ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ཉ༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ།

ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ་བཞུགས་སོ།། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །དབྱིངས་དང་ཡེ་ཤེས་རོ་གཅིག་གྱུར་ཀྱང་རྣམ་དག་དབྱིངས་ཉིད་མིག་གིས་རིག །ཐབས་དང་ཤེས་རབ་དབྱེར་མེད་གྱུར་ཀྱང་ཐབས་ཀྱིས་ཞི་དང་ཤེས་པས་སྲིད་མཐའ་གནོན། །སྲིད་དང་ཞི་བ་མཉམ་ཉིད་གྱུར་ཀྱང་སྲིད་པའི་སྐྱོན་སྤངས་ཞི་བའི་ཡོན་ཏན་བརྙེས། །རྒྱལ་བ་ཀུན་གྱི་ཡབ་གཅིག་གྱུར་ཀྱང་རྒྱལ་བའི་རྒྱལ་ཚབ་ཀུན་ཏུ་འཛིན་ལ་འདུད། །གང་གི་མཁྱེན་པ་ཆུ་ཐགས་རྫིང་བུ་ལས་བྱུང་མངོན་པར་རྟོགས་པ་པདྨོའི་ཚལ། །ཤཱཀྱའི་རྒྱལ་མཚན་གསུང་གི་ཉིན་བྱེད་འོད་ཀྱིས་རྣམ་ཕྱེ་ངེས་དོན་སྦྲང་རྩིའི་བཅུད། །བདག་བློའི་བུང་བས་རྣམ་དཔྱོད་མཆུ་ཡིས་གཞིབ་སྟེ་ལེགས་བཤད་དར་དིར་དང་བཅས་པ། །དོན་གཉེར་སྐྱེ་བོའི་ཚོགས་ལ་སྦྱིན་གྱིས་བློ་གྲོས་རོ་འཛིན་ཀུན་ཏུ་ཚིམ་པར་མཛོད། །འདི་ལ་དོན་གསུམ་སྟེ། བརྗོད་བྱ་ཤེར་ཕྱིན་ལ་འཇུག་པའི་ཡན་ལག་མཆོད་བརྗོད་དང་། རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་འབྲེལ། བསྟན་བཅོས་ཀྱི་བརྗོད་བྱ་མངོན་རྟོགས་བཤད་པའོ། །དང་པོ་ལ་དངོས་དང་། འཕྲོས་དོན་གཉིས་ལས་དང་པོ་ནི། མཆོད་བརྗོད་ཀྱི་ཡུལ་དུ་གྱུར་པའི་ཡུམ་གྱི་མཚན་ཉིད། རང་སྲས་འཕགས་པ་སྐྱེད་བྱེད་དང་དེའི་བཞེད་དོན་སྒྲུབ་བྱེད་གང་རུང་དུ་གྱུར་པའི་བདག་མེད་རྟོགས་པའི་མཁྱེན་པ། དེ་ལ་སྐྱེད་བྱེད་ཀྱི་དང་། བཞེད་དོན་སྒྲུབ་བྱེད་ཀྱི་ཡུམ་གཉིས་ལས། དང་པོའི་མཚན་ཉིད། བདག་མེད་གསུམ་གང་རུང་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་སྲས་འཕགས་པ་སྐྱེད་པར་བྱེད་པའི་མཁྱེན་པ། དེ་ལ་དབྱེ་ན་རང་སྲས་ཉན་ཐོས་འཕགས་པ། རང་སྲས་རང་རྒྱལ་འཕགས་པ། རང་སྲས་བྱང་སེམས་འཕགས་པ། རང་སྲས་སངས་རྒྱས་འཕགས་པའི་སྐྱེད་བྱེད་ཀྱི་ཡུམ་དང་བཞི་ལས་དང་པོའི་མཚན་ཉིད། གཞི་གང་ཟག་གཾི་བདག་གི་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་ཉན་ཐོས་འཕགས་པ་སྐྱེད་པར་བྱེད་པའི་མཁྱེན་པ། དེ་ལ་དབྱེ་ན་གཞི་གང་ཟག་གི་བདག་གི་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པའི་དང་། མངོན་སུམ་དུ་རྟོགས་པའི་སྐྱེད་བྱེད་ཀྱི་ཡུམ་གཉིས་ལས། སྔ་མ་ནི་ཉན་ཐོས་ཀྱི་ཚོགས་སྦྱོར་ན་ཡོད། ཕྱི་མ་ནི་ཉན་ཐོས་ཀྱི་མཐོང་ལམ་ནས་ཐེག་ཆེན་ལམ་དུ་འཇུག་ཁ་མའི་སྔ་ལོགས་ཀྱི་བར་ན་ཡོད། གཉིས་པའི་མཚན་ཉིད། གཞི་གཟུང་བ་ཆོས་ཀྱི་བདག་གཾི་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་རང་རྒྱལ་འཕགས་པ་སྐྱེད་པར་བྱེད་པའི་མཁྱེན་པ། དབྱེ་བ་དང་ས་མཚམས་སྔ་མ་ལ་དཔགས་ཏེ་ཤེས་པར་བྱའོ། །གསུམ་པའི་མཚན་ཉིད། ལམ་འཛིན་པ་ཆོས་ཀྱི་བདག་གིཾ་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་བྱང་སེམས་འཕགས་པ་སྐྱེད་པར་བྱེད་པའི་མཁྱེན་པའོ། །དབྱེ་ན་ལམ་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པའི་དང་། མངོན་སུམ་དུ་རྟོགས་པའི་སྐྱེད་བྱེད་ཀྱི་ཡུམ་གཉིས་ལསཾ་སྔ་མ་ནི་ཐེག་ཆེན་གྱི་ཚོགས་སྦྱོར་ན་ཡོད། ཕྱི་མ་ནི་ས་དང་པོ་ནས་རྒྱུན་མཐའི་སྔ་ལོགས་ཀྱི་བར་ན་ཡོད་དོ། །བཞི་པའི་མཚན་ཉིད་རྣམ་པ་སྐྱེ་མེད་དུ་རྟོགས་པའི་སྒོ་ནས་རང་གི་རྟོགས་པའི་རྒྱུན་ཕྱི་མ་ལ་གནས་པའི་སངས་རྒྱས་འཕགས་པ་སྐྱེད་པར་བྱེད་པའི་མཁྱེན་པ། དབྱེ་ན་རྣམ་པ་སྐྱེ་མེད་དུ་དོན་སྤྱིའི་ཚུལ་གྱིས་རྟོགས་པའི་མཁྱེན་པ་དང་། མངོན་སུམ་དུ་རྟོགས་པའི་སྐྱེད་བྱེད་ཀྱི་ཡུམ་གཉིས་ལས་སྔ་མ་ནི་ཐེག་ཆེན་གྱི་ཚོགས་སྦྱོར་ན་ཡོད། ཕྱི་མ་ནི་ས་དང་པོ་ནས་སངས་རྒྱས་སའི་བར་ན་ཡོད། གཉིས་པ་བཞེད་དོན་སྒྲུབ་བྱེད་ཀྱི་ཡུམ་གྱི་མཚན་ཉིད། བདག་མེད་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་འཕགས་པའི་བཞེད་དོན་གྱི་གཙོ་བོ་སྒྲུབ་པའི་རིགས་སུ་གནས་པའི་མཁྱེན་པ། དབྱེ་ན་མཆོད་བརྗོད་ཀྱི་ཡུལ་དུ་གྱུར་པའི་ཡུམ་གཞི་ཤེས། ལམ་ཤེས། རྣམ་མཁྱེན་གསུམ། དང་པོའི་མཚན་ཉིད། གཞི་གང་ཟག་གི་བདག་གིཾ་དང་གཟུང་བ་ཆོས་ཀྱི་བདག་གིཾ་སྐྱེ་མེད་གང་རུང་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་ཐེག་དམན་འཕགས་པ་ཉེར་ཞི་གཉིས་སུ་འཁྲིད་པར་བྱེད་པའི་མཁྱེན་པ། ས་མཚམས་ཐེག་དམན་གྱི་མཐོང་ལམ་ནས་ཐེག་ཆེན་ལམ་དུ་འཇུག་ཁ་མའི་བར་ན་ཡོད། གཉིས་པའི་མཚན་ཉིད། ལམ་སྐྱེ་མེད་མངོན་སུམ་དུ་རྟོགས་པའི་སྒོ་ནས་རང་རྒྱུད་ལྡན་གྱི་བྱང་སེམས་འཕགས་པའི་འཇིག་རྟེན་གྱི་དོན་སྒྲུབ་པར་བྱེད་པའི་མཁྱེན་པ། ས་མཚམས་ས་དང་པོ་ནས་རྒྱུན་མཐའི་བར་ན་ཡོད། གསུམ་པའི་མཚན་ཉིད། རྣམ་པ་སྐྱེ་མེད་དུ་མངོན་སུམ་དུ་རྟོགས་པ་མཐར་ཐུག་པའི་སྒོ་ནས་རང་རྒྱུད་ལྡན་གྱི་སངས་རྒྱས་འཕགས་པས་ཆོས་འཁོར་བསྐོར་བའི་བདག་རྐྱེན་དུ་གྱུར་པའི་མཁྱེན་པ། ས་མཚམས་སངས་རྒྱས་ཀྱི་ས་ཁོ་ནར་ཡོད། གཉིས་པ་འཕྲོས་དོན་ལ་གསུམ་སྟེ། བསྡུས་ཚུལ་ལས་འཕྲོས་པ། ཚིག་དོན་ལས་འཕྲོས་པ། བརྒལ་ལན་ལས་འཕྲོས་པའོ། །དང་པོ་ནི། ཐམས་ཅད་མཁྱེན་པ་ཉིད་གསུམ་གྱིས་དོན་བརྒྱད་བསྡུས་པའི་ཚུལ་ཇི་ལྟ་བུ་སྙམ་ན། སྡུད་བྱེད་ཀྱི་མཁྱེན་གསུམ་ནི། གཞི་སྐྱེ་མེད་དུ་རྟོགས་པ་དང་། ལམ་སྐྱེ་མེད་དུ་རྟོགས་པ་དང་། རྣམ་པ་སྐྱེ་མེད་དུ་རྟོགས་པ་ཙམ་ཡིན་ལ། དང་པོས་ཐེག་དམན་འཕགས་པའི་མངོན་པར་རྟོགས་པ་ལ་གཞི་ཤེས་སུ་བཞག་པ་དེ་བསྡུས། གཉིས་པས་བྱང་སེམས་འཕགས་པའི་མངོན་པར་རྟོགས་པ་ལ་ལམ་ཤེས་སུ་བཞག་པ་དང་སྦྱོར་བ་བཞི་པོ་བསྡུས། གསུམ་པས་སངས་རྒྱས་འཕགས་པའི་མངོན་པར་རྟོགས་པ་ལ་རྣམ་མཁྱེན་དུ་བཞག་པ་དང་འབྲས་བུ་ཆོས་སྐུ་བསྡུས་སོ། །ངེས་པའི་དོན་ནི་གཞན་ཞིག་ན་སྣང་ངོ་། །གཉིས་པ་ལ་གཞི་ཤེས་ཀྱི་ཚིག་དོན་གྱི་སྐབས་སུ་དམན་པའི་མྱང་འདས་ཀྱི་མཚན་ཉིད། ཁམས་གསུམ་གྱི་ཉོན་མོངས་མ་ལུས་པར་སྤངས་པའི་དམན་པའི་སོ་སོར་བརྟགས་འགོག དེ་ལ་བསྟན་ཚུལ་གྱི་སྒོ་ནས་དབྱེ་ན་དམན་པའི་ལྷག་བཅས་མྱང་འདས་དང་དམན་པའི་ལྷག་མེད་མྱང་འདས་གཉིས་ལས་མཚན་ཉིད་རིམ་བཞིན། ཉོན་མོངས་པའི་ཀུན་འབྱུང་ཟད་པར་སྤངས་ཤིང་དགྲ་བཅོམ་དང་པོར་ཐོབ་པའི་ལུས་རྟེན་དང་བཅས་པའི་དང་། དེ་དང་བྲལ་བའི་དམན་པའི་སོ་སོར་བརྟགས་འགོག ཐེག་པའི་སྒོ་ནས་དབྱེ་ན་ཉན་ཐོས་ཀྱི་མྱང་འདས་དང་། རང་རྒྱལ་གྱི་མྱང་འདས་གཉིས་ལས་ཁམས་གསུམ་གྱི་ཉོན་མོངས་མ་ལུས་པར་སྤངས་པའི་ཉན་ཐོས་ཀྱི་རྒྱུད་ཀྱི་སོ་སོར་བརྟགས་འགོག་དང་། དེ་མ་ལུས་པར་སྤངས་པའི་རང་རྒྱལ་གྱི་རྒྱུད་ཀྱི་སོ་སོར་བརྟགས་འགོག རྣམ་མཁྱེན་གྱི་ཚིག་དོན་གྱི་སྐབས་སུ་ཆོས་འཁོར་གྱི་མཚན་ཉིད། ལུང་རྟོགས་གང་རུང་གིས་བསྡུས་པའི་སྟོན་པའི་དམ་ཆོས། དབྱེ་ན་ལུང་གི་ཆོས་འཁོར་དང་། རྟོགས་པའི་ཆོས་འཁོར་གཉིས་ལས་དང་པོའི་མཚན་ཉིད། རྟོགས་པའི་ཆོས་འཁོར་བརྗོད་བྱར་སྟོན་པའི་སྟོན་པའི་དམ་ཆོས། དབྱེ་ན་བཀའ་དང་པོ་བདེན་བཞིའི་ཆོས་འཁོར་སོགས་གསུམ་ཡོད་ཅིང་དེ་རེ་རེ་ལ་ཡང་ཆོས་འཁོར་དང་པོའི་དང་པོ་སོགས་གསུམ་གསུམ་ཡོད་དོ། །གཉིས་པའི་མཚན་ཉིད། འགོག་ལམ་གང་རུང་གིས་བསྡུས་པའི་བསྟན་པའི་དམ་ཆོས། དབྱེ་ན་འགོག་ལམ་གཉིས་ལས། དང་པོ་ལ་ཉན་ཐོས་ཀྱི་འགོག་པ། རང་རྒྱལ་གྱི་འགོག་པ། ཐེག་ཆེན་གྱི་འགོག་པ་དང་གསུམ་མོ། །ཕྱི་མ་ལ་ཐེག་པ་གསུམ་གྱི་ལམ་ལྔ་གསུམ་བཅོ་ལྔ་ཡོད་དོ། །གསུམ་པ་ལ་བརྒལ་ལན་གྱི་ལམ་ཤེས་ཀྱི་མདོའི་སྐབས་སུ་ཉན་རང་གི་སྤངས་རྟོགས་ཀྱི་རིགས་ཐེག་ཆེན་གྱི་ལམ་གང་དུ་རྫོགས་པ། རྫོགས་སྨིན་སྦྱང་གསུམ་གྱི་ཚད། ཡང་དག་མཐའ་ངོས་གཟུང་ཞིང་དེ་མངོན་དུ་བྱས་པའི་ཚད་དང་གསུམ་ལས། དང་པོ་ནི། ཉན་རང་དགྲ་བཅོམ་གྱི་སྤངས་རྟོགས་ཀྱི་རིགས་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ནས་རྫོགས་ཏེ། དེས་ཉན་རང་དགྲ་བཅོམ་གྱིས་ཇི་ཙམ་སྤངས་པ་དེ་སྤངས། ཇི་ཙམ་རྟོགས་པ་དེ་རྟོགས་པའི་ཕྱིར་དང་། དེས་འཁོར་བར་འཆིང་བྱེད་ཀྱི་ཉོན་སྒྲིབ་མ་ལུས་པར་སྤངས་ཤིང་། གང་ཟག་གི་བདག་མེད་དང་གཟུང་བ་ཆོས་ཀྱི་བདག་མེད་མངོན་སུམ་དུ་རྟོགས་པའི་དགོས་པ་མཐར་ཐུག་ཐོབ་པའི་ཕྱིར་རོ། །ཉོན་ཡིད་ཁས་ལེན་ན་འདིའི་རྣམ་བཞག་བྱེད་པ་དཀའོ། །གཉིས་པ་ལ། སྨོན་ལམ་རྫོགས་པའི་ཚད་ནི་སྨོན་ལམ་གྱི་གཙོ་བོ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་སྨོན་པ་དེ་རྫོགས་པའོ། །སེམས་ཅན་སྨིན་པར་བྱས་པའི་ཚད་ནི། རང་ཉིད་སྤྲུལ་སྐུར་སངས་རྒྱས་པའི་ཚེ་ཆོས་འཁོར་དང་པོའི་གདུལ་བྱའི་གཙོ་བོ་དེ། མཐོང་སྤངས་གི་སྒྲིབ་པ་དངོས་སུ་སྤོང་རུང་དང་། གཉེན་པོ་མཐོང་ལམ་དངོས་སུ་སྐྱེ་རུང་དུ་བྱས་པའོ། །སངས་རྒྱས་ཀྱི་ཞིང་ཡོངས་སུ་སྦྱངས་པའི་ཚད་ནི། རང་སྣང་ལ་སྣོད་བཅུད་ཐམས་ཅད་དག་པ་རབ་འབྱམས་འབའ་ཞིག་ཏུ་ཤར་བའོ། །གསུམ་པ་ལ། ཡང་དག་མཐའི་ངོ་བོ་ནི་ཆོས་ཉིད་དེ་བཞིན་ཉིད་དེ། མདོ་སྡེ་ས་བཅུ་པ་ལས་བཤད་པའི་སྤྲོས་པ་མཐའ་དག་བཀག་པའི་འགོག་པ་དང་དོན་གཅིག་གོ །དེ་མངོན་དུ་བྱས་པའི་ཚད་ལ་རྫོགས་སྨིན་སྦྱངས་གསུམ་མ་བྱས་པར་དེ་མངོན་དུ་བྱས་པ་དང་། རྫོགས་སྨིན་སྦྱངས་གསུམ་བྱས་ཏེ་མངོན་དུ་བྱས་པ་གཉིས་ལས། དང་པོ་ནི། དག་སར་ཆོས་ཉིད་དེ་བཞིན་ཉིད་ལ་རྩོལ་མེད་དུ་ཡུན་རིང་དུ་མཉམ་པར་གཞག་པས་རེ་ཞིག་གཞན་དོན་རྒྱུན་ཆད་པའི་ཉེས་པ་དང་བཅས་པའོ། །ཕྱི་མ་ནི་སངས་རྒྱས་ཀྱི་སར་གཞན་དོན་འབད་མེད་ལྷུན་གྲུབ་ཏུ་འབྱུང་བཞིན་དུ་ཆོས་ཉིད་ལ་དུས་རྟག་ཏུ་མཉམ་པར་གཞག་པ་ལས་མ་གཡོས་པའོ། །གཉིས་པ་རྗོད་བྱེད་བསྟན་བཅོས་ལ་འཇུག་པའི་ཡན་ལག་དགོས་སོགས་ཆོས་བཞི་བཤད་པ་ལ། དགོས་འབྲེལ་ངག་ལ་ཡོད་པའི་དགོས་སོགས་ཆོས་བཞི་བཤད་པ་དང་། བསྟན་བཅོས་ལུས་ལ་ཡོད་པའི་དགོས་སོགས་ཆོས་བཞི་བཤད་པ་ལ་གཉིས་ལས། དང་པོ་ནི། བསྟན་བཅོས་ལུས་ཀྱི་དགོས་སོགས་ཆོས་བཞི་པོ་དེ་དགོས་འབྲེལ་ངག་གི་བརྗོད་བྱ། དགོས་འབྲེལ་ངག་ལ་བརྟེན་ནས་རྒྱན་ལ་དགོས་སོགས་ཆོས་བཞི་ཡོད་པར་ངེས་པས། རྒྱན་ལ་དགོས་སོགས་ཆོས་བཞི་མེད་པར་འཛིན་པའི་དོགས་པ་བསལ་ནས་རྩེ་གཉིས་སུ་འཛིན་པའི་ཐེ་ཚོམ་བསྐྱེད་པའམ་རྩེ་གཉིས་སུ་འཛིན་པའི་དོགས་པ་བསལ་ནས་དོན་འགྱུར་གྱི་ཐེ་ཚོམ་བསྐྱེད་པ་ནི་དགོས་འབྲེལ་ངག་གི་དགོས་པ། དགོས་འབྲེལ་ངག་ལ་བརྟེན་ནས་རྒྱན་ལ་དགོས་སོགས་ཆོས་བཞི་ཡོད་པར་ངེས་ཏེ། རྒྱན་ལ་ཐོས་སོགས་ཀྱིས་འཇུག་པ་ནི་དགོས་འབྲེལ་ངག་གི་ཉིང་དགོས། དེ་གསུམ་ཐབས་ལས་བྱུང་བའི་འབྲེལ་པ་ནི་དགོས་འབྲེལ་ངག་གི་འབྲེལ་པ་ཡིན་ནོ། །གཉིས་པ་ནི། བརྗོད་བྱ་དངོས་པོ་བརྒྱད་དོན་བདུན་ཅུ་རྗོད་བྱེད་ཤེར་ཕྱིན་དང་བཅས་པ་ནི་བརྗོད་བྱ། རྒྱན་ལ་བརྟེན་ནས་མདོ་དོན་བདེ་བླག་ཏུ་རྟོགས་པ་ནི་རྒྱན་གྱི་དགོས་པ། རྒྱན་ལ་བརྟེན་ནས་འབྲས་བུ་ཆོས་སྐུ་མངོན་དུ་བྱས་པ་ནི་རྒྱན་གྱི་ཉིང་དགོས། དེ་གསུམ་ཐབས་ལས་བྱུང་བའི་ཚུལ་གྱིས་འབྲེལ་པ་ནི་རྒྱན་གྱི་འབྲེལ་པ་ཡིན་ནོ། །གསུམ་པ་བསྟན་བཅོས་ཀྱི་བརྗོད་བྱ་མངོན་རྟོགས་བཤད་པ་ལ་གཉིས་ཏེ། བསྡུས་དོན་ལུས་རྣམ་གཞག་དང་། ཚིག་དོན་ཡན་ལག་རྒྱས་བཤད་དོ། །དང་པོ་ལ་གཉིས་ཏེ། ལུས་མདོར་བསྟན་པ་དང་། ཅུང་ཟད་ཕྱེ་སྟེ་བཤད་པའོ། །དང་པོ་ལ་ཇི་ལྟར་བཤད་པའི་ཚུལ་དང་། དངོས་པོ་བརྒྱད་དུ་ཕྱེ་བ་གཉིས་ལས། དང་པོ་ནི། དངོས་པོ་བརྒྱད་དུ་ཕྱེ་བའི་ཤེར་ཕྱིན་དེ་མངོན་རྟོགས་བརྒྱད་ཀྱི་སྒོ་ནས་བཤད་པའོ། །དེ་ལ་ཤེར་ཕྱིན་མཚན་ཉིད་པ་ནི་འབྲས་བུ་ཤེར་ཕྱིན་ཡིན་ལ། དེའི་མཚན་ཉིད་ནི། ཆོས་རབ་རྣམ་འབྱེད་ཀྱི་བློ་གང་ཞིག་སྲིད་ཞིའི་ཕ་རོལ་ཏུ་སོན་པའོ། །གཞུང་ཤེར་ཕྱིན་སྟོང་ཕྲག་བརྒྱ་པ་ལ་སོགས་པ་གཞུང་གི་ཚོགས་རྣམས་སོ། །ལམ་ཤེར་ཕྱིན་ནི་ཆོས་རང་བཞིན་མེད་པར་མངོན་སུམ་དུ་རྟོགས་པའི་ཤེས་རབ་སྟེ། ཐེག་པ་ཆེན་པོའི་མཐོང་ལམ་དང་སྒོམ་ལམ་གྱིས་བསྡུས་པའོ། །དེ་གཉིས་ནི་ཤེར་ཕྱིན་བཏགས་པ་བ་ཡིན་ཏེ། འདོགས་པའི་རྒྱུ་མཚན་ནི་གཞུང་ཤེར་ཕྱིན་ནི་ཤེར་ཕྱིན་བརྗོད་བྱར་སྟོན་བྱེད་ཙམ་ཡིན་པའི་ཕྱིར་དང་། ལམ་ཤེར་ཕྱིན་ནི་ཤེར་ཕྱིན་འཐོབ་བྱེད་ཡིན་པའི་ཕྱིར་རོ། །བཏགས་པའི་དགོས་པ་ནི། ཤེར་ཕྱིན་དོན་དུ་གཉེར་བས་གཞུང་ཤེར་ཕྱིན་ལ་ཐོས་སོགས་ཀྱིས་འཇུག་ཅིང་། ལམ་ཤེར་ཕྱིན་ནི་བསྒོམ་བྱར་བསྟན་པའི་དོན་དུ་ཡིན་ནོ། །དངོས་ལ་གནོད་བྱེད་ནི། དེ་གཉིས་ལ་དེའི་མཚན་ཉིད་མ་ཚང་བའི་ཕྱིར་རོ། །གཉིས་པ་ནི། ཅིའི་ཕྱིར་ཤེར་ཕྱིན་གྱི་ལུས་དེ་ལ་དངོས་པོ་བརྒྱད་དུ་གྲངས་ངེས་ཤེ་ན། དོན་དུ་གཉེར་བྱའི་འབྲས་བུ་ཤེར་ཕྱིན་དེ་ཐོབ་པ་ལ། གཏན་ལ་དབབ་པར་བྱ་བའི་ཡུལ་གསུམ། ཉམས་ལེན་སྦྱོར་བ་བཞི། ཐོབ་བྱའི་འབྲས་བུ་ཆོས་སྐུ་རྣམས་ཀྱིས་མཐར་ཕྱིན་པར་བྱ་དགོས་པའི་ཕྱིར་རོ། །ཅིའི་ཕྱིར་གཏན་ལ་དབབ་པར་བྱ་བའི་ཡུལ་ལ་གསུམ་དུ་གྲངས་ངེས་ཤེ་ན། འབྲས་བུ་ལ་སྤྲོ་བ་བསྐྱེད་པའི་ཆེད་དུ་རྣམ་མཁྱེན། འཐོབ་བྱེད་ཀྱི་རྒྱུ་ཤེས་པའི་ཆེད་དུ་ལམ་ཤེས། དེ་དག་གི་གོལ་ས་གཅོད་པའི་ཡན་ལག་དུ་གཞི་ཤེས་རྣམས་ལ་སྒྲོ་འདོགས་གཅད་དགོས་པའི་ཕྱིར་རོ། །ཅིའི་ཕྱིར་ཉམས་ལེན་གྱི་སྦྱོར་བ་དེ་ལ་བཞིར་གྲངས་ངེས་ཞེ་ན། མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་དེ་རྣམ་པར་བསྡུས་ནས་སྒོམ་དགོས་པས་རྣམ་རྫོགས་སྦྱོར་བ། དེ་ཉིད་ལ་སྒོམ་བྱུང་གཙོ་བོར་གྱུར་པའི་སྒོ་ནས་དབང་ཐོབ་པ་རྩེ་མོའི་སྦྱོར་བ། དེ་ཉིད་ལ་བློའི་ནུས་པ་ཕུལ་དུ་བྱུང་བར་བྱ་བའི་ཕྱིར་གོ་རིམ་དུ་བསྒོམ་པ་མཐར་གྱིས་པའི་སྦྱོར་བ། དེ་ཉིད་ལ་བརྟན་པ་ཐོབ་ནས་ཅིག་ཅར་དུ་བསྒོམ་པ་སྐད་ཅིག་མའི་སྦྱོར་བ་རྣམས་སུ་གྲངས་ངེས་པའི་ཕྱིར། གཉིས་པ་ཅུང་ཟད་ཕྱེ་སྟེ་བཤད་པ་ལ་གསུམ་སྟེ། ཡུལ་དང་། སྦྱོར་བ་དང་། འབྲས་བུའོ། །དང་པོ་ལ་རྣམ་མཁྱེན། ལམ་ཤེས། གཞི་ཤེས་གསུམ་ལས། དང་པོ་རྣམ་མཁྱེན་ལ་གསུམ་སྟེ། མཚོན་བྱེད་ཆོས་ཀྱི་གྲངས་ངེས། ཇི་ལྟར་མཚོན་པའི་ཚུལ། དེ་ཉིད་ལུས་དང་སྦྱར་བའོ། །དང་པོ་ནི། རྣམ་མཁྱེན་མཚོན་བྱེད་ཀྱི་ཆོས་དེ་ལ་བཅུར་གྲངས་ངེས་ཏེ། དེ་ལ་བསམ་པ་དང་སྦྱོར་བ་གཉིས་ལས། དང་པོ་ནི་སེམས་བསྐྱེད། གཉིས་པ་ལ་སྒྲུབ་པའི་རྒྱུ། འབྲས་བུ་སྒྲུབ་པ། སྒྲུབ་པའི་ཡན་ལག་གི་ཆོས་དང་གསུམ་ལས། དང་པོ་ནི་གདམས་ངག གཉིས་པ་ནི་ངེས་འབྱེད་ཡན་ལག གསུམ་པ་ལ་སྒྲུབ་པའི་རྟེན། སྒྲུབ་པའི་དམིགས་པ། སྒྲུབ་པའི་ཆེད་དུ་བྱ་བ། སྒྲུབ་པ་རང་གི་ངོ་བོ་དང་བཞི་ལས། དང་པོ་ནི་སྒྲུབ་པའི་རྟེན་དུ་གྱུར་པའི་ཆོས་དབྱིངས། གཉིས་པ་ནི་སྒྲོ་འདོགས་གཅད་པར་བྱ་བའི་དམིགས་པ། གསུམ་པ་ནི་ཆེད་དུ་བྱ་བ་ཆེན་པོ་གསུམ། བཞི་པ་ལ་འཁོར་གསུམ་མི་དམིགས་པས་གོ་བགོས་པ་དང་། གོ་བགོས་པ་ལྟར་ཐེག་ཆེན་ལ་སྦྱོར་བའི་བརྩོན་འགྲུས་ལ་ཞུགས་པ་དང་། ཞུགས་པའི་འོག་ཏུ་མི་མཐུན་ཕྱོགས་ལས་ངེས་པར་འབྱུང་བའི་ཆེད་དུ་ཚོགས་གཉིས་གསག་པ་དང་། ཚོགས་ཀྱི་དཔུང་སོགས་པས་མི་མཐུན་ཕྱོགས་ལས་རྒྱལ་བ་དང་བཞི་ལས། དང་པོ་ནི་གོ་སྒྲུབ། གཉིས་པ་ནི་འཇུག་སྒྲུབ། གསུམ་པ་ནི་ཚོགས་སྒྲུབ། བཞི་པ་ནི་ངེས་འབྱུང་སྒྲུབ་པ་ཡིན་པའི་ཕྱིང་རོ། །གཉིས་པ་ནི། ཡུལ་གྱིས་ཡུལ་ཅན་མཚོན་པའི་ཚུལ་གྱིས་མཚོན་ཏེ། ཆོས་བཅུ་པོ་མངོན་སུམ་དུ་རྟོགས་པའི་མཁྱེན་པ་ནི་རྣམ་མཁྱེན་ཡིན་པའི་ཕྱིར་རོ། །གསུམ་པ་ནི། ཐུབ་པའི་རྣམ་ཀུན་མཁྱེན་པ་ཉིད། །ཅེས་པ་སྟེ་རྣམ་ཀུན་མཁྱེན་ཉིད་ཅེས་པའི་རྣམ་མཁྱེན་ངོས་གཟུང་བའོ། །ལམ་ཤེས་ལ་ཡང་སྔ་མ་ལྟར་གསུམ་ལས། དང་པོ་ནི། ལམ་ཤེས་མཚོན་བྱེད་ཀྱི་ཆོས་དེ་ལ་བཅུ་གཅིག་ཏུ་གྲངས་ངེས་ཏེ། དེ་ལ་ལམ་ཤེས་བསྐྱེད་པའི་ཆོས། རང་བཞིན། བྱེད་ལས། ཤེས་བྱ་ལམ་གྱི་ངོ་བོ་དང་བཞི་ལས། དང་པོ་གསུམ་པོ་ལམ་ཤེས་ཀྱི་ཡན་ལག་ཅེས་གཅིག་ཏུ་བགྲང་། ཕྱི་མ་ལ་གཞན་རྗེས་སུ་འཛིན་པའི་ལམ་དང་། རང་མངོན་དུ་བྱ་བའི་ལམ་གཉིས། དང་པོ་ལ་ཉན་ཐོས་ཀྱི་རིགས་ཅན་ལ་བསྟན་པར་བྱ་བ་དང་། རང་རྒྱལ་གྱི་རིགས་ཅན་ལ་བསྟན་པར་བྱ་བ་གཉིས་ལས། དང་པོ་ནི་ཤེས་བྱ་ཉན་ཐོས་ཀྱི་ལམ། གཉིས་པ་ནི་ཤེས་བྱ་རང་རྒྱལ་གྱི་ལམ། རང་མངོན་དུ་བྱ་བའི་ལམ་ལ་ཡང་སྒྲིབ་པ་ཕྱོགས་གཅིག་སྤང་བའི་གཉེན་པོ་དང་། མཐའ་དག་སྤང་བའི་གཉེན་པོ་གཉིས་ལས། དང་པོ་ནི་མཐོང་བའི་ལམ། གཉིས་པ་ལ་སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་གཉིས་ལས། དང་པོ་ནི་བྱེད་པ་དྲུག གཉིས་པ་ལ་རྗེས་ཐོབ་དག་པ་འཇིག་རྟེན་པའི་རང་བཞིན་དང་། མཉམ་གཞག་རྣམ་པར་མི་རྟོག་པའི་རང་བཞིན་གཉིས། དང་པོ་ལ་བསོད་ནམས་མ་སྐྱེས་པ་སྐྱེད་པར་བྱེད་པ་དང་། སྐྱེས་པ་བྱང་ཆུབ་ཀྱི་རྒྱུར་བསྒྱུར་བར་བྱེད་པ་དང་། བསོད་ནམས་ཀྱི་ཚོགས་ཡོངས་སུ་སྤེལ་བར་བྱེད་པ་དང་གསུམ་ལས། དང་པོ་ལ་མོས་པ་དངོས་དང་། མོས་པའི་ཕན་ཡོན་གཉིས། གཉིས་པ་ནི་བསྔོ་བ་སྒོམ་ལམ། གསུམ་པ་ནི་རྗེས་སུ་ཡི་རང་སྒོམ་ལམ། མཉམ་གཞག་རྣམ་པར་མི་རྟོག་པའི་རང་བཞིན་ལ་ཡོན་ཏན་མངོན་པར་སྒྲུབ་པར་བྱེད་པ་དང་། མི་མཐུན་ཕྱོགས་དག་པར་བྱེད་པ་གཉིས་ལས། དང་པོ་ནི་སྒྲུབ་པ་སྒོམ་ལམ། གཉིས་པ་ནི་རྣམ་དག་སྒོམ་ལམ་ཡིན་པའི་ཕྱིར་རོ། །གཉིས་པ་ནི། རང་གི་ངོ་བོའི་སྒོ་ནས་མཚོན་ཏེ། ཕལ་ཆེར་བའི་དབང་དུ་བྱས་ནས་ཆོས་བཅུ་གཅིག་པོ་འདི་ལམ་ཤེས་ཀྱི་ངོ་བོ་ཡིན་པའི་ཕྱིར་རོ། །གསུམ་པ་ནི། བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་པ་སྟེ་ལམ་ཤེས་ཉིད་ཅེས་པའི་ལམ་ཤེས་ངོས་གཟུང་བའོ། །གཞི་ཤེས་ལ་ཡང་སྔར་ལྟར་གསུམ་ལས། གཞི་ཤེས་མཚོན་བྱེད་ཀྱི་ཆོས་དེ་ལ་དགུར་གྲངས་ངེས་ཏེ། དེ་ལ་འཇུག་ཡུལ་གཞི་ཤེས། འཇུག་པ་སྦྱོར་བ། ཞུགས་འབྲས་མཐོང་ལམ་དང་གསུམ། དང་པོ་ལ་གཞི་ཤེས་ཀྱི་ངོ་བོ་དང་། ཉེ་རིང་གི་རྒྱུ་མཚན་དང་མི་མཐུན་ཕྱོགས་དང་གཉེན་པོའི་ཁྱད་པར་དང་གསུམ། དང་པོ་ལ་ཤེས་པས་སྲིད་ལ་མི་གནས་པའི་གཞི་ཤེས་དང་། སྙིང་རྗེས་ཞི་ལ་མི་གནས་པའི་གཞི་ཤེས། གཉིས་པ་ལ་འབྲས་ཡུམ་ལ་རིང་བའི་གཞི་ཤེས་དང་། འབྲས་ཡུམ་ལ་ཉེ་བའི་གཞི་ཤེས་གཉིས། གསུམ་པ་ལ་མི་མཐུན་ཕྱོགས་ཀྱི་གཞི་ཤེས་དང་། གཉེན་པོ་གཞི་ཤེས་གཉིས། འཇུག་པ་སྦྱོར་བ་ལ་སྦྱོར་བའི་དབྱེ་བ་དང་། དེའི་མཉམ་ཉིད་གཉིས་སུ་ངེས་པའི་ཕྱིར་རོ། །གཉིས་པ་ནི། ངོ་བོའི་སྒོ་ནས་མཚོན་ཏེ། ཕལ་ཆེར་བའི་དབང་དུ་བྱས་ནས་ཆོས་དགུ་པོ་ནི་གཞི་ཤེས་ཀྱི་ངོ་བོ་ཡིན་པའི་ཕྱིར་རོ། །གསུམ་པ་ནི། ཉན་ཐོས་ལ་སོགས་པའི། དེ་འདྲ་ཀུན་ཤེས་ཉིད་དུ་འདོད། །ཅེས་པ་སྟེ། དེ་ནས་ཐམས་ཅད་ཤེས་པ་ཉིད། །ཅེས་པའི་སྐབས་ཀྱི་གཞི་ཤེས་ངོས་གཟུང་བའོ། །མཁྱེན་པ་གསུམ་ལུས་དང་སྦྱར་བའི་སྐབས་སུ་ཐུབ་པའི་ཞེས་སོགས་རྟེན་གྱི་གང་ཟག་ཀྱང་སྨོས་པ་ནི། མཆོད་བརྗོད་ཀྱི་མཁྱེན་པ་གསུམ་དང་སྦྱར་བའི་ཆེད་ཡིན་ནོ། །གཉིས་པ་སྦྱོར་བ་ལ་བཞི་ལས། དང་པོ་རྣམ་རྫོགས་སྦྱོར་བ་ལ་གསུམ་སྟེ། མཚོན་བྱེད་ཀྱི་ཆོས་ཀྱི་གྲངས་ངེས། ཇི་ལྟར་མཚོན་པའི་ཚུལ། ལུས་དང་སྦྱར་བའོ། །དང་པོ་ནི། རྣམ་རྫོགས་སྦྱོར་བ་མཚོན་བྱེད་ཀྱི་ཆོས་དེ་ལ་བཅུ་གཅིག་ཏུ་གྲངས་ངེས་ཏེ། དེ་ལ་སྦྱོར་བ་སྒོམ་པ་ལ་འཇུག་པའི་ཚུལ། ཞུགས་པའི་རྟེན་གྱི་གང་ཟག བསྒོམ་བྱ་སྦྱོར་བའི་ངོ་བོ་དང་གསུམ། དང་པོ་ལ་བསྒོམ་བྱ་དང་། སྒོམ་པའི་རྣལ་འབྱོར་དང་། སྔོན་འགྲོའི་ཆོས་དང་། ཉེ་རྒྱུ་དང་བཞི། དང་པོ་ནི་རྣམ་པ། གཉིས་པ་ནི་སྦྱོར་བ། གསུམ་པ་ལ་ཡོན་ཏན། སྐྱོན། མཚན་ཉིད་དང་གསུམ། བཞི་པ་ནི་ཐར་པ་ཆ་མཐུན། ཞུགས་པའི་རྟེན་གྱི་གང་ཟག་ལ་སྦྱོར་བ་སྐྱེས་པའི་གནས་སྐབས་དང་། རྟེན་གྱི་གང་ཟག་དངོས་གཉིས་ལས། དང་པོ་ནི་ངེས་འབྱེད་ཆ་མཐུན། གཉིས་པ་ནི་སློབ་པ་ཕྱིར་མི་ལྡོག་པའི་ཚོགས། བསྒོམ་བྱ་སྦྱོར་བའི་ངོ་བོ་ལ་ཆོས་སྐུའི་རྒྱུ་དང་། གཟུགས་སྐུའི་རྒྱུ་དང་། ཕྲིན་ལས་ཀྱི་རྒྱུ་གསུམ། དང་པོ་ནི་སྲིད་ཞི་མཉམ་ཉིད་ཀྱི་སྦྱོར་བ། གཉིས་པ་ནི་ཞིང་དག་པའི་སྦྱོར་བ། གསུམ་པ་ནི་ཐབས་ལ་མཁས་པའི་སྦྱོར་བ་ཡིན་པའི་ཕྱིར་རོ། །གཉིས་པ་ནི། ངོ་བོའི་སྒོ་ནས་མཚོན་ཏེ། ཕལ་ཆེར་བའི་དབང་དུ་བྱས་ནས་ཆོས་བཅུ་གཅིག་པོ་འདི་རྣམ་རྫོགས་སྦྱོར་བའི་ངོ་བོ་ཡིན་པའི་ཕྱིར་རོ། །གསུམ་པ་ནི། རྣམ་ཀུན་མངོན་རྫོགས་རྟོགས་པ་སྟེ། །ཞེས་པ་སྟེ། རྣམ་ཀུན་མངོན་རྫོགས་རྟོགས་པ་དང་ཞེས་པའི་རྣམ་རྫོགས་སྦྱོར་བ་ངོས་འཛིན་པའོ། །རྩེ་སྦྱོར་ལ་ཡང་སྔར་ལྟར་གསུམ་ལས། དང་པོ་ནི། རྩེ་སྦྱོར་མཚོན་བྱེད་ཀྱི་ཆོས་དེ་ལ་ཡང་བརྒྱད་དུ་གྲངས་ངེས་ཏེ། དེ་ལ་སྦྱོར་ལམ། མཐོང་ལམ། སྒོམ་ལམ། བར་ཆད་མེད་པའི་རྩེ་སྦྱོར་དང་བཞི་ལས། དང་པོ་ལ་རྟགས་དང་། རྣམ་འཕེལ་དང་། བརྟན་པ་དང་། སེམས་ཀུན་ཏུ་གནས་པས་མཚོན་པའི་རྩེ་སྦྱོར་བཞི། གཉིས་པ་ནི་མཐོང་སྤང་བཞིའི་གཉེན་པོ་བར་ཆད་མེད་ལམ། གསུམ་པ་ནི་སྒོམ་སྤང་བཞིའི་གཉེན་པོ་བར་ཆད་མེད་ལམ། བཞི་པ་ལ་དངོས་དང་། བསལ་བྱ་གཉིས་ལས། དང་པོ་ནི་བར་ཆད་མེད་པའི་ཏིང་ངེ་འཛིན། གཉིས་པ་ནི་བསལ་བྱ་ལོག་སྒྲུབ་ཡིན་པའི་ཕྱིར་རོ། །གཉིས་པ་ནི་ངོ་བོའི་སྒོ་ནས་མཚོན་ཏེ། ཕལ་ཆེར་བའི་དབང་དུ་བྱས་ནས་ཆོས་བརྒྱད་པོ་འདི་རྩེ་སྦྱོར་གྱི་ངོ་བོ་ཡིན་པའི་ཕྱིར་རོ། །ལམ་ཤེས་སོགས་ལ་ཕལ་ཆེར་བ་སྨོས་པའི་དོན་ནི། ལམ་ཤེས་ཀྱི་ཡན་ལག་དང་པོ་གསུམ་དང་། བྱང་སེམས་སོ་སྐྱེའི་རྒྱུད་ཀྱི་གཞི་ཤེས་ཀྱི་སྦྱོར་བ་དང་། ཡོན་ཏན་དང་། སྐྱོན་དང་། སློབ་པ་ཕྱིར་མི་ལྡོག་པའི་ཚོགས་དང་། བསལ་བྱ་ལོག་སྒྲུབ་རྣམས་དེ་དང་དེའི་ངོ་བོ་ཡིན་པ་བསལ་བའི་ཆེད་ཡིན་པའི་ཕྱིར་རོ། །གསུམ་པ་ནི། རྩེ་མོའི་མངོན་རྟོགས་ཞེས་པ་སྟེ། རྩེ་སྦྱོར་ཕྱིན་དང་ཞེས་པའི་རྩེ་སྦྱོར་ངོས་འཛིན་པའོ། །མཐར་གྱིས་པ་ལ་ཡང་སྔར་ལྟར་གསུམ་ལས། དང་པོ་ནི། མཐར་གྱིས་པའི་སྦྱོར་བ་མཚོན་བྱེད་ཀྱི་ཆོས་དེ་ལ་བཅུ་གསུམ་དུ་གྲངས་ངེས་ཏེ། དེ་ལ་སྦྱོར་བ་ཕུན་སུམ་ཚོགས་པ་དང་། བསམ་པ་ཕུན་སུམ་ཚོགས་པ་དང་། དེ་གཉིས་རྣམ་པར་དག་བྱེད་ཀྱི་ཆོས་གསུམ་ལས། དང་པོ་ལ་ཕ་རོལ་ཏུ་ཕྱིན་པ་དྲུག གཉིས་པ་ལ་ལམ་གྱི་རྟེན་དང་། དེའི་གཞི་དང་། དེ་ཉམས་སུ་ལེན་པའི་དཔང་པོ་རྗེས་སུ་དྲན་པ་གསུམ་ལས། དང་པོ་ལ་དཀོན་མཆོག་གསུམ་རྗེས་སུ་དྲན་པ་གསུམ། གཉིས་པ་ལ་ཚུལ་ཁྲིམས་དང་གཏོང་བ་རྗེས་སུ་དྲན་པ་གཉིས། གསུམ་པ་ནི་ལྷ་རྗེས་སུ་དྲན་པ། དེ་གཉིས་རྣམ་པར་དག་བྱེད་ཀྱི་ཆོས་ནི་དངོས་མེད་ངོ་བོ་ཉིད་དུ་རྟོགས་པའི་མཐར་གྱིས་པའི་སྦྱོར་བ་ཡིན་པའི་ཕྱིར་རོ། །གཉིས་པ་ནི། ངོ་བོའི་སྒོ་ནས་མཚོན་ཏེ། ཆོས་བཅུ་གསུམ་པོ་ནི་མཐར་གྱིས་པའི་སྦྱོར་བའི་ངོ་བོ་ཡིན་པའི་ཕྱིར་རོ། །གསུམ་པ་ནི། མཐར་གྱིས་པ་ཞེས་པ་སྟེ། ལུས་ཀྱི་ཚིག་དང་ཁྱད་པར་མི་སྣང་ངོ་། །སྐད་ཅིག་མའི་སྦྱོར་བ་ལ་ཡང་སྔར་ལྟར་གསུམ་ལས། དང་པོ་ནི། སྐད་ཅིག་མའི་སྦྱོར་བ་མཚོན་བྱེད་ཀྱི་ཆོས་བཞིར་གྲངས་ངེས་ཏེ། དེ་ལ་རྟོགས་རིགས་མངོན་དུ་བྱེད་པའི་ཚུལ་དང་། ཤེས་བྱ་རྟོགས་པའི་ཚུལ་གཉིས་ལས། དང་པོ་ལ་རྣམ་པར་སྨིན་པ་མ་ཡིན་པའི་ཟག་མེད་ཀྱི་རྟོགས་རིགས་མངོན་དུ་བྱེད་པ་དང་། རྣམ་པར་སྨིན་པའི་ཟག་མེད་ཀྱི་རྟོགས་རིགས་མངོན་དུ་བྱེད་པ་གཉིས་ལས། དང་པོ་ནི། རྣམ་པར་སྨིན་པ་མིན་པའི་སྐད་ཅིག་མའི་སྦྱོར་བ། ཕྱི་མ་ནི་རྣམ་པར་སྨིན་པའི་སྐད་ཅིག་མའི་སྦྱོར་བ། གཉིས་པ་ལ་ཆོས་ཐམས་ཅད་མཚན་ཉིད་མེད་པར་རྟོགས་པ་དང་། ཆོས་ཐམས་ཅད་གཉིས་སུ་མེད་པར་རྟོགས་པ་གཉིས་ལས་དང་པོ་ནི་མཚན་ཉིད་མེད་པའི་སྐད་ཅིག་མའི་སྦྱོར་བ། ཕྱི་མ་ནི་གཉིས་སུ་མེད་པའི་སྐད་ཅིག་མའི་སྦྱོར་བ་སྟེ་རྒྱུན་མཐའི་ཡེ་ཤེས་ཉིད་ལ་མཚན་ཉིད་དོན་ལྡོག་མི་འདྲ་བ་བཞིར་ཕྱེ་བ་ཡིན་པའི་ཕྱིར་རོ། །གཉིས་པ་ནི། ངོ་བོའི་སྒོ་ནས་མཚོན་ཏེ། ཆོས་བཞི་པོ་ནི་སྐད་ཅིག་མའི་སྦྱོར་བའི་ངོ་བོ་ཡིན་པའི་ཕྱིར་རོ། །གསུམ་པ་ནི། སྐད་ཅིག་གཅིག་གིས་མངོན་རྫོགས་བྱང་ཆུབ། །ཅེས་པ་སྟེ། སྐད་ཅིག་གཅིག་གིས་མངོན་རྫོགས་བྱང་ཆུབ། །ཅེས་པའི་སྐད་ཅིག་མའི་སྦྱོར་བ་ངོས་འཛིན་པའོ། །གསུམ་པ་འབྲས་བུ་ཆོས་སྐུ་ལ་ཡང་སྔར་ལྟར་གསུམ་ལས། དང་པོ་ནི། ཆོས་སྐུ་མཚོན་བྱེད་ཀྱི་ཆོས་དེ་ལ་བཞིར་གྲངས་ངེས་ཏེ། དེ་ལ་ཆོས་སྐུ་དངོས་དང་། དེའི་མཛད་པ་གཉིས་ལས། དང་པོ་ལ་ངོ་བོ་ཉིད་ཀྱི་སྐུ། ལོངས་སྤྱོད་རྫོགས་པའི་སྐུ། སྤྲུལ་པའི་སྐུ་དང་གསུམ་དུ་ངེས་པའི་ཕྱིར། གཉིས་པ་ནི། ངོ་བོའི་སྒོ་ནས་མཚོན་ཏེ། སྐུ་གསུམ་དང་བྱེད་པ་པོ་ལ་ཡོད་པའི་ཕྲིན་ལས་ནི་ཆོས་སྐུའི་ངོ་བོ་ཡིན་པའི་ཕྱིར་རོ། །གསུམ་པ་ནི། ཆོས་སྐུ་ཞེས་པ་སྟེ། ཆོས་ཀྱི་སྐུ་དང་ཞེས་པའི་ཆོས་སྐུ་དངོས་ངོས་འཛིན་པའོ། །གཉིས་པ་ཚིག་དོན་ཡན་ལག་རྒྱས་པར་བཤད་པ་ལ་གསུམ་སྟེ། རྒྱས་པ་ལ་དད་པ་ལ་བརྒྱད་དུ་ཕྱེ། བར་པ་ལ་དད་པ་ལ་དྲུག་ཏུ་བསྟན། བསྡུས་པ་ལ་དད་པ་ལ་གསུམ་དུ་བསྡུ་བའོ། །དང་པོ་ལ་བརྒྱད་ལས། དང་པོ་རྣམ་མཁྱེན་ལ་མཚན་ཉིད་ནི། བདེན་པ་གཉིས་རྣམ་པ་སྐྱེ་མེད་དུ་མངོན་སུམ་དུ་རྟོགས་པའི་ཡེ་ཤེས་མཐར་ཐུག་གོ །དེ་ལ་དབྱེ་ན་ཡུལ་གྱི་སྒོ་ནས་དང་། བསྟན་ཚུལ་གྱི་སྒོ་ནས་དང་། མཚོན་བྱེད་ཆོས་ཀྱི་སྒོ་ནས་དབྱེ་བ་དང་གསུམ་ལས། དང་པོ་ལ་ཇི་ལྟ་བ་མཁྱེན་པའི་དང་། ཇི་སྙེད་པ་མཁྱེན་པའི་རྣམ་མཁྱེན་གཉིས། མཚན་ཉིད་རིམ་པ་བཞིན། ཆོས་དབྱིངས་གློ་བུར་གྱི་དྲི་མ་མཐའ་དག་དང་བྲལ་བ་མངོན་སུམ་དུ་རྟོགས་པའི་ཡེ་ཤེས་མཐར་ཐུག་དང་། ཆོས་ཅན་ཇི་སྙེད་པའི་དབྱེ་བ་མངོན་སུམ་དུ་རྟོགས་པའི་ཡེ་ཤེས་མཐར་ཐུག་གོ །གཉིས་པ་ལ་ཤེས་བྱ་མ་ལུས་པ་མཁྱེན་པའི་རྣམ་མཁྱེན་དང་། རྒྱུ་འབྲས་ཀྱི་གཙོ་བོ་མཁྱེན་པ་གཉིས། མཚན་ཉིད་རིམ་བཞིན། རྣམ་རྟགས་མཚན་མས་བསྡུས་པའི་ཆོས་ཐམས་ཅད་མངོན་སུམ་དུ་རྟོགས་པའི་ཡེ་ཤེས་མཐར་ཐུག སེམས་བསྐྱེད་ལ་སོགས་པའི་ཆོས་བཅུ་མངོན་སུམ་དུ་རྟོགས་པའི་ཡེ་ཤེས་མཐར་ཐུག་གོ །གསུམ་པ་ལ་བཅུ་ལས། དང་པོ་ཐེག་ཆེན་སེམས་བསྐྱེད་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་འདོད་པ་དང་། མཚུངས་ལྡན་དུ་འབྱུང་བའི་གཙོ་བོ་རྣམ་རིག་གོ །གཉིས་པ་ལ་ངོ་བོའི་སྒོ་ནས། ཡུལ་གྱི་སྒོ་ནས། ས་མཚམས་ཀྱི་སྒོ་ནས། དཔེ་གྲོགས་ཆོས་མཐུན་གྱི་སྒོ་ནས་དབྱེ་བ་དང་བཞི་ལས། དང་པོ་ལ་ཐེག་ཆེན་གྱི་སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས། དང་པོའི་མཚན་ཉིད། སོ་སོ་སྐྱེ་བོའི་རྒྱུད་ཀྱི་ཐེག་ཆེན་སེམས་བསྐྱེད་གང་ཞིག ཐེག་ཆེན་གྱི་བསླབ་པའི་གྲོགས་ཀྱིས་མ་ཟིན་པ། ས་མཚམས་ཐེག་ཆེན་ལམ་དུ་འཇུག་ཁ་མའི་གནས་སྐབས་དང་། བྱང་སེམས་ཀྱི་བསླབ་པ་ལས་ཉམས་པའི་ཚེ་ཐེག་ཆེན་གྱི་ཚོགས་ལམ་ན་ཡང་ཡོད་དོ། །གཉིས་པའི་མཚན་ཉིད། ཐེག་ཆེན་གྱི་བསླབ་པའི་གྲོགས་ཀྱིས་ཟིན་པ། དེང་སང་གི་ལུགས་དང་བསྟུན་ན་ཐེག་ཆེན་གྱི་ཀུན་རྫོབ་སེམས་བསྐྱེད་གང་ཞིག་ཅེས་བརྗོད་དགོས་པར་མངོན་ནོ། །ས་མཚམས་ཐེག་ཆེན་གྱི་ཚོགས་ལམ་ཆུང་ངུ་ནས་རྒྱུན་མཐའི་བར་ན་ཡོད་དོ། །གཉིས་པ་ལ་ཐེག་ཆེན་གྱི་ཀུན་རྫོབ་སེམས་བསྐྱེད་དང་། ཐེག་ཆེན་གྱི་དོན་དམ་སེམས་བསྐྱེད་གཉིས། དང་པོའི་མཚན་ཉིད། ཐེག་ཆེན་སེམས་བསྐྱེད་གང་ཞིག རྣམ་པར་མི་རྟོག་པའི་ཡེ་ཤེས་ཀྱིས་མ་བསྡུས་པ། ས་མཚམས་ཚོགས་སྦྱོར་གྱི་མཉམ་རྗེས་གཉིས་ཀ་དང་། ས་བཅུའི་རྗེས་ཐོབ་རྣམས་ན་ཡོད། ཕྱི་མའི་མཚན་ཉིད། ཐེག་ཆེན་སེམས་བསྐྱེད་གང་ཞིག་རྣམ་པར་མི་རྟོགས་པའི་ཡེ་ཤེས་ཀྱི་ངོ་བོར་གྱུར་པ། ས་མཚམས་ས་བཅུའི་མཉམ་གཞག་དང་སངས་རྒྱས་ཀྱི་ས་ན་ཡོད། གསུམ་པ་ལ་མོས་པས་སྤྱོད་པའི་སེམས་བསྐྱེད། ལྷག་བསམ་རྣམ་པར་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞི་ལས། དང་པོ་ནི་ཚོགས་སྦྱོར་གྱི་གནས་སྐབས་ཀྱི་སེམས་བསྐྱེད་དང་། གཉིས་པ་ནི་མ་དག་པ་ས་བདུན་གྱི་དང་། གསུམ་པ་ནི་དག་པ་ས་གསུམ་གྱི་སེམས་བསྐྱེད་དང་། བཞི་པ་ནི་སངས་རྒྱས་ཀྱི་སའི་སེམས་བསྐྱེད་ལ་འཇོག་གོ །བཞི་པ་ལ་དཔེའི་སྒོ་ནས་དབྱེ་ན་ས་ལྟ་བུའི་སེམས་བསྐྱེད་ལ་སོགས་པ་ཉེར་གཉིས། གྲོགས་ཀྱི་སྒོ་ནས་དབྱེ་ན་འདུན་པ་དང་ལྡན་པའི་སེམས་བསྐྱེད་ལ་སོགས་པ་ཉེར་གཉིས། ཆོས་མཐུན་གྱི་སྒོ་ནས་དབྱེ་ན་ཆོས་དཀར་པོ་ཐམས་ཅད་ཀྱི་གཞིར་གྱུར་པའི་སེམས་བསྐྱེད་ལ་སོགས་པ་ཉེར་གཉིས་ཏེ་དོན་གཅིག་གོ །གཉིས་པ་གདམས་ངག་ལ། སྤྱིར་གདམས་ངག་ཙམ་གྱི་མཚན་ཉིད། འབྲས་བུ་བདེ་བླག་ཏུ་ཐོབ་པའི་ཐབས་སྟོན་པར་བྱེད་པའི་གདམས་ངག དེ་ལ་དབྱེ་ན་མངོན་མཐོའི་གདམས་ངག ངེས་ལེགས་ཀྱི་གདམས་ངག་གཉིས། དང་པོའི་མཚན་ཉིད། འཁོར་བའི་བདེ་འབྲས་ཙམ་བདེ་བླག་ཏུ་ཐོབ་པའི་ཐབས་སྟོན་པར་བྱེད་པའི་ངག གཉིས་པའི་མཚན་ཉིད། བྱང་ཆུབ་གསུམ་པོ་གང་རུང་བདེ་བླག་ཏུ་ཐོབ་པའི་ཐབས་སྟོན་པར་བྱེད་པའི་ངག དེ་ལ་དབྱེ་ན་ཐེག་དམན་གྱི་གདམས་ངག་དང་། ཐེག་ཆེན་གྱི་གདམས་ངག་གཉིས་ལས། དང་པོའི་མཚན་ཉིད། གདུལ་བྱ་ཐེག་དམན་གྱི་རིགས་ཅན་ལ་ཐེག་དམན་གྱི་བྱང་ཆུབ་བདེ་བླག་ཏུ་ཐོབ་པའི་ཐབས་སྟོན་པར་བྱེད་པའི་ངག ཕྱི་མའི་མཚན་ཉིད། གདུལ་བྱ་ཐེག་ཆེན་གྱི་རིགས་ཅན་ལ་ཐེག་ཆེན་གྱི་བྱང་ཆུབ་བདེ་བླག་ཏུ་ཐོབ་པའི་ཐབས་སྟོན་པར་བྱེད་པའི་ངག སྐབས་འདིར་བསྟན་གྱི་གདམས་ངག་ལ། མཚན་ཉིད་དང་། དབྱེ་བ་དང་། གདམས་བྱ་ཡུལ་གྱི་རྣམ་གཞག་དང་གསུམ་ལས། དང་པོ་ནི། གདུལ་བྱ་བྱང་ཆུབ་ཀྱི་སེམས་བསྐྱེད་པའི་གང་ཟག་ལ་རྣམ་མཁྱེན་བསྒྲུབ་པའི་ཆེད་དུ་ཡུལ་བཅུ་པོ་གང་རུང་ཉམས་སུ་ལེན་ཚུལ་སྟོན་པར་བྱེད་པའི་ཤེར་ཕྱིན་གྱི་མདོ་ཚིག གཉིས་པ་ལ་བཅུ་ལས། དང་པོ་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་གི་མཚན་ཉིད། སྒྲུབ་པ་རང་གི་ངོ་བོ་ཡུལ་བདེན་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འབྲེལ་གྱི་སྒོ་ནས་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག གཉིས་པ་དམིགས་ཡུལ་འཕགས་པའི་བདེན་པ་ལ་འདོམས་པ་ལ་བཞི་ལས། སྡུག་བསྔལ་བདེན་པ་ལ་འདོམས་པའི་གདམས་ངག་གི་མཚན་ཉིད། ཡུལ་བདེན་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འཇུག་གི་སྒོ་ནས་སྡུག་བསྔལ་བདེན་པའི་སྟོང་ཉིད་དང་ཡུལ་ཅན་ཤེར་ཕྱིན་གཉིས་དེ་བཞིན་ཉིད་ཀྱི་ངོ་བོ་རང་བཞིན་གཅིག་པ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག སྒོ་ནས་ཞེས་པ་ཡན་ཆད་ཀུན་ལ་གསལ་བྱེད་དུ་སྦྱར་ལ། ཀུན་འབྱུང་བདེན་པ་ལ་འདོམས་པའི་གདམས་ངག་གི་མཚན་ཉིད། སྒོ་ནས་ཀུན་འབྱུང་བདེན་པ་སྔར་མེད་གསར་དུ་ཀུན་འབྱུང་བ་སོགས་ཀྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག འགོག་བདེན་ལ་འདོམས་པའི་གདམས་ངག་གི་མཚན་ཉིད། སྒོ་ནས་གློ་བུར་དྲི་བྲལ་གྱི་སྟོང་ཉིད་གཟུགས་ནས་བྱང་ཆུབ་ཀྱི་བར་གྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག ལམ་བདེན་ལ་འདོམས་པའི་གདམས་ངག་གི་མཚན་ཉིད། སྒོ་ནས་དོན་ཕན་ཚུན་བསྒོམ་བྱ་སྒོམ་བྱེད་སོགས་ཀྱི་སྤྲོས་པ་དང་བྲལ་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་གོ །གསུམ་པ་སྒྲུབ་པའི་རྟེན་ལ་འདོམས་པ་ལ་གསུམ་ལས། སངས་རྒྱས་དཀོན་མཆོག་ལ་འདོམས་པའི་གདམས་ངག་གི་མཚན་ཉིད། སྒོ་ནས་སངས་རྒྱས་དང་བྱང་ཆུབ་དབྱིངས་དང་ཡེ་ཤེས་སུ་ཞེན་པ་བཀག་པ་སོགས་ཀྱི་སྒོ་ནས་སངས་རྒྱས་དཀོན་མཆོག་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག ཆོས་དཀོན་མཆོག་ལ་འདོམས་པའི་གདམས་ངག་གི་མཚན་ཉིད། སྒོ་ནས་གཞི་གཉེན་རྣམ་གསུམ་གྱིས་བསྡུས་པའི་ཆོས་རྣམས་ངོ་བོ་ཉིད་མེད་པར་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག དགེ་འདུན་དཀོན་མཆོག་ལ་འདོམས་པའི་གདམས་ངག་གི་མཚན་ཉིད། སྒོ་ནས་བྱང་སེམས་འཕགས་པ་ཕྱིར་མི་ལྡོག་པ་རྣམས་སྐྱེ་བ་མེད་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག བཞི་པ་མ་ཞེན་པའི་བརྩོན་འགྲུས་ལ་འདོམས་པའི་གདམས་ངག་གི་མཚན་ཉིད། སྒོ་ནས་བྱ་བ་ཞེན་དོན་གྱི་ལེ་ལོའི་གཉེན་པོ་ལུས་སོགས་ངོ་བོ་ཉིད་མེད་པར་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག ལྔ་པ་ཡོངས་སུ་མི་ངལ་བའི་བརྩོན་འགྲུས་ལ་འདོམས་པའི་གདམས་ངག་གི་མཚན་ཉིད། སྒོ་ནས་སྒྱིད་ལུག་པའི་ལེ་ལོའི་གཉེན་པོར་གཟུགས་ནས་རྣམ་མཁྱེན་གྱི་བར་བདེན་པར་རློམ་པ་མེད་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག དྲུག་པ་ལམ་ཡོངས་སུ་འཛིན་པའི་བརྩོན་འགྲུས་ལ་འདོམས་པའི་གདམས་ངག་གི་མཚན་ཉིད། སྒོ་ནས་སེམས་ཞུམ་པའི་ལེ་ལོའི་གཉེན་པོར་ཆོས་རྣམས་རང་བཞིན་གྱིས་མ་སྐྱེས་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག བདུན་པ་སྤྱན་ལྔ་ལ་འདོམས་པའི་གདམས་ངག་གི་མཚན་ཉིད། སྒོ་ནས་སྤྱན་ལྔ་ལཾ་ཡུལ་ཡུལ་ཅན་རྣམས་དེ་བཞིན་ཉིད་དུ་གཅིག་པ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག བརྒྱད་པ་མངོན་ཤེས་དྲུག་ལ་འདོམས་པའི་གདམས་ངག་གི་མཚན་ཉིད། སྒོ་ནས་མངོན་ཤེས་དྲུག་པོ་གཟོད་མ་ནས་ཞི་བ་ཉིད་དུ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག དགུ་པ་མཐོང་ལམ་ལ་འདོམས་པའི་གདམས་ངག་གི་མཚན་ཉིད། སྒོ་ནས་མཐོང་སྤང་གི་གཉེན་པོ་ཐེག་ཆེན་གྱི་མཐོང་ལམ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག བཅུ་པ་སྒོམ་ལམ་ལ་འདོམས་པའི་གདམས་ངག་གི་མཚན་ཉིད། སྒོ་ནས་སྒོམ་སྤང་གི་གཉེན་པོར་ཐེག་ཆེན་གྱི་སྒོམ་ལམ་ཉམས་སུ་ལེན་ཚུལ་སྟོན་པའི་ཤེར་ཕྱིན་གྱི་མདོ་ཚིག་གོ །གསུམ་པ་གདམས་བྱ་ཡུལ་གྱི་རྣམ་གཞག་ལ་གཉིས་ཏེ། ཡུལ་བཅུར་སྤྱིར་བསྟན་པ་དང་། རྟོགས་དཀའ་བ་དགེ་འདུན་དཀོན་མཆོག་བྱེ་བྲག་ཏུ་བཤད་པའོ། །དང་པོ་ལ་བཅུ་ལས། སྒྲུབ་པ་རང་གི་ངོ་བོའི་མཚན་ཉིད། ཡུལ་བདེན་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འབྲེལ་གྱི་སྒོ་ནས་སེམས་བསྐྱེད་ཀྱི་དབྱེ་བས་འཕངས་པའི་ཉམཾས་ལཾེན་སྒྲུབ་པར་བྱེད་པའི་ཉམས་ལེན་གང་ཞིག མི་དམིགས་པའི་སྒོ་ནས་ཉན་རང་དང་ཐུན་མོང་མིན་པར་གྱུར་པ། ས་མཚམས་ཐེག་ཆེན་གྱི་ཚོགས་ལམ་ནས་ས་བཅུ་རྒྱུན་མཐའི་བར་ན་ཡོད། དམིགས་ཡུལ་འཕགས་པའི་བདེན་པ་བཞི་ལས་སྡུག་བསྔལ་བདེན་པའི་མཚན་ཉིད། རང་རྒྱུ་ལས་ཉོན་གྱི་འབྲས་བུར་གྱུར་པའི་ཟག་བཅས་ཀྱི་དངོས་པོ། དབྱེ་ན་ལས་ཉོན་གྱི་བདག་པོའི་འབྲས་བུ་ཉེར་ལེན་གྱི་ཕུང་པོ། རྒྱུ་མཐུན་གྱི་འབྲས་བུ་ལས་ཉོན་ཕྱི་མ་རྣམས་སོ། །ཀུན་འབྱུང་བདེན་པའི་མཚན་ཉིད། རང་འབྲས་སྡུག་བསྔལ་བདེན་པ་བསྐྱེད་པའི་རིགས་སུ་གནས་པའི་ལས་ཉོན་གང་རུང་གིས་བསྡུས་པའི་ཟག་བཅས། དབྱེ་ན་ཟག་བཅས་ཀྱི་ལས་དང་ཉོན་མོངས་པ་གཉིས་ལས། དང་པོ་ལ་དགེ་བའི་ལས། མི་དགེ་བའི་ལས། ལུང་མ་བསྟན་གྱི་ལས་གསུམ་མོ། །ཡང་ན་ཕན་བྱེད་ཀྱི་ལས་དང་། རྫོགས་བྱེད་ཀྱི་ལས་གཉིས། ཡང་ན་བསོད་ནམས་ཀྱི་ལས་དང་། བསོད་ནམས་མ་ཡིན་པའི་ལས། མི་གཡོ་བའི་ལས་དང་གསུམ། ཡང་ན་གཅིག་ཏུ་དཀར་བའི་ལས། གཅིག་ཏུ་གནག་པའི་ལས། འདྲེས་མའི་ལས་དང་གསུམ་མོ། །གཉིས་པ་ཉོན་མོངས་པ་ལ་དབྱེ་ན། རྩ་ཉོན་དྲུག་དང་། ཉེ་ཉོན་ཉི་ཤུའོ། །འགོག་བདེན་གྱི་མཚན་ཉིད། རང་རྒྱུ་བར་ཆད་མེད་ལམ་གྱི་ངོ་སྐལ་གྱི་དྲི་མ་ལས་གྲོལ་བའི་སོ་སོར་བརྟགས་འགོག དབྱེ་ན་ཐེག་པ་གསུམ་གྱི་མྱང་འདས། ཡང་ན་ཉོན་སྒྲིབ་སྤངས་པའི་སོ་སོར་བརྟགས་འགོག་དང་། ཤེས་སྒྲིབ་སྤངས་པའི་སོསོར་བརྟགས་འགོག་གཉིས་སམ། ཡང་ན་མཐོང་སྤང་སྤངས་པའི་སོ་སོར་བརྟགས་འགོག་དང་། སྒོམ་སྤང་སྤངས་པའི་སོ་སོར་བརྟགས་འགོག་གཉིས་སོ། །ཉི་སྣང་ལས། མྱང་འདས་ཙམ་ལ་དབྱེ་ན། དགེ་རྩ་ཆད་པ་ཡོངས་སུ་མྱ་ངན་ལས་འདས་པ་དང་། ངན་འགྲོ་ཡོངས་སུ་མྱ་ངན་ལས་འདས་པ་དང་། ཡན་ལག་ཡོངས་སུ་མྱ་ངན་ལས་འདས་པ་དང་། སྲིད་པ་བརྒྱད་པ་ཡོངས་སུ་མྱ་ངན་ལས་འདས་པ་དང་། སྲིད་པ་གཉིས་པ་ཡོངས་སུ་མྱ་ངན་ལས་འདས་པ་དང་། འདོད་པའི་ཁམས་ཡོངས་སུ་མྱ་ངན་ལས་འདས་པ་དང་། ཕུང་པོ་ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་ལས་འདས་པ་དང་། དགོངས་པ་ཅན་གྱི་མྱ་ངན་ལས་འདས་པ་དང་བརྒྱད་ཡོད་པར་གསུངས་སོ། །ལམ་བདེན་གྱི་མཚན་ཉིད། བདག་མེད་མངོན་སུམ་རྟོགས་པའི་ཤེས་རབ་མཚུངས་ལྡན་དང་བཅས་པ། དེ་ལ་ཐེག་པའི་སྒོ་ནས་དབྱེ་ན་ཉན་ཐོས་རང་རྒྱལ་ཐེག་ཆེན་གྱི་ལམ་བདེན་གསུམ། དེ་རེ་རེ་ལ་ཡང་ལམ་གྱི་སྒོ་ནས་དབྱེ་ན་མཐོང་ལམ་སྒོམ་ལམ་མི་སློབ་པའི་ལམ་གསུམ་གསུམ་མོ། །ངོ་བོའི་སྒོ་ནས་དབྱེ་ན་མཉམ་གཞག་དང་རྗེས་ཐོབ་གཉིས། དང་པོ་ལ་བར་ཆད་མེད་ལམ་དང་རྣམ་གྲོལ་ལམ་གཉིས་སོ། །འཁོར་དང་བཅས་པའི་དབང་དུ་བྱས་ནས་ལམ་ལྔ་ཡོད་པར་ཀུན་ལས་བཏུས་ལས་གསུངས་སོ། །སྒྲུབ་པའི་རྟེན་ལ་གསུམ་ལས། སངས་རྒྱས་དཀོན་མཆོག་གི་མཚན་ཉིད། འདུས་མ་བྱས་པ་ལ་སོགས་པ་ཡོན་ཏན་བརྒྱད་དང་ལྡན་པའི་མཐར་ཐུག་གི་སྐྱབས་གནས། ཡོན་ཏན་བརྒྱད་ནི། འདུས་མ་བྱས་པ། ལྷུན་གྱིས་གྲུབ་པ། གཞན་གྱི་རྐྱེན་གྱིས་རྟོགས་པ་མ་ཡིན་པ་སྟེ་རང་དོན་གྱི་ཡོན་ཏན་གསུམ། མཁྱེན་པ་དང་། བརྩེ་བ་དང་། ནུས་པ་སྟེ་གཞན་དོན་གྱི་ཡོན་ཏན་གསུམ། དབྱེ་གཞི་རང་དོན་གཞན་དོན་གཉིས་ཏེ་བརྒྱད་དོ། །ཆོས་དཀོན་མཆོག་གི་མཚན་ཉིད། འགོག་ལམ་གྱི་ཡོན་ཏན་བརྒྱད་དང་ལྡན་པའི་བྱང་སེམས་འཕགས་པའི་རྒྱུད་ཀྱི་རྣམ་བྱང་གི་བདེན་པ། ཡོན་ཏན་བརྒྱད་ནི། རྟོག་གེའི་བློས་བསམ་དུ་མེད་པ། ལས་ཉོན་གཉིས་མེད་པ། རྒྱུ་ཚུལ་མིན་ཡིད་བྱེད་ཀྱི་རྣམ་རྟོག་མེད་པ་སྟེ་འགོག་བདེན་གྱི་ཡོན་ཏན་གསུམ། དག་པ། གསལ་བ། གཉེན་པོ་བྱེད་པ་སྟེ་ལམ་བདེན་གྱི་ཡོན་ཏན་གསུམ། དབྱེ་གཞི་འགོག་ལམ་གཉིས་ཏེ་བརྒྱད་དོ། །དགེ་འདུན་དཀོན་མཆོག་གི་མཚན་ཉིད། རིག་གྲོལ་གྱི་ཡོན་ཏན་བརྒྱད་དང་ལྡན་པའི་རྒྱལ་སྲས་འཕགས་པ། ཡོན་ཏན་བརྒྱད་ནི། ཇི་ལྟ་བ་རིག་པ། ཇི་སྙེད་པ་རིག་པ། སོ་སོར་རང་གིས་རིག་པ་སྟེ་རིག་པའི་ཡོན་ཏན་གསུམ། ཆགས་པའི་སྒྲིབ་པ། ཐོགས་པའི་སྒྲིབ་པ། དམན་པའི་སྒྲིབ་པ་ལས་སྒྲོལ་བ་སྟེ་གྲོལ་བའི་ཡོན་ཏན་གསུམ། དབྱེ་གཞི་རིག་གྲོལ་གཉིས་ཏེ་བརྒྱད་དོ། །མཚན་ཉིད་འཇོག་པའི་ཚེ། སྐབས་འདིར་དངོས་བསྟན་གྱི་སངས་རྒྱས་དཀོན་མཆོག་ཅེས་སོགས་སྦྱར་རོ། །མ་ཞེན་པའི་བརྩོན་འགྲུས་ཀྱི་མཚན་ཉིད། ལུས་ལ་སོགས་པ་ངོ་བོ་ཉིད་མེད་པར་རྟོགས་པའི་སྒོ་ནས་བྱ་བ་ངན་ཞེན་གྱི་ལེ་ལོའི་གཉེན་པོར་གྱུར་པའི་སེམས་བྱུང་། ཡོངས་སུ་མི་ངལ་བའི་བརྩོན་འགྲུས་ཀྱི་མཚན་ཉིད། གཟུགས་ནས་རྣམ་མཁྱེན་གྱི་བར་ལ་བདེན་པར་རློམ་པ་མེད་པའི་སྒོ་ནས་སྒྱིད་ལུག་པའི་ལེ་ལོའི་གཉེན་པོར་གྱུར་པའི་སེམས་བྱུང་། ལམ་ཡོངས་སུ་འཛིན་པའི་བརྩོན་འགྲུས་ཀྱི་མཚན་ཉིད། ཆོས་རྣམས་རང་བཞིན་གྱིས་མ་སྐྱེས་པ་ཉིད་དུ་རྟོགས་པའི་སྒོ་ནས་སེམས་ཞུམ་པའི་ལེ་ལོའི་གཉེན་པོར་གྱུར་པའི་སེམས་བྱུང་། འདིར་ཡང་མཚོན་བྱ་རྣམས་ལ་སྐབས་འདིར་དངོས་བསྟན་ཞེས་སྦྱར་རོ། །སྤྱན་ལྔ་ལས་ཤའི་སྤྱན་གྱི་མཚན་ཉིད། ཕར་ཕྱིན་དྲུག་གི་ཉམས་ལེན་ལ་བརྟེན་ནས་དཔག་ཚད་བརྒྱ་ལ་སོགས་པ་མངོན་སུམ་དུ་མཐོང་བའི་ཡུལ་ཅན། ལྷའི་སྤྱན་གྱི་མཚན་ཉིད། ཕར་ཕྱིན་དྲུག་གི་ཉམས་ལེན་ལ་བརྟེན་ནས་དགེ་བའི་ལས་ཀྱི་རྣམ་སྨིན་ལས་བྱུང་བའི་སེམས་ཅན་ཐམས་ཅད་ཀྱི་འཆི་འཕོ་བ་དང་། སྐྱེ་བ་མངོན་སུམ་དུ་མཐོང་བའི་ཡུལ་ཅན། ཤེས་རབ་ཀྱི་སྤྱན་གྱི་མཚན་ཉིད། ཕར་ཕྱིན་དྲུག་གི་ཉམས་ལེན་ལ་བརྟེན་ནས་ཆོས་ཐམས་ཅད་ལ་བདག་གཉིས་སུ་རྣམ་པར་མི་རྟོག་པའི་ཡུལ་ཅན་དང་། ཆོས་ཀྱི་སྤྱན་གྱི་མཚན་ཉིད། ཕར་ཕྱིན་དྲུག་གི་ཉམས་ལེན་ལ་བརྟེན་ནས་འཕགས་པའི་གང་ཟག་ཐམས་ཅད་ཀྱི་རྟོགས་རིགས་མངོན་སུམ་དུ་རྟོགས་པའི་ཡུལ་ཅན། སངས་རྒྱས་ཀྱི་སྤྱན་གྱི་མཚན་ཉིད། ཕྱིན་དྲུག་ལ་བརྟེན་ནས་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་ནོ། །ས་མཚམས་ལ་དང་པོ་ཐེག་ཆེན་གྱི་ཚོགས་ལམ་ནས་དང་། གཉིས་པ་ཐེག་ཆེན་གྱི་སྦྱོར་ལམ་ནས་དང་། གསུམ་པ་ཐེག་ཆེན་འཕགས་པའི་མཉམ་གཞག་ནས་དང་། བཞི་པ་ཐེག་ཆེན་གྱི་འཕགས་པའི་རྗེས་ཐོབ་ནས་སངས་རྒྱས་སའི་བར་ན་ཡོད། ལྔ་པ་རྗེས་མཐུན་པ་ས་བདུན་པ་ན་ཡོད་ཅིང་། མཚན་ཉིད་པ་སངས་རྒྱས་ཀྱི་ས་ཁོ་ནར་ཡོད་དོ། །མངོན་ཤེས་ཀྱི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་ཡུལ་ལ་ཇི་ལྟར་འདོད་པ་བཞིན་དུ་མངོན་དུ་གྱུར་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན་དྲུག་ལས། རྫུ་འཕྲུལ་གྱི་མངོན་པར་ཤེས་པའི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་ས་གཡོ་བ་ལ་སོགས་པའི་རྫུ་འཕྲུལ་དུ་མ་ཡང་དག་པར་འབྱོར་བའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། ལྷའི་རྣ་བའི་མངོན་ཤེས་ཀྱི་མཚན་ཉིད། ཐུན་མོང་གི་བདག་རྐྱེན་བསམ་གཏན་གྱི་དངོས་གཞིའི་སེམས་དང་། ཐུན་མོང་མ་ཡིན་པའི་བདག་རྐྱེན་བསམ་གཏན་གྱི་སས་བསྡུས་ཀྱི་དབང་པོ་གཟུགས་ཅན་པ་ལ་བརྟེན་ནས་སྒྲ་ཕྲ་རགས་ཐོས་པ་ཡང་དག་པར་འབྱོར་པའི་ཏིང་ངེ་འཛིན་སོགས་དང་། གཞན་གྱི་སེམས་ཤེས་པའི་མངོན་ཤེས་ཀྱི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་གཞན་གྱི་སེམས་འདོད་ཆགས་ཡོད་མེད་སོགས་མངོན་སུམ་དུ་ཤེས་པ་ཡང་དག་པར་འབྱོར་པའི་ཏིང་ངེ་འཛིན་སོགས་དང་། སྔོན་གྱི་གནས་རྗེས་སུ་དྲན་པའི་མངོན་ཤེས་ཀྱི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་གཞན་གྱི་ཚེ་རབས་སྔ་མ་རྗེས་སུ་དྲན་པ་ཡང་དག་པར་འབྱོར་པའི་ཏིང་ངེ་འཛིན་སོགས་དང་། ལྷའི་མིག་གི་མངོན་ཤེས་ཀྱི་མཚན་ཉིད། ཐུན་མོང་གི་བདག་རྐྱེན་བསམ་གཏན་གྱི་དངོས་གཞིའི་སེམས་དང་། ཐུན་མོང་མིན་པའི་བདག་རྐྱེན་བསམ་གཏན་གྱི་སས་བསྡུས་ཀྱི་དབང་པོ་གཟུགས་ཅན་པ་ལ་བརྟེན་ནས་བསྐལ་བ་དང་མ་བསྐལ་བའི་གཟུགས་ཕྲ་རགས་ཀུན་མཐོང་བ་ཡང་དག་པར་འབྱོར་པའི་ཏིང་ངེ་འཛིན་སོགས་དང་། ཟག་པ་ཟད་པ་ཤེས་པའི་མངོན་ཤེས་ཀྱི་མཚན་ཉིད། བདག་རྐྱེན་མཉམ་གཞག་གི་སེམས་ལ་བརྟེན་ནས་ཟག་པ་ཟད་པའི་ངོ་བོའམ་ཐབས་མངོན་དུ་ཤེས་པ་ཡང་དག་པར་འབྱོར་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པའོ། །ས་མཚམས་ལ་དང་པོ་ལྔ་བསམ་གཏན་གྱི་དངོས་གཞི་ཐོབ་པའི་ལམ་མ་ཞུགས་པ་དང་། ཉན་ཐོས་ཕྱིར་མི་འོང་དང་། དགྲ་བཅོམ་གཉིས་དང་། རང་རྒྱལ་དགྲ་བཅོམ་པ་དང་། ཐེག་ཆེན་གྱི་ཚོགས་ལམ་ནས་སངས་རྒྱས་སའི་བར་དུ་ཡོད། དྲུག་པ་ལ་ཟག་པ་ཟད་པའི་ཐབས་ཤེས་པ་ནི་ཐེག་པ་གསུམ་ཆར་གྱི་མཐོང་ལམ་ནས་ཡོད་དེ། འདིར་ཟག་པ་ཟད་པའི་ཐབས་ནི་ཟག་མེད་བར་ཆད་མེད་ལམ་ལ་འཇོག་པའི་ཕྱིར་རོ། །ཟག་ཟད་རང་གི་ངོ་བོ་ཤེས་པ་ནི་ཐེག་དམན་གྱི་མི་སློབ་ལམ་དང་། ཐེག་ཆེན་གྱི་མཐོང་ལམ་ནས་ཡོད་དོ། །དགུ་པ་ཐེག་ཆེན་གྱི་མཐོང་ལམ་གྱི་མཚན་ཉིད་དང་། བཅུ་པ་ཐེག་ཆེན་གྱི་སྒོམ་ལམ་གྱི་མཚན་ཉིད་ནི་འོག་ཏུ་འཆད་དོ། །གཉིས་པ་རྟོགས་དཀའ་བ་དགེ་འདུན་དཀོན་མཆོག་བྱེ་བྲག་ཏུ་བཤད་པ་ལ་གཉིས་ཏེ། མཚོན་བྱེད་དཔེའི་དགེ་འདུན་དང་། མཚོན་བྱ་དོན་གྱི་དགེ་འདུན་ནོ། །དང་པོ་ལ་གཉིས། ཉན་ཐོས་ཀྱི་དགེ་འདུན་དང་། རང་རྒྱལ་གྱི་དགེ་འདུན་ནོ། །དང་པོ་ལ་ཟུང་བཞི་ལས། དང་པོ་རྒྱུན་ཞུགས་ཀྱི་སྐོར་ལ། རྒྱུན་ཞུགས་ཞུགས་པ་དང་། འབྲས་གནས་གཉིས། དང་པོའི་མཚན་ཉིད། སྦྱོར་ལམ་སྟན་གཅིག་པའི་རྟོགས་པ་ཐོབ་ལ་བཅུ་དྲུག་པའི་རྟོགས་པ་མ་ཐོབ་པའི་ཉན་ཐོས་གང་ཞིག བཅུ་དྲུག་པའི་རྟོགས་པ་ཐོབ་པའི་ཚེ་རྒྱུན་ཞུགས་སུ་འགྱུར་བའོ། །དབྱེ་ན་རྒྱུན་ཞུགས་ཞུགས་པ་དད་པའི་རྗེས་འབྲང་དང་། ཆོས་ཀྱི་རྗེས་འབྲང་གཉིས། མཚན་ཉིད་རིམ་བཞིན། རྒྱུན་ཞུགས་ཞུགས་པ་གང་ཞིག དད་པ་ལྷག་པས་གཞན་གྱིས་བསྟན་པའི་ལམ་གྱི་རྗེས་སུ་འབྲང་སྟེ་བདེན་པ་མངོན་པར་རྟོགས་པ་ལ་སྦྱོར་བ་དང་། གང་ཞིག ཤེས་རབ་ལྷག་པས་རང་ཉིད་ཀྱིས་བདེན་པའི་དབང་དུ་བྱས་པའི་ཆོས་ཀྱི་རྗེས་སུ་འབྲང་སྟེ་བདེན་པ་མངོན་པར་རྟོགས་པ་ལ་སྦྱོར་བའོ། །རིམ་གྱིས་པ་དང་། ཅིག་ཆར་བའི་རྒྱུན་ཞུགས་ཞུགས་པ་ལ་ཡང་མཚན་ཉིད་དང་། དབྱེ་བ་རིགས་བསྒྲེས་ཏེ་ཤེས་པར་བྱའོ། །རྒྱུན་ཞུགས་འབྲས་གནས་ཀྱི་མཚན་ཉིད། མཐོང་སྤང་ཀུན་སྦྱོར་གསུམ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་ཉན་ཐོས། དབྱེ་ན་ཅིག་ཅར་བའི་འབྲས་གནས་དང་། རིམ་གྱིས་པའི་འབྲས་གནས་གཉིས། མཚན་ཉིད་རིམ་བཞིན། རྒྱུན་ཞུགས་འབྲས་གནས་གང་ཞིག ཁམས་གསུམ་གྱི་ཉོན་མོངས་པ་རྣམ་པས་ཅིག་ཅར་སྤོང་བར་འགྱུར་བ་དང་། གང་ཞིག འབྲས་བུ་ཕྱི་མ་གསུམ་མངོན་དུ་བྱེད་པའི་རིགས་ཅན་ནོ། །འདི་ལ་དབང་པོའི་སྒོ་ནས་དབྱེ་ན། རིམ་གྱིས་པའི་རྒྱུན་ཞུགས་འབྲས་གནས་དད་པས་མོས་པ་དང་། མཐོང་བས་ཐོབ་པ་གཉིས་ལས། མཚན་ཉིད་རིམ་བཞིན། རྒྱུན་ཞུགས་འབྲས་གནས་གང་ཞིག དད་པ་ལྷག་པས་བདེན་པ་མངོན་པར་རྟོགས་པར་བྱས་པ་དང་། གང་ཞིག་ཤེས་རབ་ལྷག་པས་བདེན་པ་མངོན་པར་རྟོགས་པར་བྱས་པའོ། །སྐྱེ་བ་ལེན་ཚུལ་གྱི་སྒོ་ནས་དབྱེ་ན། རྒྱུན་ཞུགས་སྲིད་པ་ལན་བདུན་པ་དང་། རིགས་ནས་རིགས་སྐྱེས་གཉིས། མཚན་ཉིད་རིམ་བཞིན། མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་རིགས་མཐུན་གྱི་སྐྱེ་སྲིད་བདུན་བླངས་ནས་མྱང་འདས་མངོན་དུ་བྱེད་པའི་རིགས་ཅན་དང་། མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཁྱད་པར་ཅན་གང་ཞིག འདོད་པར་རིགས་མཐུན་གྱི་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་སུམ་དུ་བྱེད་པའི་རིགས་ཅན་ནོ། །གཉིས་པ་ཕྱིར་འོང་གི་སྐོར་ལ། ཞུགས་གནས་གཉིས། དང་པོའི་མཚན་ཉིད། འབྲས་བུ་བཞིའི་ནང་ནས་ཕྱིར་འོང་གི་འབྲས་བུ་འཐོབ་པར་བྱེད་པའི་ལམ་གྱི་སྦྱོར་བ་རང་རྒྱུད་ལ་ཐོབ་ཅིང་། ཕྱིར་འོང་གི་འབྲས་བུ་མངོན་དུ་བྱེད་པའི་རིགས་ཅན་གྱི་ཉན་ཐོས། དབྱེ་ན་ཆགས་བྲལ་སྔོན་སོང་གི་ཕྱིར་འོང་ཞུགས་པ་དང་། རིམ་གྱིས་པའི་ཕྱིར་འོང་ཞུགས་པ་གཉིས། དང་པོའི་མཚན་ཉིད། སྦྱོར་ལམ་སྟན་གཅིག་པའི་རྟོགས་པ་ཐོབ་ཅིང་བཅུ་དྲུག་པའི་རྟོགས་པ་མ་ཐོབ་པའི་ཉན་ཐོས་གང་ཞིག བཅུ་དྲུག་པའི་རྟོགས་པ་ཐོབ་བའི་ཚེ་ཕྱིར་འོང་དུ་འགྱུར་བའོ། །གཉིས་པའི་མཚན་ཉིད། རིམ་གྱིས་པའི་རྒྱུན་ཞུགས་འབྲས་གནས་གང་ཞིག མཐོང་ལམ་ཐོབ་རྗེས་སུ་འདོད་པའི་སྒོམ་སྤང་ཉོན་མོངས་སྤོང་བའི་སྦྱོར་བ་རང་རྒྱུད་ལ་ཐོབ་ངེས་པའོ། །ཕྱིར་འོང་འབྲས་གནས་ཀྱི་མཚན་ཉིད། གང་ཞིག འདོད་ཆགས་དང་བྲལ་བས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་ཉན་ཐོས། དབྱེ་ན་ཆགས་བྲལ་སྔོན་སོང་དང་། རིམ་གྱིས་པའི་ཕྱིར་འོང་འབྲས་གནས་གཉིས། དང་པོའི་མཚན་ཉིད། ཕྱིར་འོང་འབྲས་གནས་གང་ཞིག མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་པ། གཉིས་པའི་མཚན་ཉིད་གང་ཞིག མཐོང་ལམ་ཐོབ་རྗེས་སུ་འདོད་ཉོན་དྲུག་པ་སྤངས་པའོ། །ཕྱིར་འོང་འབྲས་གནས་ཚེ་གཅིག་བར་ཆད་གཅིག་པའི་མཚན་ཉིད། འདོད་ཉོན་བདུན་པ་སྤོང་བའི་གཉེན་པོ་ཟག་མེད་ཀྱི་དབང་པོ་དང་། བརྒྱད་པ་སྤོང་བའི་གཉེན་པོ་ཟག་མེད་ཀྱི་དབང་པོ་གང་རུང་ཐོབ་ཅིང་། མཐོང་ལམ་ཐོབ་པའི་ལུས་རྟེན་དང་བཅས་པའི་ཕྱིར་འོང་འབྲས་གནས་གང་ཞིག འདོད་པར་རིགས་མཐུན་གྱི་སྐྱེ་སྲིད་གཅིག་བླངས་ནས་མྱང་འདས་མངོན་དུ་བྱེད་པའོ། །གསུམ་པ་ཕྱིར་མི་འོང་གི་སྐོར་ལ། ཞུགས་གནས་གཉིས། དང་པོའི་མཚན་ཉིད། འབྲས་བུ་བཞིའི་ནང་ནས་ཕྱིར་མི་འོང་གི་འབྲས་བུ་འཐོབ་པར་བྱེད་པའི་ལམ་གྱི་སྦྱོར་བ་རང་རྒྱུད་ལ་ཐོབ་ཅིང་ཕྱིར་མི་འོང་གི་འབྲས་བུ་མངོན་དུ་བྱེད་པའི་རིགས་ཅན་གྱི་ཉན་ཐོས། དབྱེ་ན་ཆགས་བྲལ་སྔོན་སོང་དང་། རིམ་གྱིས་པའི་ཕྱིར་མི་འོང་ཞུགས་པ་གཉིས། དང་པོའི་མཚན་ཉིད། སྦྱོར་ལམ་སྟན་གཅིག་པའི་རྟོགས་པ་ཐོབ་ཅིང་། བཅུ་དྲུག་པའི་རྟོགས་པ་མ་ཐོབ་པའི་ཉན་ཐོས་གང་ཞིག བཅུ་དྲུག་པའི་རྟོགས་པ་ཐོབ་པ་དང་དུས་མཉམ་དུ་ཕྱིར་མི་འོང་དུ་འགྱུར་བའོ། །གཉིས་པའི་མཚན་ཉིད། ཕྱིར་འོང་འབྲས་གནས་གང་ཞིག ཕྱིར་མི་འོང་གི་འབྲས་བུ་ཐོབ་རྗེས་སུ་སྒོམ་སྤང་ཉོན་མོངས་སྤང་བའི་སྦྱོར་བ་རང་རྒྱུད་ལ་ཐོབ་པའོ། །ཕྱིར་མི་འོང་འབྲས་གནས་ཀྱི་མཚན་ཉིད། འདོད་ཉོན་དགུ་པ་སྤངས་པའི་ཉན་ཐོས་སློབ་པ་འབྲས་གནས། དེ་ལ་འབྲས་བུ་ཐོབ་ཚུལ་གྱི་སྒོ་ནས་དབྱེ་ན་ཆགས་བྲལ་སྔོན་སོང་དང་། རིམ་གྱིས་པའི་ཕྱིར་མི་འོང་འབྲས་གནས་གཉིས་ལས། མཚན་ཉིད་རིམ་བཞིན། མཐོང་ལམ་གྱི་སྔ་རོལ་དུ་འདོད་ཉོན་དགུ་པ་སྤངས་པ་དང་། མཐོང་ལམ་ཐོབ་རྗེས་སུ་འདོད་ཉོན་དགུ་པ་སྤངས་པའི་ཉན་ཐོས་སློབ་པ་འབྲས་གནས་སོ། །རིགས་ཀྱི་སྒོ་ནས་དབྱེ་ན་ལྔ། གཟུགས་སུ་ཉེར་འགྲོ། གཟུགས་མེད་ཉེར་འགྲོ། མཐོང་ཆོས་ཞི། ཚེ་ཡོངས་གྱུར་འཕགས་པ། ལུས་མངོན་བྱེད་དོ། །དང་པོའི་མཚན་ཉིད། མཐོང་ལམ་ཐོབ་པའི་ལུས་རྟེན་དང་བཅས་པའི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག གཟུགས་སུ་སྐྱེ་བ་བླངས་ནས་མྱང་འདས་མངོན་དུ་བྱེད་པའོ། །དབྱེ་ན་བར་འདའ་བ། སྐྱེས་འདའ་བ། གོང་འཕོ་དང་གསུམ། དང་པོའི་མཚན་ཉིད། གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་ཀྱི་བར་སྲིད་གཅིག་ཁོ་ནར་བླངས་ནས་བར་སྲིད་ཀྱི་རྟེན་ལ་མྱང་འདས་མངོན་དུ་བྱེད་པ། དབྱེ་ན་མྱུར་བར་འདའ་བ་དང་། མྱུར་བར་མིན་པར་འདའ་བ་དང་། དུས་རིང་མོ་ཞིག་ནས་འདའ་བ་དང་གསུམ་མོ། །གཟུགས་སུ་ཉེར་འགྲོའི་སྐྱེས་འདའ་བའི་མཚན་ཉིད། གཟུགས་སུ་སྐྱེས་ནས་མྱོང་འགྱུར་གྱི་ལས་ཅན་གྱི་གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་སྐྱེ་སྲིད་གཅིག་ཁོ་ནར་བླངས་ནས་དེའི་རྟེན་ལ་མྱང་འདས་མངོན་དུ་བྱེད་པའོ། །དབྱེ་ན་སྐྱེས་ཙམ་ན་འདའ་བ་དང་། མངོན་པར་འདུ་བྱེད་མེད་པར་འདའ་བ་དང་། མངོན་པར་འདུ་བྱེད་དང་བཅས་ཏེ་འདའ་བ་དང་གསུམ་མོ། །གཟུགས་སུ་ཉེར་འགྲོའི་གོང་འཕོའི་མཚན་ཉིད། གཟུགས་ཀྱི་ལན་གྲངས་གཞན་ལ་མྱོང་འགྱུར་གྱི་ལས་ཅན་གྱི་གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་སྐྱེ་བ་བརྒྱུད་མར་བླངས་ནས་ཁམས་གོང་གི་རྟེན་ལ་མྱང་འདས་མངོན་དུ་བྱེད་པའོ། །དབྱེ་ན་འོག་མིན་མཐར་ཐུག་འགྲོ་དང་། སྲིད་རྩེའི་མཐར་ཐུག་འགྲོའི་གོང་འཕོ་གཉིས། དང་པོའི་མཚན་ཉིད། གཟུགས་སུ་ཉེར་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ། གཟུགས་སུ་སྐྱེ་བ་བརྒྱུད་མར་བླངས་ཏེ། འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན། དབྱེ་ན་འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བ་དང་གསུམ། མཚན་ཉིད་རིམ་བཞིན། འོག་མིན་མཐར་ཐུག་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ། ཕྱི་མ་ཚངས་རིས་སུ་སྐྱེས་ནས་འཕར་ཐེབས་གཅིག་གིས་འོག་མིན་དུ་མྱང་འདས་མངོན་དུ་བྱེད་པའི་རིགས་ཅན་ནོ། །དེ་གང་ཞིག བསམ་གཏན་སྤེལ་སྒོམ་ལས་ཉམས་ཏེ། ཕྱི་མ་ཚངས་རིས་སུ་སྐྱེས་ཏེ། འཕར་ཐེབས་གཉིས་ཀྱིས་འོག་མིན་དུ་མྱང་འདས་མངོན་དུ་བྱེད་པའི་རིགས་ཅན་དང་། དེ་གང་ཞིག བསམ་གཏན་སྤེལ་སྒོམ་ལས་ཉམས་ནས་གཟུགས་ཁམས་གནས་རིགས་བཅུ་བདུན་དུ་རིམ་གྱིས་སྐྱེ་བ་བླངས་ཏེ། འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ནོ། །སྲིད་རྩེའི་མཐར་ཐུག་འགྲོའི་གོང་འཕོའི་མཚན་ཉིད། རྒྱུའི་དུས་སུ་བསམ་གཏན་སྤེལ་སྒོམ་མ་སྤྱད་པས་ཚངས་རིས་ནས་འབྲས་བུ་ཆེ་བའི་བར་དུ་རིམ་གྱིས་སྐྱེས་ཏེ་གནས་གཙང་མར་མི་འགྲོ་བར་གཟུགས་མེད་བཞིར་སྐྱེ་བ་བླངས་ནས་སྲིད་རྩེའི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ནོ། །གཟུགས་མེད་ཉེར་འགྲོའི་ཕྱིར་མི་འོང་གི་མཚན་ཉིད། གཟུགས་ལ་འདོད་ཆགས་དང་བྲལ་བའི་འདོད་པའི་རྟེན་ཅན་གྱི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག གཟུགས་མེད་ཁོ་ནར་སྐྱེ་བ་བླངས་ནས་གཟུགས་མེད་ཀྱི་རྟེན་ལ་མྱང་འདས་མངོན་དུ་བྱེད་པ། དབྱེ་ན་གཟུགས་མེད་ཉེར་འགྲོའི་སྐྱེས་ཙམ་ནས་འདའ་བ། འདུ་བྱེད་མེད་པར་འདའ་བ། དེ་དང་བཅས་ཏེ་འདའ་བ། གོང་འཕོ་དང་བཞིའོ། །མཐོང་ཆོས་ཞིའི་མཚན་ཉིད། མཐོང་ལམ་ཐོབ་པའི་ལུས་རྟེན་དང་བཅས་པའི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག རྟེན་དེ་ཉིད་ལ་མྱང་འདས་མངོན་དུ་བྱེད་པའོ། །ཚེ་ཡོངས་གྱུར་འཕགས་པའི་མཚན་ཉིད། ཕྱིར་མི་འོང་འབྲས་གནས་གང་ཞིག མཐོང་ལམ་ཐོབ་པའི་ལུས་རྟེན་དོར་བའོ། །ལུས་མངོན་བྱེད་ཀྱི་མཚན་ཉིད། ཕྱིར་མི་འོང་འབྲས་གནས་གང་ཞིག འགོག་པའི་སྙོམས་འཇུག་ཐོབ་པའོ། །བཞི་པ་དགྲ་བཅོམ་གྱི་སྐོར་ལ། ཞུགས་གནས་གཉིས། དང་པོའི་མཚན་ཉིད། འབྲས་བུ་བཞིའི་ནང་ནས་དགྲ་བཅོམ་གྱི་འབྲས་བུ་འཐོབ་པར་བྱེད་པའི་ལམ་གྱི་སྦྱོར་བ་རང་རྒྱུད་ལ་ཐོབ་ཅིང་། དགྲ་བཅོམ་གྱི་འབྲས་བུ་མངོན་དུ་བྱེད་པའི་རིགས་ཅན་གྱི་ཉན་ཐོས། དབྱེ་ན་ཅིག་ཅར་བ་དང་། རིམ་གྱིས་པའི་དགྲ་བཅོམ་ཞུགས་པ་གཉིས། དང་པོའི་མཚན་ཉིད། རྒྱུན་ཞུགས་འབྲས་གནས་གང་ཞིག འདོད་ཉོན་དང་པོ་དང་སྲིད་ཉོན་དང་པོ་ཅིག་ཅར་སྤངས་པའི་སྦྱོར་བ་རང་རྒྱུད་ལ་ཐོབ་པ། གཉིས་པའི་མཚན་ཉིད། ཕྱིར་མི་འོང་གི་འབྲས་བུ་ཐོབ་རྗེས་སུ་སྒོམ་སྤང་ཉོན་མོངས་སྤོང་བའི་སྦྱོར་བ་རང་རྒྱུད་ལ་ཐོབ་པའོ། །དགྲ་བཅོམ་འབྲས་གནས་ཀྱི་མཚན་ཉིད། ཁམས་གསུམ་གྱི་ཉོན་མོངས་མ་ལུས་པ་སྤངས་པའི་ཉན་ཐོས། དབྱེ་ན་ཅིགཅར་བ་དང་རིམ་གྱིས་པའི་དགྲ་བཅོམ་འབྲས་གནས་གཉིས། དང་པོའི་མཚན་ཉིད། འདོད་ཉོན་དགུ་པ་དང་སྲིད་ཉོན་དགུ་པ་ཅིག་ཅར་སྤོང་བའི་ཉན་ཐོས། གཉིས་པའི་མཚན་ཉིད། ཁམས་གསུམ་གྱི་ཉོན་མོངས་པ་རྣམས་རིམ་གྱིས་སྤངས་པའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་ཉན་ཐོས། དེ་ལ་དབང་པོའི་སྒོ་ནས་དབྱེ་ན། དུས་སྦྱོར་དང་། དུས་མི་སྦྱོར་གཉིས། རིགས་ཀྱི་སྒོ་ནས་དབྱེ་ན། ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་བསྐྱོད་པའི་ཆོས་ཅན་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་དང་དྲུག་གོ །འདིར་དགྲ་བཅོམ་འབྲས་གནས་མཚོན་བྱེད་དཔེའི་དགེ་འདུན་མིན་ཡང་བཤད་པའི་སྐབས་བདེ་བས་ཕྱོགས་གཅིག་ཏུ་བཤད་དོ། །གཉིས་པ་རང་སངས་རྒྱས་ཀྱི་མཚན་ཉིད། འདོད་པའི་ཁམས་སུ་སྲིད་པ་ཐ་མ་པའི་རྟེན་ལ་སློབ་དཔོན་གཞན་གྱི་གདམས་ངག་ལ་མ་ལྟོས་པར་རང་བྱུང་གི་བྱང་ཆུབ་མངོན་དུ་བྱེད་པའི་ཐེག་དམན་གྱི་གང་ཟག་གོ །དེ་ལ་དབྱེ་ན་ཉན་ཐོས་ཅིག་ཅར་བའི་རྟོགས་པ་སྔོན་དུ་སོང་བའི་རང་སངས་རྒྱས་དང་། རང་རྒྱལ་གྱི་ཚོགས་སྦྱོར་སྔོན་དུ་སོང་བའི་རང་སངས་རྒྱས་སོ། །ཕྱི་མ་ལ་སེ་རུ་ལྟ་བུ་དང་། ཚོགས་ན་སྤྱོད་པ་གཉིས། ཕྱི་མ་ལ་ཡང་སྐྱེ་བ་གཅིག་ཐོག་གི་རྟེན་ལ་བཟོད་འབྲིང་མན་སྔོན་དུ་སོང་བ་སོ་སྐྱེ་སྔོན་སོང་དང་། འབྲས་བུ་དང་པོ་གཉིས་གང་རུང་སྔོན་དུ་སོང་བ་ཉན་ཐོས་སྔོན་སོང་གཉིས་སོ། །གཉིས་པ་མཚོན་བྱ་དོན་གྱི་དགེ་འདུན་ནི། ས་དང་པོ་ནས་བཅུ་པའི་བར་ལ་གནས་པའི་རྒྱལ་སྲས་འཕགས་པ་སྟེ། རྒྱས་པར་གཞན་དུ་ཤེས་པར་བྱའོ། །གསུམ་པ་ངེས་འབྱེད་ཡན་ལག་ལ། མཚན་ཉིད། མིང་གི་རྣམ་གྲངས། དབྱེ་བ། སྐབས་སུ་བབ་པ་བྱེ་བྲག་ཏུ་བཤད་པ་དང་བཞི་ལས། དང་པོ་ནི། ཐེག་པ་རང་ལུགས་ཀྱི་ཚོགས་རྫོགས་རྗེས་སུ་བྱུང་ཞིང་ཐེག་པ་རང་ལུགས་ཀྱི་མཐོང་ལམ་མ་སྐྱེས་གོང་གི་ལམ་ཞུགས་ཀྱི་རྟོགས་པ། གཉིས་པ་ནི། ངེས་འབྱེད་ཡན་ལག ངེས་འབྱེད་ཆ་མཐུན། སྦྱོར་ལམ་ཞེས་པ་རྣམས་མཚན་ཉིད་གཅིག་གིས་མཚོན་པར་བྱའོ། །དེང་སང་མཚོན་བྱ་མི་འདྲ་བ་ཙམ་ལ་མཚན་ཉིད་སོ་སོར་འཇོག་དགོས་པར་འདོད་པ་ནི་གསུང་རབ་ཀྱི་བརྡ་ཆད་མ་གོ་བའོ། །གསུམ་པ་ལ་ཐེག་པའི་སྒོ་ནས་དབྱེ་ན། ཉན་ཐོས། རང་རྒྱལ། ཐེག་ཆེན་གྱི་སྦྱོར་ལམ་གསུམ། དེ་རེ་རེ་ལ་ཡང་ངོ་བོའི་སྒོ་ནས་དབྱེ་ན་དྲོད། རྩེ་མོ། བཟོད་པ། ཆོས་མཆོག་བཞི་བཞིའོ། །མངོན་རྟོགས་རྒྱན་གྱི་དགོངས་པ་ཐེག་པ་གསུམ་ཆར་གྱི་དྲོད་སོགས་རེ་རེ་བཞི་པོ་ལ་ཡང་ཆུང་ངུ་འབྲིང་ཆེན་པོ་གསུམ་གསུམ་ཡོད་པར་བཞེད་ལ། མངོན་པ་གོང་འོག་ལས་ཐེག་པ་གསུམ་ཆར་གྱི་དྲོད་སོགས་དང་པོ་གསུམ་ལ་ཆུང་ངུ་འབྲིང་ཆེན་པོ་གསུམ་གསུམ་ཡོད་ཀྱི་བཟོད་ཆེན་དང་ཆོས་མཆོག་སྐད་ཅིག་མ་རེ་རེ་ངེས་པར་བཞེད་དོ། །འདི་ལས་གཞན་དུ་སྨྲ་བ་ནི་གྲུབ་མཐའ་དང་། ཐེག་པའི་ཁྱད་པར་མ་ཕྱེད་པའི་ཅལ་ཅོལ་དུ་ཤེས་པར་མཛོད་ཅིག བཞི་པ་ལ་གཉིས་ཏེ། ཁྱད་གཞི་མདོར་བསྟན་པ་དང་། ཁྱད་ཆོས་རྒྱས་པར་བཤད་པའོ། །དང་པོ་ནི། སྐབས་འདིར་དངོས་བསྟན་གྱི་སྦྱོར་ལམ་གྱི་མཚན་ཉིད། དམིགས་རྣམ་སོགས་ཁྱད་ཆོས་ལྔའི་སྒོ་ནས་ཐེག་དམན་གྱི་སྦྱོར་ལམ་ལས་ཁྱད་པར་དུ་འཕགས་པའི་འཇིག་རྟེན་པའི་སྒོམ་བྱུང་གཙོ་བོར་གྱུར་པའི་ཡེ་ཤེས་སོ། །གཉིས་པ་ལ། དམིགས་རྣམ་རྒྱུ་གསུམ་རྒྱས་པར་བཤད། ལྡན་པ་རྣམ་རྟོག་རྒྱས་པར་བཤད། ཡོངས་འཛིན་དགེ་བཤེས་རྒྱས་པར་བཤད་པ་དང་གསུམ་ལས། དང་པོ་ལ་དམིགས་པའི་ཁྱད་པར་ནི། དྲོད་ཆུང་ངུའི་སྐབས་སུ་བདེན་བཞིའི་སྟེང་གི་མི་རྟག་ལ་སོགས་བཅུ་དྲུག་དམིགས་པར་བྱེད་པ་སོགས་བཅུ་གཉིས་སོ། །རྣམ་པའི་ཁྱད་པར་ནི། དྲོད་ཆུང་ངུའི་སྐབས་སུ་མི་རྟག་ལ་སོགས་བཅུ་དྲུག་ལ་ཡང་མངོན་ཞེན་བཀག་པ་སོགས་བཅུ་གཉིས་སོ། །རྒྱུའི་ཁྱད་པར་ནི། བཅུ་གཉིས་པོ་རེ་རེ་ལ་ཡང་ད་ལྟ་ཐེག་པ་གསུམ་ཆར་གྱི་རྟོགས་རིགས་ཚང་བས་ཐེག་པ་གསུམ་གྱི་རྟོགས་རིགས་མངོན་སུམ་དུ་རྟོགས་པའི་མཐོང་ལམ་གྱི་རྒྱུ་བྱེད་པའོ། །གཉིས་པ་ནི། སྐབས་འདིར་དངོས་བསྟན་གྱི་རྟོག་པའི་མཚན་ཉིད། བྱང་སེམས་ལམ་གྱི་སྤང་བྱའི་གཙོ་བོར་གྱུར་པའི་ཤེས་སྒྲིབ་གང་ཞིག གཟུང་འཛིན་གང་རུང་དུ་མངོན་པར་ཞེན་པའི་བློ། དབྱེ་ན་གཟུང་རྟོག་དང་། འཛིན་རྟོག་གཉིས། དང་པོའི་མཚན་ཉིད། གང་ཞིག་འགྲེ། རང་ཡུལ་གཟུང་བ་ལ་དམིགས་ནས་ལོངས་སྤྱད་བྱར་མངོན་པར་ཞེན་པའི་བློ་དང་། དབྱེ་ན་ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གཉིས། དང་པོའི་མཚན་ཉིད། གང་ཞིག རང་ཡུལ་དོར་བྱའི་ཆོས་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ། དབྱེ་ན་མ་རིག་པའི་གཟུང་བའི་རྣམ་རྟོག དེ་བཞིན་དུ་གཟུགས་སོགས་ཕུང་པོ་དང་། མིང་གཟུགས་ལ་མངོན་པར་ཞེན་པ་དང་། མཐའ་གཉིས་ལ་ཆགས་པ་དང་། ཀུན་བྱང་མི་ཤེས་པ་དང་། འཕགས་པའི་ལམ་ལ་མི་གནས་པ་དང་། བདག་དང་། གཞན་དང་། རྣམ་དག་སྐྱེད་པའི་གཟུང་བའི་རྣམ་རྟོག་དགུ། དང་པོའི་མཚན་ཉིད། གང་ཞིག རང་ཡུལ་མ་རིག་པ་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ། དེས་གཞན་རྣམས་ལ་འགྲེའོ། །རྣམ་བྱང་གཟུང་རྟོག་གི་མཚན་ཉིད། གང་ཞིག རང་ཡུལ་རྣམ་བྱང་གི་ཆོས་ལ་དམིགས་ནས་བླང་བྱའི་གཟུང་བར་མངོན་པར་ཞེན་པའི་བློ། དབྱེ་ན་རྣམ་བྱང་གི་ཕུང་པོ་གཟུང་བའི་རྣམ་རྟོག་དང་། དེ་བཞིན་དུ་རྣམ་བྱང་གི་སྐྱེ་མཆེད་དང་། རྣམ་བྱང་གི་རིགས་དང་། རྣམ་བྱང་གི་སྐྱེ་བ་དང་། སྟོང་ཉིད་རྟོགས་པའི་ཡེ་ཤེས་དང་། ཕ་རོལ་ཏུ་ཕྱིན་པའི་དོན་དང་། མཐོང་བ་དང་། སྒོམ་པ་དང་། མི་སློབ་པའི་ལམ་གྱི་གཟུང་བའི་རྣམ་རྟོག་དགུ་ལས། དང་པོའི་མཚན་ཉིད། གང་ཞིག རང་ཡུལ་རྣམ་བྱང་གི་ཕུང་པོ་ལ་དམིགས་ནས་བླང་བྱའི་གཟུང་བར་མངོན་པར་ཞེན་པའི་བློ། དེས་གཞན་རྣམས་ལ་འགྲེའོ། །འཛིན་རྟོག་གི་མཚན་ཉིད། གང་ཞིག རང་ཡུལ་འཛིན་པ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པའི་བློ། དབྱེ་ན་རྫས་འཛིན་རྟོག་པ་དང་། བཏགས་འཛིན་རྟོག་པ་གཉིས། རྫས་འཛིན་རྟོག་པའི་མཚན་ཉིད། གང་ཞིག རང་ཡུལ་འཛིན་པ་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ། དབྱེ་ན་གང་ཟག་གི་དབང་དུ་བྱས་པའི་རྫས་འཛིན་རྟོག་པ་དང་། ཆོས་ཀྱི་དབང་དུ་བྱས་པའི་རྫས་འཛིན་རྟོག་པ་གཉིས། དང་པོའི་མཚན་ཉིད། གང་ཞིག རང་ཡུལ་གང་ཟག་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ། དབྱེ་ན་བདག་རང་དབང་ཅན་དུ་འཛིན་པའི་རྣམ་རྟོག དེ་བཞིན་དུ་གཅིག་པུའི་བདག་དང་། རྒྱུའི་བདག་དང་། ལྟ་བ་པོ་ལ་སོགས་པའི་བདག་དང་། ཀུན་ནས་ཉོན་མོངས་པའི་རྟེན་གྱི་བདག་དང་། རྣམ་བྱང་གི་རྟེན་གྱི་བདག་དང་། མཐོང་ལམ་གྱི་རྟེན་གྱི་བདག་དང་། སྒོམ་ལམ་གྱི་རྟེན་གྱི་བདག་དང་། མི་སློབ་ལམ་གྱི་རྟེན་གྱི་བདག་འཛིན་པའི་རྣམ་པར་རྟོག་པ་དགུ་ལས། དང་པོའི་མཚན་ཉིད། གང་ཞིག རང་ཡུལ་བདག་རང་དབང་ཅན་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ། དེས་གཞན་རྣམས་ལ་འགྲེའོ། །ཆོས་ཀྱི་དབང་དུ་བྱས་པའི་རྫས་འཛིན་རྟོག་པའི་མཚན་ཉིད། གང་ཞིག རང་ཡུལ་ཕུང་སོགས་ཆོས་ཙམ་ལ་དམིགས་ནས་ལོངས་སྤྱོད་པ་པོར་བདེན་པར་མངོན་པར་ཞེན་པའི་བློ། དབྱེ་བ་སྐབས་ལྔ་པར་འཆད་དོ། །བཏགས་འཛིན་རྟོག་པའི་མཚན་ཉིད། གང་ཞིག རང་ཡུལ་འཛིན་པ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ། དབྱེ་ན། གང་ཟག་གི་དབང་དུ་བྱས་པའི་བཏགས་འཛིན་རྟོག་པ་དང་། ཆོས་ཀྱི་དབང་དུ་བྱས་པའི་བཏགས་འཛིན་རྟོག་པ་གཉིས། དང་པོའི་མཚན་ཉིད། གང་ཞིག རང་ཡུལ་གང་ཟག་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ། འདི་ལ་དབྱེ་བ་མི་སྣང་ངོ་། །གཉིས་པའི་མཚན་ཉིད། གང་ཞིག རང་ཡུལ་ཕུང་སོགས་ཆོས་ཙམ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ། དབྱེ་ན་ཕུང་པོའི་རྟེན་ཅན་གྱི་བཏགས་འཛིན་རྟོག་པ། དེ་བཞིན་དུ་སྐྱེ་མཆེད་དང་། ཁམས་དང་། རྟེན་ཅིང་འབྲེལ་བར་འབྱུང་བ་དང་། རྣམ་བྱང་དང་། མཐོང་ལམ་དང་། སྒོམ་ལམ་དང་། ཁྱད་པར་གྱི་ལམ་དང་། མི་སློབ་པའི་ལམ་གྱི་རྟེན་ཅན་གྱི་བཏགས་འཛིན་རྟོག་པ་དགུ་ལས། དང་པོའི་མཚན་ཉིད། གང་ཞིག རང་ཡུལ་ཕུང་པོ་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པའི་བློ། དེས་གཞན་རྣམས་ལ་འགྲེའོ། །གསུམ་པ་ནི་འདིར་བསྟན་ཡོངས་འཛིན་གྱི་མཚན་ཉིད། འཕགས་པ་ལྟར་ན་བྱང་སེམས་སྦྱོར་ལམ་པ་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པར་བྱེད་པའི་ཁྱད་ཆོས། དབྱེ་ན་བྱང་སེམས་སྦྱོར་ལམ་པའི་ནང་གི་ཡོངས་འཛིན་ཐབས་ལ་མཁས་པ་དང་། དེའི་ཕྱིའི་ཡོངས་འཛིན་དགེ་བཤེས་གཉིས། དང་པོའི་མཚན་ཉིད། བྱང་སེམས་སྦྱོར་ལམ་པ་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པར་བྱེད་པའི་བྱང་སེམས་སྦྱོར་ལམ་པའི་རྒྱུད་ཀྱི་ཐབས་ཁྱད་པར་ཅན། གཉིས་པའི་མཚན་ཉིད། བྱང་སེམས་སྦྱོར་ལམ་པ་ལ་ངོ་བོ་ཉིད་མེད་པ་ལ་སོགས་ཀྱི་ཆོས་སྟོན་པའི་སྒོ་ནས་ཐེག་དམན་དུ་མི་ལྟུང་བར་ཐེག་ཆེན་དུ་ཡོངས་སུ་འཛིན་པར་བྱེད་པའི་དགེ་བའི་བཤེས་གཉེན། སློབ་དཔོན་ལྟར་ན་འདིར་བསྟན་ཡོངས་འཛིན་གྱི་མཚན་ཉིད། བྱང་སེམས་སྦྱོར་ལམ་པ་ལ་ཆོས་སྟོན་པའི་སྒོ་ནས་ཐེག་ཆེན་དུ་ཡོངས་སུ་འཛིན་པར་བྱེད་པའི་ཁྱད་པར་གསུམ་ལྡན་གྱི་དགེ་བའི་བཤེས་གཉེན། ཁྱད་པར་གསུམ་ནི་ཤེས་རབ་ཀྱི། ཆོས་སྟོན་པའི། མི་མཐུན་ཕྱོགས་སྤངས་པའི་ཁྱད་པར་རོ། །བཞི་པ་སྒྲུབ་པའི་རྟེན་རིགས་ལ་རིགས་སྤྱིའི་རྣམ་གཞག་དང་། སྐབས་སུ་བབ་པ་བྱེ་བྲག་ཏུ་བཤད་པ་གཉིས། དང་པོ་ལ་སངས་རྒྱས་ཀྱི་རིགས་ཀྱི་མཚན་ཉིད། སེམས་ཅན་གྱིས་བསྡུས་པའི་སངས་རྒྱས་ཀྱི་རྒྱུ་གང་ཞིག དྲི་མས་རྣམ་པར་དག་པ་ན་རང་དོན་ཆོས་སྐུ་འགྱུར་རུང་། དབྱེ་བ་ལ་ངོ་བོའི་སྒོ་ནས། ཐེག་པའི་སྒོ་ནས། གནས་སྐབས་ཀྱི་སྒོ་ནས་དབྱེ་བ་དང་གསུམ། དང་པོ་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས། དང་པོའི་མཚན་ཉིད། དྲི་མ་དང་བཅས་པའི་སེམས་ཀྱི་གསལ་སྟོང་གང་རུང་གི་ཆ་གང་ཞིག དྲི་མས་རྣམ་པར་དག་པ་ན་ངོ་བོ་ཉིད་ཀྱི་སྐུའི་ཁྱད་ཆོས་གསུམ་གང་རུང་དུ་འགྱུར་དུ་རུང་བ། དབྱེ་ན་འདུས་བྱས་རང་བཞིན་དང་འདུས་མ་བྱས་རང་བཞིན་གནས་རིགས་གཉིས། དང་པོའི་མཚན་ཉིད། དྲི་མ་དང་བཅས་པའི་སེམས་ཀྱི་གསལ་བའི་ཆ་གང་ཞིག ཟག་མེད་ཀྱི་ཡེ་ཤེས་སུ་འགྱུར་དུ་རུང་བ། གཉིས་པའི་མཚན་ཉིད། དྲི་མ་དང་བཅས་པའི་སེམས་ཀྱི་སྟོང་པའི་ཆ་གང་ཞིག དག་པ་གཉིས་ལྡན་གྱི་དབྱིངས་མཐར་ཐུག་ཏུ་འགྱུར་དུ་རུང་བ། འདི་བཞིན་བྱས་ན་རང་བཞིན་གནས་རིགས་དང་ངོ་བོ་ཉིད་སྐུ་ལ་འབྲེལ་པ་ཅུང་ཟད་གཅིག་གྲུབ་འདྲ་ལགས་སོ། །རྒྱས་འགྱུར་གྱི་རིགས་ཀྱི་མཚན་ཉིད། རིགས་སད་པའི་སྟོབས་ཀྱིས་བྱུང་བའི་འདུས་བྱས་ཀྱི་དགེ་རྩ་གང་ཞིག དྲི་མས་རྣམ་པར་དག་པ་ན་ཡེ་ཤེས་ཕྱི་མ་གསུམ་གང་རུང་དུ་འགྱུར་དུ་རུང་བའོ། །རྒྱུད་བླར། རྒྱས་འགྱུར་གྱི་རིགས་གཟུགས་སྐུ་གཉིས་སུ་འགྱུར་དུ་རུང་བར་གསུངས་པའི་དོན་འདི་ཡིན་ནོ། །གཉིས་པ་ལ། གནས་སྐབས་ཉན་ཐོས་ཀྱི། གནས་སྐབས་རང་རྒྱལ་གྱི། གནས་སྐབས་ཐེག་ཆེན་གྱི་རིགས་གསུམ་ལས། དང་པོའི་མཚན་ཉིད། རིགས་གང་ཞིག གནས་སྐབས་ཉན་ཐོས་ཀྱི་བྱང་ཆུབ་འཐོབ་པར་འགྱུར་བ་དེས་གཞན་གཉིས་ལ་འགྲེའོ། །གསུམ་པ་ལ། ངེས་པའི་རིགས་དང་། མ་ངེས་པའི་རིགས་གཉིས། དང་པོའི་མཚན་ཉིད། རིགས་གང་ཞིག གནས་སྐབས་ཐེག་པ་གཞན་དུ་བསྒྱུར་དུ་མི་རུང་བ། གཉིས་པའི་མཚན་ཉིད། རིགས་གང་ཞིག གནས་སྐབས་ཐེག་པ་གཞན་དུ་བསྒྱུར་དུ་རུང་བའོ། །གཉིས་པ་ལ་མཚན་ཉིད། དབྱེ་བ། རྩོད་པ་སྤང་བ་གསུམ། དང་པོ་ནི། སྐབས་འདིར་དངོས་བསྟན་གྱི་སྒྲུབ་པའི་རྟེན་རིགས་ཀྱི་མཚན་ཉིད། དྲི་མ་དང་བཅས་པའི་སེམས་ཀྱི་ཆོས་དབྱིངས་གང་ཞིག རང་གི་རྟེན་ཆོས་བྱང་སེམས་ཀྱི་དྲོད་ཡན་ཆད་ཀྱི་སྒྲུབ་པའི་རྟེན་གཞི་བྱེད་པ། གཉིས་པ་ལ། བྱང་སེམས་ཀྱི་དྲོད་ཀྱི་སྒྲུབ་པའི་རྟེན་རིགས། དེ་བཞིན་དུ་བྱང་སེམས་ཀྱི་རྩེ་མོ་དང་། བཟོད་པ་དང་། ཆོས་མཆོག་དང་། མཐོང་ལམ་དང་། ས་བདུན་པ་མན་ཆད་ཀྱི་སྒོམ་ལམ་དང་། གཉེན་པོ་དང་། སྤོང་བ་དང་། ས་བརྒྱད་པའི་རྣམ་གྲོལ་ལམ་དང་། དེའི་ཁྱད་པར་གྱི་ལམ་དང་། ས་དགུ་པའི་ཐུན་མོང་མིན་པའི་ལམ་དང་། ས་བཅུ་པའི་གཞན་དོན་གོ་རིམ་དུ་བྱེད་པ་དང་། ཡེ་ཤེས་རྩོལ་བ་མི་མངའ་བར་འཇུག་པའི་སྒྲུབ་པའི་རྟེན་རིགས་ཏེ་བཅུ་གསུམ་མོ། །དང་པོའི་མཚན་ཉིད། གང་ཞིག རང་གི་རྟེན་ཆོས་བྱང་སེམས་ཀྱི་དྲོད་ཀྱི་སྒྲུབ་པའི་རྟེན་གཞི་བྱེད་པ། དེས་གཞན་རྣམས་ལ་འགྲེའོ། །གསུམ་པ་ལ་རྩོད་ལན་གཉིས། དང་པོ་ནི། དངོས་སྨྲ་བ་ན་རེ། ཆོས་དབྱིངས་སངས་རྒྱས་ཀྱི་རིགས་ཡིན་ན། སེམས་ཅན་ཐམས་ཅད་སངས་རྒྱས་ཀྱི་རིགས་སུ་གནས་པར་ཐལ། ཆོས་དབྱིངས་སེམས་ཅན་ཐམས་ཅད་ལ་སྤྱིར་གནས་པ་ཡིན་པའི་ཕྱིར། འདོད་ན། རིགས་དེ་ལ་ཐེག་པ་གསུམ་གྱི་རིགས་ཐ་དད་པ་གསུམ་དུ་དབྱེར་མི་རུང་བར་ཐལ་ལོ་ཞེ་ན། གཉིས་པ་ལ་རྒྱུའི་སྒོ་ནས་རིགས་སུ་འཇོག་པ་དང་། དཔེའི་སྒོ་ནས་དབྱེ་བ་འཐད་པའི་ཚུལ་གཉིས་ལས། དང་པོ་ནི། དྲི་མ་དང་བཅས་པའི་སེམས་ཀྱི་ཆོས་དབྱིངས་ཁོ་ནར་རིགས་སུ་འཐད་དེ། ཐེག་པ་གསུམ་གྱི་སྒྲུབ་པས་བདག་མེད་གསུམ་ལ་ཇི་ལྟར་དམིགས་པ་བཞིན་བྱང་ཆུབ་གསུམ་པོ་སོ་སོར་ཐོབ་པའི་རྒྱུ་ཡིན་པའི་ཕྱིར་རོ། །གཉིས་པ་ནི་ཆོས་དབྱིངས་རང་གི་ངོ་བོ་ལ་དབྱེ་བ་མེད་ཀྱང་ཐེག་པ་གསུམ་གྱི་རིགས་ཐ་དད་དུ་དབྱེར་རུང་སྟེ། རྟེན་ཆོས་སྒྲུབ་པ་དང་། དཔེའི་སྒོ་ནས་རྟེན་གཞི་རིགས་དེ་ལ་ཐེག་པ་གསུམ་གྱི་རིགས་གསུམ་དུ་ཕྱེ་བའི་ཕྱིར་རོ། །ལྔ་པ་སྒྲུབ་པའི་དམིགས་པ་ལ། མཚན་ཉིད་དབྱེ་བ་གཉིས། དང་པོ་ནི། ཐེག་ཆེན་སྒྲུབ་པའི་དམིགས་པའི་མཚན་ཉིད། ཐེག་ཆེན་སྒྲུབ་པས་སྒྲོ་འདོགས་གཅད་པར་བྱ་བའི་གཞི། གཉིས་པ་ལ་གསུམ་དུ་དང་བརྒྱད་དུ་དབྱེ་བ་ལ་གཉིས་ལས། དང་པོ་ལ་དགེ་མི་དགེ་ལུང་མ་བསྟན་པ་གསུམ། མཚན་ཉིད་རིམ་བཞིན། ལུང་དུ་བསྟན་པ་དང་མ་བསྟན་པ་གང་ཞིག འདོད་པ་དང་མི་འདོད་པའི་འབྲས་བུ་འབྱིན་པ་དང་། རྣམ་སྨིན་འཕེན་མི་ནུས་པའི་ཆོས་སོ། །གཉིས་པ་ལ་ལམ་གྱི་སྒོ་ནས་འཇིག་རྟེན་པའི་དང་འཇིག་རྟེན་ལས་འདས་པའི་རྟོགས་པ་གཉིས། སྤང་གཉེན་གྱི་སྒོ་ནས་ཟག་བཅས་ཟག་མེད་གཉིས། བདེན་གཉིས་ཀྱི་སྒོ་ནས་འདུས་བྱས་འདུས་མ་བྱས་གཉིས། འབྲས་བུའི་སྒོ་ནས་ཐུན་མོང་བའི་དང་ཐུན་མོང་མིན་པའི་ཡོན་ཏན་གཉིས། འཇིག་རྟེན་པའི་མཚན་ཉིད། ཁམས་གསུམ་གྱི་སྲེད་པས་འཕངས་པའི་ཆོས། འཇིག་རྟེན་ལས་འདས་པའི་མཚན་ཉིད། ཟག་མེད་ཀྱི་ཡེ་ཤེས་ཀྱི་སྟོབས་ཀྱིས་བྱུང་བའི་ཆོས། ཟག་བཅས་ཀྱི་མཚན་ཉིད། ཟག་པའི་སྒོ་དྲུག་གང་རུང་གིས་བསྡུས་པ། ཟག་མེད་ཀྱི་མཚན་ཉིད། ཟག་པའི་སྒོ་དྲུག་གང་རུང་གིས་མ་བསྡུས་པ། འདུས་བྱས་ཀྱི་མཚན་ཉིད། རང་གི་རྒྱུ་རྐྱེན་ལས་སྐྱེས་པ། འདུས་མ་བྱས་ཀྱི་མཚན་ཉིད། རང་གི་རྒྱུ་རྐྱེན་ལས་མ་སྐྱེས་པ། ཆོས་ཐུན་མོང་བའི་ཡོན་ཏན་གྱི་མཚན་ཉིད། འཕགས་པའི་སྐྱེ་བོ་ཐམས་ཅད་ཀྱི་རྒྱུད་ལ་འབྱུང་བའི་ཡོན་ཏན་གྱི་རིགས། ཐུན་མོང་མིན་པའི་ཡོན་ཏན་གྱི་མཚན་ཉིད། སངས་རྒྱས་ཁོ་ནའི་རྒྱུད་ལ་འབྱུང་བའི་ཡོན་ཏན་གྱི་རིགས་སོ། །དྲུག་པ་སྒྲུབ་པའི་ཆེད་དུ་བྱ་བའི་མཚན་ཉིད། གང་གི་དབང་དུ་བྱས་ནས་ཐེག་ཆེན་གྱི་སྒྲུབ་པ་བྱེད་པར་འགྱུར་བའི་ཐེག་ཆེན་སྒྲུབ་པའི་ཐོབ་བྱ་མཐར་ཐུག་གང་ཞིག་སྤངས་རྟོགས་གང་རུང་གིས་བསྡུས་པ། དབྱེ་ན་སེམས་སྤངས་པ་རྟོགས་པ་ཆེན་པོ་གསུམ། མཚན་ཉིད་རིམ་བཞིན། རང་རྒྱུད་ལྡན་གྱི་གང་ཟག་དེ་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སངས་རྒྱས་སའི་སེམས་བསྐྱེད། དེ་ལྟར་བྱེད་པའི་སངས་རྒྱས་སའི་སྤངས་པ་དང་། དེ་ལྟར་བྱེད་པའི་སངས་རྒྱས་སའི་རྟོགས་པའོ། །སྒྲུབ་པ་རང་གིཾ་ངོ་བོ་ལ་མཚན་ཉིད་དང་དབྱེ་བ་གཉིས། དང་པོ་ནི། ཐེག་ཆེན་སྒྲུབ་པའི་མཚན་ཉིད། ཐེག་ཆེན་སེམས་བསྐྱེད་ལ་གནས་ནས་རང་གཞན་གྱི་དོན་ལ་བརྩོན་ཞིང་བྱང་ཆུབ་ཆེན་པོ་སྒྲུབ་པར་བྱེད་པའི་ཉམས་ལེན་ནོ། །གཉིས་པ་ལ། བསྟཾན་ཚཾུལ་དཾང་ངཾོ་བོཾའི་སྒོཾ་ནཾས་དབྱཾེ་བཾ་གཉིས། དང་པོ་ལ། ཡུལ་དང་ཡུལ་ཅན་གྱི་སྒྲུབ་པ་གཉིས། དང་པོའི་མཚན་ཉིད། མཁྱེན་གསུམ་ལ་ཐོབ་བྱ་འཐོབ་བྱེད་བླང་དོར་བྱ་བའི་ཡན་ལག་ཏུ་ཐོས་བསམ་གྱིས་གཏན་ལ་ཕབ་ནས། སྒྲོ་འདོགས་གཅོད་པར་བྱེད་པའི་བྱང་སེམས་ཚོགས་ལམ་པའི་ཤེས་རབ་མཚུངས་ལྡན་དང་བཅས་པ། ས་མཚམས་ཐེག་ཆེན་གྱི་ཚོགས་ལམ་ཕལ་པའི་གནས་སྐབས་ན་ཡོད། གཉིས་པའི་མཚན་ཉིད། ཕ་རོལ་ཏུ་ཕྱིན་པ་རེ་རེ་ཞིང་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་མཁས་པའི་བརྩོན་འགྲུས་མཚུངས་ལྡན་དང་བཅས་པ། ས་མཚམས་ཐར་པ་ཆ་མཐུན་ཁྱད་པར་ཅན་ནས་རྒྱུན་མཐའི་བར་ན་ཡོད། མི་ཤེས་པ་དག་སྨྲ་བ་ཉུང་ན་མཛེས་སོ། །གཉིས་པ་ལ། གོ་སྒྲུབ། འཇུག་སྒྲུབ། ཚོགས་སྒྲུབ། ངེས་འབྱུང་གི་སྒྲུབ་པ་དང་བཞི། མཚོན་བྱེད་ཀྱི་ཆོས་བདུན་པ་གོ་སྒྲུབ་ཀྱི་མཚན་ཉིད། ཕར་ཕྱིན་རེ་རེ་ཞིང་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་འཁོར་གསུམ་མི་དམིགས་པའི་བསམ་པས་གོ་བགོས་པའི་བྱང་སེམས་ཀྱི་བསམ་པ་ཁྱད་པར་ཅན། དབྱེ་ན་སྦྱིན་པའི་གོ་སྒྲུབ་ནས་ཤེས་རབ་ཀྱི་གོ་སྒྲུབ་ཀྱི་བར་དྲུག དང་པོའི་མཚན་ཉིད། སྦྱིན་པའི་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་འཁོར་གསུམ་མི་དམིགས་པའི་བསམ་པས་གོ་བགོས་པའི་བྱང་སེམས་ཀྱི་བསམ་པ་ཁྱད་པར་ཅན། དེས་གཞན་རྣམས་ལ་འགྲེ། ས་མཚམས་ཐེག་ཆེན་གྱི་ཚོགས་ལམ་ཆུང་ངུ་ནས་རྒྱུན་མཐའི་བར་ན་ཡོད། བརྒྱད་པ་འཇུག་སྒྲུབ་ཀྱི་མཚན་ཉིད། རྒྱུ་དང་འབྲས་བུས་བསྡུས་པའི་ཐེག་ཆེན་ལ་སྟོང་ཉིད་ལ་སྒོམ་བྱུང་གཙོ་བོར་གྱུར་པའི་བརྩོན་འགྲུས་ཀྱིས་འཛེགས་པར་གྱུར་པའི་བྱང་སེམས་ཀྱི་སྦྱོར་བ་ཁྱད་པར་ཅན། དབྱེ་ན་བསམ་གཏན་གཟུགས་མེད་ལ་འཇུག་པའི་སྒྲུབ་པ། དེ་བཞིན་དུ་སྦྱིན་སོགས་དང་། ལམ་དང་། ཚད་མེད་བཞི་དང་། མི་དམིགས་པའི་ཤེས་རབ་དང་། འཁོར་གསུམ་དག་པ་དང་། ཆེད་དུ་བྱ་བ་དང་། མངོན་པར་ཤེས་པ་དང་། རྣམ་མཁྱེན་ལ་འཇུག་པའི་སྒྲུབ་པ་སྟེ་དགུའོ། །དང་པོའི་མཚན་ཉིད། འཇུག་ཡུལ་བསམ་གཏན་གཟུགས་མེད་ལ་སྟོང་ཉིད་ལ་སྒོམ་བྱུང་གཙོ་བོར་གྱུར་པའི་སྦྱོར་བའི་བརྩོན་འགྲུས་ཀྱི་འཛེགས་པར་བྱེད་པའི་བྱང་སེམས་ཀྱི་སྦྱོར་བ་ཁྱད་པར་ཅན། དེས་གཞན་རྣམས་ལ་འགྲེ། འདིར་འཇུག་ཡུལ་བསམ་གཏན་གཟུགས་མེད་དང་། ཚད་མེད་བཞི་བྱེ་བྲག་ཏུ་བཤད་པ་གཉིས་ལས། དང་པོ་ལ། ཉེར་བསྡོགས་དང་། དངོས་གཞི་གཉིས། དང་པོའི་མཚན་ཉིད། སྙོམས་འཇུག་གི་དངོས་གཞི་ཐོབ་དོན་དུ་དམིགས་རྣམ་ཡོངས་སུ་སྦྱོང་བར་བྱེད་པའི་ཐབས་ཀྱི་དགེ་བས་བསྡུས་པ། དེ་ལ་ངོ་བོའི་སྒོ་ནས་དབྱེ་ན་བསམ་གཏན་དང་པོའི་ཉེར་བསྡོགས་ནས་སྲིད་རྩེའི་ཉེར་བསྡོགས་ཀྱི་བར་བརྒྱད། དེ་རེ་རེ་ལ་ཡང་ཡིད་བྱེད་ཀྱི་སྒོ་ནས་དབྱེ་ན། མཚན་ཉིད་རབ་ཏུ་རིག་པའི། མོས་པའི་རབ་ཏུ་དབེན་པའི། དགའ་བ་སྡུད་པའི། དཔྱོད་པའི། སྦྱོར་མཐའི། སྦྱོར་མཐའི་འབྲས་བུའི་ཡིད་བྱེད་དང་བདུན་བདུན་ལས། དང་པོ་དྲུག་ནི་ཉེར་བསྡོགས་ཡིན་ལ། བདུན་པ་ནི་དེ་དང་དེའི་དངོས་གཞིར་གཏོགས་སོ། །གཉིས་པ་དངོས་གཞི་ལ་བསམ་གཏན་གྱི་དངོས་གཞི་དང་། གཟུགས་མེད་ཀྱི་དངོས་གཞི་གཉིས། དང་པོ་ལ་བཞི་ལས། བསམ་གཏན་དང་པོའི་དངོས་གཞིའི་མཚན་ཉིད། གཉེན་པོའི་ཡན་ལག་རྟོག་དཔྱོད་གང་རུང་གིས། འོག་ས་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་དགེ་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག དགའ་བདེ་ཕན་ཡོན་གྱི་ཡན་ལག་ཏུ་ལྡན་པའོ། །འདི་ལ་བསམ་གཏན་དང་པོའི་དངོས་གཞི་ཙམ་པོ་དང་ཁྱད་པར་ཅན་གཉིས་ལས། མཚན་ཉིད་རིམ་བཞིན། བསམ་གཏན་དང་པོའི་དངོས་གཞི་གང་ཞིག རྟོག་དཔྱོད་གཉིས་ཀ་ལྡན་པ་དང་། དེ་གང་ཞིག རྟོག་པ་ལ་འདོད་ཆགས་དང་བྲལ་ཞིང་དཔྱོད་པ་ཙམ་དང་ལྡན་པའོ། །བསམ་གཏན་གཉིས་པའི་དངོས་གཞིའི་མཚན་ཉིད། ནང་རབ་ཏུ་དྭངས་པ་གཉེན་པོའི་ཡན་ལག་གིས་དཔྱོད་པ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག ཏིང་ངེ་འཛིན་ལས་སྐྱེས་པའི་དགའ་བདེ་ཕན་ཡོན་གྱི་ཡན་ལག་ཏུ་ལྡན་པའོ། །བསམ་གཏན་གསུམ་པའི་དངོས་གཞིའི་མཚན་ཉིད། གཉེན་པོའི་ཡན་ལག་དྲན་ཤེས་བཞིན་བཏང་སྙོམས་གསུམ་གྱིས་དགའ་བ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག དགའ་བས་དབེན་པའི་སེམས་བདེ་ཕན་ཡོན་གྱི་ཡན་ལག་ཏུ་ལྡན་པ། བསམ་གཏན་བཞི་པའི་དངོས་གཞིའི་མཚན་ཉིད། གཉེན་པོའི་ཡན་ལག་དྲན་པ་དང་བཏང་སྙོམས་ཡོངས་སུ་དག་པས་བདེ་བ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག ཚོར་བ་བཏང་སྙོམས་ཕན་ཡོན་གྱི་ཡན་ལག་ཏུ་ལྡན་པའོ། །རྩོད་ངོར་ནི་མཚོན་བྱ་རྣམས་ལ་སོ་སོའི་སྐྱེ་བོའི་རྒྱུད་ཀྱི་བསམ་གཏན་དང་པོའི་ཞེས་སོགས་དང་། མཚན་ཉིད་རྣམས་ལ་སོ་སོའི་སྐྱེ་བོའི་རྒྱུད་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག་ཅེས་གཞི་ལ་སྦྱར་ནས་འཇོག་གོ །དེ་ལ་བསམ་གཏན་དང་པོའི་རྟོག་དཔྱོད་གཉིས། གཉིས་པའི་ནང་རབ་ཏུ་དྭངས་པ་དང་། གསུམ་པའི་དྲན་ཤེས་བཞིན་བཏང་སྙོམས་གསུམ། བཞི་པའི་དྲན་པ་ཡོངས་སུ་དག་པ་དང་། བཏང་སྙོམས་ཡང་དག་རྣམས་ནི་གཉེན་པོའི་ཡན་ལག་ཡིན་ཏེ། འོག་ས་ལ་འདོད་ཆགས་དང་བྲལ་བར་བྱེད་པའི་རྟོགས་རིགས་ཡིན་པའི་ཕྱིར་རོ། །བསམ་གཏན་དང་པོའི་དང་གཉིས་པའི་དགའ་བདེ་གཉིས། གསུམ་པའི་བདེ་བ། བཞི་པའི་ཚོར་བ་བཏང་སྙོམས་རྣམས་ནི་ཕན་ཡོན་གྱི་ཡན་ལག་ཡིན་ཏེ། བསམ་གཏན་ལ་གནས་པ་རྣམས་ཀྱི་ལུས་སེམས་ལ་ཕན་འདོགས་པར་བྱེད་པའི་ཕྱིར་རོ། །བཞི་ཆར་གྱི་སེམས་རྩེ་གཅིག་པ་རྣམས་ནི་གནས་ཀྱི་ཡན་ལག་ཡིན་ཏེ། ཡན་ལག་གཞན་རྣམས་ཀྱང་འདི་ལ་བརྟེན་ནས་འཇུག་པའི་ཕྱིར་རོ། །གཉིས་པ་གཟུགས་མེད་ཀྱི་དངོས་གཞི་ལ་བཞི་ལས། ནམ་མཁའ་མཐའ་ཡས་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་གཟུགས་དང་ཐོགས་པའི་འདུ་ཤེས་རྣམ་པར་བཤིག་ནས་ནམ་མཁའ་མཐའ་ཡས་སོ་སྙམ་དུ་ཡིད་ལ་བྱས་པས་དངོས་གཞིའི་དུས་སུ་དེ་ཉིད་མངོན་དུ་གྱུར་པའི་ཏིང་ངེ་འཛིན་མཾཚུངས་ལྡན་དང་བཅས་པ། རྣམ་ཤེས་མཐའ་ཡས་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་ཡུལ་ནམ་མཁའི་འདུ་ཤེས་བསལ་ནས་ཡུལ་ཅན་རྣམ་པར་ཤེས་པ་དེ་ཉིད་མཐའ་ཡས་སོ་སྙམ་དུ་ཡིད་ལ་བྱས་པས་དངོས་གཞིའི་དུས་སུ་དེ་ཉིད་སོགས་སོ། །ཅི་ཡང་མེད་པའི་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་གཟུང་བྱ་ཅི་ཡང་མེད་དོ་སྙམ་དུ་ཡིད་ལ་བྱས་པས་དངོས་གཞིའི་དུས་སུ་དེ་ཉིད་སོགས་སོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་འདུ་ཤེས་རགས་པ་ནི་ནད་དང་། འབྲས་དང་། ཟུག་རྔུའོ། །འདུ་ཤེས་མེད་པ་ནི་ཀུན་ཏུ་རྨོངས་པའོ། །འདུ་ཤེས་ཡོད་མིན་མེད་མིན་ནི་ཞི་བའོ་སྙམ་དུ་ཡིད་ལ་བྱས་པས། དངོས་གཞིའི་དུས་སུ་དེ་ཉིད་མངོན་དུ་གྱུར་པའི་ཏིང་ངེ་འཛིན་མཚུངས་ལྡན་དང་བཅས་པའོ། །འདི་ལ་ཡང་རྩོད་ངོར་མཚན་མཚོན་གཉིས་ཀ་གཞི་སྦྱར་བྱའོ། །གཉིས་པ་ཚད་མེད་བཞི་ལ་མཚན་ཉིད། དབྱེ་བ། ས་མཚམས་དང་གསུམ་ལས། དང་པོ་ལ་བྱམས་པ་ཚད་མེད་ཀྱི་མཚན་ཉིད། བདག་རྐྱེན་བསམ་གཏན་གྱི་དངོས་གཞི་ལ་བརྟེན་ཏེ་དམིགས་ཡུལ་སེམས་ཅན་ཚད་མེད་པ་ལ་དམིགས་ནས། རྣམ་པ་བདེ་བ་དང་འཕྲད་པར་འདོད་པའི་ཏིང་ངེ་འཛིན་ཤེས་རབ་མཚུངས་ལྡན་ནོ། །སྙིང་རྗེ་ཚད་མེད་ཀྱི་མཚན་ཉིད། དམིགས་ནས་ཞེས་པ་ཡན་ཆད་འགྲེ། རྣམ་པ་སྡུག་བསྔལ་དང་བྲལ་བར་འདོད་པའི་ཏིང་ངེ་འཛིན་ཤེས་རབ་མཚུངས་ལྡན་ནོ། །དགའ་བ་ཚད་མེད་ཀྱི་མཚན་ཉིད། དམིགས་ནས་རྣམ་པ་བདེ་བ་དང་མི་འབྲལ་བར་འདོད་པའི་ཏིང་ངེ་འཛིན་ཤེས་རབ་མཚུངས་ལྡན་ནོ། །བཏང་སྙོམས་ཚད་མེད་ཀྱི་མཚན་ཉིད། དམིགས་ནས་ཆགས་སྡང་གི་ཉོན་མོངས་པ་དང་བྲལ་བར་འདོད་པའི་ཏིང་ངེ་འཛིན་ཤེས་རབ་མཚུངས་ལྡན་ནོ། །གཉིས་པ་ནི། བཞི་པོ་རེ་རེ་ལ་ཡང་སེམས་ཅན་ལ་དང་། ཆོས་ལ་དང་། དམིགས་པ་མེད་པ་ལ་དམིགས་པ་གསུམ་གསུམ་ལས། དང་པོ་ནི་སེམས་ཅན་སྡུག་བསྔལ་བ་ལ་དམིགས། གཉིས་པ་ནི་སེམས་ཅན་སྐད་ཅིག་གིས་གཡོ་བ་ལ་དམིགས། གསུམ་པ་ནི་སེམས་ཅན་སྒྱུ་མ་ལྟ་བུ་ལ་དམིགས་པ་སྟེ། མཚན་མཚོན་བཅུ་གཉིས་ཀྱི་སྦྱོར་ཚུལ་ཤེས་པར་བྱའོ། །གསུམ་པ་ནི། སེམས་ཅན་ལ་དམིགས་པའི་ཚད་མེད་བཞི་ནི་མུ་སྟེགས་བྱེད་དང་ཐུན་མོང་བ། ཆོས་ལ་དམིགས་པ་བཞི་ནི་ཉན་རང་དང་ཐུན་མོང་བ། དམིགས་པ་མེད་པ་ལ་དམིགས་པ་བཞི་ནི་བྱང་སེམས་ཀྱི་ཐུན་མོང་མིན་པར་བྱང་ས་ལས་བཤད་དོ། །དགུ་པ་ཚོགས་སྒྲུབ་ལ་མཚན་ཉིད། དབྱེ་བ་སྤྱིར་བསྟན་པ་དང་། རྟོགས་དཀའ་བ་བྱེ་བྲག་ཏུ་བཤད་པ་གསུམ་ལས། དང་པོ་ནི། མཐར་ཐུག་གི་བྱང་ཆེན་སྒྲུབ་པ་ལ་ནུས་པ་མཐུ་ཅན་དུ་གྱུར་པའི་བྱང་སེམས་ཀྱི་ཆོས་མཆོག་སྐད་ཅིག་ཐ་མ་ཡན་ཆད་ཀྱི་ཉམས་ལེན་ནོ། །གཉིས་པ་ལ། སྙིང་རྗེ་ཆེན་པོའི་ཚོགས་སྒྲུབ་ནས། གཉེན་པོའི་ཚོགས་སྒྲུབ་ཀྱི་བར་བཅུ་བདུན་ལས། དང་པོའི་མཚན་ཉིད། མཐར་ཐུག་གི་བྱང་ཆེན་འབྱིན་པ་ལ་ཡང་ནུས་པ་མཐུ་ཅན་དུ་གྱུར་པའི་བྱང་སེམས་ཀྱི་ཆོས་མཆོག་སྐད་ཅིག་ཐ་མ་ཡན་ཆད་ཀྱི་སྙིང་རྗེའོ། །དེས་བར་གྱི་བཅུ་བཞི་ལ་འགྲེ་ཞིང་སོ་སོའི་རྐང་གྲངས་གཞུང་ལས་ཤེས། སའི་ཚོགས་སྒྲུབ་ཀྱི་མཚན་ཉིད། མཐར་ཐུག་གི་བྱང་ཆེན་འབྱིན་པ་ལ་ནུས་པ་མཐུ་ཅན་དུ་གྱུར་པའི་བྱང་སེམས་འཕགས་པའི་རྗེས་ཐོབ་ཀྱི་མཁྱེན་པ། གཉེན་པོའི་ཚོགས་སྒྲུབ་ཀྱི་མཚན་ཉིད། མཐར་ཐུག་གི་བྱང་ཆེན་འབྱིན་པ་ལ་མཐུ་ཅན་དུ་གྱུར་པའི་བྱང་འཕགས་ཀྱི་རྒྱུད་ཀྱི་སྤོང་བ་གཉེན་པོའོ། །ས་མཚམས་ལ་དང་པོ་བཅོ་ལྔ་བྱང་སེམས་ཀྱི་ཆོས་མཆོག་སྐད་ཅིག་ཐ་མ་ནས་རྒྱུན་མཐའི་བར་ན་ཡོད། སའི་ཚོགས་སྒྲུབ་ས་བཅུའི་རྗེས་ཐོབ་དང་། གཉེན་པོའི་ཚོགས་སྒྲུབ་ས་བཅུའི་མཉམ་གཞག་ན་ཡོད། གསུམ་པ་ལ་ཡེ་ཤེས་ཀྱི་ཚོགས་བྱེ་བྲག་ཏུ་བཤད་པ། གཟུངས་ཀྱི་ཚོགས་དང་། སའི་ཚོགས་དང་། གཉེན་པོའི་ཚོགས་བྱེ་བྲག་ཏུ་བཤད་པ་བཞི། དང་པོ་ལ་ཡེ་ཤེས་ཀྱི་ཚོགས་སྒྲུབ་ཀྱི་མཚན་ཉིད། ས་མཚམས་སྔར་བཤད་པ་ཉིད་ཡིན་ལ། ཡེ་ཤེས་ཀྱི་ཚོགས་ཀྱི་མཚན་ཉིད། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་མཁྱེན་པའོ། །དབྱེ་ན་ཉི་ཤུ་ལས། ནང་སྟོང་པ་ཉིད་རྟོགས་པའི་ཡེ་ཤེས་ཀྱི་མཚན་ཉིད། ནང་སྟོང་པ་ཉིད་ལ་སྒོམ་བྱུང་གཙོ་བོར་གྱུར་པས་ནང་སྟོང་པ་ཉིད་ལ་སྒྲོ་འདོགས་གཅོད་ནུས་ཀྱི་མཁྱེན་པའོ། །དེས་གཞན་རྣམས་ལ་འགྲེའོ། །ས་མཚམས་ལ་ནང་དང་། ཕྱི་དང་། གཉིས་ཀ་དང་། སྟོང་པ་ཉིད་སྟོང་པ་ཉིད་རྟོགས་པའི་ཡེ་ཤེས་བཞི་ནི་མོས་སྤྱོད་བཞི་ན་རིམ་པ་བཞིན་ཡོད། ཆེན་པོ་དང་། དོན་དམ་པ་དང་། འདུས་བྱས་དང་། འདུས་མ་བྱས་དང་། མཐའ་ལས་འདས་པ་དང་། ཐོག་མཐའ་མེད་པ་དང་། དོར་བ་མེད་པ་སྟོང་པ་ཉིད་རྟོགས་པའི་ཡེ་ཤེས་བདུན་ནི། ས་དང་པོ་ནས་བདུན་པའི་བར་ལ་རིམ་པ་བཞིན་ཡོད། རང་བཞིན་དང་། ཆོས་ཐམས་ཅད་སྟོང་པ་ཉིད་རྟོགས་པའི་ཡེ་ཤེས་གཉིས་ནི་ས་བརྒྱད་པ་དང་། རང་གི་མཚན་ཉིད་དང་མི་དམིགས་པ་སྟོང་པ་ཉིད་རྟོགས་པའི་ཡེ་ཤེས་གཉིས་ནི་ས་དགུ་པ་དང་། དངོས་པོ་མེད་པའི་ངོ་བོ་ཉིད་དང་། དངོས་པོ་སྟོང་པ་ཉིད་རྟོགས་པའི་ཡེ་ཤེས་གཉིས་ནི་ས་བཅུ་པ་དང་། དངོས་པོ་མེད་པ་དང་། རང་གི་ངོ་བོ་དང་། གཞན་གྱི་ངོ་བོ་སྟོང་པ་ཉིད་རྟོགས་པའི་ཡེ་ཤེས་གསུམ་ནི་སངས་རྒྱས་ཀྱི་སར་ཡོད་དོ། །གཉིས་པ་ལ་མཚན་ཉིད་དང་། དབྱེ་བ། ས་མཚམས་གསུམ་ལས། དང་པོ་ནི། གཟུངས་ཀྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས་དམ་པའི་ཆོས་འཛིན་ནུས་པའི་དྲན་པ་ཤེས་རབ་མཚུངས་ལྡན་ནོ། །གཉིས་པ་ལ། ཚིག་གི དོན་གྱི། བཟོད་པའི། གསང་སྔགས་ཀྱི་གཟུངས་དང་བཞི་ལས། དང་པོའི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་སངས་རྒྱས་རྣམས་ཀྱིས་གསུངས་པའི་ཆོས་རྒྱ་ཆེན་པོ་མི་བརྗེད་པར་འཛིན་ནུས་པའི་དྲན་པ་ཤེས་རབ་མཚུངས་ལྡན་ནོ། །གཉིས་པའི་མཚན་ཉིད། བརྟེན་ནས་སངས་རྒྱས་རྣམས་ཀྱིས་གསུངས་པའི་དོན་རྒྱ་ཆེན་པོ་མི་བརྗེད་པར་འཛིན་ནུས་པའི་དྲན་པ་ཤེས་རབ་མཚུངས་ལྡན་ནོ། །གསུམ་པ་ལ། བཟོད་པའི་རྒྱུར་གྱུར་གྱི་གཟུངས་དང་། བཟོད་པ་དངོས་ཀྱི་གཟུངས་གཉིས་ལས། དང་པོའི་མཚན་ཉིད། བརྟེན་ནས་རང་བཞིན་སྐྱེ་མེད་ཀྱི་དོན་ལ་འཇིག་རྟེན་པའི་སྒོམ་བྱུང་གི་གསལ་སྣང་ཐོབ་པའི་དྲན་པ་ཤེས་རབ་མཚུངས་ལྡན་ནོ། །ཕྱི་མའི་མཚན་ཉིད། གང་ཞིག ཆོས་ཉིད་མངོན་སུམ་དུ་མཐོང་བའི་དྲན་པ་ཤེས་རབ་མཚུངས་ལྡན་ནོ། །བཞི་པའི་མཚན་ཉིད། བརྟེན་ནས་གཞན་ལ་ཕན་པའི་དོན་དུ་སྔགས་རྣམས་ཀྱིས་རང་གི་འབྲས་བུ་འགྲུབ་པར་བྱིན་གྱིས་རློབ་ནུས་པའི་དྲན་པ་ཤེས་རབ་མཚུངས་ལྡན་ནོ། །གསུམ་པ་ལ་སྨོན་ལམ་དང་བསམ་གཏན་གྱི་དབང་གིས་ཐོབ་པའི་གཟུངས་བཞི་ཆར་ཡང་ཐེག་ཆེན་གྱི་ཚོགས་ལམ་ནས་ཡོད། བརྟན་པ་དང་། རྒྱ་ཆེ་བའི་གཟུངས་བཞི་ཆར་ས་དང་པོ་ནས་ཡོཾད་པར་གསལ་ལོ། །གཞན་དག་ཐེག་པ་གསུམ་གྱི་ཚོགས་ལམ་ཆེན་པོ་ནས་ཆོས་རྒྱུན་གྱི་ཏིང་ངེ་འཛིན་ཐོབ་པས་ཁྱབ་པར་སྨྲ་ཞིང་། གསུང་རབ་མཐའ་དག་གི་དགོངས་འགྲེལ་རྩོམ་པ་ནི། རྒྱུན་ཞུགས་དང་། ཕྱིར་འོང་གཉིས་འདོད་པ་ལ་འདོད་ཆགས་དང་མ་བྲལ་བའི་རྣམ་གཞག་ཙམ་ཡང་བློ་ལ་མ་ཤར་བཞིན་དུ་གདུལ་བྱ་བསླུ་བར་བྱེད་པར་སྣང་བས་བག་ཡོད་པར་གྱིས་ཤིག གསུམ་པ་ལ། རྒྱུའི་སའི་ཡོངས་སྦྱོང་དང་། འབྲས་བུའི་སའི་ངོ་བོ་གཉིས། དང་པོའི་མཚན་ཉིད། མཉམ་གཞག་ཏུ་ཐོབ་པའི་སའི་སྐྱོན་ཟད་ཅིང་ཡོན་ཏན་སྦྱོང་བའི་ཆེད་དུ་མཉམ་གཞག་གི་རྟོགས་པ་དང་མཐུན་པའི་སྒོ་ནས་རང་གཞན་གྱི་དོན་སྒྲུབ་པར་བྱེད་པའི་བྱང་སེམས་འཕགས་པའི་རྗེས་ཐོབ་ཀྱི་མཁྱེན་པའོ། །དབྱེ་ན་ས་དང་པོའི་ཡོངས་སྦྱོང་ནས་དགུ་པའི་ཡོངས་སྦྱོང་གི་བར་དགུ། དང་པོའི་མཚན་ཉིད། ས་དང་པོའི་མཉམ་གཞག་ཏུ་ཐོབ་པའི་སྐྱོན་ཟད་ཅིང་ཡོན་ཏན་ཡོངས་སུ་སྦྱོང་བའི་ཆེད་དུ་ས་དང་པོའི་རྟོགས་པ་དང་མཐུན་པའི་སྒོ་ནས་རང་གཞན་གྱི་དོན་སྒྲུབ་པར་བྱེད་པའི་ས་དང་པོའི་རྗེས་ཐོབ་ཀྱི་མཁྱེན་པའོ། །དབྱེ་ན་རང་དོན་ཡིད་བྱེད་ཀྱིས་དབེན་པའི་བསམ་པ་ལ་སོགས་པ་བཅུའོ། །ས་གཉིས་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་དགེ་བ་ཆོས་སྡུད་ཀྱི་ཚུལ་ཁྲིམས་སོགས་བརྒྱད་དོ། །ས་གསུམ་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་ཐོས་པས་མི་ངོམས་པ་ལ་སོགས་པ་ལྔའོ། །ས་བཞི་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་དགོན་པར་གནས་པ་ལ་སོགས་པ་བཅུའོ། །ས་ལྔ་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་རྙེད་བཀུར་གྱི་དོན་དུ་རབཾ་བྱུཾང་དང་འགྲོགས་པ་ལ་སོགས་སྤོང་བ་བཅུའོ། །ས་དྲུག་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་སྦྱིན་པའི་ཕར་ཕྱིན་སོགས་བཅུ་གཉིས་སོ། །ས་བདུན་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་སྤང་བྱ་བདག་ཏུ་ལྟ་བ་སོགས་ཉི་ཤུ་སྤོང་བར་བྱེད་པའི་གཉེན་པོ་རྣམ་པར་ཐར་པའི་སྒོ་སྟོང་པ་ཉིད་ཡང་དག་པར་ཤེས་པ་སོགས་ཉི་ཤུའོ། །ས་བརྒྱད་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་སེམས་ཅན་ཀུན་ཡིད་ཤེས་ནས་ལ་སོགས་པ་བརྒྱད་དོ། །ས་དགུ་པའི་ཡོངས་སྦྱོང་ལ་མཚན་ཉིད་འགྲེ། དབྱེ་ན་སྨོན་ལམ་མཐའ་ཡས་པ་བཅུ་གཉིས་སོ། །གཉིས་པ་འབྲས་བུའི་སའི་ངོ་བོ་ལ། མཚན་ཉིད་དང་། འདའ་ས་ས་དགུ་ངོས་གཟུང་བ་གཉིས། དང་པོ་ནི། འདའ་ས་ས་དགུ་ལས་འདས་ནས་དེ་པའི་མིང་གིས་གདགས་སུ་རུང་བའི་བྱང་སེམས་ཀྱི་ས་བཅུ་པའོ། །གཉིས་པ་ནི། རིགས་ཀྱི་ས་དང་། བརྒྱད་པའི་ས་དང་། མཐོང་བའི་ས་དང་། སྲབ་པའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་དང་དགུའོ། །དང་པོ་ནི། ངེས་པའི་ཉན་རང་གི་སྦྱོར་ལམ་བཞི། གཉིས་པ་ནི། རྒྱུན་ཞུགས་ཞུགས་པའི་མངོན་རྟོགས། གསུམ་པ་ནི། རྒྱུན་ཞུགས་འབྲས་གནས་ཙམ་པོའི་མངོན་རྟོགས། བཞི་པ་ནི། ཕྱིར་འོང་འབྲས་གནས་ཙམ་པོའི་མངོན་རྟོགས། ལྔ་པ་ནི། ཕྱིར་མི་འོང་འབྲས་གནས་ཙམ་པོའི། དྲུག་པ་ནི། དགྲ་བཅོམ་འབྲས་གནས་ཀྱི། བདུན་པ་ནི། ཞུགས་པ་ཕྱི་མ་གསུམ་གྱི། བརྒྱད་པ་ནི། རང་རྒྱལ་དགྲ་བཅོམ་པའི་མངོན་རྟོགས། དགུ་པ་ནི། ཇི་སྐད་བཤད་པའི་བྱང་སེམས་ཀྱི་ས་དགུའོ། །བཞི་པ་ལ་གཉེན་པོའི་ཚོགས་སྒྲུབ་ཀྱི་མཚན་ཉིད་བཤད་ཟིན། དབྱེ་ན་མཐོང་སྤང་གཉེན་པོའི་ཚོགས་སྒྲུབ་དང་། སྒོམ་སྤང་གཉེན་པོའི་ཚོགས་སྒྲུབ་གཉིས། དང་པོའི་མཚན་ཉིད། མཐར་ཐུག་གི་བྱང་ཆེན་སྒྲུབ་པ་ལ་ནུས་པ་མཐུ་ཅན་དུ་གྱུར་པའི་བྱང་སེམས་འཕགས་པའི་རྒྱུད་ཀྱི་མཐོང་སྤང་གི་སྤོང་བ་གཉེན་པོའོ། །དབྱེ་ན་སྤང་བྱ་གཟུང་འཛིན་གྱི་རྣམ་རྟོག་བཞི་ཡོད་པ་ལས། གཉེན་པོ་ཡང་དེ་ལྟར་རོ། །གཉིས་པའི་མཚན་ཉིད། མཐར་ཐུག་གི་བྱང་ཆེན་སྒྲུབ་པ་ལ་ནུས་པ་མཐུ་ཅན་དུ་གྱུར་པའི་བྱང་སེམས་འཕགས་པའི་རྒྱུད་ཀྱི་སྒོམ་སྤང་གི་སྤོང་བ་གཉེན་པོ། དབྱེ་ན་ས་གཉིས་པ་ནས་བཅུ་པའི་སྤོང་བ་གཉེན་པོའི་བར་དགུ་ཡོད་ཅིང་། དེ་རེ་རེ་ལ་ཡང་སྤང་བྱ་གཟུང་འཛིན་གྱི་རྣམ་རྟོག་བཞི་བཞི་ཡོད་པས་གཉེན་པོའི་ཚོགས་སྒྲུབ་ཀྱང་རྣམ་པ་བཞི་བཞིའོ། །བཅུ་པ་ངེས་འབྱུང་སྒྲུབ་པའི་མཚན་ཉིད། རང་གི་ངེས་པར་འབྱུང་ས་བརྒྱད་པོ་གང་རུང་དུ་མཚན་འཛིན་གྱི་བར་ཆད་མེད་པར་ངེས་པར་འབྱུང་བར་འགྱུར་བའི་དག་སའི་ཡེ་ཤེས། དབྱེ་ན་ཆེད་དུ་བྱ་བའི་ངེས་འབྱུང་སྒྲུབ་པ་ནས་ལམ་གྱི་ཡུལ་ཅན་གྱི་ངེས་འབྱུང་སྒྲུབ་པའི་བར་བརྒྱད། དང་པོའི་མཚན་ཉིད། རང་གི་ངེས་པར་འབྱུང་ས་ཆེན་པོ་གསུམ་དུ་མཚན་འཛིན་གྱི་བར་ཆད་མེད་པར་ངེས་པར་འབྱུང་བར་འགྱུར་བའི་དག་སའི་ཡེ་ཤེས། དེས་གཞན་རྣམས་ལ་ཡང་འགྲེ་ཞིང་། ས་མཚམས་ཡང་དེ་ཉིད་ཀྱིས་རྟོགས་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ་ལས་སྐབས་དང་པོའོ།། །།གཉིས་པ་ལམ་ཤེས་ལ་མཚན་ཉིད། དབྱེ་བ་གཉིས། དང་པོ་ནི། ལམ་གསུམ་རང་བཞིན་མེད་པར་མངོན་སུམ་དུ་རྟོགས་པའི་ཐེག་ཆེན་འཕགས་པའི་མཁྱེན་པའོ། །གཉིས་པ་ལ་ཡུལ་གྱི་སྒོ་ནས་དབྱེ་བ། རྒྱུ་འབྲས་ཀྱི་སྒོ་ནས་དབྱེ་བ། མཉམ་རྗེས་ཀྱི་སྒོ་ནས་དབྱེ་བ། ངོ་བོའི་སྒོ་ནས་དབྱེ་བ་དང་བཞི་ལས། དང་པོ་ལ་ཉན་ཐོས་ཀྱི་ལམ་ཤེས་པའི་ལམ་ཤེས། རང་རྒྱལ་གྱི་ལམ་ཤེས་པའི་ལམ་ཤེས། བྱང་སེམས་ཀྱི་ལམ་ཤེས་པའི་ལམ་ཤེས་དང་གསུམ། མཚན་ཉིད་འོག་ཏུ་འབྱུང་ངོ་། །གཉིས་པ་ལ་རྒྱུའི་དང་། འབྲས་བུའི་ལམ་ཤེས་གཉིས། མཚན་ཉིད་གཞན་སྔར་དང་འདྲ་བ་ལས། བྱང་སེམས་འཕགས་པའི་རྒྱུད་ཀྱི་མཁྱེན་པ་ཞེས་དང་། སངས་རྒྱས་འཕགས་པའི་རྒྱུད་ཀྱི་མཁྱེན་པ་ཞེས་སོགས་སྦྱར་རོ། །གསུམ་པ་ལ་ཐེག་ཆེན་འཕགས་པའི་མཉམ་རྗེས་གཉིས་སོ། །བཞི་པ་ལ་བཅུ་གཅིག་ལས། དང་པོ་ལམ་ཤེས་ཀྱི་ཡན་ལག་ལ་མཚན་ཉིད། དབྱེ་བ། འཕྲོས་པའི་དོན་དང་གསུམ། དང་པོ་ནི་ཆོས་ལྔ་གང་རུང་གིས་བསྡུས་པའི་ལམ་ཤེས་ཀྱི་ཁྱད་ཆོས་སོ། །གཉིས་པ་ལ་རྟེན་གྱི་ཡན་ལག རང་བཞིན་གྱི་ཡན་ལག བྱེད་ལས་ཀྱི་ཡན་ལག་དང་གསུམ། དང་པོ་ལ་དངོས་སུ་དང་། བརྒྱུད་ནས་སྐྱེ་བའི་རྟེན་གཉིས། དང་པོ་ལ་ལམ་ཤེས་དངོས་སུ་སྐྱེ་བར་རུང་བ་དང་། ལམ་ཤེས་དངོས་སུ་སྐྱེ་བའི་ཡུལ་ངེས་པ་གཉིས། དང་པོ་ནི་ང་རྒྱལ་གྱིས་མཚོན་པའི་ཉོན་མོངས་པ་མངོན་གྱུར་བ་དང་བྲལ་བའོ། །གཉིས་པ་ནི་བྱང་ཆུབ་མཆོག་ཏུ་སེམས་བསྐྱེད་པའོ། །བརྒྱུད་ནས་སྐྱེ་བའི་རྟེན་ནི་ལམ་ཤེས་དངོས་སུ་མི་སྐྱེ་བའི་སེམས་ཅན་ཐམས་ཅད་ལ་ཡང་ལམ་ཤེས་བརྒྱུད་ནས་སྐྱེ་བས་ཁྱབ་པའོ། །གཉིས་པ་རང་བཞིན་གྱི་ཡན་ལག་ནི། གཞན་དོན་དུ་འཁོར་བར་སྐྱེ་བ་ལེན་པའི་རྒྱུར་གྱུར་པའི་ཉོན་མོངས་ཀྱི་མིང་ཅན་ཆེད་དུ་གཉེར་ནས་མི་སྤོང་བའོ། །གསུམ་པ་བྱེད་ལས་ཀྱི་ཡན་ལག་ནི་སེམས་ཅན་འཁོར་དུ་མ་འདུས་པ་བསྡུད་པ་དང་། བསྡུས་པ་སྨིན་པ་ལ་སོགས་པའོ། །གསུམ་པ་ལ་ཁྱབ་པ་ལས་འཕྲོས་པ་དང་། རང་བཞིན་ལས་འཕྲོས་པ་གཉིས། དང་པོ་ལ། མཐར་ཐུག་ཐེག་པ་གཅིག་ཏུ་ངེས་པ་ཡིན་ཏེ། ཉན་རང་དགྲ་བཅོམ་ལྷག་མེད་དུ་མྱ་ངན་ལས་འདས་པ་རྣམས་ཀྱང་མཐར་ཐེག་ཆེན་གྱི་ལམ་དུ་ཞུགས་ནས་སངས་རྒྱ་བ་ཡིན་པའི་ཕྱིར་རོ། །འོ་ན་དེ་དག་དང་པོར་ཐེག་ཆེན་གྱི་ལམ་གྱི་ས་མཚམས་གང་ནས་ཞུགས་ཞེ་ན། ཐེག་ཆེན་གྱི་ཚོགས་ལམ་ཆུང་ངུ་ནས་འཇུག་སྟེ། ཐེག་ཆེན་གྱི་ལམ་དུ་ཐོག་མར་འཇུག་པའི་སྒོ་ནི་འདུན་ལྡན་སེམས་བསྐྱེད་ཡིན་པའི་ཕྱིར་དང་། ཆོས་ཀྱི་བདག་མེད་ཐོས་བསམ་གྱིས་གཏན་ལ་དབབ་དགོས་པའི་ཕྱིར་རོ། །འོ་ན་ཉན་རང་ཐེག་ཆེན་གྱི་ལམ་དུ་ཞུགས་ནས། ཐེག་ཆེན་གྱི་ཚོགས་སྦྱོར་གྱི་གནས་སྐབས་སུ་སྔར་གྱི་གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་དེ་ཇི་ལྟར་ལྡན་ཞེ་ན། དགྲ་བཅོམ་གྱི་རྟོགས་པ་སྔོན་དུ་སོང་བ་ལ་ནི་ཕལ་ཆེར་དབང་ལྡན་གྱི་ཚུལ་དུ་ལྡན་ཅིང་རེས་འགའ་མངོན་དུ་གྱུར་པ་སྲིད་དེ། ཉོན་སྒྲིབ་སྤངས་ཟིན་པས་དགོས་པ་མེད་པའི་ཕྱིར་དང་། སེམས་ཅན་གྱི་ལོག་སྒྲུབ་ཀྱིས་ཡིད་སྐྱོ་བའི་ཚེ་ན་སྔར་གྱི་རྟོགས་པ་ལ་གནས་སྲིད་པའི་ཕྱིར་རོ། །རྒྱུན་ཞུགས་སོགས་ཀྱི་རྟོགས་པ་སྔོན་དུ་སོང་བ་ལ་ནི་ཉོན་མོངས་ཀྱི་ལྷག་མ་སྤང་དགོས་པས་དེའི་གཉེན་པོ་གང་ཟག་གི་བདག་མེད་རྟོགས་པའི་རྟོགས་རིགས་སྒོམ་པའི་ཚེ་མངོན་དུ་འགྱུར་ཏེ། སྔར་གང་ཟག་གི་བདག་མེད་མངོན་སུམ་རྟོགས་པའི་མཐོང་ལམ་སྔོན་དུ་སོང་བས་དེ་ནམ་ཞིག་སྒོམ་པའི་ཚེ་མངོན་སུམ་དུ་རྟོགས་པ་ཁོ་ན་ཡིན་པའི་ཕྱིར་རོ། །དེའི་ཚེ་ཆོས་ཀྱི་བདག་མེད་རྟོགས་པའི་ཚོགས་སྦྱོར་ནི་མངོན་དུ་མི་འགྱུར་ཏེ། དེ་ནི་ཆོས་ཀྱི་བདག་མེད་དོན་སྤྱིའི་ཚུལ་གྱིས་རྟོགས་པའི་བློ་ཡིན་ལ། ཅིག་ཤོས་ནི་རྣལ་འབྱོར་མངོན་སུམ་ཡིན་པའི་ཕྱིར་རོ། །སེམས་ཅན་ཐམས་ཅད་སངས་རྒྱ་བ་ཡིན་ཏེ། སེམས་ཅན་ཐམས་ཅད་ཀྱི་རྒྱུད་ལ་རྒྱུ་རིགས་ཡོད། འགལ་རྐྱེན་སྒྲིབ་པ་སྤོང་དུ་རུང་། མཐུན་རྐྱེན་སངས་རྒྱས་ཀྱི་ཕྲིན་ལས་འཇུག་ཏུ་རུང་། ཉེར་ལེན་གྱི་རྒྱུ་རྒྱུན་ཆད་པ་མི་སྲིད་པའི་ཕྱིར་རོ། །འོ་ན་འཁོར་བ་ལ་མཐའ་ཡོད་པར་འགྱུར་རོ་ཞེ་ན། འཁོར་བ་ལ་མཐའ་མེད་དེ། སེམས་ཅན་ཐམས་ཅད་སངས་རྒྱས་ཟིན་པའི་དུས་མི་སྲིད་པའི་ཕྱིར་ཏེ། སངས་རྒྱས་རེ་རེས་སེམས་ཅན་དཔག་ཏུ་མེད་པ་མྱ་ངན་ལས་བཟླ་ཡང་སེམས་ཅན་གྱི་གྲངས་ཉུང་བ་མི་སྲིད་པའི་ཕྱིར་དང་། སེམས་ཅན་ལ་གྲངས་མེད་པའི་ཕྱིར་རོ། །གཉིས་པ་ནི། བྱང་སེམས་འཕགས་པས་ཆེད་དུ་གཉེར་ནས་མི་སྤོང་རྒྱུའི་ཉོན་མོངས་དེ་དག་གང་ཡིན་ཞེ་ན། འདི་ལ་ཉོན་མོངས་མཚན་ཉིད་པ་ལ་འདོད་པ་དང་། ཉོན་མོངས་བཏགས་པ་བ་ལ་འདོད་པ་དང་། ཉོན་མོངས་པའི་བག་ཆགས་ལ་འདོད་པ་དང་གསུམ་ལས། ཕྱི་མ་དེ་ཉིད་འཐད་དེ། རྒྱུད་བླའི་འགྲེལ་པར་ཉན་རང་དགྲ་བཅོམ་པ་དང་བྱང་སེམས་འཕགས་པ་རྣམས་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་ལེན་པར་གསུངས་པའི་ཕྱིར་རོ། །གཉིས་པ་ཉན་ཐོས་ཀྱི་ལམ་ཤེས་པའི་ལམ་ཤེས་ལ་ཤེས་བྱ་ཉན་ཐོས་ཀྱི་ལམ། ཡུལ་ཅན་དེ་ཤེས་པའི་ལམ་ཤེས། རྒྱུ་ངེས་འབྱེད་ཆ་མཐུན་དང་གསུམ་ལས། དང་པོའི་མཚན་ཉིད། རྟོགས་རིགས་གསུམ་གྱི་ནང་ནས་གང་ཟག་གི་བདག་མེད་རྟོགས་པའི་རྟོགས་རིགས་སུ་གྱུར་པའི་སྒོ་ནས་ཉོན་སྒྲིབ་ཀྱི་གཉེན་པོའི་རིགས་སུ་གནས་པ། དབྱེ་ན་གང་ཟག་གི་སྒོ་ནས་དང་། རྣམ་པའི་སྒོ་ནས་དབྱེ་བ་གཉིས། དང་པོ་ལ་ཉན་ཐོས་ཀྱི་རྒྱུད་ཀྱི་ཤེས་བྱ་ཉན་ཐོས་ཀྱི་ལམ། རང་རྒྱལ་གྱི་རྒྱུད་ཀྱི་ཤེས་བྱ་ཉན་ཐོས་ཀྱི་ལམ། བྱང་སེམས་ཀྱི་རྒྱུད་ཀྱི་ཤེས་བྱ་ཉན་ཐོས་ཀྱི་ལམ་དང་གསུམ། གཉིས་པ་ལ། ཤེར་ཕྱིན་གྱི་མདོ་ལས་བདེན་པ་བཞིའི་སྟེང་གི་མི་རྟག་ལ་སོགས་པའི་རྣམ་པ་ཉེར་དྲུག་གསུངས་ཏེ། སྡུག་བདེན་གྱི་མི་རྟག སྡུག་བསྔལ། སྟོང་པ། བདག་མེད་པའི་རྣམ་པ་སྟེ་བཞི། ཀུན་བདེན་པའི་ནད་དང་། འབྲས་དང་། ཟུག་རྔུ་དང་། སྡིག་པའི་རྣམ་པ་སྟེ་བཞི། སྡུག་ཀུན་ཐུན་མོང་བའི་ཕ་རོལ་དང་། འཇིག་པའི་ཆོས་ཅན་དང་། གཡོ་བ་དང་། རབ་ཏུ་འཇིག་པ་དང་། འཇིགས་པ་དང་ནད་འགོ་བ་དང་། འཚེ་བའི་རྣམ་པ་སྟེ་བདུན། འགོག་བདེན་གྱི་བདཾག་མེད་པ་དང་། ཞི་བ་དང་། དབེན་པ་དང་། སྟོང་པ་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱེད་པ་མེད་པའི་རྣམ་པ་སྟེ་བདུན། ལམ་བདེན་གྱི་ལམ་དང་། རིགས་པ་དང་། སྒྲུབ་པ་དང་། ངེས་པར་འབྱིན་པའི་རྣམ་པ་སྟེ་བཞི་རྣམས་སོ། །འདི་དག་འཕགས་སེང་གཉིས་ཀས་མངོན་པ་ནས་གསུངས་པའི་མི་རྟག་སོགས་བཅུ་དྲུག་དང་སྦྱོར་བར་ཡང་མཛད་དོ། །གཉིས་པ་ཡུལ་ཅན་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཆེད་དུ་ཉན་ཐོས་ཀྱི་ལམ་གྱི་དམིགས་རྣམ་མི་དམིགས་པར་མངོན་སུམ་དུ་རྟོགས་པའི་བྱང་སེམས་འཕགས་པའི་མཁྱེན་པའོ། །གསུམ་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་གྱི་མཚན་ཉིད། ཉན་ཐོས་ཀྱི་ལམ་མངོན་སུམ་ཤེས་པའི་ཆེད་དུ་གང་ཟག་གི་བདག་མེད་རྟོགས་པའི་རྟོགས་རིགས། འཇིག་རྟེན་པའི་སྒོམ་བྱུང་གཙོ་བོར་གྱུར་པའི་བྱང་སེམས་སོ་སྐྱེའི་མཁྱེན་པ། དབྱེ་ན་བྱང་སེམས་ཀྱི་དྲོད། རྩེ་མོ། བཟོད་པ། ཆོས་མཆོག་བཞིའོ། །གསུམ་པ་རང་རྒྱལ་གྱི་ལམ་ཤེས་པའི་ལམ་ཤེས་ལ། ལམ་གྱི་ཁྱད་པར་བྱེད་ཆོས། ཁྱད་གཞི་ལམ་གྱི་ངོ་བོ། རྒྱུ་ངེས་འབྱེད་ཆ་མཐུན་དང་གསུམ་ལས། འདིར་བསྟན་ལམ་གྱི་ཁྱད་པར་བྱེད་ཆོས་ཀྱི་མཚན་ཉིད། ཁྱད་ཆོས་གང་གིས་ཉན་ཐོས་དགྲ་བཅོམ་ལས་ཁྱད་པར་དུ་བྱེད་པའི་ཐེག་པ་འབྲིང་གི་དགྲ་བཅོམ་པའི་རྒྱུད་ཀྱི་ཡེ་ཤེས། དབྱེ་ན་འདིར་བསྟན་ལམ་བགྲོད་ཚུལ་གྱི་ཁྱད་པར་དང་། ཆོས་སྟོན་ཚུལ་གྱི་ཁྱད་པར་གཉིས། དང་པོའི་མཚན་ཉིད། སངས་རྒྱས་དང་ཉན་ཐོས་མེད་པའི་འདོད་ཁམས་སུ་རང་བྱུང་གི་བྱང་ཆུབ་མངོན་དུ་བྱེད་པའི་ཐེག་འབྲིང་སྐྱེས་བུའི་རྒྱུད་ཀྱི་མཁྱེན་པ། གཉིས་པའི་མཚན་ཉིད། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་སྒྲ་མེད་ལུས་ཀྱི་རྣམ་འགྱུར་གྱི་སྒོ་ནས་ཆོས་སྟོན་པའི་བདག་རྐྱེན་བྱེད་པའི་ཐེག་འབྲིང་སྐྱེས་བུའི་རྒྱུད་ཀྱི་མཁྱེན་པའོ། །གཉིས་པ་ལ་ཤེས་བྱ་རང་རྒྱལ་གྱི་ལམ་དང་། ཡུལ་ཅན་དེ་ཤེས་པའི་ལམ་ཤེས་གཉིས་ལས། དང་པོའི་མཚན་ཉིད། རྟོགས་རིགས་གསུམ་གྱི་ནང་ནས་གཟུང་བ་ཆོས་ཀྱི་བདག་མེད་རྟོགས་པའི་རིགས་སུ་གྱུར་པའི་སྒོ་ནས་ཤེས་སྒྲིབ་གཟུང་རྟོག་གི་གཉེན་པོའི་རིགས་སུ་གནས་པའམ། ཡང་ན་རྟོགས་རིགས་རང་ངོས་ནས་གཟུང་རྟོག་སྤོང་བ་དང་། འཛིན་རྟོགས་མི་སྤོང་བ་དང་། རྟེན་གྱི་ཁྱད་པར་གསུམ་དང་ལྡན་པའི་རྟོགས་རིགས་སོ། །དབྱེ་ན་གང་ཟག་གི་སྒོ་ནས་དང་། རྣམ་པའི་སྒོ་ནས་དབྱེ་བ་གཉིས། དང་པོ་ལ་རང་རྒྱལ་གྱི་རིགས་ཅན་གྱི་རྒྱུད་ཀྱི་ཤེས་བྱ་རང་རྒྱལ་གྱི་ལམ། བྱང་སེམས་ཀྱི་རྒྱུད་ཀྱི་ཤེས་བྱ་རང་རྒྱལ་གྱི་ལམ་གཉིས་སོ། །གཉིས་པ་ལ་རྗེས་ཐོབ་ཀྱི་རྣམ་པ་ལྔ། མཉམ་གཞག་གི་རྣམ་པ་དྲུག་སྟེ་སྐབས་བཞི་པར་འཆད་དོ། །གཉིས་པ་ཡུལ་ཅན་རང་རྒྱལ་གྱི་ལམ་ཤེས་ཀྱི་མཚན་ཉིད། གདུལ་བྱ་རང་རྒྱལ་གྱི་རིགས་ཅན་རྗེས་སུ་གཟུང་བའི་ཆེད་དུ་རང་རྒྱལ་ལམ་གྱི་དམིགས་རྣམ་མི་དམིགས་པར་མངོན་སུམ་དུ་རྟོགས་པའི་བྱང་སེམས་འཕགས་པའི་མཁྱེན་པའོ། །གསུམ་པ་རང་རྒྱལ་གྱི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་གྱི་མཚན་ཉིད། རང་རྒྱལ་གྱི་ལམ་མངོན་སུམ་དུ་ཤེས་པའི་ཆེད་དུ་གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་ལ་འཇིག་རྟེན་པའི་སྒོམ་བྱུང་གཙོ་བོར་གྱུར་པའི་བྱང་སེམས་སོ་སྐྱེའི་མཁྱེན་པའོ། །དབྱེ་ན་བྱང་སེམས་ཀྱི་སྦྱོར་ལམ་དྲོད་རྩེ་མོ་བཟོད་པ་ཆོས་མཆོག་བཞིའོ། །བཞི་པ་བྱང་སེམས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ནི། གདུལ་བྱ་བྱང་སེམས་ཀྱི་རིགས་ཅན་རྗེས་སུ་གཟུང་བ་དང་། རང་ཉིད་རྣམ་མཁྱེན་ཐོབ་པའི་ཆེད་དུ་བྱང་སེམས་ཀྱི་ལམ་གྱི་དམིགས་རྣམ་མི་དམིགས་པར་མངོན་སུམ་དུ་རྟོགས་པའི་མཁྱེན་པ། དབྱེ་ན་ཐེག་ཆེན་གྱི་མཐོང་ལམ་དང་། སྒོམ་ལམ་གཉིས་ལས། དང་པོའི་མཚན་ཉིད། རང་བཞིན་རྣམ་དག་གི་ཆོས་དབྱིངས་དང་པོར་མངོན་སུམ་དུ་མཐོང་བའི་མཉམ་གཞག་གི་རྒྱུན་གྱི་ཁོངས་སུ་གཏོགས་པའི་མཁྱེན་པ་གང་ཞིག འདི་ཕྱིའི་ཕན་ཡོན་གཉིས་དང་ལྡན་པ། དབྱེ་ན་བྱང་སེམས་ཀྱི་མཐོང་ལམ་སྡུག་བསྔལ་ལ་ཆོས་བཟོད་ནས་ལམ་ལ་རྗེས་ཤེས་ཀྱི་བར་བཅུ་དྲུག འདིར་བསྟན་བྱང་སེམས་ཀྱི་མཐོང་ལམ་སྡུག་བསྔལ་ལ་ཆོས་བཟོད་ཀྱི་མཚན་ཉིད། བྱང་སེམས་ཀྱི་མཐོང་ལམ་གང་ཞིག དེ་བཞིན་ཉིད་དང་སངས་རྒྱས་ཕན་ཚུན་རྣམ་གྲངས་ཀྱིས་གནས་པར་ཁས་མི་ལེན་པ་ལ་ངེས་ཤེས་གཙོ་བོར་འདྲེན་ནུས། དེས་གཞན་རྣམས་ལ་ཡང་འགྲེའོ། །གཉིས་པ་སྒོམ་ལམ་ལ། སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་གཉིས། དང་པོའི་མཚན་ཉིད། ཐེག་ཆེན་སྒོམ་ལམ་གྱི་སྟོབས་ཀྱིས་ཐོབ་པའི་རྣམ་དཀར་གྱི་ཡོན་ཏན། དབྱེ་ན་སྐྱེ་བུས་བྱེད་པའི་འབྲས་བུ་དང་། རྣམ་སྨིན་གྱི་དང་། བདག་པོའི་གསུམ། དང་པོ་ལ་ནང་གི་ཉེར་འཚེ་ཞི་བ་དང་ཕྱིའི་ཉེར་འཚེ་ཞི་བ་གཉིས། དང་པོ་ལ་གནས་སྐབས་ཀྱི་དང་མཐར་ཐུག་གི་འབྲས་བུ་གཉིས། དང་པོ་ལ་སེམས་ལ་རང་དབང་ཉིད་དུ་བྱེད་པ་དང་དགེ་བའི་བཤེས་གཉེན་སོགས་ལ་འདུད་པ་གཉིས། མཐར་ཐུག་གི་འབྲས་བུ་ནི་སྒོམ་སྤང་ཉོན་མོངས་སྤངས་པའོ། །ཕྱིའི་ཉེར་འཚེ་ཞི་བ་ནི་གཞན་གྱི་གནོད་པས་མི་བརྫི་བའོ། །རྣམ་སྨིན་གྱི་འབྲས་བུ་ནི་རྫོགས་པའི་བྱང་ཆུབ་སྒྲུབ་པའོ། །བདག་པོའི་འབྲས་བུ་ནི་རྟེན་གྱི་བྱང་སེམས་བཞུགས་པའི་ས་ཕྱོགས་ཀྱང་མཆོད་པར་བྱ་བ་ཉིད་དུ་བྱེད་པའོ། །གཉིས་པ་ཐེག་ཆེན་གྱི་སྒོམ་ལམ་གྱི་མཚན་ཉིད། ཐེག་ཆེན་གྱི་མཐོང་ལམ་མཉམ་གཞག་རྫོགས་རྗེས་སུ་བྱུང་ཞིང་ཐེག་ཆེན་གྱི་མི་སློབ་ལམ་མ་སྐྱེས་གོང་གི་ཐེག་ཆེན་སྐྱེས་བུའི་རྒྱུད་ཀྱི་མངོན་པར་རྟོགས་པ། དེ་ལ་ས་མཚམས་ཀྱི་སྒོ་ནས་དབྱེ་ན་ས་དང་པོས་བསྡུས་པའི་ཐེག་ཆེན་གྱི་སྒོམ་ལམ་དང་། ས་དགུས་བསྡུས་པའི་ཐེག་ཆེན་གྱི་སྒོམ་ལམ་གཉིས། དང་པོ་ལ་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། རྗེས་ཐོབ་རྟེན་འབྲེལ་ལ་རྟོག་པའི་གནས་སྐབས་ཀྱི་མཁྱེན་པ་དང་། མཐོང་ལམ་མཉམ་གཞག་གིས་དྲངས་པའི་ངེས་ཤེས་དང་། སངས་རྒྱས་བརྒྱ་ལས་ཆོས་མཉན་པའི་གནས་སྐབས་ཀྱི་ཐོས་བསམ་གྱིས་བསྡུས་པའི་མཁྱེན་པ་དང་། གདུལ་བྱ་བརྒྱ་ལ་ཆོས་འཆད་པའི་གནས་སྐབས་ཀྱི་ལྷག་བསམ་གྱི་མཁྱེན་པ་དང་། ཏིང་ངེ་འཛིན་བརྒྱ་ལ་སྙོམས་པར་འཇུག་པའི་གནས་སྐབས་ཀྱི་སྙོམས་འཇུག་ལ་སོགས་དཔག་ཏུ་མེད་པ་ཡོད་པས་ཐུགས་རྩོལ་ཆེ་བར་མཛོད་ཅིག གཉིས་པ་ནི་གཞུང་ནས་བཤད་པའི་སྒོམ་ལམ་རྣམས་ཡིན་ལ། དེ་ཉིད་ངོ་བོའི་སྒོ་ནས་དབྱེ་ན་རྗེས་ཐོབ་དང་མཉམ་གཞག་གཉིས། འདི་ལ་འཕགས་སེང་གཉིས་ཀྱིས་ཟག་བཅས་སྒོམ་ལམ་དང་། ཟག་མེད་སྒོམ་ལམ་གྱི་ཐ་སྙད་མཛད་པ་ལྟར་ན། དང་པོའི་མཚན་ཉིད། ཐེག་ཆེན་གྱི་སྒོམ་ལམ་གང་ཞིག གཟུང་འཛིན་ཐ་དད་དུ་སྣང་བའི་ཡང་དག་པ་མ་ཡིན་པའི་ཀུན་རྟོག་དང་བཅས་པ། དབྱེ་ན་མོས་པ་བསྔོ་བ་རྗེས་སུ་ཡི་རང་སྒོམ་ལམ་གསུམ། དང་པོ་ལ་དངོས་དང་། མོས་པའི་ཕན་ཡོན་གཉིས་ལས། མོས་པ་སྒོམ་ལམ་གྱི་མཚན་ཉིད། ལུང་རིགས་ཀྱི་རྒྱུ་ལས་ཤེར་ཕྱིན་དོན་གསུམ་གྱི་འབྱུང་གནས་སུ་མཐའ་གཅིག་ཏུ་ངེས་པར་འཛིན་པའི་དད་པ་མཚུངས་ལྡན་དང་བཅས་པ། དབྱེ་ན་རང་དོན། གཉིས་དོན། གཞན་དོན་མོས་པ་སྒོམ་ལམ་གསུམ། དང་པོའི་མཚན་ཉིད། མོས་པ་སྒོམ་ལམ་གང་ཞིག བསམ་པས་གཞན་དོན་སྒྲུབ་ཅིང་སྦྱོར་བས་རང་དོན་གཙོ་བོར་སྒྲུབ་པ། དབྱེ་ན་རང་དོན་མོས་པ་ཆུང་ངུའི་ཆུང་ངུ་ལ་སོགས་པ་དགུ། ས་མཚམས་མ་དག་ས་བདུན་ན་ཡོད། གཉིས་པའི་མཚན་ཉིད། གང་ཞིག བསམ་པས་གཞན་དོན་སྒྲུབ་ཅིང་སྦྱོར་བས་རང་གཞན་གྱི་དོན་ཆ་མཉམ་དུ་སྒྲུབ་པ། དབྱེ་ན་གཉིས་དོན་མོས་པ་ཆུང་ངུའི་ཆུང་ངུ་ལ་སོགས་པ་དགུ། ས་མཚམས་ས་བརྒྱད་པ་དང་དགུ་པ་ན་ཡོད། གསུམ་པའི་མཚན་ཉིད། གང་ཞིག བསམ་སྦྱོར་གཉིས་ཀས་གཞན་དོན་གཙོ་བོར་སྒྲུབ་པ། དབྱེ་ན་གཞན་དོན་མོས་པ་ཆུང་ངུའི་ཆུང་ངུ་སོགས་དགུ། ས་མཚམས་ས་བཅུ་པ་ན་ཡོད། མོས་པའི་ཕན་ཡོན་གྱི་མཚན་ཉིད། མོས་པ་སྒོམ་པའི་བྱང་སེམས་སྤྲོ་བ་བསྐྱེད་པའི་ཆེད་དུ་མོས་པའི་གནས་སྐབས་གསུམ་གྱི་རིམ་པ་དང་མཐུན་པར་ཡོན་ཏན་བརྗོད་པའི་དེ་བཞིན་གཤེགས་པའི་གསུང་། དབྱེ་ན་རང་དོན་མོས་པའི་གནས་སྐབས་དགུ་ལ་བསྟོད་པ་རྣམ་པ་དགུ། གཉིས་དོན་མོས་པའི་གནས་སྐབས་དགུ་ལ་བཀུར་བ་རྣམ་པ་དགུ། གཞན་དོན་མོས་པའི་གནས་སྐབས་དགུ་ལ་བསྔགས་པ་རྣམ་པ་དགུ་སྟེ་ཉི་ཤུ་རྩ་བདུན་ནོ། །བསྔོ་བ་སྒོམ་ལམ་གྱི་མཚན་ཉིད། ཟག་བཅས་སྒོམ་ལམ་གང་ཞིག དགེ་བའི་རྩ་བ་རྫོགས་པའི་བྱང་ཆུབ་ཀྱི་རྒྱུར་ཡོངས་སུ་སྒྱུར་བར་བྱེད་པའི་འདུན་པ་མཚུངས་ལྡན་དང་བཅས་པ། སྤྱིར་བསྔོ་བ་ཙམ་ལ་དབྱེ་ན། མངོན་མཐོའི་བསྔོ་བ་དང་། ངེས་ལེགས་ཀྱི་བསྔོ་བ་གཉིས། ཕྱི་མ་ལ་བྱང་ཆུབ་གསུམ་ཡོད་ཀྱང་འདིར་ནི་ཐ་མ་ཁོ་ནའོ། །ས་མཚམས་ཀྱི་སྒོ་ནས་དབྱེ་ན་ས་དང་པོས་བསྡུས་པའི་བསྔོ་བ་སྒོམ་ལམ་དང་། ས་དགུ་པོས་བསྡུས་པའི་བསྔོ་བ་སྒོམ་ལམ་གཉིས། དང་པོ་ནི་ས་དང་པོའི་རྗེས་ཐོབ་ན་ཡོད། ཕྱི་མ་ནི་ས་གཉིས་པའི་རྗེས་ཐོབ་ནས་བཅུ་པའི་རྗེས་ཐོབ་ཀྱི་བར་ན་ཡོད། ཁྱད་ཆོས་ཀྱི་སྒོ་ནས་དབྱེ་ན་བཅུ་གཉིས་ཡོད་པ་ལྔར་འདུས་ཏེ། སྤྱིའི་རང་བཞིན་དང་། མངོན་ཞེན་འགོག་པ་དང་། ཟུང་འཇུག་གི་རྣམ་པ་དང་། མི་མཐུན་ཕྱོགས་དང་བྲལ་བ་དང་། རྣམ་པའི་རབ་ཏུ་དབྱེ་བའོ། །དང་པོ་ནི། ཉན་རང་ལས་ཁྱད་པར་ཅན་གྱི་བསྔོ་བའོ། །གཉིས་པ་ལ་དངོས་པོར་མངོན་ཞེན་འགོག་པ་དང་། དངོས་མེད་དུ་མངོན་ཞེན་འགོག་པ་གཉིས་ལས། དང་པོ་ལ་བསྔོ་བྱའི་རྫས་དང་། བསྔོ་བྱེད་ཀྱི་སེམས་དང་། བསྔོ་བར་བྱེད་པ་པོ་དང་། བདག་དང་སངས་རྒྱས་ཀྱི་དགེ་རྩ་ཐམས་ཅད་དང་། ཕྱིན་དྲུག་ལ་བཟང་ངན་དུ་ཞེན་པ་འགོག་པ་ལྔ་ནི། རིམ་པ་ལྟར། མི་དམིགས་པའི་མིང་ཅན་དང་། ཕྱིན་ཅི་མ་ལོག་པའི་མིང་ཅན་དང་། དབེན་པའི་མིང་ཅན་དང་། སངས་རྒྱས་ཀྱི་བསོད་ནམས་ཀྱི་ཚོགས་ཀྱི་རང་བཞིན་དྲན་པའི་མིང་ཅན་དང་། ཐབས་ལ་མཁས་པ་དང་བཅས་པའི་མིང་ཅན་གྱི་བསྔོ་བ་རྣམས་སོ། །དངོས་མེད་དུ་ཞེན་པ་འགོག་པ་གཅིག་ནི་མཚན་མ་མེད་པའི་མིང་ཅན་གྱི་བསྔོ་བའོ། །ཟུང་འཇུག་གི་རྣམ་པ་ནི་སངས་རྒྱས་ཀྱིས་གནང་བའི་མིང་ཅན་གྱི་བསྔོ་བའོ། །མི་མཐུན་ཕྱོགས་དང་བྲལ་བ་ནི་ཁམས་གསུམ་པར་མ་གཏོགས་པའི་མིང་ཅན་གྱི་བསྔོ་བའོ། །རྣམ་པའི་རབ་དབྱེ་ལ་བསོད་ནམས་ཆེན་པོ་འབྱུང་བའི་བསྔོ་བ་ཆུང་ངུ་དང་། འབྲིང་དང་། ཆེན་པོའི་མིང་ཅན་གྱི་བསྔོ་བ་གསུམ་མོ། །རྗེས་སུ་ཡི་རང་སྒོམ་ལམ་གྱི་མཚན་ཉིད། ཟག་བཅས་སྒོམ་ལམ་གང་ཞིག ཐབས་ཤེས་ཟུང་འཇུག་གི་སྒོ་ནས་རང་གཞན་གྱི་དགེ་བ་ལ་དགའ་བ་སྒོམ་པར་བྱེད་པའི་དད་པ་མཚུངས་ལྡན་དང་བཅས་པ། ས་མཚམས་ཀྱི་སྒོ་ནས་དབྱེ་ན་སྔར་བཞིན་ནོ། །ཐེག་ཆེན་གྱི་ཟག་མེད་སྒོམ་ལམ་གྱི་མཚན་ཉིད། ཐེག་ཆེན་གྱི་སྒོམ་ལམ་གང་ཞིག གཟུང་འཛིན་ཐ་དད་དུ་སྣང་བའི་ཡང་དག་པ་མིན་པའི་ཀུན་རྟོག་དང་བྲལ་བའི་སྒོ་ནས་ཆོས་ཉིད་མཐོང་ཟིན་རྒྱུན་ལྡན་དུ་གོམས་པར་བྱེད་པའི་མཁྱེན་པ། དབྱེ་ན་སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས། དང་པོའི་ངོ་བོ། ཁྱད་པར། རྣམ་པ། བྱེད་པ་དང་བཞི་ལས། ངོ་བོ་ནི་གཟུགས་སོགས་ཀྱི་གནས་ཚུལ་མཐོང་ཟིན་སྒོམ་པར་བྱེད་པའོ། །ཁྱད་པར་ནི་སྦྱིན་སོགས་གཞན་ལས་མཆོག་ཏུ་གྱུར་པའོ། །རྣམ་པ་ནི་ཡུལ་ཀུན་ལ་མངོན་ཞེན་མེད་པའོ། །མཚན་ཉིད། ཐེག་ཆེན་གྱི་ཟག་མེད་སྒོམ་ལམ་གང་ཞིག་རང་གི་ངོས་སྐལ་གྱི་ཤེས་སྒྲིབ་ཀྱི་སྤོང་བ་གཉེན་པོར་གྱུར་པ། ས་མཚམས་ཀྱི་སྒོ་ནས་དབྱེ་ན། ས་གཉིས་པའི་ཟག་མེད་སྒོམ་ལམ་ནས་ས་བཅུ་པའི་ཟག་མེད་སྒོམ་ལམ་གྱི་བར་དགུ། དེ་རེ་རེ་ལའང་སྦྱོར་བའི་ལམ་དང་། བར་ཆད་མེད་པའི་ལམ་གཉིས་གཉིས་སུ་འབྱེད་དགོས་སོ། །ཁྱད་ཆོས་ཀྱི་སྒོ་ནས་བྱེད་པ་ལ་གཉིས་ལས། གནས་སྐབས་ཀྱི་བྱེད་པ་ནི་རྣལ་འབྱོར་པའི་རྒྱུད་ལ་ཆོས་རྣམས་མི་དམིགས་པ་ཉིད་དུ་རྟོགས་པ་བསྐྱེད་པའོ། །མཐར་ཐུག་གི་བྱེད་པ་ནི་དོན་ཆེན་པོ་སངས་རྒྱས་ཉིད་དུ་བྱེད་པའོ། །གཉིས་པ་རྣམ་དག་སྒོམ་ལམ་ལ་རྒྱུ་དང་རྒྱུ་མ་ཡིན་པའི་རབ་དབྱེ་དང་། འབྲས་བུ་རྣམ་དག་སྒོམ་ལམ་དངོས་གཉིས་ལས། དང་པོ་རྣམ་དག་སྒོམ་ལམ་གྱི་རྒྱུའི་མཚན་ཉིད། རྣམ་དག་སྒོམ་ལམ་སྐྱེད་པར་བྱེད་པའི་མཐུན་རྐྱེན། དབྱེ་ན་མཉེས་པར་བྱེད་པ་དང་། སྦྱིན་སོགས་རྫོགས་པར་བྱེད་པ་དང་། ཞི་གནས་ཀྱི་ཐབས་ལ་མཁས་པ་གསུམ་མོ། །གཉིས་པ་རྣམ་དག་སྒོམ་ལམ་གྱིས་འཕངས་པའི་རྒྱུ་མ་ཡིན་པའི་མཚན་ཉིད། རྣམ་དག་སྒོམ་ལམ་སྐྱེ་བ་ལ་བར་དུ་གཅོད་པར་བྱེད་པའི་འགལ་རྐྱེན། དབྱེ་ན་བདུད་ཀྱིས་གནོད་པ་བྱས་པ་དང་། མི་དགེ་བའི་གྲོགས་པོ་དང་འགྲོགས་པ་དང་། ཆོས་ཟབ་མོ་ལ་མ་མོས་པ་དང་། དངོས་པོར་མངོན་པར་ཞེན་པ་དང་བཞིའོ། །གཉིས་པ་འབྲས་བུ་རྣམ་དག་དངོས་ལ། རྣམ་དག་སྒོམ་ལམ་གྱི་མཚན་ཉིད། ཐེག་ཆེན་གྱི་ཟག་མེད་སྒོམ་ལམ་གང་ཞིག རང་རྒྱུ་བར་ཆད་མེད་ལམ་གྱི་ངོ་སྐལ་གྱི་ཤེས་སྒྲིབ་ལས་གྲོལ་བའི་རྣམ་དག དེ་ལ་ས་མཚམས་ཀྱི་སྒོ་ནས་དབྱེ་ན་ས་གཉིས་པའི་རྣམ་གྲོལ་ལམ་ནས། ས་བཅུ་པའི་རྣམ་གྲོལ་ལམ་གྱི་བར་དུ་དགུ་ཡོད་དོ། །འདི་ཉིད་ངེས་པར་བྱ་བ་འཕགས་བཞིའི་རྣམ་དག་སྤྱིར་བསྟན་པ་དང་། སངས་རྒྱས་ཀྱི་རྣམ་དག་ཤིན་ཏུ་བར་སྒྲུབ་པ། སྒྲུབ་བྱེད་ལ་ཀླན་ཀ་སྤང་བ་དང་གསུམ་ལས། དང་པོ་ལ་ཉན་ཐོས་ཀྱི་རྣམ་དག་གི་མཚན་ཉིད། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་ལས་གྲོལ་བའི་ཉན་ཐོས་ཀྱི་རྒྱུད་ཀྱི་ཟག་མེད་ཀྱི་རྣམ་གྲོལ་ལམ། དེ་ལ་ངོ་བོའི་སྒོ་ནས་དབྱེ་ན་འདུས་བྱས་རྣམ་གྲོལ་ལམ་དང་། འདུས་མ་བྱས་སོ་སོར་བཏགས་འགོག་གཉིས། ས་མཚམས་ཀྱི་སྒོ་ནས་དབྱེ་ན་རྒྱུན་ཞུགས། ཕྱིར་འོང་གི ཕྱིར་མི་འོང་གི དགྲ་བཅོམ་གྱི་འབྲས་བུ་དང་བཞི། སྤང་བྱའི་སྒོ་ནས་དབྱེ་ན་མཐོང་སྤང་ཉོན་མོངས་སྤངས་པའི་རྣམ་དག་དང་། སྒོམ་སྤང་ཉོན་མོངས་སྤངས་པའི་རྣམ་དག་གཉིས། ཕྱི་མ་ལ་དབྱེ་ན་གྱ་གཅིག་གོ །རང་རྒྱལ་གྱི་རྣམ་དག་གི་མཚན་ཉིད། རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཉོན་སྒྲིབ་དང་ཤེས་སྒྲིབ་གཟུང་རྟོག་ལས་གྲོལ་བའི་ཐེག་འབྲིང་གི་རྒྱུད་ཀྱི་ཟག་མེད་ཀྱི་རྣམ་གྲོལ་ལམ། དབྱེ་བ་རྣམས་ནི་སྔ་མ་ཇི་ལྟ་བ་བཞིན་དུ་འབྱུང་སྟེ། ཊཱི་ཀ་ལས། མདོ་ལས་ཀྱང་རྒྱུན་ཞུགས་ཀྱི་འགྲེས་ཉན་ཐོས་ཁོ་ན་ལ་སྦྱར་གྱི། རང་རྒྱལ་ལ་རྒྱུན་ཞུགས་སོགས་མ་གསུངས་པས་མི་གཟུང་ངོ་། །ཞེས་གསུངས་པ་ནི། རང་རྒྱལ་ཡིན་པར་གྱུར་པའི་རྒྱུན་ཞུགས་དང་། ཕྱིར་འོང་དང་། ཕྱིར་མི་འོང་མེད་ཅེས་པའི་དོན་ཡིན་ཏེ། རང་རྒྱལ་གྱི་ལམ་ལ་གནས་པའི་རྒྱུན་ཞུགས་དང་། ཕྱིར་འོང་དང་། ཕྱིར་མི་འོང་གསུམ་པོ་ཉན་ཐོས་ཡིན་པའི་ཕྱིར་དང་། རང་ས་ལས་རང་སངས་རྒྱས་ཀྱི་ལམ་བསྒྲོད་ཚུལ་གསུམ་པའི་སྐབས་སུ་འདི་ན་ལ་ལ་བསྐལ་པ་བརྒྱར་སངས་རྒྱས་འབྱུང་བ་མཉེས་པར་བྱས་ནས་ཚེ་འདིར་རྒྱུན་ཞུགས་སམ། ཕྱིར་འོང་གི་འབྲས་བུ་ཐོབ་ནས་ཚེ་འདི་ཉིད་ལ་དགྲ་བཅོམ་གྱི་འབྲས་བུ་ཐོབ་པར་མ་ནུས་པས་ཕྱི་མ་ལ་ཕྱིར་མི་འོང་དང་། དགྲ་བཅོམ་གྱི་འབྲས་བུ་ཐོབ་པའི་ཕྱིར་དུ་ཕུང་པོ་སོགས་དྲུག་ལ་མཁས་པར་བྱེད་པར་གསུངས་ཤིང་། དེ་ཉིད་ཊཱི་ཀ་ལས་ཇི་ལྟ་བ་བཞིན་དུ་རྣམ་གཞག་མཛད་པའི་ཕྱིར་རོ། །དེས་ན་རྒྱུན་ཞུགས་ཡིན་ན་ཉན་ཐོས་ཡིན་དགོས་ཀྱང་། རྒྱུན་ཞུགས་ཀྱི་འབྲས་བུ་ཡིན་ན་ཉན་ཐོས་ཀྱི་རྣམ་དག་ཡིན་པས་མ་ཁྱབ་པར་རང་རྒྱལ་གྱི་རིགས་ཅན་གྱི་སློབ་པ་ཐམས་ཅད་ཉན་ཐོས་སུ་ཁས་ལེན་བྱས་པའི་ལུགས་འདི་ལ་འཐད་པ་ཡིན་ནོ། །བྱང་སེམས་ཀྱི་རྣམ་དག་གི་མཚན་ཉིད། རང་རྒྱུ་བར་ཆད་མེད་ལམ་གྱི་ངོས་སྐལ་གྱིས་ཐེག་པ་གསུམ་གྱི་སྤང་བྱའི་རིགས་ལས་གྲོལ་བས་བྱང་སེམས་ཀྱི་རྒྱུད་ཀྱི་རྣམ་གྲོལ་ལམ། འདི་ལ་ཡང་ངོ་བོའི་སྒོ་ནས་དབྱེ་ན་ནི་སྔར་བཞིན་ཡིན་ལ། སྤང་བྱའི་སྒོ་ནས་དབྱེ་ན་མཐོང་སྤང་སྤངས་པའི་དང་། སྒོམ་སྤང་གི་ཆ་ཤས་སྤངས་པའི་རྣམ་དག་གཉིས། ཕྱི་མ་ལ་ས་གཉིས་པའི་དྲི་མ་སྤངས་པའི་ན་ས་དགུ་པའི་དྲི་མ་སྤངས་པའི་རྣམ་དག་གི་བར་ཏེ་བརྒྱད་ཡོད་ཅིང་། ས་བཅུ་པ་ལ་རྣམ་གྲོལ་ལམ་ཡོད་པ་ལྟར་ན་དགུ་ཡོད་དོ། །སངས་རྒྱས་ཀྱི་རྣམ་དག་གི་མཚན་ཉིད། སྒྲིབ་གཉིས་བག་ཆགས་དང་བཅས་པ་སྤངས་པས་རབ་ཏུ་ཕྱེ་བའི་ཟག་མེད་རྣམ་བྱང་གི་བདེན་པ། དེ་ལ་ངོ་བོའི་སྒོ་ནས་དབྱེ་ན་འདུས་བྱས་རྣམ་གྲོལ་ལམ་དང་འདུས་མ་བྱས་སོ་སོར་བཏགས་འགོག་གོ །དང་པོ་ལ་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་ཏུ་དབྱེར་རུང་ངོ་། །གཉིས་པ་ཤིན་ཏུ་བར་སྒྲུབ་པ་ནི། དེའི་རྒྱུ་མཚན་ཡོད་དེ། ཐེག་ཆེན་གྱི་སྒོམ་ལམ་བར་ཆད་མེད་ལམ་དགུ་པོ་དེ་ཁམས་གསུམ་ས་དགུའི་སྒོམ་སྤང་ཤེས་སྒྲིབ་མཐའ་དག་གི་གཉེན་པོ་ཡིན་པའི་ཕྱིར་ཏེ། འདོད་པའི་སས་བསྡུས་ཀྱི་སྒོམ་སྤང་ཤེས་སྒྲིབ་རྣམས་ཆེ་འབྲིང་ཆུང་གསུམ་དུ་བསྡུས་ནས་ས་གཉིས་པ་གསུམ་པ་བཞི་པ་གསུམ་གྱིས་རིམ་བཞིན་དུ་སྤང་ངོ་། །གཟུགས་ཀྱི་དེ་རྣམས་དེར་བསྡུས་ནས་ས་ལྔ་པ་དྲུག་པ་བདུན་པ་གསུམ་གྱིས་རིམ་བཞིན་དུ་སྤོང་། གཟུགས་མེད་ཀྱི་དེ་རྣམས་དེར་བསྡུས་ནས་ས་བརྒྱད་པ་དགུ་པ་བཅུ་པ་གསུམ་གྱིས་རིམ་པ་བཞིན་དུ་སྤོང་བའི་ཕྱིར་རོ། །གསུམ་པ་ཀླན་ཀ་སྤང་བ་ནི་གཉེན་པོ་ཆུང་རིམ་ནས་སྐྱེ་ཞིང་སྤང་བྱ་ཆེ་རིམ་ནས་འགག་པ་མི་འཐད་དོ་ཞེ་ན། སྐྱོན་མེད་དེ། གོས་ལ་ཆགས་པའི་དྲི་མ་རགས་པ་འབད་པ་ཆུང་ངུས་ནི་སེལ་ཞིང་ཕྲ་མོ་སེལ་བ་ལ་འབད་པ་ཆེན་པོ་དགོས་པའི་དཔེས་འཐད་པ་གྲུབ་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ་ལས་སྐབས་གཉིས་པའོ།། །།གསུམ་པ་གཞི་ཤེས་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། གཞི་བདག་མེད་པར་མངོན་སུམ་དུ་རྟོགས་པའི་འཕགས་རྒྱུད་ཀྱི་མཁྱེན་པ། དེ་ལ་ངོ་བོའི་སྒོ་ནས་དབྱེ་ན་མི་མཐུན་ཕྱོགས་ཀྱི་གཞི་ཤེས་དང་། གཉེན་པོ་གཞི་ཤེས་དང་གཉིས། གང་ཟག་གི་སྒོ་ནས་དབྱེ་ན་ཉན་ཐོས་ཀྱི། རང་རྒྱལ་གྱི། བྱང་སེམས་ཀྱི། སངས་རྒྱས་ཀྱི་གཞི་ཤེས་དང་བཞི་ལས། དང་པོ་གཉིས་ནི་མི་མཐུན་ཕྱོགས་ཀྱི་གཞི་ཤེས་དང་། གསུམ་པ་ནི་གཉེན་པོ་གཞི་ཤེས་ཡིན་ལ། བཞི་པ་ནི་དེ་གཉིས་གང་ཡང་མ་ཡིན་ནོ། །ལམ་གྱི་སྒོ་ནས་དབྱེ་ན་མཐོང་ལམསྒོམ་ལམ་མི་སློབ་པའི་ལམ་གསུམ་མོ། །མཚོན་བྱེད་ཀྱི་ཆོས་ཀྱི་སྒོ་ནས་དབྱེ་ན་ཤེས་པས་སྲིད་ལ་མི་གནས་པའི་གཞི་ཤེས། སྙིང་རྗེས་ཞི་ལ་མི་གནས་པའི། འབྲས་བུ་ལ་ཉེ་བའི། དེ་ལ་རིང་བའི། མི་མཐུན་ཕྱོགས་ཀྱི། གཉེན་པོ་གཞི་ཤེས། གཞི་ཤེས་ཀྱི་སྦྱོར་བ། སྦྱོར་བའི་མཉམ་ཉིད། ཞུགས་འབྲས་མཐོང་ལམ་དང་དགུ་ལས། དང་པོའི་མཚན་ཉིད། དུས་གསུམ་རང་བཞིན་མེད་པར་མཉམ་པ་ཉིད་རྟོགས་པའི་ཤེས་རབ་ཀྱིས་སྲིད་མཐའ་གནོན་ནུས་ཀྱི་བྱང་སེམས་ཀྱི་མཁྱེན་པ། གཉིས་པའི་མཚན་ཉིད། དམིགས་པ་མེད་པའི་སྙིང་རྗེས་ཞི་མཐའ་གནོན་ནུས་ཀྱི་བྱང་འཕགས་ཀྱི་མཁྱེན་པ། འདི་གཉིས་ཡན་ལག་རྒྱས་བཤད་དུ་ཕྱོགས་གཅིག་ཏུ་གཞི་ཤེས་ཀྱི་ངོ་བོར་བསྟན་པས་དངོས་བསྟན་བྱང་སེམས་ཀྱི་གཞི་ཤེས་ཀྱི་མཚན་ཉིད། ཐབས་ཤེས་ཁྱད་པར་ཅན་གྱིས་སྲིད་ཞིའི་མཐའ་གནོན་ནུས་པའི་བྱང་འཕགས་ཀྱི་མཁྱེན་པ། ཤུགས་བསྟན་ཐེག་དམན་གྱི་མཚན་ཉིད། ཐབས་ཤེས་ཁྱད་པར་ཅན་དང་བྲལ་བའི་སྲིད་ཞིས་མཐའ་གནོན་ནུས་མིན་པའི་ཐེག་དམན་འཕགས་པའི་མངོན་རྟོགས། གསུམ་པའི་མཚན་ཉིད། འབྲས་ཡུམ་སྒྲུབ་པའི་ཐབས་ལ་མཁས་པའི་བྱང་འཕགས་ཀྱི་མཁྱེན་པ། བཞི་པའི་མཚན་ཉིད། འབྲས་ཡུམ་སྒྲུབ་པའི་ཐབས་ལ་མི་མཁས་པའི་ཐེག་དམན་འཕགས་པའི་མངོན་རྟོགས། ལྔ་པའི་མཚན་ཉིད། གཞི་ལམ་འབྲས་གསུམ་གང་རུང་ལ་མཚན་མར་འཛིན་པའི་མཚན་འཛིན་གྱིས་བཅིངས་པའི་ཐེག་དམན་འཕགས་པའི་མངོན་རྟོགས། དྲུག་པའི་མཚན་ཉིད། གཞི་ལམ་འབྲས་གསུམ་གང་རུང་ལ་མཚན་མར་འཛིན་པའི་མཚན་འཛིན་གྱིས་མ་བཅིངས་པའི་བྱང་འཕགས་ཀྱི་མཁྱེན་པ། ཞར་ལ་གཞི་ལ་མཚན་འཛིན་གྱི་མཚན་ཉིད། གཞི་ལ་དམིགས་ཡུལ་དུ་མངོན་པར་ཞེན་པའི་བློ། དབྱེ་ན་གཞིའི་ཆོས་ཉིད་ལ་མཚན་མར་འཛིན་པ་དང་། གཞིའི་ཆོས་ཅན་ལ་མཚན་མར་འཛིན་པ་གཉིས་སོ། །ལམ་ལ་མཚན་འཛིན་གྱི་མཚན་ཉིད། ལམ་ཉམས་ལེན་དུ་མངོན་པར་ཞེན་པའི་བློ། དབྱེ་ན་སྦྱིན་སོགས་ལ་དང་། བྱང་ཆུབ་ཕྱོགས་མཐུན་ལ་ཉམས་ལེན་དུ་མངོན་པ་ཞེན་པའི་བློ་གཉིས་སོ། །འབྲས་བུ་ལ་མཚན་འཛིན་གྱི་མཚན་ཉིད། འབྲས་བུ་ཐོབ་བྱར་མངོན་པར་ཞེན་པའི་བློ། འདི་མི་མཐུན་ཕྱོགས་སུ་སྒྲུབ་པ་ལ་ཡུལ་ཟབ་པར་བསྟན་པ་དང་། དེ་སྒྲུབ་པ་ལ་རྟོགས་དཀའ་བར་བཤད་པ་དང་། དེ་སྒྲུབ་པ་ལ་བསམ་གྱིས་མི་ཁྱབ་པར་བཤད་པ་གསུམ་མོ། །དེ་དག་གི་གཉེན་པོ་གསུམ་ལས། གཞི་ལ་མཚན་འཛིན་གྱི་གཉེན་པོའི་མཚན་ཉིད། གཞི་ལ་མཚན་འཛིན་མངོན་གྱུར་འགོག་པའམ་ས་བོན་སྤོང་ནུས་པའི་བྱང་སེམས་ཀྱི་མཁྱེན་པ། དེ་ལ་མངོན་གྱུར་འགོག་པ་ནི་བྱང་སེམས་ཀྱི་སྦྱོར་ལམ་མཉམ་གཞག་དང་། མ་དག་ས་བདུན་གྱི་རྗེས་ཐོབ་ན་ཡོད་ཅིང་། ས་བོན་སྤོང་བ་ནི་ས་བཅུ་ཀའི་མཉམ་གཞག་ན་ཡོད་ལ། དེས་གཞན་གཉིས་ལ་ཡང་འགྲེའོ། །བདུན་པའི་མཚན་ཉིད། གཞི་བདག་མེད་པར་རྟོགས་པའི་སློབ་རྒྱུད་ཀྱི་ཤེས་རབ་མཚུངས་ལྡན་དང་བཅས་པ། དབྱེ་ན་དངོས་བསྟན་བྱང་སེམས་ཀྱི་གཞི་ཤེས་སྦྱོར་བ་དང་། ཤུགས་བསྟན་ཐེག་དམན་གྱི་གཞི་ཤེས་སྦྱོར་བ་གཉིས། དང་པོའི་མཚན་ཉིད། གཞི་རང་བཞིན་མེད་པར་རྟོགས་པའི་ཤེས་རབ་ཀྱིས་གཞི་ལ་ཞེན་སྤྱོད་མངོན་གྱུར་བཀག་ནས་སྒོམ་པར་བྱེད་པའི་སེམས་དཔའི་རྣལ་འབྱོར། དབྱེ་ན་རང་བཞིན་གྱི་སྦྱོར་བ་བཞི་དང་། གནས་སྐབས་ཀྱི་སྦྱོར་བ་དྲུག་གོ །དང་པོ་ནི་གཞིའི་ངོ་བོ་དང་། གཞིའི་ཁྱད་པར་དང་། གཟུགས་སོགས་རྫོགས་མ་རྫོགས་དང་། སྤང་གཉེན་གྱི་དབྱེ་བ་ལ་སྤྱོད་པ་བཀག་པའི་སྦྱོར་བ་བཞིའོ། །གཉིས་པ་ནི་མི་འགྱུར་བ་དང་། བྱེད་པ་པོ་མེད་པ་དང་། བྱ་དཀའ་རྣམ་གསུམ་དང་། འབྲས་བུ་མི་སྟོང་པ་དང་། སྲུང་བྱེད་གཞན་ལ་རག་མ་ལས་པ་དང་། སྣང་བ་རྣམ་བདུན་ལ་སྤྱོད་པ་བཀག་པའི་སྦྱོར་བའོ། །ས་མཚམས་ལ་མངོན་ཞེན་རགས་པའི་གཉེན་པོ་ས་བདུན་པ་མན་ཆད་དུ་ཡོད་ཅིང་། སྦྱོར་བ་ཙམ་ནི་ས་བཅུ་པའི་བར་དུ་ཡོད། གཉིས་པའི་མཚན་ཉིད། གཞིའི་གནས་ལུགས་ལ་ཞེན་སྤྱོད་དགག་མི་ནུས་པར་གཞི་བདག་མེད་པར་སྒོམ་པའི་ཐེག་དམན་སློབ་ལམ་པའི་མཁྱེན་པའོ། །བརྒྱད་པའི་མཚན་ཉིད། གཞི་ཤེས་སྦྱོར་བའི་ཡུལ་ཡུལ་ཅན་ལ་རློམ་པ་མི་དམིགས་པར་མཉམ་པ་ཉིད་དུ་རྟོགས་ནས་སྒོམ་པའི་བྱང་སེམས་ཀྱི་རྣལ་འབྱོར་རོ། །དགུ་པ་ལ་དངོས་བསྟན་གྱི་བྱང་སེམས་ཀྱི་དང་ཤུགས་བསྟན་ཐེག་དམན་གྱི་མཐོང་ལམ་གཉིས། དང་པོའི་མཚན་ཉིད། གཞི་ཤེས་ཀྱི་སྦྱོར་བ་བསྒོམས་པས་གཞིའི་གནས་ལུགས་དང་པོར་མངོན་སུམ་དུ་མཐོང་བའི་མཉམ་གཞག་གི་རྒྱུན་གྱིས་བསྡུས་པ་གང་ཞིག གཞིའི་གནས་ལུགས་ལ་མཐའ་གཉིས་ཀྱི་སྤྲོས་པ་དང་བྲལ་བའི་ངེས་ཤེས་གཙོ་བོར་འདྲེན་ནུས་པ། དབྱེ་ན་བྱང་སེམས་ཀྱི་མཐོང་ལམ་སྡུག་བསྔལ་ཆོས་བཟོད་ནས་ལམ་ལ་རྗེས་ཤེས་ཀྱི་བར་བཅུ་དྲུག དང་པོའི་མཚན་ཉིད། བྱང་སེམས་ཀྱི་མཐོང་ལམ་མཉམ་གཞག་གང་ཞིག སྡུག་བསྔལ་བདེན་པ་རྟག་མི་རྟག་གི་སྤྲོས་བྲལ་ལ་གཙོ་བོར་ངེས་པ་འདྲེན་ནུས། དེས་གཞན་རྣམས་ལ་ཡང་འགྲེའོ། །ཤུགས་བསྟན་ཐེག་དམན་གྱི་མཐོང་ལམ་གྱི་མཚན་ཉིད། གཞི་གང་ཟག་གི་བདག་མེད་པར་གསར་དུ་མངོན་སུམ་དུ་མཐོང་བའི་མཉམ་གཞག་གི་རྒྱུན་གྱིས་བསྡུས་པ་གང་ཞིག སྤྲོས་བྲལ་ལ་ངེས་པ་འདྲེན་མི་ནུས་པའོ། །ཞར་ལ་སྒོམ་ལམ་མི་སྟོན་པའི་རྒྱུ་མཚན་ནི་སྐབས་གཉིས་པར་མཐོང་ལམ་གྱི་རྗེས་སུ་སྒོམ་ལམ་བཤད་པ་ལྟར། འདིར་ཡང་ཅིའི་ཕྱིར་མ་བཤད་ཅེ་ན། འདིར་བསྟན་པའི་མཐོང་ལམ་ནི་ཐེག་དམན་གྱི་རྟོགས་རིགས་མངོན་སུམ་དུ་མཐོང་བའི་ཐེག་ཆེན་གྱི་མཐོང་ལམ་ཡིན་ལ་དེའི་རྗེས་སུ་སྒོམ་ལམ་འཆད་ན་ཐེག་དམན་གྱི་རྟོགས་རིགས་མངོན་སུམ་དུ་མཐོང་ཟིན་རྒྱུན་ལྡན་དུ་གོམས་པར་བྱེད་པའི་ཐེག་ཆེན་གྱི་སྒོམ་ལམ་འཆད་དགོས་པ་ལས་དེ་མེད་པའི་ཕྱིར་རོ། །མཁྱེན་གསུམ་གྱི་མཇུག་བསྡུ་བ་ནི་རབ་འབྱོར་ཡུམ་འདི་ནི་ཆོས་གང་སྟོན་པའོ་ཞེས་སོགས་དོན་བསྡུ་བའི་མདོ་ཚིགས་གསུམ་ཡོད་པའི་དོན་འདིར། དེ་ལྟར་འདི་དང་ཡང་འདི་དང་། །ཡང་འདི་ཡིན་ཏེ་རྣམ་གསུམ་མོ། །ཞེས་གསུངས་པ་འདི་གསུམ་གྱི་གོ་རིམ་ལ་སློབ་དཔོན་གྱིས་རྒྱས་བཤད་དང་མཐུན་པར་བཤད་དགོངས་ནས། རྣམ་མཁྱེན་དང་པོར་མཛད་ཀྱང་། མདོ་དང་ཉི་སྣང་གི་དགོངས་པ་ནི་གཞི་ཤེས་དང་པོར་བྱེད་པ་ཉིད་ཡིན་ཞིང་། ཆོས་ཀྱི་རྗེའི་དཀའ་འགྲེལ་ལས་ཀྱང་དེ་ལྟར་དུ་མཛད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ་ལས་སྐབས་གསུམ་པའོ།། །།བཞི་པ་རྣམ་རྫོགས་སྦྱོར་བ་ལ། མཚན་ཉིད་དང་། དབྱེ་བ་གཉིས་ལས། དང་པོ་ནི། མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་རྣམ་པར་བསྡུས་ནས་སྒོམ་པའི་སེམས་དཔའི་རྣལ་འབྱོར། ས་མཚམས་ཐེག་ཆེན་གྱི་ཚོགས་ལམ་ནས་ས་བཅུ་རྒྱུན་མཐའི་བར་ན་ཡོད། གཉིས་པ་ལ། བསྒོམ་བྱའི་སྒོ་ནས་དབྱེ་ན་ཐེག་ཆེན་གཞི་ཤེས་ཀྱི་སྦྱོར་བ། ལམ་ཤེས་ཀྱི་སྦྱོར་བ། རྣམ་མཁྱེན་གྱི་སྦྱོར་བ་དང་གསུམ། ཡུལ་ལ་སྤྲོས་པ་གཅོད་ཚུལ་དང་ཡོན་ཏན་གྱི་སྒོ་ནས་དབྱེ་ན་མི་གནས་པའི་སྦྱོར་བ་སོགས་ཉི་ཤུ། རྟོགས་པ་བསྐྱེད་ཚུལ་གྱི་སྒོ་ནས་དབྱེ་ན་རྣམ་རྫོགས་སྦྱོར་བ། རྩེ་མོའི་སྦྱོར་བ། མཐར་གྱིས་པའི་སྦྱོར་བ། སྐད་ཅིག་མའི་སྦྱོར་བ་དང་བཞི། མཚོན་བྱེད་ཆོས་ཀྱི་སྒོ་ནས་དབྱེ་ན་བསྒོམ་བྱའི་རྣམ་པ། ཞར་བྱུང་སྒོམ་པ་པོའི་གང་ཟག ཡུལ་ཅན་སྦྱོར་བ། སྦྱོར་བའི་ཡོན་ཏན། སྦྱོར་བའི་སྐྱོན། སྦྱོར་བའི་མཚན་ཉིད། ཐར་པ་ཆ་མཐུན། ངེས་འབྱེད་ཆ་མཐུན། རྟེན་ཕྱིར་མི་ལྡོག་པའི་གང་ཟག སྲིད་ཞི་མཉམ་ཉིད། ཞིང་དག་སྦྱོར། ཐབས་ལ་མཁས་པའི་སྦྱོར་བ་དང་བཅུ་གཅིག་ལས། དང་པོའི་མཚན་ཉིད། གཞིའི་གནས་ལུགས་རྟོགས་པའི་འཛིན་སྟངས་ཀྱི་ཁྱད་པར། འདི་ནི་གཞི་ལམ་འབྲས་གསུམ་གྱི་གཞི་མིན་གྱི། འཕགས་པའི་བདེན་པ་བཞིའོ། །དབྱེ་ན་གཞི་ཤེས་ཀྱི། ལམ་ཤེས་ཀྱི། རྣམ་མཁྱེན་གྱི་ཤེས་པའི་རྣམ་པ་གསུམ། དང་པོའི་མཚན་ཉིད། གཞི་འཕགས་པའི་བདེན་བཞིའི་སྟེང་གི་གང་ཟག་གི་བདག་མེད་དང་། གཟུང་བ་ཆོས་ཀྱི་བདག་མེད་གང་རུང་རྟོགས་པའི་རྟོགས་རིགས་སུ་གྱུར་པ། དབྱེ་ན་བདེན་པ་དང་པོ་གསུམ་གྱི་རྣམ་པ་བཅུ་གཉིས། ལམ་བདེན་གྱི་རྣམ་པ་བཅོ་ལྔ་སྟེ་ཉེར་བདུན་ནོ། །དང་པོ་ལ་སྡུག་བསྔལ་བདེན་པ་རྟག་པར་མེད་པ་དང་། དོན་དམ་པར་སྡུག་བསྔལ་མི་སྐྱེ་བ་དང་། དོན་གཞན་གྱི་བདག་གིས་དབེན་པ་དང་། བདག་ཏུ་ལྟ་བས་མི་བརྫི་བར་རྟོགས་པའི་རྣམ་པ་སྟེ་སྡུག་བསྔལ་བདེན་པའི་རྣམ་པ་བཞི། དོན་དམ་པར་སྡུག་བསྔལ་སྐྱེད་པའི་གནས་མེད་པ་དང་། ནམ་མཁའ་ལྟར་སྐྱེ་འགག་མེད་པ་དང་། བརྗོད་རྒྱུའི་རྟོག་དཔྱོད་མེད་པ་དང་། མིང་གཞི་ཕུང་པོ་མེད་པར་རྟོགས་པ་སྟེ་ཀུན་འབྱུང་བདེན་པའི་རྣམ་པ་བཞི། འགྲོ་འོང་སོགས་ཀྱིས་ཐོབ་པར་བྱར་མེད་པ་དང་། སྔོན་པོ་སོགས་ཀྱི་རྣམ་པའི་སྒོ་ནས་མི་འཕྲོག་པ་དང་། དོན་དམ་པར་དྲི་མ་མི་ཟད་པ་དང་། དོན་དམ་པར་སྐྱེ་བ་མེད་པར་རྟོགས་པ་སྟེ་འགོག་བདེན་གྱི་རྣམ་པ་བཞིའོ། །གཉིས་པ་ལ་ལམ་དང་པོའི། ལམ་གཉིས་པའི། ལམ་གསུམ་པའི་རྣམ་པ་དང་གསུམ། དང་པོ་ལ་བྱེད་པ་པོའི་བདག་མེད་པ་དང་། ཤེས་པ་པོའི་བདག་མེད་པ་དང་། དོན་དམ་པར་འཕོ་བ་མེད་པ་དང་། དོན་དམ་པར་འབྲི་བ་མེད་པར་རྟོགས་པའི་རྣམ་པ་སྟེ་བཞིའོ། །གཉིས་པ་ལ་གཟུང་བ་ཕྱི་རོལ་གྱི་དོན་རྨི་ལམ་ལྟར་ངོ་བོ་ཉིད་མེད་པ་དང་། སྒྲ་བརྙན་ལྟར་མ་སྐྱེས་པ་དང་། མིག་ཡོར་ལྟར་མ་འགགས་པ་དང་། སྨིག་རྒྱུའི་ཆུ་ལྟར་གཟོད་མ་ནས་ཞི་བ་དང་། སྒྱུ་མའི་མཚན་ཉིད་ཅན་ཏེ་རང་བཞིན་གྱིས་མྱ་ངན་ལས་འདས་པར་རྟོགས་པ་སྟེ་ལྔའོ། །གསུམ་པ་ལ་ཀུན་ནས་ཉོན་མོངས་ཀྱི་དང་། རྣམ་བྱང་གི་གཟུང་བ་རང་བཞིན་མེད་པར་རྟོགས་པ་དང་། ཀུན་ནས་ཉོན་མོངས་ཀྱིས་གོས་པ་མེད་པར་རྟོགས་པ་དང་། དབྱེ་བའི་སྤྲོས་པ་མེད་པར་རྟོགས་པ་དང་། རང་གི་རྟོགས་པ་ལ་བརླམ་བྱའི་གཟུང་བ་མེད་པར་རྟོགས་པ་དང་། རྟོགས་པ་ཐོབ་ཟིན་མི་གཡོ་བར་རྟོགས་པ་རྣམས་ཏེ་དྲུག་གོ །འདི་དག་ལ་ཉན་ཐོས་ཀྱི་རྒྱུད་ཀྱི་བདེན་པ་དང་པོ་གསུམ་གྱི་རྣམ་པ་བཅུ་གཉིས་དང་། ལམ་བདེན་གྱི་ལམ་དང་པོའི་རྣམ་པ་བཞི་སྟེ་བཅུ་དྲུག་དང་། རང་རྒྱལ་གྱི་སྒོམ་ལམ་རྗེས་ཐོབ་ཀྱི་ལམ་གཉིས་པའི་རྣམ་པ་ལྔ་དང་། མཉམ་གཞག་གི་ལམ་གསུམ་པའི་རྣམ་པ་དྲུག་པོ་རྣམས་ནི་གང་གི་རྟོགས་རིགས་སུ་འཇོག་པའི་ཡུལ་གྱི་རྟོགས་པ་དངོས་ཡིན་ལ། བྱང་སེམས་ཀྱི་རྒྱུད་ལ་ཡོད་པའི་ཉེར་བདུན་ནི་དེ་དག་གི་རྟོགས་རིགས་ཡིན་ཞིང་། འདིར་བསྟན་བྱའི་གཙོ་བོ་ནི་བྱང་སེམས་ཀྱི་རྒྱུད་ལ་ཡོད་པ་སྟེ། རྣམ་རྫོགས་སྦྱོར་བའི་བསྒོམ་བྱར་གྱུར་པའི་རྣམ་པ་ཡིན་པའི་ཕྱིར་རོ། །གཉིས་པ་ལམ་ཤེས་ཀྱི་མཚན་ཉིད། གཞི་བདེན་བཞིའི་སྟེང་གི་ལམ་གྱི་གནས་ལུགས་མངོན་སུམ་དུ་རྟོགས་པའི་འཛིན་སྟངས་ཀྱི་ཁྱད་པར། དབྱེ་ན་ཀུན་འབྱུང་བདེན་པའི་རྣམ་པ་བརྒྱད། ལམ་བདེན་གྱི་རྣམ་པ་བདུན། སྡུག་བསྔལ་བདེན་པའི་རྣམ་པ་ལྔ། འགོག་བདེན་གྱི་རྣམ་པ་བཅུ་དྲུག་སྟེ་སོ་དྲུག་གོ །དང་པོ་ལ་ལམ་ཤེས་ཀྱི་འདོད་ཆགས་དང་བྲལ་བར་རྟོགས་པའི་རྣམ་པ་དང་། དེ་བཞིན་དུ་ལམ་ཤེས་ཀྱི་མི་གནས་པ་དང་། ཞི་བ་དང་། འདོད་ཆགས་དང་། ཞེ་སྡང་དང་། གཏི་མུག་དང་། ཉོན་མོངས་པ་དང་། སེམས་ཅན་མེད་པར་རྟོགས་པའི་རྣམ་པ་བརྒྱད་དེ། དང་པོ་གསུམ་རྒྱུའི་རྣམ་པ། དེ་ནས་གསུམ་ཀུན་འབྱུང་གི་རྣམ་པ། དེ་ནས་གཅིག་རབ་སྐྱེའི་རྣམ་པ། དེ་ནས་གཅིག་རྐྱེན་གྱི་རྣམ་པའོ། །གཉིས་པ་ནི་ཚད་མེད་པ་དང་། མཐའ་གཉིས་དང་མ་འབྲེལ་བ་སྟེ་ལམ་གྱི་རྣམ་པ་གཉིས་དང་། ཐ་མི་དད་པ་དང་། མཆོག་ཏུ་འཛིན་པ་མེད་པ་སྟེ་རིགས་པའི་རྣམ་པ་གཉིས་དང་། རྣམ་པར་མི་རྟོག་པ་དང་། གཞལ་དུ་མེད་པ་སྟེ་སྒྲུབ་པའི་རྣམ་པ་གཉིས་དང་། ཆད་པ་མེད་པ་སྟེ་ངེས་འབྱིན་གྱི་རྣམ་པ་གཅིག་རྣམས་སོ། །གསུམ་པ་ལ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་སྟེ་རང་མཚན་གྱི་རྣམ་པ་བཞི་དང་། དེ་ཐམས་ཅད་རང་བཞིན་མེད་པ་སྤྱི་མཚན་གྱི་རྣམ་པ་གཅིག་རྣམས་སོ། །བཞི་པ་ལ་ནང་དང་། ཕྱི་དང་། གཉིས་ཀའི་སྟོང་ཉིད་ཀྱི་རྣམ་པ་སྟེ་འགོག་པའི་རྣམ་པ་གསུམ་དང་། སྟོང་པ་དང་། ཆེན་པོ་དང་། དོན་དམ་པ་དང་། འདུས་བྱས་དང་། འདུས་མ་བྱས་དང་། མཐའ་ལས་འདས་པ་དང་། ཐོག་མཐའ་མེད་པ་དང་། དོར་བ་མེད་པ་སྟོང་པ་ཉིད་དེ་ཞི་བའི་རྣམ་པ་བརྒྱད་དང་། རང་བཞིན་སྟོང་པ་ཉིད་ཀྱི་རྣམ་པ་སྟེ་གྱ་ནོམ་གྱི་རྣམ་པ་གཅིག་དང་། ཆོས་ཐམས་ཅད་དང་། རང་གི་མཚན་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་རྣམ་པ་སྟེ་ངེས་འབྱུང་གི་རྣམ་པ་བཞིའོ། །འདིར་རྣམ་པ་ཞེས་པ་རྣམས་ནི་དེ་དང་དེ་རྟོགས་པའི་འཛིན་སྟངས་ཀྱི་ཁྱད་པར་ལ་འཇོག་པ་ནི་སྐབས་ཀྱི་དོན་ནོ། །གསུམ་པ་རྣམ་མཁྱེན་གྱི་ཤེས་རྣམ་གྱི་མཚན་ཉིད། གཞི་ལམ་གྱི་སྟེང་དུ་རྣམ་པའི་གནས་ལུགས་མངོན་སུམ་དུ་རྟོགས་པ་མཐར་ཐུག་པའི་འཛིན་སྟངས་ཀྱི་ཁྱད་པར། དབྱེ་ན་ཉན་ཐོས་ཀྱི་གཞི་ཤེས་དང་རྗེས་མཐུན་གྱི་རྣམ་མཁྱེན་གྱི་རྣམ་པ། བྱང་སེམས་ཀྱི་ལམ་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ། སངས་རྒྱས་ཀྱི་ཐུན་མོང་མིན་པའི་རྣམ་མཁྱེན་གྱི་རྣམ་པ་དང་གསུམ། དང་པོའི་མཚན་ཉིད། རྣམ་མཁྱེན་གྱི་རྣམ་པ་གང་ཞིག ཉན་ཐོས་ཀྱི་རྟོགས་རིགས་སུ་གྱུར་པ། འདི་ལ་མཐུན་ཡུལ་ཉན་ཐོས་ཀྱི་རྟོགས་རིགས་དང་། མཐུན་ཆོས་རྣམ་མཁྱེན་གྱི་རྣམ་པ་ངོས་གཟུང་བ་གཉིས། དང་པོ་ལ་སྡེ་ཚན་བདུན་ཏེ། དྲན་པ་ཉེར་གཞག ཡང་དག་སྤོང་བ། རྫུ་འཕྲུལ་གྱི་རྐང་པ། དབང་པོ། སྟོབས། བྱང་ཆུབ་ཀྱི་ཡན་ལག འཕགས་པའི་ལམ་གྱི་ཡན་ལག་གོ །དང་པོའི་མཚན་ཉིད། དམིགས་པ་ལུས་སོགས་ལ་དམིགས་ནས་རྣམ་པ་རང་སྤྱིའི་མཚན་ཉིད་ཀྱིས་ཡོངས་སུ་བརྟགས་ཏེ་དཔྱོད་པར་བྱེད་པའི་རིགས་སུ་གནས་པའི་དྲན་པ་ཤེས་རབ་མཚུངས་ལྡན་དང་བཅས་པ། དབྱེ་ན་ལུས། ཚོར་བ། སེམས། ཆོས་དྲན་པ་ཉེ་བར་གཞག་པ་བཞི། མཚན་ཉིད་རིམ་བཞིན། དམིགས་པ་ལུས་ལ་དམིགས་ནས་ཞེས་སོགས་འགྲེའོ། །ས་མཚམས་ཉན་ཐོས་ཀྱི་ཚོགས་ལམ་ཆུང་ངུ་ནས་སངས་རྒྱས་ཀྱི་སའི་བར་ན་ཡོད། ཚོགས་ལམ་ཆུང་ངུའི་གནས་སྐབས་སུ་ནི་དངོས་པོ་ལ་ཡོངས་རྟོག་གི་ལམ་དང་ཁྱད་པར་མེད་དོ། །གཉིས་པའི་མཚན་ཉིད། དགེ་སྡིག་གི་བླང་དོར་ཚུལ་བཞིན་བྱེད་པའི་རིགས་སུ་གནས་པའི་བརྩོན་འགྲུས་མཚུངས་ལྡན་དང་བཅས་པ་གང་ཞིག ཚོགས་ལམ་འབྲིང་པོ་ཡན་གྱིས་བསྡུས་པ། དབྱེ་ན་མི་དགེ་བ་སྐྱེས་པ་ཡང་དག་པར་སྤོང་བའི། མི་དགེ་བ་མ་སྐྱེས་པ་མི་སྐྱེད་པའི། དགེ་བ་སྐྱེས་པ་ཡང་དག་པར་སྤེལ་བའི། དགེ་བ་མ་སྐྱེས་པ་སྐྱེད་པའི་ཡང་དག་སྤོང་བ་དང་བཞི། མཚན་ཉིད་རིམ་བཞིན། མི་དགེ་བ་སྐྱེས་པ་ཡང་དག་པར་སྤོང་བ་ལ་འདུན་པ་བསྐྱེད་པ་སོགས་ལྔའི་ཚུལ་གྱིས་སྒོམ་པའི་རིགས་སུ་གནས་པའི་བརྩོན་འགྲུས་མཚུངས་ལྡན་དང་བཅས་པ་གང་ཞིག ཞེས་སོགས་འགྲེའོ། །ཚོགས་ལམ་འབྲིང་པོའི་གནས་སྐབས་སུ་ནི་རྩོལ་བ་ལས་བྱུང་བའི་ལམ་དུ་འཇོག་པའོ། །གསུམ་པའི་མཚན་ཉིད། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བསྒོམས་པ་ལས་བྱུང་བའི་རིགས་སུ་གནས་པའི་ཏིང་ངེ་འཛིན་མཚུངས་ལྡན་དང་བཅས་པ་གང་ཞིག ཚོགས་ལམ་ཆེན་པོ་ཡན་ཆད་ཀྱིས་བསྡུས་པ། དབྱེ་ན་འདུན་པའི། བརྩོན་འགྲུས་ཀྱི། སེམས་པའི། ཤེས་རབ་ཀྱི་ཏིང་ངེ་འཛིན་རྫུ་འཕྲུལ་གྱི་རྐང་པ་བཞི། མཚན་ཉིད་རིམ་བཞིན། རྫུ་འཕྲལ་རྐང་པ་གང་ཞིག གུས་པར་སྦྱོར་བའི་འདུན་པ་དང་མཚུངས་པར་ལྡན་པ། གང་ཞིག རྒྱུན་དུ་སྦྱོར་བའི་བརྩོན་འགྲུས་དང་མཚུངས་པར་ལྡན་པ། གང་ཞིག སྔོན་གྱི་ཏིང་ངེ་འཛིན་གྱི་བག་ཆགས་དང་ལྡན་པའི་སེམས་དང་མཚུངས་པར་ལྡན་པ། གང་ཞིག དམིགས་པ་རྣམ་པར་འབྱེད་པའི་ཤེས་རབ་དང་མཚུངས་པར་ལྡན་པའོ། །ཚོགས་ལམ་ཆེན་པོའི་གནས་སྐབས་སུ་ནི་ཏིང་ངེ་འཛིན་ཡོངས་སུ་སྦྱོང་བའི་ལམ་དུ་འཇོག་གོ །བཞི་པའི་མཚན་ཉིད། སྒོམ་བྱུང་གཙོ་བོར་གྱུར་པའི་སྒོ་ནས་བདེན་པ་མངོན་པར་རྟོགས་པ་ལ་དབང་བྱེད་པའི་སེམས་བྱུང་གང་ཞིག དྲོད་རྩེ་ཡན་ཆད་ཀྱིས་བསྡུས་པ། དབྱེ་ན་དད་པ་བརྩོན་འགྲུས་དྲན་པ་ཏིང་ངེ་འཛིན་ཤེས་རབ་ཀྱི་དབང་པོ་ལྔ། མཚན་ཉིད་རིམ་པ་བཞིན། བདེན་པ་མངོན་པར་རྟོགས་པ་ལ་དབང་བྱེད་པའི་དབང་པོ་གང་ཞིག བདེན་པ་ལ་ཡིད་ཆེས་པའི་སེམས་བྱུང་། གང་ཞིག བདེན་པ་ལ་སྤྲོ་བའི་སེམས་བྱུང་། གང་ཞིག བདེན་པའི་དམིགས་རྣམ་མི་བརྗེད་པའི་སེམས་བྱུང་། གང་ཞིག བདེན་པ་ལ་རྩེ་གཅིག་པའི་སེམས་བྱུང་། གང་ཞིག བདེན་པའི་ཁྱད་ཆོས་རབ་ཏུ་རྣམ་པར་འབྱེད་པའི་སེམས་བྱུང་ངོ་། །དྲོད་རྩེ་གཉིས་ཀྱི་སྐབས་སུ་ནི་མངོན་པར་རྟོགས་པར་སྦྱོར་བའི་ལམ་དུ་འཇོག་གོ །ལྔ་པའི་མཚན་ཉིད། བདེན་པ་མངོན་པར་རྟོགས་པ་ལ་དབང་བྱེད་པའི་དབང་པོ་གང་ཞིག མི་མཐུན་ཕྱོགས་ཀྱིས་བརྫི་བར་མི་ནུས་པ། དབྱེ་ན་དད་པ། བརྩོན་འགྲུས། དྲན་པ། ཏིང་འཛིན། ཤེས་རབ་ཀྱི་སྟོབས་དང་རྣམ་པ་ལྔ། མཚན་ཉིད་རིམ་བཞིན། དད་པའི་དབང་པོ་གང་ཞིག མི་མཐུན་ཕྱོགས་ཀྱིས་བརྫི་བར་མི་ནུས་པ་ཞེས་སོགས་འགྲེའོ། །ས་མཚམས་ཉན་ཐོས་ཀྱི་སྦྱོར་ལམ་བཟོད་པ་ནས་སངས་རྒྱས་ཀྱི་སའི་བར་དུ་ཡོད་ཅིང་། བཟོད་པ་དང་ཆོས་མཆོག་གཉིས་ཀྱི་སྐབས་སུ་ནི་མངོན་པར་རྟོགས་པ་དང་འབྲེལ་བའི་ལམ་དུ་འཇོག་གོ །དྲུག་པའི་མཚན་ཉིད། མཐོང་ལམ་དུ་གསར་དུ་མངོན་དུ་གྱུར་པའི་ཡོན་ཏན་གྱི་རིགས་གང་ཞིག བྱང་ཆུབ་ཀྱི་ཆ་ཤས་སུ་གྱུར་པ། དབྱེ་ན་དྲན་པ་ཡང་དག་བྱང་ཆུབ་ཀྱི་ཡན་ལག དེ་བཞིན་དུ། ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང་བདུན། མཚན་ཉིད་རིམ་བཞིན། བྱང་ཆུབ་ཀྱི་གནས་ཀྱི་ཡན་ལག་གང་ཞིག ཤེས་བྱ་མ་རྟོགས་པ་རྟོགས་པར་བྱེད་པའི་སེམས་བྱུང་དང་། བྱང་ཆུབ་ཀྱི་ངོ་བོའི་ཡན་ལག་གང་ཞིག གང་ཟག་དང་ཆོས་ཀྱི་བདག་ཏུ་འཛིན་པའི་རྟོག་པ་འཇོམས་པར་བྱེད་པའི་སེམས་བྱུང་དང་། བྱང་ཆུབ་ཀྱི་ངེས་པར་འབྱུང་བའི་ཡན་ལག་གང་ཞིག མངོན་ཤེས་ལ་སོགས་པའི་ཡོན་ཏན་བདེ་བླག་ཏུ་འཐོབ་པར་བྱེད་པའི་སེམས་བྱུང་དང་། བྱང་ཆུབ་ཀྱི་ཕན་ཡོན་གྱི་ཡན་ལག་གང་ཞིག ཆོས་ཀྱི་སྣང་བས་ལུས་སེམས་ཚིམ་པར་བྱེད་པའི་སེམས་བྱུང་དང་། བྱང་ཆུབ་ཀྱི་གང་གིས་ཉོན་མོངས་པ་མི་འགྱུར་བར་བྱེད་པའི་ཡན་ལག་གང་ཞིག སེམས་ལས་སུ་རུང་བར་བྱེད་པའི་སེམས་བྱུང་དང་། བྱང་ཆུབ་ཀྱི་གང་དུ་ཀུན་ནས་ཉོན་མོངས་པ་མི་འགྱུར་བའི་ཡན་ལག་གང་ཞིག བསམ་པའི་དོན་ཐམས་ཅད་འབྱོར་པར་བྱེད་པའི་སེམས་བྱུང་དང་། བྱང་ཆུབ་ཀྱི་ཉོན་མོངས་པ་མེད་པའི་ངོ་བོའི་ཡན་ལག་གང་ཞིག མི་མཐུན་ཕྱོགས་དང་གཉེན་པོ་འདོར་ལེན་བྱེད་པའི་སེམས་བྱུང་ངོ་། །ས་མཚམས་ཉན་ཐོས་ཀྱི་མཐོང་ལམ་དང་སྒོམ་ལམ་ནས་སངས་རྒྱས་ཀྱི་སའི་བར་དུ་ཡོད་ཅིང་། མཐོང་ལམ་གྱི་གནས་སྐབས་སུ་ནི་མངོན་པར་རྟོགས་པའི་ལམ་དུ་འཇོག་གོ །བདུན་པའི་མཚན་ཉིད། སྒོམ་ལམ་དུ་གསར་དུ་མངོན་དུ་གྱུར་པའི་ཡོན་ཏན་གྱི་རིགས་གང་ཞིག འཕགས་ལམ་གྱི་ཆ་ཤས་སུ་གྱུར་པ། དབྱེ་ན་ཡང་དག་པའི་ལྟ་བ་དང་། རྟོགས་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཡང་དག་པའི་ཏིང་ངེ་འཛིན་དང་བརྒྱད། མཚན་ཉིད་རིམ་བཞིན། འཕགས་པའི་ཡན་ལག་གང་ཞིག མཉམ་གཞག་ཏུ་རྟོགས་པའི་དེ་ཁོ་ན་ཉིད་ངེས་པར་འཛིན་པ་དང་། གང་ཞིག མཉམ་གཞག་ཏུ་རྟོགས་པའི་དོན་སྟོན་པའི་ངག་ཀུན་ནས་སློང་བའི་རྒྱུ་དུས་ཀྱི་ཀུན་སློང་དང་། གང་ཞིག གཞན་གྱིས་དྲིས་པའི་ལན་ལུང་སྟོན་པའི་དེ་དུས་ཀྱི་ཀུན་སློང་དང་། གང་ཞིག སྤྱོད་པ་ཕུན་སུམ་ཚོགས་པ། གང་ཞིག ལོག་འཚོ་སྤངས་ཏེ་དེ་བཞིན་གཤེགས་པས་ཇི་ལྟར་གནང་བ་བཞིན་དུ་ལོངས་སྤྱོད་པར་བྱེད་པ་དང་། གང་ཞིག ཀུན་སྦྱོར་ལྷག་མ་རྣམས་ཀྱི་གཉེན་པོའི་རིགས་སུ་གནས་པ་དང་། གང་ཞིག ཞི་གནས་ཀྱི་མཚན་མ་མ་བརྗེད་པས་བྱིང་རྒོད་སོགས་ཀྱིས་གོ་སྐབས་མི་འབྱེད་པའི་སེམས་བྱུང་དང་། གང་ཞིག མངོན་ཤེས་ལ་སོགས་པའི་ཡོན་ཏན་མངོན་པར་འགྲུབ་པར་བྱེད་པའི་སེམས་བྱུང་ངོ་། །ས་མཚམས་ཉན་ཐོས་ཀྱི་སྒོམ་ལམ་ནས་སངས་རྒྱས་ཀྱི་སའི་བར་དུ་ཡོད་ཅིང་། སྒོམ་ལམ་གྱི་སྐབས་སུ་ནི་རྣམ་དག་ངེས་འབྱིན་གྱི་ལམ་དུ་འཇོག་གོ །གཉིས་པ་མཐུན་ཆོས་རྣམ་མཁྱེན་གྱི་རྣམ་པ་ངོས་གཟུང་བ་ནི། སངས་རྒྱས་འཕགས་པའི་ཐུགས་རྒྱུད་ཀྱི་བྱང་ཕྱོགས་སོ་བདུན་ཏེ། སྐབས་འདིར་བསྟན་གྱི་གཙོ་བོ་དེ་ཉིད་དོ། །གཉིས་པ་བྱང་སེམས་ཀྱི་ལམ་ཤེས་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པའི་མཚན་ཉིད། རྣམ་མཁྱེན་གྱི་རྣམ་པ་གང་ཞིག བྱང་སེམས་འཕགས་པའི་རྟོགས་རིགས་སུ་གྱུར་པ། འདི་ལ་མཐུན་ཡུལ་ལམ་ཤེས་ཀྱི་རྣམ་པ་ངོས་གཟུང་བ། མཐུན་ཆོས་རྣམ་མཁྱེན་གྱི་རྣམ་པ་ངོས་གཟུང་བ་གཉིས་ལས། དང་པོ་ལ་སྡེ་ཚན་དྲུག་སྟེ། གཉེན་པོའི་ལམ། སྤྲུལ་པའི་ལམ། མཐོང་ཆོས་ལ་བདེར་གནས་ཀྱི་ལམ། འདས་པའི་ལམ། སྤོང་བའི་ལམ། སངས་རྒྱས་ཉིད་ཀྱི་ལམ་མོ། །འདིར་མཚོན་བྱ་དྲུག་ཆར་གྱི་ཐོག་མར་ལམ་ཤེས་ཀྱི་རྣམ་པའི་ནང་ཚན་དུ་གྱུར་པའི་ཞེས་སྦྱར་ཏེ། དང་པོའི་མཚན་ཉིད། བདེན་པའི་ཁྱད་ཆོས་མངོན་སུམ་དུ་རྟོགས་པའི་སྒོ་ནས་ལྟ་བས་བྱས་པ་སོགས་གསུམ་པོ་གང་རུང་གི་གཉེན་པོའི་རིགས་སུ་གནས་པའི་བྱང་སེམས་འཕགས་པའི་མངོན་པར་རྟོགས་པ། དབྱེ་ན་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་གསུམ། དང་པོའི་མཚན་ཉིད། སྡུག་བསྔལ་བདེན་པའི་སྟོང་པ་བདག་མེད་གཉིས་མངོན་དུ་གྱུར་པའི་སྒོ་ནས་ལྟ་བས་བྱས་པའི་གཉེན་པོའི་རིགས་སུ་གནས་པ། གཉིས་པའི་མཚན་ཉིད་འགོག་ལམ་གྱི་རྣམ་པ་བརྒྱད་མངོན་སུམ་དུ་རྟོགས་པའི་སྒོ་ནས་ལྟ་བའི་རྒྱུ་རྣམ་རྟོག་གི་གཉེན་པོའི་རིགས་སུ་གནས་པ། གསུམ་པའི་མཚན་ཉིད། སྡུག་བསྔལ་བདེན་པའི་མི་རྟག་སྡུག་བསྔལ་གཉིས་དང་ཀུན་འབྱུང་བདེན་པའི་རྣམ་པ་བཞི་མངོན་སུམ་རྟོགས་པའི་སྒོ་ནས་ཁམས་གསུམ་པོ་བླང་བྱར་སྨོན་པའི་གཉེན་པོའི་རིགས་སུ་གནས་པའོ། །གཉིས་པའི་མཚན་ཉིད། གཞན་དོན་དུ་སྤྲུལ་པ་སྣ་ཚོགས་སྤྲུལ་པ་ལ་དབང་འབྱོར་བའི་བྱང་སེམས་འཕགས་པའི་རྒྱུད་ཀྱི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན་གཟུགས་ཅན་གཟུགས་ལ་ལྟ་བའི་རྣམ་ཐར། གཟུགས་ཅན་མ་ཡིན་པ་གཟུགས་ལ་ལྟ་བའི་རྣམ་ཐར། སྡུག་པའི་རྣམ་ཐར་དང་གསུམ། དང་པོའི་མཚན་ཉིད། བསམ་གཏན་དང་པོའི་སེམས་ལ་རྟེན་ནས་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་སྣ་ཚོགས་སུ་སྤྲུལ་པ་ལ་གེགས་བྱེད་པའི་སྒྲིབ་པ་ལས་རྣམ་པར་གྲོལ་བའི་རྣམ་ཐར་རོ། །གཉིས་པའི་མཚན་ཉིད། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམ་པ་སྣ་ཚོགས་སུ་སྤྲུལ་པ་ལ་གེགས་བྱེད་པའི་སྒྲིབ་པ་ལས་རྣམ་པར་གྲོལ་བའི་རྣམ་ཐར་རོ། །གསུམ་པའི་མཚན་ཉིད། བསམ་གཏན་བཞི་པའི་སེམས་ལ་བརྟེན་ནས་གཟུགས་ཐམས་ཅད་སྡུག་པར་རོ་གཅིག་ཏུ་སྤྲུལ་པ་ལ་གེགས་བྱེད་པའི་སྒྲིབ་པ་ལས་རྣམ་པར་གྲོལ་བའི་རྣམ་ཐར་རོ། །གསུམ་པའི་མཚན་ཉིད། ཞི་བར་གནས་པའི་རང་བཞིན་དང་། ཐར་པ་དང་མཐུན་པར་གནས་པའི་རང་བཞིན་གང་རུང་གིས་བསྡུས་པའི་བྱང་འཕགས་ཀྱི་མཁྱེན་པ། དབྱེ་ན་གཟུགས་མེད་ཀྱི་རྣམ་ཐར་བཞི། འགོག་པའི་རྣམ་ཐར་དང་ལྔ། དང་པོ་བཞི་ལས། ནམ་མཁའ་མཐའ་ཡས་སྐྱེ་མཆེད་ཀྱི་རྣམ་ཐར་གྱི་མཚན་ཉིད། གཟུགས་མེད་སྙོམས་འཇུག་དང་པོ་གང་ཞིག གཟུགས་མེད་ཞི་བའི་རོ་མྱོང་གི་སྒྲིབ་པ་ལས་གྲོལ་བ། དེས་གཞན་རྣམས་ལ་ཡང་འགྲེའོ། །འགོག་པའི་རྣམ་མཐར་གྱི་མཚན་ཉིད། འགོག་པའི་སྙོམས་འཇུག་གང་ཞིག མི་མཐུན་ཕྱོགས་ཀྱི་ཉོན་མོངས་པ་ལས་གྲོལ་བའོ། །བཞི་པའི་མཚན་ཉིད། ཟག་མེད་ལམ་གྱི་རྟེན་བྱེད་པའི་བྱང་སེམས་འཕགས་པའི་རྒྱུད་ཀྱི་སྙོམས་འཇུག དབྱེ་ན་མཐར་གནས་ཀྱི་སྙོམས་འཇུག་དགུ། དང་པོ་བརྒྱད་སྔར་བཤད་ཟིན། འགོག་པའི་སྙོམས་འཇུག་གི་མཚན་ཉིད། དགག་གཞི་དེ་བཞིན་ཉིད་ཀྱི་སྟེང་དུ་དགག་བྱ་ཟག་བཅས་ཀྱི་ཚོར་འདུ་བཀག་ནས་བདག་མེད་པའི་དོན་ལ་སེམས་རྩེ་གཅིག་པ་བྱང་སེམས་འཕགས་པའི་རྒྱུད་ཀྱི་མཁྱེན་པའོ། །སྡེ་ཚན་བཞི་པོ་འདི་དག་གི་དབྱེ་བའི་ཡ་གྱལ་རྣམས་ལ་ཡང་མཚོན་བྱ་རྣམས་ལ་ལམ་ཤེས་ཀྱི་རྣམ་པའི་ནང་ཚན་སྦྱར་བའི་ཚེ། མཚན་ཉིད་རྣམས་ལ་བྱང་འཕགས་ཀྱི་མངོན་རྟོགས་སྦྱར་བར་བྱའོ། །ལྔ་པའི་མཚན་ཉིད། ཡུལ་བདེན་བཞིའི་ཆོས་ཉིད་མངོན་སུམ་དུ་རྟོགས་པའི་སྒོ་ནས་ངོས་སྐལ་གྱི་ཤེས་སྒྲིབ་ཀྱི་དངོས་གཉེན་དུ་གྱུར་པ། ཡུལ་གྱི་སྒོ་ནས་དབྱེ་ན་བཞི། ས་མཚམས་ས་དང་པོ་ནས་རྒྱུན་མཐའི་བར་ན་ཡོད། དྲུག་པའི་མཚན་ཉིད། རྫོགས་པའི་བྱང་ཆུབ་ཏུ་བགྲོད་པར་བྱེད་པའི་གོ་སྐབས་ཕྱེ་ཤུལ་དུ་གྱུར་པའི་བྱང་སེམས་འཕགས་པའི་མཁྱེན་པ། དབྱེ་ན་སྦྱིན་སོགས་ཕར་ཕྱིན་བཅུའོ། །གཉིས་པ་མཐུན་ཆོས་རྣམ་མཁྱེན་གྱི་རྣམ་པ་ངོས་གཟུང་བ་ནི། སངས་རྒྱས་འཕགས་པའི་རྒྱུད་ཀྱི་རྣམ་ཐར་སྒོ་གསུམ་ལ་སོགས་པ་སོ་བཞི་སྟེ། སྐབས་འདིའི་བརྗོད་བྱའི་གཙོ་བོ་ནི་དེ་ཉིད་དོ། །གསུམ་པ་སངས་རྒྱས་འཕགས་པའི་ཐུགས་རྒྱུད་ཀྱི་ཐུན་མོང་མིན་པའི་རྣམ་མཁྱེན་གྱི་མཚན་ཉིད། ས་བཅུ་པ་མན་ཆད་ལས་རྟོགས་རིགས་ཕུལ་དུ་བྱུང་བའི་མཐར་ཐུག་གི་མཁྱེན་པ། དབྱེ་ན་སྟོབས། མི་འཇིགས་པ། སོ་སོ་ཡང་དག་པར་རིག་པ། མ་འདྲེས་པ། དེ་བཞིན་ཉིད། རང་བྱུང་། སངས་རྒྱས་ཉིད་ཀྱི་རྣམ་པ་དང་བདུན། དང་པོའི་མཚན་ཉིད། ཤེས་བྱ་མཐའ་ཡས་པ་ལ་ཆགས་ཐོགས་མེད་པར་འཇུག་པའི་མཐར་ཐུག་གི་མཁྱེན་པ། དབྱེ་ན་གནས་དང་གནས་མ་ཡིན་པ་དང་། ལས་ཀྱི་རྣམ་པར་སྨིན་པ་དང་། མོས་པ་སྣ་ཚོགས་དང་། འཇིག་རྟེན་གྱི་ཁམས་མ་ལུས་པ་དང་། དབང་པོ་མཆོག་དང་མཆོག་མ་ཡིན་པ་དང་། ཐམས་ཅད་དུ་འགྲོ་བའི་ལམ་དང་། ཀུན་ནས་ཉོན་མོངས་པ་དང་རྣམ་པར་བྱང་བ་དང་། སྔོན་གནས་རྗེས་སུ་དྲན་པ་དང་། འཆི་འཕོ་བ་དང་སྐྱེ་བ་དང་། ཟག་པ་ཟད་པ་མཁྱེན་པའི་སྟོབས་བཅུའི་མཚན་ཉིད་རིམ་བཞིན། རྒྱུ་འབྲས་ཀྱི་རབ་དབྱེ་མ་ལུས་པ་དང་། ཟག་བཅས་ཀྱི་ལས་ཀྱི་རྣམ་སྨིན་གྱི་འབྲས་བུ་མ་ལུས་པ་དང་། སེམས་ཅན་རྣམས་ཀྱི་བསམ་སྦྱོར་འཇུག་པའི་ཚུལ་མ་ལུས་པ་དང་། འཇིག་རྟེན་གྱི་འཇིག་ཆགས་དང་རིགས་ལ་སོགས་པ་མ་ལུས་པ་དང་། དབང་པོ་རྣོ་རྟུལ་སོགས་ཀྱི་རབ་དབྱེ་མ་ལུས་པ་དང་། བྱང་ཆུབ་གསུམ་དུ་བགྲོད་པའི་ལམ་མ་ལུས་པ་དང་། བསམ་གཏན་དང་སྙོམས་འཇུག་གི་རབ་དབྱེ་མ་ལུས་པ་དང་། ཚེ་རབས་སྔ་མ་རྣམས་ཀྱི་གནས་ཚུལ་མ་ལུས་པ་དང་། སེམས་ཅན་ཐམས་ཅད་ཀྱི་གནས་ཚུལ་མ་ལུས་དང་། ཟག་པ་ཟད་པའི་ངོ་བོ་དང་ཐབས་མ་ལུས་པར་མཁྱེན་པའོ། །གཉིས་པའི་མཚན་ཉིད། འཁོར་གྱི་དབུས་སུ་རང་གཞན་གྱི་དོན་ཕུན་སུམ་ཚོགས་པ་དམ་བཅས་པ་ལ་ཆོས་མཐུན་གྱི་རྒོལ་བ་མེད་ཅིང་མི་མཐུན་པའི་རྒོལ་བས་མི་བརྫི་བའི་མཁྱེན་པ། དབྱེ་ན་རང་དོན་རྟོགས་པ་ཕུན་སུམ་ཚོགས་པ་དང་། རང་དོན་སྤངས་པ་ཕུན་སུམ་ཚོགས་པ་དང་། གཞན་དོན་སྤང་བྱ་དང་། གཞན་དོན་ངེས་འབྱུང་གི་ལམ་དམ་བཅས་པ་ལ་མི་འཇིགས་པའི་རྣམ་པ་བཞིའི་མཚན་ཉིད་རིམ་བཞིན། འཁོར་གྱི་དབུས་སུ་ང་ནི་སངས་རྒྱས་སོ་ཞེས་ཞལ་གྱིས་བཞེས་པ་དང་། བདག་ཉིད་ཀྱི་ཟག་པ་ཟད་པ་ཉིད་དུ་ཞལ་གྱིས་བཞེས་པ་དང་། འདོད་ཆགས་སོགས་སྤང་བར་བྱ་བ་ཉིད་དང་། ཐམས་ཅད་ཤེས་པ་ཉིད་ལ་སོགས་པའི་ལམ་བྱང་ཆུབ་ཏུ་ངེས་པར་འབྱུང་བ་ཉིད་དུ་རབ་ཏུ་སྟོན་པ་ལ་ཆོས་མཐུན་གྱི་རྒོལ་བ་མེད་ཅིང་ཞེས་སོགས་སྦྱར། གསུམ་པའི་མཚན་ཉིད། བཤད་བྱ་དང་འཆད་བྱེད་ཐོགས་མེད་དུ་མཁྱེན་པས་འདྲི་བ་ཀུན་ལ་ལན་འདེབས་པའི་བདག་རྐྱེན་དུ་གྱུར་པའི་མཁྱེན་པ། དབྱེ་ན་ཆོས་དང་། དོན་དང་། ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པ་བཞིའི་མཚན་ཉིད་རིམ་བཞིན། ཆོས་རྣམས་ཀྱི་མིང་གི་རྣམ་གྲངས་དང་། ཆོས་རྣམས་ཀྱི་རང་སྤྱིའི་མཚན་ཉིད་དང་། བཤད་བྱ་ཡུལ་སོ་སོའི་སྐད་དང་། རྫས་ཡོད་བཏགས་ཡོད་སོགས་ཀྱི་རབ་ཏུ་དབྱེ་བ་ཐོགས་མེད་མཁྱེན་པས་འདྲི་བ་ཀུན་ལ་ལན་འདེབས་པའི་བདག་རྐྱེན་དུ་གྱུར་པའི་མཁྱེན་པའོ། །བཞི་པའི་མཚན་ཉིད། འཕགས་པ་གཞན་དང་ཐུན་མོང་མ་ཡིན་པའི་ཡོན་ཏན་གྱི་སྒོ་ནས་འགྲོ་བའི་བླ་མར་བྱེད་པའི་མཁྱེན་པ། དབྱེ་ན་སྤྱོད་པ་མ་འདྲེས་པ་དྲུག རྟོགས་པ་མ་འདྲེས་པ་དྲུག ཕྲིན་ལས་མ་འདྲེས་པ་གསུམ། ཡེ་ཤེས་མ་འདྲེས་པ་གསུམ་སྟེ་བཅོ་བརྒྱད་དོ། །ལྔ་པའི་མཚན་ཉིད། ཆོས་ཉིད་དེ་བཞིན་ཉིད་མངོན་སུམ་དུ་རྟོགས་པའི་ཡེ་ཤེས་མཐར་ཐུག དྲུག་པའི་མཚན་ཉིད། ཆོས་ཅན་ཇི་སྙེད་པ་མངོན་སུམ་དུ་རྟོགས་པའི་ཡེ་ཤེས་མཐར་ཐུག བདུན་པའི་མཚན་ཉིད། ཇི་ལྟ་ཇི་སྙེད་ཀྱི་རྣམ་པ་ཐམས་ཅད་མངོན་པར་རྫོགས་པར་བྱང་ཆུབ་པའི་ཡེ་ཤེས། ཞར་བྱུང་སྦྱོར་བ་སྒོམ་པའི་གང་ཟག་གི་མཚན་ཉིད། ཕྱི་ནང་གི་མཐུན་རྐྱེན་ཁྱད་པར་ཅན་གྱིས་ཡུམ་ལ་ཐོས་སོགས་ཀྱིས་འཇུག་པའི་སྣོད་དུ་གྱུར་པ། དབྱེ་ན་ཡུམ་ཉན་པའི་སྣོད། ཡུམ་གྱི་ཚིག་བློ་ལ་འཛིན་པའི་སྣོད། ཡུམ་གྱི་དོན་མི་བརྗེད་པར་འཛིན་པའི་སྣོད། ཡུམ་གྱི་དོན་ཚུལ་བཞིན་དུ་ཡིད་ལ་བྱེད་པའི་སྣོད་དང་བཞིའོ། །གཉིས་པ་ཐེག་ཆེན་གྱི་སྦྱོར་བའི་མཚན་ཉིད། ཤེས་ཁྱད་བྱེད་གསུམ་དང་ལྡན་པའི་སེམས་དཔའི་རྣལ་འབྱོར། དབྱེ་ན་རང་བཞིན་གྱི་སྦྱོར་བ་ལྔ། གནས་སྐབས་ཀྱི་སྦྱོར་བ་བཅོ་ལྔ་ལས། དང་པོ་ནི། མི་གནས་པའི་སྦྱོར་བ་དང་། ཞེན་སྤྱོད་འགོག་པའི་སྦྱོར་བ་དང་། ཟབ་པའི་དང་། གཏིང་དཔག་དཀའ་བའི་དང་། ཚད་མེད་པའི་སྦྱོར་བ་རྣམས་སོ། །གཉིས་པ་ནི། ཚེགས་ཆེན་ཡུན་རིང་དུ་རྟོགས་པའི་དང་། ལུང་བསྟན་ཐོབ་པ་དང་། ཕྱིར་མི་ལྡོག་པ་དང་། ངེས་པར་འབྱུང་བའི་དང་། བར་ཆད་མེད་པའི་དང་། བྱང་ཆུབ་ལ་ཉེ་བའི་དང་། མྱུར་བར་བྱང་ཆུབ་པའི་དང་། གཞན་དོན་གྱི་དང་། འཕེལ་འགྲིབ་མེད་པའི་དང་། ཆོས་དང་ཆོས་མིན་སོགས་མི་དམིགས་པའི་དང་། གཟུགས་སོགས་བསམ་གྱིས་མི་ཁྱབ་པའི་རྣམ་པ་འགོག་པའི་དང་། གཟུགས་ལ་སོགས་པའི་དངོས་པོར་རྣམ་པར་མི་རྟོགས་པའི་དང་། འབྲས་བུ་རིན་པོ་ཆེ་སྦྱིན་པའི་དང་། རྣམ་པར་དག་པའི་དང་། ས་མཚམས་ཀྱི་སྦྱོར་བ་རྣམས་ཏེ། རང་བཞིན་གྱི་སྦྱོར་བ་ལྔ་ནི་ཐེག་ཆེན་གྱི་ཚོགས་ལམ་ནས་ས་བཅུ་རྒྱུན་མཐའི་བར་ན་ཡོད། གནས་སྐབས་ཀྱི་སྦྱོར་བ་བཅོ་ལྔ་ནི། དང་པོ་ཐེག་ཆེན་གྱི་ཚོགས་ལམ། དེ་ནས་བཞི་ཐེག་ཆེན་དྲོད་སོགས་བཞི་ལ་རིམ་བཞིན་དུ། དེ་ནས་གཅིག་ས་དང་པོ། དེ་ནས་གཅིག་ས་གཉིས་པ་ནས་ས་བདུན་པའི་བར། དེ་ནས་ལྔ་ས་བརྒྱད་པ། དེ་ནས་གཉིས་ས་དགུ་པ་དང་བཅུ་པ་གཉིས་ལ་རིམ་བཞིན། ཐ་མ་ནི་ས་བདུན་མན་ཆད་ན་ཡོད། གསུམ་པ་ཐེག་ཆེན་སྦྱོར་བའི་ཡོན་ཏན་གྱི་མཚན་ཉིད། ཐེག་ཆེན་གྱི་སྦྱོར་བ་སྒོམ་སྟོབས་ཀྱིས་ཐེག་ཆེན་སྦྱོར་བའི་གནས་སྐབས་སུ་ཐོབ་པའི་ཡོན་ཏན། དབྱེ་ན་བདུད་ཀྱི་མཐུ་བཅོམ་པ་ལ་སོགས་བཅུ་བཞིའོ། །བཞི་པ་ཐེག་ཆེན་སྦྱོར་བའི་སྐྱོན་གྱི་མཚན་ཉིད། ཐེག་ཆེན་གྱི་སྦྱོར་བ་སྒོམ་པ་ལ་བར་དུ་གཅོད་པའི་བདུད་ལས། དབྱེ་ན་རང་ལ་བརྟེན་པའི་འགལ་རྐྱེན་ཉི་ཤུ། མཐུན་རྐྱེན་མ་ཚང་བ་ཉེར་གསུམ། གཞན་ལ་བརྟེན་པའི་འགལ་རྐྱེན་གསུམ་སྟེ་ཞེ་དྲུག་གོ །ལྔ་པ་ཐེག་ཆེན་སྦྱོར་བའི་མཚན་ཉིད་ཀྱི་མཚན་ཉིད། ཐེག་ཆེན་གྱི་སྦྱོར་བ་མཚོན་པའི་ཆེད་དུ་བཀོད་པའི་བྱེད་སྒྲུབ་དང་ལས་སྒྲུབ་གང་རུང་གིས་བསྡུས་པའི། དབྱེ་ན་ཐེག་ཆེན་སྦྱོར་བའི་ཤེས་མཚན། དེའི་ཁྱད་མཚན། དེའི་བྱེད་མཚན། དེའི་ངོ་བོ་ཉིད་མཚན་དང་བཞི་ལས། དང་པོའི་མཚན་ཉིད། ཐེག་ཆེན་སྦྱོར་བས་གཞི་ལམ་རྣམ་པ་གང་རུང་གི་གནས་ལུགས་རྟོགས་པའི་ཁྱད་པར། དབྱེ་ན་གཞི་ཤེས། ལམ་ཤེས་རྣམ་མཁྱེན་སྦྱོར་བའི་ཤེས་མཚན་དང་གསུམ། དང་པོའི་མཚན་ཉིད། གཞི་ཤེས་སྦྱོར་བས་གཞིའི་གནས་ལུགས་རྟོགས་པའི་ཁྱད་པར། དབྱེ་ན་གཞི་ཤེས་སྦྱོར་བའི་ཡུམ་ལ་བརྟེན་ནས་དེ་བཞིན་གཤེགས་པ་འབྱུང་བར་ཤེས་པ་ལ་སོགས་པའི་ཤེས་པ་བཅུ་དྲུག གཉིས་པའི་མཚན་ཉིད། ལམ་ཤེས་སྦྱོར་བས་ལམ་གྱི་གནས་ལུགས་རྟོགས་པའི་ཁྱད་པར། དབྱེ་ན་ལམ་ཤེས་སྦྱོར་བའི་ཡུམ་ལ་བརྟེན་ནས་རྣམ་ཐར་སྒོ་གསུམ་རྟོགས་པ་ལ་སོགས་པའི་ཤེས་པ་བཅུ་དྲུག གསུམ་པའི་མཚན་ཉིད། རྣམ་མཁྱེན་སྦྱོར་བས་རྣམ་པའི་གནས་ལུགས་རྟོགས་པའི་ཁྱད་པར། དབྱེ་ན་རྣམ་མཁྱེན་སྦྱོར་བའི་ཡུམ་ལ་བརྟེན་ནས་མཐོང་ཆོས་ལ་བདེར་གནས་ཤེས་པ་ལ་སོགས་པའི་ཤེས་པ་བཅུ་དྲུག ཁྱད་མཚན་གྱི་མཚན་ཉིད། རང་གང་ལ་ལྡན་པའི་ཐེག་ཆེན་གྱི་སྦྱོར་བ་དེ་ཐེག་དམན་གྱི་ལམ་ལས་ཁྱད་པར་དུ་འཕགས་པར་མཚོན་ནུས་པའི་ཐེག་ཆེན་སྦྱོར་བའི་ཁྱད་པར་བྱེད་ཆོས། དབྱེ་ན་ཆོས་ཉིད་རྟོག་གེའི་བློས་བསམ་དུ་མེད་པ་ལ་སོགས་པའི་ཁྱད་པར་བཅུ་དྲུག བྱེད་མཚན་གྱི་མཚན་ཉིད། ཐེག་ཆེན་སྦྱོར་བས་གཞན་དོན་བྱེད་པའི་ཆར་གྱུར་པའི་མཛད་པ་ཕྲིན་ལས། དབྱེ་ན་གཞི་ཤེས་ལམ་ཤེས་རྣམ་མཁྱེན་སྦྱོར་བའི་བྱེད་མཚན་དང་གསུམ། མཚན་ཉིད་རིམ་བཞིན། དེ་དང་དེས་གཞན་དོན་སྒྲུབ་པའི་ཆར་གྱུར་པའི་མཛད་པ་ཕྲིན་ལས། དབྱེ་ན་དང་པོ་ལ་གཞི་ཤེས་སྦྱོར་བས་གདུལ་བྱ་ལ་ཕན་པར་སྒྲུབ་པ་སོགས་བྱེད་པ་གསུམ། གཉིས་པ་ལ་ལམ་ཤེས་སྦྱོར་བས་གདུལ་བྱའི་སྐྱབས་མགོན་མཛད་པ་ལ་སོགས་པའི་བྱེད་པ་བདུན། གསུམ་པ་ལ་རྣམ་མཁྱེན་སྦྱོར་བས་རྟེན་གྱི་མཛད་པ་སྟེ་གཅིག་ཏུ་ངེས་སོ། །ངོ་བོ་ཉིད་མཚན་གྱི་མཚན་ཉིད། ཤེས་ཁྱད་བྱེད་གསུམ་གྱིས་མཚོན་པར་བྱ་བའི་གཞིར་གྱུར་པའི་ཐེག་ཆེན་གྱི་སྦྱོར་བའི་ལས་སྒྲུབ། དབྱེ་ན་གཞི་ཤེས་ལམ་ཤེས་རྣམ་མཁྱེན་གྱི་སྦྱོར་བའི་ངོ་བོ་ཉིད་མཚན་དང་གསུམ། མཚན་ཉིད་རིམ་བཞིན། དེ་དང་དེའི་ཤེས་ཁྱད་བྱེད་གསུམ་གྱིས་མཚོན་པར་བྱ་བའི་གཞིར་གྱུར་པའི་དེ་དང་དེའི་ལས་སྒྲུབ། དབྱེ་ན་དང་པོ་ལ་ཉོན་མོངས་པས་དབེན་པའི་ངོ་བོ་ཉིད་སོགས་བཞི། གཉིས་པ་ལ་བྱ་དཀའ་བའི་ངོ་བོ་ཉིད་སོགས་ལྔ། གསུམ་པ་ལ་དམིགས་པའི་ངོ་བོ་ཉིད་སོགས་བདུན་ནོ། །དྲུག་པ་སྐབས་འདིར་དངོས་བསྟན་གྱི་ཐེག་ཆེན་གྱི་ཐར་པ་ཆ་མཐུན་གྱི་མཚན་ཉིད། མཚན་མེད་རྟོགས་པའི་ཤེས་རབ་ཀྱི་སྒོ་ནས་རྣམ་མཁྱེན་སྒྲུབ་པའི་ཐབས་ལ་མཁས་པའི་ཐར་པ་ཆ་མཐུན། དབྱེ་ན་གཉིས་ཏེ། ཡུལ་གྱི་སྒོ་ནས་དབྱེ་ན་བདེན་པ་མངོན་པར་རྟོགས་པ་ལ་དབང་བྱེད་པའི་དད་སོགས་དབང་པོ་མཾ་ཡིཾན་པ་རྣམ་པར་བྱང་བ་ཙམ་ལ་དབང་བྱེད་པའི་དད་པའི། བརྩོན་འགྲུས། དྲན་པ། ཏིང་ངེ་འཛིན། ཤེས་རབ་ཀྱི་དབང་པོ་དང་ལྔ། དང་པོ་ནི་སངས་རྒྱས་སོགས་ཀྱི་ཡུལ་ལ་མཁས་པའི་སེམས་བྱུང་། གཉིས་པ་ནི་སྦྱིན་སོགས་ཀྱི་ཡུལ་ལ་མཁས་པའི་སེམས་བྱུང་། གསུམ་པ་ནི་བསམ་པ་ཕུན་སུམ་ཚོགས་པ་སེམས་བསྐྱེད་ལ་མཁས་པའི་སེམས་བྱུང་། བཞི་པ་ནི་རྣམ་པར་མི་རྟོག་པ་ལ་མཁས་པའི་སེམས་བྱུང་། ལྔ་པ་ནི་ཆོས་ཐམས་ཅད་ཀྱི་རྣམ་པ་ཐམས་ཅད་ཡོངས་སུ་ཤེས་པ་ལ་མཁས་པའི་སེམས་བྱུང་ངོ་། །དབང་པོའི་སྒོ་ནས་དབྱེ་ན་དད་སོགས་དབང་རྣོན་དང་དབང་རྟུལ་གཉིས། དང་པོ་ནི་ཐེག་པ་གཞན་གྱིས་བར་མ་ཆོད་པར་རྫོགས་པའི་བྱང་ཆུབ་ཐོབ་སླ་བའི་དད་སོགས་སོ། །གཉིས་པ་ནི་དེ་དཀའ་བའི་དད་སོགས་སོ། །ཤུགས་བསྟན་རང་རྒྱལ་གྱི་ཐར་པ་ཆ་མཐུན་གྱི་མཚན་ཉིད། གཟུང་བ་ཆོས་ཀྱི་བདག་མེད་རྟོགས་པའི་ཤེས་རབ་ཀྱི་སྒོ་ནས་རང་རྒྱུད་ལ་རང་རྒྱལ་གྱི་བྱང་ཆུབ་སྒྲུབ་པའི་ཐབས་ལ་མཁས་པའི་ཐར་པ་ཆ་མཐུན། ཤུགས་བསྟན་ཉན་ཐོས་ཀྱི་ཐར་པ་ཆ་མཐུན་གྱི་མཚན་ཉིད། གང་ཟག་གི་བདག་མེད་རྟོགས་པའི་སྒོ་ནས་རང་རྒྱུད་ལ་ཉན་ཐོས་ཀྱི་བྱང་ཆུབ་སྒྲུབ་པའི་ཐབས་ལ་མཁས་པའི་ཐར་པ་ཆ་མཐུན། བདུན་པ་འདིར་བསྟན་གྱི་ཐེག་ཆེན་གྱི་ངེས་འབྱེད་ཆ་མཐུན་གྱི་མཚན་ཉིད། དམིགས་པ་སེམས་ཅན་ལ་དམིགས་ནས་རྣམ་པ་རང་གཞན་གྱི་དོན་སྒྲུབ་པའི་རྗེས་ཐོབ་ཀྱིས་བསྡུས་པའི་སྒོམ་བྱུང་གཙོ་བོར་གྱུར་པའི་བྱང་སེམས་སོ་སྐྱེའི་རྒྱུད་ཀྱི་མཁྱེན་པ། དབྱེ་ན་འདིར་བསྟན་ཐེག་ཆེན་གྱི་དྲོད། རྩེ་མོ། བཟོད་པ། ཆོས་མཆོག་བཞི། དང་པོའི་མཚན་ཉིད། དམིགས་པ་སེམས་ཅན་ལ་དམིགས་ནས་རྣམ་པ་སེམས་མཉམ་པ་ཉིད་སོགས་བཅུ་པོ་གང་རུང་གིས་བསྡུས་པའི་ངེས་འབྱེད་ཆ་མཐུན། དབྱེ་ན་དྲོད་ཆུང་འབྲིང་ཆེན་པོ་གསུམ། དམིགས་པ་འདྲ་བ་ལས་རྣམ་པ་དང་པོ་ནི། མཉམ་པ་དང་། བྱམས་པའི་སེམས་གཉིས། གཉིས་པ་ནི་ཕན་པའི་སེམས་ལ་སོགས་པ་གསུམ། གསུམ་པ་ནི་ཕ་དང་མའི་སེམས་ལ་སོགས་པ་ལྔ། གཉིས་པའི་མཚན་ཉིད། དམིགས་པ་སེམས་ཅན་ལ་དམིགས་ནས་རྣམ་པ་རང་གཞན་དགེ་སྡིག་གི་བླང་དོར་ལ་སྦྱོར་བ་སོགས་གསུམ་གྱིས་བསྡུས་པའི་ངེས་འབྱེད་ཆ་མཐུན། དབྱེ་ན་རྩེ་མོ་ཆུང་འབྲིང་ཆེན་པོ་གསུམ། དམིགས་པ་གསུམ་འདྲ་བ་ལས་རྣམ་པ་དང་པོ་ནི། རང་གཞན་མི་དགེ་བ་སྤོང་བ་ལ་སྦྱོར་བ། གཉིས་པ་ནི་རང་གཞན་དགེ་བ་སྒྲུབ་པ་ལ་སྦྱོར་བ། གསུམ་པ་ནི་རང་གཞན་སྟོངཾ་ཉིདཾ་སྒོཾམ་པ་ལ་སྦྱོར་བ། གསུམ་པའི་མཚན་ཉིད། དམིགས་པ་སེམས་ཅན་ལ་དམིགས་ནས་རྣམ་པ་རང་གཞན་བདེན་པ་ཤེས་པ་ལ་སྦྱོར་བ་སོགས་གསུམ་གྱིས་བསྡུས་པའི་ངེས་བྱེད་ཆ་མཐུན། དབྱེ་ན་བཟོད་པ་ཆུང་འབྲིང་ཆེན་པོ་གསུམ། དམིགས་པ་འདྲ་བ་ལས་རྣམ་པ་དང་པོ་ནི་རང་གཞན་བདེན་པ་ཤེས་པ་ལ་སྦྱོར་བ། གཉིས་པ་ནི་རང་གཞན་རྒྱུན་ཞུགས་ཀྱི་འབྲས་བུ་ཤེས་པ་ལ་མངོན་དུ་བྱ་བའི་ཕྱིར་སྦྱོར་བ། གསུམ་པ་ནི་རང་གཞན་བྱང་སེམས་སྐྱོན་མེད་པ་ལ་སྦྱོར་བའོ། །བཞི་པའི་མཚན་ཉིད། དམིགས་པ་སེམས་ཅན་ལ་དམིགས་ནས་རྣམ་པ་རང་གཞན་སྨིན་གྲོལ་སོགས་ལ་སྦྱོར་བ་སོགས་གསུམ་གྱིས་བསྡུས་པའི་ངེས་འབྱེད་ཆ་མཐུན། དབྱེ་ན་ཆོས་མཆོག་ཆུང་འབྲིང་ཆེན་པོ་གསུམ། དམིགས་པ་འདྲ་བ་ལས་རྣམ་པ་དང་པོ་ནི་རང་གཞན་དགེ་རྩ་སྨིན་གྲོལ་ལ་སྦྱོར་བ། གཉིས་པ་ནི། རང་གཞན་མངོན་ཤེས་ཁྱད་པར་ཅན་ལ་སྦྱོར་བ། གསུམ་པ་ནི་རང་གཞན་རྣམ་མཁྱེན་གྱི་ཡེ་ཤེས་བསྐྱེད་པ་ལ་སྦྱོར་བའོ། །བརྒྱད་པ་སློབ་པ་ཕྱིར་མི་ལྡོག་པའི་ཚོགས་ཀྱི་མཚན་ཉིད། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་ཡེ་ཤེས་སྐྱེས་པའི་སྟོབས་ཀྱིས་གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པའི་བྱང་སེམས། དབྱེ་ན་སྦྱོར་ལམ། མཐོང་ལམ། སྒོམ་ལམ་ལ་གནས་པའི་ཕྱིར་མི་ལྡོག་པའི་དགེ་འདུན་གསུམ། མཚན་ཉིད་རིམ་བཞིན་སྦྱོར་མཐོང་སྒོམ་གསུམ་ལ་གནས་པའི་གང་ཟག་གང་ཞིག གནས་སྐབས་བླ་མེད་རྫོགས་བྱང་ལས་ཕྱིར་མི་ལྡོག་པའོ། །ཕྱིར་མི་ལྡོག་པའི་གཏན་ཚིགས་ཀྱི་མཚན་ཉིད། སྟོང་ཉིད་ལ་སྒོམ་བྱུང་གཙོ་བོར་གྱུར་པའི་སྟོབས་ཀྱིས་ཐོབ་པའི་ཡོན་ཏན་གང་ཞིག རང་གང་ལ་ལྡན་པའི་བྱང་སེམས་གནས་སྐབས་རྫོགས་བྱང་ལས་ཕྱིར་མི་ལྡོག་པར་སྒྲུབ་ནུས་པ། དབྱེ་ན་སྦྱོར་ལམ། མཐོང་ལམ། སྒོམ་ལམ་ལ་གནས་པའི་བྱང་སེམས་ཕྱིར་མི་ལྡོག་པའི་གཏན་ཚིགས་གསུམ། དང་པོའི་མཚན་ཉིད། གང་ཞིག རང་གང་ལ་ལྡན་པའི་སྦྱོར་ལམ་ལ་གནས་པའི་བྱང་སེམས་གནས་སྐབས་རྫོགས་བྱང་ལས་ཕྱིར་མི་ལྡོག་པར་སྒྲུབ་ནུས་པ། དབྱེ་ན་དྲོད། རྩེ་མོ། བཟོད་པ། ཆོས་མཆོག་ལ་གནས་པའི་བྱང་སེམས་ཕྱིར་མི་ལྡོག་པའི་གཏན་ཚིགས་བཞི་མཚན་ཉིད་སྔ་མས་འགྲེ། དབྱེ་ན་དང་པོ་ལ་བཅུ་གཅིག གཉིས་པ་ལ་དྲུག གསུམ་པ་ལ་གཉིས། བཞི་པ་ལ་གཅིག་སྟེ་ཉི་ཤུའོ། །གཉིས་པའི་མཚན་ཉིད། གང་ཞིག རང་གང་ལ་ལྡན་པའི་མཐོང་ལམ་ལ་གནས་པའི་བྱང་སེམས་གནས་སྐབས་རྫོགས་བྱང་ལས་ཕྱིར་མི་ལྡོག་པར་སྒྲུབ་ནུས་པ། དབྱེ་ན་ཤེས་བཟོད་སྐད་ཅིག་མ་བཅུ་དྲུག་གི་མིང་ཅན་གྱི་གཏན་ཚིགས་བཅུ་དྲུག་གོ །གསུམ་པའི་མཚན་ཉིད། གང་ཞིག རང་གང་ལ་ལྡན་པའི་སྒོམ་ལམ་ལ་གནས་པའི་བྱང་སེམས་གནས་སྐབས་རྫོགས་བྱང་ལས་ཕྱིར་མི་ལྡོག་པར་སྒྲུབ་ནུས་པའོ། །འདི་ལ་སྒོམ་ལམ་གཏན་ལ་དབབ་པ་དང་། རྟགས་ཀྱི་དོན་དངོས་གཉིས་ལས། དང་པོ་ལ་སྒོམ་ལམ་གྱི་ཁྱད་པར་བྱེད་ཆོས། ཁྱད་གཞི་སྒོམ་ལམ་གྱི་ངོ་བོ། སྒོམ་ལམ་གྱི་དབྱེ་བ་དང་གསུམ། དང་པོའི་མཚན་ཉིད། ཟབ་མོའི་སྟོང་པ་ཉིད་མངོན་སུམ་དུ་མཐོང་ཟིན་རྒྱུན་ལྡན་དུ་གོམས་པའི་སྒོ་ནས་ཐེག་དམན་གྱི་སྒོམ་ལམ་ལས་ཁྱད་པར་བྱེད་ཆོས་སུ་གྱུར་པ། གཉིས་པའི་མཚན་ཉིད། ཐེག་ཆེན་གྱི་སྦྱོར་ལམ་མཐོང་ལམ་སྒོམ་ལམ་གསུམ་མཉམ་གཞག་གི་གནས་སྐབས་སུ་མཐོང་ཟིན་གྱི་དོན་ལ་སེམས་འཇལ་རྟོག་གསུམ་བྱེད་པའི་བྱང་སེམས་འཕགས་པའི་རྒྱུད་ཀྱི་མཁྱེན་པ། མཚོན་བྱ་གཉིས་ལ་སྐབས་འདིར་བསྟན་དང་། ཐེག་ཆེན་སྦྱར་ཞིང་། གོང་གི་སྦྱོར་མཐོང་སྒོམ་གསུཾམ་གྱི་དང་ཕྱིར་མི་ལྡོག་པའི་གཏན་ཚིགས་གསུམ་གྱི་གང་ཞིག་གསུམ་ལ་ཐེག་ཆེན་སྦྱོར་ལམ་པའི་རྒྱུད་ཀྱི་ཡོན་ཏན་ཞེས་སོགས་སྦྱར་རོ། །གསུམ་པ་ལ་དངོས་དང་རྩོད་པ་སྤོང་བ་གཉིས། དང་པོ་ལ་ཐེག་ཆེན་གྱི་སྒོམ་ལམ་ཆུང་ངུའི་ཆུང་ངུ་ལ་སོགས་དགུའོ། །གཉིས་པ་ལ་གྲངས་ངེས་པ་དང་། བྱེད་ལས་ལ་རྩོད་པ་སྤང་བ་གཉིས། དང་པོ་ལ་རྩོད་པ་ནི། ཐེག་ཆེན་སྒོམ་ལམ་ཆོས་ཅན། དགུར་གྲངས་མ་ངེས་པར་ཐལ། འབྲས་བུ་དགུ་ལས་མང་བ་ཡོད་པའི་ཕྱིར་ཏེ། འབྲས་བུ་བསོད་ནམས་གྲངས་མེད་གཞལ་མེད་སོགས་སྐྱེད་པའི་ཕྱིར་ཞེ་ན། ལན་ལ་གཉིས། དོན་དམ་གྱི་ལན་ནི་ཐེག་ཆེན་གྱི་སྒོམ་ལམ་ཆོས་ཅན། དོན་དམ་པར་དགུ་ལས་མང་བར་ཐལ། དོན་དམ་པར་འབྲས་བུ་བསོད་ནམས་གྲངས་མེད་གཞལ་མེད་སོགས་སྐྱེད་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མ་ཡིན་པར་ཐལ། དབུ་མ་པས་ཁྱོད་ལ་རྟགས་མ་གྲུབ་ཀྱི་ལན་དོན་མཐུན་དུ་ཐེབས་པའི་ཕྱིར། ཀུན་རྫོབ་ཀྱི་ལན་ནི་ཐེག་ཆེན་གྱི་སྒོམ་ལམ་ཆོས་ཅན། ཀུན་རྫོབ་ཏུ་དགུ་ལས་མང་བར་ཐལ། ཀུན་རྫོབ་ཏུ་འབྲས་བུ་བསོད་ནམས་གྲངས་མེད་སོགས་སྐྱེད་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་དབུ་མ་པ་ལ་གནོད་བྱེད་ཀྱི་ཐལ་འགྱུར་ཡང་དག་མིན་པར་ཐལ། དབུ་མ་པས་ཁྱོད་ལ་ཁྱབ་པ་མ་ངེས་པའི་ལན་དོན་མཐུན་དུ་ཐེབས་པའི་ཕྱིར། གཉིས་པ་ལ་གཉིས་ཏེ། གནས་སྐབས་ཀྱི་བྱེད་ལས་ལ་རྩོད་པ་སྤང་བ་དང་། མཐར་ཐུག་གི་བྱེད་ལས་ལ་རྩོད་པ་སྤང་བའོ། །དང་པོ་ལ་རྩོད་པ་ནི་ཐེག་ཆེན་གྱི་སྒོམ་ལམ་ཆོས་ཅན། སྤང་གཉེན་ཉམས་འཕེལ་གྱི་བྱ་བ་མི་བྱེད་པར་ཐལ། དོན་དམ་པར་ཟབ་མོ་སྟོང་ཉིད་ཀྱི་ངོ་བོ་ཡིན་པའི་ཕྱིར་ཞེ་ན། ལན་ནི། དེ་ཆོས་ཅན། དོན་དམ་པར་ཟབ་མོ་སྟོང་པ་ཉིད་ཀྱི་ངོ་བོ་ཡིན་ཀྱང་ཀུན་རྫོབ་ཏུ་སྤང་གཉེན་ཉམས་འཕེལ་སོགས་ཀྱི་བྱ་བ་བྱེད་པ་འཐད་དེ། དེ་ལྟར་བྱེད་པ་རྟེན་འབྲེལ་གྱི་ཆོས་ཉིད་ཡིན་པའི་ཕྱིར། དཔེར་ན་སྐུ་གསུམ་པོ་དེ་དོན་དམ་པར་གཟུང་འཛིན་སྤྲོས་པ་དང་བྲལ་ཡང་ཀུན་རྫོབ་ཏུ་གཟུང་འཛིན་སྤྲོས་པར་བསྟན་པའི་སྒོ་ནས་གདུལ་བྱའི་དོན་མཛད་པ་བཞིན་ནོ། །གཉིས་པ་ལ་རྩོད་པ་ནི། བྱང་སེམས་སྒོམ་ལམ་པའི་རྒྱུད་ཀྱི་སེམས་བསྐྱེད་ཆོས་ཅན། ཁྱོད་ཀྱིས་བླ་ན་མེད་པའི་བྱང་ཆུབ་མི་སྐྱེད་པར་ཐལ། ཁྱོད་ཀྱི་སྐད་ཅིག་རེ་རེ་ཁོ་ནས་བླ་ན་མེད་པའི་བྱང་ཆུབ་མི་སྐྱེད། ཁྱོད་ཀྱི་སྐད་ཅིག་སྔ་ཕྱི་ལྷན་ཅིག་ཚོགས་པ་དང་རིམ་གྱིས་འབྱུང་བས་ཀྱང་མི་སྐྱེད་པའི་ཕྱིར། གཏན་ཚིགས་ཕྱི་མ་གྲུབ་སྟེ། ཁྱོད་ཀྱི་སྐད་ཅིག་ཕྱི་མ་དེ་བྱུང་མ་ཐག་ཏུ་སྔ་མ་དེ་རྗེས་སུ་འབྱུང་བ་མེད་པ་ཉིད་དུ་འཇིག་པའི་ཕྱིར་ཞེ་ན། ལན་ནི། དེ་ཆོས་ཅན། ཁྱོད་ཀྱི་སྐད་ཅིག་ཕྱི་མ་དེ་བྱུང་མ་ཐག་ཏུ་སྔ་མ་དེ་རྗེས་སུ་འབྱུང་བ་མེད་པ་ཉིད་དུ་འཇིག་ཀྱང་ཁྱོད་ཀྱི་སྐད་ཅིག་སྔ་ཕྱི་རིམ་གྱིས་འབྱུང་བས་བླ་ན་མེད་པའི་བྱང་ཆུབ་བསྐྱེད་པ་འཐད་དེ། དེ་ལྟར་འབྱུང་བ་རྟེན་འབྲེལ་གྱི་ཆོས་ཉིད་ཡིན་པའི་ཕྱིར། དཔེར་ན་མར་མེའི་སྐད་ཅིག་ཕྱི་མ་དེ་བྱུང་མ་ཐག་ཏུ་སྔ་མ་དེ་རྗེས་སུ་འགྲོ་བ་མེད་པ་ཉིད་དུ་འཇིག་ཀྱང་སྐད་ཅིག་སྔ་ཕྱི་ཕན་ཚུན་ལྟོས་ནས་སྡོང་བུ་སྣུམ་ལྡན་བསྲེག་པ་འཐད་པ་བཞིན་ནོ། །གཉིས་པ་རྟགས་ཀྱི་དོན་དངོས་ལ་བརྒྱད་དེ། སྐྱེ་བ་ཟབ་པ་དང་། དེ་བཞིན་དུ་འགག་པ་དང་། དེ་བཞིན་ཉིད་དང་། ཤེས་བྱ་དང་། ཤེས་པ་དང་། སྤྱོད་པ་དང་། གཉིས་སུ་མེད་པ་དང་། ཐབས་ལ་མཁས་པ་ཟབ་པ་རྣམས་སོ། །འདི་དག་ལ་ཡང་རྗེས་ཐོབ་ལུས་ངག་གི་སྤྱོད་པ་དང་། མཉམ་གཞག་གི་རྟོགས་པ་གཉིས་གཉིས་ཡོད་དོ། །དགུ་པ་སྲིད་ཞི་མཉམ་ཉིད་ཀྱི་སྦྱོར་བ་ལ་མཚན་ཉིད་དང་ཀླན་ཀ་སྤང་བ་གཉིས། དང་པོ་ནི། རྣམ་པར་མི་རྟོག་པའི་ཡེ་ཤེས་ལ་དབང་སྒྱུར་ཐོབ་པའི་སྒོ་ནས་སྲིད་ཞི་མཉམ་པ་ཉིད་དུ་རྟོགས་པའི་སེམས་དཔའི་རྣལ་འབྱོར། ས་མཚམས་དག་པ་ས་གསུམ་ན་ཡོད་དོ། །གཉིས་པ་ལ་རྩ་འགྲེལ་གཉིས་ཀར་དངོས་སུ་བསྟན་པའི་ལས་མེད་པར་ཐལ་བའི་ཀླན་ཀ་སྤང་བ་སོགས་ཀྱི་སྒྲས་བསྟན་པ་ལན་མ་ངེས་པར་ཐལ་བའི་ཀླན་ཀ་སྤང་བ། ལུང་དང་འགལ་བའི་ཀླན་ཀ་སྤང་བ། ཧ་ཅང་ཐལ་བའི་ཀླན་ཀ་སྤང་བ་དང་བཞིའོ། །བཅུ་པ་ཞིང་དག་པའི་སྦྱོར་བའི་མཚན་ཉིད། རང་སྣང་ལ་སྣོད་བཅུད་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བའི་ཆེད་དུ་མ་དག་པའི་སྣོད་བཅུད་ཀྱི་ཞིང་སྦྱོང་བར་བྱེད་པའི་དག་སའི་རྣལ་འབྱོར། དབྱེ་ན་བཅུད་ཀྱི་ཞིང་དག་པའི་སྦྱོར་བ་དང་། སྣོད་ཀྱི་ཞིང་དག་པའི་སྦྱོར་བ་གཉིས། དང་པོའི་མཚན་ཉིད། རང་སྣང་ལ་བཅུད་ཀྱི་ཞིང་ཐམས་ཅད་དག་པ་རབ་འབྱམས་འབའ་ཞིག་ཏུ་འཆར་བའི་ཆེད་དུ་མ་དག་པའི་བཅུད་ཀྱི་ཞིང་སྦྱོང་བར་བྱེད་པའི་དག་སའི་རྣལ་འབྱོར། དེས་ཕྱི་མ་ལ་རིགས་འགྲེའོ། །ས་མཚམས་སྔ་མ་དང་འདྲ། བཅུ་གཅིག་པ་ཐབས་མཁས་སྦྱོར་བའི་མཚན་ཉིད། ཤེར་ཕྱིན་གྱི་དོན་བཅུ་པོ་མངོན་དུ་བྱ་བའི་དུས་དང་དུས་མིན་པ་ཤེས་ནས་དུས་ལ་མ་བབས་ན་མངོན་དུ་མི་བྱེད་ཅིང་། དུས་ལ་བབས་ན་མངོན་དུ་བྱེད་པའི་དག་སའི་རྣལ་འབྱོར། དབྱེ་ན་བར་ཆད་ཀྱི་ཆོས་ལས་བརྒལ་བའི། མི་གནས་པར་གནས་པའི། གཞན་དོན་སྔོན་གྱི་སྨོན་ལམ་གྱིས་འཕངས་པའི། ཐུན་མོང་མིན་པའི། མ་ཆགས་པའི། མི་དམིགས་པའི། མཚན་མ་མེད་པའི། སྨོན་པ་མེད་པའི། ཕྱིར་མི་ལྡོག་པའི་རྟགས་ཀྱི། ཚད་མེད་པའི་ཐབས་ལ་མཁས་པའི་སྦྱོར་བ་དང་བཅུ། དང་པོའི་མཚན་ཉིད། བར་ཆད་ཀྱི་ཆོས་ལས་བརྒལ་བའི་ཤེར་ཕྱིན་མངོན་དུ་བྱ་བའི་དུས་དང་དུས་མིན་པ་ཤེས་ནས་དུས་ལ་མ་བབས་པ་ན་མངོན་དུ་མི་བྱེད་ཅིང་། དུས་ལ་བབས་པ་ན་མངོན་དུ་བྱེད་པའི་དག་སའི་རྣལ་འབྱོར། དེས་ཕྱི་མ་རྣམས་ལ་རིགས་འགྲེ། ས་མཚམས་སྔ་མ་དང་འདྲ། ཐབས་མཁས་དང་པོའི་སྐབས་སུ་ལྷའི་བུའི་བདུད། ཉོན་མོངས་པའི་བདུད། ཕུང་པོའི་བདུད། འཆི་བདག་གི་བདུད་བཞིའི་མཚན་ཉིད་རིམ་པ་བཞིན། བདུད་གཞན་གསུམ་ལས་འདས་པའི་དགེ་བ་ལ་བར་དུ་གཅོད་པར་བྱེད་པའི་འདོད་ལྷའི་རིགས་སུ་གཏོགས་པ་དང་། སེམས་རབ་ཏུ་མ་ཞི་བར་བྱེད་པའི་ཉོན་མོངས་པ་དང་། སེམས་ཅན་གྱི་རྒྱུད་ཀྱིས་བསྡུས་པའི་གཟུགས་ཀྱི་ཕུང་པོ་དང་། རང་དབང་མེད་པར་སྲོག་འགག་པར་བྱེད་པའི་ལས་རྣམས་སོ། །བཅོམ་པའི་ས་མཚམས་ལ་ཐེག་དམན་གྱི་དབང་དུ་བྱས་ན་མཐོང་ལམ་ནས་ལྷའི་བུའི་བདུད་བཅོམ། ལྷག་བཅས་མྱང་འདས་ཐོབ་ནས་ཉོན་མོངས་པའི་བདུད་བཅོམ། ལྷག་མེད་མྱང་འདས་ཐོབ་ནས་ཕུང་པོའི་བདུད་བཅོམ། བསམ་གཏན་བཞི་པའི་རབ་མཐའ་ཐོབ་ནས་འཆི་བདག་གི་བདུད་བཅོམ། ཐེག་ཆེན་གྱི་དབང་དུ་བྱས་ནས་ས་མཚམས་སྦྱོར་ལམ་ནས་ལྷའི་བུའི་བདུད་བཅོམ། ས་དང་པོ་ནས་ཉོན་མོངས་པའི་བདུད་དང་། འཆི་བདག་གི་བདུད། ས་བརྒྱད་པ་ནས་ཕུང་པོའི་བདུད་བཅོམ། སྦས་དོན་རབ་གསལ་ལས་སྐབས་བཞི་པའི་ཡན་ལག་རྒྱས་པར་བཤད་པའོ།། །།ལྔ་པ་རྩེ་སྦྱོར་ལ་མཚན་ཉིད་དང་། དབྱེ་བ་གཉིས། དང་པོ་ནི། མཁྱེན་གསུམ་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར། དེ་ལ་ངོ་བོའི་སྒོ་ནས་དབྱེ་ན་སྦྱོར་ལམ་མཐོང་ལམ་སྒོམ་ལམ་རྩེ་སྦྱོར་དང་གསུམ། མཚོན་བྱེད་ཆོས་ཀྱི་སྒོ་ནས་དབྱེ་ན། རྟགས་ཀྱི། རྣམ་འཕེལ་གྱི། བརྟན་པའི། སེམས་ཀུན་གནས་ཀྱི། མཐོང་ལམ། སྒོམ་ལམ། བར་ཆད་མེད་པའི་རྩེ་སྦྱོར། བསལ་བྱ་ལོག་སྒྲུབ་དང་བརྒྱད། དང་པོའི་མཚན་ཉིད། རྩེ་སྦྱོར་གྱི་རྟགས་བཅུ་གཉིས་གང་རུང་ཐོབ་པའི་སེམས་དཔའི་རྣལ་འབྱོར། ས་མཚམས་ཐེག་ཆེན་གྱི་དྲོད་ནས་ས་བཅུའི་རྒྱུན་མཐའི་བར་དུ་ཡོད། དེས་གཞན་རྣམས་ལ་འགྲེའོ། །དྲོད་ཀྱི་རྩེ་སྦྱོར་གྱི་མཚན་ཉིད། དྲོད་ཀྱི་ངོ་བོར་གྱུར་པའི་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར། གཉིས་པའི་མཚན་ཉིད། རྩེ་སྦྱོར་གྱི་བསོད་ནམས་རྣམ་པར་འཕེལ་ཚུལ་བཅུ་དྲུག་པོ་གང་རུང་ཐོབ་པའི་སེམས་དཔའི་རྣལ་འབྱོར། ས་མཚམས་ཐེག་ཆེན་གྱི་སྦྱོར་ལམ་རྩེ་མོ་ནས་ས་བཅུའི་རྒྱུན་མཐའི་བར་ན་ཡོད། གསུམ་པའི་མཚན་ཉིད། རྩེ་སྦྱོར་གྱི་དོན་གཉིས་བརྟན་པ་ཐོབ་པའི་སེམས་དཔའི་རྣལ་འབྱོར། ས་མཚམས་ཐེག་ཆེན་གྱི་བཟོད་པ་ནས་རྒྱུན་མཐའི་བར་ན་ཡོད། བཞི་པའི་མཚན་ཉིད། བསོད་ནམས་མང་པོས་མཚོན་ནས་བསྟན་པའི་རྩེ་སྦྱོར་གྱི་ཏིང་ངེ་འཛིན་ཐོབ་པའི་སེམས་དཔའི་རྣལ་འབྱོར། ས་མཚམས་ཐེག་ཆེན་གྱི་ཆོས་མཆོག་ནས་རྒྱུན་མཐའི་བར་ན་ཡོད། ལྔ་པ་ལ་སྤང་བྱ་རྟོག་པ་དང་། གཉེན་པོ་མཐོང་ལམ་རྩེ་སྦྱོར་གཉིས། དང་པོ་ལ་སྐབས་འདིར་དངོས་བསྟན་གྱི་མཐོང་སྤང་འཇུག་པ་གཟུང་རྟོག ལྡོག་པ་གཟུང་རྟོག རྫས་འཛིན་རྟོག་པ། བཏགས་འཛིན་རྟོག་པ་དང་བཞི། དང་པོའི་མཚན་ཉིད། མཐོང་སྤང་དུ་གྱུར་པའི་ཤེས་སྒྲིབ་གང་ཞིག རང་ཡུལ་ཐེག་ཆེན་གྱི་ཆོས་ལ་དམིགས་ནས་བླང་བྱའི་གཟུང་བར་མངོན་པར་ཞེན་པའི་བློ། དབྱེ་ན་བྱང་སེམས་ལམ་གྱི་ངོ་བོ་སོགས་ལ་བླང་བྱའི་གཟུང་བར་མངོན་པར་ཞེན་པ་དགུའོ། །གཉིས་པའི་མཚན་ཉིད། གང་ཞིག རང་ཡུལ་ཐེག་དམན་གྱི་ཆོས་ལ་དམིགས་ནས་དོར་བྱའི་གཟུང་བར་མངོན་པར་ཞེན་པའི་བློ། དབྱེ་ན་རྟོག་པ་དམན་པ་སོགས་ལ་དོར་བྱའི་གཟུང་བར་མངོན་པར་ཞེན་པ་དགུའོ། །གསུམ་པའི་མཚན་ཉིད། གང་ཞིག རང་ཡུལ་ལོངས་སྤྱོད་པ་པོ་ལ་དམིགས་ནས་འཛིན་པ་པོར་བདེན་པར་མངོན་པར་ཞེན་པའི་བློ། དབྱེ་ན་འཛིན་འདོར་བྱས་པའི་ཤེར་ཕྱིན་སོགས་ལ་དམིགས་ནས་འཛིན་པ་པོར་བདེན་པར་མངོན་པར་ཞེན་པ་དགུའོ། །བཞི་པའི་མཚན་ཉིད། གང་ཞིག རང་ཡུལ་ལོངས་སྤྱོད་པ་པོ་ལ་དམིགས་ནས་འཛིན་པ་པོར་བཏགས་པ་ཙམ་དུ་མངོན་པར་ཞེན་པའི་བློ། དབྱེ་ན་ཆེད་བཞིན་ངེས་པར་མི་འབྱུང་བ་སོགས་ལ་དམིགས་ནས་འཛིན་པ་པོར་བཏགས་པ་ཙམ་དུ་མངོན་པར་ཞེན་པ་དགུའོ། །གཉིས་པ་གཉེན་པོ་མཐོང་ལམ་རྩེ་སྦྱོར་ལ་ཞར་ལས་བྱུང་བའི་དོན་དང་། རྣལ་མ་མཐོང་ལམ་རྩེ་སྦྱོར་དངོས་གཉིས། དང་པོ་ལ་བྱང་ཆུབ་ཆེན་པོའི་རྒྱུ་དང་། སྐབས་འདིར་བསྟན་གྱི་བྱང་ཆུབ་ཆེན་པོ་དངོས་གཉིས། དང་པོའི་མཚན་ཉིད། རང་འབྲས་ཐེག་ཆེན་གྱི་མཐོང་ལམ་བསྐྱེད་པའི་རྒྱུ་ཚོགས་སུ་གྱུར་པ། དབྱེ་ན་གཞན་འབྲས་བུ་རྟོགས་པའི་ཆོས་ལ་འགོད་པ་དང་། རྒྱུ་ལུང་གི་ཆོས་ལ་འགོད་པ་དང་། རང་ཉིད་བྱང་ཆེན་ཐོབ་བྱེད་ཀྱི་བར་ཆད་མེད་པའི་རྒྱུ་དང་གསུམ། གཉིས་པ་ལ་གསུམ་སྟེ། དབུ་མ་པའི་བྱང་ཆེན་འདོད་ཚུལ་ངོས་གཟུང་བ། དངོས་སྨྲ་བའི་བྱང་ཆེན་འདོད་ཚུལ་དགག་པ། གྲོལ་བར་འདོད་པས་སྟོང་ཉིད་ལ་འཇུག་པར་གདམས་པའོ། །དང་པོ་ལ་མཚན་ཉིད་དང་། དབྱེ་བ་གཉིས། དང་པོ་ནི། དྲི་མ་གདོད་མ་ནས་ཟད་པ་དང་། མི་བསྐྱེད་པར་མངོན་སུམ་དུ་རྟོགས་པའི་སྒོ་ནས་མཐར་ཐུག་གི་སྐྱབས་གནས་སུ་གྱུར་པ། གཉིས་པ་ལ་སྐུ་གསུམ་མོ། །གཉིས་པ་དངོས་སྨྲ་བའི་བྱང་ཆུབ་འདོད་ཚུལ་དགག་པ་ལ་གཉིས་ཏེ། དངོས་སྟོབས་ཀྱི་རིགས་པས་དང་། ཁས་བླངས་དང་འགལ་བས་དགག་པའོ། །དང་པོ་ནི། ཐེག་ཆེན་གྱི་མཐོང་ལམ་ཆོས་ཅན། ཁྱོད་དྲི་མ་གདོད་མ་ནས་ཡོད་པ་གཉེན་པོས་གསར་དུ་ཟད་པ་དང་། དྲི་མ་གདོད་ནས་ཡོད་པ་གཉེན་པོས་སྐྱེ་འཕྲོ་བཅད་པའི་ཚུལ་གྱིས་མི་སྐྱེ་བར་མངོན་སུམ་ཏུ་རྟོགས་པའི་སྒོ་ནས་བྱང་ཆུབ་ཏུ་འཇོག་པར་མིན་པར་ཐལ། དྲི་མ་གདོད་མ་ནས་མ་གྲུབ་པའི་ཕྱིར། གཉིས་པ་ནི། དངོས་སྨྲ་བ་ཆོས་ཅན། དྲི་མ་བདེན་པར་གྲུབ་པ་དང་། སྟོན་པ་སངས་རྒྱས་ཀྱིས་དྲི་མ་ཟད་པར་སྤངས་པར་ཁས་བླངས་པ་གཉིས་པོ་དེ་ཁས་བླངས་ནང་འགལ་བ་ཡིན་ཏེ། དྲི་མ་བདེན་པར་གྲུབ་ན། དྲི་མ་གཉེན་པོས་སྤོང་དུ་མི་རུང་བས་ཁྱབ་པའི་ཕྱིར། འོ་ན་ཁྱོད་ཀྱི་ལུགས་ལ་དྲི་མ་གཉེན་པོས་ཇི་ལྟར་སྤོང་ཞེ་ན། རྣལ་འབྱོར་ས་བཞིས་རིམ་གྱིས་སྤོང་བ་ལས། འདི་ལ་རྣལ་འབྱོར་གྱི་ས་བཞིའི་མཚན་ཉིད། ས་མཚམས། གྲངས་ངེས་པ། གོ་རིམ་ངེས་པ་དང་བཞི་ལས། དང་པོ་བདག་མེད་རྟོགས་པའི་རྣལ་འབྱོར་གྱི་སའི་མཚན་ཉིད། ཆོས་ཐམས་ཅད་བདག་མེད་པར་རྟོགས་པའི་ལྟ་བ་བསྐྱེད་པའི་ཆེད་དུ་ཕུང་པོ་ལ་གང་ཟག་གི་བདག་མེད་པར་སྒོམ་པར་བྱེད་པའི་ཐེག་ཆེན་གྱི་ཚོགས་ལམ་གྱིས་བསྡུས་པའི་མངོན་པར་རྟོགས་པ། གཟུང་མེད་རྟོགས་པའི་རྣལ་འབྱོར་གྱི་སའི་མཚན་ཉིད། གཟུང་བ་རང་བཞིན་མེད་པའི་དོན་ལ་གསལ་སྣང་ཐོབ་པའི་བྱང་སེམས་ཀྱི་དྲོད་རྩེ་གང་རུང་གིས་བསྡུས་པའི་མངོན་པར་རྟོགས་པ། འཛིན་མེད་རྟོགས་པའི་རྣལ་འབྱོར་གྱི་སའི་མཚན་ཉིད། འཛིན་པ་རང་བཞིན་མེད་པའི་དོན་ལ་གསལ་སྣང་ཐོབ་པའི་བཟོད་མཆོག་གང་རུང་གིས་བསྡུས་པའི་མངོན་པར་རྟོགས་པ། སྤྲོས་བྲལ་རྟོགས་པའི་རྣལ་འབྱོར་གྱི་སའི་མཚན་ཉིད། ཆོས་ཐམས་ཅད་སྤྲོས་པའི་མཐའ་བཞི་དང་བྲལ་བར་མངོན་སུམ་དུ་རྟོགས་པའི་ཡེ་ཤེས་གང་ཞིག རང་གི་ངོས་སྐལ་གྱི་ཤེས་སྒྲིབ་ཀྱི་སྤོང་གཉེན་དུ་གྱུར་པ། གཉིས་པ་ལ། དང་པོ་ནི་ཐེག་ཆེན་གྱི་ཚོགས་ལམ་དུ་བསྒོམ་པར་བྱ་བ་ཡིན་ཏེ། དེར་ཆོས་ཀྱི་བདག་མེད་རྟོགས་པའི་ལྟ་བ་ལ་འཇུག་པ་དང་། ཉོན་མོངས་པའི་འཆིང་བ་རྣམ་པར་གནོན་པའི་ཕྱིར་དུ་སྒོམ་དགོས་པའི་ཕྱིར་རོ། །གཉིས་པ་ནི་ཐེག་ཆེན་གྱི་དྲོད་རྩེ་གང་རུང་དུ་བསྒོམ་པར་བྱ་བ་ཡིན་ཏེ། དེར་གཟུང་བ་རང་བཞིན་མེད་པའི་དོན་ལ་གསལ་སྣང་ལྷག་པའི་ཕྱིར། གསུམ་པ་ནི་ཐེག་ཆེན་གྱི་བཟོད་མཆོག་གཉིས་སུ་བསྒོམ་པར་བྱ་བ་ཡིན་ཏེ། དེར་འཛིན་པ་རང་བཞིན་མེད་པའི་དོན་ལ་གསལ་སྣང་ལྷག་པའི་ཕྱིར། བཞི་པ་ནི་ཐེག་ཆེན་གྱི་མཐོང་ལམ་ནས་བསྒོམ་པར་བྱ་བ་ཡིན་ཏེ། དེར་གཟུང་འཛིན་གྱི་རྣམ་རྟོག་གི་ས་བོན་གྱི་དངོས་གཉེན་དུ་བསྒོམ་པར་བྱ་བ་ཡིན་པའི་ཕྱིར། གསུམ་པ་ནི། རྣལ་འབྱོར་གྱིས་དེ་ལ་བཞིར་གྲངས་ངེས་ཏེ། ཡུལ་བདག་མེད་ལ་ལྟོས་ནས་ཀྱང་བཞིར་གྲངས་ངེས། སྤང་བྱ་སྒྲིབ་པ་ལ་ལྟོས་ནས་ཀྱང་བཞིར་གྲངས་ངེས་པའི་ཕྱིར། དང་པོ་དེར་ཐལ། ཡུལ་བདག་མེད་ལ་གང་ཟག་གི་བདག་མེད་དང་ཆོས་ཀྱི་བདག་མེད་གཉིས་ལས། ཕྱི་མ་ལ་བདེན་པ་བཀག་ཙམ་གྱི་ཆོས་ཀྱི་བདག་མེད་དང་། མཐའ་བཞིའི་སྤྲོས་པ་དང་བྲལ་བའི་ཆོས་ཀྱི་བདག་མེད་གཉིས། དང་པོ་ལ་ཡང་གཟུང་བ་ཕྱི་རོལ་གྱི་དོན་ལ་བདེན་པ་བཀག་ཙམ་གྱི་ཆོས་ཀྱི་བདག་མེད་དང་། འཛིན་པ་ལ་བདེན་པ་བཀག་ཙམ་གྱི་ཆོས་ཀྱི་བདག་མེད་གཉིས་སུ་འདུས་པའི་ཕྱིར། རྩ་བའི་གཏན་ཚིགས་ཕྱི་མ་དེར་ཐལ། སྤང་བྱ་སྒྲིབ་པ་ལ་ཤེས་སྒྲིབ་དང་ཉོན་སྒྲིབ་གཉིས་ལས། དང་པོ་ལ་མངོན་གྱུར་བ་དང་ས་བོན་གཉིས། མངོན་གྱུར་བ་ལ་གཟུང་རྟོག་མངོན་གྱུར་བ་དང་འཛིན་རྟོག་མངོན་གྱུར་བ་གཉིས་སུ་ཡོད་པའི་ཕྱིར། བཞི་པ་ནི། བདག་མེད་རྟོགས་པའི་ལྟ་བ་དེ་དང་པོར་སྒོམ་དགོས་ཏེ། ཕུང་པོ་ལ་དམིགས་ནས་ངར་འཛིན་པའི་བློ་དེ་ཉེས་པ་ཀུན་གྱི་རྩ་བ་ཡིན་པས་དང་པོར་འགོག་དགོས་པའི་ཕྱིར། དེའི་འོག་ཏུ་གཟུང་མེད་རྟོགས་པའི་ལྟ་བ་དང་འཛིན་མེད་རྟོགས་པའི་ལྟ་བ་གཉིས་རིམ་བཞིན་སྒོམ་དགོས་ཏེ། དེ་གཉིས་མ་སྐྱེད་པར་ཤེས་སྒྲིབ་སྤོང་མི་ནུས་པའི་ཕྱིར་ཏེ། དེ་གཉིས་ཀྱིས་རིམ་བཞིན་གཟུང་འཛིན་གྱི་དོན་ལ་བདེན་པར་འཛིན་པ་དེ་འགོག་དགོས་པའི་ཕྱིར། དེའི་འོག་ཏུ་སྤྲོས་བྲལ་རྟོགས་པའི་ལྟ་བ་སྒོམ་དགོས་ཏེ། ཤེས་སྒྲིབ་ཀྱི་ས་བོན་སྤང་བ་ལ། ཐེག་ཆེན་ཐུན་མོང་མ་ཡིན་པའི་རྟོགས་རིགས་དགོས་པའི་ཕྱིར། གསུམ་པ་གྲོལ་བར་འདོད་པས་སྟོང་པ་ཉིད་ལ་འཇུག་པར་གདམས་པ་ནི། འོ་ན་དངོས་པོ་རང་བཞིན་དུ་ཡོད་པའི་ཕྱོགས་ཀྱི་ཤེས་སྒྲིབ་ཀྱི་གཉེན་པོ་ཇི་ལྟར་སྒོམ་ཞེ་ན། འདི་ལ་གང་ལ་བལྟ་བའི་ཡུལ། ཇི་ལྟར་བལྟ་བའི་ཚུལ། ལྟ་བ་སྒོམ་པའི་བྱེད་པ་དང་གསུམ་ལས། དང་པོ་ནི། གཟུགས་སོགས་ཀུན་རྫོབ་པའི་ངོ་བོ་འདི་ལའོ། །གཉིས་པ་ནི་ཐ་སྙད་དུ་མེད་དོ་ཞེས་སྐུར་པ་འདེབས་པ་དང་། དོན་དམ་དུ་ཡོད་དོ་ཞེས་སྒྲོ་འདོགས་པ་བསལ་ནས་རང་བཞིན་མེད་པར་ལྟ་བའོ། །གསུམ་པ་ནི་བསལ་གཞག་སྤངས་ཏེ་རང་བཞིན་མེད་པར་སྒོམས་པ་ས་དེ་ཁོ་ན་ཉིད་མཐོང་ལ། དེས་སྒྲིབ་པ་ལས་གྲོལ་བར་འགྱུར་ཏེ། དངོས་འཛིན་གྱི་ཕྱིན་ཅི་ལོག་ལྡོག་པར་འགྱུར་བའི་ཕྱིར། གཉིས་པ་རྣལ་མ་མཐོང་ལམ་རྩེ་སྦྱོར་དངོས་ལ་གཉིས་ཏེ། བར་ཆད་མེད་ལམ་དང་། ཁྱད་པར་གྱི་ལམ་མོ། །དང་པོ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། སྦྱིན་སོགས་ཕར་ཕྱིན་རེ་རེའི་ནང་དུ་ཕར་ཕྱིན་ལྔ་ལྔ་ཚང་བའི་ཉམས་ལེན་མངོན་དུ་གྱུར་པའི་སྒོ་ནས་མཐོང་སྤང་གི་དངོས་གཉེན་བྱེད་པའི་བར་ཆད་མེད་ལམ། གཉིས་པ་ནི། སྐད་ཅིག་མའི་གྲངས་ཀྱི་སྒོ་ནས་དབྱེ་བ་མེད་དེ། འདི་རྣམས་སྡུག་བསྔལ་ཆོས་བཟོད་སྐད་ཅིག་མ་གཅིག་ཏུ་འདུ་བའི་ཕྱིར་རོ། །སྤང་བྱའི་སྒོ་ནས་དབྱེ་ན་སློབ་དཔོན་གྱི་ལུགས་ལ་མཐོང་སྤང་འཇུག་པ་གཟུང་རྟོག་དང་། རྫས་འཛིན་རྟོག་པའི་གཉེན་པོར་གྱུར་པའི་སྦྱོར་བ་ཉེར་བསྡོགས་གཉིས། ལྡོག་པ་གཟུང་རྟོག་དང་། བཏགས་འཛིན་རྟོག་པའི་གཉེན་པོར་གྱུར་པའི་བར་ཆད་མེད་ལམ་གཉིས་ཏེ། ལུས་རྣམ་གཞག་ཏུ། མཐོང་ཞེས་བྱ་བའི་ལམ་ལ་ནི། །རྣམ་རྟོག་རྣམ་པ་བཞི་དང་ནི། །ཞེས་པའི་དོན་དུ་བཞེད་དོ། །འོ་ན་སྦྱོར་འཇུག་གཉིས་ཀྱི་ཁྱད་པར་གང་ཞེ་ན། སྦྱོར་ལམ་ཆོས་མཆོག་ཆེན་པོའི་ཡེ་ཤེས་ལ་སྦྱོར་བ་ཉེར་བསྡོགས་ཀྱི་ལམ་དང་། མཐོང་ལམ་བར་ཆད་མེད་ལམ་ལ་འཇུག་པ་བར་ཆད་མེད་ལམ་གཉིས་སུ་ཕྱེ་བ་སློབ་དཔོན་གྱི་དགོངས་པ་ཡིན་ཀྱང་། རྩ་བའི་དགོངས་པ་ལ་འབྱོར་པ་ཤིན་ཏུ་དཀའ་སྟེ། འདི་བཞི་ཆར་མཐོང་ལམ་རྩེ་སྦྱོར་ཡིན་པའི་ཕྱིར་རོ། །ཡང་མཐོང་སྤང་རྟོག་པ་བཞི་ལ་ཡུལ་གྱི་དབྱེ་བས་དགུ་བཞི་སུམ་ཅུ་སོ་དྲུག དེ་ཉིད་ལ་ཁམས་གསུམ་གྱི་དབྱེ་བས་བརྒྱ་རྩ་བརྒྱད་དུ་ཡོད་པས་དེ་དག་སྤོང་བའི་ཆ་ནས་མཐོང་ལམ་རྩེ་སྦྱོར་ལ་བརྒྱ་རྩ་བརྒྱད་དུ་དབྱེ་བ་ཡང་གསུངས་སོ། །གཉིས་པ་ཁྱད་པར་གྱི་ལམ་ལ། མཉམ་གཞག་ཡེ་ཤེས། རྗེས་ཐོབ་ཡེ་ཤེས། དང་པོ་ལ་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་ཀྱི་མཚན་ཉིད། མཐོང་ལམ་རྣམ་གྲོལ་ལམ་གྱི་རྗེས་མཉམ་གཞག་ལས་མ་ལངས་པར་རྣམ་པར་ཐར་པ་བརྒྱད་དང་། མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དང་ལུགས་ལྡོག་ཏུ་སྙོམས་པར་འཇུག་པའི་གནས་སྐབས་ཀྱི་སེམས་དཔའི་རྣལ་འབྱོར། འདི་དང་སྦྱོར་བ་སེང་གེ་རྣམ་བསྒྱིངས་གཉིས་དོན་མི་གཅིག་སྟེ། སྦྱོར་བ་སེང་གེ་རྣམ་བསྒྱིངས་ནི་རྗེས་ཐོབ་རྟེན་འབྲེལ་ལ་རྟོགས་པའི་རྗེས་སུ་འབྱུང་བ་ཡིན་ལ། འདི་ནི་དེའི་སྔ་རོལ་དུ་འབྱུང་བ་ཡིན་པའི་ཕྱིར་རོ། །གཉིས་པ་ལ་རྟོག་བྱ་རྟེན་འབྲེལ། ཇི་ལྟར་རྟོག་པའི་ཚུལ། དེ་ལ་རྟོག་པའི་དགོས་པ་དང་གསུམ་ལས། དང་པོ་ལ་ཡན་ལག་བཅུ་གཉིས་ཡོད་པ་ལས། དང་པོ་མ་རིག་པ་ནི། ཡུལ་མི་གསལ་བའི་རྣམ་པས་འཇུག་པའི་སེམས་བྱུང་གང་ཞིག འདུ་བྱེད་ཀུན་སློང་དུ་གྱུར་པ། འདུ་བྱེད་ནི་མ་རིག་པས་ཀུན་ནས་བསླངས་ཏེ་ཡང་སྲིད་འཕེན་པར་བྱེད་པའི་ཟག་བཅས་ཀྱི་ལས་སོ། །རྣམ་པར་ཤེས་པ་ནི་འབྲས་བུའི་ཆ་གཟུང་ན་ལས་ལ་བརྟེན་ནས་སྐྱེ་གནས་སུ་དང་པོར་གྲུབ་པའི་རྣམ་ཤེས། རྒྱུའི་ཆ་བཟུང་ན་ལས་ཀྱི་བག་ཆགས་ཡོངས་སུ་འཛིན་པར་བྱེད་པའོ། །མིང་དང་གཟུགས་ནི་ཉིང་མཚམས་སྦྱོར་བའི་སྐད་ཅིག་གཉིས་པར་ཕུང་པོ་ལྔ་གྲུབ་པའོ། །སྐྱེ་མཆེད་ནི་མིང་གཟུགས་ཡོངས་སུ་སྨིན་པ་ལས་མིག་སོགས་ཚང་བར་དོད་པའོ། །རེག་པ་ནི་སྐྱེ་མཆེད་དྲུག་ཡུལ་དང་འཕྲད་པ་ལས་ཡུལ་གྱི་འགྱུར་བ་ཡོངས་སུ་གཅོད་པར་བྱེད་པའི་སེམས་བྱུང་ངོ་། །ཚོར་བ་ནི་རེག་པས་ཡོངས་སུ་བཅད་པ་བཞིན་རྣམ་སྨིན་ཉམས་སུ་མྱོང་བའི་སེམས་བྱུང་ངོ་། །སྲེད་པ་ནི་ཚོར་བ་བདེ་སྡུག་ལ་བླང་དོར་དུ་ཆགས་པའི་སེམས་བྱུང་ངོ་། །ལེན་པ་ནི་ཚོར་བའི་རྒྱུ་ཡོངས་སུ་འཚོལ་བ་ལ་འདུན་པའི་འདོད་ཆགས་སོ། །སྲིད་པ་ནི་རྒྱུ་འབྲས་ཆ་གཅིག་པ་ལྟར་ན་སྔར་གྱི་སྲེད་པས་གསོས་བཏབ་ནས་ལས་ཀྱི་བག་ཆགས་ནུས་པ་མཐུ་ཅན་ཏུ་གྱུར་པའོ། །ཆ་གཉིས་པ་ལྟར་ན་ཡང་སྲིད་འཕེན་བྱེད་ཀྱི་ལས་གསར་དུ་གསོག་པའི་གནས་སྐབས་སོ། །སྐྱེ་བ་ནི་མའི་མངལ་ནས་ཕུང་པོ་ལྔ་རིམ་གྱིས་གྲུབ་པའོ། །རྒ་ཤི་ནི་ན་ཚོད་དང་སྲོག་ཡོངས་སུ་འགྱུར་བའོ། །གཉིས་པ་ནི། མ་རིག་པའི་རྐྱེན་གྱིས་འདུ་བྱེད་རྣམས་སོ་ཞེས་བྱ་བ་ལ་སོགས་པ་ཀུན་ཉོན་ལུགས་དང་མཐུན་པ་དང་། དེས་འཕངས་པའི་མ་རིག་པ་འགགས་པས་འདུ་བྱེད་འགག་ཞེས་སོགས་རྣམ་བྱང་ལུགས་དང་མཐུན་པ་དང་། དེས་འཕངས་པའི་རྒ་ཤི་གང་ལས་བྱུང་ཞེས་སོགས་ཀུན་ཉོན་ལུགས་དང་མི་མཐུན་པ་དང་། སྐྱེ་བ་འགགས་པས་རྒ་ཤི་འགག་པ་སོགས་རྣམ་བྱང་ལུགས་དང་མི་མཐུན་པ་ལ་རྟོག་གོ །གསུམ་པ་ནི། འཁོར་བ་རྒྱུ་འབྲས་སྡུག་ཀུན་གྱི་བདེན་པ་ལ་མཁས་པའི་ཕྱིར་ཀུན་ཉོན་ལུགས་མཐུན་དང་ལུགས་ལྡོག་དང་། མྱང་འདས་རྒྱུ་འབྲས་འགོག་ལམ་གྱི་བདེན་པ་ལ་མཁས་པའི་ཕྱིར་རྣམ་བྱང་ལུགས་མཐུན་ལུགས་ལྡོག་སྒོམ་པར་བྱེད་དེ། འདི་ལྟར་ཀུན་ཉོན་ལུགས་མཐུན་དུ་བསྒོམས་པས་སྡུག་བསྔལ་གྱི་བདེན་པ་རྟོགས་པར་འགྱུར་ཏེ། རྒྱུ་ལས་ཉོན་གྱི་རྣམ་སྨིན་མཐར་ཐུག་པ་རྒ་ཤིར་རྟོགས་པའི་ཕྱིར། ཀུན་ཉོན་ལུགས་ལྡོག་བསྒོམས་པས་ཀུན་འབྱུང་གི་བདེན་པ་རྟོགས་པར་འགྱུར་ཏེ། སྡུག་བསྔལ་གྱི་རྩ་བ་ལས་ཉོན་དུ་རྟོགས་པའི་ཕྱིར་རོ། །རྣམ་བྱང་ལུགས་མཐུན་བསྒོམས་པས་ནི་འགོག་བདེན་རྟོགས་པར་འགྱུར་ཏེ། མ་རིག་པ་སོགས་ཡན་ལག་སྔ་མ་སྔ་མ་རྣམས་འགགས་པས་རྒ་ཤི་འགགས་པར་རྟོགས་པའི་ཕྱིར་རོ། རྣམ་བྱང་ལུགས་ལྡོག་བསྒོམས་པས་ལམ་བདེན་རྟོགས་ཏེ། རྒ་ཤི་འགགས་པར་ནི་ཡན་ལག་སྔ་མ་རྣམས་འགགས་པ་ལ་ལྟོས་ལ་དེ་ཡང་འགོག་བྱེད་ཀྱི་ལམ་ལ་རག་ལས་པར་ཤེས་པའི་ཕྱིར་རོ། །དྲུག་པ་སྒོམ་ལམ་རྩེ་སྦྱོར་ལ་གསུམ་སྟེ། རྟེན་སྒོམ་ལམ། སྤང་བྱ་རྣམ་རྟོག བརྟེན་པ་ཡོན་ཏན་ནོ། །དང་པོ་ལ་སྦྱོར་བ་སེང་གེ་རྣམ་བསྒྱིངས། དངོས་གཞི་ཐོད་རྒལ་གཉིས་ལས། དང་པོ་ནི། དེའི་མཚན་ཉིད། རྗེས་ཐོབ་རྟེན་འབྲེལ་ལ་རྟོག་པའི་རྗེས་སུ་དངོས་གཞི་ཐོད་རྒལ་གྱི་ཆེད་དུ་མཐར་གནས་ཀྱི་སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་དང་ལུགས་ལྡོག་ཏུ་སྙོམས་པར་འཇུག་པའི་གནས་སྐབས་ཀྱི་སེམས་དཔའི་རྣལ་འབྱོར། གཉིས་པ་ལ། དངོས་གཞི་ཐོད་རྒལ་ཆུང་འབྲིང་ཆེན་པོ་གསུམ་ལ། མཚན་ཉིད། སྙོམས་པར་འཇུག་པའི་དགོས་པ། ཐོབ་པའི་ས་མཚམས་དང་གསུམ་ལས། དང་པོ་ནི། རིམ་བཞིན། སྦྱོར་བ་སེང་གེ་རྣམ་བསྒྱིངས་སྔོན་དུ་སོང་ནས། དངོས་གཞི་ཐོད་རྒལ་འབྲིང་པོའི་ཆེད་དུ་མཐར་གནས་ཀྱི་སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་ཁོ་ནར་སྙོམས་པར་འཇུག་པའི་གནས་སྐབས་ཀྱི་སེམས་དཔའི་རྣལ་འབྱོར་དང་། དངོས་གཞི་ཐོད་རྒལ་ཆུང་ངུ་སྔོན་དུ་སོང་ནས། དངོས་གཞི་ཐོད་རྒལ་ཆེན་པོའི་ཆེད་དུ་འགོག་པ་སྤེལ་བའི་རིགས་སུ་གནས་པའི་སྙོམས་འཇུག་དང་། མཚམས་འཛིན་གྱི་འདོད་སེམས་ཀྱི་རྗེས་སུ་སྙོམས་འཇུག་དགུ་ལ་འདོད་སེམས་རེ་རེ་སྤེལ་ནས་ལུགས་ལྡོག་ཏུ་འཇུག་པའི་གནས་སྐབས་ཀྱི་ཐེག་ཆེན་གྱི་རྗེས་ལ་ཐོབ་པའི་མངོན་རྟོགས་སོ། །གཉིས་པ་ནི། ས་བདུན་པ་མན་ཆད་དུ་དབང་ཐོབ་པའི་ཆེད་དུ་འཇུག་ལ། ས་བརྒྱད་པ་ཡན་ཆད་དུ་དེ་མཐར་ཕྱིན་པའི་ཆེད་དུ་འཇུག་གོ །གསུམ་པ་ནི། ས་གཉིས་པ་ནས་ཐོབ་སྟེ། འཕགས་པ་དཀོན་མཆོག་སྤྲིན་དང་སྡུད་པ་ལས་བསྐལ་པ་གྲངས་མེད་པ་གཉིས་ཀྱིས་ངེས་པར་འབྱུང་བའི་བྱང་ཆུབ་སེམས་དཔའ་རྣམས་ཐོད་རྒལ་ལ་སྙོམས་པར་འཇུག་པར་བཤད་པ་གང་ཞིག ས་གཉིས་པ་ནས་བསྐལ་པ་གྲངས་མེད་པ་གཉིས་ཀྱིས་ངེས་པར་འབྱུང་བར་བྱ་བ་ཡིན་པའི་ཕྱིར་རོ། །གཉིས་པ་སྤང་བྱ་རྣམ་རྟོག་ལ་ཐེག་ཆེན་གྱི་སྒོམ་སྤང་རྟོགས་པའི་མཚན་ཉིད། ཆོས་ཉིད་མངོན་སུམ་དུ་མཐོང་ཟིན་རྒྱུན་ལྡན་དུ་གོམས་པར་བྱེད་པའི་ལམ་གྱི་སྤོང་བར་བྱ་བའི་ཞེན་བློ། དབྱེ་བ་ལ་སློབ་དཔོན་གྱི་དང་། འཕགས་པའི་ལུགས་གཉིས་ལས། དང་པོ་ལ་སྒོམ་སྤང་གཟུང་འཛིན་རྟོག་པ་གཉིས། དང་པོ་ལ་སྒོམ་སྤང་འཇུག་པ་དང་སྒོམ་སྤང་ལྡོག་པ་གཟུང་རྟོག་གཉིས་ལས། དང་པོའི་མཚན་ཉིད། ཐེག་ཆེན་གྱི་སྒོམ་སྤང་རྟོག་པ་གང་ཞིག རང་ཡུལ་ལ་འཇུག་བྱའི་གཟུང་བར་མངོན་པར་ཞེན་པ། དབྱེ་ན་སྟོན་པས་ཆོས་མདོར་བསྡུས་ཏེ་གསུངས་པ་ལ་དམིགས་ནས་མངོན་པར་ཞེན་པ་སོགས་དགུ། གཉིས་པའི་མཚན་ཉིད། གང་ཞིག རང་ཡུལ་ལ་ལྡོག་བྱའི་གཟུང་བར་མངོན་པར་ཞེན་པ། དབྱེ་ན་བྱང་ཆུབ་ཀྱི་སེམས་མི་སྐྱེ་བ་ལ་དམིགས་ནས་གཟུང་བར་མངོན་པར་ཞེན་པ་སོགས་དགུའོ། །གཉིས་པ་ལ་སྒོམ་སྤང་རྫས་འཛིན་རྟོག་པ་དང་། སྒོམ་སྤང་བཏགས་འཛིན་རྟོག་པ་གཉིས་ལས། དང་པོའི་མཚན་ཉིད། གང་ཞིག ལོངས་སྤྱོད་པ་པོ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པ། དབྱེ་ན་སེམས་ཅན་དུ་བཏགས་པ་ལ་དམིགས་ནས་ལོངས་སྤྱོད་པ་པོར་མངོན་པར་ཞེན་པ་སོགས་དགུའོ། །གཉིས་པའི་མཚན་ཉིད། གང་ཞིག ལོངས་སྤྱོད་པ་པོ་ལ་དམིགས་ནས་དེར་བཏགས་པ་ཙམ་དུ་མངོན་པར་ཞེན་པ། དབྱེ་ན་རྣམ་མཁྱེན་ལ་སྒྲིབ་པའི་སྒོམ་སྤང་ལ་དམིགས་ནས་ལོངས་སྤྱོད་པ་པོར་བཏགས་པ་ཙམ་དུ་མངོན་པར་ཞེན་པ་སོགས་དགུའོ། །གཉིས་པ་འཕགས་པའི་ལུགས་ལ། སྒོམ་སྤང་གཟུང་རྟོག་དང་། སྒོམ་སྤང་འཛིན་རྟོག་གཉིས་ལས། དང་པོ་ལ་སྦྱོར་བའི་ཡུལ་ཅན་གྱི་གཟུང་རྟོག་དང་། འཇུག་པའི་ཡུལ་ཅན་གྱི་གཟུང་རྟོག་གཉིས། ཕྱི་མ་ལ་སེམས་ཅན་ཏུ་བཏགས་པ་ལ་བརྟེན་པའི་འཛིན་རྟོག་དང་། བཏགས་པའི་རྒྱུ་མཚན་ལ་བརྟེན་པའི་འཛིན་རྟོག་གཉིས་སུ་བཞེད་པ་ནི་རྩ་བའི་དགོངས་པ་སྟེ། སྦྱོར་བའི་རྣམ་པའི་སྤྱོད་ཡུལ་ཅན། །ཞེས་དང་། འཇུག་པའི་ཡུལ་ཅན་ཡིན་བཞེད་དེ། །ཞེས་དང་། སེམས་ཅན་གྱི་དང་དེ་རྒྱུ་ཡི། །ཡུལ་ཅན་ཞེས་གསུངས་པའི་ཕྱིར་དང་། མཐོང་སྤང་རྟོག་པ་ལ་འཇུག་པ་གཟུང་རྟོག་སོགས་ཐུན་མོང་མ་ཡིན་པའི་མིང་བཞི་ཡོད་པ་ལྟར་འདི་ལ་ཡང་ངེས་པར་དགོས་ཤིང་། དགོས་པ་ལྟར་གཞུང་ན་སྣང་ངོ་། །གསུམ་པ་ཡོན་ཏན་ནི། སྒོམ་སྤང་གཟུང་འཛིན་གྱི་རྣམ་པར་རྟོག་པ་བརྒྱ་རྩ་བརྒྱད་ཀྱི་ས་བོན་སྤངས་པས་ཐེག་པ་གསུམ་གྱི་རྟོགས་རིགས་ཕུན་སུམ་ཚོགས་པ་ཐམས་ཅད་རྒྱ་མཚོ་ཆེན་པོ་ལ་ཆུ་བོ་བཞི་འདུ་བ་བཞིན་དུ་འོང་བའི་རྣམ་པས་བརྟེན་པའི་སྒོམ་ལམ་ཆེན་པོའི་ཆེན་པོ་ལ་གནས་པའི་བྱང་སེམས་ཀྱི་རྒྱུད་ཀྱི་ཡོན་ཏན་ནོ། །བདུན་པ་བར་ཆད་མེད་པའི་རྩེ་སྦྱོར་ལ་ངོ་བོ་དང་། དམིགས་རྣམ་གཉིས་ལས། དང་པོ་ནི། རང་གི་དངོས་འབྲས་སུ་གྱུར་པའི་རྣམ་མཁྱེན་བསྐྱེད་པ་ལ་ཆོས་གཞན་གྱི་བར་མ་ཆོད་པའི་བསྡུས་སྒོམ་རབ་ཏུ་གྱུར་པའི་སེམས་དཔའི་རྣལ་འབྱོར། གཉིས་པ་ལ་ཆོས་ཐམས་ཅད་བདེན་པའི་དངོས་པོ་མེད་པ་དེ་ཆོས་ཅན། བར་ཆད་མེད་རྩེའི་དམིགས་རྐྱེན་ཡིན་ཏེ། དེ་ཁྱོད་ལ་དམིགས་ནས་སྐྱེ་བའི་ཕྱིར། རྒྱུན་མཐའ་མན་ཆད་ཀྱི་མཁྱེན་གསུམ་གྱི་དམིགས་རྣམ་མ་བརྗེད་པའི་དྲན་པ་དེ་ཆོས་ཅན། བར་ཆད་མེད་རྩེའི་བདག་རྐྱེན་ཡིན་ཏེ། དེ་རང་དབང་དུ་སྐྱེད་བྱེད་ཡིན་པའི་ཕྱིར། བར་ཆད་མེད་རྩེའི་རྣམ་པ་ཆོས་ཅན། ཞི་བ་ཉིད་ཡིན་ཏེ། སྤྲོས་བྲལ་གྱི་རྣམ་པ་ཅན་ཡིན་པའི་ཕྱིར། བརྒྱད་པ་བསལ་བྱ་ལོག་སྒྲུབ་ལ་གཉིས་ཏེ། བསལ་བྱ་དང་། སེལ་བྱེད་དོ། །དང་པོ་ལ་བསལ་བྱ་ལོག་རྟོག་དང་། དེས་ཀུན་ནས་བསླངས་པའི་ཀླན་ཀ་གཉིས་ལས། དང་པོ་ནི། དོན་དམ་རྒྱུ་མཚན་དུ་བྱས་ནས་ཀུན་རྫོབ་ཀྱི་རྣམ་གཞག་མི་འཐད་སྙམ་དུ་འཛིན་པ་དང་། ཀུན་རྫོབ་རྒྱུ་མཚན་དུ་བྱས་ནས་དོན་དམ་གྱི་རྣམ་གཞག་མི་འཐད་སྙམ་དུ་འཛིན་པའི་ལོག་རྟོག་གཉིས་དང་། གཉིས་པ་ལ་ཀུན་རྫོབ་སྒོ་ཅན་དང་། དོན་དམ་སྒོ་ཅན་གྱི་ཀླན་ཀ་གཉིས། དེ་ཡང་ཀུན་རྫོབ་རྟགས་སུ་བཀོད་པའི་ཀླན་ཀ་དང་། དོན་དམ་རྟགས་སུ་བཀོད་པའི་ཀླན་ཀ་གཉིས་རིམ་བཞིན་ཀུན་རྫོབ་སྒོ་ཅན་དང་དོན་དམ་སྒོ་ཅན་གྱི་ཀླན་ཀ་ཡིན་ཞིང་། དང་པོ་ལ་ཀུན་རྫོབ་རིགས་མཐུན་གྱི་དང་། དེ་རིགས་མི་མཐུན་གྱི་ཀླན་ཀ་གཉིས་ཀྱི་མཚན་གཞི་རིམ་བཞིན། བྱང་འཕགས་ཆོས་ཅན། ལམ་གསུམ་སྒོམ་པ་མེད་པར་ཐལ། ཉན་རང་གི་ལམ་སྒོམ་པ་མེད་པའི་ཕྱིར་ཞེས་དང་། དོན་དམ་པར་བསྒོམ་བྱ་རང་སྤྱིའི་མཚན་ཉིད་ཡོད་པར་ཐལ། ཀུན་རྫོབ་ཏུ་ཡུམ་སྒོམ་པ་ཡོད་པའི་ཕྱིར། ཞེས་པ་ལྟ་བུའོ། །ཕྱི་མ་ལ་དོན་དམ་རིགས་མཐུན་དང་། རིགས་མི་མཐུན་གྱི་ཀླན་ཀ་གཉིས་ཀྱི་མཚན་གཞི་རིམ་བཞིན། དོན་དམ་པར་བར་ཆད་མེད་རྩེའི་དམིགས་པ་མི་འཐད་པར་ཐལ། དོན་དམ་པར་འདུས་བྱས་དང་འདུས་མ་བྱས་ཀྱི་ཁམས་མེད་པའི་ཕྱིར་ཞེས་དང་། ཀུན་རྫོབ་ཏུ་ཡུམ་སྒོམ་པ་མི་འཐད་པར་ཐལ། དོན་དམ་པར་བསྒོམ་བྱ་རང་སྤྱིའི་མཚན་ཉིད་མི་འཐད་པའི་ཕྱིར། ཞེས་པ་ལྟ་བུའོ། །ཀུན་རྫོབ་ཏུ་བར་ཆད་མེད་རྩེའི་དམིགས་པ་མི་འཐད་པར་ཐལ། དོན་དམ་པར་འདུས་བྱས་དང་། འདུས་མ་བྱས་ཀྱི་ཁམས་མེད་པའི་ཕྱིར། ཞེས་གཞུང་ལས་དངོས་སུ་བསྟན་པའི་ཀླན་ཀ་བཅུ་དྲུག་ནི་དོན་དམ་རིགས་མི་མཐུན་གྱི་ཀླན་ཀ་དང་། དོན་དམ་པར་འདུས་བྱས་དང་འདུས་མ་བྱས་ཀྱི་ཁམས་ཡོད་པར་ཐལ། ཀུན་རྫོབ་ཏུ་བར་ཆད་མེད་རྩེའི་དམིགས་པ་འཐད་པའི་ཕྱིར། ཞེས་པ་ལྟ་བུ་གཞུང་ལས་ཤུགས་བསྟན་གྱི་ཀླན་ཀ་བཅུ་དྲུག་ནི་ཀུན་རྫོབ་རིགས་མི་མཐུན་གྱི་ཀླན་ཀ་ཡིན་ནོ། །གཉིས་པ་སེལ་བྱེད་ལ་ལོག་རྟོག་སེལ་བྱེད་ཀྱི་ཤེས་རབ་དང་། ཀླན་ཀ་སེལ་བྱེད་ཀྱི་ལན་གཉིས། དང་པོ་ལ་ཀུན་རྫོབ་ཏུ་ཡོད་ཀྱང་དོན་དམ་པར་མེད་པ་རྟོགས་པའི་ཤེས་རབ་ཀྱིས་ཀུན་རྫོབ་རྒྱུ་མཚན་དུ་བྱས་ནས་དོན་དམ་པར་མི་འཐད་དོ་སྙམ་པའི་ལོག་རྟོག་སེལ། དོན་དམ་དུ་མེད་ཀྱང་ཀུན་རྫོབ་ཏུ་ཡོད་པ་མི་འགལ་བར་རྟོགས་པའི་ཤེས་རབ་ཀྱིས་དོན་དམ་རྒྱུ་མཚན་དུ་བྱས་ནས་ཀུན་རྫོབ་ཀྱི་རྣམ་གཞག་མི་འཐད་དོ་སྙམ་པའི་ལོག་རྟོག་སེལ་ལོ། །གཉིས་པ་ནི། གཞུང་ལས་དངོས་བསྟན་གྱི་དོན་དམ་སྒོ་ཅན་གྱི་ཀླན་ཀ་བཅུ་དྲུག་ལ་ཀུན་རྫོབ་ཀྱི་སྒོ་ནས་ལན་འདེབས་ཤིང་། ཤུགས་བསྟན་ཀུན་རྫོབ་སྒོ་ཅན་གྱི་ཀླན་ཀ་བཅུ་དྲུག་ལ་དོན་དམ་གྱི་སྒོ་ནས་འདེབས་དགོས་པ་ཡིན་གྱི། སྤྱིར་དོན་དམ་སྒོ་ཅན་གྱི་ཀླན་ཀ་ལ་ཀུན་རྫོབ་དང་། ཀུན་རྫོབ་སྒོ་ཅན་གྱི་ཀླན་ཀ་ལ་དོན་དམ་གྱི་སྒོ་ནས་ལན་འདེབས་དགོས་པ་ནི་མ་ངེས་ཏེ། དོན་དམ་སྒོ་ཅན་གྱི་ཀླན་ཀ་ཡིན་ན་ཀུན་རྫོབ་སུན་འབྱིན་པ་དང་། ཀུན་རྫོབ་སྒོ་ཅན་གྱི་ཀླན་ཀ་ཡིན་ན་དོན་དམ་སུན་འབྱིན་པས་མ་ཁྱབ་པའི་ཕྱིར། དེས་ན་སྐབས་འདིར་བསྟན་གྱི་བསལ་བྱ་ལོག་རྟོག་གི་མཚན་ཉིད། དམིགས་པ་འཐད་པ་ལ་སོགས་པའི་ཡུལ་བཅུ་དྲུག་པོ་གང་རུང་ལ་བདེན་གཉིས་གང་རུང་རྒྱུ་མཚན་དུ་བྱས་ནས་བདེན་གཉིས་གང་རུང་མི་འཐད་སྙམ་དུ་འཛིན་པའི་ལོག་རྟོག སྐབས་འདིར་བསྟན་གྱི་བསལ་བྱ་ཀླན་ཀའི་མཚན་ཉིད། དམིགས་པ་འཐད་པ་ལ་སོགས་པའི་ཡུལ་བཅུ་དྲུག་པོ་གང་རུང་ལ་བདེན་གཉིས་གང་རུང་རྒྱུ་མཚན་དུ་བྱས་ནས་སུན་འབྱིན་པར་བྱེད་པའི་སུན་འབྱིན་ལྟར་སྣང་། དབྱེ་ན་སྐབས་འདིར་བསྟན་གྱི་དོན་དམ་སྒོ་ཅན་གྱི་ཀླན་ཀ་དང་། ཀུན་རྫོབ་སྒོ་ཅན་གྱི་ཀླན་ཀ་གཉིས། མཚན་ཉིད་རིམ་བཞིན། གཞན་འདྲ་བ་ལ། དོན་དམ་རྒྱུ་མཚན་དུ་བྱས་ནས་ཞེས་པ་དང་། ཀུན་རྫོབ་རྒྱུ་མཚན་དུ་བྱས་ནས་ཞེས་སྦྱར། སྐབས་འདིར་བསྟན་གྱི་སེལ་བྱེད་གཉེན་པོའི་མཚན་ཉིད། བདེན་གཉིས་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པའི་བློའི་རྒྱུན་ཤེས་རབ་མཚུངས་ལྡན་དང་བཅས་པའོ། །སྦས་དོན་རབ་གསལ་ལས་སྐབས་ལྔ་པའི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པའོ།། །།དྲུག་པ་མཐར་གྱིས་པའི་སྦྱོར་བ་ལ། མཚན་ཉིད། དབྱེ་བ། ས་མཚམས་དང་གསུམ་ལས། དང་པོ་ནི། རང་རྒྱུ་སྦྱོར་ལམ་རྩེ་སྦྱོར་ལས་བྱུང་ཞིང་བརྟན་པ་ཐོབ་བའི་ཆེད་དུ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པར་བྱེད་པའི་སེམས་དཔའི་རྣལ་འབྱོར། གཉིས་པ་ལ་སྦྱོར་བ་ཕུན་ཚོགས་ཕར་ཕྱིན་དྲུག་གི་མཐར་གྱིས་པའི་སྦྱོར་བ། བསམ་པ་ཕུན་ཚོགས་རྗེས་དྲན་དྲུག་གི་མཐར་གྱིས་པའི་སྦྱོར་བ། དངོས་མེད་ངོ་བོ་ཉིད་དུ་རྟོགས་པའི་མཐར་གྱིས་པའི་སྦྱོར་བ་དང་གསུམ་ལས། དང་པོ་ལ་སྦྱིན་པའི་ཕར་ཕྱིན་གྱི་མཐར་གྱིས་པའི་སྦྱོར་བ་སོགས་དྲུག དང་པོའི་མཚན་ཉིད། སྦྱིན་པའི་ཕར་ཕྱིན་གྱི་ཉམས་ལེན་གྱིས་ཟིན་པའི་སྒོ་ནས་བརྟན་པ་ཐོབ་པའི་ཆེད་དུ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པར་བྱེད་པའི་སེམས་དཔའི་རྣལ་འབྱོར། དེས་ཕྱི་མ་ལྔ་ལ་ཡང་འགྲེའོ། །གཉིས་པ་ལ་སངས་རྒྱས། ཆོས། དགེ་འདུན། ཚུལ་ཁྲིམས། གཏོང་བ། ལྷ་རྗེས་སུ་དྲན་པའི་མཐར་གྱིས་པའི་སྦྱོར་བ་སྟེ་དྲུག མཚན་ཉིད་རིམ་བཞིན། དྲན་པ་ཉེར་གཞག་སོགས་ཀྱི་ལམ་གསུམ་དོན་དམ་པར་དྲན་པ་མེད་ཅིང་ཀུན་རྫོབ་ཏུ་མཚན་ཉིད་རྗེས་སུ་དྲན་པའི་སྒོ་ནས་དང་། དགེ་མི་དགེ་ལུང་མ་བསྟན་གྱི་ཆོས་དོན་དམ་པར་སོགས་དང་། བྱང་སེམས་འཕགས་པ་དོན་དམ་པར་སོགས་དང་། ཚུལ་ཁྲིམས་གསུམ་དོན་དམ་པར་སོགས་དང་། གཏོང་བ་གསུམ་དོན་དམ་པར་སོགས་དང་། ལྷར་སྐྱེས་པའི་འཕགས་པ་དོན་དམ་པར་དྲན་པ་མེད་ཅིང་། ཀུན་རྫོབ་ཏུ་མཚན་ཉིད་རྗེས་སུ་དྲན་པའི་སྒོ་ནས་བརྟན་པ་ཐོབ་པའི་ཆེད་དུ་མཁྱེན་གསུམ་གྱི་རྣམ་པ་གོ་རིམ་དུ་སྒོམ་པར་བྱེད་པའི་སེམས་དཔའི་རྣལ་འབྱོར། གསུམ་པ་དངོས་མེད་ངོ་བོ་ཉིད་དུ་རྟོགས་པའི་མཐར་གྱིས་པའི་སྦྱོར་བའི་མཚན་ཉིད། ཆོས་ཐམས་ཅད་བདེན་པའི་ངོ་བོ་ཉིད་དུ་མེད་པར་རྟོགས་པའི་སྒོ་ནས་བརྟན་པ་ཐོབ་པའི་ཆེད་དུ་སོགས་སོ། །གསུམ་པ་ནི། འཕགས་པ་ལྟར་ན་ཐེག་ཆེན་གྱི་ཚོགས་ལམ་ན་ཡོད་ཅིང་། སློབ་དཔོན་ལྟར་ན་ཐེག་ཆེན་གྱི་དྲོད་སྐད་ཅིག་གཉིས་པ་ནས་རྒྱུན་མཐའི་སྔ་ལོགས་ཀྱི་བར་ན་ཡོད་དོ། །སྦས་དོན་རབ་གསལ་ལས་སྐབས་དྲུག་པའི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པའོ།། །།བདུན་པ་སྐད་ཅིག་མའི་སྦྱོར་བ་ལ། མཚན་ཉིད། དབྱེ་བ། ས་མཚམས་དང་གསུམ་ལས། དང་པོ་ནི། བརྟན་པ་ཐོབ་ནས་མཁྱེན་གསུམ་གྱི་རྣམ་པ་རྣམས་དུས་སྐད་ཅིག་མ་གཅིག་ལ་ཅིག་ཅར་དུ་སྒོམ་པའི་སེམས་དཔའི་རྣལ་འབྱོར་མཐར་ཐུག་གོ །གཉིས་པ་ལ་རྣམ་པར་སྨིན་པ་མིན་པའི། རྣམ་པར་སྨིན་པའི། མཚན་ཉིད་མེད་པའི། གཉིས་སུ་མེད་པའི་སྐད་ཅིག་མའི་སྦྱོར་བ་དང་བཞི་ལས། དང་པོ་ལ་མཚན་ཉིད་དངོས་དང་། རྣམ་སྨིན་ཡིན་མིན་ངོས་གཟུང་བ། མངོན་དུ་བྱེད་པའི་དཔེ་དང་གསུམ་ལས། དང་པོ་ནི། རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་གཅིག་མངོན་དུ་བྱེད་པའི་ཚེ་དེ་དང་རིགས་མཐུན་པའི་ཟག་མེད་ཀྱི་ཆོས་ཐམས་ཅད་མངོན་དུ་བྱེད་ནུས་པའི་སེམས་དཔའི་རྣལ་འབྱོར་མཐར་ཐུག་གོ །གཉིས་པ་ནི། རྒྱུན་མཐའི་གནས་སྐབས་ཀྱི་ས་བདུན་པ་མན་ཆད་ཀྱི་ཟག་མེད་ཀྱི་རྟོགས་རིགས་ལ་རྣམ་པར་སྨིན་པ་མིན་པའི་ཟག་མེད་ཀྱི་རྟོགས་རིགས་ཞེས་བྱ་སྟེ། ས་བདུན་པ་མན་ཆད་ཀྱི་ཟག་མེད་ཀྱི་ཡེ་ཤེས་དེ་འབད་རྩོལ་དང་བཅས་པས་རྣམ་པར་སྨིན་པ་མིན་པར་བཞག་པའི་ཕྱིར་རོ། །རྒྱུན་མཐའི་གནས་སྐབས་ཀྱི་ས་བརྒྱད་པ་ཡན་ཆད་ཀྱི་རྟོགས་རིགས་ལ་རྣམ་པར་སྨིན་པའི་ཟག་མེད་ཀྱི་རྟོགས་རིགས་ཞེས་བྱ་སྟེ། ས་བརྒྱད་པ་ཡན་ཆད་ཀྱི་ཡོན་ཏན་དེ་འབད་རྩོལ་ལ་མི་ལྟོས་པས་རྣམ་པར་སྨིན་པར་གཞག་པའི་ཕྱིར་རོ། །འདིར་རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་དང་། དེའི་རྟོགས་རིགས་མ་ནོར་བ་གལ་ཆེ་སྟེ། ས་བརྒྱད་པ་ཡན་ཆད་ཀྱི་ཟག་མེད་གྱི་ཡོན་ཏན་ཡིན་ན་རྣམ་པར་སྨིན་པ་མིན་པའི་ཟག་མེད་ཀྱི་ཡོན་ཏན་མིན་པས་ཁྱབ་ཀྱང་། དེའི་རྟོགས་རིགས་མིན་པས་མ་ཁྱབ་པའི་ཕྱིར་རོ། །གསུམ་པ་ནི། ཟག་མེད་ཀྱི་རྟོགས་རིགས་གཅིག་མངོན་དུ་བྱས་ན་དེ་དང་རིགས་མཐུན་པའི་རྟོགས་རིགས་ཐམས་ཅད་མངོན་དུ་བྱེད་པའི་དཔེ་ནི། སྐྱེས་བུའི་རྡོག་སྟབས་གཅིག་གིས་བསྐྱོད་པ་ན་ཟོ་ཆུན་གྱི་རྒྱུད་ཅིག་ཅར་འགུལ་བ་བཞིན་ནོ། །ཕྱི་མ་གསུམ་གྱི་མཚན་ཉིད་རིམ་བཞིན། རྣམ་པར་སྨིན་པའི་ཟག་མེད་ཀྱི་རྟོགས་རིགས་གཅིག་མངོན་དུ་བྱས་པ་ན་དེ་དང་རིགས་མཐུན་པའི་ཟག་མེད་ཀྱི་རྟོགས་རིགས་ཐམས་ཅད་མངོན་དུ་བྱེད་ནུས་པའི་སེམས་དཔའི་རྣལ་འབྱོར་མཐར་ཐུག་དང་། ཆོས་ཐམས་ཅད་བདེན་པའི་མཚན་ཉིད་མེད་པར་མངོན་སུམ་དུ་རྟོགས་པའི་སེམས་དཔའི་རྣལ་འབྱོར་མཐར་ཐུག ཆོས་ཐམས་ཅད་གཟུང་འཛིན་གཉིས་སུ་མེད་པར་མངོན་སུམ་དུ་རྟོགས་པའི་སེམས་དཔའི་རྣལ་འབྱོར་མཐར་ཐུག་གོ །གསུམ་པ་ནི། རྒྱུན་མཐའི་ཡེ་ཤེས་གཅིག་ལ་ཡོན་ཏན་མངོན་དུ་བྱེད་ཚུལ་གྱི་སྒོ་ནས་དང་པོ་གཉིས་དང་། ཆོས་ཉིད་རྟོགས་ཚུལ་གྱི་སྒོ་ནས་ཕྱི་མ་གཉིས་ཕྱེ་བ་ཡིན་པས་བཞི་ཀ་ཡང་རྒྱུན་མཐའ་ཁོ་ནར་ཡོད་དོ། །སྦས་དོན་རབ་གསལ་ལས་སྐབས་བདུན་པའི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པའོ།། །།བརྒྱད་པ་འབྲས་བུ་ཆོས་སྐུ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། སྦྱོར་བཞི་བསྒོམས་པའི་རྣམ་སྨིན་མཐར་ཐུག་གོ །གཉིས་པ་ལ་འཕགས་པས་རྩ་བའི་དགོངས་པ་འཆད་པའི་ཚུལ་དང་། སློབ་དཔོན་གྱིས་རྒན་པོའི་ཟེར་སྒྲོས་འཆད་པའི་ཚུལ་གཉིས་ལས། དང་པོ་ལ་ངོ་བོའི་སྒོ་ནས་དབྱེ་ན་རྟེན་སྐུ་དང་། བརྟེན་པ་ཕྲིན་ལས་གཉིས་སོ། །མཚོན་བྱེད་ཆོས་ཀྱི་སྒོ་ནས་དབྱེ་ན་ངོ་བོ་ཉིད་སྐུ། ལོངས་སྤྱོད་རྫོགས་པའི་སྐུ། སྤྲུལ་པའི་སྐུ། མཛད་པ་ཕྲིན་ལས་དང་བཞིའོ། །དང་པོ་ལ་མཚན་ཉིད་དང་། ཟག་མེད་ཀྱི་ཡོན་ཏན་བྱེ་བྲག་ཏུ་བཤད་པ་གཉིས་ལས། དང་པོ་ནི་དག་པ་གཉིས་ལྡན་གྱི་དབྱིངས་མཐར་ཐུག་དང་ཟག་མེད་ཀྱི་ཡོན་ཏན་དབྱེར་མེད་དུ་གྱུར་པའི་རང་དོན་དོན་དམ་པའི་སྐུའོ། །གཉིས་པ་ནི། འོ་ན་མཚན་ཉིད་གསུམ་ལྡན་དུ་གྱུར་པའི་ཟག་མེད་ཀྱི་ཡེ་ཤེས་དེ་གང་ཞེ་ན། འདི་ལ་ཡེ་ཤེས་ཀྱི་རང་བཞིན། ཡོན་ཏན་གྱི་ཁྱད་པར། དེ་ལ་རྩོད་པ་སྤོང་བ་དང་གསུམ་ལས། དང་པོ་ལ་སྡེ་ཚན་ཉེར་གཅིག་ལས། དང་པོ་བྱང་ཆུབ་ཕྱོགས་མཐུན་དང་། གཉིས་པ་ཚད་མེད་བཞི་དང་། གསུམ་པ་རྣམ་ཐར་བརྒྱད་དང་། བཞི་པ་མཐར་གནས་ཀྱི་སྙོམས་འཇུག་དགུ་ནི་རང་རང་གི་ངོ་བོ་སྐབས་དང་པོ་དང་། སྐབས་བཞི་པར་བཤད་ཟིན་ཅིང་། འདིར་སངས་རྒྱས་ཀྱི་ས་ལ་སྦྱོར་བའི་ཚེ་གནས་ཡོངས་སུ་གྱུར་པའི་ཡེ་ཤེས་མཐར་ཐུག་ཅེས་སྦྱོར། ལྔ་པ་ཟད་པར་ལ། མཚན་ཉིད་དང་། དབྱེ་བ་གཉིས་ལས། དང་པོ་ནི། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་གང་གི་སྒོ་ནས་ཟད་པར་དུ་འཇོག་པའི་དམིགས་པའི་སྣང་བ་དེས་རང་ཡུལ་གྱི་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ནི་ཟད་པར་གྱི་ཏིང་ངེ་འཛིན་གྱི་མཚན་ཉིད་ཡིན་ལ། ཟད་པར་གྱི་སྐྱེ་མཆེད་གྱི་མཚན་ཉིད་དུ་འཇོག་ན་དེ་ལྟར་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ཞེས་སྦྱར་རོ། །གཉིས་པ་ལ་ཟད་པར་ས་དང་། ཆུ་དང་། མེ་དང་། རླུང་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ནམ་མཁའ་དང་། རྣམ་པར་ཤེས་པའི་སྐྱེ་མཆེད་དེ་བཅུའོ། །མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་དམིགས་པའི་སྣང་བ་ས་ནས་རྣམ་པར་ཤེས་པའི་བར་རང་ཡུལ་གྱི་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ཞེས་སོ་སོར་སྦྱར་རོ། །མཛོད་ལྟར་ན། དང་པོ་བརྒྱད་ལ། དེ་ལྟར་སྤྲོ་ནུས་པའི་སེམས་བྱུང་མ་ཆགས་པའི་རང་བཞིན་ཞེས་པ་དང་། ཕྱི་མ་གཉིས་ལ་བདག་རྐྱེན་གཟུགས་མེད་ཀྱི་དངོས་གཞི་ལ་བརྟེན་ནས་ཞེས་སྦྱར་རོ། །དྲུག་པ་ཟིལ་གནོན་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་ཡུལ་གྱི་གཟུགས་ཐམས་ཅད་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱིས་གནོན་པར་ནུས་པའི་ཞི་ལྷག་ཟུང་འཇུག་གོ །གཉིས་པ་ལ་བརྒྱད་ཡོད་པ་ལས། གཟུགས་ཅན་གཟུགས་ཆུང་ངུ་ལ་ལྟ་བའི་ཟིལ་གནོན་གྱི་མཚན་ཉིད། བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་ལ་གཟུགས་སྣང་མ་དོར་བའི་སྒོ་ནས་རང་ཡུལ་དུ་གྱུར་པའི་སེམས་ཅན་གཟུགས་བཟང་ངན་ཐམས་ཅད་ལ་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱིས་གནོན་ནུས་པའི་ཞི་ལྷག་ཟུང་འཇུག་གོ །གཟུགས་ཅན་གཟུགས་ཆེན་པོ་ལ་ལྟ་བའི་ཟིལ་གནོན་གྱི་མཚན་ཉིད། གཞན་འདྲ་བ་ལས་རང་ཡུལ་དུ་གྱུར་པའི་སྣོད་ཀྱི་གཟུགས་བཟང་ངན་ཐམས་ཅད་ཞེས་སོགས་སྦྱར་རོ། །གཟུགས་མེད་གཟུགས་ཆུང་ངུ་དང་། ཆེན་པོ་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་ལ་ལྟ་བའི་ཟིལ་གནོན་རྣམས་ཀྱི་མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ཏེ་རང་ལ་གཟུགས་སྣང་དོར་བའི་སྒོ་ནས་སེམས་ཅན་དང་། སྣོད་ཀྱི་གཟུགས་བཟང་ངན་ཐམས་ཅད་དང་། ཕྱི་རོལ་གྱི་གཟུགས་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཇི་ལྟར་འདོད་པ་བཞིན་དུ་དབང་བསྒྱུར་བའི་སྒོ་ནས་ཟིལ་གྱིས་གནོན་ནུས་པའི་ཞི་ལྷག་ཟུང་འཇུག་གོ །བདུན་པ་ཉོན་མོངས་མེད་པ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། གཞན་རྒྱུད་ཀྱི་ཉོན་མོངས་འགོག་པས་ཁྱད་པར་དུ་བྱས་པའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ལ་ཉན་ཐོས། རང་རྒྱལ། སངས་རྒྱས་ཀྱི་ཉོན་མོངས་པ་མེད་པ་དང་གསུམ་ལས། མཚན་ཉིད་རིམ་བཞིན། གཞན་རྒྱུད་ཀྱི་ཉོན་མོངས་སྐྱེ་རུང་རེ་ཞིག་འགོག་པས་ཁྱད་པར་དུ་བྱས་པའི་ཉན་ཐོས་ཀྱི་རྒྱུད་ཀྱི་དང་། རང་རྒྱལ་གྱི་རྒྱུད་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པ་དང་། གཞན་རྒྱུད་ཀྱི་ཉོན་མོངས་དྲུང་ནས་འབྱིན་པའི་ཆེད་དུ་ཆོས་སྟོན་པའི་བདག་རྐྱེན་དུ་གྱུར་པའི་སངས་རྒྱས་ཀྱི་རྒྱུད་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པའོ། །བརྒྱད་པ་སྨོན་གནས་ཤེས་པ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། ཉོན་མོངས་མེད་པའི་སྔོན་དུ་གཞན་རྒྱུད་ཀྱི་ཉོན་མོངས་སྐྱེ་མི་སྐྱེ་མངོན་སུམ་རྟོགས་པས་ཁྱད་པར་དུ་བྱས་པའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ལ་ཉན་ཐོས་དང་། རང་རྒྱལ་གྱི་སྨོན་གནས་ཤེས་པ་དང་། སངས་རྒྱས་ཀྱི་སྨོན་གནས་མཁྱེན་པ་གསུམ་ལས། དང་པོ་གཉིས་ཀྱི་མཚན་ཉིད་རིམ་བཞིན། རྩ་བའི་མཚན་ཉིད་གཞིར་བཞག་ནས་ཉན་ཐོས་ཀྱི་རྒྱུད་ཀྱི་དང་། རང་རྒྱལ་གྱི་རྒྱུད་ཀྱི་སེམས་རྩེ་གཅིག་པ་ཞེས་སྦྱར་རོ། །གསུམ་པའི་མཚན་ཉིད། འཁོར་བ་ཇི་སྲིད་པ་དང་། རྣམ་པར་གྲོལ་བ་ཇི་སྲིད་པར་འཇུག་པའི་སངས་རྒྱས་ཀྱི་རྒྱུད་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པའོ། །དགུ་པ་མངོན་པར་ཤེས་པ་དྲུག་དང་། བཅུ་པ་སོ་སོ་ཡང་དག་རིག་པ་བཞི་ནི་བཤད་ཟིན་ཏོ། །བཅུ་གཅིག་པ་ཡོངས་སུ་དག་པ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། རྟེན་ཡོངས་དག་སོགས་ལ་དབང་བསྒྱུར་བའི་རང་གཞན་གྱི་དོན་སྒྲུབ་པའི་སེམས་རྩེ་གཅིག་པ་མཚུངས་ལྡན་དང་བཅས་པ། གཉིས་པ་ལ་བཞི་ལས། རྟེན་ཡོངས་སུ་དག་པ་ནི་ལུས་འདོར་ལེན་ལ་དབང་བྱེད་པའོ། དམིགས་པ་ཡོངས་སུ་དག་པ་ནི་སྤྲུལ་བསྒྱུར་ལ་དབང་བྱེད་པའོ། །ཐུགས་ཡོངས་སུ་དག་པ་ནི་ཏིང་ངེ་འཛིན་གྲངས་མེད་ལ་དབང་བྱེད་པའོ། །ཡེ་ཤེས་ཡོངས་སུ་དག་པ་ནི་གཟུངས་ཀྱི་སྒོ་དཔག་ཏུ་མེད་པ་ལ་དབང་བྱེད་པའོ། །བཅུ་གཉིས་པ་དབང་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། ཕར་ཕྱིན་དྲུག་གི་འབྲས་བུ་མཐར་ཐུག་གྲུབ་པས་རང་གི་བསྒྱུར་བྱ་ལ་དབང་སྒྱུར་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །དབྱེ་ན་བཅུ་ལས། ཚེ་ལ་དབང་བ་ནི་བསྐལ་པའམ་བསྐལ་པ་ལས་ལྷག་པར་བཞུགས་པའི་ནུས་པ་ཐོབ་པའོ། །སེམས་ལ་དབང་བ་ནི་ཇི་ལྟར་འདོད་པ་བཞིན་དུ་སྙོམས་པར་འཇུག་པའི་ནུས་པ་ཐོབ་པའོ། །ཡོ་བྱད་ལ་དབང་བ་ནི་ནོར་གྱི་ཆར་འབེབས་ནུས་པའོ། །ལས་ལ་དབང་བ་ནི་གོང་མར་མྱོང་གྱུར་གྱི་རྣམ་པར་སྨིན་པ་འདོད་པར་སྒྱུར་ནུས་པའོ། །སྐྱེ་བ་ལ་དབང་བ་ནི་བསམ་གཏན་ལས་མ་ཉམས་བཞིན་དུ་འདོད་པར་སྐྱེ་བ་ལེན་པར་བྱེད་པའོ། །མོས་པ་ལ་དབང་བ་ནི་ས་དང་ཆུ་ལ་སོགས་པ་གང་མོས་པ་དེ་དང་དེར་འགྱུར་བའོ། །སྨོན་ལམ་ལ་དབང་བ་ནི་གཞན་དོན་ཕུན་སུམ་ཚོགས་པར་བྱེད་པའི་སྨོན་ལམ་གྲངས་མེད་པ་འགྲུབ་པའོ། །རྫུ་འཕྲུལ་ལ་དབང་བ་ནི་གདུལ་བྱ་འདུལ་བའི་ཕྱིར་རྫུ་འཕྲུལ་དཔག་ཏུ་མེད་པ་སྟོན་པའོ། །ཡེ་ཤེས་ལ་དབང་བ་ནི་སོ་སོ་ཡང་དག་པར་རིག་པ་བཞི་ཕུལ་དུ་བྱུང་བའི་མཐར་འགྲོ་བའོ། །ཆོས་ལ་དབང་བ་ནི་གསུང་རབ་ཡན་ལག་བཅུ་གཉིས་ཀྱི་སྒོ་ནས་གདུལ་བྱའི་བསམ་པ་ཇི་ལྟ་བ་བཞིན་དུ་ཆོས་སྟོན་པར་མཛད་པའོ། །འདི་དག་ལས་དང་པོ་གསུམ་ནི་སྦྱིན་པ་གསུམ་གྱི་འབྲས་བུའོ། །ལས་དང་སྐྱེ་བ་གཉིས་ནི་ཚུལ་ཁྲིམས་དང་། མོས་པ་ནི་བཟོད་པ་དང་། སྨོན་ལམ་ནི་བརྩོན་འགྲུས་དང་། རྫུ་འཕྲུལ་ནི་བསམ་གཏན་དང་། ཐ་མ་གཉིས་ནི་ཤེས་རབ་ཀྱི་འབྲས་བུའོ། །བཅུ་གསུམ་པ་སྟོབས་བཅུ་དང་། བཅུ་བཞི་པ་མི་འཇིགས་པ་བཞི་ནི་བཤད་ཟིན་ཏོ། །བཅོ་ལྔ་པ་བསྲུང་བ་མེད་པ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། རང་གི་སྤྱོད་པ་ལ་གཞན་གྱིས་ཡོངས་སུ་ཤེས་པའི་བསྙེངས་པས་བཅབ་པར་བྱའོ་སྙམ་པའི་དགོངས་པ་མི་མངའ་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ལ། སྐུ་དང་། གསུང་དང་། ཐུགས་ཀྱི་སྤྱོད་པ་བསྲུང་བ་མེད་པ་གསུམ། མཚན་ཉིད་རིམ་བཞིན། སྐུ་དང་གསུང་དང་ཐུགས་ཀྱི་སྤྱོད་པ་ལ་གཞན་གྱིས་ཡོངས་སུ་ཤེས་པ་ཞེས་སོགས་སྦྱར་རོ། །བཅུ་དྲུག་པ་དྲན་པ་ཉེར་གཞག་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། ཆོས་ཉན་པའི་གདུལ་བྱ་ལ་ཆགས་སྡང་གིས་དབེན་པ་ཁོ་ནར་བཏང་སྙོམས་སུ་དྲན་པ་དང་ལྡན་པར་གནས་པའི་དྲན་པ་ཤེས་རབ་མཚུངས་ལྡན་དང་བཅས་པའོ། །གཉིས་པ་ལ་ཆོས་གུས་པར་ཉན་པའི་གདུལ་བྱ་ལ་འདོད་ཆགས་ཀྱིས་དབེན་པ་དང་། གུས་པས་མི་ཉན་པའི་གདུལ་བྱ་ལ་ཁོང་ཁྲོས་དབེན་པ་དང་། ཕྱོགས་གཅིག་གུས་པས་ཉན་པ་དང་མི་ཉན་པ་ལ་ཆགས་སྡང་གཉིས་ཀས་དབེན་པའི་དྲན་པ་ཉེར་གཞག་གསུམ་མོ། །བཅུ་བདུན་པ་བསྙེལ་བ་མི་མངའ་བའི་ཆོས་ཉིད་ཀྱི་མཚན་ཉིད། སེམས་ཅན་གྱི་དོན་མཛད་པའི་དུས་ལས་སྐད་ཅིག་ཀྱང་མི་འདའ་བའི་མཐར་ཐུག་གི་ཡེ་ཤེས་སོ། །བཅོ་བརྒྱད་པ་བག་ཆགས་ཡང་དག་བཅོམ་པའི་མཚན་ཉིད། སྒྲིབ་གཉིས་བག་ཆགས་དང་བཅས་པ་མ་ལུས་པར་སྤངས་པའི་ཡེ་ཤེས་མཐར་ཐུག་གོ །བཅུ་དགུ་པ་ཐུགས་རྗེ་ཆེན་པོའི་མཚན་ཉིད། སྐྱེ་བོ་མཐའ་དག་ལ་ཕན་པར་སེམས་པའི་ཡེ་ཤེས་མཐར་ཐུག་གོ །ཉི་ཤུ་པ་མ་འདྲེས་པ་བཅོ་བརྒྱད་དང་། ཉེར་གཅིག་པ་རྣམ་པ་ཐམས་ཅད་མཁྱེན་པ་ཉིད་ནི་བཤད་ཟིན་ཏོ། །དང་ཞེས་པའི་སྒྲས་སློབ་དཔོན་གྱིས་ལམ་ཤེས་དང་། གཞི་ཤེས་བསྡུས་པར་འདོད་ཀྱང་། འཕགས་པས་འབྱེད་པ་ལ་འདོད་ཀྱི་སྡུད་པ་ལ་མི་འདོད། གང་ལས་འབྱེད་ན། ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་ཆོས་སྐུ་ལས་འབྱེད་དེ། འདིའི་ཆོས་སྐུ་ནི་ཆོས་ཉིད་ཀྱི་སྐུ་ལ་སྡེབ་སྦྱོར་གྱི་དབང་གིས་ཉིད་ཀྱི་རྐྱེན་ཏ་མི་མངོན་པར་བྱས་ནས། ཆོས་ཀྱི་སྐུ་ཞེས་གཞག་པ་ཡིན་པས་དོན་ཆོས་ཉིད་ཀྱི་སྐུ་ཡིན་པའི་ཕྱིར་རོ། །གང་འབྱེད་ན་བྱང་ཆུབ་ཕྱོགས་མཐུན་ནས་རྣམ་མཁྱེན་གྱི་བར་ཉེར་གཅིག་པོ་དེའོ། །ཇི་ལྟར་འབྱེད་ན་སྡེ་ཚན་ཉེར་གཅིག་པོ་དེ་ཟག་པ་མེད་པའི་ཆོས་གང་དག འཐོབ་འགྱུར་ཞེས་པའི་ཟག་མེད་ཀྱི་ཆོས་ཀྱི་མཚན་གཞི་ཡིན་གྱི། ཆོས་སྐུའི་མཚན་གཞི་མིན་ཏེ། ཆོས་ཉིད་ཀྱི་སྐུ་མིན་པའི་ཕྱིར་ཞེས་པའི་ཚུལ་གྱིས་སོ། །གཉིས་པ་ཡོན་ཏན་གྱི་ཁྱད་པར་ལ། ཉོན་མོངས་མེད་པའི་དང་། སྨོན་པ་མེད་པའི་ཁྱད་པར་གཉིས་ལས། དང་པོ་ནི། སངས་རྒྱས་ཀྱི་ཉོན་མོངས་མེད་པའི་ཏིང་ངེ་འཛིན་ཉན་ཐོས་ལ་སོགས་པའི་ཏིང་ངེ་འཛིན་ལས་ཁྱད་པར་དུ་འཕགས་ཏེ། གྲོང་ལ་སོགས་པར་བྱོན་ནས་སྐྱེ་བོ་མཐའ་དག་གི་ཉོན་མོངས་པ་དྲུང་ནས་འབྱིན་པའི་ཆེད་དུ་ཆོས་སྟོན་པའི་བདག་རྐྱེན་བྱེད་པའི་མཁྱེན་པ་ཡིན་པའི་ཕྱིར། གཉིས་པ་ནི། སངས་རྒྱས་ཀྱི་སྨོན་གནས་མཁྱེན་པ་ནི་ཉན་ཐོས་ལ་སོགས་པའི་སྨོན་གནས་ཤེས་པ་ལས་ཁྱད་པར་དུ་འཕགས་ཏེ། མཚན་མ་མེད་པར་ལྷུན་གྱིས་གྲུབ་པ་སོགས་ཁྱད་ཆོས་ལྔ་དང་ལྡན་པའི་ཕྱིར། གསུམ་པ་རྩོད་པ་སྤང་བ་ནི། རྟག་གནས་དང་ཞེས་པ་ལས་འཕྲོས་ནས་ཆོས་སྐུ་རྟག་ཏུ་གནས་ན་རྟག་ཏུ་སེམས་ཅན་ཐམས་ཅད་ཀྱི་དོན་ཅིའི་ཕྱིར་མི་མཛད་ཅེ་ན་སྐྱོན་མེད་དེ། ཆོས་སྐུས་སེམས་ཅན་གྱི་དོན་མཛད་པར་ཁྱད་པར་མེད་ཀྱང་། སངས་རྒྱས་སུ་སྣང་བའི་སྨོན་ལམ་དང་དགེ་རྩ་སྨིན་པའི་སེམས་ཅན་ལ་སངས་རྒྱས་སུ་སྣང་ལ་དེ་མ་སྨིན་པ་ལ་དེ་མི་སྣང་བའི་ཕྱིར། གཉིས་པ་ལོངས་སྐུ་ལ་མཚན་ཉིད་དང་། ཡོན་ཏན་རྒྱས་པར་བཤད་པ་གཉིས་ལས། དང་པོ་ནི། ངེས་པ་ལྔ་ལྡན་གྱི་གཟུགས་སྐུ་མཐར་ཐུག ངེས་པ་ལྔ་ནི། གནས་ངེས་པ་འོག་མིན་ཁོ་ན་དང་། དུས་ངེས་པ་འཁོར་བ་ཇི་སྲིད་མ་སྟོངས་ཀྱི་བར་དུ་སྐུའི་སྣང་བ་མི་སྡུད་པར་བཞུགས་པ། ངོ་བོ་ངེས་པ་མཚན་དཔེས་སྤྲས་པ། འཁོར་ངེས་པ་བྱང་སེམས་འཕགས་པ་ཁོ་ནས་བསྐོར་བ། ཆོས་ངེས་པ་ཐེག་ཆེན་གྱི་ཆོས་འབའ་ཞིག་ལ་ལོངས་སྤྱོད་པ་དང་ལྔ་ལས། རྩ་བར་ངོ་བོ་དང་ཆོས་གཉིས་དངོས་སུ་འབྱུང་ཞིང་། འགྲེལ་པར་འཁོར་དང་གསུམ་གསུངས་སོ། །གཉིས་པ་ལ་མཚན་དང་། དཔེ་བྱད་གཉིས་ལས། ལོངས་སྐུའི་མཚན་གྱི་མཚན་ཉིད། ལོངས་སྐུ་གཞན་ངོར་སྐྱེས་བུ་དམ་པར་མཚོན་པར་བྱེད་པའི་ཡོན་ཏན། དབྱེ་ན། ཕྱག་དང་ཞབས་འཁོར་ལོའི་མཚན་དང་ལྡན་པ་སོགས་སོ་གཉིས་དང་། དེའི་རྒྱུ་ལ་ཡང་བླ་མ་རྣམས་ལ་སྐྱེལ་བ་དང་བསུ་བ་སོགས་སོ་གཉིས་ཡོད་དོ། །ལོངས་སྐུའི་དཔེ་བྱད་ཀྱི་མཚན་ཉིད། ལོངས་སྐུ་མཐོང་བ་ཙམ་གྱིས་རབ་ཏུ་དད་པར་བྱེད་པའི་ཡོན་ཏན། དབྱེ་ན། སེན་མོའི་དབང་དུ་བྱས་པ། སོར་མོའི་དབང་དུ་བྱས་པ། རྩའི་དབང་དུ་བྱས་པ། ཞབས་ཀྱི་དབང་དུ་བྱས་པ། གཤེགས་ཚུལ་གྱི་དབང་དུ་བྱས་པ། སྐུའི་དཀྱིལ་འཁོར་གྱི་དབང་དུ་བྱས་པ། ཕྱག་གི་དབང་དུ་བྱས་པ། ཞལ་འཁོར་བཅས་ཀྱི་དབང་དུ་བྱས་པ། དབུ་དབུ་སྐྲ་དང་བཅས་པའི་དབང་དུ་བྱས་པ་སྟེ་སྡེ་ཚན་དགུ་ལས། དང་པོ་ལ་སེན་མོ་ཟངས་ཀྱི་མདོག་ལྟར་དམར་བ་སོགས་གསུམ། གཉིས་པ་ལ་སོར་མོ་ཟླུམ་པ་སོགས་གསུམ། གསུམ་པ་ལ་རྩ་མི་མངོན་པ་སོགས་གཉིས། བཞི་པ་ལ་ལོང་བུ་མི་མངོན་པ་སོགས་གཉིས། ལྔ་པ་ལ་སེང་གེའི་སྟབས་སུ་གཤེགས་པ་སོགས་བདུན། དྲུག་པ་ལ་འཁྲིལ་བག་ཆགས་པ་སོགས་ཉེར་ལྔ། བདུན་པ་ལ་ཕྱག་ཤིང་བལ་ལྟར་འཇམ་པ་སོགས་བཞི། བརྒྱད་པ་ལ་ཞལ་མཆུ་དང་བཅས་པའི་དབང་དུ་བྱས་པ། ལྗགས་གསུང་དང་བཅས་པའི་དབང་དུ་བྱས་པ། མཆེ་བའི་དབང་དུ་བྱས་པ། ཤངས་ཀྱི་དབང་དུ་བྱས་པ། སྤྱན་འཁོར་དང་བཅས་པའི་དབང་དུ་བྱས་པ། སྙན་གྱི་དབང་དུ་བྱས་པ། དཔྲལ་བའི་དབང་དུ་བྱས་པ་སྟེ་བདུན་ལས། དང་པོ་ལ་ཞལ་ཧ་ཅང་མི་རིང་བ་སོགས་གཉིས། གཉིས་པ་ལ་ལྗགས་མཉེན་པ་སོགས་དྲུག གསུམ་པ་ལ་མཆེ་བ་ཟླུམ་པ་སོགས་ལྔ། བཞི་པ་ལ་ཤངས་མཐོ་བ་སོགས་གཉིས། ལྔ་པ་ལ་སྤྱན་ཡངས་པ་སོགས་བདུན། དྲུག་པ་ལ་སྙན་རིང་ཞིང་རྒྱས་པ་སོགས་གསུམ། བདུན་པ་ལ་དཔྲལ་བ་ལེགས་པར་ཕྱེས་པ་སོགས་གཉིས། རྩ་བའི་དགུ་པ་ལ་དབུ་རྒྱས་པ་སོགས་བརྒྱད་དོ། །གསུམ་པ་ལ་སྤྲུལ་སྐུ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། སེམས་ཅན་གྱི་དོན་དུ་གང་ལ་གང་འདུལ་གྱི་སྐུར་སྟོན་པའི་ལོངས་སྐུའི་སྤྲུལ་པའོ། །གཉིས་པ་ལ། རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །ཞེས་པ་ལྟར་གསུམ་ལས། བཟོའི་སྤྲུལ་སྐུ་ནི་དྲི་ཟའི་རྒྱལ་པོ་རབ་དགའ་འདུལ་བའི་ཆེད་དུ་པི་ཝང་མཁན་གྱི་གཟུགས་སུ་སྤྲུལ་པ་ལྟ་བུའོ། །སྐྱེ་བའི་སྤྲུལ་སྐུ་ནི་གདུལ་བྱའི་དོན་དུ་རི་བོང་དུ་སྐྱེ་བ་གཟུང་བ་ལྟ་བུའོ། །མཆོག་གི་སྤྲུལ་སྐུ་ནི་མཛད་པ་བཅུ་གཉིས་ཀྱི་ཚུལ་དངོས་སུ་སྟོན་པ་སྟེ་ཤཱཀྱ་ཐུབ་པ་ལྟ་བུའོ། །གཉིས་པ་བརྟེན་པ་ཕྲིན་ལས་ལ་ཆོས་སྐུའི་ཕྲིན་ལས་ཀྱི་མཚན་ཉིད་དང་། དབྱེ་བ་གཉིས་ལས། དང་པོ་ནི་ཆོས་སྐུས་བདག་རྐྱེན་བྱས་པ་ལས་བྱུང་བའི་རྣམ་དཀར་གྱི་ཡོན་ཏན་ནོ། །གཉིས་པ་ལ་རྟེན་གྱི་སྒོ་ནས་དང་། ས་མཚམས་ཀྱི་སྒོ་ནས་དབྱེ་བ་གཉིས་ལས། དང་པོ་ལ་བྱེད་པ་པོ་ལ་ཡོད་པའི་ཕྲིན་ལས་དང་། བྱ་བ་ཡུལ་ལ་ཡོད་པའི་ཕྲིན་ལས་གཉིས་ལས། དང་པོ་ནི་སངས་རྒྱས་ཀྱི་ས་ཁོ་ནར་ཡོད་དེ། སངས་རྒྱས་འཕགས་པའི་རྒྱུད་ཀྱི་རྣམ་མཁྱེན་ལ་གདུལ་བྱ་ལམ་གྱི་རྟེན་ལ་འགོད་པ་ནས་མི་གནས་པའི་མྱང་འདས་ལ་འགོད་པའི་བར་གྱི་བྱེད་ལས་ཉི་ཤུ་རྩ་བདུན་དང་ལྡན་པ་རྣམས་སོ། །གཉིས་པ་ལ་གདུལ་བྱ་ལམ་གྱི་རྟེན་ལ་བཀོད་པ་ནས་མི་གནས་པའི་མྱང་འདས་ལ་བཀོད་པའི་བར་ཉི་ཤུ་རྩ་བདུན་ཡོད་དོ། །སངས་རྒྱས་ཕྱི་མའི་རྒྱུད་ཀྱི་མི་གནས་པའི་མྱང་འདས་དེ་ཡང་སངས་རྒྱས་སྔ་མ་ལ་ལྟོས་ཏེ། བྱ་བ་ཡུལ་ལ་ཡོད་པའི་ཕྲིན་ལས་སུ་འགྱུར་རོ། །གཉིས་པ་ལ་གདུལ་བྱ་ལམ་གྱི་རྟེན་ལ་འགོད་པ། ལམ་ལ་འགོད་པ། ལམ་གྱི་འབྲས་བུ་ལ་འགོད་པ་དང་གསུམ་ལས། དང་པོ་འཁོར་བ་མཐའ་དག་སྤངས་ནས་མྱང་འདས་ཐོབ་འདོད་ཀྱི་བློ་ལ་འགོད་པའོ། །གཉིས་པ་ལ་ཚོགས་ལམ། སྦྱོར་ལམ། མཐོང་ལམ། སྒོམ་ལམ་ལ་འགོད་པ་དང་བཞི་ལས། དང་པོ་ལ་བསྡུ་དངོས་བཞི་ལ་འགོད་པ་དང་། བླང་དོར་རྟོགས་པ་དང་། གཞན་དོན་གྱི་སྤྱོད་པ་དང་། རང་དོན་གྱི་སྤྱོད་པ་དང་། གཉིས་དོན་གྱི་སྤྱོད་པ་ལ་འགོད་པ་སྟེ་ལྔའོ། །གཉིས་པ་ནི་སྟོང་ཉིད་གོམས་པ་ལ་འགོད་པའོ། །གསུམ་པ་ནི་སྦྱིན་པའི་ཕར་ཕྱིན་ལ་འགོད་པའོ། །བཞི་པ་ལ་ས་གཉིས་པ་ནས་ལྔ་པའི་བར་ལ་འགོད་པ་དང་། དྲུག་པ། བདུན་པ། བརྒྱད་པ། དགུ་པ། བཅུ་པ་ལ་འགོད་པ་དང་དྲུག་ལས། དང་པོ་ནི་ཚུལ་ཁྲིམས་ཀྱི་ཕར་ཕྱིན་ནས་བསམ་གཏན་གྱི་ཕར་ཕྱིན་གྱི་བར་ལ་འགོད་པའོ། །གཉིས་པ་ནི་ཤེས་རབ་ཀྱི་ཕར་ཕྱིན་ལ་འགོད་པའོ། །གསུམ་པ་ནི་ཐབས་ཀྱི་ཕར་ཕྱིན་ལ་འགོད་པའོ། །བཞི་པ་ལ་སྟོབས་ཀྱི་ཕར་ཕྱིན་སྟོབས་ཀྱིས་བྱང་ཆུབ་སེམས་དཔའི་ལམ་དང་། མངོན་པར་ཞེན་པ་བཟློག་པ་ལ་འགོད་པ་གཉིས་སོ། །ལྔ་པ་ནི་སྨོན་ལམ་གྱི་ཕར་ཕྱིན་ལ་འགོད་པའོ། །དྲུག་པ་ལ་ས་བཅུ་ཐོབ་མ་ཐག་པ་ལ་འགོད་པ་གཅིག སྐྱེ་བ་གཅིག་གིས་ཐོགས་པ་ལ་འགོད་པ་གསུམ། སྲིད་པ་ཐ་མ་ལ་འགོད་པ་བརྒྱད་རྣམས་སོ། །གསུམ་པ་ལམ་གྱི་འབྲས་བུ་ལ་འགོད་པ་ནི་མི་གནས་པའི་མྱང་འདས་ལ་འགོད་པའོ། །དེ་ལྟར་ཕྲིན་ལས་ཉེར་བདུན་པོ་རེ་རེ་ལ་ཡང་བྱེད་པ་པོ་ལ་ཡོད་པ་དང་། བྱ་བ་ཡུལ་ལ་ཡོད་པ་གཉིས་གཉིས་སུ་ཕྱེ་བ་ནི་སྐབས་ཀྱི་དོན་ཏེ་སྔར་བཤད་ཟིན་ཏོ། །གཉིས་པ་སློབ་དཔོན་གྱིས་རྒན་པོའི་ཟེར་སྒྲོས་འཆད་ཚུལ་ནི། བྱང་ཆུབ་ཕྱོགས་མཐུན་ཚད་མེད་དང་། །ཞེས་སོགས་ཀྱིས་ཡེ་ཤེས་ཆོས་སྐུ་བསྟན་པས་སངས་རྒྱས་ཀྱི་སྐུ་ལ་བཞིར་གྲངས་ངེས་ཤིང་། ལུས་རྣམ་གཞག་ཏུ་ཆོས་སྐུ་མཇུག་ཏུ་སྨོས་པ་ནི་ཚིགས་བཅད་སྦྱར་བདེ་བ་དང་། མཛད་པ་ཐམས་ཅད་ཡེ་ཤེས་ཆོས་སྐུ་ཁོ་ནའི་མཛད་པར་གཏོགས་པའི་ཆེད་ཡིན་ཞེས་སོགས་སྤྲོས་པ་དང་བཅས་ཏེ་འཆད་པ་ལ་དཔྱད་པ་གཞན་དུ་བསྟན་ཟིན་ཏོ། །གཉིས་པ་བར་པ་ལ་དད་པ་ལ་དྲུག་ཏུ་བསྟན་པ་ནི། མཚན་ཉིད་དང་། སྦྱོར་བ་དང་། རབ་དང་། གོ་རིམ་དང་། མཐར་ཐུག་པ་དང་། རྣམ་སྨིན་ཏེ་དྲུག་ལས། དང་པོ་ནི་མཁྱེན་པ་གསུམ་སྟེ། འཕགས་པས་མཚན་ཉིད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ་ཞེས་དང་། སློབ་དཔོན་གྱིས་མངོན་པར་མཚོན་པའི་གནས་ཉིད་ཡིན་པས་མཚན་ཉིད་དོ་ཞེས་གསུངས་སོ། །ཕྱི་མ་ལྔ་སྦྱོར་བ་བཞི་དང་། འབྲས་བུ་ཆོས་སྐུའོ། །གསུམ་པ་བསྡུས་པ་ལ་དད་པ་ལ་གསུམ་དུ་བསྡུ་བ་ནི། སློབ་དཔོན་ལྟར་ན་ཡུལ་གྱི་རྒྱུ་དང་། སྦྱོར་བ་དང་། འབྲས་བུ་གསུམ། འཕགས་པ་དང་། སངས་རྒྱས་ཡེ་ཤེས་ཞབས་ལྟར་ན་ཡུལ་དང་། རྒྱུ་དང་། འབྲས་བུ་དང་གསུམ་ལས། དང་པོ་ནི་མཁྱེན་པ་གསུམ་མོ། །གཉིས་པ་ནི་སྦྱོར་བ་བཞིའོ། །གསུམ་པ་ནི་ཆོས་ཀྱི་སྐུ་མཛད་པ་དང་བཅས་པའོ།། །།གང་གི་ལེགས་གསུང་འོད་ཟེར་སྟོང་ལྡན་གྱིས། །ལྷན་སྐྱེས་ཡིད་ཀྱི་མུན་པ་ཀུན་བསལ་ནས། །ཡུམ་དོན་པད་ཚལ་རྒྱས་པའི་གཉེན་གཅིག་པོ། །རོང་སྟོན་དམ་པའི་ཉི་མས་ད་དུང་སྐྱོངས། །གང་ཞིག་གསུང་ལ་བརྟེན་ནས་གང་ཞིག་གིས། །གང་ཞིག་ཆེས་བསགས་དགེ་རྩ་གང་ཞིག་ནི། །གང་ཞིག་རྗེས་འབྲང་གདུལ་བྱ་གང་ཞིག་གིས། །གང་ཞིག་རྟོགས་ནས་གང་ཞིག་ཐོབ་ཕྱིར་བསྔོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་མཚོན་བྱེད་ཀྱི་ཆོས་རྣམས་ཀྱི་ཡན་ལག་རྒྱས་པར་བཤད་པ་སྦས་དོན་རབ་གསལ་ཞེས་བྱ་བ་འདི་ནི། རོང་སྟོན་པ་དམ་པ་སངས་རྒྱས་ཀྱི་དགོངས་པ་ཇི་ལྟ་བ་བཞིན་དུ། མང་དུ་ཐོས་པའི་དགེ་སློང་བསོད་ནམས་སེང་གེས། ཆུ་ཕོ་འབྲུག་གི་ལོ་ས་ག་ཟླ་བའི་ཡར་ཚེས་གསུམ་ལ། རྟ་ནག་གསེར་གླིང་གི་དགོན་པར་སྦྱར་བའི། ཡི་གེ་པ་ནི་སྙོམ་ལས་པ་གཞོན་ནུ་བཟང་པོའོ།། །།འདི་བསྒྲུབས་པ་ལས་བྱུང་བ་ཡི། །དགེ་བ་གང་དང་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་མྱུར་ཐོབ་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

ཞུགས་གནས་ཀྱི་རྣམ་གཞག་སྐྱེས་བུ་མཆོག་གི་གསལ་བྱེད།

ཞུགས་གནས་ཀྱི་རྣམ་གཞག་སྐྱེས་བུ་མཆོག་གི་གསལ་བྱེད་ཅེས་བྱ་བ་བཞུགས་སོ།། དགེ་འདུན་དཀོན་མཆོག་གི་རྣམ་པར་གཞག་པ་སྐྱེས་བུ་མཆོག་གི་གསལ་བྱེད་ཅེས་བྱ་བ། བླ་མ་དང་ལྷག་པའི་ལྷ་མཆོག་འཇམ་པའི་དབྱངས་ལ་ཕྱག་འཚལ་ལོ། །འཕགས་མཆོག་གང་གིས་བདེ་གཤེགས་སྙིང་པོ་ཇི་བཞིན་ཡང་དག་ལེགས་གཟིགས་ནས། །སྐྱེ་སོགས་རྣམས་ལས་འདས་ཀྱང་སྙིང་རྗེའི་དབང་གིས་སྐྱེ་སོགས་ཚུལ་སྟོན་པ། །གང་གིས་མཚོན་བྱེད་ཐོས་སྒྲོགས་བསེ་རུར་བཅས་པའི་ཚོགས་ལ་གུས་བཏུད་ནས། །མཚོན་བྱ་མཚོན་བྱེད་མཚོན་ཚུལ་རྣམ་གཞག་འཁྲུལ་མེད་ངག་གིས་འདིར་བརྗོད་བྱ།། །།དཀོན་མཆོག་གསུམ་ལ་འདོམས་པའི་གདམས་ངག་གི་སྐབས་སུ་དགེ་འདུན་དཀོན་མཆོག་གི་རྣམ་གཞག་འཆད་པ་ལ་གསུམ་སྟེ། མཚོན་བྱ་དོན་གྱི་དགེ་འདུན་ཤེར་ཕྱིན་ལས་གསུངས་པའི་ཚུལ། མཚོན་བྱེད་དཔེའི་དགེ་འདུན་མངོན་པ་ནས་གསུངས་པའི་ཚུལ། མཚོན་བྱེད་དེས་མཚོན་བྱ་དེ་ཇི་ལྟར་མཚོན་པའི་ཚུལ་ལོ། །དང་པོ་ལ་གསུམ་སྟེ། མདོ་ལས་གསུངས་པའི་ཚུལ། བསྟན་བཅོས་སུ་བསྡུས་པའི་ཚུལ། དེ་དག་གི་དགོངས་པ་དཔྱད་པའོ། །དང་པོ་ནི། ཡུམ་བར་མ་ལས། དད་པས་རྗེས་སུ་འབྲང་བའི་དབང་དུ་མཛད་ནས་གསུངས་པ་ནི། དེ་ལ་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་མིའི་ནང་ནས་ཤི་འཕོས་ནས་མི་རྣམས་དང་སྐལ་བ་མཉམ་པ་ཉིད་དུ་སྐྱེས་པ་དེ་ནི་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་མ་གཏོགས་པར་དབང་པོ་རྟུལ་བ་ཡིན་ཏེ་ཞེས་བྱ་བ་ལ་སོགས་པ་ཡིན་ནོ། །ཆོས་ཀྱི་རྗེས་སུ་འབྲང་བའི་དབང་དུ་མཛད་ནས་གསུངས་པ་ནི། ཤཱ་རིའི་བུ་དེ་ལ་བྱང་སེམས་ཆེན་པོ་གང་སངས་རྒྱས་ཀྱི་ཞིང་གཞན་ནམ་དགའ་ལྡན་གྱི་ལྷའི་རིས་ནས་ཤི་འཕོས་ནས་འདིར་སྐྱེས་པ་དེ་ནི་དབང་པོ་རྣོན་པོར་འགྱུར་ཞིང་ཞེས་བྱ་བ་ལ་སོགས་པ་ཡིན་ནོ། །འབྲས་བུ་གཉིས་པ་དང་གསུམ་པ་ལ་ཞུགས་པ་དད་མོས་ཀྱི་དབང་དུ་མཛད་ནས་གསུངས་པ་ནི། ཤཱ་རིའི་བུ་བྱང་ཆུབ་སེམས་དཔའ་ཐབས་མི་མཁས་པ་གང་དག་བསམ་གཏན་བཞི་པོ་དག་ནི་སྒྲུབ་པར་བྱེད་ལ། ཕ་རོལ་ཏུ་ཕྱིན་པ་དྲུག་ལ་ཡང་སྤྱོད་པར་བྱེད་ཅིང་བསམ་གཏན་ཐོབ་པ་དེས་ཀྱང་ལྷ་ཚེ་རིང་པོའི་ནང་དུ་སྐྱེས་ཏེ་དེ་ནས་ཤི་འཕོས་ནས་དེ་དག་གལ་ཏེ་འདོད་པའི་ཁམས་སུ་ལྷ་དང་མི་རྣམས་ཀྱི་ནང་དུ་སྐྱེས་ན་དེ་དག་གི་དབང་པོ་རྣམས་རྟུལ་པོར་འགྱུར་གྱི་རྣོན་པོ་མི་འགྱུར་བ་དག་ཀྱང་ཡོད་དོ། །ཞེས་བྱ་བའོ། །མཐོང་ཐོབ་ཀྱི་དབང་དུ་མཛད་ནས་གསུངས་པ་ནི། ཤཱ་རིའི་བུ་བྱང་སེམས་ཐབས་ལ་མཁས་པ་གང་དག་བསམ་གཏན་དང་གཟུགས་མེད་པའི་སྙོམས་པར་འཇུག་པ་རྣམས་ལ་སྙོམས་པར་བཞུགས་ཤིང་། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་པོ་རྣམས་ལ་ཡང་སྙོམས་པར་འཇུག་ལ། བསམ་གཏན་ལ་སོགས་པའི་དབང་གིས་ནི་མ་ཡིན་ཏེ། འོན་ཀྱང་ཐབས་ལ་མཁས་པས་གང་དང་གང་ན་སངས་རྒྱས་བཅོམ་ལྡན་འདས་རྣམས་མཉེས་པར་བྱེད་པ་དེ་དང་དེ་དག་ཏུ་སྐྱེ་བར་འགྱུར་བ་དག་ཡོད་དོ། །དེ་དག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་དང་མ་བྲལ་བས་བསྐལ་པ་བཟང་པོ་འདི་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་བྱ་བ་ཡིན་ནོ། །ལན་གཅིག་ཕྱིར་འོང་བའི་དབང་དུ་མཛད་ནས་གསུངས་པ་ནི། ཤཱ་རིའི་བུ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་གང་དག་ཐབས་ལ་མཁས་པས་བསམ་གཏན་དང་གཟུགས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་ཞེས་བྱ་བ་ནས་རྒྱ་ཆེར་དགའ་ལྡན་གྱི་གནས་སུ་ཚེ་ཇི་སྲིད་ཀྱི་བར་དུ་གནས་ནས་དེ་ནས་ཤི་འཕོས་ཏེ་འདིར་སྐྱེ་བ་ཡང་དག་པར་བསྟན་ཏེ། སངས་རྒྱས་ཀྱི་ཞིང་སྣ་ཚོགས་པ་རྣམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའང་ཡོད་དོ་ཞེས་བྱ་བའི་བར་རོ། །ཕྱིར་མི་འོང་བའི་དབང་དུ་མཛད་ནས་གསུངས་པ་ནི། ཤཱ་རིའི་བུ་འདི་ལྟར་ཡང་བྱང་ཆུབ་སེམས་དཔའ་མངོན་པར་ཤེས་པ་དྲུག་ཐོབ་པ་གང་དག་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་སུ་མི་སྐྱེའི། འོན་ཀྱང་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འདོང་བ་ཞེས་བྱ་བ་ནས་བརྩམས་ཏེ། གང་དང་གང་ན་སངས་རྒྱས་བཅོམ་ལྡན་འདས་རྣམས་བཞུགས་པ་དེ་དང་དེར་སྐྱེ་བར་འགྱུར་བར་བྱེད་པ་དག་ཀྱང་ཡོད་དོ་ཞེས་བྱ་བ་ཡིན་ནོ། །རྒྱུན་ཞུགས་རིགས་ནས་རིགས་སྐྱེ་ལ་གཉིས་ལས། མིའི་རིགས་ནས་རིགས་སྐྱེ་ནི་ཤཱ་རིའི་བུ་བྱང་ཆུབ་སེམས་དཔའ་གང་དག་བསམ་གཏན་དང་གཟུགས་མེད་པའི་སྙོམས་པར་འཇུག་པ་བསྐྱེད་ནས་ཐབས་ལ་མཁས་པས་མིའི་རིགས་རྣམས་སུ་རྒྱལ་རིགས་ཤིང་སཱ་ལ་ཆེན་པོ་ལྟ་བུའམ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའམ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུའི་རིགས་སུ་སྐྱེ་བར་འགྱུར་བ་དག་ཡོད་དོ་ཞེས་གང་གསུངས་པ་ཡིན་ནོ། །གཉིས་པ་ནི། ཤཱ་རིའི་བུ་བྱང་ཆུབ་སེམས་དཔའ་བསམ་གཏན་ལ་སོགས་པ་ཐོབ་པ་གང་དག་ཐབས་ལ་མཁས་པས་རྒྱལ་ཆེན་བཞིའི་རིས་ནས་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་བར་དུ་སྐྱེས་ཏེ་ཞེས་བྱ་བ་ནས། དེར་སངས་རྒྱས་བཅོམ་ལྡན་འདས་རྣམས་ཀྱང་མཉེས་པར་བྱེད་པ་དག་ཡོད་དོ་ཞེས་བྱ་བའི་བར་དུ་གང་གསུངས་པ་ཡིན་ནོ། །ལན་གཅིག་ཕྱིར་འོང་བ་ཞེས་གང་གསུངས་པ་དེ་ཉིད་བར་ཆད་གཅིག་པ་ཡིན་པ་ནི། ཤཱ་རིའི་བུ་བྱང་ཆུབ་སེམས་དཔའ་གང་དག་བསམ་གཏན་བཞི་ནས་འཕགས་པའི་བདེན་པ་བཞིའི་བར་དུ་ཐོབ་ཀྱང་དེ་དག་མངོན་དུ་མི་བྱེད་པ་དག་ཡོད་དེ། དེ་དག་ནི་ཚེ་གཅིག་གིས་ཐོགས་པར་ཤེས་པར་བྱའོ་ཞེས་གང་གསུངས་པ་ཡིན་ནོ། །ཕྱིར་མི་འོང་ལ་བདུན་ལས། དང་པོ་བར་འདའ་བ་ནི། ཤཱ་རིའི་བུ་བྱང་ཆུབ་སེམས་དཔའ་བསམ་གཏན་ལ་སོགས་པ་ཐོབ་པ་གང་དག་ཐབས་ལ་མཁས་པས་ཚངས་རིས་ཀྱི་ལྷ་རྣམས་ཀྱི་བར་དུ་སྐྱེ་བར་འགྱུར་བ་དག་ཡོད་དོ་ཞེས་གང་གསུངས་པའོ། །གཉིས་པ་སྐྱེས་འདའ་བ་ནི། ཤཱ་རིའི་བུ་བྱང་ཆུབ་སེམས་དཔའ་གང་དག་དང་པོར་སེམས་བསྐྱེད་པ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་ཞིང་ཞེས་བྱ་བ་ནས། དེ་དག་ཡོངས་སུ་མྱ་ངན་ལས་འདས་ནས་དམ་པའི་ཆོས་བསྐལ་པའམ་བསྐལ་པ་ལས་ལྷག་པར་གནས་པ་དག་ཡོད་དོ་ཞེས་གང་གསུངས་པའོ། །གསུམ་པ་མངོན་པར་འདུ་བྱེད་དང་བཅས་པས་འདའ་བ་ནི། ཤཱ་རིའི་བུ་བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་གང་དག་འཇིག་རྟེན་གྱི་ཁམས་ནས་འཇིག་རྟེན་གྱི་ཁམས་སུ་འདོང་ཞིང་དེ་དག་སེམས་ཅན་རྣམས་ཀྱི་དོན་ལ་མངོན་པར་བརྩོན་ཏེ་ཞེས་བྱ་བ་ནས། བསྐལ་པ་གྲངས་མེད་པ་ཚད་མེད་པ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དག་ཡོད་དོ་ཞེས་བྱ་བའི་བར་གང་གསུངས་པའོ། །བཞི་པ་འདུ་བྱེད་མེད་པས་འདའ་བ་ནི། ཤཱ་རིའི་བུ་བྱང་ཆུབ་སེམས་དཔའ་གང་དག་དང་པོ་སེམས་བསྐྱེད་པ་ཉིད་ཀྱིས་བྱང་ཆུབ་སེམས་དཔའི་སྐྱོན་མེད་པ་ལ་གནས་ཤིང་ཞེས་བྱ་བ་ནས། སངས་རྒྱས་ཀྱི་ཞིང་གཞན་དང་གཞན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དག་ཡོད་དོ་ཞེས་བྱ་བའི་བར་གང་གསུངས་པའོ། །ལྔ་པ་གོང་འཕོ་ལ་གཉིས་ལས། འོག་མིན་མཐར་ཐུག་འགྲོ་ནི། ཤཱ་རིའི་བུ་བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་གང་དག་འཁོར་ལོས་སྒྱུར་བའི་རྒྱལ་པོར་གྱུར་ནས་སེམས་ཅན་རྣམས་ལ་བདེ་བའི་ཡོ་བྱད་ཐམས་ཅད་ཉེ་བར་སྒྲུབ་ཅིང་ཟས་འདོད་པ་རྣམས་ལ་ཟས་ཞེས་བྱ་བ་ནས་བརྩམས་ཏེ། སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་བཞག་ནས་ཚངས་རིས་ཀྱི་ལྷ་རྣམས་ནས་འོག་མིན་གྱི་བར་དུ་སྐྱེས་ཏེ་སངས་རྒྱས་ཀྱི་ཞིང་རྣམ་པ་སྣ་ཚོགས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དག་ཡོད་དོ་ཞེས་བྱ་བའི་བར་གང་གསུངས་པའོ། །དེ་ལ་གསུམ་ལས་འཕར་བ་ནི། ཤཱ་རིའི་བུ་བྱང་སེམས་ཆེན་པོ་གང་དག་བསམ་གཏན་བཞི་རྫོགས་པར་བྱས་ནས་བསམ་གཏན་ལས་ཡོངས་སུ་ཉམས་ནས་བསམ་གཏན་དང་པོ་བསྒྲུབས་ཏེ་ཚངས་རིས་ཀྱི་ལྷ་རྣམས་སུ་སྐྱེས་ཤིང་། དེ་དག་ཀྱང་བསམ་གཏན་བསྒྲུབས་ནས་འོག་མིན་གྱི་ལྷ་རྣམས་སུ་སྐྱེས་ཏེ་སངས་རྒྱས་ཀྱི་ཞིང་སྣ་ཚོགས་པ་རྣམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དག་ཡོད་དོ་ཞེས་གང་གསུངས་པའོ། །ཕྱེད་འཕར་ནི། ཤཱ་རིའི་བུ་བྱང་སེམས་ཆེན་པོ་གང་དག་ཚངས་པའི་འཇིག་རྟེན་ནས་ཤི་འཕོས་ནས་གནས་གཙང་མར་སྐྱེས་ཏེ། དེ་དག་གནས་གཙང་མའི་གནས་གཅིག་གམ་གཉིས་ལས་བརྒལ་ཏེ་འོག་མིན་གྱི་བར་དུ་སྐྱེས་ནས་སངས་རྒྱས་ཀྱི་ཞིང་སྣ་ཚོགས་རྣམས་སུ་ཞེས་བྱ་བ་ལ་སོགས་པ་གང་གསུངས་པའོ། །གནས་ཐམས་ཅད་དུ་འཆི་འཕོ་བ་ནི། ཤཱ་རིའི་བུ་བྱང་སེམས་ཆེན་པོ་གང་དག་དགའ་ལྡན་གྱི་གནས་སྦྱངས་ནས་ཚངས་རིས་ནས་འོག་མིན་གྱི་བར་དུ་སྐྱེས་ཏེ། ཐབས་ལ་མཁས་པས་དམྱལ་བ་དང་། དུད་འགྲོའི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ཆོས་སྟོན་པར་བྱེད་པ་དག་ཕྱོགས་བཅུ་རྣམས་སུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱེད་པ་དང་ཞེས་བྱ་བ་ལ་སོགས་པ་གང་གསུངས་པའོ། །སྲིད་རྩེའི་མཐར་ཐུག་འགྲོ་ནི། ཤཱ་རིའི་བུ་བྱང་སེམས་ཆེན་པོ་གང་དག་བསམ་གཏན་དང་གཟུགས་མེད་པའི་སྙོམས་པར་འཇུག་པ་སྒྲུབ་པར་བྱེད་པ་དག་ཚངས་རིས་ནས་དགེ་རྒྱས་ཀྱི་བར་གྱི་ལྷ་རྣམས་སུ་སྐྱེ་བར་འགྱུར་ཞིང་། ནམ་མཁའ་མཐའ་ཡས་སྐྱེ་མཆེད་ནས་སྲིད་པའི་རྩེ་མོའི་བར་དུ་སྐྱེ་བར་འགྱུར་ལ། དེ་ནས་སངས་རྒྱས་ཀྱི་ཞིང་རྣམ་པ་སྣ་ཚོགས་པ་རྣམས་སུ་སྐྱེ་བ་ཞེས་གསུངས་པ་ཡིན་ནོ། །དྲུག་པ་གཟུགས་ཀྱི་ཆགས་བཅོམ་ནི། ཤཱ་རིའི་བུ་བྱང་སེམས་ཆེན་པོ་གང་དག་ནམ་མཁའ་མཐའ་ཡས་སྐྱེ་མཆེད་ནས་སྲིད་རྩེའི་བར་གྱི་ལྷ་རྣམས་སུ་སྐྱེ་བར་འགྱུར་ལ། དེ་ནས་སངས་རྒྱས་ཀྱི་ཞིང་སྣ་ཚོགས་པ་རྣམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དག་ཡོད་དོ་ཞེས་གང་གསུངས་པའོ། །བདུན་པ་མཐོང་ཆོས་ཞི་ནི། ཤཱ་རིའི་བུ་བྱང་སེམས་ཆེན་པོ་གང་དག་ལུས་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་ཅིང་དབང་པོ་ཡོངས་སུ་དག་པ་བླ་ན་མེད་པ་རྣམས་དང་ལྡན་ཏེ་ནམ་ཡང་ངན་སོང་ངན་འགྲོར་ལོག་པར་ལྟུང་བར་སྐྱེ་བར་མི་འགྱུར་བ་དང་ཞེས་བྱ་བ་ནས། དེ་དག་ལ་གནས་ཀྱང་སངས་རྒྱས་བྱེ་བ་ཕྲག་ཁྲིག་བརྒྱ་སྟོང་དུ་མ་ལ་བཀུར་སྟི་བྱས། མཆོད་པར་བྱས། བརྗེད་པར་བྱས་ནས་འདི་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དག་ཡོད་དོ་ཞེས་གསུངས་པ་ཡིན་ནོ། །ལུས་མངོན་བྱེད་ནི། ཤཱ་རིའི་བུ་བྱང་སེམས་ཆེན་པོ་གང་དག་ཤེར་ཕྱིན་ལ་སྤྱོད་པ་དང་། བསམ་གཏན་དང་། ཚད་མེད་པ་དང་། གཟུགས་མེད་པའི་སྙོམས་པར་འཇུག་པ་རྣམས་ཀྱིས་རྣམ་པར་རྩེ་ཞིང་དེ་དག་བསམ་གཏན་དང་པོ་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལའོ། །དེ་ལས་ལངས་ནས་བསམ་གཏན་གཉིས་པ་ལ་སྙོམས་པར་འཇུག་གོ་ཞེས་བྱ་བ་ནས། ཤཱ་རིའི་བུ་དེ་ལྟར་བྱང་སེམས་ཆེན་པོ་ཤེར་ཕྱིན་ལ་སྤྱོད་པ་ཐབས་མཁས་པས་ཐོད་རྒལ་གྱི་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་སྣ་ཚོགས་སུ་ཞེས་བྱ་བ་ལ་སོགས་པའི་བར་དུ་གསུངས་པ་ཡིན་ནོ། །དགྲ་བཅོམ་ཞུགས་པ་ནི། ཤཱ་རིའི་བུ་བྱང་སེམས་ཆེན་པོ་གང་དག་ཕ་རོལ་ཏུ་ཕྱིན་པ་དྲུག་ལ་གནས་ནས་སེམས་ཅན་རྣམས་ལ་སངས་རྒྱས་ཀྱི་ཆོས་རྣམས་སྣང་བར་བྱེད་ཅིང་། བདག་ཉིད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱི་བར་དུ་སངས་རྒྱས་ཀྱི་ཆོས་ཀྱི་སྣང་བ་དང་འབྲལ་བར་མི་བྱེད་པ་དག་ཡོད་དོ་ཞེས་གསུངས་པ་ཡིན་ནོ། །དགྲ་བཅོམ་པ་ནི་ཡང་དག་པར་རྫོགས་པའི་སངས་རྒྱས་ཡིན་ལ། དེའང་སངས་རྒྱས་དཀོན་མཆོག་ལ་གདམས་པར་བསྟན་པས་འདིར་ཡང་མ་སྨོས་སོ། །བྱང་ཆུབ་སེམས་དཔའ་རང་སངས་རྒྱས་ཀྱི་དབང་དུ་མཛད་ནས་གསུངས་པ་ནི། ཤཱ་རིའི་བུ་བྱང་སེམས་ཆེན་པོ་གང་དག་སངས་རྒྱས་མི་བཞུགས་ཤིང་ཉན་ཐོས་མེད་པའི་འཇིག་རྟེན་གྱི་ཁམས་རྣམས་སུ་རང་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དག་ཡོད་དོ། །དེ་དག་ཐབས་ལ་མཁས་པས་སྲོག་ཆགས་བྱེ་བ་ཕྲག་བརྒྱ་སྟོང་མང་པོ་ཐེག་པ་གསུམ་པོ་རྣམས་སུ་ཡོངས་སུ་སྨིན་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་བྱ་བ་ཡིན་ནོ། །འདིའི་མཚམས་སྦྱོར་གྱི་ཚིག་རྣམས་ནི་ཉིར་སྣང་ཇི་ལྟ་བ་བཞིན་དུ་བྲིས་པ་ཡིན་ལ། འདི་དག་གི་ཐོག་མར་བཅོམ་ལྡན་འདས་གང་ཞིག་ཤེར་ཕྱིན་གྱི་གནས་པ་འདིས་གནས་པའི་བྱང་སེམས་དེ་གང་ནས་ཤི་འཕོས་ནས་འདིར་སྐྱེས་པ་ལགས། འདི་ནས་ཤི་འཕོས་ནས་ནི་གང་དུ་སྐྱེ་བར་འགྱུར་ཞེས་བྱ་བའི་དྲི་བའི་ཚིག་ལ་གང་གི་ཕྱིར་བརྒྱད་པའི་དབང་དུ་མཛད་ནས་གསུངས་པ་ནི་ཞེས་པའི་མཚམས་སྦྱོར་གསུངས་སོ། །གཉིས་པ་ནི། མདོ་འདི་དག་གི་དོན་བསྟན་བཅོས་ལས། དབང་པོ་རྟུལ་དང་རྣོན་པོ་དག །ཅེས་སོགས་ཚིགས་བཅད་གཉིས་སུ་བསྡུས་ཤིང་། དགེ་འདུན་གྱི་གྲངས་ཉི་ཤུར་ངེས་པར་གསུངས་སོ། །གསུམ་པ་ནི། དེ་ལ་མདོ་དང་བསྟན་བཅོས་ཀྱི་དགེ་འདུན་གྱི་གྲངས་བསྒྲིག་པའི་ཚུལ་ལ། རྒྱ་བོད་ཀྱི་མཁས་པ་རྣམས་ཀྱི་བཞེད་པ་བཀོད་པ་དང་། མདོ་དང་བསྟན་བཅོས་ཀྱི་དགོངས་པ་ངོས་གཟུང་བ་གཉིས་ལས། དང་པོ་ལའང་མདོ་ནས་ཁ་བསྐང་བའི་ལུགས་དང་། བསྟན་བཅོས་ཀྱི་དངོས་བསྟན་བགྲང་བའི་ཚུལ་གཉིས་སོ། །དང་པོ་ལ་རཏྣ་ཀཱིརྟིའི་ལུགས། སློབ་དཔོན་གྱི་ལུགས། འཕགས་པའི་ལུགས་དང་གསུམ་ལས། དང་པོ་ནི་འགྲེལ་པ་གྲགས་པའི་ཆ་ལས། བྱང་ཆུབ་སེམས་དཔའི་སྡོམ་པ་བླངས་པ་སོ་སོའི་སྐྱེ་བོ་ནས་བཟུང་སྟེ། ཇི་སྲིད་ས་བཅུ་ལ་རབ་ཏུ་ཞུགས་པའི་སྣ་ཚོགས་པའི་རབ་ཏུ་དབྱེ་བས་ཕྱེ་བའི་བློ་དང་ལྡན་པའི་བདག་ཉིད་ཆེན་པོ་དེ་རྣམས་ནི་བྱང་ཆུབ་སེམས་དཔའི་དགེ་འདུན་ནོ། །དགེ་སློང་གི་སྡོམ་པ་བླངས་པ་སོ་སོའི་སྐྱེ་བོ་ནས་བཟུང་སྟེ། ཇི་སྲིད་ཁམས་གསུམ་ལ་འདོད་ཆགས་དང་བྲལ་བ་གང་ཟག་ཆེན་པོ་བརྒྱད་ལ་སོགས་པའི་དབྱིབས་ཕྱེ་བའི་བདག་ཉིད་ཆེན་པོ་དེ་རྣམས་ཐམས་ཅད་ནི་ཉན་ཐོས་ཀྱི་དགེ་འདུན་ནོ་ཞེས་དང་། ད་ནི་འཕགས་པའི་ཉན་ཐོས་དང་བྱང་ཆུབ་སེམས་དཔའི་ཐུན་མོང་གི་རབ་ཏུ་དབྱེ་བ་བསྟན་པའི་ཕྱིར་གསུངས་པ། དབང་པོ་རྟུལ་དང་རྣོན་པོ་དག །ཅེས་པ་ནས། དད་པས་ཐོབ་པ་དང་། མཐོང་བས་ཐོབ་པ་དང་། རྒྱུན་དུ་ཞུགས་པ་དང་། ལྷའི་རིགས་ནས་རིགས་དང་། མིའི་རིགས་ནས་རིགས་དང་། ལན་གཅིག་ཕྱིར་འོང་བའི་འབྲས་བུ་ལ་སོ་སོར་ཞུགས་པ་དང་། ལན་གཅིག་ཕྱིར་འོང་བ་དང་། བར་ཆད་གཅིག་པ་དང་། ཕྱིར་མི་འོང་བའི་འབྲས་བུ་ལ་སོ་སོར་ཞུགས་པ་དང་། བར་མ་དོ་དང་། སྐྱེས་ནས་དང་། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་དང་། འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཕར་བ་ཕྱིར་མི་འོང་བ་དང་། མཐོང་བའི་ཆོས་ལ་ཞི་བ་ཕྱིར་མི་འོང་བ་དང་། ལུས་ཀྱིས་མངོན་སུམ་དུ་བྱེད་པ་ཕྱིར་མི་འོང་བ་དང་། དགྲ་བཅོམ་པའི་འབྲས་བུ་ལ་སོ་སོར་ཞུགས་པ་དང་། ཉན་ཐོས་ཀྱི་སངས་རྒྱས་ནི་སངས་རྒྱས་དཀོན་མཆོག་གི་ནང་དུ་འདུས་པས་ན་རང་སངས་རྒྱས་དང་ཞེས་པ་སྟེ་ཉི་ཤུའོ་ཞེས་བཤད་དོ། །དེ་དག་གི་དོན་ནི། སྤྱིར་བྱང་སེམས་དང་ཉན་ཐོས་ཀྱི་དགེ་འདུན་ཙམ་སེམས་བསྐྱེད་དང་། དགེ་སློང་གི་སྡོམ་པ་བླངས་པ་ནས་འཇོག་ཀྱང་། འདིར་བསྟན་གྱི་དགེ་འདུན་ནི་འཕགས་པ་ཁོ་ན་ཡིན་པས་མདོ་ནས་ཁ་བསྐང་བ་ལ་རྒྱུན་ཞུགས་འབྲས་གནས་ཙམ་པོ། ཕྱིར་འོང་ཞུགས་པ་དང་འབྲས་གནས་ཙམ་པོ། ཕྱིར་མི་འོང་ཞུགས་པ། དགྲ་བཅོམ་ཞུགས་པ་སྟེ་ལྔ། བསྟན་བཅོས་ཀྱི་དངོས་བསྟན་ལ་བཅོ་ལྔ་སྟེ་ཉི་ཤུའོ། །དབང་པོ་རྟུལ་པོ་དང་རྣོན་པོ་གཉིས་ནི་དད་མོས་མཐོང་ཐོབ་ཀྱི་བྱེ་བྲག་ཡིན་པས་དབྱེ་བར་མི་བགྲང་། སྲིད་རྩེའི་མཐར་ཐུག་འགྲོ་དང་། གཟུགས་ཀྱི་ཆགས་བཅོམ་གཉིས་མཐོང་ཆོས་ཞི་དང་ལུས་མངོན་བྱེད་ཀྱི་དབྱེ་གཞི་ཡིན་པས་མི་བགྲང་། འོག་མིན་འགྲོ་ཡང་འཕར་གསུམ་གྱི་དབྱེ་གཞི་ཡིན་པས་མི་བགྲང་ངོ་། །གཉིས་པ་སློབ་དཔོན་གྱི་ལུགས་ནི། རྒྱུན་ཞུགས་ཞུགས་པ་ལ་རྗེས་འབྲང་གཉིས། རྒྱུན་ཞུགས་འབྲས་གནས་ཙམ་པོ་ཁ་བསྐང་། ཁྱད་པར་ཅན་རིགས་ནས་རིགས་སྐྱེས་གཉིས་ཏེ། རྒྱུན་ཞུགས་ཀྱི་སྐོར་ལ་ལྔའོ། །ཕྱིར་འོང་ཞུགས་པ་དད་མོས་མཐོང་ཐོབ་གཉིས་གཅིག་ཏུ་བསྡུས་པ་དང་། འབྲས་གནས་ཙམ་པོ་ཁ་བསྐང་། ཁྱད་པར་ཅན་བར་ཆད་གཅིག་པ་སྟེ་ཕྱིར་འོང་གི་སྐོར་གསུམ་མོ། །ཕྱིར་མི་འོང་ལ་ཞུགས་པ་སྔར་དང་འདྲ་བ་དང་། འབྲས་གནས་ལ་འདའ་བ་བཞི། འཕར་བ་གསུམ། མཐོང་ཆོས་ཞི། ལུས་མངོན་བྱེད་དེ་ཕྱིར་མི་འོང་གི་སྐོར་བཅུ། དགྲ་བཅོམ་ཞུགས་པ་ཁ་བསྐང་། རང་སངས་རྒྱས་དང་ཉི་ཤུ་སྟེ་དངོས་བསྟན་བཅུ་བདུན། ཁ་སྐོང་གསུམ་མོ། །འོག་མིན་འགྲོ་དང་། སྲིད་རྩེའི་མཐར་ཐུག་འགྲོ་དང་། གཟུགས་ཀྱི་ཆགས་བཅོམ་རྣམས་མིང་བགྲང་བའི་ཚུལ་ནི་སྔར་ལྟར་རོ།། །།གསུམ་པ་འཕགས་པའི་ལུགས་ལ། རྔོག་ལོ་ཆེན་པོ་ལྟར་ན། འཇིག་རྟེན་ལས་འདས་པའི་སེམས་དང་པོ་བསྐྱེད་པ་དང་སྤྱོད་པ་ལ་ཞུགས་པ་དང་། ཕྱིར་མི་ལྡོག་པ་དང་། སྐྱེ་བ་གཅིག་གིས་ཐོགས་པ་དང་བཞི་ལས། དང་པོ་ལ་སློབ་དཔོན་གྱི་བཞེད་པ་ལྟར་གྱི་རྒྱུན་ཞུགས་ཀྱི་སྐོར་ལྔའོ། །གཉིས་པ་ལ། དད་མོས་མཐོང་ཐོབ་གཉིས། ཕྱིར་འོང་འབྲས་གནས་ཙམ་པོ་གཅིག ཁྱད་པར་ཅན་བར་ཆད་གཅིག་པ་སྟེ་བཞིའོ། །གསུམ་པ་ལ། ཕྱིར་མི་འོང་འབྲས་གནས་ཙམ་པོ་གཅིག ཁྱད་པར་ཅན་འདའ་བ་བཞི། གོང་འཕོ། གཟུགས་ཀྱི་ཆགས་བཅོམ། མཐོང་ཆོས་ཞི། ལུས་མངོན་བྱེད་དང་དགུའོ། །བཞི་པ་ནི་དགྲ་བཅོམ་ཞུགས་པའོ། །རང་སངས་རྒྱས་ཀྱང་ཅི་རིགས་པར་དེ་བཞིར་འདུ་བ་ཉིད་དོ། །དེས་ན་རྩ་ཚིག་གིས་བཅུ་དྲུག་ཟིན་པར་བྱས་ནས་འབྲས་བུ་དང་པོ་གསུམ་གྱི་འབྲས་གནས་ཙམ་པོ་གསུམ། དགྲ་བཅོམ་ཞུགས་པ་སྟེ་བཞི་ཁ་བསྐང་བར་བཞེད་དོ། །འབྲེས་འཕགས་པའི་དགོངས་པ་བླངས་པ་ལྟར་ན། བརྒྱད་པ་བགྲངས་ནས་རྒྱུན་ཞུགས་འབྲས་གནས་ཙམ་པོ་མི་བགྲང་ངོ་། །མཁན་ཆེན་པས་ཀྱང་འཕགས་པའི་དགོངས་པ་འདི་ལྟར་དུ་མཛད་ཅིང་། རོང་སྟོང་ཆེན་པོས་ཀྱང་བརྒྱད་པར་བགྲང་བ་འདི་དང་ཆ་འདྲ་བ་ལས། དབང་པོ་རྣོ་རྟུལ་གཉིས་རྒྱུན་ཞུགས་འབྲས་གནས་ཙམ་པོར་མཛད། ཕྱིར་འོང་ལ་ཞུགས་པ་དད་མོས་དང་མཐོང་ཐོབ་གཅིག་ཏུ་བསྡུས་པས་གསུམ་མོ། །ཕྱིར་མི་འོང་ལ་ཞུགས་པ་དད་མོས་དང་མཐོང་ཐོབ་གཅིག་ཏུ་བསྡུས་པ་དང་། དོན་གྱིས་ཐོབ་པ་འབྲས་གནས་ཙམ་པོ་དང་། ཁྱད་པར་ཅན་བརྒྱད་སྔར་བཞིན་ཏེ་བཅུའོ། །དགྲ་བཅོམ་ཞུགས་པ་ཁ་བསྐང་བ་དང་། རང་སངས་རྒྱས་ཏེ་ཉི་ཤུ་ཅེས་བཞེད་དོ། །དེ་དག་ལ་བརྒྱད་པ་ཁ་བསྐང་བ་ནི་འཕགས་པའི་དགོངས་པ་མ་ཡིན་ཏེ། ཉིར་སྣང་ལས་རེ་ཞིག་བྱང་ཆུབ་སེམས་དཔའ་དད་པས་རྗེས་སུ་འབྲང་བ་ནས་བརྩམས་ནས་བྱང་ཆུབ་སེམས་དཔའ་རང་སངས་རྒྱས་ཀྱི་བར་ཡིན་ནོ། །ཞེས་གསུངས་པའི་ཕྱིར་རོ། །ལོ་ཙཱ་བས། དད་མོས་མཐོང་ཐོབ་གཉིས་ཕྱིར་འོང་ཞུགས་པའི་སྐབས་སུ་སོ་སོར་བགྲངས་ནས། ཕྱིར་མི་འོང་ཞུགས་པའི་སྐབས་སུ་མི་བགྲང་བ་ཡང་དགོངས་པ་མ་ཡིན་ཏེ། ཉིར་སྣང་ལས། འབྲས་བུ་གཉིས་པ་དང་གསུམ་པ་ལ་ཞུགས་པ་དད་པས་ལྷག་པར་མོས་པའི་དབང་དུ་མཛད་ནས་ཞེས་དང་། འབྲས་བུ་གཉིས་པ་དང་གསུམ་པ་ལ་ཞུགས་པ་མཐོང་བས་ཐོབ་པའི་དབང་དུ་མཛད་ནས་ཞེས་གསུངས་པའི་ཕྱིར་རོ། །དེས་དད་མོས་མཐོང་ཐོབ་གཉིས་ཕྱིར་འོང་ཞུགས་པའི་སྐབས་སུ་གཅིག་ཏུ་བགྲང་། ཕྱིར་མི་འོང་ཞུགས་པའི་སྐབས་སུ་གཅིག་ཏུ་བགྲངས་ནས་ཞུགས་པ་གཉིས་བགྲངས་པ་ཡང་ཁེགས་སོ། །ཐུན་མོང་དུ་ཕྱིར་མི་འོང་འབྲས་གནས་ཁྱད་པར་ཅན་ལ་བརྒྱད་དུ་བྱེད་པ་ཡང་མི་འཐད་དེ། གོང་འཕོ་ལ་ལྔ་པ་དང་། གཟུགས་ཀྱི་ཆགས་བཅོམ་ལ་དྲུག་པ་དང་། མཐོང་ཆོས་ཞི་ལ་བདུན་པ་ཞེས་པའི་ཐ་སྙད་གསུངས་ཀྱང་། ལུས་མངོན་བྱེད་ལ་བརྒྱད་པ་ཞེས་པའི་ཐ་སྙད་མ་གསུངས་པའི་ཕྱིར་རོ། །གལ་ཏེ་དེ་ཉིད་དོན་གྱིས་ཐོབ་བོ་སྙམ་ན། དེ་ཡང་མ་ཡིན་ཏེ། མཐོང་ཆོས་ཞི་ཡན་ཆད་ལ་བདུན་དུ་མཛད་པ་ནི་མཛོད་ལས། གཟུགས་སུ་ཉེར་འགྲོ་ལ་ལྔར་ཕྱེ་ནས་གཟུགས་མེད་ཉེར་འགྲོ་ལ་དྲུག་པ་དང་། མཐོང་ཆོས་ཞི་ལ་བདུན་པ་ཅེས་པ་དང་མཐུན་པར་གསུངས་པ་ཡིན་གྱི་སྐབས་འདིའི་དགེ་འདུན་གྱི་གྲངས་བགྲང་ཚུལ་མིན་པའི་ཕྱིར་རོ། །གཞན་དུ་ན་ལུས་མངོན་བྱེད་ལ་བརྒྱད་པ་ཅེས་པའི་ཐ་སྙད་མ་གསུངས་པའི་རྒྱུ་མཚན་ཅི་ཡིན་སྨྲོས་ཤིག འོ་ན་འཕགས་པའི་དགོངས་པ་ཇི་ལྟར་ཡིན་སྙམ་ན། རྒྱུན་ཞུགས་ཞུགས་པ་ལ་རྗེས་འབྲང་གཉིས། འབྲས་བུ་བར་པ་གཉིས་ཀྱི་ཞུགས་པ་ལ་དད་མོས་མཐོང་ཐོབ་གཉིས། དོན་གྱིས་ཐོབ་པ་ཕྱིར་འོང་དང་ཕྱིར་མི་འོང་ཙམ་པོ་གཉིས། རྒྱུན་ཞུགས་འབྲས་གནས་ཁྱད་པར་ཅན་རིགས་ནས་རིགས་སྐྱེ་གཉིས་ཕྱིར་འོང་འབྲས་གནས་ཁྱད་པར་ཅན་བར་ཆད་གཅིག་པ། ཕྱིར་མི་འོང་འབྲས་གནས་ཁྱད་པར་ཅན་ལ་འདའ་བ་བཞི། གོང་འཕོ་གཉིས། གཟུགས་ཀྱི་ཆགས་བཅོམ། མཐོང་ཆོས་ཞི། ལུས་མངོན་བྱེད་དེ་དགུ། དོན་གྱིས་ཐོབ་པ་དགྲ་བཅོམ་ཞུགས་པ། བསེ་རུ་དང་ཉི་ཤུའོ། །བརྒྱད་པ་ལ་མདོ་སྦྱོར་གསུངས་པ་ནི་དྲི་བའི་ཚིག་དང་སྦྱར་གྱི་ལན་དང་སྦྱར་བ་མི་སྣང་ངོ་། །འདི་འཕགས་པའི་དགོངས་པ་ཡིན་མིན་ཉི་ཁྲི་སྣང་བར་ཞིབ་དུ་གཟིགས་ཤིག གཉིས་པ་བསྟན་བཅོས་ཀྱི་དངོས་བསྟན་བགྲང་བའི་ཚུལ་ནི་ཤཱནྟི་པ་དང་། བུདྡྷ་ཤྲཱི་གཉིས་ཀྱི་ལུགས་ཏེ། འདི་ལ་དབང་པོའི་སྒོ་ནས་ཕྱེ་བ་བཞི། འབྲས་བུའི་སྒོ་ནས་ཕྱེ་བ་བཅོ་ལྔ། རང་རྒྱལ་གྱི་མིང་ཅན་དང་ཉི་ཤུའོ། །དང་པོ་ནི། རྒྱུན་ཞུགས་ཞུགས་པ་དབང་པོ་རྟུལ་པོ་དང་། རྣོན་པོ་གཉིས་ལས། འབྲས་བུ་བར་པ་གཉིས་ཀྱི་ཞུགས་པ་དད་མོས་དང་མཐོང་ཐོབ་གཉིས་སོ། །གཉིས་པ་ནི་རྒྱུན་ཞུགས་འབྲས་གནས་ཁྱད་པར་ཅན་རིགས་ནས་རིགས་སྐྱེ་གཉིས། ཕྱིར་འོང་འབྲས་གནས་ཁྱད་པར་ཅན་བར་ཆད་གཅིག་པ། ཕྱིར་མི་འོང་འབྲས་གནས་ཁྱད་པར་ཅན་ལ་འདའ་བ་བཞི། འོག་མིན་འགྲོ། འཕར་བ་གསུམ། སྲིད་རྩེར་འགྲོ། གཟུགས་ཀྱི་ཆགས་བཅོམ། མཐོང་ཆོས་ཞི། ལུས་མངོན་བྱེད་རྣམས་སོ། །གསུམ་པ་ནི་བསེ་རུའི་མིང་ཅན་ནོ། །ཞེས་བཞེད་དོ། །འདི་དག་ལའང་མི་འཐད་པའི་ཆ་ཅུང་ཟད་ཡོད་པ་ནི་རང་ལུགས་ཀྱི་སྐབས་སུ་རྟོགས་པར་འགྱུར་རོ། །འབྲེ་ཆེན་པོས་འཕགས་སེང་གི་ལུགས་སོ་སོར་བཀག་ནས་རང་ལུགས་བཞག་པ་འདི་ལྟར་མཛད་དེ། ཚིག་ལེར་བཅས་ལས་མ་གསུངས་དང་། །དེ་རྣམས་བྱེ་བྲག་མེད་ཕྱིར་དང་། །མདོ་གཞན་དོན་ཡང་མ་ཚང་དང་། །མདོ་འདི་ཉིད་ལ་མི་གསལ་ཕྱིར། །དབྱེ་བ་འདི་ནི་རིགས་མ་ཡིན། །གོ་རིམ་གཞུང་དང་མི་མཐུན་དང་། །རྒྱུ་མཚན་དང་པོ་གསུམ་གྱི་ཕྱིར། །དབྱེ་བ་གཞན་ཡང་མི་འཐད་དོ། །བསྟན་བཅོས་གཞན་གྱི་རྗེས་འབྲང་ནས། །དབྱེ་འོ་ཞེ་ན་མ་ཡིན་ཏེ། །འབྲས་བུ་གསུམ་པའི་དབྱེ་བ་ཡང་། །གཞན་པ་དག་དང་འགལ་ཕྱིར་རོ། །ལྷག་དང་ཆད་པ་མེད་པ་དང་། །མདོ་འདི་ཉིད་ལ་ཞུགས་པ་དང་། །མདོ་གཞན་དོན་དང་འགལ་མེད་ཕྱིར། །དབྱེ་བ་གཞུང་བཞིན་རིགས་པ་ཡིན། །འགལ་མེད་མ་གྲུབ་ཞེ་ན་སྤྱིར། །གསུངས་པས་ཁྱད་པར་འགལ་མེད་དེ། །ཤ་བ་ཤིང་དང་མི་འགལ་བཞིན། །ཞེས་གསུངས་སོ། །གཉིས་པ་མདོ་དང་བསྟན་བཅོས་ཀྱི་དགོངས་པ་ངོས་བཟུང་བ་ལ་གསུམ་སྟེ། དོན་དངོས་དང་། སྒྲུབ་བྱེད་འགོད་པ་དང་། དོགས་པ་དཔྱད་པའོ། །དང་པོ་ནི། མཚོན་བྱེད་དཔེའི་དགེ་འདུན་ལ་སྦྱར་ན། ཉན་ཐོས་ཀྱི་དགེ་འདུན་དང་། རང་རྒྱལ་གྱི་དགེ་འདུན་གཉིས་ལས། དང་པོ་ལ་ཞུགས་པའི་སྐོར། འབྲས་གནས་ཙམ་པོའི་སྐོར། འབྲས་གནས་ཁྱད་པར་ཅན་གྱི་སྐོར་དང་གསུམ། དང་པོ་ནི། དབང་པོ་རྟུལ་དང་རྣོན་པོ་དག །ཅེས་ཏེ། འདི་ལ་རྒྱུན་ཞུགས་ཞུགས་པ་གཉིས། ཆགས་བྲལ་སྔོན་སོང་གི་འབྲས་བུ་བར་པ་གཉིས་ཀྱི་ཞུགས་པ་གཉིས་གཉིས་ཏེ་དྲུག་ཡོད་ཀྱང་། རིམ་གྱིས་པའི་ཚེ་རྒྱུན་ཞུགས་ཞུགས་པ་གཉིས་ལས་མེད་པས་གཉིས་སུ་བགྲང་བར་བྱའོ། །འདི་ནི་ཉིར་སྣང་གི་དགོངས་པའང་ཡིན་ནོ། །གཉིས་པ་ནི། དད་དང་མཐོང་ཐོབ་ཅེས་ཏེ། འདི་ལ་འབྲས་བུ་དང་པོ་གསུམ་གྱི་འབྲས་གནས་ཙམ་པོ་གཉིས་གཉིས་ཏེ། རིམ་གྱིས་པའི་སྐབས་སུའང་དྲུག་པོ་ཐ་དད་དུ་ཡོད་པས་དྲུག་ཏུ་བགྲང་བར་བྱ་བ་ཡིན་ནོ། །མདོ་ལས། སྐབས་འདིར་ཕྱིར་འོང་དང་ཕྱིར་མི་འོང་གི་མདོ་གཉིས་འབྱུང་བའི་གནད་ཀྱང་འདི་ཉིད་ཡིན་ནོ། །གསུམ་པ་ལ་རྒྱུན་ཞུགས་འབྲས་གནས་ཁྱད་པར་ཅན། ཕྱིར་འོང་འབྲས་གནས་ཁྱད་པར་ཅན། ཕྱིར་མི་འོང་འབྲས་གནས་ཁྱད་པར་ཅན་གསུམ་ལས། དང་པོ་ནི། རིགས་ནས་རིགས་ཞེས་པ་སྟེ་གཅིག་ཏུ་བགྲང་ངོ་། །རྒྱ་གར་བ་ཕལ་ཆེར་གྱིས་འདི་ལ་རྟེན་གྱི་སྒོ་ནས་གཉིས་སུ་བགྲང་བ་ནི་མི་འཐད་དེ། རྟེན་གྱི་སྒོ་ནས་དབྱེ་བ་ཡོད་པ་རྣམས་སྐབས་འདིའི་དགེ་འདུན་གྱི་གྲངས་སུ་བཀོད་ན་ཧ་ཅང་ཐལ་བའི་ཕྱིར་རོ། །གཉིས་པ་ནི། བར་ཆད་གཅིག་ཅེས་པའོ། །གསུམ་པ་ལ་འདའ་བ་བཞི། གོང་འཕོ་གཉིས། གཟུགས་ཀྱི་ཆགས་བཅོམ། མཐོང་ཆོས་ཞི། ལུས་མངོན་བྱེད་དེ་དགུའོ། །གཉིས་པ་ནི། བསེ་རུ་དང་ནི་ཞེས་པའོ། །འཕར་བ་གསུམ་ནི་འོག་མིན་འགྲོའི་ནང་ཚན་གྱི་དབྱེ་བ་ཙམ་ཡིན་གྱི། རྩ་བའི་དབྱེ་བ་མ་ཡིན་ནོ། །གཉིས་པ་ལ་གསུམ་སྟེ། མདོའི་དགོངས་པར་འགྱུར་བ། བསྟན་བཅོས་རྩ་བའི་དགོངས་པར་འགྱུར་བ། མདོ་གཞན་དང་ཕྱོགས་མཐུན་པར་འགྱུར་བའོ། །དང་པོ་ནི། མདོ་ལས་ཀྱང་ཞུགས་པ་རྗེས་འབྲང་གཉིས་ཀྱི་མདོ་སྦྱོར་ཐོག་མར་སྨོས་པའི་འོག་ཏུ་རྒྱུན་ཞུགས་འབྲས་གནས་དད་མོས་མཐོང་ཐོབ་གཉིས་ཀྱི་མདོ་དང་། ཕྱིར་འོང་དང་ཕྱིར་མི་འོང་གཉིས་ཀྱི་མདོ་དང་། རིགས་ནས་རིགས་སྐྱེ་མན་ཆད་ཀྱི་མདོ་རྣམས་གོ་རིམ་བཞིན་དུ་འབྱུང་བ་ལས་ཀྱང་ཤེས་སོ། །གཞན་དུ་ན་རིགས་ནས་རིགས་སྐྱེའི་གོང་དུ་ཕྱིར་འོང་དང་ཕྱིར་མི་འོང་གཉིས་ཀྱི་མདོ་འབྱུང་བའི་རྒྱུ་མཚན་ཅི་ཡིན་སྨྲ་དགོས་སོ། །གཉིས་པ་ནི། སྤྱིར་བསྟན་བཅོས་འདིར་སེམས་བསྐྱེད་ཉི་ཤུ་རྩ་གཉིས་དང་། གདམས་ངག་བཅུ་ལ་སོགས་པ་ནས་ཕྲིན་ལས་ཉི་ཤུ་རྩ་བདུན་གྱི་བར་བསྟན་བཅོས་ཀྱི་ཚིག་ཟིན་ལ་གྲངས་དངོས་སུ་བསྟན་པ་རྣམས་ལ་བསྟན་བཅོས་ལ་མ་ཚང་བར་མདོ་ལས་ཁ་བསྐང་དགོས་པའི་ཚུལ་གཏན་ནས་མེད་པས་འདིར་ཡང་བསྟན་བཅོས་ཀྱི་དངོས་བསྟན་ལ་ཉི་ཤུ་ཚང་དགོས་ལ། དེ་ལ་ཤཱནྟི་པ་དང་བུདྡྷ་ཤྲཱིའི་ལུགས་དེ་ནི་མི་འཐད་དེ། རིགས་ནས་རིགས་སྐྱེ་གཉིས་སུ་བགྲངས་འདུག་པའི་ཕྱིར་དང་། འཕར་གསུམ་དང་འོག་མིན་འགྲོ་སོ་སོར་བགྲངས་འདུག་པའི་ཕྱིར་རོ། །དེས་ན་བསྟན་བཅོས་རྩོམ་པ་པོས་ཐ་སྙད་ཟོར་ཡང་བའི་ཕྱིར་དུ་ཞུགས་པ་རྣམས་ཕྱོགས་གཅིག་དང་། འབྲས་གནས་ཙམ་པོ་རྣམས་ཕྱོགས་གཅིག་དང་། ཁྱད་པར་ཅན་རྣམས་ཕྱོགས་གཅིག་པར་མཛད་པར་སྣང་བས། ལུགས་འདི་ལས་གཞན་འོས་མེད་པའི་ཕྱིར་རོ། །གསུམ་པ་ནི། ཕྱིར་མི་ལྡོག་པ་འཁོར་ལོའི་མདོར། བྱང་ཆུབ་སེམས་དཔའ་ལ་བརྒྱད་པ་ལ་སོགས་པ་དང་། རང་སངས་རྒྱས་དང་། དབྱེ་བཞི་བརྒྱད་ཀྱི་མིང་གིས་འདོགས་པའི་རྒྱུ་མཚན་གསུངས་ཤིང་མདོ་དང་བསྟན་བཅོས་འདིར་ཟུང་བཞི་ཡ་བརྒྱད་ཀྱི་ནང་ཚན་སོ་སོ་བའི་མིང་གིས་འདོགས་པའི་རྒྱུ་མཚན་གསུངས་ཀྱི་ཟུང་བཞི་ཡ་བརྒྱད་གང་ཡང་རུང་བའི་རང་ལྡོག་གིས་མིང་གི་མ་གསུངས་ལ། རང་སངས་རྒྱས་ལ་ནི་དབྱེ་བ་མེད་པས་མདོ་གཉིས་ཀར་མཐུན་པར་གསུངས་པ་འདི་ཉིད་ཀྱིས་ཀྱང་བགྲང་ཚུལ་འདི་ལས་འོས་མེད་དོ། །གསུམ་པ་དོགས་པ་བཅད་པ་ནི། འོ་ན་ཞུགས་པའི་སྐབས་སུ་རྗེས་འབྲང་གཉིས་པོ་གཉིས་སུ་བགྲངས་ནས་འབྲས་གནས་ཙམ་པོའི་སྐབས་སུ་མོས་ཐོབ་གཉིས་དྲུག་ཏུ་བགྲང་བའི་རྒྱུ་མཚན་ཅི་ཡིན་སྙམ་ན་དེ་ནི་གོང་དུ་བཤད་ཟིན་ཏོ། རྒྱུན་ཞུགས་འབྲས་གནས་ཀྱི་སྐབས་སུ་སྲིད་པ་ལན་བདུན་པ་མི་བགྲང་བ་ཅི་ཡིན་ཞེ་ན། དེ་ནི་རྒྱུན་ཞུགས་འབྲས་གནས་ཙམ་པོར་ངེས་ལ། ཙམ་པོ་ནི་དད་མོས་མཐོང་ཐོབ་གཉིས་སུ་བསྡུ་བའི་སྐབས་ཡིན་པའི་ཕྱིར་རོ། །བགྲང་ཚུལ་གཞན་སྨྲ་བ་རྣམས་ལ་ཁོ་བོས་རྒྱུ་མཚན་འདི་དྲིས་ན་རྒྱ་གར་བ་རྣམས་ཁ་སྤུ་སུད་རེ། བོད་རྣམས་མིག་ཧུར་རེ་ལུས་པར་འགྱུར་རོ། །འཕར་གསུམ་སོ་སོར་མི་བགྲང་བ་ཅི་ཡིན་སྙམ་ན་དེ་ནི་འོག་མིན་འགྲོའི་གསལ་བའི་དབྱེ་བ་ཙམ་བསྟན་པ་ཡིན་གྱི་རྩ་བའི་དབྱེ་བ་ནི་འོག་མིན་འགྲོ་ཉིད་ཡིན་པས་འདི་ལ་དགོངས་ནས་འཕར་གསུམ་གྱི་མདོ་ལས་ལོགས་སུ་འོག་མིན་འགྲོའི་མདོ་གསུངས་པ་ཡིན་ནོ། །འབྲས་བུ་ཕྱི་མ་གསུམ་གྱི་ཞུགས་པ་མི་བགྲངས་བའི་རྒྱུ་མཚན་ཅི་ཡིན་སྙམ་ན། འབྲས་བུ་སྔ་མ་གསུམ་གྱི་འབྲས་གནས་ཁྱད་པར་ཅན་དེ་ཉིད་ཕྱི་མ་གསུམ་གྱི་ཞུགས་པ་ཡིན་པའི་ཕྱིར་རོ། །གལ་ཏེ་རིགས་ནས་རིགས་སྐྱེ་གཉིས་དང་འཕར་གསུམ་ལ་མདོ་སོ་སོར་ཡོད་པས་རྩ་བའི་དབྱེ་བར་བགྲང་དགོས་སོ་སྙམ་ན། དེ་ལྟར་ན་བདེན་པ་བཞི་ལ་ཡང་མདོ་སོ་སོར་ཡོད་པས་གདམས་ངག་བཅུའི་རྩ་བའི་དབྱེ་བར་བགྲང་དགོས་པར་མཚུངས་སོ། །བསྟན་བཅོས་རྩ་བར་འཕར་གསུམ་ཞེས་པའི་ཚིག་དངོས་སུ་ཡོད་པས་རྩ་བའི་དབྱེ་བར་བགྲང་དགོས་སོ་སྙན་ན། དེ་ལྟར་ན་སངས་རྒྱས་ལ་སོགས་དཀོན་མཆོག་གསུམ་ཞེས་པའི་ཚིག་ཡོད་པས་གདམས་ངག་གི་རྩ་བའི་དབྱེ་བར་བགྲང་དགོས་པར་འགྱུར་རོ། །ཁོ་བོས་མདོ་དང་བསྟན་བཅོས་ཀྱི་དགོངས་པ་འདི་བཞིན་དུ་སྨྲ་བ་ལ་མི་ཤེས་པ་དག་གིས་འཇིག་རྟེན་ཕལ་པའི་ཐ་སྙད་ལ་བརྟེན་ནས་ཅི་ཡང་སྨྲ་བར་མི་བྱ་སྟེ། བླུན་པོ་སྨྲ་བ་ཉུང་ན་མཛེས་པའི་ཕྱིར་རོ། །མདོ་དང་བསྟན་བཅོས་ཀྱི་དོན་ལ་བློ་གྲོས་ཀྱི་སྣང་བ་རྒྱས་པ་དག་གིས་འཐད་མི་འཐད་ཀྱི་ཆ་སྨྲ་བ་ནི་བསྟན་པ་འཛིན་པའི་ལུགས་ཡིན་པས་སྨྲ་བ་ཐོས་ན་ཁོ་བོས་ཀྱང་བརྟག་དཔྱད་བྱའོ།། །།གཉིས་པ་མཚོན་བྱེད་དཔེའི་དགེ་འདུན་མངོན་པ་ནས་བཤད་པའི་ཚུལ་ལ་གཉིས་ཏེ། མངོན་པའི་གཞུང་ནས་བཤད་ཚུལ་དངོས་དང་། དེའི་དོན་གཏན་ལ་ཕབ་པའོ། །དང་པོ་ལ་གཉིས་ཏེ། གང་ལ་གནས་པ་འབྲས་བུའི་རྣམ་གཞག་དང་། དེ་ལ་གནས་པའི་གང་ཟག་གི་རྣམ་གཞག་གོ །དང་པོ་ལ་གསུམ་སྟེ། དགེ་སྦྱོང་གི་ཚུལ་དང་། དེའི་འབྲས་བུ་ངོས་བཟུང་ནས་བརྒྱད་ཅུ་རྩ་དགུར་དབྱེ་བ། མདོ་ལས་འབྲས་བུ་བཞིར་གསུངས་པ་དང་འགལ་བ་སྤང་བ། ཁམས་གསུམ་གང་དུ་འབྲས་བུ་དུ་ཞིག་ཐོབ་པའོ། །དང་པོ་ནི་མཛོད་དུ། དགེ་སྦྱོང་ཚུལ་ནི་དྲི་མེད་ལམ། །འབྲས་བུ་འདུས་བྱས་འདུས་མ་བྱས། །དེ་དག་བརྒྱད་ཅུ་རྩ་དགུ་འོ། །གྲོལ་ལམ་ཟད་པ་རྣམས་དང་བཅས། །ཞེས་དང་། དེའི་འགྲེལ་པར། དགེ་སྦྱོང་གི་ཚུལ་ཞེས་བྱ་བ་འདི་ཅི་ཞིག་ཅེ་ན། དགེ་སྦྱོང་ཚུལ་ནི་དྲི་མེད་ལམ། དགེ་སྦྱོང་གི་ཚུལ་ནི་ཟག་པ་མེད་པའི་ལམ་ཡིན་ནོ། །དེས་ཉོན་མོངས་པ་ཡང་དག་པར་ཞི་བར་བྱེད་པའི་སྒོ་ནས་དགེ་སྦྱོང་དུ་འགྱུར་ཏེ། མདོར་འདིས་སྡིག་པ་མི་དགེ་བའི་ཆོས་ཅན་ཞེས་བྱ་བ་ནས་རྒྱས་པར་རྒས་ཤིང་འགྱུར་བའི་བར་རྣམ་པ་དུ་མ་ཞི་བར་བྱས་པ་ཡིན་པས་དེའི་ཕྱིར་དགེ་སྦྱོང་ཞེས་གསུངས་པའི་ཕྱིར་རོ། །སོ་སོའི་སྐྱེ་བོ་ནི་གཏན་དུ་ཞི་བར་མི་བྱེད་པའི་ཕྱིར་དོན་དམ་པའི་དགེ་སྦྱོང་མ་ཡིན་ནོ། །དགེ་སྦྱོང་གི་ཚུལ་དེའི། འབྲས་བུ་འདུས་བྱས་འདུས་མ་བྱས། །དགེ་སྦྱོང་གི་ཚུལ་གྱི་འབྲས་བུ་ནི་འདུས་བྱས་དང་འདུས་མ་བྱས་རྣམས་ཡིན་ཏེ། དེ་དག་ཀྱང་མདོར་རྣམ་པ་བཞིར་གསུངས་སོ། །གཞན་ཡང་དེ་དག་བརྒྱད་ཅུ་རྩ་དགུའོ། །དེ་དག་ཀྱང་གང་ཞེ་ན། གྲོལ་ལམ་ཟད་པ་རྣམས་དང་བཅས། །མཐོང་བས་སྤང་བར་བྱ་བ་སྤོང་བར་བྱེད་པ་བར་ཆད་མེད་པའི་ལམ་བརྒྱད། རྣམ་པར་གྲོལ་བའི་ལམ་བརྒྱད་དང་། སྒོམ་པས་སྤང་བར་བྱ་བ་སྤོང་བར་བྱེད་པ་ས་དགུ་པོ་རེ་རེ་ཞིང་ཉོན་མོངས་པ་རྣམ་པ་དགུ་སྤོང་བར་བྱེད་པ་དེ་སྙེད་ཁོ་ནའི་བར་ཆད་མེད་པའི་ལམ་དང་། རྣམ་པར་གྲོལ་བའི་ལམ་དག་གོ །དེ་ལ་བར་ཆད་མེད་པའི་ལམ་རྣམས་ནི་དགེ་སྦྱོང་གི་ཚུལ་ཡིན་ནོ། །རྣམ་པར་གྲོལ་བའི་ལམ་རྣམས་ནི་དགེ་སྦྱོང་གི་ཚུལ་གྱི་འབྲས་བུ་འདུས་བྱས་དག་ཡིན་ཏེ། དེའི་རྒྱུ་མཐུན་པ་དང་སྐྱེས་བུ་བྱེད་པའི་འབྲས་བུ་དག་ཡིན་པའི་ཕྱིར་རོ། །ཉོན་མོངས་པ་དེ་དག་གི་སྤངས་པ་ནི་དགེ་སྦྱོང་གི་ཚུལ་གྱི་འབྲས་བུ་འདུས་མ་བྱས་དག་ཡིན་ཏེ། དེ་ལྟར་ན་བརྒྱད་ཅུ་རྩ་དགུ་ཡིན་ནོ་ཞེས་སོ། །གཉིས་པ་ནི། དེ་ཉིད་ལས། འབྲས་བུ་བཞིར་རྣམ་གཞག་པ་ནི། །རྒྱུ་ལྔ་དག་ནི་སྲིད་ཕྱིར་རོ། །འབྲས་ལ་སྔོན་ལམ་བཏང་བ་དང་། །གཞན་ཐོབ་པ་དང་ཟད་སྡོམ་དང་། །ཤེས་པ་བརྒྱད་ཚན་ཐོབ་པ་དང་། །རྣམ་པ་བཅུ་དྲུག་ཐོབ་པའོ། །ཞེས་དང་། དེའི་འགྲེལ་པར། དེ་ལྟ་ན་འོ་ན་ནི་སངས་རྒྱས་ཀྱིས་གསུངས་པ་ཁ་བསྐང་བར་བྱ་དགོས་པར་འགྱུར་རོ་ཞེ་ན། བྱ་མི་དགོས་ཏེ། གལ་ཏེ་ཡང་འབྲས་བུ་རྣམས་མང་མོད་ཀྱི། འབྲས་བུ་བཞིར་རྣམ་པར་གཞག་པ་ནི། རྒྱུ་ལྔ་དག་ནི་སྲིད་ཕྱིར་རོ། །བཅོམ་ལྡན་འདས་ཀྱིས་སྤང་བའི་ལམ་གྱི་གནས་སྐབས་གང་ལ་རྒྱུ་ལྔ་སྲིད་པ་དེ་ལ་འབྲས་བུར་རྣམ་པར་གཞག་གོ་ཞེས་གྲག་གོ །ལྔ་གང་ཞེ་ན། འབྲས་ལ་སྔོན་ལམ་བཏང་བ་དང་། །གཞན་ཐོབ་པ་དང་ཟད་སྡོམ་དང་། །ཤེས་པ་བརྒྱད་ཚན་ཐོབ་པ་དང་། །རྣམ་པ་བཅུ་དྲུག་ཐོབ་པའོ། །ལམ་སྔ་མ་བཏང་བ་དང་སྔོན་མེད་པའི་ལམ་ཐོབ་པ་ནི་ཞུགས་པ་དང་འབྲས་བུའི་ལམ་བཏང་བ་དང་ཐོབ་པའི་ཕྱིར་རོ། །སྤངས་པ་སྡོམ་པ་ནི་ཐམས་ཅད་ཀྱིས་ཐོབ་པ་གཅིག་རྙེད་པའི་ཕྱིར་རོ། །ཤེས་པ་བརྒྱད་ཅིག་ཅར་ཐོབ་པ་ནི་ཆོས་དང་རྗེས་སུ་ཤེས་པ་རྣམ་བཞིའི་འོ། །རྣམ་པ་བཅུ་དྲུག་ཐོབ་པ་ནི་མི་རྟག་པའི་རྣམ་པ་ལ་སོགས་པའི་སྟེ། རྒྱུ་ལྔ་པོ་དེ་དག་ནི་འབྲས་བུ་རེ་རེ་ལ་ཡོད་དོ་ཞེས་སོ། །གསུམ་པ་ནི། དེ་ཉིད་ལས། འདོད་པར་གསུམ་ཐོབ་ཐ་མ་ནི། །གསུམ་དུའོ་གོང་ན་མཐོང་ལམ་མེད། །མི་སྐྱོ་ལུང་ལས་འདིར་རྩོམ་ཞིང་། །དེ་མཐར་ཕྱིན་ཞེས་འབྱུང་ཕྱིར་རོ། །ཞེས་དང་། དེའི་འགྲེལ་པར་ཡང་ཁམས་གང་དུ་དགེ་སྦྱོང་གི་ཚུལ་གྱི་འབྲས་བུ་དུ་དག་ཅིག་ཐོབ་ཅེ་ན། འདོད་པར་གསུམ་ཐོབ། གསུམ་ནི་འདོད་པའི་ཁམས་ཁོ་ནར་ཐོབ་ཀྱི་གཞན་དུ་ནི་མ་ཡིན་ནོ། །ཐ་མ་ནི་གསུམ་དུའོ། །དགེ་སྦྱོང་གི་ཚུལ་གྱི་འབྲས་བུ་ཐ་མ་ནི་དགྲ་བཅོམ་པ་ཉིད་དེ་དེ་ཁམས་གསུམ་ཆར་དུ་འཐོབ་བོ། །རེ་ཞིག་འབྲས་བུ་གཉིས་ནི་འདོད་ཆགས་དང་མ་བྲལ་བས་ཐོབ་པར་བྱ་བ་ཡིན་པའི་ཕྱིར། གོང་མར་མི་འཐོབ་པར་ཡང་རིགས་ན་གསུམ་པ་གོང་དུ་ཅི་ཕྱིར་མི་འཐོབ་ཅེ་ན། གོང་ན་མཐོང་ལམ་མེད། འདོད་པའི་ཁམས་ལས་གོང་ན་ནི་མཐོང་ལམ་མེད་ལ་དེ་མེད་པར་ཡང་འདོད་ཆགས་དང་བྲལ་བ་ཕྱིར་མི་འོང་བའི་འབྲས་བུ་ཐོབ་པ་མེད་པས་ཞེས་བྱ་བ་འདི་ནི་གཏན་ཚིགས་ཡིན་ནོ། །ཅི་ཕྱིར་དེ་ན་མཐོང་བའི་ལམ་མེད་ཅེ་ན་རེ་ཞིག་གཟུགས་མེད་པའི་ཁམས་ན་ནི་ཉན་པ་མེད་པ་དང་། ཁམས་འོག་མ་ལ་མི་དམིགས་པའི་ཕྱིར་རོ། །གཟུགས་ཀྱི་ཁམས་ན་ནི་མི་སྐྱོ་ལུང་ལས་འདིར་རྩོམ་ཞིང་། དེ་མཐར་ཕྱིན་ཞེས་འབྱུང་ཕྱིར་རོ། །གཟུགས་ན་སྤྱོད་པའི་སོ་སོའི་སྐྱེ་བོ་རྣམས་ནི་སྙོམས་པར་འཇུག་པའི་བདེ་བ་ལ་ཆགས་པའི་ཕྱིར་དང་། སྡུག་བསྔལ་གྱི་ཚོར་བ་མེད་ཕྱིར་ཀུན་ཏུ་སྐྱོ་བར་མི་འགྱུར་ལ་སྐྱོ་བ་མེད་པར་ཡང་འཕགས་པའི་ལམ་འཐོབ་པར་མི་ནུས་ཏེ། འདི་ནི་རིགས་པ་ཡིན་ནོ། །ལུང་ཡང་བར་མ་དོར་ཡོངས་སུ་མྱ་ངན་ལས་འདའ་བ་ནས་གོང་དུ་འཕོ་བའི་བར་གང་ཟག་ལྔ་ནི་འདིར་རྩོམ་ཞིང་དེར་མཐར་ཕྱིན་པར་འགྱུར་རོ། །ཞེས་གསུངས་པ་འདི་ཡིན་ནོ། །རྩོམ་པ་ཞེས་བྱ་བ་ནི་ལམ་རྩོམ་པ་ཡིན་ཏེ། མྱ་ངན་ལས་འདས་པའི་ཐབས་ཡིན་པའི་ཕྱིར་རོ། །ཞེས་གསུངས་སོ། །གཉིསཔ་དེ་ལ་གནས་པ་གང་ཟག་གི་རྣམ་བཞག་ལ་གཉིས་ཏེ། ཀུན་ལས་བཏུས་ལས་བཤད་ཚུལ་དང་། མཛོད་ལས་བཤད་ཚུལ་ལོ། །དང་པོ་ནི། འཐོབ་པ་རྣམ་པར་ངེས་པའི་སྐབས་སུ། གང་ཟག་རྣམ་པར་གཞག་པ་དང་། མངོན་པར་རྟོགས་པ་རྣམ་པར་གཞག་པ་གཉིས་ལས། དང་པོ་ལ་དབྱེ་སྒོ་བདུན་ཡོད་པ་ལས། དབྱེ་སྒོ་བཞི་པ་དང་། ལྔ་པ་གཉིས་ཀྱིས་ཞུགས་གནས་ཀྱི་རྣམ་གཞག་སྟོན་ཏེ། འདི་ལ་སྤང་བྱ་རིམ་གྱི་པ་དང་། ཅིག་ཆར་བ་གཉིས་ལས། དང་པོ་ནི། དེ་ཉིད་ལས་སྦྱོར་བས་རབ་ཏུ་དབྱེ་བ་ཇི་ལྟ་བུ་ཞེ་ན། དད་པས་རྗེས་སུ་འབྲང་བ་དང་། ཆོས་ཀྱི་རྗེས་སུ་འབྲང་བའི་གང་ཟག་གོ །འབྲས་བུས་རབ་ཏུ་དབྱེ་བ་ཇི་ལྟ་བུ་ཞེ་ན། དད་པས་མོས་པ་དང་། མཐོང་བས་ཐོབ་པ་དང་། ལུས་ཀྱི་མངོན་དུ་བྱེད་པ་དང་། ཤེས་རབ་ཀྱིས་རྣམ་པར་གྲོལ་བ་དང་། གཉིས་ཀའི་ཆ་ལས་རྣམ་པར་གྲོལ་བ་དང་། རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། ཕྱིར་མི་འོང་བ་དང་དགྲ་བཅོམ་པ་ཉིད་ཀྱི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། དགྲ་བཅོམ་པ་དང་། རེ་ལྟར་ཐོགས་ན་སྲིད་པ་ལན་བདུན་པ་དང་། རིགས་ནས་རིགས་སུ་སྐྱེ་བ་དང་། བར་ཆད་གཅིག་པ་དང་། བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་དང་བཅས་པས་མྱ་ངན་ལས་འདའ་བ་དང་། གོང་དུ་འཕོ་བ་དང་། དགྲ་བཅོམ་པ་ཡོངས་སུ་ཉམས་པའི་ཆོས་ཅན་དང་། བདག་གསོད་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་གཡོ་བའི་ཆོས་ཅན་དང་། རབ་ཏུ་རྟོགས་པའི་འོས་སུ་གྱུར་པ་དང་། མི་འཁྲུགས་པའི་ཆོས་ཅན་གྱི་གང་ཟག་གོ་ཞེས་གསུངས་སོ། །དེ་ལ་དང་པོ་ལྔ་ནི་ཡོན་ཏན་གྱི་སྒོ་ནས་ཕྱེ་བ་སྟེ། དད་མོས་མཐོང་ཐོབ་གཉིས་ནི་འབྲས་བུ་དང་པོ་གསུམ་ག་དང་། བར་པ་ནི་ཕྱིར་མི་འོང་དང་། ཐ་མ་གཉིས་ནི་དགྲ་བཅོམ་ཁོ་ནའོ། །དེ་ནས་བརྒྱད་ནི། ཞུགས་གནས་ཀྱི་སྒོ་ནས་གང་ཟག་ཡ་བརྒྱད་དུ་དབྱེ་བ་ཡིན་ལ། ལྷག་མ་རྣམས་ནི་དེ་དག་གི་ཁྱད་པར་བྱེ་བྲག་ཏུ་བཤད་པའོ། །དེ་ཡང་དང་པོ་གཉིས་ནི་རྒྱུན་ཞུགས་ཀྱི་ཁྱད་པར། གསུམ་པ་ནི་ཕྱིར་འོང་གི་ཁྱད་པར། དེ་ནས་ལྔ་ནི་ཕྱིར་མི་འོང་གི་ཁྱད་པར། དེ་ནས་དྲུག་ནི་དགྲ་བཅོམ་གྱི་ཁྱད་པར་རོ། །འོ་ན་ཕྱིར་མི་འོང་ལ་གཟུགས་མེད་ཉེར་འགྲོ། མཐོང་ཆོས་ཞི། ལུས་མངོན་བྱེད་གསུམ་ཅི་ཕྱིར་མ་བཤད་ཅེ་ན། དང་པོ་ནི། བར་འདའ་བ་མ་གཏོགས་པའི་གཟུགས་སུ་ཉེར་འགྲོ་ཕྱི་མ་བཞིས་གཟུགས་མེད་ཉེར་འགྲོ་ཡང་བསྟན་པ་ལ་དགོངས་ཏེ། མཛོད་དུ། གཞན་ནི་གཟུགས་མེད་འགྲོ་རྣམས་བཞི། །ཞེས་པ་དང་ཡང་མཐུན་ནོ། །ཡང་ན་ལུགས་འདི་ལ་གཟུགས་མེད་ཉེར་འགྲོ་མེད་དེ། རྩ་འགྲེལ་གཉིས་ཆར་ལས། གོང་འཕོ་ཡན་ཆད་གཟུགས་སུ་ཉེར་འགྲོ་ཁོ་ན་ལ་སྦྱར་བར་སྣང་བའི་ཕྱིར་རོ། །འདི་གཉིས་གང་འཐད་ཤེས་ལྡན་དག་གིས་དཔྱོད་མཛོད་ཅིག གཉིས་ནི་ཅིག་ཆར་བའི་སྐབས་སུ་འཆད་པར་འགྱུར་བ་ལ་དགོངས་ཤིང་། གསུམ་པ་ནི་ཡོན་ཏན་གྱི་སྒོ་ནས་ཕྱེ་བའི་སྐབས་སུ་བཤད་ཟིན་ཏོ། །གཉིས་པ་ཅིག་ཅར་བ་ནི། ཡང་དེ་ཉིད་ལས་རྒྱུན་དུ་ཞུགས་པའི་གང་ཟག་ཅེས་གང་གསུངས་པ་ལ། རྒྱུན་དུ་ཞུགས་པ་ནི་གཉིས་ཏེ། རིམ་གྱིས་པ་དང་ཅིག་ཅར་ངེས་པར་འབྱིན་པའོ། །རིམ་གྱིས་པ་ནི་ཇི་སྐད་བསྟན་པ་ཡིན་ནོ། །ཅིག་ཅར་ངེས་པར་འབྱིན་པ་ནི་གང་བདེན་པ་རྣམས་མངོན་པར་རྟོགས་པར་བྱས་ནས་མི་ལྕོགས་པ་མེད་པ་ལ་བརྟེན་ཏེ་འཇིག་རྟེན་ལས་འདས་པའི་ལམ་གྱིས་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་ཅིག་ཅར་སྤོང་སྟེ། འདི་ནི་རྒྱུན་ཏུ་ཞུགས་པའི་འབྲས་བུ་དང་། དགྲ་བཅོམ་པའི་འབྲས་བུ་སྟེ། འབྲས་བུ་གཉིས་ལ་གདགས་སོ། །ཕལ་ཆེར་ནི་མཐོང་བའི་ཆོས་སམ་འཆི་བའི་དུས་ཀྱི་ཚེ་ཀུན་ཤེས་པ་ཐོབ་པར་བྱེད་དོ། །གལ་ཏེ་མི་བྱེད་ནའང་དེ་སྨོན་ལམ་གྱི་སྟོབས་ཅན་ཡིན་ཏེ། སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེས་ཏེ་སངས་རྒྱས་འབྱུང་བ་མེད་པ་ན་རང་རྒྱལ་བར་འགྱུར་རོ། །ཞེས་གསུངས་སོ། །འདི་དག་ལ་རྗེས་འབྲངས་གཉིས་སྦྱོར་ལམ་སྟན་གཅིག་པ་ནས་འཇོག་པ་དང་། བར་ཆད་གཅིག་པ་ལྷའི་རྟེན་ལ་མྱ་ངན་ལས་འདའ་བར་ངེས་པ་དང་། གཟུགས་མེད་ཉེར་འགྲོ་དངོས་སུ་མ་བཤད་པ་དང་། དགྲ་བཅོམ་དབང་རྟུལ་རྣམས་མཐོང་ཆོས་བདེ་གནས་ལས་ཉམས་པ་སྲིད་ཀྱི་འབྲས་བུ་ལས་ཉམས་པ་མི་སྲིད་པ་དང་། ཅིག་ཆར་བའི་རྣམ་གཞག་རྣམས་ནི་ལུགས་འདིའི་ཁྱད་པར་གྱིས་ཆོས་ཡིན་ལ། གཞན་རྣམས་ནི་ཕལ་ཆེར་མཛོད་དང་འདྲ་ཞིང་། རྒྱུན་ཞུགས་ཞུགས་གནས་ཀྱི་སྐབས་སུ་ཆགས་བྲལ་སྔོན་སོང་གི་འབྲས་བུ་བར་མ་གཉིས་ཀྱི་རྣམ་གཞག་འཆད་ཚུལ་ཡང་མཛོད་དང་འདྲའོ། །གཉིས་པ་མཛོད་ལས་བཤད་པའི་ཚུལ་ལ་གསུམ་སྟེ། མཐོང་ལམ་དང་། སྒོམ་ལམ་དང་། མི་སློབ་ལམ་ལ་གནས་པའི་གང་ཟག་གོ །དང་པོ་ནི། དབང་པོ་རྣོ་རྟུལ་དེ་དག་ཏུ། །དད་དང་ཆོས་ཀྱི་རྗེས་འབྲང་བ། །སྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །རྣམ་ལྔའི་བར་བཅོམ་གཉིས་པ་ལ། །དགུ་པ་ཚུན་ཆད་ཟད་པ་ཡིན། །འདོད་པའམ་ཡང་ན་གོང་མ་ལས། །ཆགས་བྲལ་གསུམ་པ་ལ་ཞུགས་པ། །ཞེས་དང་། དེའི་འགྲེལ་པར། ད་ནི་ཇི་ལྟར་ན་འཕགས་པའི་ལམ་སྐྱེས་པའི་གང་ཟག་རྣམས་རྣམ་པར་གཞག་པ་དེ་བཞིན་ཏུ་བཤད་པར་བྱ་སྟེ། མཐོང་བའི་ལམ་གྱི་རང་བཞིན་གྱི་སྐད་ཅིག་མ་བཅོ་ལྔར་བཤད་པ་གང་ཡིན་པ། དབང་པོ་རྣོ་རྟུལ་དེ་དག་ཏུ། །དད་དང་ཆོས་ཀྱི་རྗེས་འབྲང་བ། །ཡིན་པར་རིག་པར་བྱ་སྟེ་དབང་པོ་རྟུལ་པོ་དེ་དག་ལ་གནས་པ་ནི་དད་པས་རྗེས་སུ་འབྲང་བ་ཞེས་བྱ་བའོ། །དད་པས་རྗེས་སུ་འབྲང་བས་ན། དད་པས་རྗེས་སུ་འབྲང་བའོ། །དེ་འདི་ལ་ཡོད་པས་སམ། འདི་དད་པས་རྗེས་སུ་འབྲང་བའི་ངང་ཚུལ་ཅན་ཡིན་པས་ན། དད་པས་རྗེས་སུ་འབྲང་བ་སྟེ་སྔོན་གཞན་གྱི་དྲིང་གིས་དོན་གྱི་རྗེས་སུ་འབྲང་བའི་ཕྱིར་རོ། །ཆོས་ཀྱི་རྗེས་སུ་འབྲང་བ་ཡང་དེ་དང་འདྲ་སྟེ། སྔོན་བདག་ཉིད་ཁོ་ནས་མདོ་ལ་སོགས་པའི་ཆོས་ཀྱིས་དོན་གྱི་རྗེས་སུ་འབྲང་བའི་ཕྱིར་རོ། །དེ་གཉིས་ནི་སྒོམ་པས་སྤང་བྱ་མ་སྤངས་ན། འབྲས་བུ་དང་པོ་ལ་ཞུགས་པ། འབྲས་བུ་རྣམས་ཀྱི་དང་པོ་ནི་འབྲས་བུ་དང་པོ་སྟེ། རྒྱུན་དུ་ཞུགས་པའི་འབྲས་བུའོ། །དེ་ནི་འབྲས་བུ་ཐོབ་པར་བྱ་བ་ཐམས་ཅད་ཀྱི་དང་པོ་ཡིན་པའི་ཕྱིར་རོ། །དད་པ་དང་ཆོས་ཀྱི་རྗེས་སུ་འབྲང་བ་དེ་དག་ཉིད་གལ་ཏེ་སྔོན་འཇིག་རྟེན་པའི་ལམ་གྱིས་སྒོམ་པས་སྤང་བར་བྱ་བ་མ་སྤངས་པ་འཆིང་བ་མཐའ་དག་དང་ལྡན་པ་ཡིན་ན་ནི་དེ་གཉིས་རྒྱུན་དུ་ཞུགས་པའི་འབྲས་བུ་ལ་ཞུགས་པ་ཞེས་བྱའོ། །རྣམ་ལྔའི་བར་བཅོམ་གལ་ཏེ་སྔོན་འཇིག་རྟེན་པའི་ལམ་གྱིས་བསྒོམས་ཏེ་སྤང་བར་བྱ་བ་འདོད་པ་ན་སྤྱོད་པ་རྣམས་ལས་རྣམ་པ་ལྔའི་བར་དུ་སྤངས་པ་ཞིག་ཡིན་ན་ཡང་དེ་བཞིན་དུ་དང་པོར་འབྲས་བུ་ལ་ཞུགས་པ་དག་ཅེས་བྱའོ། །གཉིས་པ་ལ་དགུ་པ་ཚུན་ཆད་ཟད་པ་ཡིན། གཉིས་པ་ལ་ཞེས་བྱ་བ་ནི་གཉིས་པའི་ཕྱིར་ཏེ། གལ་ཏེ་དེ་གཉིས་ཀྱི་དེ་ཡན་ཆད་རྣམ་པ་དྲུག་གམ་བདུན་ནས་བརྒྱད་གཅིག་སྔོན་སྤངས་པ་ཡིན་ན་ནི་དེ་གཉིས་འབྲས་བུ་གཉིས་པ་ལ་ཞུགས་པ་ཞེས་བྱ་སྟེ། གཉིས་པ་གང་ཞེ་ན་ལན་ཅིག་ཕྱིར་འོང་བའི་འབྲས་བུའོ། །འདོད་པའམ་ཡང་ན་གོང་མ་ལས། ཆགས་བྲལ་གསུམ་པ་ལ་ཞུགས་པ། གལ་ཏེ་རྣམ་པ་དགུ་པ་ཡང་སྤངས་པའི་ཕྱིར། འདོད་པའི་ཁམས་ལས་འདོད་ཆགས་དང་བྲལ་བ་ཡིན་པའམ། གོང་མ་ཅི་ཡང་མེད་པའི་སྐྱེ་མཆེད་ཀྱི་བར་ལས་འདོད་ཆགས་དང་བྲལ་བ་ཞིག་ཡིན་ན། དེ་གཉིས་འབྲས་བུ་གསུམ་པ་ལ་ཞུགས་པ་ཞེས་བྱ་སྟེ། གསུམ་པ་གང་ཞེ་ན། ཕྱིར་མི་འོང་བའི་འབྲས་བུའོ། །དེ་གཉིས་དད་པ་དང་ཆོས་ཀྱི་རྗེས་སུ་འབྲང་བ་ཞེས་ཀྱང་མི་བྱ་ལ། ཞུགས་པ་ཞེས་ཀྱང་མི་བྱའོ། །འོ་ན་ཅི་ཞེ་ན། འབྲས་བུ་ལ་གནས་པ་དག་ཡིན་ཏེ། གང་ཞིག་རྒྱུན་དུ་ཞུགས་པའི་འབྲས་བུའམ་ལན་ཅིག་ཕྱིར་འོང་བའི་འབྲས་བུ་ཡང་རུང་འབྲས་བུ་གང་ལ་ཞུགས་པར་གྱུར་པ་དེ་ནི་དེའི་ཚེ་འབྲས་བུ་ལ་གནས་པ་ཡིན་ནོ་ཞེས་གསུངས་སོ། །དེ་དག་གི་དོན་ནི་མཐོང་ལམ་སྐད་ཅིག་བཅོ་ལྔ་ལ་གནས་པའི་ཉན་ཐོས་དབང་རྟུལ་རྣམས་ལ་དད་པས་རྗེས་འབྲང་དང་། དབང་རྣོན་རྣམས་ལ་ཆོས་ཀྱི་རྗེས་འབྲང་དུ་འཇོག་པས་ན་རྗེས་འབྲང་གཉིས་པོ་ནི་མཐོང་ལམ་ལ་གནས་པ་ཁོ་ནར་ངེས་སོ། །དེ་ལ་འདོད་པའི་སྒོམ་སྤངས་ཅུང་ཟད་ཀྱང་མ་སྤངས་པ་ནས་ལྔ་པའི་བར་སྤངས་པ་དང་། དྲུག་པ་ངེས་པར་སྤངས་པ་དང་། དགུ་པ་ངེས་པར་སྤངས་པ་དང་གསུམ་དུ་ཡོད་པ་ལས། དང་པོ་ནི་རྒྱུན་ཞུགས་ཞུགས་པ་དང་། གཉིས་པ་ནི་ཕྱིར་འོང་ཞུགས་པ་དང་། གསུམ་པ་ནི་ཕྱིར་མི་འོང་ཞུགས་པར་འཇོག་སྟེ། ཕྱི་མ་འདི་གཉིས་ལ་ཆགས་བྲལ་སྔོན་སོང་ཞེས་པའི་ཐ་སྙད་བོད་རྣམས་ཀྱིས་མཛད་དོ། །ཆགས་བྲལ་སྔོན་སོང་གི་ཞུགས་པ་གཉིས་རྒྱན་ཞུགས་ཞུགས་པ་དང་ལྷན་ཅིག་ཏུ་འཆད། འབྲས་གནས་གཉིས་རྒྱུན་ཞུགས་འབྲས་གནས་དང་ལྷན་ཅིག་ཏུ་འཆད་པ་ནི་ལམ་གྱི་གནས་སྐབས་འདྲ་བས་ཐ་སྙད་ཟོར་ཡང་བའི་ཕྱིར་ན་མངོན་པ་གོང་འོག་གཉིས་ཀ་བཤད་ཚུལ་མཐུན་པར་སྣང་ངོ་། །གཉིས་པ་སྒོམ་ལམ་ལ་གནས་པ་ལ་གཉིས་ཏེ། སྔར་གྱི་ཞུགས་པ་གསུམ་གྱི་སྒོ་ནས་བཞག་པ་དང་། མཐོང་ལམ་ཐོབ་རྗེས་སུ་སྒོམ་སྤངས་རིམ་གྱིས་སྤངས་པའི་སྒོ་ནས་བཞག་པའོ། །དང་པོ་ནི་གང་ཞིག་གང་ལ་ཞུགས་པ་ནི། །བཅུ་དྲུག་པ་ལ་དེ་འབྲས་གནས། །དེ་ཚེ་དབང་པོ་རྣོ་རྟུལ་དག །དད་པས་མོས་དང་མཐོང་བས་ཐོབ། །ཅེས་དང་། དེའི་འགྲེལ་པར། སེམས་བཅུ་དྲུག་པ་སྐྱེས་ན་དེ་གཉིས་དད་པ་དང་ཆོས་ཀྱི་རྗེས་སུ་འབྲང་བ་ཞེས་ཀྱང་མི་བྱ་ལ། ཞུགས་པ་ཞེས་ཀྱང་མི་བྱའོ། །འོ་ན་ཅི་ཞེ་ན། འབྲས་བུ་ལ་གནས་པ་དག་ཡིན་ཏེ། གང་ཞིག་རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུ་ཡང་རུང་། འབྲས་བུ་གང་ལ་ཞུགས་པར་གྱུར་པ་དེ་ནི་དེའི་ཚེ་འབྲས་བུ་ལ་གནས་པ་ཡིན་ནོ། །དགྲ་བཅོམ་པ་ཉིད་ནི་དང་པོ་ཉིད་དུ་ཐོབ་པར་མི་ནུས་ཏེ། མཐོང་བའི་ལམ་གྱིས་སྒོམ་པས་སྤང་བར་བྱ་བ་མི་སྤོང་བའི་ཕྱིར་དང་། སྔར་ཡང་སྲིད་པའི་རྩེ་མོ་ལས་འདོད་ཆགས་དང་བྲལ་བ་མི་སྲིད་པའི་ཕྱིར་རོ། །དེ་ཚེ་དབང་པོ་རྣོ་རྟུལ་དག །དད་པས་མོས་དང་མཐོང་བས་ཐོབ། །དེའི་ཚེ་དབང་པོ་རྟུལ་པོ་སྔོན་དད་པས་རྗེས་སུ་འབྲངས་བ་གང་ཡིན་པ་དེ་ནི་དད་པས་མོས་པ་ཞེས་བྱའོ། །དབང་པོ་རྣོན་པོ་སྔོན་ཆོས་ཀྱི་རྗེས་སུ་འབྲང་བ་གང་ཡིན་པ་དེ་ནི་མཐོང་བས་ཐོབ་པ་ཞེས་བྱ་སྟེ། དད་པ་དང་ཤེས་རབ་ལྷག་པས་མོས་པ་དང་མཐོང་བས་རབ་ཏུ་ཕྱེ་བའི་ཕྱིར་རོ། །ཞེས་གསུངས་སོ། །དེ་དག་གི་དོན་ནི་སྔར་གྱི་ཞུགས་པ་གསུམ་པོ་བཅུ་དྲུག་པའི་རྟོགས་པ་ཐོབ་པའི་ཚེ་དེ་དང་དེའི་འབྲས་གནས་སུ་འགྱུར་ཞིང་། དེའི་ཚེ་དབང་པོ་རྣོ་རྟུལ་གཉིས་ལ་དད་མོས་དང་མཐོང་ཐོབ་ཞེས་བྱའི་རྗེས་འབྲང་གཉིས་སུ་མི་བརྗོད་དེ། བདེན་པ་མཐོང་ཟིན་པའི་ཕྱིར་རོ། །དེས་ན་དབང་པོ་རྣོ་རྟུལ་གཉིས་ནི་དོན་ཡིན་པས་མཐོང་སྒོམ་མི་སློབ་ལམ་གྱི་གནས་སྐབས་གསུམ་ཆར་དུ་ཡོད་ལ། རྗེས་འབྲང་གཉིས་དང་། དད་མོས་མཐོང་ཐོབ་གཉིས་དང་། དུས་སྦྱོར་དུས་མི་སྦྱོར་གཉིས་ནི་མཐོང་སྒོམ་མི་སློབ་པའི་ལམ་གསུམ་ལ་སོ་སོར་འཇོག་པ་ནི་གཞུང་ལུགས་འདིའི་དགོངས་པའོ། །གཉིས་པ་ལ་བཞི་སྟེ། རྒྱུན་ཞུགས་འབྲས་གནས། ཕྱིར་འོང་ཞུགས་གནས། ཕྱིར་མི་འོང་ཞུགས་གནས། དགྲ་བཅོམ་ཞུགས་པའོ། །དང་པོ་ལ་གཉིས་ཏེ། སྲིད་པ་ལན་བདུན་པ་དང་། རིགས་ནས་རིགས་སྐྱེའོ། །དང་པོ་ནི། མཛོད་དུ། འབྲས་གནས་སྒོམ་སྤང་བྱ་མ་ཟད། །རེ་ལྟར་ཐོགས་ན་ལན་བདུན་པ། །ཞེས་དང་། དེའི་འགྲེལ་པར་དེ་ལྟར་ཉོན་མོངས་རྣམ་པ་དགུ་པོ་དེ་དག་ཐམས་ཅད་དུ་འབྲས་གནས་སྒོམ་སྤང་བྱ་མ་ཟད། རེ་ལྟར་ཐོགས་ན་ལན་བདུན་པ། །འབྲས་བུ་ལ་གནས་པ་གང་ཞིག་གིས་སྒོམ་པས་སྤང་བར་བྱ་བའི་ཉོན་མོངས་པ་གཅིག་ཀྱང་མ་སྤངས་པ་དེ་ནི་རྒྱུན་དུ་ཞུགས་པ་ཡིན་ལ། ཚེ་བདུན་གྱི་བར་དུ་སྐྱེ་བས་ན་ལན་བདུན་པའོ། །ཐམས་ཅད་དུ་ནི་ལན་བདུན་པ་མ་ཡིན་པས་རེ་ལྟར་ཐོགས་ན་ཞེས་བྱ་བ་ནི་ཐམས་ཅད་ཀྱི་ཐ་ཤལ་བའོ། །མདོ་ལས་མཆོག་ཏུ་ཐོགས་ན་ལན་བདུན་པ་ཞེས་འབྱུང་བ་ནི་མཆོག་ཏུ་ཐོགས་ན་སྐྱེ་བ་ལན་བདུན་ཞེས་པའི་ཐ་ཚིག་སྟེ། མཆོག་ཅེས་བྱ་བའི་སྒྲ་ནི་རབ་ཏུའོ། །མྱ་ངན་ལས་འདས་པའི་རྒྱུན་ནི་ལམ་སྟེ། དེ་ནས་དེར་འགྲོ་བའི་ཕྱིར་རོ། །འདི་ནི་དེར་ཞུགས་ཤིང་ཕྱིན་ལ་སོན་པས་ན་རྒྱུན་དུ་ཞུགས་པ་ཡིན་ནོ། །ཇི་ལྟར་ན་ཞུགས་པ་ཡིན། གལ་ཏེ་ལམ་དང་པོ་ཐོབ་པའི་ཕྱིར་རོ་ཞེ་ན་ནི་བརྒྱད་པ་ཡང་ཡིན་པར་འགྱུར་རོ། །གལ་ཏེ་འབྲས་བུ་དང་པོ་ཐོབ་པའི་ཕྱིར་རོ་ཞེ་ན་ནི་ཕལ་ཆེར་ལས་འདོད་ཆགས་དང་བྲལ་བ་ཡང་ཡིན་པར་འགྱུར་ལ། འདོད་པ་ལས་འདོད་ཆགས་དང་བྲལ་བ་ཡང་ཡིན་པར་འགྱུར་རོ། །འབྲས་བུ་ཐམས་ཅད་འཐོབ་པའི་དབང་དུ་བྱས་ནས་འབྲས་བུ་དང་པོ་ཐོབ་པའི་ཕྱིར་རོ། །ཅིའི་ཕྱིར་དེ་ཁོ་ན་ཡིན་ལ། བརྒྱད་པ་ནི་མ་ཡིན་ཞེ་ན། ལམ་ལ་རྗེས་སུ་ཤེས་པ་ལ་ནི་ཞུགས་པ་དང་འབྲས་བུའི་ལམ་ཐོབ་པའི་ཕྱིར་དང་། མཐོང་བ་དང་སྒོམ་པའི་ལམ་ཐོབ་པའི་ཕྱིར་དང་། རྒྱུན་ཐམས་ཅད་མངོན་པར་རྟོགས་པའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ན་རེ། དེ་ནི་དེ་ལས་གཞན་པ་སྐྱེ་བའི་སྲིད་པ་བདུན་དང་། སྲིད་པ་བར་མ་བདུན་དུ་མི་རྣམས་ཀྱི་ནང་དུ་ཉིང་མཚམས་སྦྱོར་བར་བྱེད་ལ། དེ་བཞིན་དུ་ལྷ་དག་གི་ནང་དུ་ཡང་ཉིང་མཚམས་སྦྱོར་བར་བྱེད་དེ། དེ་ལྟར་ན་སྲིད་པ་ཉི་ཤུ་རྩ་བརྒྱད་ཀྱི་བར་དུ་ཉིང་མཚམས་སྦྱོར་བར་བྱེད་དོ། །སྲིད་པ་བདུན་ཚན་དུ་འདྲ་བའི་ཕྱིར་མཆོག་ཏུ་ཐོགས་ན་ལན་བདུན་པ་ཞེས་བཤད་དེ། གནས་བདུན་ལ་མཁས་པ་ཞེས་བྱ་བ་དང་། འདབ་མ་བདུན་པ་ཞེས་བྱ་བ་བཞིན་ནོ། །ཞེས་ཟེར་རོ། །འོ་ན་གང་མདོ་ལས་གང་ཟག་ལྟ་བ་ཕུན་སུམ་ཚོགས་པ་སྲིད་པ་བརྒྱད་པ་མངོན་པར་འགྲུབ་པ་གང་ཡིན་པ་ནི་གནས་མ་ཡིན་ཞིང་གོ་སྐབས་མེད་དེ། འདི་ནི་གནས་མེད་དོ་ཞེས་གསུངས་པ་ཇི་ལྟ་བུ་ཞེ་ན། འགྲོ་བ་གཅིག་ཏུ་དགོངས་པ་ཡིན་ནོ། །འོ་ན་སྒྲ་ཇི་བཞིན་དུ་བཏགས་ན་ནི་སྲིད་པ་བར་མ་ཡང་ཡོད་པར་མི་འགྱུར་རོ། །དེ་ལྟ་ན་ཡང་སྲིད་པའི་རྩེ་མོའི་བར་དུ་གང་དུ་འཕོ་བ་འགྲོ་བ་གཅིག་ཏུ་སྐྱེ་བའི་སྲིད་པ་བརྒྱད་པར་མི་འགྱུར་རོ་ཞེ་ན། འདོད་པའི་ཁམས་ལ་དགོངས་ཏེ་གསུངས་པས་ཉེས་པ་མེད་དོ། །འདི་ལ་ཤེས་པར་བྱེད་པའི་མདོའམ་རིགས་པ་ཅི་ཞིག་ཡོད་ལྷ་དང་མི་དག་གི་ནང་དུ་སོ་སོར་ལན་བདུན་སྐྱེའི་གཉིས་ཀའི་ནང་དུ་ལན་བདུན་མ་ཡིན་པ་ཉིད་དོ། །ཞེས་བྱ་བ་འདི་ལ་ཡང་ཤེས་པར་བྱེད་པ་ཅི་ཞིག་ཡོད་དེ། འདི་སྐད་དུ་ལྷ་རྣམས་དང་མི་རྣམས་སུ་ལན་བདུན་ཞེས་འབྱུང་ངོ་ཞེ་ན། འོད་སྲུང་པ་རྣམས་ལྷ་རྣམས་སུ་ལན་བདུན་མི་རྣམས་སུ་ལན་བདུན་ཞེས་སོ་སོར་ཡང་འདོན་པས་འདི་ལ་མངོན་པར་ཞེན་པར་མི་བྱའོ། །གང་ཞིག་མི་དག་གི་ནང་དུ་རྒྱུན་དུ་ཞུགས་པར་གྱུར་པ་དེ་ནི་དེ་ཁོ་ནར་འོངས་ནས་ཡོངས་སུ་མྱ་ངན་ལས་འདའ་ལ། གང་ཞིག་ལྷ་དག་གི་ནང་དུ་རྒྱུན་དུ་ཞུགས་པར་གྱུར་པ་དེ་ནི་དེ་ཁོ་ནར་འོངས་ནས་ཡོངས་སུ་མྱ་ངན་ལས་འདའོ། །ཅི་ཕྱིར་སྲིད་པ་བརྒྱད་པ་མངོན་པར་མི་འགྲུབ་ཅེ་ན་དུས་དེ་སྲིད་ཀྱིས་གདོན་མི་ཟ་བར་རྒྱུད་ཡོངས་སུ་སྨིན་པའི་ཕྱིར་རོ། །ལམ་དེ་ནི་དེ་འདྲ་སྟེ། སྦྲུལ་གོམས་པ་བདུན་པས་ཟིན་པ་ལྟ་བུ་དང་། རིམས་ཉིན་བཞི་པ་བཞིན་ནོ། །ཀུན་ཏུ་སྦྱོར་བ་བདུན་པོ་ཐ་མའི་ཆ་དང་མཐུན་པ་གཉིས་དང་། གོང་མའི་ཆ་དང་མཐུན་པ་ལྔ་ལུས་པའི་ཡང་ཕྱིར་རོ། །བར་སྐབས་སུ་ཡང་འཕགས་པའི་ལམ་མངོན་དུ་བྱེད་ཅིང་ཡོངས་སུ་མྱ་ངན་ལས་མི་འདའ་སྟེ། དེ་སྲིད་དུ་སྲིད་པ་མྱོང་བར་འགྱུར་བའི་ལས་ཀྱི་སྟོབས་བསྐྱེད་པའི་ཕྱིར་རོ། །སངས་རྒྱས་འབྱུང་བ་མེད་ན་ནི་ཁྱིམ་པ་ཁོ་ནར་དགྲ་བཅོམ་པ་ཉིད་འཐོབ་ལ་ཁྱིམ་ན་ནི་མི་གནས་སོ། །ཆོས་ཉིད་ཀྱིས་འཐོབ་པའི་དགེ་སློང་གི་མཚན་མ་ཡང་ཐོབ་བོ། །གཞན་དག་ན་རེ་དགེ་སྦྱོང་གཞན་གྱི་མཚན་མའོ་ཞེས་ཟེར་རོ། །ཅི་ཕྱིར་ལོག་པར་ལྟུང་བའི་ཆོས་ཅན་མ་ཡིན་ཞེ་ན། དེར་འགྲོ་བའི་ལས་མི་སོགས་པའི་ཕྱིར་དང་། གསོག་པ་ཡང་སྦྱོར་བ་དང་བསམ་པ་དག་གི་སྒོ་ནས་དགེ་བའི་རྩ་བ་སྟོབས་དང་ལྡན་པས་བསྒོམ་པའི་ཕྱིར་རྒྱུད་རྣམ་པར་སྨིན་པ་དང་། མི་མཐུན་པར་བྱས་པའི་ཕྱིར་རོ། །ངན་སོང་དུ་ངེས་པའི་ལས་ཡོད་ན་ནི་དེས་བཟོད་པ་ཡང་བསྐྱེད་པར་མི་འགྱུར་རོ། །འདིར་སྨྲས་པ། མི་མཁས་པས་ནི་སྡིག་པ་ཆུང་ངུ་བྱས་ཀྱང་འོག་ཏུ་འགྲོ། །མཁས་པས་ཆེན་པོ་བྱས་ཀྱང་གནོད་པ་རབ་ཏུ་ཡང་བར་འགྱུར། །ལྕགས་ཀྱི་གོང་བུ་ཆུང་ཡང་ཆུ་ཡི་གཏིང་དུ་འབྱིང་འགྱུར་ལ། །དེ་ཉིད་སྣོད་དུ་བྱས་ན་ཆེ་ཡང་སྟེང་དུ་འཕྱོ་བར་འགྱུར། །སྡུག་བསྔལ་གྱི་མཐར་བྱེད་དོ་ཞེས་བྱ་བ་སྡུག་བསྔལ་གྱི་མཐའ་གང་ཡིན་ཞེ་ན། གང་ཕན་ཆད་སྡུག་བསྔལ་མེད་པ་སྟེ། སྡུག་བསྔལ་ཉིང་མཚམས་མི་སྦྱོར་བར་བྱེད་ཅེས་བྱ་བའི་ཐ་ཚིག་གོ །ཡང་ན་མཐའ་ནི་མྱ་ངན་ལས་འདས་པ་ཡིན་ནོ། །མྱ་ངན་ལས་འདས་པ་ཇི་ལྟར་བྱེད་ཅེ་ན། །དེ་འཐོབ་པའི་གེགས་བསལ་བའི་ཕྱིར་ཏེ། དཔེར་ན་སྨྲ་བ་པོ་བདུན་ཁང་རྟིབ་ལ་ནམ་མཁའ་གྱིས་ཞེས་འཛེར་བ་ལྟ་བུ་ཡིན་ནོ། །མཆོག་ཏུ་ཐོགས་ན་ལན་བདུན་པ་གཞན་ཡང་ཡོད་མོད་ཀྱི་མ་ངེས་པས་མི་བརྗོད་དོ། །རེ་ཞིག་འབྲས་བུ་ལ་གནས་པ་སྒོམ་པས་སྤང་བར་བྱ་བ་མ་ཟད་པ་མཆོག་ཏུ་ཐོགས་ན་ལན་བདུན་པ་ནི་དེ་ལྟ་བུ་ཡིན་ནོ། །དེ་དག་གི་དོན་ལ་འབྲས་བུ་ལ་གནས་པ་གང་ཞིག་གིས་སྒོམ་པས་སྤང་བར་བྱ་བའི་ཉོན་མོངས་པ་གཅིག་ཀྱང་མ་སྤངས་པ་ཞེས་སོགས་ཀྱིས་ནི་སྲིད་པ་ལན་བདུན་པའི་སྒྲ་དོན་དང་། དེ་ཡང་འདིར་རེ་ལྟར་ཐོགས་ན་ཞེས་པ་ནི་ཤིན་ཏུ་འགོར་པའམ་མདོ་ལས་མཆོག་ཏུ་ཐོགས་ན་ཞེས་འབྱུང་བ་ནི་མ་ངེས་པའི་རིགས་ཅན་གྱི་དབང་དུ་བྱས་པར་བསྟན་ནོ། །མྱ་ངན་ལས་འདས་པའི་རྒྱུན་ནི་ལམ་སྟེ། ཞེས་སོགས་ཀྱི་རྒྱུན་ཞུགས་ཀྱི་སྒྲ་དོན་བསྟན། ཇི་ལྟར་ན་ཞུགས་པ་ཡིན་ཞེས་སོགས་ཀྱིས་རྒྱུན་ཞུགས་ཀྱི་འཇོག་བྱེད་དྲིས་ནས་དང་པོ་གཉིས་རིགས་པས་སུན་ཕྱུངས་ནས་རང་ལུགས་འབྲས་བུ་བཞི་ཆར་རིམ་གྱིས་ཐོབ་པའི་དབང་དུ་བྱས་ནས་འབྲས་བུ་དང་པོ་ཐོབ་པ་བཀོད་པའོ། །ཅི་ཕྱིར་དེ་ཁོ་ན་ཡིན་ལ་ཞེས་སོགས་ཀྱིས་རྒྱུན་ཞུགས་ཞུགས་པ་དང་། འབྲས་གནས་གཉིས་རྒྱུན་ཞུགས་ཡིན་མིན་གྱི་ཁྱད་པར་བསྟན་ནོ། །བྱེ་བྲག་ཏུ་སྨྲ་བ་རྣམས་ན་རེ་ཞེས་སོགས་ཀྱིས་བྱེ་བྲག་ཏུ་སྨྲ་བའི་ལུགས་ཀྱི་སྲིད་པ་ལན་བདུན་པའི་སྐྱེ་བ་ལེན་ཚུལ་དོགས་གཅོད་དང་བཅས་པ་བསྟན་ནོ། །འདི་ལ་ཤེས་པར་བྱེད་པའི་མདོའམ་རིགས་པ་ཅི་ཞིག་ཡོད་ཅེས་སོགས་ཀྱིས་མདོ་སྡེ་པས་བྱེ་བྲག་ཏུ་སྨྲ་བ་ལ་སྲིད་པ་ལན་བདུན་པས་སྐྱེ་སྲིད་བཅུ་བཞི་ལེན་པའི་སྒྲུབ་བྱེད་དྲིས་ནས་དེ་སུན་འབྱིན་པ་བསྟན། དེ་ལྟར་ན་བྱེ་བྲག་ཏུ་སྨྲ་བའི་ལུགས་ལ་སྲིད་པ་ལན་བདུན་པས་ལྷ་མི་གཉིས་སུ་སྐྱེ་སྲིད་བཅུ་བཞི་དང་། མདོ་སྡེ་པས་ལྷ་མི་གཉིས་བསྡོམས་ནས་སྐྱེ་སྲིད་བདུན་དང་། འོད་སྲུང་པས་ལྷ་མི་གཉིས་གང་རུང་གཅིག་ཏུ་སྐྱེ་སྲིད་བདུན་ལེན་པར་འདོད་པ་ནི་ཁྱད་པར་རོ། །གང་ཞིག་མི་དག་གི་ནང་དུ་ཞེས་སོགས་ཀྱིས་ནི་རྒྱུན་ཞུགས་ཀྱིས་འདོད་པའི་རྟེན་ལ་འབྲས་བུ་མངོན་དུ་བྱེད་པའི་རྟེན་གྱི་ཁྱད་པར་བསྟན་ནོ། །ཅི་ཕྱིར་སྲིད་པ་བརྒྱད་པ་མངོན་པར་མི་འགྲུབ་ཅེ་ན་ཞེས་སོགས་ཀྱིས་ངེས་པའི་རིགས་ཅན་གྱི་སྲིད་པ་ལན་བདུན་པས་སྲིད་པ་བརྒྱད་པ་མི་འགྲུབ་ཅིང་། དྲུག་པ་ཚུན་ཆད་དུ་ཡང་མྱ་ངན་ལས་མི་འདའ་བའི་སྒྲུབ་བྱེད་དང་། ལོག་པར་ལྟུང་བའི་ཆོས་ཅན་མ་ཡིན་པའི་སྒྲུབ་བྱེད་རྣམས་བསྟན། སྡུག་བསྔལ་གྱི་མཐར་བྱེད་དོ་ཞེས་བྱ་བ་སོགས་ཀྱིས་ནི་སྡུག་བསྔལ་གྱི་མཐའ་ངོས་བཟུང་ནས་དེ་མངོན་དུ་བྱེད་པའི་ཚུལ་བསྟན། མཆོག་ཏུ་ཐོགས་ན་ཞེས་སོགས་ཀྱིས་ནི་གོང་དུ་བཤད་པ་དེ་དག་ཀྱང་ངེས་པའི་རིགས་ཅན་གྱི་དབང་དུ་བྱས་པར་བསྟན་ནོ། །གཉིས་པ་ནི། རྣམ་གསུམ་རྣམ་བཞི་ལས་གྲོལ་བ། །ཚེ་གཉིས་གསུམ་དུ་རིགས་ནས་རིགས། །ཞེས་དང་དེའི་འགྲེལ་པར། རྒྱུན་དུ་ཞུགས་པ་དེ་ཉིད་རྒྱུ་གསུམ་གྱིས་ན་རིགས་ནས་རིགས་སུ་སྐྱེ་བ་ཡིན་ཏེ། ཉོན་མོངས་པ་སྤངས་པ་ལས་ནི་ཉོན་མོངས་པའི་རྣམ་པ་གསུམ་མམ་བཞི་སྤངས་པའི་ཕྱིར་རོ། །དབང་པོ་ལས་ནི་དེའི་གཉེན་པོ་ཟག་པ་མེད་པའི་དབང་པོ་ཐོབ་པའི་ཕྱིར་རོ། །སྐྱེ་བ་ལས་ནི་ཚེ་གཅིག་གམ་གཉིས་ལུས་པའི་ཕྱིར་རོ། །ཚིགས་སུ་བཅད་པའི་ནང་དུ་གཉིས་ཤིག་སྨོས་པ་ནི་རྒྱུན་དུ་ཞུགས་པ་ཕྱིས་ཉོན་མོངས་པ་སྤོང་བར་བྱེད་ན་དེའི་གཉེན་པོ་ཟག་པ་མེད་པའི་དབང་པོ་ཐོབ་པ་ནི་མ་སྨོས་ཀྱང་འགྲུབ་པའི་ཕྱིར་རོ། །སྐྱེ་བ་ནི་གལ་ཏེ་ན་གོང་མའི་སྐལ་བ་དང་ལྡན་པའི་ཕྱིར་ཆེས་ཉུང་ངུར་ཡང་འགྱུར་བས་དེའི་ཕྱིར་འདི་སྨོས་སོ། །ཅིའི་ཕྱིར་རྣམ་པ་ལྔ་སྤངས་པའི་ཕྱིར་མ་ཡིན་ཞེ་ན་དེ་སྤངས་ན་དྲུག་པ་ཡང་གདོན་མི་ཟ་བར་སྤོང་བའི་ཕྱིར་དེའི་རྣམ་པ་གཅིག་གིས་ནི་བར་ཆད་གཅིག་པའི་བཞིན་དུ་འབྲས་བུ་ལ་གེགས་བྱ་བར་མི་ནུས་ཏེ་ཁམས་ལས་མི་འདའ་བའི་ཕྱིར་རོ། །རིགས་ནས་རིགས་སུ་སྐྱེ་བ་དེ་ནི་རྣམ་པ་གཉིས་ཏེ། ལྷའི་རིགས་ནས་རིགས་སུ་སྐྱེ་བ་ནི་ལྷ་དག་གི་ནང་དུ་རིགས་གཉིས་སམ་གསུམ་དུ་འཁོར་ནས་རིས་དེའམ་གཞན་དུ་ཡོངས་སུ་མྱ་ངན་ལས་འདས་པ་གང་ཡིན་པའོ། །མིའི་རིགས་ནས་རིགས་སུ་སྐྱེ་བ་ནི་མི་དག་གི་ནང་དུ་རིགས་གཉིས་སམ་གསུམ་དུ་འཁོད་ནས་གླིང་དེའམ་གཞན་དུ་ཡོངས་སུ་མྱ་ངན་ལས་འདའ་བ་གང་ཡིན་པའོ། །ཞེས་གསུངས་ཏེ་དེ་དག་གི་དོན་ནི། རྒྱུན་དུ་ཞུགས་པ་དེ་ཉིད་ཅེས་སོགས་ཀྱིས་རིགས་ནས་རིགས་སྐྱེར་འཇོག་པའི་ཁྱད་ཆོས་གསུམ་བསྟན། ཚིགས་སུ་བཅད་པའི་ནང་དུ་ཞེས་སོགས་ཀྱིས་རྩ་བར་གཉེན་པོའི་ཁྱད་པར་མ་སྨོས་ཀྱང་སྐབས་འདིར་མཐོང་ལམ་ཐོབ་རྗེས་སུ་སྤང་བྱ་སྤངས་པའི་ཁྱད་པར་འཇོག་པའི་སྐབས་ཡིན་པས་དེའི་གཉེན་པོ་ཟག་མེད་ཀྱི་དབང་པོ་ཐོབ་པ་དོན་གྱིས་ཐོབ་པའི་ཕྱིར་རོ། །ཞེས་བསྟན་ཏོ། །སྐྱེ་བ་ནི་གལ་ཏེ་ན་ཞེས་སོགས་ཀྱི་དོན་ནི། ཚེ་གཅིག་ལུས་པའི་རྒྱུན་ཞུགས་ནི་ཚེ་དེ་ཉིད་ལ་ཕྱིར་འོང་གི་འབྲས་བུ་མངོན་དུ་བྱེད་པའི་སྐལ་བ་དང་ལྡན་པའི་ཕྱིར། སྐྱེ་བའི་ཁྱད་པར་ཆེས་ཉུང་བར་ཡང་འགྱུར་བས་དེའི་ཕྱིར་ཚེ་གཉིས་དང་གསུམ་གྱི་ཁྱད་པར་འདི་སྨོས་སོ་ཞེས་པའི་དོན་ནོ། །ཅིའི་ཕྱིར་རྣམ་པ་ལྔ་སྤངས་པའི་ཕྱིར་མ་ཡིན་ཞེ་ན་ཞེས་སོགས་ཀྱིས་ནི་སྤངས་པའི་ཁྱད་པར་གྱི་ངེས་པ་བསྟན་ཏོ། །རིགས་ནས་རིགས་སུ་སྐྱེ་བ་དེ་ནི་རྣམ་པ་གཉིས་ཞེས་སོགས་ཀྱིས་དབྱེ་བ་དང་། དབྱེ་བ་སོ་སོའི་དོན་བསྟན་ཏེ་གོ་སླའོ། །གཉིས་པ་ཕྱིར་འོང་ཞུགས་གནས་ལ་ཞུགས་པ་དང་འབྲས་གནས་སོ། །དང་པོ་ཡང་དེ་ཉིད་ལས། འབྲས་བུ་ལ་གནས་པ་དེ་ཉིད། །རྣམ་པ་ལྔ་ཡི་བར་བཅོམ་པ། །གཉིས་པ་ལ་ནི་ཞུགས་པ་ཡིན། །འབྲས་བུ་ལ་གནས་པ་གང་གི་རྣམ་པ་གཅིག་ནས་ལྔའི་བར་དུ་སྤངས་པ་ཡིན་ན། དེ་ནི་འབྲས་བུ་གཉིས་པ་ལ་ཞུགས་པ་ཡིན་པར་རིག་པར་བྱའོ། །ཞེས་གསུངས་ཏེ་དོན་ནི་གོ་སླའོ། །གཉིས་པ་ལ་གཉིས་ཏེ་འབྲས་གནས་ཙམ་པོ་དང་། འབྲས་གནས་ཁྱད་པར་ཅན་ནོ། །དང་པོ་ནི་ཡང་དེ་ཉིད་ལས། རྣམ་པ་དྲུག་པ་ཟད་གྱུར་པ། །དེ་ནི་ལན་ཅིག་ཕྱིར་འོང་བ། །དེ་ནི་འབྲས་བུ་གཉིས་པ་ཐོབ་པ་ཡིན་ཏེ། ལྷ་དག་གི་ནང་དུ་སོང་ནས་མིའི་འཇིག་རྟེན་དུ་ལན་གཅིག་ཕྱིར་འོང་བའི་ཕྱིར་ལན་ཅིག་ཕྱིར་འོང་བ་སྟེ། ཕན་ཆད་སྐྱེ་བ་མེད་པའི་ཕྱིར་རོ། །འདོད་ཆགས་དང་ཞེ་སྡང་དང་གཏི་མུག་རྣམས་བསྲབས་པའི་ཕྱིར་ཞེས་འབྱུང་བ་ནི་ཆུང་ངུའི་རྣམ་པ་ལུས་པའི་ཕྱིར་རོ། །ཞེས་གསུངས་ཏེ་དོན་ནི་གོ་སླའོ། །གཉིས་པ་ནི་ཡང་དེ་ཉིད་ལས། ཉེས་ཆ་བདུན་དང་བརྒྱད་ཟད་པ། །ཚེ་གཅིག་བར་ཆད་གཅིག་པ་དང་། །གསུམ་པ་ལ་ནི་ཞུགས་པའང་ཡིན། །ཡང་ལན་ཅིག་ཕྱིར་འོང་བ་དེ་ཉིད་རྒྱུ་གསུམ་གྱིས་བར་ཆད་གཅིག་པ་ཡིན་པར་རིག་པར་བྱ་སྟེ། ཉོན་མོངས་པའི་རྣམ་པ་བདུན་ནམ་བརྒྱད་སྤངས་པའི་ཕྱིར་དང་། དེའི་གཉེན་པོ་ཟག་པ་མེད་པའི་དབང་པོ་ཐོབ་པའི་ཕྱིར་དང་། ཚེ་གཅིག་ལུས་པའི་ཕྱིར་རོ། །ཇི་ལྟར་ན་འདིའི་རྣམ་པ་གཅིག་གིས་འབྲས་བུ་ལ་གེགས་བྱེད་པར་ནུས་ཤེ་ན་ཁམས་རྣམས་ལས་འདའ་བའི་ཕྱིར་ཏེ། གོང་དུ་ལས་རྣམས་ནི་གནས་སྐབས་གསུམ་དུ་གེགས་བྱ་བའི་ཕྱིར་ཉེ་བར་གནས་སོ་ཞེས་བཤད་ཟིན་ཏོ། །ལས་རྣམས་ཇི་ལྟ་བར་ཉོན་མོངས་པ་རྣམས་ཀྱང་དེ་དང་འདྲ་བར་རིག་པར་བྱ་སྟེ། རྣམ་པར་སྨིན་པ་དང་རྒྱུ་མཐུན་པའི་འབྲས་བུའི་ས་ལས་འདའ་བའི་ཕྱིར་རོ། །བར་ཆད་ཅེས་བྱ་བ་ནི་བར་ཆད་བྱེད་པའོ། །དེའི་མྱ་ངན་ལས་འདའ་བ་ལ་ཚེ་གཅིག་གིས་ཆོད་པའི་ཕྱིར་རམ་ཕྱིར་མི་འོང་གི་འབྲས་བུ་ལ་ཉོན་མོངས་པའི་རྣམ་པ་གཅིག་གིས་ཆོད་པའི་ཕྱིར། འདི་ལ་བར་ཆད་གཅིག་ཡོད་པས་ན་བར་ཆད་གཅིག་པ་ཡིན་ནོ་ཞེས་གསུངས་སོ། །དེའི་དོན་ཡང་ཡང་ལན་ཅིག་ཕྱིར་འོང་བ་དེ་ཉིད་རྒྱུ་གསུམ་གྱིས་ནི་ཞེས་སོགས་ཀྱིས་ཚེ་གཅིག་བར་ཆད་གཅིག་པར་འཇོག་པའི་ཁྱད་པར་གྱི་ཆོས་གསུམ་བསྟན། ཇི་ལྟར་ན་འདིའི་རྣམ་པ་གཅིག་གིས་ཞེས་སོགས་ཀྱི་དོན་ནི་ཕྱིར་མི་འོང་གི་འབྲས་བུ་ཐོབ་པ་ལ་ཁམས་ལས་འདའ་དགོས་པས་ཉོན་མོངས་པའི་རྣམ་པ་གཅིག་གིས་ཀྱང་ཚེ་འདིར་འབྲས་བུ་དེ་ཐོབ་པ་ལ་གེགས་བྱེད་ནུས་པའི་ཕྱིར། གོང་དུ་ལས་བསྟན་པར། བཟོད་དང་ཕྱིར་མི་འོང་དགྲ་བཅོམ། །འཐོབ་ལ་ལས་གེགས་ཤིན་ཏུ་བྱེད། །ཅེས་བཟོད་པ་ཐོབ་པ་ལ་ངན་འགྲོ་མྱོང་ངེས་ཀྱི་ལས་ཀྱིས་གེགས་བྱེད། ཕྱིར་མི་འོང་གི་འབྲས་བུ་ཐོབ་པ་ལ་འདོད་པ་མྱོང་ངེས་ཀྱི་ལས་ཀྱིས་གེགས་བྱེད། དགྲ་བཅོམ་གྱི་འབྲས་བུ་ཐོབ་པ་ལ་གོང་མ་མྱོང་ངེས་ཀྱི་ལས་ཀྱིས་གེགས་བྱེད་པར་བསྟན་པས་ཀྱང་འདོད་པའི་ཉོན་མོངས་པ་གཅིག་གིས་ཕྱིར་མི་འོང་གི་འབྲས་བུ་ཚེ་དེ་ཉིད་དུ་ཐོབ་པ་ལ་གེགས་བྱེད་ནུས་པར་གྲུབ་སྟེ། ཕྱིར་མི་འོང་གི་འབྲས་བུ་ཐོབ་པ་ལ་འདོད་པའི་ལས་ཀྱི་རྣམ་སྨིན་གྱི་འབྲས་བུ་དང་། འདོད་པའི་ལས་ཀྱི་རྒྱུ་མཐུན་གྱི་འབྲས་བུ་གཉིས་ལས་འདའ་དགོས་པའི་ཕྱིར་རོ། །བར་ཆད་ཅེས་བྱ་བ་ནི་ཞེས་སོགས་ཀྱིས་ཚེ་གཅིག་བར་ཆད་གཅིག་པའི་སྒྲ་དོན་བསྟན་ཏོ། །གསུམ་པ་ཕྱིར་མི་འོང་ཞུགས་གནས་ལ་གཉིས་ཏེ། ཞུགས་པ་དང་འབྲས་གནས་སོ། །དང་པོ་ནི། རྩ་ཚིག་གོང་མར་གསུམ་པ་ལ་ནི་ཞུགས་པའང་ཡིན་ཅེས་པ་དང་། དེའི་འགྲེལ་པར་རྣམ་པ་བདུན་དང་བརྒྱད་སྤངས་པ་དེ་ནི་འབྲས་བུ་གསུམ་པ་ལ་ཞུགས་པ་ཡིན་པའང་རིག་པར་བྱའོ། །སྔོན་རྣམ་པ་གསུམ་དང་བཞི་སྤངས་པའམ། རྣམ་པ་བདུན་དང་བརྒྱད་སྤངས་པ་འབྲས་བུ་ཐོབ་པ་ནི་ཇི་སྲིད་དུ་འབྲས་བུ་ཁྱད་པར་ཅན་གྱི་ལམ་མངོན་དུ་མ་བྱས་པ་དེ་སྲིད་དུ་རིགས་ནས་རིགས་སུ་སྐྱེ་བའམ་བར་ཆད་གཅིག་པ་མ་ཡིན་ནོ་ཞེས་གསུངས་ཏེ་དེའི་དོན་ནི་ཚེ་གཅིག་བར་ཆད་གཅིག་པ་ཡིན་ན་ཕྱིར་མི་འོང་ཞུགས་པ་ཡིན་པས་ཁྱབ་ཅིང་དེས་ན་མཐོང་ལམ་གྱི་སྔ་རོལ་དུ་འཇིག་རྟེན་པའི་ལམ་གྱིས་བདུན་པ་དང་བརྒྱད་པ་སྤངས་ནས་ཚེ་གཅིག་ལུས་པ་ཡང་འབྲས་གནས་ཁྱད་པར་ཅན་དུ་མ་གྱུར་གྱི་བར་དུ་ཚེ་གཅིག་བར་ཆད་གཅིག་པ་མི་འགྱུར་རོ།། །།གཉིས་པ་ལ་གཉིས་ཏེ། འབྲས་གནས་ཙམ་པོ་དང་ཁྱད་པར་ཅན་ནོ། །དང་པོ་ནི། ཡང་དེ་ཉིད་ལས། དེ་དགུ་ཟད་པས་ཕྱིར་མི་འོང་། །འབྲས་བུ་ལ་གནས་པ་དེ་ཉིད་རྣམ་པ་དགུ་སྤངས་པས་ཕྱིར་མི་འོང་བ་ཡིན་པར་ལྟ་བར་བྱ་སྟེ། འདོད་པའི་ཁམས་སུ་མི་འོང་བའི་ཕྱིར་རོ། །ཀུན་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པའི་ཕྱིར། ཞེས་འབྱུང་བ་ནི་སྤངས་པ་སྡོམ་པའི་ཕྱིར་ཏེ། གདོན་མི་ཟ་བར་སྔོན་གཉིས་སམ་གསུམ་སྤངས་པ་ཡིན་ནོ། །ཞེས་གསུངས་སོ། །དེ་དག་གི་དོན་ནི་མཐོང་ལམ་ཐོབ་རྗེས་སུ་འདོད་ཉོན་དགུ་པ་སྤངས་པ་ཙམ་གྱིས་ཕྱིར་མི་འོང་འབྲས་གནས་སུ་འགྱུར་ལ། ཐ་མའི་ཆ་མཐུན་ལྔ་སྤངས་པས་ཕྱིར་མི་འོང་དུ་འགྱུར་ཞེས་པ་ནི། འདོད་ཉོན་དགུ་པ་སྤངས་པའི་ཚེ། སྤངས་པ་སྡོམ་པ་ཐོབ་པ་ཙམ་ལ་དགོངས་ཀྱི་ལྔ་པོ་ཅིག་ཅར་དུ་སྤངས་པ་ནི་མ་ཡིན་ཏེ། སྔོན་བཅུ་དྲུག་པའི་རྟོགས་པ་ཐོབ་པའི་ཚེ་འཇིག་ཚོགས་ལ་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་གསུམ་སྤངས་ཟིན་པའི་ཕྱིར་ཏེ། དེ་གསུམ་མཐོང་སྤངས་ཡིན་པའི་ཕྱིར་རོ། །གཉིས་སམ་ཞེས་པའི་དོན་ནི་མདོ་སྡེ་པས་མཐོང་ལམ་གྱིས་འཇིག་ལྟ་སྒོམ་སྤང་གི་ཆ་མི་སྤོང་བར་འདོད་པ་སྡུད་དེ། རྣམ་འགྲེལ་ལས། ལྷན་ཅིག་སྐྱེས་པ་མ་སྤངས་ཕྱིར། །ཞེས་གསུངས་པ་ལྟར་རོ། །གཉིས་པ་ལ་གཉིས་ཏེ། འབྲས་བུ་མངོན་དུ་བྱེད་ཚུལ་གྱི་སྒོ་ནས་དབྱེ་བ་དང་། ཡོན་ཏན་གྱི་སྒོ་ནས་དབྱེ་བའོ། །དང་པོ་ལ་བཞི་སྟེ། དབྱེ་བ་དངོས་དང་། མདོ་ལས་འབྱུང་བའི་རྣམ་པའི་རབ་དབྱེ་དང་། རྟེན་གྱི་ཁྱད་པར་ལ་དོགས་པ་བཅད་པ་དང་། འོག་མིན་འགྲོའི་རྒྱུ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། ཚེ་རབས་གཞན་དུ་འབྲས་བུ་མངོན་དུ་བྱེད་པ་དང་། ཚེ་འདིར་འབྲས་བུ་མངོན་དུ་བྱེད་པའོ། །དང་པོ་ལ་གཉིས་ཏེ། གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོའོ། །དང་པོ་ནི། ཡང་དེ་ཉིད་ལས། དེ་ནི་བར་སྐྱེས་འདུ་བྱེད་དང་། །འདུ་བྱེད་མེད་ཡོངས་མྱ་ངན་འདའ། །གོང་དུ་འཕོ་བ་རྣམས། འདིར་བར་མ་དོར་ཡོངས་སུ་མྱ་ངན་ལས་འདའ་བས་ན་བར་མ་དོར་ཡོངས་སུ་མྱ་ངན་ལས་འདའ་བ་སྟེ། དེ་བཞིན་དུ་སྐྱེས་པ་དང་འདུ་བྱེད་མེད་པ་ལ་ཡང་སྦྱར་བར་བྱའོ། །ཕྱིར་མི་འོང་བ་དེ་ཉིད་རྣམ་པ་ལྔ་ཡིན་ཏེ། བར་མ་དོར་ཡོངས་སུ་མྱ་ངན་ལས་འདའ་བར་ནི་སྲིད་པ་བར་མར་ཡོངས་སུ་མྱ་ངན་ལས་འདའ་བ་གང་ཡིན་པའོ། །སྐྱེས་ནས་ཡོངས་སུ་མྱ་ངན་ལས་འདའ་བ་ནི་སྐྱེས་པ་ཙམ་ལས་མི་འཆི་བར་ཕུང་པོའི་ལྷག་མ་དང་བཅས་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བ་སྟེ་རྣམ་པར་མངོན་པར་བརྩོན་པ་དང་ལམ་ངང་གིས་འབྱུང་བའི་ཕྱིར་རོ། །གཞན་དག་ན་རེ་དེ་ཡང་ཕུང་པོ་ལྷག་མ་མེད་པས་སོ་ཞེས་ཟེར་རོ། །མ་ཡིན་ཏེ། ཚེ་འདོར་བ་ལ་དབང་མེད་པའི་ཕྱིར་རོ། །མངོན་པར་འདུ་བྱེད་དང་བཅས་པས་ཡོངས་སུ་མྱ་ངན་ལས་འདའ་བ་ནི་སྐྱེས་ནས་སྦྱོར་བ་མ་བཏང་ཞིང་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་གང་ཡིན་པ་སྟེ། མངོན་པར་བརྩོན་པ་དང་ལམ་ངང་གིས་འབྱུང་བ་མ་ཡིན་པའི་ཕྱིར་རོ། །མངོན་པར་འདུ་བྱེད་པ་མེད་པར་ཡོངས་མྱ་ངན་ལས་འདའ་བ་ནི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་སྟེ། མངོན་པར་བརྩོན་པ་དང་ལམ་ངང་གིས་འབྱུང་བའི་ཕྱིར་ཞེས་གྲག་གོ །གཞན་དག་ན་རེ། འདུས་བྱས་དང་འདུས་མ་བྱས་ལ་དམིགས་པའི་ལམ་གྱིས་ཡོངས་སུ་མྱ་ངན་ལས་འདའ་བའི་ཕྱིར་རོ། །ཞེས་ཟེར་རོ། །དེ་ནི་མི་རུང་སྟེ། ཧ་ཅང་ཐལ་བར་འགྱུར་བའི་ཕྱིར་རོ། །སློབ་དཔོན་ཉིད་ཀྱི་བཞེད་པ་ནི་མདོ་ལས་ནི་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་སྔར་འབྱུང་བས་དེ་ཁོ་ན་བཞིན་དུ་རུང་སྟེ། ལམ་ངང་གིས་འབྱུང་བ་དང་། ངང་གིས་འབྱུང་བ་མ་ཡིན་པ་དག་ནི་འབད་པ་མེད་པ་དང་འབད་པས་ཐོབ་པའི་སྒོ་ནས་མངོན་པར་འདུ་བྱེད་པ་མེད་པ་དང་། མངོན་པར་འདུ་བྱེད་པས་འགྲུབ་པར་བྱ་བ་ཡིན་པའི་ཕྱིར་རོ། །སྐྱེས་ནས་ཡོངས་སུ་མྱ་ངན་ལས་འདའ་བ་ནི་ལམ་ཆེས་ངང་གིས་འབྱུང་བ་དང་། ཆེས་ཆེ་བ་དང་། ཕྲ་རྒྱས་ཆེས་ཆུང་བ་ཡིན་ནོ། །གོང་དུ་འཕོ་བ་ནི་གོང་དུ་སྐྱེས་པ་འདི་ཉིད་དུ་ཡོངས་སུ་མྱ་ངན་ལས་མི་འདའ་བར་གོང་དུ་འགྲོ་བ་གང་ཡིན་པ་སྟེ། འཕོ་བ་དང་འགྲོ་བ་ཞེས་བྱ་བ་ནི་དོན་གཅིག་གོ །དེ་ནི་བསམ་གཏན་སྤེལ་ན་འོག་མིན་འགྲོ། གོང་དུ་འཕོ་བ་དེ་ནི་རྒྱུ་དང་འབྲས་བུའི་སྒོ་ནས་རྣམ་པ་གཉིས་ཏེ། རྒྱུའི་སྒོ་ནས་བསམ་གཏན་སྤེལ་བ་དང་། སྤེལ་བ་མིན་པའི་ཕྱིར། འབྲས་བུའི་སྒོ་ནས་ནི་འོག་མིན་འགྲོ་དང་སྲིད་པའི་རྩེ་མོ་ལ་ཐུག་པའི་ཕྱིར་རོ། །དེ་ལ་གང་གིས་བསམ་གཏན་སྤེལ་བ་དེ་ནི་འོག་མིན་དུ་སོང་ནས་ཡོངས་སུ་མྱ་ངན་ལས་འདའོ། །དེ་འཕར་ཕྱེད་འཕར་ཐམས་ཅད་དུ། འཆི་འཕོ། གོང་དུ་འཕོ་བ་འོག་མིན་གྱི་མཐར་ཐུག་པ་དེ་ཡང་འཕར་བ་ལ་སོགས་པའི་བྱེ་བྲག་གིས་རྣམ་པ་གསུམ་སྟེ། དེ་ལ་འཕར་བ་ཞེས་བྱ་བ་ནི་འདིར་བསམ་གཏན་རྣམས་སྤེལ་ནས་བསམ་གཏན་དང་པོའི་རོ་མྱངས་ཏེ་བསམ་གཏན་གསུམ་ལས་ཡོངས་སུ་ཉམས་པ་ཚངས་རིས་པ་དག་གི་ནང་དུ་སྐྱེས་ནས་སྔོན་གོམས་པའི་དབང་གིས་བསམ་གཏན་བཞི་པ་སྤེལ་ཏེ། དེ་ནས་ཤི་འཕོས་ནས་འོག་མིན་པ་དག་གི་ནང་དུ་སྐྱེ་བ་གང་ཡིན་པ་སྟེ། དེ་ནི་བར་མི་འགྲོ་བས་ན་འཕར་བ་ཞེས་བྱའོ། །ཕྱེད་འཕར་བ་ཞེས་བྱ་བ་ནི་དེ་གནས་གཙང་མ་རྣམས་སུ་སྐྱེས་ལ་བར་ནས་གནས་གཞན་འགའ་ཙམ་ཡང་བརྒལ་ཏེ་འོག་མིན་དུ་འཇུག་པ་གང་ཡིན་པའོ། །འཕགས་པ་ནི་ཚངས་ཆེན་པ་དག་གི་ནང་དུ་མི་སྐྱེ་སྟེ་ལྟ་བའི་གནས་ཡིན་པའི་ཕྱིར་དང་། གཙོ་བོ་གཅིག་ཏུ་ཟད་པའི་ཕྱིར་རོ། །གནས་ཐམས་ཅད་དུ་འཆི་འཕོ་བ་ཞེས་བྱ་བ་ནི་གནས་གཞན་ཐམས་ཅད་དུ་འཕོས་ནས་འོག་མིན་དུ་འཇུག་པ་གང་ཡིན་པའོ། །ཕྱིར་མི་འོང་བ་ནི་ནམ་ཡང་སྐྱེ་བའི་སྐྱེ་མཆེད་དེ་ཉིད་དུ་ཚེ་གཉིས་པ་མངོན་པར་གྲུབ་པར་མི་བྱེད་དེ། ཁྱད་པར་དུ་འགྲོ་བ་ཡིན་པའི་ཕྱིར་རོ། །འདི་ལྟར་ན་འདིའི་ཕྱིར་མི་འོང་བ་ཉིད་ཡོངས་སུ་རྫོགས་པ་ཡིན་ཏེ། གོང་དུ་སྐྱེས་པ་དེའི་འོག་དང་དེར་གཏན་དུ་མི་འོང་བའི་ཕྱིར་རོ། །རེ་ཞིག་བསམ་གཏན་སྤེལ་ན་འོག་མིན་དུ་འགྲོ་བ་ནི་དེ་ལྟ་བུ་ཡིན་པར་རིག་པར་བྱའོ། །དེ་ལས་གཞན་སྲིད་རྩེ་མོར་འགྲོ། གོང་དུ་འཕོ་བ་བསམ་གཏན་མ་སྤེལ་བ་ནི། སྲིད་པའི་རྩེ་མོར་ཐུག་པ་ཡིན་ཏེ། དེ་ནི་སྙོམས་པར་ཞུགས་པ་གཞན་རྣམས་རོ་མྱོང་བར་བྱེད་ཅིང་གནས་གཞན་ཐམས་ཅད་དུ་སྐྱེས་ལ་གནས་གཙང་མ་རྣམས་སུ་མི་འཇུག་པ་ཁོ་ནར་གཟུགས་མེད་པར་སྐྱེ་བའི་རིམ་གྱིས་སྲིད་པའི་རྩེ་མོར་སོང་སྟེ་ཡོངས་སུ་མྱ་ངན་ལས་འདའ་བའོ། །འདི་ནི་ཞི་གནས་སྤྱད་པ་ཡིན་ནོ། །སྔ་མ་ནི་ལྷག་མཐོང་སྤྱད་པ་ཡིན་ནོ། །གོང་དུ་འཕོ་བ་བར་སྐབས་སུ་ཡོངས་སུ་མྱ་ངན་ལས་འདའ་བར་རུང་བར་ལྟའོ། །འོག་མིན་དང་སྲིད་པའི་རྩེ་མོའི་མཐར་ཐུག་པ་ཉིད་ནི་ཕན་ཆད་དུ་འགྲོ་བ་མེད་པའི་ཕྱིར་ཏེ། དཔེར་ན་རྒྱུན་དུ་ཞུགས་པ་མཆོག་ཏུ་ཐོགས་ན་ལན་བདུན་པ་ཉིད་བཞིན་ནོ། །རེ་ཞིག་དེ་དག་ནི་གཟུགས་སུ་ཉེ་བར་འགྲོ་བའི་ཕྱིར་མི་འོང་བ་ལྔ་ཡིན་ནོ། །འདི་དག་གི་དོན་ལ་བར་མ་དོར་ཡོངས་སུ་མྱ་ངན་ལས་འདའ་བས་ན་ཞེས་སོགས་ཀྱིས་ནི་འདའ་བ་བཞིའི་མྱང་འདས་མངོན་དུ་བྱེད་ཚུལ་བསྟན་ཅིང་། འདིར་བར་འདའ་བའི་སྐབས་སུ་ལྷག་མེད་དུ་འདའ་བའི་གསལ་ཁ་མ་བྱུང་ཡང་། སྐྱེས་འདའ་བ་ལ་ཕུང་པོའི་ལྷག་མ་དང་བཅས་པས་འདའ་བར་གསུངས་པ་དང་། གཞན་དག་ན་རེ་ཞེས་པའི་རྩོད་ལན་གྱི་ཤུགས་ལ་བར་འདའ་བ་ལ་ལྷག་མེད་དུ་འདའ་བར་བསྟན་ཏོ། །དེ་ལ་སྔོན་གྱི་མཁས་པ་དག་ལྷག་མེད་དུ་ཉེ་བ་ལ་དགོངས་ཞེས་དང་། ཚེ་འདོར་ལེན་ལ་དབང་མ་ཐོབ་པས་བརྟག་དགོས་ཞེས་དང་། སྐྱེ་སྲིད་ཀྱི་ཕུང་པོ་ལེན་པ་མེད་པར་མྱ་ངན་ལས་འདའ་བའི་དོན་ཏོ། །ཞེས་པའི་ལུགས་གསུམ་སྣང་ཡང་དེ་དག་ནི་ལྷག་བཅས་སུ་འདའ་བར་འདོད་པའི་ལུགས་སོ། །གནད་ཀྱི་དོན་ནི་འདི་ཡིན་ཏེ། བར་དོའི་རྟེན་ལ་མྱང་འདས་མངོན་དུ་བྱས་པ་དང་། འཆི་འཕོ་བ་དུས་མཉམ་སྟེ། མྱང་འདས་མངོན་དུ་བྱས་པའི་རྗེས་སུ་ཡང་ལྷག་བཅས་ཀྱི་རྟེན་ལ་གནས་པར་གསུངས་པ་རྣམས་ནི་སྐྱེ་སྲིད་ཀྱི་རྟེན་ཁོ་ན་ལ་དགོངས་པའི་ཕྱིར་རོ། །འདི་ཇི་ལྟར་ཤེས་ཅེ་ན་མྱང་འདས་མངོན་དུ་བྱས་ཀྱང་ཚེ་གནས་པ་ནི་རྫོགས་བྱེད་ཀྱི་ལས་ཀྱི་འབྲས་བུར་གྱུར་པའི་ཚེའི་འཕེན་པའི་དབང་གིས་གནས་པ་ཡིན་ལ། རྫོགས་བྱེད་ཀྱི་ལས་ཀྱི་འབྲས་བུར་གྱུར་པའི་ཚེ་རིང་ཐུང་སོགས་ནི་ལས་དེའི་འཕེན་བྱེད་ཀྱི་ལས་ཀྱི་འབྲས་བུ་དགོས་པའི་ངེས་པ་མེད་ཀྱང་སྤྱིར་འཕེན་བྱེད་ཀྱི་ལས་ཀྱི་འབྲས་བུར་གྱུར་པའི་རྣམ་སྨིན་གྱི་ཕུང་པོའི་སྟེང་དུ་འབྱུང་དགོས་ཤིང་། དེ་ཡང་སྐྱེ་སྲིད་ཀྱི་ཕུང་པོ་ཁོ་ན་ལ་ཡིན་པའི་ཕྱིར་ཏེ། ལུགས་འདི་ལ་རྟེན་འབྲེལ་ཡན་ལག་བཅུ་གཉིས་ཀྱིས་བསྡུས་པའི་འབྲས་བུའི་རྟེན་འབྲེལ་ཐམས་ཅད་སྐྱེ་སྲིད་ནས་འཆི་སྲིད་ཀྱི་བར་ཁོ་ན་ལ་བཞག་པར་སྣང་གི་བར་སྲིད་ལ་བཞག་པའི་ཚུལ་མི་སྣང་བའི་ཕྱིར་རོ། །ཇི་སྐད་དུ། རྣམ་ཤེས་མཚམས་སྦྱོར་ཕུང་པོ་ཡིན། །ཞེས་དང་། ཉིང་མཚམས་སྦྱོར་བ་སྐྱེ་བ་ཡིན། །ཞེས་གསུངས་སོ། །མདོར་ན་དགྲ་བཅོམ་པ་ལྷག་བཅས་ལ་གནས་པ་ནི་རྫོགས་བྱེད་ཀྱི་ལས་ཀྱི་ཚེའི་འཕེན་པ་ལ་བརྟེན་ནས་གནས་ཤིང་བར་སྲིད་ནི་དགྲ་བཅོམ་མངོན་དུ་མ་བྱས་ཀྱི་བར་རམ་སྐྱེ་སྲིད་མ་ཐོབ་ཀྱི་བར་དུ་ཅིག་ཆར་ལས་དབང་གིས་གནས་པ་ཙམ་ཡིན་གྱི་རྫོགས་བྱེད་ཀྱི་ལས་ཀྱིས་འཕེན་པའི་དབང་གིས་གནས་པ་མ་ཡིན་པས་ན་བར་སྲིད་ཀྱི་རྟེན་ཅན་གྱིས་དགྲ་བཅོམ་པ་མེད་པའི་གནད་ཀྱང་འདི་ཉིད་ཡིན་ནོ། །འདིར་སྐྱེས་ནས་འདའ་བའི་སྐབས་སུ་ཚེ་འདོར་ལེན་ལ་དབང་མ་ཐོབ་པའི་ཕྱིར་རོ་ཞེས་དང་། བར་འདའ་བ་གསུམ་གྱི་དཔེ་ལ་འགྲེལ་བཤད་རྣམས་ལས། སོག་མའི་མེ་སྟག་གནམ་དུ་ཡལ་བ་སོགས་ཀྱི་དཔེར་བརྗོད་མཛད་པའི་ཚིག་གི་ནུས་པ་དང་། རྟེན་འབྲེལ་ཡན་ལག་བཅུ་གཉིས་ཀྱི་རྒྱུ་འབྲས་ཀྱི་རྣམ་པར་གཞག་པ་ཤེས་ན་ལུགས་འདི་ལ་ངེས་པ་གཏིང་ནས་ཚུགས་པ་སྐྱེ་བར་འགྱུར་རོ། །མཁས་མཆོག་དབྱིག་གཉེན་ཐུགས་དགྱེས་པར་གྱུར་ཅིག གཞན་དག་ན་རེ་ཞེས་སོགས་ཀྱིས་ནི་འདའ་བ་ཕྱི་མ་གཉིས་ཀྱི་ཁྱད་པར་ལ་གཞན་ལུགས་འགོག་པ་བསྟན་ཏེ། འདུས་བྱས་ལ་དམིགས་པའི་ལམ་དང་། འདུས་མ་བྱས་ལ་དམིགས་པའི་ལམ་གྱིས་མྱ་ངན་ལས་འདའ་བ་དེ་གཉིས་ཀྱི་ཁྱད་ཡིན་ན། མྱ་ངན་ལས་འདའ་བ་ཐམས་ཅད་འདའ་བ་གཉིས་པ་ཡིན་པར་འགྱུར་བས་ཧ་ཅང་ཐལ་ཏེ། ཐམས་ཅད་ཀྱང་བདེན་པ་བཞི་ལ་དམིགས་པའི་ལམ་གྱིས་འདའ་བའི་ཕྱིར་རོ། །མདོ་ལས་ནི་ཞེས་སོགས་ཀྱིས་སློབ་དཔོན་རང་གི་འདོད་པ་བསྟན་ཏེ། ཚིགས་བཅད་ཀྱི་ནང་དུ་མངོན་པར་འདུ་བྱེད་དང་བཅས་པ་སྔར་འབྱུང་བ་ནི་ཚིགས་སུ་བཅད་པ་སྦྱར་བདེ་བའི་དབང་གིས་ཡིན་ལ་དོན་གྱི་རིམ་པ་ནི་མྱང་འདས་མངོན་དུ་བྱེད་པ་མྱུར་བུལ་གྱི་ཁྱད་པར་ཡིན་པས་འདུ་བྱེད་མེད་པར་འདའ་བ་སྔར་འབྱུང་བའི་ཕྱིར་རོ། །འདི་ཉིད་དོན་ལ་གནས་ཏེ། མདོ་ལས་འདུ་བྱེད་མེད་པར་འདའ་བ་སྔར་འབྱུང་བར་གསུངས་ཤིང་། ཀུན་བཏུས་ལས་ཀྱང་དེ་བཞིན་དུ་འབྱུང་ལ་དེ་དག་གི་ནི་ཁྱད་པར་རམ། ལས་དབང་ཉོན་མོངས་བྱེ་བྲག་ལས། །ཞེས་པའི་དོན་ཡང་འདི་ལ་གནས་པའི་ཕྱིར་རོ། །གོང་དུ་འཕོ་བ་ནི་ཞེས་སོགས་ཀྱིས་གོང་འཕོའི་སྒྲ་དོན་བསྟན་ཏེ། གོང་དུ་སྐྱེས་པ་དེ་ཉིད་དུ་མྱ་ངན་ལས་མི་འདའ་བར་དེའི་གོང་དུ་འགྲོ་བས་ན་གོང་འཕོར་འཇོག་པའི་ཕྱིར་རོ། །དེ་ནི་བསམ་གཏན་སྤེལ་ན་འོག་མིན་འགྲོ། །ཞེས་སོགས་ཀྱིས་ནི་གོང་འཕོ་ལ་གཉིས་སུ་ཕྱེ་ནས་འོག་མིན་མཐར་ཐུག་འགྲོའི་གོང་འཕོ་ལ་ཡང་གསུམ་དུ་དབྱེ་བ་ངོས་འཛིན་དང་བཅས་པ་བསྟན་ཏེ། གཞན་རྣམས་ནི་གོ་སླ་ལ། འདིར་བསམ་གཏན་རྣམས་སྤེལ་ནས་བསམ་གཏན་དང་པོའི་རོ་མྱངས་ཏེ་བསམ་གཏན་གསུམ་ལས་ཡོངས་སུ་ཉམས་པ་ཞེས་པའི་དོན་ནི་བསམ་གཏན་སྤེལ་བ་ནི་ཟག་མེད་གཉིས་ཀྱི་བར་དུ་ཟག་བཅས་གཅིག་སྤེལ་བ་ཡིན་ལ་རོ་མྱངས་པ་ནི་ཟག་བཅས་ཀྱི་རོ་མྱངས་པ་ཡིན་ཏེ། དག་པ་དེ་ནི་དེས་མྱོངས་བྱ། །ཞེས་གསུངས་པའི་ཕྱིར་རོ། །དག་པ་བའི་རོ་མྱངས་པས་དག་པ་བ་ལས་ཉམས་ཏེ་སྙོམས་འཇུག་ཉོན་མོངས་ཅན་དུ་འགྱུར་ཞིང་དེའི་ཚེ་ཟག་མེད་ཀྱི་བསམ་གཏན་ལས་ཀྱང་ཉམས་ཏེ་ཟག་མེད་ཀྱི་བསམ་གཏན་གྱི་དོན་ནི་དང་པོར་དག་པ་བའི་བསམ་གཏན་སྐྱེད་ནས་དེའི་འོག་ཏུ་བདག་མེད་མངོན་སུམ་དུ་རྟོགས་པའི་ཤེས་རབ་བསྐྱེད་དེ། དེ་སྐྱེས་པའི་ཚེ་སྔར་གྱི་བསམ་གཏན་དེ་བདག་མེད་མངོན་སུམ་དུ་རྟོགས་པ་འི་བསམ་གཏན་ཀྱི་ངོ་བོར་འགྱུར་བ་ལ་འཇོག་པའི་ཕྱིར་རོ། །འོ་ན་ཟག་མེད་ལམ་བདེན་ལས་ཉམས་པར་ཡོད་པ་འགྱུར་རོ་ཞེ་ན། སྤྱིར་ཟག་མེད་ལམ་བདེན་ལས་ཉམས་པ་ནི་མེད་དེ། བདག་མེད་མངོན་སུམ་དུ་རྟོགས་པའི་ཤེས་རབ་ལས་ཉམས་པ་མེད་པའི་ཕྱིར་རོ། །བསམ་གཏན་གྱི་དངོས་གཞིས་བསྡུས་པའི་ཟག་མེད་ལམ་བདེན་ལས་ཉམས་པ་ནི་ཡོད་དེ། དག་པ་བའི་བསམ་གཏན་ལས་ཉམས་པའི་ཚེ་ན་བསམ་གཏན་གྱི་དངོས་གཞི་ཟག་བཅས་ཟག་མེད་ཐམས་ཅད་ལས་ཉམས་པའི་ཕྱིར་རོ། །གཞན་དུ་ན། བསམ་གཏན་གྱི་དངོས་གཞི་ཐམས་ཅད་ལས་ཉམས་ནས་སྙོམས་འཇུག་ཉོན་མོངས་ཅན་རྒྱུད་ལྡན་ཡང་ཡིན། བསམ་གཏན་གྱི་དངོས་གཞི་ཟག་མེད་རྒྱུད་ལྡན་ཡང་ཡིན་པའི་གཞི་མཐུན་ཁས་ལེན་དགོས་པར་འགྱུར་རོ། །བྱེ་བྲག་ཏུ་སྨྲ་བའི་ལུགས་ལ་ནི་ཟག་མེད་བར་ཆད་མེད་ལམ་གྱིས་སྤངས་པའི་སྤངས་པ་ལས་ཉམས་པ་ཡོད་ཅིང་། མདོ་སྡེ་པའི་ལུགས་ལ་དེ་མེད་ཀྱང་དགྲ་བཅོམ་པ་མཐོང་ཆོས་ལ་བདེར་གནས་ལས་ཉམས་པར་གསུངས་ཤིང་མཐོང་ཆོས་ལ་བདེར་གནས་ལས་ཉམས་པ་ནི་དག་པ་བའི་བསམ་གཏན་ལ་བཞད་དེ། ཀུན་བཏུས་ཀྱི་འགྲེལ་པ་རྒྱལ་པོ་སྲས་ལས། མཐོང་བའི་ཆོས་ལ་བདེ་བར་གནས་པ་ལས་ཡོངས་སུ་ཉམས་པ་ཞེས་བྱ་བ་ནི་འཇིག་རྟེན་པའི་བསམ་གཏན་པ་རྣམས་ལས་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར་རོ། །འོ་ན་དེའི་རྒྱུད་ལ་བདག་མེད་མངོན་སུམ་དུ་རྟོགས་པའི་ཤེས་རབ་མེད་པར་འགྱུར་རོ་སྙམ་ན་བསམ་གཏན་དང་པོའི་དངོས་གཞི་ལས་ཉམས་པའི་ཚེ་བསམ་གཏན་དང་པོའི་ཉེར་བསྡོགས་ལ་བརྟེན་པའི་ཕྱིར་སྐྱོན་མེད་དོ། །གཉིས་པ་ནི། གཞན་ནི་གཟུགས་མེད་འགྲོ་རྣམ་བཞི་ཕྱིར་མི་འོང་བ་གཞན་ནི་གཟུགས་མེད་པར་ཉེ་བར་འགྲོ་བ་སྟེ་གཟུགས་ཀྱི་འདོད་ཆགས་བྲལ་བ་འདི་ནས་ཤི་འཕོས་ནས་གཟུགས་མེད་པ་དག་གི་ནང་དུ་སྐྱེ་བ་གང་ཡིན་པའོ། །དེ་ཡང་སྐྱེས་ནས་ཡོངས་སུ་མྱ་ངན་ལས་འདའ་བ་ལ་སོགས་པའི་བྱེ་བྲག་གིས་རྣམ་པ་བཞི་སྟེ། དེ་དག་ནི་ཕྱིར་མི་འོང་བ་དྲུག་ཡིན་ནོ། ཞེས་གསུངས་ཏེ་དོན་ནི་གོ་སླའོ། །གཉིས་པ་མཐོང་ཆོས་ཞི་ནི། གཞན་ནི་འདི་ལ་མྱ་ངན་འདའ། གཞན་ནི་ཚེ་འདི་ཁོ་ན་ལ་ཡོངས་སུ་མྱ་ངན་ལས་འདའ་སྟེ་མཐོང་བའི་ཆོས་ལ་ཡོངས་སུ་མྱ་ངན་ལས་འདའ་བ་དེ་ནི་བདུན་པ་ཡིན་ནོ། །ཞེས་གསུངས་ཏེ་དོན་ནི་གོ་སླའོ། །གཉིས་པ་མདོ་ལས་འབྱུང་བའི་རྣམ་པའི་རབ་དབྱེ་ལ་གཉིས་ཏེ། གཟུགས་སུ་ཉེར་འགྲོ་དགུར་བཞག་པ་དང་། སྐྱེས་བུ་དམ་པའི་འགྲོ་བ་བདུན་དུ་བཞག་པའོ། །དང་པོ་ནི་ཡང་དེ་ཉིད་ལས། གསུམ་ལ་ཡང་རྣམ་གསུམ་ཕྱེ་ནས། །གཟུགས་སུ་ཉེར་འགྲོ་དགུར་བཤད་དོ། །ཕྱིར་མི་འོང་བ་གསུམ་ལ་ཡང་རྣམ་པ་གསུམ་དུ་ཕྱེ་ནས་གཟུགས་སུ་ཉེ་བར་འགྲོ་བའི་ཕྱིར་མི་འོང་བ་དགུ་ཡིན་ནོ། །གསུམ་པོ་གང་དག་ཅེ་ན་བར་མ་དོར་དང་སྐྱེས་ནས་ཡོངས་སུ་མྱ་ངན་ལས་འདས་པ་དག་དང་། གོང་དུ་འཕོ་བའོ། །རྣམ་པ་གསུམ་དུ་ཕྱེ་བ་ཇི་ལྟ་བུ་ཞེ་ན་རེ་ཞིག་བར་མ་དོར་ཡོངས་སུ་མྱ་ངན་ལས་འདའ་བ་ནི་དཔེ་གསུམ་གྱི་མྱུར་བ་དང་མྱུར་བ་མ་ཡིན་པ་དང་། ཡུན་རིང་མོ་ཞིག་ན་ཡོངས་སུ་མྱ་ངན་ལས་འདའ་བའི་ཕྱིར་རོ། །སྐྱེས་ནས་ཡོངས་སུ་མྱ་ངན་ལས་འདའ་བ་ནི་སྐྱེས་ནས་དང་། མངོན་པར་འདུ་བྱེད་པ་དང་། མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བའི་ཕྱིར་རོ། །དེ་དག་ཐམས་ཅད་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བའི་ཕྱིར་སྐྱེས་ནས་ཡོངས་སུ་མྱ་ངན་ལས་འདའ་བ་དག་ཡིན་ནོ། །གོང་དུ་འཕོ་བ་ནི་འཕར་བ་ལ་སོགས་པའི་བྱེ་བྲག་གིས་སོ། །ཡང་ན་གསུམ་པོ་ཐམས་ཅད་མྱུར་བ་དང་མྱུར་བ་མ་ཡིན་པ་དང་ཡུན་རིང་མོ་ཞིག་ནས་ཡོངས་སུ་མྱ་ངན་ལས་འདའ་བའི་ཕྱིར་རོ། །དེ་དག་གི་ཁྱད་པར་རྣམས་ལས་དབང་ཉོན་མོངས་བྱེ་བྲག་ལས། ཕྱིར་མི་འོང་བ་གསུམ་དང་དགུ་པོ་དེ་དག་གི་ཁྱད་པར་ནི་ལས་དང་ཉོན་མོངས་པ་དང་དབང་པོའི་བྱེ་བྲག་ལས་ཏེ། རེ་ཞིག་ལས་ནི་གསུམ་ནི་གོ་རིམ་བཞིན་དུ་མངོན་པར་འགྲུབ་པ་དང་། སྐྱེས་པ་དང་ལན་གྲངས་གཞན་ལ་མྱོང་བར་འགྱུར་བའི་ལས་བསགས་པའི་ཕྱིར་དང་། ཉོན་མོངས་པ་ཀུན་ཏུ་སྤྱོད་པ་ཆུང་བ་དང་། འབྲིང་དང་། ཆེན་པོའི་ཕྱིར་དང་། དབང་པོ་ཆེན་པོ་དང་། འབྲིང་དང་། ཆུང་ངུའི་ཕྱིར་རོ། །དེ་ཉིད་ཀྱི་ཕྱིར་དེ་དག་སོ་སོའི་ཁྱད་པར་ཡང་ཅི་རིགས་པར་གསུམ་ཚན་དང་པོ་གཉིས་ནི་གོང་མ་བཞིན་དུ་ཉོན་མོངས་པ་དང་དབང་པོའི་བྱེ་བྲག་ལས་སོ། །གསུམ་ཚན་ཐ་མ་ནི་ལན་གྲངས་གཞན་ལ་མྱོང་འགྱུར་གྱི་ལས་ཀྱི་བྱེ་བྲག་ལས་ཀྱང་ཁྱད་པར་དུ་ལྟ་སྟེ། དེ་དག་ནི་ཉོན་མོངས་པ་དང་དབང་པོའི་རྣམ་པ་དགུའི་ཕྱིར་ཕྱིར་མི་འོང་བ་དགུ་ཡིན་ནོ། །ཞེས་གསུངས་སོ། །དེ་དག་གི་དོན་ལ་ཕྱིར་མི་འོང་བ་གསུམ་ལ་ཡང་ཞེས་སོགས་ཀྱིས་བར་འདའ་བ་དང་སྐྱེས་འདའ་བ་དང་། གོང་འཕོ་གསུམ་ལ་གསུམ་གསུམ་དུ་ཕྱེ་ནས་གཟུགས་སུ་ཉེར་འགྲོ་དགུར་བཞག་པ་བསྟན། དེ་དག་གི་ནི་ཁྱད་པར་རྣམས་ཞེས་སོགས་ཀྱི་གཟུགས་སུ་ཉེར་འགྲོ་དགུར་དབྱེ་བ་དང་། གསུམ་པོ་རེ་རེ་ལ་གསུམ་གསུམ་དུ་དབྱེ་བའི་སྒྲུབ་བྱེད་བསྟན་ནོ། །འོ་ན་གོང་དུ་གཟུགས་སུ་ཉེར་འགྲོའི་དབྱེ་བའི་སྐབས་སུ་བར་འདའ་བ་དང་གོང་འཕོ་རེ་རེར་བགྲངས་ནས་སྐྱེས་འདའ་བ་ལ་གསུམ་དུ་དབྱེ་བའི་རྒྱུ་མཚན་ཅི་ཡིན་སྙམ་ན་ཆོས་མངོན་པའི་མདོ་ལས་ཀྱང་། བར་མ་དོར་ཡོངས་སུ་མྱ་ངན་ལས་འདའ་བ་ནས་གོང་དུ་འཕོ་བའི་བར་ལྔ་ནི་ཞེས་དང་། མངོན་རྟོགས་རྒྱན་དང་ཀུན་བཏུས་ལས་ཀྱང་དེ་བཞིན་དུ་གསུངས་པས་ལུགས་འདི་བཀའ་དང་བསྟན་བཅོས་ཐམས་ཅད་ཀྱི་དགོངས་པར་འདུག་པས་དེའི་དགོངས་པ་ནི་ཅིས་ཀྱང་བཤད་པར་བྱ་སྟེ། སྐྱེས་འདའ་བ་ལ་གསུམ་དུ་ཕྱེ་བ་དེ་ཉིད་ཀྱིས་བར་འདའ་བ་དང་གོང་འཕོ་གཉིས་ལ་ཡང་གསུམ་གསུམ་དུ་དབྱེར་ཡོད་པར་མཚོན་པའི་ཆེད་ཡིན་ལ། གོང་འཕོ་ལ་གསུམ་དུ་མ་ཕྱེ་བ་ནི་གཟུགས་མེད་ཉེར་འགྲོའི་དབྱེ་བའི་སྐབས་སུ་གོང་འཕོ་གཅིག་ལས་མེད་པས་དེ་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར་རོ། །འོ་ན་བར་འདའ་བ་ལ་གསུམ་དུ་ཕྱེ་ནས་གཞན་གཉིས་པོ་རེ་རེར་བཞག་པས་ཀྱང་དགོས་པ་དེ་གཉིས་འགྲུབ་བོ་སྙམ་ན་མ་ཡིན་ཏེ། དེ་ལྟར་ན་གཟུགས་མེད་ཉེར་འགྲོ་ལ་སྦྱར་བའི་ཚེ་ཐོག་མར་སྐྱེས་འདའ་བ་དང་གོང་འཕོ་གཉིས་སུ་ཕྱེ་ནས་སླར་ཡང་སྐྱེས་འདའ་བ་ལ་གསུམ་དུ་དབྱེ་དགོས་པས་དབྱེ་བའི་ཚུལ་ཅུང་ཟད་དཀའ་བའི་ཕྱིར་རོ། །མདོར་ན་གཟུགས་སུ་ཉེར་འགྲོ་ལ་ལྔར་ཕྱེ་ནས་བར་འདའ་བ་དོར་ཏེ་ལྷག་མ་བཞི་པོ་གཟུགས་མེད་ཉེར་འགྲོའི་དབྱེ་བར་བཀོད་པས་གཟུགས་མེད་ཉེར་འགྲོའི་དབྱེ་བ་བདེ་བླག་ཏུ་རྟོགས་པའི་ཆེད་དུ་བཀའ་དང་བསྟན་བཅོས་ཁུངས་ཐུབ་རྣམས་ནས་དེ་ལྟར་དུ་མཛད་པར་སྣང་སྟེ། གཞན་ནི་གཟུགས་མེད་འགྲོ་རྣམ་བཞི་ཞེས་གསུངས་པ་ལས་ཤེས་སོ། །གཟུགས་སུ་ཉེར་འགྲོ་འབའ་ཞིག་གི་རྣམ་བཞག་བྱེད་པའི་ཚེ་ནི་གསུམ་ལ་ཡང་རྣམ་གསུམ་ཕྱེ་ནས། ཞེས་པ་ལྟར་གྱིས་ཆོག་གོ །ཁོ་བོ་ནི་གསུང་རབ་ཀྱི་དཀའ་བའི་གནས་ལ་འདི་བཞིན་འཆད་པ་ཡིན་གྱི་དེང་སང་གི་བྱིས་པ་མགོ་བོ་བསྐོར་བའི་ཚིག་གིས་དུས་འདའ་བ་ནི་མ་ཡིན་ནོ། །གཉིས་པ་ནི་ཡང་དེ་ཉིད་ལས། འོ་ན་མདོ་ལས་སྐྱེས་བུ་དམ་པའི་འགྲོ་བ་བདུན་བསྟན་པ་ཇི་ལྟ་བུ་ཞེ་ན། གོང་དུ་འཕོ་བ་མ་ཕྱེ་བར་དམ་པའི་འགྲོ་བ་བདུན་དུ་འདོད། གོང་དུ་འགྲོ་བའི་ཆོས་ནི་གོང་དུ་འགྲོ་བའོ། །མདོ་ལས་ནི་དེ་མ་ཕྱེ་བར་བསྟན་པའི་ཕྱིར་མདོ་ལས་སྐྱེས་བུ་དམ་པའི་འགྲོ་བ་བདུན་ཞེས་གསུངས་སོ། །ཅིའི་ཕྱིར་འདི་དག་ཁོ་ན་སྐྱེས་བུ་དམ་པའི་འགྲོ་བ་ཡིན་སློབ་པའི་འགྲོ་བ་གཞན་དག་ནི་མ་ཡིན་ཞེ་ན་གང་དག་ལ་འགྲོ་བ་འདི་དག་ཡོད་པ་དེ་དག་ནི་ལས་དམ་པ་དགེ་བ་ཁོ་ན་ལ་འཇུག་ཅིང་དམ་པ་ལ་མ་ཡིན་པ་མི་དགེ་བ་ལ་མི་འཇུག་པ་དང་འགྲོ་བ་འདི་དག་ཏུ་སོན་པ་རྣམས་ཡང་ཕྱིར་མི༷་འོང་བ་མེད་པ་ཡིན་ལ་ཇི་སྐད་དུ་བཤད་པ་འདི་གཞན་ལ་ནི་མེད་པས་དེའི་ཕྱིར། དམ་པ་དམ་མིན་འཇུག་མི་འཇུག །སོན་པ་ཕྱིར་མི་འོང་ཕྱིར་ཏེ། སྐྱེས་བུ་དམ་པའི་འགྲོ་བ་དག་ཡིན་གྱི་གཞན་དག་ནི་མ་ཡིན་ནོ། །འོ་ན་མདོ་ཁོ་ན་ལས། སྐྱེས་བུ་དམ་པ་གང་ཞེ་ན་སློབ་པའི་ཡང་དག་པའི་ལྟ་བ་དང་ལྡན་པའོ་ཞེས་རྒྱས་པར་གསུངས་པ་ཇི་ལྟ་བུ་ཞེ་ན། གཞན་དག་ལའང་སྡིག་པ་རྣམ་པ་ལྔ་གཏན་མི་བྱེད་པའི་སྡོམ་པ་ཐོབ་པའི་ཕྱིར་དང་། ཉོན་མོངས་པ་མི་དགེ་བ་ཕལ་ཆེར་སྤངས་པའི་ཕྱིར་རྣམ་གྲངས་པའི་སྐྱེས་བུ་དམ་པ་ཉིད་ཡོད་མོད་ཀྱི་འདིར་ནི་གང་དག་ལ་རྣམ་གྲངས་མེད་པར་ཡོད་པ་དེ་དག་གི་སྐབས་ཡིན་ནོ་ཞེས་གསུངས་སོ། །དེ་དག་གི་དོན་ནི་གོང་དུ་འཕོ་བ་མ་ཕྱེ་བར་ཞེས་སོགས་ཀྱིས་གཟུགས་སུ་ཉེར་འགྲོ་དགུའི་དང་པོ་དྲུག་དང་། གོང་འཕོ་གཅིག་ཏུ་བཞག་པ་རྣམས་ལ་སྐྱེས་བུ་དམ་པའི་འགྲོ་བ་བདུན་དུ་བཞག་པར་བསྟན། ཅིའི་ཕྱིར་འདི་དག་ཁོ་ན་ཞེས་སོགས་ཀྱིས་རྒྱུན་ཞུགས་དང་ཕྱིར་འོང་ལ་འགྲོ་བའི་དོན་ཚང་ཡང་སྐྱེས་བུ་དམ་པའི་དོན་མ་ཚང་། མཐོང་ཆོས་ཞི་ལ་སྐྱེས་བུ་དམ་པའི་དོན་ཚང་ཡང་འགྲོ་བའི་དོན་མ་ཚང་བས་སྐྱེས་བུ་དམ་པའི་འགྲོ་བ་མ་ཡིན་པར་བསྟན་ཏོ། །འོ་ན་གཟུགས་མེད་ཉེར་འགྲོ་སྐྱེས་བུ་དམ་པའི་འགྲོ་བ་ཡིན་ནམ་མ་ཡིན་ཞེ་ན། ཡིན་ཏེ། སྐྱེས་བུ་དམ་པ་དང་འགྲོ་བ་གཉིས་ཀྱི་དོན་ཚང་བའི་ཕྱིར་རོ། །འོ་ན་དེ་གང་གིས་བསྟན་སྙམ་ན་འགྲོ་བ་དང་པོ་གསུམ་པོ་དོར་བའི་ཕྱི་མ་བཞིས་བསྟན་ཏེ་སྐབས་འདིར་གོང་འཕོ་གཅིག་ཏུ་བསྡུས་པའི་དགོས་པ་ཡང་དེ་ཉིད་ཡིན་པས་སྔར་བཤད་པ་དང་དོན་གཅིག་གོ །འོ་ན་མདོ་ཁོ་ན་ལས་ཞེས་སོགས་ཀྱིས་རྒྱུན་ཞུགས་དང་ཕྱིར་འོང་སྐྱེས་བུ་དམ་པར་གསུངས་པ་རྣམ་གྲངས་པར་བསྟན་ཏོ། །གསུམ་པ་རྟེན་གྱི་ཁྱད་པར་ལ་དོགས་པ་བཅད་པ་ནི། ཡང་དེ་ཉིད་ལས་ཅི་ཕྱིར་མི་འོང་བ་ཚེ་ཡོངས་སུ་གྱུར་པ་ལ་ཡང་དབྱེ་བ་འདི་ཡོད་དམ་ཞེ་ན་མེད་དེ་འདི་ལྟར་འདོད་པར་ཚེ་ཡོངས་གྱུར་པས་འཕགས། ཁམས་གཞན་དུ་ནི་འགྲོ་བ་མེད། འདོད་པའི་ཁམས་སུ་ཚེ་ཡོངས་སུ་གྱུར་པའི་འཕགས་པ་ནི་ཁམས་གཞན་དུ་མི་འགྲོ་སྟེ་ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་ནས་ཡོངས་སུ་མྱ་ངན་ལས་འདའ་བའི་ཕྱིར་རོ། །གཟུགས་ཀྱི་ཁམས་སུ་ཚེ་ཡོངས་སུ་གྱུར་པ་ནི་གལ་ཏེ་ན་གཟུགས་མེད་པའི་ཁམས་དག་ཏུ་ཡང་འཇུག་སྟེ། གོང་དུ་འཕོ་བ་སྲིད་པའི་རྩེ་མོའི་མཐར་ཐུག་པ་གང་ཡིན་པའོ། །འོ་ན་བརྒྱ་བྱིན་གྱིས་བདག་ནི་ཐ་མར་ཉམས་ན་ལྷ་གང་འོག་མིན་ཞེས་རྣམ་པར་གྲགས་པ་དེར་ནི་སྐྱེ་བར་འགྱུར་བར་ཤོག ཅེས་གང་སྨྲས་པ་ཇི་ལྟ་བུ་ཞེ་ན་བྱེ་བྲག་ཏུ་སྨྲ་བ་རྣམས་ན་རེ། ཆོས་མངོན་པ་མངོན་པར་མི་ཤེས་པའི་ཕྱིར་དང་། ཡང་དག་པར་དགའ་བར་བྱ་བ་ཡིན་པའི་ཕྱིར། བཅོམ་ལྡན་འདས་ཀྱིས་ཀྱང་མ་བཀག་གོ །ཞེས་ཟེར་རོ། །དེ་དང་གོང་མར་སྐྱེས་པ་ནི། །ཡོངས་ཉམས་དབང་པོ་འཕོ་མི་བསྟེན། །འདོད་པའི་ཁམས་སུ་ཚེ་ཡོངས་སུ་གྱུར་པའི་འཕགས་པ་དེ་དང་ཁམས་གོང་མར་སྐྱེས་པའི་འཕགས་པ་ནི་དབང་པོ་རྣམས་ཀྱང་མི་འཕོ་ལ་ཇི་ལྟར་ཡང་ཡོངས་སུ་ཉམས་པར་མི་འགྱུར་རོ། །ཅི་ཕྱིར་འཕགས་པ་ཚེ་གཞན་དུ་ཡོངས་སུ་གྱུར་པ་གཟུགས་དང་གཟུགས་མེད་པར་འཇུག་པ་དང་། དབང་པོ་འཕོ་བ་དང་ཡོངས་སུ་ཉམས་པ་དག་ཏུ་མི་འདོད་ཅེ་ན། འདི་ལྟར་མེད་པའི་ཕྱིར་རོ། །ཅི་ཕྱིར་མེད་ཅེ་ན། ཚེ་རབས་གཞན་ནས་ཡོངས་སུ་འདྲིས་པས། དབང་པོ་རྣམས་ཡོངས་སུ་སྨིན་པའི་ཕྱིར་དང་། རྟེན་ཁྱད་པར་ཅན་ཐོབ་པའི་ཕྱིར་རོ། །ཅིའི་ཕྱིར་སློབ་པ་འདོད་ཆགས་དང་མ་བྲལ་བ་བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་ཞེ་ན། ལམ་ལ་མ་འདྲིས་པས་མངོན་སུམ་དུ་མི་འགྱུར་བའི་ཕྱིར་དང་། ཕྲ་རྒྱས་རྣམས་ཤིན་ཏུ་ཆུང་བ་མིན་པའི་ཕྱིར། བྱེ་བྲག་ཏུ་སྨྲ་བ་རྣམས་ན་རེ། འདོད་པའི་ཁམས་ལས་འདའ་བར་དཀའ་བའི་ཕྱིར་ཏེ། འདིས་ཉོན་མོངས་པ་མི་དགེ་བ་དང་། ལུང་དུ་མ་བསྟན་པ་སྤངས་པ་དང་། དགེ་སྦྱོང་གི་ཚུལ་གྱི་འབྲས་བུ་གཉིས་སམ་གསུམ་ཐོབ་པ་དང་། ཁམས་གསུམ་ལས་ཡང་དག་པར་འདའ་བ་སྟེ། མང་པོ་ཞིག་བྱ་དགོས་ལ་དེ་ཡང་སྲིད་པ་བར་མ་ལ་གནས་པས་བྱ་བར་མི་ནུས་སོ། །ཞེས་ཟེར་རོ། །དེ་དག་གི་དོན་ལ་ཅི་ཕྱིར་མི་འོང་བ་ཚེ་ཡོངས་སུ་གྱུར་པ་ལ་ཡང་ཞེས་སོགས་ཀྱིས་ནི་གོང་དུ་བཤད་པའི་དབྱེ་བ་དེ་དག་མཐོང་ལམ་ཐོབ་པའི་ལུས་རྟེན་མ་དོར་བ་ལ་འཇོག་པར་བསྟན་ཏེ། མཐོང་ལམ་ཐོབ་པའི་ལུས་རྟེན་དོར་བའི་འདོད་པའི་རྟེན་ཅན་ནི་ཁམས་གོང་དུ་འགྲོ་བ་མེད་པས་གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོ་འཇོག་ཏུ་མི་རུང་བའི་ཕྱིར་དང་། མཐོང་ལམ་ཐོབ་པའི་ལུས་རྟེན་དོར་བ་དེ་ཉིད་ཀྱིས་མཐོང་ཆོས་ཞི་ཡིན་པར་འགལ་བའི་ཕྱིར་རོ། །གཟུགས་ཀྱི་ཁམས་སུ་ཞེས་སོགས་ཀྱིས་གཟུགས་ཀྱི་ཁམས་ཀྱི་ཚེ་ཡོངས་གྱུར་གྱི་འཕགས་པ་ཁམས་གཞན་དུ་འགྲོ་བ་ཡོད་པར་བསྟན་ཏེ། འོ་ན་བརྒྱ་བྱིན་གྱིས་ཞེས་སོགས་ཀྱིས་ནི་འདོད་པར་ཚེ་ཡོངས་གྱུར་གྱི་འཕགས་པ་ཁམས་གཞན་དུ་འགྲོ་བ་མེད་པ་ལ་རྩོད་པ་སྤང་བ་བསྟན་ནོ། །དེ་དང་གོང་མར་སྐྱེས་པ་ནི། །ཞེས་སོགས་ཀྱིས་ཚེ་ཡོངས་གྱུར་གྱི་འཕགས་པའི་ཁྱད་ཆོས་བསྟན་ཏེ་གོ་སླའོ། །ཅི་ཕྱིར་སློབ་པ་ཞེས་སོགས་ཀྱིས་རྒྱུན་ཞུགས་དང་ཕྱིར་འོང་ལ་བར་འདའ་བ་མེད་པའི་སྒྲུབ་བྱེད་སློབ་དཔོན་རང་གི་བཞེད་པ་བསྟན་ཏེ། བར་སྲིད་ཀྱི་རྟེན་ཅན་གྱི་རྒྱུན་ཞུགས་དང་། ཕྱིར་འོང་དེས་འདོད་ཉོན་མ་སྤངས་པས་ཕྲ་རྒྱས་ཤིན་ཏུ་ཆུང་བ་མིན་པའི་ཕྱིར་དང་། འཕགས་ལམ་ལ་མ་འདྲིས་པས་བར་སྲིད་ཀྱི་སྐབས་སུ་མངོན་སུམ་དུ་ཡང་མི་འགྱུར་བའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ན་རེ། ཞེས་སོགས་ཀྱིས་སྔར་གྱི་དེའི་སྒྲུབ་བྱེད་བྱེ་བྲག་ཏུ་སྨྲ་བའི་ལུགས་སྟོན་ཏེ། བར་སྲིད་ཀྱི་རྟེན་ལ་འདོད་པའི་ཁམས་ལས་འདའ་བ་སྟོན་པའི་ཕྱིར་ཏེ། བར་སྲིད་ཀྱི་རྟེན་ཅན་གྱི་རྒྱུན་ཞུགས་དང་། ཕྱིར་འོང་གི་དགྲ་བཅོམ་གྱི་འབྲས་བུ་ཐོབ་པ་ལ་འདོད་ཉོན་མ་སྤངས་པས་ཉོན་མོངས་པ་མི་དགེ་བ་དང་ལུང་མ་བསྟན་གཉིས་སྤང་དགོས་པ་དང་། དགེ་སྦྱོང་ཚུལ་གྱི་འབྲས་བུ་ཕྱིར་འོང་གིས་གཉིས་སམ་རྒྱུན་ཞུགས་ཀྱིས་གསུམ་ཐོབ་དགོས་པ་དང་། འདོད་པའི་ཁམས་ལས་ཀྱང་མ་འདས་པས་ཁམས་གསུམ་ཀར་ལས་འདའ་བ་སྟེ་མང་པོ་ཞིག་བྱ་དགོས་ལ་དེ་ནི་བར་སྲིད་གང་གི་རྟེན་ལའང་བྱ་བར་མི་ནུས་པའི་ཕྱིར་ཞེས་ཟེར་རོ། །བཞི་པ་འོག་མིན་འགྲོའི་རྒྱུ་བྱེ་བྲག་ཏུ་བཤད་པ་ནི། ཡང་དེ་ཉིད་ལས། དེ་ནི་བསམ་གཏན་སྤེལ་ན་འོག་མིན་འགྲོ་ཞེས་བཤད་པ་ཡང་དང་པོ་ཉིད་དུ་བསམ་གཏན་གང་སྤེལ་བར་བྱེད་ཅེ་ན། དང་པོ་བཞི་པ་སྤེལ་བར་བྱེད། ཏིང་ངེ་འཛིན་དེ་ནི་ཐམས་ཅད་ལ་ལས་སུ་རུང་བ་དང་། ལམ་སླ་བ་རྣམས་ཀྱི་ནང་ནས་མཆོག་ཡིན་པའི་ཕྱིར་རོ། །འདི་ལྟར་སྤེལ་བར་བྱེད་དེ། དགྲ་བཅོམ་པའམ་ཕྱིར་མི་འོང་བའང་རུང་ཟག་མེད་ཀྱི་བསམ་གཏན་བཞི་པ་ལ་རྒྱུན་དང་ལྡན་པར་སྙོམས་པར་འཇུག་ཅིང་དེ་ལས་ལངས་ནས་དེ་ཉིད་ཟག་པ་དང་བཅས་པ་རྒྱུན་དང་ལྡན་པ་ལ་སྙོམས་པར་འཇུག་ལ། ཡང་ཟག་པ་མེད་པ་ལ་སྙོམས་པར་ཞུགས་པ་སྟེ་དེ་བཞིན་དུ་རྒྱུན་ཕྲི་ནས་གང་གི་ཚེ་སྐད་ཅིག་མ་གཉིས་ཟག་པ་མེད་པ་ལ་སྙོམས་པར་འཇུག་ཅིང་། སྐད་ཅིག་མ་གཉིས་ཟག་པ་དང་བཅས་པ་ལ་སྙོམས་པར་འཇུག་ལ་ཡང་ཟག་པ་མེད་པ་ལ་སྙོམས་པར་འཇུག་གོ །ཞེས་གྲགས་ཏེ་འདི་ཉིད་སྤེལ་བའི་སྦྱོར་བ་ཡིན་ནོ་ལོ། །སྐད་ཅིག་མ་ནི་བསྲེས་པས་འགྲུབ། བྱེ་བྲག་ཏུ་སྨྲ་བ་རྣམས་ན་རེ། གང་གི་ཚེ་ཟག་པ་མེད་པའི་སྐད་ཅིག་མའི་མཇུག་ཐོག་ཏུ་ཟག་པ་དང་བཅས་པ་མངོན་སུམ་དུ་བྱེད་ཅིང་ཟག་པ་དང་བཅས་པའི་མཇུག་ཐོག་ཏུ་ཡང་ཟག་པ་མེད་པ་མངོན་སུམ་དུ་བྱེད་པ་དེ་ལྟར་ཟག་པ་དང་བཅས་པའི་སྐད་ཅིག་མ་དང་ཟག་པ་མེད་པ་དག་ཏུ་བསྲེས་པས་སྤེལ་བ་གྲུབ་པ་ཡིན་ཏེ་སྐད་ཅིག་མ་གཉིས་ནི་བར་ཆད་མེད་པའི་ལམ་དུ་ཡིན་ལ་གསུམ་པ་ནི་རྣམ་པར་གྲོལ་བའི་ལམ་དུ་ཡིན་ནོ་ཞེས་ཟེར་རོ། །དེ་ལྟར་བསམ་གཏན་བཞི་པ་སྤེལ་ནས་དེའི་སྟོབས་ཀྱིས་གཞན་དང་གཞན་དག་ཀྱང་སྤེལ་བར་བྱེད་དེ། དང་པོར་འདོད་པའི་ཁམས་སུ་གླིང་གསུམ་དག་ཏུ་སྤེལ་བར་བྱེད་ལ་ཕྱིས་ནི་ཡོངས་སུ་ཉམས་པས་གཟུགས་ཀྱི་ཁམས་སུ་སྤེལ་བར་བྱེད་དོ། །སངས་རྒྱས་མ་གཏོགས་པས་སྐད་ཅིག་མ་སྤེལ་བར་མི་ནུས་ཏེ། དེའི་ཕྱིར་རྒྱུན་ཆགས་གསུམ་ལ་ཇི་སྲིད་དུ་འདོད་པར་སྙོམས་པར་འཇུག་པའི་སྒོ་ནས་རྫོགས་པ་ཡིན་ནོ་ཞེས་བྱ་བར་ལྟའོ། །ཅིའི་ཕྱིར་བསམ་གཏན་སྤེལ་བར་བྱེད་ཅེ་ན། སྐྱེ་དང་གནས་པར་བྱ་ཕྱིར་དང་། །ཉོན་མོངས་པས་ནི་འཇིགས་ཕྱིར་ཡང་། །རྒྱུ་གསུམ་གྱིས་ན་བསམ་གཏན་སྤེལ་བར་བྱེད་དེ། ཕྱིར་མི་འོང་བ་དབང་པོ་རྣོན་པོ་རྣམས་ནི་གནས་གཙང་མར་སྐྱེ་བར་བྱ་བའི་ཕྱིར་དང་། མཐོང་བའི་ཆོས་ལ་བདེ་བར་གནས་པའི་ཕྱིར་རོ། །དབང་པོ་རྟུལ་པོ་རྣམས་ནི་ཉོན་མོངས་པས་ཡང་འཇིག་པའི་ཕྱིར་ཏེ། རོ་མྱང་བ་དང་མཚུངས་པར་ལྡན་པའི་ཏིང་ངེ་འཛིན་ཐག་བསྲིང་བའི་སྒོ་ནས་ཡོངས་སུ་མི་ཉམས་པར་བྱ་བའི་ཕྱིར་རོ། །དགྲ་བཅོམ་པ་ནི་དབང་པོ་རྣོན་པོ་རྣམས་ནི་མཐོང་བའི་ཆོས་ལ་བདེ་བར་གནས་པའི་ཕྱིར་རོ། །དབང་པོ་རྟུལ་པོ་རྣམས་ནི་ཉོན་མོངས་པས་འཇིགས་པའི་ཡང་ཕྱིར་ཏེ། ཡོངས་སུ་མི་ཉམས་པར་བྱ་བའི་ཕྱིར་རོ། །ཡང་ཅིའི་ཕྱིར་གནས་གཙང་མར་སྐྱེས་པ་ལྔ་ཁོ་ན་ཡིན་ཞེ་ན་བསམ་གཏན་བཞི་པ་སྤེལ་མར་བསྒོམ་པར་བཤད་པ་གང་ཡིན་པ་དེ་ནི་རྣམ་པ་ལྔའི་ཕྱིར། གནས་གཙང་སྐྱེ་བ་ལྔ་ཁོ་ན་སྤེལ་མར་བསྒོམ་པ་དེ་ནི་ཆུང་ངུ་དང་འབྲིང་དང་ཆེན་པོ་ཤིན་ཏུ་ཆེ་བ་དང་ཤིན་ཏུ་ཆེས་ཆེ་བའི་བྱེ་བྲག་གི་རྣམ་པ་ལྔ་ཡིན་ཏེ། དང་པོ་ལ་ནི་ཟག་པ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་སེམས་གསུམ་མངོན་དུ་བྱེད་དོ། །གཉིས་པ་ལ་ནི་དྲུག་གོ །གསུམ་པ་ལ་ནི་དགུའོ། །བཞི་པ་ལ་ནི་བཅུ་གཉིས་སོ། །ལྔ་པ་ལ་ནི་བཅོ་ལྔ་སྟེ། དེ་དག་གི་འབྲས་བུ་ནི་གྲངས་བཞིན་དུ་གནས་གཙང་མ་ལྔ་ཡིན་ལ་དེ་ལ་ཟག་པ་དང་བཅས་པ་གང་ཡིན་པའི་དབང་གིས་དེ་དག་ཏུ་སྐྱེའོ། །གཞན་དག་ན་རེ། དད་པའི་དབང་པོ་ལ་སོགས་པ་ལྷག་པའི་ཕྱིར་ལྔ་ཡིན་ནོ། །ཞེས་ཟེར་རོ། །ཞེས་གསུངས་སོ། །དེ་དག་གི་དོན་ལ་དེ་ནས་བསམ་གཏན་སྤེལ་ནས་འོག་མིན་འགྲོ། ཞེས་སོགས་ཀྱི་འོག་མིན་མཐར་ཐུག་འགྲོའི་རྒྱུ་ལ་བསམ་གཏན་སྤེལ་སྒོམ་དགོས་པས་དང་པོར་གང་སྤེལ་བ་དང་ཚུལ་ཇི་ལྟར་སྤེལ་བ་དང་། གྲུབ་པའི་ཚད་དང་། རྟེན་གང་ལ་སྤེལ་བ་རྣམས་བསྟན་ནོ། །སངས་རྒྱས་མ་གཏོགས་པས་ཞེས་སོགས་ཀྱིས་གྲུབ་པའི་ཚད་སློབ་དཔོན་རང་གི་བཞེད་པ་བསྟན་ནོ། །ཅིའི་ཕྱིར་བསམ་གཏན་སྤེལ་བར་བྱེད་ཅེ་ན། ཞེས་སོགས་ཀྱིས་བསམ་གཏན་སྤེལ་སྒོམ་བྱེད་པའི་དགོས་པ་བསྟན། གཞན་དག་ན་རེ་ཞེས་སོགས་ཀྱིས་བཙུན་པ་དཔལ་ལེན་གྱིས་དད་པའི་དབང་པོ་ལ་སོགས་པ་ལྔ་ལྷག་པའི་ཕྱིར། གནས་གཙང་མ་ལྔར་ངེས་པར་འདོད་པ་བསྟན་ནོ། །གཉིས་པ་ཡོན་ཏན་གྱི་སྒོ་ནས་དབྱེ་བ་ནི། ཡང་དེ་ཉིད་ལས། འགོག་པ་ཐོབ་པའི་ཕྱིར་མི་འོང་། །ལུས་ཀྱིས་མངོན་པར་བྱེད་པར་འདོད། །འདི་ལ་འགོག་པ་ཐོབ་པ་ཡོད་པས་ན་འགོག་པ་ཐོབ་པ་སྟེ། ཕྱིར་མི་འོང་བ་གང་ལ་ལ་འགོག་པ་དེ་ནི་མྱ་ངན་ལས་འདས་པ་དང་འདྲ་བའི་ཆོས་ལུས་ཀྱིས་མངོན་སུམ་དུ་བྱེད་པའི་ཕྱིར་ལུས་ཀྱིས་མངོན་སུམ་དུ་བྱེད་པ་ཞེས་བྱ་བའོ། །ཇི་ལྟར་ན་ལུས་ཀྱིས་མངོན་སུམ་དུ་བྱེད་ཅེ་ན། སེམས་མེད་པས་ལུས་ལ་བརྟེན་ཏེ་སྐྱེ་བའི་ཕྱིར་རོ། །འདི་ལྟ་བུ་ཡིན་པར་འགྱུར་ཏེ། དེ་འགོག་པ་དེ་ལས་ལངས་ནས་གང་ལས་དེ་འདི་སྙམ་དུ། ཀྱེ་མ་འགོག་པའི་སྙོམས་པར་འཇུག་པ་ནི་མྱ་ངན་ལས་འདས་པ་དང་འདྲ་བར་ཞི་བ་ཡིན་ནོ་སྙམ་དུ་སེམས་པར་གྱུར་པ་རྣམ་པར་ཤེས་པ་དང་བཅས་པའི་ལུས་ཞི་བ་སྔོན་མ་ཐོབ་པ་ཐོབ་པར་འགྱུར་ཏེ། དེ་ལྟར་ན་འདིས་དེའི་ཞི་བ་ཉིད་ལུས་ཀྱིས་མངོན་དུ་བྱས་པ་ཡིན་ཏེ། ཐོབ་པ་དང་ཤེས་པས་མངོན་སུམ་དུ་བྱེད་པ་དག་གི་མངོན་སུམ་དུ་གྱུར་པ་ནི་མངོན་དུ་བྱེད་པ་ཡིན་ནོ། །ཞེས་སོགས་གསུངས་ཞིང་དེའི་དོན་ལ་འདི་ལ་འགོག་པ་ཐོབ་པ་ཡོད་པས་ན་ཞེས་སོགས་ཀྱིས་ལུས་ཀྱིས་མངོན་སུམ་དུ་བྱེད་པའི་སྒྲ་དོན་བྱེ་བྲག་ཏུ་སྨྲ་བའི་ལུགས་བསྟན་ཏེ། འགོག་པ་ལ་སྙོམས་པར་འཇུག་པའི་སྐབས་སུ་སེམས་མེད་པའི་གྲུབ་མཐའ་ལ་བརྟེན་པའོ། །འདི་ལྟ་བུ་ཡིན་པར་འགྱུར་ཏེ་ཞེས་སོགས་ཀྱིས་སློབ་དཔོན་གྱི་བཞེད་པ་བསྟན་ཏེ། འགོག་པའི་སྙོམས་འཇུག་ལས་ལངས་པའི་སྐབས་སུ་རྣམ་ཤེས་དང་བཅས་པའི་ལུས་ཀྱིས་སྔར་གྱི་འགོག་སྙོམས་ཞི་བ་ཡིན་པའི་ངེས་ཤེས་མངོན་དུ་བྱེད་པ་ལ་དགོངས་སོ། །མདོར་ན་སྔ་མས་ནི་སྙོམས་པར་འཇུག་པའི་སྐབས་ལ་དགོངས་ནས་སེམས་མེད་པའི་ལུས་ཀྱིས་མངོན་དུ་བྱེད་ཅེས་པ་དང་། ཕྱི་མས་ནི་སྙོམས་འཇུག་ལས་ལངས་པའི་སྐབས་ལ་དགོངས་ནས་སེམས་དང་བཅས་པའི་ལུས་ཀྱིས་མངོན་སུམ་དུ་བྱེད་ཅེས་པ་ནི་ཁྱད་པར་རོ། །སྔར་བཤད་པ་དེ་དག་ལ་མཐོང་ཆོས་ཞི་ཡན་ཆད་ནི་མཐོང་ལམ་ཐོབ་པའི་ལུས་རྟེན་མ་དོར་བ་ཁོ་ན་དང་། ཚེ་ཡོངས་གྱུར་གྱི་འཕགས་པ་ནི་མཐོང་ལམ་ཐོབ་པའི་ལུས་རྟེན་དོར་བ་ཁོ་ན་དང་། ལུས་མངོན་བྱེད་ནི་དོར་མ་དོར་གཉིས་ཀ་ཡོད་པའི་དབང་དུ་བྱས་ནས་གོ་རིམ་བཞིན་དུ་བསྟན་པར་ཤེས་པར་བྱའོ། །དེ་དག་ནི་དབྱེ་བ་ཆེ་ལོང་ཙམ་ཡིན་ལ། ཞིབ་ཏུ་ཕྱེ་ན་ཕྱིར་མི་འོང་བ་ཁྲི་ཉིས་སྟོང་དགུ་བརྒྱ་རྩ་དྲུག་ཅུར་འགྱུར་བ་ཡང་གསུངས་མོད་ཀྱི་ཧ་ཅང་ཡང་མངས་སུ་དོགས་ནས་མ་སྤྲོས་སོ། །བཞི་པ་དགྲ་བཅོམ་ཞུགས་པ་ནི། ཡང་དེ་ཉིད་ལས། སྲིད་རྩེའི་བར་ཆད་བརྒྱད་ཟད་པ། །དགྲ་བཅོམ་ཉིད་ལ་ཞུགས་པ་ཡིན། །ཕྱིར་མི་འོང་བ་ཞེས་བྱ་བའི་དབང་དུ་བྱས་པ་སྟེ། ཡང་ཕྱིར་མི་འོང་བ་དེ་བསམ་གཏན་དང་པོའི་རྣམ་པ་གཅིག་ལས་འདོད་ཆགས་དང་བྲལ་བ་ནས་བཟུང་སྟེ་སྲིད་པའི་རྩེ་མོའི་རྣམ་པ་བརྒྱད་ཀྱི་བར་སྤངས་པས་དགྲ་བཅོམ་པ་ཉིད་ལ་ཞུགས་པ་ཡིན་ནོ། །དགུ་པའི་བར་ཆད་མེད་ལམ་ཡང་དེ་སྲིད་པའི་རྩེ་མོ་པའི་རྣམ་པ་དགུ་པ་སྤོང་བར་བྱེད་པའི་བར་ཆད་མེད་པའི་ལམ་ལ་གནས་པ་ན་ཡང་དགྲ་བཅོམ་པ་ཉིད་ལ་ཞུགས་པ་ཁོ་ན་ཡིན་ནོ། །དེ་ནི་རྡོ་རྗེ་ལྟ་བུ་ཡིན། བར་ཆད་མེད་པའི་ལམ་དེ་ནི་ཕྲ་རྒྱས་ཐམས་ཅད་འཇོམས་པ་ཡིན་པའི་ཕྱིར། རྡོ་རྗེ་ལྟ་བུའི་ཏིང་ངེ་འཛིན་ཅེས་བྱའོ། །བཅོམ་ཟིན་པའི་ཕྱིར་འདིས་ཐམས་ཅད་འཇོམས་པ་མ་ཡིན་གྱི། བར་ཆད་མེད་པའི་ལམ་ཐམས་ཅད་ཀྱི་ནང་ན་ཤིན་ཏུ་ཆེ་བ་ཡིན་པའི་ཕྱིར། འཇོམས་པར་ནུས་པ་ཡིན་ནོ་ཞེས་གསུངས་སོ། །དེའི་དོན་ལ་སྲིད་རྩེའི་བར་ཆད་བརྒྱད་ཟད་པ་ཞེས་སོགས་ཀྱིས་བསམ་གཏན་དང་པོའི་ཉོན་མོངས་དང་པོ་སྤང་བ་ལ་བརྩོན་པ་ནས་སྲིད་ཉོན་བརྒྱད་པ་སྤངས་པའི་བར་གྱི་ཕྱིར་མི་འོང་རྣམས་དགྲ་བཅོམ་ཞུགས་པ་ཡིན་པར་བསྟན་ཏེ། ཅིག་ཅར་བ་མེད་པའི་ལུགས་སོ། །དགུ་པའི་བར་ཆད་མེད་ལམ་ཡང་ཞེས་སོགས་ཀྱིས་ནི་སྲིད་ཉོན་དགུ་པ་སྤོང་བའི་བར་ཆད་མེད་ལམ་ལ་གནས་པ་ཡང་དགྲ་བཅོམ་ཞུགས་པ་ཡིན་པར་བསྟན་ཅིང་། དེ་ནི་རྡོ་རྗེ་ལྟ་བུ་ཡིན་ཞེས་སོགས་ཀྱིས་བར་ཆད་མེད་ལམ་དེ་རྡོ་རྗེ་ལྟ་བུར་འཇོག་པའི་སྒྲ་དོན་བསྟན་ནོ། །སྒོམ་ལམ་ལ་གནས་པའི་གང་ཟག་བསྟན་ཟིན་ཏོ། །གསུམ་པ་མི་སློབ་ལམ་ལ་གནས་པའི་གང་ཟག་ལ་གཉིས་ཏེ། ངོ་བོ་དང་། དབྱེ་བའོ། །དང་པོ་ནི། ཡང་དེ་ཉིད་དུ། གང་སྲིད་པའི་རྩེ་མོ་པའི་རྣམ་པ་དགུ་པར་བཤད་པ་རྡོ་རྗེ་ལྟ་བུའི་སྤངས་པ་གང་ཡིན་པ། དེ་ཟད་ཐོབ་དང་ཟད་པ་ཤེས། །རྣམ་པ་དགུ་པ་དེ་ཟད་པའི་ཐོབ་པ་དང་ལྷན་ཅིག་ཏུ་ཟད་པ་ཤེས་པ་སྐྱེས་ཏེ། རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོག་ཏུ་རྣམ་པར་གྲོལ་བའི་ལམ་ཐ་མ་སྐྱེ་བ་ཡིན་ནོ། །དེ་ཉིད་ཀྱི་ཕྱིར་དེ་ནི་དང་པོ་ཉིད་དུ་ཟག་པ་ཐམས་ཅད་ཟད་པའི་འཐོབ་པ་དང་ལྷན་ཅིག་སྐྱེ་བའི་ཕྱིར་ཟད་པ་ཤེས་པ་ཡིན་ནོ། །དེ་ཚེ་དེ་མི་སློབ་དགྲ་བཅོམ། །ཡང་དགྲ་བཅོམ་པ་ཉིད་ལ་ཞུགས་པ་དེ་ཟད་པ་ཤེས་པ་སྐྱེས་ན་མི་སློབ་པ་དང་དགྲ་བཅོམ་པ་ཉིད་ཀྱི་འབྲས་བུ་ཐོབ་པ་ཡིན་གྱི་འབྲས་བུ་གཞན་གྱི་ཕྱིར་བསླབ་པར་བྱ་བ་མེད་པའི་ཕྱིར་མི་སློབ་པ་ཡིན་ནོ། །དེ་ཉིད་ཀྱི་ཕྱིར་དེ་ནི་གཞན་གྱི་དོན་བྱེད་པར་འོས་པའི་ཕྱིར་དང་། འདོད་ཆགས་དང་བཅས་པ་ཐམས་ཅད་ཀྱི་མཆོད་པར་འོས་པའི་ཕྱིར་དགྲ་བཅོམ་པ་ཡིན་ནོ་ཞེས་གསུངས་སོ། །དེ་དག་གི་དོན་ལ་གང་སྲིད་པའི་རྩེ་མོ་པའི་རྣམ་པ་དགུ་པར་བཤད་པ་ཅེས་སོགས་ཀྱིས་སྲིད་ཉོན་དགུ་པ་ཟད་པའི་ཐོབ་པ་དང་ཟད་པ་ཤེས་པ་དུས་གཅིག་ཏུ་སྐྱེ་བའི་ཚུལ་དང་། ཟད་པ་ཤེས་པའི་སྒྲ་དོན་བསྟན། དེ་ཚེ་དེ་མི་སློབ་དགྲ་བཅོམ། །ཞེས་སོགས་ཀྱིས་ཟད་པ་ཤེས་པ་སྐྱེས་པའི་ཚེ་སྔར་གྱི་དགྲ་བཅོམ་ཞུགས་པ་དེ་མི་སློབ་པ་དང་། དགྲ་བཅོམ་པར་འགྱུར་བའི་ཚུལ་དང་། དགྲ་བཅོམ་གྱི་སྒྲ་དོན་བསྟན་ནོ། །གཉིས་པ་ནི་ཡང་དེ་ཉིད་དུ། ཇི་སྐད་དུ། གལ་ཏེ་མི་གཡོ་ཟད་ཤེས་ལས། །མི་སྐྱེ་བའི་བློ་གྲོས་ཞེས་བཤད་པ་དེ། ཅི་དགྲ་བཅོམ་པ་ལ་ཡང་དབྱེ་བ་ཡོད་དམ་ཞེ་ན་སྨྲས་པ་ཡོད་དེ། དགྲ་བཅོམ་དྲུག་འདོད། མདོ་ལས་དགྲ་བཅོམ་པ་དྲུག་གསུངས་ཏེ། ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་བསྐྱོད་པ་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་ནོ། །དེ་དག་ལས་ལྔ་ནི་དད་པས་མོས་ལས་སྐྱེས། མི་གཡོ་བའི་ཆོས་ཅན་མ་གཏོགས་པ་གཞན་ལྔ་ནི་དད་པས་མོས་པ་སྔོན་དུ་འགྲོ་བ་དག་ཡིན་ནོ། །དེ་དག་རྣམ་གྲོལ་དུས་དང་སྦྱོར། །ལྔ་པོ་འདི་དག་གིས་སེམས་ཀྱི་རྣམ་པར་གྲོལ་བ་ནི་དུས་དང་སྦྱོར་བ་ལ་འཕངས་པ་ཡིན་པར་རིག་པར་བྱ་སྟེ། རྟག་ཏུ་རྗེས་སུ་བསྲུང་བའི་ཕྱིར་རོ། །དེ་ཉིད་ཀྱི་ཕྱིར་འདི་དག་ནི་དུས་ཀྱིས་རྣམ་པར་གྲོལ་བ་ཞེས་བྱའོ། །འདི་དག་ནི་དུས་ལ་ལྟོས་པ་ཡང་ཡིན་ལ་རྣམ་པར་གྲོལ་བ་ཡང་ཡིན་པས་དུས་ཀྱིས་རྣམ་པར་གྲོལ་བ་དག་སྟེ་བར་གྱི་ཚིག་མི་མངོན་པར་བྱས་པའི་ཕྱིར་མར་གྱི་བུམ་པ་བཞིན་ནོ། །འདི་དག་གི་ཏིང་ངེ་འཛིན་མངོན་སུམ་དུ་གྱུར་པ་ནི་ཡོ་བྱད་དང་ནད་མེད་པ་དང་། ཡུལ་གྱི་བྱེ་བྲག་ལ་ལྟོས་པའི་ཕྱིར་དུས་ལ་ལྟོས་པ་ཡིན་ནོ། །མི་གཡོའི་ཆོས་ཅན་མི་གཡོ་བ། །མི་གཡོ་བའི་ཆོས་ཅན་གྱི་རྣམ་པར་གྲོལ་བ་ནི་ཡོངས་སུ་མི་ཉམས་པའི་སྒོ་ནས་གཡོ་བར་མི་ནུས་པའི་ཕྱིར་མི་གཡོ་བ་ཡིན་ནོ། །དེ་ཕྱིར་དེ་དུས་མི་སྦྱོར་གྲོལ། །དེ་ཉིད་ཀྱི་ཕྱིར་དེ་ནི་དུས་དང་མི་སྦྱོར་བར་རྣམ་པར་གྲོལ་བ་ཞེས་བྱ་སྟེ་དེ་ནི་འདོད་དགུར་ཏིང་ངེ་འཛིན་མངོན་སུམ་དུ་འགྱུར་བའི་ཕྱིར་དུས་ལ་མི་ལྟོས་པ་དང་རྣམ་པར་གྲོལ་བ་ཡིན་ནོ། །ཡང་ན་ཡོངས་སུ་ཉམས་པ་སྲིད་པ་དང་མི་སྲིད་པའི་སྒོ་ནས་དུས་གཞན་གྱི་བར་དང་གཏན་དུ་རྣམ་པར་གྲོལ་བའི་ཕྱིར་དུས་ཀྱི་རྣམ་པར་གྲོལ་བ་དང་དུས་དང་མི་སྦྱོར་བར་རྣམ་པར་གྲོལ་བ་ཉིད་ཡིན་ནོ། །དེ་ནི་མཐོང་ཐོབ་རྒྱུ་ལས་བྱུང་། །མི་གཡོ་བའི་ཆོས་ཅན་དེ་ནི་མཐོང་བས་ཐོབ་པ་སྔོན་དུ་འགྲོ་བ་ཡིན་པར་རིག་པར་བྱའོ། །ཅི་དགྲ་བཅོམ་པ་དྲུག་པོ་འདི་དག་དང་པོ་ཁོ་ནས་དེའི་རིགས་ཅན་དག་གཅིག་ཡིན་ནམ་འོན་ཏེ་ཕྱིས་ཡིན་ཞེ་ན། ཁ་ཅིག་དང་པོ་ནས་དེའི་རིགས། །ཁ་ཅིག་སྦྱངས་པ་ལས་གྱུར་ཏོ། །ཁ་ཅིག་ནི་དང་པོ་ཉིད་ནས་འཆི་བར་སེམས་པའི་ཆོས་ཅན་གྱི་རིགས་ཅན་ཡིན་ལ། ཁ་ཅིག་ནི་ཡོངས་སུ་ཉམས་པའི་ཆོས་ཅན་དུ་གྱུར་པ་ལས་དབང་པོ་རྣམས་སྦྱངས་པས་འཆི་བར་སེམས་པའི་ཆོས་ཅན་དུ་གྱུར་པ་ཡིན་ཏེ། མི་གཡོ་བའི་ཆོས་ཅན་དུ་གྱུར་པའི་བར་དུ་ཡང་དེ་དང་འདྲ་བར་རིག་པར་བྱའོ། །དེ་ལ་ཡོངས་སུ་ཉམས་པའི་ཆོས་ཅན་ནི་ཡོངས་སུ་ཉམས་པར་འགྱུར་བའི་སྐལ་བ་དང་ལྡན་གྱི་འཆི་བར་སེམས་པ་ལ་སོགས་པའི་ཆོས་ཅན་མ་ཡིན་པ་གང་ཡིན་པའོ། །འཆི་བར་སེམས་པའི་ཆོས་ཅན་ནི་འཆི་བར་སེམས་པར་འགྱུར་བའི་སྐལ་བ་ཅན་གང་ཡིན་པའོ། །རྗེས་སུ་བསྲུང་བའི་ཆོས་ཅན་ནི་རྗེས་སུ་བསྲུང་བར་འགྱུར་བའི་སྐལ་བ་ཅན་གང་ཡིན་པའོ། །གནས་པ་ལས་མི་བསྐྱོད་པ་ནི་ཡོངས་སུ་ཉམས་པར་འགྱུར་བའི་རྐྱེན་སྟོབས་དང་ལྡན་པ་མེད་ན་རྗེས་སུ་མ་བསྲུངས་ཀྱང་གནས་པར་འགྱུར་བའི་སྐལ་བ་ཅན་ཡིན་ཅིང་ཉམས་པར་མི་འགྱུར་བ་དང་། མངོན་པར་བརྩོན་པ་མེད་ན་འཕེལ་བར་ཡང་མི་འགྱུར་བའི་སྐལ་བ་ཅན་གང་ཡིན་པའོ། །རྟོགས་པའི་སྐལ་བ་ཅན་ནི་མི་གཡོ་བར་རྟོགས་པར་འགྱུར་བའི་སྐལ་བ་ཅན་གང་ཡིན་པའོ། །མི་གཡོ་བའི་ཆོས་ཅན་ནི་ཡོངས་སུ་ཉམས་པར་མི་འགྱུར་བའི་སྐལ་བ་ཅན་གང་ཡིན་པ་དེ་ཁོ་ནའོ། །དང་པོ་གཉིས་ནི་སློབ་པའི་གནས་སྐབས་ཁོ་ན་ན་རྒྱུན་དུ་སྦྱོར་བ་དང་གུས་པར་སྦྱོར་བ་མེད་པ་ཡིན་ནོ། །གསུམ་པ་ནི། རྒྱུན་དུ་སྦྱོར་བ་པ་ཡིན་ནོ། །བཞི་པ་ནི་གུས་པར་སྦྱོར་བ་པ་ཡིན་ནོ། །ལྔ་པ་ནི་གཉིས་ཀར་སྦྱོར་བ་པ་ཡིན་ལ་དབང་པོ་རྟུལ་པོ་ཡིན་ནོ། །དྲུག་པ་ནི་གཉིས་ཀར་སྦྱོར་བ་པ་དང་དབང་པོ་རྣོན་པོ་ཡང་ཡིན་ནོ། །ཡོངས་སུ་ཉམས་པའི་ཆོས་ཅན་ཡང་གདོན་མི་ཟ་བར་ཡོངས་སུ་ཉམས་པར་འགྱུར་བ་མ་ཡིན་ལ། རྟོགས་པའི་སྐལ་བ་ཅན་གྱི་བར་དུ་ཡང་རྟོགས་པར་འགྱུར་བ་མ་ཡིན་གྱི། སྲིད་པའི་ཕྱིར་དེ་སྐད་ཅེས་གསུངས་པའོ། །དེ་ལྟར་བྱས་ན་ཁམས་གསུམ་ཆར་ན་ཡང་དགྲ་བཅོམ་པ་དྲུག་ཡོད་རུང་ངོ་། །གང་དག་གིས་གདོན་མི་ཟ་བར་ཡོངས་སུ་ཉམས་པར་འགྱུར་བ་ནས་མངོན་པར་རྟོགས་པའི་བར་དུ་འགྱུར་བ་དེ་དག་གི་ལྟར་ན་འདོད་པའི་ཁམས་ན་ནི་དྲུག་གོ །གཟུགས་དང་གཟུགས་མེད་པའི་ཁམས་ན་ནི་གནས་པ་ལས་མི་བསྐྱོད་པ་དང་མི་གཡོ་བའི་ཆོས་ཅན་དང་གཉིས་ཏེ། དེ་གཉིས་ན་ཡོངས་སུ་ཉམས་པ་དང་འཆི་བར་སེམས་པ་དང་དབང་པོ་འཕོ་བ་མེད་པའི་ཕྱིར་རོ། །ཞེས་གསུངས་སོ། །དེ་དག་གི་དོན་ལ་འདི་སྐད་དུ། གལ་ཏེ་མི་གཡོ་ཟད་ཤེས་ལས། །མི་སྐྱེའི་བློ་གྲོས་ཅེས་སོགས་ཀྱིས་ནི་གོང་དུ་དགྲ་བཅོམ་པ་མི་གཡོ་བ་ལ་ཟད་པ་ཤེས་པའི་རྗེས་སུ་མི་སྐྱེ་བ་ཤེས་པ་འབྱུང་གི མི་གཡོ་བ་མ་ཡིན་ན་ཟད་པ་ཤེས་པ་ལས་ཟད་ཤེས་དེ་ཉིད་དམ། མི་སློབ་པའི་ཡང་དག་པའི་ལྟ་བ་འབྱུང་བར་བཤད་པ་ལ་འོ་ན་དགྲ་བཅོམ་པ་ལ་ཡང་དབྱེ་བ་ཡོད་དམ་ཞེ་ན་ཞེས་པའི་དྲི་བ་བསྟན་ནོ། །དགྲ་བཅོམ་དྲུག་འདོད་ཅེས་པ་རྩ་འགྲེལ་གྱིས་ནི་དེའི་ལན་བསྟན་ནོ། །དེ་དག་ལས་ནི། ལྔ་ནི་དད་པས་མོས་ལས་སྐྱེས། །ཞེས་སོགས་ཀྱིས་དྲུག་པོ་དེ་དག་དུས་སྦྱོར་དུས་མི་སྦྱོར་གཉིས་སུ་བསྡུས་ནས་དེར་འཇོག་པའི་རྒྱུ་མཚན་དང་། དད་མོས་མཐོང་ཐོབ་གང་གི་རྒྱུ་ལས་བྱུང་བ་བསྟན། ཅི་དགྲ་བཅོམ་པ་དྲུག་པོ་འདི་དག་ཅེས་སོགས་ཀྱིས་དང་པོ་ནས་དེའི་རིགས་ཅན་དང་སྦྱངས་པ་ལས་གྱུར་པ་གང་ཡིན་པ་དེའི་ཁྱད་པར་དང་། དྲུག་པོ་སོ་སོའི་ངོས་འཛིན་བསྟན་ནོ། །ཡོངས་སུ་ཉམས་པའི་ཆོས་ཅན་ཡང་གདོན་མི་ཟ་བར་ཡོངས་སུ་ཉམས་པར་འགྱུར་བ་མ་ཡིན་ལ་ཞེས་སོགས་ཀྱིས་ནི་རྟེན་གྱི་ཁྱད་པར་བསྟན་ནོ། །དེ་དག་གིས་ནི་ཉན་ཐོས་ཀྱི་དགེ་འདུན་མཛོད་རྩ་འགྲེལ་ལས་ཇི་ལྟར་བཤད་པའི་ཚུལ་བསྟན་ཟིན་ཅིང་། རང་སངས་རྒྱས་ཀྱི་དགེ་འདུན་ནི་གཞན་དུ་རྒྱས་པར་བཤད་ཟིན་པས་འདིར་ཚིག་མང་དུ་དོགས་པས་མ་སྤྲོས་སོ།། །།གཉིས་པ་དེ་དག་གི་དོན་གཏན་ལ་དབབ་པ་ལ་བཞི་སྟེ། སྤང་བྱ་སྒྲིབ་པའི་རྣམ་གཞག སྤོང་བྱེད་གཉེན་པོའི་རྣམ་གཞག སྤངས་པ་འབྲས་བུའི་རྣམ་གཞག དེ་ལ་གནས་པའི་གང་ཟག་གི་རྣམ་གཞག་གོ །དང་པོ་ནི། སྤྱིར་སྤང་བྱ་ལ་ཉོན་སྒྲིབ་དང་། ཤེས་སྒྲིབ་གཉིས་ཡོད་ཀྱང་ཤེས་སྒྲིབ་ནི་སྐབས་མ་ཡིན་པས་མི་འཆད་དོ། །ཉོན་སྒྲིབ་ལ་མཛོད་ཀྱི་ལུགས་དང་། ཀུན་ལས་བཏུས་ཀྱི་ལུགས་གཉིས་ལས། དང་པོ་ནི་ཕྲ་རྒྱས་བསྟན་པའི་སྐབས་སུ་མཐོང་སྤང་ལ། ལྟ་མིན་ལྔ་དང་ལྟ་བ་ལྔ་སྟེ་སྡུག་བསྔལ་མཐོང་སྤང་བཅུ། ཀུན་འབྱུང་མཐོང་སྤང་དང་། འགོག་པ་མཐོང་སྤང་གཉིས་ལ་འཇིག་མཐར་གཉིས་དང་། ཚུལ་ཁྲིམས་དང་བརྟུལ་ཞུགས་མཆོག་འཛིན་མ་གཏོགས་པ་བདུན་བདུན། ལམ་མཐོང་སྤང་ལ་འཇིག་མཐར་གཉིས་མ་གཏོགས་པ་བརྒྱད་དེ་འདོད་པའི་ཁམས་ན་མཐོང་སྤང་སུམ་ཅུ་སོ་གཉིས། ཁམས་གོང་མ་གཉིས་ན་ཁོང་ཁྲོ་བཞི་བཞི་མ་གཏོགས་པའི་ཉེར་བརྒྱད་དེ། མཐོང་སྤང་བརྒྱད་ཅུ་རྩ་བརྒྱད་དོ། །སྒོམ་སྤང་ལ་འདོད་པའི་ཁམས་ན་འདོད་ཆགས། ཁོང་ཁྲོ། ང་རྒྱལ། མ་རིག་པ་དང་བཞི། ཁམས་གོང་མ་གཉིས་ན་ཁོང་ཁྲོ་མ་གཏོགས་པ་གསུམ་གསུམ་ཡོད་པས་བཅུ་སྟེ། དེ་ལྟར་ན་སྤང་བྱ་དགུ་བཅུ་གོ་བརྒྱད་དུ་བཤད་དོ། །དེ་ཉིད་ལམ་དང་གང་ཟག་བསྟན་པའི་སྐབས་སུ་མཐོང་སྤང་ཐམས་ཅད་འདོད་པའི་སྡུག་བསྔལ་མཐོང་སྤང་ལ་སོགས་པ་བཞི། ཁམས་གོང་མའི་སྡུག་བསྔལ་མཐོང་སྤང་ལ་སོགས་པ་བཞི་སྟེ་བརྒྱད་དུ་བསྡུས་ནས་སྔར་གྱི་སྒོམ་སྤང་དེ་ཉིད། ས་དང་ས་ན་ཉེས་རྣམ་དགུ། །ཞེས་པ་རྩ་འགྲེལ་གྱིས་འདོད་པ་ནས་སྲིད་རྩེའི་བར་གྱི་ས་དགུ་པོ་རེ་རེ་ལ་ཆེན་པོའི་ཆེན་པོ་ལ་སོགས་པ་དགུ་དགུར་ཕྱེ་ནས་སྔར་གྱི་མཐོང་སྤང་དང་བསྡོམས་པས་སྤང་བྱ་བརྒྱད་ཅུ་རྩ་དགུར་གསུངས་པ་ནི་སྐབས་འདིར་མཁོ་བའི་དབྱེ་བ་ཡིན་ནོ། །གཉིས་པ་ནི་བདེན་པ་རྣམ་ངེས་ཀྱི་ཀུན་འབྱུང་བདེན་པའི་སྐབས་སུ། བདེན་པ་རེ་རེ་ལ་ལྟ་མིན་ལྔ་དང་། ལྟ་བ་ལྔ་སྟེ་འདོད་པའི་ཁམས་ན་མཐོང་སྤང་བཞི་བཅུ། ཁམས་གོང་མ་གཉིས་ན་ཁོང་ཁྲོ་བཞི་མ་གཏོགས་པའི་སུམ་ཅུ་སོ་དྲུག་རེ་སྟེ། མཐོང་སྤང་བརྒྱ་དང་བཅུ་གཉིས། སྒོམ་སྤངས་ལ་ལུགས་འདི་ལ་འཇིག་མཐར་གཉིས་ཀྱང་ཡོད་པས། འདོད་པའི་ཁམས་ན་དྲུག ཁམས་གོང་མ་གཉིས་ན་ཁོང་ཁྲོ་རེ་རེ་མ་གཏོགས་པ་ལྔ་ལྔ་སྟེ་བཅུ་དྲུག་ཏུ་གསུངས་སོ། །དེ་ཉིད་མཐོང་ལམ་གྱི་སྐབས་སུ་མཐོང་སྤང་ཐམས་ཅད་ཁམས་གོང་འོག་སོ་སོར་མ་ཕྱེ་བར་སྡུག་བསྔལ་མཐོང་སྤང་ལ་སོགས་པ་བཞིར་བསྡུས། སྒོམ་ལམ་གྱི་སྐབས་སུ་སྒོམ་སྤང་གི་དབྱེ་བ་སྔར་བཞིན་དུ་གསུངས་པ་ནི་སྐབས་འདིར་མཁོ་བའི་དབྱེ་བའོ། །གཉིས་པ་སྤོང་བྱེད་གཉེན་པོའི་རྣམ་གཞག་ལ། མཐོང་སྤོང་གི་གཉེན་པོ་དང་སྒོམ་སྤང་གི་གཉེན་པོ་གཉིས་ལས། དང་པོ་ནི་མཛོད་ལྟར་ན། འདོད་པའི་སས་བསྡུས་ཀྱི་མཐོང་སྤོང་བཞི་ནི་ཆོས་བཟོད་བཞིས་རིམ་པ་བཞིན་སྤོང་། ཁམས་གོང་མའི་སས་བསྡུས་ཀྱི་མཐོང་སྤང་བཞི་ནི་རྗེས་བཟོད་བཞིས་རིམ་པ་བཞིན་སྤོང་བས་བར་ཆད་མེད་ལམ་བརྒྱད་དོ། །ཀུན་བཏུས་ལྟར་ན་མཐོང་སྤོང་བཞི་ནི་ཆོས་བཟོད་བཞིས་རིམ་པ་བཞིན་སྤོང་བས་བར་ཆད་མེད་ལམ་བཞིའོ། །གཉིས་པ་ལ། ཅིག་ཆར་བའི་སྤོང་བའི་ཚུལ་དང་། རིམ་གྱིས་པའི་སྤོང་ཚུལ་གཉིས་ལས། དང་པོ་ནི་ལམ་ལ་རྗེས་ཤེས་རྫོགས་པའི་རྗེས་སུ་འདོད་པའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོ་ནས་སྲིད་རྩེའི་སས་བསྡུས་ཀྱི་སྒོམ་སྤང་ཆེན་པོའི་ཆེན་པོའི་བར་ས་དགུའི་སྒོམ་སྤང་ཆེན་པོའི་ཆེན་པོ་དགུ་ཟག་མེད་བར་ཆད་མེད་ལམ་གཅིག་གིས་ཅིག་ཆར་དུ་སྤོང་བ་ནས་ས་དགུའི་སྒོམ་སྤོང་ཆུང་ངུའི་ཆུང་ངུ་དགུ་ཟག་མེད་བར་ཆད་མེད་ལམ་གཅིག་གིས་ཅིག་ཆར་དུ་སྤོང་བས་ན་སྒོམ་ལམ་བར་ཆད་མེད་ལམ་དགུའོ། །གཉིས་པ་ལ་འཇིག་རྟེན་པའི་ལམ་གྱིས་སྤོང་ཚུལ་དང་། འཇིག་རྟེན་ལས་འདས་པའི་ལམ་གྱིས་སྤོང་ཚུལ་གཉིས་ལས། དང་པོ་ནི། འདོད་པའི་སས་བསྡུས་ཀྱི་ཉོན་མོངས་དགུ་པོ་བསམ་གཏན་དང་པོའི་ཉེར་བསྡོགས་ཞི་རགས་ཀྱི་རྣམ་པ་ཅན་གྱིས་སྤོང་བ་ནས་ཅི་ཡང་མེད་ཀྱི་སྒོམ་སྤང་ཉོན་མོངས་དགུ་སྲིད་རྩེའི་ཉེར་བསྡོགས་ཀྱིས་སྤོང་བར་བྱེད་པ་སྟེ་སྤོང་ཚུལ་འདི་ནི་མཐོང་ལམ་གྱི་སྔ་རོལ་དུ་ཡང་ཡོད་ལ། མཐོང་ལམ་གྱི་རྗེས་སུ་ཡང་ཡོད་དོ། །འདི་ལ་བར་ཆད་མེད་ལམ་ཉི་ཤུ་རྩ་བཞིར་འདོད་དགོས་ཏེ། ཉེར་བསྡོགས་ཞི་རགས་ཀྱི་རྣམ་པ་ཅན་གྱིས་འོག་སའི་ཉོན་མོངས་སྤོང་བ་ལ་ས་རེ་རེའི་ཆེན་པོ་གསུམ་ཅིག་ཆར་དུ་སྤོང་། འབྲིང་གསུམ་ཅིག་ཆར་དུ་སྤོང་། ཆུང་ངུ་གསུམ་ཅིག་ཆར་དུ་སྤོང་བ་ཡིན་པའི་ཕྱིར། འོན་ཀྱང་ཅིག་ཆར་བའི་ཐ་སྙད་ནི་མི་འདོགས་ཏེ། ས་གོང་འོག་གི་ཉོན་མོངས་ཅིག་ཆར་དུ་སྤོང་བ་མེད་པའི་ཕྱིར། སྲིད་རྩེའི་ཉོན་མོངས་རྣམས་ནི་འཇིག་རྟེན་པའི་ལམ་གྱིས་སྤོང་བར་བྱེད་པ་མེད་དེ། གོང་སའི་ཉེར་བསྡོགས་མེད་པའི་ཕྱིར། གཉིས་པ་ནི། སྔར་བཤད་པའི་སྒོམ་སྤང་བརྒྱད་ཅུ་རྩ་གཅིག་པོ་དེ་དག་མཐོང་ལམ་ཐོབ་རྗེས་སུ་ཟག་མེད་བར་ཆད་མེད་ལམ་རེ་རེས་སོ་སོར་སྤོང་བར་བྱེད་པས་ན་འདི་ལ་བར་ཆེད་མེད་ལམ་བརྒྱད་ཅུ་རྩ་གཅིག་གོ །དེ་ཡང་སྲིད་པའི་དབང་དུ་བྱས་པ་ཡིན་གྱི་མཐོང་ལམ་གྱི་སྔ་རོལ་དུ་འགའ་ཞིག་སྤངས་ཟིན་པ་ལ་ནི་དེར་མ་ངེས་སོ། །གསུམ་པ་སྤངས་པ་འབྲས་བུའི་རྣམ་པར་བཞག་པ་ལ་བཞི་སྟེ། ངོ་བོ། དབྱེ་བ། གྲངས་ངེས། ཐོབ་པའི་ཚུལ་ལོ། །དང་པོ་ནི་ཟག་མེད་བར་ཆད་མེད་ལམ་ནི་དགེ་སྦྱོང་གི་ཚུལ་ཞེས་བྱ་སྟེ། འཆལ་བའི་ཚུལ་ཁྲིམས་ཀྱི་རྒྱུ་ཉོན་མོངས་པའི་ས་བོན་སྤོང་བར་བྱེད་པའི་སྒོ་ནས་རང་རྒྱུད་ལྡན་གྱི་གང་ཟག་དེ་དོན་དམ་པའི་དགེ་སྦྱོང་དུ་བྱེད་པའི་ཕྱིར་ཏེ། མདོ་ལས། འདིས་སྡིག་པ་མི་དགེ་བའི་ཆོས་ཞེས་བྱ་བ་ནས་རྒྱས་པར་རྒ་ཤིར་འགྱུར་བའི་བར་རྣམ་པ་དུ་མ་ཞི་བར་བྱས་པ་ཡིན་པས་དེའི་ཕྱིར་དགེ་སྦྱོང་ཞེས་གསུངས་པའི་ཕྱིར་རོ། །དེའི་འབྲས་བུ་ལ་འདུས་བྱས་འདུས་མ་བྱས་གཉིས་ཡོད་དེ། རྒྱུ་མཐུན་གྱི་འབྲས་བུ་རྣམ་པར་གྲོལ་བའི་ལམ་དང་། བྲལ་བའི་འབྲས་བུ་སོ་སོར་བརྟགས་འགོག་གཉིས་ཡོད་པའི་ཕྱིར་རོ། །དེས་ན་དགེ་སྦྱོང་ཚུལ་གྱི་འབྲས་བུའི་མཚན་ཉིད་ནི་ཟག་མེད་བར་ཆད་མེད་ལམ་གྱི་རྒྱུ་མཐུན་གྱི་འབྲས་བུ་དང་། བྲལ་བའི་འབྲས་བུ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པའོ། །གཉིས་པ་ལ་གཉིས་ཏེ། བརྒྱད་ཅུ་རྩ་དགུར་དབྱེ་བ་དང་བཞིར་གསུངས་པ་དང་འགལ་བ་སྤང་བའོ། །དང་པོ་ནི་སྔར་བཤད་པའི་མཐོང་སྤང་བརྒྱད་དམ་བཞི་སྤངས་པའི་འབྲས་བུ་བརྒྱད་དམ་བཞི། སྒོམ་སྤང་བརྒྱད་ཅུ་གྱ་གཅིག་སྤངས་པའི་འབྲས་བུ་བརྒྱད་ཅུ་གྱ་གཅིག་སྟེ། བརྒྱད་ཅུ་གྱ་དགུའམ་གྱ་ལྔ་ཡོད་དོ། །གཉིས་པ་ནི་འོ་ན་མདོ་ལས་རྒྱུན་ཞུགས་ཀྱི་འབྲས་བུ་ལ་སོགས་པ་རྣམ་པ་བཞིར་གསུངས་པ་དང་འགལ་ལོ་ཞེ་ན་མི་འགལ་ཏེ། མཛོད་ལྟར་ན་ཁྱད་པར་ལྔ་ལྡན་གྱི་དགེ་སྦྱོང་ཚུལ་གྱི་འབྲས་བུའི་དབང་དུ་བྱས་ནས་བཞིར་གྲངས་ངེས་པའི་ཕྱིར་རོ། །ཁྱད་པར་ལྔ་ནི། འབྲས་གནས་ཀྱི་སྔོན་དུ་ཞུགས་པའི་ལམ་བཏང་བ་དང་། གཞན་འབྲས་བུའི་ལམ་ཐོབ་པ་དང་། ཟད་པ་ཕྱོགས་གཅིག་ཏུ་སྡོམ་པ་ཐོབ་པ་དང་། ཆོས་ཤེས་ལ་སོགས་པའི་ཤེས་པ་བརྒྱད་ཚན་ཐོབ་པ་དང་། མི་རྟག་ལ་སོགས་པའི་རྣམ་པ་བཅུ་དྲུག་ཐོབ་པའོ། །ཀུན་བཏུས་ལྟར་ན། སྤྱིར་སྤང་བྱ་ལ་ཐར་པ་ལ་འཇུག་པའི་གེགས་ཀྱི་གཙོ་བོ་ཀུན་སྦྱོར་གསུམ་དང་། འགྲོ་བ་ཐ་མ་དང་། ཁམས་ཐ་མ་ལས་འདའ་བའི་གེགས་ཐ་མའི་ཆ་མཐུན་ལྔ་དང་། ཁམས་གོང་མ་གཉིས་ལས་འདའ་བའི་གེགས་གོང་མའི་ཆ་མཐུན་ལྔ་སྟེ། གསུམ་དུ་ངེས་ཤིང་། དང་པོ་སྤངས་པ་ལས་རྒྱུན་ཞུགས་ཀྱི་འབྲས་བུ། གཉིས་པ་ལ། ཕལ་ཆེར་སྤངས་པ་ལས་ཕྱིར་འོང་གི་འབྲས་བུ། མ་ལུས་པར་སྤངས་པ་ལས་ཕྱིར་མི་འོང་གི་འབྲས་བུ། གསུམ་པ་སྤངས་པ་ལས་དགྲ་བཅོམ་གྱི་འབྲས་བུར་བཞག་སྟེ། མདོ་ལས། གང་ཟག་འདི་ནི་ཀུན་ཏུ་སྦྱོར་བ་གསུམ་སྤངས་པའི་ཕྱིར་རྒྱུན་དུ་ཞུགས་པར་འགྱུར་རོ། །ཞེས་དང་། ལན་གཅིག་ཕྱིར་འོང་བ་གང་ཞེ་ན་ཀུན་ཏུ་སྦྱོར་བ་གསུམ་སྤངས་ཤིང་འདོད་ཆགས་དང་། ཞེ་སྡང་དང་། གཏི་མུག་བསྲབས་པ་གང་ཡིན་པའོ། །ཕྱིར་མི་འོང་བ་གང་ཞེ་ན། ཐ་མའི་ཆ་མཐུན་ལྔ་སྤངས་པ་གང་ཡིན་པའོ། །དགྲ་བཅོམ་པ་གང་ཞེ་ན་གོང་མའི་ཆ་མཐུན་ལྔ་སྤངས་པ་གང་ཡིན་པའོ། །ཞེས་གསུངས་སོ། །ཀུན་སྦྱོར་གསུམ་ནི་འཇིག་ཚོགས་ལ་ལྟ་བ་དང་། ཐེ་ཚོམ་དང་། ཚུལ་ཁྲིམས་དང་བརྟུལ་ཞུགས་མཆོག་འཛིན་ནོ། །འདི་གསུམ་ལ་མཛོད་ལྟར་ན། མཐོང་སྤང་གིས་ཁྱབ་པར་གསུངས་ཤིང་། ཀུན་བཏུས་དང་རྣམ་འགྲེལ་ལས། འཇིག་མཐར་ལ་མཐོང་སྤང་དང་སྒོམ་སྤང་གཉིས་ཡོད་པར་གསུངས་སོ། །ཐ་མའི་ཆ་མཐུན་ལྔ་ནི་གསུམ་པོ་དེའི་སྟེང་དུ་འདོད་པ་ལ་འདུན་པ་དང་། རྣམ་འཚེ་གཉིས་བསྣན་པའོ། །གོང་མའི་ཆ་མཐུན་ལྔ་ནི་ཁམས་གོང་མ་གཉིས་ཀྱི་སས་བསྡུས་ཀྱི་འདོད་ཆགས་གཉིས་དང་། ཁམས་གོང་མ་གཉིས་སོ་སོར་མ་ཕྱེ་བར་རྒོད་པ་དང་། ང་རྒྱལ་དང་། རྨོངས་པའོ། །གསུམ་པ་ནི་དགེ་སྦྱོང་ཚུལ་གྱི་འབྲས་བུ་དེ་ལ་བཞིར་གྲངས་ངེས་ཏེ། ཉན་ཐོས་ཀྱི་སྤང་བྱ་ལ་མཐོང་སྤང་ཉོན་མོངས་པ་དང་། སྒོམ་སྤང་ཉོན་མོངས་པ་གཉིས་སུ་ངེས་ཤིང་། དང་པོ་སྤངས་པ་ལ་རྒྱུན་ཞུགས་ཀྱི་འབྲས་བུ། གཉིས་པ་ལ་འདོད་པའི་སས་བསྡུས་དང་། ཁམས་གོང་མའི་སས་བསྡུས་གཉིས་ལས། དང་པོ་ལ་ཕལ་ཆེར་སྤངས་པ་ལས་ཕྱིར་འོང་གི་འབྲས་བུ། མ་ལུས་པར་སྤངས་པ་ལས་ཕྱིར་མི་འོང་གི་འབྲས་བུ། གཉིས་པ་སྤངས་པ་ལས་དགྲ་བཅོམ་གྱི་འབྲས་བུ་བཞག་པའི་ཕྱིར་རོ། །འོ་ན་འདོད་པའི་སས་བསྡུས་ཀྱི་ཉོན་མོངས་སྤངས་པ་ལས་འབྲས་བུ་གཉིས་བཞག་ནས་གཞན་རྣམས་ལ་ཅི་ཕྱིར་མ་ཡིན་ཞེ་ན། འདོད་པ་ནི་ཉེས་དམིགས་ཆེ་བས་མྱུར་དུ་འདའ་དགོས་ལ་དགེ་སྦྱོང་ཚུལ་གྱི་འབྲས་བུ་གཉིས་སུ་བཞག་པས་མྱུར་དུ་འདའ་བར་ཡང་འགྱུར་ཏེ། འདོད་པའི་ཉོན་མོངས་ཕལ་ཆེར་སྤངས་པ་ལ་ཡང་དགེ་སྦྱོང་ཚུལ་གྱི་འབྲས་བུ་བཞག་པས་དགེ་སྦྱོང་ཚུལ་གྱི་འབྲས་བུ་གསར་ཐོབ་ཡོད་པར་ཤེས་ནས་མྱུར་དུ་སྤྲོ་བས་འཇུག་པར་འགྱུར་བའི་ཕྱིར་རོ། །བཞི་པ་འཐོབ་ཚུལ་ལ་གསུམ་སྟེ། ཁམས་གང་དུ་འཐོབ་པ། ལམ་གང་གིས་འཐོབ་པ། ས་གང་ལ་བརྟེན་པའོ། །དང་པོ་ནི་འབྲས་བུ་དང་པོ་གསུམ་པོ་ནི་འདོད་པའི་ཁམས་སུ་འཐོབ་སྟེ། རྒྱུན་ཞུགས་དང་ཕྱིར་འོང་དང་རིམ་གྱིས་པའི་ཕྱིར་མི་འོང་གི་འབྲས་བུ་གསུམ་ནི་འདོད་པ་ལ་འདོད་ཆགས་དང་མ་བྲལ་བས་འཐོབ་དགོས་ཤིང་ཆགས་བྲལ་སྔོན་སོང་གི་ཕྱིར་མི་འོང་འབྲས་བུ་འདོད་པ་ལ་འདོད་ཆགས་དང་བྲལ་བའི་གང་ཟག་གིས་ཐོབ་པ་ཡིན་ཀྱང་དེ་མཐོང་ལམ་ལ་བརྟེན་ནས་ཐོབ་དགོས་ཤིང་། ཁམས་གོང་ན་ཉན་ཐོས་ཀྱི་མཐོང་ལམ་སྐྱེ་བ་མེད་པའི་ཕྱིར་རོ། །གཏན་ཚིགས་གྲུབ་སྟེ། ཁམས་གོང་མའི་སོ་སོ་སྐྱེ་བོ་རྣམས་ནི་སྙོམས་འཇུག་གི་བདེ་བ་ལ་ཆགས་པས་འཁོར་བ་ལ་ཡིད་སྐྱོ་བ་མེད་ཅིང་འཁོར་བ་ལ་ཡིད་སྐྱོ་བ་མེད་པར་ཡང་ཉན་ཐོས་ཀྱི་མཐོང་ལམ་སྐྱེ་བ་མེད་པའི་ཕྱིར་རོ། །ཕྱིར་མི་འོང་གི་འབྲས་བུ་འདོད་པའི་ཁམས་སུ་འཐོབ་དགོས་པའི་སྒྲུབ་བྱེད་གཞན་ཡང་ཁམས་གོང་མའི་རྟེན་ཅན་གྱི་ཕྱིར་མི་འོང་ཐམས་ཅད་ཀྱང་དང་པོར་འདོད་པའི་རྟེན་ལ་ཕྱིར་མི་འོང་གི་འབྲས་བུ་ཐོབ་པ་ཁོ་ན་ཡིན་པའི་ཕྱིར་ཏེ། མདོར། བར་མ་དོར་ཡོངས་སུ་མྱ་ངན་ལས་འདའ་བ་ནས་གོང་དུ་འཕོ་བའི་བར་གང་ཟག་ལྔ་ནི་འདིར་རྩོམ་ཞིང་དེར་མཐར་ཕྱིན་པར་འགྱུར་རོ་ཞེས་གསུངས་པའི་ཕྱིར། དགྲ་བཅོམ་གྱི་འབྲས་བུ་ནི་ཁམས་གསུམ་ཆར་གྱི་རྟེན་ལ་འཐོབ་ཏུ་རུང་སྟེ། རྒྱུན་ཞུགས་སྲིད་པ་ལན་བདུན་པ་དང་། རིགས་ནས་རིགས་སྐྱེ་གཉིས་དང་། ཕྱིར་འོང་ཚེ་གཅིག་བར་ཆད་གཅིག་པ་དང་། ཕྱིར་མི་འོང་མཐོང་ཆོས་ཞི་རྣམས་འདོད་པའི་རྟེན་ལ་མྱང་འདས་མངོན་དུ་བྱེད། འདའ་བ་བཞི་དང་། འོག་མིན་མཐར་ཐུག་འགྲོའི་གོང་འཕོ་རྣམས་ཀྱིས་གཟུགས་ཀྱི་རྟེན་ལ་མྱང་འདས་མངོན་དུ་བྱེད། སྲིད་རྩེའི་མཐར་ཐུག་འགྲོ་དང་། གཟུགས་མེད་ཉེར་འགྲོ་རྣམས་ཀྱིས་གཟུགས་མེད་ཀྱི་རྟེན་ལ་མྱང་འདས་མངོན་དུ་བྱེད་པའི་ཕྱིར་རོ། །གཉིས་པ་ནི་རྒྱུན་ཞུགས་ཀྱི་འབྲས་བུ་དང་། ཆགས་བྲལ་སྔོན་སོང་གི་འབྲས་བུ་རྣམས་ནི་འཇིག་རྟེན་ལས་འདས་པའི་ལམ་གྱིས་འཐོབ་སྟེ། མཐོང་ལམ་གྱི་ཐོབ་པའི་ཕྱིར་རོ། །རིམ་གྱིས་པའི་འབྲས་བུ་བར་པ་གཉིས་ནི་རྟེན་གྱི་གང་ཟག་དེ་ཞི་གནས་ཤས་ཆེར་སྤྱད་པ་ཡིན་ན། འཇིག་རྟེན་པའི་ལམ་གྱིས་ཐོབ་སྟེ། བསམ་གཏན་དང་པོའི་ཉེར་བསྡོགས་ཞི་རགས་ཀྱི་རྣམ་པ་ཅན་གྱིས་འདོད་ཉོན་དྲུག་པ་དང་། དགུ་པ་སྤངས་པ་ལས་ཐོབ་པའི་ཕྱིར་རོ། །ལྷག་མཐོང་ཤས་ཆེར་སྤྱད་པ་ཡིན་ན་འཇིག་རྟེན་ལས་འདས་པའི་ལམ་གྱིས་འཐོབ་སྟེ། བསམ་གཏན་དང་པོའི་ཉེར་བསྡོགས་ཞི་གནས་ལ་བརྟེན་ནས་བདག་མེད་མངོན་སུམ་དུ་རྟོགས་པའི་ལྷག་མཐོང་ལ་བརྩོན་པར་བྱེད་པའི་ཕྱིར་རོ། །དགྲ་བཅོམ་གྱི་འབྲས་བུ་ནི་འཇིག་རྟེན་ལས་འདས་པའི་ལམ་གྱིས་ཐོབ་སྟེ། སྲིད་ཉོན་དགུ་པ་སྤོང་བའི་བར་ཆེད་མེད་ལམ་གྱིས་འཐོབ་པའི་ཕྱིར་རོ། །གསུམ་པ་ལ་རྒྱུན་ཞུགས་ཀྱི་འབྲས་བུ་དང་། ཕྱིར་འོང་གི་འབྲས་བུ་གཉིས་ནི་བསམ་གཏན་དང་པོའི་ཉེར་བསྡོགས་ལ་བརྟེན་ཏེ། མཉམ་པར་བཞག་པའི་ས་ལ་བརྟེན་དགོས་ཤིང་བསམ་གཏན་གྱི་དངོས་གཞི་མ་ཐོབ་པའི་ཕྱིར་རོ། །ཕྱིར་མི་འོང་གི་འབྲས་བུ་ནི་བསམ་གཏན་ས་དྲུག་གང་རུང་ལ་བརྟེན་ཏེ་ཆགས་བྲལ་སྔོན་སོང་གི་ཚེ་མཐོང་ལམ་གྱི་སྔ་རོལ་དུ་འདོད་པ་ལ་འདོད་ཆགས་དང་བྲལ་ཟིན་པས་བསམ་གཏན་གྱི་དངོས་གཞི་ལ་བརྟེན་དུ་རུང་ཞིང་རིམ་གྱིས་པའི་ཚེ་འདོད་ཉོན་དགུ་པ་སྤངས་མ་ཐག་པའི་འབྲས་བུ་དེ་བསམ་གཏན་དང་པོའི་ཉེར་བསྡོགས་ལ་བརྟེན་དགོས་ཀྱང་དེ་ཕྱིན་ཆད་ནི་བསམ་གཏན་གྱི་དངོས་གཞི་ཐོབ་ཏུ་རུང་བས་དེའི་ཚེ་བསམ་གཏན་གྱི་དངོས་གཞི་ལ་བརྟེན་པའི་ཕྱིར་རོ། །དགྲ་བཅོམ་གྱི་འབྲས་བུ་ནི་ཟག་མེད་ས་དགུ་གང་རུང་ལ་བརྟེན་ཏེ་བསམ་གཏན་དང་པོའི་ཉེར་བསྡོགས་མི་ལྕོགས་པ་མེད་པ་ལ་བརྟེན་ནས་སྲིད་ཉོན་དགུ་པ་སྤོང་བ་ཡོད་པ་ནས་བཟུང་སྟེ། ཅི་ཡང་མེད་ཀྱི་ཟག་མེད་ཀྱིས་སྲིད་ཉོན་དགུ་པ་སྤོང་བའི་བར་ཆད་མེད་ལམ་རྣམས་སུ་ཡོད་པའི་ཕྱིར་རོ། །དེ་ཡང་ཉེར་བསྡོགས་མི་ལྕོགས་པ་མེད་པས་རང་ས་གོང་ས་འོག་སའི་ཉོན་མོངས་ཐམས་ཅད་སྤོང་བ་ཡོད་ཅིང་དངོས་གཞི་ཟག་མེད་ཀྱིས་འོག་སའི་ཉོན་མོངས་སྤོང་བ་མེད་ཀྱང་རང་ས་དང་གོང་སའི་ཉོན་མོངས་སྤོང་བ་ཡོད་པའི་གནད་ཀྱིས་སོ། །འདི་དག་ནི་དགེ་སྦྱོང་ཚུལ་གྱི་འབྲས་བུ་འདུས་བྱས་ཀྱི་དབང་དུ་བྱས་པ་ཡིན་ནོ། །བཞི་པ་དེ་ལ་གནས་པའི་གང་ཟག་གི་རྣམ་གཞག་ལ་སྤང་བྱ་སྤོང་ཚུལ་གྱི་སྒོ་ནས་དབྱེ་ན། སྤང་བྱ་རིམ་གྱིས་པ་དང་། སྤང་བྱ་ཅིག་ཅར་བ་གཉིས། དང་པོ་ལ་འབྲས་བུ་ཐོབ་ཚུལ་གྱི་སྒོ་ནས་དབྱེ་ན། འབྲས་བུ་ཐོད་རྒལ་བ་དང་། འབྲས་བུ་རིམ་གྱིས་པ་གཉིས་ཡོད་དེ། རྒྱུན་ཞུགས་ཀྱི་འབྲས་བུ་མ་ཐོབ་པར་ཕྱིར་འོང་ཕྱིར་མི་འོང་གི་འབྲས་བུ་ཐོབ་པ་དང་། འབྲས་བུ་བཞི་ཆར་རིམ་གྱིས་འཐོབ་པ་ཡོད་པའི་ཕྱིར་རོ། །དེའི་དང་པོ་ནི་ཆགས་བྲལ་སྔོན་སོང་ཡིན་ལ། གཉིས་པ་ནི་རིམ་གྱིས་པ་ཡིན་ནོ། །དེ་དག་རིམ་པ་བཞིན་བཤད་ན། ཆགས་བྲལ་སྔོན་སོང་བཤད་པ། རིམ་གྱིས་པ་བཤད་པ། ཅིག་ཅར་བ་བཤད་པ་དང་གསུམ་ལས་དང་པོ་ལ་གཉིས་ཏེ། ཆགས་བྲལ་སྔོན་སོང་གི་འབྲས་བུ་གང་ལ་བཞག་པ་དང་། དེ་ལ་བཞག་པའི་ཆགས་བྲལ་སྔོན་སོང་གི་རྣམ་གཞག་གོ །དང་པོ་ལ་མཁས་པ་ཁ་ཅིག་ན་རེ། ཆགས་བྲལ་སྔོན་སོང་གི་རྒྱུན་ཞུགས་དང་དགྲ་བཅོམ་ཡོད་དེ། མཐོང་ལམ་གྱི་སྔ་རོལ་དུ་འདོད་ཉོན་ལྔ་པ་སྤངས་པའི་རྒྱུན་ཞུགས་ཡོད་པའི་ཕྱིར་དང་། མཐོང་ལམ་གྱི་སྔ་རོལ་དུ་ཅི་ཡང་མེད་མན་ཆད་ཀྱི་ཉོན་མོངས་སྤངས་པའི་དགྲ་བཅོམ་ཡོད་པའི་ཕྱིར། རྒྱུན་ཞུགས་ཆགས་བྲལ་སྔོན་སོང་དང་། དགྲ་བཅོམ་ཆགས་བྲལ་སྔོན་སོང་ནི་མེད་དེ། མཐོང་ལམ་གྱི་སྔ་རོལ་དུ་རྒྱུན་ཞུགས་ཀྱི་འབྲས་བུའི་གེགས་ཀྱི་གཙོ་བོ་མཐོང་སྤངས་ཉོན་མོངས་པ་དང་། དགྲ་བཅོམ་གྱི་འབྲས་བུའི་གེགས་ཀྱི་གཙོ་བོ་སྲིད་ཉོན་དགུ་པ་སྤངས་པ་མེད་པའི་ཕྱིར། ལུང་ནི། སྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །རྣམ་ལྔའི་བར་བཅོམ་ཞེས་པ་རྩ་འགྲེལ་གྱིས་གྲུབ་བོ་ཞེས་ཟེར་རོ། །མི་འཐད་དེ། སྤྱིར་སྒོམ་སྤངས་ཀྱི་ཆ་ཤས་མཐོང་ལམ་གྱི་སྔ་རོལ་དུ་སྤངས་པ་ཙམ་གྱིས་ཆགས་བྲལ་སྔོན་སོང་དུ་བཞག་པ་མ་ཡིན་གྱི། རང་གང་ལ་གནས་པའི་འབྲས་བུ་དེ་ཐོབ་པའི་གེགས་ཀྱི་གཙོ་བོ་མཐོང་ལམ་གྱི་སྔ་རོལ་དུ་སྤངས་པ་ལ་ཆགས་བྲལ་སྔོན་སོང་དུ་བཞག་པའི་ཕྱིར་རོ། །དེས་ན་མཐོང་ལམ་གྱི་སྔ་རོལ་དུ་འདོད་ཉོན་ལྔ་པ་སྤངས་པའི་རྒྱུན་ཞུགས་འབྲས་གནས་ཆོས་ཅན། ཆགས་བྲལ་སྔོན་སོང་མིན་པར་ཐལ། རང་གང་ལ་གནས་པའི་འབྲས་བུ་དེ་ཐོབ་པའི་གེགས་ཀྱི་གཙོ་བོ་མཐོང་ལམ་གྱི་སྔ་རོལ་དུ་སྤངས་པ་མ་ཡིན་པའི་ཕྱིར། དེ་བཞིན་དུ་དགྲ་བཅོམ་ལའང་སྦྱར་རོ། །གཞན་ཡང་རང་རྒྱུ་བར་ཆད་མེད་ལམ་གྱི་ངོས་སྐལ་གྱི་ཁམས་གོང་འོག་གི་མཐོང་སྤངས་ཉོན་མོངས་པ་ཅིག་ཅར་དུ་སྤངས་པའི་འབྲས་གནས་ཡིན་ན་ཅིག་ཅར་བ་ཡིན་དགོས་པར་ཐལ། མཐོང་ལམ་གྱི་སྔ་རོལ་དུ་འདོད་ཉོན་ལྔ་པ་སྤངས་པའི་འབྲས་གནས་ཡིན་ན་ཆགས་བྲལ་སྔོན་སོང་ཡིན་དགོས་པའི་ཕྱིར། འདོད་ན་རིམ་གྱིས་པའི་རྒྱུན་ཞུགས་འབྲས་གནས་ཆོས་ཅན། དེར་ཐལ། དེའི་ཕྱིར། གཏན་ཚིགས་གྲུབ་སྟེ། ལམ་ལ་ཆོས་བཟོད་དེས་ཁམས་གོང་འོག་གི་ལམ་མཐོང་སྤངས་ཐམས་ཅད་ཅིག་ཆར་དུ་སྤོང་བར་བྱེད་པའི་ཕྱིར། གལ་ཏེ་ལམ་ལ་ཆོས་བཟོད་དེས་འདོད་པའི་ལམ་མཐོང་སྤངས་སྤོང་བར་བྱེད། ལམ་ལ་རྗེས་བཟོད་དེས་ཁམས་གོང་གི་ལམ་མཐོང་སྤངས་སྤོང་བར་བྱེད་པ་སོགས་མཛོད་ལྟར་དུ་ཁས་ལེན་པར་བྱེད་པས་གཏན་ཚིགས་མ་གྲུབ་བོ་ཞེ་ན། འོ་ན་འཇིག་རྟེན་པའི་ལམ་གྱིས་མཐོང་ལམ་གྱི་སྔ་རོལ་དུ་ཅི་ཡང་མེད་མན་ཆེད་ཀྱི་མཐོང་སྤངས་སྤངས་པ་ཡོད་པར་ཐལ། དེ་ལྟར་དུ་མཛོད་དུ་བཤད་པའི་ཕྱིར། གཞན་ཡང་མཐོང་ལམ་གྱི་སྔ་རོལ་དུ་འདོད་ཉོན་ལྔ་པ་སྤངས་པའི་རྒྱུན་ཞུགས་ཆོས་ཅན། འབྲས་བུ་ཐོད་རྒལ་བ་ཡིན་པར་ཐལ། ཆགས་བྲལ་སྔོན་སོང་ཡིན་པའི་ཕྱིར། ལུང་དེས་ཆགས་བྲལ་སྔོན་སོང་གི་རྒྱུན་ཞུགས་བསྟན་པ་ཡང་མ་ཡིན་ཏེ། རྒྱུན་ཞུགས་ཞུགས་པར་འཇོག་པ་ལ་འདོད་ཉོན་ཅུང་ཟད་ཀྱང་མ་སྤངས་པ་ནས་འདོད་ཉོན་ལྔ་པ་སྤངས་པའི་བར་ཁྱད་པར་མེད་པ་ཙམ་ཞིག་བསྟན་པའི་ཕྱིར་རོ། །ཡང་མཁས་པ་ཁ་ཅིག མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་དང་། དགུ་པ་སྤངས་ནས་བཅུ་དྲུག་པའི་རྟོགས་པ་ཐོབ་པའི་གང་ཟག་ལ་ཕལ་ཆེར་ལ་འདོད་ཆགས་དང་བྲལ་བ་སྔོན་དུ་སོང་བའི་ཕྱིར་འོང་དང་། འདོད་པ་ལ་འདོད་ཆགས་དང་བྲལ་བ་སྔོན་དུ་སོང་བའི་ཕྱིར་མི་འོང་ཞེས་པའི་ཐ་སྙད་འཐད་ཀྱི། ཆགས་བྲལ་སྔོན་སོང་གི་ཕྱིར་འོང་དང་། ཕྱིར་མི་འོང་ཞེས་པའི་ཐ་སྙད་མི་འཐད་ཅེས་ཟེར་རོ། །དེ་ནི་སྔོན་གྱི་མཁས་པ་རྣམས་ཀྱིས་གསུང་རབ་འཆད་པའི་སྐབས་སུ་ཐ་སྙད་བདེ་བའི་རྣམ་གཞག་འགོག་པར་སྣང་གིས་དོན་གཞན་མི་སྣང་སྟེ། དེ་ལྟར་ན་རིམ་གྱིས་པའི་ཕྱིར་འོང་དང་། ཕྱིར་མི་འོང་གཉིས་ལ་ཕལ་ཆེར་ལ་འདོད་ཆགས་དང་བྲལ་བའི་ཕྱིར་འོང་དང་། འདོད་པ་ལ་འདོད་ཆགས་དང་བྲལ་བའི་ཕྱིར་མི་འོང་ཞེས་པའི་ཐ་སྙད་འཐད་ཀྱི་རིམ་གྱིས་པའི་ཕྱིར་འོང་ཕྱིར་མི་འོང་ཞེས་པའི་ཐ་སྙད་མི་འཐད་པར་མཚུངས་སོ། །དེ་བཞིན་དུ་རྟོག་གེ་པ་དག་གིས་ཚུལ་དང་པོ་བདེ་བླག་ཏུ་རྟོགས་པའི་ཕྱིར་དུ་ཕྱོགས་ཆོས་ཞེས་པའི་ཐ་སྙད་མཛད་པ་ལ། ཤེས་འདོད་ཆོས་ཅན་གྱི་ཆོས་ཞེས་པའི་ཐ་སྙད་འཐད་ཀྱི་ཕྱོགས་ཆོས་ཞེས་པའི་ཐ་སྙད་མི་འཐད་ཞེས་རྩོད་པར་བྱེད་དམ། སྨྲ་བ་ལ་དགའ་བ་ཁྱེད་བློ་ནང་དང་ཁུག་ཞིག རང་གི་ལུགས་ནི། ཆགས་བྲལ་སྔོན་སོང་ནི་འབྲས་བུ་བར་པ་གཉིས་ཁོ་ན་ལ་བཞག་པ་ཡིན་ཏེ། མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་དང་། དགུ་པ་སྤོངས་པ་ཡོད་ཅིང་། མཐོང་སྤངས་ཉོན་མོངས་པ་དང་། སྲིད་ཉོན་དགུ་པ་སྤངས་པ་མེད་པའི་ཕྱིར་རོ། །གཉིས་པ་དེ་ལ་བཞག་པའི་གང་ཟག་གི་རྣམ་བཞག་ལ་གཉིས་ཏེ། ཆགས་བྲལ་སྔོན་སོང་གི་ཕྱིར་འོང་གི་སྐོར་དང་། ཕྱིར་མི་འོང་གི་སྐོར་རོ། །དང་པོ་ལ་གཉིས་ཏེ། ཞུགས་པ་དང་། འབྲས་གནས་སོ། །དང་པོ་ལ། སྤངས་པའི་ཁྱད་པར། རྟོགས་པའི་ཁྱད་པར། མཚན་ཉིད། དབྱེ་བ་དང་བཞི། དང་པོ་ལ་མཐོང་སྤངས་ལ་ལྟོས་པ་དང་། སྒོམ་སྤངས་ལ་ལྟོས་པ་གཉིས་ལས། དང་པོ་ནི། ཆགས་བྲལ་སྔོན་སོང་གི་ཞུགས་པ་གཉིས་དང་། རྒྱུན་ཞུགས་ཞུགས་པ་གསུམ་ཆར་གྱིས་མངོན་པ་གོང་མ་ལྟར་ན་མཐོང་སྤངས་ཅུང་ཟད་ཀྱང་མ་སྤངས་པ་ཡང་ཡོད་དེ། སྡུག་བསྔལ་ཆོས་བཟོད་ལ་གནས་པའི་གང་ཟག་གསུམ་པོ་དེས་མཐོང་སྤངས་ཅུང་ཟད་ཀྱང་མ་སྤངས་པའི་ཕྱིར་རོ། །མཐོང་སྤངས་ཉོན་མོངས་པ་མ་ལུས་པར་སྤངས་པ་ཡང་ཡོད་དེ། ལམ་ཆོས་ཤེས་དང་། རྗེས་བཟོད་ལ་གནས་པའི་གང་ཟག་གསུམ་པོ་དེས་མཐོང་སྤངས་ཉོན་མོངས་མ་ལུས་པར་སྤངས་པའི་ཕྱིར་རོ། །མཛོད་ལྟར་ན་གང་ཟག་གསུམ་པོ་དེས་ཁམས་གོང་གི་ལམ་མཐོང་སྤངས་མ་སྤངས་པ་གཅིག་དགོས་ཏེ། ལམ་རྗེས་བཟོད་དེ་ཁམས་གོང་གི་ལམ་མཐོང་སྤངས་ཀྱི་དངོས་གཉེན་ཡིན་པའི་ཕྱིར་རོ། །སྒོམ་སྤངས་ལ་ལྟོས་པའི་ཁྱད་པར་ནི་ཆགས་བྲལ་སྔོན་སོང་གི་ཕྱིར་འོང་ཞུགས་པས་མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་ངེས་པར་སྤངས་པ་ཅིག་དགོས་ཤིང་བདུན་པ་དང་བརྒྱད་པ་སྤངས་མ་སྤངས་ཅི་རིགས་པ་ཡོད་ལ་དགུ་པ་མ་སྤངས་པའོ། །གཉིས་པ་རྟོགས་པའི་ཁྱད་པར་ནི་མཛོད་ལྟར་ན་སྡུག་བསྔལ་ཆོས་བཟོད་རང་རྒྱུད་ལ་ཐོབ་ཅིང་ལམ་རྗེས་ཤེས་མ་ཐོབ་པའོ། །ཀུན་བཏུས་ལྟར་ན་སྦྱོར་ལམ་སྟན་གཅིག་པའི་རྟོགས་པ་ཐོབ་ཅིང་ལམ་རྗེས་ཤེས་མ་ཐོབ་པའོ། །སྟན་གཅིག་པའི་དོན་ལ་ཁ་ཅིག་སྦྱོར་ལམ་ཐོབ་པའི་རྟེན་དེ་ཉིད་ལ་མཐོང་ལམ་ཐོབ་པར་འགྱུར་བ་ཞེས་པ་ནི་ཀློག་མ་བསླབས་པའི་སྐྱོན་ཏེ། སྟན་དང་རྟེན་ནོར་འདུག་པའི་ཕྱིར་རོ། །འོ་ན་ཅི་ཞེ་ན། སྟན་ཐོག་གཅིག་ལ་སྦྱོར་ལམ་གང་ལ་མཉམ་པར་བཞག་པའི་མཉམ་གཞག་ལས་མ་ལངས་བཞིན་དུ་མཐོང་ལམ་ཐོབ་པར་འགྱུར་བ་སྟེ་འདིའི་ལུགས་ལ་བཟོད་ཆེན་དང་ཆོས་མཆོག་གཉིས་སོ།། །།གསུམ་པ་མཚན་ཉིད་ནི། སྦྱོར་ལམ་སྟན་གཅིག་པའི་རྟོགས་པ་ཐོབ་པའི་ཉན་ཐོས་གང་ཞིག བཅུ་དྲུག་པའི་རྟོགས་པ་ཐོབ་པ་དང་དུས་མཉམ་དུ་ཕྱིར་འོང་གི་འབྲས་བུ་ཐོབ་པར་འགྱུར་བའོ། །བཞི་པ་དབྱེ་བ་ལ། སྤངས་པའི་སྒོ་ནས་དབྱེ་བ། རྟོག་པའི་སྒོ་ནས་དབྱེ་བ། དབང་པོའི་སྒོ་ནས་དབྱེ་བ་དང་གསུམ་ལས། དང་པོ་ནི་མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས། བདུན་པ་སྤངས། བརྒྱད་པ་སྤངས་པ་དང་གསུམ་མོ། །གཉིས་པ་ནི། སྦྱོར་ལམ་སྟན་གཅིག་པའི་རྟོགས་པ་དང་། མཐོང་ལམ་སྐད་ཅིག་དང་པོ་བཅོ་ལྔ་ལ་གནས་པ་སྟེ་བཅུ་དྲུག་གོ །གསུམ་པ་ལ་ཆགས་བྲལ་སྔོན་སོང་གི་ཕྱིར་འོང་ཞུགས་པ་དད་པས་རྗེས་འབྲང་དང་། ཆོས་ཀྱི་རྗེས་འབྲང་གཉིས་སོ། །དེ་གཉིས་ཀྱི་མཚན་ཉིད་རིམ་བཞིན། ཆགས་བྲལ་སྔོན་སོང་གི་ཕྱིར་འོང་ཞུགས་པ་གང་ཞིག དད་པ་ལྷག་པས་གཞན་གྱིས་བསྟན་པའི་རྗེས་སུ་འབྲངས་ཏེ་བདེན་པ་མངོན་པར་རྟོགས་པ་ལ་སྦྱོར་བའོ། །དེ་གང་ཞིག་ཤེས་རབ་ལྷག་པས་རང་ཉིད་ཀྱིས་བདེན་པའི་དབང་དུ་བྱས་ཏེ་ཆོས་ཀྱི་རྗེས་སུ་འབྲངས་པས་བདེན་པ་མངོན་པར་རྟོགས་པ་ལ་སྦྱོར་བའོ། །གཉིས་པ་འབྲས་གནས་ལ་སྔར་ལྟར་བཞི་ལས། དང་པོ་སྤངས་པའི་ཁྱད་པར་ནི། སྒོམ་སྤངས་སྤངས་ཚུལ་སྔར་དང་འདྲ་བ་ལས་མཐོང་སྤངས་ཀུན་སྦྱོར་གསུམ་མ་ལུས་པར་སྤངས་པའོ། །རྟོགས་པའི་ཁྱད་པར་ནི་བཅུ་དྲུག་པའི་རྟོགས་པ་ཐོབ་འདོད་ཉོན་དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །མཚན་ཉིད་ལ་ཁ་ཅིག མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་ཤིང་འདོད་ཉོན་དགུ་པ་མ་སྤངས་པའི་ཉན་ཐོས་འབྲས་གནས་ཞེས་པ་ལ་གཞན་དག་ན་རེ། མཐོང་ལམ་སྡུག་བསྔལ་རྗེས་ཤེས་ལ་གནས་པའི་ཆགས་བྲལ་སྔོན་སོང་གི་ཕྱིར་འོང་ཞུགས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་ཤིང་འདོད་ཉོན་དགུ་པ་མ་སྤངས་པའི་ཉན་ཐོས་གང་ཞིག འབྲས་གནས་ཡིན་པའི་ཕྱིར། ཟུར་ཕྱི་མ་གྲུབ་སྟེ། ཁྱོད་ཀྱི་རྒྱུད་ཀྱི་མཁྱེན་པ་དེ་དགེ་སྦྱོང་ཚུལ་གྱི་འབྲས་བུ་ཡིན་པའི་ཕྱིར་ཞེ་ན། ས་དང་པོའི་རྗེས་ཐོབ་ལ་གནས་པའི་བྱང་སེམས་ཆོས་ཅན། སྒོམ་ལམ་པ་ཡིན་པར་ཐལ། ཁྱོད་ཀྱི་རྒྱུད་ཀྱི་མཁྱེན་པ་དེ་སྒོམ་ལམ་ཡིན་པའི་ཕྱིར། ཁྱབ་པ་ཁས། འདོད་ན། མིན་པར་ཐལ། མཐོང་ལམ་པ་ཡིན་པའི་ཕྱིར། གཏན་ཚིགས་གྲུབ་སྟེ། རྗེས་ཐོབ་ལུས་ངག་གི་སྤྱོད་པ་ཁྱད་པར་ཅན་དང་ལྡན་པའི་མཐོང་ལམ་པ་ཡིན་པའི་ཕྱིར། ཡང་ཁ་ཅིག མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་ཤིང་། འདོད་ཉོན་དགུ་པ་མ་སྤངས་པའི་ཉན་ཐོས་འབྲས་གནས་གང་ཞིག འདོད་ཉོན་དགུ་པ་སྤངས་པ་དང་དུས་མཉམ་དུ་ཕྱིར་མི་འོང་གི་འབྲས་བུ་མངོན་དུ་བྱེད་པར་འགྱུར་བ་ཞེ་ན། འདོད་ཉོན་དགུ་པ་མ་སྤངས་པའི་སྔ་རོལ་དུ་ཐེག་ཆེན་ལམ་དུ་འཇུག་པར་ངེས་པའི་ཆགས་བྲལ་སྔོན་སོང་གི་ཕྱིར་འོང་འབྲས་གནས་ཆོས་ཅན། མཚན་ཉིད་ཀྱི་ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། རང་ལུགས་ནི་མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་པའི་ཉན་ཐོས་འབྲས་གནས་གང་ཞིག འདོད་ཉོན་དགུ་པ་སྤོང་བར་འགྱུར་བའོ། །དབྱེ་བ་ལ་གསུམ་ལས། སྤངས་པའི་སྒོ་ནས་དབྱེ་ན་མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་པ་དང་། བདུན་པ་དང་། བརྒྱད་པ་སྤངས་པའི་འབྲས་གནས་གསུམ་མཐོང་ལམ་གྱི་རྗེས་སུ་བདུན་པ་དང་། བརྒྱད་པ་སྤངས་པ་གཉིས་ཏེ་ལྔའོ། །རྟོགས་པའི་སྒོ་ནས་དབྱེ་ན། བཅུ་དྲུག་པའི་རྟོགས་པ་ལ་གནས་པ། དེའི་རྗེས་ཐོབ་ལ་གནས་པ། འདོད་ཉོན་བདུན་པ་སྤོང་བའི་སྦྱོར་བའི་ལམ། བར་ཆད་མེད་པའི་ལམ། རྣམ་པར་གྲོལ་བའི་ལམ། དེའི་རྗེས་ཐོབ་ལ་གནས་པ་སྟེ་བཞི། འདོད་ཉོན་བརྒྱད་པ་ལ་ཡང་དེ་བཞིན་དུ་བཞི། །དགུ་པ་སྤོང་པའི་སྦྱོར་བའི་ལམ། བར་ཆད་མེད་ལམ་ལ་གནས་པ་གཉིས་ཏེ་བཅུ་གཉིས་སོ། །དབང་པོའི་སྒོ་ནས་དབྱེ་ན། ཆགས་བྲལ་སྔོན་སོང་གི་ཕྱིར་འོང་འབྲས་གནས་དད་པས་མོས་པ་དང་། མཐོང་བས་ཐོབ་པ་གཉིས། མཚན་ཉིད་རིམ་བཞིན། ཆགས་བྲལ་སྔོན་སོང་གི་ཕྱིར་འོང་འབྲས་གནས་གང་ཞིག དད་པ་ལྷག་པས་གཞན་གྱི་རྗེས་སུ་འབྲངས་ཏེ་བདེན་པ་མངོན་པར་རྟོགས་པར་བྱས་པ་དང་། དེ་གང་ཞིག ཤེས་རབ་ལྷག་པས་རང་ཉིད་ཀྱིས་བདེན་པའི་དབང་དུ་བྱས་པའི་ཆོས་ཀྱི་རྗེས་སུ་འབྲངས་ཏེ་བདེན་པ་མངོན་པར་རྟོགས་པར་བྱས་པའོ། །གཉིས་པ་ཆགས་བྲལ་སྔོན་སོང་གི་ཕྱིར་མི་འོང་གི་སྐོར་ལ་ཞུགས་པ་དང་འབྲས་གནས་གཉིས། དང་པོ་ལ་བཞི་ལས། སྤངས་པའི་ཁྱད་པར་ནི་མཐོང་ལམ་གྱི་སྔ་རོལ་དུ་འདོད་ཉོན་དགུ་པ་སྤངས་ཤིང་བསམ་གཏན་དང་པོའི་ཉོན་མོངས་དང་པོ་ནས་ཅི་ཡང་མེད་ཀྱི་ཉོན་མོངས་དགུ་པ་མན་ཆད་སྤངས་པ་དང་། མ་སྤངས་པ་ཅི་རིགས་པ་ཡོད་ལ། སྲིད་ཉོན་དང་པོ་མ་སྤངས་པའོ། །རྟོགས་པའི་ཁྱད་པར་ནི་སྔར་དང་འདྲའོ། །མཚན་ཉིད་ནི་མཐོང་ལམ་གྱི་སྔ་རོལ་དུ་འདོད་ཉོན་དགུ་པ་སྤངས། སྦྱོར་ལམ་སྟན་གཅིག་པའི་རྟོགས་པ་ཐོབ་པའི་ཉན་ཐོས་གང་ཞིག བཅུ་དྲུག་པའི་རྟོགས་པ་ཐོབ་པ་དང་དུས་མཉམ་དུ་ཕྱིར་མི་འོང་དུ་འགྱུར་བའོ། །དབྱེ་བ་ལ་སྤངས་པའི་སྒོ་ནས་དབྱེ་ན་འདོད་ཉོན་དགུ་པ་སྤངས་པ་དང་། བསམ་གཏན་དང་པོའི་ཉོན་མོངས་དང་པོ་ནས་ཅི་ཡང་མེད་ཀྱི་ཉོན་མོངས་དགུ་པ་སྤངས་པའི་བར་དྲུག་ཅུ་རྩ་བཞིའོ། །རྟོགས་པའི་སྒོ་ནས་དབྱེ་ན་སྔར་ལྟར་བཅུ་དྲུག་གོ །དབང་པོའི་སྒོ་ནས་དབྱེ་ན་སྔར་ལྟར་རྗེས་འབྲངས་གཉིས་སོ། །གཉིས་པ་འབྲས་གནས་ལ་ཡང་བཞི་ལས། དང་པོ་སྤངས་པའི་ཁྱད་པར་ནི། འདོད་ཉོན་དགུ་པ་དང་། མཐོང་སྤངས་ཀུན་སྦྱོར་གསུམ་མ་ལུས་པར་སྤངས་ཤིང་བསམ་གཏན་དང་པོའི་ཉོན་མོངས་དང་པོ་ནས་སྲིད་ཉོན་བརྒྱད་པའི་བར་སྤངས་མ་སྤངས་ཅི་རིགས་པ་ཡོད་ལ། སྲིད་ཉོན་དགུ་པ་མ་སྤངས་པའོ། །རྟོགས་པའི་ཁྱད་པར་ནི་བཅུ་དྲུག་པའི་རྟོགས་པ་ཐོབ་ཅིང་སྲིད་ཉོན་དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །མཚན་ཉིད་ནི། མཐོང་ལམ་གྱི་སྔ་རོལ་དུ་འདོད་ཉོན་དགུ་པ་སྤངས་པའི་ཉན་ཐོས་སློབ་པ་འབྲས་གནས་སོ། །དབྱེ་བ་ལ་སྤངས་པའི་སྒོ་ནས་དབྱེ་ན། འདོད་ཉོན་དགུ་པ་སྤངས་པ་གཅིག བསམ་གཏན་དང་པོའི་ཉོན་མོངས་དང་པོ་ནས་ཅི་ཡང་མེད་ཀྱི་ཉོན་མོངས་དགུ་པའི་བར་མཐོང་ལམ་གྱི་སྔ་རོལ་དུ་སྤངས་པ་དྲུག་ཅུ་རྩ་གསུམ། མཐོང་ལམ་གྱི་རྗེས་སུ་སྤངས་པ་དྲུག་ཅུ་རྩ་གསུམ། སྲིད་ཉོན་དང་པོ་ནས་བརྒྱད་པའི་བར་སྤངས་པ་བརྒྱད་དེ་བརྒྱ་དང་སུམ་ཅུ་རྩ་ལྔའོ། །རྟོག་པའི་སྒོ་ནས་དབྱེ་ན། འདོད་ཉོན་དགུ་པ་སྤངས་པའི་རྣམ་གྲོལ་ལམ་ལ་གནས་པ། དེའི་རྗེས་ཀྱི་རྗེས་ཐོབ་ལ་གནས་པ་སྟེ་གཉིས། བསམ་གཏན་དང་པོའི་ཉོན་མོངས་དང་པོ་ནས་སྲིད་ཉོན་བརྒྱད་པའི་བར་བདུན་ཅུ་རྩ་གཅིག་པོ་རེ་རེ་ལ་ཡང་སྦྱོར་བའི་ལམ། བར་ཆད་མེད་པའི་ལམ། རྣམ་པར་གྲོལ་བའི་ལམ། རྗེས་ཐོབ་ལ་གནས་པ་བཞི། སྲིད་ཉོན་དགུ་པ་སྤངས་པའི་སྦྱོར་བའི་ལམ་དང་། བར་ཆད་མེད་པའི་ལམ་ལ་གནས་པ་གཉིས་ཏེ་ཉིས་བརྒྱ་དང་བརྒྱད་ཅུ་རྩ་བརྒྱད་དོ། །དབང་པོའི་སྒོ་ནས་དབྱེ་ན་སྔར་ལྟར་དད་མོས་མཐོང་ཐོབ་གཉིས་སོ། །འོ་ན་ཆགས་བྲལ་སྔོན་སོང་གི་ཕྱིར་འོང་གིས་ཐོབ་པའི་ཕྱིར་མི་འོང་དེ་རིམ་གྱིས་པ་ཡིན་ནམ་ཆགས་བྲལ་སྔོན་སོང་ཡིན་ཞེ་ན། འདི་ལ་ཁ་ཅིག རིམ་གྱིས་པ་ཡིན་ཏེ། ཕྱིར་འོང་དང་ཕྱིར་མི་འོང་གི་འབྲས་བུ་གཉིས་རིམ་གྱིས་ཐོབ་པའི་ཕྱིར། ཆགས་བྲལ་སྔོན་སོང་ཡང་ཡིན་ཏེ། མཐོང་ལམ་གྱི་སྔ་རོལ་དུ་འདོད་ཉོན་དྲུག་པ་སྤངས་པའི་འབྲས་གནས་ཡིན་པའི་ཕྱིར་ཞེས་ཟེར་རོ། །ཁ་ཅིག་ཆགས་བྲལ་སྔོན་སོང་ཡིན་གྱི་རིམ་གྱིས་པ་མ་ཡིན་ཏེ། རྒྱུན་ཞུགས་ཀྱི་འབྲས་བུ་མ་ཐོབ་པར་ཕྱིར་འོང་གི་འབྲས་བུ་མངོན་དུ་བྱས་པའི་ཕྱིར་ཞེས་ཟེར་རོ། །དང་པོ་ལ་དེ་ཆོས་ཅན། འབྲས་བུ་ཐོད་རྒལ་བ་ཡིན་པར་ཐལ། རྒྱུན་ཞུགས་ཀྱི་འབྲས་བུ་མ་ཐོབ་པར་ཕྱིར་འོང་གི་འབྲས་བུ་མངོན་དུ་བྱས་པའི་ཕྱིར། ཁྱབ་པ་ཁས། འདོད་ན། འབྲས་བུ་རིམ་གྱིས་པ་ཡིན་པར་ཐལ། ཕྱིར་འོང་དང་ཕྱིར་མི་འོང་གི་འབྲས་བུ་གཉིས་རིམ་གྱིས་མངོན་དུ་བྱས་པའི་ཕྱིར། འདོད་ན་འགལ་ལོ། །སྔ་ཕྱི་གཉིས་ཆར་ལ་དེ་ཆོས་ཅན། ཕྱིར་མི་འོང་ཆགས་བྲལ་སྔོན་སོང་དུ་ཐལ། ཕྱིར་མི་འོང་གང་ཞིག ཆགས་བྲལ་སྔོན་སོང་ཡིན་པའི་ཕྱིར། ཡང་དེ་ཆོས་ཅན། རང་གང་ལ་གནས་པའི་འབྲས་བུ་དེའི་གེགས་ཀྱི་གཙོ་བོ་མཐོང་ལམ་གྱི་སྔ་རོལ་དུ་སྤངས་པར་ཐལ། ཆགས་བྲལ་སྔོན་སོང་ཡིན་པའི་ཕྱིར། རང་ལུགས་ནི་དེ་རིམ་གྱིས་པ་ཡིན་ཏེ། ཕྱིར་འོང་དང་ཕྱིར་མི་འོང་གི་འབྲས་བུ་གཉིས་རིམ་གྱིས་མངོན་དུ་བྱས་པ་གང་ཞིག དེ་གཉིས་ཀྱི་བར་དུ་འབྲས་བུ་གཞན་རྒལ་བར་བྱར་མེད་པའི་ཕྱིར། འབྲས་བུ་རིམ་གྱིས་པ་ཡིན་ན། འབྲས་བུ་བཞི་རིམ་གྱིས་ཐོབ་ཟིན་པ་ཡིན་མི་དགོས་ཤིང་། རིམ་གྱིས་ཐོབ་པར་བྱེད་པ་ཡང་ཡིན་མི་དགོས་པའི་ཕྱིར་རོ། །གཉིས་པ་རིམ་གྱིས་པ་བཤད་པ་ལ། རིམ་གྱིས་པའི་རྒྱུན་ཞུགས་ཀྱི་སྐོར། ཕྱིར་འོང་གི་སྐོར། ཕྱིར་མི་འོང་གི་སྐོར། དགྲ་བཅོམ་གྱི་སྐོར་དང་བཞི་ལས། དང་པོ་ལ་ཞུགས་པ་དང་འབྲས་གནས་གཉིས། དང་པོ་ལ་སྤངས་པའི་ཁྱད་པར་སོགས་བཞི་ལས། དང་པོ་སྤངས་པའི་ཁྱད་པར་ནི་འདོད་པའི་སྒོམ་སྤངས་ཅུང་ཟད་ཀྱང་མ་སྤངས་པའམ། དང་པོ་ནས་ལྔ་པའི་བར་སྤངས་པ་དང་མ་སྤངས་པ་ཅི་རིགས་པ་ཡོད་ལ་དྲུག་པ་མ་སྤངས་པའོ། །གཉིས་པ་རྟོག་པའི་ཁྱད་པར་ནི་མངོན་པ་གོང་མ་ལྟར་ན། སྦྱོར་ལམ་སྟན་གཅིག་པའི་རྟོགས་པ་ཐོབ་ནས་མཐོང་ལམ་སྐད་ཅིག་བཅོ་ལྔ་གང་རུང་ལ་གནས་པའོ། །འོག་མ་ལྟར་ན། མཐོང་ལམ་སྐད་ཅིག་བཅོ་ལྔ་གང་རུང་ལ་གནས་པའོ། །གསུམ་པ་མཚན་ཉིད་ལ་ཁ་ཅིག སྦྱོར་ལམ་སྟན་གཅིག་པའི་རྟོགས་པ་ཐོབ་ཅིང་ལམ་རྗེས་ཤེས་ཀྱི་རྟོགས་པ་མ་ཐོབ་པའི་ཉན་ཐོས་གང་ཞིག འདོད་ཉོན་དྲུག་པ་མ་སྤངས་པ་ཟེར་ན། ཅིག་ཆར་བའི་རྒྱུན་ཞུགས་ཞུགས་པས་མ་ངེས་སོ། །རང་ལུགས་ནི་སྦྱོར་ལམ་སྟན་གཅིག་པའི་རྟོགས་པ་ཐོབ་ཅིང་། ལམ་རྗེས་ཤེས་ཀྱི་རྟོགས་པ་མ་ཐོབ་པའི་ཉན་ཐོས་གང་ཞིག ལམ་རྗེས་ཤེས་ཀྱི་རྟོགས་པ་ཐོབ་པའི་ཚེ་རིམ་གྱིས་པའི་རྒྱུན་ཞུགས་འབྲས་གནས་སུ་འགྱུར་བའོ། །བཞི་པ་དབྱེ་བ་ལ་སྤངས་པའི་སྒོ་ནས་དབྱེ་ན་འདོད་པའི་སྒོམ་སྤངས་ཅུང་ཟད་ཀྱང་མ་སྤངས་པ་དང་། དང་པོ་ནས་ལྔ་པའི་བར་སྤངས་པ་སྟེ་དྲུག་གོ །རྟོགས་པའི་སྒོ་ནས་དབྱེ་ན་མངོན་པ་གོང་མ་ལྟར་ན་བཅུ་དྲུག་དང་འོག་མ་ལྟར་ན་བཅོ་ལྔའོ། །དབང་པོའི་སྒོ་ནས་དབྱེ་ན། དད་པས་རྗེས་འབྲང་དང་། ཆོས་ཀྱི་རྗེས་འབྲང་གཉིས་ཏེ། ཆགས་བྲལ་སྔོན་སོང་གི་ཞུགས་པའི་སྐབས་བཞིན་དུ་ཤེས་པར་བྱའོ། །གཉིས་པ་རིམ་གྱིས་པའི་རྒྱུན་ཞུགས་འབྲས་གནས་ལའང་བཞི་ལས། དང་པོ་སྤངས་པའི་ཁྱད་པར་ནི། མཐོང་སྤངས་ཉོན་མོངས་མ་ལུས་པ་སྤངས་ཤིང་། འདོད་པའི་སྒོམ་སྤང་ཅུང་ཟད་ཀྱང་མ་སྤངས་པའམ་དང་པོ་ནས་ལྔ་པའི་བར་སྤངས་མ་སྤངས་ཅི་རིགས་པ་ཡོད་ལ་དྲུག་པ་མ་སྤངས་པའོ། །གཉིས་པ་རྟོགས་པའི་ཁྱད་པར་ནི་ལམ་ལ་རྗེས་ཤེས་ཀྱི་རྟོགས་པ་ཐོབ་ཅིང་འདོད་ཉོན་དྲུག་པ་སྤངས་པའི་རྣམ་གྲོལ་ལམ་མ་ཐོབ་པའོ། །གསུམ་པ་མཚན་ཉིད་ལ་ཁ་ཅིག མཐོང་སྤངས་ཀུན་སྦྱོར་གསུམ་སྤངས་པའི་ཉན་ཐོས་གང་ཞིག འདོད་ཉོན་དྲུག་པ་མ་སྤངས་པ་ཞེས་པ་དང་། ཡང་དེ་གང་ཞིག འདོད་ཉོན་དྲུག་པ་སྤངས་དགོས་པ་ཞེས་ཟེར་ན། འདོད་ཉོན་དྲུག་པ་མ་སྤངས་པའི་ཅིག་ཅར་བའི་རྒྱུན་ཞུགས་འབྲས་གནས་ཀྱིས་མ་ངེས་སོ། །ཡང་དེ་གང་ཞིག་འབྲས་བུ་ཕྱི་མ་གསུམ་རིམ་གྱིས་མངོན་དུ་བྱེད་པ་ཞེས་ཟེར་ན། ཕྱིར་འོང་གི་འབྲས་བུ་མངོན་དུ་མི་བྱེད་པར་ཐེག་ཆེན་གྱི་ལམ་དུ་འཇུག་པར་ངེས་པའི་རིམ་གྱིས་པའི་རྒྱུན་ཞུགས་འབྲས་གནས་ཀྱིས་མ་ངེས་སོ། །ཡང་དེ་གང་ཞིག་འབྲས་བུ་ཕྱི་མ་གསུམ་མངོན་དུ་བྱེད་པའི་རིགས་ཅན་ཞེས་ཟེར་ན་ལམ་ཆོས་ཤེས་ལ་གནས་པའི་རྒྱུན་ཞུགས་ཞུགས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་སྔ་ཟུར་ནི་མངོན་པ་གོང་མས་གྲུབ་བོ། །ཡང་འབྲས་བུ་ཕྱི་མ་གསུམ་མངོན་དུ་བྱེད་པའི་རིགས་ཅན་གང་ཞིག བཅུ་དྲུག་པའི་རྟོགས་པ་ཐོབ་པའི་ཉན་ཐོས་ཞེས་ཟེར་ན། རིམ་གྱིས་པའི་ཕྱིར་འོང་འབྲས་གནས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། སྔ་ཟུར་གྲུབ་སྟེ། འབྲས་བུ་རིམ་གྱིས་པའི་ཉན་ཐོས་ཡིན་པའི་ཕྱིར་རོ། །རང་ལུགས་ནི་བཅུ་དྲུག་པའི་རྟོགས་པ་ཐོབ་ཅིང་འདོད་ཉོན་དྲུག་པ་སྤང་དགོས་པའི་ཉན་ཐོས་གང་ཞིག འབྲས་བུ་ཕྱི་མ་གསུམ་མངོན་དུ་བྱེད་པའི་རིགས་ཅན་ནོ། །བཞི་པ་དབྱེ་བ་ལ་དབྱེ་སྒོ་བདུན་ཏེ། སྤངས་པའི་སྒོ་ནས་དང་། རྟོགས་པའི་སྒོ་ནས་དང་། དབང་པོའི་སྒོ་ནས་དང་། རིགས་ཀྱི་སྒོ་ནས་དང་། ལམ་ལ་བརྩོན་མི་བརྩོན་གྱི་སྒོ་ནས་དང་། རྟེན་གྱི་སྒོ་ནས་དང་། སྐྱེ་བ་ལེན་ཚུལ་གྱི་སྒོ་ནས་དབྱེ་བའོ། །དང་པོ་ལ། འདོད་པའི་སྒོམ་སྤངས་ཅུང་ཟད་ཀྱང་མ་སྤངས་པ་ནས་ལྔ་པ་སྤངས་པའི་བར་དྲུག་གོ །གཉིས་པ་ལ། བཅུ་དྲུག་པའི་རྟོག་པ་ལ་གནས་པ། དེའི་རྗེས་ཐོབ་ལ་གནས་པ། འདོད་ཉོན་དང་པོ་ནས་ལྔ་པའི་བར་རེ་རེ་ལ་ཡང་དེ་སྤོང་བའི་སྦྱོར་བའི་ལམ། བར་ཆད་མེད་པའི་ལམ། རྣམ་པར་གྲོལ་བའི་ལམ། དེའི་རྗེས་ཐོབ་ལ་གནས་པ་སྟེ་བཞི་བཞི། འདོད་ཉོན་དྲུག་པ་སྤོང་བའི་སྦྱོར་བའི་ལམ། བར་ཆད་མེད་པའི་ལམ་ལ་གནས་པ་གཉིས་ཏེ། ཉི་ཤུ་རྩ་བཞིའོ། །གསུམ་པ་ལ་དད་པས་མོས་པ་དང་། མཐོང་བས་ཐོབ་པ་གཉིས་སོ། །བཞི་པ་ལ་ཡོངས་སུ་ཉམས་པའི་ཆོས་ཅན་གྱི་དགྲ་བཅོམ་པའི་རིགས་ཅན་ནས་མི་གཡོ་བའི་ཆོས་ཅན་གྱི་དགྲ་བཅོམ་པའི་རིགས་ཅན་གྱི་བར་དྲུག་གོ །དེ་ལ་དང་པོ་ལྔ་ནི། དད་མོས་སུ་འདུ་ལ། ཕྱི་མ་ནི་མཐོང་ཐོབ་ཏུ་འདུའོ། །ལྔ་པ་ལ་རིམ་གྱིས་པའི་རྒྱུན་ཞུགས་འབྲས་གནས་ཙམ་པོ་དང་། ཁྱད་པར་ཅན་གཉིས། འདི་གཉིས་ཀྱི་མཚན་ཉིད་ལ་ཁ་ཅིག་རིམ་པ་བཞིན་དུ་རིམ་གྱིས་པའི་རྒྱུན་ཞུགས་འབྲས་གནས་གང་ཞིག ཕྱིར་འོང་གི་འབྲས་བུ་ཐོབ་ཕྱིར་དུ་ལམ་ལ་བརྩོན་པར་བྱས་པ་དང་། མ་བྱས་པའོ། །ཞེས་ཟེར་ན། རིམ་གྱིས་པའི་རྒྱུན་ཞུགས་འབྲས་གནས་ཙམ་པོ་ཆོས་ཅན། རིམ་གྱིས་པའི་རྒྱུན་ཞུགས་འབྲས་གནས་ཁྱད་པར་ཅན་དུ་ཐལ། མཚན་ཉིད་དེའི་ཕྱིར། རྟགས་ཕྱི་མ་གྲུབ་སྟེ། ཕྱིར་འོང་གི་འབྲས་བུ་ཐོབ་ཕྱིར་དུ་མཐོང་ལམ་ཐོབ་པར་བྱས་པའི་ཕྱིར་རོ། །ཁ་ཅིག་དེ་བཅད་པའི་ཕྱིར་དུ་མཐོང་ལམ་ཐོབ་རྗེས་སུ་དེ་ལྟར་དུ་བྱས་པ་དང་། མ་བྱས་པ་ཞེས་ཟེར་ན། རིམ་གྱིས་པའི་རྒྱུན་ཞུགས་འབྲས་གནས་ཙམ་ཁྱད་གཉིས་ཀ་ཆོས་ཅན། ཙམ་པོ་བར་ཐལ། ཞེས་པའི་སྐྱོན་བརྗོད་པ་ཡང་འདུག་གོ །རང་ལུགས་ནི། དེ་གཉིས་ཀྱི་མཚན་ཉིད་རིམ་བཞིན། རིམ་གྱིས་པའི་རྒྱུན་ཞུགས་འབྲས་གནས་གང་ཞིག མཐོང་ལམ་ཐོབ་རྗེས་སུ་ཕྱིར་འོང་གི་འབྲས་བུ་ཐོབ་པའི་ཕྱིར་དུ་སྔར་ལམ་ལ་མ་བརྩོན་པ་གསར་དུ་བརྩོན་དགོས་པ་དང་། དེ་གང་ཞིག མཐོང་ལམ་ཐོབ་རྗེས་སུ་འདོད་ཉོན་སྤངས་པའི་སྦྱོར་བ་རང་རྒྱུད་ལ་ཐོབ་པ་སྟེ། ཕྱིར་འོང་དང་ཕྱིར་མི་འོང་གི་སྐབས་སུ་ཡང་འདིས་བསྒྲེས་ཏེ་ཤེས་པར་བྱའོ། །དྲུག་པ་ལ་འདོད་ལྷ་རིས་དྲུག་དང་། གླིང་གསུམ་གྱི་མིའི་རྟེན་ཅན་ཏེ་དགུའོ། །བདུན་པ་ལ་གཉིས་ཏེ། དབྱེ་བ་སྤྱིར་བསྟན་པ་དང་། སྐབས་སུ་བབ་པ་བྱེ་བྲག་ཏུ་བཤད་པའོ། །དང་པོ་ལ་ཁམས་གསུམ་གང་དུ་ཡང་སྐྱེ་བ་མི་ལེན་པར་ཚེ་དེ་ཉིད་ལ་མྱང་འདས་མངོན་དུ་བྱེད་པ་དང་། ཕྱི་མ་ཁམས་གོང་དུ་སྐྱེས་ནས་ཁམས་གོང་དུ་མྱང་འདས་མངོན་དུ་བྱེད་པ་དང་། ཕྱི་མ་འདོད་པར་སྐྱེས་ནས་འདོད་པར་མྱང་འདས་མངོན་དུ་བྱེད་པ་གསུམ་ལས། དང་པོ་ནི་མཐོང་ཆོས་ཞི་ཕྱིར་མི་འོང་གི་རིགས་ཅན་ནོ། །གཉིས་པ་ནི་གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོའི་ཕྱིར་མི་འོང་གི་རིགས་ཅན་ནོ། །གསུམ་པ་ལ་འདོད་པར་རིས་མཐུན་གྱི་སྐྱེ་བ་གཅིག་ཁོ་ན་བླངས་ནས་དང་། གཉིས་སམ་གསུམ་བླངས་ནས་དང་། བཞི་པ་ཕན་ཆད་བླངས་ནས་འདོད་པར་མྱང་འདས་མངོན་དུ་བྱེད་པ་གསུམ་ལས། དང་པོ་ནི་ཚེ་གཅིག་བར་ཆད་གཅིག་པའི་ཕྱིར་འོང་གི་རིགས་ཅན་ནོ། །གཉིས་པ་ལ་རིགས་ནས་རིགས་སྐྱེ་དང་། གསུམ་པ་ལ་སྲིད་པ་ལན་བདུན་པའི་རྣམ་གཞག་བྱེད་ཀྱང་ཡན་ལག་གཞན་རྣམས་མ་ཚང་བ་ལ་དེར་འཇོག་པའི་ངེས་པ་ནི་མེད་དོ། །གཉིས་པ་སྐབས་སུ་བབ་པ་བྱེ་བྲག་ཏུ་འཆད་པ་ནི། འོ་ན་དེ་རྣམས་ཀྱི་ནང་ནས་རྒྱུན་ཞུགས་ཀྱི་རྣམ་གཞག་འཆད་པའི་ཚེ་གང་སྐབས་སུ་བབ་པ་ཡིན་ཞེ་ན། སྔ་མ་རྣམས་ནི་ཚེ་དེ་ཉིད་ཀྱི་རྟེན་ལ་ཕྱིར་འོང་དང་། ཕྱིར་མི་འོང་དུ་འགྱུར་བས་དེ་དག་གི་སྐབས་སུ་བཤད་པར་བྱ་བ་ཡིན་གྱི་རྒྱུན་ཞུགས་ཀྱི་སྐབས་འདིར་རྣམ་གཞག་འཆད་མི་དགོས་ཏེ། སྐབས་འདིར་ནི་འབྲས་བུ་གོང་མ་མངོན་དུ་མ་བྱས་པར་རྒྱུན་ཞུགས་ཉིད་ཀྱི་ངང་ནས་འཆི་འཕོ་བར་འགྱུར་བའི་རྣམ་གཞག་འཆད་པ་སྐབས་སུ་བབ་པའི་ཕྱིར་རོ། །དེས་ན་ཆོས་མངོན་པ་ལས་རྒྱུན་ཞུགས་ཀྱི་སྐབས་སུ་སྲིད་པ་ལན་བདུན་པ་དང་། རིགས་ནས་རིགས་སྐྱེ་གཉིས། ཕྱིར་འོང་གི་སྐབས་སུ་ཚེ་གཅིག་བར་ཆད་གཅིག་པ་དང་། ཕྱིར་མི་འོང་གི་སྐབས་སུ་སློབ་པའི་གང་ཟག་གི་རྣམ་གཞག་ལྷག་མ་ཐམས་ཅད་འཆད་པའི་གནད་ཀྱང་འདི་ཉིད་ཡིན་ནོ། །དེས་ན་འདིར་སྐབས་སུ་བབ་པ་ལ་སྲིད་པ་ལན་བདུན་པ་དང་། རིགས་ནས་རིགས་སྐྱེ་གཉིས་ལས། དང་པོ་ལ། སྤངས་པའི་ཁྱད་པར། རྟོགས་པའི་ཁྱད་པར། སྐྱེ་བ་ལེན་ཚུལ་གྱི་ཁྱད་པར། མཚན་ཉིད་དང་བཞིའོ། །དང་པོ་ནི། འདོད་པའི་སྒོམ་སྤངས་སྔར་ཅུང་ཟད་ཀྱང་མ་སྤངས་ཤིང་། ཚེ་དེ་ཉིད་ལ་ཡང་མི་སྤོང་བ་གཅིག་དགོས་ཏེ། གཞན་དུ་ན་སྐྱེ་བའི་ཁྱད་པར་མི་འགྲུབ་པའི་ཕྱིར་རོ། །གཉིས་པ་ནི། བཅུ་དྲུག་པའི་རྟོགས་པ་ཐོབ་ཅིང་འདོད་ཉོན་དང་པོ་སྤོང་བའི་སྦྱོར་བ་ཙམ་ཡང་མ་ཐོབ་པའོ། །གསུམ་པ་ལ། བྱེ་བྲག་ཏུ་སྨྲ་བའི་ལུགས་དང་། མདོ་སྡེ་པའི་ལུགས་གཉིས། དང་པོ་ལ་ངེས་པའི་རིགས་ཅན་དང་། མ་ངེས་པའི་རིགས་ཅན་གཉིས་ལས། དང་པོ་ནི། འདོད་པར་མིའི་སྐྱེ་སྲིད་བདུན། དེའི་བར་སྲིད་བདུན། ལྷའི་སྐྱེ་སྲིད་བདུན། དེའི་བར་སྲིད་བདུན་ཏེ་སྲིད་པ་ཉི་ཤུ་རྩ་བརྒྱད་ལེན་ཀྱང་བདུན་ཚན་དུ་འདྲ་བའི་ཕྱིར། ལན་བདུན་པ་ཞེས་བྱ་སྟེ། ཤིང་ལོ་མ་བདུན་པ་དང་། གནས་བདུན་ལ་མཁས་པའི་དགེ་སློང་ཞེས་པའི་ཐ་སྙད་བཞིན་ནོ། །ཤིང་ལོ་མ་བདུན་པ་ནི་ཤིང་སྡོང་པོ་གཅིག་ལ་ཡལ་ག་བདུན། ཡལ་ག་རེ་རེ་ལ་ལོ་མ་བདུན་བདུན་ཡོད་ཀྱང་བདུན་ཚན་དུ་འདྲ་བའི་ཕྱིར་ན་ལོ་མ་བདུན་པ་ཞེས་བརྗོད་དོ། །གནས་བདུན་ལ་མཁས་པའི་དགེ་སློང་ནི་གཟུགས་ཀྱི་ཕུང་པོའི་ཡང་དག་པ། ཀུན་འབྱུང་། འགོག་པ། འགོག་པར་འགྲོ་བའི་ལམ། རོ་མྱང་། ཉེས་དམིགས། ངེས་འབྱུང་སྟེ་བདུན། དེ་བཞིན་དུ་ཕུང་པོ་གཞན་བཞི་ལའང་བདུན་བདུན་ཤེས་ཀྱང་བདུན་ཚན་དུ་འདྲ་བའི་ཕྱིར་ན། གནས་བདུན་ལ་མཁས་པ་ཞེས་བརྗོད་པ་བཞིན་ནོ། །འོ་ན་མདོ་ལས། གང་ཟག་ལྟ་བ་ཕུན་སུམ་ཚོགས་པ་སྲིད་པ་བརྒྱད་པ་མངོན་པར་འགྲུབ་པ་དེ་ནི་གནས་མ་ཡིན་ཞིང་གོ་སྐབས་མེད་དེ། འདི་ནི་གནས་མེད་དོ་ཞེས་གསུངས་པ་ཇི་ལྟ་བུ་ཞེ་ན། གང་ཟག་ལྟ་བ་ཕུན་སུམ་ཚོགས་པ་ནི་འཕགས་ལམ་ཡན་ལག་བརྒྱད་ཀྱི་ནང་ཚན་དུ་གྱུར་པའི་ཡང་དག་པའི་ལྟ་བ་ཐོབ་པ་ཡིན་ལ། དེས་འགྲོ་བ་རིས་མཐུན་གཅིག་ཏུ་སྐྱེ་སྲིད་བརྒྱད་པ་མི་ལེན་པ་ལ་དགོངས་སོ། །འོ་ན་གནས་ཐམས་ཅད་དུ་འཆི་འཕོ་བའི་གོང་འཕོ་དེ་ཚངས་རིས་ནས་འོག་མིན་གྱི་བར་དུ་སྐྱེ་བ་ལེན་པ་མིན་ནམ་ཞེ་ན། འདོད་པའི་ཁམས་ལ་དགོངས་པས་ཉེས་པ་མེད་དོ། །ཅིའི་ཕྱིར་འདོད་པའི་རྟེན་ལ་རིས་མཐུན་གྱི་སྐྱེ་སྲིད་བརྒྱད་པ་མི་ལེན་ཅེ་ན། དུས་དེ་སྲིད་ཀྱི་གདོན་མི་ཟ་བར་རྒྱུད་ཡོངས་སུ་སྨིན་པའི་ཕྱིར་ཏེ། སྦྲུལ་གོམས་པ་བདུན་པས་ཟིན་པ་དང་། རིམས་ཉིན་བཞི་པས་ཐེབས་པ་བཞིན་ནོ། །བར་སྐབས་སུ་འཕགས་པའི་ལམ་མངོན་དུ་བྱེད་ཀྱི་མྱ་ངན་ལས་ཀྱང་མི་འདའ་སྟེ། དེ་སྲིད་དུ་སྲིད་པ་མྱོང་བར་འགྱུར་བའི་ལས་ཀྱི་སྟོབས་བསྐྱེད་པའི་ཕྱིར་རོ། །སྲིད་པ་ཐ་མའི་རྟེན་ལ་སངས་རྒྱས་འབྱུང་བ་མེད་པ་དང་ཐུག་ན་ཁྱིམ་པའི་རྟེན་ལ་དགྲ་བཅོམ་ཐོབ་ཅིང་། ཁྱིམ་ན་ནི་མི་གནས་ལ་དགྲ་བཅོམ་ཐོབ་རྗེས་སུ་ཆོས་ཉིད་ཀྱིས་ཐོབ་པའི་དགེ་སློང་གི་མཚན་མ་ཡང་ཐོབ་བོ། །འདི་ནི་དེ་ལྟར་ཐོགས་ན་ལན་བདུན་པ་སྟེ། རྒྱུན་ཞུགས་ཐམས་ཅད་ཀྱི་ཐ་ཤལ་ལན་བདུན་ལེན་པར་ངེས་པའི་དབང་དུ་བྱས་པའོ། །གཉིས་པ་མ་ངེས་པའི་རིགས་ཅན་གྱིས་སྐྱེ་བ་ལེན་ཚུལ་ནི་སྔར་འདོད་པའི་བསྒོམ་སྤངས་ཅུང་ཟད་ཀྱང་མ་སྤངས་ཤིང་ཚེ་དེ་ཉིད་ལ་ཡང་མི་སྤོང་བས། ལན་བདུན་ལེན་པའི་རྒྱུ་ཡོད་ཀྱང་བར་སྐབས་སུ་འཕགས་པའི་ལམ་མངོན་དུ་བྱས་ནས་རིས་མཐུན་གྱི་སྐྱེ་སྲིད་གཅིག་ནས་དྲུག་པའི་བར་གང་ཡང་རུང་བ་ལ་མྱང་འདས་མངོན་དུ་བྱེད་པའོ། །འོ་ན་རིགས་ནས་རིགས་སྐྱེ་ཡང་དེར་འགྱུར་རོ་སྙམ་ན་མ་ཡིན་ཏེ། དེ་ནི་མཐོང་ལམ་ཐོབ་པའི་ལུས་རྟེན་ལ། རྣམ་གསུམ་རྣམ་བཞི་ལས་གྲོལ་བ་དགོས་ལ་འདི་ནི་མཐོང་ལམ་ཐོབ་པའི་ལུས་རྟེན་ལ་འདོད་ཉོན་ཅུང་ཟད་ཀྱང་མ་སྤངས་པའི་དབང་དུ་བྱས་པའི་ཕྱིར་རོ། །གོང་དུ་འཕོ་བའི་སྐབས་སུ་གོང་དུ་འཕོ་བ་བར་སྐབས་སུ་མྱ་ངན་ལས་འདའ་བར་རུང་བར་ལྟའོ། །དཔེར་ན་རྒྱུན་དུ་ཞུགས་པ་མཆོག་ཏུ་ཐོགས་ན་ལན་བདུན་པ་བཞིན་ནོ། །ཞེས་གསུངས་པ་ནི་མ་ངེས་པའི་རིགས་ཅན་འདི་ཉིད་ཀྱི་དབང་དུ་བྱས་པའོ། །གཉིས་པ་མདོ་སྡེའི་ལུགས་ནི། སྲིད་པ་ལན་བདུན་པ་ཞེས་པའི་སྒྲ་ཇི་བཞིན་ཉིད་དུ་སྐྱེ་སྲིད་བདུན་ཁོ་ན་ལེན་པར་བཞེད་ཀྱི་ལྷ་མི་གཉིས་ཆར་གྱི་རྟེན་ལ་སྐྱེ་སྲིད་བདུན་བདུན་ལེན་པ་ནི་མི་བཞེད་དོ། །བྱེ་བྲག་ཏུ་སྨྲ་བས། ལྷ་མི་སོ་སོའི་རྟེན་ལ་སྐྱེ་སྲིད་ལན་བདུན་ལེན་པར་འདོད་པ་འདི་ལ་ཤེས་པར་བྱེད་པའི་ལུང་དང་རིགས་པ་ཅི་ཞིག་ཡོད་ཅེས་དྲིས་པས་ལྷ་མི་སོ་སོར་ལན་བདུན་སྐྱེའི་གཉིས་ཀའི་ནང་དུ་ལན་བདུན་སྐྱེ་བས་སྲིད་པ་ལན་བདུན་པར་མི་འགྱུར་བའི་ཕྱིར་རོ་ཞེ་ན། འདི་ལ་ཡང་ཤེས་བྱེད་ཅི་ཞིག་ཡོད། འདི་སྐད་དུ་ལྷ་རྣམས་དང་མི་རྣམས་སུ་ལན་བདུན་ཞེས་འབྱུང་བའི་ཕྱིར་རོ་ཞེ་ན། དེ་ནི་གང་ཟག་གཅིག་གིས་ལྷ་མི་སོ་སོའི་རྟེན་ལ་སྲིད་པ་ལན་བདུན་འབྱུང་བའི་ཤེས་བྱེད་དུ་མི་རུང་སྟེ། འོད་སྲུང་པ་རྣམས་ལྷ་རྣམས་སུ་ལན་བདུན། མི་རྣམས་སུ་ལན་བདུན་ཞེས་གང་ཟག་སོ་སོ་ལའང་སྦྱོར་བའི་ཕྱིར་རོ། །དེས་ན་འདི་ལ་ལུགས་གསུམ་སྣང་སྟེ། བྱེ་བྲག་ཏུ་སྨྲ་བས་ལྷ་མི་སོ་སོའི་རྟེན་ལ་སྐྱེ་སྲིད་བདུན་བདུན་ཏེ། བཅུ་བཞི་ལེན་པ་དང་། མདོ་སྡེ་པས་གཉིས་ཆར་བསྡོམས་ནས་སྐྱེ་སྲིད་བདུན་ལེན་པ་དང་། འོད་སྲུང་པས་ལྷ་མི་གང་རུང་གཅིག་གི་རྟེན་ལ་སྐྱེ་སྲིད་བདུན་ལེན་པར་འདོད་པའོ། །བཞི་པ་མཚན་ཉིད་ལ། བྱེ་བྲག་ཏུ་སྨྲ་བའི་ལུགས་ལ་སྲིད་པ་ལན་བདུན་པའི་མཚན་ཉིད། མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་རིས་མཐུན་གྱི་སྐྱེ་སྲིད་བདུན་ལེན་པའི་རིགས་ཅན་ནོ། །དབྱེ་ན་ངེས་པའི་རིགས་ཅན་གྱི་དང་། མ་ངེས་པའི་རིགས་ཅན་གྱི་སྲིད་པ་ལན་བདུན་པ་གཉིས། །དང་པོའི་མཚན་ཉིད་ལ་ཁ་ཅིག རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་རིས་མཐུན་གྱི་སྐྱེ་སྲིད་ལན་བདུན་ལེན་པར་ངེས་པ་ཞེ་ན། ངེས་པའི་རིགས་ཅན་གྱི་སྲིད་པ་ལན་བདུན་པའི་རྟོགས་པ་སྔོན་དུ་སོང་བའི་འདོད་པའི་བར་སྲིད་དང་པོའི་རྟེན་ཅན་གྱི་རྒྱུན་ཞུགས་འབྲས་གནས་ཙམ་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁ་ཅིག དེ་བཅད་པའི་ཕྱིར་དུ་མཐོང་ལམ་ཐོབ་པའི་ལུས་རྟེན་མ་དོར་བའི་རྒྱུན་ཞུགས་འབྲས་གནས་ཙམ་པོ་གང་ཞིག དེ་ལྟར་བྱེད་པ་ཞེས་ཟེར་བ་ན། གཞན་དག་ན་རེ། ངེས་པའི་རིགས་ཅན་གྱི་སྲིད་པ་ལན་བདུན་པ་དང་། དེའི་རྟོགས་པ་སྔོན་དུ་སོང་བའི་འདོད་པའི་བར་སྲིད་དང་པོའི་རྟེན་ཅན་གྱི་རྒྱུན་ཞུགས་འབྲས་གནས་ཙམ་པོ་གཉིས་ཀ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། སྔ་ཟུར་གྲུབ་སྟེ། རྒྱུན་ཞུགས་འབྲས་གནས་ཙམ་པོ་གང་ཞིག་མཐོང་ལམ་ཐོབ་པའི་ལུས་རྟེན་མ་དོར་བའི་ཕྱིར། ཕྱི་མ་མ་གྲུབ་ན་ངེས་པའི་རིགས་ཅན་གྱི་སྲིད་པ་ལན་བདུན་པ་དེས་མཐོང་ལམ་ཐོབ་པའི་ལུས་རྟེན་དོར་བར་ཐལ། དེ་གཉིས་ཀས་དེ་དོར་བའི་ཕྱིར་ཞེས་ཟེར། འོ་ན་ངེས་པའི་རིགས་ཅན་གྱི་སྲིད་པ་ལན་བདུན་པའི་རྟོགས་པ་སྔོན་དུ་སོང་བའི་འདོད་པའི་བར་སྲིད་དང་པོའི་རྟེན་ཅན་གྱི་རྒྱུན་ཞུགས་འབྲས་གནས་ཙམ་དེས༷་མཐོང་ལམ་ཐོབ་པའི་ལུས་རྟེན་མ་དོར་བའི་རྒྱུན་ཞུགས་འབྲས་གནས་ཙམ་པོར་ཐལ། དེ་དང་ངེས་པའི་རིགས་ཅན་གྱི་སྲིད་པ་ལན་བདུན་པ་གཉིས་ཀ་དེ་ཡིན་པའི་ཕྱིར་རོ། །རང་ལུགས་ནི་མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་རིས་མཐུན་གྱི་སྐྱེ་སྲིད་བདུན་བླངས་ནས་མྱང་འདས་མངོན་དུ་བྱེད་པར་ངེས་པའོ། །དེ་ཡང་ལྷའི་རྟེན་ལ་རྒྱུན་ཞུགས་ཀྱི་འབྲས་བུ་ཐོབ་ན་ལྷར་ལན་དྲུག མིར་ལན་བདུན། མཐར་ལྷའི་རྟེན་ལ་མྱང་འདས་མངོན་དུ་བྱེད་པའོ། །མིའི་རྟེན་ལ་རྒྱུན་ཞུགས་ཀྱི་འབྲས་བུ་ཐོབ་ན་མིར་ལན་དྲུག ལྷར་ལན་བདུན་མཐར་མིའི་རྟེན་ལ་མྱང་འདས་མངོན་དུ་བྱེད་པའོ། །གཉིས་པ་མ་ངེས་པའི་རིགས་ཅན་གྱི་རྒྱུན་ཞུགས་སྲིད་པ་ལན་བདུན་པའི་མཚན་ཉིད། རྒྱུན་ཞུགས་སྲིད་པ་ལན་བདུན་པ་གང་ཞིག འདོད་པའི་སྐྱེ་སྲིད་བཅུ་གསུམ་པ་ཚུན་ཆད་དུ་མྱང་འདས་མངོན་དུ་བྱེད་པའོ། །མདོ་སྡེ་པའི་ལུགས་ལ་ངེས་པའི་རིགས་ཅན་གྱི་སྲིད་པ་ལན་བདུན་པའི་མཚན་ཉིད། མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་སྐྱེ་སྲིད་བདུན་བླངས་ནས་སྐྱེ་སྲིད་བདུན་པའི་རྟེན་ལ་མྱང་འདས་མངོན་དུ་བྱེད་པར་ངེས་པའོ། །མ་ངེས་པའི་རིགས་ཅན་གྱི་སྲིད་པ་ལན་བདུན་པའི་མཚན་ཉིད་རྒྱུན་ཞུགས་སྲིད་པ་ལན་བདུན་པ་གང་ཞིག འདོད་པའི་སྐྱེ་སྲིད་དྲུག་པ་ཚུན་ཆད་དུ་མྱང་འདས་མངོན་དུ་བྱེད་པའོ། །སྐྱེ་བ་ལེན་ཚུལ་ལ་ཁ་ཅིག ལྷ་མི་རེ་རེ་བཞིན་དུ་སྤེལ་ནས་ལེན་ཟེར་བ་ནི་མི་འཐད་དེ་བྱེ་བྲག་ཏུ་སྨྲ་བའི་ལུགས་ལ་ཡང་དེ་ལྟར་དུ་ཐལ་བའི་ཕྱིར་རོ། །ཁ་ཅིག་ལྷའི་རྟེན་ཅན་གྱི་སྲིད་པ་ལན་བདུན་པ་དེ་ལྷར་ལན་བདུན། མིའི་རྟེན་ཅན་གྱི་སྲིད་པ་ལན་བདུན་པ་དེས་མིར་ལན་བདུན་ལེན་ཟེར་བ་ནི་མི་འཐད་དེ། དེ་ནི་མདོ་སྡེ་པ་རང་ཉིད་ཀྱིས་ཀྱང་འོད་སྲུང་པའི་འདོད་པར་བྱས་པའི་ཕྱིར་རོ། །རང་ལུགས་ནི་ལྷའི་རྟེན་ཅན་དེས་དང་པོར་ལྷར་གསུམ། དེ་ནས་མིར་གསུམ། མཐར་ལྷའི་རྟེན་ལ་མྱ་ངན་ལས་འདའ། མིའི་རྟེན་ལ་ཡང་དེས་འགྲེའོ། །གཉིས་པ་རིགས་ནས་རིགས་སྐྱེ་ལ་མཛོད་རྩ་འགྲེལ་ལས་གསུངས་པའི་ཚུལ་དང་། འགྲེལ་བཤད་ལས་གསུངས་པའི་ཚུལ་གཉིས་ལས། དང་པོ་ལ་སྤངས་པའི། རྟོགས་པའི། སྐྱེ་བ་ལེན་ཚུལ་གྱི་ཁྱད་པར། མཚན་ཉིད་དང་བཞི་ལས། དང་པོ་ནི། རྣམ་གསུམ་རྣམ་བཞི་ལས་འགྲོ་བ་ཞེས་ཏེ། འདོད་པའི་སྒོམ་སྤངས་གསུམ་པ་སྤངས་པ་གཅིག་དགོས་ཏེ། དེ་མ་སྤངས་ན་སྐྱེ་སྲིད་བཞི་ལེན་སྲིད་པས་སྐྱེ་བའི་ཁྱད་པར་མི་གྲུབ་པའི་ཕྱིར་རོ། །བཞི་པ་སྤངས་མ་སྤངས་ཅི་རིགས་སུ་ཡོད་ཅིང་། ལྔ་པ་སྔར་མ་སྤངས་ཤིང་ཚེ་དེ་ཉིད་ལ་ཡང་མི་སྤོང་བ་གཅིག་དགོས་ཏེ། ལྔ་པ་སྤོངས་ན་དྲུག་པ་ཡང་ཚེ་དེ་ཉིད་ལ་སྤོང་བས་ཕྱིར་འོང་དུ་འགྱུར་བའི་ཕྱིར་ཏེ། འདོད་ཉོན་དྲུག་པ་སྤངས་ན་དགེ་སྦྱོང་ཚུལ་གྱི་འབྲས་བུ་གསར་ཐོབ་ཡོད་པར་ཤེས་ནས་སྤྲོ་བས་འཇུག་པར་འགྱུར་བ་གང་ཞིག འདོད་པའི་ཉོན་མོངས་པའི་རྣམ་པ་གཅིག་གིས་ཚེ་དེ་ཉིད་ལ་ཕྱིར་འོང་གི་འབྲས་བུ་ཐོབ་པའི་གེགས་བྱེད་མི་ནུས་པའི་ཕྱིར་ཏེ། ཕྱིར་འོང་གི་འབྲས་བུ་ཐོབ་པ་ལ་ཁམས་ལས་འདའ་མི་དགོས་པའི་ཕྱིར། ཕྱིར་མི་འོང་གི་འབྲས་བུ་ལ་ནི་མི་མཚུངས་ཏེ། འདི་ལ་ཁམས་ལས་འདའ་དགོས་པས་འདོད་པའི་ཉོན་མོངས་པའི་རྣམ་པ་གཅིག་གིས་ཀྱང་ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་པའི་གེགས་བྱེད་ནུས་པའི་ཕྱིར་རོ། །གཉིས་པ་ནི་སྤང་བྱ་གང་དང་གང་སྤངས་པའི་གཉེན་པོ་ཟག་མེད་ཀྱི་དབང་པོ་ཐོབ་པ་གཅིག་དགོས་ཏེ། གཞན་དུ་ན་དབང་པོའི་ཁྱད་པར་མི་འགྲུབ་པའི་ཕྱིར་རོ། །རྩ་ཚིག་ཏུ་དབང་པོའི་ཁྱད་པར་མ་སྨོས་ཀྱང་། རྒྱུན་དུ་ཞུགས་པ་མཐོང་ལམ་གྱིས་ཕྱིས་ཉོན་མོངས་པ་སྤོང་བར་བྱེད་ན། དེའི་གཉེན་པོ་ཟག་མེད་ཀྱི་དབང་པོ་ཐོབ་པ་ནི་དོན་ལ་གྲུབ་པའི་ཕྱིར་རོ། །འདིར་མཁས་པའི་དབང་པོ་དག་ཟག་མེད་ཀྱི་དབང་པོ་མ་ཐོབ་ན་ཟག་བཅས་ཀྱི་སྤངས་པ་ཉམས་སྲིད་པས་སྐྱེ་བའི་ཁྱད་པར་མི་འགྲུབ་པའི་ཕྱིར་ཞེས་པ་ཤེས་བྱེད་དུ་བཀོད་པ་ནི་མཛོད་ཀྱི་འགྲེལ་པར་མི་སྣང་ཞིང་བྱེ་བྲག་ཏུ་སྨྲ་བའི་ལུགས་ཀྱང་མ་ཡིན་ཏེ། དེའི་ལུགས་ལ་ཟག་མེད་ཀྱི་དབང་པོ་ཐོབ་ཀྱང་སྤངས་པ་ཉམས་སྲིད་པས་སྐྱེ་བའི་ཁྱད་པར་མི་འགྲུབ་པར་ཐལ་བའི་ཕྱིར་རོ། །དེས་ན་མཐོང་ལམ་ཐོབ་རྗེས་སུ་འཇིག་རྟེན་པ་དང་། འཇིག་རྟེན་ལས་འདས་པའི་ལམ་གང་གིས་ཉོན་མོངས་པ་སྤངས་ཀྱང་ཟག་མེད་ཀྱི་དབང་པོ་ཐོབ་པ་འབྱུང་བ་ལ་དགོངས་སོ། །གོ་བོའི་གཤོག་པ་ལ་རྒོད་ཀྱི་གཤོག་རྩལ་ཡོད་དོ། །གསུམ་པ་ནི། རྣམ་གསུམ་རྣམ་བཞི་ལས་གྲོལ་བ། ཚེ་གཉིས་གསུམ་དུ་རིགས་ནས་རིགས་ཞེས་ཏེ། འདོད་ཉོན་གསུམ་པ་སྤངས། བཞི་པ་མ་སྤངས་པས་དེས་འདོད་ཁམས་སུ་རིས་མཐུན་གྱི་སྐྱེ་སྲིད་གསུམ་ལེན་པར་བྱེད་དེ། བཞི་པའི་དབང་གིས་གཅིག ལྔ་པ་དྲུག་པ་བདུན་པ་གསུམ་གྱི་དབང་གིས་གཅིག བརྒྱད་པ་དགུ་པ་གཉིས་ཀྱིས་གཅིག་ལེན་པར་བྱེད་པའི་ཕྱིར་རོ། །དང་པོ་གྲུབ་སྟེ། འདོད་ཉོན་བཞི་པ་སྤངས་ནས་ལྔ་པ་མ་སྤངས་པའི་བར་དུ་འཆི་འཕོ་བ་ཡོད་པའི་ཕྱིར། བར་པ་གསུམ་གྱིས་གཅིག་ལེན་པར་བྱེད་ཀྱི་རེ་རེ་ལེན་པ་ནི་མེད་དེ། ལྔ་པ་སྤངས་ན་དྲུག་པ་ཚེ་དེ་ཉིད་ལ་སྤོང་བས་ཕྱིར་འོང་དུ་འགྱུར་ཞིང་། ཕྱི་མ་འདོད་པར་སྐྱེ་བའི་ཕྱིར་འོང་ཡིན་ན། འདོད་ཉོན་བདུན་པ་སྔར་སྤངས་པའམ། ཕྱིས་སྤོང་བར་འགྱུར་བ་གང་རུང་ཡིན་དགོས་པའི་ཕྱིར་རོ། །ཐ་མ་གཉིས་ཀྱིས་འདོད་པའི་སྐྱེ་སྲིད་ཅིག་ལེན་པར་བྱེད་དེ། བདུན་པ་སྤངས་ནས་བརྒྱད་པ་མ་སྤངས་པའི་བར་དུ་འཆི་འཕོ་བ་ཡོད་པའི་ཕྱིར། འོ་ན་ཐ་མ་གཉིས་པོ་རེ་རེས་ཀྱང་སྐྱེ་སྲིད་རེ་རེ་ལེན་པར་འགྱུར་ཏེ། བརྒྱད་པ་སྤངས་ནས་དགུ་པ་མ་སྤངས་པའི་བར་དུ་འཆི་འཕོ་བ་ཡོད་པའི་ཕྱིར་ཞེ་ན། སྐྱོན་མེད་དེ། དེའི་ཚེ་ཕྱིར་འོང་གི་འབྲས་བུ་ཐོབ་པའི་ལུས་རྟེན་ལ་བརྒྱད་པ་ངེས་པར་སྤངས་པ་གཅིག་དགོས་པས་ལྔ་པ། དྲུག་པ། བདུན་པ། བརྒྱད་པ་བཞི་ཆར་གྱིས་སྐྱེ་བ་གཅིག་ལེན་པར་སོང་བའི་ཕྱིར་རོ། །འཁྲུལ་པ་མེད་དོ། །འདོད་ཉོན་བཞི་པ་སྤངས་པའི་རིགས་ནས་རིགས་སྐྱེ་དེས་འདོད་པར་སྐྱེ་བ་གཉིས་ལེན་ཏེ། ལྔ་པ། དྲུག་པ། བདུན་པ་རྣམས་ཀྱིས་སྐྱེ་བ་གཅིག ཐ་མ་གཉིས་ཀྱིས་སྐྱེ་བ་གཅིག་ལེན་པའམ་ཡང་ན་བརྒྱད་པ་ཡན་ཆད་ཀྱིས་སྐྱེ་བ་གཅིག་བླངས་ནས་དགུ་པས་སྐྱེ་བ་གཅིག་ལེན་པའི་ཕྱིར་རོ། །གསུམ་པ་མཚན་ཉིད་ལ་ཁ་ཅིག རྒྱུན་ཞུགས་འབྲས་གནས་ཁྱད་པར་ཅན་གང་ཞིག འདོད་པར་རིས་མཐུན་གྱིས་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་དུ་བྱེད་པ་ཞེ་ན། སྲིད་པ་ལན་བདུན་པའི་རྟོག་པ་སྔོན་དུ་སོང་ཞིང་འདོད་པར་རིས་མཐུན་གྱིས་སྐྱེ་སྲིད་གཉིས་སམ་གསུམ་ལེན་པར་ངེས་པའི་རྒྱུན་ཞུགས་འབྲས་གནས་ཁྱད་པར་ཅན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁ་ཅིག་དེ་བཅད་པའི་ཆེད་དུ་མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཁྱད་པར་ཅན་གང་ཞིག དེ་ལྟར་བྱེད་པ་ཞེ་ན། རིགས་ནས་རིགས་སྐྱེར་འགྱུར་ངེས་ཀྱི་འདོད་ཉོན་གསུམ་པ་སྤང་བའི་སྦྱོར་བ་ལ་གནས་བཞིན་པའི་རྒྱུན་ཞུགས་འབྲས་གནས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། འདོད་ཉོན་གསུམ་པ་མ་སྤངས་པའི་ཕྱིར། ཡང་ཁ་ཅིག་འདོད་ཉོན་གསུམ་པ་སྤངས་ཤིང་ཞེས་བསྣོན་ཀྱང་། མཐོང་ལམ་གྱི་སྔ་རོལ་དུ་འདོད་ཉོན་གསུམ་པ་སྤངས་ཤིང་རིགས་ནས་རིགས་སྐྱེར་འགྱུར་ངེས་ཀྱི་རྒྱུན་ཞུགས་འབྲས་གནས་ཁྱད་པར་ཅན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རང་ལུགས་ནི་འདོད་ཉོན་གསུམ་པ་སྤངས་པའི་གཉེན་པོ་ཟག་མེད་ཀྱི་དབང་པོ་དང་། བཞི་པ་སྤངས་པའི་གཉེན་པོ་ཟག་མེད་ཀྱི་དབང་པོ་གང་རུང་ཐོབ་པའི་མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་གང་ཞིག འདོད་པར་རིས་མཐུན་གྱི་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་དུ་བྱེད་པའོ། །དབྱེ་ན་ལྷའི་རིས་ནས་རིགས་སྐྱེ་དང་། མིའི་རིགས་ནས་རིགས་སྐྱེ་གཉིས། དང་པོའི་མཚན་ཉིད། ལྷའི་རྟེན་ལ་མཐོང་ལམ་ཐོབ་པའི་རིགས་ནས་རིགས་སྐྱེ་གང་ཞིག ལྷའི་རྟེན་ལ་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་དུ་བྱེད་པར་ངེས་པའོ། །གཉིས་པའི་མཚན་ཉིད། མིའི་རྟེན་ལ་མཐོང་ལམ་ཐོབ་པའི་རྒྱུན་ཞུགས་རིགས་ནས་རིགས་སྐྱེ་གང་ཞིག མིའི་རྟེན་ལ་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་དུ་བྱེད་པར་ངེས་པའོ། །གཉིས་པ་འགྲེལ་བཤད་ལས་ཇི་ལྟར་བཤད་པའི་ཚུལ་ནི། རྣམ་གཅིག་རྣམ་གཉིས་ལས་གྲོལ་བ། །ཚེ་བཞི་ཚེ་ལྔ་རིགས་ནས་རིགས། །ཞེས་པའང་ཐོབ་པས་འདོད་ཉོན་གཅིག་སྤངས་ནས་འདོད་པར་རིགས་མཐུན་གྱི་སྐྱེ་སྲིད་བཞི་བླངས་ནས་མྱང་འདས་མངོན་དུ་བྱེད་པའི་རིགས་ནས་རིགས་སྐྱེ་དང་། འདོད་ཉོན་གཉིས་པ་སྤངས་ནས་འདོད་པར་རིས་མཐུན་གྱི་སྐྱེ་སྲིད་བཞི་བླངས་ནས་མྱང་འདས་མངོན་དུ་བྱེད་པའི་རིགས་ནས་རིགས་སྐྱེ་གཉིས་ཡོད་དེ། དེ་ལས་གཞན་དུ་ན་འདོད་ཉོན་གསུམ་པ་ནས་དགུ་པ་སྤངས་པའི་བར་ལ་རྣམ་པར་གཞག་པ་མཛད་ན་འདོད་ཉོན་དང་པོ་དང་གཉིས་པ་སྤངས་པ་ལ་ཅིའི་ཕྱིར་རྣམ་པར་གཞག་པ་མི་མཛད་དེ་མཛད་དགོས་པའི་ཕྱིར་གསུངས་སོ། །དེའི་དོན་ནི། འདོད་ཉོན་གསུམ་པ་དང་བཞི་པ་སྤངས་པ་ལ་རིགས་ནས་རིགས་སྐྱེ་དང་། ལྔ་པ་སྤངས་པ་ལ་ལོགས་སུ་རྣམ་བཞག་མ་མཛད་ཀྱང་དེ་སྤངས་ན་དྲུག་པ་ཡང་ཚེ་དེ་ཉིད་ལ་སྤངས་པས་ཕྱིར་འོང་དུ་འགྱུར་བས་དེའི་རྣམ་གཞག་མཛད་པ་དང་། བདུན་པ་དང་བརྒྱད་པ་སྤངས་པ་ལ་ཕྱིར་འོང་ཚེ་གཅིག་བར་ཆད་གཅིག་པ་དང་། དགུ་པ་སྤངས་པ་ལ་ཕྱིར་མི་འོང་གི་རྣམ་གཞག་མཛད་ན༷་ཞེས་པའི་དོན་ཏོ། །གཉིས་པ་ལ་རིམ་གྱིས་པའི་ཕྱིར་འོང་གི་སྐོར་ལ་ཞུགས་པ་དང་། འབྲས་གནས་གཉིས། དང་པོ་ལ་བཞི་ལས། དང་པོ་སྤངས་པའི་ཁྱད་པར་ནི་མཐོང་སྤངས་ཀུན་སྦྱོར་གསུམ་སྤངས་ཤིང་འདོད་པའི་སྒོམ་སྤངས་སུ་གྱུར་པའི་ཉོན་མོངས་དང་པོ་ནས་ལྔ་པའི་བར་སྤངས་མ་སྤངས་ཅི་རིགས་སུ་ཡོད་ཅིང་དྲུག་པ་མ་སྤངས་པ་གཅིག་དགོས་སོ། །གཉིས་པ་རྟོགས་པའི་ཁྱད་པར་ནི། བཅུ་དྲུག་པའི་རྟོགས་པ་ཐོབ་ཅིང་འདོད་པའི་སྒོམ་སྤངས་ཉོན་མོངས་དྲུག་པ་སྤངས་པའི་རྣམ་གྲོལ་ལམ་མ་ཐོབ་པ་གཅིག་དགོས་སོ། །གསུམ་པ་མཚན་ཉིད་ལ་ཁ་ཅིག རྒྱུན་ཞུགས་འབྲས་གནས་ཁྱད་པར་ཅན་གང་ཞིག འདོད་ཉོན་དྲུག་པ་མ་སྤངས་པ་ཞེ་ན། འདོད་ཉོན་ལྔ་པ་སྤངས་ཤིང་། འདོད་ཉོན་དྲུག་པ་མ་སྤངས་པའི་རྒྱུན་ཞུགས་འབྲས་གནས་ཁྱད་པར་ཅན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཡང་རིམ་གྱིས་པའི་རྒྱུན་ཞུགས་འབྲས་གནས་ཁྱད་པར་ཅན་གང་ཞིག འདོད་པའི་སྒོམ་སྤངས་སུ་གྱུར་པའི་ཉོན་མོངས་དྲུག་པ་མ་སྤངས་པ་ཞེ་ན། དེ་དེའི་མཚན་ཉིད་དུ་འཇོག་པ་མི་འཐད་དེ། རིམ་གྱིས་པའི་རྒྱུན་ཞུགས་འབྲས་གནས་ཁྱད་པར་ཅན་དང་། རིམ་གྱིས་པའི་ཕྱིར་འོང་ཞུགས་པ་གཉིས་ཡིན་ཁྱབ་མཉམ་ཡིན་པས་གཅིག་གིས་མཚན་ཉིད་ཀྱི་ཟུར་དུ་ཅིག་ཤོས་བཞག་པ་ལ་དགོས་པ་མེད་པའི་ཕྱིར་རོ། །ཡང་རིམ་གྱིས་པའི་རྒྱུན་ཞུགས་འབྲས་གནས་གང་ཞིག འདོད་པའི་སྒོམ་སྤངས་ཉོན་མོངས་སྤངས་པའི་སྦྱོར་བ་རང་རྒྱུད་ལ་ཐོབ་པ་ཞེ་ན། མཐོང་ལམ་གྱི་སྔ་རོལ་དུ་འདོད་ཉོན་ལྔ་པ་སྤངས་པའི་རིམ་གྱིས་པའི་རྒྱུན་ཞུགས་འབྲས་གནས་ཙམ་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རང་ལུགས་ནི་རིམ་གྱིས་པའི་རྒྱུན་ཞུགས་འབྲས་གནས་གང་ཞིག མཐོང་ལམ་ཐོབ་རྗེས་སུ་འདོད་པའི་སྒོམ་སྤངས་ཉོན་མོངས་སྤངས་པའི་སྦྱོར་བ་རང་རྒྱུད་ལ་ཐོབ་པའོ། །བཞི་པ་དབྱེ་བ་ལ་སྤངས་པའི་སྒོ་ནས་དབྱེ་བ་སོགས་གསུམ་སྟེ། སྔ་མ་ལ་དཔགས་ཏེ་ཤེས་པར་བྱའོ། །གཉིས་པ་རིམ་གྱིས་པའི་ཕྱིར་འོང་འབྲས་གནས་ལ་སྔར་ལྟར་བཞི་ལས། དང་པོ་སྤངས་པའི་ཁྱད་པར་ནི། འདོད་པའི་སྒོམ་སྤངས་དྲུག་པ་སྤངས་ཤིང་། བདུན་པ་དང་། བརྒྱད་པ་སྤངས་མ་སྤངས་ཅི་རིགས། དགུ་པ་མ་སྤངས་པའོ། །གཉིས་པ་རྟོགས་པའི་ཁྱད་པར་ནི། འདོད་ཉོན་དྲུག་པ་སྤངས་པའི་རྣམ་གྲོལ་ལམ་ཐོབ་ཅིང་། དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །གསུམ་པ་མཚན་ཉིད་ནི། མཐོང་ལམ་ཐོབ་རྗེས་སུ་འདོད་ཉོན་དྲུག་པ་སྤངས་པའི་ཉན་ཐོས་འབྲས་གནས་གང་ཞིག འདོད་ཉོན་དགུ་པ་དང་བསམ་གཏན་དང་པོའི་ཉོན་མོངས་དང་པོ་སྤང་དགོས་པ་དེ་རིམ་གྱིས་པའི་ཕྱིར་འོང་འབྲས་གནས་ཀྱི་མཚན་ཉིད་དུ་བཞག་པ་ལ། ཁ་ཅིག་ན་རེ། ཕྱིར་མི་འོང་གི་འབྲས་བུ་ལས་ཉམས་པར་ངེས་པའི་རིམ་གྱིས་པའི་ཕྱིར་མི་འོང་འབྲས་གནས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཞན་རྣམས་བསྒྲུབ་སླ་ལ། འདོད་ཉོན་དགུ་པ་སྤོང་དགོས་པར་ཐལ། འདོད་ཉོན་དགུ་པ་སྤངས་པའི་སྤངས་པ་ལས་ཉམས་པར་ངེས་པ་གང་ཞིག སྤངས་པ་དེ་སླར་ཡང་སོར་ཆུད་དགོས་པའི་ཕྱིར་ཟེར་རོ། །དེ་ནི་མི་འཐད་དེ། དེ་ཆོས་ཅན། འདོད་ཉོན་དགུ་པ་མ་སྤངས་པར་ཐལ། དེ་སྤང་དགོས་པའི་ཕྱིར། བཞི་པ་དབྱེ་བ་ལ་བདུན་ལས། དང་པོ་སྤངས་པའི་སྒོ་ནས་དབྱེ་ན། འདོད་ཉོན་དྲུག་པ་སྤངས་པ། བདུན་པ་སྤངས་པ། བརྒྱད་པ་སྤངས་པ་དང་གསུམ་མོ། །གཉིས་པ་རྟོགས་པའི་སྒོ་ནས་དབྱེ་ན། འདོད་ཉོན་དྲུག་པ་སྤངས་པའི་རྣམ་གྲོལ་ལམ་ལ་གནས་པ་དང་། དེའི་རྗེས་ཐོབ་ལ་གནས་པ་གཉིས། བདུན་པ་དང་བརྒྱད་པ་གཉིས་ལ་སྦྱོར་བའི་ལམ་ལ་གནས་པ་སོགས་བཞི་བཞི། དགུ་པ་སྤོང་བའི་སྦྱོར་བའི་ལམ་དང་། བར་ཆད་མེད་ལམ་ལ་གནས་པ་གཉིས་ཏེ་བཅུ་གཉིས་སོ། །གསུམ་པ་དབང་པོའི་སྒོ་ནས་དབྱེ་བ་དང་། བཞི་པ་རིགས་ཀྱི་སྒོ་ནས་དབྱེ་བ་དང་། ལྔ་པ་ལམ་ལ་བརྩོན་མི་བརྩོན་གྱི་སྒོ་ནས་དབྱེ་བ་དང་། དྲུག་པ་རྟེན་གྱི་སྒོ་ནས་དབྱེ་བ་ནི་རྒྱུན་ཞུགས་ཀྱི་སྐབས་སུ་ཤེས་པར་བྱའོ། །བདུན་པ་སྐྱེ་བ་ལེན་ཚུལ་གྱི་སྒོ་ནས་དབྱེ་བ་ལ་སྤྱིར་བསྟན་པ་དང་། སྐབས་སུ་བབ་པ་བྱེ་བྲག་ཏུ་བཤད་པ་གཉིས། དང་པོ་ཁམས་གསུམ་གང་དུ་ཡང་སྐྱེ་བ་མི་ལེན་པར་ཚེ་དེ་ཉིད་ལ་མྱང་འདས་མངོན་དུ་བྱེད་པ་དང་། ཕྱི་མ་ཁམས་གོང་དུ་སྐྱེས་ནས་ཁམས་གོང་མའི་རྟེན་ལ་མྱང་འདས་མངོན་དུ་བྱེད་པ་དང་། ཕྱི་མ་འདོད་པར་སྐྱེས་ནས་འདོད་པའི་རྟེན་ལ་མྱང་འདས་མངོན་དུ་བྱེད་པ་དང་གསུམ་ལས། དང་པོ་ལ་མཐོང་ཆོས་ཞིའི་རིགས་ཅན། གཉིས་པ་ནི་གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོའི་ཕྱིར་མི་འོང་གི་རིགས་ཅན་ནོ། །གསུམ་པ་ལ་ཚེ་གཅིག་བར་ཆད་གཅིག་པར་འཇོག་གོ །གཉིས་པ་ནི་ཚེ་གཅིག་བར་ཆད་གཅིག་པ་སྟེ། མཛོད་ལས། ཉེས་ཆ་བདུན་ནམ་བརྒྱད་ཟད་པ། །ཚེ་གཅིག་བར་ཆད་གཅིག་པ་དང་། །ཞེས་གསུངས་ཏེ། འདི་ལ་སྤངས་པའི་ཁྱད་པར་འདོད་ཉོན་བདུན་པ་སྤངས་ཤིང་། བརྒྱད་པ་ཅི་རིགས། དགུ་པ་ངེས་པར་མ་སྤངས་པའོ། །རྟོག་པའི་ཁྱད་པར་ནི་འདོད་ཉོན་བདུན་པ་སྤངས་པའི་གཉེན་པོ་ཟག་མེད་ཀྱི་དབང་པོ་ཐོབ་པའོ། །དེས་ན་མཐོང་ལམ་གྱི་སྔ་རོལ་དུ་འདོད་ཉོན་བདུན་པ་དང་བརྒྱད་སྤངས་པའི་ཕྱིར་འོང་འབྲས་གནས་ཀྱང་གཉེན་པོ་ཟག་མེད་ཀྱི་དབང་པོ་མ་ཐོབ་ཀྱི་བར་དུ་ཚེ་གཅིག་བར་ཆད་གཅིག་པ་ནི་མ་ཡིན་ནོ། །མཚན་ཉིད་ལ་ཁ་ཅིག་ཕྱིར་འོང་འབྲས་གནས་ཁྱད་པར་ཅན་གང་ཞིག འདོད་པར་རིགས་མཐུན་གྱི་སྐྱེ་སྲིད་གཅིག་བླངས་ནས་མྱང་འདས་མངོན་དུ་བྱེད་པ་ཟེར་ན། སྲིད་པ་ལན་བདུན་པའི་རྟོགས་པ་སྔོན་དུ་སོང་བའི་རིས་མཐུན་གྱིས་སྐྱེ་སྲིད་གཅིག་ལེན་པའི་ཕྱིར་འོང་འབྲས་གནས་ཁྱད་པར་ཅན་གྱིས་མ་ངེས་སོ། ཁ་ཅིག་དེ་བཅད་པའི་ཕྱིར་དུ་སྔར་གྱི་མཚན་ཉིད་ཀྱི་སྟེང་དུ་མཐོང་ལམ་ཐོབ་པའི་ལུས་རྟེན་མ་དོར་བ་ཞེས་བསྣོན་ན། ཚེ་གཅིག་བར་ཆད་གཅིག་པར་འགྱུར་ངེས་ཀྱི་འདོད་ཉོན་བདུན་པ་སྤོང་བའི་སྦྱོར་བ་ལ་གནས་བཞིན་པའི་ཕྱིར་འོང་གིས་མ་ངེས་སོ། །རང་ལུགས་ནི་འདོད་ཉོན་བདུན་པ་སྤངས་པའི་གཉེན་པོ་ཟག་མེད་ཀྱི་དབང་པོ་དང་། བརྒྱད་པ་སྤངས་པའི་གཉེན་པོ་ཟག་མེད་ཀྱི་དབང་པོ་གང་རུང་ཐོབ་ཅིང་མཐོང་ལམ་ཐོབ་པའི་ལུས་རྟེན་དང་བཅས་པའི་ཕྱིར་འོང་འབྲས་གནས་གང་ཞིག འདོད་པར་རིས་མཐུན་གྱི་སྐྱེ་སྲིད་གཅིག་བླངས་ནས་མྱང་འདས་མངོན་དུ་བྱེད་པའོ། །སྐྱེ་བ་ལེན་ཚུལ་ལ་ཉན་ས་ལས། ལྷའི་སྲིད་པ་གཅིག་དང་། མིའི་སྲིད་པ་གཅིག་མངོན་དུ་གྲུབ་པའི་ཚེ་གཅིག་བར་ཆད་གཅིག་པར་བཞག་གོ །ཞེས་རིགས་མི་མཐུན་གྱི་སྐྱེ་སྲིད་གཉིས་ལེན་པར་ངེས་ཀྱང་། རིས་མཐུན་གྱི་སྐྱེ་སྲིད་གཅིག་ལས་མི་ལེན་པས་ཚེ་གཅིག་བར་ཆད་གཅིག་པའི་སྒྲ་དོན་ཡང་མི་འདོར་རོ། །ཡང་ཀུན་བཏུས་ལས་ལྷའི་རྟེན་ལ་མྱང་འདས་མངོན་དུ་བྱེད་པར་བཤད་པས་དེ་ལྟར་ན་ལྷའི་རྟེན་ལ་རྒྱུན་ཞུགས་ཀྱི་འབྲས་བུ་ཐོབ་པ་དགོས་ཏེ། མིའི་རྟེན་ལ་རྒྱུན་ཞུགས་ཀྱི་འབྲས་བུ་ཐོབ་པ་དེས་འདོད་པའི་ལྷའི་རྟེན་ལ་མྱང་འདས་མངོན་དུ་བྱེད་པ་མེད་པའི་ཕྱིར་རོ། །གསུམ་པ་རིམ་གྱིས་པའི་ཕྱིར་མི་འོང་གི་སྐོར་ལ་ཞུགས་པ་དང་འབྲས་གནས་གཉིས། དང་པོ་ལ་བཞི་ལས། དང་པོ་སྤངས་པའི་ཁྱད་པར་ནི་འདོད་ཉོན་དྲུག་པ་སྤངས་ཤིང་། དགུ་པ་མ་སྤངས་པའོ། །གཉིས་པ་རྟོགས་པའི་ཁྱད་པར་ནི། འདོད་ཉོན་བདུན་པ་སྤངས་པའི་སྦྱོར་བ་ཐོབ་ཅིང་། དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །གསུམ་པ་མཚན་ཉིད་ལ་ཁ་ཅིག འདིའི་མཚན་ཉིད་ཀྱི་ཟུར་དུ་རིམ་གྱིས་པའི་ཕྱིར་འོང་ཞེས་པ་ནི་མི་འཐད་དེ། ཆགས་བྲལ་སྔོན་སོང་གི་ཕྱིར་འོང་འབྲས་གནས་ཁྱད་པར་ཅན་དེ་ཡང་རིམ་གྱིས་པའི་ཕྱིར་མི་འོང་ཞུགས་པ་ཡིན་པའི་ཕྱིར། ཁ་ཅིག ཕྱིར་འོང་འབྲས་གནས་གང་ཞིག འདོད་ཉོན་དྲུག་པ་སྤངས་རྗེས་སུ་ཕྱིར་མི་འོང་གི་འབྲས་བུ་ཐོབ་དོན་དུ་ལམ་ལ་བརྩོན་པར་བྱས་པ་ཞེ་ན། ཆགས་བྲལ་སྔོན་སོང་གི་ཕྱིར་འོང་འབྲས་གནས་ཙམ་པོས་མ་ངེས་སོ། །རང་ལུགས་ནི་ཕྱིར་འོང་འབྲས་གནས་གང་ཞིག ཕྱིར་འོང་གི་འབྲས་བུ་ཐོབ་རྗེས་སུ་ཕྱིར་མི་འོང་གི་འབྲས་བུ་ཐོབ་པའི་དོན་དུ་ལམ་ལ་བརྩོན་པར་བྱས་པའོ། །བཞི་པ་དབྱེ་བ་ལ་སྤངས་པའི་སྒོ་ནས་གསུམ། རྟོགས་པའི་སྒོ་ནས་བཅུ། དབང་པོའི་སྒོ་ནས་དད་མོས་མཐོང་ཐོབ་གཉིས་ཏེ། སྔ་མ་ལ་དཔགས་ཏེ་ཤེས་པར་བྱའོ། །གཉིས་པ་རིམ་གྱིས་པའི་ཕྱིར་མི་འོང་འབྲས་གནས་ལ་བཞི་ལས། དང་པོ་སྤངས་པའི་ཁྱད་པར་ནི། འདོད་ཉོན་དགུ་པ་སྤངས་ཤིང་སྲིད་ཉོན་དགུ་པ་མ་སྤངས་པའོ། །གཉིས་པ་རྟོགས་པའི་ཁྱད་པར་ནི་འདོད་ཉོན་དགུ་པ་སྤངས་པའི་རྣམ་གྲོལ་ལམ་ཐོབ་ཅིང་སྲིད་ཉོན་དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །གསུམ་པ་མཚན་ཉིད་ནི། མཐོང་ལམ་ཐོབ་རྗེས་སུ་འདོད་ཉོན་དགུ་པ་སྤངས་པའི་ཉན་ཐོས་སློབ་པ་འབྲས་གནས་སོ། །བཞི་པ་དབྱེ་བ་ལ། སྔར་ལྟར་དབྱེ་སྒོ་བདུན་ལས། དང་པོ་སྤངས་པའི་སྒོ་ནས་དབྱེ་ན། འདོད་ཉོན་དགུ་པ་སྤངས་པ་དང་། བསམ་གཏན་དང་པོ་ནས་ཅི་ཡང་མེད་ཀྱི་བར་གྱིས་བདུན་པོ་རེ་རེ་ལའང་དགུ་དགུ། སྲིད་ཉོན་དང་པོ་ནས་བརྒྱད་པའི་བར་སྤངས་པ་སྟེ། ཀུན་བསྡོམས་པས་བདུན་ཅུ་དོན་གཉིས་ཡོད་དོ། །གཉིས་པ་རྟོགས་པའི་སྒོ་ནས་དབྱེ་ན་འདོད་ཉོན་དགུ་པ་སྤངས་པའི་རྣམ་གྲོལ་ལམ་ལ་གནས་པ་དང་། དེའི་རྗེས་ཐོབ་ལ་གནས་པ་གཉིས་དང་། བསམ་གཏན་དང་པོའི་ཉོན་མོངས་དང་པོ་ནས་སྲིད་ཉོན་བརྒྱད་པའི་བར་རེ་རེ་ལ་ཡང་། སྦྱོར་བའི་ལམ། བར་ཆད་མེད་པའི་ལམ། རྣམ་པར་གྲོལ་བའི་ལམ། དེའི་རྗེས་ཐོབ་ལ་གནས་པ་དང་བཞི་བཞི་སྟེ་ཉིས་བརྒྱ་དང་གྱ་བཞི། སྲིད་ཉོན་དགུ་པ་སྤོང་བའི་སྦྱོར་བའི་ལམ་ལ་གནས་པ་དང་། བར་ཆད་མེད་པའི་ལམ་ལ་གནས་པ་གཉིས་ཏེ་ཀུན་བསྡོམས་པས་ཉིས་བརྒྱ་བརྒྱད་ཅུ་གྱ་བརྒྱད་ཡོད་དོ། །གསུམ་པ་དབང་པོའི་སྒོ་ནས་དབྱེ་བ་དང་། བཞི་པ་རིགས་ཀྱི་སྒོ་ནས་དབྱེ་བ་དང་། ལྔ་པ་ལམ་ལ་བརྩོན་མི་བརྩོན་གྱི་སྒོ་ནས་དབྱེ་བ་ནི་སྔར་ལྟར་རོ། །དྲུག་པ་རྟེན་གྱི་སྒོ་ནས་དབྱེ་ན་འདོད་པའི་རྟེན་ཅན་དགུ། གཟུགས་ཀྱི་བར་སྲིད་ཀྱི་རྟེན་ཅན་བཅུ་བདུན། སྐྱེ་སྲིད་ཀྱི་རྟེན་ཅན་བཅུ་བདུན། གཟུགས་མེད་ཀྱི་རྟེན་ཅན་བཞི་སྟེ་ཞེ་བདུན་ནོ། །གལ་ཏེ་གཟུགས་མེད་ལ་བར་སྲིད་མེད་པས་དེའི་རྟེན་ཅན་མེད་ན་ཡང་འདོད་པའི་བར་སྲིད་ཀྱི་རྟེན་ཅན་གྱི་ཕྱིར་མི་འོང་ཅི་ཕྱིར་མེད་ཅེ་ན། དེའི་རྒྱུ་མཚན་ནི་ཕྱིར་མི་འོང་གི་འབྲས་བུ་ཐོབ་པའི་གང་ཟག་གི་འདོད་པའི་བར་སྲིད་འགྲུབ་བར་མི་བྱེད་ཅིང་། འདོད་པའི་བར་སྲིད་ཀྱི་རྟེན་ལ་ཕྱིར་མི་འོང་གི་འབྲས་བུ་གསར་དུ་ཐོབ་པ་ཡང་མེད་པའི་ཕྱིར་ཏེ། འདོད་པའི་བར་སྲིད་ཀྱི་རྟེན་ལ་ཕྱིར་མི་འོང་གི་འབྲས་བུ་གསར་དུ་ཐོབ་པ་དེ་ཡིན་ན། བར་སྲིད་དེ་སྲིད་དུ་དགྲ་བཅོམ་གྱི་འབྲས་བུ་མངོན་དུ་བྱེད་དགོས་པ་གང་ཞིག འདོད་པའི་བར་སྲིད་ལ་དགྲ་བཅོམ་གྱི་འབྲས་བུ་མངོན་དུ་བྱེད་པ་མེད་པའི་ཕྱིར། དང་པོ་གྲུབ་སྟེ། ཕྱིར་མི་འོང་གི་འདོད་པའི་སྐྱེ་སྲིད་ལེན་པ་མེད་པའི་ཕྱིར། ཕྱི་མ་གྲུབ་སྟེ། འདོད་པའི་བར་སྲིད་ཀྱི་རྟེན་ལ་དགྲ་བཅོམ་གྱི་འབྲས་བུ་མངོན་དུ་བྱེད་པ་ལ་ཁམས་གསུམ་ཆར་ལས་འདའ་བ་དང་། ཉོན་མོངས་པ་མི་དགེ་བ་དང་ལུང་མ་བསྟན་གཉིས་སྤོང་བ་དང་། དགེ་སྦྱོང་ཚུལ་གྱིས་འབྲས་བུ་གཉིས་སམ་གསུམ་ཐོབ་པར་བྱེད་པ་སྟེ་དེ་ལྟ་བུའི་བྱ་བ་མང་པོ་ཞིག་བྱེད་དགོས་ལ་དེ་ནི་བར་སྲིད་གང་གི་རྟེན་ལའང་འགྲུབ་པ་མི་སྲིད་པའི་ཕྱིར་རོ། །དེ་དག་གི་དོན་ཡང་འདོད་པའི་བར་སྲིད་ཀྱི་རྟེན་ཅན་གྱི་འཕགས་པ་དེ་ཡིན་ན། རྒྱུན་ཞུགས་དང་ཕྱིར་འོང་གང་རུང་ཡིན་དགོས་ཤིང་འཇིག་མཐར་གཉིས་ལུང་མ་བསྟན་ཡིན་ཞིང་དེ་ལས་གཞན་པའི་འདོད་པའི་སས་བསྡུས་ཀྱི་ཉོན་མོངས་རྣམས་མི་དགེ་བ་ཡིན་པས་དེ་དག་སྤོང་དགོས་པ་དང་། རྒྱུན་ཞུགས་ཀྱིས་དགེ་སྦྱོང་ཚུལ་གྱི་འབྲས་བུ་གསུམ་དང་ཕྱིར་འོང་གིས་གཉིས་ཐོབ་པར་བྱེད་དགོས་པའི་དོན་ཏོ། །གཟུགས་ཀྱི་བར་སྲིད་ཀྱི་རྟེན་ཅན་གྱི་ཕྱིར་མི་འོང་ཡོད་པ་ནི་འདོད་པའི་རྟེན་ལ་ཕྱིར་མི་འོང་གི་འབྲས་བུ་ཐོབ་པ་གཟུགས་ཀྱི་ཁམས་སུ་སྐྱེ་བ་ལེན་པ་ཡོད་པ་ཡིན་གྱི་གཟུགས་ཀྱི་བར་སྲིད་ཀྱི་རྟེན་ལ་ཕྱིར་མི་འོང་གི་འབྲས་བུ་གསར་དུ་ཐོབ་པ་ནི་མེད་དེ། འདོད་པ་ལ་འདོད་ཆགས་དང་མ་བྲལ་བའི་གང་ཟག་གཟུགས་སུ་སྐྱེ་བ་ལེན་པ་མེད་པའི་ཕྱིར་རོ། །གཟུགས་ཀྱི་བར་སྲིད་ཀྱི་རྟེན་ལ་དགྲ་བཅོམ་གྱི་འབྲས་བུ་ཐོབ་པ་ནི་ཡོད་དེ། དེའི་རྟེན་ཅན་གྱི་འཕགས་པ་དེ་ཡིན་ན། ཁམས་གསུམ་ཆར་ལས་འདའ་མི་དགོས་པའི་ཕྱིར་དང་། ཉོན་མོངས་པ་མི་དགེ་བ་སྤངས་མི་དགོས་པའི་ཕྱིར་དང་། དགེ་སྦྱོང་ཚུལ་གྱི་འབྲས་བུ་གཅིག་ལས་ཐོབ་པར་བྱར་མེད་པའི་ཕྱིར་རོ། །བདུན་པ་སྐྱེ་བ་ལེན་ཚུལ་གྱི་སྒོ་ནས་དབྱེ་བ་ལ་གསུམ་སྟེ། དབྱེ་བ་སྤྱིར་བསྟན་པ་དང་། སྐབས་སུ་བབ་པ་བྱེ་བྲག་ཏུ་བཤད་པ་དང་། དཀའ་བའི་གནས་ལ་དོགས་པ་བཅད་པའོ། །དང་པོ་ནི། སྤྱིར་ཕྱིར་མི་འོང་འབྲས་གནས་ལ་ཡོན་ཏན་གྱི་སྒོ་ནས་དབྱེ་ན་འགོག་སྙོམས་ཐོབ་པ་དང་། མ་ཐོབ་པ་གཉིས། དང་པོ་ནི་ལུས་མངོན་བྱེད་དེ། འདི་ལ་མཐོང་ལམ་ཐོབ་པའི་ལུས་རྟེན་དོར་མ་དོར་གཉིས་ཡོད་དོ། །འགོག་སྙོམས་མ་ཐོབ་པ་ལ་མཐོང་ལམ་ཐོབ་པའི་ལུས་རྟེན་དོར་བ་དང་། མ་དོར་བ་གཉིས་ལས། དང་པོ་ནི། ཚེ་ཡོངས་གྱུར་གྱི་འཕགས་པར་བཞེད་དོ། །གཉིས་པ་ལ་ཁམས་གསུམ་གང་དུ་ཡང་སྐྱེ་བ་མི་ལེན་པར་ཚེ་དེ་ཉིད་ལ་མྱང་འདས་མངོན་དུ་བྱེད་པ་དང་། ཕྱི་མ་གཟུགས་སུ་སྐྱེ་བ་ལེན་པ་དང་། གཟུགས་སུ་སྐྱེ་བ་མི་ལེན་པར་གཟུགས་མེད་དུ་སྐྱེ་བ་ལེན་པ་དང་གསུམ་ལས། དང་པོ་ནི་མཐོང་ཆོས་ཞི། གཉིས་པ་ནི་གཟུགས་སུ་ཉེར་འགྲོ། གསུམ་པ་ནི་གཟུགས་མེད་ཉེར་འགྲོའོ། །གཟུགས་སུ་ཉེར་འགྲོ་ལ་ཡང་། གཟུགས་སུ་བར་སྲིད་ཁོ་ན་ལེན་པ་དང་། སྐྱེ་སྲིད་ལེན་པ་གཉིས་ལས། དང་པོ་ནི་བར་འདའ་བའོ། །ཕྱི་མ་ལ་སྐྱེ་སྲིད་གཅིག་ཁོ་ན་ལེན་པ་དང་། གཉིས་པ་ཕན་ཆད་ལེན་པ་གཉིས་ལས། དང་པོ་ནི་སྐྱེས་འདའ་བའོ། །གཉིས་པ་ནི་གོང་འཕོ་ཡིན་ལ། དེ་ལ་ཡང་གཟུགས་སུ་སྐྱེ་སྲིད་གཉིས་ཕན་ཆད་བླངས་ནས་གཟུགས་སུ་མྱང་འདས་མངོན་དུ་བྱེད་པ་དང་། དེ་ལྟར་བླངས་ནས་གཟུགས་མེད་དུ་མྱང་འདས་མངོན་དུ་བྱེད་པ་གཉིས་ལས། དང་པོ་ནི། འོག་མིན་མཐར་ཐུག་འགྲོ་དང་། ཕྱི་མ་ནི་སྲིད་རྩེའི་མཐར་ཐུག་འགྲོའོ། །དང་པོ་ལའང་གཟུགས་སུ་སྐྱེ་སྲིད་གཉིས་ཁོ་ན་ལེན་པ་དང་། གསུམ་ཁོ་ན་ལེན་པ་དང་། བཅུ་བདུན་བླངས་ནས་གཟུགས་ཀྱི་རྟེན་ལ་མྱང་འདས་མངོན་དུ་བྱེད་པ་གསུམ་ལ་རིམ་པ་བཞིན་དུ་འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བ་དང་གསུམ་དུ་འཇོག་གོ །གཟུགས་མེད་ཉེར་འགྲོ་ལ་ཡང་གཟུགས་མེད་དུ་སྐྱེ་སྲིད་གཅིག་ཁོ་ན་ལེན་པ་དང་། གཉིས་པ་ཕན་ཆད་ལེན་པ་གཉིས་ལས། དང་པོ་ནི། གཟུགས་མེད་ཉེར་འགྲོའི་སྐྱེས་འདའ་བ་དང་། ཕྱི་མ་ནི་གཟུགས་མེད་ཉེར་འགྲོའི་གོང་འཕོར་འཇོག་གོ །གཉིས་པ་སྐབས་སུ་བབ་པ་བྱེ་བྲག་ཏུ་བཤད་པ་ལ་ལྔ་སྟེ། གཟུགས་སུ་ཉེར་འགྲོ། གཟུགས་མེད་ཉེར་འགྲོ། མཐོང་ཆོས་ཞི། ཚེ་ཡོངས་གྱུར་གྱི་འཕགས་པ། ལུས་མངོན་བྱེད་བཤད་པའོ། །དང་པོ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། མཐོང་ལམ་ཐོབ་པའི་ལུས་རྟེན་དང་བཅས་པའི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག གཟུགས་སུ་སྐྱེ་བ་བླངས་ནས་མྱང་འདས་མངོན་དུ་བྱེད་པའོ། །དབྱེ་བ་ལ་གཉིས་ཏེ། དབྱེ་བ་དངོས་དང་། མདོ་ལས་འབྱུང་བའི་རྣམ་པའི་རབ་དབྱེ་བཤད་པའོ། །དང་པོ་ལ། བར་འདའ་བ་དང་། སྐྱེས་འདའ་བ་དང་། གོང་འཕོ་གསུམ་ལས། དང་པོ་ལ་མཚན་ཉིད་དང་། དབྱེ་བ་གཉིས། དང་པོ་ནི། གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་བར་སྲིད་གཅིག་ཁོ་ན་བླངས་ནས་བར་སྲིད་ཀྱི་རྟེན་ལ་མྱང་འདས་མངོན་དུ་བྱེད་པའོ། །གཉིས་པ་དབྱེ་བ་ལ། མྱུར་བར་འདའ་བ་དང་། མྱུར་བར་མ་ཡིན་པར་འདའ་བ་དང་། དུས་རིང་མོ་ཞིག་ནས་འདའ་བ་དང་གསུམ་ལས། དང་པོ་ནི། བར་སྲིད་གྲུབ་མ་ཐག་མྱ་ངན་ལས་འདའ་བ་སྟེ། དཔེར་ན་སོག་མའི་མེ་སྟག་གནམ་ལ་ཡར་མ་ཁད་ཡལ་བ་ལྟ་བུའོ། །གཉིས་པ་ནི་བར་སྲིད་གྲུབ་ནས་སྐྱེ་སྲིད་དུ་འགྲོ་འདོད་མ་སྐྱེས་ཙམ་དུ་མྱ་ངན་ལས་འདའ་བ་སྟེ། དཔེར་ན་ཞོགས་མའི་མེ་སྟག་གནམ་ལ་ཡར་ནས་ཐུར་དུ་ལྡོག་ལ་ཁད་དུ་ཡལ་བ་ལྟ་བུའོ། །གསུམ་པ་ནི་སྐྱེ་སྲིད་དུ་འཇུག་པར་བརྩམས་ནས་སྐྱེ་སྲིད་མ་ཐོབ་ཙམ་ནས་མྱ་ངན་ལས་འདའ་བ་སྟེ་དཔེར་ན་ལྕགས་ཀྱི་ཚྭ་ཚྭ་ཐུར་དུ་བཟློག་ནས། ས་ལ་མ་ལྷུང་ཙམ་དུ་ཡལ་བ་ལྟ་བུའོ། །ཡང་གང་དུ་མྱང་འདས་མངོན་དུ་བྱེད་པའི་རྟེན་གྱི་སྒོ་ནས་དབྱེ་ན་ཚངས་རིས་ཀྱི་བར་སྲིད་ཀྱི་རྟེན་ལ་མྱང་འདས་མངོན་དུ་བྱེད་པ་ནས་འོག་མིན་གྱི་བར་སྲིད་ཀྱི་རྟེན་ལ་མྱང་འདས་མངོན་དུ་བྱེད་པའི་བར་བཅུ་བདུན་དུ་ཡོད་ཅིང་འདི་དག་ལྷག་མེད་དུ་མྱ་ངན་ལས་འདའ་མི་འདའི་དཔྱད་པ་ནི་སྔར་བསྟན་ཟིན་ཏོ། །གཉིས་པ་སྐྱེས་འདའ་བ་ལ་མཚན་ཉིད་དང་། དབྱེ་བ་གཉིས་ལས་དང་པོ་གཟུགས་སུ་ཉེར་འགྲོའི་སྐྱེས་འདའ་བའི་མཚན་ཉིད། གཟུགས་སུ་སྐྱེས་ནས་མྱོང་གྱུར་གྱི་ལས་ཅན་གྱི་གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་སྐྱེ་སྲིད་གཅིག་ཁོ་ན་བླངས་ནས་དེའི་རྟེན་ལ་མྱང་འདས་མངོན་དུ་བྱེད་པའོ། །གཉིས་པ་དབྱེ་བ་ལ་སྐྱེས་ཙམ་ནས་འདའ་བ། མངོན་པར་འདུ་བྱེད་མེད་པར་འདའ་བ། མངོན་པར་འདུ་བྱེད་དང་བཅས་ཏེ་འདའ་བ་དང་གསུམ་ལས། མཚན་ཉིད་རིམ་བཞིན། གཟུགས་སུ་ཉེར་འགྲོའི་སྐྱེས་འདའ་བ་གང་ཞིག གཟུགས་སུ་སྐྱེ་སྲིད་གྲུབ་མ་ཐག་ལམ་རང་གི་ངང་གིས་འབྱུང་བའི་སྒོ་ནས་མྱང་འདས་མངོན་དུ་བྱེད་པའོ། །དེ་གང་ཞིག་གཟུགས་སུ་སྐྱེས་སྲིད་གྲུབ་ནས་ཡུན་ཅུང་ཞིག་ལོན་པ་ན་ལམ་རང་གི་ངང་གིས་འབྱུང་བའི་སྒོ་ནས་མྱང་འདས་མངོན་དུ་བྱེད་པ་དང་། དེ་གང་ཞིག གཟུགས་སུ་སྐྱེ་སྲིད་གྲུབ་ནས་ཡུན་རིང་དུ་ལོན་པ་ན་ལམ་ལ་འབད་རྩོལ་གྱིས་མངོན་པར་འདུ་བྱེད་པ་དང་བཅས་པའི་སྒོ་ནས་མྱང་འདས་མངོན་དུ་བྱེད་པ་སྟེ། མཚོན་བྱ་རྣམས་ལའང་གཟུགས་སུ་ཉེར་འགྲོ་སྦྱར་དགོས་སོ། །གོང་དུ་མྱང་འདས་མངོན་དུ་བྱེད་པའི་རྟེན་གྱི་སྒོ་ནས་དབྱེ་ན་ཚངས་རིས་ཀྱི་སྐྱེ་སྲིད་ཀྱི་རྟེན་ལ་མྱང་འདས་མངོན་དུ་བྱེད་པ་ནས་འོག་མིན་གྱི་སྐྱེ་སྲིད་ཀྱི་རྟེན་ལ་མྱང་འདས་མངོན་དུ་བྱེད་པའི་བར་བཅུ་བདུན་ཡོད་ཅིང་། དེ་རེ་རེ་ལ་ཡང་སྔར་བཤད་པ་ལྟར་གསུམ་གསུམ་དུ་ཡོད་དོ། །གསུམ་པ་གཟུགས་སུ་ཉེར་འགྲོའི་གོང་འཕོ་ལ། མཚན་ཉིད། སྒྲ་དོན། དབྱེ་བ། གྲངས་ངེས་པའི་རྒྱུ་དང་བཞི་ལས། དང་པོ་ནི། གཟུགས་ཀྱི་ལན་གྲངས་གཞན་ལ་མྱོང་འགྱུར་གྱི་ལས་ཅན་གྱི་གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་སྐྱེ་བ་བརྒྱུད་མར་བླངས་ནས་ཁམས་གོང་གི་རྟེན་ལ་མྱང་འདས་མངོན་དུ་བྱེད་པའོ། །གཉིས་པ་ནི། ཅིའི་ཕྱིར་གོང་འཕོ་ཞེས་བྱ་ཞེ་ན། ད་ལྟ་འདོད་པའི་རྟེན་ཅན་གྱི་ཕྱིར་མི་འོང་ཡིན་པ་ལས་ཕྱི་མ་གང་དུ་སྐྱེས་པའི་སྐྱེ་ས་དེ་ཉིད་དུ་མྱ་ངན་ལས་མི་འདའ་བར་དེའི་གོང་དུ་འགྲོ་བས་ན་གོང་འཕོ་ཞེས་བྱའོ། །འདིར་གོང་འོག་མིན་དང་། སྲིད་རྩེ་ལ་བྱས་ནས་དེར་འགྲོ་བས་ན་གོང་འཕོར་འཇོག་པ་ནི་འདིའི་སྒྲ་དོན་མ་ཡིན་ཏེ། བར་འདའ་བ་དང་། སྐྱེས་འདའ་བ་ལ་ཡང་འོག་མིན་དང་སྲིད་རྩེར་འགྲོ་བ་ཡོད་པའི་ཕྱིར། གསུམ་པ་ལ་འོག་མིན་མཐར་ཐུག་འགྲོ་དང་། སྲིད་རྩེའི་མཐར་ཐུག་འགྲོའི་གོང་འཕོ་གཉིས་ལས། དང་པོ་ལ། མཚན་ཉིད་དང་། དབྱེ་བ་གཉིས། དང་པོ་ནི། གཟུགས་སུ་ཉེར་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ་གཟུགས་སུ་སྐྱེ་བ་བརྒྱུད་མར་བླངས་ནས་འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ནོ། །གཉིས་པ་དབྱེ་བ་ལ། འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བ་དང་གསུམ་ལས། མཚན་ཉིད་རིམ་བཞིན་འོག་མིན་མཐར་ཐུག་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ་ཕྱི་མ་ཚངས་རིས་སུ་སྐྱེས་ནས་འཕར་ཐེབས་གཅིག་གིས་འོག་མིན་དུ་སྐྱེས་ནས་མྱང་འདས་མངོན་དུ་བྱེད་པའི་རིགས་ཅན་དང་། དེ་གང་ཞིག བསམ་གཏན་སྤེལ་སྒོམ་ལས་ཉམས་ནས་ཕྱི་མ་ཚངས་རིས་སུ་སྐྱེས་ཏེ། འཕར་ཐེབས་གཉིས་ཀྱིས་འོག་མིན་དུ་སྐྱེས་ནས་མྱང་འདས་མངོན་དུ་བྱེད་པའི་རིགས་ཅན་དང་། དེ་གང་ཞིག བསམ་གཏན་སྤེལ་སྒོམ་ལས་ཉམས་ནས་གཟུགས་ཁམས་གནས་རིས་བཅུ་བདུན་དུ་སྐྱེ་བ་རིམ་གྱིས་བླངས་ནས་འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ཏེ། ཕྱི་མ་འདིའི་མཚོན་བྱ་ལ་ཡང་འོག་མིན་མཐར་ཐུག་འགྲོ་སྦྱར་དགོས་སོ། །བྱེ་བྲག་ཏུ་སྨྲ་བས་ནི་ཚངས་ཆེན་མ་གཏོགས་པའི་གནས་བཅུ་དྲུག་ཏུ་སྐྱེ་བ་རིམ་གྱིས་ལེན་པ་ཡིན་ལ། ཚངས་ཆེན་དུ་ནི་འཕགས་པ་མི་སྐྱེ་སྟེ། གཙོ་བོ་གཅིག་ཏུ་ཟད་པའི་ཕྱིར་དང་། ལྟ་བ་ངན་པའི་གནས་ཡིན་པའི་ཕྱིར་ཞེས་འདོད་པ་ལ་ནི། རིན་ཆེན་ཕྲེང་བ་ལས། ས་དགུ་པ་ལ་གནས་པའི་བྱང་སེམས་སྟོང་གཉིས་ཀྱི་བདག་པོ་ཚངས་པ་ཆེན་པོར་སྐྱེ་བ་བླངས་པར་གསུངས་པས་གནོད་དོ་ཞེས་བཞེད་དགོས་པ་འདྲའོ། །གཉིས་པ་སྲིད་རྩེ་མཐར་ཐུག་འགྲོའི་གོང་འཕོའི་མཚན་ཉིད་ནི། རྒྱུའི་དུས་སུ་བསམ་གཏན་སྤེལ་སྒོམ་མ་སྤྱད་པས་ཚངས་རིས་ནས་འབྲས་བུ་ཆེ་བའི་བར་དུ་རིམ་གྱིས་སྐྱེས་ཏེ་གནས་གཙང་མར་མི་འགྲོ་བར་གཟུགས་མེད་བཞིར་སྐྱེ་བ་བླངས་ནས་སྲིད་རྩེའི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ནོ། །བཞི་པ་གྲངས་ངེས་པའི་རྒྱུ་ནི། ཅིའི་ཕྱིར་གཟུགས་སུ་ཉེར་འགྲོའི་གོང་འཕོ་ལ། འོག་མིན་མཐར་ཐུག་འགྲོ་དང་། སྲིད་རྩེ་མཐར་ཐུག་འགྲོ་གཉིས་སུ་ངེས་ཅེ་ན། རྒྱུའི་དུས་སུ་བསམ་གཏན་སྤེལ་སྒོམ་བྱས་པ་དང་མ་བྱས་པ་གཉིས་སུ་ངེས་པས་བསམ་གཏན་སྤེལ་སྒོམ་བྱས་པ་ནི་བསམ་གཏན་དང་པོའི་རོ་མྱངས་ནས་བསམ་གཏན་གོང་མ་གསུམ་ལས་ཉམས་ན་ཕྱི་མ་ཚངས་རིས་སུ་སྐྱེས་ནས་སླར་ཡང་དེ་ཉིད་ཀྱི་རྟེན་ལ་བསམ་གཏན་སྤེལ་སྒོམ་བྱས་པས་ཉོན་མོངས་པ་ཆུང་བ་དང་། དབང་པོ་རྣོ་བ་ཡིན་ན། འཕར་ཐེབས་གཅིག་གིས་འོག་མིན་དུ་འགྲོ། ཉོན་མོངས་པ་དང་དབང་པོ་འབྲིང་ཡིན་ན། འཕར་ཐེབས་གཉིས་ཀྱིས་འོག་མིན་དུ་འགྲོ། ཉོན་མོངས་པ་ཆེ་ཞིང་དབང་པོ་རྟུལ་བ་ཡིན་ན། གནས་ཐམས་ཅད་དུ་འཆི་འཕོས་ནས་འོག་མིན་དུ་འགྲོ། བསམ་གཏན་སྤེལ་སྒོམ་མ་བྱས་པ་ནི་བསམ་གཏན་དང་པོའི་རོ་མྱངས་པས་གོང་མ་གསུམ་ལས་ཉམས་ན་ཕྱི་མ་ཚངས་རིས་སུ་སྐྱེས་ནས་སླར་ཡང་བསམ་གཏན་གོང་མ་རྣམས་བསྒོམས་པའི་སྟོབས་ཀྱིས་འབྲས་བུ་ཆེ་བའི་བར་དུ་རིམ་པ་བཞིན་སྐྱེས་ནས་གནས་གཙང་མར་འགྲོ་མི་ནུས་པས་གཟུགས་མེད་དུ་སྐྱེ་བ་བླངས་ཏེ་སྲིད་རྩེའི་བར་དུ་འགྲོ་བ་གཉིས་ཡོད་པའི་ཕྱིར་རོ། །འོ་ན་བསམ་གཏན་སྤེལ་སྒོམ་བྱས་པ་ལས་མ་ཉམས་ན་གོང་དུ་སྐྱེ་བ་ཡིན་སྙམ་ན་བསམ་གཏན་སྤེལ་སྒོམ་ལྔའི་རིམ་གྱིས་ཚངས་རིས་སོགས་སུ་མི་སྐྱེ་བར་དང་པོ་ཉིད་ནས་གནས་གཙང་མ་ལྔ་གང་རུང་དུ་སྐྱེ་བ་ཡིན་པས་བར་འདའ་བ་དང་། སྐྱེས་འདའ་བར་འཇོག་གོ །འདི་ནི་ཁོ་བོའི་ལུགས་ཀྱི་འདའ་བ་དང་པོ་གཉིས་ལ་གང་དུ་མྱང་འདས་མངོན་དུ་བྱེད་པའི་གནས་ཀྱི་སྒོ་ནས་བཅུ་བདུན་དུ་དབྱེ་བ་འདི་ལ་འཐད་པ་ཡིན་གྱི་གཞན་དག་གིས་ནི་བསམ་གཏན་སྤེལ་སྒོམ་བྱས་ན་དེ་ལས་ཉམས་པའི་ཁྱབ་པ་ཁས་ལེན་དགོས་པས་བག་ཡོད་པར་གྱིས་ཤིག འོ་ན་བསམ་གཏན་སྤེལ་སྒོམ་གྱི་ཚུལ་ཇི་ལྟར་སྙམ་ན། འདི་ལ་རྟེན་གང་ལ། གང་ཟག་གང་གིས། གཞི་གང་། ཚུལ་ཇི་ལྟར། དང་པོར་གང་སྤེལ་བ། གྲུབ་པའི་ཚད། དགོས་པ་གང་། འབྲས་བུའི་གྲངས་ངེས་དང་བརྒྱད་ལས། དང་པོ་ནི་མ་སྐྱེས་པ་གསར་དུ་བསྐྱེད་པའི་རྟེན་ནི་གླིང་གསུམ་གྱི་མི་ཡིན་ལ་ཕྱིས་ཉམས་པ་ནི་གཟུགས་ཀྱི་ཁམས་སུ་སྤེལ་ལོ། །གཉིས་པ་ནི་ཕྱིར་མི་འོང་དང་། དགྲ་བཅོམ་པ་གཉིས་ཀྱིས་སྤེལ་ལོ། །གསུམ་པ་ནི་ཟག་བཅས་ཀྱི་བསམ་གཏན་དང་ཟག་མེད་ཀྱི་བསམ་གཏན་ནོ། །བཞི་པ་ནི་ཟག་མེད་གཉིས་ཀྱི་བར་དུ་ཟག་བཅས་གཅིག་སྤེལ་ཞིང་། ཟག་མེད་སྔ་ཕྱིའི་མཚམས་འཛིན་ནི་རྗེས་ཐོབ་ཀྱིས་བྱེད་དོ། །ལྔ་པ་ནི་དང་པོར་བཞི་པ་སྤེལ་བར་བྱེད་དེ། ཏིང་ངེ་འཛིན་དེ་ནི་གཞན་ལས་ལས་སུ་རུང་བ་དང་། ལམ་སླ་བ་རྣམས་ཀྱི་ནང་ནས་མཆོག་ཡིན་པའི་ཕྱིར་རོ། །དྲུག་པ་ལ་བྱེ་བྲག་ཏུ་སྨྲ་བའི་ལུགས་ཀྱི་ཟག་མེད་ཀྱི་བསམ་གཏན་བཞི་པ་རྒྱུན་ལྡན་ལ་སྙོམས་པར་འཇུག་ཅིང་། དེ་ལས་ལངས་ནས་ཟག་བཅས་ཀྱི་བཞི་པ་རྒྱུན་ལྡན་ལ་སྙོམས་པར་འཇུག་ལ། ཡང་ཟག་མེད་ཀྱི་བཞི་པ་རྒྱུན་ལྡན་ལ་སྙོམས་པར་འཇུག་སྟེ་དེ་བཞིན་དུ་རྒྱུན་ཕྲིས་ནས་སྐད་ཅིག་མ་གཉིས་གཉིས་ལ་སྙོམས་པར་འཇུག་པ་ནི་སྤེལ་བའི་སྦྱོར་བ་ཡིན་ལ། སྐད་ཅིག་མ་རེ་རེ་སྤེལ་བའི་ཚེ་གྲུབ་པའི་ཚད་ཡིན་ནོ། །ཞེས་འདོད་དོ། །སློབ་དཔོན་གྱིས་ནི་སངས་རྒྱས་མ་གཏོགས་པས་སྐད་ཅིག་མ་སྤེལ་མི་ནུས་པས་རྒྱུན་ཆགས་གསུམ་ལ་ཇི་ལྟར་འདོད་པར་སྙོམས་པར་འཇུག་པའི་སྒོ་ནས་རྫོགས་པ་ཡིན་ནོ་ཞེས་བཞེད་དོ། །བདུན་པ་ནི། ཕྱིར་མི་འོང་བ་དབང་པོ་རྣོན་པོ་རྣམས་ནི་གནས་གཙང་མར་སྐྱེ་བར་བྱེད་པའི་ཕྱིར་དང་། མཐོང་བའི་ཆོས་ལ་བདེ་བར་གནས་པར་བྱ་བའི་ཕྱིར་འཇུག་ལ། དབང་པོ་རྟུལ་པོ་རྣམས་ནི་གཉིས་པོ་དེ་དང་། ཉོན་མོངས་པས་འཇིགས་པའི་ཕྱིར་ཡང་འཇུག་གོ །དགྲ་བཅོམ་པ་དབང་པོ་རྣོན་པོ་རྣམས་ནི་མཐོང་ཆོས་ལ་བདེ་བར་གནས་པར་བྱ་བའི་ཕྱིར་དང་། རྟུལ་པོ་རྣམས་ནི་ཉོན་མོངས་པས་འཇིགས་པའི་ཕྱིར་ཡང་འཇུག་གོ །བརྒྱད་པ་ནི་ཅིའི་ཕྱིར་གནས་གཙང་མའི་སྐྱེ་བ་དེ་ལ་ལྔ་ཁོ་ནར་ངེས་ཞེ་ན། རྒྱུ་བསམ་གཏན་སྤེལ་སྒོམ་དེ་ལ་ཆུང་ངུ་དང་། འབྲིང་དང་། ཆེན་པོ་དང་། ཤིན་ཏུ་ཆེན་པོ་དང་། ཤིན་ཏུ་ཆེས་ཆེ་བ་ལྔར་ངེས་པའི་ཕྱིར་རོ། །དེ་ལ་དང་པོ་ནི་ཟག་མེད་དང་། ཟག་བཅས་དང་། ཟག་མེད་གསུམ་མངོན་དུ་བྱེད་དོ། །གཉིས་པ་ལ་ནི་དྲུག གསུམ་པ་ལ་ནི་དགུ། བཞི་པ་ལ་ནི་བཅུ་གཉིས། ལྔ་པ་ལ་ནི་བཅོ་ལྔ་སྟེ། དེ་ལ་ཟག་པ་དང་བཅས་པ་གང་ཡིན་པའི་དབང་གིས་དེ་དག་ཏུ་སྐྱེ་བའོ། །ཟག་མེད་ཀྱི་སྐྱེ་བ་ནི་མེད་དེ། ཟག་མེད་ཀྱི་ལས་ཀྱིས་ཁམས་གསུམ་གྱི་སྐྱེ་བ་འཕེན་པ་མི་སྲིད་པའི་ཕྱིར་རོ། །འོ་ན་སོ་སོའི་སྐྱེ་བོ་ཡང་སྐྱེ་བར་འགྱུར་རོ་སྙམ་ན་སྐྱོན་མེད་དེ། ཟག་མེད་དང་སྤེལ་བའི་ཟག་བཅས་ཀྱི་དབང་གིས་སྐྱེ་བ་ཡིན་གྱི། ཟག་བཅས་ཁོ་ནའི་དབང་གིས་གནས་གཙང་མར་སྐྱེ་བ་མི་སྲིད་པའི་ཕྱིར་རོ། །འདི་དང་སྤེལ་སྒོམ་ལས་མ་ཉམས་ན་དང་པོ་ཉིད་ནས་གནས་གཙང་མར་སྐྱེ་བས་བར་འདའ་བ་དང་། སྐྱེས་འདའ་བར་འཇོག་པའི་ཚུལ་སྐབས་འདིར་གནད་དུ་ཆེ་ཞིང་གནས་གཙང་མ་ལ་འཕགས་པའི་གནས་སུ་འཇོག་པའི་ཚུལ་ཡང་རྟོགས་པར་འགྱུར་རོ། །གཉིས་པ་མདོ་ལས་བྱུང་བའི་རྣམ་པའི་རབ་དབྱེ་བཤད་པ་ལ་གཟུགས་སུ་ཉེར་འགྲོ་དགུར་བཞག་པ་དང་། སྐྱེས་བུ་དམ་པའི་འགྲོ་བ་བདུན་དུ་བཞག་པ་ལ་གཉིས་ལས། དང་པོ་ནི། མདོ་ལས། གཟུགས་སུ་ཉེར་འགྲོ་དགུ་ཞེས་བཤད་པ་དེ་གང་ཞེ་ན། གོང་དུ་བཤད་པའི་བར་འདའ་བ་གསུམ་དང་། སྐྱེས་འདའ་བ་གསུམ་དང་། གོང་འཕོ་གསུམ་པོ་དེ་ཉིད་ཡིན་ནོ། །ཅི་ཕྱིར་གསུམ་དང་དགུར་དབྱེ་ཞེ་ན། བར་འདའ་བ་སོགས་གསུམ་དུ་དབྱེ་བ་ནི་ལས་ཀྱི་བྱེ་བྲག་གིས་ཡིན་ཏེ། མངོན་པར་འགྲུབ་པ་དང་། སྐྱེས་ནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་གྱི་ལས་ཅན་ཡིན་པའི་ཕྱིར་དང་། ཉོན་མོངས་པ་ཆུང་ངུ་དང་། འབྲིང་དང་། ཆེན་པོ་ཡིན་པའི་ཕྱིར་དང་། དབང་པོ་ཆེན་པོ་དང་། འབྲིང་དང་ཆུང་ངུ་ཡིན་པའི་ཕྱིར་རོ། །བར་འདའ་བ་དང་། སྐྱེས་འདའ་བ་ལ་ནང་ཚན་གསུམ་གསུམ་དུ་ཕྱེ་བའི་རྒྱུ་མཚན་ཡང་ཉོན་མོངས་པ་དང་དབང་པོའི་བྱེ་བྲག་གི་སྒོ་ནས་ཕྱེ་བ་སྔ་མ་དང་འདྲ་ཞིང་གོང་འཕོ་ལ་གསུམ་དུ་དབྱེ་བའི་རྒྱུ་མཚན་ཉོན་མོངས་པ་དང་། དབང་པོའི་བྱེ་བྲག་སྔར་དང་འདྲ་བ་ལས་ལན་གྲངས་གཞན་ལ་མྱོང་འགྱུར་གྱི་ལས་ཉིད་ལ་ཡང་མང་ཉུང་གི་བྱེ་བྲག་གི་སྒོ་ནས་ཕྱེ་བའོ། །གཉིས་པ་ནི། མདོ་ལས། སྐྱེས་བུ་དམ་པའི་འགྲོ་བ་བདུན་གསུང་བ་དེ་གང་ཞེ་ན། དགུ་པོ་དེ་ཉིད་ལས་གོང་འཕོ་གཅིག་ཏུ་བསྡུས་པའོ། །སྔ་མ་ལ་ནི་གཟུགས་སུ་ཉེར་འགྲོས་ཁྱབ་ཅིང་འདི་ལ་ནི་གཟུགས་སུ་ཉེར་འགྲོས་མ་ཁྱབ་ཏེ། གཟུགས་མེད་ཉེར་འགྲོའི་སྐྱེས་འདའ་བ་གསུམ་དང་། གོང་འཕོ་རྣམས་ཀྱང་བསྡུ་བའི་ཆེད་དུ་འདིར་གོང་འཕོ་གཅིག་ཏུ་བཞག་པ་ཡིན་པའི་ཕྱིར་ཏེ། སྔར་བཤད་ཟིན་ཏོ། །གཉིས་པ་གཟུགས་མེད་ཉེར་འགྲོ་ལ། མཚན་ཉིད་དང་། དབྱེ་བ་གཉིས། དང་པོ་ནི། གཟུགས་ལ་འདོད་ཆགས་དང་བྲལ་བའི་འདོད་པའི་རྟེན་ཅན་གྱི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག གཟུགས་མེད་ཁོ་ནར་སྐྱེ་བ་བླངས་ནས་གཟུགས་མེད་ཀྱི་རྟེན་ལ་མྱང་འདས་མངོན་དུ་བྱེད་པའོ། །དེ་ལ་གཟུགས་ལ་འདོད་ཆགས་དང་བྲལ་བ་ཆད་ན་གཟུགས་མེད་ཉེར་འགྲོར་འགྱུར་ངེས་ཀྱི་གཟུགས་ལ་འདོད་ཆགས་དང་བྲལ་བར་བྱེད་བཞིན་པས་མ་ངེས། འདོད་པའི་རྟེན་ཅན་ཆད་ན་ནམ་མཁའ་མཐའ་ཡས་སུ་སྐྱེ་བ་བླངས་ཟིན་ནས་སྲིད་རྩེར་མྱང་འདས་མངོན་དུ་བྱེད་པས་མ་ངེས། ཁྱད་པར་ཅན་ཆད་ན་གཟུགས་མེད་ཉེར་འགྲོར་འགྱུར་ངེས་ཀྱི་ཙམ་པོས་མ་ངེས། ཁོ་ན་ཆད་ན་འགོག་པ་ཐོབ་པའི་ཕྱིར་མི་འོང་། ད་ལྟ་གཟུགས་ལ་འདོད་ཆགས་དང་བྲལ་བ་ཡིན་ཀྱང་ཆགས་བྲལ་ལས་ཉམས་ནས་གཟུགས་དང་གཟུགས་མེད་གཉིས་ཆར་དུ་སྐྱེ་བ་ཡོད་པས་མ་ངེས་པ་སྟེ། དེ་བཞིན་དུ་མཚན་ཉིད་གོང་འོག་ཀུན་ལ་རང་གི་བློས་ཞིབ་ཏུ་དཔྱད་པར་བྱ་ཡི་འདིར་ནི་འབྲི་བར་ག་ལ་ལང་། གཉིས་པ་དབྱེ་བ་ལ། གཟུགས་མེད་ཉེར་འགྲོའི་སྐྱེས་ཙམ་ནས་འདའ་བ། འདུ་བྱེད་མེད་པར་འདའ་བ། འདུ་བྱེད་དང་བཅས་ཏེ་འདའ་བ། གོང་འཕོ་དང་བཞིའི་མཚན་ཉིད་རིམ་བཞིན། གཟུགས་མེད་ཉེར་འགྲོའི་ཕྱིར་མི་འོང་གང་ཞིག གཟུགས་མེད་དུ་སྐྱེ་སྲིད་གཅིག་ཁོ་ན་བླངས་ནས་སྐྱེ་སྲིད་གྲུབ་མ་ཐག ལམ་རང་གི་ངང་གིས་འབྱུང་བའི་སྒོ་ནས་མྱང་འདས་མངོན་དུ་བྱེད་པ་དང་། དེ་གང་ཞིག གཟུགས་མེད་དུ་སྐྱེ་སྲིད་གཅིག་ཁོ་ན་བླངས་ནས་ཡུན་ཅུང་ཞིག་ལོན་པ་ན་ལམ་རང་གི་ངང་གིས་འབྱུང་བའི་སྒོ་ནས་མྱང་འདས་མངོན་དུ་བྱེད་པ་དང་། དེ་གང་ཞིག གཟུགས་མེད་དུ་སྐྱེ་སྲིད་གཅིག་ཁོ་ན་བླངས་ནས་ཡུན་རིང་དུ་ལོན་པ་ན་འབད་རྩོལ་གྱི་མངོན་པར་འདུ་བྱེད་དང་བཅས་པའི་སྒོ་ནས་མྱང་འདས་མངོན་དུ་བྱེད་པ་དང་། དེ་གང་ཞིག གཟུགས་མེད་བཞི་ལ་སྐྱེ་བ་རིམ་གྱིས་བླངས་ནས་སྲིད་རྩེར་མྱང་འདས་མངོན་དུ་བྱེད་པའི་རིགས་ཅན་ནོ། །གང་དུ་མྱང་འདས་མངོན་དུ་བྱེད་པའི་རྟེན་གྱི་སྒོ་ནས་དང་པོ་གསུམ་པོ་རེ་རེ་ལ་ཡང་ནམ་མཁའ་མཐའ་ཡས་སྐྱེ་མཆེད་ཀྱི་རྟེན་ལ་མྱང་འདས་མངོན་དུ་བྱེད་པ་ནས་སྲིད་རྩེའི་རྟེན་ལ་མྱང་འདས་མངོན་དུ་བྱེད་པའི་བར་བཞི་བཞི་ཡོད་ཅིང་། ཕྱི་མ་ལ་རྒྱུའི་དུས་སུ་བསམ་གཏན་སྤེལ་སྒོམ་མ་སྤྱད་པས་འཕར་བ་སོགས་བྱེད་མི་ནུས་པའི་ཕྱིར་ན་གནས་ཐམས་ཅད་དུ་འཆི་འཕོ་བ་ཁོ་ནའོ། །གསུམ་པ་མཐོང་ཆོས་ཞིའི་མཚན་ཉིད་ནི། མཐོང་ལམ་ཐོབ་པའི་ལུས་རྟེན་མ་དོར་བའི་ཕྱིར་མི་འོང་འབྲས་གནས་ཁྱད་པར་ཅན་གང་ཞིག རྟེན་དེ་ཉིད་ལ་མྱང་འདས་མངོན་དུ་བྱེད་པའོ། །འབྲས་བུ་དང་པོ་གཉིས་ཀྱི་སྐབས་སུ་ཡང་། འདི་ཡི་དོན་ཡོད་མོད་ཀྱི་དེ་དག་ཀྱང་རྟེན་དེ་ཉིད་ལ་ཕྱིར་མི་འོང་དུ་གྱུར་ནས་འདི་གཞག་དགོས་པས་ན་དེ་དག་གི་སྐབས་སུ་རྣམ་གཞག་མ་བཤད་དེ། གཟུགས་སུ་ཉེར་འགྲོ་སོགས་དང་འདྲའོ། །བཞི་པ་ཚེ་ཡོངས་གྱུར་གྱི་འཕགས་པ་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི་ཕྱིར་མི་འོང་འབྲས་གནས་གང་ཞིག མཐོང་ལམ་ཐོབ་པའི་ལུས་རྟེན་དོར་བའོ། །གཉིས་པ་ལ། འདོད་པའི་རྟེན་ཅན་དང་། གཟུགས་ཀྱི་རྟེན་ཅན་དང་། གཟུགས་མེད་ཀྱི་རྟེན་ཅན་གསུམ་མོ། །དང་པོ་ནི། འདོད་པའི་རྟེན་ཅན་གྱི་ཕྱིར་མི་འོང་གང་ཞིག མཐོང་ལམ་ཐོབ་པའི་ལུས་རྟེན་དོར་བ་སྟེ། གཞན་གཉིས་ལའང་འགྲེའོ། །འདོད་པར་ཚེ་ཡོངས་གྱུར་གྱི་འཕགས་པ་དང་། འདོད་པའི་རྟེན་ཅན་གྱི་ཚེ་ཡོངས་གྱུར་གྱི་འཕགས་པ་གཉིས་དོན་གཅིག་ཀྱང་གཟུགས་སུ་ཚེ་ཡོངས་གྱུར་གྱི་འཕགས་པ་ཡིན་ན། གཟུགས་ཀྱི་རྟེན་ཅན་ཡིན་པས་མ་ཁྱབ་སྟེ། སྲིད་རྩེར་མཐར་ཐུག་འགྲོའི་ཕྱིར་མི་འོང་གཟུགས་དང་གཟུགས་མེད་གཉིས་ཆར་དུ་སྐྱེ་བ་བླངས་པ་ན་གཟུགས་མེད་ཀྱི་རྟེན་ཅན་དེ་གཟུགས་སུ་ཚེ་ཡོངས་གྱུར་གྱི་འཕགས་པར་ཁས་བླང་དགོས་པའི་ཕྱིར་རོ། །དེ་དག་གི་ཁྱད་ཆོས་ལ་འདོད་པའི་རྟེན་ཅན་གྱི་ཚེ་ཡོངས་གྱུར་གྱི་འཕགས་པ་དང་། ཁམས་གོང་མར་སྐྱེས་པའི་འཕགས་པ་ཐམས་ཅད་འབྲས་བུ་ལས་ཉམས་པ་དང་། དབང་པོ་འཕོ་བ་མེད་དེ། འཕགས་པའི་སྐྱེ་བ་བརྒྱུད་མར་བརྟེན་པར་བྱས་པའི་ཕྱིར་རོ། །ཁ་ཅིག མཐོང་ལམ་ཐོབ་པའི་ལུས་རྟེན་དོར་བའི་འཕགས་པ་ཐམས་ཅད་ཚེ་ཡོངས་གྱུར་གྱི་འཕགས་པར་བྱས་ནས། རྒྱུན་ཞུགས་དང་། ཕྱིར་འོང་ལ་ཡང་ཚེ་ཡོངས་གྱུར་གྱི་འཕགས་པར་འཇོག་པ་ནི་རྣམ་གཞག་སྐབས་སུ་བབ་པའི་དོན་མ་རྟོགས་པ་སྟེ། མཛོད་འགྲེལ་ལས། འདོད་པའི་ཁམས་སུ་ཚེ་ཡོངས་སུ་གྱུར་པའི་འཕགས་པ་ནི་ཁམས་གཞན་དུ་མི་འགྲོ་སྟེ། ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་ནས། ཡོངས་སུ་མྱ་ངན་ལས་འདའ་བའི་ཕྱིར་རོ། །ཞེས་གསུངས་པ་དང་འགལ་བའི་ཕྱིར་དང་། གཞན་དུ་ན་རྒྱུན་ཞུགས་དང་། ཕྱིར་འོང་ལ་གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོ་ཡང་འཇོག་དགོས་པར་ཐལ་བའི་ཕྱིར་རོ། །ལྔ་པ་ལུས་མངོན་བྱེད་ལ་མཚན་ཉིད་དང་། དབྱེ་བ་གཉིས་ལས། དང་པོ་ནི། ཕྱིར་མི་འོང་འབྲས་གནས་གང་ཞིག འགོག་པའི་སྙོམས་འཇུག་ཐོབ་པའོ། །གཉིས་པ་དབྱེ་བ་ལ། མཐོང་ལམ་ཐོབ་པའི་ལུས་རྟེན་མ་དོར་བ་དང་། དོར་བ་གཉིས། དང་པོ་ནི། འདོད་པའི་རྟེན་དུ་ངེས་སོ། །ཕྱི་མ་ལ་གཟུགས་ཀྱི་རྟེན་ཅན་དང་། གཟུགས་མེད་ཀྱི་རྟེན་ཅན་གཉིས་ཡོད་དེ། འདོད་པའི་རྟེན་ལ་འགོག་སྙོམས་ཐོབ་པ་གཟུགས་ཀྱི་ཆགས་བྲལ་ལས་ཉམས་ནས་གཟུགས་སུ་སྐྱེ་བ་ལེན་པ་ཡོད་པར་འགོག་སྙོམས་ཀྱི་སྐབས་སུ་བཤད་ཅིང་། དེ་ཉིད་སླར་ཡང་གཟུགས་མེད་དུ་སྐྱེ་བ་གཅིག་ཀྱང་ཁས་ལེན་དགོས་པ་འདྲའོ། །དེ་མིན་པའི་དབང་དུ་བྱས་ན་ཡང་གཟུགས་མེད་ཀྱི་རྟེན་ཅན་ནི་ངེས་པར་ཡོད་དེ། འདོད་པའི་རྟེན་ཅན་གྱི་ལུས་མངོན་བྱེད་དེས་ཅི་ཡང་མེད་མན་ཆད་ཀྱི་ཆགས་བྲལ་ལས་མ་ཉམས་བཞིན་དུ་འཆི་འཕོ་བ་སྲིད་རྩེར་སྐྱེ་བ་ལས་འོས་མེད་པའི་ཕྱིར་རོ། །དེས་ན་མཛོད་ལས། གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོ་དང་། མཐོང་ཆོས་ཞི་དང་། ཚེ་ཡོངས་གྱུར་དང་། ལུས་མངོན་བྱེད་རྣམས་གོ་རིམ་བཞིན་དུ་བཤད་པ་ནི་དང་པོ་གསུམ་མཐོང་ལམ་ཐོབ་པའི་ལུས་རྟེན་མ་དོར་བ་དང་། བཞི་པ་མཐོང་ལམ་ཐོབ་པའི་ལུས་རྟེན་དོར་བ་དང་། ལྔ་པ་ལ་གཉིས་ཀ་ཡོད་པའི་དབང་དུ་བྱས་ནས་གསུངས་པ་ཡིན་པས་བསྟན་བཅོས་ཆེན་པོའི་གོང་འོག་གི་བབ་འདི་བཞིན་དུ་སྨྲ་བའི་རྗེས་སུ་འབྲང་བར་རིགས་ཀྱི་དེང་སང་གི་བྱིས་པ་རྣ་ལས་མིག་དབུགས་མང་བ་དག་གི་ཁ་ནས་ལེགས་བཤད་མི་འབྱུང་ངོ་། །གསུམ་པ་དཀའ་བའི་གནས་ལ་དོགས་པ་དཔྱད་པ་ལ། དབྱེ་བའི་ཚུལ་ལ་དོགས་པ་དཔྱད་པ། ཕྱིར་མི་འོང་གི་སྒྲ་དོན་ལ་དོགས་པ་དཔྱད་པ། སྤང་བྱའི་ཉོན་མོངས་ལ་དོགས་པ་དཔྱད་པ་དང་གསུམ་ལས། དང་པོ་ནི། ཆོས་མངོན་པའི་མདོ། མངོན་རྟོགས་རྒྱན། མངོན་པ་གོང་འོག་རྣམས་ལས་གཟུགས་སུ་ཉེར་འགྲོའི་སྐབས་སུ་སྐྱེས་འདའ་བ་གསུམ་རྩ་བའི་དབྱེ་བར་བཀོད་ཅིང་། བར་འདའ་བ་དང་། གོང་འཕོ་རེ་རེར་བགྲངས་ནས་ལྔར་དབྱེ་བའི་ཚུལ་ལ་དོགས་པ་དཔྱད་དགོས་པ་ནི་སྔར་འགྲེལ་པའི་དོགས་གཅོད་ཀྱི་སྐབས་སུ་བཤད་ཟིན་ཏོ། །གཉིས་པ་ནི། འདིར་ཁ་ཅིག འདོད་པའི་ཁམས་སུ་ཕྱིར་མི་འོང་བས་ན་ཕྱིར་མི་འོང་ཡིན་ཞེས་པའི་སྒྲ་བཤད་བྱེད་པ་ནི་བློ་དོགས་པའི་སྐྱོན་ཡིན་ཏེ། གོང་དུ་སྐྱེ་བའི་གནས་དེ་ཉིད་དང་། དེའི་འོག་ཏུ་ཕྱིར་མི་འོང་བས་ན་ཕྱིར་མི་འོང་བ་ཞེས་པའི་སྒྲ་བཤད་དགོས་པའི་ཕྱིར་ཏེ། མཛོད་འགྲེལ་ལས། ཕྱིར་མི་འོང་བ་ནི། ནམ་ཡང་སྐྱེ་བའི་སྐྱེ་མཆེད་དེ་ཉིད་དུ་ཚེ་གཉིས་པ་མངོན་པར་འགྲུབ་པར་མི་བྱེད་དེ་ཁྱད་པར་དུ་འགྲོ་བ་ཡིན་པའི་ཕྱིར་རོ། །འདི་ལྟར་ན་འདིའི་ཕྱིར་མི་འོང་བ་ཉིད་ཡོངས་སུ་རྫོགས་པ་ཡིན་ཏེ། གང་དུ་སྐྱེས་པ་དེའི་འོག་ཏུ་མི་འོང་བའི་ཕྱིར་རོ། །ཞེས་གསུངས་པའི་ཕྱིར་རོ། །གསུམ་པ་ནི། ཁ་ཅིག་ན་རེ། ཕྱིར་མི་འོང་ཡིན་ན། འདོད་པའི་སས་བསྡུས་ཀྱི་ཉོན་མོངས་མ་ལུས་པར་སྤངས་པས་ཁྱབ་པ་མངོན་པ་གོང་འོག་གཉིས་ཀའི་ལུགས་ལ་ཁས་བླངས་ནས་གཞན་གྱིས་འདོད་པའི་རྟེན་ཅན་གྱི་ཕྱིར་མི་འོང་གིས་འདོད་པའི་སས་བསྡུས་ཀྱི་ཉོན་མོངས་མ་ལུས་པར་མ་སྤངས་ཏེ། འདོད་པའི་སས་བསྡུས་ཀྱི་ཉོན་ཡིད་མ་སྤངས་པའི་ཕྱིར་ཏེ། སུམ་ཅུ་པ་ལས། གང་དུ་སྐྱེས་པ་དེ་ཡིའོ། །ཞེས་སྨྲ་བ་ལ་ལུང་དེའི་དོན་ནི་འདོད་པའི་རྟེན་ཅན་གྱི་གང་ཟག་གི་རྒྱུད་ཀྱི་ཉོན་ཡིད་འདོད་པའི་སར་གཏོགས་པའི་ལུང་མ་ཡིན་གྱི། ཉོན་ཡིད་དེ་རང་གི་འཁོར་དང་ཁམས་དང་ས་མཚུངས་པའི་ལུང་ཡིན་པའི་ཕྱིར། དེའི་འགྲེལ་པར་བློ་བརྟན་གྱིས་ཅི་རང་གི་ས་པ་ཉིད་དང་མཚུངས་པར་ལྡན་ནམ། འོན་ཏེ་གཞན་གྱི་ས་པ་དག་དང་མཚུངས་པར་ལྡན་པ་མི་ཤེས་སོ་ཞེ་ན། དེའི་ཕྱིར་གང་དུ་སྐྱེས་པ་དེ་ཡིའོ་ཞེས་བྱ་བ་སྨོས་ཏེ། གང་དུ་སྐྱེས་པ་དེ་ནི་གང་དུ་བྱུང་བའོ། །དེ་ཡིའོ་ཞེས་བྱ་བ་ནི་ཁམས་དང་ས་གང་དུ་སྐྱེས་པའི་ཁམས་དེ་དང་ས་དེ་ཉིད་དང་མཚུངས་པར་ལྡན་ཏེ། ཁམས་གཞན་དག་དང་ས་གཞན་དག་ནི་མ་ཡིན་ནོ། །ཞེས་བཤད་པའི་ཕྱིར་རོ། །གཞན་དུ་ན་འདོད་པའི་རྟེན་ཅན་གྱི་ཅི་ཡང་མེད་མན་ཆད་ལ་འདོད་ཆགས་དང་བྲལ་བའི་ཕྱིར་མི་འོང་ཆོས་ཅན། ཁྱོད་ཀྱི་རྒྱུད་ལ་འདོད་ཉོན་མངོན་གྱུར་དུ་ཡོད་པར་ཐལ། ཁྱོད་ཀྱི་རྒྱུད་ལ་འདོད་པའི་ཉོན་ཡིད་མངོན་གྱུར་དུ་ཡོད་པའི་ཕྱིར། འདོད་མི་ནུས་ཏེ། ཅི་ཡང་མེད་མན་ཆད་ལ་འདོད་ཆགས་དང་བྲལ་བའི་ཕྱིར་རོ། །གཞན་ཡང་ཕྱིར་མི་འོང་ཡིན་ན། འདོད་ཉོན་དགུ་པ་སྤངས་པས་ཁྱབ་ན་ནི་འདོད་པའི་ཉོན་ཡིད་མ་སྤངས་པ་འགལ་ཞིང་། མ་ཁྱབ་ན་འདོད་ཉོན་ལ་དགུར་གྲངས་མ་ངེས་པར་ཐལ་ལོ། །ཕྱིར་མི་འོང་ཡིན་ན། འདོད་པའི་སས་དུས་ཀྱི་ཉོན་མོངས་ཐམས་ཅད་སྤངས་པས་མ་ཁྱབ་པ་མངོན་པ་གོང་འོག་གི་ལུགས་ཀྱང་མ་ཡིན་ཏེ། ཀུན་བཏུས་སུ། ཕྱིར་མི་འོང་བའི་གང་ཟག་གང་ཞེ་ན། འདོད་པ་ན་སྤྱོད་པའི་ཉོན་མོངས་པ་རྣམ་པ་དགུ་སྤངས་པའི་ལམ་ལ་གནས་པའི་གང་ཟག་གོ །གང་གི་ཚེ་འདོད་པ་ན་སྤྱོད་པའི་སྒོམ་པས་སྤང་བར་བྱ་བ་ཐམས་ཅད་སྤངས་པས་ཕྱིར་མི་འོང་བར་འགྱུར་ན་ཞེས་གསུངས་པའི་ཕྱིར་རོ། །གཞན་ཡང་ཕྱིར་མི་འོང་གི་རྒྱུད་ལ་འདོད་ཉོན་དགུ་སྤང་བའི་བར་ཆད་མེད་ལམ་དགུ་ཁས་ལེན་པ་འདི་འདྲ་བ་ནི་ཞུགས་གནས་ཀྱི་རྣམ་གཞག་ལ་ཧ་ཅང་གནོད་ཚབས་ཆེའོ་ཞེས་སྨྲའོ། །འདི་དག་ནི་གསུང་རབ་ཀྱི་དོན་ལ་རྟོག་དཔྱོད་ཞུགས་ནས་སྨྲ་བ་ཡིན་པར་སྣང་ཡང་། ཕུགས་རྩད་མ་ཆོད་པར་སྣང་སྟེ། འདི་ལྟར་སེམས་ཙམ་པའི་ལུགས་ལ་སྐྱེ་བ་སྔ་མའི་ལས་ཀྱི་རྣམ་སྨིན་གྱི་ཕུང་པོའི་གཙོ་བོ་ནི་ཀུན་གཞིའི་རྣམ་ཤེས་འཁོར་བཅས་ལ་འཇོག་པས་འདོད་པའི་རྟེན་ཅན་གྱི་ཕྱིར་མི་འོང་གི་རྒྱུད་ཀྱི་ཀུན་གཞིའི་རྣམ་ཤེས་དེ་འདོད་པར་འཕེན་བྱེད་ཀྱི་ལས་ཀྱི་རྣམ་སྨིན་འབྲས་བུ་ཡིན་པས་འདོད་པའི་སས་བསྡུས་སུ་ཁས་བླངས་དགོས་ཏེ། ས་གཞན་གྱི་ལས་ཀྱིས་ས་གཞན་གྱི་རྣམ་སྨིན་གྱི་ཕུང་པོ་འཕེན་པར་མི་བྱེད་པའི་ཕྱིར་རོ། །དེས་ན་དེ་ལྟ་བུའི་རྒྱུད་ཀྱི་ཉོན་ཡིད་དེ་ཡང་འདོད་པའི་སས་བསྡུས་སུ་ཁས་བླངས་དགོས་ཏེ། ས་གཞན་གྱི་རྣམ་སྨིན་གྱི་ཕུང་པོ་ལས་གཞན་གྱི་ཉོན་ཡིད་ཀྱིས་ངར་འཛིན་པ་མི་སྲིད་པའི་ཕྱིར་རོ། །ལེགས་པར་དཔྱོད་ཅིག ཁྱོད་ཀྱི་ལུགས་ལྟར་ན་འདོད་པའི་སས་བསྡུས་ཀྱི་ཉོན་ཡིད་དེ་ལ་ཡང་དགུར་ཕྱེ་ནས་འདོད་ཉོན་དགུ་པོ་སྤོང་བའི་བར་ཆད་མེད་ལམ་རྣམས་ཀྱིས་རིམ་པ་བཞིན་དུ་སྤོང་བར་ཁས་ལེན་པར་སྣང་བས། དེ་ནི་ཐོགས་མེད་ཀྱི་གཞུང་དང་འགལ་ཏེ། གཏན་ལ་དབབ་པ་བསྡུ་བར། དེ་དག་ནི་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་འདོད་ཆགས་དང་བྲལ་བ་ཁོ་ནས་ཅིག་ཆར་སྤོང་བ་རིག་པར་བྱའོ། །འདི་ལྟ་སྟེ་དཔེར་ན། དེ་ལས་གཞན་པའི་ཉོན་མོངས་པ་དག་ལྟར་རིམ་གྱིས་སྤོང་བ་ནི་མ་ཡིན་ཏེ། ཞེས་གསུངས་པའི་ཕྱིར་རོ། །དེས་ན་འདོད་ཉོན་དགུ་པ་སྤངས་ན་འདོད་པའི་སས་བསྡུས་ཀྱི་ཉོན་ཡིད་སྤངས་པས་ཁྱབ་པར་སྨྲ་བ་དང་། འདོད་པའི་རྟེན་ཅན་གྱི་ཕྱིར་མི་འོང་གི་རྒྱུད་ལ་འདོད་པའི་སས་བསྡུས་ཀྱི་ཉོན་ཡིད་ཡོད་ན། ཕྱིར་མི་འོང་གི་རྒྱུད་ལ་འདོད་ཉོན་དགུ་པ་སྤོང་བའི་བར་ཆད་མེད་ལམ་དགུ་ཁས་ལེན་དགོས་པར་འགྱུར་རོ་ཞེས་སྨྲ་བ་ཐམས་ཅད་འབྲེལ་མེད་པར་གོ་བར་བྱའོ། །འདོད་པའི་རྟེན་ཅན་གྱི་ཕྱིར་མི་འོང་གི་རྒྱུད་ལ་ཉོན་ཡིད་ཡོད་དམ་མེད། ཡོད་ན་དེ་ཁམས་གོང་གི་སས་བསྡུས་སུ་ཁས་ལེན་དགོས་པས། བསྡུ་བར། ཉོན་མོངས་པ་དེ་དག་ནི་གང་དུ་ལུས་སྐྱེས་པར་གྱུར་པ་དེའི་ས་པ་ཉིད་དེ་ཞེས་གསུངས་པ་དང་འགལ་ལོ། །མེད་ན་དེ་ཉིད་ལས། སློབ་པ་བཞི་མཐོང་བ་ལ་ནི་འཇིག་རྟེན་ལས་འདས་པའི་ལམ་མངོན་དུ་གྱུར་ན་མི་འབྱུང་ངོ་། །དེ་ལས་ལངས་པ་ལ་ནི་ཀུན་ཏུ་འབྱུང་སྟེ། ཤིན་ཏུ་རྟོག་པའི་ཕྱིར་དང་། མ་སྤངས་པའི་ཕྱིར་རོ། །ཞེས་གསུངས་པ་དང་འགལ་ལོ། །སུམ་ཅུ་པ་རྩ་འགྲེལ་གྱི་ལུང་གི་དོན་ཉོན་ཡིད་དེ་རང་གི་འཁོར་དང་ཁམས་དང་། ས་མཚུངས་པར་སྟོན་པ་ཡིན་ཡང་། ལུང་དེ་ཉིད་ཀྱིས་ལུས་གང་དུ་སྐྱེས་པའི་སར་གཏོགས་པར་གྲུབ་སྟེ། རང་གི་འཁོར་ཐུན་མོང་མ་ཡིན་པ་བཞི་པོ་དེས་དམིགས་པ་ཀུན་གཞིའི་རྣམ་ཤེས་ལ་དམིགས་ནས་རྣམ་པ་བདག་ལ་ལྟ་བ་དང་། ངའོ་སྙམ་པ་དང་། བདག་ལ་ཆགས་པ་དང་། བདག་ཏུ་རྨོངས་པའི་རྣམ་པ་ཅན་ཡིན་ཞིང་། དེའི་ཚེ་ཀུན་གཞིའི་རྣམ་ཤེས་ནི་ལུས་གང་དུ་སྐྱེས་པ་དེའི་ས་པ་ཡིན་པ་སེམས་ཙམ་པའི་ལུགས་ཡིན་པའི་ཕྱིར་རོ། །གཞན་དུ་ན་ཁམས་གོང་མའི་སས་བསྡུས་ཀྱི་འཇིག་ཚོགས་ལ་ལྟ་བས་འདོད་པའི་སས་བསྡུས་ཀྱི་ཕུང་པོ་ལ་དམིགས་པར་ཁས་བླང་དགོས་པས་མངོན་པའི་གཞུང་ལུགས་དང་འགལ་ལོ། །གནད་ཀྱི་དོན་ནི་འདི་ཡིན་ཏེ། ཉོན་ཡིད་ཁས་མི་ལེན་པའི་ཚེ་ཕྱིར་མི་འོང་ཡིན་ན། འདོད་པའི་སས་བསྡུས་ཀྱི་ཉོན་མོངས་སྤངས་པས་ཁྱབ་པར་ཁས་བླངས་པ་ལ་འགལ་བ་མེད་ཀྱང་ཁས་ལེན་པའི་ཚེ་འདོད་ཉོན་དགུ་པ་སྤངས་པ་དང་། འདོད་པ་ལ་འདོད་ཆགས་དང་བྲལ་བས་ཁྱབ་པ་ཁས་བླངས་ཀྱི་འདོད་པའི་སས་བསྡུས་ཀྱི་ཉོན་མོངས་མ་ལུས་པར་སྤངས་པས་ཁྱབ་པ་ནི་ཁས་ལེན་དུ་མི་རུང་སྟེ། གཏན་ལ་དབབ་པ་བསྡུ་བ་ལས། ཡིད་ནི་དུས་རྟག་ཏུ་ཡེ་ཡོད་པའི་ཉོན་མོངས་པ་བཞི་པོ་འདི་ལྟ་སྟེ། ངར་འཛིན་པ་དང་། ང་ཡིར་འཛིན་པ་རྣམས་འཇིག་ཚོགས་ལ་ལྟ་བ་དང་། ངའོ་སྙམ་པའི་ང་རྒྱལ་དང་། བདག་ལ་ཆགས་པ་དང་། མ་འདྲེས་པའི་མ་རིག་པ་དང་ལྷན་ཅིག་གི་དངོས་པོ་མཚུངས་པར་ལྡན་ཏེ། ཉོན་མོངས་པ་དེ་དག་ཀྱང་། དགེ་བ་དང་། མི་དགེ་བ་དང་། ལུང་དུ་མ་བསྟན་པའི་རྣམ་པར་ཤེས་པ་ལ་འགལ་བ་མེད་པ་དང་། སྒྲིབ་ལ་ལུང་དུ་མ་བསྟན་པ་དང་ཡེ་ཡོད་པ་ཡིན་ནོ། །དེ་ལས་གཞན་པ་རྣམ་པར་བརྟགས་པ་རྣམས་ལ་ནི་རྐྱེན་ཇི་ལྟ་བ་བཞིན་དུ་འཇུག་པ་ཡིན་པར་རིག་པར་བྱའོ། །འཇིག་རྟེན་པའི་ལམ་ནི་ཡེ་ཡོད་པའི་ཉོན་མོངས་པ་བཞི་པོ་ཀུན་ཏུ་འགྲོ་བ་དེ་དག་ཉམས་པར་བྱེད་པའི་གཉེན་པོ་མ་ཡིན་ཏེ། འདི་ལྟར་དེ་དག་ནི་འདོད་ཆགས་དང་བྲལ་བ་རྣམས་ལ་ཡང་ཀུན་ཏུ་འབྱུང་བའི་ཕྱིར་རོ། །ཉོན་མོངས་པ་དེ་དག་ནི་གང་དུ་ལུས་སྐྱེས་པར་གྱུར་པའི་ས་དེ་པ་ཉིད་དེ། འདོད་ཆགས་དང་བྲལ་བ་ལ་ཡང་དེ་དག་ཉིད་ཀུན་ཏུ་འབྱུང་བར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཀུན་གཞིའི་རྣམ་པར་ཤེས་པའི་ས་བོན་ལས་བྱུང་བ་ཁོ་ན་ཡིན་པས་དུས་རྟག་ཏུ་ཡོད་པ་དང་། མི་མཐུན་ཕྱོགས་དང་། གཉེན་པོའི་ཕྱོགས་ཀྱི་ཡུལ་གྱི་རྐྱེན་ཅན་མ་ཡིན་པའི་ཕྱིར་རོ། །དེ་དག་ནི་འཇིག་རྟེན་པའི་འདོད་ཆགས་དང་བྲལ་བ་ལ་ནི་ལམ་མངོན་དུ་གྱུར་ཀྱང་རུང་མ་གྱུར་ཀྱང་ཀུན་ཏུ་འབྱུང་ངོ་། །སློབ་པ་བཞི་མཐོང་བ་ལ་ནི་འཇིག་རྟེན་པའི་ལམ་མངོན་དུ་གྱུར་ན་མི་འབྱུང་ངོ་། །དེ་ལས་ལངས་པ་ལ་ནི་ཀུན་ཏུ་འབྱུང་སྟེ། ཤིན་ཏུ་རྟོག་པའི་ཕྱིར་དང་། མ་སྤངས་པའི་ཕྱིར་རོ། །མི་སློབ་པ་ལ་ནི། རྣམ་པ་ཐམས་ཅད་དུ་ཀུན་ཏུ་མི་འབྱུང་ངོ་། །དེ་དག་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་འདོད་ཆགས་དང་བྲལ་བ་ཁོ་ནས་ཅིག་ཆར་སྤོང་བར་རིག་པར་བྱའོ། །འདི་ལྟ་སྟེ། དཔེར་ན་དེ་ལས་གཞན་པའི་ཉོན་མོངས་པ་དག་ལྟར་རིམ་གྱིས་སྤངས་པ་ནི་མ་ཡིན་ཏེ། དེ་ལྟར་ན་དེ་ལྟ་བུ་དང་མཐུན་པ་དག་ནི་ཀུན་ནས་ཉོན་མོངས་པ་དང་རྣམ་པར་བྱང་བའི་འཇུག་པ་རྣམ་པར་བཞག་པ་ཡིན་པར་རིག་པར་བྱའོ་ཞེས་གསུངས་པའི་ཕྱིར་རོ། །ལུང་འདི་ལས་ཉོན་ཡིད་རྟེན་གང་དུ་སྐྱེས་པའི་སར་གཏོགས་པ་དང་། གནས་སྐབས་གོང་དུ་མངོན་དུ་འགྱུར་བ་དང་། སྲིད་ཉོན་དགུ་པ་སྤོང་བའི་བར་ཆད་མེད་ལམ་གྱིས་ཅིག་ཅར་དུ་སྤོང་བ་དང་། ཆེ་འབྲིང་དགུའི་རྣམ་བཞག་མེད་པ་རྣམས་བསྟན་ཅིང་། ཅིག་ཆར་བ་ལ་འདོད་ཉོན་དགུ་པ་སྤངས་པ་དང་དུས་མཉམ་དུ་སྤངས་པ་ཡིན་ཀྱང་རིམ་གྱིས་པ་ལ་འདོད་ཉོན་དགུ་པ་སྤངས་པ་དང་། འདོད་པའི་སས་བསྡུས་ཀྱི་ཉོན་ཡིད་ཅིག་ཅར་དུ་སྤངས་པ་མི་སྲིད་པ་རྣམས་བསྟན་པ་ནི་གསུང་རབ་ཀྱི་གནད་དོ། །འདོད་པ་ལ་འདོད་ཆགས་དང་བྲལ་ཞེས་པའི་འདོད་པ་ནི་འདོད་པའི་ཡོན་ཏན་ལྔ་ཡིན་གྱི་ཀུན་གཞིའི་རྣམ་པར་ཤེས་པ་མ་ཡིན་པས་གནད་མ་འཆུག་པ་གལ་ཆེའོ། །བཞི་པ་རིམ་གྱིས་པའི་དགྲ་བཅོམ་གྱི་སྐོར་ལ། ཞུགས་པ་དང་། འབྲས་གནས་གཉིས་ལས། དང་པོ་ལ་སྤངས་པའི་ཁྱད་པར་ནི། འདོད་ཉོན་དགུ་པ་སྤངས་སྲིད་ཉོན་དགུ་པ་མ་སྤངས་པའོ། །རྟོགས་པའི་ཁྱད་པར་ནི། འདོད་ཉོན་དགུ་པ་སྤངས་པའི་རྣམ་གྲོལ་ལམ་ཐོབ་ཅིང་། སྲིད་ཉོན་དགུ་པ་སྤངས་པའི་རྣམ་གྲོལ་ལམ་མ་ཐོབ་པའོ། །མཚན་ཉིད་ནི་ཕྱིར་མི་འོང་འབྲས་གནས་གང་ཞིག ཕྱིར་མི་འོང་གི་འབྲས་བུ་ཐོབ་རྗེས་སུ་ཁམས་གོང་གི་ཉོན་མོངས་སྤོང་བའི་སྦྱོར་བ་རང་རྒྱུད་ལ་ཐོབ་པའོ། །དབྱེ་བ་ལ་སྤངས་པའི་སྒོ་ནས་དབྱེ་བ་ནི་ཕྱིར་མི་འོང་འབྲས་གནས་ཀྱི་སྐབས་དང་ཁྱད་པར་མེད་ཅིང་། རྟོགས་པའི་སྒོ་ནས་དབྱེ་བ་ནི། དེ་ཉིད་ལས་འདོད་ཉོན་དགུ་པ་སྤངས་པའི་རྣམ་གྲོལ་ལམ་དང་། རྗེས་ཐོབ་ལ་གནས་པ་གཉིས་ཕྲི་བས་ཉིས་བརྒྱ་བརྒྱད་ཅུ་གྱ་དྲུག་ཏུ་འགྱུར་རོ། །དབང་པོའི་སྒོ་ནས་དབྱེ་བ་ནི་སྔར་ལྟར་རོ། །གཉིས་པ་འབྲས་གནས་ལ་བཞི་ལས། སྤངས་པའི་ཁྱད་པར་ནི། ཁམས་གསུམ་གྱི་ཉོན་མོངས་མ་ལུས་པར་སྤངས་པའོ། །རྟོགས་པའི་ཁྱད་པར་ནི། སྲིད་ཉོན་དགུ་པ་སྤངས་པའི་རྣམ་གྲོལ་ལམ་ཐོབ་པའོ། །མཚན་ཉིད་ལ་སྤྱིར་དགྲ་བཅོམ་འབྲས་གནས་ཀྱི་མཚན་ཉིད་ཁམས་གསུམ་གྱི་ཉོན་མོངས་མ་ལུས་པར་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་ཉན་ཐོས། རིམ་གྱིས་པའི་དགྲ་བཅོམ་འབྲས་གནས་དང་། ཅིག་ཆར་བའི་དགྲ་བཅོམ་འབྲས་གནས་གཉིས་ལ་ནི་ཁམས་གསུམ་གྱི་ཉོན་མོངས་རྣམ་པས་རིམ་གྱིས་སྤངས་པའི་ཞེས་དང་། རྣམ་པས་ཅིག་ཆར་སྤངས་པའི་དགེ་སྦྱོང་ཚུལ་གྱི་འབྲས་བུ་ལ་གནས་པའི་ཉན་ཐོས་ཞེས་སྦྱར་རོ། །བཞི་པ་དབྱེ་བ་ལ་སྤངས་པའི་སྒོ་ནས་དབྱེ་བ་དང་། སྐྱེ་བ་ལེན་ཚུལ་གྱི་སྒོ་ནས་དབྱེ་བ་དང་། ལམ་ལ་བརྩོན་མི་བརྩོན་གྱི་སྒོ་ནས་དབྱེ་བ་ནི་མེད་ཅིང་། རྟོགས་པའི་སྒོ་ནས་དབྱེ་ན་སྲིད་ཉོན་དགུ་པ་སྤངས་པའི་རྣམ་གྲོལ་ལམ་ལ་གནས་པའི་དང་། དེའི་རྗེས་ཐོབ་ལ་གནས་པ་དང་། མཐོང་ཆོས་བདེར་གནས་ལ་གནས་པ་གསུམ་དུ་དབྱེར་རུང་ངོ་། །རྟེན་གྱི་སྒོ་ནས་དབྱེ་ན་འདོད་པའི་རྟེན་ཅན་དགུ། གཟུགས་ཀྱི་རྟེན་ཅན་བཅུ་བདུན། གཟུགས་མེད་ཀྱི་རྟེན་ཅན་བཞི་སྟེ་སུམ་ཅུ་ཡོད་ལ། གཟུགས་ཀྱི་བར་སྲིད་ཀྱི་རྟེན་ཅན་མེད་པའི་རྒྱུ་མཚན་ནི་སྔར་བཤད་ཟིན་ཏོ། །དབང་པོའི་སྒོ་ནས་དབྱེ་ན། དུས་སྦྱོར་དང་། དུས་མི་སྦྱོར་གཉིས་སོ། །རིགས་ཀྱི་སྒོ་ནས་དབྱེ་ན། ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་སྐྱོད་པ་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་ཏེ་དྲུག་གོ །དེ་ལ་དང་པོ་ལྔ་ནི་དད་མོས་ཀྱི་རྒྱུ་ལས་བྱུང་བ་ཡིན་ཞིང་། དུས་སྦྱོར་ཞེས་བྱ་སྟེ། ཏིང་ངེ་འཛིན་མངོན་དུ་འགྱུར་བ་ཡོ་བྱད་དང་། ནད་མེད་པ་དང་། ཡུལ་གྱི་བྱེ་བྲག་ལ་ལྟོས་པའི་ཕྱིར་རོ། །དྲུག་པ་ནི་མཐོང་ཐོབ་ཀྱི་རྒྱུ་ལས་བྱུང་ཞིང་དུས་མི་སྦྱོར་ཞེས་བྱ་སྟེ་ཏིང་ངེ་འཛིན་འདོད་རྒུར་མངོན་དུ་འགྱུར་བའི་ཕྱིར་རོ། །དྲུག་པོ་དེ་དག་གི་མཚན་ཉིད་རིམ་བཞིན། དབང་པོ་རྟུལ་པོ་སྔོན་སྦྱོར་བ་གཉིས་དང་མི་ལྡན་པས་འདོད་ཡོན་གྱིས་སེམས་གཡེངས་པའམ་མ་གཡེངས་ཀྱང་རུང་རང་གི་ངང་གིས་མཐོང་ཆོས་ཀྱི་བདེར་གནས་ཀྱི་བསམ་གཏན་ལས་ཉམས་པར་འགྱུར་བའི་རིགས་ཅན་དང་། དབང་པོ་རྟུལ་པོ་སྔོན་སྦྱོར་བ་གཉིས་དང་མི་ལྡན་པས་སྐུ་ཚེའི་འདུ་བྱེད་མི་གཏོང་ན་ཉམས་ཤིང་། བཏང་ན་མི་ཉམས་པའི་རིགས་ཅན་དང་། དབང་པོ་སྔོན་རྒྱུན་དུ་སྦྱོར་བ་དང་ལྡན་པས་འདོད་ཡོན་ལས་སེམས་བསྲུངས་ན་ཉམས་པར་མི་འགྱུར་ཞིང་། མ་བསྲུངས་ན་ཉམས་པར་འགྱུར་བའི་རིགས་ཅན་དང་། དབང་པོ་རྟུལ་པོ་སྔོན་གུས་པར་སྦྱོར་བ་དང་ལྡན་པས་འདོད་ཡོན་ལས་རྣམ་པར་གཡེངས་སམ་མ་གཡེངས་ཀྱང་རུང་ཉམས་པར་མི་འགྱུར་ལ་དབང་པོ་རྣོན་པོར་ཡོངས་སུ་སྦྱོང་མི་ནུས་པའི་རིགས་ཅན་དང་། དབང་པོ་རྟུལ་པོ་འདོད་ཡོན་གྱིས་གཡེངས་སམ་མ་གཡེངས་ཀྱང་རུང་ཉམས་པར་མི་འགྱུར་ལ་དབང་པོ་རྣོན་པོར་སྦྱོང་ནུས་པའོ། །དབང་པོ་རྣོན་པོ་སྦྱོར་བ་གཉིས་ཀ་དང་ལྡན་པས་འདོད་ཡོན་གྱིས་ནམ་ཡང་མི་ཉམས་ཤིང་དབང་པོ་སྦྱོང་མི་དགོས་པའོ། །འདི་དག་དེའི་རིགས་ཅན་ཙམ་ལ་འཇོག་ན་ཁམས་གསུམ་ཆར་ན་ཡང་དགྲ་བཅོམ་པ་དྲུག་ཆར་ཡོད་ལ། ངེས་པའི་དབང་དུ་བྱས་ན་འདོད་པའི་ཁམས་ན་དྲུག་ཀ་ཡོད་ཅིང་། ཁམས་གོང་མ་གཉིས་ན་གནས་པ་ལས་མི་བསྐྱོད་པ་དང་། མི་གཡོ་བའི་ཆོས་ཅན་གཉིས་ཡོད་ཀྱི་གཞན་བཞི་པོ་མེད་པར་བཤད་དོ། །མཐོང་ཆོས་ལ་བདེར་གནས་ལས་ཉམས་མི་ཉམས་ཀྱི་སྒོ་ནས་འཇོག་པ་འདི་ནི་མདོ་སྡེ་པའི་ལུགས་ཡིན་གྱི་བྱེ་བྲག་ཏུ་སྨྲ་བས་ནི་འབྲས་བུ་ལས་ཉམས་མི་ཉམས་ཀྱི་སྒོ་ནས་འཇོག་པར་འདོད་དོ། །དེ་ལ་མདོ་སྡེ་པ་ན་རེ། འཇིག་རྟེན་པའི་ལམ་གྱིས་ཐོབ་པའི་འབྲས་བུ་བར་པ་གཉིས་ལས་ཉམས་པ་སྲིད་ཀྱི་འབྲས་བུ་ཐོག་མཐའ་གཉིས་དང་། འདས་ལམ་གྱིས་ཐོབ་པའི་འབྲས་བུ་བར་པ་གཉིས་ལས་ཉམས་པ་ནི་མེད་དེ། འདི་ལ་ལུང་དང་རིགས་པ་གཉིས་ལས། ལུང་ནི་དགེ་སློང་དག་འཕགས་པའི་ཤེས་རབ་ཀྱིས་སྤངས་པ་གང་ཡིན་པ་དེ་ནི་སྤངས་པ་ཡིན་ནོ་ཞེས་གསུངས་པ་དང་། སློབ་པ་ལ་བག་ཡོད་པ་ལ་བག་ཡོད་པར་བྱའོ། །ཞེས་ང་སྨྲའོ་ཞེས་གསུངས་ཀྱི་དགྲ་བཅོམ་པ་ལ་ནི་མ་ཡིན་ནོ། །ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིའི་བར་ཆད་བྱེད་པ་ཡིན་པར་ང་སྨྲའོ་ཞེས་གསུངས་པའི་མདོ་དེ་ལས་ནི་མཐོང་བའི་ཆོས་ལ་བདེ་བར་གནས་པ་ཙམ་ཁོ་ན་ལས་ཡོངས་སུ་ཉམས་པར་འགྱུར་བར་གསུངས་པར་ཟད་དེ། འདིས་སེམས་རྣམ་པར་གྲོལ་བ་མི་གཡོ་བ་ལུས་ཀྱིས་མངོན་སུམ་དུ་བྱས་པ་གང་ཡིན་པ་དེ་ལས་ནི་རྣམ་གྲངས་གང་གིས་ཀྱང་ཡོངས་སུ་ཉམས་པར་འགྱུར་བ་ང་མི་སྨྲའོ་ཞེས་ཀྱང་གསུངས་སོ་ཞེས་གསུངས་པའི་ཕྱིར། གཉིས་པ་རིགས་པ་ལས་ཇི་ལྟ་བུ་ཞེ་ན། རེ་ཞིག་གལ་ཏེ་དགྲ་བཅོམ་པ་ལ་གང་གིས་ན་ཉོན་མོངས་པ་རྣམས་གཏན་དུ་མི་སྐྱེ་བའི་ཆོས་ཉིད་དུ་འགྱུར་བ་དེ་ལྟ་བུའི་གཉེན་པོ་གང་ཞིག་སྐྱེས་ན་ནི། ཇི་ལྟར་ན་ཡང་ཡོངས་སུ་ཉམས་པར་འགྱུར། འོན་ཏེ་མ་སྐྱེས་ཏེ་དེའི་ས་བོན་གྱི་ཆོས་ཅན་ཉིད་གཏན་དུ་རྩད་ནས་མ་བཏོན་ན་ནི་ཇི་ལྟར་ཟག་པ་ཟད་པ་ཡིན། ཟག་པ་མ་ཟད་ནའང་ཇི་ལྟར་དགྲ་བཅོམ་པ་ཉིད་ཡིན་ཏེ། རིགས་པ་ལས་ནི་དེ་ལྟ་བུ་ཡིན་ནོ། །ཞེས་གསུངས་སོ། །གསུམ་པ་ཅིག་ཅར་བ་ལ་གཉིས་ཏེ། གཞུང་ལས་ཇི་ལྟར་བཤད་པའི་ཚུལ། དེའི་དོན་བཤད་པའོ། །དང་པོ་ནི། མཛོད་ལས་ཅིག་ཅར་བའི་རྣམ་གཞག་མ་གསུངས་ཤིང་། ཀུན་ལས་བཏུས་ལས། རྒྱུན་དུ་ཞུགས་པའི་གང་ཟག་ཅེས་གང་གསུངས་པ་ལ། རྒྱུན་དུ་ཞུགས་པ་ནི་གཉིས་ཏེ། རིམ་གྱིས་པ་དང་ཅིག་ཅར་ངེས་པར་འབྱིན་པའོ། །རིམ་གྱིས་པ་ནི་ཇི་སྐད་བསྟན་པ་ཡིན་ནོ། །ཅིག་ཅར་ངེས་པར་འབྱིན་པ་ནི། གང་བདེན་པ་རྣམས་མངོན་པར་རྟོག་པར་བྱས་ནས་མི་ལྕོགས་པ་མེད་པ་ལ་བརྟེན་ཏེ། འཇིག་རྟེན་ལས་འདས་པའི་ལམ་གྱིས་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་ཅིག་ཅར་སྤོང་སྟེ། འདི་ནི་རྒྱུན་དུ་ཞུགས་པའི་འབྲས་བུ་དང་། དགྲ་བཅོམ་པའི་འབྲས་བུ་སྟེ། འབྲས་བུ་གཉིས་ལ་གདགས་སོ། །ཕལ་ཆེར་ནི་མཐོང་བའི་ཆོས་སམ་འཆི་བའི་དུས་ཀྱི་ཚེ་ཀུན་ཤེས་པ་ཐོབ་པར་བྱེད་དོ། །གལ་ཏེ་མི་བྱེད་ནའང་དེ་སྨོན་ལམ་གྱི་སྟོབས་ཅན་ཡིན་ཏེ། སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེས་ཏེ་སངས་རྒྱས་འབྱུང་བ་མེད་པ་ན་རང་རྒྱལ་བར་འགྱུར་རོ། །ཞེས་གསུངས་སོ། །གཉིས་པ་ལ་ཉོན་མོངས་སྤོང་བའི་ཚུལ། འབྲས་བུ་གང་ལ་གདགས་པ། མྱང་འདས་མངོན་དུ་བྱེད་པའི་ཚུལ་དང་གསུམ་ལས། དང་པོ་ལ་ཡང་བཞི་སྟེ། གནས་སྐབས་གང་དུ་སྤོང་བ། ས་གང་ལ་བརྟེན་པ། ལམ་གང་གིས་སྤོང་བ། ཚུལ་ཇི་ལྟར་སྤོང་བའོ། །དང་པོ་ནི། བདེན་པ་རྣམས་མངོན་པར་རྟོགས་པར་བྱས་ནས་ཞེས་པ་སྟེ་མཐོང་ལམ་གྱི་རྗེས་སུ་སྤོང་བ་ཡིན་གྱི་སྔ་རོལ་དུ་ནི་མ་ཡིན་ཏེ། སོ་སོའི་སྐྱེ་བོའི་གནས་སྐབས་སུ་ས་གོང་འོག་གི་ཉོན་མོངས་ཅིག་ཅར་དུ་སྤོང་བའི་གཉེན་པོ་མེད་པའི་ཕྱིར་རོ། །གཉིས་པ་ནི། མི་ལྕོགས་པ་མེད་པ་ལ་བརྟེན་ཏེ་ཞེས་པ་སྟེ། བསམ་གཏན་གྱི་དངོས་གཞི་ལ་བརྟེན་པ་ནི་མེད་དེ། འདོད་པ་ལ་འདོད་ཆགས་དང་མ་བྲལ་བས་བསམ་གཏན་གྱི་དངོས་གཞི་མ་ཐོབ་པའི་ཕྱིར་རོ། །གསུམ་པ་ནི། འཇིག་རྟེན་ལས་འདས་པའི་ལམ་གྱིས་ཞེས་པ་སྟེ། འཇིག་རྟེན་པའི་ལམ་གྱིས་ས་གོང་འོག་གི་ཉོན་མོངས་ཅིག་ཅར་དུ་སྤོང་མི་ནུས་པའི་ཕྱིར་རོ། །བཞི་པ་ནི་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་ཅིག་ཅར་སྤོང་སྟེ་ཞེས་པ་སྟེ། འདོད་པའི་སས་བསྡུས་ཀྱི་ཉོན་མོངས་ཆེན་པོའི་ཆེན་པོ་ནས་སྲིད་རྩེའི་ཉོན་མོངས་ཆེན་པོའི་ཆེན་པོའི་བར་ཆེན་པོའི་ཆེན་པོ་དགུ་ཅིག་ཅར་དུ་སྤོང་བ་ནས་ཆུང་ངུའི་ཆུང་ངུ་དགུ་ཅིག་ཅར་དུ་སྤོང་བར་བྱེད་པ་ནི་རྣམ་པས་ཞེས་པའི་དོན་ཏོ། །གཞན་དུ་ན་ས་དགུ་ཆར་གྱི་སྒོམ་སྤང་ཐམས་ཅད་ཅིག་ཅར་དུ་སྤོང་བར་འགྱུར་རོ། །གཉིས་པ་འབྲས་བུ་གང་ལ་གདགས་པ་ནི། འདི་ནི་རྒྱུན་དུ་ཞུགས་པའི་འབྲས་བུ་དང་། དགྲ་བཅོམ་པའི་འབྲས་བུ་སྟེ། འབྲས་བུ་གཉིས་ལ་གདགས་སོ་ཞེས་པ་སྟེ་འབྲས་བུ་བར་པ་གཉིས་ལ་ནི་བཞག་དུ་མེད་དེ། འདིས་འདོད་ཉོན་དྲུག་པ་སྤངས་པའི་ཚེ་གོང་མ་རྣམས་ཀྱི་དྲུག་པ་ཡང་སྤངས་པས་ཕྱིར་འོང་དུ་འགལ་བའི་ཕྱིར་དང་། འདོད་ཉོན་དགུ་པ་སྤངས་པའི་ཚེ་ཁམས་གོང་གི་ཉོན་མོངས་མ་ལུས་པར་སྤངས་པས་ཕྱིར་མི་འོང་དུ་འགལ་བའི་ཕྱིར་རོ། །གསུམ་པ་མྱང་འདས་མངོན་དུ་བྱེད་པའི་ཚུལ་ནི་ཕལ་ཆེར་ནི་མཐོང་བའི་ཆོས་སམ་ཞེས་སོགས་ཏེ། འདི་ནི་དབང་པོ་རྣོ་ཞིང་ང་རྒྱལ་ཤས་ཆེ་བ་རང་སངས་རྒྱས་ཀྱི་རིགས་དང་འདྲ་བ་ཡིན་པས་ཕལ་ཆེར་མཐོང་བའི་ཆོས་ལ་མྱང་འདས་མངོན་དུ་བྱེད་ཅིང་གལ་ཏེ་ཉོན་མོངས་ལྷག་མ་སྤོང་བར་མ་ནུས་ན་འདོད་ཉོན་མ་སྤངས་པས་འདོད་པ་ཁམས་སུ་སྐྱེ་བ་ལས་འོས་མེད་ཅིང་སངས་རྒྱས་དང་ཉན་ཐོས་མེད་པའི་ཞིང་ཁམས་སུ་སྐྱེས་ནས་རང་བྱུང་གི་བྱང་ཆུབ་མངོན་དུ་བྱེད་པར་གྱུར་ཅིག་ཅེས་པའི་སྨོན་ལམ་གྱི་མཐུས་ཞིང་དེ་འདྲར་སྐྱེས་ནས་རང་བྱང་ཆུབ་མངོན་དུ་བྱེད་པའོ། །འདི་ནི་བཟུང་དོན་རྟོག་པ་སྤོང་ཕྱིར་དང་ཞེས་པའི་སྐབས་ཀྱི་སྤངས་རྟོགས་ཀྱི་ཁྱད་པར་དང་མི་ལྡན་ཡང་འདོད་པ་ཁམས་ཀྱི་སྲིད་པ་ཐ་མ་པའི་རྟེན་ལ་སློབ་དཔོན་མེད་པར་རང་བྱུང་གི་བྱང་ཆུབ་མངོན་དུ་བྱས་པའི་ཕྱིར་ན་རང་སངས་རྒྱས་སུ་བཞག་པ་ཡིན་གྱི་ཉན་ཐོས་དང་སྤང་རྟོགས་ཁྱད་པར་མེད་དོ། །འདིར་ཁ་ཅིག་སངས་རྒྱས་འབྱུང་བ་དང་འཕྲད་ན། ཉན་ཐོས་ཀྱི་དགྲ་བཅོམ་དུ་འགྱུར་ཡང་སངས་རྒྱས་འབྱུང་བ་མེད་ན་རང་རྒྱལ་དུ་འགྱུར་ཞེས་པ་དང་། གཞན་དག་སངས་རྒྱས་འབྱུང་བ་དང་ཕྲད་ན་བྱང་ཆུབ་སེམས་དཔར་འགྱུར་ཀྱང་སངས་རྒྱས་འབྱུང་བ་མེད་ན་རང་རྒྱལ་དུ་འགྱུར་རོ་ཞེས་སྨྲ་བ་ནི་བྱིས་པའི་གཏམ་སྟེ། སྔ་མ་ལྟར་ན་སངས་རྒྱས་འབྱུང་བ་དང་ཕྲད་མ་ཕྲད་གཉིས་ཀྱི་ནང་ནས་མ་ཕྲད་པ་བཟང་བར་ཐལ་བའི་ཕྱིར་དང་། ཕྱི་མ་ལྟར་ན་ཐེག་ཆེན་སེམས་བསྐྱེད་མ་སྐྱེས་ན་སངས་རྒྱས་འབྱུང་བ་དང་ཕྲད་ཀྱང་། བྱང་ཆུབ་སེམས་དཔར་མི་འགྱུར་བའི་ཕྱིར་དང་། སྐྱེས་ན་མ་འཕྲད་ཀྱང་བྱང་ཆུབ་སེམས་དཔར་འགྱུར་བའི་ཕྱིར་ཏེ། རྒྱན་ལས། དོན་བྱས་མ་ཡིན་དེ་སངས་རྒྱས། །མེད་པར་སྐྱེས་ནས་སྤྲུལ་དོན་གཉེར། །བསམ་གཏན་དོན་བརྩོན་དེར་བསྟེན་ནས། །བྱང་ཆུབ་དམ་པ་ཐོབ་པར་འགྱུར། །ཞེས་གསུངས་པའི་ཕྱིར་རོ། །དེས་ན་ཅིག་ཆར་བའི་རྒྱུན་ཞུགས་འབྲས་གནས་མཐོང་བའི་ཆོས་ལ་མྱང་འདས་མ་ཐོབ་པ་དེ་ང་རྒྱལ་ཤས་ཆེ་བའི་རིགས་ཅན་ཡིན་པས་སངས་རྒྱས་འབྱུང་བ་མེད་པའི་ཞིང་ཁམས་སུ་སྐྱེ་བར་སྨོན་ལམ་འདེབས་པར་འདྲ་ཡང་། དེར་སྐྱེས་ནས་རང་བྱང་ཆུབ་མངོན་དུ་བྱེད་པ་དང་། ཐེག་ཆེན་ལམ་དུ་ཞུགས་པ་གཉིས་ཡོད་པ་ལས། སྔ་མ་ནི་གཞུང་འདི་ནས་བཤད་པ་དེ་ཉིད་ཡིན་ཅིང་། ཕྱི་མ་ནི་རྒྱན་ལས་འབྱུང་བ་དེ་ཉིད་ཡིན་ནོ། །ཁ་ཅིག་འདོད་ཁམས་སུ་སྐྱེ་བ་ཡང་སྨོན་ལམ་གྱི་སྟོབས་ཀྱིས་ཡིན་པར་འདོད་པ་ནི་གཞུང་གི་གཅོད་མཚམས་མ་ཤེས་པས་རང་དགར་སྨྲ་བ་སྟེ། སྨོན་ལམ་མ་བཏབ་ན་དེ་གང་དུ་སྐྱེ་སྨྲོས་ཤིག དེས་ན་སྤྱིར་འདོད་ཁམས་སུ་སྐྱེ་བ་ཙམ་སྨོན་ལམ་གྱི་སྟོབས་ཀྱིས་མ་ཡིན་ཡང་། སངས་རྒྱས་འབྱུང་བ་མེད་པར་ན་འདོད་ཁམས་སུ་སྐྱེ་བ་ནི་སྨོན་ལམ་གྱི་སྟོབས་ཀྱིས་ཡིན་པ་ཁྱད་པར་ཕྱེད་པར་བྱའོ། །དེ་དག་གི་དོན་བསྡུས་པའི་རྣམ་གཞག་ལ་ཅིག་ཆར་བའི་རྒྱུན་ཞུགས་ཞུགས་གནས་དང་། ཅིག་ཆར་བའི་དགྲ་བཅོམ་ཞུགས་གནས་གཉིས་ལས། དང་པོའི་མཚན་ཉིད་རྒྱུན་ཞུགས་ཞུགས་པ་གང་ཞིག འདོད་ཉོན་དང་པོ་དང་སྲིད་ཉོན་དང་པོ་ཅིག་ཅར་དུ་སྤོང་བར་འགྱུར་བའོ། །གཉིས་པའི་མཚན་ཉིད་རྒྱུན་ཞུགས་འབྲས་གནས་གང་ཞིག འདོད་ཉོན་དགུ་པ་དང་སྲིད་ཉོན་དགུ་པ་ཅིག་ཆར་དུ་སྤང་བར་འགྱུར་བའོ། །གསུམ་པའི་མཚན་ཉིད། རྒྱུན་ཞུགས་འབྲས་གནས་གང་ཞིག འདོད་ཉོན་དང་པོ་དང་། སྲིད་ཉོན་དང་པོ་ཅིག་ཆར་དུ་སྤོང་བའི་སྦྱོར་བ་རང་རྒྱུད་ལ་ཐོབ་པའོ། །བཞི་པའི་མཚན་ཉིད་ནི་སྔར་བསྟན་ཟིན་ཏོ། །མངོན་པ་ནས་བཤད་པའི་མཚོན་བྱེད་དཔེའི་དགེ་འདུན་བཤད་ཟིན་ཏོ།། །།གསུམ་པ་མཚོན་བྱེད་དེས་མཚོན་བྱ་ཇི་ལྟར་མཚོན་པའི་ཚུལ་ལ་གསུམ་ཏེ། གཞུང་གི་དངོས་བསྟན་ཐེག་པ་གསུམ་གྱི་གང་ཟག་གང་ཡིན་དཔྱད་པ། དེ་དག་གི་ས་མཚམས་རྣམ་པར་བཞག་པ། ཇི་ལྟར་མཚོན་པའི་ཚུལ་དངོས་སོ། །དང་པོ་ནི། དབང་པོ་རྟུལ་དང་རྣོན་པོ་ལ་སོགས་པའི་གང་ཟག་ཉི་ཤུ་པོ་འདི་དག་བྱང་ཆུབ་སེམས་དཔའ་ཡིན་ནམ། དང་པོ་བཅུ་དགུ་ཉན་ཐོས་དང་། ཕྱི་མ་རང་སངས་རྒྱས་མཚན་ཉིད་པ་ཡིན། དང་པོ་ལྟར་ན་བྱང་ཆུབ་སེམས་དཔའ་ལ་རྒྱུན་ཞུགས་དང་། ཕྱིར་འོང་སོགས་ཡོད་པར་འགྱུར་ཞིང་། ཕྱི་མ་ལྟར་ན། སངས་རྒྱས་ལ་སོགས་དཀོན་མཆོག་གསུམ། །ཞེས་པའི་དགེ་འདུན་དཀོན་མཆོག་གི་རྒྱས་བཤད་མིན་པར་འགྱུར་རོ་ཞེ་ན། ཕྱི་མ་ཁས་མི་ལེན་ཅིང་། དང་པོ་ཁས་བླངས་ཀྱང་། སྐྱོན་དེ་ཉིད་མི་གནས་ཏེ། དབང་པོ་རྟུལ་པོ་ལ་སོགས་པའི་མིང་གིས་འདོགས་པའི་ཕྱིར་རོ། །འོ་ན་འདོགས་པའི་རྒྱུ་མཚན། བཏགས་པའི་དགོས་པ། དངོས་ལ་གནོད་བྱེད་ཇི་ལྟར་ཞེ་ན། དང་པོ་ནི་འོག་མཚོན་ཚུལ་གྱི་སྐབས་སུ་འབྱུང་ཞིང་། གཉིས་པ་ནི་ཉན་ཐོས་པ་འགའ་ཞིག དགེ་འདུན་དཀོན་མཆོག་ནི་ཟུང་བཞི་ཡ་བརྒྱད་དང་། རང་སངས་རྒྱས་ཁོ་ན་ཡིན་གྱི་བྱང་ཆུབ་སེམས་དཔའ་ནི་ཚོགས་ལམ་ཁོ་ནར་བསྐལ་པ་གྲངས་མེད་གསུམ་དུ་ཚོགས་བསགས་པ་ཡིན་པས་དགེ་འདུན་དཀོན་མཆོག་གི་རྣམ་པར་བཞག་པ་བྱར་མེད་ཅིང་། དྲོད་ནས་ཟད་མི་སྐྱེ་ཤེས་ཀྱི་བར་མཉམ་གཞག་ཐུན་ཅིག་ལ་བསྐྱེད་པས་ས་བཅུའི་རྣམ་པར་གཞག་པ་ཡང་བྱར་མེད་དོ། །ཞེས་འདོད་པ་ལས་ལོག་རྟོག་དང་པོ་བཟློག་པའི་ཆེད་དུ་ཤེར་ཕྱིན་གྱི་མདོའི་དོན་བསྟན་བཅོས་འདིར་བྱང་ཆུབ་སེམས་དཔའ་ལ་དབང་པོ་རྟུལ་དང་རྣོན་པོ་ནས་རང་སངས་རྒྱས་ཀྱི་བར་ཉི་ཤུར་བཏགས་པའི་ཕྱིར་དང་། ཕྱི་མ་བཟློག་པའི་ཆེད་དུ་མདོ་གཞན་གྱི་དགོངས་པ་རིན་ཆེན་ཕྲེང་བ་ལས། ཇི་ལྟར་ཉན་ཐོས་ཐེག་པ་ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་གསུངས་པའི་ཕྱིར་རོ། །དེ་ལྟར་འདོགས་པའི་རྒྱུ་མཚན་ཡང་། བྱེ་བྲག་ཏུ་སྨྲ་བས་བྱང་ཆུབ་སེམས་དཔའ་འཁོར་བར་སྐྱེ་བ་ལེན་པ་ཐམས་ཅད་ཚོགས་ལམ་ཁོ་ནར་ལེན་པ་ཡིན་གྱི། དྲོད་ཡན་ཆད་ནས་འཁོར་བར་སྐྱེ་བ་ལེན་པ་མི་སྲིད་པའི་ཕྱིར་ཏེ། དྲོད་ཐོབ་པའི་རྟེན་དེ་ཉིད་ལ་མངོན་པར་རྫོགས་པར་སངས་རྒྱ་བ་ཡིན་པའི་ཕྱིར། འཁོར་བར་སྐྱེ་བ་ལེན་པའི་འཕགས་པ་ཡིན་ན། ཉན་ཐོས་ཡིན་པས་ཁྱབ་སྟེ། རྒྱུན་ཞུགས་དང་། ཕྱིར་འོང་དང་། ཕྱིར་མི་འོང་གསུམ་ལས་གཞན་པའི་འཕགས་པ་འཁོར་བར་སྐྱེ་བ་ལེན་པ་མི་སྲིད་པའི་ཕྱིར་རོ། །དེས་ན་འཁོར་བར་སྐྱེ་བ་ལེན་པའི་འཕགས་པ་ཡིན་ན། སྲིད་པ་ལན་བདུན་པ་སོགས་མངོན་པ་ནས་བཤད་པ་རྣམས་ཡིན་དགོས་ཤིང་། དེ་དག་བྱང་སེམས་ལ་མེད་པའི་ཕྱིར་ན། བྱང་སེམས་འཕགས་པ་གཞན་དོན་དུ་འཁོར་བར་སྐྱེ་བ་ལེན་པ་ཉིད་མི་འཐད་དོ་ཞེས་མཐའ་གཅིག་ཏུ་དམ་བཅའོ། །དེ་བཟློག་པའི་ཆེད་དུ་ཤེར་ཕྱིན་གྱི་མདོར། བྱང་ཆུབ་སེམས་དཔའ་ལའང་སྐྱེ་བ་ལེན་ཚུལ་འདི་དང་འདི་ལྟ་བུ་ཡོད་པས། རྒྱུན་ཞུགས་དང་ཕྱིར་འོང་ལ་སོགས་པའི་མིང་གིས་གདགས་སུ་རུང་བས་ན་ཉན་ཐོས་འཕགས་པ་ལ་སྐྱེ་བ་ལེན་ཚུལ་གྱི་སྒོ་ནས་གང་ཟག་བཅུ་དགུའི་རྣམ་གཞག་བྱེད་པ་ཇི་ལྟ་བ་བཞིན་དུ་བྱང་སེམས་འཕགས་པ་ལ་ཡང་ཡོད་པར་ཤེས་པར་གྱིས་ཤིག ཅེས་འདོམས་པ་ཡིན་ནོ། །བྱེ་བྲག་ཏུ་སྨྲ་བས་སངས་རྒྱས་དང་ཉན་ཐོས་མི་བཞུགས་པའི་འཇིག་རྟེན་གྱི་ཁམས་སུ་སྒྲ་མེད་ལུས་ཀྱི་རྣམ་འགྱུར་གྱིས་ཆོས་སྟོན་པའི་སྒོ་ནས་སེམས་ཅན་གྱི་དོན་བྱེད་པ་དེ་ཡིན་ན། རང་སངས་རྒྱས་ཡིན་པས་ཁྱབ་པར་སྨྲ་བ་དེ་བཟློག་པའི་ཆེད་དུ། ཤེར་མདོར། དོན་བྱེད་ཚུལ་དེ་བྱང་ཆུབ་སེམས་དཔའ་ལ་ཡང་ཡོད་པས་བྱང་ཆུབ་སེམས་དཔའ་ལ་ཡང་རང་སངས་རྒྱས་ཀྱི་མིང་གིས་གདགས་སུ་རུང་བར་བསྟན་ཏོ། །ཡང་བྱེ་བྲག་ཏུ་སྨྲ་བས། རིགས་ཀྱི་ས་དང་། བརྒྱད་པའི་ས་ལ་སོགས་པ་རྗེས་ཐོབ་ཀྱིས་བར་དུ་ཆོད་པའི་ས་སོ་སོའི་རྣམ་པར་བཞག་པ་ཉན་ཐོས་ཀྱི་སྦྱོར་ལམ་ཡན་ཆད་དུ་ཡོད་པ་ཡིན་གྱི་བྱང་ཆུབ་སེམས་དཔའ་ལ་ནི་དྲོད་ནས་བཟུང་སྟེ་མི་སློབ་ལམ་གྱི་བར་མཉམ་བཞག་ཐུན་གཅིག་ཡིན་པས་རྗེས་ཐོབ་ཀྱིས་བར་དུ་ཆོད་པའི་ས་སོ་སོའི་རྣམ་པར་བཞག་པ་མེད་པར་སྨྲ་བ་དེ་དགག་པའི་ཆེད་དུ། རིན་ཆེན་ཕྲེང་བ་ལས་སྔར་གྱི་གཞུང་དེ་བཤད་པ་ཡིན་ནོ། །དེ་ལྟར་ཤེར་ཕྱིན་གྱི་མདོར། བྱང་ཆུབ་སེམས་དཔའ་ལ་ཉན་ཐོས་དང་རང་སངས་རྒྱས་ཀྱི་དགེ་འདུན་གྱི་མིང་གིས་བཏགས་ནས་གསུངས་པ་ལ་དེ་དག་ཉན་ཐོས་དང་རང་སངས་རྒྱས་མཚན་ཉིད་པ་ཡིན་པར་བཟུང་བའི་དགེ་སློང་འགའ་ཞིག་བྱུང་བས་དེ་དག་གི་འདུ་ཤེས་བཟློག་པའི་ཆེད་དུ་ཕྱིར་མི་ལྡོག་པ་འཁོར་ལོའི་མདོར། སྔར་གྱི་དེ་དག་ནི་བྱང་ཆུབ་སེམས་དཔའ་ལ་ཉན་ཐོས་དང་། རང་སངས་རྒྱས་ཀྱི་དགེ་འདུན་གྱི་མིང་གིས་བཏགས་པ་ཡིན་གྱི་བརྒྱད་པ་ལ་སོགས་པ་མཚན་ཉིད་པ་མ་ཡིན་ནོ་ཞེས་བསྟན་ཏེ། མདོ་དེ་ཉིད་དུ། ཀུན་དགའ་བོ་དགེ་སློང་དེ་དག་ནི་ཆུ་མིན་པ་ལ་ཆུར་འདུ་ཤེས་པ་བཞིན་དུ་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་མ་ཡིན་པ་ལ་དེ་དག་ཏུ་འདུ་ཤེས་པ་དང་། ཕུང་པོ་མ་ཡིན་པ་ལ་ཕུང་པོར་འདུ་ཤེས་པ་དག་སྟེ། དེ་དག་གི་འདུ་ཤེས་རྣམ་པར་གྲོལ་བའི་དོན་དུ་ང་ལ་ཆོས་བསྟན་དུ་ཡོད་པས་ཁྱོད་ཀྱི་ཕྱོགས་དང་ཕྱོགས་ཐམས་ཅད་དང་རིའི་གསེབ་ན་འདུག་པའི་དགེ་སློང་དག་བོས་ཤིག་འོང་བར་འགྱུར་རོ། །ཞེས་གསུངས་པས། ཀུན་དགའ་བོས་དེ་བཞིན་དུ་བསྒྲུབ་པ་དང་། དེར་དགེ་སློང་རྣམས་འདུས་པ་ན་ཀུན་དགའ་བོས་བཅོམ་ལྡན་འདས་འཁོར་འདི་ན་འཁོར་བཞི་པོ་དག་ཀྱང་མང་། ལྷ་བརྒྱད་སྟོང་དག་ཀྱང་མང་ངོ་། །དེ་མ་ལགས་པ་རྒྱུན་དུ་ཞུགས་པའི་འབྲས་བུར་འདུ་ཤེས་པ་ལ་སོགས་པ་ཡང་མང་དུ་མཆིས་པས་ཞེས་སྔ་མ་རྣམས་བརྗོད་དེ། བཅོམ་ལྡན་འདས་ལ་ཆོས་བསྟན་པར་ཞུས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལ་དད་པས་རྗེས་སུ་འབྲང་བར་བསྟན་ནོ་ཞེས་པས་རང་སངས་རྒྱས་ཀྱི་བར་དུ་བསྟན་ནོ་ཞེས་གསུངས་སོ། །དེས་ན་བསྟན་བཅོས་འདིར་བྱང་ཆུབ་སེམས་དཔའ་ལ་དབང་རྟུལ་དང་དབང་པོ་རྣོན་པོ་ལ་སོགས་པའི་རྣམ་གཞག་མེད་དམ་སྙམ་པའི་ལོག་རྟོག་དགག་པའི་ཆེད་དུ་དེ་དག་གི་མིང་གིས་འདོག་པར་གསུངས་པས་ན་འདོགས་པའི་རྒྱུ་མཚན་ཁོ་ན་གསུངས་ཤིང་། ཕྱིར་མི་ལྡོག་པ་འཁོར་ལོའི་མདོ་ལས་ནི་བྱང་ཆུབ་སེམས་དཔའ་ལ་བརྒྱད་པ་ལ་སོགས་པ་མཚན་ཉིད་པར་འཛིན་པའི་ལོག་རྟོག་བཟློག་པའི་ཆེད་དུ་དངོས་ལ་གནོད་བྱེད་དང་། འདོགས་པའི་རྒྱུ་མཚན་གཉིས་ཀ་གསུངས་ཏེ། ཆུ་མ་ཡིན་པ་ལ་ཆུར་འདུ་ཤེས་པ་བཞིན་དུ་རྒྱུན་དུ་ཞུགས་པ་ནས་རང་སངས་རྒྱས་ཀྱི་བར་མ་ཡིན་པ་ལ་དེ་དག་ཏུ་འདུ་ཤེས་པ་ཞེས་པས་ནི་དངོས་ལ་གནོད་བྱེད་བསྟན་ཅིང་། ལོག་པ་བརྒྱད་ལས་ཤིན་ཏུ་འདས། །རྣམ་པར་ཐར་བ་བརྒྱད་ལ་རེག །ཡང་དག་བརྒྱད་ལ་ཞེན་པ་མེད། །དེ་ཕྱིར་བརྒྱད་པ་ཞེས་བྱ་བའོ། །སངས་རྒྱས་མཐོང་བས་ཆགས་མེད་ལ། །སེམས་ཅན་དཔག་མེད་དད་པར་བྱེད། །དེ་ནི་དེ་ལ་ཆགས་པ་མེད། །དེ་ཕྱིར་བློ་ལྡན་དད་པས་འབྲང་། །སངས་རྒྱས་ཆོས་ལས་རྣམ་ཀུན་ཏུ། །ཆོས་ལས་ལྡོག་པར་མི་བྱེད་ཅིང་། །ཆོས་ཉིད་འདི་དག་འཛིན་བྱེད་དེ། །དེ་ཕྱིར་ཆོས་རྗེས་འབྲང་ཞེས་བྱ། །ལམ་ལ་རྒྱུན་ཞེས་ངས་བརྗོད་དེ། །བསམ་དུ་མེད་པས་སངས་རྒྱས་ལམ། །གང་དག་ལ་ལ་འདིར་གནས་པ། །དེ་དང་དེ་ནི་རྒྱུན་ལ་གཞོལ། །གང་གི་བྱང་ཆུབ་འགྲུབ་འགྱུར་བ། །རྐྱེན་རྣམས་མང་པོ་རབ་གསུངས་པ། །རྐྱེན་འདི་ཤེས་པར་བྱའོ་ཞེས། །དེ་དག་ཚོལ་ཞིང་འོངས་པ་ཡིན། །འགྲོ་བ་རྣམ་གསུམ་གང་དུ་ཡང་། །དེ་ནི་ཕྱིར་ཞིང་མི་འགྲོ་སྟེ། །སངས་རྒྱས་ཆོས་རྣམས་ཐོབ་པས་ན། །དེ་ནི་ཕྱིར་མི་འོང་ཞེས་བརྗོད། །ཉི་ཚེའི་སྤྱོད་པ་གང་ཡིན་པ། །སྤྱོད་པ་ཐམས་ཅད་དེ་ཡིས་ཤེས། །དེས་དེ་དགྲ་བཅོམ་ཞེས་བྱ་བ། །ཞེས་དང་། ཀུན་དགའ་བོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྟེན་འབྲེལ་བཅུ་གཉིས་ཀྱི་རང་བཞིན་མངོན་དུ་གྱུར་པ་ཡིན་ཏེ། དེ་ལྟ་བས་ན་རང་སངས་རྒྱས་ཞེས་བྱའོ། །ཞེས་པ་རྣམས་ཀྱིས་ནི་འདོགས་པའི་རྒྱུ་མཚན་བསྟན་པའི་ཕྱིར་རོ། །གཉིས་པ་དེ་དག་གི་ས་མཚམས་རྣམ་པར་གཞག་པ་ནི། འདིར་བསྟན་གྱི་དགེ་འདུན་ཉི་ཤུ་པོ་དེ་དག་ལམ་གྱི་ས་མཚམས་གང་ནས་བཞག་ཅེ་ན། གཞོན་ནུ་ཚུལ་ཁྲིམས་ཀྱིས། རཏྣ་ཀིརྟིའི་ལུགས་ལ་ཚོགས་ལམ་ནས་བཞག་པ་ཡིན་ཟེར་ཀྱང་དེའི་ལུགས་ལ་སྤྱིར་བྱང་ཆུབ་སེམས་དཔའི་དགེ་འདུན་ཙམ་ཚོགས་ལམ་ནས་བཞག་པར་སྣང་ཡང་འདིར་བསྟན་གྱི་དགེ་འདུན་ཚོགས་ལམ་ནས་བཞག་པ་མི་སྣང་སྟེ། ད་ནི་འཕགས་པའི་ཉན་ཐོས་དང་། བྱང་ཆུབ་སེམས་དཔའི་ཐུན་མོང་གི་རབ་ཏུ་དབྱེ་བ་བསྟན་པའི་ཕྱིར་གསུངས་པ། དབང་པོ་རྟུལ་དང་རྣོན་པོ་དག །ཅེས་སོགས་གསུངས་པའི་ཕྱིར་རོ། །ཤཱནྟི་པས། སློབ་པ་ཕྱིར་མི་ལྡོག་པའི་ཚོགས། །ཞེས་པའི་རྗེས་སུ་འབྲངས་ནས་བྱང་སེམས་ཀྱི་སྦྱོར་ལམ་དྲོད་ནས་འཇོག་པར་མཛད་དོ། །འཕགས་སེང་གཉིས་ཀྱིས་རྒྱུད་བླ་མར། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །ལུས་ཅན་ཀུན་གྱི་སྐྱབས་ཡིན་ནོ། །ཞེས་པའི་རྗེས་སུ་འབྲངས་ནས་ས་དང་པོ་ཡན་ཆད་དུ་འཇོག་པར་མཛད་དོ། །ལོ་ཆེན་གྱིས་དེ་དག་ཀྱང་། རྒྱུན་ཞུགས་ཀྱི་སྐོར་རྣམས་འཇིག་རྟེན་ལས་འདས་པའི་སེམས་དང་པོ་བསྐྱེད་པ་དང་། ཕྱིར་འོང་གི་སྐོར་དང་། ཕྱིར་མི་འོང་ཞུགས་པ་ནི་སྤྱོད་པ་ལ་ཞུགས་པ་དང་། ཕྱིར་མི་འོང་འབྲས་གནས་རྣམས་ནི་ཕྱིར་མི་ལྡོག་པ་དང་། དགྲ་བཅོམ་ཞུགས་པ་ནི་སྐྱེ་བ་གཅིག་གིས་ཐོགས་པ་ལ་འཇོག་པར་མཛད་དོ། །འོན་ཀྱང་ས་མཚམས་འདི་བཞིན་དུ་འཇོག་པ་དང་། མཚོན་ཚུལ་སྤངས་རྟོགས་ཀྱི་སྒོ་ནས་མཚོན་པ་གཉིས་མི་འགྲིག་སྟེ། སྤང་བྱའི་ཉོན་མོངས་དེ་དག་ཉོན་སྒྲིབ་ལ་འཇོག་ན་ནི་ས་དང་པོ་ནས་སྤངས་ཟིན་པའི་ཕྱིར་དང་། ཉོན་སྒྲིབ་ཀྱི་བག་ཆགས་ལ་འཇོག་ན་ནི་ཕྱིར་མི་འོང་དུ་བཞག་པའི་ཚེ་འདོད་པའི་སས་བསྡུས་ཀྱི་ཉོན་སྒྲིབ་ཀྱི་བག་ཆགས་སྤངས་ཟིན་པར་ཐལ་བའི་ཕྱིར་རོ། །གཞན་ཡང་བྱང་ཆུབ་སེམས་དཔས་ཤེས་སྒྲིབ་སྤོང་ཚུལ་ཅིག་ཆར་བའི་སྤོང་ཚུལ་ལྟར་འཐད་པའི་ཕྱོགས་ཡིན་པས་ཉོན་སྒྲིབ་ཀྱི་བག་ཆགས་སྤོང་ཚུལ་གྱི་སྒོ་ནས་འདི་ལྟ་བུའི་རྣམ་གཞག་འཇོག་པ་དཀའོ། །དེས་ན་སྔོན་གྱི་མཁས་པ་གཞོན་ནུ་ཚུལ་ཁྲིམས། མཁས་གྲུབ་གཡག་པ་ལ་སོགས་པ་མང་པོས་སྐྱེ་བ་ལེན་ཚུལ་གང་དང་གང་ཡོད་པའི་བྱང་སེམས་དེ་དང་དེ་ལ་དབང་པོ་རྟུལ་དང་རྣོན་པོ་ལ་སོགས་པའི་མིང་གིས་འདོགས་པ་ཡིན་གྱི་ས་མཚམས་འདི་ན་ཡོད་ཀྱི་ངེས་པ་མེད་པར་བཞེད་པ་ཉིད་ལེགས་སོ། །གསུམ་པ་ཇི་ལྟར་མཚོན་པའི་ཚུལ་དངོས་ནི་འཕགས་སེང་གཉིས་ཀྱིས་ནི་སྤངས་རྟོགས་ཆ་འདྲ་བའི་སྒོ་ནས་མཚོན་པར་བཞེད་དེ། ཉི་ཁྲི་སྣང་བ་ལས། དེ་ལ་ལམ་ཤེས་པ་ཉིད་ལ་ས་དགུ་པོ་རྣམས་ཀྱི་ཉོན་མོངས་པ་ཆེན་པོའི་ཆེན་པོ་ལ་སོགས་པ་སྤངས་པའི་དོན་དུ་ཆུང་ངུའི་ཆུང་ངུ་ལ་སོགས་པའི་དབྱེ་བས་སྒོམ་པའི་ལམ་རྣམ་པ་དགུ་འཆད་པར་འགྱུར་བ་གང་ཡིན་པ་དེ་ལས་དད་པ་དང་ཆོས་ཀྱི་རྗེས་སུ་འབྲང་བ་གང་ཡིན་པའི་གང་ཟག་གིས་གལ་ཏེ་རྣམ་པ་དྲུག་པའམ་བདུན་པ་དང་། བརྒྱད་པ་སྔར་སྤངས་པར་འགྱུར་ན་ནི་དེ་ལས་དེ་དག་འབྲས་བུ་གཉིས་པ་ལ་ཞུགས་པར་འགྱུར་རོ། །གལ་ཏེ་རྣམ་པ་དགུ་པ་སྤངས་པའི་ཕྱིར་འདོད་པའི་ཁམས་སམ་གོང་མ་ཅི་ཡང་མེད་པའི་སྐྱེ་མཆེད་ཀྱི་བར་ལ་འདོད་ཆགས་དང་བྲལ་བར་འགྱུར་ན་ནི། དེ་ལས་འབྲས་བུ་གསུམ་པ་ལ་ཞུགས་པ་ཡིན་ནོ། །ཞེས་དང་། སློབ་དཔོན་གྱི་འགྲེལ་ཆེན་ལས། མཐོང་བའི་ལམ་སོ་སོར་མངོན་པར་རྟོགས་པ་ལས་ཀྱང་སྐད་ཅིག་མ་གཅིག་ཡིན་ན་ཞུགས་གནས་ཀྱི་རྣམ་གཞག་མི་རུང་བར་ཐལ་བས་སུན་ཕྱུང་བས་ཀྱང་རྟོགས་པའི་སྒོ་ནས་མཚོན་པར་གསལ་བའི་ཕྱིར་རོ། །འོན་ཀྱང་ཉན་རང་གི་སྤངས་རྟོགས་ས་དང་པོ་ནས་རྫོགས་པ་ཤེར་ཕྱིན་གྱི་མདོ་དང་། མངོན་རྟོགས་རྒྱན་དང་། རྒྱུད་བླ་མ་དང་། འཕགས་སེང་གཉིས་ཆར་གྱི་བཞེད་པར་གྲུབ་ཅིང་། དེ་ཡི་ཚེ་སྤངས་རྟོགས་ཀྱི་སྒོ་ནས་མཚོན་པར་མི་རུང་སྟེ། བྱང་སེམས་འཕགས་པ་ཉན་རང་དགྲ་བཅོམ་དང་། ཉོན་སྒྲིབ་སྤངས་པ་དང་། གང་ཟག་གི་བདག་མེད་མངོན་སུམ་དུ་རྟོགས་པའི་ཆ་ནས་སྤངས་རྟོགས་མཉམ་ཤིང་། ཐེག་ཆེན་རང་གི་སྤངས་རྟོགས་ཐུན་མོང་མ་ཡིན་པའི་སྒོ་ནས་ཁྱད་པར་དུ་འཕགས་པར་གྲུབ་བཞིན་དུ་ཡང་ཉན་ཐོས་སློབ་པ་དང་། སྤངས་རྟོགས་འདྲ་བསྒྲིགས་པ་འདི་ནི་ཤིན་ཏུ་འགྲུབ་པར་དཀའ་བའི་ཕྱིར་རོ། །གལ་ཏེ་ཉན་ཐོས་ཀྱི་ཉོན་སྒྲིབ་སྤོང་ཚུལ་གྱི་རྣམ་གཞག་དེས་བྱང་སེམས་ཀྱི་ཤེས་སྒྲིབ་སྤོང་ཚུལ་མཚོན་ནུས་པ་ཡིན་ནོ་སྙམ་ན། དེ་ལྟར་ན་ཤེས་སྒྲིབ་ཅིག་ཅར་བའི་ལུགས་ལྟར་སྤོང་བ་ལ་ནི་གཏན་མི་འགྲིག་ཅིང་། རིམ་གྱིས་སྤོང་བའི་ལུགས་ལ་ཡང་གཏན་མི་འགྲིག་སྟེ། ས་ལྔ་པ་ལ་གནས་པའི་བྱང་སེམས་ཀྱིས་འདོད་པའི་སས་བསྡུས་ཀྱི་ཤེས་སྒྲིབ་སྤངས་པར་ཁས་ལེན་དགོས་པས་ཕྱིར་མི་འོང་དུ་བཞག་དགོས་པར་ཐལ་བའི་ཕྱིར་རོ། །དེས་ན་མདོ་དང་། བསྟན་བཅོས་ཀྱི་དགོངས་པ་ནི་འདི་ལྟར་ཡིན་ཏེ། ཉན་ཐོས་ཀྱི་དགེ་འདུན་རྣམས་ཀྱིས་ནི་སྐྱེ་བ་ལེན་ཚུལ་གྱི་སྒོ་ནས་མཚོན་ཏེ། མདོ་ལས་སྐྱེ་བ་ལེན་ཚུལ་གྱི་སྒོ་ནས་མཚོན་པ་ཁོ་ན་བཤད་ཀྱི། སྤངས་རྟོགས་ཀྱི་སྒོ་ནས་མཚོན་ཚུལ་ཅུང་ཟད་ཀྱང་མ་གསུངས་པའི་ཕྱིར་དང་། སྐྱེ་བ་ལེན་ཚུལ་གྱི་སྒོ་ནས་མཚོན་པའི་ཚེ་ཉན་ཐོས་དགྲ་བཅོམ་གྱིས་བྱང་སེམས་འཕགས་པ་མཚོན་མི་ནུས་པས་སྐབས་འདིར་དགྲ་བཅོམ་མ་བཤད་པ་ཡང་འདི་ལ་འགྲིག་པའི་ཕྱིར་དང་། སྤངས་རྟོགས་ཀྱི་སྒོ་ནས་མཚོན་ན། ཉན་ཐོས་དགྲ་བཅོམ་གྱིས་ཀྱང་བྱང་སེམས་འཕགས་པ་མཚོན་ནུས་པས། དགྲ་བཅོམ་འབྲས་གནས་ཀྱང་བཤད་རིགས་པར་ཐལ་བའི་ཕྱིར་རོ། །འོ་ན་མདོ་ལས། ལྷ་ཚེ་རིང་པོར་སྐྱེ་བའི་བྱང་སེམས་དང་། གཟུགས་མེད་དུ་སྐྱེ་བ་ལེན་པའི་བྱང་སེམས་བཤད་པས་སྐྱེ་བ་ལེན་ཚུལ་འདི་དག་བྱང་སེམས་འཕགས་པ་ལ་མེད་དོ་སྙམ་ན། རྩོད་པ་འདི་ནི་གཉིས་ཀ་ལ་ཡང་ཡོད་མོད་ཀྱི། དེ་ཡི་ནུས་པ་ཡོད་པ་ཙམ་ལ་དགོངས་པ་ལས། ལན་གཞན་མེད་དོ། །འབྲེས་བྱང་ཆུབ་སེམས་དཔའ་འཕགས་པ་རྣམས་ལྷ་ཚེ་རིང་པོར་སྐྱེ་བར་བཤད་པ་ནི་འབྱུང་བའི་འདུ་ཤེས་སྔོན་དུ་མ་བཏང་བས། ཕྱིས་ལོག་ལྟ་མི་སྐྱེ་བས་ན་དེར་སྐྱེས་ཀྱང་མི་ཁོམ་པའི་གནས་མ་ཡིན་གྱི་སྐྱེ་བ་བཟློག་མི་ཤེས་པ་དབང་མེད་དུ་སྐྱེ་བར་ཟད་དོ། །ཞེས་གསུངས་པ་ནི་མི་འཐད་དེ། བྱང་སེམས་འཕགས་པ་དབང་མེད་དུ་སྐྱེ་བ་ལེན་པ་ཐེག་པ་ཆེན་པོའི་སྡེ་སྣོད་རྣམས་ལས་མ་བཤད་པའི་ཕྱིར་རོ། །རང་སངས་རྒྱས་ཀྱི་དགེ་འདུན་གྱི་གཞན་དོན་ཕྲིན་ལས་བྱེད་ཚུལ་གྱི་སྒོ་ནས་མཚོན་ཏེ། མདོ་ལས་ཀྱང་འདི་ཉིད་འབྱུང་བའི་ཕྱིར་དང་། སངས་རྒྱས་དང་ཉན་ཐོས་མེད་པའི་ཞིང་ཁམས་སུ་རང་སངས་རྒྱས་སུ་སྤྲུལ་ནས་སེམས་ཅན་གྱི་དོན་བྱེད་པ་ནི་བྱང་ཆུབ་སེམས་དཔའ་ལ་ཡོད་པའི་ཕྱིར་རོ། །མདོར་ན་མདོ་ལས་བཤད་པ་ལྟར་གྱི་སྐྱེ་བ་ལེན་ཚུལ་དང་། གཞན་དོན་ཕྲིན་ལས་བྱེད་ཚུལ་གང་ལ་ཡོད་པའི་བྱང་སེམས་འཕགས་པ་དེ་མཚན་གཞི་བཟུང་ནས་གང་ཟག་ཉི་ཤུ་པོ་དེ་དང་དེའི་མིང་གི་འདོགས་པའི་རྒྱུ་མཚན་ཡོད་དེ། སྐྱེ་བ་ལེན་ཚུལ་འདི་དང་གཞན་དོན་ཕྲིན་ལས་བྱེད་ཚུལ་འདི་ཚང་བའི་ཕྱིར། ཞེས་བཀོད་པར་བྱ་བ་ཡིན་ནོ།། །།བདེ་གཤེགས་སྙིང་པོ་ཇི་བཞིན་གཟིགས་པ་ཡིས། །ལས་ཉོན་དབང་གིས་སྐྱེ་འཆི་རབ་སྤངས་ཀྱང་། །གཞན་གྱི་དོན་དུ་སྐྱེ་འཆིའི་ཚུལ་སྟོན་ཅིང་། །སྒྲ་མེད་ལུས་ཀྱིས་ཆོས་སྟོན་མཚོན་བྱ་ཡིན། །རྗེས་འབྲང་གཉིས་ནས་ལུས་མངོན་བྱེད་ཀྱི་བར། །ལས་ཉོན་དབང་གི་སྐྱེ་འཆི་ལེན་ཚུལ་དང་། །བསེ་རུ་ལྟ་བུ་སངས་རྒྱས་མེད་ཞིང་དུ། །སྒྲ་མེད་ལུས་ཀྱིས་ཆོས་སྟོན་མཚོན་བྱེད་ཡིན། །མི་ལྡོག་འཁོར་ལོའི་མདོ་ལས་མཚོན་ཚུལ་ནི། །གཞན་དུ་བཤད་ཀྱང་མདོ་ལས་གསུངས་པ་ཡི། །མཚོན་ཚུལ་སྐྱེ་བ་ལེན་དང་ཆོས་སྟོན་པ། །མདོ་ལས་གསུངས་ཤིང་རིགས་པས་ལེགས་པར་གྲུབ། །འདི་འདྲའི་ཆོས་ཚུལ་གང་གིས་སྨྲ་བ་ནི། །མདོ་སྔགས་གཞུང་ལ་བློ་གྲོས་རབ་སྦྱངས་པ། །མདོ་ཁམས་འབུམ་གྱི་ཡུལ་དུ་སྐྱེས་པ་ཡི། །བསོད་ནམས་སེང་གེ་ཡིན་ཞེས་གསང་མཐོར་སྒྲོགས། །འདི་སྦྱར་དགེ་བ་ཉིན་མོར་བྱེད་པ་དེས། །མཁའ་མཉམ་འགྲོ་བའི་བློ་མུན་ཀུན་བསལ་ནས། །ཤེར་ཕྱིན་གཞུང་གི་པད་ཚལ་ཁ་ཕྱེ་སྟེ། །ངེས་དོན་སྦྲང་རྩིའི་དཔལ་ལ་རོལ་བར་ཤོག། །།དགེ་འདུན་དཀོན་མཆོག་གི་རྣམ་གཞག་སྐྱེས་བུ་མཆོག་གི་གསལ་བྱེད་ཅེས་བྱ་བ་འདི་ནི། སྡེ་སྣོད་འཛིན་པ་དུ་མས་ཡང་ཡང་བསྐུལ་ཞིང་། ལ་སྟོད་པ་གཞོན་ནུ་བཟང་པོས་འཕྲལ་དུ་བསྐུལ་ཏེ་ཡི་གེའི་རྐྱེན་སྦྱར་བ་ལ་བརྟེན་ནས། སྨྲ་བའི་ཁྱུ་མཆོག་སངས་རྒྱས་འཕེལ་གྱི་ཞབས་རྡུལ་ལ་རེག་པ་ཤཱཀྱའི་དགེ་སློང་བསོད་ནམས་སེང་གེས་ལྕགས་ཕོ་སྟག་གི་ལོ་ཆོ་འཕྲུལ་ཆེན་པོའི་སྐར་མ་རྒྱལ་ལ་བབ་པའི་ཚེ་རྟ་ནག་གསེར་གླིང་གི་དགོན་པར་སྦྱར་བའོ།། །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག། །དགེའོ། །དགེའོ། །དགེའོ།། །།

མཐར་གྱིས་གནས་པའི་སྙོམས་པར་འཇུག་པའི་རྣམ་བཤད་སྙོམས་འཇུག་རབ་གསལ།

མཐར་གྱིས་གནས་པའི་སྙོམས་པར་འཇུག་པའི་རྣམ་བཤད་སྙོམས་འཇུག་རབ་གསལ་བཞུགས་སོ།། མཐར་གྱིས་གནས་པའི་སྙོམས་པར་འཇུག་པའི་རྣམ་བཤད་སྙོམས་འཇུག་རབ་གསལ་ཞེས་བྱ་བ། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །རྟོག་དཔྱོད་མེ་ཡིས་འདོད་ལ་འདུན་དང་རྣམ་འཚེའི་བུད་ཤིང་རབ་བསྲེགས་དེ་ཉིད་རབ་དྭང་ཆུ་ཡིས་སྦྱངས། །དགའ་བདེའི་རླན་བྱེད་དྲན་དང་ཤེས་བཞིན་འོད་ཀྱིས་རྣམ་སྐེམས་བདེ་བའི་དྲྭ་བ་ཡང་དག་མཚོན་གྱིས་བཅད། །ཐོགས་བཅས་མཁའ་དང་ཡུལ་ཅན་འདུ་ཤེས་རིམ་བཞིན་བསལ་ཏེ་མཐའ་གཉིས་སྤངས་པའི་འདུ་ཤེས་ལ་བརྟེན་ནས། །རྩོད་དང་འཁོར་བའི་རྩ་བ་རྣམ་གཉིས་བཀག་པའི་གནས་པ་མཆོག་གིས་གནས་མཛད་འཕགས་མཆོག་ལ་བཏུད་ནས། །མཉམ་པར་མ་བཞག་ས་ལས་བརྒལ། །ཐོགས་བཅས་སྣང་བ་རབ་བསལ་ཏེ། །ཚོར་འདུ་ཞི་བར་གནས་པ་ཡི། །སྙོམས་འཇུག་དགུ་ཡི་རྣམ་བཤད་བྲི། །མི་ཡི་སེང་གེའི་གསུང་རབ་ལས། བསམ་གཏན་བཞི་དང་། གཟུགས་མེད་པ་བཞི་དང་། འགོག་པའི་སྙོམས་པར་འཇུག་པ་སྟེ་མཐར་གྱིས་གནས་པའི་སྙོམས་པར་འཇུག་པ་དགུ་གསུངས་པ་ལས། དང་པོ་བརྒྱད་ནི་འཇིག་རྟེན་པ་རྣམས་ཀྱིས་འདོད་པ་ལས་འདས་པའི་བདེ་བ་ཐམས་ཅད་ཐོབ་པའི་རྒྱུ་དང་། འཇིག་རྟེན་ལས་འདས་པ་རྣམས་ཀྱིས་ཡོན་ཏན་ཐམས་ཅད་བརྟེན་པའི་གཞི་ཡིན་ཞིང་། ཐ་མ་ནི་འཕགས་པའི་གང་ཟག་རྣམས་མཐོང་ཆོས་ལ་བདེ་བར་གནས་པ་དང་། ཏིང་ངེ་འཛིན་གྱི་རྩལ་སྦྱང་བའི་ཆེད་དུ་ཡང་དང་ཡང་དུ་སྒོམ་པར་བྱ་བ་ཡིན་པས། འདི་འཆད་པ་ལ་དོན་བཞི་སྟེ། ཚོར་བས་ངེས་པར་འབྱུང་བ་བསམ་གཏན་བཞི་བཤད་པ། འདུ་ཤེས་ཀྱིས་ངེས་པར་འབྱུང་བ་གཟུགས་མེད་བཞི་བཤད་པ། གཉིས་ཀས་ངེས་པར་འབྱུང་བ་འགོག་པའི་སྙོམས་འཇུག་བཤད་པ། སྙོམས་པར་འཇུག་ཚུལ་གྱི་ཁྱད་པར་ཐོད་རྒལ་བཤད་པའོ། །དང་པོ་ལ་གསུམ་སྟེ། མདོ་ལས་ཇི་ལྟར་བཤད་པའི་ཚུལ། བསྟན་བཅོས་ལས་ཇི་ལྟར་བཀྲལ་བའི་ཚུལ། དེ་དག་གི་རྣམ་བཞག་གཏན་ལ་དབབ་པའོ། །དང་པོ་ནི། ཤེར་ཕྱིན་གྱི་མདོ་ལས། འདོད་པས་དབེན་པ། སྡིག་ཏོ་མི་དགེ་བའི་ཆོས་ཀྱིས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །དེ་རྣམ་པར་རྟོག་པ་དང་། རྣམ་པར་དཔྱོད་པ་ཉེ་བར་ཞི་ནས་ནང་ཡོངས་སུ་དྭངས་ཏེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །དེ་དགའ་བ་ལ་འདོད་ཆགས་དང་བྲལ་བས་དྲན་པ་དང་ལྡན་ཞིང་ཤེས་བཞིན་དུ་བཏང་སྙོམས་ལ་གནས་ཏེ། བདེ་བ་ལུས་ཀྱིས་མྱོང་བས། འཕགས་པ་རྣམས་ཀྱིས་དེ་ལ་དྲན་པ་དང་ལྡན་པ་བདེ་བ་ལ་རྣམ་པར་དཔྱོད་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས་སྡུག་བསྔལ་ཡང་སྤངས་ཤིང་། ཡིད་བདེ་བ་དང་ཡིད་མི་བདེ་བ་སྔ་ནས་ནུབ་པས། བདེ་བ་ཡང་མེད། སྡུག་བསྔལ་ཡང་མེད་པ། བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ་ཞེས་གསུངས་སོ། །གཉིས་པ་ལ་གཉིས་ཏེ། ཚིག་ཇི་ལྟར་བཀྲལ་བའི་ཚུལ་དང་། དོན་ཇི་ལྟར་བཀྲལ་བའི་ཚུལ་ལོ། །དང་པོ་ནི། ཉན་ས་ལས། སྔར་བཤད་པའི་བསམ་གཏན་དང་པོའི་མདོའི་དོན། འདོད་པ་དག་ཅེས་བྱ་བ་ནི། རྣམ་པ་གཉིས་ཏེ། ཉོན་མོངས་པའི་འདོད་པ་དང་། དངོས་པོའི་འདོད་པའོ། །འདོད་པ་དག་ལས་དབེན་པ་ཞེས་བྱ་བ་ཡང་རྣམ་པ་གཉིས་ཏེ། མཚུངས་པར་ལྡན་པ་ལས་དབེན་པ་དང་། དམིགས་པ་ལས་དབེན་པའོ། །སྡིག་ཏོ་མི་དགེ་བའི་ཆོས་རྣམས་ལས་དབེན་པ་ཞེས་བྱ་བ་ནི་འདོད་པའི་རྒྱུ་ལས་བྱུང་བ་སྟེ། ཉེ་བའི་ཉོན་མོངས་པ་མི་དགེ་བ་འདི་ལྟ་སྟེ། ལུས་ཀྱིས་ཉེས་པར་སྤྱད་པ་དང་། ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པ་དང་། མཚོན་འབྱིན་པ་དང་། དབྱིག་པ་འབྱིན་པ་དང་། འཐབ་མོ་དང་། མཚང་འབྲུ་བ་དང་། རྩོད་པ་དང་། འགྱེད་པ་དང་། གཡོ་བྱེད་པ་དང་། བསླུ་བ་དང་། སྙིང་རྗེ་མེད་པ་དང་། བརྫུན་དུ་སྨྲ་བ་ཀུན་དུ་འབྱུང་བ་གང་དག་ཡིན་པ་དེ་དག་སྟེ། དེ་དག་སྤངས་པའི་ཕྱིར་སྡིག་པ་མི་དགེ་བའི་ཆོས་རྣམས་ལས་དབེན་པ་ཞེས་བྱའོ། །རྟོག་པ་དང་བཅས་པ་དཔྱོད་པ་དང་བཅས་པ་ཞེས་བྱ་བ་ནི། རྟོག་པ་དང་དཔྱོད་པ་དག་ལ་སྐྱོན་དུ་མི་ལྟ་བའི་ཕྱིར། འདོད་པའི་གཉེན་པོ་རང་གི་ས་པའི་རྟོག་པ་དང་དཔྱོད་པ་དག་དང་ལྡན་པས་ན། རྟོག་པ་དང་བཅས་པ་དཔྱོད་པ་དང་བཅས་པ་ཞེས་བྱ་བའོ། །དབེན་པ་ལས་ཞེས་བྱ་བ་ནི་འདོད་པ་གང་དག་ལས་དབེན་པ་ལ་སྦྱོར་བ་མཐར་ཐུག་པའི་ཡིད་ལ་བྱེད་པ་ལས་སོ། །སྐྱེས་པ་ཞེས་བྱ་བ་ནི་རྒྱུ་དེ་དང་རྐྱེན་དེས་དེའི་མཇུག་ཐོག་ཁོ་ནར་ཡང་དག་པར་སྐྱེས་པ་ལ་བྱ་སྟེ། དེའི་ཕྱིར་དབེན་པ་ལས་སྐྱེས་པ་ཞེས་བྱ་བ་གསུངས་སོ། །དགའ་བ་དང་བདེ་བ་ཅན་ཞེས་བྱ་བ་དེ་ནི་འདོད་པ་དང་རེ་བའི་དོན་ཐོབ་ཅིང་དགའ་བ་ལ་སྐྱོན་དུ་མི་ལྟ་བའི་ཕྱིར་དང་། གནས་ངན་ལེན་ཐམས་ཅད་བྲལ་ཞིང་སེམས་དང་ལུས་ལས་སུ་རུང་བ་རྒྱ་ཆེན་པོ་དང་ལྡན་པས་དགའ་བ་དང་བདེ་བ་ཅན་ཞེས་བྱའོ། །བསམ་གཏན་ཞེས་བྱ་བ་ནི་དམིགས་པ་ལ་ཡང་དག་པར་ཉེ་བར་སྤྱོད་པ་དང་། དྲན་པ་རྩེ་གཅིག་ཏུ་ཉེ་བར་གཏོད་པའི་ཕྱིར་བསམ་གཏན་ཞེས་བྱའོ། །དང་པོ་ཞེས་བྱ་བ་ནི། དེ་ལྟར་འདོད་པའི་ཁམས་ནས་བསྐྱོད་པའི་གོ་རིམ་བཞིན་དུ་བགྲང་བའི་ཕྱིར་དང་པོ་ཞེས་བྱའོ། །བསྒྲུབས་ཏེ་ཞེས་བྱ་བ་ནི་སྦྱོར་བ་མཐར་ཐུག་པའི་འབྲས་བུ་སྤྱིར་བསྒྲུབས་ཏེ་ཞེས་བྱའོ། །གནས་སོ་ཞེས་བྱ་བ་ནི་ཕྱིས་སྒོམ་པ་ལན་མང་དུ་བསྒྲུབས་པས་ཅི་འདོད་པ་བཞིན་ཐོབ་པ་དང་། དཀའ་བ་མེད་པར་ཐོབ་པ་དང་། ཚེགས་མེད་པར་ཐོབ་པའི་ཕྱིར་བསམ་གཏན་གྱི་སྙོམས་པར་འཇུག་པ་དེས་མཚན་མོ་དང་ཉིན་མོ་དང་། ཉིན་མཚན་དང་། ཉིན་མཚན་བདུན་གྱི་བར་རམ། ཇི་སྲིད་འདོད་པའི་བར་དུ་འདའ་བར་བྱེད་པས་ན་གནས་སོ་ཞེས་སོ། །བསམ་གཏན་གཉིས་པའི་མདོའི་དོན། དེ་ལ་རྟོག་པ་དང་དཔྱོད་པ་དང་བྲལ་ཞིང་ཞེས་བྱ་བ་ནི། རྟོག་པ་དང་བཅས་པ་དཔྱོད་པ་དང་བཅས་པའི་ཏིང་ངེ་འཛིན་གྱི་མཚན་མ་དག་ལས་སེམས་རྣམ་པར་བཟློག་ནས་རྟོག་པ་མེད་པ་དང་དཔྱོད་པ་མེད་པའི་ཏིང་ངེ་འཛིན་གྱི་མཚན་མ་དག་ལ་ལེགས་པར་གཏོད་ཅིང་། དམིགས་པ་ལས་མི་བརྟན་པར་སྤྱོད་པ་ལས་རྣམ་པར་བྲལ་ཏེ། དམིགས་པ་ལ་བརྟན་པར་སྤྱོད་པ་ལ་ངང་ཅིག་གིས་སེམས་ཞི་བ་དང་དྭང་བར་འཇུག་པར་བྱེད་ཅིང་། རྣམ་པར་འཇོག་པར་བྱེད་པས་ན་དེའི་ཕྱིར། རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དྭངས་ཏེ་ཞེས་བྱ་བ་གསུངས་སོ། །སེམས་ཀྱི་རྒྱུད་གཅིག་ཏུ་གྱུར་པས་ཞེས་བྱ་བ་ནི། དེས་བསྒོམ་པ་ཡོངས་སུ་གོམས་པར་བྱས་པའི་ཕྱིར། རྟོག་པ་དང་དཔྱོད་པ་མེད་པའི་ཏིང་ངེ་འཛིན་དེ་ཉིད་ལ་རྟོག་པ་དང་དཔྱོད་པས་བར་དུ་གཅོད་ཅིང་སྐབས་སུ་ཆད་པའི་གནས་སྐབས་ལས་ཡང་དག་པར་འདས་ཏེ་བར་དུ་གཅོད་པ་མེད་པ་དང་སྐབས་སུ་ཆད་པ་མེད་པའི་གནས་སྐབས་ཐོབ་པས་ན། དེའི་ཕྱིར་སེམས་ཀྱི་རྒྱུད་ཅིག་ཏུ་གྱུར་པས་ཞེས་བྱ་བ་གསུངས་སོ། །རྟོག་པ་མེད་པ་དཔྱོད་པ་མེད་པ་ཞེས་བྱ་བ་ནི་རྟོག་པ་དང་དཔྱོད་པ་རྣམ་པ་ཐམས་ཅད་ཀྱིས་ཐམས་ཅད་དུ་སྤངས་པའི་ཕྱིར་རྟོག་པ་མེད་པ་དང་དཔྱོད་པ་མེད་པ་ཞེས་བྱའོ། །ཏིང་ངེ་འཛིན་ལས་སྐྱེས་པ་ཞེས་བྱ་བ་ནི། སྦྱོར་བ་མཐར་ཐུག་པ་ཡིད་ལ་བྱེད་པའི་ཏིང་ངེ་འཛིན་ལས་སོ། །སྐྱེས་པ་ཞེས་བྱ་བ་ནི་རྒྱུ་དེ་དང་རྐྱེན་དེས་དེའི་མཇུག་ཐོག་ཁོ་ནར་ཡང་དག་པར་སྐྱེས་པ་ལ་བྱ་སྟེ། དེའི་ཕྱིར་ཏིང་ངེ་འཛིན་ལས་སྐྱེས་པ་ཞེས་བྱ་བ་གསུངས་སོ། །དགའ་བ་དང་བདེ་བ་ཅན་ཞེས་བྱ་བ་ནི་འདོད་པ་དང་རེ་བའི་དོན་ཐོབ་ཅིང་དགའ་བ་ལ་སྐྱོན་དུ་མི་ལྟ་བས་ཡང་དག་པར་རབ་ཏུ་དགའ་བ་དང་ལྡན་ཞིང་། ཡིད་བདེ་བ་དང་ལྡན་པའི་ཕྱིར་དང་། བསམ་གཏན་དང་པོའི་རྟོག་པ་དང་དཔྱོད་པ་དང་ཉོན་མོངས་པའི་ཕྱོགས་ཀྱི་གནས་ངན་ལེན་ཐམས་ཅད་དང་བྲལ་བ་སྟེ། དེའི་གཉེན་པོ་སེམས་དང་ལུས་ཤིན་ཏུ་སྦྱངས་ཤིང་ལས་སུ་རུང་བའི་བདེ་བ་དང་ལྡན་པའི་ཕྱིར་དགའ་བ་དང་བདེ་བ་ཅན་ཞེས་བྱའོ། །བསམ་གཏན་གཉིས་པ་བསྒྲུབས་ཏེ་གནས་སོ་ཞེས་བྱ་བ་ལ་གཉིས་པ་ཞེས་བྱ་བ་ནི་གོ་རིམ་བཞིན་དུ་བགྲང་བའི་ཕྱིར་རོ། །ལྷག་མ་ཐམས་ཅད་ནི་སྔ་མ་བཞིན་དུ་རིག་པར་བྱའོ་ཞེས་སོ། །བསམ་གཏན་གསུམ་པའི་མདོའི་དོན་ནི་དེ་ལ་དགའ་བའི་འདོད་ཆགས་དང་བྲལ་བས་ཞེས་བྱ་བ་ནི། དགའ་བའི་མཚན་མ་དག་ལ་སྐྱོན་དུ་ལྟ་བའི་ཕྱིར་ཏེ། དེའི་ཕྱིར་དེ་དགའ་བའི་འདོད་ཆགས་དང་བྲལ་བ་ཞེས་གསུངས་སོ། །བཏང་སྙོམས་ལ་གནས་ཤིང་ཞེས་བྱ་བ་ནི་དགའ་བ་མེད་པའི་བསམ་གཏན་གསུམ་པ་ལ་སེམས་གཏོད་པར་བྱེད་པ་དེའི་ཚེ་ན་དེའི་སེམས་ཀུན་ཏུ་འཁྲུག་པར་བྱེད་པའི་སྐྱོན་རྣམ་པ་གཉིས་པོ་བསམ་གཏན་གཉིས་པ་ལ་རྟོག་པ་དང་། དཔྱོད་པ་དང་། ད་ལྟར་གྱི་དགའ་བ་དང་བྲལ་བས་ན། དེའི་ཕྱིར་བཏང་སྙོམས་ལ་གནས་ཞིང་ཞེས་བྱ་བ་གསུངས་ཏེ། སེམས་ཀུན་ཏུ་འཁྲུག་པར་བྱེད་པའི་ཆོས་དེ་གཉིས་ནི་སེམས་རྒྱུན་དུ་བཏང་སྙོམས་སུ་བཞག་པ་ལ་གེགས་བྱེད་པ་ཡིན་པས་ན་སེམས་ཀུན་ཏུ་འཁྲུག་པར་བྱེད་པ་ཞེས་བྱའོ། །དེ་ལ་བསམ་གཏན་དང་པོ་ལ་ནི་རྟོག་པ་དང་དཔྱོད་པ་ཡོད་པས་དེས་ན་རྒྱུན་དུ་བཏང་སྙོམས་ལ་འཇུག་པར་མི་འགྱུར་རོ། །བསམ་གཏན་གཉིས་པ་ལ་ནི་དགའ་བ་ཡོད་པས། དེས་ན་དེར་ཡང་རྒྱུན་དུ་བཏང་སྙོམས་ལ་འཇུག་པར་མི་འགྱུར་ཏེ། དེ་བས་ན་བསམ་གཏན་དང་པོ་དང་། བསམ་གཏན་གཉིས་པ་དེ་དག་ལ་བཏང་སྙོམས་ཤས་ཆེར་མེད་པས་དེའི་ཕྱིར་བསམ་གཏན་གསུམ་པ་ལ་སྙོམས་པར་འཇུག་པའི་བསམ་གཏན་གསུམ་པ་དེ་ནི། བཏང་སྙོམས་ལ་གནས་པ་ཞེས་བྱའོ། །དྲན་པ་དང་ཤེས་བཞིན་ཡིན་ཏེ་ཞེས་བྱ་བ་ནི་དེ་ནི་བཏང་སྙོམས་ལ་གནས་པ་ན། ཇི་ལྟ་ཇི་ལྟར་དགའ་བ་དང་ལྡན་པའི་འདུ་ཤེས་ཡིད་ལ་བྱེད་པ་དེ་དག་ཀུན་ཏུ་འབྱུང་བར་མི་འགྱུར་བ་དེ་ལྟ་དེ་ལྟར་དྲན་པ་ཉེ་བར་བཞག་སྟེ་གནས་པར་བྱེད་དོ། །གལ་ཏེ་བསམ་གཏན་གསུམ་པ་ལེགས་པར་གོམས་པར་མ་བྱས་པས་བརྗེད་ངེས་པའི་ཕྱིར། བརྒྱ་ལམ་བརྒྱ་ལམ་ན་དགའ་བ་དང་ལྡན་པའི་འདུ་ཤེས་ཡིད་པ་བྱེད་པ་དེ་དག་ཀུན་ཏུ་འབྱུང་བར་འགྱུར་ན་མྱུར་བ་མྱུར་བར་ཁོ་ནར་དེ་དག་ལ་ཤེས་རབ་ཀྱིས་སོ་སོར་རྟོག་པར་བྱེད་དོ། །ལེགས་པ་ཁོ་ནར་རབ་ཏུ་ཤེས་པར་བྱེད། ལེགས་པ་ཁོ་ནར་རབ་ཏུ་ཤེས་པར་བྱེད་ཅིང་བྱུང་ངོ་ཅོག་དང་དུ་མི་ལེན་པར་སྤོང་བར་བྱེད། སེལ་བར་བྱེད། བྱང་བར་བྱེད་ཅིང་སེམས་བཏང་སྙོམས་སུ་བྱེད་པས་ན། དེའི་ཕྱིར་དྲན་པ་དང་ཤེས་བཞིན་ཅན་ཡིན་ཏེ་ཞེས་གསུངས་སོ། །བདེ་བ་ལུས་ཀྱིས་མྱོང་ལ་ཞེས་བྱ་བ་ནི་དེའི་ཚེ་ན་གཟུགས་ཀྱི་ལུས་དང་། ཡིད་ཀྱི་ལུས་ཀྱིས་ཚོར་བ་བདེ་བ་དང་། ཤིན་ཏུ་སྦྱངས་པའི་བདེ་བ་སོ་སོར་མྱོང་བར་བྱེད་པས་ན། དེའི་ཕྱིར་བདེ་བ་ལུས་ཀྱིས་མྱོང་བ་ཞེས་བྱ་བ་གསུངས་སོ། །འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ་ཞེས་བྱ་བ་ནི། བསམ་གཏན་གསུམ་པ་མན་ཆད་ལ་ནི་བདེ་བ་དེ་ལྟ་བུ་ཡང་མེད་ལ་རྒྱུན་དུ་བཏང་སྙོམས་ལ་གནས་པ་ཡང་མེད་དོ། །བསམ་གཏན་གསུམ་པའི་གོང་མ་ནི་བཏང་སྙོམས་ཡོད་ཀྱང་བདེ་བ་དེ་ལྟ་བུ་མེད་དོ། །དེ་ལྟར་འོག་མ་དག་ལ་བདེ་བ་དང་བཏང་སྙོམས་མེད་པ་དང་། གོང་མ་དག་ལ་བདེ་བ་མེད་པའི་ཕྱིར་འདི་ལྟ་སྟེ་བསམ་གཏན་གསུམ་པ་འདི་ནི་དེ་དག་གི་གནས་ཡིན་པས་ན་འཕགས་པས་ཀྱང་དེ་ལ་དམིགས་ཏེ། གནས་པའི་གང་ཟག་ཡིན་པས་དེའི་དབང་དུ་མཛད་ནས། གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་དོ། །འཕགས་པ་ཞེས་བྱ་བ་ནི་སངས་རྒྱས་དང་སངས་རྒྱས་ཀྱི་ཉན་ཐོས་རྣམས་སོ། །དགའ་བ་མེད་པའི་ཞེས་བྱ་བ་ནི་དེ་ལྟར་བཏང་སྙོམས་ལ་གནས་པ་དེས་དེའི་ཚེ་དྲན་པ་དང་ཤེས་བཞིན་ཀུན་ཏུ་རྟེན་ཅིང་གོམས་པར་བྱས་ལན་མང་དུ་བྱས་པའི་རྒྱུས་དགའ་བ་དང་ལྡན་པའི་ཚོར་བས་སེམས་དགའ་བར་བྱེད་པ་དེ་སྤོང་བར་བྱེད་ཅིང་། དགའ་བའི་གཉེན་པོ་དགའ་བ་མེད་པའི་ཞི་བ་དང་། རབ་ཏུ་ཞི་བའི་ཚོར་བ་སེམས་པ་ལ་སྐྱེ་བར་འགྱུར་བས་ན། དེའི་ཕྱིར་དགའ་བ་མེད་པ་ཞེས་བྱ་བ་གསུངས་སོ། །བསམ་གཏན་གསུམ་པ་བསྒྲུབས་ཏེ་གནས་སོ་ཞེས་བྱ་བ་ནི་སྔ་མ་བཞིན་དུ་རིག་པར་བྱའོ། །བསམ་གཏན་བཞི་པའི་མདོའི་དོན་ནི་དེ་ལ་བདེ་བ་སྤངས་ཏེ་ཞེས་བྱ་བ་ནི་བདེ་བའི་གཉེན་པོའི་རིགས་འདྲ་ཕྱིར་སྤོང་བའི་གཉེན་པོ་མ་བསྟེན་པར་དེའི་གཉེན་པོས་བྱས་པ་བདེ་བ་སྤངས་པ་གང་ཡིན་པ་དེ་ཉིད་བསྟན་ཏེ། དེའི་གཉེན་པོ་ཡང་གང་ཞེ་ན། འདི་ལྟ་སྟེ། བཏང་སྙོམས་དང་། དྲན་པ་དང་། ཤེས་བཞིན་ཡིན་ནོ། །དེ་དག་ལ་བརྟེན་ཅིང་གོམས་པར་བྱས་པས་བསམ་གཏན་གསུམ་པ་ལས་བསྐྱོད་ཅིང་བསམ་གཏན་གསུམ་པའི་ས་པའི་བདེ་བ་གང་ཡིན་པ་དེས་སྤོང་བར་བྱེད་པས་ན། དེའི་ཕྱིར་བདེ་བ་ཡང་སྤངས་ཏེ་ཞེས་བྱ་བ་གསུངས་སོ། །སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་། ཡིད་མི་བདེ་བ་ཡང་ནུབ་པས་ཞེས་བྱ་བ་ནི། དེའི་ཚེ་བསམ་གཏན་པ་དེས་བདེ་བ་དང་སྡུག་བསྔལ་ལས་ཡང་དག་པར་འདས་པའི་རྗེས་སུ་ཐོབ་ཅིང་། དེས་སྔོན་སྤངས་པ་གང་ཡིན་པ་དང་། ད་ལྟར་སྤོང་བར་བྱེད་པ་དེ་དག་གཅིག་ཏུ་བསྡུས་པས་ན་དེའི་ཕྱིར་སྔ་ནས་སྡུག་བསྔལ་ཡང་སྤངས་ཞིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་ཞེས་བྱ་བ་གསུངས་སོ། །དེ་ལ་བསམ་གཏན་བཞི་པ་ལ་སྙོམས་པར་འཇུག་པའི་ཚེ་ན་ནི་བདེ་བ་ཡང་སྤངས་སོ། །བསམ་གཏན་གཉིས་པ་ལ་སྙོམས་པར་འཇུག་པའི་ཚེ་ན་ནི་སྡུག་བསྔལ་སྤངས་སོ། །བསམ་གཏན་གསུམ་པ་ལ་སྙོམས་པར་འཇུག་པའི་ཚེ་ན་ནི་ཡིད་བདེ་བ་ནུབ་བོ། །བསམ་གཏན་དང་པོ་ལ་སྙོམས་པར་འཇུག་པའི་ཚེ་ན་ཡིད་མི་བདེ་བ་ནུབ་བོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཞེས་བྱ་བ་ནི་དེས་དེ་དག་གི་བདེ་བ་དང་སྡུག་བསྔལ་སྤངས་པའི་ཕྱིར། དེ་ལ་ཚོར་བ་ལྷག་མ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཉེ་ཚེ་ཡོད་པ་ཡིན་པས་ན། དེའི་ཕྱིར་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཞེས་གསུངས་སོ། །བཏང་སྙོམས་དང་དྲན་པ་ཡོངས་སུ་དག་པ་ཞེས་བྱ་བ་ནི་དེས་དེའི་ཚེ་ན་བསམ་གཏན་དང་པོ་ཡན་ཆད་ཀྱི་ས་འོག་མའི་སྐྱོན་འདི་ལྟ་སྟེ། རྟོག་པ་དང་། དཔྱོད་པ་དང་། དགའ་བ་དང་། བདེ་བ་དང་། དབུགས་རྔུབ་པ་དང་། དབུགས་འབྱུང་བ་ཐམས་ཅད་སྤངས་པར་འགྱུར་ཞིང་། དེ་དག་སྤངས་པའི་ཕྱིར་དེ་ལ་བཏང་སྙོམས་དང་དྲན་པ་གང་ཡོད་པ་དེ་ཡོངས་སུ་དག་པ་དང་། ཡོངས་སུ་བྱང་བར་འགྱུར་ཏེ། དེས་ན་བསམ་གཏན་བཞི་པ་ལ་སྙོམས་པར་འཇུག་པ་དེའི་སེམས་མི་གཡོ་བར་གནས་ཤིང་གཡོ་བ་ཐམས་ཅད་དང་བྲལ་བས་ན་དེའི་ཕྱིར་བཏང་སྙོམས་དང་དྲན་པ་ཡོངས་སུ་དག་པ་ཞེས་གསུངས་སོ། །དེ་ལ་བསམ་གཏན་བཞི་པ་བསྒྲུབས་ཏེ་གནས་སོ་ཞེས་བྱ་བ་ནི། བསམ་གཏན་དང་པོ་ལ་སོགས་པ་བསམ་གཏན་སྔ་མ་དག་ལ་ཇི་ལྟ་བ་དེ་བཞིན་དུ་རིག་པར་བྱའོ།། །།གཉིས་པ་ལ་གཉིས་ཏེ། མངོན་པ་གོང་མར་ཇི་ལྟར་བཀྲལ་བའི་ཚུལ། མཛོད་དུ་ཇི་ལྟར་བཀྲལ་བའི་ཚུལ་ལོ། །དང་པོ་ནི། བསམ་གཏན་གཟུགས་མེད་ལ་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་དག་པ་དང་། རྣམ་པར་དག་པས་རྣམ་པར་དག་པ་བཞིས་འཆད་པ་ལས། དང་པོ་ནི། སྙོམས་འཇུག་ཉོན་མོངས་ཅན་བཞིའོ། །གཉིས་པ་ནི་དག་པ་བ་ཡན་ཆད་དོ། །གསུམ་པ་ལ་ཡན་ལག་རྣམ་པར་དག་པ་དང་། སྙོམས་པར་འཇུག་པ་རྣམ་པར་དག་པ་དང་། ཚད་རྣམ་པར་དག་པ་དང་། མིང་དུ་བཏགས་པ་རྣམ་པར་དག་པ་བཞི་ལས། དང་པོ་ནི། བསམ་གཏན་གྱི་ཡན་ལག་བཅོ་བརྒྱད་དོ། །གཉིས་པ་ནི་སྙོམས་པར་འཇུག་ཚུལ་ཡིད་ལ་བྱེད་པ་བདུན་ནོ། །གསུམ་པ་ནི། དེ་ལས་འབྲས་བུ་སྐྱེ་བའི་བསམ་གཏན་འགྲུབ་ཚུལ་ལོ། །བཞི་པ་ནི་རེ་རེ་ལ་མིང་གི་ཐ་སྙད་ཅི་ཙམ་ཡོད་པ་ཉན་ཐོས་དང་རང་སངས་རྒྱས་རྣམས་ཀྱིས་མི་ཤེས་པའི་ཚུལ་ལོ། །བཞི་པ་རྣམ་པར་དག་པས་རྣམ་པར་དག་པ་ནི་རབ་ཀྱི་མཐའི་ཆ་ལས་བྱུང་བའི་བསམ་གཏན་བཞི་དང་གཟུགས་མེད་བཞིའོ། །འདི་ལ་མཁས་པ་ཆེན་པོ་དག་གིས་མཛོད་ལས་གསུངས་པའི་རབ་མཐའ་དང་འདྲ་བར་བྱས་ནས། འདོད་པ་ནས་སྲིད་རྩེའི་བར་ལ་ལུགས་མཐུན་དང་། སྲིད་རྩེ་ནས་འདོད་པའི་བར་ལ་ལུགས་བཟློག་ཏུ་འཇུག་པའི་རྗེས་ལས་བྱུང་བའི་བསམ་གཏན་བཞི་དང་གཟུགས་མེད་བཞི་ལ་འཆད་པར་སྣང་མོད་ཀྱི་དེ་ནི་མི་འཐད་དེ། མཛོད་ལས་གསུངས་པའི་རབ་མཐའ་ཡང་ས་བསམ་གཏན་བཞི་པ་ཁོ་ན་དང་། གང་ཟག་མི་གཡོ་བའི་ཆོས་ཅན་གྱི་དགྲ་བཅོམ་པ་ཁོ་ནས་བསྐྱེད་པར་གསུངས་ཀྱི་གཞན་ལ་མ་གསུངས་པའི་ཕྱིར་དང་། འདིར་ཀུན་བཏུས་རྩ་འགྲེལ་གཉིས་ཆར་ལས་རབ་མཐའི་ཚུལ་དེ་འདྲ་བ་བཤད་པ་མེད་པའི་ཕྱིར་རོ། །དེས་ན་འདིར་རབ་ཀྱི་མཐའ་ལས་འབྱུང་བ་ནི་བསམ་གཏན་དང་གཟུགས་མེད་ཀྱི་སྙོམས་འཇུག་ཆུང་ངུ་རྣམས་འབྲིང་དུ་འཕེལ། འབྲིང་རྣམས་ཆེན་པོར་འཕེལ་བའོ། །འོ་ན་སྔར་རྣམ་པར་བྱང་བའི་རྣམ་པར་དག་པ་དང་ཁྱད་མེད་དོ་སྙམ་ན་མིན་ཏེ། རྣམ་པར་བྱང་བའི་རྣམ་པར་དག་པ་ནི། དག་པ་བ་དང་ཟག་མེད་གཉིས་ཆར་ལ་འཇུག་ལ། འདི་ནི་དག་པ་བ་ཁོ་ན་ཡིན་པའི་ཕྱིར་རོ། །གཉིས་པ་ནི། བསམ་གཏན་དང་གཟུགས་མེད་ཀྱི་རྣམ་གཞག་ཐུན་མོང་དུ་མཛོད་ལས། བསམ་གཏན་དག་ནི་རྣམ་གཉིས་བཞི། །དེ་སྐྱེ་བ་དག་རབ་ཏུ་བཤད། །སྙོམས་འཇུག་དགེ་བ་རྩེ་གཅིག་པ། །རྗེས་འབྲེལ་བཅས་ན་ཕུང་པོ་ལྔ། །དཔྱོད་དང་དགའ་དང་བདེ་དང་ལྡན། །ཡན་ལག་སྔ་སྔ་སྤངས་པ་ཡི། །དེ་བཞིན་གཟུགས་མེད་ཕུང་པོ་བཞི། །འོག་མའི་ས་ལས་དབེན་ལས་སྐྱེས། །ཉེར་བསྡོགས་གསུམ་དང་བཅས་པ་ནི། །གཟུགས་ཀྱི་འདུ་ཤེས་བཤིག་ཅེས་བྱ། །གཟུགས་མེད་པ་ན་གཟུགས་མེད་དོ། །གཟུགས་ནི་སེམས་ལས་སྐྱེ་བར་འགྱུར། །རྣམ་ཤེས་མཐའ་ཡས་མཁའ་མཐའ་ཡས། །ཅི་ཡང་མེད་ཅེས་བྱ་དེ་ལྟར། །སྦྱོར་ཕྱིར་དམན་ཕྱིར་འདུ་ཤེས་མེད། །འདུ་ཤེས་མེད་པའང་མ་ཡིན་ནོ། །དེ་ལྟར་སྙོམས་འཇུག་དངོས་གཞིའི་རྫས། །རྣམ་པ་བརྒྱད་བདུན་རྣམ་པ་གསུམ། །རོ་མྱོང་ལྡན་དང་དག་པ་དང་། །ཟག་མེད་བརྒྱད་པ་རྣམ་པ་གཉིས། །རོ་མྱོང་མཚུངས་ལྡན་སྲེད་བཅས་སོ། །འཇིག་རྟེན་པ་ཡི་དགེ་བ་ནི། །དག་པ་དེ་ནི་དེ་མྱོང་བྱ། །ཟག་མེད་འཇིག་རྟེན་འདས་པའོ། །དང་པོ་ལ་ལྔ་རྟོག་དཔྱོད་དང་། །དགའ་དང་བདེ་དང་ཏིང་འཛིན་གནས། །གཉིས་པ་ལ་ནི་ཡན་ལག་བཞི། །རབ་དང་དང་ནི་དགའ་ལ་སོགས། །གསུམ་པ་ལ་ལྔ་བཏང་སྙོམས་དང་། །དྲན་དང་ཤེས་བཞིན་བདེ་དང་གནས། །མཐའ་ན་བཞི་དྲན་བཏང་སྙོམས་དང་། །བདེ་མིན་སྡུག་མིན་ཏིང་འཛིན་རྣམས། །རྫས་སུ་བཅུ་གཅིག་དང་པོ་ན། །ཤིན་ཏུ་སྦྱངས་པ་བདེ་བ་ཡིན། །རབ་ཏུ་དྭང་བ་དད་པ་ཡིན། །ལུང་རྣམ་གཉིས་ཕྱིར་དགའ་ཡིད་བདེ། །ཉོན་མོངས་ཅན་ལ་དགའ་བདེ་དང་། །རབ་དང་ཤེས་བཞིན་དྲན་པ་དང་། །བཏང་སྙོམས་དྲན་པ་དག་པ་མེད། །ཁ་ཅིག་ཤིན་ཏུ་སྦྱངས་བཏང་སྙོམས། །སྐྱོན་བརྒྱད་ལས་ནི་གྲོལ་བའི་ཕྱིར། །བཞི་པ་གཡོ་བ་མེད་པ་ཡིན། །རྟོག་དང་དཔྱོད་དང་དབུགས་དག་དང་། །བདེ་བ་ལ་སོགས་བཞི་ཡིན་ནོ། །སྐྱེ་བའི་བསམ་གཏན་དག་ན་ནི། །ཡིད་བདེ་བདེ་དང་བཏང་སྙོམས་དང་། །བཏང་སྙོམས་ཡིད་བདེ་བདེ་བ་དང་། །བཏང་སྙོམས་བཏང་སྙོམས་ཚོར་བ་ཡོད། །གཉིས་པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །དེ་ལུང་མ་བསྟན་ཉོན་མོངས་མིན། །དེ་དང་མི་ལྡན་འདོད་ཆགས་བྲལ། །སྐྱེ་བ་ལས་ནི་དག་པ་ཐོབ། །ཟག་མེད་འདོད་ཆགས་བྲལ་བ་ཡིས། །ཉོན་མོངས་ཅན་ཉམས་སྐྱེ་བ་ཡིས། །ཟག་པ་མེད་པའི་མཇུག་ཐོགས་སུ། །ལྡོག་འོག་གསུམ་པའི་བར་དགེ་བ། །སྐྱེ་བོ་དག་པ་ལས་དེ་བཞིན། །རང་གི་ས་པའི་ཉོན་མོངས་ཀྱང་། །ཉོན་མོངས་ཅན་ལས་རང་དག་དང་། །ཉོན་མོངས་འོག་མའི་དག་གཅིག་ཀྱང་། །འཆི་འཕོའི་དག་ལས་ཉོན་མོངས་ཀུན། །ཉོན་མོངས་ཅན་ལས་གོང་མ་མིན། །དག་པ་ཉམས་པ་ཆ་མཐུན་སོགས། །ཉམས་བཞི་དེ་ནི་གོ་རིམ་བཞིན། །ཉོན་མོངས་སྐྱེ་དང་རང་ས་དང་། །གོང་དང་ཟག་མེད་རྗེས་མཐུན་པའོ། །ཉམས་ཆ་མཐུན་སོགས་མཇུག་ཐོགས་སུ། །གཉིས་དང་གསུམ་དང་གསུམ་དང་གཅིག །ས་བརྒྱད་རྣམས་གཉིས་འབྲེལ་བ་དང་། །གཅིག་རྒལ་སོང་བཞིན་འོང་ནས་ནི། །རིས་མི་མཐུན་པ་གསུམ་པར་འགྲོ། །ཐོད་རྒལ་གྱི་ནི་སྙོམས་འཇུག་ཡིན། །བསམ་གཏན་གཟུགས་མེད་རང་དང་ནི། །འོག་སའི་རྟེན་ཅན་འོག་དགོས་མེད། །སྲིད་རྩེ་འཕགས་པ་ཅི་ཡང་མེད། །མངོན་དུ་བྱས་ནས་ཟག་པ་ཟད། །སྲེད་བཅས་རང་གི་སྲིད་ལ་དམིགས། །བསམ་གཏན་དགེ་ཡུལ་ཡོད་དགུ་ཡིན། །གཟུགས་མེད་དངོས་གཞི་དགེ་རྣམས་ནི། །སྤྱོད་ཡུལ་ཟག་བཅས་འོག་མ་མིན། །ཟག་པ་མེད་པས་ཉོན་མོངས་རྣམས། །སྤོང་ངོ་ཉེར་བསྡོགས་དག་པས་ཀྱང་། །དེ་དག་ལས་ནི་ཉེར་བསྡོགས་བརྒྱད། །དག་པ་བདེ་མིན་སྡུག་བསྔལ་མིན། །དང་པོ་འཕགས་པའང་ཁ་ཅིག་གསུམ། །རྟོག་མེད་བསམ་གཏན་ཁྱད་པར་ཅན། །རྣམ་གསུམ་བདེ་མིན་སྡུག་བསྔལ་མིན། །དེ་ནི་ཚངས་ཆེན་འབྲས་བུ་ཅན། །མན་ཆད་རྟོག་དཔྱོད་བཅས་པ་ཡིས། །ཏིང་འཛིན་ཡན་ཆད་གཉིས་ཀ་མེད། །ཞེས་གསུངས་ལ། འདི་དག་གི་དོན་ལ། བསམ་གཏན་གཟུགས་མེད་ཀྱི་ངོ་བོ་དང་དབྱེ་བ། བསམ་གཏན་གྱི་ཡན་ལག་བྱེ་བྲག་ཏུ་བཤད་པ། སྙོམས་འཇུག་གསུམ་གྱི་ཐོབ་ཚུལ། གསུམ་པོ་གང་གི་མཇུག་ཐོགས་སུ་གང་འབྱུང་བ། སྙོམས་འཇུག་དག་པ་བ་བྱེ་བྲག་ཏུ་བཤད་པ། ཁྱད་པར་གྱི་ཆོས་ཞིབ་ཏུ་དཔྱད་པ་དང་དྲུག་བསྟན་པ་ལས། དང་པོ་ནི། བསམ་གཏན་དག་ནི་ཞེས་སོགས་ཚིགས་བཅད་དྲུག་སྟེ། ཚིག་རྐང་དང་པོས་བསམ་གཏན་ལ་རྒྱུ་སྙོམས་འཇུག་དང་། འབྲས་བུ་སྐྱེ་བ་གཉིས་སུ་ཕྱེ་ནས་གཉིས་པས་འབྲས་བུ་སྐྱེ་བ་གནས་གསུམ་པར་བཤད་ཟིན་པ་བསྟན། དེ་ནས་གཉིས་ཀྱིས་བསམ་གཏན་གྱི་ངོ་བོ་དང་། དེ་ནས་གཉིས་ཀྱི་བཞི་པོ་སོ་སོའི་ངོ་བོ་བསྟན། དེ་ནས་གཅིག་གིས་གཟུགས་མེད་ཀྱི་ངོ་བོ་དང་། དེ་ནས་གཅིག་གིས་བཞི་པོ་སོ་སོའི་ངོ་བོ་བསྟན། དེ་ནས་གཉིས་ཀྱིས་གཟུགས་མེད་ཀྱི་དངོས་གཞི་དང་། ཉེར་བསྡོགས་གོང་མ་གསུམ་དང་བཅས་པ་གཟུགས་ཀྱི་འདུ་ཤེས་ཞིག་པར་བསྟན། དེ་ནས་གཉིས་ཀྱི་སྔར་ཕུང་པོ་བཞི་པར་འཇོག་པའི་སྒྲུབ་བྱེད་བསྟན། དེ་ནས་ཚིགས་བཅད་གཅིག་གིས་གཟུགས་མེད་བཞིའི་ངེས་ཚིག་དང་། དེ་ནས་ཚིག་རྐང་ཕྱེད་དང་གཉིས་ཀྱིས་སྙོམས་འཇུག་གི་དངོས་གཞིའི་རྫས་བརྒྱད་དུ་གྲངས་ངེས་པ་དང་། དེ་ནས་ཕྱེད་དང་བདུན་གྱིས་སྲིད་རྩེ་མ་གཏོགས་པ་བདུན་པོ་ལ་སྙོམས་འཇུག་གསུམ་གསུམ་དུ་ཕྱེ་ནས་གསུམ་པོའི་ངོ་བོ་དང་བཅས་པ་བསྟན་ཏོ། །གཉིས་པ་ནི། དང་པོ་ལ་ལྔ་ཞེས་སོགས་ཚིགས་བཅད་བདུན་ཏེ། ཚིགས་བཅད་དང་པོ་གཉིས་ཀྱིས་བསམ་གཏན་གྱི་ཡན་ལག་ལ་མིང་གི་སྒོ་ནས་བཅོ་བརྒྱད་དུ་དབྱེ་བ་དང་། དེ་ནས་ཚིག་རྐང་ཕྱེད་ཀྱིས་རྫས་སུ་བཅུ་གཅིག་ཏུ་བསྡུ་བ་བསྟན་ནོ། །དེ་ནས་ཕྱེད་དང་བཞིས་རྫས་སུ་བཅུ་གཅིག་ཏུ་འགྱུར་བའི་སྒྲུབ་བྱེད་དང་། དང་པོ་གཉིས་ཀྱི་བདེ་བ་དང་། དགའ་བ་གཉིས་དང་། གསུམ་པའི་ནང་རབ་ཏུ་དྭང་བའི་ངོ་བོ་ངོས་བཟུང་བ་བསྟན། དེ་ནས་ཚིགས་བཅད་གསུམ་གྱིས་རིམ་པ་ལྟར་སྙོམས་འཇུག་ཉོན་མོངས་ཅན་ལ་ཡན་ལག་ཅི་ཙམ་ཡོད་པ་དང་། བཞི་པ་མི་གཡོ་བར་འཇོག་པའི་རྒྱུ་མཚན་དང་། སྐྱེ་བའི་བསམ་གཏན་ན་ཚོར་བ་དུ་ཡོད་པ་བསྟན། དེ་ནས་ཚིགས་བཅད་གཅིག་གིས་དེ་ལས་འཕྲོས་ནས་བསམ་གཏན་གཉིས་པ་ཡན་ཆད་ན་ལུས་དང་མིག་དང་རྣ་བའི་རྣམ་ཤེས་གསུམ་དང་། རྣམ་པར་རིག་བྱེད་ཀུན་ནས་སློང་བའི་ཤེས་པ་རྣམས་ས་གང་དུ་གཏོགས་པ་ངོ་བོ་ངོས་འཛིན་དང་བཅས་པ་བསྟན་ཏོ། །གསུམ་པ་ནི། དེ་དང་མི་ལྡན་ཞེས་སོགས་ཚིགས་བཅད་གཅིག་གོ །བཞི་པ་ནི། ཟག་པ་མེད་པའི་ཞེས་སོགས་ཚིགས་བཅད་གཉིས་སོ། །ལྔ་པ་ནི། དག་པ་ཉམས་པའི་ཞེས་སོགས་ཚིགས་བཅད་ཕྱེད་དང་གསུམ་སྟེ། ཚིགས་བཅད་དང་པོས་ནི་དག་པ་བ་ལ་ཆ་མཐུན་བཞིར་ཕྱེ་ནས་བཞི་པོ་སོ་སོའི་ངོ་བོ་དང་བཅས་པ་བསྟན། དེ་ནས་ཚིག་རྐང་གཉིས་ཀྱིས་བཞི་པོ་གང་གི་མཇུག་ཏུ་གང་འབྱུང་བ་དང་། དེ་ནས་ཚིགས་བཅད་གཅིག་གིས་དེ་ལས་འཕྲོས་ནས་ཐོད་རྒལ་གྱི་སྙོམས་འཇུག་བསྟན་ནོ། །དྲུག་པ་ནི་བསམ་གཏན་གཟུགས་མེད་ཞེས་སོགས་ཚིགས་བཅད་ཕྱེད་དང་ལྔ་སྟེ་ཚིག་རྐང་དང་པོ་གཉིས་ཀྱིས་རྟེན་གྱི་ཁྱད་པར་སྒྲུབ་བྱེད་དང་བཅས་པ་དང་། དེ་ནས་གཉིས་ཀྱིས་དེའི་དམིགས་བསལ་དང་། དེ་ནས་ཚིགས་བཅད་གཅིག་གིས་དམིགས་པའི་ཁྱད་པར་དང་། དེ་ནས་ཚིགས་བཅད་གཅིག་གིས་ཉོན་མོངས་སྤོང་བྱེད་ངོས་བཟུང་ཞིང་ཞར་ལ་ཉེར་བསྡོགས་ཀྱི་ངོ་བོ་དང་བཅས་པ་དང་། དེ་ནས་ཚིག་རྐང་གསུམ་གྱིས་བསམ་གཏན་ཁྱད་པར་ཅན་འབྲས་བུ་དང་བཅས་པ་དང་། དེ་ནས་གཉིས་ཀྱིས་ཏིང་ངེ་འཛིན་ཐམས་ཅད་རིགས་གསུམ་དུ་འདུ་བ་བསྟན་ནོ། །གསུམ་པ་ལ། བསམ་གཏན་དང་གཟུགས་མེད་ཀྱི་རྣམ་གཞག་ཐུན་མོང་བ་རྣམས་ཐ་སྙད་ཟོར་ཡངས་བའི་ཕྱིར་ཕྱོགས་གཅིག་ཏུ་འཆད་ཅིང་། ཐུན་མོང་མ་ཡིན་པ་རྣམས་བསམ་གཏན་ལ་སྦྱར་ཏེ་འཆད་པ་གཉིས་ཏེ། རྒྱུ་སྙོམས་འཇུག་གི་བསམ་གཏན་དང་། འབྲས་བུ་སྐྱེ་བའི་བསམ་གཏན་ནོ། །དང་པོ་ལ་ལྔ་སྟེ། གང་ལ་སྐྱེ་བའི་རྟེན། ཐོབ་བྱེད་ཀྱི་རྒྱུ། ཐོབ་བྱའི་ངོ་བོ། ཐོབ་པའི་ཚུལ། ཐོབ་པའི་རྟགས་སོ། །དང་པོ་ལ་སྔར་མེད་གསར་དུ་སྐྱེ་བའི་རྟེན་ནི། ངན་སོང་གསུམ་གྱི་རྟེན་ལ་བསམ་གཏན་དང་གཟུགས་མེད་མི་སྐྱེ་སྟེ། རྣམ་མིན་གྱིས་སྒྲིབ་པ་ཤས་ཆེ་བའི་ཕྱིར་རོ། །སྒྲ་མི་སྙན་པའི་རྟེན་ལ་མི་སྐྱེ་སྟེ། ལས་ཀྱི་སྒྲིབ་པ་ཤས་ཆེ་བའི་ཕྱིར་རོ། །འདུ་ཤེས་མེད་པའི་རྟེན་ལ་ཡང་མི་སྐྱེ་སྟེ། འདུ་ཤེས་གསལ་པོ་མེད་པའི་ཕྱིར་རོ། །སྲིད་རྩེའི་རྟེན་ལ་ཡང་དག་པ་བ་མི་སྐྱེ་སྟེ། ས་གོང་འོག་ལ་ཞི་རགས་སུ་ལྟ་བ་མེད་པའི་ཕྱིར་ཏེ། དེ་ལ་གོང་ས་མེད་པའི་ཕྱིར་རོ། །དེ་རྣམས་མ་གཏོགས་པའི་འགྲོ་བ་གཞན་རྣམས་ནི་རྟེན་དུ་རུང་སྟེ། འདོད་པའི་རྟེན་ལ་བསམ་གཏན་དང་པོ་ནས་སྲིད་རྩེའི་བར་གྱི་སྙོམས་འཇུག་བརྒྱད་ཀ་སྐྱེ་བ་ནས་བཟུང་སྟེ་ཅི་ཡང་མེད་པའི་རྟེན་ལ་སྲིད་རྩེའི་སྙོམས་འཇུག་སྐྱེ་བའི་ཕྱིར་ཏེ། གོང་ས་གོང་སའི་སྙོམས་འཇུག་རྣམ་འོག་ས་འོག་སའི་རྟེན་ལ་བསྒྲུབ་དགོས་པའི་ཕྱིར་རོ། །རང་སའི་རྟེན་ལ་རང་སའི་རྒྱུ་སྙོམས་འཇུག་བསྒོམ་པ་ཡོད་དམ་མེད་ཅེ་ན། ཉེར་བསྡོགས་ཀྱི་སྒོ་ནས་སྔར་མེད་གསར་དུ་སྐྱེ་བ་ནི་མེད་ལ། སྐྱེས་ཟིན་མངོན་དུ་བྱེད་པ་ནི་ཡོད་དེ། ཚངས་རིས་ཀྱི་རྟེན་ལ་བསམ་གཏན་དང་པོའི་རྒྱུ་སྙོམས་འཇུག་འབྲིང་དུ་བསྒོམ་པས་མདུན་ན་འདོན་དུ་སྐྱེ་ཞིང་། དེའི་རྟེན་ལ་ཆེན་པོར་བསྒོམས་པས་ཚངས་ཆེན་དུ་སྐྱེ་བ་ལྟ་བུའོ། །གལ་ཏེ་འདོད་པའི་རྟེན་ལ་བསམ་གཏན་དང་པོའི་དངོས་གཞི་ཆུང་ངུ་འབྲིང་ཆེན་པོ་གསུམ་དུ་བསྒོམས་པས་བསམ་གཏན་དང་པོའི་གནས་གསུམ་དུ་རིམ་གྱིས་སྐྱེ་བ་ཡིན་ནོ་སྙམ་ན་མིན་ཏེ། འདོད་པའི་རྟེན་ལ་ཆེན་པོ་བསྒོམས་པ་མ་ཉམས་པར་ཤི་འཕོས་ན་ཚངས་རིས་སུ་སྐྱེ་བའི་གོ་སྐབས་མེད་ཅིང་། ཉམས་ན་ཚངས་རིས་སུ་སྐྱེ་བ་ཡིན་ན་སླར་ཡང་དེའི་རྟེན་ལ་ཆེན་པོ་དང་འབྲིང་གཉིས་བསྒོམ་དགོས་པའི་ཕྱིར་རོ། །དེ་དག་ཀྱང་དག་པ་བའི་དབང་དུ་བྱས་པ་ཡིན་གྱི་ཟག་མེད་ནི་གོང་སའི་རྟེན་ཅན་ཡང་ཡོད་དེ། སྲིད་རྩེའི་རྟེན་ཅན་གྱི་ཕྱིར་མི་འོང་གིས་ཅི་ཡང་མེད་ཀྱི་ཟག་མེད་མངོན་དུ་བྱས་ནས་སྲིད་རྩེའི་ཉོན་མོངས་སྤོང་དགོས་པའི་ཕྱིར་ཏེ། སྲིད་རྩེའི་ཉོན་མོངས་སྤོང་བ་ལ་ལམ་ཟག་མེད་དགོས་ཤིང་། སྲིད་རྩེ་ལ་རང་སས་བསྡུས་པའི་ཟག་མེད་མེད་པའི་ཕྱིར་ཏེ། མཛོད་ཀྱི་ལུང་སྔར་དྲངས་པ་ལྟར་རོ། །དེ་ཡང་ཉན་ཐོས་ཀྱི་དབང་དུ་བྱས་པ་ཡིན་གྱི། བྱང་སེམས་འཕགས་པས་ནི་དེ་མ་གཏོགས་པའི་སྙོམས་འཇུག་ཀྱང་གོང་སའི་རྟེན་ལ་སྒོམ་པ་ཡོད་དེ། བསམ་གཏན་བཞི་པའི་རྟེན་ཅན་གྱི་བྱང་སེམས་སྒོམ་ལམ་པས་ཐོད་རྒལ་གྱི་སྙོམས་འཇུག་སྒོམ་པ་ཡོད་པའི་ཕྱིར་རོ།། །།གཉིས་པ་ལ་གཉིས་ཏེ། སྤྱིར་རྒྱུ་ལྔར་དབྱེ་བ་དང་། ཕྱི་མ་གཉིས་ཀྱི་ཉམས་ལེན་རྒྱས་པར་བཤད་པའོ། །དང་པོ་ལ་རྒྱུ་དང་། ལས་དང་། ཆོས་ཉིད་དང་། ཐོས་པ་དང་། མན་ངག་གི་སྟོབས་ཀྱིས་སྐྱེ་བ་དང་ལྔ་ལས། དང་པོ་ནི། སྔར་སྙོམས་འཇུག་གོམས་པར་བྱས་པ་ཉམས་པ་འདོད་ཁམས་སུ་སྐྱེས་པ་ཡིན་ན་སླར་ཡང་ཚེ་དེ་ཉིད་ལ་ཉེར་བསྡོགས་བསྒོམ་པ་ལ་མི་ལྟོས་པར་རྐྱེན་ཅུང་ཟད་ཙམ་གྱིས་གསོས་བཏབ་ནས་སྐྱེ་བ་ལྟ་བུའོ། །གཉིས་པ་ནི། ཁམས་གོང་མ་འཕེན་བྱེད་ཀྱི་རྒྱུ་ཉེ་བར་གནས་པ་ལས། བྱམས་པའི་སེམས་ཀྱིས་གསོས་བཏབ་ནས་སྐྱེ་བ་ལྟ་བུ་སྟེ། སྤྱོད་འཇུག་ལས། སེམས་གསལ་གཅིག་བསྐྱེད་འབྲས་བུ་གང་། །ཚངས་ལ་སོགས་པ་ཡིན་པ་ལྟར། །ཞེས་སོ། །དེ་ཡང་གོང་མ་འཕེན་བྱེད་ཀྱི་ལས་དེ་བྱམས་པའི་སེམས་ཀྱིས་གསོས་བཏབ་ནས་སྙོམས་འཇུག་སྐྱེ་བའི་དབང་གི་ཁམས་གོང་དུ་སྐྱེ་བ་ཡིན་གྱི་བྱམས་པའི་སེམས་ཁོ་ནས་སྐྱེ་བ་ནི་མ་ཡིན་ཏེ། འོག་ས་ལ་འདོད་ཆགས་དང་མ་བྲལ་བར་གོང་མར་སྐྱེ་བ་མེད་པའི་ཕྱིར་རོ། །གསུམ་པ་ནི་བསྐལ་པ་འཇིག་པའི་ཚེ་ལྟ་བུ་སྟེ། བསམ་གཏན་དང་པོ་མན་ཆད་མེས་འཇིག་པ་ལ་ཉེ་བའི་ཚེ། ངན་སོང་གི་སེམས་ཅན་ལས་མ་ཟད་པ་རྣམས་འཇིག་རྟེན་གྱི་ཁམས་གཞན་གྱིས་སེམས་ཅན་དུ་སྐྱེ། ལས་ཟད་པ་རྣམས་གླིང་གསུམ་གྱི་མིར་སྐྱེས་ཏེ་འཛམ་བུ་གླིང་པའི་མི་གང་ཡང་རུང་བ་གཅིག་གི་རྒྱུད་ལ་བསམ་གཏན་དང་པོའི་སྙོམས་འཇུག་ཆོས་ཉིད་ཀྱི་སྟོབས་ཀྱིས་སྐྱེ་ཞིང་དེ་ལས་ལངས་མ་ཐག་ཏུ་ཀྱེ་མ་དབེན་པ་ལས་སྐྱེས་པའི་དགའ་བ་དང་བདེ་བ་ནི་བདེ་བའོ། །དབེན་པ་ལས་སྐྱེ་བའི་དགའ་བ་དང་བདེ་བ་ནི་ཞི་བའོ། །ཞེས་ཟེར་ཞིང་ཚིག་དེ་ཉིད་ཀྱིས་རྐྱེན་བྱས་ནས་གླིང་གསུམ་གྱི་མི་གཞན་རྣམས་ཀྱི་རྒྱུད་ལ་ཡང་སྙོམས་འཇུག་སྐྱེས་ཏེ་བསྒོམ་པ་ལ་བརྟེན་ནས་བསམ་གཏན་དང་པོར་སྐྱེའོ། །དེ་བཞིན་དུ་སྒྲ་མི་སྙན་པའི་མི་རྣམས་འདོད་ལྷར་སྐྱེ་ཞིང་འདོད་ལྷའི་རྟེན་ལ་བསམ་གཏན་དང་པོའི་སྙོམས་འཇུག་ཆོས་ཉིད་ཀྱི་སྟོབས་ཀྱིས་སྐྱེ་བ་ལ་བརྟེན་ནས་དེ་དག་ཀྱང་བསམ་གཏན་དང་པོར་སྐྱེའོ། །བསམ་གཏན་དང་པོའི་རྟེན་ལ་བསམ་གཏན་གཉིས་པའི་སྙོམས་འཇུག་ཆོས་ཉིད་ཀྱིས་སྐྱེ་བ་ལ་བརྟེན་ནས་དེ་དག་བསམ་གཏན་གཉིས་པར་སྐྱེའོ། །བསམ་གཏན་གཉིས་པ་མན་ཆད་ཆུས་འཇིག་པ་ལ་ཉེ་བའི་ཚེ་བསམ་གཏན་གསུམ་པ་མན་ཆད་ཀྱི་སྙོམས་འཇུག་ཆོས་ཉིད་ཀྱི་སྟོབས་ཀྱིས་སྐྱེ་བ་སོགས་ཀྱང་ཤེས་པར་བྱའོ། །གཟུགས་མེད་ཀྱི་སྙོམས་འཇུག་ཆོས་ཉིད་ཀྱིས་སྐྱེ་བ་ནི་མེད་དེ། སྣོད་འཇིག་པའི་དབང་གིས་གཟུགས་མེད་དུ་སྐྱེ་བ་མེད་པའི་ཕྱིར་ཏེ། བསམ་གཏན་བཞི་པ་ལ་མེ་ཆུ་རླུང་གསུམ་གྱི་འཇིག་པ་མེད་པའི་ཕྱིར་རོ། །སྐྱེ་ཚུལ་གསུམ་པོ་འདི་ནི་ཚེ་འདིར་ཉེར་བསྡོགས་བསྒོམས་པ་ལ་མི་ལྟོས་པའི་སྐྱེ་ཚུལ་ཡིན་ལ་དེ་དག་གི་ལུང་ཡང་། མཛོད་ལས། ཁམས་གཉིས་དག་ཏུ་གཟུགས་མེད་པ། །རྒྱུད་དང་ལས་ཀྱི་སྟོབས་ཀྱིས་སྐྱེ། །གཟུགས་ཀྱི་ཁམས་སུ་བསམ་གཏན་རྣམས། །དེ་དག་དང་ཆོས་ཉིད་ཀྱིས་ཀྱང་། །ཞེས་གསུངས་སོ། །བཞི་པ་ནི། རང་ཉིད་ཀྱིས་སྙོམས་འཇུག་གི་དབང་དུ་བྱས་པའི་གསུང་རབ་མང་དུ་ཐོས་པའི་སྟོབས་ཀྱིས་སྙོམས་འཇུག་ཐོབ་པའི་ཐབས་ཤེས་ནས་བསྒོམས་པ་ལྟ་བུ་སྟེ། དབང་རྣོན་ཆོས་ཀྱི་རྗེས་འབྲང་གི་ལུགས་ཡིན་ནོ། །ལྔ་པ་ནི་སློབ་དཔོན་གཞན་གྱི་མན་ངག་ལ་བརྟེན་ནས་སྐྱེ་བ་སྟེ། དེ་ནི་དབང་རྟུལ་དད་པའི་རྗེས་འབྲངས་ཀྱི་ལུགས་སོ། །གཉིས་པ་ལ་བསམ་གཏན་དང་པོ་ལྟ་བུ་ལ་མཚོན་ན། ཉེར་བསྡོགས་ཞི་གནས་དང་། ལྷག་མཐོང་གཉིས་ལས། དང་པོ་ནི། མདོ་སྡེ་རྒྱན་ལས། དམིགས་པ་ལ་ནི་སེམས་གཏད་ནས། །དེའི་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོགས་བྱས་ནས། །དེ་ལ་སླར་ཡང་བླན་པར་བྱ། །བློ་ལྡན་གོང་ནས་གོང་དུ་ཡང་། །སེམས་ནི་ནང་དུ་བསྡུ་བར་བྱ། །དེ་ནས་ཡོན་ཏན་མཐོང་བའི་ཕྱིར། །ཏིང་ངེ་འཛིན་ལ་སེམས་འདུལ་ལོ། །རྣམ་གཡེང་ཉེས་པ་མཐོང་བའི་ཕྱིར། །དེ་ལ་མི་དགའ་ཞི་བར་བྱ། །བརྣབ་སེམས་ཡིད་མི་བདེ་ལ་སོགས། །ལངས་པ་དེ་བཞིན་ཞི་བར་བྱ། །དེ་ནས་སྡོམ་བརྩོན་ཅན་གྱིས་ནི། །སེམས་ནི་མངོན་པར་འདུ་བྱེད་བཅས། །རང་གི་ངང་གིས་འབྱུང་བ་ཐོབ། །དེ་གོམས་པ་ལས་འདུ་མི་བྱེད། །དེ་ནས་དེ་ཡི་ལུས་དང་སེམས། །ཤིན་ཏུ་སྦྱངས་པ་ཆེ་ཐོབ་ནས། །ཡིད་ལ་བྱེད་དང་བཅས་ཞེས་བྱ། །དེ་ཡིས་དེ་ནི་འཕེལ་བྱས་ནས། །འཕེལ་བ་རིང་དུ་འགྲོ་བ་ཡིས། །དངོས་གཞིའི་གནས་པ་དེས་ཐོབ་བོ། །ཞེས་གསུངས་པ་ལྟར། སེམས་གནས་པའི་ཐབས་དགུ་བསྒོམས་ནས་དགུ་པའི་གནས་སྐབས་སུ་ལུས་སེམས་ཤིན་ཏུ་སྦྱངས་པའི་བདེ་བ་ཐོབ་པ་ན། བསམ་གཏན་དང་པོའི་སས་བསྡུས་པའི་ཉེར་བསྡོགས་ཞི་གནས་སྐྱེས་པ་ཡིན་ལ། དེའི་ཚེ་ཡིད་ལ་བྱེད་པ་བཾཅུ་གཅིགཾ་དང་བཅས་ཤིང་། དེ་དག་རིམ་པ་བཞིན་དུ་འཕེལ་བ་ཡིས་དངོས་གཞིའི་གནས་པ་ཐོབ་པ་ཡིན་ནོ། །དེ་ལྟ་བུའི་ཉེར་བསྡོགས་ཞི་གནས་དེ་ལ། བདག་མེད་མངོན་སུམ་དུ་རྟོགས་པའི་ཤེས་རབ་བརྟེན་པའི་ཚེ། ཉེར་བསྡོགས་མི་ལྕོགས་པ་མེད་པ་ཞེས་བྱ་སྟེ། རང་ས། གོང་ས། འོག་སའི་ཉོན་མོངས་པ་ཐམས་ཅད་སྤོང་ནུས་པའི་ཕྱིར་རོ། །དེས་ན་རྒྱུན་ཞུགས་དང་། ཕྱིར་འོང་དང་། རིམ་གྱིས་པའི་ཕྱིར་མི་འོང་ཞུགས་པ་རྣམས་ཀྱི་ལམ་ཟག་མེད་ཀྱི་སེམས་རྟེན་དུ་གྱུར་པའི་ཉེར་བསྡོགས་ཡང་དེ་ཉིད་ཡིན་གྱི། མཚན་ཉིད་རབ་ཏུ་རིག་པ་ཡིད་ལ་བྱེད་པ་སོགས་ནི་མ་ཡིན་ཏེ། དེ་དག་ནི་ཞི་རགས་ཀྱི་རྣམ་པ་ཅན་ཡིན་ལ། ཞི་རགས་ཀྱི་རྣམ་པ་ཅན་གྱི་ཉེར་བསྡོགས་ལ། ལམ་ཟག་མེད་བརྟེན་པ་འགལ་བའི་ཕྱིར་རོ། །ཞི་གནས་དེ་ལ་ལམ་ཟག་མེད་མི་བརྟེན་པར་མཚན་ཉིད་རབ་ཏུ་རིག་པ་སོགས་ལ་བརྟེན་པའི་ཚེ་འོག་ས་ཁོ་ནའི་ཉོན་མོངས་སྤོང་ལ་དངོས་གཞི་ཐོབ་པ་ཡིན་ནོ།། །།གཉིས་པ་ལ་མཚན་ཉིད། དབྱེ་བ། བྱེད་ལས། རྣམ་གཞག་དང་བཞི་ལས། དང་པོ་ནི། བསམ་གཏན་དང་པོའི་དངོས་གཞིའི་ཆེད་དུ་དམིགས་རྣམ་ཡོངས་སུ་སྦྱོང་བར་བྱེད་པའི་ཞི་རགས་ཀྱི་རྣམ་པ་ཅན་གྱི་དགེ་རྩས་བསྡུས་པའོ། །གཉིས་པ་ལ། བསམ་གཏན་དང་པོའི་ཉེར་བསྡོགས་མཚན་ཉིད་རབ་ཏུ་རིག་པ་ཡིད་ལ་བྱེད་པ། མོས་པ་ཡིད་ལ་བྱེད་པ། རབ་ཏུ་དབེན་པ་ཡིད་ལ་བྱེད་པ། དགའ་བ་སྡུད་པ་ཡིད་ལ་བྱེད་པ། དཔྱད་པ་ཡིད་ལ་བྱེད་པ། སྦྱོར་བའི་མཐའ་ཡིད་ལ་བྱེད་པ། སྦྱོར་བའི་མཐའི་འབྲས་བུ་ཡིད་ལ་བྱེད་པ་དང་བདུན་ལས། ཕྱི་མ་ནི་དངོས་གཞིའི་ཁོངས་སུ་གཏོགས་པས་ཉེར་བསྡོགས་མིན་ལ། བསམ་གཏན་དང་པོའི་ཉེར་བསྡོགས་དྲུག་གི་མཚན་ཉིད་རིམ་བཞིན། མཉམ་གཞག་གི་སས་བསྡུས་ཀྱི་ཡིད་བྱེད་གང་ཞིག ཐོས་བསམ་འདྲེས་མའི་སྒོ་ནས་འདོད་པ་ལ་རགས་པ་དང་། བསམ་གཏན་དང་པོ་ལ་ཞི་བའི་རྣམ་པར་ལྟ་བ་དང་། ཐོས་བསམ་ལས་འདས་ཏེ་ཞི་རགས་ཀྱི་མཚན་མ་རྩེ་གཅིག་ཏུ་སྒོམ་པའི་ཡིད་བྱེད་གང་ཞིག འདོད་ཉོན་ཆེན་པོ་གསུམ་སྤོང་བའི་སྦྱོར་བར་གྱུར་པ་དང་། དེ་གང་ཞིག འདོད་ཉོན་ཆེན་པོ་གསུམ་དངོས་སུ་སྤོང་བ་དང་། འདོད་ཉོན་ཆེན་པོ་གསུམ་སྤངས་པའི་དགའ་བདེ་ཆུང་ངུས་རང་རྒྱུད་ལ་རེག་ཅིང་། ཉོན་མོངས་སྤོང་བ་ལ་ཡོན་ཏན་དུ་མཐོང་བ་དྭང་བར་གྱུར་པའི་ཡིད་བྱེད་གང་ཞིག འདོད་ཉོན་འབྲིང་པོ་གསུམ་དངོས་སུ་སྤོང་བ་དང་། དེ་གང་ཞིག འདོད་ཉོན་འབྲིང་པོ་སྤངས་པས་དགེ་བའི་ཆོས་ལ་སྦྱོར་བ་བརྟན་པར་བྱས་པའི་ཕྱིར་ཀུན་ནས་དཀྲིས་པ་མངོན་དུ་གྱུར་པ་མི་འབྱུང་བའི་ཚེ་འདོད་པའི་ཉོན་མོངས་སྤངས་མ་སྤངས་དཔྱོད་པར་བྱེད་པའི་ཡིད་བྱེད་དང་། འདོད་ཉོན་ལྷག་མ་མ་སྤངས་པར་ཤེས་ནས་དེ་སྤང་བའི་ཕྱིར་ཞི་རགས་ཀྱི་མཚན་མ་རྩེ་གཅིག་ཏུ་སྒོམ་པའི་ཡིད་བྱེད་གང་ཞིག འདོད་ཉོན་ཆུང་ངུ་གསུམ་དངོས་སུ་སྤོང་བར་བྱེད་པ་སྟེ། དེ་སྐད་དུ་ཡང་རྒྱལ་སྲས་མ་ལས། ཇི་ལྟར་ན་བསམ་གཏན་དང་པོ་ལ་སྙོམས་པར་འཇུག་པའི་ཡིད་ལ་བྱེད་པ་བདུན་དུ་འགྱུར་ཞེ་ན། མཉམ་པར་གཞག་པའི་ས་པའི་ཡིད་ལ་བྱེད་པ་གང་གིས་འདོད་པ་རྣམས་ལ་ཉེས་དམིགས་ལ་སོགས་པར་བལྟས་པས་རགས་པའི་མཚན་ཉིད་ཅན་དུ་རིག་པར་བྱེད་ལ། དེ་མེད་པའི་ཕྱིར་བསམ་གཏན་དང་པོ་ལ་ཞི་བའི་མཚན་ཉིད་དོ། །འདི་ནི་མཚན་ཉིད་རབ་ཏུ་རིག་པ་ཡིད་ལ་བྱེད་པ་ཞེས་བྱ་སྟེ། དེ་ནི་ཐོས་པ་དང་བསམ་པ་དང་འདྲེས་པར་རིག་པར་བྱའོ། །དེའི་འོག་ཏུ་ཐོས་པ་དང་བསམ་པ་ལས་འདས་ནས་གཅིག་ཏུ་བསྒོམ་པའི་རྣམ་པས་དེའི་རགས་པ་དང་། ཞི་བའི་མཚན་ཉིད་ཀྱི་མཚན་མ་ལ་གནས་པའི་ཞི་གནས་དང་ལྷག་མཐོང་བསྒོམ་ཞིང་། ཇི་ལྟར་ཡང་ཡོངས་སུ་བཙལ་བ་རགས་པ་དང་། ཞི་བ་ཉིད་དུ་མོས་ཏེ། འདི་ནི་མོས་པ་ལས་བྱུང་བ་ཞེས་བྱའོ། །དེ་སྒོམ་པས་ཐོག་མ་ཁོ་ནར་སྤོང་བའི་ལམ་དང་ལྡན་པའི་ཡིད་ལ་བྱེད་པ་ནི། རབ་ཏུ་དབེན་པ་ལས་བྱུང་བ་སྟེ། དེས་ཉོན་མོངས་པའི་རྣམ་པ་ཆེན་པོ་སྤངས་པ་དང་། དེའི་ཕྱོགས་ཀྱི་གནས་ངན་ལེན་དང་བྲལ་བའི་ཕྱིར་རོ། །རྣལ་འབྱོར་པ་དེ་དེའི་འོག་ཏུ་སྤོང་བ་ལ་དགའ་བར་འགྱུར་ཞིང་སྤོང་བ་ལ་ཡོན་ཏན་དུ་ལྟ་སྟེ། རབ་ཏུ་དབེན་པའི་དགའ་བ་དང་བདེ་བ་ཆུང་ངུས་རེག་པ་ན་དུས་དུས་སུ་དང་བར་འགྱུར་བའི་ཡིད་ལ་བྱེད་པས་ཇི་ཙམ་རྨུགས་པ་དང་། གཉིད་དང་རྒོད་པ་དང་བྲལ་བར་བྱ་བའི་ཕྱིར་དུ་རབ་ཏུ་དགའ་བར་བྱེད་པ་འདི་ནི་དགའ་བ་སྡུད་པ་ཞེས་བྱའོ། །དེ་ལྟར་ལེགས་པར་ཞུགས་པ་དེ་དགེ་བའི་ཕྱོགས་ལ་སྦྱོར་བ་བརྟན་པའི་ཕྱིར། འདོད་པ་ན་སྤྱོད་པའི་ཉོན་མོངས་པ་ཀུན་ནས་དཀྲིས་པ་ཀུན་ཏུ་མི་འབྱུང་བས། དེའི་སྤངས་སམ་མ་སྤངས་པ་ཁོང་དུ་ཆུད་པར་བྱ་བའི་ཕྱིར། དེ་དེ་འབྱུང་བ་དང་མཐུན་པའི་སྡུག་པའི་མཚན་མ་ཡིད་ལ་བྱེད་པས་སོ་སོར་རྟོག་པ་ནི་དཔྱོད་པའི་ཡིད་ལ་བྱེད་པའོ། །དེས་དེ་ལྟར་དཔྱད་ནས་གཉེན་པོ་སྒོམ་པས། དུས་དེ་སྲིད་གཅིག་པའི་ཚུལ་གྱིས་འདོད་པ་ན་སྤྱོད་པའི་ཉོན་མོངས་པ་ཐམས་ཅད་བྲལ་བར་བྱ་བའི་ཕྱིར། བསམ་གཏན་དང་པོ་ལ་སྦྱོར་བའི་མཐར་ཐུག་པའི་གཉེན་པོ་ཡིད་ལ་བྱེད་པ་ནི་སྦྱོར་བའི་མཐའ་འོ། །དེའི་འོག་ཏུ་དངོས་གཞིའི་བསམ་གཏན་དང་པོར་གྱུར་པ་ནི་སྦྱོར་བའི་མཐའི་འབྲས་བུ་ཞེས་བྱའོ་ཞེས་གསུངས་སོ། །གསུམ་པ་ནི། རྒྱལ་སྲས་མ་ལས། དེ་ལ་མཚན་ཉིད་རབ་ཏུ་རིག་པས་ནི་སྤང་བར་བྱ་བ་དང་ཐོབ་པར་བྱ་བ་ལེགས་པར་ཡོངས་སུ་ཤེས་ནས་སྤང་བར་བྱ་བ་དང་ཐོབ་པར་བྱ་བའི་ཕྱིར་སེམས་ཡོངས་སུ་འཇོག་གོ །མོས་པ་ལས་བྱུང་བས་ནི་དེའི་དོན་དུ་ཡང་དག་པར་སྦྱོར་བ་བརྩམ་མོ། །རབ་ཏུ་དབེན་པ་ལས་བྱུང་བས་ནི་ཀུན་ནས་ཉོན་མོངས་ཆེན་པོ་རྣམས་རབ་ཏུ་སྤོང་ངོ་། །དགའ་བ་སྡུད་པས་ནི་ཉོན་མོངས་པའི་རྣམ་པ་འབྲིང་རབ་ཏུ་སྤོང་ངོ་། །དཔྱོད་པས་ནི་ཐོབ་པར་མངོན་པའི་ང་རྒྱལ་མེད་པ་ལ་སེམས་འཇོག་པར་བྱེད་དོ། །སྦྱོར་བའི་མཐས་ནི་ཉོན་མོངས་པའི་རྣམ་པ་ཆུང་ངུའི་བར་དུ་སྤོང་ངོ་། །སྦྱོར་བའི་མཐའི་འབྲས་བུས་ནི་ཡིད་ལ་བྱེད་པ་ལེགས་པར་སྒོམ་པ་འདི་དག་གི་སྒོམ་པའི་འབྲས་བུ་མྱོང་བར་བྱེད་དོ་ཞེས་གསུངས་པ་ལྟར་རོ། །བཞི་པ་ལ་གསུམ་སྟེ། ཡིད་བྱེད་བཞིར་བསྡུ་བ། ལམ་བཞིར་བསྡུ་བ། ཁྱད་པར་གྱི་ཆོས་ལ་དཔྱད་པའོ། །དང་པོ་ནི། ཉན་ཐོས་ཀྱི་ས་ལས། གཞན་ཡང་མཚན་ཉིད་སོ་སོར་རིག་པ་ཡིད་ལ་བྱེད་པ་གང་ཡིན་པ་དང་། མོས་པ་ལས་བྱུང་བའི་ཡིད་ལ་བྱེད་པ་གང་ཡིན་པ་དེ་ནི། སུན་འབྱིན་པའི་གཉེན་པོ་དང་ལྡན་པ་སྟེ་རྗེས་སུ་མཐུན་པའི་ཡིད་ལ་བྱེད་པ་ཡིན་ནོ། །རབ་ཏུ་དབེན་པའི་ཡིད་ལ་བྱེད་པ་གང་ཡིན་པ་དང་། སྦྱོར་བ་མཐར་ཐུག་པ་ཡིད་ལ་བྱེད་པ་གང་ཡིན་པ་དེ་ནི་སྤོང་བའི་གཉེན་པོ་དང་ལྡན་པ་སྟེ། གཉེན་པོ་ཡིད་ལ་བྱེད་པ་ཡིན་ནོ། །དགའ་བ་སྡུད་པའི་ཡིད་ལ་བྱེད་པ་གང་ཡིན་པ་དེ་ནི། གཉེན་པོ་ཡིད་ལ་བྱེད་པ་དང་། དྭང་བར་འགྱུར་བའི་ཡིད་ལ་བྱེད་པ་ཡིན་ནོ། །དཔྱོད་པ་ཡིད་ལ་བྱེད་པ་གང་ཡིན་པ་དེ་ནི། སོ་སོར་རྟོག་པའི་ཡིད་ལ་བྱེད་པ་ཞེས་བྱ་སྟེ། དེ་ལྟར་ན་ཡིད་ལ་བྱེད་པ་དྲུག་པོ་དེ་དག་ནི་ཡིད་ལ་བྱེད་པ་བཞི་པོ་འདི་ལྟ་སྟེ། རྗེས་མཐུན་པ་དང་། གཉེན་པོ་དང་། དྭང་བར་འགྱུར་བ་དང་། སོ་སོར་རྟོག་པ་དག་ཏུ་འདུས་པར་རིག་པར་བྱའོ་ཞེས་གསུངས་པ་ལྟར་རོ། །གཉིས་པ་ནི། བསྡུ་བ་ལས། མཚན་ཉིད་སོ་སོར་རིག་པ་དང་། མོས་པ་ཡིད་ལ་བྱེད་པ་ནི་སྦྱོར་བའི་ལམ་གྱིས་བསྡུས་པ་ཡིན་ནོ། །རབ་ཏུ་དབེན་པ་དང་། སྦྱོར་བའི་མཐར་ཐུག་པ་གཉིས་ནི་བར་ཆད་མེད་པའི་ལམ་གྱིས་བསྡུས་པ་ཡིན་ནོ། །དགའ་བ་སྡུད་པ་ནི་ལམ་རྣམ་པ་བཞི་ཆར་གྱིས་བསྡུས་པ་ཡིན་ནོ། །དཔྱོད་པ་ཡིད་ལ་བྱེད་པ་ནི། ཁྱད་པར་གྱི་ལམ་གྱིས་བསྡུས་པ་ཡིན་ནོ་ཞེས་གསུངས་པ་ལྟར་རོ། །གསུམ་པ་ལ་ཚོར་བ་གང་དང་མཚུངས་པར་ལྡན་དཔྱད་པ། སྙོམས་འཇུག་གསུམ་པོ་གང་ཡོད་དཔྱད་པ། ལམ་གསུམ་པོ་གང་ཡོད་དཔྱད་པ་དང་གསུམ་ལས། དང་པོ་ནི། དངོས་གཞི་ལ་ཚོར་བ་གསུམ་ཡོད་པ་ལྟར། ཉེར་བསྡོགས་ལ་ཡང་ཚོར་བ་གསུམ་ཡོད་དམ་ཞེ་ན། མ་ཡིན་ཏེ་འབད་དེ་དྲང་བར་བྱ་བའི་ཕྱིར་དང་། ས་འོག་མ་ལ་ཡིད་འབྱུང་བ་དང་མ་བྲལ་བའི་ཕྱིར་ན། ཚོར་བ་བཏང་སྙོམས་ཁོ་ན་དང་མཚུངས་པར་ལྡན་པའི་ཕྱིར་རོ། །དེ་སྐད་དུ་ཡང་མཛོད་ལས། དག་པ་བདེ་མིན་སྡུག་བསྔལ་མིན། །ཞེས་པའི་འགྲེལ་པར། དེ་དག་ནི་དག་པ་བ་ཡང་ཡིན་ལ། བཏང་སྙོམས་ཀྱི་དབང་པོ་དང་མཚུངས་པར་ལྡན་པ་དག་ཀྱང་ཡིན་ཏེ། འབད་དེ་དྲང་བར་བྱ་བའི་ཕྱིར་དང་། ས་འོག་མ་ལ་ཡིད་འབྱུང་བ་དང་མ་བྲལ་བའི་ཕྱིར་དང་། འདོད་ཆགས་དང་བྲལ་བའི་ལམ་ཡིན་པའི་ཕྱིར་རོ། །རོ་མྱོང་བ་དང་མཚུངས་པར་ལྡན་པ་མིན་ནོ་ཞེས་གསུངས་སོ། །གཉིས་པ་ནི། དངོས་གཞི་ལ་ཉོན་མོངས་ཅན་དང་དག་པ་བ་ཟག་མེད་གསུམ་ཡོད་པ་ལྟར། ཉེར་བསྡོགས་ལ་ཡང་དེ་ལྟར་ཡོད་དམ་ཞེ་ན། ཉེར་བསྡོགས་རྣམས་ལ་ཉོན་མོངས་ཅན་ནི་མེད་དེ། ཉེར་བསྡོགས་ནི་འདོད་ཆགས་དང་བྲལ་བར་བྱེད་པའི་ལམ་ཡིན་ལ། ཉོན་མོངས་ཅན་གྱིས་འདོད་ཆགས་དང་བྲལ་བར་བྱེད་མི་ནུས་པའི་ཕྱིར་རོ། །བསམ་གཏན་དང་པོའི་ཉེར་བསྡོགས་ལ་དག་པ་བ་དང་ཟག་མེད་གཉིས་ཡོད་ཀྱི་ཉེར་བསྡོགས་ལྷག་མ་རྣམས་ལ་ཟག་མེད་མེད་དེ། བསམ་གཏན་གཉིས་པ་ཡན་ཆད་ཀྱི་ཉེར་བསྡོགས་ལ་བདག་མེད་མངོན་སུམ་དུ་རྟོགས་པའི་ཤེས་རབ་བརྟེན་པ་མེད་པའི་ཕྱིར་ཏེ། འོག་མའི་དངོས་གཞི་མ་ཐོབ་པར་གོང་མའི་ཉེར་བསྡོགས་མི་ཐོབ་ལ། འོག་མའི་དངོས་གཞི་ཐོབ་ན་གོང་མའི་ཉེར་བསྡོགས་ལ་བདག་མེད་མངོན་སུམ་དུ་རྟོགས་པའི་ཤེས་རབ་མི་བརྟེན་པའི་ཕྱིར་ཏེ། དངོས་གཞི་ནི་ཞི་ལྷག་ཟུང་འབྲེལ་ཡིན་པས་ལམ་སླ་བ་ཡིན་ལ། ཉེར་བསྡོགས་ནི་ལྷག་མཐོང་ཤས་ཆེ་བས་ལམ་དཀའ་བ་ཡིན་པའི་ཕྱིར་རོ། །འོ་ན་བསམ་གཏན་དང་པོའི་ཉེར་བསྡོགས་ལ་མི་བརྟེན་པར་མཚུངས་སོ་སྙམ་ན། བསམ་གཏན་དང་པོའི་ཉེར་བསྡོགས་མཚན་ཉིད་རབ་ཏུ་རིག་པ་ལ་སོགས་ལ་མི་བརྟེན་ཀྱང་། དེའི་སྔ་རོལ་གྱི་ཞི་གནས་ལ་བརྟེན་པར་གོང་དུ་བཤད་ཟིན་ནོ། །འོ་ན་བསམ་གཏན་གཉིས་པའི་ཉེར་བསྡོགས་ལ་ཡང་མཚན་ཉིད་རབ་ཏུ་རིག་པའི་སྔ་རོལ་དུ་བསམ་གཏན་གཉིས་པའི་སས་བསྡུས་ཀྱི་ཞི་གནས་གཅིག་དགོས་པར་མཚུངས་སོ་ཞེ་ན། མི་མཚུངས་ཏེ། དེའི་སྔ་རོལ་དུ་མཉམ་གཞག་གི་སེམས་དགོས་པ་ནི་བསམ་གཏན་དང་པོའི་དངོས་གཞི་ཡིན་པའི་ཕྱིར་རོ། །དེས་ན་ཉེར་བསྡོགས་ལྷག་མ་བདུན་ནི་དག་པ་བ་ཁོ་ན་ཡིན་ནོ། །གསུམ་པ་ནི་ཉེར་བསྡོགས་རྣམས་ལ་འདོད་ཆགས་དང་བྲལ་བར་བྱེད་པའི་ལམ་དང་། ཡོན་ཏན་མངོན་པར་བསྒྲུབ་པའི་ལམ། མཐོང་ཆོས་ལ་བདེར་གནས་ཀྱི་ལམ་གསུམ་གང་ཡོད་ཞེ་ན། འདོད་ཆགས་དང་བྲལ་བར་བྱེད་པའི་ལམ་ཁོ་ན་ཡོད་ཀྱི། ཡོན་ཏན་མངོན་པར་སྒྲུབ་པར་བྱེད་པའི་ལམ་མེད་དེ། ཡན་ལག་དང་མི་ལྡན་པས་སྤྱན་དང་མངོན་ཤེས་ལ་སོགས་པའི་ཡོན་ཏན་མངོན་པར་བསྒྲུབ་མི་ནུས་པའི་ཕྱིར། མཐོང་ཆོས་ལ་བདེར་གནས་ཀྱི་ལམ་ཡང་མེད་དེ། མི་མཐུན་ཕྱོགས་སྤོང་བའི་འབད་རྩོལ་དང་བཅས་པའི་ཕྱིར་རོ། །བསམ་གཏན་དང་པོའི་ཉེར་བསྡོགས་ཀྱི་རྣམ་གཞག་དེ་དག་གིས་བསམ་གཏན་གཉིས་པ་ནས་སྲིད་རྩེའི་བར་གྱི་ཉེར་བསྡོགས་རྣམས་ཀྱང་རིག་པར་བྱ་སྟེ། ཉན་ས་ལས། ཇི་ལྟར་ཡིད་ལ་བྱེད་པ་བདུན་གྱིས་བསམ་གཏན་དང་པོ་ལ་སྙོམས་པར་འཇུག་པ་དེ་བཞིན་དུ། བསམ་གཏན་གཉིས་པ་དང་། གསུམ་པ་དང་། བཞི་པ་ལ་སྙོམས་པར་འཇུག་པ་དང་། ནམ་མཁའ་དང་། རྣམ་ཤེས་དང་། ཅི་ཡང་མེད་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་ཡང་ཡིད་ལ་བྱེད་པ་བདུན་གྱིས་ཡིན་པར་རིག་པར་བྱའོ་ཞེས་གསུངས་སོ། །འོན་ཀྱང་ཡིད་བྱེད་དང་པོ་ཐོས་བསམ་འདྲེས་མ་ཡིན་པ་ནི། འདོད་པའི་རྟེན་ལ་སྒོམ་པའི་དབང་དུ་བྱས་ལ། ཞི་རགས་ཀྱི་རྣམ་པ་ནི་ས་འོག་མའི་སྐྱོན་མཐོང་བས་རགས་པ་དང་། གོང་མའི་ཡོན་ཏན་མཐོང་ནས་ཞི་བར་ལྟ་བ་སྟེ། རྒྱས་སྲས་མ་ལས། རགས་པའི་མཚན་ཉིད་ནི་ས་འོག་མ་ཐམས་ཅད་དེ། ཅི་ཡང་མེད་པའི་སྐྱེ་མཆེད་ཀྱི་བར་དུའོ། །མདོར་བསྡུ་ན་རྣམ་པ་གཉིས་སུ་རིག་པར་བྱ་སྟེ། རབ་ཏུ་མ་ཞི་བར་གནས་པས་ཤིན་ཏུ་སྡུག་བསྔལ་བར་གནས་པ་དང་ཤིན་ཏུ་ཚེ་ཐུང་བའོ། །དེ་ལས་བཟློག་སྟེ་ས་གོང་མ་ནི་ཞི་བའི་མཚན་ཉིད་དུ་རིག་པར་བྱའོ་ཞེས་གསུངས་སོ། །གསུམ་པ་ཐོབ་བྱའི་ངོ་བོ་ལ་དྲུག་སྟེ། ངོ་བོ། དབྱེ་བ། གྲངས་ངེས། མི་མཐུན་ཕྱོགས། ཁྱད་པར་ལ་དཔྱད་པ། དམིགས་རྣམ་ལ་དཔྱད་པའོ། །དང་པོ་ནི། བསམ་གཏན་གྱི་དངོས་གཞིའི་སྙོམས་འཇུག་གི་མཚན་ཉིད། ཚོར་བའི་སྒོ་ནས་འོག་ས་ལས་ངེས་པར་འབྱུང་བའི་ཁྱད་པར་དུ་བྱས་པའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག སྙོམས་འཇུག་གི་དངོས་གཞིས་བསྡུས་པའོ། །གཉིས་པ་ལ་གཉིས་ཏེ། སའི་སྒོ་ནས་དབྱེ་བ་དང་། ངོ་བོའི་སྒོ་ནས་དབྱེ་བའོ། །དང་པོ་ལ་གཉིས་ཏེ། སོ་སོའི་ངོ་བོ་དང་། ཡན་ལག་གི་རྣམ་གཞག་གོ །དང་པོ་ལ་བཞི་ལས། བསམ་གཏན་དང་པོའི་དངོས་གཞི་ཤེར་ཕྱིན་གྱི་མདོ་ལས་གསུངས་པའི་དོན་ཉན་ས་ལས་འགྲེལ་བའི་ཚུལ་ནི། འདོད་པ་ལ་ཉོན་མོངས་པའི་འདོད་པ་དང་། དངོས་པོའི་འདོད་པ་གཉིས་ལས། དང་པོ་ནི། འདོད་པ་ལ་འདུན་པ་དང་རྣམ་འཚེ་གཉིས་སོ། །ཕྱི་མ་ནི་གཟུགས་སོགས་འདོད་པའི་ཡོན་ཏན་ལྔའོ། །དེས་དབེན་པ་ལ་ཡང་གཉིས་ལས། སྔ་མ་ནི་མཚུངས་ལྡན་གྱིས་དབེན་པ་དང་། ཕྱི་མ་ནི་དམིགས་པས་དབེན་པའོ། །སྡིག་ཏོ་མི་དགེ་བའི་ཆོས་ནི་འདོད་པ་དེ་དག་གི་རྒྱུ་ལས་བྱུང་བའི་ལུས་ངག་ཡིད་གསུམ་གྱི་ཉེས་སྤྱོད་ཡིན་ལ། དེས་དབེན་པ་ནི་རྒྱུ་འདོད་པ་སྤངས་པས་འབྲས་བུ་ཉེས་སྤྱོད་སླར་ཡང་མི་འབྱུང་བའོ། །རྟོག་དཔྱོད་དང་བཅས་པ་ནི་དེ་ལ་སྐྱོན་དུ་མི་ལྟ་བས་འདོད་པའི་གཉེན་པོར་རང་སས་བསྡུས་པའི་རྟོག་དཔྱོད་དང་བཅས་པའོ། །དབེན་པ་ནི་འདོད་པའི་གཉེན་པོར་གྱུར་པའི་ཡིད་བྱེད་དྲུག་པ་ཡིན་ལ། དེའི་མཇུག་ཐོགས་དེ་མ་ཐག་ཏུ་བྱུང་བས་ན་སྐྱེས་པའོ། །རེ་ཞིག་འདོད་པའི་དོན་ཐོབ་པས་ན་དགའ་བ། ལུས་སེམས་ལས་སུ་རུང་བ་རྒྱ་ཆེན་པོ་དང་ལྡན་པས་ན་བདེ་བ་ཅན་ཏེ་ཕན་ཡོན་གྱི་ཡན་ལག་གོ །བསམ་གཏན་ནི་ཏིང་ངེ་འཛིན་མཚུངས་ལྡན་དང་བཅས་པ། དང་པོ་ནི། འདོད་པ་ལས་བསྐྱོད་པའི་དང་པོའོ། །ཉེ་བར་བསྒྲུབ་པ་ནི་ཉེར་བསྡོགས་ལ་བརྟེན་ཏེ་གསར་དུ་བསྒྲུབ་པ། གནས་པ་ནི་ཕྱིས་ཡང་དང་ཡང་དུ་སྙོམས་པར་འཇུག་པའོ། །དེས་ན་བསམ་གཏན་དང་པོའི་དངོས་གཞིའི་མཚན་ཉིད། རྟོག་དཔྱོད་གང་རུང་གཉེན་པོའི་ཡན་ལག་གིས་འདོད་པ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག དབེན་པ་ལས་སྐྱེས་པའི་དགའ་བདེ་ཕན་ཡོན་གྱི་ཡན་ལག་ཏུ་ལྡན་པའོ། །སངས་རྒྱས་ཀྱི་ས་ལམ་ཁྱབ་པ་སྤང་བའི་ཆེད་དུ་དེའི་རིགས་སུ་གནས་པའི་དངོས་གཞིའི་སྙོམས་འཇུག་ཞེས་སྦྱར་ཞིང་། འོག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །རྟོག་དཔྱོད་གང་རུང་ཞེས་པའི་དོན་ནི་བསམ་གཏན་དང་པོའི་དངོས་གཞི་ལ་རང་གི་ཡན་ལག་རགས་པ་སྤངས་མ་སྤངས་ཀྱི་ཁྱད་པར་གྱིས་དངོས་གཞི་ཙམ་པོ་དང་། ཁྱད་པར་ཅན་གཉིས་ཡོད་པ་ལས་དངོས་གཞི་ཙམ་པོའི་སྐབས་སུ་རྟོག་དཔྱོད་གཉིས་ཀ་ལྡན་ཡང་དངོས་གཞི་ཁྱད་པར་ཅན་གྱི་སྐབས་སུ་རྟོག་པ་མེད་ཅིང་དཔྱོད་པ་ཙམ་དང་ལྡན་པས་དེ་སྐད་དུ་སྨོས་སོ། །བསམ་གཏན་གཉིས་པའི་དངོས་གཞི་ཤེར་ཕྱིན་ལས་གསུངས་པའི་དོན་ཉན་ས་ལས་འགྲེལ་པའི་ཚུལ་ནི། དེ་རྣམ་པར་རྟོག་པ་དང་རྣམ་པར་དཔྱོད་པ་ཐམས་ཅད་ཉེ་བར་ཞི་ནས་ཞེས་པ་ནི་རྟོག་དཔྱོད་དང་བཅས་པའི་ཏིང་ངེ་འཛིན་ནི་མི་བརྟན་པ་ཡིན་པས་དེ་དང་བྲལ་ཏེ་རྟོག་དཔྱོད་སྤངས་པའི་ཏིང་ངེ་འཛིན་བརྟན་པ་ལ་ཞུགས་པའོ། །ནང་ཡོངས་སུ་དང་སྟེ་ཞེས་པ་ནི་དེས་སེམས་ཞི་བར་བྱེད་པ་དང་། དྭང་བར་བྱེད་པའི་དོན་ནོ། །སེམས་ཀྱི་རྒྱུད་གཅིག་ཏུ་གྱུར་པས་ཞེས་བྱ་བ་ནི་སྒོམ་པ་ངང་དུ་གྱུར་པས་དེ་ལ་རྟོག་དཔྱོད་ཀྱིས་བར་དུ་གཅོད་མི་ནུས་པའོ། །རྟོག་པ་མེད་ཅིང་དཔྱོད་པ་མེད་པ་ཞེས་བྱ་བ་ནི་དེ་སྤངས་པའོ། །ཏིང་ངེ་འཛིན་ནི་བསམ་གཏན་དང་པོ་ལ་འདོད་ཆགས་དང་བྲལ་བར་བྱེད་པའི་ཡིད་བྱེད་དྲུག་པ་ཡིན་ལ། དེ་ལས་བྱུང་བ་ནི་དེའི་མཇུག་ཐོགས་སུ་བྱུང་བའོ། །དགའ་བ་མན་ཆད་ཀྱི་དོན་ནི་སྔར་བཞིན་ནོ། །དེས་ན་བསམ་གཏན་གཉིས་པའི་དངོས་གཞིའི་སྙོམས་འཇུག་གི་མཚན་ཉིད། ནང་རབ་ཏུ་དྭང་བ་གཉེན་པོའི་ཡན་ལག་གིས་དཔྱོད་པ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག ཏིང་ངེ་འཛིན་ལས་སྐྱེས་པའི་དགའ་བདེ་ཕན་ཡོན་གྱི་ཡན་ལག་ཏུ་ལྡན་པའོ། །བསམ་གཏན་གསུམ་པའི་དངོས་གཞི་ཤེར་ཕྱིན་ལས་གསུངས་པའི་དོན་ཉན་ས་ལས་འགྲེལ་པའི་ཚུལ་ནི། དེ་དགའ་བ་ལ་འདོད་ཆགས་དང་བྲལ་བས་ཞེས་བྱ་བ་ནི་དེའི་མཚན་མ་ལ་སྐྱོན་དུ་ལྟ་བའོ། །བཏང་སྙོམས་སུ་གནས་ཏེ་ཞེས་པ་ནི་སེམས་རྒྱུན་དུ་བཏང་སྙོམས་སུ་གནས་པའི་གེགས་བསམ་གཏན་དང་པོའི་རྟོག་དཔྱོད་དང་གཉིས་པའི་དགའ་བ་དང་བྲལ་བས་རྒྱུན་དུ་བཏང་སྙོམས་ལ་གནས་པའོ། །དྲན་པ་དང་ཤེས་བཞིན་དུ་ཞེས་པའི་དོན་ནི་སེམས་རྒྱུན་དུ་བཏང་སྙོམས་ལ་གནས་པ་ན་དགའ་བའི་འདུ་ཤེས་མི་འབྱུང་བའི་ཆེད་དུ་དྲན་པ་ཉེ་བར་གནས་པར་བྱེད་ཅིང་། བརྗེད་ངས་པའི་དབང་གིས་བརྒྱ་ལམ་ན་དགའ་བའི་འདུ་ཤེས་བྱུང་བ་ན་ཤེས་བཞིན་གྱིས་སོ་སོར་རྟོག་པར་བྱེད་ཅིང་སྤོང་བར་བྱེད་པའོ། །བདེ་བ་ལུས་ཀྱི་མྱོང་ལ་ཞེས་པའི་དོན་ནི་གཟུགས་ཀྱི་ལུས་ཀྱིས་ཚོར་བ་བདེ་བ་དང་། ཡིད་ཀྱི་ལུས་ཀྱིས་ཤིན་ཏུ་སྦྱངས་པའི་བདེ་བ་སོ་སོར་མྱོང་བའོ། །འཕགས་པ་རྣམས་ཀྱིས་ཞེས་སོགས་ཀྱི་དོན་ནི་བསམ་གཏན་གཉིས་པ་མན་ཆད་ལ་ནི་བདེ་བ་དེ་ལྟ་བུ་ཡང་མེད་ལ་རྒྱུན་དུ་བཏང་སྙོམས་ལ་གནས་པ་ཡང་མེད། བཞི་པ་ཡན་ཆད་ལ་ནི་བཏང་སྙོམས་ཡོད་ཀྱང་བདེ་བ་དེ་ལྟ་བུ་མེད་པས་བསམ་གཏན་གསུམ་པ་ཁོ་ན་ལ་འཕགས་པ་རྣམས་ཀྱིས་དེ་སྐད་དུ་བརྗོད་པའོ། །འཕགས་པ་ནི་སངས་རྒྱས་དང་། སངས་རྒྱས་ཀྱི་ཉན་ཐོས་རྣམས་སོ། །དགའ་བ་མེད་པའི་ཞེས་བྱ་བ་ནི་དྲན་པ་དང་ཤེས་བཞིན་གྱི་སྟོབས་ཀྱིས་དགའ་བའི་ཚོར་བ་སྤངས་པའོ། །བསམ་གཏན་གསུམ་པ་ཞེས་པ་མན་ཆད་ཀྱི་དོན་ནི་སྔར་བཞིན་ནོ། །དེས་ན་བསམ་གཏན་གསུམ་པའི་དངོས་གཞིའི་སྙོམས་འཇུག་གི་མཚན་ཉིད། གཉེན་པོའི་ཡན་ལག་དྲན་ཤེས་བཞིན་བཏང་སྙོམས་གསུམ་གྱིས་དགའ་བ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག དགའ་བ་སྤངས་པའི་སེམས་བདེ་ཕན་ཡོན་གྱི་ཡན་ལག་ཏུ་ལྡན་པའོ། །བསམ་གཏན་བཞི་པའི་དངོས་གཞི་ཤེར་ཕྱིན་ལས་གསུངས་པའི་དོན་ཉན་ས་ལས་འགྲེལ་པའི་ཚུལ་ནི། དེ་བདེ་བ་ཡང་སྤངས་ཞེས་པའི་དོན་ནི་བསམ་གཏན་གསུམ་པའི་ཡན་ལག་ཏུ་གྱུར་པའི་བདེ་བ་ད་ལྟ་ཉིད་དུ་སྤངས་པའི་དོན་ནོ། །སྡུག་བསྔལ་དང་ཡིད་བདེ་བ་དང་མི་བདེ་བ་སྔ་ནས་ནུབ་ཞེས་པའི་དོན་ནི། ཡིད་མི་བདེ་བ་བསམ་གཏན་དང་པོ་ནས་སྤངས། སྡུག་བསྔལ་བསམ་གཏན་གཉིས་པ་ནས་སྤངས། ཡིད་བདེ་བསམ་གཏན་གསུམ་པ་ནས་སྤངས་པའི་དོན་ནོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་ཞེས་པ་ནི་ཚོར་བར་བཏང་སྙོམས་ཁོ་ན་ཕན་ཡོན་གྱི་ཡན་ལག་ཏུ་ལྡན་པའོ། །བཏང་སྙོམས་དང་དྲན་པ་ནི་གཉེན་པོའི་ཡན་ལག་ཡིན་ལ། དེ་ལ་ཡོངས་སུ་དག་པ་ཞེས་སྨོས་པའི་དོན་ནི་བསམ་གཏན་གྱི་སྐྱོན་བརྒྱད་ལས་གྲོལ་བའི་ཕྱིར་རོ། །བཏང་སྙོམས་འདི་ནི་འདུ་བྱེད་བཏང་སྙོམས་སོ། །ལྷག་མ་རྣམས་ནི་སྔར་བཞིན་ནོ། །དེས་ན་བསམ་གཏན་བཞི་པའི་དངོས་གཞིའི་སྙོམས་འཇུག་གི་མཚན་ཉིད། དྲན་པ་དང་བཏང་སྙོམས་ཡང་དག་གཉེན་པོའི་ཡན་ལག་གིས་བདེ་བ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག ཚོར་བ་བཏང་སྙོམས་ཕན་ཡོན་གྱི་ཡན་ལག་ཏུ་ལྡན་པའོ། །གཉིས་པ་ཡན་ལག་གི་རྣམ་བཞག་ལ་གསུམ་སྟེ། ཡན་ལག་གི་དབྱེ་བ། ཡན་ལག་ཏུ་འགྱུར་ཚུལ། ཡན་ལག་སོ་སོའི་ངོ་བོའོ། །དང་པོ་ནི། ཀུན་བཏུས་ལས། བསམ་གཏན་དང་པོ་ལ་ཡན་ལག་ལྔ་སྟེ། ཡན་ལག་ལྔ་ནི་རྟོག་པ་དང་། དཔྱོད་པ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་ཉིད་དོ། །གཉིས་པ་ལ་ཡན་ལག་བཞི་སྟེ། ཡན་ལག་བཞི་ནི་ནང་རབ་ཏུ་དྭང་བ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་ཉིད་དོ། །གསུམ་པ་ལ་ཡན་ལག་ལྔ་སྟེ། ཡན་ལག་ལྔ་ནི། དྲན་པ་དང་། ཤེས་བཞིན་དང་། བཏང་སྙོམས་དང་། བདེ་བ་དང་། སེམས་རྩེ་གཅིག་པ་ཉིད་དོ། །བཞི་པ་ལ་ཡན་ལག་བཞི་སྟེ། ཡན་ལག་བཞི་ནི། བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་དང་། བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་དང་། སེམས་རྩེ་གཅིག་པ་ཉིད་དོ་ཞེས་གསུངས་སོ། །མཛོད་ལས་ཀྱང་དེ་ལྟར་དུ་གསུངས་ཏེ། ལུང་ནི་སྔར་དྲངས་ཟིན་ཏོ། །གཉིས་པ་ནི། དང་པོའི་རྟོག་དཔྱོད་གཉིས། གཉིས་པའི་ནང་རབ་ཏུ་དྭང་བ། གསུམ་པའི་དྲན་ཤེས་བཞིན་བཏང་སྙོམས་གསུམ། བཞི་པའི་དྲན་པ་ཡོངས་དག་དང་། བཏང་སྙོམས་ཡོངས་དག་རྣམས་ནི། རང་རང་གི་གཉེན་པོའི་ཡན་ལག་ཡིན་ཏེ། རང་རང་གི་འོག་ས་ལ་འདོད་ཆགས་དང་བྲལ་བར་བྱེད་པའི་ལམ་ཡིན་པའི་ཕྱིར། དངོས་གཞིའི་དུས་སུ་འོག་ས་ལ་འདོད་ཆགས་དང་བྲལ་ཟིན་པས་གཉེན་པོར་མི་འཐད་དོ་ཞེ་ན། སྐྱོན་མེད་དེ། དངོས་གཞིའི་དུས་སུ་འོག་སའི་ཐག་བསྲིང་བའི་གཉེན་པོ་བྱེད་ལ། ཉེར་བསྡོགས་ཀྱི་གནས་སྐབས་སུ་འོག་ས་ལ་འདོད་ཆགས་དང་བྲལ་བར་བྱེད་པའི་གཉེན་པོ་དངོས་བྱེད་པའི་ཕྱིར། དང་པོ་གཉིས་ཀྱི་དགའ་བདེ། གསུམ་པའི་བདེ་བ། བཞི་པའི་ཚོར་བ་བཏང་སྙོམས་རྣམས་ནི་ཕན་ཡོན་གྱི་ཡན་ལག་ཡིན་ཏེ། རང་རང་གི་འོག་ས་ལ་འདོད་ཆགས་དང་བྲལ་བར་བྱས་པའི་སྟོབས་ཀྱིས་ཐོབ་པའི་ཕྱིར་དང་། བསམ་གཏན་ལ་གནས་པའི་གང་ཟག་དེ་ལུས་སེམས་བདེ་བར་བྱེད་པའི་ཕྱིར། བཞི་ཀའི་ཏིང་ངེ་འཛིན་གནས་ཀྱི་ཡན་ལག་ཡིན་ཏེ། སྔར་བཤད་པའི་གཉེན་པོའི་ཡན་ལག་དང་། ཕན་ཡོན་གྱི་ཡན་ལག་གཉིས་ཀ་ཡང་དེ་ལ་བརྟེན་པའི་ཕྱིར་རོ། །ཇི་སྐད་དུ། རྒྱལ་པོའི་སྲས་ལས། གང་གི་དབང་དུ་བྱས་ནས་ཆོས་གཞན་དག་ཀྱང་ཡོད་བཞིན་དུ་རྟོག་པ་ལ་སོགས་པ་ཁོ་ན་བསམ་གཏན་རྣམས་ལ་ཡན་ལག་ཉིད་དུ་རྣམ་པར་བཞག་ཅེ་ན། དེ་ཙམ་གྱིས་གཉེན་པོ་དང་། ཕན་ཡོན་དང་། དེ་གཉིས་ཀའི་གནས་ཀྱི་ཡན་ལག་ཡོངས་སུ་རྫོགས་པའི་ཕྱིར་རོ། །བསམ་གཏན་དང་པོ་ལ་རྟོག་པ་དང་དཔྱོད་པ་ནི་གཉེན་པོའི་ཡན་ལག་སྟེ། དེ་གཉིས་ཀྱིས་འདོད་པ་དང་གནོད་སེམས་དང་འཚེ་བའི་རྣམ་པར་རྟོག་པ་ལ་སོགས་པ་སྤོང་བའི་ཕྱིར་རོ། །དགའ་བ་དང་། བདེ་བ་ནི་ཕན་ཡོན་གྱི་ཡན་ལག་སྟེ། རྟོག་པ་དཔྱོད་པ་གཉིས་ཀྱིས་གཉེན་པོ་བྱས་པའི་མི་མཐུན་ཕྱོགས་དེ་ལས་དབེན་པ་ལས་སྐྱེས་པའི་དགའ་བ་དང་བདེ་བ་ཐོབ་པའི་ཕྱིར་རོ། །སེམས་རྩེ་གཅིག་པ་ཉིད་ནི་དེ་གཉིས་ཀའི་གནས་ཀྱི་ཡན་ལག་སྟེ། ཏིང་ངེ་འཛིན་ལ་བརྟེན་པའི་སྟོབས་ཀྱིས་རྟོག་པ་ལ་སོགས་པ་འཇུག་པའི་ཕྱིར་རོ་ཞེས་གསུང་ཞིང་། དེ་བཞིན་དུ་བསམ་གཏན་གཉིས་པ་སོགས་ལ་ཡང་སྦྱར་ནས་གསུངས་སོ། །གསུམ་པ་ནི། བསམ་གཏན་དང་པོའི་ཡན་ལག་ཏུ་གྱུར་པའི་རྟོག་པ་ནི། འདོད་པ་ལ་རགས་པ་དང་བསམ་གཏན་དང་པོ་ལ་ཞི་བའི་རྣམ་པར་ལྟ་བའི་སེམས་བྱུང་ངོ་། །དཔྱོད་པ་ནི་དེའི་རྗེས་སུ་ཉོན་མོངས་པ་མང་ཉུང་དང་ཚེ་རིང་ཐུང་སོགས་ཞིབ་མོར་དཔྱོད་པའི་སེམས་བྱུང་ངོ་། །གཉིས་པའི་ནང་རབ་ཏུ་དྭང་བ་ནི་བྱེ་བྲག་ཏུ་སྨྲ་བས་བསམ་གཏན་གྱི་ས་ལས་ངེས་པར་འབྱུང་བའི་དད་པ་ལ་འདོད་དེ། མཛོད་ལས། རབ་ཏུ་དྭང་བ་དད་པ་ཡིན། །ཞེས་སོ། །སེམས་ཙམ་པས་དྲན་ཤེས་བཞིན་བཏང་སྙོམས་གསུམ་ལ་འདོད་དེ། གཏན་ལ་དབབ་པ་བསྡུ་བ་ལས། ནང་རབ་ཏུ་དྭང་བའི་ངོ་བོ་ནི་དྲན་པ་དང་། ཤེས་བཞིན་དང་། བཏང་སྙོམས་དག་གོ །བསམ་གཏན་དང་པོ་ནི། དྲན་པ་དང་། ཤེས་བཞིན་དང་། བཏང་སྙོམས་དག་རྟོག་དཔྱོད་ཀྱིས་རྣམ་པར་དཀྲུགས་པའི་ཕྱིར་མ་སྨོས་སོ་ཞེས་སོ། །དང་པོ་གཉིས་ཀྱི་ཡན་ལག་དགའ་བ་ནི་སེམས་ཚོར་ཡིན་ཏེ། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཚོར་བ་སིམ་པར་ཉམས་སུ་མྱོང་བ་ཡིན་པའི་ཕྱིར། བདེ་བ་ནི། བྱེ་བྲག་ཏུ་སྨྲ་བས་ཤིན་ཏུ་སྦྱངས་པ་ལ་འདོད་དེ། མཛོད་ལས། ཤིན་ཏུ་སྦྱངས་པ་བདེ་བ་ཡིན། །ཞེས་གསུངས་པའི་ཕྱིར། དེ་ནི་སེམས་བྱུང་དགེ་བ་བཅུ་གཅིག་གི་ནང་ཚན་ཡིན་པས་འདུ་བྱེད་ཀྱི་ཕུང་པོའི་ཁོངས་སུ་གཏོགས་ལ། ཚོར་བ་བདེ་བར་ནི་མི་འཐད་དེ། བསམ་གཏན་ལ་མཉམ་པར་བཞག་པའི་གནས་སྐབས་ན་ལུས་ཚོར་མེད་པའི་ཕྱིར་དང་། སེམས་ཚོར་ནི་དགའ་བར་བཞག་ཟིན་པའི་ཕྱིར། གཙོ་སེམས་གཅིག་གི་འཁོར་དུ་སེམས་བྱུང་ཚོར་བ་རྫས་ཐ་དད་པ་གཉིས་ཅིག་ཆར་དུ་འབྱུང་བ་མི་སྲིད་པའི་ཕྱིར་ཞེས་ཟེར་རོ། །མདོ་སྡེ་པས་ལུས་ཚོར་ལ་འདོད་དེ། མདོ་ལས། བདེ་བ་ལུས་ཀྱིས་མྱོང་ལ་ཞེས་བཤད་པའི་ཕྱིར། ཤིན་ཏུ་སྦྱངས་པའི་བདེ་བ་ལ་འདོད་པ་མི་འཐད་དེ། བསམ་གཏན་གསུམ་པའི་གནས་སྐབས་ན་ཤིན་ཏུ་སྦྱངས་པ་སྔ་མ་ལས་ཆེས་ཁྱད་པར་དུ་འཕགས་པ་ཡོད་ཀྱང་། ཡན་ལག་དུ་མ་བཞག་པའི་ཕྱིར་རོ། །གལ་ཏེ་བྱེ་བྲག་ཏུ་སྨྲ་བས་བསམ་གཏན་གསུམ་པར་ཤིན་ཏུ་སྦྱངས་པ་དེ་ཉིད་བཏང་སྙོམས་ཀྱིས་བཅོམ་པའི་ཕྱིར་སྐྱོན་མེད་དོ་ཞེ་ན་དེ་ཡང་མི་འཐད་དེ། བཏང་སྙོམས་དེས་ཤིན་ཏུ་སྦྱངས་པ་དེ་གོང་ནས་གོང་དུ་འཕེལ་བར་བྱེད་པའི་ཕྱིར་རོ། །སེམས་ཙམ་པས་སེམས་བདེ་ལ་འདོད་དེ། གཏན་ལ་དབབ་པ་བསྡུ་བ་ལས། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཚོར་བ་སིམ་པར་ཉམས་སུ་མྱོང་བ་གཅིག་ཉིད་ཡིད་ཤེས་འཁོར་བཅས་ལ་ཕན་འདོགས་པའི་ཆ་ནས་དགའ་བ། དབང་ཤེས་འཁོར་བཅས་ལ་ཕན་འདོགས་པའི་ཆ་ནས་བདེ་བར་བཤད་ཅིང་། རྒྱལ་སྲས་མ་ལས། དེས་འཇུག་ཤེས་འཁོར་བཅས་ལ་ཕན་འདོགས་པའི་ཆ་ནས་དགའ་བ། ཀུན་གཞིའི་རྣམ་པར་ཤེས་པ་འཁོར་བཅས་ལ་ཕན་འདོགས་པའི་ཆ་ནས་བདེ་བར་བཤད་པའི་ཕྱིར། གསུམ་པའི་ཡན་ལག་ཏུ་གྱུར་པའི་དྲན་པ་ནི་དགའ་བ་མི་འབྱུང་བར་བྱ་བའི་ཕྱིར་དུ་དམིགས་རྣམ་མ་བརྗེད་པར་འཛིན་པའི་སེམས་བྱུང་ངོ་། །ཤེས་བཞིན་ནི། དགའ་བ་བྱུང་མ་བྱུང་སོ་སོར་རྟོག་པར་བྱེད་ཅིང་། བྱུང་ན་མྱུར་དུ་སྤོང་བའི་སེམས་བྱུང་ངོ་། །བཏང་སྙོམས་ནི་སེམས་རིང་དུ་གནས་པའི་འདུ་བྱེད་བཏང་སྙོམས་ཡིན་གྱིས་ཚོར་བ་ནི་མ་ཡིན་ནོ། །གསུམ་པའི་ཡན་ལག་བདེ་བ་ནི། མདོ་སྡེ་པས་ལུས་ཚོར་ལ་འདོད་དེ། མདོ་ལས། བདེ་བ་ལུས་ཀྱིས་མྱོང་ལ་ཞེས་གསུངས་པའི་ཕྱིར། བྱེ་བྲག་ཏུ་སྨྲ་བ་དང་སེམས་ཙམ་པས་སེམས་ཚོར་ལ་འདོད་དེ། བྱེ་བྲག་ཏུ་སྨྲ་བས་སྔར་གྱི་དགའ་བའི་རྒྱུན་དེ་ཉིད་དགའ་བ་ལ་འདོད་ཆགས་དང་བྲལ་བ་ཙམ་ལ་འདོད་ཅིང་། སེམས་ཙམ་པས་ནི་སྔར་གྱི་བདེ་བའི་རྒྱུན་ལ་འདོད་པའི་ཕྱིར་རོ། །བཞི་པའི་ཡན་ལག་ཏུ་གྱུར་པའི་བཏང་སྙོམས་ནི། སེམས་རྒྱུན་དུ་གནས་པའི་འདུ་བྱེད་བཏང་སྙོམས་ཡིན་ལ། དྲན་པ་ནི་བདེ་བ་མི་འབྱུང་བར་བྱ་བའི་ཕྱིར་དམིགས་རྣམ་མི་བརྗེད་པར་འཛིན་པའི་སེམས་བྱུང་ངོ་། །འོ་ན་དྲན་པ་དང་བཏང་སྙོམས་ཡན་ལག་ཏུ་སྨོས་ནས་ཤེས་བཞིན་མི་སྨོས་པའི་རྒྱུ་མཚན་ཅི་ཡིན་ཞེ་ན། ཤེས་བཞིན་ནི་མི་མཐུན་ཕྱོགས་བྱུང་མ་བྱུང་སོ་སོར་རྟོག་པར་བྱེད་ཅིང་བྱུང་ན་མྱུར་དུ་སྤོང་བར་བྱེད་པ་ཡིན་ལ། བསམ་གཏན་བཞི་པ་ནི་བསམ་གཏན་གྱི་སྐྱོན་བརྒྱད་ལས་གྲོལ་བས་མི་མཐུན་ཕྱོགས་བྱུང་མ་བྱུང་སོ་སོར་རྟོག་པར་བྱེད་མི་དགོས་པའི་ཕྱིར་མ་སྨོས་སོ། །འོ་ན་དྲན་པ་ལ་ཡང་མཚུངས་སོ་སྙམ་ན་མ་ཡིན་ཏེ། དྲན་པ་ནི་མི་མཐུན་ཕྱོགས་མི་འབྱུང་བར་བྱེད་པ་ཙམ་ཡིན་ལ་དེ་ནི་ཐག་བསྲིང་བའི་གཉེན་པོའི་གནས་སྐབས་སུ་ཡང་དགོས་ཤིང་། མི་མཐུན་ཕྱོགས་བྱུང་མ་བྱུང་སོ་སོར་རྟོག་པར་བྱེད་པ་ནི་མི་མཐུན་ཕྱོགས་འབྱུང་མི་སྲིད་པའི་གནས་སྐབས་སུ་མི་དགོས་པའི་ཕྱིར་རོ། །འོ་ན་བསམ་གཏན་དང་པོར་དྲན་ཤེས་བཞིན་བཏང་སྙོམས་གསུམ་པོ་དེ་ཡན་ལག་ཏུ་མི་སྨོས་པའི་རྒྱུ་མཚན་ཅི་ཡིན་ཞེ་ན། རྟོག་དཔྱོད་ཀྱིས་མངོན་པར་དཀྲུགས་པས་གཉེན་པོར་མི་འཐད་པའི་ཕྱིར་རོ། །གཉིས་པའི་སྐབས་སུ་གཉེན་པོར་འཐད་ཀྱང་རང་གི་མིང་གིས་མི་སྨོས་པའི་རྒྱུ་མཚན་ཡོད་དེ། དགའ་བ་ཉོན་མོངས་ཅན་གྱི་ཀུན་དཀྲིས་དང་མ་བྲལ་བས་རང་མིང་གིས་མི་ཐོབ་པའི་ཕྱིར་རོ། །གསུམ་པའི་སྐབས་སུ་རང་མིང་གིས་སྨོས་པའི་རྒྱུ་མཚན་ཡོད་དེ། དགའ་བ་ཉོན་མོངས་ཅན་གྱིས་ཀུན་དཀྲིས་དང་བྲལ་བས་རང་མིང་གིས་ཐོབ་པའི་ཕྱིར་རོ། །བཞི་པར་དྲན་པ་དང་བཏང་སྙོམས་གཉིས་ལ་ཡོངས་དག་ཞེས་སྨོས་པའི་རྒྱུ་མཚན་ཡོད་དེ། བསམ་གཏན་གྱི་སྐྱོན་བརྒྱད་ལས་གྲོལ་བའི་ཕྱིར་རོ། །བཞི་ཆར་གྱི་ཏིང་ངེ་འཛིན་ནི་སེམས་རྩེ་གཅིག་པའི་སེམས་བྱུང་ངོ་། །གཉིས་པ་ངོ་བོའི་སྒོ་ནས་དབྱེ་བ་ལ་གསུམ་སྟེ། སྙོམས་འཇུག་ཉོན་མོངས་ཅན་དང་། དག་པ་བ་དང་། ཟག་མེད་དོ། །དང་པོ་ལ་གཉིས་ཏེ། མཚན་ཉིད་དང་། དབྱེ་བའོ། །དང་པོ་ལ། ཁ་ཅིག་ན་རེ། བསམ་གཏན་གྱི་སྙོམས་འཇུག་ཉོན་མོངས་ཅན་གྱི་མཚན་ཉིད། རང་སའི་ཉོན་མོངས་པས་བཅིངས་པའི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པ་ཟེར་ན་སོ་སོ་སྐྱེ་བོའི་རྒྱུད་ཀྱི་བསམ་གཏན་གྱི་དངོས་གཞིའི་སྙོམས་འཇུག་དག་པ་བ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། རང་སའི་སྲེད་པས་བཅིངས་པའི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་ཡིན་པའི་ཕྱིར། གཏན་ཚིགས་གྲུབ་སྟེ། ཟག་བཅས་ཀྱི་ས་རྣམས་ནི་སྲེད་པས་རིས་སུ་བཅད་པ་ཡིན་པའི་ཕྱིར། དེས་ན་རང་སའི་ཉོན་མོངས་པ་དང་མཚུངས་པར་ལྡན་པའི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ལ་བཞི་སྟེ། སྲེད་པ་དང་། ལྟ་བ་དང་། ང་རྒྱལ་དང་ཐེ་ཚོམ་ཤས་ཆེ་བའི་བསམ་གཏན་གྱི་སྙོམས་འཇུག་ཉོན་མོངས་ཅན་ནོ། །དང་པོའི་མཚན་ཉིད། ཤིན་ཏུ་སྦྱངས་པའི་བདེ་བའི་རོ་མྱོང་བའི་སྲེད་པ་དང་མཚུངས་པར་ལྡན་པའི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པའི་མཚན་ཉིད། སྔོན་གྱི་མཐའ་ལ་རྟོག་པ་ལ་སོགས་པ་རང་སའི་ལྟ་བ་དང་མཚུངས་པར་ལྡན་པའི་སོགས་སོ། །གསུམ་པའི་མཚན་ཉིད། ཡོན་ཏན་མ་ཐོབ་པ་ལ་ཐོབ་བོ་སྙམ་པའི་རང་སའི་མངོན་པའི་ང་རྒྱལ་དང་སོགས་སོ། །བཞི་པའི་མཚན་ཉིད། ཐར་པ་ལ་ཡིད་གཉིས་ཟ་བ་སོགས་ཀྱི་རང་སའི་ཐེ་ཚོམ་དང་མཚུངས་པར་ལྡན་པའི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་དག་པ་བ་ལ་མཚན་ཉིད་དང་། དབྱེ་བ་གཉིས་ལས། དང་པོ་ལ་ཁ་ཅིག་ན་རེ། ཚོར་བའི་སྒོ་ནས་འོག་ས་ལས་ངེས་པར་འབྱུང་བའི་ཞི་རགས་ཀྱི་རྣམ་པ་ཅན་གྱི་བསམ་གཏན་གྱི་སས་བསྡུས་ཀྱི་སེམས་རྩེ་གཅིག་པ་མཚུངས་ལྡན་དང་བཅས་པ་ཞེས་ཟེར་ན། བདེན་པའི་རྣམ་པ་ཅན་གྱི་ཉན་ཐོས་ཀྱི་སྦྱོར་ལམ་གྱི་སེམས་རྟེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེས་ན་བསམ་གཏན་གྱི་དངོས་གཞིའི་སྙོམས་འཇུག་དག་པ་བའི་མཚན་ཉིད། ཚོར་བའི་སྒོ་ནས་འོག་ས་ལས་ངེས་པར་འབྱུང་བའི་རིགས་སུ་གནས་པའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག བདག་མེད་མངོན་སུམ་དུ་མ་རྟོགས་པའོ། །གཉིས་པ་དབྱེ་བ་ལ། ཉམས་པ་ཆ་མཐུན། གནས་པ་ཆ་མཐུན། ཁྱད་པར་ཆ་མཐུན། ངེས་འབྱེད་ཆ་མཐུན་དང་བཞི། དེ་རྣམས་ཀྱི་མཚན་ཉིད་ལ་ཁ་ཅིག རིམ་པ་ལྟར། བསམ་གཏན་གྱི་སྙོམས་འཇུག་དག་པ་བ་གང་ཞིག རང་གི་མཇུག་ཐོགས་སུ་ཉོན་མོངས་སྐྱེ་བ་དང་རྗེས་སུ་མཐུན་པ། གང་ཞིག རང་གི་མཇུག་ཐོགས་སུ་རང་རིགས་སྐྱེ་བ་དང་རྗེས་སུ་མཐུན་པ། གང་ཞིག རང་གི་མཇུག་ཐོགས་སུ་གོང་ས་སྐྱེ་བ་དང་རྗེས་སུ་མཐུན་པ། གང་ཞིག རང་གི་མཇུག་ཐོགས་སུ་ཟག་མེད་སྐྱེ་བ་དང་རྗེས་སུ་མཐུན་པ་ཞེ་ན། རང་གི་མཇུག་ཐོགས་སུ་བསམ་གཏན་གྱི་དངོས་གཞིའི་སྙོམས་འཇུག་དག་པ་བ་སྐད་ཅིག་མ་གསུམ་སྐྱེ་བར་ངེས་ཤིང་དེའི་མཇུག་ཐོགས་སུ་བསམ་གཏན་གྱི་སྙོམས་འཇུག་ཉོན་མོངས་ཅན་སྐྱེ་བ་དང་རྗེས་སུ་མཐུན་པའི་བསམ་གཏན་གྱི་སྙོམས་འཇུག་དག་པ་བ་ཆོས་ཅན། ཉམས་པ་ཆ་མཐུན་དུ་ཐལ། མཚན་ཉིད་དེའི་ཕྱིར། འདོད་ན། གནས་པ་ཆ་མཐུན་དུ་ཐལ། མཚན་ཉིད་དེའི་ཕྱིར། འདོད་ན། འགལ་ལོ། །རང་གི་མཇུག་ཐོགས་སུ་གོང་སའི་ཟག་མེད་སྐྱེ་བ་དང་རྗེས་སུ་མཐུན་པའི་བསམ་གཏན་གྱི་སྙོམས་འཇུག་དག་པ་བ་ཆོས་ཅན། ཁྱད་པར་ཆ་མཐུན་དུ་ཐལ། མཚན་ཉིད་དེའི་ཕྱིར། འདོད་ན། ངེས་འབྱེད་ཆ་མཐུན་དུ་ཐལ། མཚན་ཉིད་དེའི་ཕྱིར། འདོད་ན་འགལ་ལོ། །དེས་ན་རིམ་པ་བཞིན། བསམ་གཏན་གྱི་སྙོམས་འཇུག་དག་པ་བ་གང་ཞིག རང་གི་རྒྱུན་རྫོགས་པའི་མཇུག་ཐོགས་དེ་མ་ཐག་ཏུ་ཉོན་མོངས་ཅན་གྱི་སྙོམས་འཇུག་སྐྱེ་བ་དང་རྗེས་སུ་མཐུན་པ། གང་ཞིག རང་གི་མཇུག་ཐོགས་དེ་མ་ཐག་ཏུ་རང་སའི་དག་པ་བ་སྐྱེ་བ་དང་རྗེས་སུ་མཐུན་ཅིང་། དེའི་རྒྱུན་རྫོགས་པའི་ཚེ་རྗེས་ཐོབ་ལ་གནས་པར་འགྱུར་བ། གང་ཞིག རང་གི་རྒྱུན་རྫོགས་པའི་མཇུག་ཐོགས་དེ་མ་ཐག་ཏུ་གོང་སའི་དག་པ་བ་སྐྱེ་བ་དང་རྗེས་སུ་མཐུན་པ། གང་ཞིག རང་གི་རྒྱུན་རྫོགས་པའི་མཇུག་ཐོགས་དེ་མ་ཐག་ཏུ་ཟག་མེད་སྐྱེ་བ་དང་རྗེས་སུ་མཐུན་པའོ། །གསུམ་པ་བསམ་གཏན་གྱི་སྙོམས་འཇུག་ཟག་མེད་ཀྱི་མཚན་ཉིད། ཚོར་བའི་སྒོ་ནས་འོག་ས་ལས་ངེས་པར་འབྱུང་བའི་རིགས་སུ་གནས་པའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག བདག་མེད་མངོན་སུམ་དུ་རྟོགས་པའོ། །གསུམ་པ་གྲངས་ངེས་ནི། སོ་སོ་སྐྱེ་བོའི་རྒྱུད་ཀྱི་སྙོམས་འཇུག་དེ་ལ་བསམ་གཏན་གྱི་སྙོམས་འཇུག་དང་། གཟུགས་མེད་ཀྱི་སྙོམས་འཇུག་གཉིས་སུ་གྲངས་ངེས་ཏེ། སོ་སོ་སྐྱེ་བོ་རྣམས་ནི་རྩོད་པའི་རྩ་བ་ལས་ངེས་པར་འབྱུང་བའི་ཕྱིར་དུ་སྙོམས་པར་འཇུག་པ་ཡིན་ཅིང་། རྩོད་པའི་རྩ་བ་དེ་ལ། ཚོར་བ་དང་། འདུ་ཤེས་གཉིས་སུ་ངེས་ལ། ཚོར་བས་ངེས་པར་འབྱུང་བའི་དབང་དུ་བྱས་ནས་བསམ་གཏན། འདུ་ཤེས་ཀྱིས་ངེས་པར་འབྱུང་བའི་དབང་དུ་བྱས་ནས་གཟུགས་མེད་ཀྱི་སྙོམས་འཇུག་བཞག་པའི་ཕྱིར་རོ། །རྩོད་པའི་རྩ་བ་ལ་གཉིས་སུ་ངེས་ཏེ། ཁྱིམ་པ་རྣམས་ནི་ཚོར་བ་བདེ་སྡུག་གི་དབང་གི་རྩོད་པར་བྱེད། རབ་ཏུ་བྱུང་བ་རྣམས་ནི་འདུ་ཤེས་ཕྱིན་ཅི་ལོག་མ་ལོག་གི་དབང་གིས་རྩོད་པར་བྱེད་པའི་ཕྱིར་ཏེ། མཛོད་ལས། རྩོད་པའི་རྩ་བར་གྱུར་པ་དང་། །འཁོར་བའི་རྒྱུ་ཕྱིར་རིམ་རྒྱུའི་ཕྱིར། །སེམས་བྱུང་རྣམས་ལས་ཚོར་བ་དང་། །འདུ་ཤེས་ལོགས་ཤིག་ཕུང་པོར་བཞག །ཅེས་གསུངས་པའི་ཕྱིར། ཚོར་བས་ངེས་པར་འབྱུང་བའི་དབང་དུ་བྱས་ནས་བསམ་གཏན་གྱི་སྙོམས་འཇུག་དེ་ལ་ཡང་བཞིར་ངེས་ཏེ། ཚོར་བ་དེ་ལ་སྡུག་བསྔལ་དང་། བདེ་བ་གཉིས། དེ་གཉིས་ལ་རགས་པ་དང་ཕྲ་བ་གཉིས་གཉིས་ཏེ་བཞི་ཡོད་ཅིང་། དེ་དག་ལས་རིམ་གྱིས་ངེས་པར་འབྱུང་བའི་དབང་དུ་བྱས་ནས་བསམ་གཏན་གྱི་སྙོམས་འཇུག་བཞི་པོ་རིམ་པ་བཞིན་དུ་བཞག་པའི་ཕྱིར་རོ། །བཞི་པ་མི་མཐུན་ཕྱོགས་ལ་ཆེན་པོ་དང་། འབྲིང་དང་། ཆུང་ངུ་གསུམ་ལས། འདོད་པ་ལ་འདུན་པ་དང་། རྣམ་འཚེ་གཉིས་ནི་བསམ་གཏན་གྱི་མི་མཐུན་ཕྱོགས་ཆེན་པོ་ཡིན་ཏེ། བསམ་གཏན་ཙམ་སྐྱེ་བ་ལ་གེགས་བྱེད་པའི་ཕྱིར། རྟོག་དཔྱོད་གཉིས་ནི་མི་མཐུན་ཕྱོགས་འབྲིང་པོ་ཡིན་ཏེ། བསམ་གཏན་ཐོབ་ཟིན་ཁྱད་པར་དུ་འགྱུར་བ་ལ་གེགས་བྱེད་པའི་ཕྱིར། དགའ་བདེ་གཉིས་ནི་མི་མཐུན་ཕྱོགས་ཆུང་ངུ་ཡིན་ཏེ། སེམས་གནས་པ་ལས་རུང་དུ་བྱེད་པ་ལ་གེགས་བྱེད་པའི་ཕྱིར། ལྔ་པ་ཁྱད་པར་ལ་དཔྱད་པ་ལ། སྤང་བྱའི་ཁྱད་པར་དང་། ཚོར་བས་ངེས་པར་འབྱུང་བའི་ཁྱད་པར་གཉིས་ལས། དང་པོ་ནི། བསམ་གཏན་དང་པོ་དང་། གཉིས་པ་ལ། རྟོག་དཔྱོད་སྤངས་པ་དང་མ་སྤངས་པའི་བྱེ་བྲག་གིས། གཉེན་པོའི་ཡན་ལག་ཡོངས་སུ་རྫོགས་པ་དང་མ་རྫོགས་པའི་ཁྱད་པར་ཡོད། གཉིས་པ་དང་གསུམ་པ་ལ་དགའ་བ་སྤངས་མ་སྤངས་ཀྱི་བྱེ་བྲག་གིས་ཕན་ཡོན་གྱི་ཡན་ལག་ཡོངས་སུ་རྫོགས་མ་རྫོགས་ཀྱི་ཁྱད་པར་ཡོད། གསུམ་པ་དང་བཞི་པ་ལ་བདེ་བ་སྤངས་མ་སྤངས་ཀྱི་བྱེ་བྲག་གིས་ཏིང་ངེ་འཛིན་རྫོགས་མ་རྫོགས་ཀྱི་ཁྱད་པར་ཡོད་དོ། །གཉིས་པ་ནི། བྱིས་པ་རྣམས་ཀྱིས་ཚོར་བ་བཏང་སྙོམས་ལས་ངེས་པར་འབྱུང་མི་ནུས་པས་ན་འདིས་ངེས་པར་འབྱུང་བར་བྱ་བའི་ཚོར་བ་དེ་ལ་ཡིད་མི་བདེ་དང་། སྡུག་བསྔལ་དང་། ཡིད་བདེ་དང་། བདེ་བ་བཞི་ཡོད་པས། དེ་བཞི་རིམ་པ་བཞིན་དུ་སྤངས་མ་སྤངས་ཀྱི་ཁྱད་པར་ཡོད་དོ། །དྲུག་པ་དམིགས་རྣམ་ལ་དཔྱད་པ་ལ། སྙོམས་འཇུག་ཉོན་མོངས་ཅན་གྱི་དམིགས་རྣམ་ལ་དཔྱད་པ་དང་། དག་པ་བ་དང་ཟག་མེད་ཀྱི་དམིགས་རྣམ་ལ་དཔྱད་པ་དང་གཉིས་ལས། དང་པོ་ལ་མཛོད་ཀྱི་ལུགས་དང་། ཀུན་བཏུས་ཀྱི་ལུགས་གཉིས། དང་པོ་ནི། ཁ་ཆེ་བྱེ་བྲག་ཏུ་སྨྲ་བ་རྣམས་ཀྱིས་སྙོམས་འཇུག་ཉོན་མོངས་ཅན་ཐམས་ཅད་ཀྱང་སྲེད་པ་ཤས་ཆེ་བའི་སྙོམས་འཇུག་ཁོ་ནར་འདོད་དེ། སྙོམས་འཇུག་དེ་ལ་རོ་མྱོང་མཚུངས་ལྡན་དང་། དག་པ་བ་དང་། ཟག་མེད་གསུམ་དུ་ཕྱེ་ནས་རོ་མྱོང་མཚུངས་ལྡན་སྲེད་བཅས་སོ་ཞེས་གསུངས་པའི་ཕྱིར་རོ། །དེས་ན་སྲེད་པ་ཤས་ཆེ་བའི་སྙོམས་འཇུག་དེས་འོག་ས་ལ་དམིགས་པ་མེད་དེ། དེས་གང་ལ་དམིགས་པའི་ཡུལ་དེ་ལ་སྲེད་དགོས་ཤིང་། འོག་ས་ལ་འདོད་ཆགས་དང་བྲལ་ཟིན་པའི་ཕྱིར་རོ། །གོང་ས་ལ་དམིགས་པ་མེད་དེ། ཟག་བཅས་ཀྱི་ས་རྣམས་ནི་སྲེད་པས་རིས་སུ་བཅད་པ་ཡིན་པའི་ཕྱིར་རོ། །ཟག་མེད་ལ་དམིགས་པ་མེད་དེ། དེས་གང་ལ་དམིགས་པའི་ཡུལ་དེ་ལ་འདོད་པའི་ཚུལ་གྱིས་དམིགས་དགོས་ཤིང་ཟག་མེད་ལ་འདོད་པའི་ཚུལ་གྱིས་དམིགས་པའི་བློ་ཡིན་ན་དགེ་བ་ཡིན་ནོ་ཞེས་གསུངས་པའི་ཕྱིར་རོ། །དེས་ན་རང་སའི་ཟག་བཅས་ཁོ་ན་ལ་དམིགས་པའི་དབང་དུ་བྱས་ནས་སྲེད་བཅས་རང་གི་སྲིད་ལ་དམིགས་ཞེས་གསུངས་སོ། །གཉིས་པ་ཀུན་བཏུས་ཀྱི་ལུགས་ནི། སྙོམས་འཇུག་ཉོན་མོངས་ཅན་གྱིས་གོང་ས་ལ་དམིགས་པ་ཡོད་དེ། ང་རྒྱལ་ཤས་ཆེ་བའི་སྙོམས་འཇུག་དེས་གོང་མའི་ཡོན་ཏན་མ་ཐོབ་པ་ལ་ཐོབ་བོ་སྙམ་དུ་རློམས་པའི་ཕྱིར་རོ། །འོག་ས་ལ་དམིགས་པ་ཡོད་དེ། ལྟ་བ་ཤས་ཆེ་བའི་སྙོམས་འཇུག་དེས་འོག་མའི་སེམས་ཅན་ལ་དམིགས་ནས་བདག་ཉིད་དེ་ལས་ཁྱད་པར་དུ་འཕགས་པར་འཛིན་པའི་ཕྱིར་རོ། །ཟག་མེད་ལ་དམིགས་པ་ཡོད་དེ། ཐེ་ཚོམ་ཤས་ཆེ་བའི་སྙོམས་འཇུག་དེས་ཐར་པ་ལ་དམིགས་ནས་ཡིད་གཉིས་ཟ་བའི་ཕྱིར་རོ། །སྲེད་པ་ཤས་ཆེ་བའི་སྙོམས་འཇུག་གིས་ནི། འདིའི་ལུགས་ལ་ཡང་རང་སའི་ཟག་བཅས་ཁོ་ན་ལ་དམིགས་སོ། །ཁྱད་པར་ཕྱེད་པ་གལ་ཆེའོ། །གཉིས་པ་སྙོམས་འཇུག་དག་པ་བ་དང་། ཟག་མེད་ཀྱི་དམིགས་རྣམ་ལ་དཔྱད་པ་ནི། བསམ་གཏན་གྱི་དངོས་གཞི་དག་པ་བ་དང་། ཟག་མེད་གཉིས་ཀས་ཀྱང་རང་ས་གོང་ས་འོག་སའི་ཟག་བཅས་ཐམས་ཅད་དང་། ཟག་མེད་ཐམས་ཅད་ལ་དམིགས་ཏེ། མཛོད་ལས། བསམ་གཏན་དགེ་ཡུལ་ཡོད་དགུ་ཡིན། །ཞེས་གསུངས་པའི་ཕྱིར། བཞི་པ་ཐོབ་ཚུལ་ནི། རྣལ་འབྱོར་པ་རྣམས་ཀྱིས་དང་པོར་འདོད་པ་ལ་འདུན་པ་དང་། རྣམ་འཚེ་གཉིས་པོ་སྡུག་བསྔལ་གྱི་རྩ་བར་མཐོང་ནས་རྟོག་དཔྱོད་གཉིས་ཀྱིས་དེ་སྤོང་བ་ལ་ཞུགས་ཏེ་སྤངས་པའི་ཚེ་བསམ་གཏན་དང་པོའི་དངོས་གཞི་ཐོབ། དེའི་འོག་ཏུ་རྟོག་དཔྱོད་གཉིས་པོ་ཡང་སེམས་རྣམ་པར་དཀྲུགས་པར་བྱེད་པས་ཏིང་ངེ་འཛིན་གྱི་སྐྱོན་དུ་མཐོང་ནས་ནང་རབ་ཏུ་དྭང་བས་དེ་སྤོང་བ་ལ་ཞུགས་ཏེ་སྤངས་པའི་ཚེ་བསམ་གཏན་གཉིས་པའི་དངོས་གཞི་ཐོབ། དེའི་འོག་ཏུ་དགའ་བ་ཡང་ཡིད་གཡོ་བར་བྱེད་པས་ཏིང་ངེ་འཛིན་གྱི་སྐྱོན་དུ་མཐོང་ནས་དྲན་ཤེས་བཞིན་བཏང་སྙོམས་གསུམ་གྱིས་དེ་སྤོང་བ་ལ་ཞུགས་ཏེ་སྤངས་པའི་ཚེ་བསམ་གཏན་གསུམ་པའི་དངོས་གཞི་ཐོབ། དེའི་འོག་ཏུ་བདེ་བ་ཡང་སེམས་ལ་འགྱུར་བ་བསྐྱེད་པར་བྱེད་པས་ཏིང་ངེ་འཛིན་གྱི་སྐྱོན་དུ་མཐོང་ནས་བཏང་སྙོམས་ཡོངས་དག་དང་། དྲན་པ་ཡོངས་དག་གིས་དེ་སྤོང་བ་ལ་ཞུགས་པས་སྤངས་པའི་ཚེ་བསམ་གཏན་བཞི་པའི་དངོས་གཞི་ཐོབ་བོ། །ལྔ་པ་ཐོབ་པའི་རྟགས་ནི། ཉན་ས་ལས། བསམ་གཏན་གྱི་ཏིང་ངེ་འཛིན་ཐོབ་པའི་ཚེ་ལུས་ས་ལ་འབྱིངས་བ་ལྟ་བུའི་རྟགས་འབྱུང་བར་གསུངས་སོ། །གཉིས་པ་འབྲས་བུ་སྐྱེ་བའི་བསམ་གཏན་བཤད་པ་ལ་གཉིས་ཏེ། མཚན་ཉིད་དང་། དབྱེ་བའོ། །དང་པོ་ནི། ཁ་ཅིག རྒྱུ་སྙོམས་འཇུག་གི་བསམ་གཏན་བསྒོམས་སྟོབས་ཀྱིས་གཟུགས་ཁམས་སུ་ཐོབ་པའི་རྣམ་སྨིན་གྱི་འབྲས་བུའོ་ཞེས་ཟེར་བ་ནི་མི་འཐད་དེ། གཟུགས་ཁམས་ཀྱི་གཞལ་ཡས་ཁང་དེ་འབྲས་བུ་སྐྱེ་བའི་བསམ་གཏན་ཡིན་ཀྱང་། རྒྱུ་སྙོམས་འཇུག་གི་བསམ་གཏན་བསྒོམས་སྟོབས་ཀྱིས་ཐོབ་པའི་རྣམ་སྨིན་གྱི་འབྲས་བུ་མིན་པའི་ཕྱིར་ཏེ། དེའི་བདག་འབྲས་ཡིན་པའི་ཕྱིར། གཞན་ཡང་གཟུགས་ཁམས་སུ་སྐྱེ་བས་ཐོབ་པའི་བསམ་གཏན་གྱི་དངོས་གཞིའི་སྙོམས་འཇུག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། དགེ་བ་ཡིན་པའི་ཕྱིར་རོ། །ཁ་ཅིག རྒྱུ་སྙོམས་འཇུག་གི་བསམ་གཏན་བསྒོམས་སྟོབས་ཀྱིས་ཐོབ་པའི་ཡོན་ཏན་ཞེས་ཟེར་ན། འདོད་པའི་རྟེན་ཅན་གྱི་སོ་སྐྱེའི་རྒྱུད་ཀྱི་མངོན་ཤེས་དང་པོ་ལྔ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། འདོད་པའི་རྟེན་ཅན་གྱིས་སོ་སྐྱེའི་རྒྱུད་ཀྱི་ཡོན་ཏན་ཡིན་པའི་ཕྱིར། རང་ལུགས་ནི། རྒྱུ་སྙོམས་འཇུག་གི་བསམ་གཏན་བསྒོམས་སྟོབས་ཀྱིས་གཟུགས་ཁམས་སུ་ཐོབ་པའི་འདུས་བྱས་ཀྱི་ཆོས་སོ། །གཉིས་པ་དབྱེ་བ་ལ། ངོ་བོའི་སྒོ་ནས་དབྱེ་བ་དང་། གནས་ཀྱི་སྒོ་ནས་དབྱེ་བ་གཉིས་ལས། དང་པོ་ལ། རྒྱུ་མཐུན་གྱི། རྣམ་སྨིན་གྱི། བདག་པོའི་འབྲས་བུ་དང་གསུམ། དང་པོ་ནི། གཟུགས་ཁམས་སུ་སྐྱེ་བས་ཐོབ་པའི་བསམ་གཏན་གྱི་དངོས་གཞིའི་སྙོམས་འཇུག་རྣམས་སོ། །གཉིས་པ་ནི། གཟུགས་ཁམས་པའི་གང་ཟག་གི་རྒྱུད་ཀྱི་རྣམ་སྨིན་གྱི་འབྲས་བུས་བསྡུས་པའི་ཉེར་ལེན་གྱི་ཕུང་པོ་ལྔའོ། །གསུམ་པ་ནི་གཟུགས་ཁམས་ཀྱི་གཞལ་ཡས་ཁང་ལྟ་བུའོ། །གཟུགས་ཁམས་ཀྱི་གཞལ་ཡས་ཁང་སེམས་ཅན་དང་བཅས་པ་འབྲས་བུ་སྐྱེ་བའི་བསམ་གཏན་ཡིན་པའི་རྒྱུ་མཚན་ནི་མཛོད་ཀྱི་སྙོམས་འཇུག་བསྟན་པའི་སྐབས་སུ། བསམ་གཏན་དག་ནི་རྣམ་གཉིས་བཞི། །དེར་སྐྱེ་བ་དག་རབ་ཏུ་བཤད། །ཅེས་གསུང་ཞིང་། དེའི་འགྲེལ་པར། འབྲས་བུ་སྐྱེ་བའི་བསམ་གཏན་ནི་འཇིག་རྟེན་བསྟན་པའི་སྐབས་སུ་བཤད་ཟིན་པར་གསུངས་ལ། འཇིག་རྟེན་བསྟན་པའི་སྐབས་སུ། གོང་མའི་གནས་དག་བཅུ་བདུན་ནི། །གཟུགས་ཁམས་ཡིན་དེར་སོ་སོ་ཡི། །བསམ་གཏན་ས་ནི་གསུམ་པ་ཡིན། །བཞི་པ་ས་ནི་བརྒྱད་པ་ཡིན། །ཞེས་གསུངས་ལ། དེའི་འགྲེལ་པར། དེ་ལྟར་ན་གནས་བཅུ་བདུན་པོ་འདི་དག་དེ་ན་གནས་པའི་སེམས་ཅན་རྣམས་དང་བཅས་པ་ནི་གཟུགས་ཀྱི་ཁམས་ཡིན་ནོ་ཞེས་དང་། ཀུན་བཏུས་ཀྱི་འགྲེལ་པ་རྒྱལ་པོ་སྲས་ལས། བསམ་གཏན་རྣམས་ནི་ཆུང་ངུ་དང་འབྲིང་དང་ཆེར་ཡོངས་སུ་བསྒོམ་པའི་ཕྱིར་རོ། །རེ་རེ་ལ་ཡང་བསམ་གཏན་གྱི་སྐྱེ་བ་རྣམ་པ་གསུམ་ནི་འབྲས་བུ་ཡིན་ཏེ། འདི་ལྟ་སྟེ་ཚངས་རིས་དང་ཞེས་སོགས་གསུངས་པ་ལས་ཤེས་སོ། །གཉིས་པ་གནས་ཀྱི་སྒོ་ནས་དབྱེ་ན་རྣམ་པ་བཅུ་བདུན་ཡོད་དེ། རྒྱུ་སྙོམས་འཇུག་གི་བསམ་གཏན་དང་པོ་ཆུང་ངུ་འབྲིང་ཆེན་པོ་གསུམ་བསྒོམས་པས་རིམ་པ་བཞིན་དུ་བསམ་གཏན་དང་པོའི་གནས་ཚངས་རིས་དང་ཚངས་པ་མདུན་ན་འདོན་དང་། ཚངས་ཆེན་གསུམ་གྱི་སྐྱེ་བ་འགྲུབ། གཉིས་པའི་རྒྱུ་སྙོམས་འཇུག་གི་བསམ་གཏན་ཆུང་ངུ་འབྲིང་ཆེན་པོ་གསུམ་བསྒོམས་པས་རིམ་པ་བཞིན་བསམ་གཏན་གཉིས་པའི་གནས། འོད་ཆུང་། ཚད་མེད་འོད། འོད་གསལ་གསུམ་གྱི་སྐྱེ་བ་འགྲུབ། བསམ་གཏན་གསུམ་པ་ཆུང་ངུ་འབྲིང་ཆེན་པོ་གསུམ་བསྒོམས་པས་རིམ་བཞིན་དགེ་ཆུང་། ཚད་མེད་དགེ དགེ་རྒྱས་གསུམ་གྱི་སྐྱེ་བ་འགྲུབ། བཞི་པ་ཆུང་ངུ་འབྲིང་ཆེན་པོ་གསུམ་བསྒོམས་པས་རིམ་པ་བཞིན་བསམ་གཏན་བཞི་པའི་སོ་སྐྱེའི་སྤྲིན་མེད། བསོད་ནམས་སྐྱེས། འབྲས་བུ་ཆེ་བའི་སྐྱེ་བ་གསུམ་འགྲུབ། བཞི་པ་སྤེལ་སྒོམ་ཆུང་ངུ་འབྲིང་ཆེན་པོ་ཤིན་ཏུ་ཆེན་པོ་ཤིན་ཏུ་ཆེས་ཆེན་པོ་ལྔ་སྒོམ་པས་རིམ་པ་བཞིན། འཕགས་པའི་གནས་མི་ཆེ་བ། མི་གདུང་བ། ཤིན་ཏུ་མཐོང་། གྱ་ནོམ་སྣང་། འོག་མིན་གྱི་སྐྱེ་བ་ལྔ་འགྲུབ་པའི་ཕྱིར་རོ། །འོ་ན་ཆུང་ངུ་དང་། འབྲིང་དང་། ཆེན་པོ་གསུམ་གྱི་ཁྱད་པར་གང་ཞེ་ན། གུས་སྦྱོར་དང་། རྟགས་སྦྱོར་གཉིས་ཀ་དང་མི་ལྡན་པར་སྒོམ་པ་ནི་ཆུང་ངུ་། གང་རུང་གཅིག་དང་ལྡན་པར་སྒོམ་པ་ནི་འབྲིང་། གཉིས་ཀ་དང་ལྡན་པར་སྒོམ་པ་ནི་ཆེན་པོའོ། །སྤེལ་སྒོམ་ཆུང་ངུ་སོགས་ཀྱི་ཁྱད་པར་ནི་གསུམ་སྤེལ་ཆུང་ངུ་། དྲུག་སྤེལ་འབྲིང་། དགུ་སྤེལ་ཆེན་པོ། བཅུ་གཉིས་སྤེལ་ཤིན་ཏུ་ཆེན་པོ། བཅོ་ལྔ་སྤེལ་ཤིན་ཏུ་ཆེས་ཆེན་པའོ། །འོ་ན་འདིའི་ཟག་བཅས་དང་ཟག་མེད་གང་གི་དབང་གིས་གནས་གཙང་མར་སྐྱེ་བ་ཡིན་ཞེ་ན། ཟག་བཅས་ཀྱི་དབང་གིས་སྐྱེ་བ་ཡིན་ཏེ། མཛོད་འགྲེལ་ལས། དེ་ལ་ཟག་པ་དང་བཅས་པ་གང་ཡིན་པའི་དབང་གིས་དེ་དག་ཏུ་སྐྱེའོ་ཞེས་གསུངས་པའི་ཕྱིར། འོ་ན་སོ་སོ་སྐྱེ་བོ་ཡང་གནས་གཙང་མར་སྐྱེ་བར་འགྱུར་རོ་སྙམ་ན། མ་ཡིན་ཏེ། ཟག་མེད་དང་སྤེལ་བའི་ཟག་བཅས་ཀྱི་དབང་གིས་སྐྱེ་དགོས་པའི་ཕྱིར་རོ། །ཚོར་བས་ངེས་པར་འབྱུང་བ་བསམ་གཏན་བཤད་ཟིན་ཏོ།། །།གཉིས་པ་འདུ་ཤེས་ཀྱིས་ངེས་པར་འབྱུང་བ་གཟུགས་མེད་བཤད་པ་ལ་གསུམ་སྟེ། མདོ་ལས་ཇི་ལྟར་གསུངས་པའི་ཚུལ། བསྟན་བཅོས་ལས་ཇི་ལྟར་བཀྲལ་བའི་ཚུལ། དེ་དག་གི་དོན་གཏན་ལ་དབབ་པའོ། །དང་པོ་ནི། ཤེར་ཕྱིན་གྱི་མདོ་ལས། དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཐོགས་པའི་འདུ་ཤེས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་ཤེས་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ཡང་དག་པར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅུང་ཟད་མེད་དོ་ཞེས་ཅུང་ཟད་མེད་པའི་སྐྱེ་མཆེད་ཡང་དག་པར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཡང་དག་པར་བསྒྲུབས་ཏེ་གནས་སོ་ཞེས་གསུངས་སོ། །གཉིས་པ་ལ་གཉིས་ཏེ། ཚིག་ཇི་ལྟར་བཀྲལ་བའི་ཚུལ་དང་། དོན་ཇི་ལྟར་བཀྲལ་བའི་ཚུལ་ལོ། །དང་པོ་ནི། མདོ་དང་པོའི་དོན་ཉན་ས་ལས། དེ་ལ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཞེས་བྱ་བ་ནི། ནམ་མཁར་མོས་པར་བྱེད་པའི་ཕྱིར། ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་ལྡན་པའི་འདུ་ཤེས་དེ་དག་ནི་མི་སྣང་ཞིང་སྐྱེ་ལ་འདོད་ཆགས་དང་བྲལ་བས་ཡང་དག་པར་འདས་པས་ན། དེའི་ཕྱིར་དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཞེས་བྱ་བ་གསུངས་སོ། །ཐོགས་པའི་འདུ་ཤེས་རྣམས་ནུབ་པར་གྱུར་ཅིང་ཞེས་བྱ་བ་ནི། དེ་དག་ལས་ཡང་དག་པར་འདས་ཤིང་མི་སྣང་བར་འགྱུར་བའི་རྒྱུས་ཁ་དོག་བསགས་པའི་རྒྱུ་གྱུར་པའི་སྒྲིབ་པའི་འདུ་ཤེས་རྣམ་པ་དུ་མ་རྣམ་པ་སྣ་ཚོགས་མང་པོ་དག་དང་བྲལ་བས་ན། དེའི་ཕྱིར་ཐོགས་པའི་འདུ་ཤེས་རྣམས་ནུབ་པར་གྱུར་ཅིང་ཞེས་བྱ་བ་གསུངས་སོ། །སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ཞེས་བྱ་བ་ནི། དེ་དག་དང་བྲལ་བས་ཐོགས་པ་ཁྱད་པར་ཅན་རྣམ་པ་སྣ་ཚོགས་པ་དེ་དག་ཉིད་ལ་འདི་ལྟ་སྟེ། ཟས་དང་། སྐོམ་དང་། བཞོན་པ་དང་། གོས་དང་། རྒྱན་དང་། གནས་དང་། སྐྱེད་མོས་ཚལ་དང་། ནགས་ཚལ་དང་། དམག་དང་། རི་ལ་སོགས་པའི་ཉེ་བར་འདོགས་པའི་འདུ་ཤེས་འཇུག་པ་གང་ཡིན་པའི་འདུ་ཤེས་དེ་དག་ཀྱང་དེ་རྣམས་ལ་གཏད་ཀྱང་། རྣམ་པ་ཐམས་ཅད་དུ་དེ་ལས་འབྱུང་བར་མི་འགྱུར་བས་ན། དེའི་ཕྱིར་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པ་ཞེས་བྱ་བ་གསུངས་སོ། །ནམ་མཁའ་མཐའ་ཡས་སོ་སྙམ་ནས་ཞེས་བྱ་བ་ནི། དེས་དེ་ལྟར་གཟུགས་དང་། ཐོགས་པ་དང་། སྣ་ཚོགས་ཀྱི་འདུ་ཤེས་དག་རྣམ་པར་བཤིག་ནས་ནམ་མཁའ་མཐའ་ཡས་པའི་རྣམ་པས་མོས་པར་བྱེད་པས་ན། དེའི་ཕྱིར་ནམ་མཁའ་མཐའ་ཡས་སོ་སྙམ་ནས་ཞེས་བྱ་བ་གསུངས་སོ། །ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་ནི་ཉེར་བསྡོགས་ལས་ཡང་དག་པར་འདས་ཤིང་། སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་ན་དེའི་ཕྱིར་ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་གསུངས་སོ། །ཇི་སྲིད་དུ་དངོས་གཞི་ལ་སྙོམས་པར་མི་འཇུག་པའི་བར་དུ་ནི་དེ་ནམ་མཁའ་ཁོ་ན་ལ་དམིགས་པར་བྱེད་དོ། །སྙོམས་པར་འཇུག་ནས་ཀྱང་ནམ་མཁའ་དེ་ཉིད་དང་དེ་ལ་གནས་པ་རང་གི་ས་པའི་ཕུང་པོ་རྣམས་ལ་དམིགས་པར་བྱེད་དོ། །ཉེར་བསྡོགས་ཀྱི་ཚེ་ན་ནི་ས་འོག་མའི་ཕུང་པོ་རྣམས་ལ་ཡང་དམིགས་པར་བྱེད་དོ་ཞེས་སོ། །མདོ་གཉིས་པའི་དོན་ཉན་ས་ལས། དེ་ལ་དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་ཞེས་བྱ་བ་ནི་དེ་རྣམ་པར་ཤེས་པ་གང་གིས་ནམ་མཁའ་མཐའ་ཡས་པར་མོས་པར་བྱེད་པ་ནམ་མཁའ་མཐའ་ཡས་པར་མོས་པར་བྱེད་པའི་རྣམ་པར་ཤེས་པ་དེ་ཉིད་ཀྱིས་རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་པར་འདོད་པས་ནམ་མཁའ་མཐའ་ཡས་སྐྱེ་མཆེད་ཀྱི་འདུ་ཤེས་ལས་བཟློག་སྟེ། རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་རྣམ་པར་ཤེས་པ་དེ་ཉིད་ལ་མཐའ་ཡས་པའི་རྣམ་པར་མོས་པར་བྱེད་ཅིང་། ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིའི་ཉེར་བསྡོགས་དང་བཅས་པ་ལས་ཡང་དག་པར་འདས་པ་ན་དེའི་ཕྱིར་དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་སྙམ་ནས་ཞེས་གསུངས་སོ། །རྣམ་པར་ཤེས་པ་མཐའ་ཡས་སོ་སྙམ་ནས་རྣམ་པར་གནས་སོ་ཞེས་བྱ་བ་ནི་རྣམ་ཤེས་མཐའ་ཡས་སྐྱེ་མཆེད་ཀྱི་ཉེར་བསྡོགས་ལས་ཡང་དག་པར་འདས་ཤིང་། སྦྱོར་བ་མཐར་ཐུག་པའི་བར་དུ་ཡིད་ལ་བྱས་པས་སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་ན་དེའི་ཕྱིར་རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་གསུངས་སོ། །མདོ་གསུམ་པའི་དོན་ཉན་ས་ལས། དེ་རྣམ་ཤེས་མཐའ་ཡས་སྐྱེ་མཆེད་ལས་བསྐྱོད་ཅིང་རྣམ་པར་ཤེས་པ་ལས་གཞན་པའི་དམིགས་པ་ཅི་དང་ཡང་ལྡན་པ་གཟུགས་ཅན་ནམ། གཟུགས་ཅན་མ་ཡིན་པ་ཡོངས་སུ་ཚོལ་བར་བྱེད་པ་ན་མ་རྙེད་དེ། དེས་དམིགས་པ་དེ་མ་རྙེད་པ་ན་རྣམ་ཤེས་མཐའ་ཡས་སྐྱེ་མཆེད་ཀྱི་དངོས་གཞིའི་ཉེར་བསྡོགས་དང་བཅས་པ་ལས་ཡང་དག་པར་འདས་ཏེ། དམིགས་པ་གཞན་ཅི་ཡང་མེད་དོ་ཞེས་མོས་པར་བྱེད་ཅིང་ཅི་ཡང་མེད་པའི་འདུ་ཤེས་ཁོ་ན་ལ་མོས་པར་འགྱུར་ཏེ། དེས་འདུ་ཤེས་ལ་མོས་པ་དེ་ལན་མང་དུ་བྱས་པའི་རྒྱུ་ཅི་ཡང་མེད་པའི་སྐྱེ་མཆེད་ཀྱི་ཉེར་བསྡོགས་ལས་ཡང་དག་པར་འདས་ཏེ་སྦྱོར་བ་མཐར་ཐུག་པའི་བར་དུ་ཡིད་ལ་བྱས་པས། སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་ན་དེའི་ཕྱིར་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ་ཞེས་གསུངས་སོ། །མདོ་བཞི་པའི་དོན་ཉན་ས་ལས། དེ་ལ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་ཞེས་བྱ་བ་ནི། དེ་ཅི་ཡང་མེད་པའི་སྐྱེ་མཆེད་ལས་བསྐྱོད་ཅིང་། ཅི་ཡང་མེད་པའི་སྐྱེ་མཆེད་ཀྱི་འདུ་ཤེས་ལ་རགས་པར་འདུ་ཤེས་ཤིང་ཉེས་དམིགས་སུ་འདུ་ཤེས་པས། ཅི་ཡང་མེད་པའི་སྐྱེ་མཆེད་ཀྱི་འདུ་ཤེས་ལས་བཟློག་པར་བྱེད་པས་ན། དེའི་ཕྱིར་དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་ཞེས་བྱ་བ་གསུངས་སོ། །འདུ་ཤེས་མེད་ཅེས་བྱ་བ་ནི་དེ་སྔོན་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པའི་ཚེ་ན་ནི་ཅི་ཡང་གི་འདུ་ཤེས་ལས་ཡང་དག་པར་འདས་ལ་ད་ལྟར་ནི་ཅི་ཡང་མེད་པའི་འདུ་ཤེས་ལས་ཡང་དག་པར་འདས་པས་ན་དེའི་ཕྱིར་འདུ་ཤེས་མེད་ཅེས་བྱ་བ་གསུངས་ཏེ། འདི་ལྟ་སྟེ་ཅི་ཡང་མེད་པའི་འདུ་ཤེས་མེད་པ་ལ་བྱའོ། །འདུ་ཤེས་མེད་མིན་ཞེས་བྱ་བ་ནི། དེའི་འདུ་ཤེས་འདི་ལྟ་སྟེ་དཔེར་ན་འདུ་ཤེས་མེད་པའམ་འགོག་པའི་སྙོམས་པར་འཇུག་པ་དག་གི་ལྟར་རྣམ་པ་ཐམས་ཅད་ཀྱི་ཐམས་ཅད་དུ་འགགས་པ་མ་ཡིན་ཏེ། འདུ་ཤེས་དེ་ཕྲ་ཞིང་དམིགས་པ་ལ་མཚན་མ་མེད་པ་འཇུག་པ་ཁོ་ནར་ཡིན་པས་ན་དེའི་ཕྱིར་འདུ་ཤེས་མེད་མིན་ཞེས་གསུངས་སོ། །སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་ནི་དེ་དེ་ལྟར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་མོས་པར་བྱེད་པས་ན་ཅི་ཡང་མེད་པའི་སྐྱེ་མཆེད་ཀྱི་དངོས་གཞིའི་ཉེར་བསྡོགས་དང་བཅས་པ་ལས་ཡང་དག་པར་འདས་ཤིང་སྦྱོར་བ་མཐར་ཐུག་པའི་བར་དུ་ཡིད་ལ་བྱས་པས་སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་དེའི་ཕྱིར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་གསུངས་སོ། །དེ་ལ་བསམ་གཏན་ལ་སྙོམས་པར་འཇུག་པའི་ཚེ་ན་ནི་ལུས་སའི་འོག་ཏུ་བྱིང་བར་སྣང་བ་ལྟ་བུའི་རྟགས་འབྱུང་ངོ་། །གཟུགས་མེད་པ་དག་ལ་སྙོམས་པར་འཇུག་པའི་ཚེ་ན་ནི། ལུས་ནམ་མཁའ་ལ་འཕུར་བ་ལྟར་སྣང་བའི་རྟགས་འབྱུང་སྟེ། དེ་དག་ལ་ཞི་གནས་ཀྱི་རྣམ་པས་བཏང་སྙོམས་སུ་བཞག་ན་ཡང་དག་པའི་རབ་ཏུ་སྦྱོར་བ་ཡིན་ནོ་ཞེས་སོ། །ཅི་ཕྱིར་གཟུགས་མེད་པ་བཞིར་ཟད་དེ། དེ་བས་ཆེས་མང་བ་ཡང་མ་ཡིན་ལ་ཉུང་བ་ཡང་མ་ཡིན་ཞེ་ན་ཞེས་གསུངས་སོ། །གཉིས་པ་དོན་ཇི་ལྟར་བཀྲལ་བའི་ཚུལ་ནི། མངོན་པ་གོང་འོག་ལས་གསུངས་པའི་ཚུལ་སྔར་བཤད་པ་རྣམས་ཡན་ལག་གི་རྣམ་པར་བཞག་པ་རྣམས་མ་གཏོགས་པ་ཕལ་ཆེར་བསམ་གཏན་དང་གཟུགས་མེད་གཉིས་ཆར་གྱི་ཐུན་མོང་བ་ཡིན་པས་དེར་ཤེས་པར་བྱའོ། །གསུམ་པ་དེ་དག་གི་དོན་གཏན་ལ་དབབ་པ་ལ་གཉིས་ཏེ། རྒྱུ་སྙོམས་འཇུག་གི་གཟུགས་མེད་དང་། འབྲས་བུ་སྐྱེ་བའི་གཟུགས་མེད་དོ། །དང་པོ་ལ། གང་ལ་སྐྱེ་བའི་རྟེན་དང་། ཐོབ་པར་བྱེད་པའི་རྒྱུ་ནི་སྔར་བསམ་གཏན་གྱི་སྐབས་སུ་བཤད་ཟིན་ནས། འདིར་ཐོབ་བྱའི་ངོ་བོ། ཐོབ་པའི་ཚུལ། ཐོབ་པའི་རྟགས་དང་གསུམ་ལས། དང་པོ་ལ་ལྔ་སྟེ། ངོ་བོ། དབྱེ་བ། གྲངས་ངེས། མི་མཐུན་ཕྱོགས། དམིགས་རྣམ་དཔྱད་པའོ། །དང་པོ་ནི། དམིགས་པའི་སྒོ་ནས་འོག་ས་ལས་ངེས་པར་འབྱུང་བའི་རིགས་སུ་གནས་པའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ལ་གཉིས་ཏེ། སའི་སྒོ་ནས་དབྱེ་བ་དང་། ངོ་བོའི་སྒོ་ནས་དབྱེ་བའོ། །དང་པོ་ལ་གཟུགས་མེད་དང་པོ་ཤེར་ཕྱིན་ལས་གསུངས་པ་ཉན་ས་ལས་བཀྲལ་བའི་ཚུལ་ནི། དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཞེས་བྱ་བ་ནི་ཁ་དོག་སྔོན་པོ་ལ་སོགས་པའི་ཁ་དོག་གི་འདུ་ཤེས་མི་སྣང་ཞིང་སྐྱོ་ལ་འདོད་ཆགས་དང་བྲལ་བའོ། །ཐོགས་པའི་འདུ་ཤེས་རྣམས་ནུབ་པར་གྱུར་ཅིང་ཞེས་བྱ་བ་ནི་རྒྱུ་དེས་ཁ་དོག་བསགས་པའི་རྒྱུ་ལས་བྱུང་བའི་རྭ་བ་ལ་སོགས་པ་སྒྲིབ་པའི་འདུ་ཤེས་དང་བྲལ་བའོ། །སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ཞེས་བྱ་བ་ནི་རྒྱུ་དེས་ཐོགས་པ་ཁྱད་པར་ཅན་ཟས་སྐོམ་ལ་སོགས་པ་སྣ་ཚོགས་པ་རྣམས་ལ་ཡིད་གཏད་ཀྱང་དེའི་འདུ་ཤེས་འབྱུང་བར་མི་འགྱུར་བའོ། །ནམ་མཁའ་མཐའ་ཡས་སོ་ཞེས་བྱ་བ་ནི་འདུ་ཤེས་གསུམ་པོ་དེ་དག་བཤིག་ནས་སྦྱོར་བའི་དུས་སུ་ནམ་མཁའ་མཐའ་ཡས་པའི་རྣམ་པས་མོས་པར་བྱེད་པའོ། །ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ་ཞེས་བྱ་བ་ནི་ཉེར་བསྡོགས་ལས་འདས་ཤིང་དངོས་གཞི་ལ་སྙོམས་པར་འཇུག་པའོ། །དག་ལྡན་ལས་ཀྱང་། གཟུགས་ཀྱི་འདུ་ཤེས་ནི་སྔོན་པོ་དང་སེར་པོ་ལ་སོགས་པའི་འདུ་ཤེས་སོ། །ཐོགས་པའི་འདུ་ཤེས་ནི་རྩིག་པ་དང་རྭ་བ་ལ་སོགས་པ་སྒྲིབ་པའི་འདུ་ཤེས་སོ། །སྣ་ཚོགས་ཀྱི་འདུ་ཤེས་ནི་ཁང་བཟངས་དང་། སྐྱེད་མོས་ཚལ་དང་། རི་དང་། ཟླ་བ་དང་། ཉི་མ་ལ་སོགས་པའི་འདུ་ཤེས་སོ་ཞེས་གསུངས་སོ། །ཇི་སྲིད་དུ་དངོས་གཞི་ལ་སྙོམས་པར་མི་འཇུག་པའི་བར་དུ་ཞེས་སོགས་ཀྱི་དོན་ནི། གཟུགས་མེད་ཀྱི་དངོས་གཞི་བསྒྲུབ་པའི་ཚུལ་ལ་དང་པོར་ཉེར་བསྡོགས་ཡིད་བྱེད་དྲུག་གིས་འོག་ས་ལ་འདོད་ཆགས་དང་བྲལ་བར་བྱས་ནས་དེའི་འོག་ཏུ་འདི་ནས་བཤད་པ་ལྟར་གྱི་གཟུགས་ཀྱི་འདུ་ཤེས་དང་། ནམ་མཁའི་འདུ་ཤེས་ལ་སོགས་པ་བསལ་ནས་ནམ་མཁའ་མཐའ་ཡས་སོ་སྙམ་པ་སོགས་ཀྱི་སྦྱོར་བསྒོམ། དེའི་འོག་ཏུ་སྦྱོར་བ་དེ་ཉིད་དངོས་གཞིར་གྱུར་པ་སྟེ་གསུམ་གསུམ་ཡོད་པ་ལས་ཉེར་བསྡོགས་ཀྱི་སྐབས་སུ་ཞི་རགས་ཀྱི་རྣམ་པ་སྒོམ་དགོས་པས་འོག་སའི་ཕུང་པོ་དང་། རང་སའི་ཕུང་པོ་གཉིས་ཀ་ལ་དམིགས། སྦྱོར་བའི་སྐབས་སུ་འདུ་ཤེས་འོག་མ་བསལ་ནས་ནམ་མཁའ་སོགས་ཀྱི་འདུ་ཤེས་རྩེ་གཅིག་ཏུ་སྒོམ་དགོས་པས་ནམ་མཁའ་དང་རྣམ་ཤེས་སོགས་ཁོ་ན་ལ་དམིགས། དངོས་གཞིའི་སྐབས་སུ་དེ་ཉིད་གོམས་པ་ངང་དུ་གྱུར་པས་རང་སའི་ཕུང་པོ་ལ་ཡང་དམིགས་པའི་དོན་ཏེ། ནམ་མཁའ་ཁོ་ན་ལ་དམིགས་པར་བྱེད་དོ་ཞེས་པའི་ཚིག་དེ་ཉིད་རྣམ་ཤེས་ཁོ་ན་ལ་ཡང་དམིགས་པར་བྱེད་དོ་ཞེས་སོགས་འདོན་པ་བསྒྱུར་བར་བྱེད་དོ། །བསམ་གཏན་དང་པོ་ནས་སྲིད་རྩེའི་བར་གྱི་ཉེར་བསྡོགས་ཡིད་བྱེད་དྲུག་པོ་ཐམས་ཅད་ས་གོང་འོག་ལ་ཞི་རགས་སུ་ལྟ་བའི་རྣམ་པ་ཅན་ཡིན་པ་དང་། གཟུགས་མེད་རྣམས་དམིགས་པའི་སྒོ་ནས་འོག་ས་ལས་འདའ་བ་དང་། ནམ་མཁའ་མཐའ་ཡས་སྐྱེ་མཆེད་ཅེས་པའི་ཐ་སྙད་སྦྱོར་བའི་སྒོ་ནས་མིང་དུ་བཏགས་པར་གསུངས་པ་དང་། འདིར་གཟུགས་མེད་ཀྱི་སྐབས་སུ་ཉེར་བསྡོགས་དང་སྦྱོར་བ་སོ་སོར་བཤད་པའི་གནད་རྣམས་རྟོགས་ན་དེའི་ཚེ་ཁོ་བོ་དྲན་པ་འབྱུང་ངོ་། །མི་ཤེས་པ་དག་གི་ངོ་ཚ་བོར་བའི་གཏམ་ཅི་ཡང་མ་སྨྲ་ཤིག དེས་ན་གཟུགས་མེད་ནམ་མཁའ་མཐའ་ཡས་སྐྱེ་མཆེད་ཀྱི་སྙོམས་འཇུག་གི་མཚན་ཉིད་སྦྱོར་བའི་དུས་སུ་གཟུགས་ཀྱི་འདུ་ཤེས་བསལ་ནས་ནམ་མཁའི་འདུ་ཤེས་གོམས་པར་བྱས་པ་ལས་དངོས་གཞིའི་དུས་སུ་དེ་ཉིད་མངོན་དུ་གྱུར་པའི་རིགས་སུ་གནས་པའི་དགེ་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཟུགས་མེད་ཀྱི་སྙོམས་འཇུག་གཉིས་པ་ཤེར་ཕྱིན་ལས་གསུངས་པའི་དོན་ཉན་ས་ལས་འགྲེལ་བའི་ཚུལ་ནི། དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཞེས་པས་ནི། ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིའི་ཉེར་བསྡོགས་དང་བཅས་པ་ལས་འདས་པའོ། །རྣམ་པར་ཤེས་པ་མཐའ་ཡས་སོ་སྙམ་ནས་ཞེས་པས་ནི་སྦྱོར་བའི་གནས་སྐབས་ཀྱི་དམིགས་རྣམ་སྟོན། ལྷག་མ་རྣམས་ནི་སྔར་བཞིན་ནོ། །དེས་ན་རྣམ་ཤེས་མཐའ་ཡས་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་ནམ་མཁའི་འདུ་ཤེས་བསལ་ནས་རྣམ་པར་ཤེས་པའི་འདུ་ཤེས་གོམས་པར་བྱས་པས། དངོས་གཞིའི་དུས་སུ་དེ་ཉིད་མངོན་དུ་གྱུར་པའི་རིགས་སུ་གནས་པའི་དགེ་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཟུགས་མེད་ཀྱི་སྙོམས་འཇུག་གསུམ་པ་ཤེར་ཕྱིན་གྱི་མདོ་ལས་གསུངས་པའི་དོན་ཉན་ས་ལས་འགྲེལ་བའི་ཚུལ་ནི། དེ་རྣམ་པ་ཐམས་ཅད་དུ། རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཞེས་པ་ནི་རྣམ་ཤེས་མཐའ་ཡས་སྐྱེ་མཆེད་ཀྱི་དངོས་གཞི་ཉེར་བསྡོགས་དང་བཅས་པ་ལས་ཡང་དག་པར་འདས་པའོ། །ཅུང་ཟད་མེད་དོ་སྙམ་ནས་ཞེས་པས་ནི་རྣམ་ཤེས་ལས་གཞན་པའི་དམིགས་པ་གཟུགས་ཅན་དང་གཟུགས་ཅན་མ་ཡིན་པ་ཅི་ཡང་མ་རྙེད་པ་སྟེ་སྦྱོར་བའི་དམིགས་རྣམ་བསྟན་ཏོ། །ལྷག་མ་རྣམས་ནི་སྔར་བཞིན་ནོ། །དེས་ན་ཅི་ཡང་མེད་པའི་སྐྱེ་མཆེད་ཀྱི་སྙོམས་འཇུག་གི་མཚན་ཉིད། སྦྱོར་བའི་དུས་སུ་རྣམ་ཤེས་ལས་གཞན་པའི་བཟུང་བྱ་ཅི་ཡང་མེད་པ་གོམས་པས་དངོས་གཞིའི་དུས་སུ་དེ་ཉིད་མངོན་དུ་གྱུར་པའི་རིགས་སུ་གནས་པའི་དགེ་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཟུགས་མེད་ཀྱི་སྙོམས་འཇུག་བཞི་པ་ཤེར་ཕྱིན་གྱི་མདོ་ལས་གསུངས་པའི་དོན་ཉན་ས་ལས་འགྲེལ་བའི་ཚུལ་ནི། དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ་ཞེས་པ་ནི། ཅི་ཡང་མེད་པའི་སྐྱེ་མཆེད་ཀྱི་དངོས་གཞི་ཉེར་བསྡོགས་དང་བཅས་པ་ལས་ཡང་དག་པར་འདས་པའོ། །འདུ་ཤེས་མེད་ཅེས་པ་ནི་སྔར་ཅི་ཡང་མེད་པའི་སྐབས་སུ་ནི་ཅི་ཡང་གི་འདུ་ཤེས་མེད་ལ། འདིར་ནི་ཅི་ཡང་མེད་པའི་འདུ་ཤེས་ལ་ཡང་སྐྱོན་དུ་ལྟས་ནས་ཡང་དག་པར་འདས་པའོ། །འདུ་ཤེས་མེད་མིན་ཞེས་པ་ནི་སྙོམས་འཇུག་གཉིས་ལྟར་འདུ་ཤེས་གཏན་མེད་པ་མ་ཡིན་པས་དམིགས་པ་ལ་མཚན་མ་མེད་པར་འཇུག་པའི་འདུ་ཤེས་ཕྲ་མོ་ཡོད་པའོ། །སྐྱེ་མཆེད་ཉེ་བར་བསྒྲུབས་ཏེ་གནས་སོ་ཞེས་བྱ་བ་ནི་སྦྱོར་བའི་སྐབས་སུ་དེ་ལྟར་ཡིད་ལ་བྱས་པས་དངོས་གཞིའི་དུས་སུ་མངོན་དུ་གྱུར་པའོ། །དེས་ན་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་འཇུག་གི་མཚན་ཉིད། འཇུག་ཤེས་ཀྱིས་བསྡུས་པའི་འདུ་ཤེས་རགས་པ་མེད་ཅིང་ཕྲ་བ་དང་བཅས་པའི་དགེ་བའི་སེམས་རྩེ་གཅིག་པ་མཚུངས་ལྡན་དང་བཅས་པའོ། །གཉིས་པ་ངོ་བོའི་སྒོ་ནས་དབྱེ་བ་ལ། གཟུགས་མེད་ཀྱི་སྙོམས་འཇུག་ཉོན་མོངས་ཅན་དང་། དག་པ་བ་དང་། ཟག་མེད་དང་གསུམ་ཡོད་པ་ནི་སྔར་བསམ་གཏན་གྱི་སྐབས་སུ་བཤད་པ་དང་འདྲ་ལ། ཁྱད་པར་ནི་སྲིད་རྩེ་ལ་ཟག་མེད་མེད་དེ། སེམས་ཀྱི་རྒྱུ་བ་མི་གསལ་བས་བདག་མེད་མངོན་སུམ་དུ་རྟོགས་པའི་ཤེས་རབ་ཀྱི་སེམས་རྟེན་དུ་མི་རུང་བའི་ཕྱིར་རོ། །མངོན་པ་གོང་འོག་གཉིས་ཀ་ལས་འདི་བཞིན་དུ་བཤད་པ་ནི་དངོས་སྨྲ་བའི་གྲུབ་མཐའི་དབང་དུ་བྱས་པའམ། ཡང་ན་ཐེག་དམན་གྱི་དབང་དུ་བྱས་པ་ཡིན་གྱི་ཐེག་པ་ཆེན་པོ་ལ་ནི་དེར་མ་ངེས་ཏེ། མཐར་གནས་ཀྱི་སྙོམས་འཇུག་དགུ་འཇིག་རྟེན་ལས་འདས་པའི་ལམ་དུ་བཤད་པའི་ཚེ་སྲིད་རྩེ་ལ་ཡང་ཟག་མེད་བྱ་དགོས་པའི་ཕྱིར། སྲིད་རྩེའི་སྙོམས་འཇུག་དག་པ་བ་ལ་ཆ་མཐུན་གཞན་གསུམ་པོ་ཡོད་ཀྱི། ཁྱད་པར་ཆ་མཐུན་མེད་དེ། དེ་ལ་གོང་ས་མེད་པའི་ཕྱིར་རོ། །ཅིའི་ཕྱིར་བསམ་གཏན་རྣམས་ལ་ཡན་ལག་གི་སྒོ་ནས་འདའ་བ་དང་། གཟུགས་མེད་ལ་དམིགས་པའི་སྒོ་ནས་འདའ་བར་འཇོག་ཅེ་ན། བསམ་གཏན་རྣམས་ནི་རང་རང་གི་འོག་སའི་ཡན་ལག་རགས་པ་ལ་འདོད་ཆགས་དང་བྲལ་བའི་ཁྱད་པར་རེ་རེ་ཡོད་པས་ཡན་ལག་གི་སྒོ་ནས་འདའ་བར་འཇོག་ལ། གཟུགས་མེད་རྣམས་ནི་གཟུགས་ཀྱི་འདུ་ཤེས་བསལ་བ་ལས་ནམ་མཁའ་མཐའ་ཡས། ནམ་མཁའི་འདུ་ཤེས་བསལ་བ་ལས་རྣམ་ཤེས་མཐའ་ཡས། རྣམ་ཤེས་ཀྱི་འདུ་ཤེས་བསལ་བ་ལས་ཅི་ཡང་མེད་པའི་སྐྱེ་མཆེད། བཟུང་བྱ་ཅི་ཡང་མེད་པའི་འདུ་ཤེས་བསལ་བ་ལས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་པར་འཇུག་པ་འབྱུང་བས་ན་དམིགས་པའི་སྒོ་ནས་འདའ་བར་བཞག་གོ། །།གསུམ་པ་གྲངས་ངེས་པ་ནི། གཟུགས་མེད་ཀྱི་སྙོམས་འཇུག་དེ་ལ་བཞིར་གྲངས་ངེས་ཏེ། འདུ་ཤེས་ལས་ངེས་པར་འབྱུང་བའི་དབང་དུ་བྱས་ནས་གཟུགས་མེད་བཞག་པ་གང་ཞིག འདུ་ཤེས་དེ་ལ་ཡུལ་གྱི་འདུ་ཤེས་དང་ཡུལ་ཅན་གྱི་འདུ་ཤེས་གཉིས། ཡུལ་གྱི་འདུ་ཤེས་ལ་ཡང་ཡུལ་གཟུགས་ཀྱི་འདུ་ཤེས་དང་། གཉེན་པོ་ནམ་མཁའི་འདུ་ཤེས་གཉིས། ཡུལ་ཅན་གྱི་འདུ་ཤེས་དེ་ལ་ཡང་ཡུལ་ཅན་རྣམ་པར་ཤེས་པའི་འདུ་ཤེས་དང་། གཉེན་པོ་ཅི་ཡང་མེད་པའི་འདུ་ཤེས་གཉིས་ཡོད་ལ། བཞི་པོ་དེ་དག་ལས་རིམ་པ་བཞིན་དུ་ངེས་པར་འབྱུང་བའི་དབང་དུ་བྱས་ནས་གཟུགས་མེད་ཀྱི་སྙོམས་འཇུག་བཞི་པོ་རིམ་བཞིན་བཞག་པའི་ཕྱིར་རོ། །བཞི་པ་མི་མཐུན་ཕྱོགས་ནི། གཟུགས་མེད་ཀྱི་མི་མཐུན་ཕྱོགས་ནི་སྤྱིར་འདུ་ཤེས་ཡིན་ལ། དེ་ལ་ཡང་ཐོགས་བཅས་ཀྱི་འདུ་ཤེས་དང་། ཐོགས་མེད་ཀྱི་འདུ་ཤེས་གཉིས། དང་པོ་ནི། ནམ་མཁའ་མཐའ་ཡས་སྐྱེ་མཆེད་ཀྱི་མི་མཐུན་ཕྱོགས་ཡིན་ནོ། །གཉིས་པ་ལ། ཡུལ་ནམ་མཁའི་འདུ་ཤེས་དང་། ཡུལ་ཅན་རྣམ་པར་ཤེས་པའི་འདུ་ཤེས་གཉིས་ལས། དང་པོ་ནི། རྣམ་ཤེས་མཐའ་ཡས་སྐྱེ་མཆེད་ཀྱི་མི་མཐུན་ཕྱོགས་ཡིན་ནོ། །གཉིས་པ་ལ་རགས་པ་དང་། ཅུང་ཟད་ཕྲ་བ་དང་། ཤིན་ཏུ་ཕྲ་བ་དང་གསུམ། དང་པོ་ནི། ཅི་ཡང་མེད་པའི་སྐྱེ་མཆེད་ཀྱི་མི་མཐུན་ཕྱོགས། གཉིས་པ་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་མི་མཐུན་ཕྱོགས་ཡིན་ལ། གསུམ་པ་ནི་འདིར་སྐྱོན་མ་ཡིན་པས་དགག་པར་བྱ་བ་མ་ཡིན་ནོ། །ལྔ་པ་དམིགས་རྣམ་ལ་དཔྱད་པ་ལ། གཟུགས་མེད་ཀྱི་སྙོམས་འཇུག་ཉོན་མོངས་ཅན་གྱི་དམིགས་རྣམ་ནི་སྔར་བཤད་ཟིན་ལ། དག་པ་བ་དང་། ཟག་མེད་ཀྱི་རང་ས་དང་གོང་ས་གཉིས་ལ་དམིགས་པ་ཡོད་ཅིང་། འོག་སའི་ཟག་བཅས་ལ་དམིགས་པ་མེད་དེ། འོག་སའི་ཟག་བཅས་དེ་མ་ཞི་བ་ཡིན་པའི་ཕྱིར་དང་། གཟུགས་མེད་ཀྱི་དངོས་གཞི་རྣམས་འོག་ས་ལས་དམིགས་པའི་སྒོ་ནས་འདའ་བ་ཡིན་པའི་ཕྱིར་ཏེ། མཛོད་ལས། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཞེས་གསུངས་པའི་ཕྱིར། འོག་སའི་ཟག་བཅས་ལ་མི་དམིགས་པར་གསུངས་པའི་ཤུགས་ལ་འོག་སའི་ཟག་མེད་ལ་དམིགས་པ་ཡོད་པར་བསྟན་ཏེ། སྲིད་རྩེའི་རྟེན་ཅན་གྱི་ཕྱིར་མི་འོང་གིས་ཅི་ཡང་མེད་ཀྱི་ཟག་མེད་ཀྱི་སྙོམས་འཇུག་སྒོམ་པའི་ཚེ་སྲིད་རྩེའི་སེམས་དེས་འདི་བསྒོམ་པར་བྱའོ་སྙམ་དུ་དམིགས་དགོས་པའི་ཕྱིར། གཟུགས་མེད་ཀྱི་དངོས་གཞི་དགེ་བ་རྣམས་ཀྱིས་འོག་སའི་ཟག་བཅས་ལ་མི་དམིགས་པར་བསྟན་པའི་ཤུགས་ལ་གཟུགས་མེད་ཀྱི་ཉེར་བསྡོགས་རྣམས་ཀྱིས་འོག་སའི་ཟག་བཅས་ལ་དམིགས་པར་བསྟན་ཏེ། གང་སྤེལ་ལས། ནམ་མཁའ་མཐའ་ཡས་སྐྱེ་མཆེད་ཀྱི་བར་ཆད་མེད་པའི་ལམ་རྣམས་ཀྱི་དམིགས་པ་བསམ་གཏན་བཞི་པ་ཡིན་ལ། སྲིད་རྩེའི་ཉེར་བསྡོགས་བར་ཆད་མེད་པའི་ལམ་རྣམས་ཀྱི་དམིགས་པ་ནི་ཅི་ཡང་མེད་པའི་སྐྱེ་མཆེད་ཡིན་པའི་བར་དུའོ་ཞེས་དང་། ཉན་ས་ལས། ཇི་སྲིད་དངོས་གཞི་ལ་སྙོམས་པར་མི་འཇུག་པའི་བར་དུ་ནི་ཞེས་སོགས་སྔར་བཤད་པ་ལྟར་རོ། །གཉིས་པ་ཐོབ་པའི་ཚུལ་ནི། བསམ་གཏན་བཞི་པ་ཐོབ་པའི་རྣལ་འབྱོར་པ་དེས་གཟུགས་ཀྱི་འདུ་ཤེས་ཏིང་ངེ་འཛིན་གྱི་སྐྱོན་དུ་མཐོང་ནས་ནམ་མཁའ་མཐའ་ཡས་ཀྱི་སྦྱོར་བས་དེ་སྤོང་བ་ལ་ཞུགས་ཏེ། སྤངས་པའི་ཚེ་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིའི་སྙོམས་འཇུག་དེ་ཐོབ་བོ། །དེའི་འོག་ཏུ་ནམ་མཁའི་འདུ་ཤེས་དང་། རྣམ་ཤེས་ཀྱི་འདུ་ཤེས་རགས་པ་དང་། ཅུང་ཟད་ཕྲ་བ་གསུམ་ཏིང་ངེ་འཛིན་གྱི་སྐྱོན་དུ་མཐོང་ནས་གཟུགས་མེད་ཀྱི་སྦྱོར་བ་ཕྱི་མ་གསུམ་གྱིས་དེ་གསུམ་རིམ་གྱིས་སྤོང་བ་ལ་ཞུགས་ཏེ། སྤངས་པའི་ཚེ་དངོས་གཞི་ཕྱི་མ་གསུམ་ཐོབ་བོ། །གསུམ་པ་ཐོབ་པའི་རྟགས་ནི། ཉན་ས་ལས། གཟུགས་མེད་ཀྱི་ཏིང་ངེ་འཛིན་སྐྱེས་པའི་ཚེ་ནམ་མཁའ་ལ་འཕུར་བ་ལྟ་བུའི་སྣང་བ་འབྱུང་བར་གསུངས་སོ། །གཉིས་པ་འབྲས་བུ་སྐྱེ་བའི་གཟུགས་མེད་ལ། མཚན་ཉིད་དང་། དབྱེ་བ་གཉིས། དང་པོ་ནི། རྒྱུ་སྙོམས་འཇུག་གི་གཟུགས་མེད་བསྒོམ་སྟོབས་ཀྱིས་གཟུགས་མེད་ཁམས་སུ་ཐོབ་པའི་འདུས་བྱས་ཀྱི་ཆོས་སོ། །གཉིས་པ་ལ། ངོ་བོའི་སྒོ་ནས་དབྱེ་བ་དང་། གནས་ཀྱི་སྒོ་ནས་དབྱེ་བ་གཉིས་ལས། དང་པོ་ལ་གཉིས་ཏེ། རྒྱུ་མཐུན་གྱི་འབྲས་བུ་དང་། རྣམ་སྨིན་གྱི་འབྲས་བུའོ། །དང་པོ་ནི། གཟུགས་མེད་དུ་སྐྱེ་བས་ཐོབ་པའི་གཟུགས་མེད་ཀྱི་སྙོམས་འཇུག་རྣམས་སོ། །གཉིས་པ་ནི། གཟུགས་མེད་ཁམས་པའི་གང་ཟག་གི་རྒྱུད་ཀྱི་རྣམ་སྨིན་གྱིས་བསྡུས་པའི་ཕུང་པོ་བཞིའོ། །བདག་པོའི་འབྲས་བུ་ནི་མེད་དེ། གཟུགས་མེད་ཁམས་ན་ཕྱི་སྣོད་ཀྱི་འཇིག་རྟེན་མེད་པའི་ཕྱིར་རོ། །གཉིས་པ་གནས་ཀྱི་སྒོ་ནས་དབྱེ་ན། གཟུགས་མེད་ནམ་མཁའ་མཐའ་ཡས་སྐྱེ་མཆེད་ཀྱི་སྐྱེ་བ་ལ་སོགས་པ་བཞི་ཡོད་དོ། །རྒྱུ་སྙོམས་འཇུག་གི་གཟུགས་མེད་ཆུང་ངུ་དང་འབྲིང་དང་ཆེན་པོར་བསྒོམས་པའི་སྟོབས་ཀྱིས་གནས་གོང་འོག་གིས་ཕྱེ་བའི་གཟུགས་མེད་ཀྱི་སྐྱེ་བ་ཐོབ་པ་མེད་ཀྱང་། གཟུགས་མེད་ཀྱི་སྐྱེ་བ་མཐོན་པོ་དང་། དམའ་བ་དང་། ངན་པ་དང་། བཟང་པོ་ཐོབ་པ་ནི་ཡོད་དེ། ཀུན་བཏུས་ཀྱི་འགྲེལ་པ་རྒྱལ་པོའི་སྲས་ལས། གཟུགས་མེད་པ་རྣམས་ན་ནི་གཞལ་མེད་ཁང་གི་གནས་གཞན་མེད་པའི་ཕྱིར། དེ་ལྟར་སྐྱེ་བའི་བྱེ་བྲག་རྣམ་པར་གཞག་པ་མེད་ལ། འོན་ཀྱང་དེ་དག་ལ་ཆུང་ངུ་ལ་སོགས་པ་ཡོངས་སུ་བསྒོམས་པ་རྣམས་ཀྱི་སྐྱེ་བ་ལ་ཚེ་ལ་སོགས་པའི་ཁྱད་པར་གྱིས་མཐོན་པོ་དང་། དམའ་བ་དང་། ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་མང་བའི་ཁྱད་པར་གྱིས་ངན་པ་དང་བཟང་པོ་ནི་ཡོད་དོ་ཞེས་གསུངས་སོ། །འདུ་ཤེས་ཀྱིས་ངེས་པར་འབྱུང་བ་གཟུགས་མེད་བཤད་ཟིན་ཏོ།། །།གསུམ་པ་གཉིས་ཀས་ངེས་པར་འབྱུང་བ་འགོག་པའི་སྙོམས་འཇུག་བཤད་པ་ལ་གསུམ་སྟེ། བྱེ་བྲག་ཏུ་སྨྲ་བའི་ལུགས། སེམས་ཙམ་པའི་ལུགས། དབུ་མ་པའི་ལུགས་སོ། །དང་པོ་ལ་གཉིས་ཏེ། གཞུང་ལས་ཇི་ལྟར་བཤད་ཚུལ་སྤྱིར་བསྟན་པ་དང་། ཁྱད་པར་གྱི་ཆོས་བྱེ་བྲག་ཏུ་བཤད་པའོ། །དང་པོ་ནི། མཛོད་ལས། འགོག་པ་ཞེས་པའང་དེ་བཞིན་ཉིད། །འདིར་གནས་དོན་དུ་སྲིད་རྩེར་སྐྱེས། །དགེ་བའོ་གཉིས་སུ་མྱོང་འགྱུར་དང་། །མ་ངེས་འཕགས་པའི་སྦྱོར་བས་ཐོབ། །ཐུབ་པའི་བྱང་ཆུབ་ཀྱིས་ཐོབ་བྱ། །དང་པོར་མ་ཡིན་སྐད་ཅིག་མ། །སུམ་ཅུ་རྩ་བཞིས་ཐོབ་ཕྱིར་རོ། །གཉིས་ཀ་འདོད་དང་གཟུགས་རྟེན་ཅན། །འགོག་པ་དང་པོ་མི་ནང་དུ། །ཞེས་གསུངས་ཏེ། འདི་ལ་དགག་བྱ་གང་འགོག་པ། ཡིད་བྱེད་གང་གིས་འཇུག་པ། ས་གང་གིས་བསྡུས་པ། ངོ་བོ་གང་ཡིན་དཔྱད་པ། མྱོང་འགྱུར་གང་ཡིན་དཔྱད་པ། གང་ཟག་གང་གིས་འཇུག་དཔྱད་པ། ཚུལ་ཇི་ལྟར་དུ་ཐོབ་པ། རྟེན་གང་ལ་འཇུག་པ་དང་བརྒྱད་ལས། དང་པོ་ནི། འགོག་པ་ཞེས་པའང་དེ་བཞིན་ཉིད། །ཅེས་པ་སྟེ། གོང་དུ་འདུ་ཤེས་མེད་པའི་སྙོམས་འཇུག་གི་སྐབས་སུ་སེམས་སེམས་བྱུང་ཐམས་ཅད་དགག་བྱར་བསྟན་པ་དེ་བཞིན་དུ། འདིར་ཡང་སེམས་སེམས་བྱུང་ཐམས་ཅད་འགོག་ཞེས་པའི་དོན་ཏེ། འགྲེལ་པར། དེ་བཞིན་ཞེས་བྱ་བའི་སྒྲས་རྣམ་པ་གང་ཞིག་བཟུང་ཞེ་ན། སེམས་དང་སེམས་ལས་བྱུང་བ་རྣམས་འགོག་པར་བྱའོ་ཞེས་བཟུང་ངོ་ཞེས་གསུངས་པའི་ཕྱིར་རོ། །འོ་ན་དེ་གཉིས་ཀྱི་ཁྱད་པར་གང་ཞེ་ན། གཉིས་པ་ནི། འདི་གནས་དོན་དུ་ཞེས་པ་སྟེ། སྔ་མ་ལ་ནི་ངེས་པར་འབྱུང་བའི་འདུ་ཤེས་སྔོན་དུ་བཏང་བས་འཇུག་ལ། འདི་ནི་ཚོར་འདུ་ཞི་བར་གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་འཇུག་པའོ། །གསུམ་པ་ནི་སྲིད་རྩེར་སྐྱེས་ཞེས་ཏེ། སྔ་མ་ནི་བསམ་གཏན་བཞི་པའི་སས་བསྡུས་ཡིན་ལ། འདི་ནི་སྲིད་རྩེའི་སས་བསྡུས་ཡིན་ནོ། །བཞི་པ་ནི་དགེ་བའོ་ཞེས་པ་སྟེ། དགེ་བ་ཟག་བཅས་སུ་ནི་གཉིས་ཀ་འདྲའོ། །ལྔ་པ་ནི་གཉིས་སུ་མྱོང་འགྱུར་དང་། མ་ངེས་ཞེས་པ་སྟེ། སྔ་མ་ནི་སྐྱེས་ནས་མྱོང་འགྱུར་ཁོ་ན་ཡིན་ལ། འདི་ནི་སྐྱེས་ནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་དང་། མྱོང་བར་མ་ངེས་པ་དང་གསུམ་ཡོད་པ་ཡིན་གྱིས། མཐོང་ཆོས་ལ་མྱོང་འགྱུར་ནི་མེད་དོ། །དྲུག་པ་ནི། འཕགས་པའི་ཞེས་པ་སྟེ། སོ་སོ་སྐྱེ་བོ་རྣམས་ནི་འདི་ལ་སྙོམས་པར་འཇུག་མི་ནུས་ཏེ། འཕགས་ལམ་གྱི་སྟོབས་ཀྱིས་བསྐྱེད་པར་བྱ་བ་ཡིན་པའི་ཕྱིར་རོ། །བདུན་པ་ནི་སྦྱོར་བས་འཐོབ་ཅེས་པ་སྟེ། འདོད་ཆགས་དང་བྲལ་བ་ཙམ་གྱིས་འཐོབ་པ་མ་ཡིན་གྱི་སྦྱོར་བ་འབད་པས་འཐོབ་པ་ཡིན་ནོ། །འོ་ན་བཅོམ་ལྡན་འདས་ཀྱིས་ཀྱང་སྦྱོར་བ་འབད་པས་ཐོབ་བམ་ཞེ་ན། ཐུབ་པའི་བྱང་ཆུབ་ཀྱིས་ཐོབ་བྱ། །ཞེས་པ་སྟེ། ཟད་པ་ཤེས་པ་དང་དུས་མཉམ་དུ་ཐོབ་པས་ན་འདོད་ཆགས་དང་བྲལ་བས་ཐོབ་པ་ཡིན་ནོ། །འོ་ན་ཐུབ་པས་སྔར་སློབ་པ་ལམ་གྱི་གནས་སྐབས་སུ་འགོག་སྙོམས་མ་ཐོབ་བམ་ཞེ་ན། འདི་ལ་རྒྱ་གར་ནུབ་ཕྱོགས་པ་དག་ན་རེ། དང་པོ་ཁོ་ནར་བྱང་ཆུབ་སེམས་དཔས་བསྐྱེད་དེ། གནས་བརྟན་ཉི་སྲུངས་ཀྱི་ལུགས་ཀྱི་ཚིག་ནི་དེ་བཞིན་གཤེགས་པ་ནི་འགོག་པའི་སྙོམས་པར་འཇུག་པ་བསྐྱེད་ནས། ཟག་པ་ཟད་པ་བསྐྱེད་དོ་ཞེས་བརྗོད་པར་བྱའོ་ཞེས་པ་འདི་ཚད་མར་བྱ་དགོས་པའི་ཕྱིར་ཞེས་བཞེད་དོ། །ཁ་ཆེ་བ་རྣམས་ན་རེ། དང་པོར་མ་ཡིན་སྐད་ཅིག་མ། །སུམ་ཅུ་རྩ་བཞིས་ཐོབ་ཕྱིར་རོ། །ཞེས་ཏེ། བྱང་ཆུབ་སེམས་དཔའ་ནི་བདེན་པ་མངོན་པར་རྟོགས་པ་བཅུ་དྲུག་དང་། སྲིད་རྩེ་ལ་འདོད་ཆགས་དང་བྲལ་བར་བྱེད་པའི་བར་ཆད་མེད་ལམ་དགུ། རྣམ་གྲོལ་ལམ་དགུ་སྟེ། སུམ་ཅུ་རྩ་བཞི་བར་མ་ཆད་དུ་འབྱུང་བའི་ཕྱིར་ཏེ། བར་སྐབས་དེར་སྙོམས་པར་འཇུག་པའི་སེམས་སྲིད་རྩེའི་སེམས་མངོན་དུ་བྱས་ན་བསམ་པ་ལྡང་བ་ཅན་དུ་འགྱུར་བའི་སྐྱོན་ཡོད་པའི་ཕྱིར་ཟེར་རོ། །ཉི་འོག་པ་རྣམས་ན་རེ། བསམ་པ་ལྡང་བ་ཅན་མ་ཡིན་ཞེས་པའི་དོན་ནི། ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་མི་བཤིག་པའི་དོན་ཡིན་གྱི། ཟག་མེད་ཀྱི་ལམ་ལས་མི་ལྡང་བ་ནི་མ་ཡིན་ནོ་ཞེས་ཟེར་རོ། །བརྒྱད་པ་ནི། གཉིས་ཀ་འདོད་དང་གཟུགས་རྟེན་ཅན། །འགོག་པ་དང་པོ་མི་ནང་དུ། །ཞེས་པ་སྟེ། སྙོམས་འཇུག་གཉིས་ཀ་ཡང་འདོད་པ་དང་། གཟུགས་ཀྱི་རྟེན་ཅན་ཡིན་གྱི། གཟུགས་མེད་ཀྱི་རྟེན་ཅན་མ་ཡིན་ནོ། །ཁྱད་པར་དུ་འགོག་པའི་སྙོམས་འཇུག་ནི། དང་པོར་མིའི་ནང་དུ་བསྐྱེད། ཕྱིས་ཉམས་པ་གཟུགས་ཀྱི་ཁམས་སུ་མངོན་དུ་བྱེད་པ་ཡོད་ལ། འདུ་ཤེས་མེད་པའི་སྙོམས་འཇུག་ནི་དང་པོ་ནས་གཟུགས་ཁམས་སུ་སྐྱེད་པ་ཡང་ཡོད་དོ། །འོ་ན་འགོག་པའི་སྙོམས་འཇུག་ལས་ཉམས་པ་ཡོད་དམ་ཞེ་ན་ཡོད་དེ། འཆར་བྱེད་ཀྱི་མདོ་ལས། ཚེ་དང་ལྡན་པ་དག་འདི་ན་དགེ་སློང་ཚུལ་ཁྲིམས་ཕུན་སུམ་ཚོགས་པ་ཡང་ཡིན། ཏིང་ངེ་འཛིན་ཕུན་སུམ་ཚོགས་པ་ཡང་ཡིན། ཤེས་རབ་ཕུན་སུམ་ཚོགས་པ་ཡང་ཡིན་པ་དེ་ནི་ཡང་དང་ཡང་དུ་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་དང་། ལྡང་བའི་གནས་དེ་ཡོད་དོ་ཞེས་བྱ་བར་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་མཐོང་བའི་ཆོས་ཁོ་ན་ལ་ཀུན་ཤེས་པའི་ཆོས་ཐོབ་པར་ཡང་མི་བྱེད་ཅིང་འཆི་བའི་དུས་ཀྱི་ཚེ་ཡང་མ་ཡིན་ལ། ལུས་ཞིག་ནས་ཀྱང་ཁམ་གྱི་ཟས་ཟ་བའི་ལྷ་ལས་འདས་ཏེ། ཡིད་ལས་བྱུང་བའི་ལྷའི་ལུས་གང་ཡང་རུང་བ་ཞིག་ཏུ་སྐྱེ་བར་འགྱུར་རོ། །དེ་དེར་སྐྱེས་ནས་ཡང་དང་ཡང་དུ་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་དང་། ལྡང་བའི་གནས་དེ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་གསུངས་པའི་ཕྱིར་རོ། །གཉིས་པ་ཁྱད་པར་གྱི་ཆོས་བྱེ་བྲག་ཏུ་བཤད་པ་ལ། འགོག་པའི་སྙོམས་འཇུག་ནི་རྫས་ཡོད་དང་། བཏགས་ཡོད་གཉིས་ཀྱི་ནང་ནས་རྫས་ཡོད་ཡིན་ཏེ། སེམས་སེམས་བྱུང་རེ་ཤིག་སྐྱེ་བ་ལ་གེགས་བྱེད་པའི་ཆོས་ཡིན་པའི་ཕྱིར་ཏེ། མཛོད་འགྲེལ་ལས། ཡང་ཅི་སྙོམས་པར་འཇུག་པ་འདི་དག་རྫས་སུ་ཡོད་དམ། འོན་ཏེ་བཏགས་པར་ཡོད་ཅེ་ན། སེམས་སྐྱེ་བ་ལ་གེགས་བྱེད་པའི་ཕྱིར་རྫས་སུ་ཡོད་དོ་ཞེས་ཟེར་རོ་ཞེས་གསུངས་པའི་ཕྱིར། སློབ་དཔོན་གྱིས་ནི་དེ་མི་འཐད་དེ། སྙོམས་པར་འཇུག་པའི་སེམས་ཁོ་ན་སེམས་སྐྱེ་བ་དེ་ལ་གེགས་བྱེད་པའི་ཕྱིར་རོ་ཞེས་བཞེད་དོ། །དེའི་དོན་ཡང་། བྱེ་མདོ་གཉིས་ཀ་འགོག་སྙོམས་ལྡན་མིན་འདུ་བྱེད་དུ་འདོད་པ་འདྲ་ཡང་ལྡན་མིན་འདུ་བྱེད་ཉིད་རྫས་ཡོད་དང་བཏགས་ཡོད་དུ་འདོད་པའི་ཁྱད་པར་ཡིན་པར་ཤེས་པར་བྱའོ། །ཟག་བཅས་ཟག་མེད་གཉིས་ཀྱི་ནང་ནས་ཟག་བཅས་ཡིན་ཏེ། སྲིད་རྩེའི་སས་བསྡུས་ཡིན་པའི་ཕྱིར་རོ། །སྡེ་པ་ཁ་ཅིག་བསམ་གཏན་བཞི་པའི་སས་བསྡུས་སུ་འདོད་པ་ནི་མི་འཐད་དེ། མདོ་ལས་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་འབྱུང་བའི་ཕྱིར་རོ། །འོ་ན་ཐོད་རྒལ་དུ་སྙོམས་པར་འཇུག་པ་ཇི་ལྟར་ཡིན་སྙམ་ན། རྩོམ་པ་དང་པོའི་སྐབས་སུ་མཐར་གྱིས་གནས་ཞེས་པའི་དོན་ཡིན་པས་སྐྱོན་མེད་དོ། །སེམས་ཡོད་མེད་གཉིས་ཀྱི་ནང་ནས་སེམས་མེད་ཡིན་ཏེ། འགོག་པ་ལ་སྙོམས་པར་འཇུག་པའི་གནས་སྐབས་སུ་སེམས་དང་སེམས་བྱུང་མ་ལུས་པ་བཀག་ཟིན་པའི་ཕྱིར་རོ། །ཁ་ཅིག དེའི་གནས་སྐབས་ན་སེམས་ཡོད་དེ། ཡིད་དབང་ཡོད་པའི་ཕྱིར་ཏེ། སྲོག་དབང་ཡོད་པའི་ཕྱིར། ཁྱབ་སྟེ། བཏང་སྙོམས་དང་ནི་སྲོག་དང་ནི། །ཡིད་དང་ལྡན་ལ་ངེས་གསུམ་ལྡན། །ཞེས་གསུངས་པའི་ཕྱིར། ཡང་དེའི་གནས་སྐབས་ན་སེམས་ཡོད་དེ། རྣམ་པར་ཤེས་པ་ཡོད་པའི་ཕྱིར་ཏེ། སྲོག་ཡོད་པའི་ཕྱིར། ཁྱབ་སྟེ། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །ཞེས་གསུངས་པའི་ཕྱིར། ཡང་དེའི་གནས་སྐབས་ན་སེམས་ཡོད་དེ། སེམས་བྱུང་ཡོད་པའི་ཕྱིར་ཏེ། མ་ཆགས་པའི་སེམས་བྱུང་ཡོད་པའི་ཕྱིར་ཏེ། རང་བཞིན་གནས་རིགས་ཡོད་པའི་ཕྱིར། ཁྱབ་སྟེ། མ་ཆགས་འཕགས་རིགས་ཞེས་གསུངས་པའི་ཕྱིར། འོ་ན་མཛོད་འགྲེལ་ལས། བྱེ་བྲག་ཏུ་སྨྲ་བ་རྣམས་ན་རེ། འགོག་པའི་སྙོམས་པར་འཇུག་པ་ནི་སེམས་མེད་པ་ཡིན་ནོ་ཞེས་ཟེར་རོ་ཞེས་གསུངས་པ་དང་འགལ་ལོ་ཞེ་ན། ལུང་དེའི་དོན་ནི་སེམས་སེམས་བྱུང་མངོན་འགྱུར་བ་མེད་ཅེས་པའི་དོན་ཡིན་པས་སྐྱོན་མེད་དོ་ཞེས་སྨྲའོ། །འོ་ན་གཟུགས་མེད་ཀྱི་རྟེན་ཅན་གྱི་འཕགས་པའི་རྒྱུད་ལ་གཟུགས་ཡོད་པར་ཐལ། དེའི་རྒྱུད་ལ་ཟག་མེད་ཀྱི་སྡོམ་པ་ཡོད་པའི་ཕྱིར། ཁྱབ་སྟེ། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །སྡོམ་པ་སོ་སོ་ཐར་ཞེས་བྱ། །དེ་བཞིན་ཟག་མེད་བསམ་གཏན་སྐྱེས། །ཞེས་གསུངས་པའི་ཕྱིར། གཏན་ཚིགས་ཁས་བླངས་ཏེ། ཟག་མེད་ནི། བསམ་གཏན་ཁྱད་པར་འདུ་ཤེས་མེད། །སེམས་ཅན་མ་གཏོགས་གཟུགས་མེད་ནའང་། །ཞེས་གསུངས་པའི་ཕྱིར། གཞན་ཡང་གཟུགས་མེད་ཀྱི་རྟེན་གྱི་གང་ཟག་གི་རྒྱུད་ལ་གཟུགས་ཡོད་པར་ཐལ། དེའི་རྒྱུད་ལ་དྲོད་ཡོད་པའི་ཕྱིར། རྟགས་ཁས་བླངས་ཏེ། དེའི་རྒྱུད་ལ་སྲོག་ཡོད་པའི་ཕྱིར། ཁྱབ་པ་ཁས་བླངས་ཏེ། སྲོག་ནི་ཚེ་ཡིན་དྲོད་དང་ནི། །ཞེས་གསུངས་པའི་ཕྱིར། གཞན་ཡང་། རང་བཞིན་གནས་རིགས་ཡོད་པའི་ཕྱིར་ཞེས་པ་དེ། རང་གི་ངོ་བོ་ཡོད་པ་ལ་བྱེད་དམ། དེའི་ཐོབ་པ་ཡོད་པ་ལ་བྱེད། དང་པོ་ལྟར་ན་གཏན་ཚིགས་མི་འགྲུབ་ཅིང་། ཕྱི་མ་ལྟར་ན་ས་མ་འཕོས་པའི་མཐོང་ལམ་པའི་རྒྱུད་ལ་སྦྱོར་ལམ་ཡོད་པར་འགྱུར་བར་ཐལ། དེའི་ཐོབ་པ་ཡོད་པའི་ཕྱིར། དེས་ན་འགོག་པའི་སྙོམས་འཇུག་གི་གནས་སྐབས་ན་སེམས་སེམས་བྱུང་གཏན་ནས་མེད་པ་ཡིན་ཏེ། དེས་སེམས་སེམས་བྱུང་མ་ལུས་པ་འགོག་པ་ཡིན་གྱི། མངོན་འགྱུར་བ་འགོག་ཅིང་ཕྲ་བ་མི་འགོག་པའི་རྣམ་གཞག་བྱེ་བྲག་ཏུ་སྨྲ་བའི་གཞུང་གང་ལས་ཀྱང་མ་གསུངས་པའི་ཕྱིར་དང་། དེའི་ཐོབ་པ་ཡོད་པ་ཙམ་གྱིས་དེ་ཡོད་པར་མི་འགྲུབ་པའི་ཕྱིར་དང་། སེམས་སེམས་བྱུང་གང་རུང་ཡིན་ན། མངོན་འགྱུར་བ་ཡིན་དགོས་པའི་ཕྱིར། དེ་དག་གི་དོན་བསྡུ་ན། འགོག་སྙོམས་ཀྱི་མཚན་ཉིད་དང་། དབྱེ་བ་གཉིས་ལས། དང་པོ་ལ། ཁ་ཅིག་དགག་གཞི་ལུས་ཀྱི་སྟེང་དུ་དགག་བྱ་རྣམ་ཤེས་ཚོགས་དྲུག་བཀག་པའི་སྙོམས་འཇུག་ཅེས་ཟེར་བ་ནི་མི་འཐད་དེ། འདུ་ཤེས་མེད་པའི་སྙོམས་འཇུག་གིས་མ་ངེས་པའི་ཕྱིར་རོ། །རང་ལུགས་ནི། དགག་གཞི་ལུས་ཀྱི་སྟེང་དུ་དགག་བྱ་རྣམ་ཤེས་ཚོགས་དྲུག་འཁོར་བཅས་བཀག་པའི་འཕགས་རྒྱུད་ཀྱི་སྙོམས་འཇུག་གང་ཞིག སྲིད་རྩེའི་སས་བསྡུས་པའོ། །འདི་དང་ཟག་མེད་ཀྱི་གཞི་མཐུན་ནི་མེད་དེ། ལུགས་འདི་ལ་ཟག་མེད་དང་འདུ་བྱས་ཀྱི་གཞི་མཐུན་ཡིན་ན། ལམ་བདེན་ཡིན་དགོས་ཤིང་། འགོག་སྙོམས་ཡིན་ན། ལམ་བདེན་མིན་དགོས་པའི་ཕྱིར་རོ། །གཉིས་པ་དབྱེ་བ་ལ། རྟེན་གྱི་སྒོ་ནས་དབྱེ་ན། འདོད་པའི་རྟེན་ཅན་དང་། གཟུགས་ཀྱི་རྟེན་ཅན་གཉིས། གང་ཟག་གི་སྒོ་ནས་དབྱེ་ན། སློབ་པའི་རྒྱུད་ལ་ཡོད་པ་དང་། མི་སློབ་པའི་རྒྱུད་ལ་ཡོད་པ་གཉིས། ཕྱི་མ་ལ་ཐེག་པ་གསུམ་གྱི་དབྱེ་བས་གསུམ་ཡོད་དོ། །བྱེ་བྲག་ཏུ་སྨྲ་བའི་ལུགས་བཤད་ཟིན་ཏོ།། ༈ །།སེམས་ཙམ་པའི་ལུགས་ལ་གཉིས་ཏེ། གཞུང་ལས་ཇི་ལྟར་བཤད་པའི་ཚུལ་དང་། ཁྱད་པར་གྱི་ཆོས་བྱེ་བྲག་ཏུ་བཤད་པའོ། །དང་པོ་ནི། མངོན་པ་ཀུན་བཏུས་ཀྱི་མཚན་ཉིད་རྣམ་པར་ངེས་པ་ལས། འགོག་པའི་སྙོམས་པར་འཇུག་པ་གང་ཞེ་ན། ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བ། སྲིད་པའི་རྩེ་མོ་ལས་གྱེན་དུ་བསྐྱོད་པའི་ཞི་བར་གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་སེམས་དང་སེམས་ལས་བྱུང་བའི་ཆོས་བརྟན་པ་མ་ཡིན་པ་རྣམས་དང་། བརྟན་པ་དེ་དག་ལས་ཀྱང་ཁ་ཅིག་འགོག་པ་ལ་འགོག་པའི་སྙོམས་པར་འཇུག་པ་ཞེས་གདགས་སོ་ཞེས་དང་། ཡང་དེ་ཉིད་ཀྱི་བདེན་པ་རྣམ་པར་ངེས་པ་ལས། འགོག་པའི་སྙོམས་པར་འཇུག་པ་ནི་འཇིག་རྟེན་ལས་འདས་པ་སྟེ་མི་རྣམས་ཀྱི་ནང་དུ་མངོན་པར་བསྒྲུབ་བོ། །མི་རྣམས་ཀྱི་ནང་དུ་མངོན་པར་གྲུབ་ནས་མི་རྣམས་ཀྱི་ནང་དུའམ། གཟུགས་ཀྱི་ཁམས་སུ་མངོན་དུ་བྱེད་དོ། །གཟུགས་མེད་པའི་ཁམས་སུ་ནི་འདི་མངོན་དུ་འགྱུར་བ་མེད་དེ། ཞི་བའི་རྣམ་པར་ཐར་པའི་རྣམ་པར་སྨིན་པའི་གནས་པ་རྣམས་ནི་འདི་ལ་འབད་པའི་བརྩོན་པ་མེད་པའི་ཕྱིར་རོ་ཞེས་དང་། གཏན་ལ་དབབ་པ་བསྡུ་བ་ལས། དེ་ཡང་རྣམ་པ་གསུམ་སྟེ་ངོ་བོ་ལས་ནི་དགེ་བ་ཡིན་ནོ། །གང་ཟག་ལས་ནི་འཕགས་པའི་རྒྱུད་དུ་གཏོགས་པ་སྟེ། སློབ་པའི་རྒྱུད་དུ་གཏོགས་པ་དང་མི་སློབ་པའི་རྒྱུད་དུ་གཏོགས་པའོ། །སྐྱེ་བ་ལས་ནི་ཀུན་གཞི་རྣམ་པར་མ་བཞག་ན་དང་པོར་འདིར་བསྐྱེད་ཅིང་། དེའི་འོག་ཏུ་གཟུགས་ཀྱི་ཁམས་སུ་མངོན་དུ་བྱེད་དེ། དེ་མངོན་དུ་བྱེད་པ་ནི་གཟུགས་ཀྱི་ལུས་ལ་བྱེད་པ་རག་ལས་པའི་ཕྱིར། ཀུན་གཞི་རྣམ་པར་བཞག་ན་མངོན་དུ་བྱེད་པ་ཐམས་ཅད་དུ་འགྲོ་བར་ལྟའོ་ཞེས་གསུངས་སོ། །དེ་ལ་ཀུན་བཏུས་ལས་གསུངས་པའི་ལུང་དང་པོའི་དོན་ནི། ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་ཞེས་པས་ནི་ཞི་གནས་ཁྱད་པར་ཅན་སྲིད་རྩེའི་སེམས་ཐོབ་དགོས་པར་བསྟན། སྲིད་པའི་རྩེ་མོ་ལས་ཞེས་སོགས་ཀྱིས་ནི་ལྷག་མཐོང་ཁྱད་པར་ཅན་བདག་མེད་མངོན་སུམ་དུ་རྟོགས་པའི་ཤེས་རབ་ཐོབ་དགོས་པར་བསྟན་པས་དེ་གཉིས་ཀྱིས་སའི་ཁྱད་པར་བསྟན་ནོ། །ཞི་བར་གནས་པའི་ཞེས་སོགས་ཀྱིས་ཡིད་བྱེད་ཀྱི་ཁྱད་པར་བསྟན། སེམས་དང་སེམས་ལས་བྱུང་བའི་ཞེས་སོགས་ཀྱིས་གནས་ཀྱི་ཁྱད་པར་བསྟན་ཏེ། བརྟན་པ་མ་ཡིན་པ་ཚོགས་དྲུག་དང་། བརྟན་པ་དེ་དག་ལས་ཁ་ཅིག་ཉོན་ཡིད་དགག་བྱར་དངོས་སུ་བསྟན་ནས་ཀུན་གཞི་གནས་སུ་ཤུགས་ལ་བསྟན་པའི་ཕྱིར་རོ། །ཚོགས་དྲུག་ནི་སོ་སོ་སྐྱེ་བོའི་གནས་སྐབས་སུ་ཡང་དང་ཡང་དུ་རྒྱུན་ཆད་པ་སྲིད་པས་ན་བརྟན་པ་མ་ཡིན་པ་དང་། ཉོན་ཡིད་ནི་སོ་སྐྱེའི་གནས་སྐབས་སུ་རྒྱུན་ཆད་པ་མི་སྲིད་པས་བརྟན་པ་ཞེས་བརྗོད་དོ། །འགོག་པའི་སྙོམས་པར་འཇུག་པ་ཞེས་པས་ནི་ངོ་བོའི་ཁྱད་པར་བསྟན། གདགས་སོ་ཞེས་པས་ནི་བཏགས་ཡོད་དུ་བསྟན་ཏེ། འགྲེལ་པ་རྒྱལ་པོའི་སྲས་ལས། སྙོམས་པར་འཇུག་པ་འདི་གཉིས་ནི་ས་དང་ཡིད་ལ་བྱེད་པ་དང་། གནས་དང་། ངོ་བོ་དང་། བཏགས་པས་བསྟན་ཏེ་ཞེས་གསུངས་པའི་ཕྱིར་རོ། །ལུང་གཉིས་པའི་དོན་ནི། འགོག་པའི་སྙོམས་པར་འཇུག་པ་ནི་ཞེས་པས་ནི་ངོ་བོ་འཇིག་རྟེན་ལས་འདས་པར་བསྟན། མི་རྣམས་ཀྱི་ནང་དུ་ཞེས་སོགས་ཀྱིས་ནི་འདོད་གཟུགས་གཉིས་ཀའི་རྟེན་ཅན་དུ་བསྟན་ནོ། །ལུང་གསུམ་པའི་དོན་ནི། ངོ་བོ་གང་ཡིན་པ་དང་། གང་ཟག་གང་གི་རྒྱུད་ལ་ཡོད་པ་དང་། རྟེན་གང་ལ་མངོན་དུ་བྱེད་པ་གསུམ་སྟེ་གོ་སླའོ། །གཉིས་པ་ཁྱད་པར་གྱི་ཆོས་བྱེ་བྲག་ཏུ་བཤད་པ་ལ་བདུན་སྟེ། གང་ཟག་གང་གིས་འཇུག་པ། རྟེན་གང་ལ་འཇུག་པ། ས་གང་ལ་བརྟེན་པ། ཡིད་བྱེད་གང་གིས་འཇུག་པ། དུས་ཇི་སྲིད་དུ་འཇུག་པ། དགག་བྱ་གང་འགོག་པ། ངོ་བོའི་ཁྱད་པར་ལ་དཔྱད་པའོ། །དང་པོ་ནི། སོ་སོ་སྐྱེ་བོ་རྣམས་འགོག་པ་ལ་སྙོམས་པར་མི་འཇུག་སྟེ། སོ་སོ་སྐྱེ་བོ་འགའ་ཞིག་གིས་ཞི་གནས་ཁྱད་པར་ཅན་སྲིད་རྩེའི་སེམས་ཙམ་ཐོབ་ཀྱང་ལྷག་མཐོང་ཁྱད་པར་ཅན་བདག་མེད་མངོན་སུམ་དུ་རྟོགས་པའི་ཤེས་རབ་མ་ཐོབ་པའི་ཕྱིར། འཕགས་པ་ལ་ཡང་རྒྱུན་ཞུགས་དང་། ཕྱིར་འོང་དང་། སྲིད་རྩེའི་སེམས་མ་ཐོབ་པའི་ཕྱིར་མི་འོང་རྣམས་ཀྱིས་ནི་དེ་ལ་སྙོམས་པར་འཇུག་མི་ནུས་ཏེ། ལྷག་མཐོང་ཁྱད་པར་ཅན་བདག་མེད་མངོན་སུམ་དུ་རྟོགས་པའི་ཤེས་རབ་དང་ལྡན་ཀྱང་ཞི་གནས་ཁྱད་པར་ཅན་སྲིད་རྩེའི་སེམས་མ་ཐོབ་པའི་ཕྱིར། འོ་ན་འགོག་པའི་སྙོམས་འཇུག་ཐོབ་པ་ལ་དེ་གཉིས་ཐོབ་དགོས་པའི་རྒྱུ་མཚན་ཅི་ཡིན་ཞེ་ན། བདག་མེད་མངོན་སུམ་དུ་རྟོགས་པའི་ཤེས་རབ་ཐོབ་དགོས་ཏེ། དེ་དང་མི་ལྡན་ན་བདག་ཆད་ཀྱིས་དོགས་པའི་འཇིགས་པ་དང་བཅས་པས་ཉོན་ཡིད་དགག་མི་ནུས་ཞིང་། དེ་མ་བཀག་ན་འཕགས་པའི་གནས་པ་མཆོག་ཏུ་མི་འགྱུར་བའི་ཕྱིར་དང་། སྲིད་རྩེའི་སེམས་ཡང་ཐོབ་དགོས་ཏེ། འགོག་པ་ལ་སྙོམས་པར་འཇུག་པ་ལ་ཚོར་འདུ་རགས་པ་འགོག་དགོས་ཤིང་། སྲིད་རྩེའི་སེམས་དེ་སེམས་ཀྱི་རྒྱུ་བ་མི་གསལ་བས་ཚོར་འདུ་རགས་པ་དགག་སླ་བའི་ཕྱིར། ཇི་སྐད་དུ་མདོ་ལས། འགོག་པ་ལ་སྙོམས་པར་འཇུག་པས་ཆོས་གཉིས་གཅེས་སྤྲས་སུ་བྱ་སྟེ། གཉིས་གང་ཞེ་ན། ཞི་གནས་དང་ལྷག་མཐོང་ངོ་ཞེས་གསུངས་པའི་ཕྱིར་རོ། །དེས་ན་ཞི་གནས་ཁྱད་པར་ཅན་སྲིད་རྩེའི་སེམས་དང་། ལྷག་མཐོང་ཁྱད་པར་ཅན་བདག་མེད་མངོན་སུམ་དུ་རྟོགས་པའི་ཤེས་རབ་ཐོབ་པས་འདི་ལ་སྙོམས་པར་འཇུག་པས་ན་ཕྱིར་མི་འོང་ཡན་ཆད་ཀྱིས་སྙོམས་པར་འཇུག་དགོས་སོ། །གཉིས་པ་ནི། འགོག་པའི་སྙོམས་པར་འཇུག་པ་ནི་འདོད་གཟུགས་ཀྱི་རྟེན་ཅན་ཡིན་གྱི་གཟུགས་མེད་ཀྱི་རྟེན་ཅན་ནི་མེད་དེ། རང་རྒྱལ་འདོད་པའི་རྟེན་ཅན་དུ་ངེས་པའི་ཕྱིར་དང་། བྱང་འཕགས་རྣམས་ཀྱང་འདོད་གཟུགས་ཀྱི་རྟེན་ཅན་དུ་ངེས་པའི་ཕྱིར་དང་། ཉན་ཐོས་ལ་གཟུགས་མེད་ཀྱི་རྟེན་ཅན་ཡོད་ཀྱང་རྟེན་དེ་ལ་འགོག་པའི་སྙོམས་པར་འཇུག་པ་ནི་མེད་དེ། ཉན་ཐོས་རྣམས་འགོག་པ་ལ་སྙོམས་པར་འཇུག་པའི་དགོས་པ་ནི། ཚོར་འདུ་རགས་པས་སྐྱོ་བ་སྐྱེས་ནས་དེ་ཞི་བའི་དོན་དུ་སྙོམས་པར་འཇུག་པ་ཡིན་པ་ནི་གང་ཞིག གཟུགས་མེད་ཀྱི་རྟེན་ཅན་གྱི་ཉན་ཐོས་འཕགས་པ་རྣམས་ནི་ཞི་བའི་རྣམ་པར་ཐར་པའི་རྣམ་པར་སྨིན་པའི་གནས་པ་ཡིན་པས་ཚོར་འདུ་རགས་པས་སྐྱོ་བ་སྐྱེ་བ་མེད་པའི་ཕྱིར་རོ། །དེ་ཡང་གཟུགས་མེད་ཀྱི་རྟེན་ལ་ཚོར་འདུ་རགས་པས་སྐྱོ་བ་སྐྱེ་བ་མེད་པ་ཡིན་གྱི། ཚོར་འདུ་རགས་པ་མེད་པ་ནི་མ་ཡིན་ཏེ། ཡིད་ཀྱི་རྣམ་ཤེས་དང་། ཉོན་ཡིད་ཀྱི་འཁོར་དུ་བྱུང་བའི་ཚོར་འདུ་ཡོད་པའི་ཕྱིར་རོ། །འོ་ན་བསྡུ་བ་ལས་ཀུན་གཞི་རྣམ་པར་བཞག་ན་མངོན་དུ་བྱེད་པ་ཐམས་ཅད་དུ་འགྲོ་བར་ལྟའོ་ཞེས་བཤད་པ་དང་འགལ་ལོ་སྙམ་ན། དེ་ནི་ནུས་པ་ཡོད་པ་ཙམ་ལ་དགོངས་པས་སྐྱོན་མེད་དོ། །མདོར་ན་གཟུགས་མེད་ཁམས་ན་འགོག་པ་ལ་སྙོམས་པར་འཇུག་པ་མེད་དེ། འགོག་པ་ལ་སྙོམས་པར་འཇུག་པ་ལ་དགོས་ནུས་གཉིས་ཀ་ཚང་དགོས་ཞིང་ཀུན་གཞི་རྣམ་པར་བཞག་ན་ནུས་པ་ཡོད་ཀྱང་དགོས་པ་མེད། མ་བཞག་ན་དགོས་ནུས་གཉིས་ཀ་མེད་པའི་ཕྱིར་རོ། །ཁ་ཅིག་བསྡུ་བ་ལས་གཟུགས་མེད་ཁམས་སུ་འགོག་པ་ལ་སྙོམས་པར་འཇུག་པ་ཡོད་པར་བཤད་པ་ནི་སྐྱེས་ཟིན་མངོན་དུ་བྱེད་པའི་དབང་དུ་བྱས་པ་ཡིན་ལ། ཀུན་ལས་བཏུས་ལས་མེད་པར་བཤད་པ་ནི་གསར་དུ་མངོན་དུ་བྱེད་པ་མེད་པ་ལ་དགོངས་སོ་ཞེས་སྨྲ་བ་ནི་མི་འཐད་དེ། དེ་ལྟར་ན་ཀུན་བཏུས་སུ་གཟུགས་སུ་ཡང་འགོག་སྙོམས་མངོན་དུ་མི་བྱེད་པར་འཆད་རིགས་པར་ཐལ་བའི་ཕྱིར་ཏེ། འགོག་པའི་སྙོམས་པར་འཇུག་པ་དང་པོར་མིའི་རྟེན་ལ་སྒྲུབ་དགོས་པར་བཤད་པའི་ཕྱིར་རོ། །ཁ་ཅིག ཐོགས་མེད་ཀྱི་ལུགས་ལ་ཀུན་གཞི་རྣམ་པར་མ་བཞག་པ་ཉན་ཐོས་སྡེ་པའི་གྲུབ་མཐའ་དང་སྒོ་བསྟུན་པའི་ལུགས་གཅིག་དང་། ཀུན་གཞི་རྣམ་པར་བཞག་པ་སེམས་ཙམ་པའི་གྲུབ་མཐའ་དང་སྒོ་བསྟུན་པའི་ལུགས་གཉིས་ཡོད་པ་ལས། དང་པོའི་དབང་དུ་བྱས་ནས་གཟུགས་མེད་དུ་མངོན་དུ་མི་བྱེད་པར་བཤད། ཕྱི་མའི་དབང་དུ་བྱས་ནས་མངོན་དུ་བྱེད་པར་བཤད་པ་ཡིན་ནོ་ཞེས་འདོད་པ་ཡང་མི་འཐད་དེ། ཀུན་ལས་བཏུས་ཀྱི་ལུགས་ཀུན་གཞི་རྣམ་པར་བཞག་པའི་གནས་སྐབས་ཡིན་ཀྱང་མཐའ་གཅིག་ཏུ་གཟུགས་མེད་དུ་མངོན་དུ་མི་བྱེད་པར་བཤད་པའི་ཕྱིར་རོ། །འོ་ན་བསྡུ་བའི་ལུང་གི་དོན་ཇི་ལྟར་སྙམ་ན། གཟུགས་མེད་དུ་མངོན་དུ་མི་བྱེད་པ་ལ་དོགས་པ་གཅོད་པའི་དབང་དུ་བྱས་ནས། འོ་ན་གཟུགས་མེད་དུ་འགོག་པ་ལ་སྙོམས་པར་འཇུག་པའི་ནུས་པ་ཡང་མེད་དམ་ཞེ་ན། ཀུན་གཞི་རྣམ་པར་བཞག་ན་ནུས་པ་ཡོད་ཅེས་པའི་དོན་ནོ། །དེས་ན་འགོག་སྙོམས་ཀྱི་རྟེན་ནི་འདོད་གཟུགས་ཁོ་ནར་ངེས་ཏེ། ཐེག་ཆེན་གྱི་མཐོང་ལམ་འདོད་གཟུགས་གཉིས་ཀའི་རྟེན་ལ་སྐྱེ་བ་ཡོད་པས། བྱང་སེམས་འཕགས་པ་རྣམས་ཀྱིས་འདོད་གཟུགས་གཉིས་ཀའི་རྟེན་ལ་འགོག་སྙོམས་གསར་དུ་མངོན་དུ་བྱེད་པ་ཡོད་པ་གང་ཞིག ཉན་ཐོས་རྣམས་ཀྱིས་ནི་དང་པོར་མིའི་རྟེན་ལ་བསྐྱེད་ཅིང་། དེ་ལས་ཉམས་ན་ཚེ་དེ་ཉིད་ལ་འདོད་པར་མངོན་དུ་བྱེད་པའམ་སྐྱེ་བ་ཕྱི་མར་གཟུགས་སུ་མངོན་དུ་བྱེད་པ་གང་རུང་དུ་ངེས་པའི་ཕྱིར་རོ། །ཐེག་ཆེན་གྱི་མཐོང་ལམ་སྐྱེས་པའི་རྟེན་ལ་འགོག་སྙོམས་མངོན་དུ་བྱེད་པས་ཁྱབ་སྟེ། རྣམ་གྲོལ་ལམ་གྱི་རྗེས་སུ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་ཀྱི་ཏིང་ངེ་འཛིན་སྒོམ་པར་ངེས་པའི་ཕྱིར་རོ། །ཉན་ཐོས་རྣམས་ཀྱི་སྐྱེ་བ་ཕྱི་མ་གཟུགས་སུ་མངོན་དུ་བྱེད་པ་ཡོད་དེ། འགོག་པའི་སྙོམས་འཇུག་འབྲིང་དུ་སྒོམ་པ་ལས་ཉམས་ན་ཚེ་དེ་ཉིད་ལ་མངོན་དུ་བྱེད་ཅིང་ཆུང་ངུར་སྒོམ་པ་ལས་ཉམས་ན་ཕལ་ཆེར་ཚེ་ཕྱི་མ་ལ་གཟུགས་སུ་མངོན་དུ་བྱེད་དེ། བསྡུ་བ་ལས། དེ་ལ་འགོག་པའི་སྙོམས་པར་འཇུག་པ་ཆུང་ངུ་སྒོམ་པ་ནི་ཡོངས་སུ་ཉམས་པར་འགྱུར་ཞིང་། མྱུར་བ་ཁོ་ནར་ཕྱིས་བསྐྱེད་པར་མི་ནུས་སོ། །འབྲིང་དུ་སྒོམ་པ་ནི་ཡོངས་སུ་ཉམས་པར་འགྱུར་ལ་མྱུར་བ་ཁོ་ནར་ཕྱིས་བསྐྱེད་པར་ནུས་སོ། །ཆེན་པོར་སྒོམ་པ་ནི་ཡོངས་སུ་ཉམས་པར་མི་འགྱུར་བ་ཁོ་ན་ཡིན་ནོ་ཞེས་གསུངས་པའི་ཕྱིར་རོ། །འགོག་པའི་སྙོམས་འཇུག་ལས་ཉམས་ནས་ཕྱི་མ་འདོད་པར་མངོན་དུ་བྱེད་པ་ནི་མེད་དེ། བྱང་སེམས་འཕགས་པ་འགོག་སྙོམས་ལས་ཉམས་པ་མི་སྲིད་ཅིང་འགོག་སྙོམས་ཐོབ་པའི་ཐེག་དམན་གྱི་གང་ཟག་ཡིན་ན། ཕྱིར་མི་འོང་དང་དགྲ་བཅོམ་གང་རུང་ཡིན་དགོས་པས་ལས་ཉོན་གྱི་དབང་གིས་འདོད་ཁམས་སུ་སྐྱེ་བ་མི་སྲིད་པའི་ཕྱིར་རོ། །འོ་ན་ཕྱི་མ་གཟུགས་ཁམས་སུ་མངོན་དུ་བྱེད་པར་ཡོད་པར་གང་ལས་ཤེས་ཤེ་ན། འཆར་བྱེད་ཀྱི་མདོ་ལས་གསུངས་པའི་ཁམ་ཟས་ཟ་བའི་ལྷ་ལས་འདས་ཏེ། ཡིད་ལས་བྱུང་བའི་ལྷའི་རིགས་སུ་སྐྱེས་ནས་མངོན་དུ་བྱེད་པ་ཡོད་པ་དེ་ཉིད་ཀྱིས་གྲུབ་བོ། །གལ་ཏེ་དང་པོར་མིའི་རྟེན་ལ་འགོག་སྙོམས་ཐོབ་པའི་གང་ཟག་ཕྱི་མ་གཟུགས་ཁམས་སུ་ལས་ཉོན་གྱི་དབང་གིས་སྐྱེ་བ་མེད་པར་ཐལ། འགོག་པའི་སྙོམས་འཇུག་ཐོབ་ན་ཅི་ཡང་མེད་མན་ཆད་ལ་འདོད་ཆགས་དང་བྲལ་བས་ཁྱབ་པའི་ཕྱིར་ཞེ་ན། འདི་ལ་འགྲེལ་པ་རྒྱས་སྲས་མའི་ལན་དང་། རང་ལུགས་ཀྱི་ལན་གཉིས་ལས། དང་པོ་ནི། མུ་བཞི་མཛད་པ་ལས། མུ་དང་པོ་གཟུགས་ལ་འདོད་ཆགས་དང་བྲལ་ནས་གཟུགས་མེད་ལ་སྙོམས་པར་འཇུག་མི་ནུས་པ་ནི་མི་ལྕོགས་པ་མེད་པ་ལ་བརྟེན་ནས་གཟུགས་ལ་འདོད་ཆགས་དང་བྲལ་བའི་ཕྱིར་མི་འོང་དང་། དགྲ་བཅོམ་ལྟ་བུ་སྟེ། བསམ་གཏན་གྱི་དངོས་གཞི་ཙམ་ཡང་མ་ཐོབ་པའི་ཕྱིར་རོ། །མུ་གཉིས་པ་གཟུགས་ལ་འདོད་ཆགས་དང་མ་བྲལ་བར་གཟུགས་མེད་ལ་སྙོམས་པར་འཇུག་ནུས་པ་ནི། བསམ་གཏན་བཞི་པ་ཐོབ་པའི་འཕགས་པ་གཟུགས་མེད་དུ་སྐྱེ་བ་དོན་དུ་མི་གཉེར་བས། སྤོང་ལམ་བསལ་ནས་ཁྱད་པར་གྱི་ལམ་ལ་གནས་ཏེ་གཟུགས་མེད་ཀྱི་རྣམ་ཐར་ལ་སྙོམས་པར་འཇུག་པ་ལྟ་བུའོ། །མུ་གསུམ་པ་གཟུགས་ལ་འདོད་ཆགས་དང་བྲལ་ནས་གཟུགས་མེད་ལ་སྙོམས་པར་འཇུག་ནུས་པ་ནི་དེ་ཉིད་གཟུགས་ལ་འདོད་ཆགས་དང་བྲལ་བ་དོན་དུ་གཉེར་བས་སྤོང་ལམ་ལ་གནས་ཏེ་གཟུགས་མེད་ལ་སྙོམས་པར་འཇུག་པ་ལྟ་བུའོ། །མུ་བཞི་པ་གཉིས་ཀ་མ་ཡིན་པ་ནི་དེ་དག་ལས་མ་གཏོགས་པ་རྣམས་སོ། །གཟུགས་སུ་འགོག་སྙོམས་མངོན་དུ་བྱེད་པ་ནི་མུ་གཉིས་པའི་དབང་དུ་བྱས་པའོ་ཞེས་གསུངས་སོ། །འདི་ལ་ཊཱི་ཀ་ལས་འོག་ས་ལ་འདོད་ཆགས་དང་མ་བྲལ་བར་གོང་མ་ཐོབ་པར་འདོད་པ་ལ་ནི་མཐར་གནས་ཀྱི་སྙོམས་འཇུག་མ་ཡིན་པར་ཐལ་བའི་སྐྱོན་གནས་སོ་ཞེས་གསུངས་པའི་དོན་དུ་བསམ་ནས་ཁ་ཅིག་བསམ་གཏན་བཞི་དང་གཟུགས་མེད་བཞི་པོ་མཐར་གནས་ཀྱི་སྙོམས་འཇུག་མིན་པར་ཐལ། འོག་སའི་དངོས་གཞི་མངོན་དུ་མ་བྱས་པར་གོང་སའི་དངོས་གཞི་མངོན་དུ་བྱས་པ་ཡོད་པའི་ཕྱིར། ཞེས་སྨྲ་བ་ནི་དགོངས་པ་མ་ཡིན་ཏེ། གཏན་ཚིགས་དེ་ཕྱོགས་སྔས་ཁས་ཀྱང་མ་བླངས་ཤིང་ཅིག་ཆར་བའི་དགྲ་བཅོམ་གྱིས་དེ་ལྟར་དུ་བྱས་པ་ཡོད་པས་ཁྱབ་པ་ཡང་མ་ངེས་པའི་ཕྱིར་རོ། །དེས་ན་ཊཱི་ཀའི་དགོངས་པ་ནི་འོག་ས་ལ་འདོད་ཆགས་དང་མ་བྲལ་བར་གོང་མ་ཐོབ་པ་ལ་སྐྱོན་བརྗོད་པ་ཡིན་ནོ། །སྐྱོན་གཞན་ཡང་ཡོད་དེ། བར་ཆད་མེད་ལམ་སྔོན་དུ་མ་སོང་བའི་རྣམ་གྲོལ་ལམ་ཡོད་པར་ཐལ། སྤོང་ལམ་སྔོན་དུ་མ་སོང་བའི་ཁྱད་པར་གྱི་ལམ་ཡོད་པའི་ཕྱིར། གཟུགས་མེད་དུ་སྐྱེ་བ་ལེན་པ་གཟུགས་ལ་འདོད་ཆགས་དང་བྲལ་དགོས་པར་ཐལ། བསམ་གཏན་བཞི་པ་ཐོབ་པའི་འཕགས་པ་གཟུགས་མེད་ཀྱི་སྐྱེ་བ་དོན་དུ་མི་གཉེར་བའི་རྒྱུ་མཚན་གྱིས་གཟུགས་ལ་ཆགས་བྲལ་མི་བྱེད་པ་ལ་རྒྱུ་མཚན་ཡོད་པའི་ཕྱིར། འདོད་ན། ཁས་བླངས་དང་འགལ་ཏེ། བསམ་གཏན་བཞི་པ་ལ་ཆགས་པ་དང་མ་བྲལ་ཞིང་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིའི་སྙོམས་འཇུག་ལས་མ་ཉམས་པར་འཆི་འཕོ་བ་ཕྱིར་མི་འོང་དེ་གཟུགས་མེད་དུ་མི་སྐྱེ་བར་ཐལ། འདོད་པ་དེའི་ཕྱིར།༞ མཛོད་ཀྱི་འགྲེལ་བཤད་ལས། འགོག་པའི་སྙོམས་འཇུག་གི་ལུས་རྟེན་ལ། གླིང་གསུམ་གྱི་མི། འདོད་ལྷ་རིས་དྲུག ཚངས་ཆེན་མ་གཏོགས་པའི་གཟུགས་ཁམས་གནས་རིགས་བཅུ་དྲུག་སྟེ། ཉེར་ལྔ་ཡོད་པར་བཤད་པ་ཡང་མི་འཐད་དེ། འདི་བྱེ་བྲག་ཏུ་སྨྲ་བའི་ལུགས་ཡིན་ནམ། ཐེག་པ་ཆེན་པོའི་ལུགས་ཡིན། དང་པོ་ལྟར་ན། བྱང་སེམས་འཕགས་པ་འགོག་པ་ལ་སྙོམས་པར་འཇུག་མི་སྲིད་ཅིང་། འགོག་པ་ཐོབ་པའི་ཐེག་དམན་གྱི་གང་ཟག་ཡིན་ན། ཕྱི་མ་འདོད་ལྷར་སྐྱེ་བ་མི་སྲིད་པས་མི་འཐད་དོ། །གཉིས་པ་ལྟར་ན། ཚངས་ཆེན་མ་གཏོགས་པ་ཞེས་པ་དང་འགལ་ཏེ། ཚངས་ཆེན་གྱི་རྟེན་ལ་ཡང་འགོག་སྙོམས་ཐོབ་ཟིན་མངོན་དུ་བྱེད་པ་ཡོད་པའི་ཕྱིར་རོ། །འདི་ཡས་མན་ནས་ས་བཅད་གཅིག་ཆད་པས་སླན་ཆད་བཙལ་དགོས་མཆན། གསུམ་པ་ས་གང་ལ་བརྟེན་པ་ནི་རྩོམ་པ་དང་པོའི་ཚེ་ཐེག་པ་ཆེ་ཆུང་གཉིས་ཀས་སྲིད་རྩེའི་སེམས་ལ་བརྟེན་ནས་འཇུག་གོ །ཐེག་དམན་གྱི་ལུགས་ལ་སྲིད་རྩེ་དེ་སེམས་ཀྱི་རྒྱུ་བ་མི་གསལ་བས་དེ་ལ་བརྟེན་ནས་ཚོར་འདུ་རགས་པ་རྒྱུན་གཅོད་སླ་བའི་ཕྱིར་ཏེ། མཛོད་ལས། ཕྲ་བ་ཕྲ་བའི་མཇུག་ཐོག་ཏུ། །ཞེས་པའི་འགྲེལ་པར། སྲིད་པའི་རྩེ་མོ་ནི་འདུ་ཤེས་ཤིན་ཏུ་ཕྲ་བ་ཡིན་ཏེ། དེ་བས་ཀྱང་ཆེས་ཕྲ་བར་བྱས་ནས་འགོག་པ་ལ་སྙོམས་པར་འཇུག་གོ་ཅེས་གསུངས་པའི་ཕྱིར། འདིའི་ཕྲ་བ་ཡང་ས་གཞན་ལ་ལྟོས་ནས་ཕྲ་བ་ཡིན་གྱི་འགོག་སྙོམས་ཀྱི་དགག་བྱའི་འདུ་ཤེས་རགས་པའི་ཟླས་ཕྱེ་བའི་ཕྲ་བ་ནི་མིན་ཏེ། དེའི་ཕྲ་བ་ནི་ཀུན་གཞི་དང་མཚུངས་ལྡན་གྱི་འདུ་ཤེས་ལ་འཇོག་པའི་ཕྱིར་རོ། །ཐེག་ཆེན་ལ་ཡང་རྩོམ་པ་དང་པོའི་གནས་སྐབས་སུ་དེ་ལྟར་དུ་ངེས་ཏེ། ཐེག་ཆེན་འགོག་པ་ལ་སྙོམས་པར་འཇུག་པའི་ཐོག་མ་ནི་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་ཀྱི་གནས་སྐབས་ཡིན་ལ། དེའི་ཚེ་སྲིད་རྩེའི་མཇུག་ཐོག་ཏུ་འབྱུང་བར་ངེས་པའི་ཕྱིར་རོ། །ཕྱིས་ནི་བསམ་གཏན་དང་གཟུགས་མེད་གཞན་གྱི་མཇུག་ཐོག་ཏུ་འཇུག་པ་ཡང་ཡོད་དེ། མཛོད་འགྲེལ་ལས། འདི་ནི་རྩོམ་པ་དང་པོ་ལ་རྣམ་པར་ངེས་པ་ཡིན་གྱི་ཕྱིས་དགའ་འགུར་དབང་ཐོབ་པས་ནི་རྣམ་པར་བརྒལ་ཏེ་ཡང་འགོག་པ་ལ་སྙོམས་པར་འཇུག་གོ་ཞེས་གསུངས་པའི་ཕྱིར། འདིར་སྲིད་རྩེ་ལ་བརྟེན་ནས་སྙོམས་པར་འཇུག་ཞེས་པའི་དོན་ཡང་སྲིད་རྩེའི་མཇུག་ཐོག་ཏུ་སྙོམས་པར་འཇུག་པ་ཡིན་གྱི་སྲིད་རྩེ་འགོག་སྙོམས་ཀྱི་སེམས་རྟེན་ཡིན་པའི་དོན་ནི་མིན་ཏེ། སེམས་རྟེན་གྱི་དོན་ནི་རྣམ་ཤེས་གཅིག་གི་འཁོར་དུ་མཚུངས་ལྡན་དུས་མཉམ་དུ་འབྱུང་བ་ལ་འདོད་ཅིང་སྲིད་རྩེའི་སེམས་མ་འགགས་པར་འགོག་སྙོམས་མི་སྐྱེ། འགོག་སྙོམས་ནམ་ཞིག་སྐྱེས་པའི་ཚེ་སྲིད་རྩེའི་སེམས་འགག་ཟིན་པའི་ཕྱིར་རོ། །ཁ་ཅིག འགོག་པ་ལ་སྙོམས་པར་འཇུག་པ་ལ་ཞི་གནས་ཁྱད་པར་ཅན་སྲིད་རྩེའི་སེམས་དང་། ལྷག་མཐོང་ཁྱད་པར་ཅན་འདས་ལམ་ཐོབ་དགོས་པར་བཤད་པས་འཁྲུལ་གཞི་བྱས་ནས་གཉིས་ཀ་སྙོམས་པར་འཇུག་སེམས་སུ་འདོད་པ་ནི་བློ་གྲོས་རྩིང་བ་སྟེ། སེམས་ཙམ་པའི་ལུགས་ལ་སྲིད་རྩེའི་སེམས་ལ་འདས་ལམ་བརྟེན་པ་མེད་པས་དེ་གཉིས་ལྷན་ཅིག་ཏུ་འབྱུང་བ་མི་སྲིད་པའི་ཕྱིར་རོ། །དེས་ན་སྲིད་རྩེའི་སས་བསྡུས་ཀྱི་ཡིད་ཀྱི་རྣམ་ཤེས་ཀྱི་འཁོར་དུ་བྱུང་བའི་ཚོར་འདུ་གཅད་བྱའི་གཙོ་བོར་བྱས་ནས། དེ་དང་མཚུངས་ལྡན་གྱི་ཤེས་རབ་གཅོད་བྱེད་ཀྱི་གཙོ་བོར་བྱས་ཏེ། དེ་ལྟ་བུའི་ཡིད་ཀྱི་རྣམ་པར་ཤེས་པ་འཁོར་དང་བཅས་པ་འགོག་པའི་ཚེ་འགོག་པའི་སྙོམས་འཇུག་ཏུ་འཇོག་པའོ། །བཞི་པ་ཡིད་བྱེད་གང་གིས་འཇུག་པ་ནི། ཉན་ཐོས་རྣམས་ནི་ཚོར་འདུ་རགས་པ་ཞི་བས་གནས་པའི་ཡིད་ལ་བྱེད་པས་འཇུག་སྟེ། མཛོད་ལས། འདི་གནས་དོན་དུ་ཞེས་དང་། ཀུན་བཏུས་ལས། ཞི་བར་གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་ཞེས་གསུངས་པའི་ཕྱིར། བྱང་ཆུབ་སེམས་དཔའ་རྣམས་ནི་སྙོམས་འཇུག་ལ་རྩལ་སྦྱངས་པ་དང་། གཞན་དོན་དུ་ཤེས་པར་བྱེད་པའི་ཡིད་ལ་བྱེད་པས་འཇུག་སྟེ། སྤྱོད་འཇུག་ལས། རྒྱས་སྲས་རྣམས་ཀྱིས་མི་བསླབ་པའི། །དངོས་དེ་གང་ཡང་ཡོད་མ་ཡིན། །ཞེས་པ་ལྟར་རོ། །སངས་རྒྱས་ནི་གཞན་ངོར་སྙོམས་པར་འཇུག་པར་སྣང་བ་ཙམ་ཡིན་གྱི་དོན་ལ་སྙོམས་པར་འཇུག་པ་མེད་དེ། ལུགས་འདི་ལ་འགོག་པའི་སྙོམས་འཇུག་ཡིན་ན། འཇུག་ཤེས་འཁོར་བཅས་བཀག་པས་ཁྱབ་པ་གང་ཞིག སངས་རྒྱས་འཕགས་པ་ཡིན་ན། རྣམ་པར་མི་རྟོག་པའི་ཡེ་ཤེས་རྒྱུན་མི་ཆད་དུ་ལྡན་པས་ཁྱབ་པའི་ཕྱིར། མདོ་སྡེ་རྒྱན་གྱི་འགྲེལ་པ་དང་། བྱང་སར་སྙོམས་པར་འཇུག་པར་བཤད་པ་ནི་གཞན་ངོར་སྣང་བ་ཙམ་ལ་དགོངས་ལ། རྒྱན་དང་། ཀུན་བཏུས་ལས་སངས་རྒྱས་ཀྱི་ཟག་མེད་ཀྱི་ཡེ་ཤེས་འཆད་པའི་སྐབས་སུ་འགོག་པའི་སྙོམས་འཇུག་མི་འཆད་པ་ནི། དོན་ལ་སྙོམས་པར་འཇུག་པ་མེད་པའི་གནས་འདི་ཉིད་ཡིན་ནོ། །ལྔ་པ་དུས་ཇི་སྲིད་དུ་འཇུག་པ་ནི་ཉན་རང་རྣམས་ནི་བློའི་འཕེན་པ་ཇི་སྲིད་ཡོད་པ་དེ་སྲིད་དུ་སྙོམས་པར་འཇུག་ལ། བྱང་སེམས་ནི་ཞག་བདུན་ལས་ལྷག་པ་མི་འཇུག་སྟེ། མདོ་སྡེ་ཉི་མའི་སྙིང་པོ་ལས། ཉི་མ་གཅིག་ནས་བདུན་གྱི་བར་དུ་སྙོམས་པར་འཇུག་གོ །དུས་རིང་མོ་ཞིག་ཏུ་ཞུགས་ན་བྱང་ཆུབ་སེམས་པའི་སྤྱོད་པ་དམན་པར་འགྱུར་རོ་ཞེས་གསུངས་སོ། །ཁ་ཅིག་བྱང་སེམས་ཡུན་རིང་དུ་སྙོམས་པར་འཇུག་པ་ཡོད་དེ། སྙིང་རྗེ་པད་དཀར་ལས། སྐྱེ་བ་གཅིག་གིས་ཐོག་པའི་བྱང་ཆུབ་སེམས་དཔའ་འགོག་པ་ལ་སྙོམས་པར་འཇུག་པའི་སེམས་ཀྱིས་བར་གྱི་བསྐལ་པ་བཅུ་པོ་འདི་དག་འདའ་བར་བྱེད་དོ་ཞེས་དང་། སའི་སྙིང་པོ་འཁོར་ལོ་བཅུ་པའི་མདོ་ལས། བྱང་ཆུབ་སེམས་དཔའ་ཡང་དེའི་ཚེ་འདི་སྙམ་དུ་ཆོས་ཐམས་ཅད་བཟུང་སྟེ་ཡང་དག་པ་མ་ཡིན་པ་བདག་གིས་ཚོར་བ་རྣམ་པ་གསུམ་དང་འདུ་ཤེས་གསུམ་ལ་སོགས་པ་ཆོས་ཐམས་ཅད་ལྷག་མ་མ་ལུས་པ་ཡོངས་སུ་གཅོད་དོ་སྙམ་པས་འགོག་པའི་ཏིང་ངེ་འཛིན་ལ་སྙོམས་པར་འཇུག་གོ །ཏིང་ངེ་འཛིན་འདི་ལ་གནས་ནས་བློ་སྔོན་དུ་བཏང་བ་བཞིན་ཐམས་ཅད་ཡོངས་སུ་གཅོད་པར་བྱེད་དོ། །ཏིང་ངེ་འཛིན་དེའི་ཟས་ཀྱིས་འཚོ། གལ་ཏེ་ན་ཞག་བདུན་ནམ། བདུན་གཉིས་སམ། བདུན་གསུམ་མམ། བདུན་བཞིའམ། བདུན་ལྔའམ། བདུན་དྲུག་གམ། བདུན་བདུན་ནམ། བདུན་བརྒྱད་དམ། གལ་ཏེ་ན་བསྐལ་པ་ཚད་མེད་པ་བྱེ་བར་ཕྲག་ཁྲིག་བརྒྱ་སྟོང་གི་བར་དུ་ཅི་ནུས་སུ་གནས་ཏེ། ཏིང་ངེ་འཛིན་གྱི་ཟས་ཟའོ། །ཏིང་ངེ་འཛིན་དེ་ལས་ལངས་ནས་སེམས་ཅི་ལ་ཡང་མི་ཆགས་པར་གནས་ཏེ་ཞེས་གསུངས་པའི་ཕྱིར་ཞེས་ཟེར་བ་མི་འཐད་དེ། བྱང་སེམས་ནི་གཙོ་བོར་གཞན་དོན་དུ་ཤེས་པར་བྱ་བའི་ཕྱིར་དུ་འཇུག་ཅིང་དེ་ནི་ཡུན་ཚད་ཐུང་ངུས་འགྲུབ་པའི་ཕྱིར་དང་། ཡུན་རིང་དུ་སྙོམས་པར་འཇུག་ན་བྱང་ཆུབ་ཀྱི་སེམས་དང་སྙིང་རྗེ་ཡང་དེ་སྲིད་དུ་བཀག་དགོས་པས་བྱང་ཆུབ་སེམས་དཔའི་སྤྱོད་པ་དམན་པར་འགྱུར་བའི་ཕྱིར་རོ། །གལ་ཏེ་གཞན་དོན་དོར་བར་མི་འགྱུར་ཏེ། འགོག་པ་ལ་སྙོམས་པར་འཇུག་པ་དེ་ཉིད་གཞན་དོན་ཡིན་པའི་ཕྱིར་ཞེ་ན། འོ་ན་ས་བརྒྱད་པའི་བྱང་སེམས་སྤྲོས་པ་མཐའ་དག་བཀག་པའི་འགོག་པ་ལ་ཡུན་རིང་དུ་མཉམ་པར་བཞག་པ་དེ་ལས་སངས་རྒྱས་རྣམས་ཀྱིས་སློང་བར་མཛད་པ་མི་རིགས་པར་ཐལ། དེ་ཉིད་གཞན་དོན་ཡིན་པའི་ཕྱིར་ཞེས་མཚུངས་སོ། །དེས་ན་སྙིང་རྗེ་པད་དཀར་གྱི་ལུང་དོན་ནི་ནུས་པ་ཡོད་པ་ཙམ་ལ་དགོངས་སོ། །དྲུག་པ་དགག་བྱ་གང་འགོག་པ་ནི། ཚོགས་བདུན་འཁོར་དང་བཅས་པ་འགོག་སྟེ། ཀུན་བཏུས་ལས། བརྟན་པ་མ་ཡིན་པ་རྣམས་དང་བརྟན་པ་དེ་དག་ལས་ཀྱང་ཁ་ཅིག་འགོག་པ་ལ་ཞེས་བཤད་པའི་ཕྱིར་རོ། །འདིར་ཁ་ཅིག ཡིད་ཀྱི་རྣམ་ཤེས་ཟག་བཅས་འགོག་པ་ཡིན་གྱི་ཟག་མེད་མི་འགོག་པར་འདོད་པ་ནི་གྲུབ་མཐའི་སྐབས་མ་ཕྱེད་པ་སྟེ། དེ་ལྟར་ན་འགོག་པ་ལ་སྙོམས་པར་འཇུག་པའི་སྐབས་སུ་ཡང་སྙོམས་པར་འཇུག་སེམས་ཀྱི་རྒྱུན་ཡོད་པར་ཁས་ལེན་དགོས་ཤིང་། དེ་ཡང་འདོད་ན། དེ་ཉིད་འགོག་པའི་སྙོམས་འཇུག་ཏུ་འགྱུར་བས་ཐེག་བསྡུས་ལས་རྣམ་པར་མི་རྟོག་པའི་ཡེ་ཤེས་ཡིན་ན། འགོག་པའི་སྙོམས་འཇུག་མ་ཡིན་པས་ཁྱབ་པར་གསུངས་པ་དང་འགལ་བའི་ཕྱིར་རོ། །བརྟན་པ་མ་ཡིན་པའི་དོན་ལ་འདོད་པར་འཇུག་ཤེས་དྲུག་དང་། གཟུགས་སུ་སྣ་ལྕེའི་རྣམ་ཤེས་མ་གཏོགས་པ་བཞི་དང་། གཟུགས་མེད་དུ་ཡིད་ཀྱི་རྣམ་ཤེས་འགོག་པ་ཡིན་ཞིང་། ས་བདུན་པ་མན་ཆད་ཀྱི་བྱང་སེམས་དང་ཐེག་དམན་སློབ་པ་རྣམས་ཀྱིས་བརྟན་པ་དེ་དག་ལས་ཀྱང་ཁ་ཅིག་ཉོན་ཡིད་འགོག་པར་བྱེད་དེ། བློ་བརྟན་གྱི་ཕུང་པོ་ལྔའི་རབ་བྱེད་ཀྱི་འགྲེལ་པར་འགོག་པ་ལ་སྙོམས་པར་འཇུག་པ་རྣམས་ཀྱིས་འཇུག་པའི་རྣམ་པར་ཤེས་པ་དྲུག་དང་། བཞི་དང་། གཅིག་ནི་འདོད་པ་དང་། གཟུགས་དང་། གཟུགས་མེད་པའི་ཁམས་སུ་གོ་རིམ་བཞིན་ནོ་ཞེས་གསུངས་པས་སོ། །དེ་ལ་ཁ་ཅིག་འགོག་པའི་སྙོམས་འཇུག་གིས་འཇུག་ཤེས་འཁོར་དང་བཅས་པ་བཀག་པ་མི་འཐད་དེ། འགོག་པ་ལ་མཉམ་པར་བཞག་བཞིན་པའི་སངས་རྒྱས་འཕགས་པའི་རྒྱུད་ལ་རྣམ་པར་མི་རྟོག་པའི་ཡེ་ཤེས་ཡོད་པའི་ཕྱིར་དང་། གལ་ཏེ་སངས་རྒྱས་འཕགས་པའི་རྒྱུད་ལ་འགོག་པའི་སྙོམས་འཇུག་མེད་པར་འདོད་ན། གཏན་ལ་དབབ་པ་བསྡུ་བ་ལས། འཇུག་པའི་རྣམ་པར་ཤེས་པ་དང་ལྡན་ལ་ཀུན་གཞིའི་རྣམ་པར་ཤེས་པ་དང་མི་ལྡན་པ་ནི་སེམས་ཡོད་པའི་གནས་སྐབས་ན་དགྲ་བཅོམ་པ་དང་། རང་སངས་རྒྱས་དང་། ཕྱིར་མི་ལྡོག་པའི་བྱང་ཆུབ་སེམས་དཔའ་དང་། དེ་བཞིན་གཤེགས་པའོ། །གཉིས་ཀ་དང་མི་ལྡན་པ་ནི་དགྲ་བཅོམ་པ་དང་། རང་སངས་རྒྱས་དང་། ཕྱིར་མི་ལྡོག་པའི་བྱང་ཆུབ་སེམས་དཔའ་དང་། དེ་བཞིན་གཤེགས་པ་འགོག་པ་ལ་སྙོམས་པར་འཇུག་པ་རྣམས་དང་། ཕུང་པོ་ལྷག་མ་མེད་པའི་དབྱིངས་ནའོ་ཞེས་གསུངས་པ་དང་འགལ་ལོ་ཞེས་སྨྲའོ། །མི་འཐད་དེ། ལུང་དེའི་དོན་ནི་གཞན་ངོར་སྙོམས་པར་འཇུག་པར་སྣང་བ་ཙམ་ལ་སྔར་བཤད་ཟིན་ཅིང་། གཞན་དུ་ན་གནས་སྐབས་དེར་རྣམ་པར་མི་རྟོག་པའི་ཡེ་ཤེས་ཡོད་པར་བཤད་པ་དང་འགལ་བའི་ཕྱིར་ཏེ། གནས་སྐབས་དེར་འཇུག་ཤེས་དང་མི་ལྡན་པར་གསུངས་པའི་ཕྱིར་རོ། །སྐྱོན་གཞན་ཡང་། འདུ་ཤེས་མེད་པའི་སྙོམས་འཇུག་ཡིན་ན། ཡིད་ཀྱི་རྣམ་ཤེས་བཀག་པས་མ་ཁྱབ་པར་ཐལ། འགོག་སྙོམས་ཡིན་ན། དེ་བཀག་པས་མ་ཁྱབ་པའི་ཕྱིར། ཁྱབ་ཅིང་འདོད་མི་ནུས་ཏེ། སུམ་ཅུ་པ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུ་འདུ་ཤེས་མེད་པ་དང་། །སྙོམས་པར་འཇུག་པ་རྣམ་གཉིས་དང་། །སེམས་མེད་གཉིད་དང་རྒྱལ་མ་གཏོགས། །ཞེས་གསུངས་པའི་ཕྱིར། གཞན་ཡང་འདུ་ཤེས་མེད་པའི་སྙོམས་འཇུག་དང་། འགོག་པའི་སྙོམས་འཇུག་གཉིས་ལ་ཉོན་ཡིད་ལས་གཞན་པའི་དགག་བྱའི་ཁྱད་པར་ཡོད་པར་ཐལ། དེ་གཉིས་ལ་ཡིད་ཀྱི་རྣམ་ཤེས་བཀག་མ་བཀག་གི་ཁྱད་པར་ཡོད་པའི་ཕྱིར། འདོད་མི་ནུས་ཏེ། ཐེག་བསྡུས་ལས། འདིར་འདུ་ཤེས་མེད་པའི་སྙོམས་པར་འཇུག་པ་ནི་ཉོན་མོངས་པ་ཅན་གྱི་ཡིད་ཀྱིས་རབ་ཏུ་ཕྱེ་བ་ཡིན་གྱི་འགོག་པའི་སྙོམས་པར་འཇུག་པ་ནི་མ་ཡིན་ཏེ། གཞན་དུ་ན་འདི་གཉིས་བྱེ་བྲག་མེད་པ་ཉིད་དུ་འགྱུར་རོ་ཞེས་གསུངས་པའི་ཕྱིར། དགྲ་བཅོམ་པ་དང་། རང་རྒྱལ་དང་། ཕྱིར་མི་ལྡོག་པའི་བྱང་སེམས་གསུམ་གྱི་རྒྱུད་ལ་ཀུན་གཞིའི་རྣམ་ཤེས་མེད་པར་ཐལ། གཉིས་ཀ་དང་མི་ལྡན་པ་ནི་དགྲ་བཅོམ་པ་དང་ཞེས་སོགས་གསུངས་པའི་ཕྱིར། ཁྱབ་པ་ཁས། འདོད་མི་ནུས་ཏེ། སེམས་ཅན་ཡིན་པའི་ཕྱིར། འོ་ན་ལུང་དེའི་དོན་ཇི་ལྟར་སྙམ་ན་ཀུན་གཞི་ལ་རྣམ་སྨིན་གྱི་ཆ་དང་། ས་བོན་གྱི་ཆ་གཉིས་ཡོད་པ་ལས་ཉོན་ཡིད་ཀྱིས་དམིགས་པར་གྱུར་པའི་ཀུན་གཞི་ས་བོན་གྱི་ཆ་མེད་པ་ལ་དགོངས་སོ། །འདུ་ཤེས་མེད་པའི་སྙོམས་འཇུག་དང་། འགོག་པའི་སྙོམས་འཇུག་གཉིས་ལྡན་མིན་འདུ་བྱེད་ཀྱི་དབྱེ་བར་མཉམ་དུ་བཤད་པ་མི་འཐད་པར་ཐལ། འགོག་སྙོམས་དང་ཤེས་པའི་གཞི་མཐུན་ཡོད་པའི་ཕྱིར། རྟགས་ཁས། རྣམ་པར་མི་རྟོག་པའི་ཡེ་ཤེས་ཡིན་ན། འགོག་སྙོམས་མ་ཡིན་པས་མ་ཁྱབ་པར་ཐལ། ཤཱཀྱ་ཐུབ་པའི་རྒྱུད་ལ་རྣམ་པར་མི་རྟོག་པའི་ཡེ་ཤེས་སུ་གྱུར་པའི་འགོག་སྙོམས་ཡོད་པའི་ཕྱིར། འདོད་མི་ནུས་ཏེ། ཐེག་བསྡུས་ལས། དེ་ལ་རྣམ་པ་ལྔ་སྤངས་པ་ནི་རྣམ་པར་མི་རྟོག་པའི་ངོ་བོ་ཉིད་ཅེས་བྱ་སྟེ་ཡིད་ལ་མི་བྱེད་པ་ཡོངས་སུ་སྤངས་པ་དང་། རྟོག་པ་དང་བཅས་པ་དང་། དཔྱོད་པ་དང་བཅས་པའི་ས་ལས་ཤིན་ཏུ་འདས་པ་ཡོངས་སུ་སྤངས་པ་དང་། འདུ་ཤེས་དང་ཚོར་བ་ཉེ་བར་ཞི་བ་ཡོངས་སུ་སྤངས་པ་དང་། གཟུགས་ཀྱི་ངོ་བོ་ཉིད་ཡོངས་སུ་སྤངས་པ་དང་། དེ་ཁོ་ནའི་དོན་ལ་བཀྲ་བར་འཛིན་པ་ཡོངས་སུ་སྤངས་པའི་ཕྱིར་ཏེ། རྣམ་པར་མི་རྟོག་པའི་ཡེ་ཤེས་ནི་རྣམ་པ་འདི་ལྔ་ཡོངས་སུ་སྤངས་པར་རིག་པར་བྱའོ་ཞེས་གསུངས་པའི་ཕྱིར། བཙུན་པ་དབྱིག་བཤེས་ཀྱིས་འགོག་སྙོམས་ཀྱི་སྐབས་སུ་ཡིད་ཀྱི་རྣམ་པར་ཤེས་པ་ཕྲ་མོ་ཡོད་པར་ཁས་བླངས་པ་དེ་སེམས་ཙམ་པས་འགོག་མི་རིགས་པར་ཐལ། སེམས་ཙམ་པས་ཀྱང་དེ་ལྟར་དུ་ཁས་ལེན་པའི་ཕྱིར། འདོད་མི་ནུས་ཏེ། དབྱིག་གཉེན་གྱིས་ལས་གྲུབ་པའི་རབ་ཏུ་བྱེད་པར་དབྱིག་བཤེས་ཀྱི་འདོད་པ་འགོག་པའི་སྐབས་སུ་རྟོག་གེ་བ་དག་གིས་ལུང་གི་དོན་ཇི་ལྟ་བ་བཞིན་མ་རྟོགས་པས་འགོག་པའི་སྙོམས་པར་འཇུག་པ་ལ་སོགས་པའི་གནས་སྐབས་སུ་ཡིད་ཀྱི་རྣམ་པར་ཤེས་པའི་སེམས་དང་བཅས་པར་རྟོག་པ་ནི་གཟུ་ལུམ་དུ་རྟོག་པ་ཡིན་ནོ་ཞེས་གསུངས་པའི་ཕྱིར། གལ་ཏེ་སེམས་ཙམ་པས་འགོག་སྙོམས་སུ་གྱུར་པའི་འདས་ལམ་དང་། སྒོམ་ལམ་རྩེ་སྦྱོར་དང་། རྟོགས་པ་ཆོས་སྐུ་ཡོད་པར་ཁས་ལེན་དགོས་ཏེ། ཤེར་ཕྱིན་གྱི་མདོ་དང་། མངོན་རྟོགས་རྒྱན་ལས་དེ་ལྟར་དུ་བཤད་པ་གང་ཞིག མདོ་དང་བསྟན་བཅོས་དེ་དག་སེམས་ཙམ་པས་ཀྱང་ཁས་ལེན་པའི་ཕྱིར་རོ་ཞེ་ན། འོ་ན་སེམས་ཙམ་པས་ཆོས་ཐམས་ཅད་བདེན་སྟོང་དུ་ཁས་ལེན་པར་ཐལ། ཤེར་ཕྱིན་གྱི་མདོ་དང་། མངོན་རྟོགས་རྒྱན་ལས་དེ་ལྟར་དུ་བཤད་པ་གང་ཞིག མདོ་དང་བསྟན་བཅོས་དེ་དག་སེམས་ཙམ་པས་ཀྱང་ཁས་ལེན་པའི་ཕྱིར། བདུན་པ་ལ་གསུམ་སྟེ། མཚན་ཉིད། དབྱེ་བ། ཁྱད་པར་གྱི་ཆོས་ལ་དཔྱད་པའོ། །དང་པོ་ལ་དགག་བཞག་གཉིས་ལས། དང་པོ་ལ། ཁ་ཅིག ཚོགས་དྲུག་འགོག་བྱེད་སྲིད་རྩེའི་སེམས་དང་། ཉོན་ཡིད་འགོག་བྱེད་བདག་མེད་རྟོགས་པའི་ཤེས་རབ་གཉིས་ཀྱིས་དགག་གཞི་ཀུན་གཞིའི་སྟེང་དུ་དགག་བྱ་ཚོགས་བདུན་འཁོར་བཅས་བཀག་པའི་ཀུན་གཞིའི་གནས་སྐབས་ལ་བཏགས་པའི་ལྡན་མིན་འདུ་བྱེད་ཅེས་ཟེར་བ་ནི་དགག་བྱ་འགོག་ཚུལ་མ་ཤེས་པ་སྟེ། འོ་ན་འགོག་པ་ལ་སྙོམས་པར་འཇུག་པའི་ཚེ་དང་པོར་སྲིད་རྩེའི་སེམས་ཀྱིས་ཚོགས་དྲུག་བཀག་ནས་དེའི་རྗེས་སུ་བདག་མེད་རྟོགས་པའི་ཤེས་རབ་ཀྱི་ཉོན་ཡིད་འགོག་པ་ཡིན་ནམ། གོ་རིམ་དེ་ལས་བཟློག་པ་ཡིན་ནམ། དུས་མཉམ་དུ་འགོག་པར་བྱེད་པ་ཡིན། དང་པོ་ལྟར་ན་བདག་མེད་རྟོགས་པའི་ཤེས་རབ་ཀྱིས་ཉོན་ཡིད་འགོག་པར་བྱེད་བཞིན་པའི་འགོག་པ་ལ་སྙོམས་པར་འཇུག་ཁ་མའི་གང་ཟག་གི་རྒྱུད་ལ་ཡིད་ཀྱི་རྣམ་ཤེས་མེད་པར་ཐལ། ཁས་བླངས་དེའི་ཕྱིར། འདོད་ན། དེའི་རྒྱུད་ལ་བདག་མེད་རྟོགས་པའི་ཤེས་རབ་མེད་པར་ཐལ་ལོ། །གཉིས་པ་ལྟར་ན། སྲིད་རྩེའི་སེམས་ལ་བརྟེན་ནས་ཚོགས་དྲུག་འགོག་པར་བྱེད་བཞིན་པའི་འགོག་པ་ལ་སྙོམས་པར་འཇུག་ཁ་མའི་ཕྱིར་མི་འོང་གི་རྒྱུད་ལ་ཉོན་ཡིད་མེད་པར་ཐལ། ཁས་བླངས་དེའི་ཕྱིར། འདོད་ན། དེ་ལྟ་བུའི་ཕྱིར་མི་འོང་ཆོས་ཅན། ཁྱོད་ཀྱི་རྒྱུད་ལ་ཉོན་ཡིད་ཡོད་པར་ཐལ། ཁྱོད་འདས་ལམ་དང་འགོག་སྙོམས་མངོན་དུ་མ་གྱུར་པའི་ཐེག་དམན་སློབ་པ་ཡིན་པའི་ཕྱིར། གསུམ་པ་ལྟར་ན་མི་འཐད་དེ། ལུགས་འདི་ལ་སྲིད་རྩེའི་སེམས་དང་། བདག་མེད་མངོན་སུམ་དུ་རྟོགས་པའི་ཤེས་རབ་དུས་མཉམ་དུ་འབྱུང་བ་མེད་པའི་ཕྱིར། ཁ་ཅིག དགག་གཞི་ཀུན་གཞིའི་སྟེང་དུ་དགག་བྱ་ཚོགས་བདུན་བཀག་པའི་མཐར་གནས་ཀྱི་སྙོམས་འཇུག་གང་ཞིག སྲིད་རྩེའི་སས་བསྡུས་པ་ཞེས་ཟེར་བ་ལ་གཞན་དག་ན་རེ། སངས་རྒྱས་འཕགས་པའི་རྒྱུད་ཀྱི་འགོག་པའི་སྙོམས་འཇུག་ཆོས་ཅན། མཚན་ཉིད་ཀྱི་ཟུར་དང་པོ་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། དེའི་རྒྱུད་ལ་ཀུན་གཞི་མེད་པའི་ཕྱིར་ཞེས་བཀག་ནས་རང་ལུགས་ལ་དགག་གཞི་སེམས་རྒྱུན་གྱི་སྟེང་དུ་དགག་བྱ་འཇུག་ཤེས་མངོན་འགྱུར་བ་བཀག་པའི་མཐར་གནས་ཀྱི་སྙོམས་འཇུག་གང་ཞིག སྲིད་རྩེའི་སས་བསྡུས་པ་ཞེས་སྨྲ་བ་ནི་གཞན་ལུགས་འགོག་པ་དང་འགལ་ཏེ། སངས་རྒྱས་ཀྱི་འགོག་སྙོམས་ཆོས་ཅན། མཚན་ཉིད་ཀྱི་སྔ་ཟུར་དུ་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། འཇུག་ཤེས་མངོན་འགྱུར་བ་ཡིན་པར་ཐལ། འདོད་པ་དེའི་ཕྱིར། འདོད་ན། རྣམ་པར་མི་རྟོག་པའི་ཡེ་ཤེས་མིན་པར་ཐལ། འདོད་པ་དེའི་ཕྱིར། བསལ་བ་རྣམས་རིམ་པ་བཞིན་དུ་ཁས་བླངས་གཞན་ཡང་སངས་རྒྱས་འཕགས་པའི་རྒྱུད་ལ་འགོག་སྙོམས་མེད་པར་གོང་དུ་བསྒྲུབ་ཟིན་པས་ལུགས་འདི་མི་འཐད་པར་གྲུབ་བོ། །སྔ་ཕྱི་གཉིས་ཆར་གྱིས་འགོག་སྙོམས་སྲིད་རྩེའི་སས་བསྡུས་སུ་འདོད་པ་ནི་གྲུབ་མཐའི་སྐབས་མ་ཕྱེད་པ་སྟེ། དེ་ནི་བྱེ་བྲག་ཏུ་སྨྲ་བའི་ལུགས་ཡིན་ཏེ། ལུགས་འདི་ལ་ཟག་མེད་དུ་བཤད་པའི་ཕྱིར་རོ། །ཁ་ཅིག སྲིད་རྩེའི་སེམས་ལ་བརྟེན་ནས་ཚོར་འདུ་རགས་པ་ཆ་མཉམ་དུ་བཀག་སྟེ་བདག་མེད་པའི་དོན་ལ་རྩེ་གཅིག་ཏུ་གྱུར་པའི་མཐར་གནས་ཀྱི་སྙོམས་འཇུག་ཞེས་ཟེར་བ་ཡང་མི་འཐད་དེ། དབུ་མ་པའི་ལུགས་ཡིན་ན། སྲིད་རྩེའི་སེམས་ལ་བརྟེན་ནས་ཚོར་འདུ་རགས་པ་འགོག་པས་མ་ཁྱབ་པའི་ཕྱིར་ཏེ། བསམ་གཏན་དང་པོའི་མཇུག་ཐོག་དེ་མ་ཐག་ཏུ་འགོག་པ་ལ་སྙོམས་པར་འཇུག་པ་ཡོད་པའི་ཕྱིར་དང་། སེམས་ཙམ་པའི་ལུགས་ལ་ལྡན་མིན་འདུ་བྱེད་ཡིན་པས་བདག་མེད་པའི་དོན་ལ་རྩེ་གཅིག་པར་འགལ་བའི་ཕྱིར་རོ། །གཉིས་པ་ནི། ཊཱི་ཀ་ལས། ཚོར་འདུ་རགས་པ་སུན་འབྱིན་པའི་སྲིད་རྩེའི་ཏིང་ངེ་འཛིན་གྱི་སྙོམས་པར་འཇུག་པ་པོའི་རྒྱུད་ཀྱི་རྣམ་ཤེས་ཚོགས་བདུན་འཁོར་དང་བཅས་པ་རེ་ཤིག་སྐྱེ་བ་དང་མི་མཐུན་པར་བྱས་པའི་ཀུན་གཞིའི་གནས་སྐབས་ལ་བཏགས་པའི་ལྡན་མིན་འདུ་བྱེད་ཅེས་གསུངས་པ་ནི་ཐེག་དམན་གྱིས་དང་པོར་བསྒྲུབ་པའི་དབང་དུ་བྱས་པ་ཡིན་གྱིས་ཐེག་ཆེན་ལ་ནི་དེ་ལྟར་མ་ངེས་ཏེ། བྱང་སེམས་སྒོམ་ལམ་པས་ཐོད་རྒལ་འབྲིང་པོའི་སྐབས་སུ་མཐར་གནས་ཀྱི་སྙོམས་འཇུག་བརྒྱད་པོ་རེ་རེའི་མཇུག་ཐོག་ཏུ་ཡང་འགོག་པ་ལ་སྙོམས་པར་འཇུག་པར་བཤད་པ་དེ། སེམས་ཙམ་པས་ཀྱང་ཁས་ལེན་པའི་ཕྱིར། གལ་ཏེ་དེའི་ཚེ་བསམ་གཏན་དང་པོའི་མཇུག་ཐོག་ཏུ་སྲིད་རྩེའི་སེམས་ལ་བརྟེན་ནས་འགོག་པ་ལ་སྙོམས་པར་འཇུག་པའི་དོན་ཡིན་པས་སྐྱོན་མེད་དོ་སྙམ་ན་མ་ཡིན་ཏེ། དེ་ལྟར་ན་བསམ་གཏན་དང་པོ་ལ་སྲིད་རྩེ་སྤེལ། སྲིད་རྩེ་ལ་འགོག་པ་སྤེལ་བར་སོང་གི བསམ་གཏན་དང་པོ་ལ་འགོག་པ་སྤེལ་བར་མ་སོང་བའི་ཕྱིར་རོ། །རང་ལུགས་ནི། དགག་གཞི་ཀུན་གཞིའི་སྟེང་དུ་དགག་བྱ་སྙོམས་པར་འཇུག་པ་པོའི་རྒྱུད་ལ་ཡོད་པའི་ཚོགས་བདུན་གྱི་ཁོངས་སུ་གཏོགས་པ་འཁོར་བཅས་བཀག་པའི་ཀུན་གཞིའི་གནས་སྐབས་ལ་བཏགས་པའི་ལྡན་མིན་འདུ་བྱེད་དོ། །སྙོམས་པར་འཇུག་པ་པོའི་ཞེས་སྨོས་པ་ནི། སློབ་དཔོན་བློ་བརྟན་གྱིས་ཁམས་གསུམ་ལ་རིམ་པ་བཞིན་འཇུག་ཤེས་དྲུག་དང་། བཞི་དང་། གཅིག་འགོག་པར་གསུངས་པའི་དོན་ཡིན་ནོ། །གཉིས་པ་དབྱེ་བ་ལ་གསུམ་སྟེ། གང་ཟག་གི་སྒོ་ནས་དབྱེ་བ། རྟེན་གྱི་སྒོ་ནས་དབྱེ་བ། སྙོམས་པར་འཇུག་སེམས་ཀྱི་སྒོ་ནས་དབྱེ་བའོ། །དང་པོ་ལ་ཉན་ཐོས་སློབ་པ་དང་། མི་སློབ་པའི་རྒྱུད་ཀྱི་འགོག་སྙོམས་གཉིས། རང་སངས་རྒྱས་ཀྱི་རྒྱུད་ཀྱི་འགོག་སྙོམས། བྱང་སེམས་འཕགས་པའི་རྒྱུད་ཀྱི་འགོག་སྙོམས་དང་བཞིའོ། །གཉིས་པ་ལ་འདོད་པའི་རྟེན་ཅན་དང་། གཟུགས་ཀྱི་རྟེན་ཅན་གཉིས། དང་པོ་ལ། ཐེག་དམན་གྱི་དབང་དུ་བྱས་ན་གླིང་གསུམ་གྱི་མིའི་རྟེན་ཅན་དུ་ངེས་ཤིང་། བྱང་སེམས་ཀྱི་དབང་དུ་བྱས་ན་འགྲོ་བ་གཞན་རྣམས་ལ་ཡང་ཡོད་དོ། །ཕྱི་མ་ལ་གཟུགས་ཁམས་གནས་རིགས་བཅུ་བདུན་གྱི་རྟེན་ཅན་བཅུ་བདུན་ནོ། །གསུམ་པ་ལ་ཁམས་གསུམ་ས་དགུའི་མཇུག་ཐོག་ཏུ་བྱུང་བའི་འགོག་པའི་སྙོམས་འཇུག་དགུའོ། །གསུམ་པ་ཁྱད་པར་གྱི་ཆོས་ལ་དཔྱད་པ་ནི། འགོག་སྙོམས་དེ་རྫས་ཡོད་དང་བཏགས་ཡོད་གཉིས་ཀྱི་ནང་ནས་བཏགས་ཡོད་ཡིན་ཏེ། བསྡུ་བ་ལས། འགོག་པའི་སྙོམས་པར་འཇུག་པ་ནི་བཏགས་པའི་ཕྱིར་ཡོད་པ་ཡིན་གྱི། རྫས་སུ་ནི་མ་ཡིན་ནོ་ཞེས་གསུངས་པའི་ཕྱིར། འོ་ན་བྱེ་བྲག་ཏུ་སྨྲ་བས་དེ་རྫས་ཡོད་དང་། སེམས་ཙམ་པས་བཏགས་ཡོད་དུ་འདོད་པའི་ཁྱད་པར་ཉིད་མི་འཐད་དེ། དེ་གཉིས་ཀས་ལྡན་མིན་འདུ་བྱེད་དུ་འདོད་པའི་ཕྱིར་ཞེ་ན། སྐྱོན་མེད་དེ། ལྡན་མིན་འདུ་བྱེད་ཉིད་རྫས་ཡོད་དང་བཏགས་ཡོད་དུ་འདོད་པའི་ཁྱད་པར་ཡོད་པའི་ཕྱིར། ཟག་བཅས་ཟག་མེད་གཉིས་ཀྱི་ནང་ནས་ཟག་མེད་ཡིན་ཏེ། ཀུན་བཏུས་ལས། འགོག་པའི་སྙོམས་པར་འཇུག་པ་ནི་འཇིག་རྟེན་ལས་འདས་པ་སྟེ་ཞེས་དང་། བསྡུ་བ་ལས། འགོག་པའི་སྙོམས་པར་འཇུག་པ་ནི་ཟག་པ་མེད་པར་བརྗོད་པར་བྱ་སྟེ། ཉོན་མོངས་པ་དང་བྲལ་བ་དང་། ཉོན་མོངས་པ་དང་མཚུངས་པར་ལྡན་པ་མ་ཡིན་པ་དང་། ཉོན་མོངས་པ་ལ་དམིགས་པ་མ་ཡིན་པ་དང་། ཉོན་མོངས་པ་རྣམས་ཀྱིས་མ་བསྐྱེད་པའི་ཕྱིར་ཞེས་སོ། །དགེ་མི་དགེ་ལུང་མ་བསྟན་གསུམ་གྱི་ནང་ནས་དགེ་བ་ཡིན་ཏེ། བསྡུ་བ་ལས། ངོ་བོ་ཉིད་ལས་ནི་དགེ་བའོ་ཞེས་སོ། །ཕུང་པོ་ལྔའི་ནང་ནས་འདུ་བྱེད་ཀྱི་ཕུང་པོ་ཡིན་ཏེ། ལྡན་མིན་འདུ་བྱེད་ཀྱི་དབྱེ་བར་བཤད་པའི་ཕྱིར། སེམས་ཡོད་མེད་གཉིས་ཀྱི་ནང་ནས་སེམས་ཡོད་ཡིན་ཏེ། དེའི་གནས་སྐབས་ན་ཀུན་གཞིའི་རྣམ་ཤེས་ཡོད་པའི་ཕྱིར་རོ།༞ །འགོག་པའི་སྙོམས་པར་འཇུག་པ་ལ་ཆོས་གཉིས་གཅེས་སྤྲས་སུ་བྱེད་དོ། །གཉིས་གང་ཞེ་ན་ཞི་གནས་དང་ལྷག་མཐོང་ངོ་། །དེ་ལ་ཞི་གནས་ནི་གང་། ལྷག་མཐོང་ནི་གང་། དེ་གཉིས་ཅི་ལྟར་དུ་གཅེས་སྤྲས་སུ་བྱེད་ཅེ་ན། དོན་འདིར་ཞི་གནས་ནི་མཐར་གྱིས་གནས་པའི་སྙོམས་པར་འཇུག་པ་དང་པོ་བརྒྱད་ལ་བྱའོ། །ལྷག་མཐོང་ནི་འཕགས་པའི་ཤེས་རབ་སྟེ། དེ་གཉིས་གཅིག་མེད་ན་འཇུག་ཏུ་མི་རུང་བའི་ཕྱིར། དེ་གཉིས་ཀ་ཚོགས་པ་ན་གཅེས་སྤྲས་སུ་བྱེད་པར་འགྱུར་རོ་ཞེས་གཏན་ལ་དབབ་པ་བསྡུ་བའི་མཉམ་པར་འཇོག་པའི་སྐབས་སུ་འབྱུང་ངོ་།། ༈ །།གསུམ་པ་དབུ་མ་པའི་ལུགས་ལ་གཉིས་ཏེ། ལུང་ལས་གསུངས་པའི་ཚུལ་དང་། རྣམ་གཞག་ཞིབ་ཏུ་གཏན་ལ་དབབ་པའོ། །དང་པོ་ནི། ཤེར་ཕྱིན་གྱི་མདོ་ལས། མཐར་གནས་ཀྱི་སྙོམས་འཇུག་འཆད་པའི་སྐབས་སུ་འདུ་ཤེས་དང་ཚོར་བ་འགོག་པ་ཞེས་པའི་མིང་ཙམ་ཞིག་ཡང་ཡང་གསུངས་ཀྱི། དོན་ཞིབ་ཏུ་མ་གསུངས་སོ། །སའི་སྙིང་པོ་འཁོར་ལོ་བཅུ་པའི་མདོ་ལས། བྱང་ཆུབ་སེམས་དཔའ་རྣམས་འགོག་པའི་ཏིང་ངེ་འཛིན་ལ་སྙོམས་པར་འཇུག་གོ །ཏིང་ངེ་འཛིན་དེ་ལ་གནས་ནས་ཚོར་བ་གསུམ་དང་འདུ་ཤེས་གསུམ་ཡོངས་སུ་གཅོད་དེ་མངོན་པར་འདུ་བྱེད་པ་དང་། གཡོ་བའི་སེམས་ཀྱི་དཔྱོད་པ་མེད་པར་ཚོར་བ་དང་། འདུ་ཤེས་དང་། སེམས་པ་དང་། རེག་པ་དང་། ཡིད་ལ་བྱེད་པ་ཀུན་གཅོད་པར་འགྱུར་རོ་ཞེས་གསུངས་སོ། །མདོ་སྡེ་ས་བཅུ་པ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ས་དྲུག་པ་ཡན་ཆད་བྱང་ཆུབ་སེམས་དཔའི་འགོག་པ་ལ་སྙོམས་པར་འཇུག་གོ །བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་སེམས་ཀྱི་སྐད་ཅིག་དང་། སེམས་ཀྱི་སྐད་ཅིག་ལ་ཡང་འགོག་པ་ལ་སྙོམས་པར་འཇུག་ཅིང་ལྡང་སྟེ་འགོག་པ་མངོན་དུ་བྱས་ཞེས་ནི་མི་བྱའོ་ཞེས་རྒྱས་པར་གསུངས་སོ། །འཇུག་པ་ལས། རིང་དུ་སོང་བ་འདིར་ནི་སྐད་ཅིག་དང་། །སྐད་ཅིག་ལ་ནི་འགོག་པར་འཇུག་འགྱུར་ཞིང་། །ཞེས་པའི་འགྲེལ་པར། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས་དེ་བཞིན་ཉིད་ལ་འགོག་པ་ཞེས་བརྗོད་དེ། འདིར་སྤྲོས་པ་ཐམས་ཅད་འགག་པར་འགྱུར་བའི་ཕྱིར་རོ། །ས་བདུན་པ་རིང་དུ་སོང་བ་འདིར་ནི་ས་དྲུག་པར་ཐོབ་པའི་འགོག་པ་དེ་ལ་བྱང་ཆུབ་སེམས་དཔའ་སྐད་ཅིག་དང་སྐད་ཅིག་ལ་སྙོམས་པར་འཇུག་པར་འགྱུར་ཏེ། ཇི་སྐད་དུ་ཀྱེ་རྒྱལ་བའི་སྲས་དག་ཅེས་སོགས་བཤད་མ་ཐག་པའི་ལུང་ཤེས་བྱེད་དུ་དྲངས་སོ། །དེ་དག་གི་དོན་ལ་ཐུན་མོང་བ་འདུ་ཤེས་དང་ཚོར་བ་འགོག་པའི་སྙོམས་འཇུག་དང་། ཐུན་མོང་མ་ཡིན་པ་ཡང་དག་མཐའ་ལ་སྙོམས་པར་འཇུག་པའི་སྙོམས་འཇུག་གཉིས་ལས། ཤེར་ཕྱིན་གྱི་མདོ་དང་། མངོན་རྟོགས་རྒྱན་ལས་དང་པོ་བསྟན་ལ། སའི་སྙིང་པོ་འཁོར་ལོ་བཅུ་པའི་མདོ་ལས་གཉིས་ཀ་བསྟན་ཏེ། དང་པོའི་དགག་བྱ་ཚོར་བ་གསུམ་དང་། བདག་ཏུ་འཛིན་པའི་འདུ་ཤེས་དང་། གཉིས་པའི་དགག་བྱ་དམན་པའི་ཡིད་བྱེད་དང་སྤྲོས་པའི་མཚན་མའི་འདུ་ཤེས་གཉིས་དགག་བྱར་བསྟན་པའི་ཕྱིར་རོ། །མདོ་སྡེ་ས་བཅུ་པ་དང་། འཇུག་པ་རྩ་འགྲེལ་ལས་ཕྱི་མ་ཁོ་ན་བསྟན་ཏེ། དེ་ནས་བཤད་པའི་འགོག་སྙོམས་ས་དྲུག་པ་མན་ཆད་དུ་ཐོབ་པ་མེད་པར་བཤད་པའི་ཕྱིར། གཉིས་པ་ལ་གཉིས་ཏེ། ཐུན་མོང་བ་འདུ་ཤེས་དང་ཚོར་བ་འགོག་པའི་སྙོམས་འཇུག་དང་། ཐུན་མོང་མ་ཡིན་པ་ཡང་དག་མཐའ་ལ་སྙོམས་པར་འཇུག་པའི་འགོག་སྙོམས་སོ། །དང་པོ་ལ་རྟེན་ངོས་གཟུང་བ། དགག་གཞི། དགག་བྱ། འགོག་བྱེད། ངོ་བོ་ལ་དཔྱད་པ་དང་ལྔ་ལས། དང་པོ་ནི། བྱང་སེམས་འཕགས་པས་འདོད་གཟུགས་གཉིས་སུ་མངོན་དུ་བྱས་ཚུལ་ནི་སྔར་སེམས་ཙམ་པའི་སྐབས་སུ་བཤད་པ་ལྟར་ཡིན་ལ་ཉན་རང་གིས་གསར་དུ་ཐོབ་ཚུལ་ནི་དབུ་མ་པའི་གཞུང་ལས་གསལ་བར་མ་བཤད་པས། སེམས་ཙམ་པ་ལྟར་ཁས་ལེན་དགོས་ཤིང་། ཕྱིས་ནི་གཟུགས་མེད་ཀྱི་རྟེན་ལ་ཡང་མངོན་དུ་བྱེད་པ་ཡོད་དེ། དེར་མངོན་དུ་བྱེད་པའི་དགོས་ནུས་གཉིས་ཚང་བའི་ཕྱིར་ཏེ། བདག་ཏུ་འཛིན་པའི་འདུ་ཤེས་དང་། དེའི་རྒྱུར་གྱུར་པའི་ཚོར་བ་འགོག་དགོས་པས་དགོས་པ་ཡོད་ཅིང་། དེའི་ཚེ་ཟག་མེད་ཀྱི་ཤེས་པ་ཡོད་པས་ནུས་པ་ཡང་ཡོད་པའི་ཕྱིར། གཉིས་པ་ལ་ཁ་ཅིག ལུས་ལ་འདོད་པ་ནི་མི་འཐད་དེ། འགོག་པ་ལ་སྙོམས་པར་འཇུག་བཞིན་པའི་དུས་སུ་ཟག་མེད་ཀྱི་ཤེས་པ་ཡོད་པས་ལུས་དགག་གཞིར་གཟུང་མི་དགོས་པའི་ཕྱིར་རོ། །ཁ་ཅིག་ཀུན་གཞི་ལ་འདོད་པ་ཡང་མི་འཐད་དེ། དབུ་མ་པ་ཐམས་ཅད་ཀྱིས་ཀུན་གཞི་ཁས་ལེན་པའི་ངེས་པ་མེད་པའི་ཕྱིར་དང་། སངས་རྒྱས་འཕགས་པའི་རྒྱུད་ལ་ཀུན་གཞི་མེད་པའི་ཕྱིར་རོ། །ཁ་ཅིག སེམས་རྒྱུན་ལ་འདོད་པ་ཡང་མི་འཐད་དེ། སེམས་རྒྱུན་དེ་འགོག་བྱེད་ཡིན་གྱི་དགག་གཞི་མིན་པའི་ཕྱིར་རོ། །དེས་ན་དེ་བཞིན་ཉིད་དགག་གཞིར་འཐད་དེ། དབུ་མ་པས་ཆོས་ཐམས་ཅད་དེ་བཞིན་ཉིད་ལ་བརྟེན་པར་ཁས་ལེན་པའི་ཕྱིར། གསུམ་པ་ནི། དབང་ཤེས་དགག་དགོས་ཏེ། དེ་མ་བཀག་ན་བདག་མེད་པའི་དོན་ལ་རྩེ་གཅིག་ཏུ་མཉམ་པར་གཞག་མི་ནུས་པའི་ཕྱིར། ཡིད་ཀྱི་རྣམ་ཤེས་ཟག་བཅས་རྣམས་ཀྱང་མཐའ་གཅིག་ཏུ་དགག་དགོས་ཏེ། ཐེག་དམན་སློབ་པ་རྣམས་ནི་ཉོན་མོངས་ཀྱི་རྒྱུར་གྱུར་པའི་ཚོར་འདུ་དགག་དགོས། བྱང་སེམས་འཕགས་པ་རྣམས་ནི་ཆོས་ཀྱི་བདག་ཏུ་འཛིན་པའི་རྒྱུར་གྱུར་པའི་ཚོར་འདུ་དགག་དགོས་པའི་ཕྱིར་རོ། །ཡིད་ཀྱི་རྣམ་ཤེས་ཟག་མེད་ནི་མི་འགོག་སྟེ། འགོག་སྙོམས་ཉིད་ཟག་མེད་ཀྱི་ཤེས་པ་ཡིན་པའི་ཕྱིར། ཉོན་ཡིད་ཁས་ལེན་ན་དེ་ཡང་དགག་དགོས་ཏེ། དེ་ནི་ངར་འཛིན་ཡིན་པས་འདིར་དགག་བྱའི་གཙོ་བོ་ཡིན་པའི་ཕྱིར་རོ། །བཞི་པ་ནི། ཟག་མེད་ཀྱི་ཤེས་པར་ངེས་ཏེ། འདིར་ནི་བདག་འཛིན་དགག་བྱའི་གཙོ་བོར་བྱས་ནས་འགོག་དགོས་པས་དེ་ལ་བདག་མེད་རྟོགས་པའི་ཤེས་རབ་དགོས་ཤིང་། འཕགས་རྒྱུད་ཀྱི་བདག་མེད་རྟོགས་པའི་ཤེས་རབ་ལ་ཟག་མེད་ཀྱིས་ཁྱབ་པའི་ཕྱིར་རོ། །འོན་ཀྱང་སྲིད་རྩེའི་སེམས་ལ་བརྟེན་ནས་འགོག་པ་ནི་མི་འགལ་ཏེ། ལུགས་འདི་ལ་བདག་མེད་རྟོགས་པའི་ཤེས་རབ་སྲིད་རྩེའི་སེམས་ལ་བརྟེན་པ་ཡོད་པའི་ཕྱིར། དང་པོར་འཇུག་པའི་ཚེ་སྲིད་རྩེའི་སེམས་ལ་བརྟེན་དགོས་ཏེ། ཉན་རང་ནི་དེ་ལ་བརྟེན་ནས་བསྒྲུབ་སླ་ཞིང་། བྱང་འཕགས་འགོག་པ་ལ་སྙོམས་པར་འཇུག་པའི་ཐོག་མ་ནི་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་ཀྱི་ཡར་འོང་བའི་གནས་སྐབས་ཀྱི་འགོག་པ་ཡིན་ཅིང་། དེ་སྲིད་རྩེ་ལ་བརྟེན་ནས་ཐོབ་པ་ཡིན་པའི་ཕྱིར་རོ། །དེས་ན་འགོག་བྱེད་ཀྱི་ཤེས་པ་དང་། སྙོམས་པར་འཇུག་སེམས་གཉིས་པོ་དོན་གཅིག་ཅིང་། འགོག་པ་ལ་མཉམ་པར་བཞག་བཞིན་པའི་གནས་སྐབས་སུ་འཇུག་སེམས་ཀྱི་རྒྱུན་ཡོད་པ་དེ་ཉིད་སྙོམས་འཇུག་དངོས་ཡིན་པས་འདིར་འགོག་བྱེད་ཀྱི་ཤེས་པ་ཟག་མེད་དུ་ངེས་སོ། །ལྔ་པ་ལ་གསུམ་སྟེ། མཚན་ཉིད། དབྱེ་བ། ཁྱད་པར་གྱི་ཆོས་ལ་དཔྱད་པའོ། །དང་པོ་ལ་དགག་གཞག་གཉིས་ལས། དང་པོ་ནི། མཁན་ཆེན་པ་ན་རེ། དགག་གཞིའི་སྟེང་དུ་དགག་བྱ་ཅི་རིགས་པ་བཀག་པའི་འཕགས་རྒྱུད་ཀྱི་མཁྱེན་པ་རྩེ་གཅིག་པ་ཞེས་གསུངས་པ་ནི་མི་འཐད་དེ། ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དགག་གཞིའི་སྟེང་དུ་གང་ཟག་གི་བདག་འཛིན་བཀག་པའི་འཕགས་རྒྱུད་ཀྱི་མཁྱེན་པ་རྩེ་གཅིག་པ་ཡིན་པའི་ཕྱིར། ཁ་ཅིག་སྲིད་རྩེའི་སེམས་ལ་བརྟེན་ནས་ཚོར་འདུ་རགས་པ་ཆ་མཉམ་དུ་བཀག་སྟེ། བདག་མེད་པའི་དོན་ལ་རྩེ་གཅིག་པའི་སྙོམས་འཇུག་ཅེས་ཟེར་ཡང་མི་འཐད་དེ། བསམ་གཏན་དང་པོའི་འཇུག་ཐོག་དེ་མ་ཐག་ཏུ་འགོག་པ་ལ་སྙོམས་པར་འཇུག་པའི་ཕྱིར་རོ། །ཁ་ཅིག འགོག་བྱེད་ས་དགུ་གང་རུང་གིས་དགག་གཞི་དེ་བཞིན་ཉིད་ཀྱི་སྟེང་དུ་དགག་བྱ་ཟག་བཅས་ཀྱི་ཚོར་འདུ་རགས་པ་ཅི་རིགས་པ་བཀག་པའི་འཕགས་རྒྱུད་ཀྱི་ལྡན་མིན་འདུ་བྱེད་ཅེས་ཟེར་བ་ཡང་མི་འཐད་དེ། འདིར་འགོག་པའི་སྙོམས་འཇུག་ལྡན་མིན་འདུ་བྱེད་མིན་པའི་ཕྱིར་དང་། སངས་རྒྱས་འཕགས་པའི་རྒྱུད་ཀྱི་འགོག་སྙོམས་དེས་ཟག་བཅས་ཀྱི་ཚོར་འདུ་རགས་པ་འགོག་པ་མིན་པའི་ཕྱིར་རོ། །གལ་ཏེ་དེས་ཟག་བཅས་ཀྱི་ཚོར་འདུ་རགས་པ་བཀག་སྟེ། སངས་རྒྱས་འཕགས་པའི་རྒྱུད་ལ་ཟག་བཅས་ཀྱི་ཚོར་འདུ་མེད་པའི་ཕྱིར་ཞེ་ན། གཟུགས་ཀྱི་རྟེན་ཅན་གྱི་འགོག་སྙོམས་དེས་སྣ་ལྕེའི་རྣམ་ཤེས་དེ་གཉིས་བཀག་པར་ཐལ། དེར་དེ་གཉིས་མེད་པའི་ཕྱིར། འདོད་ན། གོང་དུ་དྲངས་པའི་བློ་བརྟན་གྱི་ལུང་དང་འགལ་ལོ། །གཉིས་པ་ནི་ཐུན་མོང་བ་འདུ་ཤེས་དང་ཚོར་བ་འགོག་པའི་སྙོམས་འཇུག་གི་མཚན་ཉིད། ཟག་བཅས་ཀྱི་ཚོར་འདུ་གཉིས་ཀ་དགག་བྱའི་གཙོ་བོར་བྱས་ནས་བཀག་པའི་རིགས་སུ་གནས་པའི་མཐར་གནས་ཀྱི་སྙོམས་འཇུག་གོ །གཉིས་པ་ལ་གང་ཟག་གི་སྒོ་ནས་དབྱེ་བ། རྟེན་གྱི་སྒོ་ནས་དབྱེ་བ། སྙོམས་པར་འཇུག་སེམས་ཀྱི་སྒོ་ནས་དབྱེ་བ་དང་གསུམ་ལས། དང་པོ་ལ་ཉན་ཐོས་སློབ་མི་སློབ་གཉིས། རང་རྒྱལ་མི་སློབ་པ། ཐེག་ཆེན་སློབ་པ་དང་མི་སློབ་པའི་རྒྱུད་ཀྱི་འགོག་པའི་སྙོམས་འཇུག་དང་ལྔའོ། །གཉིས་པ་ལ། ཁམས་གསུམ་གྱི་རྟེན་ཅན་གསུམ་མོ། །གསུམ་པ་ལ་སྔར་བཤད་པ་ལྟར་དགུའོ། །གསུམ་པ་ཁྱད་པར་གྱི་ཆོས་ལ་དཔྱད་པ་ནི། རྫས་ཡོད་བཏགས་ཡོད་གཉིས་ཀྱི་ནང་ནས་བཏགས་ཡོད་ཡིན་ཏེ། རྫས་ཡོད་ཀྱི་ཆོས་མེད་པའི་ཕྱིར་རོ། །ཟག་བཅས་ཟག་མེད་གཉིས་ཀྱི་ནང་ནས་ཟག་མེད་ཡིན་ཏེ། འཕགས་རྒྱུད་ཀྱི་བདག་མེད་རྟོགས་པའི་མཉམ་བཞག་ཡིན་པའི་ཕྱིར། སེམས་བཅས་སེམས་མེད་གཉིས་ཀྱི་ནང་ནས་སེམས་བཅས་ཡིན་ཏེ། དེའི་གནས་སྐབས་ན་ཟག་མེད་ཀྱི་ཤེས་པ་ཡོད་པའི་ཕྱིར། ཕུང་པོ་ལྔའི་ནང་ནས་གཟུགས་ཕུང་མ་གཏོགས་པའི་གཞན་བཞི་ཀ་ཡོད་དེ། གཙོ་བོ་ཡིད་ཀྱི་རྣམ་ཤེས་འགོག་སྙོམས་སུ་སོང་བའི་ཚེ། དེའི་འཁོར་དུ་བྱུང་བའི་ཚོར་བ་དང་། འདུ་ཤེས་དང་། མཚུངས་ལྡན་གྱི་འདུ་བྱེད་གསུམ་པོ་དེ་ཡང་འགོག་སྙོམས་སུ་འགྱུར་བའི་ཕྱིར། དར་ཊཱིཀ་པ་ན་རེ། འགོག་པའི་སྙོམས་འཇུག་ཡིན་ན། མཉམ་བཞག་ཡིན་པས་མ་ཁྱབ་སྟེ། འཕགས་སེང་གཉིས་ཀྱིས་ཐོགས་མེད་སྐུ་མཆེད་ཀྱིས་བཤད་པ་ལས་མ་གཏོགས་པའི་འགོག་སྙོམས་མ་བཤད་པ་གང་ཞིག ཐོགས་མེད་སྐུ་མཆེད་ཀྱིས་དེ་ལྡན་མིན་འདུ་བྱེད་དུ་བཤད་པའི་ཕྱིར། གཞན་ཡང་འགོག་སྙོམས་དང་མི་རྟོག་ཡེ་ཤེས་ཀྱི་གཞི་མཐུན་མེད་དེ། ཐེག་བསྡུས་ལས། དེ་ལ་རྣམ་པ་ལྔ་སྤངས་པ་ནི་ཞེས་སོགས་གསུངས་པའི་ཕྱིར་ཞེས་ཟེར་རོ། །འོ་ན་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དེ་བདེན་གྲུབ་ཏུ་ཐལ། འཕགས་སེང་གཉིས་ཀྱིས་ཐོགས་མེད་སྐུ་མཆེད་ཀྱི་བཤད་པ་ལས་མ་གཏོགས་པའི་གཟུང་འཛིན་གཉིས་མེད་ཀྱི་ཤེས་པ་མ་བཤད་པ་གང་ཞིག ཐོགས་མེད་སྐུ་མཆེད་ཀྱིས་དེ་བདེན་གྲུབ་ཏུ་བཤད་པའི་ཕྱིར། གལ་ཏེ་གཏན་ཚིགས་དང་པོ་མ་གྲུབ་སྟེ། འཕགས་སེང་གཉིས་ཀྱིས་རྟེན་འབྲེལ་གྱི་རྟགས་ལས་གཟུང་འཛིན་གཉིས་མེད་ཀྱི་ཤེས་པ་ངོ་བོ་ཉིད་མེད་པར་བཤད་པའི་ཕྱིར་ཏེ། དེ་ཡང་རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར་ཏེ། སྒྱུ་མ་བཞིན་དུ་ངོ་བོ་ཉིད་མེད་པ་སྟེ་ཞེས་གསུངས་པའི་ཕྱིར་ཞེ་ན། འོ་ན་སྔ་མའི་གཏན་ཚིགས་དང་པོ་ཡང་མ་གྲུབ་སྟེ། སློབ་དཔོན་གྱིས་འགོག་སྙོམས་དེ་འདས་ལམ་དུ་བཤད་པའི་ཕྱིར་ཏེ། འཇིག་རྟེན་ལས་འདས་པའི་ལམ་ལ་བསམ་གཏན་བཞི་དང་། གཟུགས་མེད་པ་བཞི་དང་། འགོག་པའི་སྙོམས་པར་འཇུག་པ་དག་སྟེ་དགུའོ་ཞེས་གསུངས་པའི་ཕྱིར། འགོག་སྙོམས་ཡིན་ན། འདས་ལམ་ཡིན་དགོས་པར་ཐལ། འཕགས་སེང་གཉིས་ཀྱིས་བྱམས་མགོན་གྱིས་བཤད་པ་ལས་མ་གཏོགས་པའི་འགོག་སྙོམས་མ་བཤད་པ་གང་ཞིག བྱམས་མགོན་གྱིས་འགོག་སྙོམས་ལ་འདས་ལམ་གྱིས་ཁྱབ་པར་བཤད་པའི་ཕྱིར་ཏེ། བྱང་སེམས་སྒོམ་ལམ་པའི་རྒྱུད་ཀྱི་འགོག་སྙོམས་སྒོམ་ལམ་རྩེ་སྦྱོར་དང་། སངས་རྒྱས་ཀྱི་འགོག་སྙོམས་རྟོགས་པ་ཆོས་སྐུར་བཤད་པའི་ཕྱིར། ཐེག་བསྡུས་ཀྱི་ལུང་གི་དོན་ནི། སེམས་ཙམ་པའི་དབང་དུ་བྱས་པར་བཤད་ཟིན་ཏོ།། །།གཉིས་པ་ལ་གང་ཟག ས་མཚམས། དགག་བྱ། འགོག་བྱེད། ངོ་བོའི་ཁྱད་པར་དང་ལྔ་ལས། དང་པོ་ནི། འདི་ལ་ཐེག་ཆེན་འཕགས་པ་རྣམས་འཇུག་གི ཐེག་དམན་རྣམས་མི་འཇུག་སྟེ། འདིའི་དགག་བྱའི་གཙོ་བོ་མཚན་འཛིན་གྱི་སྤྲོས་པ་འགོག་མི་ནུས་པའི་ཕྱིར། གཉིས་པ་ནི། ས་དྲུག་པ་ནས་འཐོབ་སྟེ། དེར་ཤེར་ཕྱིན་ལྷག་པར་ཐོབ་པའི་ཕྱིར་རོ། །དེ་ལྟར་ཡང་། འཇུག་པ་ལས། ཤེས་རབ་གནས་པས་འགོག་པ་འཐོབ་པར་འགྱུར། །ཞེས་པའི་འགྲེལ་པར། རྟེན་ཅིང་འབྲེལ་བར་འབྱུང་བ་ཟབ་མོའི་དེ་ཁོ་ན་ཉིད་མཐོང་བའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་འགོག་པ་འཐོབ་པར་འགྱུར་གྱི་སྔ་རོལ་དུ་ནི་མ་ཡིན་ཏེ། ཤེར་ཕྱིན་ལྷག་པར་གྱུར་པ་མེད་པའི་ཕྱིར། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ཕུལ་དུ་བྱུང་བ་དང་ལྡན་པས་འདི་ཐོབ་པར་མི་ནུས་སོ་ཞེས་གསུངས་སོ། །ས་བདུན་པ་ནས་སྐད་ཅིག་རེ་རེ་ལ་འཇུག་ལྡང་བྱེད་ནུས་ཏེ། དེར་མཚན་འཛིན་གྱི་སྤྲོས་པ་དངོས་སུ་འགོག་པའི་ནུས་པ་ཐོབ་པའི་ཕྱིར་ཏེ། འཇུག་པ་ལས། རིང་དུ་སོང་བ་འདིར་ནི་སྐད་ཅིག་དང་། །སྐད་ཅིག་ལ་ནི་འགོག་པར་འཇུག་འགྱུར་ཞིང་། །ཞེས་གསུངས་པའི་ཕྱིར། འོ་ན་ནུས་པ་དེ་ས་བདུན་པར་ཐོབ་པའི་རྒྱུ་མཚན་ཅི་ཡིན་སྙམ་ན། མདོ་སྡེ་ས་བཅུ་པ་ལས། བྱང་ཆུབ་སེམས་དཔའི་ས་བདུན་པ་རིང་དུ་སོང་བ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཀྱང་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ་ཞེས་གསུངས་པའི་དོན་བྱང་སེམས་རང་གི་ཐུན་མོང་མ་ཡིན་པའི་ཡུལ་ནི་སྤྲོས་པ་མཐའ་དག་བཀག་པའི་དེ་བཞིན་ཉིད་ཡིན་ལ། དེ་ཤེས་པའི་ཆེ་བ་ནི་མཚན་འཛིན་གྱི་སྤྲོས་པ་དངོས་སུ་འགོག་པའི་ནུས་པ་ཡིན་པས་དེ་ས་བདུན་པ་ནས་ཐོབ་ཅེས་པའི་དོན་ནོ། །ས་བརྒྱད་པར་ནི་རྩོལ་མེད་དུ་འཇུག་ནུས་ཏེ། མཚན་འཛིན་གྱི་སྤྲོས་པ་མཐའ་དག་དང་བྲལ་བའི་ཕྱིར་རོ། །སངས་རྒྱས་ཀྱི་སར་ནི་དུས་རྟག་ཏུ་མཉམ་པར་བཞག་པའི་སྒོ་ནས་གཞན་དོན་འབད་མེད་ལྷུན་གྲུབ་ཏུ་འབྱུང་བ་ཡིན་ཏེ། འཇུག་འགྲེལ་ལས། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས་ཞེས་འདིར་བསྟན་གྱི་འགོག་པ་དང་། རྫོགས་སྨིན་སྦྱངས་གསུམ་མ་བྱས་པར་ཡང་དག་མཐའ་མངོན་དུ་མ་བྱེད་ཅིག་ཅེས་པའི་ཡང་དག་མཐའ་གཉིས་དོན་གཅིག་པར་བཤད་ཅིང་། སངས་རྒྱས་འཕགས་པས་རྫོགས་སྨིན་སྦྱངས་གསུམ་བྱས་ནས་ཡང་དག་མཐའ་མངོན་དུ་བྱས་པའི་ཕྱིར། གསུམ་པ་ནི། སའི་སྙིང་པོ་འཁོར་ལོ་བཅུ་པའི་མདོ་ལས་འདུ་ཤེས་གསུམ་གསུངས་པའི་བདག་ཏུ་འཛིན་པའི་འདུ་ཤེས་ནི་ཐེག་པ་ཆེ་ཆུང་གཉིས་ཀའི་འགོག་སྙོམས་ཀྱི་དགག་བྱ་དང་། དམན་པའི་ཡིད་བྱེད་ཀྱི་འདུ་ཤེས་ནི་ཐེག་ཆེན་གྱི་འགོག་སྙོམས་གཉིས་ཀྱི་དགག་བྱ་དང་། མཚན་འཛིན་གྱི་སྤྲོས་པའི་འདུ་ཤེས་ནི་འདིའི་ཐུན་མོང་མ་ཡིན་པའི་དགག་བྱ་ཡིན་ཏེ། འཇུག་འགྲེལ་ལས། དེ་བཞིན་ཉིད་ལ་འགོག་པ་ཞེས་བྱ་སྟེ་ཞེས་གསུངས་པའི་ཕྱིར་རོ། །དེས་ན་འདི་ནས་བཤད་པའི་མཚན་འཛིན་དང་། སྐབས་དང་པོར་སྦྱོར་ལམ་གྱི་དགག་བྱར་བཤད་པའི་མངོན་ཞེན་དང་། སྐབས་དང་པོ་དང་ལྔ་པར་བཤད་པའི་བཏགས་འཛིན་རྟོག་པ་དང་། སྐབས་གསུམ་པར་བཤད་པའི་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་དང་། རྒྱུད་བླར། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་པའི་ཤེས་སྒྲིབ་དང་། འཇུག་པ་ལས་བཤད་པའི་སྦྱིན་པ་ལ་སོགས་པའི་འཁོར་གསུམ་དུ་རྣམ་པར་རྟོག་པའི་བློ་རྣམས་དོན་གཅིག་ཅིང་། དེ་ནི་ཐེག་ཆེན་ཐུན་མོང་མ་ཡིན་པའི་དགག་བྱ་ཡིན་གྱི་ཐེག་དམན་གྱིས་དེ་འགོག་མིན་ནུས་ཤིང་མ་བཀག་ཀྱང་རང་གི་བྱང་ཆུབ་ཐོབ་པ་ལ་གེགས་ཅུང་ཟད་ཀྱང་མི་བྱེད་དོ། །བཞི་པ་ནི། སྔར་བཤད་པའི་མཚན་འཛིན་གྱི་སྤྲོས་པ་དེའི་གཉེན་པོར་གྱུར་པའི་མཚན་མེད་རྟོགས་པའི་ཤེས་རབ་ཡིན་ལ། དེ་ལྟ་བུའི་མཚན་མེད་དེ་ཐོས་བསམ་གྱི་སྒོ་ནས་རྟོགས་པ་ཐེག་ཆེན་གྱི་ཚོགས་ལམ་ནས་ཡོད་དེ། མཚན་མེད་རབ་ཏུ་སྦྱིན་ལ་སོགས། །ཞེས་གསུངས་པའི་ཕྱིར། སྒོམ་བྱུང་གི་སྒོ་ནས་དོན་སྤྱིའི་ཚུལ་གྱིས་རྟོགས་པ་ཐེག་ཆེན་གྱི་སྦྱོར་ལམ་ནས་ཡོད་དེ། རྣམ་པ་མངོན་ཞེན་ལ་སོགས་འགོག །ཅེས་དང་། སྤྱོད་པ་བཀག་པའི་སྦྱོར་བ་དང་། །ཞེས་གསུངས་པའི་ཕྱིར། མངོན་སུམ་དུ་རྟོགས་པ་ཐེག་ཆེན་གྱི་མཐོང་ལམ་ནས་ཡོད་དེ། བསམ་མི་ཁྱབ་སོགས་ཁྱད་པར་གྱིས། །ཞེས་གསུངས་པའི་ཕྱིར། མངོན་སུམ་དུ་རྟོགས་ཟིན་རྒྱུན་ལྡན་དུ་བསྒོམས་པ་ཐེག་ཆེན་གྱི་སྒོམ་ལམ་ནས་ཡོད་དེ། སྒོམ་པའི་ལམ་ནི་ཟབ་པ་སྟེ། །ཞེས་གསུངས་པའི་ཕྱིར། དེས་ན་བསྟན་བཅོས་མངོན་རྟོགས་རྒྱན་འདིར་དེ་ལྟ་བུའི་ཤེས་རབ་ལ་ཆོས་ཀྱི་བདག་མེད་རྟོགས་པའི་ཤེས་རབ་ཀྱི་ཐ་སྙད་མཛད་ནས། ཉན་རང་ལ་མེད་པར་བཤད་པ་ཡིན་ཏེ། ཐེག་ཆེན་གྱི་སྦྱོར་མཐོང་སྒོམ་གསུམ་དེ་ལྟ་བུའི་ཤེས་རབ་དང་ལྡན་པའི་ཆ་ནས་ཐེག་དམན་གྱི་སྦྱོར་མཐོང་སྒོམ་གསུམ་ལས་ཁྱད་པར་དུ་འཕགས་པར་བཤད་པའི་ཕྱིར། དེ་ཉིད་ཀླུ་སྒྲུབ་ཡབ་སྲས་ཀྱང་བཞེད་དེ། རིན་ཆེན་ཕྲེང་བ་ལས། ཟབ་མོ་འཁུ་འཕྲིག་ཅན་འཇིགས་པ། །བྱང་ཆུབ་བསྒྲུབ་པ་ཁ་ཅིག་ལའོ། །ཞེས་དང་། སློབ་དཔོན་ཟླ་བས། སྦྱིན་པའི་འཁོར་གསུམ་མི་དམིགས་པར་རྟོགས་པའི་ཤེས་རབ་བྱང་ཆུབ་སེམས་དཔའི་གནས་སྐབས་མ་ཐོབ་པ་ལ་མེད་པར་བཤད་པའི་ཕྱིར། དེས་ན་ཤེར་ཕྱིན་ལྷག་པར་ཐོབ་པའི་སྟོབས་ཀྱིས་མཚན་འཛིན་གྱི་སྤྲོས་པ་མཐའ་དག་འགོག་པའི་ནུས་པ་མཐུ་ཅན་དུ་གྱུར་པའི་ཟག་མེད་ཀྱི་ཡེ་ཤེས་ནི་འགོག་བྱེད་ཀྱི་ཤེས་པ་ཡིན་ཏེ། འདིར་འགོག་བྱེད་ཀྱི་ཤེས་པ་དང་། འགོག་པའི་སྙོམས་འཇུག་གཉིས་ནི་ཤེས་པ་རིགས་རྒྱུན་གཅིག་ལ་འཇོག་དགོས་པའི་ཕྱིར་རོ། །མདོར་ན་ཐེག་ཆེན་ཐུན་མོང་མ་ཡིན་པའི་རྟོགས་རིགས་སུ་གྱུར་པའི་མཚན་འཛིན་གྱི་སྤྲོས་པ་མཐའ་དག་བཀག་པའི་མཚན་མེད་རྟོགས་པའི་ཤེས་རབ་དེ་ཐེག་ཆེན་གྱི་ཚོགས་སྦྱོར་གྱི་གནས་སྐབས་སུ་དོན་སྤྱིའི་ཚུལ་དུ་བསྒོམས་པའི་མཐུས་ཐེག་ཆེན་གྱི་མཐོང་ལམ་དུ་མངོན་སུམ་དུ་རྟོགས། ས་དྲུག་པར་མཚན་འཛིན་གྱི་སྤྲོས་པ་འགོག་པའི་ནུས་པ་ཐོབ། ས་བདུན་པར་སྐད་ཅིག་རེ་རེ་ལ་འཇུག་ལྡང་ནུས། ས་བརྒྱད་པར་རྩོལ་མེད་དུ་འཇུག་ནུས། སངས་རྒྱས་ཀྱི་སར་ཇི་ལྟ་བ་མཁྱེན་པའི་རྣམ་མཁྱེན་དུ་འགྱུར་བས་ན། ཐེག་ཆེན་རང་གི་རྟོགས་རིགས་ཐུན་མོང་མ་ཡིན་པ་དེ་ལ་ས་དྲུག་པ་ནས་འདིའི་འགོག་སྙོམས་སུ་བཞག་པ་ཙམ་མོ། །དེ་ཡང་མདོ་སྡེ་ས་བཅུ་པ་ལས། སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ནོ་ཞེས་དང་། བཟོད་པའི་སྒོ་འདི་ཉིད་ཀྱང་མ་དོར་ཅིག་ཅེས་གསུངས་པས། ཐེག་ཆེན་ཐུན་མོང་མ་ཡིན་པའི་རྟོགས་རིགས་སུ་གྲུབ་ལ། འདི་དང་ཤེར་ཕྱིན་གྱི་མདོ་ལས་གསུངས་པའི་ཡང་དག་མཐའ་གཉིས་དོན་གཅིག་པས་དེ་གཉིས་མངོན་དུ་བྱས་པ་ཡང་དོན་གཅིག དེ་གཉིས་ལ་མཉམ་པར་བཞག་པ་ཡང་དོན་གཅིག་གོ །འོན་ཀྱང་མཉམ་པར་བཞག་པ་ཙམ་གྱིས་མངོན་དུ་བྱས་པ་ནི་མ་ཡིན་ཏེ། ས་བདུན་པའི་གནས་སྐབས་སུ་དེ་ལ་མཉམ་པར་བཞག་པ་ཡོད་ཀྱང་མངོན་དུ་བྱས་པ་མེད་པའི་ཕྱིར་དང་། མདོ་ལས་ཀྱང་རྫོགས་སྨིན་སྦྱང་གསུམ་མ་བྱས་པར་ཡང་དག་མཐའ་མངོན་དུ་བྱེད་པ་བཀག་གི ཡང་དག་མཐའ་ལ་མཉམ་པར་བཞག་པ་ཙམ་མ་བཀག་པའི་ཕྱིར་ཏེ། དག་པ་ས་གསུམ་གྱི་གནས་སྐབས་སུ་སྒོམ་སྤང་ཆུང་ངུའི་ཆུང་ངུ་སོགས་ཀྱི་གཉེན་པོར་ཡང་དག་མཐའ་ལ་མཉམ་པར་གཞག་དགོས་པའི་ཕྱིར། འོ་ན་ས་བརྒྱད་པའི་བྱང་སེམས་སྤྲོས་པ་མཐའ་དག་བཀག་པའི་འགོག་པ་ལ་མཉམ་པར་བཞག་པ་ལས་རྒྱལ་བ་རྣམས་ཀྱིས་སློང་བ་མི་འཐད་པར་འགྱུར་རོ་ཞེ་ན། མཉམ་པར་བཞག་པ་ཙམ་བཀག་པ་ནི་མ་ཡིན་ཏེ། སྔར་བཤད་པ་ལྟར་ཤེས་སྒྲིབ་ཀྱི་གཉེན་པོར་མཉམ་པར་བཞག་པའི་སྐབས་སྲིད་པའི་ཕྱིར་ཡུན་རིང་དུ་མཉམ་པར་བཞག་པ་ནི་བཀག་སྟེ། དེར་མཚན་འཛིན་གྱི་སྤྲོས་པ་མེད་པས་ཡུན་རིང་དུ་མཉམ་པར་བཞག་ནུས་ཤིང་ཡུན་རིང་དུ་མཉམ་པར་བཞག་ཀྱང་མཚན་འཛིན་གྱི་བར་ཆད་སྤོང་བ་སོགས་ཀྱི་དགོས་པ་མེད་ལ། ཤེས་སྒྲིབ་ཀྱི་བག་ཆགས་སྤོང་བ་ལ་ནི་རྗེས་ཐོབ་ཏུ་བསོད་ནམས་ཀྱི་ཚོགས་གསོག་པ་གཙོ་ཆེ་བའི་ཕྱིར་རོ། །ས་བདུན་པ་མན་ཆད་དུ་ཡུན་རིང་དུ་མཉམ་པར་བཞག་པ་མ་བཀག་སྟེ་མཚན་འཛིན་གྱི་བར་ཆད་དང་བཅས་པས་ཡུན་རིང་དུ་མཉམ་པར་བཞག་མི་ནུས་ལ། ཡུན་རིང་དུ་མཉམ་པར་བཞག་པ་ལ་མཚན་འཛིན་གྱི་བར་ཆད་སྤོང་བའི་དགོས་པ་ཡོད་ཅིང་། མཚན་འཛིན་གྱི་བར་ཆད་སྤོང་བ་ལ། མཉམ་རྗེས་གཉིས་ཀྱི་ནང་ནས་མཉམ་གཞག་གཙོ་ཆེ་བའི་ཕྱིར་རོ། །ལྔ་པ་ནི། ཤེར་ཕྱིན་ལྷག་པར་ཐོབ་པའི་སྟོབས་ཀྱིས་མཚན་འཛིན་གྱི་སྤྲོས་པ་མཐའ་དག་བཀག་པའི་དེ་བཞིན་ཉིད་ལ་རྩེ་གཅིག་པའི་ཡེ་ཤེས་ཏེ། ས་མཚམས་ས་དྲུག་པ་ནས་སངས་རྒྱས་ཀྱི་སའི་བར་ན་ཡོད་དོ། །གཉིས་ཀས་ངེས་པར་འབྱུང་བ་འགོག་པའི་སྙོམས་འཇུག་བཤད་ཟིན་ཏོ།། །།བཞི་པ་སྙོམས་པར་འཇུག་ཚུལ་གྱི་ཁྱད་པར་ཐོད་རྒལ་བཤད་པ་ལ་གསུམ་སྟེ། ཐེག་པ་ཆེན་པོའི་ལུགས་ཀྱི་ཐོད་རྒལ་བཤད་པ། ཉན་ཐོས་པའི་ལུགས་ཀྱི་ཐོད་རྒལ་བཤད་པ། དམན་པའི་ལུགས་ཀྱིས་མཆོག་ལ་མི་གནོད་པར་བསྟན་པའོ། །དང་པོ་ལ་གསུམ་སྟེ། མདོ་ལས་ཇི་ལྟར་གསུངས་པའི་ཚུལ། བསྟན་བཅོས་ལས་ཇི་ལྟར་བསྟན་པའི་ཚུལ། སྙོམས་འཇུག་གི་རང་བཞིན་གཏན་པ་དབབ་པའོ། །དང་པོ་ནི། ཡུམ་རྒྱས་པ་ལས་མཐོང་ལམ་རྩེ་སྦྱོར་གྱི་སྐབས་སུ་ཕར་ཕྱིན་དྲུག་པོ་རེ་རེའི་ནང་དུ་ཕར་ཕྱིན་གཞན་ལྔ་ལྔ་བསྡུས་ཚུལ་གསུངས་པའི་ཤེས་རབ་ཀྱི་ཕར་ཕྱིན་གྱི་བསྡུ་བྱར་གྱུར་པའི་བསམ་གཏན་གྱི་ཕར་ཕྱིན་སྟོན་པའི་མདོ་རྣམས་ཀྱིས་སེངྒེ་རྣམ་བསྒྱིངས་དང་ཐོད་རྒལ་རྣམས་སྟོན་ཏེ། འདི་ལྟར། གསོལ་པ་བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཤིང་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་འཛིན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཤིང་། དེ་བཞིན་གཤེགས་པའི་ཏིང་ངེ་འཛིན་མ་གཏོགས་པར་ཉན་ཐོས་ཀྱི་ཏིང་ངེ་འཛིན་ནམ། རང་སངས་རྒྱས་ཀྱི་ཏིང་ངེ་འཛིན་ནམ། བྱང་ཆུབ་སེམས་དཔའི་ཏིང་ངེ་འཛིན་ཡང་རུང་སྟེ། ཏིང་ངེ་འཛིན་གང་ཇི་སྙེད་པ་དེ་དག་ཐམས་ཅད་ལ་སྙོམས་པར་འཇུག་གོ །ཏིང་ངེ་འཛིན་དེ་དག་ཐམས་ཅད་ལ་གནས་ཤིང་རྣམ་པར་ཐར་པ་བརྒྱད་ལ་ལུགས་དང་མཐུན་པ་དང་། ལུགས་དང་མི་མཐུན་པར་སྙོམས་པར་འཇུག་ཅིང་རྣམ་པར་ལྡང་ངོ་། །བརྒྱད་གང་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ཅན་གྱི་གཟུགས་རྣམ་པར་མཐོང་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པའི་འདུ་ཤེས་དང་ལྡན་པའི་ཕྱི་རོལ་གྱི་གཟུགས་རྣམ་པར་མཐོང་བ་འདི་ནི་རྣམ་པར་ཐར་པ་གཉིས་པའོ། །བཟང་པོར་མོས་པ་འདི་ནི་རྣམ་པར་ཐར་པ་གསུམ་པའོ། །དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་ཅིང་། སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབ་ཏེ་གནས་པ་འདི་ནི་རྣམ་པར་ཐར་པ་བཞི་པའོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་ཤེས་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་ལྔ་པའོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅུང་ཟད་མེད་དོ་ཞེས་ཅུང་ཟད་མེད་པའི་སྐྱེ་མཆེད་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་དྲུག་པའོ། །དེ་རྣམ་པ་ཐམས་ཅད་དུ་ཅུང་ཟད་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་བདུན་པའོ། །དེ་རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་དང་ཚོར་བ་འགོག་པ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་བརྒྱད་པ་སྟེ། དེ་ལྟར་ན་རྣམ་པར་ཐར་པ་བརྒྱད་པོ་འདི་དག་ལ་ལུགས་དང་མཐུན་པ་དང་ལུགས་དང་མི་མཐུན་པར་སྙོམས་པར་འཇུག་ཅིང་ལྡང་ངོ་། །མཐར་གྱིས་གནས་པའི་སྙོམས་པར་འཇུག་པ་དགུ་ལ་ལུགས་དང་མཐུན་པ་དང་ལུགས་དང་མི་མཐུན་པར་སྙོམས་པར་འཇུག་ཅིང་རྣམ་པར་ལྡང་སྟེ། དགུ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འདོད་པས་དབེན། སྡིག་ཏོ་མི་དགེ་བའི་ཆོས་ཀྱིས་དབེན་པ་རྟོག་པ་དང་བཅས་པ། དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །དེ་རྣམ་པར་རྟོག་པ་དང་། རྣམ་པར་དཔྱོད་པ་ཉེ་བར་ཞི་ནས་ནང་ཡོངས་སུ་དྭངས་ཏེ་སེམས་ཀྱི་རྒྱུད་གཅིག་ཏུ་གྱུར་ནས་རྟོག་པ་མེད་པ་དང་དཔྱོད་པ་མེད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །དེ་དགའ་བ་ལ་འདོད་ཆགས་དང་བྲལ་བས་དྲན་པ་དང་ལྡན་ཅིང་ཤེས་བཞིན་དུ་བཏང་སྙོམས་སུ་གནས་ཏེ་བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་དེ་ལ་དྲན་པ་དང་ལྡན་པ་བདེ་བ་ལ་རྣམ་པར་དཔྱོད་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བདེ་བ་ཅན་གྱི་བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས་ཡིད་བདེ་བ་དང་མི་བདེ་བ་སྔ་ནས་ཀྱང་ནུབ་པས་བདེ་བ་ཡང་མེད། སྡུག་བསྔལ་ཡང་མེད་པ་བཏང་སྙོམས་དང་དྲན་པ་ཡོངས་སུ་དག་པའི་བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ། ཐོགས་པའི་འདུ་ཤེས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་ཤེས་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅུང་ཟད་མེད་དོ་ཞེས་ཅུང་ཟད་མེད་པའི་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ཅུང་ཟད་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་དང་ཚོར་བ་འགོག་པ་ཉེ་བར་བསྒྲུབས་ཏེ་གནས་སོ། །དེ་ལྟར་མཐར་གྱིས་གནས་པའི་སྙོམས་པར་འཇུག་པ་དགུ་པོ་དེ་དག་ལ་ལུགས་དང་མཐུན་པ་དང་ལུགས་དང་མི་མཐུན་པར་སྙོམས་པར་འཇུག་ཅིང་རྣམ་པར་ལྡང་ངོ་། །དེ་ལྟར་རྣམ་པར་ཐར་པ་བརྒྱད་པོ་དེ་དག་དང་མཐར་གྱིས་གནས་པའི་སྙོམས་པར་འཇུག་པ་དགུ་པོ་དེ་དག་རྣམ་པར་ཕྱེ་ཞིང་སེང་གེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་འཇུག་པའོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་སེང་གེ་རྣམ་པར་བསྒྱིངས་པ་དེ་གང་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདོད་པས་དབེན་པ། སྡིག་ཏོ་མི་དགེ་བའི་ཆོས་ཀྱིས་དབེན་པ་རྟོག་པ་དང་བཅས་པ་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །བསམ་གཏན་དང་པོ་ལས་ལངས་ནས་བསམ་གཏན་གཉིས་པ་ལ་སྙོམས་པར་འཇུག་གོ །བསམ་གཏན་གཉིས་པ་ལས་ལངས་ནས་བསམ་གཏན་གསུམ་པ་ལ་སྙོམས་པར་འཇུག་གོ །བསམ་གཏན་གསུམ་པ་ལས་ལངས་ནས་བསམ་གཏན་བཞི་པ་ལ་སྙོམས་པར་འཇུག་གོ །དེ་ལས་ལངས་ནས་རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་ཅུང་ཟད་མེད་པའི་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འགོག་པ་ལའོ། །དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའོ། །དེ་བཞིན་དུ་དེ་ལས་ལངས་ནས་བསམ་གཏན་དང་པོ་ལ་སྙོམས་པར་འཇུག་གོ །སེང་གེ་རྣམ་པར་བསྒྱིངས་པའི་ཏིང་ངེ་འཛིན་འདི་སྨིན་པར་བྱས་ནས་ཐོད་རྒལ་གྱི་ཏིང་ངེ་འཛིན་ལ་སྙོམས་པར་འཇུག་གོ །རབ་འབྱོར་བྱང་སེམས་ཆེན་པོའི་ཏིང་ངེ་འཛིན་ཐོད་རྒལ་གང་ཞེ་ན། རབ་འབྱོར་འདི་ལ་བྱང་སེམས་ཆེན་པོ་འདོད་པས་དབེན་སྡིག་ཏོ་མི་དགེ་བའི་ཆོས་ཀྱིས་དབེན་པ། རྟོག་པ་དང་བཅས་པ་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །བསམ་གཏན་དང་པོ་ལས་ལངས་ནས་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །ཞེས་པ་ནས་དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་འཇུག་ཉེ་བར་བསྒྲུབས་ཏེ་གནས་སོ། །དེ་ལས་ལངས་ནས་འདུ་ཤེས་དང་ཚོར་བ་འགོག་པ་ཉེ་བར་བསྒྲུབས་ཏེ་གནས་སོ་ཞེས་པའི་བར་དང་། ཡང་། དེ་ལས་ལངས་ནས་བསམ་གཏན་དང་པོ་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་འཇུག་ལ་སྙོམས་པར་འཇུག་གོ་ཞེས་པ་ནས། དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའོ། །དེ་ལས་ལངས་ནས་མཉམ་པར་མ་བཞག་པའི་སེམས་སུ་བྱེད་དོ་ཞེས་པའི་བར་དང་། དེ་ནས་འགོག་པའི་སྙོམས་འཇུག་ལ་སྙོམས་པར་འཇུག་གོ །དེ་ལས་ལངས་ནས་མཉམ་པར་མ་བཞག་པའི་སེམས་ལ་གནས་སོ། །དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་འཇུག་ལ་སྙོམས་པར་འཇུག་གོ །ཞེས་པ་ནས་དེ་ལས་ལངས་ནས་བསམ་གཏན་དང་པོ་ལའོ། །དེ་ལས་ལངས་ནས་མཉམ་པར་མ་བཞག་པའི་སེམས་སུ་བྱེད་དོ་ཞེས་པའི་བར་དང་། དེ་ཐོད་རྒལ་གྱི་ཏིང་ངེ་འཛིན་འདི་ལ་གནས་ཤིང་ཆོས་ཐམས་ཅད་མཉམ་པ་ཉིད་རྗེས་སུ་ཐོབ་པར་བྱེད་དེ། རབ་འབྱོར་དེ་ལྟར་ན་བྱང་སེམས་ཆེན་པོ་ཡུམ་ལ་གནས་ཤིང་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་འཛིན་ཏོ་ཞེས་གསུངས་སོ། །མདོ་དེ་དག་ལས་རྣམ་ཐར་བརྒྱད་ལ་ལུགས་མཐུན་དང་། ལུགས་བཟློག་དང་། མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དང་ལུགས་བཟློག་ཏུ་སྙོམས་པར་འཇུག་པས་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་ཀྱི་ཏིང་ངེ་འཛིན་བསྟན་ཅིང་འདི་ལ་སེང་གེ་རྣམ་བསྒྱིངས་ཞེས་པའི་ཐ་སྙད་མདོ་ལས་མ་གསུངས་སོ། །རབ་འབྱོར་བྱང་སེམས་ཆེན་པོའི་སེང་གེ་རྣམ་པར་བསྒྱིངས་པ་གང་ཞེ་ན། ཞེས་པ་ནས་ཐོད་རྒལ་གྱི་ཏིང་ངེ་འཛིན་ལ་སྙོམས་པར་འཇུག་གོ་ཞེས་པའི་བར་གྱིས་སྦྱོར་བ་སེང་གེ་རྣམ་བསྒྱིངས་བསྟན། རབ་འབྱོར་བྱང་སེམས་ཆེན་པོའི་ཏིང་ངེ་འཛིན་ཐོད་རྒལ་གང་ཞེ་ན། ཞེས་པ་མན་ཆད་ཀྱིས་དངོས་གཞི་ཐོད་རྒལ་བསྟན་ཏོ།། །།གཉིས་པ་ལ་གཉིས་ཏེ། རྩ་བའི་དགོངས་པ་དང་། འགྲེལ་པ་ལས་གསུངས་ཚུལ་ལོ། །དང་པོ་ནི། ཤེས་བྱ་ཀུན་རིག་གི་ཞལ་སྔ་ནས། དེ་ནས་སེང་གེ་རྣམ་བསྒྱིངས་པའི། །ཞེས་པའི་རྐང་པ་གཉིས་ཀྱིས་ཁྱད་པར་ལམ་གྱིས་སེང་གེ་རྣམ་བསྒྱིངས་དང་སྦྱོར་བ་སེང་གེ་རྣམ་བསྒྱིངས་གཉིས་ཀ་བསྟན། འགོག་དང་བཅས་པའི་སྙོམས་འཇུག་དགུར། །ཞེས་སོགས་ཀྱིས་དངོས་གཞི་ཐོད་རྒལ་ཁོ་ན་བསྟན་པ་ལས། འགོག་དང་བཅས་པའི་སྙོམས་འཇུག་དགུར། རྣམ་པ་གཉིས་སུ་སོང་ཞེས་པའི་རྣམ་པ་གཅིག་གིས་ཐོད་རྒལ་ཆུང་ངུ་དང་། གཅིག་གིས་འབྲིང་བསྟན་ཏེ། དེ་གཉིས་ཀ་ཡང་ལུགས་མཐུན་དུ་སོང་བར་མཚུངས་པའི་ཕྱིར་རོ། །འོངས་ནས་ཞེས་པས་ཁྲི་བརྒྱད་སྟོང་པ་ནས་བཤད་པའི་ནུད་ཆུང་བསྟན། དེ་ནས་རྐང་པ་གཉིས་ཀྱིས་ཆེ་འབྲིང་གཉིས་ཀྱི་མཚམས་འཛིན་བསྟན། དེ་ནས་རྐང་པ་གཅིག་གིས་མིང་བསྟན། དེ་ནས་གཉིས་ཀྱིས་ཆེན་པོ་བསྟན། དེ་ནས་གཅིག་གིས་སྒྲ་དོན་བསྟན་ཅིང་། ཨ་བྷ་ཡས་ཀྱང་འདི་ལྟར་དུ་བཞེད་དོ། །ཁ་ཅིག འགོག་དང་བཅས་པའི་སྙོམས་འཇུག་དགུར། །ཞེས་སོགས་ཀྱི་སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་གཉིས་ཀ་བསྟན་པར་འདོད་པ་ནི། འཕགས་པས་སེང་གེ་རྣམ་བསྒྱིངས་ཀྱི་མདོ་དང་། དངོས་གཞི་ཐོད་རྒལ་གྱི་མདོ་གཉིས་ཕྱོགས་གཅིག་ཏུ་དྲངས་པས་འཁྲུལ་གཞི་བྱས་པར་ཟད་དོ་ཞེས་གསུངས་སོ། །དེ་ལ་གཞན་དག་གནོད་བྱེད་འདི་ལྟར་བརྗོད་དེ། དེ་ནས་སེང་གེ་རྣམ་བསྒྱིངས་པའི། །ཞེས་པའི་སྐབས་ནས་དངོས་སུ་བསྟན་པའི་སེང་གེ་རྣམ་བསྒྱིངས་དེ་ཆོས་ཅན། ཁྱོད་ཐོད་རྒལ་གྱི་དངོས་ཀྱི་སྦྱོར་བ་མ་ཡིན་པར་ཐལ། ཁྱོད་དང་ཐོད་རྒལ་གྱི་བར་དུ་རྗེས་ཐོབ་རྟེན་འབྲེལ་ལ་རྟོག་པས་ཆོད་པའི་ཕྱིར། འདོད་ན། གཞུང་དེས་ཐོད་རྒལ་གྱི་དངོས་ཀྱི་སྦྱོར་བར་གྱུར་པའི་སེང་གེ་རྣམ་བསྒྱིངས་མ་བསྟན་པར་ཐལ། འདོད་པ་དེའི་ཕྱིར། ཡང་དེའི་སྐབས་ནས་དངོས་བསྟན་གྱི་སྦྱོར་བ་སེང་གེ་རྣམ་བསྒྱིངས་ཆོས་ཅན། ཁྱོད་ཐོད་རྒལ་གྱི་དངོས་ཀྱི་སྦྱོར་བ་མིན་པར་ཐལ། ཁྱོད་དང་དེའི་བར་དུ་རྗེས་ཐོབ་རྟེན་འབྲེལ་ལ་རྟོག་པས་ཆོད་པའི་ཕྱིར་ཏེ། ཁྱོད་དེའི་སྐབས་ནས་དངོས་བསྟན་གྱི་སེང་གེ་རྣམ་བསྒྱིངས་ཡིན་པའི་ཕྱིར་ཟེར་རོ། །མི་འཐད་དེ། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོང་ནས། །ཞེས་པ་དེས། དངོས་གཞི་ཐོད་རྒལ་ཆུང་ངུ་དང་འབྲིང་གཉིས་མ་བསྟན་པར་ཐལ། དེའི་སྐབས་ནས་བསྟན་པའི་དངོས་གཞི་ཐོད་རྒལ་གྱི་ཏིང་ངེ་འཛིན་དེ་གཉིས་གང་རུང་མིན་པའི་ཕྱིར། ཁྱབ་པ་ཐལ་འགྱུར་སྔ་མའི་ཁྱབ་པ་ཕྱི་མ་ལ་སྒྲིགས། འདོད་ན། དེ་གཉིས་སྟོན་བྱེད་ཀྱི་རྒྱན་གཞུང་མེད་པར་ཐལ་ལོ། །ཐལ་འགྱུར་གཉིས་པའི་ཁྱབ་པ་ཕྱི་མ་མ་ངེས་ཏེ། རྒྱུན་མཐའི་རྣམ་རྫོགས་སྦྱོར་བ་ཆོས་ཅན། ཁྱོད་དང་སྐད་ཅིག་མའི་སྦྱོར་བའི་བར་དུ་མཐར་གྱིས་པའི་སྦྱོར་བས་ཆོད་པར་ཐལ། ཁྱོད་མཚན་ཉིད་དེ་ཡི་སྦྱོར་བ་དང་ཞེས་པའི་སྐབས་ནས་དངོས་བསྟན་གྱི་སྦྱོར་བ་ཡིན་པའི་ཕྱིར། ཡང་ཁ་ཅིག མཐོང་ལམ་མཉམ་གཞག་དང་སྒོམ་ལམ་མཉམ་བཞག་གཉིས་པོ་བར་མ་ཆད་དུ་འབྱུང་བར་ཐལ། དེ་ནས་སེང་གེ་རྣམ་བསྒྱིངས་པའི། །ཞེས་པའི་སྐབས་ནས་བསྟན་པའི་སེང་གེ་རྣམ་པར་བསྒྱིངས་པའི་ཏིང་ངེ་འཛིན་དེ་སྒོམ་ལམ་མཉམ་གཞག་ཡིན་པའི་ཕྱིར་ཞེ་ན། གཏན་ཚིགས་དེ་ནི་ཁྱེད་ཉིད་ཀྱང་ཁས་ལེན་དགོས་ཏེ། མཐོང་ལམ་སྐད་ཅིག་བཅུ་དྲུག་རྫོགས་པའི་དེ་མ་ཐག་ཏུ་བྱུང་བའི་མཉམ་གཞག་ཡིན་ན། སྒོམ་ལམ་མཉམ་གཞག་ཡིན་དགོས་པ་ཁས་བླངས་པའི་ཕྱིར་རོ། །ཡང་ཁ་ཅིག མཐོང་ལམ་རྩེ་སྦྱོར་དང་སྦྱོར་བ་སེང་གེ་རྣམ་བསྒྱིངས་གཉིས་པོ་བར་མ་ཆད་དུ་འབྱུང་བར་ཐལ། སྦྱིན་པ་ལ་སོགས་རེ་རེ་ནི། །ཞེས་པ་དེས་མཐོང་ལམ་རྩེ་སྦྱོར་བསྟན་པ་གང་ཞིག དེ་ནས་སེང་གེ་རྣམ་བསྒྱིངས་པའི། །ཞེས་པའི་གཞུང་དེས་སྦྱོར་བ་སེང་གེ་རྣམ་བསྒྱིངས་བསྟན་པའི་ཕྱིར་ཞེ་ན། འོ་ན་སྦྱོར་བ་སེང་གེ་རྣམ་བསྒྱིངས་དང་མཚམས་འཛིན་གྱི་འདོད་སེམས་གཉིས་པོ་ཡང་བར་མ་ཆད་དུ་འབྱུང་བར་ཐལ། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོང་ནས། །ཞེས་པ་དེས་སྦྱོར་བ་སེང་གེ་རྣམ་བསྒྱིངས་བསྟན་པ་གང་ཞིག འདོད་པར་གཏོགས་པའི་རྣམ་པར་ཤེས། །ཞེས་པས་མཚམས་འཛིན་གྱི་འདོད་སེམས་བསྟན་པའི་ཕྱིར། རྟགས་ཁྱབ་ཁས། ཡང་ཁ་ཅིག དེས་ནས་སེང་གེ་རྣམ་བསྒྱིངས་པའི། །ཞེས་པའི་གཞུང་དེ་ཆོས་ཅན། མཐོང་ལམ་རྩེ་སྦྱོར་སྟོན་བྱེད་ཀྱི་རྒྱན་གཞུང་མིན་པར་ཐལ། སྒོམ་ལམ་རྩེ་སྦྱོར་སྟོན་བྱེད་ཀྱི་རྒྱན་གཞུང་ཡིན་པའི་ཕྱིར་ཞེ་ན། མཐོང་ལམ་རྩེ་སྦྱོར་གྱི་ཤེར་ཕྱིན་གྱི་བསྡུ་བྱར་གྱུར་པའི་བསམ་གཏན་གྱི་ཕར་ཕྱིན་སྟོན་པར་བྱེད་པའི་ཤེར་ཕྱིན་གྱི་མདོ་རྣམས་ཆོས་ཅན། མཐོང་ལམ་རྩེ་སྦྱོར་སྟོན་བྱེད་ཀྱི་མདོ་མིན་པར་ཐལ། སྒོམ་ལམ་རྩེ་སྦྱོར་སྟོན་བྱེད་ཀྱི་མདོ་ཡིན་པའི་ཕྱིར། རྟགས་ཁྱབ་ཁས། འོ་ན་དེ་ལྟ་བུའི་མདོ་དེ་མཐོང་ལམ་རྩེ་སྦྱོར་གྱི་སྐབས་སུ་འབྱུང་ཞིང་། སྒོམ་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། ཐོད་རྒལ་སྟོན་པའི་རྒྱུ་མཚན་ཅི་ཡིན་ཞེ་ན། དེ་གཉིས་མངོན་དུ་བྱེད་པའི་ནུས་པ་མཐོང་ལམ་རྩེ་སྦྱོར་གྱི་སྐབས་སུ་ཐོབ་པས་མདོ་དེ་མཐོང་ལམ་རྩེ་སྦྱོར་གྱི་སྐབས་སུ་བཤད་ཅིང་། ནུས་པ་དེ་ཉིད་ལ་མཐོང་ལམ་རྩེ་སྦྱོར་གྱི་ཤེར་ཕྱིན་གྱི་བསྡུ་བྱར་གྱུར་པའི་བསམ་གཏན་གྱི་ཕར་ཕྱིན་ཞེས་ཀྱང་བརྗོད་དེ། མཐོང་ལམ་རྩེ་སྦྱོར་གྱི་གནས་སྐབས་སུ་ཕར་ཕྱིན་རེ་རེའི་ནང་དུ་གཞན་ལྔ་ལྔ་ཚང་བ་དེ་ཡང་ལྡོག་པའི་སྒོ་ནས་ཕྱེ་བ་ཡིན་པའི་ཕྱིར་རོ། །མཐོང་ལམ་རྩེ་སྦྱོར་གྱི་གནས་སྐབས་སུ་དེ་ཉིད་མངོན་དུ་བྱེད་པའི་ནུས་པ་ཐོབ་ཀྱང་དེར་མངོན་དུ་མི་བྱེད་པར་སྒོམ་ལམ་གྱི་གནས་སྐབས་སུ་མངོན་དུ་གྱུར་པའི་ཕྱིར་ན་མདོ་དེ་རྣམས་ཀྱི་སྒོམ་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། ཐོད་རྒལ་བསྟན་ཏེ། ཀུན་ལས་བཏུས་ལས། བྱང་ཆུབ་སེམས་དཔའ་རྣམས་མཐོང་བའི་ལམ་ལ་བདེན་པ་རྣམ་པར་འཇོག་པ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་རྣམས་འཐོབ་ཀྱི་མངོན་དུ་བྱེད་པ་ནི་མ་ཡིན་ནོ། །དེ་དག་ནི་སྒོམ་པའི་ལམ་ལ་མངོན་དུ་བྱེད་དོ་ཞེས་གསུངས་པ་དང་མཐུན་ནོ།། །།གཉིས་པ་ལ་བཞི་སྟེ། འཕགས་པའི་ལུགས། སློབ་དཔོན་གྱི་ལུགས། ཤཱནྟི་པའི་ལུགས། བུདྡྷ་ཤྲཱིའི་ལུགས་སོ། །དང་པོ་ནི། གཞུང་སྔ་མས་སྦྱོར་བ་སེང་གེ་རྣམ་བསྒྱིངས་བསྟན་ཟིན་པ་སྔར་དང་འདྲ་བ་ལ། དེ་ཡང་རྣམ་པ་གཉིས་སུ་ཞེས་པས་ལུགས་མཐུན་དང་ལུགས་བཟློག་བསྟན་པས་སོང་ཞེས་པ་ནི་ལུགས་མཐུན་དང་། འོང་ཞེས་པ་ནི་ལུགས་མི་མཐུན་ལ་སྦྱར་རོ། །དེ་ལ་ལུགས་མཐུན་ནི་དངོས་གཞི་ཐོད་རྒལ་ཆུང་ངུ་དང་འབྲིང་གཉིས་ཡིན་ལ། ལུགས་བཟློག་ནི་ཐོད་རྒལ་ཆེན་པོའོ། །མདོ་འདྲེན་པའི་ཚེ་སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་གྱི་མདོ་གཉིས་ཕྱོགས་གཅིག་པར་འདྲེན་པར་མཛད་ཅིང་། དེ་གཉིས་ཆར་གྱི་སྔ་རོལ་དུ་ཁྱད་པར་ལམ་གྱི་སེང་གེ་རྣམ་བསྒྱིངས་དང་། རྗེས་ཐོབ་རྟེན་འབྲེལ་ལ་རྟོག་པ་འགྲོ་དགོས་པར་བཞེད་དེ། ཉིར་སྣང་ལས། སྒོམ་པའི་ལམ་ཡང་མཐར་གྱིས་གནས་པའི་སྙོམས་པར་འཇུག་པ་དགུས་བསྡུས་པ་ཡིན་ལ། དེ་དག་ཀྱང་ཐོད་རྒལ་གྱི་སྙོམས་པར་འཇུག་པས་བསྡུས་པ་ཡིན་ཏེ། དེས་ན་དེས་ངེས་པར་བསྟན་པའི་སྒོ་ནས་མདོར་བསྡུས་ཏེ། སྒོམ་པའི་ལམ་གྱི་དབང་དུ་བྱས་ནས་གསུངས་པ་ནི། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོང་ནས། །འདོད་པར་གཏོགས་པའི་རྣམ་པར་ཤེས། །མཉམ་བཞག་མིན་པའི་མཚམས་བཟུང་ནས། །ཐོད་རྒལ་དུ་ནི་སྙོམས་འཇུག་པ། །གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་བརྒལ་ནས། །འགོག་པའི་བར་དུ་མི་འདྲར་འགྲོ། །ཞེས་བྱ་བ་གསུངས་པ་ཡིན་ཏེ། རྣམ་པ་གཉིས་སུ་ཞེས་བྱ་བ་ནི། ལུགས་དང་མཐུན་པ་དང་མི་མཐུན་པའོ། །ཇི་སྐད་དུ་དེ་ནས་སེང་གེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་འཇུག་གོ །རྟེན་ཅིང་འབྲེལ་བར་འབྱུང་བ་ལ་སོ་སོར་རྟོག་པའི་རྗེས་ལ་མཐར་གྱིས་གནས་པའི་སྙོམས་པར་འཇུག་པ་དགུ་དང་། མཉམ་པར་མ་བཞག་པའི་སེམས་ཀྱིས་ལུགས་དང་མཐུན་པ་དང་། ལུགས་དང་མི་མཐུན་པར་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་ཐོད་རྒལ་དུ་སྙོམས་པར་འཇུག་པ་མངོན་སུམ་དུ་བྱེད་པས་ཇི་ལྟར་འདོད་པ་བཞིན་དུ་དབང་ཐོབ་པར་གསུངས་པ་ཡིན་ནོ། །འདིའི་མདོ་ནི་ཞེས་གསུངས་ཤིང་། དེའི་འོག་ཏུ་སྔར་གྱི་སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་གྱི་མདོ་གཉིས་ཁོ་ན་འདྲེན་པར་མཛད་དོ། །གཉིས་པ་ནི། སློབ་དཔོན་གྱི་འགྲེལ་པ་ཆེ་ཆུང་གཉིས་ལས། གཞུང་སྔ་མས་མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་བསྟན་ཟིན་ནས། འགོག་དང་བཅས་པའི་སྙོམས་འཇུག་དགུར། །ཞེས་སོགས་ཀྱིས་སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་གཉིས་ཀ་བསྟན་ཏེ། རྣམ་པ་གཉིས་སུ་སོང་འོང་ནས། །ཞེས་པས་སྦྱོར་བ་སེང་གེ་རྣམ་བསྒྱིངས་དངོས་སུ་བསྟན་ཅིང་། དེའི་ཡར་འགྲོས་དངོས་གཞི་ཐོད་རྒལ་ཆུང་ངུ་དོན་གྱིས་བསྟན། འབྲིང་པོ་ཤུགས་ལ་བསྟན་པར་བཞེད་དགོས་པ་འདྲ་སྟེ། སྟོན་བྱེད་གཞན་མི་སྣང་བའི་ཕྱིར་རོ། །ལྷག་མ་རྣམས་ཀྱིས་སྟོན་ཚུལ་ནི་སྔར་རྩ་བའི་སྐབས་སུ་བཤད་པ་དང་འདྲའོ། །ཁ་ཅིག ལུགས་འདི་ལ། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་ཞེས་པས་སྦྱོར་བ་སེང་གེ་རྣམ་བསྒྱིངས་དང་། འོང་ནས་ཞེས་པས་ཁྲི་བརྒྱད་སྟོང་པ་ནས་བཤད་པའི་ནུད་ཆུང་བསྟན་ཞེས་ཟེར་བ་ནི་མི་འཐད་དེ། སོང་ཞེས་པས་སྦྱོར་བ་སེང་གེ་རྣམ་བསྒྱིངས་ཀྱི་ཡར་འགྲོ་དང་། འོང་ཞེས་པས་དེའི་མར་འོང་བསྟན་པར་བཞེད་པའི་ཕྱིར་ཏེ། དོན་གསལ་ལས། བྱང་ཆུབ་སེམས་དཔའ་རྣམས་ནི་བསམ་གཏན་དང་པོ་ནས་བཟུང་སྟེ། འགོག་པའི་བར་དུ་སོང་ནས་དེའི་འོག་ཏུ་འགོག་པ་ནས་བཟུང་སྟེ་བསམ་གཏན་དང་པོའི་བར་དུ་འོངས་ཏེ་ཞེས་གསུངས་པས་སོ། །གསུམ་པ་ནི། དག་ལྡན་ལས་བཤད་ཚུལ་དང་། སྙིང་པོ་མཆོག་ལས་བཤད་ཚུལ་གཉིས་ལས། དང་པོ་ནི། སྦྱོར་བ་སེང་གེ་རྣམ་བསྒྱིངས་གཞུང་སྔ་མས་བསྟན་ཟིན་པས། འགོག་དང་བཅས་པའི་སྙོམས་འཇུག་དགུར། །ཞེས་སོགས་ཀྱིས་དངོས་གཞི་ཐོད་རྒལ་ཁོ་ན་སྟོན་པ་ནི་སྔར་རྩ་བའི་སྐབས་སུ་བཤད་པ་དང་འདྲ་ལ། དེ་ཡང་ཚིག་རྐང་དང་པོ་གཉིས་ནི་འོག་མ་ཐམས་ཅད་ཀྱི་མདོར་བསྟན་ཏེ་སྙོམས་འཇུག་དགུ་ལ་རྣམ་པ་གཉིས་སུ་སོང་བ་དང་འོང་བ་གཅིག་སྟེ་གསུམ་མོ། །སོང་བ་དང་པོ་ནི། སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་དུ་སོང་བ་སྟེ། དེང་སང་ཐོད་རྒལ་ཆུང་ངུའི་ཐ་སྙད་བྱེད་པ་དེའོ། །སོང་བ་གཉིས་པ་ནི། སྙོམས་འཇུག་དགུ་ལ་འགོག་པ་རེ་རེ་སྤེལ་ནས་ལུགས་མཐུན་དུ་སོང་བ་སྟེ། གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་བརྒལ་ནས། །འགོག་པའི་བར་དུ་ཞེས་པས་བསྟན་ཏོ། །འོ་ན་འགོག་པའི་བར་ཁོ་ནའམ་ཞེ་ན། དེར་མ་ཟད། འདོད་པར་གཏོགས་པའི་རྣམ་པར་ཤེས། །མཉམ་གཞག་མིན་པས་མཚམས་བཟུང་སྟེ། །ཞེས་པ་སྟེ། འདོད་སེམས་ཀྱི་མཐར་ཐུག་པའི་བར་དུའོ། །འདི་ནི་དེང་སང་ཐོད་རྒལ་འབྲིང་པོའི་ཐ་སྙད་བྱེད་པ་དེ་ཡིན་ཞིང་། དེ་ཡང་བསམ་གཏན་དང་པོ་ནས་སྲིད་རྩེའི་བར་བརྒྱད་ལ་འགོག་པ་རེ་རེ་སྤེལ་བའི་རྗེས་སུ་འགོག་པ་ལ་འགོག་པ་སྤེལ་མི་ནུས་པས་སླར་ཡང་སྲིད་རྩེ་ལ་སྙོམས་པར་འཇུག དེ་ལས་ལངས་ནས་འགོག་པ་ལ་སྙོམས་པར་འཇུག དེ་ནས་མཉམ་པར་མ་བཞག་པའི་སེམས་ལ་གནས་པ་སྟེ། སྤྱིར་སྙོམས་འཇུག་དགུ་ལ་འགོག་པ་དགུ་སྤེལ་དགོས་པ་ལས། འགོག་པ་ལ་འགོག་པ་སྤེལ་བའི་ཚབ་ཏུ་འགོག་པ་ལ་འདོད་སེམས་སྤེལ་བར་དགོངས་སོ། །དེས་ན་སྲིད་རྩེའི་སྤེལ་ཆོས་ཀྱི་འགོག་པ་དང་། འདོད་སེམས་ཀྱི་སྤེལ་གཞིའི་འགོག་པ་གཉིས་ཀྱི་བར་དུ་སྲིད་རྩེ་མངོན་དུ་བྱེད་པ་ནི་ཁྲི་བརྒྱད་སྟོང་པ་ནས་བཤད་པའི་ནུད་ཆུང་གི་དོན་དུ་བཞེད་པར་མངོན་ནོ། །གསུམ་པ་འོང་བ་གཅིག་ནི་མཐར་གནས་ཀྱི་སྙོམས་འཇུག་དགུ་ལ་འདོད་སེམས་དགུ་སྤེལ་ནས་ལུགས་མི་མཐུན་དུ་འོང་བ་སྟེ། དེ་ལ་སྤེལ་ཆོས་ནི་འདོད་པར་གཏོགས་པའི་ཞེས་སོགས་རྐང་པ་གཉིས་ཀྱིས་བསྟན། སྤེལ་གཞི་ནི་གཅིག་དང་གཉིས་གསུམ་ཞེས་སོགས་རྐང་པ་ཕྱེད་དང་གསུམ་གྱིས་བསྟན། མི་འདྲར་འགྲོ་ཞེས་པས་ནི་མཉམ་བཞག་དེ་དང་རྗེས་ཐོབ་དེ་སྤེལ་བས་མཉམ་རྗེས་རིགས་མི་འདྲ་བར་འགྲོ་ཞེས་བསྟན་ཏོ། །གཉིས་པ་ནི་སྙིང་པོ་མཆོག་ལས། གཞན་ཐམས་ཅད་སྔར་དང་འདྲ་བ་ལས། སོང་བ་གཉིས་པའི་སྐབས་སུ་མཐར་གནས་ཀྱི་སྙོམས་འཇུག་བརྒྱད་ལ་འགོག་པ་བརྒྱད་སྤེལ་ནས་དེའི་འོག་ཏུ་འདོད་སེམས་མངོན་དུ་བྱེད་པས་གནས་བཅུ་བདུན་དུ་ངེས་ལ། སྔ་མ་ལ་ནི་སྲིད་རྩེའི་སྤེལ་ཆོས་ཀྱི་འགོག་པའི་རྗེས་སུ་ཡང་སྲིད་རྩེ་དང་འགོག་པ་གཉིས་ཏེ། གནས་བཅུ་དགུར་ངེས་པ་ནི་ཁྱད་པར་རོ། །ཨ་བྷ་ཡ་ཡང་སོང་བ་དང་པོ་ལ་གནས་དགུ་དང་། སོང་བ་གཉིས་པ་ལ་གནས་བཅུ་བདུན་དང་། འོང་བ་གཅིག་ལ་གནས་བཅོ་བརྒྱད་དུ་བྱས་ནས་སྦྱོར་བ་སེང་གེ་རྣམ་བསྒྱིངས་གཞུང་སྔ་མས་བསྟན་ཟིན་པ་ནི་སྙིང་པོ་མཆོག་ཇི་ལྟ་བ་བཞིན་དུ་སྣང་ཞིང་སློབ་དཔོན་གྱི་ལུགས་འཕགས་པའི་དགོངས་པ་དང་མི་འགྲིག་པར་གསུངས་སོ། །བཞི་པ་ནི། ཤེས་རབ་སྒྲོན་མེའི་ཕྲེང་བ་ལས། སྦྱོར་བ་སེང་གེ་རྣམ་བསྒྱིངས་བསྟན་ཚུལ་སློབ་དཔོན་དང་མཐུན་ཅིང་། མཇུག་གི་འགྲོ་ཞེས་པའི་ཚིག་དེ་ཉིད་ལ་གསུམ་བྱས་ནས་དངོས་གཞི་ཐོད་རྒལ་གསུམ་པོ་སྟོན་པར་བཞེད་དོ།། །།གསུམ་པ་སྙོམས་འཇུག་གི་རང་བཞིན་གཏན་ལ་དབབ་པ་ལ་ལྔ་སྟེ། སྙོམས་འཇུག་གི་གྲངས་ངེས། སྙོམས་པར་འཇུག་པའི་ཚུལ། སྙོམས་པར་འཇུག་པའི་དགོས་པ། ཐོབ་པའི་ས་མཚམས། རྩོད་པ་སྤང་བའོ། །དང་པོ་ནི། སྤྱིར་མདོ་དང་འགྲེལ་པ་རྣམས་ལས། དངོས་གཞི་ཐོད་རྒལ་ལ་ཆུང་ངུ་འབྲིང་ཆེན་པོ་ཞེས་པའི་ཐ་སྙད་མ་གསུངས་ཀྱང་། སྙོམས་འཇུག་གི་རིགས་སོ་སོར་འབྱེད་པའི་ཆེད་དུ། སྔོན་གྱི་མཁས་པ་རྣམས་བཞེད་པ་ལྟར་ཐ་སྙད་འདི་སྦྱར་ནས་བཤད་པར་བྱའོ། །དེ་ལ་ཡང་སྐབས་འདིར་བསྟན་གྱི་སྙོམས་འཇུག་དེ་ལ་བཞིར་གྲངས་ངེས་ཏེ། མཐར་གནས་ཀྱི་སྙོམས་འཇུག་དགུ་ལ་ཆོས་གཞན་གང་ཡང་མ་སྤེལ་བར་སྙོམས་པར་འཇུག་པ་དང་། སྤེལ་ཆོས་གཞན་སྤེལ་ནས་སྙོམས་པར་འཇུག་པ་གཉིས། དང་པོ་ལ་ལུགས་མཐུན་ལུགས་མི་མཐུན་གཉིས་ཆར་དུ་སྙོམས་པར་འཇུག་པ་དང་། ལུགས་མཐུན་ཁོ་ནར་སྙོམས་པར་འཇུག་པ་གཉིས། ཕྱི་མ་ལ་སྤེལ་ཆོས་གཞན་སྤེལ་ནས་ལུགས་མཐུན་ཁོ་ནར་སྙོམས་པར་འཇུག་པ་དང་། ལུགས་བཟློག་ཁོ་ནར་སྙོམས་པར་འཇུག་པ་གཉིས་ཏེ་བཞི་ལ་རིམ་པ་ལྟར། སྦྱོར་བ་སེང་གེ་རྣམ་བསྒྱིངས་དང་། དངོས་གཞི་ཐོད་རྒལ་ཆུང་ངུ་དང་། འབྲིང་དང་། ཆེན་པོར་འཇོག་པའི་ཕྱིར་རོ། །གཉིས་པ་ལ་བཞི་སྟེ། སྦྱོར་བ་སེང་གེ་རྣམ་བསྒྱིངས་བཤད། དངོས་གཞི་ཐོད་རྒལ་ཆུང་ངུ་བཤད། འབྲིང་པོ་བཤད། ཆེན་པོ་བཤད་པའོ། །དང་པོ་ལ་གནས་ཀྱི་གྲངས་ངེས། མཚན་ཉིད། དབྱེ་༞བ། སྙོམས་པར་འཇུག་པའི་དགོས་པ། སྒྲ་བཤད་པ་དང་ལྔ་ལས། དང་པོ་ལ། མཁན་ཆེན་པ་ན་རེ། སྦྱོར་བ་སེང་གེ་རྣམ་བསྒྱིངས་ཀྱི་ཏིང་ངེ་འཛིན་གྱི་གནས་ལ་བཅུ་བདུན་དུ་ངེས་ཏེ། ཡར་འོང་གི་འགོག་པ་དང་། མར་འོང་གི་འགོག་པ་གཉིས་རྒྱུན་གཅིག་པའི་ཕྱིར་ཞེས་གསུངས་པ་ནི་མདོའི་དངོས་བསྟན་ལ་བར་དེར་འགོག་པ་གཅིག་ལས་མ་གསུངས་པས་འགྲིག་པར་སྣང་ཡང་། སློབ་དཔོན་གྱི་དགོངས་པར་མཛད་ན་ཅུང་ཟད་མི་འགྲིག་སྟེ། སློབ་དཔོན་གྱིས་སྦྱོར་བ་སེང་གེ་རྣམ་བསྒྱིངས་ཀྱི་ཡར་འོང་གི་གནས་ཀྱི་འགོག་པ་མངོན་དུ་བྱས་ནས་སླར་ཡང་མར་འོང་གི་གནས་ཀྱི་འགོག་པ་མངོན་དུ་བྱེད་པར་བཤད་པའི་ཕྱིར་ཏེ། འགྲེལ་པར། བྱང་ཆུབ་སེམས་དཔའ་རྣམས་ནི་བསམ་གཏན་དང་པོ་ནས་བཟུང་སྟེ། འགོག་པའི་བར་དུ་སོང་ནས་དེའི་འོག་ཏུ་འགོག་པ་ནས་བཟུང་ནས་བསམ་གཏན་དང་པོའི་བར་དུ་འོངས་ཏེ་ཞེས་གསུངས་པའི་ཕྱིར། མདོའི་དགོངས་པ་ཡང་འདི་ཉིད་དུ་སྣང་སྟེ། གཞན་དུ་ན་སྦྱོར་བ་སེང་གེ་རྣམ་བསྒྱིངས་ཀྱི་གནས་ཀྱི་འགོག་པ་དེ་ཆོས་ཅན། སྙོམས་འཇུག་དགུ་ལ་ལུགས་མཐུན་དུ་འཇུག་པའི་སྐབས་ཀྱི་འགོག་པ་མིན་པར་ཐལ། དེ་ལ་ལུགས་མི་མཐུན་དུ་འཇུག་པའི་སྐབས་ཀྱི་འགོག་པ་ཡིན་པའི་ཕྱིར། རྟགས་གསལ་ཁས། རང་ལུགས་ནི་འགོག་པ་གཉིས་ཀྱི་བར་གྱི་མཚམས་འཛིན་རྗེས་ཐོབ་གཅིག་གིས་བྱེད་པས་གནས་བཅོ་བརྒྱད་དོ། །གཉིས་པ་ལ་དགག་གཞག་སྤང་གསུམ་ལས། དང་པོ་ལ་ཁ་ཅིག་ན་རེ། མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དང་ལུགས་མི་མཐུན་དུ་སྙོམས་པར་འཇུག་པའི་བྱང་འཕགས་ཀྱི་མཁྱེན་པ་ཞེས་དང་། གཞན་དག་ན་རེ། མཐོང་ལམ་རྩེ་སྦྱོར་རྫོགས་རྗེས་སུ་མཐར་གནས་ཀྱི་སྙོམས་འཇུག་ལ་ཆོས་གཞན་མ་སྤེལ་བར་ལུགས་མཐུན་དང་། ལུགས་མི་མཐུན་དུ་སྙོམས་པར་འཇུག་པའི་དགེ་སེམས་རྩེ་གཅིག་པ་ཞེས་ཟེར་རོ། །དང་པོ་ལ་ཐོད་རྒལ་འབྲིང་པོ་དང་ཆེན་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་དེར་ཐལ། སྦྱོར་བ་སེང་གེ་རྣམ་བསྒྱིངས་དེ་དེ་ཡིན་པའི་ཕྱིར། གཉིས་པ་ལ་སྦྱོར་བ་སེང་གེ་རྣམ་བསྒྱིངས་ཀྱི་ཡར་འོང་གི་གནས་ཀྱི་ནང་ཚན་དུ་གྱུར་པའི་བསམ་གཏན་དང་པོའི་སྙོམས་འཇུག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། སྦྱོར་བ་སེང་གེ་རྣམ་བསྒྱིངས་རང་རྒྱུད་ལ་སྐྱེས་ནས་དེའི་རྒྱུན་མ་རྫོགས་བར་གྱི་སྙོམས་འཇུག་ཡིན་པའི་ཕྱིར། འདོད་ན། དེ་ཆོས་ཅན། མཐར་གནས་ཀྱི་སྙོམས་འཇུག་དགུ་ལ་ལུགས་མི་མཐུན་དུ་སྙོམས་པར་འཇུག་པའི་སྙོམས་འཇུག་ཏུ་ཐལ། འདོད་པ་དེའི་ཕྱིར། འདོད་མི་ནུས་ཏེ། དེ་ལ་ལུགས་མཐུན་དུ་སྙོམས་པར་འཇུག་པའི་གནས་སྐབས་ཀྱི་སྙོམས་འཇུག་ཡིན་པའི་ཕྱིར་རོ། །གཉིས་པ་ནི། སྤྱིར་སེང་གེ་རྣམ་བསྒྱིངས་ཀྱི་མཚན་ཉིད། རྣམ་ཐར་བརྒྱད་ལ་ཆོས་གཞན་མ་སྤེལ་བར་ལུགས་མཐུན་དང་ལུགས་མི་མཐུན་གང་རུང་དང་། སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་དང་ལུགས་མི་མཐུན་གང་རུང་དུ་སྙོམས་པར་འཇུག་པའི་གནས་སྐབས་ཀྱི་བྱང་འཕགས་ཀྱི་མཁྱེན་པའོ། །གསུམ་པ་ནི། ཁ་ཅིག སྦྱོར་བ་སེང་གེ་རྣམ་བསྒྱིངས་ཀྱི་ཡར་འོང་གི་གནས་ཀྱི་ནང་ཚན་དུ་གྱུར་པའི་བསམ་གཏན་དང་པོའི་སྙོམས་འཇུག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཞེ་ན། ཤིན་ཏུ་འདོད་དེ། ལུགས་མཐུན་དུ་སྙོམས་པར་འཇུག་པའི་གནས་སྐབས་ཀྱི་བྱང་འཕགས་ཀྱི་མཁྱེན་པ་ཡིན་པའི་ཕྱིར་རོ། །གསུམ་པ་དབྱེ་བ་ནི། མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་བསྒྱིངས་དང་། སྦྱོར་བ་སེང་གེ་རྣམ་བསྒྱིངས་གཉིས་ལས། དང་པོའི་མཚན་ཉིད། མཚན་ཉིད་སྔ་མ་དེ་གང་ཞིག རྗེས་ཐོབ་རྟེན་འབྲེལ་ལ་རྟོག་པ་སྔོན་དུ་མ་སོང་བ། གཉིས་པའི་མཚན་ཉིད། རྗེས་ཐོབ་རྟེན་འབྲེལ་ལ་རྟོག་པ་སྔོན་དུ་སོང་ནས་དངོས་གཞི་ཐོད་རྒལ་གྱི་ཆེད་དུ་མཐར་གནས་ཀྱི་སྙོམས་འཇུག་ལ་ཆོས་གཞན་མ་སྤེལ་བར་ལུགས་མཐུན་དང་ལུགས་བཟློག་གང་རུང་དུ་སྙོམས་པར་འཇུག་པའི་གནས་སྐབས་ཀྱི་བྱང་འཕགས་ཀྱི་མཁྱེན་པའོ། །བཞི་པ་ནི། མཐོང་ལམ་ཁྱད་པར་ལམ་གྱི་ངོ་བོར་གྱུར་པའི་སེང་གེ་རྣམ་པར་བསྒྱིངས་པ་སྒོམ་པའི་དགོས་པ་ནི་མཐོང་ལམ་རྩེ་སྦྱོར་གྱི་སྐབས་སུ་རྣམ་ཐར་བརྒྱད་དང་མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དང་ལུགས་མི་མཐུན་དུ་སྙོམས་པར་འཇུག་པའི་ནུས་པ་ཐོབ་པ་དེ་ལ་དབང་ཐོབ་པར་བྱ་བའི་ཆེད་ཡིན་ཏེ། དེ་ལ་དབང་དུ་བྱ་བའི་ཕྱིར་དེ་ཉིད་ཡང་དང་ཡང་དུ་སྒོམ་པར་བྱེད་པས་ཞེས་འབྱུང་བའི་ཕྱིར། སྦྱོར་བ་སེང་གེ་རྣམ་བསྒྱིངས་སྒོམ་པའི་དགོས་པ་ནི་དངོས་གཞི་ཐོད་རྒལ་གྱི་སྙོམས་འཇུག་ལ་ཇི་ལྟར་འདོད་པ་བཞིན་དུ་འཇུག་ནུས་པའི་ཆེད་ཡིན་ཏེ། དེའི་སྦྱོར་བ་ཡིན་པའི་ཕྱིར་རོ། །ལྔ་པ་ལ་གཉིས་ལས། དང་པོ་ལ་སེང་གེ་རྣམ་བསྒྱིངས་ཞེས་འཇོག་པའི་རྒྱུ་མཚན་ནི་སེང་གེ་རྣམ་པར་བསྒྱིངས་པ་དེ་རི་དྭགས་གཞན་ལ་བག་ཚ་བ་མེད་པ་ལྟར། འདི་ཡང་མཐོང་སྤང་སྒྲིབ་གཉིས་ཀྱི་བག་ཚ་བ་མེད་པའི་ཕྱིར་ཏེ། མཐོང་བའི་ལམ་ཐོབ་པའི་རྣལ་འབྱོར་པ་དེ་ཉོན་མོངས་པ་དང་ཤེས་བྱའི་སྒྲིབ་པའི་འཇིགས་པ་མེད་པའི་ཕྱིར་ཞེས་འབྱུང་བའི་ཕྱིར་རོ། །གཉིས་པ་ལ། སེང་གེ་རྣམ་པར་བསྒྱིངས་པ་ཞེས་བརྗོད་པའི་རྒྱུ་མཚན་ཡོད་དེ། སྙོམས་འཇུག་གི་རིགས་ཐམས་ཅད་དགུ་པོ་འདིའི་ནང་དུ་འདུས་པས་སྙོམས་འཇུག་གི་རིགས་རྣམས་ལ་འཇུག་མི་ནུས་སམ་སྙམ་པའི་བག་ཚ་བ་མེད་པའི་ཕྱིར་རོ། །མདོ་ལས་ནི་འདི་ཁོ་ན་ལ་སེང་གེ་རྣམ་བསྒྱིངས་ཀྱི་ཐ་སྙད་གསུངས་སོ། །གཉིས་པ་དངོས་གཞི་ཐོད་རྒལ་ཆུང་ངུ་ལ། གནས་ཀྱི་གྲངས་ངེས། མཚན་ཉིད། སྒོམ་པའི་དགོས་པ། ཐ་སྙད་ལ་རྩོད་པ་སྤང་བ་དང་བཞི། དང་པོ་ནི། དགུར་གྲངས་ངེས་ཏེ། མཐར་གནས་ཀྱི་སྙོམས་འཇུག་ལ་ཆོས་གཞན་མ་སྤེལ་བར་ལུགས་མཐུན་ཁོ་ནར་སྙོམས་པར་འཇུག་པའི་གནས་སྐབས་ཡིན་པའི་ཕྱིར་རོ། །གཉིས་པ་ལ་དགག་བཞག་གཉིས་ལས། དང་པོ་ལ་ཁ་ཅིག མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དུ་སྙོམས་པར་འཇུག་པའི་ཐེག་ཆེན་གྱི་རྗེས་ལ་མངོན་རྟོགས་ཞེས་དང་། ལུགས་མཐུན་ཁོ་ནར་ཞེས་པའི་ཁྱད་པར་སྦྱོར་བ་དང་། སྦྱོར་བ་སེང་གེ་རྣམ་བསྒྱིངས་སྔོན་དུ་བཏང་ནས་ཞེས་པའི་ཚིག་གི་ཁྱད་པར་སྦྱོར་བ་དང་། དངོས་གཞི་ཐོད་རྒལ་གྱི་སྙོམས་འཇུག་གང་ཞིག མཐར་གནས་ཀྱི་སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་དུ་སྙོམས་པར་འཇུག་པའི་ཐེག་ཆེན་གྱི་རྗེས་ལ་མངོན་རྟོགས་ཞེས་བཤད་པ་བཞི་ལས། དང་པོ་གཉིས་ལ་སྦྱོར་བ་སེང་གེ་རྣམ་བསྒྱིངས་ཀྱི་ཡར་འགྲོའི་སྙོམས་འཇུག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གསུམ་པ་ལ། སྦྱོར་བ་ལ་སེང་གེ་རྣམ་བསྒྱིངས་ལན་གཉིས་སྒོམ་པའི་ཡར་འགྲོའི་སྙོམས་འཇུག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། བཞི་པ་ལ་ཁ་ཅིག དངོས་གཞི་ཐོད་རྒལ་འབྲིང་པོའི་སྙོམས་འཇུག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཕྱི་ཟུར་མ་གྲུབ་ན། དེར་ཐལ། མཐར་གནས་ཀྱི་སྙོམས་འཇུག་ལ་མཐར་གནས་ཀྱི་སྙོམས་འཇུག་དགུ་ལས་གཞན་པའི་ཆོས་མ་སྤེལ་བར་ལུགས་མཐུན་དུ་སྙོམས་པར་འཇུག་པའི་སྙོམས་འཇུག་ཡིན་པའི་ཕྱིར་ཏེ། ཁྱོད་ཀྱི་མཐར་གནས་ཀྱི་སྙོམས་འཇུག་དགུ་ལ་སྤེལ་བར་བྱ་བའི་ཆོས་དེ་ཡིན་ན། དེ་དགུ་པོ་གང་རུང་ཡིན་དགོས་པ་གང་ཞིག ཁྱོད་མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དུ་སྙོམས་པར་འཇུག་པ་ཡིན་པའི་ཕྱིར་ཞེས་ཟེར་རོ། །འོ་ན་ཕྱེད་དུ་འཕར་བའི་ཕྱིར་མི་འོང་ཆོས་ཅན། ཕྱེད་འཕར་གྱི་ཕྱིར་མི་འོང་མིན་པར་ཐལ། གཟུགས་ཁམས་གནས་རིགས་བཅུ་བདུན་ལ་གནས་གཞན་མ་བརྒལ་བར་འོག་མིན་དུ་སྐྱེ་བ་ཡིན་པའི་ཕྱིར་ཏེ། གཟུགས་ཁམས་གནས་རིགས་བཅུ་བདུན་ལ་ཁོ་རང་ལས་གཞན་པའི་གནས་མ་བརྒལ་བར་འོག་མིན་དུ་སྐྱེ་བ་ཡིན་པའི་ཕྱིར་ཏེ། ཁྱོད་ཀྱིས་གཟུགས་ཁམས་གནས་རིགས་བཅུ་བདུན་ལས་བརྒལ་བར་བྱ་བའི་གནས་དེ་ཡིན་ན། བཅུ་བདུན་པོ་དེ་གང་རུང་ཡིན་དགོས་པ་གང་ཞིག ཁྱོད་འོག་མིན་དུ་སྐྱེ་བ་ཡིན་པའི་ཕྱིར་རིམ་པ་བཞིན་ཁས། གཉིས་པ་ནི། སྦྱོར་བ་སེང་གེ་རྣམ་བསྒྱིངས་སྔོན་དུ་བཏང་ནས་དངོས་གཞི་ཐོད་རྒལ་འབྲིང་པོའི་ཆེད་དུ་མཐར་གནས་ཀྱི་སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མཐུན་དུ་སྙོམས་པར་འཇུག་པའི་གནས་སྐབས་ཀྱི་དངོས་གཞིའི་སྙོམས་འཇུག་གོ །གསུམ་པ་ནི། དངོས་གཞི་ཐོད་རྒལ་གྱི་སྙོམས་འཇུག་གི་ནང་དུ་མཐར་གནས་ཀྱི་སྙོམས་འཇུག་ལ་ཆོས་གཞན་མ་སྤེལ་བར་སྙོམས་པར་འཇུག་པ་དང་། རིགས་མཐུན་གྱི་ཆོས་གཞན་སྤེལ་ནས་སྙོམས་པར་འཇུག་པ་དང་། རིགས་མི་མཐུན་གྱི་ཆོས་གཞན་སྤེལ་ནས་སྙོམས་པར་འཇུག་པ་དང་གསུམ་ཡོད་པའི་དང་པོ་ལ་དབང་ཐོབ་པའི་ཆེད་ཡིན་ནོ། །དེ་ལྟར་གསུམ་དགོས་པའི་རྒྱུ་མཚན་ཡང་འདིར་སྙོམས་འཇུག་གི་རིགས་ཐམས་ཅད་འདུས་པའི་ཕྱིར་རོ། །འོ་ན་འདིར་མཐར་གནས་ཀྱི་སྙོམས་འཇུག་དགུ་ལ་ཆོས་གཞན་མ་སྤེལ་བར་ལུགས་མི་མཐུན་དུ་སྙོམས་པར་འཇུག་པ་གཅིག་ཀྱང་སྒོམ་དགོས་པར་འགྱུར་རོ་སྙམ་ན་སྐྱོན་མེད་དེ། ཆོས་གཞན་མ་སྤེལ་བར་ལུགས་མཐུན་དུ་སྙོམས་པར་འཇུག་པས་ཆོས་གཞན་མ་སྤེལ་བར་སྙོམས་པར་འཇུག་པའི་རིགས་ཐམས་ཅད་ཚང་བར་འགྱུར་བའི་ཕྱིར། འོ་ན་སྦྱོར་བ་སེང་གེ་རྣམ་བསྒྱིངས་ལ་ཡང་ལུགས་མི་མཐུན་མི་དགོས་པར་འགྱུར་རོ་སྙམ་ན། དེར་ནི་དངོས་གཞི་ཐོད་རྒལ་གྱི་ནང་ན་སྙོམས་འཇུག་དགུ་ལས་ལུགས་མི་མཐུན་དུ་སྙོམས་པར་འཇུག་པ་ཡོད་པས་དེའི་སྦྱོར་བ་སྒོམ་དགོས་པའི་ཕྱིར་ན་མི་འདྲའོ། །བཞི་པ་ལ། དར་ཊཱིཀ་པ་ན་རེ། སྦྱོར་བ་སེང་གེ་རྣམ་བསྒྱིངས་ཀྱི་རྗེས་སུ་སྙོམས་འཇུག་དགུ་ལ་ཆོས་གཞན་མ་སྤེལ་བར་སྙོམས་པར་འཇུག་པའི་སྙོམས་འཇུག་དེ་ལ་ཐོད་རྒལ་ཆུང་ངུའི་ཐ་སྙད་བྱེད་པ་མི་འཐད་དེ། དངོས་གཞི་ཐོད་རྒལ་ལ་ཆུང་འབྲིང་ཆེན་པོའི་ཐ་སྙད་མདོ་དང་བསྟན་བཅོས་གང་ལས་ཀྱང་མ་བཤད་པའི་ཕྱིར་དང་། སྙོམས་འཇུག་དེ་ལ་དངོས་གཞི་ཐོད་རྒལ་གྱི་དོན་མ་ཚང་བའི་ཕྱིར་ཏེ། དེས་སྙོམས་འཇུག་ལ་ཆོས་གཞན་སྤེལ་བ་ཡང་མེད། བར་དུ་ཆོས་གཞན་པ་རྒལ་བ་ཡང་མེད་པའི་ཕྱིར་རོ་ཞེས་ཟེར་རོ། །དེ་ནི་མི་འཐད་དེ། སྐྱེས་བུ་གསུམ་གྱི་ལམ་རིམ་དེ་ལ་སྐྱེས་བུ་ཆུང་འབྲིང་ཆེན་པོ་གསུམ་གྱི་ཐ་སྙད་མཛད་པ་ལ་བརྟེན་ནས་བརྗོད་བྱའི་སྤུ་རིས་འབྱེད་སླ་བའི་ཁྱད་པར་ཡོད་པས། ཇོ་བོ་རྗེས་མཛད་པ་དེ་ཁས་ལེན་རིགས་པ་ལྟར་འདིར་ཡང་དངོས་གཞི་ཐོད་རྒལ་ཆུང་ངུ་འབྲིང་ཆེན་པོ་གསུམ་གྱི་ཐ་སྙད་ལ་བརྟེན་ནས་བརྗོད་བྱའི་དོན་གྱི་སྤུ་རིས་འབྱེད་སླ་བའི་ཁྱད་པར་ཡོད་པས། སྔོན་གྱི་མཁས་པ་འབྲེ་ཨར་གྱིས་མཛད་པ་དེ་དང་། ཤཱནྟི་པས་དངོས་གཞི་ཐོད་རྒལ་ལ་དང་པོ་དང་གཉིས་པ་དང་གསུམ་པའི་ཐ་སྙད་གསུངས་པ་ལྟར་དོན་གཅིག་པར་ཁས་ལེན་རིགས་པའི་ཕྱིར་རོ། །དེ་ལ་དངོས་གཞི་ཐོད་རྒལ་གྱི་དོན་མ་ཚང་བས་དངོས་གཞི་ཐོད་རྒལ་མིན་ནོ་ཞེས་པའི་ལོག་རྟོག་འདི་འདྲ་བ་སྔར་བྱུང་འདུག་པ་ལ། མཁས་གྲུབ་གཡག་གི་དཀའ་འགྲེལ་ལས། མངོན་རྟོགས་རྒྱན་འཆད་པའི་སྐབས་སུ་མདོ་དངོས་སུ་འགོག་པ་ནི་བུ་རུ་བརྫུས་ནས་རབས་གཅོད་པ་ཡིན་པར་གསུངས་པའི་བཀའ་བཀྱོན་ལྗི་མོ་གནང་འདུག་པ་འདི་ཁྱེད་ཀྱི་ཐེག་གམ། མི་ཐེག་པའི་ལུང་རིགས་ཀྱི་གདེང་ཅི་ཡོད། ནུས་པ་ཡོད་ན་ད་གཟོད་དཔུང་སྦྲན་རན་ནོ། །གསུམ་པ་དངོས་གཞི་ཐོད་རྒལ་འབྲིང་པོ་ལ་གནས་ཀྱི་གྲངས་ངེས། མཚན་ཉིད། སྙོམས་པར་འཇུག་པའི་དགོས་པ། ནུད་ཆུང་གི་དོན་བཤད་པ་དང་བཞི་ལས། དང་པོ་ལ་ཤཱནྟི་པས། སྔར་བཤད་པ་ལྟར་གནས་བཅུ་དགུར་འདོད་ཀྱང་། ནུད་ཆུང་མི་དགོས་པའི་གནས་སྐབས་སུ་གནས་བཅུ་བདུན་ལས་མེད་ཅིང་། གཞན་དུ་ན་རྒྱས་འབྲིང་གཉིས་ནས་བཤད་པའི་ཐོད་རྒལ་འབྲིང་པོའི་གནས་ལ་མ་ཚང་བར་ཐལ་བའི་སྐྱོན་ཡོད་པས་མི་འཐད་དོ། །མཁན་ཆེན་པ་མཐར་གནས་ཀྱི་སྙོམས་འཇུག་བརྒྱད་ལ་འགོག་པ་བརྒྱད་སྤེལ་དེ་ནས་སྲིད་རྩེ་ལ་ནུད་ཆུང་། དེ་ནས་མཚམས་འཛིན་གྱི་འདོད་སེམས། དེ་ནས་སྤེལ་གཞིའི་འགོག་པ། དེ་ནས་སྤེལ་ཆོས་ཀྱི་འདོད་སེམས་ཏེ་གནས་ཉི་ཤུར་ངེས་ཞེས་གསུངས་པ་ཡང་མི་འཐད་དེ། མཚམས་འཛིན་གྱི་འདོད་སེམས་དེ་འབྲིང་པོ་དང་། ཆེན་པོ་གཉིས་ཀྱི་མཚམས་འཛིན་གྱི་འདོད་སེམས་ཡིན་གྱི་འབྲིང་པོའི་བར་སྐབས་ཀྱི་མཚམས་འཛིན་མིན་པའི་ཕྱིར་དང་། འབྲིང་པོའི་མཚན་ཉིད་དུ་སྙོམས་འཇུག་བརྒྱད་ལ་འགོག་པ་བརྒྱད་སྤེལ་ནས་སྙོམས་པར་འཇུག་པའི་དགེ་སེམས་རྩེ་གཅིག་པ་བཤད་པའི་རང་ལུགས་དང་ཡང་འགལ་བའི་ཕྱིར་དང་། མཚམས་འཛིན་གྱི་རྗེས་སུ་འབྱུང་བའི་འགོག་པ་དེ་ཆེན་པོའི་གནས་ཡིན་གྱི་འབྲིང་པོའི་གནས་མིན་པའི་ཕྱིར་དང་། འབྲིང་པོ་ལ་སྤེལ་ཆོས་ཀྱི་འདོད་སེམས་མེད་པའི་ཕྱིར་རོ། །རང་ལུགས་ནི་རྒྱས་འབྲིང་ལྟར་ན་སྙོམས་འཇུག་བརྒྱད་ལ་འགོག་པ་བརྒྱད་སྤེལ་བས་བཅུ་དྲུག་ཡིན་ལ། ཁྲི་བརྒྱད་སྟོང་པ་ལྟར་ན་ནུད་ཆུང་དང་བཅུ་བདུན་ནོ། །གཉིས་པ་ལ་དགག་བཞག་གཉིས་ལས། དང་པོ་ལ། མཁན་ཆེན་པ་ན་རེ། དངོས་གཞི་ཐོད་རྒལ་ཆུང་ངུ་སྔོན་དུ་བཏང་ནས་དངོས་གཞི་ཐོད་རྒལ་ཆེན་པོའི་ཆེད་དུ་མཐར་གནས་ཀྱི་སྙོམས་འཇུག་དང་པོ་བརྒྱད་ལ་འགོག་པ་བརྒྱད་སྤེལ་ནས་སྙོམས་པར་འཇུག་པའི་དགེ་སེམས་རྩེ་གཅིག་པ་ཞེས་དང་། ཁ་ཅིག ལུགས་མཐུན་དུ་ཞེས་པའི་ཁྱད་པར་བསྣན་པ་དང་། ཁ་ཅིག སྙོམས་འཇུག་དགུ་ལ་འགོག་པ་དགུ་སྤེལ་ནས་སྙོམས་པར་འཇུག་པའི་དངོས་གཞིའི་སྙོམས་འཇུག་ཞེའོ། །དང་པོ་ལ་ཁས་བླངས་འགལ་བའི་སྐྱོན་བསྟན་ཟིན་ཅིང་། གཞན་ཡང་སྲིད་རྩེའི་ནུད་ཆུང་ནས་སྤེལ་ཆོས་ཀྱི་འདོད་སེམས་ཀྱི་བར་གྱི་འགོག་པའི་སྙོམས་འཇུག་དེ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་ཆོས་ཅན་དང་བཅས་པ་ཁས་བླངས་སོ། །གཉིས་པ་དང་གསུམ་པ་ལ་དངོས་གཞི་ཐོད་རྒལ་འབྲིང་པོའི་གནས་ཀྱི་ནང་ཚན་གྱི་སྲིད་རྩེའི་ནུད་ཆུང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། འགོག་པའི་མཇུག་ཐོག་དེ་མ་ཐག་ཏུ་བྱུང་བའི་སྲིད་རྩེའི་སྙོམས་འཇུག་ཡིན་པའི་ཕྱིར། བཞི་པ་ཡང་མི་འཐད་དེ། འགོག་པ་ལ་འགོག་པ་སྤེལ་བ་མེད་པའི་ཕྱིར་དང་། བར་དུ་མཚམས་འཛིན་གྱི་སེམས་གཞན་གྱིས་ཆོད་ན་དེ་སྤེལ་ཆོས་ཡིན་གྱི་འགོག་པ་སྤེལ་ཆོས་སུ་མི་རུང་བའི་ཕྱིར་རོ། །གཉིས་པ་ནི། དངོས་གཞི་ཐོད་རྒལ་ཆུང་ངུ་སྔོན་དུ་བཏང་ནས་ཆེན་པོའི་ཆེད་དུ་འགོག་པ་སྤེལ་བའི་རིགས་སུ་གནས་པའི་སྙོམས་འཇུག་གོ །གསུམ་པ་ནི། སྔར་བཤད་པ་ལྟར་རིགས་གསུམ་ཡོད་པའི་བར་པ་ལ་དབང་ཐོབ་པའི་ཆེད་ཡིན་ནོ། །བཞི་པ་ནི་ཤཱནྟི་པ་ན་རེ། སྤེལ་གཞིའི་འགོག་པ་སྔོན་དུ་བྱེད་པ་ཡིན་ནོ་ཞེས་གསུངས་ཤིང་། མཁན་ཆེན་པ་ཡང་དེ་ལྟར་དུ་བཞེད་དེ། ནུད་ཆུང་གི་རྗེས་སུ་མཚམས་འཛིན་གྱི་འདོད་སེམས་དེ་ནས་སྤེལ་གཞིའི་འགོག་པ། དེ་ནས་སྤེལ་ཆོས་ཀྱི་འདོད་སེམས་མངོན་དུ་བྱེད་པའི་ཕྱིར་ཞེས་གསུངས་སོ། །དེ་ནི་མི་འཐད་དེ། འབྲིང་པོའི་གནས་ལ་སྤེལ་གཞིའི་འགོག་པ་དང་། སྤེལ་ཆོས་ཀྱི་འདོད་སེམས་མེད་པའི་ཕྱིར་རོ། །ཁ་ཅིག མཚམས་འཛིན་གྱི་འདོད་སེམས་མངོན་དུ་བྱེད་པའི་ཆེད་ཡིན་ཏེ། སྲིད་རྩེའི་མཇུག་ཐོག་གི་འགོག་པ་དེ་ཟག་བཅས་ཀྱི་སེམས་ཤིན་ཏུ་ཞི་བ་སྲིད་རྩེ་ལས་ཐོབ་པས་སྲིད་རྩེ་ལ་ནུད་ཆུང་མ་བྱས་པར་འདོད་སེམས་མངོན་དུ་བྱེད་པར་མི་ནུས་པའི་ཕྱིར་ཏེ། དེ་ལྟ་བུའི་འགོག་པ་དེ་སེམས་ཞི་བ་མཐར་ཐུག་དང་། འདོད་སེམས་དེ་སེམས་མ་ཞི་བ་མཐར་ཐུག་ཡིན་པའི་ཕྱིར་ཟེར་རོ། །འོ་ན་འབྲིང་པོ་ཡིན་ན། སྲིད་རྩེ་ལ་ནུད་ཆུང་བྱེད་པས་ཁྱབ་པར་ཐལ། དེ་ཡིན་ན། ཆེན་པོ་ལ་འཇུག་པའི་ཚེ་འདོད་སེམས་མངོན་དུ་བྱེད་པས་ཁྱབ་པའི་ཕྱིར། ཁྱབ་པ་ཁས། འདོད་ན། རྒྱས་འབྲིང་གཉིས་ནས་བཤད་པའི་འབྲིང་པོའི་གནས་ལ་མ་ཚང་བའི་སྐྱོན་ཡོད་པར་ཐལ་ལོ། །གཞན་ཡང་མར་འོང་གི་འགོག་པའི་མཇུག་ཐོག་དེ་མ་ཐག་ཏུ་འདོད་སེམས་མངོན་དུ་བྱེད་མི་ནུས་པར་ཐལ། དེའི་འགོག་པ་དེ་སེམས་ཞི་བ་མཐར་ཐུག་དང་། འདོད་སེམས་དེ་སེམས་མ་ཞི་བ་མཐར་ཐུག་ཡིན་པའི་ཕྱིར། གལ་ཏེ་གཏན་ཚིགས་མ་གྲུབ་སྟེ། དེའི་སྐབས་ཀྱི་འགོག་པ་དེ་འདོད་སེམས་ཀྱི་མཇུག་ཐོག་དེ་མ་ཐག་ཏུ་བྱུང་བའི་ཕྱིར་རོ་ཞེ་ན། དེ་དང་སྲིད་རྩེའི་མཇུག་ཐོག་ཏུ་བྱུང་བའི་འགོག་པ་གཉིས་ལ་ཞི་མ་ཞིའི་ཁྱད་པར་མེད་པར་ཐལ། དེ་གཉིས་ལ་དགག་བྱ་མང་ཉུང་གི་ཁྱད་པར་ཡང་མེད། རང་གི་ངོ་བོ་ལ་ཟག་པ་དང་བཅས་མ་བཅས་ཀྱི་ཁྱད་པར་ཡང་མེད་པའི་ཕྱིར། གཞན་ཡང་སྲིད་རྩེའི་མཇུག་ཐོག་གི་འགོག་པ་དེ་སྲིད་རྩེ་ལ་ནུད་ཆུང་མ་བྱས་པར་འགོག་པ་ལ་སྙོམས་པར་འཇུག་པའི་མཉམ་གཞག་དེ་ལས་ལྡང་ནུས་སམ་མི་ནུས། ནུས་ན་འདོད་སེམས་མངོན་དུ་བྱེད་མི་ནུས་པར་འདོད་པ་དང་འགལ་ལ། མི་ནུས་ན་འགོག་པ་ལ་མཉམ་པར་བཞག་པའི་མཉམ་བཞག་དེ་ལས་ལྡང་བའི་ཆེད་དུ་ཡང་སྲིད་རྩེ་ལ་ནུད་ཆུང་བྱེད་དགོས་པར་ཐལ་ལོ། །གཞན་ཡང་སྲིད་རྩེའི་མཇུག་ཐོག་དེ་མ་ཐག་ཏུ་འདོད་སེམས་མངོན་དུ་བྱེད་པ་མེད་པར་ཐལ། སྤྱིར་འགོག་པའི་མཇུག་ཐོག་དེ་མ་ཐག་ཏུ་འདོད་སེམས་མངོན་དུ་བྱེད་པ་གཅིག་ཡོད། སྲིད་རྩེའི་མཇུག་ཐོག་གི་འགོག་པ་དེ་སྲིད་རྩེ་ལས་ཐོབ་པའི་རྒྱུ་མཚན་གྱིས་སྲིད་རྩེ་ལ་ནུད་ཆུང་མ་བྱས་པར་འདོད་སེམས་མངོན་དུ་བྱེད་མི་ནུས་པའི་ཕྱིར་རོ། །རང་ལུགས་ནི་ཐོད་རྒལ་ལ་ལེགས་པར་བྱང་བའི་གང་ཟག་དང་། བྱང་སེམས་དབང་རྣོན་གཉིས་ལ་ནུད་ཆུང་མི་དགོས་པའི་དབང་དུ་བྱས་ནས་རྒྱས་འབྲིང་ལས་དེ་མ་བཤད་ལ། ཐོད་རྒལ་ལ་མ་བྱང་བའི་གང་ཟག་དང་། བྱང་སེམས་དབང་རྟུལ་གཉིས་ཀྱི་དབང་དུ་བྱས་ནས་ཁྲི་བརྒྱད་སྟོང་པ་ནས་ནུད་ཆུང་བྱེད་པར་བཤད་དེ། གང་ཟག་དེ་གཉིས་སྙོམས་འཇུག་དགུ་ལ་ལུགས་མཐུན་དུ་སྙོམས་པར་ཞུགས་པའི་མཇུག་ཐོག་དེ་མ་ཐག་ཏུ་སྲིད་རྩེ་ལ་ནུད་ཆུང་མ་བྱས་པར་ཆོས་གཞན་སྤེལ་ནས་ལུགས་བཟློག་ཏུ་སྙོམས་པར་འཇུག་མི་ནུས་པའི་ཕྱིར། སྦྱོར་བ་སེང་གེ་རྣམ་བསྒྱིངས་ལ་ནི་མི་མཚུངས་ཏེ། དེར་ལུགས་མི་མཐུན་དུ་སྙོམས་པར་འཇུག་པ་ཡོད་ཀྱང་ཆོས་གཞན་སྤེལ་བ་མེད་པའི་ཕྱིར། འོ་ན་གང་ཟག་དེ་གཉིས་མར་འོང་གི་འགོག་པའི་མཇུག་ཐོག་དེ་མ་ཐག་ཏུ་འདོད་སེམས་མངོན་དུ་བྱེད་མི་ནུས་པར་ཐལ། གང་ཟག་དེ་གཉིས་སྲིད་རྩེ་ལ་ནུད་ཆུང་མ་བྱས་པར་ཆོས་གཞན་སྤེལ་ནས་ལུགས་མི་མཐུན་དུ་སྙོམས་པར་འཇུག་མི་ནུས་པའི་ཕྱིར་ཞེ་ན་སྐྱོན་མེད་དེ། འདོད་སེམས་མངོན་དུ་བྱེད་པའི་ཆེད་དུ་སྲིད་རྩེ་ལ་ནུད་ཆུང་བྱེད་པར་ཁས་མ་བླངས་ཤིང་། ཆོས་གཞན་སྤེལ་བ་དང་ལུགས་མི་མཐུན་དུ་སྙོམས་པར་འཇུག་པ་གཉིས་ཀའི་ཆེད་དུ་སྲིད་རྩེ་ལ་ནུད་ཆུང་བྱེད་པར་ཁས་བླངས་ཀྱང་སྐབས་དེར་ནི་ནུད་ཆུང་སྔོན་དུ་སོང་བའི་ཕྱིར་རོ། །བཞི་པ་དངོས་གཞི་ཐོད་རྒལ་ཆེན་པོ་ལ་གནས་ཀྱི་གྲངས་ངེས། མཚན་ཉིད། སྙོམས་པར་འཇུག་པའི་དགོས་པ། སྤེལ་ཆོས་ཀྱི་འདོད་སེམས་བཤད་པ་དང་བཞི། དང་པོ་ལ་དགག་བཞག་གཉིས་ལས། དང་པོ་ནི། མཁན་ཆེན་པ་དངོས་གཞི་ཐོད་རྒལ་ཆེན་པོའི་སྐབས་སུ། ལུགས་མཐུན་ལུགས་མི་མཐུན་གཉིས་ཡོད་ཅིང་འདིའི་ལུགས་མི་མཐུན་པ་འགོག་པ་ལ་འདོད་སེམས་སྤེལ་མི་དགོས་པས་སྲིད་རྩེ་ནས་བསམ་གཏན་དང་པོའི་བར་དུ་འདོད་སེམས་རེ་རེ་སྤེལ་བས་གནས་བཅུ་དྲུག ལུགས་མཐུན་ལ་བསམ་གཏན་དང་པོ་ལ་འདོད་སེམས་སྤེལ་མི་དགོས་པས་བསམ་གཏན་གཉིས་པ་ནས་སྲིད་རྩེའི་བར་ལ་འགོག་པ་རེ་རེ་སྤེལ་བས་བཅུ་བཞི། དེ་ནས་འགོག་པ་ལ་སྙོམས་པར་འཇུག་པས་སོ་གཅིག་ཏུ་ངེས་ཤིང་། འདི་ཉིད་མདོ་དང་། བསྟན་བཅོས་རྩ་བ་དང་། འགྲེལ་པ་གཉིས་ཀའི་དགོངས་པ་ཡིན་ཏེ། རྩ་བར། འགོག་པའི་བར་དུ་མི་འདྲར་འགྲོ། །ཞེས་དང་། འགྲེལ་པར་དེ་ལྟར་གཅིག་ལ་སོགས་པ་བོར་ནས་བསམ་གཏན་བཞི་དང་། གཟུགས་མེད་པ་བཞི་དང་། འགོག་པའི་སྙོམས་པར་འཇུག་པ་ལ་ཐུག་གི་བར་དུ་ཞེས་པས་ལུགས་མཐུན་དུ་སྙོམས་པར་འཇུག་པ་ཡང་བསྟན་པའི་ཕྱིར་རོ། །ལུགས་མི་མཐུན་གྱི་སྐབས་སུ་འགོག་པ་ལ་འདོད་སེམས་སྤེལ་མི་དགོས་ཏེ། དེའི་འོག་ཏུ་འགོག་པ་གཅིག་པུ་བོར་ལ་ཞེས་གསུངས་པའི་ཕྱིར། ལུགས་མཐུན་གྱི་སྐབས་སུ་བསམ་གཏན་དང་པོ་ལ་འདོད་སེམས་སྤེལ་མི་དགོས་ཏེ། དེ་སྤེལ་མ་ཐག་པ་ཡིན་པའི་ཕྱིར་ཏེ། གལ་ཏེ་དེ་ལྟར་གཅིག་ལ་སོགས་པ་བོར་ནས་ཞེས་པ་དོན་བསྡུ་ཡིན་ན་ནི། འགོག་པའི་བར་དུ་མི་འདྲར་འགྲོ། །ཞེས་པ་ཡང་དོན་བསྡུར་འགྱུར་ལ། འདོད་ན། དེ་གཞུང་གང་གི་དོན་བསྡུ་ཡིན་སྨྲ་དགོས་སོ་ཞེས་གསུངས་སོ། །དེ་ནི་མི་འཐད་དེ། འགྲེལ་ཆེན་ལས། དེ་བཞིན་དུ་བརྒྱད་ཀྱི་བར་དུ་བོར་ནས་བསམ་གཏན་དང་པོ་ལའོ། །དེ་ནས་མཉམ་པར་མ་བཞག་པ་ལ་སྟེ། དེ་ལྟར་གཅིག་ལ་སོགས་པ་བོར་ནས་ཞེས་དོན་བསྡུར་གསལ་བར་བཤད་པའི་ཕྱིར་དང་། དེ་བཞིན་དུ་བརྒྱད་ཀྱི་བར་དུ་བོར་ནས་ཞེས་གསུངས་པས་ལུགས་བཟློག་གི་སྐབས་སུ་སྲིད་རྩེ་ནས་བསམ་གཏན་གཉིས་པའི་བར་ལ་ཡང་འདོད་སེམས་སྤེལ་མི་དགོས་པར་ཐལ་བའི་ཕྱིར་རོ། །གཞན་ཡང་རྣམ་པ་རྣམས་ཕྱོགས་གཅིག་ཏུ་བསྡོམས་ན་རྣམ་པ་བརྒྱ་བདུན་ཅུ་རྩ་གསུམ་པོ་ཞེས་པ་འདི་རྣམ་པའི་དོན་བསྡུ་ཡིན་ནམ་མིན། ཡིན་ན་མེད་པའི་རྣམ་པ་ནས་བཟུང་སྟེ། ཞེས་སོགས་གཞུང་ཚན་གསུམ་པོ་དེའི་དོན་བསྡུར་འགྱུར་ཞིང་། འདོད་ན། དེ་གཞུང་གང་གི་དོན་བསྡུ་ཡིན་གསུང་ཕྱུང་རན་ནོ། །གཉིས་པ་ལྟར་ན་ཧ་ཅང་ཐལ་ལོ། །གཉིས་པ་ལ་དགག་བཞག་གཉིས་ལས། དང་པོ་ནི། མཁས་གྲུབ་ཁ་ཅིག དངོས་གཞི་ཐོད་རྒལ་འབྲིང་པོ་སྔོན་དུ་བཏང་ནས་སྲིད་རྩེ་ནས་བཟུང་སྟེ་བསམ་གཏན་དང་པོའི་བར་གྱི་མཐར་གནས་ཀྱི་སྙོམས་འཇུག་བརྒྱད་ལ་འདོད་སེམས་བརྒྱད་སྤེལ་ནས་སྙོམས་པར་འཇུག་པའི་དགེ་སེམས་རྩེ་གཅིག་པ་ཞེས་གསུང་བ་ནི་མི་འཐད་དེ། འགོག་པ་སྐབས་འདིར་སྤེལ་གཞིར་དངོས་སུ་གསུང་བ་དེ་མ་ཚང་འདུག་པའི་ཕྱིར་དང་། མཚན་ཉིད་ཀྱི་ཟུར་དུ་དགེ་སེམས་རྩེ་གཅིག་པ་ཞེས་པ་ཡང་སྤེལ་ཆོས་ཀྱི་འདོད་སེམས་ལ་མ་ཁྱབ་པའི་ཕྱིར་རོ། །གཉིས་པ་ནི་མཚམས་འཛིན་གྱི་འདོད་སེམས་ཀྱི་རྗེས་སུ་སྙོམས་པར་འཇུག་པ་དགུ་ལ་འདོད་སེམས་རེ་སྤེལ་ནས་ལུགས་བཟློག་ཏུ་འཇུག་པའི་གནས་སྐབས་ཀྱི་ཐེག་ཆེན་གྱི་རྗེས་ལ་ཐོབ་པའི་མངོན་རྟོགས། གསུམ་པ་ལ་སྤྱིར་སྒོམ་པའི་དགོས་པ་དང་། བྱེ་བྲག་ཏུ་འདོད་སེམས་སྤེལ་ནས་སྒོམ་པའི་དགོས་པ་གཉིས་ལས། དང་པོ་ནི། སྔར་བཤད་པ་ལྟར་རིགས་གསུམ་ལས་ཕྱི་མ་ལ་དབང་ཐོབ་པའི་ཆེད་ཡིན་ལ། གཉིས་པ་ནི་སྙོམས་འཇུག་གི་རིགས་ཐམས་ཅད་ལ་དབང་ཐོབ་པའི་ཆེད་ཡིན་ནོ། །དེ་ལ་ཁ་ཅིག སྙོམས་འཇུག་གི་རིགས་ཐམས་ཅད་ལ་དབང་ཐོབ་པའི་ཆེད་དུ་འདོད་སེམས་སྤེལ་བ་མེད་པར་ཐལ། མཉམ་བཞག་ལ་དབང་ཐོབ་པའི་ཆེད་དུ་མཉམ་པར་མ་བཞག་པའི་སེམས་མངོན་དུ་བྱེད་པ་མི་འཐད་པའི་ཕྱིར་ཏེ། ཡང་དག་པའི་ལྟ་བ་ལ་དབང་ཐོབ་པའི་ཆེད་དུ་ལོག་ལྟ་མངོན་དུ་བྱེད་པ་མི་འཐད་པའི་ཕྱིར་ཞེས་ཟེར་རོ། །འོ་ན་སྙོམས་འཇུག་ལ་དབང་ཐོབ་པའི་ཆེད་དུ་སྙོམས་འཇུག་དགུ་ལ་ལུགས་བཟློག་ཏུ་སྙོམས་པར་འཇུག་པ་མི་འཐད་པར་ཐལ། ཐར་ལམ་ལ་དབང་ཐོབ་པའི་ཆེད་དུ་ཐར་ལམ་ལ་ལུགས་བཟློག་ཏུ་འཇུག་པ་མི་འཐད་པའི་ཕྱིར། ཁྱབ་པ་ཁས། བཞི་པ་ནི། ཁ་ཅིག དངོས་གཞི་ཐོད་རྒལ་གྱི་སྐབས་སུ་ཁམས་གསུམ་གྱིས་བསྡུས་པའི་སྙོམས་འཇུག་གི་རིགས་ཐམས་ཅད་ཚང་བར་སྒོམ་དགོས་པས་འདིར་བསྟན་གྱི་འདོད་སེམས་དེ་འདོད་པའི་སས་བསྡུས་ཀྱི་སྙོམས་འཇུག་ཡིན་ཞེས་ཟེར་བ་ནི་རང་ཚིག་དང་འགལ་ཏེ། འདོད་པའི་སས་བསྡུས་ཀྱི་སྙོམས་འཇུག་མེད་པའི་ཕྱིར། ཁ་ཅིག་དངོས་གཞི་ཐོད་རྒལ་གྱི་སྐབས་སུ་ཁམས་གསུམ་གྱིས་བསྡུས་པའི་མཉམ་གཞག་གི་རིགས་ཐམས་ཅད་ཚང་བར་སྒོམ་དགོས་པས་འདིར་བསྟན་འདོད་སེམས་འདོད་པའི་སས་བསྡུས་ཀྱི་མཉམ་གཞག་ཡིན་ཞེས་ཟེར་བ་ཡང་མ་བརྟགས་པ་སྟེ། མདོ་དང་རྒྱན་རྩ་འགྲེལ་རྣམས་ལས་མཉམ་པར་མ་བཞག་པའི་སེམས་སུ་བཤད་པའི་ཕྱིར་རོ། །འོ་ན་ཇི་ལྟར་ཞེ་ན། མཉམ་གཞག་བཏང་ཙམ་གྱི་རྗེས་ཐོབ་དག་པ་འཇིག་རྟེན་པའི་ཡེ་ཤེས་ལ་འདོད་སེམས་ཀྱི་མིང་གིས་བཏགས་པ་སྟེ། འདི་ཐོད་རྒལ་ཆེན་པོའི་ཁོངས་སུ་གཏོགས་པས་ཐོད་རྒལ་ཡིན་ན་མཉམ་གཞག་ཡིན་པས་མ་ཁྱབ་པ་ནི་གནད་ཕྲ་མོའོ། །གསུམ་པ་སྒོམ་པའི་དགོས་པ་ནི། ས་བདུན་པ་མན་ཆད་དུ་དབང་ཐོབ་པའི་ཆེད་དང་། ས་བརྒྱད་པ་ཡན་ཆད་དུ་དབང་ཐོབ་པ་ཕུལ་དུ་བྱུང་བའི་ཆེད་ཡིན་ལ། ཁྱད་པར་སྒོམ་སྤང་རྟོག་པའི་གཉེན་པོ་སྒོམ་ལམ་རྩེ་སྦྱོར་གྱི་རྟེན་དང་ཐེག་པ་གསུམ་གྱི་ཡོན་ཏན་གྱི་རིགས་ཐམས་ཅད་ཀྱི་རྟེན་སྒྲུབ་པའི་ཆེད་ཡིན་ཏེ། མི་མཐུན་པའི་ཕྱོགས་སྤོང་བ་ལ་སོགས་པ་ནི་རྟེན་གྲུབ་པ་སྔོན་དུ་འགྲོ་བ་ཅན་ཡིན་ན་ཞེས་སོགས་གསུངས་པའི་ཕྱིར། བཞི་པ་ཐོབ་པའི་ས་མཚམས་ནི། ཁ་ཅིག མདོ་སྡེ་དཀོན་མཆོག་སྤྲིན་དང་། བསྡུ་བ་ལས་བསྐལ་པ་གྲངས་མེད་པ་གཉིས་ཀྱིས་ངེས་པར་འབྱུང་བའི་བྱང་ཆུབ་སེམས་དཔའ་ཐོད་རྒལ་ལ་སྙོམས་པར་འཇུག་ཞེས་པ་ལ་བརྟེན་ནས་ས་བརྒྱད་པ་ནས་འཇུག་གོ་ཞེས་འདོད་པ་ནི་མི་འཐད་དེ། ས་གཉིས་པའི་བྱང་སེམས་ཆོས་ཅན། སྒོམ་ལམ་རྩེ་སྦྱོར་མ་ཐོབ་པར་ཐལ། དེའི་རྟེན་མ་ཐོབ་པའི་ཕྱིར། ལུང་དོན་དང་ཡང་འགལ་ཏེ། ས་བརྒྱད་པ་ནས་བསྐལ་པ་གྲངས་མེད་པ་གཉིས་ཀྱིས་ངེས་པར་འབྱུང་བར་བྱར་མེད་པའི་ཕྱིར་ཏེ། ས་བརྒྱད་པ་ནས་སངས་རྒྱས་ཀྱི་ས་མངོན་དུ་བྱེད་པ་ལ་བསྐལ་པ་གྲངས་མེད་གཅིག་ལས་མེད་པའི་ཕྱིར་རོ། །ལུང་དེའི་དོན་མ་མཐའ་ས་གཉིས་པ་ནས་འཇོག་པར་མཛད་པ་ཡང་ཅུང་ཟད་མི་འཐད་དེ། གཉིས་པའི་མཉམ་བཞག་ལ་འདི་སྔོན་དུ་འགྲོ་དགོས་པའི་ཕྱིར་ཏེ། རྟེན་གྲུབ་པ་སྔོན་དུ་འགྲོ་བ་ཡིན་ན་གོ་སླ་བས་སྒོམ་པའི་ལམ་ཞེས་གསུངས་པའི་ཕྱིར། དེས་ན་གནད་ཀྱི་དོན་ནི་འདི་དག་མངོན་དུ་བྱེད་པའི་ནུས་པ་མཐོང་ལམ་རྩེ་སྦྱོར་དུ་ཐོབ་པས་མདོ་ལས་མཐོང་ལམ་རྩེ་སྦྱོར་གྱི་སྐབས་སུ་གསུངས་ཤིང་། མངོན་དུ་བྱེད་པ་ས་དང་པོའི་རྗེས་ཐོབ་ཀྱི་སྐབས་སུ་འབྱུང་བས་བསྟན་བཅོས་ལས་མཐོང་སྤང་རྟོག་པའི་གཉེན་པོ་དང་སྒོམ་སྤང་རྟོག་པའི་གཉེན་པོ་གཉིས་ཀྱི་བར་དུ་གསུངས་པ་སོགས་གནད་མང་དུ་ཡོད་པ་ནི་ཞལ་གྱི་པད་མོ་ལ་དྲི་བར་བྱའོ།།༞ །།གཉིས་པ་ཉན་ཐོས་པའི་ལུགས་ཀྱི་ཐོད་རྒལ་བཤད་པ་ནི་མཛོད་ལས། ས་བརྒྱད་རྣམ་པ་གཉིས་འབྲེལ་དང་། །གཅིག་བརྒལ་སོང་ཞིང་འོང་ནས་ནི། །རིགས་མི་མཐུན་པ་གསུམ་པར་འགྲོ། །ཐོད་རྒལ་གྱི་ནི་སྙོམས་འཇུག་ཡིན། །ཞེས་གསུངས་ཏེ། ས་བརྒྱད་ཅེས་པ་ནི་བསམ་གཏན་བཞི་དང་གཟུགས་མེད་བཞི་སྟེ་བརྒྱད་དོ། །རྣམ་གཉིས་ཞེས་པ་ནི་སྲིད་རྩེ་མ་གཏོགས་པ་རྣམས་ལ་ཟག་བཅས་ཟག་མེད་གཉིས་གཉིས་སུ་ཕྱེ་བ་སྟེ། སྦྱོར་དངོས་ཐམས་ཅད་ཀྱི་སྙོམས་པར་འཇུག་པའི་གཞི་བསྟན་ནོ། །སྙོམས་འཇུག་ལ་སྦྱོར་བ་དང་། དངོས་གཞི་གཉིས། དང་པོ་ལ་རིང་སྦྱོར་དང་། ཉེ་སྦྱོར་གཉིས་ལས། དང་པོ་ནི། འབྲེལ་བར་སོང་ཞིང་འོང་ནས་ཞེས་པ་སྟེ། འབྲེལ་པ་ནི་ཆོས་གཞན་སྤེལ་བ་དང་བོར་བ་གང་ཡང་མེད་པར་ཟག་བཅས་བརྒྱད་ལ་ཡར་སོང་ཞིང་མར་འོང་ནས་ཟག་མེད་བདུན་ལ་ཡང་དེ་བཞིན་དུ་སྙོམས་པར་འཇུག་པའོ། །གཉིས་པ་ནི། གཅིག་བརྒལ་སོང་ཞིང་འོང་ནས་ནི། །ཞེས་པ་སྟེ། ཟག་བཅས་བརྒྱད་ལ་རེ་རེ་བོར་ནས་ལུགས་མཐུན་དུ་སོང་ཞིང་ལུགས་བཟློག་ཏུ་འོང་ནས་ཟག་མེད་བདུན་ལ་ཡང་དེ་བཞིན་དུ་སྙོམས་པར་འཇུག་པའོ། །གཉིས་པ་དངོས་གཞི་ནི་རྐང་པ་ཕྱི་མ་གཉིས་ཏེ། རིགས་མི་མཐུན་པ་ནི་ཟག་བཅས་ཟག་མེད་སྤེལ་བ་ཡིན་ལ། གསུམ་པར་འགྲོ་བ་ནི་དང་པོའི་གནས་ནས་གཉིས་པ་བོར་ནས་གསུམ་པར་འགྲོ་བ་སྟེ། དེ་ཡང་ཟག་བཅས་བསམ་གཏན་དང་པོ་ལ་འཇུག དེ་ལས་ལངས་ནས་གཉིས་པ་བོར་ནས་ཟག་མེད་བསམ་གཏན་གསུམ་པ་ལ་འཇུག དེ་ནས་བཞི་པ་བོར་ནས་ཟག་བཅས་ནམ་མཁའ་ལ་འཇུག དེ་ནས་རྣམ་ཤེས་བོར་ནས་ཟག་མེད་ཅི་ཡང་མེད་ལ་འཇུག དེ་ནས་སྲིད་རྩེ་བོར་ནས་ཟག་བཅས་ཅི་ཡང་མེད་ལ་འཇུག དེ་ནས་རྣམ་ཤེས་བོར་ལ་ཟག་མེད་ནམ་མཁའ་ལ། དེ་ནས་བཞི་པ་བོར་ནས་ཟག་བཅས་བསམ་གཏན་གསུམ་པ་ལ། དེ་ནས་གཉིས་པ་བོར་ནས་ཟག་མེད་བསམ་གཏན་དང་པོ་ལ་སྙོམས་པར་འཇུག་པའོ། །གསུམ་པ་དམན་པའི་ལུགས་ཀྱིས་མཆོག་ལ་མི་གནོད་པར་བསྟན་པ་ནི་ཉིར་སྣང་ལས། སྔར་གྱི་མཛོད་ཀྱི་ལུང་དེ་ཉིད་དང་མི་མཐུན་པས་ལུགས་སྔ་མ་མི་འཐད་དོ་ཞེ་ན། ཅི་བྱ་རོག་དང་། འོ་ཐུག་མཚན་ཉིད་འདྲའམ་ཞེས་པའི་ལན་མཛད་ཅིང་འགྲེལ་ཆེན་ལས་ཀྱང་དེ་ཉིད་གསུངས་སོ། །དེའི་དོན་ལ་མཁས་གྲུབ་གཡག་གིས་ཀཱ་ཀ་དང་། ཀཱ་དུ་ཀ་གཉིས་མིང་འདྲ་ཡང་། དོན་ཀཱ་ཀ་བྱ་རོག་དང་། ཀཱ་དུ་ཀ་འོ་ཐུག་ལ་འཇུག་པ་ལྟར་ཐེག་པ་ཆེ་ཆུང་གི་ཐོད་རྒལ་གཉིས་ཐོད་རྒལ་ཅེས་པ་ཙམ་གྱི་མིང་འདྲ་ཡང་དོན་མི་འདྲ་བས་མི་གནོད་པར་གསུངས་ཏེ། སྦྱོར་ལམ་གྱི་རྣམ་པའི་སྐབས་སུ་ཐེག་དམན་གྱི་ལུང་གི་སུན་འབྱིན་མི་ནུས་པའི་སྒྲུབ་བྱེད་དུ་ཐེག་ཆེན་གྱི་ལུགས་འདི་ཁྱད་པར་དུ་འཕགས་པ་ཁོ་ན་ཡིན་པར་གསུངས་པ་དང་དོན་མཐུན་ནོ།། །།རྨད་བྱུང་ཡོན་ཏན་ཀུན་གྱི་གཞིར་གྱུར་བསམ་གཏན་གཟུགས་མེད་སྙོམས་འཇུག་དང་། །འཕགས་པའི་གནས་པ་མཆོག་གྱུར་འདུ་ཤེས་ཚོར་བ་འགོག་པའི་སྙོམས་འཇུག་གི །ཇི་བཞིན་གནས་ལུགས་ཇི་ལྟར་འཇུག་ཚུལ་སྡེ་སྣོད་རྒྱ་མཚོ་རྣམ་དཔྱོད་ཀྱི། །སྲུབ་ཤིང་ས་འཛིན་བརྩོན་པ་གཉིས་ཀྱིས་བསྲུབ་ཐག་ཀླུ་དབང་བསྒྱུར་བ་ཡིས། །སྙོམས་འཇུག་རབ་གསལ་ལེགས་བཤད་ཟླ་བ་ཕྱུང་སྟེ་ཐུབ་བསྟན་གངས་རི་ལ། །སྡེབ་ལེགས་འོད་དཀར་དྲྭ་བ་འཕྲོ་ཚེ་ལྟ་འདོད་ཕྱོགས་ཀྱི་བྲམ་ཟེ་དག །དགའ་གུས་ཕྱག་གི་སོར་མོ་ཟུམ་ཞིང་བློ་གྲོས་མིག་འབོར་རྣམ་ཕྱེ་ནས། །ཡིད་གཉིས་རྫི་མ་ཟུམ་པ་མེད་པར་ཟབ་དོན་དཀྱིལ་འཁོར་བལྟ་བར་གྱུར། །འདི་སྦྱར་དགེ་བ་ཡར་ངོའི་ཟླ་ཚེས་ལྟ་བུ་གང་ཞིག་ཐོབ་པ་དེ། །ཆོས་དབྱིངས་ཡིད་ཀྱི་ནམ་མཁར་ཞི་ལྷག་ཟུང་དུ་འབྲེལ་བའི་ཐབས་མཁས་ཀྱིས། །གོང་ནས་གོང་དུ་འཕེལ་བར་བྱས་ཏེ་ས་དང་ས་ཡི་རྟོགས་པ་མཆོག །རིམ་གྱིས་འཛེགས་ནས་སྤངས་རྟོགས་ཡོངས་རྫོགས་བདེ་གཤེགས་ཟླ་བ་ཉིད་ཐོབ་ཤོག །དེང་སང་ལ་ལ་ལེ་ལོའི་དགྲ་ཉེ་བག་ཆགས་ངན་པའི་གྲོགས་ཀྱིས་སྲུང་། །འགའ་ཞིག་ཅུང་ཟད་བརྩོན་ཡང་བཤེས་གཉེན་ངན་པས་ལོག་པའི་གཡང་སར་ཁྲིད། །གཞན་དག་ཇི་བཞིན་དོན་སྟོན་མགོན་གྱིས་བཟུང་ཡང་རྣམ་དཔྱོད་སྟོབས་དང་བྲལ། །དེ་སླད་ཐེག་ཆེན་གཞུང་གི་དགོངས་པ་ཇི་བཞིན་རྟོགས་པ་ཤིན་ཏུ་ཉུང་། །ཁོ་བོ་སྔོན་སྦྱངས་ཐོས་པའི་བག་ཆགས་གོམས་པས་སྐྱེས་སྟོབས་བློ་གྲོས་ལྡན། །འཇིག་རྟེན་བྱ་བ་སྙིང་པོ་མེད་པར་ངེས་པས་གསུང་རབ་དོན་ལ་བརྩོན། །ཡོངས་འཛིན་དམ་པའི་མགོན་གྱིས་བཟུང་བས་ལོག་པའི་གཡང་ས་རིང་དུ་སྤངས། །དེ་སླད་མདོ་སྔགས་གཞུང་གི་དགོངས་པ་སྨྲ་ལ་མི་འཇིགས་སྤོབས་པ་ཐོབ། །བློ་གྲོས་ཉམས་ཆུང་ཕྱོགས་ཞེན་དྲི་མས་བསྒོས་པའི་གོས་ཀྱིས་གཡོགས་པ་རྣམས། །ལེགས་བཤད་ཟླ་བའི་འོད་ཟེར་བཀྱེ་བ་འདི་ལ་ཁོང་ནས་སྨོད་གྱུར་ཀྱང་། །མཁས་མང་གཟའ་སྐར་དབུས་ན་ལྷམ་མེར་གསལ་ཞིང་བློ་གསལ་ཀུ་མུད་ཀྱི། །ཕྲེང་བ་མཚར་དུ་མངར་བའི་སྤྱི་བོའི་གཙུག་ན་མཛེས་པའི་རྣམ་འགྱུར་སྟོན།། །།མཐར་གྱིས་གནས་པའི་སྙོམས་པར་འཇུག་པ་དགུའི་རྣམ་པར་བཞག་པ་སྙོམས་འཇུག་རབ་གསལ་ཞེས་བྱ་བ་འདི་ནི་སྙིགས་མའི་དུས་སུ་བསྟན་པ་མི་ནུབ་པའི་རྒྱལ་མཚན་འཛིན་པ་མཁས་པའི་དབང་པོ་ཀུན་མཁྱེན་སངས་རྒྱས་འཕེལ་ལ་སོགས་པ་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པས་སྡེ་སྣོད་རྒྱ་མཚོ་ལྟ་བུའི་དོན་ལ་ངེས་པའི་ཤེས་པ་གཏིང་ནས་རྙེད་པ་ཤཱཀྱའི་དགེ་སློང་བསོད་ནམས་སེང་གེས་དོན་གཉེར་རབ་ཏུ་མང་པོས་ཡང་ཡང་བསྐུལ་ཞིང་། ལ་སྟོད་བྱང་གི་སའི་ཆར་སྐྱེས་པ་གཞོན་ནུ་བློ་ལྡན་གྱིས་འཕྲལ་དུ་བསྐུལ་ཏེ་ཡི་གེའི་རྐྱེན་སྦྱར་བ་ལ་བརྟེན་ནས། ལྕགས་ཕོ་སྟག་གི་སྣྲོན་གྱི་ཟླ་བའི་ཡར་ཚེས་བརྒྱད་ལ་རྟ་ནག་གསེར་གླིང་གི་དགོན་པར་སྦྱར་བའོ།། ༈ །།འདི་བསྒྲུབས་པ་ལས་བྱུང་བ་ཡི། །དགེ་བ་གང་ཞིག་ཐོབ་པ་དེས། །མཁའ་ཁྱབ་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

རྟེན་འབྲེལ་གྱི་རྣམ་པར་བཞག་པ་འཁོར་འདས་རབ་གསལ།

རྟེན་འབྲེལ་གྱི་རྣམ་པར་བཞག་པ་འཁོར་འདས་རབ་གསལ་ཞེས་བྱ་བ་བཞུགས་སོ།། རྟེན་འབྲེལ་གྱི་རྣམ་པར་བཞག་པ་འཁོར་འདས་རབ་གསལ་ཞེས་བྱ་བ། བླ་མ་དང་ལྷག་པའི་ལྷ་མཆོག་རྗེ་བཙུན་འཇམ་པའི་རྡོ་རྗེ་ལ་ཕྱག་འཚལ་ལོ། །ཡོན་ཏན་ཀུན་འདུས་མཐོང་ལམ་རྩེ་སྦྱོར་གྱི། །རྟོགས་པ་བརྙེས་ནས་སེངྒེ་རྣམ་བསྒྱིངས་ཀྱིས། །རྣམ་པར་བསྒྱིངས་ནས་སླར་ཡང་རྗེས་ཐོབ་ཏུ། །རྟེན་འབྲེལ་རྟོགས་མཛད་རྒྱལ་སྲས་འཕགས་པ་རྒྱལ། །གང་ཞིག་རྟོགས་ནས་སྲིད་པའི་རྭ་བ་ལས། །རྣམ་པར་བརྒལ་ཏེ་ཐར་པའི་རི་ངོས་སུ། །འཛེགས་པའི་ཐབས་ནི་རྟེན་འབྲེལ་རྟོགས་པ་ལས། །གཞན་དུ་མེད་པར་རྫོགས་པའི་སངས་རྒྱས་གསུང་། །འཁོར་བའི་རྩ་བ་གང་ཟག་ལ་རྨོངས་པའི། །མ་རིག་ཡིན་ཞིང་དེ་ཡི་རྩ་བ་ཡང་། །གནས་ལུགས་དོན་ལ་རྨོངས་པའི་མ་རིག་ཏུ། །ཐེག་ཆེན་དབུ་མའི་སྡེ་སྣོད་རྣམས་ལས་གསུངས། །མ་རིག་དེ་ཡི་ཞེན་ཡུལ་སྤྲོས་པ་ནི། །སྟོང་པ་ཉིད་ཀྱི་ལྟ་བས་བཅད་བྱས་ནས། །འཇིག་ཚོགས་ལྟ་སོགས་ཉོན་མོངས་མཐའ་དག་དང་། །ཟག་བཅས་ལས་རྣམས་འབྱུང་བ་མེད་པ་ནི། །འཁོར་བར་སྐྱེ་བའི་སྡུག་བསྔལ་མི་འབྱུང་བས། །ཡན་ལག་བཅུ་གཉིས་ལུགས་འབྱུང་ལུགས་བཟློག་གི །གོ་རིམ་ངེས་པར་བྱས་ནས་སྒོམ་པ་ནི། །བྱང་ཆུབ་གསུམ་ལ་འཛེགས་པའི་ཐེམ་སྐས་ཡིན། །རྟེན་འབྲེལ་དོན་དང་སྟོང་ཉིད་དོན་གཅིག་པའི། །དབུ་མའི་ལྟ་བ་སྐྱེ་ཚུལ་རིགས་པ་ཡི། །རྣམ་གཞག་འཕགས་མཆོག་ཀླུ་སྒྲུབ་གཞུང་ལུགས་ལས། །གསལ་བར་གསུངས་པ་ཐེག་པ་ཆེན་པོའི་ལུགས། །འདིར་ནི་གྲུབ་མཐའ་ཀུན་ལ་གྲགས་པ་ཡི། །ཡན་ལག་བཅུ་གཉིས་སོ་སོའི་ངོ་བོ་དང་། །རྒྱུ་འབྲས་དུས་བསྡུས་ས་མཚུངས་དཔྱད་པ་སོགས། །བཤད་པར་བྱ་ཡི་དོན་གཉེར་དགའ་བས་ཉོན། །འདི་ལ་བཞི་སྟེ། བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས། སེམས་ཙམ་པའི་ལུགས། དབུ་མ་པའི་ལུགས་སོ། །དང་པོ་ལ་གཉིས་ཏེ། སྤྱིར་རྟེན་འབྲེལ་བཞིར་དབྱེ་བ་དང་། གནས་སྐབས་པའི་རྟེན་འབྲེལ་བྱེ་བྲག་ཏུ་བཤད་པའོ། །དང་པོ་ནི། སྐད་ཅིག་མའི། འབྲེལ་པ་ཅན་གྱི། གནས་སྐབས་པའི། རྒྱུན་ཆགས་པའི་རྟེན་འབྲེལ་དང་བཞིའོ། །དང་པོ་ནི། འདོད་ཆགས་དྲག་པོས་ཀུན་ནས་བསླངས་པའི་སྲོག་གཅོད་པའི་གནས་སྐབས་གྱི་སྐད་ཅིག་མ་གཅིག་ལ་ཡང་ཡན་ལག་བཅུ་གཉིས་བརྩིར་རུང་སྟེ། དེའི་གནས་སྐབས་ཀྱི་སེམས་བྱུང་རྨོངས་པ་ནི་མ་རིག་པ། སེམས་བྱུང་སེམས་པ་ནི་འདུ་བྱེད། གཙོ་སེམས་ནི་རྣམ་པར་ཤེས་པ། དེ་ཉིད་ཕུང་པོ་གཞན་བཞི་དང་བཅས་པ་ནི་མིང་གཟུགས། མིང་གཟུགས་དེ་ལ་གནས་པའི་མིག་སོགས་དྲུག་ནི་སྐྱེ་མཆེད་དྲུག སྐྱེ་མཆེད་དྲུག་ཡུལ་དང་འཕྲད་པ་ནི་རེག་པ། རེག་པ་ཉམས་སུ་མྱོང་བ་ནི་ཚོར་བ། འདོད་ཆགས་དྲག་པོ་ནི་སྲེད་པ། དེས་ཀུན་ནས་བསླངས་པའི་ལུས་ངག་གི་ལས་རྣམས་ནི་ལེན་པ་དང་སྲིད་པ། ལས་དེས་འབྲས་བུ་ཕྱི་མ་བསྐྱེད་ནུས་པ་ནི་སྐྱེ་བ། ལས་དེ་ཞིག་ཅིང་འགག་པ་ནི་རྒ་ཤི་སྟེ། དེ་ཐམས་ཅད་ཀྱང་འདོད་ཆགས་དྲག་པོས་ཀུན་ནས་སློང་བའི་སྲོག་གཅོད་པའི་གནས་སྐབས་ཀྱི་སྐད་ཅིག་མ་སྐྱེས་ནས་འགགས་པ་ཙམ་ལ་ཚང་བའི་ཕྱིར་རོ། །གཉིས་པ་ནི་བསྟན་བཅོས་རབ་ཏུ་བྱེད་པ་ལས། རྟེན་ཅིང་འབྲེལ་བར་འབྱུང་བ་གང་ཞེ་ན། འདུས་བྱས་ཀྱི་ཆོས་ཐམས་ཅད་དོ། །ཞེས་གསུངས་པ་ལྟར། འདུས་བྱས་ཐམས་ཅད་འབྲེལ་བ་ཅན་གྱི་རྟེན་འབྲེལ་ཏེ། རྒྱུ་དང་རྐྱེན་དེ་དང་དེ་ལ་བརྟེན་ནས་འབྲས་བུ་དེ་དང་དེ་འབྱུང་བའི་ཕྱིར་ན་རྒྱུ་འབྲས་སུ་འབྲེལ་བ་ལ་རྟེན་འབྲེལ་དུ་འཇོག་པའི་ཕྱིར་རོ། །གསུམ་པ་ནི། ཚེ་གསུམ་གྱིས་བསྡུས་པའི་ཕུང་པོའི་གནས་སྐབས་ལ་ཡན་ལག་བཅུ་གཉིས་སུ་འགྱུར་བ་སྟེ་འཆད་པར་འགྱུར་རོ། །བཞི་པ་ནི། འབྲེལ་བ་ཅན་གྱི་རྟེན་འབྲེལ་དང་། གནས་སྐབས་པའི་རྟེན་འབྲེལ་གཉིས་སྐད་ཅིག་སྔ་ཕྱི་བར་མ་ཆད་དུ་འབྱུང་བ་སྟེ་གཉིས་པོ་ཁོ་ན་ལ་འཇོག་གོ །གཉིས་པ་ལ་སྡོམ་ནི། ཚེ་གསུམ་ཕུང་པོའི་སྐབས་ལ་བཅུ་གཉིས་བཞག །ཡན་ལག་ཐ་སྙད་གཙོ་བོའི་སྒོ་ནས་བསྟན། །ཚེ་གསུམ་ཉིད་ལ་བཞག་པའི་དགོས་པ་བསྟན། །ཉོན་མོངས་གསུམ་དང་རྒྱུ་འབྲས་གཉིས་སུ་བསྡུ། །གཉིས་ཀྱི་རྒྱུ་འབྲས་བསྡུས་ཀྱང་བར་མས་རྟོགས། །སྔ་ཕྱིའི་རྒྱུ་འབྲས་ཡོད་ཀྱང་བཅུ་གཉིས་ངེས། །འབྱུང་དང་བྱུང་བའི་རྟེན་འབྲེལ་ཁྱད་པར་བཤད། །ཅེས་པ་ལྟར་བདུན་ལས། དང་པོ་ནི། ཡན་ལག་བཅུ་གཉིས་ཚང་བ་ནི་འདོད་པ་ཁམས་པའི་བརྫུས་སྐྱེས་མ་ཡིན་པའི་སེམས་ཅན་ཚེ་ཡོངས་སུ་རྫོགས་པ་གཅིག་དབུས་སུ་བྱས་ནས་དེའི་ཚེ་གསུམ་ལ་མ་རིག་པ་དང་། འདུ་བྱེད། རྣམ་ཤེས་ནས་སྲིད་པའི་བར་བརྒྱད། སྐྱེ་རྒ་གཉིས་སོ་སོར་བཞག་དགོས་ཏེ། མཛོད་ལས། སྔོན་དང་ཕྱི་མཐར་གཉིས་གཉིས་དང་། །བར་དུ་བརྒྱད་ཡང་རྫོགས་ལྡན་ལ། །ཞེས་སོ། །འོ་ན་དེ་ཚེ་གསུམ་ལ་བཞག་པའི་ངོ་བོ་གང་ཞེ་ན། མ་རིག་པ་ནི་ཚེ་སྔ་མའི་ལས་ཀུན་ནས་བསློངས་པའི་ཉོན་མོངས་པའི་གནས་སྐབས་ཀྱང་ཕུང་པོ་ལྔའོ། །འདུ་བྱེད་ནི་སྔ་མའི་ཉོན་མོངས་པའི་དབང་གིས་ལས་བསོག་པའི་གནས་སྐབས་ཀྱི་ཕུང་པོ་ལྔའོ། །རྣམ་པར་ཤེས་པ་ནི་ལས་དེས་ཚེ་འདིར་མའི་མངལ་དུ་ཉིང་མཚམས་སྦྱོར་བའི་སྐད་ཅིག་མ་དང་པོའི་གནས་སྐབས་ཀྱི་ཕུང་པོ་ལྔའོ། །མིང་དང་གཟུགས་ནི་ཉིང་མཚམས་སྦྱོར་བའི་སྐད་ཅིག་གཉིས་པ་ནས་སྐྱེ་མཆེད་དྲུག་མ་དོད་པའི་བར་གྱི་གནས་སྐབས་ཀྱི་ཕུང་པོ་ལྔའོ། །སྐྱེ་མཆེད་དྲུག་ནི་སྐྱེ་མཆེད་དྲུག་དོད་པ་ནས་ཡུལ་དབང་རྣམ་ཤེས་གསུམ་མ་འདུས་པའི་བར་གྱི་གནས་སྐབས་ཀྱི་ཕུང་པོ་ལྔའོ། །རེག་པ་ནི་དེ་གསུམ་འདུས་ནས་བདེ་སྡུག་གི་འགྱུར་བ་མི་ཤེས་པའི་བར་གྱི་གནས་སྐབས་ཀྱི་ཕུང་པོ་ལྔའོ། །ཚོར་བ་ནི་བདེ་སྡུག་གི་འགྱུར་བ་ཤེས་ནས་འཁྲིག་པ་སྤྱོད་མི་ཤེས་པའི་བར་གྱི་གནས་སྐབས་ཀྱི་ཕུང་པོ་ལྔའོ། །སྲེད་པ་ནི་འཁྲིག་པ་སྤྱོད་ཤེས་པ་ནས་འཁྲིག་པའི་ལོངས་སྤྱོད་ལ་ཆགས་པ་མ་སྐྱེས་པའི་བར་གྱི་གནས་སྐབས་ཀྱི་ཕུང་པོ་ལྔའོ། །ལེན་པ་ནི་དེ་ལ་ཆགས་པ་སྐྱེས་པ་ནས་ལོངས་སྤྱོད་དེ་ཐོབ་པའི་ཆེད་དུ་ཡོངས་སུ་རྒྱུག་པའི་བར་གྱི་གནས་སྐབས་ཀྱི་ཕུང་པོ་ལྔའོ། །སྲིད་པ་ནི་རྒྱུག་པ་དེ་ཉིད་ཡང་སྲིད་ཕྱི་མ་འབྱུང་བའི་ལས་སོག་པའི་གནས་སྐབས་ཀྱི་ཕུང་པོ་ལྔའོ། །སྐྱེ་བ་ནི་ལས་དེས་ཚེ་ཕྱི་མར་མངལ་དུ་ཉིང་མཚམས་སྦྱོར་བའི་སྐད་ཅིག་དང་པོའི་གནས་སྐབས་ཀྱི་ཕུང་པོ་ལྔའོ། །རྒ་ཤི་ནི་དེའི་སྐད་ཅིག་གཉིས་པ་མིང་གཟུགས་ནས་བཟུང་སྟེ་ཚོར་བའི་བར་གྱི་ཕུང་པོ་ལྔའོ། །དེ་ཡང་འདི་ཉིད་དབུས་སུ་བཞག་པ་ན་སྐྱེ་བ་ལ་རྣམ་ཤེས་དང་། རྒ་ཤི་ལ་མིང་གཟུགས་ནས་ཚོར་བའི་བར་བཞག་སྟེ། གཞན་ལ་ཡང་འགྲེའོ། །གཉིས་པ་ནི་ཐམས་ཅད་ཕུང་པོ་ལྔ་པ་ཡིན་ན། མ་རིག་པ་སོགས་ཅིའི་ཕྱིར་ཡན་ལག་ཏུ་བཞག་ཅེ་ན། དེ་དང་དེའི་གནས་སྐབས་ན་གཙོ་གང་ཆེ་བ་དེའི་མིང་ནས་སྨོས་ཏེ་ཡན་ལག་ཏུ་བཞག་པ་ཡིན་ཏེ། སྔོན་ཉོན་མོངས་པའི་གནས་སྐབས་ན་མ་རིག་པ་གཙོ་ཆེ་བ་དང་། ལས་ཀྱི་གནས་སྐབས་ན་འདུ་བྱེད་སེམས་པ་གཙོ་ཆེ་བ་ལ་སོགས་པའི་དབང་གིས་ཡན་ལག་རེ་རེ་ལ་ཕུང་པོ་ལྔ་ཆར་ཡོད་ཀྱང་མ་རིག་པ་སོགས་དེ་དང་དེའི་མིང་གིས་སྨོས་པའི་ཕྱིར་ཏེ། གཙོ་བོའི་ཕྱིར་ན་ཡན་ལག་བསྒྲགས། །ཞེས་སོ། །གསུམ་པ་ནི། འོ་ན་ཡན་ལག་བཅུ་གཉིས་ཕུང་པོ་ཉིད་ལ་བཞག་ནས། དེ་ཡང་ཚེ་གསུམ་ལ་བཞག་པའི་དགོས་པ་གང་ཞེ་ན། སྔོན་གྱི་མཐར་བདག་བྱུང་ངམ་མ་བྱུང་སྙམ་པའི་རྨོངས་པ་བསལ་ནས་ཕུང་པོའི་རྒྱུན་ཙམ་ཞིག་འབྱུང་གི་བདག་ནི་ཅུང་ཟད་ཙམ་ཡང་མ་བྱུང་བར་ཤེས་པ་དང་། ཕྱི་མའི་ཚེ་བདག་འབྱུང་ངམ་མི་འབྱུང་སྙམ་པའི་རྨོངས་པ་བསལ་ནས་ཕུང་པོའི་རྒྱུན་ཙམ་ཞིག་འབྱུང་གི་བདག་ནི་ཅུང་ཟད་ཀྱང་འབྱུང་བ་མེད་པར་ཤེས་པ་དང་། ད་ལྟར་བདག་གི་ངོ་བོ་ནི་ཇི་ལྟ་བུ་ཞིག་ཡིན་སྙམ་པའི་རྨོངས་པ་བསལ་ནས་ཕུང་པོའི་རྒྱུན་ཙམ་ཞིག་ཡོད་ཀྱི་བདག་ནི་ཅུང་ཟད་ཀྱང་ཡོད་པ་མིན་ནོ་ཞེས་ཤེས་པའི་ཆེད་དུ་ཡིན་ཏེ། བདག་མེད་ཕུང་པོ་ཙམ་ཉིད་དོ། །ཞེས་དང་། སྔོན་དང་ཕྱི་མཐའ་བར་དག་ལ། །རྨོངས་པ་རྣམ་པར་བཟློག་ཕྱིར་རོ། །ཞེས་སོ། །བཞི་པ་ནི། བཅུ་གཉིས་པོ་ཐམས་ཅད་ཉོན་མོངས་པ་གསུམ་དུ་ཡང་འདུས་ཏེ། མ་རིག་པ་དང་། སྲེད་པ་དང་། ལེན་པ་གསུམ་ནི། ཉོན་མོངས་པའི་ཀུན་ནས་ཉོན་མོངས་པ་དང་། འདུ་བྱེད་དང་སྲིད་པ་གཉིས་ནི་ལས་ཀྱི་ཀུན་ནས་ཉོན་མོངས་པ་དང་། ལྷག་མ་བདུན་ནི་གཞིའི་ཀུན་ནས་ཉོན་མོངས་པ་ཡིན་པའི་ཕྱིར་རོ། །ཡང་རྒྱུ་འབྲས་གཉིས་སུ་ཡང་འདུས་ཏེ། ཉོན་མོངས་པ་དང་ལས་ཀྱིས་བསྡུས་པ་ལྔ་ནི་རྒྱུའི་རྟེན་འབྲེལ་དང་། ལྷག་མ་བདུན་ནི་འབྲས་བུའི་རྟེན་འབྲེལ་ཡིན་པའི་ཕྱིར་ཏེ། ཉོན་མོངས་གསུམ་མོ་ལས་གཉིས་སོ། །གཞི་བདུན་དེ་བཞིན་འབྲས་བུ་ཡིན། །ཞེས་སོ། །ལྔ་པ་ནི། ཡན་ལག་བཅུ་གཉིས་ཆ་གཅིག་གིས་བསྡུས་པའི་ཚེ་ཕྱི་མའི་འབྲས་བུའི་གནས་སྐབས་སུ་རྣམ་ཤེས་ནས་ཚོར་བའི་བར་ལྔ་མེད་པར་ཐལ། ཕྱི་མའི་འབྲས་བུའི་ཡན་ལག་རྣམས་སྐྱེ་རྒ་གཉིས་སུ་འདུས་པའི་ཕྱིར་རོ། །ཚེ་སྔ་མའི་རྒྱུའི་གནས་སྐབས་སུ་སྲེད་ལེན་སྲིད་པ་གསུམ་མེད་པར་ཐལ། ཚེ་སྔ་མའི་རྒྱུའི་ཡན་ལག་རྣམས་མ་རིག་པ་དང་འདུ་བྱེད་གཉིས་སུ་འདུས་པའི་ཕྱིར་ཞེ་ན་སྐྱོན་མེད་དེ། ཚེ་འདིའི་འབྲས་བུའི་ཡན་ལག་ལ་ལྔར་ཕྱེ་བའི་རྗེས་སུ་དཔག་པ་ལས་ཕྱི་མའི་འབྲས་བུའི་ཡན་ལག་ལ་ཡང་ཡན་ལག་ལྔ་པོ་དེ་ཡོད་པར་རྟོགས་ནུས་པའི་ཕྱིར་དང་། ཚེ་འདིའི་རྒྱུའི་ཡན་ལག་ལ་གསུམ་དུ་ཕྱེ་བའི་རྗེས་སུ་དཔག་པ་ལས་སྔ་མའི་རྒྱུའི་ཡན་ལག་ལ་ཡང་གསུམ་པོ་དེ་ཡོད་པར་རྟོགས་ནུས་པའི་ཕྱིར་ཏེ། གཉིས་ཀྱི་རྒྱུ་འབྲས་མདོར་བསྡུས་པ། །བར་མའི་རྗེས་སུ་དཔག་པ་ལས། །ཞེས་སོ། །འོ་ན་སྔ་ཕྱི་གཉིས་ཀྱི་རྒྱུ་འབྲས་རྒྱས་པར་མི་ཕྱེ་བའི་རྒྱུ་མཚན་ཅི་ཡིན་སྙམ་ན། དེ་ལྟར་ན་མདོ་ལས། ཡན་ལག་བཅུ་གཉིས་ཆ་གཅིག་གིས་སྔ་མ་སྔ་མའི་རྐྱེན་གྱིས་ཕྱི་མ་ཕྱི་མ་བསྐྱེད་པ་དེ་མི་འགྲུབ་པས་དེ་བསྒྲུབ་པའི་ཆེད་དུ་སྔ་ཕྱི་གཉིས་ཀྱི་རྒྱུ་འབྲས་མདོར་བསྡུས་ནས་བར་མ་རྒྱས་པར་ཕྱེ་བའོ། །དྲུག་པ་ནི་མ་རིག་པ་ལ་རྒྱུ་མེད་ན་འཁོར་བ་ལ་ཐོག་མ་ཡོད་པར་འགྱུར་ཞིང་། ཡོད་ན་ཡན་ལག་བཅུ་གཉིས་སུ་གྲངས་མ་ངེས་པར་འགྱུར་བ་དང་། རྒ་ཤི་ལ་འབྲས་བུ་མེད་ན་འཁོར་བ་ལ་ཐ་མ་ཡོད་པར་འགྱུར་ཞིང་། ཡོད་ན་ཡན་ལག་བཅུ་གཉིས་སུ་གྲངས་མ་ངེས་པར་འགྱུར་རོ་ཞེ་ན། འདིའི་ལན་དུ། ཉོན་མོངས་པ་ལས་ཉོན་མོངས་དང་། །བྱ་བ་ཉིད་དོ་དེ་ལས་གཞི། །དེ་ལས་གཞི་དང་ཉོན་མོངས་སྐྱེ། །འདི་ནི་སྲིད་པའི་ཡན་ལག་ལུགས། །ཞེས་གསུངས་ཏེ། རྒྱས་པར་འོག་ཏུ་འཆད་དོ། །དེ་ཡང་མདོ་ལས་གསུངས་པའི་ཡན་ལག་བཅུ་གཉིས་ཆ་གཅིག་ལ་འཁོར་བས་བསྡུས་པའི་ཡན་ལག་བཅུ་གཉིས་ཆ་གཉིས་ངེས་པར་ཚང་བ་ནི་ཐེག་པ་ཆེ་ཆུང་གི་སྡེ་སྣོད་ཀུན་གྱི་དགོངས་པར་སྣང་སྟེ། འདིར་ཡང་མདོ་ལས་གསུངས་པའི་ཡན་ལག་བཅུ་གཉིས་ཆ་གཅིག་བཞག་པ་ལ་ཡང་ཚེ་གསུམ་ངེས་པར་དགོས་ཤིང་། འཁོར་བས་བསྡུས་པའི་ཡན་ལག་བཅུ་གཉིས་ཆ་གཅིག་ལ་ཚེ་གཉིས་ཀྱིས་ཆོག་པའི་ཕྱིར་ཏེ། ཚེ་སྔ་མའི་མ་རིག་པ་དང་འདུ་བྱེད་ལ་སྲེད་ལེན་སྲིད་པ་གསུམ་ཚང་ཞིང་། ཚེ་འདིའི་རྣམ་ཤེས་ནས་ཚོར་བའི་བར་ལ་སྐྱེ་བ་དང་རྒ་ཤི་གཉིས་ཚང་བས་དེར་ཡང་འཁོར་བའི་རྒྱུ་འབྲས་ཆ་གཅིག་རྫོགས་ལ། ཚེ་འདིའི་སྲེད་ལེན་སྲིད་པ་གསུམ་ལ་མ་རིག་པ་དང་འདུ་བྱེད་གཉིས་ཚང་། ཚེ་ཕྱི་མའི་སྐྱེ་བ་དང་རྒ་ཤི་གཉིས་ལ་རྣམ་ཤེས་ནས་ཚོར་བའི་བར་ལྔ་ཚང་བས་དེར་ཡང་འཁོར་བའི་རྒྱུ་འབྲས་ཆ་གཅིག་རྫོགས་པའི་ཕྱིར་རོ། །འོ་ན་མདོ་ལས་འཁོར་བའི་རྒྱུ་འབྲས་ཆ་གཅིག་ལ་ཡན་ལག་བཅུ་གཉིས་སུ་མི་འཇོག་པར་ཆ་གཉིས་ལ་ཡན་ལག་བཅུ་གཉིས་སུ་བཞག་པའི་དགོས་པ་གང་ཞེ་ན། འདི་ལ་ཚེ་གསུམ་ལ་བཞག་པའི་དགོས་པ་དང་། སྔ་མ་སྔ་མའི་རྐྱེན་གྱིས་ཕྱི་མ་ཕྱི་མ་འབྱུང་བར་རྟོགས་པའི་དགོས་པ་གཉིས་ལས། དང་པོ་ནི་བཤད་ཟིན་ལ། ཕྱི་མ་ནི་ཡན་ལག་བཅུ་གཉིས་ཆ་གཅིག་ལ་མདོ་ལས་ཡན་ལག་བཅུ་གཉིས་སུ་བཞག་ན་སྔ་མ་སྔ་མའི་རྐྱེན་གྱིས་ཕྱི་མ་ཕྱི་མ་འབྱུང་བར་མི་འགྲུབ་སྟེ། དེའི་ཚེ་སྲེད་ལེན་སྲིད་པ་གསུམ་པོ་རྒྱུར་བྱས་ནས་རྣམ་ཤེས་ནས་ཚོར་བའི་བར་འབྲས་བུར་བཞག་དགོས་པས་ཚོར་བའི་རྐྱེན་གྱིས་སྲེད་པ་འབྱུང་བ་མི་འགྲུབ་པའི་ཕྱིར་རོ། །ཆ་གཉིས་ལ་ཡན་ལག་བཅུ་གཉིས་ཆ་གཅིག་ཏུ་བཞག་པའི་ཚེ་ཚོར་བའི་རྐྱེན་གྱིས་སྲེད་པ་འབྱུང་བ་འགྲུབ་སྟེ། དེའི་ཚེ་ཚོར་བ་ནི་ཆ་སྔ་མའི་འབྲས་བུ་ཡིན་ལ། སྲེད་པ་ནི་ཆ་ཕྱི་མའི་རྒྱུ་ཡིན་ཅིང་། མདོ་ལས་འབྱུང་བའི་ཡན་ལག་བཅུ་གཉིས་ཀྱི་ཚེ་གཉིས་ཀ་ཡང་ཆ་གཅིག་ཏུ་རྟོགས་པའི་ཕྱིར་རོ། །གཞན་དག་གིས་ཐེ་ཚོམ་ཡང་ག་ལ་ཞུགས། བདུན་པ་ནི། འོ་ན་མདོ་ལས་རྟེན་ཅིང་འབྲེལ་བར་འབྱུང་བ་དང་བྱུང་བ་ཞེས་གཉིས་གསུངས་ན་དེ་གཉིས་ཀྱི་ཁྱད་པར་གང་ཞེ་ན། མདོའི་དགོངས་པ་ནི་ཡན་ལག་བཅུ་གཉིས་པོ་ཐམས་ཅད་འབྱུང་བ་དང་བྱུང་བ་གཉིས་ཀ་ཡིན་པའི་དོན་ཡིན་ལ། བསྟན་བཅོས་ལས་ནི་རྒྱུའི་ཡན་ལག་ལྔ་པོ་འབྱུང་བ་དང་། འབྲས་བུའི་ཡན་ལག་བདུན་པོ་བྱུང་བར་འཆད་དེ། འདིར་ནི་འབྱུང་བ་རྒྱུ་ཡིན་ཏེ། །བྱུང་བ་འབྲས་བུ་ཡིན་པར་འདོད། །ཅེས་སོ། །བྱེ་བྲག་ཏུ་སྨྲ་བའི་ལུགས་བཤད་ཟིན་ཏོ།། །།གཉིས་པ་མདོ་སྡེ་པའི་ལུགས་ལ་གཉིས་ཏེ། བྱེ་བྲག་ཏུ་སྨྲ་བའི་ལུགས་སུན་ཕྱུང་བ་དང་། རང་གི་འདོད་པ་བཞག་པའོ། །དང་པོ་ནི། ཡན་ལག་བཅུ་གཉིས་པོ་ཐམས་ཅད་ཕུང་པོ་ལྔ་པར་འདོད་པ་མི་འཐད་དེ། ལུང་རིགས་གཉིས་ཀྱིས་གནོད་པའི་ཕྱིར་རོ། །ལུང་ནི་བཅོམ་ལྡན་འདས་ཀྱིས་མདོ་ལས། མ་རིག་པ་གང་ཞེ་ན་སྔོན་གྱི་མཐའ་མི་ཤེས་པ་དང་ཞེས། སེམས་བྱུང་རྨོངས་པ་ལ་མ་རིག་པར་བཤད་པས་ཕུང་པོ་ལྔ་པར་འདོད་པ་མི་འཐད་དོ། །རིགས་པ་ནི་ཡན་ལག་བཅུ་གཉིས་པོ་ཐམས་ཅད་ཕུང་པོ་ལྔ་པ་ཡིན་ན། མིང་གཟུགས་ཁོ་ན་ཕུང་པོ་ལྔ་པར་བཤད་པ་ལ་དགོས་པ་མེད་པར་ཐལ་བའི་ཕྱིར་རོ། །གཉིས་པ་ནི། མ་རིག་པ་ནི། རིག་པ་ཡེ་ཤེས་ཀྱི་འགལ་ཟླ་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པ་སྟེ། རིག་པ་ཡེ་ཤེས་ལས་གཞན་ཙམ་དང་། རིག་པ་ཡེ་ཤེས་བཀག་ཙམ་མ་རིག་པ་ཡིན་ན། མདོ་ལས། མ་རིག་པའི་ཀུན་སྦྱོར་དང་། མ་རིག་པའི་འཆིང་བ་སོགས་གསུངས་པ་དང་འགལ་བའི་ཕྱིར་རོ། །གལ་ཏེ་ཤེས་རབ་ངན་པ་མ་རིག་པ་ཡིན་ནོ་སྙམ་ན་མིན་ཏེ། ཤེས་རབ་ངན་པ་ནི་ལྟ་བ་ཡིན་ལ། ལྟ་བ་ནི་མ་རིག་པ་དེ་དང་མཚུངས་ལྡན་དུ་བཤད་པས་རྣམ་ཤེས་གཅིག་གི་འཁོར་དུ་ཤེས་རབ་ཀྱི་རྫས་གཉིས་འབྱུང་བ་མི་སྲིད་པའི་ཕྱིར་རོ། །ཡང་མདོ་ལས་མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་ཤེས་རབ་ནི་རྣམ་པར་མི་གྲོལ་ལོ་ཞེས་ཤེས་རབ་དེ་མ་རིག་པས་ཉོན་མོངས་པར་བྱ་བ་ཡིན་པའི་ཕྱིར་ན་ཡང་ཤེས་རབ་མ་རིག་པ་མ་ཡིན་ནོ་ཞེས་པ་ནི་མངོན་པ་སྨྲ་བའི་མདོ་སྡེ་པའི་ལུགས་ཡིན་ལ། ཚད་མ་སྨྲ་བའི་མདོ་སྡེ་པ་ནི་འཇིག་ཚོགས་ལ་ལྟ་བ་ཉིད་མ་རིག་པར་འདོད་དེ། རྣམ་འགྲེལ་ལས། ཉེས་པ་རྣམ་པ་ཐམས་ཅད་དག །འཇིག་ཚོགས་ལྟ་ལས་སྐྱེས་པ་ཡིན། །དེ་མ་རིག་དེ་དེ་ལས་ཆགས། །ཞེས་སོ། །འདུ་བྱེད་ནི་ལས་བསྟན་པའི་སྐབས་སུ་འཆད་པར་འགྱུར་རོ། །རྣམ་ཤེས་དང་། གཟུགས་དང་། སྐྱེ་མཆེད་དྲུག་ནི། ཁམས་བསྟན་པར་བཤད་ཟིན་ནས། མིང་ནི་མིང་གཞིའི་ཕུང་པོའོ། །རིག་པ་ནི་གསུམ་འདུས་ནས་ཡུལ་གྱི་འགྱུར་བ་ཡོངས་སུ་གཅོད་པའི་སེམས་བྱུང་སྟེ། མིག་གི་འདུས་ཏེ་རེག་པ་སོགས་དྲུག་གོ །དེ་ཉིད་ཀྱི་དང་པོ་ལྔ་ལ་ཐོགས་པའི་རེག་པ་དང་། ཕྱི་མ་ལ་ཚིག་བླ་དྭགས་པའི་རེག་པ་ཞེས་གཉིས་སུ་ཡང་དབྱེའོ། །ཡང་རེག་པ་ལ་དབྱེ་ན། རིག་པའི་རེག་པ། མ་རིག་པའི་རེག་པ། དེ་ལས་གཞན་པའི་རེག་པ་གསུམ་སྟེ། དང་པོ་ནི་ཟག་མེད་ཀྱི་རེག་པ། གཉིས་པ་ནི་ཉོན་མོངས་ཅན་གྱི་རེག་པ། གསུམ་པ་ནི་དགེ་བ་ཟག་བཅས་དང་། མ་བསྒྲིབས་པའི་རེག་པའོ། །ཉོན་མོངས་ཅན་གྱི་རེག་པ་ལ་གནོད་སེམས་དང་མཚུངས་ལྡན་གྱི་རེག་པ་དང་། རྗེས་སུ་ཆགས་པ་དང་མཚུངས་ལྡན་གྱི་རེག་པ་གཉིས་སོ། །ཡང་རེག་པ་ལ་བདེ་བ་སྡུག་བསྔལ་བཏང་སྙོམས་མྱོང་འགྱུར་གྱི་རེག་པ་དང་གསུམ་སྟེ། དེ་ལྟར་དབྱེ་སྒོ་ལྔ་ལས། རྣམ་གྲངས་ཀྱི་སྒོ་ནས་བཅུ་དྲུག་ཏུ་བཞེད་དོ། །ཚོར་བ་ནི་རེག་པས་བཅད་པ་ལྟར་རྣམ་སྨིན་ཉམས་སུ་མྱོང་བའི་སེམས་བྱུང་སྟེ། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་སོགས་དྲུག་གོ །སྲེད་པ་དང་ལེན་པ་གཉིས་ནི་ཕྲ་རྒྱས་བསྟན་པའི་སྐབས་སུ་འཆད་པར་འགྱུར་རོ། །སྲིད་པ་ནི་འདུ་བྱེད་ཀྱི་གནས་སྐབས་ལ་བཏགས་པའི་བཏགས་ཡོད་དོ། །སྐྱེ་བ་དང་རྒ་ཤི་གཉིས་ནི་རྣམ་པར་ཤེས་པ་ནས་ཚོར་བའི་བར་ལ་བཏགས་པའི་བཏགས་ཡོད་དོ། །ཉོན་མོངས་པ་གསུམ་དུ་བསྡུ་བ་སོགས་ཕལ་ཆེར་ནི་སྔ་མ་དང་འདྲ་ལ། རྒྱུ་འབྲས་དུས་བསྡུས་པའི་མངོན་པ་ཀུན་ལས་བཏུས་བཞིན་དུ་བཞེད་པར་མངོན་ནོ། །མདོ་སྡེ་པའི་ལུགས་བཤད་ཟིན་ཏོ།། །།གསུམ་པ་སེམས་ཙམ་པའི་ལུགས་ལ། རྟེན་འབྲེལ་གང་ལ་འཇོག་པའི་གཞི་ངོས་བཟུང་བ། དེ་ལ་བཞག་པའི་རྟེན་འབྲེལ་གྱི་རབ་དབྱེ་བཤད་པ། སྐབས་སུ་བབ་པའི་རྟེན་འབྲེལ་བྱེ་བྲག་ཏུ་བཤད་པ་དང་གསུམ་ལས། དང་པོ་ནི། འདིའི་ལུགས་ལ་རྟེན་འབྲེལ་གྱི་རྣམ་གཞག་འདུས་བྱས་ཐམས་ཅད་ལ་བརྩི་ཡིས། འདུས་མ་བྱས་ལ་ནི་མི་རྩི་སྟེ། དེ་ལ་རྟེན་འབྲེལ་གྱི་མཚན་ཉིད་གསུམ་པོ་དེ་མ་ཚང་བའི་ཕྱིར། གསུམ་གང་ཞེ་ན། གཡོ་བ་མེད་པའི་རྐྱེན་གྱིས་བྱུང་བ། མི་རྟག་པའི་རྐྱེན་གྱིས་བྱུང་བ། ནུས་པའི་རྐྱེན་གྱིས་བྱུང་བའོ། །དེ་གསུམ་གྱི་ངོས་འཛིན་རིམ་པ་བཞིན། ཕྱིའི་རྟེན་འབྲེལ་མྱུ་གུ་སོགས་དང་། ནང་གི་རྟེན་འབྲེལ་མ་རིག་སོགས་རྣམས་ཆོས་ཅན། གཡོ་བ་མེད་པའི་རྐྱེན་གྱིས་བྱུང་བ་ཞེས་བརྗོད་པའི་རྒྱུ་མཚན་ཡོད་དེ། རྒྱུ་རྐྱེན་དེ་དང་དེ་ཚོགས་པ་ལས་འབྲས་བུ་འབྱུང་བ་ཡིན་གྱི་བདག་གིས་འབྲས་བུ་འདི་བསྐྱེད་པར་བྱའོ་སྙམ་པའི་བློ་སྔོན་དུ་བཏང་བའི་གཡོ་བ་མེད་པའི་ཕྱིར། འདི་ལ་དགོངས་ནས། བཅོམ་ལྡན་འདས་ཀྱིས་འདི་ཡོད་པས་འདི་འབྱུང་ཞེས་པ་དང་། ཡང་དེ་གཉིས་ཆོས་ཅན། མི་རྟག་པའི་རྐྱེན་གྱིས་བྱུང་བ་ཞེས་བརྗོད་པའི་རྒྱུ་མཚན་ཡོད་དེ། གཡོ་བ་མེད་པ་ལས་བྱུང་དུ་ཟིན་ཀྱང་རྟག་པས་འབྲས་བུ་བསྐྱེད་ན་འབྲས་བུ་ཐམས་ཅད་ཅིག་ཆར་བསྐྱེད་པར་ཐལ་བའི་ཕྱིར་རོ། །འདི་ལ་དགོངས་ནས་བཅོམ་ལྡན་འདས་ཀྱིས་འདི་སྐྱེས་པའི་ཕྱིར་འདི་སྐྱེ་ཞེས་གསུངས་སོ། །ཡང་དེ་ཉིད་ཆོས་ཅན། ནུས་པའི་རྐྱེན་གྱིས་བྱུང་བ་ཞེས་བརྗོད་པའི་རྒྱུ་མཚན་ཡོད་དེ། གཡོ་བ་མེད་པ་དང་། མི་རྟག་ཏུ་ཟིན་ཀྱང་རྐྱེན་གང་ཡང་རུང་བས་འབྲས་བུ་ཐམས་ཅད་བསྐྱེད་པ་མིན་པའི་ཕྱིར་དང་། བསྐྱེད་པར་ནུས་པའི་རྐྱེན་གྱིས་འབྲས་བུ་བསྐྱེད་པ་ཡིན་པའི་ཕྱིར། འདི་ལ་དགོངས་ནས། བཅོམ་ལྡན་འདས་ཀྱིས་མ་རིག་པའི་རྐྱེན་གྱིས་འདུ་བྱེད་རྣམས་སོ་ཞེས་གསུངས་སོ། །གཉིས་པ་ལ་གཉིས་ཏེ། ཀུན་ནས་ཉོན་མོངས་ཀྱི་དང་། རྣམ་བྱང་གི་རྟེན་འབྲེལ་ལོ། །དང་པོ་ལ་ནང་གི་དང་། ཕྱིའི་རྟེན་འབྲེལ་གཉིས། དང་པོ་ལ། བརྟེན་པའི་དབང་དུ་བྱས་པ། རྟེན་གྱི་དབང་དུ་བྱས་པ། གྲུབ་ཟིན་གནས་པའི་དབང་དུ་བྱས་པ། མ་གྲུབ་པ་གྲུབ་པའི་དབང་དུ་བྱས་པ་དང་བཞི་ནི་རིམ་པ་བཞིན། མིག་དབང་གཟུགས་ཅན་པ་ལས་མིག་གི་རྣམ་པར་ཤེས་པ་འབྱུང་བ་ལྟ་བུ་དང་། མ་རིག་པའི་རྐྱེན་གྱིས་འདུ་བྱེད་འབྱུང་བ་ནས་སྐྱེ་བའི་རྐྱེན་གྱིས་རྒ་ཤི་འབྱུང་བའི་བར་ལྟ་བུ་དང་། ཁམས་གསུམ་གྱི་སེམས་ཅན་རྣམས་ཟས་ལ་བརྟེན་ནས་གནས་པ་ལྟ་བུ་དང་། ལེགས་སྤྱད་དང་ཉེས་སྤྱད་ལ་བརྟེན་ནས་བདེ་འགྲོ་དང་། ངན་འགྲོ་སོ་སོར་འགྲུབ་པ་ལྟ་བུའོ། །གཉིས་པ་ལ་བརྟེན་པའི་དབང་དུ་བྱས་པ་དང་། རྟེན་གྱི་དབང་དུ་བྱས་པ་གཉིས། དང་པོ་ནི། ས་བོན་ལས་མྱུ་གུ། དེ་ལས་སྡོང་བུ་འབྱུང་བ་ལ་སོགས་པ་ལྟ་བུའོ། །ཕྱི་མ་ནི་སེམས་ཅན་རྣམས་ཀྱི་སྤྱི་མཐུན་གྱི་ལས་ཀྱིས་སྣོད་ཀྱི་འཇིག་རྟེན་ཆགས་པ་དང་། འཇིག་པ་ལྟ་བུའོ། །གཉིས་པ་རྣམ་བྱང་གི་རྟེན་འབྲེལ་ལ་བརྟེན་པའི་དབང་དུ་བྱས་པ་དང་། རྟེན་གྱི་དབང་དུ་བྱས་པ་གཉིས། དང་པོ་ནི། ཚོགས་ལམ་ལས་སྦྱོར་ལམ། དེ་ལས་མཐོང་ལམ་འབྱུང་བ་ལྟ་བུའོ། །གཉིས་པ་ནི་བསམ་གཏན་ལ་བརྟེན་ནས་སྤྱན་དང་མངོན་ཤེས་སོགས་ཀྱི་ཡོན་ཏན་ཁྱད་པར་ཅན་འབྱུང་བ་ལྟ་བུའོ། །གསུམ་པ་ལ་དགུ་སྟེ། མཚན་ཉིད། ཡན་ལག་རྣམ་པར་དབྱེ་བ། ཡན་ལག་མདོར་བསྡུ་བ། ཡན་ལག་རྐྱེན་ཉིད་དུ་རྣམ་པར་བཞག་པ། ཡན་ལག་གི་ལས་བསྟན་པ། ཡན་ལག་ཀུན་ནས་ཉོན་མོངས་པར་བསྡུ་བ། རྟེན་འབྲེལ་གྱི་སྒྲ་དོན། ཟབ་མོ་རྟོག་པར་དཀའ་བའི་ཚུལ། ལུགས་མཐུན་དང་ལུགས་བཟློག་ཏུ་སྒོམ་པའི་ཚུལ་ལོ། །དང་པོ་ནི། ཁྱད་པར་གསུམ་དང་ལྡན་པའི་རྐྱེན་ལས་བྱུང་བ་ནི་རྟེན་ཅིང་འབྲེལ་བར་འབྱུང་བའི་མཚན་ཉིད་དོ། །ཁྱད་པར་གསུམ་པོ་གང་ཞེ་ན། གཡོ་བ་མེད་པ་ལ་སོགས་པའོ། །དེ་ལ་དང་པོས་ནི། སྔོན་གྱི་མཐའ་ལ་རྨོངས་པ་སེལ་ཏེ། ཕྱི་ནང་གི་འབྲས་བུ་འདི་དག་སྔོན་དབང་ཕྱུག་ལ་སོགས་པ་བྱེད་པ་པོ་འགའ་ཞིག་གིས་བློ་སྔོན་དུ་བཏང་སྟེ་བྱས་སོ་སྙམ་པའི་དོགས་པ་བཟློག་པར་བྱེད་པའི་ཕྱིར་རོ། །གཉིས་པས་ནི་ད་ལྟར་གྱི་རང་གི་ངོ་བོ་ལ་རྨོངས་པ་སེལ་ཏེ། གཙོ་བོ་ལ་སོགས་པ་རྟག་པའི་རྒྱུ་ལས་བྱུང་བས་རང་གི་ངོ་བོ་སྐད་ཅིག་གིས་སྐྱེ་འགག་མི་བྱེད་པའི་རྟག་པར་སྒྲོ་འདོགས་པ་བཟློག་པའི་ཕྱིར་ཏེ། རྒྱུ་རྐྱེན་མི་རྟག་པ་ལས་སྐྱེས་པའི་འབྲས་བུ་རྟག་པའི་གོ་སྐབས་མི་འཐད་པའི་ཕྱིར་རོ། །གསུམ་པས་ནི། ཕྱི་མའི་མཐའ་ལ་རྨོངས་པ་སེལ་ཏེ། ཕྱུགས་ཀྱི་མཆོད་སྦྱིན་ལ་སོགས་པ་མི་མཐུན་པའི་རྒྱུ་ལས་མ་འོངས་པ་ན་མཐོ་རིས་ཀྱི་བདེ་བ་ལ་སོགས་པའི་མི་མཐུན་པའི་འབྲས་བུ་འབྱུང་བར་སྨྲ་བ་སེལ་བའི་ཕྱིར་ཏེ། རྒྱུ་དང་རྗེས་སུ་མཐུན་པར་འབྲས་བུ་འབྱུང་གི་མི་མཐུན་པའི་རྒྱུ་ལས་མི་མཐུན་པའི་འབྲས་བུ་མི་འབྱུང་བའི་ཕྱིར་རོ། །གཉིས་པ་དང་། གསུམ་པ་དང་། དྲུག་པ་ནི་དབུ་མ་པའི་སྐབས་སུ་འཆད་པར་འགྱུར་རོ། །བཞི་པ་ནི། ཀུན་ལས་བཏུས་ལས། ཡན་ལག་རྐྱེན་ཉིད་དུ་རྣམ་པར་བཞག་པ་ཇི་ལྟ་བུ་ཞེ་ན། བག་ཆགས་དང་། ཤུགས་དང་། ཡིད་ལ་བྱེད་པ་དང་། ལྷན་ཅིག་འབྱུང་བས་ཀྱང་ཡན་ལག་རྐྱེན་ཉིད་དུ་རྣམ་པར་བཞག་པར་རིག་པར་བྱ་སྟེ། ཅི་རིགས་སུ་སྦྱར་རོ། །ཞེས་གསུངས་པ་དེའི་དོན་ནི། བག་ཆགས་ཀྱིས་རྒྱུའི་རྐྱེན། ཤུགས་ཀྱིས་དེ་མ་ཐག་རྐྱེན། ཡིད་ལ་བྱེད་པས་དམིགས་རྐྱེན། ལྷན་ཅིག་འབྱུང་བས་བདག་རྐྱེན་བསྟན་པ་ཡིན་པས་མ་རིག་པ་ལ་འདུ་བྱེད་ཀྱི་རྒྱུའི་རྐྱེན་ཞེས་བརྗོད་པའི་རྒྱུ་མཚན་ཡོད་དེ། མ་རིག་པས་བག་ཆགས་བསྒོས་པའི་སེམས་རྒྱུད་ལ་ཡོད་པའི་འདུ་བྱེད་ཀྱིས་ཡང་སྲིད་འཕེན་གྱི་གཞན་གྱིས་མིན་པའི་ཕྱིར། དེ་ལ་དེའི་དེ་མ་ཐག་རྐྱེན་ཞེས་བརྗོད་པའི་རྒྱུ་མཚན་ཡོད་དེ། མ་རིག་པའི་དབང་གིས་འདུ་བྱེད་སྔ་མ་ལས་དེ་ཕྱི་མ་འབྱུང་བ་ཡིན་པའི་ཕྱིར། དེ་ལ་དེའི་དམིགས་རྐྱེན་ཞེས་བརྗོད་པའི་རྒྱུ་མཚན་ཡོད་དེ། མ་རིག་པ་དེའི་དབང་གིས་ཚུལ་བཞིན་མིན་པ་ཡིད་ལ་བྱེད་པའི་སྒོ་ནས་ཡུལ་ལ་ཕྱིན་ཅི་ལོག་ཏུ་དམིགས་པའི་ཕྱིར། དེ་ལ་དེའི་བདག་རྐྱེན་ཞེས་བརྗོད་པའི་རྒྱུ་མཚན་ཡོད་དེ། མ་རིག་པའི་དབང་གིས་དེ་དང་ལྷན་ཅིག་ཏུ་འབྱུང་བའི་སེམས་བྱུང་རྣམས་ཡུལ་ལ་མངོན་པར་འདུ་བྱེད་པ་ཡིན་པའི་ཕྱིར། ཅི་རིགས་ཞེས་པའི་དོན་ནི། རིག་པས་རིག་པའི་རྐྱེན་བཞི་ཀ་དང་། དེས་བེམ་པོའི་རྐྱེན་བྱས་ན་བདག་རྐྱེན་ཁོ་ན། བེམ་པོས་བེམ་པོའི་རྐྱེན་བྱས་ན། རྒྱུའི་རྐྱེན་དང་། བདག་རྐྱེན་གཉིས། བེམ་པོས་རིག་པའི་རྐྱེན་བྱས་ན་དམིགས་རྐྱེན་དང་བདག་རྐྱེན་གཉིས་བྱེད་དོ། །དེ་དག་ཀྱང་དངོས་བཏགས་མ་ཕྱེ་བའི་དབང་དུ་བྱས་པ་ཡིན་གྱི། ཕྱེ་ན། མ་རིག་པས་འདུ་བྱེད་ཀྱི་རྐྱེན་བྱེད་པའི་ཚེ་ན་དང་པོ་གསུམ་བཏགས་པ་བ་ཡིན་ཞིང་། ཕྱི་མ་ཁོ་ན་མཚན་ཉིད་པ་ཡིན་ནོ། །ཡང་། སའི་དངོས་གཞི་ལས། ཡན་ལག་བཅུ་གཉིས་པོ་སྔ་མ་སྔ་མས་ཕྱི་མ་ཕྱི་མའི་རྒྱུའི་རྐྱེན་བྱེད་པར་མི་སྲིད་དེ། རྒྱུའི་རྐྱེན་གྱི་དོན་ནི། རང་རང་གི་ས་བོན་གྱིས་སོ་སོར་བྱེ་བ་ཡིན་པའི་ཕྱིར། དེས་ན་བདག་རྐྱེན་ཁོ་ན་ཡིན་ཞེས་གསུངས་པའི་དོན་ནི་རྒྱུའི་རྐྱེན་མཚན་ཉིད་པ་ལ་དགོངས་ཏེ། འདི་པའི་ལུགས་ཀྱི་རྒྱུའི་རྐྱེན་མཚན་ཉིད་པ་ཡིན་ན། ཀུན་གཞིའི་རྣམ་ཤེས་ཀྱི་སྟེང་གི་རང་རང་གི་ས་བོན་ཡིན་དགོས་པ་ལ། ཡན་ལག་བཅུ་གཉིས་པོ་དེའི་སྟེང་གི་ས་བོན་མིན་པའི་ཕྱིར། བསྡུ་བ་ལས། དམིགས་རྐྱེན་དང་བདག་རྐྱེན་གཉིས་གསུངས་པ་ནི་རིག་པས་བེམ་པོའི་རྐྱེན་དང་། བེམ་པོས་རིག་པའི་རྐྱེན་བྱེད་པ་ལ་དགོངས་སོ། །དབུས་མཐའ་དང་ཐེག་བསྡུས་ལས། བདག་རྐྱེན་ཁོ་ནར་གསུངས་པ་ནི་རྐྱེན་མཚན་ཉིད་པ་ལ་དགོངས་སོ། །ལྔ་པ་ལ། ཡན་ལག་དང་པོ་བཅུ་གཅིག་གིས་གང་ཟག་དང་ཆོས་ལ་བྱ་བ་བྱེད་དེ། དེ་ཡང་མ་རིག་པས་གཉིས་བྱེད་དེ། སྲིད་པ་ལ་སེམས་ཅན་རྣམས་རྨོངས་པར་བྱེད་པ་དང་། འདུ་བྱེད་ཀྱི་རྐྱེན་བྱེད་པའི་ཕྱིར། འདུ་བྱེད་ཀྱིས་གཉིས་བྱེད་དེ། དེས་འགྲོ་བ་རྣམས་སུ་སེམས་ཅན་རྣམས་འབྱེད་པར་བྱེད་པ་དང་། རྣམ་པར་ཤེས་པའི་བག་ཆགས་ཀྱི་རྐྱེན་བྱེད་པའི་ཕྱིར། རྣམ་པར་ཤེས་པས་གཉིས་བྱེད་དེ། སེམས་ཅན་རྣམས་ཀྱི་ལས་ཀྱི་འཆིང་བ་འཛིན་པ་དང་། མིང་གཟུགས་ཀྱི་རྐྱེན་བྱེད་པའི་ཕྱིར། དེ་བཞིན་དུ་མིང་དང་གཟུགས་ཀྱིས་སེམས་ཅན་རྣམས་ལུས་ལེན་དུ་འཇུག་པ་དང་། སྐྱེ་མཆེད་དྲུག་གི་རྐྱེན་བྱེད། སྐྱེ་མཆེད་དྲུག་གིས་སེམས་ཅན་རྣམས་ལུས་རྫོགས་པར་ལེན་པ་དང་རེག་པའི་རྐྱེན་བྱེད། རེག་པས་སེམས་ཅན་རྣམས་ཡུལ་གྱི་ལོངས་སྤྱོད་ལ་སྦྱོར་བ་དང་ཚོར་བའི་རྐྱེན་བྱེད། ཚོར་བས་སེམས་ཅན་རྣམས་སྐྱེ་བའི་ལོངས་སྤྱོད་ལ་སྦྱོར་བ་དང་། སྲེད་པའི་རྐྱེན་བྱེད། སྲེད་པས་སེམས་ཅན་རྣམས་ཀྱི་སྐྱེ་བ་མངོན་པར་འགྲུབ་པ་དང་ལེན་པའི་རྐྱེན་བྱེད། ལེན་པས་སེམས་ཅན་རྣམས་ཀྱི་རྣམ་པར་ཤེས་པ་ཉེ་བར་ལེན་པ་དང་བཅས་པར་བྱེད་པ་དང་། སྲིད་པའི་རྐྱེན་བྱེད། སྲིད་པས་སེམས་ཅན་རྣམས་ཡང་སྲིད་ཕྱི་མ་ལ་མངོན་དུ་ཕྱོགས་པ་དང་། སྐྱེ་བའི་རྐྱེན་བྱེད། སྐྱེ་བས་སེམས་ཅན་རྣམས་མིང་གཟུགས་ནས་ཚོར་བའི་བར་རིམ་གྱིས་འགྲུབ་པ་དང་། རྒ་ཤིའི་རྐྱེན་བྱེད། རྒ་ཤིས་ཡང་དང་ཡང་དུ་ན་ཚོད་འགྱུར་བར་བྱེད་པས་གང་ཟག་ལ་བྱ་བ་བྱེད་ཅིང་། འཁོར་བས་བསྡུས་པའི་རྟེན་འབྲེལ་ཆ་གཅིག་ལ་ཆོས་ལ་བྱ་བ་བྱེད་པ་ནི་མེད་ལ། མདོ་ལས་བྱུང་བའི་ཆ་གཅིག་གི་དབང་དུ་བྱས་ན་སྲེད་པའི་རྐྱེན་བྱེད་པས་ཆོས་ལ་བྱ་བ་བྱེད་པ་ཡང་ཡོད་དོ། །བདུན་པ་ནི། རྟེན་ཅིང་འབྲེལ་བར་འབྱུང་བ་ཞེས་པའི་སྒྲས་བྱེད་པ་པོ་མེད་པའི་དོན་བསྟན་ཏེ། དབང་ཕྱུག་ལ་སོགས་པའི་བྱེད་པ་པོ་མེད་པར་གཡོ་བ་མེད་པའི་རྐྱེན་ཙམ་ལས་བྱུང་བར་བསྟན་པའི་ཕྱིར། འོ་ན་རྒྱུ་མེད་པར་འགྱུར་རོ་ཞེ་ན། རྒྱུ་དང་བཅས་པར་ཡང་བསྟན་ཏེ། མ་རིག་པ་ལས་འདུ་བྱེད་སོགས་ཡན་ལག་སྔ་མ་ལས་ཕྱི་མ་འབྱུང་བར་བསྟན་པའི་ཕྱིར། བདག་མེད་པར་ཡང་བསྟན་ཏེ། ཕུང་པོ་ལས་གཞན་པའི་གང་ཟག་མེད་པར་བསྟན་པའི་ཕྱིར། གཞན་དབང་ཙམ་ཡང་བསྟན་ཏེ། རྒྱུ་རྐྱེན་གཞན་གྱི་དབང་གིས་བྱུང་བར་བསྟན་པའི་ཕྱིར། གཡོ་བ་མེད་པར་ཡང་བསྟན་ཏེ། རྒྱུ་རྐྱེན་ཚོགས་པ་ལས་འབྲས་བུ་འབྱུང་གི་འདི་བསྐྱེད་པར་བྱའོ་སྙམ་པའི་བློ་སྔོན་དུ་བཏང་བའི་གཡོ་བ་མེད་པར་བསྟན་པའི་ཕྱིར། མི་རྟག་པར་ཡང་བསྟན་ཏེ། ཐེར་ཟུག་ཏུ་མི་གནས་པར་བསྟན་པའི་ཕྱིར། སྐད་ཅིག་མར་ཡང་བསྟན་ཏེ། སྐྱེས་པའི་དུས་ནས་ཕ་རོལ་ཏུ་མི་གནས་པར་བསྟན་པའི་ཕྱིར། འོ་ན་རྒྱུ་འབྲས་རྒྱུན་ཆད་པར་འགྱུར་རོ་ཞེ་ན། མིན་ཏེ། རྒྱུ་ཞིག་པའི་སྐད་ཅིག་ཕྱིར་ལོགས་ན་འབྲས་བུ་ཡོད་པས་རྒྱུ་དང་འབྲས་བུ་རྒྱུན་མི་ཆད་པའི་ཕྱིར། འོ་ན་རྒྱུ་འབྲས་ངེས་པ་མེད་པར་འགྱུར་རོ་ཞེ་ན། མ་ཡིན་ཏེ། སྦྱིན་པ་ལས་ལོངས་སྤྱོད། སེར་སྣ་ལས་དབུལ་བ་སོགས་རྒྱུ་དང་འབྲས་བུ་མཐུན་པའི་དོན་ཡིན་པའི་ཕྱིར། འོ་ན་རྒྱུ་འབྲས་གྲངས་མཉམ་པར་འགྱུར་རོ་ཞེ་ན། མ་ཡིན་ཏེ། རྒྱུ་དུ་མ་ལས་འབྲས་བུ་གཅིག་འབྱུང་བ་དང་། རྒྱུ་གཅིག་ལས་འབྲས་བུ་དུ་མ་འབྱུང་བ་ཡོད་པས་རྒྱུ་དང་འབྲས་བུ་སྣ་ཚོགས་པའི་དོན་ཡིན་པའི་ཕྱིར། འོ་ན་ལས་མ་བྱས་པ་དང་ཕྲད་པར་འགྱུར་རོ་ཞེ་ན། མ་ཡིན་ཏེ། རང་རྒྱུད་ལ་གང་བསགས་པའི་ལས་ཀྱི་འབྲས་བུ་དེ་མྱོང་བར་འགྱུར་བས་རྒྱུ་དང་འབྲས་བུ་སོ་སོར་ངེས་པའི་དོན་ཡིན་པའི་ཕྱིར། འདི་དག་ཐམས་ཅད་ཀྱང་རྟེན་ཅིང་འབྲེལ་བར་འབྱུང་བ་ཞེས་པའི་ཚིག་གི་ནུས་པ་ལ་ཚང་བའི་དོན་ནོ། །བརྒྱད་པ་ལ་ལྔ་ལས། ཕྱི་ནང་གི་རྟེན་ཅིང་འབྲེལ་བར་འབྱུང་བ་འདི་དག་ཆོས་ཅན། རྒྱུས་ཟབ་པ་ཡིན་ཏེ། བྱེད་པ་པོ་མེད་པ་དང་རྒྱུ་དང་བཅས་པའི་དོན་གཉིས་ཀྱིས་རྒྱུ་མེད་པ་དང་། མི་མཐུན་པའི་རྒྱུ་ལས་བྱུང་བ་སྤངས་པའི་ཕྱིར། རང་གི་མཚན་ཉིད་ཀྱིས་ཟབ་སྟེ། བདག་ཏུ་སྣང་ཡང་བདག་ཏུ་མེད་པའི་དོན་ཅན་ཡིན་པའི་ཕྱིར། སྐྱེ་བས་ཟབ་པ་ཡིན་ཏེ། གཞན་གྱི་དབང་དང་སྐྱེ་བ་མེད་པའི་དོན་གཉིས་ཀྱིས་རྐྱེན་རྣམས་ལས་འབྲས་བུ་འབྱུང་ཡང་དེ་དག་གི་བློ་སྔོན་དུ་བཏང་ནས་མ་བྱས་པའི་ཕྱིར་རོ། །གནས་པས་ཟབ་པ་ཡིན་ཏེ། མི་རྟག་པ་དང་སྐད་ཅིག་མའི་དོན་གཉིས་ཀྱིས་དོན་དམ་པར་གནས་པ་མེད་བཞིན་དུ་ཐ་སྙད་དུ་རྒྱུན་གནས་པར་སྣང་བ་ཡིན་པའི་ཕྱིར། འབྱུང་བས་ཟབ་པ་ཡིན་ཏེ། རྒྱུ་དང་འབྲས་བུ་རྒྱུན་མི་ཆད་པ་སོགས་བཞིས་རྒྱུ་ལས་འབྲས་བུ་འབྱུང་བའི་ཚུལ་ཤིན་ཏུ་རྟོགས་པར་དཀའ་བའི་ཕྱིར་རོ། །ཡང་ཚུལ་གཞན་གྱི་སྒོ་ནས་ཀྱང་ཟབ་པར་ལྟ་སྟེ། འདི་ལྟར་རང་གི་ངོ་བོ་སྐད་ཅིག་ཀྱང་མི་གནས་ལ་རྒྱུན་གནས་པར་ཡང་དམིགས། བློ་སྔོན་དུ་བཏང་བའི་གཡོ་བ་མེད་པར་ནུས་པའི་རྐྱེན་ལས་རྗེས་སུ་དཔག་པའི་འབྲས་བུ་འབྱུང་བར་ཡང་དམིགས། དོན་དམ་པར་སེམས་ཅན་མེད་ཀྱང་ཐ་སྙད་དུ་སེམས་ཅན་དུ་གདགས་པར་ཡང་དམིགས། ལས་བྱེད་པ་པོ་མེད་ཀྱང་བྱས་པའི་ལས་ཀྱི་འབྲས་བུ་ཆུད་མི་ཟ་བར་ཡང་དམིགས། མཐའ་བཞི་དང་བྲལ་བའི་རྐྱེན་ལས་སྐྱེས་པ་དེའི་ཕྱིར་ཟབ་པར་ཡང་ལྟའོ། །ཅིའི་ཕྱིར་མཐའ་བཞི་དང་བྲལ་ཞེ་ན། ཕྱི་ནང་གི་རྟེན་འབྲེལ་རྣམས་ཆོས་ཅན། བདག་གིས་མ་བྱས་ཏེ། རང་ཉིད་རང་ལ་བྱེད་པ་འགལ་བའི་ཕྱིར། གཞན་ལས་སྐྱེ་བ་མ་ཡིན་ཏེ། རིགས་མི་མཐུན་པ་རྒྱུ་འབྲས་སུ་མི་རུང་བའི་ཕྱིར་དང་། རིགས་མཐུན་པའི་རྒྱུ་རྐྱེན་རྣམས་ནི་གཞན་དུ་མི་འཐད་པའི་ཕྱིར་རོ། །གཉིས་ཀ་ལས་ཀྱང་མ་ཡིན་ཏེ། ཉེས་པ་གཉིས་ཀར་ཡོད་པར་ཐལ་བའི་ཕྱིར་རོ། །རྒྱུ་མེད་པ་ལས་བྱུང་བ་མ་ཡིན་ཏེ། དུས་རྟག་ཏུ་སྐྱེ་བའམ་གཏན་མི་སྐྱེ་བར་ཐལ་བའི་ཕྱིར་རོ། །འདི་དག་ནི་དངོས་པོར་སྨྲ་བ་རྣམས་ཀྱིས་མཐའ་བཞིའི་སྐྱེ་བ་འགོག་པའི་ཚུལ་ཡིན་གྱིས་དབུ་མ་པ་རྣམས་ཀྱིས་གཞན་ལས་སྐྱེ་བ་མིན་ཏེ། འབྲས་བུ་རྒྱུ་ལས་གཞན་མིན་པའི་ཕྱིར། གཞན་ཡིན་ན་མི་ལྟོས་པར་ཐལ་བའི་ཕྱིར་རོ། །ཞེས་འཆད་པས། དངོས་སྨྲ་བ་རྣམས་ཀྱིས་གཞན་སྐྱེ་ཇི་ལྟར་བཀག་ཀྱང་གཞན་སྐྱེ་ཁས་བླངས་པ་ལས་མ་འདས་པར་འཆད་དོ། །དགུ་པ་ནི། མ་རིག་པའི་རྐྱེན་གྱིས་འདུ་བྱེད་འབྱུང་ཞེས་པ་ནས་སྐྱེ་བའི་རྐྱེན་གྱིས་རྒ་ཤི་འབྱུང་ཞེས་པའི་བར་གྱི་སྒོམ་ཚུལ་ནི་ཀུན་ནས་ཉོན་མོངས་ཀྱི་རྟེན་འབྲེལ་ལུགས་མཐུན་དུ་སྒོམ་ཚུལ་ཡིན་ཏེ། རྣལ་འབྱོར་པའི་བློ་ལ་སྣང་བའི་རྟེན་འབྲེལ་གྱི་རིམ་པ་དང་། ཀུན་ནས་ཉོན་མོངས་ཀྱི་རྟེན་འབྲེལ་གྱི་རིམ་པ་མཐུན་པའི་སྒོམ་ཚུལ་ཡིན་པའི་ཕྱིར། འདིའི་དགོས་པ་ནི་ལས་ཉོན་གྱི་འབྲས་བུ་མཐར་ཐུག་པ་སྡུག་བསྔལ་དུ་རྟོགས་པའི་ཆེད་ཡིན་ནོ། །རྒ་ཤི་གང་ལས་བྱུང་སྐྱེ་བ་ལས་བྱུང་ཞེས་པ་ནས་འདུ་བྱེད་གང་ལས་བྱུང་མ་རིག་པ་ལས་བྱུང་ཞེས་པའི་བར་གྱི་སྒོམ་ཚུལ་ནི་ཀུན་ནས་ཉོན་མོངས་ཀྱི་རྟེན་འབྲེལ་ལུགས་བཟློག་ཏུ་སྒོམ་པའི་ཚུལ་ཡིན་ཏེ། རྣལ་འབྱོར་པའི་བློ་ལ་སྣང་བའི་རྟེན་འབྲེལ་གྱི་གོ་རིམ་དང་། ཀུན་ནས་ཉོན་མོངས་ཀྱི་རྟེན་འབྲེལ་སྐྱེ་བའི་རིམ་པ་མི་མཐུན་པའི་སྒོམ་ཚུལ་ཡིན་པའི་ཕྱིར། འདིའི་དགོས་པ་ནི་སྡུག་བསྔལ་གྱི་རྩ་བ་མཐར་ཐུག་པ་མ་རིག་པར་རྟོག་པའི་ཆེད་ཡིན་ནོ། །མ་རིག་པ་འགགས་པས་འདུ་བྱེད་འགག་ཅེས་པ་ནས། སྐྱེ་བ་འགགས་པས་རྒ་ཤི་འགག་ཅེས་པའི་བར་གྱི་སྒོམ་ཚུལ་ནི་རྣམ་བྱང་གི་རྟེན་འབྲེལ་ལུགས་མཐུན་དུ་སྒོམ་པའི་ཚུལ་ཡིན་ཏེ། རྣལ་འབྱོར་པའི་བློ་ལ་སྣང་བའི་རྟེན་འབྲེལ་གྱི་གོ་རིམ་དང་རྣམ་བྱང་གི་རྟེན་འབྲེལ་གྱི་སྐྱེ་ཚུལ་མཐུན་པའི་སྒོམ་ཚུལ་ཡིན་པའི་ཕྱིར། འདིའི་དགོས་པ་ནི་ལམ་སྒོམ་པའི་འབྲས་བུ་མཐར་ཐུག་པ་འགོག་བདེན་དུ་རྟོགས་པའི་ཆེད་ཡིན་ནོ། །སྐྱེ་བ་འགགས་པས་རྒ་ཤི་འགག་ཅེས་པ་ནས་མ་རིག་པ་འགགས་པས་འདུ་བྱེད་འགག་ཅེས་པའི་བར་གྱི་སྒོམ་ཚུལ་ནི་རྣམ་བྱང་གི་རྟེན་འབྲེལ་ལུགས་བཟློག་ཏུ་སྒོམ་པའི་ཚུལ་ཡིན་ཏེ། རྣལ་འབྱོར་པའི་བློ་ལ་སྣང་བའི་རྟེན་འབྲེལ་གྱི་རིམ་པ་དང་། རྣམ་བྱང་གི་རྟེན་འབྲེལ་སྐྱེ་ཚུལ་མི་མཐུན་པའི་སྒོམ་ཚུལ་ཡིན་པའི་ཕྱིར། འདིའི་དགོས་པ་ནི་འཁོར་བ་སྤངས་པའི་མྱང་འདས་ཀྱི་རྩ་བ་མཐར་ཐུག་པ་ནི་མ་རིག་པ་དང་འཛིན་སྟངས་དངོས་སུ་འགལ་བའི་རིག་པ་ཡེ་ཤེས་ཡིན་པར་རྟོགས་པའི་ཆེད་ཡིན་ནོ། །མངོན་པ་བ་ཁ་ཅིག་རྣམ་བྱང་གི་རྟེན་འབྲེལ་གྱི་རིམ་པ་གཉིས་པོ་དེ་རྣམ་བྱང་གི་རྟེན་འབྲེལ་སྒོམ་ཚུལ་མིན་པར་ཐལ། དེ་རྣམ་བྱང་གི་རྟེན་འབྲེལ་མིན་པའི་ཕྱིར་ཏེ། དེ་འདུས་བྱས་ཀྱི་ཆོས་མིན་པའི་ཕྱིར། ཞེས་བཀག་ནས། རང་ལུགས་ལ་མ་རིག་པ་འགགས་པའི་ཟག་མེད་ཀྱི་ཡེ་ཤེས་ལས་ཟག་མེད་ཀྱི་འདུ་བྱེད་སེམས་པ་འབྱུང་བ་ལ་སོགས་པ་ཡིན་ནོ་ཞེས་ཟེར་བ་ནི་མི་འཐད་དེ། དེ་ལྟར་ན་མ་རིག་པ་འགགས་པས་འདུ་བྱེད་འབྱུང་ཞེས་པར་སོང་བའི་ཕྱིར། སྔ་མའི་དགག་པ་ཡང་མི་འཇུག་སྟེ། མ་རིག་པ་འགགས་པའི་ཟག་མེད་ཀྱི་ཡེ་ཤེས་ལས་འདུ་བྱེད་འགགས་པའི་ཟག་མེད་ཀྱི་སེམས་པ་འབྱུང་བ་སོགས་ཡིན་པའི་ཕྱིར་རོ།། །།བཞི་པ་དབུ་མ་པའི་ལུགས་ལ་གསུམ་སྟེ། རྟེན་འབྲེལ་གང་ལ་འཇོག་པའི་གཞི་ངོས་བཟུང་བ། དེ་ལ་འཇོག་པའི་རྟེན་འབྲེལ་གྱི་རྣམ་གཞག་བཤད། གྲུབ་མཐའ་འོག་མ་ལས་རྟེན་འབྲེལ་རྟོགས་ཚུལ་ཁྱད་པར་དུ་འཕགས་པར་བསྟན་པའོ། །དང་པོ་ནི། ཡུལ་རང་གི་སྡོད་ལུགས་ཀྱི་ངོས་ནས་གྲུབ་པ་མ་ཡིན་པར་ཡུལ་ཅན་གྱི་བློ་ལ་སྣང་བ་ཙམ་རྒྱུ་མཚན་དུ་བྱས་ནས་ཐ་སྙད་འདོགས་པའི་ཆོས་ཐམས་ཅད་རྟེན་འབྲེལ་ཡིན་ཏེ། རྩ་ཤེ་ལས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་པ་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །འོ་ན་རྟེན་འབྲེལ་དང་སྟོང་པ་དོན་གཅིག་པའི་རྒྱུ་མཚན་ཅི་ཡིན་ཞེ་ན། ཀུན་རྫོབ་སྣང་ཙམ་དུ་རྒྱུ་མེད་པ་དང་། མི་མཐུན་པའི་རྒྱུ་ལས་བྱུང་བ་མ་ཡིན་པར་རྒྱུ་འབྲས་སོ་སོར་ངེས་ཀྱང་རྒྱུ་དེ་ལས་འབྲས་བུ་སྐྱེ་བའི་རྒྱུ་མཚན་ལ་རིགས་པས་དཔྱད་པའི་ཚེ། མཐའ་བཞིའི་སྐྱེ་བ་དང་བྲལ་བས་རྒྱུ་ལས་འབྲས་བུ་སྐྱེ་བ་ཉིད་མི་འགྲུབ་པ་ནི་རྟེན་འབྲེལ་ཡིན་ཏེ། ཀླུ་སྒྲུབ་ཞབས་ཀྱིས། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་འཕོ་བར་ནི་མཁས་རྟོགས་བྱ། །ཞེས་གསུངས་པས་སོ། །དེས་ན་དངོས་སྨྲ་བ་དག་གིས་རྟེན་འབྲེལ་ཇི་ལྟར་གཏན་ལ་དབབ་ཀྱང་རྒྱུ་འབྲས་བདེན་པ་བ་ཁས་བླངས་པས་རྟེན་འབྲེལ་གྱི་དོན་ལ་ཕྱིན་ཅི་ལོག་ཏུ་གྱུར་ལ། རྒྱུ་བརྫུན་པ་ལས་འབྲས་བུ་བརྫུན་པ་འབྱུང་བ་འདི་ལ། བདེན་པ་གཉིས་ཆར་དང་འགལ་བ་མེད་པའི་རྟེན་འབྲེལ་གྱི་གནད་འབྱུང་བར་བཞེད་དེ། དཔལ་ལྡན་ཟླ་བས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲྭ་བ་མཐའ་དག་གཅོད་པར་བྱེད། །ཞེས་སོ། །གཉིས་པ་ལ་གཉིས་ཏེ། ཀུན་ནས་ཉོན་མོངས་ཀྱི་རྟེན་འབྲེལ་དང་། རྣམ་བྱང་གི་རྟེན་འབྲེལ་ལོ། །དང་པོ་ལ་བདུན་ཏེ། ཡན་ལག་སོ་སོའི་ངོ་བོ། ཡན་ལག་སྔ་མ་ལས་ཕྱི་མ་འབྱུང་བའི་ཚུལ། ཡན་ལག་གི་བསྡུ་བ། ཡན་ལག་གི་གྲངས་ངེས། རྟེན་འབྲེལ་གྱི་སྒྲ་དོན། ཚེ་དུ་ཞིག་ལ་རྫོགས་པའི་ཚུལ། ས་མཚུངས་དཔྱད་པའོ། །དང་པོ་ལ་བཅུ་གཉིས་ལས། མ་རིག་པ་ལ་ཁ་ཅིག ཡུལ་ལ་མི་གསལ་བའི་རྣམ་པས་འཇུག་པའི་སེམས་བྱུང་ཞེས་ཟེར་ན། ཀུན་གཞི་རྣམ་ཤེས་ཀྱི་འཁོར་དུ་བྱུང་བའི་སེམས་བྱུང་སེམས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཏན་ཚིགས་གྲུབ་སྟེ། ཀུན་གཞིའི་རྣམ་ཤེས་དེ་ཡུལ་ལ་མི་གསལ་བའི་རྣམ་པས་འཇུག་པའི་གཙོ་སེམས་ཡིན་པའི་ཕྱིར་རོ། །ཁ་ཅིག་རིག་པ་ཡེ་ཤེས་དང་འཛིན་སྟངས་འགལ་བའི་སེམས་བྱུང་ཟེར་ན། རིག་པ་ཡེ་ཤེས་དང་འཛིན་སྟངས་འགལ་བའི་མ་རིག་པ་དང་མཚུངས་ལྡན་གྱི་འདོད་ཆགས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཏན་ཚིགས་གྲུབ་སྟེ། རིག་པ་ཡེ་ཤེས་དང་འཛིན་སྟངས་འགལ་བའི་མ་རིག་པ་དང་དམིགས་རྣམ་མཚུངས་པའི་ཕྱིར། རང་ལུགས་ནི་རིག་པ་ཡེ་ཤེས་དང་འཛིན་སྟངས་འགལ་བའི་སེམས་བྱུང་རྨོངས་པ་གང་ཞིག ཟག་བཅས་ཀྱི་ལས་ཀུན་ནས་སློང་བར་ནུས་པ་དེ་འདིར་བསྟན་མ་རིག་པའི་མཚན་ཉིད། དེ་ལ་ཁ་ཅིག ཉན་ཐོས་སློབ་པ་འཕགས་པའི་རྒྱུད་ཀྱི་སྒོམ་སྤངས་སུ་གྱུར་པའི་མ་རིག་པ་ཆོས་ཅན། ཟུར་ཕྱི་མ་དེར་ཐལ། མཚོན་བྱ་དེའི་ཕྱིར། འདོད་ན། དེའི་རྒྱུད་ལ་ཡང་སྲིད་འཕེན་བྱེད་ཀྱི་ལས་གསར་དུ་སོགས་པ་ཡོད་པར་ཐལ། འདོད་པ་དེའི་ཕྱིར་ཞེ་ན། མ་ཁྱབ་སྟེ། དེའི་རྒྱུད་ལ་ཡང་སྲིད་འགྲུབ་བྱེད་ཀྱི་ལས་ཀྱིས་ཡང་སྲིད་འཕེན་བྱེད་ཀྱི་ལས་གསོས་འདེབས་པ་མེད་པར་ཐལ། དེའི་རྒྱུད་ལ་ཡང་སྲིད་འགྲུབ་བྱེད་ཀྱི་ལས་ཀུན་ནས་སློང་བའི་ཉོན་མོངས་པ་མེད་པའི་ཕྱིར། མ་གྲུབ་ན། དེའི་རྒྱུད་ཀྱི་སྒོམ་སྤངས་སུ་གྱུར་པའི་མ་རིག་པ་དེས་ཟག་བཅས་ཀྱི་ལས་ཀུན་ནས་སློང་བར་བྱེད་མི་ནུས་པ་དང་འགལ་ལོ། །འདིར་བསྟན་མ་རིག་པ་མཐོང་སྤངས་དང་སྒོམ་སྤངས་གང་ཡིན་དཔྱད་པ་ལ། དོན་གསང་རྣམ་པར་བཤད་པ་ལས། འདི་ནི་ཡང་སྲིད་འཕེན་བྱེད་ཡིན་པའི་ཕྱིར་དང་། རྟེན་འབྲེལ་གྱི་མདོ་འགྲེལ་ལས། བདེན་པ་མཐོང་ལ་ཕན་བྱེད་མེད། །ཅེས་གསུངས་པའི་ཕྱིར། མཐོང་བས་སྤང་བར་བྱ་བའི་མ་རིག་པ་ཁོ་ན་ཡིན་ནོ། །ཞེས་གསུངས་པ་ལ། མཁས་པ་ཁ་ཅིག དེ་ནི་མི་འཐད་དེ། གྲུབ་མཐས་བློ་མ་བསྒྱུར་བའི་བྱ་དང་རི་དྭགས་སོགས་ཀྱི་རྒྱུད་ལ་ཡང་འདིར་བསྟན་གྱི་མ་རིག་པ་ཡོད་པའི་ཕྱིར་རོ། །ཁྱབ་སྟེ། མཐོང་སྤངས་སུ་གྱུར་པའི་མ་རིག་པ་ཡིན་ན། གྲུབ་མཐས་བློ་བསྒྱུར་བའི་སྤང་བྱ་ཀུན་བཏགས་ཡིན་དགོས་པའི་ཕྱིར། གཞན་ཡང་། འདོད་པར་བསགས་པའི་བསོད་ནམས་དང་། མི་གཡོ་བའི་འདུ་བྱེད་དེ་དག་མི་དགེ་བ་ཡིན་པར་འགྱུར་ཏེ། འདོད་པ་ན་སྤྱོད་པའི་མཐོང་སྤང་གི་ཉོན་མོངས་པ་ཐམས་ཅད་ནི་མི་དགེ་བ་ཁོ་ན་ཡིན་པའི་ཕྱིར། ཞེས་བཀག་ནས། རང་ལུགས་ལ་སྒོམ་སྤངས་ཁོ་ན་ཡིན་ཏེ། འདུ་བྱེད་ཐམས་ཅད་ཀྱི་སྤྱིའི་རྐྱེན་ཡིན་པའི་ཕྱིར་དང་། ཉོན་མོངས་པ་ཅན་གྱི་ཡིད་ཀྱི་འཁོར་དུ་བྱུང་བའི་མ་འདྲེས་པའི་མ་རིག་པ་ཡིན་པའི་ཕྱིར། ཡིད་ཀྱི་རྣམ་ཤེས་ཀྱི་འཁོར་དུ་བྱུང་བའི་མ་རིག་པ་ནི། འདིར་བསྟན་གྱི་མ་རིག་པ་མིན་ཏེ། དེ་ནི་བསོད་ནམས་དང་མི་གཡོ་བའི་འདུ་བྱེད་དག་ལ་རྗེས་སུ་མི་འགྲོ་བའི་ཕྱིར་རོ། །འོ་ན་ཉོན་ཡིད་ཀྱི་འཁོར་དུ་བྱུང་བའི་མ་རིག་པ་ཁ་ནང་དུ་བལྟས་པའི་ཕྱིར། དགེ་མི་དགེའི་ལས་ཇི་ལྟར་སློང་སྙམ་ན་ཀུན་སློང་ལ་རྒྱུ་དུས་ཀྱི་དང་། དེ་དུས་ཀྱི་ཀུན་སློང་གཉིས་ཡོད་པ་ལས། མ་རིག་པའི་རྐྱེན་གྱིས་འདུ་བྱེད་འབྱུང་ཞེས་པ་འདི་ནི། རྒྱུ་དུས་ཀྱི་ཀུན་སློང་གི་དབང་དུ་བྱས་ཀྱི། དེ་དུས་ཀྱི་ཀུན་སློང་ནི་མིན་ཏེ། གཞན་དུ་ན་བསོད་ནམས་དང་མི་གཡོ་བའི་ལས་ཀྱང་ཉོན་མོངས་ཅན་ཁོ་ནར་འགྱུར་ཏེ། མ་རིག་པ་དེ་དུས་ཀྱི་རྐྱེན་དུ་ལྡན་པའི་ཕྱིར། ཞེས་སྤྲོས་པ་དང་བཅས་ཏེ་འཆད་དོ། །འདི་མི་འཐད་པར་སྟོན་པ་ལ་ཁས་བླངས་ནང་འགལ་གྱི་སྐྱོན་དང་། རང་ལུགས་ཀྱི་སྒྲུབ་བྱེད་མ་ངེས་པའི་སྐྱོན་དང་། དེ་དུས་ཀྱི་ཀུན་སློང་ཡན་ལག་བཅུ་གཉིས་ཀྱིས་མ་བསྡུས་པར་ཐལ་བའི་སྐྱོན་གསུམ་ལས། དང་པོ་ནི། གཞན་ལ་ཀུན་སློང་གི་མ་རིག་པ་མི་དགེ་བ་ཡིན་ན། དེས་ཀུན་ནས་བསླངས་པའི་ལས་ཐམས་ཅད་མི་དགེ་བར་ཐལ་བ་འཕངས་ནས། རང་གི་ཀུན་སློང་གི་མ་རིག་པ་ཉོན་མོངས་པ་ཅན་ཡིན་ཀྱང་དེས་བསླངས་པའི་ལས་ཐམས་ཅད་ཉོན་མོངས་ཅན་ཁོ་ནར་མི་འགྱུར་བའི་སྒྲུབ་བྱེད་དུ་རྒྱུ་དུས་ཀྱི་ཀུན་སློང་ལ་དགོངས་པའི་ཕྱིར་ཞེས་བཀོད་པ་ནི་རྣམ་པ་ཀུན་ཏུ་མཚུངས་ཏེ། གཞན་གྱིས་ཀྱང་རྒྱུ་དུས་ཀྱི་ཀུན་སློང་ལ་དགོངས་པའི་ཕྱིར་ཞེས་བརྗོད་ཤེས་པའི་ཕྱིར། གཉིས་པ་ནི་ཡིད་ཤེས་འཁོར་གྱི་མ་རིག་པ་མ་ཡིན་པའི་སྒྲུབ་བྱེད་དུ་དེ་ནི་བསོད་ནམས་དང་མི་གཡོ་བའི་འདུ་བྱེད་དག་ལ་རྗེས་སུ་མི་འགྲོ་བའི་ཕྱིར། ཞེས་བཀོད་པ་ཡང་ཧ་ཅང་རྩིངས་ཏེ། ཀུན་སློང་གི་མ་རིག་པ་ཡིན་ན། ལས་གསུམ་ཆར་ཀུན་ནས་སློང་བས་མ་ཁྱབ་པའི་ཕྱིར། གསུམ་པ་ནི། འདུ་བྱེད་ཀྱི་དེ་དུས་ཀྱི་ཀུན་སློང་དུ་གྱུར་པའི་མ་རིག་པ་དེ་ཆོས་ཅན། ཁྱོད་ཡན་ལག་བཅུ་གཉིས་ཀྱིས་མ་བསྡུས་པར་ཐལ། ཁྱོད་ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་མ་རིག་པ་ནས་རྒ་ཤིའི་བར་གང་གིས་ཀྱང་མ་བསྡུས་པའི་ཕྱིར། གལ་ཏེ་ཡན་ལག་གཉིས་པས་བསྡུས་སོ་ཞེ་ན། དེ་ནི་མ་ཡིན་ཏེ། ཡན་ལག་གཉིས་པ་ཀུན་ནས་སློང་བར་བྱེད་པའི་མ་རིག་པ་ཡིན་པའི་ཕྱིར། གཞན་ཡང་ལས་འབྲས་མེད་པར་ལྟ་བའི་ལོག་ལྟ་དང་མཚུངས་ལྡན་གྱི་མ་རིག་པའི་དབང་གིས་ངན་སོང་དུ་སྐྱེ་བའི་ལས་སོག་པ་མེད་པར་ཐལ། ཀུན་སློང་གི་མ་རིག་པ་ཡིན་ན། ཉོན་ཡིད་འཁོར་གྱི་མ་རིག་པ་ཡིན་དགོས་པའི་ཕྱིར། རང་ལུགས་ནི་མཐོང་སྤངས་དང་སྒོམ་སྤངས་གཉིས་ཀ་ཡོད་དེ། སའི་དངོས་གཞི་ལས། རྒྱུན་དུ་ཞུགས་པས་ཡན་ལག་དུ་སྤངས་པར་བརྗོད་པར་བྱ་ཞེ་ན། ཐམས་ཅད་ཀྱི་ཕྱོགས་གཅིག་སྟེ། གང་ཡང་རིལ་གྱིས་སྤངས་པ་ནི་མ་ཡིན་ནོ། །རྒྱུན་དུ་ཞུགས་པ་ཇི་ལྟ་བ་དེ་བཞིན་དུ་ལན་གཅིག་ཕྱིར་འོང་བ་ཡང་དེ་བཞིན་ནོ། །ཕྱིར་མི་འོང་བས་ཡན་ལག་དུ་སྤངས་པར་བརྗོད་ཅེ་ན། འདོད་པ་ན་སྤྱོད་པ་ཐམས་ཅད་དོ། །གཟུགས་དང་གཟུགས་མེད་པ་ན་སྤྱོད་པ་ལ་ནི་ངེས་པ་མེད་དོ། །དགྲ་བཅོམ་པས་ཡན་ལག་དུ་སྤངས་པར་བརྗོད་ཅེ་ན། ཁམས་གསུམ་ན་སྤྱོད་པ་ཐམས་ཅད་དོ། །ཞེས་གསུངས་པའི་ཕྱིར། འདིར་བསྟན་མ་རིག་པ་ལ་དབྱེ་ན། ལས་འབྲས་ལ་རྨོངས་པའི་དང་། དེ་ཁོ་ནའི་དོན་ལ་རྨོངས་པའི་མ་རིག་པ་གཉིས་ལས། དང་པོས་ནི། བསོད་ནམས་མ་ཡིན་པའི་ལས་ཀུན་ནས་སློང་ལ། ཕྱི་མས་ནི། བསོད་ནམས་དང་མི་གཡོ་བའི་ལས་ཀུན་ནས་སློང་བར་ཀུན་བཏུས་ལས་བཤད་དོ། །འདུ་བྱེད་ནི་རང་རྒྱུ་མ་རིག་པས་ཀུན་ནས་བསླངས་ཤིང་ཡང་སྲིད་འཕེན་པར་ནུས་པའི་ཟག་པ་དང་བཅས་པའི་ལས། དབྱེ་ན་བསོད་ནམས་མ་ཡིན་པ་དང་། བསོད་ནམས་དང་། མི་གཡོ་བའི་ལས་དང་གསུམ། མཚན་ཉིད་ནི་རིམ་པ་བཞིན། ངན་འགྲོར་འཕེན་པའི་ལས་དང་། འདོད་པའི་བདེ་འགྲོར་འཕེན་པའི་ལས་དང་། ཁམས་གོང་མར་འཕེན་པའི་ལས་རྣམས་སོ། །རྣམ་པར་ཤེས་པ་ནི་རྒྱུའི་ཆ་བཟུང་ན་ལས་ཀྱི་བག་ཆགས་འཛིན་པར་བྱེད་པའི་ཀུན་གཞི་ས་བོན་གྱི་ཆ་དང་། འབྲས་བུའི་ཆ་བཟུང་ན་ལས་ལ་བརྟེན་ནས་སྐྱེ་གནས་སུ་དང་པོར་གྲུབ་པའི་རྣམ་ཤེས་སོ། །ཐོགས་མེད་ཀྱིས་ནི་རྒྱུའི་ཆ་འཛིན་ཏེ། འཕེན་པར་བྱེད་པའི་ཡན་ལག་གང་ཞེ་ན། མ་རིག་པ་དང་། འདུ་བྱེད་དང་། རྣམ་པར་ཤེས་པའོ་ཞེས་གསུངས་པའི་ཕྱིར། ཀླུ་སྒྲུབ་ཀྱིས་ནི་འབྲས་བུའི་ཆ་བཟུང་སྟེ། གཉིས་ལས་བདུན་འབྱུང་ཞེས་གསུངས་པའི་ཕྱིར། འོ་ན་རྟེན་འབྲེལ་གྱི་མདོ་ལས། འདིའི་རྣམ་ཤེས་ལ་ཚོགས་དྲུག་ཏུ་དབྱེ་བ་ཡོད་པར་གསུངས་པའི་དགོངས་པ་ཇི་ལྟར་ཞེ་ན། མངོན་པ་བ་ཁ་ཅིག ཐོགས་མེད་ཀྱི་ལུགས་ལ་ཀུན་གཞི་ས་བོན་གྱི་ཆ་ལ་ཚོགས་དྲུག་བསྐྱེད་པའི་ནུས་པ་ཡོད་པ་ལ་དགོངས། ཀླུ་སྒྲུབ་ཀྱི་ལུགས་ནི། ལས་ལ་བརྟེན་ནས་སྐྱེ་གནས་སུ་དང་པོར་གྲུབ་པའི་རྣམ་ཤེས་དེ་བདག་རྐྱེན་དང་དམིགས་རྐྱེན་གཉིས་དང་འཕྲད་ན། ཚོགས་དྲུག་བསྐྱེད་པའི་ནུས་པ་ཡོད་པ་ལ་དགོངས་པའམ། ཡང་ན་རྫུས་སྐྱེས་ལ་མིང་གཟུགས་དང་སྐྱེ་མཆེད་དྲུག་གཅིག་ཆར་གྲུབ་པའི་དབང་དུ་བྱས་པ་ཡིན་ནོ། །ཞེས་གསུངས། མིང་གཟུགས་ནི་ཉིང་མཚམས་སྦྱོར་བའི་སྐད་ཅིག་གཉིས་པར་ཕུང་པོ་ལྔ་གྲུབ་པའོ། །འོ་ན་གཞན་ནས་བཤད་པའི་ཕུང་པོ་ལྔའི་གོ་རིམ་དང་མི་ཐུན་པའི་རྒྱུ་མཚན་ཅི་ཞེ་ན། མངོན་པ་བ་ཁ་ཅིག ཉེ་བར་ལེན་པ་པོ་དང་། ཉེ་བར་བླང་བྱའི་དབང་དུ་བྱས་པར་བཞེད་ཀྱང་མི་འཐད་དེ། རྣམ་སྨིན་གྱི་ཕུང་པོ་ཡིན་པས་ཉེ་བར་བླང་བྱར་མཚུངས་པའི་ཕྱིར། དེས་ན་རྣམ་ཤེས་ཀྱི་དུས་སུ་མིང་གཞིའི་ཕུང་པོ་གྲུབ་ཀྱང་སྐད་ཅིག་གཉིས་པར་གཟུགས་ཕུང་གྲུབ་པའི་ཚེ་མིང་གཟུགས་སུ་འཇོག་པས་གྲུབ་སྔ་ཕྱི་གོ་རིམ་གྱི་དབང་དུ་བྱས་ལ། གཟུགས་ཕུང་དང་པོར་བྱས་པ་ནི། རིམ་ནི་རགས་དང་ཀུན་ཉོན་མོངས། །ཞེས་པ་ལྟར་ཤེས་པར་བྱའོ། །སྐྱེ་མཆེད་དྲུག་ནི་མིང་གཟུགས་འཕེལ་བ་ལས་སྐྱེ་མཆེད་དྲུག་ཚང་བར་དོད་པའོ། །རེག་པ་ནི་སྐྱེ་མཆེད་དྲུག་ཡུལ་དང་ཕྲད་པ་ལས་ཡུལ་དབང་རྣམ་ཤེས་གསུམ་འདུས་ནས་ཡུལ་གྱི་འགྱུར་བ་ཡོངས་སུ་གཅོད་པར་བྱེད་པའི་སེམས་བྱུང་ངོ་། །དབྱེ་ན་མིག་གི་འདུས་ཏེ་རེག་པ་ནས། ཡིད་ཀྱི་འདུས་ཏེ་རེག་པའི་བར་དྲུག་གོ །ཚོར་བ་ནི་རེག་པས་བཅད་པ་ལྟར་སིམ་གདུང་བར་མ་ཅི་རིགས་པར་ཉམས་སུ་མྱོང་བའི་སེམས་བྱུང་། དབྱེ་ན་མིག་གི་འདུས་ཏེ་རེག་པ་སོགས་ནས་ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བའི་བར་དྲུག་གོ །གལ་ཏེ་རེག་ཚོར་གཉིས་པོ་དེ་རྟེན་འབྲེལ་གྱི་ཡན་ལག་ཏུ་འཇོག་པ་མི་འཐད་དེ། སེམས་བྱུང་ཀུན་འགྲོའི་རྫས་ཡིན་པས་ཟག་མེད་ཀྱང་སྲིད་པའི་ཕྱིར་རོ་ཞེ་ན། སྐྱོན་མེད་དེ། རྟེན་འབྲེལ་གྱི་འགགས་རིམ་བསྟན་པའི་ཤུགས་ལ་རེག་ཚོར་ཟག་བཅས་སུ་གྲུབ་པའི་ཕྱིར་ཏེ། སྐྱེ་མཆེད་དྲུག་འགགས་པས་ཟག་མེད་ཀྱི་རེག་པ་འགགས་པའི་དོན་མེད་པའི་ཕྱིར་དང་། ཟག་མེད་ཀྱི་ཚོར་བ་འགགས་པས་སྲེད་པ་འགགས་པའི་དོན་མེད་པའི་ཕྱིར། སྲེད་པ་ནི་ཚོར་བའི་ངོ་བོ་ལ་ཆགས་པའི་སེམས་བྱུང་ངོ་། །དབྱེ་ན་ཚོར་བ་གསུམ་ཡོད་པའི་བྱེ་བྲག་གིས། འཐོབ་པར་སྲེད་པ། འབྲལ་བར་སྲེད་པ། གཉིས་མིན་དུ་སྲེད་པ་དང་གསུམ་མོ། །ལེན་པ་ནི་ཚོར་བའི་རྒྱུ་ལུས་དང་ལོངས་སྤྱོད་ལ་ཆགས་པའི་སེམས་བྱུང་ངོ་། །དབྱེ་ན་འདོད་པ་ཉེ་བར་ལེན་པ། ྎ སྲིད་པ་ཉེ་བར་ལེན་པ། ྎ ལྟ་བ་ཉེ་བར་ལེན་པ། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ། བདག་ཏུ་ལྟ་བ་ཉེ་བར་ལེན་པ་དང་བཞི་འོ། །ཁ་ཅིག སྤྱིར་ཡང་སྲིད་མངོན་པར་འདོད་པ་ནི་སྲེད་པ། ཡང་སྲིད་བྱེ་བྲག་པ་མངོན་པར་འདོད་པ་ནི་ལེན་པར་བཞེད་ཅིང་། འཇུག་འགྲེལ་ལས། དང་པོར་ཡང་སྲིད་མངོན་པར་འདོད་པ་ནི་སྲེད་པ། དེ་ཉིད་འཕེལ་བ་ནི་ལེན་པའོ་ཞེས་བཤད་དོ། །སྲིད་པ་ནི་རྒྱུ་འབྲས་ཆ་གཉིས་པ་ལྟར་ན་ཡང་སྲིད་འཕེན་བྱེད་ཀྱི་ལས་གསར་དུ་སོག་པའི་སེམས་པ་དང་། ཆ་གཅིག་པ་ལྟར་ན་སྔར་གྱི་འདུ་བྱེད་སྲེད་ལེན་གྱིས་གསོས་བཏབ་ནས་ལས་ཀྱི་བག་ཆགས་ནུས་པ་མཐུ་ཅན་དུ་བྱེད་པའོ། །སྐྱེ་བ་ནི་སྲིད་པའི་དབང་གིས་ཉིང་མཚམས་སྦྱོར་བའི་དུས་སུ་ཕུང་པོ་ལྔ་རིམ་གྱིས་གྲུབ་པའོ། །རྒས་པ་ནི་ན་ཚོད་གཞན་དུ་འགྱུར་བ། འཆི་བ་ནི་ཚེ་གཅིག་གི་དབང་དུ་བྱས་པའི་སྲོག་གི་དབང་པོ་འགག་བཞིན་པའི་གནས་སྐབས་སོ། །རྒ་ཤི་གཉིས་ཡན་ལག་གཅིག་ཏུ་བྱས་པ་ནི་མ་རྒས་པར་འཆི་བ་ཡོད་པའི་ཕྱིར། འོ་ན་མིང་གཟུགས་དང་སྐྱེ་མཆེད་དྲུག་ཀྱང་ཡན་ལག་གཅིག་ཏུ་བྱེད་རིགས་པར་འགྱུར་ཏེ། རྫུས་སྐྱེས་ཀྱི་སེམས་ཅན་ལ་མིང་གཟུགས་གྲུབ་པ་དང་དུས་མཉམ་དུ་སྐྱེ་མཆེད་དྲུག་ཚང་བའི་ཕྱིར་ཞེ་ན་སྐྱོན་མེད་དེ། འདི་ནི་མངལ་སྐྱེས་ལ་དགོངས་པའི་ཕྱིར་ཞེས་རྒྱལ་སྲས་མ་ལས་བཤད་དོ། །འགྲེལ་པ་འདིའི་ལུགས་ལ་ན་ཚོད་གཞན་དུ་འགྱུར་བ་ཙམ་རྒས་པ་མ་ཡིན་པར་དབང་པོ་རྒུད་པའི་གནས་སྐབས་ལ་རྒས་པར་འཇོག་པར་མངོན་ཏེ། གཞན་དུ་ན་མ་རྒས་པར་ཤི་བ་མེད་པའི་ཕྱིར་རོ། །སའི་དངོས་གཞི་ལས་ནི། གཞན་དུ་འགྱུར་བ་ཙམ་ལ་རྒས་པར་བཤད་དེ། དེ་ཉིད་ལས། འདོད་པ་དང་རབ་ཏུ་ལྡན་པ་དུ་ཞེ་ན། ཐམས་ཅད་རིམཾ་གྱིས་འདུས་པའོ། །གཟུགས་དང་རབ་ཏུ་ལྡན་པ་དུ་ཞེ་ན། ཐམས་ཅད་ཀྱི་ཕྱོགས་གཅིག་གོ །དེར་རྒས་པ་ཇི་ལྟར་ཡོད་ཅེ་ན། འདུ་བྱེད་རྣམས་རྙིང་པ་དང་དེངས་པ་གང་ཡིན་པའོ། །གཟུགས་དང་རབ་ཏུ་ལྡན་པ་ཇི་ལྟ་བ་དེ་བཞིན་དུ་གཟུགས་མེད་པ་དང་རབ་ཏུ་ལྡན་པ་ཡང་དེ་དང་འདྲའོ། །ཞེས་གསུངས་སོ། །གཉིས་པ་ནི། མ་རིག་པའི་རྐྱེན་གྱིས་འདུ་བྱེད་འབྱུང་སྟེ། མ་རིག་པའི་དབང་གིས་ཡང་སྲིད་འཕེན་བྱེད་ཀྱི་ལས་གསར་དུ་སོག་པ་དེ་འབྱུང་བའི་ཕྱིར། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་རྒྱུའི་ཆ་བཟུང་ན། འདུ་བྱེད་སྔ་མ་ལས་བག་ཆགས་ཅན་གྱི་རྣམ་ཤེས་ཕྱི་མ་དེ་འབྱུང་བའི་ཕྱིར། རྣམ་པར་ཤེས་པ་འབྲས་བུའི་ཆ་བཟུང་ན། འདུ་བྱེད་སྔ་མ་ལས་རྣམ་ཤེས་སྐྱེ་གནས་སུ་འཕེན་པ་དེ་འབྱུང་བའི་ཕྱིར། རྣམ་པར་ཤེས་པ་ལས་མིང་གཟུགས་འབྱུང་སྟེ། རྣམ་ཤེས་རྒྱུའི་ཆ་བཟུང་ན་བག་ཆགས་ཅན་གྱི་རྣམ་ཤེས་ལས་མིང་གཟུགས་ཀྱི་བག་ཆགས་རིམ་གྱིས་བརྟས་པ་དེ་འབྱུང་བའི་ཕྱིར། རྣམ་པར་ཤེས་པ་འབྲས་བུའི་ཆ་བཟུང་ན། སྐྱེ་གནས་སུ་དང་པོར་གྲུབ་པའི་སྐད་ཅིག་གཉིས་པར་མིང་གཟུགས་རིམ་གྱིས་གྲུབ་པ་དེ་འབྱུང་བའི་ཕྱིར། མིང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་འབྱུང་སྟེ། མིང་གཟུགས་རིམ་གྱིས་འཕེལ་བ་ལས་སྐྱེ་མཆེད་དྲུག་ཚང་བར་དོད་པ་དེ་འབྱུང་བའི་ཕྱིར། སྐྱེ་མཆེད་དྲུག་གི་རྐྱེན་གྱིས་རེག་པ་འབྱུང་སྟེ། སྐྱེ་མཆེད་དྲུག་ཡུལ་དང་ཕྲད་པ་ལས་ཡུལ་དབང་རྣམ་ཤེས་གསུམ་འདུས་པས་ཡུལ་གྱི་འགྱུར་བ་ཡོངས་སུ་གཅོད་པ་དེ་འབྱུང་བའི་ཕྱིར། རེག་པ་ལས་ཚོར་བ་འབྱུང་སྟེ། རེག་པས་ཇི་ལྟར་བཅས་པ་ལྟར་ཚོར་བས་ཉམས་སུ་མྱོང་བ་དེ་འབྱུང་བའི་ཕྱིར། ཚོར་བ་ལས་སྲེད་པ་འབྱུང་སྟེ། ཚོར་བའི་དབང་གིས་ཚོར་བ་བདེ་སྡུག་ལ་བླང་དོར་དུ་ཆགས་པ་དེ་འབྱུང་བའི་ཕྱིར། སྲེད་པ་ལས་ལེན་པ་འབྱུང་སྟེ། ཚོར་བའི་ངོ་བོ་ལ་ཆགས་པས་ཚོར་བའི་རྒྱུ་ཚོར་བ་ལ་འདུན་ཅིང་ཆགས་པ་དེ་འབྱུང་བའི་ཕྱིར། ལེན་པ་ལས་སྲིད་པ་འབྱུང་སྟེ། ལེན་པའི་དབང་གིས་ཡང་སྲིད་འཕེན་བྱེད་ཀྱི་ལས་ནུས་པ་མཐུ་ཅན་དུ་གྱུར་པ་དེ་འབྱུང་བའི་ཕྱིར། སྲིད་པ་ལས་སྐྱེ་བ་འབྱུང་སྟེ། སྲིད་པའི་དབང་གིས་འགྲོ་བ་གཞན་དང་སྐྱེ་གནས་གཞན་དུ་འདྲེན་པ་དེ་འབྱུང་བའི་ཕྱིར། སྐྱེ་བ་ལས་རྒ་ཤི་འབྱུང་སྟེ། སྐྱེ་བའི་དབང་གིས་ན་ཚོད་གཞན་དུ་འགྱུར་བ་དང་སྲོག་གི་དབང་པོ་འགག་པ་དེ་འབྱུང་བའི་ཕྱིར། གསུམ་པ་ཡན་ལག་གི་བསྡུ་བ་ལ། རྒྱུ་འབྲས་གཉིས་སུ་བསྡུ་བ། ཀུན་ནས་ཉོན་མོངས་པ་གསུམ་དུ་བསྡུ་བ། འཕེན་འགྲུབ་ཀྱི་ཡན་ལག་བཞིར་བསྡུ་བ་དང་གསུམ་ལས། དང་པོ་ནི། ཀུན་ལས་བཏུས་ལྟར་ན། མ་རིག་པ། འདུ་བྱེད། རྣམ་པར་ཤེས་པ་གསུམ། སྲེད་ལེན་སྲིད་པ་དང་དྲུག་རྒྱུའི་ཡན་ལག ལྷག་མ་དྲུག་འབྲས་བུའི་ཡན་ལག ཀླུ་སྒྲུབ་ལྟར་ན། རྣམ་པར་ཤེས་པ་ཡང་འབྲས་བུའི་ཡན་ལག་ཏུ་འདོད་པས་འབྲས་བུའི་ཡན་ལག་བདུན་དུ་འདོད་དོ། །གཉིས་པ་ལ། མ་རིག་པ། སྲེད་པ། ལེན་པ་གསུམ་ནི་ཉོན་མོངས་པའི་ཉོན་མོངས་པ་ཡིན་ཏེ། ལས་ཀྱི་ཉོན་མོངས་པ་ཀུན་ནས་སློང་བར་བྱེད་ཅིང་། སྐྱེ་བའི་ཉོན་མོངས་པ་འདྲེན་པར་བྱེད་པའི་ཕྱིར། འདུ་བྱེད་རྣམ་པར་ཤེས་པ་སྲེད་པ་གསུམ་ནི་ལས་ཀྱི་ཉོན་མོངས་པ་ཡིན་ཏེ། ཉོན་མོངས་པའི་ཉོན་མོངས་པས་ཀུན་ནས་བསླངས་ཤིང་། སྐྱེ་བའི་ཉོན་མོངས་པ་འདྲེན་པར་བྱེད་པའི་ཕྱིར། ལྷག་མ་དྲུག་ནི་སྐྱེ་བའི་ཉོན་མོངས་པ་ཡིན་ཏེ། ལས་ཉོན་གྱི་འབྲས་བུར་གྱུར་པའི་རྣམ་སྨིན་གྱི་ངོ་བོ་ཡིན་པའི་ཕྱིར། ཀླུ་སྒྲུབ་ལྟར་ན། རྣམ་པར་ཤེས་པ་ཡང་སྐྱེ་བའི་ཉོན་མོངས་པར་བཤད་དེ། ཀླུ་སྒྲུབ་ཀྱིས། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་བདུན་ནི་སྡུག་བསྔལ་ཡིན། །ཞེས་གསུངས་པའི་ཕྱིར། མཛོད་དང་། དབུས་མཐའ་དང་། སའི་དངོས་གཞི་ལས་ཀྱང་དེ་ལྟར་དུ་བཤད་དེ། མཛོད་ལས། ཉོན་མོངས་གསུམ་མོ་ལས་གཉིས་སོ། །གཞི་བདུན་དེ་བཞིན་འབྲས་བུ་ཡིན། །ཞེས་དང་། དབུས་མཐའ་ལས། རྣམ་གསུམ་རྣམ་གཉིས་ལས་ཉོན་མོངས། །རྣམ་བདུན་ཡང་དག་མིན་རྟོག་ལས། །ཞེས་དང་། སའི་དངོས་གཞི་ལས། གསུམ་ནི་ཉོན་མོངས་པའི་ལམ་མོ། །གཉིས་ནི་ལས་ཀྱི་ལམ་མོ། །བདུན་ནི་སྡུག་བསྔལ་གྱི་ལམ་མོ་ཞེས་གསུངས་སོ། །དེ་རྣམས་ཀྱི་དགོངས་པ་གང་ཞེ་ན། ཐོགས་མེད་ཀྱིས་ནི་ཀུན་གཞི་ས་བོན་གྱི་ཆ་ལ་དགོངས། ཀླུ་སྒྲུབ་དང་། མཛོད་ཀྱི་དགོངས་པ་ནི་ཀུན་གཞི་རྣམ་པར་མ་བཞག་པའི་དབང་དུ་བྱས་ལ། དབུས་མཐའ་དང་། སའི་དངོས་གཞི་གཉིས་ལས་ནི། ཀུན་གཞི་རྣམ་སྨིན་གྱི་ཆ་ལ་དགོངས་སོ། །གསུམ་པ་ནི། ཡན་ལག་བཅུ་གཉིས་པོ་ཐམས་ཅད་འཕེན་འགྲུབ་ཀྱི་ཡན་ལག་བཞིར་འདུས་ཏེ། མ་རིག་པ། འདུ་བྱེད། རྣམ་ཤེས་རྒྱུའི་ཆ་ལ་བཞག་པ་ལྟར་ན། རྣམ་ཤེས་གསུམ་ནི་འཕེན་བྱེད་ཀྱི་ཡན་ལག མིང་དང་གཟུགས་སྐྱེ་མཆེད་དྲུག རེག་པ་ཚོར་བ་བཞི་ནི་འཕངས་པའི་ཡན་ལག སྲེད་ལེན་སྲིད་པ་གསུམ་ནི་འགྲུབ་བྱེད་ཀྱི་ཡན་ལག སྐྱེ་རྒ་གཉིས་ནི་གྲུབ་པའི་ཡན་ལག་ཡིན་པའི་ཕྱིར་རོ། །འཕེན་བྱེད་རྒྱུ་འབྲས་ལ་ཡང་གང་གིས་འཕེན་པ། ཇི་ལྟར་འཕེན་པ། གང་འཕངས་པ་དང་གསུམ་ལས། དང་པོ་ནི། མ་རིག་པ་དང་འདུ་བྱེད་གཉིས་ཏེ། མ་རིག་པའི་དབང་གིས་འདུ་བྱེད་ཀྱིས་ལས་སོག་པར་བྱེད་པའི་ཕྱིར་རོ། །གཉིས་པ་ནི། རྣམ་ཤེས་ལ་བག་ཆགས་བསྒོས་པའི་ཚུལ་གྱིས་ཏེ། རྒྱུའི་ཆ་ལ་དགོངས་སོ། །གསུམ་པ་ལ། ལུས་དང་ལོངས་སྤྱོད་གཉིས་ལས། ལུས་ཀྱི་ངོ་བོའི་དབང་དུ་བྱས་ནས་མིང་དང་གཟུགས། ཁྱད་པར་གྱི་དབང་དུ་བྱས་ནས་སྐྱེ་མཆེད་དྲུག ལོངས་སྤྱོད་ལ་ཡུལ་གྱི་ལོངས་སྤྱོད་ཀྱི་དབང་དུ་བྱས་ནས་རེག་པ། རྣམ་སྨིན་གྱི་ལོངས་སྤྱོད་ཀྱི་དབང་དུ་བྱས་ནས་ཚོར་བ་འཕངས་སོ། །འགྲུབ་བྱེད་རྒྱུ་འབྲས་ལ་ཡང་། གང་གིས་འགྲུབ། ཇི་ལྟར་འགྲུབ། གང་འགྲུབ། དེའི་ཉེས་དམིགས་དང་བཞི་ལས། དང་པོ་ནི། སྲེད་ལེན་གཉིས་ཏེ། སྲེད་པའི་དབང་གིས་ཉེ་བར་ལེན་པས་འགྲུབ་པར་བྱེད་པའི་ཕྱིར་རོ། །གཉིས་པ་ནི་སྲིད་པ་སྟེ། སྲེད་ལེན་གཉིས་ཀྱི་དབང་གིས་རྣམ་སྨིན་འགྲུབ་པའི་ནུས་པ་མཐུ་ཅན་དུ་བྱས་པའི་ཚུལ་གྱིས་སོ། །གསུམ་པ་ནི། སྐྱེ་བ་སྟེ། རྣམ་སྨིན་གྱི་ངོ་བོ་ཡིན་པའི་ཕྱིར་རོ། །བཞི་པ་ནི། རྒ་ཤི་སྟེ། དེའི་གནས་སྐབས་ཀྱི་ཉེས་དམིགས་ཡིན་པའི་ཕྱིར་རོ། །ཇི་སྐད་དུ། རྟེན་འབྲེལ་གྱི་མདོ་འགྲེལ་ལས། གང་གིས་འཕེན་དང་ཇི་ལྟར་གང་། །དེ་འགྲུབ་བྱེད་པ་དེ་ལ་ཡང་། །ཉེས་དམིགས་གང་ཡིན་དེ་དག་རྣམས། །ཡན་ལག་བཅུ་གཉིས་རྣམས་ཀྱིས་བསྟན། །གཉིས་ཀྱིས་ཡན་ལག་གཅིག་གིས་དང་། །རྣམ་པ་བཞི་དང་གཉིས་ཀྱིས་དང་། །གཅིག་གིས་གཅིག་གི་གཅིག་གི་དང་། །དོན་བདུན་དག་ཏུ་རབ་ཏུ་བསྟན། །བདེན་པ་ཇི་བཞིན་མི་ཤེས་ཕྱིར། །ལས་ཀྱིས་སེམས་ལ་བསྒོས་པའི་ཕྱིར། །ཡན་ལག་བཞི་ནི་རིམ་གྱིས་འཕེན། །དེ་ཡི་ས་བོན་ཡང་བརྟས་ཕྱིར། །འཕངས་པ་བཞིན་དུ་སྐྱེས་པ་ཡི། །ཚོར་བས་བསྐྱེད་པའི་སྲེད་པ་ལ། །ལེན་པ་འབྱུང་བས་དེ་ཡི་ལས། །དགོས་པ་མངོན་དུ་འགྱུར་བ་ཡིན། །གྲུབ་པ་སྐྱེ་བཞིན་དེ་ལ་ཡང་། །རྒ་སོགས་ཉེས་དམིགས་གང་གི་ཕྱིར། །བདེན་པ་མཐོང་ལ་འཕེན་བྱེད་མེད། །སྲེད་དང་བྲལ་ལ་འབྱུང་བ་མེད། །ཅེས་སོ། །འདི་དག་ཀྱང་མདོ་ལས་འབྱུང་བའི་ཡན་ལག་ཆ་གཅིག་ལ་སྦྱར་བ་དང་། འཁོར་བའི་རྒྱུ་འབྲས་ཀྱིས་བསྡུས་པའི་ཆ་གཅིག་ལ་སྦྱར་བ་གཉིས་ལས། དང་པོ་ལྟར་ན་ཐམས་ཅད་ཀྱང་མངོན་གྱུར་ལ་སྦྱར་ཏེ་དོན་ལ་རྒྱུ་འབྲས་ཆ་གཉིས་ཡོད་པས་ཚོར་བ་མངོན་གྱུར་བའི་དབང་གིས་སྲེད་པ་བསྐྱེད་པའི་ཕྱིར་རོ། །ཕྱི་མ་ལྟར་ན་མིང་གཟུགས་ནས་ཚོར་བའི་བར་བཞི་ནི་ས་བོན་ལ་བཞག་དགོས་ཏེ། འཕེན་བྱེད་རྒྱུ་འབྲས་ཀྱི་རྗེས་སུ་འགྲུབ་བྱེད་རྒྱུ་འབྲས་འབྱུང་བའི་ཕྱིར་རོ། །བཞི་པ་ནི། མ་རིག་པ་ལ་རྒྱུ་དང་རྒ་ཤི་ལ་འབྲས་བུ་ཡོད་དམ་མེད། ཡོད་ན་ཡན་ལག་བཅུ་གཉིས་སུ་གྲངས་མ་ངེས་པར་འགྱུར་ཞིང་། མེད་ན་འཁོར་བ་ལ་ཐོག་མ་ཡོད་པར་ཐལ་བ་དང་། མ་རིག་པ་དེ་རེས་འགའ་བའི་དངོས་པོ་མིན་པར་ཐལ་བ་དང་། ཡན་ལག་གཞན་རྣམས་ལ་ཡང་རྒྱུ་མེད་པར་འགྱུར་ཏེ། མ་རིག་པ་ལ་རྒྱུ་མེད་པའི་ཕྱིར། ཡན་ལག་ཆ་གཅིག་རྫོགས་ནས་འབད་མེད་དུ་གྲོལ་བར་འགྱུར་ཏེ། རྒ་ཤི་ལ་འབྲས་བུ་མེད་པའི་ཕྱིར་ཞེ་ན། མ་རིག་པ་ལ་རྒྱུ་དང་། རྒ་ཤི་ལ་འབྲས་བུ་ཡོད་ཀྱང་ཡན་ལག་བཅུ་གཉིས་སུ་གྲངས་མ་ངེས་པར་ཐལ་བའི་སྐྱོན་མེད་དེ། དེ་དག་ནི་རྟེན་འབྲེལ་གྱི་ཆ་གཞན་དང་གཞན་དུ་གཏོགས་པའི་ཕྱིར་ཏེ། རིན་ཆེན་ཕྲེང་བར། ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །འཁོར་ལོ་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །ཞེས་དང་། དེའི་ཚུལ་ཡང་རྟེན་འབྲེལ་སྙིང་པོ་ལས། གསུམ་པོ་དག་ལས་གཉིས་འབྱུང་ཞིང་། །གཉིས་ལས་བདུན་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་སྟེ། །དེ་ཉིད་ཡང་དང་ཡང་དུ་འཁོར། །ཞེས་སོ། །དེའི་དོན་ཡང་སྐྱེ་བ་དང་རྒ་ཤི་གཉིས་ཀྱི་གནས་སྐབས་སུ། ཕུང་པོ་ལ་བདེན་པར་འཛིན་པའི་བདེན་འཛིན་རྒྱུན་མ་ཆད་པར་ཡོད་པ་དེ་ཤེས་སྒྲིབ་ཀྱི་རྣམ་རྟོག་ཡིན་ལ། དེས་སྐད་ཅིག་མ་རེ་རེ་བཞིན་དུ་དངོས་འབྲས་གང་ཟག་ལ་བདེན་པར་འཛིན་པའི་བདེན་འཛིན་བསྐྱེད་པ་ནི་ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་མ་རིག་པ་སྟེ། སྟོང་ཉིད་བདུན་ཅུ་པ་ལས། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང་། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང་། །ཞེས་ཕུང་པོ་ལ་བདེན་པར་འཛིན་པའི་མ་རིག་པ་དེ་ཡན་ལག་བཅུ་གཉིས་ཀྱི་རྒྱུར་གསུངས་པའི་ཕྱིར་དང་། དེ་བཞིན་དུ། དབུ་མ་རྩ་བ་ལས། ལས་དང་ཉོན་མོངས་རྣམ་རྟོག་ལས། །ཞེས་པའི་རྣམ་རྟོག་དང་། རིན་ཆེན་ཕྲེང་བར། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ཅེས་པའི་ཕུང་པོར་འཛིན་པ་དང་། རྒྱུད་བླར། ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཞེས་པའི་ཚུལ་མིན་ཡིད་བྱེད་རྣམས་ཀྱང་། ཇི་སྲིད་ཕུང་པོ་བདེན་མེད་དུ་མ་རྟོགས་ཀྱི་བར་དུ་ཆོས་ལ་བདེན་པར་འཛིན་པའི་བདེན་འཛིན་ཡིན་པས་ཡན་ལག་བཅུ་གཉིས་ཀྱི་རྒྱུར་གྱུར་པའི་མ་རིག་པ་ཡིན་ལ། ཕུང་པོ་བདེན་མེད་དུ་མངོན་སུམ་དུ་རྟོགས་པའི་མཐོང་ལམ་སྐྱེས་ནས་ཐེག་དམན་གྱི་སློབ་མི་སློབ་གཉིས་ཀ་དང་། ཐེག་ཆེན་གྱི་ས་བདུན་པ་མན་ཆད་དུ་ཕུང་པོ་ལ་བཏགས་པ་ཙམ་དུ་མངོན་པར་ཞེན་པའི་ཤེས་སྒྲིབ་ཀྱི་རྣམ་རྟོག་ཡིན་པས་ཟག་བཅས་ཀྱི་ལས་འཕེན་པར་བྱེད་པ་ནི་མ་ཡིན་ནོ། །འདི་ལ་དགོངས་ནས། བདེན་པ་མཐོང་ལ་འཕེན་བྱེད་མེད། །ཅེས་གསུངས་པ་ཡང་ཐེག་པ་ཆེ་ཆུང་གཉིས་ཆར་གྱི་དབང་དུ་བྱས་པའོ། །དེ་ལྟར་ན་ཕུང་པོ་བདེན་མེད་དུ་མ་རྟོགས་ཀྱི་བར་དུ་ཡན་ལག་བཅུ་གཉིས་ཀྱི་གནས་སྐབས་ཐམས་ཅད་དུ་ཕུང་པོ་ལ་བདེན་པར་འཛིན་པའི་བདེན་འཛིན་ཡོད་པས་དངོས་འབྲས་གང་ཟག་ལ་བདེན་པར་འཛིན་པའི་མ་རིག་པ་ཡང་ཡོད་པར་འགྱུར་རོ་ཞེ་ན། ཤིན་ཏུ་འདོད་དེ། བཞི་བརྒྱ་པ་ལས། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་འགྱུར་ཏེ། །དེ་ཕྱིར་ཉོན་མོངས་ཐམས་ཅད་ནི། །གཏི་མུག་བཅོམ་པས་བཅོམ་པར་འགྱུར། །ཞེས་གསུངས་པས་སོ། །ཟབ་མོའི་གནད་འདི་ལ་དབུ་མའི་གཞུང་ལུགས་ཀྱི་དགོངས་པ་ཕྱིན་ཅི་མ་ལོག་པ་རྒྱས་པར་ནི་ངག་ལས་ཤེས་པར་བྱའོ།། །།ལྔ་པ་ནི། ཡན་ལག་བཅུ་གཉིས་པོ་ཐམས་ཅད་ཉོན་མོངས་པར་འདུས་ན་ཉོན་མོངས་པར་འཇོག་པའི་རྒྱུ་མཚན་གང་ཞེ་ན། མ་རིག་པས་ནི། ཡུལ་གྱི་གནས་ལུགས་མཐོང་བ་ལ་སྒྲིབ་པའི་སྒོ་ནས་འགྲོ་བ་རྣམས་ཉོན་མོངས་པར་འདྲེན་པར་བྱེད་དེ། དེ་བཞིན་དུ་འདུ་བྱེད་ཀྱིས་ནི་ཡང་སྲིད་ཀྱི་ས་བོན་འདེབས་པའི་སྒོ་ནས། རྣམ་པར་ཤེས་པས་ནི་སྐྱེ་གནས་སུ་འཁྲིད་པའི་སྒོ་ནས། མིང་གཟུགས་ཀྱིས་ནི་ཡང་སྲིད་ཀྱི་ལུས་ཀུན་འཛིན་པའི་སྒོ་ནས། སྐྱེ་མཆེད་དྲུག་གིས་ནི་ཡང་སྲིད་ཀྱི་ལུས་ཀུན་རྫོགས་པར་བྱེད་པའི་སྒོ་ནས། རེག་པས་ནི་ཡུལ་དབང་རྣམ་ཤེས་གསུམ་འདུས་ནས་ཡུལ་གྱི་འགྱུར་བ་ཡོངས་སུ་གཅོད་པའི་སྒོ་ནས། ཚོར་བས་ནི་རྣམ་སྨིན་གྱི་ལོངས་སྤྱོད་ལ་ཉེ་བར་སྦྱོར་བའི་སྒོ་ནས། སྲེད་པས་ནི་ཡང་སྲིད་ཀྱི་ལུས་ཀུན་སྡུད་པའི་སྒོ་ནས། ལེན་པས་ནི་ཡང་སྲིད་ཀྱི་ལས་ལ་སྦྱོར་བའི་སྒོ་ནས། སྲིད་པས་ནི་ཡང་སྲིད་ལ་མངོན་དུ་ཕྱོགས་པའི་སྒོ་ནས། སྐྱེ་བས་ནི་དོག་པའི་སྡུག་བསྔལ་སོགས་ལ་སྦྱོར་བའི་སྒོ་ནས། རྒ་ཤིས་ནི་ན་ཚོད་གཞན་དུ་འགྱུར་བ་དང་། སྲོག་གི་དབང་པོ་འགགས་པའི་སྡུག་བསྔལ་ལ་སྦྱོར་བའི་སྒོ་ནས་འགྲོ་བ་རྣམས་ཉོན་མོངས་པར་འདྲེན་པར་བྱེད་པའི་ཕྱིར། དེ་སྐད་དུ་ཡང་། དབུས་མཐའ་ལས། སྒྲིབ་པའི་ཕྱིར་དང་འདེབས་པའི་ཕྱིར། །འཁྲིད་པའི་ཕྱིར་དང་ཀུན་འཛིན་ཕྱིར། །རྫོགས་བྱེད་ཕྱིར་དང་གསུམ་གཅོད་ཕྱིར། །ཉེར་སྦྱོར་ཕྱིར་དང་སྡུད་པའི་ཕྱིར། །སྦྱོར་བའི་ཕྱིར་དང་མངོན་འདུའི་ཕྱིར། །སྡུག་བསྔལ་ཕྱིར་ན་འགྲོ་ཉོན་མོངས། །ཞེས་སོ། །དྲུག་པ་ལ། འཁོར་བའི་རྒྱུ་འབྲས་ཆ་གཅིག་གིས་བསྡུས་པའི་ཡན་ལག་བཅུ་གཉིས་ཚེ་དུ་ལ་རྫོགས་དཔྱད་པ་དང་། མདོ་ལས་འབྱུང་བའི་ཡན་ལག་བཅུ་གཉིས་ཚེ་དུ་ལ་རྫོགས་དཔྱད་པ་གཉིས་ལས། དང་པོ་ནི། ཤིན་ཏུ་མྱུར་ན་ཚེ་གཉིས་ལ་རྫོགས་པ་ཡང་སྲིད་དེ། ཚེ་སྔ་མའི་ཚེ་སྟོད་ལ་འཕེན་བྱེད་ཀྱི་ལས་བསགས། ཚེ་མཇུག་ལ་འགྲུབ་བྱེད་ཀྱི་ལས་ཀྱིས་གསོས་བཏབ་ནས་ཚེ་ཕྱི་མ་ལ་འཕངས་པའི་འབྲས་བུ་དང་། གྲུབ་པའི་འབྲས་བུ་རྣམས་འབྱུང་བའི་ཕྱིར་ཤིན་ཏུ་རིང་ན་ཚེ་གསུམ་ལ་རྫོགས་ཏེ། སྔ་མ་ལ་འཕེན་བྱེད་ཀྱི་ལས་བསགས། བར་པ་ལ་འགྲུབ་བྱེད་ཀྱི་ལས་ཀྱིས་གསོས་བཏབ་ནས། ཚེ་ཕྱི་མ་ལ་འབྲས་བུ་རྣམས་འབྱུང་བའི་ཕྱིར། དེ་ཡང་ལས་བསགས་པའི་སྐྱེ་བ་དང་། གསོས་བཏབ་པའི་སྐྱེ་བ་གཉིས་པོ་བར་མ་ཆད་དུ་འབྱུང་བར་ནི་མ་ངེས་ཏེ། འཕེན་བྱེད་ཀྱི་ལས་བསགས་ནས་སྐྱེ་བ་དུ་མས་བར་དུ་ཆོད་ཀྱང་གསོས་མ་བཏབ་པ་སྲིད་པའི་ཕྱིར། འགྲུབ་བྱེད་ཀྱི་ལས་ཀྱིས་གསོས་བཏབ་པའི་སྐྱེ་བ་དེ་དང་འབྲས་བུ་འགྲུབ་པའི་སྐྱེ་བ་དེ་ནི་བར་མ་ཆད་དུ་འབྱུང་བར་ངེས་ཏེ། འགྲུབ་བྱེད་ཀྱི་ལས་ཀྱིས་གསོས་བཏབ་པའི་དུས་སུ་ཡང་སྲིད་འགྲུབ་བྱེད་ཀྱི་ལས་ཀྱི་ནུས་པ་མཐུ་ཅན་དུ་བྱས་པའི་ཕྱིར། གལ་ཏེ་ཤིན་ཏུ་རིང་ན་ཚེ་གསུམ་ལ་རྫོགས་པ་མི་འཐད་པར་ཐལ། ལས་བསགས་པའི་སྐྱེ་བ་དང་། འབྲས་བུ་འགྲུབ་པའི་སྐྱེ་བ་གཉིས་ཀྱི་བར་དུ་སྐྱེ་བ་དུ་མས་ཆོད་པ་སྲིད་པའི་ཕྱིར་ཞེ་ན། སྐྱོན་མེད་དེ། དེ་རྣམས་རྟེན་འབྲེལ་གྱི་ཆ་གཞན་དུ་གཏོགས་པའི་ཕྱིར། གཞན་དུ་མོས་སྤྱོད་ཀྱི་ཚོགས་དང་། དག་སའི་ཚོགས་གཉིས་བསྐལ་པ་གྲངས་མེད་གཉིས་ལ་རྫོགས་པ་མི་སྲིད་པར་ཐལ། མོས་སྤྱོད་ཀྱི་འགོ་བརྩམས་ནས་དག་ས་མ་རྫོགས་ཀྱི་བར་དུ་བསྐལ་པ་གྲངས་མེད་གསུམ་དགོས་པའི་ཕྱིར། ཁྱབ་པ་ཁས། འདིར་ཚོར་བའི་རྐྱེན་གྱིས་སྲེད་པ་འབྱུང་བ་མེད་པར་ཐལ། ཚོར་བ་དེ་སྲེད་ལེན་གཉིས་ཀྱིས་གསོས་བཏབ་པའི་རྗེས་སུ་བྱུང་བའི་འབྲས་བུ་ཡིན་པའི་ཕྱིར། ཞེས་པའི་ལན་དུ་དོན་གསང་མཁན་པོས་རྟེན་འབྲེལ་གྱི་ཆ་གཞན་དུ་གཏོགས་པའི་ཚོར་བའི་རྐྱེན་གྱིས་སྲེད་པ་འབྱུང་བས་སྐྱོན་མེད་ཅེས་པའི་ལན་མཛད་ཀྱང་། ཕྱོགས་སྔ་མའི་བསམ་པ་དང་། ལན་གདབ་ཚུལ་ནི་མི་མཐུན་ཏེ། སྔ་མ་ནི་མདོ་ལས་འབྱུང་བའི་རྟེན་འབྲེལ་ཆ་གཅིག་གིས་དབང་དུ་བྱས་ནས་རྩོད་པ་ཡིན་ཏེ། གཞན་དུ་ན་ཚོར་བའི་རྐྱེན་གྱིས་སྲེད་པ་འབྱུང་བར་ཁས་མ་བླངས་པའི་ཕྱིར་རོ། །དེ་ལ་རྟེན་འབྲེལ་གྱི་ཆ་གཞན་དུ་གཏོགས་པའི་ལན་མཛད་པ་ནི་འཁོར་བས་བསྡུས་པའི་རྒྱུ་འབྲས་ཆ་གཞན་དུ་གཏོགས་པའི་དོན་ཡིན་ན་ནི། ཕྱོགས་སྔ་མའི་ལན་དུ་མ་སོང་ལ། མདོ་ལས་འབྱུང་བའི་ཡན་ལག་བཅུ་གཉིས་ཆ་གཞན་དུ་གཏོགས་པའི་དོན་ཡིན་ན་ནི། མདོ་ལས་འབྱུང་བའི་རྟེན་འབྲེལ་ཆ་གཅིག་ལ་ཚོར་བའི་རྐྱེན་གྱིས་སྲེད་པ་འབྱུང་བ་མི་སྲིད་པར་ཐལ་བའི་ཕྱིར་རོ། །ལུགས་འདི་ལ་ནི་རྩོད་པའི་གནས་མེད་དེ། འཁོར་བས་བསྡུས་པའི་རྒྱུ་འབྲས་ཆ་གཅིག་ལ་ཚོར་བའི་ས་བོན་གྱིས་སྲེད་པ་བསྐྱེད་པ་ཡོད་ཀྱང་ཚོར་བ་མངོན་འགྱུར་བའི་རྐྱེན་གྱིས་སྲེད་པ་འབྱུང་བ་མེད་པའི་ཕྱིར་རོ། །གཉིས་པ་ལ་འཕེན་འགྲུབ་དངོས་ཤུགས་བརྒྱད་དུ་དབྱེ་བ། དངོས་བསྟན་བཞི་ལ་ཡན་ལག་བཅུ་གཉིས་སུ་བཞག་པ། དེ་ལྟར་བཞག་པའི་དགོས་པ། རྒྱུ་འབྲས་ཆ་གཅིག་ཏུ་བཞག་པའི་དགོས་པ། དེས་ན་གསུམ་དང་བཞི་ལ་རྫོགས་པའི་ཚུལ་དང་ལྔ་ལས། དང་པོ་ནི། མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་ལ་འཕེན་འགྲུབ་ཀྱི་ཡན་ལག་བརྒྱད་ཚང་དགོས་ཏེ། དེ་ལ་འཁོར་བས་བསྡུས་པའི་རྒྱུ་འབྲས་ཆ་གཉིས་ངེས་པར་དགོས་པ་གང་ཞིག དེ་རེ་རེའི་སྟེང་དུ་ཡང་འཕེན་འགྲུབ་ཀྱི་ཡན་ལག་བཞི་བཞི་ཚང་བའི་ཕྱིར། དེ་ལྟར་བརྒྱད་ཡོད་པ་ལས་འཕེན་བྱེད་ཀྱི་རྒྱུ་གཅིག་མ་རིག་པ། འདུ་བྱེད་རྣམ་པར་ཤེས་པ་གསུམ་གྱི་སྐབས་སུ་དངོས་སུ་བསྟན། གཅིག་སྲེད་ལེན་སྲིད་པ་གསུམ་གྱི་སྐབས་སུ་ཤུགས་ལ་བསྟན། འཕངས་པའི་འབྲས་བུ་གཅིག་མིང་གཟུགས་ནས་ཚོར་བའི་བར་དུ་དངོས་སུ་བསྟན། གཅིག་སྐྱེ་བ་དང་རྒ་ཤི་གཉིས་ཀྱི་སྐབས་སུ་ཤུགས་ལ་བསྟན། འགྲུབ་བྱེད་ཀྱི་རྒྱུ་གཅིག་སྲེད་ལེན་སྲིད་པ་གསུམ་གྱིས་སྐབས་སུ་དངོས་སུ་བསྟན། གཅིག་མ་རིག་པ་སོགས་ཀྱི་སྐབས་སུ་ཤུགས་ལ་བསྟན། གྲུབ་པའི་འབྲས་བུ་གཅིག་སྐྱེ་བ་དང་རྒ་ཤི་གཉིས་ཀྱི་སྐབས་སུ་དངོས་སུ་བསྟན། གཅིག་མིང་གཟུགས་ནས་ཚོར་བའི་བར་ལ་ཤུགས་ལ་བསྟན་པ་ཡིན་ནོ། །ལུགས་འདི་ལ་ཡན་ལག་བཅུ་གཉིས་ཆ་གཅིག་གི་ཚོར་བའི་རྐྱེན་གྱིས་སྲེད་པ་འབྱུང་བ་དང་། ཚོར་བ་སྲེད་ལེན་གྱིས་གསོས་བཏབ་པའི་རྗེས་སུ་སྐྱེ་བ་ཕྱི་མ་ལ་འབྱུང་བ་མི་འགལ་ཏེ། དངོས་བསྟན་གྱི་ཚོར་བའི་རྐྱེན་གྱིས་སྲིད་པ་འབྱུང་ལ་ཤུགས་བསྟན་གྱི་ཚོར་བ་དེ་སྲེད་ལེན་གྱིས་གསོས་བཏབ་པའི་རྗེས་སུ་སྐྱེ་བ་ཕྱི་མ་ལ་འབྱུང་བའི་ཕྱིར། གཉིས་པ་ནི། མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་ལ་འཕེན་འགྲུབ་དངོས་བསྟན་བཞི་དང་། ཤུགས་བསྟན་བཞི་ཡོད་པ་ལས། དངོས་བསྟན་བཞི་པོ་ཕྱོགས་གཅིག་ཏུ་བསྒྲིགས་ནས་ཡན་ལག་བཅུ་གཉིས་སུ་བཞག་གོ །གསུམ་པ་ནི། འོ་ན་དེ་ལ་དགོས་པ་ཅི་ཡོད་ཅེ་ན། འདི་ལ་དགོས་པ་གཉིས་ལས། དང་པོ་ནི། རྒྱུ་ལ་རིང་རྒྱུ་དང་། ཉེ་རྒྱུ་གཉིས་ཡོད་པ་དང་། འབྲས་བུ་ལ་རིང་བའི་འབྲས་བུ་དང་། ཉེ་བའི་འབྲས་བུ་གཉིས་ཡོད་པ་རྟོག་པའི་ཆེད་དུ་ཡིན་ཏེ། འཕེན་བྱེད་རྒྱུ་འབྲས་ཀྱི་སྐབས་སུ་རིང་བའི་རྒྱུ་འབྲས་བསྟན་ནས། འགྲུབ་བྱེད་རྒྱུ་འབྲས་ཀྱི་སྐབས་སུ་ཉེ་བའི་རྒྱུ་འབྲས་བསྟན་པའི་ཕྱིར། དེ་ལྟར་རྟོགས་པ་ལ་དགོས་པ་ཅི་ཡོད་སྙམ་ན་རྒྱུ་ལ་གཉིས་ཡོད་པ་རྟོགས་པའི་དགོས་པ་ནི་རིང་བའི་རྒྱུ་བསགས་ཀྱང་ཉེ་བའི་རྒྱུས་གསོས་མ་བཏབ་ན་འབྲས་བུ་མི་བསྐྱེད་པར་ཤེས་ནས་སྲེད་པ་སྤོང་བའི་ཆེད་ཡིན་ལ། འབྲས་བུ་ལ་གཉིས་ཡོད་པ་རྟོགས་པའི་དགོས་པ་ནི་རྣམ་སྨིན་གྱི་ངོ་བོ་དང་། དེའི་ཉེས་དམིགས་རྟོགས་པའི་ཆེད་ཡིན་ནོ། །དགོས་པ་གཉིས་པ་ནི། ཡན་ལག་བཅུ་གཉིས་སྔ་མ་སྔ་མའི་རྐྱེན་གྱིས་ཕྱི་མ་ཕྱི་མ་འབྱུང་བ་དང་། སྔ་མ་སྔ་མ་འགགས་པས་ཕྱི་མ་ཕྱི་མ་འགག་པར་རྟོགས་པའི་ཆེད་ཡིན་ཏེ། རྒྱུ་འབྲས་ཆ་གཉིས་ཀྱི་དངོས་བསྟན་བཞི་ཕྱོགས་གཅིག་ཏུ་མ་བསྒྲིགས་ན་དགོས་པ་དེ་གཉིས་མི་འགྲུབ་པའི་ཕྱིར་རོ། །བཞི་པ་ནི་དེ་ལྟར་ན་མཛོད་ལས་འབྱུང་བ་ལྟར་མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་ལ་རྒྱུ་འབྲས་ཆ་གཉིས་སུ་སྟོན་རིགས་པར་འགྱུར་ཏེ། དོན་ལ་རྒྱུ་འབྲས་ཆ་གཉིས་ཡོད་པའི་ཕྱིར་ཞེ་ན། འདིར་རྒྱུ་འབྲས་ཆ་གཅིག་ཏུ་བསྟན་པའི་དགོས་པ་ནི། འཁོར་བས་བསྡུས་པའི་རྒྱུ་འབྲས་ཆ་གཅིག་ལ་ཡང་འཕེན་འགྲུབ་ཀྱི་ཡན་ལག་བཞི་ཚང་བར་ཤེས་པའི་ཆེད་ཡིན་ཏེ། འཁོར་བས་བསྡུས་པའི་རྒྱུ་འབྲས་ཆ་གཅིག་ལ་ཡན་ལག་བཅུ་གཉིས་ཚང་ཞིང་འདིར་ཡན་ལག་བཅུ་གཉིས་ལ་འཕེན་འགྲུབ་ཀྱི་ཡན་ལག་བཞིར་བསྟན་པའི་ཕྱིར། ལྔ་པ་ནི། མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་མྱུར་ན་ཚེ་གསུམ་གྱིས་རྫོགས་ཏེ། ཚེ་སྔ་མ་ལ་འཕེན་བྱེད་དངོས་བསྟན་གསུམ། འགྲུབ་བྱེད་ཤུགས་བསྟན་གསུམ་སྟེ་དྲུག་རྫོགས་ཤིང་། ཚེ་བར་པ་ལ་འཕངས་པའི་འབྲས་བུ་དངོས་བསྟན་བཞི། འགྲུབ་པའི་འབྲས་བུ་ཤུགས་བསྟན་གཉིས་ཏེ་དྲུག་རྫོགས། དེ་ཉིད་ཀྱི་ཚེ་འགྲུབ་བྱེད་དངོས་བསྟན་གསུམ་དང་། འཕེན་བྱེད་ཤུགས་བསྟན་གསུམ་སྟེ་དྲུག་འབྱུང་བས་བཅུ་གཉིས་སུ་འགྱུར་ལ། ཚེ་ཕྱི་མ་ལ་གྲུབ་པའི་འབྲས་བུ་དངོས་བསྟན་གཉིས། འཕངས་པའི་འབྲས་བུ་ཤུགས་བསྟན་གཉིས་རྫོགས། དངོས་ཤུགས་ཉི་ཤུ་རྩ་བཞི་པོ་དེ་ཉིད་ཀྱི་མདོ་ལས་འབྱུང་བའི་ཡན་ལག་བཅུ་གཉིས་པོ་ཆ་གཅིག་རྫོགས་པའི་ཕྱིར་རོ། །རིང་ན་ཚེ་བཞི་ལ་རྫོགས་ཏེ། ཚེ་སྔ་མ་ལ་འཕེན་བྱེད་དངོས་བསྟན་གསུམ། ཚེ་གཉིས་པ་ལ་འགྲུབ་བྱེད་ཤུགས་བསྟན་གསུམ། ཚེ་གསུམ་པ་ལ་འཕངས་པའི་འབྲས་བུ་དངོས་བསྟན་བཞི། གྲུབ་པའི་འབྲས་བུ་ཤུགས་བསྟན་གཉིས་ཏེ་དྲུག་རྫོགས་ཤིང་། དེ་ཉིད་ཀྱི་ཚེ་འགྲུབ་བྱེད་དངོས་བསྟན་གསུམ་འཕེན་བྱེད་ཤུགས་བསྟན་གསུམ་སྟེ་དྲུག་འབྱུང་བས་བཅུ་གཉིས་སུ་འགྱུར་ལ། ཚེ་བཞི་པ་ལ་གྲུབ་པའི་འབྲས་བུ་དངོས་བསྟན་གཉིས་དང་། འཕངས་པའི་འབྲས་བུ་ཤུགས་བསྟན་བཞི་སྟེ་དྲུག་འབྱུང་བས་དངོས་ཤུགས་ཉི་ཤུ་རྩ་བཞི་པོ་དེ་ཉིད་ཀྱིས་མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་རྫོགས་པའི་ཕྱིར། འདིའི་ཚེ་དང་པོ་དང་གཉིས་པ་བར་མ་ཆད་དུ་འབྱུང་བ་ངེས་པ་མེད་པ་ནི་སྔར་དང་འདྲ་ལ། ཚེ་ཕྱི་མ་གསུམ་པོ་བར་མ་ཆད་དུ་འབྱུང་སྟེ། ཚོར་བའི་རྐྱེན་གྱིས་སྲེད་པ་འབྱུང་དགོས་པའི་ཕྱིར་དང་། འགྲུབ་བྱེད་ཀྱི་གསོས་བཏབ་པའི་སྐྱེ་བ་དང་། འབྲས་བུ་འགྲུབ་པའི་སྐྱེ་བ་གཉིས་ལ་སྐྱེ་བ་གཞན་གྱིས་བར་ཆོད་པ་མི་སྲིད་པའི་ཕྱིར། མདོར་ན་རྒྱུ་འབྲས་སྔ་མའི་ཚོར་བ་རྒྱུར་བྱས་ནས་རྒྱུ་འབྲས་ཕྱི་མའི་སྲེད་པ་འབྲས་བུར་བྱས་པ་ལ་སྔ་མའི་འབྲས་བུ་དང་། ཕྱི་མའི་རྒྱུ་གཉིས་པོ་ཚེ་གཅིག་ལ་འབྱུང་དགོས་ཤིང་། དེ་ཡང་མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་གིས་བསྡུས་པ་ནི་གནད་ཀྱི་དོན་ནོ། །འདིར་རྣམ་ཤེས་འཕེན་བྱེད་ཀྱི་ཡན་ལག་ཏུ་བྱས་པ་ནི་ཀུན་ལས་བཏུས་ལས་གསུངས་པའི་དབང་དུ་བྱས་ལ། རྣམ་ཤེས་འབྲས་བུའི་ཆ་བཟུང་བ་ལྟར་ན་འཕངས་པའི་འབྲས་བུའི་ཁོངས་སུ་བསྡུ་བར་བྱའོ། །བདུན་པ་ལ་དགག་བཞག་གཉིས་ལས། དང་པོ་ནི། མཁས་པ་ཁ་ཅིག འདོད་པ་ནས་འདོད་པར་སྐྱེ་བའི་ཚེ་ཐམས་ཅད་ས་མཚུངས་ཤིང་ཁམས་དང་ས་གཞན་ནས་གཞན་དུ་སྐྱེ་བའི་ཚེ་མི་མཚུངས་པ་ཡང་ཡོད་དེ། དེ་ལ་འདུ་བྱེད་དང་མིང་གཟུགས་ནས་སྲེད་པའི་བར་དག་ནི་སྐྱེ་བའི་ས་པ་ཁོ་ནར་གཏོགས་པའི་ཕྱིར་ས་མཚུངས་པ་ཡིན་ཏེ། ས་གཞན་གྱི་འདུ་བྱེད་ཀྱིས་ས་གཞན་གྱི་རྣམ་སྨིན་མི་འགྲུབ་པའི་ཕྱིར་དང་། ས་གཞན་གྱི་ཚོར་བ་ལས་ས་གཞན་གྱི་སྲེད་པ་མི་འཕེལ་བའི་ཕྱིར། མ་རིག་པ་དང་། རྣམ་ཤེས་ནི་གང་དུ་ལས་སོག་པར་བྱེད་པའི་ས་དེ་ཁོ་ནར་གཏོགས་ཏེ། རྣམ་ཤེས་ནི་ལས་སོག་པའི་རྟེན་དེའི་ཀུན་གཞི་ཡིན་པའི་ཕྱིར་དང་། མ་རིག་པ་ནི་ཉོན་ཡིད་དང་མཚུངས་ལྡན་ཡིན་པས་གང་དུ་སྐྱེས་པ་དེའི་ས་པ་ཡིན་པའི་ཕྱིར་རོ། །ལེན་པ་དང་སྲིད་པ་ནི་སྐྱེ་བ་དང་རྒ་ཤི་གར་གཏོགས་པ་དེའི་ས་པར་གཏོགས་ཏེ། དེ་དག་མངོན་པར་འགྲུབ་པར་བྱེད་པའི་ཉེར་རྒྱུ་ཡིན་པའི་ཕྱིར་རོ། །དེ་ལྟར་ན་འདོད་པ་ནས་བསམ་གཏན་དང་པོར་སྐྱེ། དེ་ནས་བསམ་གཏན་གཉིས་པར་སྐྱེ་བར་འགྱུར་བ་དེའི་ཚེ་མ་རིག་པ་དང་། རྣམ་པར་ཤེས་པ་ནི་འདོད་པའི་ས་པ། འདུ་བྱེད་དང་མིང་གཟུགས་ནས་སྲེད་པའི་བར་ནི་བསམ་གཏན་དང་པོའི་ས་པ། ལྷག་མ་རྣམས་ནི་བསམ་གཏན་གཉིས་པའི་ས་པ་ཡིན་ནོ། །སྲེད་པ་བསམ་གཏན་དང་པོའི་ས་པ་ཡིན་ཏེ། བསམ་གཏན་དང་པོའི་ཚོར་བ་ལ་ཆགས་པའི་འདོད་ཆགས་ཡིན་པའི་ཕྱིར་དང་། ས་གཞན་གྱི་ཚོར་བ་ལས་ས་གཞན་གྱི་སྲེད་པ་མི་འཕེལ་བའི་ཕྱིར་རོ། །ལེན་པ་དང་སྲིད་པ་བསམ་གཏན་གཉིས་པའི་ས་པ་ཡིན་ཏེ། སྲིད་པ་ནི་བསམ་གཏན་གཉིས་པའི་ལས་ནུས་པ་མཐུ་ཅན་དུ་གྱུར་པའི་ངོ་བོ་ཡིན་པའི་ཕྱིར་དང་། ལེན་པ་ནི་བསམ་གཏན་གཉིས་པའི་ཕུང་པོ་ཐོབ་པར་འདོད་པའི་སྲེད་པ་ཡིན་པའི་ཕྱིར་རོ། །འོ་ན་བསམ་གཏན་དང་པོའི་སྲེད་པ་གཉིས་པའི་ལེན་པའི་རྐྱེན་དུ་ཇི་ལྟར་འགྱུར་ཞེ་ན། བསམ་གཏན་དང་པོའི་ས་པའི་ཉོན་མོངས་པ་ཅན་གྱི་ཡིད་ཀྱི་འཁོར་གྱི་བདག་ལ་ཆགས་པའི་དབང་གིས་གཉིས་པའི་ཕུང་པོ་ལ་སྲེད་པའི་ལེན་པ་སྐྱེ་བའི་ཕྱིར་ཉེས་པ་མེད་དོ། །དེས་ན་དོན་གསང་རྣམ་པར་བཤད་པ་ལས། སྐྱེ་བའི་ས་པ་གང་ཡིན་པ་མངོན་པར་འགྲུབ་པར་བྱེད་པའི་ཉོན་མོངས་པ་ཡང་ངེས་པར་དེའི་ས་པའོ། །ཞེས་བཤད་པ་གང་ཡིན་པ་དེ་མི་འཐད་པ་ཡིན་ནོ། །ཞེས་སྤྲོས་པ་དང་བཅས་ཏེ་སྨྲའོ། །འདི་དགག་པ་ལ། ཁས་བླངས་འགལ་བ་དང་། སྒྲུབ་བྱེད་མི་འཐད་པ་དང་། རྣམ་པར་བཏགས་ནས་དགག་པ་དང་གསུམ་ལས། དང་པོ་ནི། འདུ་བྱེད་སྐྱེ་བའི་ས་པར་གཏོགས་པའི་ཤེས་བྱེད་དུ་ས་གཞན་གྱི་འདུ་བྱེད་ཀྱིས་ས་གཞན་གྱི་རྣམ་སྨིན་མི་འགྲུབ་པའི་ཕྱིར་ཞེས་བཀོད་པ་ནི་སྲེད་པ་ལ་ཡང་མཚུངས་ཏེ། སྲེད་པ་ཡང་། སྐྱེ་བ་དང་རྒ་ཤི་གང་དུ་གཏོགས་པའི་ས་དེར་གཏོགས་པར་ཐལ། ས་གཞན་གྱི་འགྲུབ་བྱེད་ཀྱིས་ས་གཞན་གྱི་རྣམ་སྨིན་མི་འགྲུབ་པའི་ཕྱིར་རོ། །ལེན་པ་སྐྱེ་བ་དང་རྒ་ཤི་གང་དུ་གཏོགས་པའི་ས་དེར་གཏོགས་པའི་ཤེས་བྱེད་དུ་ལེན་པ་ནི་སྐྱེ་བ་ཕྱི་མའི་ཕུང་པོ་ཐོབ་པར་འདོད་པའི་སྲེད་པ་ཡིན་པའི་ཕྱིར་རོ། །ཞེས་བཀོད་པ་ཡང་སྲེད་པ་ལ་མཚུངས་ཏེ། སྲེད་པ་ཡང་སྐྱེ་བ་ཕྱི་མའི་ཕུང་པོ་ཐོབ་པར་འདོད་པའི་སྲེད་པ་ཡིན་པའི་ཕྱིར། གལ་ཏེ་མ་གྲུབ་སྟེ། སྲེད་པ་ནི་ཉོན་ཡིད་འཁོར་དུ་བྱུང་བའི་བདག་ལ་ཆགས་པ་ཡིན་པས་ཀུན་གཞིའི་རྣམ་ཤེས་ཁོ་ན་ལ་སྲེད་པའི་ཕྱིར་ཞེ་ན། དེ་ལྟར་ན་ཚོར་བ་ལ་ཆགས་པ་སྲེད་པ་ཡིན་པར་འདོད་པ་དང་འགལ་ཏེ། ཚོར་བ་ནི་ཀུན་གཞི་མིན་པའི་ཕྱིར་རོ། །གཉིས་པ་ནི། ཚོར་བ་དང་སྲེད་པ་ས་མཚུངས་པའི་ཤེས་བྱེད་དུ་ས་གཞན་གྱི་ཚོར་བ་ལས་ས་གཞན་གྱི་སྲེད་པ་མི་འཕེལ་བའི་ཕྱིར་ཞེས་བཀོད་པ་ནི་རྣམ་པར་མ་བརྟགས་པ་སྟེ། སྲེད་པ་ཡིན་ན་ཚོར་བ་བདེ་བ་ལ་མི་འབྲལ་བར་སྲེད་པས་མ་ཁྱབ་པའི་ཕྱིར་ཏེ། ཚོར་བ་གསུམ་ལ་སྲེད་ཚུལ་གསུམ་ཡོད་པའི་ཕྱིར། དེས་ན་ས་གཞན་གྱི་ཚོར་བ་ལས་ས་གཞན་གྱི་སྲེད་པ་འཕེལ་བ་ཡོད་དེ། འདོད་པའི་ཚོར་བ་སྡུག་བསྔལ་ལ་དམིགས་ནས་དེ་དང་འབྲལ་བར་འདོད་པའི་བསམ་གཏན་དང་པོའི་སས་བསྡུས་ཀྱི་སྲེད་པ་འཕེལ་བ་ཡོད་པའི་ཕྱིར་ཏེ། འདོད་པ་དང་། བསམ་གཏན་དང་པོ་ལ་ཞི་རགས་སུ་ལྟ་བའི་སྐབས་ཀྱི་སྲེད་པ་དེ་བསམ་གཏན་དང་པོའི་སས་བསྡུས་ཡིན་པའི་ཕྱིར། ལེགས་པར་སོམས་ཤིག གསུམ་པ་ནི། དེ་ལྟ་བུའི་ས་མཚུངས་འདི་འཁོར་བས་བསྡུས་པའི་རྒྱུ་འབྲས་ཆ་གཅིག་ལ་འཇོག་གམ། ཆ་གཉིས་ལ་འཇོག དང་པོ་ལྟར་ན། མིང་གཟུགས་ནས་ཚོར་བའི་བར་དང་། སྐྱེ་བ་དང་རྒ་ཤི་གཉིས་ས་མཚུངས་ཡོད་པར་འདོད་པ་དང་འགལ་ལ། ཕྱི་མ་ལྟར་ན་འདུ་བྱེད་གང་དུ་སྐྱེ་བའི་སར་གཏོགས་ཤིང་སྲེད་པ་རྣམ་སྨིན་འགྲུབ་པའི་སར་མི་གཏོགས་པར་འདོད་པ་དང་འགལ་ཏེ། རྒྱུ་འབྲས་སྔ་མའི་མ་རིག་པ་དང་། འདུ་བྱེད་གཉིས་རྒྱུར་འཇོག་པ་ལྟར། རྒྱུ་འབྲས་ཕྱི་མའི་སྲེད་ལེན་སྲིད་པ་གསུམ་པོ་ཡང་རྒྱུར་འཇོག་དགོས་པའི་ཕྱིར། གཉིས་པ་ལ་གཉིས་ཏེ། འཁོར་བས་བསྡུས་པའི་རྒྱུ་འབྲས་ཆ་གཅིག་གི་ས་མཚུངས་དཔྱད་པ་དང་། མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་གི་ས་མཚུངས་དཔྱད་པ་གཉིས་ལས། དང་པོ་ནི། ཁམས་གསུམ་ས་དགུ་ནས་སྐྱེ་བའི་ཚུལ་བསྡུ་ན། རང་ས་ནས་རང་སར་སྐྱེ་བ། འོག་ས་ནས་གོང་སར་སྐྱེ་བ། གོང་ས་ནས་འོག་སར་སྐྱེ་བ་གསུམ་དུ་འདུས་ཤིང་། རྒྱས་པར་ཕྱེ་ན་གྱ་གཅིག་ཡོད་དེ། ཁམས་གསུམ་ས་དགུ་ནས་འདོད་པར་སྐྱེ་བ་དགུ་ཡོད་པ་ནས་བཟུང་སྟེ། སྲིད་རྩེར་སྐྱེ་བ་དགུའི་བར་རྣམས་སུ་ཡོད་པའི་ཕྱིར། དེ་ལ་ཡན་ལག་བཅུ་གཉིས་ལས། འདུ་བྱེད་ལ་སོགས་པའི་ཕྱི་མ་བཅུ་གཅིག་པོ་དེ་གང་དུ་སྐྱེ་བའི་སྐྱེ་ས་ཁོ་ནར་གཏོགས་ཏེ། རྣམ་སྨིན་གྱི་ཡན་ལག་དྲུག་གམ་བདུན་པོ་དེ་སྐྱེས་པ་དེའི་ཟག་བཅས་ཀྱི་ཕུང་པོ་ལ་འཇོག་དགོས་ཤིང་། ས་གཞན་གྱི་འཕེན་བྱེད་ཀྱི་ལས་ཀྱིས་ས་གཞན་གྱི་རྣམ་སྨིན་མི་འཕེན། ས་གཞན་གྱི་འགྲུབ་བྱེད་ཀྱི་ལས་ཀྱིས་ས་གཞན་གྱི་རྣམ་སྨིན་མི་འགྲུབ་པའི་ཕྱིར་རོ། །མ་རིག་པ་གང་དུ་སྐྱེ་བའི་སྐྱེ་སར་གཏོགས་པ་ལ་ཡང་དགུ་ཡོད་དེ། ཁམས་གསུམ་ས་དགུ་ནས་འདོད་པར་སྐྱེ་བ་ནའོ། །དེའི་རྒྱུ་མཚན་ཡང་ཁམས་གོང་གི་སས་བསྡུས་ཀྱི་མ་རིག་པས་འདོད་པར་འཕེན་བྱེད་ཀྱི་ལས་ཀུན་ནས་མི་སློང་བའི་ཕྱིར་ཏེ། གོང་མའི་དངོས་གཞིའི་སེམས་མ་ཐོབ་པར་གོང་མའི་མ་རིག་པ་མངོན་དུ་མི་འགྱུར་ལ། གོང་མའི་དངོས་གཞི་ཐོབ་ནས་མ་ཉམས་པར་འདོད་པར་འཕེན་བྱེད་ཀྱི་ལས་སོག་པ་མི་སྲིད་པའི་ཕྱིར་ཏེ། འདོད་པ་དམན་པར་མཐོང་བའི་ཕྱིར། ཡང་ཁམས་གསུམ་ས་དགུ་ནས་བསམ་གཏན་དང་པོར་སྐྱེ་བའི་སྐྱེ་བ་དགུ་ལ་མ་རིག་པ་འདོད་པའི་སས་བསྡུས་ཁོ་ན་ཡིན་ཏེ། བསམ་གཏན་དང་པོ་ཡན་ཆད་ཀྱི་སས་བསྡུས་ཀྱི་མ་རིག་པས་བསམ་གཏན་དང་པོར་འཕེན་བྱེད་ཀྱི་ལས་ཀུན་ནས་མི་སློང་བའི་ཕྱིར་ཏེ། དེར་སྐྱེ་བའི་འཕེན་བྱེད་ཀྱི་ལས་སོག་པར་བྱེད་པ་ལ་ཉེར་བསྡོགས་ཞི་རགས་ཀྱི་རྣམ་པ་ཅན་གྱིས་འོག་སར་ལ་འདོད་ཆགས་དང་བྲལ་བར་བྱེད་པ་སྔོན་དུ་འགྲོ་དགོས་ཞིང་། ཀུན་སློང་གི་མ་རིག་པ་ནི་དེའི་ཡང་སྔོན་དུ་འགྲོ་དགོས་པའི་ཕྱིར་རོ། །ཡང་ཁམས་གསུམ་ས་དགུ་ནས་བསམ་གཏན་གཉིས་པར་སྐྱེ་བའི་སྐྱེ་བ་དགུ་ལ་མ་རིག་པ་བསམ་གཏན་དང་པོའི་སས་བསྡུས་ཁོ་ན་ཡིན་ཏེ། འདོད་པའི་སས་བསྡུས་ཀྱི་མ་རིག་པས་བསམ་གཏན་གཉིས་པའི་ལས་ཀུན་ནས་མི་སློང་བ་གང་ཞིག བསམ་གཏན་གཉིས་པ་ཡན་ཆད་ཀྱི་མ་རིག་པས་ཀྱང་བསམ་གཏན་གཉིས་པར་འཕེན་བྱེད་ཀྱི་ལས་ཀུན་ནས་མི་སློང་བའི་ཕྱིར། གཏན་ཚིགས་སྔ་མ་གྲུབ་སྟེ། བསམ་གཏན་གཉིས་པར་སྐྱེ་བའི་འཕེན་བྱེད་ཀྱི་ལས་སོག་པ་ལ་བསམ་གཏན་དང་པོའི་དངོས་གཞིའི་སེམས་ཐོབ་པ་དགོས། དེ་ཐོབ་ནས་འདོད་པའི་སྒོམ་སྤངས་སུ་གྱུར་པའི་མ་རིག་པ་སྤང་བའི་ཕྱིར་དང་། འདོད་པའི་མཐོང་སྤངས་སུ་གྱུར་པའི་མ་རིག་པ་ནི་མི་དགེ་བ་ཡིན་པས་མི་གཡོ་བའི་ལས་ཀུན་ནས་མི་སློང་བའི་ཕྱིར། དེས་མཚོན་ནས་བསམ་གཏན་གསུམ་པ་ནས་བཟུང་སྟེ་སྲིད་རྩེའི་བར་གྱི་སྐྱེ་བ་དགུ་དགུ་པོ་ཐམས་ཅད་ཀྱི་ཀུན་སློང་གི་མ་རིག་པ་རང་རང་གི་འོག་ས་དེ་མ་ཐག་ཏུ་ཤེས་པར་བྱའོ། །བསྡུ་ན་མ་རིག་པ་ལ་མུ་བཞི་ལས། སྐྱེ་འཆི་གཉིས་ཀའི་སར་གཏོགས་པ་ནི་འདོད་པ་ནས་འདོད་པར་སྐྱེ་བ་ལྟ་བུ། སྐྱེ་སར་གཏོགས་ནས་འཆི་སར་མི་གཏོགས་པ་ནི་གོང་མ་བརྒྱད་ནས་འདོད་པར་སྐྱེ་བ་ལྟ་བུ། འཆི་སར་གཏོགས་ནས་སྐྱེ་སར་མི་གཏོགས་པ་ནི་འདོད་པ་ནས་བསམ་གཏན་དང་པོར་སྐྱེ་བ་ནས་བཟུང་སྟེ། ཅི་ཡང་མེད་ནས་སྲིད་རྩེར་སྐྱེ་བའི་བར་བརྒྱད་ལྟ་བུའོ། །སྐྱེ་འཆི་གཉིས་ཀའི་སར་མི་གཏོགས་པ་ནི་བཅུ་བདུན་པོ་དེའི་ལྷག་མ་རྣམས་སོ། །འདི་དག་ཀྱང་ཡིད་ཀྱི་ས་པའི་མ་རིག་པས་ཀུན་སློང་བྱེད་པའི་དབང་དུ་བྱས་ཀྱི་ཉོན་ཡིད་ཀྱི་འཁོར་དུ་བྱུང་བའི་མ་རིག་པས་ཀུན་སློང་བྱེད་ན་མ་རིག་པ་ནི་གང་དུ་ལས་སོག་པའི་རྟེན་དེའི་སར་གཏོགས་ཏེ། ཉོན་ཡིད་ནི་ཀུན་གཞིའི་རྣམ་ཤེས་ལ་དམིགས་ནས་བདག་ཏུ་འཛིན་པ་ཡིན་པས་གཞན་གྱི་ཉོན་ཡིད་ཀྱིས་ས་གཞན་གྱི་ཀུན་གཞི་ལ་བདག་ཏུ་འཛིན་པ་མི་སྲིད་པའི་ཕྱིར། འདི་དག་གི་དགག་སྒྲུབ་རྒྱས་པ་ནི་སྐྱེས་བུ་མཆོག་གི་གསལ་བྱེད་དུ་བསྟན་ཟིན་པས་དེར་ལྟ་བར་བྱའོ། །གཉིས་པ་ལ། འདོད་པ་ནས་འདོད་པར་སྐྱེ་བ་ལ་མདོ་ལས་འབྱུང་བའི་ཡན་ལག་བཅུ་གཉིས་ཚང་བའི་ཚེ་ཐམས་ཅད་ས་མཚུངས་པ་ནི་རྟོགས་པར་སླ་ལ། འདོད་པ་ནས་བསམ་གཏན་དང་པོ། དེ་ནས་བསམ་གཏན་གཉིས་པར་སྐྱེ་བ་ལ་མདོ་ལས་འབྱུང་བའི་ཡན་ལག་བཅུ་གཉིས་ཚང་བའི་ཚེ་དངོས་བསྟན་གྱི་མ་རིག་པ་ནི་འདོད་པའི་སས་བསྡུས་དང་། འདུ་བྱེད་དང་རྣམ་པར་ཤེས་པ་ནས་ཚོར་བའི་བར་ནི་བསམ་གཏན་དང་པོའི་སས་བསྡུས་ཡིན་ལ། འདི་ལ་ཤུགས་བསྟན་གྱི་འགྲུབ་བྱེད་གསུམ་དང་གྲུབ་པའི་འབྲས་བུ་གཉིས་ཡོད་པ་ཡང་། བསམ་གཏན་དང་པོའི་སས་བསྡུས་ཡིན་ནོ། །དངོས་བསྟན་གྱི་སྲེད་ལེན་སྲིད་པ་གསུམ་ནི་བསམ་གཏན་གཉིས་པའི་སས་བསྡུས་ཡིན་ཏེ། བསམ་གཏན་གཉིས་པའི་རྣམ་སྨིན་འགྲུབ་བྱེད་ཡིན་པའི་ཕྱིར། དངོས་བསྟན་གྱི་གྲུབ་པའི་འབྲས་བུ་གཉིས་ཀྱང་བསམ་གཏན་གཉིས་པའི་སས་བསྡུས་ཡིན་ཏེ། དེའི་རྣམ་སྨིན་གྱི་ཕུང་པོ་ཡིན་པའི་ཕྱིར། འདི་ལ་ཤུགས་བསྟན་གྱི་ཡན་ལག་བདུན་ཡོད་པ་ལས་མ་རིག་པ་བསམ་གཏན་དང་པོའི་སས་བསྡུས་དང་། འདུ་བྱེད་ནས་ཚོར་བའི་བར་དྲུག་ནི་བསམ་གཏན་གཉིས་པའི་སས་བསྡུས་ཡིན་པའི་སྒྲུབ་བྱེད་སྔ་མ་ལ་དཔག་སྟེ་ཤེས་པར་བྱའོ། །དེ་ཡང་ཡིད་ཀྱི་རྣམ་ཤེས་ཀྱི་འཁོར་དུ་བྱུང་བའི་མ་རིག་པས་ཀུན་སློང་བྱེད་པའི་དབང་དུ་བྱས་ཀྱི། ཉོན་ཡིད་ཀྱི་འཁོར་དུ་བྱུང་བའི་མ་རིག་པས་ཀུན་སློང་བྱེད་ན་མ་རིག་པ་ཕྱི་མ་བསམ་གཏན་གཉིས་པའི་འཕེན་བྱེད་ཀྱི་ལས་གང་དུ་བསགས་པའི་རྟེན་དེར་གཏོགས་པར་ཤེས་པར་བྱའོ། །དེ་བཞིན་དུ་བསམ་གཏན་གཉིས་པ་ནས་བསམ་གཏན་དང་པོར། དེ་ནས་འདོད་པར་སྐྱེ་བ་ལ་དངོས་བསྟན་གྱི་མ་རིག་པ་འདོད་པའི་སས་བསྡུས་དང་། དངོས་བསྟན་གྱི་འདུ་བྱེད་ནས་ཚོར་བའི་བར་བསམ་གཏན་དང་པོའི་སས་བསྡུས་དང་། འདི་ལ་ཤུགས་བསྟན་ལྔ་ཡོད་པ་ལས་ལྔ་ཆར་ཡང་བསམ་གཏན་དང་པོའི་སས་བསྡུས་ཡིན་ལ། དངོས་བསྟན་གྱི་འགྲུབ་བྱེད་གསུམ་དང་གྲུབ་པའི་འབྲས་བུ་གཉིས་ནི་འདོད་པའི་སས་བསྡུས་དང་། འདིའི་ཤུགས་བསྟན་བདུན་ནི་འདོད་པའི་སས་བསྡུས་སུ་ཤེས་པར་བྱའོ། །གཉིས་པ་རྣམ་བྱང་གི་རྟེན་འབྲེལ་ལ། སྤྱིར་ཐར་ལམ་སྔ་མ་སྔ་མ་ལས་ཕྱི་མ་ཕྱི་མ་འབྱུང་བ་དང་ལམ་བདེན་ལ་བརྟེན་ནས་འགོག་བདེན་འབྱུང་བ་དང་། སྦྱོར་བཞི་བསྒོམས་པ་ལས་འབྲས་བུ་ཆོས་སྐུ་འབྱུང་བ་སོགས་རྣམ་བྱང་གི་རྒྱུ་ལས་རྣམ་བྱང་གི་འབྲས་བུ་འབྱུང་བ་ཐམས་ཅད་རྣམ་བྱང་གི་རྟེན་འབྲེལ་དུ་ཤེས་པར་བྱ་སྟེ། རྒྱུ་འབྲས་གཉིས་ཀ་ཡང་རྣམ་བྱང་གི་ཆོས་ཡིན་ཅིང་། རྒྱུ་འབྲས་ཐམས་ཅད་ལ་རྒྱུ་དེ་ཉིད་འབྲས་བུའི་ངོ་བོར་གྱུར་པ་ཡང་མ་ཡིན། རྒྱུ་དེ་ལ་མ་བརྟེན་པར་འབྱུང་བ་ཡང་མ་ཡིན། འོན་ཀྱང་འབྲས་བུ་དེ་འབྱུང་བ་རྒྱུ་དེ་ལ་ངེས་པར་བརྟེན་དགོས་པས་རིགས་པས་དཔྱད་མི་བཟོད་ཀྱང་ཀུན་རྫོབ་ཏུ་རྒྱུ་འབྲས་སོ་སོར་ངེས་པའི་ཆ་ནས་རྟེན་འབྲེལ་གྱི་དོན་ཚང་བའི་ཕྱིར་རོ། །འདིར་ཡང་ཀུན་ནས་ཉོན་མོངས་ཀྱི་རྟེན་འབྲེལ་འགག་པའི་རིམ་པ་ལ་རྣམ་བྱང་གི་རྟེན་འབྲེལ་དུ་འཇོག་པའི་ཚུལ་བཤད་ན། སོ་སོ་སྐྱེ་བོ་དང་ཉན་རང་སློབ་པ་ལ་ཡོད་པའི་རྟེན་འབྲེལ་འགག་པའི་རིམ་པ་དང་། ཉན་རང་དགྲ་བཅོམ་པ་དང་བྱང་སེམས་འཕགས་པ་ལ་ཡོད་པའི་རྟེན་འབྲེལ་འགག་པའི་རིམ་པ་གཉིས་ལས། དང་པོ་ནི། དབུ་མ་རྩ་བ་ལས། མ་རིག་འགག་པར་གྱུར་པ་ནི། །འདུ་བྱེད་རྣམས་ཀུན་འབྱུང་མི་འགྱུར། །མ་རིག་འགག་པར་འགྱུར་བ་ནི། །ཤེས་པས་དེ་ཉིད་བསྒོམ་པས་སོ། །ཞེས་པས། མ་རིག་པ་འགགས་པས་འདུ་བྱེད་མི་འབྱུང་བ་དང་། མ་རིག་པ་འགག་པའི་རྒྱུ་ངོས་བཟུང་ནས། དེ་དང་དེ་ནི་འགག་གྱུར་པས། །དེ་དང་དེ་ནི་མངོན་མི་འབྱུང་། །སྡུག་བསྔལ་ཕུང་པོ་འབའ་ཞིག་པ། །དེ་ནི་དེ་ལྟར་ཡང་དག་འགག །ཞེས་འདུ་བྱེད་འགགས་པས་ཡན་ལག་ཕྱི་མ་རྣམས་རིམ་གྱིས་འགག་པའི་ཚུལ་གསུངས་སོ། །ལུགས་འདི་ལ་མ་རིག་པ་འགག་པའི་རྒྱུ་དེ་ཁོ་ན་ཉིད་ཀྱི་དོན་བསྒོམ་པ་ནི་གང་ཟག་གི་བདག་མེད་རྟོགས་པའི་ལྟ་བ་བསྒོམ་པ་ཡིན་ལ། དེ་རྟོགས་པ་ལ་ཉེར་ལེན་གྱི་ཕུང་པོ་བདེན་མེད་དུ་རྟོགས་དགོས་པས། ཐེག་དམན་ཚོགས་སྦྱོར་གྱི་གནས་སྐབས་སུ་གང་ཟག་གི་བདག་མེད་བསྒོམས་ནས་མཐོང་ལམ་དུ་མངོན་སུམ་མཐོང་བའི་ཚེ་མཐོང་སྤངས་སུ་གྱུར་པའི་མ་རིག་པ་འགག་ཅིང་། སྒོམ་སྤངས་སུ་གྱུར་པའི་མ་རིག་པ་མ་འགགས་ཀྱང་དེས་འཕེན་བྱེད་ཀྱི་ལས་སློང་བར་མི་བྱེད་དེ། བདེན་པ་མངོན་སུམ་མཐོང་བའི་ཕྱིར། སྔར་སོ་སྐྱེའི་རྟེན་ལ་འཕེན་བྱེད་ཀྱི་ལས་མང་དུ་བསགས་པས། འགྲུབ་བྱེད་ཀྱི་ལས་ཀྱིས་གསོས་བཏབ་པའི་དབང་གིས་སྐྱེ་བ་དུ་མ་ལེན་པ་ད་དུང་ཡོད་དེ། སྲིད་པ་ལན་བདུན་པ་བཞིན་ནོ། །བསྒོམ་ལམ་གྱི་གནས་སྐབས་སུ་མཐོང་སྤངས་ཀྱི་མ་རིག་པའི་རྐྱེན་གྱིས་ཡན་ལག་ཕྱི་མ་འགགས་ཟིན་ཀྱང་སྔར་སོ་སྐྱེའི་རྟེན་ལ་སྒོམ་སྤངས་ཀྱི་མ་རིག་པའི་རྐྱེན་གྱིས་འདུ་བྱེད་འགགས་པའི་དབང་གིས་བྱུང་བའི་ཡན་ལག་ཕྱི་མ་རྣམས་ནི་མ་འགགས་ལ། བསྒོམ་ལམ་སྐད་ཅིག་མ་ཐ་མས་སྒོམ་སྤངས་ཀྱི་མ་རིག་པ་བཅོམ་པའི་རྗེས་སུ་ནི་བསྒོམ་སྤངས་ཀྱི་མ་རིག་པའི་རྐྱེན་གྱིས་བྱུང་བའི་ཡན་ལག་ཕྱི་མ་རྣམས་ཀྱང་མི་འབྱུང་བར་ཤེས་པར་བྱའོ། །བྱང་སེམས་ལ་ནི་མཐོང་ལམ་སྐྱེས་པའི་ཚེ་སྔར་གྱི་མཐོང་སྤང་དང་བསྒོམ་སྤངས་ཀྱི་མ་རིག་པ་ཐམས་ཅད་ཅིག་ཆར་འགགས་པས་ལས་དང་ཉོན་མོངས་ཀྱི་དབང་གིས་སྐྱེ་འཆི་སྤངས་པ་ནི་རྒྱུད་བླ་མ་སོགས་ཚད་ལྡན་གྱི་གཞུང་རྣམས་ལས་གསུངས་ཏེ་གཞན་དུ་བཤད་ཟིན་ཏོ།། །།གཉིས་པ་ལ་ཉན་རང་དགྲ་བཅོམ་དང་། བྱང་སེམས་འཕགས་པ་རྣམས་ཀྱི་རྒྱུད་ལ་ཟག་བཅས་ཀྱི་ཡན་ལག་བཅུ་གཉིས་མེད་ཀྱང་། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ལས་བྱུང་བའི་ཡན་ལག་བཅུ་གཉིས་ཆ་འདྲ་བ་ཡོད་པ་ནི་སངས་རྒྱས་མ་ཐོབ་ཀྱི་བར་དུ་མ་འགག་སྟེ། མ་རིག་བག་ཆགས་ཀྱི་ས་མ་སྤངས་པའི་ཕྱིར་རོ། །འདི་ཇི་ལྟར་ཤེས་ཅེ་ན། རྒྱུད་བླ་མ་ལས། གང་ཟག་དེ་དག་ལ་མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ལས་བྱུང་བའི་ཡིད་ཀྱི་རང་བཞིན་ཅན་གྱི་སྐྱེ་བ་དང་། ཟག་མེད་མངོན་པར་འདུ་བྱེད་ཀྱི་རྒ་བ་དང་། བག་ཆགས་ཕྲ་མོའི་ནད་དང་། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བ་ཡོད་ཅིང་། སངས་རྒྱས་འཕགས་པས་དེ་བཞི་སྤངས་པས་རྟག་པ་དམ་པ་སོགས་ཐོབ་པར་གསུངས་པས་སོ་སྐྱེ་དང་ཉན་ཐོས་སློབ་པ་ལ་ལས་དང་ཉོན་མོངས་པའི་དབང་གིས་སྐྱེ་རྒ་ན་འཆི་བཞི་ཡོད་པ་ལྟར། ཉན་རང་དགྲ་བཅོམ་དང་བྱང་སེམས་འཕགས་པ་ལ་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལས་བྱུང་བའི་སྐྱེ་རྒ་ན་འཆི་ཡོད་པས། ཡན་ལག་བཅུ་གཉིས་ཀྱི་ཚུལ་འདི་ཡང་ཤིན་ཏུ་གནས་པའི་ཕྱིར་རོ། །འོ་ན་དེའི་ཡན་ལག་བཅུ་གཉིས་ནི་གང་། འགག་པའི་དུས་ནི་ནམ་ཞིག་ཅེ་ན། དང་པོ་ནི་མ་རིག་བག་ཆགས་ཀྱི་ས་ནི་དེའི་མ་རིག་པ། ཟག་མེད་ཀྱི་ལས་ནི་འདུ་བྱེད། གཞན་དོན་དུ་སྲིད་པར་སྐྱེ་བ་ལེན་པར་འདོད་པའི་དགེ་བའི་རྩ་བ་དང་མཚུངས་ལྡན་གྱི་ཉོན་མོངས་པ་ནི་སྲེད་ལེན་སྲིད་པ་གསུམ་ཡིན་པས། དེ་ལས་ཡིད་ཀྱི་རང་བཞིན་གྱི་མིང་གཟུགས་ནས་ཚོར་བའི་བར་གྲུབ་པ་ནི་ཡིད་ཀྱི་རང་བཞིན་གྱི་སྐྱེ་བ་ཡིན་ཏེ། དེ་ཉིད་སྐད་ཅིག་སྔ་མ་འགགས་ནས་ཕྱི་མ་སྐྱེ་བ་ནི་འདུ་བྱེད་དང་། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བ་ནི་སྐྱེ་བ་དང་རྒ་ཤི་ཡིན་ནོ། །གཉིས་པ་འགག་པའི་དུས་ནི། རྒྱུན་མཐའི་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་གཉིས་བག་ཆགས་དང་བཅས་པ་བཅོམ་པའི་ཚེ་མ་རིག་བག་ཆགས་ཀྱི་ས་འགག་ལ། དེ་འགགས་པས་ཡན་ལག་ཕྱི་མ་ཐམས་ཅད་འགགས་ནས་དམ་པའི་ཕ་རོལ་ཏུ་ཕྱིན་པ་བཞི་ཐོབ་པར་འགྱུར་རོ། །གསུམ་པ་གྲུབ་མཐའ་འོག་མ་ལས་རྟེན་འབྲེལ་རྟོགས་ཚུལ་ཁྱད་པར་དུ་འཕགས་པར་སྟོན་པ་ནི། ཕྱི་རོལ་པ་རྣམས་ནི་རྟེན་འབྲེལ་ཁས་མི་ལེན་ཏེ། ཁ་ཅིག་གཙོ་བོ་དང་དབང་ཕྱུག་སོགས་བྱེད་པོ་དང་། ཁ་ཅིག་རྟག་པའི་རྒྱུ་དང་། ཁ་ཅིག་རྒྱུ་མེད་པར་སྨྲ་བའི་ཕྱིར་རོ། །ཆོས་འདི་པ་ཐམས་ཅད་ནི་རྟེན་ཅིང་འབྲེལ་བར་འབྱུང་བ་ཁས་ལེན་པ་ཤ་སྟག་སྟེ། བཤེས་སྤྲིང་ལས། རྟེན་ཅིང་འབྲེལ་བར་འབྱུང་འདི་རྒྱལ་བ་ཡིན། །གསུང་གི་མཛོད་ཀྱི་གཅེས་པ་ཟབ་མོ་སྟེ། །ཞེས་རྟེན་འབྲེལ་དེ་བཞིན་གཤེགས་པའི་གསུང་གི་མཛོད་ཀྱི་གཅེས་པ་ཟབ་མོར་གསུངས་པའི་ཕྱིར་རོ། །འོན་ཀྱང་ཐམས་ཅད་ཀྱི་རྟེན་ཅིང་འབྲེལ་བར་འབྱུང་བའི་དོན་ཕྱིན་ཅི་མ་ལོག་པར་རྟོགས་པ་ནི་མ་ཡིན་ཏེ། འདི་ལྟར་རྟེན་འབྲེལ་ལ་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་དང་། སྡུག་པ་དང་མི་སྡུག་པའི་འགྲོ་བ་རྣམ་པར་འབྱེད་པའི་རྟེན་འབྲེལ་གཉིས། དང་པོ་ནི་ཕྱི་ནང་གི་དངོས་པོ་ཀུན་རྒྱུ་གང་དང་རྐྱེན་གང་ལས་ཇི་ལྟར་བྱུང་བའི་ཚུལ་ལོ། །གཉིས་པ་ནི་ནང་གི་སྐྱེ་མཆེད་དྲུག་གི་དངོས་པོ་འདི་རྒྱུ་གང་དང་རྐྱེན་གང་ལས་འགྲོ་བ་ལྔར་ཇི་ལྟར་འཁོར་བའི་ཚུལ་ལོ། །དེ་ལ་ཕྱི་རོལ་པ་དག་ནི་གཉིས་ཀ་ལ་རྨོངས་ཞིང་། ཉན་ཐོས་སྡེ་གཉིས་དག་དང་པོ་ལ་རྨོངས་ཏེ། ཕྱི་རོལ་གྱི་དངོས་པོ་རྣམས་རྡུལ་ཕྲ་རབ་ཀྱིས་བྱས་པ་དང་། ནང་གི་སྐྱེ་མཆེད་རྣམས་སྔོན་གྱི་ལས་ཀྱི་རྒྱུ་ལས་བྱུང་བ་སོགས་རིགས་པས་དཔྱད་བཟོད་དུ་ཁས་ལེན་པའི་ཕྱིར་རོ། །མ་རིག་པའི་རྐྱེན་གྱིས་འདུ་བྱེད་འབྱུང་བ་སོགས་ཡན་ལག་བཅུ་གཉིས་ཀྱི་འཇུག་པ་ཁས་ལེན་པའི་ཆ་ནས་རྟེན་འབྲེལ་གཉིས་པ་ལ་རྨོངས་པ་མ་ཡིན་མོད་ཀྱི། བྱེ་བྲག་ཏུ་སྨྲ་བ་རྣམས་ནི་ཡན་ལག་བཅུ་གཉིས་པོ་ཐམས་ཅད་ཀྱང་ཚེ་གསུམ་གྱི་ཕུང་པོའི་གནས་སྐབས་ལ་འཇོག་པ་སོགས་ལོག་པར་རྟོག་པ་ཡང་ཡོད་པས་རྣམ་པ་ཐམས་ཅད་དུ་ཕྱིན་ཅི་མ་ལོག་པར་རྟོགས་པ་ནི་མ་ཡིན་ནོ། །རྣམ་རིག་པ་རྣམས་ནི་ཕྱི་ནང་གི་དངོས་པོ་རྣམས་ཇི་ལྟར་སྣང་བའི་རྒྱུ་མཚན་བོར་ནས་ཀུན་གཞིའི་རྣམ་ཤེས་བདེན་གྲུབ་པ་ལས་བྱུང་བར་ཁས་ལེན་པས་རྟེན་ཅིང་འབྲེལ་བར་འབྱུང་བ་ཕྱིན་ཅི་མ་ལོག་པར་རྟོགས་པ་མ་ཡིན་ལ་མཐའ་བཞིའི་སྐྱེ་བ་བཀག་པའི་ཐ་སྙད་ཙམ་ཁས་བླངས་ཀྱང་དོན་ལ་བཀག་མ་ནུས་ཏེ། རྒྱུ་རྐྱེན་རྫས་གཞན་ལས་སྐྱེ་བ་ཁས་བླངས་པའི་ཕྱིར། མདོར་ན་ཕྱི་རོལ་པ་ནས་རྣམ་རིག་པའི་བར་གྱི་དངོས་སྨྲ་བ་རྣམས་ནི་ཕྱི་ནང་གི་དངོས་པོ་རྣམས་བདག་དང་། གཞན་དང་། གཉིས་ཀ་དང་། རྒྱུ་མེད་པར་འབྱུང་བ་གང་རུང་སྨྲ་བས་རྟེན་འབྲེལ་ཕྱིན་ཅི་མ་ལོག་པར་མ་རྟོགས་ཏེ། མགོན་པོ་ཀླུ་སྒྲུབ་ཀྱིས། སྡུག་བསྔལ་རང་གིས་བྱས་པ་དང་། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་རྟོག་གེ་པ་ཡིས་བརྟག །ཁྱོད་ཀྱིས་བརྟེན་ནས་འབྱུང་བར་གསུངས། །ཞེས་གསུངས་སོ། །དེས་ན་རྟེན་འབྲེལ་ཕྱིན་ཅི་མ་ལོག་པར་རྟོགས་པ་ནི་དབུ་མ་པ་ཁོ་ན་སྟེ། རིགས་པས་དཔྱད་པའི་ཚེ། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་པའི་ཚུལ་གྱིས་མཐའ་བཞིའི་སྐྱེ་བ་མི་རྙེད་ཀྱང་། ཐ་སྙད་དུ་རྒྱུ་འདི་ལ་རྟེན་ནས་འབྲས་བུ་འདི་འབྱུང་ཞེས་པ་ཙམ་ཞིག་མི་འགལ་བས་ན་སྐྱེ་བ་མེད་ཀྱང་སྐྱེ་བར་སྣང་། སྐྱེ་བར་སྣང་ཡང་སྐྱེ་བ་མེད་པ་ལ་རྟེན་ཅིང་འབྲེལ་བར་འབྱུང་བར་འཇོག་པའི་ཕྱིར་རོ། །མདོར་ན་ས་བོན་གྱི་རྐྱེན་གྱིས་མྱུ་གུ་ཞེས་སོགས་ཕྱིའི་རྟེན་འབྲེལ་དང་། མ་རིག་པའི་རྐྱེན་གྱིས་འདུ་བྱེད་ཞེས་སོགས་ནང་གི་རྟེན་འབྲེལ་ཐམས་ཅད་ལ་ཐ་སྙད་དུ་རྒྱུ་འབྲས་ཁས་བླངས་ཀྱང་རྒྱུ་འབྲས་དེ་ཉིད་གཅིག་དང་། ཐ་དད་དང་། རྟག་པ་དང་། མི་རྟག་པ་དང་། དངོས་པོ་དང་། དངོས་མེད་སོགས་གང་ཡིན་དཔྱད་པའི་ཚེ་དེ་དག་གང་རུང་ཞིག་ཏུ་ཁས་ལེན་པ་ནི། དངོས་སྨྲ་བའི་ལུགས་ཡིན་ལ། དབུ་མ་པས་ནི། ཕྱོགས་གཉིས་གང་དུ་ཡང་ཁས་མི་ལེན་ཏེ། ཇི་ལྟར་སྣང་བ་ཙམ་ལ་རྟེན་ནས་རྒྱུ་འདི་ལས་འབྲས་བུ་འདི་འབྱུང་ཞེས་པ་ཙམ་ཞིག་ཁས་ལེན་པའོ། །ཐོག་མཐའ་མེད་པའི་ཉོན་མོངས་ལས་དང་རྣམ་པར་སྨིན། །མུ་མཐའ་མེད་པའི་འཁོར་བར་འགལ་མེའི་འཁོར་ལོ་ལྟར། །བར་མཚམས་མེད་པར་འཁོར་བའི་ཚུལ་འདི་ལེགས་ཤེས་ནས། །སྐྱེ་འགག་མེད་པར་རྟོགས་པའི་བློ་ཡིས་བཅད་བྱའི་ཕྱིར། །འཁོར་དང་མྱ་ངན་འདས་པའི་གནས་ལུགས་གསལ་བ་ཡི། །ལེགས་བཤད་འདི་ནི་གྲུབ་མཐའི་གནད་རྣམས་མ་འདྲེས་ཤིང་། །ཁྱད་པར་དབུ་མའི་ཐ་སྙད་རྟེན་འབྲེལ་གཙོར་བྱས་ནས། །ལུང་རིགས་དོན་ལ་མ་རྨོངས་བློ་ལྡན་དེ་ཡིས་སྦྱར། །རྒྱུ་འབྲས་གཅིག་གི་འཕེན་གྲུབ་སྦྱར་དང་ས་མཚུངས་ཙམ། །བརྒྱ་ཚར་ཐོས་ནས་འདོན་པ་གོམས་ཀྱང་ཚུལ་ལུགས་འདིའི། །མན་ངག་མེད་ན་མངོན་པའི་ང་རྒྱལ་མཚོ་བརྡོལ་ནས། །ཚིག་གི་རླབས་ཕྲེང་གཡོ་ཡང་དོན་མེད་ལྦུ་བའི་རྒྱུ། །སྔ་མའི་རྐྱེན་གྱིས་ཕྱི་མ་འབྱུང་བའི་ཚར་གཅིག་ལ། །དངོས་ཤུགས་སྦྱར་ཚེ་འཁོར་བའི་རྒྱུ་འབྲས་ཚར་གཉིས་འབྱུང་། །དེ་ལྟ་ན་ཡང་ཚར་གཅིག་ཉིད་དུ་བཞག་ཚུལ་དང་། །བཞག་པའི་དགོས་པ་དེ་ཡི་འཕེན་གྲུབ་སྦྱར་ཚུལ་དང་། །དེ་ཉིད་ཚེ་རབས་དུས་བསྡུས་དེ་ཡི་ས་མཚུངས་དང་། །གྲུབ་མཐའ་གཞན་དུ་ཚར་གཉིས་བཞག་པའི་གནད་རྣམས་ནི། །རོང་སྟོན་དམ་པའི་གསུང་གི་མན་ངག་ལ་བརྟེན་ནས། །ཁོ་བོས་རྟོགས་འདི་སྨྲ་བ་གཞན་དང་ཐུན་མོང་མིན། །འདི་སྦྱར་དགེ་བ་ཡེ་ཤེས་རྡོ་རྗེའི་མེ་ཆར་གྱིས། །མཁའ་མཉམ་འགྲོ་བའི་སྲིད་པའི་འཁོར་ལོ་རྣམ་བཤིག་ནས། །ཡོན་ཏན་ལྷུན་བརྩེགས་མྱ་ངན་འདས་པའི་སྨན་ལྗོངས་སུ། །རྣམ་གྲོལ་བདེ་བའི་འབྲས་བུའི་ཟས་ཀྱི་འཚོ་བར་ཤོག །རྟེན་འབྲེལ་གྱི་རྣམ་པར་བཞག་པ་འཁོར་འདས་རབ་གསལ་ཞེས་བྱ་བ་འདི་ནི། བསྟན་པ་མི་འགྱུར་བའི་སྲོག་ཤིང་ཐམས་ཅད་མཁྱེན་པ་སངས་རྒྱས་འཕེལ་གྱི་ཞབས་རྡུལ་ལ་རེག་པ་མདོ་ཁམས་པ་བསོད་ནམས་སེང་གེས་ལྕགས་ཕོ་སྟག་གི་ལོ། གྲོ་བཞིན་གྱི་ཟླ་བ་ལ་རྟ་ནག་གསེར་གླིང་གི་དགོན་པར་སྦྱར་བའི་ཡི་གེ་པ་ནི་གཞོན་ནུ་བློ་ལྡན་ནོ།། ༈ །།འདི་བསྒྲུབས་པ་ལས་བྱུང་བ་ཡི། །དགེ་བ་གང་ཞིག་ཐོབ་པ་དེས། །མཁའ་ཁྱབ་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། དགེའོ། དགེའོ།། །།

བློ་སྦྱོང་ཞེན་པ་བཞི་བྲལ་གྱི་ཁྲིད་ཡིག་ཟབ་དོན་གནད་ཀྱི་ལྡེའུ་མིག

བློ་སྦྱོང་ཞེན་པ་བཞི་བྲལ་གྱི་ཁྲིད་ཡིག་ཟབ་དོན་གནད་ཀྱི་ལྡེའུ་མིག་ཅེས་བྱ་བ་བཞུགས་སོ།། གང་གི་མཁྱེན་རབ་ལྷ་ལམ་བཞིན་དུ་ཤེས་བྱ་ཀུན་ལ་ཁྱབ། །དེ་ཡི་ཐུགས་རྗེ་ཟླ་ཟེར་ལྟ་བུར་འགྲོ་བའི་གཙུག་ན་མཛེས། །ཁྱོད་ཀྱི་ཕྲིན་ལས་ཡིད་བཞིན་ནོར་ལྟར་དགོས་འདོད་འབྱུང་བའི་གཏེར། །སྐྱོབ་པ་མཚུངས་མེད་ཤཱཀྱ་སེང་གེས་འགྲོ་ལ་དགེ་ལེགས་སྩོལ། །དུས་གསུམ་རྒྱལ་བ་ཀུན་གྱི་ཡེ་ཤེས་གཅིག་བསྡུས་འཇམ་པའི་དབྱངས། །ཁམས་གསུམ་འགྲོ་བ་ཀུན་གྱི་སྐྱོབ་པར་ཞལ་བཞེས་སྤྱན་རས་གཟིགས། །སྙིགས་དུས་འགྲོ་བ་འདྲེན་ཕྱིར་མི་ཡི་གཟུགས་འཛིན་ས་སྐྱ་པ། །མཚན་ནས་བརྗོད་པར་དཀའ་བ་དེ་ལ་གུས་པས་ཕྱག་འཚལ་ནས། །སྔོན་བསགས་བསོད་ནམས་སྟོབས་ཀྱིས་དམ་ཆོས་སྒྲུབ་པའི་ལུས་རྟེན་བརྙེས། །དཔལ་འབྱོར་ལྷུན་གྱིས་གྲུབ་པས་བསྟན་དང་བསྟན་འཛིན་མཆོད་མཛད་པ། །རྣམ་དཀར་དགེ་བའི་བློ་ཅན་དེ་ཡིས་སླར་ཡང་དྲིས་པའི་ལན། །ཐེག་ཆེན་གནད་ཀྱི་གདམས་པ་ཐུན་མོང་མ་ཡིན་འདིར་བརྗོད་བྱ། །དེ་ལ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་ལ་མ་བསྐུལ་བཞིན་དུ་ལེགས་པར་མཛད་པའི་ཐུགས་མངའ་བ་དེས། གདུལ་བྱའི་ཁམས་དང་། བསམ་པ་དང་བག་ལ་ཉལ་དང་མཐུན་པར་ཆོས་ཀྱི་ཕུང་པོ་ཇི་སྙེད་གསུངས་པ་ཐམས་ཅད་ཕ་རོལ་ཏུ་ཕྱིན་པ་དང་། རྡོ་རྗེ་ཐེག་པ་གཉིས་སུ་འདུས་པ་ལས་དང་པོ་ལ་གཞུང་ལས་བཤད་པ་གཙོ་ཆེ་བའི་ཉམས་ལེན་དང་། མན་ངག་གི་གནད་ཀྱི་ཉམས་ལེན་གཉིས་ལས། གཞུང་ལས་བཤད་པ་གཙོ་ཆེ་བའི་དབང་དུ་བྱས་ན། མགོན་པོ་བྱམས་པས་མངོན་རྟོགས་རྒྱན་ལས། ཤེར་ཕྱིན་གྱི་མདོའི་དོན་མངོན་རྟོགས་བརྒྱད་ཀྱི་ལམ་རིམ་དང་། མདོ་སྡེ་བརྒྱན་ལས་ཐེག་པ་ཆེན་པོའི་མདོ་སྡེ་སྣ་ཚོགས་ཀྱི་དགོངས་པ་རིགས་དང་ཆོས་ལ་མོས་པ་ལ་སོགས་པའི་ལམ་གྱི་རིམ་པ་གསུངས་པ་དང་། འཕགས་མཆོག་ཀླུ་སྒྲུབ་ཀྱིས་དབུ་མ་རིན་ཆེན་ཕྲེང་བར། བསྒྲུབ་བྱ་མངོན་མཐོ་དང་ངེས་ལེགས་གཉིས། སྒྲུབ་བྱེད་དད་པ་དང་ཤེས་རབ་གཉིས་ཀྱིས་བསྒྲུབ་པའི་ལམ་རིམ་གསུངས་པ་དང་། སློབ་དཔོན་འཕགས་པ་ལྷ་ཡིས། ཕྱིན་ཅི་ལོག་བཞི་སྤངས་པའི་སངས་རྒྱས་དམིགས་ཡུལ་དུ་བྱས་ནས་བྱང་ཆུབ་སེམས་དཔའི་སྤྱོད་པ་མཐར་ཕྱིན་པའི་གེགས་ཉོན་མོངས་པ་རྒྱུ་དང་བཅས་པ་བཅད་དེ། དེ་ཁོ་ན་ཉིད་ཀྱི་སྣོད་རུང་དུ་བྱས་ནས་དངོས་གཞི་དེ་ཁོ་ན་ཉིད་ཀྱི་བདུད་རྩི་བསྟན་པའི་ལམ་རིམ་གསུངས་པ་དང་། སློབ་དཔོན་ཞི་བ་ལྷས། དལ་འབྱོར་གྱི་ལུས་རྟེན་གྱི་སྟེང་དུ་བྱང་སེམས་ཀྱི་སྤྱོད་པའི་ངོ་བོ་ཕ་རོལ་ཏུ་ཕྱིན་པ་དྲུག་ཉམས་སུ་བླངས་ནས་སྨོན་ལམ་རྣམ་པར་དག་པས་མཚམས་སྦྱར་ཏེ། སངས་རྒྱས་སྒྲུབ་པའི་ལམ་རིམ་གསུངས་པ་དང་། ཇོ་བོ་རྗེས། ཚེ་འདིའི་ཞེན་པ་སྤངས་ནས་ཕྱི་མའི་དོན་ཙམ་སྒྲུབ་པ་སྐྱེས་བུ་ཆུང་ངུ་། འཁོར་བའི་བདེ་འབྲས་སྤངས་ནས་ཐར་པ་ཙམ་སྒྲུབ་པ་སྐྱེས་བུ་འབྲིང་། སེམས་ཅན་གྱི་དོན་དུ་སངས་རྒྱས་སྒྲུབ་པ་སྐྱེས་བུ་ཆེན་པོ་སྟེ་སྐྱེས་བུ་གསུམ་གྱི་ལམ་རིམ་གསུངས་པ་དང་། དཔལ་ལྡན་ཟླ་བ་གྲགས་པས། སོ་སོ་སྐྱེ་བོའི་གནས་སྐབས་སུ། སྙིང་རྗེ་དང་བྱང་ཆུབ་ཀྱི་སེམས་དང་། གཉིས་སུ་མེད་པའི་བློ་གསུམ་ཉམས་སུ་བླངས་ནས་འཕགས་པའི་ས་ཐོབ་ནས་ཕ་རོལ་ཏུ་ཕྱིན་པ་བཅུས་ས་བཅུ་བགྲོད་དེ། སྐུ་གསུམ་བསྒྲུབ་པའི་ལམ་གྱི་རིམ་པ་གསུངས་པ་རྣམས་ནི་ཐེག་པ་ཆེན་པོའི་སྡེ་སྣོད་ཀྱི་དགོངས་པ་གྲུབ་པའི་དབང་ཕྱུག་རྣམས་ཀྱིས་ཕྱིན་ཅི་མ་ལོག་པར་བཀྲལ་བའི་ལུགས་བཟང་པོ་རྨད་དུ་བྱུང་བ་ཡིན་ན་ཡང་། གཞུང་ལུགས་ལ་བློ་སྦྱངས་པ་དག་གིས་རྟོགས་པར་བྱ་བ་ཡིན་གྱི། འདིར་ཉུང་ངུའི་སྒོ་ནས་རྟོགས་པར་བྱ་བ་མ་ཡིན་ནོ། །གཉིས་པ་དེ་དག་གི་དོན་མན་ངག་གི་གནད་ཀྱིས་ཉམས་སུ་ལེན་པ་ལ་སྤྱིར་རབ་ཏུ་མང་པོ་སྣང་ཡང་གཙོ་བོར་གྱུར་པ་བླ་མ་གསེར་གླིང་པས་ཇོ་བོ་རྗེ་ལ་གནང་བ་དང་། མགོན་པོ་འཇམ་པའི་དབྱངས་ཀྱིས་བླ་མ་ས་སྐྱ་པ་ལ་གནང་བ་གཉིས་ལས། དང་པོ་ནི་དལ་འབྱོར་རྙེད་དཀའ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བཞིས་བྱང་ཆུབ་ཀྱི་སེམས་སྐྱེ་བའི་རྟེན་དུ་བསྒྲུབས་ཏེ། སྦྱོར་བ་བྱམས་པ་དང་། སྙིང་རྗེ་ཡུན་རིང་དུ་སྦྱངས་ནས་དངོས་གཞི་ལ་བདག་གཞན་བརྗེ་བའི་བྱང་ཆུབ་ཀྱི་སེམས་གཙོ་བོར་བསྒོམ་ཞིང་སྐབས་སུ་བབ་པ་ན་དོན་དམ་བྱང་ཆུབ་ཀྱི་སེམས་ཀྱང་བསྒོམས་ཏེ། ལམ་གྱི་ཡན་ལག་ལ་རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ། ཚེ་གཅིག་གི་ཉམས་ལེན་དྲིལ་ཏེ་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག བློ་སྦྱོང་གི་བསླབ་བྱ་རྣམས་ཉམས་སུ་ལེན་པའི་སྒོ་ནས་མངོན་ཚན་ཆུང་ལ་ས་ཆོད་ཆེ་བའི་ལམ་ཕུལ་དུ་བྱུང་བ་ཞིག་སྟེ། འདི་ནི་བོད་དུ་ཇོ་བོ་རྗེས་དགེ་བའི་བཤེས་གཉེན་འབྲོམ་སྟོན་པ་ལས་གཞན་ལ་མ་གནང་ལ། དགེ་བཤེས་པས་ཀྱང་སྐུ་མཆེད་རིན་པོ་ཆེ་རྣམ་པ་གསུམ་ལས་གཞན་ལ་མ་གནང་ཞིང་དེ་ནས་ཤིན་ཏུ་དར་ཏེ། གངས་རིའི་ཁྲོད་འདིར་ཉི་ཟླ་ལྟར་གྲགས་པའི་ལམ་པོ་ཆེ་ཡིན་ལ། འདི་དག་གི་ཉམས་ལེན་ནི་རྒྱལ་སྲས་ཆོས་རྫོང་བ་ཡབ་སྲས་དང་། སེམས་དཔའ་ཆེན་པོ་གཞོན་ནུ་རྒྱལ་མཆོག་ལ་སོགས་པའི་གསུང་རབ་རྣམས་ལ་བལྟ་བར་བྱའོ། །ད་ནི་སྐབས་སུ་བབ་པ་མགོན་པོ་འཇམ་པའི་དབྱངས་ཀྱིས་བླ་མ་ས་སྐྱ་པ་ལ་གནང་བ་ནི་སྔར་གྱི་དེ་དག་དང་ཉམས་ལེན་གྱི་གནད་འདྲ་ཡང་། བརྗོད་བྱའི་ཚོ་བགོསཾ་དང་། དོན་གྱི་གོ་རིམ་ནི་གཞན་ལས་ཁྱད་པར་དུ་འཕགས་པ་ཞིག་སྟེ། དེ་ཡང་བླ་མ་ས་སྐྱ་པ་ཆེན་པོ་ཀུན་དགའ་སྙིང་པོ་དགུང་ལོ་བཅུ་གཉིས་བཞེས་པའི་དུས་སུ་འཇམ་པའི་དབྱངས་ཀྱི་སྒྲུབ་པ་མཛད་པས་ཟླ་བ་དྲུག་ན་ཞལ་གཟིགས་ཏེ་མགོན་པོ་འཇམ་པའི་དབྱངས་ཀྱི་ཞལ་ནས། ཚེ་འདི་ལ་ཞེན་ན་ཆོས་པ་མིན། །འཁོར་བ་ལ་ཞེན་ན་ངེས་འབྱུང་མིན། །བདག་དོན་ལ་ཞེན་ན་བྱང་སེམས་མིན། །འཛིན་པ་བྱུང་ན་ལྟ་བ་མིན། །ཞེས་གསུངས་པ་འདིའི་ནང་དུ་ཕ་རོལ་ཏུ་ཕྱིན་པའི་ཉམས་ལེན་མཐའ་དག་འདུས་པ་ཡིན་ནོ། །འདི་དག་གི་དོན་ལ་ཚེ་འདི་ལ་ཞེན་པ་དང་བྲལ་ནས་བློ་ཆོས་སུ་འགྲོ་བར་བྱེད་པ་དང་། འཁོར་བ་ལ་ཞེན་པ་དང་བྲལ་ནས་ཆོས་ལམ་དུ་འགྲོ་བར་བྱེད་པ་དང་། བདག་དོན་ལ་ཞེན་པ་དང་བྲལ་ནས་ལམ་འཁྲུལ་པ་སེལ་བར་བྱེད་པ་དང་། མཐའ་བཞིར་ཞེན་པ་དང་བྲལ་ནས་འཁྲུལ་པ་ཡེ་ཤེས་སུ་འཆར་བར་བྱེད་པ་དང་བཞི་ལས། དང་པོ་ལ་སྔོན་འགྲོ་དལ་འབྱོར་རྙེད་དཀའ། དངོས་གཞི་འཆི་བ་མི་རྟག་པ། ལམ་གྱི་ཡན་ལག་ལས་རྒྱུ་འབྲས་སྒོམ་པ་གསུམ། དང་པོ་དལ་འབྱོར་རྙེད་དཀའ་བསྒོམ་པ་ནི། སྟན་བདེ་བ་ལ་བསྡད་ནས་བླ་མ་དང་དཀོན་མཆོག་ལ་སྐྱབས་འགྲོ་ལན་མང་དུ་བྱས་ནས་བློ་ཆོས་སུ་འགྲོ་བ་སོགས་བཞིས་གསོལ་བ་བཏབ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་དུ་སེམས་བསྐྱེད་ནས་འདི་ལྟར་བསམ་སྟེ། དལ་འབྱོར་གྱི་ལུས་འདི་ངོ་བོའི་སྒོ་ནས་དལ་བ་བརྒྱད་དང་། འབྱོར་པ་བཅུ་ཚང་བ་རྙེད་པ་དཀའ་བར་འདུག རྒྱུའི་སྒོ་ནས་དགེ་བ་བསྒྲུབ་དགོས་པ་ལ་སེམས་རྒྱུད་འདི་ལ་དགེ་བ་ཤིན་ཏུ་དཀོན་པས་རྙེད་དཀའ་བར་འདུག གྲངས་ཀྱི་སྒོ་ནས་སྤྱིར་འགྲོ་བ་རིས་དྲུག་གོང་མ་གོང་མ་ལས་འོག་མ་འོག་མ་མང་ལ། མངོན་སུམ་དུ་མཐོང་བ་ལ་ཡང་དབྱར་ཀོ་མོག་གཅིག་དང་། ཤིང་ཕུང་གཅིག་ལ་གནས་པའི་དུད་འགྲོའི་གྲངས་དེ་འཛམ་བུ་གླིང་གི་མི་ཐམས་ཅད་ལ་མེད་པས་རྙེད་དཀའ་བར་འདུག དཔེའི་སྒོ་ནས་ཀྱང་གྱང་ལོག་ལ་སྲན་མ་གཏོར་ན་ཆགས་པ་དཀའ་བའམ། རྒྱ་མཚོ་ཆེན་པོ་རླུང་གིས་གཡེངས་པ་ལ་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་ལས་ཀྱང་དཀའ་བར་འདུག དེས་ན་དལ་འབྱོར་ལན་ཅིག་རྙེད་པ་འདི་ཅི་ནས་ཀྱང་ཆུད་མ་ཟོས་པར་སྐྱེ་བ་ཕྱི་མ་ཕན་ཆད་ཀྱི་དོན་བསྒྲུབ་པར་བྱའོ་སྙམ་དུ་སྒོམ་མོ། །གཉིས་པ་འཆི་བ་མི་རྟག་པ་སྒོམ་པ་ནི། སྐྱབས་འགྲོ་སེམས་བསྐྱེད་སྔར་ལྟར་བྱས་ནས་འདི་ལྟར་བསམ་སྟེ། སྐྱེས་ནས་མ་ཤི་ཚེ་ཐར་དུ་སྡོད་པ་སུ་ཡང་མི་འདུག་པས་ངེས་པར་འཆི། དེ་ཡང་འདི་ཙམ་ལ་འཆི་མི་འཆིའི་གདེང་མེད། འཆི་བའི་རྐྱེན་མང་། འཚོ་བའི་རྐྱེན་ཉུང་བས་ངེས་པར་འཆི། འཆི་བའི་དུས་ལ་བབ་པ་ན་སྨན་དང་རིམ་གྲོ་ལ་སོགས་པ་གང་གིས་ཀྱང་བཟློག་མི་ནུས་པས། འཆི་བ་ལ་གང་གིས་ཀྱང་མི་ཕན། ཤི་བའི་འོག་ཏུ་ཆོས་མིན་པ་འཁོར་དང་ལོངས་སྤྱོད་གང་ཡང་རྗེས་སུ་མི་འབྲང་སྙམ་ཏུ་བསྒོམས་ནས་ཚེ་འདི་ལ་ཞེན་པ་དང་བྲལ་བར་བྱའོ། །བློ་ཆོས་སུ་འགྲོ་བར་བྱ་བའི་ཐབས་ཀྱི་གཙོ་བོ་འདི་ཡིན་པས་ཟས་བཟང་པོ་ཟ་བ་དང་། གོས་བཟང་པོ་གོན་པ་དང་། འཁོར་མང་པོས་བསྐོར་བའི་ཚེ་ཡང་། ད་ལྟ་བདག་འདི་དང་འདི་ལྟ་བུ་འདུག་སྟེ། ནམ་ཞིག་འདི་དག་དང་བྲལ་ནས་གཅིག་པུར་འགྲོ་དགོས་པས་སྙིང་པོ་མེད་དོ་སྙམ་དུ་བསྒོམས་ནས་ཚེ་འདིའི་བྱ་བྱེད་ལ་ཞེན་པ་དང་བྲལ་བར་བྱའོ། །གསུམ་པ་ལས་རྒྱུ་འབྲས་བསྒོམས་པ་ནི། སྐྱབས་འགྲོ་སེམས་བསྐྱེད་སྔར་ལྟར་བྱས་ནས་དེ་ལྟར་རྙེད་དཀའ་བའི་དལ་འབྱོར་ཐོབ་ཅིང་དེ་ཡང་མི་རྟག་པར་འདུག་པས་མ་ཤི་བའི་གོང་དུ་མི་དགེ་བ་མཐའ་དག་སྤངས་ཤིང་། དགེ་བ་ཅི་ནུས་སུ་བསྒྲུབ་དགོས་ཏེ། དེའི་རྒྱུ་མཚན་མི་དགེ་བ་བཅུ་སྤྱད་པའི་རྣམ་སྨིན་གྱི་འབྲས་བུས་ངན་སོང་གསུམ་དུ་སྐྱེ། རྒྱུ་མཐུན་གྱི་འབྲས་བུ་ལ་མྱོང་བ་རྒྱུ་མཐུན་ནི་སྲོག་བཅད་པས་ཚེ་ཐུང་། མ་བྱིན་པར་བླངས་པས་ནོར་དང་བྲལ་བ་ལ་སོགས་པ་འབྱུང་བར་བཤད་ལ། བྱེད་པ་རྒྱུ་མཐུན་ནི་མི་དགེ་བ་གང་དང་གང་ལ་གོམས་པ་དེ་སླར་ཡང་བྱེད་འདོད་པ་འབྱུང་ཞིང་། ཡང་དེའི་འབྲས་བུས་ངན་སོང་དུ་ལྟུང་བ་སོགས་འབྱུང་བས་ཐར་པའི་སྐབས་མེད་ལ། སྐྱེས་བུ་བྱེད་པའི་འབྲས་བུས་ས་ཕྱོགས་དྲི་ང་བ་དང་རྡུལ་ཚུབ་ཅན་དུ་སྐྱེ་བས་ངེས་པར་སྤང་དགོས་སྙམ་དུ་བསམ། དེ་བཞིན་དུ་དགེ་བ་བཅུའི་རྣམ་སྨིན་གྱི་འབྲས་བུས་བདེ་གྲོར་སྐྱེ་བ་དང་། རྒྱུ་མཐུན་གྱི་འབྲས་བུ་ལ་མྱོང་བ་རྒྱུ་མཐུན་སྲོག་གཅོད་སྤངས་པས་ཚེ་རིང་བ་སོགས་དང་། བྱེད་པ་རྒྱུ་མཐུན་དགེ་བ་དེ་དང་དེ་བྱེད་འདོད་པ་དང་། སྐྱེས་བུ་བྱེད་པའི་འབྲས་བུས་ས་ཕྱོགས་དྲི་ཞིམ་པར་སྐྱེ་བ་ལ་སོགས་པར་འབྱུང་བས་ངེས་པར་བསྒྲུབ་དགོས་པར་འདུག་སྙམ་དུ་བསམ་ཞིང་། ཁྱད་པར་དུ་ལས་འབྲས་ཀྱི་བླངས་དོར་འདི་དག་གི་གནད་ཤེས་པར་བྱས་ནས་ལག་ལེན་ལ་འདེབས་པ་གལ་ཆེ་བ་ཡིན་ནོ། །གཉིས་པ་འཁོར་བ་ལ་ཞེན་པ་དང་བྲལ་ནས། ཆོས་ལམ་དུ་འགྲོ་བར་བྱེད་པ་ནི་ཁམས་གསུམ་འཁོར་བའི་ཉེས་དམིགས་བསམས་ཏེ། སྐྱབས་འགྲོ་སེམས་བསྐྱེད་སྔར་ལྟར་བྱས་ནས། ཁམས་གསུམ་འཁོར་བ་འདི་སྡུག་བསྔལ་གྱི་རང་བཞིན་ལས་མ་འདས་པར་འདུག་སྟེ། ཚ་བའི་དམྱལ་བ་རྣམས་ལ་ལུས་མེས་བསྲེག་པ་དང་། མཚོན་གྱིས་གཅོད་པ་ལ་སོགས་སྡུག་བསྔལ་དང་། གྲང་དམྱལ་རྣམས་ལ་ཤིན་ཏུ་གྲང་སྟེ་ཤ་རུས་དུམ་བུར་གས་པ་ལ་སོགས་པའི་སྡུག་བསྔལ་དང་། ཉེ་འཁོར་བ་རྣམས་ལ་མེ་མར་མུར་གྱི་འོབས་ན་གནས་པ་ལ་སོགས་པའི་སྡུག་བསྔལ་དང་། སྡུག་བསྔལ་དེ་ད་ལྟར་རང་གི་ལུས་ལ་བབ་ན་ཆ་ཤས་ཙམ་ཡང་མི་བཟོད་པ་དང་། ཡི་དྭགས་རྣམས་ལ་བཀྲེས་པ་དང་། སྐོམ་པ་དང་། ཚ་གྲང་དང་། ངལ་བ་དང་། འཇིགས་པའི་སྡུག་བསྔལ་ཡ་ང་བ་ཡོད། དུད་འགྲོ་བྱིངས་ན་གནས་པ་རྣམས་ལ་གཅིག་ལ་གཅིག་ཟ་བ་དང་། ཁ་འཐོར་བ་རྣམས་ལ་བཀོལ་ཞིང་སྤྱོད་པའི་སྡུག་བསྔལ་མང་བ་ཡོད། མི་རྣམས་ལ་ཡང་མཐོ་དམན་དུ་གྱུར་པ་དང་། འདོད་པ་བཙལ་ཏེ་མ་རྙེད་པ་དང་། མི་འདོད་པ་དང་ཕྲད་པ་དང་། གཉེན་དང་བྲལ་བ་ལ་སོགས་པའི་སྡུག་བསྔལ་ད་ལྟ་མངོན་སུམ་དུ་མཐོང་བ་རྣམས་ཡིན་ནོ། །འདོད་ཁམས་ཀྱི་ལྷ་ལ་ཡང་འཆི་ལྟས་དང་ཉེ་བའི་འཆི་ལྟས་བྱུང་བའི་ཚེ། སེམས་ཅན་དམྱལ་བའི་ལུས་ཀྱི་སྡུག་བསྔལ་ལས་ཀྱང་སེམས་ཀྱི་སྡུག་བསྔལ་ཆེ་བ་ཡོད། གཟུགས་དང་གཟུགས་མེད་ཀྱི་ལྷ་ལ་ཡང་ད་ལྟ་སྡུག་བསྔལ་མངོན་གྱུར་པ་མེད་ཀྱང་། ནམ་ཞིག་འོག་ཏུ་ལྷུང་སྟེ་ངན་སོང་གི་སྡུག་བསྔལ་མཐའ་དག་མྱོང་དགོས་པས་ཁམས་གསུམ་འཁོར་བ་འདི་སྡུག་བསྔལ་གྱི་རང་བཞིན་ལས་མ་འདས། དེས་ན་འཁོར་བ་མཐའ་དག་སྤངས་ནས་ཐར་པའི་གོ་འཕང་ཐོབ་པར་བྱ་དགོས་སྙམ་དུ་བསམ་མོ། །འདི་ཡན་ཆད་ཀྱིས་སྐྱེས་བུ་གསུམ་གྱི་ལམ་རིམ་དང་བསྟུན་ན། སྐྱེས་བུ་ཆུང་ངུ་དང་འབྲིང་གི་ལམ་རྫོགས། གསེར་གླིང་པ་ལྟར་ན་སྔོན་འགྲོ་རྟེན་གྱི་ཆོས་བཞི་རྫོགས་པ་ཡིན་ནོ། །གསུམ་པ་བདག་དོན་ལ་ཞེན་པ་བྲལ་ནས་ལམ་འཁྲུལ་པ་སེལ་བར་བྱེད་པ་ལ། བྱམས་པ་དང་། སྙིང་རྗེ་དང་། བྱང་ཆུབ་ཀྱི་སེམས་བསྒོམ་པ་གསུམ་ལས་དང་པོ་ནི། དེ་ལྟར་རང་ཉིད་གཅིག་པུ་འཁོར་བའི་སྡུག་བསྔལ་ལས་ཐར་བས་མི་ཆོག ཁམས་གསུམ་གྱི་སེམས་ཅན་ཐམས་ཅད་བདག་གི་ཕ་མ་ལན་གྲངས་དུ་མར་བྱས་པའི་དྲིན་ཅན་འབའ་ཞིག་ཡིན། ཁྱད་པར་རྩ་བའི་མ་འདིས་དང་པོར་མངལ་དུ་བཟུང་། ཕྱིས་བཙས་པ་ན་འབུ་རིད་ལྟ་བུ་དེ་སྲོག་མགོ་བཏོན། དེ་ནས་ཟས་གོས་སོགས་ཀྱིས་བསྐྱངས་པའི་དྲིན་ཡོད་ཚད་དྲན་པར་བྱས་ནས། མ་འདི་དྲིན་ཅན་ཡིན་པས་བདེ་བ་ལ་འགོད་དགོས་སྙམ་དུ་བསམ། དེ་ནས་གཉེན་ཚན་གཞན་རྣམས་དང་། གནོད་པ་སྐྱེལ་བའི་དགྲ་བོ་རྣམས་དང་། ངན་སོང་གསུམ་ལ་སོགས་པའི་སྡུག་བསྔལ་ཅན་རྣམས་ཀྱིས་ཀྱང་འཁོར་བ་ཐོག་མེད་ནས་མ་ཡང་ཡང་བྱས་པའི་དྲིན་དྲན་པར་བྱས་ནས། དེ་དག་བདེ་བ་ལ་འགོད་པར་འདོད་པའི་བྱམས་པ་རྒྱུད་ལ་སྐྱེས་སྐྱེས་སུ་བསྒོམ་མོ། །གཉིས་པ་སྙིང་རྗེ་བསྒོམ་པ་ནི། རྩ་བའི་མ་འདིའི་དྲིན་གང་ཡོད་དྲན་པར་བྱས་ནས། དྲིན་ཅན་གྱི་མ་འདི་སྡུག་བསྔལ་དང་བྲལ་དགོས་ཀྱང་། ད་ལྟ་སྡུག་བསྔལ་གྱི་རང་བཞིན་དུ་འདུག་པས་སྙིང་རེ་རྗེ། འདི་སྡུག་བསྔལ་དང་བྲལ་ན་ཅི་མ་རུང་། འདི་སྡུག་བསྔལ་དང་བྲལ་བ་ལ་འགོད་པར་བྱའོ་སྙམ་དུ་བསྒོམ། དེ་བཞིན་དུ་འགྲོ་བ་རྣམས་ལ་ཡང་སྔར་བཞིན་དུ་དྲིན་དྲན་པར་བྱས་ནས་སྡུག་བསྔལ་དང་བྲལ་བ་འདོད་ཀྱི་སྙིང་རྗེ་བསྒོམ་མོ། །བྱམས་སྙིང་རྗེ་འདི་གཉིས་རྒྱུད་ལ་མ་སྐྱེས་ན་བྱང་ཆུབ་ཀྱི་སེམས་རྣལ་མ་མི་སྐྱེ་བས་ཐེག་པ་ཆེན་པོའི་ཆོས་ཐམས་ཅད་ཀྱི་རྩ་བ་འདི་གཉིས་ལ་འབད་པ་གལ་ཆེའོ། །གསུམ་པ་བྱང་ཆུབ་ཀྱི་སེམས་བསྒོམ་པ་ལ། སྨོན་པ་བྱང་ཆུབ་ཀྱི་སེམས། བདག་གཞན་མཉམ་པའི་བྱང་ཆུབ་ཀྱི་སེམས། བདག་གཞན་བརྗེ་བའི་བྱང་ཆུབ་ཀྱི་སེམས་དང་གསུམ་ལས། དང་པོ་ནི། དེ་ལྟར་ཁམས་གསུམ་འཁོར་བའི་ཕ་མ་དྲིན་ཅན་རྣམས་བདེ་བ་དང་ལྡན་པ་དང་། སྡུག་བསྔལ་དང་བྲལ་དགོས་ཀྱང་དེའི་ནུས་པ་ད་ལྟ་བདག་ལ་མེད། དེར་མ་ཟད་འཇིག་རྟེན་པའི་ཆེ་བ་ཚངས་པ་དང་བརྒྱ་བྱིན་ལ་སོགས་པ་དང་། འཇིག་རྟེན་ལས་འདས་པ་ཉན་ཐོས་དང་རང་སངས་རྒྱས་ལ་མེད། སུ་ལ་ཡོད་ན་ཡང་དག་པར་རྫོགས་པའི་སངས་རྒྱས་ཁོ་ན་ལ་ཡོད་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཅིག་ཐོབ་པར་བྱས་ནས། དྲིན་ཅན་གྱི་ཕ་མ་རྣམས་འཁོར་བའི་རྒྱ་མཚོ་ལས་བསྒྲལ་བར་བྱའོ་སྙམ་དུ་བསྒོམ་མོ། །སངས་རྒྱས་བསྒྲུབ་པའི་རྒྱུ་ལ་འདི་མེད་ཁ་མེད་ཡིན་ཅིང་། བློ་འདི་ཡོད་ན་དགེ་བའི་རྩ་བ་གང་བསྒྲུབས་པ་ཐམས་ཅད་རྫོགས་པའི་སངས་རྒྱས་ཀྱི་རྒྱུར་འགྱུར་བས་ཐེག་པ་ཆེན་པོའི་སྡེ་སྣོད་རྣམས་ལས་འདིའི་བསྔགས་པ་མང་དུ་གསུངས་སོ། །གཉིས་པ་བདག་གཞན་མཉམ་པ་བསྒོམ་པ་ནི། བདག་བདེ་བ་འདོད་པ་ལྟར་སེམས་ཅན་ཐམས་ཅད་ཀྱང་བདེ་བ་འདོད་པས། བདག་གི་བདེ་བ་བསྒྲུབ་པ་བཞིན་དུ་སེམས་ཅན་ཐམས་ཅད་ཀྱི་བདེ་བའང་བསྒྲུབ་དགོས། བདག་སྡུག་བསྔལ་མི་འདོད་པ་ལྟར་སེམས་ཅན་ཐམས་ཅད་ཀྱང་སྡུག་བསྔལ་མི་འདོད་པས་བདག་གི་སྡུག་བསྔལ་བསལ་བ་བཞིན་དུ་སེམས་ཅན་ཐམས་ཅད་ཀྱི་སྡུག་བསྔལ་ཡང་བསལ་བར་བྱ་དགོས་སོ་སྙམ་དུ་བསྒོམ་པའོ། །གསུམ་པ་བདག་གཞན་བརྗེ་བ་བསྒོམ་པ་ནི། རྩ་བའི་མ་མདུན་དུ་དམིགས་ནས་མ་འདི་དྲིན་ཅན་ཡིན་ཡང་སྡུག་བསྔལ་གྱི་རང་བཞིན་དུ་འདུག་པ་སྙིང་རེ་རྗེ། མ་འདིའི་སྡུག་བསྔལ་དང་། དེའི་མི་དགེ་བ་ཐམས་ཅད་བདག་ལ་སྨིན་ནས་བདག་གིས་ཉམས་སུ་མྱོང་བར་གྱུར་ཅིག བདག་གི་བདེ་དགེ་ཐམས་ཅད་མ་འདི་ལ་སྨིན་ནས་མ་འདི་སངས་རྒྱས་པར་གྱུར་ཅིག་སྙམ་དུ་བསྒོམ་མོ། །དེ་བཞིན་དུ་གཉེན་ཚན་གཞན་རྣམས་དང་། མཐོང་ཐོས་ཀྱི་སེམས་ཅན་རྣམས་དང་། བདག་ལ་གནོད་པ་བྱེད་པའི་དགྲ་བོ་རྣམས་དང་། ངན་སོང་ལ་སོགས་པའི་སྡུག་བསྔལ་ཅན་རྣམས་ལ་རེ་རེ་བཞིན་བསྒོམས་ཏེ། མཐར་སེམས་ཅན་ཐམས་ཅད་ཀྱི་སྡུག་བསྔལ་འུབས་ཀྱིས་རང་ལ་འདུས་ནས་རང་གི་བདེ་དགེ་སེམས་ཅན་ཐམས་ཅད་ཀྱི་གནས་སྐབས་སུ་གང་ལ་གང་འདོད་ཀྱི་ལོངས་སྤྱོད་རྣམས་དང་། མཐར་ཐུག་སངས་རྒྱ་བའི་རྒྱུར་གྱུར་པར་བསྒོམ་མོ། །འདི་ནི་ཐེག་ཆེན་གྱི་ཉམས་ལེན་གྱི་སྙིང་པོ་དུས་གསུམ་སངས་རྒྱས་ཐམས་ཅད་ཀྱི་གསང་ཚིག་ཡིན་པས་འདི་ལྟར་བསྒོམ་དགོས་པའི་རྒྱུ་མཚན་དང་། ཤེས་བྱེད་ཀྱི་ལུང་དང་། སྒོམ་ཚུལ་གྱི་དོགས་གཅོད་དང་བཅས་པ་དགོས་མོད་ཀྱི་ཧ་ཅང་མང་བར་འགྱུར་བས་མ་སྤྲོས་སོ། །སྨོན་པ་བྱང་ཆུབ་ཀྱི་སེམས་ནས་འདིའི་བར་རྣམས་ལ་སྔར་བསྟན་པ་ལྟར་གྱི་སྔོན་འགྲོ་སྐྱབས་འགྲོ་སེམས་བསྐྱེད་ནི་ངེས་པར་དགོས་ལ། དེའི་སྟེང་དུ་ཡང་བླ་མའི་རྣལ་འབྱོར་བསྒོམས་ནའང་བཟང་ངོ་། །དམིགས་པ་ཐམས་ཅད་ཀྱི་ཐུན་མཇུག་ཏུ་བསྔོ་བ་སྨོན་ལམ་གྱིས་རྒྱས་བཏབ་ལ། གཞན་འགྲོ་འཆག་ཉལ་འདུག་གི་སྤྱོད་ལམ་ཐམས་ཅད་དུ་ཡང་དྲན་པར་བྱའོ། །བཞི་པ་མཐའ་བཞིར་ཞེན་པ་དང་བྲལ་ནས་འཁྲུལ་པ་ཡེ་ཤེས་སུ་འཆར་བར་བྱེད་པ་ནི་མན་ངག་གཞན་གྱི་ལུགས་ལ་ཞི་གནས་དང་། ལྷག་མཐོང་གཉིས་ལས། ལྷག་མཐོང་ལ་ཡང་གང་ཟག་གི་བདག་མེད་བསྒོམ་པ་དང་། ཆོས་ཀྱི་བདག་མེད་པ་སྒོམ་པ་ལ་སོགས་པ་ཡོད་མོད་ཀྱི། འདི་པའི་ལུགས་ལ་མཉམ་བཞག་ཏུ་སྣང་བ་སེམས་སུ་བསྒྲུབ་པ། སེམས་སྒྱུ་མར་བསྒྲུབ་པ། སྒྱུ་མ་རང་བཞིན་མེད་པར་བསྒྲུབ་པ་གསུམ་བསྒོམ་ཞིང་། རྗེས་ཐོབ་ཏུ་ཞེན་མེད་སྒྱུ་མ་དང་། རྨི་ལམ་ལྟ་བུར་ལྟ་བའི་ཉམས་ལེན་ཡོད་པ་ནི་བླ་མའི་མན་ངག་ལ་མ་ལྟོས་པར་རང་དགར་བསྒོམས་ན་འཁྲུལ་གཞི་ཆེ་ཞིང་ཡི་གེ་ཙམ་གྱིས་ཤེས་པར་མི་ནུས་པས་འདིར་མ་སྤྲོས་སོ། །འོན་ཀྱང་འཕྲལ་དུ་ཕན་པ་ནི་དགེ་བའི་རྩ་བ་གང་བསྒྲུབས་ཀྱང་བདག་ནི་དགེ་བ་བྱེད་པ་པོའོ། །དགེ་བ་ནི་འདི་དག་གོ་དེས་ན་ཁོ་བོས་དགེ་བ་འདི་བྱས་སོ་སྙམ་པའི་མངོན་རློམ་མེད་པ་ཡང་གལ་ཆེ། གཞན་དགེ་བ་ལ་བསྐུལ་བའི་ཆེད་དུ་རང་ལ་རློམ་པ་མེད་པར་ཁོ་བོས་དགེ་བ་འདི་ལྟ་བུ་བྱས་སོ་ཞེས་སྒྲོག་པ་ལ་ནི་ཉེས་པ་མེད་དོ། །དེས་ན་དགེ་བའི་རྩ་བ་བསྒྲུབ་པ་དང་། འཕྲལ་དུ་འཇིག་རྟེན་གྱི་བྱ་བ་བྱེད་པའི་ཚེ་སྒྱུ་མ་ཡིན་ནམ། རྨི་ལམ་ཡིན་ནམ་སྙམ་དུ་དྲན་པར་བྱེད་ན་ལྟ་བ་རྟོགས་པའི་རྒྱུར་འགྱུར་བས་དྲན་འཛིན་གལ་ཆེའོ། །དེ་ལྟར་འདི་ལ་ལམ་རིམ་བཞི་ཡོད་པའི་དང་པོ་ནི། སྐྱེ་བ་ཕྱི་མ་ཕན་ཆད་ཀྱི་དོན་བསྒྲུབ་པས་བློ་ཆོས་སུ་འགྲོ་བ་ཞེས་བྱ། གཉིས་པས་འཁོར་བ་སྤངས་ནས་ཐར་ལམ་བསྒྲུབས་པས་ཆོས་ལམ་དུ་འགྲོ་བ་ཞེས་བྱ། གསུམ་པས་ཐེག་དམན་གྱི་བསམ་པ་སྤངས་ནས་ཐེག་ཆེན་ལ་སྦྱོར་བས་ལམ་འཁྲུལ་པ་སེལ་བ་ཞེས་བྱ། བཞི་པས་མཐར་འཛིན་གྱི་སྤྲོས་པ་མཐའ་དག་སྤངས་ནས་གནས་ལུགས་ཀྱི་དོན་ལ་སྦྱོར་བས་འཁྲུལ་པ་ཡེ་ཤེས་སུ་འཆར་བ་ཞེས་བྱ་སྟེ། ལམ་གྱི་གཙོ་བོ་འདི་ལྟ་བུ་ཉམས་སུ་བླངས་ཤིང་འཕྲལ་གྱི་སྤྱོད་པ་ལུས་དོན་ཡོད་པར་བྱ་བའི་ཕྱིར་ཕྱག་དང་བསྐོར་བ། ངག་དོན་ཡོད་པར་བྱ་བའི་ཕྱིར་སངས་རྒྱས་བྱང་སེམས་ཀྱི་བསྟོད་པ། མདོ་སྡེ་ཟབ་མོ་ཀློག་པ། ཡིད་དོན་ཡོད་པར་བྱ་བའི་ཕྱིར་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པ། ལོངས་སྤྱོད་དོན་ཡོད་པར་བྱ་བའི་ཕྱིར་དཀོན་མཆོག་ལ་མཆོད་པ་དང་། དགེ་འདུན་གྱི་བསྙེན་བཀུར་ལ་སོགས་པ་བྱས་ཏེ། སྨོན་ལམ་རྣམ་པར་དག་པས་མཚམས་སྦྱར་ན་སྐྱོན་མེད་ཡོན་ཏན་ཀུན་དང་ལྡན་པའི་རྫོགས་པའི་སངས་རྒྱས་ཐོབ་པར་འགྱུར་བ་ནི་ངེས་པའོ། །སླར་ཡང་གནད་བསྡུས་པའི་ཚིགས་སུ་བཅད་པ་ནི། དམ་ཆོས་བསྒྲུབ་པའི་ལུས་རྟེན་རྙེད་དཀའ་ཞིང་། །མི་རྟག་མྱུར་དུ་འཇིག་པའི་རང་བཞིན་དུ། །ལེགས་པར་རྟོགས་ནས་དགེ་སྡིག་བླང་དོར་ལ། །བཟོབ་པ་ལྷུར་ལེན་རིམ་པ་དང་པོ་ལགས། །འཁོར་བའི་རྒྱ་མཚོར་མཐའ་མེད་འགྲོ་བ་རྣམས། །སྡུག་བསྔལ་ཆུ་སྲིན་ཁ་རུ་ཆུད་མཐོང་ནས། །མྱང་འདས་ཐར་པའི་སྐམ་ས་དོན་གཉེར་བའི། །ངེས་འབྱུང་བསྐྱེད་པ་རིམ་པ་གཉིས་པའོ། །མཁའ་མཉམ་འགྲོ་བས་བདག་གི་ཕ་དང་མ། །ཡང་ཡང་བྱས་ཤིང་ཕན་བཏགས་དྲིན་དྲན་ནས། །བྱམས་དང་སྙིང་རྗེ་བྱང་ཆུབ་སེམས་མཆོག་གིས། །གཞན་དོན་བསྒྲུབ་པ་རིམ་པ་གསུམ་པའོ། །ཇི་ལྟར་སྣང་བའི་འདི་དག་རང་གི་སེམས། །སེམས་ཉིད་རྒྱུ་རྐྱེན་ཚོགས་ཙམ་སྒྱུ་མ་བཞིན། །སྒྱུ་མ་སྤྲོས་དང་བྲལ་བ་རྟོགས་གྱུར་ནས། །གནས་ལུགས་བསྒོམ་པ་རིམ་པ་བཞི་པའོ། །གནས་སྐབས་ཀུན་ཏུ་དཀོན་མཆོག་མཆོད་པ་དང་། །མི་དགེའི་ཆ་ཤས་རིམ་གྱིས་སྤོང་བ་དང་། །མགོན་མེད་དབུལ་འཕོང་སྦྱིན་པས་ཚིམ་བྱས་ནས། །འཁོར་གསུམ་ཡོངས་དག་བསྔོ་བས་མཚམས་སྦྱར་ན། །གནས་སྐབས་མཐར་ཐུག་དོན་རྣམས་འགྲུབ་པར་ངེས། །འདི་ནི་ཐེག་ཆེན་ལམ་གྱི་གནད་བསྡུས་ནས། །བསྟན་པའི་སྦྱིན་བདག་ཁྱེད་ཀྱི་ཐུགས་དམ་དུ། །ཕན་པའི་བསམ་པས་འབུལ་བར་བགྱིད་ལགས་ཀྱིས། །ཉམས་སུ་བླངས་ནས་དོན་ཀུན་འགྲུབ་པར་མཛོད། །ཅེས་པ་འདི་ནི་བསྟན་པ་རིན་པོ་ཆེ་ལ་མི་ཕྱེད་པའི་དད་པ་དང་ལྡན་པའི་སྒོ་ནས། བསྟན་འཛིན་གྱི་སྐྱེས་བུ་རྣམས་ཀྱི་སྦྱིན་བདག་དམ་པར་གྱུར་པ་ཁྱིམ་པའི་རྟེན་ཅན་གྱི་བྱང་ཆུབ་སེམས་དཔའ་རྭ་ལོད་རྡོ་རྗེས། གསུང་གི་གདམས་པ་ལྷ་ཆོས་ལ་ཕན་པའི་བསླབ་བྱ་ཞིབ་པ་ཞིག་དགོས་ཞེས་བསྐུལ་བའི་ངོར། ཤཱཀྱའི་དགེ་སློང་བསོད་ནམས་སེང་གེས་སྨིན་དྲུག་ཟླ་བའི་ཡར་ཚེས་གསུམ་ལ་མདོ་མཁར་གྱི་དབེན་གནས་དམ་པར་བྲིས་པ་ཡིན་ལ། ལས་འབྲས་ཀྱི་གནད་མདོའི་ལུང་ཁུངས་དང་བཅས་པ་ཞིག་རྗེས་སུ་འབུལ་བ་ལགས།། །།མངྒ་ལཾ་བྷ་ཝན་ཏུ། །དགེའོ།། །།

ཀུན་མཁྱེན་ཆོས་ཀྱི་རྒྱལ་པོ་བསོད་ནམས་སེང་གེའི་རྣམ་པར་ཐར་པ་ངོ་མཚར་གསལ་བའི་ཉིན་བྱེད་བསོད་ནམས་རབ་རྒྱས།