དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པ།
དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པ་བཞུགས་སོ།། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པར་འདོད་པས། གཙུག་ལག་ཁང་ལ་སོགས་པའི་གནས་དབེན་པར་ཕྱག་དར་དང་སྐྱང་ནུལ་བྱས་ལ། དེར་ཁྲུ་གང་ཡན་ཆད་ཇི་ལྟར་འཚམས་པའི་ཚད་ཀྱིས་ཟླུམ་པོར་བྱས་པ་ལ་བའི་རྣམ་པ་ལྔའམ་དྲི་བཟང་གིས་བྱུགས་ཏེ། གནས་སྲུང་གི་མེ་ཏོག་བཞག་གོ །དེའི་མཐར་བྱང་ཤར་དུ་མཚམས་འཛིན་གྱི་མེ་ཏོག ཤར་དུ་བསང་གཏོར་དང་མཆོད་ཡོན། ཤར་ལྷོར་ཞབས་བསིལ། ལྷོར་མེ་ཏོག ལྷོ་ནུབ་ཏུ་བདུག་སྤོས། ནུབ་ཏུ་མར་མེ། ནུབ་བྱང་དུ་དྲི་ཆབ། བྱང་དུ་ཞལ་ཟས་བཤམ། སྤྱི་མཆོད་དེའི་ནང་དུ་བདུག་སྤོས། མར་མེ། ཞལ་ཟས་གསུམ་ཤར་ནུབ་གཉིས་སུ་ཚན་པ་དྲུག་རེ་དང་། ལྷོ་བྱང་གཉིས་སུ་ཚན་པ་བཞི་རེ་སྟེ་ཉི་ཤུ་བཤམ། དེ་ཡང་ནུབ་ཀྱི་གཉིས་ཤར་གྱི་སྣམ་བུའི་རེག་རྡོ་རྗེ་མ་དང་ཆོས་དབྱིངས་རྡོ་རྗེ་མ་གཉིས་ཀྱི་ཡིན་ལ། ཤར་གྱི་གཉིས་གཙོ་བོ་ཡབ་ཡུམ་དང་། རིགས་བདག་གཉིས་ཀྱི་ཡིན་ཅིང་། ལྷག་མ་ཕྱོགས་རེ་རེར་བཞི་བཞིར་གནས་པ་ནི་ནུབ་ཀྱི་བཞི་ཤར་དང་། ཤར་ལྷོའི་འཁོར་གྱི་ལྷ་བཞིའི་ཡིན་པ་སོགས་སོ། །དེའི་ཤར་ཕྱོགས་སུ་ཅི་འབྱོར་པའི་ཡོ་བྱད་ཀྱིས་བརྒྱན་པའི་གཏོར་མ་རྒྱལ་མཚན་ནམ། བ་དན་གྱིས་སྤྲས་པ་ལྔ་བཤམ། གཞན་ཡང་བླ་རེ་དང་། བ་དན་དང་། གདུགས་དང་། རྒྱལ་མཚན་དང་། གོས་ཟུང་དང་། རོལ་མོའི་ཡོ་བྱད་ལ་སོགས་པ་རྣམས་བཤམས་ཤིང་། རང་གི་མདུན་དུ་ནང་མཆོད་དང་། རྡོ་རྗེ་དྲིལ་བུ་ཡང་བཤམ་མོ། །དེ་ནས་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་ནས་བརྩམས་ཏེ། སྒྲུབ་པའི་ཐབས་ལས་བྱུང་བའི་རིམ་པས། ཏིང་ངེ་འཛིན་གསུམ་གྱིས་བདག་བསྐྱེད་རྒྱས་པ་བསྒོམ་ཏེ། རང་གཙོ་བོ་ཡབ་ཡུམ་གྱི་ང་རྒྱལ་གྱིས། མཎྜལ་དབུས་ཀྱི་གནས་སྲུང་གི་མེ་ཏོག་བསལ་ཏེ། དྲིའི་ཐིག་ལེ་གྲུ་བཞི་བྱ་སྟེ། མེ་ཏོག་ཅུང་ཟད་ཅིག་བཞག དེ་ནས་མཎྜལ་བགེགས་མཐར་བྱེད་ཀྱིས་བསང་། ཤཱུ་ནྱ་ཏཱས་སྦྱངས། སྟོང་པའི་ངང་ལས་ཨྃ་དམར་པོ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་རྡོ་རྗེ་རྩེ་ལྔ་པ་ནག་པོ་ཁ་གྱེས་པ། ལྟེ་བ་ལ་ཧཱུྃ་གིས་མཚན་པ་དེ་ལས་བྱུང་བའི་རྡོ་རྗེའི་རང་བཞིན་གྱི་འོད་ཟེར་ཕྱོགས་ཀུན་དུ་འཕྲོས་པས་བགེགས་ཐམས་ཅད་བསལ་ལ། རྡོ་རྗེའི་རང་བཞིན་གྱི་འོད་ཟེར་དེ་ཉིད་ལས་རྡོ་རྗེའི་རྭ་བ་དང་། དྲྭ་བ་དཔངས་དཔག་ཚད་བརྒྱ་སྟོང་དུ་ཡོད་པ། བདུད་ཐམས་ཅད་ཀྱིས་བགྲོད་པར་མི་ནུས་པ་ཕྱོགས་ཐམས་ཅད་ཁྱབ་པ། ཕྱི་རོལ་ན་དུས་མཐའི་མེའི་ཕུང་པོ་འབར་བ་ལྟ་བུས་བསྐོར་བ་དང་། རྡོ་རྗེའི་རང་བཞིན་གྱི་སའི་དཀྱིལ་འཁོར་ས་འོག་གི་མཐར་ཐུག་པར་བསམས་ལ། ཆོས་འབྱུང་ནས་བཟུང་སྟེ། གཞལ་ཡས་ཁང་གདན་དང་བཅས་པ་སྒྲུབ་ཐབས་ལྟར་བསྒོམ་མོ། །དེ་ནས་དབུས་སུ་སླར་ཡང་མེ་ཏོག་སྤུངས་ཏེ། ཨོཾ་ཨཱཿམཱཾ་ཧཱུྃ་ཞེས་པ་གཙོ་བོའི་སྔགས་ལན་གསུམ་དང་། འཁོར་གྱི་ལྷ་སོ་སོའི་གནས་སུ་དྲིའི་ཐིག་ལེ་དང་། མེ་ཏོག་གི་ཚོམ་བུ་རེ་བྱ་སྟེ། སོ་སོའི་སྔགས་ལན་གསུམ་གསུམ་བཟླ་བར་བྱའོ། །དེ་ནས་དཀྱིལ་འཁོར་གྱི་གཙོ་བོ་ནས་བརྩམས་ཏེ། བགེགས་མཐར་བྱེད་ཀྱི་བར་སྐད་ཅིག་གིས་བསྐྱེད་ནས་སྒྲུབ་པའི་ཐབས་ཀྱི་དཀྱིལ་འཁོར་རྒྱལ་མཆོག་གི་སྐབས་ནས་འབྱུང་བ་ལྟར། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་ནས་རིགས་ཀྱི་བདག་པོས་རྒྱས་གདབ་པའི་བར་རྣམས་བྱའོ། །དེ་ནས་ཡེ་ཤེས་སེམས་དཔའི་ཐུགས་ཁའི་ས་བོན་མྃ་ཡིག་ལས་འོད་ཟེར་སྤྲོས་པས་དེ་བཞིན་གཤེགས་པ་ཐམས་ཅད་བཀུག་སྟེ་ཞལ་ནས་ཞུགས་པ་སོགས་ལྷ་མོ་བཅུ་སྒྲུབ་ཐབས་ལྟར་མངལ་དུ་བསྐྱེད་པ་ཨོཾ་བཛྲ་ས་ཕ་ར་ཎ་ཁྃ་ཞེས་པས་དེ་རྣམས་རང་གི་བ་སྤུའི་བུ་ག་ནས་ཕྱིར་འཕྲོས་དཔག་ཏུ་མེད་པར་གྱུར་ནས་མདུན་བསྐྱེད་ཀྱི་མཐའ་སྐོར་དུ་འཁོད་ནས་དཀྱིལ་འཁོར་པ་རྣམས་ལ་མཆོད་པར་བསམ་སྟེ། མཆོད་རྫས་རྣམས་བགེགས་མཐར་བྱེད་ཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་བསང་གཏོར། མཆོད་ཡོན། ཞབས་གསིལ། མེ་ཏོག བདུག་སྤོས། མར་མེ། དྲི། ཞལ་ཟས། རོལ་མོ་ལ་སོགས་པའི་མཆོད་རྫས་རྣམས་དྭངས་ཤིང་ཐོགས་པ་མེད་པ་ངོ་བོ་བཟང་ཤིང་རྒྱ་ཆེ་བ། ས་དང་ནམ་མཁའ་བར་སྣང་ཐམས་ཅད་ཁྱབ་པ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་། དཔལ་གསང་བ་འདུས་པའི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག ཅེས་བརྗོད་ལ། སོ་སོའི་སྔགས་དང་ཕྱག་རྒྱས་བྱིན་གྱིས་བརླབ་བོ། །དེ་ནས་རྡོ་རྗེ་ཐལ་མོ་སྙིང་གར་སྦྱར་ལ། ལྷ་ཡི་བསང་གཏོར་དམ་པ་འདིས། །དཀྱིལ་འཁོར་མཆོད་པར་བགྱིད་པར་འཚལ། །ཐུགས་ནི་བརྩེ་བས་ཉེར་དགོངས་ཏེ། །མགོན་པོས་མཆོད་པ་འདི་བཞེས་ཤིག །ཨོཾ་མྃ་མཉྫུ་བཛྲ་ཨོཾ་ཨཱཿམྃ་ཧཱུྃ། ཞེས་པས་གཙོ་བོ་ཡབ་ཡུམ་དང་། ཨོཾ་ཧཱུྃ་བཛྲ་དྷྲྀཀ་ཨོཾ་ཨཱཿམྃ་ཧཱུྃ། ཞེས་པས་རིགས་བདག་དང་། དེ་བཞིན་དུ་ཨོཾ་བུྃ་ཛི་ན་ཛིཀ་དང་། ཨོཾ་ཨཱྃ་རཏྣ་ཌྷྲྀཀ ཨོཾ་ཛྲཱིཾ་ཨཱ་ཿརོ་ལིཀ ཨོཾ་ཁྃ་པྲ་ཛྙཱ་ཌྷྲྀཀ ཨོཾ་ལྃ་མོ་ཧཱ་ར་ཏཱི། ཨོཾ་མྃ་དྭེ་ཥ་ར་ཏཱི། ཨོཾ་པཱྃ་ར་ག་ར་ཏཱི། ཨོཾ་ཏཱྃ་བཛྲ་ར་ཏཱི། ཨོཾ་ཛ་རཱུ་པ་བཛྲཱི། ཨོཾ་ཧཱུྃ་ཤབྡ་བཛྲཱི། ཨོཾ་བྃ་གནྡྷེ་བཛྲཱི། ཨོཾ་ཧོཿར་ས་བཛྲཱི། ཨོཾ་ཁྃ་པརྵེ་བཛྲཱི། ཨོཾ་རྃ་དྷརྨ་དྷཱ་ཏུ་བཛྲཱི། ཨོཾ་ཧཱུྃ་ཡ་མཱནྟ་ཀྲིཏ། ཨོཾ་ཧཱུྃ་པྲཛྙཱནྟ་ཀྲིཏ། ཨོཾ་ཧཱུྃ་པདྨཱནྟ་ཀྲིཏ། ཨོཾ་ཧཱུྃ་བིགྷཱནྟ་ཀྲིཏ། ཨོཾ་ཨཱཿམྃ་ཧཱུྃ། ཞེས་པ་རེ་རེ་བཞིན་སྦྱར་བས་འཁོར་གྱི་ལྷ་རྣམས་ལ་དབུལ་ལོ། །དེ་བཞིན་དུ་མཆོད་ཡོན་དང་། ཞབས་བསིལ་གཉིས་ཀྱང་ཚིགས་བཅད་ཀྱི་འདོན་པ་བསྒྱུར་བ་མ་གཏོགས་སྔགས་རྣམས་འདྲའོ། །ཆུ་སྐྱེས་དེ་བཞིན་ཐང་ལས་སྐྱེས། །མེ་ཏོག་དམ་པ་འདི་དག་ནི། །མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱོད་ཀྱིས་བཞེས། །ཨོཾ་མྃ་མཉྫུ་བཛྲ་པུཥྤེ་པྲ་ཏཱིཙྪ་ཡེ་སྭཱཧཱ། ཞེས་པ་ནས། ཨོཾ་ཧཱུྃ་བིགྷཱན་ཏ་ཀྲིཏ་པུཥྤཾ་པྲ་ཏིཙྪ་ཡེ་སྭཱཧཱ། ཞེས་པའི་བར་བརྗོད། ལྷན་ཅིག་སྐྱེས་དང་སྦྱར་ལས་བྱུང་། །དེ་བཞིན་བདུག་སྤོས་མཆོག་འདི་དག །མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱེད་ཀྱིས་བཞེས། །ལྷ་སོ་སོའི་སྔགས་ལ་དྷཱུ་པྃ་པྲ་ཏཱིཙྪ་ཡེ་བཏགས་པས་བདུག་སྤོས་དབུལ། ཞུན་མར་འབྲུ་མར་མར་མེ་འདི། །ལྷ་རྫས་འབར་བས་མུན་པ་འཇོམས། །མི་ཤེས་ཐམས་ཅད་ཞི་བྱའི་ཕྱིར། །བདག་ཉིད་དད་པས་དབུལ་བར་བགྱི། །ལྷ་སོ་སོའི་སྔགས་ལ་དཱི་པྃ་པྲ་ཏཱིཙྪ་སྦྱར་བས་མར་མེ་དབུལ། ལྷན་ཅིག་སྐྱེས་དང་སྦྱར་བ་ཡིས། །དྲི་མཆོག་དམ་པ་འདི་དག་ནི། །མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱེད་ཀྱིས་བཞེས། །ལྷ་སོ་སོའི་སྔགས་ལ་གནྡྷཾ་པྲ་ཏཱིཙྪ་སྦྱར་བས་དྲི་མཆོག་དབུལ། བཟའ་དང་བཅའ་བར་ཡང་དག་ལྡན། །ཁ་དོག་དྲི་དང་རོ་ལྡན་ཞིང་། །ཐམས་ཅད་སྦྱར་བའི་ཞལ་ཟས་འདི། །འབུལ་གྱི་ཡང་དག་བཞེས་སུ་གསོལ། །ལྷ་སོ་སོའི་སྔགས་ལ་ནཻ་བིདྱཱ་བཏགས་པས་ཞལ་ཟས་དབུལ། སིལ་སྙན་ལ་སོགས་རོལ་མོའི་ཚོགས། །དབྱངས་ཀྱི་ང་རོ་ལྡན་པ་འདི། །མཆོག་ཏུ་དགའ་བས་བདག་འབུལ་གྱིས། །ཅི་བདེ་བར་ནི་བཞེས་སུ་གསོལ། །ལྷ་སོ་སོའི་སྔགས་ལ་ཤཱབྡ་པྲ་ཏཱིཙྪ་ཡེ་སྭཱཧཱ་སྦྱར་བ་དང་། བཛྲ་དྷརྨཱ་ར་ཎི་ཏའི་སྔགས་བརྗོད་པས་རོལ་མོ་ཅི་འབྱོར་པར་དབུལ་ལོ། །དེ་ནས་གཟུགས་སོགས་ཐབས་ཀྱི་ངོ་བོར་བྱས་པའི་མཆོད་པ་རྒྱུད་ཀྱི་དངོས་བསྟན། གཟུགས་ལ་རྣམ་གསུམ་ཤེས་བྱས་ནས་ཞེས་སོགས་རྗེ་བླ་མས་མཛད་པའི་གསང་བ་འདུས་པའི་མཆོད་པའི་ཆོ་ག་མཆོད་སྤྲིན་རྒྱ་མཚོ་ལས་འབྱུང་བ་ལྟར་བྱའོ། །གཟུགས་སོགས་ཤེས་རབ་ཀྱི་ངོ་བོར་བྱས་པའི་མཆོད་པ་ནི། བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །འཇོ་སྒེག་སྒྱུ་འཕྲུལ་རོལ་པས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་གཟུགས་ཀྱི་སྤྲིན་གྱིས་མཆོད། །ཀུན་འཛིན་རྣམས་སྦྱོང་མ་ཆགས་རབ་དགའི་ས་བསྒྲུབ་ཤོག །ཨོཾ་ཨཱཿརུ་པ་བཛྲཱི་ཧཱུྃ། བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །ཡན་ལག་འཁྲིལ་ལྡན་དབྱངས་ཀྱིས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་སྒྲ་ཡིས་སྤྲིན་གྱིས་མཆོད། །འཆལ་ཚུལ་རྣམས་སྦྱོང་ཁྲིམས་དག་དྲི་མེད་ས་སྒྲུབ་ཤོག །ཨོཾ་ཨཱཿཤཱབྡ་བཛྲཱི་ཧཱུྃ། བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །དྲི་ཞིམ་སྤོས་ངད་ལྡན་པས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་དྲི་ཞིམ་སྤྲིན་གྱིས་མཆོད། །ཁྲོ་བ་རྣམ་སྦྱོང་བཟོད་དག་འོད་བྱེད་ས་བསྒྲུབ་ཤོག །ཨོཾ་ཨཱཿགནྡྷེ་བཛྲཱི་ཧཱུྃ། བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །རོ་མཆོག་བརྒྱ་ལྡན་མཐའ་ཡས་བཅུད་ཀྱིས་ཞིང་བཀང་ནས། །མ་ལུས་རྒྱལ་བ་དཔེ་མེད་རོ་མཆོག་སྤྲིན་གྱིས་མཆོད། །ལེ་ལོ་རྣམ་སྦྱོང་བརྩོན་དག་འོད་འཕྲོའི་ས་བསྒྲུབ་ཤོག །ཨོཾ་ཨཱཿར་ས་བཛྲཱི་ཧཱུྃ། བུད་མེད་མཚནྎ །འཇམ་ཞིང་བདེ་སྐྱེད་རེག་བྱས་མཐའ་ཡས་ཞིང་བཀང་ནས། མ་ལུས་རྒྱལ་བ་དཔེ་མེད་རེག་མཆོག་སྤྲིན་གྱིས་མཆོད། །གཡེང་བ་རྣམས་སྦྱོང་རྩེ་གཅིག་སྦྱང་དཀའི་ས་བསྒྲུབ་ཤོག །ཨོཾ་ཨཱཿཔརྵེ་བཛྲཱི་ཧཱུྃ། བུད་མེདྎ །སྤྲོས་མེད་རྒྱ་ཆེན་ཆོས་ཀྱི་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་ཆོས་ཀྱི་སྤྲིན་གྱིས་མཆོད། །མི་ཤེས་རྣམ་སྦྱོང་ཤེས་རབ་མངོན་གྱུར་ས་བསྒྲུབ་ཤོག །ཨོཾ་ཨཱཿདྷརྨ་དྷཱ་ཏུ་བཛྲཱི་ཧཱུྃ། །ཞེས་པས་མཆོད། དེ་ནས་ཐུན་མོང་གི་མཆོད་པ་དང་། ཁྱད་པར་གྱི་མཆོད་པ་དང་། ལུས་ངག་ཡིད་གསུམ་གྱིས་མཆོད་པ་རྣམས་ནི་མཆོད་སྤྲིན་རྒྱ་མཚོ་བཞིན་བྱའོ། །ནང་གི་མཆོད་པ་ལ་བསྡུ་ན། བླ་མའི་མཚན་གྱི་སྐབས་སུ་འདིའི་བླ་མ་བརྒྱུད་པ་དང་། དཀྱིལ་འཁོར་གྱི་སྔགས་ཀྱི་སྐབས་སུ་འདིའི་སྔགས་རྣམས་བརྗོད་ནས། རིགས་དྲུག་གི་སེམས་ཅན་ཚིམ་པའི་བར་ཕ་རྒྱུད་སྤྱི་དང་མཐུན་པའི་ནང་མཆོད་འབུལ་བ་ཉིད་ཀྱིས་ཆོག་ལ། རྒྱས་པར་སྤྲོ་ན་ནང་གི་མཆོད་པ་ལྔ་ཆར་ཡང་མཆོད་སྤྲིན་རྒྱ་མཚོ་ལྟར་བྱའོ། །གསང་བའི་མཆོད་པ་ནི་རང་གི་སྙིང་ཁ་ནས་མཚན་ཉིད་དང་ལྡན་པའི་ཡེ་ཤེས་ཀྱི་ཕྱག་རྒྱ་དཔག་ཏུ་མེད་པ་སྤྲོས་ནས་མདུན་གྱི་དེ་བཞིན་གཤེགས་པ་རྣམས་ལ་ཕུལ་བས། རྒྱལ་བ་རྣམས་རིག་མའི་འདོད་ཡོན་ལྔ་ལ་ལོངས་སྤྱོད་ཅིང་། མཆོག་ཏུ་དགའ་བའི་བདེ་བ་ཉམས་སུ་མྱོང་བར་བསམས་ལ། མཚུངས་མེད་སྒྱུ་འཕྲུལ་སྒེག་མ་ཐུགས་རྗེའི་སྤྱན། །བརྟན་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །ཞི་མཛད་ཐབས་མཁས་རིང་སོང་ས་སྒྲུབ་མ། །འཇམ་པའི་རྡོ་རྗེའི་ལྷ་ཚོགས་མཉེས་ཕྱིར་འབུལ། །མཚུངས་མེད་སྒྱུ་འཕྲུལ་སྒེག་མ་བྱམས་པའི་བདག །བརླན་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །སྲུང་མཛད་སྨོན་ལམ་མི་གཡོའི་ས་སྒྲུབ་མ། །འཇམ་པའི་རྡོ་རྗེའིྎ །མཚུངས་མེད་སྒྱུ་འཕྲུལ་སྒེག་མ་དགའ་དཀར་མོ། །སྨིན་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །རྒྱས་མཛད་མི་བརྫི་ལེགས་པའི་ས་སྒྲུབ་མ། །འཇམ་པའི་རྡོ་རྗེའིྎ །མཚུངས་མེད་སྒྱུ་འཕྲུལ་སྒེག་མ་བཏང་སྙོམས་སྒྲོལ། །གཡོ་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །དབང་མཛད་ཡེ་ཤེས་ཆོས་སྤྲིན་ས་སྒྲུབ་མ། འཇམ་པའི་རྡོ་རྗེའིྎ །མཚུངས་མེད་སྒྱུ་འཕྲུལ་སྒེག་མ་ཡེ་ཤེས་དབྱིངས། །གོ་འབྱེད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །མཆོག་མཛད་ཆོས་སྐུ་ཀུན་ཏུ་འོད་སྒྲུབ་མ། །འཇམ་པའི་རྡོ་རྗེའི་ལྷ་ཚོགས་མཉེས་ཕྱིར་འབུལ། །རེ་རེའི་མཇུག་ཏུ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། ཞེས་བརྗོད་པས་མཆོད་དོ། །དེ་ནས་ཡིད་ལས་བྱུང་བའི་མཆོད་པ་གསུམ་དང་། བླ་ན་མེད་པའི་མཆོད་པ་གསུམ་ཡང་མཆོད་སྤྲིན་རྒྱ་མཚོ་བཞིན་བྱས་ནས། བསྟོད་པའི་མཆོད་པ་ནི་རྡོ་རྗེ་དྲིལ་བུ་འཛིན་པས། དེ་ཉིད་ལྔ་པ་དང་། གང་གི་དངོས་ཀུན་གདོད་ནས་གསལ་བ་སོགས་དང་། རྗེ་བླ་མས་མཛད་པའི་དཀྱིལ་འཁོར་གྱི་འཁོར་ལོའི་བསྟོད་པ་རྣམས་ཀྱིས་མཆོད་དོ། །དེ་ནས་དམ་ཚིག་གཟུང་བ་ནི་ལུགས་འདིའི་རྒྱུན་བཤགས་ལན་གསུམ་དང་། རིགས་ལྔའི་སྡོམ་བཟུང་ལན་གསུམ་བྱ་སྟེ། སྒྲུབ་པའི་མཆོད་པ་ཡང་དཀྱིལ་འཁོར་འདིའི་སྔགས་ཀྱི་བཟླས་པས་མཆོད་པར་བྱའོ། །དེ་ནས་མདུན་དུ་བཤམས་པའི་གཏོར་མ་རྣམས་ནང་མཆོད་ཆུ་ཆང་གིས་སྦྱངས་ལ་སྒྲུབ་ཐབས་ལྟར་བྱིན་གྱིས་བརླབས་ནས། གཏོར་མ་དང་པོ་གཏོར་ཆོག་ལྟར་འདས་པའི་ལྷ་ལ་དབུལ། གཉིས་པ་གུར་གྱི་མགོན་པོ་ལ་དབུལ། གསུམ་པ་སངས་རྒྱས་ཡེ་ཤེས་ཞབས་ཀྱི་བཀའ་སྲུང་མགོན་པོ་གདོང་བཞི་པ་ལ་དབུལ། བཞི་པ་གུར་གྱི་མགོན་པོའི་ལས་མགོན་རྣམས་ལ་དབུལ། ལྔ་པ་གཏོར་ཆོག་ལྟར་ཕྱོགས་སྐྱོང་རྣམས་ལ་དབུལ། དེ་ནས་དཔའ་བོའི་སྟོན་མོ་ལ་ལོངས་སྤྱོད་རྒྱུ་ཡོད་ན་མཆོད་ཅིང་བྱིན་གྱིས་བརླབས་ནས། རྡོ་རྗེའི་གླུ་དང་། བཀྲ་ཤིས་བརྗོད་པའི་བར་ཚུལ་བཞིན་དུ་བྱའོ། །རྗེས་ཀྱི་ཆོ་ག་ནི་མཆོད་པ་རྣམས་ཁ་གསོས་ཏེ་བསང་སྦྱང་བྱིན་གྱིས་བརླབ་ལ། ཨོཾ་སརྦ་ཏ་ཐཱ་ག་ཏ་ཤྲཱི་གུ་ཧྱ་ས་མཱ་ཛ་མཎྜ་ལ་ས་པ་རི་ཝཱ་ར་ཞེས་པ་ཀུན་ལ་སྦྱར་བའི་ཆུ་གསུམ་ཉེར་སྤྱོད་རོལ་མོའི་བར་དང་། རྡོ་རྗེ་མ་ལྔས་མཆོད། དེ་ཉིད་ལྔ་པས་བསྟོད། ལྷ་སོ་སོའི་ས་བོན་གྱི་མཐར་འབྲུ་གསུམ་བཏགས་པས་བདུད་རྩི་དབུལ། སྔར་ལྟར་དངོས་གྲུབ་བླངས་ལ་ཡི་གེ་བརྒྱ་པ་ལན་གསུམ་བརྗོད་ཅིང་། མ་འབྱོར་པ་དང་ཉམས་པ་དང་། །ཞེས་སོགས་ཀྱིས་ནོངས་པ་བཟོད་པར་གསོལ། མདུན་བསྐྱེད་ཀྱི་ཡེ་ཤེས་པ་གཤེགས་སུ་གསོལ། དམ་ཚིག་པ་རང་ལ་བསྡུས་ལ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་སྟེ། སྒྲུབ་པའི་ཐབས་ནས་འབྱུང་བ་ལྟར། སྨན་པའི་ཞབས་ཀྱིས་མཛད་པའི་སྨོན་ལམ་དང་། རྗེ་བླ་མས་མཛད་པའི་དཀྱིལ་འཁོར་གྱི་བསྟོད་པའི་ནང་གི་རྒྱུན་བཤགས་ཀྱི་མཇུག་གི་སྨོན་ལམ་རྣམས་བཏབ་ལ་ཆོས་འཆད་པ་སོགས་ཆོས་མཐུན་གྱི་བྱ་བ་ལ་འཇུག་པར་བྱའོ། །དཔལ་ལྡན་འཇམ་པའི་རྡོ་རྗེའི་ལྷ་ཚོགས་ལ། །ཚུལ་བཞིན་མཆོད་པའི་ཆོ་ག་འདི་ཕུལ་བས། །མཁའ་མཉམ་འགྲོ་ལ་ཕན་བདེའི་ཆར་ཕབ་ནས། །ཤེས་རབ་སྣང་བ་ཕྱོགས་བཅུར་འབར་གྱུར་ཅིག །འདི་ཡང་ཤཱཀྱའི་དགེ་སློང་བསོད་ནམས་སེང་གེས་སྦྱར་བའོ།། །།དགེའོ། །དགེའོ། །དགེའོ།། །། ༈ བལ་ཡུལ་མཆོད་རྟེན་ཉེ་འདབས་ནས་རྒྱལ་ཡོངས་ས་ཆེན་ཞེས་པ་ལས། སློབ་བུ་ཐ་ཤལ་པ་གུ་རུས་སྤེལ་བའོ།།