འབྲས་བུ་ཆོས་སྐུ།
འབྲས་བུ་ཆོས་སྐུ་ལ་སྐད་ཅིག་མའི་འོག་ཏུ་འབྲས་བུ་ཆོས་སྐུ་འཆད་པའི་རྒྱུ་མཚན་དང་། རྒྱུ་མཚན་ཅན་གྱི་འབྲས་བུ་ཆོས་སྐུ་དངོས་གཉིས་ལས། དང་པོ་ནི། སྐད་ཅིག་མའི་སྦྱོར་བ་དེས་རང་གི་སྐད་ཅིག་གཉིས་པར་སྦྱིན་པ་ནས་དཔེ་བྱད་བཟང་པོ་བརྒྱད་ཅུའི་བར་གྱི་ཆོས་ཐམས་ཅད་མངོན་སུམ་དུ་བྱས་པ་ལ་འབྲས་བུ་ཆོས་སྐུར་འཇོག་པའི་ཕྱིར་ན་དེའི་འོག་ཏུ་དེ་བཤད་དོ། །གཉིས་པ་ལ། སྤྱིར་ཕ་རོལ་ཏུ་ཕྱིན་པའི་ལུགས་ཀྱི་སྐུའི་རྣམ་གཞག བྱེ་བྲག་ཏུ་གཞུང་འདིའི་དགོངས་པ་ངེས་པར་བྱ་བ། ཡོན་ཏན་གྱི་ཁྱད་པར་བྱེ་བྲག་ཏུ་བཤད་པ་དང་གསུམ་ལས། དང་པོ་ལ། སྐུ་གཅིག་ཏུ་བཞག་པ། གཉིས་སུ་བཞག་པ། གསུམ་དུ་བཞག་པ། བཞི་དང་ལྔར་རྟོག་པའི་ཚུལ་དང་། མཚན་བཏགས་ཀྱི་ཁྱད་པར། ལོངས་སྤྲུལ་གཉིས་ལ་མུ་བཞི་བརྩི་བ་དང་དྲུག་ལས། དང་པོ་ནི། གསེར་འོད་དམ་པར། ཉོན་མོངས་པའི་སྒྲིབ་པ་ཐམས་ཅད་དང་བྲལ་བ་དགེ་བའི་ཆོས་ཐམས་ཅད་རྫོགས་པའི་ཕྱིར་དེ་ཁོ་ན་ཉིད་དང་། ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི་ཆོས་ཀྱི་སྐུ་ཞེས་བྱའོ། །སྔ་མ་གཉིས་ནི་བཏགས་པ་ཙམ་མོ། །ཆོས་ཀྱི་སྐུ་ནི་ཡང་དག་པ་སྟེ་སྐུ་དེ་གཉིས་ཀྱི་གཞི་བྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང་། རྣམ་པར་མི་རྟོག་པའི་ཡེ་ཤེས་ལས་གུད་ན་སངས་རྒྱས་རྣམས་ཀྱི་ཆོས་གང་ཡང་མེད་པའི་ཕྱིར་རོ། །ཞེས་དང་། གཞན་དོན་མོས་པ་ཆུང་ངུ་འབྲིང་གི་མདོར། དགེ་སློང་དག་འདི་ལ་ནི་སྐུ་དམ་པར་མ་འཛིན་པར་དགེ་སློང་དག་ང་ལ་ནི་ཆོས་ཀྱི་སྐུ་ཡོངས་སུ་རྫོགས་པར་ལྟོས་ཤིག ཅེས་དང་། འགྱུར་འགའ་ཞིག་ལས་དགེ་སློང་དག་ང་ལ་ནི་འཇིག་ཚོགས་ཀྱི་སྐུར་མ་ལྟ་བར་ཆོས་ཀྱི་སྐུ་ཡོངས་སུ་རྫོགས་པར་ལྟོས་ཤིག ཅེས་འབྱུང་ལ། དེའི་དོན་འགྲེལ་ཆེན་དུ། མཚན་དང་དཔེ་བྱད་འབར་བ་རྣམ་པར་མཛེས་པའི་འཇིག་ཚོགས་ལ་སྐུར་མ་འཛིན་ཞེས་གཟུགས་སྐུ་གཉིས་སངས་རྒྱས་ཀྱི་སྐུ་བཏགས་པ་བ་ཡིན་པས་སྐུ་མཚན་ཉིད་པ་ཆོས་སྐུ་ཁོ་ནར་གསུངས་སོ། །གཉིས་པ་ནི་རྒྱུད་བླར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་སྐུ་ལ་རང་དོན་དོན་དམ་པའི་སྐུ་དང་། གཞན་དོན་ཀུན་རྫོབ་པའི་སྐུ་གཉིས་དང་། ཡོན་ཏན་ལ་བྲལ་བའི་ཡོན་ཏན་དང་། རྣམ་པར་སྨིན་པའི་ཡོན་ཏན་གཉིས་སུ་ཕྱེ་ནས་སྐུ་གཉིས་ལ་ཡོན་ཏན་གཉིས་པོ་སོ་སོར་བསྟེན་པར་བཤད་དོ། །གསུམ་པ་ནི། རྒྱུད་བླར། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡི། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་དང་། རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །ཞེས་དང་། གཞུང་འདི་དང་ཐེག་བསྡུས་དང་། མངོན་པ་ཀུན་ལས་བཏུས་ལ་སོགས་པ། ཕ་རོལ་ཏུ་ཕྱིན་པའི་གཞུང་ལུགས་ཕལ་ཆེར་ལས་སྐུ་གསུམ་དུ་གསུངས་སོ། །བཞི་པ་ནི། མངོན་རྟོགས་རྒྱན་གྱི་འགྲེལ་བྱེད་ཁ་ཅིག སྐུ་གསུམ་གྱི་དང་པོ་ལ་ངོ་བོ་ཉིད་སྐུ་དང་། ཆོས་སྐུ་གཉིས་སུ་ཕྱེ་ནས་སྐུ་བཞིར་འདོད་པ་དང་། ཆོས་བཤེས་ཀྱིས། དེ་ལྟར་བཞིར་ཕྱེ་བའི་ལོངས་སྐུ་ལ་ཡང་ས་བཅུ་པའི་བྱང་སེམས་ཁོ་ན་ལ་སྣང་བའི་ལོངས་སྐུ་ཆེན་པོ་དང་། ས་དང་པོ་ཡན་ཆད་ལ་སྣང་བའི་ལོངས་སྐུ་ཕལ་པ་གཉིས་སུ་ཕྱེ་ནས་ལྔར་བྱེད་པ་དང་། ཁ་ཅིག སྤྲུལ་སྐུ་ལ་རྣམ་པར་སྨིན་པའི་སྤྲུལ་སྐུ་དང་། རྣམ་པར་སྨིན་པ་མ་ཡིན་པའི་སྤྲུལ་སྐུར་ཕྱེ་ནས་ལྔར་བྱེད་པ་དང་། གསེར་གླིང་པས་རྩ་བ་ཆོས་ཀྱི་སྐུ་དང་། ངོ་བོ་ཉིད་ཀྱི་སྐུ་ལ་སོགས་པ་སྐུ་ལྔའི་བདག་ཉིད་དུ་གྲུབ་ཅེས་པ་སོགས་རྣམ་རྟོག་གིས་སྤྲོ་བསྡུའི་སྐུ་བཞི་དང་ལྔའི་གྲངས་ངེས་བྱེད་པ་ནི་རིན་པོ་ཆེ་བསོད་ནམས་རྩེ་མོས་ཕ་རོལ་ཏུ་ཕྱིན་པའི་ལུགས་ལ་ཡེ་ཤེས་བཞི་དང་སྐུ་གསུམ་བཤད་པ་ཡིན་གྱི་ཡེ་ཤེས་ལྔ་དང་སྐུ་བཞིར་བྱེད་པ་ནི་རྡོ་རྗེ་ཐེག་པའི་ཐུན་མོང་མ་ཡིན་པའི་ཁྱད་ཆོས་ཡིན་པར་གསུངས་པ་ཉིད་ཀྱིས་བཀག་ཟིན་ཏོ། །ལྔ་པ་ནི། གཞུང་ལུགས་འགའ་ཞིག་ལས། སངས་རྒྱས་ཀྱི་སྐུ་ལ་གསུམ་དུ་གསུངས་པ་དང་། འགའ་ཞིག་ལས་གཟུགས་སྐུ་གཉིས་སྐུ་བཏགས་པ་བར་གསུངས་པས་ཇི་ལྟར་བྱ་སྙམ་ན། གནད་ཀྱི་དོན་ནི་འདི་ཡིན་ཏེ། སངས་རྒྱས་རང་སྣང་ལ་དབྱིངས་དང་ཡེ་ཤེས་རོ་གཅིག་པའི་ཆོས་ཀྱི་སྐུ་གཅིག་པུར་གནས་ཏེ། རང་སྣང་ལ་ཤེས་བྱ་ཐམས་ཅད་དབྱིངས་དང་ཡེ་ཤེས་རོ་གཅིག་པའི་ཆོས་ཀྱི་སྐུར་མངོན་པར་རྫོགས་པར་བྱང་ཆུབ་པའི་ཕྱིར་རོ། །འདི་ལ་དགོངས་ནས་གསེར་འོད་དུ། སྐུ་གཞན་གཉིས་བཏགས་པ་བར་གསུངས་ཤིང་། ཡང་དེ་ཉིད་ལས། སྐུ་གཉིས་ལ་ནི་མྱ་ངན་ལས་འདས་པ་ཞེས་མི་བྱ་སྟེ། ཆོས་ཀྱི་སྐུ་ལས་གཞན་པའི་སངས་རྒྱས་མེད་པའི་ཕྱིར་རོ། །ཅིའི་ཕྱིར། སྐུ་གཉིས་པོ་མྱ་ངན་ལས་འདས་པ་ཞེས་མི་བྱ་ཞེ་ན། སྐུ་དེ་གཉིས་ནི་ཡང་དག་པ་མ་ཡིན་པ་བཏགས་པ་ཙམ་པས་སྐད་ཅིག་ཏུ་སྐྱེ་ཞིང་འགག་པ་རྟག་པར་མི་གནས་པ་ཞེས་གསུངས་པ་དང་། རྡོ་རྗེ་གཅོད་པར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་བར་མི་བྱའོ། །རབ་འབྱོར་གལ་ཏེ་མཚན་ཕུན་སུམ་ཚོགས་པས་དེ་བཞིན་གཤེགས་པར་འགྱུར་ན་འཁོར་ལོས་སྒྱུར་བའི་རྒྱལ་པོ་ཡང་དེ་བཞིན་གཤེགས་པར་འགྱུར་ཏེ། དེ་བས་ན་མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་བར་མི་བྱའོ། །ཞེས་དང་། དེ་རྣམས་ཀྱི་དོན་ཚིགས་སུ་བཅད་པ། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་ཡི། །སྐྱེ་བོ་དེ་ཡིས་ང་མི་མཐོང་། །ཞེས་གསུངས་སོ། །གདུལ་བྱའི་གཞན་སྣང་གི་དབང་དུ་བྱས་ནས་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པ་ཡིན་ཏེ། གདུལ་བྱའི་ངོར་ཕྲིན་ལས་མཛད་པའི་སངས་རྒྱས་ཀྱི་སྐུ་མཚན་ཉིད་པ་གཅིག་ཡོད་དགོས་ཤིང་། དེ་ཡང་གདུལ་བྱའི་བློ་ལ་ཤར་བའི་གཟུགས་སྐུ་གཉིས་ལ་འཇོག་དགོས་པའི་ཕྱིར། འདི་ལ་དགོངས་ནས་རྒྱུད་བླར། རང་དོན་དོན་དམ་པའི་སྐུ་དང་། གཞན་དོན་ཀུན་རྫོབ་པའི་སྐུ་གཉིས་སུ་ཕྱེ་ནས་ཕྱི་མས་ཕྲིན་ལས་མཛད་པ་ན་སངས་རྒྱས་ཀྱི་ཕྲིན་ལས་སུ་འཇོག་ཅིང་དེ་ཡང་སྐུ་སྔ་མ་དེའི་གཟུགས་བརྙན་ཙམ་ཡིན་གྱི། སྐུ་སྔ་མ་ལྟར་མཚན་ཉིད་པ་མིན་པའི་ཚུལ་རྒྱས་པར་གསུངས་སོ། །དེང་སང་ཕལ་ཆེར། ཇི་ལྟར་བཻ་ཌཱུར་དག་པ་ཡི། །ཞེས་སོགས་ཀྱི་དོན། སྤྲུལ་སྐུ་དེ་ལོངས་སྐུའི་གཟུགས་བརྙན་ཡིན་པའི་དོན་ལ་འཆད་པ་ནི་རྒྱུད་བླའི་གཞུང་གོང་འོག་གི་བབ་སྒྲིག་མ་ཤེས་ཤིང་ཐུབ་པའི་དབང་པོའི་སྐུ་ཞེས་པ་རང་དོན་ཆོས་ཀྱི་སྐུ་ལ་འཇུག་པའི་དོན་མ་རྟོགས་པར་ཟད་དོ། །མངོན་པར་རྟོགས་པའི་རྒྱན་འདིར་ཡང་སྐུ་གསུམ་ལ་ཕྲིན་ལས་ཉི་ཤུ་རྩ་བདུན་སྦྱར་བའི་སྐབས་ཡིན་པས་གདུལ་བྱའི་གཞན་སྣང་གི་དབང་དུ་བྱས་ནས་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པར་བཤད་དེ། ཕྲིན་ལས་དངོས་སུ་མཛད་པའི་སངས་རྒྱས་ནི་གཟུགས་སྐུ་གཉིས་ལས་གཞན་མེད་པའི་ཕྱིར་རོ། །མདོར་ན་སངས་རྒྱས་རང་གི་གནས་ལུགས་འཆད་པའི་ཚེ་སངས་རྒྱས་ཀྱི་སྐུ་མཚན་ཉིད་པ་ཆོས་སྐུ་གཅིག་པུ་ཡིན་ཏེ། ལོངས་སྤྲུལ་གཉིས་ཀྱང་མཚན་དང་དཔེ་བྱད་ཀྱི་སྤྲས་པའི་གཟུགས་སྐུ་ལ་མི་འཇོག་པར་ཡེ་ཤེས་ཕྱི་མ་གསུམ་ལ་འཇོག་པའི་ཕྱིར་རོ། །གདུལ་བྱའི་ངོར་ཕྲིན་ལས་མཛད་ཚུལ་འཆད་པའི་ཚེ་མཚན་དང་དཔེ་བྱད་ཀྱིས་སྤྲས་པའི་གཟུགས་སྐུ་གཉིས་ཀྱང་སངས་རྒྱས་ཀྱི་སྐུ་མཚན་ཉིད་པར་འཇོག་སྟེ། དེའི་ཚེ་གདུལ་བྱའི་བློ་ངོར་སྣང་ཚུལ་གྱི་རྣམ་གཞག་འཆད་པའི་སྐབས་ཡིན་ཞིང་། གདུལ་བྱའི་ངོར་གཟུགས་སྐུ་གཉིས་ཀྱང་སངས་རྒྱས་སུ་སྣང་བའི་ཕྱིར་རོ། །ཇི་སྐད་དུ། གཞན་དོན་མོས་པ་ཆུང་ངུ་འབྲིང་གི་སྐབས་སུ་འགྲེལ་ཆེན་དུ། དེ་བཞིན་གཤེགས་པའི་གཟུགས་ཀྱི་སྐུ་མཚན་དང་དཔེ་བྱད་འབར་བ་དང་ལྡན་པ་སེམས་ཅན་སྐལ་བ་ཅན་རྣམས་ཀྱིས་ཉེ་བར་མཐོང་བ་འདི་ནི་སྟོན་པའི་དེ་ཁོ་ན་ཉིད་ཀྱི་ཆོས་ཀྱི་སྐུ་མིན་མོད་ཀྱི་འོན་ཀྱང་མཆོག་ཏུ་དྲི་མ་མེད་པའི་ཡོན་ཏན་མཐའ་ཡས་པའི་ཚོགས་དང་ལྡན་པ་ཆོས་ཀྱི་སྐུའི་དབང་གིས་དེ་རྣམས་ཀྱིས་རང་གི་ཤེས་པ་དེ་ལྟ་བུའི་གཟུགས་ཀྱི་སྐུའི་རྣམ་པར་སོ་སོར་སྣང་སྟེ། ཞེས་དང་། གསེར་འོད་དུ་དཔེར་ན་སྟོང་པ་ལ་བརྟེན་ཏེ་གློག་འབྱུང་ངོ་། །གློག་ལ་བརྟེན་ཏེ་འོད་འབྱུང་ངོ་། །དེ་བཞིན་དུ་ཆོས་ཀྱི་སྐུ་ལ་བརྟེན་ཏེ་ལོངས་སྤྱོད་རྫོགས་པའི་སྐུ་འབྱུང་ངོ་། །ལོངས་སྐུ་ལ་བརྟེན་ཏེ་སྤྲུལ་པའི་སྐུ་སྣང་ངོ་། །ཞེས་གསུངས་སོ། །དྲུག་པ་ནི། གསེར་འོད་ལས། རིགས་ཀྱི་བུ་གཞན་ཡང་སྐུ་འདི་གསུམ་དབྱེ་བ་ལ་ཡང་རྣམ་པ་བཞི་སྟེ། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་ཡང་ཡོད་ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་ཡང་ཡོད། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་ཡིན་པ་ཡང་ཡོད། སྤྲུལ་པའི་སྐུ་མ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་ཡང་ཡོད་དོ། །སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་གང་ཞེ་ན། དེ་བཞིན་གཤེགས་པ་གནས་སམ་མྱ་ངན་ལས་འདས་སུ་ཟིན་ཡང་སྨོན་ལམ་གྱི་དབང་གིས་སྐལ་བ་ཇི་ལྟ་བ་བཞིན་ཕན་ཐོགས་པ་ནི་སྤྲུལ་པའི་སྐུ་ཞེས་བྱའོ། །ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་གང་ཞེ་ན། སའི་སྔ་རོལ་པའི་སྐུའོ། །སྤྲུལ་པའི་སྐུ་ཡང་ཡིན་ལ་ལོངས་སྤྱོད་རྫོགས་པའི་སྐུ་ཡང་ཡིན་པ་དེ་གང་ཞེ་ན། ལྷག་མ་དང་བཅས་པའི་མྱ་ངན་ལས་འདས་པའི་སྐུའོ། །སྤྲུལ་པའི་སྐུ་ཡང་མ་ཡིན་ལ་ལོངས་སྤྱོད་རྫོགས་པའི་སྐུ་ཡང་མ་ཡིན་པ་དེ་ནི་ཆོས་ཀྱི་སྐུའོ། །ཞེས་མུ་བཞི་གསུངས་པའི་དང་པོ་ནི་མཆོག་གི་སྤྲུལ་སྐུ་ལས་གཞན་པའི་སྤྲུལ་པའི་སྐུ་རྣམས་སོ། །གཉིས་པ་ནི། སངས་རྒྱས་ཀྱི་ས་ཡིན་ལ། དེའི་སྔ་རོལ་པ་ནི་ས་བཅུ་པ་བ་ཡིན་པས། དེ་ལ་སྣང་བའི་གཟུགས་སྐུ་སྟེ། མདོ་འདིར་གཟུགས་ཀྱི་སྐུ་ནི་གདུལ་བྱའི་སྣང་བ་ཁོ་ན་ལ་འཇོག་པའི་སྐབས་ཡིན་པའི་ཕྱིར་རོ། །གསུམ་པ་ནི་མཆོག་གི་སྤྲུལ་སྐུ་ལྟ་བུའོ། །བཞི་པ་ནི་ངོ་བོ་ཉིད་ཀྱི་སྐུ་ལྟ་བུའོ། །གཉིས་པ་བྱེ་བྲག་ཏུ་གཞུང་འདིའི་དགོངས་པ་ངེས་པར་བྱ་བ་ལ་གཉིས་ཏེ། སྐུ་བཞིར་ཕྱེ་བའི་ལུགས་བརྗོད་ཅིང་། དེ་ལ་ལུང་རིགས་ཀྱིས་དཔྱད་པ་བྱ་བ་དང་། སྐུ་གསུམ་དུ་ཕྱེ་བའི་ལུགས་བརྗོད་ཅིང་དེ་ལུང་རིགས་ཀྱིས་གྲུབ་པའི་ཚུལ་ལོ། །དང་པོ་ནི། སློབ་དཔོན་གྱི་འགྲེལ་པ་འདིའི་དངོས་བསྟན་དང་གསེར་གླིང་པ། ཆོས་བཤེས། ཤེར་འབྱུང་བློ་གྲོས། བུདྡྷ་ཤྲཱི་རྣམས་ཆོས་སྐུ་མཚོན་བྱེད་ཀྱི་ཆོས་ལ་སྐུ་བཞིར་གྲངས་ངེས་ཤིང་མཛད་པ་ནི་ཞར་བྱུང་ཡིན་པར་བཞེད་དོ། །ལུས་རྣམ་གཞག་ཏུ་ངོ་བོ་ཉིད་ལོངས་རྫོགས་བཅས་དང་། དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །ཞེས་པའི་ཆོས་སྐུ་ནི་དབྱེ་བའི་ཡ་གྱལ་གྱི་ཆོས་སྐུ་ཡིན་ཞིང་། མཇུག་ཏུ་སྨོས་པའི་དགོས་པ་ནི་ཡེ་ཤེས་ཆོས་སྐུ་ཁོ་ན་དང་མཛད་པ་སྦྱར་བའི་ཆེད་ཡིན་ལ། མཛད་པ་ཡེ་ཤེས་ཆོས་སྐུ་ཁོ་ནའི་ཡིན་པའི་རྒྱུ་མཚན་ཡང་ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་སྐུར་སྣང་བ་སྐྱེད་དེ། དེ་ཉིད་སྤྲུལ་སྐུར་སྣང་བ་སྐྱེད་ནས་ཕྲིན་ལས་མཛད་པའི་ཕྱིར་རོ། །གཞན་དུ་ན་སངས་རྒྱས་ཀྱི་སའི་ཁྱད་པར་གསུམ་ལྡན་གྱི་ཡེ་ཤེས་གདོན་མི་ཟ་བར་ཁས་བླང་དགོས་པ་རྣམས་སངས་རྒྱས་ཀྱི་སྐུས་མ་བསྡུས་པར་འགྱུར་ཏེ། སྐུ་གསུམ་གང་རུང་གིས་མ་བསྡུས་པའི་ཕྱིར་ཞེས་བཞེད་དོ། །འདི་ནི་མངོན་པར་རྟོགས་པའི་རྒྱན་ཕར་ཕྱིན་ཐེག་པར་འཆད་པའི་ཚེ་གཞུང་གི་དགོངས་པ་མ་ཡིན་ཏེ། ཆོས་སྐུ་མཛད་པ་དང་བཅས་པ། ཞེས་པའི་ཆོས་སྐུ་དེ་དབྱེ་བའི་ཡ་གྱལ་གྱི་ཆོས་སྐུ་མ་ཡིན་གྱི། ཆོས་ཀྱི་སྐུ་དང་དེ་རྣམས་བརྒྱད། །ཅེས་པའི་སྐབས་ཀྱི་ཆོས་སྐུ་དང་སྦྱར་བའི་ཚིག་ཡིན་པའི་ཕྱིར། མངོན་པར་རྟོགས་པ་གཞན་བདུན་ལ་ལུས་དང་སྦྱར་བའི་ཚིག་རེ་རེ་ཡོད་པ་ལྟར། འདི་ལ་ཡང་ངེས་པར་དགོས་པའི་ཕྱིར་རོ། །གལ་ཏེ་དེ་ལྟར་ན་མཛད་པ་ཕྲིན་ལས་མཚོན་བྱེད་ཀྱི་ཆོས་གཅིག་ཏུ་བགྲང་དགོས་པས། དེ་ལུས་དང་སྦྱར་བའི་ཚིག་གི་མཇུག་ཏུ་འབྱུང་བ་མི་འཐད་དོ་སྙམ་ན་འདིའི་དོགས་པ་སེལ་བའི་ཆེད་དུ། རྣམ་ཀུན་མངོན་རྫོགས་རྟོགས་པ་སྟེ། །འདི་ནི་ཐབས་མཁས་བཅས་པ་ཡིན། །ཞེས་པའི་གཞུང་གསུངས་པ་དེ་དྲན་པར་གྱིས་ཤིག གལ་ཏེ་ལུས་རྣམ་གཞག་ཏུ་ཆོས་སྐུ་ཐ་མར་སྨོས་པ་དེ་ཚིགས་བཅད་སྦྱར་བདེ་བའི་ཆེད་ཡིན་ནོ་སྙམ་ན། དེ་ལྟར་ན། དེ་བཞིན་གཞན་པ་སྤྲུལ་པ་ནི། །ཞེས་སྨོས་མི་རིགས་པར་སྤྲུལ་པ་དང་། ཞེས་སྨོས་རིགས་པར་འགྱུར་ཏེ། དེ་གཉིས་ཚིགས་བཅད་སྦྱར་བདེ་མི་བདེ་ཁྱད་པར་མེད་པ་གང་ཞིག་ནི་ཞེས་པའི་ཚིག་དེས་སྐུ་སྔ་མ་གསུམ་པོ་དེ་ཆོས་སྐུའི་མཚན་གཞིར་སྟོན་ཅིང་། དང་ཞེས་པས་སོ་སོར་འབྱེད་ནུས་པའི་ཕྱིར་རོ། །སྒྲུབ་བྱེད་ལ་ཁྱབ་པ་མ་ངེས་པའམ་ཡང་ན་འགལ་བའི་སྐྱོན་གནས་པར་སྣང་སྟེ། དང་པོ་ནི། ཆོས་འཁོར་རིམ་པ་གསུམ་བསྐོར་བ་པོ་དེ་རྣམ་མཁྱེན་ཁོ་ནར་འགྱུར་ཏེ། རྣམ་མཁྱེན་གྱིས་བདག་རྐྱེན་བྱས་ནས་སྤྲུལ་སྐུས་ཆོས་འཁོར་རིམ་པ་གསུམ་བསྐོར་བའི་ཕྱིར་རོ། །གལ་ཏེ་ཁྱབ་པ་འགལ་ལོ་སྙམ་ན་བདེན་མོད་ཀྱི་དེ་ལྟར་ན་ཕྲིན་ལས་ཉེར་བདུན་པོ་ཡེ་ཤེས་ཆོས་སྐུ་ཁོ་ནའི་ཡིན་ཏེ། སྐུ་གསུམ་ཆར་གྱི་ཡིན་པའི་ཕྱིར་ཞེས་བཀོད་པར་སོང་བས། ཁྱབ་པ་འགལ་བར་དོགས་སོ། །གཞན་ལ་སྐྱོན་བརྗོད་པ་དེ་ཡང་མི་འཐད་དེ། སངས་རྒྱས་སའི་ཁྱད་པར་གསུམ་ལྡན་གྱི་ཡེ་ཤེས་དེ་ངོ་བོ་ཉིད་སྐུའི་ཁོངས་སུ་བསྡུ་བའི་སྐབས་ཡིན་པའི་ཕྱིར་རོ། །གཞན་དུ་ན་སྐུ་བཞིར་གྲངས་ངེས་པར་འདོད་ན་ཡང་མཚན་དཔེ་སྐུ་གང་གིས་བསྡུས། རྒྱུད་བླར་སྐུ་གཉིས་སུ་གྲངས་ངེས་པར་བཤད་པའི་སྐབས་སུ་ཡང་བྲལ་བའི་ཡོན་ཏན་དང་། རྣམ་སྨིན་གྱི་ཡོན་ཏན་རྣམས་སྐུ་གང་གིས་བསྡུས་ཞེས་ཁྱེད་ལ་འདྲི་སྟེ། དེའི་ལན་གང་གསུངས་པ་དེ་ཉིད་ཁོ་བོས་ཀྱང་སྨྲ་བ་ལ་དབང་ཕྱུག་གིས་ཅི་ཞིག་བྱར་ཡོད། ད་ནི་གཉིས་པ་སྐུ་གསུམ་དུ་འདོད་པའི་ལུགས་བརྗོད་ཅིང་ལུང་རིགས་ཀྱིས་ངེས་པའི་ཚུལ་བཤད་པར་བྱ་སྟེ། གྲོལ་སྡེ་རྣམ་གཉིས། སློབ་དཔོན་གྱི་འགྲེལ་ཆེན་གྱི་བསྔོ་བའི་སྐབས། ཨ་བྷ་ཡ། ཤཱནྟི་པ། རཏྣ་ཀཱིརྟི་རྣམས་ཆོས་སྐུ་མཚོན་བྱེད་ཀྱི་ཆོས་ལ་སྐུ་གསུམ་མཛད་པ་ཕྲིན་ལས་དང་བཅས་པ་བཞིར་ངེས་པར་མཛད་དོ། །འདིར་སྐུ་གསུམ་གྱི་ངོ་བོ་མདོར་བསྟན་པ་དང་། ཡོན་ཏན་རྒྱས་པར་བཤད་པ་གཉིས་གཉིས་ལས། དང་པོ་ངོ་བོ་ཉིད་སྐུ་ལ་ངོ་བོ་མདོར་བསྟན་པ་ནི། ཐུབ་པའི་ངོ་བོ་ཉིད་སྐུ་ནི། །ཞེས་སོགས་ཚིགས་བཅད་གཅིག་དང་། འོག་གི་ཆོས་ཀྱི་སྐུ་ཞེས་བརྗོད་པ་ཡིན། ཞེས་པ་སྟེ། ཐུབ་པའི་ངོ་བོ་ཉིད་སྐུ་ནི། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་འབྲེལ་ལོ། །ཆོས་ཀྱི་སྐུ་དེ་ཡང་དྷརྨཱ་ཏ་ཀ་ཡ་ཞེས་ཆོས་ཉིད་ཀྱི་སྐུ་ཡིན་པ་ལས། ངོ་བོ་ཉིད་ཀྱི་རྐྱེན་ཏ་མི་མངོན་པར་བྱས་ནས་དྷརྨཱ་ཀ་ཡ་ཞེས་ཆོས་ཀྱི་སྐུར་བཞག་པ་ཡིན་ནོ། །ཆོས་ཉིད་ཀྱི་སྐུ་དེ་གང་ཞེ་ན། ཟག་པ་མེད་པའི་ཆོས་དང་། གློ་བུར་དྲི་བྲལ་དང་། རང་བཞིན་རྣམ་དག་གསུམ་དབྱེར་མེད་པ་ཡིན་ནོ། །ཞེས་པ་ནི། ཟག་པ་མེད་པའི་ཆོས་གང་དག །ཞེས་སོགས་རྐང་པ་གསུམ་གྱིས་སྟོན། ཡོན་ཏན་རྒྱས་པར་བཤད་པ་ནི་དེ་གསུམ་གྱི་ནང་ནས་ཟག་མེད་ཀྱི་ཆོས་དེ་གང་ཞེ་ན། བྱང་ཆུབ་ཕྱོགས་མཐུན་ཚད་མེད་དང་། །ཞེས་པ་ནས། རྣམ་པ་ཐམས་ཅད་མཁྱེན་ཉིད་དང་། །ཞེས་པའི་བར་རོ། །གང་དག་དང་གི་སྒྲས་གཞི་ཤེས་དང་ལམ་ཤེས་སྡུད་པ་ནི་གཞུང་གི་དོན་མ་ཡིན་ཏེ། ཐེག་བསྡུས་དང་། ཀུན་བཏུས་སོགས་ལས་སྡེ་ཚན་འདི་དག་འཆད་པའི་སྐབས་སུ་རྣམ་མཁྱེན་ལས་ལོགས་སུ་དེ་གཉིས་མ་བགྲངས་ཤིང་། འདིར་རྣམ་མཁྱེན་གྱི་རྣམ་པ་བརྒྱ་དང་བཅུ་ལ་རྣམ་མཁྱེན་དུ་འཇོག་པའི་སྐབས་ཡིན་པས་གཞན་གཉིས་ཀྱང་དེའི་ནང་དུ་འདུས་པའི་ཕྱིར་རོ། །འོ་ན་ཇི་ལྟར་ཞེ་ན། རྣམ་པ་ཐམས་ཅད་མཁྱེན་པ་ནི་ཞེས་སྨོས་ན་སྡེ་ཚན་ཉེར་གཅིག་པོ་མཚན་གཞིར་གཟུང་ནས་སྐབས་འདིའི་ཆོས་སྐུར་འགྱུར་ལ་དེ་ལྟར་ན་སྡེ་ཚན་ཉེར་གཅིག་པོ་ཆོས་ཉིད་ཀྱི་སྐུར་འགྱུར་བས་དེ་སྤོང་བའི་ཆེད་དུ་དང་ཞེས་འབྱེད་པའི་སྒྲ་གསུངས་པ་ནི་འཕགས་པས་དང་ཞེས་པ་འབྱེད་པ་ལ་འཆད་ཀྱི་སྡུད་པ་ལ་མི་འཆད་པའི་དོན་ཡིན་ནོ། །མདོར་བསྡུ་ན། སྐུ་བཞིར་འདོད་པ་མི་འཐད་དེ། ནི་ཞེས་པའི་ཚིག་དང་ཞེས་པའི་ཚིག་མ་ཡིན་པའི་ཕྱིར་དང་། དང་ཞེས་པ་ནི་ཞེས་པར་མི་རུང་བའི་ཕྱིར་རོ། །ལེགས་པར་དཔྱོད་ཅིག ཟག་མེད་ཀྱི་ཆོས་རྣམས་ཀྱི་ནང་ནས་ཉོན་མོངས་པ་མེད་པ་དང་། སྨོན་གནས་མཁྱེན་པ་གཉིས་ཉན་ཐོས་ཀྱི་དེ་གཉིས་ལས་ཁྱད་པར་འཕགས་པར་ཤེས་པའི་ཆེད་དུ་ཉན་ཐོས་ཉོན་མོངས་མེད་པའི་ལྟ། ཞེས་སོགས་དང་། སངས་རྒྱས་སྨོན་གནས་མཁྱེན་པ་ནི། །ཞེས་སོགས་གསུངས་སོ། །སྨོན་མཁྱེན་རྟག་ཏུ་གནས་པ་ལ་རྩོད་པ་སྤོང་བ་ནི། རྒྱུ་ནི་ཡོངས་སུ་སྨིན་གྱུར་ནས། །ཞེས་སོགས་ཚིགས་བཅད་གཉིས་སོ། །ཁྱབ་རྟགས་གཉིས་ཀ་ལ་རྩོད་པ་སྤོང་བ་ནི། དེ་ལྟར་མཛད་པ་རྒྱ་ཆེའི་ཕྱིར། །ཞེས་སོགས་ཚིགས་བཅད་གཅིག་གོ །ལོངས་སྐུ་ལ་ངོ་བོ་མདོར་བསྟན་པ་ནི། མཚན་ནི་སུམ་ཅུ་རྩ་གཉིས་དང་། །ཞེས་སོགས་ཚིགས་བཅད་གཅིག་སྟེ། མཚན་སོ་གཉིས་དང་། དཔེ་བྱད་བརྒྱད་ཅུས་སྤྲས་ཤིང་ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པའི་མཚན་ཉིད་གསུམ་ལྡན་དུ་བཤད་དོ། །ཡོན་ཏན་རྒྱས་པར་བཤད་པ་ལ་མཚན་ནི། ཕྱག་ཞབས་འཁོར་ལོའི་མཚན་དང་རུས་སྦལ། །ཞེས་སོགས་ཚིགས་བཅད་ལྔས་བསྟན། དེའི་རྒྱུ་ནི། འདི་ལ་མཚན་ནི་གང་གང་གིས། །ཞེས་སོགས་ཚིགས་བཅད་གསུམ་གྱིས་བསྟན། དཔེ་བྱད་ནི། ཐུབ་པའི་སེན་མོ་ཟངས་མདོག་དང་། །ཞེས་སོགས་ཚིགས་བཅད་བཅུ་གཉིས་ཀྱིས་བསྟན་ཏོ། །སྤྲུལ་སྐུ་ལ་ངོ་བོ་མདོར་བསྟན་པ་ནི། གང་གིས་སྲིད་པ་ཇི་སྲིད་བར། །ཞེས་སོགས་ཚིགས་བཅད་གཅིག་སྟེ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་ཡུལ་འགྲོ་བ་མཐའ་དག་ལ་གང་ལ་གང་འདུལ་གྱིས་ཕན་པ་སྣ་ཚོགས་པ་མཉམ་དུ་མཛད་པ་སྟེ་ཁྱད་པར་གསུམ་ལྡན་ནོ། །དེ་མྱ་ངན་ལས་འདའ་བའི་ཚུལ་བསྟན་པས་བྱེ་བྲག་ཏུ་སྨྲ་བ་འདོད་པ་ལྟར་གྱི་དེ་རྒྱུན་ཆད་པ་སྲིད་དམ་སྙམ་པའི་དོགས་པ་ལྡོག་པའི་ཕྱིར་དུ་རྒྱུན་མི་ཆད་ཅེས་གསུངས་སོ། །ཡོན་ཏན་རྒྱས་པར་བཤད་པ་ནི། ཕན་པ་སྣ་ཚོགས་མཛད་པ་དེ་ཕྲིན་ལས་ཉེར་བདུན་དང་དོན་གཅིག་པར་དགོངས་ནས་ལོགས་སུ་མ་བསྟན་ཏོ། །མཛད་པ་ཕྲིན་ལས་ནི། དེ་བཞིན་འཁོར་བ་ཇི་སྲིད་འདི། །ཅེས་སོགས་ཏེ། གདུལ་བྱ་ལམ་གྱི་རྟེན་ལ་འགོད་པ་ནས་མི་གནས་པའི་མྱང་འདས་ལ་འགོད་པར་བྱེད་པའི་བར་ཉེར་བདུན་ནི་སྐབས་འདིའི་ཕྲིན་ལས་དངོས་ཡིན་ལ་བྱ་བའི་ལས་ཉེར་བདུན་ཡང་དེར་བསྡུའོ། །འོ་ན་ཕྲིན་ལས་ཉེར་བདུན་པོ་དེ་མཚོན་བྱེད་ཀྱི་ཆོས་གཞན་དུ་བསྟན་པ་མི་འཐད་པར་འགྱུར་རོ་སྙམ་ན་སྐྱོན་མེད་དེ། སྤྲུལ་སྐུ་ཁོ་ནའི་ཕྲིན་ལས་མ་ཡིན་པར་སྐུ་གསུམ་ཆར་གྱི་ཕྲིན་ལས་ཡིན་ནོ། །ཞེས་ཤེས་པའི་ཆེད་དུ་ལོགས་སུ་བསྟན་པའི་ཕྱིར་རོ། །སྐུ་གསུམ་ཆར་གྱི་ཕྲིན་ལས་སུ་ཇི་ལྟར་འགྱུར་སྙམ་ན། སྦྱོར་བཞི་སྒོམ་པའི་རྣམ་སྨིན་དེ་སངས་རྒྱས་རང་སྣང་ལ་ངོ་བོ་ཉིད་སྐུར་འགྱུར་ཞིང་། དེ་ཉིད་བྱང་སེམས་འཕགས་པ་ལ་ལོངས་སྐུ་དང་། རིགས་ཅན་གསུམ་ལ་སྤྲུལ་སྐུར་སྣང་ཞིང་དེས་ཕྲིན་ལས་འདི་དག་མཛད་པའི་ཕྱིར་རོ། །འོ་ན་སྐུ་གསུམ་ཆར་གྱི་ཡོན་ཏན་རྒྱས་བཤད་དུ་འགྱུར་གྱི་སྤྲུལ་སྐུའི་ཡོན་ཏན་རྒྱས་བཤད་དུ་མི་འགྱུར་རོ་སྙམ་ན་ཉེར་བདུན་པོ་འདི་དག་དངོས་སུ་མཛད་པ་པོ་ནི་སྤྲུལ་སྐུ་ཡིན་པས་དེའི་དབང་དུ་བྱས་པའི་ཕྱིར་ན་སྐྱོན་མེད་དོ། །འདི་ལ་དགོངས་ནས་ཉིར་སྣང་ལས། དེ་བཞིན་འཁོར་བ་ཇི་སྲིད་འདི། །ལས་ནི་རྒྱུན་མི་ཆད་པར་འདོད། །ཅེས་པའི་ཚིག་རྐང་གཉིས་སྤྲུལ་སྐུའི་ས་ཁོངས་ལ་སྦྱར་བ་མཛད་དོ། །གཞན་དག་གིས་ནི་མིག་གིས་མཐོང་ཡང་ཙིཏྟས་མ་ཟིན་པར་སྣང་ངོ་། །བསྟན་བཅོས་འདིའི་ཐོག་མར་གླེང་གཞིའི་འགྲེལ་པ་མཆོད་བརྗོད་ཀྱི་སྐབས་སུ་ཕྲིན་ལས་ཉེར་བདུན་ཚང་བས་དེ་དག་གི་དོན་མངོན་རྟོགས་བརྒྱད་དུ་འདུས་པ་དེ་ཉམས་སུ་བླངས་པས་འབྲས་བུ་སྐུ་གསུམ་འབྱུང་ཞིང་དེ་ལས་ཕྲིན་ལས་ཉེར་བདུན་འབྱུང་ལ་དེ་ཉིད་ཀྱང་གླེང་གཞིའི་ཚུལ་གྱི་མཛད་པ་ལས་མ་འདས་པས་མཛད་པ་ཕྲིན་ལས་ཀྱི་འཁོར་ལོ་རྒྱུན་མི་ཆད་པ་མཚོན་པའི་ཆེད་དུ་ཐོག་མར་མཆོད་བརྗོད་དང་། མཇུག་ཏུ་ཕྲིན་ལས་སྨོས་པ་ཡིན་ནོ། །གསུམ་པ་ཡོན་ཏན་གྱི་ཁྱད་པར་བྱེ་བྲག་ཏུ་བཤད་པ་ལ། ཟད་པར་བཤད་པ་དང་། ཟིལ་གནོན་བཤད་པ་གཉིས་ལས། དང་པོ་ལ་བདུན་ཏེ། ངོ་བོ། དབྱེ་བ། གྲངས་ངེས། སྒྲ་དོན། བསྒོམ་པའི་ཚུལ། གྲུབ་པའི་རྟགས། བྱེད་ལས་སོ། །དང་པོ་ནི། ཟད་པར་གྱི་ཏིང་ངེ་འཛིན་གྱི་མཚན་ཉིད། བདག་རྐྱེན་བསམ་གཏན་ལ་བརྟེན་ནས་གང་གི་སྒོ་ནས་ཟད་པར་དུ་འཇོག་པའི་དམིགས་པའི་སྣང་བ་དེས་རང་ཡུལ་གྱི་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ནོ། །ཟད་པར་གྱི་སྐྱེ་མཆེད་ཀྱི་མཚན་ཉིད་འཇོག་ན་དེ་ལྟར་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ཞེས་འཇོག་དགོས་ཏེ། ཀུན་བཏུས་ལས། ཟད་པར་རྒྱས་པར་བྱེད་པ་ཡང་དག་པར་འབྱོར་བའི་ཏིང་ངེ་འཛིན་དང་། ཤེས་རབ་གང་ཡིན་པ་དང་། དེ་དག་དང་མཚུངས་པར་ལྡན་པའི་སེམས་དང་། སེམས་ལས་བྱུང་བའི་ཆོས་རྣམས་ནི་ཟད་པར་གྱི་སྐྱེ་མཆེད་ཅེས་བྱའོ། །ཞེས་གསུངས་པས་སོ། །མཛོད་ལས་ནི། དང་པོ་བརྒྱད་སེམས་བྱུང་མ་ཆགས་པ་དང་། ཐ་མ་གཉིས་ལ་སེམས་སེམས་བྱུང་གཉིས་ཀ་ཡོད་པར་བཤད་དོ། །གཉིས་པ་ལ་ཟད་པར་ས་དང་། ཆུ་དང་། མེ་དང་། རླུང་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ནམ་མཁའ་དང་། རྣམ་པར་ཤེས་པའི་སྐྱེ་མཆེད་དེ་བཅུའོ། །མཚན་ཉིད་རིམ་པ་བཞིན་བདག་རྐྱེན་བསམ་གཏན་གྱི་དངོས་གཞི་ལ་བརྟེན་ནས་དམིགས་པའི་སྣང་བ་ས་ནས་རྣམ་པར་ཤེས་པའི་བར་གྱི་རང་ཡུལ་དེ་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་སྟེ་སོ་སོར་སྦྱར་རོ། །མཛོད་ལྟར་ན། དང་པོ་བརྒྱད་ལ་དེ་ལྟར་སྤྲོ་ནུས་པའི་སེམས་བྱུང་མ་ཆགས་པའི་རང་བཞིན་ཞེས་དང་། ཕྱི་མ་གཉིས་ལ། བདག་རྐྱེན་གཟུགས་མེད་ཀྱི་དངོས་གཞི་ལ་བརྟེན་ནས་ཞེས་སྦྱར་རོ། །གསུམ་པ་ནི། རེག་བྱ་དང་། གཟུགས་ཀྱི་སྐྱེ་མཆེད་དང་། ཆོས་དང་། ཡིད་ཀྱི་སྐྱེ་མཆེད་བཞི་ལ་ཟད་པར་བཞག་ནས་ཅིའི་ཕྱིར་སྐྱེ་མཆེད་གཞན་བརྒྱད་ལ་མི་འཇོག་ཅེ་ན། རེག་བྱ་དང་གཟུགས་གཉིས་ནི། རང་གཞན་གཉིས་ཀ་དང་། གཟུགས་ཅན་གྱི་ཁམས་ཐམས་ཅད་ན་ཡོད་པས་ཁྱབ་པར་སྤྲོ་ནུས་པ་དང་། རྟེན་འབྱུང་བ་མེད་པར་བརྟེན་པ་འབྱུང་འགྱུར་སྤྲོ་མི་ནུས་པས་འབྱུང་བ་བཞིའི་ཟད་པར་བཞག་ལ། ནམ་མཁའ་ནི་ཀུན་ལ་ཁྱབ་ཅིང་རྣམ་པར་ཤེས་པ་ཡུལ་ཅན་ཡིན་པས་དེ་དག་ལ་བཞག་གོ །སྐྱེ་མཆེད་གཞན་རྣམས་ལ་མ་ཡིན་ཏེ། དབང་པོ་ལྔ་ཕྱི་རོལ་དུ་སྤྲོ་མི་ནུས་པའི་ཕྱིར་དང་། སྒྲ་ལ་རྒྱུན་མེད་པའི་ཕྱིར། དྲི་རོ་ནི་གཟུགས་ཁམས་སུ་སྤྲོ་མི་ནུས་པའི་ཕྱིར་རོ། །གཟུགས་མེད་ཀྱི་སྐྱེ་མཆེད་དང་པོ་གཉིས་ལ་ཟད་པར་གཞག་པས་ཕྱི་མ་གཉིས་ལ་ཡང་ཅིའི་ཕྱིར་མི་འཇོག་སྙམ་ན། འདི་ལ་མཁས་པ་དག་དེ་གཉིས་སེམས་ནང་དུ་སྡུད་ཅིང་མི་གསལ་བས་མ་གཞག་གོ །ཅེས་གསུངས་པ་ནི་མི་འཐད་དེ། སྲིད་རྩེའི་སེམས་མི་གསལ་བར་བཤད་ཀྱི་གཟུགས་མེད་དང་པོ་གསུམ་ལ་སེམས་གསལ་མི་གསལ་གྱི་ཁྱད་པར་བཤད་པ་མེད་པའི་ཕྱིར་རོ། །འོ་ན་ཅི་ཞེ་ན། ཟད་པར་འཇོག་པ་ལ་རང་ཡུལ་གྱི་དམིགས་པའི་གཙོ་བོ་དེ་མཐའ་ཡས་པའི་རྣམ་པ་ཅན་དགོས་པ་ལས་གཟུགས་མེད་དང་པོ་གཉིས་ལ་དེ་ཡོད་ཅིང་། ཕྱི་མ་གཉིས་ལ་དེ་མེད་པའི་ཕྱིར་རོ། །བཞི་པ་ནི། ཟད་པར་དང་། རྒྱས་པར་དང་། ཁྱབ་པར་དང་། མཐའ་དག་ཅེས་པ་རྣམས་མིང་གི་རྣམ་གྲངས་ཡིན་པས། དམིགས་ཡུལ་ས་ལ་སོགས་པ་དེས་ཡུལ་མཐའ་དག་ལ་ཟད་ཟད་ཀྱི་བར་དུ་རྒྱས་པར་བྱེད། ཁྱབ་པར་བྱེད་པའི་དོན་གྱིས་ན་ཟད་པར་ཞེས་བྱ་སྟེ། ཉིར་སྣང་ལས། རྒྱུན་མི་ཆད་པར་ཁྱབ་པར་སྤྲོ་བས་ན་ཟད་པར་གྱི་སྐྱེ་མཆེད་ཅེས་དང་། རྒྱལ་སྲས་མ་ལས། བར་ཆད་མེད་པར་ཟད་པར་ས་ལ་སོགས་པ་རྒྱས་ཤིང་ཁྱབ་པར་བྱེད་པས་དེའི་ཕྱིར་ཟད་པར་གྱི་སྐྱེ་མཆེད་རྣམས་ཞེས་བྱའོ། །ཞེས་གསུངས་སོ། །ལྔ་པ་ལ་བཞི་སྟེ། ལུས་རྟེན། སེམས་རྟེན། དམིགས་པའི་རྟེན། སྦྱོར་དངོས་ཀྱི་ཡིད་ལ་བྱེད་ཚུལ་ལོ། །དང་པོ་ལ། སྔ་མ་བརྒྱད་ནི་འདོད་པའི་རྟེན་ཅན་ཏེ། ཐོས་བསམ་གྱི་མཐུས་རབ་ཏུ་བསྐྱེད་པར་བྱ་བ་ཡིན་པའི་ཕྱིར་རོ། །ཐ་མ་གཉིས་ནི་ཀུན་བཏུས་ལྟར་ན་འདོད་གཟུགས་ཀྱི་རྟེན་ཅན་ཡིན་ལ། མཛོད་ལྟར་ན། ཁམས་གསུམ་ཆར་གྱི་རྟེན་ཅན་ཡིན་ཏེ། གཟུགས་མེད་ཅེས་བྱ་ཁམས་གསུམ་གྱི། །རྟེན་ཅན་ལྷག་མ་མི་ལས་སྐྱེ། །ཞེས་སོ། །གཉིས་པ་ནི། ཀུན་ལས་བཏུས་ལས། ཐམས་ཅད་ཀྱང་བསམ་གཏན་གྱི་དངོས་གཞི་ལ་བརྟེན་པར་བཤད་ལ། མཛོད་ལས། ཐ་མ་གཉིས་གཟུགས་མེད་ཀྱི་དངོས་གཞི་དག་པ་བར་བཤད་དོ། །གསུམ་པ་ལ་སྔར་སྦྱང་བར་བྱས་པའི་དམིགས་རྟེན་དང་། སྔར་སྦྱང་བར་མ་བྱས་པའི་དམིགས་རྟེན་གཉིས་ལས། དང་པོ་ནི། ཆུ་ཀླུང་དང་། ནགས་ཀྱི་མེ་འབར་བ་དང་། རླུང་གིས་བསྐྱོད་པའི་འོད་མ་དང་། མེ་ཏོག་ལ་སོགས་པ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། དངུལ་དང་། ཟླ་བའི་དཀྱིལ་འཁོར་ལ་སོགས་པ་དང་། ཉི་མ་དང་ཟླ་བའི་འོད་ཀྱིས་ཕོག་པའི་རྩིག་པ་དང་། སྐར་ཁུང་གི་ནང་དང་། བུ་ག་ལ་སོགས་པ་རྣམས་མཐོང་བ་ཙམ་གྱིས་རིམ་པ་ལྟར་ཟད་པར་ཆུ་ནས་ནམ་མཁའི་བར་གྱི་ཏིང་ངེ་འཛིན་སྐྱེ་བར་འགྱུར་རོ། །གཉིས་པ་ནི། ཟད་པར་སའི་དམིགས་རྟེན་ནི་ཉིར་སྣང་ལས་མ་བཤད་ལ། གཞན་རྣམས་ཀྱི་རིམ་པ་ལྟར་ལྷུང་བཟེད་ལ་སོགས་པའི་སྣོད་དྲི་མ་མེད་པ་ཆུ་གཙང་མས་བཀང་བ་དང་། ཐབ་ཁུང་གྲུ་བཞི་པར་འོག་ཏུ་བུད་ཤིང་དང་། བར་དུ་མེ་དང་། སྟེང་དུ་དུ་བ་འཐུལ་བ་དང་། ཡན་ལག་གི་ཕྱོགས་གང་དུ་རླུང་གིས་རེག་པར་འགྱུར་བའི་སྐར་ཁུང་སོགས་ལས་བྱུང་བའི་རླུང་དང་། མཚོན་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཀྱིས་ཟླུམ་པོར་བྱས་ཏེ། ཁ་དོག་གཞན་གྱིས་བཅད་པར་བྱས་པ་དང་། མཐོ་གང་སོར་བཞི་ཙམ་གྱི་བུ་ག་ནམ་མཁའི་མཐོངས་བཏོད་པ་དང་། བུམ་པའི་ནང་གི་མར་མེའི་འོད་བུ་གའི་ངོས་ནས་རྩིག་པ་ལ་ཕོག་པ་རྣམས་སོ། །བཞི་པ་ནི། བསམ་གཏན་གྱི་དངོས་གཞི་ཐོབ་པའི་གང་ཟག་གིས་དམིགས་རྟེན་དེ་དག་ལ་རྩེ་གཅིག་ཏུ་དམིགས་ནས་སྦྱོར་བའི་དུས་སུ་དམིགས་རྟེན་འདིས་ཤེས་བྱ་ཐམས་ཅད་ལ་ཁྱབ་པར་བྱའོ་སྙམ་པའི་མོས་པ་ཡིད་བྱེད་སྔོན་དུ་བཏང་སྟེ་དངོས་གཞི་དུས་སུ་ཡང་། ས་ས། ཆུ་ཆུ། ཞེས་པའི་མིང་ཙམ་ལ་དམིགས་ཏེ། རྩེ་གཅིག་ཏུ་བསྒོམ་མོ། །དྲུག་པ་ལ་འཛིན་པའི་མཚན་མ་དང་། སྣང་བའི་མཚན་མ་གཉིས་ལས། དང་པོ་ནི། ས་ལ་མ་བཤད་ཅིང་། གཞན་རྣམས་ལ་རིམ་པ་ལྟར་ཆུའི་སྦུ་བ་དང་། ཆུ་བུར་འདྲེས་པའི་ཆུ་གཡོ་བའི་རྣམ་པ་ཅན་དང་། མེ་ལྕེ་མཆེད་ཅིང་ལྷུང་བ་ལྟ་བུར་གཡོ་བ་དང་། འོ་མ་བསྐོལ་བ་ས་ལ་ཕོག་མ་ཐག་པའི་རླངས་པ་འཐུལ་བ་ལྟ་བུ་དང་། སྔོན་པོ་ལ་སོགས་པ་བཞི་ལ་མེ་ཏོག་གེ་སར་དང་། སྡོང་བུ་མེད་པ་ལྟ་བུ་དང་། ཐ་མ་གཉིས་ལ་རྩིག་པའི་བུ་ག་དང་འདྲ་བར་གྱུར་ཏེ། བསྐྱེད་ཀྱང་མི་འཕེལ་བ་དང་། ས་ལས་བྱས་པའི་དཀྱིལ་འཁོར་དང་འདྲ་བར་ཐོག་བཅས་སུ་སྣང་བ་སྟེ་འཛིན་པའི་མཚན་མའི་དོན་ནི་མ་འབྱོངས་པའི་རྟགས་ཡིན་ནོ། །གཉིས་པ་ཡང་ས་ལ་མ་བཤད་ལ། ཆུ་ལ་སོགས་པ་གསུམ་ལ་ནམ་མཁའ་ལ་གནས་པའི་ནོར་བུའི་རླུང་གཡབ་ལྟར་མི་གཡོ་བའི་རྣམ་པ་ཅན་དུ་སྣང་བ་དང་། ནམ་མཁར་གནས་པའི་ཟླ་བ་དམར་པོ་ཟླུམ་པོ་ལྟར་ཉེ་བར་གནས་པ་དང་འདུག་པ་ལྟར་མི་གཡོ་བ་དང་། སྔོན་པོ་ལ་སོགས་པ་བཞི་ལ་དམིགས་པའི་རྟེན་ནམ་མཁར་འཕགས་ནས་ནོར་བུའི་རླུང་གཡབ་ལྟར་གནས་པ་དང་། ཐ་མ་གཉིས་ལ་སྣང་བའི་ཚོགས་སྟུག་པོ་རབ་ཏུ་དྭངས་པ་དང་འདྲ་བར་ཐམས་ཅད་གསལ་བ་དང་། ནམ་མཁའི་དཀྱིལ་འཁོར་ལྟར་གྱུར་ནས་བསྐྱེད་ནས་འཕེལ་བར་གྱུར་པ་རྣམས་སོ། །སྣང་བའི་མཚན་མའི་དོན་ནི་འབྱོངས་པའི་རྟགས་སོ། །བདུན་པ་ནི། རིམ་པ་ལྟར་གཅིག་ཏུ་གྱུར་ནས་མང་པོར་གྱུར་བ་དང་། ནམ་མཁའ་དང་ཆུ་ལ་ཡང་གོམ་པ་དོར་ནས་འགྲོ་བ་དང་། ས་ལ་ཡང་ཆུ་ལ་འཇུག་པ་ལྟར་བྱེད་པ་དང་། བདུད་ཀྱི་གཞལ་ཡས་ཁང་བསྲེགས་པའི་མེ་འབར་ཞིང་མེ་མདག་གི་ཆར་འབེབས་པ་སོགས་དང་། རླུང་ལྟར་མགྱོགས་པར་འགྲོ་བ་དང་། གཟུགས་སོགས་སྔོན་པོར་སྤྲུལ་ཞིང་མུན་པར་བྱེད་པ་དང་། སེར་པོར་སྤྲུལ་ཞིང་གསེར་དུ་བསྒྱུར་བ་དང་། གཟུགས་དམར་པོར་སྤྲུལ་པ་དང་། དཀར་པོར་སྤྲུལ་པ་དང་། རྩིག་པ་སོགས་ལ་ཐོགས་མེད་དུ་འགྲོ་བ་དང་། གཟུགས་གསལ་བར་བྱེད་པ་དང་། གཉིད་དང་རྨུགས་པ་རྒྱང་རིང་དུ་བྱེད་པའོ། །གཉིས་པ་ཟིལ་གནོན་ལ། མདོ་ལས་ཇི་ལྟར་གསུངས་པའི་ཚུལ། དེའི་དོན་བཤད་པ། སྐབས་ཀྱི་དོན་ངོས་གཟུང་བ་དང་གསུམ་ལས། དང་པོ་ནི། མདོ་ལས། ནང་གཟུགས་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་། ཁོ་དོག་ངན་པ་རྣམས་ལ་ལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟར་འདུ་ཤེས་པར་གྱུར་པ་དེ་ནི་ཟིལ་གྱིས་གནོན་པའི་སྐྱེ་མཆེད་དང་པོའོ། །དེ་བཞིན་དུ། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ལ་སྦྱར་བ་དང་། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་དང་ཆེན་པོ་ལ་སྦྱར་བ་གཉིས་ཏེ་བཞི་གསུངས་སོ། །ནང་གཟུགས་མེད་པར་འདུ་ཤེས་པ་ཁོ་ནས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་རྣམས་ལ་བལྟ་སྟེ། དཔེར་ན། ཟར་མའི་མེ་ཏོག་གམ་ཡུལ་བཱ་རཱ་ཎ་སཱིའི་རས་ཕུན་སུམ་ཚོགས་པ་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་བཞིན་དུ། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བའི་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟར་འདུ་ཤེས་པ་འདི་ནི་ཟིལ་གྱིས་གནོན་པའི་སྐྱེ་མཆེད་ལྔ་པའོ། །དེ་བཞིན་དུ། སེར་པོ་ལ་དོང་ཀའི་མེ་ཏོག་ལྟ་བུ་དང་། དམར་པོ་ལ་མཉྫུ་ཛཱི་བ་ཀའི་མེ་ཏོག་ལྟ་བུ་དང་། དཀར་པོ་ལ་སྐར་མ་པ་བ་སངས་དང་སྦྱར་ནས་གསུངས་སོ། །གཉིས་པ་ནི། ཆུང་ངུ་ནི་སེམས་ཅན་གྱི་གཟུགས། ཆེན་པོ་ནི་སྣོད་ཀྱི་འཇིག་རྟེན་གྱི་གཟུགས། བཟང་པོ་དང་། ངན་པ་ནི་སོ་སོར་སྦྱར་རོ། །སྔོན་པོ་ཞེས་སོགས་ཀྱིས་ནི་མདོར་བསྟན། ཁ་དོག་སྔོན་པོ། ཞེས་སོགས་ཀྱིས་ནི་ལྷན་སྐྱེས་དང་། སྔོན་པོ་ལྟ་བུར་སྟོན་པ་ཞེས་སོགས་ཀྱིས་ནི་སྦྱར་བྱུང་དང་། འོད་སྔོན་པོ་འབྱུང་བ་ཞེས་སོགས་ཀྱིས་ནི་གཉིས་ཀ་ལ་སྔོན་པོ་སོགས་ཀྱི་མདངས་ཡོད་པར་སྟོན་ཏོ། །མེ་ཏོག་ནི་ལྷན་སྐྱེས་ཀྱི་དཔེ། རས་ནི་སྦྱར་བྱུང་གི་དཔེ། ཡུལ་བཱ་རཱ་ཎ་སཱིའི་རས་གསུངས་པ་ནི་ཁ་དོག་ཆེས་གསལ་བའི་དཔེའོ། །ཟིལ་གྱིས་གནོན་པ་ནི། ཇི་ལྟར་འདོད་པ་བཞིན་དུ་དབང་བསྒྱུར་བའོ། །ཤེས་པ་ནི་ཞི་གནས་ཀྱིས་ཤེས་པའོ། །མཐོང་བ་ནི་ལྷག་མཐོང་གིས་མཐོང་བའོ། །གསུམ་པ་ནི། ཟིལ་གྱིས་གནོན་པའི་སྐྱེ་མཆེད་ཀྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས། རང་ཡུལ་གྱི་གཟུགས་ཐམས་ཅད་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱིས་གནོན་པར་ནུས་པའི་ཞི་ལྷག་ཟུང་འཇུག་གོ །དེ་ལ་དབྱེ་ན་བརྒྱད་ཡོད་པ་ལ། གཟུགས་ཅན་གཟུགས་ཆུང་ངུ་ལ་ལྟ་བའི་ཟིལ་གནོན་གྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་ལ་གཟུགས་སྣང་མི་དོར་བའི་སྒོ་ནས། རང་ཡུལ་དུ་གྱུར་པའི་སེམས་ཅན་གྱི་གཟུགས་བཟང་ངན་ཐམས་ཅད་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱི་གནོན་ནུས་པའི་ཞི་ལྷག་ཟུང་འཇུག་གོ །གཟུགས་ཅན་གཟུགས་ཆེན་པོ་ལ་ལྟ་བའི་ཟིལ་གནོན་གྱི་མཚན་ཉིད། གཞན་སྔ་མ་དང་འདྲ་བ་ལས། རང་ཡུལ་དུ་གྱུར་པའི་སྣོད་ཀྱི་གཟུགས་བཟང་ངན་ཐམས་ཅད་ཅེས་སྦྱར་རོ། །གཟུགས་མེད་གཟུགས་ཆུང་ངུ་ལ་བལྟ་བའི་ཟིལ་གནོན་གྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ཏེ། རང་ལ་གཟུགས་སྣང་དོར་བའི་སྒོ་ནས། སེམས་ཅན་གྱི་གཟུགས་བཟང་ངན་ཐམས་ཅད་ཅེས་སོགས་དང་། གཟུགས་མེད་གཟུགས་ཆེན་པོ་ལ་བལྟ་བའི་ཟིལ་གནོན་གྱི་མཚན་ཉིད། གཞན་འདྲ་བ་ལས་རང་ཡུལ་དུ་གྱུར་པའི་སྣོད་ཀྱི་གཟུགས་བཟང་ངན་ཐམས་ཅད་ཞེས་སོགས་སྦྱར་རོ། །གཟུགས་མེད་གཟུགས་སྔོན་པོ་ལ་བལྟ་བའི་དང་། སེར་པོ་དང་། དམར་པོ་དང་། དཀར་པོ་ལ་བལྟ་བའི་ཟིལ་གནོན་བཞིའི་མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས། རང་ལ་གཟུགས་སྣང་དོར་བའི་སྒོ་ནས། ཕྱི་རོལ་གྱི་གཟུགས་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས། ཟིལ་གྱིས་གནོན་ནུས་པའི་ཞི་ལྷག་ཟུང་འཇུག་གོ །དང་པོ་གཉིས་རྣམ་ཐར་དང་པོ་དང་། དེ་ནས་གཉིས་རྣམ་ཐར་གཉིས་པ་དང་། ཕྱི་མ་བཞི་སྡུག་པའི་རྣམ་ཐར་གྱི་རྒྱུ་ལས་བྱུང་བར་བཤད་དོ། །དེ་དག་གིས་རྒྱས་པ་ལ་དད་པ་ལ་བརྒྱད་དུ་ཕྱེ་བའམ་ཚིག་གི་དོན་བཤད་ཟིན་ནས་བར་པ་ལ་དད་པ་ལ་དྲུག་ཏུ་བསྟན་པའམ། བཤད་ཐབས་ཀྱི་མན་ངག་ལྔའི་ནང་ནས་མཚམས་སྦྱར་བ་ནི། མཚན་ཉིད་དེ་ཡི་སྦྱོར་བ་དང་། །ཞེས་སོགས་ཚིགས་བཅད་གཅིག་སྟེ། ཉིར་སྣང་ལས། ཐམས་ཅད་མཁྱེན་པ་ཉིད་གསུམ་ནི། མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །རྣམ་པ་ཐམས་ཅད་མངོན་པར་རྫོགས་པར་རྟོགས་པ་ནི་སྦྱོར་བའོ། །རྩེ་མོའི་མངོན་པར་རྟོགས་པ་ནི་རབ་ཏུ་གྱུར་པ་དང་ལྡན་པའོ། །མཐར་གྱིས་པའི་མངོན་པར་རྟོགས་པ་ནི་གོ་རིམ་དང་ལྡན་པའོ། །སྐད་ཅིག་མ་གཅིག་ལ་མངོན་པར་རྫོགས་པར་བྱང་ཆུབ་པ་ནི་མཐར་ཐུག་པའོ། །ཆོས་ཀྱི་སྐུ་མཛད་པ་དང་བཅས་པ་ནི་རྣམ་པར་སྨིན་པ་སྟེ། དེ་ལྟར་ན་འདི་ནི་བཤད་པའི་རྣམ་གྲངས་གཞན་ཡིན་ནོ། །ཞེས་གསུངས་སོ། །འདིར་འདས་པ་ལ་སྙེགས་པས་དེ་ལྔ་པོ་སྔ་མ་སྔ་མ་ལ་སྙེགས་པ་དང་། མཁྱེན་གསུམ་ལ་སྙེགས་པ་གང་གི་ཡང་གསལ་ཁ་མི་སྣང་ཡང་། སློབ་དཔོན་གྱིས་དེའི་དགོངས་པ་མཁྱེན་གསུམ་ལ་སྙེགས་པར་མཛད་དོ། །འདི་དག་མཚམས་སྦྱར་དུ་འགྲོ་བའི་རྒྱུ་མཚན་ནི་སྔར་བཤད་ཟིན་ཅིང་། འདིར་མཁྱེན་གསུམ་གཅིག་ཏུ་བསྡུ་བའི་དགོས་པ་དང་། དེ་ལྔ་པོ་མཁྱེན་གསུམ་ལ་སྙེགས་ཀྱང་སྔ་ཕྱི་མཚམས་སྦྱོར་བའི་ཚིག་ཏུ་འགྲོ་ཚུལ་རྣམས་ནི་ཞིབ་ཏུ་ངག་ལས་ཤེས་པར་བྱའོ། །དེའི་འོག་ཏུ་བསྡུས་པ་ལ་དད་པ་ལ་གསུམ་དུ་བསྡུ་བའམ། བཤད་ཐབས་ཀྱི་མན་ངག་ལྔའི་ནང་ནས་བརྒལ་ལན་ནི། ཡུལ་ནི་རྣམ་པ་གསུམ་པོ་རྒྱུ། །ཞེས་སོགས་ཚིགས་བཅད་གཅིག་གིས་སྟོན་ཏོ། །འདི་ལ་དགོས་པ་གཉིས་ལས། གདུལ་བྱ་བརྗོད་བྱའི་རྐང་གྲངས་ཉུང་བ་ལ་དགའ་བ་རྣམས་ལ་བརྗོད་བྱའི་གཙོ་བོ་དངོས་པོ་གསུམ་དུ་བསྡུས་ནས་སྟོན་པ་དང་། མངོན་པར་རྟོགས་པ་བརྒྱད་དུ་བསྟན་པ་དང་། དྲུག་ཏུ་བསྟན་པ་ལ་འགལ་བར་རྒོལ་བ་ལ་དེ་ནི་མི་འགལ་ཏེ། ཕྱེ་ན་བརྒྱད་དུ་ཡོད་ཀྱང་མཁྱེན་པ་གསུམ་པོ་ཐོབ་བྱའི་འབྲས་བུ་ཤེར་ཕྱིན་མཚན་ཉིད་པ་གཅིག་ཏུ་བསྡུ་བའི་ཚེ་ན་དྲུག་ཏུ་འགྱུར་ཞིང་། སྦྱོར་བ་བཞི་པོ་ཡང་ཐོབ་བྱེད་ཀྱི་རྒྱུ་ཞེས་པ་གཅིག་ཏུ་བསྡུ་བའི་ཚེ་ན། མངོན་པར་རྟོགས་པ་གསུམ་དུ་འགྱུར་བའི་ཕྱིར། ཞེས་པ་བརྒལ་ལན་གྱི་དགོས་པ་ཡང་ཡོད་དོ། །འདིར་འཕགས་གྲོལ་དང་། སངས་རྒྱས་ཡེ་ཤེས་ཞབས་ཀྱིས་ཡུལ་དང་། རྒྱུ་དང་། འབྲས་བུ་གསུམ་དུ་མཛད་ནས། དང་པོ་ནི། ཡུལ་ནི་རྣམ་པ་གསུམ་པོ་ཞེས་དང་། གཉིས་པ་ནི། རྒྱུ་སྦྱོར་བ་བཞི་ཡི་བདག་ཉིད་དང་། །ཞེས་དང་། གསུམ་པ་ནི། ཆོས་སྐུ་ཕྲིན་ལས་འབྲས་བུ་ནི། །ཞེས་པས་སྟོན་པར་བཞེད་དོ། །སློབ་དཔོན་གྱིས་ནི་འཇུག་པའི་ཡུལ་གྱི་རྒྱུ། ཉམས་ལེན་གྱི་སྦྱོར་བ། ཉམས་སུ་བླངས་པའི་འབྲས་བུ་དང་གསུམ་དུ་མཛད་ནས། ཚིག་རྐང་དང་པོ་གསུམ་རེ་རེས་སྟོན་པར་མཛད་དོ། །དེ་དག་ཀྱང་མངོན་པར་རྟོགས་པ་བརྒྱད་ཆར་གང་ཟག་ཅིག་འཚང་རྒྱ་བའི་ལམ་གྱི་རིམ་པར་སྒྲིག་པའི་དབང་དུ་བྱས་པ་ཡིན་གྱི། ཡང་དག་པར་ན་མངོན་པར་རྟོགས་པ་བརྒྱད་པོ་རེ་རེའི་སྐབས་སུ་ཡང་འཚང་རྒྱ་བའི་ལམ་རིམ་རེ་རེ་ཚང་བར་ཡོད་ཅིང་། སེམས་བསྐྱེད་དང་། གདམས་ངག་ལ་སོགས་པ་མཚོན་བྱེད་ཀྱི་ཆོས་རེ་རེ་ལ་ཡང་འཚང་རྒྱ་བའི་ལམ་རིམ་ཚང་བར་ཡོད་ལ། ཕྲིན་ལས་ཉི་ཤུ་རྩ་བདུན་ཉིད་ལ་ཡང་རྫོགས་པའི་སངས་རྒྱས་ཀྱི་གསུང་རབ་ཀྱི་བརྗོད་བྱ་མ་ལུས་པ་ཚང་བ་སོགས་ཟབ་ཅིང་རྒྱ་ཆེ་བའི་བློ་གྲོས་ཀྱིས་ཁྱབ་པར་སྤྲོ་བར་བྱ་བ་ཡིན་ནོ།། །།གཤེགས་དང་གཤེགས་བཞིན་གཤེགས་པར་འགྱུར་བའི་བདེ་གཤེགས་སྲས་བཅས་ཀྱིས། །བགྲོད་དང་བགྲོད་བཞིན་བགྲོད་པར་འགྱུར་བའི་ལམ་འདི་མཁས་རྣམས་ཀྱིས། །ཕྱེ་དང་ཕྱེ་བཞིན་ཕྱེ་བར་འགྱུར་ལས་གཞན་དུ་བདག་བློ་ཡིས། །འཆད་དང་འཆད་བཞིན་འཆད་པར་འགྱུར་བ་མེད་མོད་དེ་ལྟ་ནའང་། །སྐྱེ་དང་སྐྱེ་བར་ལུས་བཟང་རྟེན་ལ་ལུགས་བཟང་གོམས་པ་དང་། །ཡང་དང་ཡང་དུ་ལྷ་མཆོག་དེ་ལ་སེམས་མཆོག་དད་བྱས་ཤིང་། །མཁས་དང་མཁས་པའི་གསུང་རབ་ཚོགས་ལ་ཡིད་རབ་བརྩོན་པའི་མཐུས། །རྒྱལ་དང་རྒྱལ་སྲས་ཇི་བཞིན་དགོངས་པ་ཚུལ་བཞིན་ཕྱེ་བ་འདི། །རྒྱ་ཆེན་བསོྃད་ནམྃས་ལུས་སྟོབས་རབ་རྒྱས་ཏེ། །བདེ་གཤེགས་གསུང་རབ་སེྃང་གེྃའི་ང་རོ་ཡིས། །ལོག་སྨྲའི་རི་དྭགས་མཐའ་དག་སྐྲག་བྱེད་ཅིང་། །ཐུབ་བསྟན་གངས་རི་སྐྱོང་བ་དེ་ཡིས་སྦྱར། །བརྗོད་བྱ་དོན་ལྡན་རྗོད་བྱེད་ཆོས་དང་འབྲེལ། །བྱེད་ལས་ཁམས་གསུམ་ཉོན་མོངས་སྤོང་བྱེད་ཅིང་། །ཞི་བའི་ཕན་ཡོན་སྟོན་པ་རྒྱལ་བ་ཡི། །བཀའ་ཡིན་དེ་ལས་བཟློག་པ་གཞན་དུ་གསུངས། །རྒྱལ་བའི་བསྟན་པ་འབའ་ཞིག་དབང་བྱས་ཤིང་། །རྣམ་གཡེང་མེད་པས་ཐར་པའི་ཆེད་དུ་བཤད། །དེ་ཡང་དྲང་སྲོང་བཀའ་བཞིན་སྤྱི་བོ་ཡིས། །བླང་བྱ་ཡིན་པར་ཚད་ལྡན་གཞུང་ལས་གསུངས། །ཚུ་རོལ་མཐོང་བས་བླ་མའི་མན་ངག་དང་། །ཡིད་ཆེས་ལུང་དང་རིགས་པ་རྣམ་བཞི་ལ། །བརྟེན་ནས་གསུང་རབ་དགོངས་པ་འགྲེལ་པ་ནི། །འཇིག་རྟེན་སོ་སོའི་ལེགས་བཤད་ཡིན་པར་གསུངས། །དེ་སླད་འཕགས་མཆོག་མཁའ་ལྡིང་བགྲོད་པ་ཡི། །གསུང་རབ་བྱ་ལམ་ཡངས་པར་བྱིས་པའི་བློ། །སྦྲང་རྩི་འཛིན་པ་རྐང་དྲུག་ལྡན་པ་ཡང་། །རྗེས་སུ་བརྩོན་པ་ཅུང་ཟད་བྱས་པ་ལགས། །དེ་ལས་བྱུང་བའི་རྣམ་དཀར་དགེ་བའི་ཚོགས། །ཉི་མའི་འོད་ལྟར་གསལ་བ་གང་ཐོབ་དེས། །མཁའ་མཉམ་འགྲོ་བའི་སྙིང་མུན་ཀུན་བསལ་ནས། །ཐེག་མཆོག་ལམ་གྱི་སྣང་བ་རྒྱས་པར་ཤོག །བདག་ཀྱང་ཚེ་འདིའི་སྣང་བ་ནུབ་མ་ཐག །མི་ཕམ་ཆོས་རྗེའི་ཞལ་མཆོག་མཐོང་གྱུར་ཏེ། །བསྟན་བཅོས་འདི་ཡི་ཚིག་དང་དོན་རྣམས་ཀུན། །ཐོས་ནས་སྒྲོ་འདོགས་མ་ལུས་ཆོད་པར་ཤོག །ཚེ་རབས་ཀུན་ཏུ་སྒོ་གསུམ་བྱ་བ་རྣམས། །མཐའ་དག་འགྲོ་ལ་ཕན་པའི་རྒྱུར་གྱུར་ནས། །རླབས་ཆེན་བྱང་ཆུབ་སྤྱོད་པ་མཐར་ཕྱིན་ཏེ། །སྐུ་གསུམ་ཕྲིན་ལས་བཅས་པ་མྱུར་ཐོབ་ཤོག །དམ་ཆོས་སྒྲུབ་ལ་བར་དུ་གཅོད་པ་ཡི། །རླུང་མཁྲིས་བད་ཀན་ལ་སོགས་ཉེར་འཚེ་དང་། །མི་དང་མི་མིན་འབྱུང་པོའི་གནོད་པ་སོགས། །རྣམ་རྟོག་མ་ལུས་དབྱིངས་སུ་དག་གྱུར་ཅིག །བདག་གི་གདུལ་བྱར་གྱུར་པ་ཐམས་ཅད་ཀྱང་། །ཚུལ་ཁྲིམས་དག་ཅིང་བྱང་ཆུབ་སེམས་དང་ལྡན། །རབ་འབྱམས་གཞུང་གི་དོན་ལ་མཁས་གྱུར་ཏེ། །བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག། །།ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཞེས་བྱ་བའི་གཞུང་སྔ་ཕྱིའི་འབྲེལ་དང་། དཀའ་བའི་གནས་ལ་དཔྱད་པ་སྦས་དོན་ཟབ་མོའི་གཏེར་གྱི་ཁ་འབྱེད་ཅེས་བྱ་བ་འདི་ནི། རྗེ་བཙུན་དམ་པ་སངས་རྒྱས་ཀྱི་སྤྲུལ་པ་རོང་སྟོན་ཆོས་ཀྱི་རྒྱལ་པོ་དང་། སྨྲ་བའི་ཟླ་བ་མཚུངས་པ་མེད་པ་ཀུན་མཁྱེན་སངས་རྒྱས་འཕེལ་ལ་སོགས་པ། མཁས་པའི་མཁས་པ་དུ་མའི་ཞབས་རྡུལ་སྤྱི་བོས་བླངས་པ་ལ་བརྟེན་ནས། སྡེ་སྣོད་གསུམ་དང་། རྒྱུད་སྡེ་བཞི་ལ་བློ་གྲོས་ཀྱི་སྣང་བ་ཅུང་ཟད་ཐོབ་ཅིང་། ཁྱད་པར་དུ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལུགས་ལ། ངེས་པའི་ཤེས་པ་གཏིང་ནས་སྐྱེས་པ་མང་དུ་ཐོས་པའི་དགེ་སློང་བསོད་ནམས་སེང་གེས་དོན་གཉེར་དུ་མས་ཡང་ཡང་བསྐུལ་ཞིང་། ལ་སྟོད་མདོག་གི་སའི་ཆ་ལ་སྐྱེས་པ་སྙོམ་ལས་པ་གཞོན་ནུ་བཟང་པོས་འཕྲལ་དུ་བསྐུལ་ཏེ་ཡི་གེའི་རྐྱེན་སྦྱར་བ་ལ་བརྟེན་ནས། ལྕགས་ཕོ་སྟག་གི་ལོ་ས་ག་ཟླ་བའི་ཡར་ཚེས་བཅོ་ལྔ་ལ། རྟ་ནག་གསེར་གླིང་གི་དགོན་པར་སྦྱར་བའོ།། །།འདིས་ཀྱང་བསྟན་པ་རིན་པོ་ཆེ་དར་རྒྱས་སུ་གྱུར་ཅིག། །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།