ་ལ་སོགས་རེ་རེ་ནི། །ཞེས་སོགས་ཚིགས་བཅད་གཅིག་གིས་སྟོན། དེའི་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། སྦྱོར་བ་སེང་གེ་རྣམ་བསྒྱིངས་གཉིས་ནི། དེ་ནས་སེང་གེ་རྣམ་བསྒྱིངས་པའི། །ཞེས་སོགས་ཚིག་རྐང་གཉིས་ཀྱིས་བསྟན། རྟེན་ཅིང་འབྲེལ་འབྱུང་ལུགས་མཐུན་དང་། །ཞེས་སོགས་ཚིག་རྐང་གཉིས་ཀྱིས་ས་དང་པོའི་རྗེས་ཐོབ་ཀྱིས་ཉམས་ལེན་མ་ལུས་པ་མཚོན་ནས་སྟོན། ཅི་ལྟར་བསྟན་ཞེ་ན། གོང་དུ་མཐོང་ལམ་ཐམས་ཅད་སྐད་ཅིག་མ་བཅུ་དྲུག་གི་སྒོ་ནས་བཤད་པ་ཡིན་ན། སྐད་ཅིག་མ་བཅུ་དྲུག་པོ་ཐམས་ཅད་མཐོང་ལམ་རྩེ་སྦྱོར་ཡིན་ནམ་ཞེ་ན། གོང་དུ་རྗེས་ཐོབ་ཏུ་ངེས་ཤེས་འདྲེན་པའི་མཉམ་བཞག་ཙམ་གྱི་ལྡོག་པ་ནས་བསྟན་པ་ཡིན་ལ། འདིར་མཐོང་ལམ་རྩེ་སྦྱོར་ནི། མཐོང་སྤང་མ་ལུས་པ་ཅིག་ཅར་དུ་སྤོང་བའི་བར་ཆད་མེད་ལམ་ཡིན་པས་སྔར་བཤད་པའི་ཤེས་བཟོད་སྐད་ཅིག་མ་བཅུ་དྲུག་གི་ནང་ནས་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་དེ་ཉིད་ཁོ་ན་མཐོང་ལམ་རྩེ་སྦྱོར་ཡིན་ནོ། །ཞེས་པ་ནི་ཚིག་རྐང་ཕྱི་མ་གཉིས་ཀྱིས་སྟོན། འོ་ན་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་དེ་སྟོང་ཉིད་སྤྲོས་བྲལ་ལ་མཉམ་པར་གཞག་པ་ཡིན་པས། ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ལ། དེ་ལྟར་ན་དེ་ལ་ཕར་ཕྱིན་གཞན་རྣམས་མ་ཚང་བར་འགྱུར་རོ་ཞེ་ན། སྔར་གོ་སྒྲུབ་ཀྱི་སྐབས་སུ། སྦྱིན་སོགས་ཕར་ཕྱིན་རེ་རེའི་ནང་དུ་ཡང་ཕར་ཕྱིན་གཞན་རྣམས་ཚང་བ་ཉམས་སུ་ལེན་པའི་ཉམས་ལེན་དེ་ཉིད་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཀྱི་གནས་སྐབས་སུ་མངོན་དུ་འགྱུར་བ་ཡིན་པས། བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཀྱི་ནང་དུ་ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་ཉམས་ལེན་དེ་ཚང་བ་ཡིན་ནོ། །ཞེས་པ་ནི་ཚིག་རྐང་དང་པོ་གཉིས་ཀྱིས་སྟོན། མཐོང་ལམ་སྐད་ཅིག་མ་གཅིག་ཏུ་ངེས་པ་ལྟར་ན་མཉམ་གཞག་སྐད་ཅིག་མ་གཅིག་པོ་དེའི་རྗེས་དེ་ནས་ཞེས་པའམ། སྐད་ཅིག་བཅུ་དྲུག་ཏུ་ངེས་པ་ལྟར་ན་བར་ཆད་མེད་ལམ་སྐད་ཅིག་མ་གཅིག་པོ་དེའི་རྗེས་སུ་སྔར་བཤད་པའི་རྣམ་གྲོལ་ལམ་སྐད་ཅིག་མ་བཅོ་ལྔ་པོ་དེ་འབྱུང་བ་རྟེན་འབྲེལ་གྱི་ཆོས་ཉིད་ཡིན་པས། མཉམ་གཞག་སྐད་ཅིག་མ་བཅུ་དྲུག་པོ་དེ་རྫོགས་པའི་རྗེས་དེ་ནས། རྗེས་ཐོབ་ཀྱིས་བར་མ་ཆོད་པར་ཐོག་མར་རྣམ་ཐར་བརྒྱད་དང་སྙོམས་འཇུག་དགུ་ལ་ལུགས་མཐུན་དང་ལུགས་མི་མཐུན་དུ་སྙོམས་པར་འཇུག་པའི་མཐོང་ལམ་གྱི་ཁྱད་པར་ལམ་གྱི་ངོ་བོར་གྱུར་པའི་ཏིང་ངེ་འཛིན་སེང་གེ་རྣམ་བསྒྱིངས་སྒོམ་པར་བྱེད་དོ། །དགོས་པ་ཅིའི་ཕྱིར་དུ་ཞེ་ན། མཐོང་ལམ་རྩེ་སྦྱོར་གྱི་གནས་སྐབས་སུ་རྣམ་ཐར་བརྒྱད་དང་། སྙོམས་འཇུག་དགུ་ཐོབ་པ་དེ་ལ་དབང་ཐོབ་པའི་ཆེད་དུའོ། །ཅིའི་ཕྱིར་སེང་གེ་རྣམ་པར་བསྒྱིངས་པ་ཞེས་བྱ་ཞེ་ན། མཐོང་སྤང་སྒྲིབ་གཉིས་ཀྱིས་འཇིགས་པ་མེད་པའི་ཕྱིར་རོ། །ཤེར་ཕྱིན་གྱི་མདོར། མཐོང་ལམ་རྩེ་སྦྱོར་གྱི་གནས་སྐབས་ཀྱི་ཤེར་ཕྱིན་གྱི་བསྡུ་བྱར་གྱུར་པའི་བསམ་གཏན་གྱི་ཕར་ཕྱིན་སྟོན་པའི་སྐབས་སུ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་རྣམས་བར་མ་ཆད་དུ་འབྱུང་བས་རྟེན་འབྲེལ་ལ་རྟོག་ཚུལ་གྱི་མདོ་ཚིག་མི་འབྱུང་བས་རྗེ་བཙུན་གྱིས་བར་སྐབས་འདིར་རྟེན་འབྲེལ་ལ་རྟོག་ཚུལ་གྱི་རྐང་པ་གཉིས་གསུངས་པ་དེ་དགོས་པའི་དབང་གིས་ཡིན་ལ་དགོས་པ་ཡང་མཐོང་ལམ་མཉམ་གཞག་དང་སྒོམ་ལམ་མཉམ་གཞག་གཉིས་བར་མ་ཆད་དུ་འབྱུང་ངམ་སྙམ་པའི་དོགས་པ་བཟློག་པའི་ཆེད་དུ་ཡིན་ནོ། །ཇི་ལྟར་ཞེ་ན། མཐོང་ལམ་མཉམ་གཞག་སྐད་ཅིག་མ་གཅིག་གམ་བཅུ་དྲུག་རྫོགས་པའི་རྗེས་དེ་མ་ཐག་ཏུ་ཁྱད་པར་ལམ་གྱི་ངོ་བོ་སེང་གེ་རྣམ་བསྒྱིངས་ཀྱི་ཏིང་ངེ་འཛིན་དེ་འབྱུང་ཞིང་། དེའི་རྗེས་སུ་རྟེན་འབྲེལ་ལ་རྟོག་པས་མཚོན་ནས་མདོ་སྡེ་ས་བཅུ་པར་བཤད་པའི་ཡོན་ཏན་བརྒྱ་ཕྲག་བཅུ་གཉིས་དང་། སྐབས་གཉིས་པ་དང་། གསུམ་པ་དང་། ཁྱད་མཚན་གྱི་སྐབས་སུ་བཤད་པའི་མཐོང་ལམ་མཉམ་གཞག་སྐད་ཅིག་མ་བཅུ་དྲུག་གིས་དྲངས་པའི་ངེས་ཤེས་བཅུ་དྲུག་པོ་རྣམས་དང་། ཕྱིར་མི་ལྡོག་གི་སྐབས་སུ་བཤད་པའི་མཐོང་ལམ་པ་ཕྱིར་མི་ལྡོག་པའི་གཏན་ཚིགས་རྣམས་དང་། ཡོངས་སྦྱོང་བཅུ་ལ་སོགས་པ་ས་དང་པོའི་རྗེས་ཐོབ་ཀྱི་ཡོན་ཏན་མ་ལུས་པ་འབྱུང་ལ། དེ་ནས་སྒོམ་སྤང་མི་མཐུན་ཕྱོགས་སྤོང་བ་ལ་ཏིང་ངེ་འཛིན་གྱི་རྩལ་སྦྱང་དགོས་པས་སྦྱོང་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་རྣམས་འབྱུང་བར་ཤེས་པའི་ཆེད་དུ་ཡིན་ནོ་སྙམ་དུ་སེམས་སོ། །ཉིར་སྣང་དུ། དེ་ལ་ལུགས་དང་མཐུན་པ་ནི་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ལ་སོགས་པའོ། །ལུགས་དང་མི་མཐུན་པ་ནི་དེ་མེད་ན་མྱ་ངན་དང་སྨྲེ་སྔགས་འདོན་པ་ལ་སོགས་པ་མི་འབྱུང་ངོ་། །ཞེས་བྱ་བ་ལ་སོགས་པའོ། །ཞེས་གསུངས་པ་འདི་མདོ་སྦྱོར་ཡིན་ན། འཕགས་པས་གཟིགས་པའི་མདོ་གཅིག་ན་ཡོད་པར་གསལ་ལོ། །སྒོམ་ལམ་རྩེ་སྦྱོར་ལ། གང་ལ་བརྟེན་ནས་སྐྱེ་བའི་རྟེན་དང་། དེ་ལ་བརྟེན་ནས་སྐྱེས་པའི་སྒོམ་ལམ་རྩེ་སྦྱོར། དེ་དག་གི་གནས་སྐབས་སུ་ཐོབ་པའི་ཡོན་ཏན་དང་གསུམ་ལས། དང་པོ་ནི། འགོག་དང་བཅས་པའི་སྙོམས་འཇུག་དགུར། །ཞེས་སོགས་ཀྱིས་སྟོན། བསྟན་ཚུལ་ལ། འཕགས་སེང་གཉིས་ཀྱིས་ཚིག་རྐང་དང་པོ་གཉིས་ཀྱིས་སྦྱོར་བ་སེང་གེ་རྣམ་བསྒྱིངས། ལྷག་མ་རྣམས་ཀྱིས་དངོས་གཞི་ཐོད་རྒལ་སྟོན་པར་བཞེད། མཁས་པ་ཁ་ཅིག་རྩ་བའི་དགོངས་པ། དེ་ནས་སེང་གེ་རྣམ་བསྒྱིངས་པའི་ཞེས་པས་སྦྱོར་བ་སེང་གེ་རྣམ་བསྒྱིངས་བསྟན་ཟིན་པས་ཚིག་རྐང་དང་པོ་གཉིས་ཀྱིས་དངོས་གཞི་ཐོད་རྒལ་ཆུང་ངུ་འབྲིང་གཉིས་འོངས་ནས་ཞེས་པས། ཁྲི་བརྒྱད་སྟོང་པ་ནས་འབྱུང་བའི་ནུད་ཆུང་། དེ་ནས་རྐང་པ་གཉིས་ཀྱིས་ཆེ་འབྲིང་གཉིས་ཀྱི་མཚམས་འཛིན། དེ་ནས་རྐང་པ་གཅིག་གིས་མིང་། ལྷག་མ་རྣམས་ཀྱིས་ཆེན་པོ་བསྟན་ཞེས་གསུངས་སོ། །འདི་དག་གི་ས་མཚམས་ལ་བོད་ཕལ་ཆེར་ས་གཉིས་པའི་བར་ཆད་མེད་ལམ་ནས་ཡོད་ཅེས་པ་ནི་མི་འཐད་དེ། ཏིང་ངེ་འཛིན་འདི་དག་མཐོང་ལམ་རྩེ་སྦྱོར་གྱི་གནས་སྐབས་སུ་མངོན་དུ་བྱེད་པའི་ནུས་པ་ཐོབ་ནས། ས་དང་པོའི་རྗེས་ཐོབ་ཀྱི་གནས་སྐབས་སུ་ཡང་དང་ཡང་དུ་བསྒོམ་པར་བྱེད་པའི་ཕྱིར། འདི་དག་མཐོང་ལམ་དུ་ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་ཉམས་ལེན་ཁྱད་པར་ཅན་གྱི་ངོ་བོར་སྐྱེས་པའི་གནས་སྐབས་ཀྱི་ཤེས་རབ་ཀྱི་ཕར་ཕྱིན་གྱི་བསྡུ་བྱར་གྱུར་པའི་བསམ་གཏན་གྱི་ཕར་ཕྱིན་དེ་ཡིན་པའི་ཕྱིར། དེས་ན་འདི་དག་མངོན་དུ་བྱེད་པའི་ནུས་པ་མཐོང་ལམ་རྩེ་སྦྱོར་གྱི་གནས་སྐབས་སུ་ཐོབ་པ་ལ་དགོངས་ནས་ཤེར་ཕྱིན་གྱི་མདོར་མཐོང་ལམ་རྩེ་སྦྱོར་གྱི་ཁོངས་སུ་བསྡུ་བར་གསུངས་ཀྱི། ས་དང་པོའི་རྗེས་ཐོབ་ཏུ་མངོན་དུ་འགྱུར་བ་ལ་དགོངས་ནས་འཕགས་སེང་གཉིས་ཀྱིས་སྒོམ་ལམ་རྩེ་སྦྱོར་གྱི་ཁོངས་སུ་བསྡུ་བར་གསུངས་སོ། །འོན་ཀྱང་སྒོམ་ལམ་རྩེ་སྦྱོར་ནི་མ་ཡིན་ཏེ། སྒོམ་སྤང་ཤེས་སྒྲིབ་ཀྱི་སྤོང་གཉེན་མ་ཡིན་པའི་ཕྱིར་རོ། །གཉིས་པ་ལ། སྤང་བྱ་རྣམ་རྟོག་དང་། སྤོང་བྱེད་ཀྱི་གཉེན་པོ་གཉིས་ལས། དང་པོ་ལ། གཟུང་རྟོག་དང་འཛིན་རྟོག་གཉིས་ལས། གཟུང་རྟོག་ནི། མདོར་བསྡུས་རྒྱས་དང་སངས་རྒྱས་ཀྱི། །ཞེས་སོགས་དང་། གཉིས་པ་སེམས་དང་སེམས་བྱུང་རྣམས། །ཞེས་སོགས་དང་། འཛིན་རྟོག་ནི། སེམས་ཅན་བཏགས་དང་དེ་རྒྱུ་ཡི། །ཞེས་སོགས་དང་། བདག་ཉིད་ཇི་བཞིན་ཀུན་མཁྱེན་ནི། །ཞེས་སོགས་ཀྱིས་བསྟན། འདི་དག་ལ་སློབ་དཔོན་གྱིས་གཟུང་རྟོག་ལ་ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གཉིས། འཛིན་རྟོག་ལ་རྫས་འཛིན་རྟོག་པ་དང་། བརྟགས་འཛིན་རྟོག་པ་གཉིས་ཀྱི་རྣམ་གཞག་མཛད་པར་སྣང་སྟེ། སྐབས་དང་པོར་བཤད་ཟིན་པའི་གཟུང་འཛིན་གྱི་རྣམ་པར་རྟོག་པ་དེས། མཐོང་སྤང་དང་སྒོམ་སྤང་གཉིས་ཀྱི་སྤྱི་འཛིན་པར་བཤད་ཅིང་། གཉེན་པོའི་ཚོགས་སྒྲུབ་ཀྱི་སྐབས་སུ་ཡང་དེ་ལྟར་དུ་བཤད་པའི་ཕྱིར་དང་། སྒོམ་སྤང་རྟོག་པ་དང་པོའི་སྐབས་སུ་སྦྱོར་བའི་ཡུལ་ཅན་ཞེས་དང་། གཉིས་པའི་སྐབས་སུ་འཇུག་པའི་ཡུལ་ཅན་ཞེས་པའི་སྦྱོར་འཇུག་གཉིས་ནི། གཉེན་པོ་ཡིན་པས་དེ་ཉིད་མཐོང་སྤང་རྟོག་པ་ལ་ཡར་སྦྱར་ཏེ་གཟུང་རྟོག་དང་པོ་དང་། འཛིན་རྟོག་དང་པོ་སྦྱོར་བའི་སྤང་བྱ། གཟུང་རྟོག་གཉིས་པ་དང་། འཛིན་རྟོག་གཉིས་པ་འཇུག་པའི་སྤང་བྱར་བཤད་དོ། །འཕགས་པས་སྒོམ་སྤང་རྟོག་པ་བཞི་ལ་སྐབས་འདིར་ཐ་སྙད་གསལ་བར་གསུངས་པ་མི་སྣང་ཞིང་། གཉེན་པོའི་ཚོགས་སྒྲུབ་ཀྱི་སྐབས་སུ་གསུངས་པ་ནི་སྔར་བཤད་ཟིན་ཏོ།། །།འདི་བསྟན་སྒོམ་སྤང་རྟོག་པ་བཞི་པོ་འདི་དག་བྱང་སེམས་ལམ་གྱི་སྤང་བྱའི་རིགས་སུ་གནས་པའི་ཤེས་སྒྲིབ་ཁོ་ན་ཡིན་གྱི་ཐེག་དམན་གྱི་སྤང་བྱའི་རིགས་ནི་མེད་དེ། ཐེག་དམན་གྱི་སྤང་བྱའི་རིགས་མ་ལུས་པ་ས་དང་པོ་ནས་སྤངས་ཟིན་པའི་ཕྱིར་རོ། །གཉིས་པ་སྤོང་བྱེད་གཉེན་པོ་ལ་རང་གི་ངོ་བོ་ནི་སྐབས་གཉིས་པར། ས་དགུ་ལ་ནི་ཆེན་པོ་ཡི། །ཞེས་པར་བསྟན་ཟིན་པ་ལ་དགོངས་ནས་འདིར་དངོས་སུ་མ་བསྟན་པ་ཡིན་ལ། སྤང་གཉེན་སྦྱོར་བའི་ཚིག་ནི་གཟུང་རྟོག་གི་སྐབས་སུ་སྒོམ་པའི་ལམ་ལ་ཤེས་པར་བྱ། ཞེས་དང་། འཛིན་རྟོག་གི་སྐབས་སུ་སྒོམ་པའི་ལམ་དང་འབྲེལ་པ་ཡི། ཞེས་པས་སྟོན་ཏོ། །འོ་ན་འདིར་བསྟན་སྒོམ་ལམ་རྩེ་སྦྱོར་དེ། །ས་དགུ་ལ་ནི་ཆེན་པོ་ཡི། །ཞེས་པའི་སྐབས་ཀྱི་མཉམ་གཞག་བར་ཆད་མེད་ལམ་དགུ་པོ་ཡིན་ན། ལུས་རྣམ་གཞག་ཏུ་སྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དང་ནི། །ཞེས་བཞིར་བཤད་པ་དང་འགལ་ལོ་སྙམ་ན། མི་འགལ་ཏེ་དགུར་ཕྱེ་བ་ནི། ཁམས་གསུམ་ས་དགུར་རེ་རེ་ལ་སྒོམ་སྤང་ཤེས་སྒྲིབ་ཆེན་པོའི་ཆེན་པོ་སོགས་དགུ་དགུ་ཡོད་པས་དེ་དག་རིམ་པ་བཞིན་སྤོང་བའི་དབང་དུ་བྱས་ནས་ས་མཚམས་ཀྱི་སྒོ་ནས་ཕྱེ་བ་ཡིན་ལ། བཞིར་ཕྱེ་བ་ནི། སྔར་བཤད་པའི་མཉམ་གཞག་བར་ཆད་མེད་ལམ་རེ་རེས་ཀྱང་རང་གི་ངོས་སྐལ་གྱི་སྒོམ་སྤང་གཟུང་འཛིན་གྱི་རྣམ་པར་རྟོག་པ་བཞིའི་ས་བོན་སྤོང་བའི་གཉེན་པོ་བྱེད་པས་ལྡོག་པའི་སྒོ་ནས་ཕྱེ་བ་ཡིན་པའི་ཕྱིར་རོ། །དེ་ལྟར་བྱས་ན་ས་གཉིས་པའི་མཉམ་གཞག་སྤོང་བ་གཉེན་པོ་གཅིག་ཉིད་ལ་ཡང་སྤང་བྱ་གཟུང་འཛིན་གྱི་རྣམ་རྟོག་བཞིའི་གཉེན་པོ་བྱེད་པའི་ཆ་ནས་བཞི་དང་། དེ་བཞི་ལ་ཡུལ་གྱི་སྒོ་ནས་སོ་དྲུག་ཡོད་པས་གཉེན་པོ་ཡང་སོ་དྲུག དེ་དག་ལ་ཁམས་ཀྱི་སྒོ་ནས་བརྒྱ་རྩ་བརྒྱད་ཡོད་པས་དེའི་གཉེན་པོ་ཡང་བརྒྱ་རྩ་བརྒྱད། སའི་སྒོ་ནས་སུམ་བརྒྱ་དང་ཉེར་བཞི་ཡོད་པས་དེའི་གཉེན་པོ་ཡང་སུམ་བརྒྱ་དང་ཉེར་བཞི། དེ་བཞིན་དུ་ས་བཅུ་པའི་བར་ཆད་མེད་ལམ་གྱི་བར་རྣམས་ལ་ཡང་དེ་ལྟར་དུ་ཡོད་པས་ཕྱོགས་གཅིག་ཏུ་བསྡོམས་ན་སྒོམ་ལམ་རྩེ་སྦྱོར་ཉིས་སྟོང་དང་དགུ་བརྒྱ་བཅུ་དྲུག་ཡོད་དོ། །དེ་བཞིན་དུ་མཐོང་ལམ་རྩེ་སྦྱོར་ལ་ཡང་སྤང་བྱ་མཐོང་སྤང་གཟུང་འཛིན་གྱི་རྣམ་རྟོག་བཞིའི་ས་བོན་གྱི་གཉེན་པོ་བྱེད་པའི་ཆ་ནས་མཐོང་ལམ་སྡུག་བསྔལ་ལ་ཆོས་བཟོད་གཅིག་པོ་དེ་ཉིད་ལ་བཞི་དང་། སོ་དྲུག་གི་གཉེན་པོའི་ཆ་ནས་སོ་དྲུག་དང་། བརྒྱ་རྩ་བརྒྱད་ཀྱི་གཉེན་པོའི་ཆ་ནས་བརྒྱ་རྩ་བརྒྱད་དང་། སུམ་བརྒྱ་དང་ཉེར་བཞིའི་གཉེན་པོ་བྱེད་པའི་ཆ་ནས་སུམ་བརྒྱ་དང་ཉེར་བཞི་ཡོད་པ་ཡང་ཤེས་པར་བྱའོ། །གསུམ་པ་དེ་དག་གི་སྐབས་སུ་ཐོབ་པའི་ཡོན་ཏན་ནི། ཡམས་ནད་འདི་རྣམས་ཟད་ནས་ནི། །ཞེས་སོགས་ཀྱིས་སྟོན། འདིའི་དོན་ལ་སློབ་དཔོན་གྱིས་རྒྱུན་མཐའི་བྱང་སེམས་ཆོས་ཅན། རང་གི་སྐད་ཅིག་ཕྱི་ལོགས་སུ་ཐེག་པ་གསུམ་གྱི་ཡོན་ཏན་གྱི་རིགས་ཕུན་སུམ་ཚོགས་པ་ཐམས་ཅད་མངོན་དུ་འོང་བའི་རྣམ་པས་བརྟེན་པར་བྱེད་དེ། རང་གི་སྐད་ཅིག་ཕྱི་ལོགས་སུ་སྒོམ་སྤང་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་སྤངས་ཤིང་དེ་དག་གི་རྒྱུར་བསྡུས་པའི་ཉོན་མོངས་པ་བརྒྱ་རྩ་བརྒྱད་སྤང་བའི་ཕྱིར། དེ་ལྟ་བུའི་སྤང་རྟོགས་ཀྱི་ཡོན་ཏན་དེ་དག་རྣམ་མཁྱེན་སྐད་ཅིག་མ་དང་པོའི་གནས་སྐབས་སུ་མངོན་དུ་འགྱུར་བ་ཡིན་ཀྱང་རྒྱུན་མཐའི་བྱང་སེམས་ཀྱི་ཡོན་ཏན་དུ་མི་འགྱུར་བ་མ་ཡིན་ཏེ། ཡོན་ཏན་དེ་དག་དེ་མ་ཐག་ཏུ་འདྲེན་པར་བྱེད་པའི་ལྡོག་པ་ནས་བཤད་པའི་ཕྱིར། ཞེས་གསུངས་པའི་ཕྱིར་རོ། །རང་ལུགས་ནི་སྐབས་བཞི་པར་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་རྣམས་ཕྱིར་མི་ལྡོག་པར་བསྟན་པ་ན་དེ་དག་ཉམས་ལེན་གྱི་རིམ་པ་ལ་མི་ལྟོས་པར་འགྱུར་སྙམ་པའི་དོགས་པ་བསལ་བའི་ཕྱིར་དུ་སྦྱོར་བ་གསུམ་ཆར་དག་སའི་བྱང་སེམས་ཀྱི་ཉམས་ལེན་ལ་སྦྱར་བ་ལྟར་དུ། སྔར་མཐོང་སྒོམ་གྱི་རྩེ་སྦྱོར་གཉེན་པོ་འབད་རྩོལ་གྱི་ལྡོག་པ་ནས་བསྟན་པ་ན་དེ་དག་ལ་འབད་རྩོལ་ལ་མི་ལྟོས་པའི་ཡོན་ཏན་མེད་པ་ཡིན་ནམ་སྙམ་པའི་དོགས་པ་བསལ་བའི་ཕྱིར་དག་སར་འབད་རྩོལ་ལ་མི་ལྟོས་པའི་ཡོན་ཏན་གྱི་ལྡོག་པ་སྟོན་པའི་ཕྱིར་གཞུང་འདི་དག་འབྱུང་བ་ཡིན་ནོ། །ཇི་ལྟར་ཞེ་ན། འབད་རྩོལ་ལ་མི་ལྟོས་པའི་རྟེན་གྱི་གང་ཟག འབད་རྩོལ་ལ་མི་ལྟོས་པའི་རྒྱུ། འབད་རྩོལ་ལ་མི་ལྟོས་པའི་ཡོན་ཏན། འབད་རྩོལ་ལ་མི་ལྟོས་པའི་ཚུལ་ལོ། །དང་པོ་ནི། འབྲས་བུ་མཆོག་གིས་སྤ་བ་ཡི། །སེམས་དཔའ་ཆེན་པོ་དེ་ལ་ནི། །ཞེས་པའི་རྐང་པ་གཉིས་ཀྱིས་སྟོན་ཏེ། དག་སའི་བྱང་སེམས་སོ། །གཉིས་པ་ནི། ཡམས་ནད་འདི་རྣམས་ཟད་ནས་ནི། །ཡུན་རིང་ལོན་ནས་དབུགས་ཕྱིན་ལྟར། །ཞེས་པས་སྟོན་ཏེ། ཡམས་ནད་ཟད་ནས་ཡུན་རིང་པོ་ལོན་ཏེ། ལུས་སྟོབས་རྒྱས་པར་བྱེད་པའི་གེགས་བྱེད་པ་མེད་པས། རང་གི་ངང་གིས་རྒྱས་པ་བཞིན་དུ་སྒོམ་སྤང་གཟུང་འཛིན་གྱི་རྣམ་རྟོག་ཟད་ནས་ཐེག་པ་གསུམ་གྱི་རྟོགས་རིགས་རང་གི་ངང་གིས་གེགས་མེད་པར་ཡར་ལྡན་དུ་འབྱུང་བ་ཡིན་ནོ། །གསུམ་པ་ནི། རྣམ་པ་ཀུན་ཏུ་འགྲོ་བ་ཡི། །བདེ་སྒྲུབ་ཡོན་ཏན་ཕུན་ཚོགས་ཀུན། །ཞེས་པས་སྟོན་ཏེ། རིགས་ཅན་གསུམ་གྱི་དོན་སྒྲུབ་པའི་ཐེག་པ་གསུམ་གྱི་རྟོགས་རིགས་སོ། །བཞི་པ་ནི། རྒྱ་མཚོ་ཆེ་ལ་ཆུ་བོ་བཞིན། །རྣམ་པ་ཀུན་ཏུ་བརྟེན་པར་བྱེད། །ཅེས་པས་སྟོན་ཏེ། རྒྱ་མཚོ་ཆེན་པོ་ལ་ཆུ་བོ་བཞི་རྒྱུན་མི་ཆད་པར་འབྱུང་བ་བཞིན་དུ་ཐེག་པ་གསུམ་གྱི་རྟོགས་རིགས་རྣམས་རྒྱུན་མི་ཆད་པར་འབྱུང་བ་ཡིན་ནོ། །བར་ཆད་མེད་པའི་རྩེ་སྦྱོར་ལ་མདོ་ལས་གསུངས་ཚུལ། བསྟན་བཅོས་ལས་བསྟན་ཚུལ། དེ་ལྟར་བསྟན་པའི་དགོས་པ་དང་གསུམ། དང་པོ་ནི་མདོར། སྟོང་གསུམ་གྱི་སེམས་ཅན་ཐམས་ཅད་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་སྐྱོན་མེད་པ་ལ་བཀོད་པ་དཔེར་བྱས་ནས་རྣམ་མཁྱེན་དེ་ལས་བསོད་ནམས་མང་བར་དངོས་སུ་བསྟན་ནས། སྦས་དོན་ལ་བར་ཆད་མེད་པའི་རྩེ་སྦྱོར་བསྟན་པ་ཡིན་ནོ། །གཉིས་པ་ནི་དཔེ་དེ་ཉིད་དང་། སྦས་དོན་བར་ཆད་མེད་པའི་རྩེ་སྦྱོར་སྦྱར་ནས་དེ་ཉིད་དེ་ལས་བསོད་ནམས་མང་བར་སྟོན་པ་ནི། སྟོང་གསུམ་སྐྱེ་བོ་ཉན་ཐོས་དང་། །ཞེས་སོགས་ཀྱིས་སྟོན། མདོ་ལས་རྣམ་མཁྱེན་བསོད་ནམས་མང་བར་དངོས་སུ་བསྟན་པས་བར་ཆད་མེད་པའི་རྩེ་སྦྱོར་བསོད་ནམས་མང་བར་ཤུགས་ལ་བསྟན་ནུས་པ་ཡིན་ཏེ། དངོས་འབྲས་རྣམ་མཁྱེན་བསོད་ནམས་མང་བར་དངོས་སུ་བསྟན་པས་དངོས་རྒྱུ་བར་ཆད་མེད་པའི་རྩེ་སྦྱོར་བསོད་ནམས་མང་བར་ཤུགས་ལ་སྟོན་ནུས་པའི་ཕྱིར་ཏེ། བར་ཆད་མེད་པའི་དོན་རང་གི་དངོས་འབྲས་རྣམ་མཁྱེན་བསྐྱེད་པ་ལ་ཆོས་གཞན་གྱིས་བར་མ་ཆོད་པ་ལ་འཇོག་པ་ཡིན་པའི་ཕྱིར་ཞེས་པ་ནི། དེ་ནི་རྣམ་པ་ཀུན་མཁྱེན་ཉིད། །ཅེས་པས་སྟོན། གསུམ་པ་ལ་དགོས་པ་གཉིས་ལས། དང་པོ་ནི། ཚོགས་སྒྲུབ་ཀྱི་སྐབས་སུ་ས་དགུ་པ་མན་ཆད་ཡོངས་སྦྱོང་གི་སྒོ་ནས་བསྟན་ཅིང་ས་བཅུ་པ་འབྲས་བུའི་སྒོ་ནས་བསྟན་པ་ལྟར་མཐོང་སྒོམ་ལམ་གྱི་རྩེ་སྦྱོར་གཉེན་པོའི་ལྡོག་པ་ནས་བསྟན་པ་ན་གདུལ་བྱ་འགའ་ཞིག་སེམས་ཞུམ་པར་འགྱུར་བས་དེ་བསལ་ནས་སྤྲོ་བ་བསྐྱེད་པའི་ཕྱིར་ཕན་ཡོན་གྱི་སྒོ་ནས་བར་ཆད་མེད་པའི་རྩེ་སྦྱོར་སྟོན་པ་ཡིན་ནོ། །གཉིས་པ་ནི། སྤྱིར་ཐེག་ཆེན་གྱི་བྱང་ཆུབ་དེ་ལ་རང་བཞིན་རྣམ་དག་གི་ཆོས་ཉིད་མཐའ་དག་མངོན་སུམ་དུ་མཐོང་བའི་བྱང་ཆུབ་དང་། གློ་བུར་དྲི་བྲལ་གྱི་ཆོས་ཉིད་མཐའ་དག་མངོན་སུམ་དུ་མཐོང་བའི་བྱང་ཆུབ་གཉིས་ལས། དང་པོ་ནི། ཐེག་ཆེན་གྱི་མཐོང་ལམ་ནས་ཡོད་དེ། དྲི་མ་ཟད་དང་མི་སྐྱེ་བའི། །ཞེས་པའི་སྐབས་སུ་བསྟན་པ་ལྟ་བུའོ། །ཕྱི་མ་ནི་སངས་རྒྱས་ཀྱི་ས་ཁོ་ནར་ཡོད་དེ། དེ་ནི་རྣམ་པ་ཀུན་མཁྱེན་ཉིད། །ཅེས་པའི་རྣམ་མཁྱེན་ལྟ་བུའོ། །དེ་གཉིས་ཀྱི་དངོས་རྒྱུ་བསོད་ནམས་མང་བར་སྟོན་པའི་གཞུང་ཡང་གཉིས་ལས། དང་པོ་ནི། བསོད་ནམས་མང་པོ་ཉིད་ཀྱི་ནི། །ཞེས་དང་། དེ་ཐོབ་བར་ཆད་མེད་པའི་རྒྱུ། །བསོད་ནམས་མང་པོའི་མཚན་ཉིད་དོ། །ཞེས་པ་ལྟ་བུའོ། །ཕྱི་མ་ནི་གཞུང་འདི་ཉིད་དེ། བསོད་ནམས་མང་པོ་ཉིད་ཀྱིས་ནི། །སངས་རྒྱས་ཉིད་ཀྱི་བར་མེད་དེ། །ཞེས་གསུངས་པའི་ཕྱིར་རོ། །དངོས་རྒྱུ་དེ་གཉིས་བསོད་ནམས་མང་པོའི་ལྡོག་པ་ནས་བསྟན་པའི་དགོས་པ་ཡང་དངོས་འབྲས་ཉིད་ལ་སྤྲོ་བ་བསྐྱེད་པའི་ཆེད་དུ་ཡིན་ནོ། །མདོར། རྣམ་མཁྱེན་བསོད་ནམས་མང་བར་དངོས་སུ་བསྟན་པས་དམིགས་རྐྱེན་སོགས་གསུམ་ཡང་རྣམ་མཁྱེན་ལ་སྦྱར་ཏེ། མདོར། རྣམ་པ་ཐམས་ཅད་མཁྱེན་པ་ཉིད་འདིའི་དམིགས་པའི་རྐྱེན་ནི་དངོས་པོ་མེད་པའོ། །བདག་པོ་ནི་དྲན་པ་ཡིན་ནོ། །རྣམ་པ་ནི་ཞི་བ་སྟེ་མཚན་མ་མེད་པའོ། །ཞེས་གསུངས་པའི་ཕྱིར་རོ། །དེའི་སྟོབས་ཀྱིས་བསལ་བྱ་ལོག་སྒྲུབ་ཡང་རྣམ་མཁྱེན་གྱི་དམིགས་རྣམ་ལ་སྦྱོར་རོ། །བསྟན་བཅོས་རྩ་བའི་དགོངས་པ་ཡང་བར་ཆད་མེད་པའི་རྩེ་སྦྱོར་བསོད་ནམས་མང་བར་དངོས་སུ་བསྟན་ཀྱང་དམིགས་རྐྱེན་སོགས་དེ་དག་རྣམ་མཁྱེན་ལ་སྦྱོར་བར་སྣང་སྟེ། དེ་ནི་རྣམ་པ་ཀུན་མཁྱེན་ཉིད། །འདི་ཡི་དམིགས་པ་དངོས་མེད་དེ། །ཞེས་དང་། རྣམ་པ་ཀུན་མཁྱེན་ཉིད་རྟེན་ཅན། །རྣམ་པ་བཅུ་དྲུག་དག་ཏུ་བཞེད། །ཅེས་གསུངས་པའི་ཕྱིར་རོ། །ཉིར་སྣང་གི་དགོངས་པ་ཡང་འདི་ཉིད་དུ་སྣང་སྟེ། དེ་ལ་རྣམ་པ་ཐམས་ཅད་མཁྱེན་པ་ཉིད་ལ་བརྟེན་པའི་དམིགས་པ་འཐད་པ་ལ་ལོག་པར་རྟོག་པ་ནི་འདི་ཡིན་ཏེ། ཞེས་གསུངས་པའི་ཕྱིར་རོ། །སློབ་དཔོན་གྱིས་ནི་བར་ཆད་མེད་པའི་རྩེ་སྦྱོར་གྱི་དམིགས་རྐྱེན་སོགས་ལ་སྦྱོར་བར་མཛད་དེ། བར་ཆད་མེད་པའི་ཏིང་ངེ་འཛིན་འདིའི་དམིགས་པའི་རྐྱེན་ནི་ཆོས་ཐམས་ཅད་དངོས་པོ་མེད་པ་ཡིན་ནོ། །ཞེས་གསུངས་པའི་ཕྱིར། རྣམ་མཁྱེན་གྱི་དམིགས་རྐྱེན་སོགས་ལ་སྦྱོར་བ་དོན་ལ་ཡང་གནས་ཏེ། གོང་དུ་ཐེག་ཆེན་སྒྲུབ་པའི་དམིགས་པ་འདུས་བྱས་འདུས་མ་བྱས་ལ་སོགས་པའི་ཆོས་ཐམས་ཅད་ལ་བཤད་ཅིང་། འདིར་དངོས་པོ་མེད་པ་ཁོ་ན་དམིགས་པར་བཤད་པའི་ཕྱིར་རོ། །འོ་ན་རྣམ་མཁྱེན་གྱིས་ཀྱང་ཆོས་ཐམས་ཅད་ལ་དམིགས་པ་མ་ཡིན་ནམ། ཅིའི་ཕྱིར། རྣམ་མཁྱེན་གྱི་དམིགས་པ་དངོས་མེད་དུ་བཤད་ཅེ་ན། རྣམ་མཁྱེན་གྱིས་ནི་ཆོས་ཐམས་ཅད་ཆོས་ཀྱི་དབྱིངས་སུ་རོ་གཅིག་པར་རྟོགས་པས་རང་ངོར་ཆོས་དབྱིངས་སྤྲོས་བྲལ་ལས་གཞན་མེད་པའི་ཕྱིར་དང་། ཐེག་ཆེན་གྱི་སྒྲུབ་པས་ནི་ཆོས་ཅན་སྣ་ཚོགས་ལ་སྒྲོ་འདོགས་གཅོད་དགོས་པའི་ཕྱིར་རོ། །སྦས་དོན་ཟབ་མོའི་གཏེར་གྱི་ཁ་འབྱེད་ལས་སྐབས་ལྔ་པའི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། ༈ །།མཐར་གྱིས་པའི་སྦྱོར་བ་ལ་རྩེ་སྦྱོར་གྱི་འོག་ཏུ་མཐར་གྱིས་པ་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་མཐར་གྱིས་པ་གཉིས་ལས། དང་པོ་ལ། རྩེ་སྦྱོར་གྱིས་འོག་ཏུ་མཐར་གྱིས་པའི་སྦྱོར་བ་འཆད་པའི་རྒྱུ་མཚན་ཡོད་དེ། རྩེ་སྦྱོར་གྱིས་བྱང་སེམས་ལམ་གྱིས་མི་མཐུན་ཕྱོགས་མ་ལུས་པ་སྤངས་ཀྱང་མཐར་གྱིས་པའི་སྦྱོར་བས་ཡོན་ཏན་མངོན་པར་བསྒྲུབ་པ་མེད་ན་སངས་རྒྱས་ཀྱི་སར་སྤངས་པ་ཕྱོགས་གཅིག་པར་འགྱུར་གྱི་རྟོགས་པ་ཕུན་སུམ་ཚོགས་པ་མི་འགྲུབ་པས་དེ་འགྲུབ་པའི་ཕྱིར་དུ་མཐར་གྱིས་པའི་སྦྱོར་བ་བསྒོམ་དགོས་པའི་ཕྱིར་རོ། །སློབ་དཔོན་ལྟར་ན་རྩེ་སྦྱོར་གྱི་འོག་ཏུ་མཐར་གྱིས་པ་འཆད་པའི་རྒྱུ་མཚན་ཡོད་དེ། སོ་སོ་བ་དང་བསྡུས་པ་ཉིད་དུ་རྟོགས་པའི་དོན་རྣམས་གོ་རིམ་བཞིན་དུ་བཀླགས་ནས་སྒོམ་པ་དེ་མཐར་གྱིས་པ་ཡིན་པ་གང་ཞིག དེ་རྩེ་མོའི་མངོན་པར་རྟོགས་པ་ཐོབ་པ་ཅིག་གིས་བསྒོམ་དགོས་པའི་ཕྱིར་རོ། །སོ་སོ་བ་དང་བསྡུས་པའི་དོན་ལ་ཆོས་བཤེས་ཀྱིས་སོ་སོ་བ་སྐབས་རེ་རེས་ཇི་ལྟར་བསྟན་པ་དང་། ཚོགས་ལམ་ལ་སོགས་པའི་གནས་སྐབས་རེ་རེ་ལ་ཡང་ཆོས་ཅན་ཇི་སྙེད་པ་རྗེས་ཐོབ་ཀྱི་རྟོགས་པ་རྣམས་ཡིན་ལ་བསྡུས་པ་ནི་སྙིང་པོའི་དོན་ཆོས་དབྱིངས་ཇི་ལྟ་བ་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་མཉམ་གཞག་ཏུ་རྟོགས་པ་རྣམས་ལ་བཞེད་དེ། ཚིག་གསལ་ལས། སོ་སོའི་དོན་རྣམས་ནི་སྐབས་རེ་རེས་ཇི་ལྟར་བསྟན་པ་དང་། ཚོགས་ལམ་ལ་སོགས་པའི་གནས་སྐབས་རེ་རེ་ལ་རང་བཞིན་ཇི་སྙེད་ཡོད་པ་མངོན་པར་རྟོགས་པའི་དོན་དེ་ནི་རྗེས་ཀྱི་ངོ་བོར་ཐོབ་པའི་ཡེ་ཤེས་ཀྱིས་རྟོགས་པའོ། །བསྡུས་པ་ཉིད་ཀྱི་དོན་ནི་སྙིང་པོའི་དོན་ཆོས་དབྱིངས་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ཏེ། དོན་དེ་ནི་མཉམ་པར་གཞག་པའི་ཡེ་ཤེས་ཀྱིས་རྟོགས་པར་མཛད་ནས་སོ། །དེ་ལྟར་ན་གོ་རིམ་བཞིན་དུ་བཀླགས་ནས་ཞེས་བྱ་བ་ནི་ཡིད་ཀྱིས་བཀླགས་ནས་ཞེས་བྱ་བའི་དོན་ཡིན་ཏེ། བསྐལ་པ་གྲངས་མེད་དང་པོས་ནི། འཇིག་རྟེན་ཆོས་མཆོག་གི་བར་དུའོ། །གཉིས་པས་ནི་ས་མི་གཡོ་བའི་བར་དུའོ། །གསུམ་པས་ནི་ས་བཅུ་པའི་བར་དུའོ། །ཞེས་གསུངས་སོ། །གསེར་གླིང་པས་སོ་སོ་བ་མཁྱེན་པ་གསུམ་ལུགས་ཟློག་དུ་སྟོན་པ་སྐབས་དང་པོ་གསུམ་དང་། བསྡུས་པ་མཁྱེན་གསུམ་ལུགས་འབྱུང་དུ་སྟོན་པ་རྣམ་རྫོགས་སྦྱོར་བ་ལ་འཆད་དེ། རྟོགས་དཀའི་སྣང་བ་ལས། རྩེ་མོའི་མངོན་པར་རྟོགས་པ་ཐོབ་པ་ཞེས་བྱ་བ་ནི་སྔར་བཤད་པའི་རྩེ་མོའི་སྦྱོར་བ་ལ་ལྷུན་གྱིས་གྲུབ་པ་ཐོབ་པའོ། །སོ་སོ་བ་དང་བསྡུས་པ་ཉིད་དུ་ཞེས་བྱ་བ་ནི་ལུགས་ལས་ཟློག་པ་དང་། ལུགས་སུ་འབྱུང་བ་དག་གིས་སོ། །ཞེས་སོ། །ཁ་ཅིག་སོ་སོ་བ་ཕར་ཕྱིན་དྲུག་དང་། རྗེས་དྲན་དྲུག་བསྡུས་པ་དངོས་མེད་ངོ་བོ་ཉིད་དུ་རྟོགས་པ་ལ་འཆད་པ་དང་། སྔ་རབས་པ་ཁ་ཅིག སོ་སོ་བ་སྦྱོར་ལམ། མཐོང་ལམ། སྒོམ་ལམ་གྱི་རྩེ་སྦྱོར་གསུམ། བསྡུས་པ་བར་ཆད་མེད་པའི་རྩེ་སྦྱོར་ལ་འཆད་དོ། །དེ་རྣམས་ཀྱི་ནང་ནས་གསེར་གླིང་པའི་ལུགས་དེ་ཁོ་ན་སློབ་དཔོན་གྱི་དགོངས་པ་ཡིན་གྱི་གཞན་རྣམས་ནི་དོན་མེད་དེ། སྐབས་དང་པོ་གསུམ་དུ་མཁྱེན་པ་གསུམ་པོ་ལུགས་ཟློག་གི་ཚུལ་དུ་སོ་སོར་བསྟན་པ་དེ་རྣམ་རྫོགས་སྦྱོར་བའི་སྐབས་སུ་ལུགས་འབྱུང་གི་ཚུལ་དུ་རྣམ་པ་བརྒྱ་བདུན་ཅུ་རྩ་གསུམ་དུ་བསྡུས་ནས་མཐར་གྱིས་པས་གོ་རིམ་དུ་སྒོམ་པར་བྱེད་པའི་ཕྱིར། དེ་ནས་རྟོགས་པའི་དངོས་པོ་ངེས་པར་བྱ་བའི་ཕྱིར་སོ་སོ་བ་དང་མཐའ་དག་ཏུ་རྣམ་པར་བསྒོམ་པའི་དོན་གཞུང་སྲོང་བར་བྱེད་པས་མཐར་གྱིས་པའི་མངོན་པར་རྟོགས་པ་ནི་ཐམས་ཅད་མཁྱེན་པ་ཉིད་གསུམ་གྱི་གོ་རིམ་གྱི་གནས་སྐབས་ཡིན་ནོ། །ཞེས་གསུངས་པའི་ཕྱིར་རོ། །ཁ་ཅིག་བསྡུས་པ་རྣམ་ཀུན་དང་། རྩེ་སྦྱོར་གཉིས་ཀ་ལ་འཆད་པ་ཡང་ཅུང་ཟད་ཐལ་བའི་སྐྱོན་ཏེ། རྩེ་སྦྱོར་གྱི་འོག་ཏུ་མཐར་གྱིས་པ་འཆད་པའི་རྒྱུ་མཚན་ནི་རྩེ་མོའི་མངོན་པར་རྟོགས་པ་ཐོབ་པ་ཞིག་གིས་མཐར་གྱིས་པ་བསྒོམ་དགོས་པའི་ཕྱིར་ཞེས་པའི་དོན་ཡིན་གྱི་རྩེ་སྦྱོར་བསྡུས་པའི་ནང་དུ་འཇུག་པ་ནི་སྐབས་ཀྱི་དོན་མ་ཡིན་པའི་ཕྱིར་རོ། །རྒྱུ་མཚན་ཅན་གྱི་མཐར་གྱིས་པ་ནི། སྦྱིན་པ་ཤེས་རབ་བར་དག་དང་། །ཞེས་སོགས་ཏེ། འདི་ལ་འཕགས་པས་ཇི་ལྟར་བཀྲལ་བའི་ཚུལ་དང་། སློབ་དཔོན་གྱིས་ཇི་ལྟར་འགྲེལ་བའི་ཚུལ་གཉིས་ལས། དང་པོ་ནི། མཐར་གྱིས་པ་ཐེག་ཆེན་གྱི་ཚོགས་ལམ་ནས་ཡོད་པར་བཞེད་དེ། མདོ་ལས། བཅོམ་ལྡན་འདས་གལ་ཏེ་དེ་ལྟར་རྟོགས་པའི་ཆོས་དང་། དངོས་པོ་མེད་པའི་ངོ་བོ་ཉིད་ལགས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡུམ་ལ་སྤྱོད་པ་ན་མཐར་གྱིས་བགྱི་བ་དང་། མཐར་གྱིས་བསླབ་པ་དང་། མཐར་གྱིས་སྒྲུབ་པར་ཇི་ལྟར་གདགས་པར་འགྱུར། ཞེས་གསུངས་པའི་དོན་ལ་ཉིར་སྣང་དུ། བགྱི་བ་སྨོས་པས་ནི་སེམས་བསྐྱེད་པ་གཟུང་བའི་དོན་དུའོ། །བསླབ་པ་སྨོས་པས་ནི་ངེས་པར་འབྱེད་པའི་ཆ་དང་མཐུན་པ་ཤེས་པར་བྱ་བའི་དོན་དུའོ། །སྒྲུབ་པ་སྨོས་པས་ནི་མཐོང་བའི་ལམ་དང་། སྒོམ་པའི་ལམ་ཤེས་པའི་དོན་དུའོ། །གསུམ་སྨོས་པས་ནི་མངོན་པར་རྟོགས་པའི་མཐར་གྱིས་པ་ཤེས་པར་བྱ་བའི་དོན་དུ་ཡིན་ནོ། །ཞེས་དང་། སངས་རྒྱས་རྗེས་སུ་དྲན་པའི་མཐར་གྱིས་པའི་སྐབས་སུ་དེ་བཞིན་གཤེགས་པ་ལ་གཟུགས་ལ་སོགས་པར་ཡིད་ལ་མི་བྱེད་པས་དེ་རྗེས་སུ་དྲན་པ་དང་། དེ་བཞིན་དུ་མཚན་དང་དཔེ་བྱད་ལ་སོགས་པར་ཡིད་ལ་མི་བྱེད་པ་དང་། ཚུལ་ཁྲིམས་ཀྱི་ཕུང་པོ་ལ་སོགས་པར་ཡིད་ལ་མི་བྱེད་པ་དང་། སྟོབས་བཅུ་ལ་སོགས་པར་ཡིད་ལ་མི་བྱེད་པ་དང་། རྟེན་ཅིང་འབྲེལ་བར་འབྱུང་བར་ཡིད་ལ་མི་བྱེད་པས་སངས་རྒྱས་རྗེས་སུ་དྲན་པ་ལྔ་གསུངས་པའི་དང་པོས་སེམས་བསྐྱེད་པ་དང་། ཕྱི་མ་བཞིས་སྦྱོར་ལམ་བཞི་དང་། བྱང་ཕྱོགས་སོ་བདུན་ཡོངས་སུ་རྫོགས་པས་སངས་རྒྱས་རྗེས་སུ་དྲན་པ་ནི་མཐོང་ལམ་དང་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཡོངས་སུ་རྫོགས་པའི་བར་གྱི་སངས་རྒྱས་རྗེས་སུ་དྲན་པ་ནི་སྒོམ་ལམ་ལ་སྦྱར་བར་མཛད་པའི་ཕྱིར་རོ། །དེ་ལྟར་མཛད་པའི་རྒྱུ་མཚན་ཡང་མདོ་ལས། བྱང་སེམས་ཆེན་པོ་སེམས་དང་པོ་བསྐྱེད་པ་ནས་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱེད་པས། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་ཁོང་དུ་ཆུད་པས་ཞེས་པ་འདི་ཀུན་རྫོབ་བྱང་ཆུབ་ཀྱི་སེམས་དང་པོ་བསྐྱེད་པ་ལ་དགོངས་སོ། །གཉིས་པ་ནི། སློབ་དཔོན་གྱིས་རྩེ་མོའི་མངོན་པར་རྟོགས་པ་ཐོབ་པ་ཞེས་མཐར་གྱིས་པ་ལ་རྩེ་སྦྱོར་ཐོབ་པ་སྔོན་དུ་འགྲོ་དགོས་པ་ཙམ་ཞིག་གསུངས་ཀྱི། རྩེ་སྦྱོར་ཐོབ་པའི་སྐད་ཅིག་ཕྱི་ལོགས་ནས་མཐར་གྱིས་པ་འབྱུང་བའི་གསལ་ཁ་མི་སྣང་ཡང་སངས་རྒྱས་རྗེས་སུ་དྲན་པའི་སྐབས་སུ་དྲན་པ་ཉེ་བར་གཞག་པ་ནས་སྟོབས་ལྔའི་བར་དོན་དམ་པར་དྲན་པ་མེད་པའི་མཚན་ཉིད་ཀྱིས་སངས་རྒྱས་རྗེས་སུ་དྲན་པ་ངེས་པར་འབྱེད་པའི་ཆ་དང་མཐུན་པ་དང་། བྱང་ཆུབ་ཡན་ལག་བདུན་གྱི་སྒོ་ནས་དྲན་པ་མཐོང་ལམ་དང་། འཕགས་ལམ་ཡན་ལག་བརྒྱད་ཀྱི་སྒོ་ནས་དྲན་པ་སྒོམ་ལམ་ལ་སྦྱོར་བས་སྦྱོར་ལམ་ནས་མཐར་ཕྱིན་གྱིས་པའི་སྦྱོར་བ་ཡོད་པར་བཞེད་པ་འདྲའོ། །འཕགས་པས་ནི་དེ་གསུམ་ཆར་ཡང་མཐོང་ལམ་ལ་སྦྱོར་ཏེ་སྔར་བཤད་ཟིན་ཏོ། །ཕ་རོལ་ཏུ་ཕྱིན་པ་ཕྱི་མ་བཞི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་འདུས་པའི་ཕྱིར་རོ། །སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་འཁོར་གསུམ་རྣམ་པར་དག་པས་རབ་ཏུ་ཕྱེ་བ་རྣམ་པ་དྲུག་ཐམས་ཅད་དུ་ཡོངས་སུ་རྫོགས་པས་ས་བཅུ་ཡང་དག་པར་སྒྲུབ་པར་བྱེད་པ་དང་། ཞེས་པ་ལྟར་ན། ཕར་ཕྱིན་དྲུག་གི་མཐར་གྱིས་པའི་སྦྱོར་བ་ས་དང་པོ་ནས་འཇོག་པར་མངོན་ཏེ། ཚོགས་ལམ་དུ་རྣམ་རྫོགས་སྦྱོར་བ་བསྒོམ་པ་ལས་བསྒོམ་བྱའི་དོན་ལ་གསལ་སྣང་ཐོབ་པའི་སྦྱོར་ལམ་སྐྱེས་པ་ལ་རྩེ་སྦྱོར་དུ་འཇོག་ཅིང་། སྦྱོར་ལམ་དུ་རྩེ་སྦྱོར་བསྒོམ་པས་ས་དང་པོར་ཕར་ཕྱིན་དྲུག་ཐོབ་སྟེ། ཕར་ཕྱིན་དྲུག་གི་སྒོ་ནས་མཁྱེན་གསུམ་གྱི་རྣམ་པ་གོ་རིམ་དུ་བསྒོམ་པ་ལ་ཕར་ཕྱིན་དྲུག་གི་མཐར་གྱིས་པར་འཇོག་པའི་ཕྱིར་སྙམ་དུ་སེམས་ཏེ་དཔྱད་དོ། །ཕ་རོལ་ཏུ་ཕྱིན་པ་ཕྱི་མ་བཞི་ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་འདུས་པའི་ཚུལ་ལ་ཆོས་ཀྱི་བཤེས་གཉེན་གྱིས་ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ། ཕ་རོལ་ཏུ་ཕྱིན་པ་བཞི་པོ་འདི་རྣམས་ཡུམ་གྱི་ནང་དུ་འདུས་པར་གྱུར་པ་ནི་སྦྱིན་པ་ལ་སོགས་པ་རྣམས་བྱང་ཆུབ་ཆེན་པོར་བསྔོས་པའི་མཐུ་ཡིས་ཅུང་ཟད་ཡང་འཁོར་བ་ཇི་སྲིད་དུ་མི་ཟད་པར་བྱེད་པའི་ཐབས་ནི་ཐབས་ཀྱི་ཕ་རོལ་ཏུ་ཕྱིན་པ་སྟེ། དེ་ནི་ཤེས་རབ་ཀྱི་ཁྱད་པར་ཉིད་དོ། །ཡང་སྦྱིན་པ་ལ་སོགས་པའི་དངོས་པོ་ངན་པའམ་ཉུང་ངུ་ཞིག་ན་ཡང་འཕགས་པ་ནམ་མཁའི་མཛོད་ཀྱི་མདོ་ལ་སོགས་པའི་རྗེས་སུ་འབྲངས་ཏེ་མང་ཞིང་ཁྱད་པར་དུ་སྤྲུལ་ཏེ། དེ་ལ་ཕན་འདོགས་པས་འདི་ནི་སྟོབས་ཀྱི་ཕ་རོལ་ཏུ་ཕྱིན་པ་སྟེ། འདི་ཡང་ཡུམ་གྱི་བྱེ་བྲག་གོ །གང་བྱང་ཆུབ་སེམས་དཔའ་ལེགས་པར་སྤྱད་པ་རྣམས་བློས་གཅིག་ཏུ་བསྡུས་ཏེ་དངོས་པོ་དམན་པ་རྣམས་ཀྱང་ཁྱད་དུ་མི་གསོད་པར་བདག་དགེ་བའི་ལས་འདིས་སངས་རྒྱས་འཇིག་རྟེན་གྱི་འདྲེན་པར་གྱུར་ཅིག དེ་མ་ཐོབ་པའི་བར་དུ་ཡང་རིགས་དང་ལོངས་སྤྱོད་ལ་སོགས་པ་འདི་དང་འདི་ལྟར་གྱུར་ཅིག ཅེས་སྨོན་ལམ་འདེབས་པས། དེ་ཇི་ལྟར་སྨོན་པ་ལྟར་འགྲུབ་སྟེ། འདི་ཡང་ཡུམ་གྱི་བྱེ་བྲག་གོ །དེ་དེ་ལྟར་སྨོན་ལམ་གྱི་འབྲས་བུ་གྲུབ་པ་སྤྱོད་པ་ན་ཡང་ཚེ་གཞན་དང་གཞན་དག་ཏུ་དེ་ལྟ་བུའི་གོ་འཕང་ལས་མ་ཉམས་པའི་ཡེ་ཤེས་ཀྱི་སྤྱོད་པ་དང་། ཇི་ལྟར་ཐོབ་པའི་བདེ་བ་རྣམས་ལེགས་པར་སྤྱད་པའི་འབྲས་བུར་འདོད་ཀྱི་རྒྱུ་མེད་པ་དང་། མི་མཐུན་པའི་རྒྱུར་སྨྲ་བ་ལ་སོགས་པ་མི་འདོད་པ་འདི་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ། དེ་ཡང་ཡུམ་གྱི་བྱེ་བྲག་གོ །ཅེས་གསུངས་སོ། །སྦས་དོན་ཟབ་མོའི་གཏེར་གྱི་ཁ་འབྱེད་ལས་སྐབས་དྲུག་པའི་གཞུང་གི་འབྲེལ་དང་། དཀའ་བའི་གནས་རྣམས་ལེགས་པར་བཤད་ཟིན་ཏོ།། ༈ །།སྐད་ཅིག་མའི་སྦྱོར་བ་ལ་མཐར་གྱིས་པའི་འོག་ཏུ་སྐད་ཅིག་མའི་སྦྱོར་བ་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་སྐད་ཅིག་མའི་སྦྱོར་བ་དངོས་གཉིས་ལས། དང་པོ་ནི། མཐར་གྱིས་པའི་སྦྱོར་བ་བསྒོམ་པའི་དགོས་པ་ནི་བསྒོམ་བྱའི་མཁྱེན་གསུམ་གྱི་རྣམ་པ་ཅིག་མངོན་དུ་གྱུར་པ་ན་མཁྱེན་གསུམ་གྱི་རྣམ་པ་ཐམས་ཅད་མངོན་དུ་འགྱུར་བའི་ཆེད་ཡིན་ལ་དེ་བསྒོམ་པས་བརྟན་པ་ཐོབ་ནས་ཟག་མེད་ཀྱི་ཆོས་གཅིག་མངོན་དུ་བྱས་པ་ན་དེ་དང་རིགས་མཐུན་པའི་ཟག་མེད་ཀྱི་ཆོས་ཐམས་ཅད་སྐད་ཅིག་མ་གཅིག་ལ་མངོན་དུ་འགྱུར་བའི་གནས་སྐབས་ལ་སྐད་ཅིག་མའི་སྦྱོར་བར་འཇོག་པའི་ཕྱིར་རོ། །གཉིས་པ་ནི། དེ་ལྟ་བུའི་སྐད་ཅིག་མའི་སྦྱོར་བའི་ངོ་བོ་ནི་རྒྱུན་མཐའི་ཡེ་ཤེས་ཡིན་ལ་དེ་ལ་མཚན་ཉིད་དེ་དོན་ལྡོག་མི་འདྲ་བའི་སྒོ་ནས་བཞིར་བྱེད་པ་ཡིན་ཏེ། རྣམ་པར་སྨིན་པ་མ་ཡིན་པའི་ཟག་མེད་ཀྱི་རྟོགས་རིགས་གཅིག་མངོན་དུ་གྱུར་པའི་ཚེ་དེ་དང་རིགས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་སྐད་ཅིག་མ་གཅིག་ལ་མངོན་དུ་འགྱུར་བ་དང་། རྣམ་པར་སྨིན་པའི་ཟག་མེད་ཀྱི་རྟོགས་རིགས་གཅིག་མངོན་དུ་གྱུར་པ་ན་དེ་དང་རིགས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་སྐད་ཅིག་མ་གཅིག་ལ་མངོན་དུ་གྱུར་པ་དང་། ཡེ་ཤེས་དེ་གཉིས་ཀྱིས་ཤེས་བྱ་རྟོགས་པའི་ཚུལ་ལ་ཆོས་ཐམས་ཅད་མཚན་ཉིད་མེད་པར་རྟོགས་པ་དང་། གཟུང་འཛིན་གཉིས་སུ་མེད་པར་རྟོགས་པའི་ལྡོག་པ་ནས་སྐད་ཅིག་མའི་སྦྱོར་བ་བཞིའི་རིམ་པ་བཞིན་དུ་གཞག་པའི་ཕྱིར་རོ། །དེ་ལ་དང་པོ་ནི། སྦྱིན་པ་ལ་སོགས་རེ་རེས་ཀྱང་། །ཞེས་སོགས་དང་། དེའི་དཔེ་ཡང་། ཇི་ལྟར་སྐྱེས་བུའི་ཟོ་ཆུན་རྒྱུད། །ཅེས་སོགས་དང་། གཉིས་པ་ནི། གང་ཚེ་ཆོས་དཀར་ཐམས་ཅད་ཀྱི། །ཞེས་སོགས་དང་། གསུམ་པ་ནི། སྦྱིན་པ་ལ་སོགས་སྤྱོད་པ་ཡི། །ཞེས་སོགས་དང་། བཞི་པ་ནི། རྨི་ལམ་དང་ནི་དེ་མཐོང་ཉིད། །ཞེས་སོགས་ཀྱིས་སྟོན་ཏོ། །འོ་ན་རྣམ་པར་སྨིན་པ་མ་ཡིན་པའི་ཟག་མེད་ཀྱི་རྟོགས་པ་གང་། རྣམ་པར་སྨིན་པའི་ཟག་མེད་ཀྱི་རྟོགས་པ་ནི་གང་། དེ་གཉིས་ཀྱི་རྟོགས་རིགས་ནི་ཇི་ལྟ་བུ་གཅིག་མངོན་དུ་བྱས་པ་ན་རིགས་མཐུན་ཐམས་ཅད་མངོན་དུ་བྱས་པའི་དཔེ་གང་ཞེ་ན། མ་དག་ས་བདུན་གྱི་ཟག་མེད་ཀྱི་ཡོན་ཏན་ལ་རྣམ་པར་སྨིན་པ་མ་ཡིན་པ་ཞེས་བརྗོད་དེ། མངོན་པ་བ་དག་གིས་རྣམ་པར་སྨིན་པ་མ་ཡིན་པའི་སྦྱོར་བྱུང་གི་ཡོན་ཏན་རྣམས་ཚེ་འདིར་འབད་རྩོལ་ལ་ལྟོས་པར་འདོད་པ་དང་འདྲ་བར་འདི་ཡང་མཚན་འཛིན་གྱིས་བར་ཆད་དང་བཅས་པས་འབད་རྩོལ་ལ་ལྟོས་པའི་ཕྱིར་རོ། །དག་པ་སའི་ཟག་མེད་ཀྱི་ཡོན་ཏན་རྣམས་ལ་རྣམ་པར་སྨིན་པ་ཞེས་བརྗོད་དེ། མངོན་པ་བ་དག་གིས་རྣམ་པར་སྨིན་པའི་འབྲས་བུ་དེ་སྔ་མའི་ལས་ཉོན་གྱིས་ཚེ་འདིར་འབད་རྩོལ་མེད་པར་གྲུབ་པར་འདོད་པ་ལྟར་འདིར་ཡང་རྣམ་པར་མི་རྟོག་པའི་ཡེ་ཤེས་ལ་དབང་བསྒྱུར་ཐོབ་པས་འབད་རྩོལ་ལ་མི་ལྟོས་པའི་ཕྱིར་རོ། །ཡོན་ཏན་དེ་གཉིས་ཀྱི་རིགས་རྒྱུན་རྒྱུན་མཐའི་གནས་སྐབས་སུ་ཡོད་པ་ལ་དེ་གཉིས་ཀྱི་རྟོགས་པའི་རིགས་སུ་འཇོག་གོ །དཔེ་ནི་སྔར་བཤད་ཟིན་པ་ལས་ཤེས་སོ། །རྒྱུ་མཚན་འདིས་ཀྱང་ཕ་རོལ་ཏུ་ཕྱིན་པ་དྲུག་གི་མཐར་གྱིས་པ་ས་དང་པོ་ནས་ཡོད་པར་གྲུབ་སྟེ། མཐར་གྱིས་པའི་སྦྱོར་བས་བསྒོམ་པར་བྱ་བའི་རྟོགས་པའི་རིགས་རྣམས་སྐད་ཅིག་མའི་སྦྱོར་བའི་གནས་སྐབས་སུ་མངོན་དུ་འགྱུར་བ་གང་ཞིག དེར་མངོན་དུ་འགྱུར་བའི་ཆོས་རྣམས་རྣམ་པར་སྨིན་པ་མ་ཡིན་པའི་ཟག་པ་མེད་པའི་རྟོགས་རིགས་དང་། རྣམ་པར་སྨིན་པའི་ཟག་པ་མེད་པའི་རྟོགས་རིགས་གཉིས་སུ་འདུས་པའི་ཕྱིར་སྙམ་དུ་སེམས་ཏེ་ལེགས་པར་དཔྱད་དགོས་སོ། །སྦས་དོན་ཟབ་མོའི་གཏེར་གྱི་ཁ་འབྱེད་ལས་སྐབས་བདུན་པའི་འབྲེལ་དང་དཀའ་བའི་གནས་རྣམས་ལེགས་པར་བཤད་ཟིན་ཏོ།། །།

འབྲས་བུ་ཆོས་སྐུ།

འབྲས་བུ་ཆོས་སྐུ་ལ་སྐད་ཅིག་མའི་འོག་ཏུ་འབྲས་བུ་ཆོས་སྐུ་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་འབྲས་བུ་ཆོས་སྐུ་དངོས་གཉིས་ལས། དང་པོ་ནི། སྐད་ཅིག་མའི་སྦྱོར་བ་དེས་རང་གི་སྐད་ཅིག་གཉིས་པར་སྦྱིན་པ་ནས་དཔེ་བྱད་བཟང་པོ་བརྒྱད་ཅུའི་བར་གྱི་ཆོས་ཐམས་ཅད་མངོན་སུམ་དུ་བྱས་པ་ལ་འབྲས་བུ་ཆོས་སྐུར་འཇོག་པའི་ཕྱིར་ན་དེའི་འོག་ཏུ་དེ་བཤད་དོ། །གཉིས་པ་ལ། སྤྱིར་ཕ་རོལ་ཏུ་ཕྱིན་པའི་ལུགས་ཀྱི་སྐུའི་རྣམ་གཞག བྱེ་བྲག་ཏུ་གཞུང་འདིའི་དགོངས་པ་ངེས་པར་བྱ་བ། ཡོན་ཏན་གྱི་ཁྱད་པར་བྱེ་བྲག་ཏུ་བཤད་པ་དང་གསུམ་ལས། དང་པོ་ལ། སྐུ་གཅིག་ཏུ་བཞག་པ། གཉིས་སུ་བཞག་པ། གསུམ་དུ་བཞག་པ། བཞི་དང་ལྔར་རྟོག་པའི་ཚུལ་དང་། མཚན་བཏགས་ཀྱི་ཁྱད་པར། ལོངས་སྤྲུལ་གཉིས་ལ་མུ་བཞི་བརྩི་བ་དང་དྲུག་ལས། དང་པོ་ནི། གསེར་འོད་དམ་པར། ཉོན་མོངས་པའི་སྒྲིབ་པ་ཐམས་ཅད་དང་བྲལ་བ་དགེ་བའི་ཆོས་ཐམས་ཅད་རྫོགས་པའི་ཕྱིར་དེ་ཁོ་ན་ཉིད་དང་། ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི་ཆོས་ཀྱི་སྐུ་ཞེས་བྱའོ། །སྔ་མ་གཉིས་ནི་བཏགས་པ་ཙམ་མོ། །ཆོས་ཀྱི་སྐུ་ནི་ཡང་དག་པ་སྟེ་སྐུ་དེ་གཉིས་ཀྱི་གཞི་བྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང་། རྣམ་པར་མི་རྟོག་པའི་ཡེ་ཤེས་ལས་གུད་ན་སངས་རྒྱས་རྣམས་ཀྱི་ཆོས་གང་ཡང་མེད་པའི་ཕྱིར་རོ། །ཞེས་དང་། གཞན་དོན་མོས་པ་ཆུང་ངུ་འབྲིང་གི་མདོར། དགེ་སློང་དག་འདི་ལ་ནི་སྐུ་དམ་པར་མ་འཛིན་པར་དགེ་སློང་དག་ང་ལ་ནི་ཆོས་ཀྱི་སྐུ་ཡོངས་སུ་རྫོགས་པར་ལྟོས་ཤིག ཅེས་དང་། འགྱུར་འགའ་ཞིག་ལས་དགེ་སློང་དག་ང་ལ་ནི་འཇིག་ཚོགས་ཀྱི་སྐུར་མ་ལྟ་བར་ཆོས་ཀྱི་སྐུ་ཡོངས་སུ་རྫོགས་པར་ལྟོས་ཤིག ཅེས་འབྱུང་ལ། དེའི་དོན་འགྲེལ་ཆེན་དུ། མཚན་དང་དཔེ་བྱད་འབར་བ་རྣམ་པར་མཛེས་པའི་འཇིག་ཚོགས་ལ་སྐུར་མ་འཛིན་ཞེས་གཟུགས་སྐུ་གཉིས་སངས་རྒྱས་ཀྱི་སྐུ་བཏགས་པ་བ་ཡིན་པས་སྐུ་མཚན་ཉིད་པ་ཆོས་སྐུ་ཁོ་ནར་གསུངས་སོ། །གཉིས་པ་ནི་རྒྱུད་བླར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་སྐུ་ལ་རང་དོན་དོན་དམ་པའི་སྐུ་དང་། གཞན་དོན་ཀུན་རྫོབ་པའི་སྐུ་གཉིས་དང་། ཡོན་ཏན་ལ་བྲལ་བའི་ཡོན་ཏན་དང་། རྣམ་པར་སྨིན་པའི་ཡོན་ཏན་གཉིས་སུ་ཕྱེ་ནས་སྐུ་གཉིས་ལ་ཡོན་ཏན་གཉིས་པོ་སོ་སོར་བསྟེན་པར་བཤད་དོ། །གསུམ་པ་ནི། རྒྱུད་བླར། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡི། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་དང་། རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །ཞེས་དང་། གཞུང་འདི་དང་ཐེག་བསྡུས་དང་། མངོན་པ་ཀུན་ལས་བཏུས་ལ་སོགས་པ། ཕ་རོལ་ཏུ་ཕྱིན་པའི་གཞུང་ལུགས་ཕལ་ཆེར་ལས་སྐུ་གསུམ་དུ་གསུངས་སོ། །བཞི་པ་ནི། མངོན་རྟོགས་རྒྱན་གྱི་འགྲེལ་བྱེད་ཁ་ཅིག སྐུ་གསུམ་གྱི་དང་པོ་ལ་ངོ་བོ་ཉིད་སྐུ་དང་། ཆོས་སྐུ་གཉིས་སུ་ཕྱེ་ནས་སྐུ་བཞིར་འདོད་པ་དང་། ཆོས་བཤེས་ཀྱིས། དེ་ལྟར་བཞིར་ཕྱེ་བའི་ལོངས་སྐུ་ལ་ཡང་ས་བཅུ་པའི་བྱང་སེམས་ཁོ་ན་ལ་སྣང་བའི་ལོངས་སྐུ་ཆེན་པོ་དང་། ས་དང་པོ་ཡན་ཆད་ལ་སྣང་བའི་ལོངས་སྐུ་ཕལ་པ་གཉིས་སུ་ཕྱེ་ནས་ལྔར་བྱེད་པ་དང་། ཁ་ཅིག སྤྲུལ་སྐུ་ལ་རྣམ་པར་སྨིན་པའི་སྤྲུལ་སྐུ་དང་། རྣམ་པར་སྨིན་པ་མ་ཡིན་པའི་སྤྲུལ་སྐུར་ཕྱེ་ནས་ལྔར་བྱེད་པ་དང་། གསེར་གླིང་པས་རྩ་བ་ཆོས་ཀྱི་སྐུ་དང་། ངོ་བོ་ཉིད་ཀྱི་སྐུ་ལ་སོགས་པ་སྐུ་ལྔའི་བདག་ཉིད་དུ་གྲུབ་ཅེས་པ་སོགས་རྣམ་རྟོག་གིས་སྤྲོ་བསྡུའི་སྐུ་བཞི་དང་ལྔའི་གྲངས་ངེས་བྱེད་པ་ནི་རིན་པོ་ཆེ་བསོད་ནམས་རྩེ་མོས་ཕ་རོལ་ཏུ་ཕྱིན་པའི་ལུགས་ལ་ཡེ་ཤེས་བཞི་དང་སྐུ་གསུམ་བཤད་པ་ཡིན་གྱི་ཡེ་ཤེས་ལྔ་དང་སྐུ་བཞིར་བྱེད་པ་ནི་རྡོ་རྗེ་ཐེག་པའི་ཐུན་མོང་མ་ཡིན་པའི་ཁྱད་ཆོས་ཡིན་པར་གསུངས་པ་ཉིད་ཀྱིས་བཀག་ཟིན་ཏོ། །ལྔ་པ་ནི། གཞུང་ལུགས་འགའ་ཞིག་ལས། སངས་རྒྱས་ཀྱི་སྐུ་ལ་གསུམ་དུ་གསུངས་པ་དང་། འགའ་ཞིག་ལས་གཟུགས་སྐུ་གཉིས་སྐུ་བཏགས་པ་བར་གསུངས་པས་ཇི་ལྟར་བྱ་སྙམ་ན། གནད་ཀྱི་དོན་ནི་འདི་ཡིན་ཏེ། སངས་རྒྱས་རང་སྣང་ལ་དབྱིངས་དང་ཡེ་ཤེས་རོ་གཅིག་པའི་ཆོས་ཀྱི་སྐུ་གཅིག་པུར་གནས་ཏེ། རང་སྣང་ལ་ཤེས་བྱ་ཐམས་ཅད་དབྱིངས་དང་ཡེ་ཤེས་རོ་གཅིག་པའི་ཆོས་ཀྱི་སྐུར་མངོན་པར་རྫོགས་པར་བྱང་ཆུབ་པའི་ཕྱིར་རོ། །འདི་ལ་དགོངས་ནས་གསེར་འོད་དུ། སྐུ་གཞན་གཉིས་བཏགས་པ་བར་གསུངས་ཤིང་། ཡང་དེ་ཉིད་ལས། སྐུ་གཉིས་ལ་ནི་མྱ་ངན་ལས་འདས་པ་ཞེས་མི་བྱ་སྟེ། ཆོས་ཀྱི་སྐུ་ལས་གཞན་པའི་སངས་རྒྱས་མེད་པའི་ཕྱིར་རོ། །ཅིའི་ཕྱིར། སྐུ་གཉིས་པོ་མྱ་ངན་ལས་འདས་པ་ཞེས་མི་བྱ་ཞེ་ན། སྐུ་དེ་གཉིས་ནི་ཡང་དག་པ་མ་ཡིན་པ་བཏགས་པ་ཙམ་པས་སྐད་ཅིག་ཏུ་སྐྱེ་ཞིང་འགག་པ་རྟག་པར་མི་གནས་པ་ཞེས་གསུངས་པ་དང་། རྡོ་རྗེ་གཅོད་པར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་བར་མི་བྱའོ། །རབ་འབྱོར་གལ་ཏེ་མཚན་ཕུན་སུམ་ཚོགས་པས་དེ་བཞིན་གཤེགས་པར་འགྱུར་ན་འཁོར་ལོས་སྒྱུར་བའི་རྒྱལ་པོ་ཡང་དེ་བཞིན་གཤེགས་པར་འགྱུར་ཏེ། དེ་བས་ན་མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་བར་མི་བྱའོ། །ཞེས་དང་། དེ་རྣམས་ཀྱི་དོན་ཚིགས་སུ་བཅད་པ། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་ཡི། །སྐྱེ་བོ་དེ་ཡིས་ང་མི་མཐོང་། །ཞེས་གསུངས་སོ། །གདུལ་བྱའི་གཞན་སྣང་གི་དབང་དུ་བྱས་ནས་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པ་ཡིན་ཏེ། གདུལ་བྱའི་ངོར་ཕྲིན་ལས་མཛད་པའི་སངས་རྒྱས་ཀྱི་སྐུ་མཚན་ཉིད་པ་གཅིག་ཡོད་དགོས་ཤིང་། དེ་ཡང་གདུལ་བྱའི་བློ་ལ་ཤར་བའི་གཟུགས་སྐུ་གཉིས་ལ་འཇོག་དགོས་པའི་ཕྱིར། འདི་ལ་དགོངས་ནས་རྒྱུད་བླར། རང་དོན་དོན་དམ་པའི་སྐུ་དང་། གཞན་དོན་ཀུན་རྫོབ་པའི་སྐུ་གཉིས་སུ་ཕྱེ་ནས་ཕྱི་མས་ཕྲིན་ལས་མཛད་པ་ན་སངས་རྒྱས་ཀྱི་ཕྲིན་ལས་སུ་འཇོག་ཅིང་དེ་ཡང་སྐུ་སྔ་མ་དེའི་གཟུགས་བརྙན་ཙམ་ཡིན་གྱི། སྐུ་སྔ་མ་ལྟར་མཚན་ཉིད་པ་མིན་པའི་ཚུལ་རྒྱས་པར་གསུངས་སོ། །དེང་སང་ཕལ་ཆེར། ཇི་ལྟར་བཻ་ཌཱུར་དག་པ་ཡི། །ཞེས་སོགས་ཀྱི་དོན། སྤྲུལ་སྐུ་དེ་ལོངས་སྐུའི་གཟུགས་བརྙན་ཡིན་པའི་དོན་ལ་འཆད་པ་ནི་རྒྱུད་བླའི་གཞུང་གོང་འོག་གི་བབ་སྒྲིག་མ་ཤེས་ཤིང་ཐུབ་པའི་དབང་པོའི་སྐུ་ཞེས་པ་རང་དོན་ཆོས་ཀྱི་སྐུ་ལ་འཇུག་པའི་དོན་མ་རྟོགས་པར་ཟད་དོ། །མངོན་པར་རྟོགས་པའི་རྒྱན་འདིར་ཡང་སྐུ་གསུམ་ལ་ཕྲིན་ལས་ཉི་ཤུ་རྩ་བདུན་སྦྱར་བའི་སྐབས་ཡིན་པས་གདུལ་བྱའི་གཞན་སྣང་གི་དབང་དུ་བྱས་ནས་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པར་བཤད་དེ། ཕྲིན་ལས་དངོས་སུ་མཛད་པའི་སངས་རྒྱས་ནི་གཟུགས་སྐུ་གཉིས་ལས་གཞན་མེད་པའི་ཕྱིར་རོ། །མདོར་ན་སངས་རྒྱས་རང་གི་གནས་ལུགས་འཆད་པའི་ཚེ་སངས་རྒྱས་ཀྱི་སྐུ་མཚན་ཉིད་པ་ཆོས་སྐུ་གཅིག་པུ་ཡིན་ཏེ། ལོངས་སྤྲུལ་གཉིས་ཀྱང་མཚན་དང་དཔེ་བྱད་ཀྱི་སྤྲས་པའི་གཟུགས་སྐུ་ལ་མི་འཇོག་པར་ཡེ་ཤེས་ཕྱི་མ་གསུམ་ལ་འཇོག་པའི་ཕྱིར་རོ། །གདུལ་བྱའི་ངོར་ཕྲིན་ལས་མཛད་ཚུལ་འཆད་པའི་ཚེ་མཚན་དང་དཔེ་བྱད་ཀྱིས་སྤྲས་པའི་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པར་འཇོག་སྟེ། དེའི་ཚེ་གདུལ་བྱའི་བློ་ངོར་སྣང་ཚུལ་གྱི་རྣམ་གཞག་འཆད་པའི་སྐབས་ཡིན་ཞིང་། གདུལ་བྱའི་ངོར་གཟུགས་སྐུ་གཉིས་ཀྱང་སངས་རྒྱས་སུ་སྣང་བའི་ཕྱིར་རོ། །ཇི་སྐད་དུ། གཞན་དོན་མོས་པ་ཆུང་ངུ་འབྲིང་གི་སྐབས་སུ་འགྲེལ་ཆེན་དུ། དེ་བཞིན་གཤེགས་པའི་གཟུགས་ཀྱི་སྐུ་མཚན་དང་དཔེ་བྱད་འབར་བ་དང་ལྡན་པ་སེམས་ཅན་སྐལ་བ་ཅན་རྣམས་ཀྱིས་ཉེ་བར་མཐོང་བ་འདི་ནི་སྟོན་པའི་དེ་ཁོ་ན་ཉིད་ཀྱི་ཆོས་ཀྱི་སྐུ་མིན་མོད་ཀྱི་འོན་ཀྱང་མཆོག་ཏུ་དྲི་མ་མེད་པའི་ཡོན་ཏན་མཐའ་ཡས་པའི་ཚོགས་དང་ལྡན་པ་ཆོས་ཀྱི་སྐུའི་དབང་གིས་དེ་རྣམས་ཀྱིས་རང་གི་ཤེས་པ་དེ་ལྟ་བུའི་གཟུགས་ཀྱི་སྐུའི་རྣམ་པར་སོ་སོར་སྣང་སྟེ། ཞེས་དང་། གསེར་འོད་དུ་དཔེར་ན་སྟོང་པ་ལ་བརྟེན་ཏེ་གློག་འབྱུང་ངོ་། །གློག་ལ་བརྟེན་ཏེ་འོད་འབྱུང་ངོ་། །དེ་བཞིན་དུ་ཆོས་ཀྱི་སྐུ་ལ་བརྟེན་ཏེ་ལོངས་སྤྱོད་རྫོགས་པའི་སྐུ་འབྱུང་ངོ་། །ལོངས་སྐུ་ལ་བརྟེན་ཏེ་སྤྲུལ་པའི་སྐུ་སྣང་ངོ་། །ཞེས་གསུངས་སོ། །དྲུག་པ་ནི། གསེར་འོད་ལས། རིགས་ཀྱི་བུ་གཞན་ཡང་སྐུ་འདི་གསུམ་དབྱེ་བ་ལ་ཡང་རྣམ་པ་བཞི་སྟེ། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་ཡང་ཡོད་ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་ཡང་ཡོད། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་ཡིན་པ་ཡང་ཡོད། སྤྲུལ་པའི་སྐུ་མ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་ཡང་ཡོད་དོ། །སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་གང་ཞེ་ན། དེ་བཞིན་གཤེགས་པ་གནས་སམ་མྱ་ངན་ལས་འདས་སུ་ཟིན་ཡང་སྨོན་ལམ་གྱི་དབང་གིས་སྐལ་བ་ཇི་ལྟ་བ་བཞིན་ཕན་ཐོགས་པ་ནི་སྤྲུལ་པའི་སྐུ་ཞེས་བྱའོ། །ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་གང་ཞེ་ན། སའི་སྔ་རོལ་པའི་སྐུའོ། །སྤྲུལ་པའི་སྐུ་ཡང་ཡིན་ལ་ལོངས་སྤྱོད་རྫོགས་པའི་སྐུ་ཡང་ཡིན་པ་དེ་གང་ཞེ་ན། ལྷག་མ་དང་བཅས་པའི་མྱ་ངན་ལས་འདས་པའི་སྐུའོ། །སྤྲུལ་པའི་སྐུ་ཡང་མ་ཡིན་ལ་ལོངས་སྤྱོད་རྫོགས་པའི་སྐུ་ཡང་མ་ཡིན་པ་དེ་ནི་ཆོས་ཀྱི་སྐུའོ། །ཞེས་མུ་བཞི་གསུངས་པའི་དང་པོ་ནི་མཆོག་གི་སྤྲུལ་སྐུ་ལས་གཞན་པའི་སྤྲུལ་པའི་སྐུ་རྣམས་སོ། །གཉིས་པ་ནི། སངས་རྒྱས་ཀྱི་ས་ཡིན་ལ། དེའི་སྔ་རོལ་པ་ནི་ས་བཅུ་པ་བ་ཡིན་པས། དེ་ལ་སྣང་བའི་གཟུགས་སྐུ་སྟེ། མདོ་འདིར་གཟུགས་ཀྱི་སྐུ་ནི་གདུལ་བྱའི་སྣང་བ་ཁོ་ན་ལ་འཇོག་པའི་སྐབས་ཡིན་པའི་ཕྱིར་རོ། །གསུམ་པ་ནི་མཆོག་གི་སྤྲུལ་སྐུ་ལྟ་བུའོ། །བཞི་པ་ནི་ངོ་བོ་ཉིད་ཀྱི་སྐུ་ལྟ་བུའོ། །གཉིས་པ་བྱེ་བྲག་ཏུ་གཞུང་འདིའི་དགོངས་པ་ངེས་པར་བྱ་བ་ལ་གཉིས་ཏེ། སྐུ་བཞིར་ཕྱེ་བའི་ལུགས་བརྗོད་ཅིང་། དེ་ལ་ལུང་རིགས་ཀྱིས་དཔྱད་པ་བྱ་བ་དང་། སྐུ་གསུམ་དུ་ཕྱེ་བའི་ལུགས་བརྗོད་ཅིང་དེ་ལུང་རིགས་ཀྱིས་གྲུབ་པའི་ཚུལ་ལོ། །དང་པོ་ནི། སློབ་དཔོན་གྱི་འགྲེལ་པ་འདིའི་དངོས་བསྟན་དང་གསེར་གླིང་པ། ཆོས་བཤེས། ཤེར་འབྱུང་བློ་གྲོས། བུདྡྷ་ཤྲཱི་རྣམས་ཆོས་སྐུ་མཚོན་བྱེད་ཀྱི་ཆོས་ལ་སྐུ་བཞིར་གྲངས་ངེས་ཤིང་མཛད་པ་ནི་ཞར་བྱུང་ཡིན་པར་བཞེད་དོ། །ལུས་རྣམ་གཞག་ཏུ་ངོ་བོ་ཉིད་ལོངས་རྫོགས་བཅས་དང་། དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །ཞེས་པའི་ཆོས་སྐུ་ནི་དབྱེ་བའི་ཡ་གྱལ་གྱི་ཆོས་སྐུ་ཡིན་ཞིང་། མཇུག་ཏུ་སྨོས་པའི་དགོས་པ་ནི་ཡེ་ཤེས་ཆོས་སྐུ་ཁོ་ན་དང་མཛད་པ་སྦྱར་བའི་ཆེད་ཡིན་ལ། མཛད་པ་ཡེ་ཤེས་ཆོས་སྐུ་ཁོ་ནའི་ཡིན་པའི་རྒྱུ་མཚན་ཡང་ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་སྐུར་སྣང་བ་སྐྱེད་དེ། དེ་ཉིད་སྤྲུལ་སྐུར་སྣང་བ་སྐྱེད་ནས་ཕྲིན་ལས་མཛད་པའི་ཕྱིར་རོ། །གཞན་དུ་ན་སངས་རྒྱས་ཀྱི་སའི་ཁྱད་པར་གསུམ་ལྡན་གྱི་ཡེ་ཤེས་གདོན་མི་ཟ་བར་ཁས་བླང་དགོས་པ་རྣམས་སངས་རྒྱས་ཀྱི་སྐུས་མ་བསྡུས་པར་འགྱུར་ཏེ། སྐུ་གསུམ་གང་རུང་གིས་མ་བསྡུས་པའི་ཕྱིར་ཞེས་བཞེད་དོ། །འདི་ནི་མངོན་པར་རྟོགས་པའི་རྒྱན་ཕར་ཕྱིན་ཐེག་པར་འཆད་པའི་ཚེ་གཞུང་གི་དགོངས་པ་མ་ཡིན་ཏེ། ཆོས་སྐུ་མཛད་པ་དང་བཅས་པ། ཞེས་པའི་ཆོས་སྐུ་དེ་དབྱེ་བའི་ཡ་གྱལ་གྱི་ཆོས་སྐུ་མ་ཡིན་གྱི། ཆོས་ཀྱི་སྐུ་དང་དེ་རྣམས་བརྒྱད། །ཅེས་པའི་སྐབས་ཀྱི་ཆོས་སྐུ་དང་སྦྱར་བའི་ཚིག་ཡིན་པའི་ཕྱིར། མངོན་པར་རྟོགས་པ་གཞན་བདུན་ལ་ལུས་དང་སྦྱར་བའི་ཚིག་རེ་རེ་ཡོད་པ་ལྟར། འདི་ལ་ཡང་ངེས་པར་དགོས་པའི་ཕྱིར་རོ། །གལ་ཏེ་དེ་ལྟར་ན་མཛད་པ་ཕྲིན་ལས་མཚོན་བྱེད་ཀྱི་ཆོས་གཅིག་ཏུ་བགྲང་དགོས་པས། དེ་ལུས་དང་སྦྱར་བའི་ཚིག་གི་མཇུག་ཏུ་འབྱུང་བ་མི་འཐད་དོ་སྙམ་ན་འདིའི་དོགས་པ་སེལ་བའི་ཆེད་དུ། རྣམ་ཀུན་མངོན་རྫོགས་རྟོགས་པ་སྟེ། །འདི་ནི་ཐབས་མཁས་བཅས་པ་ཡིན། །ཞེས་པའི་གཞུང་གསུངས་པ་དེ་དྲན་པར་གྱིས་ཤིག གལ་ཏེ་ལུས་རྣམ་གཞག་ཏུ་ཆོས་སྐུ་ཐ་མར་སྨོས་པ་དེ་ཚིགས་བཅད་སྦྱར་བདེ་བའི་ཆེད་ཡིན་ནོ་སྙམ་ན། དེ་ལྟར་ན། དེ་བཞིན་གཞན་པ་སྤྲུལ་པ་ནི། །ཞེས་སྨོས་མི་རིགས་པར་སྤྲུལ་པ་དང་། ཞེས་སྨོས་རིགས་པར་འགྱུར་ཏེ། དེ་གཉིས་ཚིགས་བཅད་སྦྱར་བདེ་མི་བདེ་ཁྱད་པར་མེད་པ་གང་ཞིག་ནི་ཞེས་པའི་ཚིག་དེས་སྐུ་སྔ་མ་གསུམ་པོ་དེ་ཆོས་སྐུའི་མཚན་གཞིར་སྟོན་ཅིང་། དང་ཞེས་པས་སོ་སོར་འབྱེད་ནུས་པའི་ཕྱིར་རོ། །སྒྲུབ་བྱེད་ལ་ཁྱབ་པ་མ་ངེས་པའམ་ཡང་ན་འགལ་བའི་སྐྱོན་གནས་པར་སྣང་སྟེ། དང་པོ་ནི། ཆོས་འཁོར་རིམ་པ་གསུམ་བསྐོར་བ་པོ་དེ་རྣམ་མཁྱེན་ཁོ་ནར་འགྱུར་ཏེ། རྣམ་མཁྱེན་གྱིས་བདག་རྐྱེན་བྱས་ནས་སྤྲུལ་སྐུས་ཆོས་འཁོར་རིམ་པ་གསུམ་བསྐོར་བའི་ཕྱིར་རོ། །གལ་ཏེ་ཁྱབ་པ་འགལ་ལོ་སྙམ་ན་བདེན་མོད་ཀྱི་དེ་ལྟར་ན་ཕྲིན་ལས་ཉེར་བདུན་པོ་ཡེ་ཤེས་ཆོས་སྐུ་ཁོ་ནའི་ཡིན་ཏེ། སྐུ་གསུམ་ཆར་གྱི་ཡིན་པའི་ཕྱིར་ཞེས་བཀོད་པར་སོང་བས། ཁྱབ་པ་འགལ་བར་དོགས་སོ། །གཞན་ལ་སྐྱོན་བརྗོད་པ་དེ་ཡང་མི་འཐད་དེ། སངས་རྒྱས་སའི་ཁྱད་པར་གསུམ་ལྡན་གྱི་ཡེ་ཤེས་དེ་ངོ་བོ་ཉིད་སྐུའི་ཁོངས་སུ་བསྡུ་བའི་སྐབས་ཡིན་པའི་ཕྱིར་རོ། །གཞན་དུ་ན་སྐུ་བཞིར་གྲངས་ངེས་པར་འདོད་ན་ཡང་མཚན་དཔེ་སྐུ་གང་གིས་བསྡུས། རྒྱུད་བླར་སྐུ་གཉིས་སུ་གྲངས་ངེས་པར་བཤད་པའི་སྐབས་སུ་ཡང་བྲལ་བའི་ཡོན་ཏན་དང་། རྣམ་སྨིན་གྱི་ཡོན་ཏན་རྣམས་སྐུ་གང་གིས་བསྡུས་ཞེས་ཁྱེད་ལ་འདྲི་སྟེ། དེའི་ལན་གང་གསུངས་པ་དེ་ཉིད་ཁོ་བོས་ཀྱང་སྨྲ་བ་ལ་དབང་ཕྱུག་གིས་ཅི་ཞིག་བྱར་ཡོད། ད་ནི་གཉིས་པ་སྐུ་གསུམ་དུ་འདོད་པའི་ལུགས་བརྗོད་ཅིང་ལུང་རིགས་ཀྱིས་ངེས་པའི་ཚུལ་བཤད་པར་བྱ་སྟེ། གྲོལ་སྡེ་རྣམ་གཉིས། སློབ་དཔོན་གྱི་འགྲེལ་ཆེན་གྱི་བསྔོ་བའི་སྐབས། ཨ་བྷ་ཡ། ཤཱནྟི་པ། རཏྣ་ཀཱིརྟི་རྣམས་ཆོས་སྐུ་མཚོན་བྱེད་ཀྱི་ཆོས་ལ་སྐུ་གསུམ་མཛད་པ་ཕྲིན་ལས་དང་བཅས་པ་བཞིར་ངེས་པར་མཛད་དོ། །འདིར་སྐུ་གསུམ་གྱི་ངོ་བོ་མདོར་བསྟན་པ་དང་། ཡོན་ཏན་རྒྱས་པར་བཤད་པ་གཉིས་གཉིས་ལས། དང་པོ་ངོ་བོ་ཉིད་སྐུ་ལ་ངོ་བོ་མདོར་བསྟན་པ་ནི། ཐུབ་པའི་ངོ་བོ་ཉིད་སྐུ་ནི། །ཞེས་སོགས་ཚིགས་བཅད་གཅིག་དང་། འོག་གི་ཆོས་ཀྱི་སྐུ་ཞེས་བརྗོད་པ་ཡིན། ཞེས་པ་སྟེ། ཐུབ་པའི་ངོ་བོ་ཉིད་སྐུ་ནི། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་འབྲེལ་ལོ། །ཆོས་ཀྱི་སྐུ་དེ་ཡང་དྷརྨཱ་ཏ་ཀ་ཡ་ཞེས་ཆོས་ཉིད་ཀྱི་སྐུ་ཡིན་པ་ལས། ངོ་བོ་ཉིད་ཀྱི་རྐྱེན་ཏ་མི་མངོན་པར་བྱས་ནས་དྷརྨཱ་ཀ་ཡ་ཞེས་ཆོས་ཀྱི་སྐུར་བཞག་པ་ཡིན་ནོ། །ཆོས་ཉིད་ཀྱི་སྐུ་དེ་གང་ཞེ་ན། ཟག་པ་མེད་པའི་ཆོས་དང་། གློ་བུར་དྲི་བྲལ་དང་། རང་བཞིན་རྣམ་དག་གསུམ་དབྱེར་མེད་པ་ཡིན་ནོ། །ཞེས་པ་ནི། ཟག་པ་མེད་པའི་ཆོས་གང་དག །ཞེས་སོགས་རྐང་པ་གསུམ་གྱིས་སྟོན། ཡོན་ཏན་རྒྱས་པར་བཤད་པ་ནི་དེ་གསུམ་གྱི་ནང་ནས་ཟག་མེད་ཀྱི་ཆོས་དེ་གང་ཞེ་ན། བྱང་ཆུབ་ཕྱོགས་མཐུན་ཚད་མེད་དང་། །ཞེས་པ་ནས། རྣམ་པ་ཐམས་ཅད་མཁྱེན་ཉིད་དང་། །ཞེས་པའི་བར་རོ། །གང་དག་དང་གི་སྒྲས་གཞི་ཤེས་དང་ལམ་ཤེས་སྡུད་པ་ནི་གཞུང་གི་དོན་མ་ཡིན་ཏེ། ཐེག་བསྡུས་དང་། ཀུན་བཏུས་སོགས་ལས་སྡེ་ཚན་འདི་དག་འཆད་པའི་སྐབས་སུ་རྣམ་མཁྱེན་ལས་ལོགས་སུ་དེ་གཉིས་མ་བགྲངས་ཤིང་། འདིར་རྣམ་མཁྱེན་གྱི་རྣམ་པ་བརྒྱ་དང་བཅུ་ལ་རྣམ་མཁྱེན་དུ་འཇོག་པའི་སྐབས་ཡིན་པས་གཞན་གཉིས་ཀྱང་དེའི་ནང་དུ་འདུས་པའི་ཕྱིར་རོ། །འོ་ན་ཇི་ལྟར་ཞེ་ན། རྣམ་པ་ཐམས་ཅད་མཁྱེན་པ་ནི་ཞེས་སྨོས་ན་སྡེ་ཚན་ཉེར་གཅིག་པོ་མཚན་གཞིར་གཟུང་ནས་སྐབས་འདིའི་ཆོས་སྐུར་འགྱུར་ལ་དེ་ལྟར་ན་སྡེ་ཚན་ཉེར་གཅིག་པོ་ཆོས་ཉིད་ཀྱི་སྐུར་འགྱུར་བས་དེ་སྤོང་བའི་ཆེད་དུ་དང་ཞེས་འབྱེད་པའི་སྒྲ་གསུངས་པ་ནི་འཕགས་པས་དང་ཞེས་པ་འབྱེད་པ་ལ་འཆད་ཀྱི་སྡུད་པ་ལ་མི་འཆད་པའི་དོན་ཡིན་ནོ། །མདོར་བསྡུ་ན། སྐུ་བཞིར་འདོད་པ་མི་འཐད་དེ། ནི་ཞེས་པའི་ཚིག་དང་ཞེས་པའི་ཚིག་མ་ཡིན་པའི་ཕྱིར་དང་། དང་ཞེས་པ་ནི་ཞེས་པར་མི་རུང་བའི་ཕྱིར་རོ། །ལེགས་པར་དཔྱོད་ཅིག ཟག་མེད་ཀྱི་ཆོས་རྣམས་ཀྱི་ནང་ནས་ཉོན་མོངས་པ་མེད་པ་དང་། སྨོན་གནས་མཁྱེན་པ་གཉིས་ཉན་ཐོས་ཀྱི་དེ་གཉིས་ལས་ཁྱད་པར་འཕགས་པར་ཤེས་པའི་ཆེད་དུ་ཉན་ཐོས་ཉོན་མོངས་མེད་པའི་ལྟ། ཞེས་སོགས་དང་། སངས་རྒྱས་སྨོན་གནས་མཁྱེན་པ་ནི། །ཞེས་སོགས་གསུངས་སོ། །སྨོན་མཁྱེན་རྟག་ཏུ་གནས་པ་ལ་རྩོད་པ་སྤོང་བ་ནི། རྒྱུ་ནི་ཡོངས་སུ་སྨིན་གྱུར་ནས། །ཞེས་སོགས་ཚིགས་བཅད་གཉིས་སོ། །ཁྱབ་རྟགས་གཉིས་ཀ་ལ་རྩོད་པ་སྤོང་བ་ནི། དེ་ལྟར་མཛད་པ་རྒྱ་ཆེའི་ཕྱིར། །ཞེས་སོགས་ཚིགས་བཅད་གཅིག་གོ །ལོངས་སྐུ་ལ་ངོ་བོ་མདོར་བསྟན་པ་ནི། མཚན་ནི་སུམ་ཅུ་རྩ་གཉིས་དང་། །ཞེས་སོགས་ཚིགས་བཅད་གཅིག་སྟེ། མཚན་སོ་གཉིས་དང་། དཔེ་བྱད་བརྒྱད་ཅུས་སྤྲས་ཤིང་ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པའི་མཚན་ཉིད་གསུམ་ལྡན་དུ་བཤད་དོ། །ཡོན་ཏན་རྒྱས་པར་བཤད་པ་ལ་མཚན་ནི། ཕྱག་ཞབས་འཁོར་ལོའི་མཚན་དང་རུས་སྦལ། །ཞེས་སོགས་ཚིགས་བཅད་ལྔས་བསྟན། དེའི་རྒྱུ་ནི། འདི་ལ་མཚན་ནི་གང་གང་གིས། །ཞེས་སོགས་ཚིགས་བཅད་གསུམ་གྱིས་བསྟན། དཔེ་བྱད་ནི། ཐུབ་པའི་སེན་མོ་ཟངས་མདོག་དང་། །ཞེས་སོགས་ཚིགས་བཅད་བཅུ་གཉིས་ཀྱིས་བསྟན་ཏོ། །སྤྲུལ་སྐུ་ལ་ངོ་བོ་མདོར་བསྟན་པ་ནི། གང་གིས་སྲིད་པ་ཇི་སྲིད་བར། །ཞེས་སོགས་ཚིགས་བཅད་གཅིག་སྟེ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་ཡུལ་འགྲོ་བ་མཐའ་དག་ལ་གང་ལ་གང་འདུལ་གྱིས་ཕན་པ་སྣ་ཚོགས་པ་མཉམ་དུ་མཛད་པ་སྟེ་ཁྱད་པར་གསུམ་ལྡན་ནོ། །དེ་མྱ་ངན་ལས་འདའ་བའི་ཚུལ་བསྟན་པས་བྱེ་བྲག་ཏུ་སྨྲ་བ་འདོད་པ་ལྟར་གྱི་དེ་རྒྱུན་ཆད་པ་སྲིད་དམ་སྙམ་པའི་དོགས་པ་ལྡོག་པའི་ཕྱིར་དུ་རྒྱུན་མི་ཆད་ཅེས་གསུངས་སོ། །ཡོན་ཏན་རྒྱས་པར་བཤད་པ་ནི། ཕན་པ་སྣ་ཚོགས་མཛད་པ་དེ་ཕྲིན་ལས་ཉེར་བདུན་དང་དོན་གཅིག་པར་དགོངས་ནས་ལོགས་སུ་མ་བསྟན་ཏོ། །མཛད་པ་ཕྲིན་ལས་ནི། དེ་བཞིན་འཁོར་བ་ཇི་སྲིད་འདི། །ཅེས་སོགས་ཏེ། གདུལ་བྱ་ལམ་གྱི་རྟེན་ལ་འགོད་པ་ནས་མི་གནས་པའི་མྱང་འདས་ལ་འགོད་པར་བྱེད་པའི་བར་ཉེར་བདུན་ནི་སྐབས་འདིའི་ཕྲིན་ལས་དངོས་ཡིན་ལ་བྱ་བའི་ལས་ཉེར་བདུན་ཡང་དེར་བསྡུའོ། །འོ་ན་ཕྲིན་ལས་ཉེར་བདུན་པོ་དེ་མཚོན་བྱེད་ཀྱི་ཆོས་གཞན་དུ་བསྟན་པ་མི་འཐད་པར་འགྱུར་རོ་སྙམ་ན་སྐྱོན་མེད་དེ། སྤྲུལ་སྐུ་ཁོ་ནའི་ཕྲིན་ལས་མ་ཡིན་པར་སྐུ་གསུམ་ཆར་གྱི་ཕྲིན་ལས་ཡིན་ནོ། །ཞེས་ཤེས་པའི་ཆེད་དུ་ལོགས་སུ་བསྟན་པའི་ཕྱིར་རོ། །སྐུ་གསུམ་ཆར་གྱི་ཕྲིན་ལས་སུ་ཇི་ལྟར་འགྱུར་སྙམ་ན། སྦྱོར་བཞི་སྒོམ་པའི་རྣམ་སྨིན་དེ་སངས་རྒྱས་རང་སྣང་ལ་ངོ་བོ་ཉིད་སྐུར་འགྱུར་ཞིང་། དེ་ཉིད་བྱང་སེམས་འཕགས་པ་ལ་ལོངས་སྐུ་དང་། རིགས་ཅན་གསུམ་ལ་སྤྲུལ་སྐུར་སྣང་ཞིང་དེས་ཕྲིན་ལས་འདི་དག་མཛད་པའི་ཕྱིར་རོ། །འོ་ན་སྐུ་གསུམ་ཆར་གྱི་ཡོན་ཏན་རྒྱས་བཤད་དུ་འགྱུར་གྱི་སྤྲུལ་སྐུའི་ཡོན་ཏན་རྒྱས་བཤད་དུ་མི་འགྱུར་རོ་སྙམ་ན་ཉེར་བདུན་པོ་འདི་དག་དངོས་སུ་མཛད་པ་པོ་ནི་སྤྲུལ་སྐུ་ཡིན་པས་དེའི་དབང་དུ་བྱས་པའི་ཕྱིར་ན་སྐྱོན་མེད་དོ། །འདི་ལ་དགོངས་ནས་ཉིར་སྣང་ལས། དེ་བཞིན་འཁོར་བ་ཇི་སྲིད་འདི། །ལས་ནི་རྒྱུན་མི་ཆད་པར་འདོད། །ཅེས་པའི་ཚིག་རྐང་གཉིས་སྤྲུལ་སྐུའི་ས་ཁོངས་ལ་སྦྱར་བ་མཛད་དོ། །གཞན་དག་གིས་ནི་མིག་གིས་མཐོང་ཡང་ཙིཏྟས་མ་ཟིན་པར་སྣང་ངོ་། །བསྟན་བཅོས་འདིའི་ཐོག་མར་གླེང་གཞིའི་འགྲེལ་པ་མཆོད་བརྗོད་ཀྱི་སྐབས་སུ་ཕྲིན་ལས་ཉེར་བདུན་ཚང་བས་དེ་དག་གི་དོན་མངོན་རྟོགས་བརྒྱད་དུ་འདུས་པ་དེ་ཉམས་སུ་བླངས་པས་འབྲས་བུ་སྐུ་གསུམ་འབྱུང་ཞིང་དེ་ལས་ཕྲིན་ལས་ཉེར་བདུན་འབྱུང་ལ་དེ་ཉིད་ཀྱང་གླེང་གཞིའི་ཚུལ་གྱི་མཛད་པ་ལས་མ་འདས་པས་མཛད་པ་ཕྲིན་ལས་ཀྱི་འཁོར་ལོ་རྒྱུན་མི་ཆད་པ་མཚོན་པའི་ཆེད་དུ་ཐོག་མར་མཆོད་བརྗོད་དང་། མཇུག་ཏུ་ཕྲིན་ལས་སྨོས་པ་ཡིན་ནོ། །གསུམ་པ་ཡོན་ཏན་གྱི་ཁྱད་པར་བྱེ་བྲག་ཏུ་བཤད་པ་ལ། ཟད་པར་བཤད་པ་དང་། ཟིལ་གནོན་བཤད་པ་གཉིས་ལས། དང་པོ་ལ་བདུན་ཏེ། ངོ་བོ། དབྱེ་བ། གྲངས་ངེས། སྒྲ་དོན། བསྒོམ་པའི་ཚུལ། གྲུབ་པའི་རྟགས། བྱེད་ལས་སོ། །དང་པོ་ནི། ཟད་པར་གྱི་ཏིང་ངེ་འཛིན་གྱི་མཚན་ཉིད། བདག་རྐྱེན་བསམ་གཏན་ལ་བརྟེན་ནས་གང་གི་སྒོ་ནས་ཟད་པར་དུ་འཇོག་པའི་དམིགས་པའི་སྣང་བ་དེས་རང་ཡུལ་གྱི་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ནོ། །ཟད་པར་གྱི་སྐྱེ་མཆེད་ཀྱི་མཚན་ཉིད་འཇོག་ན་དེ་ལྟར་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ཞེས་འཇོག་དགོས་ཏེ། ཀུན་བཏུས་ལས། ཟད་པར་རྒྱས་པར་བྱེད་པ་ཡང་དག་པར་འབྱོར་བའི་ཏིང་ངེ་འཛིན་དང་། ཤེས་རབ་གང་ཡིན་པ་དང་། དེ་དག་དང་མཚུངས་པར་ལྡན་པའི་སེམས་དང་། སེམས་ལས་བྱུང་བའི་ཆོས་རྣམས་ནི་ཟད་པར་གྱི་སྐྱེ་མཆེད་ཅེས་བྱའོ། །ཞེས་གསུངས་པས་སོ། །མཛོད་ལས་ནི། དང་པོ་བརྒྱད་སེམས་བྱུང་མ་ཆགས་པ་དང་། ཐ་མ་གཉིས་ལ་སེམས་སེམས་བྱུང་གཉིས་ཀ་ཡོད་པར་བཤད་དོ། །གཉིས་པ་ལ་ཟད་པར་ས་དང་། ཆུ་དང་། མེ་དང་། རླུང་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ནམ་མཁའ་དང་། རྣམ་པར་ཤེས་པའི་སྐྱེ་མཆེད་དེ་བཅུའོ། །མཚན་ཉིད་རིམ་པ་བཞིན་བདག་རྐྱེན་བསམ་གཏན་གྱི་དངོས་གཞི་ལ་བརྟེན་ནས་དམིགས་པའི་སྣང་བ་ས་ནས་རྣམ་པར་ཤེས་པའི་བར་གྱི་རང་ཡུལ་དེ་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་སྟེ་སོ་སོར་སྦྱར་རོ། །མཛོད་ལྟར་ན། དང་པོ་བརྒྱད་ལ་དེ་ལྟར་སྤྲོ་ནུས་པའི་སེམས་བྱུང་མ་ཆགས་པའི་རང་བཞིན་ཞེས་དང་། ཕྱི་མ་གཉིས་ལ། བདག་རྐྱེན་གཟུགས་མེད་ཀྱི་དངོས་གཞི་ལ་བརྟེན་ནས་ཞེས་སྦྱར་རོ། །གསུམ་པ་ནི། རེག་བྱ་དང་། གཟུགས་ཀྱི་སྐྱེ་མཆེད་དང་། ཆོས་དང་། ཡིད་ཀྱི་སྐྱེ་མཆེད་བཞི་ལ་ཟད་པར་བཞག་ནས་ཅིའི་ཕྱིར་སྐྱེ་མཆེད་གཞན་བརྒྱད་ལ་མི་འཇོག་ཅེ་ན། རེག་བྱ་དང་གཟུགས་གཉིས་ནི། རང་གཞན་གཉིས་ཀ་དང་། གཟུགས་ཅན་གྱི་ཁམས་ཐམས་ཅད་ན་ཡོད་པས་ཁྱབ་པར་སྤྲོ་ནུས་པ་དང་། རྟེན་འབྱུང་བ་མེད་པར་བརྟེན་པ་འབྱུང་འགྱུར་སྤྲོ་མི་ནུས་པས་འབྱུང་བ་བཞིའི་ཟད་པར་བཞག་ལ། ནམ་མཁའ་ནི་ཀུན་ལ་ཁྱབ་ཅིང་རྣམ་པར་ཤེས་པ་ཡུལ་ཅན་ཡིན་པས་དེ་དག་ལ་བཞག་གོ །སྐྱེ་མཆེད་གཞན་རྣམས་ལ་མ་ཡིན་ཏེ། དབང་པོ་ལྔ་ཕྱི་རོལ་དུ་སྤྲོ་མི་ནུས་པའི་ཕྱིར་དང་། སྒྲ་ལ་རྒྱུན་མེད་པའི་ཕྱིར། དྲི་རོ་ནི་གཟུགས་ཁམས་སུ་སྤྲོ་མི་ནུས་པའི་ཕྱིར་རོ། །གཟུགས་མེད་ཀྱི་སྐྱེ་མཆེད་དང་པོ་གཉིས་ལ་ཟད་པར་གཞག་པས་ཕྱི་མ་གཉིས་ལ་ཡང་ཅིའི་ཕྱིར་མི་འཇོག་སྙམ་ན། འདི་ལ་མཁས་པ་དག་དེ་གཉིས་སེམས་ནང་དུ་སྡུད་ཅིང་མི་གསལ་བས་མ་གཞག་གོ །ཅེས་གསུངས་པ་ནི་མི་འཐད་དེ། སྲིད་རྩེའི་སེམས་མི་གསལ་བར་བཤད་ཀྱི་གཟུགས་མེད་དང་པོ་གསུམ་ལ་སེམས་གསལ་མི་གསལ་གྱི་ཁྱད་པར་བཤད་པ་མེད་པའི་ཕྱིར་རོ། །འོ་ན་ཅི་ཞེ་ན། ཟད་པར་འཇོག་པ་ལ་རང་ཡུལ་གྱི་དམིགས་པའི་གཙོ་བོ་དེ་མཐའ་ཡས་པའི་རྣམ་པ་ཅན་དགོས་པ་ལས་གཟུགས་མེད་དང་པོ་གཉིས་ལ་དེ་ཡོད་ཅིང་། ཕྱི་མ་གཉིས་ལ་དེ་མེད་པའི་ཕྱིར་རོ། །བཞི་པ་ནི། ཟད་པར་དང་། རྒྱས་པར་དང་། ཁྱབ་པར་དང་། མཐའ་དག་ཅེས་པ་རྣམས་མིང་གི་རྣམ་གྲངས་ཡིན་པས། དམིགས་ཡུལ་ས་ལ་སོགས་པ་དེས་ཡུལ་མཐའ་དག་ལ་ཟད་ཟད་ཀྱི་བར་དུ་རྒྱས་པར་བྱེད། ཁྱབ་པར་བྱེད་པའི་དོན་གྱིས་ན་ཟད་པར་ཞེས་བྱ་སྟེ། ཉིར་སྣང་ལས། རྒྱུན་མི་ཆད་པར་ཁྱབ་པར་སྤྲོ་བས་ན་ཟད་པར་གྱི་སྐྱེ་མཆེད་ཅེས་དང་། རྒྱལ་སྲས་མ་ལས། བར་ཆད་མེད་པར་ཟད་པར་ས་ལ་སོགས་པ་རྒྱས་ཤིང་ཁྱབ་པར་བྱེད་པས་དེའི་ཕྱིར་ཟད་པར་གྱི་སྐྱེ་མཆེད་རྣམས་ཞེས་བྱའོ། །ཞེས་གསུངས་སོ། །ལྔ་པ་ལ་བཞི་སྟེ། ལུས་རྟེན། སེམས་རྟེན། དམིགས་པའི་རྟེན། སྦྱོར་དངོས་ཀྱི་ཡིད་ལ་བྱེད་ཚུལ་ལོ། །དང་པོ་ལ། སྔ་མ་བརྒྱད་ནི་འདོད་པའི་རྟེན་ཅན་ཏེ། ཐོས་བསམ་གྱི་མཐུས་རབ་ཏུ་བསྐྱེད་པར་བྱ་བ་ཡིན་པའི་ཕྱིར་རོ། །ཐ་མ་གཉིས་ནི་ཀུན་བཏུས་ལྟར་ན་འདོད་གཟུགས་ཀྱི་རྟེན་ཅན་ཡིན་ལ། མཛོད་ལྟར་ན། ཁམས་གསུམ་ཆར་གྱི་རྟེན་ཅན་ཡིན་ཏེ། གཟུགས་མེད་ཅེས་བྱ་ཁམས་གསུམ་གྱི། །རྟེན་ཅན་ལྷག་མ་མི་ལས་སྐྱེ། །ཞེས་སོ། །གཉིས་པ་ནི། ཀུན་ལས་བཏུས་ལས། ཐམས་ཅད་ཀྱང་བསམ་གཏན་གྱི་དངོས་གཞི་ལ་བརྟེན་པར་བཤད་ལ། མཛོད་ལས། ཐ་མ་གཉིས་གཟུགས་མེད་ཀྱི་དངོས་གཞི་དག་པ་བར་བཤད་དོ། །གསུམ་པ་ལ་སྔར་སྦྱང་བར་བྱས་པའི་དམིགས་རྟེན་དང་། སྔར་སྦྱང་བར་མ་བྱས་པའི་དམིགས་རྟེན་གཉིས་ལས། དང་པོ་ནི། ཆུ་ཀླུང་དང་། ནགས་ཀྱི་མེ་འབར་བ་དང་། རླུང་གིས་བསྐྱོད་པའི་འོད་མ་དང་། མེ་ཏོག་ལ་སོགས་པ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། དངུལ་དང་། ཟླ་བའི་དཀྱིལ་འཁོར་ལ་སོགས་པ་དང་། ཉི་མ་དང་ཟླ་བའི་འོད་ཀྱིས་ཕོག་པའི་རྩིག་པ་དང་། སྐར་ཁུང་གི་ནང་དང་། བུ་ག་ལ་སོགས་པ་རྣམས་མཐོང་བ་ཙམ་གྱིས་རིམ་པ་ལྟར་ཟད་པར་ཆུ་ནས་ནམ་མཁའི་བར་གྱི་ཏིང་ངེ་འཛིན་སྐྱེ་བར་འགྱུར་རོ། །གཉིས་པ་ནི། ཟད་པར་སའི་དམིགས་རྟེན་ནི་ཉིར་སྣང་ལས་མ་བཤད་ལ། གཞན་རྣམས་ཀྱི་རིམ་པ་ལྟར་ལྷུང་བཟེད་ལ་སོགས་པའི་སྣོད་དྲི་མ་མེད་པ་ཆུ་གཙང་མས་བཀང་བ་དང་། ཐབ་ཁུང་གྲུ་བཞི་པར་འོག་ཏུ་བུད་ཤིང་དང་། བར་དུ་མེ་དང་། སྟེང་དུ་དུ་བ་འཐུལ་བ་དང་། ཡན་ལག་གི་ཕྱོགས་གང་དུ་རླུང་གིས་རེག་པར་འགྱུར་བའི་སྐར་ཁུང་སོགས་ལས་བྱུང་བའི་རླུང་དང་། མཚོན་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཀྱིས་ཟླུམ་པོར་བྱས་ཏེ། ཁ་དོག་གཞན་གྱིས་བཅད་པར་བྱས་པ་དང་། མཐོ་གང་སོར་བཞི་ཙམ་གྱི་བུ་ག་ནམ་མཁའི་མཐོངས་བཏོད་པ་དང་། བུམ་པའི་ནང་གི་མར་མེའི་འོད་བུ་གའི་ངོས་ནས་རྩིག་པ་ལ་ཕོག་པ་རྣམས་སོ། །བཞི་པ་ནི། བསམ་གཏན་གྱི་དངོས་གཞི་ཐོབ་པའི་གང་ཟག་གིས་དམིགས་རྟེན་དེ་དག་ལ་རྩེ་གཅིག་ཏུ་དམིགས་ནས་སྦྱོར་བའི་དུས་སུ་དམིགས་རྟེན་འདིས་ཤེས་བྱ་ཐམས་ཅད་ལ་ཁྱབ་པར་བྱའོ་སྙམ་པའི་མོས་པ་ཡིད་བྱེད་སྔོན་དུ་བཏང་སྟེ་དངོས་གཞི་དུས་སུ་ཡང་། ས་ས། ཆུ་ཆུ། ཞེས་པའི་མིང་ཙམ་ལ་དམིགས་ཏེ། རྩེ་གཅིག་ཏུ་བསྒོམ་མོ། །དྲུག་པ་ལ་འཛིན་པའི་མཚན་མ་དང་། སྣང་བའི་མཚན་མ་གཉིས་ལས། དང་པོ་ནི། ས་ལ་མ་བཤད་ཅིང་། གཞན་རྣམས་ལ་རིམ་པ་ལྟར་ཆུའི་སྦུ་བ་དང་། ཆུ་བུར་འདྲེས་པའི་ཆུ་གཡོ་བའི་རྣམ་པ་ཅན་དང་། མེ་ལྕེ་མཆེད་ཅིང་ལྷུང་བ་ལྟ་བུར་གཡོ་བ་དང་། འོ་མ་བསྐོལ་བ་ས་ལ་ཕོག་མ་ཐག་པའི་རླངས་པ་འཐུལ་བ་ལྟ་བུ་དང་། སྔོན་པོ་ལ་སོགས་པ་བཞི་ལ་མེ་ཏོག་གེ་སར་དང་། སྡོང་བུ་མེད་པ་ལྟ་བུ་དང་། ཐ་མ་གཉིས་ལ་རྩིག་པའི་བུ་ག་དང་འདྲ་བར་གྱུར་ཏེ། བསྐྱེད་ཀྱང་མི་འཕེལ་བ་དང་། ས་ལས་བྱས་པའི་དཀྱིལ་འཁོར་དང་འདྲ་བར་ཐོག་བཅས་སུ་སྣང་བ་སྟེ་འཛིན་པའི་མཚན་མའི་དོན་ནི་མ་འབྱོངས་པའི་རྟགས་ཡིན་ནོ། །གཉིས་པ་ཡང་ས་ལ་མ་བཤད་ལ། ཆུ་ལ་སོགས་པ་གསུམ་ལ་ནམ་མཁའ་ལ་གནས་པའི་ནོར་བུའི་རླུང་གཡབ་ལྟར་མི་གཡོ་བའི་རྣམ་པ་ཅན་དུ་སྣང་བ་དང་། ནམ་མཁར་གནས་པའི་ཟླ་བ་དམར་པོ་ཟླུམ་པོ་ལྟར་ཉེ་བར་གནས་པ་དང་འདུག་པ་ལྟར་མི་གཡོ་བ་དང་། སྔོན་པོ་ལ་སོགས་པ་བཞི་ལ་དམིགས་པའི་རྟེན་ནམ་མཁར་འཕགས་ནས་ནོར་བུའི་རླུང་གཡབ་ལྟར་གནས་པ་དང་། ཐ་མ་གཉིས་ལ་སྣང་བའི་ཚོགས་སྟུག་པོ་རབ་ཏུ་དྭངས་པ་དང་འདྲ་བར་ཐམས་ཅད་གསལ་བ་དང་། ནམ་མཁའི་དཀྱིལ་འཁོར་ལྟར་གྱུར་ནས་བསྐྱེད་ནས་འཕེལ་བར་གྱུར་པ་རྣམས་སོ། །སྣང་བའི་མཚན་མའི་དོན་ནི་འབྱོངས་པའི་རྟགས་སོ། །བདུན་པ་ནི། རིམ་པ་ལྟར་གཅིག་ཏུ་གྱུར་ནས་མང་པོར་གྱུར་བ་དང་། ནམ་མཁའ་དང་ཆུ་ལ་ཡང་གོམ་པ་དོར་ནས་འགྲོ་བ་དང་། ས་ལ་ཡང་ཆུ་ལ་འཇུག་པ་ལྟར་བྱེད་པ་དང་། བདུད་ཀྱི་གཞལ་ཡས་ཁང་བསྲེགས་པའི་མེ་འབར་ཞིང་མེ་མདག་གི་ཆར་འབེབས་པ་སོགས་དང་། རླུང་ལྟར་མགྱོགས་པར་འགྲོ་བ་དང་། གཟུགས་སོགས་སྔོན་པོར་སྤྲུལ་ཞིང་མུན་པར་བྱེད་པ་དང་། སེར་པོར་སྤྲུལ་ཞིང་གསེར་དུ་བསྒྱུར་བ་དང་། གཟུགས་དམར་པོར་སྤྲུལ་པ་དང་། དཀར་པོར་སྤྲུལ་པ་དང་། རྩིག་པ་སོགས་ལ་ཐོགས་མེད་དུ་འགྲོ་བ་དང་། གཟུགས་གསལ་བར་བྱེད་པ་དང་། གཉིད་དང་རྨུགས་པ་རྒྱང་རིང་དུ་བྱེད་པའོ། །གཉིས་པ་ཟིལ་གནོན་ལ། མདོ་ལས་ཇི་ལྟར་གསུངས་པའི་ཚུལ། དེའི་དོན་བཤད་པ། སྐབས་ཀྱི་དོན་ངོས་གཟུང་བ་དང་གསུམ་ལས། དང་པོ་ནི། མདོ་ལས། ནང་གཟུགས་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་། ཁོ་དོག་ངན་པ་རྣམས་ལ་ལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟར་འདུ་ཤེས་པར་གྱུར་པ་དེ་ནི་ཟིལ་གྱིས་གནོན་པའི་སྐྱེ་མཆེད་དང་པོའོ། །དེ་བཞིན་དུ། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ལ་སྦྱར་བ་དང་། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་དང་ཆེན་པོ་ལ་སྦྱར་བ་གཉིས་ཏེ་བཞི་གསུངས་སོ། །ནང་གཟུགས་མེད་པར་འདུ་ཤེས་པ་ཁོ་ནས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་རྣམས་ལ་བལྟ་སྟེ། དཔེར་ན། ཟར་མའི་མེ་ཏོག་གམ་ཡུལ་བཱ་རཱ་ཎ་སཱིའི་རས་ཕུན་སུམ་ཚོགས་པ་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་བཞིན་དུ། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བའི་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟར་འདུ་ཤེས་པ་འདི་ནི་ཟིལ་གྱིས་གནོན་པའི་སྐྱེ་མཆེད་ལྔ་པའོ། །དེ་བཞིན་དུ། སེར་པོ་ལ་དོང་ཀའི་མེ་ཏོག་ལྟ་བུ་དང་། དམར་པོ་ལ་མཉྫུ་ཛཱི་བ་ཀའི་མེ་ཏོག་ལྟ་བུ་དང་། དཀར་པོ་ལ་སྐར་མ་པ་བ་སངས་དང་སྦྱར་ནས་གསུངས་སོ། །གཉིས་པ་ནི། ཆུང་ངུ་ནི་སེམས་ཅན་གྱི་གཟུགས། ཆེན་པོ་ནི་སྣོད་ཀྱི་འཇིག་རྟེན་གྱི་གཟུགས། བཟང་པོ་དང་། ངན་པ་ནི་སོ་སོར་སྦྱར་རོ། །སྔོན་པོ་ཞེས་སོགས་ཀྱིས་ནི་མདོར་བསྟན། ཁ་དོག་སྔོན་པོ། ཞེས་སོགས་ཀྱིས་ནི་ལྷན་སྐྱེས་དང་། སྔོན་པོ་ལྟ་བུར་སྟོན་པ་ཞེས་སོགས་ཀྱིས་ནི་སྦྱར་བྱུང་དང་། འོད་སྔོན་པོ་འབྱུང་བ་ཞེས་སོགས་ཀྱིས་ནི་གཉིས་ཀ་ལ་སྔོན་པོ་སོགས་ཀྱི་མདངས་ཡོད་པར་སྟོན་ཏོ། །མེ་ཏོག་ནི་ལྷན་སྐྱེས་ཀྱི་དཔེ། རས་ནི་སྦྱར་བྱུང་གི་དཔེ། ཡུལ་བཱ་རཱ་ཎ་སཱིའི་རས་གསུངས་པ་ནི་ཁ་དོག་ཆེས་གསལ་བའི་དཔེའོ། །ཟིལ་གྱིས་གནོན་པ་ནི། ཇི་ལྟར་འདོད་པ་བཞིན་དུ་དབང་བསྒྱུར་བའོ། །ཤེས་པ་ནི་ཞི་གནས་ཀྱིས་ཤེས་པའོ། །མཐོང་བ་ནི་ལྷག་མཐོང་གིས་མཐོང་བའོ། །གསུམ་པ་ནི། ཟིལ་གྱིས་གནོན་པའི་སྐྱེ་མཆེད་ཀྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས། རང་ཡུལ་གྱི་གཟུགས་ཐམས་ཅད་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱིས་གནོན་པར་ནུས་པའི་ཞི་ལྷག་ཟུང་འཇུག་གོ །དེ་ལ་དབྱེ་ན་བརྒྱད་ཡོད་པ་ལ། གཟུགས་ཅན་གཟུགས་ཆུང་ངུ་ལ་ལྟ་བའི་ཟིལ་གནོན་གྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་ལ་གཟུགས་སྣང་མི་དོར་བའི་སྒོ་ནས། རང་ཡུལ་དུ་གྱུར་པའི་སེམས་ཅན་གྱི་གཟུགས་བཟང་ངན་ཐམས་ཅད་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱི་གནོན་ནུས་པའི་ཞི་ལྷག་ཟུང་འཇུག་གོ །གཟུགས་ཅན་གཟུགས་ཆེན་པོ་ལ་ལྟ་བའི་ཟིལ་གནོན་གྱི་མཚན་ཉིད། གཞན་སྔ་མ་དང་འདྲ་བ་ལས། རང་ཡུལ་དུ་གྱུར་པའི་སྣོད་ཀྱི་གཟུགས་བཟང་ངན་ཐམས་ཅད་ཅེས་སྦྱར་རོ། །གཟུགས་མེད་གཟུགས་ཆུང་ངུ་ལ་བལྟ་བའི་ཟིལ་གནོན་གྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ཏེ། རང་ལ་གཟུགས་སྣང་དོར་བའི་སྒོ་ནས། སེམས་ཅན་གྱི་གཟུགས་བཟང་ངན་ཐམས་ཅད་ཅེས་སོགས་དང་། གཟུགས་མེད་གཟུགས་ཆེན་པོ་ལ་བལྟ་བའི་ཟིལ་གནོན་གྱི་མཚན་ཉིད། གཞན་འདྲ་བ་ལས་རང་ཡུལ་དུ་གྱུར་པའི་སྣོད་ཀྱི་གཟུགས་བཟང་ངན་ཐམས་ཅད་ཞེས་སོགས་སྦྱར་རོ། །གཟུགས་མེད་གཟུགས་སྔོན་པོ་ལ་བལྟ་བའི་དང་། སེར་པོ་དང་། དམར་པོ་དང་། དཀར་པོ་ལ་བལྟ་བའི་ཟིལ་གནོན་བཞིའི་མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས། རང་ལ་གཟུགས་སྣང་དོར་བའི་སྒོ་ནས། ཕྱི་རོལ་གྱི་གཟུགས་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས། ཟིལ་གྱིས་གནོན་ནུས་པའི་ཞི་ལྷག་ཟུང་འཇུག་གོ །དང་པོ་གཉིས་རྣམ་ཐར་དང་པོ་དང་། དེ་ནས་གཉིས་རྣམ་ཐར་གཉིས་པ་དང་། ཕྱི་མ་བཞི་སྡུག་པའི་རྣམ་ཐར་གྱི་རྒྱུ་ལས་བྱུང་བར་བཤད་དོ། །དེ་དག་གིས་རྒྱས་པ་ལ་དད་པ་ལ་བརྒྱད་དུ་ཕྱེ་བའམ་ཚིག་གི་དོན་བཤད་ཟིན་ནས་བར་པ་ལ་དད་པ་ལ་དྲུག་ཏུ་བསྟན་པའམ། བཤད་ཐབས་ཀྱི་མན་ངག་ལྔའི་ནང་ནས་མཚམས་སྦྱར་བ་ནི། མཚན་ཉིད་དེ་ཡི་སྦྱོར་བ་དང་། །ཞེས་སོགས་ཚིགས་བཅད་གཅིག་སྟེ། ཉིར་སྣང་ལས། ཐམས་ཅད་མཁྱེན་པ་ཉིད་གསུམ་ནི། མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །རྣམ་པ་ཐམས་ཅད་མངོན་པར་རྫོགས་པར་རྟོགས་པ་ནི་སྦྱོར་བའོ། །རྩེ་མོའི་མངོན་པར་རྟོགས་པ་ནི་རབ་ཏུ་གྱུར་པ་དང་ལྡན་པའོ། །མཐར་གྱིས་པའི་མངོན་པར་རྟོགས་པ་ནི་གོ་རིམ་དང་ལྡན་པའོ། །སྐད་ཅིག་མ་གཅིག་ལ་མངོན་པར་རྫོགས་པར་བྱང་ཆུབ་པ་ནི་མཐར་ཐུག་པའོ། །ཆོས་ཀྱི་སྐུ་མཛད་པ་དང་བཅས་པ་ནི་རྣམ་པར་སྨིན་པ་སྟེ། དེ་ལྟར་ན་འདི་ནི་བཤད་པའི་རྣམ་གྲངས་གཞན་ཡིན་ནོ། །ཞེས་གསུངས་སོ། །འདིར་འདས་པ་ལ་སྙེགས་པས་དེ་ལྔ་པོ་སྔ་མ་སྔ་མ་ལ་སྙེགས་པ་དང་། མཁྱེན་གསུམ་ལ་སྙེགས་པ་གང་གི་ཡང་གསལ་ཁ་མི་སྣང་ཡང་། སློབ་དཔོན་གྱིས་དེའི་དགོངས་པ་མཁྱེན་གསུམ་ལ་སྙེགས་པར་མཛད་དོ། །འདི་དག་མཚམས་སྦྱར་དུ་འགྲོ་བའི་རྒྱུ་མཚན་ནི་སྔར་བཤད་ཟིན་ཅིང་། འདིར་མཁྱེན་གསུམ་གཅིག་ཏུ་བསྡུ་བའི་དགོས་པ་དང་། དེ་ལྔ་པོ་མཁྱེན་གསུམ་ལ་སྙེགས་ཀྱང་སྔ་ཕྱི་མཚམས་སྦྱོར་བའི་ཚིག་ཏུ་འགྲོ་ཚུལ་རྣམས་ནི་ཞིབ་ཏུ་ངག་ལས་ཤེས་པར་བྱའོ། །དེའི་འོག་ཏུ་བསྡུས་པ་ལ་དད་པ་ལ་གསུམ་དུ་བསྡུ་བའམ། བཤད་ཐབས་ཀྱི་མན་ངག་ལྔའི་ནང་ནས་བརྒལ་ལན་ནི། ཡུལ་ནི་རྣམ་པ་གསུམ་པོ་རྒྱུ། །ཞེས་སོགས་ཚིགས་བཅད་གཅིག་གིས་སྟོན་ཏོ། །འདི་ལ་དགོས་པ་གཉིས་ལས། གདུལ་བྱ་བརྗོད་བྱའི་རྐང་གྲངས་ཉུང་བ་ལ་དགའ་བ་རྣམས་ལ་བརྗོད་བྱའི་གཙོ་བོ་དངོས་པོ་གསུམ་དུ་བསྡུས་ནས་སྟོན་པ་དང་། མངོན་པར་རྟོགས་པ་བརྒྱད་དུ་བསྟན་པ་དང་། དྲུག་ཏུ་བསྟན་པ་ལ་འགལ་བར་རྒོལ་བ་ལ་དེ་ནི་མི་འགལ་ཏེ། ཕྱེ་ན་བརྒྱད་དུ་ཡོད་ཀྱང་མཁྱེན་པ་གསུམ་པོ་ཐོབ་བྱའི་འབྲས་བུ་ཤེར་ཕྱིན་མཚན་ཉིད་པ་གཅིག་ཏུ་བསྡུ་བའི་ཚེ་ན་དྲུག་ཏུ་འགྱུར་ཞིང་། སྦྱོར་བ་བཞི་པོ་ཡང་ཐོབ་བྱེད་ཀྱི་རྒྱུ་ཞེས་པ་གཅིག་ཏུ་བསྡུ་བའི་ཚེ་ན། མངོན་པར་རྟོགས་པ་གསུམ་དུ་འགྱུར་བའི་ཕྱིར། ཞེས་པ་བརྒལ་ལན་གྱི་དགོས་པ་ཡང་ཡོད་དོ། །འདིར་འཕགས་གྲོལ་དང་། སངས་རྒྱས་ཡེ་ཤེས་ཞབས་ཀྱིས་ཡུལ་དང་། རྒྱུ་དང་། འབྲས་བུ་གསུམ་དུ་མཛད་ནས། དང་པོ་ནི། ཡུལ་ནི་རྣམ་པ་གསུམ་པོ་ཞེས་དང་། གཉིས་པ་ནི། རྒྱུ་སྦྱོར་བ་བཞི་ཡི་བདག་ཉིད་དང་། །ཞེས་དང་། གསུམ་པ་ནི། ཆོས་སྐུ་ཕྲིན་ལས་འབྲས་བུ་ནི། །ཞེས་པས་སྟོན་པར་བཞེད་དོ། །སློབ་དཔོན་གྱིས་ནི་འཇུག་པའི་ཡུལ་གྱི་རྒྱུ། ཉམས་ལེན་གྱི་སྦྱོར་བ། ཉམས་སུ་བླངས་པའི་འབྲས་བུ་དང་གསུམ་དུ་མཛད་ནས། ཚིག་རྐང་དང་པོ་གསུམ་རེ་རེས་སྟོན་པར་མཛད་དོ། །དེ་དག་ཀྱང་མངོན་པར་རྟོགས་པ་བརྒྱད་ཆར་གང་ཟག་ཅིག་འཚང་རྒྱ་བའི་ལམ་གྱི་རིམ་པར་སྒྲིག་པའི་དབང་དུ་བྱས་པ་ཡིན་གྱི། ཡང་དག་པར་ན་མངོན་པར་རྟོགས་པ་བརྒྱད་པོ་རེ་རེའི་སྐབས་སུ་ཡང་འཚང་རྒྱ་བའི་ལམ་རིམ་རེ་རེ་ཚང་བར་ཡོད་ཅིང་། སེམས་བསྐྱེད་དང་། གདམས་ངག་ལ་སོགས་པ་མཚོན་བྱེད་ཀྱི་ཆོས་རེ་རེ་ལ་ཡང་འཚང་རྒྱ་བའི་ལམ་རིམ་ཚང་བར་ཡོད་ལ། ཕྲིན་ལས་ཉི་ཤུ་རྩ་བདུན་ཉིད་ལ་ཡང་རྫོགས་པའི་སངས་རྒྱས་ཀྱི་གསུང་རབ་ཀྱི་བརྗོད་བྱ་མ་ལུས་པ་ཚང་བ་སོགས་ཟབ་ཅིང་རྒྱ་ཆེ་བའི་བློ་གྲོས་ཀྱིས་ཁྱབ་པར་སྤྲོ་བར་བྱ་བ་ཡིན་ནོ།། །།གཤེགས་དང་གཤེགས་བཞིན་གཤེགས་པར་འགྱུར་བའི་བདེ་གཤེགས་སྲས་བཅས་ཀྱིས། །བགྲོད་དང་བགྲོད་བཞིན་བགྲོད་པར་འགྱུར་བའི་ལམ་འདི་མཁས་རྣམས་ཀྱིས། །ཕྱེ་དང་ཕྱེ་བཞིན་ཕྱེ་བར་འགྱུར་ལས་གཞན་དུ་བདག་བློ་ཡིས། །འཆད་དང་འཆད་བཞིན་འཆད་པར་འགྱུར་བ་མེད་མོད་དེ་ལྟ་ནའང་། །སྐྱེ་དང་སྐྱེ་བར་ལུས་བཟང་རྟེན་ལ་ལུགས་བཟང་གོམས་པ་དང་། །ཡང་དང་ཡང་དུ་ལྷ་མཆོག་དེ་ལ་སེམས་མཆོག་དད་བྱས་ཤིང་། །མཁས་དང་མཁས་པའི་གསུང་རབ་ཚོགས་ལ་ཡིད་རབ་བརྩོན་པའི་མཐུས། །རྒྱལ་དང་རྒྱལ་སྲས་ཇི་བཞིན་དགོངས་པ་ཚུལ་བཞིན་ཕྱེ་བ་འདི། །རྒྱ་ཆེན་བསོྃད་ནམྃས་ལུས་སྟོབས་རབ་རྒྱས་ཏེ། །བདེ་གཤེགས་གསུང་རབ་སེྃང་གེྃའི་ང་རོ་ཡིས། །ལོག་སྨྲའི་རི་དྭགས་མཐའ་དག་སྐྲག་བྱེད་ཅིང་། །ཐུབ་བསྟན་གངས་རི་སྐྱོང་བ་དེ་ཡིས་སྦྱར། །བརྗོད་བྱ་དོན་ལྡན་རྗོད་བྱེད་ཆོས་དང་འབྲེལ། །བྱེད་ལས་ཁམས་གསུམ་ཉོན་མོངས་སྤོང་བྱེད་ཅིང་། །ཞི་བའི་ཕན་ཡོན་སྟོན་པ་རྒྱལ་བ་ཡི། །བཀའ་ཡིན་དེ་ལས་བཟློག་པ་གཞན་དུ་གསུངས། །རྒྱལ་བའི་བསྟན་པ་འབའ་ཞིག་དབང་བྱས་ཤིང་། །རྣམ་གཡེང་མེད་པས་ཐར་པའི་ཆེད་དུ་བཤད། །དེ་ཡང་དྲང་སྲོང་བཀའ་བཞིན་སྤྱི་བོ་ཡིས། །བླང་བྱ་ཡིན་པར་ཚད་ལྡན་གཞུང་ལས་གསུངས། །ཚུ་རོལ་མཐོང་བས་བླ་མའི་མན་ངག་དང་། །ཡིད་ཆེས་ལུང་དང་རིགས་པ་རྣམ་བཞི་ལ། །བརྟེན་ནས་གསུང་རབ་དགོངས་པ་འགྲེལ་པ་ནི། །འཇིག་རྟེན་སོ་སོའི་ལེགས་བཤད་ཡིན་པར་གསུངས། །དེ་སླད་འཕགས་མཆོག་མཁའ་ལྡིང་བགྲོད་པ་ཡི། །གསུང་རབ་བྱ་ལམ་ཡངས་པར་བྱིས་པའི་བློ། །སྦྲང་རྩི་འཛིན་པ་རྐང་དྲུག་ལྡན་པ་ཡང་། །རྗེས་སུ་བརྩོན་པ་ཅུང་ཟད་བྱས་པ་ལགས། །དེ་ལས་བྱུང་བའི་རྣམ་དཀར་དགེ་བའི་ཚོགས། །ཉི་མའི་འོད་ལྟར་གསལ་བ་གང་ཐོབ་དེས། །མཁའ་མཉམ་འགྲོ་བའི་སྙིང་མུན་ཀུན་བསལ་ནས། །ཐེག་མཆོག་ལམ་གྱི་སྣང་བ་རྒྱས་པར་ཤོག །བདག་ཀྱང་ཚེ་འདིའི་སྣང་བ་ནུབ་མ་ཐག །མི་ཕམ་ཆོས་རྗེའི་ཞལ་མཆོག་མཐོང་གྱུར་ཏེ། །བསྟན་བཅོས་འདི་ཡི་ཚིག་དང་དོན་རྣམས་ཀུན། །ཐོས་ནས་སྒྲོ་འདོགས་མ་ལུས་ཆོད་པར་ཤོག །ཚེ་རབས་ཀུན་ཏུ་སྒོ་གསུམ་བྱ་བ་རྣམས། །མཐའ་དག་འགྲོ་ལ་ཕན་པའི་རྒྱུར་གྱུར་ནས། །རླབས་ཆེན་བྱང་ཆུབ་སྤྱོད་པ་མཐར་ཕྱིན་ཏེ། །སྐུ་གསུམ་ཕྲིན་ལས་བཅས་པ་མྱུར་ཐོབ་ཤོག །དམ་ཆོས་སྒྲུབ་ལ་བར་དུ་གཅོད་པ་ཡི། །རླུང་མཁྲིས་བད་ཀན་ལ་སོགས་ཉེར་འཚེ་དང་། །མི་དང་མི་མིན་འབྱུང་པོའི་གནོད་པ་སོགས། །རྣམ་རྟོག་མ་ལུས་དབྱིངས་སུ་དག་གྱུར་ཅིག །བདག་གི་གདུལ་བྱར་གྱུར་པ་ཐམས་ཅད་ཀྱང་། །ཚུལ་ཁྲིམས་དག་ཅིང་བྱང་ཆུབ་སེམས་དང་ལྡན། །རབ་འབྱམས་གཞུང་གི་དོན་ལ་མཁས་གྱུར་ཏེ། །བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག། །།ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཞེས་བྱ་བའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་འདི་ནི། རྗེ་བཙུན་དམ་པ་སངས་རྒྱས་ཀྱི་སྤྲུལ་པ་རོང་སྟོན་ཆོས་ཀྱི་རྒྱལ་པོ་དང་། སྨྲ་བའི་ཟླ་བ་མཚུངས་པ་མེད་པ་ཀུན་མཁྱེན་སངས་རྒྱས་འཕེལ་ལ་སོགས་པ། མཁས་པའི་མཁས་པ་དུ་མའི་ཞབས་རྡུལ་སྤྱི་བོས་བླངས་པ་ལ་བརྟེན་ནས། སྡེ་སྣོད་གསུམ་དང་། རྒྱུད་སྡེ་བཞི་ལ་བློ་གྲོས་ཀྱི་སྣང་བ་ཅུང་ཟད་ཐོབ་ཅིང་། ཁྱད་པར་དུ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལུགས་ལ། ངེས་པའི་ཤེས་པ་གཏིང་ནས་སྐྱེས་པ་མང་དུ་ཐོས་པའི་དགེ་སློང་བསོད་ནམས་སེང་གེས་དོན་གཉེར་དུ་མས་ཡང་ཡང་བསྐུལ་ཞིང་། ལ་སྟོད་མདོག་གི་སའི་ཆ་ལ་སྐྱེས་པ་སྙོམ་ལས་པ་གཞོན་ནུ་བཟང་པོས་འཕྲལ་དུ་བསྐུལ་ཏེ་ཡི་གེའི་རྐྱེན་སྦྱར་བ་ལ་བརྟེན་ནས། ལྕགས་ཕོ་སྟག་གི་ལོ་ས་ག་ཟླ་བའི་ཡར་ཚེས་བཅོ་ལྔ་ལ། རྟ་ནག་གསེར་གླིང་གི་དགོན་པར་སྦྱར་བའོ།། །།འདིས་ཀྱང་བསྟན་པ་རིན་པོ་ཆེ་དར་རྒྱས་སུ་གྱུར་ཅིག། །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

འགྲེལ་པ་དོན་གསལ་གྱི་ངག་དོན།

འགྲེལ་པ་དོན་གསལ་གྱི་ངག་དོན་བཞུགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་ངག་དོན་སྦས་དོན་ཟབ་མོའི་གནད་ཀྱི་སྒྲོན་མེ་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་དག་ལྟ་བ་གང་ལ་ལྟ། །ཇི་ལྟར་ལྟ་བ་རྣམ་དག་ཀྱང་། །ཡང་དག་དོན་ལ་ལྟ་བའི་ཚུལ། །སྟོན་མཛད་བླ་མ་ལྷར་བཅས་མཆོད། །མཁའ་ལྟར་རྣམ་དག་ཉེར་ཞིའི་གོ་འཕང་མཆོག་བརྙེས་ཐོག་མ་མི་མངོན་ཡང་། །ཏིང་འཛིན་མངལ་ལྡན་སྟོང་ཉིད་ཡུམ་ལ་ཐབས་མཁས་ས་བོན་གྱིས་བསྐྲུན་ནས། །སྙིང་རྗེའི་མ་མས་བསྐྱངས་པའི་རྒྱལ་སྲས་ཚུལ་འཛིན་སླར་ཡང་མི་མཇེད་འདིར། །རྒྱལ་བའི་མཛད་པས་གྲངས་མེད་ཆོས་སྒོ་འབྱེད་མཛད་མི་ཕམ་མགོན་ལ་འདུད། །མགོན་པོ་གང་གི་གསུང་རབ་མཆོག་ལ་སྔོན་སྦྱང་བག་ཆགས་སད་པ་དང་། །ཚེ་འདིར་དམ་པའི་མགོན་གྱིས་བཟུང་ཞིང་བརྩོན་པ་དུ་མས་སྦྱངས་པའི་མཐུས། །ངེས་དོན་ཟབ་མོའི་དོན་ལ་མི་འཇིགས་སྤོབས་པ་ཐོབ་པ་ལས། །འདིར་ནི་ངག་དོན་གནད་ཀྱི་སྒྲོན་མེ་གཟུར་གནས་བློ་ལྡན་རྣམས་ལ་སྦྱིན། །འདི་ལ་གསུམ་སྟེ། བསྟན་བཅོས་ལ་འཇུག་པའི་ཡན་ལག ཡན་ལག་ཅན་གྱི་བསྟན་བཅོས། བསྟན་བཅོས་ཇི་ལྟར་བསྒྱུར་བའི་ཚུལ་ལོ། །དང་པོ་ལ་གསུམ་སྟེ། ཐ་སྙད་རྟོགས་པའི་དོན་དུ་མཚན་གྱི་དོན། གཞུང་ཚད་རྟོགས་པའི་དོན་དུ་བམ་པོའི་གྲངས། གུས་པས་འཇུག་པའི་དོན་དུ་ཕྱག་འཚལ་བའོ། །དང་པོ་ནི། རྒྱཾ་གརཾ་རྔོག་ལོ་ཙཱ་བས་འགྲེལ་པ་དོན་གསལ་བསྒྱུར་བའི་ཐོག་མར་མཚན་དོན་སྨོས་པ་ཆོས་ཅན། དགོས་པ་ཡོད་དེ། འགྲེལ་པ་དོན་གསལ་གྱི་གླེགས་བམ་བཙལ་སླ་བའི་ཆེད་ཡིན་པའི་ཕྱིར། དེས་དེའི་ཐོག་མར་རྒྱ་སྐད་སྨོས་པ་ཆོས་ཅན། དགོས་པ་ཡོད་དེ། བསྟན་བཅོས་ཁུངས་བཙུན་པར་ཤེས་པ་དང་སཾ་སྐྲྀ་ཏའི་སྐད་ལ་བག་ཆགས་འཇོག་པའི་ཆེད་ཡོད་པའི་ཕྱིར། དེས་དེའི་ཐོག་མར་བོད་སྐད་སྨོས་པ་ཆོས་ཅན། དགོས་པ་ཡོད་དེ། དབང་རྟུལ་གྱིས་མིང་ཙམ་ཤེས་པ་དང་། དབང་རྣོན་གྱིས་བརྗོད་བྱར་རགས་པ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། བམ་པོ། དེས་དེའི་ཐོག་མར་བམ་གྲངས་སྨོས་པ་ཆོས་ཅན། དགོས་པ་ཡོད་དེ། གཞུང་གྲངས་ལྷག་ཆད་སྤོང་བའི་ཆེད་ཡིན་པའི་ཕྱིར། གསུམ་པ་ནི། སངསཾ་རྒྱསཾ་དེས་དེའི་ཐོག་མར་ཡུལ་ཁྱད་པར་ཅན་ལ་མཆོད་པར་བརྗོད་པ་ཆོས་ཅན། དགོས་པ་ཡོད་དེ། འགྱུར་གྱི་བར་ཆད་ཞི་བའི་ཆེད་ཡིན་པའི་ཕྱིར། གཉིས་པ་ལ་གསུམ་སྟེ། བཤད་པ་ལ་འཇུག་པ། བཤད་པ་ཉིད་ཉེ་བར་འགོད་པ། བཤད་པ་ཡོངས་སུ་རྫོགས་པའི་བྱ་བའོ། །དང་པོ་ལ་གསུམ་སྟེ། མཆོད་པར་བརྗོད་པའི་དོན། སློབ་དཔོན་སྔ་མས་ཇི་ལྟར་ཕྱེ་བའི་ཚུལ། རང་ཉིད་ཀྱིས་འགྲེལ་པའི་རྒྱུའོ། །དང་པོ་ནི། ཤེསཾ་རབཾ་སློབ་དཔོན་སེང་གེ་བཟང་པོས་འགྲེལ་པ་དོན་གསལ་རྩོམ་པའི་ཐོག་མར་ཕྱག་འཚལ་བ་ཆོས་ཅན། དགོས་པ་ཡོད་དེ། མངོན་པར་རྟོགས་པའི་རྒྱན་གཞུང་རྒྱས་འབྲིང་བསྡུས་པ་ཀུན་གྱི་རྒྱན་དུ་དབྱེ་བའི་ཆེད་ཡིན་པའི་ཕྱིར། གཉིས་པ་ལ་བཞི་སྟེ། ཐོགས་མེད་ཀྱིས་རྣམ་བཤད་མཛད་ཚུལ། དབྱིག་གཉེན་གྱིས་རྣམ་པར་བཀྲལ་ཚུལ། འཕགས་པ་གྲོལ་སྡེས་རྣམ་པར་ཕྱེ་ཚུལ། བཙུན་པ་གྲོལ་སྡེས་རྣམ་བཤད་བྱས་ཚུལ་ལོ། །དང་པོ་ནི། འགྲོ་ལ་བསམ་སྦྱོར་གྱི་ཡོན་ཏན་ཁྱད་པར་ཅན་གཉིས་དང་ལྡན་པའི་ཐོགས་མེད་ཆོས་ཅན། བསྟན་བཅོས་ཆེན་པོའི་རྣམ་བཤད་མཛད་དེ། མི་ཕམ་མགོན་པོ་ལས་དངོས་སུ་གསན་པ་ལ་བརྟེན་ནས་དེ་ཉིད་རྣམ་ངེས་བརྩམས་པའི་ཕྱིར། གཉིས་པ་ནི། འགྲོཾ་དོནཾ་འགྲོ་དོན་མཆོག་ཏུ་གྱུར་པའི་དབྱིག་གཉེན་ཆོས་ཅན། བསྟན་བཅོས་ཆེན་པོ་རྣམ་པར་བཀྲོལ་ཏེ། སེམས་ཙམ་གྱི་གྲུབ་མཐའ་ལ་བརྟེན་ནས་གཞུང་འགྲེལ་བརྩམས་པའི་ཕྱིར། གསུམ་པ་ནི། འཕགསཾ་པའཾི་འཕགས་པའི་ས་བརྙེས་པའི་གྲོལ་སྡེ་ཆོས་ཅན། བསྟན་བཅོས་ཆེན་པོ་རྣམ་པར་ཕྱེ་སྟེ། དབུ་མ་པའི་གྲུབ་མཐའ་ལ་བརྟེན་ནས་ཉི་ཁྲི་སྣང་བ་བརྩམས་པའི་ཕྱིར། བཞི་པ་ནི། དེཾ་ཡིཾ་དད་པའི་ས་ལ་གནས་པའི་གྲོལ་སྡེ་ཆོས་ཅན། བསྟན་བཅོས་ཆེན་པོའི་རྣམ་བཤད་བྱས་ཏེ། རང་གི་རྟོགས་པ་དང་མཐུན་པར་ཉི་ཁྲི་རྣམ་འགྲེལ་བརྩམས་པའི་ཕྱིར། གསུམ་པ་ལ་གསུམ་སྟེ། རང་གིས་རྟོགས་པ་གཞན་ལས་ཁྱད་པར་དུ་ཞུགས་པ། དབྱེ་བར་རིགས་པའི་རྒྱུ་མཚན། ཁེངས་པ་སྐྱུང་སྟེ་བརྩམས་པར་དམ་བཅའ་བའོ། །དང་པོ་ནི། དེཾ་ལྟརཾ་སེང་བཟང་ཆོས་ཅན། འགྲེལ་བྱེད་གཞན་ལས་ཡ་མཚན་ཆེ་སྟེ། དབྱིག་གཉེན་དང་བཙུན་གྲོལ་གྱིས་མ་རྙེད་པའི་རྒྱན་གྱི་ཚིག་དོན་རྙེད་པའི་ཕྱིར། གཉིས་པ་ནི། དེཾ་ལྟརཾ་ཡུམ་དོན་ཆོས་ཅན། ཁྱོད་ཕྱིན་ཅི་མ་ལོག་པར་རྙེད་པའི་མཁས་པས་དབྱེ་བར་རིགས་ཏེ། ཁྱོད་རྟོག་གེས་རྙེད་པར་དཀའ་ཞིང་སངས་རྒྱས་ཀྱི་བྱིན་རླབས་ཀྱིས་རྙེད་དགོས་པས་ཟབ་མོའི་དོན་ཡིན་པའི་ཕྱིར། གསུམ་པ་ནི། རྣམཾ་པཾ་སེང་བཟང་ཆོས་ཅན། ཡུམ་དོན་ཁྱོད་ཀྱི་མངོན་སུམ་གྱི་སྤྱོད་ཡུལ་མ་ཡིན་ཡང་འགྲེལ་པ་རྩོམ་པ་ལ་སྤྲོ་བ་བསྐྱེད་པའི་རྒྱུ་མཚན་ཡོད་དེ། འགྲེལ་པ་བརྩམས་པས་རང་གཞན་ལ་ཕན་འདོགས་པར་འདོད་པའི་སོ་སྐྱེ་ཡིན་པའི་ཕྱིར་རོ། །གཉིས་པ་བཤད་པ་ཉིད་ཉེ་བར་འགོད་པ་ལ་གསུམ་སྟེ། བརྗོད་བྱ་མངོན་རྟོགས་ལ་འཇུག་པའི་ཡན་ལག་མཆོད་བརྗོད། རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འབྲེལ། བསྟན་བཅོས་ཀྱི་བརྗོད་བྱ་མངོན་པར་རྟོགས་པའོ། །དང་པོ་ལ། མཚམས་སྦྱར། རྩ་བ། འགྲེལ་པ་དང་གསུམ་ལས། དང་པོ་ནི། འཕགཾས་པཾ་མགོན་པོ་བྱམས་པས་རྒྱན་བརྩམས་པའི་ཐོག་མར་ཡུམ་ལ་མཆོད་པར་བརྗོད་པ་ཆོས་ཅན། དགོས་པ་ཡོད་དེ། བསྟན་བཅོས་རྩོམ་པ་པོ་རང་ཉིད་དམ་པའི་སྤྱོད་པ་དང་མཐུན་པར་བསྟན་པའི་སྒོ་ནས་གདུལ་བྱ་གཞན་ཡུམ་ལ་དྭང་བ་སྐྱེད་པའི་ཆེད་ཡིན་པའི་ཕྱིར། གདུལ་བྱ་གཞན་ཡུམ་ལ་དྭང་བ་སྐྱེད་པ་ཆོས་ཅན། དགོས་པ་ཡོད་དེ། ཡུམ་ལ་དོན་གྱིས་འཇུག་པའི་ཆེད་ཡིན་པའི་ཕྱིར། གཉིས་པ་ནི། ཉཾན་ཐོསཾ་བྱམས་མགོན་ཆོས་ཅན། ཡུམ་ལ་མཆོད་པར་བརྗོད་པ་ཡིན་ཏེ། བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་མཁྱེན་པས་སངས་རྒྱས་འཕགས་པ་སྐྱེད་བྱེད་ཀྱི་ཡུམ་བྱེད་པ་དང་། སངས་རྒྱས་འཕགས་པའི་སྐྱེ་མེད་གསུམ་རྟོགས་པའི་མཁྱེན་པས་རིགས་ཅན་གསུམ་ལ་ཆོས་འཁོར་བསྐོར་བའི་བདག་རྐྱེན་བྱེད་པ་དང་། འཕགས་པ་སོ་སོའི་སྐྱེ་མེད་གསུམ་རྟོགས་པའི་མཁྱེན་པས་འཕགས་པ་སོ་སོའི་བཞེད་དོན་སྒྲུབ་པའི་ཡུམ་བྱེད་པའི་ཡོན་ཏན་བརྗོད་པའི་སྒོ་ནས་ཡུམ་ལ་ཕྱག་འཚལ་བ་ཡིན་པའི་ཕྱིར། ཆོས་ཅན་དེ་ཉིད་ཐུགས་དགྱེས་པར་གྱུར་ཅིག གསུམ་པ་ལ་བཞི་སྟེ། དགོས་དོན། བསྡུས་དོན། ཚིག་དོན། བརྒལ་ལན་ནོ། །དང་པོ་ལ་གཉིས་ཏེ། དགོས་པའི་རྐྱེན། དགོས་པ་དངོས་སོ། །དང་པོ་ནི། ཚིགཾས་སུཾ་ཉན་ཐོས་ཞི་བ་ཚོལ་རྣམས་ཞེས་སོགས་ཀྱིས་ཡུམ་གྱི་ཡོན་ཏན་བརྗོད་པ་ཆོས་ཅན། དགོས་པ་ཡོད་དེ། མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་ཡུམ་ལ་དྭང་བ་བསྐྱེད་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། དགོས་པ་སོ་སོའི་རང་བཞིན། ཐུན་མོང་གི་མཇུག་བསྡུ་བའོ། །དང་པོ་ལ་གཉིས་ཏེ། དངོས་ཀྱི་དགོས་པ། བརྒྱུད་པའི་དགོས་པའོ། །དང་པོ་ལ་གཉིས་ཏེ། དབང་རྟུལ་དྭང་བ་སྐྱེ་ཚུལ་དང་། དབང་རྣོན་དྭང་བ་སྐྱེ་ཚུལ་ལོ། །དང་པོ་ནི། དེཾ་ཐོཾས་ཉན་ཐོས་ཞི་བ་ཚོལ་རྣམས་ཞེས་སོགས་ཀྱི་ཚིགས་བཅད་ཆོས་ཅན། ཁྱོད་ལ་བརྟེན་ནས་མཆོད་བརྗོད་ངག་གི་གདུལ་བྱ་དབང་རྟུལ་དྭང་བ་བསྐྱེད་དེ། ཁྱོད་ལ་བརྟེན་ནས་ཡུམ་ལ་ཡོན་ཏན་ཡོད་མེད་མི་དཔྱོད་པར་མྱུར་དུ་དྭང་བ་སྐྱེ་བའི་ཕྱིར། གཉིས་པ་ནི། ཆོཾས་ཀྱིཾ་སྔ་མ་དེ་ཆོས་ཅན། ཁྱོད་ལ་བརྟེན་ནས་མཆོད་བརྗོད་ངག་གི་གདུལ་བྱ་དབང་རྣོན་ཡུམ་ལ་དྭང་བ་སྐྱེ་སྟེ། ཁྱོད་ལ་བརྟེན་ནས་དེ་མཁྱེན་གསུམ་གྱིས་འཕགས་བཞིའི་ཡུམ་བྱེད་ཚུལ་ལ་གནོད་པ་མ་མཐོང་ནས་དྭང་བ་སྐྱེ་བའི་ཕྱིར། གཉིས་པ་ནི། དེ་ལ་མཆོད་བརྗོད་ངག་གི་གདུལ་བྱ་དབང་པོ་རྣོ་རྟུལ་གཉིས་ཡུམ་ལ་དྭང་བ་ཆོས་ཅན། དགོས་པ་ཡོད་དེ། ཡུམ་བརྗོད་བྱར་སྟོན་པའི་གསུང་རབ་ལ་ཐོས་བསམ་གྱིས་འཇུག་པའི་ཆེད་ཡོད་པའི་ཕྱིར། དེ་གཉིས་དེ་ལ་འཇུག་པ་ཆོས་ཅན། དགོས་པ་ཡོད་དེ། བླ་ན་མེད་པའི་བྱང་ཆུབ་ཐོབ་པའི་ཆེད་ཡིན་པའི་ཕྱིར། གཉིས་པ་ནི། དེཾའི་ཕྱིརཾ་འབྲས་ཡུམ་ལ་དྭང་བའི་དད་པ་ཆོས་ཅན། བྱང་ཆུབ་གསུམ་གྱི་རྟོགས་རིགས་འཐོབ་པའི་རྒྱུའི་གཙོ་བོ་ཡིན་ཏེ། དེའི་ཐོག་མའི་བྱེད་རྒྱུ་ཡིན་པའི་ཕྱིར། གཉིས་པ་ནི། དེཾ་ལཾ་ཉན་ཐོས་ཞི་བ་ཚོལ་རྣམས་ཞེས་སོགས་ཀྱི་ཚིགས་བཅད་ཆོས་ཅན། མཁྱེན་གསུམ་གྱི་ཡོན་ཏན་བརྗོད་པའི་སྒོ་ནས་ཡུམ་ལ་བསྟོད་པ་ཡིན་ཏེ། མཁྱེན་གསུམ་གྱིས་མངོན་རྟོགས་བརྒྱད་བསྡུས་ཤིང་། མངོན་རྟོགས་བརྒྱད་ལ་འཕགས་བཞིའི་བཞེད་དོན་བསྒྲུབ་པའི་རྟོགས་རིགས་ཚང་བ་རྒྱུ་མཚན་དུ་བྱས་ནས་མཁྱེན་གསུམ་གྱི་ཡོན་ཏན་བརྗོད་པའི་ཚིགས་བཅད་ཡིན་པའི་ཕྱིར་རོ། །གསུམ་པ་ལ་གཉིས་ཏེ། མཁྱེན་གསུམ་གྱི་ཡོན་ཏན་བརྗོད་པ། དོན་བསྡུས་ཏེ་འཕགས་བཞིའི་ཡུམ་དུ་བསྟན་པའོ། །དང་པོ་ལ་གསུམ་ལས། གཞི་ཤེས་ཀྱི་ཡོན་ཏན་བརྗོད་པ་ནི། ཉཾན་ཐོསཾ་གཞི་ཤེས་ཆོས་ཅན། ཉན་རང་གི་རིགས་ཅན་ཉེར་ཞི་གཉིས་སུ་འཁྲིད་པའི་ཡོན་ཏན་དང་ལྡན་ཏེ། ཉན་རང་གི་རིགས་ཅན་ཉེར་ཞི་གཉིས་སུ་འཁྲིད་པར་བྱེད་པའི་རྟོགས་རིགས་ཡིན་པའི་ཕྱིར་རོ། །ལམ་ཤེས་ཀྱི་ཡོན་ཏན་བརྗོད་པ་ནི། བྱངཾ་ཆུཾབ་ལམ་ཤེས་ཆོས་ཅན། བྱང་ཆུབ་སེམས་དཔས་གཞན་དོན་སྒྲུབ་པའི་ཡོན་ཏན་དང་ལྡན་ཏེ། བྱང་ཆུབ་སེམས་དཔས་གཞན་དོན་སྒྲུབ་པའི་ཐབས་སུ་གྱུར་པའི་རྟོགས་རིགས་ཡིན་པའི་ཕྱིར། རྣམ་མཁྱེན་གྱི་ཡོན་ཏན་བརྗོད་པ་ནི། རྣཾམ་པཾ་རྣམ་མཁྱེན་ཆོས་ཅན། སངས་རྒྱས་ཀྱིས་ཆོས་འཁོར་བསྐོར་བའི་ཡོན་ཏན་དང་ལྡན་ཏེ། སངས་རྒྱས་ཀྱིས་ཆོས་འཁོར་བསྐོར་བའི་བདག་རྐྱེན་བྱེད་པའི་རྟོགས་རིགས་ཡིན་པའི་ཕྱིར། གཉིས་པ་ནི། སཾངས་རྒྱསཾ་འབྲས་ཡུམ་ཆོས་ཅན། བྱམས་མགོན་གྱི་བསྟོད་ཕྱག་གི་ཡུལ་ཡིན་ཏེ། མཆོག་གི་སྤྲུལ་སྐུའི་བཞེད་དོན་སྒྲུབ་བྱེད་ཀྱི་མཁྱེན་པ་ཡིན་པའི་ཕྱིར། བཞི་པ་ལ་གཉིས་ཏེ། བརྒལ་བ་དང་། ལན་ནོ། །དང་པོ་ནི། དེཾ་ལྟརཾ་མཆོད་བརྗོད་ཀྱི་ཚིགས་སུ་བཅད་པས་དངོས་སུ་མཁྱེན་གསུམ་གྱི་ཡོན་ཏན་བརྗོད་པས་ཤུགས་ལ་མཁྱེན་གསུམ་གྱི་རྒྱན་རྩོམ་པར་དམ་བཅས་ན་གཞི་ཁོ་ན་བརྗོད་བྱར་བསྡུས་པས་མཁྱེན་གསུམ་གྱི་རྒྱན་རྩོམ་མམ། ལམ་ཁོ་ན་བརྗོད་བྱར་བསྡུས་པས་དེའི་རྒྱན་རྩོམ་མམ། རྣམ་པ་ཁོ་ན་བརྗོད་བྱར་བསྡུས་པས་དེའི་རྒྱན་རྩོམ། དང་པོ་ལྟར་ན། ཆོས་མངོན་པ་དང་ཟློས་པའི་སྐྱོན་ཡོད། གཉིས་པ་ལྟར་ན། སྤང་བྱ་མི་རྟོགས་པའི་སྐྱོན་ཡོད། གསུམ་པ་ལྟར་ན། སྐྱེས་བུ་ལ་ཉེ་བར་མཁོ་བའི་དོན་མ་བཤད་པའི་སྐྱོན་ཡོད་དོ་ཅེ་ན། གཉིས་པ་ལ་གསུམ་སྟེ། གཏན་ཚིགས་འགོད། སྒྲུབ་བྱེད་བཤད། མཇུག་བསྡུ་བའོ། །དང་པོ་ནི། དེཾ་ནིཾ་རྒྱན་ཆོས་ཅན། གཞི་གཉེན་རྣམ་པ་གང་རུང་རེ་རེ་ཁོ་ན་བརྗོད་བྱར་བསྡུས་པ་ལ་བཀོད་པའི་སྐྱོན་ཡོད་པ་མ་ཡིན་ཏེ། གཞི་གཉེན་རྣམ་པའི་ཕྱོགས་གསུམ་ཆར་བརྗོད་བྱར་བསྡུས་པའི་ཕྱིར། དེས་ན་རྒྱན་ཆོས་ཅན། འཕགས་པ་བཞི་ཆར་གྱི་རྟོགས་རིགས་བརྗོད་བྱར་བསྡུས་ཏེ། མཁྱེན་གསུམ་བརྗོད་བྱར་བསྡུས་པ་གང་ཞིག མཁྱེན་གསུམ་གྱིས་འཕགས་པ་བཞི་ཆར་གྱི་རྟོགས་རིགས་བསྡུས་པའི་ཕྱིར། གཉིས་པ་ལ་གཉིས་ཏེ། ལུང་འགོད་པ། ལུང་གི་དོན་བཤད་པའོ། །དང་པོ་ལ་གསུམ་སྟེ། ཡུམ་བར་མའི་ལུང་འགོད། བསྡུས་པའི་ལུང་འགོད། རྒྱས་པའི་ལུང་ཁུངས་འགོད་པའོ། །དང་པོ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ནི། འདིཾ་ལྟརཾ་མཁྱེན་གསུམ་ཆོས་ཅན། ཁྱོད་ཀྱིས་འཕགས་བཞིའི་རྟོགས་རིགས་བསྡུས་པ་ཡིན་ཏེ། དེ་ལྟར་དུ་ཡུམ་བར་མ་ལས་དོན་མཐུན་དུ་གསུངས་པའི་ཕྱིར། གཉིས་པ་ལ་གསུམ་སྟེ། གཞི་ཤེས་ཉན་རང་གི་རྟོགས་རིགས་སུ་བསྟན་པ། ལམ་ཤེས་བྱང་སེམས་ཀྱི་རྟོགས་རིགས་སུ་བསྟན་པ། རྣམ་མཁྱེན་སངས་རྒྱས་ཀྱི་རྟོགས་རིགས་སུ་བསྟན་པའོ། །དང་པོ་ལ་གཉིས་ཏེ། རྒྱུ་མཚན་དྲི་བ་དང་། རྒྱུ་མཚན་འགོད་པའོ། །དང་པོ་ནི། བཅོམཾ་ལྡཾན་ཅིའི་ཕྱིར་གཞི་ཤེས་ཉན་རང་གི་རྟོགས་རིགས་ཡིན་ཅེ་ན། གཉིས་པ་ནི། རབཾ་འབྱོརཾ་གཞི་ཤེས་ཆོས་ཅན། ཉན་རང་གི་རྟོགས་རིགས་ཡིན་ཏེ། གཞི་བདེན་པའི་སྐྱེ་མེད་དུ་རྟོགས་པའི་རྟོགས་རིགས་གང་ཞིག ལམ་ཤེས་ཀྱི་རྟོགས་རིགས་ཀྱང་མ་ཡིན། རྣམ་མཁྱེན་གྱི་རྟོགས་རིགས་ཀྱང་མ་ཡིན་པའི་ཕྱིར། གཉིས་པ་ལ་གཉིས་ཏེ། རྒྱུ་མཚན་དྲི་བ་དང་། རྒྱུ་མཚན་འགོད་པའོ། །དང་པོ་ནི། བཅོཾམ་ལྡནཾ་ཅིའི་ཕྱིར་ལམ་ཤེས་བྱང་སེམས་འཕགས་པའི་རྟོགས་རིགས་ཡིན་ཅེ་ན། གཉིས་པ་ནི། རཾབ་འབྱོརཾ་དེ་ཆོས་ཅན། དེ་ཡིན་ཏེ། ཐེག་པ་གསུམ་གྱི་ལམ་གསུམ་ཤེས་ཤིང་སྤངས་རྟོགས་རྫོགས་པར་བྱེད་པ་དང་། རྫོགས་སྨིན་སྦྱང་གསུམ་མ་བྱས་པར་ཡང་དག་མཐའ་མངོན་དུ་མི་བྱེད་པའི་རྟོགས་རིགས་ཡིན་པའི་ཕྱིར། གསུམ་པ་ལ་གཉིས་ཏེ། རྒྱུ་མཚན་དྲི་བ་དང་། རྒྱུ་མཚན་འགོད་པའོ། །དང་པོ་ནི། བཅོཾམ་ལྡཾན་ཅིའི་ཕྱིར་རྣམ་མཁྱེན་སངས་རྒྱས་འཕགས་པའི་རྟོགས་རིགས་ཡིན་ཅེ་ན། གཉིས་པ་ནི། རཾབ་འབྱོརཾ་དེ་ཆོས་ཅན། དེ་ཡིན་ཏེ། ངོ་བོ་རྒྱུ་འབྲས་ཀྱི་རྣམ་པ་ཐམས་ཅད་མཁྱེན་པའི་རྟོགས་རིགས་ཡིན་པའི་ཕྱིར། གཉིས་པ་ནི། དེཾ་བཞིཾན་མཁྱེན་གསུམ་ཆོས་ཅན། འཕགས་བཞིའི་རྟོགས་རིགས་བསྡུས་ཏེ། དེ་བསྡུས་པར་བརྒྱད་སྟོང་པ་ལས་གསུངས་པའི་ཕྱིར། གསུམ་པ་ནི། རྒྱསཾ་པཾར་གཞན་སྔར་དང་འདྲ་བ་ལས་རྒྱས་པ་འབུམ་ལས་ཞེས་སྦྱར་རོ། །གཉིས་པ་ལུང་གི་དོན་བཤད་པ་ལ་གསུམ་སྟེ། གཞི་ཤེས་ཀྱི། ལམ་ཤེས་ཀྱི། རྣམ་མཁྱེན་གྱི་ལུང་གི་དོན་བཤད་པའོ། །དང་པོ་ནི། དེཾ་ལཾ་གཞི་ཤེས་ཆོས་ཅན། ཁྱད་པར་གསུམ་དང་ལྡན་ཏེ། དམིགས་རྣམ་འབྲས་བུའི་ཁྱད་པར་དང་ལྡན་པའི་ཕྱིར། གཉིས་པ་ནི། ལཾམ་ཤེསཾ་པཾ་ལམ་ཤེས་ཆོས་ཅན། ཆོས་རྟགས་འདྲ། གསུམ་པ་ནི། རྣཾམ་པཾ་རྣམ་མཁྱེན་ཆོས་ཅན། ཆོས་རྟགས་འདྲའོ། །གསུམ་པ་ནི། དེཾ་ལྟརཾ་རྒྱན་ཆོས་ཅན། འཕགས་བཞིའི་མངོན་རྟོགས་ཀྱི་རིགས་མ་ལུས་པར་བསྟན་ཏེ། གཞི་གཉེན་རྣམ་པ་གསུམ་ཆར་བརྗོད་བྱར་བསྡུས་པའི་སྒོ་ནས་མཁྱེན་གསུམ་གྱི་རྒྱན་དུ་གྱུར་པ་ཡིན་པའི་ཕྱིར་རོ། །སྐབས་འདིའི་མཁྱེན་གསུམ་གྱི་མིང་ཅན་ཕལ་ཆེ་བ་ནི་གཞུང་འདིའི་བརྗོད་བྱའི་གཙོ་བོ་བྱང་སེམས་ཀྱི་རྒྱུད་ཀྱི་སྐྱེ་མེད་གསུམ་རྟོགས་པའི་རྟོགས་པ་ཡིན་ལ། འབྲས་ཡུམ་ལ་བཞག་པའི་ཚེ་ནི་སངས་རྒྱས་ཀྱི་ས་ལའང་ཤེས་པར་བྱའོ། །འདི་མན་ཆད་དུ་ས་བཅད་དམིགས་བསལ་མེད་པའི་གསུམ་ཞེས་པ་རྣམས་མཚམས་སྦྱར་རྩ་བ་འགྲེལ་པ་གསུམ་ཡིན་ལ། གཉིས་ཞེས་པ་རྣམས་མཚམས་སྦྱར་བ་དང་རྩ་འགྲེལ་ཕྱོགས་གཅིག་ཏུ་བཤད་པ་ཡིན་ཅིང་། དང་གིས་བར་དུ་ཆོད་པའི་མཚམས་གོང་འོག་ནི་རྩ་འགྲེལ་སྡེབས་པའི་གཞུང་གི་མགོ་གཉིས་ཡིན་ནོ། །རྩ་འགྲེལ་སྦྱོར་བ་འགོད་ཚུལ་མི་མཐུན་པ་རྣམས་ལ་རྩ་བའི་སྦྱོར་བ་ནི་རང་ལུགས་ཡིན་པས་འགལ་བར་མི་སེམས་སོ། །གཉིས་པ་རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འབྲེལ་ལ་གཉིས་ལས། དང་པོ་ནི། སྐྱེཾ་བོཾ་བྱམས་པས་རྒྱན་གྱི་དགོས་འགྲེལ་གྱི་ངག་གསུངས་པ་ཆོས་ཅན། དགོས་པ་ཡོད་དེ། རྒྱན་གྱི་གདུལ་བྱ་རྒྱན་ལ་དགོས་སོགས་ཆོས་བཞི་ཡོད་དམ་སྙམ་པའི་དོན་འགྱུར་གྱི་ཐེ་ཚོམ་བསྐྱེད་པའི་སྒོ་ནས་རྒྱན་ལ་འཇུག་པའི་ཆེད་ཡིན་པའི་ཕྱིར། གཉིས་པ་ལ་བཞི་ལས། བརྗོད་བྱ་ནི། རྣཾམ་དང་རྣཾམ་ཤེར་ཕྱིན་གྱིས་མདོའི་བརྗོད་བྱར་གྱུར་པའི་མངོན་པར་རྟོགས་པ་བརྒྱད་ཆོས་ཅན། རྒྱན་གྱི་བརྗོད་བྱ་ཡིན་ཏེ། རྒྱན་གྱི་བཤད་པར་བྱ་བ་ཡིན་པའི་ཕྱིར། འགྲེལ་པ་ནི། བརྗོཾད་པཾར་རྒྱན་ཆོས་ཅན། ཁྱོད་ཀྱི་བརྗོད་བྱ་རྗོད་བྱེད་ལ་ཐབས་ཐབས་བྱུང་གི་འབྲེལ་པ་གྲུབ་སྟེ། ཁྱོད་བསྟན་བཅོས་རྣམ་དག་ཡིན་པའི་ཕྱིར། ཉིང་དགོས་ནི། གཞཾན་དང་ཕྱིཾ་རྒྱན་ལ་བརྟེན་ནས་མངོན་པར་རྟོགས་པ་བརྒྱད་ཡོངས་སུ་རྫོགས་པར་མངོན་སུམ་དུ་རྟོགས་པ་ཆོས་ཅན། རྒྱན་གྱི་ཉིང་དགོས་ཡིན་ཏེ། རྒྱན་ལ་བརྟེན་ནས་ཐོབ་པའི་མཐར་ཐུག་གི་འབྲས་བུ་ཡིན་པའི་ཕྱིར། དགོས་པ་ནི། བདེཾ་དང་དགོཾས་རྒྱན་ལ་བརྟེན་ནས་ཤེར་ཕྱིན་གྱི་མདོའི་དོན་བདེ་བླག་དུ་རྟོགས་པ་དེ་ཆོས་ཅན། ཁྱོད་རྒྱན་གྱི་དགོས་པ་ཡིན་ཏེ། ཁྱོད་གང་གི་ཆེད་དུ་རྒྱན་རྩོམ་པའི་ཆེད་དུ་བྱ་བ་ཡིན་པའི་ཕྱིར། གསུམ་པ་བསྟན་བཅོས་ཀྱི་བརྗོད་བྱ་མངོན་རྟོགས་བཤད་པ་ལ་གསུམ་སྟེ། རྒྱས་པ་ལ་དད་པ་ལ་བརྒྱད་དུ་ཕྱེ། བར་པ་ལ་དད་པ་ལ་དྲུག་ཏུ་བསྟན། བསྡུས་པ་ལ་དད་པ་ལ་གསུམ་དུ་བསྡུ་བའོ། །དང་པོ་ལ་གཉིས་ཏེ། བསྡུས་དོན་ལུས་རྣམ་བཞག་དང་། ཚིགས་དོན་ཡན་ལག་བརྒྱད་བཤད་དོ། །དང་པོ་ལ་བཞི་སྟེ། དགོས་པའི་སྒོ་ནས་མཚམས་སྦྱར། བཤད་བྱའི་ངག་ཉེ་བར་དགོད། དེ་དག་གིས་བསྡུས་པའི་དོན། རྒྱས་པར་མ་བཀྲོལ་བའི་རྒྱུ་མཚན་ནོ། །དང་པོ་ནི། དེཾ་ལྟརཾ་མགོན་པོ་བྱམས་པས་རྒྱན་གྱི་ལུས་རྣམ་བཞག་གསུངས་པ་ཆོས་ཅན། དགོས་པ་ཡོད་དེ། རྒྱན་ཉན་པ་པོས་རྟོགས་སླ་བ་དང་། འཆད་པ་པོས་བཤད་སླ་བའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། ལུས་མདོར་བསྟན། ཅུང་ཟད་ཕྱེ་སྟེ་བཤད་པའོ། །དང་པོ་ལ་གཉིས་ཏེ། ཇི་ལྟར་བཤད་པའི་ཚུལ། དངོས་པོ་བརྒྱད་དུ་ཕྱེ་བའོ། །དང་པོ་ནི། ཤེཾས་རཾབ་བྱམས་མགོན་ཆོས་ཅན། ཤེར་ཕྱིན་ཡང་དག་པར་བཤད་པ་ཡིན་ཏེ། ཤེར་ཕྱིན་དངོས་པོ་བརྒྱད་ཀྱི་སྒོ་ནས་མདོ་ཇི་ལྟ་བ་བཞིན་དུ་བཤད་པའི་ཕྱིར། གཉིས་པ་ནི། རྣཾམ་ཀུཾན་རྒྱན་གྱི་ལུས་ཆོས་ཅན། དངོས་པོ་བརྒྱད་དུ་ཡོད་དེ། ཡུལ་མཁྱེན་པ་གསུམ། ཡུལ་ཅན་སྦྱོར་བ་བཞི། འབྲས་བུ་ཆོས་ཀྱི་སྐུ་རྣམས་སུ་ཡོད་པའི་ཕྱིར། གཉིས་པ་ལ་བརྒྱད་ལས་རྣམ་མཁྱེན་ནི། སེམཾས་བསྐྱེདཾ་བྱམས་མགོན་ཆོས་ཅན། རྣམ་མཁྱེན་ཡང་དག་པར་བཤད་དེ། རྣམ་མཁྱེན་མཚོན་བྱེད་ཀྱི་ཆོས་བཅུའི་སྒོ་ནས་མདོ་ཇི་ལྟ་བ་བཞིན་དུ་བཤད་པའི་ཕྱིར། ལམ་ཤེས་ནི། མོཾག་མོཾག་ལམ་ཤེས་དང་། མཚོན་བྱེད་ཀྱི་ཆོས་བཅུ་གཅིག་སྦྱར་བ་གཞན་འགྲེ། གཞི་ཤེས་ནི། ཤེཾས་པཾ་དཾང་། གཞི་ཤེས་དང་། མཚོན་བྱེད་ཀྱི་ཆོས་དགུ་སྦྱར། རྣམ་ཀུན་ནི། རྣཾམ་པཾ་རྣམ་རྫོགས་སྦྱོར་བ་དང་མཚོན་བྱེད་ཀྱི་ཆོས་བཅུ་གཅིག་སྦྱར། རྩེ་སྦྱོར་ནི། དེཾ་ཡིཾ། རྩེ་སྦྱོར་དང་མཚོན་བྱེད་ཀྱི་ཆོས་བརྒྱད་སྦྱར། མཐར་གྱིས་པ་ནི། མཐརཾ་གྱིསཾ་མཐར་གྱིས་སྦྱོར་བ་དང་མཚོན་བྱེད་ཀྱི་ཆོས་བཅུ་གསུམ་སྦྱར། སྐད་ཅིག་མ་ནི། སྐདཾ་ཅིགཾ་སྐད་ཅིག་མའི་སྦྱོར་བ་དང་མཚོན་བྱེད་ཀྱི་ཆོས་བཞི་སྦྱར། འབྲས་བུ་ཆོས་སྐུ་ནི། ངོཾ་བོཾ་བྱམས་མགོན་ཆོས་ཅན། འབྲས་བུ་ཆོས་སྐུ་ཡང་དག་པར་བཤད་དེ། འབྲས་བུ་ཆོས་སྐུ་མཚོན་བྱེད་ཀྱི་ཆོས་བཞིའི་སྒོ་ནས་མདོ་ཇི་ལྟ་བ་བཞིན་དུ་བཤད་པའི་ཕྱིར། གསུམ་པ་ནི། དེཾ་ལཾ་ཤེས་རབ་ཕ་རོལ་ཕྱིན་པ་ནི་ཞེས་སོགས་ཀྱི་ཚིགས་བཅད་གཉིས་ཆོས་ཅན། རྒྱན་གྱི་ལུས་མདོར་བསྟན་པ་ཡིན་ཏེ། རྒྱན་གྱི་ལུས་དངོས་པོ་བརྒྱད་དུ་བསྡུས་ནས་བསྟན་པའི་ཕྱིར། ཚིགཾ་ལེཾར་སེམས་བསྐྱེད་པ་དང་། གདམས་ངག་དང་ཞེས་སོགས་ཚིགས་བཅད་བཅུ་གསུམ་ཆོས་ཅན། རྒྱན་གྱི་ལུས་ཅུང་ཟད་བཤད་དེ། དོན་བདུན་ཅུའི་རྐང་གྲངས་ཙམ་དུ་ཕྱེ་ནས་བསྟན་པའི་ཕྱིར། དེཾ་ལྟརཾ་ལུས་རྣམ་བཞག་གི་ཚིགས་བཅད་བཅོ་ལྔ་ཆོས་ཅན། རྒྱན་གྱི་ལུས་ལེགས་པར་བཤད་པ་ཡིན་ཏེ། རྒྱན་གྱི་ལུས་དངོས་པོ་བརྒྱད་དུ་བསྡུས་པ་དང་དོན་བདུན་ཅུར་ཕྱེ་ནས་བསྟན་པའི་ཕྱིར། བཞི་པ་ནི། བསྡུསཾ་པཾའི་སེངྒེ་བཟང་པོ་ཆོས་ཅན། ཡན་ལག་རྒྱས་བཤད་ཀྱི་གོང་དུ་ལུས་རྣམ་གཞག་གི་ཚིག་དོན་རྒྱས་པར་མ་བཀྲོལ་བའི་རྒྱུ་མཚན་ཡོད་དེ། དེ་ལྟར་བཀྲོལ་ན་ཟློས་པའི་ཉེས་པར་འགྱུར་དུ་དོགས་པའི་ཕྱིར། གཉིས་པ་ཚིག་དོན་ཡན་ལག་རྒྱས་པར་བཤད་པ་ལ་གསུམ་སྟེ། ཐོས་བསམ་གྱིས་གཏན་ལ་དབབ་པའི་ཡུལ། ཉམས་སུ་ལེན་པའི་སྦྱོར་བ། ཉམས་སུ་བླངས་པའི་འབྲས་བུའོ། །དང་པོ་ལ་གསུམ་སྟེ། འབྲས་བུ་རྣམ་མཁྱེན། རྒྱུ་ལམ་ཤེས། རྣམ་པར་དག་བྱེད་གཞི་ཤེས་སོ། །དང་པོ་ལ་གསུམ་སྟེ། འབྲེལ་དགོད་པས་མཚམས་སྦྱར་མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། དེཾ་ལྟརཾ་མགོན་པོ་བྱམས་པས་སྐབས་བརྒྱད་ཀྱི་དང་པོར་རྣམ་མཁྱེན་བསྟན་པ་ཆོས་ཅན། དགོས་པ་ཡོད་དེ། རྒྱན་གྱི་གདུལ་བྱ་འབྲས་བུ་ལ་སྤྲོ་བ་བསྐྱེད་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། བསམ་པ་སེམས་བསྐྱེད་པ། སྦྱོར་བ་སྒྲུབ་པ་ལ་འཇུག་ཚུལ་ལོ། །དང་པོ་ལ་བཞི་སྟེ། ངོ་བོ་དམིགས་པའི་སྒོ་ནས་བསྟན། དམིགས་པ་རྒྱས་བསྡུས་མདོ་དང་སྦྱར། རྒྱས་བསྡུས་སྒོ་ནས་དབྱེ་བ་བསྟན། དབྱེ་བ་དེ་ཡི་ས་མཚམས་བཤད་པའོ། །དང་པོ་ལ་གཉིས་ཏེ། དངོས་དང་། རྩོད་པ་སྤོང་བའོ། །དང་པོ་ལ་གཉིས་ལས། དང་པོ་ནི། སེཾམས་བཾསྐྱེད་བྱམས་མགོན་ཆོས་ཅན། རྣམ་མཁྱེན་གྱི་ཆོས་བཅུའི་དང་པོར་སེམས་བསྐྱེད་འཆད་པའི་རྒྱུ་མཚན་ཡོད་དེ། རྣམ་མཁྱེན་དོན་དུ་གཉེར་བས་ཐོག་མར་བྱང་ཆུབ་མཆོག་ཏུ་སེམས་བསྐྱེད་དགོས་པའི་ཕྱིར། གཉིས་པ་ནི། སེམཾས་དང་སཾངས་བྱང་སེམས་ཚོགས་ལམ་པའི་རྒྱུད་ཀྱི་འདུན་ལྡན་སེམས་བསྐྱེད་ཆོས་ཅན། ཐེག་ཆེན་སེམས་བསྐྱེད་ཡིན་ཏེ། ཐེག་ཆེན་ལམ་ཞུགས་ཀྱི་གང་ཟག་གི་རྒྱུད་ཀྱི་གཞན་དོན་དུ་རྫོགས་པའི་བྱང་ཆུབ་དོན་དུ་གཉེར་བའི་འདུན་པ་མཚུངས་ལྡན་དང་བཅས་པ་ཡིན་པའི་ཕྱིར། སློབ་དཔོན་ལྟར་ན། དེ་འདྲའི་འདུན་པ་དང་མཚུངས་ལྡན་གྱི་གཙོ་བོ་རྣམ་རིག་འགོད་དོ། །ཐེག་ཆེན་སེམས་བསྐྱེད་ཆོས་ཅན། རྣམ་པ་གཉིས་ཡོད་དེ། སྨོན་པ་སེམས་བསྐྱེད་དང་འཇུག་པ་སེམས་བསྐྱེད་གཉིས་ཡོད་པའི་ཕྱིར། གཉིས་པ་ལ་གཉིས་ཏེ། རྩོད་པ་དང་། ལན་ནོ། །དང་པོ་ནི། ཡཾང་དཾག་ཡང་དག་རྫོགས་པའི་བྱང་ཆུབ་འདོད་ཅེས་སྐབས་ཀྱི་འདོད་པ་ཆོས་ཅན། སེམས་བསྐྱེད་མིན་པར་ཐལ། སེམས་བྱུང་ཡིན་པའི་ཕྱིར་ཞེ་ན། གཉིས་པ་ལ་གཉིས་ཏེ། རྒྱུ་མིང་འབྲས་བུ་ལ་བཏགས། གྲོགས་མིང་གྲོགས་ཅན་ལ་བཏགས་པའོ། །དང་པོ། བདེཾན་མོཾད་ཐེག་ཆེན་སེམས་བསྐྱེད་ཆོས་ཅན། ཁྱོད་ལ་རྒྱུ་གཞན་དོན་དོན་གཉེར་གྱི་འདུན་པའི་མིང་གིས་འདོགས་པའི་རྒྱུ་མཚན་ཡོད་དེ། ཁྱོད་རང་རྒྱུ་གཞན་དོན་དོན་གཉེར་གྱི་འདུན་པ་དེའི་འབྲས་བུ་ཡིན་པའི་ཕྱིར། དེ་ལ་དེའི་མིང་གིས་བཏགས་པ་ཆོས་ཅན། དགོས་པ་ཡོད་དེ། གཞན་དོན་དོན་གཉེར་གྱི་འདུན་པ་ཡོད་ན་དགེ་བའི་ཆོས་ཐམས་ཅད་རྣམ་པར་འཕེལ་བར་འགྱུར་རོ་ཞེས་ཤེས་པའི་ཆེད་ཡིན་པའི་ཕྱིར། གཉིས་པ་ནི། རྣཾམ་པཾ་ཐེག་ཆེན་སེམས་བསྐྱེད་ཆོས་ཅན། ཁྱོད་ལ་རང་གི་གྲོགས་བྱང་ཆུབ་དོན་གཉེར་གྱི་སྨོན་ལམ་གྱི་མིང་གིས་འདོགས་པའི་རྒྱུ་མཚན་ཡོད་དེ། ཁྱོད་དེ་དང་མཚུངས་ལྡན་ཡིན་པའི་ཕྱིར། དེ་ལ་དེའི་མིང་གིས་བཏགས་པ་ཆོས་ཅན། དགོས་པ་ཡོད་དེ། བྱང་ཆུབ་སེམས་དཔའ་རྣམས་ལ་སྨོན་ལམ་དང་མཚུངས་ལྡན་གྱི་སེམས་བསྐྱེད་སྐྱེའོ་ཞེས་ཤེས་པའི་ཆེད་ཡིན་པའི་ཕྱིར། འདི་དག་ནི་སློབ་དཔོན་སེམས་བསྐྱེད་གཙོ་སེམས་སུ་འདོད་པའི་རྩོད་ལན་ནོ། །གཉིས་པ་ལ་གསུམ་ལས། དང་པོ་ནི། ཡཾང་གཾང་དེ་དང་དེ་ནི་མདོ་བཞིན་དུ་ཞེས་སོགས་ཚིག་རྐང་གཉིས་གསུངས་པ་ཆོས་ཅན། དགོས་པ་ཡོད་དེ། སེམས་བསྐྱེད་ཀྱི་དམིགས་པ་བྱང་ཆུབ་དང་གཞན་དོན་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། དེཾ་དཾང་རྒྱན་གཞུང་ཆོས་ཅན། ཐེག་ཆེན་སེམས་བསྐྱེད་ཀྱི་དམིགས་པ་ཡང་དག་པར་བཤད་པ་ཡིན་ཏེ། དེའི་དམིགས་པ་བྱང་ཆུབ་དང་གཞན་དོན་གཉིས་མདོར་བསྟན་དང་རྒྱས་བཤད་གཉིས་གཉིས་ཀྱི་སྒོ་ནས་མདོ་ཇི་ལྟ་བ་བཞིན་དུ་བཤད་པའི་ཕྱིར་རོ། །གསུམ་པ་ལ་གསུམ་སྟེ། ཡུམ་གསུམ་ཆར་གྱི་ཁུངས་སྨོས་པ། ཡུམ་བར་མའི་མདོ་དང་སྦྱར་བ། རྒྱས་བསྡུས་གཉིས་ཀྱི་ལུང་ཚིག་མ་སྨོས་པའི་རྒྱུ་མཚན་ནོ། །དང་པོ་ནི། རྒྱལཾ་ཐེག་ཆེན་སེམས་བསྐྱེད་ཆོས་ཅན། གཞན་དོན་དང་བྱང་ཆུབ་ལ་དམིགས་པ་ཡིན་ཏེ། དེ་ལ་དམིགས་པ་ཡུམ་གསུམ་ཆར་ལས་དོན་མཐུན་དུ་གསུངས་པའི་ཕྱིར། གཉིས་པ་ལ་གསུམ་སྟེ། ལུང་དྲངས་པ། རྩ་བའི་ཚིག་དོན་བཤད་པ། དོན་བསྡུ་བའོ། །དང་པོ་ནི། ཤེཾས་རཾབ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ་ཞེས་པའི་མདོ་ཆོས་ཅན། བྱང་ཆུབ་མདོར་བསྟན་པ་ཡིན་ཏེ། བྱང་ཆུབ་ཀྱི་མིང་ཙམ་སྨོས་པའི་ཕྱིར། སྦྱིནཾ་པཾ་སྦྱིན་པ་པོ་དང་ལེན་པ་པོ་ལ་སོགས་པ་མི་དམིགས་པའི་ཕྱིར་ཡོངས་སུ་བཏང་བ་མེད་པའི་ཚུལ་གྱིས་ཞེས་སོགས་ཀྱི་མདོ་ཆོས་ཅན། བྱང་ཆུབ་རྒྱས་པར་བཤད་པ་ཡིན་ཏེ། བྱང་ཆུབ་ཀྱི་ངོ་བོ་ཕར་ཕྱིན་དྲུག་དུ་ཕྱེ་ནས་བཤད་པའི་ཕྱིར། སེཾམས་ཅཾན། བྱང་སེམས་ཆེན་པོ་ཕྱོགས་བཅུ་རེ་རེ་ཞིང་གངྒཱའི་ཀླུང་གི་ཞེས་སོགས་ཀྱི་མདོ་ཆོས་ཅན། གཞན་དོན་མདོར་བསྟན་པ་ཡིན་ཏེ། གཞན་དོན་གྱི་ཐབས་མ་ཕྱེ་བར་བསྟན་པའི་ཕྱིར། སེཾར་སྣཾ་སེར་སྣ་ཅན་རྣམས་སྦྱིན་པ་ལ་འགོད་པར་འདོད་པས་ཞེས་སོགས་ཀྱི་མདོ་ཆོས་ཅན། གཞན་དོན་རྒྱས་པར་བཤད་པ་ཡིན་ཏེ། གཞན་དོན་གྱི་ཐབས་ཕྱེ་ནས་བསྟན་པའི་ཕྱིར། གཉིས་པ་ནི། ངཾག་གིཾས་རྒྱན་གྱི་ངག་ཆོས་ཅན། ཐེག་ཆེན་སེམས་བསྐྱེད་ཀྱི་དམིགས་པ་ཡང་དག་པར་བརྗོད་པ་ཡིན་ཏེ། བྱང་ཆུབ་དང་གཞན་དོན་གཉིས་མདོ་བཞིན་དུ་རྒྱས་བསྡུས་གཉིས་གཉིས་ཀྱི་སྒོ་ནས་བསྟན་པའི་ཕྱིར། གསུམ་པ་ནི། དེཾ་ལྟརཾ་ཐེག་ཆེན་སེམས་བསྐྱེད་ཆོས་ཅན། གཞན་དོན་དུ་རྫོགས་པའི་བྱང་ཆུབ་ལ་དམིགས་པ་ཡིན་ཏེ། དེ་ལྟར་དུ་མདོ་ལས་བསྟན་པའི་ཕྱིར། གསུམ་པ་ནི། གཙུགཾ་ལཾག་སེང་བཟང་ཆོས་ཅན། སེམས་བསྐྱེད་ཀྱི་དམིགས་པ་འཆད་པའི་འགྲེལ་པ་དོན་གསལ་གྱི་སྐབས་འདིར་རྒྱས་བསྡུས་གཉིས་ཀྱི་ལུང་དངོས་སུ་མ་བྲིས་པའི་རྒྱུ་མཚན་ཡོད་དེ། འགྲེལ་པ་དོན་གསལ་ཚིག་མང་དུ་དོགས་པའི་ཕྱིར། གསུམ་པ་ལ་གསུམ་ལས། དང་པོ་ནི། དེཾ་ལྟརཾ་དེ་ཡང་ས་གསེར་ཟླ་བ་མེ་ཞེས་སོགས་ཚིགས་བཅད་གཉིས་སྨོས་པ་ཆོས་ཅན། དགོས་པ་ཡོད་དེ། ཐེག་ཆེན་སེམས་བསྐྱེད་ཀྱི་དབྱེ་བ་བདེ་བླག་ཏུ་རྟོགས་པའི་ཆེད་ཡོད་པའི་ཕྱིར། གཉིས་པ་ནི། དེཾ་ཡངཾ་ཐེག་ཆེན་སེམས་བསྐྱེད་ཆོས་ཅན། དམིགས་པའི་སྒོ་ནས་ཉེར་གཉིས་ཡོད་དེ། བྱང་ཆུབ་དང་གཞན་དོན་མདོར་བསྡུས་པ་ལ་དམིགས་པའི་སྒོ་ནས་གཅིག བྱང་ཆུབ་རྒྱས་པ་ལ་དམིགས་པའི་སྒོ་ནས་གསུམ། གཞན་དོན་རྒྱས་པ་ལ་དམིགས་པའི་སྒོ་ནས་བཅོ་བརྒྱད་རྣམས་སུ་ཡོད་པའི་ཕྱིར། གསུམ་པ་ལ་གཉིས་ཏེ། སོ་སོར་བཤད་པ་དང་དོན་བསྡུ་བའོ། །དང་པོ་ནི། འདུཾན་པཾ་དེ་ཆོས་ཅན། མཚུངས་ལྡན་གྱི་སྒོ་ནས་ཉེར་གཉིས་ཡོད་དེ། དེའི་སྒོ་ནས་འདུན་པ་དང་མཚུངས་པར་ལྡན་པ་ནས་ཆོས་ཀྱི་སྐུ་དང་མཚུངས་པར་ལྡན་པའི་བར་རྣམས་སུ་ཡོད་པའི་ཕྱིར། སཾ་དཾང་དེ་ཆོས་ཅན། དཔེའི་སྒོ་ནས་ཉེར་གཉིས་ཡོད་དེ། དཔེའི་སྒོ་ནས་ས་ལྟ་བུ་ནས་སྤྲིན་ལྟ་བུའི་བར་རྣམས་སུ་ཡོད་པའི་ཕྱིར། ཆོསཾ་དཀཾར་དེ་ཆོས་ཅན། ཆོས་མཐུན་གྱི་སྒོ་ནས་ཉེར་གཉིས་ཡོད་དེ། དེའི་སྒོ་ནས་ཆོས་དཀར་པོ་ཐམས་ཅད་ཀྱི་གཞིའི་དངོས་པོར་རུང་བ་ནས་མཛད་པ་བཅུ་གཉིས་སྟོན་པའི་བར་རྣམས་སུ་ཡོད་པའི་ཕྱིར། གཉིས་པ་ནི། དེཾ་ལྟཾར་ས་གསེར་ཟླ་བ་མེ་ཞེས་སོགས་ཀྱི་ཚིགས་བཅད་གཉིས་ཆོས་ཅན། སེམས་བསྐྱེད་ཉི་ཤུ་རྩ་གཉིས་བཤད་དེ། དཔེའི་སྒོ་ནས་འདུན་ལྡན་སེམས་བསྐྱེད་སོགས་འཕངས་པའི་རྒྱན་ཚིག་ཡིན་པའི་ཕྱིར། བཞི་པ་ནི། དེཾ་ལཾ་ཐེག་ཆེན་གྱི་སེམས་བསྐྱེད་ཆོས་ཅན། ཐེག་ཆེན་ལས་དང་པོ་པའི་ས་ནས་སངས་རྒྱས་ཀྱི་སའི་བར་དུ་ཡོད་དེ། ཐེག་ཆེན་གྱི་ཚོགས་ལམ་ཆུང་ངུ་ནས། སངས་རྒྱས་ཀྱི་སའི་རྗེས་ཐོབ་ཀྱི་བར་དུ་ཡོད་པའི་ཕྱིར། གཉིས་པ་སྦྱོར་བ་སྒྲུབ་པ་ལ་འཇུག་ཚུལ་ལ་གསུམ་སྟེ། ཐེག་ཆེན་གྱི་སྒྲུབ་པ་ཙམ་ལ་འཇུག་ཚུལ། ཕྱིར་མི་ལྡོག་པའི་སྒྲུབ་པ་ལ་འཇུག་ཚུལ། དེ་གཉིས་ཀའི་ཐུན་མོང་གི་ཆོས་བཤད་པའོ། །དང་པོ་ལ་གཉིསཾ་ཏེ། གདམས་ངག་བཅུ་སྤྱིར་བསྟན། རྟོགས་དཀའ་བ་བྱེ་བྲག་ཏུ་བཤད་པའོ། །དང་པོ་ལ་གསུམ་ལས། དང་པོ་ནི། དབྱེཾ་བཾ་ཐེག་ཆེན་གྱི་སེམས་བསྐྱེད་ཀྱི་དབྱེ་བའི་འོག་ཏུ་ཐེག་ཆེན་གྱི་གདམས་ངག་བསྟན་པ་ཆོས་ཅན། དགོས་པ་ཡོད་དེ། བྱང་ཆུབ་ཀྱི་སེམས་དང་པོ་བསྐྱེད་པའི་བྱང་ཆུབ་སེམས་དཔས་སེམས་བསྐྱེད་ཀྱི་དབྱེ་བས་འཕངས་པའི་ཡོན་ཏན་མ་ཐོབ་པ་ཐོབ་པ་དང་ཐོབ་ཟིན་མངོན་པར་འཕེལ་བར་བྱ་བའི་ཆེད་ཡིན་པའི་ཕྱིར། གཉིས་པ་ནི། སྒྲུབཾ་དཾང་སྐབས་འདིར་བསྟན་གྱི་ཐེག་ཆེན་གྱི་གདམས་ངག་ཆོས་ཅན། རྣམ་པ་བཅུར་གྲངས་ངེས་ཏེ། གདམས་བྱའི་ཡུལ་བཅུར་གྲངས་ངེས་པའི་ཕྱིར། གསུམ་པ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ལ་གཉིས་ཏེ། སྒྲུབ་པ་རང་གི་ངོ་བོ་ལ་འདོམས་པ་དང་། སྒྲུབ་པའི་ཁྱད་པར་གྱི་ཆོས་ལ་འདོམས་པའོ། །དང་པོ་ནི། བྱངཾ་ཆུཾབ་ཤཱ་རིའི་བུ་འདི་ལ་བྱང་སེམས་ཆེན་པོ་ཡུམ་ལ་སྤྱོད་པས་ནི་བྱང་ཆུབ་སེམས་དཔའ་ཡང་དག་པར་མི་མཐོང་ཞེས་སོགས་ཀྱི་མདོ་ཚིག་ཆོས་ཅན། སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་ཡིན་ཏེ། ཡུལ་བདེན་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འབྲེལ་གྱི་སྒོ་ནས་སྒྲུབ་པ་རང་གི་ངོ་བོ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། གཉིས་པ་ལ་བརྒྱད་ལས། དང་པོ་སྒྲུབ་པའི་དམིགས་པ་ལ་འདོམས་པ་ནི། སྡུགཾ་བསྔལཾ་ཤཱ་རིའི་བུ་འདི་ལ་བྱང་སེམས་ཆེན་པོས་གཟུགས་སྟོང་པ་ཉིད་ལ་བརྩོན་ན་བརྩོན་ཞེས་བྱའོ་ཞེས་སོགས་ཀྱི་མདོ་ཚིག་ཆོས་ཅན། སྡུག་བསྔལ་བདེན་པ་ལ་འདོམས་པའི་གདམས་ངག་ཡིན་ཏེ། སྒོ་ནས་ཞེས་པ་ཡན་ཆད་འགྲེ་སྡུག་བསྔལ་བདེན་པའི་སྟོང་ཉིད་དང་ཡུལ་ཅན་ཤེར་ཕྱིར་གཉིས། དེ་བཞིན་ཉིད་ཀྱི་ངོ་བོར་རང་བཞིན་གཅིག་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། ཀུནཾ་འཾབྱུང་གཟུགས་སྐྱེ་བའི་ཆོས་ཅན་དང་། འགག་པའི་ཆོས་ཅན་དུ་ཡང་དག་པར་རྗེས་སུ་མི་མཐོང་ཞེས་སོགས་ཀྱི་མདོ་ཚིག་ཆོས་ཅན། ཀུན་འབྱུང་བདེན་པ་ལ་འདོམས་པའི་གདམས་ངག་ཡིན་ཏེ། སྒོ་ནས་ཀུན་འབྱུང་བདེན་པ་སྔར་མེད་གསར་དུ་ཀུན་འབྱུང་བ་སོགས་ཀྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། འགོཾག་པཾ་ཤཱ་རིའི་བུ་སྟོང་པ་ཉིད་དེ་ནི་མི་སྐྱེ་མི་འགག་ཅིང་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན་ཞེས་སོགས་ཀྱི་མདོ་ཚིག་ཆོས་ཅན། འགོག་བདེན་ལ་འདོམས་པའི་གདམས་ངག་ཡིན་ཏེ། སྒོ་ནས་གློ་བུར་དྲི་བྲལ་གྱི་སྟོང་ཉིད་གཟུགས་ནས་བྱང་ཆུབ་ཀྱི་བར་གྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། ལཾམ་ལཾ་ཤེར་ཕྱིན་ལ་སྤྱོད་པ་ན་བདག་ཉིད་ལ་སྦྱིན་པའི་ཕ་རོལ་ཏུ་ཕྱིན་པ་ལ་བརྩོན་ཞེས་བྱ་བའམ་མི་བརྩོན་ཞེས་བྱ་བར་ཡང་དག་པར་རྗེས་སུ་མི་མཐོང་ཞེས་སོགས་ཀྱི་མདོ་ཚིག་ཆོས་ཅན། ལམ་བདེན་ལ་འདོམས་པའི་གདམས་ངག་ཡིན་ཏེ། སྒོ་ནས་དོན་དམ་པར་ཕན་ཚུན་བསྒོམ་བྱ་སྒོམ་བྱེད་ཀྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། གཉིས་པ་སྒྲུབ་པའི་རྟེན་ལ་འདོམས་པ་ནི། སངས་རྒྱས་དེ་ཤེར་ཕྱིན་ལ་སྤྱོད་པའི་ཚེ་གཟུགས་ལ་ཐཾམས་ཅད་མཁྱེན་པ་ཉིད་ཀྱིསཾ་སྦྱོར་བར་མི་བྱེད་དོ་ཞེས་སོགས་ཀྱི་མདོ་ཚིག་ཆོས་ཅན། སངས་རྒྱས་དཀོན་མཆོག་ལ་འདོམས་པའི་གདམས་ངག་ཡིན་ཏེ། སྒོ་ནས་སངས་རྒྱས་དང་བྱང་ཆུབ་དབྱིངས་དང་ཡེ་ཤེས་སུ་ཞེན་པ་བཀག་པ་སོགས་ཀྱི་སངས་རྒྱས་དཀོན་མཆོག་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། ཆོཾས་ལཾ་དེ་ཤེར་ཕྱིན་ལ་སྤྱོད་པའི་ཚེ་གཟུགས་དངོས་པོ་ཡོད་ཅེས་བྱ་བར་མི་སྦྱོར་རོ་ཞེས་སོགས་ཀྱི་མདོ་ཚིག་ཆོས་ཅན། ཆོས་དཀོན་མཆོག་ལ་འདོམས་པའི་གདམས་ངག་ཡིན་ཏེ། སྒོ་ནས་གཞི་གཉེན་རྣམ་གསུམ་གྱིས་བསྡུས་པའི་ཆོས་ཐམས་ཅད་ངོ་བོ་ཉིད་མེད་པར་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། དགེཾ་འདུཾན། བཅོམ་ལྡན་འདས་གང་ཞིག་ཤེར་ཕྱིན་གྱི་གནས་པ་འདིས་གནས་པའི་བྱང་ཆུབ་སེམས་དཔའ་དེ་གང་ནས་ཤི་འཕོས་ནས་འདིར་སྐྱེས་པ་ལགས། འདི་ནས་ཤི་འཕོས་ནས་ནི་གང་དུ་སྐྱེ་བར་འགྱུར་ཞེས་སོགས་ཀྱི་མདོ་ཚིག་ཆོས་ཅན། དགེ་འདུན་དཀོན་མཆོག་ལ་འདོམས་པའི་གདམས་ངག་ཡིན་ཏེ། སྒོ་ནས་བྱང་སེམས་འཕགས་པ་ཕྱིར་མི་ལྡོག་པ་རྣམས་རང་བཞིན་གྱི་སྐྱེ་བ་མེད་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། གསུམ་པ་སྒྲུབ་པ་ཁྱད་བར་དུ་འགྲོ་བའི་རྒྱུ་ལ་འདོམས་པ་ནི། བརྩོནཾ་འཾགྲུས། བཅོམ་ལྡན་འདས་བྱང་སེམས་ཆེན་པོའི་ལུས་ཀྱི་ཁ་ན་མ་ཐོ་བ་དང་བཅས་པ་དང་ཞེས་སོགས་ཀྱི་མདོ་ཚིག་ཆོས་ཅན། མ་ཞེན་པའི་བརྩོན་འགྲུས་ལ་འདོམས་པའི་གདམས་ངག་ཡིན་ཏེ། སྒོ་ནས་བྱ་བ་ངན་ཞེན་གྱི་ལེ་ལོའི་གཉེན་པོར་ལུས་སོགས་ངོ་བོ་ཉིད་མེད་པར་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། བཞི་པ་སྒྲུབ་པ་ཕྱིར་མི་ལྡོག་པར་འགྲོ་བའི་རྒྱུ་ལ་འདོམས་པ་ནི། དུཾས་ཡུཾན་གཟུགས་ལ་རློམ་སེམས་མེད་པ་དང་ཞེས་སོགས་ཀྱི་མདོ་ཚིག་ཆོས་ཅན། ཡོངས་སུ་མི་ངལ་བའི་བརྩོན་འགྲུས་ལ་འདོམས་པའི་གདམས་ངག་ཡིན་ཏེ། སྒོ་ནས་སྒྱིད་ལུག་པའི་ལེ་ལོའི་གཉེན་པོར་གཟུགས་ནས་རྣམ་མཁྱེན་གྱི་བར་ལ་བདེན་པར་རློམ་པ་མེད་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། ལྔ་པ་སྒྲུབ་པ་ཐེག་པ་གཞན་གྱིས་མི་འགྲོ་བའི་རྒྱུ་ལ་འདོམས་པ་ནི། ཕྱོགཾས་བཾཅུ་ཤཱ་རིའི་བུ་བྱང་སེམས་ཆེན་པོ་ཡེ་ཤེས་གང་དག་ལྡན་པས་ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱང་མཐོང་ཞེས་སོགས་ཀྱི་མདོ་ཚིག་ཆོས་ཅན། ལམ་ཡོངས་སུ་འཛིན་པའི་བརྩོན་འགྲུས་ལ་འདོམས་པའི་གདམས་ངག་ཡིན་ཏེ། སྒོ་ནས་སེམས་ཞུམ་པའི་ལེ་ལོའི་གཉེན་པོར་ཆོས་རྣམས་རང་བཞིན་གྱིས་མ་སྐྱེས་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། དྲུག་པ་སྒྲུབ་པ་གཞན་གྱི་དྲིང་མི་འཇོག་པར་འགྲོ་བའི་རྒྱུ་ལ་འདོམས་པ་ནི། ཤའིཾ་དངཾ་ཤཱ་རིའི་བུ་བྱང་སེམས་ཆེན་པོའི་ཤའི་མིག་གིས་དཔག་ཚད་བརྒྱ་མཐོང་བ་ཡོད་དེ་ཞེས་སོགས་ཀྱི་མདོ་ཚིག་ཆོས་ཅན། སྤྱན་ལྔ་ལ་འདོམས་པའི་གདམས་ངག་ཡིན་ཏེ། སྒོ་ནས་སྤྱན་ལྔ་ཡུལ་ཡུལ་ཅན་རྣམས་དེ་བཞིན་ཉིད་དུ་གཅིག་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། བདུན་པ་སྒྲུབ་པ་རྣམ་མཁྱེན་རྫོགས་པའི་རྒྱུ་ལ་འདོམས་པ་ནི། རྫུཾ་འཕྲུཾལ་དེ་ནི་ས་ཆེན་པོ་འདིའང་རབ་ཏུ་གཡོ་བར་བྱེད་དོ། །གཅིག་ཏུ་གྱུར་ནས་མང་པོར་འགྱུར་རོ་ཞེས་སོགས་ཀྱི་མདོ་ཚིག་ཆོས་ཅན། མངོན་ཤེས་དྲུག་ལ་འདོམས་པའི་གདམས་ངག་ཡིན་ཏེ། སྒོ་ནས་མངོན་ཤེས་དྲུག་གཟོད་མ་ནས་ཞི་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། བརྒྱད་པ་སྒྲུབ་པ་མཐར་ཐུག་པའི་རྒྱུ་ལ་འདོམས་པ་ནི། མཐོཾང་བཾའི་རབ་འབྱོར་ཁྱོད་བྱང་སེམས་ཆེན་པོ་རྣམས་ལ་ཤེར་ཕྱིན་ལས་བརྩམས་ཏེ་སྤོབས་པ་སྐྱེད་ཅིག་ཞེས་སོགས་ཀྱི་མདོ་ཚིག་ཆོས་ཅན། མཐོང་ལམ་ལ་འདོམས་པའི་གདམས་ངག་ཡིན་ཏེ། སྒོ་ནས་མཐོང་སྤང་གི་གཉེན་པོར་མཐོང་ལམ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། འདུཾས་བྱསཾ་རབ་འབྱོར་འདུས་བྱས་ཀྱི་དབྱིངས་མེད་པར་འདུས་མ་བྱས་ཀྱི་དབྱིངས་གདགས་པར་མི་ནུས་སོ་ཞེས་སོགས་ཀྱི་མདོ་ཚིག་ཆོས་ཅན། སྒོམ་ལམ་ལ་འདོམས་པའི་གདམས་ངག་ཡིན་ཏེ། སྒོ་ནས་སྒོམ་སྤང་གི་གཉེན་པོར་སྒོམ་ལམ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་ཡིན་པའི་ཕྱིར། གཉིས་པ་ནི། དེཾ་ལྟརཾ་ཐེག་ཆེན་གྱི་གདམས་ངག་ཆོས་ཅན། ཁྱོད་ལ་རྣམ་པ་བཅུར་གྲངས་ངེས་ཏེ། ཁྱོད་ཀྱི་གདམས་བྱའི་ཡུལ་བཅུ་པོ་དེས་རྣམ་མཁྱེན་དོན་གཉེར་གྱི་སྐྱེས་བུའི་དོན་ཐམས་ཅད་ཕུན་སུམ་ཚོགས་པར་འགྱུར་བའི་ཕྱིར་ཏེ། ཁྱོད་ཀྱི་གདམས་བྱའི་ཡུལ་དེ་ལ་སྒྲུབ་པའི་རྣམ་པ་ནས། སྒྲུབ་པ་མཐར་ཐུག་པར་འགྲོ་བའི་རྒྱུའི་བར་རྣམས་སུ་ཡོད་པའི་ཕྱིར། གཉིས་པ་རྟོགས་དཀའ་བ་བྱེ་བྲག་དུ་བཤད་པ་ལ་གསུམ་ལས། དང་པོ་ནི། དགེཾ་འཾདུན་དབང་པོ་རྟུལ་དང་རྣོན་པོ་དག་ཞེས་སོགས་ཚིགས་བཅད་གཉིས་གསུངས་པ་ཆོས་ཅན། དགོས་པ་ཡོད་དེ། ཐེག་ཆེན་གྱི་དགེ་འདུན་དཀོན་མཆོག་གི་རབ་དབྱེ་བདེ་བླག་དུ་རྟོགས་པའི་ཆེད་ཡོད་པའི་ཕྱིར། གཉིས་པ་ལ་གཉིས་ཏེ། ཉན་ཐོས་ཀྱི་དགེ་འདུན་གྱི་མིང་ཅན་དང་། རང་རྒྱལ་གྱི་དགེ་འདུན་གྱི་མིང་ཅན་ནོ། །དང་པོ་ལ་གསུམ་སྟེ། ཞུགས་པའི་འབྲས་གནས་ཙམ་པོའི། འབྲས་གནས་ཁྱད་པར་ཅན་གྱི་མིང་ཅན་ནོ། །དང་པོ་ནི། དབཾང་པོཾ། བྱང་སེམས་འཕགས་པ་ཆོས་ཅན། ཁྱོད་ལ་ཞུགས་པའི་མིང་ཅན་གཉིས་ཡོད་དེ། ཁྱོད་ལ་དད་པའི་རྗེས་འབྲང་དང་། ཆོས་ཀྱི་རྗེས་འབྲང་གི་མིང་ཅན་གཉིས་ཡོད་པའི་ཕྱིར། གཉིས་པ་ནི། དཾད་དཾང་དེ་ཆོས་ཅན། ཁྱོད་ལ་འབྲས་གནས་ཙམ་པོའི་མིང་ཅན་དྲུག་ཏུ་ཡོད་དེ། ཁྱོད་ལ་རྒྱུན་ཞུགས་འབྲས་གནས་ཙམ་པོ་དད་མོས་མཐོང་ཐོབ་གཉིས། ཕྱིར་འོང་འབྲས་གནས་ཙམ་པོ་དད་མོས་མཐོང་ཐོབ་གཉིས། ཕྱིར་མི་འོང་འབྲས་གནས་ཙམ་པོ་དད་མོས་མཐོང་ཐོབ་གཉིས་ཀྱི་མིང་ཅན་རྣམས་སུ་ཡོད་པའི་ཕྱིར། གསུམ་པ་ནི། རིཾགས་ནཾས་དེ་ཆོས་ཅན། ཁྱོད་ལ་འབྲས་གནས་ཁྱད་པར་ཅན་གྱི་མིང་ཅན་བཅུ་གཅིག་ཡོད་དེ། ཁྱོད་ལ་རྒྱུན་ཞུགས་འབྲས་གནས་ཁྱད་པར་ཅན་གཅིག ཕྱིར་འོང་འབྲས་གནས་ཁྱད་པར་ཅན་གཅིག ཕྱིར་མི་འོང་འབྲས་གནས་ཁྱད་པར་ཅན་དགུའི་མིང་ཅན་རྣམས་སུ་ཡོད་པའི་ཕྱིར། དེ་ཆོས་ཅན། ཁྱོད་ལ་ཕྱི་མ་དགུ་པོ་དེ་ཡོད་དེ། ཁྱོད་ལ་འདའ་བ་བཞི། འོག་མིན་མཐར་ཐུག་འགྲོ། སྲིད་རྩེའི་མཐར་ཐུག་འགྲོ། གཟུགས་ཀྱི་ཆགས་བཅོམ། མཐོང་ཆོས་ཞི། ལུས་མངོན་བྱེད་ཀྱི་མིང་ཅན་རྣམས་སུ་ཡོད་པའི་ཕྱིར། འདི་དག་རྩ་བ་དང་། ཉི་སྣང་གི་དགོངས་པ་ཡིན་ཚུལ་དོགས་གཅོད་དང་བཅས་པ་ངག་ལས་ཤེས་པར་བྱའོ། །གཉིས་པ་ནི། བསེཾ་རུཾ་དེ་ཆོས་ཅན། བསེ་རུ་ལྟ་བུའི་མིང་གིས་གདགས་སུ་རུང་སྟེ། སངས་རྒྱས་དང་ཉན་ཐོས་མི་བཞུགས་པའི་ཞིང་ཁམས་སུ་སྒྲ་མེད་ལུས་ཀྱིས་ཆོས་སྟོན་པའི་ཕྱིར། གསུམ་པ་ལ་གཉིས་ཏེ། ཉན་ཐོས་ཀྱི་དང་། རང་རྒྱལ་གྱི་དགེ་འདུན་གྱི་མིང་ཅན་ནོ། །དང་པོ་ལ་ཟུང་བཞི་ལས། དང་པོ་རྒྱུན་ཞུགས་ཀྱི་སྐོར་ལ་ཞུགས་པ་ནི། འཆཾད་པཾར་མཐོང་ལམ་སྐད་ཅིག་དང་པོ་བཅོ་ལྔ་ལ་གནས་པའི་བྱང་སེམས་ཆོས་ཅན། རྒྱུན་ཞུགས་ཞུགས་པའི་མིང་གིས་གདགས་སུ་རུང་སྟེ། མཐོང་སྤངས་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་པའི་བྱང་སེམས་ཡིན་པའི་ཕྱིར། དེ་ལ་གནས་པའི་བྱང་སེམས་དབང་རྟུལ་ཆོས་ཅན། དད་པའི་རྗེས་འབྲང་གི་མིང་གིས་གདགས་སུ་རུང་སྟེ། དད་པ་ལྷག་པས་འབྲས་བུའི་རྗེས་སུ་སྦྱོང་བའི་བྱང་སེམས་ཡིན་པའི་ཕྱིར། དེ་ལ་གནས་པའི་བྱང་སེམས་དབང་རྣོན་ཆོས་ཅན། ཆོས་ཀྱི་རྗེས་འབྲང་གི་མིང་གིས་གདགས་སུ་རུང་སྟེ། ཤེས་རབ་ལྷག་པས་འབྲས་བུའི་ཆེད་དུ་སྦྱོར་བའི་བྱང་སེམས་ཡིན་པའི་ཕྱིར། འབྲས་གནས་ལ་ཙམ་པོ་ནི། རྒྱུནཾ་དུཾ། སྔར་སྒོམ་སྤང་མ་སྤངས་པའི་སེམས་ཀྱི་སྐད་ཅིག་བཅུ་དྲུག་པ་ལ་གནས་པའི་བྱང་སེམས་ཆོས་ཅན། རྒྱུན་དུ་ཞུགས་པའི་མིང་གིས་གདགས་སུ་རུང་སྟེ། མཐོང་སྤངས་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་བྱང་སེམས་ཡིན་པའི་ཕྱིར། ཁྱད་པར་ཅན་ནི། དེཾ་ཉིདཾ་འདོད་པའི་ལྷའི་སྐྱེ་བ་རིས་མཐུན་གཉིས་སམ་གསུམ་བླངས་ནས་སངས་རྒྱ་བའི་ཚུལ་སྟོན་པའི་བྱང་སེམས་ཆོས་ཅན། ལྷའི་རིགས་ནས་རིགས་སྐྱེའི་མིང་གིས་གདགས་སུ་རུང་སྟེ། དེ་དང་སྐྱེ་བ་ལེན་ཚུལ་མཚུངས་པའི་ཕྱིར། ཟུང་གཉིས་པ་ལ་ཞུགས་པ་ནི། དབངཾ་པོཾ། འདོད་པའི་སྒོམ་སྤང་ལྔ་པ་སྤངས་ནས་དྲུག་པ་སྤོང་བ་ལ་བརྩོན་པའི་བྱང་སེམས་ཆོས་ཅན། ཕྱིར་འོང་ཞུགས་པའི་མིང་གིས་གདགས་སུ་རུང་སྟེ། འདོད་པའི་སྒོམ་སྤངས་དྲུག་པ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་པ་ཡིན་པའི་ཕྱིར། འབྲས་གནས་ལ་ཙམ་པོ་ནི། ལནཾ་གཅིཾག་འདོད་པའི་སྒོམ་སྤངས་དྲུག་པ་སྤངས་པའི་རྣམ་གྲོལ་ལམ་ལ་གནས་པའི་བྱང་སེམས་ཆོས་ཅན། ལན་གཅིག་ཕྱིར་འོང་གི་མིང་གིས་གདགས་སུ་རུང་སྟེ། འདོད་པའི་སྒོམ་སྤངས་དྲུག་པ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པ་ཡིན་པའི་ཕྱིར། ཁྱད་པར་ཅན་ནི། དེཾ་ཉིདཾ་འདོད་པ་ཁམས་སུ་སྐྱེ་བ་ལན་གཅིག་བླངས་ནས་སངས་རྒྱ་བའི་ཚུལ་སྟོན་པའི་བྱང་སེམས་ཆོས་ཅན། བར་ཆད་གཅིག་པའི་མིང་གིས་གདགས་སུ་རུང་སྟེ། དེ་དང་སྐྱེ་བ་ལེན་ཚུལ་མཚུངས་པའི་ཕྱིར། ཟུང་གསུམ་པ་ལ་ཞུགས་པ་ནི། སྔཾ་མཾ་འདོད་པའི་སྒོམ་སྤངས་དགུ་པ་སྤོང་བ་ལ་བརྩོན་པའི་བྱང་སེམས་ཆོས་ཅན། ཕྱིར་མི་འོང་ཞུགས་པའི་མིང་གིས་གདགས་སུ་རུང་སྟེ། འདོད་པའི་སྒོམ་སྤངས་དགུ་པ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱིས་འབྲས་བུ་ཐོབ་ཕྱིར་དུ་བརྩོན་པ་ཡིན་པའི་ཕྱིར། འབྲས་གནས་ལ་ཙམ་པོ་ནི་མ་གསུངས་ལ། ཁྱད་པར་ཅན་ལ་འདའ་བ་ཞི། གོང་འཕོ་གསུམ། སྲིད་རྩེའི་མཐར་ཐུག་འགྲོ་གཉིས་ཏེ་ཚན་པ་གསུམ་ལས། དང་པོ་ནི། ཕྱིརཾ་མིཾ། གཟུགས་ཀྱི་བར་དོར་སངས་རྒྱ་བའི་ཚུལ་སྟོན་པ་དང་། གཟུགས་སུ་སྐྱེས་ཙམ་ནས་སངས་རྒྱ་བའི་ཚུལ་སྟོན་པ་དང་། གཟུགས་སུ་སྐྱེས་ནས་ལམ་ལ་འབད་རྩོལ་དང་བཅས་ཏེ་སངས་རྒྱ་བའི་ཚུལ་སྟོན་པ་དང་། ལམ་ལ་འབད་རྩོལ་མེད་པར་སངས་རྒྱ་བའི་ཚུལ་སྟོན་པའི་བྱང་སེམས་བཞི་པོ་ཆོས་ཅན། རིམ་པ་ལྟར་བར་འདའ་བ་དང་། སྐྱེས་འདའ་བ་དང་། མངོན་པར་འདུ་བྱེད་དང་བཅས་ཏེ་འདའ་བ་དང་། མངོན་པར་འདུ་བྱེད་མེད་པར་འདའ་བའི་མིང་གིས་གདགས་སུ་རུང་སྟེ། དེ་དག་དང་སྐྱེ་བ་ལེན་ཚུལ་མཚུངས་པའི་ཕྱིར། གཉིས་པ་ནི། དེཾ་ཉིདཾ་ཚངས་རིས་ནས་འོག་མིན་གྱི་བར་དུ་སྐྱེས་ནས་ཞིང་སྣ་ཚོགས་སུ་སངས་རྒྱ་བའི་ཚུལ་སྟོན་པའི་བྱང་སེམས་ཆོས་ཅན། འོག་མིན་མཐར་ཐུག་འགྲོའི་མིང་གིས་གདགས་སུ་རུང་སྟེ། དེ་དང་སྐྱེ་བ་ལེན་ཚུལ་མཚུངས་པའི་ཕྱིར། དབྱེ་ན་གསུམ་ལས། ཕྱི་མ་ཚངས་རིས་སུ་སྐྱེས་ཏེ། བར་གྱི་གནས་གཞན་རྣམས་དོར་བ་འོག་མིན་དུ་སངས་རྒྱ་བའི་ཚུལ་སྟོན་པ་དང་། ཚངས་རིས་ནས་གཙང་མའི་འོག་མ་གསུམ་གང་རུང་དུ་སྐྱེས་ནས་བར་གྱི་གནས་གཞན་རྣམས་བརྒལ་ཏེ། འོག་མིན་དུ་སྐྱེས་ནས་སངས་རྒྱ་བའི་ཚུལ་སྟོན་པ་དང་། ཚངས་རིས་ནས་འོག་མིན་གྱི་བར་དུ་རིམ་པ་བཞིན་དུ་སྐྱེས་ནས་ཞིང་སྣ་ཚོགས་སུ་སངས་རྒྱ་བའི་ཚུལ་སྟོན་པའི་བྱང་སེམས་ཆོས་ཅན། རིམ་པ་ལྟར་འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བའི་མིང་གིས་གདགས་སུ་རུང་སྟེ། དེ་དག་དང་སྐྱེ་བ་ལེན་ཚུལ་མཚུངས་པའི་ཕྱིར། གསུམ་པ་ནི། དེཾ་ཉིདཾ་གཟུགས་ཀྱི་འདོད་ཆགས་དང་བྲལ་བའི་བྱང་སེམས་ཆོས་ཅན། སྲིད་རྩེའི་མཐར་ཐུག་འགྲོའི་མིང་གིས་གདགས་སུ་རུང་སྟེ། བཞེད་ན་གཟུགས་མེད་བཞི་ལ་འཇུག་ནུས་པའི་ཕྱིར། དབྱེ་ན་གཉིས་ལས། མཐོང་བའི་ཆོས་ལ་བྱང་ཆུབ་མངོན་དུ་བྱེད་པའི་བྱང་སེམས་ཆོས་ཅན། མཐོང་ཆོས་བཞིའི་མིང་གིས་གདགས་སུ་རུང་སྟེ། དེ་དང་བྱང་ཆུབ་ཐོབ་ཚུལ་མཚུངས་པའི་ཕྱིར། རྣམ་ཐར་བརྒྱད་ཀྱི་ཏིང་ངེ་འཛིན་ལུས་ཀྱིས་མངོན་སུམ་དུ་བྱེད་པའི་བྱང་སེམས་ཆོས་ཅན། ལུས་མངོན་བྱེད་ཀྱི་མིང་གིས་གདགས་སུ་རུང་སྟེ། དེ་དང་ཡོན་ཏན་ཐོབ་ཚུལ་མཚུངས་པའི་ཕྱིར། ཟུང་བཞི་པ་ལ་ཞུགས་པ་ནི། དགྲཾ་བཅོཾམ་སྲིད་རྩེའི་སྒོམ་སྤངས་དགུ་པ་སྤོང་བ་ལ་བརྩོན་པའི་བྱང་སེམས་ཆོས་ཅན། དགྲ་བཅོམ་ཞུགས་པའི་མིང་གིས་གདགས་སུ་རུང་སྟེ། ཁམས་གསུམ་གྱི་སྒོམ་སྤངས་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་པའི་བྱང་སེམས་ཡིན་པའི་ཕྱིར། གཉིས་པ་ནི། རཾང་སཾངས་རྩ་བའི་ངག་དོན་འགོད། ཉན་ཐོས་ཀྱི་དགེ་འདུན་གྱི་མིང་ཅན་རྣམས་མདོ་ལས་སྐྱེ་བ་ལེན་ཚུལ་གྱི་ཆོས་མཐུན་འབའ་ཞིག་གསུངས་པས་སྐྱེ་བ་ལེན་ཚུལ་གསུངས་པའི་ཕྱིར་ཞེས་པ་འབའ་ཞིག་གིས་ཆོག་མོད་ཀྱི། འདིར་ཞུགས་པ་དང་། འབྲས་གནས་ཙམ་པོ་རྣམས་སྤངས་པའི་སྒོ་ནས་བཞག་པ་ནི་ཉི་སྣང་གི་རྗེས་སུ་འབྲང་བའོ། །གཉིས་པ་ཕྱིར་མི་ལྡོག་པའི་སྒྲུབ་པ་ལ་བཞི་སྟེ། སྒྲུབ་པ་སྐྱེས་པའི་གནས་སྐབས། སྒྲུབ་པའི་རྟེན། སྒྲུབ་པའི་དམིགས་པ། སྒྲུབ་པའི་ཆེད་དུ་བྱ་བའོ། །དང་པོ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གསུམ་ལས། དང་པོ་ནི། ལཾས་དཾང་བྱམས་མགོན་ཆོས་ཅན། ཐེག་ཆེན་གྱི་གདམས་ངག་གི་འོག་ཏུ་ཐེག་ཆེན་གྱི་ངེས་འབྱེད་ཆ་མཐུན་འཆད་པའི་རྒྱུ་མཚན་ཡོད་དེ། ལས་དང་པོ་པ་ཐེག་ཆེན་གྱི་གདམས་ངག་ཐོབ་པ་ལས། ཐེག་ཆེན་གྱི་ངེས་འབྱེད་ཆ་མཐུན་འབྱུང་བའི་ཕྱིར། གཉིས་པ་ནི། དམིཾགས་པཾ་རྟེན་དང་། ངོ་བོ་དང་། ལྡན་པ་དང་། དབྱེ་བའི་ཁྱད་པར་བཞི་དང་ལྡན་པའི་བྱང་སེམས་ཀྱི་སྦྱོར་ལམ་ཆོས་ཅན། ཉན་རང་གི་སྦྱོར་ལམ་ལས་ཁྱད་པར་དུ་འཕགས་ཏེ། དེ་ལས་དམིགས་པ་དང་། རྣམ་པ་དང་། རྒྱུ་དང་། ཡོངས་འཛིན་བཞིའི་སྒོ་ནས་ཁྱད་པར་དུ་འཕགས་པའི་ཕྱིར། གསུམ་པ་ལ་གཉིས་ཏེ། དངོས་ཀྱི་དོན་དང་། ཞར་ལས་བྱུང་བའོ། །དང་པོ་ལ་གཉིས་ཏེ། ཁྱད་པར་དུ་འཕགས་པའི་ཚུལ་དང་། ཁྱད་པར་དུ་འཕགས་པའི་རྒྱུ་མཚན་ནོ། །དང་པོ་ལ་གསུམ་སྟེ། གང་དང་། གང་གིས་དང་། གང་ལས་ཁྱད་པར་དུ་འཕགས་པའོ། །དང་པོ་ལ་བཞི་སྟེ། རྒྱུ་དང་། འབྱུང་བའི་དུས་དང་། ངོ་བོ་དང་། དབྱེ་བའོ། །དང་པོ་ནི། བྱངཾ་ཆུབཾ་ཐེག་ཆེན་གྱི་སྦྱོར་ལམ་ཆོས་ཅན། ཁྱོད་ཀྱི་ཉེ་རྒྱུ་ཡོད་དེ། ཐེག་ཆེན་གྱི་ཚོགས་ལམ་ཁྱད་པར་ཅན་གྱི་དད་སོགས་དེ་ཁྱོད་ཀྱི་ཉེ་རྒྱུ་ཡིན་པའི་ཕྱིར། གཉིས་པ་ནི། དེའི་འོཾག་ཏུཾ་ཐེག་ཆེན་གྱི་སྦྱོར་ལམ་ཆོས་ཅན། ཁྱོད་འབྱུང་བའི་དུས་ཡོད་དེ། ཁྱོད་ཐེག་ཆེན་གྱི་ཚོགས་ལམ་ཁྱད་པར་ཅན་གྱི་དད་སོགས་རྫོགས་པའི་འོག་ཏུ་འབྱུང་བའི་ཕྱིར། གསུམ་པ་ནི། བདེཾན་པཾ་ཐེག་ཆེན་གྱི་དྲོད་སོགས་བཞི་པོ་ཆོས་ཅན། ཐེག་ཆེན་གྱི་སྦྱོར་ལམ་གྱི་ངོ་བོ་ཡིན་ཏེ། ཐེག་ཆེན་གྱི་མཐོང་ལམ་དང་། དམིགས་རྣམ་རྗེས་སུ་མཐུན་པའི་འཇིག་རྟེན་པའི་སྒོམ་བྱུང་གཙོ་བོར་གྱུར་པ་ཡིན་པའི་ཕྱིར། བཞི་པ་ནི། ཆུཾང་ངུཾ་ཐེག་ཆེན་གྱི་དྲོད་སོགས་བཞི་པོ་ཆོས་ཅན། རེ་རེ་ལ་གསུམ་གསུམ་ཡོད་དེ། རེ་རེ་ལ་ཆུང་འབྲིང་ཆེན་པོ་གསུམ་ཡོད་པའི་ཕྱིར། གཉིས་པ་ནི། འཆདཾ་པཾར་ཐེག་ཆེན་གྱི་སྦྱོར་ལམ་མཉམ་གཞག་དྲོད་སོགས་བཞི་ཆོས་ཅན། ཁྱད་ཆོས་ལྔ་དང་ལྡན་ཏེ། བདེན་བཞི་མི་རྟག་ལ་སོགས་བཅུ་དྲུག་ལ་དམིགས་པ་དང་། མངོན་ཞེན་མེད་པ་སོགས་ཀྱི་རྣམ་པར་ཞུགས་པ་དང་། ཐེག་པ་གསུམ་ཆར་རྟོགས་པའི་མཐོང་ལམ་གྱི་རྒྱུ་དང་། ཐེག་ཆེན་གྱི་ཡོངས་འཛིན་གྱིས་ཡོངས་སུ་འཛིན་པ་དང་། རྣམ་རྟོག་བཞི་དང་འབྲེལ་བར་འབྱུང་བའི་སྦྱོར་ལམ་ཡིན་པའི་ཕྱིར། གསུམ་པ་ནི། ཉནཾ་ཐོསཾ་ཐེག་ཆེན་གྱི་སྦྱོར་ལམ་ཆོས་ཅན། ཉན་རང་གི་སྦྱོར་ལམ་ལས་ཁྱད་པར་དུ་འཕགས་ཏེ། ཁྱད་ཆོས་ལྔ་ལྡན་གྱི་བྱང་སེམས་ཀྱི་སྦྱོར་ལམ་ཡིན་པའི་ཕྱིར། གཉིས་པ་ནི། དེཾ་དཾག་ཉན་རང་གི་སྦྱོར་ལམ་ཆོས་ཅན། ཐེག་ཆེན་གྱི་སྦྱོར་ལམ་ལས་དམན་ཏེ། ཁྱོད་ཆོས་ལྔ་དང་བྲལ་བའི་སྦྱོར་ལམ་ཡིན་པའི་ཕྱིར། གཉིས་པ་ཞར་ལས་བྱུང་བ་ལ་གསུམ་སྟེ། དམིགས་ཚུལ་སྣ་ཚོགས་སུ་བསྟན་པ། རྒྱས་པར་མ་བཀྲོལ་བའི་རྒྱུ་མཚན། ལུང་གཞན་དང་འགལ་བ་སྤང་བའོ། །དང་པོ་ནི། བྱངཾ་ཆུཾབ་བྱང་སེམས་ཀྱི་ངེས་འབྱེད་ཆ་མཐུན་ཆོས་ཅན། བདེན་བཞིའི་དངོས་པོ་ལ་དམིགས་ཚུལ་སྣ་ཚོགས་ཀྱིས་དམིགས་ཏེ། དེ་ལ་རྒྱུ་འབྲས་ངོ་བོ་ཆོས་ཉིད་སོགས་ཀྱིས་དམིགས་པའི་ཕྱིར། དེ་ཆོས་ཅན། མི་རྟག་ལ་སོགས་བཅུ་དྲུག་གིས་ཀྱང་བདེན་བཞི་ལ་དམིགས་ཏེ། ཐེག་དམན་གྱི་རྟོགས་རིགས་ཀྱི་བདེན་བཞི་ལ་དམིགས་པའི་ཕྱིར། གཉིས་པ་ནི། མདོཾར་བསྡུསཾ་རྣམ་པ་གཞན་གྱིས་དམིགས་ཚུལ་བརྗོད་དགོས་སོ་ཞེ་ན། སེང་བཟང་ཆོས་ཅན། རྣམ་པ་གཞན་གྱིས་དམིགས་ཚུལ་སྐབས་འདིར་རྒྱས་པར་མ་བརྗོད་དེ། སྐབས་འདིར་དམིགས་ཚུལ་མདོར་བསྡུས་པ་ཙམ་བརྗོད་པར་འདོད་པའི་ཕྱིར། གསུམ་པ་ནི། གཾང་གིཾས་རྣམ་པ་མི་འདྲ་བ་དུ་མའི་དམིགས་ཚུལ་མི་འཐད་དེ། མཛོད་ལས། དྲི་མེད་བཅུ་དྲུག་གཞན་རྣམ་མེད། །ཅེས་བཤད་པས་སོ་ཤེ་ན། ཐེག་པ་ཆེན་པོ་ཆོས་ཅན། ཁྱོད་ཀྱི་ལུགས་ཀྱིས་ཐེག་ཆེན་གྱི་སྦྱོར་ལམ་གྱི་དམིགས་རྣམ་བཞག་པ་ལ། ཐེག་པ་གཞན་གྱི་སུན་འབྱིན་བརྗོད་པར་མི་བྱ་སྟེ། ཁྱོད་ཀྱི་དེ་ཐེག་པ་གཞན་ལས་ཁྱད་པར་དུ་འཕགས་པ་ཁོ་ན་ཡིན་པའི་ཕྱིར། གཉིས་པ་རྒྱས་པར་བཤད་པ་ལ་གསུམ་སྟེ། དམིགས་རྣམ་རྒྱུ་གསུམ་རྒྱས་པར་བཤད། ལྡན་པ་རྣམ་རྟོག་རྒྱས་པར་བཤད། ཡོངས་འཛིན་དགེ་བཤེས་རྒྱས་པར་བཤད་པའོ། །དང་པོ་ལ་གསུམ་སྟེ། དྲི་བའི་སྒོ་ནས་མཚམས་སྦྱར། སོ་སོའི་རང་བཞིན་རྒྱས་པར་བཤད། ཆོས་ཅན་བརྗོད་པ་ཆད་པའི་རྩོད་སྤང་ངོ་། །དང་པོ་ནི། དམིཾགས་པཾ་དམིགས་པ་མི་རྟག་ལ་སོགས་པ་ཞེས་སོགས་ཚིགས་བཅད་བདུན་གསུངས་པ་ཆོས་ཅན། དགོས་པ་ཡོད་དེ། ཐེག་ཆེན་གྱི་སྦྱོར་ལམ་གྱི་དམིགས་རྣམ་གྱི་ཁྱད་པར་བདེ་བླག་ཏུ་རྟོགས་པའི་ཆེད་ཡོད་པའི་ཕྱིར། གཉིས་པ་ལ་དྲོད་སོགས་བཞི་ལས། དང་པོ་དྲོད་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ནི། དམིཾགས་དང་དེཾ་བྱང་སེམས་ཀྱི་སྦྱོར་ལམ་དྲོད་ཆུང་ངུ་ཆོས་ཅན། ཐེག་དམན་གྱི་དྲོད་ཆུང་ངུ་ལས་ཁྱད་པར་དུ་འཕགས་ཏེ། དེ་ལས་དམིགས་རྣམ་རྒྱུ་གསུམ་གྱིས་ཁྱད་པར་དུ་འཕགས་པའི་ཕྱིར། འོག་མ་ཀུན་ལ་འགྲེའོ། །གཟུགས་དང་འབྲིངཾ་དྲོད་འབྲིང་དང་སྦྱར་རོ། །གནཾས་དང་ཆེཾན་དྲོད་ཆེན་པོ་དང་སྦྱར་རོ། །གཉིས་པ་ནི། དེཾ་ལྟརཾ་དམིགས་རྣམ་རྒྱུ་གསུམ་གྱི་ཁྱད་པར་དང་ལྡན་པའི་ཐེག་ཆེན་གྱི་སྦྱོར་ལམ་དང་པོ་ཆོས་ཅན། དྲོ་བར་གྱུར་པ་ཞེས་བརྗོད་པའི་རྒྱུ་མཚན་ཡོད་དེ། མཐོང་ལམ་རྣམ་པར་མི་རྟོག་པའི་ཡེ་ཤེས་ཀྱི་མེ་སྐྱེ་བའི་སྔ་ལྟས་སུ་གྱུར་པ་ཡིན་པའི་ཕྱིར། གཉིས་པ་རྩེ་མོ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ནི། གཟུགས་དང་ཆུངཾ་རྩེ་མོ་ཆུང་ངུ་དང་སྦྱར་རོ། །དེཾ་རྣཾམས་དང་འབྲིངཾ་རྩེ་མོ་འབྲིང་དང་སྦྱར་རོ། །དེཾ་དཾག་དང་ཆེཾན་རྩེ་མོ་ཆེན་པོ་དང་སྦྱར་རོ། །གཉིས་པ་ནི། དེཾ་ལྟརཾ་དམིགས་རྣམ་རྒྱུ་གསུམ་གྱི་ཁྱད་པར་དང་ལྡན་པའི་ཐེག་ཆེན་གྱི་སྦྱོར་ལམ་གཉིས་པ་ཆོས་ཅན། རྩེ་མོར་གྱུར་པ་ཞེས་བརྗོད་པའི་རྒྱུ་མཚན་ཡོད་དེ། དགེ་བའི་རྩ་བ་མི་མཐུན་ཕྱོགས་ཀྱིས་གཡོ་བ་རྣམས་ཀྱི་རྩེ་མོ་ཡིན་པའི་ཕྱིར། གསུམ་པ་བཟོད་པ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ནི། གཟུཾགས་དང་ཆུཾང་། བཟོད་པ་ཆུང་ངུ་སྦྱར་རོ། །དེཾ་དང་འབྲིངཾ་བཟོད་པ་འབྲིང་དང་སྦྱར་རོ། །དེཾ་དཾག་དང་ཆེནཾ་བཟོད་པ་ཆེན་པོ་དང་སྦྱར་རོ། །གཉིས་པ་ནི། དེཾ་ལྟརཾ་དམིགས་རྣམ་རྒྱུ་གསུམ་གྱི་ཁྱད་པར་དང་ལྡན་པའི་ཐེག་ཆེན་གྱི་སྦྱོར་ལམ་གསུམ་པ་ཆོས་ཅན། བཟོད་པར་གྱུར་པ་ཞེས་བརྗོད་པའི་རྒྱུ་མཚན་ཡོད་དེ། ཆོས་ཆེན་པོ་སྐྱེ་མེད་ཀྱི་དོན་ལ་མི་སྐྲག་པའི་བཟོད་པ་ཐོབ་པའི་ཕྱིར། བཞི་པ་ཆོས་མཆོག་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ནི། ཏིངཾ་དང་ཆུཾང་ཆོས་མཆོག་ཆུང་ངུ་དང་སྦྱར་རོ། །ལུཾང་དང་འབྲིཾང་ཆོས་མཆོག་འབྲིང་དང་སྦྱར་རོ། །གསུམཾ་དང་ཆེནཾ་ཆོས་མཆོག་ཆེན་པོ་དང་སྦྱར་རོ། །གཉིས་པ་ནི། དེ་ལྟར་དམིགས་རྣམ་རྒྱུ་གསུམ་གྱི་ཁྱད་པར་དང་ལྡན་པའི་ཐེག་ཆེན་གྱི་སྦྱོར་ལམ་བཞི་པ་ཆོས་ཅན། ཆོས་མཆོག་ཅེས་བརྗོད་པའི་རྒྱུ་མཚན་ཡོད་དེ། འཇིག་རྟེན་པའི་ཆོས་ཐམས་ཅད་ཀྱི་མཆོག་ཡིན་པའི་ཕྱིར། གསུམ་པ་ལ་རྩོད་པ་ནི། དམིགས་པ་མི་རྟག་ལ་སོགས་པ། བདེན་པའི་རྟེན་ཅན། ཞེས་པས་དམིགས་རྣམ་དང་པོ་བདེན་པའི་རྟེན་ཅན་དུ་བསྟན་པ་ལྟར། དམིགས་རྣམ་ལྷག་མ་རྣམས་ཀྱང་བདེན་པའི་རྟེན་ཅན་དུ་བསྟན་དགོས་པ་ལས་མ་བསྟན་པར་དམིགས་རྣམ་གྱི་ཆོས་འབའ་ཞིག་བརྗོད་པས་དམིགས་རྣམ་ལྷག་མ་རྣམས་སྟོན་པའི་གཞུང་ལ་ཐོས་བསམ་བྱས་ཀྱང་བདེན་བཞིའི་དོན་མི་རྟོགས་པར་འགྱུར་རོ་ཞེ་ན། ལན་ལ་གཉིས་ཏེ། སྒྲ་གཉིས་བརྗོད་བྱ་ཐ་དད་མེད་པས་ཆོས་ཅན་གོ་བའི་ལན། དོན་གྱི་ཤུགས་ཀྱིས་ཆོས་ཅན་གོ་བའི་ལན་ནོ། །དང་པོ་ནི། དམིཾགས་པཾ་དམིགས་རྣམ་ཕྱི་མ་རྣམས་སྟོན་པའི་རྒྱན་གཞུང་ཆོས་ཅན། ཁྱོད་ལ་བརྟེན་ནས་ཆོས་ཅན་བདེན་བཞི་མི་རྟོགས་པའི་སྐྱོན་མེད་དེ། ཁྱོད་ཀྱིས་བདེན་བཞིའི་ཆོས་དམིགས་རྣམ་བརྗོད་པ་གང་ཞིག ཆོས་དང་ཆོས་ཅན་བརྗོད་པའི་སྒྲ་གཉིས་དོན་གཅིག་ཉིད་ཁྱད་པར་གཞན་སྤོང་མི་སྤོང་གི་ཚུལ་གྱིས་བརྗོད་པ་མ་གཏོགས་པར་བརྗོད་བྱའི་དོན་ལ་ཁྱད་པར་མེད་པའི་ཕྱིར་རོ། །གཉིས་པ་ནི། རྣཾམ་པཾ་དམིགས་རྣམ་ཕྱི་མ་རྣམས་བདེན་བཞིའི་རྟེན་ཅན་དུ་མ་བསྟན་པས་བདེན་བཞིའི་ཆོས་མིན་པར་འགྱུར་རོ་ཞེ་ན། དམིགས་རྣམ་ཕྱི་མ་རྣམས་ཆོས་ཅན། བདེན་བཞིའི་ཆོས་མ་ཡིན་པའི་སྐྱོན་མེད་དེ། དམིགས་རྣམ་དང་པོའི་ཆོས་ཅན་བདེན་བཞི་དེ་ཁྱོད་ཀྱི་ཆོས་ཅན་ཡིན་པའི་ཕྱིར། གཉིས་པ་ལྡན་པ་རྣམ་རྟོག་རྒྱས་པར་བཤད་པ་ལ་གཉིས་ཏེ། མཚམས་སྦྱར། གཞུང་གི་དོན་འབྱེད་པའོ། །དང་པོ་ནི། རྣཾམ་པཾར་སོགས་སོ། །གཉིས་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ལྡན་ཚུལ་གྱིས་དོན་བསྡུ་བའོ། །དང་པོ་ལ་གཉིས་ཏེ། གཟུང་རྟོག་མདོར་བསྟན། འཛིན་རྟོག་མདོར་བསྟན་པའོ། །དང་པོ་ནི། གཞིཾ་དང་གཟུཾང་གཟུང་རྟོག་ཆོས་ཅན། གཉིས་ཡོད་དེ། གཞིའི་རྟེན་ཅན་གྱི་གཟུང་བར་རྟོག་པ་དང་། གཉེན་པོའི་རྟེན་ཅན་གྱི་གཟུང་བར་རྟོག་པ་གཉིས་ཡོད་པའི་ཕྱིར། གཟུང་རྟོག་གཉིས་པོ་ཆོས་ཅན། རྣམ་པ་དགུ་དགུར་ཡོད་དེ། ཡུལ་དགུ་དགུ་ཡོད་པའི་དབྱེ་བས་ཕྱེ་བའི་ཕྱིར་རོ། །གཉིས་པ་ནི། རྫཾས་དང་གཾང་འཛིན་རྟོག་ཆོས་ཅན། གཉིས་ཡོད་དེ། གང་ཟག་རྫས་སུ་ཡོད་པ་ལ་དམིགས་པ་དང་། སྐྱེས་བུ་བཏགས་པར་ཡོད་པ་ལ་དམིགས་པ་གཉིས་ཡོད་པའི་ཕྱིར། འཛིན་རྟོག་གཉིས་པོ་ཆོས་ཅན། ཆོས་རྟགས་གཟུང་རྟོག་གི་སྐབས་དང་འདྲ། གཉིས་པ་ལ་གཉིས་ཏེ། མཚམས་སྦྱར་བ། རྒྱས་པར་བཤད་པའོ། །དང་པོ་ནི། དེཾ་སོགས་སོ། །གཉིས་པ་ལ་གཉིས་ཏེ། གཟུང་རྟོག་རྒྱས་པར་བཤད་པ། འཛིན་རྟོག་རྒྱས་པར་བཤད་པའོ། །དང་པོ་ལ་གཉིས་ཏེ། གཞི་དང་། གཉེན་པོའི་རྟེན་ཅན་གྱི་གཟུང་རྟོག་རྒྱས་པར་བཤད་པའོ། །དང་པོ་ནི། ཀུཾན་མ་རིག་པ་ལ་དམིགས་ནས་དོར་བྱའི་བཟུང་བར་མངོན་པར་ཞེན་པའི་བློ་ཆོས་ཅན། གཞིའི་རྟེན་ཅན་གྱི་གཟུང་བར་རྟོག་པ་ཡིན་ཏེ། རང་ཡུལ་དོར་བྱ་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ་ཡིན་པའི་ཕྱིར། གཟུགས་ལ་སོགས་པའི་ཕུང་པོ་ནས་རྣམ་དག་སྐྱེ་བྱེད་སོགས་ཀྱི་བར་བརྒྱད་པོ་རེ་རེ་བཞིན་ཆོས་ཅན་དུ་བཟུང་ནས་ཆོས་རྟགས་འདྲའོ། །དེ་ལ་དང་པོ་བརྒྱད་རང་རྒྱལ་གྱི་སྤང་བྱའི་རིགས་སུ་གནས་པའི་ཀུན་ནས་ཉོན་མོངས་གཟུང་རྟོག་ཡིན་ལ། ཕྱི་མ་ནི་བྱང་སེམས་ཀྱི་སྤང་བྱའི་རིགས་སུ་གནས་པའི་གཟུང་རྟོག་སྟེ། འདི་ལ་སྐབས་ལྔ་པར་ལྡོག་པ་གཟུང་རྟོག་དགུར་ཕྱེ་ནས་གསུངས་སོ། །གཉིས་པ་ནི། གཉེནཾ་རྣམ་བྱང་གི་ཕུང་པོ་ལ་དམིགས་ནས་བླང་བྱའི་གཟུང་བར་མངོན་པར་ཞེན་པའི་བློ་ཆོས་ཅན། གཉེན་པོའི་རྟེན་ཅན་གྱི་གཟུང་བར་རྟོག་པ་ཡིན་ཏེ། རང་ཡུལ་བླང་བྱ་ལ་དམིགས་ནས་བླང་བྱའི་བཟུང་བར་མངོན་པར་ཞེན་པའི་བློ་ཡིན་པའི་ཕྱིར། རྣམ་བྱང་སྐྱེ་བའི་སྒོ་ནས་གཟུང་སྟེ་མི་སློབ་པའི་ལམ་ལ་བླང་བྱའི་བཟུང་བར་རྟོག་པའི་བར་བརྒྱད་པོ་རེ་རེ་བཞིན་ཆོས་ཅན་དུ་བཟུང་ནས་ཆོས་རྟགས་འདྲའོ། །དེ་ལ་གཟུང་རྟོག་དང་པོ་བཞི་དང་། ཕྱི་མ་གསུམ་ནི་རང་རྒྱལ་གྱི་སྤང་བྱའི་རིགས་སུ་གནས་པའི་རྣམ་བྱང་གཟུང་རྟོག་ཡིན་ལ། བར་པ་གཉིས་ནི་བྱང་སེམས་ཀྱི་སྤང་བྱའི་རིགས་སུ་གནས་པའི་གཟུང་རྟོག་སྟེ། འདི་ལ་སྐབས་ལྔ་པར་འཇུག་པ་གཟུང་རྟོག་དགུར་ཕྱེ་ནས་གསུངས་སོ། །གཉིས་པ་ལ་གཉིས་ཏེ། རྫས་འཛིན་རྟོག་པ་རྒྱས་པར་བཤད། བཏགས་འཛིན་རྟོག་པ་རྒྱས་པར་བཤད་པའོ། །དང་པོ་ནི། གཾང་བདག་རང་དབང་ཅན་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ་དེ་ཆོས་ཅན། རྫས་འཛིན་རྟོག་པ་ཡིན་ཏེ། རང་ཡུལ་འཛིན་པ་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ་ཡིན་པའི་ཕྱིར། གཅིག་བུའི་བདག་ནས་བཟུང་སྟེ། མི་སློབ་ལམ་གྱི་རྟེན་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བར་བརྒྱད་པོ་རེ་རེ་བཞིན་ཆོས་ཅན་དུ་བཟུང་ནས་ཆོས་རྟགས་འདྲའོ། །དེ་ལ་འཛིན་རྟོག་དང་པོ་བཞི་ནི་གང་ཟག་གི་དབང་དུ་བྱས་པའི་རྫས་འཛིན་རྟོག་པ་སྟེ་ཉན་ཐོས་ཀྱི་སྤང་བྱའི་རིགས་སུ་གནས་པའི་ཉོན་སྒྲིབ་ཡིན་ལ། ཕྱི་མ་ལྔ་ནི་ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་སྟེ། འདི་ལ་སྐབས་ལྔ་པར་མཐོང་སྤངས་རྫས་འཛིན་རྟོག་པ་དགུར་ཕྱེ་ནས་གསུངས་སོ། །གཉིས་པ་ནི། སྐྱེསཾ་གང་ཟག་བཏགས་ཡོད་ཀྱི་གདགས་གཞིའི་ཕུང་པོ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ་ཆོས་ཅན། བཏགས་འཛིན་རྟོག་པ་ཡིན་ཏེ། རང་ཡུལ་བཏགས་ཡོད་ཀྱི་འཛིན་པ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ་ཡིན་པའི་ཕྱིར། དེ་བཞིན་དུ་གང་ཟག་བཏགས་ཡོད་ཀྱི་གདགས་གཞི་སེམས་བསྐྱེད་ནས་བཟུང་སྟེ་མི་སློབ་པའི་ལམ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློའི་བར་བརྒྱད་པོ་རེ་རེ་བཞིན་ཆོས་ཅན་དུ་བཟུང་ནས་ཆོས་རྟགས་འདྲའོ། །འདི་དག་ནི་བྱང་སེམས་ཀྱི་སྤང་བྱའི་རིགས་ཁོ་ན་སྟེ། ཉན་རང་གིས་བཏགས་འཛིན་རྟོག་པ་སྤང་བྱར་མི་བྱེད་པའི་ཕྱིར་རོ། །འདི་ལ་བཏགས་ཆོས་དགུ་ལ་བཏགས་ཡོད་དུ་འཛིན་པ་ནི་གང་ཟག་གི་དབང་དུ་བྱས་པའི་བཏགས་འཛིན་རྟོག་པ་ཡིན་ཞིང་། གདགས་གཞི་དགུ་ལ་བཏགས་ཡོད་དུ་འཛིན་པ་ནི་ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་སྟེ། སྐབས་ལྔ་པར་མཐོང་སྤངས་བཏགས་འཛིན་རྟོག་པ་དགུར་ཕྱེ་ནས་གསུངས་སོ། །གསུམ་པ་ནི། དེཾ་ཅི་སྐད་བཤད་པའི་རྟོག་པ་བཞི་པོ་ཆོས་ཅན། ཐེག་ཆེན་གྱི་ངེས་འབྱེད་ཆ་མཐུན་བཞི་ལ་གྲངས་བཞིན་དུ་ལྡན་པ་ཡིན་ཏེ། ཐེག་ཆེན་གྱི་ངེས་འབྱེད་ཆ་མཐུན་རྗེས་ཐོབ་བཞིའི་ངོ་བོར་གྲངས་བཞིན་དུ་ལྡན་པའི་ཕྱིར། ཤུགས་བསྟན་དགག་རྟོག་དང་མཉམ་གཞག་བཞིའི་ལྡན་ཚུལ་ཡང་སྦྱར་རོ། །གསུམ་པ་ཡོངས་འཛིན་དགེ་བཤེས་རྒྱས་པར་བཤད་པ་ལ་གསུམ་ལས། དང་པོ་ནི། ཚིཾག་ངེས་འབྱེད་ཆ་མཐུན་མདོར་བསྟན་དུ་ཡོངས་འཛིན་རྟོག་པའི་གོང་དུ་གསུངས་པ་ཆོས་ཅན། དགོས་པ་ཡོད་དེ། མདོར་བསྟན་གྱི་ཚིགས་བཅད་སྦྱར་བདེ་བའི་ཆེད་ཡིན་པའི་ཕྱིར། ངེས་འབྱེད་ཆ་མཐུན་རྒྱས་བཤད་དུ་ཡོངས་འཛིན་རྟོག་པའི་མཇུག་ཐོགས་སུ་གསུངས་པ་ཆོས་ཅན། དགོས་པ་ཡོད་དེ། ཡོངས་འཛིན་གྱི་སྟོབས་ཀྱིས་རྟོག་པ་ཁྱད་ཆོས་སུ་ཤེས་པའི་ཆེད་ཡིན་པའི་ཕྱིར། གཉིས་པ་ནི། སེཾམས་འཕགས་པ་ལྟར་ན་བྱང་སེམས་སྦྱོར་ལམ་པ་ཆོས་ཅན། ཐེག་དམན་གྱི་རྟོགས་རིགས་རྒྱུན་ལྡན་དུ་བསྒོམས་ཀྱང་ཐེག་དམན་དུ་མི་ལྟུང་སྟེ། ཕྱི་ནང་གི་ཡོངས་འཛིན་ཁྱད་པར་ཅན་གཉིས་ཀྱིས་ཐེག་ཆེན་དུ་ཡོངས་སུ་འཛིན་པའི་ཕྱིར། གསུམ་པ་ནི། སེཾམས་ཁྱད་པར་གསུམ་ལྡན་གྱི་མཆོག་གི་སྤྲུལ་སྐུ་ཆོས་ཅན། བྱང་སེམས་སྦྱོར་ལམ་པའི་ཡོངས་འཛིན་ཡིན་ཏེ། དེ་ལ་ཐེག་ཆེན་གྱི་ཆོས་སྟོན་པའི་དགེ་བའི་བཤེས་གཉེན་ཡིན་པའི་ཕྱིར། གཉིས་པ་སྒྲུབ་པའི་རྟེན་ལ་གཉིས་ཏེ། རིགས་ཀྱི་དབྱེ་བ། རིགས་ལ་རྩོད་པ་སྤང་བའོ། །དང་པོ་ལ་གསུམ་ལས། དང་པོ་ནི། སྒྲུབ་བྱམས་མགོན་ཆོས་ཅན། ངེས་འབྱེད་ཆ་མཐུན་གྱི་འོག་དུ་སྒྲུབ་པའི་རྟེན་དུ་གྱུར་པའི་རིགས་འཆད་པའི་རྒྱུ་མཚན་ཡོད་དེ། ཅི་སྐད་བཤད་པའི་རྟེན་ཆོས་སྒྲུབ་པ་དང་ལྡན་པ་ལ་ངེས་འབྱེད་ཆ་མཐུན་དང་མཐོང་ལམ་སོགས་གཞན་ཡང་འབྱུང་བའི་ཕྱིར། གཉིས་པ་ནི། རྟོགཾས་སྒྲུབ་པ་བཅུ་གསུམ་གྱི་རྟེན་དུ་འགྱུར་བའི་སེམས་ཀྱི་ཆོས་དབྱིངས་ཆོས་ཅན། སངས་རྒྱས་ཀྱི་རིགས་ཡིན་ཏེ། ཐེག་ཆེན་སྒྲུབ་པའི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཡིན་པའི་ཕྱིར། གསུམ་པ་ལ་གསུམ་སྟེ། གོ་རིམ་ངེས་པ། གྲངས་ངེས་པ། རིགས་སུ་འཇོག་པའི་རྒྱུ་མཚན་ནོ། །དང་པོ་ནི། རིགས་ཐེག་ཆེན་གྱི་སྦྱོར་ལམ་དྲོད་ཀྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། དེ་བཞིན་སྦྱོར་ལམ་ཕྱི་མ་གསུམ་དང་། ཐེག་ཆེན་གྱི་མཐོང་ལམ་དང་། ས་བདུན་པ་མན་ཆད་ཀྱི་སྒོམ་ལམ་གྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན་དུ་བཟུང་ནས་སྦྱོར་བ་དྲུག་གོ །དེཾའི་ས་བརྒྱད་པའི་བར་ཆད་མེད་ལམ་གྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། ས་བརྒྱད་པའི་བར་ཆད་མེད་ལམ་ཆོས་ཅན། ཁྱོད་ལ་ལྡོག་པའི་སྒོ་ནས་གཉེན་པོའི་སྒྲུབ་པ་དང་། སྤང་བའི་སྒྲུབ་པ་གཉིས་སུ་དབྱེར་རུང་སྟེ། ཁྱོད་སྐྱེ་བ་དང་། ཁྱོད་ཀྱི་ངོས་སྐལ་གྱི་སྤང་བྱ་འགག་པ་དུས་མཉམ། ཁྱོད་སྐྱེས་པ་དང་། ཁྱོད་ཀྱི་ངོ་སྐལ་གྱི་སྤང་བྱ་འགགས་པ་དུས་མཉམ་པའི་ཕྱིར། དཔེར་ན་རྐུན་པོ་ཕྱུང་བ་དང་། སྒོ་འཕར་བཅད་པ་ལྟར་རོ། །སྤང་བའི་སྒྲུབ་པ་རྣམ་གྲོལ་ལམ་འཇོག་ན་སྤོང་བ་དང་། སྤངས་པ་ཁྱད་མེད་དུ་ཐལ་བས་བར་ཆད་མེད་ལམ་ལ་བཞག་པ་གཞུང་གི་དགོངས་པ་སྟེ། ས་དང་པོ་ནས་ཀྱང་བཞག་ཏུ་རུང་བར་མངོན་ནོ། །དེཾའི་ས་བརྒྱད་པའི་རྣམ་གྲོལ་ལམ་གྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། དེཾའི་ས་བརྒྱད་པའི་ཁྱད་པར་ལམ་གྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། དེཾའི་ས་དགུ་པའི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། དེཾའི་ས་བཅུ་པའི་རྗེས་ཐོབ་ཀྱི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། དེཾའི་ས་བཅུ་རྒྱུན་མཐའི་སྒྲུབ་པའི་རྟེན་དུ་གྱུར་པའི་སེམས་ཀྱི་ཆོས་དབྱིངས་ཆོས་ཅན། ཆོས་རྟགས་འདྲ། འདིཾ་སྒྲུབ་པ་བཅུ་གསུམ་ཆོས་ཅན། གོ་རིམ་བཞིན་དུ་བསྟན་པའི་རྒྱུ་མཚན་ཡོད་དེ། ཕར་ཆེར་རྒྱུ་འབྲས་དོན་གྱི་གོ་རིམ་ཡིན་པའི་ཕྱིར། གཉིས་པ་ནི། འདིཾས་སྒྲུབ་པ་བཅུ་གསུམ་ཆོས་ཅན། ཁྱོད་ཀྱིས་རྣམ་མཁྱེན་དོན་གཉེར་གྱི་སྐྱེས་བུའི་དོན་ཐམས་ཅད་ཕུན་སུམ་ཚོགས་པར་འགྱུར་བ་ཡིན་ཏེ། ཁྱོད་ཀྱི་ཐེག་ཆེན་གྱི་སྦྱོར་ལམ་དྲོད་ནས་ས་བཅུ་རྒྱུན་མཐའི་བར་གྱི་སྒྲུབ་པ་ཐམས་ཅད་བསྡུས་པའི་ཕྱིར། གསུམ་པ་ནི། སྒྲུབཾ་སྒྲུབ་པ་བཅུ་གསུམ་ལ་གནས་པའི་བྱང་ཆུབ་སེམས་དཔའ་རྣམ་པ་བཅུ་གསུམ་པོ་ཆོས་ཅན། ཁྱོད་ཀྱི་སེམས་ཀྱི་ཆོས་དབྱིངས་ཁོ་ན་སྐབས་འདིར་རིགས་སུ་འཇོག་པའི་རྒྱུ་མཚན་ཡོད་དེ། དེ་ཁོ་ན་སྟོང་ཉིད་ལ་སྒོམ་བྱུང་གཙོ་བོར་གྱུར་པའི་སྒྲུབ་པའི་རྟེན་ཡིན་པའི་ཕྱིར། ཁོ་ནའི་དོན་འདི་ཡིན་པར་མངོན་ནོ། །གཉིས་པ་ལ་གཉིས་ཏེ། རྩོད་པ་དང་། ལན་ནོ། །དང་པོ་ནི། གཾལ་ཆོས་དབྱིངས་ཁོ་ན་འཕགས་པའི་ཆོས་རྟོགས་པའི་རྒྱུ་ཡིན་པའི་ཕྱིར། དེ་དང་ལྡན་པའི་བྱང་ཆུབ་སེམས་དཔའ་བཅུ་གསུམ་པོ་ཁོ་ན་སངས་རྒྱས་ཀྱི་རིགས་ཅན་ཡིན་ན། སེམས་ཅན་ཐམས་ཅད་སངས་རྒྱས་ཀྱི་རིགས་ལ་གནས་པར་ཐལ། ཆོས་དབྱིངས་སེམས་ཅན་ཐམས་ཅད་ལ་སྤྱིར་གནས་པའི་ཕྱིར། འདོད་ན། ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེར་མི་རུང་བར་འགྱུར་རོ་ཞེ་ན། གཉིས་པ་ལ་གཉིས་ཏེ། འཐད་པའི་སྒོ་ནས་རིགས་སུ་འཇོག་པ་དང་། དཔེའི་སྒོ་ནས་དབྱེ་བ་འཐད་པའི་ཚུལ་ལོ། །དང་པོ་ནི། ཇིཾ་དྲི་མ་དང་བཅས་པའི་སེམས་ཀྱི་ཆོས་དབྱིངས་ཆོས་ཅན། རྒྱུའི་སྒོ་ནས་རིགས་སུ་འཇོག་པའི་རྒྱུ་མཚན་ཡོད་དེ། ཐེག་པ་གསུམ་གྱི་སྒྲུབ་པས་བདག་མེད་གསུམ་རྟོགས་པའི་རིམ་གྱིས་ཁྱོད་ལ་ཇི་ལྟར་དམིགས་པ་ལྟར་འཕགས་ཆོས་སོ་སོར་ཐོབ་པའི་གཞིར་གྱུར་པའི་ཆོས་དབྱིངས་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། སྔཾ་ཆོས་དབྱིངས་ལ་རིགས་ཐ་དད་པ་གསུམ་དུ་དབྱེར་མི་རུང་བར་ཐལ་བ་ལ། དཔེའི་སྒོ་ནས་ལན་བཏབ་པ་ཆོས་ཅན། དགོས་པ་ཡོད་དེ། ལན་གོ་སླ་བའི་ཆེད་ཡིན་པའི་ཕྱིར། གཉིས་པ་ནི། རྟེཾན་དྲི་མ་དང་བཅས་པའི་སེམས་ཀྱི་ཆོས་དབྱིངས་ཆོས་ཅན། རང་གི་ངོ་བོའི་སྒོ་ནས་དབྱེ་བ་མེད་ཀྱང་། ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེར་རུང་སྟེ། རང་གི་ངོ་བོའི་སྒོ་ནས་དབྱེ་བ་མེད་ཀྱང་ཐེག་པ་གསུམ་གྱི་སྒྲུབ་པའི་རྟེན་གཞི་སོ་སོར་བྱེད་དུ་རུང་བའི་ཆོས་དབྱིངས་ཡིན་པའི་ཕྱིར། དཔེར་ན་རྫའི་སྣོད་གསུམ་བཅུད་ཀྱི་སྒོ་ནས་སྦྲང་རྩི་དང་ལི་ཁ་ར་ལ་སོགས་པའི་སྣོད་ཀྱི་དབྱེ་བ་རུང་བ་བཞིན་ནོ། །འདི་དག་ལ་འཕགས་པས་རྩོད་ལན་ཚན་པ་གཉིས་སུ་གསུངས་པའི་ཚུལ་ནི་གཞན་དུ་བཤད་ཟིན་ཏོ།། །།གསུམ་པ་སྒྲུབ་པའི་དམིགས་པ་ལ་གསུམ་ལས། དང་པོ་ནི། ཇིཾ་སྐཾད་སོགས་སོ། །གཉིས་པ་ནི། དམིཾགས་པཾ་ཆོས་ཐམས་ཅད་ཆོས་ཅན། ཐེག་ཆེན་སྒྲུབ་པའི་དམིགས་པ་ཡིན་ཏེ། ཐེག་ཆེན་སྒྲུབ་པས་སྒྲོ་འདོགས་བཅད་པར་བྱ་བའི་གཞི་ཡིན་པའི་ཕྱིར། གསུམ་པ་ལ་གསུམ་སྟེ། སོ་སོའི་ངོ་བོ། གོ་རིམ་ངེས་པ། གྲངས་ངེས་པའོ། །དང་པོ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་ནི། རེཾ་ཤིཾག་དགེ་མི་དགེ་ལུང་མ་བསྟན་གསུམ་པོ་ཆོས་ཅན། ཆོས་རྟགས་འདྲ། གཉིས་པ་ནི། དེའིཾ་འོཾག་སོ་སྐྱེའི་རྒྱུད་ཀྱི་ཕུང་པོ་ལྔ་སོགས་བརྒྱད་ཆོས་ཅན་དུ་བཟུང་ནས། ཆོས་རྟགས་འདྲ། གཉིས་པ་ནི། དེཾ་ལྟརཾ་དམིགས་པ་བཅུ་གཅིག་ཆོས་ཅན། ཁྱོད་གོ་རིམ་བཞིན་དུ་བསྟན་པའི་རྒྱུ་མཚན་ཡོད་དེ། ཁྱོད་ཀྱི་གོ་རིམ་དེ་རྟོགས་པའི་གོ་རིམ་ཡིན་པའི་ཕྱིར། གསུམ་པ་ནི། དམིཾགས་པཾ་ཐེག་ཆེན་སྒྲུབ་པའི་དམིགས་པ་ཆོས་ཅན། ཁྱོད་ལ་བཅུ་གཅིག་ཏུ་གྲངས་ངེས་ཏེ། ཁྱོད་ལ་སྤྱི་གསུམ་དང་། བྱེ་བྲག་བརྒྱད་རྣམས་སུ་ངེས་པའི་ཕྱིར། བཞི་པ་བསྒྲུབ་པའི་ཆེད་དུ་བྱ་བ་ལ་གསུམ་ལས། དང་པོ་ནི། དམིཾགས་པཾ་སོགས་སོ། །གཉིས་པ་ནི། སེཾམས་ཅཾན་སངས་རྒྱས་ཀྱི་སའི་ཆེན་པོ་གསུམ་པོ་ཆོས་ཅན། ཐེག་ཆེན་བསྒྲུབ་པའི་ཆེད་དུ་བྱ་བ་ཡིན་ཏེ། གང་གིས་དབང་དུ་བྱས་ནས་ཐེག་ཆེན་གྱི་སྒྲུབ་པ་བྱེད་པར་འགྱུར་བའི་ཐེག་ཆེན་སྒྲུབ་པའི་ཐོབ་བྱ་མཐར་ཐུག་ཡིན་པའི་ཕྱིར། གསུམ་པ་ནི། རྣམཾ་པཾ་སངས་རྒྱས་སའི་སེམས་བསྐྱེད་ཆོས་ཅན། སེམས་ཆེན་པོ་ཡིན་ཏེ། རང་གང་གིས་འཐོབ་པའི་སེམས་ཅན་ཐམས་ཅད་སེམས་ཅན་ཀུན་གྱི་མཆོག་ཉིད་དུ་བྱེད་པའི་སེམས་བསྐྱེད་ཡིན་པའི་ཕྱིར། སངས་རྒྱས་སའི་སྤང་བ་ཆོས་ཅན། སྤང་བ་ཆེན་པོ་ཡིན་ཏེ། རྟགས་གཞན་འདྲ་བ་ལས་སྤང་བ་ཡིན་པའི་ཕྱིར། སངས་རྒྱས་སའི་བདག་མེད་གཉིས་རྟོགས་པའི་རྟོགས་པ་དེ་ཆོས་ཅན། རྟོགས་པ་ཆེན་པོ་ཡིན་ཏེ། རྟགས་གཞན་འདྲ་བ་ལས་རྟོགས་པ་ཡིན་པའི་ཕྱིར། གསུམ་པ་དེ་གཉིས་ཀའི་ཐུན་མོང་གི་ཆོས་བཤད་པ་ལ་གསུམ་སྟེ། དྲི་བའི་སྒོ་ནས་མཚམས་སྦྱར། ལན་གྱི་སྒོ་ནས་ངོ་བོ་ངོས་བཟུང་། སོ་སོའི་རང་བཞིན་རྒྱས་པར་བཤད་པའོ། །དང་པོ་ནི། དེཾ་ལྟརཾ་སོགས་སོ། །གཉིས་པ་ལ་གཉིས་ཏེ། ཡུལ་མཁྱེན་གསུམ་གྱི་སྒྲུབ་པ། ཡུལ་ཅན་སྦྱོར་བའི་སྒྲུབ་པའོ། །དང་པོ་ནི། ཐཾམས་ཅདཾ་མཁྱེན་གསུམ་ལ་ཐོས་བསམ་གཙོ་བོར་གྱུར་པའི་བྱང་སེམས་ཚོགས་ལམ་པའི་ལྟ་བ་ཆོས་ཅན། ཡུལ་མཁྱེན་གསུམ་གྱི་སྒྲུབ་པ་ཡིན་ཏེ། མཁྱེན་གསུམ་ལ་ཐོབ་བྱ་ཐོབ་བྱེད་བླང་དོར་བྱ་བའི་ཡན་ལག་ཏུ་ཐོས་བསམ་གྱིས་སྒྲོ་འདོགས་བཅད་ནས་སྤྱིར་དགེ་བའི་ཆོས་ཀྱི་རྟེན་ཅན་དུ་གྱུར་པའི་བྱང་སེམས་ལས་དང་པོ་པའི་མངོན་རྟོགས་ཡིན་པའི་ཕྱིར། ས་མཚམས་ཚོགས་ལམ་ཕལ་པའི་གནས་སྐབས་ཁོ་ན་ན་ཡོད། གཉིས་པ་ནི། རྣམཾ་མཁྱེན་གསུམ་ལ་ཐོས་བསམ་རབ་ཏུ་གྱུར་པའི་བྱང་སེམས་ཚོགས་ལམ་པའི་ལྟ་བ་ཆོས་ཅན། ཡུལ་ཅན་སྦྱོར་བའི་སྒྲུབ་པ་ཡིན་ཏེ། མངོན་རྟོགས་དྲུག་པོ་རེ་རེ་ཞིང་ཕ་རོལ་ཏུ་ཕྱིན་པ་དྲུག་གི་རྟེན་ཅན་དུ་བསྒྲུབ་པའི་ཚུལ་ལ་མཁས་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། ས་མཚམས་ཐེག་ཆེན་གྱི་ཚོགས་ལམ་ཁྱད་པར་ཅན་ནས་ས་བཅུ་རྒྱུན་མཐའི་བར་ན་ཡོད། སྤྱི་སྒྲུབ་པ་དང་བྱེ་བྲག་བསྒྲུབ་པ་ཞེས་པའི་ཐ་སྙད་སྦྱར་ན་ཡང་འདྲའོ། །གསུམ་པ་ལ་བཞི་སྟེ། བསམ་པས་གོ་བགོས་པ་གོ་ཆའི་སྒྲུབ་པ། སྦྱོར་བས་ཚུལ་བཞིན་དུ་ཞུགས་པ་འཇུག་པའི་སྒྲུབ་པ། འབྲས་བུ་ལ་མངོན་དུ་ཕྱོགས་པ་ཚོགས་ཀྱི་སྒྲུབ་པ། འབྲས་བུ་འབྱིན་པ་ལ་ཞུགས་པ་ངེས་འབྱུང་སྒྲུབ་པའོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། སྒྲུབ་པ་བཞིའི་ནང་ནས་དང་པོར་གོ་སྒྲུབ་འཆད་པའི་རྒྱུ་མཚན་ཡོད་དེ། གོ་སྒྲུབ་དེ་ཐོག་མར་བསམ་པས་གོ་བགོས་པའི་བརྩོན་འགྲུས་ཀྱི་ངོ་བོ་ཉིད་ཡིན་པའི་ཕྱིར། སྒྲུབ་པ་བཞི་པོ་ཆོས་ཅན། ཁྱོད་ཀྱི་མ་མཐའི་ས་མཚམས་སོ་སོར་ཡོད་དེ། ཁྱོད་ཀྱི་མ་མཐའི་ས་མཚམས་རིམ་པ་ལྟར། ཐེག་ཆེན་གྱི་ཚོགས་ལམ་དང་། སྦྱོར་ལམ་དྲོད་དང་། ཆོས་མཆོག་ཆེན་པོ་དང་། ས་བརྒྱད་པ་ནས་ཡོད་པའི་ཕྱིར་རོ། །གཉིས་པ་ནི། དེཾ་དཾག་བྱང་སེམས་ཚོགས་ལམ་པའི་ལྟ་བ་ཆོས་ཅན། གོ་ཆའི་སྒྲུབ་པ་ཡིན་ཏེ། ཕར་ཕྱིན་རེ་རེ་ཞིང་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་འཁོར་གསུམ་མི་དམིགས་པའི་བསམ་པས་གོ་བགོས་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། གསུམ་པ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གཉིས་ཏེ། སྦྱིན་པའི་གོ་ཆ་བཤད་པ། དེ་ཚུལ་གཞན་ལ་བསྒྲེ་བའོ། །དང་པོ་ནི། ཆོསཾ་ཀྱི་བྱང་སེམས་ཚོགས་ལམ་པའི་ལྟ་བ་ཆོས་ཅན། སྦྱིན་པའི་གོ་སྒྲུབ་ཡིན་ཏེ། སྦྱིན་པའི་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་སོགས་འགྲེ། གཉིས་པ་ནི། དེཾ་བཞིཾན་ཆོས་ཅན་སྔ་མ་བཟུང་ནས་ཚུལ་ཁྲིམས་ཀྱི་གོ་སྒྲུབ་ཡིན་ཏེ། སོགས་ལྔ་འགྲེའོ། །གཉིས་པ་ནི། དེཾ་ལྟརཾ་གོ་སྒྲུབ་ཆོས་ཅན་ཁྱོད་ལ་རྒྱས་པར་ཕྱེ་ན་སུམ་ཅུ་རྩ་དྲུག་ཡོད་ཀྱང་། བསྡུ་ན་དྲུག་ཏུ་འདུས་ཏེ། ཁྱོད་ལ་རྒྱས་པར་ཕྱེ་ན་སྦྱིན་སོགས་རེ་རེ་ལ་དྲུག་དྲུག་དུ་དབྱེར་ཡོད་ཀྱང་། བསྡུ་ན་བསྡུ་བྱ་དྲུག་དྲུག སྡུད་བྱེད་རེ་རེར་འདུས་པའི་ཕྱིར་རོ། །འདི་ཡང་སྦྱིན་པའི་བསྡུ་བྱ་དྲུག་སྦྱིན་པར་ཆོས་མཐུན་ཞེས་པ་ནི་མདོ་སྡེ་རྒྱན་གྱི་དགོངས་པ་ཡིན་པས་འགོག་དུ་མི་རུང་ངོ་། །གཉིས་པ་འཇུག་སྒྲུབ་ལ་གཉིས་ལས། དང་པོ་ནི། དེཾ་ལྟརཾ་སོགས་ཏེ། བྱམས་མགོན་ཆོས་ཅན། གོ་སྒྲུབ་ཀྱི་འོག་ཏུ་འཇུག་སྒྲུབ་འཆད་པའི་རྒྱུ་མཚན་ཡོད་དེ། བསམ་པས་གོ་བགོས་པ་ལས་སྦྱོར་བས་ཐེག་ཆེན་ལ་འཇུག་པ་འབྱུང་བའི་ཕྱིར། གཉིས་པ་ནི། བསཾམ་དང་བསཾམ་བྱང་སེམས་སྦྱོར་ལམ་པའི་བརྩོན་འགྲུས་ཆོས་ཅན། འཇུག་སྒྲུབ་ཡིན་ཏེ། རྒྱུ་དང་འབྲས་བུས་བསྡུས་པའི་ཐེག་ཆེན་སྒོམ་བྱུང་གཙོ་བོར་གྱུར་པའི་སྦྱོར་བའི་བརྩོན་འགྲུས་ཀྱིས་རྣམ་པར་གནོན་པའི་བྱང་སེམས་ཀྱི་ཉམས་ལེན་ཡིན་པའི་ཕྱིར། དགུ་པོ་སོ་སོར་ཕྲལ་ན་བསམ་གཏན་གཟུགས་མེད་ལ་འཇུག་པའི་བྱང་སེམས་སྦྱོར་ལམ་པའི་བརྩོན་འགྲུས་ཆོས་ཅན། བསམ་གཏན་གཟུགས་མེད་ལ་འཇུག་པའི་སྒྲུབ་པ་ཡིན་ཏེ། བསམ་གཏན་གཟུགས་མེད་སྒོམ་བྱུང་གཙོ་བོར་གྱུར་པའི་སྦྱོར་བའི་བརྩོན་འགྲུས་ཀྱིས་རྣམ་པར་གནོན་པའི་ཉམས་ལེན་ཡིན་པའི་ཕྱིར། ཞེས་སོགས་འགོད་དོ། །གསུམ་པ་ཚོགས་སྒྲུབ་ལ་གཉིས་ཏེ། ཚོགས་བཅུ་བདུན་སྤྱིར་བསྟན་པ་དང་། རྟོགས་དཀའ་བ་བྱེ་བྲག་ཏུ་བཤད་པའོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། བརྩེཾ་ཚོགས་སྒྲུབ་བཅུ་བདུན་ཆོས་ཅན། ཁྱོད་རིམ་བཞིན་དུ་བསྟན་པའི་རྒྱུ་མཚན་ཡོད་དེ། ཁྱོད་ཀྱི་བསྒྲུབ་བྱ་ཚོགས་བཅུ་བདུན་པོ་རིམ་ཅན་དུ་འབྱུང་བའི་ཕྱིར་རོ། །གསུམ་པ་ལ་གཉིས་ཏེ། ཚོགས་ཀྱི་དབྱེ་བ་དང་། ཚོགས་སྒྲུབ་ཏུ་འཇོག་པའི་རྒྱུ་མཚན་ནོ། །དང་པོ་ནི། སྙིངཾ་ཚོགས་ཆོས་ཅན། ཁྱོད་ལ་རྣམ་པ་བཅུ་བདུན་ཡོད་དེ། ཁྱོད་ལ་ཐེག་པ་ལ་གནས་ནས་གོ་ཆ་ཆེན་པོ་བགོས་པར་འཇོག་བྱེད་བཅུ། ཐེག་པ་རང་གི་ངོ་བོ་བདུན་རྣམས་སུ་ཡོད་པའི་ཕྱིར། གཉིས་པ་ནི། མིཾ་དམིཾགས་ཆོས་མཆོག་ཆེན་པོ་ཡན་ཆད་ཀྱི་ཚོགས་བཅུ་བདུན་པོ་ཆོས་ཅན། ཚོགས་ཀྱི་སྒྲུབ་པ་ཡིན་ཏེ། རང་འབྲས་དྲི་མ་གདོད་མ་ནས་ཟད་སྐྱེ་མེད་པ་མངོན་སུམ་དུ་རྟོགས་པའི་བྱང་ཆུབ་འབྱིན་པའི་རྒྱུ་ཚོགས་ནུས་པ་མཐུ་ཅན་ཡིན་པའི་ཕྱིར། གཉིས་པ་ལ་གསུམ་སྟེ། ཡེ་ཤེས་ཀྱི་ཚོགས་བྱེ་བྲག་ཏུ་བཤད་པ། སའི་ཚོགས་བྱེ་བྲག་ཏུ་བཤད་པ། གཉེན་པོའི་ཚོགས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། ཡུལ་ཅན་ཡེ་ཤེས་བཤད་པ་དང་། ཡུལ་སྟོང་ཉིད་བཤད་པའོ། །དང་པོ་ནི། དེཾ་ལཾ་ཚོགས་སྒྲུབ་ཀྱི་སྐབས་འདིར་སྟོང་ཉིད་ཉི་ཤུ་སྟོན་པའི་མདོ་ཚིག་ཆོས་ཅན། ཁྱོད་ཀྱིས་སྦས་དོན་ཡུལ་ཅན་ཡེ་ཤེས་ཉི་ཤུ་བསྟན་པ་ཡིན་ཏེ། ཁྱོད་ཀྱིས་དེ་མ་བསྟན་ན་ཁྱོད་ཀྱིས་མངོན་རྟོགས་ཀྱི་རིམ་པ་མ་བསྟན་དགོས་པ་གང་ཞིག ཁྱོད་ཀྱིས་མངོན་རྟོགས་ཀྱི་རིམ་པ་བསྟན་པའི་ཕྱིར། གཉིས་པ་ནི། འདིར་སྟོང་ཉིད་ཆོས་ཅན། ཁྱོད་ལ་ཉི་ཤུ་ཡོད་དེ། ཁྱོད་ཀྱི་སྟོང་གཞིའི་ཆོས་ཅན་ཉི་ཤུ་པོ་རང་རང་ངོ་བོས་སྟོང་པའི་རྒྱུ་མཚན་གྱིས་ཁྱོད་ལ་ཉི་ཤུར་ཕྱེ་བའི་ཕྱིར། གཉིས་པ་སའི་ཚོགས་བྱེ་བྲག་ཏུ་བཤད་པ་ལ་གཉིས་ཏེ། མཚམས་སྦྱར་བ་དང་། དོན་དངོས་སོ། །དང་པོ་ནི། སཾའི་སའི་ཚོགས་ལ་བར་སྐབས་ཀྱི་ཚིགས་སུ་བཅད་པ་ཉི་ཤུ་རྩ་གསུམ་གསུངས་པ་ཆོས་ཅན། དགོས་པ་ཡོད་དེ། སའི་ཡོངས་སྦྱོང་བདེ་བླག་ཏུ་རྟོགས་པའི་ཆེད་དུ་ཡིན་པའི་ཕྱིར། གཉིས་པ་ལ་གཉིས་ཏེ། རྒྱུ་སའི་ཡོངས་སྦྱོང་དང་། འབྲས་བུ་སའི་ངོ་བོའོ། །དང་པོ་ལ་དགུ་ལས། ས་དང་པོའི་ཡོངས་སྦྱོང་ནི། ཡོཾངས་དང་ཇིཾ་ས་དང་པོའི་རྗེས་ཐོབ་ལ་གནས་པའི་བྱང་ཆུབ་སེམས་དཔས་ཡོངས་སྦྱོང་གི་ཆོས་བཅུ་ཡོངས་སུ་སྦྱོང་བ་ཆོས་ཅན། དགོས་པ་ཡོད་དེ། ས་དང་པོའི་སྐྱོན་ཟད་ཅིང་ཡོན་ཏན་ཡོངས་སུ་རྫོགས་པའི་སྒོ་ནས་རྫོགས་པར་འཐོབ་པའི་ཆེད་ཡིན་པའི་ཕྱིར། ས་དང་པོའི་རྗེས་ཐོབ་ལ་གནས་པའི་བྱང་སེམས་ཀྱི་རྒྱུད་ཀྱི་ཡོངས་སྦྱོང་གི་ཆོས་བཅུ་པོ་ངོ་བོ་ཉིད་མི་དམིགས་པའི་སྒོ་ནས་ཡོངས་སུ་སྦྱོང་བར་བྱེད་པའི་ཉམས་ལེན་དེ་ཆོས་ཅན། ས་དང་པོའི་ཡོངས་སྦྱོང་ཡིན་ཏེ། ས་དང་པོའི་མཉམ་གཞག་གི་སྐབས་སུ་སའི་ངོ་བོ་ཐོབ་པ་དེ་སྐྱོན་དང་ཡོན་ཏན་ཡོངས་སུ་སྦྱོང་བའི་སྒོ་ནས་རྫོགས་པར་བྱེད་པའི་ས་དང་པོའི་ཉམས་ལེན་ཡིན་པའི་ཕྱིར། གཉིས་པོ་འདི་འོག་མ་ཀུན་ལ་བསྒྲེའོ། །ས་གཉིས་པའི་ཡོངས་སྦྱོང་ནི། ཚུལཾ་དང་སྡོམཾ་ས་གཉིས་པའི་རྗེས་ཐོབ་ལ་གནས་པའི་བྱང་སེམས་ཀྱི་ཡོངས་སྦྱོང་གི་ཆོས་བརྒྱད་པོ་ངོ་བོ་ཉིད་མི་དམིགས་པའི་སྒོ་ནས་ཡོངས་སུ་སྦྱོང་བ་ཆོས་ཅན་སོགས་འགྲེའོ། །ས་གསུམ་པའི་ཡོངས་སྦྱོང་ནི། ཐོཾས་དང་དཾམ་ས་གསུམ་པའི་རྗེས་ཐོབ་ལ་གནས་པའི་བྱང་སེམས་ཀྱིས་ཡོངས་སྦྱོང་གི་ཆོས་ལྔ་པོ་ངོ་བོ་ཉིད་མི་དམིགས་པའི་སྒོ་ནས་ཡོངས་སུ་སྦྱོང་བ་ཆོས་ཅན་སོགས་འགྲེའོ། །ས་བཞི་པའི་ཡོངས་སྦྱོང་ནི། ནཾགས་དང་དགོཾན་ས་བཞི་པའི་རྗེས་ཐོབ་ལ་གནས་པའི་བྱང་སེམས་ཀྱིས་ཡོངས་སྦྱོང་གི་ཆོས་བཅུ་པོ་ངོ་བོ་ཉིད་མི་དམིགས་པའི་སྒོ་ནས་ཡོངས་སུ་སྦྱོང་བ་ཆོས་ཅན་སོགས་འགྲེའོ། །ས་ལྔ་པའི་ཡོངས་སྦྱོང་ནི། འདྲིཾས་དང་རྙེཾད་ཡོངས་སྦྱོང་གི་ཆོས་བཅུ་སྦྱར་གཞན་འགྲེ། ས་དྲུག་པའི་ཡོངས་སྦྱོང་ནི། སྦྱིནཾ་དང་ཕཾ་ཡོངས་སྦྱོང་གི་ཆོས་བཅུ་གཉིས་ཞེས་སྦྱར་གཞན་འགྲེ། ས་བདུན་པའི་ཡོངས་སྦྱོང་ལ་གཉིས་ཏེ། སྤང་བྱ་སྤངས་པ་དང་། གཉེན་པོ་རྫོགས་པའོ། །དང་པོ་ནི། བདཾག་དང་བདཾག་ས་བདུན་པའི་རྗེས་ཐོབ་ལ་གནས་པའི་བྱང་སེམས་ཀྱིས་བདག་ཏུ་ལྟ་བ་སོགས་སྤང་བྱ་ཉི་ཤུ་བཀག་ནས་སྒོམ་པ་ཆོས་ཅན་སོགས་འགྲེའོ། །གཉིས་པ་ལ་གཉིས་ལས། དང་པོ་ནི། དོཾན་གྱིཾ་སོགས་སོ། །གཉིས་པ་ནི། རྣཾམ་དང་རྣམཾ་ས་བདུན་པའི་རྗེས་ཐོབ་ལ་གནས་པའི་བྱང་སེམས་ཀྱི་རྣམ་ཐར་སྒོ་གསུམ་ཤེས་པ་སོགས་གཉེན་པོ་ཉི་ཤུ་ངོ་བོ་ཉིད་མི་དམིགས་པའི་སྒོ་ནས་ཡོངས་སུ་སྦྱོང་བ་ཆོས་ཅན་སོགས་འགྲེའོ། །ས་བརྒྱད་པའི་ཡོངས་སྦྱོང་ནི། སེཾམས་དང་སེཾམས་ཡོངས་སྦྱོང་གི་ཆོས་བརྒྱད་པོ་ཞེས་སྦྱར་གཞན་འགྲེ། ས་དགུ་པའི་ཡོངས་སྦྱོངས་ནི། སྨོནཾ་དང་སྨོཾན་ཡོངས་སྦྱོང་གི་ཆོས་བཅུ་གཉིས་ཞེས་སྦྱར་གཞན་འགྲེ། གཉིས་པ་འབྲས་བུ་སའི་མཚན་ཉིད་ལ་གསུམ་ལས། དང་པོ་ནི། རྒྱུའིཾ་སའི་ཚོགས་བྱེ་བྲག་ཏུ་བཤད་པའི་སྐབས་འདིར་ཆོས་ཅན། ས་བཅུ་པ་ཡོངས་སྦྱོང་གི་སྒོ་ནས་མ་བཤད་པའི་རྒྱུ་མཚན་ཡོད་དེ། ས་བཅུ་པ་ས་འོག་མའི་རྟོགས་རིགས་འདུས་པའི་མཚན་ཉིད་ཀྱི་སྒོ་ནས་བཤད་པ་སྐབས་སུ་བབ་པའི་ཕྱིར། གཉིས་པ་ནི། སཾ་ས་བཅུ་པའི་ཡེ་ཤེས་ཆོས་ཅན། སངས་རྒྱས་ཀྱི་ས་ཞེས་བརྗོད་པའི་རྒྱུ་མཚན་ཡོད་དེ། དམན་པ་ས་བརྒྱད་དང་། བྱང་སེམས་ཀྱི་ས་དགུ་གཅིག་ཏུ་བྱས་པ་རྣམས་ལས་འདས་པའི་ཡེ་ཤེས་ཡིན་པའི་ཕྱིར། གསུམ་པ་ལ་གཉིས་ཏེ། འདས་ས་ས་དགུ་ངོས་བཟུང་བ་དང་། འབྲས་བུ་ས་བཅུ་པའི་མཚན་ཉིད་དོ། །དང་པོ་ནི། ཉནཾ་ཐོཾས་ས་བཅུ་པའི་ཡེ་ཤེས་གང་ལས་འདས་པའི་ས་དེ་ཆོས་ཅན། ཁྱོད་ལ་དགུ་ཡོད་དེ། ཁྱོད་ལ་ཉན་ཐོས་ཀྱི་ས་བདུན། རང་རྒྱལ་གྱི་ས་གཅིག བྱང་སེམས་ཀྱི་ས་དགུ་གཅིག་ཏུ་བྱས་པ་རྣམས་སུ་ཡོད་པའི་ཕྱིར། གཉིས་པ་ནི། སཾ་དཾགུ་སོགས་ལ་རྩ་བའི་ངག་འདོན་འགོད། གསུམ་པ་གཉེན་པོའི་ཚོགས་བྱེ་བྲག་དུ་བཤད་པ་ལ་གཉིས་ལས། དང་པོ་ནི། གཉེནཾ་པོཾའི་སོགས་སོ། །གཉིས་པ་ནི། མཐོཾང་དང་གཟུཾངས་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཆོས་ཅན། མཐོང་སྤངས་གཉེན་པོའི་ཚོགས་སྒྲུབ་ཡིན་ཏེ། རང་གི་ངོས་སྐལ་གྱི་མཐོང་སྤངས་བཞིའི་གཉེན་པོར་གྱུར་པའི་བྱང་འཕགས་ཀྱི་མཉམ་གཞག་ཡིན་པའི་ཕྱིར། ས་གཉིས་པའི་བར་ཆད་མེད་ལམ་ཆོས་ཅན། སྒོམ་སྤངས་གཉེན་པོའི་ཚོགས་སྒྲུབ་ཡིན་ཏེ། རང་གི་ངོས་སྐལ་གྱི་སྒོམ་སྤངས་བཞིའི་གཉེན་པོར་གྱུར་པའི་བྱང་འཕགས་ཀྱི་མཉམ་གཞག་ཡིན་པའི་ཕྱིར། བཞི་པ་ངེས་འབྱུང་སྒྲུབ་པ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། ཆེདཾ་དང་ཆེདཾ་ས་བརྒྱད་པའི་ཡེ་ཤེས་ཆོས་ཅན། ངེས་འབྱུང་སྒྲུབ་པ་ཡིན་ཏེ། རང་གི་ངེས་པར་འབྱུང་ས་བརྒྱད་དུ་བར་ཆད་མེད་པར་ངེས་པར་འབྱུང་བར་བྱེད་པའི་དག་སའི་ཡེ་ཤེས་ཡིན་པའི་ཕྱིར། སོ་སོར་སྦྱར་ན་དེ་ཆོས་ཅན། ཆེད་དུ་བྱ་བའི་ངེས་འབྱུང་སྒྲུབ་པ་ཡིན་ཏེ། རང་གི་ངེས་པར་འབྱུང་ས་ཆེད་དུ་བྱ་བ་ཆེན་པོ་གསུམ་དུ་བར་ཆད་མེད་པར་ངེས་པར་འབྱུང་བའི་ཞེས་སོགས་བརྒྱད་འགོད་དོ། །གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེཾས་རཾབ་སོགས་སོ།། །།གཉིས་པ་རྒྱུ་ལམ་ཤེས་ལ་གསུམ་སྟེ། འབྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། རྣམཾ་པཾ་བྱམས་མགོན་ཆོས་ཅན། རྣམ་མཁྱེན་གྱི་འོག་ཏུ་ལམ་ཤེས་འཆད་པའི་རྒྱུ་མཚན་ཡོད་དེ། རྣམ་མཁྱེན་དེ་རང་རྒྱུ་ལམ་ཤེས་མེད་པར་མི་འབྱུང་བའི་ཕྱིར། གཉིས་པ་ལ་གཉིས་ཏེ། ལམ་ཤེས་ཀྱི་ཡན་ལག་དང་། ཡན་ལག་ཅན་གྱི་ལམ་ཤེས་སོ། །དང་པོ་ལ་གཉིས་ལས། རྩ་བ་ནི། ལྷཾ་རྣམཾས་ལམ་ཤེས་ཆོས་ཅན། ཁྱོད་ཀྱི་ཡན་ལག་དེ་ལ་ལྔར་ཡོད་དེ། ཁྱོད་ཀྱི་རྟེན་གྱི་ཡན་ལག་གསུམ། རང་བཞིན་གྱི་ཡན་ལག་གཅིག བྱེད་ལས་ཀྱི་ཡན་ལག་གཅིག་རྣམས་སུ་ཡོད་པའི་ཕྱིར། འགྲེལ་པ་ལ་གསུམ་སྟེ། རྟེན་གྱི་ཡན་ལག རང་བཞིན་གྱི་ཡན་ལག བྱེད་ལས་ཀྱི་ཡན་ལག་གོ །དང་པོ་ལ་གཉིས་ཏེ། དངོས་སུ་སྐྱེ་བའི་རྟེན་དང་། བརྒྱུད་ནས་སྐྱེ་བའི་རྟེན་ནོ། །དང་པོ་ལ་གཉིས་ཏེ། འགལ་རྐྱེན་བྲལ་བའི་རྟེན་དང་། མཐུན་རྐྱེན་ཚང་བའི་རྟེན་ནོ། །དང་པོ་ནི། ལཾམ་ཤེསཾ་དེ་བཞིན་གཤེགས་པའི་རང་བཞིན་གྱི་འོད་ཀྱིས་ལྷ་ལ་སོགས་པའི་རྣམ་སྨིན་གྱི་འོད་མོག་མོག་པོར་མཛད་པ་ཆོས་ཅན། དགོས་པ་ཡོད་དེ། ལམ་ཤེས་དངོས་སུ་སྐྱེ་རུང་གི་རྟེན་སྒྲུབ་པའི་ཆེད་ཡོད་པའི་ཕྱིར། ངཾ་རྒྱལཾ་དེའི་འོད་ཀྱི་ཆེ་བ་སྟོན་པའི་ཚིག་ཟུར་ཆོས་ཅན། ལམ་ཤེས་དངོས་སུ་སྐྱེ་བའི་རྟེན་བརྗོད་པ་ཡིན་ཏེ། ལམ་ཤེས་དངོས་སུ་སྐྱེ་བའི་རྟེན་ལ་ང་རྒྱལ་དང་བྲལ་བ་དགོས་པར་བསྟན་པའི་ཕྱིར། གཉིས་པ་ནི། དེཾ་ཡཾང་ལམ་ཤེས་ཆོས་ཅན། ཁྱོད་དངོས་སུ་སྐྱེ་བའི་ཡུལ་སོ་སོར་ངེས་པ་ཡིན་ཏེ། ཁྱོད་དངོས་སུ་སྐྱེ་བའི་རྟེན་ལ་བྱང་ཆུབ་མཆོག་ཏུ་སེམས་བསྐྱེད་པ་གཅིག་དགོས་པའི་ཕྱིར། གཉིས་པ་ནི། ཐེཾག་པཾ་ལམ་ཤེས་དངོས་སུ་མི་སྐྱེ་བའི་རྟེན་བྱང་ཆུབ་ཏུ་སེམས་བསྐྱེད་པ་མ་ཚང་བའི་ཉན་རང་དགྲ་བཅོམ་པ་དང་། ང་རྒྱལ་དང་བྲལ་བ་མ་ཚང་བའི་ཕྱི་རོལ་པའི་ཆགས་བྲལ་སོགས་ཆོས་ཅན། ལམ་ཤེས་བསྒོམ་པར་བྱ་བ་ཡིན་པས་ཁྱབ་སྟེ། ཁྱོད་སོགས་སྐྱེ་བོ་ཐམས་ཅད་སངས་རྒྱ་བ་ཡིན་པའི་ཕྱིར། གལ་ཏེ་ཉན་རང་ལྷག་མེད་དུ་མྱ་ངན་ལས་འདས་ནས་ཐེག་ཆེན་གྱི་ལམ་དུ་མི་འཇུག་པས་གཏན་ཚིགས་མ་གྲུབ་བོ་ཞེ་ན། དེ་ནི་མ་ཡིན་ཏེ། མཐར་ཐུག་ཐེག་པ་གཅིག་ཡིན་པའི་ཕྱིར། གཉིས་པ་ནི། བྱངཾ་ཆུཾབ་བྱང་སེམས་འཕགས་པའི་རྒྱུད་ཉིད་ཀྱི་ལམ་ཤེས་ཆོས་ཅན། ཉོན་མོངས་པའི་མིང་ཅན་འདོད་སྲེད་ཆེད་དུ་གཉེར་ནས་མི་སྤོང་བའི་རང་བཞིན་ཅན་ཡིན་ཏེ། ཁྱོད་རྒྱུད་ལྡན་གྱི་གང་ཟག་དེ་བསམ་བཞིན་དུ་སྲིད་པར་སྐྱེ་བ་ལེན་པའི་སྒོ་ནས་སེམས་ཅན་གྱི་དོན་བྱེད་དགོས་པའི་ཕྱིར། གསུམ་པ་ནི། དེཾའི་འོཾག་ལམ་ཤེས་ཆོས་ཅན། བྱེད་ལས་ཁྱད་པར་ཅན་དང་ལྡན་ཏེ། རང་དོན་རྫོགས་སྨིན་སྦྱང་གསུམ་མ་བྱས་པར་ཡང་དག་མཐའ་མངོན་དུ་མི་བྱེད་པ་དང་། གཞན་དོན་སེམས་ཅན་འཁོར་དུ་མ་སྡུས་པ་བསྡུད་པར་བྱེད་པའི་ཕྱིར། གཉིས་པ་ཡན་ལག་ཅན་གྱི་ལམ་ཤེས་ལ་གསུམ་སྟེ། ཉན་ཐོས་ཀྱི། རང་རྒྱལ་གྱི། བྱང་སེམས་ཀྱི་ལམ་ཤེས་སོ། །དང་པོ་ལ་གཉིས་ཏེ། ལམ་ཤེས་དངོས་དང་། རྒྱུ་ངེས་འབྱེད་ཆ་མཐུན་ནོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། ལམ་ཤེས་ཀྱི་ཡན་ལག་བཤད་ཟིན་པའི་འོག་ཏུ་ཤེས་བྱ་ཉན་ཐོས་ཀྱི་ལམ་འཆད་པའི་རྒྱུ་མཚན་ཡོད་དེ། ལམ་ཤེས་ཀྱི་སྐབས་སུ་ཐེག་པ་གསུམ་གྱི་ལམ་རྫོགས་པར་ཤེས་དགོས་པའི་ཕྱིར། གཉིས་པ་ནི། ལཾམ་ཤེཾས་བྱང་སེམས་ཀྱི་མཐོང་ལམ་མཉམ་གཞག་ཆོས་ཅན། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ཏེ། བདེན་བཞིའི་སྟེང་གི་མི་རྟག་སོགས་བཅུ་དྲུག་གི་སྤྲོས་བྲལ་མངོན་སུམ་དུ་རྟོགས་པའི་སྒོ་ནས་ཉན་ཐོས་ཀྱི་ལམ་གྱི་དམིགས་རྣམ་ལ་ངེས་པ་རང་སྟོབས་ཀྱིས་འདྲེན་པར་བྱེད་པའི་བྱང་འཕགས་ཀྱི་མཉམ་གཞག་ཡིན་པའི་ཕྱིར། ཉན་ཐོས་ཀྱི་ལམ་གྱི་དམིགས་རྣམ་ངོ་བོ་ཉིད་མི་དམིགས་པའི་སྒོ་ནས་མངོན་སུམ་དུ་རྟོགས་པའི་ས་དང་པོའི་རྗེས་ཐོབ་ཀྱི་མཁྱེན་པ་ཆོས་ཅན། ཡང་དེ་ཡིན་ཏེ། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་བཟུང་བའི་ཕྱིར་དུ། ཉན་ཐོས་ཀྱི་ལམ་གྱི་དམིགས་རྣམ་འཁོར་གསུམ་མི་དམིགས་པའི་སྒོ་ནས་མངོན་སུམ་དུ་རྟོགས་པའི་བྱང་འཕགས་ཀྱི་མཁྱེན་པ་ཡིན་པའི་ཕྱིར། གསུམ་པ་ལ་གཉིས་ཏེ། ཤེས་བྱའི་ལམ་གྱི་རྣམ་པ། དེ་ཇི་ལྟར་ཤེས་པའི་ཚུལ་ལོ། །དང་པོ་ལ་གཉིས་ཏེ། དོར་བྱའི་རྣམ་པ་དང་། བླང་བྱའི་རྣམ་པའོ། །དང་པོ་ལ་གཉིས་ཏེ། སྡུག་ཀུན་སོ་སོ་བའི་རྣམ་པ་དང་། སྡུག་ཀུན་ཐུན་མོང་བའི་རྣམ་པའོ། །དང་པོ་ལ་གཉིས་ཏེ། སྡུག་བསྔལ་བདེན་པའི་རྣམ་པ་དང་། ཀུན་འབྱུང་བདེན་པའི་རྣམ་པའོ། །དང་པོ་ནི། དེཾ་ལཾ་སྡུག་བསྔལ་བདེན་པའི་རྣམ་པ་ཆོས་ཅན། ཁྱོད་ལ་བཞི་ཡོད་དེ། ཁྱོད་ལ་ངོ་བོ་ཉིད་ཀྱི་རྣམ་པ་གཉིས། རྣམ་གྲངས་ཀྱི་རྣམ་པ་གཉིས་རྣམས་སུ་ཡོད་པའི་ཕྱིར། གཉིས་པ་ནི། ཀུཾན་འབྱུངཾ་ཀུན་འབྱུང་བདེན་པའི་རྣམ་པ་ཆོས་ཅན། ཁྱོད་ལ་བཞི་ཡོད་དེ། ཁྱོད་ལ་འགོག་པའི་རྣམ་གྲངས་ཀྱི་རྣམ་པ། ནད་ཀྱི་རྣམ་པ་སོགས་བཞི་ཡོད་པའི་ཕྱིར། གཉིས་པ་ནི། ཡིཾད་འབྱུངཾ་སྡུག་ཀུན་ཐུན་མོང་བའི་རྣམ་པ་ཆོས་ཅན། ཁྱོད་ལ་བདུན་ཡོད་དེ། ཁྱོད་ལ་ཡིད་འབྱུང་བའི་རྣམ་པ་གཉིས། འདོད་ཆགས་དང་བྲལ་བའི་རྣམ་པ་གཉིས། འགོག་པའི་རྣམ་པ་གསུམ་རྣམས་སུ་ཡོད་པའི་ཕྱིར། གཉིས་པ་ལ་གཉིས་ཏེ། འགོག་བདེན་གྱི་རྣམ་པ་དང་། ལམ་བདེན་གྱི་རྣམ་པའོ། །དང་པོ་ནི། འགོཾག་པཾའི་འགོག་བདེན་གྱི་རྣམ་པ་ཆོས་ཅན། ཁྱོད་ལ་བདུན་ཡོད་དེ། ཁྱོད་ལ་འགོག་པའི་རྣམ་གྲངས་ཀྱི་རྣམ་པ་བདག་མེད་པ་དང་། ངོ་བོ་ཉིད་ཀྱི་རྣམ་པ་ཞི་བ་དང་། གྱ་ནོམ་པའི་རྣམ་གྲངས་ཀྱི་རྣམ་པ་དབེན་པ་དང་། ངེས་འབྱུང་གི་རྣམ་གྲངས་ཀྱི་རྣམ་པ་བཞི་རྣམས་སུ་ཡོད་པའི་ཕྱིར། གཉིས་པ་ནི། ལཾམ་གྱིཾ་ལམ་བདེན་གྱི་རྣམ་པ་ཆོས་ཅན། ཁྱོད་ལ་བཞི་ཡོད་དེ། ཁྱོད་ལ་ངོ་བོ་ཉིད་ཀྱི་རྣམ་པ་ལམ་སོགས་བཞི་ཡོད་པའི་ཕྱིར། གཉིས་པ་ནི། ངོཾ་བོཾ་སོགས་ཏེ། རྩ་བའི་ངག་དོན་གཉིས་འགོད། གཉིས་པ་རྒྱུ་ངེས་འབྱེད་ཆ་མཐུན་ལ་གཉིས་ལས། དང་པོ་ནི། བདེཾན་པཾ་བྱམས་མགོན་ཆོས་ཅན། ཉན་ཐོས་ཀྱི་ལམ་ཤེས་ཀྱི་འོག་ཏུ་དེའི་རྒྱུ་ངེས་འབྱེད་ཆ་མཐུན་འཆད་པའི་རྒྱུ་མཚན་ཡོད་དེ། དེ་དེ་མེད་པར་མི་འབྱུང་བའི་ཕྱིར། གཉིས་པ་ནི། འཕཾགས་དང་གཟུཾགས་ཉན་ཐོས་ཀྱི་རྟོགས་རིགས་སྒོམ་པར་བྱེད་པའི་བྱང་སེམས་ཀྱི་སྦྱོར་ལམ་དྲོད་ཀྱི་ཡེ་ཤེས་དེ་ཆོས་ཅན། དམིགས་རྣམ་ཁྱད་པར་ཅན་དང་ལྡན་ཏེ། དམིགས་པ་བདེན་བཞི་ལ་དམིགས་ནས་རྣམ་པ་སྟོང་པ་ཉིད་རྣམས་ཕན་ཚུན་དབྱེར་མེད་པའི་རྣམ་པ་ཅན་ཡིན་པའི་ཕྱིར། དེཾ་དང་གཟུཾགས་དེ་སྒོམ་པའི་བྱང་སེམས་ཀྱི་སྦྱོར་ལམ་རྩེ་མོ་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་གཟུགས་སོགས་མི་དམིགས་པའི་རྣམ་པ་ཅན་ཡིན་པའི་ཕྱིར། དེཾ་དང་དེཾ་དེ་སྒོམ་པའི་བྱང་སེམས་ཀྱི་སྦྱོར་ལམ་བཟོད་པ་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་རྟག་མི་རྟག་སོགས་སུ་གནས་པ་བཀག་པའི་རྣམ་པ་ཅན་ཡིན་པའི་ཕྱིར། སཾ་དང་གཾང་དེ་སྒོམ་པའི་བྱང་སེམས་ཀྱི་སྦྱོར་ལམ་ཆོས་མཆོག་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་ས་བཅུ་ལ་མི་གནས་པའི་རྣམ་པ་ཅན་ཡིན་པའི་ཕྱིར། གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་ལ་གཉིས་ཏེ། ཤེས་བྱའི་ལམ་གྱི་རྣམ་བཞག རྒྱུ་ངེས་འབྱེད་ཆ་མཐུན་ནོ། །དང་པོ་ལ་གཉིས་ཏེ། འབྲས་བུའི་ཁྱད་པར་བྱེད་ཆོས། རྒྱུ་ལམ་གྱི་ངོ་བོའོ། །དང་པོ་ལ་གཉིས་ཏེ། དངོས་དང་རྩོད་པ་སྤོང་བའོ། །དང་པོ་ལ་གཉིས་ལས། དང་པོ་ནི། ཉནཾ་ཉན་ཐོས་ཀྱི་ལམ་གྱི་མཇུག་ཐོགས་སུ་ཤེས་བྱ་རང་རྒྱལ་གྱི་ལམ་འཆད་པར་རིགས་ཀྱང་ཐོག་མར་འབྲས་བུ་རང་རྒྱལ་གྱི་ཡེ་ཤེས་ཀྱི་ཁྱད་པར་འཆད་པ་ཆོས་ཅན། དགོས་པ་ཡོད་དེ། འབྲས་བུ་རང་རྒྱལ་གྱི་ཡེ་ཤེས་ཀྱི་ཁྱད་པར་རྟོགས་པའི་སྒོ་ནས་རྒྱུ་ལམ་གྱི་ཁྱད་པར་རྟོགས་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། ཁྱད་པར་དུ་འཕགས་པའི་ཚུལ། ཁྱད་པར་དུ་འཕགས་པའི་རྒྱུ་མཚན་ནོ། །དང་པོ་ལ་གཉིས་ལས། དང་པོ་ནི། རཾང་དང་རཾང་བསེ་རུ་ལྟ་བུའི་རང་སངས་རྒྱས་ཀྱི་ཡེ་ཤེས་ཆོས་ཅན། ཉན་ཐོས་ལས་ལམ་བགྲོད་ཚུལ་གྱིས་ཁྱད་པར་འཕགས་ཏེ། འདོད་པ་ཁམས་ཀྱི་སྲིད་པ་ཐ་མ་པའི་རྟེན་ལ་སློབ་དཔོན་གཞན་གྱི་གདམས་ངག་ལ་མ་ལྟོས་པར་རང་བྱུང་གི་བྱང་ཆུབ་མངོན་དུ་བྱས་པའི་མི་སློབ་ལམ་ཡིན་པའི་ཕྱིར། གཉིས་པ་ནི། སྒྲརཾ་དེ་ཆོས་ཅན། ཉན་ཐོས་ལས་ཆོས་སྟོན་ཚུལ་གྱིས་ཁྱད་པར་འཕགས་ཏེ། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་སྒྲ་མེད་ལུས་ཀྱིས་ཆོས་སྟོན་པའི་བདག་རྐྱེན་བྱེད་པའི་མཁྱེན་པ་ཡིན་པའི་ཕྱིར། གཉིས་པ་ནི། གོང་གི་ལུཾང་ལཾས་འདོད་པ་ཁམས་ཀྱི་སྲིད་པ་ཐ་མ་པའི་རྟེན་ལ་རང་བྱུང་གི་བྱང་ཆུབ་མངོན་དུ་བྱས་པ་དང་། གདུལ་བྱ་ལ་སྒྲ་མེད་ལུས་ཀྱིས་ཆོས་སྟོན་ན། ཉན་ཐོས་ལས་ཁྱད་པར་དུ་འཕགས་པས་ཁྱབ་སྟེ། དེ་གཉིས་ཉན་ཐོས་ལ་མེད་པར་ལུང་ལས་བཤད་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡཾང་ཅིཾ་བསེ་རུ་ལྟ་བུའི་རང་སངས་རྒྱས་ཆོས་ཅན། ཆོས་སྟོན་པར་མི་འཐད་པར་ཐལ། ཆོས་སྟོན་པའི་སྒྲ་མེད་པའི་ཕྱིར་ཞེ་ན། གཉིས་པ་ནི། གཾང་དང་རྣམཾ་དེ་ཆོས་ཅན། སྒྲ་མེད་ཀྱང་ཆོས་སྟོན་པ་མི་འགལ་ཏེ། སྔོན་གྱི་སྨོན་ལམ་ལ་སོགས་པའི་མཐུས་སྒྲ་མེད་ཀྱང་ལུས་ཀྱི་སྒོ་ནས་གདུལ་བྱའི་རྒྱུད་ལ་བདེན་བཞི་སོགས་ཀྱི་རྣམ་པ་སྐྱེད་ནུས་པའི་ཕྱིར། བསེ་རུ་ལྟ་བུའི་རང་སངས་རྒྱས་ཆོས་ཅན། སྒྲ་མེད་དུ་ཆོས་སྟོན་པར་གྱུར་ཅིག་ཅེས་སྔོན་སྨོན་ལམ་བཏབ་པའི་རྒྱུ་མཚན་ཡོད་དེ། ཚིག་ཏུ་བརྗོད་པའི་ཀུན་སློང་གི་རྟོག་དཔྱོད་ཀྱིས་ཏིང་ངེ་འཛིན་གྱི་རྒྱུད་འཁྲུག་པར་བྱེད་པར་དགོངས་ནས་སྔོན་སྨོན་ལམ་དེ་ལྟར་བཏབ་པའི་ཕྱིར། དཔེར་ན་བྱང་ཆུབ་སེམས་དཔས་སྒྲ་མེད་དུ་ཆོས་སྟོན་པས་འདུལ་བའི་དོན་དུ་སྔོན་སྨོན་ལམ་དེ་ལྟར་བཏབ་པ་བཞིན་ནོ། །གཉིས་པ་ལ་གཉིས་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། འབྲས་བུ་རང་རྒྱལ་གྱི་ཡེ་ཤེས་ཀྱི་ཁྱད་པར་བཤད་ཟིན་པའི་འོག་ཏུ་རྒྱུ་ལམ་གྱི་ཁྱད་པར་འཆད་པའི་རྒྱུ་མཚན་ཡོད་དེ། འབྲས་བུ་ལ་ཁྱད་པར་ཡོད་ན་རྒྱུ་ལ་ཁྱད་པར་ཡོད་པ་རིགས་པའི་ཚུལ་ཡིན་པའི་ཕྱིར་རོ། །གཉིས་པ་ནི། གཟུཾངས་དང་རཾང་ཤེས་བྱ་རང་རྒྱལ་གྱི་ལམ་ཆོས་ཅན། ཉན་ཐོས་ཀྱི་ལམ་ལས་ཁྱད་པར་དུ་འཕགས་ཏེ། གཟུང་རྟོག་སྤོང་བའི་རྟོགས་རིགས་ཡིན་པའི་ཕྱིར། དེ་ཆོས་ཅན། ཐེག་ཆེན་གྱི་ལམ་ལས་རྟོགས་རིགས་ཀྱི་སྒོ་ནས་དམན་ཏེ། འཛིན་རྟོག་མི་སྤོང་བའི་རྟོགས་རིགས་ཡིན་པའི་ཕྱིར། དེ་ཆོས་ཅན། རྟེན་གྱི་ཁྱད་པར་དང་ལྡན་ཏེ། ཅི་སྐད་བཤད་པའི་རྟོག་རིགས་གཉིས་ཀྱི་རྟེན་ཆོས་དབྱིངས་དང་ལྡན་པའི་ཕྱིར། ཡུལ་ཅན་ལམ་ཤེས་ཀྱི་སྦྱོར་བ་གཉིས་པཾ་སྔ་མ་ལ་བསྒྲེས་ཏེ་འགོད་པར་བྱའོ། །གཉིས་པ་རྒྱུ་ངེས་འབྱེད་ཆ་མཐུན་ལ་གཉིས་ལས། དང་པོ་ནི། ངེཾས་སོགས་སོ། །གཉིས་པ་ནི། བཏགཾས་དང་གཟུགས་རང་རྒྱལ་གྱི་རྟོགས་རིགས་སྒོམ་པར་བྱེད་པའི་བྱང་སེམས་ཀྱི་སྦྱོར་ལམ་དྲོད་ཀྱི་ཡེ་ཤེས་དེ་ཆོས་ཅན། དམིགས་རྣམ་ཁྱད་པར་ཅན་དང་ལྡན་ཏེ། དམིགས་པ་བདེན་བཞི་ལ་དམིགས་ནས་རྣམ་པ་མིང་དུ་བཏགས་པའི་ཆོས་ཉིད་མི་འགལ་བར་སྟོན་པའི་རྣམ་པ་ཅན་ཡིན་པའི་ཕྱིར། རྩེཾ་དང་གཟུཾགས་དེ་འདྲའི་རྩེ་མོའི་ཡེ་ཤེས་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་དོན་དམ་པར་འཕེལ་འགྲིབ་མེད་པ་སོགས་ཀྱི་རྣམ་པ་ཅན་ཡིན་པའི་ཕྱིར། ནངཾ་དང་ངོཾ་དེ་འདྲའི་བཟོད་པའི་ཡེ་ཤེས་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་ནང་སྟོང་པ་ཉིད་ལ་སོགས་པས་གཟུགས་སོགས་མི་འཛིན་པའི་རྣམ་པ་ཅན་ཡིན་པའི་ཕྱིར། གཟུཾགས་དང་གཟུཾགས་དེ་འདྲའི་ཆོས་མཆོག་གི་ཡེ་ཤེས་ཆོས་ཅན། ཆོས་འདྲ། དམིགས་པ་བདེན་བཞི་ལ་དམིགས་ནས་རྣམ་པ་སྐྱེ་འགག་མེད་པ་སོགས་ཀྱི་རྣམ་པ་ཅན་ཡིན་པའི་ཕྱིར། གསུམ་པ་བྱང་སེམས་ཀྱི་ལམ་ཤེས་པའི་ལམ་ཤེས་ལ་གཉིས་ཏེ། མཐོང་ལམ་དང་། བསྒོམ་ལམ་མོ། །དང་པོ་ལ་གསུམ་སྟེ། ཡེ་ཤེས་མདོར་བསྟན། རྣམ་པ་རྒྱས་པར་བཤད། གཞན་གྱི་ལོག་རྟོག་སྤང་བའོ། །དང་པོ་ལ་གཉིས་ལས། དང་པོ་ནི། རཾང་བྱམས་མགོན་ཆོས་ཅན། ཤེས་བྱ་རང་རྒྱལ་གྱི་ལམ་གྱི་མཇུག་ཐོགས་སུ་ཤེས་བྱ་བྱང་སེམས་ཀྱི་ལམ་འཆད་པའི་རྒྱུ་མཚན་ཡོད་དེ། དམན་མཆོག་གི་གོ་རིམ་ལ་དགོངས་ནས་དེ་ལྟར་འཆད་པའི་ཕྱིར། གཉིས་པ་ནི། བདེཾན་དང་རྣམཾ་བྱང་སེམས་ཀྱི་ཤེས་བཟོད་སྐད་ཅིག་བཅུ་དྲུག་པོ་ཆོས་ཅན། ལམ་ཤེས་འཆད་པའི་སྐབས་ནས་བསྟན་པའི་མཐོང་ལམ་ཡིན་ཏེ། འདི་ཕྱིའི་ཕན་ཡོན་ཁྱད་པར་ཅན་གཉིས་དང་ལྡན་པའི་ཐེག་ཆེན་གྱི་བདེན་པ་མངོན་རྟོགས་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། རྣམཾ་པཾ་སོགས་སོ། །གཉིས་པ་ནི། དེཾ་བཞིཾན་ལམ་ཤེས་འཆད་པའི་སྐབས་ནས་བསྟན་པའི་ཐེག་ཆེན་གྱི་མཐོང་ལམ་ཆོས་ཅན། ཁྱོད་ལ་ཤེས་བཟོད་སྐད་ཅིག་མ་བཅུ་དྲུག་ཡོད་དེ། ཁྱོད་ལ་དེ་བཞིན་ཉིད་དང་སངས་རྒྱས་དག་ཕན་ཚུན་རྣམ་གྲངས་ཀྱིས་གནས་པ་ཁས་མི་ལེན་པ་སོགས་ལ་ངེས་པ་རང་སྟོབས་ཀྱིས་འདྲེན་པའི་མཉམ་གཞག་སྐད་ཅིག་མ་བཅུ་དྲུག་ཡོད་པའི་ཕྱིར། གསུམ་པ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ལ་བཞི་ལས། དང་པོ་སྡུག་བསྔལ་བདེན་པའི་རྣམ་པ་ནི། དོཾན་དཾམ་བྱང་སེམས་ཀྱི་མཐོང་ལམ་མཉམ་གཞག་སྐད་ཅིག་མ་དང་པོ་ཆོས་ཅན། ལམ་ཤེས་འཆད་པའི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། བྱང་སེམས་ཀྱི་མཐོང་ལམ་མཉམ་གཞག་གང་ཞིག དེ་བཞིན་ཉིད་དང་སངས་རྒྱས་དག་ཕན་ཚུན་རྣམ་གྲངས་ཀྱིས་གནས་པར་ཁས་མི་ལེན་པ་ལ་ངེས་པ་རང་སྟོབས་ཀྱིས་འདྲེན་པའི་ཕྱིར། དེས་གཞན་གསུམ་ལ་འགྲེའོ། །གཉིས་པ་ཀུན་འབྱུང་བདེན་པ་ནི། གཟུགས་དེ་འདྲའི་ལྔ་པ་ཆོས་ཅན། ལམ་ཤེས་འཆད་པའི་སྐབས་ནས་བསྟན་པའི་ཀུན་འབྱུང་ཆོས་བཟོད་ཡིན་ཏེ། གང་ཞིག་གཟུགས་སོགས་རྟག་ཆད་མེད་པ་ལ་ངེས་པ་རང་སྟོབས་ཀྱིས་འདྲེན་པའི་ཕྱིར། དེས་གཞན་གསུམ་ལ་འགྲེའོ། །གསུམ་པ་འགོག་བདེན་གྱི་རྣམ་པ་ནི། གཟུཾགས་དེ་འདྲའི་དགུ་པ་ཆོས་ཅན། ལམ་ཤེས་འཆད་པའི་སྐབས་ནས་བསྟན་པའི་འགོག་པ་ལ་ཆོས་བཟོད་ཡིན་ཏེ། གང་ཞིག་གཟུགས་སོགས་རང་བཞིན་ཁོ་ནས་སྟོང་པ་ཉིད་ལ་ངེས་པ་རང་སྟོབས་ཀྱིས་འདྲེན་པའི་ཕྱིར། དེས་གཞན་གསུམ་ལ་འགྲེའོ། །བཞི་པ་ལམ་བདེན་གྱི་རྣམ་པ་ནི། ངོཾ་བོཾ་དེ་འདྲའི་སྐད་ཅིག་བཅུ་གསུམ་པ་ཆོས་ཅན། ལམ་ཤེས་འཆད་པའི་སྐབས་ནས་བསྟན་པའི་ལམ་ཆོས་བཟོད་ཡིན་ཏེ། གང་ཞིག་གཟུགས་སོགས་དང་། མྱང་འདས་ལ་མངོན་ཞེན་ཞི་བའི་ངེས་པ་རང་སྟོབས་ཀྱིས་འདྲེན་པའི་ཕྱིར། དེས་གཞན་གསུམ་ལ་འགྲེའོ། །གཉིས་པ་ནི། དེཾ་ལྟརཾ་སོགས་སོ། །གསུམ་པ་ལ་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཁཾ་ཅིཾག་རྒྱན་གྱི་འགྲེལ་བྱེད་ཁ་ཅིག་ན་རེ། སྐབས་འདིར་མཐོང་ལམ་རྒྱས་བཤད་ཀྱི་གཞུང་གིས་རྣམ་པ་མ་བཤད་པར་མཐོང་ལམ་སྐད་ཅིག་མ་བཅུ་དྲུག་གི་རབ་དབྱེ་ཙམ་བསྟན་པ་ཡིན་ལ། སྐབས་དང་པོར་བཤད་པའི་ངེས་འབྱེད་ཆ་མཐུན་དང་། འོག་ནས་འཆད་པར་འགྱུར་བའི་ངེས་འབྱེད་ཆ་མཐུན་སྟོན་པའི་གཞུང་གིས་ཀྱང་རྣམ་པ་མ་བཤད་པར་དེ་དག་གི་རབ་དབྱེ་ཙམ་བསྟན་པ་ཡིན་ནོ་ཞེས་ཟེར་རོ། །གཉིས་པ་ནི། གཞཾན་དཾག་དེ་བཞིན་ཉིད་དང་སངས་རྒྱས་དག་ཞེས་སོགས་ཀྱི་གཞུང་ཆོས་ཅན། མཉམ་བཞག་དུ་སྒོམ་པའི་རིམ་པ་དང་རྗེས་ཐོབ་ཏུ་ཡིད་ལ་བྱ་བའི་རིམ་པ་མ་བསྟན་པར་ཐལ། རྣམ་པ་མ་བསྟན་པའི་ཕྱིར། འདོད་ན། མངོན་པར་རྟོགས་པའི་རིམ་པ་ཅུང་ཟད་ཀྱང་མ་བསྟན་པར་ཐལ། འདོད་པ་དེའི་ཕྱིར། གཞན་ཡང་དམིགས་པ་དང་ནི་རྣམ་པ་དང་ཞེས་སོགས་དང་། དྲོ་བ་རྣམས་ཀྱི་དམིགས་པ་འདིར་ཞེས་སོགས་ཀྱི་གཞུང་དྲང་དུ་མི་རུང་བར་ཐལ། གཞུང་དེ་དག་གིས་དམིགས་རྣམ་མ་བསྟན་པའི་ཕྱིར། གཉིས་པ་སྒོམ་ལམ་ལ་གཉིས་ཏེ། སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་མོ། །དང་པོ་ལ་གསུམ་ལས། དང་པོ་ནི། མཐོཾང་བཾའི་སྐྱེ་བའི་རིམ་པ་དང་བསྟུན་ན་མཐོངཾ་ལམ་གྱི་རྗེས་སུ་སྒོམ་ལམ་བརྗོད་པར་བྱ་བ་ཡིན་ན་ཡང་བྱམས་མགོན་གྱིས་ཐོག་མར་སྒོམ་ལམ་གྱི་བྱེད་པ་བསྟན་པ་ཆོས་ཅན། རྒྱུ་མཚན་དང་དགོས་པ་ཡོད་དེ། གཞུང་ཉུང་བའི་ཕྱིར་དང་། གདུལ་བྱ་རྒྱུ་སྒོམ་ལམ་ལ་ཞུགས་པའི་ཆེད་ཡིན་པའི་ཕྱིར། གཉིས་པ་ནི། ཀུཾན་ནཾས་ཐེག་ཆེན་གྱི་སྒོམ་ལམ་སྒོམ་སྟོབས་ཀྱིས་ཐོབ་པའི་ཉོན་མོངས་ཀྱི་ནུས་པ་ཞི་བ་ལ་སོགས་པའི་ཡོན་ཏན་དྲུག་པོ་དེ་ཆོས་ཅན། ཐེག་ཆེན་སྒོམ་ལམ་གྱི་བྱེད་པ་ཡིན་ཏེ། ཐེག་ཆེན་གྱི་སྒོམ་ལམ་སྒོམ་སྟོབས་ཀྱིས་ཐོབ་པའི་རྣམ་དཀར་གྱི་ཡོན་ཏན་ཡིན་པའི་ཕྱིར། གསུམ་པ་ནི། རྣཾམ་པཾ་ཐེག་ཆེན་གྱི་སྒོམ་ལམ་ཆོས་ཅན། སྐྱེས་བུ་བྱེད་པའི་འབྲས་བུ་བཞི་དང་ལྡན་ཏེ། ནང་གི་ཉེར་འཚེ་ཞི་བ་གསུམ། ཕྱིའི་ཉེར་འཚེ་ཞི་བ་གཅིག་དང་ལྡན་པའི་ཕྱིར། ཡང་དག་དེ་ཆོས་ཅན། རྣམ་སྨིན་གྱི་འབྲས་བུ་དང་ལྡན་ཏེ། རྫོགས་པའི་བྱང་ཆུབ་སྒྲུབ་པར་བྱེད་པའི་ཕྱིར། རྟེནཾ་གྱིཾ་དེ་ཆོས་ཅན། བདག་པོའི་འབྲས་བུ་དང་ལྡན་ཏེ། རང་རྒྱུད་ལྡན་གྱི་གང་ཟག་བཞུགས་པའི་ས་ཕྱོགས་མཆོད་པའི་ཡུལ་དུ་བྱེད་པའི་ཕྱིར། གཉིས་པ་ལ་གཉིས་ཏེ། དབྱེ་བ་བསྟན་ཏེ་མཚམས་སྦྱར། སོ་སོའི་རང་བཞིན་ཕྱེ་སྟེ་བཤད་པའོ། །དང་པོ་ནི། བྱེདཾ་པཾའི་ཐེག་ཆེན་གྱི་སྒོམ་ལམ་ཆོས་ཅན། ཁྱོད་ལ་ཟག་བཅས་དང་ཟག་མེད་སྒོམ་ལམ་གཉིས་ཡོད་དེ། ཁྱོད་ལ་གཟུང་འཛིན་གཉིས་སྣང་དང་བཅས་པའི་སྒོམ་ལམ་དང་། དེ་མེད་པའི་སྒོམ་ལམ་གཉིས་སུ་ཡོད་པའི་ཕྱིར། གཉིས་པ་ལ་གཉིས་ཏེ། ཟག་བཅས་སྒོམ་ལམ་དང་། ཟག་མེད་སྒོམ་ལམ་མོ། །དང་པོ་ལ་གསུམ་སྟེ། དབྱེ་བའི་སྒོ་ནས་མཚམས་སྦྱར། ཕྱེ་བ་སོ་སོའི་རང་བཞིན་བཤད། བྱེད་ལས་ཀྱི་སྒོ་ནས་དོན་བསྡུ་བའོ། །དང་པོ་ནི། དེཾའི་ཕྱིརཾ་ཐེག་ཆེན་གྱི་ཟག་བཅས་སྒོམ་ལམ་ཆོས་ཅན། མོས་བསྔོ་རྗེས་སུ་ཡི་རང་བསྒོམ་ལམ་གསུམ་ཡོད་དེ། དགེ་རྩ་སོག་པར་བྱེད་པ་དང་། མི་ཟད་པར་བྱེད་པ་དང་། སྤེལ་བར་བྱེད་པའི་སྒོམ་ལམ་གསུམ་ཡོད་པའི་ཕྱིར། གཉིས་པ་ལ་གསུམ་སྟེ། མོས་སྒོམ་ལམ། བསྔོ་སྒོམ་ལམ། རྗེས་སུ་ཡི་རང་སྒོམ་ལམ་མོ། །དང་པོ་ལ་གཉིས་ཏེ། མོས་པའི་དབྱེ་བ་དང་། མོས་པའི་ཕན་ཡོན་ནོ། །དང་པོ་ལ་གཉིས་ལས། དང་པོ་ནི། རྣམཾས་ཀྱིསཾ་བྱམས་མགོན་ཆོས་ཅན། ཟག་བཅས་སྒོམ་ལམ་གསུམ་གྱི་ནང་ནས་དང་པོར་མོས་པ་སྒོམ་ལམ་འཆད་པའི་རྒྱུ་མཚན་ཡོད་དེ། ཟག་བཅས་སྒོམ་ལམ་གསུམ་གྱི་ནང་ནས་ཐོག་མར་དགེ་རྩ་སོག་པ་སྔོན་དུ་འགྲོ་བའི་ཕྱིར། གཉིས་པ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ནི། མོཾས་དང་ཇིཾ་ས་གཉིས་པའི་རྗེས་ཐོབ་ཀྱི་གནས་སྐབས་ཀྱི་ཡུམ་དོན་གསུམ་གྱི་འབྱུང་གནས་སུ་མོས་པའི་སྒོམ་ལམ་དེ་ཆོས་ཅན། མོས་པ་སྒོམ་ལམ་ཡིན་ཏེ། ཐེག་ཆེན་གྱི་ཟག་བཅས་སྒོམ་ལམ་གང་ཞིག ཡུམ་དོན་གསུམ་གྱི་འབྱུང་གནས་སུ་མོས་པའི་མོས་པ་མཚུངས་ལྡན་དང་བཅས་པ་ཡིན་པའི་ཕྱིར། རང་དོན་ཕུན་སུམ་ཚོགས་པའི་འབྱུང་གནས་སུ་མོས་པའི་ཞེས་སོགས་སོ་སོར་ཕྲལ་ནས་རང་དོན་མོས་པ་སྒོམ་ལམ་སོགས་གསུམ་དུ་ཕྲལ་ནས་ཡང་འགོད་དོ། །གཉིས་པ་ནི། རྣཾམ་དང་དེཾ་མོས་པ་སྒོམ་ལམ་ཆོས་ཅན། ཉི་ཤུ་རྩ་བདུན་ཡོད་དེ། རང་དོན་མོས་པ་སྒོམ་ལམ་དགུ། གཉིས་དོན་མོས་པ་སྒོམ་ལམ་དགུ། གཞན་དོན་མོས་པ་སྒོམ་ལམ་དགུ་རྣམས་སུ་ཡོད་པའི་ཕྱིར། གཉིས་པ་ལ་གཉིས་ལས། དང་པོ་ནི། དེཾ་བསྒོཾམ་ཤེས་རབ་ཕ་རོལ་ཕྱིན་པ་ལ་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། མོས་པ་སྒོམ་པའི་བྱང་སེམས་སྤྲོ་བ་བསྐྱེད་པའི་ཆེད་དུ་བསྟོད་བཀུར་བསྔགས་གསུམ་མཛད་ཚུལ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། ཤེཾས་དང་ཇིཾ་རྫོགས་པའི་སངས་རྒྱས་ཀྱིས་རང་དང་གཉིས་དོན་མོས་པའི་གནས་སྐབས་དགུ་ལ་བསྟོད་བཀུར་དགུ། གཞན་དོན་མོས་པའི་གནས་སྐབས་དགུ་ལ་བསྔགས་པ་དགུ་མཛད་པ་ཆོས་ཅན། དགོས་པ་ཡོད་དེ། མོས་པ་སྒོམ་པའི་བྱང་སེམས་སྤྲོ་བ་སྐྱེད་པའི་ཆེད་ཡིན་པའི་ཕྱིར། དེཾས་ནཾ་མོས་པ་སྒོམ་པའི་བྱང་སེམས་ལ་སངས་རྒྱས་ཀྱིས་བསྟོད་བཀུར་བསྔགས་པ་མཛད་པ་ཆོས་ཅན། གཅམ་བུའི་ངོ་བོ་མ་ཡིན་ཏེ། ཡོན་ཏན་དང་འཚམས་པའི་བསྟོད་སོགས་ཡིན་པའི་ཕྱིར། གཉིས་པ་བསྔོ་བ་སྒོམ་ལམ་ལ་གཉིས་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། མོས་པ་སྒོམ་ལམ་གྱི་འོག་ཏུ་བསྔོ་བ་སྒོམ་ལམ་འཆད་པའི་རྒྱུ་མཚན་ཡོད་དེ། མོས་པས་བསགས་པའི་དགེ་རྩ་བསྔོ་བས་མི་ཟད་པར་བྱེད་དགོས་པའི་ཕྱིར། གཉིས་པ་ནི། ཡོཾངས་དང་ཇིཾ་ས་གཉིས་པའི་རྗེས་ཐོབ་ཀྱི་གནས་སྐབས་ཀྱི་དགེ་རྩ་རྫོགས་པའི་བྱང་ཆུབ་ཏུ་སྒྱུར་བར་བྱེད་པའི་སྒོམ་ལམ་དེ་ཆོས་ཅན། བསྔོ་བ་སྒོམ་ལམ་ཡིན་ཏེ། ཐེག་ཆེན་གྱི་ཟག་བཅས་སྒོམ་ལམ་གང་ཞིག དགེ་རྩ་རྫོགས་པའི་བྱང་ཆུབ་ཀྱི་རྒྱུར་བསྒྱུར་བར་བྱེད་པའི་འདུན་པ་མཚུངས་ལྡན་དང་བཅས་པ་ཡིན་པའི་ཕྱིར། བསྔོ་བ་སྒོམ་ལམ་ཆོས་ཅན། རྣམ་པ་བཅུ་གཉིས་ཡོད་དེ། སྤྱིའི་རང་བཞིན། མངོན་ཞེན་འགོག་པ་དྲུག ཟུང་འཇུག་གི་རྣམ་པ། མི་མཐུན་ཕྱོགས་དང་བྲལ་བ། རྣམ་པའི་རབ་དབྱེ་གསུམ་རྣམས་སུ་ཡོད་པའི་ཕྱིར། གསུམ་པ་རྗེས་སུ་ཡི་རང་སྒོམ་ལམ་ལ་གཉིས་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། བསྔོ་བ་སྒོམ་ལམ་གྱི་འོག་ཏུ་རྗེས་སུ་ཡི་རང་སྒོམ་ལམ་འཆད་པའི་རྒྱུ་མཚན་ཡོད་དེ། བསྔོ་བས་བསྔོས་པའི་དགེ་རྩ་ཡི་རང་གིས་མངོན་པར་སྤེལ་དགོས་པའི་ཕྱིར་རོ། །གཉིས་པ་ནི། ཐཾབས་དང་རཾབ་ས་གཉིས་པའི་རྗེས་ཐོབ་ཀྱི་གནས་སྐབས་ཀྱི་རང་གཞན་གྱི་དགེ་རྩ་ལ་རྗེས་སུ་ཡི་རང་བའི་སྒོམ་ལམ་དེ་ཆོས་ཅན། རྗེས་སུ་ཡི་རང་བའི་སྒོམ་ལམ་ཡིན་ཏེ། ཐེག་ཆེན་གྱི་ཟག་བཅས་སྒོམ་ལམ་གང་ཞིག དགེ་རྩ་སྤེལ་བར་བྱེད་པའི་འདུན་པ་མཚུངས་ལྡན་དང་བཅས་པ་ཡིན་པའི་ཕྱིར། གསུམ་པ་བྱེད་ལས་ཀྱི་སྒོ་ནས་དོན་བསྡུ་བ་ནི། དེཾ་ལཾ་མོས་པ་སྒོམ་ལམ་ཆོས་ཅན། བྱེད་ལས་ཁྱད་པར་ཅན་དང་ལྡན་ཏེ། དགེ་རྩ་སོག་པར་བྱེད་པའི་ཕྱིར། བསྔོ་བ་སྒོམ་ལམ་ཆོས་ཅན། ཆོས་འདྲ། དགེ་རྩ་མི་ཟད་པར་བྱེད་པའི་ཕྱིར། རྗེས་སུ་ཡི་རང་སྒོམ་ལམ་ཆོས་ཅན། ཆོས་འདྲ། དགེ་རྩ་སྤེལ་བར་བྱེད་པའི་ཕྱིར། གཉིས་པ་ཟག་མེད་སྒོམ་ལམ་ལ་གཉིས་ཏེ། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་མོ། །དང་པོ་ལ་གཉིས་ལས། དང་པོ་ནི། ཟཾག་པཾ་བྱམས་མགོན་ཆོས་ཅན། ཟག་བཅས་སྒོམ་ལམ་གྱི་འོག་ཏུ་ཟག་མེད་སྒོམ་ལམ་འཆད་པའི་རྒྱུ་མཚན་ཡོད་དེ། དམན་མཆོག་གི་གོ་རིམ་ལ་དགོངས་ནས་དེ་ལྟར་བཤད་པའི་ཕྱིར། ཟག་མེད་སྒོམ་ལམ་ཆོས་ཅན། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས་ཡོད་དེ། སྤང་བྱའི་དངོས་གཉེན་དང་། རྣམ་གྲོལ་ལམ་གཉིས་ཡོད་པའི་ཕྱིར། གཉིས་པ་ནི། དེཾ་དང་གཟུཾགས་ས་གཉིས་པའི་བར་ཆད་མེད་ལམ་ཆོས་ཅན། སྒྲུབ་པ་སྒོམ་ལམ་གྱི་ངོ་བོ་ཡིན་ཏེ། གཟུགས་སོགས་ཀྱི་གནས་ཚུལ་མངོན་སུམ་དུ་མཐོང་ཟིན་རྒྱུན་ལྡན་དུ་སྒོམ་པའི་སྤང་བ་གཉེན་པོ་ཡིན་པའི་ཕྱིར། མཆོཾག་དང་གཞཾན་སྒྲུབ་པ་སྒོམ་ལམ་གྱིས་བསྡུས་པའི་ཤེར་ཕྱིར་ཆོས་ཅན། སྦྱིན་སོགས་གཞན་ལས་མཆོག་ཡིན་ཏེ། སྦྱིན་སོགས་གཞན་གྱིས་སངས་རྒྱས་ཐོབ་པ་ཁྱོད་ལ་རག་ལས་པའི་ཕྱིར། ཀུཾན་དང་ཆོཾས་སྒྲུབ་པ་སྒོམ་ལམ་ཆོས་ཅན། ཡུལ་ལ་མངོན་པར་ཞེན་པའི་ཚུལ་གྱིས་འདུ་མི་བྱེད་དེ། ཆོས་ཐམས་ཅད་སྐྱེ་མེད་དུ་མངོན་སུམ་དུ་རྟོགས་པའི་ངེས་ཤེས་འདྲེན་པར་བྱེད་པའི་ཕྱིར། ཆོསཾ་དང་དེཾ་སྒྲུབ་པ་སྒོམ་ལམ་ཆོས་ཅན། བྱེད་ལས་ཁྱད་པར་ཅན་དང་ལྡན་ཏེ། རྣལ་འབྱོར་པའི་རྒྱུད་ལ་ཆོས་རྣམས་མི་དམིགས་པའི་རྟོགས་པ་སྐྱེད་པའི་ཕྱིར། དོཾན་དང་དོཾན་དེ་ཆོས་ཅན། དོན་ཆེན་པོ་དང་ལྡན་ཏེ། སངས་རྒྱས་ཉིད་དུ་བྱེད་པའི་ཕྱིར་རོ། །གཉིས་པ་ལ་གཉིས་ཏེ། རྒྱུ་དང་རྒྱུ་མ་ཡིན་པའི་རབ་དབྱེ་དང་། འབྲས་བུ་རྣམ་དག་སྒོམ་ལམ་དངོས་སོ། །དང་པོ་ལ་གཉིས་ལས། དང་པོ་ནི། དེཾའི་འོཾག་སངས་རྒྱས་བརྟེན་དང་སྦྱིན་སོགས་དང་ཞེས་སོགས་ཚིགས་བཅད་གཉིས་གསུངས་པ་ཆོས་ཅན། དགོས་པ་ཡོད་དེ། རྣམ་དག་སྒོམ་ལམ་སྐྱེ་བའི་མཐུན་རྐྱེན་དང་། འགལ་རྐྱེན་བདེ་བླག་ཏུ་རྟོགས་པའི་ཆེད་ཡོད་པའི་ཕྱིར། གཉིས་པ་ནི། སཾངས་རྒྱསཾ་དང་སཾངས་རྒྱསཾ་སངས་རྒྱས་མཉེས་པར་བྱེད་པ་སོགས་གསུམ་པོ་ཆོས་ཅན། རང་འབྲས་རྣམ་དག་སྒོམ་ལམ་སྐྱེ་བའི་རྒྱུ་ཡིན་ཏེ་དེ་སྐྱེ་བ་ལ་ཕན་འདོགས་བྱེད་ཡིན་པའི་ཕྱིར། བདུཾད་དང་བཾདུད་བདུད་ཀྱིས་གནོད་པ་བྱས་པ་སོགས་བཞི་པོ་ཆོས་ཅན། རྣམ་དག་སྒོམ་ལམ་སྐྱེ་བའི་འགལ་རྐྱེན་ཡིན་ཏེ། དེ་སྐྱེ་བ་ལ་བར་དུ་གཅོད་བྱེད་ཡིན་པའི་ཕྱིར། གཉིས་པ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་དུ་བཤད་པའོ། །དང་པོ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། འབྲཾས་དང་འཕཾགས་ས་གཉིས་པའི་རྣམ་གྲོལ་ལམ་ཆོས་ཅན། ཁྱོད་རང་རྒྱུ་བར་ཆད་མེད་ལམ་གྱི་ངོས་སྐལ་གྱི་དྲི་མས་རྣམ་པར་དག་པ་ན་ཁྱོད་ཀྱི་ཡུལ་གཟུགས་སོགས་ཀྱང་དེས་རྣམ་པར་དག་པ་ཡིན་ཏེ། ཁྱོད་དེས་དག་པའི་དག་པ་དང་། ཁྱོད་ཀྱི་ཡུལ་གཟུགས་སོགས་དེས་དག་པའི་དག་པ་གཉིས་རང་སྤྱི་གཉིས་ཆར་དུ་ཐ་དད་མེད་པར་དོན་གཅིག་ཡིན་པའི་ཕྱིར། གཉིས་པ་ལ་གསུམ་སྟེ། འཕགས་བཞིའི་རྣམ་དག་སྤྱིར་བསྟན། སངས་རྒྱས་ཀྱི་རྣམ་དག་ཤིན་ཏུ་བར་སྒྲུབ། སྒྲུབ་བྱེད་ལ་ཀླན་ཀ་སྤང་བའོ། །དང་པོ་ལ་གཉིས་ལས། དང་པོ་ནི། རྣམཾ་པཾར་སོགས་སོ། །གཉིས་པ་ནི། ཉོནཾ་དང་འདོཾད་ཉན་ཐོས་ཀྱི་མཐོང་ལམ་རྣམ་གྲོལ་ལམ་དེ་ཆོས་ཅན། ཉན་ཐོས་ཀྱི་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་ཙམ་སྤངས་པས་རབ་ཏུ་ཕྱེ་བའི་རྣམ་གྲོལ་ལམ་ཡིན་པའི་ཕྱིར། ཤེཾས་དང་དེཾ་བསེ་རུ་ལྟ་བུའི་རང་རྒྱལ་གྱི་མཐོང་ལམ་རྣམ་གྲོལ་ལམ་ཆོས་ཅན། རང་རྒྱལ་གྱི་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་དང་། ཤེས་སྒྲིབ་གཟུང་རྟོག་ཙམ་སྤངས་པས་རབ་ཏུ་ཕྱེ་བའི་རྣམ་གྲོལ་ཡིན་པའི་ཕྱིར། ལཾམ་དང་ཐེཾག་ས་དང་པོའི་རྣམ་གྲོལ་ལམ་ཆོས་ཅན། བྱང་སེམས་ཀྱི་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཐེག་པ་གསུམ་གྱི་ལམ་གྱི་སྒྲིབ་པ་གསུམ་སྤངས་པས་རབ་ཏུ་ཕྱེ་བའི་རྣམ་གྲོལ་ལམ་ཡིན་པའི་ཕྱིར། འདི་དག་ནི་མ་མཐའ་ངོས་བཟུང་བའོ། །སཾངས་དང་ཉོནཾ་སངས་རྒྱས་སའི་རྣམ་གྲོལ་ལམ་ཆོས་ཅན། སངས་རྒྱས་ཀྱི་རྣམ་དག་ཡིན་ཏེ། སྒྲིབ་གཉིས་བག་ཆགས་དང་བཅས་པ་སྤངས་པས་རབ་ཏུ་ཕྱེ་བའི་རྣམ་གྲོལ་ལམ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ལཾམ་ཤེཾས་ས་དགུ་ལ་ནི་ཆེན་པོ་ཡི་ཞེས་སོགས་ཚིགས་བཅད་གཅིག་སྨོས་པ་ཆོས་ཅན། དགོས་པ་ཡོད་དེ། རྣམ་དག་ཤིན་ཏུ་བ་དང་ཤིན་ཏུ་བ་མ་ཡིན་པའི་ཁྱད་པར་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། སཾ་དང་འདོཾད་སངས་རྒྱས་ཀྱི་རྣམ་དག་ཆོས་ཅན། རྣམ་དག་ཤིན་ཏུ་བ་ཡིན་ཏེ། རང་རྒྱུ་རྒྱུན་མཐའི་བར་ཆད་མེད་ལམ་དེས་ཁམས་གསུམ་གྱི་ཤེས་སྒྲིབ་མཐའ་དག་གི་གཉེན་པོ་བྱས་པ་ལས་བྱུང་བའི་རྣམ་གྲོལ་ལམ་ཡིན་པའི་ཕྱིར། ཉན་ཐོས་སོགས་ཀྱི་རྣམ་དག་གསུམ་པོ་ཆོས་ཅན། རྣམ་དག་ཤིན་ཏུ་བ་མ་ཡིན་ཏེ། རང་རྒྱུ་བར་ཆད་མེད་ལམ་དེས་ཁམས་གསུམ་གྱི་ཤེས་སྒྲིབ་མཐའ་དག་གི་གཉེན་པོ་མ་བྱས་པའི་ཕྱིར། གསུམ་པ་ལ་གསུམ་ལས། དང་པོ་ནི། ཇིཾ་ལྟརཾ་སོགས་སོ། །གཉིས་པ་ནི། དེཾ་ལཾ་རྒྱུན་མཐའི་ཡེ་ཤེས་ཆོས་ཅན། ཁམས་གསུམ་གྱི་ཤེས་སྒྲིབ་མཐའ་དག་གི་གཉེན་པོར་གྲུབ་སྟེ། ཁམས་གསུམ་གྱི་གཟུང་འཛིན་མཉམ་པ་ཉིད་དུ་མངོན་སུམ་རྟོགས་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། གསུམ་པ་ལ་གསུམ་སྟེ། བསལ་བྱ་ཀླན་ཀ སེལ་བྱེད་གཉེན་པོ། ཀླན་ཀ་བསལ་བས་གྲུབ་པའི་དོན་ནོ། །དང་པོ་ནི། དེཾ་ལཾ་གཉེན་པོ་ཆུང་རིམ་ནས་སྐྱེ་ཤིང་སྤང་བྱ་ཆེ་རིམ་ནས་འགགས་པ་མི་འཐད་དེ། གོ་རིམ་དེ་ལས་བཟློག་པ་འཐད་པའི་ཕྱིར་ཞེ་ན། གཉིས་པ་ནི། གོས་ལ་གཉེན་པོ་ཆུང་རིམ་ནས་སྐྱེ་ཤིང་། སྤང་བྱ་ཆེ་རིམ་ནས་འགགས་པའི་དཔེ་ཡོད་དེ། གོས་ལ་ཆགས་པའི་དྲི་མ་རགས་པ་འབད་པ་ཆུང་ངུས་སེལ་ཞིང་། ཕྲ་མོ་འབད་པ་ཆེན་པོས་སེལ་དགོས་པའི་ཕྱིར། གསུམ་པ་ནི། སྒོཾམ་ལཾམ་པཾའི་སངས་རྒྱས་ཀྱི་རྣམ་དག་ཤིན་ཏུ་བར་གྲུབ་སྟེ། ཐེག་ཆེན་གྱི་སྒོམ་ལམ་ཆུང་ངུའི་ཆུང་ངུ་སོགས་དགུ་པོ་དེ་ཁམས་གསུམ་ས་དགུའི་སྒོམ་སྤངས་ཆེན་པོའི་ཆེན་པོ་སོགས་དགུའི་གཉེན་པོར་གྲུབ་པའི་ཕྱིར། གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེས་རབ་སོགས་སོ།། །།གསུམ་པ་རྣམ་པར་དག་བྱེད་གཞི་ཤེས་ལ་གསུམ་སྟེ། འབྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། གཞི་ཐམཾས་ཅཾད་བྱམས་མགོན་ཆོས་ཅན། ལམ་ཤེས་ཀྱི་འོག་ཏུ་གཞི་ཤེས་འཆད་པའི་རྒྱུ་མཚན་ཡོད་དེ། བྱང་སེམས་འཕགས་པའི་རྗེས་ཐོབ་ཀྱིས་ལམ་ལེགས་པར་ཤེས་པ་མཚན་འཛིན་མི་མཐུན་པའི་ཕྱོགས་དང་། མཚན་མེད་རྟོགས་པའི་ཤེས་རབ་གཉེན་པོ་ཡིན་པའི་ཁྱད་པར་ཤེས་པ་ལ་རག་ལས་པའི་ཕྱིར། གཉིས་པ་ལ་གསུམ་སྟེ། ལམ་ཤེས་རྣམ་པར་དག་པར་བྱེད་པའི་གཞི་ཤེས། སྐབས་དོན་ཐེག་དམན་གྱི་རྟོགས་རིགས་སུ་གྱུར་པའི་གཞི་ཤེས་རྣམ་པ་དང་སྦྱར་བའི་ཆེད་དུ་མཁྱེན་གསུམ་གྱི་མཇུག་བསྡུ་བའོ། །དང་པོ་ལ་གསུམ་སྟེ། གཞི་ཤེས་ཀྱི་ངོ་བོ། ཉེ་རིང་གི་རྒྱུ་མཚན། མི་མཐུན་ཕྱོགས་དང་གཉེན་པོའི་ཁྱད་པར་རོ། །དང་པོ་ལ་གཉིས་ཏེ། རྩ་བ་དང་། འགྲེལ་པའོ། །དང་པོ་ནི། ཚུ་རོལ་བྱང་སེམས་ཀྱི་མཐོང་སྒོམ་བར་ཆད་མེད་ལམ་ཆོས་ཅན། སྐབས་གསུམ་པ་འདིར་གཞི་ཤེས་ཀྱིས་བསྡུས་པའི་ཤེར་ཕྱིན་དུ་འདོད་དེ། ཁམས་གསུམ་གྱི་གཟུང་འཛིན་མཉམ་ཉིད་དུ་རྟོགས་པར་མ་ཟད་པར་འཁོར་འདས་བར་གསུམ་ལ་མི་གནས་ཤིང་དུས་གསུམ་མཉམ་པ་ཉིད་དུ་རྟོགས་པའི་བྱང་སེམས་ཀྱི་མཉམ་གཞག་ཡིན་པའི་ཕྱིར། གཉིས་པ་ལ་གཉིས་ཏེ། དངོས་བསྟན་བྱང་སེམས་ཀྱི་གཞི་ཤེས། ཤུགས་བསྟན་ཉན་རང་གི་གཞི་ཤེས་སོ། །དང་པོ་ནི། དུཾས་གསུཾམ་བྱང་སེམས་ཀྱི་གཞི་ཤེས་ཆོས་ཅན། སྲིད་ཞི་ལ་མི་གནས་པའི་གཞི་ཤེས་ཡིན་ཏེ། ཤེས་རབ་ཀྱིས་སྲིད་མཐའ་དང་། སྙིང་རྗེས་ཞི་མཐའ་གནོན་དུས་ཀྱི་གཞི་ཤེས་ཡིན་པའི་ཕྱིར་ཏེ། དུས་གསུམ་མཉམ་པ་ཉིད་དུ་མངོན་སུམ་དུ་རྟོགས་པའི་གཞི་ཤེས་ཡིན་པའི་ཕྱིར། གཉིས་པ་ནི། ཀུཾན་ཤེཾས་ཐེག་དམན་གྱི་གཞི་ཤེས་ཆོས་ཅན། སྲིད་ཞི་ལ་གནས་པའི་གཞི་ཤེས་ཡིན་ཏེ། ཐབས་ཤེས་ཁྱད་པར་ཅན་དང་བྲལ་བའི་གཞི་ཤེས་ཡིན་པའི་ཕྱིར་ཏེ། དུས་གསུམ་མཉམ་པ་ཉིད་དུ་མ་རྟོགས་པའི་གཞི་ཤེས་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། ལུཾགས་ལཾས་ཉན་རང་གི་གཞི་ཤེས་ཤེར་ཕྱིན་ལ་རིང་བ་དང་། བྱང་སེམས་ཀྱི་གཞི་ཤེས་ཤེར་ཕྱིན་ལ་ཉེ་བའི་ཁྱད་པར་མི་འཐད་པར་ཐལ། དེ་གཉིས་ཀས་དུས་གསུམ་མཉམ་པ་ཉིད་དུ་ཤེས་པའི་ཕྱིར་ཏེ། དེ་གཉིས་ཀས་གཞི་རྟེན་འབྲེལ་གྱི་དོན་རྟོགས་པའི་ཕྱིར་ཞེ་ན། གཉིས་པ་ནི། དེཾ་ནིཾ་བྱང་སེམས་ཀྱི་གཞི་ཤེས་ཆོས་ཅན། རྗེས་ཐོབ་ཏུ་མཚན་མར་དམིགས་པའི་སྒོ་ནས་སྦྱིན་སོགས་ལ་སྤྱོད་ན། རྣམ་མཁྱེན་ལ་རིང་བར་འགྱུར་ཏེ། རྗེས་ཐོབ་དུ་མཚན་མར་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མི་མཁས་པའི་ཕྱིར། དེཾ་ནིཾ་དེ་ཆོས་ཅན། རྗེས་ཐོབ་དུ་མཚན་མར་མི་དམིགས་པའི་སྒོ་ནས་སྦྱིན་སོགས་ལ་སྤྱོད་ན་རྣམ་མཁྱེན་ལ་ཉེ་བར་འགྱུར་ཏེ། དེ་ལྟར་སྤྱོད་ན་རྣམ་མཁྱེན་སྒྲུབ་པའི་ཐབས་ལ་མཁས་པའི་ཕྱིར། ཉེ་རིང་གི་ཡུལ་སྐབས་དང་པོའི་རྣམ་མཁྱེན་དང་། ཉེ་རིང་དུ་འགྲོ་བ་པོ་སྔར་བཤད་པའི་གཞི་ཤེས་ཀྱི་ངོ་བོ་ཡིན་པར་དེ་ནི་ཞེས་པའི་ཚིག་གོང་འོག་གཉིས་ཀྱིས་གསལ་ལོ། །གསུམ་པ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གཉིས་ཏེ། ཉན་རང་གི་གཞི་ཤེས་འབྲས་ཡུམ་ལ་རིང་བའི་རྒྱུ་མཚན། བྱང་སེམས་ཀྱི་གཞི་ཤེས་འབྲས་ཡུམ་ལ་ཉེ་བའི་རྒྱུ་མཚན་ནོ། །དང་པོ་ནི། སྒྱུཾ་མཾ་ཐེག་དམན་གྱི་གཞི་ཤེས་ཆོས་ཅན། འབྲས་ཡུམ་ལ་རིང་བ་ཡིན་ཏེ། དུས་གསུམ་མཉམ་ཉིད་དུ་མི་ཤེས་པའི་གཞི་ཤེས་ཡིན་པའི་ཕྱིར་ཏེ། མཚན་འཛིན་གྱིས་བཅིངས་པའི་གཞི་ཤེས་ཡིན་པའི་ཕྱིར། གཉིས་པ་ནི། བྱཾང་ཆུབཾ་བྱང་སེམས་ཀྱི་གཞི་ཤེས་ཆོས་ཅན། འབྲས་ཡུམ་ལ་ཉེ་བའི་གཞི་ཤེས་ཡིན་ཏེ། དུས་གསུམ་མཉམ་ཉིད་དུ་ཤེས་པའི་གཞི་ཤེས་ཡིན་པའི་ཕྱིར་ཏེ། མཚན་འཛིན་གྱིས་མ་བཅིངས་པའི་གཞི་ཤེས་ཡིན་པའི་ཕྱིར། གཉིས་པ་ནི། ཐབཾས་མཾ་ཉན་ཐོས་ཀྱི་གཞི་ཤེས་དང་། བྱང་སེམས་ཀྱི་གཞི་ཤེས་གཉིས་ཆོས་ཅན། འབྲས་ཡུམ་ལ་ཉེ་རིང་གི་ཁྱད་པར་ཡོད་དེ། འབྲས་ཡུམ་སྒྲུབ་པའི་ཐབས་ལ་མཁས་མི་མཁས་ཀྱི་ཁྱད་པར་ཡོད་པའི་ཕྱིར། གསུམ་པ་མི་མཐུན་ཕྱོགས་དང་གཉེན་པོའི་ཁྱད་པར་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གཉིས་ཏེ། གཞི་ལམ་ལ་མཚན་འཛིན་གྱི་སྤང་གཉེན། འབྲས་བུ་ལ་མཚན་འཛིན་གྱི་སྤང་གཉེན་ནོ། །དང་པོ་ལ་གཉིས་ཏེ། སྤང་བྱ་དང་། གཉེན་པོའོ། །དང་པོ་ལ་གཉིས་ལས། དང་པོ་ནི། དེཾ་ལྟརཾ་གཟུགས་སོགས་ཕུང་པོ་སྟོང་ཉིད་དང་ཞེས་སོགས་གསུངས་པ་ཆོས་ཅན། དགོས་པ་ཡོད་དེ། འབྲས་ཡུམ་ལ་རིང་བའི་གཞི་ཤེས་དེ་མི་མཐུན་ཕྱོགས་ཀྱི་གཞི་ཤེས་སུ་བསྟན་པའི་ཆེད་ཡིན་པའི་ཕྱིར། གཉིས་པ་ནི། གཟུགཾས་དང་གཟུགཾས་གཞིའི་ཆོས་ཉིད་དང་ཆོས་ཅན་ལ་མཚན་མར་འཛིན་པའི་མཚན་འཛིན་ཆོས་ཅན། བྱང་སེམས་ལམ་གྱི་མི་མཐུན་ཕྱོགས་ཡིན་ཏེ། བྱང་སེམས་ལམ་གྱི་སྤང་བྱ་ཡིན་པའི་ཕྱིར། སྦྱིཾན་དང་ཟཾག་ལམ་ལ་མཚན་མར་འཛིན་པའི་མཚན་འཛིན་ཆོས་ཅན། ཆོས་རྟགས་འདྲ། གཉིས་པ་ལ་གཉིས་ལས། དང་པོ་ནི། བྱཾང་ཆུཾབ་སྦྱིན་ལ་སོགས་ལ་ངར་འཛིན་མེད་ཞེས་སོ་གསུངས་པ་ཆོས་ཅན། དགོས་པ་ཡོད་དེ། བྱང་སེམས་ཀྱི་གཞི་ཤེས་དེ་གཉེན་པོ་གཞི་ཤེས་སུ་བསྟན་པའི་ཆེད་ཡིན་པའི་ཕྱིར། གཉིས་པ་ནི། སྦྱིནཾ་དང་འཁོཾར་ས་བདུན་པ་མན་ཆད་ཀྱི་སྦྱིན་སོགས་ལ་འཁོར་གསུམ་མི་དམིགས་པའི་མཁྱེན་པ་དེ་ཆོས་ཅན། ལམ་ལ་མཚན་འཛིན་འགོག་བྱེད་ཡིན་ཏེ། སྦྱིན་སོགས་འཁོར་གསུམ་མི་དམིགས་པར་རྟོགས་པ་ལ་རང་གནས་ནས་གཞན་སྦྱོར་བར་བྱེད་པའི་མཁྱེན་པ་ཡིན་པའི་ཕྱིར། གཉིས་པ་ལ་གསུམ་སྟེ། སྤང་བྱ་མི་མཐུན་པའི་ཕྱོགས། སྤོང་བྱེད་གཉེན་པོ། ཡུལ་ཟབ་པར་བསྟན་པའོ། །དང་པོ་ལ་གཉིས་ཏེ། མི་མཐུན་ཕྱོགས་སུ་བསྟན་པ། མི་མཐུན་ཕྱོགས་སུ་བསྒྲུབ་པའོ། །དང་པོ་ནི། རྒྱཾལ་དང་དེཾ་དེ་བཞིན་གཤེགས་པ་ལ་སྐྱབས་གནས་སུ་མཚན་མར་འཛིན་པའི་བློ་ཆོས་ཅན། བྱང་སེམས་ལམ་གྱི་མི་མཐུན་ཕྱོགས་ཡིན་ཏེ། བྱང་སེམས་ལམ་གྱི་སྤང་བྱ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡཾང་ཇིཾ་སོགས་སོ། །གཉིས་པ་ནི། ཆོཾས་དང་གཾང་དེ་བཞིན་གཤེགས་པ་ལ་སྐྱབས་གནས་སུ་མཚན་མར་འཛིན་པའི་བློ་ཆོས་ཅན། མི་མཐུན་ཕྱོགས་ཡིན་ཏེ། དེ་བཞིན་གཤེགས་པ་ཟབ་མོ་སྤྲོས་བྲལ་ཡིན་པ་ལ་མཚན་མར་བཟུང་བའི་བློ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། འོཾ་ནཾ་སོགས་སོ། །གཉིས་པ་ནི། ཆོཾས་དང་གཟུཾགས་མ་དག་ས་བདུན་གྱི་བར་ཆད་མེད་ལམ་ཆོས་ཅན། རང་གི་ངོས་སྐལ་གྱི་མཚན་འཛིན་སྤོང་བྱེད་ཡིན་ཏེ། གཟུང་འཛིན་རང་བཞིན་མེད་པར་མཉམ་པ་ཉིད་དུ་རྟོགས་པའི་ས་བདུན་པ་མན་ཆད་ཀྱི་བར་ཆད་མེད་ལམ་ཡིན་པའི་ཕྱིར། གསུམ་པ་ཡུལ་ཟབ་པར་བསྟན་པ་ལ་གཉིས་ཏེ། རྟོགས་དཀའ་བར་བཤད་པ། བསམ་གྱིས་མི་ཁྱབ་པར་བཤད་པའོ། །དང་པོ་ལ་གཉིས་ལས། དང་པོ་ནི། ཡངཾ་ཇིཾ་སོགས་སོ། །གཉིས་པ་ནི། མཐོཾང་དང་གཾང་དེ་བཞིན་གཤེགས་པ་ཆོས་ཅན། དོན་དམ་པར་ཟབ་མོ་ཡིན་ཏེ། དོན་དམ་པར་རྟོགས་པར་དཀའ་བ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡངཾ་དེཾ་སོགས་སོ། །གཉིས་པ་ནི། གཟུཾགས་དང་གཾང་དེ་ཆོས་ཅན། དོན་དམ་པར་རྟོགས་པར་དཀའ་བ་ཡིན་ཏེ། དོན་དམ་པར་བསམ་གྱིས་མི་ཁྱབ་པའི་ཕྱིར་རོ། །གཉིས་པ་དོན་བསྡུ་བ་ལ་གསུམ་ལས། དང་པོ་ནི། དེཾ་ལྟཾར་སོགས་སོ། །གཉིས་པ་ནི། དེཾ་ལྟཾར་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་མི་མཐུན་ཕྱོགས་དང་། མཚན་མེད་རྟོགས་པའི་ཤེས་རབ་གཉེན་པོ་ཡིན་པའི་ཁྱད་པར་དེ་ཆོས་ཅན། གཞི་ཤེས་འཆད་པའི་སྐབས་འདིར་ཤེས་པར་བྱ་བ་ཡིན་ཏེ། གཞི་ཤེས་འཆད་པའི་སྐབས་འདིར་རྟོགས་པར་བྱ་བ་ཡིན་པའི་ཕྱིར། གསུམ་པ་ནི། ཐམཾས་ཅཾད་ཉན་རང་གི་གཞི་ཤེས་མི་མཐུན་ཕྱོགས་དང་། བྱང་སེམས་ཀྱི་གཞི་ཤེས་གཉེན་པོ་ཡིན་པའི་ཁྱད་པར་ཆོས་ཅན། ཆོས་རྟགས་འདྲ། གཉིས་པ་སྐབས་དོན་ཐེག་དམན་གྱི་རྟོགས་རིགས་སུ་གྱུར་པའི་གཞི་ཤེས་ལ་གསུམ་སྟེ། འཇུག་པ་སྦྱོར་བ། ཞུགས་འབྲས་མཐོང་ལམ། སྒོམ་ལམ་མི་སྟོན་པའི་རྒྱུ་མཚན་ནོ། །དང་པོ་ལ་གཉིས་ཏེ། སྦྱོར་བའི་དབྱེ་བ་དང་། སྦྱོར་བའི་མཉམ་ཉིད་དོ། །དང་པོ་ལ་གསུམ་ལས། དང་པོ་ནི་དེཾ་ལྟརཾ་གཟུགས་སོགས་དེ་མི་རྟག་སོགས་དང་ཞེས་སོགས་གསུངས་པ་ཆོས་ཅན། དགོས་པ་ཡོད་དེ། མཚན་འཛིན་གྱི་གཉེན་པོར་གཞི་ཤེས་ཀྱི་སྦྱོར་བ་སྒོམ་ཚུལ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། གཟུགཾས་སོཾགས་གཞི་ཤེས་ཀྱི་སྦྱོར་བ་ཆོས་ཅན། རྣམ་པ་བཅུ་ཡོད་དེ། རང་བཞིན་གྱི་སྦྱོར་བ་བཞི། གནས་སྐབས་ཀྱི་སྦྱོར་བ་དྲུག་རྣམས་སུ་ཡོད་པའི་ཕྱིར། གསུམ་པ་ལ་གཉིས་ཏེ། དངོས་བསྟན་བྱང་སེམས་ཀྱི་གཞི་ཤེས་སྦྱོར་བ། ཤུགས་བསྟན་ཐེག་དམན་གྱི་གཞི་ཤེས་སྦྱོར་བའོ། །དང་པོ་ནི། གཟུཾགས་ལཾས་བྱང་སེམས་ཀྱི་སྦྱོར་ལམ་མཉམ་བཞག་ཆོས་ཅན། གཞིའི་ངོ་བོ་ལ་ཞེན་སྤྱོད་བཀག་པའི་སྦྱོར་བ་ཡིན་ཏེ། གཞིའི་ངོ་བོ་ལ་སྒྲུབ་པའི་ཡོངས་སུ་ཤེས་པ་གསལ་བའི་སེམས་དཔའི་རྣལ་འབྱོར་ཡིན་པའི་ཕྱིར། དེ་བཞིན་དུ་དེ་ཆོས་ཅན། གཞིའི་ཁྱད་པར་དང་། མཚན་ཉིད་གསུམ་དང་། ཆགས་པ་མེད་པ་དང་། གཞན་དུ་མི་འགྱུར་བ་དང་། བྱེད་པ་པོ་མེད་པ་དང་། བྱ་དཀའ་རྣམ་གསུམ་དང་། འབྲས་བུ་མི་གཏོང་བ་དང་། སྲུང་བྱེད་གཞན་ལ་རག་མ་ལས་པ་དང་། སྣང་བ་རྣམ་བདུན་ལ་ཞེན་སྤྱོད་བཀག་པའི་སྦྱོར་བ་ཡིན་ཏེ། དེ་དག་ལ་སྒྲུབ་པའི་ཡོངས་སུ་ཤེས་པ་གསལ་བའི་སེམས་དཔའི་རྣལ་འབྱོར་ཡིན་པའི་ཕྱིར། གཉིས་པ་ནི། ཤུགཾས་ཀྱིཾས་ཐེག་དམན་གྱི་སྦྱོར་ལམ་མཉམ་གཞག་ཡེ་ཤེས་ཆོས་ཅན། ཞེན་སྤྱོད་དང་བཅས་པའི་སྦྱོར་བ་ཡིན་ཏེ། གཞིའི་ངོ་བོ་དང་ཁྱད་པར་སོགས་ལ་མངོན་པར་ཞེན་པའི་སྦྱོར་བ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། མཉཾམ་པཾ་སོགས་སོ། །གཉིས་པ་ནི། གཟུཾགས་དང་གཟུཾགས་བྱང་སེམས་ཀྱི་སྦྱོར་ལམ་མཉམ་གཞག་ཆོས་ཅན། སྦྱོར་བའི་མཉམ་པ་ཉིད་ཡིན་ཏེ། གཟུགས་སོགས་ཀྱི་ངོ་བོ་དང་། ཁྱད་པར་དང་། དབྱེ་བ་དང་། ཡུལ་ཅན་རྣམས་རང་བཞིན་མེད་པར་མཉམ་པ་ཉིད་དུ་རྟོགས་ནས་སྒོམ་པའི་སེམས་དཔའི་རྣལ་འབྱོར་ཡིན་པའི་ཕྱིར། གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། སྦྱོརཾ་བཾའི་བྱམས་མགོན་ཆོས་ཅན། གཞི་ཤེས་སྦྱོར་བའི་མཉམ་པ་ཉིད་ཀྱི་འོག་ཏུ་མཐོང་ལམ་འཆད་པའི་རྒྱུ་མཚན་ཡོད་དེ། སྦྱོར་ལམ་གྱི་སྐབས་ཀྱི་སྦྱོར་བའི་མཉམ་པ་ཉིད་ལས་མཐོང་ལམ་འབྱུང་བའི་ཕྱིར། གཉིས་པ་ནི། སྡུཾག་དང་བདེཾན་བྱང་སེམས་ཀྱི་ཤེས་བཟོད་སྐད་ཅིག་མ་བཅུ་དྲུག་པོ་ཆོས་ཅན། གཞི་ཤེས་འཆད་པའི་སྐབས་ནས་དངོས་སུ་བསྟན་པའི་མཐོང་ལམ་ཡིན་ཏེ། རྟག་མི་རྟག་སོགས་ཀྱི་སྤྲོས་པ་སོ་གཉིས་དང་བྲལ་བའི་ཐེག་ཆེན་གྱི་བདེན་པ་མངོན་རྟོགས་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། བདེནཾ་པཾའི་སོགས་སོ། །གཉིས་པ་ནི། གཟུཾགས་རྟགཾས་སོགས་སོ། །གསུམ་པ་ལ་གཉིས་ཏེ། དངོས་བསྟན་བྱང་སེམས་ཀྱི་མཐོང་ལམ། ཤུགས་བསྟན་ཐེག་དམན་གྱི་མཐོང་ལམ་མོ། །དང་པོ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་བཞི་ལས། དང་པོ་སྡུག་བསྔལ་བའི་རྣམ་པ་ནི། ངོཾ་བོཾ་བྱང་སེམས་ཀྱི་མཐོང་ལམ་མཉམ་གཞག་སྐད་ཅིག་མ་དང་པོ་ཆོས་ཅན། གཞི་ཤེས་འཆད་པའི་སྐབས་ནས་བསྟན་པའི་སྡུག་བསྔལ་ཆོས་བཟོད་ཡིན་ཏེ། གཟུགས་སོགས་རྟག་མི་རྟག་གི་སྤྲོས་བྲལ་ལ་གཙོ་བོར་ངེས་པ་འདྲེན་ནུས་ཀྱི་མཐོང་ལམ་མཉམ་གཞག་ཡིན་པའི་ཕྱིར། དེས་གཞན་གསུམ་ལ་འགྲེའོ། །གཉིས་པ་ཀུན་འབྱུང་བདེན་པའི་རྣམ་པ་ནི། རྒྱུཾ་དངཾ་དེ་འདྲའི་སྐད་ཅིག་ལྔ་པ་ཆོས་ཅན། གཞི་ཤེས་འཆད་པའི་སྐབས་ནས་བསྟན་པའི་ཀུན་འབྱུང་ཆོས་བཟོད་ཡིན་ཏེ། ཀུན་འབྱུང་རྒྱུ་དང་རྒྱུ་མ་ཡིན་པའི་སྤྲོས་བྲལ་ལ་གཙོ་བོར་ངེས་པ་འདྲེན་ནུས་ཀྱི་མཐོང་ལམ་མཉམ་གཞག་ཡིན་པའི་ཕྱིར། དེས་གཞན་གསུམ་ལ་འགྲེའོ། །གསུམ་པ་འགོག་བདེན་གྱི་རྣམ་པ་ནི། གཾང་གིཾ་དེ་འདྲའི་སྐད་ཅིག་དགུ་པ་ཆོས་ཅན། གཞི་ཤེས་འཆད་པའི་སྐབས་ནས་བསྟན་པའི་འགོག་པ་ཆོས་བཟོད་ཡིན་ཏེ། འགོག་བདེན་འགོག་པ་ཡིན་མ་ཡིན་གྱི་སྤྲོས་བྲལ་ལ་གཙོ་བོར་ངེས་པ་འདྲེན་ནུས་ཀྱི་མཐོང་ལམ་མཉམ་གཞག་ཡིན་པའི་ཕྱིར། དེས་གཞན་གསུམ་ལ་འགྲེའོ། །བཞི་པ་ལམ་བདེན་གྱི་རྣམ་པ་ནི། ལཾམ་དཾང་དེ་འདྲའི་སྐད་ཅིག་བཅུ་གསུམ་པ་ཆོས་ཅན། གཞི་ཤེས་འཆད་པའི་སྐབས་ནས་བསྟན་པའི་ལམ་ཆོས་བཟོད་ཡིན་ཏེ། ལམ་བདེན་ལམ་ཡིན་མ་ཡིན་གྱི་སྤྲོས་བྲལ་ལ་གཙོ་བོར་ངེས་པ་འདྲེན་ནུས་ཀྱི་མཐོང་ལམ་མཉམ་གཞག་ཡིན་པའི་ཕྱིར། དེས་གཞན་གསུམ་ལ་འགྲེའོ། །གཉིས་པ་ནི། དེཾ་ལྟརཾ་མདོར་བསྟན་གྱི་ངག་དོན་འགོད། གཉིས་པ་ནི། ཉནཾ་ཐོསཾ་ཉན་ཐོས་ཀྱི་ཤེས་བཟོད་སྐད་ཅིག་མ་བཅུ་དྲུག་པོ་ཆོས་ཅན། གཞི་ཤེས་འཆད་པའི་སྐབས་ནས་ཤུགས་ལ་བསྟན་པའི་མཐོང་ལམ་ཡིན་ཏེ། རྟག་སོགས་བཅུ་དྲུག་གི་སྤྲོས་བྲལ་མངོན་སུམ་དུ་རྟོགས་ཤིང་མི་རྟག་ལ་སོགས་བཅུ་དྲུག་གི་སྤྲོས་བྲལ་མ་རྟོགས་པའི་བདེན་པ་མངོན་རྟོགས་ཡིན་པའི་ཕྱིར། གསུམ་པ་ནི། ཉནཾ་ཐོསཾ་བྱམས་མགོན་ཆོས་ཅན། གཞི་ཤེས་འཆད་པའི་སྐབས་འདིར་མཐོང་ལམ་གྱི་རྗེས་སུ་སྒོམ་ལམ་མ་བསྟན་པའི་རྒྱུ་མཚན་ཡོད་དེ། ཉན་ཐོས་ཀྱི་རྟོགས་རིགས་དེ་བྱང་ཆུབ་སེམས་དཔས་གཞན་དོན་དུ་མངོན་སུམ་དུ་མཐོང་བར་བྱ་བ་ཡིན་གྱི་མངོན་སུམ་དུ་མཐོང་ཟིན་རྒྱུན་ལྡན་དུ་སྒོམ་པར་བྱ་བ་མིན་པའི་ཕྱིར། གསུམ་པ་རྣམ་པ་དང་སྦྱོར་བའི་ཆེད་དུ་མཁྱེན་གསུམ་གྱི་མཇུག་བསྡུ་བ་ལ་གསུམ་ལས། དང་པོ་ནི། དེཾ་ལྟརཾ་དེ་ལྟར་འདི་དང་ཡང་འདི་དང་ཞེས་སོགས་གསུངས་པ་ཆོས་ཅན། དགོས་པ་ཡོད་དེ། མཁྱེན་གསུམ་རྒྱས་པར་བསྟན་པའི་མཇུག་བསྡུ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། དེཾ་ལྟརཾ་རབ་འབྱོར་ཡུམ་འདི་ནི་ཆོས་གང་སྟོན་པར་བྱེད་པའམ་ཞེས་པ་ནས་གཟུགས་མེད་པའི་ཁམས་ལས་འདའ་བར་བྱེད་པ་མ་ཡིན་ཞེས་སོགས་ཀྱི་མདོ་ཚིག་ཆོས་ཅན། གཞི་ཤེས་དང་པོར་བྱས་པའི་སྒོ་ནས་མཁྱེན་གསུམ་རྫོགས་པར་བསྟན་པ་ཡིན་ཏེ། ལེའུ་གསུམ་གྱི་བརྗོད་བྱ་མཁྱེན་པ་གསུམ་པོ་དེ་རྣམ་པར་བསྡུ་བའི་ཆེད་དུ་གཞི་ཤེས་དང་པོར་བྱས་པའི་སྒོ་ནས་བསྡུས་ཏེ་བསྟན་པའི་མདོ་ཚིག་ཡིན་པའི་ཕྱིར། གསུམ་པ་ནི། བཤདཾ་མཾ་རབ་འབྱོར་ཡུམ་འདི་ནི་སངས་རྒྱས་ཀྱི་ཆོས་རྣམས་སྟེར་བར་བྱེད་པ་མ་ཡིན་འཕྲོགས་པར་བྱེད་པ་མ་ཡིན་ཞེས་སོགས་ཀྱི་མདོ་ཚིག་གསུམ་པ་ཆོས་ཅན། མཁྱེན་གསུམ་རྫོགས་པར་བསྟན་པ་ཡིན་ཏེ། མཁྱེན་གསུམ་རྒྱས་པར་བཤད་ཟིན་པའི་མཇུག་ཏུ་བསྡུས་ཏེ་བསྟན་པའི་མདོ་ཚིག་ཡིན་པའི་ཕྱིར། གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེཾས་རཾབ་སོགས་སོ།། །།གཉིས་པ་ཉམས་སུ་ལེན་པའི་སྦྱོར་བ་ལ་བཞི་སྟེ། དབང་ཐོབ་པའི་དོན་དུ་བསྒོམ་པ་རྣམ་རྫོགས་སྦྱོར་བ། དབང་ཐོབ་པའི་ཚུལ་གྱིས་བསྒོམ་པ་རྩེ་མོའི་སྦྱོར་བ། བརྟན་པ་ཐོབ་པའི་དོན་དུ་བསྒོམ་པ་མཐར་གྱིས་པའི་སྦྱོར་བ། བརྟན་པ་ཐོབ་ནས་ཅིག་ཆར་དུ་བསྒོམ་པ་སྐད་ཅིག་མའི་སྦྱོར་བའོ། །དང་པོ་ལ་གསུམ་སྟེ། འབྲེལ་དགོད་པའི་སྒོ་ནས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། ཐམཾས་ཅཾད་བྱམས་མགོན་ཆོས་ཅན། མཁྱེན་གསུམ་གྱི་འོག་ཏུ་རྣམ་རྫོགས་སྦྱོར་བ་འཆད་པའི་རྒྱུ་མཚན་ཡོད་དེ། མཁྱེན་གསུམ་ཐོས་བསམ་གྱིས་གཏན་ལ་བབ་པའི་དོན་རྣམ་པར་བསྡུས་ནས་སྦྱོར་བས་སྒོམ་དགོས་པའི་ཕྱིར། གཉིས་པ་ལ་གཉིས་ཏེ། སྦྱོར་བ་ལ་འཇུག་ཚུལ་གཏན་ལ་དབབ་པ། སྦྱོར་བ་སྐྱེས་པའི་གོ་རིམ་མོ། །དང་པོ་ལ་བཞི་སྟེ། བསྒོམ་བྱ་རྣམ་པ། སྦྱོར་བ་པོའི་གང་ཟག ཡུལ་ཅན་སྦྱོར་བའི་དབྱེ་བ། སྦྱོར་བའི་སྔོན་འགྲོའི་ཆོས་སོ། །དང་པོ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། གཞིཾ་དང་རྟགཾ་བྱང་སེམས་འཕགས་པའི་རྒྱུད་ཀྱི་བདེན་བཞིའི་སྟེང་གི་རྟག་པར་མེད་པ་ལ་སོགས་པའི་རྣམ་པ་བརྒྱ་བདུན་ཅུ་རྩ་གསུམ་ཆོས་ཅན། ཁྱོད་ལས་བསྒྲུབ་ཀྱི་དབང་དུ་བྱས་པའི་མཚན་ཉིད་ཡིན་ཏེ། ཁྱོད་ཐེག་ཆེན་གྱི་སྦྱོར་བས་མཚོན་ཞིང་མངོན་དུ་བྱས་པ་ཡིན་པའི་ཕྱིར། མཚན་མཚོན་གཞི་གསུམ་གྱི་མཚན་མཚོན་ནི་མ་ཡིན་ནོ། །ཀུཾན་དང་དེཾ་འདིར་བསྟན་རྣམ་པ་ཆོས་ཅན། རྣམ་པ་གསུམ་ཡོད་དེ། མཁྱེན་པ་གསུམ་གྱི་རྣམ་པ་རྣམས་སུ་ཡོད་པའི་ཕྱིར། གཉིས་པ་ལ་གསུམ་སྟེ། གཞི་ཤེས་ཀྱི་རྣམ་པ། ལམ་ཤེས་ཀྱི་རྣམ་པ། རྣམ་མཁྱེན་གྱི་རྣམ་པའོ། །དང་པོ་ལ་གསུམ་ལས། དང་པོ་ནི། རྣམཾ་པཾ་སོགས་སོ། །གཉིས་པ་ནི། མེདཾ་པཾའི་གཞི་ཤེས་ཀྱི་རྣམ་པ་ཆོས་ཅན། ཉེར་བདུན་ཡོད་དེ། ཉན་ཐོས་ཀྱི་རྟོགས་རིགས་སུ་གྱུར་པའི་རྣམ་པ་བཅུ་དྲུག རང་རྒྱལ་གྱི་རྟོགས་རིགས་སུ་གྱུར་པའི་རྣམ་པ་བཅུ་གཅིག་རྣམས་སུ་ཡོད་པའི་ཕྱིར། གསུམ་པ་ལ་གཉིས་ཏེ། བདེན་བཞིའི་རྣམ་པ་སོ་སོར་བཤད། གྲངས་ཀྱི་སྒོ་ནས་དོན་བསྡུ་བའོ། །དང་པོ་ལ་གཉིས་ཏེ། བདེན་པ་དང་པོ་གསུམ་གྱི་རྣམ་པ། ལམ་བདེན་གྱི་རྣམ་པའོ། །དང་པོ་ནི། དེཾ་ལཾ་སྡུག་བསྔལ་བདེན་པ་རྟག་པ་མེད་པར་རྟོགས་པ་སོགས་ཀྱི་རྣམ་པ་བཞི་པོ་ཆོས་ཅན། གཞི་ཤེས་ཀྱི་རྣམ་པ་ཡིན་ཏེ། སྡུག་བསྔལ་བདེན་པའི་མི་རྟག་སོགས་བཞི་ལ་ངེས་པ་རང་སྟོབས་ཀྱིས་འདྲེན་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། གནཾས་མེཾད་དོན་དམ་པར་སྡུག་བསྔལ་སྐྱེ་བའི་གནས་མེད་པར་རྟོགས་པ་སོགས་ཀྱི་རྣམ་པ་བཞི་པོ་ཆོས་ཅན། ཆོས་འདྲ། ཀུན་འབྱུང་བདེན་པའི་རྒྱུ་སོགས་བཞི་ལ་ངེས་པ་རང་སྟོབས་ཀྱིས་འདྲེན་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། འགྲོ་བ་དོན་དམ་པར་དམན་པ་ནས་མཆོག་ཏུ་འགྲོ་བ་མེད་པར་རྟོགས་པ་སོགས་རྣམ་པ་བཞི་པོ་ཆོས་ཅན། ཆོས་འདྲ། འགོག་བདེན་གྱི་འགོག་པ་སོགས་བཞི་ལ་ངེས་པ་རང་སྟོབས་ཀྱིས་འདྲེན་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། གཉིས་པ་ལ་གསུམ་སྟེ། རྟེན་ལམ་གྱི་དབྱེ་བ། ལམ་སོ་སོའི་རྣམ་པ། གྲངས་ཀྱི་སྒོ་ནས་དོན་བསྡུ་བའོ། །དང་པོ་ནི། ཉོནཾ་མོཾངས་བྱང་སེམས་འཕགས་པའི་རྒྱུད་ཀྱི་གཞི་ཤེས་ཀྱིས་བསྡུས་པའི་ལམ་བདེན་གྱི་རྣམ་པ་ཆོས་ཅན། གསུམ་ཡོད་དེ། ཉོན་སྒྲིབ་ཀྱི་གཉེན་པོར་གྱུར་པའི་ལམ་ཟག་མེད་ཀྱི་རྟོགས་རིག་གཅིག ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་བཅས་དང་། ཟག་མེད་ཀྱི་རྟོགས་རིགས་གཉིས་རྣམས་སུ་ཡོད་པའི་ཕྱིར། གཉིས་པ་ལ་གསུམ་སྟེ། ལམ་དང་པོའི་རྣམ་པ། གཉིས་པའི་རྣམ་པ། གསུམ་པའི་རྣམ་པའོ། །དང་པོ་ནི། དེཾ་ལཾ་དོན་དམ་པར་བྱེད་པ་པོའི་བདག་མེད་རྟོགས་པ་སོགས་ཀྱི་རྣམ་པ་བཞི་པོ་ཆོས་ཅན། གཞི་ཤེས་ཀྱི་རྣམ་པ་ཡིན་ཏེ། ལམ་བདེན་གྱི་ལམ་སོགས་བཞི་ལ་ངེས་པ་རང་སྟོབས་ཀྱིས་འདྲེན་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། གཉིས་པ་ནི། གཉིཾས་པཾ་བྱང་སེམས་འཕགས་པའི་རྒྱུད་ཀྱི་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་པའི་རྣམ་པ་ཆོས་ཅན། ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་བཅས་ཀྱི་རྟོགས་རིགས་ཡིན་ཏེ། ཕྱི་གཟུང་བའི་ཡུལ་ལ་བདེན་འཛིན་སྤོང་བྱེད་ཀྱི་གཉེན་པོའི་རིགས་ཡིན་པའི་ཕྱིར། གསུམ་པ་ནི། གསུཾམ་པཾ་བྱང་སེམས་འཕགས་པའི་རྒྱུད་ཀྱི་ཀུན་ནས་ཉོན་མོངས་ཀྱི་བཟུང་བ་སོགས་དྲུག་པོ་རང་བཞིན་མེད་པར་རྟོགས་པའི་རྣམ་པ་དེ་ཆོས་ཅན། ཤེས་སྒྲིབ་གཟུང་རྟོག་གི་གཉེན་པོར་གྱུར་པའི་ལམ་ཟག་མེད་ཀྱི་རྟོགས་རིགས་ཡིན་ཏེ། ཀུན་ནས་ཉོན་མོངས་ཀྱི་གཟུང་བར་རྣམ་པར་རྟོགས་པ་སོགས་དྲུག་གི་གཉེན་པོའི་རིགས་ཡིན་པའི་ཕྱིར། གསུམ་པ་ནི། དེཾ་ལྟཾར་སོགས་སོ། །གཉིས་པ་ནི། སྤྱིཾར་བསྟཾན་སོགས་སོ། །གཉིས་པ་ལམ་ཤེས་ཀྱི་རྣམ་པ་ལ་གསུམ་སྟེ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་རྒྱས་པར་བཤད། གྲངས་ཀྱི་སྒོ་ནས་དོན་བསྡུ་བའོ། །དང་པོ་ལ་གཉིས་ལས། དང་པོ་ནི། དེའིཾ་འོཾག་སོགས་སོ། །གཉིས་པ་ནི་རྒྱུཾ་དང་ཀུཾན་ལམ་ཤེས་ཀྱི་རྣམ་པ་ཆོས་ཅན། སུམ་ཅུ་རྩ་དྲུག་ཡོད་དེ། ཀུན་འབྱུང་བདེན་པའི་རྣམ་པ་བརྒྱད། ལམ་བདེན་གྱི་རྣམ་པ་བདུན། སྡུག་བསྔལ་བདེན་པའི་རྣམ་པ་ལྔ། འགོག་བདེན་གྱི་རྣམ་པ་བཅུ་དྲུག་རྣམས་སུ་ཡོད་པའི་ཕྱིར། གཉིས་པ་ལ་བཞི་སྟེ། ཀུན་འབྱུང་བདེན་པ་སྤང་གཉེན་གྱི་སྒོ་ནས་བཤད། ལམ་བདེན་དམ་བཅའ་དང་འཐད་པའི་སྒོ་ནས་བཤད། སྡུག་བདེན་རང་སྤྱིའི་མཚན་ཉིད་ཀྱི་སྒོ་ནས་བཤད། འགོག་བདེན་དྲི་བྲལ་གྱི་སྒོ་ནས་བཤད་པའོ། །དང་པོ་ལ་གཉིས་ཏེ། རྒྱས་པར་བཤད་པ་དང་། གྲངས་ཀྱི་སྒོ་ནས་དོན་བསྡུ་བའོ། །དང་པོ་ནི། དེཾ་དང་གོཾ་ལམ་ཤེས་ཀྱིས་འདོད་ཆགས་དང་བྲལ་བར་རྟོགས་པ་སོགས་ཀྱི་རྣམ་པ་གསུམ་པོ་ཆོས་ཅན། རྒྱུའི་རྣམ་པ་ཡིན་ཏེ། རྒྱུའི་གནས་ཚུལ་རྟོགས་པའི་སྒོ་ནས་འདོད་ཡོན་ལ་འདུན་པ་སོགས་ཀྱི་གཉེན་པོར་གྱུར་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། འདོཾད་དང་ཀུཾན་ལམ་ཤེས་ཀྱིས་དོན་དམ་པར་འདོད་ཆགས་མེད་པར་རྟོགས་པ་སོགས་ཀྱི་རྣམ་པ་གསུམ་པོ་ཆོས་ཅན། ཀུན་འབྱུང་གི་རྣམ་པ་ཡིན་ཏེ། ཀུན་འབྱུང་གི་གནས་ཚུལ་རྟོགས་པའི་སྒོ་ནས་དུག་གསུམ་གྱི་གཉེན་པོར་གྱུར་པའི་འཛིན་སྟངས་ཀྱི་བྱེ་བྲག་ཡིན་པའི་ཕྱིར། ཉོཾན་དང་རབཾ་ལམ་ཤེས་ཀྱིས་དོན་དམ་པར་ཉོན་མོངས་མེད་པར་རྟོགས་པའི་རྣམ་པ་ཆོས་ཅན། རབ་ཏུ་སྐྱེ་བའི་རྣམ་པ་ཡིན་ཏེ། རབ་སྐྱེའི་གནས་ཚུལ་རྟོགས་པའི་སྒོ་ནས་ཀུན་རྟོག་གི་གཉེན་པོ་གྱུར་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། སེམཾས་དང་རྐྱེནཾ་ལཾམ་ཤེས་ཀྱིས་སེམས་ཅན་མེད་པར་རྟོགས་པའི་རྣམ་པ་ཆོས་ཅན། རྐྱེན་གྱི་རྣམ་པ་ཡིན་ཏེ། རྐྱེན་གྱི་གནས་ཚུལ་རྟོགས་པའི་སྒོ་ནས་སེམས་ཅན་དུ་མངོན་པར་ཞེན་པའི་གཉེན་པོར་གྱུར་པའི་ཡེ་ཤེས་ཀྱི་བྱེ་བྲག་ཡིན་པའི་ཕྱིར། གཉིས་པ་ནི་དེཾ་རྣམཾས་སོགས་སོ། །གཉིས་པ་ནི། ཚདཾ་མེདཾ་ལམ་ཤེས་ཀྱིས་ཆོས་ཉིད་ཚད་མེད་པར་རྟོགས་པ་སོགས་ཀྱི་རྣམ་པ་བདུན་པོ་དེ་ཆོས་ཅན། ལམ་བདེན་གྱི་རྣམ་པ་ཡིན་ཏེ། ལམ་བདེན་གྱི་གནས་ཚུལ་རྟོགས་པའི་སོགས་འགྲེ། དེཾ་རྣམཾ་ལམ་བདེན་གྱི་རྣམ་པ་ཆོས་ཅན། བདུན་ཡོད་དེ། ལམ་གྱི་རྣམ་པ་གཉིས། རིགས་པའི་རྣམ་པ་གཉིས། སྒྲུབ་པའི་རྣམ་པ་གཉིས། ངེས་འབྱིན་གྱི་རྣམ་པ་གཅིག་རྣམས་སུ་ཡོད་པའི་ཕྱིར། གསུམ་པ་ནི། མིཾ་རྟགཾ་ལམ་ཤེས་ཀྱིས་སྡུག་བསྔལ་གྱི་བདེན་པ་མི་རྟག་པར་རྟོགས་པ་སོགས་ཀྱི་རྣམ་པ་ལྔ་པོ་ཆོས་ཅན། སྡུག་བསྔལ་བདེན་པའི་རྣམ་པ་ཡིན་ཏེ། སྡུག་བསྔལ་བདེན་པའི་གནས་ཚུལ་རྟོགས་པའི་སོགས་འགྲེ། དེཾ་ལྟརཾ་སྡུག་བསྔལ་བདེན་པའི་རྣམ་པ་ཆོས་ཅན། ལྔ་ཡོད་དེ། རང་མཚན་གྱི་རྣམ་པ་བཞི། སྤྱི་མཚན་གྱི་རྣམ་པ་གཅིག་རྣམས་སུ་ཡོད་པའི་ཕྱིར། བཞི་པ་ལ་གཉིས་ཏེ། སོ་སོར་བཤད་པ་དང་། གྲངས་ཀྱི་སྒོ་ནས་མཇུག་བསྡུ་བའོ། །དང་པོ་ལ་བཞི་སྟེ། དངོས་པོའི་གྲངས་ངེས་དགག་པ། མངོན་ཞེན་གྱི་དྲི་མ་དགག་པ། བྱེད་པ་པོའི་རྟོགས་པས་དབེན་པ། འཁྲུལ་པའི་དྲི་མ་སེལ་བའི་ངེས་འབྱུང་ངོ་། །དང་པོ་ནི། འགོཾག་པཾའི་ལམ་ཤེས་ཀྱིས་དག་པ་གཉིས་ལྡན་གྱི་ནང་སྟོང་པ་ཉིད་ལ་སོགས་པ་གསུམ་རྟོགས་པའི་རྣམ་པ་ཆོས་ཅན། འགོག་བདེན་གྱི་འགོག་པའི་རྣམ་པ་ཡིན་ཏེ། འགོག་པའི་གནས་ཚུལ་རྟོགས་པའི་སོགས་འགྲེའོ། །གཉིས་པ་ནི། ཞིཾ་བཾའི་ལམ་ཤེས་ཀྱིས་དག་པ་གཉིས་ལྡན་གྱི་སྟོང་པ་ཉིད་སྟོང་པ་ཉིད་ལ་སོགས་པ་བརྒྱད་རྟོགས་པའི་རྣམ་པ་ཆོས་ཅན། ཞི་བའི་རྣམ་པ་ཡིན་ཏེ། ཞི་བའི་གནས་ཚུལ་རྟོགས་པའི་སོགས་འགྲེ། གསུམ་པ་ནི། གྱཾ་ནོམཾ་ལམ་ཤེས་ཀྱིས་དག་པ་གཉིས་ལྡན་གྱི་རང་བཞིན་སྟོང་པ་ཉིད་རྟོགས་པའི་རྣམ་པ་ཆོས་ཅན། གྱ་ནོམ་པའི་རྣམ་པ་ཡིན་ཏེ། གྱ་ནོམ་གྱི་གནས་ཚུལ་རྟོགས་པའི་སོགས་འགྲེ། བཞི་པ་ནི། ངེསཾ་པཾར་ལམ་ཤེས་ཀྱིས་དག་པ་གཉིས་ལྡན་ཆོས་ཐམས་ཅད་སྟོང་པ་ཉིད་ལ་སོགས་པ་བཞི་རྟོགས་པའི་རྣམ་པ་ཆོས་ཅན། ངེས་འབྱུང་གི་རྣམ་པ་ཡིན་ཏེ། ངེས་འབྱུང་གི་གནས་ཚུལ་རྟོགས་པའི་སོགས་འགྲེ། གཉིས་པ་ནི། དེཾ་ལྟརཾ་འགོག་བདེན་གྱི་རྣམ་པ་ཆོས་ཅན། བཅུ་དྲུག་ཡོད་དེ། འགོག་པའི་རྣམ་པ་གསུམ། ཞི་བའི་རྣམ་པ་བརྒྱད། གྱ་ནོམ་གྱི་རྣམ་པ་གཅིག ངེས་འབྱུང་གི་རྣམ་པ་བཞི་རྣམས་སུ་ཡོད་པའི་ཕྱིར། གསུམ་པ་གྲངས་ཀྱི་སྒོ་ནས་མཇུག་བསྡུ་བ་ནི། སྤྱིརཾ་བསྟཾན་སོགས་སོ། །གསུམ་པ་རྣམ་མཁྱེན་གྱི་རྣམ་པ་རྒྱས་པར་བཤད་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། དེའི་འོཾག་སོགས་སོ། །གཉིས་པ་ནི། དྲནཾ་དང་དྲནཾ་རྣམ་མཁྱེན་གྱི་རྣམ་པ་ཆོས་ཅན། བརྒྱ་དང་བཅུ་ཡོད་དེ། ཉན་ཐོས་དང་ཐུན་མོང་བའི་གཞི་ཤེས་ཀྱི་རྣམ་པ་སུམ་ཅུ་སོ་བདུན། བྱང་སེམས་དང་ཐུན་མོང་བའི་ལམ་ཤེས་ཀྱི་རྣམ་པ་སུམ་ཅུ་སོ་བཞི། སངས་རྒྱས་འཕགས་པའི་ཐུན་མོང་མ་ཡིན་པའི་རྣམ་པ་སུམ་ཅུ་རྩ་དགུ་རྣམས་སུ་ཡོད་པའི་ཕྱིར། གཉིས་པ་ལ་གསུམ་སྟེ། ཉན་ཐོས་དང་ཐུན་མོང་བའི་གཞི་ཤེས་ཀྱི་རྣམ་པ། བྱང་སེམས་དང་ཐུན་མོང་བའི་ལམ་ཤེས་ཀྱི་རྣམ་པ། སངས་རྒྱས་འཕགས་པའི་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་རྒྱས་པར་བཤད་པའོ། །དང་པོ་ལ་གཉིས་ཏེ། རྒྱས་པར་བཤད་པ་དང་། གྲངས་ཀྱི་སྒོ་ནས་མཇུག་བསྡུ་བའོ། །དང་པོ་ལ་སྡེ་ཚན་བདུན་ལས། དང་པོ་དངོས་པོ་ལ་ཡོངས་སུ་རྟོགས་པའི་ལམ་ནི། དེཾ་ལཾ་མཐུན་ཡུལ་གྱི་ངོས་ནས་འགོད་ན་ཚོགས་ལམ་ཆུང་ངུའི་གནས་སྐབས་ཀྱི་དྲན་པ་ཉེར་བཞག་གི་རྣམ་པ་བཞི་པོ་ཆོས་ཅན། དངོས་པོ་ལ་ཡོངས་སུ་རྟོགས་པའི་ལམ་ཡིན་ཏེ། དམིགས་པ་ལུས་སོགས་ལ་དམིགས་ནས་རྣམ་པ་རང་སྤྱིའི་མཚན་ཉིད་ཀྱིས་བརྟགས་ཏེ་གཅོད་པར་བྱེད་པའི་ཚོགས་ལམ་ཆུང་ངུ་བའི་མངོན་རྟོགས་ཡིན་པའི་ཕྱིར། མཐུན་ཆོས་ཀྱི་ངོས་ནས་འགོད་ན་སངས་རྒྱས་འཕགས་པའི་རྒྱུད་ཀྱི་དྲན་པ་ཉེར་གཞག་གི་རྣམ་པ་ཆོས་ཅན། ཉན་ཐོས་དང་ཐུན་མོང་བའི་རྣམ་མཁྱེན་གྱི་རྣམ་པ་ཡིན་ཏེ། རྣམ་མཁྱེན་གྱི་རྣམ་པ་གང་ཞིག དྲན་པ་ཉེ་བཞག་གི་རྟོགས་རིགས་ཡིན་པའི་ཕྱིར། གཉིས་པ་རྩོལ་བ་ལས་བྱུང་བའི་ལམ་ནི། དེའིཾ་འོགཾ་ཚོགས་ལམ་འབྲིང་པོ་བའི་རྒྱུད་ཀྱི་ཡང་དག་སྤོང་བའི་རྣམ་པ་བཞི་པོ་ཆོས་ཅན། རྩོལ་བ་ལས་བྱུང་བའི་ལམ་ཡིན་ཏེ། དགེ་སྡིག་གི་བླང་དོར་ཚུལ་བཞིན་དུ་བྱེད་པའི་ཚོགས་ལམ་འབྲིང་པོས་བསྡུས་པའི་མངོན་རྟོགས་ཡིན་པའི་ཕྱིར། མཐུན་ཆོས་འགྲེ། གསུམ་པ་ཏིང་ངེ་འཛིན་ཡོངས་སུ་སྦྱོང་བའི་ལམ་ནི། བརྩོཾན་འགྲུཾས་ཚོགས་ལམ་ཆེན་པོའི་རྒྱུད་ཀྱི་རྫུ་འཕྲུལ་གྱི་རྐང་པའི་རྣམ་པ་བཞི་པོ་ཆོས་ཅན། ཏིང་ངེ་འཛིན་ཡོངས་སུ་སྦྱོང་བའི་ལམ་ཡིན་ཏེ། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བསྟེན་པ་ལས་བྱུང་ཞིང་སེམས་གནས་པ་ལས་རུང་དུ་བྱེད་པའི་ཚོགས་ལམ་ཆེན་པོས་བསྡུས་པའི་མངོན་རྟོགས་ཡིན་པའི་ཕྱིར། མཐུན་ཆོས་འགྲེ། བཞི་པ་མངོན་པར་རྟོགས་པར་སྦྱོར་བའི་ལམ་ནི། སེམཾས་ཡོངཾས་དྲོད་ཀྱི་གནས་སྐབས་ཀྱི་དབང་པོའི་རྣམ་པ་ལྔ་པོ་ཆོས་ཅན། མངོན་པར་རྟོགས་པར་སྦྱོར་བའི་ལམ་ཡིན་ཏེ། དྲོད་རྩེ་གང་རུང་གིས་བསྡུས་པའི་རྣམ་བྱང་གི་དབང་པོ་ཡིན་པའི་ཕྱིར། མཐུན་ཆོས་འགྲེ། ལྔ་པ་མངོན་པར་རྟོགས་པ་དང་འབྲེལ་པའི་ལམ་ནི། དྲོཾ་བཾ་སྦྱོར་ལམ་བཟོད་པའི་གནས་སྐབས་ཀྱི་སྟོབས་ཀྱི་རྣམ་པ་ལྔ་པོ་ཆོས་ཅན། མངོན་པར་རྟོགས་པ་དང་འབྲེལ་བའི་ལམ་ཡིན་ཏེ། བཟོད་མཆོག་གང་རུང་གིས་བསྡུས་པའི་རྣམ་བྱང་གི་སྟོབས་ཡིན་པའི་ཕྱིར། མཐུན་ཆོས་འགྲེ། དྲུག་པ་མངོན་པར་རྟོགས་པའི་ལམ་ནི། དྲོཾ་བཾ་མཐོང་ལམ་གྱི་གནས་སྐབས་ཀྱི་བྱང་ཆུབ་ཀྱི་ཡན་ལག་གི་རྣམ་པ་བདུན་པོ་ཆོས་ཅན། མངོན་པར་རྟོགས་པའི་ལམ་ཡིན་ཏེ། བདེན་པ་གསར་དུ་མངོན་སུམ་དུ་མཐོང་བའི་མཉམ་གཞག་གིས་བསྡུས་པའི་མངོན་རྟོགས་ཡིན་པའི་ཕྱིར། མཐུན་ཆོས་འགྲེ། བདུན་པ་རྣམ་དག་ངེས་འབྱིན་གྱི་ལམ་ནི། བདེཾན་པཾ་སྒོམ་ལམ་པའི་རྒྱུད་ཀྱི་འཕགས་པའི་ལམ་གྱི་ཡན་ལག་གི་རྣམ་པ་ཆོས་ཅན། རྣམ་དག་ངེས་འབྱིན་གྱི་ལམ་ཡིན་ཏེ། སྒོམ་སྤང་གི་གཉེན་པོའི་རིགས་སུ་གནས་པའི་སྒོམ་ལམ་གྱིས་བསྡུས་པའི་མངོན་རྟོགས་ཡིན་པའི་ཕྱིར། གཉིས་པ་ནི། དེཾ་ལྟཾར་སངས་རྒྱས་འཕགས་པའི་རྒྱུད་ཀྱི་ཉན་ཐོས་དང་ཐུན་མོང་བའི་རྣམ་མཁྱེན་གྱི་རྣམ་པ་ཆོས་ཅན། ཁྱོད་ལ་སུམ་ཅུ་རྩ་བདུན་ཡོད་དེ། ཁྱོད་ཀྱི་མཐུན་ཡུལ་སུམ་ཅུ་རྩ་བདུན་ཡོད་པའི་རྒྱུ་མཚན་གྱིས་ཁྱོད་ལ་སུམ་ཅུ་རྩ་བདུན་དུ་ཕྱེ་བ་ཡིན་པའི་ཕྱིར། གཉིས་པ་བྱང་སེམས་དང་ཐུན་མོང་བའི་ལམ་ཤེས་ཀྱི་རྣམ་པ་ལ་གཉིས་ཏེ། རྒྱས་པར་བཤད་པ་དང་། གྲངས་ཀྱི་སྒོ་ནས་མཇུག་བསྡུ་བའོ། །དང་པོ་ལ་སྡེ་ཚན་དྲུག་ལས། དང་པོ་གཉེན་པོའི་ལམ་ནི། ལམཾ་ཤེསཾ་མཐུན་ཡུལ་གྱི་སྒོ་ནས་འགོད་ན་བྱང་སེམས་འཕགས་པའི་རྒྱུད་ཀྱི་རྣམ་ཐར་སྒོ་གསུམ་ཆོས་ཅན། གཉེན་པོའི་ལམ་ཡིན་ཏེ། བདག་ཏུ་ལྟ་བ་སོགས་ཀྱི་གཉེན་པོར་གྱུར་པའི་བྱང་སེམས་འཕགས་པའི་མངོན་རྟོགས་ཡིན་པའི་ཕྱིར། མཐུན་ཆོས་ཀྱི་སྒོ་ནས་འགོད་ན་སངས་རྒྱས་འཕགས་པའི་རྒྱུད་ཀྱི་རྣམ་ཐར་སྒོ་གསུམ་ཆོས་ཅན། བྱང་སེམས་དང་ཐུན་མོང་བའི་རྣམ་མཁྱེན་གྱི་རྣམ་པ་ཡིན་ཏེ། རྣམ་མཁྱེན་གྱི་རྣམ་པ་གང་ཞིག རྣམ་ཐར་སྒོ་གསུམ་གྱི་རྟོགས་རིགས་ཡིན་པའི་ཕྱིར། དེཾ་ལྟརཾ་བྱང་སེམས་འཕགས་པའི་རྒྱུད་ཀྱི་རྣམ་པར་ཐར་བའི་སྒོ་ཆོས་ཅན། རྣམ་པ་གསུམ་ཡོད་དེ། སྟོང་པ་ཉིད་ཀྱི་ཏིང་ངེ་འཛིན་སོགས་གསུམ་དུ་ཡོད་པའི་ཕྱིར། གཉིས་པ་སྤྲུལ་པའི་ལམ་ནི། སྤྲུལཾ་པཾའི་བྱང་སེམས་འཕགས་པའི་རྒྱུད་ཀྱི་གཟུགས་ཅན་གྱི་རྣམ་པར་ཐར་པ་དང་པོ་གཉིས་ཆོས་ཅན། སྤྲུལ་པའི་ལམ་ཡིན་ཏེ། གཞན་དོན་དུ་སྤྲུལ་པ་སྣ་ཚོགས་སྤྲུལ་པ་ལ་གེགས་བྱེད་པའི་སྒྲིབ་པའི་གཉེན་པོར་གྱུར་པའི་འཕགས་རྒྱུད་ཀྱི་མངོན་རྟོགས་ཡིན་པའི་ཕྱིར། གཟུགཾས་སྡུགཾ་པཾ་བྱང་སེམས་འཕགས་པའི་རྒྱུད་ཀྱི་སྡུག་པའི་རྣམ་ཐར་ཆོས་ཅན། སྤྲུལ་པའི་ལམ་ཡིན་ཏེ། གཟུགས་སྡུག་པ་དང་མི་སྡུག་པ་སྤྲུལ་པ་ལ་དགའ་མི་དགའི་རྣམ་རྟོག་གི་གཉེན་པོར་གྱུར་པའི་འཕགས་རྒྱུད་ཀྱི་མངོན་རྟོགས་ཡིན་པའི་ཕྱིར། གཉིས་ཀ་ལ་མཐུན་ཆོས་འགྲེ། དེཾ་ལྟརཾ་གཟུགས་ཅན་གྱི་རྣམ་ཐར་ཆོས་ཅན། གསུམ་ཡོད་དེ། སྤྲུལ་པའི་སྒྲིབ་པའི་གཉེན་པོ་གཉིས། དགའ་མི་དགའི་རྣམ་རྟོག་གི་གཉེན་པོ་གཅིག་རྣམས་སུ་ཡོད་པའི་ཕྱིར། གསུམ་པ་མཐོང་ཆོས་ལ་བདེར་གནས་ཀྱི་ལམ་ནི། མཐོངཾ་བཾའི་བྱང་སེམས་འཕགས་པའི་རྒྱུད་ཀྱི་གཟུགས་མེད་ཀྱི་རྣམ་ཐར་བཞི་པོ་ཆོས་ཅན། ཐར་པ་དང་མཐུན་པར་གནས་པའི་ལམ་གྱི་རང་བཞིན་ཡིན་ཏེ། གཟུགས་མེད་ཞི་བའི་རོ་མྱོང་གི་སྒྲིབ་པ་ལས་གྲོལ་བའི་གཟུགས་མེད་ཀྱི་རྣམ་ཐར་ཡིན་པའི་ཕྱིར། བྱང་སེམས་འཕགས་པའི་རྒྱུད་ཀྱི་འགོག་པའི་རྣམ་ཐར་ཆོས་ཅན། ཞི་བར་གནས་པའི་ལམ་ཡིན་ཏེ། ཚོར་འདུ་རགས་པ་ཞི་བའི་འཕགས་རྒྱུད་ཀྱི་རྣམ་ཐར་ཡིན་པའི་ཕྱིར། མཐུན་ཆོས་འགྲེ། དེཾ་ལྟཾར་མཐོང་ཆོས་ལ་བདེར་གནས་ཀྱི་ལམ་ཆོས་ཅན། རྣམ་པ་ལྔ་ཡོད་དེ། ཐར་པ་དང་མཐུན་པར་གནས་པའི་ལམ་གྱི་རང་བཞིན་བཞི། ཞི་བར་གནས་པའི་ལམ་གྱི་རང་བཞིན་གཅིག་རྣམས་སུ་ཡོད་པའི་ཕྱིར། བཞི་པ་འཇིག་རྟེན་ལས་འདས་པའི་ལམ་ནི་འཇིཾག་རྟེནཾ་བྱང་སེམས་འཕགས་པའི་རྒྱུད་ཀྱི་མཐར་གནས་ཀྱི་སྙོམས་འཇུག་ཆོས་ཅན། འཇིག་རྟེན་ལས་འདས་པའི་ལམ་ཡིན་ཏེ། འཕགས་རྒྱུད་ཀྱི་ཟག་མེད་ཀྱི་སྙོམས་འཇུག་ཡིན་པའི་ཕྱིར། མཐུན་ཆོས་འགྲེ། ལྔ་པ་སྤོང་བའི་ལམ་ནི། སྤོངཾ་བཾའི་བྱང་སེམས་འཕགས་པའི་རྒྱུད་ཀྱི་བདེན་བཞིའི་གནས་ཚུལ་རྟོགས་པའི་བར་ཆད་མེད་ལམ་ཆོས་ཅན། སྤོང་བའི་ལམ་ཡིན་ཏེ། བར་ཆད་མེད་པའི་ལམ་ཡིན་པའི་ཕྱིར། མཐུན་ཆོས་འགྲེ། དྲུག་པ་སངས་རྒྱས་ཉིད་ཀྱི་ལམ་ནི། སངཾས་རྒྱསཾ་བྱང་སེམས་འཕགས་པའི་རྒྱུད་ཀྱི་ཕར་ཕྱིན་བཅུ་ཆོས་ཅན། སངས་རྒྱས་ཉིད་ཀྱི་ལམ་ཡིན་ཏེ། རྫོགས་པའི་བྱང་ཆུབ་དུ་བགྲོད་པའི་གོ་སྐབས་ཕྱེ་ཤུལ་ཡིན་པའི་ཕྱིར། མཐུན་ཆོས་འགྲེ། གཉིས་པ་ནི། དེཾ་ལྟརཾ་སངས་རྒྱས་འཕགས་པའི་རྒྱུད་ཀྱི་བྱང་སེམས་དང་ཐུན་མོང་བའི་རྣམ་མཁྱེན་གྱི་རྣམ་པ་ཆོས་ཅན། སུམ་ཅུ་རྩ་བཞི་ཡོད་དེ། ཁྱོད་ཀྱི་མཐུན་ཆོས་དེ་ལ་སུམ་ཅུ་རྩ་བཞི་ཡོད་པའི་རྒྱུ་མཚན་གྱིས་ཁྱོད་ལ་སུམ་ཅུ་རྩ་བཞིར་ཕྱེ་བའི་ཕྱིར། གསུམ་པ་སངས་རྒྱས་འཕགས་པའི་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། རྣམཾ་པཾ་སྟོབས་བཅུ་ནས་སངས་རྒྱས་ཉིད་ཀྱི་རྣམ་པའི་བར་སུམ་ཅུ་རྩ་དགུ་ཆོས་ཅན། ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་ཡིན་ཏེ། འཕགས་པ་འོག་མ་ལས་རྟོགས་རིགས་ཕུལ་དུ་བྱུང་བའི་སངས་རྒྱས་འཕགས་པའི་མཁྱེན་པ་ཡིན་པའི་ཕྱིར། གཉིས་པ་ལ་གཉིས་ཏེ། བརྟེན་པ་ཡོན་ཏན་བཤད་པ། རྟེན་ཡེ་ཤེས་བཤད་པའོ། །དང་པོ་ལ་བཞི་སྟེ། སྟོབས་ཀྱི་རྣམ་པ། མི་འཇིགས་པའི་རྣམ་པ་སོ་སོ་ཡང་དག་རིག་པའི་རྣམ་པ། མ་འདྲེས་པའི་རྣམ་པའོ། །དང་པོ་ནི། དེཾ་ལཾ་སངས་རྒྱས་ཀྱི་ཡེ་ཤེས་ཆོས་ཅན། སྟོབས་ཀྱི་རྣམ་པ་ཡིན་ཏེ། གནས་དང་གནས་མ་ཡིན་པ་སོགས་ཤེས་བྱ་མཐའ་ཡས་པ་ལ་ཆགས་ཐོགས་མེད་པར་འཇུག་པའི་མཐར་ཐུག་གི་མཁྱེན་པ་ཡིན་པའི་ཕྱིར། གཉིས་པ་ནི། ངཾ་ནིཾ་སངས་རྒྱས་ཀྱི་ཡེ་ཤེས་ཆོས་ཅན། མི་འཇིགས་པའི་རྣམ་པ་ཡིན་ཏེ། རང་དོན་ཕུན་ཚོགས་བརྙེས་པ་དང་། གཞན་དོན་ཕུན་ཚོགས་སྒྲུབ་པའི་ཐབས་དམ་བཅས་པ་ལ་ཆོས་མཐུན་པའི་རྒོལ་བ་མེད་ཅིང་། ཆོས་མི་མཐུན་གྱི་རྒོལ་བས་མི་བརྫི་བའི་མཐར་ཐུག་གི་མཁྱེན་པ་ཡིན་པའི་ཕྱིར། གསུམ་པ་ནི། རྣམཾ་གྲངཾས་སངས་རྒྱས་ཀྱི་ཡེ་ཤེས་ཆོས་ཅན། སོ་སོ་ཡང་དག་པར་རིག་པའི་རྣམ་པ་ཡིན་ཏེ། བཤད་བྱ་འཆད་བྱེད་གཉིས་ལ་ཐོགས་མེད་དུ་འཇུག་པའི་མཐར་ཐུག་གི་མཁྱེན་པ་ཡིན་པའི་ཕྱིར། བཞི་པ་ལ་གཉིས་ཏེ། སོ་སོར་བཤད། དོན་བསྡུ་བའོ། །དང་པོ་ལ་བཞི་ལས། དང་པོ་སྤྱོད་པ་མ་འདྲེས་པ་ནི། འཁྲུཾལ་པཾ་སངས་རྒྱས་ཀྱི་ཡེ་ཤེས་ཆོས་ཅན། སྤྱོད་པ་མ་འདྲེས་པ་ཡིན་ཏེ། སྐུ་གསུང་ཐུགས་ཀྱི་སྤྱོད་པ་ལ་ཉེས་པ་མི་མངའ་བའི་མཐར་ཐུག་གི་ཡེ་ཤེས་ཡིན་པའི་ཕྱིར། གཉིས་པ་རྟོགས་པ་མ་འདྲེས་པ་ནི། འདུཾན་པཾ་སངས་རྒྱས་ཀྱི་ཡེ་ཤེས་ཆོས་ཅན། རྟོགས་པ་མ་འདྲེས་པ་ཡིན་ཏེ། འདུན་པ་སོགས་ཉམས་པ་མི་མངའ་བའི་མཐར་ཐུག་གི་ཡེ་ཤེས་ཡིན་པའི་ཕྱིར། གསུམ་པ་ཕྲིན་ལས་མ་འདྲེས་པ་ནི། སྐུཾ་དཾང་སངས་རྒྱས་ཀྱི་ཡེ་ཤེས་ཆོས་ཅན། ཕྲིན་ལས་མ་འདྲེས་པ་ཡིན་ཏེ། སྐུ་གསུང་ཐུགས་ཀྱི་ཕྲིན་ལས་རྣམ་པར་མི་རྟོག་པའི་ཡེ་ཤེས་ཀྱིས་ཟིན་པའི་མཐར་ཐུག་གི་ཡེ་ཤེས་ཡིན་པའི་ཕྱིར། བཞི་པ་ཡེ་ཤེས་མ་འདྲེས་པ་ནི། འདསཾ་པཾ་སངས་རྒྱས་ཀྱི་ཡེ་ཤེས་ཆོས་ཅན། ཡེ་ཤེས་མ་འདྲེས་པ་ཡིན་ཏེ། དུས་གསུམ་ལ་ཆགས་ཐོགས་མེད་པའི་ཡེ་ཤེས་མཐར་ཐུག་ཡིན་པའི་ཕྱིར། གཉིས་པ་ནི། དེཾ་ལྟརཾ་སངས་རྒྱས་ཀྱི་ཆོས་མ་འདྲེས་པའི་ཡེ་ཤེས་ཀྱི་རྣམ་པ་ཆོས་ཅན། བཅོ་བརྒྱད་ཡོད་དེ། སྤྱོད་པ་མ་འདྲེས་པ་དྲུག རྟོགས་པ་མ་འདྲེས་པ་དྲུག ཕྲིན་ལས་མ་འདྲེས་པ་གསུམ། ཡེ་ཤེས་མ་འདྲེས་པ་གསུམ་རྣམས་སུ་ཡོད་པའི་ཕྱིར། གཉིས་པ་རྟེན་ཡེ་ཤེས་བཤད་པ་ནི། སངཾས་རྒྱསཾ་ཅི་ལྟ་བ་མཁྱེན་པའི་རྣམ་མཁྱེན་ཆོས་ཅན། དེ་བཞིན་ཉིད་ཀྱི་རྣམ་པ་ཡིན་ཏེ། ཆོས་ཐམས་ཅད་ཀྱི་དེ་བཞིན་ཉིད་མངོན་སུམ་དུ་རྟོགས་པའི་ཡེ་ཤེས་མཐར་ཐུག་ཡིན་པའི་ཕྱིར། ཇི་སྙེད་པ་མཁྱེན་པའི་རྣམ་མཁྱེན་ཆོས་ཅན། རང་བྱུང་གི་རྣམ་པ་ཡིན་ཏེ། གཟུགས་སོགས་ཆོས་ཐམས་ཅད་ལ་མངའ་བསྒྱུར་བའི་ཡེ་ཤེས་མཐར་ཐུག་ཡིན་པའི་ཕྱིར། རྣམ་མཁྱེན་ཆོས་ཅན། སངས་རྒྱས་ཉིད་ཀྱི་རྣམ་པ་ཡིན་ཏེ། ཆོས་ཐམས་ཅད་རྣམ་པ་ཐམས་ཅད་དུ་རྫོགས་པར་བྱང་ཆུབ་པའི་རྣམ་པ་ཡིན་པའི་ཕྱིར། གསུམ་པ་ནི། དེཾ་ལྟརཾ་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་ཆོས་ཅན། སུམ་ཅུ་རྩ་དགུ་ཡོད་དེ། སྟོབས་བཅུ་ནས་སངས་རྒྱས་ཉིད་ཀྱི་རྣམ་པའི་བར་རྣམས་སུ་ཡོད་པའི་ཕྱིར། གསུམ་པ་དོན་བསྡུ་བ་ལ་གཉིས་ཏེ། ངོ་བོའི་སྒོ་ནས་སོ་སོའི་དོན་བསྡུ་བ། གྲངས་ཀྱི་སྒོ་ནས་ཐུན་མོང་གི་དོན་བསྡུ་བའོ། །དང་པོ་ནི། དེཾ་ལཾ་ཉན་ཐོས་ཀྱི་རྒྱུད་ཀྱི་གཞི་ཤེས་ཀྱི་རྣམ་པ་ཆོས་ཅན། ཟག་པ་མེད་པ་ཞེས་བརྗོད་པའི་རྒྱུ་མཚན་ཡོད་དེ། རང་དོན་དུ་མཉམ་གཞག་དུ་སྒོམ་པར་བྱ་བའི་རྣམ་པ་ཡིན་པའི་ཕྱིར། བྱང་ཆུབ་སེམས་དཔའི་རྒྱུད་ཀྱི་གཞི་ཤེས་ཀྱི་རྣམ་པ་ཆོས་ཅན། ཟག་བཅས་ཞེས་བརྗོད་པའི་རྒྱུ་མཚན་ཡོད་དེ། གཞན་དོན་དུ་རྗེས་ཐོབ་ཏུ་ཤེས་པར་བྱ་བའི་རྣམ་པ་ཡིན་པའི་ཕྱིར། ལམཾ་ཤེསཾ་བྱང་སེམས་འཕགས་པའི་རྒྱུད་ཀྱི་ལམ་ཤེས་ཀྱི་རྣམ་པ་སུམ་ཅུ་རྩ་དྲུག་ཆོས་ཅན། ཟག་བཅས་ཞེས་བརྗོད་པའི་རྒྱུ་མཚན་ཡོད་དེ། ཉོན་སྒྲིབ་ཆེད་དུ་གཉེར་ནས་མི་སྤོང་བའི་རྟོགས་རིགས་ཡིན་པའི་ཕྱིར། རྣམཾ་པཾ་སངས་རྒྱས་འཕགས་པའི་རྒྱུད་ཀྱི་རྣམ་མཁྱེན་གྱི་རྣམ་པ་བརྒྱ་དང་བཅུ་པོ་ཆོས་ཅན། ཟག་པ་མེད་པ་ཡིན་ཏེ། སྒྲིབ་གཉིས་བག་ཆགས་དང་བཅས་པ་ཟད་པར་སྤངས་པའི་མཁྱེན་པ་ཡིན་པའི་ཕྱིར། གཉིས་པ་ནི། རྣམཾ་པཾ་སྐབས་འདིར་བསྟན་གྱི་རྣམ་པ་ཆོས་ཅན། བརྒྱ་དང་བདུན་ཅུ་རྩ་གསུམ་ཡོད་དེ། གཞི་ཤེས་ཀྱི་རྣམ་པ་ཉི་ཤུ་རྩ་བདུན། ལམ་ཤེས་ཀྱི་རྣམ་པ་སུམ་ཅུ་རྩ་དྲུག རྣམ་མཁྱེན་གྱི་རྣམ་པ་བརྒྱ་དང་བཅུ་རྣམས་སུ་ཡོད་པའི་ཕྱིར། གཉིས་པ་སྦྱོར་བ་པོའི་གང་ཟག་ལ་གཉིས་ལས། དང་པོ་ནི། སྦྱོརཾ་བཾ་བྱམས་མགོན་ཆོས་ཅན། རྣམ་པའི་འོག་ཏུ་སྦྱོར་བ་པོའི་གང་ཟག་འཆད་པའི་རྒྱུ་མཚན་ཡོད་དེ། ཐེག་ཆེན་གྱི་སྦྱོར་བས་རྣམ་པ་སྒོམ་པ་ལ་སྦྱོར་བ་དེ་ཡང་སྦྱོར་བ་པོའི་གང་ཟག་བསྟན་པ་སྔོན་དུ་སོང་ན་གོ་སླ་བའི་དགོས་པ་ཡོད་པའི་ཕྱིར། གཉིས་པ་ནི། སངཾས་དང་འདཾས་བྱང་སེམས་ཚོགས་ལམ་པ་ཆོས་ཅན། ཡུམ་ཉན་པའི་སྣོད་ཡིན་ཏེ། ཡུམ་ཉན་པའི་ཕྱི་ནང་གི་མཐུན་རྐྱེན་ཁྱད་པར་གཉིས་དང་ལྡན་པའི་གང་ཟག་ཡིན་པའི་ཕྱིར། སངཾས་དང་དེཾ་དེ་ཆོས་ཅན། ཡུམ་གྱི་ཚིག་བློ་ལ་འཛིན་པ་དང་། དོན་མི་བརྗེད་པར་སེམས་པ་དང་། བསམ་བྱུང་གི་རིགས་པས་ཚུལ་བཞིན་ཡིད་ལ་བྱེད་པའི་སྣོད་ཡིན་ཏེ། དེ་ལྟར་བྱེད་པའི་ཕྱི་ནང་གི་མཐུན་རྐྱེན་ཁྱད་པར་ཅན་གཉིས་དང་ལྡན་པའི་གང་ཟག་ཡིན་པའི་ཕྱིར། གསུམ་པ་ཡུལ་ཅན་སྦྱོར་བའི་དབྱེ་བ་ལ་གསུམ་ལས། དང་པོ་ནི། དེཾ་ལྟཾར་སོགས་སོ། །གཉིས་པ་ནི། གཟུཾགས་ལཾ་ཐེག་ཆེན་གྱི་སྦྱོར་བ་ཆོས་ཅན། རྣམ་པ་ཉི་ཤུ་ཡོད་དེ། རང་བཞིན་གྱི་སྦྱོར་བ་ལྔ། གནས་སྐབས་ཀྱི་སྦྱོར་བ་བཅོ་ལྔ་རྣམས་སུ་ཡོད་པའི་ཕྱིར། གསུམ་པ་ལ་གཉིས་ཏེ། རང་བཞིན་གྱི་སྦྱོར་བ་ལྔ། གནས་སྐབས་ཀྱི་སྦྱོར་བ་བཅོ་ལྔའོ། །དང་པོ་ནི། གཟུཾགས་ལཾ་བྱང་སེམས་ཀྱི་ཚོགས་ལམ་ཁྱད་པར་ཅན་གྱི་མངོན་པར་རྟོགས་པ་ཆོས་ཅན། མི་གནས་པའི་སྦྱོར་བ་ཡིན་ཏེ། གཟུགས་སོགས་དོན་དམ་པར་གནས་བྱ་མ་ཡིན་པར་རྟོགས་པའི་སེམས་དཔའི་རྣལ་འབྱོར་ཡིན་པའི་ཕྱིར། དེས་གཞན་བཞི་ལ་འགྲེའོ། །གཉིས་པ་ནི། ཤེསཾ་རབཾ་དེ་ཆོས་ཅན། ཚེགས་ཆེན་ཡུན་རིང་རྟོགས་པའི་སྦྱོར་བ་ཡིན་ཏེ། སྟོང་ཉིད་ལ་སྒོམ་བྱུང་གཙོ་བོར་གྱུར་པ་མ་ཐོབ་པས་ཤེར་ཕྱིན་ལ་སྐྲག་པ་སྐྱེ་སྲིད་པའི་སེམས་དཔའི་རྣལ་འབྱོར་ཡིན་པའི་ཕྱིར། ཚེགས་ཆེན་ཡུན་རིང་རྟོགས་པའི་སྦྱོར་བ་ཆོས་ཅན། ཁྱོད་ལ་མཁྱེན་གསུམ་གྱི་སྦྱོར་བ་གསུམ་དུ་ཡོད་དེ། ཁྱོད་ཀྱི་སྒོམ་བྱ་རྣམ་པ་དེ་ལ་མཁྱེན་གསུམ་གྱི་རྣམ་པ་གསུམ་དུ་ཡོད་པའི་རྒྱུ་མཚན་གྱིས་ཁྱོད་ལ་མཁྱེན་གསུམ་གྱི་སྦྱོར་བ་གསུམ་དུ་ཡོད་པའི་ཕྱིར། དེས་ལྷག་མ་རྣམས་ལའང་འགྲེའོ། །བཞི་པ་སྦྱོར་བའི་སྔོན་འགྲོའི་ཆོས་ལ་གསུམ་སྟེ། ཐོབ་པར་བྱ་བ་ཡོན་ཏན། དོར་བར་བྱ་བ་སྐྱོན། ཤེས་པར་བྱ་བ་མཚན་ཉིད་དོ། །དང་པོ་ལ་གཉིས་ལས། དང་པོ་ནི། ཡོནཾ་ཏནཾ་བྱམས་མགོན་ཆོས་ཅན། ཐེག་ཆེན་སྦྱོར་བའི་འོག་ཏུ་དེའི་ཡོན་ཏན་འཆད་པའི་རྒྱུ་མཚན་ཡོད་དེ། ཐེག་ཆེན་གྱི་སྦྱོར་བ་སྒོམ་པ་ལ་དེའི་ཡོན་ཏན་མཐོང་བ་སྔོན་དུ་འགྲོ་དགོས་པའི་ཕྱིར། གཉིས་པ་ནི། བདུཾད་དང་བདུཾད་ཐེག་ཆེན་གྱི་སྦྱོར་བ་སྒོམ་སྟོབས་ཀྱིས་ཐོབ་པའི་བདུད་ཀྱི་མཐུ་བཅོམ་པ་ལ་སོགས་པ་བཅུ་བཞི་ཆོས་ཅན། ཐེག་ཆེན་སྦྱོར་བའི་ཡོན་ཏན་ཡིན་ཏེ། ཐེག་ཆེན་གྱི་སྦྱོར་བ་སྒོམ་པའི་གནས་སྐབས་ཀྱི་ཕན་ཡོན་ཡིན་པའི་ཕྱིར་རོ། །གཉིས་པ་ལ་གཉིས་ལས། དང་པོ་ནི། དེའིཾ་འོགཾ་བྱམས་མགོན་ཆོས་ཅན། ཐེག་ཆེན་སྦྱོར་བའི་ཡོན་ཏན་གྱི་འོག་ཏུ་ཐེག་ཆེན་སྦྱོར་བའི་སྐྱོན་འཆད་པའི་རྒྱུ་མཚན་ཡོད་དེ། ཡོན་ཏན་མཐོང་ནས་ཐེག་ཆེན་གྱི་སྦྱོར་བ་སྒོམ་པ་ལ་བར་ཆད་བྱེད་པའི་སྐྱོན་ཤེས་པ་སྔོན་དུ་འགྲོ་དགོས་པའི་ཕྱིར། གཉིས་པ་ནི། སྐྱོནཾ་དང་ཚེགཾས་ཐེག་ཆེན་གྱི་སྦྱོར་བ་སྒོམ་པའི་གནས་སྐབས་སུ་ཚེགས་ཆེན་པོས་འཐོབ་པ་སོགས་བཞི་བཅུ་རྩ་དྲུག་ཆོས་ཅན། ཐེག་ཆེན་སྦྱོར་བའི་སྐྱོན་ཡིན་ཏེ། ཐེག་ཆེན་གྱི་སྦྱོར་བ་བསྒོམ་པ་ལ་བར་དུ་གཅོད་པའི་བདུད་ལས་ཡིན་པའི་ཕྱིར། གསུམ་པ་ལ་གསུམ་སྟེ། རྒྱུ་མཚན་གྱི་སྒོ་ནས་མཚམས་སྦྱར། སོ་སོའི་རང་བཞིན་རྒྱས་པར་བཤད། གྲངས་ཀྱི་སྒོ་ནས་མཇུག་བསྡུ་བའོ། །དང་པོ་ནི། གོཾ་རིམཾ་བྱམས་མགོན་ཆོས་ཅན། ཐེག་ཆེན་སྦྱོར་བའི་སྐྱོན་གྱི་རྗེས་སུ་ཐེག་ཆེན་སྦྱོར་བའི་མཚན་ཉིད་འཆད་པའི་རྒྱུ་མཚན་ཡོད་དེ། ཡོན་ཏན་དང་སྐྱོན་ལ་བླང་དོར་བྱེད་པའི་སྒོ་ནས་ཐེག་ཆེན་གྱི་སྦྱོར་བ་སྒོམ་པ་ལ་ཐེག་ཆེན་སྦྱོར་བའི་མཚན་ཉིད་ཤེས་པ་སྔོན་དུ་འགྲོ་དགོས་པའི་ཕྱིར། གཉིས་པ་ལ་གཉིས་ཏེ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་ཕྱེ་སྟེ་བཤད་པའོ། །དང་པོ་ལ་གཉིས་ལས། དང་པོ་ནི། གཾང་གིཾས་ཐེག་ཆེན་སྦྱོར་བའི་མཚན་ཉིད་ཆོས་ཅན། རྣམ་པ་བཞི་ཡོད་དེ། བྱེད་སྒྲུབ་ཀྱི་དབང་དུ་བྱས་པ་གསུམ། ལས་སྒྲུབ་ཀྱི་དབང་དུ་བྱས་པ་གཅིག་རྣམས་སུ་ཡོད་པའི་ཕྱིར། གཉིས་པ་ནི། བྱེདཾ་པཾར་ཐེག་ཆེན་སྦྱོར་བའི་ཤེས་ཁྱད་བྱེད་གསུམ་ཆོས་ཅན། ཐེག་ཆེན་སྦྱོར་བའི་བྱེད་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་ཏེ། ངོ་བོ་ཉིད་མཚན་བཅུ་དྲུག་པོ་ཐེག་ཆེན་གྱི་སྦྱོར་བར་མཚོན་པར་བྱེད་པའི་ཆ་ཡིན་པའི་ཕྱིར། ལསཾ་སུ་ངོ་བོ་ཉིད་མཚན་བཅུ་དྲུག་པོ་ཆོས་ཅན། ཐེག་ཆེན་སྦྱོར་བའི་ལས་སྒྲུབ་ཀྱི་དབང་དུ་བྱས་པའི་མཚན་ཉིད་ཡིན་ཏེ། ཐེག་ཆེན་གྱི་སྦྱོར་བ་མཚོན་པར་བྱ་བའི་གཞི་ཡིན་པའི་ཕྱིར། གཉིས་པ་ལ་བཞི་སྟེ། ཤེས་མཚན། ཁྱད་མཚན། བྱེད་མཚན། ངོ་བོ་ཉིད་མཚན་ནོ། །དང་པོ་ལ་གཉིས་ཏེ། དབྱེ་བའི་སྒོ་ནས་མཚམས་སྦྱར། སོ་སོའི་རང་བཞིན་རྒྱས་པར་བཤད་པའོ། །དང་པོ་ནི། དེཾ་ལཾ་ཤེས་མཚན་ཆོས་ཅན། རྣམ་པ་གསུམ་ཡོད་དེ། མཁྱེན་གསུམ་གྱི་སྦྱོར་བའི་རྣམ་པ་གསུམ་རྣམས་སུ་ཡོད་པའི་ཕྱིར། གཉིས་པ་ལ་གསུམ་སྟེ། གཞི་ཤེས་སྦྱོར་བའི་ཤེས་མཚན། ལམ་ཤེས་སྦྱོར་བའི་ཤེས་མཚན། རྣམ་མཁྱེན་སྦྱོར་བའི་ཤེས་མཚན་ནོ། །དང་པོ་ལ་གཉིས་ལས། དང་པོ་ནི། རེཾ་ཞིགཾ་སོགས་སོ། །གཉིས་པ་ནི། དེཾ་དང་དེཾ་ཐེག་ཆེན་གྱི་གཞི་ཤེས་སྦྱོར་བའི་ཤེས་མཚན་ཆོས་ཅན། ཁྱོད་ལ་རྣམ་པ་བཅུ་དྲུག་ཡོད་དེ། ཁྱོད་ཀྱི་ཡུལ་དེ་ལ་བཅུ་དྲུག་ཡོད་པའི་རྒྱུ་མཚན་གྱིས་ཁྱོད་ལ་བཅུ་དྲུག་ཏུ་ཕྱེ་བ་ཡིན་པའི་ཕྱིར། ཐམཾས་དང་འདིཾ་གཞི་ཤེས་སྦྱོར་བས་ཡུམ་ལ་བརྟེན་ནས་དེ་བཞིན་གཤེགས་པ་འབྱུང་བར་ཤེས་པ་སོགས་ཀྱི་ཤེས་པ་བཅུ་དྲུག་ཆོས་ཅན། གཞི་ཤེས་སྦྱོར་བའི་ཤེས་མཚན་ཡིན་ཏེ། ཉོན་མོངས་ཀྱིས་དབེན་པ་སོགས་ཀྱི་ངོ་བོ་ཉིད་བཞི་པོ་ཐེག་ཆེན་གྱི་གཞི་ཤེས་ཀྱི་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་ཤེས་པའི་ཆ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། དེའིཾ་འོགཾ་སོགས་སོ། །གཉིས་པ་ནི། སྟོངཾ་དང་སྟོངཾ་ལམ་ཤེས་སྦྱོར་བའི་ཤེས་མཚན་ཆོས་ཅན། ཁྱོད་ལ་རྣམ་པ་བཅུ་དྲུག་ཡོད་དེ། ཁྱོད་ཀྱི་ཡུལ་དེ་ལ་བཅུ་དྲུག་ཡོད་པའི་རྒྱུ་མཚན་གྱིས་ཁྱོད་ལ་བཅུ་དྲུག་ཏུ་ཕྱེ་བའི་ཕྱིར། ལམཾ་དང་འདིཾ་ལམ་ཤེས་སྦྱོར་བས་སྟོང་པ་ཉིད་རྟོགས་པ་སོགས་ཀྱི་ཤེས་པ་བཅུ་དྲུག་པོ་ཆོས་ཅན། ལམ་ཤེས་སྦྱོར་བའི་ཤེས་མཚན་ཡིན་ཏེ། བྱ་དཀའ་བ་སོགས་ཀྱི་ངོ་བོ་ཉིད་ལྔ་པོ་ལམ་ཤེས་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་ཤེས་པའི་ཆ་ཡིན་པའི་ཕྱིར། གསུམ་པ་ལ་གཉིས་ལས། དང་པོ་ནི། དེཾའི་འོགཾ་སོགས་སོ། །གཉིས་པ་ནི། དེཾ་དང་དེཾ་རྣམ་མཁྱེན་སྦྱོར་བའི་ཤེས་མཚན་ཆོས་ཅན། ཁྱོད་ལ་རྣམ་པ་བཅུ་དྲུག་ཡོད་དེ། ཁྱོད་ཀྱི་ཡུལ་དེ་ལ་བཅུ་དྲུག་ཡོད་པའི་རྒྱུ་མཚན་གྱིས་ཁྱོད་ལ་བཅུ་དྲུག་ཏུ་ཕྱེ་བ་ཡིན་པའི་ཕྱིར། རྣམཾ་དང་འདིཾ་རྣམ་མཁྱེན་སྦྱོར་བས་མཐོང་ཆོས་ལ་བདེར་གནས་རྟོགས་པ་སོགས་ཀྱི་ཤེས་པ་བཅུ་དྲུག་ཆོས་ཅན། རྣམ་མཁྱེན་སྦྱོར་བའི་ཤེས་མཚན་ཡིན་ཏེ། དམིགས་པ་ལ་སོགས་པའི་ངོ་བོ་ཉིད་བདུན་པོ་རྣམ་མཁྱེན་གྱི་སྦྱོར་བ་མཚོན་པའི་བྱེད་པ་གསུམ་གྱི་ནང་ནས་ཤེས་པའི་ཆ་ཡིན་པའི་ཕྱིར། གཉིས་པ་ཁྱད་མཚན་ལ་གཉིས་ཏེ། མཚམས་སྦྱར་བ་དང་། དོན་དངོས་སོ། །དང་པོ་ནི། དེཾ་ལྟཾར་བྱམས་མགོན་ཆོས་ཅན། ཐེག་ཆེན་སྦྱོར་བའི་ཤེས་མཚན་གྱི་འོག་ཏུ་དེའི་ཁྱད་མཚན་འཆད་པའི་རྒྱུ་མཚན་ཡོད་དེ། ཤེས་མཚན་གྱི་སྐབས་སུ་སྦྱོར་བ་གསུམ་གྱི་ཤེས་མཚན་གསུམ་དུ་ཕྱེ་བའི་ཁྱད་པར་ཤེས་པར་བྱ་དགོས་པའི་ཕྱིར། གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། རྩ་བ་ནི། བསཾམ་མིཾ་ཐེག་ཆེན་སྦྱོར་བས་ཆོས་ཉིད་རྟོག་གེའི་བློས་བསམ་གྱིས་མི་ཁྱབ་པར་རྟོགས་པ་སོགས་ཀྱི་རྣམ་པ་བཅུ་དྲུག་པོ་ཆོས་ཅན། ཐེག་ཆེན་སྦྱོར་བའི་ཁྱད་མཚན་ཡིན་ཏེ། ངོ་བོ་ཉིད་མཚན་བཅུ་དྲུག་པོ་ཐེག་ཆེན་གྱི་སྦྱོར་བར་མཚོན་པར་བྱེད་པ་གསུམ་གྱི་ནང་ནས་བྱེད་པའི་ཁྱད་པར་གྱི་ཆ་ཡིན་པའི་ཕྱིར། འགྲེལ་པ་ནི་བསཾམ་གྱིཾས་ཆོས་འདྲ། ངོ་བོ་ཉིད་མཚན་ཕྱི་མ་བཅུ་གཉིས་ལམ་ཤེས་དང་རྣམ་མཁྱེན་གྱི་སྦྱོར་བར་མཚོན་པར་བྱེད་པའི་ཁྱད་པར་གྱི་ཆ་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། ཡངཾ་བསཾམ་སོགས་སོ། །གཉིས་པ་ལ་གཉིས་ཏེ། གང་ཁྱད་པར་དུ་འཕགས་པའི་ཆོས། གང་ལས་ཁྱད་པར་དུ་འཕགས་པའི་ཚུལ་ལོ། །དང་པོ་ནི། བསཾམ་མིཾ་ཐེག་ཆེན་སྦྱོར་བའི་ཁྱད་མཚན་ཆོས་ཅན། རྣམ་པ་བཅུ་དྲུག་ཡོད་དེ། ཡུལ་བདེན་བཞིའི་སྟེང་གི་ཁྱད་ཆོས་བཅུ་དྲུག་རྟོགས་པའི་སྐད་ཅིག་མ་བཅུ་དྲུག་ཡོད་པའི་ཕྱིར། གཉིས་པ་ནི། གཾང་གིཾས་ཐེག་ཆེན་སྦྱོར་བའི་ཁྱད་མཚན་བཅུ་དྲུག་པོ་ཆོས་ཅན། ཁྱོད་ལ་ཁྱད་མཚན་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཀྱིས་རང་གང་ལ་ལྡན་པའི་སྦྱོར་བ་དེ་ཐེག་དམན་གྱི་སྦྱོར་བ་ལས་རྟོགས་རིགས་ཀྱི་སྒོ་ནས་ཁྱད་པར་དུ་འཕགས་པར་མཚོན་ནུས་པའི་ཕྱིར། གསུམ་པ་ལ་གཉིས་ཏེ། མཚན་ཉིད་དངོས་དང་། དམན་ལམ་མི་སྟོན་པའི་རྒྱུ་མཚན་ནོ། །དང་པོ་ལ་གཉིས་ཏེ། ཁྱད་པར་གྱི་དབྱེ་བ་དང་། ཁྱད་པར་དུ་འཕགས་པའི་ཚུལ་ལོ། །དང་པོ་ནི། ཡངཾ་དགཾ་སོགས་དང་། གཉིས་པ་ནི། གངཾ་གིཾས་སོགས་ཏེ། རྩ་བའི་ངག་དོན་འགོད་དོ། །གཉིས་པ་ནི། དེའིཾ་ཕྱིརཾ་བྱམས་མགོན་ཆོས་ཅན། ཁྱད་མཚན་འཆད་པའི་སྐབས་འདིར་གང་ལས་ཁྱད་པར་དུ་འཕགས་པའི་ལམ་དངོས་སུ་མི་སྟོན་པའི་རྒྱུ་མཚན་ཡོད་དེ། སྐབས་འདིར་དེ་ཤུགས་ཀྱིས་གོ་བ་ལ་དགོངས་པའི་ཕྱིར། གསུམ་པ་བྱེད་མཚན་ལ་གཉིས་ལས། དང་པོ་ནི། ཁྱདཾ་པརཾ། ཕན་དང་བདེ་དང་སྐྱོབ་པ་དང་ཞེས་སོགས་བར་སྐབས་ཀྱི་ཚིགས་སུ་བཅད་པ་གཉིས་ཀྱིས་བྱེད་མཚན་བཤད་པ་ཆོས་ཅན། དགོས་པ་ཡོད་དེ། ཁྱད་མཚན་དང་ལྡན་པའི་སྦྱོར་བའི་བྱེད་པ་བདེ་བླག་ཏུ་རྟོག་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། མཚན་ཉིད་ཀྱི་དབྱེ་བ་དང་། མཚོན་པའི་ཚུལ་ལོ། །དང་པོ་ནི། ཕནཾ་དང་མཾ་ཐེག་ཆེན་གྱི་གཞི་ཤེས་སྦྱོར་བས་མ་འོངས་པའི་ཕན་པ་སྒྲུབ་པ་སོགས་ཀྱི་བྱེད་པ་གསུམ་པོ་ཆོས་ཅན། ཐེག་ཆེན་གྱི་གཞི་ཤེས་སྦྱོར་བའི་བྱེད་མཚན་ཡིན་ཏེ། ཉོན་མོངས་ཀྱིས་དབེན་པ་ལ་སོགས་པའི་ངོ་བོ་ཉིད་བཞི་པོ་ཐེག་ཆེན་གྱི་གཞི་ཤེས་ཀྱི་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་གཞན་དོན་སྒྲུབ་པའི་ཆ་ཡིན་པའི་ཕྱིར། མིཾ་དང་གཏནཾ་ལམཾ་ཤེས་སྦྱོར་བས་གཏན་དུ་ཕན་པ་སྒྲུབ་པ་སོགས་ཀྱི་བྱེད་པ་བདུན་པོ་ཆོས་ཅན། ལམ་ཤེས་སྦྱོར་བའི་བྱེད་མཚན་ཡིན་ཏེ། བྱ་དཀའ་བ་ལ་སོགས་པའི་ངོ་བོ་ཉིད་བདུན་པོ་ལམ་ཤེས་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་གཞན་དོན་སྒྲུབ་པའི་ཆ་ཡིན་པའི་ཕྱིར། ཐཾ་དང་རྣམཾ་རྣམ་མཁྱེན་སྦྱོར་བས་ཆོས་ཐམས་ཅད་སྟོན་པ་ཉེ་བར་སྒྲུབ་པའི་བྱེད་པ་ཆོས་ཅན། རྣམ་མཁྱེན་སྦྱོར་བའི་བྱེད་མཚན་ཡིན་ཏེ། དམིགས་པ་ལ་སོགས་པའི་ངོ་བོ་ཉིད་ལྔ་པོ་རྣམ་མཁྱེན་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་གཞན་དོན་སྒྲུབ་པའི་ཆ་ཡིན་པའི་ཕྱིར། གཉིས་པ་ནི། འདིཾ་དང་དེཾ་ཕན་པ་ལ་སོགས་པའི་བྱེད་པ་བཅུ་གཅིག་ཆོས་ཅན། ཐེག་ཆེན་སྦྱོར་བའི་བྱེད་མཚན་ཡིན་ཏེ། ངོ་བོ་ཉིད་མཚན་བཅུ་དྲུག་པོ་ཐེག་ཆེན་གྱི་སྦྱོར་བར་མཚོན་པའི་བྱེད་པ་གསུམ་གྱི་ནང་ནས་གཞན་དོན་སྒྲུབ་པའི་ཆ་ཡིན་པའི་ཕྱིར། བཞི་པ་ངོ་བོ་ཉིད་མཚན་ལ་གཉིས་ལས། དང་པོ་ནི། བྱེདཾ་པཾའི་ཉོན་མོངས་རྟགས་དང་མཚན་མ་དང་། །ཞེས་སོགས་ཚིགས་བཅད་གསུམ་གྱིས་ངོ་བོ་ཉིད་མཚན་བཤད་པ་ཆོས་ཅན། དགོས་པ་ཡོད་དེ། བྱེད་མཚན་དང་ལྡན་པའི་སྦྱོར་བའི་མཚན་གཞི་རྟོགས་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། མཚན་ཉིད་ཀྱི་དབྱེ་བ་དང་། མཚོན་པའི་ཚུལ་ལོ། །དང་པོ་ནི། ཉོནཾ་དང་འདོཾད་ཉོན་མོངས་ཀྱིས་དབེན་པ་ལ་སོགས་པའི་ངོ་བོ་ཉིད་བཞི་པོ་ཆོས་ཅན། ཐེག་ཆེན་གྱི་གཞི་ཤེས་སྦྱོར་བའི་ངོ་བོ་ཉིད་མཚན་ཡིན་ཏེ། ཐེག་ཆེན་གྱི་གཞི་ཤེས་སྦྱོར་བ་གང་ལ་མཚོན་པར་བྱ་བའི་མཚན་གཞིའི་ངོ་བོ་ཉིད་ཡིན་པའི་ཕྱིར། དཀཾའ་དང་དོནཾ་བྱ་དཀའ་བ་ལ་སོགས་པའི་ངོ་བོ་ཉིད་ལྔ་པོ་ཆོས་ཅན། ལམ་ཤེས་སྦྱོར་བའི་ངོ་བོ་ཉིད་མཚན་ཡིན་ཏེ། རྟགས་འགྲེ། དམིགཾས་དང་ཐམཾས་དམིགས་པ་ལ་སོགས་པའི་ངོ་བོ་ཉིད་བདུན་པོ་ཆོས་ཅན། རྣམ་མཁྱེན་སྦྱོར་བའི་ངོ་བོ་ཉིད་མཚན་ཡིན་ཏེ། རྟགས་འགྲེ། གཉིས་པ་ནི། ངོཾ་དང་དེཾ་ཉོན་མོངས་ཀྱིས་དབེན་པ་ལ་སོགས་པའི་ངོ་བོ་ཉིད་བཅུ་དྲུག་པོ་ཆོས་ཅན། ཐེག་ཆེན་སྦྱོར་བའི་ངོ་བོ་ཉིད་མཚན་ཡིན་ཏེ། རྟགས་འགྲེ། གསུམ་པ་ནི། དེཾ་ལྟརཾ་ཐེག་ཆེན་གྱི་སྦྱོར་བའི་མཚན་ཉིད་ཆོས་ཅན། ཕྱེ་ན་དགུ་བཅུ་རྩ་གཅིག་ཡོད་དེ། ཤེས་མཚན་བཞི་བཅུ་རྩ་བརྒྱད། ཁྱད་མཚན་བཅུ་དྲུག བྱེད་མཚན་བཅུ་གཅིག ངོ་བོ་ཉིད་མཚན་བཅུ་དྲུག་རྣམས་སུ་ཡོད་པའི་ཕྱིར། གཉིས་པ་སྦྱོར་བ་སྐྱེས་པའི་གནས་སྐབས་ཀྱི་གོ་རིམ་ལ་གསུམ་སྟེ། ཐོགས་པ་མེད་པའི་སྒྲུབ་པས་བསྡུས་པའི་སྦྱོར་བ། འཛིན་པ་མེད་པའི་སྦྱོར་བས་བསྡུས་པའི་སྒྲུབ་པའོ། །དང་པོ་ལ་གཉིས་ཏེ། མདོར་བསྟན་རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། ཐཾར་པཾའི་བྱམས་མགོན་ཆོས་ཅན། སྦྱོར་བའི་མཚན་ཉིད་ཀྱི་འོག་ཏུ་ཐར་པ་ཆ་མཐུན་འཆད་པའི་རྒྱུ་མཚན་ཡོད་དེ། ཐར་པ་ཆ་མཐུན་གྱི་དགེ་རྩ་དང་ལྡན་པ་ལ་སྦྱོར་བའི་མཚན་ཉིད་ཤེས་པ་འབྱུང་བའི་ཕྱིར། འོན་ཀྱང་འགྱུར་བཟློག་ན་བདེའོ། །གཉིས་པ་ནི། མཚཾན་དང་མཚནཾ་ཐེག་ཆེན་གྱི་ཚོགས་ལམ་ཁྱད་པར་ཅན་གྱི་དད་སོགས་ལྔ་པོ་ཆོས་ཅན། རྣམ་རྫོགས་སྦྱོར་བས་བསྡུས་པའི་ཐར་པ་ཆ་མཐུན་ཡིན་ཏེ། མཚན་མེད་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་སྦྱིན་སོགས་སྒྲུབ་པའི་ཐབས་ལ་མཁས་པའི་ཐེག་ཆེན་ལས་དང་པོ་པའི་མངོན་རྟོགས་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། མཁཾས་པཾ་སོགས་སོ། །གཉིས་པ་ལ་གཉིས་ཏེ། དངོས་བསྟན་ཐེག་ཆེན་གྱི་ཐར་པ་ཆ་མཐུན། ཤུགས་བསྟན་ཐེག་དམན་གྱི་ཐར་པ་ཆ་མཐུན་ནོ། །དང་པོ་ལ་གཉིས་ཏེ། ཡུལ་གྱི་སྒོ་ནས་དབྱེ་བ་དང་། དབང་པོའི་སྒོ་ནས་དབྱེ་བའོ། །དང་པོ་ནི། སངཾས་དང་དཾད་ཐེག་ཆེན་གྱི་ཚོགས་ལམ་ཁྱད་པར་ཅན་དེ་ཆོས་ཅན། ཁྱོད་ལ་དད་སོགས་ལྔ་ཡོད་དེ། ཁྱོད་ཀྱི་མཁས་བྱའི་ཡུལ་དེ་ལ་སངས་རྒྱས་སོགས་ལྔ་ཡོད་པའི་རྒྱུ་མཚན་གྱིས་ཁྱོད་ལ་དད་སོགས་ལྔར་ཕྱེ་བ་ཡིན་པའི་ཕྱིར། གཉིས་པ་ནི། རྫོགཾས་དང་དེཾ་ཐེག་ཆེན་གྱི་ཚོགས་ལམ་ཁྱད་པར་ཅན་གྱི་དད་སོགས་ལྔ་པོ་ཆོས་ཅན། ཁྱོད་ལ་རྣོ་རྟུལ་གཉིས་ཡོད་དེ། ཁྱོད་ལ་ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འཐོབ་པར་སླ་བ་དང་དཀའ་བ་གཉིས་སུ་ཡོད་པའི་ཕྱིར། གཉིས་པ་ནི། ཤུགཾས་ཀྱིསཾ་རང་རྒྱལ་གྱི་རིགས་ཅན་ཚོགས་ལམ་པའི་དད་སོགས་ལྔ་པོ་ཆོས་ཅན། རང་རྒྱལ་གྱི་བྱང་ཆུབ་ཐོབ་པར་འགྱུར་ཏེ། རང་རྒྱལ་གྱི་བྱང་ཆུབ་སྒྲུབ་པའི་ཐབས་ལ་མཁས་པའི་རང་རྒྱལ་གྱི་སློབ་ལམ་ཡིན་པའི་ཕྱིར། ཉན་ཐོས་ཀྱི་ཚོགས་ལམ་ཁྱད་པར་ཅན་གྱི་དད་སོགས་ལྔ་པོ་ཆོས་ཅན། ཉན་ཐོས་ཀྱི་བྱང་ཆུབ་ཐོབ་པར་འགྱུར་ཏེ། རྟགས་འགྲེ། གཉིས་པ་ལ་གསུམ་སྟེ། སྦྱོར་བ་སྐྱེས་པའི་གནས་སྐབས། རྟེན་ཕྱིར་མི་ལྡོག་པའི་གང་ཟག བསྒོམ་བྱ་སྦྱོར་བའི་ངོ་བོའོ། །དང་པོ་ལ་གསུམ་ལས། དང་པོ་ནི། ཐརཾ་པའིཾ་བྱམས་མགོན་ཆོས་ཅན། ཐེག་ཆེན་གྱི་ཐར་པ་ཆ་མཐུན་གྱི་འོག་ཏུ་ཐེག་ཆེན་གྱི་ངེས་འབྱེད་ཆ་མཐུན་འཆད་པའི་རྒྱུ་མཚན་ཡོད་དེ། དེ་ལས་དེ་འབྱུང་བའི་ཕྱིར། གཉིས་པ་ནི། དྲོཾ་བཾ་དམིགས་པ་སེམས་ཅན་ལ་དམིགས་ནས་རྣམ་པ་སེམས་མཉམ་པ་ལ་སོགས་པའི་ངེས་འབྱེད་ཆ་མཐུན་དེ་ཆོས་ཅན། རྣམ་རྫོགས་སྦྱོར་བར་བསྟན་པའི་ངེས་འབྱེད་ཆ་མཐུན་ཡིན་ཏེ། སེམས་ཅན་ལ་དམིགས་པའི་བསམ་སྦྱོར་ཁྱད་པར་ཅན་དང་ལྡན་པའི་རྗེས་ཐོབ་ཀྱིས་བསྡུས་པའི་ངེས་འབྱེད་ཆ་མཐུན་ཡིན་པའི་ཕྱིར། གསུམ་པ་ལ་གཉིས་ཏེ། དངོས་ཀྱི་དོན་དང་། ཞར་ལས་བྱུང་བའོ། །དང་པོ་ལ་གཉིས་ཏེ། རྒྱས་པར་བཤད། དོན་བསྡུ་བའོ། །དང་པོ་ལ་བཞི་ལས། དྲོད་ཀྱི་དམིགས་རྣམ་ནི། རྣམཾ་པཾ་དམིགས་པ་སེམས་ཅན་ལ་དམིགས་ནས་རྣམ་པ་སེམས་མཉམ་པ་སོགས་བཅུ་དང་ལྡན་པའི་ངེས་འབྱེད་ཆ་མཐུན་ཆོས་ཅན། རྣམ་རྫོགས་སྦྱོར་བའི་འཆད་པའི་སྐབས་ནས་བསྟན་པའི་དྲོད་ཡིན་ཏེ། སེམས་ཅན་ལ་དམིགས་པའི་བསམ་སྦྱོར་ཁྱད་པར་ཅན་དང་ལྡན་པའི་རྗེས་ཐོབ་ཀྱིས་བསྡུས་པའི་དྲོད་ཀྱི་ཡེ་ཤེས་ཡིན་པའི་ཕྱིར། རྩེ་མོའི་དམིགས་རྣམ་ནི། མདོརཾ་ནཾ་དམིགས་པ་སེམས་ཅན་ལ་དམིགས་ནས་རྣམ་པ་དགེ་སྡིག་གི་བླང་དོར་ལ་གཞན་འགོད་པ་སོགས་ཀྱི་ངེས་འབྱེད་ཆ་མཐུན་ཆོས་ཅན། རྣམ་རྫོགས་སྦྱོར་བ་འཆད་པའི་སྐབས་ནས་བསྟན་པའི་རྩེ་མོ་ཡིན་ཏེ། རྟགས་འགྲེ། བཟོད་པའི་དམིགས་རྣམ་ནི། རྩེཾ་མོརཾ་དམིགས་པ་སེམས་ཅན་ལ་དམིགས་ནས་རྣམ་པ་བདེན་བཞི་ཤེས་པ་ལ་རང་གནས་ནས་གཞན་འགོད་པ་སོགས་ཀྱི་རྣམ་པ་དང་ལྡན་པའི་ངེས་འབྱེད་ཆ་མཐུན་ཆོས་ཅན། རྣམ་རྫོགས་སྦྱོར་བ་འཆད་པའི་སྐབས་ནས་བསྟན་པའི་བཟོད་པ་ཡིན་ཏེ། རྟགས་འགྲེ། ཆོས་མཆོག་གི་དམིགས་རྣམ་ནི། སྔཾ་མཾ་དམིགས་པ་སེམས་ཅན་ལ་དམིགས་ནས་རྣམ་པ་རང་སྨིན་གྲོལ་ལ་གནས་ནས་གཞན་འགོད་པ་སོགས་ཀྱི་རྣམ་པ་དང་ལྡན་པའི་ངེས་འབྱེད་ཆ་མཐུན་ཆོས་ཅན། རྣམ་རྫོགས་སྦྱོར་བ་འཆད་པའི་སྐབས་ནས་བསྟན་པའི་ཆོས་མཆོག་ཡིན་ཏེ། སེམས་ཅན་ལ་དམིགས་པའི་བསམ་སྦྱོར་ཁྱད་པར་ཅན་དང་ལྡན་པའི་རྗེས་ཐོབ་ཀྱིས་བསྡུས་པའི་ཆོས་མཆོག་གི་ཡེ་ཤེས་ཡིན་པའི་ཕྱིར། གཉིས་པ་ནི། དེཾ་ལྟརཾ་སོགས་སོ། །གཉིས་པ་ལ་གཉིས་ཏེ། མཁྱེན་པ་གསུམ་གྱི་སྐབས་སུ་ལམ་གསུམ་བསྟན་པའི་འདོད་ཚུལ། སྦྱོར་བ་གསུམ་གྱི་སྐབས་སུ་ལམ་གསུམ་བསྟན་པའི་འདོད་ཚུལ་ལོ། །དང་པོ་ནི། རྣམཾ་པཾ་བྱམས་མགོན་ཆོས་ཅན། མཁྱེན་པ་གསུམ་གྱི་སྐབས་སུ་སྦྱོར་མཐོང་སྒོམ་གསུམ་ལན་གསུམ་དུ་བསྟན་པ་ལ། ཟློས་པའི་སྐྱོན་མེད་དེ། རྣམ་པ་དང་། ལམ་དང་། གཞི་སྐྱེ་མེད་དུ་རྟོགས་པའི་ལྡོག་པ་ནས་མཁྱེན་པ་གསུམ་གྱི་སྐབས་སུ་སྦྱོར་མཐོང་སྒོམ་གསུམ་བསྟན་པ་ཡིན་པའི་ཕྱིར། གཉིས་པ་ནི། རྣམཾ་པཾ་བྱམས་མགོན་ཆོས་ཅན། སྦྱོར་བ་དང་པོ་གསུམ་གྱི་སྐབས་སུ་སྦྱོར་མཐོང་སྒོམ་གསུམ་ལན་གསུམ་དུ་བསྟན་པ་ལ་ཟློས་པའི་སྐྱོན་མེད་དེ། རྣམ་རྫོགས་སྦྱོར་བའི་སྐབས་སུ་ས་བརྒྱད་པའི་ཡེ་ཤེས་ཆུང་ངུ་འབྲིང་ཆེན་པོ་གསུམ་དང་། རྩེ་སྦྱོར་གྱི་སྐབས་སུ་ས་དགུ་པའི་ཡེ་ཤེས་ཆུང་ངུ་འབྲིང་ཆེན་པོ་གསུམ་དང་། མཐར་གྱིས་པའི་སྐབས་སུ་ས་བཅུ་པའི་ཡེ་ཤེས་ཆུང་ངུ་འབྲིང་ཆེན་པོ་གསུམ་ལ་སྦྱོར་མཐོང་སྒོམ་གསུམ་གྱི་མིང་གིས་བཏགས་ནས་བསྟན་པའི་ཕྱིར། གཉིས་པ་བརྟེན་ཕྱིར་མི་ལྡོག་པའི་གང་ཟག་ལ་གསུམ་སྟེ། རྟེན་གྱི་སྒོ་ནས་མདོར་བསྟན། རྟགས་ཀྱི་སྒོ་ནས་རྒྱས་པར་བཤད། ངོ་བོའི་སྒོ་ནས་དོན་བསྡུ་བའོ། །དང་པོ་ལ་གཉིས་ལས། དང་པོ་ནི། ཕྱིརཾ་མིཾ་བྱམས་མགོན་ཆོས་ཅན། ཐེག་ཆེན་གྱི་ངེས་འབྱེད་ཆ་མཐུན་གྱི་འོག་ཏུ་ཕྱིར་མི་ལྡོག་པའི་དགེ་འདུན་འཆད་པའི་རྒྱུ་མཚན་ཡོད་དེ། ཐེག་ཆེན་གྱི་ངེས་འབྱེད་ཆ་མཐུན་ཐོབ་ནས་གང་ཟག་དེ་ཕྱིར་མི་ལྡོག་པའི་དགེ་འདུན་དུ་འགྱུར་བའི་ཕྱིར། འདིའི་རིགས་པ་སྔ་མའི་མཚམས་སྦྱར་ལ་ཡང་ཐོབ་བོ། །གཉིས་པ་ནི། ངེསཾ་དང་སཾ་སྦྱོར་མཐོང་སྒོམ་གསུམ་ལ་གནས་པའི་བྱང་སེམས་ཆོས་ཅན། ཕྱིར་མི་ལྡོག་པའི་དགེ་འདུན་ཡིན་ཏེ། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་ཐབས་ཤེས་ཁྱད་པར་ཅན་རྒྱུད་ལ་སྐྱེས་པའི་བྱང་སེམས་ཡིན་པའི་ཕྱིར། གཉིས་པ་ལ་གསུམ་སྟེ། སྦྱོར་ལམ་པ་ཕྱིར་མི་ལྡོག་པའི་རྟགས། མཐོང་ལམ་པ་ཕྱིར་མི་ལྡོག་པའི་རྟགས། སྒོམ་ལམ་པ་ཕྱིར་མི་ལྡོག་པའི་རྟགས་སོ། །དང་པོ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། དེཾ་རྣམསཾ་སོགས་སོ། །གཉིས་པ་ནི། གཟུགསཾ་དང་གཟུགསཾ་བྱང་སེམས་སྦྱོར་ལམ་པ་ཆོས་ཅན། ཁྱོད་གནས་སྐབས་བླ་མེད་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་ཏེ། དེའི་རྟགས་ཉི་ཤུ་ཡོད་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡངཾ་ལྡོགཾ་སོགས་སོ། །གཉིས་པ་ལ་གཉིས་ཏེ། རྟགས་ཀྱི་དབྱེ་བ་དང་། རྟེན་ལ་སྦྱར་བའོ། །དང་པོ་ནི། གཟུགསཾ་དང་ངོཾ་གཟུགས་སོགས་ལ་བདེན་ཞེན་མངོན་གྱུར་བ་ལྡོག་པའི་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་དྲོད་ལ་གནས་པའི་སེམས་དཔའ་ཆོས་ཅན། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་སྔོན་དུ་སོང་བ་ཡིན་ཏེ། དེས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་ཕྱིར། ཞེས་འབྲས་རྟགས་འགོད། དེ་གྲུབ་ནས། དེ་ཆོས་ཅན། ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འབྱུང་དུ་རུང་སྟེ། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཉམ་གཞག་དང་སྙིང་རྗེ་ཆེན་པོ་ཚང་བའི་ཕྱིར་ཞེས་རང་བཞིན་གྱི་གཏན་ཚིགས་འགོད། དེ་གྲུབ་ནས་དེ་ཆོས་ཅན། གནས་སྐབས་བླ་མེད་རྫོགས་པའི་བྱང་ཆུབ་ལས་ཕྱིར་མི་ལྡོག་སྟེ། ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་འབྱུང་དུ་རུང་བའི་ཕྱིར། ཞེས་མ་དམིགས་པའི་གཏན་ཚིགས་འགོད་དེ། གསུམ་རྒྱུད་འདི་ནི་འགྲེལ་པ་ཆེ་ཆུང་གཉིས་ཀྱི་དགོངས་པ་ཡིན་ཞིང་། དེས་ལྷག་མ་བཅུ་ལ་ཡང་འགྲེའོ། །ལུསཾ་དང་དགེཾ་ལུས་ལ་སྲིན་བུའི་རིགས་བརྒྱད་ཁྲི་མི་འབྱུང་བའི་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་རྩེ་མོ་ལ་གནས་པའི་བྱང་སེམས་ཆོས་ཅན་དུ་བཟུང་ནས་གསུམ་རྒྱུད་འགོད། དེས་ལྷག་མ་ལྔ་ལ་འགྲེའོ། །གཞནཾ་དང་རྟོགསཾ་བདུད་ཀྱིས་ལམ་གཞན་དུ་དཀྲིར་མི་བཏུབ་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་བཟོད་པ་ལ་གནས་པའི་བྱང་སེམས་ཆོས་ཅན་དུ་བཟུང་ནས་གསུམ་རྒྱུད་འགོད། དེས་འོག་མ་ལ་འགྲེའོ། །སངསཾ་དང་འཁོརཾ་སྤྱོད་པ་ཐམས་ཅད་ལ་སངས་རྒྱས་དགེས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་ཆོས་མཆོག་ལ་གནས་པའི་བྱང་སེམས་ཆོས་ཅན་དུ་བཟུང་ནས་གསུམ་རྒྱུད་དུ་འགོད། གཉིས་པ་ནི། དདཾ་བྱང་སེམས་སྦྱོར་ལམ་པ་ཕྱིར་མི་ལྡོག་པའི་གཏན་ཚིགས་ཆོས་ཅན། རྣམ་པ་ཉི་ཤུ་ཡོད་དེ། དྲོད་ཀྱི་རྟགས་བཅུ་གཅིག རྩེ་མོའི་རྟགས་དྲུག བཟོད་པའི་རྟགས་གཉིས། ཆོས་མཆོག་གི་རྟགས་གཅིག་རྣམས་སུ་ཡོད་པའི་ཕྱིར། གཉིས་པ་མཐོང་ལམ་པ་ཕྱིར་མི་ལྡོག་པའི་གཏན་ཚིགས་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། ངེསཾ་པརཾ་བྱམས་མགོན་ཆོས་ཅན། སྦྱོར་ལམ་པ་ཕྱིར་མི་ལྡོག་པའི་མཚན་ཉིད་ཀྱི་འོག་ཏུ་མཐོང་ལམ་པ་ཕྱིར་མི་ལྡོག་པའི་མཚན་ཉིད་འཆད་པའི་རྒྱུ་མཚན་ཡོད་དེ། དེ་ལས་དེ་འབྱུང་བའི་ཕྱིར། གཉིས་པ་ནི། མཐོངཾ་དང་སྡུགཾ་བྱང་སེམས་མཐོང་ལམ་པ་ཆོས་ཅན། ཁྱོད་གནས་སྐབས་སུ་བླ་མེད་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་གཏན་ཚིགས་ཡོད་དེ། དེའི་གཏན་ཚིགས་བྱང་སེམས་ཀྱི་ཤེས་བཟོད་སྐད་ཅིག་མ་བཅུ་དྲུག་ཡོད་པའི་ཕྱིར། གཉིས་པ་ལ་གསུམ་ལས། དང་པོ་ནི། སྐདཾ་ཅིགཾ་སོགས་སོ། །གཉིས་པ་ནི། གཟུགསཾ་སོགས་བྱང་སེམས་ཀྱི་ཤེས་བཟོད་སྐད་ཅིག་མ་བཅུ་དྲུག་གིས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་བཅུ་དྲུག་ཆོས་ཅན། བྱང་སེམས་མཐོང་ལམ་པ་གཞན་ངོར་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པར་སྒྲུབ་པའི་གཏན་ཚིགས་ཡིན་ཏེ། ཆོས་ཉིད་མངོན་སུམ་དུ་རྟོགས་པའི་མཐོང་ལམ་གྱིས་དྲངས་པའི་བྱང་སེམས་མཐོང་ལམ་པའི་རྗེས་ཐོབ་ལུས་ངག་གི་སྤྱོད་པ་ཡིན་པའི་ཕྱིར། གསུམ་པ་ལ་གཉིས་ཏེ། རྟགས་ཀྱི་དབྱེ་བ་དང་། རྟགས་སུ་འགྱུར་བའི་ཚུལ་ལོ། །དང་པོ་ལ་བཞི་ལས་སྡུག་བསྔལ་བདེན་པའི་རྣམ་པ་ནི། རངཾ་གིཾ་གཟུགས་སོགས་ལ་མངོན་ཞེན་བཟློག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་བྱང་སེམས་མཐོང་ལམ་པ་ཆོས་ཅན། སྟོང་ཉིད་མངོན་སུམ་དུ་རྟོགས་པའི་མཉམ་གཞག་སྔོན་དུ་སོང་བ་ཡིན་ཏེ། དེས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་ཕྱིར། ཞེས་འབྲས་རྟགས་བཀོད་ནས་རང་བཞིན་དང་མ་དམིགས་པའི་གཏན་ཚིགས་སྔ་མ་ལས་རིགས་བསྒྲེས་ཏེ་དེས་ལྷག་མ་གསུམ་ལ་ཡང་འགྲེའོ། །ཀུན་འབྱུང་བདེན་པའི་རྣམ་པ་ནི། མིཾ་དགེཾ་ལུས་སེམས་ཡང་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་བྱང་སེམས་མཐོང་ལམ་པ་ཆོས་ཅན་དུ་བཟུང་ནས་གསུམ་རྒྱུད་འགོད། དེས་ལྷག་མ་གསུམ་ལ་འགྲེའོ། །འགོག་བདེན་གྱི་རྣམ་པ་ནི། སྟོངཾ་པཾ་ཕུང་ཁམས་སྐྱེ་མཆེད་ལ་གནས་པ་བཀག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་བྱང་སེམས་མཐོང་ལམ་པ་ཆོས་ཅན་དུ་བཟུང་ནས་གསུམ་རྒྱུད་འགོད། དེས་ལྷག་མ་གསུམ་ལ་འགྲེའོ། །ལམ་བདེན་གྱི་རྣམ་པ་ནི། སྦྱིནཾ་པཾ་སེར་སྣ་སོགས་ལ་གནས་པ་བཀག་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་བྱང་སེམས་མཐོང་ལམ་པ་ཆོས་ཅན་དུ་བཟུང་ནས་གསུམ་རྒྱུད་འགོད། དེས་ལྷག་མ་གསུམ་ལ་འགྲེའོ། །གཉིས་པ་ནི། དེཾ་ལྟརཾ་གཟུགས་སོགས་ལ་མངོན་ཞེན་བཟློག་པ་ལ་སོགས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་བཅུ་དྲུག་ཆོས་ཅན། ཁྱོད་ལ་བྱང་སེམས་ཀྱི་ཤེས་བཟོད་སྐད་ཅིག་མ་བཅུ་དྲུག་གི་མིང་གིས་འདོགས་པའི་རྒྱུ་མཚན་ཡོད་དེ། ཁྱོད་དེའི་འབྲས་བུ་ཡིན་པའི་ཕྱིར། རྣལཾ་འབྱོརཾ་དེ་ལ་དེའི་མིང་གིས་བཏགས་པ་ཆོས་ཅན། དགོས་པ་ཡོད་དེ། ཆོས་ཉིད་མཐོང་བའི་རྣལ་འབྱོར་པའི་རྗེས་ཐོབ་ལུས་ངག་གི་སྤྱོད་པ་རྣམས་སེམས་ཅན་འདུལ་བའི་དགོས་པའི་དབང་མ་གཏོགས་པར་མཉམ་བཞག་གི་རྟོགས་པ་དང་མཐུན་པར་ཤེས་པའི་ཆེད་ཡིན་པའི་ཕྱིར། དེཾ་ལྟརཾ་བྱང་སེམས་ཀྱི་ཤེས་བཟོད་སྐད་ཅིག་མ་བཅུ་དྲུག་ཆོས་ཅན། ཁྱོད་བྱང་སེམས་མཐོང་ལམ་པ་རང་ལས་རྟོགས་པ་དམའ་བའི་གང་ཟག་གི་ངོར་ཐོག་མར་ཕྱིར་མི་ལྡོག་ཏུ་སྒྲུབ་པའི་གཏན་ཚིགས་ཡང་དག་མ་ཡིན་པར་ཐལ། ཁྱོད་བྱང་སེམས་མཐོང་ལམ་པ་ལས་རྟོགས་པ་དམའ་བའི་གང་ཟག་གིས་ཐོག་མར་མི་རྟོགས་པའི་ཕྱིར་རོ། །གསུམ་པ་སྒོམ་ལམ་པ་ཕྱིར་མི་ལྡོག་པའི་གཏན་ཚིགས་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། དེའིཾ་འོགཾ་བྱམས་མགོན་ཆོས་ཅན། བྱང་སེམས་མཐོང་ལམ་པ་ཕྱིར་མི་ལྡོག་པའི་མཚན་ཉིད་ཀྱི་འོག་ཏུ། བྱང་སེམས་ཀྱི་སྒོམ་ལམ་གྱི་ཁྱད་པར་འཆད་པའི་རྒྱུ་མཚན་ཡོད་དེ། ཁྱད་པར་བཟུང་ནས་ཁྱད་པར་ཅན་གྱི་བློ་སྐྱེད་དགོས་པའི་རྒྱུ་མཚན་གྱིས་དེ་ལྟར་བཤད་པའི་ཕྱིར། གཉིས་པ་ནི། སྒོམཾ་དང་སྟོངཾ་བྱང་སེམས་ཀྱི་སྒོམ་ལམ་ཆོས་ཅན། ཐེག་དམན་གྱི་སྒོམ་ལམ་ལས་རྟོགས་རིགས་ཀྱི་སྒོ་ནས་ཟབ་སྟེ། སྒྲོ་སྐུར་དང་བྲལ་བའི་ཟབ་མོ་སྟོང་ཉིད་ལ་སེམས་འཇལ་རྟོགས་གསུམ་བྱེད་པའི་སྒོམ་ལམ་ཡིན་པའི་ཕྱིར། དབུ་མ་པ་ཆོས་ཅན། སྒོམ་ལམ་གྱི་ངོ་བོའི་འདོད་ཚུལ་དངོས་སྨྲ་བའི་འདོད་ཚུལ་ལས་ཟབ་སྟེ། སྒོམ་ལམ་དོན་དམ་པར་ཟབ་མོ་སྟོང་ཉིད་ཀྱི་ངོ་བོར་འདོད་པའི་ཕྱིར། བྱང་སེམས་སྒོམ་ལམ་པ་ཕྱིར་མི་ལྡོག་པའི་གཏན་ཚིགས་རྗེས་ཐོབ་ལུས་ངག་གི་སྤྱོད་པ་ཆོས་ཅན། ཟབ་མོ་ཡིན་ཏེ། སྒྲོ་སྐུར་དང་བྲལ་བའི་ཟབ་མོ་སྟོང་ཉིད་མངོན་སུམ་དུ་རྟོགས་པའི་མཉམ་གཞག་གིས་དྲངས་པའི་གཏན་ཚིགས་ཁྱད་པར་ཅན་ཡིན་པའི་ཕྱིར། གཉིས་པ་ལ་གསུམ་སྟེ། རྟོགས་རིགས་ཟབ་པ་རྒྱས་པར་བཤད། ངོ་བོ་ཟབ་པ་རྒྱས་པར་བཤད། གཏན་ཚིགས་ཟབ་པ་རྒྱས་པར་བཤད་པའོ། །དང་པོ་ལ་གཉིས་ཏེ། སྒོམ་ལམ་གྱི་ངོ་བོ་དང་། སྒོམ་ལམ་གྱི་དབྱེ་བའོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། ཐེག་ཆེན་གྱི་མཐོང་ལམ་གྱི་ཁྱད་པར་བསྟན་ནས་ཁྱད་གཞི་ཐེག་ཆེན་གྱི་སྒོམ་ལམ་གྱི་ཁྱད་པར་འཆད་པའི་རྒྱུ་མཚན་ཡོད་དེ། ཁྱད་པར་བཟུང་ནས་ཁྱད་པར་ཅན་གྱི་བློ་སྐྱེ་བའི་ཕྱིར་རོ། །གཉིས་པ་ནི། ངེསཾ་ཤེསཾ་ས་གཉིས་པའི་མཉམ་གཞག་གིས་དྲངས་པའི་རྗེས་ཐོབ་ཀྱི་ངེས་ཤེས་ཁྱད་པར་ཅན་དེ་ཆོས་ཅན། སྐབས་འདིར་བསྟན་གྱི་སྒོམ་ལམ་ཡིན་ཏེ། སྦྱོར་མཐོང་སྒོམ་གསུམ་མཉམ་གཞག་གི་གནས་སྐབས་སུ་མཐོང་ཟིན་པའི་སྒྲོ་སྐུར་དང་བྲལ་བའི་ཟབ་མོ་སྟོང་ཉིད་ཀྱི་དོན་ལ་སེམས་འཇལ་རྟོག་གསུམ་བྱེད་པའི་སྒོམ་ལམ་ཡིན་པའི་ཕྱིར། གསུམ་པ་ནི། ཐོསཾ་པཾ་ཐེག་ཆེན་གྱི་སྒོམ་ལམ་ཆོས་ཅན། སྐབས་འདིར་བསྟན་གྱི་སྒོམ་ལམ་ཡིན་ཏེ། སྦྱོར་མཐོང་སྒོམ་གསུམ་མཉམ་གཞག་གི་གནས་སྐབས་སུ་མཐོང་བའི་ཟབ་མོ་སྟོང་ཉིད་ཀྱི་དོན་ལ་ཐོས་བསམ་སྒོམ་གསུམ་མམ། སྦྱོར་དངོས་རྗེས་གསུམ་གྱི་ཤེས་རབ་ཀྱིས་སེམས་འཇལ་རྟོག་གསུམ་བྱེད་པའི་སྒོམ་ལམ་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། དེཾ་རྣམསཾ་སོགས་སོ། །གཉིས་པ་ནི། དེཾ་ནིཾ་ཐེག་ཆེན་གྱི་སྒོམ་ལམ་མཉམ་གཞག་གིས་དྲངས་པའི་ངེས་ཤེས་དེ་ལ་དགུར་གྲངས་ངེས་ཏེ། ཐེག་ཆེན་གྱི་སྒོམ་ལམ་མཉམ་གཞག་དེ་ལ་དགུར་གྲངས་ངེས་པའི་ཕྱིར། གསུམ་པ་ནི། བྱངཾ་ཆུབཾ་ཐེག་ཆེན་གྱི་སྒོམ་ལམ་མཉམ་གཞག་ཆོས་ཅན། ཁྱོད་ལ་ཆུང་ངུའི་ཆུང་ངུ་སོགས་དགུར་གྲངས་ངེས་ཏེ། ཁྱོད་ཀྱི་སྤང་བྱ་རྣམ་རྟོག་དེ་ལ་ཆེན་པོའི་ཆེན་པོ་སོགས་དགུར་གྲངས་ངེས་པའི་ཕྱིར། དེཾ་ལྟརཾ་ཐེག་ཆེན་གྱི་སྒོམ་ལམ་མཉམ་གཞག་ཆོས་ཅན། ཁྱོད་རྒྱུན་ཆགས་སུ་བྱུང་སྟེ། ཁམས་གསུམ་ས་དགུའི་རྣམ་རྟོག་ཆེན་པོའི་ཆེན་པོ་སོགས་དགུ་རྣམ་པས་ཅིག་ཆར་སྤོང་བའི་སྒོ་ནས་ཆུང་ངུའི་ཆུང་ངུ་སོགས་དགུ་རྒྱུན་ཆགས་སུ་འབྱུང་བའི་ཕྱིར། གཉིས་པ་ངོ་བོ་ཟབ་པ་རྒྱས་པར་བཤད་པ་ལ་གཉིས་ཏེ། དོན་དམ་གྱི་བྱེད་པ་ལ་རྩོད་པ་སྤང་བ། ཀུན་རྫོབ་ཀྱི་བྱེད་པ་ལ་རྩོད་པ་སྤང་བའོ། །དང་པོ་ལ་གཉིས་ཏེ། འབྲས་བུ་སྐྱེད་པ་མི་འཐད་པར་ཐལ་བ་སྤང་བ། བྱ་བ་བྱེད་པ་མི་འཐད་པ་སྤང་བའོ། །དང་པོ་ལ་གསུམ་ལས། དང་པོ་ནི། རྒྱལཾ་བའིཾ་ཐེག་ཆེན་གྱི་སྒོམ་ལམ་ཆོས་ཅན། ཁྱོད་ལ་དགུར་གྲངས་མ་ངེས་པར་ཐལ། ཁྱོད་ཀྱི་འབྲས་བུ་དགུ་ལས་མང་བའི་ཕྱིར་ཏེ། ཁྱོད་རེ་རེས་ཀྱང་འབྲས་བུ་བསོད་ནམས་གྲངས་མེད་སོགས་བསྐྱེད་པ་རྒྱལ་བའི་ཡུམ་ལས་གསུངས་པའི་ཕྱིར་ཞེ་ན། གཉིས་པ་ནི། འཕགས་པ་ལྟར་ན་གཉིས་ལས། རྩོད་པ་ནི། གྲངསཾ་མེདཾ་ཐེག་ཆེན་གྱི་སྒོམ་ལམ་ཆོས་ཅན། འབྲས་བུ་བསོད་ནམས་གྲངས་མེད་སོགས་བསྐྱེད་པ་མི་འཐད་པར་ཐལ། དོན་དམ་པར་ཟབ་མོ་སྟོང་ཉིད་ཡིན་པའི་ཕྱིར་ཞེ་ན། ལན་ནི། ཀུནཾ་རྫོབཾ་དེ་ཆོས་ཅན། དོན་དམ་པར་ཟབ་མོ་སྟོང་ཉིད་ཡིན་ཡང་ཀུན་རྫོབ་ཏུ་བསོད་ནམས་གྲངས་མེད་སོགས་བསྐྱེད་པར་མི་འགལ་ཏེ། དོན་དམ་པར་ཟབ་མོ་སྟོང་ཉིད་ཡིན་ཀྱང་ཀུན་རྫོབ་དུ་བསོད་ནམས་གྲངས་མེད་སོགས་ཁྱོད་ཀྱི་ཐུགས་རྗེའི་རྒྱུ་མཐུན་གྱི་འབྲས་བུ་ཡིན་པའི་ཕྱིར། གསུམ་པ་ནི་མཚམས་སྦྱར་གྱི་ལན་དུ་སྦྱར་ཏེ། གྲངསཾ་མེདཾ་དེ་ཆོས་ཅན། དོན་དམ་པར་བསོད་ནམས་གྲངས་མེད་གཞལ་མེད་སོགས་བསྐྱེད་པའི་སྒོ་ནས་དགུར་གྲངས་མ་ངེས་པར་ཐལ་བའི་སྐྱོན་མེད་དེ། དོན་དམ་པར་བསོད་ནམས་གྲངས་མེད་སོགས་སྟོང་ཉིད་སོགསཾ་ཀྱི་ངོ་བོ་ཡིན་པས་ཐ་དད་དུ་མེད་པའི་ཕྱིར། ཀུནཾ་རྫོབཾ་དེ་ཆོས་ཅན། ཀུན་རྫོབ་ཏུ་འབྲས་བུ་བསོད་ནམས་གྲངས་མེད་སོགས་བསྐྱེད་པའི་རྒྱུ་མཚན་གྱིས་ཁྱོད་ལ་དགུར་གྲངས་མ་ངེས་པར་ཐལ་བའི་སྐྱོན་མེད་དེ། ཀུན་རྫོབ་ཏུ་ཁྱོད་ཀྱི་འབྲས་བུ་བསོད་ནམས་གྲངས་མེད་སོགས་ཀྱིས་དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་གྱིས་ཚོགས་གཉིས་བསྒོམས་པའི་རྒྱུ་མཐུན་གྱི་འབྲས་བུ་ཡིན་གྱི་ཁྱོད་ཀྱི་ངོ་བོ་མ་ཡིན་པས་ངོ་བོའི་གྲངས་ངེས་ལ་མི་གནོད་པའི་ཕྱིར་རོ། །གཉིས་པ་ལ་གཉིས་ཏེ། རྩོད་པ་དང་ལན་ནོ། །དང་པོ་ལ་གཉིས་ལས། དང་པོ་ནི། སྟོངཾ་པཾ་དངོས་པོ་བརྗོད་དུ་མེད་པ་ལ་ཞེས་སོགས་ཀྱི་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། དོན་དམ་པར་སྟོང་ཉིད་ཡིན་ན། སྤང་གཉེན་ཉམས་འཕེལ་གྱི་བྱ་བ་བྱེད་པར་མི་རུང་ངོ་སྙམ་པའི་དོགས་པ་བསུ་བའི་ཆེད་ཡིན་པའི་ཕྱིར། གཉིས་པ་ནི། དངོསཾ་དང་ཆོསཾ་དེ་ཆོས་ཅན། སྤང་གཉེན་ཉམས་འཕེལ་གྱི་བྱ་བ་བྱེད་པར་མི་རུང་བར་ཐལ། སྒོམ་པ་ཕུལ་དུ་བྱུང་བ་བྱར་མེད་པའི་ཕྱིར་ཏེ། དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་པའི་ཕྱིར། དེཾ་བསཾ་དེ་ཆོས་ཅན། སྤང་གཉེན་ཉམས་འཕེལ་གྱི་བྱ་བ་བྱེད་པའི་ཆེད་དུ་ཁྱོད་སྟོན་པའི་གཞུང་ཉེ་བར་དགོད་པར་མི་བྱ་བ་ཁོ་ན་ཡིན་པར་ཐལ། སྤང་གཉེན་ཉམས་འཕེལ་གྱི་བྱ་བ་མི་བྱེད་པའི་ཕྱིར་ཞེ་ན། གཉིས་པ་ལ་གསུམ་སྟེ། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། བྱངཾ་ཆུབཾ་ཐེག་པ་ཆེན་པོའི་སྒོམ་ལམ་ཆོས་ཅན། ཁྱོད་དོན་དམ་པར་སྟོང་ཉིད་ཡིན་ཡང་ཀུན་རྫོབ་དུ་སྤང་གཉེན་ཉམས་འཕེལ་གྱི་བྱ་བ་བྱེད་པའི་དཔེ་ཡང་དག་ཡོད་དེ། སྐུ་གསུམ་པོ་དོན་དམ་པར་གཟུང་འཛིན་གྱི་སྤྲོས་པ་དང་བྲལ་ཡང་ཀུན་རྫོབ་ཏུ་གཟུང་འཛིན་གྱི་སྤྲོས་པར་བསྟན་པའི་སྒོ་ནས་གདུལ་བྱའི་དོན་བྱེད་པ་དེ་ཁྱོད་དེ་ལྟར་བྱེད་པའི་དཔེ་ཡང་དག་ཡིན་པའི་ཕྱིར། གསུམ་པ་ལ་གཉིས་ཏེ། ཀུན་རྫོབ་ཏུ་མ་ངེས་པའི་ལན་དང་། དོན་དམ་དུ་འདོད་པའི་ལན་ནོ། །དང་པོ་ལ་གཉིས་ཏེ། དཔེ་སྒྲུབ་པ་དང་། དོན་ལ་སྦྱར་བའོ། །དང་པོ་ནི། ཇིཾ་ལྟརཾ་སྐུ་གསུམ་པོ་ཆོས་ཅན། དོན་དམ་པར་གཟུང་འཛིན་གྱི་སྤྲོས་པ་དང་བྲལ་ཡང་ཀུན་རྫོབ་ཏུ་གཟུང་འཛིན་གྱི་སྤྲོས་པར་བསྟན་པའི་སྒོ་ནས་གདུལ་བྱའི་དོན་མཛད་པ་མི་འགལ་ཏེ། དོན་དམ་པར་གཟུང་འཛིན་གྱི་སྤྲོས་པ་དང་བྲལ་ཡང་། ཀུན་རྫོབ་ཏུ་གདུལ་བྱའི་སྐྱེ་བོ་རྣམས་ཀྱིས་ཚོགས་གཉིས་ཀྱི་རྗེས་སུ་མཐུན་པར་གཟུགས་སྐུ་ཁྱད་པར་ཅན་སྣང་བའི་སྒོ་ནས་གདུལ་བྱའི་དོན་མཛད་པའི་ཕྱིར། གཉིས་པ་ནི། སྒོམཾ་ལམཾ་པསཾ་ཐེག་ཆེན་གྱི་སྒོམ་ལམ་ཆོས་ཅན། དོན་དམ་པར་སྟོང་ཉིད་ཡིན་ཡང་ཀུན་རྫོབ་ཏུ་སྤང་གཉེན་ཉམས་འཕེལ་གྱི་བྱ་བ་བྱེད་པ་མི་འགལ་ཏེ། དེ་ལྟར་བྱེད་པའི་མཐུན་དཔེ་ཡང་དག་ཡོད་པའི་ཕྱིར། གཉིས་པ་ནི། དོནཾ་དམཾ་ཐེག་ཆེན་གྱི་སྒོམ་ལམ་ཆོས་ཅན། དོན་དམ་པར་སྤང་གཉེན་ཉམས་འཕེལ་གྱི་བྱ་བ་མི་བྱེད་པར་ཐལ། དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མ་ཡིན་པར་ཐལ། དབུ་མ་པས་ཁྱོད་ལ་འདོད་ལན་དོན་མཐུན་དུ་ཐེབས་པའི་ཕྱིར། གཉིས་པ་ཀུན་རྫོབ་ཀྱི་བྱེད་པ་ལ་རྩོད་པ་སྤོང་བ་ལ་གཉིས་ཏེ། རྩོད་པ་དང་། ལན་ནོ། །དང་པོ་ལ་གཉིས་ལས། དང་པོ་ནི། དེཾ་ལྟརཾ་སེམས་ནི་སྔ་མས་ཞེས་སོགས་ཚིག་རྐང་གཉིས་གསུངས་པ་ཆོས་ཅན། དགོས་པ་ཡོད་དེ། ཐེག་པ་ཆེན་པོའི་སྒོམ་ལམ་དེས་ཀུན་རྫོབ་ཏུ་ཡང་བྱང་ཆུབ་སྐྱེད་པར་མི་རིགས་སོ་སྙམ་པའི་དོགས་པ་བསུ་བའི་ཆེད་ཡིན་པའི་ཕྱིར། གཉིས་པ་ནི། སེམསཾ་དང་སྔཾ་ཐེག་ཆེན་གྱི་སྒོམ་ལམ་ཆོས་ཅན། སྐད་ཅིག་སྔ་ཕྱི་གང་རུང་རེ་རེ་ཁོ་ནས་བྱང་ཆུབ་བསྐྱེད་པར་རིགས་པ་མ་ཡིན་ཏེ། སྐད་ཅིག་སྔ་ཕྱི་གང་རུང་རེ་རེ་ཁོ་ན་ལ་བྱང་ཆུབ་བསྒྲུབ་པའི་རྒྱུ་ཚོགས་མ་ཚང་བའི་ཕྱིར། འདོདཾ་པའིཾ་ཐེག་ཆེན་གྱི་སྒོམ་ལམ་གྱི་སེམས་བསྐྱེད་ཆོས་ཅན། རིགས་མཐུན་དུ་མ་ཅིག་ཆར་འབྱུང་བས་བྱང་ཆུབ་བསྐྱེད་པར་རིགས་པ་མ་ཡིན་ཏེ། རིགས་མཐུན་དུ་མ་ཅིག་ཆར་འབྱུང་བ་མི་སྲིད་པའི་ཕྱིར་རོ། །བླཾ་ནཾ་དེ་ཆོས་ཅན། རིམ་གྱིས་འབྱུང་བ་དུ་མས་བྱང་ཆུབ་བསྐྱེད་པར་རིགས་པ་མ་ཡིན་ཏེ། སྔ་ཕྱི་ཕན་ཚུན་འབྲེལ་བ་མེད་པའི་ཕྱིར་ཏེ། ཕྱི་མ་བྱུང་མ་ཐག་ཏུ་སྔ་མ་འཇིག་པའི་ཕྱིར། དེཾ་བསཾ་བླ་ན་མེད་པའི་བྱང་ཆུབ་ཆོས་ཅན། ཁྱོད་ཀྱིས་དོན་ཁྱད་པར་ཅན་སྣང་བའི་སེམས་བསྐྱེད་པའི་སྒོ་ནས་དོན་བྱེད་པ་མ་ཡིན་པར་ཐལ། ཁྱོད་ཀྱི་རྒྱུས་ཁྱོད་བསྐྱེད་པའི་ཚུལ་ལ་བརྟགས་ན་མི་འཐད་པའི་ཕྱིར་ཞེ་ན། གཉིས་པ་ལ་གསུམ་ལས། དང་པོ་ནི། དེཾ་ནིཾ་སོགས་སོ། །གཉིས་པ་ནི། མརཾ་མེཾ་ཐེག་ཆེན་སྒོམ་ལམ་གྱི་སེམས་བསྐྱེད་ཆོས་ཅན། ཁྱོད་ཀྱིས་བྱང་ཆུབ་བསྐྱེད་ཚུལ་མཐའ་གསུམ་དུ་བརྟགས་ན་མི་འཐད་པའི་སྐྱོན་མེད་དེ། ཁྱོད་ཀྱིས་བྱང་ཆུབ་བསྐྱེད་ཚུལ་གྱི་མཐའ་ཕྱི་མའི་བསྒྲུབ་བྱེད་དེ་ལ་མར་མེས་སྡོང་བུ་སྣུམ་ལྡན་བསྲེག་པའི་དཔེས་ཁྱབ་པ་མ་ངེས་པའི་ལན་ཐེབས་པའི་ཕྱིར། གསུམ་པ་ལ་གསུམ་སྟེ། དཔེ་སྒྲུབ་པ། དོན་ལ་སྦྱར་བ། དོན་གཞན་ཡང་མཚོན་པའི་ཚུལ་ལོ། །དང་པོ་ལ་གསུམ་སྟེ། ལྟོས་མེད་དུ་མི་བསྲེག་པ། ལྟོས་ནས་བསྲེག་པ། དེ་གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། སྐད་ཅིག་དང་པོས་ལྟོས་མེད་དུ་མི་བསྲེག་པ། དེ་གཉིས་པས་ལྟོས་མེད་དུ་མི་བསྲེག་པའོ། །དང་པོ་ནི། ཇིཾ་ལྟརཾ་མར་མེའི་མེ་ལྕེ་སྐད་ཅིག་དང་པོ་ཆོས་ཅན། མེ་ལྕེ་སྐད་ཅིག་གཉིས་པ་ལ་མ་ལྟོས་པར་སྡོང་བུ་སྣུམ་ལྡན་མི་བསྲེག་སྟེ། མེ་ལྕེ་སྐད་ཅིག་གཉིས་པ་ལ་མ་ལྟོས་པར་སྡོང་བུ་སྣུམ་ལྡན་བསྲེག་ནུས་ཀྱི་ནུས་པ་ཁྱད་པར་ཅན་དུ་མ་སྐྱེས་པའི་ཕྱིར། གཉིས་པ་ནི། དེཾ་ནིཾ་མར་མེའི་མེ་ལྕེ་སྐད་ཅིག་གཉིས་པ་ཆོས་ཅན། མར་མེའི་མེ་ལྕེ་སྐད་ཅིག་དང་པོ་ལ་མ་ལྟོས་པར་སྡོང་བུ་སྣུམ་ལྡན་མི་བསྲེག་སྟེ། མར་མེའི་མེ་ལྕེ་སྐད་ཅིག་གཉིས་པ་ལ་མ་ལྟོས་པར་ཀུན་རྫོབ་ཏུ་ཡང་འབྱུང་བ་མེད་པའི་ཕྱིར། གཉིས་པ་ནི། གངཾ་གིཾ་མར་མེའི་མེ་ལྕེ་ཆོས་ཅན། སྐད་ཅིག་སྔ་ཕྱི་ཕན་ཚུན་ལྟོས་ནས་སྡོང་བུ་སྣུམ་ལྡན་བསྲེག་སྟེ། སྐད་ཅིག་སྔ་མ་སྔ་མས་ཕྱི་མ་ཕྱི་མ་སྡོང་བུ་སྣུམ་ལྡན་བསྲེག་ནུས་ཀྱི་ནུས་པ་ཁྱད་པར་ཅན་དུ་བྱས་པའི་ཕྱིར། གསུམ་པ་ནི། དེཾ་བསཾ་མར་མེའི་མེ་ལྕེ་ཆོས་ཅན། སྐད་ཅིག་སྔ་ཕྱི་ཕན་ཚུན་མ་ལྟོས་པར་སྡོང་བུ་སྣུམ་ལྡན་མི་བསྲེག་སྟེ། དེ་ལྟར་བསྒྲུབས་ཟིན་པའི་ཕྱིར། གཉིས་པ་ནི། སྐདཾ་ཅིགཾ་ཐེག་ཆེན་སྒོམ་ལམ་གྱི་སེམས་བསྐྱེད་ཆོས་ཅན། སྐད་ཅིག་སྔ་ཕྱི་ཕན་ཚུན་ལྟོས་ནས་བྱང་ཆུབ་ཐོབ་པར་རིགས་ཏེ། སྐད་ཅིག་སྔ་མ་སྔ་མས་ཕྱི་མ་ཕྱི་མ་བྱང་ཆུབ་ཐོབ་པའི་ནུས་པ་ཁྱད་པར་ཅན་དུ་བྱས་པའི་ཕྱིར། གསུམ་པ་ནི། ཇིཾ་སྐདཾ་མར་མེའི་མེ་ལྕེས་སྡོང་བུ་སྣུམ་ལྡན་བསྲེག་པའི་དཔེ་ཆོས་ཅན། དོན་གཞན་ཡང་མཚོན་ནུས་ཏེ། འོག་ནས་འཆད་པའི་ཟབ་མོའི་ཆོས་ཉིད་རྣམ་པ་བརྒྱད་ཀྱང་མི་འགལ་བར་མཚོན་ནུས་པའི་ཕྱིར། གསུམ་པ་གཏན་ཚིགས་ཟབ་པ་རྒྱས་པར་བཤད་པ་ལ་གསུམ་ལས། དང་པོ་ནི། སྒོམཾ་པའིཾ་ཟབ་མོ་རྣམ་པ་བརྒྱད་གང་ལ་ཡོད་པའི་ཡུལ་དང་བཅས་པ་བསྟན་པ་ཆོས་ཅན། དགོས་པ་ཡོད་དེ། ཐེག་ཆེན་སྒོམ་ལམ་པ་ཕྱིར་མི་ལྡོག་པའི་མཚན་ཉིད་རྟོགས་པའི་ཆེད་ཡིན་པའི་ཕྱིར། གཉིས་པ་ནི། སྐྱེཾ་བཾ་ཐེག་ཆེན་སྒོམ་ལམ་པ་ཆོས་ཅན། ཁྱོད་ཕྱིར་མི་ལྡོག་པའི་གཏན་ཚིགས་ཟབ་མོ་རྣམ་པ་བརྒྱད་ཡོད་དེ། ཁྱོད་ཕྱིར་མི་ལྡོག་པར་བསྒྲུབ་པའི་གཏན་ཚིགས་ཟབ་མོ་ལ་ཡུལ་སྐྱེ་འགག་ཟབ་པ་གཉིས། ཆོས་ཉིད་དེ་བཞིན་ཉིད་ཟབ་པ་གཅིག སྤང་བྱ་གཟུང་འཛིན་ཟབ་པ་གཉིས། ཉམས་ལེན་སྤྱོད་པ་ཟབ་པ་གསུམ་རྣམས་སུ་ཡོད་པའི་ཕྱིར། གསུམ་པ་ནི། སྐདཾ་ཅིགཾ་ཐེག་ཆེན་སྒོམ་ལམ་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དེ་ཆོས་ཅན། སྐྱེ་བ་ཟབ་པ་ཡིན་ཏེ། སྐྱེ་བ་ཟབ་པ་རྟོགས་པའི་མཉམ་གཞག་གིས་དྲངས་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་ཡིན་པའི་ཕྱིར། དེས་འོག་མ་རྣམས་ལ་འགྲེའོ། །བསམཾ་གྱིསཾ་ཐེག་ཆེན་སྒོམ་ལམ་པའི་རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་ཆོས་ཅན། ཟབ་མོ་ཡིན་ཏེ། འགལ་བ་ལྟར་སྣང་ཡང་མི་འགལ་བའི་སྒོ་ནས་རྟོག་གེའི་བློས་བསམ་གྱིས་མི་ཁྱབ་པ་ཡིན་པའི་ཕྱིར། གསུམ་པ་ངོ་བོའི་སྒོ་ནས་དོན་བསྡུ་བ་ནི། སློབཾ་པཾ་སོགས་སོ། །གསུམ་པ་བསྒོམ་བྱ་སྦྱོར་བའི་ངོ་བོ་ལ་གསུམ་སྟེ། ཆོས་སྐུའི་རྒྱུ་སྲིད་ཞི་མཉམ་ཉིད་ཀྱི་སྦྱོར་བ། གཟུགས་སྐུའི་རྒྱུ་ཞིང་དག་པའི་སྦྱོར་བ། ཕྲིན་ལས་ཀྱི་རྒྱུ་ཐབས་ལ་མཁས་པའི་སྦྱོར་བའོ། །དང་པོ་ལ་གསུམ་ལས། དང་པོ་ནི། སློབཾ་པའིཾ་བྱམས་མགོན་ཆོས་ཅན། སློབ་པ་ཕྱིར་མི་ལྡོག་པའི་ཚོགས་ཀྱི་འོག་ཏུ་སྲིད་ཞི་མཉམ་ཉིད་ཀྱི་སྦྱོར་བ་འཆད་པའི་རྒྱུ་མཚན་ཡོད་དེ། ས་བདུན་པ་མན་ཆད་ཀྱི་ཕྱིར་མི་ལྡོག་པའི་རྟགས་ཐོབ་ནས་སྲིད་ཞི་མཉམ་ཉིད་ཀྱི་སྦྱོར་བ་སྒོམ་དགོས་པའི་ཕྱིར། གཉིས་པ་ནི། ཆོསཾ་རྣམསཾ་ས་བརྒྱད་པའི་ཡེ་ཤེས་ཆོས་ཅན། སྲིད་ཞི་མཉམ་ཉིད་ཀྱི་སྦྱོར་བ་ཡིན་ཏེ། རྗེས་ཐོབ་དུ་ཡང་འཁོར་འདས་ལ་བླང་དོར་ཐ་དད་དུ་མ་ིརྟོག་པར་མཉམ་པ་ཉིད་དུ་རྟོགས་པའི་དག་སའི་ཡེ་ཤེས་ཡིན་པའི་ཕྱིར། ལཾས་མེཾད་འཁོར་འདས་ཀྱི་ཆོས་རྣམས་རྨི་ལམ་དང་འདྲ་བ་ཆོས་ཅན། ཁྱོད་ལ་ཆོས་མཐུན་གྱི་ཀླན་ཀ་མེད་དེ། ཁྱོད་ཀྱི་ཀླན་ཀའི་ལན་མདོ་ལས་བསལ་ཟིན་པའི་ཕྱིར། གསུམ་པ་ལ་གཉིས་ཏེ། དངོས་དང་ཀླན་ཀ་སྤང་བའོ། །དང་པོ་ནི། འཁོརཾ་བཾ་རྩ་བའི་ངག་དོན་འགོད། གཉིས་པ་ལ་གཉིས་ཏེ། ཀླན་ཀ་དང་ལན་ནོ། །དང་པོ་ནི། རྨིཾ་ལམཾ་གཉིད་མ་ལོག་པའི་གནས་སྐབས་ན་ཆོས་ཅན། དགེ་མི་དགེའི་ལས་མེད་པར་ཐལ། རྨི་ལམ་དང་འདྲ་བ་ཉིད་ཡིན་པའི་ཕྱིར་ཞེ་ན། གཉིས་པ་ལ་གསུམ་སྟེ། རྟགས་མ་ངེས་པར་བསྟན་པ། དཔེ་མ་གྲུབ་པར་བསྟན་པ། ཀླན་ཀ་བསལ་བས་གྲུབ་པའི་དོན་ནོ། །དང་པོ་ལ་གཉིས་ཏེ། དཔེ་སྒྲུབ། དོན་ལ་སྦྱར་བའོ། །དང་པོ་ལ་གཉིས་ཏེ། དོན་དམ་སྐད་ཅིག་མ་ལ་དགེ་སྡིག་གི་ལས་མ་གྲུབ་པ། ཀུན་རྫོབ་རྒྱུན་ལ་ལྟོས་ནས་དགེ་སྡིག་གི་ལས་གྲུབ་པའོ། །དང་པོ་ནི། ཇིཾ་ལྟརཾ་ཉན་ཐོས་སྡེ་གཉིས་ཀྱི་ལུགས་ལ་ཡང་དོན་དམ་སྐད་ཅིག་མ་ལ་ཆོས་ཅན། སྲོག་གཅོད་ཀྱི་ལས་མེད་དེ། བསད་བྱའི་སྲོག་རང་རྒྱུ་ལས་རྒྱུ་གཞན་མེད་པར་རང་གི་ངང་གིས་འཇིགས་པའི་ཕྱིར་དང་། ལས་ཀྱི་དབང་གིས་བསད་བྱའི་སྲོག་འགག་པ་ཡིན་པའི་ཕྱིར། དེ་ཆོས་ཅན། སྲོག་གཅོད་སྤངས་པའི་དགེ་བ་ཡོད་པ་མིན་ཏེ། སྲོག་གཅོད་ཀྱི་ལས་མེད་པའི་ཕྱིར། གཉིས་པ་ནི། རྒྱུནཾ་འཇུགཾ་ཀུན་རྫོབ་རྒྱུན་ལ་ཆོས་ཅན། དགེ་སྡིག་གི་ལས་ཡོད་དེ། ཚུལ་མིན་ཡིད་བྱེད་ཀྱིས་ཀུན་ནས་བསླངས་ཏེ། སྲོག་གི་རྒྱུན་འཇུག་པ་དང་འགལ་བའི་དངོས་པོ་བསྐྱེད་པ་ལ་སྲོག་གཅོད་ཀྱི་ལས་དང་ཚུལ་བཞིན་ཡིད་བྱེད་ཀྱི་སྒོ་ནས་མི་དགེ་བའི་རྒྱུན་འཇུག་པ་དང་འགལ་བའི་དངོས་པོ་བསྐྱེད་པ་ལ་དགེ་བར་འཇོག་པའི་ཕྱིར། གཉིས་པ་ནི། དངོས་པོ་དབུ་མ་པ་ལའང་ཆོས་ཅན། དོན་དམ་པར་དགེ་སྡིག་གི་ལས་མེད་ཀྱང་ཀུན་རྫོབ་ཏུ་དགེ་སྡིག་གི་ལས་འཇོག་པ་མི་འགལ་ཏེ། དེ་ལྟར་འཇོག་པའི་མཐུན་དཔེ་ཡང་དག་ཡོད་པའི་ཕྱིར། གཉིས་པ་ལ་གཉིས་ཏེ། ཉི་ཤུ་པའི་ལུང་གིས་མ་གྲུབ་པར་བསྟན་པ། ཤེར་ཕྱིན་གྱི་ལུང་གིས་མ་གྲུབ་པར་བསྟན་པའོ། །དང་པོ་ནི། གཞནཾ་ཡངཾ་རྨི་ལམ་ཆོས་ཅན། ཁྱོད་ཀུན་རྫོབ་ཏུ་ལས་མེད་པའི་དཔེར་མ་གྲུབ་སྟེ། ཉི་ཤུ་པ་ལས་ཁྱོད་ཀྱི་གནས་སྐབས་ན་ལས་དམན་པ་སོགས་པ་ཡོད་པར་གསུངས་པས་སོ། །གཉིས་པ་ནི། དེཾ་བཞིནཾ་ནིཾ་གཞི་ཆོས་འདྲ། ཤེར་ཕྱིན་གྱི་མདོ་ལས་ཁྱོད་ཀྱི་གནས་སྐབས་ན་ལས་སྤྱད་པར་རྨིས་པ་དེ་སད་པའི་གནས་སྐབས་སུ་གསོས་བཏབ་ན་ལས་སོགས་པར་གསུངས་པའི་ཕྱིར། གསུམ་པ་ནི། འཁོརཾ་བཾ་དོན་དམ་པར་འཁོར་འདས་མཉམ་པ་ཉིད་ཡིན་ཏེ། དོན་དམ་པར་འཁོར་འདས་མཉམ་པ་ཉིད་དུ་བསྟན་པ་ན་ཆོས་མཐུན་གྱི་ཀླན་ཀ་མེད་པའི་ཕྱིར། གཉིས་པ་གཟུགས་སྐུའི་རྒྱུ་ཞིང་དག་པའི་སྦྱོར་བ་ལ་གཉིས་ལས། དང་པོ་ནི། གཉིསཾ་ཀཾ་བྱམས་མགོན་ཆོས་ཅན། སྲིད་ཞི་མཉམ་ཉིད་ཀྱི་སྦྱོར་བའི་འོག་ཏུ་ཞིང་དག་པའི་སྦྱོར་བ་འཆད་པའི་རྒྱུ་མཚན་ཡོད་དེ། སྲིད་ཞི་མཉམ་ཉིད་དུ་སྒོམ་པའི་གང་ཟག་དེ་ཞིང་དག་པའི་སྦྱོར་བའི་འབྲས་བུ་མཐར་ཕྱིན་པར་འགྱུར་བའི་ཕྱིར། གཉིས་པ་ནི། སེམསཾ་དང་སེམསཾ་ས་བརྒྱད་པའི་ཡེ་ཤེས་ཆོས་ཅན། ཞིང་དག་པའི་སྦྱོར་བ་ཡིན་ཏེ། སྣོད་བཅུད་ཀྱི་ཞིང་མ་དག་པའི་གཉེན་པོར་སྣོད་བཅུད་ཀྱི་ཞིང་དག་པ་སོ་སོར་སྒོམ་པའི་དག་སའི་ཡེ་ཤེས་ཡིན་པའི་ཕྱིར། གསུམ་པ་ཕྲིན་ལས་ཀྱི་རྒྱུ་ཐབས་མཁས་ཀྱི་སྦྱོར་བ་ལ་གསུམ་ལས། དང་པོ་ནི། རངཾ་གིཾ་བྱམས་མགོན་ཆོས་ཅན། ཞིང་དག་སྦྱོར་གྱི་འོག་ཏུ་ཐབས་མཁས་སྦྱོར་བ་འཆད་པའི་རྒྱུ་མཚན་ཡོད་དེ། ཞིང་དག་པའི་སྦྱོར་བ་སྒོམ་པའི་གང་ཟག་དེ་ཐབས་མཁས་སྦྱོར་བའི་འབྲས་བུ་ལ་འཇུག་པར་འགྱུར་བའི་ཕྱིར། གཉིས་པ་ནི། ཡུལཾ་དངཾ་ཐབས་མཁས་སྦྱོར་བ་ཆོས་ཅན། ཁྱོད་ལ་རྣམ་པ་བཅུ་ཡོད་དེ། ཁྱོད་ཀྱི་ཡུལ་ཐབས་མཁས་དེ་ལ་བཅུ་ཡོད་པའི་རྒྱུ་མཚན་གྱིས་ཁྱོད་ལ་ཡང་བཅུར་ཕྱེ་བ་ཡིན་པའི་ཕྱིར། གསུམ་པ་ལ་གཉིས་ཏེ། ཡུལ་ཐབས་མཁས་བཤད་པ་དང་། ཡུལ་ཅན་སྦྱོར་བ་བཤད་པའོ། །དང་པོ་ནི། བརཾ་ཆདཾ་སངས་རྒྱས་ཀྱི་ཡེ་ཤེས་ཆོས་ཅན། བདུད་ལས་འདས་པའི་ཐབས་ལ་མཁས་པ་ཡིན་ཏེ། བདུད་བཞི་མ་ལུས་པར་སྤངས་པའི་ཡེ་ཤེས་ཡིན་པའི་ཕྱིར། དེས་འོག་མ་རྣམས་ལ་འགྲེའོ། །གཉིས་པ་ནི། ཤེསཾ་རབཾ་ས་བརྒྱད་པའི་ཡེ་ཤེས་ཆོས་ཅན། ཐབས་ལ་མཁས་པའི་སྦྱོར་བ་ཡིན་ཏེ། ཡུལ་ཐབས་མཁས་བཅུ་པོ་མངོན་སུམ་དུ་བྱ་བའི་དུས་དང་དུས་མ་ཡིན་པ་ཤེས་ནས་དུས་ལ་མ་བབས་པ་ན་མངོན་དུ་མི་བྱེད་ཅིང་། དུས་ལ་བབས་པ་ན་མངོན་དུ་བྱེད་པའི་དག་སའི་རྣལ་འབྱོར་ཡིན་པའི་ཕྱིར། གསུམ་པ་སྐབས་ཀྱི་སྒོ་ནས་འཇུག་བསྡུ་བ་ནི། ཤེསཾ་རབཾ་སོགས་སོ།། །།གཉིས་པ་དབང་ཐོབ་པའི་ཚུལ་གྱིས་སྒོམ་པ་རྩེ་མོའི་སྦྱོར་བ་ལ་གསུམ་སྟེ། འབྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། རྣམཾ་པཾ་བྱམས་མགོན་ཆོས་ཅན། རྣམ་རྫོགས་སྦྱོར་བའི་འོག་ཏུ་རྩེ་སྦྱོར་འཆད་པའི་རྒྱུ་མཚན་ཡོད་དེ། རྣམ་རྫོགས་སྦྱོར་བ་བསྒོམས་པ་ལས་བསྒོམ་བྱའི་དོན་ལ་གསལ་སྣང་ཐོབ་པའི་རྩེ་སྦྱོར་འབྱུང་བའི་ཕྱིར། གཉིས་པ་ལ་བཞི་སྟེ། སྦྱོར་ལམ་རྩེ་སྦྱོར། མཐོང་ལམ་རྩེ་སྦྱོར། སྒོམ་ལམ་རྩེ་སྦྱོར། བར་ཆད་མེད་པའི་རྩེ་སྦྱོར་རོ། །དང་པོ་ལ་གཉིས་ཏེ། སོ་སོར་བཤད་པ་དང་། དོན་བསྡུ་བའོ། །དང་པོ་ལ་བཞི་སྟེ། རྟགས་ཀྱིས་མཚོན་པའི་རྩེ་སྦྱོར། རྣམ་འཕེལ་གྱིས་མཚོན་པའི་རྩེ་སྦྱོར། བརྟན་པ་གཉིས་ཀྱིས་མཚོན་པའི་རྩེ་སྦྱོར། སེམས་ཀུན་ཏུ་གནས་པས་མཚོན་པའི་རྩེ་སྦྱོར་རོ། །དང་པོ་ལ་གཉིས་ལས། རྩ་བ་ནི། རྨིཾ་ལམཾ་བྱང་སེམས་ཀྱི་སྦྱོར་ལམ་དྲོད་ཀྱི་ཡེ་ཤེས་ཆོས་ཅན། སྦྱོར་ལམ་རྩེ་སྦྱོར་ཡིན་ཏེ། རྩེ་སྦྱོར་ཐོབ་པའི་རྟགས་བཅུ་གཉིས་ཀྱིས་མཚོན་ནས་མདོ་ལས་དངོས་སུ་བསྟན་པའི་ངེས་འབྱེད་ཆ་མཐུན་ཡིན་པའི་ཕྱིར། འགྲེལ་པ་ནི། ཤིནཾ་ཏུཾ་དྲོད་ལ་གནས་པའི་སེམས་དཔའ་ཆོས་ཅན། རྩེ་སྦྱོར་ཐོབ་པ་ཡིན་ཏེ། ཤིན་ཏུ་གོམས་པའི་དབང་གིས་རྨི་ལམ་གྱི་གནས་སྐབས་ན་ཡང་ཆོས་ཐམས་ཅད་རྨི་ལམ་དང་འདྲ་བ་ལ་སོགས་པར་བལྟ་བའི་ཕྱིར། དེས་འོག་མ་ལྔ་ལ་འགྲེ། གྲོངཾ་ཁྱེརཾ་ཆོས་ཅན་དང་ཆོས་འདྲ། བདག་བྱང་ཆུབ་ཏུ་ལུང་བསྟན་ན་མེ་འདི་ཞི་བར་གྱུར་ཅིག་ཅེས་བརྗོད་པས་གྲོང་ཁྱེར་ལ་སོགས་པ་ཚིག་པ་ཞི་བར་བྱེད་པའི་བདེན་པའི་བྱིན་རླབས་གྲུབ་པ་ཡིན་པའི་ཕྱིར། དེས་འོག་མ་ལྔ་ལ་འགྲེ། ཞེསཾ་བྱཾ་དེ་ཆོས་ཅན། ཁྱོད་ཀྱིས་རྩེ་སྦྱོར་ཐོབ་པའི་རྟགས་བཅུ་གཉིས་ཡོད་དེ། ཁྱོད་ཀྱིས་རྩེ་སྦྱོར་ཐོབ་པའི་རྨི་ལམ་གྱི་རྟགས་དྲུག སད་པའི་རྟགས་དྲུག་རྣམས་སུ་ཡོད་པའི་ཕྱིར། གཉིས་པ་ལ་གསུམ་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། འཛམཾ་བཾུ་རྩེ་མོ་ལ་གནས་པའི་བྱང་སེམས་ཀྱི་མངོན་རྟོགས་ཆོས་ཅན། རྩེ་མོའི་རྩེ་སྦྱོར་ཡིན་ཏེ། བསོད་ནམས་རྣམ་པར་འཕེལ་བ་བཅུ་དྲུག་གིས་མཚོན་ནས་མདོ་ལས་དངོས་སུ་བསྟན་པའི་ངེས་འབྱེད་ཆ་མཐུན་ཡིན་པའི་ཕྱིར། གསུམ་པ་ནི། འཛམཾ་བུའིཾ་བྱང་སེམས་ཀྱི་སྦྱོར་ལམ་རྩེ་མོ་ཆོས་ཅན། བསོད་ནམས་རྣམ་པར་འཕེལ་བ་ཡིན་ཏེ། སྟོང་གསུམ་གྱི་འཇིག་རྟེན་གྱི་སེམས་ཅན་སྙེད་ཀྱིས་དེ་བཞིན་གཤེགས་པ་ལ་མཆོད་པ་ལས་ཁྱོད་ཀྱི་བསོད་ནམས་ལྷག་པའི་ཕྱིར། དེ་ཆོས་ཅན། བསོད་ནམས་རྣམ་པར་འཕེལ་བ་ཡིན་ཏེ། ཁྱད་པར་དུ་རྩེ་མོའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིད་ལ་བྱེད་པ་ཡིན་པའི་ཕྱིར། དེས་འོག་མ་རྣམས་ལ་འགྲེའོ། །མེཾ་ཏོགཾ་སྦྱོར་ལམ་རྩེ་མོའི་བསོད་ནམས་རྣམ་པར་འཕེལ་བ་ཆོས་ཅན། ཁྱོད་ལ་བཅུ་དྲུག་ཡོད་དེ། ཁྱོད་ལ་ཕྱི་གཙོ་བོར་གྱུར་པའི་བསོད་ནམས་རྣམ་པར་འཕེལ་བ་བརྒྱད། ནང་གཙོ་བོར་གྱུར་པའི་བསོད་ནམས་རྣམ་པར་འཕེལ་བ་བརྒྱད་རྣམས་སུ་ཡོད་པའི་ཕྱིར། གསུམ་པ་ལ་གསུམ་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། རྣམ་འཕེལ་གྱི་འོག་ཏུ་ངེས་པར་བརྟན་པ་འཆད་པའི་རྒྱུ་མཚན་ཡོད་དེ། རྣམ་འཕེལ་མཐར་ཕྱིན་པ་ལས་ངེས་པར་བརྟན་པ་འབྱུང་བའི་ཕྱིར། གཉིས་པ་ནི། ཀུནཾ་མཁྱེནཾ་བཟོད་པ་ལ་གནས་པའི་བྱང་སེམས་ཀྱི་མངོན་པར་རྟོགས་པ་ཆོས་ཅན། བརྟན་པའི་རྩེ་སྦྱོར་ཡིན་ཏེ། བརྟན་པ་གཉིས་ཀྱིས་མཚོན་ནས་མདོ་ལས་དངོས་སུ་བསྟན་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། གསུམ་པ་ནི། དེཾ་ལྟརཾ་བྱང་སེམས་ཀྱི་སྦྱོར་ལམ་བཟོད་པ་ཆོས་ཅན། གཞན་དོན་ཕྲིན་ལས་བརྟན་པ་ཡིན་ཏེ། སྙིང་རྗེ་ཆེན་པོས་སེམས་ཅན་གྱི་དོན་ཡོངས་སུ་མི་གཏོང་བའི་ངེས་འབྱེད་ཆ་མཐུན་ཡིན་པའི་ཕྱིར། རྣམཾ་པཾ་དེ་ཆོས་ཅན། རང་དོན་རྟོགས་པ་བརྟན་པ་ཡིན་ཏེ། མཁྱེན་གསུམ་གྱི་ཆོས་ཡོངས་སུ་རྫོགས་པར་བསྔོ་བ་བླ་ན་མེད་པའི་ངེས་འབྱེད་ཆ་མཐུན་ཡིན་པའི་ཕྱིར། བཞི་པ་ལ་གཉིས་ལས། དང་པོ་ནི། དེཾ་ལྟརཾ་བྱམས་མགོན་ཆོས་ཅན། བརྟན་པའི་འོག་ཏུ་སེམས་ཀུན་ཏུ་གནས་པ་འཆད་པའི་རྒྱུ་མཚན་ཡོད་དེ། བརྟན་པ་གཉིས་པོ་མཐར་ཕྱིན་པ་ལས་སེམས་ཀུན་ཏུ་གནས་པར་འབྱུང་བའི་ཕྱིར། གཉིས་པ་ནི། གླིངཾ་དང་ཚདཾ་བྱང་སེམས་ཀྱི་སྦྱོར་ལམ་ཆོས་མཆོག་ཆོས་ཅན། སེམས་ཀུན་གནས་ཀྱི་རྩེ་སྦྱོར་ཡིན་ཏེ། སྟོང་གསུམ་གྱི་ས་རྡོའི་གྲངས་དང་། ཆུ་ཐིགས་ཀྱི་གྲངས་ལས་ཆེས་ཆེར་ཁྱད་པར་དུ་འཕགས་ཤིང་ཚད་ལས་འདས་པའི་བསོད་ནམས་མང་པོའི་སྒོ་ནས་མདོ་ལས་དངོས་སུ་བསྟན་པའི་ངེས་འབྱེད་ཆ་མཐུན་ཡིན་པའི་ཕྱིར། གཉིས་པ་དོན་བསྡུ་བ་ནི། རྟགསཾ་རྟགས་ཀྱི་རྩེ་སྦྱོར་སོགས་བཞི་པོ་ཆོས་ཅན། སྦྱོར་ལམ་རྩེ་སྦྱོར་ཡིན་ཏེ། མཐོང་ལམ་རྩེ་སྦྱོར་གྱི་སྔོན་དུ་བྱུང་བའི་རྩེ་སྦྱོར་ཡིན་པའི་ཕྱིར་རོ། །གཉིས་པ་མཐོང་ལམ་རྩེ་སྦྱོར་ལ་གཉིས་ཏེ། མཚམས་སྦྱར་བ་དང་། དོན་དངོས་སོ། །དང་པོ་ནི། ངེསཾ་པརཾ་བྱམས་མགོན་ཆོས་ཅན། སྦྱོར་ལམ་རྩེ་སྦྱོར་གྱི་འོག་ཏུ་མཐོང་ལམ་རྩེ་སྦྱོར་འཆད་པའི་རྒྱུ་མཚན་ཡོད་དེ། དེ་ལས་དེ་འབྱུང་བའི་ཕྱིར། གཉིས་པ་ལ་གཉིས་ཏེ། སྤང་བྱ་རྣམ་རྟོག གཉེན་པོ་མཐོང་ལམ་རྩེ་སྦྱོར་རོ། །དང་པོ་ལ་གསུམ་སྟེ། མདོར་བསྟན། རྒྱས་པར་བཤད། གཉེན་པོའི་དབྱེ་བའོ། །དང་པོ་ལ་གཉིས་ཏེ། གཟུང་རྟོག་མདོར་བསྟན། འཛིན་རྟོག་མདོར་བསྟན་པའོ། །དང་པོ་ལ་གཉིས་ལས། དང་པོ་ནི། དེཾ་ལཾ་བྱམས་མགོན་ཆོས་ཅན། མཐོང་སྤངས་རྟོག་པ་བཞིའི་ནང་ནས་གཟུང་རྟོག་གཉིས་ཐོག་མར་སྟོན་པའི་རྒྱུ་མཚན་ཡོད་དེ། དེ་སྟོན་པ་སྐབས་སུ་བབ་པའི་ཕྱིར། གཉིས་པ་ནི། འཇུགཾ་དང་འཇུགཾ་གཟུང་རྟོག་ཆོས་ཅན། རྣམ་པ་གཉིས་ཡོད་དེ། འཇུག་པ་གཟུང་རྟོག་དང་། ལྡོག་པ་གཟུང་རྟོག་གཉིས་ཡོད་པའི་ཕྱིར། ཉོནཾ་མོངསཾ་མཐོང་སྤང་གཟུང་རྟོག་གཉིས་པོ་ཆོས་ཅན། མཐོང་ལམ་རྩེ་སྦྱོར་གྱི་མི་མཐུན་པའི་ཕྱོགས་ཡིན་ཏེ། དེ་སྐྱེ་བའི་གེགས་བྱེད་པ་ཡིན་པའི་ཕྱིར། སོཾ་དང་ཡུལཾ་གཟུང་རྟོག་གཉིས་པོ་ཆོས་ཅན། སོ་སོར་དགུ་དགུ་ཡོད་དེ། ཡུལ་དགུ་དགུ་ཡོད་པའི་དབྱེ་བས་སོ་སོར་དགུ་དགུར་ཕྱེ་བ་ཡིན་པའི་ཕྱིར། ཇིཾ་དང་དངོསཾ་གཟུང་རྟོག་གཉིས་པོ་ཆོས་ཅན། ཡུལ་གྱི་གནས་ཚུལ་ཇི་ལྟ་བ་བཞིན་རྟོགས་པ་མ་ཡིན་ཏེ། དེ་ལ་ཕྱིན་ཅི་ལོག་ཏུ་ཞུགས་པའི་ཕྱིར། གཉིས་པ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། སོཾ་དང་སོཾ་མཐོང་སྤངས་འཛིན་རྟོག་ཆོས་ཅན། རྣམ་པ་གཉིས་ཡོད་དེ། སོ་སོ་སྐྱེ་བོའི་རྒྱུད་ཀྱི་སྐྱེས་བུ་རྫས་སུ་ཡོད་པའི་རྟེན་ཅན་གྱི་འཛིན་རྟོག་དང་། འཕགས་པའི་གང་ཟག་གི་རྒྱུད་ཀྱི་སྐྱེས་བུ་བཏགས་པར་ཡོད་པའི་རྟེན་ཅན་གྱི་འཛིན་རྟོག་གཉིས་ཡོད་པའི་ཕྱིར། གངཾ་མཐོང་སྤངས་འཛིན་རྟོག་གཉིས་ཆོས་ཅན། མཐོང་ལམ་རྩེ་སྦྱོར་གྱི་མི་མཐུན་པའི་ཕྱོགས་ཡིན་ཏེ། མཐོང་ལམ་རྩེ་སྦྱོར་སྐྱེ་བའི་གེགས་བྱེད་པའི་ཕྱིར། དེཾ་དང་ཡུལཾ་མཐོང་སྤངས་འཛིན་རྟོག་གཉིས་ཆོས་ཅན། སོ་སོར་དགུ་དགུ་ཡོད་དེ། ཡུལ་དགུ་དགུ་ཡོད་པའི་དབྱེ་བས་སོ་སོར་དགུ་དགུར་ཕྱེ་བ་ཡིན་པའི་ཕྱིར། གལཾ་དང་གངཾ་མཐོང་སྤངས་འཛིན་རྟོག་གཉིས་ཆོས་ཅན། ཡུལ་གྱི་གནས་ཚུལ་ཇི་ལྟ་བ་བཞིན་རྟོགས་པ་མ་ཡིན་ཏེ། དེ་ཕྱིན་ཅི་ལོག་དུ་སྣང་བའི་ཕྱིར། གཉིས་པ་རྒྱས་པར་བཤད་པ་ལ་གཉིས་ཏེ། གཟུང་རྟོག་རྒྱས་པར་བཤད། འཛིན་རྟོག་རྒྱས་པར་བཤད་པའོ། །དང་པོ་ལ་གཉིས་ཏེ། འཇུག་པ་གཟུང་རྟོག་རྒྱས་པར་བཤད། ལྡོག་པ་གཟུང་རྟོག་རྒྱས་པར་བཤད་པའོ། །དང་པོ་ལ་གསུམ་ལས། དང་པོ་ནི། གཟུངཾ་བའིཾ་སོགས་སོ། །གཉིས་པ་ནི། ངོཾ་བོཾ་བྱང་སེམས་ཀྱི་ལམ་འབྲས་བུ་དང་བཅས་པ་ལ་འཇུག་བྱ་མངོན་པར་ཞེན་པའི་བློ་ཆོས་ཅན། འཇུག་པ་གཟུང་རྟོག་ཡིན་ཏེ། རང་ཡུལ་ཐེག་ཆེན་གྱི་འཇུག་བྱའི་གཟུང་བ་ལ་དམིགས་ནས་འཇུག་བྱའི་གཟུང་བར་མངོན་པར་ཞེན་པའི་སྤང་བྱ་རྣམ་རྟོག་ཡིན་པའི་ཕྱིར། གསུམ་པ་ནི། དབེནཾ་པསཾ་འཇུག་པ་གཟུང་རྟོག་གི་འཇུག་བྱའི་བཟུང་བ་ཆོས་ཅན། དགུ་ཡོད་དེ། བྱང་སེམས་ཀྱི་ལམ་གྱི་དབང་དུ་བྱས་པ་ལྔ་འབྲས་བུའི་དབང་དུ་བྱས་པ་བཞི་རྣམས་སུ་ཡོད་པའི་ཕྱིར། སྐྱོནཾ་མེདཾ་རྩ་བའི་ངག་དོན་འགོད། མཐོངཾ་བའིཾ་འཇུག་པ་གཟུང་རྟོག་དགུ་པོ་ཆོས་ཅན། མཐོང་ལམ་རྩེ་སྦྱོར་གྱི་སྦྱོར་བའི་གནས་སྐབས་ཀྱི་སྤང་བྱ་ཡིན་ཏེ། དེའི་གཞོམ་བྱ་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། གཟུངཾ་བའིཾ་སོགས་སོ། །གཉིས་པ་ནི། སྲིདཾ་དང་ཐེག་དམན་གྱི་ལམ་འབྲས་བུ་དང་བཅས་པ་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ་ཆོས་ཅན། ལྡོག་པ་གཟུང་རྟོག་ཡིན་ཏེ། རང་ཡུལ་ཐེག་དམན་གྱི་ལྡོག་བྱའི་གཟུང་བ་ལ་དམིགས་ནས་དོར་བྱར་མངོན་པར་ཞེན་པའི་སྤང་བྱ་རྣམ་རྟོག་ཡིན་པའི་ཕྱིར། གསུམ་པ་ནི། འཁོརཾ་བཾ་ལྡོག་པ་གཟུང་རྟོག་གི་ལྡོག་བྱའི་བཟུང་བ་ཆོས་ཅན། དགུ་ཡོད་དེ། ཐེག་དམན་གྱི་ལམ་གྱི་དབང་དུ་བྱས་པ་ལྔ། འབྲས་བུའི་དབང་དུ་བྱས་པ་བཞི་རྣམས་སུ་ཡོད་པའི་ཕྱིར། ཉེསཾ་པཾ་རྩ་བའི་ངག་དོན་འགོད། ཉནཾ་ཐོསཾ་ཇི་སྐད་བཤད་པའི་ཡུལ་དགུ་པོ་ཆོས་ཅན། ཉན་རང་ལ་ལྟོས་ནས་ལྡོག་བྱ་མ་ཡིན་ཏེ། དེ་ལ་ལྟོས་ནས་བླང་བྱ་ཡིན་པའི་ཕྱིར། བྱངཾ་ཆུབཾ་ལྡོག་པ་གཟུང་རྟོག་དགུ་པོ་ཆོས་ཅན། མཐོང་བའི་ལམ་གྱི་འཇུག་པའི་གནས་སྐབས་ཀྱི་སྤང་བྱ་ཡིན་ཏེ། དེའི་གཞོམ་བྱ་ཡིན་པའི་ཕྱིར། གཉིས་པ་ལ་གཉིས་ཏེ། རྫས་འཛིན་རྟོག་པ་རྒྱས་པར་བཤད། བཏགས་འཛིན་རྟོག་པ་རྒྱས་པར་བཤད་པའོ། །དང་པོ་གསུམ་ལས། དང་པོ་ནི། སོཾ་སོའིཾ་སོགས་སོ། །གཉིས་པ་ནི། འཛིཾན་པཾ་འཛིན་དོར་སོགས་ཡུལ་དགུ་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ་ཆོས་ཅན། རྫས་འཛིན་རྟོག་པ་ཡིན་ཏེ། རང་ཡུལ་རྫས་ཡོད་ཀྱི་འཛིན་པ་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ་ཡིན་པའི་ཕྱིར། གསུམ་པ་ནི། ཀུནཾ་རྫོབཾ་རྫས་འཛིན་རྟོག་པའི་ཡུལ་དུ་གྱུར་པའི་འཛིན་པ་ཆོས་ཅན། དགུ་ཡོད་དེ། གཙོ་བོ་ཤེར་ཕྱིན་གྱི་དབང་དུ་བྱས་པ་བརྒྱད། ཕར་ཕྱིན་གཞན་ལྔའི་དབང་དུ་བྱས་པ་གཅིག་རྣམས་སུ་ཡོད་པའི་ཕྱིར། དོནཾ་དམཾ་རྩ་བའི་ངག་དོན་འགོད། མཐོཾང་བཾའི་ཅི་སྐད་བཤད་པའི་རྫས་འཛིན་རྟོག་པ་དགུ་ཆོས་ཅན། སྔ་མས་འགྲེ། གཉིས་པ་ལ་གསུམ་ལས། དང་པོ་ནི། འཛིཾན་པཾར་སོགས་སོ། །གཉིས་པ་ནི། ཆེདཾ་བཞིཾན་ཆེད་བཞིན་ངེས་པར་མི་འབྱུང་བ་སོགས་ཡུལ་དགུ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ་ཆོས་ཅན། བཏགས་འཛིན་རྟོག་པ་ཡིན་ཏེ། རང་ཡུལ་བཏགས་ཡོད་ཀྱི་འཛིན་པ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་སྤང་བྱ་རྣམ་རྟོག་ཡིན་པའི་ཕྱིར། གསུམ་པ་ནི། ཉཾན་ཐོསཾ་བཏགས་འཛིན་རྟོག་པའི་ཡུལ་དུ་གྱུར་པའི་འཛིན་པ་ཆོས་ཅན། དགུ་ཡོད་དེ། ཉན་ཐོས་ཀྱི་ལམ་གྱི་དབང་དུ་བྱས་པ་གཉིས། བྱང་སེམས་ཀྱི་ལམ་གྱི་དབང་དུ་བྱས་པ་དྲུག སོ་སོ་སྐྱེ་བོ་ཐ་མལ་པའི་དབང་དུ་བྱས་པ་གཅིག་རྣམས་སུ་ཡོད་པའི་ཕྱིར། བཏགཾས་པཾའི་རྩ་བའི་ངག་དོན་འགོད། མཐོཾང་བཾའི་ཅི་སྐད་བཤད་པའི་བཏགས་འཛིན་རྟོག་པ་དགུ་ཆོས་ཅན། སྔ་མས་འགྲེའོ། །གསུམ་པ་གཉེན་པོའི་དབྱེ་བ་ནི། དེཾ་ལྟཾར་མཐོང་སྤངས་རྟོག་པ་ཆོས་ཅན། ཁྱོད་ཀྱི་གཉེན་པོ་བཞི་པོ་རེ་རེ་ལ་ཡང་སྤང་བྱའི་སྒོ་ནས་དགུ་དགུར་དབྱེར་རུང་སྟེ། ཁྱོད་བཞི་པོ་རེ་རེ་ལ་ཡང་དགུ་དགུར་ཡོད་པས་དེ་ལྟར་དབྱེར་རུང་བའི་ཕྱིར། གཉིས་པ་གཉེན་པོ་མཐོང་ལམ་རྩེ་སྦྱོར་ལ་གཉིས་ཏེ། ཞར་ལས་བྱུང་བའི་དོན་དང་། རྣལ་མ་མཐོང་ལམ་རྩེ་སྦྱོར་དངོས་སོ། །དང་པོ་ལ་གཉིས་ཏེ། བྱང་ཆུབ་ཆེན་པོའི་རྒྱུ་དང་། འབྲས་བུ་བྱང་ཆུབ་ཆེན་པོའོ། །དང་པོ་ལ་གསུམ་ལས། དང་པོ་ནི། དེཾ་ལྟཾར་བྱང་ཆུབ་ལ་གཞན་སྟོན་པ་དང་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། བྱང་ཆུབ་ཆེན་པོ་འགྲུབ་པར་བྱེད་པའི་རྒྱུ་གསུམ་བདེ་བླག་དུ་རྟོགས་པར་བྱེད་པའི་ཆེད་ཡིན་པའི་ཕྱིར་རོ། །གཉིས་པ་ནི། བྱཾང་ཆཾུབ་བྱང་ཆུབ་ཆེན་པོའི་རྒྱུ་ཆོས་ཅན། རྣམ་པ་གསུམ་ཡོད་དེ། གཞན་འབྲས་བུ་རྟོགས་པའི་ཆ་ལ་འགོད་པ། རྒྱུ་ལུང་གི་ཆོས་ལ་འགོད་པ། རང་ཉིད་བྱང་ཆུབ་ཀྱི་རྒྱུ་ལ་སྦྱོར་བ་རྣམས་སུ་ཡོད་པའི་ཕྱིར། གསུམ་པ་ནི། འཆཾད་པཾར་གཞན་འབྲས་བུ་རྟོགས་པའི་ཆོས་ལ་འགོད་པ་ཆོས་ཅན། བྱང་ཆུབ་ཆེན་པོའི་རྒྱུ་ཡིན་ཏེ། བྱང་ཆུབ་ཆེན་པོ་ཐོབ་པར་བྱེད་པའི་དགེ་རྩ་ཡིན་པའི་ཕྱིར། དེས་འོག་མ་གཉིས་ལ་འགྲེའོ། །གཉིས་པ་ལ་གསུམ་སྟེ། དབུ་མ་པའི་བྱང་ཆུབ་འདོད་ཚུལ་བརྗོད། དངོས་སྨྲ་བའི་བྱང་ཆུབ་འདོད་ཚུལ་དགག གྲོལ་བ་འདོད་པས་སྟོང་ཉིད་ལ་འཇུག་པར་གདམས་པའོ། །དང་པོ་ལ་གསུམ་ལས། དང་པོ་ནི། གཾང་གིཾ་དྲི་མ་ཟད་དང་མི་སྐྱེ་བའི་ཞེས་སོགས་ཀྱི་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། རྒྱུ་གསུམ་ལས་བྱུང་བའི་བྱང་ཆེན་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། དྲིཾ་མཾ་ཐེག་ཆེན་གྱི་མཐོང་ལམ་ཆོས་ཅན། བྱང་ཆུབ་ཡིན་ཏེ། མཐོང་སྤང་རྣམ་པར་རྟོག་པའི་དྲི་མ་གདོད་མ་ནས་ཟད་པ་ལ་ཟད་པ་དང་མི་སྐྱེ་བ་ལ་མི་སྐྱེ་བར་མངོན་སུམ་དུ་རྟོགས་པའི་ཡེ་ཤེས་ཡིན་པའི་ཕྱིར། ཟདཾ་མེདཾ་མཐོང་སྤང་རྣམ་པར་རྟོག་པའི་དྲི་མ་ཆོས་ཅན། གདོད་མ་ནས་ཟད་པ་དང་། མི་སྐྱེ་བ་ཡིན་ཏེ། གདོད་མ་ནས་ཡོད་པ་གཉེན་པོས་གསར་དུ་ཟད་པ་མེད་པའི་ཕྱིར་དང་། སྔར་མེད་བདེན་པ་བ་གསར་དུ་སྐྱེ་བ་མེད་པའི་ཕྱིར། གསུམ་པ་ནི། ཉོནཾ་མོངཾས་མཐོང་སྤངས་སྒྲིབ་གཉིས་ཀྱི་དྲི་མ་ཆོས་ཅན་དུ་བཟུང་ནས། རྩ་བའི་ཆོས་རྟགས་ཕྱི་མ་འགོད། གོཾ་རིམཾ་སྐུ་གསུམ་པོ་ཆོས་ཅན། བྱང་ཆུབ་ཆེན་པོ་ཡིན་ཏེ། སྒྲིབ་གཉིས་ཀྱི་དྲི་མ་གདོད་མ་ནས་ཟད་པ་ལ་ཟད་པ་དང་། མི་སྐྱེ་བ་ལ་མི་སྐྱེ་བར་མངོན་སུམ་དུ་རྟོགས་པའི་མཐར་ཐུག་གི་བྱང་ཆུབ་ཡིན་པའི་ཕྱིར། གཉིས་པ་ལ་གཉིས་ཏེ། དངོས་པོའི་རིགས་པས་དགག་པ་དང་། ཁས་བླངས་འགལ་བས་དགག་པའོ། །དང་པོ་ལ་གཉིས་ལས། དང་པོ་ནི། གཾང་གིཾ་འགོག་པ་མེད་པའི་རང་བཞིན་ལ་ལ་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། དྲི་མ་བདེན་གྲུབ་ཡོད་ན་ཟད་དང་མི་སྐྱེ་ཤེས་པའི་བྱང་ཆུབ་མི་རུང་ངོ་ཞེས་བསྟན་པའི་ཆེད་ཡིན་པའི་ཕྱིར། གཉིས་པ་ནི། འགོཾག་དང་སྐྱེཾ་ཐེག་ཆེན་གྱི་མཐོང་ལམ་ཆོས་ཅན། མཐོང་སྤང་རྟོག་པ་ཟད་པ་བདེན་གྲུབ་ཟད་པ་དང་། དེ་ཟད་པའི་འགོག་པ་ཐོབ་པ་མི་འཐད་པར་ཐལ། མཐོང་སྤངས་རྟོག་པ་བདེན་གྲུབ་མེད་པའི་ཕྱིར། གཉིས་པ་ལ་གསུམ་ལས། དང་པོ་ནི། དེཾ་ལྟཾར་གཞན་གྱི་ཆོས་རྣམས་ཀྱང་ཡོད་ལ་ཞེས་སོགས་ཀྱི་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། དངོས་སྨྲ་བས་དྲི་མ་བདེན་གྲུབ་དུ་ཁས་ལེན་པ་དང་། བཅོམ་ལྡན་འདས་ཀྱི་སྒྲིབ་གཉིས་དྲི་མ་སྤངས་པར་ཁས་བླངས་པ་ལ་ཁས་བླངས་ནང་འགལ་བསྟན་པའི་ཆེད་ཡིན་པའི་ཕྱིར། གཉིས་པ་ནི། གཞཾན་གྱིཾ་སེམས་ཙམ་པ་ཆོས་ཅན། དབུ་མ་པས་བཞད་གད་ཀྱི་གནས་ཡིན་ཏེ། དྲི་མ་བདེན་པར་གྲུབ་པ་དང་སྟོན་པས་སྒྲིབ་གཉིས་སྤངས་པར་ཁས་བླངས་པའི་རྒོལ་བ་ཡིན་པའི་ཕྱིར། གསུམ་པ་ལ་གསུམ་སྟེ། དབུ་མ་པ་ལ་དྲི་མ་སྤོང་བ་འཐད་པའི་ཚུལ། དངོས་སྨྲ་བ་ལ་དེ་མི་འཐད་པའི་ཚུལ། རྩ་བའི་ཚིག་དོན་དངོས་འཆད་པའོ། །དང་པོ་ལ་རྣལ་འབྱོར་གྱི་ས་བཞི་ལས། བདག་མེད་རྟོགས་པའི་རྣལ་འབྱོར་གྱི་ས་ནི། དེཾ་ལཾ་ཉེར་ལེན་གྱི་ཕུང་པོ་གང་ཟག་གི་བདག་གིས་སྟོང་པར་རྟོགས་ནས་སྒོམ་པའི་བྱང་སེམས་ཀྱི་རྣལ་འབྱོར་དེ་ཆོས་ཅན། བདག་མེད་རྟོགས་པའི་རྣལ་འབྱོར་གྱི་ས་ཡིན་ཏེ། གང་ཟག་གི་བདག་འཛིན་གཙོ་བོར་སྤོང་བར་བྱེད་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། གཉིས་པ་བཟུང་མེད་རྟོགས་པའི་རྣལ་འབྱོར་གྱི་ས་ནི། སྔོནཾ་པོཾ་ལྷན་ཅིག་དམིགས་ངེས་ཀྱི་རྟགས་ལས་བཟུང་བ་ཕྱི་རོལ་གྱི་དོན་མེད་པར་རྟོགས་ནས་སྒོམ་པའི་བྱང་སེམས་ཀྱི་རྣལ་འབྱོར་ཆོས་ཅན། བཟུང་མེད་རྟོགས་པའི་རྣལ་འབྱོར་གྱི་ས་ཡིན་ཏེ། བཟུང་བ་ཕྱི་རོལ་གྱི་དོན་ལ་བདེན་འཛིན་གཙོ་བོར་སྤོང་བར་བྱེད་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། གསུམ་པ་འཛིན་མེད་རྟོགས་པའི་རྣལ་འབྱོར་གྱི་ས་ནི། གཟུཾང་བཾ་བཟུང་བ་མེད་ན་དེ་ལ་ལྟོས་པའི་འཛིན་པ་མེད་པར་རྟོགས་ནས་སྒོམ་པའི་བྱང་སེམས་ཀྱི་རྣལ་འབྱོར་ཆོས་ཅན། འཛིན་མེད་རྟོགས་པའི་རྣལ་འབྱོར་གྱི་ས་ཡིན་ཏེ། ནང་འཛིན་པ་ལ་བདེན་འཛིན་གཙོ་བོར་སྤོང་བར་བྱེད་པའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། བཞི་པ་སྤྲོས་བྲལ་རྟོགས་པའི་རྣལ་འབྱོར་གྱི་ས་ནི། དེཾ་ཡཾང་མཐའ་བཞིའི་སྤྲོས་བྲལ་རྟོགས་པའི་བྱང་སེམས་ཀྱི་བར་ཆད་མེད་ལམ་ཆོས་ཅན། སྤྲོས་བྲལ་རྟོགས་པའི་རྣལ་འབྱོར་གྱི་ས་ཡིན་ཏེ། རང་གི་ངོས་སྐལ་གྱི་ཤེས་སྒྲིབ་ཀྱི་དངོས་གཉེན་དུ་གྱུར་པའི་རྣམ་པར་མི་རྟོག་པའི་ཡེ་ཤེས་ཡིན་པའི་ཕྱིར། གཉིས་པ་ནི། དེཾ་ལྟཾར་དེ་ལྟ་མ་ཡིན་པར་སྒྲིབ་གཉིས་བདེན་པར་གྲུབ་ན་སྒྲིབ་གཉིས་ཆོས་ཅན། ཁྱོད་གཉེན་པོ་བསྒོམས་པས་སྤོང་མི་ནུས་པར་ཐལ། ཁྱོད་རང་སྐྱེད་དུ་མེད་པ་དང་། གཉེན་པོས་སྤོང་དུ་མེད་པའི་རང་གི་ངོ་བོ་འཛིན་པའི་ཕྱིར། དཔེར་ན་ནམ་མཁའ་རྫས་མེད་པ་ཙམ་གྱི་ངོ་བོ་རྟག་དུ་འཛིན་པའི་རྫས་མེད་པ་ཙམ་གྱི་ངོ་བོ་འདོར་དུ་མི་རུང་བ་བཞིན་ནོ། །གསུམ་པ་ནི། དེའིཾ་ཕྱིརཾ་རྩ་བའི་ངག་དོན་འགོད་དོ། །གསུམ་པ་གྲོལ་བ་འདོད་པས་སྟོང་ཉིད་ལ་འཇུག་པར་གདམས་པ་ལ་གསུམ་ལས། དང་པོ་ནི། དེཾ་ལྟརཾ་འདི་ལ་བསལ་བྱ་ཅི་ཡང་མེད་ཞེས་སོགས་ཀྱི་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། ཐེག་ཆེན་གྱི་ཐར་པ་འདོད་པ་རྣམས་ཀྱིས་དྲི་མ་གདོད་མ་ནས་ཟད་སྐྱེ་མེད་པ་ཁས་བླང་དགོས་པར་ཤེས་པའི་ཆེད་ཡིན་པའི་ཕྱིར། གཉིས་པ་ནི། འདིཾ་ལཾ་དྲི་མ་གདོད་མ་ནས་ཡོད་པ་གཉེན་པོས་གསར་དུ་ཟད་པ་མེད་པ་དང་། དྲི་མ་སྤངས་པའི་འགོག་བདེན་གསར་དུ་བཞག་པར་བྱ་བ་མེད་པའི་ཡང་དག་པའི་ལྟ་བ་བསྒོམས་པ་ཆོས་ཅན། དགོས་པ་ཡོད་དེ། ཕྱིན་ཅི་ལོག་གི་འཆིང་བ་ལས་རྣམ་པར་གྲོལ་བའི་ཆེད་ཡིན་པའི་ཕྱིར། གསུམ་པ་ནི། གཾང་གིཾ་གཟུགས་སོགས་ཡང་དག་ཀུན་རྫོབ་ཆོས་ཅན། ཁྱོད་ལ་སྣང་བའི་ངོ་བོ་བསལ་བ་དང་། བདེན་པའི་ངོ་བོ་བཞག་པ་མ་བྱས་པར་ལྟ་དགོས་ཏེ། ཁྱོད་ལ་སྣང་བའི་ངོ་བོ་བསལ་བ་དང་། བདེན་པའི་ངོ་བོ་བཞག་པ་བྱས་ན་བདེན་འཛིན་ལས་མི་གྲོལ་བའི་ཕྱིར། རངཾ་བཞིནཾ་དེ་ཆོས་ཅན། ཁྱོད་ལ་རང་བཞིན་མེད་པ་ལ་སོགས་པར་བརྟག་པར་བྱ་བ་ཡིན་ཏེ། ཁྱོད་ལ་རང་བཞིན་མེད་པ་ལ་སོགས་པར་བརྟགས་པས་གནས་ལུགས་མཐོང་བར་འགྱུར་བའི་ཕྱིར་རོ། །དེཾ་ལྟཾར་གཟུགས་སོགས་ཀྱི་དེ་ཁོ་ན་ཉིད་མཐོང་བ་ཆོས་ཅན། དགོས་པ་ཡོད་དེ། ཕྱིན་ཅི་ལོག་ལས་གྲོལ་བའི་ཆེད་ཡིན་པའི་ཕྱིར། གཉིས་པ་རྣལ་མ་མཐོང་ལམ་རྩེ་སྦྱོར་དངོས་ལ་གསུམ་སྟེ། བར་ཆད་མེད་ལམ་པའི་ལམ། རྣམ་གྲོལ་གྱི་ལམ། ཁྱད་པར་གྱི་ལམ་མོ། །དང་པོ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། སྦྱིནཾ་དང་སྦྱིནཾ་ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ཆོས་ཅན། རྩེ་སྦྱོར་འཆད་པའི་སྐབས་ནས་དངོས་སུ་བསྟན་པའི་མཐོང་བའི་ལམ་ཡིན་ཏེ། མཐོང་སྤངས་སྒྲིབ་གཉིས་ཀྱི་དངོས་གཉེན་དུ་གྱུར་པའི་བར་ཆད་མེད་ལམ་ཡིན་པའི་ཕྱིར། གཉིས་པ་ནི། དེཾ་སྐྱེསཾ་བྱང་སེམས་ཀྱི་མཐོང་ལམ་སྐད་ཅིག་ཕྱི་མ་བཅོ་ལྔ་པོ་ཆོས་ཅན། མཐོང་ལམ་རྣམ་གྲོལ་ལམ་ཡིན་ཏེ། མཐོང་ལམ་མཉམ་གཞག་གང་ཞིག མཐོང་སྤངས་མ་ལུས་པར་སྤངས་པའི་ཕྱིར། གསུམ་པ་ལ་གཉིས་ལས། དང་པོ་ནི། དེཾ་ལཾ་དེ་ནས་སེང་གེ་རྣམ་བསྒྱིངས་པའི་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། མཐོང་ལམ་རྩེ་སྦྱོར་གྱི་གནས་སྐབས་སུ་ཐོབ་པའི་ཡོན་ཏན་ལ་དབང་དུ་བྱ་བའི་ཕྱིར་ཡང་དང་ཡང་དུ་བསྒོམ་པར་བྱེད་དགོས་སོ་ཞེས་ཤེས་པར་བྱ་བའི་ཆེད་ཡིན་པའི་ཕྱིར། གཉིས་པ་ནི། དེཾ་དང་མཐོངཾ་ས་དང་པོའི་བྱང་སེམས་ཀྱིས་སེང་གེ་རྣམ་བསྒྱིངས་ཀྱི་ཏིང་ངེ་འཛིན་བསྒོམ་པ་ཆོས་ཅན། དགོས་པ་ཡོད་དེ། སེང་གེ་རྣམ་བསྒྱིངས་ལ་དབང་ཐོབ་པའི་ཆེད་ཡིན་པའི་ཕྱིར། རྟེནཾ་དང་དུསཾ་ས་དང་པོའི་རྗེས་ཐོབ་ཀྱི་གནས་སྐབས་སུ་རྟེན་འབྲེལ་ལུགས་མཐུན་དང་ལུགས་བཟློག་ཏུ་བསྒོམ་པ་ཆོས་ཅན། དགོས་པ་ཡོད་དེ། འཁོར་བ་རྒྱུ་འབྲས་སྡུག་ཀུན་གྱི་བདེན་པ་དང་། མྱང་འདས་རྒྱུ་འབྲས་འགོག་ལམ་གྱི་བདེན་པ་ལ་མཁས་པའི་ཆེད་ཡིན་པའི་ཕྱིར། གསུམ་པ་སྒོམ་ལམ་རྩེ་སྦྱོར་ལ་གསུམ་སྟེ། རྟེན་སྒོམ་ལམ། སྤང་བྱ་རྣམ་རྟོག བརྟེན་པ་ཡོན་ཏན་ནོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་འགོག་དང་བཅས་པའི་སྙོམས་འཇུག་དགུར་ཞེས་སོགས་ཚིགས་བཅད་གཉིས་གསུངས་པ་ཆོས་ཅན། དགོས་པ་ཡོད་དེ། མི་མཐུན་ཕྱོགས་སྤོང་བའི་སྒོམ་ལམ་དང་། བརྟེན་པ་ཡོན་ཏན་གྱི་རྟེན་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། འགོཾག་དངཾ་བྱང་སེམས་སྒོམ་ལམ་པས་དངོས་གཞི་ཐོད་རྒལ་ཆུང་ངུ་དང་འབྲིང་གཉིས་བསྒོམ་པ་ཆོས་ཅན། དགོས་པ་ཡོད་དེ། དངོས་གཞི་ཐོད་རྒལ་ཆེན་པོ་ཐོབ་པའི་ཆེད་ཡིན་པའི་ཕྱིར། འོངཾ་ནསཾ་བྱང་སེམས་སྒོམ་ལམ་པས་དངོས་གཞི་ཐོད་རྒལ་འབྲིང་པོའི་རྗེས་སུ་སྲིད་རྩེའི་ནུད་ཆུང་བྱེད་པ་ཆོས་ཅན། དགོས་པ་ཡོད་དེ། ཏིང་ངེ་འཛིན་གྱི་རྩལ་སྦྱང་བའི་ཆེད་ཡིན་པའི་ཕྱིར། འདོཾད་པཾར་བྱང་སེམས་སྒོམ་ལམ་པས་མཚམས་འཛིན་གྱི་འདོད་སེམས་མངོན་དུ་བྱེད་པ་ཆོས་ཅན། དགོས་པ་ཡོད་དེ། ཐོད་རྒལ་འབྲིང་པོའི་འགོག་པ་དང་ཐོད་རྒལ་ཆེན་པོའི་འགོག་པ་གཉིས་ཀྱི་མཚམས་ཕྱེད་པའི་ཆེད་ཡིན་པའི་ཕྱིར། ཐོདཾ་རྒཾལ་བྱང་སེམས་སྒོམ་ལམ་པས་དངོས་གཞི་ཐོད་རྒལ་ཆེན་པོ་སྒོམ་པ་ཆོས་ཅན། དགོས་པ་ཡོད་དེ། སྒོམ་ལམ་མཉམ་གཞག་གི་རྩལ་སྦྱང་བའི་ཆེད་ཡིན་པའི་ཕྱིར། གསུམ་པ་ལ་གསུམ་སྟེ། རྒྱས་པར་བཤད་པ་དང་། དོན་བསྡུས་ཏེ་ཐོད་རྒལ་གྱི་ངོ་བོར་བསྟན་པ་དང་། རྟེན་བསྒོམ་ལམ་གྱི་ངོ་བོར་བསྟན་པའོ། །དང་པོ་ལ་གཉིས་ཏེ། སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་གྱི་སྙོམས་འཇུག་གོ །དང་པོ་ནི། བྱངཾ་ཆུཾབ་བྱང་སེམས་སྒོམ་ལམ་པས་སྦྱོར་བ་སེང་གེ་རྣམ་བསྒྱིངས་སྒོམ་པ་ཆོས་ཅན། དགོས་པ་ཡོད་དེ། དངོས་གཞི་ཐོད་རྒལ་ལ་སྙོམས་པར་འཇུག་ནུས་པའི་ཆེད་ཡིན་པའི་ཕྱིར། གཉིས་པ་ལ་གསུམ་སྟེ། དངོས་གཞི་ཐོད་རྒལ་འབྲིང་པོ། མཚམས་འཛིན་གྱི་འདོད་སེམས། དངོས་གཞི་ཐོད་རྒལ་ཆེན་པོའོ། །དང་པོ་ནི། ཡངཾ་བསཾམ་བྱང་སེམས་སྒོམ་ལམ་པས་མཐར་གནས་ཀྱི་སྙོམས་འཇུག་བརྒྱད་ལ་འགོག་པ་བརྒྱད་སྤེལ་ནས་བསྒོམ་པ་ཆོས་ཅན། དགོས་པ་ཡོད་དེ། ཆོས་གཞན་སྤེལ་ནས་ལུགས་མཐུན་དུ་སྙོམས་པར་འཇུག་པའི་སྙོམས་འཇུག་གི་རིགས་ལ་དབང་ཐོབ་པའི་ཆེད་ཡིན་པའི་ཕྱིར། དེཾ་ལཾས་རྩ་བའི་ནུད་ཆུང་གི་སྦྱོར་བ་འགོད། གཉིས་པ་ནི། འདོཾད་པཾ་རྩ་བའི་མཚམས་འཛིན་གྱི་སྦྱོར་བ་འགོད། གསུམ་པ་ནི། དེཾའི་འོཾག་བྱང་སེམས་སྒོམ་ལམ་པས་མཐར་གནས་ཀྱི་སྙོམས་འཇུག་དགུ་ལ་འདོད་སེམས་དགུ་སྤེལ་ནས་ལུགས་བཟློག་ཏུ་སྙོམས་པར་འཇུག་པ་ཆོས་ཅན། དགོས་པ་ཡོད་དེ། ཆོས་གཞན་སྤེལ་ནས་ལུགས་བཟློག་ཏུ་སྙོམས་པར་འཇུག་པའི་སྙོམས་འཇུག་གི་རིགས་ལ་དབང་ཐོབ་པའི་ཆེད་ཡིན་པའི་ཕྱིར། གཉིས་པ་ནི། དེཾ་ལྟཾར་མཐར་གནས་ཀྱི་སྙོམས་འཇུག་དགུ་ལ་འདོད་སེམས་དགུ་སྤེལ་ནས་ལུགས་བཟློག་ཏུ་སྙོམས་པར་འཇུག་པའི་སྙོམས་འཇུག་ཆོས་ཅན། ཐོད་རྒལ་གྱི་སྙོམས་འཇུག་ཞེས་བརྗོད་པའི་རྒྱུ་མཚན་ཡོད་དེ། མཉམ་རྗེས་རིགས་མི་འདྲ་བ་སྤེལ་བའི་སྒོ་ནས་ལུགས་བཟློག་ཏུ་སྙོམས་པར་འཇུག་པའི་སྙོམས་འཇུག་ཡིན་པའི་ཕྱིར། གསུམ་པ་ནི། དགཾ་པཾ་དངོས་གཞི་ཐོད་རྒལ་གྱི་སྙོམས་འཇུག་ཆོས་ཅན། རྟེན་བསྒོམ་ལམ་ཡིན་ཏེ། སྒོམ་སྤངས་ཤེས་སྒྲིབ་ཀྱི་དངོས་གཉེན་དུ་གྱུར་པའི་སྒོམ་ལམ་མཉམ་གཞག་གི་རྟེན་གྲུབ་པའི་ཆེད་དུ་བསྒོམ་པའི་སྙོམས་འཇུག་ཡིན་པའི་ཕྱིར། གཉིས་པ་སྤང་བྱ་རྣམ་རྟོག་ལ་གསུམ་སྟེ། མཚམས་སྦྱར་བ། རྒྱས་པར་བཤད་པ། གཉེན་པོའི་དབྱེ་བའོ། །དང་པོ་ནི། དེཾ་ལྟཾར་སྒོམ་ལམ་རྩེ་སྦྱོར་གྱི་སྐབས་སུ་སྤང་བྱ་རྣམ་རྟོག་བཞི་བཤད་པ་ཆོས་ཅན། དགོས་པ་ཡོད་དེ། སྒོམ་ལམ་རྩེ་སྦྱོར་གྱི་སྤང་བྱ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ལ་གཉིས་ཏེ། གཟུང་རྟོག་རྒྱས་པར་བཤད་པ། འཛིན་རྟོག་རྒྱས་པར་བཤད་པའོ། །དང་པོ་ལ་གཉིས་ཏེ། སྦྱོར་བའི་ཡུལ་ཅན་གྱི་གཟུང་རྟོག་དང་། འཇུག་པའི་ཡུལ་ཅན་གྱི་གཟུང་རྟོག་གོ །དང་པོ་ལ་གསུམ་ལས། དང་པོ་ནི། རེཾ་ཞིཾག་སོགས་སོ། །གཉིས་པ་ནི། མདོཾར་དང་བསྡུཾས་བཟློག་པ་དང་རྣལ་མ་ཅི་རིགས་པར་སྦྱོར་བའི་ཡུལ་དགུ་ལ་དམིགས་ནས་འཇུག་བྱའི་གཟུང་བར་མངོན་པར་ཞེན་པའི་བློ་ཆོས་ཅན། སྦྱོར་བའི་ཡུལ་ཅན་གྱི་གཟུང་རྟོག་ཡིན་ཏེ། རང་ཡུལ་སྦྱོར་བའི་རྣམ་པ་ལ་དམིགས་ནས་འཇུག་བྱའི་གཟུང་བར་མངོན་པར་ཞེན་པའི་སྤང་བྱ་རྣམ་རྟོག་ཡིན་པའི་ཕྱིར། གསུམ་པ་ནི། མདོཾར་བསྡུཾས་སྦྱོར་བའི་ཡུལ་ཅན་གྱི་གཟུང་རྟོག་གི་ཡུལ་ཆོས་ཅན། རྣམ་པ་དགུ་ཡོད་དེ། རྣལ་མར་སྦྱོར་བ་གཉིས། བཟློག་པར་སྦྱོར་བ་བཞི། སླར་ཡང་རྣལ་མར་སྦྱོར་བ་གསུམ་རྣམས་སུ་ཡོད་པའི་ཕྱིར། བཟུཾང་བཾའི་རྩ་བའི་ངག་དོན་འགོད། གནཾས་སྐབཾས་སྦྱོར་བའི་ཡུལ་ཅན་གྱི་གཟུང་རྟོག་དགུ་པོ་ཆོས་ཅན། ཐེག་ཆེན་གྱི་སྒོམ་ལམ་གྱི་སྦྱོར་བའི་གནས་སྐབས་ཀྱི་སྤང་བྱ་ཡིན་ཏེ། དེའི་གཞོམ་བྱ་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། གཉིཾས་པཾ་ཉན་རང་གི་སེམས་སེམས་བྱུང་གི་རྒྱུན་འཇུག་པ་ལ་དམིགས་ནས་ལྡོག་བྱའི་གཟུང་བར་མངོན་པར་ཞེན་པའི་བློ་ཆོས་ཅན། འཇུག་པའི་ཡུལ་ཅན་གྱི་གཟུང་རྟོག་ཡིན་ཏེ། རང་ཡུལ་འཇུག་པ་ལ་དམིགས་ནས་ལྡོག་བྱའི་བཟུང་བར་མངོན་པར་ཞེན་པའི་སྤང་བྱ་རྣམ་རྟོག་ཡིན་པའི་ཕྱིར། གསུམ་པ་ནི། དགེཾ་བཾའི་འཇུག་པའི་ཡུལ་ཅན་གྱི་གཟུང་རྟོག་གི་ཡུལ་ཆོས་ཅན། རྣམ་པ་དགུ་ཡོད་དེ། ཉན་རང་གི་ཚོགས་ཀྱི་དབང་དུ་བྱས་པ་གཉིས། སྦྱོར་ལམ་གྱི་དབང་དུ་བྱས་པ་གཉིས། མཐོང་སྒོམ་མི་སློབ་ལམ་གསུམ་གྱི་རེ་རེ་སྒོམ་མི་སྒོམ་ལས་བཟློག་པ་དང་། ཤེས་བྱ་མ་གཏོགས་པའི་དབང་དུ་བྱས་པ་རྣམས་སུ་ཡོད་པའི་ཕྱིར། བཟུཾང་བཾའི་རྩ་བའི་ངག་དོན་འགོད། གནཾས་སྐབཾས་འཇུག་པའི་ཡུལ་ཅན་གྱི་གཟུང་རྟོག་དགུ་པོ་ཆོས་ཅན། ཐེག་ཆེན་གྱི་སྒོམ་ལམ་གྱི་འཇུག་པ་བར་ཆད་མེད་ལམ་གྱི་སྤང་བྱ་ཡིན་ཏེ། དེའི་གཞོམ་བྱ་ཡིན་པའི་ཕྱིར། གཉིས་པ་འཛིན་རྟོག་རྒྱས་པར་བཤད་པ་ལ་གཉིས་ཏེ། སེམས་ཅན་དུ་གདགས་པ་ལ་བརྟེན་པ་དང་། གདགས་པའི་རྒྱུ་མཚན་ལ་བརྟེན་པའོ། །དང་པོ་ལ་གསུམ་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། སེམཾས་ཅནཾ་སེམས་ཅན་དུ་བཏགས་པ་སོགས་ཡུལ་དགུ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་ཆོས་ཅན། སེམས་ཅན་དུ་བཏགས་པ་ལ་བརྟེན་པའི་འཛིན་རྟོག་ཡིན་ཏེ། སྒོམ་སྤངས་རྟོག་པ་གང་ཞིག སེམས་ཅན་དུ་བཏགས་པ་སོགས་ཡུལ་དགུ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་ཡིན་པའི་ཕྱིར། གསུམ་པ་ནི། རྫསཾ་སུཾ་སྒོམ་སྤངས་འཛིན་རྟོག་དང་པོའི་ཡུལ་ཆོས་ཅན། དགུ་ཡོད་དེ། ཤེས་བྱའི་དབང་དུ་བྱས་པ་གསུམ། ཉན་རང་དང་། བྱང་སེམས་ཀྱི་ཤེས་རབ་གཉིས། ཐབས་གཉིས། སོ་སོ་སྐྱེ་བོའི་ལྟ་སྤྱོད་གཉིས་རྣམས་སུ་ཡོད་པའི་ཕྱིར། སྔཾ་མཾ་རྩ་བའི་ངག་དོན་འགོད། སྒོམཾ་པཾའི་གཟུང་རྟོག་དང་པོས་འགྲེའོ། །གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། སེམས་དང་མིཾ་མ་རིག་པ་དགུ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་ཆོས་ཅན། སྒོམ་སྤངས་འཛིན་རྟོག་གཉིས་པ་ཡིན་ཏེ། སྒོམ་སྤངས་རྟོག་པ་གང་ཞིག སེམས་ཅན་དུ་གདགས་པའི་རྒྱུ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། ཇིཾ་ལྟརཾ་སོགས་སོ། །གཉིས་པ་ནི། བདགཾ་ཉིདཾ་མདོར་བསྟན་གྱི་ངག་དོན་འགོད། གསུམ་པ་ནི། རྣམཾ་པཾ་སྒོམ་སྤངས་འཛིན་རྟོག་གཉིས་པའི་ཡུལ་ཆོས་ཅན། རྣམ་པ་དགུ་ཡོད་དེ། མཁྱེན་གསུམ་གྱི་སྒྲིབ་པ་ལ་རྨོངས་པ་སོགས་མ་རིག་པ་དགུ་ཡོད་པའི་ཕྱིར། སྔཾ་མཾ་མདོར་བསྟན་གྱི་ངག་དོན་འགོད། སྒོམཾ་པཾའི་བཟུང་རྟོག་གཉིས་པས་འགྲེའོ། །གསུམ་པ་གཉེན་པོའི་དབྱེ་བ་ནི། སྒོམཾ་པཾའི་སྒོམ་སྤངས་གཟུང་འཛིན་གྱི་རྣམ་རྟོག་བཞི་པོ་ཆོས་ཅན། ཁྱོད་ཀྱི་གཉེན་པོ་བཞི་པོ་རེ་རེ་ལ་ཡང་སྤང་བྱའི་སྒོ་ནས་དགུ་དགུར་ཡོད་དེ། ཁྱོད་བཞི་པོ་རེ་རེ་ལ་ཡང་དགུ་དགུར་ཡོད་པས་དེ་ལྟར་དབྱེ་བ་ཡིན་པའི་ཕྱིར། གསུམ་པ་བརྟེན་པ་ཡོན་ཏན་ལ་གཉིས་ལས། དང་པོ་ནི། སྔཾ་མཾ་ཡམས་ནད་འདི་རྣམས་ཟད་ནས་ནི་ཞེས་སོགས་ཚིགས་བཅད་གཉིས་གསུངས་པ་ཆོས་ཅན། དགོས་པ་ཡོད་དེ། སྒོམ་སྤངས་གཟུང་འཛིན་གྱི་རྣམ་པར་རྟོག་པ་མངོན་འགྱུར་བརྒྱ་རྩ་བརྒྱད་སྤངས་པ་ན་ཐེག་པ་གསུམ་གྱི་རྟོགས་རིགས་ཀྱི་ཡོན་ཏན་བར་མ་ཆད་དུ་བརྟེན་པར་ཤེས་པའི་ཆེད་ཡིན་པའི་ཕྱིར། གཉིས་པ་ནི། ཡམཾས་དང་སྒོམཾ་དག་ས་ལ་གནས་པའི་བྱང་སེམས་ཆོས་ཅན། ཐེག་པ་གསུམ་གྱི་རྟོགས་རིགས་ཀྱི་ཡོན་ཏན་བར་མ་ཆད་དུ་བརྟེན་པ་ཡིན་ཏེ། དེ་བརྟེན་པ་ལ་གེགས་བྱེད་པའི་མཚན་འཛིན་སྤངས་པའི་བྱང་སེམས་ཡིན་པའི་ཕྱིར། བཞི་པ་བར་ཆད་མེད་པའི་རྩེ་སྦྱོར་ལ་གཉིས་ཏེ། དངོས་དང་། དམིགས་རྣམ་མོ། །དང་པོ་ལ་གཉིས་ལས། དང་པོ་ནི། སྒོམ་པའི་བྱམས་མགོན་ཆོས་ཅན། སྒོམ་ལམ་རྩེ་སྦྱོར་གྱི་འོག་ཏུ་བར་ཆད་མེད་པའི་རྩེ་སྦྱོར་འཆད་པའི་རྒྱུ་མཚན་ཡོད་དེ། སྒོམ་ལམ་རྩེ་སྦྱོར་སྔོན་དུ་སོང་ནས་བར་ཆད་མེད་པའི་རྩེ་སྦྱོར་འབྱུང་བའི་ཕྱིར། གཉིས་པ་ནི། སྟོངཾ་དང་འགཾའ་ས་བཅུ་རྒྱུན་མཐའི་ཡེ་ཤེས་ཆོས་ཅན། བར་ཆད་མེད་པའི་རྩེ་སྦྱོར་ཡིན་ཏེ། དངོས་འབྲས་རྣམ་མཁྱེན་བསོད་ནམས་མང་པོའི་སྒོ་ནས་མདོ་ལས་དངོས་སུ་བསྟན་པའི་སྦས་དོན་གྱི་མངོན་རྟོགས་ཡིན་པའི་ཕྱིར། གཉིས་པ་ལ་གཉིས་ཏེ། དམིགས་རྣམ་དངོས་དང་། བསལ་བྱ་ལོག་པར་སྒྲུབ་པའོ། །དང་པོ་ལ་གཉིས་ལས། དང་པོ་ནི། དེའིཾ་དམིཾགས་འདི་ཡི་དམིགས་པ་དངོས་མེད་དེ། ཞེས་སོགས་གསུངས་པ་ཆོས་ཅན། དགོས་པ་ཡོད་དེ། བར་ཆད་མེད་རྩེའི་དམིགས་རྣམ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། འདིཾ་དང་བཾར་ཆོས་ཐམས་ཅད་བདེན་པའི་དངོས་པོ་མེད་པ་དེ་ཆོས་ཅན། བར་ཆད་མེད་རྩེའི་དམིགས་པའི་རྐྱེན་ཡིན་ཏེ། བར་ཆད་མེད་རྩེ་དེ་ཁྱོད་ལ་དམིགས་ནས་སྐྱེ་བའི་ཕྱིར། བདཾག་དང་བདཾག་རྒྱུན་མཐའ་མན་ཆད་ཀྱི་མཁྱེན་གསུམ་གྱི་དམིགས་རྣམ་མི་བརྗེད་པའི་དྲན་པ་ཆོས་ཅན། བར་ཆད་མེད་རྩེའི་བདག་པོའི་རྐྱེན་ཡིན་ཏེ། དེ་རང་དབང་དུ་སྐྱེ་བྱེད་ཡིན་པའི་ཕྱིར། རྣམཾ་དང་རྣམཾ་བར་ཆད་མེད་རྩེ་ཆོས་ཅན། ཞི་བའི་རྣམ་པ་ཅན་ཡིན་ཏེ། སྤྲོས་བྲལ་གྱི་རྣམ་པ་ཅན་ཡིན་པའི་ཕྱིར། གཉིས་པ་བསལ་བྱ་ལོག་པར་སྒྲུབ་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ནི། འདིཾ་དང་གནསཾ་བར་ཆད་མེད་རྩེའི་དམིགས་རྣམ་ཆོས་ཅན། ཁྱོད་ལ་རྟོག་གེ་པ་རྣམས་ཀླན་ཀ་འབྱུང་བའི་རྒྱུ་མཚན་ཡོད་དེ། ཁྱོད་རྟོག་གེ་པ་རྣམས་ཀྱིས་རྟོགས་པར་དཀའ་བའི་ཟབ་མོའི་གནས་ཡིན་པའི་ཕྱིར། ཐབཾས་ལཾ་བར་ཆད་མེད་རྩེའི་དམིགས་རྣམ་གྱི་གནས་ལ་ཀླན་ཀ་ཆོས་ཅན། ཁྱོད་ཐབས་ལ་མཁས་པས་བསལ་བར་བྱ་བ་ཡིན་ཏེ། ཁྱོད་ལ་ཐབས་ལ་མི་མཁས་པའི་ཀླན་ཀ་ཡིན་པའི་ཕྱིར། འདིསཾ་ནིཾ་བར་ཆད་མེད་རྩེའི་དམིགས་རྣམ་ལ་ཀླན་ཀ་འབྱུང་བར་བསྟན་པ་ཆོས་ཅན། དགོས་པ་ཡོད་དེ། དེའི་དམིགས་རྣམ་ཟབ་པར་རྟོགས་པའི་ཆེད་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། བློའིཾ་ནོརཾ་བར་ཆད་མེད་རྩེའི་འོག་ཏུ་ལོག་རྟོག་བཤད་པ་ཆོས་ཅན། དགོས་པ་ཡོད་དེ། ལོག་རྟོག་བསལ་ནས་བར་ཆད་མེད་རྩེའི་ཏིང་ངེ་འཛིན་བསྐྱེད་ཚུལ་བདེ་བླག་དུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། དམིགཾས་པཾ་བར་ཆད་མེད་རྩེའི་དམིགས་རྣམ་ལ་ལོག་པར་རྟོག་པའི་ལོག་རྟོག་ཆོས་ཅན། ཁྱོད་ལ་བཅུ་དྲུག་ཡོད་དེ། ཁྱོད་ཀྱི་ཡུལ་དེ་ལ་བཅུ་དྲུག་ཡོད་པའི་རྒྱུ་མཚན་གྱིས་ཁྱོད་ལ་བཅུ་དྲུག་དུ་ཕྱེ་བ་ཡིན་པའི་ཕྱིར། གསུམ་པ་ལ་གཉིས་ཏེ། བསལ་བྱ་ཀླན་ཀ་བསལ་ནས་ཏིང་ངེ་འཛིན་བསྐྱེད་པའི་ཚུལ་ལོ། །དང་པོ་ནི། འདུསཾ་བྱཾས་འདུས་བྱས་དང་འདུས་མ་བྱས་ཀྱི་ཁམས་བདེན་པའི་དངོས་པོར་མེད་པས་ཀུན་རྫོབ་དུ་རྣམ་མཁྱེན་གྱི་དམིགས་པ་མི་འཐད་སྙམ་པའི་ལོག་རྟོག་ཆོས་ཅན། ཁྱོད་བསལ་བྱ་ལོག་རྟོག་ཡིན་ཏེ། ཁྱོད་དོན་དམ་དུ་མེད་ན་ཀུན་རྫོབ་དུ་ཡང་མེད་དགོས་སོ་སྙམ་པའི་དོན་དམ་སྒོ་ཅན་གྱི་ལོག་རྟོག་ཡིན་པའི་ཕྱིར། ལོག་རྟོག་དེས་ཀུན་ནས་བསླངས་པའི་ཀླན་ཀ་ཆོས་ཅན། ཁྱོད་བསལ་བྱ་ཀླན་ཀ་ཡིན་ཏེ། ཁྱོད་དོན་དམ་གྱི་ཁས་བླངས་རྟགས་སུ་བཀོད་ནས་ཀུན་རྫོབ་སུན་འབྱིན་པའི་དོན་དམ་སྒོ་ཅན་གྱི་ཀླན་ཀ་ཡིན་པའི་ཕྱིར། དེས་འོག་མ་རྣམས་ལ་འགྲེའོ། །སྐྱེཾ་བོཾ་སྐབས་འདིར་བསྟན་གྱི་ལོག་རྟོག་བཅུ་དྲུག་བསྟན་པའི་མདོ་ཆོས་ཅན། དངོས་རྒྱུ་བར་ཆད་མེད་པའི་རྩེ་སྦྱོར་གྱི་དམིགས་རྣམ་ལ་བརྟེན་པའི་ལོག་རྟོག་ཤུགས་ལ་བསྟན་པ་ཡིན་ཏེ། དངོས་འབྲས་རྣམ་མཁྱེན་གྱི་དམིགས་རྣམ་ལ་ལོག་རྟོག་དངོས་སུ་བསྟན་པའི་ཕྱིར། གཉིས་པ་ནི། དེཾ་བཾས་བར་ཆད་མེད་རྩེའི་ཏིང་ངེ་འཛིན་འདོད་པའི་བྱང་སེམས་ཆོས་ཅན། བར་ཆད་མེད་རྩེའི་དམིགས་རྣམ་ལ་ལོག་པར་རྟོག་པའི་ལོག་རྟོག་བསལ་དགོས་ཏེ། བར་ཆད་མེད་རྩེའི་དམིགས་རྣམ་ལ་ངེས་པ་སྐྱེད་པའི་སྒོ་ནས་བར་ཆད་མེད་རྩེའི་ཏིང་ངེ་འཛིན་བསྐྱེད་དགོས་པའི་ཕྱིར། གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེསཾ་རབཾ་སོགས་སོ།། །།གསུམ་པ་བརྟན་པ་ཐོབ་པའི་དོན་དུ་བསྒོམ་པ་མཐར་གྱིས་པའི་སྦྱོར་བ་ལ་གསུམ་སྟེ། འབྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། རྩེཾ་མོཾའི་བྱམས་མགོན་ཆོས་ཅན། རྩེ་སྦྱོར་གྱི་འོག་དུ་མཐར་གྱིས་པའི་སྦྱོར་བ་འཆད་པའི་རྒྱུ་མཚན་ཡོད་དེ། རྩེ་སྦྱོར་གྱི་གནས་སྐབས་སུ་རྟོགས་པའི་མཁྱེན་གསུམ་གྱི་རྣམ་པ་མཐར་གྱིས་པས་གོ་རིམ་དུ་བསྒོམ་དགོས་པའི་ཕྱིར། གཉིས་པ་ལ་རྩ་བ་དང་། འགྲེལ་པ་གཉིས་ལས། དང་པོ་ནི། སྦྱིཾན་པཾ་སྦྱིན་པའི་ཕར་ཕྱིན་ནས་དངོས་མེད་ངོ་བོ་ཉིད་ཀྱི་བར་བཅུ་གསུམ་པོ་ཆོས་ཅན། ཚོགས་ལམ་དུ་མཐར་གྱིས་པའི་བྱ་བ་ཡིན་ཏེ། དེར་ཐོས་བསམ་གྱིས་གཏན་ལ་ཕབ་པར་བྱ་བ་ཡིན་པས་མཐར་གྱིས་པར་འཇོག་པ་ཡིན་པའི་ཕྱིར། དེ་ཆོས་ཅན། སྦྱོར་ལམ་དུ་མཐར་གྱིས་པ་སློབ་པ་ཡིན་ཏེ། དེར་རྒྱུན་ལྡན་དུ་སྒོམ་པར་བྱ་བ་ཡིན་པས་མཐར་གྱིས་པར་འཇོག་པ་ཡིན་པའི་ཕྱིར་རོ། །དེ་ཆོས་ཅན། མཐོང་སྒོམ་གྱི་གནས་སྐབས་སུ་མཐར་གྱིས་སྒྲུབ་པ་ཡིན་ཏེ། དེར་མངོན་སུམ་དུ་རྟོགས་པར་བྱ་བ་ཡིན་པས་མཐར་གྱིས་པར་འཇོག་པ་ཡིན་པའི་ཕྱིར། གཉིས་པ་ལ་གསུམ་སྟེ། སྦྱོར་བ་ཕུན་སུམ་ཚོགས་པ། བསམ་པ་ཕུན་སུམ་ཚོགས་པ། རྣམ་པར་དག་བྱེད་ཀྱི་ཆོས་སོ། །དང་པོ་ནི། ཕཾ་རོལཾ་ས་དང་པོའི་རྗེས་ཐོབ་ཀྱི་གནས་སྐབས་སུ་མཁྱེན་གསུམ་གྱི་རྣམ་པ་གོ་རིམ་བཞིན་དུ་སྒོམ་པའི་རྣལ་འབྱོར་ཆོས་ཅན། སྦྱིན་པའི་ཕར་ཕྱིན་གྱི་མཐར་གྱིས་པའི་སྦྱོར་བ་ཡིན་ཏེ། སྦྱིན་པའི་ཕར་ཕྱིན་གྱིས་ཟིན་པའི་སྒོ་ནས་མཁྱེན་གསུམ་གྱི་རྣམ་པ་གོ་རིམ་བཞིན་དུ་བཀླགས་ནས་བརྟན་པོར་བྱ་བའི་ཕྱིར་སྒོམ་པར་བྱེད་པའི་སེམས་དཔའི་རྣལ་འབྱོར་ཡིན་པའི་ཕྱིར། དེས་གཞན་ལྔ་ལ་འགྲེའོ། །གཉིས་པ་ནི། དྲནཾ་པཾ་དེ་ཆོས་ཅན། སངས་རྒྱས་རྗེས་སུ་དྲན་པའི་མཐར་གྱིས་པའི་སྦྱོར་བ་ཡིན་ཏེ། སངས་རྒྱས་རྗེས་སུ་དྲན་པས་ཟིན་པའི་སྒོ་ནས་མཁྱེན་གསུམ་གྱི་རྣམ་པ་གོ་རིམ་བཞིན་དུ་བཀླགས་ནས་བརྟན་པོར་བྱ་བའི་ཕྱིར་སྒོམ་པའི་སེམས་དཔའི་རྣལ་འབྱོར་ཡིན་པའི་ཕྱིར། དེས་གཞན་ལྔ་ལ་འགྲེའོ། །གསུམ་པ་ནི། གཟཾུགས་ལཾས་དེ་ཆོས་ཅན། དངོས་མེད་ངོ་བོ་ཉིད་ཀྱི་མཐར་གྱིས་པའི་སྦྱོར་བ་ཡིན་ཏེ། ཆོས་ཐམས་ཅད་བདེན་པའི་དངོས་པོ་མེད་པར་རྟོགས་པས་ཟིན་པའི་སྒོ་ནས་མཁྱེན་གསུམ་གྱི་རྣམ་པ་གོ་རིམ་བཞིན་དུ་བཀླགས་ནས་བརྟན་པོར་བྱ་བའི་ཕྱིར། སྒོམ་པའི་སེམས་དཔའི་རྣལ་འབྱོར་ཡིན་པའི་ཕྱིར། འདི་དག་ལས་མཐར་གྱིས་པ་དང་། མཐར་གྱིས་པའི་སྦྱོར་བའི་ཁྱད་པར་ནི། མཐར་གྱིས་བྱ་བ་སོགས་ཚོགས་ལམ་ནས་འཇོག་ཀྱང་མཐར་གྱིས་པའི་སྦྱོར་བ་ས་དང་པོ་ནས་འཇོག་ཚུལ་ཤེས་པ་གལ་ཆེ་བས་དེ་བློ་ཡུལ་དུ་མ་ཤར་བར་དུ་རང་གི་རྣ་བ་ཚད་མར་མི་བྱའོ། །གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེསཾ་རབཾ་སོགས་སོ།། །།བཞི་པ་བརྟན་པ་ཐོབ་ནས་ཅིག་ཆར་བསྒོམ་པ་སྐད་ཅིག་མའི་སྦྱོར་བ་ལ་གསུམ་སྟེ། འགྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། མཐཾར་གྱིསཾ་བྱམས་མགོན་ཆོས་ཅན། མཐར་གྱིས་པའི་སྦྱོར་བའི་འོག་ཏུ་སྐད་ཅིག་མའི་སྦྱོར་བ་འཆད་པའི་རྒྱུ་མཚན་ཡོད་དེ། མཐར་གྱིས་པའི་སྦྱོར་བས་བསྒོམས་པའི་རྣམ་པ་སྐད་ཅིག་མའི་སྦྱོར་བས་ཅིག་ཆར་དུ་སྒོམ་དགོས་པའི་ཕྱིར། གཉིས་པ་ལ་བཞི་སྟེ། རྣམ་པར་སྨིན་པ་མ་ཡིན་པའི་སྐད་ཅིག་མའི་སྦྱོར་བ། རྣམ་པར་སྨིན་པའི་སྐད་ཅིག་མའི་སྦྱོར་བ། མཚན་ཉིད་མེད་པའི་སྐད་ཅིག་མའི་སྦྱོར་བ། གཉིས་སུ་མེད་པའི་སྐད་ཅིག་མའི་སྦྱོར་བའོ། །དང་པོ་ལ་གཉིས་ཏེ། དངོས་དང་། དེའི་དཔེའོ། །དང་པོ་ལ་གཉིས་ལས། དང་པོ་ནི། དེཾ་ཡངཾ་བྱམས་མགོན་ཆོས་ཅན། སྐད་ཅིག་མའི་སྦྱོར་བ་བཞིའི་ནང་ནས་རྣམ་པར་སྨིན་པ་མ་ཡིན་པའི་སྐད་ཅིག་མའི་སྦྱོར་བ་དང་པོར་འཆད་པའི་རྒྱུ་མཚན་ཡོད་དེ། དེ་འཆད་པ་བཤད་པའི་རིམ་པ་ཡིན་པའི་ཕྱིར། དེས་འོག་མ་གསུམ་ལའང་འགྲེའོ། །གཉིས་པ་ནི། སྦྱིནཾ་དང་ལུཾགས་རྒྱུན་མཐའི་ཡེ་ཤེས་ཆོས་ཅན། རྣམ་པར་སྨིན་པ་མ་ཡིན་པའི་སྐད་ཅིག་མའི་སྦྱོར་བ་ཡིན་ཏེ། རྣམ་པར་སྨིན་པ་མ་ཡིན་པའི་ཟག་མེད་ཀྱི་རྟོགས་རིགས་གཅིག་སྒོམ་པའི་ཚེ་དེ་དང་རིས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་ཅིག་ཆར་བསྒོམ་ནུས་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡངཾ་ཇིཾ་ལྟཾར་སོགས་སོ། །གཉིས་པ་ནི། ཇིཾ་ལྟརཾ་དང་དཔེཾར་རྒྱུན་མཐའི་ཡེ་ཤེས་ཀྱིས་ཟག་མེད་ཀྱི་རྟོགས་རིགས་གཅིག་བསྒོམས་པའི་ཚེ་དེ་དང་རིས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་སྒོམ་ནུས་པ་ཆོས་ཅན། ཁྱོད་ཀྱི་མཐུན་དཔེ་ཡང་དག་ཡོད་དེ། སྐྱེས་བུའི་རྡོག་ཐབས་གཅིག་གིས་སྐྱོད་པ་ན་ཟོ་ཆུན་གྱི་རྒྱུད་ཐམས་ཅད་ཅིག་ཆར་འགུལ་བ་དེ་ཁྱོད་ཀྱི་མཐུན་དཔེ་ཡང་དག་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། གངཾ་དང་གངཾ་རྒྱུན་མཐའི་ཡེ་ཤེས་ཆོས་ཅན། རྣམ་པར་སྨིན་པའི་སྐད་ཅིག་མའི་སྦྱོར་བ་ཡིན་ཏེ། རྣམ་པར་སྨིན་པའི་ཟག་མེད་ཀྱི་རྟོགས་རིགས་གཅིག་བསྒོམ་པ་ན་དེ་དང་རིས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་སྒོམ་ནུས་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། གསུམ་པ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། སྦྱིནཾ་དང་སྔོནཾ་རྒྱུན་མཐའི་ཡེ་ཤེས་ཆོས་ཅན། མཚན་ཉིད་མེད་པའི་སྐད་ཅིག་མའི་སྦྱོར་བ་ཡིན་ཏེ། ཀུན་ནས་ཉོན་མོངས་དང་རྣམ་བྱང་གི་ཆོས་ཐམས་ཅད་བདེན་པའི་མཚན་ཉིད་མེད་པར་མངོན་སུམ་དུ་རྟོགས་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། བཞི་པ་ལ་གཉིས་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ནི། རྨིཾ་དང་ཡུལཾ་ཅནཾ་རྒྱུན་མཐའི་ཡེ་ཤེས་ཆོས་ཅན། གཉིས་སུ་མེད་པའི་སྐད་ཅིག་མའི་སྦྱོར་བ་ཡིན་ཏེ། འཁོར་འདས་ཀྱི་ཆོས་ཐམས་ཅད་གཟུང་འཛིན་གཉིས་སུ་མེད་པར་སྐད་ཅིག་མ་གཅིག་ཁོ་ན་ལ་མངོན་སུམ་དུ་རྟོགས་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེསཾ་རབཾ་སོགས་སོ།། །།གསུམ་པ་འབྲས་བུ་ཆོས་ཀྱི་སྐུ་ལ་གསུམ་སྟེ། འབྲེལ་དགོད་པས་མཚམས་སྦྱར། མཚོན་བྱེད་ཀྱི་ཆོས་རྒྱས་པར་བཤད། སྐབས་ཀྱི་སྒོ་ནས་མཇུག་བསྡུ་བའོ། །དང་པོ་ནི། དེཾ་ལྟརཾ་བྱམས་མགོན་ཆོས་ཅན། སྐད་ཅིག་མའི་སྦྱོར་བའི་འོག་དུ་འབྲས་བུ་ཆོས་ཀྱི་སྐུ་འཆད་པའི་རྒྱུ་མཚན་ཡོད་དེ། སྐད་ཅིག་མའི་སྦྱོར་བ་རྣམ་པར་བསྒོམ་པའི་སྐད་ཅིག་མ་གཉིས་པ་ལ་འབྲས་བུ་ཆོས་སྐུ་འབྱུང་བའི་ཕྱིར། གཉིས་པ་ལ་གཉིས་ཏེ། རྟེན་སྐུ་བཤད་པ། བརྟེན་པ་ཕྲིན་ལས་བཤད་པའོ། །དང་པོ་ལ་བཞི་སྟེ། ངོ་བོ་ཉིད་ཀྱི་སྐུ། ཡེ་ཤེས་ཆོས་ཀྱི་སྐུ། ལོངས་སྤྱོད་རྫོགས་པའི་སྐུ། སྤྲུལ་པའི་སྐུའོ། །དང་པོ་ལ་གསུམ་ལས། དང་པོ་ནི། དེཾ་ཡངཾ་བྱམས་མགོན་ཆོས་ཅན། སྐུ་བཞིའི་ནང་ནས་དང་པོར་ངོ་བོ་ཉིད་སྐུ་འཆད་པའི་རྒྱུ་མཚན་ཡོད་དེ། ངོ་བོ་ཉིད་ཀྱི་སྐུ་དེ་སྐུ་གཞན་གསུམ་གྱི་རྟེན་ཡིན་པའི་ཕྱིར། གཉིས་པ་ནི། ཐུབཾ་པཾའི་སངས་རྒྱས་སའི་ཆོས་ཉིད་ཀྱི་སྐུ་དེ་ཆོས་ཅན། ངོ་བོ་ཉིད་སྐུ་ཡིན་ཏེ། ཟག་མེད་ཀྱི་ཡེ་ཤེས་དང་། དག་པ་གཉིས་ལྡན་གྱི་དབྱིངས་དབྱེར་མེད་པའི་འདུས་མ་བྱས་ཀྱི་སྐུ་ཡིན་པའི་ཕྱིར། གསུམ་པ་ལ་གཉིས་ཏེ། ངོ་བོ་ཉིད་སྐུའི་རང་བཞིན། སྐུ་ལྷག་མ་གསུམ་པོ་ཐ་དད་དུ་བསྟན་པའི་དགོས་པའོ། །དང་པོ་ནི། ཐུབཾ་པ་དྲན་པ་ཉེར་བཞག་སོགས་ཡེ་ཤེས་སྡེ་ཚན་ཉེར་གཅིག་གི་ཆོས་ཉིད་ཆོས་ཅན། ངོ་བོ་ཉིད་སྐུ་ཡིན་ཏེ། དག་པ་གཉིས་ལྡན་གྱི་དབྱིངས་མཐར་ཐུག་པ་ཡིན་པའི་ཕྱིར། བཅོཾས་མཾ་ངོ་བོ་ཉིད་སྐུ་ཆོས་ཅན། འཇིག་རྟེན་ལས་འདས་པའི་ལམ་བསྒོམས་པའི་སྟོབས་ཀྱིས་འཐོབ་པ་ཡིན་གྱི་ངོ་བོ་གསར་དུ་བྱས་པ་མ་ཡིན་ཏེ། རྒྱུ་རྐྱེན་གྱིས་མ་བཅོས་པའི་མཐར་ཐུག་གི་ཡོན་ཏན་ཡིན་པའི་ཕྱིར། གཉིས་པ་ནི། སྐུ་ལྷག་ཆོས་ཅན་གྱི་སྐུ་གསུམ་པོ་ཆོས་ཅན། དོན་དམ་པར་ངོ་བོ་ཉིད་ཀྱི་སྐུ་དང་ཐ་མི་དད་ཀྱང་ཀུན་རྫོབ་དུ་ཐ་དད་དུ་རྣམ་པར་བཞག་པ་ཆོས་ཅན། དགོས་པ་ཡོད་དེ། སངས་རྒྱས་དང་། བྱང་སེམས་དང་། ཉན་ཐོས་ལ་སོགས་པའི་སྤྱོད་ཡུལ་དུ་སོ་སོར་སྣང་བའི་སངས་རྒྱས་ཀྱི་སྐུ་ལ་སྐུ་གསུམ་སོ་སོར་བཞག་པ་ཡིན་ནོ་ཞེས་ཤེས་པའི་ཆེད་ཡིན་པའི་ཕྱིར། གཉིས་པ་ལ་གསུམ་སྟེ། ཆོས་ཀྱི་སྐུའི་རང་བཞིན། ཡོན་ཏན་གྱི་ཁྱད་པར། དེ་ལ་རྩོད་པ་སྤང་བའོ། །དང་པོ་ལ་གསུམ་སྟེ། ཡེ་ཤེས་དང་སྐུ་ཐ་དད་དུ་བསྟན་པ། ཐ་མི་དད་དུ་འདོད་པ་དགག་པ། ཐ་དད་དུ་བསྟན་པ་ལ་རྩོད་པ་སྤང་བའོ། །དང་པོ་ལ་གསུམ་ལས། དང་པོ་ནི། དེཾ་ལྟཾར་བྱམས་མགོན་ཆོས་ཅན། ངོ་བོ་ཉིད་སྐུའི་འོག་ཏུ་ཡེ་ཤེས་ཆོས་སྐུ་འཆད་པའི་རྒྱུ་མཚན་ཡོད་དེ། ཡེ་ཤེས་ཆོས་སྐུ་དེ་གཟུགས་སྐུ་གཉིས་སུ་སྣང་བའི་རྒྱུ་ཡིན་པའི་ཕྱིར། གཉིས་པ་ནི། བྱཾང་ཆུཾབ་བྱང་ཕྱོགས་སོ་བདུན་སོགས་ཡེ་ཤེས་སྡེ་ཚན་ཉེར་གཅིག་པོ་ཆོས་ཅན། ངོ་བོ་ཉིད་སྐུའི་ཡོན་ཏན་ཡིན་ཏེ། ངོ་བོ་ཉིད་སྐུའི་མཚན་ཉིད་གསུམ་གྱི་ནང་ནས་དག་པ་གཉིས་ལྡན་གྱི་ཆོས་དབྱིངས་དང་དབྱེར་མེད་པའི་ཟག་མེད་ཀྱི་ཡེ་ཤེས་ཡིན་པའི་ཕྱིར། འཕགས་པའི་འོ། །གསུམ་པ་ལ་གཉིས་ཏེ། ཡོན་ཏན་སོ་སོར་བཤད་པ། ཐམས་ཅད་ཆོས་སྐུར་བསྡུ་བའོ། །དང་པོ་ལ་གཉིས་ཏེ། ཐུན་མོང་གི་ཡོན་ཏན་གྱི་སྡེ་ཚན། ཐུན་མོང་མ་ཡིན་པའི་ཡོན་ཏན་གྱི་སྡེ་ཚན་ནོ། །དང་པོ་ནི། དྲཾན་པཾ་སངས་རྒྱས་སའི་བྱང་ཕྱོགས་སོ་བདུན་ཆོས་ཅན། ཡེ་ཤེས་ཆོས་སྐུ་ཡིན་ཏེ། གནས་ཡོངས་སུ་གྱུར་པའི་ཡེ་ཤེས་མཐར་ཐུག་ཡིན་པའི་ཕྱིར། མངོན་པར་ཤེས་པ་དྲུག་གི་བར་ལ་འགྲེ་སྟེ། ཆོས་ཅན་ལ་སངས་རྒྱས་སའི་ཞེས་སྦྱར་རོ། །གཉིས་པ་ནི། སོཾ་སོཾ་སོ་སོ་ཡང་དག་རིག་པ་བཞི་ཆོས་ཅན། ཡེ་ཤེས་ཆོས་སྐུ་ཡིན་ཏེ། གནས་ཡོངས་སུ་གྱུར་པའི་ཡེ་ཤེས་མཐར་ཐུག་ཡིན་པའི་ཕྱིར། རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་འགྲེ་སྟེ། ཆོས་ཅན་རང་ལྡོག་ནས་བཟུང་བས་ཆོག་གོ །གཉིས་པ་ནི། བྱཾང་ཆཾུབ་སངས་རྒྱས་སའི་བྱང་ཕྱོགས་སོ་བདུན་སོགས་ཡེ་ཤེས་སྡེ་ཚན་ཉེར་གཅིག་པོ་ཆོས་ཅན། ཆོས་རྟགས་འགྲེ། གཉིས་པ་ཐ་མི་དད་དུ་འདོད་པ་དགག་པ་ལ་གཉིས་ཏེ། ཕྱོགས་སྔ་མ་བརྗོད། དེ་དགག་པའོ། །དང་པོ་ནི། གཞཾན་དཾག་སྐུ་གསུམ་དུ་འདོད་པ་དག་ན་རེ། ཐུབ་པའི་ངོ་བོ་ཉིད་སྐུ་ནི་ཞེས་པ་ནས་ཆོས་ཀྱི་སྐུ་ཞེས་བརྗོད་པ་ཡིན་ཞེས་པའི་བར་གྱི་ཚིགས་བཅད་དྲུག་པོ་ཆོས་ཅན། ཁྱོད་ཀྱིས་ངོ་བོ་ཉིད་སྐུ་སྟོན་པ་ཡིན་ཏེ། ཁྱོད་ཀྱི་ཚིགས་བཅད་དང་པོས་ངོ་བོ་ཉིད་སྐུ་མཚན་ཉིད་གསུམ་ལྡན་དུ་བསྟན། ཚིགས་བཅད་ཕྱི་མ་རྣམས་ཀྱིས་མཚན་ཉིད་གསུམ་གྱི་ནང་ནས་ཟག་མེད་ཀྱི་ཆོས་རྒྱས་པར་བཤད་པའི་ཕྱིར་ཞེས་ཟེར། གཉིས་པ་ནི། གཞཾན་དཾག་སྐུ་བཞིར་འདོད་པ་དག་ན་རེ། སངས་རྒྱས་ཀྱི་སྐུ་ཐམས་ཅད་སྐུ་གསུམ་དུ་བསྡུས་ན་སངས་རྒྱས་ཀྱི་སའི་གཟུང་འཛིན་གཉིས་སུ་མེད་པའི་སེམས་དང་སེམས་ལས་བྱུང་བ་དེ་ཆོས་ཅན། སངས་རྒྱས་ཀྱི་སྐུས་མ་བསྡུས་པར་ཐལ། སྐུ་གསུམ་པོ་གང་རུང་མ་ཡིན་པའི་ཕྱིར་ཞེས་ཟེར་རོ། །གསུམ་པ་ཐ་དད་དུ་བསྟན་པ་ལ་རྩོད་པ་སྤོང་བ་ལ་གཉིས་ཏེ། རྩོད་པ་དང་། ལན་ནོ། །དང་པོ་ནི། ཁཾ་ཅིགཾ་སྐུ་གསུམ་དུ་འདོད་པ་དག་ན་རེ། སངས་རྒྱས་ཀྱི་སྐུ་ཆོས་ཅན། ཁྱོད་ལ་གསུམ་ཁོ་ནར་གྲངས་ངེས་ཏེ། ཁྱོད་གསུམ་དུ་གྲངས་ངེས་པའམ། བཞིར་གྲངས་ངེས་པ་གང་རུང་གང་ཞིག ཁྱོད་བཞིར་གྲངས་ངེས་ན། ལུས་རྣམ་གཞག་ཏུ་ངོ་བོ་ཉིད་ཅེས་བྱ་བའི་སྒྲའི་མཇུག་ཐོབ་དེ་མ་ཐག་དུ་ཆོས་ཀྱི་སྐུ་ཞེས་བྱ་བའི་སྒྲ་འབྱུང་རིགས་པ་ལས་དེ་མི་འབྱུང་བའི་ཕྱིར་རོ་ཞེས་ཟེར་རོ། །གཉིས་པ་ནི། གཞནཾ་དག་ལུས་རྣམ་བཞག་ཏུ་ཆོས་སྐུ་མཛད་པ་བཅས་པ་སྟེ་ཞེས་ཆོས་སྐུ་མཇུག་དུ་སྨོས་པ་ཆོས་ཅན། དགོས་པ་ཡོད་དེ། ལུས་རྣམ་བཞག་གི་ཚིགས་བཅད་སྦྱར་བདེ་བའི་ཆེད་ཡིན་པའི་ཕྱིར་དང་། ཡེ་ཤེས་ཁོ་ན་དང་མཛད་པ་སྦྱར་བའི་ཆེད་ཡིན་པའི་ཕྱིར། དེཾའི་ཕྱིཾར་བསྟན་བཅོས་འདིར་ཆོས་ཅན། སྐུ་བཞིར་གྲངས་ངེས་པ་ལ་ཕྱོགས་མཐུན་གྱི་ལུང་ཡོད་དེ། སྔགས་ཀྱི་ཐེག་པ་ནས་ཀྱང་སྐུ་བཞིར་གསུངས་པའི་ཕྱིར། གཉིས་པ་ཡོན་ཏན་གྱི་ཁྱད་པར་ལ་གཉིས་ཏེ། ཉོན་མོངས་མེད་པའི་ཁྱད་པར། སྨོན་གནས་ཤེས་པའི་ཁྱད་པར་རོ། །དང་པོ་ལ་གཉིས་ལས། དང་པོ་ནི། ཉཾན་ཐོཾས་ཉན་ཐོས་ཉོན་མོངས་མེད་པའི་ལྟ་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། སངས་རྒྱས་ཀྱི་ཉོན་མོངས་མེད་པའི་ཏིང་ངེ་འཛིན་གྱི་ཁྱད་པར་རྟོགས་པའི་ཆེད་ཡིན་པའི་ཕྱིར། གཉིས་པ་ནི། ཉཾན་དང་ཉཾན་ཉན་ཐོས་ཀྱི་ཉོན་མོངས་པ་མེད་པའི་ཏིང་ངེ་འཛིན་དེ་ཆོས་ཅན། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ལས་དམན་ཏེ། མིའི་རྒྱུད་ཀྱི་ཉོན་མོངས་པ་སྐྱེ་རུང་འགོག་པ་ཙམ་གྱི་བྱེད་ལས་ཅན་ཡིན་གྱི་ཉོན་མོངས་ཀྱི་རྒྱུན་དྲུང་ནས་འབྱིན་མི་ནུས་པའི་ཕྱིར། གྲོཾང་དང་དེཾ་སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་དེ་ཆོས་ཅན། ཉན་ཐོས་ལ་སོགས་པའི་ཉོན་མོངས་པ་མེད་པའི་ཏིང་ངེ་འཛིན་ལས་ཁྱད་པར་དུ་འཕགས་ཏེ། ཆོས་སྟོན་པའི་སྒོ་ནས་གཞན་རྒྱུད་ཀྱི་ཉོན་མོངས་པའི་རྒྱུན་དྲུང་ནས་འབྱིན་ནུས་པའི་ཏིང་ངེ་འཛིན་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ཉཾན་ཐོཾས་སངས་རྒྱས་སྨོན་གནས་མཁྱེན་པ་ནི་ཞེས་སོགས་ཀྱི་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། སངས་རྒྱས་ཀྱི་སྨོན་གནས་མཁྱེན་པའི་ཁྱད་པར་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། གཉིས་པ་ནི། སངཾས་དང་དེཾ་སངས་རྒྱས་ཀྱི་སྨོན་གནས་མཁྱེན་པ་ཆོས་ཅན། ཉན་ཐོས་ཀྱི་སྨོན་གནས་ཤེས་པ་ལས་ཁྱད་པར་དུ་འཕགས་པ་ཡིན་ཏེ། ལྷུན་གྱིས་གྲུབ་པ་སོགས་ཁྱད་ཆོས་ལྔ་ལྡན་གྱི་ཏིང་ངེ་འཛིན་ཡིན་པའི་ཕྱིར། ཉཾན་ཐོཾས་ཉན་ཐོས་ཀྱི་སྨོན་གནས་ཤེས་པ་ཆོས་ཅན། སངས་རྒྱས་ཀྱི་སྨོན་གནས་མཁྱེན་པ་ལས་དམན་ཏེ། ལྷུན་གྱིས་གྲུབ་པ་སོགས་ཁྱད་ཆོས་ལྔ་ལས་ལྡོག་པའི་ཏིང་ངེ་འཛིན་ཡིན་པའི་ཕྱིར། གསུམ་པ་རྩོད་པ་སྤང་བ་ལ་གཉིས་ཏེ། ཆོས་སྐུ་རྟག་པ་ལ་རྩོད་པ་སྤོང་བ། ཁྱབ་རྟག་གཉིས་ཀ་ལ་རྩོད་པ་སྤང་བའོ། །དང་པོ་ལ་གཉིས་ཏེ། སྐལ་ལྡན་ལ་སྣང་བ། སྐལ་མེད་ལ་མི་སྣང་བ་དཔེས་བསྟན་པའོ། །དང་པོ་ལ་གཉིས་ལས། དང་པོ་ནི། རྟགཾ་ཏུཾ་རྒྱུད་ནི་ཡོངས་སུ་སྨིན་གྱུར་ནས་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། ཆོས་སྐུ་རྟག་པ་ཡིན་ན། རྟག་ཏུ་ཇི་ལྟར་དོན་མི་མཛད་ཅེས་པའི་ལན་གདབ་པའི་ཆེད་ཡིན་པའི་ཕྱིར། གཉིས་པ་ནི། རྒྱུཾ་དང་དེཾ་དགེཾ་ཆོས་སྐུ་ཆོས་ཅན། སྐལ་ལྡན་ལ་རྟག་ཏུ་དོན་མཛད་དེ། སྐལ་ལྡན་ལ་རྟག་ཏུ་དོན་མཛད་པའི་སྨོན་ལམ་གྲུབ་པའི་ཕྱིར། རངཾ་གིཾ་ཆོས་སྐུ་ཆོས་ཅན། སྐལ་མེད་ལ་དངོས་སུ་མི་སྣང་སྟེ། སྐལ་མེད་ལ་དངོས་སུ་སྣང་བའི་རྒྱུ་མ་ཚང་བའི་ཕྱིར། གཉིས་པ་ལ་གཉིས་ལས། དང་པོ་ནི། དེཾ་ཇིཾ་སོགས་སོ། །གཉིས་པ་ནི། ལྷཾ་དང་དཔེཾར་ཆོས་སྐུ་སྐལ་མེད་ལ་དངོས་སུ་མི་སྣང་བ་ཆོས་ཅན། ཁྱོད་ཀྱི་དཔེ་ཡོད་དེ། ལྷའི་དབང་པོས་ཆར་ཕབ་ཀྱང་ས་བོན་རུལ་བ་ལས་མྱུ་གུ་མི་འབྱུང་བ་དེ་ཁྱོད་ཀྱི་དཔེ་ཡིན་པའི་ཕྱིར། གཉིས་པ་ལ་གཉིས་ལས། དང་པོ་ནི། ཡེཾ་ཤེཾས་དེ་ལྟར་མཛད་པ་རྒྱ་ཆེ་བའི་ཕྱིར་ཞེས་སོགས་ཚིགས་བཅད་གཅིག་གསུངས་པ་ཆོས་ཅན། དགོས་པ་ཡོད་དེ། ཆོས་སྐུ་རྟག་པ་ཡིན་ན། སྐད་ཅིག་རེ་རེ་ལ་འབྱུང་བ་དང་། ཁྱབ་པ་ཡིན་ན་རྒྱུད་སོ་སོར་ངེས་པ་མི་འཐད་ཅེས་པའི་ལན་བཏབ་པའི་ཆེད་ཡིན་པའི་ཕྱིར། གཉིས་པ་ནི། དེཾ་དང་དེཾ་ཆོས་སྐུ་ཆོས་ཅན། ཁྱབ་པ་ཞེས་བརྗོད་དེ། གཞན་དོན་རྒྱ་ཆེ་བའི་ཕྱིར། དེ་ཆོས་ཅན། རྟག་པ་ཞེས་བརྗོད་དེ། འཁོར་བ་ཇི་སྲིད་པར་རྒྱུན་མི་འཆད་པའི་ཕྱིར། གསུམ་པ་ལོངས་སྤྱོད་རྫོགས་པའི་སྐུ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། དེཾ་ལྟཾར་བྱམས་མགོན་ཆོས་ཅན། ཆོས་སྐུའི་འོག་ཏུ་ལོངས་སྐུ་འཆད་པའི་རྒྱུ་མཚན་ཡོད་དེ། ཆོས་སྐུ་དེ་བྱང་སེམས་འཕགས་པ་ལ་ལོངས་སྐུར་སྣང་བ་སྟོན་པའི་ཕྱིར། གཉིས་པ་ནི། མཚཾན་དང་མཚཾན་ས་བཅུ་པ་ལ་བཞུགས་པའི་བྱང་སེམས་ཁོ་ན་ལ་སྣང་བའི་སངས་རྒྱས་ཀྱི་གཟུགས་སྐུ་ཆོས་ཅན། ལོངས་སྤྱོད་རྫོགས་པའི་སྐུ་ཡིན་ཏེ། ངེས་པ་ལྔ་ལྡན་གྱི་གཟུགས་སྐུ་མཐར་ཐུག་ཡིན་པའི་ཕྱིར། གཉིས་པ་ལ་གཉིས་ཏེ། མཚན་བཤད་པ། དཔེ་བྱད་བཤད་པའོ། །དང་པོ་ལ་གཉིས་ཏེ། མཚན་དངོས་དང་། མཚན་གྱི་རྒྱུའོ། །དང་པོ་ལ་གཉིས་ལས། དང་པོ་ནི། མཚཾན་གསུཾམ་སོགས་སོ། །གཉིས་པ་ནི། ཕྱཾག་དང་བླཾ་ལོངས་སྐུའི་ཕྱག་དང་ཞབས་ཀྱི་འཁོར་ལོའི་མཚན་ཆོས་ཅན། ལོངས་སྐུའི་མཚན་ཡིན་ཏེ། ལོངས་སྐུ་དེ་གཞན་ངོར་སྐྱེས་བུ་ཆེན་པོར་མཚོན་ཞིང་མཐོང་བ་ཙམ་གྱིས་དྭང་བར་མཛད་པའི་ལོངས་སྐུའི་ཡོན་ཏན་ཡིན་པའི་ཕྱིར། དེས་གཞན་རྣམས་ལ་འགྲེའོ། །གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ལ་གཉིས་ལས། དང་པོ་ནི། རྒྱུཾ་གྲུབཾ་སོགས་སོ། །གཉིས་པ་ནི། འདིཾ་དང་མཚཾན་བླ་མ་རྣམས་ལ་བསུ་བ་དང་སྐྱེལ་བ་སོགས་སུམ་ཅུ་སོ་གཉིས་ཆོས་ཅན། མཚན་གྱི་རྒྱུ་ཡིན་ཏེ། མཚན་སྐྱེད་བྱེད་ཡིན་པའི་ཕྱིར། གཉིས་པ་ལ་གསུམ་ལས། དང་པོ་ནི། རྒྱུཾ་དེཾ་སོགས་སོ། །གཉིས་པ་ནི། བླཾ་མཾ་མཚན་སྒྲུབ་བྱེད་ཀྱི་རྒྱུ་སུམ་ཅུ་སོ་གཉིས་པོའི་ལྷག་མ་རྣམས་ཆོས་ཅན། ཁྱོད་སྐབས་འདིར་དངོས་སུ་མ་བསྟན་ཀྱང་མི་རྟོགས་པའི་སྐྱོན་མེད་དེ། ཁྱོད་སྐབས་འདིར་དངོས་སུ་མ་བསྟན་ཀྱང་མདོ་ལས་རྟོགས་ནུས་པའི་ཕྱིར། གསུམ་པ་ནི། ཚིཾག་ལེཾ་བླ་མ་སྐྱེལ་ལ་སོགས་པ་དང་ཞེས་སོགས་ཚིགས་བཅད་གཉིས་ཆོས་ཅན། ཁྱོད་ཀྱི་འགྲེལ་པ་སྐབས་འདིར་དངོས་སུ་མི་འབྲི་བའི་རྒྱུ་མཚན་ཡོད་དེ། ཁྱོད་ཀྱི་འགྲེལ་པ་གོང་དུ་མཚན་བཤད་པར་བྲིས་ཟིན་པའི་ཕྱིར། གཉིས་པ་དཔེ་བྱད་བཤད་པ་ལ་གསུམ་ལས། དང་པོ་ནི། དེཾ་ལྟརཾ་སོགས་སོ། །གཉིས་པ་ལ་སྡེ་ཚན་བཅུ་སྟེ། སེན་མོའི་དབང་དུ་བྱས་པ། སོར་མོའི་རྩེའི། རྩའི། ཞབས་ཀྱི། གཤེགས་ཚུལ་གྱི། སྐུའི་དཀྱིལ་འཁོར་གྱི། ཕྱག་གི ཞལ་གྱི་དཀྱིལ་འཁོར་གྱི། དབུ་འཁོར་དང་བཅས་པའི། དགེ་མཚན་གྱི་དབང་དུ་བྱས་པའོ། །དང་པོ་ནི། ཐུབཾ་པཾའི་སོགས་སོ། །གཉིས་པ་ནི། སོརཾ་མོཾ་སོགས་སོ། །གསུམ་པ་ནི། རྩཾ་མིཾ་སོགས་སོ། །བཞི་པ་ནི། ལོཾང་བུཾ་སོགས་སོ། །ལྔ་པ་ནི། སེངཾ་གེཾ་སོགས་སོ། །དྲུག་པ་ནི། འཁྲིཾལ་བཾག་སོགས་སོ། །བདུན་པ་ནི། ཕྱཾག་ནིཾ་སོགས་སོ། །བརྒྱད་པ་ལ་དྲུག་སྟེ། ཞལ་གྱི་དབང་དུ་བྱས་པ། ལྗགས་གསུང་དང་བཅས་པའི། མཆེ་བའི། ཤངས་ཀྱི། སྤྱན་འཁོར་དང་བཅས་པའི། སྙན་གྱི་དབང་དུ་བྱས་པའོ། །དང་པོ་ནི། ཞཾལ་ནིཾ་སོགས་སོ། །གཉིས་པ་ནི། ལྗཾགས་མཉེཾན་སོགས་སོ། །གསུམ་པ་ནི། མཆེཾ་བཾ་སོགས་སོ། །བཞི་པ་ནི། ཤངཾས་མཐོཾ་སོགས་སོ། །ལྔ་པ་ནི། སྤྱཾན་ཡངཾས་སོགས་སོ། །དྲུག་པ་ནི། ཕྱཾག་རིངཾ་སོགས་སོ། །དགུ་པ་ནི། དཔྲཾལ་བཾ་སོགས་སོ། །བཅུ་པ་ནི། དཔཾལ་གྱིཾ་སོགས་སོ། །གསུམ་པ་ནི། འདུཾ་བྱེཾད་ལོངས་སྐུའི་སེན་མོ་ཟངས་ཀྱི་མདོག་ལྟ་བུ་ཆོས་ཅན། ལོངས་སྐུའི་དཔེ་བྱད་ཡིན་ཏེ། ཆོས་རྟགས་མཚན་གྱི་སྐབས་དང་འདྲ། དེས་འོག་མ་རྣམས་ལ་འགྲེའོ། །དེས་ན་མདོ་སྡེ་རྒྱན་ལས་ལུས་ཅན་ཀུན་གྱིས་ཁྱོད་མཐོང་ན། །སྐྱེས་བུ་དམ་པ་ལེགས་པར་འཚལ། །མཐོང་བ་ཙམ་གྱིས་རབ་དང་བར། །མཛད་པ་ཁྱོད་ལ་ཕྱག་འཚལ་ལོ། །ཞེས་པའི་སྔ་ཕྱི་གཉིས་གཉིས་མཚན་དང་དཔེ་བྱད་སོ་སོ་ལ་སྦྱར་བ་ནི་དགོངས་པ་མིན་ཏེ། འགྲེལ་པར་གཉིས་ཀ་ལ་གཉིས་ཀ་སྦྱར་བའི་ཕྱིར་རོ། །དེ་ཡང་མཚན་དང་དཔེ་བྱད་གཉིས་ཀའི་སྐད་དོད་ལ། ལཀྵ་མི་ཞེས་པ་ཡོད་ལ། དེ་ནི་མཚན་ཉིད་དང་། མཚོན་བྱ་དང་། བྱ་བ་དང་། བྱེད་པ་དང་། མཚན་དང་། དཔེ་བྱད་རྣམས་ལ་འཇུག་པས་ཚིག་རྐང་དང་པོ་གཉིས་ཀྱིས་མཚན་ཉིད་བསྟན་ཞིང་། ཕྱི་མ་གཉིས་ཀྱིས་བྱེད་ལས་བསྟན་པ་ནི་གཉིས་ཀ་ལ་འདྲ་བའི་དབང་དུ་བྱས་པའོ། །བཞི་པ་སྤྲུལ་པའི་སྐུ་ལ་གཉིས་ལས། དང་པོ་ནི། དེཾ་ལྟཾར་བྱམས་མགོན་ཆོས་ཅན། ལོངས་སྐུའི་འོག་ཏུ་སྤྲུལ་སྐུ་འཆད་པའི་རྒྱུ་མཚན་ཡོད་དེ། ལོངས་སྐུ་དེ་སྤྲུལ་སྐུར་སྣང་བའི་རྒྱུ་ཡིན་པའི་ཕྱིར། གཉིས་པ་ནི། གཾང་དང་ཤཱཾཀྱཾ་ཤཱཀྱ་ཐུབ་པ་ཆོས་ཅན། སྤྲུལ་བའི་སྐུ་ཡིན་ཏེ། གདུལ་བྱ་རིགས་ཅན་གསུམ་གྱི་དོན་མཉམ་དུ་མཛད་པའི་སངས་རྒྱས་ཀྱི་གཟུགས་སྐུ་ཡིན་པའི་ཕྱིར། གཉིས་པ་བརྟེན་པ་ཕྲིན་ལས་ལ་གསུམ་ལས། དང་པོ་ནི། དེཾ་ལྟཾར་བྱམས་མགོན་ཆོས་ཅན། ཁྱད་པར་བཞི་ལྡན་གྱི་སྐུ་གསུམ་བསྟན་ཟིན་ནས་ཕྲིན་ལས་འཆད་པའི་རྒྱུ་མཚན་ཡོད་དེ། ཀུན་རྫོབ་དུ་ཆོས་སྐུ་དེ་ལོངས་སྐུར་སྣང་བ་བསྐྱེད། ལོངས་སྐུ་དེ་སྤྲུལ་སྐུར་སྣང་བ་བསྐྱེད་པའི་སྒོ་ནས་ཕྲིན་ལས་མཛད་པ་ཡིན་པའི་ཕྱིར། གདུཾལ་བྱཾའི་ཕྲིན་ལས་ཉེར་བདུན་ཆོས་ཅན། ཆོས་སྐུའི་ཕྲིན་ལས་ཡིན་ཏེ། ཆོས་སྐུའི་བདག་རྐྱེན་ལ་བརྟེན་ནས་བྱུང་བའི་རྣམ་དཀར་གྱི་ལས་ཡིན་པའི་ཕྱིར། གཉིས་པ་ལ་གསུམ་སྟེ། ཕྲིན་ལས་ཀྱི་དུས། ཕྲིན་ལས་ཀྱི་དབྱེ་བ། ཕྲིན་ལས་ཀྱི་གྲངས་ངེས་སོ། །དང་པོ་ནི། དེཾ་བཞིཾན་སོགས་སོ། །གཉིས་པ་ལ་གསུམ་སྟེ། གདུལ་བྱ་ལམ་གྱི་རྟེན་ལ་འགོད་པ། ལམ་ལ་འགོད་པ། ལམ་གྱི་འབྲས་བུ་ལ་འགོད་པའོ། །དང་པོ་ནི། འགྲོཾ་རྣམཾས་སོགས་སོ། །གཉིས་པ་ལ་ཚོགས་ལམ་ལ་འགོད་པ། སྦྱོར་ལམ་ལ། མཐོང་ལམ་ལ། སྒོམ་ལམ་ལ་འགོད་པའོ། །དང་པོ་ནི། བསྡུཾ་རྣམཾས་སོགས་སོ། །གཉིས་པ་ནི། རངཾ་བཞིནཾ་སོགས་སོ། །གསུམ་པ་ནི། གཉིསཾ་ཟདཾ་དཾང་སོགས་སོ། །བཞི་པ་ནི། བརྡཾ་དཾང་སོགས་སོ། །གསུམ་པ་ནི། མྱཾ་ངནཾ་སོགས་སོ། །གསུམ་པ་ནི། ཆོསཾ་ཀྱིཾ་སོགས་སོ། །གསུམ་པ་ལ་གསུམ་སྟེ། ཕྲིན་ལས་ཀྱི་དབྱེ་བ། ཕྲིན་ལས་ཀྱི་དུས། ཕྲིན་ལས་ཀྱི་ས་མཚམས་སོ། །དང་པོ་ནི། དཾང་པོཾར་ཆོས་སྐུ་ཆོས་ཅན། གདུལ་བྱ་ལམ་གྱི་རྟེན་ལ་འགོད་པར་མཛད་དེ། གདུལ་བྱ་ངེས་འབྱུང་གི་བསམ་པ་ལ་འགོད་པར་མཛད་པའི་ཕྱིར། སྦྱིཾན་པཾ་ཆོས་སྐུ་ཆོས་ཅན། གདུལ་བྱ་ཚོགས་ལམ་ལ་འགོད་པར་མཛད་དེ། གདུལ་བྱ་བསྡུ་བའི་དངོས་པོ་བཞི་ལ་སོགས་པ་ལ་འགོད་པར་མཛད་པའི་ཕྱིར། དེཾ་ནཾས་ཆོཾས་ཆོས་སྐུ་ཆོས་ཅན། གདུལ་བྱ་སྦྱོར་ལམ་ལ་འགོད་པར་མཛད་དེ། གདུལ་བྱ་རང་བཞིན་སྟོང་པ་ཉིད་གོམས་པ་ལ་འགོད་པར་མཛད་པའི་ཕྱིར། དེའིཾ་རྗེསཾ་ཆོས་སྐུ་ཆོས་ཅན། གདུལ་བྱ་ས་དང་པོ་ལ་འགོད་པར་མཛད་དེ། གདུལ་བྱ་སྦྱིན་པའི་ཕར་ཕྱིན་ལ་བརྟེན་ནས་ཆོས་དབྱིངས་ཀུན་ཏུ་འགྲོ་བ་རྟོགས་པ་ལ་འགོད་པར་མཛད་པའི་ཕྱིར། དེཾ་ནསཾ་ཚོགཾས་ཆོས་སྐུ་ཆོས་ཅན། གདུལ་བྱ་ས་གཉིས་པ་ནས་ལྔ་པའི་བར་ལ་འགོད་པར་མཛད་དེ། གདུལ་བྱ་ཚུལ་ཁྲིམས་ལ་སོགས་པའི་ཆོས་ཐམས་ཅད་བརྡར་བཏགས་པ་ཙམ་དུ་ཤེས་པ་ལ་འགོད་པའི་ཕྱིར། དེས་འོག་མ་རྣམས་ལ་འགྲེའོ། །གཉིས་པ་ནི། དེཾ་ལྟརཾ་ཆོས་སྐུའི་ཕྲིན་ལས་ཉེར་བདུན་ཆོས་ཅན། རྒྱུན་མི་ཆད་པར་འཇུག་པ་ཡིན་ཏེ། འཁོར་བ་ཇི་སྲིད་པར་འཇུག་པའི་ཕྱིར། གསུམ་པ་ནི། སེམཾས་བཾསྐྱེད། དང་པོ་སེམས་བསྐྱེད་དང་ཐ་མ་ཆོས་སྐུའི་ཕྲིན་ལས་ཀྱི་ས་མཚམས་བསྟན་པའི་གཞུང་ཆོས་ཅན། ཁྱོད་ལ་བརྟེན་ནས་ལྷག་མ་བར་གྱི་ཚིག་རྣམས་ཀྱི་ས་མཚམས་ཁོང་དུ་ཆུད་པར་བྱ་བ་ཡིན་ཏེ། ཁྱོད་ལ་བརྟེན་ནས་ལྷག་མ་བར་གྱི་ཚིག་གི་དོན་རྣམས་ཀྱི་ས་མཚམས་རྟོགས་པར་བྱ་བ་ཡིན་པའི་ཕྱིར། ཚིགཾ་མངཾ་སེང་གེ་བཟང་པོ་ཆོས་ཅན། ལྷག་མ་བར་གྱི་ཚིག་གི་དོན་རྣམས་ཀྱི་ས་མཚམས་འགྲེལ་པ་འདིར་དངོས་སུ་མ་བྲིས་པའི་རྒྱུ་མཚན་ཡོད་དེ། འགྲེལ་པ་ཚིག་མང་དུ་དོགས་པའི་ཕྱིར། གསུམ་པ་སྐབས་ཀྱི་སྒོ་ནས་མཇུག་བསྡུ་བ་ནི་ཤེསཾ་རཾབ་སོགས་སོ།། །།གཉིས་པ་བར་པ་ལ་དད་པ་ལ་དྲུག་ཏུ་བསྟན་པ་ལ་གསུམ་ལས། དང་པོ་ནི། རྒྱསཾ་པཾ་བྱམས་མགོན་ཆོས་ཅན། ཡུམ་དོན་དངོས་པོ་བརྒྱད་ཀྱི་སྒོ་ནས་བཤད་པའི་འོག་ཏུ་ཡུམ་དོན་དངོས་པོ་དྲུག་གི་སྒོ་ནས་བཤད་པའི་རྒྱུ་མཚན་ཡོད་དེ། རྒྱས་པ་ལ་དགའ་བའི་གདུལ་བྱ་རྗེས་སུ་འཛིན་པའི་འོག་ཏུ་བར་པ་ལ་དགའ་བའི་གདུལ་བྱ་རྗེས་སུ་འཛིན་དགོས་པའི་ཕྱིར། གཉིས་པ་ནི། མཚཾན་ཉིདཾ་བྱམས་མགོན་ཆོས་ཅན། ཤེར་ཕྱིན་ཡང་དག་པར་བཤད་པ་ཡིན་ཏེ། ཤེར་ཕྱིན་དངོས་པོ་དྲུག་གི་སྒོ་ནས་མདོ་ཇི་ལྟ་བ་བཞིན་བཤད་པའི་ཕྱིར། གསུམ་པ་ནི། དངཾ་པོརཾ་སྐབས་དང་པོ་གསུམ་དུ་བསྟན་པའི་མཁྱེན་གསུམ་ཆོས་ཅན། མཁྱེན་གསུམ་གྱི་ལས་གྲུབ་ཀྱི་དབང་དུ་བྱས་པའི་མཚན་ཉིད་ཡིན་ཏེ། མཁྱེན་གསུམ་མཚོན་བྱེད་ཀྱི་ཆོས་སུམ་ཅུས་མཚོན་པར་བྱ་བ་ཡིན་པའི་ཕྱིར། དེཾ་ནཾས་རྣམ་རྫོགས་སྦྱོར་བ་ཆོས་ཅན། མཁྱེན་གསུམ་གྱི་སྦྱོར་བ་ཡིན་ཏེ། མཁྱེན་གསུམ་གྱི་རྣམ་པ་སྒོམ་པ་ལ་སྦྱོར་བའི་སེམས་དཔའི་རྣལ་འབྱོར་ཡིན་པའི་ཕྱིར། དེཾ་ནཾས་རྩེ་སྦྱོར་ཆོས་ཅན། མཁྱེན་གསུམ་གྱི་རབ་ཀྱི་གནས་སྐབས་ཡིན་ཏེ། མཁྱེན་གསུམ་གྱི་རྣམ་པ་སྒོམ་པ་ལས་རྟོགས་པ་ཕུལ་བྱུང་ཐོབ་པའི་སེམས་དཔའི་རྣལ་འབྱོར་ཡིན་པའི་ཕྱིར། དེཾ་ནཾས་མཐར་གྱིས་པའི་སྦྱོར་བ་ཆོས་ཅན། མཁྱེན་གསུམ་གྱི་གོ་རིམ་གྱི་གནས་སྐབས་ཡིན་ཏེ། སོ་སོ་བ་དང་མཐའ་དག་ཏུ་རྟོགས་པའི་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པའི་སེམས་དཔའི་རྣལ་འབྱོར་ཡིན་པའི་ཕྱིར། དེཾ་ནཾས་སྐད་ཅིག་མའི་སྦྱོར་བ་ཆོས་ཅན། མཁྱེན་གསུམ་གྱི་མཐར་ཐུག་པའི་གནས་སྐབས་ཡིན་ཏེ། མཁྱེན་གསུམ་གྱི་རྣམ་པ་ཅིག་ཆར་སྒོམ་པའི་སེམས་དཔའི་རྣལ་འབྱོར་མཐར་ཐུག་ཡིན་པའི་ཕྱིར། དེཾ་ནཾས་ཆོས་སྐུ་མཛད་པ་དང་བཅས་པ་ཆོས་ཅན། དེའི་རྣམ་སྨིན་ཡིན་ཏེ། མཁྱེན་གསུམ་གྱི་རྣམ་པ་སྒོམ་པའི་རྣམ་སྨིན་མཐར་ཐུག་ཡིན་པའི་ཕྱིར། དེཾ་ལྟཾར་ཡུམ་དོན་ཆོས་ཅན། དངོས་པོ་དྲུག་ཏུ་བསྡུས་ཀྱང་། མཚོན་བྱེད་ཀྱི་ཆོས་ལ་ཁྱད་པར་མེད་དེ། དངོས་པོ་དྲུག་ཏུ་བསྡུས་ཀྱང་མཚོན་བྱེད་ཀྱི་ཆོས་བདུན་ཅུའི་སྒོ་ནས་བཤད་དགོས་པའི་ཕྱིར།། །།གསུམ་པ་བསྡུས་པ་ལ་དད་པ་ལ་གསུམ་དུ་བསྡུ་བ་ལ་གསུམ་ལས། དང་པོ་ནི། བཾར་པཾ་བྱམས་མགོན་ཆོས་ཅན། ཡུམ་དོན་དངོས་པོ་དྲུག་གི་བཤད་པའི་འོག་ཏུ་དངོས་པོ་གསུམ་གྱི་སྒོ་ནས་འཆད་པ་ལ་རྒྱུ་མཚན་ཡོད་དེ། བཾར་མཾ་ལ་དགའ་བའི་གདུལ་བྱ་རྗེས་སུ་འཛིན་པའི་འོག་ཏུ་བསྡུས་པ་ལ་དགའ་བའི་གདུལ་བྱ་རྗེས་སུ་འཛིན་དགོས་པའི་ཕྱིར། གཉིས་པ་ནི། ཡུཾལ་ནིཾ་རྣམཾ་པཾ་བྱམས་མགོན་ཆོས་ཅན། ཡུམ་དོན་ཡང་དག་པར་བཤད་པ་ཡིན་ཏེ། ཡུམ་དོན་དངོས་པོ་གསུམ་གྱི་སྒོ་ནས་མདོ་ཇི་ལྟ་བ་བཞིན་བཤད་པའི་ཕྱིར། གསུམ་པ་ནི། དཾང་པོཾར་སྐབས་དང་པོ་གསུམ་དུ་བསྟན་པའི་མཁྱེན་གསུམ་ཆོས་ཅན། འཇུག་པའི་ཡུལ་གྱི་རྒྱུ་ཡིན་ཏེ། ཐོས་བསམ་གྱིས་གཏན་ལ་ཕབ་པར་བྱ་བའི་ཆ་ནས་མངོན་རྟོགས་སུ་བཞག་པ་ཡིན་པའི་ཕྱིར། དེཾ་ཇིཾ་སྦྱོར་བ་བཞི་པོ་ཆོས་ཅན། སྦྱོར་བ་ཡིན་ཏེ། མཁྱེན་གསུམ་གྱི་རྣམ་པ་སྒོམ་པ་ལ་སྦྱོར་བའི་ཆ་ནས་མངོན་རྟོགས་སུ་བཞག་པ་ཡིན་པའི་ཕྱིར། སྦྱོཾར་བཾ་ཆོས་སྐུ་ཕྲིན་ལས་དང་བཅས་པ་ཆོས་ཅན། འབྲས་བུ་ཡིན་ཏེ། སྦྱོར་བཞི་བསྒོམས་པའི་རྣམ་སྨིན་ཡིན་པའི་ཆ་ནས་མངོན་རྟོགས་སུ་བཞག་པ་ཡིན་པའི་ཕྱིར། རྒྱཾལ་བཾའི་ཡུམ་དོན་ཆོས་ཅན། དངོས་པོ་གསུམ་དུ་བསྡུས་ཀྱང་མཚོན་བྱེད་ཀྱི་ཆོས་ལ་ཁྱད་པར་མེད་དེ། དངོས་པོ་གསུམ་དུ་བསྡུས་ཀྱང་མཚོན་བྱེད་ཀྱི་ཆོས་བདུན་ཅུས་བཤད་པར་བྱ་བ་ཡིན་པའི་ཕྱིར། གསུམ་པ་བཤད་པ་ཡོངས་སུ་རྫོགས་པའི་བྱ་བ་ལ་ལྔ་སྟེ། ཡུམ་གསུམ་བརྗོད་བྱ་གཅིག་ཏུ་བསྟན། འགྲེལ་པ་ཇི་ལྟར་བརྩམས་པའི་ཚུལ། བརྩམས་པའི་དགེ་བ་བྱང་ཆུབ་བསྔོ། ནོངས་པའི་དོན་ལ་བཟོད་པར་གསོལ། ཡུམ་དོན་རྟོགས་པའི་དུས་ཀྱི་ཁྱད་པར་བསྟན་པའོ། །དང་པོ་ནི། ལགཾས་ཡུམ་རྒྱས་འབྲིང་བསྡུས་གསུམ་ཆོས་ཅན། བརྗོད་བྱ་ཁྱད་པར་མེད་དེ། མངོན་པར་རྟོགས་པ་བརྒྱད་ཚིག་རྒྱས་འབྲིང་བསྡུས་གསུམ་གྱི་སྒོ་ནས་བསྟན་པར་ཟད་པའི་ཕྱིར། དེཾ་ལྟཾར་རྒྱན་ཆོས་ཅན། ཡུམ་གསུམ་ཆར་གྱི་རྒྱན་ཡིན་ཏེ། ཡུམ་གསུམ་ཆར་གྱིས་མངོན་པར་རྟོགས་པ་བརྒྱད་བརྗོད་བྱར་བསྡུས་པ་གང་ཞིག ཁྱོད་ཀྱིས་ཀྱང་མངོན་པར་རྟོགས་པ་བརྒྱད་ཀྱི་སྒོ་ནས་ཡུམ་གྱི་རྒྱན་དུ་བྱེད་པའི་ཕྱིར་རོ། །དེཾ་ལཾ་ཡུམ་གསུམ་པོ་ཆོས་ཅན། ཚིག་རྒྱས་བསྡུས་ཀྱི་ཁྱད་པར་ཡོད་དེ། མངོན་པར་རྟོགས་པ་བརྒྱད་པོ་ཚིགས་བསྡུས་པ་དང་། འབྲིང་དང་། རྒྱས་པའི་སྒོ་ནས་སོ་སོར་བསྟན་པའི་ཕྱིར། གཉིས་པ་ནི། འཕཾགས་པཾ་སེང་གེ་བཟང་པོས་འཕགས་པ་གྲོལ་སྡེའི་ལེགས་བཤད་ཀྱི་མཐུ་ལ་བརྟེན་ནས་བླ་མ་ལ་གནང་བ་ནོས་ཏེ། བསྟན་བཅོས་ཀྱི་ཚིག་རེ་རེ་ཞིང་མདོ་དང་སྦྱོར་བའི་ལུང་སྦྱོར་རྒྱས་པར་མ་བྱས་པར་དོན་ཡང་དག་པར་བླངས་པའི་འགྲེལ་པ་དོན་གསལ་བརྩམས་པ་ཆོས་ཅན། དགོས་པ་ཡོད་དེ། གོ་སླ་བའི་ཆེད་ཡིན་པའི་ཕྱིར། གསུམ་པ་ནི། དེཾ་བསྡེཾབས་སློབ་དཔོན་སེང་གེ་བཟང་པོས་འགྲེལ་པ་དོན་གསལ་བརྩམས་པའི་དགེ་བ་བྱང་ཆུབ་ཏུ་བསྔོས་པ་ཆོས་ཅན། དགོས་པ་ཡོད་དེ། དགེ་རྩ་ཆུད་མི་ཟ་བའི་ཆེད་ཡིན་པའི་ཕྱིར། བཞི་པ་ནི། ཤེཾས་རཾབ་འགྲེལ་པ་དོན་གསལ་ཆོས་ཅན། ནོངས་པ་མཆིས་ན་མཁས་པ་རྣམས་ཀྱི་བཟོད་པ་མཛད་རིགས་ཏེ། ཚུ་རོལ་མཐོང་བས་བརྩམས་པའི་བསྟན་བཅོས་གང་ཞིག རང་གཞན་ལ་ཕན་པའི་བསམ་པ་རྣམ་དག་གིས་བརྩམས་པ་ཡིན་པའི་ཕྱིར། ལྔ་པ་ནི། ཀྱེཾ་མཾ་སློབ་དཔོན་སེང་གེ་བཟང་པོ་ཆོས་ཅན། ཡུམ་དོན་ཕྱིན་ཅི་མ་ལོག་པར་མཐོང་བ་ཡིན་ཏེ། ཡུམ་དོན་ལ་ཡུན་རིང་དུ་སྦྱངས་པ་ལ་བརྟེན་ནས་མགོན་པོ་བྱམས་པའི་བྱིན་རླབས་ཞུགས་པའི་སྟོབས་ཀྱིས་ཡུམ་དོན་མཐོང་ཞིང་མཐོང་ནས་བསྟན་པ་རྣམས་རྒྱ་བོད་ཐམས་ཅད་དུ་ཉི་མའི་འོད་ལྟར་ཀུན་ལ་སྙོམས་པར་ཕན་པ་ཡིན་པའི་ཕྱིར། ཤེཾས་རབཾ་འགྲེལ་པ་དོན་གསལ་ཆོས་ཅན། ཁྱོད་རྩོམ་པ་པོའི་གང་ཟག་ཡོད་དེ། ཁྱོད་སློབ་དཔོན་སེང་གེ་བཟང་པོས་རྩོམ་པར་ཀུན་ལ་གྲགས་པའི་ཕྱིར་རོ། །གསུམ་པ་བསྟན་བཅོས་ཇི་ལྟར་བསྒྱུར་བའི་ཚུལ་ནི་རྒྱཾ་གརཾ་གྱཾི། ཞུ་ཆེན་གྱི་ལོ་ཙྪ་བ་བནྡེ་དཔལ་བརྩེགས་དང་། ལོ་ཙྪ་བ་བློ་ལྡན་ཤེས་རབ་ཀྱིས་འགྲེལ་པ་དོན་གསལ་བསྒྱུར་བ་ཆོས་ཅན། དགོས་པ་ཡོད་དེ། བོད་ལ་ཕན་པའི་ཆེད་ཡིན་པའི་ཕྱིར། གཞུང་ལུགས་པདྨོ་ཁ་ཕྱེ་ནས། །མངོན་རྟོགས་གེ་སར་ཕྲེང་མཛེས་ཤིང་། །ཟབ་དོན་སྦྲང་རྩི་འབྱུང་བྱེད་པའི། །ངག་དོན་ཡིད་ཀྱི་ཉི་མ་འདི། །ཤེས་པར་འདོད་པའི་ཤེས་རབ་དང་། །དོན་ལ་སྦྱོར་བའི་དོན་གཉེར་དང་། །གཟུ་བོར་སྤྱོད་པའི་གཟུ་བོའི་བློ། །གསུམ་ལྡན་དེ་ལ་སྦྱིན་པར་བྱ། །དེ་ལས་བྱུང་བའི་དགེ་བའི་ཚོགས། །གངས་རིའི་ཕྲེང་མཛེས་ལྟར་གསལ་བ། །བདག་གི་རྒྱུད་ལ་གང་ཐོབ་དེས། །འགྲོ་སེམས་བདེ་ལ་འགོད་པར་ཤོག །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དོན་གསལ་དང་བཅས་པའི་ངག་དོན། སྦས་དོན་རབ་གསལ་ཞེས་བྱ་བ་འདི་མང་དུ་ཐོས་པའི་དགེ་སློང་བསོད་ནམས་སེང་གེས་ལྕགས་མོ་གླང་གི་སྨིན་དྲུག་ཟླ་བའི་ཡར་ཚེས་གཉིས་ལ་དཔལ་ཨེ་ཝྃ་ཆོས་ལྡན་ཀྱི་གཙུག་ལག་ཁང་དུ་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།མདྒ་ལཾ།། ༈ །།འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག། །།དགེའོ། །དགེའོ། །དགེའོ།། །